Jisu Mạsi do Dạudakʼ bõsren ar Dạud do Abraham bõsren hoṛe tahekana. Jisu Mạsi reakʼ bõs budạ do nonkaleka. Abraham do Isạhak jonome emadea; Isạhak do Jakob jonome emadea, Jakob do Jihudạ jonome emadea ar uniren boehako; Jihudạ do Phares jonome emadea ar Seroho hõ Thamar hotete; Phares do Hesrom jonome emadea; Hesrom do Aram jonome emadea; Aram do Aminadab jonome emadea; Aminadab do Nahason jonome emadea; Nahason do Salmon jonome emadea. Salmon do Boas jonome emadea Rahab hotete; Boas do Obed jonome emadea Rut hotete; Obed do Jisại jonome emadea; Ar Jisại do Dạud raj jonome emadea. Dạud do Solomon jonome emadea; Uriạ rinicʼ hotete; Solomon do Rehoboam jonome emadea; Rehoboam do Abiạ jonome emadea; Abiạ do Asaph jonome emadea; Asaph do Josaphat jonome emadea; Josaphat do Joram jonome emadea; Joram do Usiạ jonome emadea; Usiạ do Jotham jonome emadea; Jotham do Ahas jonome emadea; Ahas do Hiskiạ jonome emadea; Hiskiạ do Manase jonome emadea; Manase do Amos jonome emadea; Amos do Josiạ jonome emadea; Josiạ do Jekhoniạ jonome emadea ar uniren boehako Babel disạmte bondikate idiko jokhecʼ. Babelte bondikate idiko tayom Jikhoniạ do Sealtiel jonome emadea; Sealtiel do Serubabel jonome emadea; Serubabel do Abihud jonome emadea; Abihud do Eliạkim jonome emadea; Eliạkim do Asor jonome emadea; Asor do Sadok jonome emadea; Sadok do Akhim jonome emadea; Akhim do Elihud jonome emadea; Elihud do Eleasar jonome emadea; Eleasar do Mathan jonome emadea; Mathan do Jakob jonome emadea; Jakob do Mạriạmren jãwãe Joseph jonome emadea; ar nui Mạriạm khonge Mạsiko metae Jisu doe janamlena. Ado nonka leka Abraham khon Dạud hạbicʼ gelpon piṛhi; Dạud khon Babelte bondikate idiko hạbicʼ gelpon piṛhi; ar Babelte bondi idiko tayom khon Mạsi hạbicʼ gelpon piṛhi. Jisu Mạsiakʼ janam do nonka leka hoelena. Jisuren eṅgat Mạriạm do Joseph tulucʼ baplakʼ reakʼ ṭhik akantae tahẽkana, menkhan unkin ạurikin mitʼ ṭhenokʼrege Sonot Jiu reakʼ daṛete Mạriạm doe bhạrti hoṛmoyena. Mạriạmren jãwãe Joseph do dhorom hoṛe tahẽkante hoṛko samaṅre Mạriạm lajaore paṛao ocoye do bae khojlakʼa; onate uni do mone monete Mạriạm bạgiye reakʼe goṭakeda. Ado Joseph noako reakʼ tinreye gunạnokʼkan tahẽkana unre Probhuren mitʼṭen goḍet do kukmũte uni ṭhen ńel ocoyenteye menkeda, “E Dạud bõsren Joseph; Mạriạm baplaye do alom botorokʼa, ente uniakʼ kukhire okoeye janam akan uni do sonot Jiu reakʼ daṛetegeye janam akana. Uniren do mitʼṭen koṛa gidrại hoyokʼtaea. Ar am do uniakʼ ńutum Jisum dohoetaea, ente uni do acʼren hoṛko akoakʼ kại khone bańcaokoa.” Noa joto do hoyena nạbi hotete Probhui roṛletʼakʼ katha jemon purạukʼ: enkathae, “Mitʼṭen kũạri kuṛi doe bhạrti hoṛmokʼa, ar uniren do mitʼṭen koṛa gidrại hoyokʼtaea; ar uniakʼ ńutum do Immanuel dohokʼtaea.” Ona reakʼ mane do, Abon tulucʼ Isor. Ado Probhuren goḍet okalekae hukumade tahẽkan, onkage Joshep do jạpitʼ khon beretʼkateye kạmikeda. Uni do Mạriạme baplakedea, menkhan gidrạ ạuriye janame hạbicʼ bae jakʼ joṭetʼledea; ar gidrạwakʼ ńutum do Jisui dohoketʼtaea. Jihudạ disạm reakʼ Betlehem atore Jisuakʼ janam do hoelena. Unre Herod do raje tahẽkana. Ar purub disạmren gonok ponḍetko do Jerusalemte hecʼkateko menkeda, “Jihudikoren janam akan raj do okare menaea? Ale do uniren ipil purubrele ńelakadea ar uni sewawae lạgitʼle hecʼakana.” Noa katha ańjomkate Herod raj ar uni sãote goṭa Jerusalemrenko doko torasena. Herod do sanam maraṅ naekeko ar sostor baḍaeko hoho jarwakate onko ṭhene kuliyana Mạsi do okareye janamokʼa mente. Adoko lạiadea, “Uni do Jihudạ reakʼ Betlehemreye janamokʼa, ente nạbi hotete nonkage olakana, enkathae; ‘E Jihudạ reakʼ Betlehem, am do Jihudạren ạyurko khon oka secʼte hõ bam huḍińa, ente am bhitri khon nonkan mitʼṭen ạyuricʼe oḍokokʼa, okoe do ińren Israel jạtkoe ạyurko.’ ” Unre Herod do onko gonok ponḍetko oko okoteye hohoatʼkoa ar oka okte ipile ńellen onae kuli ṭhikketʼkoa. Ar noa menkate Betlehemteye kolketʼkoa, “Do senkate uni gidrạ reakʼ mońjte suṭhik ạguipe. Arpe ńamle khan baḍae ocoyińpe jemon iń hõ senkateń sewa daṛeae.” Ado rajakʼ katha ańjomkate gonok ponḍetko doko calaoena. Ar purubreko ńellede uni ipil do onko laha lahateye calao idiyena. Ar gidrạ okareye tahẽkan ona oṛakʼ coṭre seṭerkate ạuriye teṅgokʼ hạbicʼ ipil do calakʼtegeye tahẽyena. Ar ipilko ńelkede khan gonok ponḍetko do ạḍi rạskạ salakʼ oṛakʼteko boloyena ar bale gidrạ do uniren eṅgattetʼ Mạriạm ṭhenko ńel ńamkedea. Unre onko do ombakʼkateko sewawadea ar akoakʼ baksa jhicʼkate Sona, Kunduru ar Gondhorosko samaṅadea. Ar Isor do Herod ṭhen aloko ruạṛ calakʼa mente kukmũte onkoe sontorkatʼkoa. Unre onko do eṭakʼ horte akoakʼ disạmteko ruạṛ calaoena. Gonok ponḍetkoko calaoen khan Probhuren mitʼṭen goḍet do kukmũte Joseph ṭhen ńel ocoyenteye menkeda, “Ma beretʼme, gidrạ ar eṅgattetʼ sotokʼkinte Misor disạmte dạṛme ar ạuriń metam hạbicʼ onḍege tahenme, ente Herod do gidrạ goje iạteye sendra lạgidokʼ kana.’” Unre Joseph do beretʼkate gidrạ ar eṅgattetʼe sotokʼketʼkinte ńindạge Misor disạmteye calaoena ar Herod ạuriye gujukʼ hạbicʼ onḍegeye tahẽyena. Noa do hoyena nạbi hotete Probhui roṛletʼakʼ katha jemon purạukʼ; enkathae, “Iń do Misor khon ińren Hoponiń hoho ạgukedetińạ.” Herod do gonok ponḍetkoko eṛekedea menteye baḍaeketʼ khan ạḍi ãṭe raṅgaoena. Ar onko ṭhen khone baḍaeletʼ tahẽkan okte reakʼ hisạb lekate bar bochor ar ona khon latar umerren tinạkʼ koṛa gidrạ Betlehem ar ona aḍepase jaegakoreko tahẽkan onko joto gocʼko lạgitʼe hukumkeda. Onate Jirimiạ nạbi hotete noa roṛlenakʼ katha purạuena: enkathae, “Ramore ãṭ aṛaṅte rakʼ ańjomokʼ kana; Rahel do acʼren gidrạko lạgitʼe rakʼeda, cetʼte hõ jiwi do baṅ raṛejokʼ kantaea, ente onko do ar bạnukʼkotaea.” Herode gocʼen khan Probhuren mitʼṭen goḍet do Misor disạmre Joseph ṭhen kukmũte ńel ocoyenteye menkeda, “Ma beretʼme, gidrạ ar uniren eṅgattetʼ sotokʼkinte Israel disạmte ruạṛ calakʼme. Ente gidrạ goje lạgitʼ okoeko sendrakan tahẽkan onko doko gocʼena.” Unre Joseph doe beretʼente gidrạ ar uniren eṅgattetʼ sotokʼketʼkinte Israel disạmteye ruạṛ calaoena. Ona jokhecʼ Jihudạre Herod tayom uniren hopon Arkhilạus do raje tahẽkana. Ar Joseph do noa kathae ańjomketʼ khan onḍe calakʼ doe botorena. Tayomte uni do kukmũte hukume ńamketʼ khan Gạlil Prodeshteye calaoena, ar Nasaretko metakʼ mitʼṭen atore senkateye berelena. Noa do hoyena nạbiko hotete roṛlenakʼ katha jemon purạukʼ: enkathae, “Uni do Nasario menteye hoho ocokʼa.” Onako dinre Johan bạbạptisicʼ do Jihudạ reakʼ hahaṅkar jaegakore hecʼkate nonka menkate porcare ehopʼena, “Mon ạcurtape, ente serma raj do sorakana.” Nui Johan reaṅge Jesaea nạbi doe roṛletʼa; enkathae, “hahaṅkarre mitʼṭen hohokạnicʼ reakʼ aṛaṅ, ‘Probhuakʼ hor tearkataepe uniakʼ konḍea horko sojhe kataepe.’ ” Johan do ũṭ upʼ reakʼ aṅgrop ar ḍanḍare harta reakʼ paṭheakʼ tahẽkantaea. Uni do pohoko ar bir dumur rasae jometʼkan tahẽkana. Unre Jerusalem, goṭa Jihudạ ar Jordan gaḍa dene banar secʼren hoṛko do uni ṭhen hijukʼko ehopʼena. Ar tinre onko hoṛ do apan ạpin kạiko aṅgocketʼtakoa unre Johan do Jordan gaḍareye bạptisketʼkoa. Ar ạḍi utạr Phạrusiko ar Sạdukiko hõ bạptisokʼ lạgitʼ acʼ ṭhen hijukʼkane ńelketʼkoa. Uni doe metatʼkoa, “Eya kạrinạṅgin hoponko, Isorakʼ daraekan sạjại khon ńirjoṅ lạgitʼ bud do okoeye ematʼpea? Bhagegea, kại khon monpe ạcurakatʼte ona reakʼ apeakʼ jionre bhage jo ńel ocoetape. Ar Abraham bõsren hoṛ kanape, mente monre alope hudisjoṅa. Ińiń metapekana, noako dhiri khon Isor do Abrahamren bõskoe benao daṛeakoa. Dare gonḍarege ṭeṅgocʼ do ṭenḍar doho akana. Oka dare bhage baṅ jokʼ ona do makʼgiḍikʼte seṅgelre khadle ocokʼa. Monpe ạcurakatʼte dakʼteń bạptisetʼpea, menkhan iń tayomte okoeye daraekan uni do iń khone daṛegea. Iń do uniakʼ panahi teweńtae lek hõń baṅkana. Uni do sonot Jiu ar seṅgelteye bạptispea. Uniakʼ haṭakʼ do tirege menakʼtaea ar khạrại do mońjteye saphaetaea. Ar phosol do golareye jarwaea, menkhan bhusạ do tishõ baṅ ĩṛĩjokʼ seṅgelreye atar giḍikakʼa.” Inạko oktere Jisu hõ bạptisokʼ lạgitʼ Gạlil khon Jordante Johan ṭhene hecʼena. Menkhan Johan do noa menkateye mana manakadea, “Ińge coṅ am tite bạptis maṛaṅokʼ jạruṛtiń; ar amge cetʼ iń ṭhenem hijukʼ kana.” Jisui menkeda, “Niạ dom do nonkage hoe ocowakʼme, ente Isorakʼ sana do nonkage purạu lek talaṅa.” Adoe aṛakʼadea. Ado Jisu bạptiskate dakʼ khone rakapʼen sãote sãote uni samaṅre serma do jhicʼena. Ar Isorren sonot Jiu do parwa leka acʼ cetanre pheḍ hijukʼkane ńelkedea. Unre serma khon mitʼṭen aṛaṅ ańjomena, “Nuige ińren dulạṛiạ Hopon, one unireń kusiakan.” Inạ tayom Jisu do sonot Jiu hotete hahaṅkar jaegateye idi ocoyena Soetan ṭhen biḍạu ocokʼ lạgitʼ. Onḍe uni do pongel siń ar pongel ńindại upạsketʼ khan reṅgecʼkedea. Unre Soetan do hecʼkate uniye metadea, “Isorren Hopon kan khanem enḍekhan noako dhiri piṭhạ hoe ocoeme.” Jisui roṛ ruạṛkeda, “Sonot sostorre ol menakʼa, eken piṭhạ motote manwa do jiwetʼ bako tahena, menkhan Isorakʼ moca khon oḍokokʼkan mitʼke mitʼ kathatege jiwetʼko tahena.” Unre Soetan do sonot nagraha Jerusalemte Jisui idikedea ar mundil reakʼ cuṛạre teṅgokedeteye metadea, “Isorren Hopon kan khanem ma nonḍe khon latarte donme, ente sonot sostorre ol menakʼa, Isor do acʼren goḍetko am reaṅe hukumakoa; onko do titeko sepeńmea, jemon dhirire jaṅga alo bajaokʼtam.” Jisu do Soetane metadea, “Noa katha olakana, amren Probhu Isor do alom biḍạuea.” Soetan do arhõ mitʼṭen ạḍi usul burute Jisui idikedete dhạrti reakʼ sanam rajosṭi ar onako reakʼ ṭhonok udukʼadeteye metadea, “Noako joto do amiń emama, khạjuk ombakʼkate ińem sewawạń.” Unre Jisu do uniye metadea, “Men ńir joṅme Soetan. Sonot sostorre ol menakʼa, am do amren Probhu Isorgem sewawaea, ar uni eskargem dewa sewawaea.” Unre Soetan do Jisu bạgiadeteye calaoena, ar sermaren goḍetko hecʼkate uniko sapʼsoradea. Ado Johan hajotreye bondi ocoakana menteye ańjomketʼ khan, Jisu do Gạlilteye calaoena ar Nasaret atoe bạgiatʼe Sebulon ar Naphthạli elaka reakʼ doreão aṛe Kapharnạhum nagrahate senkateye berelena. Noa do hoyena Jesaea nạbi hotete roṛletʼakʼ katha jemon purạukʼ; enkathae, Sebulon ar Naphthạli elaka reakʼ, doreão secʼ, Jordan gaḍa reakʼ eṭakʼ aṛe ar boṅgan hoṛ jạtrenkoakʼ Gạlil ar okoeko hoṛ ńutreko tahenkan, onko do maraṅ marsalko ńela. Ar okoe kaṛaṅ ńut disạmreko duṛupʼ akan, onko do marsal rakapʼakoa. Un khon Jisu do nonka menkate porcare ehopʼena, “Kại khon mon ạcurtape, ente serma raj do sorakana.” Jisu do Gạlil doreão aṛe aṛeteye calakʼkan tahẽkanre Simon, okoe do Patrasko metaekan ar uniren boeha Andreas tạkine ńel ńamketʼkinạ. Unkin do doreãore jhạlikin oḍaokan tahẽkana, ente unkin do jạilạkin tahẽkana. Jisui metatʼkinạ, “Dela iń sãote hijukʼ ben, iń do hoṛ sasapʼ hoṛiń benao bena.” Unkin do unrege jhạlikin bạgi oṭoatʼte Jisukin pańjakedea. Ado onḍe khon lahańokʼe senen khan Jakob ar Johan ńutuman eṭakʼ bar boehae ńel ńamketʼkinạ. Unkin do Sabdaeren hoponkin tahẽkana. Unkin do ạkinren apat sãote lạukạre duṛupʼkate jhạlikin jujutkan tahẽkana. Jisu do unkin hõe hohoatʼkinạ. Ar unrege unkin hõ lạukạ ar apattetʼ bạgikate Jisukin pańjakedea. Jisu do Gạlil Prodesh reakʼ sanam jaegakore dãṛã dãṛãte Jihudikoakʼ sunạgogkore cetʼakoe ehopʼena. Ona chaḍa uni do serma raj reakʼ bhage sombat porcar ar hoṛkoakʼ sanam lekan rog bighin ar ruạ hasokoe bogeyetʼtako tahẽkana. Uniakʼ katha do Siriạ disạm reakʼ sanam jaegakore pasnao idiyena. Ar hoṛko do ạḍi lekan rog bighinte sasetokʼkanko, bhut capaṛ akatʼko, mirgi ar mitʼ kaṛ gocʼ rogteko jạbun akanko Jisu ṭhenko ạguketʼkoa. Ar uni do onko sanamkoe bogeketʼkoa. Ar Gạlil, Dikapoli, Jerusalem, Jihudạ ar Jordan gaḍa hanasakoren ạḍi gadel hoṛ do Jisuko pańja idikedea. Jisu do ạḍi utạr hoṛe ńelketʼko khan buruteye decʼena. Are duṛupʼen khan acʼren celako hõ uni ṭhenko hecʼ sorena. Unre uni do celako nonka menkate cetʼakoe ehopʼena: “Monre reṅgejokʼkogeko bhạgana, ente serma raj do onkoakʼkangea. Dukokʼkogeko bhạgana, ente onko do jiwi raṛecʼko ńama. Mạhirkogeko bhạgana, ente dhạrti do onkogeko ạidạrijoṅa. Mon ar ontorte Isorakʼ sanaleka calakʼkogeko bhạgana, ente onkoakʼ monejoṅakʼ do purạukʼtakoa. Mãyãkʼkogeko bhạgana, ente onko do mãyãko ńama. Okoeakʼ ontor khạṭigetako onkogeko bhạgana, ente onko do Isorko ńelea. Sulukokʼkogeko bhạgana, ente onko do Isorren hoponko ńumogokʼa. Dhorom iạte santao ar khed ocokʼkogeko bhạgana; ente serma raj do onkoakʼkangea. “Bhạgangeape iń iạte hoṛko opoman arko santao lepere ar ạuṛiakʼte sanam lekan bạṛicʼakʼ reaṅko roṛlepere. Ape do rạskạ ar hulạsokʼpe, ente sermare ape lạgitʼ maraṅ kuṛại menakʼa. Ente ape laha okoe nạbikoko tahẽkan onko hõ nonkageko santaoletʼkoa. “Ape do dhạrti reakʼ buluṅ kanape, menkhan buluṅ sabakʼlen khan cekate rahamokʼa? Ona do ar okaṭakʼ kạmirege baṅ lagaokʼa. Eken bahrete giḍikakʼ ar hoṛko lebetʼakʼ lek hoyokʼa. “Ape do dhạrti reakʼ marsal kanape. Buru coṭ reakʼ nagraha do oho danaṅ daṛelena. Okoe hõ diuhe jeretʼkate khạclạkʼte do bako hạrupʼ esetʼkakʼa, bickom bạti dohowakʼ cetanregeko dohoea. Onate oṛakʼren sanam hoṛge marsalko ńama. Onkage apeakʼ marsal do hoṛko samaṅre jolokʼtapema, jemon apeakʼ bhage kạmi ńelte aperen sermaren Babako sarhaoe. “Noa do alope hudisa, Moseakʼ ạn-ạri ar nạbikoakʼ olakʼko bạtil lạgitʼ iń hecʼakana. Iń do bạtil lạgitʼ do baṅ, bickom purạu lạgitʼgeń hecʼakana. Sạrigeń metapekana, serma ar dhạrti ạuri cabakʼ hạbicʼ, ạn-ạri reakʼ sanamakʼ kathako ạuri purạukʼ hạbicʼ ona ạn-ạri reakʼ mitʼ akhor se ṭuḍạkʼ hõ oho meṭaolena. Onate jãhãege noa kạṭicʼ utạrakʼ hukumko modre mitʼ goṭecʼe rạpud ar onkage hoṛkoe cetʼako, uni do serma rajre huḍiń utạricʼe ńumogokʼa. Menkhan jãhãege onakoe senakʼ are cetʼako uni do serma rajre maraṅe ńum ocokʼa. Ińiń metapekana, apeakʼ dhorom do Phạrusiko ar sostor baḍaeko khon baṅ soroslentape khan ape do serma rajre ohogepe bolo daṛelena. “Ańjom akadape, sedaeren hoṛko ṭhen noa katha roṛlena, ‘Alom khũna’ ar okoeye khũna uni do bicạrre dạyike hoyokʼa.” Menkhan ińiń metapekana, okoe acʼren boeha cetanreye edrekʼ, uni do bicạrre dạyike hoyokʼa. Ar okoe acʼren boehae metae, ‘Eya orlo’ uni do maraṅ bạisire dạyike hoyokʼa. Okoe acʼ boehae metae, ‘Eya dundhạ’ uni do norok seṅgelre khadle ocokʼ leke hoyokʼa. “Onate Isor samaṅre amakʼ samaṅokʼakʼem samaṅre, am upạrte amren boehawakʼ jãhãnakʼ menakʼtaea mentem disạle khan, amakʼ ona dan do pinḍ samaṅre bạgi oṭowakʼme. Ar senkate amren boeham tulucʼ solho maṛaṅokʼme ar inạ tayom do hecʼkate amakʼ dan samaṅme. “Jãhãe am birudreye mamblae khan adalotte ạuri calakʼrege uni sãote samka sạṭikʼme. Ar baṅkhan uni do hạkim ṭhene soprotmea, ar hạkim do pulis ṭhen, ar pulis do hajotreye bhoraomea. Sạrigeń metam kana, kạuḍi kạuḍi ạurim hala cabae hạbicʼ onḍe khon okalekate hõ ohogem oḍok daṛelena. “Ańjomakadape roṛlena mente, ‘alom laṭghaṭa.’ Menkhan ińiń metapekana, jãhãe hoṛ bạṛicʼ sanate maejiue beṅgetʼae uni do unrege acʼakʼ ontorre uni tulucʼe laṭghaṭeda.” Amakʼ jojom mẽtʼe kại ocome khan ona do hoṭor oḍokkakʼme. Amakʼ goṭa hoṛmo norokre khadlekʼ khon ona mitʼ hạṭiń bạṛicʼ ocoakʼge am lạgitʼ bhagea. Amakʼ jojom tiye kại ocome khan ona do samakʼ giḍikakʼme. Amakʼ goṭa hoṛmo norok seṅgelre khadlekʼ khon hoṛmo reakʼ mitʼ hạṭiń nosṭo ocoakʼge am lạgitʼ bogea. “Arhõ roṛ akana, “Jãhãe hoṛ bạhuttetʼe bạgiye khan uni do bapag dolele emaema.” Menkhan ińiń metapekana, jãhãe hoṛ laṭghaṭ chaḍa eṭakʼ karonte bạhuttetʼe bạgiye uni doe loṭghuṭi ocoyea, ar jãhãege uni bạgi ocoyicʼ maejiue baplaye, uni hõe loṭghuṭiya. “Arhõpe ańjomakada, ạgil hapṛamko ṭhen roṛlena, ‘eṛe eṛe alom kiriạkʼa, bickom amakʼ sanam kiriạwakʼko Probhu purạuaeme.’ Menkhan ińiń metapekana, alotetʼgepe kiriạkʼa. Serma ńutumte hõ alo, ente ona do Isorakʼ siṅghạson kana. Dhạrti ńutumte hõ alo ente ona do uniakʼ jaṅga lebedokʼ jaega kana. Jerusalem ńutumte hõ alo, ente ona do maraṅ rajakʼ nagraha kana. Amakʼ bohokʼte hõ alo, ente ona reakʼ mitʼṭen upʼ hõ bam ponḍ daṛeakʼa se bam hende daṛeakʼa. Ape do, ‘Hẽ khan hẽ,’ ar ‘Baṅ khan baṅpe,’ Ar noa khon bạ̃ṛtiakʼ okaṭakʼkan, ona do Soetan ṭhen khonge hijukʼa. “Ańjomakadape roṛlena mente, ‘Mẽtʼ hala hạli mẽtʼ ar ḍaṭa hala hạli ḍaṭa.’ Menkhan ińiń metapekana, jãhãe ape tulucʼ bạṛicʼko beohar khan onko birudre cetʼhõ alope cekaea; bickom jãhãe jojom johae thapame khan uni do eṭakʼ joha hõ thapa ocoaeme. Jãhãe amakʼ aṅgrop hatao lạgitʼe lạlis khan uni do oyonakʼ hõ idiocoaeme. Jãhãe acʼakʼ bojha mitʼ mail iditae lạgitʼe sapʼlem khan uni tulucʼ bar mail calakʼme. Koyetʼmekạnicʼ do emaeme, ar okoe am ṭhen pańcae khojkan uni hõ alom dea giḍikaea. “Ańjomakadape, roṛlena mente, ‘Am aḍepaseren hoṛem dulạṛea ar amren bạiri dom kurudaea.’ Menkhan ińiń metapekana, aperen bạiriko dulạṛkope. Ar okoe apeko santaoetʼpe onko do koeakope. Jemon hoṛko ńelpe ape do sạrige serma Babaren hoponko kanape mente. Uni do jotoko cetanre acʼren siń candoe rakapʼ ocoyedea ar dhoromko ar bedhoromkoe dakʼako kana. Okoe apeko dulạṛetʼpe eken onkogepe dulạṛetʼko khan enḍekhan cetʼ kuṛại menakʼtapea? Mạsul uṭhạuko hõ cetʼ bako onkayeda? Eken apekoren hoṛgepe joharakokan khan enḍekhan eṭakʼko khon bạ̃ṛti do cetʼpe cekayeda? Boṅgan hoṛ jạtrenko hõ cetʼ bako onkayeda? Onate aperen sermaren Baba cetʼlekae khạṭige, onkage ape hõ khạṭiko hoyokʼpe. “Husiạrokʼpe, hoṛ ṭhen ńel ocokʼ leka do alope dhorom koroma; arpe onkae khan aperen sermaren Baba ṭhen khon jãhãn kuṛại do bape ńama. “Onate koeyem emokʼre phạsiạra hoṛko leka do alom onkaea. Ente onko do hoṛko ṭhen sarhao ocokʼ lạgitʼ sunạgogre ar kulhikore siṅgạ oroṅate koeko emakokana. Sạrigeń metapekana, onko do akoakʼ kuṛạiko ńam horayeda. Menkhan am do reṅgecʼ orecʼko jãhãnakʼem danakore amakʼ leṅga ti hõ aloe baḍaema jojom ti cetʼe cekayeda mente. Jemon amakʼ dan emokʼ do okoge tahentam. Enḍekhan okoe danaṅ khon jotowakʼe ńeńelkan uni amren Baba do kuṛạiye emama. ‘‘Apepe koejoṅre phạsiạra hoṛko leka do alope onkaea, ente onko do hoṛko ṭhen ńel ocokʼ lạgitʼ sunạgog ar dobạṭiạkore teṅgokate koejoṅko kusiyakʼkana. Sạrigeń metapekana, onko do akoakʼ kuṛạiko ńam horayeda. Menkhan amem koejoṅre bhitri oṛakʼre bolokate duạr sińme, ar amren Baba, okoe do bae ńelokʼkanre hõ hạjirge menae, uni ṭhen koejoṅme. Enḍekhan amren Baba okoe do danaṅ khon jotowakʼe ńeńel kan, unige kuṛạiye emama. ‘‘Apepe koejoṅre boṅgan hoṛ jạtrenko leka ạuṛiakʼ do alope boktaokʼa. Ente onko doko hudisa, bạ̃ṛti katha roṛle khan Isor do koejoṅe ańjomtakoa. Onko leka do alope onkaea, ente ape ạuripe koeyerege aperen Baba do apeakʼ sanam jạruṛakʼ koe baḍaekana. Onate ape do nonka leka koejoṅpe; E aleren sermare menam Baba, amakʼ ńutum sonotokʼ ma. Amakʼ raj hijukʼ ma. Amakʼ sana leka hoyokʼ ma, cetʼ leka sermare, onkage otre hõ. Aleakʼ jạruṛ jomakʼ de teheń emalem. Ar aleakʼ kạiko ikạ katalem, cetʼ leka ale hõ ale reakʼ kạkại kole ikạ katako kan; ar biḍạute alom aderlea, menkhan bạṛicʼ khon bańcaolem. [Ente raj ar daṛe ar ṭhonok jaejug hạbicʼ amakʼge, Amen.] Ape do eṭakʼkoakʼ doskope ikạletako khan enḍekhan aperen sermaren Baba hõ apeakʼe ikạitapea. Menkhan eṭakʼko bape ikạleko khan aperen Baba hõ apeakʼ ghạṭko bae ikạitapea. ‘‘Apepe upạsre phạsiạrako leka mẽtãhã do alope mirluṅtapea. Ente onko do hoṛko ṭhen udugokʼ lạgitʼko upạseda ar bohokʼ ar mẽtãhãre torocʼko ojokʼ joṅkana. Sạrigeń metapekana onko do akoakʼ kuṛạiko ńam horayeda. Menkhan amem upạsre bohokʼre sunum ojogme ar mẽtãhã apʼ saphakʼme, jemon eṭakʼko aloko baḍae daṛeakʼ, am dom upạsetʼ kana. Enḍekhan amren Baba okoe do bae ńelokʼkanre hõ hạjirge menae ar danaṅ khon jotowakʼe ńeńelkan unige kuṛạiye emama. ‘‘Noa dhạrtire ape lagitʼ dhon alope doho jarwa joṅa. Nonḍe do joṅ dhoraokʼte bạṛijokʼa ar tejokoko nosṭoea ar kombṛo hõ oṛakʼ bhugạkʼkateko idiya. Menkhan sermare do joṅhõ baṅ dhoraokʼa, ar tejo hõ bako nosṭoea ar kombṛo hõ bako kombṛoea. Onate ape lạgitʼ sermare dhon jarwa joṅpe, ente okare dhon tahen tama onḍege amakʼ mon hõ tahena. ‘‘Mẽtʼ do hoṛmo reakʼ diuhe kana. Onate amakʼ mẽtʼ nirolage khan amakʼ goṭa hoṛmo hõ marsalte perejokʼa. Menkhan amakʼ mẽtʼ bạṛicʼ getam khan amakʼ goṭa hoṛmo hõ ńutgetama. Amre menakʼ marsal sạrige ńutgetam khan enḍekhan ona do artetʼ ńutgea! ‘‘Okoe hõ barea kisạ̃ṛ ṭhen guti ohoe khaṭao daṛelena, ente mitʼ hoṛe dulạṛea ar eṭagicʼ doe kurudaea. Mitʼ hoṛakʼe ańjomtaea ar eṭagicʼ doe neṅghaoea. Isor ṭhen ar dhon ṭhen guti do ohope khaṭao daṛelena. ‘‘Noa iạteń metapekana, bańcao tahen lạgitʼ cetʼpe joma se cetʼpe ńũiya se hoṛmo lạgitʼ cetʼpe horokʼ-bandea ona do alope dạndikʼa. Jiwi do eken jom ar ńũi lạgitʼ do baṅkana, ar hoṛmo hõ horokʼ bandekʼ lạgitʼ do baṅa. ‘‘Coṭren cẽṛẽko beṅgetʼakope; itạ hõ bako era ar ir hõ bako ira, ar golare hõ bako doho jarwaea, enrehõ aperen sermaren Baba doe jom ocoyetʼkoa. Ape do cetʼ onko khon bạ̃ṛti bape damangea? Ape modre okoe cintạ-bhabnakate acʼakʼ jiwi mitʼ ghonṭa gan bạ̃ṛtiye doho daṛeketaea? ‘‘Horokʼ-bandekʼ lạgitʼ cedakʼpe dạndikʼ kana? Ṭạnḍire menakʼ bahako reakʼ hudispe, cetʼ lekate harakʼkana mente. Onko do bako kạmiya ar sutạm hõ bako takoea. Menkhan ińiń metapekana, Solomon raj do unạkʼ jak jomoke tahẽkanre hõ noako reakʼ mitʼ goṭen leka hõ bae saj daṛeada. Ado ṭạnḍi reakʼ ghãs teheń oka menakʼ, ona do gapa culhạre khadle ocokʼre hõ, Isor nonkae sajetʼkan khan E nase pạtiạuko, unre ape do cetʼ artetʼ bạ̃ṛti bae sajpea? Onate ‘cetʼpe joma’ se ‘cetʼpe ńũiya’ ar cetʼpe horokʼ bandea ona reakʼ do alope dạndikʼa. Boṅgan hoṛ jạtrenkoge noako reaṅ doko ńam baṛayetʼkana; Ona chaḍa aperen sermaren Baba doe baḍaegea noako sanamakʼ reakʼ jạruṛ menakʼtapea mente. Menkhan pạhilre ape do Isorakʼ raj ar dhorom ńam maṛaṅpe. Enḍekhan ona sanamakʼpe ńama. Gapa lạgitʼ do alope dạndikʼa; gapa reakʼ dạndi do gapage dạndi ocowaepe. Ar dintetʼ lạgitʼ do enhilokʼ reakʼ haronge ḍhera. “Eṭakʼkoakʼ dosko alope ńam baṛaea, jemon apeakʼ dos hõ alo sabokʼtape, ente cetʼleka eṭakʼkoakʼ doskope saba onkage apeakʼ dos hõ sabokʼtapea, ar cetʼlekape soṅakoa onkage ape lạgitʼ hõ soṅokʼa. “Amren boehamakʼ mẽtʼre menakʼ cubạkʼgem ńeletʼkana, menkhan apnar mẽtʼre menakʼ jobra do cekate bam ńel ńameda? Apnar mẽtʼrege jobra menakʼtam tulucʼ cekate amren boeha dom metaekana, ‘hape se amakʼ mẽtʼ khon cubạkʼ oḍok ocoạńme?’ E phạsiạra! Pạhilre amakʼ mẽtʼ reakʼ jobra oḍok giḍi maṛaṅme, enḍekhan boehamakʼ mẽtʼ khon cubạkʼ oḍokʼ lạgitʼ purṭhạm ńeńela. “Okaṭakʼ sonotge ona do seta alope emakoa. Ar sukri samaṅre mạnik hõ alope giḍiya. Hoedaṛeakʼa onko do onakoko lebetʼ gasmanḍaoa ar ạcurkate apeko hoṭakʼ cirạpea. “Koepe, ado emapea; ńam baṛaepe, adope ńama, duạr ṭhopʼ ṭhopʼpe, ado jhicʼapea. Ente mitʼke mitʼ kokoyicʼ do milạuaea; ar ńam baṛayicʼ doe ńama ar ṭhopʼ ṭhopʼetʼicʼ do jhicʼaea. Ape modre jãhãe nonkanicʼ menaea, one acʼren gidrạ piṭhại koelere dhiriye calae? Se hakoe koelere bińe calae? Apepe bạṛicʼgere hõ aperen gidrạko bhage bhage jinisko emakope baḍaekan khan, enḍekhan sermare menae aperen Baba do tinạkʼ artetʼ acʼ koeye kanko bhageakʼkoe emakoa! Hoṛko ṭhen khon cetʼleka beoharpe khojkan onkage ape hõ onko tulucʼ beoharpe. Ente noa kangea Moseakʼ ạn-ạri ar nạbikoakʼ cecetʼakʼ reakʼ katha do. “Sakṛa duạrte bolokʼpe, ente okaṭakʼ hor bạṛicʼ secʼe idipe ona reakʼ duạr do osargea ar hor hõ phaelaogea. Ar ḍher hoṛge onateko bolokʼ kana. Menkhan okaṭakʼ hor jion secʼe ạyur idi ona reakʼ hor do sakṛagea ar duạr hõ suṛucʼgea. Ar thoṛa hoṛge noa doko sendra ńametʼkana. “Eṛe nạbiko khon sontor akae tahenpe. Onko do bhiḍi chinte ape ṭhenko hijukʼa, menkhan bhitri bhitrite onko do jojom hunḍạr kanako. Onkoakʼ jion reakʼ jotege onko dope orom daṛeakoa. Jạnum dare khon darkha jo se kũṛitʼ rama jhạwạ khon cetʼ loa doko godgea? Onkage mimitʼ bhage darere do bhagege jokʼa ar bạṛicʼ darere do bạṛicʼge jokʼa. Bhage darere bạṛicʼ jo ar bạṛicʼ darere bhage jo do baṅ jo daṛeakʼa. Okaṭakʼ darere bhage baṅ jokʼ ona do makʼ giḍikʼte sengelre khadle ocokʼa. Onateń mena, bhonḍ nạbikoakʼ jionre oka jo ńelokʼkan onatege onkope orom daṛeakoa. “Okoe ‘Probhu, Probhuko’ mitạńkan onko joto do serma rajre ohoko bolo daṛelena, menkhan okoe ińren serma Babawakʼ sana leka senokʼe menjoṅ, unigeye bolo daṛeakʼa. Enhilokʼ do ạḍi hoṛko mitạńa, ‘E Probhu, E Probhu, ale do cetʼ am ńutumte bale nạbileda? Am ńutumte cetʼ bạṛicʼ jiuko bale oḍok giḍiletʼkoa? Am ńutumte cetʼ hahaṛa kạmiko bale kạmileda?’ Unre pusṭạuteń lạiakoa, ‘ape do tis hõ bạń baḍaeletʼpea. E bedhorom kạmiko, men iń khon sahaṛokʼpe.’ “Onateń metapekana, jãhãege noako kathae ańjom ar ona lekae calakʼ uni do nonkan budan hoṛ kanae, okoe do dhiri cetanre oṛakʼe benaoketʼ. Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; menkhan ona oṛakʼ do baṅ bhindạṛlena, ente ona do dhiri cetanre benao akan tahẽkana. Ar okoe ińakʼ katha ańjomkate ona leka bae senakʼ uni do lelha hoṛ lekanae, one okoe do gitil cetanre oṛakʼe benaoketʼ. Ado jhar jhare dakʼkeda, are hoekeda, ar ḍubạ dakʼ hecʼena ar ona oṛakʼre bajaoena; ar ona do lạnduṛena, ar botorge oborena.” Jisu noako kathae mucạtʼketʼ khan gadel hoṛ do uniakʼ cecetʼakʼteko hahaṛa cabayena, ente uni do sostor baḍaeko leka do baṅ, bickom ektiạran hoṛ lekae cetʼ akokan tahẽkana. Jisu buru khone pheḍ hecʼen khan ạḍi utạr hoṛ do uniko pańja idikedea. Unre mitʼṭen murhucʼ jom rog hoṛ do hecʼkate sewawadeteye menkeda “E Probhu, sanalem khanem sapha daṛeạńạ.” Jisu do ti tiạrkate joṭetʼkedeteye metadea, “Sanań kangea, ma saphakokʼ me.” Ar unrege murhucʼ jom rog do bogeyentaea. Ar Jisu do uniye metadea, “Men, okoe hõ alom lại baṛawakoa; bickom senkate naeke ṭhen ńel ocokʼme, ar Moseye hukum akatʼ leka dan samaṅme. Onate hoṛko ṭhenem sạbudokʼa am dom bogeakana.” Jisu Kapharnạhum nagrahateye boloyen khan, mitʼṭen Romiạ subedar do uni ṭhen hecʼkate nehõrenteye menkeda, “E Probhu, ińren guti do aṭetʼreye jaṛao akana. Uni do mitʼkaṛ gocʼ rogte ạḍitetʼe sasetokʼ kana.” Jisu do uniye metadea, “Senkateń bogeyea.” Subedar do Jisui roṛ ruạṛadea, “E Probhu, ińakʼ oṛakʼtem bolokʼ nonkan lek geń baṅkana. Eken katha moto roṛgotʼkam, ar inạtege ińren guti doe bogekʼa. Ente iń hõ eṭakʼicʼakʼ katha leka calakʼ hoyokʼtińạ ar iń latarre hõ palṭonko menakʼkoa; iń do mitʼ hoṛ ‘calakʼ iń metae khan uni doe calakʼa, ar eṭagicʼ ‘hijukʼ iń metae khan uni doe hijukʼa; ar ińren golam iń metae khan nonkaeme uni doe onkaea.” Jisu do noa katha ańjomkateye hahaṛayena, ar acʼ pańja edeyekankoe metatʼkoa, “Sạrigeń metapekana, Israelko modre nunạkʼ maraṅ pạtiạu do okoere hõ bạń ńelakada. Ińiń metapekana, purub ar pạchim khon aema hoṛko hijukʼa ar Abraham, Isahak, ar Jakob sãote serma rajre jojomko duṛupʼa. Menkhan rajosṭiren hoponko do bahre ńutreko giḍi ocokʼa. Onḍe do rakʼjoṅ ar togocʼ ḍaṭa hoyokʼa.’’ Jisu do subedare metadea, “Do calakʼme. Ar cetʼlekam pạtiạu akan onkage baṛe hoyokʼma.” Ar ṭhik unrege uniren guti doe bogeyena. Inạ tayom Jisu do Patrasakʼ oṛakʼte senkateye ńelkeda, Patrasren hanhartetʼ doe ruạkʼkana ar uni doe giticʼ akana. Jisu do uniakʼ tiye joṭetʼketʼtaea ar inạtege ruạ do chuṭạu gotʼentaea. Ar unre beretʼkate uni do Jisui sapʼsoradea. Ạyupʼen khan ạḍi utạr bhut capaṛ hoṛ do uni ṭhenko ạguketʼkoa. Ar moca kathatege uni do bhutkoe oḍok giḍiketʼkoa ar okoeko ruạkʼkan tahẽkan onko hõe bogeketʼkoa. Noa do hoyena Jesaea nạbi hotete roṛlenakʼ katha jemon purạukʼ: Uni do aboakʼ sanam nijorakʼkoe hataoketʼ tabona, ar aboakʼ rogkoe ocokʼketʼ tabona. Ado Jisu acʼ beṛhaete ạḍi utạr hoṛkoakʼ bhiṛe ńelketʼ khan celako doreão hanasa calakʼ lạgitʼe hukumatʼkoa. Unre mitʼṭen sostor baḍae hoṛ do Jisu ṭhen hecʼenteye menkeda, “E Guru, jãhãtegem calakʼ iń hõ onḍegeń calakʼa.” Jisu do uniye metadea, “Toyokoakʼ do bhugạkʼ menakʼtakoa ar cẽṛẽkoakʼ hõ tukạ menakʼa, menkhan Manwa Hoponakʼ do bohokʼ dohoetae lạgitʼ jaega hõ bạnukʼtaea.” Ado celako modren eṭagicʼ do hecʼkateye menkeda, “E Probhu, ạpuń topaye lạgitʼ sen maṛaṅ ocowạńme.” Jisu do uniye metadea, “Gocʼkoge akoren gocʼko topa ocoakome, menkhan am do iń pańjańme.” Ado Jisu lạukạreye decʼen khan uniren celako hõ uni sãoteko calaoena. Ar ackage doreãore birbão hecʼgotʼena, onate lạukạ do ḍheokote uḍucʼ ḍubujokʼ ehopʼena. Menkhan Jisu doe jạpitʼ akatʼ tahẽkana. Unre celako do uni ṭhen hecʼkate beretʼ kedeteko metadea, “E Probhu, bańcao bonme; gujukʼkana bon.” Uni doe metatʼkoa, “E nase pạtiạukʼko, cedakʼpe botorokʼ kana?” Inạ tayom beretʼkate uni do hoe ar doreãoe dhomkaokeda. Ar unre sanamakʼ do ḍel ḍel thir hapeyena. Noa ńelte celako do hahaṛayenteko menkeda, “Nui doe okalekan hoṛ kante, hoe hõ hoe ar doreão hõ doreãokin bataoetʼtaea!” Inạ tayom Jisu do doreão hanasa Gadarikoakʼ elakateye calaoena. Unre bạṛicʼ jiu capaṛ akatʼkin barhoṛ do mạ̃ṛĩ poḍa khon oḍokente Jisu ṭhenkin hecʼena. Unkin do nonkan haḍrapkin tahẽkana, ona horte okoe hõ bako parom daṛeakʼkan tahẽkana. Ado kikiạuatekin menkeda, “E Isorren Hopon, ale tulucʼ amakʼ do cetʼ? Okte ạuri hoyokʼrege sasetle lạgitʼem hecʼakana?” Onko khon thoṛa sạṅgiń ńokʼre ạḍi utạr sukriko ạtińkan tahẽkana. Bạṛicʼ jiuko do Jisu nehõradeteko metadea, “Oḍok giḍikalem menetʼkan khan enḍekhan onko pal sukrire kolkaleme.” Jisui metatʼkoa, “Do calakʼpe.” Ar unrege onko doko oḍokente sukrikoreko boloyena. Onate onko sukri do daṛaṅ secʼteko ńir senente doreão dakʼreko gad gadao pheḍena arko unum gocʼena. Ar okoekoko gupikan tahẽkan onko do atoteko ńir senente jotowakʼko lạikeda. Ḍherkaete onko do bhut capaṛ akatʼkin hoṛ reaṅko lạikeda. Unre atoren hoṛko Jisu tulucʼ ńapamokʼ lạgitʼko oḍok hecʼena. Arko ńapamkede khan akoakʼ elaka khon senokʼ lạgitʼko nehõradea. Inạ tayom Jisu do lạukạreye decʼena ar doreão paromkate acʼakʼ nagrahateye hecʼena. Unre hoṛko do jaṛao akan mitʼṭen mitʼkaṛ gocʼ rog hoṛ do parkomte uni ṭhenko ạgukedea. Jisu do onko hoṛkoakʼ pạtiạu ńelte rugiye metadea, “Diljoṅ me. Amakʼ kại do ikạyen tama.” Noa iạte sostor baḍaeko modre adom hoṛ do mone moneteko menkeda, “Nui hoṛ do Isore opomane kana.” Jisu do onkoakʼ mon reakʼ hudisakʼkoe baḍaeketʼ khane metatʼkoa, “Mone monte bạṛicʼakʼ do cedakʼpe hudiseda? Okaṭakʼ roṛ algawa, ‘Amakʼ kại ikạyentama,’ se ‘beretʼkate taṛamme?’ Menkhan ape jemonpe baḍae daṛeakʼ Manwa Hopon do dhạrtire kại ikạ reakʼ ektiạri menakʼtaea.” Ado noa menkate mitʼ kaṛ gocʼ rog hoṛe metadea, “Ma beretʼme, amakʼ parkom kuṭuṅtam ar oṛakʼte calakʼme.” Unre uni doe beretʼena ar acʼakʼ oṛakʼteye calaoena. Ar hoṛko do noa ńelte botor caṛhaoatʼkoa, ar manwa nonkan ektiạriye emakawadete Isor sarhaoeko ehopʼena. Jisu onḍe khone calakʼkan tahẽkan jokhecʼ Mathaeko metae mitʼ hoṛ do mạsul uṭhạu oṛakʼre duṛupʼ akane ńelkedea. Jisu do uniye metadea, “Dela ińren cela hoyokʼme.” Ar unrege Mathae doe beretʼente Jisui pańjakedea. Inạ tayom Jisu do Mathaeakʼ oṛakʼre jojome duṛupʼena. Unre ạḍi utạr mạsul uṭhạuko ar bạṛicʼ hoṛko hõ hecʼkate Jisu ar uniren celako sãote jom lạgitʼko duṛupʼ panteyena. Ona ńelte Phạrusiko do Jisuren celakoko metatʼkoa, “Aperen Guru do mạsul uṭhạuko ar bạṛicʼ hoṛko tulucʼ cedakʼe jom ńũiyeda?” Noa katha ańjomkate Jisui menkeda, “Boge hoṛkoakʼ do raranicʼ reakʼ jạruṛ bạnukʼtakoa, menkhan ruạkʼko lạgitʼ do jạruṛgea. Iń do mãyãgeń kusiyakʼ kana, dãṛẽ do baṅ, sonot sostorre noa katha reakʼ mane do cetʼ kana mente ona baṛe ḍunḍhạupe. Ente dhorom hoṛ hohoako lạgitʼ do baṅ, menkhan kại hoṛko lạgitʼgeń hecʼakana.” Tayomte Johanren celako do Jisu ṭhen hecʼkateko menkeda, “Ale ar Phạrusiko dole upạseda, menkhan amren celako do cedakʼ bako upạseda?” Jisui metatʼkoa, “Jãwãe beṭa soṅgere tahen tulucʼ cetʼ bạriạtko doko bhabnakokʼa? Menkhan okte hijukʼ kana jãwãe beṭa do onko khone idiocokʼa. Ar unre onko doko upạsa. “Okoe hõ mare aṅgropre nawa kicricʼ do bako tạli jalada, ente ona mare kicricʼ khon nawa tạliakʼ do oṛecʼ hijukʼa ar onate oṛecʼ do arhõ lạṭukʼa. Mare kumkore nawa darkha rasa do bako dohoea. Arko dohoe khan kumko do oṛejokʼa ar darkha rasa do buhel giḍikʼa ar kumko hõ nosṭokʼa; Onate nawa darkha rasa do nawa kumregeko dohoea, inạ khan banarge mońj tahena.” Jisu noakoe galmarao akokan tahẽkanre Jihudikoren mitʼṭen mukhiạ hoṛ do hecʼkate ḍobokʼadeteye metadea, “Hoponerań do ńitgeye gocʼena. Menkhan enhõ senkate capoyem, ar inạtege uni doe jiwedokʼa.” Unre Jisu ar uniren celako do beretʼkate uni soṅgeteko calaoena. Ona jokhecʼ mitʼṭen maejiu do tayom secʼ khon hecʼkate Jisuakʼ oyon ańcare joṭetʼketʼtaea. Ente uni do gelbar bochor khon pordhol ruạteye jạbun akan tahẽkana. Uni do mone moneteye hudisokʼkan tahẽkana, eken uniakʼ kicricʼe joṭetʼ tiyokʼ lekhangeye boge utạrokʼa. Jisu do ạcurente uni ńel ńamkedeteye metadea, “E mạ̃i dil joṅme. Amakʼ pạtiạugeye bogeakatʼmea.” Ar inạ ghuṛi khonge maejiu doe boge utạrena. Inạ tayom Jisu do Jihudikoren uni mukhiạ hoṛakʼ oṛakʼteye calaoena. Onḍe do tạriạ oroṅko ar hoṛko kạuạ rạuạkʼkane ńelketʼkoa. Onate Jisui metatʼkoa, “Ape do bahrete oḍokokʼpe. Kuṛi do bae gocʼakana, ekene jạpitʼ akada.” Noa katha ańjomkate onko doko landa dhutʼadea. Ado hoṛkoko oḍok ocoyen khan bhitrite bolokate uni do kuṛiyakʼ tiye sapʼkeda. Ar inạtege kuṛi doe beretʼena. Ar noa katha do ona elaka reakʼ sanam jaegare pasnao idiyena. Ado Jisu onḍe khone calakʼkan tahẽkan jokhecʼ barea kãṛã hoṛ do unikin pańjakedea. Ar ãṭ aṛaṅte hohoatekin menkeda, “E Dạudren Hopon, mãyãwạlińme.” Jisu oṛakʼteye boloyen khan unkin kãṛã hoṛ hõ uni ṭhenkin hecʼena. Unre Jisui metatʼkinạ, “Pạtiạukʼkangea ben, noań daṛeakʼa mente?” Unkin kin menkeda, “Hẽ Probhu.” Uni do mẽtʼ joṭetʼketʼ tạkinteye metatʼkinạ, “Aben cetʼleka ben pạtiạu akan, onkage hoyokʼma baṛe.” Unre unkinakʼ mẽtʼ do beṅgetʼen tạkina. Ar Jisu do sontorketʼ kinteye metatʼkinạ, “Ńel ben, okoe ṭhen hõ alo ben lại baṛaea.” Menkhan unkin do bahrete senkate ona elaka reakʼ sanam jaegakore uniakʼ sombat kin lạikeda. Unkin hoṛkin calakʼkan tahẽkan jokhecʼ hoṛko do bhut capaṛ akawade mitʼṭen guṅgạ hoṛ Jisu ṭhenko ạgukedea. Jisu do bhute oḍok giḍikade khan uni hoṛ do roroṛe ehopʼena. Onate sanam hoṛ do hahaṛayenteko menkeda, “Israel disạmre nonka do ar tishõ baṅ ńelakana.” Unre Phạrusikoko menkeda, “Bhutkoren sordar hotete uni do bhutkoe oḍok giḍiyetʼkoa.” Jisu do nagraha nagraha ar ato ato senkate sunạgogkore cetʼako ar serma raj reakʼ bhage sombat porcarakoe ehopʼena. Ona chaḍa sanam lekan ruạ hasokoe bogeyetʼtako tahẽkana. Uni do gadel hoṛe ńelketʼko khan mãyã hecʼadea, ente onko do gupiyicʼ begor bhiḍi leka laṅga arko asokʼ ṭayokʼ akan tahẽkana. Unre celakoe metatʼkoa, “Phosol do ḍhergea menkhan kạmiạko doko thoṛagea. Onate phosolren mạlik ṭhen nehõrokʼpe jemon uni do phosol samṭao lạgitʼ hoṛe kolko.” Jisu do acʼren gelbar celakoe hohoatʼkoa ar bạṛicʼ jiu oḍok giḍikako ar sanam lekan rog bighinko bogey reakʼ ektiạriye ematʼkote onkoe kolkatʼkoa. Onko gelbar apostolkoakʼ ńutum do nõkʼõe nonka; pạhil do Patrasko metae Simon, ar uniren boeha Andreas, Sabdaeren hopon Jakob ar uniren boeha Johan, Philip ar Bartholomae; Thoma ar mạsul-uṭhạuicʼ Mathae; Alphaeren hopon Jakob ar Thaddae; Moulobadi Simon ar okoe do Jisu bạiriko ṭhene soprot ocolede uni Jihudi Iskoriạt. Jisu do onko gelbarko noa hukumatʼkoteye kolketʼkoa, “Boṅgan hoṛ jạtrenko ṭhen do alope calakʼa ar Samariạkoakʼ okaṭakʼ atote hõ alope bolokʼa, menkhan Israel jạtren atʼakan bhiḍiko ṭhen calakʼpe. Ar calakʼ calakʼte noa porcarpe, serma raj do sorakana. Ona chaḍa rugiko bogekope, gocʼko jiwetʼkope, murhucʼ jom hoṛ bogekope ar bạṛicʼ jiuko oḍok giḍikope. Ape do begor damtepe ńamakada, begor damtege emakope. Apeakʼ ḍanḍa totolakʼre sona, rupạ se tama reakʼ poesa hõ alope soṅge tora joṅa. Horte lạgitʼ jãhã lekan thuli hõ alo, babar goṭen aṅgrop hõ alo, panahi se ṭheṅga hõ alo, ente okoeye kạmi uni do jojom ar ńũiyakʼ ńam lek kanae. “Jãhãṭakʼ nagraha se atotepe bolokʼre onḍenicʼ mitʼṭen mukhiạ hoṛ ńamepe ar eṭakʼte ạuripe oḍokʼ calakʼ hạbicʼ uniakʼ oṛakʼrege tahenpe. Ar ona oṛakʼtepe bolokʼre oṛakʼrenko joharakope. Judi ona oṛakʼ lekgepe bujhạu enḍekhan apeakʼ suluk do ona oṛakʼre paṛaokʼma. Menkhan ona oṛakʼ lek leka bape bujhạu enḍekhan apeakʼ suluk do ape ṭhenge ruạṛ hijukʼma. Jãhãe bako ataṅpe se apeakʼ kathako bako ańjom enḍekhan ona oṛakʼ se ato khonpe oḍokokʼre apeakʼ jaṅga reakʼ dhuṛi hõ koṭa giḍi oṭokakʼpe. Sạrigeń metapekana, bicạr dinre ona nagraha reakʼ khon Sodom ar Gomora reakʼge boroṅ ḍher sahaokʼa. “Ńelpe, iń do hunḍạrko talare bhiḍiko lekań koletʼpea. Onate biń leka husiạrokʼpe ar parwa leka soṛa hoyokʼpe. Sontor akae tahenpe, ente maraṅ bạisiren hoṛkoakʼ tireko soprotpea ar onkoakʼ sunạgogkoreko dalpea. Iń khạtirte disạm calaoko ar rapajko ṭhenko idipea, jemon onko ar boṅgan hoṛ jạtrenko ṭhen gohape em daṛeakʼ. Hoṛkoko soprot lepere alope bhabnakʼa cetʼ leka se cetʼkope roṛa mente. Ente cetʼko roroṛ hoyokʼa ona do unregepe lại ocokʼa. Ape do roroṛko dope baṅkana, menkhan aperen Baba Isorren Jiuge ape bhitrite kathae roṛa. “Boeha do boehattetʼe soprotea gocʼ ocoye lạgitʼ ar apat do hopontetʼ, ar hoponko do go-baba upạrteko teṅgona arko gocʼ ocokoa. Iń khạtirte sanam hoṛko hirkhạwapea, menkhan okoe mucạtʼ hạbicʼ ṭarhaoe tahen unigeye bańcaokʼa. Mitʼ nagrahare santao arko khedlepere eṭakʼ nagrahate dạṛpe. Sạrigeń metapekana, Israel disạm reakʼ sanam nagraha ar atokore ạuripe kạmi purạurege Manwa Hopon doe hijukʼa. “Guru khon cela do bae maraṅa, ar kisạ̃ṛ khon golam hõ baṅ. Cela lạgitʼ do niạge ḍhera acʼren guru lekae hoyokʼ ar golam hõ acʼren kisạ̃ṛ leka. Oṛakʼren kisạ̃ṛge Beelsebulko metaekan khan gharońjrenko do tinạkʼ artetʼgeko metakoa. “Onate alope botorakoa, ente danaṅ reakʼ sanamakʼ do sodorokʼa ar oko reakʼ joto do baḍaeokʼa. Okaṭakʼ ńutreń lại apekan, ona do marsalre roṛpe. Ar luturte okaṭakʼpe ańjometʼkan ona do sạṛim cetan khon porcarpe. Okoe eken hoṛmo motoko gocʼ daṛeakʼ menkhan jiwi do baṅ onko do alope botorakoa. Menkhan okoe hoṛmo ar jiwi banarge norokre marao lạgitʼ daṛe menakʼtae unige botoraepe. Barea ghaṛwa cẽṛẽ do cetʼ thoṛa damte bạkin ạkhrińokʼ kana? Enre hõ aperen Baba Isorakʼ hukum chaḍa onko modre mitʼṭen hõ otre bae ńurokʼa; Apeakʼ ma bohokʼ reakʼ upʼ hõ lekha akantape. Onate alope botorokʼa. Ente aema aema ghaṛwa cẽṛẽko khon hõ apeakʼ dam do ḍher bạ̃ṛtigetapea. “Jãhãege hoṛko samaṅre ińe aṅgociń iń hõ ińren sermare menae Baba samaṅre uniń aṅgocea. Menkhan okoe hoṛko samaṅre ińe baṅeń iń hõ ińren sermare menae Baba samaṅre uniń baṅea. “Dhạrtite suluk emokʼiń hecʼakana mente alope hudisa. Suluk emokʼ do bạń hecʼakana bickom tarwaṛege. Hopon do apat birudre ar hoponera do eṅgat birudre ar bạhu kuṛi do hanhartetʼ birudre teṅgoko lạgitʼgeń hecʼakana. Ar hoṛren bạiri do acʼ gharońjren hoṛgeko hoyokʼtaea. “Jãhãege, gogo se baba iń khon bạ̃ṛtiye dulạṛkin uni do ińre lek doe baṅkana. Ar jãhãe acʼren gidrạko iń khon bạ̃ṛtiye dulạṛko uni hõ ińre lek doe baṅkana. Okoe acʼakʼ krus gokʼkate bae pańjayiń uni hõ iń lek doe baṅkana. Okoe acʼakʼ jiwi baṅcaoe menjoṅ uni do sạriakʼ reakʼ jione adtaea. Menkhan okoe iń lạgitʼ acʼakʼ jiwiye adtae uni do sạriakʼ reakʼ jione rukhiyạutaea. “Okoe apeko ataṅpe onko do ińgeko ataṅediń kana; ar okoe ińe ataṅediń kan uni do kol akadińicʼgeye ataṅede kana. Mitʼṭen nạbi jãhãege nạbi menteye ataṅe, enḍekhan nạbi okaṭakʼ kuṛạiye ńam, uni hõ ona kuṛạigeye ńama. Isor sewawae hoṛ jãhãege Isor sewawae hoṛ menteye ataṅe enḍekhan Isor sewawae hoṛ oka kuṛạiye ńam, uni hõ ona kuṛạigeye ńama. Jãhãege noko kạṭicʼko modre mitʼ hoṛ ińren cela mente mitʼ bạṭi reaṛ dakʼe ńu ocoye; sạrigeń metapekana, uni do oka lekate hõ acʼakʼ kuṛại do ohoe atʼletaea.” Jisu do acʼren gelbar celako hukumakoe mucạtʼketʼ khan, uni do ato ato cetʼako ar porcar lạgitʼ onḍe khone oḍok calaoena. Johan do hajotre tahenrege Mạsiakʼ kạmiko reaṅe ańjomketʼ khan acʼren celako kolketʼkoteye kulikedea, “Okoeakʼ hijukʼ reakʼ katha menakʼtae uni dom am kangea, se eṭakʼgicʼle ńel horea?” Jisui roṛ ruạṛatʼkoa, “Okakope ńeletʼ arpe ańjometʼ onako senkate Johan lạiaepe. Kãṛã hoṛko ńeńelkana, leḍha hoṛko taṛameda, murhucʼ jom hoṛko bogekʼkana ar kala hoṛko ańjomeda; gocʼ hoṛko jiwetʼ beredokʼkana ar reṅgecʼ orecʼko ṭhen do bhage sombat reakʼ katha lạiạgokʼ kana. Bhạgangeae uni do okoe ińre bae tạkijokʼkan.” Ado Johanren celakoko ruạṛ calakʼkan tahẽkanre, Jisu do gadel hoṛko Johan reaṅ lạiakoe ehopʼena, “Hahaṅkarte do cetʼ ńeńelpe oḍok senlena? Hoete hilạukʼkan chuchi? Se, cetʼ ńeńelpe oḍok calaolena? Mońj kicricʼe horokʼ akatʼ mitʼhoṛ ńeńel? Sạrige okoe mońj kicricʼko horokʼetʼkan onko do rajakʼ oṛakʼreko tahenkana. Se cetʼ ńeńelpe oḍok senlena? Jãhãe nạbi? Hẽ, metapekạnạń, uni do nạbi khon hõe maraṅgea. Johan doe uni kana one okoe reaṅ sostorre olakan: Ńelme, ińren goḍet do am lahateń kolekana, uni do am lahate senkate amakʼ hore teara. Sạrigeń metapekana, maejiuko khon janam akan modre Johan bạbạptisicʼ khon maraṅ do okoe hõ bạnukʼkoa. Menkhan serma rajre okoe do joto khone huḍińge uni hõ Johan khon doe maraṅgea. Johan bạbạptisicʼakʼ okte khon ńit hạbicʼ serma raj doko jormoṭetʼ kana, ar okoeko jormoṭetʼkan onkoge ona doko recʼjoṅ kana. Ente joto nạbi ar ạn do Johan hạbicʼgeko nạbileda. Noa kathape pạtiạuakʼkan khan enḍekhan ańjompe okoeakʼ hijukʼ reakʼ katha tahẽkan uni Eliạ doe nui Johan kangea. Ańjom lạgitʼ lutur menakʼtaeicʼ doe ańjomma.” “Niạ piṛhiren hoṛ do okoe tulucʼ iń jurikekoa? Onko do nonkan gidrạko lekanako okoe do bajarre duṛupʼkate eṭakʼ gidrạko hohoateko metakokan, ‘ale do ape lạgitʼ tiriole oroṅkeda, menkhan bape enecʼlena; homor halaṅ kedale, ar koṛam hõ bape ceṭakʼlena.’ Johan do hecʼkate jom hõ bae jometʼ tahẽkana ar ńũ hõ bae ńũyetʼ tahẽkana, onate hoṛko meneda unire do bhut menaea. Ar Manwa Hopon do hecʼkateye jom-ńũyetʼte hoṛkoko meneda, ‘hạni ńelepe, mitʼṭen lebṛa ar darkha rasa hoṅgoricʼ, mạsul uṭhạuko ar bạṛicʼ hoṛkoren gate.’ Menkhan ạkil je khạṭige ona reakʼ porman do acʼakʼ kạmikorege menakʼa.” Ado Jisu okako ato ar nagrahakore ḍher hahaṛa kạmikoe kạmiletʼ onako jaegaren hoṛko do mon bako ạcurletʼtakoa. Onate uni do onako jaega nisṛạue ehopʼena, “Hae amre, E Khorashin, hae amre E Bethsaeda! Aben talare oka hahaṛa kạmiko hoeakan, ona do Tur ar Sidon reakʼ nagrahare hoelen khan ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa. Sạrigeń metaben kana, bicạr dinre abenakʼ khon Tur ar Sidon reakʼge boroṅ sahaokʼa. Ar E am Kaparnạhum! Baṅ do serma hạbicʼem usul ocokokʼ? Tishõ baṅa, am do patal puri hạbicʼem ńurhạ ocokʼa. Okako hahaṛa kạmi amre hoeakan, ona Sodomre hoelen khan enḍekhan teheń hạbicʼ tahẽkokʼa honaṅ. Sạrigeń metaben kana, bicạr dinre abenakʼ khon boroṅ Sodom reakʼge ḍher sahaokʼa.” Ona tayom Jisui menkeda, “E Baba, ot ar sermaren Probhu. Amiń sarhaoetʼmea, ente am do ạkilan ar budanko ṭhen khon noako reaṅ dom oko dohoakada, menkhan kạṭicʼ gidrạ lekanko ṭhen dom sodor akada. Hẽ Baba, amakʼ sana lekage noa do hoeakana. “Ińren Baba do sanamakʼge ińakʼ tireye jimạ akada. Baba chaḍa Hopon do okoe hõ bako baḍaeyede kana ar Hopon chaḍa Baba hõ okoege bako baḍaeyedea, Hopon okoe ṭhen Baba sodoreye menjoṅkan unige uni doe baḍaeyea. “Ape okoe do laṅga ar bojhatepe ten akan, dela iń ṭhen hijukʼpe, ińgeń jirạu ocopea. Ińakʼ ãrãṛ gogpe ar iń ṭhen khon cetʼ joṅpe, ente iń do mạ̃hir ariń nindhạngea. Onate ontorre jirạupe ńama, ente ińakʼ ãrãṛ do algagea ar ińakʼ bojha do rawalgea.” Mitʼ din Jisu do phosol talateye calakʼkan tahẽkana. Ona din do jirạukʼ mãhã tahẽkana. Uniren celako do reṅgecʼetʼko tahẽkante gele hotʼkate jojomko ehopʼena. Ona ńelte Phạrusiko do Jisuko metadea, “Ńelme, dhorom reakʼ niạm lekate jirạukʼ mãhãre okaṭakʼ lek baṅkan amren celako do onageko kạmiyeda.” Jisui metatʼkoa, “Dạud ar uniren soṅgetenko tinre reṅgecʼletʼkoa unre onko do cetʼko cekaleda mente ona do cetʼ bape paṛhao akada? Uni ma Isorakʼ oṛakʼre bolokate samaṅ akatʼ piṭhạ coṅe jomletʼ. Dạud ar uniren soṅgetenko do ona jojom lek baṅ tahẽkantakoa, eken naekekoge ona doko jometʼ tahẽkana. Ona chaḍa Moseakʼ ạn-ạrikore cetʼ bape paṛhao akada, jirạukʼ mãhãre mundilren naeke do jirạukʼ mãhã reakʼ ạnko rạputʼlerehõ onkoakʼ do dos baṅ hoyokʼtakoa mente? Ińiń metapekana, nonḍe do mundil khon hõ mitʼṭen maraṅicʼge menaea. ‘Iń do mãyãgeń kusiyakʼ kana, dãṛẽ do baṅ’ sostor reakʼ noa kathape baḍaele khan honaṅ begor dos akatʼ hoṛ do ohope doslekoa. Baḍaekakʼpe, Manwa Hopon kangeae jirạukʼ mãhãren mạlik do. Inạ tayom Jisu do ona jaega bạgikate onko Phạrusikoakʼ sunạgogteye boloyena. Onḍe do mitʼṭen hoṛe tahẽkana one okoe do mitʼ ti borocʼge tahẽkantae. Phạrusiko do uniko kulikedea, “Dhorom reakʼ niạm lekate jirạukʼ mãhãre jãhãe bogeye do ganokʼgea?” Jisui metatʼkoa, “Ape modre jãhãeren mitʼṭen bhiḍiye tahentae, ar jirạukʼ mãhãre khạ̃yũkʼreye ńurlenre uni do cetʼ bae tul rakabea? Bhiḍi khon manwa do artetʼge cetʼ bae sorosa? Onate jirạukʼ mãhãre bhage kạmi do lek kangea.” Ona tayom uni hoṛe metadea, “Amakʼ ti tiạrtam.” Ado tiye tiạrketʼ khan dosarakʼ lekage hoyentaea. Unre Phạrusiko do barhete oḍok senkate Jisu goje lạgitʼ soṛojontroko dhurạuena. Ado ona soṛojontroe baḍaeketʼ khan Jisu do onḍe khone oḍok calaoena. Unre gadel hoṛ do uniko pańja idikedea. Ar onko modre okoe do rugiko tahẽkan onko sanamkoe bogeketʼkoa ar acʼ reaṅ alo lại baṛae lạgitʼe sontorkatʼkoa. Noa do hoeyena Jesaea nạbi hotete roṛlenakʼ katha jemon purạukʼ: Ńelpe, ińren guti one uniń bachao akade, unige ińren dulạṛiạ, one unireń kusi akan. Ińren Jiu do unireń dohoyea, uni do boṅgan hoṛ jạtrenko ṭhen hok reakʼ bicạre lại jạhira. Uni do bae jhogṛakʼa ar bae kikiạukʼa; kulhikore acʼakʼ aṛaṅ bae ańjom ocoetaea. Hok reakʼ bicạrko ạuriye jitạu ocoe hạbicʼ, uni do talga tạwạkʼ akan chuci bae rạpuda, ar ńuṛuṅ ńuṛuṅokʼkan diuhe hõ bae ĩṛĩja. Ar porjạtrenko do uniakʼ ńutumreko bhorsakʼa. Inạ tayom bhut capaṛ akawade mitʼṭen hoṛ do Jisu ṭhenko ạgukedea. Uni do guṅgạ ar kãṛãgeye tahẽkana. Ar Jisu do uniye bogekedea. Onate uni hoṛ do roroṛe ehopʼena ar ńeńel daṛeye ńamkeda. Unre sanam hoṛ do hahaṛayenteko menkeda, “Nui do cetʼ Dạudren hopon kanae?” Noa katha ańjomkate Phạrusikoko menkeda, “Nui do bhutkoren raj Beelsebul hotete bhutkoe oḍok giḍiyetʼkoa.” Jisu do Phạrusikoakʼ mone joṅakʼkoe baḍaeketʼ khane metatʼkoa, “Okaṭakʼ rajosṭi apnar talare hạṭińokʼ ona rajosṭi do marao utạrokʼa. Ar okaṭakʼ nagraha se gharońj apnar talare hạṭińokʼ ona nagraha se gharońj hõ baṅ ṭikạukʼa. Soetan do Soetane oḍok giḍiye khan uni do apnar bhitriregeye hạṭińokʼa. Enḍekhan uniakʼ rajosṭi do cekate ṭikạukʼtaea? Iń do Beelsebul hotete bhutkoń oḍok giḍiyetʼko khan aperen hoṛko do okoe hoteteko oḍokketʼkoa? Onate ṭhikpe meneda se baṅ, ona do aperen hoṛgeko bicạra. Menkhan Isorren Jiu hotete bhutkoń oḍok giḍiyetʼko khan enḍekhan Isorakʼ raj do apere hecʼakana. “Daṛe menakʼtae hoṛ do pạhilre baṅ tol maṛaṅ lekhan uniakʼ oṛakʼre bolokate cetʼ jãhãe jiniskoe luṭ daṛeketaea? Menkhan uniye tol maṛaṅ lekhan doe daṛeakʼgea. “Okoe iń secʼrene baṅkan uni do iń birudren kanae. Okoe iń sãote bae samṭao uni doe chiṭiạua. Noa iạteń metapekana, manwakoakʼ joto lekan kại ar Isor birudre opoman katha do ikạkʼtaea, menkhan sonot Jiu birudre opoman katha do baṅ ikạkʼtakoa. Manwa Hopon birudre jãhãege jãhãnakʼe roṛ ona do ikạkʼtaea, menkhan sonot Jiu birudre kathae roṛlekhan baṅ ikạkʼtaea, niạ jugre hõ baṅ ar darakan jugre hõ baṅ. “Noa katha do aṅgocpe je, dare bhage ge khan jo hõ bhage hoyokʼa, ar dare bạṛicʼge khan jo hõ bạṛicʼge hoyokʼa; ente jotege dare do oromokʼa. E bińren bõsko! Apepe bạṛicʼgere hõ cekate bhageakʼ kathakope roṛ daṛeakʼ kana? Ente ontorre oka sareṛokʼ, onage moca doe roṛa. Bhage hoṛ do acʼakʼ bhageakʼ khon bhageakʼgeye oḍoka, ar bạṛicʼ hoṛ do acʼakʼ bạṛicʼ babaeakʼ khon bạṛicʼakʼgeye oḍoka. Menkhan ińiń metapekana, okoe ạuṛi sạuṛi kathako roṛ, onko do bicạr dinre akoakʼ mimitʼ katha reakʼ lekha jokha emokʼ hoyokʼtakoa. Amakʼ kathatege am do bin dusạnicʼ mentem ṭarhaokʼa ar amakʼ kathategem dusi ocokʼa.” Inạ tayom adom sostor baḍaeko ar Phạrusiko do Jisuko metadea, “E Guru, ale do am ṭhen khon mitʼṭen cinhạle ńela.” Jisui metatʼkoa, “Niạ bạṛicʼ ar laṭghaṭ piṛhirenko do cinhạko khojkana, menkhan Jona nạbiakʼ cinhạ chaḍa eṭakʼ ar cetʼ cinhạ hõ baṅ udukʼakoa. Cetʼ leka Jona do maraṅ hako lacʼre pe siń ar pe ńindạye tahẽkan, onkage Manwa Hopon hõ pe siń ar pe ńindạ ot bhitrireye tahena. Bicạr dinre Niniwe nagraharen hoṛko do beretʼkate noa piṛhiren hoṛkoakʼ doskoko uduga, ente Niniweren hoṛ do Jona nạbiakʼ porcarte akoakʼ kại khon monko ạcurletʼtakoa. Ar ńelpe, nonḍe do Jona khon hõ maraṅicʼge menaea. Bicạr dinre dạkhin disạmren rạni do beretʼkate noa piṛhiren hoṛko doskoe udukʼakoa, ente Solomon rajakʼ ạkilanakʼ kathako ańjom lạgitʼ dhạrti reakʼ mucạtʼ khon uni doe hecʼlena. Ar ńelpe, nonḍe do Solomon khon hõ maraṅicʼge menaea. “Bạṛicʼ jiu do jãhãe manwa khone oḍok calaolenre jirạu ńam lạgitʼ khaṅgoṭ jaegakoreye ạcur baṛaea. Menkhan bae ńamle khan uni doe mena, ‘oka khoniń oḍok hecʼakan ińakʼ ona oṛakʼtegeń ruạṛ calakʼa.’ Ar ruạṛ hecʼkate ona oṛakʼ do ạjạuṛige, jokʼ cikạ̃ṛ ar sajaoakatʼe ńama. Tayomte uni bạṛicʼ jiu do senkate acʼ khon artetʼ bạṛicʼ eae goṭen eṭakʼ jiue soṅge darajoṅa ar onḍe bolokateko mạnḍiạukʼa. Onate uni hoṛakʼ dosa do pạhil khon artetʼ bạṛicʼ hoyokʼtaea. Noa bạṛicʼ piṛhiren hoṛkoakʼ dosa hõ onkage hoyokʼtakoa.” Jisu do tinre onko gadel hoṛe galmarao akokan tahẽkana unre ńelpe, eṅgat ar boehakotae do acʼ tulucʼ galmarao lạgitʼ bahrereko teṅgo akan tahẽkana. Unre mitʼ hoṛ do hecʼkate uniye metadea. “Ńelme, eṅgam ar boehamteko do am tulucʼ galmarao lạgitʼ bahrereko teṅgo akana.” Unre Jisu do uniye metadea, “Okoe kanae eṅgạń, ar okoe kanako boehań do?” Uni do acʼren celako udukʼketʼkoteye menkeda, “Noko ńelkom, ińren eṅgạń ar boehańko do; ente okoe sermare menae Babawakʼ mone lekako senokʼ, onkoge ińren boehań, miserań ar eṅgạń kanako.” Enhilokʼge Jisu do oṛakʼ khon oḍok senkate doreão aṛereye duṛupʼena. Ar acʼ ṭhen ạḍi utạr hoṛko jarwayen khan, uni do mitʼṭen lạukạre decʼkateye duṛupʼena, ar sanam hoṛ do ḍhipreko teṅgo tahẽyena. Unre uni do phenkote ạḍi lekan sikhnạt emakoe ehopʼena. Uni doe metatʼkoa, “Mitʼṭen casa hoṛ do itạ erokʼe oḍok calaoena. Ar erokʼ jokhecʼ adomakʼ itạ do hor aṛere ńurena ar cẽṛẽko hecʼkate onako halaṅ jomkeda. Ar adomakʼ itạ do cạṭạni hasare ńurena. Onḍe do dạriạ hasa baṅ tahẽkana. Ar dạriạ hasa baṅ tahẽkante itạ do usạrage janam rakapʼtʼena, menkhan siń candoe rakapʼen khan ona do tolmocʼ cabayena ar mońjte rehetʼ baṅ bạisạulente rohoṛ kạrcupʼena. Arhõ adomakʼ itạ do jạnum jhạwạ talare ńurena. Ar jạnumko hara rakapʼen khan onakoe jhurkeda. Ar adomakʼ itạ do bhage hasare ńurente adom do mitʼ sae doboṛ, adom do turui gel doboṛ ar adom do pegel doboṛ gele beleyena.” Ado golpoe lại mucạtʼketʼ khan Jisui menkeda, “Ańjom lạgitʼ lutur menakʼtaeicʼ doe ańjomma.” Tayomte celako do Jisu ṭhen hecʼsorenteko metadea, “Am do golpoko hotete hoṛko cedakʼem cetʼako kana?” Uniye roṛ ruạṛatʼkoa, “Ape do serma raj reakʼ okoakʼkope baḍae ocoakana, menkhan onko do baṅ emakatʼkoa. Ente okoe menakʼtae uni do arhõe em ocokʼa, onate uniakʼ do aema hoyokʼtaea. Menkhan okoeakʼ bạnukʼ uni do oka menakʼtae ona hõe recʼocokʼa. Noa iạte golpoko hoteteń cetʼako kana, ente onko do ńeńel tulucʼ bako ńeńelkana, ańjom tulucʼ bako ańjomeda ar bujhạu hõ bako bujhạueda. Noko hotetege Jesaea nạbiakʼ katha do purạukʼ kana: Ańjom dope ańjomgea menkhan bape bujhạua; ńeńel dope ńeńelgea menkhan baṅgepe oroma. Noko hoṛkoakʼ ontor do goṛdho akana ar lutur hõ tepetʼakan takoa, onko do mẽtʼko jạpitʼ akada, jemon mẽtʼte aloko ńeńel, luturte aloko ańjom ar ontorte aloko bujhạu, ar bogekʼ lạgitʼ iń ṭhen aloko ruạṛ hijukʼ. “Menkhan ape dope bhạgangea, ente apeakʼ mẽtʼ doe ńeleda, ar apeakʼ lutur doe ańjomeda. Sạrigeń metapekana, okakope ńeletʼ ona do ạḍi utạr nạbi ar dhorom hoṛko ńeńelko gagojlena menkhan bako ńelleda, ar okakope ańjometʼkan ona hõ ańjomko gagojlena menkhan bako ańjomleda. “Nõkʼõe enḍekhan casa hoṛakʼ golpo reakʼ bhed ańjompe. Jãhãege serma rajosṭi reakʼ katha ańjomkatehõ bae bujhạu khan unre Soetan doe hijukʼa ar uniakʼ monre oka katha er akan onae ạtkira. Ona hor aṛere ńurlen itạ reakʼte do nonkan hoṛ reaṅge roṛ akana. Ar cạṭạni hasare ńuren itạ reakʼte do onko reaṅ roṛ akana okoe do serma raj reakʼ katha ańjomkate unrege rạskạteko ataṅetʼkan, menkhan onkore mońjte baṅ rehedokʼ kante thoṛa ghuṛi lạgitʼko ṭarhao tahen kana. Ar ona katha khạtirte tinre santao ar khedreko paṛaokʼkana unre onko doko pạcokʼkana. Jạnum jhạwạre eren itạ reakʼte do nonkanko lạgitʼge roṛ akana okoe do ona kathako ańjomketʼ, menkhan gharońj reakʼ dạndi ar dhon reakʼ mãyãte ona katha doko ten dohokakʼ kana. Onate onkore jãhãn jo do baṅ hoyokʼ kana. Ar bhage hasare ńuren itạ reakʼte do nonkanko lạgitʼ roṛakana okoe do ona katha ańjomkateko bujhạuetʼkan ar joko emokʼkan. Adom do mitʼ sae doboṛ, adom do turui gel doboṛ, ar adom do pegel doboṛ.” Uni do cetʼako lạgitʼ arhõ mitʼṭen golpoe lạiatʼkoa. “Serma raj do nonkan mitʼṭen hoṛ lekana, okoe do acʼakʼ goḍare bhage itạye erketʼ. Menkhan hoṛko jạpitʼ akatʼ tahẽkanre uni hoṛren bạiri doe hecʼena ar guhum talare sama ghãs reakʼ itạ er oṭokateye calaoena. Ado guhum omonkate geleyen khan ona talare sama ghãs hõ ńelena. Ona ńelte gutiko do hecʼkate oṛakʼ kisạ̃ṛko metadea, ‘Amakʼ goḍare cetʼ bhage itạ do bam erleda? Enḍekhan sama ghãs do oka khon hecʼena?’ ‘‘Uni doe metatʼkoa, ‘jãhãe bạiriye nonka akada.’ ‘‘Gutikoko metadea, ‘enḍekhan ale do cetʼ senkate onakole totʼ giḍikakʼa?’ “Uniye metatʼkoa, alo, ‘ente sama ghãspe jarwaere guhum hõpe totʼ boteja. Phosol belekʼ hạbicʼ mitʼ dhaote hara ocoakʼpe. Unre samṭao jokhecʼ phosol samṭaokoń metakoa, pạhilre sama ghãs jarwa maṛaṅpe ar ạṭikate begarpe seṅgelre atar giḍi lạgitʼ, menkhan guhum do ińakʼ golare ạgu jarwaepe.’ ” Jisu do arhõ mitʼṭen phene lạiatʼkoa. “Serma raj do mitʼṭen tuṛi jaṅ lekana, one okaṭakʼ do mitʼ hoṛ idikate acʼakʼ goḍareye erketʼ. Ona itạ do sanam itạko khon kạṭicʼgere hõ, haralen khan joto aṛakʼ sakam khon lạṭuge hoyokʼa; ar nunạkʼ lạṭu harakʼa je, coṭren cẽṛẽko hõ hecʼkate ona reakʼ dạrkore tukạya.” Uni do arhõ mitʼṭen golpoe lạiatʼkoa: “Serma raj do khạmi lekana. Mitʼṭen maejiu do ona idikate gel irạl keji holoṅreye sipi mesalkeda. Onate joto holoṅ do khạmianakʼ hoyena.” Jisu do golpoko hotete hoṛko noa sikhnạte ematʼkoa. Ar golpo begor okaṭakʼ cecetʼakʼ hõ uni do bae emakokan tahẽkana. Noa do hoyena nạbi hotete roṛlenakʼ katha jemon purạukʼ: Iń do ińakʼ mocate phenkoń lạia; dhạrti etohopʼ khon okako oko tahẽkan, onań lại sodora. Ona tayom Jisu do onko gadel hoṛkoe bạgiatʼkote oṛakʼteye boloyena. Unre acʼren celako hecʼkateko metadea, “Goḍa reaṅ ona sama ghãs reakʼ bhed baṛe bhoṅaleme.” Jisui roṛ ruạṛatʼkoa, “Okoe bhage itạye eretʼkan uni doe Manwa Hopon kana. Goḍa do dhạrti kana ar bhage itạ do serma rajren hoṛ kanako. Ar Soetanren hoṛ doko sama ghãs kana. Okoe bạiri onae er oṭoletʼ uni doe Soetan kana, ar phosol samṭao okte do jug reakʼ mucạtʼ kana, ar phosol samṭaoko do sermaren goḍetko kanako. Sama ghãs jarwakate cetʼ leka seṅgelre atar giḍikʼ, onkage jug reakʼ mucạtʼre hõ hoyokʼa. Manwa Hopon do acʼren serma goḍetkoe kolkoa. Onko do uniakʼ rajosṭi khon sanam tạkicʼakʼ ar sanam bedhorom kạmikan hoṛko jarwa mitʼkoa ar jolokʼkan seṅgelreko khadlekoa. Onḍe do rakʼjoṅ ar togocʼ ḍaṭa hoyokʼa. Unre dhorom hoṛ do akoren sermaren Babawakʼ rajre siń cando lekako jhak jhakaokʼa. Ańjom lạgitʼ lutur menakʼtaeicʼ hoṛ doe ańjomma. “Serma raj do goḍare topa okoakatʼ dhon lekana. Mitʼ hoṛ do ona ńamkate arhõe oko dohokada. Inạ tayom uni do rạskạ monteye calaoena ar acʼakʼ oka tahẽkantae ona joto ạkhrińkate ona goḍae kirińkeda. “Arhõ serma raj do mitʼṭen bepari hoṛ lekana one okoe do bhage mạnike ńam baṛayetʼ. Ado mitʼṭecʼ damanakʼ mạnike ńamketʼ khan senkate acʼakʼ cetʼko tahẽkantae ona joto ạkhrińkate uni do mạnike kirińkeda. “Arhõ serma raj do nonkan mitʼṭen lạtu jhạli lekana one okaṭakʼ do doreãoreko oḍaoketʼte onare joto lekan hakoko jhạliyen. Ado jhạli perecʼen khan ghuṭuteko or rakapʼkeda. Ar duṛupʼkate bhage hakoko bachaoketʼkote jhuṛireko dohoketʼkoa ar bạṛicʼko doko giḍikatʼkoa. Onkage jug mucạtʼre hõ hoyokʼa. Serma goḍetko do hecʼkate dhorom hoṛ tala khon bedhoromkoko begarkoa ar jolokʼkan seṅgelreko khadlekoa. Onḍe do rakʼjoṅ ar togocʼ ḍaṭa hoyokʼa.” Inạ tayom Jisu do celakoe kuliketʼkoa, “Ape do cetʼ noakope bujhạuetʼkangea?” Metadeako, “Hẽ, bujhạuetʼgeale.” Unre Jisui metatʼkoa, “Serma raj reaṅko cetʼakawan mitʼke mitʼ sostor baḍaeko do mitʼṭen oṛakʼ kisạ̃ṛ lekan kanako one okoe do acʼakʼ gola khon nawanakʼ ar mareakʼkoe oḍokketʼ.” Ado Jisu noako golpoe lại mucạtʼketʼ khan onḍe khone uṭhạu calaoena. Ar inạ tayom do acʼakʼ atote senkate sunạgogre cetʼakoe ehopʼena. Ar uniakʼ katha ańjomkate hoṛko do hahaṛayenteko menkeda, “Noa akel ar hahaṛa kạmiko reakʼ daṛe do oka khone ńamakada? Nui do cetʼ kaṭmistiriren hopon doe baṅkana? Uniren eṅgat do cetʼ Mạriạm doe baṅkana? Ar uniren boehako do cetʼ Jakob, Joseph, Simon ar Jihudạ, doko baṅkana? Uniren miserako do cetʼ abo talare bạnukʼkoa? Enḍekhan oka khon noako doe ńamana?” Nonkate Jisu iạte hoṛko do monre tạkijokʼko ehopʼena. Unre Jisui metatʼkoa, “Nij nagraha ar nij oṛakʼ chaḍa, nạbiko do sanam jaegarege manotko ńama.” Ar onkoakʼ bepạtiạu iạte onḍe do ḍher hahaṛa kạmiko bae kạmileda. Onako oktere Herod do Jisu reaṅe ańjomketʼ khan acʼren kạmiạkoe metatʼkoa, “Nui doe Johan bạbạptisicʼ kana; unige gocʼko khone jiwetʼ beretʼ akana. Ar onatege uni do noako hahaṛa kạmiye kạmikana.” Herod do acʼren boeha Philipren bạhu Herodiạ iạte Johan tolkate hajotreye bhorao akade tahẽkana, Ente Johan doe metade tahẽkana, “Herodiạ bạhu mentem dohoye do baṅ ganokʼtama.” Herod do Johan gojeye menjoṅkan tahẽkana, menkhan uni do hoṛkoe botoratʼkoa, ente Johan do mitʼṭen nạbi menteko manaoede tahẽkana. Herodakʼ janam din reakʼ rạskạre Herodiạren hoponera do jarwa akanko talareye enecʼente Herode kusi ocokedea. Onate Herod do kuṛi jãhãnakʼgeye khoj ona emae lạgitʼe kiriạwadea. Ar kuṛi do eṅgattetʼ ṭhene sikhạu maṛaṅ ocoyenteye menkeda, “Johan bạbạptisicʼakʼ bohokʼ nonḍe thạrire emạńme.” Onate Herod doe bhabnayena, menkhan acʼ soṅgete jojom duṛupʼ akanko samaṅreye kiriạlen iạte ona emae lạgitʼe hukumkeda. Uni do hoṛ kolkate hajotrege Johanakʼ bohokʼe makʼ ocoketʼtaea. Ar thạrire uniakʼ bohokʼ ạgukate kuṛiko calade khan uni do eṅgattetʼe idiadea. Inạ tayom Johanren celako do hecʼkate mạ̃ṛĩko idikeda arko topakatʼtaea ar senkate ona sombat do Jisuko lạiadea Johanakʼ gujukʼ reakʼ sombate ańjomketʼ khan Jisu do eskarge onḍe khon lạukạte mitʼṭen nisun jaegateye calaoena. Ar gadel hoṛko onako ańjomketʼ khan eṭakʼ eṭakʼ atoko khon ot otte uniko pańjakedea. Ar lạukạ khone pheḍen khan uni do gadel hoṛko ńelte mãyã hecʼadea ar onko modre tinạkʼ rugiko tahẽkan onkoe bogeketʼkoa. Ado ạyubokʼ jokhecʼ celako do hecʼkateko metadea, “Noa jaega do nisungea ar bela hõ bạnuea. Onate hoṛko bidạkakome jemon onko do atokote senkate jomakʼko kiriń daṛeakʼ.” Menkhan Jisui metatʼkoa, “Onkoakʼ calakʼ reakʼ jạruṛ do bạnukʼa, apege jomakʼ emakope.” Celakoko metadea, “Abo ṭhen do eken mõṛẽ goṭen piṭhạ ar barea hako chaḍa ar cetʼge bạnukʼa.” Uniye metatʼkoa, “Onako iń ṭhen ạguipe.” Tayomte uni do gadel hoṛko ghãsre duṛupʼe hukumatʼkoa, ar ona mõṛẽ goṭen piṭhạ ar barea hako ataṅkate serma secʼ beṅgetʼkateye bhorada. Inạ tayom piṭhại kecakʼketʼte celakoe ematʼkoa ar celako do gadel hoṛkoko calatʼkoa. Ar sanamkoko jomkeda arko biyena. Ado jom tayom okako kecakʼ hạricʼ pạsir ńur tahẽyen ona halaṅkate celako do gelbar phạtiạkʼko perecʼkeda. Ar tinạkʼko jomketʼ onko modre maejiu ar kạṭicʼ gidrạ chaḍa mõṛẽ hajar herel hoponko tahẽkana. Inạ tayom Jisu do celako lạukạre dejokʼte doreão hanasa parom lahakʼ lạgitʼe udgạu gotʼkatʼkoa, ar acʼ do hoṛko bidạkoe ehopʼena. Ado gadel hoṛe bidạketʼko khan koejoṅ lạgitʼ acʼ eskarge buruteye rakapʼena. Ar ńuhumen khan eskarge onḍeye tahẽyena. Unre celakoakʼ lạukạ do tala doreãore tahẽkana ar samaṅ secʼ khone hoeyetʼ tahẽkante ḍheokote lạukạ do botorge sokojokʼkan tahẽkana. Ado maraṅ sim rakʼ okte Jisu do doreão cetan cetante taṛamate celako ṭhene hijukʼkan tahẽkana. Ar dakʼ cetante mitʼ hoṛ taṛamate hijukʼkanko ńelkede khan celako do botorte, “Bhut, bhut” menkateko kikiạukeda. Unre Jisui metatʼkoa,” Dil joṅpe, alope botorokʼa, ińkangeạń.” Patrase roṛ ruạṛadea, “E Probhu, am kan khanem enḍekhan dakʼ cetante am ṭhen calakʼ hukumạńme.” Jisui menkeda, “Dela hijukʼme.” Unre Patras do lạukạ khon pheḍkate dakʼ cetante Jisu ṭhen calakʼe ehopʼena. Menkhan hoe ńelteye botoren khan unumokʼe ehopʼena ar kikiạuateye menkeda, “E Probhu, bańcaoiń me.” Jisu do usạrate tiye tiạrketʼte uniye sapʼgotʼkedea are metadea, “E nase pạtiạukʼicʼ cedakʼem digdhạyena?” Ado Jisu ar Patras lạukạrekin decʼen khan hoe do thirgotʼena. Ar lạukạre okoeko tahẽkan onko do Jisu sewawadeteko menkeda, “Sạrige am dom Isorren Hopon kana.” Tayomte doreão paromkate onko do Genesaret elakate hecʼkateko pheḍena. Ar onḍenko hoṛ do Jisuko oromkede khan beṛhaeteakʼ jaegakore hoṛko kolketʼkoa. Ar joto dukhạliạko uni ṭhen ạguketʼkoteko nehõradea jemon onko do uniakʼ kicricʼ ańcarko joṭetʼ daṛeatae; ar tinạkʼko joṭetʼketʼtae onko jotogeko bogeyena. Unre Jerusalem khon adom Phạrusiko ar sostor baḍaeko do Jisu ṭhen hecʼkateko menkeda, “Amren celako do cedakʼ hapṛamko khon hecʼ ạguakʼ ạn bako manaoeda? Onko do jom lahare ti bako ạbukokʼkana.” Jisui roṛ ruạṛatʼkoa, “Oka ạri-cạli calao hijukʼkan ona iạte ape do cedakʼ Isorakʼ hukumkope bemanoteda? Isore menakada, ‘eṅgam ạpum ganaokinme’ ar ‘okoe eṅgat se apat bạṛicʼe metakin uni do gocʼte hõ goje hoyokʼa.’ Menkhan apepe meneda, jãhãe hoṛ acʼren eṅgat se apate metae, ‘ińakʼ okaṭakʼtem porhokokʼ, ona do Isor ṭhen emakana,’ enḍekhan uni do eṅgat se apat manotkin reakʼ jạruṛ bạnukʼtaea. Apeakʼ noako ạri-cạli iạtege ape do Isorakʼ kathape mạutạ akada. E Phạsiạrako! Jesaea nạbi do ṭhikge ape reaṅe nạbileda, noko do mocategeko ganaoedińa, menkhan onkoakʼ ontor do iń khon sạṅgińgetakoa. Onko do ạuṛiakʼgeko sewawạń kana, ar manwakoakʼ hukumkoge onko do dhorom sikhnạt menteko cetʼakokana. Jisu do gadel hoṛko acʼ ṭhen hoho sorketʼkoteye metatʼkoa, “Ińakʼ kathako ańjompe ar bujhạujoṅpe. Moca secʼte oka bolokʼkan onate manwa do bae bhõnḍokʼa, menkhan moca khon oka oḍokokʼkan onatege manwa doe bhõnḍokʼ kana.” Unre celako hecʼkateko metadea, “Amakʼ noa kathate Phạrusikoko tạkijokʼkan dom baḍae kangea?” Uniye roṛ ruạṛatʼkoa, “Sermaren ạpuń bae rohoe akatʼ mitʼke mitʼ poha do totʼ giḍi ocokʼa. Onate onkoakʼ katha do bạgiyakʼpe. Onko do apnartetʼko kãṛãgere hõ kãṛã ạyurko kanako. Ar kãṛã do kãṛãye ạyure khan banarge ghaḍlakʼrekin ńurokʼa.” Unre Patras do Jisui metadea, “Okaṭakʼ phenem lạiketʼ ona baṛe bujhạu aleme.” Jisui metatʼkoa, “Ńit hạbicʼ hõ bebujge menakʼpea? Cekate bape bujhạueda, moca secʼte oka bolokʼkan ona do lacʼte bolokʼkana, ar mucạtʼre do ṭanḍite oḍok giḍikʼa? Menkhan okaṭakʼ moca khon oḍok hijukʼkan ona do ontor khonge hijukʼ kana, ar onakotege hoṛ doe bhõnḍokʼkana. Ente ontor khonge bạṛicʼ cintạ, khũn, laṭghaṭ, kombṛo, eṛe goha, ar opomanko do oḍok hijukʼa. Ar noakotege hoṛ doe bhõnḍokʼa, menkhan ti begor ạbukte jom lekhan manwa do bae bhõnḍokʼa.” Ado Jisu ona jaegae bạgiatʼte Tur ar Sidon elakateye calaoena. Ar ńelpe, Kananren mitʼṭen maejiu do oḍok hecʼkate hohoateye menkeda, “E Probhu, Dạudren Hopon, mãyãwạńme baṛe, ente hoponerań do bạṛicʼ jiue capaṛ akawadete ạḍitetʼe sasetokʼ kana.” Menkhan Jisu do cetʼge bae roṛ ruạṛadea. Unre celako hecʼkate nehõradeteko metadea, “Uni do bidạkaeme, ente abo tayomteye hoho ạguyeda.” Jisui roṛ ruạṛatʼkoa, “Iń do eken Israel bõsren atʼ akan bhiḍiko ṭheniń kol ocoakana.” Menkhan maejiu do Jisu ṭhene hecʼena ar ḍobokʼadeteye menkeda, “E Probhu goṛowạńme baṛe.” Jisui menkeda, “Gidrạkoakʼ jomakʼ hataokate setako samaṅre lebda giḍikakʼ do baṅ bhagea.” Maejiue roṛ ruạṛkeda, “Katha do sạrikangea Probhu, enrehõ kisạ̃ṛakʼ mej khon hiricʼ pạsirakʼ ganḍa gunḍạ do setakogeko jomeda.” Unre Jisui menkeda, “E go, sạrige amakʼ pạtiạu do ḍhergea. Amem khojkan leka baṛe hoyokʼma.” Ar unrege uniren hoponera doe bogeyena. Ado Jisu ona jaegae bạgiatʼe Gạlil doreão aṛe aṛeteye calaoena ar mitʼṭen burure rakapʼkateye duṛupʼena. Unre gadel hoṛ do soṅgete, leḍhako, kãṛãko, ṭhunṭạko, guṅgạko ar eṭakʼkoko ạgu daraketʼkoa. Ar uniakʼ jaṅga ṭhenko dohoketʼko khan uni doe bogeketʼkoa. Onate guṅgạko roroṛkan, leḍhako taṛamkan, ṭhunṭạko bogekʼkan, ar kãṛãkoko ńeńelkana menteko ńelketʼko khan gadel hoṛ doko hahaṛa cabayena, ar Israelren Isorko sarhaokedea. Inạ tayom Jisu do celako hohoatʼkoteye metatʼkoa, “Noko gadel hoṛkoreń mãyãkʼ kana, ente teheń pe mãhã hoyokʼ kana onko do iń sãote menakʼkoa, ar noko ṭhen jãhãn jomakʼge bạnukʼa. Ar reṅgecʼte bidạkako hõ baṅ sanań kana; ente hoedaṛeakʼa onko do horkoreko lorao botecʼkokʼa.” Ado celakoko metadea, “Noa nisun jaegare nunạkʼ hoṛ jom bi ocoko lạgitʼ piṭhạ do okare bon ńamkea?” Jisui metatʼkoa, “Tinạkʼ piṭhạ menakʼtapea?” Celakoko roṛ ruạṛadea, “Eae goṭen piṭhạ ar thoṛagan kạṭicʼ hako.” Jisu do gadel hoṛko otre duṛubokʼe hukumatʼkote onko hako ar ona eae goṭen piṭhại ataṅkeda. Ar Isore gun manao joharadete onakoe kecakʼketʼte celakoe calatʼkoa ar onko do gadel hoṛkoko ematʼkoa. Ar sanam hoṛko jomkeda arko biyena, ar tinạkʼ hiricʼ pạsir ńur tahẽyen celako do onakoko halaṅ jarwaketʼ khan eae khạclạkʼko perecʼkeda. Okoeko jomketʼ onko modre maejiu ar kạṭicʼ gidrạ chaḍa pon hajar herel hoponko tahẽkana. Inạ tayom Jisu do gadel hoṛko bidạkate lạukạreye decʼena ar Magadan elakateye calaoena. Phạrusiko ar Sạdukiko do Jisu bidạue lạgitʼ uni ṭhenko hecʼena ar serma khon mitʼṭen cinhạ udukʼako lạgitʼko metadea. Jisui roṛ ruạṛatʼkoa, “Ạyupʼ jokhecʼ dope mena, ‘dhạrungeae ente serma do arakʼgea.’ Ar setakʼ jokhecʼ dope mena, ‘teheń doe hoe daga ente serma do arakʼ ar dhũndgea.’ Serma reakʼ muṭhạn papachnao dope baḍaekana, menkhan okte reakʼ cinhạko do bape bujhạu daṛeakʼ kana. Niạ bạṛicʼ ar laṭghaṭ piṛhiren hoṛge cinhạ doko ńam baṛakana, menkhan Jona reakʼ chaḍa ar okaṭakʼ hõ onko do baṅ udukʼakoa.” Inạ tayom Jisu do onko bạgiatʼkoteye calaoena. Doreão hanasako parom calakʼkan tahẽkanre celako do soṅgete piṭhạ iditorako hiṛińkeda. Ado Jisui metatʼkoa, “Phạrusiko ar Sạdukikoakʼ khạmi khon sontor akan tahenpe.” Noate celako do ako ako talare kheńjer-meńjer baṛayenteko menkeda, “Piṭhạ babon ạgutoraletʼte noa kathae metabon kana.” Jisu onae baḍaeketʼ khan onkoe metatʼkoa, “E nase pạtiạukʼko, piṭhạ bạnukʼtapete cedakʼpe kheńjer meńjerokʼ kana? Ape do cetʼ ńit hõ bape bujhạueda se bape disạyeda, onko mõṛẽ hajar hoṛ lạgitʼ mõṛẽ goṭen piṭhạ reakʼ katha, ar ona tayom ape do tinạkʼ khạclạkʼpe halaṅ jarwaleda? Se pon hajar hoṛ lạgitʼ eae goṭen piṭhạ reakʼ katha, ar tinạkʼ khạclạkʼpe halaṅleda? Piṭhạ reakʼ katha bạń metapekan do cetʼ bape bujhạueda? Menkhan Phạrusi ar Sạdukikoakʼ khạmi khon sontor akan tahenpe.” Ado un utạrko bujhạukeda, piṭhạ reakʼ khạmi khon sontor akae do baṅ, menkhan Phạrusi ar Sạdukiko reakʼ cecetʼakʼ khon sontor tahene metako kana mente. Jisu do Kạisạriạ Philipi reakʼ elakateye hecʼenre acʼren celakoe kuliketʼkoa, “Hoṛko do Manwa Hopon okoe kanae menteko meneda?” Onkoko menkeda, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda Jirimiạ; ar baṅkhan nạbiko modren mitʼ hoṛ.” Unre Jisui metatʼkoa, “Menkhan ape do okoe kạnạń mentepe meneda?” Simon Patrase roṛ ruạṛkeda, “Am do Mạsi, jiwetʼ Isorren Hopon kanam.” Jisui roṛ ruạṛadea, “Jona hopon Simon, am dom bhạgangea, ente okoe manwa hõ am ṭhen noa do bae sodorakada; menkhan ińren sermaren Babageye sodor akatʼmea. Ińiń metam kana, am dom Patras kana, ar noa dhiri cetanrege ińakʼ manḍereń benao rakaba. Norok reakʼ oka daṛege onare bae jitạu daṛeakʼa. Iń do serma raj reakʼ kạṭhikoń emama, ar jãhãnakʼge dhạrtirem tol ona do sermare hõ tolge tahena ar jãhãnakʼge dhạrtirem raṛae ona do sermare hõ raṛage tahena.” Ona tayom uni do celakoe sontorkatʼkoa jemon okoe hõ aloko lại baṛaye, acʼ doe Mạsi kanae mente. Un khonge Jisu do acʼren celako lạiakoe ehopʼena je, acʼ do Jerusalemte calakʼ hoyokʼtaea ar murubiko, maraṅ naekeko, ar sostor baḍaeko hotete ạḍi okocʼ duk jojom hoyokʼtaea. Are gocʼ ocokʼa ar pe mãhã hilokʼre gocʼko khon uni do jiwetʼ beredokʼ hoyokʼtaea. Unre Patras do begar idikedete nisṛạueye ehopʼkeda, “E Probhu noa do am khon sahaṛokʼma. Am cetanre nonka do tisge oho hoedaṛelena.” Jisu do ạcurente Patrase metadea, “Eya Soetan iń samaṅ khon pharakokʼme. Am do iń tạkʼkicʼicʼ kanam. Isor reakʼakʼko do bam moneakʼ kana menkhan manwa reakʼakʼkogem moneakʼ kana.” Ona tayom Jisu do acʼren celakoe metatʼkoa, “Jãhãe ińakʼ horte hijukʼ sanayede khan uni do acʼakʼ kusi sanaleka aloe calakʼma; menkhan acʼakʼ kruse gogma ar ińe pańjańma. Jãhãe acʼakʼ jiwi bańcao sanaye, uni doe khuạua; menkhan jãhãege iń lạgitʼ acʼakʼ jiwiye khuạu uni do onae ńama. Jãhãege goṭa dhạrtiye hameṭte acʼakʼ jiwiye khuạutae enḍekhan cetʼ porho hoyokʼtaea? Se mitʼṭen hoṛ acʼakʼ jiwi bodolte cetʼe emkea? Manwa Hopon do acʼren goḍetko soṅgekate apat reakʼ ṭhonokanteye hijukʼa. Ar mimitʼ hoṛ akoakʼ kạmi lekae halawakoa. Sạrigeń metapekana, nonḍe teṅgo akanko modre adom hoṛ menakʼkoa onko do Manwa Hopon acʼakʼ rajre ạuriko ńele hạbicʼ bako gujukʼa.” Ado niạ turui din tayom Jisu do eken Patras, Jakob ar uniren boeha Johan soṅgekate mitʼṭecʼ usul buruteye rakapʼ calaoena. Ar onko samaṅre uni doe eṭakʼ boronena. Uniakʼ mẽtãhã do siń cando leka jhak jhak ar kicricʼko do marsal leka pĩṛĩtʼ pĩṛĩtʼ ponḍentaea. Onko do Mose ar Eliạ Jisu tulucʼ galmaraoko ńelketʼkinạ. Unre Patras do Jisui metadea, “E Probhu, bhagege hoeakana ale nonḍe menakʼle iạte do. Amem khoj khan nonḍe pea kumbạ oṛakʼ iń benaoa; mitʼṭen do am lạgitʼ, mitʼṭen do Mose lạgitʼ ar mitʼṭen do Eliạ lạgitʼ.” Ado Patras kathae roroṛkan tahẽkanrege mitʼṭen jhalkaokʼkan rimil do onkoe umul esetʼketʼkoa. Ar ona rimil khon mitʼṭen aṛaṅ ańjomena, “Nuige ińren dulạṛiạ Hopon, iń do unireń kusi akana. Ape do uniakʼ ańjomtaepe.” Noa katha ańjomkate celako do ạḍiko botorena ar otreko taber hapeyena. Unre Jisu do hecʼkate joṭetʼketʼkoteye metatʼkoa, “Ma beretʼpe, alope botorokʼa.” Adoko beṅgetʼ rakapʼketʼ khan Jisu chaḍa ar okoehõ bako ńel ńamletʼkoa. Ado buru khonko pheḍ hijukʼkan tahẽkanre uni do noae hukumatʼkoa, “Okape ńelketʼ, ona do Manwa Hopon gocʼko khon ạuriye jiwetʼ beredokʼ hạbicʼ okoe hõ alope lạiakoa.” Celakoko kulikedea, “Cedakʼ enḍekhan sostor baḍaeko doko meneda, pạhil do Eliạge hijukʼ reakʼ jạruṛ menakʼtaea mente?” Jisui roṛ ruạṛatʼkoa, “Sạrige Eliại hijukʼa ar sanamakʼ do lahate lekae teṅgo aroea. Menkhan ińiń metapekana, Eliạ doe hecʼlengea ar bako ńel oromledea. Ar hoṛko cetʼleka sanaletʼko onkage uni cetanreko kạmikeda. Manwa Hopon hõ onkage hoṛko hotete duk jojom hoyokʼtaea.” Unre celakoko bujhạukeda je, uni do Johan bạbạptisicʼ reaṅe lạiatʼkoa mente. Jisu ar uniren celako gadel hoṛ ṭhenko ruạṛ hecʼen khan mitʼṭen hoṛ do Jisu ṭhen hecʼkate ikhṛumenteye menkeda, “E Probhu hoponiń baṛe mãyãwaeme. Uni do mirgi rogte ạḍiye sasetokʼkana. Ente ghane uni do seṅgelre ar ghane do dakʼreye bhindạṛokʼa. Amren celako ṭheniń ạguledea menkhan onko do bako boge daṛeadea.” Jisui roṛ ruạṛkeda, “E bepạtiạu ar peṛta piṛhirenko! Ar tinạkʼ din ape sãoreń tahena? Ar tinạkʼ diniń sahaokatapea? Dini iń ṭhen ạguyepe.” Ado Jisu uniye dhomkaokede khan bạṛicʼ jiu do uni khone oḍok calaoena, ar koṛa do unregeye boge utạrena. Inạ tayom celako do hape hapete hecʼkate Jisuko metadea, “Ale do cekate bale oḍok daṛeadea?” Jisui metatʼkoa, “Apeakʼ nase pạtiạu iạte bape daṛeada. Sạrigeń metapekana, tuṛi jaṅ inạkʼ hõ biswạs tahentape ar noa burupe metakʼ, ‘nonḍe khon hanḍe ucạṛokʼme,’ enḍekhan ona do ucạṛokʼa. Ape lạgitʼ bin daṛeanakʼ do cetʼge bạnukʼa. Menkhan nui jạtrenko do koejoṅ ar upạs begor ohogeko oḍoklena. Ado Gạlil Prodesh talateye parom calakʼkan tahẽkan jokhecʼ Jisu do acʼren celakoe metatʼkoa, “Manwa Hopon do hoṛkoakʼ tireko soprotea. Ar hoṛko do uniko gojea, ar pe mãhã hilokʼre uni do gocʼko khone jiwetʼ beredokʼa.” Onate celako do ạḍiko mon dukena. Jisu ar acʼren celako Kapharnạhum nagarahateko hecʼen khan mundil reakʼ khajna uṭhạuko do Patras ṭhen hecʼkateko kulikedea, “Aperen Guru do cetʼ mundil reakʼ khajnae emetʼkangea?” Patras do onkoe metatʼkoa, “Hẽ, emetʼgeae.” Inạ tayom Patras oṛakʼteye boloyen khan Jisu do roṛ daramkedeteye metadea, “E Simon, am do cetʼem hudiskea? Noa dhạrtiren rapajko do okoe ṭhen khon khajnako uṭhạueda? Nij disạmren hoṛko ṭhen khon, se bidesi hoṛko ṭhen khon?” Patrase menkeda, “Bidesi hoṛko ṭhen khon.” Jisu do uniye metadea, “Enḍekhan nij disạmren hoṛko do rehaeko ńamakada. Menkhan alaṅ iạte jemon khajna uṭhạuko aloko tạkijokʼ onate doreãote calakʼme ar bạ̃ṛsi caḍoeme, ar pạhilre okoeṭakʼ hakom rakabe unim or cahapʼle khan mitʼṭecʼ rupạ reakʼ ṭakam ńama. Ar ona hataokate iń ar am ńutumte khajna em oṭokakʼme.” Ona jokhecʼ celako do Jisu ṭhen hecʼkateko menkeda, “Serma rajre maraṅicʼ doe okoe kana?” Unre Jisu do mitʼṭen kạṭicʼ gidrạ hoho sorkate onko talare teṅgo kedeteye metatʼkoa, “Sạrigeń metapekana, mon ạcurkate kạṭicʼ gidrạko leka bape hoelen khan serma rajre ohogepe bolo daṛelena. Onate jãhãege nui kạṭicʼ gidrạ leka acʼteye nindhạnokʼ unige serma rajre sanamko khone maraṅa. Ar jãhãege iń ńutumte nonkan kạṭicʼ gidrại ataṅe uni do ińgeye ataṅińạ. “Ińreko pạtiạu akan noko kạṭicʼko modren mitʼ goṭen jãhãege kại horteye idiye enḍekhan uni do hoṭokʼre jante dhiri akawaete jalapuri reakʼ khạndri dakʼre unum giḍikaege bhagekʼa. Hae hae! Kại horte idiko lạgitʼ tinạkʼ uskạu baṅ amre menakʼ! Ente uskạu do hijukʼgea; enhõ hae uni hoṛ do, one okoe hotete uskạuko hijukʼkan! “Amakʼ ti se jaṅga kại horteye idime khan ona do samakʼ giḍikakʼme. Banar ti ar banar jaṅga tahen tulucʼ jaejug seṅgelrem khadle ocokʼ khon ṭhunṭạ se leḍhage jionrem bolokʼge am lạgitʼ bogea. Amak̕ mẽtʼ kại horteye idime khan ona do hoṭor totʼ giḍikakʼme. Banar mẽtʼ tahentam tulucʼ norok seṅgelrem khadle ocokʼ khon mitʼ mẽtʼante jionrem bolokʼge am lạgitʼ bogea. “Ńelpe, noko kạṭicʼko modren mitʼ goṭen hõ alope nihạ̃tkoa; ińiń metapekana sermare onkoren goḍetko do sanam ghạṛicʼ ińren sermare menae Babawakʼ mẽtãhãko ńeleda. “Ente Manwa Hopon do atʼakanko bańcaoko lạgitʼgeye hecʼakana. Ape do cetʼpe hudiskea? Mitʼ hoṛren mitʼ sae bhiḍiko tahentae. Ar onko modren mitʼ goṭene chingạulen khan onko are gel are goṭen burure bạgi oṭoakote uni chingạu akanicʼ cetʼ bae ńam baṛayea? Sạrigeń metapekana, uniye ńamlere onko bako chingạu akan are gel areko khon chingạuicʼ iạte uni do arhõ bạ̃ṛtiye rạskạkʼa. Nonkage, aperen sermare menae Babawakʼ hõ mone bạnukʼtaea; noko kạṭicʼko mod khon mitʼ goṭene adokʼ. ‘‘Amren boeha am birudreye kại lekhan uni ṭhen senokʼme ar aben eskar tahenrege uniakʼ dosko lại bujhạuaeme. Ar amakʼ kathae ańjom khan enḍekhan amren boeham dom ńam ruạṛkedea. Menkhan bae ańjomletam khan eṭakʼ mitʼ se bar hoṛ soṅge torajoṅme, jemon bar se pe hoṛakʼ goha do sạriakʼ mente sạbudokʼ. Ar onkoakʼ katha hõ bae ańjomle khan enḍekhan manḍerrenko lạiakome. Ar manḍerrenkoakʼ katha hõ bae ańjom khan uni do boṅgan hoṛ jạtren se mạsul uṭhạu hoṛko leka bujhạuem. ‘‘Sạrigeń metapekana, dhạrtire okakope tola ona do sermare hõ tolge tahena, ar dhạrtire okape raṛae ona do sermare hõ raṛage tahena. ‘‘Arhõń metapekana, apeko modre bar hoṛ dhạrtire jãhãnakʼ reaṅ mitʼ montekin koe enḍekhan sermare menae Baba secʼ khon hoyokʼ getakinạ, ente okare bar se pe hoṛ iń ńutumteko jarwakʼa, onḍege iń do onko talareń tahena.” Unre Patras do hecʼkate Jisui metadea, “E Probhu, boehań iń birudreye kạilere tinạkʼ dhaoiń ikạitaea? Eae dhao hạbicʼ?’’ Jisui metadea, “Bạń metamkana eae dhao hạbicʼ do, menkhan eae gel doboṛ eae dhao hạbicʼ ikạyem. “Ńelpe, serma raj do nonkan mitʼṭen raj lekana, okoe do acʼren gutiko ṭhen hisạb hataoe menwan. Ado hisạb hataoe ehopʼen khan onko modren nonkan mitʼṭen gutiye ạgu ocoyena, one okoe do raj ṭhen lakh lakh ṭakae rin akatʼ tahẽkan. Uniakʼ do halateakʼ cetʼ hõ baṅ tahẽkantaea. Onate kisạ̃ṛ doe hukumkeda uni ar uniren era hopon ar uniakʼ menakʼ jotowakʼko ạkhrińkate jemon paona ạdạyokʼtae. Khange uni guti do kisạ̃ṛakʼ ti jaṅgare giḍiyenteye menkeda, ‘E Probhu, ma jiwi hataṛme, ado jotoń hala ruạṛkatama.’ Unre kisạ̃ṛ do mãyã hecʼadete uni gutiye aṛakʼkadea ar joto rin khone khalaskadea. “Tayomte uni guti do bahrete oḍok senkate acʼ sãoten mitʼṭen gutiye ńamkedea. Uni guti do acʼ ṭhen mitʼ sae ṭakae dharao akatʼ tahẽkana. Ar uni guti limbạtʼkedeteye metadea, ‘dharaoakʼ halakạtińme.’ “Khange sãoten guti do ti jaṅgare giḍiyente nehõrenteye menkeda, ‘ma jiwi hataṛme, adoń hala ruạṛkatama.’ Menkhan uni do bae rebenlena bickom dharaoakʼ ạuriye hala cabae hạbicʼ hajotreye bhoraokadea. “Noako ńelkate uni sãoten eṭakʼ gutiko do ạḍiko bhabnayena. Ar senkate akoren kisạ̃ṛko lạiadea Unre kisạ̃ṛ do uni guti hoho ạgu ocokedeteye metadea, ‘Eya bạṛicʼ guti! Amem nehõradiń tahẽkante amakʼ sanam dharaoakʼ iń ikạletʼtama. Iń cetʼlekań dayawatʼme tahẽkan onkage cetʼ uni hõ mãyãwae lek baṅ tahẽkantama?’ Khange kisạ̃ṛ doe raṅgaoente joto rin ạuriye hala ruạṛ cabae hạbicʼ hajotren hoṛko ṭhene jimạkadea. “Onkage, ape mimitʼko aperen boehako apeakʼ ontorte bape ikạleko khan, sermare menae ińren Baba hõ apeye onkawapea.” Noako kathae roṛ mucạtʼketʼ khan Gạlil khon uṭhạuente Jisu do Jordan gaḍa paromkate Jihudạ reakʼ simạkoteye calaoena. Ar ạḍi utạr hoṛ do uniko pańja idikedea ar onko do onḍeye bogeketʼkoa. Unre adom Phạrusiko Jisu biḍạue lạgitʼ uni ṭhen hecʼkateko menkeda, “Moseakʼ ạn lekate jãhãe hoṛ acʼren bạhu jãhãn karonte bạgiye do ganokʼtaea se baṅ? Jisui roṛ ruạṛatʼkoa, “Bape paṛhao akada, Sisirjạuicʼ do pạhilre herel ar maejiue sirjạuketʼkinạ are menkeda, ‘ona iạte herel do eṅgat-apat bạgikate acʼren bạhu tulucʼ mitʼ akane tahena ar unkin do mitʼ hoṛmokin hoyokʼa?’ Ar barea dokin baṅkana, menkhan mitʼ hoṛmo kanakin. Onate Isor okae joṛao mitʼ akatʼ manwa ona aloe topagma.” Unre Phạrusikoko metadea, “Cedakʼ enḍekhan Mose do bapag dolel olaete bạhu bạgiye reakʼ hukume emakana?” Jisui metatʼkoa, “Apeakʼ keṭecʼ mon iạte Mose do bạhu bạgiye reakʼe aṛakʼakawatʼpea Menkhan pạhil khon nonka do baṅ tahẽkana. Ińiń metapekana, jãhãege laṭghaṭ chaḍa eṭakʼ karonte acʼren bạhui bạgiye ar eṭakʼgicʼe baplaye uni doe loṭghuṭiya.” Unre celako do uniko metadea, “Jãwãe ar bạhu talare nonkage hoyokʼ khan, baplakʼge baṅ bhagea.” Jisui metatʼkoa, “Sanam hoṛ noa katha do ohoko manao daṛelea; menkhan okoeko em ocoakan eken onkogeko daṛeakʼa. Ente adom do eṅgat kukhi khon mạ̃yạ̃ṛigeko janam akana, onate onko do bako baplakʼ kana. Ar adom do hoṛgeko mạ̃yạ̃ṛi ocoyetʼkoa, onate onko hõ bako baplakʼkana, arhõ adomko do serma rajre bolokʼ iạte baṅ baplakʼko muruk akada. Onate okoeye manao daṛeakʼ uni doe manaoma.” Unre kạṭicʼ gidrạ Jisu ṭhenko ạguketʼkoa jemon uni do onkoe capoko are koeako. Menkhan celako do onkoko dhomkaoketʼkoa. Jisu do onkoe metatʼkoa, “Kạṭicʼ gidrạko iń ṭhen hecʼ ocoakope, alope manakoa, ente serma raj do nonkankoakʼ kangea.” Ado kạṭicʼ gidrạko bohokʼre capokateye bhoratʼkoa, ar onḍe khone calaoena. Ar ńelpe, mitʼṭen juạn koṛa do hecʼkate Jisui metadea, “E Guru, jaejug jion ńam lạgitʼ bhageakʼ cetʼko cekae hoyokʼtińạ?” Jisu do uniye metadea, “Bhageakʼ reaṅ do cedakʼem kuliyediń kana? Ente mitʼ goṭengeae bhageicʼ do. Am do jaejug jionte bolokʼem menetʼ khan enḍekhan uniakʼ sanam hukumko dohoeme.” Uni juạn koṛa doe menkeda, “Okako hukum?” Jisui menkeda, “Alom khũna, alom laṭghaṭa, alom kombṛoea, eṛe goha alom ema, eṅgam-ạpum ganaokinme ar am aḍepaseren hoṛ apnar leka dulạṛem.” Uni juạn koṛa doe menkeda, “Noako joto doń manao ạguakada, ado ar cetʼko cekae hoyokʼtińạ? Jisui menkeda, “Am do khạṭi utạrokʼem menetʼ khan enḍekhan senkate amakʼ sanam sompotti ạkhrińkate reṅgecʼ orecʼko danakome. Onate sermaere dhon hoyokʼtama. Ar ona tayom do hecʼkate ińren cela hoyokʼme.” Noa katha ańjomkate kisạ̃ṛ juạn do ạḍi bhabnakateye calaoena, ente uni do ạḍi utạr dhon tahẽkantaea. Unre Jisu do acʼren celakoe metatʼkoa, “Sạrigeń metapekana, kisạ̃ṛ hoṛko lạgitʼ serma rajte bolokʼ do muskilgea. Arhõń metapekana, kisạ̃ṛ hoṛ serma rajte bolokʼ khon sui bhugạkʼte ũṭe bolo tabokʼge algawa.” Noa katha ańjomkate celako do hahaṛayenteko menkeda, “Enḍekhan kại khon bańcao do okoeye ńam daṛekea?” Jisu do celako beṅgetʼatʼkoteye metatʼkoa, “Manwako hotete do baṅ hoedaṛeakʼa, menkhan Isor hotete do sanamakʼge hoedaṛeakʼa.” Unre Patras do uniye metadea, “Ńelme, sanamakʼ bạgikate amren celale hoeakana; ale do cetʼle ńama?” Jisui metatʼkoa, “Sạrigeń metapekana, okoe ińren celape hoeakan, nawa janamokʼre Manwa Hopon tinre acʼakʼ ṭhonok reakʼ siṅghạsonreye duṛupʼa unre ape hõ gelbar siṅghạsonre duṛupʼkate Israelren gelbar khũṭkope bicạrkoa. Ar iń iạte okoe do acʼakʼ oṛakʼ-duạr, se eṅgat-apat, se boeha-miserako, se gidrạko se ot-baṛgekoe bạgi oṭoakatʼ, uni do mitʼ sae doboṛ bạ̃ṛtiye ńama ar jaejug jion hõe ạidạri joṅa. Menkhan lahatenko aema doko tayomokʼa, ar tayomtenko doko lahakʼa.” “Serma raj do mitʼṭen oṛakʼ kisạ̃ṛ lekana, one okoe do acʼakʼ darkha bagwanre kạmiạko lagaoko lạgitʼ paha poho jokhecʼ bahreteye oḍok calaoen. Uni do kạmiạko tulucʼ dinre mimitʼ Dinar kateye rikitketʼte acʼakʼ darkha bagwanteye kolkatʼkoa. Ado baskeakʼ ber okte uni do arhõ bahreteye oḍok senena ar bajarre eṭakʼko ạuṛiakʼ teṅgo baṛa akane ńelketʼkoa. Uni doe metatʼkoa, ‘ape hõ ińakʼ darkha bagwante kạmi calakʼpe. Iń do hok reakʼ iń emkatapea.’ Onate onko hoṛ hõ kạmi lạgitʼko calaoena. “Uni kisạ̃ṛ do arhõ tikin ar tarasiń jokhecʼ bahrete senkateye onkakeda. Arhõ uni do huḍiń dakʼ lo ber okte oḍok senkate eṭakʼko teṅgo akane ńamketʼko khane metatʼkoa, ‘ạuṛiakʼ cedakʼpe teṅgo akana?’ “Onko doko metadea, ‘okoe hõ kạmire bako lagaoletʼlea.’ “Uni doe metatʼkoa, ‘Do, ape hõ ińakʼ darkha bagwante senkate kạmipe.’ “Ado ạyupʼen khan darkha bagwanren mạlik do acʼren gutiye metadea, ‘kạmiạko hoho ạgukom ar tayomtenko khon ehopʼkate lahatenko hạbicʼ mimitʼ mimitʼte kuṛại emakom.’ “Khan huḍiń dakʼ lo ber oktere okoe do kạmiko dhurạu ocolen onko do hecʼkate mimitʼ Dinarkateko idikeda. Onate okoeko pạhilre kạmiko ehopʼlen onko do bạ̃ṛtigeko ńama menteko hudiskeda, menkhan onko hõ mimitʼ Dinar kategeko ńamkeda. Onate onko do kisạ̃ṛ upạrte karacʼ kurucʼente memenko ehopʼena, ‘Ale do goṭa din jharla jhạrli setoṅrele kạmikeda. Menkhan mucạtʼre okoe kạmireko dhurạu ocolen onko do eken mitʼ ghạṛiko kạmikeda, ar ale somangem ematʼkoa.’ “Unre mạlik do onko modren mitʼ hoṛe metadea, ‘E ho, iń ma bacoń behok akatʼme. Iń do cetʼ am tulucʼ mitʼ Dinarte bạń rikitlakʼa? Amakʼ paona hataokate calao joṅme. Iń do am cetʼ lekań emakatʼme, onkage nui tayomicʼ hõ emayiń menjoṅkana. Ar okaṭakʼ ińakʼ kan, ona do cetʼ ińakʼ kusileka laṛcaṛ reakʼ ektiạri bạnukʼtińạ? Se ińiń dayakʼkante mẽtʼ jolokʼkan tama?’ ” Golpo mucạtʼre Jisui menkeda, “Onkage okoe do tayomre menakʼko onko doko lahakʼa ar lahatenko doko tayomokʼa.” Ado Jisu Jerusalemteye rakapʼ calakʼkan tahẽkanre acʼren gelbar celako hor mitʼ aṛere hohoatʼkoteye metatʼkoa, “Ńelpe, Jerusalemte bon calakʼkana; onḍe Manwa Hopon do maraṅ naekeko ar sostor baḍaekoakʼ tireko soprotea; onko doko bicạrea ar gujukʼ lek kanae menteko dusi ṭarhaoea. Arko siṛogaea, arko cạbukea ar kruskae lạgitʼ boṅgan hoṛ jạtrenkoakʼ tireko soprotea; ar pe mãhã hilokʼre uni do gocʼko khone jiwetʼ beredokʼa.” Ado Sabdae hoponkinren eṅgattetʼ do acʼren hoponkine soṅgeketʼkinte Jisu ṭhene hecʼena ar jãhãnakʼ koyea mente uniye ḍobokʼadea. Jisu do uniye metadea, “Cetʼem khojkana?” Uni doe menkeda, “Noa hukum emokʼme, amakʼ rajre jemon nukin modre mitʼ hoṛ do amakʼ jojom secʼre ar eṭagicʼ do amakʼ leṅga secʼre kin duṛupʼ ńam.” Jisui menkeda, “Ape cetʼpe khojkan ona do bape baḍaea. Okaṭakʼ bạṭi reakʼ iń ńũi lạgidokʼkan, ona reakʼ do cetʼ ben ńu daṛeakʼgea?” Metadeakin, “Daṛeakʼ gealiń.” Unre Jisui metatʼkinạ, “Ińakʼ bạti reakʼ ma ben ńũige, menkhan ińakʼ jojomsa ar ińakʼ leṅgasa aṛere duṛupʼko reakʼ ektiạri do bạnukʼtińạ. Ona do ińren Baba okoe lạgitʼe dohoakatʼ onkogeko ńama.” Noa katha ańjomkate, gel celako do unkin banar boeha upạrteko edreyena. Unre Jisu do celako hohoatʼkoteye metatʼkoa, “Noa kathape baḍaegea baṅma, boṅgan hoṛ jạtrenko do rapajkoge onkoren Probhu kanako ar onkoren mukhiạkoge ektiạriko calaoeda. Menkhan ape talare onka hoyokʼ do baṅ ṭhika. Ape modre jãhãe maraṅ hoyokʼe menetʼ khan uni do aperen sapʼ dapʼicʼe hoyokʼma. Ar jãhãege pạhilicʼ hoyokʼe menetʼ khan uni do aperen golame hoyokʼma. Manwa Hopon do sapʼsor ocokʼ do bae hecʼakana, bickom sapʼsosor lạgitʼge, ar ạḍi uṭạr hoṛko bodolte chaḍao reakʼ dam menkate acʼakʼ jiwi emokʼgeye hecʼakana.” Jisu ar uniren celako do Jerikho nagraha khonko oḍok calakʼkan tahẽkanre gadel hoṛ do uniko pańja idikedea. Ar ńelpe, barea kãṛã hoṛ do hor aṛerekin duṛupʼakan tahẽkana. Ado Jisu ona horteye parom calakʼkan kin ańjomketʼ khan unkin do hohoatekin menkeda, “E Probhu, Dạudren Hopon, mãyãwạlińme.” Khange gadel hoṛ do thir hapekʼa mente unkinko dhomkaoketʼkinạ. Menkhan unkin do artetʼge ãṭ aṛaṅte hohoatekin menkeda, “E Probhu Dạudren Hopon mãyãwạlińme baṛe.” Unre Jisu doe teṅgoyena ar hohoatʼkinteye metatʼkinạ, “Iń do aben lạgitʼ cetʼ iń cekaea? Metadeakin, “E Probhu, mẽtʼ jhicʼkataliń me.” Unre Jisu do mãyã hecʼadea ar unkinakʼ mẽtʼe joṭetʼketʼtạkina, ar unrege unkin do ńeńelkin ehopʼena, ar unikin pańjakedea. Jisu ar uniren celako do Jerusalem sor Jạitun buru ṭhenakʼ Bethaphage ato ṭhenko seṭerena. Unre Jisu do barea cela noa menkateye kolketʼkinạ, “Aben do samaṅ reakʼ atote calakʼ ben. Ar onḍe ben senlen khange hopon salakʼ mitʼṭen gadha eṅga tolakade ben ńamea. Ar unkin raṛakate iń ṭhen ben ạgukinạ. Ar jãhãege jãhãnakʼe metaben enḍekhan metaeben, ‘Probhu do nukin reakʼ jạruṛ menakʼtaea.’ Ar unrege uni doe aṛakʼabena.” Noa do hoyena nạbi hotete roṛlenakʼ katha jemon purạukʼ: “Sionren hoponera metaepe, ńelme amren raj do am ṭhene darae kana; uni do mạ̃hir ar gadhare decʼakan; ar mitʼṭen gadha hopon, ladhna janwar hoponre.” Ado Jisu cetʼlekae hukumatʼkin tahẽkan onkage unkin do senkatekin kạmikeda. Unkin do gadha eṅga ar hoponkin ạguketʼkina ar ạkinakʼ kicricʼko unkin cetanrekin aṭetʼketʼ khan Jisu doe decʼena. Ar gadel hoṛ do hor horte akoakʼ kicricʼkoko aṭetʼkeda. Ar eṭakʼko do dare ḍạrko hese ạguketʼte horteko aṭetʼ idikeda. Ar Jisu laha lahate calakʼkan ar pańjayedekan gadel hoṛko do ãṭ aṛaṅte hohoate memenko ehopʼena, “Hosanna, Dạudren Hopon! Bhorangeae Probhu ńutumte hijukʼkạnicʼ do. Coṭ utạrre Hosanna!” Ado Jisu Jerusalemteye boloyen khan goṭa nagraha do dal malaoena. Ar sanamkoge kulikʼko ehopʼena, “Okoe kanae nui do?” Gadel hoṛko menkeda, “Nui do Gạlil reakʼ Nasaretren nạbi Jisu kanae.” Ado Jisu mundilteye boloyen khan onḍeko kiriń-ạkhrińkan tahẽkan joto doe laga oḍokketʼkoa. Uni do ṭaka bodolkoakʼ mạciko ar parwa kiriń-ạkhirińkoakʼ duṛupʼakʼkoe ulṭạu giḍikatʼteye metatʼkoa, “Sonot sostorte Isore menakada, ‘ińakʼ oṛakʼ do koejoṅ oṛakʼ ńumogokʼa,’ menkhan ape do ḍạkukoakʼ danderpe hoeocoakada.” Inạ tayom kãṛã ar leḍhako mundilre Jisu ṭhenko hecʼen khan uni do onkoe bogeketʼkoa. Ado uni okako hahaṛa kạmikoe kạmiketʼ ona do maraṅ naekeko ar sostor baḍaekoko ńelkeda. Onko do mundil bhitrire kạṭicʼ gidrạko, “Hosannawaema, Dạudren Hopon!” Hohokanko ańjomketʼkoa. Ar noako ńelteko ạṛisente onko do Jisuko metadea, “Onko cetʼko menetʼ ona dom ańjometʼkangea?” Jisui metatʼkoa, “Hẽ, ańjometʼgeạń. Sostorre cetʼ tishõ bape paṛhaoakada: Bale gidrạko ar towa nunuko reakʼ moca khon, am do apnar lạgitʼ sarhaoem tear sạbitana?” Inạ tayom Jisu do onkoe bạgiatʼkote nagraha bahre Bethaniạ atoteye calaoena ar onḍegeye tahẽ aṅgayena. Dosar hilokʼ setakʼ okte Jisu do nagrahateye ruạṛokʼ tahẽkanre reṅgecʼkedea. Uni do hor aṛere mitʼṭen loa dareye ńelketʼ khan dare ṭhene calaoena, menkhan onare sakam chaḍa ar cetʼge bae ńel ńamlakʼa. Unre uni do dareye metatʼa, “Amre ar tishõ alo jokʼma.” Ar unrege loa dare do rohoṛ gotʼena. Ona ńelte celako doko hahaṛayente uniko metadea, “Cekate loa dare do rohoṛ gotʼena?” Jisui roṛ ruạṛatʼkoa, “Sạrigeń metapekana, biswạs tahentape ar bape digdhạkʼ enḍekhan loa darere okań cekaketʼ ape hõ onape daṛeakʼa. Eken ona do baṅ, menkhan noa buru hõpe metakʼ, ‘uṭhạukʼte jalapurire khadlekʼme,’ enḍekhan ona hõ hoyokʼgea. Ape do jãhãnakʼge pạtiạukatepe koe enḍekhan ona dope ńamgea.” Jisu do arhõ mundilteye boloyena. Ar tinreye cetʼakokan tahẽkan unre maraṅ naekeko ar Jihudikoren murubiko do uni ṭhen hecʼkateko menkeda, “Cetʼ ektiạrite noako dom kạmi kana? Ar okoe noa ektiạri doe emakatʼmea?” Jisui metatʼkoa, “Mitʼṭen kathań kulipea. Arpe lạiạń khan enḍekhan iń hõ apeń lạiapea oka ektiạrite noakoń kạmi kana mente. Mase lạipe, Johan do bạptisma emokʼ reakʼ ektiạri oka khone ńamleda? Serma khon se manwako secʼ khon?” Unre onko do ako talare galmaraoketʼteko menkeda, “Menle khan bon ‘serma secʼ khon,’ adoe metabona, ‘cedakʼ enḍekhan Johan do bape pạtiạuadea?’ Ar bon menle khan ‘manwa secʼ khon,’ enḍekhan ma gadel hoṛ bon botorakokan, ente sanamkoge Johan do mitʼṭen nạbi menteko manaoedea.” Onate onko do Jisuko roṛ ruạṛadea, “Ale do bale baḍaea.” Unre Jisui metatʼkoa, “Enḍekhan iń hõ bạń lạiapea oka ektiạrite noakoń kạmi kana.” Ona tayom Jisui menkeda, cetʼlekape bujhạuekea? “Mitʼ hoṛren barea hoponkin tahẽkana. Uni do acʼren maraṅicʼ hopon ṭhen senkateye menkeda, ‘E beṭa teheń do darkha bagwante senkate kạmime.’ Hopontetʼe roṛ ruạṛkeda, ‘Iń do ohoń senlena.’ Menkhan tayomte uni do kastaoenteye calaoena. Tayomte uni hoṛ do dosaricʼ hopon ṭhen senkate inạ kathageye menkeda. Dosaricʼ hopon doe roṛ ruạrkeda, ‘calakʼ kangeạń,’ menkhan bae senlena. Ado nukin bar hoṛ modre okoeṭakʼ do apatakʼ sana lekakin kạmikeda?” Unre sostor baḍaekoko roṛ ruạṛadea, “Pạhilicʼge,” Jisui metatʼkoa, “Sạrigeń metapekana, mạsul uṭhạuko ar kusmbikoge ape khon lahare Isorakʼ rajreko bolokʼkana, ente Johan do Isorakʼ sana leka calakʼ reakʼ hor udukʼape lạgitʼe hecʼlena, ar bape pạtiạuatʼtea. Menkhan mạsul uṭhạuko ar kusmbiko doko pạtiạuatʼtaea. Ona ńelte ape do mon hõ bape ạcurleda ar uniakʼ hõ bape pạtiạuatʼtaea. “Mitʼṭen phen ańjompe. Mitʼṭen oṛakʼ kisạ̃ṛ do mitʼṭen darkha bagwane benaokeda ar ona beṛhaeteye eṭetʼ ạcurkada. Tayomte uni do ona bagwanre lelen kũnḍe la tearketʼte mitʼṭen usul pahra oṛakʼe benaokeda. Ar inạ tayom do casako ṭhen onae bạisạu oṭokatʼte acʼ do eṭakʼ disạmteye calaoena. Ado tinre jo belekʼ reakʼ okte hoyena unre uni do acʼakʼ bhag hatao lạgitʼ casako ṭhen acʼren gutikoe kolketʼkoa. Ar onko casako do uniren gutikoko sapʼketʼkote mitʼ doko dal urkedea, mitʼ doko gocʼkedea ar mitʼ do dhiriteko tińkedea. Inạ tayom uni do pạhil khon arhõ saṅgeńokʼ gutikoe kolketʼkoa, menkhan casako do onko gutiko tulucʼ hõ onkageko beoharkeda. Mucạtʼre darkha bagwanren kisạ̃ṛ do acʼren hoponge onko ṭhene kolkedea. Uni doe hudiskeda, acʼren hopon doko manotea. Menkhan onko casa do hopontetʼko ńelkede khan akoreko menjoṅana, ‘nuige sompottiren mạlik doe hoyokʼa. Dela bon gojea, inạ khan aboge mạlik bon hoyokʼa.’ Ar noa menkate hopontetʼko sapʼkedea ar darkha bagwan bahrete oḍok idikedeteko gocʼkedea. Enḍekhan mase lạipe, darkha bagwanren kisạ̃ṛe hecʼlenre onko casa doe cekakoa? Sostor baḍaekoko menkeda, “Uni do onko bạṛicʼ hoṛkoe maraokoa ar okoe casako okte nạpitre acʼakʼ jo reakʼ bhagko emae onko ṭhene bạisạu oṭokakʼa.” Jisui metatʼkoa, “Sonot sostorkore tis hõ bape paṛhaoakada, ‘raj mistiriko okaṭakʼ dhiriko nihạ̃t giḍiletʼ, onage konac reakʼ asol dhiri hoyena; noa do Probhu khonge hoyena, ar aboakʼ mẽtʼ samaṅre do hahaṛawakʼge?’ Onateń metapekana, Isorakʼ raj do ape ṭhen khon rejogokʼa ar nonkan hoṛko ṭhen emogokʼa, one okoeakʼ jionre ona rajosṭi reakʼ jo ńelokʼkan. Ar okoe ona dhirireye ńurokʼ uni doe gejerokʼa ar okoere ona ńurokʼ uni doe holoṅ ḍigir utạrokʼa.” Maraṅ naekeko ar Phạrusiko do Jisuakʼ cecetʼakʼte perecʼ golpoko ańjomketʼ khan uni do ako reaṅgeye roṛeda menteko bujhạukeda. Unre onko do Jisu sabeko menwana, menkhan gadel hoṛko botoratʼkote bako onkaleda, ente hoṛko do nạbi menteko bujhạuede kan tahẽkana. Jisu do sostor baḍaeko cetʼako lạgitʼ arhõ mitʼṭen phene lạiatʼkoa, “Serma raj do nonkan mitʼṭen raj lekana, one okoe do acʼren hopon lạgitʼ bapla bhoje tearketʼ. Ado ona bhojre neota akanko hoho ạguko lạgitʼ acʼren gutikoe kolketʼkoa, menkhan neota akanko do hijukʼ bako rebenlena. Unre uni do arhõ eṭakʼ gutiko noa menkateye kolketʼkoa, ‘ńelpe bhojiń tear akada, ar ińren daṅgra ar posaokoń gur akatʼkoa. Ar ńitokʼ do sanamakʼ sạt akana, ado dela hijukʼ tabonpe.’ “Menkhan neota akan hoṛko do gutikoakʼ katha bako hetawada; calao baṛayenako, okoe do acʼakʼ khette, okoe do acʼakʼ bạnij beparte. Ar sarecʼko do rajren guti sapʼkateko opomanketʼkoa arko gocʼketʼkoa. Unre raj doe raṅgaoena ar acʼren palṭonkoe kolketʼkote khũniạhikoe maraoketʼkoa ar onkoakʼ nagrahakoe jeretʼ giḍikatʼtakoa. Ado acʼren gutikoe metatʼkoa, ‘bhoj do tear ṭhikgea, menkhan neota ocolenko do noaren lek bako tahẽkana. Onate dobạṭiạkore calakʼpe, ar tinạkʼpe ńamko jotoge bapla bhojte hoho ạgukope.’ Unre onko gutiko do horkore oḍok senkate boge bạṛicʼ tinạkʼko ńamketʼko, jotogeko hoho ạguketʼkoa. Ar nonkate bapla oṛakʼ do onko peṛakote perecʼena. “Inạ tayom raj do peṛa ńelko lạgitʼ bhitriteye boloyena, ar bapla bhoj kicricʼ baṅ horokʼ akatʼ mitʼ hoṛe ńel ńamkedea. Raj do uniye kulikedea, ‘henda ho, bapla bhoj kicricʼ begorte cekate nonḍe dom boloyena?’ Khange uni doe keklesetʼena ar cetʼge bae roṛ ruạṛ daṛeada. Unre raj do acʼren gutikoe metatʼkoa, ‘ti jaṅga toltaete bahre ńutre giḍikaepe. Onḍe do rakʼjoṅ ar togocʼ ḍaṭa hoyokʼa.’ ” Ado mucạtʼre Jisui menkeda, “Ḍherkogeko hoho ocoakana, menkhan bachao ocoakanko doko thoṛagea.” Unre Phạrusiko doko calaoena ar Jisu acʼakʼ kathate cekateko jhạliyea ona reakʼ sopolhako dhurạuena. Onko do Herod secʼrenko sãote akoren celako uni ṭhenko kolketʼkoa. Onko do Jisuko metadea, “E Guru, alele baḍaea am dom sạri hoṛ kana. Ar Isorakʼ hor reaṅ sạritegem cetʼako kana. Am do okoe hõ bam hetawako kana, ente hoṛkoakʼ mẽtãhã do bam beṅgetʼakʼ kana. Ado mase lạialeme, Moseakʼ ạn lekate Romren maharaj do cetʼ khajna emae ganokʼgea? Am do cetʼem menkea?” Jisu do onkoakʼ monsubại baḍaeketʼ khane metatʼkoa, “E phạsiạrako, cedakʼpe biḍạuedeń kana? Oka ṭaka khajnape em ona udukʼạńpe.” Onko do mitʼṭen Dinarko ạguadea. Unre Jisui metatʼkoa, “Noa muṭhạn ar noa ńutum do okoeakʼ kana? Adoko menkeda, “Romren maharajakʼ.” Jisui metatʼkoa, “Enḍekhan okaṭakʼ maharajakʼkan ona do maharajge emaepe, ar okaṭakʼ Isorakʼkan ona do Isorge emaepe.” Noa katha ańjomkate onko doko hahaṛayena ar bạgiyadeteko calaoena. Enhilokʼge adom Sạdukiko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ cetʼge bạnukʼa. Onate onko do Jisuko kulikedea, “E Guru, Moseye menakada, jãhãe hoṛ ạuri gidrạ joṅreye gocʼlen khan bokottetʼ do hilit erae baplayete dadattetʼ lạgitʼ bõse teṅgokoma. Ale nonḍe do eae boehako tahẽkana. Ar pạhilicʼ do baplakateye gocʼena ar begor gidrạwanrege acʼren oṛakʼ hoṛ do bokottetʼ ṭhene bạgi oṭoadea. Onkage dosaricʼ, tesaricʼ, ar eaeyicʼ boeha hạbicʼ uni maejiuko baplakedea. Ar mucạtʼre uni maejiu hõe gocʼena. Enḍekhan gocʼkoko jiwetʼ beretʼlenre onko eae boehako modre uni maejiu do okoeṭakʼren bạhui hoyokʼa? Onko ma jotogeko doholede.” Jisui roṛ ruạṛatʼkoa, “Bhuletʼ kanape, ente ape do sostor hõ bape baḍaea, ar Isorakʼ daṛe reaṅ hõ bape baḍaekana. Gocʼkoko jiwetʼ beredokʼ tayom do bạhu hõ bako bạhu joṅa ar jãwãe hõ bako jãwãeokʼa; onko do sermaren goḍet lekako hoyokʼa. Gocʼkoko jiwetʼ beredokʼ reaṅ Isor okae menakatʼ, ona do cetʼ sostorre bape paṛhao akada? Onare olakana, ‘Ińge Abrahamren Isor, Isạhakren Isor, ar Jakobren Isor.’ Menkhan Isor do gocʼkoren Isor doe baṅkana, uni do jiwetʼkoren Isor kanae.” Noa katha ańjomkate hoṛko do uniakʼ cecetʼakʼteko hahaṛayena. Jisu do Sạdukikoakʼ mocae bond akatʼtakoa mente Phạrusikoko ańjomketʼ khan onko do mitʼ ṭhenko jarwayena. Onko modren mitʼṭen ạn guru do Jisu biḍạuea menteye kulikedea, “E Guru, Moseakʼ ạn-ạriko modre joto khon maraṅ hukum do okaṭakʼ kana?” Jisu do uniye metadea, “Sanam khon maraṅ ar jạruṛokʼakʼ hukum do hoyokʼ kana, ‘Probhu amren Isor do, amakʼ goṭa ontorte, goṭa jiwite ar goṭa monte dulạṛem.’ Ona tayom dosarakʼ do; ‘am aḍe paseren hoṛ apnar leka dulạṛem.’ Moseakʼ ạn ar nạbikoakʼ sanam cecetʼakʼ do noa barea hukumrege ṭehãḍ menakʼa.” Phạrusiko mitʼ ṭhenko jarwa akan tahẽkanre Jisu do onkoe kuliketʼkoa, “Ape do Mạsi reaṅ cetʼpe bujhạueda? Uni do okoe bõsren kanae? Onkoko menkeda, “Dạud bõsren.” Unre Jisui metatʼkoa, “Enḍekhan Dạud do cekate Mạsi do sonot Jiu reakʼ ạyurte Probhu menteye hohoade tahẽkana? Uniye menleda, ‘Probhu do ińren Probhui metadea, tin hạbicʼ amren bạiriko amakʼ jaṅga latarre ạuriń dohoko, un hạbicʼ am do ińakʼ jojomsa aṛere duṛupʼme.’ Enḍekhan Dạud do Mạsige Probhu menteye hohoade tahẽkan khan enḍekhan Mạsi do cekate Dạudren hopone hoedaṛekokʼa?” Onko do okoege mitʼṭen katha hõ bako roṛ ruạṛ daṛeadea ar enhilokʼ khon okoege jãhãnakʼ kuliye bako dillakʼa. Unre Jisu do gadel hoṛko ar acʼren celakoe metatʼkoae, “Sostor baḍaeko ar Phạrusiko do ạn-ạriko cecetʼ babotre Moseakʼ jaegaregeko duṛupʼ akana. Onate jãhãnakʼgeko metape ona kạmipe ar jãhãnakʼgeko hukumape ona senakʼpe. Menkhan onkoakʼ kạmi leka do alope kạmiya, ente onko do mocate okako roṛ kạmite ona do bako purạua. Onko do hamal hamal bojha tolkate hoṛkoakʼ tarenreko ladea, menkhan ako do kạtupʼte hõ bako laṛao legaea. Hoṛko ṭhen ńelocokʼ lạgitʼ onko do sanamakʼko kạmiyeda. Sonot sostor reakʼ olakʼ tạbijkoko lạṭuiya ar dhorom ńel ocokʼ lạgitʼ oyonakʼ reakʼ ańcarkore jeleń jeleńko dạsiya. Ar bhojkore laha jaega ar sunạgogkore asol asol duṛupʼakʼre duṛupʼko kusiyakʼa. Onko do hạṭiạ bajarkore johar ocokʼ ar hoṛko ṭhen guru men ocokʼgeko kusikʼkana. “Ape do guru mente alope hoho ocokʼa, ente mitʼṭengeae aperen Guru do, ar ape do jotokogepe boeha kana. Dhạrtire aperen baba mente okoe hõ alope metakoa, ente mitʼ goṭengeae aperen baba do, uni sermare menayicʼge. Ạyurko hõ alope ńum ocokʼa, ente aperen ạyuricʼ doe mitʼ goṭengea, uni do Mạsige. Ape modre maraṅicʼ do aperen sapʼdapʼicʼe hoyokʼma. Okoe acʼteye usulokʼ, uni doe copotʼ ocokʼa ar okoe acʼteye copodokʼ uni doe usul ocokʼa. “Hae, ape sostor baḍaeko, Phạrusiko ar phạsiạrako do! Ente ape do hoṛko samaṅre serma raj reakʼ duạrpe siń esetʼetʼ kana. Onare ape hõ bape bolokʼkana ar okoe bolokʼko kurumuṭukan onko hõ bape bolo ocoakokana. “Hae, ape sostor baḍaeko, Phạrusiko ar phạsiarako do! Ape do hoṛko ṭhen ńel ocokʼ lạgitʼ jeleń jeleńpe koejoṅ kana, ar eṭakʼ secʼ do rạnḍi maejiukoakʼ oṛakʼ duạrkope jom ujạṛetʼtakoa. Onate ape do artetʼ bạ̃ṛti sạjại hoyokʼtapea.” “Hae, ape sostor baḍaeko, Phạrusiko ar phạsiạrako do! Eken mitʼ hoṛ apeakʼ dhoromre ạguye lạgitʼ dhạrti reakʼ oka jaegare bape dãṛãn kana. Ar aperen celae hoelenre uni do ape khon hõ bạ̃ṛti norokre khadlekʼ lekpe hoeocoyede kana. “Hae ape do! Apepe kãṛãgere hõ eṭakʼko horpe udukʼako kana. Arpe menetʼkana, jãhãe mundil ńutumteye kiriạlen khan cetʼ hõ baṅ hoyokʼtaea, menkhan mundil reakʼ sona ńutumteye kiriạlen khan uni doe dạyikokʼa. E lelha ar kãṛãko, okaṭakʼ maraṅa? Sona, se ona mundil, one okaṭakʼ sona do Isor lạgitʼ begarge dohoakan? Ape do arhõpe meneda, pinḍ ńutumte jãhãeye kiriạlen khan cetʼge baṅ hoyokʼa, menkhan jãhãe ona pinḍ cetanre samaṅ akan dãṛẽ ńutumteye kiriạkʼ uni do ona reakʼ dạyike hoyokʼa. E kãṛãko, okaṭakʼ maraṅa? Ona dãṛẽ se pinḍ, one okaṭakʼ dãṛẽ do Isor lạgitʼ begar dohokʼkan? Onate pinḍ ńutumte okoeye kiriạkʼkan uni do pinḍ ar ona cetan reakʼ jotowakʼ ńutumtegeye kiriạkʼ kana. Okoe mundil ńutumteye kiriạkʼkan uni do mundil ar ona bhitrire tahenkạnicʼ ńutumtegeye kiriạkʼ kana. Okoe serma ńutumteye kiriạkʼkan uni do Isorakʼ siṅghạson ar onare tahenkạnicʼ ńutumtegeye kiriạkʼkana. “Hae, ape sostor baḍaeko, Phạrusiko ar phạsiạrako do! Ape do ṭhik lekage pudina, muhri ar jirạ reakʼ bhag do gel hạṭiń reakʼ mitʼ hạṭińge Isorpe emaekana; menkhan bicạr, mãyã, ar pạtiạr, okaṭakʼ do Moseakʼ ạn-ạriko reakʼ arhõ jạruṛanakʼ kan ona dope bạgi oṭoakada. Onate lahateakʼko são sãote tayomakʼko hõ manao lektapea. E kãṛã ạyurko; mitʼṭen sĩkṛĩcʼ dope chakao giḍiyedea, menkhan ũṭ dope utʼgotʼkae kana. “Hae, ape sostor baḍaeko, Phạrusiko ar phạsiạrako do! Ape do thạri bạṭi reakʼ bahretetʼgepe saphayeda, menkhan bhitritetʼ do luluṭ ar bin sambṛaoakʼte perecʼgea. E kãṛã Phạrusiko, lahare ona reakʼ bhitritetʼ sapha maṛaṅpe, inạ khan bahre secʼ hõ saphakʼa. “Hae, ape sostor baḍaeko, Phạrusiko ar phạsiarako do! Ape do cunte potao akatʼ topa lekanko kanape, one oka do bahre ma mońjge ńelokʼkan, menkhan bhitri do gocʼ hoṛakʼ jaṅ ar joto lekan mạilạte perecʼgea. Onkage, ape hõ bahre do hoṛko ṭhen dhorompe ńel ocokʼkana, menkhan bhitri do bạṛicʼ ar kạite perecʼgetapea. “Hae, ape sostor baḍaeko, Phạrusiko ar phạsiạrako do! Ape do nạbikoakʼ topa nawatepe tol aroyeda ar dhorom hoṛkoakʼ topakope sajaoeda. Arpe meneda, ‘aboren hapṛamko bidạlrele tahẽlen khan nạbikoakʼ mãyãm joroyre onko são do ohole seletʼkokʼa.’ Onate apnar birudre gohape emeda je, ape do nạbikoko khũnletʼkoren hoponko kanape mente. Enḍekhan aperen hapṛamko okaṭakʼko ehopʼ oṭoletʼ ona reakʼ sarecʼakʼ do apege mucạtʼ gotʼkakʼpe baṛe. “E bińko ar bińkoren hoponko! Cekate norok reakʼ sạjại khonpe bańcaokʼa? Onate iń do nạbiko, ạkilanko, ar sostor baḍaeko ape ṭheniń koletʼkoa. Ar ape do onko modren adomko dope gocʼkoa ar adomko dope kruskoa. Ar adomko do apeakʼ sunạgogkorepe cạbukkoa ar mitʼ nagraha khon eṭakʼ nagrahatepe laga baṛakoa. Onate Habel reakʼ mãyãm khon Borkhiạren hopon Sakariạ reakʼ mãyãm hạbicʼ one sonot jaega ar pinḍ talarepe khũnlede, uni Sakariạ khũn hạbicʼ dhạrtiren tinạkʼ bin dusạnkoko khũn ocoakan onko sanamkoakʼ mãyãm reakʼ dạyipe hoyokʼa. Sạrigeń metapekana, niạ bidạlren hoṛkoge ona mãyãm reakʼ dạyiko hoyokʼa. “E Jerusalem! E Jerusalem! Am do nạbikom khũnetʼkoa ar am ṭhen kol ocokʼkanko do dhiritem tińetʼkoa. Sim eṅga cetʼleka acʼren hoponko acʼakʼ phạ̃kṛạ̃kʼ latarreye guṅgutʼko onkage iń hõ amren hoṛko hạr samṭaokoń menleda, menkhan onko do bako rebenlena. E Jerusalemren hoṛko, apeakʼ oṛakʼ do ujạṛokʼa. Ińiń metapekana, tin hạbicʼ ạuripe men ‘Bhorangeae Probhu ńutumte darae kanicʼ do’ un hạbicʼ ape do ar bape ńeleńa.” Jisu mundil khone oḍok calakʼkan tahẽkanre celako do mundil reakʼ bhitko udukʼae lạgitʼ uni ṭhenko hecʼ sorena. Unre Jisui metatʼkoa, “Ape ma noakope ńeletʼ, menkhan ińiń metapekana, nonḍe do mitʼṭen dhiri hõ eṭakʼ dhiri cetanre baṅ tahena, joto do rạputʼ giḍikʼa” Jisu Joitun burureye duṛupʼ akan tahẽkanre celako uni ṭhen hape hapete hecʼkateko metadea, “Lạialeme, noako do tis hoyokʼa ar oka lekan cinhạko hotetele bujhạu daṛeakʼa amakʼ hijukʼ ar jug mucạdokʼ reakʼ okte do seṭer akana mente?” Jisui roṛ ruạṛatʼkoa, “Men sontorokʼpe, okoe hõ jemon aloko bulạupe, ente ạḍi hoṛ in ńutumte hecʼkateko mena, ‘Iń doń Mạsi kana,’ ar ạḍi hoṛko bulạukoa. Ape do lạṛhại reakʼ saḍekope ańjomma. Menkhan sontorokʼpe! Noate alope botorokʼa, ente noako do hoyokʼgea; menkhan unre hõ mucạtʼtetʼ do ạuriakʼa. Mitʼ jạt eṭakʼ jạt upạrte ar mitʼ rajosṭi eṭakʼ rajosṭi upạrteko lạṛhạiya. Jaega jaegakore akal hoyokʼa ar dhạrti laṛaokʼa. Menkhan noako do eken bedon reakʼ ehopʼkana. “Unre santaope lạgitʼko soprotʼpea arko gocʼpea. Iń iạte sanam hoṛko hirkhạwapea. Unre ạḍi hoṛko tạkijokʼa ar mitʼ hoṛ do eṭakʼ hoṛe soprotea are hirkhạwaea. Ạḍi utạr eṛe nạbikoko hijukʼa ar aema hoṛko bulạukoa. Ar bedhoromge ḍherokʼte ḍher hoṛkoakʼ dulạṛ do reaṛokʼa. Menkhan mucạtʼ hạbicʼ okoeye ṭarhao tahen uni do bańcaoe ńama. Sanam jạtko ṭhen goha emokʼ lạgitʼ serma raj reakʼ bhage sombat do goṭa dhạrtire porcarokʼa ar ona tayom do mucạtʼ hoyokʼa. “Daniel nạbi hotete ujạṛ reakʼ hirkhạwakʼ reaṅ oka roṛ akan ona sonot jaegare teṅgo akanpe ńellere (okoeye paṛhaoetʼkan uni doe bujhạuma), Unre Jihudạre tahenko do buruteko dạṛma. Ar sạṛimre menaeicʼ do oṛakʼ khon jãhãnakʼ hatao lạgitʼ latarte aloe pheḍokʼma. Okoe khetreye tahen uni hõ acʼakʼ oyonakʼ ạgui lạgitʼ aloe ruạṛma. Unre bhạrti hoṛmoko ar gidrạ nunuako kankore do hae hae! Koejoṅpe jemon rabaṅ din se jirạukʼ mãhãre dạdạṛ alo hoyokʼtape. Unre nunạkʼ bạṛicʼ kosṭo hoyokʼa one oka do dhạrti etohopʼ khon ńit hạbicʼ baṅ hoeakan ar tisge baṅ hoyokʼa. Ona saset reakʼ dinko Isor bae khaṭo lekhan okoe hõ ohoko bańcaolena. Menkhan acʼren bachao hoṛko lạgitʼ Isor do onako dine khaṭoea. “Unre jãhãegeko metape, ‘ńelpe, Mạsi do nonḍe menaea,’ se ‘hanḍe menaea,’ alope pạtiạuakʼa; ente aema eṛe Mạsi ar eṛe nạbikoko hijukʼa ar maraṅ maraṅ hahaṛa kạmi ar cinhạkoko uduga jemon Isorren bachao akan hoṛkoko bulạu daṛeako. Ńelpe, iń do laharege noakoń lại dohowatʼpea. “Onate hoṛko metape khan, ‘ńelpe, uni do hahaṅkarre menaea,’ alope oḍok calakʼa. Se ‘uni do bhitri oṛakʼre menaea,’ alope pạtiạukʼa. Cetʼleka bijli do purub khon oḍokokʼte pạchim hạbicʼ malkao calakʼ, onkage Manwa Hopon reakʼ seṭerokʼ hõ hoyokʼa. Jãhãrege mạ̃ṛĩ tahen onḍege gidi hõko jarwakʼa. “Onako din reakʼ santao tayomge siń cando doe ńutokʼa, ar ńindạ cando do bae terdeja, ipilko hõ coṭ khonko ńurokʼa ar siń cando, ńindạ cando, ar ipilko do bako ṭarhao tahena. Unre Manwa Hopon reakʼ cinhạ do sermare ńelokʼa. Ar dhạrtiren sanam gusṭirenko dukte koṛamko ceṭagokʼa. Onko do Manwa Hopon daṛe ar ṭhonokante rimilte hijukʼkanko ńelea. Ar murukte siṅgạ saḍekʼa ar ona são sãote Manwa Hopon do acʼren goḍetkoe kolkoa. Onko do dhạrti reakʼ mitʼ mucạtʼ khon eṭakʼ mucạtʼ hạbicʼ ar ponon secʼ khon acʼren bachao akan hoṛkoko jarwakoa. “Loa dare ńelte cetʼjoṅpe. Ona reakʼ ḍạrko bale ruạṛkate sakam sagen len khangepe baḍae daṛeakʼ kana je setoṅ din do seṭerakana. Onkage ape hõ noako sanamakʼpe ńellere baḍaepe, Manwa Hopon doe seṭer akana, hẽ duạr ṭhenge menaea. Sạrigeń metapekana, tinre noako joto hoyokʼa unre niạ bidạlren thoṛa hoṛ do bańcaoko tahena. Serma ar dhạrti do cabakʼa, menkhan ińakʼ katha do jaejug hạbicʼ tahena. “Menkhan okoe hõ ona din ar ona okte reakʼ do bako baḍaea, sermaren goḍetko hõ baṅ, Hopon hõ baṅ, eken Babageye baḍaea. “Noah oktere cetʼleka hoelen onkage Manwa Hopone seṭerokʼre hõ hoyokʼa. Ente ḍubạ laha dinkore Noah do jahajre ạuriye bolokʼ hạbicʼ hoṛko doko jom ńũyetʼ tahẽkana, bạhu joṅkan tahẽkana ko arko jãwãyokʼkan tahẽkana. Ar ḍubạ dakʼ hecʼkate sanamko ạuriye ạtu idiko hạbicʼ onko do cetʼge bako bujhạu daṛeada. Manwa Hoponakʼ hijukʼ hõ ṭhik onkage hoyokʼa. Unre bar hoṛ do goḍarekin tahena; mitʼ hoṛ doe idiocokʼa, ar eṭagicʼ doe bạgi oṭokʼa. Barea maejiu do jantekin riritʼa; mitʼṭen doe idi ocokʼa, ar eṭagicʼ doe bạgi oṭokʼa. “Onate ape do jagwar akae tahenpe, ente bape baḍae hilokʼrege aperen Probhu doe hijukʼa. Menkhan noa baḍaepe, oṛakʼ kisạ̃ṛe baḍaele khan oka pohor kombṛoe hijukʼa, enḍekhan uni do ebhengeye tahẽkokʼa, ar acʼakʼ oṛakʼ do ohogeye bhugạkʼ ocolea. Onate ape hõ sapṛao akan tahenpe, ente bape hudisetʼkan ghuṛirege Manwa Hopon doe hijukʼa. “Uni pạtiạricʼ ar budanicʼ guti doe okoe kana, one okoe acʼren kisạ̃ṛ do guti ar kạ̃ṛmĩko okte oktere jomakʼ emakoa mente acʼ gharońjrenko cetanreye dohokede? Bhạgangeae uni guti do, one uni kisạ̃ṛtetʼ onkayetʼkane hecʼ ńame. Sạrigeń metapekana, unige acʼakʼ menakʼtaeakʼ sanamakʼko cetanreye dohoyea. Menkhan, uni bạṛicʼ golam do acʼakʼ monreye menle khan, ‘ińren kisạ̃ṛ do hijukʼe bilomeda.’ Ar acʼ sãoten gutiko dadale ehob, ar bulokʼko tulucʼe jom ńũi; Enḍekhan guti bae ńel horakatʼ dinre ar bae baḍae akatʼ ghuṛire uni kisạ̃ṛ doe hijukʼa. Ar unre uni doe makʼ paṛagea ar phạsiạrako tulucʼ bakhrae niṭaea. Onḍe do rakʼjoṅ ar togocʼ ḍaṭa hoyokʼa. “Unre serma raj do nonkan gel tetre kuṛiko leka hoyokʼa one okoe do gate kuṛiren Jãwãe daram ạguye lạgitʼ diuhewante bahreteko oḍok calaoen. Onko modre mõṛẽ goṭen do lilhi ar mõṛẽ goṭen do budanko tahẽkana. Lilhi kuṛiko do diuheko idiletʼgea menkhan soṅgete sunum do bako idi toraleda. Ar budan kuṛiko do akoakʼ diuhe sãote cukạkʼre sunum hõko iditorawana. Ado Jãwãe beṭa hijukʼe bilomokʼkante onko do dudṛum sapketʼkoa ar jotogeko jạpitʼkeda. “Khan tala ńindạ jokhecʼ hoho ańjomena, ‘hạni ńelepe, Jãwãe beṭa doe hijukʼ kana! Ma oḍokokʼpe ar ataṅ daramepe.’ Unre onko tetre kuṛi do beretʼkate diuheko jutketʼtakoa. Ar lilhi kuṛiko do budan kuṛikoko metatʼkoa, ‘apeakʼ sunum khon den thoṛa emalepe, ente diuhe do ĩṛĩjokʼ kantalea.’ Unre budan kuṛikoko roṛ ruạṛkeda, ‘bale emokʼa, ente oka menakʼtale onate ape ar ale lạgitʼ do ohoge kulạulena. Ape do boroṅ ạkhrińko ṭhen senkate kiriń ạgujoṅpe.’ Ado onko lilhi kuṛi sunum kirińko sen akan tahẽkanrege Jãwãe beṭa doe hecʼena. Ar unre sapṛao akan tahẽkan kuṛiko do Jãwãe beṭa sãote bapla oṛakʼteko boloyena. Ar sanamkoko boloyen khan silpiń do sińena. “Tayomte onko lilhi kuṛiko do hecʼkateko menkeda, E Probhu, E Probhu, ‘duạr jhicʼaleme.’ Unre Jãwãe beṭa doe roṛ ruạṛatʼkoa, ‘sạrigeń metapekana, iń do bạń orom akatʼpea.’” “Onate jagwar akae tahenpe, ente ona din se ona okte reakʼ katha do bape baḍaea.” “Serma raj do nonkan mitʼṭen hoṛ lekana, one okoe do eṭakʼ disạmte calakʼ lahare acʼren gutiko hoho jarwakate acʼakʼ sanam sompotti reakʼ bhar onkoakʼ tireye jimạ oṭokatʼ. Uni do gutikoakʼ daṛe leka mitʼ hoṛ do mõṛẽ hajar, ar mitʼ hoṛ do bar hajar ar eṭakʼicʼ do mitʼ hajar ṭakae emadea. Ado okoe mõṛẽ hajar ṭakae ńamletʼ uni do onateye bạnij beparketʼte arhõ mõṛẽ hajar ṭakae labkeda. Ar okoe bar hajar ṭakae ńamletʼ uni hõ onkakate arhõ bar hajar ṭakae labkeda. Menkhan okoe mitʼ hajar ṭaka ńamletʼ uni do senkate ote lakeda ar acʼren kisạ̃ṛakʼ ṭakae topa okokada. “Ado ḍher din tayom kisạ̃ṛ do hecʼkate onko gutiko ṭhen khon hisạbe khojkeda. Khange okoe mõṛẽ hajar ṭakae ńamletʼ uni do arhõ mõṛẽ hajar ṭaka ạgu darakateye menkeda, ‘E Probhu, am do mõṛẽ hajar ṭakam jimạwạdiń tahẽkana. Ńelme, iń do arhõ mõṛẽ hajar ṭakań lab akada.’ Unre acʼren kisạ̃ṛe menkeda, ‘bes akadam. E bhage ar pạtiạr golam. Am do thoṛawakʼre pạtiạrem tahẽkante ḍher okocʼakʼko cetanreń dohokama. Ar dela hijukʼte iń sãote rạskạ seledokʼme.’ “Ar okoe bar hajar ṭakae ńamletʼ uni hõ hecʼkateye menkeda, ‘E Probhu, am do bar hajar ṭakam jimạwạdiń tahẽkana. Ar nõkʼõe ńelme, ona khon arhõ bar hajar ṭakań lab akada.’ Unre uniren kisạ̃ṛ doe menkeda, ‘bes akadam, E bhage ar pạtiạr golam. Am do thoṛawakʼre pạtiạrem tahẽkante ạḍi okocʼakʼko cetanreń dohokama. Ar dela hijukʼte, iń sãote rạskạ seledokʼme.’ “Menkhan okoe mitʼ hajar ṭakae ńamletʼ uni do hecʼkateye menkeda, ‘E Probhu, baḍae akatʼme tahẽkạnạń am dom kuṭhin hoṛ kana. Ente am do okare itạ bam erakatʼ onḍe khonem ireda ar okare bam chiṭạu akatʼ onḍe khon dom halaṅeda. Onate iń do botorte amakʼ ṭaka otreń topa dohoakatʼ tahẽkana. Ar ńelme, amakʼ jinis do amakʼge menakʼa.’ Khange acʼren kisạ̃ṛ doe roṛ ruạṛadea, ‘E bạṛicʼ ar asaṅpoḍa golam! Baḍaekan tahẽkange com okare bạń er akatʼ onḍe khoniń ireda ar okare bạń chiṭạu akatʼ onḍe khoniń halaṅeda. Enḍekhan ińakʼ ṭaka do cedakʼ mahajon ṭhen bam doholeda? Inạ khan hecʼkate iń do ṭaka ar ona reakʼ sud hoń ńamkea.’ Ona tayom uni do eṭakʼkoe metatʼkoa, ‘uni ṭhen khon ṭaka hataope ar okoeakʼ gel hajar ṭaka menakʼtae uni emaepe. Ente okoeakʼ menakʼtae uni do arhõe emocokʼa ar onate uniakʼ do aema hoyokʼtaea. Menkhan okoeakʼ bạnukʼ uni do oka menakʼtae ona hõe recʼ ocokʼa. Uni okoḍa guti do bahre ńutre gidikaepe; onḍe do rakʼjoṅ ar togocʼ ḍaṭa hoyokʼa.’ “Manwa Hopon do acʼren serma goḍetko sãote acʼakʼ ṭhonokanteye hecʼlenre uni do ṭhonok reakʼ siṅghạsonreye duṛupʼa. Ar sanam jạtren hoṛko do uni samaṅreko jarwa ocokʼa. Cetʼleka gupiyicʼ do bhiḍi ar meromkoe begarko onkage uni do sanam hoṛkoe begarkoa. Uni do acʼakʼ jojom secʼre bhiḍiko ar leṅga secʼre meromkoe dohokoa. “Inạ tayom raj do acʼakʼ jojom secʼrenkoe metakoa, ‘Okoe ińren Babawakʼ bhorpe ńamakatʼ, dela hijukʼpe. Dhạrti reakʼ rehetʼ khon okaṭakʼ rajosṭiye tear akatʼpe ona baṛe ạidạrijoṅpe. Ente reṅgecʼiń tahẽkanre jomakʼpe emadiń tahẽkana; tetaṅ ledińa arpe ńũ ocoledińa; upriạń tahẽkana arpe ataṅ sãohãledińa; laṅgaṭiń tahẽkana arpe kicricʼledińa; ruạreń paṛaolena arpe jotonledińa; ar hajotreń tahẽkana arpe hiriledińa.’ “Unre dhoromkoko roṛ ruạṛaea, ‘E Probhu, tis baṅ reṅgecʼletʼme ńeltele jom ocoletʼme se tetaṅeletʼme ńeltele ńũ ocoletʼme? Tis baṅ upriạm tahẽkantele ataṅ sãohãletʼme, se laṅgaṭem tahẽkantele kicricʼletʼme? Ar tis baṅ ruạkʼ se hajotrem tahẽkanrele hiriletʼme?’ “Ado raje roṛ ruạṛakoa, ‘sạrigeń metapekana, ińren noko huḍiń utạr boehako modre jãhãe mitʼ hoṛpe nonkawade enḍekhan unre ińgepe onkawạdiń tahẽkana.’ “Tayomte uni do acʼakʼ leṅga secʼren hoṛkoe metakoa, ‘E sarapanko, iń ṭhen khon sạṅgińokʼpe. Soetan ar uniren celako lạgitʼ tearakan jaejug seṅgelre calakʼpe. Tinre reṅgecʼledińa unre ape do jomakʼ bape emadińạ; tetaṅ ledińa ar bape ńũ ocoledińa; Upriạń tahẽkana ar bape ataṅ sãohãledińạ; laṅgaṭiń tahẽkana ar bape kicricʼledińa; ruạ haso ar hajotreń tahẽkana ar bape hiriledińa.’ “Unreko metaea, ‘E Probhu, tis baṅ reṅgecʼletʼme, se tetaṅletʼme, se upriạ, se laṅgaṭ, se ruạ, se hajotre ńelkate bale sapʼ soratʼme?’ “Uni do roṛ ruạṛ akoteye metakoa, ‘sạrigeń metapekana, noko ińren huḍiń utạrko modre jãhãe mitʼ hoṛ tinạkʼ bape nonkawade, unạkʼge iń hõ bape onkawạdińa.’ ” Ona tayom Jisui menkeda, “Noko hoṛ do jaejug sạjạiteko calakʼa, menkhan dhoromko do jaejug jionko ńama.” Ado noako kathae mucạtʼketʼ khan Jisu do acʼren celakoe metatʼkoa, “Baḍaegeape bar din tayom khange sen-parom porob do hoyokʼa, ar Manwa Hopon do kruse lạgitʼko soprotea.” Unre maraṅ naekeko ar Jihudikoren murubiko do Kaeaphako metae maraṅ naekeakʼ oṛakʼreko jarwa mitʼena, ar Jisu hape hapete sapʼkate goje reakʼ phundiko aṭaokeda. Menkhanko menkeda, “Porobre do babo onkaea; baṅkhan disạm hoṛko talare gulmal ehopʼ botejokʼa.” Jisu do Bethaniạre murhucʼ jom rugi Simonakʼ oṛakʼreye tahẽkanre mitʼṭen maejiu do uni ṭhene hecʼena. Ar mitʼṭen ponḍ dhiri reakʼ cukạkʼre ạḍi damanakʼ mahkaokʼ sunume ạgu darakeda. Ar Jisu tinre jojome duṛupʼ akan tahẽkan unre uni do ona mahkaokʼ sunum bohokʼreye duladea. Ona ńelte celako do edreyenteko menkeda, “Nunạkʼ damanakʼ jinis do cedakʼ nosṭo giḍikakʼ hoyokʼ kana? Noa ma damtege coṅ ạkhrińkokʼ ar reṅgecʼ orecʼko emkeko.” Jisu onae baḍaeketʼ khan onkoe metatʼkoa, “Nui do cedakʼpe mon duk ocoyede kana? Uni do iń lạgitʼ bhageakʼgeye kạmi akada. Ente reṅgecʼ orecʼkoma jaoge ape tulucʼ menakʼko, menkhan iń do jao okte bape ńameńa. Uni do hoṛmore mahkaokʼ sunume dulạdińte topayiń lạgitʼe sapṛaoe edeńkana. Sạrigeń metapekana, dhạrti reakʼ jãhã jaegarege bhage sombat porcarokʼ, onḍege nui maejiue kạmiakatʼ reakʼ katha hõ disại lạgitʼ lại torakʼa.” Unre gelbar celako modren Jihudạ Iskạriotko metae cela do maraṅ naekeko ṭhen senkateye metatʼkoa, “Apeakʼ tire Jisuń soprot lekhan cetʼpe emạńa?” Unre maraṅ naekeko do pegel rupạ ṭaka lekhawadeteko emadea. Ona tayom khon Jihudạ do Jisu soprote lạgitʼ ạte ńam baṛayetʼ tahẽkana. Ado bin khạmianakʼ piṭhạ porob reakʼ pạhil dinre celako do Jisu ṭhen hecʼkateko menkeda, “Sen-parom porob reakʼ bhoj do okarele tearama mentem menjoṅ kana?” Jisui metatʼkoa, “Naṅgrahate calaokate uni hoṛ metaepe, Gurui meneda, ‘ińakʼ okte do sorakana. Iń do ińren celako tulucʼ amakʼ oṛakʼre sen-parom porobiń porobokʼa.’ ” Onate celako do Jisui hukumatʼko tahẽkan leka sen-parom porob reakʼ bhojko tearkeda. Ado ạyupʼen khan Jisu do onko gelbar celako tulucʼ jojome duṛupʼena. Arko jojomkan tahẽkanre uni doe metatʼkoa, “Sạrigeń metapekana, ape modre mitʼ hoṛ bạirikoakʼ tireye soprotińạ.” Unre celako do ạḍiko bhabnayente mimitʼ hoṛ Jisu kuliyeko ehopʼena, “Probhu uni do cetʼ iń kạnạń?” Uniye roṛ ruạratʼkoa, “Iń tulucʼ bạṭire okoe tiye topoyetʼkan unige iń doe soprotińạ. Manwa Hopon reaṅ sonot sostorre okaleka olakan onkage uni doe gujukʼa, menkhan uni hoṛre do hae hae, okoe bạirikoakʼ tire Manwa Hopone soprot ocoye! Uni do aloe janamlen khange honaṅ boge hoekokʼtaea.” Ado okoe bạirikoakʼ tire Jisui soprot ocoye lạgidokʼkan tahẽkan uni Jihudại menkeda, “Guru, uni do cetʼ iń kạnạń?” Jisu do uniye metadea, “Am do ṭhikgem meneda.” Arko jojomkan tahẽkanre, Jisu do piṭhạ halaṅkateye bhorada. Ar kecakʼkate celako ematʼkoteye menkeda, “Ne ataṅpe ar jompe, noa do ińakʼ hoṛmo kana.” Inạ tayom bạṭi halaṅkate gun manao joharkate ematʼkoteye, metatʼkoa, “Ne, noa reakʼ ńũiype sanamko, ente noa do bondobos reakʼ ińakʼ mãyãm kana, oka do ạḍi hoṛko ńutumte jorokʼkan kại ikạkʼ lạgitʼ. Ińiń metapekana, ińren Babawakʼ rajosṭire ape tulucʼ nawanakʼ darkha rasa ạuriń ńũi hạbicʼ ńit khon noa do ar bạń ńũiya.” Ado mitʼṭen sarhao sereńate onko doko oḍokente Jạitun buruteko rakapʼena. Unre Jisui metatʼkoa, “Niạ ńindạ ape jotoge ińrepe tạkijokʼa. Sonot sostorre olakana, ‘gupiyicʼ iń gojea, enḍekhan palren bhiḍikoko chir chạturokʼa.’ Menkhan ińiń jiwetʼ beredokʼ tayom iń do ape lahate Gạlilteń calakʼa.” Unre Patras doe roṛ ruạṛadea, “Amre jotokogeko tạkicʼlenre hõ iń do ohogeń tạkicʼlena.” Jisu do uniye metadea, “Sạrigeń metamkana, niạ ńindạge sim sạnḍi ạuriye ragre am do pe dhaoem baṅeńa.” Patrase menkeda, “Am saõte gujukʼ hoyokʼtińre hõ iń do ohogeń baṅlema.” Ar eṭakʼ celako hõ onka lekako menkeda. Unre Jisu do onko tulucʼ Gethsemaneko metakʼ mitʼṭen jaegate senkate celakoe metatʼkoa, “Iń do onḍe senkate tin hạbicʼ iń koejoṅ un hạbicʼ ape do nonḍe duṛupʼ hataṛokʼpe.” Noa menkate uni do Patras ar Sabdaeren banar hopon soṅge toraketʼkinteye calaoena. Ar bhabnate uniakʼ mon do dhak dhakaokʼ ehopʼentaea. Uniye metatʼkoa, “Gujukʼ dạkhil jiwi lokʼkantińa. Ape do onḍege tahẽ hataṛokʼpe ar iń tulucʼ jagwar akae tahenpe.” Khan laha ńokʼ senkate uni doe taberena ar koeketʼteye menkeda, “E Baba, hoedaṛeakʼ khan noa duk reakʼ bạṭi do iń khon pharakokʼma. Enhõ ińiń menjoṅkan leka do baṅ, bickom amakʼ sanalekage baṛe hoyokʼma.” Inạ tayom acʼren celako ṭhene hecʼen khan jạpitʼ akatʼe ńelketʼkoa. Uni do Patrase metadea, “Iń tulucʼ cetʼ mitʼ ghonṭa hõ jagwar bape tahẽ daṛeada? Jagwar tahenpe ar koejoṅpe jemon biḍạure alope paṛaokʼ. Jiure sana menakʼgea, menkhan hoṛmo do nijorgea.” Uni do ruạṛ senkate dosar dhao koeketʼteye menkeda, “E Baba, noa bạṭi iń ṭhen khon baṅ pharakokʼ khan begor onań ńũite, enḍekhan amakʼ sanaleka baṛe hoyokʼma.” Adoe ruạr hecʼen khan arhõ jạpitʼ akatʼe ńamketʼkoa, ente onko do dudṛumte ạḍiko laṅga akan tahẽkana. Uni do arhõe bạgi oṭoatʼkote tesar dhao senkate inạ kathageye koekeda. Ar celako ṭhen hecʼkateye metatʼkoa, “Ape do ńit hõpe jạpitʼ jirạu joṅkana? Ńelpe, okte do seṭerena; Manwa Hopon do kại hoṛkoakʼ tireko soprotea. Ma beretʼpe, dela bon calakʼa. Ńelpe, bạirikoakʼ tire okoeye soprotiń uni doe seṭerena.” Jisui roroṛkan tahẽkanrege, ńelpe, Jihudạ do onḍeye hecʼena. Uni do gelbar celako modren mitʼ hoṛe tahẽkana. Uni sãote ạḍi utạr hoṛ do tarwaṛe ar ṭhengawanteko hecʼena. Onko do maraṅ naekeko ar murubikoko kolakatʼko tahẽkana. Jisu bạirikoakʼ tire okoeye sapʼ ocoye uni do onko tulucʼ mitʼṭecʼ cinhại ṭhik dohoakatʼ tahẽkana; uni doe metatʼko tahẽkana, “Jãhãeṭakʼgeń cokʼae, uni kangea, ape do unigepe sabeya.” Onate Jihudạ do Jisu ṭhen hecʼkateye menkeda, “Johar Guru,” Ar noa menkateye cokʼadea. Jisu do uniye metadea, “E gate, okaṭakʼ lạgitʼem hecʼakan, ma onkaeme.” Ar soṅge soṅgete onko hoṛ do hecʼkate Jisuko sapʼkedea. Jisu soṅgete tahẽkanko modren mitʼ hoṛ do acʼakʼ tarwaṛeye oḍokkeda ar maraṅ naekeren gutiyakʼ mitʼṭen luture heseketʼtaea. Unre Jisui metadea, “Amakʼ tarwaṛe do khapre bhoraokakʼme. Ente tarwaṛe sasapʼko jotoge tarwaṛeteko gujukʼa. Am do cetʼ bam moneakʼ kana, ińren Babań hohoae khan ńitge hajar hajar serma goḍetko cetʼ bae kolạńạ? Enḍekhan cekate sostorko reakʼ katha do purạukʼa? Sostorre ma coṅ olge menakʼ, noako hoyokʼ do jạruṛgea.” Uni do gadel hoṛkoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawante iń sasapʼpe hecʼakana? Iń ma coṅ jaoge mundilre duṛupʼkateń cetʼakokan tahẽkan, ar unrema bacope sapʼlediń. Menkhan noa joto do hoyena jemon nạbiko reakʼ olakʼko purạukʼ.” Unre celako do Jisuko ńir bạgiadea. Ado okoeko Jisuko sapʼlede onko do maraṅ naeke Kaeapha ṭhenko idikedea. Onḍe do sostor baḍaeko ar murubikoko jarwa akan tahẽkana. Patras do pharak pharakte maraṅ naekeakʼ raca hạbicʼ Jisui pańja idikedea ar mucạtʼ hạbicʼe ńela mente bhitrite bolokate sipạhiko sãoteye duṛupʼ panteyena. Maraṅ naekeko ar maraṅ bạisiren sanam hoṛko do Jisu goje lạgitʼ eṛe gohakoko ńam baṛayetʼko tahẽkana. Ar aema eṛe gohako hõko hecʼlengea, menkhan onko do ṭhik leka goha bako ńamleda. Ado mucạtʼre bar hoṛ hecʼkate kin menkeda, “Nui hoṛe menakada, Isorakʼ mundil iń dhaṅ dhasera ar pe mãhãte arhõń benao ruạṛa.” Unre maraṅ naeke do teṅgoyente Jisui metadea, “Am do cetʼ jãhãnakʼ bam roṛ ruạṛa? Am upạrte nukin do cetʼ gohakin emeda?” Menkhan Jisu do hapegeye tahẽyena. Maraṅ naeke do arhõe metadea, “Jiwetʼ Isorreń kiriạ ocoyetʼme kana, lại aleme, am do Mạsi, Isorren Hopon kanam se baṅ?” Jisu do uniye metadea, “Hẽ am do ṭhikgem menakada; enḍekhan arhõń metapekana, ńit khon Manwa Hopon do sanam daṛean Isorakʼ jojomsa aṛere duṛupʼakan ar rimilte hijukʼ kanpe ńelea.” Khange maraṅ naeke do acʼakʼ kicricʼ oṛecʼketʼteye menkeda “Nui do Isore opoman akadea. Gohako reakʼ ar cetʼ jạruṛabona? Ńitge coṅ ape hõpe ańjomketʼ, uni do Isore opomane kana. Cetʼpe bujhạueda?” Onkoko roṛ ruạṛkeda, “Nui do gocʼ ocokʼ lek kanae.” Unre mẽtʼãhãreko thoadea, arko kilạukedea arko thapakedea. Adoko metadea, “E Mạsi, mase lạime, okoeye dalketʼmea?” Unre Patras do bahre racareye duṛupʼ akan tahẽkana. Ar mitʼṭen kạ̃ṛmĩ kuṛi do hecʼkateye metadea, “Am hõ coṅ Gạlilren Jisu tulucʼem tahẽkan.” Menkhan Patras do jotoko samaṅre baṅketʼteye menkeda, “Am cetʼem menetʼkan ona do bạń baḍaea.” Inạ tayom Patras do duạr ṭhene oḍok senena. Uni ńelte eṭagicʼ kạ̃ṛmĩ do onḍenko hoṛkoe metatʼkoa, “Nui hoṛ hõ Nasaretren Jisu sãoteye tahẽkana.” Unre Patras doe kiriạyena ar baṅketʼteye menkeda, “Uni hoṛ do baḍae hõ bạń baḍae akadea.” Mitʼ ghạṛi tayom onḍe teṅgo akan tahẽkanko hõ Patras ṭhen hecʼkateko menkeda, “Khạṭige am hõ onko modren kangeam; ente amakʼ kathategem sapʼocokʼ kana.” Unre Patras doe sarapana ar kiriạente memene ehopʼena, “Uni hoṛ do baḍae hõ bạń baḍae akadea.” Ar unrege saṭmente sim sạnḍiye rakʼgotʼkeda. Unre Patras do Jisui metade tahẽkan kathae disạkeda, “Sim sạnḍi ạuriye ragre pe dhaoem baṅeńa.” Ar bahrete oḍok senkate uni do hũk hũke rakʼkeda. Ado setakʼen khan maraṅ naekeko ar murubiko do Jisu goje reakʼko goṭakeda. Onko do Jisu tolkateko idikedete disạm cakʼlaoicʼ Pilạt ṭhenko soprotkedea. Ar bạirikoakʼ tireye soprotlede Jihudạ do Jisuko bicạr dusikede khan ạḍi ãṭe kastaoena. Uni do maraṅ naeke ar murubiko ona pegel rupạ ṭaka ruạṛatʼkoteye metatʼkoa, “Kại akadạń, ente bin dusạnicʼ gocʼ ocoye lạgitʼ iń soprot akadea.” Onkoko metadea, “Onate aleakʼ do cetʼ? Amge ńeljoṅme.” Unre Jihudạ do ona ṭaka mundilre capatʼ giḍi oṭokateye calaoena are pạsi gocʼena. Ar maraṅ naekeko do ona ṭaka halaṅkateko menkeda, “Mundil reakʼ sundukre noa do doho baṅ ṭhikokʼa, ente noa do mãyãm reakʼ dam kana” Ado solha mitʼkate ona ṭakate upriạ hoṛ topako lạgitʼ kuṅkạlakʼ mitʼṭen goḍako kirińkeda. Onate teheń hạbicʼ ona goḍa do mãyãm reakʼ goḍako metakʼkana. Noate Jirimiạ nạbi hotete roṛlenakʼ katha purạuena: “Onko do pegel rupạ ṭakako hataokeda. Noa ṭaka do uniakʼ dam kana. Israelko do uni lạgitʼ noa damko ṭhik dohoakatʼ tahẽkana. Probhu cetʼlekae hukum ạdiń tahẽkan onkage onko do kuṅkạl reakʼ goḍa lạgitʼ ona ṭakako emkeda.” Jisu do disạm cakʼlaoicʼ Pilạt samaṅreko teṅgokedea. Unre Pilạt do Jisui kulikedea, “Am do cetʼ Jihudikoren raj kanam?” Jisui roṛ ruạṛkeda, “Am do ṭhikgem meneda.” Maraṅ naekeko ar murubiko aemako dusikedea menkhan Jisu do cetʼ hõ bae roṛ ruạṛleda. Unre Pilạt do uniye metadea, “Tinạkʼko dusiyetʼmekan do cetʼ bam ańjomeda? Menkhan Jisu do mitʼṭen katha hõ bae roṛ ruạṛleda. Onate disạm cakʼlaoicʼ do ạḍiye hahaṛayena. Disạm cakʼlaoicʼ do sen-parom porobre hoṛkoakʼ kusileka jaoge mitʼṭen kạidiye aṛakʼedekan tahẽkana. Ar noage uniakʼ cạli do tahẽkana. Ona jokhecʼ Barabbako metae mitʼṭen kạidiye tahẽkana. Ado hoṛkoko jarwayen khan Pilạt do onkoe kuliketʼkoa, “Cetʼpe khojkana? Ape ṭhen okoeṭakʼ iń aṛagea, Barabba, se Mạsiko metae Jisu?” Ente Pilạt doe baḍaekan tahẽkana, onko do hiskạ iạte Jisuko soprotakadea. Ado Pilạt tinre bicạr duṛupʼakʼreye duṛupʼ akan tahẽkana unre uniren oṛakʼ hoṛ do kathae roṛgotʼkada, “Uni dhoromicʼ do jãhãnakʼ alom cekaea, ente uni iạte teheń kukmũte ạḍi duk iń ńamakada.” Menkhan maraṅ naekeko ar murubiko do hoṛkoko rạmjạuketʼkoa jemon Barabbako khoje ar Jisu do goje reakʼ kathako roṛ. Tayomte disạm cakʼlaoicʼ do hoṛkoe kuliketʼkoa, “Nukin bar hoṛ modre okoeṭakʼiń aṛakʼapepe khojkana? Onkoko menkeda, “Barabbage.” Unre Pilạte metatʼkoa, “Enḍekhan Mạsiko metae Jisu doń cekaea?” Onkoko menkeda, “Kruskae me.” Pilạte metatʼkoa, “Cedakʼ, cetʼe dos akatʼte?” Menkhan onko do arhõ ãṭ aṛaṅte hohoate memenko ehopʼena, “Uni do kruskae me.” Pilạt do cetʼ hõ bae dhejeda bickom arhõ gulmal hoyokʼ kane ńelketʼ khan dakʼ hataokate hoṛko samaṅre ti ạbukenteye menkeda, “Nui hoṛakʼ mãyãm lạgitʼ iń do bạń dạyikokʼa; apege ńeljoṅpe.” Sanamkoko roṛ ruạṛadea, “Ale ar aleren gidrạkoge uniakʼ mãyãm reakʼ dạyikle hoyokʼa.” Unre Pilạt do Barabbageye aṛakʼatʼkoa, menkhan Jisu do cạbuk baṛakate kruskae lạgitʼe soprotkedea. Unre disạm cakʼlaoicʼ Pilạtren palṭonko do oṛakʼ bhitrite Jisuko aderkedea ar goṭa palṭon dolrenko Jisu beṛhaeteko jarwaketʼkoa. Onko do Jisuakʼ kicricʼko totʼkeda ar jeṅgetʼ arakʼ aṅgropko horokʼadea. Ar jạnum nạ̃ṛĩ reakʼ mukuṭ galaṅkate bohokʼreko horokʼadea, ar jojom tire mitʼṭen ṭheṅgako sapʼadea. Ona tayom ikhṛumkate siṛogateko metadea, “Johar Jihudikoren raj.” Onko do hoṛmoreko thoadea ar ona ṭheṅga hatao ruạṛkate bohokʼreko dal daladea. Adoko siṛog baṛawade khan horokʼakʼko totʼketʼtaea ar acʼakʼ kicricʼ horokʼadete kruskae lạgitʼko idikedea. Ado onḍe khonko oḍok hijukʼkan tahẽkanre palṭonko do Kurini nagraharen Simon ńutuman mitʼṭen hoṛko ńamkedea. Ar Jisuakʼ krus gokʼ iditae lạgitʼko sapʼ paṭetʼkedea. Onko do ‘Golgatha’ mane do ‘bohokʼ khạpriko’ metakʼ jaega ṭhenko hecʼen khan Jisu do haṛhatʼ sisir mesalakatʼ darkha rasa ńũi lạgitʼko emadea. Ar Jisu onae cakha ạikạuketʼ khan ńũńũ bae rebenlena. Ado Jisuko kruskede khan palṭonko do gulibãṭkate uniakʼ kicricʼko hạṭińana. Ar duṛupʼkate onḍe horhoyeko ehopʼena. Onko do Jisuakʼ bohokʼ cetanre noa dos olakʼko bạisạukeda, “Nui do Jisu, Jihudikoren raj.” Ar barea dạku hõ Jisu sãoteko krusketʼkinạ, mitʼ do uni jojomsa aṛere ar eṭagicʼ do leṅgasare. Ar ona horte parom calakʼkanko do bohokʼ ruku rukute Jisu siṛogadeteko metadea, “Eya mundil dhaṅ dhasericʼ ar pe mãhãte benaoicʼ! Enḍekhan ńitokʼ apnarte bańcaokʼme. Isorren Hopon kan khanem enḍekhan krus khon pheḍ hijukʼme.” Maraṅ naekeko ar sostor baḍaeko ar murubiko hõ siṛogadeteko menkeda, “Uni do eṭakʼkoe bańcaoetʼko tahẽkana; acʼ do bae bańcao daṛeakʼkana; Israelkoren raj kanae men khan, ńitokʼ krus khone pheḍ hijukʼma. Enḍekhan ale hõ unirele pạtiạukʼa. Uni do Isorreye bhorsa akana; ńitokʼ Isor unire kusiye tahen khan enḍekhane bańcaoema. Uni ma apnarte Isorren Hopone ńumugokʼkan tahẽkana.” Ar uni sãoteko krusletʼkin dạku hõ onkagekin siṛogadea. Enhilokʼ tikin gelbar baja khon pe baja hạbicʼ goṭa disạm do ńutge tahẽyena. Khan pe baja okte Jisu do ãṭ aṛaṅte hohoateye menkeda, “Eli Eli Lama Sabakthani,” metakʼme, “E ińren Isor, E ińren Isor, cedakʼem bạgi giḍiạdińa?” Onḍe teṅgo akan tahẽkanko modren adom hoṛ do noa katha ańjomteko menkeda, “Uni do Eliại hohoae kana.” Onko modren mitʼ hoṛ do ńir senente mitʼṭecʼ spońj hataokate sirkạreye topokeda ar ṭheṅgare gutukateye cepecʼadea. Eṭakʼko doko menkeda, “Hape se ńellege bon, uni bańcaoe lạgitʼ Eliại hijukʼ kana se baṅ.” (Mitʼ hoṛ do borlome hataokeda ar kokhareye sobokʼkede khan dakʼ ar mãyãm oḍokena.) Jisu do arhõ ãṭ aṛaṅteye hohokeda ar jiwi oḍokentaea. Unre mundil reakʼ orwal do coṭ khon pheḍ hạbicʼ oṛecʼente bar hạṭińena; ar dhạrti do dal dalaoena ar lạṭu lạṭu dhiriko paṛakʼena. Ar adomakʼ topako jhicʼenate ạḍi utạr jạpitʼ akatʼ sonot hoṛkoakʼ hoṛmo do beretʼena. Jisu gocʼko khone jiwetʼ beretʼen khan onko do topa khon oḍokkate sonot nagrahateko boloyena. Ar ạḍi hoṛko ṭhenko ńel ocoyena. Subedar ar uni tulucʼ Jisu horhoyedeko do dhạrti laṛao ar eṭakʼ ghoṭnako ńelkate ạḍi bạṛicʼko botorena arko menkeda, “Sạrige uni do Isorren Hopone tahẽkana.” Onḍe do aema maejiuko hõ pharakre teṅgokate jotowakʼko ńeńelkan tahẽkana. Onko do Jisu sapʼsorae lạgitʼ Gạlil khon soṅgeteko hecʼlena. Onko modre Magdalaren Mạriạm, Jakob ar Josephren eṅgat Mạriạm ar Sabdaeren hopon Jakob ar Johantekinren eṅgat hõe tahẽkana. Ado ạyupʼen khan Arimạthiạren Josephko metae mitṭen kisạ̃ṛ hoṛ do onḍeye hecʼena. Uni hõ Jisuren celae hoeakan tahẽkana. Uni do Pilạt ṭhen senkate Jisuakʼ mạ̃ṛĩye koekeda. Ar Pilạt do mạ̃ṛĩ emae lạgitʼe hukumkeda. Joseph do Jisuakʼ mạ̃ṛĩ hataokate sapha musnạ kicricʼteye poṭomkeda, ar cạṭạnireye kholao dohoakatʼ acʼakʼ nawa topareye baekada. Ar topa duạrre mitʼṭen maraṅ okocʼ dhiri guṛgạu idikateye esetʼ oṭokada. Menkhan Magdalaren Mạriạm ar uni eṭagicʼ Mạriạm do ona topa samaṅregekin duṛupʼ tahẽyena. Ado dosar hilokʼ, metakʼme sapṛaokʼ din tayom hilokʼ maraṅ naeke ar Phạrusiko do Pilạt ṭhen senkateko menkeda, “Hujur, disạkedale, uni bulạuicʼ do jiwetʼ tahẽkanreye menleda, ‘pe mãhã khangeń jiwetʼ ruạṛokʼa.’ Onate hukum emokʼme pe mãhã hạbicʼ jemon topa do kajakte horhokʼ. Ar baṅkhan uniren celako hecʼkate uniakʼ mạ̃ṛĩko kombṛo iditaea ar hoṛkoko lạiakoa ‘Uni do gocʼko khone jiwetʼ beretʼ akana.’ Ar onka hoelen khan pạhilakʼ bulạu khon tayomakʼ bulạu do artetʼge bạṛicʼ hoyokʼa.” Unre Pilạt do onkoe metatʼkoa, “Parhadarko idikope ar daṛeakʼ bhor horho reakʼ bebostaepe.” Adoko calaoente dhiri cetanreko mohor chap oṭoada ar kajakte horhoe lạgitʼ pahradarkoko dohoketʼkoa. Ado Jirạukʼ mãhã tayom, hapta reakʼ pạhil din paha poho jokhecʼ Magdalaren Mạriạm ar uni eṭakʼ Mạriạm do topa ńeńelkin calaoena. Unre ackage dhạrti laṛaoena, ente Probhuren mitʼṭen goḍet do serma khone pheḍ hecʼena ar topa duạr khon dhiri ocokʼkate ona cetanreye duṛupʼena. Uniakʼ muṭhạn do bijli leka ar uniakʼ kicricʼko do him leka pĩṛĩtʼ pĩṛĩtʼ ponḍ tahẽkana. Uni botorte pahradarko do thar tharaokʼko ehopʼena ar gocʼ hoṛ baragenako. Serma goḍet do maejiue metatʼkinạ, “Aloben botorokʼa, ente ińiń baḍaea, aben do krus ocolen Jisu ben ńam baṛayede kana. Nonḍe do bạnuea. Uni do cetʼlekae menletʼ onkageye jiwetʼ beretʼ akana. Dela, hijukʼte oneye giticʼlen jaega ńelben. Ar usạra senkate uniren celako lạiako ben uni do gocʼko khone jiwetʼ beretʼ akana ar onko lahate Gạlilteye calakʼ kana. Onko do onḍegeko ńelea. Ar ńelben, iń doń lại lahawatʼbena.” Unkin do botor ar rạskạ salakʼ usạrate topa khon oḍokkate Jisuren celako noa khobor lạiako lạgitʼkin ńir calaoena. Ar ackage unkin samaṅre Jisui hecʼenteye joharatʼkinạ. Unkin do sen sorkate jaṅgakin hạṛupʼkedea arkin sewawadea. Jisui metatʼkinạ, “Aloben botorokʼa; aben do calaokate ińren boehako Gạlilte senokʼ metakoben. Onko do onḍegeko ńeleńa.” Adokin calakʼkan tahẽkan jokhecʼ, ńelpe, pahradarko mod khon adomko do nagrahate senkate one hoyenakʼ joto do maraṅ naekekoko lạiatʼkoa. Unre naekeko ar murubiko do jarwa mitʼkateko sopolhawana ar palṭonko aema ṭaka ematʼkoteko metatʼkoa, “Ape do menpe, ‘ńindạle jạpitʼakatʼ tahẽkanre uniren celako hecʼkateko kombṛo idikedea.’ Ar noa katha disạm cakʼlaoicʼe baḍae lekhan unrele bujhạuaea ar sạjại khonle bańcaopea.” Unre pahradarko do ṭaka hataokate cetʼlekako men ocolen onkageko lại baṛakeda. Onate teheń hạbicʼ ona katha do Jihudiko talare pasnao akana. Ado Jisu Gạlil reakʼ okaṭakʼ burute calakʼe metatʼko tahẽkan onko gel mitʼ celako do ona buruteko calaoena. Ar onḍe Jisuko ńelkede khan uniko sewawadea, menkhan adomko do digdhạ hecʼatʼkoa. Unre Jisu do hecʼsorkateye metatʼkoa “Serma ar dhạrti reakʼ sanam ektiạri iń ṭhen emakana. Onate sanam jạtren hoṛko ṭhen calakʼpe ar ińren celakope. Ar Baba, Hopon, Sonot Jiu ńutumte bạptiskope. Ar okakoń hukum akatʼpe onako doho cetʼakope. Ńelpe, jug mucạtʼ hạbicʼ iń do ape tulucʼ minạńa. Isorren Hopon Jisu Mạsiakʼ bisoetege bhage sombat reakʼ etohopʼ do hoeakana. Jesaea nạbiakʼ puthire noa katha ol akana; Ńelme, ińren goḍet do am lahateń kolekana. Uni do amakʼ hore teara. Hahaṅkarre mitʼṭen hohokạnicʼ reaṅ aṛaṅ, Probhuakʼ hor tearkataepe, Uniakʼ suṛucʼ horko sojhekataepe. Ona katha lekage Johan bạbạptisicʼ do hahaṅkarre senkate hoṛkoe bạptisetʼko tahẽkana ar kại khon ikạ ńam lạgitʼe porcaretʼ tahẽkana jemon hoṛko do mon ạcurkate bạptismako ataṅ. Onate Jihudạ disạm ar Jerusalem nagraharen sanamkoko oḍok hecʼente Johan ṭhen hijukʼko ehopʼena. Ar tinre akoakʼ kạikoko aṅgocketʼa unre Johan do Jordan gaḍare onkoe bạptisketʼkoa. Johan do ũṭ upʼ reakʼ aṅgrop ar ḍanḍare harta reakʼ paṭheakʼ tahẽkantaea. Uni do pohoko ar bir dumur rasae jometʼ tahẽkana. Ar nonka menkateye porcaretʼ tahẽkana, “Iń tayomte mitʼ hoṛe darae kana. Uni do iń khone daṛeangea. Uniakʼ panahi reakʼ phitạ eṅgotʼkate raṛaetae lek hõń baṅkana. Iń do dakʼteń bạptisetʼpea menkhan uni do sonot Jiuteye bạptispea.” Onako oktere Jisu do Gạlil Prodesh reakʼ Nasaret ato khone hecʼena, ar Johan do Jordan gaḍare uniye bạptiskedea. Ar dakʼ khone rakapʼtʼen são sãote Jisu do serma oṛejokʼkan ar sonot Jiu parwa leka acʼ cetanre pheḍ hijukʼkane ńelkedea. Unre serma khon mitʼṭen aṛaṅ ańjomena, “Amge ińren dulạṛiạ Hopon, iń do amreń kusi akana.” Noa tayom Jisu do sonot Jiu hotete hahaṅkarteye idiocoyena. Ar pongel din hạbicʼ Soetan do Jisu laloce udukʼadete kạire ńurhạye lạgitʼe kurumuṭukeda. Onḍe do aema bir janwarko tahẽkana, ar serma goḍetko hõ uniko sapʼsorae kan tahẽkana. Johan hajotreye bhorao ocoyen khan Jisu do Gạlil Prodeshteye calaoena. Ar noa katha menkate uni do Isorakʼ bhage sombat porcare ehopʼena, “Okte purạu akana, Isorakʼ raj do sorakana. Kại khon mon ạcurtape ar bhage sombatre pạtiạukʼpe.” Mitʼ din Jisu do Gạlil doreão aṛeteye parom calakʼkan tahẽkana. Unre Simon ar uniren boeha Andreas do doreãore jhạlikin oḍaokan tahẽkana. Ente unkin do jạilạkin tahẽkana. Jisui metatʼkinạ, “Dela iń sãote hijukʼben. Iń do hoṛ sasapʼ hoṛiń benao bena.” Unkin do unrege jhạlikin bạgi oṭowatʼte Jisukin pańjakedea. Ado onḍe khon laha ńokʼe sen idiyen khan Sabdaeren hopon Jakob ar Johan tạkine ńel ńamketʼkinạ. Unkin do lạukạre duṛupʼkate jhạlikin jujutkan tahẽkana. Jisu do unkin hõe hohoatʼkinạ, ar unrege ạkinren apat Sabdae do kạmiạko sãote lạukạrekin bạgi oṭoadete Jisukin pańjakedea. Jisu ar acʼren cela do Kapharnạhum nagrahateko calaoena. Ar jirạukʼ mãhãre uni do sunạgogre bolokate cetʼakoe ehopʼena. Ar uniakʼ cecetʼakʼte hoṛko do ạḍiko hahaṛayena, ente sostor baḍaeko leka do baṅ, bickom ạidạri menakʼtae hoṛ lekae cetʼakokan tahẽkana. Ona jokhecʼ sunạgogre bạṛicʼ jiu capaṛ akawade mitʼ hoṛe tahẽkana. Uni do ãṭ aṛaṅte hohoateye menkeda, “E Nasaretren Jisu, ale tulucʼ amakʼ do cetʼ? Nosṭole lạgitʼem hecʼ akana? Baḍaegeạń am dom okoe kana; am do Isorren uni sonoticʼ kanam.” Unre Jisu do bạṛicʼ jiu dhomkao kedeteye metadea, “Thirokʼme ar uni khon oḍok calakʼme.” Khange bạṛicʼ jiu do uni hoṛe mocṛa mucṛikedea ar kikiạuate uni khone oḍok calaoena. Noa ńelte hoṛko do hahaṛayente ako akore menjoṅko ehopʼena. “Noako do cetʼ kana? Ar noa ạidạrite perecʼ nawa cecetʼakʼ baṅ cetʼkan? Ente uni do bạṛicʼ jiukoe hukumako kana ar onko do uniakʼ kathako bataoetʼtaea.” Ar noa iạte Gạlil Prodesh reakʼ joto jaegakore Jisuakʼ katha do ạḍi usạra pasnao idiyena. Ado sunạgog khonko oḍoken khan onko do Simon ar Andreas tạkinakʼ oṛakʼteko calaoena. Onko sãote Jakob ar Johan hõkin tahẽkana. Unre Simon hanhartetʼ do ruạ iạteye giticʼ akan tahẽkana. Ar Jisui hecʼen khan uni reaṅko lạiadea Jisu do uni ṭhen senkate ti sapʼkedeteye beretʼkedea. Ar inạtege uniakʼ ruạ do chuṭạuentaea ar jom ocoko lạgitʼe sapʼ soratʼkoa. Ado enhilokʼ candoe hạsuren khan ạyupʼ jokhecʼ hoṛko do joto lekan rugi ar bhut capaṛ hoṛko Jisu ṭhenko ạguketʼkoa. Unre nagraharen hoṛ do ona oṛakʼ reakʼ duạr ṭhen hecʼkateko jarwayena. Ar Jisu do ạḍi lekan rogte jạbun akan hoṛkoe bogeketʼkoa ar aema bhut capaṛ akatʼko hõe oḍok giḍiketʼkoa. Uni do bhutko bae roṛ ocoatʼkoa, ente onko doko baḍae akade tahẽkana acʼ doe okoe kana mente. Dosar hilokʼ setakʼ ńut tahẽkanre Jisu doe beretʼena ar oṛakʼ bạgikate mitʼṭen nisun jaegare senkate koejoṅe ehopʼena. Unre Simon ar uniren sãotenko do Jisu sendra baṛayeko ehopʼena. Arko ńamkede khan uniko metadea, “Sanamkoge amko ńam baṛayetʼmea.” Jisui metatʼkoa, “Dela bon, sorteakʼ atokote bon calakʼa jemon onakore hõń porcar daṛeakʼ, ente ona lạgitʼgeń hecʼakana.” Nonkage Jisu do Gạlil reakʼ joto jaegakore senkate Jihudikoakʼ sunạgogreye porcarkeda ar bhutkoe oḍok giḍiketʼkoa. Mitʼṭen murhucʼ jom rugi do Jisu ṭhen hecʼkate ikhṛumenteye menkeda, “Sanalem khanem boge daṛeạńạ.” Jisu do uni hoṛre mãyã hecʼadea. Onate ti tiạrkate joṭetʼkedeteye metadea, “Iń hõ onkageń khojkana, ma saphakokʼme.” Ar inạtege uniakʼ murhucʼ jom rog do boge utạrena. Unre Jisu do uniye bidạkadea, menkhan ona lahare sontorkedeteye metadea, “Ńelme, noa katha do okoe ṭhen hõ alom lại baṛaea. Bickom naeke ṭhen senkate ńel ocokʼme ar saphakʼ lạgitʼ Mose okaṭakʼ samaṅ reakʼ kathae menakatʼ ona samaṅme. Ar nonkate naekeko ṭhenem sạbudokʼa, am dom boge akana mente.” Menkhan uni hoṛ do bahrete oḍok senkate sanam jaegare noa khobor lại pasnaoe ehopʼena. Onate Jisu do okaṭakʼ nagrahate hõ sodorte bae bolo daṛeada. Uni do nisun jaegakore tahen hoyentaea; ar enrehõ hoṛko do sanam jaega khon uni ṭhen hijukʼko ehopʼena. Thoṛa din tayom Jisu do arhõ Kapharnạhum nagrahateye calaoena. Ar hoṛko do mitʼṭen oṛakʼre menaea menteko ańjomkeda. Unre nunạkʼ hoṛko jarwayena je, duạr bahrere hõ jaega do ar baṅ tahẽlena. Ar Jisu do hoṛko ṭhen Isorakʼ kathae porcaretʼkan tahẽkana. Ona jokhecʼ mitʼṭen mitʼkaṛ gocʼ rog hoṛ do pon hoṛte gokʼkate uni ṭhenko ạgukedea. Menkhan bhiṛ iạte Jisu ṭhen bako idi seṭer daṛeadea. Onate onko do Jisu okareye tahẽkan ṭhik ona coṭ reakʼ calko ocokʼkeda. Ar ona phãkte parkom sudhạ uni rugi hoṛ do latarteko pheḍgotʼkadea. Jisu do onkoakʼ pạtiạu ńelte uni hoṛe metadea, “Amakʼ kại do ikạyen tama.” Onḍe do adom sostor baḍaekoko duṛupʼ akan tahẽkana. Onko do mone moneteko gunạnokʼkan tahẽkana, “Nui hoṛ cedakʼ nonkan katha doe roṛeda? Nui do Isore opomane kana. Isor chaḍa ar okoe hale kại doe ikạ daṛekea? Jisu do onkoakʼ mon reakʼ nạndi gundikʼakʼe baḍaeketʼ khane metatʼkoa, “Mone monete ona katha reakʼ do cedakʼpe hudisokʼ kana? Nui rugi hoṛ do okaṭakʼ metae algawa, ‘amakʼ kại ikạyen tama’ se, ‘beretʼkate, amakʼ parkom kuṭuṅtam ar taṛamme?’ Menkhan ape jemonpe baḍae daṛeakʼ Manwa Hopon do dhạrtire kại ikạ reakʼ ektiạri menakʼtaea.” Ar ninạkʼ hạbicʼ roṛkate uni rugi hoṛe metadea, “Ińiń metamkana, ma beretʼme, amakʼ parkom kuṭuṅtam ar oṛakʼte calakʼme.” Unre uni hoṛ doe beretʼena ar acʼakʼ parkom kuṭuṅkate jotoko samaṅre bahreteye oḍok calaoena. Ar noa iạte sanamkoko hahaṛayena ar Isor sarhaokedeteko menkeda, “Nonkanakʼ do tishõ babon ńelakada.” Jisu do arhõ Gạlil doreão aṛeteye oḍok calaoena. Unre ạḍi utạr hoṛ do uni ṭhenko hecʼena ar onko cetʼakoe ehopʼena. Inạ tayom horteye parom calakʼkan tahẽkanre Alphaeren hopon Lewi do mạsul uṭhạu oṛakʼre duṛupʼ akane ńelkedea. Jisu do uniye metadea, “Dela hijukʼte, ińren cela hoyokʼme.” Unre Liwi doe beretʼente Jisui pańjakedea. Tayomte Jisu do Lewi oṛakʼre jojome duṛupʼena. Unre aema mạsul uṭhạuko ar bạṛicʼ hoṛko hõ Jisu ar uniren celako sãote jom lạgitʼko duṛupʼena, ente ạḍi utạr hoṛ do Jisu sãoteko calakʼkan tahẽkana. Ado Phạrusiko dolren sostor baḍaeko do Jisu mạsul uṭhạuko ar bạṛicʼ hoṛko tulucʼ jojomkanko ńelkede khan uniren celakoko metatʼkoa, “Uni do mạsul uṭhạuko ar bạṛicʼ hoṛko tulucʼ cedakʼe jom ńũiyeda?” Noa katha ańjomkate Jisu do sostor baḍaekoe metatʼkoa, “Boge hoṛko lạgitʼ raranicʼ reakʼ jạruṛ do bạnukʼa, menkhan ruạkʼko lạgitʼ do jạruṛgea. Dhorom hoṛ hohoako lạgitʼ do bạń hecʼakana menkhan kại hoṛko lạgitʼgeń hecʼakana.” Mitʼ dhao Johan bạbạptisicʼren celako ar Phạrusiko doko upạsetʼ tahẽkana. Ona ńelte adom hoṛ do hecʼkate Jisuko metadea, “Johanren cela ar Phạrusiko doko upạseda, menkhan amren cela do cedakʼ bako upạsetʼ kana?” Jisui metatʼkoa, “Jãwãe beṭa soṅgere tahen tulucʼ cetʼ bạriạtko doko upạs daṛekea? Tinạkʼ din soṅgere Jãwãe beṭae tahen unạkʼ din onko do bako upạsa. Menkhan okte hijukʼ kana Jãwãe beṭa tinre onko khone idiocokʼa, unre onko doko upạsa. “Okoe hõ mare kicricʼre nawa kicricʼ do bako tạli jalada. Arko onkae khan mare kicricʼ khon nawa rokʼakʼ do oṛecʼ hijukʼa. Onate oṛecʼ do artetʼge lạṭu idikʼa. Okoe hõ mare kumre nawa darkha rasa do bako dohoea. Arko dohoe khan nawa rasate kumko oṛejokʼa ar darkha rasa hõ nosṭokʼa. Onate nawa darkha rasa do nawa kumregeko dul dohoea.” Mitʼ jirạukʼ mãhãre Jisu do phosol talateye parom calakʼkan tahẽkana. Ar uniren celako do calakʼ tulucʼ geleko hotʼetʼkan tahẽkana. Ona ńelte Phạrusiko do Jisuko metadea, “Dhorom reakʼ niạm lekate jirạukʼ mãhãre oka baṅ ganokʼ ona do cedakʼko kạmi kana?” Jisui metatʼkoa, “Abiạthar do tinre maraṅ naekeye tahẽkana unre Dạud ar uni soṅgetenko reṅgecʼletʼkore, Dạud okae cekaletʼ ona do cetʼ tishõ bape paṛhao akada? Uni do Isorakʼ oṛakʼre bolokate samaṅ akan piṭhạ reakʼe jomkeda ar acʼ sãotenko hõe ematʼkoa. Menkhan ona jom reakʼ ạn do maraṅ naekeko chaḍa ar okoeakʼ hõ baṅ tahẽkana.” Jisu do arhõe metatʼkoa, “Manwa lạgitʼge jirạukʼ mãhã do hoeakana, menkhan jirạukʼ mãhã lạgitʼ manwa do baṅa. Onate Manwa Hopon do jirạukʼ mãhãren hõ mạlik kanae.” Ona tayom Jisu do arhõ sunạgogteye boloyena. Ar onḍe do nonkan mitʼṭen hoṛe tahẽkana okoe do mitʼ ti borocʼge tahẽkantae. Ar Phạrusiko modren adom hoṛ do Jisu dusire paṛaoe lạgitʼ ạtko ńam baṛayetʼkan tahẽkana. Ar jirạukʼ mãhãre Jisu jãhãeye bogekoa se baṅ onate bhageteko tạnkhiyede tahẽkana. Jisu do uni borocʼ ti hoṛe metadea, “Beretʼme ar talare teṅgokʼme.” Ona tayom Phạrusikoe kuliketʼkoa, “Jirạukʼ mãhãre bhage kạmi ganokʼa se bạṛicʼ kạmi? Jiwi bańcao se bạṛicʼ giḍikakʼ ganokʼa?” Menkhan Phạrusiko do cetʼge bako roṛ ruạṛadea. Unre Jisu do edrete onkoe beṅgetʼatʼkoa ar onkoakʼ keṭecʼ mon iạte bhabna salakʼ uni hoṛe metadea, “Amakʼ ti tiạrtam.” Adoe tiạrketʼ khan ti do boge utạrentaea. Unre Phạrusiko do bahrete oḍok hecʼkate Jisu cetʼlekateko gojea ona reaṅ Herod secʼrenko sãote sopolhako dhurạuena. Inạ tayom Jisu do acʼren celako sãote doreão aṛeteye calaoena. Ar Gạlil Prodesren ạḍi utạr hoṛ do uniko pańja idikedea. Jisu okakoe kạmi akatʼ ona reakʼ katha ańjomkate Jihudạ, Jerusalem, Edom, Jordan gaḍa hanasaren, Tur ar Sidon nagraha beṛhae secʼ khon gadel hoṛko do uni ṭhenko hecʼena. Jisu do acʼren celako mitʼṭen huḍiń lạukạ ṭhik dohokakʼe metatʼkoa jemon bhiṛ iạte hoṛko aloko riḍạtʼ ciride. Ar ḍher hoṛe boge akatʼko tahẽkante rugiko do uni joṭede lạgitʼko ṭhela ṭhilikʼkan tahẽkana. Ar bạṛicʼ jiuko do uniko ńelle khange uni samaṅreko bhindạṛokʼkan tahẽkana ar kikiạuateko metaekan tahẽkana, “Am dom Isorren Hopon kana.” Menkhan uni doe sontoretʼko tahẽkana okoe hõ jemon aloko sodore acʼ doe okoe kana mente. Ona tayom Jisu do buruteye rakapʼena ar acʼakʼ kusileka uni do thoṛa hoṛ acʼ ṭhene hohoatʼkoa. Arko hecʼen khan uni do gelbar hoṛko apostol hudạreye bahalketʼkoa, jemon onko do acʼ são sãoteko tahente, bạṛicʼ jiuko oḍok giḍiko reakʼ daṛeye danakote porcar lạgitʼe kol daṛeako. Ar okoe gelbar hoṛe bahalketʼko onko doko hoyokʼ kana, Simon, uni do Patrase bahnakedea; Sabdaeren hopon Jakob ar Johan, (nukinakʼ ńutum do Boanergise dohoketʼ tạkina metakʼme huḍurren hoponkin); Andreas, Philip, Bartholomae, Mathae, Thoma, Alphaeren hopon Jakob, Thaddae, ar moullobadi Simon, ar Jihudạ Iskariot, okoe do Jisu bạiriko thene soprot ocolede. Jisu oṛakʼteye hecʼen khan uni ṭhen arhõ nunạkʼ hoṛko jarwayena je, acʼ ar acʼren celako do cetʼge bako jom daṛeada. Ado Jisuren peṛako noa khoborko ańjomketʼ khan oḍok ạguye lạgitʼko hecʼena. Onkoko menkeda, “Uni doe koṅka akana.” Ar Jerusalem khonko hecʼakan tahẽkan sostor baḍaeko doko menkeda, “Unire do Beelsebul menaea. Uni do bạṛicʼ jiuren raj hotete bạṛicʼ jiukoe oḍok giḍiyetʼkoa.” Jisu do sostor baḍaekoe hohoatʼkoa ar cetʼako lạgitʼe metatʼkoa, “Soetan do cetʼ Soetane oḍok giḍi daṛeaea?” Jãhãṭakʼ rajosṭige apnar talare hạṭińlen khan ona rajosṭi do ohoge ṭikạu tahẽlena. Mitʼṭen gharońj hõ hạṭińlen khan ona gharońj do baṅ ṭikạukʼa. Onkage Soetan hõ apnar birudre teṅgokate acʼakʼ daṛeye rạpud khan uni hõ ohoe ṭikạu daṛelena ar onḍege uni doe caba utạrokʼa. Noa katha do sạri kana je, mitʼṭen daṛean hoṛ bako tol maṛaṅ lekhan okoe hõ uniakʼ oṛakʼre bolokate jinisko ohoe luṭ daṛeletaea. Menkhane tol maṛaṅle khan doe luṭ daṛeakʼgea. Sạrigeń metapekana, manwakoakʼ sanam kại ar Isor birudre opoman katha do ikạkʼtaea, menkhan sonot Jiu birudre opoman katha do tisge baṅ ikạkʼtaea. Uni hoṛakʼ kại do jaejug hạbicʼ tahentaea.” Sostor baḍaeko oneko menletʼ tahẽkan, “Unire do bạṛicʼ jiu menaea,” Onkoakʼ ona katha iạtege Jisu do noa kathae menkeda. Inạ tayom Jisuren eṅgat ar boehako do onḍeko hecʼena ar bahrere teṅgokate Jisu hohoae lạgitʼ khoborko kolkeda. Unre Jisu beṛhaete ạḍi utạr hoṛko duṛupʼ akan tahẽkana. Adoko metadea, “Amren eṅgam ar boeham ar misramteko bahrereko khojetʼmea.” Jisui metatʼkoa, “Okoe kanae eṅgạń ar okoe kanako ińren boehańko do?” Ado acʼ beṛhaete duṛupʼ akanko secʼ beṅgetʼ ạcurkateye menkeda, “Noko kangeako ińren eṅgạń ar boehańko do! Okoe Isorakʼ sana lekako senokʼkan onkoge ińren, boeha, misera ar eṅgạń kanako.” Jisu do arhõ Gạlil doreão aṛere hoṛko cetʼakoe ehopʼena. Ar acʼ beṛhaete ạḍi utạr hoṛko bhiṛkeda; onate uni do doreãore mitʼṭen lạukạre decʼenteye duṛupʼena ar gadel hoṛ do ghuṭureko teṅgo tahẽyena. Uni do golpokote ạḍi okocʼakʼko reaṅ cetʼatʼkoe ehopʼena. Uni doe metatʼkoa, “Mitʼṭen casa hoṛ do itạ erokʼ lạgitʼe oḍok calaoena. Ado erokʼ jokhecʼ adomakʼ itạ do hor aṛere ńurena, ar cẽṛẽko hecʼkate onako halaṅ jomkeda. Ar adomakʼ itạ do dhiri hasare ńurena. Menkhan onḍe dạriạ hasa baṅ tahẽkana. Ar dạriạ hasa baṅ tahẽkante itạ do usạrate janam rakapʼena. Ado siń candoe rakapʼen khan onako do tolmocʼ cabayena ar mońjte baṅ rehetʼlente rohoṛ kạrcupʼena. Adomakʼ itạ do jạnumko talare ńurena. Ar jạnumko hara idiyen khan onae jhurkeda, ar onate baṅ gele belelena. Menkhan thoṛa itạ do bhage hasare ńurente janamkate harayena ar gele beleyena, adom do pegel doboṛ, adom do turui gel doboṛ, ar adom do mitʼ sae doboṛ phosole hoeocokeda.” Ado mucạtʼreye menkeda, “Ańjom lạgitʼ lutur menakʼtae hoṛ doe ańjom ma.” Ado bhiṛ komaoen khan acʼren gelbar celako ar beṛhaeten hoṛko do ona golpo reakʼ bhedko kulikedea. Jisui metatʼkoa, “Ape do Isorakʼ raj reakʼ sạri okoakʼkope baḍae ocoakana, menkhan eṭakʼko ṭhen do golpo talate lạiạgokʼ kana, sonot sostor reakʼ katha leka, ‘ńeńel doko ńeńelgea menkhan bako oroma, ańjom doko ańjomgea, menkhan bako bujhạua. Jemon aloko ạcurokʼ ar alo ikạkʼtako.’ ” Ona tayom Jisui metatʼkoa, “Noa golpo reakʼ mane do cetʼ bape bujhạuleda? Enḍekhan eṭakʼ golpoko reakʼ mane do cekatepe bujhạua? Casa hoṛ oka itại erketʼ ona itạ do Isorakʼ katha kana. Ar hor aṛere ńuren itạte do nonkanko reaṅge roṛ akana okoe do ona kathako ańjomketʼ, menkhan Soetan hecʼkate unrege onkoakʼ ontorre erakan kathakoe halaṅ ạtkira. Ar dhiri hasare ńuren itạte do onko reaṅge roṛ akana okoe do ona katha ańjomkate, unrege rạskạ kateko ataṅetʼkan, menkhan onkore mońjte rehetʼ baṅ bạisạukʼ kante eken thoṛa din lạgitʼko ṭarhao tahen kana. Ente ona katha khạtirte tinre santao ar khedreko paṛaokʼ kana unre onko doko pạcokʼ kana. Jạnumko talare erlen itạte do onko reaṅge roṛ akana okoe do ona kathako ańjomketʼ, menkhan gharońj reakʼ dạndi, ar dhon reakʼ mãyã ar emanteakʼ laloc hecʼakokante onko do onako ten loṭomkakʼ kana; ar onate onkore jãhãn jo do baṅ jokʼ kana. Ar bhage hasare ńuren itạte do onko reaṅge roṛ akana okoe do ona katha ańjomkateko ataṅetʼkan arko jokʼ kan. Okoe do pegel doboṛ, okoe do turui gel doboṛ, ar okoe do mitʼ sae doboṛ.” Jisu do arhõe metatʼkoa, “Jãhãege diuhe jeretʼkate cetʼ khạclạkʼ se cạuki latarreko dohoegea? Ona do cetʼ diuhe dohowakʼ cetanre bako dohoea? Jãhãnakʼge danaṅ tahen ona do sodorokʼ lạgitʼge danaṅ tahena; arhõ jãhãnakʼge poṭom tahen ona do oṭag lạgitʼge poṭom tahena. Ańjom lạgitʼ lutur menakʼtae hoṛ doe ańjom ma.” Ona tayom Jisui metatʼkoa, “Okaṭakʼpe ańjometʼkan ona reaṅ luturakʼpe. Oka sosoṅakʼtepe soṅa, inạtege ape hõ soṅapea; arko em juṭucʼapea. Okoeakʼ menakʼtae uni do arhõe emocokʼa, menkhan okoeakʼ oka menakʼtae ona hõe recʼ ocokʼa.” Jisu do arhõe metatʼkoa, “Isorakʼ raj do nonka lekana: one mitʼṭen hoṛ do otre itạye erketʼ. Uni do siń ar ńindạ gitijokʼ ar beredotʼte okteye khemaokeda. Ar inạ oktere itạ do janamkate harayena, menkhan cekate hoyena uni do bae baḍaelakʼa. Hasa do acʼtege phosole janam ocokeda, pạhil do gạchi, ona tayom gele ar gelere do danage. Ado phosol beleyen khan uni do datrome calaokeda, ente phosol samṭao okte do hoyena.” Ona tayom Jisui metatʼkoa, “Isorakʼ raj do cetʼ sãote bon jurikea? Oka lekan phen hotete ona doń bujhạu ocoea? Ona raj do mitʼṭen tuṛi jaṅ lekana. One oka do joto itạko khon huḍiń utạrge. Menkhan haralen khan do joto aṛakʼ sakamko khon napṛakʼge hoyokʼa, ar nunạkʼ maraṅ maraṅ ḍạrko hoyokʼa je, coṭren cẽṛẽko hõ ona reakʼ ḍạrkore tukạko benao joṅa.” Nonkage Jisu do arhõ ạḍi utạr golpokote Isorakʼ kathakoe galmarao akokan tahẽkana. Ar tinạkʼ ganko bujhạu daṛeakʼkan tahẽkan inạkʼgeye lại akokan tahẽkana. Golpo chaḍa uni do bae cetʼakokan tahẽkana, menkhan tinre celako do acʼ sãote eskarko tahena unre jotowakʼe bhoṅako kan tahẽkana. Enhilokʼ ạyupʼen khan Jisu do acʼren celakoe metatʼkoa, “Dela, doreão hanasate bon parom calakʼa.” Unre celako do gadel hoṛko bạgiatʼkote Jisu okaṭakʼ lạukạreye tahẽkan ona lạukạtege uniko idi torakedea. Menkhan onḍe do arhõ eṭakʼ lạukạko tahẽkana. Ado lạukạ calakʼkan tahẽkanre mitʼṭen maraṅ birbão hecʼgotʼena ar ḍheoko nunạkʼ ãṭ chilkạu bolokʼkan tahẽkana je, lạukạ do dakʼte perejokʼ ehopʼena. Unre Jisu do lạukạ reakʼ tayom secʼre bạlisre bohokʼateye jạpitʼ akatʼ tahẽkana. Khange celako do beretʼ kedeteko metadea, “E Guru, abo bon gujukʼkan do cetʼ bam hetawakʼ kana?” Jisu doe beretʼena ar birbãoe dhomkaoketʼte doreãoe metatʼa, “Thirokʼme, hapekʼme,” Onate hoe do thirena ar jotowakʼ ḍel ḍel nijhumena. Ado celakoe metatʼkoa, “Cedakʼpe botorokʼ kana? Cekate biswạs do bạnukʼtapea?” Noate celako do ạḍi bạṛicʼko botorena ar ako ako talare memenko ehopʼena, “Nui doe okoe kante hoe hõ hoe ar doreão hõ doreãokin bataoetʼtaea?” Inạ tayom Jisu ar acʼren celako do Gạlil doreão paromkate Gerasenikoakʼ elakateko calaoena. Ado Jisu lạukạ khone pheḍ gotʼen khan bạṛicʼ jiu capaṛ akawade mitʼṭen hoṛ do mạ̃ṛĩ poḍa khon uni samaṅreye oḍok hecʼena. Uni hoṛ do mạ̃ṛĩ poḍakoregeye tahẽnkan tahẽkana ar sikṛikote hõ bako tol ṭarhao daṛeaekan tahẽkana. Ạḍi dhao biṛikote ar sikṛikoteko tolkaekan tahẽkana, menkhan uni do onae topakʼetʼ tahẽkana ar jaṅga reakʼ biṛiko hõe rạputʼetʼ tahẽkana. Ar okoege bako sambṛao daṛeaekan tahẽkana. Uni do siń ńindạ topa danderkore ar burukoreye kikiạu baṛayetʼ tahẽkana ar dhirite acʼakʼ hoṛmoe koṭecʼ sirạ soroyetʼ tahẽkana. Ado Jisu sạṅgińre tahenregeye ńel ńamkede khan uni do ńir hecʼente Jisui sewawadea, ar ãṭ aṛaṅteye menkeda, “Maraṅ Isorren Hopon Jisu, iń tulucʼ amakʼ do cetʼ? Isor ńutumteń kiriạkʼ kana, alom sasetińạ.” Noa iạteye menkeda ente Jisu do uniye metade tahẽkana, “Bạṛicʼ jiu, nui hoṛ khon oḍok calakʼme.” Jisu do uniye kulikedea, “Celeama ńutum do?” Uniye menkeda, “Ińakʼ ńutum do phạdạńạ, ente aema menakʼlea.” Uni do Jisu nehõradeteye metadea ona elaka khon jemon aloe oḍok giḍikako. Un jokhecʼ ona sor reakʼ buru dhasnare maraṅ mitʼ khạṛ sukriko ạtińkan tahẽkana. Bạṛicʼ jiuko do Jisu nehõradeteko metadea, “Onko khạṛ sukrikore kolkaleme; ar onko bhitrire bolo ocoaleme.” Ado Jisui hukumatʼko khan bạṛicʼ jiuko do oḍokente sukrikoreko boloyena. Onate onko sukri do daṛaṅ secʼteko ńir senente doreãoreko ńurhạyena arko unum gocʼena. Ona khạṛre bar hajar gan sukriko tahẽkana. Ar okoe sukriko gupikan tahẽkan onko do atoteko ńir calaoena ar sanam jaegakoreko lại pasnaokeda. Unre hoṛko do cetʼ hoeakana mente ńel lạgitʼko oḍok hecʼena. Ar Jisu ṭhenko hecʼen khan bạṛicʼ jiu capaṛ akawade tahẽkan hoṛ do kicricʼ horokʼkate duṛupʼ akan ar boge akanko ńelkedea. Noa ńelte hoṛko do botor caṛhaoatʼkoa. Noa ghoṭna okoeko ńelletʼ onko do bạṛcʼ jiu capaṛ akawade hoṛ ar khạṛ sukriko reaṅko lại baṛakeda. Onate hoṛko do Jisuko nehõradea jemon akoakʼ simạ khone calao joṅ. Ado Jisu lạukạreye dejokʼkan tahẽkanre bạṛicʼ jiu capaṛ akawade tahẽkan hoṛ do uni sãote calakʼ lạgitʼe nehõradea. Menkhan Jisu do noa menkateye bidạkadea, “Amakʼ oṛakʼte ruạṛ calakʼme ar Probhui daya akatʼme ar am lạgitʼ tinạkʼ maraṅe kạmi akatʼ ona lạiakome.” Unre uni hoṛ doe calaoena ar Jisu acʼ lạgitʼ tinạkʼ maraṅe kạmi akatʼ ona do Dekapoli elakakore lại baṛaye ehopʼena, ar onate jotokoko hahaṛayena. Ado Jisu lạukạte arhõ doreão hanasae paromen khan ạḍi utạr hoṛ do uni ṭhen hecʼkateko jarwayena. Menkhan uni do unhõ doreão aṛereye tahẽkana. Unre Jihudikoakʼ sunạgogren Jaerus ńutuman mitʼṭen mukhiạ hoṛ do onḍeye hecʼena ar Jisui ńelkede khan uniakʼ jaṅgareye giḍiyena. Uni do Jisu nehõradeteye metadea, “Ińren kuṛi do gujukʼ dạkhilre menaea. Ado senkate dela capoyem, ar inạtegeye boge utạrokʼa.” Unre Jisu do soṅgeteye calaoena. Ar gadel hoṛ do uniko pańja idikedea ar beṛhaeteko riḍetʼ ciritʼedekan tahẽkana. Ona bhiṛ bhitrire mitʼṭen maejiue tahẽkana okoe do gelbar bochor khon pordhol rogteye jạbun akan tahẽkan. Uni do raranko ṭhen khon ạḍi duke ńamakatʼ tahẽkana, ar acʼakʼ oka tahekan ona saname khoroc caba akatʼ tahẽkana, menkhan boge baṅkate dinke din uni doe kạhil idikʼkan tahẽkana. Ado Jisu reaṅe ańjomketʼ khan bhiṛ bhitrirege uni do tayom secʼte senkate Jisuakʼ oyonakʼe joṭetʼketʼtaea, enteye monejoṅkan tahẽkana eken uniakʼ kicricʼe joṭetʼ daṛeatae khangeye bogekʼa. Ar Jisuakʼ oyonakʼe joṭetʼketʼ são sãote mãyãm oḍokokʼ do thirentaea ar hoṛmoreye bujhạukeda rog do boge utạrena. Unre Jisu do acʼ khon daṛe oḍokena menteye bujhạukeda. Onate beṛhaete beṅgetʼ ạcurkateye kuliyana, “Okoeye joṭetʼkedeńa?” Unre uniren celakoko metadea, “Ńeletʼkoge com gadel hoṛko riḍạtʼ ciritʼetʼmea, ar enhõm meneda, okoeye joṭetʼ kedeńạ?” Ado okoeṭakʼe kạmi akatʼ uni ńele lạgitʼ Jisu do beṛhaete beṅgetʼ ạcure ehopʼena. Uni maejiu do hoeakanakʼe bujhạuketʼ khan thar tharaoate hecʼkate Jisuakʼ jaṅgareye giḍiyena ar jotowakʼe lạiadea Jisu do uniye metadea, “E mạ̃i, amakʼ pạtiạugeye boge akatʼmea. Sulukte calao joṅme, ar amakʼ duk khon boge akae tahenme.” Jisui roroṛkan tahẽkanrege sunạgogren mukhiạ hoṛakʼ oṛakʼ khon thoṛa hoṛ hecʼkate Jaerusko metadea, “Amren kuṛi doe gocʼena; Guru do ar alom haronea.” Onko hoṛkoakʼ katha ańjomkate Jisu do Jaeruse metadea, “Alom botorokʼa, eken pạtiạukʼme.” Ado Patras, Jakob, ar Johan chaḍa okoe hõ acʼ soṅgete bae sen ocoatʼkoa. Uni do Jaerusakʼ oṛakʼteye hecʼen khan gulmal hoyokʼkane ńelkeda. Ar hoṛko do kạuạ rạuạko rakʼ homoreda. Jisu do bhitrite bolokate hoṛkoe metatʼkoa, “Cedakʼpe rakʼreda? Kuṛi do bacoe gocʼakan, ekene jạpitʼ akada.” Noa katha ańjomkate hoṛko do Jisuko landa dhutʼadea. Unre Jisu do oṛakʼ khon sanam hoṛ oḍokokʼe metatʼkoa. Ona tayom kuṛiren eṅgat-apat ar acʼren celako soṅgekate kuṛiye tahẽkan oṛakʼe boloyena. Kuṛiwakʼ umer do gelbar bochor tahẽkana. Jisu do ti sapʼkedeteye menkeda; “Talitha kum.” Metakʼme “E mạ̃i metam kạnạń ma beretʼme.” Ar inạtege kuṛi doe beretʼena ar taṛam baṛaye ehopʼena. Noa iạte onko do ạḍitetʼko hahaṛayena. Jisu do noa ghoṭna okoe ṭhen hõ baṅ lại baṛae lạgitʼe sontorkatʼkoa; ar kuṛi do thoṛa jomakʼ emae lạgitʼe metatʼkoa. Ona tayom Jisu do ona jaegae bạgi oṭoatʼte acʼakʼ atoteye calaoena, ar uniren celako hõ acʼ soṅgeteko sen torayena. Ado Jirạukʼ mãhã seṭeren khan uni do sunạgogre bolokate cetʼakoe ehopʼena. Ar ḍher hoṛ uniakʼ katha ańjomkate hahaṛayente memenko ehopʼena, “Nui do oka khon noakoe ńamakada? Ar noa akele em ocoakan, noa baṅ cetʼkan? Ar hahaṛa kạmiko hõe kạmi kana. Nui do cetʼ uni kaṭmistiri doe baṅkana? Nui do cetʼ Mạriạmren hopon doe baṅkana? Jakob, Joses, Jihudạ ar Simon takoren boeha doe baṅkana? Uniren miserako cetʼ nonḍe abo talare bạnukʼkoa?” Nonkage hoṛko do Jisu iạte monre tạkijokʼko ehopʼena. Unre Jisui metatʼkoa, “Nij ato, nij peṛa ar nij gharońj chaḍa sanam jaegarege nạbiko do manotko ńama.” Ona tayom thoṛagan rugikoe capoketʼkote onkoe bogeketʼkoa, menkhan onḍe do jãhãn hahaṛa kạmi bae kạmileda. Ar hoṛko bako pạtiạuadete uni do ạḍiye hahaṛayena. Ona tayom Jisu do ato ato senkate hoṛko cetʼakoe ehopʼena. Uni do acʼren gelbar celako acʼ ṭhene hoho sorketʼkoa ar babar hoṛkate porcar lạgitʼe kolkatʼkoa. Ar bạricʼ jiuko cetanre hõ ektiạriye ematʼkoa. Uni do horte lạgitʼ mitʼṭen ṭheṅga chaḍa cetʼge bae idiocowatʼkoa. Piṭhạ, khuti, gạńjiạre poesa hõ iditorae baronketʼkoa. Panahi horokʼ doe metatʼkogea, menkhan aṅgrop do mitʼṭen khon bạ̃ṛti idiye manakatʼkoa. Uni do arhõe metatʼkoa, “Jãhãṭakʼ oṛakʼregepe bolokʼ ona ato ạuripe bạgiyakʼ hạbicʼ ona oṛakʼrege tahenpe. Ar jãhã jaegaren hoṛ bako ataṅpe se kathako bako ańjom enḍekhan, ona jaegape bạgi oṭowakʼre apeakʼ jaṅga talka reakʼ dhuṛi hõ koṭa oṭokakʼpe jemon onage onko birudre goha hoyokʼ.” Unre celako do senkate porcarko ehopʼena jemon hoṛko kại khon monko ạcurtako. Onko do aema bạṛicʼ jiukoko oḍok giḍikatʼkoa ar ạḍi utạr rugikohõ bohokʼre sunumko ojokʼatʼkoteko bogeketʼkoa. Jisuakʼ ńutum goṭa ṭạnḍi pasnao akan tahẽkante Herod raj hõ Jisuakʼ kathae ańjom tiyokʼkeda. Unre adom adom hoṛko menetʼ tahẽkana, “Nui doe Johan bạbạptisicʼ kana. Unige gocʼko khone jiwetʼ beretʼ akante hahaṛawakʼkoe kạmi kana.” Ar adomko doko menetʼ tahẽkana, “Uni doe Eliạ kana” Arhõ adomko doko menetʼ tahẽkana, “Sedaeren nạbiko leka uni hõ mitʼgoṭen nạbi kanae.” Noako katha ańjomkate Herode menkeda, “Uni doe Johan kana, one okoeakʼ bohokʼ iń makʼ ńur ocoletʼtae. Uni do arhõe jiwetʼ ruạṛ akana.” Noa ghoṭna lahare Herod do hoṛ kolkate Johan sapʼkate hajotreye bhorao akade tahẽkana. Uni do acʼren boeha Philipren bạhu Herodiạ iạte noae nonkaleda. Herod do Herodiại baplaledete Johane metaekan tahẽkana, “Boeham rinicʼ dohoye do baṅ ganokʼtama.” Ona iạte Herodiạ do Johan cetanre ạḍi raṅgao tahẽkantaea. Ar uni do Johan gojeye menetʼ tahẽkana, menkhan Herod do Johane botoraekan tahẽkana. Ente Johan do mitʼṭen dhorom ar sonot hoṛ menteye baḍae akade tahẽkana, ar onate uni do muskilakʼko khone rukhiạyede tahẽkana. Herod do Johanakʼ kathako ańjomkate monre jut bae ạikạuetʼ tahẽkanre hõ uniakʼ kathako ańjome kusikʼkan tahẽkana. Mucạtʼre Herodiạ do mitʼṭen ạte ńamkeda. Herod do acʼakʼ janam dinre acʼren napṛakʼ napṛakʼ kạmiạko, subedarko, ar Gạlil Prodeshren mukhiạko lạgitʼ mitʼṭene bhojkeda. Ar ona bhoj reakʼ rạskạre Herodiạren hoponera doe enecʼente Herod ar bhojre neota akankoe kusi ocoketʼkoa. Unre raj do kuṛiye metadea, “Jãhãnakʼgem koyeń onageń emama.” Herod do kuṛi ṭhen kiriạenteye menkeda, “Jãhãnakʼgem koeyeń onageń emama, emon ki ińakʼ adha rajosṭi hõ.” Kuṛi do senkate eṅgattetʼe kulikedea, “Iń do cetʼiń khoja? Uniren eṅgattetʼe menkeda, “Johan bạbạptisicʼakʼ bohokʼ koeyeme.” Ar kuṛi do senkate raje metadea, “Johan bạbạptisicʼakʼ bohokʼ ńitge mitʼṭen thạrire imạńme.” Noa katha ańjomkate Herod do ạḍiye bhabnayena, menkhan bhojre neota akanko samaṅreye kiriạlente kuṛi ruạṛkae bae menwana. Ar unrege uni do Johanakʼ bohokʼ makʼkate ạgui lạgitʼ mitʼṭen jollade hukumadea. Ar jollad do hajot oṛakʼte senkate Johanakʼ bohokʼe makʼ ńurketʼte mitʼṭen thạrireye ạgukeda. Ar raj do kuṛiye emade khan uni do idikate eṅgattetʼe caladea. Ado Johanren celako noa khoborko ańjomketʼ khan hecʼkate uniakʼ mạ̃ṛĩ idikateko topakada. Ado Jisu okoe gelbar celakoe kolletʼko onkoko ruạṛ hecʼen khan onko okakoko kạmiletʼ arko cetʼatʼko tahẽkan ona joto do uniko baḍae ocokedea. Unre onḍe ḍher hoṛko calakʼ hijukʼkan tahẽkante celako do jom reakʼ ạtge bako ńamleda. Onate Jisui metatʼkoa, “Dela, iń tulucʼ mitʼṭen nisun jaegare hecʼkate thoṛa ghạṛicʼ jirạukʼpe.” Ar lạukạre decʼkate onko do mitʼṭen nisun jaegateko senena. Ado calakʼko ńelketʼko khan ḍher hoṛge onkoko oromketʼkoa ar aḍepase ato khonko ńir oḍokente onko laharege onḍeko seṭerena. Jisu lạukạ khone pheḍen khan gadel hoṛe ńelketʼkoa. Ar hoṛkore mãyã hecʼadea, ente onko do gupiyicʼ begor bhiḍi lekako tahẽkana. Ar Jisu do ạḍi okocʼakʼko reaṅ cetʼakoe ehopʼena. Ado ạyupʼ hijukʼkan tahẽkanre celako do hecʼkate Jisuko metadea, “Noa jaega do nisungea, ar bela hõe hạsurena. Onate ma bidạkakome, jemon aḍe pase atote senkate jomakʼko kiriń daṛeakʼ.” Jisui metatʼkoa, “Apege jomakʼ emakope.” Celakoko metadea, “Ale do cetʼ senkate barsae Dinarte piṭhạ kiriń ạgukate onkole jomocokoa?” Jisui metatʼkoa, “Senkate ńelpe, tinạkʼ piṭhạ menakʼtapea?” Adoko lạiadea, “Mõṛẽ goṭen piṭhạ ar barea hako menakʼkinạ.” Unre celakoe hukumatʼkoa jemon onko do gadel hoṛko hạriạ̃ṛ ghãsreko duṛupʼ ocoko. Khan gadel hoṛ do sae sae, ar mõṛẽgel, mõṛẽgelkate sạr sạrteko duṛupʼena. Jisu do mõṛẽ goṭen piṭhạ ar barea hako hataokate serma secʼ beṅgetʼ rakapʼkate Isor gun manao joharadete piṭhại kecakʼkeda ar hoṛko emako lạgitʼ celakoe calatʼkoa, ar nonkage hako hõe hạṭińatʼkoa. Ar sanamkoko jomkeda arko biyena. Ona tayom celako do sarecʼakʼ kaṭra kuṭrạ piṭhạ halaṅkate gelbar phạtiạkʼko perecʼkeda. Ar tinạkʼko jomketʼ onko modre mõṛẽ hajar herel hoponko tahẽkana. Ona tayom Jisu do celako usạrae lạgitʼe metatʼkoa, jemon onko do lạukạre decʼkate doreão hanasako paromokʼte Bethsaeda atoteko calao hataṛokʼ, ar acʼ do gadel hoṛ bidạkoe ehopʼena. Ar gadel hoṛkoe bidạ baṛaketʼko khan koejoṅ lạgitʼ buruteye rakapʼena. Ado ńindạyen khan celakoakʼ lạukạ do tala doreãore tahẽkana ar Jisu do eskarge ghuṭureye tahẽyena. Jisu do celako ạḍi haronte lạukạ calaoetʼkane ńelketʼkoa, ente onko samaṅ secʼ khone hoyetʼkan tahẽkana. Ado maraṅ simrakʼ jokhecʼ Jisu do doreão cetante taṛamate celako ṭhene hecʼena ar onko paromkoe menjoṅkan tahẽkana. Menkhan celako do doreão cetante taṛam ạguyetʼko ńelkede khan bhut hudiskedeteko kikiạukeda, ente uni ńelte jotoge botor caṛhaoatʼkoa. Unre Jisu do celako sãoteye roṛ gotʼkeda. Metatʼkoae, “Dil joṅpe, ińkangeạń, alope botorokʼa.” Ado Jisu lạukạreye decʼen khan hoe do thirgotʼena. Ar celako doko ṭhak utạrena, ente niạ lahare piṭhại jom ocoletʼko reakʼ do bako bujhạu akatʼ tahẽkana; ente onkoakʼ mon do goṛdho akan tahẽkantakoa. Jisu ar acʼren celako do doreão paromkate Genesaret elakate hecʼkate lạukạko tolkeda. Ar lạukạ khonko pheḍen khan hoṛko do Jisuko ńel oromkedete ona elaka reakʼ sanam jaegakore ńir baṛaeko ehopʼena. Inạ tayom jãhãrege menaea menteko baḍaeketʼ onḍege parkomkote uni ṭhen rugikoko gokʼ ạguketʼkoa. Ar jãhã nagraha, se atoteye calakʼkan tahẽkan onḍege hoṛko do bajarkore rugikoko jarwayetʼko tahẽkana. Ar uniakʼ kicricʼ ańcar joṭetʼtae lạgitʼko nehõrae kan tahẽkana, ar tinạkʼ do uniko joṭetʼede tahẽkan onko doko bogekʼkan tahẽkana. Ado okoeko Jerusalem khonko hecʼakan tahẽkan onko modren adom Phạrusi ar sostor baḍaeko do Jisu ṭhenko hecʼ jarwayena. Onkoko ńelkeda, Jisuren celako modren adomko do ti begor ạbukte bhonḍ hoṛko leka jojomko duṛupʼ akana. Phạrusiko ar sanam Jihudiko do sedaeren dhorom guruko okaṭakʼ niạmko emakan ona niạm lekate ti begor ạbukte do jom hõ bako jometʼ tahẽkana. Ar hạṭiạ bajar khon hecʼkate hõ begor umte cetʼge bako jometʼ tahẽkana. Ona chaḍa onko do arhõ aema lekan ạri-cạliko pańjayetʼ tahẽkana, jemon loṭa, bạṭi, thạri gasao mańjao emanteakʼko reaṅ. Onate Phạrusiko ar sostor baḍaeko do Jisuko kulikedea, “Hapṛamko khon hecʼạgu akan ạri-cạli do amren celako cedakʼ bako manaoeda? Onko do begor ti ạbukteko jom ńuiyeda.” Jisui roṛ ruạṛatʼkoa, “Ape dope phạsiạrako kana! Jesaea nạbi do ṭhikge ape reaṅe nạbi akada. Uniakʼ puthire olakana: noko hoṛ do mocategeko ganaoedeńa, menkhan onkoakʼ ontor do iń khon sạṅgińgetakoa. Onko do ạuṛiakʼgeko sewawạń kana, ar manwakoakʼ hukumkoge dhorom reakʼ sikhnạt menteko cetʼako kana. Ape do Isor emakʼ hukumko bạgikate, manwa benaoakʼ ạri-cạlikope pańjayeda.’’ Arhõe metatʼkoa, “Isorakʼ hukumko bạgikate manwakoakʼ cạliko pańja do bhagegepe baḍae kana. Moseye menakada, ‘eṅgam ạpum ganaokinme,’ ar eṅgat se apat bạṛicʼ memenicʼ do gocʼte hõ goje hoyokʼa. Menkhan apepe meneda, jãhãege eṅgat se apattetʼe metae iń hotete okaṭakʼem porhokokʼ ona do ‘Korban,’ metakʼme Isor ṭhen samaṅ akana. Enḍekhan uni do eṅgat ar apat lạgitʼ cetʼge bape ceka ocoaekana. Nonkate hecʼ ạgu akan ạri-cạlikope cetʼako kante Isorakʼ kathape ạuṛiakʼeda. Ona chaḍa noa lekanakʼ arhõ ạḍi utạrpe kạmiyeda.” Noa tayom Jisu do hoṛko arhõ acʼ ṭhen hoho sorkateye metatʼkoa, “Jotoko ińakʼ katha ańjompe ar bujhạupe. Bahre khon manwa bhitrite okaṭakʼ bolokʼkan onate manwa do ohoe bhõnḍlena, bickom manwa bhitri khon okaṭakʼ oḍokokʼkan, onatege manwa doe bhõnḍokʼa. Inạ tayom gadel hoṛko bạgikate oṛakʼe boloyen khan celako do ona katha reakʼ bhedtetʼko kulikedea. Jisui metatʼkoa, “Cekate nunạkʼ dope bebujgea? Ape do cetʼ bape bujhạueda, bahre khon okaṭakʼ manwa bhitrite bolokʼkan onate manwa do bae bhõnḍ daṛeaea mente? Ente uniakʼ ontorre ona do baṅ bolokʼ kana menkhan lacʼre bolokʼkana, ar tayomte ona do hoṛmo khon oḍok giḍikʼ kana.” Ona kathate uni do joto jomakʼge saphagea menteye bujhạu ocoyeda. Jisu do arhõe metatʼkoa, “Manwa bhitri khon okaṭakʼ oḍok hijukʼkan onatege manwa doe bhõnḍ ocokʼ kana, ente manwa bhitri khon, metakʼme ontor khonge joto lekan bạṛicʼ hudis, laṭghaṭ, kombṛo, khũn, laloc, dusṭạmi, eṛe, umtạ umti, mẽtʼ jolokʼ, opoman, bạḍại ar bebujko do oḍok hijukʼa. Noako sanam bạṛicʼakʼ do manwa bhitri khonge oḍokʼ hijukʼ kana ar noatege manwa doe bhõnḍokʼa.” Inạ tayom Jisu do ona jaega bạgikate Tur ar Sidon elakateye calaoena. Uni do mitʼṭen oṛakʼteye boloyena ar okoe hõ aloko baḍaeyea menteye menwana, menkhan bae oko tahẽ daṛeada. Onḍe mitʼṭen maejiue tahẽkana ar uniren kuṛi do bạṛicʼ jiue capaṛ akawade tahẽkana. Ado Jisu reaṅe ańjomketʼ khan hecʼkate uniakʼ jaṅgareye giḍiyena. Uni do Junạni maejiue tahẽkana ar Surophoenikireye janamlena. Uni do Jisui nehõradea jemon acʼren kuṛi khon bạṛicʼ jiue oḍok giḍikae. Jisu do uniye metadea, “Gidrạkoge lacʼ bikʼ jom maṛaṅ ocoakome, ente gidrạkoakʼ jomakʼ hataokate setako samaṅre giḍikakʼ do baṅ bhagea.” Maejiue roṛ ruạṛkeda, “E Probhu, am do ṭhikgem menakada, menkhan gidrạkoakʼ jomakʼ reakʼ ganḍa gunḍạ oka do mej latarre ńurokʼkan setako do onakogeko jomeda.” Jisui menkeda, “Katha do bhagegem menakada, Do calakʼme; ar ńelme, bạṛicʼ jiu do hoponeram khone oḍok calao akana.’’ Ado oṛakʼe ruạṛen khan, acʼren kuṛi aṭetʼreye giticʼ akan ar bạṛicʼ jiu uni khon oḍok akane ńamkedea. Noa tayom Jisu do Tur elakae bạgiatʼe Sidon nagraha talate Gạlil doreão sor Dekapoli elaka reakʼ atokoteye calaoena. Onḍe do mitʼṭen kala ar guṅgạ hoṛ Jisu ṭhenko ạgukedea ar capoye lạgitʼko nehõraedea. Jisu do bhiṛ tala khon mitʼ aṛereye idikedete uniakʼ banar luturre acʼakʼ kạṭupʼe gutukeda; ar thokate uni hoṛakʼ alaṅe joṭetʼketʼtaea. Ona tayom serma secʼ beṅgetʼ rakapʼkate kũhrạuateye menkeda, “Ephata” mane do “Jhijokʼme.” Ar inạtege uniakʼ lutur do jhicʼgotʼentaea, ar alaṅ reakʼ gitạtʼ hõ chaḍaoente pusṭạute katha roroṛe ehopʼena. Unre Jisu do noa reaṅ hoṛko lại baṛaeye manakatʼkoa. Menkhan tinạkʼe manakatʼko, unạkʼge onko do ona reaṅ artetʼge lại baṛaeko ehopʼena. Onate hoṛko do hahaṛayenteko menkeda, “Jotowakʼ tinạkʼ bhageye kạmiyeda. Uni do kalakoe ańjom ocoyetʼkoa ar guṅgạko hõ katha roṛ reakʼ daṛeye emako kana.” Mitʼ din arhõ ạḍi utạr hoṛko jarwayena. Ar onko hoṛ ṭhen jãhãn jomakʼ baṅ tahẽkante Jisu do acʼren celako hohoatʼkoteye metatʼkoa, “Noko hoṛkoreń mãyãkʼ kana, ente teheń pe din hoyokʼ kana iń sãote menakʼkoa; onko ṭhen do jãhãn jomakʼge bạnukʼa. Ar niạ halotre oṛakʼiń kolkako khan horkoreko lorao botejokʼa, ente onko modren ḍherkoge ạḍi sạṅgiń khonko hecʼakana.” Celakoko metadea, “Menkhan noa nisun jaegare noko jom ocoko lạgitʼ piṭhạ do okarele ńamkea?” Jisui kuliketʼkoa, “Tinạkʼ piṭhạ menakʼtapea?” Menkedako, “Eae goṭen” Uni do gadel hoṛko otre duṛubokʼe hukumatʼkoa. Ar ona eae goṭen piṭhạ hataokate Isore gun manao joharadeteye kecakʼkeda ar hoṛko emako lạgitʼ celakoakʼ tireye calatʼkoa, ar celako do gadel hoṛkoko ematʼkoa. Celako ṭhen thoṛa thuṛi kạṭicʼ hako hõko tahẽkana. Jisu do hako hõe bhoratʼkote gadel hoṛko emako lạgitʼe metatʼkoa. Adoko jomkeda arko biyena. Ar okako kecakʼ kaṭra kuṭrạ ńur tahẽyen celako do onakoko halaṅ jarwaketʼte eae phạtiạkʼko perecʼkeda. Onḍe do pon hajargan herel hoponko tahẽkana. Ona tayom gadel hoṛe bidạkatʼkote uni do celako sãote mitʼṭen lạukạre decʼkate Dalmanuthạ elakateye calaoena. Ado onḍe Phạrusikoko oḍok hecʼen khan Jisu sãote reṭe peṭekʼko ehopʼena, ar biḍạue lạgitʼ serma khon mitʼṭen cinhạko khojkeda. Noa iạte Jisu do kũhrạuateye menkeda, “Niạ piṛhiren hoṛko do cinhạ reakʼ cedakʼko khojkana? Ińiń metapekana, cetʼ cinhạge noko do baṅ udukʼakoa.” Ona tayom uni do onkoe bạgiatʼkote arhõ lạukạreye decʼena ar doreão hanasae parom calaoena. Celako soṅgete piṭhạ iditora joṅko hiṛińakatʼ tahẽkana. Ar onkoakʼ do lạukạre eken mitʼṭen piṭhạ tahẽkantakoa. Unre Jisui metatʼkoa, “Phạrusiko ar Herodrenkoakʼ khạmi khon sontor akae tahenpe.” Onate celako do ako akoreko menjoṅana, “Piṭhạ bạnukʼ tabonte noae metabon kana.” Ado celakoko galmaraokan reaṅe baḍaeketʼtako khan Jisui metatʼkoa, “Cedakʼpe meneda piṭhạ bạnukʼtapea? Ape do cetʼ ńit hõ bape baḍae kana se bape bujhạueda? Apeakʼ ontor do cetʼ goṛdho akantapea? Mẽtʼ menakʼ tulucʼ cetʼ bape ńeńelkana? Lutur tahen tulucʼ cetʼ bape ańjomeda? Disạ hõ cetʼ bape disạyeda, mõṛẽ hajar hoṛko lạgitʼ mõṛẽ goṭen piṭhạń kecakʼletʼre ape do tinạkʼ phạtiạkʼpe halaṅ jarwaleda?” Celakoko roṛ ruạṛadea, “Gelbar phạtiạkʼ.” Jisu do arhõe metatʼkoa, “Pon hajar hoṛko lạgitʼ eae goṭen piṭhạń kecakʼletʼre tinạkʼ phạtiạkʼpe halaṅ jarwaleda?” Adoko lạiadea, “Eae phạtiạkʼ.” Unreye metatʼkoa, “Enḍekhan ńitokʼ hõ cetʼ bape bujhạueda?” Jisu ar acʼren celako do Bethsaeda atoteko calaoena. Ar onḍe mitʼṭen kãṛã hoṛ Jisu ṭhenko ạgukedea ar joṭedea menteko nehõradea. Jisu do uni kãṛã hoṛ tire sapʼkate ato bahreteye oḍok idikedea. Ona tayom mẽtʼreye thoadea ar capokedeteye kulikedea, “Jãhãnakʼem ńel ńameda?” Uni hoṛ do beṅgetʼ rakapʼkateye menkeda, “Iń do hoṛkoń ńel ńametʼkoa; onko do ńelokʼte dare leka, arko taṛam baṛayeda.” Jisu do arhõ uni hoṛakʼ mẽtʼe joṭetʼketʼtaea. Onate uni hoṛakʼ mẽtʼ do jhicʼentaea ar ńeńel daṛeye ńamkeda. Ar pusṭạute jotowakʼ ńeńele ehopʼena. Ar noa menkateye kolkadea, “Bethsaeda atote do bolo hõ alom bolokʼa.” Ona tayom Jisu ar acʼren celako do Kạisạriạ Philipi reakʼ atoteko oḍok calaoena. Uni do calakʼ jokhecʼ celakoe kuliketʼkoa, “Hoṛko do okoe kạnạń menteko meneda?” Celakoko metadea, “Adomko doko meneda Johan bạbạptisicʼ kanam; ar adomko doko meneda Eliạ kanam arhõ adomko doko meneda nạbiko modren mitʼ hoṛ kanam. Unre Jisui kuliketʼkoa, “Menkhan ape do okoe kạnạń mentepe meneda?” Patrase roṛ ruạradea, “Am do uni Mạsi kanam.” Unre Jisu do onkoe sontorkatʼkoa jemon acʼ reaṅ okoe ṭhen hõ aloko lại baṛae. Jisu do acʼren celako noa menkate cetʼakoe ehopʼena, Manwa Hopon do ạḍi okocʼ duk jojom hoyokʼtaea. Uni do murubiko, maraṅ naekeko ar sostor baḍaekoko nihạtea. Are gocʼ ocokʼa, ar pe mãhã hilokʼre uni do arhõ gocʼko khon jiwetʼ beredokʼ hoyokʼtaea. Uni do pusṭạute noako kathae lạiatʼkoa. Unre Patras do Jisu mitʼ secʼe begar idikedete nisṛạueye ehopʼkeda. Jisu do ạcurente celako secʼe beṅgetʼkeda ar Patras dhomkaokedeteye metadea, “Eya Soetan, iń khon pharakokʼme. Ente Isor reakʼakʼko do bam moneakʼ kana, menkhan manwa reakʼakʼkogem moneakʼ kana.” Noa tayom celako ar gadel hoṛko acʼ ṭhen hoho sorkateye metatʼkoa, “Jãhãege ińakʼ horte hijukʼe monejoṅ uni do acʼakʼ sana leka aloe calakʼma; bickom acʼakʼ krus gokʼkateye pańjayiń ma. Okoe acʼ lạgitʼ jiwetʼ tahene menjoṅkan uni do jiwiye khuạutaea; menkhan okoe iń ar Isorakʼ bhage sombat iạte acʼakʼ jiwiye khuạutae, uni do onae rukhiyạitaea. Jãhãege goṭa dhạrtiye labte acʼakʼ jiwiye khuạutae enḍekhan cetʼ porho hoyokʼtaea? Ente jiwi ńam ruạṛ lạgitʼ uniakʼ do emokʼteakʼ ar cetʼ menakʼtaea? Niạ piṛhiren bepạtiạu ar kại hoṛko talare iń ar ińakʼ kathako iạte jãhãegeye lajaokʼ, enḍekhan Manwa Hopon hõ sonot goḍetko soṅgekate acʼren Apatakʼ ṭhonokanteye hijukʼre uni hoṛ iạteye lajaokʼa.” Ona tayom Jisu do celakoe metatʼkoa, “Sạrigeń metapekana, nonḍe teṅgo akanko modre nonkan hoṛ menakʼkoa one onko do Isorakʼ raj daṛe salakʼ hijukʼ ạuriko ńel hạbicʼ okalekate hõ bako gujukʼa.” Noa turui din tayom Jisu do Patras, Jakob ar Johan soṅgekate mitʼṭen usul buruteye rakapʼ calaoena. Ar onko samaṅreye eṭakʼ boronena. Uniakʼ kicricʼko do nonka pĩṛĩtʼ pĩṛĩtʼ ponḍ hoyena je, dhạrtiren okoe dhubi hõ onka do ohoe ponḍ oco daṛekea. Onko do Eliạ ar Mose onḍeko ńelketʼkinạ. Unkin do Jisu sãotekin galmaraokan tahẽkana. Unre Patras do Jisui metadea, “E Guru, ale nonḍe menakʼle do, bhagege hoeakana. Nonḍe pea kumbạ oṛakʼle benaoa, mitʼṭen do am lạgitʼ, mitʼṭen do Mose lạgitʼ ar mitʼṭen do Eliạ lạgitʼ.” Patras do cetʼe mena mente bae bujhạulakʼa, ente onko do ạḍi botor caṛhaoatʼko tahẽkana. Ar ona jokhecʼ mitʼṭen rimil do rakapʼ hecʼente onkoe umul esetʼketʼkoa, ar ona rimil khon noa katha ańjomena, “Nuige ińren dulạṛiạ Hopon, nuiakʼ ańjomtaepe.” Celako do beṛhaeteko beṅgetʼ ạcurketʼ khan eken Jisu eskargeko ńel ńamkedea. Ado buru khonko pheḍ hijukʼkan tahẽkanre Jisu do onkoe hukumatʼkoa, “Okape ńelketʼ, ona do Manwa Hopon gocʼko khon ạuriye jiwetʼ beredokʼ hạbicʼ okoe hõ alope lại akoa.” Celako do Jisuakʼ hukumko bataoketʼtaea, menkhan gocʼko khon jiwetʼ beredokʼ reakʼ mane cetʼ kana mente ona do ako akore galmaraoko ehopʼena. Onko do Jisuko kulikedea, “Sostor baḍaeko do cekateko meneda, pạhilre Eliạ hijukʼ reakʼ jạruṛ menakʼtaea mente? Jisui roṛ ruạṛatʼkoa, “Noa katha do sạrikangea je, pạhilre Eliại hijukʼa ar sanamakʼ do lahate lekae teṅgo aroea. Menkhan Manwa Hopon reaṅ sonot sostorre cekate baṅ olakan, uni do ạḍi okocʼ duk jojom hoyokʼtaea ar hoṛko do uniko nihạtea? Menkhan ińiń metapekana, Eliạ reaṅ sonot sostorre okaleka olakan onkage uni doe hecʼlena, ar hoṛko do unire akoakʼ sana lekako kạmikeda.” Jisu ar onko pea cela do eṭakʼ celako ṭhenko ruạṛ hecʼen khan, beṛhaete gadel hoṛ jarwa akan ar adom sostor baḍaeko do onko tulucʼ reṭe peṭekʼ kanko ńelketʼkoa. Ar hoṛko do Jisuko ńelkede khan ạḍitetʼko hahaṛayena ar ńir senkateko joharadea. Jisu do sostor baḍaekoe kuliketʼkoa, “Onko tulucʼ cetʼ reaṅpe reṭepeṭekʼ kana?” Gadel hoṛ bhitri khon mitʼ hoṛe roṛ ruạṛkeda, “E Guru, ińren koṛa am ṭheniń ạgu akadea. Unire do mitʼṭen guṅgạ jiu menaea. Tinreye sabea unre uni do otreye tawakʼ bhindạṛea. Ar moca do photo photokʼtaea are togocʼ ḍaṭaea. Iń do amren celako uni jiu oḍok giḍiye lạgitʼ iń metatʼkoa, menkhan bako daṛeada.” Unre Jisui metatʼkoa, “E bepạtiạuko! Ar tinạkʼ din ape sãoteń tahena? Ar tinạkʼ iń sahaokatapea? Dini iń ṭhen ạguyepe.” Ado uni ṭhenko ạgukedea. Unre bạṛicʼ jiu do Jisui ńelkede khan koṛaye mocṛa mucṛikedea. Ar otreye bhindạṛkedete moca do photo photoyentaea ar guṛdạukʼe ehopʼena. Jisu do uniren apattetʼe kulikedea, “Tinạkʼ din khone nonka akana?” Uni doe menkeda, “Gidrạ khonge. Bạṛicʼ jiu do goje lạgitʼ jaoge seṅgel ar dakʼreye khadle akadea. Ado jãhãnakʼem daṛeakʼ khan dayakate onkaeme.” Jisui menkeda, “ ‘Daṛeakʼ khan,’ noa katha reakʼ mane do cetʼkana? Okoeye pạtiạukʼ uni lạgitʼ do jotoge hoedaṛeakʼa.” Unre gidrạren apat do ãṭ aṛaṅateye menkeda, “Iń doń pạtiạukʼ kangea; ar ńit hõ ińre oka bepạtiạu menakʼ ona baṛe ocokʼ kạtińme.” Ado gadel hoṛ ńir hijukʼkane ńelketʼko khan Jisu do bạṛicʼ jiu dhomkao kedeteye metadea, “E kala ar guṅgạ jiu, hukumam kạnạń uni khon oḍok calakʼme; ar tis hõ unire alom bolo ruạṛokʼa.” Unre bạṛicʼ jiu do kikiạuate koṛae mocṛa mucṛikedea ar uni khone oḍok calaoena. Onate koṛa do gocʼicʼ lekae ńelente ḍher hoṛgeko menkeda, “Uni doe gocʼena.” Menkhan Jisu do ti sapʼkateye beretʼkede khane teṅgoyena. Inạ tayom Jisu do oṛakʼ bhitriteye boloyena. Unre celako do hape hapete hecʼkateko kulikedea, “Cekate ale do bale oḍok daṛeadea?” Jisui metatʼkoa, “Nui jạtrenko do koejoṅ begor ar cetʼte hõ ohoko oḍoklena.” Tayomte onko do ona jaegako bạgiatʼe Gạlil Prodesh talateko parom calaoena. Uni doe menjoṅkan tahẽkana okoe hõ jemon aloko baḍaeye okateye calakʼkana mente, ente unre uni do acʼren celakoe cetʼakokan tahẽkana, are lại akokan tahẽkana, “Manwa Hopon do hoṛkoakʼ tireko soprotea. Arko gojea ar pe din hilokʼre uni do arhõe jiwetʼ beredokʼa.” Menkhan celako do Jisuakʼ katha reakʼ mane bako bujhạu daṛeada ar kuliye hõko botorena. Ona tayom Jisu ar acʼren celako do Kapharnạhumteko calaoena. Ar Jisu oṛakʼ bhitriteye boloyen khan celakoe kuliketʼkoa, “Horre cetʼ iạtepe reṭe peṭekʼkan tahẽkana?” Celako do thirgeko tahẽyena, ente joto khon maraṅicʼ doe okoe kana menteko reṭe peṭekʼkan tahẽkana. Jisu doe duṛupʼena ar onko gelbar celako acʼ ṭhen hohoatʼkoteye metatʼkoa, “Jãhãe pạhilicʼ hoyokʼe menetʼ khan uni do jotoko khon tayomre tahen hoyokʼtaea ar jotokoren sapʼdapʼicʼ hoyokʼ jạruṛtaea.” Uni do mitʼṭen gidrạ onko samaṅreye teṅgokedea. Ar hoborkedeteye metatʼkoa, “Jãhãege nonkan kạṭicʼ gidrạ iń ńutumteye ataṅe uni do ińgeye ataṅińạ, ar okoe ińe ataṅiń uni do eken iń do baṅ, menkhan kol akadińicʼgeye ataṅede kana.” Johan do Jisui metadea, “E Guru, mitʼṭen hoṛ do am ńutumte bạṛicʼ jiukoe oḍok giḍikakole ńelkede khan uni dole manakadea, ente uni do abo dolrene baṅkana.” Jisui menkeda, “Alope manayea. Jãhãege iń ńutumte hahaṛawakʼko kạmi tayom iń upạrte bạṛicʼ do ohoe roṛ daṛelea, ente okoe abo birudrene baṅkan, uni do abo secʼren kangeae. Sạrigeń metapekana, Mạsiren hoṛpe hoeakante jãhãege iń ńutumte mitʼ bạṭi dakʼe ńu ocope, uni do okalekate hõ acʼakʼ kuṛại ohoe atʼletaea. “Ińreko pạtiạu akan noko kạṭicʼko modre mitʼ goṭen jãhãege kại horteye idiye enḍekhan uni do hoṭokʼre jante dhiri tolaete doreãore khadle giḍikaege uni lạgitʼ bhage hoyokʼa. Amakʼ ti kại horteye or idime khan ona do samakʼ giḍikakʼme. Ente banar ti tahentam tulucʼ noroktem calakʼ khon boroṅ ṭhunṭạge jionte bolokʼ do am lạgitʼ bhagea. Ona norok reakʼ seṅgel do tishõ baṅ ĩṛĩjokʼa. Amakʼ jaṅga kại horteye ạyur idime khan ona do samakʼ giḍikakʼme. Ente banar jaṅga tahentam tulucʼ noroktem calakʼ khon leḍhage jiontem bolokʼ do am lạgitʼ bhagea. Amakʼ mẽtʼ kại horteye ạyur idime khan ona hõ hoṭor totʼ giḍikakʼme. Ente banar mẽtʼ tahentam tulucʼ norokte bolokʼ khon mitʼ mẽtʼante Isorakʼ rajre bolokʼge am lạgitʼ bhagea. Ona norokre gocʼ hoṛkoakʼ jel jojom tejo do tishõ bako gujukʼa, ar onḍenakʼ seṅgel hõ baṅge ĩṛĩjokʼa. “Ar buluṅ emakʼ leka sanamko cetanre seṅgel emocokʼa. “Buluṅ ma bogege, menkhan sabakʼlen khan cekate ona do arhõ rahamkokʼa? Apeakʼ ontorre buluṅ tahentapema ar sanamko tulucʼ sulukte tahenpe.” Jisu do ona jaega khon uṭhạukate Jihudạ Prodesh ar Jordan gaḍa hanasakoteye parom calaoena. Ar gadel hoṛ do arhõ uni ṭhen hecʼkateko jarwayena. Unre uni do acʼakʼ cạli leka cetʼakoe ehopʼena. Un jokhecʼ adom Phạrusiko do hecʼkate Jisu biḍạue lạgitʼko kulikedea, “Moseakʼ ạn lekate jãhãe hoṛ rinicʼtetʼe bạgiye do ganokʼtaea se baṅ?” Jisui metatʼkoa, “Mose do cetʼ hukume em akawatʼpea?” Onkoko menkeda, “Bapag dolel olaete bạgiye reakʼe hukum akada.” Jisui metatʼkoa, “Apeakʼ keṭecʼ mon iạte Mose do noa hukume olatʼpe tahẽkana. Menkhan noa hõ ol menakʼa, sirjon reakʼ etohopʼre ‘Isor do herel ar maejiue benaoketʼkinạ. Onate manwa do eṅgat-apat bạgikate acʼren bạhu tulucʼ mitʼakane tahena, ar unkin do mitʼ hoṛmokin hoyokʼa.’ Onate ar barea dokin baṅkana menkhan mitʼ hoṛmo kanakin. Onate Isor okaṭakʼe joṛao mitʼ akatʼ manwa do ona aloe topagma.” Ona tayom oṛakʼteko boloyen khan celako do arhõ ona reaṅko kulikedea. Unreye metatʼkoa, “Jãhãege acʼren bạhu bạgikate eṭakʼ maejiue baplaye uni do acʼren bạhuttetʼ birudreye laṭghaṭeda. Ar bạhu hõ hereltetʼ bạgikate eṭakʼ hoṛ ṭhene jãwãelen khan enḍekhan uni hõe laṭghaṭa.” Ado kạṭicʼ gidrạko Jisu ṭhenko ạguketʼkoa jemon uni do capokateye bhorako. Menkhan celako do onkoko dhomkaoketʼkoa. Jisu do ona ńelkate bae kusilente celakoe metatʼkoa, “Kạṭicʼ gidrạko iń ṭhen hecʼ ocoakope, alope manakoa; ente Isorakʼ raj do nonkankoakʼ kangea. Sạrigeń metapekana, okoe kạticʼ gidrạko leka Isorakʼ raj bae ataṅ, uni do okalekate hõ, Isorakʼ rajre bae bolo daṛeakʼa.” Ona tayom Jisu do onko kạṭicʼ gidrạkoe hoborketʼkoa ar bohokʼre capokateye bhoratʼkoa. Jisu do arhõ horteye oḍok calakʼ kan tahẽkanre mitʼṭen hoṛ do uni ṭhene ńir hecʼena ar ikhuṛumenteye menkeda, “E Guru, am do mitʼṭen bhage hoṛ kanam. Lạiạńme, jaejug jion ńam lạgitʼ cetʼiń cekaea?” Jisu do uniye metadea, “Cedakʼ bhage dom mitạńkana? Isor chaḍa ar okoe hõ bhage do bạnukʼkoa. Hukumko mam baḍaege, ‘alom khũna, alom loṭghuṭia, alom kombṛoea, eṛe goha alom ema, alom ṭhokakoa, ar gogo-babam manotkinạ.’ ” Uni hoṛe menkeda, “E Guru, gidrạ khonge noako joto doń manao ạguyeda.” Jisu do uniye beṅgetʼadea ar dulạṛ salakʼe metadea, “Mitʼṭen jinis dom bạki akada. Do calakʼme, ar oka menakʼtam ona ạkhrińkate reṅgecʼ orecʼko dan akome. Onate sermare dhonem ńama. Ar inạ tayom do hecʼkate ińren cela hoyokʼme.” Noa katha ańjomkate uni hoṛ doe mirluṅena. Uni do ạḍi utạr dhon tahẽkantaete bhabnakateye ruạṛ calaoena. Unre Jisu do beṛhaete beṅgetʼ ạcurkate acʼren celakoe metatʼkoa, “Kisạ̃ṛko lạgitʼ serma rajte bolokʼ do muskilgea!” Khan celako do Jisuakʼ noa katha ańjomteko hahaṛayena. Jisu do arhõe metatʼkoa, “E bachako, okoe dhon-duribreko bhorsakʼkan onko lạgitʼ Isorakʼ rajte bolokʼ do muskilgea. Kisạ̃ṛ hoṛ Isorakʼ rajte bolokʼ khon sũi bhugạkʼte ũṭe bolo tabokʼ do algagea.” Noa iạte celako do arhõko bhaṛoyente ako talare memenko ehopʼena, “Enḍekhan kại khon do okoeye bańcao daṛekokʼa?” Jisu do beṅgetʼatʼkoteye metatʼkoa, “Manwa hotete baṅ hoe daṛeakʼre hõ, Isor ṭhen bin leṭejokʼakʼ do bạnukʼa; uni ṭhen do sanamakʼge hoedaṛeakʼa.” Patras do uniye metadea, “Ńelme, ale do jotowakʼ bạgikate amren celale hoeakana,” Jisui roṛ ruạṛatʼkoa, “Sạrigeń metapekana, jãhãege iń ar Isorakʼ bhage sombat iạte oṛakʼ duạr se boehako se miserako se eṅgat se apat se gidrạko se ot baṛgekoe bạgi oṭoakatʼ, uni do niạ purire mitʼ sae doboṛ ḍher oṛakʼ-duạr, boeha-misera, eṅgat-apat, gidrạko ar ot-baṛgekoe ńama ar ona são sãote uni doe santao ocokʼa; ar hana purire jaejug jione ạidạri joṅa. Menkhan okoe lahare menakʼko onko modren ḍherkogeko tayomokʼa ar okoe tayomre menakʼko onko modren ḍherkogeko lahakʼa. Inạ tayom Jisu ar acʼren celako do Jerusalem horteko rakapʼ calaoena. Ar Jisu do onko laha lahateye calakʼkan tahẽkana; ar celako do hahaṛakʼ tulucʼ uni sãoteko calakʼkan tahẽkana ar okoeko hoṛ uniko pańja idiyede tahẽkan onko doko botorokʼkan tahẽkana. Jisu do acʼren gelbar celako mitʼ secʼe hoho begarketʼkote acʼre hoyokʼ lạgidokʼ reakʼ katha lại akoe ehopʼkeda. Uni doe metatʼkoa, “Ńelpe, Jerusalemte bon calakʼ kana. Onḍe Manwa Hopon do maraṅ naekeko ar sostor baḍaeko ṭhenko soprotea. Onko do gujukʼ lek kanae menteko bicạr dusiyea ar boṅgan hoṛ jạtrenkoakʼ tireko soprotea. Ar boṅgan hoṛ jạtrenko do uniko nisṛạuea ar hoṛmoreko thoaea ar cạbuk baṛakateko gojea. Ar pe mãhã hilokʼre uni do arhõe jiwetʼ beredokʼa.” Ado Sabdaeren hopon Jakob ar Johan do Jisu ṭhen hecʼkatekin menkeda, “E Guru, ạlińakʼ menjoṅakʼ do noage, ạliń okaliń koeme am do onagem onkawạlińa.” Jisui metatʼkinạ, “Iń do aben lạgitʼ cetʼiń cekaea? Ar cetʼben khojkana?” Unkinkin menkeda, “Am do tinre ṭhonokantem rajokʼa unre ạliń modre mitʼ hoṛ do amakʼ jojomsa aṛere ar mitʼ hoṛ do amakʼ leṅgasa aṛere jemon liń duṛupʼ daṛeakʼ.” Jisui metatʼkinạ, “Okaṭakʼ ben khojkan, ona do baben baḍaea. Oka duk reakʼ bạṭireń ńũi lạgidokʼ kan ona do cetʼ ben ńũ daṛeakʼgea? Se oka bạptismateń bạptis lạgidokʼkan ona do cetʼ ben ataṅ daṛeakʼgea? Metadeakin, “Hẽ daṛeakʼgea liń.” Unre Jisui metatʼkinạ, “Iń oka duk reakʼ bạṭireń ńũi aben hõ ona reaṅ ben ńũiya, ar oka bạptismań ataṅ, aben hõ ona ben ataṅa, menkhan ińakʼ jojomsa ar leṅgasare duṛupʼ ben reakʼ ektiạri do bạnukʼtińa. Onako jaega do okoe lạgitʼ tear akan eken onkogeko ńama.” Ar onko gel goṭen cela do noa katha ańjomkate Jakob ar Johan upạrteko edreyena. Unre Jisu do sanamko mitʼ sãote hohoatʼkoteye metatʼkoa, “Baḍaegeape, boṅgan hoṛ jạtkoren do disạm cakʼlaokoge onkoren Probhuko hoyokʼ kana ar onkoren mukhiyạkoge onko cetanre ektiạriko calaoeda. Menkhan apeko talare onka hoyokʼ do lek baṅkana, bickom ape modre jãhãege maraṅ hoyokʼe menjoṅkan khan uni do aperen sapʼdapʼicʼe hoyokʼma, Ar jãhãe pạhilicʼ hoyokʼe menetʼ khan uni do jotokoren golame hoyokʼma. Disạipe, Manwa Hopon do sapʼsor ocokʼ lạgitʼ do baṅ bickom sapʼ sosorgeye hecʼakana ar ạḍi utạr hoṛkoakʼ chaḍaokʼ reakʼ dam lekate onkoakʼ jiwi bodolte acʼakʼ jiwi emokʼgeye hecʼakana.” Ado Jisu ar uniren celako Jerikho nagrahateko calaoena. Ar celako ar gadel hoṛko sãote nagraha khone oḍok calakʼkan tahẽkanre Timạiren hopon Bạrtimại ńutuman mitʼṭen kãṛã kokoe hoṛ do hor aṛereye duṛupʼ akan tahẽkana. “Ar Nasaretren Jisu,” kanae menteye ańjomketʼ khan ãṭ aṛaṅte hohoye ehopʼena, “E Dạudren hopon Jisu, dayawạńme.” Noate ḍher hoṛge uniko dhomkaokedete thir hapekokʼko metadea, menkhan uni do artetʼge ãṭ aṛaṅte hohoateye menkeda, “E Dạudren hopon Jisu mãyãwạńme baṛe.” Jisu do teṅgoyenteye metatʼkoa, “Uni hohowaepe.” Khan uni kãṛã hoṛ hohoadeteko metadea, “Alom botorokʼa ma beretʼme. Uni do ame hohowam kana.” Unre uni do acʼakʼ oyon kicricʼ capatʼ giḍikatʼteye don beretʼena ar Jisu ṭhene hecʼena. Jisu do uniye kulikedea, “Am lạgitʼ cetʼ iń cekaea? Ar cetʼem khojkana?” Kãṛã hoṛe menkeda, “E Guru, jemoniń ńeńel.” Jisui menkeda, “Do calakʼme, am do pạtiạu akantem bogeyena.” Uni hoṛ do unrege ńeńele ehopʼena ar horteye pańja idikedea. Ado Jerusalem sorko seṭeren khan onko do Jạitun buru ṭhenakʼ Bethaphage ar Bethaniạ ato ṭhenko hecʼena. Onḍe seṭerkate Jisu do acʼren barea cela noa menkateye kolkatʼkina, “Aben do samaṅ senakʼ atote calakʼben. Ar atote bolokʼ jokhecʼ mitʼṭen gadha hopon onḍe tol akadeben ńamea. Unire do okoege tishõ bako decʼakana. Aben do raṛakate nonḍe ạguye ben. Ar jãhãegeye kuli ben, ‘cedakʼ ben nonkayeda?’ Enḍekhan metaeben, ‘Probhu do nui reakʼ jạruṛ menakʼtaea; ar uni do usạrateye aṛakʼ abena.’ ” Unre unkin dokin senena ar gadha hopon chaṭka duạrre tolakade kin ńamkedea. Ar tinre kin raṛayedekan tahẽkana, unre onḍe okoeko teṅgo akan tahẽkan onko doko metatʼkinạ, “Cetʼ ben cekayeda? Gadha hopon do cedakʼ ben raṛayedea?’’ Unkin cela do Jisu okaleka roroṛe metatʼkin tahẽkan onkagekin metatʼkoa. Unre onko do gadha hoponko idiocowatʼkinạ. Ado Jisu ṭhenkin ạgukede khan uni cetanre ạkinakʼ oyonakʼkin aṭetʼkeda. Ar Jisu do unireye decʼena. Ar ạḍi utạr hoṛ do akoakʼ oyonakʼko hor horteko aṭetʼkeda ar eṭakʼko do goḍa khon ḍạrko hese ạguketʼte horteko aṭetʼ idikeda. Ar Jisu laha lahate calakʼkanko ar uni pańjayekanko do ãṭ aṛaṅteko hoho idiyetʼkan tahẽkana, “Hosanna! Bhorangeae Probhu ńutumte darae kanicʼ do. Bhorangea aboren baba Dạudakʼ darakan raj do. Coṭ utạrre Hosanna!” Jisu do Jerusalemre senkate mundilteye boloyena ar beṛhaete jotowakʼe ạri bạndhiketʼa, menkhan bela khaṭogeye tahẽkante acʼren gelbar celakoante Bethaniạteye calaoena. Ado dosar hilokʼ onko do Bethaniạ ato khonko oḍokʼ hijukʼkan tahẽkanre Jisu do reṅgecʼ kedea. Unre loa belekʼ okte do baṅ tahẽkana, menkhan enrehõ uni do sạṅgiń khon mitʼṭen loa dareye ńel ńamketʼte onare jo ńam lạgitʼe sen sorena. Ar ona dare sore senen khan onare sakam chaḍa ar cetʼge bae ńel ńamleda. Onate dareye metatʼa, “Okoege tishõ amakʼ jo aloko jom ńamma.” Celako do Jisuakʼ noa kathako ańjom tiyokʼkeda. Ado Jerusalemteko seṭeren khan Jisu do mundilteye boloyena ar onḍe kiriń-ạkhrińkoe laga oḍokketʼkoa. Uni do ṭaka-poesa bodoletʼkan hoṛkoakʼ ṭebilko ar parwa kiriń-ạkhrińkoakʼ mạcikoe ulṭạu giḍikatʼtakoa. Uni do mundil talate kiriń ạkhirińkoakʼ oka jinis hõ bae parom idiocoatʼkoa. Ado cetʼako jokhecʼ onko hoṛkoe metatʼkoa, “Sostorre cetʼ nonka baṅ olakana, ‘ińakʼ oṛakʼ do sanam jạtko lạgitʼ koejoṅ oṛakʼ ńumogokʼa mente?’ Menkhan ape do ḍạkukoakʼ danderpe benao akada!” Maraṅ naekeko ar sostor baḍaeko do noa katha ańjomkate Jisu goje lạgitʼ ạt ńam baṛaeko ehopʼena. Onko do Jisuko botoraekan tahẽkana, ente hoṛko do Jisuakʼ cecetʼakʼteko bhaṛo caba akan tahẽkana. Ar ạyupʼen khan uni do celakowante nagraha bahreteye oḍok calaoena. Ado setakʼ jokhecʼ ona horteko parom calakʼkan tahẽkanre celako do rehetʼ sudhạ loa dare rohoṛ akanko ńelkeda. Patras do Jisuakʼ katha disạketʼteye menkeda, “E Guru, ńelme okaṭakʼ darem sarapatʼ tahẽkan ona do rohoṛ akana.” Unre Jisui metatʼkoa, “Isorre biswạs tahentapema. Sạrigeń metapekana, jãhãege begor digdhạte noa burui metakʼ, ‘nonḍe khon uṭhạukʼte jalapurire khadlekʼme,’ are pạtiạukʼ baṅma, okae menetʼ ona do hoyokʼa mente, enḍekhan uni lạgitʼ do hoyokʼgea. Onateń metapekana, jãhãnakʼgepe koe arpe khoj, pạtiạukʼpe ape do onape ńam akada, ar ape lạgitʼ ona do hoyokʼtapea. Apepe koejoṅre jãhãe birudre jãhãnakʼ tahentape khan uni do ikạyepe, jemon aperen sermaren Baba hõ apeakʼ kạikoe ikạitape.” Ona tayom Jisu ar acʼren celako do arhõ Jerusalemteko hecʼena, ar mundilreye dãṛã bãṛãkan tahẽkanre maraṅ naekeko, sostor baḍaeko ar murubiko uni ṭhen hecʼenteko kulikedea, “Oka ektiạrite noakom kạmi kana? Ar okoe noa ektiạriạ doe emakatʼmea?” Jisui roṛ ruạṛatʼkoa, “Iń do mitʼṭen kathań kulipea. Adope roṛ ruạṛ daṛeạń khan iń hõń lạiapea oka ektiạrite noakoń kạmi kana mente. Johan do bạptisma emokʼ reakʼ ektiạri oka khone ńamleda, Isor khon se manwako secʼ khon?” Unre onko do ako talare noako galmaraoana, “Menle khan bon ‘Isor ṭhen khon,’ enḍekhane metabona, ‘cedakʼ tobe bape pạtiạuadea?’ Arhõ bon men lekhan, ‘manwa secʼ khon,’ enḍekhan?” Onko do hoṛkoko botorakokan tahẽkana, ente sanamkoge Johan do mitʼṭen nạbi menteko manaoede tahẽkana. Onateko menkeda, “Ale do bale baḍaea.” Unre Jisui metatʼkoa, “Enḍekhan iń hõ bạń lạiapea oka ektiạrite noakoń kạmi kana.” Ona tayom Jisu do golpoko hotete cetʼakoe ehopʼena. Uni doe metatʼkoa, “Mitʼ hoṛ do mitʼṭen darkha bagwane benaoketʼte ona beṛhaeteye eṭetʼ ạcurkada. Ar darkha rasa benao lạgitʼ lelen kunḍe laketʼte mitʼṭen usul oṛakʼe benaokeda. Ona tayom casako ṭhen bạisạu oṭokate uni do eṭakʼ disạmteye calaoena. Ado jo belekʼ okte hoyen khan ona jo reakʼ bhag hatao lạgitʼ casako ṭhen mitʼṭen gutiye kolkedea. Menkhan casako do uni guti hõ sapʼkedeteko dalkedea ar eken tiko kolgotʼkadea. Unre kisạ̃ṛ do eṭakʼ ar mitʼṭen gutiye kolkedea. Khan casako do uni guti hõ bohokʼreko dalkedea ar uni tulucʼ ạḍi bạṛicʼko beoharkeda. Enrehõ uni do eṭakʼ ar mitʼṭene kolkedea. Ar casako do uniko gocʼkedea. Tayomte uni kisạ̃ṛ do arhõ eṭakʼkoe kolketʼkoa, menkhan onko modre adom doko dalketʼkoa ar eṭakʼko doko gocʼketʼkoa. “Ado onḍe kole lạgitʼ kisạ̃ṛren do eken mitʼ goṭengeye sarecʼena. Uni do acʼren dulạṛiạ hoponge. Ar mucạtʼre acʼren hopongeye kolkedea; are hudisana; ‘onko do nahakʼ ińren hoponko manotea.’ Menkhan onko casako do ako akoreko menana, ‘nuige owaris doe hoyokʼa. Dela bon gojea, enḍekhan aboge onaren mạlik bon hoyokʼa.’ Onko do hopontetʼ sapʼkedeteko gocʼkedea ar darkha bagwan bahrereko giḍikadea. “Enḍekhan mase lạipe, darkha bagwanren mạlik do cetʼe cekaea? Uni doe hijukʼa ar casakoe gocʼkoa ar darkha bagwan do eṭakʼkoe jimạ oṭoakoa. Ape do cetʼ sonot sostorre bape paṛhao akada? ‘Raj mistiriko okaṭakʼ dhiriko bad giḍi oṭoletʼ onage konac reakʼ asol dhiri hoyena; noa do Probhu khonakʼge hoyena, ar aboakʼ mẽtʼ samaṅre do ạḍi hahaṛawakʼge?’ ” Unre sostor baḍaeko do Jisu sabeko menana, enteko bujhạukeda, ako birudrege ona golpo doe lạiyeda. Menkhan onko do hoṛko botoratʼkote Jisu bạgiadeteko calaoena. Onko sostor baḍaeko do Jisu acʼakʼ kathate jhạliye lạgitʼ Phạrusiko ar Herod secʼrenkoko kolketʼkoa. Onko do Jisu ṭhen hecʼkateko menkeda, “E Guru, alele baḍaea, mitʼṭen sạri hoṛ kanam. Ar hoṛ cetʼko hudisme ar bako hudisme, ona do bam moneakʼ kana, ente am do okoeakʼ mẽtʼãhã hõ bam beṅgetʼakʼ kana. Ar sạri sạrige Isorakʼ hor reaṅem cetʼako kana. Ado lạialeme, Moseakʼ ạn lekate Romren maharaj khajna emae do ganokʼa se baṅ? Ar uni do khajnale emaea se baṅ?” Jisu do onkoakʼ phạsiạratetʼ baḍaeketʼteye metatʼkoa, “Cedakʼpe biḍạuedeń kana? Den mitʼṭen Dinar ạguạńpe.” Ado mitʼṭen Dinarko aguade khan Jisu do onkoe kuliketʼkoa, “Noare chap akan muṭhạn ar ńutum do okoeakʼ kana?” Metadeako, “Romren maharajakʼ kana” Jisui metatʼkoa, “Okaṭakʼ maharajakʼ kan ona do maharajge emaepe, ar okaṭakʼ Isorakʼkan ona do Isorge emaepe.” Jisuakʼ noa katha ańjomkateko hahaṛayena. Ado Sạdukiko modren adomko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ do cetʼge bạnukʼa. Onate onko do Jisuko kulikedea, “E Guru, Mose do abo lạgitʼ noae ol oṭoakada, ‘jãhãe hoṛ begor gidrạwante bạhuttetʼe gocʼ bạgi oṭoae khan enḍekhan bokottetʼ do uniye baplayete dadattetʼren bõse teṅgokoma.’ Eae boehako tahẽkana, ar pạhilicʼ do baplakate begor gidrạwantegeye gocʼena. Khan dosaricʼ do hilit erae baplakedea, menkhan uni hõ begor gidrạwantegeye gocʼena, ar tesaricʼ hõ onka lekageye gocʼena. Ar nonkage eae boehako modre, okoeren hõ gidrạ do bako hoelena. Ado mucạtʼre uni maejiu hõe gocʼena. Enḍekhan gocʼkoko jiwetʼ beredokʼre uni do okoeṭakʼren bạhui hoyokʼa? Ente eae hoṛge coṅ uni mako baplalede.” Jisui roṛ ruạṛatʼkoa, “Bhuledape, ente ape do sostor hõ bape baḍaea ar Isorakʼ daṛe reakʼakʼko hõ baṅ. Gocʼkoko jiwetʼ beredokʼre bạhu hõ bako bạhu joṅa ar jãwãe hõ bako jãwãeyokʼa; onko do serma goḍet lekako hoyokʼa. Menkhan gocʼko jiwetʼ beredokʼ reaṅ Moseakʼ puthire ol akan jolokʼkan jhạwạ reakʼ katha do cetʼ bape paṛhao akada, Isor do Moseye metadea, ‘ińge Abrahamren Isor, Isạhakren Isor ar Jakobren Isor?’ Isor do gocʼkoren Isor doe baṅkana, menkhan jiwetʼkoren Isorge. Ape do ạḍipe bhuleda.” Ado sostor baḍaeko modren mitʼ hoṛ do onḍe hecʼkate reṭe peṭekʼ kane ańjomketʼkoa. Ar Jisu bes okocʼteye roṛ ruạṛetʼkan ńelkedeteye kulikedea, “Sanam khon pạhilakʼ hukum do okaṭakʼ kana?” Jisui roṛ ruạṛkeda, “Sanam khon pạhilakʼ hukum do hoyokʼ kana, ‘E Israelko, ańjompe, aboren Probhu Isor doe mitʼ goṭengea. Onate apeakʼ goṭa ontorte, goṭa jiwite, goṭa monte ar goṭa daṛete aperen Probhu Isor dulạṛepe.’ Ar dosarakʼ hukum do noa kana, ‘am aḍe paseren hoṛ apnar leka dulạṛem.’ Noakin banar hukum khon maraṅ hukum do ar cetʼge bạnukʼa.” Unre sostor baḍayicʼ doe menkeda, “E Guru, bhage katha kangea. Am do sạrigem menakada, Isor doe mitʼ goṭengea ar uni chaḍa eṭakʼ Isor do bạnukʼkoa. Ar goṭa ontorte, goṭa bujte ar goṭa daṛete uni dulạṛe ar am aḍe paseren hoṛ apnar leka dulạṛe do janwar ar eṭakʼ joto lekan dãṛẽko khon hõ sorosgea.” Jisu do sostor baḍaeyicʼ bes budan hoṛ leka roṛ ruạṛetʼkanteye metadea, “Am do Isorakʼ raj khon pharakre do bạnukʼmea.” Ar un khon Jisu jãhãnakʼ kuliye do okoe hõ bako dilleda. Ado Jisu mundilreye cetʼakokan tahẽkan jokhecʼe kuliketʼkoa, “Sostor baḍaeko do cekateko meneda, Mạsi do Dạudren hopon kanae mente? Dạud ma acʼge coṅ sonot Jiu hoteteye menakatʼ, ‘Probhu do ińren Probhui metadea, tin dhạbicʼ iń do amren bạiriko amakʼ jaṅga latarre bạń dohoko, unhạbicʼ ińakʼ jojomsa aṛere durupʼme.’ Dạud acʼge coṅ uni ma Probhui metaekan enḍekhan cekate Mạsi do uniren hopone hoedaṛekokʼa?” Ar aema hoṛ do kusi monte Jisuakʼ kathako ańjometʼ tahẽkana. Jisu do cetʼako tulucʼe metatʼkoa, “Sostor baḍaeko khon sontor akae tahenpe. Onko do tilpạṅ talpaṅ aṅgropko horoga ar hạṭiạ bajarkore johar ocokʼko kusiyakʼa. Onko do sunạgogre laha duṛupʼakʼko ar bhojkore asol asol jaegageko kusiyakʼa. Ar hoṛko ṭhen ńelocokʼ lạgitʼ jeleń jeleńko koejoṅa, menkhan eṭakʼ secʼ do rạnḍi maejiukoakʼ oṛakʼ-duạrko jom ujạṛetʼtakoa. Nonkan hoṛ do bạ̃ṛti sạjạiko ńama.” Ona tayom Jisu do mundil reakʼ dan sunduk pheḍre duṛupʼkate ṭaka-poesa emokʼkoe ạri bạndhiyetʼko tahẽkana. Ar kisạ̃ṛ hoṛko do ḍher ṭaka-poesako dankeda. Ar mitʼṭen reṅgecʼ rạnḍi maejiu do hecʼkate eken barea huḍiń poesae dohokeda. Unre Jisu do acʼren celako hohoatʼkoteye metatʼkoa, “Sạrigeń metapekana, nui reṅgecʼ rạnḍi maejiu do sundukre sanam hoṛko khon ḍhere danakada. Ente onko hoṛ do akoakʼ asecʼ tasecʼ dhon khonko dohoakada, menkhan nui maejiu do acʼakʼ okulạnakʼ khon jauḍicʼ bańcao tahen lạgitʼ tahẽkantae, ona jotogeye dohokeda.” Ado Jisu mundil khone oḍok calakʼkan tahẽkanre acʼren mitʼṭen cela do uniye metadea, “E Guru, ńelme, tinạkʼ lạṭu lạṭu dhiri ar tinạkʼ mońj mońj dolanko!” Jisu do uniye metadea, “Am ma noako lạṭu lạṭu dolanem ńeletʼkan, menkhan noa reakʼ mitʼṭen dhiri hõ ar mitʼ dhiri cetanre baṅ tahena; joto do rạputʼ giḍi ocokʼa.” Jisu do mundil samaṅ senakʼ Joitun burureye duṛupʼ akan tahẽkanre Patras, Jakob, Johan ar Andreasteko do hape hapete hecʼkate uniko kulikedea, “Lạialeme, noako do tis hoyokʼa? Ar okalekan cinhạko ńeltele bujhạu daṛeakʼa noako purạukʼ lạgidokʼ ghuṛi do seṭer akana.” Jisui metatʼkoa, “Ńelpe, okoe hõ jemon aloko bulạupe. Aema hoṛ do iń ńutumte hecʼkateko mena, ‘iń kangeạń uni do,’ ar aema doko bulạu ocokʼa. Ape do lạṛhại reakʼ saḍekope ańjomlere alope bilbilạukʼa. Noako do hoyokʼgea, menkhan unrehõ mucạdokʼ do baṅkana. Mitʼ jạt eṭakʼ jạt birudre, ar mitʼ rajosṭi do eṭakʼ rajosṭi upạrteko lạṛhạiya; ar aema jaegare dhạrti laṛaokʼa ar akal hoyokʼa. Menkhan noako do eken saset reakʼ etohopʼ kana. “Sontor akan tahenpe. Maraṅ bạisiren hoṛko ṭhenko soprotpea ar sunạgogkoreko dalpea. Iń iạte disạm cakʼlaoko ar rapajko samaṅre teṅgokʼ hoyokʼtapea; ar onko samaṅre iń reaṅ goha emokʼ hoyokʼtapea. Sanam jạt jạtko ṭhen Isorakʼ bhage sombat do porcar maṛaṅ hoyokʼa. Ar bicạr lạgitʼko sapʼ idilepere laha khon alope bhabnakʼa cetʼko roroṛ hoyokʼtapea mente. Ona jokhecʼ oka kathape lại ocokʼ, onage roṛpe, ente apege roroṛ hoyokʼtapea ona do baṅ bickom sonot Jiugeye roṛa. “Boeha do boehatetʼe soprotea, apat do hopontetʼ gocʼ ocoye lạgitʼe sapʼocoyea. Gidrạko do go-baba birudreko teṅgona arko khũn ocokoa. Iń iạte sanamkogeko hirkhạwapea, menkhan mucạtʼ hạbicʼ okoeye ṭarhao tahen uni do bańcaoe ńama. “Ar ujạṛ reakʼ hirkhạwakʼ okare tahen baṅ ganokʼ, ona onḍe tahẽakanpe ńela (Paṛhaoicʼ doe moneakʼma) unre Jihudạre tahenko do buruteko ńir joṅma. Chatre menaeicʼ do jãhãnakʼ oḍok idi lạgitʼ aloe pheḍokʼma ar oṛakʼte aloe bolokʼma. Baṛgere menaeicʼ hõ oyonakʼ ạgui lạgitʼ aloe ruạṛma. Unre bhạrti hoṛmoanko ar okoe do gidrạko nunuako onkore do hae hae! Koejoṅpe, jemon rabaṅ dinre noako alo hoyokʼ, ente unre nonkan santaoko hoyokʼa one oka do dhạrti sirjạu khon ńit hạbicʼ baṅ hoeakan ar ona tayom do ar baṅ hoyokʼa. Probhu onako din bae khaṭole khan okoe hõ ohoko bańcao daṛekokʼa. Menkhan Isor do acʼren bachao akan hoṛko lạgitʼ ona dinkoe khaṭo akada. “Unre jãhãegeye metape, ‘ńelpe, Mạsi do nonḍe,’ se ‘hanḍe menaea,’ alope pạtiạukʼa; ente eṛe Mạsi ar eṛe nạbikoko upelokʼa ar aema lekan hahaṛa kạmikoko uduga, hoedaṛeakʼ khan Isorren bachaoko hõko bulạu daṛeakoa. Menkhan ape do sontorakae tahenpe. Ńelpe, laharege jotowakʼ iń lại dohoatʼpea. “Ona okte reakʼ santao tayomge siń cando doe ńutokʼa, ar ńindạ cando do bae terdeja, Ipilko serma khonko ńurokʼa, siń cando, ńindạ cando ar ipilko do bako ṭarhaokʼa. Unre hoṛko do Manwa Hopon maraṅ daṛe ar ṭhonokante rimilte hijukʼko ńelea. Uni do acʼren serma goḍetkoe kolkote dhạrti reakʼ mitʼ mucạtʼ khon eṭakʼ mucạtʼ hạbicʼ ponon secʼ khon Isorren sanam bachao akan hoṛkoe jarwa mitʼkoa. “Loa dare ńelte cetʼ joṅpe. Ente ona reakʼ dạrko balekate sakam sagenlen khanpe baḍae daṛeakʼkana, lolo din do seṭer akana. Onkage noako hoyokʼ kanpe ńellere bujhạupe, Manwa Hopon doe hecʼ sorakana, hẽ; duạr ṭhengeye teṅgo akana. Sạrigeń metapekana, noako hoelenre hõ noa piṛhiren thoṛa hoṛ do bańcaoko tahena. Serma ar dhạrti do cabakʼa menkhan ińakʼ kathako do jaejug hạbicʼ tahena. “Ona din ar ona okte reakʼ katha do okoe hõ bako baḍaea, sermaren goḍetko hõ baṅ, ar Hopon hõ baṅ, eken Babageye baḍaea. Ape do sontor akan tahenpe, jagwar tahenpe ar koejoṅpe, ente bape baḍaea oktetetʼ do tiskan coṅ. Ona din do nonkan mitʼṭen hoṛ lekana okoe do eṭakʼ disạmteye calao lạgidokʼkan. Ar oṛakʼe bạgiyakʼ jokhecʼ acʼren gutiko joto lekan dạyike ematʼkoa. Ar apan ạpin kạmikoe batlao baṛawatʼkote horhoicʼ do jagwar akae tahene men oṭoadea. “Ape hõ onkage jagwar akae tahenpe, ente oṛakʼren mạlik baṅ do ạyupʼ, baṅ do tala ńindạ, baṅ do simrakʼ okte, baṅ do setakʼ jokhecʼe hijukʼ ona do bape baḍaea. Uni do ackage hecʼkate jạpitʼ akatʼ jemon bae ńampe. Okaṭakʼ iń metapekan ona do sanamkoń metakokana, jagwar akae tahenpe.” Unre sen parom porob ar bin khạmianakʼ piṭhạ porob do ar bar din bạki tahẽkana. Ar maraṅ naekeko ar sostor baḍaeko do Jisu hape hapete sapʼkate goje reakʼ ạtko ńam baṛayetʼ tahẽkana. Onkoko menkeda, “Porobre do baṅ; baṅkhan disạm hoṛko talare gulmal hoe botejokʼa.” Unre Jisu do Bethaniạren murhucʼ jom rugi Simonakʼ oṛakʼreye tahẽkana. Ado jojome duṛupʼ akan tahẽkanre mitʼṭen maejiu do ponḍ dhiri cukạkʼre ạḍi daman jaṭamaṅsi sunumanteye hecʼena. Ar cukạkʼ rạputʼkate uni do Jisuakʼ bohokʼre ona sunume dulkeda. Menkhan onḍe okoeko tahẽkan onko modre adom hoṛ do edreyente ako akore menjoṅana, “Cedakʼ noa mahkaokʼ sunum do nosṭo giḍikakʼ hoyokʼ kana? Noa ạkhriń lekhan pe sae Dinar khon hõ bạ̃ṛti damkokʼa ar ona do reṅgecʼ orecʼko emdaṛekekoa.” Onko do noa menkate maejiu upạrte karacʼ kurujokʼko ehopʼena. Unre Jisui metatʼkoa, “Thirokʼpe, cedakʼpe duk ocoyedea? Uni do iń lạgitʼ bhageakʼgeye kạmiakada. Reṅgecʼ orecʼko ma jaoge ape sãore menakʼko, ar tinrepe monejoṅ unregepe goṛo daṛeakoa, menkhan iń do jao ghuṛi bape ńameńa. Uni do okae daṛeakatʼ onageye kạmi akada. Uni do topayiń lạgitʼe sapṛaoedeńte laharege sunume ojokʼ ạdińa. Sạrigeń metapekana, dhạrti reakʼ jãhã jaegarege Isorakʼ bhage sombat porcarokʼ, onḍege nui maejiue kạmiakatʼakʼ hõ uni disạye lạgitʼ lại torakʼa.” Ona tayom Jihudạ Iskariotko metae mitʼ hoṛ do Jisu soprot ocoye lạgitʼ maraṅ naekeko ṭhene calaoena. Naekeko do Jihudạwakʼ katha ańjomkateko rạskạyena ar ṭaka emae lạgitʼ kathako emadea. Ar Jisu soprote lạgitʼ ạt ńam baṛaye ehopʼena. Bin khạmianakʼ piṭhạ porob reakʼ pạhil hilokʼ do sen parom porob bhojre lạgitʼ bheḍa hoponko dãṛẽyetʼko tahẽkana. Onate celako do Jisuko kulikedea, “Sen-parom porob reakʼ bhoj do okarele tearama mentem menjoṅ kana?” Unre Jisu do acʼren barea cela noa menkateye kolketʼkinạ, “Aben do nagrahate calakʼben. Ar onḍe mitʼṭen herel hoṛ kanḍate dakʼe idikan ben ńamea. Aben do uni ben pańja idiyea. Ar uni okaṭakʼ oṛakʼteye bolokʼa, ona oṛakʼren kisạ̃ṛ ben metaea, ‘Gurui menakada, celako sãote sen-parom porob reakʼ bhoj okareń jom daṛeakʼ ona ińakʼ peṛa kandha do okare?’ Khange uni do cetan kandhare mitʼṭen sajao akatʼ oṛakʼe udukʼ abena. Ar onḍege jotowakʼ ben sapṛaoa.” Unre unkin cela do senkate nagrahatekin boloyena, ar Jisui metatʼkin tahẽkan lekage jotowakʼkin ńamketʼte sen parom porob reakʼ bhojkin sapṛaokeda. Ar ạyupʼen khan Jisu do gelbar celako sãote onḍeye calaoena. Ado jojomko duṛupʼ akan tahẽkanre Jisui metatʼkoa, “Sạrigeń metapekana, ape modre mitʼ hoṛe soprotińa, uni do iń tulucʼ jojomkanicʼge.” Unre celako doko bhabnayente mimitʼ hoṛkate memenko ehopʼena, “Probhu, uni do cetʼ iń kạnạń? Jisui metatʼkoa, “Uni do gelbarko modren mitʼ hoṛge, okoe do iń tulucʼ bạṭire piṭhại topoyetʼkan. Manwa Hoponakʼ gujukʼ reaṅ sonot sostorre okaleka olakan onkage uni do gujukʼ hoyokʼtaea; menkhan hae uni hoṛ do, one okoe uniye sapʼ ocoyede! Uni hoṛakʼ janam do alo hoelen khange boge hoekokʼa.” Adoko jojomkan tahẽkanre Jisu do piṭhạ halaṅkate Isore gun manao joharadea ar onae kecakʼketʼte celako ematʼkoteye metatʼkoa, “Ne ataṅpe, noa do ińakʼ hoṛmo kana.” Ona tayom bạṭi halaṅkate Isore gun manao joharadea are ematʼkoa. Ar sanamkoge ona bạṭi reakʼko ńũkeda. Unre Jisui metatʼkoa, “Noa do ińakʼ mãyãm kana, one okaṭakʼ do ạḍi hoṛko lạgitʼ emogokʼkan. Manwako lạgitʼ Isorakʼ nawa bondobos do ińakʼ mãyãm hotetege bahal tahena. Sạrigeń metapekana, Isorakʼ rajre darkha rasa nawate ạuriń ńũi hạbicʼ noa do ar bạń ńũiya.” Ona tayom onko do mitʼṭen sarhao sereńateko oḍokena ar jạitun buruteko rakapʼ calaoena. Ado Jisu acʼren celakoe metatʼkoa, “Jotokoge iń iạte monrepe tạkijokʼa. Sonot sostorre olakana, ‘gupiyicʼ iń gojea, onate bhiḍiko doko chir chạturokʼa.’ Menkhan gocʼko khoniń jiwetʼ beredokʼ tayom iń do ape lahate Gạlilteń calakʼa.” Unre Patrase menkeda, “Sanamkoko tạkicʼlenre hõ iń do ohogeń tạkicʼlena.” Jisu do uniye metadea, “Sạrigeń metamkana, teheń ńindạ sim sạnḍi bar dhao ạuriye ragre am do pe dhaoem baṅeńa.” Menkhan Patras do artetʼ murukteye menkeda, “Am sãote gujukʼ hoyokʼtińre hõ iń do ohogeń baṅlema.” Ar eṭakʼ celako hõ ona mitʼ kathageko roṛkeda. Ona tayom Jisu ar acʼren celako do Gethsimạniko metakʼ mitʼṭen jaegateko oḍok calaoena. Jisu do celakoe metatʼkoa, “Tin hạbicʼ iń koejoṅ unhạbicʼ nonḍe duṛupʼ hataṛokʼpe.” Noa menkate uni do Patras, Jakob ar Johane soṅge toraketʼkoa ar monre ạḍi duk ar dhak dhakaokʼe ehopʼena. Uni do onkoe metatʼkoa, “Dukte ińakʼ jiwi do oḍokokʼ kantińạ. Ape do nonḍe jagwar akae tahenpe.” Ona tayom uni do lahańokʼ senkate otre taberenteye koekeda jemon ona ghuṛi hoedaṛeakʼ khan acʼ ṭhen khon pharakokʼ. Uni doe menkeda, “Abba, E Baba, am ṭhen do sanamakʼge hoedaṛeakʼa. Noa duk reakʼ bạṭi iń khon pharakme baṛe. Enhõ ińakʼ sanaleka do baṅ menkhan amakʼ sanalekage hoyokʼma.” Ona tayom celako ṭhene ruạṛ hecʼen khan jạpitʼ akatʼe ńelketʼkoa. Uni do Patrase metadea, “E Simon, am dom jạpitʼ joṅkana? Mitʼ ghonṭa hõ cetʼ jagwar bam tahẽ daṛeada? Jagwar tahenpe ar koejoṅpe jemon biḍạure alope paṛaokʼ. Ontorre sana menakʼgea, menkhan hoṛmo do nijorgea. Jisu do arhõ senkate onkageye koekeda. Ar inạ tayome ruạṛ hecʼen khan arhõ jạpitʼakatʼe ńamketʼkoa, ente dudṛumte onkoakʼ mẽtʼ do hạrubokʼ kan tahẽkana. Ar Jisu cetʼko roṛ ruạṛaea mente onko do bako bujhạuleda. Ado tesar dhao ruạṛ hecʼkateye metatʼkoa, “Ńitokʼ hõpe jạpitʼ akatʼgea? Ḍher hoeakana. Ńelpe, okte do seṭerena. Ńitge Manwa Hopon do kại hoṛkoakʼ tireye soprotʼ ocokʼa. Ma beretʼpe, dela bon calakʼa, okoe bạirikoakʼ tireye soprotiń uni doe seṭerena.” Jisui roroṛkan tahẽkanrege Jihudạ do onḍeye hecʼena. Uni do gelbar celako modren mitʼ hoṛe tahẽkana. Ar uni sãote ạḍi utạr hoṛ do tarwaṛe ar ṭheṅgawanteko hecʼena. Onko do maraṅ naekeko ar sostor baḍaeko ar murubikoko kolakatʼko tahẽkana. Ar okoe Jisui soprotlede uni do onko tulucʼ mitʼṭecʼ cinhại ṭhik dohoakatʼ tahẽkana. Uni doe metatʼko tahẽkana, “Okoeṭakʼ iń cokʼae, uni kangeae. Ape do unigepe sabea arpe pahra idiyea.” Onate Jihudạ do mitʼ mohnḍa Jisu ṭhen senkateye menkeda, “E Guru!” Ar noa menkateye cokʼadea. Unre onko hoṛ do Jisuko sapʼkedea. Menkhan sorre teṅgo akanko modren mitʼ hoṛ do acʼakʼ tarwaṛe bocʼkate maraṅ naekeren gutiyakʼ luture hese ńurketʼtaea. Jisu do onkoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawante iń sasapʼpe hecʼakana? Iń ma jaoge ape talare tahẽkate mundilreń cetʼape kan tahẽkan, ar unre ma bacope sapʼlediń. Menkhan sostor reakʼ katha do purạukʼtege hoyokʼa.” Unre celako do uniko ńir bạgiadea. Ar mitʼ juạn koṛa do eken oyonakʼte paṭhekate Jisu tayom tayomteye calakʼkan tahẽkana. Hoṛko do uniko jhuṭiạukede khan oyonakʼ giḍikate eken hoṛmogeye ńir paskaoena. Onko hoṛ do maraṅ naeke ṭhen Jisuko idikedea. Ar onḍe do maraṅ naekeko, murubiko ar sostor baḍaeko mitʼ ṭhenko jarwayena. Ar Patras do pharak pharakʼre tahẽkate Jisu tayomte senkate maraṅ naekeakʼ raca hạbicʼe boloyena. Ar onḍe palṭonko sãoteye duṛupʼ panteyente seṅgel ṭhen jorogokʼe ehopʼena. Ar maraṅ naekeko ar maraṅ bạisiren hoṛko do Jisu goje lạgitʼ gohako ńam baṛakan tahẽkana, menkhan onko do okaṭakʼ gohage bako ńamleda. Jisu birudre aema hoṛge eṛe gohako emkeda, menkhan onkoakʼ goha hõ baṅ jurilentakoa. Unre adom hoṛ do teṅgoyente uni birudre noa eṛe gohako emkeda, “Ale do roroṛle ańjomakadea, ‘Iń do manwa benaoakʼ noa mundil iń dhaṅ dhasera ar pe dinte nonkan mitʼṭen mundil iń benaoa okaṭakʼ do manwa tite benaoakʼ baṅkan.’ ” Menkhan enrehõ onkoakʼ goha do baṅ jurilentakoa. Unre maraṅ naeke doe teṅgoyena ar Jisui kulikedea, “Am do cetʼ bam roṛ ruạṛa? Am birudre noko do cetʼ gohako emeda?” Jisu do thirgeye tahẽyena, cetʼge bae roṛ ruạṛleda. Maraṅ naeke do arhõe kulikedea, “Am do cetʼ sarhaoanicʼ Isorren Hopon Mạsi kanam?” Jisui menkeda, “Uni kangeạń. Ar ape do Manwa Hopon sanam daṛeanicʼ Isorakʼ jojomsa aṛere duṛupʼ akan ar rimilte hijukʼkanpe ńelea.” Khange maraṅ naeke do acʼakʼ kicricʼ oṛecʼketʼteye menkeda, “Goha reakʼ do ar cetʼ jạruṛabona? Ape hõ coṅpe ańjomketʼ uni do Isore opomane kana. Ado cetʼpe bujhạukea?” Onko jotoge Jisu do gujukʼ sạjại lek kanae menteko bicạr dusikedea. Unre adomko do hoṛmoreko thoadea ar uniakʼ mẽtʼko betʼketʼtaea ar kilạukedeteko metadea, “Am do cetʼ nạbi kanam? Mase lạialeme okoeye dalketʼmea!” Ona tayom palṭonko do idikateko thapa baṛakedea. Patras tinre bhitri racareye tahẽkana unre maraṅ naekeren mitʼṭen kạ̃ṛmĩ do onḍeye hecʼena. Ar Patras jorogokʼkane ńelkede khan beṅgetʼ uricʼadeteye metadea, “Am hõ coṅ uni Nasaretren Jisu sãotem tahẽkan.” Menkhan Patras doe baṅketʼteye menkeda, “Cetʼem meneda ona do baḍae hõ bạń baḍaea ar bujhạu hõ bạń bujhạueda.” Noa menkate Patras do bahre duạr ṭhene calaoen khan mitʼṭen sim sạnḍi doe rakʼgotʼkeda. Uni kạ̃ṛmĩ do Patras arhõe ńelkede khan onḍe teṅgo akankoe metatʼkoa, “Nui hoṛ do onko modren kanae. Patras do arhõe baṅkeda. Ado thoṛa ghạṛicʼ tayom sorre okoeko teṅgo akan tahẽkan onko hõ Patrasko metadea, “Khạṭige am do onko modren mitʼ hoṛ kanam, ente am dom Gạlilren kana.” Unre Patras doe sarapana ar kiriạyenteye menkeda, “Okoe reakʼpe menetʼkan uni do bạń oromakadea.” Ar unrege sim sạnḍi do dosar dhaoe rakʼgotʼkeda. Ar unre Patras do ona katha disạ hecʼadea one Jisui metade tahẽkan, “Sim sạnḍi bar dhao ạuriye ragre am do pe dhaoem baṅeńa.” Onate uni do hũk hũke rakʼkeda. Maraṅ naekeko do ạḍi setakʼre, murubiko, sostor baḍaeko ar maraṅ bạisiren hoṛko soṅgekate mitʼṭenko solhakeda. Ona tayom Jisuko tol idikedete Romren disạm cakʼlaoicʼ Pilạt ṭhenko jimạkadea. Pilạt do Jisui kulikedea, “Am do cetʼ Jihudikoren raj kanam?” Jisui roṛ ruạṛkeda, “Am do ṭhikgem menakada.” Maraṅ naekeko do Jisu aemako dusikedea. Onate Pilạt do arhõ Jisui kulikedea, “Am do cetʼ bam roṛ ruạṛa? Ńelme, tinạkʼko dusiyetʼmea.” Menkhan Jisu do cetʼge bae roṛ ruạṛleda. Onate Pilạt doe hahaṛayena. Sen-parom porobre Pilạt do hoṛkoakʼ khoj leka mitʼṭen kạidiye aṛakʼedekan tahẽkana. Unre Barabbako metae mitʼṭen hoṛ do hajotreye tahẽkana. Uni do hul jokhecʼ hulletʼkan hoṛko soṅgete tahẽkateye khũnletʼ tahẽkana. Ar gadel hoṛ do Pilạt ṭhen hecʼkateko metadea, “Am do jaoge okam ceka ạguakatʼ ńit hõ onkaeme baṛe.” Pilạte metatʼkoa, “Jihudikoren rajiń aṛakʼapepe khojkana?” Enteye baḍaekan tahẽkana, maraṅ naekeko do hiskạte acʼakʼ tire Jisuko soprot akadea. Menkhan maraṅ naekeko do disạm hoṛko uskạuketʼkoa jemon onko do Jisu bodolte Barabbako khoje. Pilạt do arhõe kuliketʼkoa, “Enḍekhan Jihudikoren rajpe metaekan uni doń cekaea?” Onko do ãṭ aṛaṅte hohoateko menkeda, “Uni do krus kaeme.” Pilạte metatʼkoa, “Cedakʼ, cetʼe dosakatʼte?” Menkhan hoṛko do artetʼ ãṭ aṛaṅte hohoate memenko ehopʼena, “Uni do krus kaeme.” Ar Pilạt do hoṛko kusi ocoko lạgitʼ Barabbageye aṛakʼatʼkoa, ar Jisu do cạbuke reakʼe hukumketʼte kruskae lạgitʼe aṛakʼatʼkoa. Ona tayom palṭonko do disạm cakʼlaoicʼakʼ dolan bhitrite Jisuko idikedea. Onḍe do eṭakʼ palṭonko hõko jarwa mitʼketʼkoa. Onko do beguni roṅakʼ kicricʼteko oyokedea, ar jạnumanakʼ nạ̃ṛĩ reakʼ mukuṭ galaṅkate bohokʼreko horokʼadea. Ona tayom metaeko ehopʼena, “Johar, Jihudikoren raj, jitạu hoyokʼtam ma!” Onko do mitʼṭen ṭheṅgate bohokʼreko dal dalaekan arko thoaekan tahẽkana, ar ikhṛumkateko ḍobokʼaekan tahẽkana. Adoko siṛog baṛawade khan beguni roṅakʼ kicricʼko totʼketʼtaete acʼakʼ kicricʼko horokʼadea ar kruskae lạgitʼko idikedea. Ado ona jokhecʼ Kurene nagraharen Simon ńutuman mitʼṭen hoṛ do ato secʼ khon ona horteye calakʼkan tahẽkana. Uni do Aleksander ar Ruphustekinren apate tahẽkana. Palṭonko do Jisuakʼ krus gokʼiditae lạgitʼko sapʼ paṭetʼkedea. Onko do Golgatha, torjomate do khạpriko metakʼ mitʼṭen jaegateko idikedea. Ar gondhoros mesalakatʼ sirkạ ńũae lạgitʼko emadea, menkhan uni do bae ńũleda. Inạ tayom onko do Jisuko kruskedea. Ar palṭonko do uniakʼ kicricʼ hạṭińjoṅa menteko gulibãṭkeda. Onko do setakʼ are baja okte Jisuko kruskedea. Ar uni birudre dusi reakʼ (dos-nama) re ol tahẽkana, “Jihudikoren raj.” Onko do Jisu sãote barea ḍạku hõko krusketʼkina, mitʼṭen do uniakʼ leṅga secʼre ar eṭagicʼ do uniakʼ jojomti secʼre. Onate sonot sostor reakʼ katha noa katha purạuena: “Uni do beạiniko tulucʼe lekhayena.” Ar horte parom calakʼkanko do bohokʼ ruku rukuate Jisu siṛogaeteko metadea, “Eya mundil dhaṅ dhasericʼ ar pe dinte benao ruạṛicʼ! Ma ńitokʼ krus khon pheḍ hijukʼte bańcaokʼme!” Onkage maraṅ naekeko ar sostor baḍaeko hõ siṛogaete ako ako talare memenko ehopʼena, “Uni do eṭakʼkoe bańcaoketʼkoa, menkhan acʼ do bae bańcao daṛeakʼ kana. Uni do Mạsi, Israelkoren raj! Ńitokʼ krus khone pheḍ hijukʼma; jemon ona ńelte ale hõle pạtiạukʼ.” Jisu sãote krus akankin hõ onkage kin siṛogadea. Ado gelbar baja khon pe baja hạbicʼ goṭa disạm do ńũtena. Ar pe baja okte Jisu do ãṭ aṛaṅte hohoateye menkeda, “Eloi, Eloi Lama Sabakhthani,” metakʼme “E ińren Isor, E ińren Isor, cedakʼem bạgi giḍiạdińa?” Ar sorre teṅgoakanko modren adom hoṛ do noa ańjomkateko menkeda, “Ańjompe, uni do Eliại hohoae kana.” Unre mitʼ hoṛ do ńir senkate sirkạre mitʼṭen spońje topokeda ar ṭheṅgare gutukate Jisu ńũae lạgitʼe cepecʼadea. Uni doe menkeda, “Hape ńellege bon Eliạ do uni bańcaoe hijukʼa se baṅ.” Ona tayom Jisu do ãṭ aṛaṅteye hohoketʼ khan jiwi oḍokentaea. Unre mundil reakʼ orwal do coṭ khon pheḍ hạbicʼ oṛecʼente bar hạṭińena. Ar samaṅreye teṅgo akan tahẽkan palṭon do Jisu nonka gujukʼkane ńelkedeteye menkeda, “Sạrige uni do Isorren Hopone tahẽkana.” Ar maejiuko hõ sạṅgińre teṅgokateko ạri bạndhiyetʼ tahẽkana. Onko modre Magdalaren Mạriạm, huḍiń Jakob ar Josestekinren eṅgat Mạriạm ar Salomitekoko tahẽkana. Jisu Gạlilreye tahẽkanre noko maejiu do uni sãoteko calakʼkan tahẽkana arko sapʼsoraekan tahẽkana. Ar Jerusalem khonko hecʼlen tahẽkan maejiuko hõ onḍeko tahẽkana. Enhilokʼ do sapṛaokʼ din, metakʼme jirạukʼ mãhã laha din tahẽkana. Ado ạyupʼ hijukʼkan tahẽkan jokhecʼ Arimạthiạren Joseph do Pilạt ṭhen senkate Jisuakʼ mạ̃ṛĩye koekeda. Uni do maraṅ bạisiren mitʼṭen manotan hoṛe tahẽkana ar acʼhõ Isorakʼ raj reakʼe ńel hohorkan tahẽkana. Pilạt do Jisu usạreteye gocʼente aḍiye hahaṛayena. Ar sạrigeye gocʼ akana se baṅ, onate subedar hohoadeteye kulikedea. Ado subedar ṭhene baḍaeketʼ khan mạ̃ṛĩ do Josephe emadea. Joseph do kicricʼe kiriń ạguketʼte Jisuakʼ mạ̃ṛĩye pheḍkeda ar kicricʼteye bedhaokeda, ar cạṭạinire kholao akatʼ mitʼṭen topareye dohokada. Ona tayom mitʼṭen dhiri guḍrạu ạgukate topa duạre esetʼ oṭokada. Jisuakʼ mạ̃ṛĩ okare dohoyen, ona do Magdaloniren Mạriạm ar Joses eṅgat Mạriạmtekin hõkin ńelkeda. Ado Jirạukʼ mãhã paromen khan Magdalaren Mạriạm, Jokob eṅgat Mạriạm, ar Salomiteko do mạ̃ṛĩre ojokʼakʼ lạgitʼ mońj so mosolako kiriń ạgukeda. Ar hapta reakʼ pạhil din setakʼ jokhecʼ, cando rakabokʼ sãote onko do topa ṭhenko calaoena. Unre ako akoreko menjoṅkan tahẽkana, “Topa duạr khon dhiri do okoeye ocokʼ abona?” Menkhan onko do beṅgetʼ rakapʼkateko ńelkeda, dhiri do maraṅge tahẽkanre hõ, ona do ocokʼ akana. Ado topa bhitriteko boloyen khan jojomsa aṛere ponḍ kicricʼ horokʼ akatʼ mitʼṭen juạn hoṛ duṛupʼ akanko ńelkedea, ar onate ạḍitetʼko tharbasaoena. Uni juạn hoṛe metatʼkoa, “Alope tharbasaokʼa. Ape do Nasaretren Jisu, okoe doko kruslede, unipe sendra baṛayede kana? Nonḍe do bạnuea, uni doe jiwetʼ beretʼ akana. Ar nõkʼõe ńelpe ona jaega, one okareko doholede. Ape do senkate uniren celako ar Patras hõ noa katha lạiaepe je, onko lahate uni do Gạlilteye calakʼkana. Ar cetʼlekae menletʼ onkage onko do onḍeko ńamea.” Onko maejiu do cetʼhõ bako bujhạu daṛeakʼte thar tharaokʼ tulucʼ topa dander khon oḍokkateko dạṛkeda. Onko do nunạkʼko botorena je, botorte okoe hõ cetʼge bako lạiatʼkoa. Ado hapta reakʼ pạhil hilokʼ ạḍire Jisu do gocʼko khone jiwetʼ beretʼen khan pạhilre Magdalaren Mạriạm ṭhene ńel ocoyena. Uni Mạriạm khonge eae goṭen bạṛicʼ jiue oḍokʼ giḍiletʼko tahẽkana. Mạriạm do Jisui ńelkede khan senkate uni sãotenkoe khoboratʼkoa. Unre onko do bhabnateko rakʼ homor joṅkan tahẽkana. Jisui jiwetʼ beretʼ akan ar Mạriạm ṭhene ńel ocoakan reakʼ katha ańjomkate onko do bako pạtiạulena. Ona tayom uniren barea cela do ato secʼkin taṛam idiyetʼkan tahẽkanre Jisu do eṭakʼ rupte unkin ṭhene ńel ocoyena. Unkin do ruạr senkate sarecʼko ona khobor kin lạiatʼkoa, menkhan unkinakʼ katha hõ eṭakʼ celako do bako pạtiạuada. Inạ tayom Jisu do acʼren gelmitʼ celako ṭhene ńel ocoyena. Unre onko doko jojomkan tahẽkana. Ar onkoakʼ bepạtiạu ar keṭecʼ mon iạte uni doe nisrạuketʼkoa, ente gocʼko khone jiwetʼ beretʼen tayom okoeko ńellede onkoakʼ katha bako pạtiạuatʼ tahẽkana. Jisui metatʼkoa, “Ape do dhạrti reakʼ sanam jaegate calakʼpe ar sanam hoṛko ṭhen Isorakʼ bhage sombat porcarpe. Ar jãhãegeye pạtiạukʼ are bạptis ocokʼ unige kại khon bańcaoe ńama; menkhan okoe bae pạtiạukʼ uni do sạjạiyokʼ lạgitʼe bicạr ocokʼa. Okoeko pạtiạukʼ onkore do noako cinhạ ńelogokʼa, onko do iń ńutumte bạṛicʼ jiukoko oḍok giḍikoa, ar nawa nawa pạrsite kathako roṛa, onko do tite bińko sapʼkoa, ar gujukʼakʼ jãhãnakʼgeko jom ńulere hõ ohoko hạnlena, ar rugikoko capokoa arko bogekʼa.” Ado joto kathae galmaraoatʼko tayom, Probhu Jisu do sermateye rakapʼ ocoyena. Ar uni do onḍe Isorakʼ jojomsa aṛereye duṛupʼena. Ar celako do senkate sanam jaegare porcarko ehopʼena. Ar Probhu do onko talate kạmiye ehopʼena ar hahaṛa kạmi reakʼ daṛeteye pormankeda, onko okako porcaretʼkan ona do sạrikana mente. Manotan Thiophil, aboko talare okako ghoṭna hoelen ar pạhil khon okoekoko ńelletʼ ar Isorakʼ bhage sombatko porcarletʼ, onko do ale sanamakʼko baḍae ocoakatʼlea, ar onkoakʼ katha lekage ḍher hoṛ do ona reaṅko ol akada. Ar iń do onako reaṅ pạhil khonge mońj okocʼte suṭhik hataokate, mitʼṭen mitʼṭenkate olam do besiń hudiskeda. Onate am okaṭakʼem ańjomakatʼ ona sạrikana se baṅa, onam baḍae daṛeakʼa. Herod do tinre Jihudạ Prodesren raje tahẽkana unre Abiạ thokren Sakariạ ńutuman mitʼṭen hoṛ do Jihudikoren naekeye tahẽkana. Uniren bạhutetʼakʼ ńutum do Elisabet. Uni hõ naeke Aron bõsrene tahẽkana. Isor samaṅre unkin bana hoṛge dhorom kin tahẽkana. Ar Probhuakʼ sanam hukum ar niạmko ṭhik lekakin manaoetʼ tahẽkana. Unkinren do cele gidrạge bako hoeakan tạkin tahẽkana ente Elisabet do bạńjhigeye tahẽkana. Inạ chaḍa unkinakʼ umer hõ ạḍi aema hoeakan tahẽkana. Mitʼ dhao Sakariạ do acʼakʼ dol reakʼ pạrire Isor samaṅre naeke reakʼe kạmikan tahẽkana. Naeke kạmi reakʼ cạli leka gulibãṭ hotete unirege paṛaoena jemon uni do Probhuakʼ mundil reakʼ sonot jaegare dhupe jeretʼ daṛeakʼ. Ar uni dhupe jered oktere bahrere do ạḍi utạr hoṛko koejoṅkan tahẽkana. Unre Probhuren mitʼṭen goḍet do ackage hecʼkate dhup pinḍ reakʼ jojomsa aṛere Sakariạ ṭhene ńel ocoyena. Ar Sakariạ do serma goḍete ńelkede khane torasena ar botor caṛhaoadea. Serma goḍet do uniye metadea, “Alom botorokʼa, Sakariạ, ente Isor do amakʼ koejoṅe ańjomakada. Amren bạhu Elisabetren do mitʼṭen koṛa gidrại hoyokʼtaea. Ar uniakʼ ńutum do Johanem dohoetaea. Uni do amakʼ jionre maraṅ rạskạwạnicʼe hoyokʼa ar uniakʼ janam khạtirte arhõ ạḍi utạr hoṛko rạskạkʼa. Ente Probhuakʼ mẽtʼãhã samaṅre uni do maraṅe hoyokʼa. Uni do tishõ darkha rasa se eṭakʼ jãhãn bubulakʼko bae ńũiya ar eṅgatakʼ kukhire tahen khonge sonot Jiuteye perejokʼa. Israelko modren ḍherkoge akoren Probhu Isor secʼe ruạṛ ạgukoa. Uni do Eliạ nạbi reakʼ Jiu ar daṛete Probhu lahateye hijukʼa. Ar apatkoakʼ mon hoponko secʼe ruạṛtakoa ar bebatao hoṛkoakʼ mon reakʼ buje pheraotakote Isor sewa hoṛkoakʼ buj lekae hoe ocoetakoa. Nonkate uni do Probhu lạgitʼ mitʼṭen sapṛao akan jạte tearkoa.” Unre Sakariạ do serma goḍete metadea, “Cekateń bujhạu daṛekea? Iń ma coń haṛamge ar ińren bạhuakʼ umer hõ ạḍi ḍher hoe akantaea.” Serma goḍete menkeda, “Iń doń Gabriel kana; iń do Isor samaṅre teṅgo akaniń tahenkana. Am saõte galmarao ar noa bhage sombat emam lạgitʼge Isor doe kolakadińạ. Ńelme, ińakʼ katha do okterege purạukʼa, menkhan ińakʼ katha bam pạtiạuatʼte am do guṅgạm tahena. Ar noako ạuri hoyokʼ hạbicʼ katha bam roṛ daṛeakʼa.” Hoṛko do Sakariạ lạgitʼko koyokʼ horakatʼ tahẽkana. Ar mundil reakʼ sonot jaegareye bilomokʼkan ńelte onko do hahaṛakʼko ehopʼena. Ado Sakariại oḍok hecʼen khan hoṛko sãote katha bae roṛ daṛeada. Ar noateko bujhạukeda, uni do sonot jaegare jãhãn dorsone ńelakada. Uni do hoṛko sãote isạrawate kathae roṛkeda ar guṅgạgeye tahẽyena. Ado naeke kạmi reakʼ pạri mucạtʼentae khan uni do oṛakʼteye calaoena. Ar inạ tayom acʼren bạhu Elisabet doe bhạrti hoṛmoyena ar mõṛẽ cando hạbicʼ oṛakʼ khon bahrete bae oḍok baṛalena. Uniye menkeda, “Noa do Probhuakʼ kạmi kana. Manwako ṭhen khon ińakʼ lajaoe cabaetiń lạgitʼ uni doe beṅgetʼ akawạdińa.” Elisabet turui cando bhạrti hoṛmoe tahẽkanre Gabriel ńutuman mitʼṭen serma goḍet do Isor ṭhen khon Gạlil reakʼ Nasaret atoren Mạriạm ńutuman mitʼṭen kũạ̃ri kuṛi ṭhene kol ocoyena. Uni do Dạud bõsren Joseph ńutuman mitʼṭen hoṛ sãote baplakʼ lạgitʼe horokʼ cikhnạ akan tahẽkana. Serma goḍet do Mạriạm ṭhen hecʼkate joharadeteye metadea, “Probhu am soṅgere menaea are bhor akatʼmea.” Noa katha ańjomkate Mạriạm do monreye ạndukʼ mạndukʼena. Uni do hudisokʼe ehopʼena, noa baṅ cetʼlekan joharkan. Serma goḍet do uniye metadea, “Mạriạm, alom botorokʼa, ente Isor do ạḍiye daya akatʼmea. Ńelme, am dom bhạrti hoṛmokʼa ar mitʼṭen koṛa gidrại hoyokʼtama. Uniakʼ ńutum do Jisum dohoetaea. Uni do maraṅe hoyokʼa. Ar maraṅ Isorren Hopone ńumogokʼa. Probhu Isor do uniren hapṛam Dạudakʼ siṅghạsone emaea. Uni do Jakob bõsrenko cetanre jaejug hạbicʼe rajokʼa. Ar uniakʼ raj do tishõ baṅ mucạdokʼtaea.” Mạriạm do serma goḍete metadea, “Noa do cekate hoedaṛekokʼa? Ińakʼ ma baplage coṅ baṅ hoeakan tiń.” Serma goḍete menkeda, “Sonot Jiu do am cetanreye hijukʼa ar maraṅ Isorakʼ daṛegeye umulkama. Noa iạte okoeṭakʼ sonot Hopone janamokʼ uni do Isorren Hopone ńumogokʼa. Ar ńelme, niạ buḍhi umerre amren peṛa Elisabet hõ hoṛmore koṛa gidrại ńam akawana. Hoṛko menetʼ tahẽkana uniren do gidrạge bako hoyokʼtaea, menkhan ńitokʼ do turui candoreye paṛao akana. Isor ṭhen do bin daṛeanakʼ mente cetʼge bạnukʼa.” Mạriạme menkeda, “Iń doń Probhuren kạ̃ṛmĩ kana, amakʼ katha lekage ińre jotowakʼ baṛe hoyokʼma.” Ona tayom serma goḍet do Mạriạm ṭhen khone calaoena. Inạko din tayom Mạriạm do usạrage Jihudi Prodes reakʼ mitʼṭen atoteye calaoena. Ona ato do buru ṭoṭhare tahẽkana. Mạriạm do onḍe Sakariạwakʼ oṛakʼre bolokate Elisabete joharadea. Elisabet do Mạriạmakʼ johare ańjomketʼ khan acʼakʼ kukhiren bale gidrạ doe keṭel gotʼena. Uni do sonot Jiuteye perecʼente ãṭ aṛaṅteye menkeda, “Sanam maejiuko modre am dom bhạgangea ar amren okoeṭakʼ gidrại hoyokʼ, uni hõe bhạgangea. Ińren Probhuren eṅgat iń ṭhene hecʼakana, noa do cekate hoyena? Ente amakʼ johar kathań ańjomketʼ sãote, ińakʼ kukhiren gidrạ do rạskạteye keṭel gotʼena. Bhạgan geam am do, ente am dom pạtiạu akana, Probhu okae menakawatʼme ona purạukʼa mente.” Unre Mạriạme menkeda, “Ińakʼ jiwi do Probhui sarhaoede kana; ińren babańcaoicʼ Isor iạte, ińakʼ jiwi do rạskạte perecʼ akana, ente acʼren kạ̃ṛmĩ secʼ uni doe beṅgetʼ akada. Ńitokʼ khon sanam hoṛ do bhạganko mitạńa, ente daṛeanicʼ Isor do iń lạgitʼ tinạkʼ maraṅakʼkoe kạmi akada. Uni doe sonotgea. Ar okoe uniko sewawaekan uni do onkoreye dayakʼ kana, piṛhi cetan piṛhige. Uni do ti tiạrkate maraṅ daṛeakʼkoe kạmi akada; ar okoeakʼ mon hiskạte perecʼge onko doe chir chạturakatʼkoa. Uni do siṅghạson khon rajkoe ńurhạketʼkoa, menkhan nindhạnko doe tul rakapʼ ketʼkoa. Ar okoekoko reṅgecʼge, bhage, bhage jiniskote uni do onkoakʼ reṅgecʼe purun akatʼtakoa, menkhan kisạ̃ṛko do eken tiye bidạkatʼkoa. Ar aboren hapṛamko ṭhen okae menletʼ tahẽkan, onkage uni do acʼren guti Israelkoe ńel sãohãketʼkoa. Abraham ar uni bõsren hoṛko cetanre jaejug hạbicʼ mãyãwako reakʼ kathae disạ dohoakatʼa. Mạriạm do Elisabet ṭhen pe cando tahẽkate acʼakʼ oṛakʼteye ruạṛ calaoena. Okte purạuen khan Elisabet do mitʼṭen koṛa gidrại janamkedea. Ar uni cetanre Probhuakʼ aema mãyã reakʼ katha ańjomkate aḍepaserenko ar peṛako do uni sãote rạskạkʼko ehopʼena. Ado Jihudikoakʼ niạm leka irạl din hilokʼ onko do gidrạ khatnaye lạgitʼko hecʼena. Ar acʼ babawakʼ ńutum leka Sakariạ ńumeko menetʼ tahẽkana, menkhan uniren eṅgattetʼ doe menkeda, “Ona do baṅ, nuiakʼ ńutum do Johan dohoe hoyokʼa. Onko do Elisabetko metadea, “Amren peṛako modre okoeakʼ hõ coṅ onkan ńutum ma bạnukʼ.” Ado gidrạren apattetʼ ṭhen baḍae sanaketʼko khan, onko do isạrawateko kulikedea cetʼ ńutum dohoeyem khojkana. Sakariạ do mitʼṭen olokʼ paṭa koekateye olkeda, “Nuiakʼ ńutum do Johan.” Ar ona iạte sanamkoko hahaṛayena, Ar unrege Sakariạwakʼ moca do jhicʼgotʼena ar alaṅ do ulṭạuentaea ar Isor sarhaoate katha roroṛe ehopʼena. Noa ńelte aḍepaseren hoṛko do botor caṛhaoatʼkoa, ar Jihudạ reakʼ goṭa buru ṭoṭharen hoṛko noa reaṅ galmaraoko ehopʼena. Okoe noa kathako ańjomketʼ onko do mone monte hudisokʼko ehopʼena arko menkeda, “Nui gidrạ do enḍekhan cele bhalae hoyokʼa?” Noa kathako menkeda ente Probhuakʼ daṛe do gidrạ sãote tahẽkana. Tayomte gidrạren apat Sakariạ do sonot Jiuteye perecʼen khan, nạbi lekate noa katha roroṛe ehopʼena, “Israelkoren Probhu Isorakʼ sarhao hoyokʼtaema, ente uni do acʼren hoṛko secʼe beṅgetʼ akada are chaḍao akatʼkoa. Uni do abo lạgitʼ acʼren guti Dạudakʼ bõs khon mitʼṭen daṛeanicʼ babańcaoicʼe omonkedea. Noa katha do acʼren sonot nạbikoakʼ moca hotete uni do ḍher din laharegeye menletʼ tahẽkana. Uni do bạirikoakʼ ti khon ar hirkhạkʼ kankoakʼ ti khon aboe bańcao akatʼ bona. Uni do aboren hapṛamko mãyãwako lạgitʼ acʼakʼ sonot bondobos, metakʼme acʼakʼ gokʼakʼ purạu lạgitʼ, aboe rukhiyạ akatʼ bona. Ona gokʼakʼ do aboren mare hapṛam Abraham ṭhene kiriyạlena. Uni do bạirikoakʼ ti khon aboe bańcaoketʼbona jemon tinạkʼ din jiwetʼbon tahen sonot ar dhoromre acʼ samaṅre teṅgo akan begor botor salakʼ bon sewa daṛeae. E bachatiń, am do coṭ utạricʼ Isorren nạbim ńumogokʼa, ente am do uniakʼ hor tear lạgitʼ uni laha lahatem calakʼa. Am do uniren hoṛkom baḍae ocokoa, cetʼ leka aboren Isorakʼ mãyãte kại reakʼ ikạ ńamokʼte kại khon bańcao bon ńama. Uniakʼ mãyãte serma khon mitʼṭen jolokʼkan marsal abo cetanreye pheḍ hijukʼ kana, jemon ńut ar gujukʼ umulreko duṛupʼ akan Onko do marsale emako, ar suluk reakʼ horteye ạyur idi bon.” Ar Johan doe hara idiyente Jiureye daṛe idiyena. Ar Israelko samaṅre ạuriye bahalokʼ hạbicʼ uni do hahaṅkarregeye tahẽyena. Ona jokhecʼ maharaj Agustus Kạisạr do acʼakʼ rajosṭiren sanam hoṛko ńutum ol ocoetako lạgitʼe hukumkeda. Siriạren disạm cakʼlaoicʼ Kurinio oktere niạge pạhil dhao ńutum ol ocoe hoelena. Ar joto hoṛ ńutum ol ocoetako lạgitʼ apan ạpin atote calakʼko ehopʼena. Joseph do Dạud bõsren hoṛe tahẽkana. Ar Jihudạ reakʼ Betlehem do Dạud rajakʼ janam ato tahẽkana. Onate Joseph hõ ńutum ol ocoetae lạgitʼ Gạlil reakʼ Nasaret khon Betlehem atoteye calaoena. Ar Mạriạm hõ uni sãote onḍeye senena. Uni do Joseph tulucʼ baplakʼ reakʼ ṭhik akantae tahẽkana. Ar ona oktere Mạriạm do bhạrti hoṛmoe tahẽkana ar Betlehemre tahenrege gidrạ janame reakʼ okte hoyentaea. Ar onḍege uni do acʼren pạhil koṛa gidrại janamkedea, ar gendrecʼteye bedhaokedete nandwarreye giticʼkadea, ente unkin lạgitʼ okarehõ tahen jaega baṅ tahẽkana. Ona ṭoṭhare ńindạ jokhecʼ bhiḍi gupiko do bathan ṭạnḍire akoren pal bhiḍikoko horhoyetʼkokan tahẽkana. Unre ackage Probhuren mitʼṭen serma goḍet do onko samaṅreye teṅgoyena. Ar uniakʼ ṭhonok do onko beṛhaete bamberena. Onate gupiko do ạḍiko botorena. Serma goḍet do onkoe metatʼkoa, “Alope botorokʼa, ente ape ṭhen ạḍi rạskạ reakʼ sombat iń ạguakada. Noa rạskạ do sanam hoṛko lạgitʼ kana. Teheń Dạud nagrahare aperen babańcaoicʼe janamakana. Uni doe Probhu Mạsi kana. Ape lạgitʼ cinhạ do nõkʼõe, ape do kicricʼte bedhao akade ar nandwarre giticʼ akan mitʼṭen bale gidrạpe ńamea.” Ar ackage uni serma goḍet soṅgete arhõ aema goḍetko ńelena. Onko do Isor sarhaoate memenko ehopʼena, “Sermare Isorakʼ ṭhonok dhạrtire suluk, manwakore kusi.” Ado serma goḍetko onko ṭhen khonko calaoen khan gupiko do ako akoreko menjoṅana, “Delabon, Betlehemte bon calakʼ ar Probhu okaṭakʼe baḍae ocoketʼ bon ona reakʼ bon ńel ạguya.” Ar onko do usạrateko calaoen khan Mạriạm, Joseph ar nandwarre giticʼ akan uni bale gidrạko sendra ńamkedea. Ar gidrạ reaṅ okalekako baḍae ocolen, onkage onko do bale gidrạ ńelkateko lại baṛakeda. Gupikoakʼ katha ańjomkate sanamkogeko hahaṛayena; menkhan Mạriạm do jotowakʼ monreye rebetʼ dohokeda, okoe hõ bae lạiatʼkoa; uni do ona reaṅ monre hudisokʼe ehopʼena. Serma goḍetko gupiko ṭhen okako lạiletʼ onkage bhiḍi gupiko do jotowakʼko ńelketʼ khan Isor sarhaoe ar sabasiae tulucʼko ruạṛ calaoena. Ado irạl mãhã purạuen khan Jihudikoakʼ niạm lekate uniakʼ ńutum do Jisuko dohoketʼtaea. Noa ńutum do eṅgatakʼ kukhire ạuriye hijukʼre serma goḍete emlen tahẽkana. Ado Moseakʼ ạn lekate onkoakʼ chut meṭaokʼ reakʼ okte seṭeren khan, Joseph ar Mạriạm do Probhu samaṅre hạjiri lạgitʼ Jerusalemtekin idikedea, ente Probhuakʼ ạnre ol menakʼa, “Pạhil janamicʼ koṛa gidrạ do Probhuren menteye ńumogokʼa.” Ona chaḍa “Mitʼ joṛ potam se barea parwa hopon” dãṛẽkin reakʼ katha cetʼleka Probhuakʼ ạnre ol menakʼ onkage unkin do dãṛẽ emokʼkin calaoena. Unre Jerusalemre Simon ńutuman mitʼṭen dhorom ar Isor bhokti hoṛe tahẽkana. Uni do Israelkoakʼ jiwi raṛecʼe ńel hohorkan tahẽkana. Sonot Jiu unireye tahẽkana are sodorade tahẽkana, gujukʼ lahare uni do Probhuren Mạsiye ńelea. Simon do sonot Jiu reakʼ uskurte enhilokʼ Jihudikoakʼ mundilteye hecʼena. Ar Moseakʼ ạn lekate cetʼko cekae jạruṛ ona lạgitʼge Jisuren eṅgat-apat do bale Jisu onḍekin ạgukedea. Unre Simon do uniye hoborkedea ar Isor gunmanao joharaeteye menkeda. “E Probhu, amakʼ katha leka amren guti do ńitokʼ suluktem bidạkạń kana, ente manwako kại khon bańcaoko lạgitʼ sanam hoṛkoakʼ mẽtʼãhã samaṅre oka bondobosem emakatʼ, iń do onań ńelana. Eṭakʼ jạtko ṭhen noa do hor udukʼako reakʼ marsal kana, ar amren Israel jạtko ṭhen noa do ṭhonokanakʼ kangea.” Simon gidrạ reakʼakʼ okakoe roṛketʼ onate gidrạren eṅgat-apat dokin hahaṛayena. Inạ tayom Simon do onkoe bhoratʼkote Jisuren eṅgat Mạriạme metadea, “Isor do noae teṅgo akada, nui bale gidrạ iạte Israelko modre aema hoṛ doko ńurokʼa, arhõ aema doko rakapʼ ocokʼa. Nui do nonkan mitʼṭen cinhại hoyokʼa, uni birudre ḍher hoṛge kathako roṛa. Onate onkoakʼ mon reakʼ hudis bundisko sodorokʼa. Ona chaḍa tarwaṛete amakʼ ontor do sobokʼ tabokʼ tama.” Un jokhecʼ Hanna ńutuman mitʼṭen maejiu hõ nạbiye tahẽkana. Uni do Aser bõsren Phạnuel hoponerae tahẽkana. Ar uni hõ aema umer hoeakantae tahẽkana. Uni do eae bochor jãwãetetʼ sãote tahẽkate irạlgel pon bochor hạbicʼ rạnḍigeye tahẽkana. Uni do mundil bạgikate okate hõ bae senokʼkan tahẽkana bickom upạs ar koejoṅ tulucʼ siń ńindạ Isore sewawaekan tahẽkana. Uni hõ unre hecʼkate Isore gun manao joharadea, ar Jerusalem reakʼ chaḍaokʼko ńel hohorkan sanam hoṛko uni gidrạ reaṅ lạiakoe ehopʼena. Probhuakʼ ạn lekate sanamakʼkin purạuketʼ khan Joseph ar Mạriạm do ạkinakʼ ato Gạlil reakʼ Nasaret tekin ruạṛ calaoena. Ar bale Jisu doe hara idiyena are daṛe idiyena akelte perejokʼ tulucʼ. Ar uni cetanre do Isorakʼ daya tahẽkana. Sen-parom porob jokhecʼ Jisuren eṅgat ar apat do jao bochor Jerusalemtekin calakʼkan tahẽkana. Jisuakʼ umạr gelbar bochor hoentae khan niạm lekage onko do porobteko calaoena. Porob mucạtʼen khan oṛakʼko ruạṛkan tahẽkanre Jisu do Jerusalemregeye tahẽyena. Menkhan uniren eṅgat-apat do bạkin baḍaeletʼa. Uni do sãoten hoṛko tulucʼ menaea mente hudiskate mitʼ din horkin calaoena. Tayomte ạkinren peṛako ar ńepel oprom hoṛko talare Jisu sendrayekin ehopʼena. Menkhan baṅkin ńamledete arhõ sendra sendrate Jerusalemtekin ruạṛ calaoena. Ado pe din tayom unkin do mundilrekin ńamkedea. Uni do guruko talare duṛupʼkate onkoakʼ kathae ańjomkan ar onkoe kuliyetʼko tahẽkana. Ar okoeko Jisuakʼ kathako ańjometʼkan tahẽkan, onko sanamko uniakʼ akel ńelte ar uniakʼ roṛ ruạṛ ańjomteko ṭhak utạrokʼkan tahẽkana. Ar uniren eṅgat-apat do uni ńelkatekin hahaṛayena. Eṅgattetʼ do uniye metadea, “E Beṭa, cedakʼem nonkaketʼ bona? Am baba ar iń do ạndukʼ mạndukʼliń sendra baṛayetʼmea.” Jisui metatʼkinạ, “Cedakʼ ben sendra baṛayediń kana? Aben do cetʼ baben baḍaea, ạpuńakʼ oṛakʼre tahen hoyokʼtińa mente?” Jisu okae menketʼ ona do acʼren eṅgat-apat bạkin bujhạu daṛeada. Inạ tayom uni do unkin sãote Nasaret atoteye ruạṛ calaoena ar unkinakʼ tabereye tahẽyena. Menkhan eṅgattetʼ do noako reaṅ monreye rebetʼ dohokada. Ar Jisu do akelte, umerte ar Isor ar manwakoakʼ dulạṛteye hara idiyena. Romren moharaj Tiberius Kạisạre rajokʼkan gel mõṛẽakʼ bochorre Pontus Pilạt do Jihudạren disạm cakʼlaoicʼe tahẽkana. Unre Herod do Gạlilre ar uniren boeha Philip do Jituriạ ar Trakhonitis disạme calaoetʼ tahẽkana. Ar Lusanius do Abileneren disạm cakʼlaoicʼe tahẽkana, ar Hannas ar Kaeapha do Jihudikoren maraṅ naekekin tahẽkana. Ona oktere Isor do hahaṅkar jaegare Sakariạ hopon Johan ṭhen acʼakʼ kathae sodorkeda. Unre Johan do Jordan gaḍa beṛhaeteakʼ sanam jaegakore senkate porcare ehopʼena jemon hoṛko kại khon monko ạcurte ikạko ńam, ar ona reakʼ cinhạ lekate bạptismako ataṅ. Jesaea nạbi reakʼ puthire olakan leka, “Hahaṅkarre mitʼṭen hohokạnicʼ reakʼ aṛaṅ, ‘Probhuakʼ hor tear kataepe, uniakʼ suṛucʼ horko sojhe kataepe. Sanam buru nala bhataokʼa ḍuṅgriko copodokʼa. Konḍeawakʼko sojhekʼa, ar khõedakʼ lopakʼakʼ hor do somanokʼa. Manwako kại khon bańcaoko lạgitʼ Isor okae ceka akatʼ, ona do sanam hoṛko ńel ńama.’ ” Unre bạptisokʼ lạgitʼ ạḍi utạr hoṛ do Johan ṭhen hijukʼko ehopʼena. Uniye metatʼkoa, “E biń bõsrenko! Isorakʼ sạjại khon ńir pharakokʼ lạgitʼ do okoeye cetaoketʼpea? Ar mon jepe ạcurakatʼ ona reakʼ lek leka jo apeakʼ jionre udugtape. Ar Abrahamren bõs kanape mente alope hudisa. Sạrigeń metapekana, Isor do noako dhiri khon Abrahamren bõskoe tear daṛeakoa. Dare gonḍarege ṭeṅgocʼ do ṭenḍar dohoakana. Oka dare bhage baṅ jokʼ ona do makʼ giḍikʼte seṅgelre khadle ocokʼa.” Unre hoṛko do Johanko kulikedea, “Enḍe khan ale do cetʼle cekaea?” Metatʼkoae, “Jãhãeakʼ barea aṅgrop menakʼtae khan, uni do bạnukʼtaeicʼe hạṭińaema. Ar jomakʼ menakʼtaeicʼ hõe onkaema.” Ado mạsul uṭhạuko bạptisokʼ lạgitʼko hecʼen khan Johanko metadea, “Guru, ale do cetʼle cekaea?” Uni doe metatʼkoa, “Ạnre oka menakʼ ona khon bạ̃ṛti alope uṭhạua.” Ar palṭonko hõko kulikedea, “Ale do cetʼle cekaea?” Uni doe metatʼkoa, “Jor julumkate se behok lekate dusikate okoe ṭhen khon hõ cetʼge alope hataoa ar apeakʼ kuṛạirege kusi tahenpe.” Hoṛko do ạḍi askate mone monete Johange Jisu kanae menteko hudisedekan tahẽkana. Unre Johan do sanamkoe metatʼkoa, “Iń do dakʼteń bạptisetʼpea, menkhan okoe iń khone daṛegea uni doe darae kana. Iń do uniakʼ panahi reakʼ phitạ raṛaetae lek geń baṅkana. Uni do sonot Jiu ar seṅgelteye bạptispea. Uniakʼ haṭakʼ do tirege menakʼtaea; onate khạrạiye saphaea ar phosol do golareye doho jarwaea, menkhan peṭecʼ do baṅ iṛijokʼ seṅgelreye atar giḍikakʼa.” Johan do arhõ ạḍi utạr sikhạunakote hoṛkoakʼ monre udgạue emakote Isorakʼ bhage sombate porcar akokan tahẽkana. Disạm cakʼlaoicʼ Herod ar bokottetʼren bạhu Herodiạwakʼ bin ganokʼ dulạṛ ar bạṛicʼ kạmiko iạte Johan do uniakʼ doskoe udukʼade tahẽkana. Onate uni do hajotre Johane bhorao akade tahẽkana. Ar noate uniakʼ eṭakʼ bạṛicʼ kạmiko sãote noa bạṛicʼ kạmi hõ juṭicʼentaea. Ado okoeko hoṛ Johan ṭhenko hecʼakan tahẽkan onko bạptismako ataṅetʼ tahẽkanre Jisu hõe bạptis ocoyena. Bạptisma tayom Jisu do tinreye koejoṅkan tahẽkana unre serma do jhicʼena. Ar sonot Jiu do parwa leka uni cetanreye pheḍ hecʼena, ar serma khon noa katha ańjomena, “Amge ińren dulạṛiạ Hopon, iń do amreń kusi akana.” Jisu do pegel serma gan umer tahẽkanre acʼakʼ kạmiye ehopʼkeda. Hoṛko bujhạure uni do Josephren hopone tahẽkana. Joseph do Eliren hopone tahẽkana; Eli do Mathatren hopon, Mathat do Lewiren hopon, Lewi do Melkiren hopon, Melki do Jannaeren hopon, Jannae do Josephren hopon; Joseph do Matathiạren hopon, Matathiạ do Amosren hopon, Amos do Nạhumren hopon, Nạhum do Esliren hopon, Esli do Nạggạiren hopon; Nạggại do Mahatren hopon, Mahat do Matathiạren hopon, Matathiạ do Simạiren hopon, Simại do Josekren hopon, Josek do Jodaren hopon; Joda do Johananren hopon, Johanan do Resaren hopon, Resa do Serubabelren hopon, Serubabel do Sealtielren hopon, Sealtiel do Neriren hopon; Neri do Melkiren hopon, Melki do Addiren hopon, Addi do Kosamren hopon, Kosam do Elmadamren hopon, Elmadam do Erren hopon; Err do Jisuren hopon, Jisu do Elieserren hopon, Elieser do Jorimren hopon, Jorim do Mathatren hopon, Mathat do Lewiren hopon; Lewi do Simeonren hopon, Simeon do Jihudạren hopon, Jihudạ do Josephren hopon, Joseph do Jonamren hopon, Jonam do Eliạkimren hopon; Eliạkim do Melearen hopon, Melea do Mennaren hopon, Menna do Mathatharen hopon, Mathatha do Nathanren hopon, Nathan do Dạudren hopon; Dạud do Jisạiren hopon, Jisại do Obedren hopon, Obed do Boasren hopon, Boas do Solmonren hopon, Solmon do Nahasonren hopon; Nahason do Aminadabren hopon, Aminadab do Adminren hopon, Admin do Arniren hopon, Arnido Hesromren hopon, Hesrom do Pharesren hopon, Phares do Jihudạren hopon; Jihudạ do Jakobren hopon, Jakob do Isahakren hopon, Isahak do Abrahamren hopon, Abraham do Thararen hopon, Thara do Nahorren hopon; Nahor do Serugren hopon, Serug do Rạgạuren hopon, Rạgạu do Phalegren hopon, Phaleg do Eberren hopon, Eber do Sạlaren hopon; Sạla do Kenanren hopon, Kenan do Arpaksadren hopon, Arpaksad do Semren hopon, Sem do Noahren hopon, Noah do Lamekren hopon; Lamek do Mạthusalaren hopon, Mạthusala do Enokren hopon, Enok do Jaredren hopon, Jared do Mahalalelren hopon, Mahalalel do Kenanren hopon; Kenan do Enosren hopon, Enos do Sethren hopon, Seth do Adamren hopon, Ar Adam do Isorren hopon. Jisu do sonot Jiuteye perecʼen khan, Jordan gaḍa khone calaoena. Ar sonot Jiu reakʼ ạyurte pongel din hạbicʼ hahaṅkar jaegakoreye tahẽyena. Unre Soetan do Jisu laloce udukʼaete kạire ńurhạye reakʼe kurumuṭukeda. Ar niạ pongel din Jisu do cetʼge bae jomleda; ar onako din purạuen khan uni do reṅgecʼkedea. Unre Soetan do Jisui metadea, “Isorren Hopon kan khanem, enḍekhan noa dhiri piṭhạ hoe ocoeme.” Jisu do uniye roṛ ruạṛadea, “Sonot sostorre ol akana, ‘piṭhạ motote manwa do jiwetʼ bako tahena.’ ” Ona tayom Soetan do Jisu mitʼṭen usul jaegateye idikedea ar mitʼ ripitʼte dhạrti reakʼ sanam rajosṭi udukʼ adeteye metadea, “Noako joto reakʼ ektiạri ar ṭhonokiń emama, ente noako joto do ińre jimạ akana. Ar jãhãege sanań unige onań em daṛeaea. Ńitokʼ judi ińem ḍobokʼạń ar Probhu mentem aṅgociń, enḍekhan noako joto do amakʼge hoyokʼa.” Jisu do uniye roṛ ruạṛadea, “Sonot sostorre ol menakʼa, ‘am do amren Isor ḍobokʼae me, ar eken uni eskarge sewawaeme.’ ” Unre Soetan do Jisu Jerusalemteye idikedea ar mundil reakʼ coṭ cuṛạre teṅgokedeteye metadea, “Isorren Hoponkan khanem nonḍe khon latarte donme, ente sonot sostorre olakana, uni do acʼren goḍetko am reaṅe hukumakoa ar onko do amko rukhiyạmea. Onko do titeko sepeńmea jemon dhirire jaṅga alo bajaokʼtam.” Jisu do uniye metadea, “Sonot sostorre roṛ akana, ‘Probhu amren Isor do alom biḍạuea.’ ” Ado joto lekan laloce udukʼ mucạtʼketʼ khan Soetan do thoṛa okte lạgitʼ Jisu bạgiyadeteye calaoena. Jisu do sonot Jiu reakʼ daṛeteye perecʼen khan Gạlil Prodesteye ruạṛ calaoena. Ar uniakʼ sombat do ona ṭoṭha reakʼ goṭa ṭạnḍire pasnao idiyena. Uni do onḍenakʼ sunạgogkore cetʼakoe ehopʼena. Ar sanamkoge uni sabasiaeko ehopʼena. Inạ tayom Jisu do Nasaretteye hecʼena. Ar nonḍege uni doe haralena. Uni do acʼakʼ niạm leka jirạukʼ mãhãre sunạgogreye boloyena, ar sostor paṛhao lạgitʼe teṅgoyena. Ado Jesaea nạbiakʼ puthiko caladea. Ar guṛhạ akan puthiye oṭakʼketʼ khan ona jaegae ńamkeda one olakan, “Probhuren Jiu doe decʼ akawạdińa, ente uni do ińe ojokʼ akadińạ jemon reṅgecʼ orecʼko bhage sombat iń porcarako. Ar bondi akanko ṭhen chaḍaoko reakʼ katha, kãṛã hoṛko ṭhen ńeńel reakʼ katha baḍae ocoko lạgitʼ uni doe kolakadińạ. Ar khed ocokʼkanko hõ, chaḍaoko lạgitʼe kolkedeńa. Ona chaḍa Probhui kusiyakʼ bochor lại saḍe lạgitʼe kolakadińa,.” Ona tayom uni do puthi guṛhạ ruạṛkate sapʼdapʼicʼ cal ruạṛadeteye duṛupʼena. Ar sunạgogren sanam hoṛkoakʼ nońjor do unire paṛaoena. Unre Jisui metatʼkoa, “Sonot sostor reakʼ katha teheńpe ańjomketʼ são sãote ona do purạuena.” Ar sanam hoṛ do uniko sabasiadea ar uniakʼ moca khon oḍokokʼkan mońj mońj katha ańjomteko hahaṛayena. Onkoko menkeda, “Nui do cetʼ Josephren hopon doe baṅkana?” Jisui metatʼkoa, “Ape do noa hõpe mitạńa, ‘E raranicʼ amge baṛe bogekokʼme.’ Arhõpe mitạńa, ‘Kapharnạhumre okako kạmi reakʼ kathakole ańjomakatʼ, ńitokʼ nijakʼ atorehõ udugme.’ ” Uni do arhõe menkeda, “Sạrigeń metapekana, okoe nạbi hõ acʼakʼ nij atoren hoṛ do bako monewaea. Eliại tahẽkan oktere pe bochor turui cando bae dakʼleda ar goṭa disạmre maraṅ akal hoelena, unre Israel disạmre ạḍi utạr rạnḍi maejiuko tahẽkana. Menkhan onko okoe ṭhen hõ Eliạ do bae kol ocolena, eken Sidon ṭoṭha reakʼ Sareptaren rạnḍi maejiu ṭhene kol ocolena. Elisa nạbi oktere Israel disạmre aema murhucʼ jom rog hoṛko tahẽkana, menkhan onko okoehõ bako boge ocolena, Eken Siriạ disạmren Naman motogeye boge ocoyena.” Noako katha ańjomkate sunạgogren sanam hoṛko do edrete pit caṛhaoatʼkoa. Onko do beretʼente ato bahrete Jisuko oḍok ạgukedea ar buru latarte ṭhelao ńurhạye lạgitʼ coṭ cuṛateko idikedea. Menkhan uni do hoṛko talateye sen tapʼ calaoena. Ado Gạlil Prodes reakʼ Kapharnạhum nagrahateye calaoena ar jirạukʼ mãhãre hoṛkoe cetʼ atʼakoa. Ar hoṛko do uniakʼ cecetʼakʼteko hahaṛa cabayena, ente uni do ektiạri menakʼtae hoṛ lekae cetʼakokan tahẽkana. Ona sunạgogre bhut capaṛ akawade mitʼṭen hoṛe tahẽkana. Uni do kikiạuateye menkeda, “E Nasaretren Jisu, ale tulucʼ amakʼ do cetʼ? Nosṭole lạgitʼem hecʼakana? Baḍaegeạń okoe kanam; am do Isorren uni sonoticʼ kanam.” Jisu do bạṛjicʼ jiu dhomkao kedeteye metadea, “Thirkokʼme, ar uni khon oḍok calakʼme.” Unre bạṛicʼ jiu do onko talare uniye bhindạṛkedea ar jãhãnakʼ begor hạnete uni khone oḍok calaoena. Noa iạte jotoge hahaṛayente ako akore menjoṅko ehopʼena, “Noa baṅ oka lekan katha kan! Ektiạri ar daṛe salakʼ bạṛicʼ jiukoe hukumako kanre onko doko oḍok calakʼkana!” Ar ona ṭoṭha reakʼ joto jaegare Jisuakʼ katha do pasnao idiyena. Inạ tayom Jisu do sunạgog bạgikate Simonakʼ oṛakʼteye calaoena. Unre Simonren hanhartetʼ do ruạteye jạbun akan tahẽkan. Ar uni bogeye lạgitʼ Jisuko nehõradea. Unre Jisu do Simon hanhartetʼ pheḍre teṅgoyente ruạe dhomkaoketʼtaea. Ar inạtege ruạ do chuṭạuentaea, ar beretʼkate uni do jomakʼ sapʼsorakoe ehopʼena. Ado bere hạsurokʼkan tahẽkanre aema lekan rugiko Jisu ṭhenko ạguketʼkoa. Onko do ạḍi lekan rogteko jạbun akan tahẽkana. Ar Jisu do onko mitʼke mitʼ capoketʼkoteye bogeketʼkoa. Unre ạḍi utạr hoṛko khon bạṛicʼ jiuko hõko oḍok calaoena. Onko bạṛicʼ jiuko do kikiạuate memenko ehopʼena, “Am dom Isorren Hopon kana.” Onko do Mạsi kanae menteko baḍae akade tahẽkana. Ona iạte uni do onkoakʼ mocae bondketʼtakoa. Ado ạḍi setakʼre oḍok senkate Jisu do mitʼṭen nisun jaegateye calaoena. Ar hoṛko do uniko sendra ńamkede khan ako ṭhen khon aloe calakʼ menteko doho dohokadea. Unre Jisui metatʼkoa, “Iń do arhõ aema jaegakore Isorakʼ raj reakʼ bhage sombat porcar hoyokʼ tińạ, ente noa lạgitʼge Isor doe kolakadińạ.” Ona tayom uni do Jihudạ disạm reakʼ eṭakʼ eṭakʼ sunạgogkore porcare ehopʼena. Mitʼ din Jisu do Genesaret doreão aṛereye teṅgo akan tahẽkana. Unre gadel hoṛ do Isorakʼ katha ańjom lạgitʼ beṛhaeteko riḍạtʼ ciritʼede tahẽkana. Un jokhecʼ uni do doreão aṛere barea lạukại ńel ńamkeda. Ona lạukạren jạilạko do pheḍkate akoakʼ jhạliko ạrupʼkan tahẽkana. Unre Jisu do Simonakʼ lạukạreye decʼena ar ḍhip khon thoṛa pharak ńokʼ idiye metadea. Ona tayom uni do lạukạreye duṛupʼena ar gadel hoṛko cetʼakoe dhurạuena. Ado galmaraoe mucạtʼketʼ khan Jisu do Simone metadea, “Khạndrite idime ar hako sapʼko lạgitʼ jhạli caḍoetape.” Simone menkeda, “E Guru, ale do goṭa ńindạle khaṭaoena, menkhan celege bale sapʼ daṛeatʼkoa; enrehõ amakʼ katha leka jhạlile caḍoea. Ado jhạliko caḍoketʼ khan nunạkʼ hakoko beṛketʼkoa je, jhạli do oṛejokʼ lekayena. Unre goṛo ńam lạgitʼ onko do eṭakʼ lạukạren sãotenkoko gạwicʼatʼkoa. Ado onkoko hecʼen khan banar lạukạre nunạkʼ hakoko rakapʼketʼkoa; hakote onakin lạukạ do unumokʼ lekayena. Noa ńelte Simon Patras do Jisu samaṅre ombakʼenteye menkeda, “E Probhu, iń doń kại hoṛ kana; iń ṭhen khon calao joṅme baṛe.” Ar unạkʼ hako jhạliyenko ńelketʼko khan Simon Patras ar uni sãoten sanamko doko hahaṛayena. Onkage Jakob ar Johanko metakin Sabdaeren banar hopon hõkin hahaṛayena. Unre Jisu do Simone metadea, “Alom botorokʼa; ńitokʼ khon am do hoṛ sasapʼicʼem hoyokʼa.” Inạ tayom onko do ḍhipite lạukạko ạgukeda ar sanamakʼ bạgi oṭowatʼte Jisuko pańjakedea. Mitʼ dhao Jisu do mitʼṭen atoteye calaoena. Ar onḍe do murhucʼ jom rogte perecʼ mitʼṭen hoṛe tahẽkana. Uni do Jisui ńelkede khan taberente nehõr salakʼe menkeda, “E Probhu, sanalem khangem boge daṛeạńạ.” Jisu do ti tiạrkate joṭetʼkedeteye metadea, “Iń hõ onageń khojkana, ma saphakokʼme,” Ar unrege uni doe boge utạrena. Jisu do uniye hukumadea, “Noa katha do okoe ṭhen hõ alom lại baṛaea, bickom senkate naeke ṭhen ńel ocokʼme. Ar ona tayom saphakʼ babotre Mose okaṭakʼ dãṛẽ reakʼe hukumakatʼ ona samaṅ me. Inạ khan hoṛko ṭhenem sạbudokʼa am dom boge akana.” Enrehõ Jisuakʼ sombat do arhõ pasnao idiyena. Uniakʼ katha ańjom lạgitʼ ar rog khon bogekʼ lạgitʼ ạḍi utạr hoṛ do uni ṭhen hijukʼko ehopʼena. Ar Jisu do jaoge nisun jaegakore senkateye koejoṅ kan tahẽkana. Mitʼ din Jisu do hoṛkoe cetʼakokan tahẽkanre Phạrusiko ar sostor baḍaeko hõ onḍeko duṛupʼ akan tahẽkana. Noko do Gạlil ar Jihudạ reakʼ atoko ar Jerusalem nagraha khonko hecʼakan tahẽkana. Ar rugiko bogeko reakʼ Probhuakʼ daṛe do Jisure tahẽkana. Unre thoṛa hoṛ do parkomte mitʼ kaṛ gocʼ rog hoṛko gokʼ ạgukedea. Onko do bhitrite idikate Jisu samaṅre dohoye lạgitʼko kurumuṭukeda, menkhan bhiṛ iạte bhitrite bolokʼ horge bako ńamleda. Unre onko do chatreko decʼena ar chat reakʼ ṭạli ocokʼkate parkom sudhạ Jisu samaṅreko pheḍ gotʼkadea. Jisu do onkoakʼ pạtiạu ńelteye menkeda, “E gate, amakʼ kại do ikạyen tama.” Noate sostor baḍaeko ar Phạrusiko do mone monete hudisokʼko ehopʼena, “Nui hoṛ doe okoe kante, Isore opomane kana? Isor chaḍa ar okoe kại doe ikạ daṛeakʼa?” Ado onkoko hudisokʼkan reakʼe bujhạuketʼ khane metatʼkoa, “Mon monte cedakʼ ona katha reakʼ dope hudisokʼ kana? Okaṭakʼ memen algawa, ‘amakʼ kại ikạyen tama,’ se ‘beretʼkate taṛam baṛaeme?’ Menkhan jemonpe baḍae daṛeakʼ Manwa Hopon do dhạrtire kại ikại reakʼ ektiạri menakʼtaea mente,” Khange Jisu do uni mitʼ kaṛ gocʼ rog hoṛe metadea, “Metam kạnạń, ma beretʼme, parkom kuṭuṅtam ar oṛakʼ calakʼme.” Uni hoṛ do unrege jotoko samaṅreye teṅgoyena ar aṭetʼakʼ kuṭuṅkate Isor sarhao sarhaoete oṛakʼe calaoena. Onate sanam hoṛko ṭhak cabayena ar botorokʼ salakʼ Isor sabasiaeteko menkeda, “Teheń do hahaṛawakʼ bon ńelkeda!” Inạ tayom Jisu do bahreteye calaoena ar mạsul uṭhạu oṛakʼre Lewi ńutuman mitʼṭen mạsul-uṭhạuicʼ do duṛupʼakane ńelkedea. Jisu do Lewiye metadea, “Dela hijukʼte, ińren cela hoyokʼme.” Onate Lewi doe beretʼena ar acʼakʼ jotowakʼ bạgikate Jisui pańjakedea. Tayomte Lewi do acʼakʼ oṛakʼre Jisu lạgitʼ maraṅ okocʼe bhojkeda. Ar onko soṅgete ạḍi utạr mạsul uṭhạuko ar eṭakʼko hõ jojomko duṛupʼena. Unre Phạrusiko ar onkoren sostor baḍaeko doko karacʼ kurucʼente Jisuren celakoko metatʼkoa, “Mạsul uṭhạuko ar bạṛicʼ hoṛko tulucʼ do cedakʼpe jom ńũiyeda?” Jisui metatʼkoa, “Boge hoṛko lạgitʼ raranicʼakʼ do jạruṛ bạnukʼa, menkhan ruạkʼko lạgitʼ do jạruṛgea. Dhorom hoṛ hohoako lạgitʼ do baṅ menkhan kại hoṛko lạgitʼgeń hecʼ akana.” Ado onko sostor baḍaeko do Jisuko metadea, “Johanren celako do jaogeko upạseda arko koejoṅ kana, ar Phạrusikoren celako hõko onkayeda, menkhan amren cela doko jom ńũiyeda.” Jisui metatʼkoa, “Jãwãe beṭa soṅgere tahen tulucʼ cetʼ bạriạtko doko upạs oco daṛekekoa? Menkhan okte darae kana Jãwãe beṭa do onko ṭhen khone idiocokʼa, ar unre onko doko upạsa.” Ona tayom Jisu do cetʼako lạgitʼ noa phene lạiatʼkoa: “Nawa kicricʼ oṛecʼkate okoe hõ marenakʼ kicricʼre bako tạli jalada, enteye onkae khan nawa kicricʼ mae oṛecʼetʼkange; ar nawa kuṭrạre mare kicricʼ hõ baṅ jurikʼa. Nawa darkha rasa do mare kumkore bako dul dohoea, arko dohole khan nawa darkha rasate kumko do oṛejokʼa. Onate rasa do buhelokʼa ar kumko hõ nosṭokʼa. Onate nawa darkha rasa do nawa kumrege dul dohoe jạruṛa. Ar mare darkha rasa ńu tayom okoe hõ nawa rasa do bae khoja, enteye mena, ‘marenakʼge bogea.’ ” Mitʼ jirạukʼ mãhãre Jisu do phosol talateye calakʼkan tahẽkana. Ar uniren celako do gele hotʼkate tire ridgạukateko jometʼ tahẽkana. Unre adom Phạrusikoko menkeda, “Dhorom reakʼ ạn lekate jirạukʼ mãhãre baṅ ganoakʼ do cedakʼpe onkayeda? Jisui metatʼkoa, “Ape do cetʼ bape paṛhao akada, Dạud ar acʼ soṅgetenko reṅgecʼ letʼkore uni do cetʼe cekaleda mente? Uni do Isorakʼ oṛakʼre bolokate samaṅ akan piṭhạ reakʼe jomkeda ar soṅgetenko hõe ematʼko tahẽkana. Menkhan ona do eken naekeko chaḍa ar okoeakʼ hõ jom reakʼ niạm do baṅ tahẽkana.” Mucạtʼre Jisu do onko Phạrusikoe metatʼkoa, “Manwa Hopon kangeae jirạukʼ mãhãren mạlik do.” Ado eṭakʼ ar mitʼ jirạukʼ mãhãre Jisu do sunạgogre bolokateye cetʼakokan tahẽkana. Onḍe do nonkan mitʼṭen hoṛe tahẽkana, one uni do jojom ti borocʼge tahẽkantae. Unre sostor baḍaeko ar Phạrusiko do Jisu dusire paṛaoe reakʼ ạtko ńam baṛayetʼ tahẽkana. Ar jirạukʼ mãhãre uni do jãhãeye bogekoa se baṅ, ona lạgitʼ mońjteko tạnkhi baṛayede tahẽkana. Menkhan Jisu do onkoakʼ mon reakʼ hudisokʼakʼkoe baḍaekan tahẽkana. Onate borocʼ ti hoṛe metadea, “Beretʼme ar dela sanamko talare teṅgonme.” Ar inạtege uni doe beretʼena are teṅgoyena. Jisu do sostor baḍaeko ar Phạrusikoe metatʼkoa, “Mitʼṭen kathań kulipea, jirạukʼ mãhãre bhage kạmi ganokʼa se bạṛicʼakʼ kạmi ganokʼa, jiwi bańcao ganokʼa se nosṭo giḍikakʼ ganokʼa?” Ona tayom beṛhaetenkoe beṅgetʼ ạcuratʼkote uni hoṛe metadea, “Amakʼ ti tiạrtam.” Are onkaketʼ khan uniakʼ ti do boge utạrentaea. Unre dhorom mukhiyạko do ạḍi bạṛicʼko raṅgaoena ar Jisu cetʼko cekaea ona reakʼ ako talare galmaraoko ehopʼena. Inạ tayom Jisu do koejoṅ lạgitʼ mitʼṭen buruteye rakapʼ calaoena ar goṭa ńindạ Isor ṭhen koejoṅteye aṅgakeda. Ado setakʼen khan acʼren celako acʼ ṭhene hohoatʼkoa ar onko mod khon gelbar hoṛe bachaoketʼko khan apostol hudại ematʼkoa. Onko doko hoyokʼkana Simon, okoe do Patrase ńutumkede; Simonren boeha Andreas; Jakob ar Johan; Philip ar Bartholomae; Mathae ar Thoma; Alphaeren hopon Jakob; Simon, okoe do moulobadiko metaekan; Jakobren hopon Jihudạ ar Jihudạ Iskariot, one okoe do Jisu bạirikoakʼ tireye soprotlede. Ado acʼren celako sãote buru khon pheḍkate mitʼṭen soman jaegareye teṅgoyena. Onḍe do acʼren ạḍi utạr celakoko jarwa akan tahẽkana. Ona chaḍa Jihudiạ, Jerusalem, Tur ar Sidonko metakʼ doreão aṛe reakʼ nagrahako khon ạḍi utạr hoṛ hõ onḍeko hecʼakan tahẽkana. Onko do uniakʼ katha ańjomtae ar rog khon boge ocokʼ lạgitʼko hecʼakan tahẽkana. Ar tinạkʼ do bạṛicʼ jiu hotete kosṭoko ńametʼ tahẽkan onko hõko bogekʼkan tahẽkana. Ar sanam hoṛ uni joṭede reakʼko kurumuṭuyetʼ tahẽkana, ente uni khon do daṛe oḍokokʼkan tahẽkana ar onate jotokoko bogekʼkan tahẽkana. Jisu do celako secʼ beṅgetʼkate memene ehopʼena, “Bhạgangeape ape reṅgecʼ orecʼko do, ente Isorakʼ raj do apeakʼge. Bhạgangeape, ape okoe ńit reṅgecʼetʼpe, ente ape dope bi ocokʼa. Bhạgangeape, ńitpe rakʼjoṅ kanko do, ente ape dope landa joṅa. Bhạgangeape, Manwa Hopon iạte hoṛko hirkhạwapere, ar somaj khonko oḍoklepere arko landa dhutʼapere ar apeakʼ ńutum ańjomteko tholere. Unre ape do rạskạkʼpe ar hulạsokʼpe, ente ape lạgitʼ sermare maraṅ kuṛại menakʼa. Ente onkoren hapṛamko hõ nạbikoko onkaletʼkoa. “Menkhan hae ape kisạ̃ṛko do! Ape do apeakʼ jiwi raṛecʼpe ńam horayeda. Hae ape bi akanko do! Ape do reṅgecʼpea. Hae ape landakanko do! Ape dope dukokʼa arpe rakʼjoṅa. Hae ape do, joto hoṛ ape reaṅ bogeko roṛlere. Ente nokoren mare hapṛamkoge bhõnḍ nạbikoko sarhaoetʼkokan tahẽkana. Ape ańjometʼkoń metapekana, aperen bạiriko dulạṛkope. Ar okoeko kurud apekan onko do bhạlạikope. Okoeko sarap apekan onko bhorakope. Ar okoe ape tulucʼ bạṛicʼko beoharetʼ onko lạgitʼ koejoṅpe. Jãhãe mitʼ johae thapame khan eṭakʼ joha hõ ạcuraeme. Okoe amakʼ oyonakʼe recʼme uni do aṅgrop hõ idiocoaeme. Okoe am ṭhenko koe onko do emakom. Ar jãhãe amakʼ jãhãn jinise idi emanle khan ona do alom koe ruạṛea. Hoṛko ṭhen khon cetʼleka beoharpe khojkan, onkage ape hõ onko sãote beoharpe. “Okoeko dulạṛetʼpe, ape hõ eken onkogepe dulạṛetʼko khan; enḍekhan apeakʼ sabasi do okor? Ente boṅgan hoṛko hõ coṅ nonka mako dulạṛetʼkoge. Okoe apeko bhạlạyetʼpe, ape hõ eken onkogepe bhạlạiyetʼko khan; enḍekhan sabasikʼ reakʼ do cetʼ menakʼtapea? Ente boṅgan hoṛko hõ coṅ ona mako onkayetʼkange. Okoe ṭhen khon ńam ruạṛpe asokʼkan, onkoge pańcape emako khan; enḍekhan onare cetʼ sabasi menakʼa? Ńam ruạṛ iạtege coṅ bạṛicʼ hoṛ ma bạṛicʼ hoṛko pańcako emakokan. Menkhan ape do aperen bạiriko dulạṛkope ar onko bhạlạikope. Ar baṅ ńam ruạṛokʼ askate pańca emakope. Enḍekhan ape lạgitʼ maraṅ kuṛại menakʼa, ar ape do sanam dayawạnicʼ Isorren hoponpe hoyokʼa, ente uni do gun baṅ manaoko ar bạṛicʼko hõe dayawako kana. Aperen baba cetʼ lekae mãyãwạnicʼkan, onkage ape hõ mãyãwanko hoyokʼpe. “Eṭakʼkoakʼ ghạṭko alope sapʼ baṛaea, inạkhan apeakʼ dos hõ baṅ sabokʼtapea. Eṭakʼko sạjại ńam lek kanako mente alope hudiskoa, onate ape hõ sạjại ńam lek mentepe menocokʼa. Eṭakʼko ikạkakope, enḍekhan ape hõpe ikạ ocokʼa. Dan emokʼpe, enḍekhan ape hõpe emocokʼa; ota khacao khacaote, ruku rukute, curu buruateko gochawapea, ente cetʼlekape soṅakoa onkage ape hõko soṅ ruạṛapea.” Jisu do acʼren celako cetʼako lạgitʼ ar mitʼṭen phene lạiatʼkoa, “Mitʼṭen kãṛã do cetʼ eṭakʼ ar mitʼ kãṛãe ạyur daṛekea? Onka khan bana hoṛge cetʼ ghaḍlakʼre bạkin khańjokʼa? Cela do guru khon bae maraṅa, menkhan joto cecetʼakʼe ńamlere guru lekae hoyokʼa. “Amren boehawakʼ mẽtʼre menakʼ cubạkʼgem beṅgetʼakʼ kana, menkhan amakʼ mẽtʼre menakʼ jobra do bam ńel ńameda? Amakʼ mẽtʼ reakʼ jobra bam aṭkaretʼ khan, cekate amren boeha dom metae kana, ‘okor ya amakʼ mẽtʼ reakʼ cubạkʼiń oḍok letamge?’ E bhonḍicʼ pạhilre amakʼ mẽtʼ khon jobra ocokʼ maṛaṅlem, enḍeanecʼ boehamakʼ mẽtʼre menakʼ cubạkʼ oḍok lạgitʼ pusṭạutem ńeńela. “Bhage darere bạricʼ jo, ar bạṛicʼ darere bhage jo do baṅ jokʼa. Jo tege dare do oromokʼa. Jạnum jhạwạ khon loa ar jạnumanakʼ dare khon darkha jo do bako goda. Bhage hoṛ do acʼakʼ ontorre perecʼ bhageakʼ khon bhage kathageye oḍok ạguya, ar bạṛicʼ hoṛ do acʼakʼ ontorre perecʼ bạṛicʼakʼ khon bạṛicʼ kathageye oḍoktaea. Manwa ontor okaṭakʼte perecʼ menakʼ, moca do ona kathageye roṛa. “Ape do cedakʼ ‘Probhu, Probhupe’ mitạń kana, menkhan iń okań metape ona do bape onkayeda? Jãhãege iń ṭhen hecʼkate ińakʼ kathae ańjom ar ona lekae kạmi uni do okoe lekanicʼ iń lạikepea. Uni do nonkan mitʼṭen hoṛ lekanae, one okoe do oṛakʼe benao iạte khạndri macha la kate dhiri cetanre rehetʼe bạisạuketʼ. Ado banbạsi ar ạtukʼ dakʼko hecʼena ar ona oṛakʼre bajaoena, menkhan oṛakʼ do baṅ cekalena, ente ona do kajakte benao akan tahẽkana. Okoe ińakʼ katha ańjomkate ona leka bae kạmi, uni do nonkan hoṛ lekanae, okoe do begor rehetʼ bạisạute hasa cetanre oṛakʼe benaoketʼ. Ado ạtukʼ dakʼ hecʼkate tinre ona oṛakʼre bajaoena unre ona oṛakʼ do lạnduṛ ńurena.” Ado hoṛko ṭhen noako sanamakʼe lại mucạtʼketʼ khan, Jisu do Kapharnạhum nagrahateye calaoena. Onḍe mitʼṭen Rom Subedarren guti do ruạ kạhilte gujukʼ dạkhile tahẽkana. Ar Subedar do uni guti ạḍiye dulạṛedekan tahẽkana. Uni do Jisu reaṅe ańjomketʼ khan Jihudikoren murubiko Jisu ṭhen kolketʼkoteye nehõradea jemon uni doe hijukʼte acʼren gutiye bogeye. Ado onko murubiko do Jisu ṭhen hecʼkate nehõrateko metadea, “Okoe lạgitʼ noam kạmi, uni do noaren lek kangeae, ente uni do aleren hoṛkoe dulạṛetʼkoa ar aleakʼ sunạgog do unigeye tearakada.” Unre Jisu do onko soṅgeteye calaoena. Ar ona oṛakʼ khon sạṅgińreye tahẽkanrege Subedar do acʼren gateko kolketʼkoteye men gotʼadea, “E Probhu, alom haronokʼa, ente ińakʼ oṛakʼtem bolokʼ ona reakʼ lekgiń baṅkana. Onate iń do am ṭhen senokʼ lek hõ bạń bujhạulena. Am do eken katha baṛe roṛgotʼkam, ar inạtege ińren guti doe boge utạrokʼa. Iń do noa kathań baḍaea, ente iń hõ eṭakʼicʼakʼ katha leka calakʼ hoyokʼ tińạ ar sipạhikohõ ińakʼ katha lekako calakʼ kana. Iń do mitʼṭecʼ ‘calakʼiń metae khan’ uni doe calakʼa, ar eṭakʼicʼ ‘hijukʼiń metae khan’ uni doe hijukʼa, ar ińren gutiń metae khan ‘noa kạmime’ uni doe onkaea.” Noa katha ańjomkate Jisu doe hahaṛaena ar acʼ pańjayedekanko secʼ beṅgetʼ ạcurkateye menkeda, “Ińiń metapekana, Israelko modre nunạkʼ maraṅ pạtiạu do tishõ bạń ńel akawana.” Ado Subedar okoekoe kolletʼko onkoko ruạṛ calaoen khan uni guti do boge akanko ńelkedea. Noa tayom Jisu do Nạinko metakʼ mitʼṭen ato secʼe calao idiyena. Unre acʼren celako ar gadel hoṛko hõ uni soṅge soṅgeteko calakʼkan tahẽkana. Ado ona ato reakʼ phaṭok-duạr ṭhene seṭeren khan mitʼṭen gocʼ hoṛ do bahreteko oḍok ạguyede tahẽkana. Ar okoeye gocʼ akan tahẽkan uni do eṅgattetʼren sadher hopone tahẽkana, ar uni maejiu hõ rạnḍigeye tahẽkana. Ar atoren ḍher hoṛge uni rạnḍi maejiu sãoteko tahẽkana. Probhu do uni rạnḍi maejiu ńelte mãyã hecʼadeteye metadea, “Alom raga.” Inạ tayom uni do sen sorkate parkome joṭetʼkeda. Ar onate mạ̃ṛĩ gokʼ idikanko doko teṅgoyena. Jisui menkeda, “E bạbu, metam kạnạń, ma beretʼme.” Ar inạtege gocʼ akanicʼ do beretʼkateye duṛupʼena ar katha roroṛe ehopʼena. Ar Jisu do eṅgattetʼ ṭhene jimạkadea. Noate sanam hoṛ do botor caṛhaoatʼkoa ar Isor sabasiaete memenko ehopʼena, “Abo talare mitʼṭen maraṅ nạbigeye upel akana. Isor do acʼren hoṛkoe hiri akatʼ bona.” Jisuakʼ noa katha do Jihudạ Prodes ar ona beṛhaeteakʼ sanam jaegakore pasnao idiyena. Ado Johan bạbạptisicʼren celako do noako reaṅ katha Johanko baḍae ocokedea. Unre Johan do acʼren barea cela hohoatʼkinte Jisu ṭhen noa katha kuliye lạgitʼe kolketʼkina, “Okoeakʼ hijukʼ reakʼ katha menakʼtae uni dom am kangea, se eṭagicʼ lạgitʼle koyokʼ hora?” Unkin hoṛ do Jisu ṭhen hecʼkatekin metadea, “Johan bạbạptisicʼ do kulime lạgitʼ am ṭhene kolakatʼlińạ, ‘okoeakʼ hijukʼ reakʼ katha menakʼtae uni dom amkangea, se eṭagicʼ lạgitʼle koyokʼ hora?’ ” Unre Jisu do ruạ hasote jạbun akanko ar bạṛicʼ jiu sapʼakatʼko hoṛkoe bogeketʼkoa ar kãṛã hoṛko hõ ńeńel daṛeye danatʼkoa. Ona tayom Johanren cela roṛ ruạṛatʼkinteye metatʼkinạ, “Okako ben ńelketʼ arben ańjomketʼ ona calaokate Johan lạiae ben. Ar baḍae ocoyeben je, kãṛã hoṛko ńeńel kana, leḍhakoko taṛameda, murhucʼ jom hoṛko bogekʼ kana, kala hoṛko ańjomeda, gocʼkoko jiwetʼ beredokʼ kana ar reṅgecʼ orecʼko ṭhen do bhage sombat porcarokʼ kana. Bhạgangeae uni do, okoe iń iạte monre bae tạkijokʼ.” Ado Johan okoeye kolletʼkin unkin hoṛkin calaoen khan Jisu do gadel hoṛko Johan reaṅ lạiakoe ehopʼena, “Cetʼ ńeńel hahaṅkarte dope oḍok calaolena? Hoete hilạukʼ kan chuci? Se cetʼ ńel lạgitʼpe oḍok calaolena? Mońj kicricʼ horokʼ akatʼ mitʼṭen hoṛ? Okoe damanakʼ kicricʼko horokʼ bandeyetʼ ar sukko jometʼkan onko ma coṅ rajakʼ oṛakʼreko tahenkan. Se cele ńeńelpe oḍok calaolena? Mitʼṭen nạbi? Hẽ metape kạnạń, uni do nạbi khon hõe maraṅgea. Johan kangeae uni hoṛ do, one okoe reaṅ sonot sostorre ol akana, ‘ńelme, am lahate ińren goḍetiń kolekana. Uni do lahare senkate amakʼ hore teara.’ Ińiń metapekana, manwako modre Johan khon maraṅicʼ do okoe hõ bạnukʼkoa; enrehõ Isorakʼ rajre huḍiń utạricʼ do Johan khon hõe maraṅgea.” Arko ańjomketʼ sanam hoṛko ar mạsul uṭhạuko do Johanakʼ porcarte Isor do dhorom menteko aṅgockedete bạptismako ataṅkeda. Menkhan Phạrusiko ar sostor baḍaeko do Johan ṭhen bako bạptismalente Isorakʼ monejoṅakʼko neṅghaokeda. Jisu do arhõe metatʼkoa, “Enḍekhan niạ jugren hoṛ do okoe tulucʼ iń jurikekoa? Ar okoe lekanako? Onko do nonkan gidrạ lekanako, okoe do bajarre duṛupʼkate eṭakʼko hohoateko metakokan, ‘ape lạgitʼ tiriole oroṅkeda, menkhan bape enecʼlena; homor halaṅkedale, menkhan bape rakʼleda.’ Johan bạbạptisicʼ do hecʼkate piṭhạ ar darkha rasa bae jomletʼtepe menkeda, ‘unire do bhut menaea.’ Ar Manwa Hopon do hecʼkateye jom ńũiyetʼtepe meneda, ‘ńelepe, uni do lebṛa ar ńu bhuteṛicʼ, mạsul uṭhạuko ar boṅgan hoṛkoren gatege.’ Menkhan okoe akel reakʼ gobolreko calakʼkan, onkoakʼ jiongeye sạbudetʼ kana, akel do khạṭigea mente.’’ Mitʼṭen Phạrusi hoṛ do Jisu acʼ ṭhen joma menteye neotakedea. Unre Jisu do uniakʼ oṛakʼte senkate jojome duṛupʼena. Ona atore mitʼṭen bạṛicʼ maejiue tahẽkana. Ar Jisu do Phạrusiakʼ oṛakʼre jom lạgitʼe calao akana menteye baḍaeketʼ khan uni do mitʼṭen ponḍ dhiri cukạkʼte mahkaokʼ sunume idi darakeda. Ar Jisu tayom secʼre uniakʼ jaṅga ṭhen senkate teṅgoyente rakʼ rakʼte mẽtʼ dakʼte uniakʼ jaṅgakine lohotʼketʼtaea. Inạ tayom uni do acʼakʼ upʼte jaṅgae jotʼketʼtaea ar jaṅgareye cokʼadete ona mahkaokʼ sunume duladea. Ado okoe Phạrusi Jisui neotalede uni do noa ńelte mone monteye menkeda, “Nui hoṛ do nạbiye tahẽnlen khane baḍae daṛekea, cetʼ lekan maejiu jaṅgae joṭetʼetʼtaea mente; ente maejiu doe bạṛicʼge.” Jisu do uniye roṛ ruạṛadea, “E Simon, am tulucʼ thoṛa katha menakʼtińạ.” Simone menkeda, “E Guru, ma menme.” Jisui menkeda, “Mitʼ mahajon ṭhen bar hoṛkin dharaoletʼa. Mitʼ hoṛ do mõṛẽ sae Dinar ar eṭakʼicʼ do mõṛẽgel Dinar. Unkin do okoeakʼ hõ hala ruạṛ reakʼ daṛe baṅ tahẽkante bana hoṛge dayateye ikạ katʼkinạ. Enḍekhan mase lạime, unkin modre mahajon do okoeṭakʼ bạ̃ṛtikin dulạṛkea?” Simone menkeda, “Ińakʼ hudisre, okoeakʼ bạ̃ṛti rin ikạ akantae unige.” Jisu do uniye metadea, “Am do ṭhikgem menakada.” Ona tayom Jisu do maejiu secʼ beṅgetʼkate Simone metadea, “Nui maejiu mam ńelekange. Iń do amakʼ oṛakʼiń hecʼenre jaṅga ạbukokʼ lạgitʼ dakʼ hõ bam emadińạ, menkhan uni do mẽtʼ dakʼte ińakʼ jaṅgakine ạbukkeda ar acʼakʼ upʼteye jotʼketʼtińạ. Am do cokʼ hõ bam cokʼ ạdińa, menkhan ińiń boloyen tayom khon uni do ińakʼ jaṅgae cokʼ ạtiń kana. Am do bohokʼre sunum hõ bam ojokʼạdińạ, menkhan uni do ińakʼ jaṅgare mahkaokʼ sunume dulạdińa. Onateń metam kana, ḍher dulạṛe udukʼketʼte uni doe bujhạu ocoyeda je, uniakʼ kạiko ḍhergetare hõ ona do ikạ akantaea. Ar okoeakʼ thoṛa ikạ akantae uni do thoṛage dulạṛe uduga.” Jisu do uni maejiue metadea, “Amakʼ kạiko do ikạyena.” Unre okoe Jisu soṅgete jojomko duṛupʼakan tahẽkan onko do mone monete memenko ehopʼena, “Nui doe okoe kante, kạiye ikạyetʼ kana?” Jisu do uni maejiue metadea, “Pạtiạu akantem, kại khon bańcaoem ńamkeda. Ma sulukte calao joṅme.” Inạ tayom Jisu do ato ato ar nagraha nagrahate dãṛãkate Isorakʼ raj reakʼ bhage sombat porcarakoe ehopʼena. Ar uni soṅgete acʼren gelbar celako ar thoṛa maejiuko hõko tahẽkana. Noko maejiu do ruạ haso ar bạṛicʼ jiuko khonko boge ocoakan tahẽkana. Noko doko hoyokʼ kana, Mạriạm, okoe do Magdalaniko metaekan ar nui khonge eae goṭen bạṛicʼ jiu doko oḍoklena; ar Herod rajren kạmiạyicʼ Khusạren bạhu Joanna; Susanna arhõ aema maejiukoge. Noko do Jisu ar acʼren celako sapʼsorako lạgitʼ akoakʼ ṭaka-poesa khonko khorocetʼ tahẽkana. Unre eṭakʼ eṭakʼ atoko khon ạḍi utạr hoṛ do Jisu ṭhen hecʼkateko bhiṛkeda. Unre Jisu do cetʼako lạgitʼ noa golpoe lạiatʼkoa: “Mitʼṭen casa do itạ er lạgitʼe oḍok calaoena. Ado erokʼ jokhecʼ adomakʼ itạ do hor aṛere ńurena. Ar hoṛko do onako lebetʼ gańjaokeda ar cẽṛẽko hõ hecʼkateko jomkeda. Ar adomakʼ itạ do dhiri hasare ńũrente janamgotʼena, menkhan ros bae ńamletʼte ona do rohoṛ kạrcupʼena. Arhõ adomakʼ itạ do jạnum jhạwạko talare ńurena. Ar jạnumko do cara soṅgete hara rakapʼen khan onako doe danaṅ esetʼkeda. Arhõ adomakʼ itạ do bhage hasare ńurena ar hara rakapʼente mitʼ sae doboṛ phosol hoyena.” Noako kathae roṛketʼ khan Jisu do ãṭ aṛaṅteye menkeda, “Ańjom lạgitʼ lutur menakʼtaeicʼ doe ańjomma.” Inạ tayom acʼren celako do ona golpo reakʼ mane cetʼkana menteko kulikedea. Unre Jisui metatʼkoa, “Ape do Isorakʼ raj reakʼ okoakʼkope baḍae ocoakana, menkhan eṭakʼko ṭhen do golpo talateń lạiyeda, jemon ńeńel tulucʼ aloko ńel ar ańjom tulucʼ aloko bujhạu. “Golpo reakʼ mane do nõkʼõe: Itạ do hoyokʼ kana Isorakʼ katha. Hor aṛere ńũren itạte do onko lạgitʼge roṛ akana, okoe do kathako ańjomketʼ, menkhan unrege Soetan do hecʼkate onkoakʼ mon khon onae halaṅ idiya. Ar bako pạtiạukʼte onko do kại khon bańcao bako ńama. Dhiri hasare ńũren itạte do onko lạgitʼge roṛ akana, okoe do katha ańjomkate rạskạteko ataṅetʼkan, menkhan onkore ona reakʼ rehetʼ do mońjte baṅ bạisạukʼ kana. Onate onko do thoṛa din lạgitʼko pạtiạukʼkana, menkhan biḍạureko paṛaolen khan doko pạcokʼ kana. Jạnum jhạwạ talare ńũren itạte do onko lạgitʼge roṛ akana, okoe doko ańjometʼkan, menkhan jion reakʼ horte calakʼ calakʼte gharońj reakʼ dand-bhabna, dhon-durib ar suk talareko ten ocokʼ kana. Ar onate onko do jionre bako gele belekʼ kana. Ar bhage hasare ńũren itạte do onko lạgitʼge roṛ akana, okoe do khạṭi ar soṛa monte ona katha ańjomkate kajakteko sapʼ dohojoṅkan ar onare ṭarhao akae tahente jionreko gele belekʼ kana. “Okoe hõ diuhe jeretʼkate jãhãnakʼte do bako hạrupʼ esetʼkakʼa, se cạuki latarre hõ bako dohoea. Menkhan ona do diuhe dohowakʼ cetanregeko dohoea, jemon bhitrite bolokʼko do ona marsalko ńel ńam. Nonkan cetʼ okoakʼge bạnukʼa, okaṭakʼ do baṅ sodorokʼ se nonkan cetʼ danaṅakʼ hõ bạnukʼa, okaṭakʼ do baṅ baḍaeyokʼ se baṅ sodorokʼ. Onate cetʼ lekape ańjometʼkan, ona reaṅ moneakʼpe, ente okoeakʼ menakʼtae uni do arhõe emocokʼa, menkhan okoeakʼ bạnukʼtae uni do oka menakʼtae ona hõe recʼ ocokʼa,” Ado Jisuren eṅgat ar boehako uni ṭhenko hecʼena, menkhan bhiṛ iạte uni tulucʼ bako ńapam daṛeada. Unre mitʼṭen hoṛ do uniye lạiadea, “Eṅgam ar boehamteko do am são ńapamokʼ lạgitʼ bahrereko teṅgo akana.” Onate Jisu do hoṛkoe metatʼkoa, “Okoe Isorakʼ katha ańjomkate ona lekako kạmikan, onko kangeako ińren eṅgạń ar boehańko do.” Mitʼ din Jisu ar acʼren celako do mitʼṭen lạukạreko decʼena. Uni do celakoe metatʼkoa, “Delabon, doreão hanasate bon calakʼa.” Khan celako do lạukạko laṛaokeda. Ado lạukạ calakʼ ehopʼen khan Jisu doe jạpitʼkeda. Unre doreãore ackage mitʼṭen birbão hecʼgotʼena, ar dakʼte lạukạ do perejokʼ ehopʼena. Onate celako do ạḍi muhinreko paṛaoena. Onko do Jisu ṭhen senkate beretʼkedeteko metadea, “E Probhu, E Probhu, gujukʼ kana bon!” Unre Jisui beretʼena ar habak ḍabakokʼkan ḍheo ar hoeye dhomkaokeda. Onate hoe ar ḍheoko thirente ḍelḍel nijhumena. Uni do celakoe metatʼkoa, “Okor tape biswạs do?” Celako do botor arko hahaṛayente ako talare memenko ehopʼena, “Nui doe okoe kante, hoe hõ hoe ar dakʼ hõ dakʼ kin bataoetʼtaea?” Ona tayom Jisu ar acʼren celako do Gạlil doreão paromkate Gerasarenkoakʼ ṭoṭhateko calaoena. Ado Jisu lạukạ khone pheḍgotʼen khan onḍenicʼ mitʼṭen hoṛ do uni ṭhene hecʼena. Uni hoṛ do ạḍi utạr bhutko capaṛ akawade tahẽkana ar ḍher din khon kicricʼko hõ bae horokʼ bandeyetʼ tahẽkana, ar oṛakʼre tahẽ baṅkate mạ̃ṛĩ poḍakoregeye tahenkan tahẽkana. Ado Jisui ńelkede khan kikiạuate otre taberente ãṭ aṛaṅteye menkeda, “Maraṅ Isorren Hopon Jisu, iń tulucʼ amakʼ do cetʼ? Dayakate alom sasetińạ.” Uni hoṛ do noa iạtegeye menkeda, ente Jisu do bạṛicʼ jiu uni khon oḍok calakʼe hukumade tahẽkana. Ar bạṛicʼ jiu do ghane ghạṛicʼ uni hoṛe sapʼ tirupʼede tahẽkana. Ar sikṛite tolkateko horhoyedekan tahẽkanre hõ uni do onae topakʼetʼ tahẽkana, ar bạṛicʼ jiu hotete hahaṅkar jaegakoreye ạcur baṛaekan tahẽkana. Jisu do uniye kulikedea, “Celeyama ńutum do?” Uniye menkeda, “Phạdạńạ,” ente ạḍi utạr bạṛicʼ jiu uni bhitrireko bolo akan tahẽkana. Unre onko bạṛicʼ jiu do Jisuko nehõradea, jemon athan kunḍte aloe kol giḍikako. Ar onḍe buru dhasna sorre ạḍi saṅge khạṛ sukriko ạtińkan tahẽkana. Bạṛicʼ jiuko do Jisu nehõradeteko metadea jemon sukri bhitrire bolokʼ reakʼe aṛakʼako. Adoe aṛakʼatʼko khan onko do uni hoṛ khonko oḍokente khạṛ sukrikoreko boloyena. Onate onko sukri do daṛaṅ secʼteko ńir calaoente doreão dakʼreko unum gocʼena. Ar okoekoko gupikan tahẽkan, onko do noa ghoṭna ńelkate atoteko dạṛkeda ar ona aḍepase reakʼ sanam jaegakore noa khoborko lạikeda. Unre hoṛko do cetʼ hoeakana mente ńel lạgitʼ bahreteko oḍok hecʼena. Ado Jisu ṭhenko seṭeren khan bhut capaṛ akawade hoṛ do kicricʼ horokʼ akatʼ ar mạ̃hir monte Jisuakʼ jaṅga ṭhen duṛupʼ akanko ńelkedea. Noa ńelte onko do botor caṛhaoatʼkoa. Ar okoe ona ghoṭnako ńelletʼ onko do hoṛkoko lạiatʼkoa cetʼlekate uni doe bogeyena mente. Unre Gerasa ṭoṭharen sanam hoṛ Jisuko nehõradea jemon ako ṭoṭha khone calaojoṅ, ente onko do ạḍi botor caṛhaoatʼko tahẽkana. Ado unre Jisu do ruạṛ calakʼ lạgitʼ lạukạreye decʼena. Ar okoe khon bhutko oḍoken uni do Jisui nehõradea, jemon acʼhõ uni sãoteye calao daṛeakʼ. Menkhan Jisu do noa katha menkateye bidạkadea, “Am do oṛakʼte ruạṛ calakʼme ar am lạgitʼ Isor tinạkʼ maraṅakʼe kạmi akatʼ ona porcarme.” Unre uni hoṛ do oṛakʼteye calaoena ar Jisu acʼ lạgitʼ tinạkʼ maraṅakʼe kạmi akatʼ ona reakʼ sanam jaegare lại baṛaye ehopʼena. Ado Jisu eṭakʼ aṛe secʼe ruạṛ calaoen khan onḍenko hoṛ do rạskạ monte uniko ataṅ daramkedea, ente onko do uni lạgitʼgeko koyokʼ hor akatʼ tahẽkana. Unre Jaerus ńutuman sunạgogren mitʼṭen mukhiyạ hoṛ do hecʼente Jisuakʼ ti jaṅgareye giḍiyena. Ar Jisu acʼakʼ oṛakʼte hijukʼ lạgitʼe nehõradea, ente uniren gelbar bochor umerren sadher hoponera do gujukʼ dạkhile tahẽkantaea. Ado Jisu tinreye calakʼkan tahẽkana unre gadel hoṛko do beṛhaeteko riḍetʼ ciritʼede tahẽkana. Ar onko modren mitʼṭen maejiue tahẽkana okoe do gelbar bochor khon pordhol rogteye jạbun akan tahekan. Uni do acʼakʼ joto ạsulokʼakʼko raranko tayomreye khorocʼ caba akatʼ tahẽkana, menkhan okoe hõ bako boge daṛeaekan tahẽkana. Uni do tayom secʼ khon hecʼkate Jisuakʼ kicricʼ reakʼ ańcare joṭetʼketʼtaea, ar unrege mãyãm oḍokokʼ do thirentaea. Unre Jisui menkeda, “Okoeye joṭetʼ kedińạ?” Ado jotokoko baṅketʼ khan Patras ar uniren sãotenko doko metadea, “E Guru, gadel hoṛko beṛhaeteko riḍetʼ ciritʼetʼmea.” Enrehõ Jisui menkeda, “Ińiń baḍaea jãhãe baṅ jãhãe, ińe joṭetʼ akadińạ, enteń bujhạu daṛeada iń khon daṛe oḍokena.” Uni maejiu do bae oko daṛeakʼ kana menteye ńelketʼ khan thar tharao tulucʼ hecʼkate Jisu samaṅreye ombakʼena. Ar sanamko samaṅreye lạikeda cedakʼe joṭetʼkedea, ar cetʼlekateye bogeyena. Onate Jisu do maejiue metadea, “E mạ̃i, amakʼ pạtiạugeye bańcao akatʼmea. Do sulukte ruạṛ joṅme.” Ado Jisu kathae roroṛkan tahẽkanrege sunạgogren mukhiyạ hoṛakʼ oṛakʼ khon, mitʼ hoṛ do hecʼkateye menkeda, “Amren hoponera doe gocʼena; onate Guru do ar alom haronea. Noa katha ańjomkate Jisu do Jaeruse metadea, “Alom botorokʼa; eken pạtiạu dohoeme, ar inạtege uni doe bańcaokʼa.” Ado Jaerusakʼ oṛakʼe seṭeren khan Jisu do Patras, Johan, Jakob ar kuṛiren eṅgat-apat chaḍa okoe hõ oṛakʼ bhitrite do bae bolo ocoatʼkoa. Ar sanamkoge kuṛi lạgitʼko rakʼ homoretʼkan ar koṛamko ceṭagokʼkan tahẽkana. Unre Jisui metatʼkoa, “Alope raga, kuṛi do bae gocʼ akana, ekene jạpitʼ akada.” Khan hoṛko do uniko landa dhutʼadea, enteko baḍaekan tahẽkana kuṛi doe gocʼakana. Jisu do ti sapʼkate hohoadeteye metadea, “E mại, ma beretʼme.” Ar inạtege kuṛiakʼ jiwi do ruạṛentaea, are beretʼena. Unre Jisu do uni kuṛi thoṛa jom ocoye lạgitʼe hukumatʼkoa. Ar kuṛiren eṅgat-apat dokin ṭhak utạrena, menkhan Jisu doe baron katʼkinạ, jemon noa ghoṭna okoe ṭhen hõ alokin lại baṛae. Niạ tayom Jisu do gelbar celako mitʼ ṭhene hoho jarwaketʼkoa ar sanam bhutko cetanre ektiạriye ematʼkoa. Ar rugiko bogeko reakʼ daṛe hõe danatʼkoa. Ona tayom Isorakʼ raj porcar ar rugiko bogeko lạgitʼe kolketʼkoa. Uni doe metatʼkoa, “Horte lạgitʼ ṭheṅga, khuti, piṭhạ se ṭaka cetʼge alope iditora joṅa, ar babar goṭen aṅgrop hõ alo. Ar jãhãṭakʼ oṛakʼregepe bolokʼ onḍegepe tahena ona ato ạuripe bạgiyakʼ hạbicʼ. Ar hoṛko bako ataṅpe khan, enḍekhan onkoakʼ ato khonpe oḍokʼ hijukʼre apeakʼ jaṅga reakʼ dhuṛi hõ koṭa giḍi oṭokakʼpe, jemon onage onko birudre gohae teṅgokʼ.” Unre celako do ato ato dãṛãkate Isorakʼ raj reakʼ bhage sombat porcar ar rugiko bogekoko ehopʼena. Ado Jisui kạmi akatʼakʼko reaṅ ańjomkate disạm cakʼlaoicʼ Herod do cetʼge bae bujhạu daṛeakʼkan tahẽkana. Ente adom hoṛko menetʼ tahẽkana, Johan bạbạptisicʼge gocʼko khone jiwetʼ beretʼ akana; arhõ adomko doko menetʼ tahẽkana, Eliại sodor akana; arhõ adomko doko menetʼ tahẽkana, ḍher din laharen mitʼṭen nạbigeye jiwetʼ beretʼ akana. Herode menkeda, “Johanakʼ bohokʼ mań makʼ ńur ocoakatʼtae. Enḍekhan okoe reaṅ iń ańjometʼkan, uni doe okoe kana?” Ar Herod do Jisu ńele reakʼ kurumuṭui ehopʼena. Ado oneye kolletʼko celakoko ruạṛ hecʼen khan cetʼ cetʼko kạmiketʼ ona joto do Jisuko lạiadea. Unre Jisu doe soṅgeketʼkote Bethsaeda sor mitʼṭen nisun jaegateye senena. Menkhan gadel hoṛ do ona khoborko baḍaeketʼ khan Jisuko pańjakedea. Uni do onko hoṛkoe ataṅketʼkote Isorakʼ raj reakʼe lạiatʼkoa. Ona chaḍa okoekoakʼ boge ocokʼ reakʼ jạruṛ tahẽkan onkoe bogeketʼkoa. Ado ber hạsurokʼkan tahẽkan jokhecʼ onko gelbar celako do Jisu ṭhen hecʼkateko menkeda, “Abo okare menakʼ bon noa do mitʼṭen nisun jaegakana. Onate gadel hoṛko bidạkakome jemon onko do sor reakʼ ato ar nagrahate senkate jom ar tahen lạgitʼ jaegako sendra ńam daṛeakʼ.” Jisui metatʼkoa, “Onko do apege jomakʼ emakope.” Adoko metadea, “Ale ṭhen do eken mõṛẽ goṭen piṭhạ ar barea hako chaḍa ar cetʼge bạnukʼa. Menkhan ale do senkate jomakʼle kiriń ạgule anecʼle jom oco daṛeakoa.” Onḍe do mõṛẽ hajar gan herel hoponko tahẽkana. Jisu do acʼren celakoe metatʼkoa, “Mimitʼ dolre mõṛẽgel mõṛẽgelkate pantete duṛupʼ ocokope.” Ado onkage celako do sanam hoṛko duṛupʼ ocoketʼkoa. Ar Jisu do ona mõṛẽ goṭen piṭhạ ar barea hako ataṅkate serma secʼ beṅgetʼ rakapʼkateye bhorada are kecakʼkeda. Ona tayom gadel hoṛko emako lạgitʼ celakoakʼ tireye calatʼkoa. Ar sanam hoṛko jomkeda arko biyena. Ar okako kecakʼ hiricʼ pạsir ńur tahẽkan onate celako do gelbar phạtiạkʼko halaṅ jarwakeda. Mitʼ dhao Jisu do mitʼṭen nisun jaegareye koejoṅkan tahẽkana. Unre uni soṅgete eken acʼren cela motogeko tahẽkana. Adoe kuliketʼkoa, “Iń doń okoe kana, ar noa reaṅ hoṛko do cetʼko meneda?” Celakoko metadea, “Adomko doko meneda am dom Johan bạbạptisicʼ kana; ar adomko doko meneda Eliạ kanam; arhõ adomko doko meneda sedaeren mitʼṭen nạbigeye jiwetʼ beretʼ akana.” Jisui metatʼkoa, “Menkhan ape do okoe kạnạń mentepe meneda?” Patrase menkeda, “Am do Isorren uni Mạsi kanam.” Unre Jisu doe sontorkatʼkoa are hukumatʼkoa, okoe ṭhen hõ jemon noa katha aloko lại baṛae. Uni do arhõe metatʼkoa, Manwa Hopon do aema duk jojom hoyokʼtaea. Ar murubiko, maraṅ naekeko ar sostor baḍaeko do uniko nihạtea. Are gocʼ ocokʼa ar pe din hilokʼre gocʼko khon jiwetʼ beredokʼ hoyokʼtaea. Ona tayom sanamkoe metatʼkoa, “Jãhãege ińakʼ horte hijukʼe menetʼ khan uni do acʼakʼ kusileka aloe calakʼma; ar dinạmge acʼakʼ krus gokʼkate ińe pańjańma. Jãhãe acʼ lạgitʼ bańcao tahene menetʼ khan uni do acʼakʼ jiwiye khuạutaea; menkhan okoe iń lạgitʼ acʼakʼ jiwiye khuạutae, uni do onae bańcaotaea. Ar jãhãege goṭa dhạrtiye lab iạte acʼakʼ jiwiye khuạutae enḍekhan uniakʼ do cetʼ porho hoyokʼtaea? Jãhãege iń ar ińakʼ katha iạteye lajaokʼ khan, Manwa Hopon hõ tinre acʼ ar acʼren Apatakʼ ar sonot goḍetkoakʼ ṭhonokanteye hijukʼa unre acʼ hõ uni hoṛ iạteye lajaokʼa. Sạrigeń metapekana, nonḍe adom hoṛ menakʼkoa, onko do Isorakʼ raj ạuriko ńel hạbicʼ bako gujukʼa.” Ado noako kathae roṛketʼ mitʼ hapta tayom Jisu do koejoṅ lạgitʼ Patras, Johan ar Jakobteko soṅgekate mitʼṭen buruteye rakapʼena. Are koejoṅkan tahẽkanrege Jisuakʼ mẽtʼãhã do bodolena ar uniakʼ kicricʼko hõ pĩṛĩtʼ pĩṛĩtʼ ponḍentaea, ar uni tulucʼ bar hoṛ galmaraokan kin ńelena. Unkin do Mose ar Eliạge. Onko do ṭhonokanteko ńelena. Ar Jerusalemre purạu lạgidokʼkan Jisuakʼ gujukʼ reaṅko galmarokan tahẽkana. Unre Patras ar uni soṅgeten kin do jhap jhap dudṛumetʼko tahẽkana. Adoko beṅgetʼ pharnoen khan Jisuakʼ ṭhonokko ńelkeda ar soṅgete bar hoṛ teṅgo akan hõko ńelketʼkinạ. Ado unkin hoṛ tinre Jisu ṭhen khonkin calakʼkan tahẽkana unre Patras do Jisui metadea, “E Guru, bhagege hoeakana nonḍe menakʼle iạte. Ale do nonḍe pea kumbạ oṛakʼle benaoa, mitʼṭen do am lạgitʼ, mitʼṭen do Mose lạgitʼ ar mitʼṭen do Eliạ lạgitʼ.” Menkhan uni do bae bujhạuleda acʼ do cetʼe meneda mente. Patras kathae roroṛkan tahẽkanrege mitʼṭen rimil do rakapʼ hecʼente onkoe umul esetʼketʼkoa. Ar rimilteko danaṅen khan celako do botor caṛhaowatʼkoa. Ona rimil khon noa katha ańjomena, “Nuige ińren Hopon do, one uniń bachao akade; ape do uniakʼ ańjomtaepe.” Ado katha roṛ thiren khan eken Jisu eskargeye ńelena. Ar celako do oneko ńelketʼ reaṅ okoe hõ bako lại baṛaletʼte hapegeko tahẽyena. Ado dosar hilokʼ Jisu ar pea cela buru khonko pheḍ hecʼen khan ạḍi utạr hoṛ do Jisu sãote ńapamokʼ lạgitʼko hecʼena. Unre gadel hoṛ bhitri khon mitʼ hoṛ do ãṭ aṛaṅte hohoate Jisui metadea, “E Guru, dayakate hoponiń baṛe ńeleme. Uni doe sadher hopon kantińạ. Uni do mitʼṭen bạṛicʼ jiue sabea ar ackageye kikiạu goda. Are mocṛa mucṛiyea ar uniakʼ moca khon photo photo oḍokokʼa; ar ona tayom do garal garal huruṛ baṛakateye aṛagea. Iń do amren celako ṭheniń nehõrlena jemon uni jiuko oḍok giḍikae, menkhan bako daṛeada.” Unre Jisui menkeda, “E bepạtiạu ar peṛta piṛhirenko! Ar tinạkʼ din ape tulucʼ iń tahena ar tinạkʼ diniń sahaokatapea? Dini hoponme nonḍe ạguyetam.” Ado tinre koṛa do Jisu ṭhene hijukʼkan tahẽkana unre bạṛicʼ jiu do uniye mocṛao bhinḍạṛkedea. Onate Jisu do bạṛicʼ jiue dhomkaokedea ar koṛae bogekedete eṅgat-apat ṭhene jimạkadea. Unre sanam hoṛ do Isorakʼ maraṅtetʼ iạteko hahaṛayena. Ado Jisui cekaketʼakʼ babotre hahaṛa tulucʼko hudisokʼkan tahẽkanre, uni do acʼren celakoe metatʼkoa, “Ińakʼ noako katha monre rebetʼ dohoepe, ente Manwa Hopon do hoṛkoakʼ tireko soprotea.” Menkhan celako do ona katha bako bujhạuleda. Isor do onko ṭhen khone danaṅ akatʼ tahẽkana jemon onko do ona aloko bujhạu daṛeakʼ. Ar celako hõ noa reakʼ jãhãnakʼ katha kuliyeko botorokʼ kan tahẽkana. Ado celako modre okoeṭakʼ sanamko khone maraṅa ona reaṅ ako talareko reṭepeṭekʼkan tahẽkana. Jisu do onkoko hudisokʼkan reakʼe bujhạuketʼtako khan mitʼṭen kạṭicʼ gidrạ ạgukate acʼ ṭhene teṅgokedea. Ona tayome metatʼkoa, “Jãhãege iń ńutumte nui gidrại ataṅe, uni do ińgeye ataṅińạ. Ar okoe ińe ataṅiń, uni do kol akadińicʼgeye ataṅea. Apeko modre okoe sanamko khone huḍiń utạricʼkan, unigeye maraṅa.” Johane menkeda, “E Guru, am ńutumte mitʼṭen hoṛ do bạṛicʼ jiukoe oḍok giḍikanle ńṭoṭhadea. Ar abo dolrene baṅkante uni dole mana akadea.” Jisu do uniye metadea, “Alope manaea, ente okoe ape birudrene baṅ kan uni do ape secʼren kangeae.” Ado sermate calakʼ reakʼ okte hoyentae khan uni do Jerusalemte calakʼ lạgitʼe mon murukkeda. Uni do laharege onḍe hoṛkoe kolketʼkoa. Onko do Jisu sanamakʼ tearae lạgitʼ Samariạkoakʼ mitʼṭen atoteko boloyena. Menkhan Jisu do Jerusalemteye calakʼkante ona atoren hoṛko do bako ataṅledea. Ona ńelte acʼren cela Jakob ar Johan dokin menkeda, “E Probhu, Eliạ leka serma khon seṅgel ńurakote marao giḍikako lạgitʼ hukum liń emamem khojkana?’’ Jisu do unkin secʼ ạcurkate dhomkao ketʼkinteye metatʼkinạ, ‘‘Abenre cetʼlekan jiu menaea baben baḍaea, ente Manwa Hopon do manwa nosṭoko lạgitʼ do bae hecʼakana, bickom bańcaoko lạgitʼge.’’ Ona tayom onko do eṭakʼ atoteko calaoena. Ar horteko calakʼkan tahẽkanre mitʼ hoṛ do Jisui metadea, “Jãhãtegem calakʼ iń hõ am sãote onḍegeń calakʼa.” Jisu do uniye metadea, “Toyoko do bhugạkʼ menakʼtakoa ar cẽṛẽkoakʼ do tukạ menakʼa, menkhan Manwa Hopon do bohokʼ dohoetae reakʼ jaega hõ bạnukʼtaea.” Ado eṭakʼ mitʼ hoṛe metadea, “Dela iń soṅgete hijukʼme.” Menkhan uni hoṛ doe menkeda, “E Guru, ạpuń baṛe topa maṛaṅ ocoạńme.” Jisu do uniye metadea, “Gocʼko do akoren gocʼko topa ocoakome, menkhan am do hijukʼte Isorakʼ raj lại pasnaome.” Ado arhõ eṭakʼ mitʼ hoṛe menkeda, “E Guru, iń do am sãoteń calakʼgea, menkhan iń oṛakʼrenko ṭhen bidạ hatao maṛaṅ ocowạńme. Jisu do uniye metadea, “Nahel kãṛbare ti capokate tayom secʼ beṅgetʼicʼ do Isorakʼ raj lạgitʼ lek doe baṅkana.” Ona tayom Probhu Jisu do arhõ eae gel celako porcar kạmi kolko lạgitʼe bachaoketʼkoa. Ar acʼ do okako ato ar jaegakote calakʼ lạgitʼe goṭa akatʼ tahẽkan, onako jaega calakʼ lahare uni do babar hoṛkateye kolkatʼkoa. Are metatʼkoa, “Sạrige phosol do ḍhergea, menkhan kạmiyạko doko thoṛagea. Onate phosolren mạlik nehõraepe, jemon uni do acʼakʼ phosol samṭao lạgitʼ hoṛe kolko. Do calakʼpe; iń do hunḍạrko talare bhiḍi hoponko lekań koletʼpea. Ṭaka reakʼ thạilạkʼ, khuti se panahi hõ soṅgete alope idijoṅa, ar horkore okoe hõ alope joharakoa. Ar jãhã oṛakʼregepe bolokʼ pạhil do menpe, ‘noa gharońjrenko sulukapema.’ Ar suluke kusiakʼkan jãhãe hoṛ onḍe menae khan enḍekhan apeakʼ suluk do unire tahena, menkhan jãhãe onkanko bạnukʼko khan enḍekhan apeakʼ suluk do aperege ruạṛ hijukʼa. Ona oṛakʼrege tahenpe ar okako emape onage jompe, ente okoeye kạmikan uni do acʼakʼ kuṛại ńam lek kanae. Ar mitʼ oṛakʼ bạgikate eṭakʼ oṛakʼte alope calakʼa. “Jãhã atotepe bolokʼre ar onḍenko hoṛko ataṅlepere onko okako jom ocope onage jompe. Ar ona atoren ruạkʼ hasokʼkan hoṛko bogekope ar lạiakope, ‘Isorakʼ raj do ape ṭhen sorakana.’ Menkhan jãhã atotepe senlenre ar onḍenko hoṛ bako ataṅpe enḍekhan ona ato reakʼ kulhikore senkate noa katha menpe, ‘ape ato reakʼ jaṅgare laṭkao akawatʼle dhuṛi do ape birudrele koṭa giḍi oṭokakʼ kana. Enrehõ baḍaekakʼpe, Isorakʼ raj do sorakana.’ Ińiń metapekana, bicạr dinre ona ato reakʼ khon Sodom nagraha reakʼge boroṅ ḍher sahaokokʼa. “Hae am do E Khorasin! Hae am do E Bethsaeda! Okako hahaṛa kạmi aben talare hoeakan, ona do Tur ar Sidon nagrahare hoelen khan, enḍekhan ḍher din laharege onko do gõṛẽ kicricʼ horokʼkate ar torocʼre duṛupʼkate kại khon monko ạcurketakoa. Sạrige, bicạr dinre abenakʼ khon Tur ar Sidon reakʼge boroṅ ḍher sahaokʼa. Ar am E Kapharnạhum, am do cetʼ serma hạbicʼ usul ocokʼem meneda? Tishõ baṅa, bickom am do patal puritem giḍi ocokʼa.” Jisu do arhõ celakoe metatʼkoa, “Okoe apeakʼ kathako ańjometʼkan onko do ińakʼ kathageko ańjomeda. Okoe apeko nihạ̃tetʼpe onko do ińgeko nihạ̃tedeń kana. Ar okoe ińko nihạ̃tedeńkan onko do kol akadińicʼgeko nihạ̃tedekana.” Ado onko eae gel cela rạskạte ruạṛ hecʼkateko metadea, “E Probhu, amakʼ ńutumle ńumetʼ khange bhutko hõ aleakʼ kathako ańjometʼ kana.” Jisui metatʼkoa, “Soetan do serma khon bijli leka ńurokʼkaniń ńel akadea. Ńelpe, iń do biń ar kidińko cetanre lebedokʼ reakʼ daṛe, ar aperen bạiri Soetanakʼ sanam lekan daṛe cetanre hõ ektiạriń emakatʼpea. Onate jãhãnakʼtege ohope hạnlena. Menkhan bhutko apeakʼ kathako ańjometʼkante alope rạskạkʼa, bickom sermare apeakʼ ńutum ol caṛhao akan iạte hulạsokʼpe.” Unre Jisu do sonot Jiu reakʼ rạskạte hulạsenteye menkeda, “E Baba, am do serma ar dhạrtiren Probhu kanam. Sarhaoetʼme kạnạń, ente am do noako reaṅ ạkilan ar budanko khonem oko dohoakada menkhan albudạha lekanko ṭhen dom sodor akada. Hẽ Baba, amakʼ sanalekage noa do hoeakana. ‘‘Ińren Baba do ińakʼ tire sanamakʼe jimạ akada. Baba chaḍa okoe hõ bako baḍaea Hopon doe okoe kana, arhõ Hopon chaḍa okoe hõ bako baḍaea Baba doe okoe kana mente. Ona chaḍa Hopon okoe ṭhen Baba sodoreye menetʼkan eken unigeye baḍaea.’’ Uni do celako secʼe ạcurente hape hapeteye metatʼkoa, “Bhạgangea onako mẽtʼ do, one okakope ńeletʼkan ar ona ńel ńametʼkanko hõ. Ińiń metapekana, okakope ńeletʼkan, ona do ạḍi utạr nạbi ar rapajko ńeńelko menletʼre hõ bako ńelletʼa; ar okakope ańjometʼkan, ona ańjom sanaletʼkore hõ bako ańjomlakʼa.” Mitʼṭen dhorom guru do Jisu ṭhene hecʼena. Ar biḍạue lạgitʼe menkeda, “E Guru, iń do cetʼ iń cekalere jaejug jioniń ńam daṛekea? Jisu do uniye metadea, “Moseakʼ ạnre cetʼko ol menakʼa? Onḍe do cetʼem paṛhao akada?” Uni dhorom gurui roṛ ruạṛkeda, “Probhu amren Isor do amakʼ goṭa ontorte, amakʼ goṭa jiwite, amakʼ goṭa daṛete ar amakʼ goṭa monte dulạṛem, ar am aḍe paseren hoṛ apnar leka dulạṛem.” Jisu do uniye metadea, “Am do ṭhikgem roṛ ruạṛ akada. Arem onka idiyetʼkan khan enḍekhan jionem ńama.” Uni dhorom guru do dhorome ṭarhaokʼa mente Jisui kulikedea, “Okoe kanae iń aḍepaseren hoṛ do?” Jisui roṛ ruạṛadea, “Mitʼṭen hoṛ do Jerusalem khon Jerikho nagrahateye calakʼkan tahẽkan jokhecʼ ḍạku talareye paṛaoena. Unre onko do uni hoṛakʼ kicricʼko totʼketʼtaea ar dal admạrwạkateko bạgi oṭowadea. Khan bhạg leka mitʼṭen naeke do ona horteye calakʼkan tahẽkana. Menkhan uni hoṛe ńelkede khan naeke doe sa paromena. Ṭhik onkage ar mitʼṭen Lewi hoṛ hõ ona jaegareye hecʼena ar uni hõ hoṛe ńelkede khane sa paromena. Ona tayom Samariạren mitʼṭen hoṛ hõ ona horteye calakʼkan tahẽkanre uni hoṛ ṭhene hecʼ sorena. Ar uni hoṛ ńelte mãyã hecʼadea. Ar uni ṭhen senkate dal ghaokore sunum ar darkha rasae dulatʼteye bedhaokatʼtaea. Ona tayom acʼren gadhareye ladekedete mitʼṭen sạrạite idikedeteye jotonkedea. Ado dosar hilokʼ bar Dinar oḍokʼkate sạrạiren mạlik emadeteye metadea, ‘nui hoṛ jotonem. Ar noa khon bạ̃ṛti khoroclen khan, iń do ruạṛokʼreń emkatama.’ ” Mucạtʼre Jisui menkeda, “Am do ńitokʼ cetʼem hudiskea? Noko pene hoṛ modre okoeṭakʼ do ḍạku tireye paṛaolen hoṛren aḍepaserene hoyena?” Uni dhorom gurui menkeda, “Uni mãyãwạdiyicʼ hoṛge.” Jisu do uniye metadea, “Enḍekhan am hõ calaokate onkaeme.” Niạ tayom Jisu ar acʼren celakoko dãṛãnkan tahẽkanre mitʼṭecʼ atoteko boloyena. Ar Martha ńutuman mitʼṭen maejiu do rạskạte acʼakʼ oṛakʼte Jisui ataṅ aderkedea. Martharen do Mạriạm ńutuman mitʼṭen boeha kuṛiye tahẽkantaea. Uni do Probhuakʼ jaṅga pheḍre duṛupʼkate kathae ańjomkan tahẽkana. Menkhan Martha do jom ńu tear lạgitʼe udhuṛ dhupuṛ baṛaekan tahẽkana. Onate uni do hecʼkateye menkeda, “E Probhu, boehań kuṛi sapʼsosore bae goṛowạńkan do cetʼ bam moneakʼ kana? Ado ma metaeme, jemon kạmireye goṛowạń.” Unre Jisu do Marthae metadea, “Martha, E Martha, am do ạḍi okocʼ reaṅem dạndikʼ kana, arem uduṛ dhupuṛ baṛae kana, menkhan mitʼṭenge jạruṛakʼ do menakʼa. Ente Mạriạm do bhage bakhrageye bachao akawana. Ona do uni ṭhen khon baṅ rejogokʼa.” Mitʼ jokhecʼ Jisu do mitʼṭen jaegareye koejoṅkan tahẽkana. Ado koejoṅe mucạtʼketʼ khan acʼren mitʼṭen cela doe menkeda, “E Probhu, Johan bạbạptisicʼ cetʼleka acʼren celako koejoṅe cetʼatʼko tahẽkan onkage ale hõ cetʼaleme.” Jisu do onkoe metatʼkoa, “Apepe koejoṅre nonka menpe, ‘E aleren sermaren Baba, amakʼ ńutum sonotokʼma, amakʼ raj hijukʼma; aleakʼ din hilokʼ reakʼ jạruṛ jomakʼ dinạmge emaleme baṛe; ar aleakʼ kạiko ikạkataleme ente okoe ale birudreko kạiyetʼ ale hõ onkole ikạkatako kana. Ar biḍạute alom aderlea.’ ” Ona tayom Jisu do acʼren celakoe metatʼkoa, “Ape modre mitʼ hoṛ tala ńindạ jokhecʼ acʼren gateakʼ oṛakʼte senkateye metae, ‘E gate, pea piṭhạ pańcate den em hataṛạńme. Ente hortenicʼ mitʼṭen gateye hecʼ akawạdińa. Ar uni jom ocoye lạgitʼ cetʼge bạnukʼtińạ.’ Unre oṛakʼ bhitri khon acʼren gateye roṛ ruạṛadea, ‘alom ạṛisińạ. Ente ńitokʼ do duạr sińgea ar ińren gidrạko hõ iń sãote aṭetʼreko giticʼ akana. Ar beretʼkate cetʼge ohoń em daṛelema.’ Sạrigeń metapekana, uni do gate iạte jãhãnakʼ emae bae beretʼrehõ, enhõ ạḍiye nehõrokʼkante uni do beretʼkate tinạkʼ jạruṛae onae emaea. “Onateń metapekana, koepe ado emapea; ńam baṛaepe adope ńama; ṭhopʼ ṭhobpe ado jhicʼapea. Ente mitʼke mitʼ kokoyicʼ do milạuaea; ar ńam baṛayicʼ doe ńama; ar ṭhopʼ ṭhopʼetʼkạnicʼ do jhicʼaea. Ape modre nonkan okoeṭakʼ apat hoṛ menaea, one hopontetʼ piṭhại koelere dhiriye calae, se hakoe koelere hako bodolte bińe calae, se beleye koelere kidińkaṭkome calae? Enḍekhan apepe bạṛicʼgere hõ aperen gidrạko bhage bhage jinisko emakope baḍaekan khan, sermaren Baba do acʼ koeyekanko tinạkʼ artetʼ sonot Jiue emakoa!” Eṭakʼ mitʼ jokhecʼ Jisu do mitʼṭen guṅgạ bhute oḍok giḍiyedekan tahẽkana. Ado bhute oḍok calaoen khan, guṅgạ hoṛ do katha roroṛe ehopʼena. Ar noate hoṛko do ạḍiko hahaṛayena, menkhan adomko doko menkeda, “Bhutkoren sordar Beelsebul hotete uni do bhutkoe oḍok giḍiyetʼkoa.” Ar eṭakʼ hoṛko do Jisu biḍạue lạgitʼ serma khon mitʼṭen cinhạ udukʼako lạgitʼko metadea. Menkhan uni do onkoakʼ mon reakʼ kathae bujhạuketʼtako khane metatʼkoa, “Okaṭakʼ rajosṭi acʼ talare hạṭińokʼ, ona do maraokʼa, ar onate rajosṭi reakʼ gharońjko hõ hạṭińokʼa. Soetan hõ acʼ birudreye teṅgon khan, enḍekhan rajosṭi do cekate ṭikạu tahentaea? Apepe meneda Beelsebul hotete bhutkoń oḍok giḍiyetʼkoa. Ar ińge, Beelsebul hoteteń oḍok giḍiyetʼko khan aperen hoṛko do okoe hotete bhutkoko oḍok giḍiyetʼkoa? Ar ṭhik kathape roṛeda se baṅ ona do aperen hoṛkoge bicạra. Menkhan Isorakʼ daṛete bhutkoń oḍok giḍiyetʼko khan enḍekhan Isorakʼ raj do ape ṭhen seṭer akana. “Mitʼṭen daṛe hoṛ do sanam lekan khanḍa bhanḍawate acʼakʼ oṛakʼe horhotae khan uniakʼ jinisko do nirạige tahentaea. Menkhan uni khon ḍher daṛeanicʼ jãhãe hecʼkate uniye bhagao lekhan enḍekhan okako khanḍa bhanḍareye bhorsakʼkan tahẽkan, uni eṭakʼ hoṛ do onakoe rejea ar luṭakʼ jiniskoe hạṭińtaea. “Jãhãege iń secʼrene baṅkan khan uni do iń birudren kanae. Okoe iń sãote bae halaṅ uni doe chiṭạua. “Bạṛicʼ jiu do mitʼṭen hoṛ khone oḍokʼ calaolenre jirạukʼ lạgitʼ hahaṅkar jaegakoreye ạcur baṛaea. Ar bae ńamle khan uni doe mena, ‘oka oṛakʼ khoniń oḍok hecʼakan ona oṛakʼtege arhõń ruạṛ calakʼa.’ Ar ruạṛ hecʼkate uni do ona oṛakʼ sapha ar sajao akatʼe ńama. Unre uni do senkate acʼ khon artetʼ bạṛicʼ eṭakʼ eae goṭen jiue soṅge darajoṅa ar onḍeye girobasokʼa. Onate uni hoṛakʼ dosa do pạhilakʼ khon artetʼ bạṛicʼ hoyokʼtaea.” Ado Jisu kathae roroṛkan tahẽkanrege gadel hoṛko modren mitʼṭen maejiu do hohoateye menkeda, “Bhạgangeae uni maejiu, one okoe do kukhireye doholetʼme ar toae nunuatʼme tahekan.” Menkhan Jisui menkeda, “Onkogeko bhạgana one okoe do Isorakʼ kathako ańjometʼkan ar ona lekako kạmikan.” Arhõ aema hoṛ do Jisu beṛhaete lad lad jarwakʼko ehopʼena. Unre Jisui menkeda, “Niạ piṛhiren hoṛ doko bạṛicʼgea. Onko do cinhạko khojkana menkhan Jona reakʼ chaḍa eṭakʼ ar cetʼ cinhạ hõ baṅ udukʼakoa. Jona do Ninwi nagraharen hoṛko lạgitʼ cetʼleka cinhại hoelen ṭhik onkage Manwa Hopon hõ noa piṛhirenko lạgitʼ cinhại hoyokʼa. Bicạr dinre dạkhin disạmren rạni doe rakapʼ hijukʼte niạ piṛhiren hoṛko doskoe udukʼakoa, ente Solomon reakʼ ạkilan kathako ańjom lạgitʼ uni do dhạrti reakʼ mitʼ mucạtʼ khone rakapʼ hecʼlena; ar ńelpe, nonḍe do Solomon khon hõ maraṅicʼ mitʼṭen menaea. Menkhan bicạr dinre Ninwi nagraharen hoṛko do beretʼkate niạ piṛhiren hoṛko doskoko udukʼakoa, ente Ninwiren hoṛ do Jonawakʼ porcarte kại khon monko ạcurletʼtakoa; ar ńelpe, nonḍe do Jona khon hõ maraṅicʼ mitʼṭen menaea. “Okoe hõ diuhe jeretʼkate do danaṅre bako dohoea se khạclạkʼte hõ bako hạrupʼ esetʼkakʼa bickom diuhe dohowakʼ cetanregeko dohoea, jemon bhitrite bolokʼko do marsalko ńelńam. Amakʼ mẽtʼ do hoṛmo reakʼ diuhe kana. Ar amakʼ mẽtʼ mońjgetam khan enḍekhan amakʼ goṭa hoṛmo hõ marsalte perecʼgea, menkhan mẽtʼ bạṛicʼge khan amakʼ hoṛmo hõ ńutte perecʼgetama. Amre menakʼ marsal jemon alo ńutokʼ onate sontor akae tahenme. Amakʼ goṭa hoṛmo marsalte perecʼgetam khan ar thoṛa hõ ńut bạnukʼ khan enḍekhan ona do goṭage marsalokʼa, cetʼleka diuhe reakʼ marsal amre paṛaolenre amakʼ hoṛmo marsalokʼtam.” Ado Jisu katha roṛe mucạtʼketʼ khan mitʼṭen Phạrusi hoṛ do jom ocoye lạgitʼe neotakedea. Unre Jisu do bhitrite bolokate jojome duṛupʼena. Dhorom reakʼ niạm lekate Jisu do jom lahare ti ạrubokʼ bae ńelledete uni Phạrusi doe hahaṛayena. Unre Probhu do uniye metadea, “Ape Phạrusiko do thạri ar bạṭi reakʼ bahre secʼgepe saphayetʼ kana, menkhan apeakʼ bhitritetʼ do laloc ar bạṛicʼte perecʼgetapea. E bebujko! Bahre secʼ benaoicʼ do cetʼ bhitri secʼ hõ bae benao akada? Ape do thạri ar bạṭi reakʼ bhitrire oka menakʼ onage boroṅ dan emokʼpe; enḍekhan sanamakʼ saphakʼtapea. “Hae ape Phạrusiko do! Ape do eken podina, tejpat ar mitʼke mitʼ aṛakʼ sakam reakʼ gel hạṭiń reakʼ mitʼ hạṭińge Isorpe emae kana, menkhan dhorom bicạr ar Isorakʼ dulạṛ secʼ do bape moneakʼkana. Onate sedaeakʼko pańjae são sãote tayom reakʼakʼko hõ pańjae lek tapea. “Hae ape Phạrusiko do! Ape do sunạgog reakʼ asol asol duṛupʼakʼkore duṛubokʼ ar hạṭiạ bajarkore johar ocokʼgepe kusiyakʼ kana. Hae ape do! Ente ape do begor cinhạ akatʼ topa lekanko kanape. One hoṛko do begor baḍaete ona cetanteko taṛam paromokʼ kan.” Unre sostor baḍaeko modre mitʼ hoṛ do Jisui metadea, “E Guru, am do noa kathate ale hõm bemanotetʼlea.” Jisui menkeda, “Hae ape sostor baḍaeko do! Ape do hoṛko hamal hamal bojhape ladeako kana, menkhan goṛowako lạgitʼ ape do mitʼṭen kạṭupʼte hõ bape joṭetʼ legayeda. “Hae ape do! Ape do nạbikoakʼ topako nawatepe tol aroyeda, ente aperen hapṛamkoge onko doko gocʼletʼkoa. Onate aperen hapṛamkoren gohako do apege ar onkoakʼ ona kạmiko hõ apegepe aṅgoceda. Ente onko do nạbikoko gocʼletʼkoa ar ape do onkoakʼ topakope benao aroyeda. Onate Isor do acʼakʼ akel lekage noa kathae menakada, ‘iń do onko ṭhen nạbiko ar apostolkoń kolkoa. Onko modre adom doko khũnkoa ar adom doko santaokoa.’ Ar nonkate, dhạrti sirjạu reakʼ ehopʼ khon tinạkʼgan nạbikoko gocʼ ocoakana, onkoakʼ mãyãm reakʼ dạyik do niạ piṛhiren hoṛko cetanrege paṛaokʼa. Hẽ, sạrigeń metapekana, Habel reakʼ mãyãm khon ehopʼkate Sakariạ hạbicʼ, one okoe do pinḍ ar sonot jaegareye gocʼ ocolen uni Sakariạ khũn hạbicʼ sanamkoakʼ mãyãm reakʼ dạyik do niạ piṛhiren hoṛgeko hoyokʼa. “Hae ape sostor baḍaeko do! Ape do akel reakʼ choṛanpe iditora akada. Ape hõ bape bolokʼkana ar bhitrite bolokʼko hõ bape bolo ocoako kana.” Ado ona jaegae bạgi oṭoatʼkan tahẽkanre sostor baḍaeko ar Phạrusiko do uni birudre emanteakʼ roroṛko ehopʼena. Ar ạḍi lekan kuklikote jhạlire paṛaoe lạgitʼ ạt ńam baṛaeko ehopʼena. Ar inạkʼtege hajar hajar hoṛ nonkako jarwayena je, onko do ṭhela ṭhili iạte bhindạṛokʼko ehopʼena. Unre Jisu do pạhilre acʼren celakoe metatʼkoa, “Phạrusikoakʼ khạmi khon sontor akae tahenpe. Ona khạmi do hoyokʼ kana onkoakʼ phạsiạratetʼ. Oko reakʼ sanamakʼ do sodorokʼa ar danaṅre menakʼ jotowakʼ do baḍaeyokʼa. Onate ńutre jãhãnakʼgepe roṛakatʼ ona do marsalreko ańjoma. Ar bhitri oṛakʼre jãhãnakʼge khae khoepe roṛakatʼ ona do sạṛim cetan khon lại saḍekʼa. “E gateko, ińiń metapekana, hoṛmo gogocʼko ar ona tayom bạ̃ṛti jãhãnakʼ baṅ ceka daṛeakʼko do alope botorakoa. Menkhan ińiń udukʼapea okoeṭakʼpe botoraea mente. Ape gocʼpe tayom okoe do norokre khadlepe reakʼ ektiạri menakʼtae unige botoraepe. Hẽ ińiń metapekana, ape do unige botoraepe. “Mõṛẽ goṭen ghaṛwa cẽṛẽ do cetʼ thoṛa damte bako ạkhirińokʼ kana? Enrehõ Isor do onkoren mitʼṭen hõ bae hiṛińetʼkoa. Menkhan apeakʼ ma bohokʼ reakʼ upʼ hõ lekha akantape. Alope botorokʼa, ente aema aema ghaṛwa cẽṛẽko khon hõ ape do bạ̃ṛtipe damangea. “Ińiń metapekana, jãhãege hoṛko samaṅreye aṅgociń Manwa Hopon hõ uni do Isorren goḍetko samaṅreye aṅgocea. Menkhan jãhãege hoṛko samaṅreye baṅeń, uni do Isorren goḍetko samaṅreye baṅ ocokʼa. Manwa Hopon birudre jãhãege jãhãnakʼe roṛ uni do ikạkʼtaea, menkhan sonot Jiu birudre jãhãege opoman reakʼ kathae roṛ uni do baṅ ikạkʼtaea. Sunạgogkore ar disạm cakʼlaoko ar ektiạrianko samaṅreko idilepere cetʼ leka se cetʼpe roṛ ruạṛa ona reaṅ do alope bhabnakʼa. Ente unre cetʼ roroṛ hoyokʼa ona do sonot Jiugeye cetʼapea.” Ado gadel hoṛko modren mitʼ hoṛ do Jisui metadea, “E Guru, ạlińren baba okaṭakʼ sompottiye doho oṭoakatʼ ona do boehań iń sãote hạṭiń lạgitʼ metaeme.” Jisu do uniye metadea, “Henda ho abenakʼ bicạr lạgitʼ se aben talare sompotti hạṭińaben lạgitʼ ektiạri do okoeye emakawạdińạ?” Ona tayom Jisu do gadel hoṛkoe metatʼkoa, “Men cehaokʼpe! Ar sanam lekan lob-laloc khon sontor akae tahenpe, ente manwakoakʼ jionre ḍher sompotti tahen do sanam khon jạruṛteakʼ do baṅkana.” Ado gadel hoṛko cetʼako lạgitʼ mitʼṭen phene lạiatʼkoa: “Mitʼṭen kisạ̃ṛ hoṛakʼ jumire aema phosol upjạuena. Onate uni do mone monteye hudisana, ‘nunạkʼ phosol dohoe reakʼ jaega ma bạnukʼtiń; ńitokʼ do cetʼ iń cekaea? Adoe menkeda ińakʼ murạikoń rạpuda, ar lạṭu lạṭu murạikoń benaoa ar onare ińakʼ sanam phosolko ar dhonkoń dohoetińạ. Ar ińakʼ jiwiń metawakʼa, E jiwi ḍher bochor lạgitʼ baeakan acel pacel dhon menakʼtama. Onate ma jirạukʼte, jomme, ńũiyme ar hesecʼ sekrecʼjokʼte din ṭalaome.’ Menkhan Isor do uniye metadea, ‘E bebuj, teheń ńindạge am dom gujukʼa. Enḍekhan onem doho jarwa akatʼ dhon do okoeakʼ hoyokʼa?’ ” Ado mucạtʼre Jisui menkeda, “Okoe hoṛ apnar lạgitʼ dhone jarwae ar Isor samaṅre kisạ̃ṛicʼe baṅkan, enḍekhan uniakʼ dosa hõ onkage hoyokʼtaea.” Ona tayom Jisu do acʼren celakoe metatʼkoa, “Noa iạtegeń metapekana, jiwi lạgitʼ do alope dandokʼa cetʼpe joma; ar hoṛmo lạgitʼ hõ alope dạndikʼa cetʼpe bandea mente. Ente jiwi do eken jom ar ńũi lạgitʼ do baṅkana, ar hoṛmo hõ eken kicricʼ khạnḍwạkʼ lạgitʼ do baṅa. Kạhũko beṅgetʼakope, onko do itạ hõ bako era ar phosol hõ bako ira. Ar kuṭhi se murại hõ bạnukʼtakoa, enrehõ Isor do onkoe jom ocoyetʼkoa. Menkhan ape do noko cẽṛẽko khon hõ artetʼ bạ̃ṛtipe damangea. Ape modre okoe dạndikate acʼakʼ jiwi mitʼ ghonṭa gan bạ̃ṛtiye doho daṛeataea? Ar niạ huḍiń utạrakʼ kạmi hõ bape daṛeakʼ khan enḍekhan eṭakʼakʼko lạgitʼ do cedakʼpe dandokʼ kana? “Bahako secʼ beṅgedpe, cetʼlekate harakʼ kana mente. Onko do kạmi hõ bako kạmiya ar sutạm hõ bako takoea ar bako tińa. Menkhan ińiń metapekana, Solomon raj do nunạkʼ ṭhonokreye tahẽkanre hõ onako reakʼ mitʼṭecʼ leka hõ bae sajao daṛeada. Ṭạnḍire okaṭakʼ ghãs teheń menakʼ ar gapa culhạre khadle ocokʼrehõ Isor do ona nonkae sajaoetʼ khan E nase pạtiạukʼko, uni do tinạkʼ artetʼge bae sajaopea! Cetʼpe joma ar cetʼpe ńũiya mente hudiskate alope uduṛ dhupuṛ baṛaea. Ente dhạrtiren eṭakʼ jạtkoge onako reaṅ doko ńam baṛakana; ona chaḍa aperen Baba doe baḍaegea, apeakʼ do noako jạruṛ menakʼtapea mente. Ona khon boroṅ Isorakʼ rajko reakʼ dạndikʼpe, enḍekhan noako hõpe ńama. “Alope botorokʼa, E huḍiń palrenko, ente aperen Baba do apege acʼakʼ rajosṭi emapeye menjoṅkana. Ape do menakʼ tapeakʼko ạkhrińkate dan emokʼpe. Ar oka baṅ marekʼ ona ṭaka reakʼ thạilạkʼ tear joṅpe, metakʼme okaṭakʼ dhon jaejug hạbicʼ ṭikạu tahen onage sermare jarwaepe. Onḍe do kombṛo hõ bako hijukʼa ar tejoko hõ bako bạṛija. Ente okare apeakʼ dhon menakʼ onḍege apeakʼ mon hõ tahena. “Ape do ḍanḍare kicricʼ paṭhe akatʼ ar diuhe do jol akae tahentape ma. Ar nonkan hoṛko leka hoyokʼpe okoe do akoren kisạ̃ṛ lạgitʼ koyokʼ horre menakʼko, jemon uni do bapla bhoj khon ruạr hecʼkate duạre ṭhopʼ ṭhopʼlere duạrko jhicʼae. Bhạgangeako onko guti do, one okoe do jagwar tahene hecʼ ńamko. Sạrigeń metapekana, uni kisạ̃ṛ do ḍanḍare kicricʼe paṭhekʼte onkoe duṛupʼ ocokoa ar hecʼkate acʼgeye jom ocokoa. Bhạgangeako onko gutiko do, one uni do tala ńindạ se aṅgakʼ jokhecʼ hecʼkate jagwar tahene ńamko. Oṛakʼ kisạ̃ṛe baḍae khan oka ghuṛi kombṛoe hijukʼa, enḍekhan uni do jagware tahẽkokʼa ar acʼakʼ oṛakʼre kombṛo ohoe bolo ocolea. Onkage ape hõ sapṛao akae tahenpe, ente bape hudisakatʼ ghuṛirege Manwa Hopon doe hijukʼa.” Unre Patrase menkeda, “Henda Probhu, noa cecetʼakʼ do eken ale lạgitʼ se sanamko lạgitʼem emokʼkana?” Probhui menkeda, “Uni pạtiạricʼ ar budanicʼ kạmiyạ hoṛ doe okoe kana, one uniren kisạ̃ṛtetʼ do gutiko cetanre sordare dohoyete ṭhik oktere ser sidhạ emako lạgitʼ bhare emaekan? Bhạgangeae uni guti, one okoe do kisạ̃ṛtae pạtiạu salakʼ kạmireye hecʼńame. Sạrigeń metapekana, uni kisạ̃ṛ do acʼakʼ sanam menakʼtaeakʼko cetanre sordare dohokaea. Menkhan uni sordar acʼakʼ monreye menle khan, ‘ińren kisạ̃ṛ do hijukʼe bilomeda.’ Ar unre uni do sãoten guti ar kạ̃ṛmĩkoe dal baṛakote jom-ńũkate bulokʼe ehobokʼ. Enḍekhan okaṭakʼ din ar okaṭakʼ ghuṛi reakʼ katha bae hudisetʼkan, ona din ar ona ghuṛirege acʼren kisạ̃ṛ doe hijukʼa. Are makʼ paṛagea ar bepạtiạrko tulucʼ jaegae ṭhikaea. “Ar okoeṭakʼ guti do acʼren kisạ̃ṛakʼ sana baḍaekatehõ sapṛao bae tahen se kisạ̃ṛ okae khojkan ona bae onkae enḍekhan uni do bebạṛicʼe dal ocokʼa. Menkhan okoe begor baḍaete sạjại ńam reakʼe kạmi akatʼ uni do thoṛageye sạjại ocokʼa. Ar ḍhere em ocoakanicʼ ṭhen khon do ḍhergeko hataoa ar ḍhere jimạ ocoakan hoṛ hõ bạ̃ṛtiko koeyea. “Iń do dhạrtite seṅgel lagaoiń hecʼakana; ar ona do laharege jollen khan bhage hoekokʼa! Iń do mitʼṭen bạptisma ataṅ hoyokʼtińạ ar ona ạuri purạukʼ hạbicʼ ińakʼ duk do baṅ cabakʼtińạ. Ape do cetʼpe meneda, dhạrtire suluk emokʼiń hecʼakana? Onka do baṅa. Iń do suluk emokʼ do bạń hecʼakana, bickom manwa birudre manwa teṅgoye lạgitʼgeń hecʼakana. Ńit khon mitʼ oṛakʼren do mõṛẽ ṭhenko hạṭińokʼa, ar pe hoṛ do bar hoṛ birudre ar bar hoṛ do pe hoṛ birudreko teṅgona. Onko do nonka lekako hạṭińokʼa, Apat do hopon birudre ar hopon do apat birudre, eṅgat do hoponera birudre ar hoponera do eṅgat birudre, hanhartetʼ do kimintetʼ birudre ar kimintetʼ do hanhartetʼ birudre.” Ona tayom Jisu do gadel hoṛkoe metatʼkoa, ‘‘Pạchimre rimil rakabokʼpe ńelle khangepe mena, ‘hoe dakʼ do darae kana,’ ar onkage hoyokʼ kana. Ar dạkhin secʼ khone hoele khan dope mena, ‘jharla jhạrliye setoṅa,’ ar onkage hoyokʼ kana. E phạsiạrako, ot ar serma reakʼ cinhạ dope baḍae orometʼ kangea, menkhan ńitokʼ reakʼ okteko do cekate bape oromeda? “Ar okaṭakʼ ṭhikakʼkan ona do cedakʼ bape bicạreda? Amren bạdi tulucʼ Hạkim ṭhenem calakʼre horrege phanḍao lạgitʼ kurumuṭuime. Ar baṅkhan uni do Hạkim ṭhene or ghac ghacao idimea. Unre Hạkim do daroga ṭhene jimạkama ar daroga do hajotreye bhoraokama. Ińiń metamkana, kạuḍi kạuḍi ạurim hala cabae hạbicʼ hajot khon ohogem oḍok daṛelena.” Ado ona jokhecʼ onḍeko jarwa akan tahẽkan adom hoṛ do Jisu Gạlil Prodes reaṅko lạiadea. Onkoko menkeda, Romren disạm cakʼlaoicʼ Pilạt do Gạlilrenkoe makʼketʼkote dãṛẽ samaṅ akatʼ janwarakʼ mãyãm sãote onkoakʼ mãyãm hõe milạuketʼtakoa. Noa katha ańjomkate Jisui menkeda, “Ape do cetʼpe bujhạueda, onko do Gạlilrenko khon bạ̃ṛti kạiyan hoṛko tahẽkante onkako saset ocoyena? Ińiń metapekana, ona do baṅ, ar onkage ape hõ kại khon mon bape ạcurle khan jotokogepe nosṭo ocokʼa. Siloam reakʼ usul oṛakʼ bhindạṛlenre okoe gel irạl hoṛko gocʼlen, apeakʼ hudisre onko do cetʼ Jerusalemreko khon hõ bạ̃ṛti dusiyan hoṛko tahẽkana? Ińiń metapekana, ona do baṅ, menkhan kại khon mon bape ạcurle khan ape hõ sanamkogepe marao utạrokʼa.” Ona tayom Jisu do cetʼako lạgitʼ noa kathae metatʼkoa: “Mitʼ hoṛakʼ darkha bagwanre mitʼṭen loa dare rohoe tahẽkana. Mitʼ din uni hoṛ do hecʼkate joe ńam baṛakeda menkhan bae ńamleda. Unre mạliye metadea, ‘ńelme, iń do pe bochor khon noa darere joń ńam baṛakana menkhan cetʼge bạń ńameda. Onate loa dare do makʼ giḍikakʼme. Cedakʼ je noa do ạuṛiakʼ jumiye nosṭo ocoyeda.’ Mạliye roṛ ruạṛkeda, ‘E baba niạ bochor hõ tahẽ ocoakʼme. Iń do beṛhaeteń la ghạḍluga ar guricʼkoń emakʼa. Ar ona tayom jo sapʼlen khan ma bogege ar baṅ khan dom makʼ giḍikakʼge.’ ” Ado mitʼ jirạukʼ mãhãre Jisu do mitʼṭen sunạgogreye cetʼako kan tahẽkana. Onḍe do nonkan mitʼṭen maejiue tahẽkana, one okoe do mitʼṭen bạṛicʼ jiue sapʼakade tahẽkante gel irạl bochor khon ruạteye jạbun akan tahẽkan. Ar kubjạgeye tahẽkante bae sojhe daṛeakʼkan tahẽkana. Jisu do uniye ńelkedea ar acʼ ṭhen hoho sorkateye metadea, “E go, amakʼ ruạ khon dom bogeyena.” Ar noa katha menkateye capokedea ar inạtege uni doe sojheyente Isor gunmanao joharaye ehopʼena. Jisu do jirạukʼ mãhãreye bogekedete sunạgogren mukhiyạ do edreyente hoṛkoe metatʼkoa, “Kạmi lạgitʼ turui din ma menakʼge. Onate jirạukʼ mãhãre baṅ hecʼkate ona turui din bhitrire hecʼkate boge ocokʼpe.” Unre Probhu do uni mukhiyại metadea, “E phạsiạrako! Jirạukʼ mãhãre ape do cetʼ aperen gadha se ḍaṅgrako goṛa khon raṛakate dakʼ ńũ bape idiyetʼkoa? Menkhan Abraham bõsren nui maejiu do gel irạl bochor hạbicʼ Soetane tol akade tahẽkana, ar jirạukʼ mãhãre ona tonol khone raṛa ocokʼ do cetʼ baṅ ganokʼtaea?” Noa kathae roṛketʼ khan uni birudreko tahẽkan sanamko doko lajaoena. Menkhan eṭakʼ hoṛko do uniakʼ maraṅ kạmi ńelte ạḍiko rạskạyena. Inạ tayom Jisui menkeda, “Isorakʼ raj do oka lekana? Ar cetʼ tulucʼ iń jurikea? Isorakʼ raj do mitʼṭen tuṛi jaṅ lekanakʼ kana, one oka do mitʼṭen hoṛ idikate acʼakʼ goḍareye erketʼ. Tayomte ona do harayente mitʼṭen dare leka hoyena. Ar cẽṛẽko hõ hecʼkate ona reakʼ ḍạrkore tukạko benao joṅana.” Jisu do arhõe menkeda, “Isorakʼ raj do cetʼ tulucʼ iń juria? Isorakʼ raj do khạmi lekana. Mitʼṭen maejiu do ona idikate gel irạl keji holoṅ sãoteye sipi mesalkeda, onate joto holoṅ do phulạu rakapʼena.” Ado ato ato ar nagrahakore dãṛã dãṛãte lại cetʼakote Jisu do Jerusalem secʼe calao idiyena. Ar mitʼṭen hoṛ do uniye kulikedea, “Henda Probhu, kại khon bańcao do cetʼ eken thoṛa hoṛgeko ńama? Unre Jisu do gadel hoṛkoe metatʼkoa, “Sakṛa duạrte bolokʼ lạgitʼ lạgiạ paṛaokʼpe. Ińiń metapekana, ḍher hoṛge bolokʼ lạgitʼko kurumuṭuya, menkhan bako bolo daṛeakʼa. Unre oṛakʼren kisạ̃ṛ beretʼkate silpińe siń esetʼlere ape do bahrere teṅgokate silpiń ṭhopʼ ṭhopʼkatepe mena, ‘E Probhu, jhicʼ aleme.’ Menkhan uni doe roṛ ruạṛ apea, ‘bạń baḍaeyetʼpea okaren kan coṅpe.’ Unrepe mena, ‘ale do am sãotele jom ńũleda, ar aleakʼ kulhi korem cetʼalekan tahẽkana.’ Unreye metapea, ‘oka khon coṅpe hecʼakan, iń do bạń baḍae akatʼpea. E phạsiạrako, men iń khon pharakokʼpe.’ “Tinre Abraham, Isạhak, Jakob ar nạbiko do Isorakʼ rajosṭirepe ńelkoa ar ape do bahrerepe giḍi ocoakana, unre ape dope rakʼ homora ar hasotepe togocʼ ḍaṭaea. Unre purub, pạchim, utạr ar dạkhin khon hoṛko hijukʼte Isorakʼ rajre jojomko duṛupʼa. Okoe ńitokʼ tayomre menakʼko onko do lahakʼa, ar lahare okoe menakʼko onko do tayomokʼa.” Ona ghuṛire tin uḍicʼ Phạrusiko coṅ Jisu ṭhen hecʼenteko menkeda, “Am do nonḍe khon senjoṅme, ente Herod do gocʼme lạgitʼe menjoṅ kana.” Jisu do onkoe metatʼkoa, “Senkate uni khikṛĩ metaepe, ‘iń do teheń ar gapa bhutkoń oḍok giḍikoa ar rugikoń bogekoa ar tesar hilokʼ do kạmiń mucạda. Enhõ teheń, gapa ar meaṅ do dãṛãntege hoyokʼtińạ, ente Jerusalem bahrere jãhãe nạbiye gujukʼ do baṅ hoedaṛeakʼa.’ “E Jerusalem, E Jerusalem! Am do nạbikom gocʼetʼkoa ar am ṭhen kol ocokʼkanko do dhiritem tińetʼkoa. Sim eṅga cetʼleka acʼren hoponko phạ̃kṛạ̃kʼ latareye guṅgutʼko onkage iń hõ amren hoṛko guṅgutʼkoń menleda, menkhan ape do bape rebenlena. Ńelpe, apeakʼ oṛakʼ do ape samaṅre khạlige tahena. Ińiń metapekana, tin hạbicʼ ạuripe men, ‘bhorangeae Probhu ńutumte daraekanicʼ do,’ un hạbicʼ iń do ar bape ńelńameńa.” Mitʼ jirạukʼ mãhãre Jisu do Phạrusikoren mitʼṭen mukhiyạ hoṛakʼ oṛakʼte jom lạgitʼe calaoena. Unre Phạrusiko do Jisu mońjteko tạnkhiyede tahẽkana. Jisu samaṅre mitʼṭen rugiye tahẽkana, okoe do goṭa hoṛmo udri rog tahẽkanteye phulạu akan tahẽkana. Jisu do sostor baḍaeko ar Phạrusikoe kuliketʼkoa, “Moseakʼ ạn lekate jirạukʼ mãhãre jãhãe bogeko do cetʼ ganokʼgea?” Sostor baḍaeko do thir hapegeko tahẽyena. Unre Jisu do uni hoṛe joṭetʼkedea ar bogekedeteye bidạkadea. Ona tayom sostor baḍaekoe metatʼkoa, “Jirạukʼ mãhãre ape modre jãhãeren gidrạ se ḍaṅgra kũńreye ńurlenre hare phare cetʼ bape rakapʼ godea?” Menkhan sostor baḍaeko do noa katha reakʼ bako roṛ ruạṛ daṛeada. Ado neota akan hoṛko laha duṛupʼakʼ jaegako bachao joṅkane ńelketʼko khan, Jisu do cetʼako lạgitʼ noa kathae metatʼkoa, “Jãhãe bapla bhojreye neotalemre laha duṛupʼakʼre do alom duṛupʼa, ente pasere pase uni do am khon hõ manotan hoṛe neota akade. Enḍekhan okoeye neota akatʼben uni do hecʼkateye metama, ‘noa jaega do uni aṛakʼae me.’ Unre lajaorem paṛaokʼte tayom utạrakʼ jaegarem duṛupʼa. Onate amem neota ocolenre senkate tayomakʼ jaegare duṛupʼme. Enḍekhan neotayicʼ do hecʼkateye metama ‘E gate, dela lahare duṛupʼme.’ Unre eṭakʼ neota akanko samaṅre am do manotem ńama. Okoe acʼte usulokʼe menetʼkan uni doe copotʼ ocokʼa, ar okoe acʼteye copodokʼ uni doe usul ocokʼa.” Ado neota akadeyicʼ hõe metadea, “Am do jom ńũi reakʼem ehopʼlere, se bhojem tearlere amren gateko se boehako se peṛa pạrbhạko se aḍe paseren kisạ̃ṛ hoṛko do alom neotakoa. Arem onka lekhan onko hõ amko neotamete amakʼ neotako hala ruạṛkatama. Menkhan bhojem tearlere am do reṅgecʼko, ṭhunṭako, leḍhako, ar kãṛãko neotakom. Enḍekhan Isorakʼ bhorem ńama, ente onko do bako neota hala ruạṛ daṛeama. Ar dhoromko gocʼko khonko jiwetʼ beretʼ ocokʼre am do noa reakʼ halawama.” Ado jojom duṛupʼ akanko modren mitʼ hoṛ do noa katha ańjomkate Jisui metadea, “Okoe Isorakʼ rajre jojome duṛubokʼ uni doe bhạgangea.” Jisui menkeda, “Mitʼ hoṛ do maraṅ okocʼe bhojkeda ar aema hoṛe neotaketʼkoa. Ado jojom okte hoyen khan uni do acʼren golame kolkedete neota akan hoṛko ṭhene roṛgotʼkada, ‘dela hijukʼpe,’ ńitokʼ do jotowakʼ sạt akana. Menkhan onko sanamkoge mimitʼ mimitʼte ikạ ocokʼko ehopʼena. Pạhilicʼ do uni golame metadea, ‘iń do thoṛa jumiń kiriń akada, calaokate ńeńel hoyokʼtińạ. Onate ma ikạ kạńme.’ Ar mitʼ hoṛ doe menkeda, ‘iń do mõṛẽ ãrãṛ ḍaṅgrań kiriń akatʼkoa, onko biḍạuko lạgitʼ iń calakʼkana. Onate dayakate ikạ kạńme.’ Eṭakʼ ar mitʼ hoṛ doe menkeda, ‘bạhu akanwạnạń, onate bạń sen daṛeakʼ kana.’ “Ado uni golam do ruạṛ senkate acʼren kisạ̃ṛ jotowakʼe lạiadea. Onate oṛakʼ kisạ̃ṛ do ạḍiye raṅgaoena ar acʼren golame metadea, ‘usạrate nagraha reakʼ kulhiko ar kucitʼ horkote sen hodokʼme ar reṅgecʼko, ṭhunṭạko, kãṛãko ar leḍhako nonḍe ạgukom.’ Are onkaketʼ khan uni golam doe menkeda, ‘E Probhu, jotowakʼ do amakʼ hukum lekage hoeakana, menkhan jaega do ńitokʼ hõ menakʼgea.’ Onate kisạ̃ṛ do golame metadea, ‘am do nagraha bahre soṛokkote oḍok calakʼme ar hijukʼ lạgitʼ hoṛko jormoṭkom, jemon oṛakʼ do perejokʼtiń. Ińiń metapekana, okoeko neota ocolen onko okoe hõ ińakʼ noa bhoj do bako cakha ńama.’ ” Ar ạḍi gadel hoṛ do Jisu sãoteko calakʼkan tahẽkana. Jisu do onko secʼ ạcurenteye metatʼkoa, okoe iń ṭhene hijukʼ, uni do acʼren eṅgat-apat ar bạhu ar gidrạko ar boehako ar miserako se acʼakʼ jiwi hõ iń khon bạ̃ṛtiye dulạṛ, enḍekhan ińren cela do ohoe hoedaṛelena. Okoe acʼakʼ krus gokʼkate iń tayomte bae hijukʼ, uni hõ ińren cela ohoe hoedaṛelena. “Ape modre jãhãege mitʼṭen usul oṛakʼ benaoe menjoṅ khan uni do lahare duṛupʼkate khoroce hisạb maṛaṅa. Uni doe ńela, ona sạt lạgitʼ ṭaka menakʼtaea se baṅa. Ar baṅkhan rehetʼ bạisạu tayom ona oṛakʼ bae purạu daṛeakʼ khan okoe onako ńel onko doko landa dhutʼaea. Onkoko mena, ‘uni hoṛ do benaoe ehopʼletʼgea, menkhan bae purạu daṛeada.’ ‘‘Mitʼṭen raj do eṭakʼ raj birudre lạṛhạiye calakʼre pạhilre duṛupʼkateye hudis maṛaṅokʼa, ‘bargel hajar sipạhiwante okoe iń birudre lạṛhạiye hijukʼkan, uni do eken gel hajar sipạhikoteń daram daṛekea se baṅa?’ Ar bae daṛeakʼ khan eṭagicʼ raj sạṅgińreye tahenrege uni do mukhiyạ hoṛko kolkate sulukokʼ lạgitʼe kulijoṅa.” Ado mucạtʼre Jisui menkeda, “Onkage apeko modre jãhãe begor hudis cintạte acʼakʼ jotowakʼko bae bạgi oṭowakʼ khan, uni do ińren cela ohogeye hoe daṛelena. ‘‘Buluṅ ma bhagege, menkhan sabakʼlen khan cekate ona do rahamokʼa? Unre ona do hasa lạgitʼ hõ lek baṅ hoyokʼa, ar guricʼ mande lạgitʼ hõ baṅ; ar hoṛko do bahrete onako oḍok giḍikakʼa. Ańjom lạgitʼ lutur menakʼtae hoṛ doe ańjomma.” Unre aema mạsul uṭhạuko ar bạṛicʼ hoṛko hõ Jisuakʼ katha ańjomtae lạgitʼ uni ṭhenko hecʼ sorena. Onate Phạrusiko ar sostor baḍaeko do noa menkate karacʼ kurujokʼko ehopʼena, “Nui hoṛ do kại hoṛko sãoteye gatekʼkana are jom ńũyeda.” Unre Jisu do cetʼako lạgitʼ noa kathae lạiatʼkoa: “Ape modre, mitʼ hoṛren mitʼ sae bhiḍiko tahentae. Ar onko modre mitʼṭene atʼlen khan, uni do cetʼ onko aregel are goṭen ṭạnḍire bạgi oṭoakote atʼakanicʼ bae sendra baṛaea ạuriye ńame hạbicʼ? Are sendra ńamle khan uni do rạskạte tarenreye ladeyea. Ar oṛakʼte calaokate acʼren gateko ar aḍepaseren hoṛko hohoakoteye metakoa, ‘iń sãote rạskạkʼpe, ente atʼlen bhiḍi doń ńam ruạṛakadea.’ Ińiń metapekana, onkage kại khon mon ạcur bako moneakʼkan aregel are dhorom hoṛko khon bickom mitʼṭen kại hoṛ mone ạcuretʼkante sermare arhõ bạ̃ṛti rạskạ hoyokʼa. “Mitʼṭen maejiu do gel goṭecʼ rupạ ṭaka menakʼtaea. Ar onako modre mitʼ goṭene atʼlere uni do cetʼ diuhe jeretʼkate jokʼ jokʼte bae sendraea ạuriye ńam hạbicʼ? Are ńamle khan acʼren gateko ar aḍepaseren hoṛko hohoakoteye metakoa, ‘iń sãote rạskạkʼpe, ente oneń atʼletʼ siki doń ńam ruạṛakada.’ Ińiń metapekana, mitʼṭen kại hoṛ mone ạcurle khan Isorren goḍetko talare hõ onkage rạskạ hoyokʼa.” Ona tayom Jisui menkeda, “Mitʼṭen hoṛren barea hoponkin tahẽkana. Uniren huḍińicʼ hopon do apattetʼe metadea, ‘E baba, ińakʼ bhag reakʼ somppoti emkạtińme.’ Onate uni hoṛ do acʼren banar hopontetʼe hạṭińatʼkinạ. Thoṛa din tayom huḍińicʼ hopon do acʼakʼ sompotti ạkhrińkate ṭaka-poesawante sạṅgiń disạmteye calaoena. Ar onḍe rij roṅre tahẽkate uni do acʼakʼ sanam ṭaka-poesae ublạ ḍublạ cabakeda. Ado sanam ṭaka-poesae cabaketʼ khan ona disạm reakʼ sanam jaegare maraṅ akal hoyena. Onate uni do reṅgecʼreye paṛaoena. Unre uni do ona disạmren mitʼṭen kisạ̃ṛ ṭhen senkate kạmiye khojkeda. Uni hoṛ do acʼren sukri gupiko lạgitʼ maṭteye kolkedea. Ar sukriko oka coklakʼ baklakʼko jometʼ tahẽkan onakote uni hõ jom bikʼe menetʼ tahẽkana, menkhan okoege ona hõ bako emaekan tahẽkana. “Ado mitʼ din cetao hecʼadeteye menkeda, ‘ạpuńren unạkʼ unạkʼ gutiko do sareṛokʼ leka jomakʼko ńameda, menkhan iń do nonḍe reṅgecʼteń gujukʼ kana. Iń do beretʼkate ạpuń ṭheniń calakʼa ariń metaea, E baba, Isor ar am samaṅreń kại akada. Amren hopon ńumugokʼ lek geń baṅkana. Onate amren gutiko modren mitʼ hoṛ mente dohokạńme.’ “Noa menkate uni doe beretʼente acʼ apat ṭhene calaoena. Ado sạṅgińreye tahẽkanrege uniren apattetʼ doe ńel ńamkedea ar ạḍi mãyã hecʼadea. Ar ńir senkate uniye hạṛupʼkedea are cokʼ cokʼadea. Unre hopon doe menkeda, ‘E baba, iń do Isor ar am samaṅreń kại akada. Amren hopon ńumogokʼ lek geń baṅkana.’ “Menkhan apattetʼ do acʼren gutikoe metatʼkoa, ‘den usạrate mońj utạrakʼ kicricʼ ạguipe ar uni horokʼaepe. Tire mundạm ar jaṅgare panahi horokʼaepe, ar lodgopʼ ḍaṅgra ạguyete jabeyepe. Ar dela, jom ńũ katebon hesecʼ sekrejokʼma, ente nui ińren hopon do gocʼgeye tahẽkana menkhan arhõe jiwetʼ beretʼ akana; atʼgeye tahẽkana are ńam ruạṛ akana.’ Ona tayom onko do hesecʼ sekrejokʼko ehopʼena. “Ona oktere maraṅicʼ hopon do maṭreye tahẽkana. Ado oṛakʼ sore hecʼen khan enecʼ sereń ar bajnako reakʼ saḍeye ańjomkeda. Unre mitʼṭen guti hohoadeteye kulikedea, ‘noako do cetʼ hoyokʼ kana?’ “Guti doe roṛ ruạṛadea, ‘bokome hecʼakana. Ar ạpum do napaegeye ńam ruạṛkedete lodgopʼ ḍaṅgrae jabe akadea.’ “Unre maraṅicʼ hopon doe raṅgaoente bhitrite bolokʼ bae rebenlena. Onate apattetʼ doe oḍok hecʼena ar bhitrite bolokʼ lạgitʼe nehõradea. Uni do apattetʼe metadea, ‘ńelme, iń do nunạkʼ bochor khoniń joton ạguyetʼmea; menkhan mitʼ dhao hõ amakʼ hukum do bạń taṛam parom akada. Enhõ ińren gateko sãote hesecʼ sekrejokʼ lạgitʼ mitʼṭen gan merom hopon tanakʼ hõ bam emakawạdińa. Menkhan amren nui hopon do, kusmbiko tulucʼ amakʼ ṭaka-poesae ublạ ḍubla cabakeda, are hecʼenre uni do lodgopʼ ḍạṅgram gocʼadea.’ “Apattetʼ do uniye metadea, ‘E beṭa, am do jaoge iń soṅgere menama. Ar ińakʼ oka menakʼ ona joto do amakʼkangea. Menkhan hesecʼ sekrejokʼ ar rạskạkʼ do lek kan tabona, ente amren nui boeha do gocʼgeye tahẽkana arhõe jiwetʼ akana; atʼgeye tahẽkana arhõe ńam ruạṛ akana.’ ” Jisu do acʼren celakoe metatʼkoa, “Mitʼṭen kisạ̃ṛ hoṛren maraṅ lonbonicʼ do noa menteko dusikedea je, uni do acʼren kisạ̃ṛakʼ dhonkoe nosṭoyeda. Unre kisạ̃ṛ do uni hoṛ hohoadeteye kulikedea, ‘am birudre cetʼkoń ańjomeda? Onate kạmi reakʼ hisạb imạńme, ente maraṅ lonbonicʼ do ar bam tahẽdaṛeakʼa.’ “Unre guti do mone moneteye menkeda, ‘ńitokʼ do cetʼ iń cekaea? Ińren kisạ̃ṛ ma kạmi khone ocokʼ idiń. Ar hasa makʼ reakʼ daṛe hõ bạnukʼtiń ar kokoe mań lajaokʼkan. Jaehok, kạmi khoniń jirạu ocolenre hoṛko jemon akoakʼ oṛakʼreko ataṅiń onate cetʼ cekae lagaoạńạ ona doń baḍaegea.’ “Ar noa menkante uni do acʼren kisạ̃ṛ ṭhen dharaoletʼ tahẽkankoe hohoatʼkoa. Ona tayom pạhilicʼe kulikedea, ‘ińren kisạ̃ṛ ṭhen tinạkʼem dharao akada?’ Uni doe menkeda, ‘bar hajar ponsae liṭar sunum.’ Uniye metadea, ‘oka kagocre amakʼ dharaoakʼ ol menakʼ ona ạguime ar usạra duṛupʼkate ol hodme mitʼ hajar bar sae liṭar.’ Ona tayom eṭagicʼe metadea, ‘am do tinạkʼem dharao akada?’ Uni doe menkeda, ‘gel irạl ṭon guhum.’ Adoe metadea, ‘amakʼ kagocre gel pon tala ṭon olme.’ Ado uni gutiye bedhoromgere hõ bud salakʼe kạmiketʼte kisạ̃ṛ do uniye sarhaokedea. Noate bujhạukʼ kana, noa puriren hoponko do ako bidạlrenko talare marsalren hoponko khon hõ bạ̃ṛtiko budangea. Ińiń metapekana, bedhorom dhonte gate benao joṅpe, jemon ona dhon cabalenre jaejug tahen reakʼ jaegareko ataṅ darampe. Thoṛa utạrakʼkore pạtiạricʼ do ḍher okocʼakʼkore hõe pạtiạrgea. Okoe thoṛa utạrakʼkore pạtiạricʼe baṅkan, uni do ḍher okocʼakʼkore hõ ohogeye pạtiạu ocolena. Noa piṛhi reakʼ dhonko cetanre bape pạtiạu ocokʼkan khan enḍekhan sạri dhon do bhorsakate okoeye jimạwapea? Eṭakʼ hoṛkoakʼre pạtiạr bape tahen khan, ape apnarakʼ do okoe baṅe emape? “Okoe hõ barea kisạ̃ṛ ṭhen guti ohoe khaṭao daṛelena, ente mitʼ hoṛ doe kurudaea ar eṭakʼicʼ doe dulạṛea, se mitʼ hoṛ doe manotea ar eṭakʼicʼ doe neṅghaoea. Isor ar dhon ṭhen guti do ohogepe khaṭao daṛelena.” Ado noako katha ańjomkate Phạrusiko do Jisu siṛogaeko ehopʼena, ente onko do ṭaka-poesage bạ̃ṛtiko dulạṛetʼ tahẽkana. Unre Jisui metatʼkoa, “Ape do hoṛko samaṅre dhorompe udugokʼ kana, menkhan Isor do apeakʼ mon reakʼe baḍaegea. Ente manwa ṭhen okaṭakʼ manotakʼkan, Isor samaṅre ona do hirkhạwakʼ kana. “Moseakʼ ạn ar nạbikoakʼ olakʼ do Johan hạbicʼge. Ona tayom khon Isorakʼ raj reakʼ bhage sombat do porcarokʼ kana ar sanamkoge ona rajre jormoṭko bolokʼ kana. Menkhan ạn reakʼ mitʼ ṭuḍạkʼ meṭaokʼ khon bickom serma ar ot cabakʼge algawa. “Okoe acʼren bạhu bạgikate eṭakʼicʼe baplaye, uni doe laṭghaṭeda. Ar jãwãe khon bapag akan maejiu okoeye baplaye, uni hõe laṭghaṭeda. “Mitʼṭen kisạ̃ṛ hoṛe tahẽkana. Uni do beguni roṅakʼ ar eṭakʼ damanakʼ kicricʼkoe horokʼ bandeyetʼ tahẽkana. Ar jaoge hesecʼ sekrejokʼ tulucʼe jom-ńũiyetʼ tahẽkana. Ar uni kisạ̃ṛ hoṛakʼ duạr ṭhen Lasar ńutuman mitʼṭen kokoe hoṛ do jaoge ạgukateye doho ocokʼkan tahẽkana. Uni do goṭa hoṛmo ghaote perecʼ tahẽkantaea. Ar kisạ̃ṛ hoṛakʼ mej khon hiricʼ pạsir okako jomakʼ ńurokʼkan tahẽkan onakote lacʼ perejtaye menetʼ tahẽkana, ar setako hõ uniakʼ ghaokoko jaletʼtae tahẽkana. “Mitʼ din uni kokoe hoṛ doe gocʼena. Ar serma goḍetko hecʼkate Abraham ṭhenko idikedea. Ona tayom uni kisạ̃ṛ hoṛ hõe gocʼena arko topakadea. Ado patalreye sasetokʼkan tahẽkanre coṭ secʼe beṅgetʼ rakapʼketʼ khan sạṅgińre Abraham ar uni sorre Lasare ńelkeda. Unre uni do ãṭ aṛaṅte hohoateye menkeda, ‘E baba Abraham, dayawạńme baṛe. Ar Lasar iń ṭhen kolkaeme jemon uni do acʼakʼ coṭ kạṭupʼ dakʼre topokate ińakʼ alaṅe reaṛkạtiń. Ente noa jolokʼ seṅgelreń jal jalaokʼ kana.’ “Menkhan Abrahame menkeda, ‘disạime, am do jiwetʼem tahẽkanre tinạkʼ sukem jomleda ar Lasar do tinạkʼe sasetlena. Menkhan nonḍe uni do jiwi raṛecʼe ńameda ar am dom sasetokʼkana. Ona chaḍa ape ar ale talare nonkan mitʼṭen maraṅ khạndṛuṅ dohoakana jemon jãhãege sanalere nonḍe khon paromkate ape ṭhen aloko calao daṛeakʼ ar onḍe khon paromkate ale ṭhen hõ aloko hecʼ daṛeakʼ.’ “Unre kisạ̃ṛ hoṛe menkeda, ‘E baba, enḍekhan dayakate iń babawakʼ oṛakʼte Lasar kolkaeme, jemon ińren mõṛẽ goṭen boehae sontor daṛeako; ar baṅ khan onko hõ noa sasetokʼ jaegareko hijukʼa.’ “Menkhan Abrahame menkeda, ‘Mose ar nạbikoakʼ puthi ma coṅ menakʼge. Onko do onkoakʼ kathako luturakʼ ma.’ “Uni kisạ̃ṛ hoṛe menkeda, ‘baṅa, E baba Abraham, gocʼko khon jãhãege onko ṭhene calaolen khan onko do kại khon monko ạcurtakoa.’ “Unre Abrahame menkeda, ‘Mose ar nạbikoakʼ katha jãhãe bako ańjom khan enḍekhan gocʼko mod khon jãhãegeye beretʼlenre hõ onko do ohoko pạtiạulena.’ ” Jisu do acʼren celakoe metatʼkoa, “Kại horte idiko lạgitʼ uskạu do hijukʼte hõ hijukʼgea, menkhan hae uni hoṛ do, one okoe hotete ona uskạu hijukʼkan! Noko huḍińko modre jãhãege mitʼ goṭen kại horteye idiye enḍekhan uni do hoṭokʼre jante dhiri akawaete doreãore khadle giḍikaege bhage hoyokʼtaea. “Men sontorokʼpe. Amren boeha am birudreye kạilere cehaoem. Ar kại khon mone ạcurletae khan uni do ikạkaeme. Dinre eae dhao am birudreye kại khan ar eae dhaoge hecʼkateye men, ‘kastaokʼ kạnạń,’ enḍekhan uni do ikạkae me.” Onko gelbar apostolko do Probhuko metadea, “Aleakʼ biswạs baṛe bạ̃ṛti kataleme.” Probhui menkeda, “Mitʼṭen tuṛi jaṅ inạkʼ pạtiạu tahentape ar noa loa darepe metakʼ, ‘rehetʼ sudhạ todokʼte jalapurire khadlekʼme;’ ar inạtege ona dare do apeakʼ kathae ańjomtapea. “Ape modre okoe menaea one uni do siokʼ se gupiyicʼ golam menaetae. Ar uni golam maṭ khone hecʼlenre kisạ̃ṛ do cetʼ ‘usạrate jom lạgitʼ duṛubokʼe metaea?’ Onka do baṅa, bickome metaea, ‘jomakʼ tearạńme, ar ạuriń jom ńũi hạbicʼ ḍanḍa paṭhekate sapʼsorạńme. Ar ona tayom do amem joma.’ Ado uni guti oneye hukumade lekae kạmiketʼte kisạ̃ṛ do cetʼ bae sarhaoea? Onkage Isorakʼ hukum leka sanamakʼ kạmi tayom ape do menpe, ‘okạjuạ gutiko kanale; okaṭakʼ kạmi lek tahẽkantale eken inạgele kạmi akada.’ ” Ado Jerusalemteko calakʼkan tahẽkanre Jisu do Samariạ ar Gạlil talateye sen paromokʼkan tahẽkana. Unre mitʼṭen atoteko bolokʼkan tahẽkanre uni do gel goṭen murhucʼ jom rugiye ńel ńamketʼkoa. Onko do sạṅgińre teṅgokate hohoateko menkeda, “Jisu, Probhu, mãyãwaleme.” Jisu do murhucʼ jom rog hoṛ ńelketʼkoteye metatʼkoa, “Do senkate naekeko ṭhen udugokʼpe.” Ar calakʼ calakʼtege onko doko bogeyena. Ado onko modre mitʼ hoṛ do bogeyene ńelketʼ khan ãṭ aṛaṅte Isor sarhao sarhaoateye ruạṛ hecʼena ar Jisuakʼ jaṅga pheḍre taberenteye gunmanao joharadea. Uni do Samariạ Prodesren hoṛe tahẽkana. Unre Jisui menkeda, “Gel goṭen do cetʼ bako bogelena? Enḍekhan sarecʼ are goṭen doko okayena? Isor gun manao joharae lạgitʼ nui eṭakʼ jạtren chaḍa ar okoe hõ cetʼ bako ruạṛlena? Ona tayom Jisu do uni hoṛe metadea, “Ma beredokʼme ar calao joṅme. Ente pạtiạu akantem bogeyena.” Ado Phạrusiko modren adomko do Isorakʼ raj tis hijukʼa menteko kulikedea. Unre Jisui roṛ ruạṛatʼkoa, “Isorakʼ raj hijukʼre jãhãn cinhạ do baṅ ńelokʼa. Okoe hõ bako mena, ‘Isorakʼ raj do nõkʼõe nonḍe’ se, ‘hane hanḍe,’ ente Isorakʼ raj do aperege menakʼa.” Ona tayom acʼren celakoe metatʼkoa, “Nonkan dinko hijukʼ kana, ape do Manwa Hopon reakʼ mitʼṭen din ńelpe mena, menkhan bape ńelńama. Ar hoṛkoko metapea, ‘hanḍe ńelepe’ se ‘nõkʼõe nonḍe ńelepe.’ Unre bahrete do alope oḍokokʼa se alope pańjakoa. Bijli cetʼleka sermare mitʼ nakha khon eṭakʼ nakha hạbicʼ malkaokʼ, onkage Manwa Hopone hijukʼ dinre hõ hoyokʼa. Menkhan pạhilre uni do ạḍi utạr duk ar saset jojom hoyokʼtaea. Ona chaḍa noa piṛhiren hoṛko do uniko nihạtea. “Noah oktere cetʼleka hoelen onkage Manwa Hopon hijukʼre hõ hoyokʼa. Ente Noah do jahajre ạuriye bolokʼ hạbicʼ ar ḍubạ dakʼ hecʼkate sanamko ạuriye maraoko hạbicʼ hoṛko doko jom ńũiyetʼ tahẽkana, bạhu joṅkan tahẽkanako arko jãwãeyokʼkan tahẽkana. Loṭ oktere cetʼleka hoelen onkage hoyokʼa. Ona jokhecʼ hoṛko doko jom ńũiyetʼ tahẽkana, kiriń-ạkhrińetʼkan tahẽkanako, cas-basetʼkan tahẽkanako arko oṛakʼ duạretʼkan tahẽkana. Menkhan Loṭ Sodom khone oḍok calaoen dinre serma khon seṅgel ar gondhok reakʼ dakʼe jạṛiketʼ khan sanam hoṛkoe ḍahao maraoketʼkoa. Oka hilokʼ Manwa Hopone sodorokʼ ona din hõ onkage hoyokʼa. “Enhilokʼ okoe sạṛim cetanreye tahen uni do jãhãnakʼ hatao lạgitʼ aloe pheḍokʼma. Onkage baṛgere okoeye tahen uni hõ aloe ruạṛ hijukʼma. Loṭren bạhuwakʼ katha disạipe. Jãhãege acʼakʼ jiwi rukhiyạu lạgitʼe kurumuṭui, uni do acʼakʼ jiwiye khuạutaea, ar okoe acʼakʼ jiwiye khuạutae uni do onae bańcaotaea. Ińiń metapekana, ona ńindạ mitʼ aṭetʼre bar hoṛkin tahenre; mitʼ hoṛ doe idiocokʼa ar eṭagicʼ doe bạgi oṭokʼa. Unre barea maejiu jantekin riritʼre; Mitʼ hoṛ doe idiocokʼa ar eṭagicʼ doe bạgi oṭokʼa.” Ado celakoko metadea, “Henda Probhu, okare?” Jisui roṛ ruạṛkeda, “Jãhãrege mạ̃ṛĩ onḍege gidi hõko jarwakʼa.” Ado celako sanam ghạṛicʼko koejoṅ ar alo jemonko as chuṭạukʼ onate Jisu do noa phene lạiatʼkoa: “Mitʼ nagrahare mitʼṭen hạkime tahẽkana. Uni do Isor bae botoraekan tahẽkana ar hoṛko hõ bae moneyakokan tahẽkana. Ona nagrahare mitʼṭen rạnḍi maejiue tahẽkana. Uni do ghane ghạṛicʼ hecʼkateye metaekan tahẽkana, ‘De, hok reakʼ bicạr chinḍạu kạtińme.’ Menkhan hạkim do thoṛa din hạbicʼ cetʼge bae cekawadea. Ado mucạtʼre mone moneteye menkeda, ‘iń do Isor bạń botorae kanre hõ ar manwako bạń moneyako kanre hõ, enhõ nui rạnḍi maejiu doe ạṛis edeńte hok reakʼ iń bicạrkataea. Ar baṅ khan gahne ghạṛicʼ hecʼkateye ạṛis cabayińạ.’ ” Noa tayom Probhu do arhõe menkeda, “Uni bedhorom bicạricʼ cetʼe menkeda ona baṛe hudisjoṅpe. Enḍekhan okoe siń ńindạ Isorko hohoaekan, onko bachao akan acʼren hoṛko lạgitʼ Isor do cetʼ dhorom reakʼ bae bicạra? Uni do cetʼ ona onkae lạgitʼe biloma? Ińiń metapekana, onkoakʼ dhorom bicạrtako lạgitʼ uni do bae biloma. Menkhan Manwa Hopone hecʼlenre uni do cetʼ dhạrtire biswạse ńamgea?” Okoe apnarte dhorom menteko hudisokʼkan ar eṭakʼkoko nihạ̃tetʼko onko cetʼako lạgitʼ Jisu do noa kathae lạiatʼkoa: “Barea hoṛ do koejoṅ lạgitʼ mundiltekin rakapʼ calaoena. Unkin modre mitʼ hoṛ do Phạrusi ar eṭagicʼ do mạsul-uṭhạuicʼe tahẽkana. Khan uni Phạrusi do teṅgokate acʼ babotre nonkae koekeda, ‘E Isor, gunmanao joharam kạnạń, ente iń do eṭakʼ hoṛko leka luluṭicʼ, bedhoromicʼ, ar laṭghaṭicʼ doń baṅkana, se nui mạsul-uṭhạuicʼ leka hõń baṅkana. Iń do haptare bar dhaoiń upạsetʼkana ar ińakʼ sanam upjạuakʼ ar rojgarakʼ khon gel hạṭiń reakʼ mitʼ hạṭiń do amiń emamkana.’ Unre uni mạsul-uṭhạuicʼ do thoṛa sạṅgiń ńokʼre teṅgo akane tahẽkana. Uni do serma secʼ beṅgetʼ rakapʼ hõ bae dilleda; ar koṛam ceṭakʼateye menkeda, ‘E Isor, iń doń kại hoṛ kana; ińre mãyãkʼme baṛe.’ “Ińiń metapekana, Isor do mạsul-uṭhạuicʼge bin dusi menteye ataṅkedea ar uni do oṛakʼteye ruạṛ calaoena. Menkhan uni Phạrusi doe dusikedea. Okoe acʼteye usulokʼ uni doe copotʼ ocokʼa ar okoeye copotʼ ocokʼ uni doe usul ocokʼa.” Ado kạṭicʼ gidrạko Jisu ṭhenko ạguketʼkoa jemone capoko. Ona ńelte celako do onko hoṛko dhomkaoketʼkoa. Menkhan Jisu do onko gidrạko acʼ ṭhene hohoatʼkoa. Ar inạ tayom do celakoe metatʼkoa, “Gidrạko iń ṭhen hecʼ ocoakope, alope manakoa; ente Isorakʼ raj do nonkankoakʼ kangea. Sạrigeń metapekana, jãhãege kạṭicʼ gidrạko leka Isorakʼ raj bae ataṅ uni do onare ohogeye bolo daṛelena.” Mitʼṭen mukhiyạ hoṛ do Jisui kulikedea, “E Guru, am do mitʼṭen bhage hoṛ kanam. Lạiạńme, cetʼ iń cekalere jaejug jioniń ńamkea?” Jisu do uniye metadea, “Cedakʼ bhage dom mitạń kana? Isor chaḍa ar okoe hõ bhage do bạnukʼkoa. Hukumko mam baḍaege, ‘alom laṭghaṭa, alom khũna, alom kombṛoea, eṛe goha alom ema, eṅgam ạpum ganaokinme.’ ” Uni mukhiyạ hoṛ doe menkeda, “Gidrạ khonge noako joto doń manao ạguakada.” Noa katha ańjomkate Jisu do uniye metadea, “Ńitokʼ hõ mitʼṭen kạmi dom sarecʼ akada. Amakʼ okaṭakʼ menakʼtam onako ạkhrińkate reṅgecʼ orecʼko hạṭińakome, enḍekhan am do sermare dhonem ńama. Ar ona tayom do hecʼkate ińren cela hoyokʼme.” Noa katha ańjomkate mukhiyạ hoṛ do ạḍi ãṭe bhabnayena, ente uni do ạḍi kisạ̃ṛe tahẽkana. Ado uni mukhiyạ hoṛ secʼ beṅgetʼkate Jisui menkeda, “Kisạ̃ṛko lạgitʼ Isorakʼ rajte bolokʼ do muskilgea. Kisạ̃ṛko Isorakʼ rajte bolokʼ khon, sui bhugạkʼte ũṭe bolo tabokʼge algawa.” Jisuakʼ noa katha okoekoko ańjomketʼ onko doko menkeda, “Enḍekhan kại khon do okoeye bańcao daṛekokʼa?” Jisui menkeda, “Manwako ṭhen oka leṭejokʼakʼ baṅ kan Isor ṭhen ona do leṭejokʼakʼ kangea.” Unre Patrase menkeda, “Ale ma sanamakʼ bạgikate amren celale hoeakan.” Jisu do onkoe metatʼkoa, “Sạrigeń metapekana, okoe Isorakʼ raj iạte oṛakʼ-duạr, bạhu, boeha-misera, eṅgat-apat se gidrạkoko bạgi oṭo akatʼko, onko mimitʼko do noa piṛhire hõ ḍherko ńama ar darakan piṛhirehõ jaejug jionko hameṭ joṅa.” Jisu do acʼren gelbar celako mitʼ secʼe hohoatʼkoteye metatʼkoa, “Ńelpe, Jerusalemte bon calakʼ kana. Ar Manwa Hopon reaṅ nạbiko okaṭakʼko ol oṭoakatʼ ona do sanamakʼge purạukʼa. Uni do boṅgan hoṛkoakʼ tireko soprotea. Ar hoṛko do uniko siṛogaea arko bemanotea arko thoaea. Arko cạbukete uni doko gojea, ar pe mãhã hilokʼre uni doe jiwetʼ beredokʼa.” Menkhan celako do noako reaṅ cetʼge bako bujhạu daṛeada. Ente ona katha reakʼ bhed onko khon danaṅre tahẽyente Jisu okae roṛketʼ ona do bako bujhạuleda. Jisu Jerikho nagrahae seṭerokʼkan tahẽkanre mitʼṭen kãṛã hoṛ do hor aṛere duṛupʼkateye kokoekan tahẽkana. Ar gadel hoṛko parom calakʼkan reakʼ saḍeye ańjomketʼ khan cetʼ hoyokʼ kana menteye kuliyana. Adoko lạiadea, Nasaretren Jisu noa horteye paromokʼ kana. Unre uni do ãṭ aṛaṅte hohoateye menkeda, “E Jisu Dạudren hopon, mãyãwạńme.” Ado okoeko hoṛ laha lahateko calakʼkan tahẽkan onko doko dhomkaokedete thir hapekʼko metadea. Menkhan uni do artetʼ ãṭ aṛaṅte hohoateye menkeda, “E Dạudren hopon, mãyãwạńme baṛe.” Jisu doe teṅgoyena ar uni kãṛã hoṛ acʼ ṭhen ạguye lạgitʼe metatʼkoa. Are hecʼen khane metadea, “Cetʼem khojkana? Am lạgitʼ do cetʼ iń cekaea?” Uni doe menkeda, “E Probhu, jemoniń ńeńel.” Jisu do uniye metadea, “Onkage hoyokʼma. Am do amakʼ biswạsgeye bogeketʼmea.” Ar unrege uni hoṛ do ńeńele ehopʼena ar Isor sarhao sarhaoate Jisui pańjakedea. Ar noa ńelte gadel hoṛ hõ Isorko sarhaokedea. Jisu do Jerikho nagraha talateye parom calakʼkan tahẽkana. Ar ńelpe, Sakhae ńutuman mitʼṭen hoṛ onḍeye tahẽkana. Uni do maraṅ mạsul-uṭhạuicʼ ar mitʼṭen kisạ̃ṛ hoṛe tahẽkana. Ar Jisu okoeṭakʼ kanae mente ńele lạgitʼe kurumuṭukan tahẽkana, menkhan geḍrageye tahẽkante bhiṛ iạte uni do bae ńel ńam daṛeaekan tahẽkana. Onate uni do Jisu ńele lạgitʼ samaṅ secʼe ńir lahayente mitʼṭen loa darereye decʼena, ente Jisu do ona hortegeye parom calakʼkan tahẽkana. Ado Jisu ona loa dare ṭhene seṭeren khan cetan secʼe beṅgetʼ rakapʼkeda ar Sakhaeye metadea, “E Sakhae, ma usạra pheḍ hijukʼme, ente teheń do amakʼ oṛakʼre tahen hoyokʼtińạ.” Unre Sakhae do usạrateye pheḍena ar rạskạ salakʼ Jisui ataṅkedea. Ar ona ńelte sanamkoge karacʼ kurujokʼko ehopʼena arko menkeda, “Uni do mitʼṭen kại hoṛ ṭhen peṛakʼ lạgitʼe calakʼ kana.” Ar Sakhae do onḍege teṅgokate Probhui metadea, “E Probhu, ińakʼ dhon-durib reakʼ adha do reṅgecʼ orecʼkoń emako kana ar jãhãegeń ṭhoka akatʼko khan enḍekhan ona reakʼ pon dobṛań ruạṛkatako kana.” Unre Jisui menkeda, “Teheń do noa gharońjre bańcao hoeakana, ente nui hõ Abraham bõsren hoṛ kanae.” Ente atʼakan ńamko ar bańcaoko lạgitʼge Manwa Hopon doe hecʼakana.” Jisu okareye tahẽkan onḍe khon Jerusalem do ḍher sạṅgiń baṅ tahẽkana, ar okoe uniakʼ kathako ańjometʼkan tahekan onko doko hudisetʼkan tahẽkana Isorakʼ raj do ne nahakʼ sodorokʼ kana. Onate Jisu do cetʼako lạgitʼ noae lạiatʼkoa: “Mitʼṭen maraṅ bõsren hoṛ do raj hudạwanteye ruạṛ hijukʼa mente sạṅgiń disạmteye calaoena. Ado calakʼ lahare acʼren gel goṭen gutikoe hohoatʼkoa ar mimitʼ hoṛ mitʼ sae Dinarkate ematʼkoteye metatʼkoa, ‘iń ạuriń ruạṛ hijukʼ hạbicʼ noate bạnij bepar hataṛpe.’ “Menkhan acʼakʼ disạmren hoṛko do uniko kurudaekan tahẽkana. Onate onko do uni tayomte hoṛ kolkateko roṛgotʼkada, ‘nui hoṛ ale cetanreye rajokʼ do bale khojkana.’ “Enrehõ uni do raj hoekateye ruạṛ hecʼena ar okoeko ṭakae ematʼko tahẽkan onko gel goṭen guti do hoho ạguko lạgitʼe hukumkeda. Ar okoe tinạkʼko lab akada mente baḍae sanakedea. Ado pạhilicʼ hecʼkateye menkeda, ‘E Probhu, amakʼ ṭakate iń do arhõ gel doboṛiń lab akada.’ “Raj do uniye metadea, ‘bes akadam. Am do bhage guti kanam. Ar thoṛawakʼkore pạtiạrem tahẽkante gel goṭen nagraha reakʼ dạyikiń emamkana.’ “Dosaricʼ hõ hecʼkateye menkeda, ‘E Probhu, amakʼ ṭakate iń do arhõ mõṛẽ doboṛiń lab akada.’ “Uni gutiye metadea, ‘am hõ mõṛẽ goṭen ato reakʼ bharem ńama.’ Ado ona tayom ar mitʼṭen guti hecʼkateye menkeda, ‘E Probhu, amakʼ ṭaka do gamchareń moṭra doho akatʼ tahẽkana. Am babotre botor tahẽkantińạ ente am do ạḍi kuṭhin hoṛ kanam; ente oka bam dohoakatʼ onam hataoeda ar oka bam erletʼ onam iretʼa.’ “Unre raje menkeda, ‘Eya bạṛicʼ golam! Amakʼ moca reakʼ kathatege am doń bicạrmea. Am mam baḍaekan tahẽkange, iń doń kuṭhin hoṛ kana; okaṭakʼ bạń dohoakatʼ onań hataoeda ar okaṭakʼ bạń erletʼ onań ireda. Enḍekhan ińakʼ ṭaka do mahajon ṭhen cedakʼ bam bạisạukada? Enḍekhan iń do hecʼkate ṭaka hõń ńamkea ar soṅgete sud hõń ńamkea.’ “Khange raj do acʼ ṭhen teṅgo akan hoṛkoe metatʼkoa, ‘uni ṭhen khon ona mitʼ sae Dinar hataope ar okoeakʼ mitʼ hajar Dinar menakʼtae uni emaepe.’ “Unre onko hoṛ do rajko metadea, ‘E Probhu, uniakʼ ma coṅ mitʼ hajar Dinar menakʼtaege.’ Raje menkeda, ‘ińiń metapekana, okoeakʼ menakʼtae uni do arhõe em ocokʼa, menkhan okoeakʼ bạnukʼtae uni do oka menakʼtae ona hõe recʼocokʼa. Ińren bạiriko one okoe ińakʼ raj reakʼ bako khojkan, onko do nonḍe ạgukope ar iń samaṅre gocʼ giḍikakope.’ ” Ado noako menkate Jisu do onko laha lahate Jerusalemteye calao idiyena. Ar Jạitun buru ṭhenakʼ Bethaphage ar Bethaniạ nagraha sore hecʼen khan acʼren barea cela noa menkateye kolketʼkinạ, “Samaṅ senakʼ atote calakʼben. Ar onḍe bolokʼ jokhecʼ mitʼṭen gadha hopon tolakade ben ńamea. Uni cetanre okoe hoṛ hõ tisge bako decʼakana. Aben do raṛakate nonḍe bene ạguyea. Ar jãhãye kuliben khan, ‘cedakʼ ben raṛayedea?’ Enḍekhan men ben, ‘Probhu do nui reakʼ jạruṛ menakʼtaea.’ ” Ado okoe celakin kol ocolen unkin do senkate Jisuakʼ katha lekagekin ńamkedea. Arkin raṛayedekan tahẽkanre kisạ̃ṛ do unkine kuliketʼkinạ, “Gadha hopon do cedakʼben raṛayede kana?” Unkin dokin menkeda, “Probhu do nui reakʼ jạruṛ menakʼtaea.” Ona tayom unkin cela do gadha hopon Jisu ṭhenkin ạgukedea ar unire ạkinakʼ oyonakʼ kin palanketʼte onare Jisukin decʼkedea. Ar uniye calakʼkan tahẽkan jokhecʼ gadel hoṛko do akoakʼ kicricʼko hor horteko aṭetʼ idikeda. Ado Jerusalem sor reakʼ okaṭakʼ hor do Joitun buru khon pheḍ hecʼakan ona soṛokreye seṭerena. Ar uni sãote uniren ạḍi utạr celako tahẽkana. Onko do uniakʼ hahaṛa kạmiko ńelletʼte rạskạte ãṭ aṛaṅte Isor sarhaoete memenko ehopʼena, “Bhorangeae Probhu ńutumte daraekanicʼ raj do; sermare suluk ar coṭ utạrkore ṭhonok.” Unre gadelko modren adom Phạrusiko do Jisuko metadea, “E Guru, amren celako thirokʼ metakom.” Jisu do onkoe metatʼkoa, “Ińiń metapekana, noko thirko tahen khan enḍekhan dhirikoko hohoya.” Ado Jerusalem ṭhenko hecʼen khan Jisu do nagraha ńelteye rakʼkeda. Uniye menkeda, “Hae, suluk ńam lạgitʼ oka jạruṛ ona baṛe teheńem baḍaele khan honaṅ! Menkhan ńitokʼ ona do amakʼ mẽtʼãhã khon danaṅ akana. Nonkan okte hijukʼkana amren bạiri do am birudreko teṅgona arko gherao ạcurmea ar sanam secʼ khonko cipạmea. Onko do am ar amre menakʼko sanam hoṛ sapʼkate otreko tawakʼkoa ar amre dhiri cetan dhiri hõ bako dohoea, ente Isore hiriletʼme okte do bam baḍae oromlakʼa.” Ona tayom Jisu do mundilre bolokate kiriń-ạkhrińkoe laga oḍokketʼkoa. Uni do beparikoe metatʼkoa, “Sonot sostorre ol menakʼa, ‘ińakʼ oṛakʼ do koejoṅ oṛakʼ hoyokʼa,’ menkhan ape do ḍạkukoakʼ danderpe benao akada.” Jisu do dinạm hilokʼ mundilre senkate cetʼakoe ehopʼena. Ar Maraṅ naekeko, sostor baḍaeko ar disạm hoṛkoren mukhiyạko do goje lạgitʼ ạtko ńam baṛayetʼ tahẽkana, menkhan cetʼlekateko cekaea ona reakʼ jãhãn upạige bako ńam totʼ daṛeada, ente hoṛko do mon lagaokate uniakʼ kathako ańjometʼ tahẽkana. Mitʼ din Jisu do mundilre hoṛkoe cetʼakokan are porcarako kan tahẽkana. Unre maraṅ naekeko, sostor baḍaeko ar murubiko do hecʼkate Jisuko metadea, “Lạialeme, oka ektiạrite noakom kạmi kana, ar okoe noa ektiạri doe emakatʼmea?” Jisui roṛ ruạṛatʼkoa, “Iń hõ mitʼṭen kathań kulipea. Mase lạiạńpe, Oka khon Johan do bạptisma emokʼ reakʼ ektiạriye ńamleda, serma secʼ khon se manwako secʼ khon?” Unre onko do ako akore galmaraoanteko menana, “Menle khan bon, ‘Isor secʼ khon,’ enḍekhane metabona, ‘tobe cedakʼ uni do bape pạtiạuadea?’ Ar bon menle khan, ‘manwa secʼ khon,’ enḍekhan disạm hoṛko dhiriteko tińbona, ente Johan do nạbi kanae menteko khạṭi akawana.” Onate onko doko menkeda, “Ale do bale baḍaea oka khon ona ektiạriye ńamleda.” Jisui metatʼkoa, “Enḍekhan iń hõ bạń lại apea oka ektiạrite noakoń kạmi kana mente.” Ona tayom Jisu do disom hoṛko cetʼako lạgitʼ noae lạiatʼkoa: “Mitʼ hoṛ do mitʼṭen darkha bagwane benaokeda ar casako ṭhen bạisạu oṭokate ḍher din lạgitʼ eṭakʼ disạmteye calaoena. Ado okte hoyen khan uni do darkha jo reakʼ bhag hatao lạgitʼ casako ṭhen mitʼṭen golame kolkedea. Menkhan casako do uniko dalkedea ar eken tiko kol ruạṛkadea. Unre uni do ar mitʼṭen golame kolkedea, menkhan casako do uni hõko dalkedea arko bemanot kedete eken tiko kolgotʼkadea. Tayomte uni do tesaricʼ golame kolkedea, menkhan casako do uni hõ ạḍi bạṛicʼko dalkedea arko laga oḍokkedea. “Unre darkha bagwanren kisạ̃ṛe menkeda, ‘cetʼ iń cekaea? Iń do ińren sadher hopongeń kolea. Hoedaṛeakʼa onko do uniko manotea.’ “Menkhan casako do uniko ńelkede khan ako akoreko menana, ‘nuige nahakʼ sompottiren mạlik doe hoyokʼa. Onate delabon gojea, jemon aboge onaren ạidạriko bon hoyokʼ.’ Noa menkate uniko sapʼkedea ar bagwan bahrete idikateko gocʼkedea. “Ńitokʼ darkha bagwanren kisạ̃ṛ do onko casakoe cekakoa? Uni do hecʼkate onkoe gocʼkoa ar bagwan do eṭakʼko ṭhene bạisạu oṭokakʼa.” Hoṛko do Jisuakʼ noa katha ańjomkateko menkeda, “Nonka do alo baṛe hoyokʼ ma.” Unre Jisu do onko secʼ beṅgetʼkateye menkeda, “Enḍekhan sonot sostorre noa katha olakan reakʼ mane do cetʼkana, ‘raj mistiriko okaṭakʼ dhiriko bad giḍiletʼ tahẽkan, onage konac reakʼ asol dhiri hoyena.’ Ar jãhãege ona dhiri cetanreye ńurokʼ uni doe gejerokʼa ar okoe cetanre ona dhiri ńurokʼ uni doe holoṅ ḍigir utạrokʼa.” Unre sostor baḍaeko ar maraṅ naekeko do Jisu sabeko menwana, enteko bujhạu daṛeada, Jisu do ako birudrege noako kathae roṛetʼ kana; menkhan onko do hoṛkoko botoratʼkoa. Sostor baḍaeko ar maraṅ naekeko do Jisu akoakʼ nojorreko dohokedea ar guptocorko kolketʼkoa. Onko guptocor do Jisu acʼakʼ kathate jhạliye lạgitʼ dhorom hoṛ leka udugokʼko ehopʼena, jemon onko do disạm cakʼlaoicʼ gobolreko soprot daṛeae. Onateko metadea, “E Guru, alele baḍaea am do ṭhik ṭhikem roṛeda arem cetʼako kana. Ar okoeakʼ mẽtʼãhã hõ bam beṅgetʼakʼ kana ar Isorakʼ hor reaṅ sạri sạriakʼgem cetʼakokana. Ado Moseakʼ ạn lekate Romren maharaj do cetʼ khajna emae lek gea?” Jisu do onkoakʼ phundi baḍaeketʼteye metatʼkoa, “Mitʼṭen Dinar udukʼạńpe. Noare okoeakʼ muṭhạn ar okoeakʼ ńutum ol menakʼa?” Onkoko menkeda, “Romren maharajakʼ.” Adoe metatʼkoa, “Enḍekhan okaṭakʼ maharajakʼkan ona do maharajge emkataepe ar okaṭakʼ Isorakʼkan ona do Isorge emaepe.” Hoṛko samaṅre Jisu okae menketʼ onate onko guptocor do bako jhạli daṛeadea. Ar uniakʼ roṛ ruạṛteko hahaṛayente hapegeko tahẽyena. Sạdukiko modren adomko do Jisu ṭhenko hecʼena. Sạdukiko ṭhen do gocʼkoakʼ jiwetʼ beredokʼ reakʼ do cetʼge bạnukʼa. Onate onko do Jisuko kulikedea, “E Guru, Mose do noae ol oṭoakatʼ bona, begor gidrạwante jãhãe acʼren bạhui gocʼ bạgi oṭoae khan, enḍekhan bokottetʼ do uniren bạhui baplayema ar dadattetʼ lạgitʼ bõse teṅgokoma. Ado eae boehako tahẽkana. Ar pạhilicʼ do baplakate begor gidrạwanteye gocʼena. Tayomte dosaricʼ ar tesaricʼ boeha hõ uni rạnḍi maejiukin baplakedea, ar onkaleka eae boehage begor gidrạwanteko gocʼena. Ado mucạtʼre uni maejiu hõe gocʼena. Enḍekhan gocʼkoko jiwetʼ beredokʼre uni do okoeṭakʼren bạhui hoyokʼa? Ente eae boehage coṅ uni mako baplalede.” Jisu do onkoe metatʼkoa, “Niạ jugren hoṛko doko bạhujoṅ kana arko jãwãyokʼ kana. Menkhan gocʼko khon beretʼkate darakan jugre parom calakʼ lạgitʼ lek kanako menteko lekhakʼte onko do bạhu hõ bako bạhu joṅa ar jãwãe hõ bako jãwãyokʼa. Onko do ar bako gujukʼa, ente onko do serma goḍet lekako hoyokʼa. Onko do Isoren hoponko hoyokʼa ente gocʼko khonko jiwetʼ beretʼ ocoakana. Jolokʼkan jhạwạ reaṅ okare olakan onḍe Moseye sodorakatʼa, gocʼko do sạrigeko jiwetʼ beredokʼa. Onḍe Mose do Probhuge, ‘Abrahamren Isor, Isạhakren Isor, ar Jakobren Isor’ menteye hohoaekana. Menkhan Isor do gocʼkoren Isor doe baṅkana, uni do jiwetʼkoren Isorge. Uni lạgitʼge sanam hoṛ do jiwetʼko tahena.” Unre adom sostor baḍaeko doko menkeda, “E Guru, am do bhagegem menakada.” Onko do jãhãnakʼge Jisu kuliye ar bako dilleda. Jisu do onko sostor baḍaekoe metatʼkoa, “Hoṛko do cekateko meneda, Mạsi do Dạud bõsren kanae? Sonot sostorre sereńko reakʼ puthire Dạud ma acʼge coṅ noa kathae menakatʼ, ‘Probhu do ińren Probhui metadea, tin hạbicʼ amren bạiriko amakʼ jaṅga latarre bạń dohoko, un hạbicʼ ińakʼ jojomsa aṛere duṛupʼme.’ Dạud ma Mạsige Probhu menteye hohoade tahẽkan; enḍekhan cekate Mạsi do Dạudren hopone hoedaṛekokʼa?” Ado sanam hoṛ uniakʼ kathako ańjometʼkan tahẽkanre Jisu do acʼren celakoe metatʼkoa, sostor baḍaeko khon sontor akae tahenpe. Onko do jhạl jhạl aṅgrop horokʼkate dãṛã bãṛãe ar hạṭiạ bajarkore johar ocokʼko kusiyakʼa. Onko do sunạgogkore laha duṛupʼakʼ ar bhojre laha jaegako kusiyakʼ kana. Hoṛko ṭhen ńel ocokʼ lạgitʼ onko do jeleń jeleńko koejoṅa, ar eṭakʼ secʼ do rạnḍi maejiukoakʼ dhonko luṭ joṅkana. Noko hoṛ do ạḍi bạ̃ṛti sạjạyokʼ hukumko ńama.” Niạ tayom Jisu do kisạ̃ṛ hoṛko mundil reakʼ dan sundukre akoakʼ dan dohokane ńelketʼkoa. Ar mitʼṭen reṅgecʼ rạnḍi maejiu hõ hecʼkate barea huḍiń poesa dohoe ńelkedea. Unre Jisu do acʼren celakoe metatʼkoa, “Sạrigeń metapekana, nui reṅgecʼ rạnḍi maejiu do eṭakʼ sanamko khon bạ̃ṛtiye dohoakada, ente eṭakʼko do akoakʼ sareṛokʼakʼ dhon khonko dohoakada, menkhan nui maejiu doe reṅgecʼ gerehõ bańcao tahen lạgitʼ oka tahẽkantae ona jotogeye emkeda” Celako modren adomko do mundil reaṅko galmaraokan tahẽkana. Onko doko menetʼ tahẽkana, mońj mońj dhiri ar dan reakʼ jiniskote dolan do cetʼleka sajao akana. Unre Jisui metatʼkoa, “Ape ma noakope ńeletʼkan, menkhan nonkan din hijukʼa, unre dhiri cetan dhiri do baṅ tahena; jotoge rạputʼ giḍi ocokʼa.” Celako do Jisuko kulikedea, “E Guru, tis noako do hoyokʼa ar okaṭakʼ cinhạ ńeltele bujhạu daṛeakʼa, noako hoyokʼ reakʼ okte do seṭer akana mente?” Jisui roṛ ruạṛatʼkoa, “Ńelpe, okoe hõ jemon aloko bulạupe, ente ḍher hoṛge iń ńutumte hecʼkateko metapea, ‘iń kangeạń’ ar ‘okte do sorakana.’ Onko do alope pańjakoa. Ape do lạṛhại ar gulmalkope ańjomlere alope botorokʼa, ente pạhilre noako do hoyokʼgea; menkhan unrehõ mucạtʼ do baṅ hoe hodokʼa.” Ona tayom Jisui metatʼkoa, “Mitʼ jạt do eṭakʼ jạt birudre, ar mitʼ rajosṭi do eṭakʼ rajosṭi birudreko lạṛhạiya. Ạḍi ãṭ dhạrti laṛao hoyokʼa ar jaega jaegakore akal ar mahamạriko hoyokʼa. Ona chaḍa sermare nonkan ghoṭnako hoyokʼa ar cinhạko ńelokʼa, oka do ạḍi botorge. “Noako hoyokʼ lahare hoṛko do apeko sapʼpea arko santaopea. Ar bicạrpe lạgitʼ sunạgogreko idipea ar hajotreko bhoraopea. Iń iạte rapajko ar disạm cakʼlaoko samaṅreko idipea, onate iń reaṅ goha emokʼ reakʼ ạt hoyokʼtapea. Ńitge monre niṭ joṅpe, ar roṛ dogokʼ lạgitʼ do alope sapṛaokʼa, ente iń do nonkan katha ar nonkan akeliń emapea, onape roṛ ruạṛakore aperen bạiriko do cetʼ hõ bako roṛ daṛeakʼa, ar ona hõ bako baṅ daṛeakʼa. Aperen gogo-baba, boeha, gate ar peṛa pạrbhạko do apeko sapʼocopea. Ar ape modre adomko doko gocʼ ocokoa. Iń iạte joto hoṛko hirkhạwapea, menkhan apeakʼ do mitʼṭen upʼ hõ baṅ loksanokʼ tapea. Ape do ṭarhao akaepe tahente sạri jionpe labjoṅa. “Tinre Jerusalem do palṭonko hotete esetʼ ạcurakatʼpe ńela unre bujhạupe je, Jerusalem dhaṅ dhaserokʼ din do sorakana. Unre okoe Jihudạreko tahen onko do buruteko ńirjoṅma. Ar okoe nagrahareko tahen onko do nagraha bahreteko oḍok calakʼma. Ar okoe atoreko tahen, onko do nagrahate aloko hijukʼma, ente noako din do sạjạyokʼ din hoyokʼa, ar onate sonot sostorre oka ol menakʼ ona do purạukʼa. Unre bhạrti hoṛmo akanko ar okoe gidrạko nunuakokan onkore do hae hae! Unre dhạrtire do maraṅ dorloe hoyokʼa ar Jihudiko cetanre Isorakʼ sạjại pheḍ hijukʼa. Onko do tarwaṛeteko gocʼ ocokʼa ar sanam jạtko talare bondi akan leka chir chạturko tahena. Ar por jạtkoakʼ okte ạuri purạukʼ hạbicʼ Jerusalem do onkoakʼ jaṅgate lebetʼ gańjaokʼa. “Unre siń cando, ńindạ cando ar ipilkore ạḍi lekan cinhạko ńelokʼa. Dhạrtiren sanam jạtko do kosṭoko ńama ar jalapuri reakʼ hudhud saḍe ar ḍheoko iạte onko do jiwi oṭaṅokʼ takoa. Ar dhạrtire darakanakʼko reakʼ botorte hoṛko doko keklesedokʼa, ente siń cando, ńindạ cando ar ipilko do ar bako ṭarhao tahena. Unre Manwa Hopon do ạḍi daṛe ar ṭhonokante rimilre hijukʼkanko ńelea. Noa ghoṭnako hoyokʼre ape do sojhete teṅgokʼpe ar bohokʼ rakabtape, ente apeakʼ chaḍaokʼ do sorakana.” Ona tayom Jisu do acʼren celako cetʼako lạgitʼ noa phene lạiatʼkoa, “Loa dare ar eṭakʼ dareko beṅgetʼakʼpe. Sakam sagenlen khanpe bujhạu daṛeakʼ kana, hoe lolo din do sorakana. Onkage noako hoyokʼpe ńellere bujhạupe, Isorakʼ raj do sorakana. Sạrigeń metapekana, noako hoelenre hõ niạ jugren thoṛa hoṛ do jiwetʼko tahena. Ot ar serma do cabakʼa, menkhan ińakʼ kathako do jaejug hạbicʼ tahena. “Sontor akae tahenpe, jemon apeakʼ mon do rij roṅ, ńũ bulokʼ ar gharońj reakʼ dạndite ten alo tahentape. Ar baṅkhan cetʼleka pạsi ackage bond godokʼ onkage ona din hõ ackage apere hecʼpaṛaokʼa, ar onka leka dhạrtiren sanam hoṛko cetanre hõ hecʼ paṛaokʼa. Onate jagwar tahenpe ar koejoṅpe jemon jãhãnakʼge hecʼape onakope parom idite Manwa Hopon samaṅrepe teṅgo daṛeakʼ.” Onako dinre Jisu do dinạmge mundilreye cetʼakokan tahẽkana, menkhan ńindạ do bahrete senkate Joitun burureye tahenkan tahẽkana. Ar sanam hoṛ uniakʼ katha ańjomtae lạgitʼ setakʼ khonge mundilteko hijukʼkan tahẽkana. Ona oktere Jihudikoakʼ bin khạmianakʼ piṭhạ porob hecʼ sorakan tahẽkana. Noage sen-parom porob hõko metakʼkan tahẽkana. Maraṅ naekeko ar sostor baḍaeko do hape hapete Jisu goje reakʼ ạtko ńam baṛayetʼ tahẽkana, ente onko do disạm hoṛko botorako kan tahẽkana. Unre okoe Jihudạ Iskạriotko metaekan tahẽkan unire do Soetane boloyena. Nui do Jisuren gelbar celako modren mitʼ hoṛe tahẽkana. Uni do senkate maraṅ naekeko ar mundilren kạmiyạko sãoteye galmaraokeda cetʼlekate onkoakʼ tire Jisui soprotea mente. Onate onko do ạḍiko rạskạyena ar ṭaka emae reakʼko gokʼadea. Unre Jihudạ doe rạjiyena ar ạt ńam baṛaye ehopʼena jemon hoṛ bako tahenre Jisui soprot daṛeae. Ado bin khạmianakʼ piṭhạ porob reakʼ dinre sen-parom porob bhojre lạgitʼ bheḍa hoponko gocʼetʼko kan tahẽkana. Ado ona din seṭeren khan Jisu do Patras ar Johan noa menkateye kolkatʼkinạ, “Do senkate abo lạgitʼ sen-parom porob reakʼ bhoj tearben, jemon bon jom daṛeakʼ.” Unkin do Jisukin kulikedea, “Okareliń tearama mentem menjoṅ kana?” Jisui metatʼkinạ, “Ńelben, nagrahate ben bolokʼre mitʼṭen baba hoṛ do kanḍate dakʼ idikan ben ńelea. Aben do uni ben pańja idiyea ar okaṭakʼ oṛakʼteye bolokʼa, ona oṛakʼren mạlik ben metaea, ‘Guru baḍae sanayedea, celako sãote sen-parom porob reakʼ bhoj okareye jom, ona peṛa kandha do okaṭakʼ kana?’ Unre uni do cetan koṭhare sajao akatʼ mitʼṭen kandhae udukʼ abena; ar onḍege jotowakʼ ben teara.” Ado Jisui metatʼkin lekage, unkin do senkate sanamakʼ onkage kin ńamkeda ar sen-parom porob reakʼ bhojkin sapṛaokeda. Ona tayom okte hoyen khan Jisu do apostolko tulucʼ jojome duṛupʼena. Uni doe metatʼkoa, “Duk ạuriń jomre, sen-parom porob reakʼ noa bhoj ape tulucʼ jojom ạḍi sana tahẽkantińạ. Ińiń metapekana, Isorakʼ rajre noa reakʼ ạuri purạukʼ hạbicʼ, iń do noa ohogeń jomlea.” Inạ tayom Jisu do bạṭi ataṅkate Isor gunmanao joharadeteye menkeda, “Ape do noa reakʼ hạṭińjoṅpe, enteń metapekana, ńit khon Isorakʼ raj ạuri hijukʼ hạbicʼ iń do darkha rasa bạń ńũiya.” Ona tayom uni do piṭhạ ataṅkate Isore gunmanao joharadea. Ar ona kecakʼkate celako ematʼkoteye metatʼkoa, “Noa do ińakʼ hoṛmo kana oka do apeko lạgitʼ emogokʼkan. Nonkaepe iń disạyiń lạgitʼ.” Ado jom tayom onkage bạṭi hõ ataṅkateye metatʼkoa, “Ińakʼ mãyãm hotete Isorakʼ oka nawa bondobos bahalokʼkan, ona bondobos reakʼ cinhạ do noa bạṭi kana. Ińakʼ noa mãyãm do apeko lạgitʼ emogokʼa. Ńelpe, okoe ińe soprotiń uniakʼ ti hõ ińakʼ ti sãote noa mejre menakʼa. Isor okae niṭ dohoakatʼ onkage Manwa Hopon do gujukʼ hoyokʼtaea; menkhan hae uni hoṛ lạgitʼ do, one okoe do uniye soprot ocoye!” Khange celako do ako akore kupulikʼko ehopʼena, nonkanakʼ do okoeṭakʼe kạmikea mente. Ado okoeṭakʼe maraṅa ona reaṅ ako talareko reṭepeṭekʼ kan tahẽkana. Jisui metatʼkoa, “Boṅgan hoṛ jạtko modre rapajkoge mạlikiko calaoeda ar onkoren ektiạriankoge bhạlạikoko metako kana, menkhan apeko talare nonka hoyokʼ do lek baṅkana. Ape modre joto khon maraṅicʼ do huḍińicʼ lekae hoyokʼma, ar ạyuricʼ do sapʼdapʼicʼ leka. Okoeṭakʼe maraṅa, jojom duṛupʼ akanicʼ se sapʼ sosoricʼ guti? Uni jojom duṛupʼ akanicʼge cetʼ baṅa? Menkhan iń do apeko talare sapʼ sosoricʼ lekań hoeakana. Ińakʼ sanam harket saset oktere ape do bape bạgi giḍi akawạdińạ. Ińren Baba cetʼleka ektiạriye emakawạdiń onkage iń hõ apeko ektiạriń dan akawatʼpea. Onate ińakʼ rajre ape do iń tulucʼpe jom ńũiya ar siṅghạsonre duṛupʼkate Israelren gel bar khũṭrenkoakʼpe bicạrtakoa. E Simon, E Simon, ńelpe, Soetan do guhum leka calape lạgitʼe khoj akada. Menkhan iń do am lạgitʼ iń koeyeda, jemon amakʼ biswạs alo ḍigạukʼtam. Am do iń ṭhenem ruạṛ hijukʼre amren noko boehakom keṭecʼkoa.” Patras do Jisui metadea, “E Probhu, am tulucʼ hajot ocokʼ ar gujukʼ hõń sapṛaogea.” Jisui roṛ ruạṛadea, “E Patras, ińiń metam kana, teheń sim sạnḍi ạuriye ragre am do pe dhaoem baṅeńa.” Ona tayom Jisu do acʼren celakoe metatʼkoa, “Ṭaka reakʼ thạilạkʼ, khuti ar panahi chaḍań koletʼpere cetʼ jãhãnakʼtepe ṭonṭa emanlena?” Celakoko menkeda, “Cetʼte hõ baṅa.” Jisui metatʼkoa, “Menkhan ńitiń metapekana, jãhãege ṭaka reakʼ thạilạkʼ se khuti menakʼtae khan uni doe iditora joṅma. Ar okoeakʼ tarwaṛe bạnukʼtae uni do acʼakʼ oyonakʼ ạkhrińkate mitʼṭen tarwaṛeye kirińjoṅ ma. Sonot sostorre olakana, ‘uni do kại hoṛko sãoteye lekhayena.’ Ińiń metapekana, noa katha do ińrege hoe purạukʼa, ente iń reaṅ okako olakan ona do purạu lạgidokʼ kana.” Unre celakoko menkeda, “E Probhu, ńelme, nonḍe do barea tarwaṛe menakʼa.” Jisui roṛ ruạṛatʼkoa, “Inạge ḍhera.” Ado Jisu ona jaegae bạgi oṭoatʼte acʼakʼ cạli leka Jạitun buruteye rakapʼena. Ar acʼren celako hõ uniko pańjakedea. Ar ṭhik jaegareye seṭeren khan Jisu do onkoe metatʼkoa, “Koejoṅpe jemon biḍạure alope paṛaokʼ.” Ona tayom Jisu do celako ṭhen khon thoṛa sạṅgiń ńokʼ senkate ikhṛumente koejoṅe ehopʼena, “E Baba, amem mone joṅkan khan, noa duk reakʼ bạṭi iń khon pharakme baṛe. Enhõ ińakʼ monejoṅ leka do baṅ, menkhan amakʼ sana lekage hoyokʼma.” Unre serma khon mitʼṭen goḍet do hecʼkate Jisui daṛe ocokedea. Ar Jisu do ala jhalareye paṛaoente arhõ jidkateye koekeda. Uniakʼ hoṛmo reakʼ balbal dakʼ do mãyãm leka otre ṭhopʼ ṭhopʼ ńurokʼ ehopʼena. Ado koejoṅ tayom beretʼkate uni do acʼren celako ṭhene hecʼena. Ar mon reakʼ duk ar laṅgate jạpitʼ akatʼe ńelketʼkoteye metatʼkoa, “Cedakʼpe jạpitʼ joṅkana? Ma beretʼpe ar koejoṅpe jemon biḍạure alope paṛaokʼ.” Jisu kathae roroṛkan tahẽkanrege onḍe ạḍi utạr hoṛko hecʼena. Ar Jihudạko metae gelbar celako modren mitʼ hoṛ do onko laha lahateye hijukʼkan tahẽkana. Uni do Jisu ṭhene hecʼ sorena cokʼae lạgitʼ. Unre Jisu do uniye metadea, “E Jihudạ, cokʼate Manwa Hoponem soprotede kana?” Ado Jisu beṛhaete okoeko tahẽkan onko do cetʼ hoe lạgidokʼ kana menteko bujhạukeda. Onate onko do Jisuko metadea, “E Probhu, ale do cetʼ tarwaṛele calaoa?” Ar celako modren mitʼ hoṛ do tarwaṛete maraṅ naekeren gutiwakʼ jojom luture hese ńurketʼtaea. Jisui menkeda, “Inạkʼ kakʼme, ar baṅa.” Ar noa menkate uni hoṛakʼ luture joṭetʼketʼteye bogekedea. Ado acʼ upạrte hecʼakan maraṅ naekeko, mundilren kạmiyạko ar murubikoe metatʼkoa, “Iń do cetʼ ḍạku kạnạń, onate tarwaṛe ar ṭheṅgawantepe hecʼ akana? Iń do mundilre dinke din ape samaṅreń tahẽkana, menkhan unre ma bacope sapʼlediń. Menkhan ńitokʼ do apeakʼ okte kangea; ar ńut reakʼ ektiạri hõ ńelokʼ kana.” Unre onko do Jisu sapʼkate maraṅ naekeakʼ oṛakʼteko idikedea. Ar Patras do pharak pharakre tahẽkate uniye pańja idikedea. Ar bakher raca talare okoe do seṅgel jolkateko jorogokʼkan tahẽkan onko ṭhen hecʼkateye duṛupʼ panteyena. Unre mitʼṭen kạ̃ṛmĩ do seṅgel reakʼ marsalte Patrase ńel ńamkede khan beṅgetʼ uricʼadeteye menkeda, “Nũi hoṛ hõ uni sãoteye tahẽkana.” Menkhan Patras do baṅketʼteye menkeda, “Uni do bạń oromakadea.” Thoṛa ghạṛicʼ tayom ar mitʼṭen hoṛ hõ uni ńelteye menkeda, “Am hõ onko modren mitʼ hoṛ kanam.” Patrase menkeda, “Baṅ, iń doń baṅkana.” Ado mitʼ ghonṭa tayom ar mitʼ hoṛ jorkateye menkeda, “Nũi hoṛ do khạṭige uni sãoteye tahẽkana, ente nũi hõe Gạlilren kana” Patrase menkeda, “Am okam roṛetʼkan ona do bạń bujhạueda.” Patrasakʼ katha ạuri mucạdokʼrege sim sạnḍi doe rakʼgotʼkeda. Unre Probhu doe ạcurente Patrase beṅgetʼadea. Onate Patras do one Probhui metade tahẽkan kathae disạgotʼkeda, “Teheń sim sạnḍi ạuriye ragre pe dhaoem baṅeńa.” Unre Patras do bahrete senkate ạḍiye rakʼkeda. Ado okoeko Jisuko horhoyedekan tahẽkan onko do uniko siṛogadea arko dalkedea. Ar mẽtʼko betʼketʼtaete uniko metadea, “Mase lạime, okoeye dalketʼmea? Nonkate onko do arhõ ạḍi utạr kathakote uniko bemanotkedea. Ado setakʼen khan Jihudikoren murubiko, maraṅ naekeko ar sostor baḍaekoko jarwa mitʼena ar maraṅ bạisi samaṅre Jisu ạgukedeteko metadea, “Mạsi kan khanem, enḍekhan lại aleme.” Jisui menkeda, “Ińiń menlere hõ ape do bape pạtiạukʼa ar apeń kuli lepere hõ bape roṛ ruạṛạńạ. Menkhan Manwa Hopon do ńit khon sanam daṛeanicʼ Isorakʼ jojomsa aṛere duṛupʼ akane tahena.” Unre sanamkoko kulikedea, “Enḍekhan am do cetʼ Isorren Hopon kanam?” Uniye metatʼkoa, “Ape do ṭhikgepe meneda, iń doń uni kangea.” Unre mukhiyạkoko menkeda, “Goha reakʼ do ar cetʼ jạruṛa bona? Abo sanamkoge coṅ uniakʼ moca khon bon ańjomketʼ.” Unre ona bạisiren sanamko do beretʼente Romren disạm cakʼlaoicʼ Pilạt ṭhen Jisuko idikedea. Onko do noa menkate Jisu birudre lạlisaeko ehopʼena, “Alele ńel akadea, nui hoṛ do aleren hoṛko raj birudreye bhiṅgṛạuetʼkoa. Uni do maharaj khajna emaye baronetʼkoa ar acʼge Mạsi ar mitʼṭen raje ńumogokʼ kana.” Pilạt do Jisui kulikedea, “Am do cetʼ Jihudikoren raj kanam?” Jisui menkeda, “Am do ṭhikgem meneda.” Unre Pilạt do maraṅ naekeko ar sanam hoṛkoe metatʼkoa, “Iń do nui hoṛakʼ jãhãn dosge bạń ńametʼtaea.” Menkhan onko do artetʼ ãṭ aṛaṅte memenko ehopʼena, “Jihudi Prodes reakʼ sanam jaegareye cetʼakokante hoṛkoe ạulạuetʼkoa. Uni do Gạlil khon ehopʼkate ńitokʼ do nonḍeye hecʼakana.” Noa katha ańjomkate Pilạt doe kuliyana, Jisu do Gạlil Prodesren hoṛ kanae se baṅ. Ado Jisu Herodakʼ Prodesren kanae menteye baḍaeketʼ khan Pilạt do Herod ṭhene kolkadea. Un jokhecʼ Herod hõ Jerusalemregeye tahẽkana. Herod do Jisui ńelkedekhan ạḍiye rạskạyena. Uni do Jisu reaṅ ạḍi utạr kathae ańjomakatʼ tahẽkana, ar ḍher din khon uni ńele lạgitʼe monejoṅkan tahẽkana. Ar Herod doe asokʼkan tahẽkana, Jisu do jãhãn hahaṛa kạmiye udukʼaea. Uni do Jisu ḍhere kulikedea, menkhan Jisu do cetʼge bae roṛ ruạṛadea. Unre maraṅ naekeko ar sostor baḍaeko do onḍe teṅgokate ãṭ aṛaṅte hohoate Jisu dusiyeko ehopʼena. Unre Herod do Jisui bemanotkedea are siṛogadea, ar uniren sipạhiko hõko onkawadea. Ona tayom uni do ṭhosok kicricʼe horokʼadete Pilạt ṭhene kol ruạṛkadea. Noa lahare Herod ar Pilạt talare bạiri tahẽkana, menkhan enhilokʼ khon unkin do arhõkin gateyena. Unre Pilạt do maraṅ naekeko, mukhiyạko ar sanam hoṛko hoho jarwakateye metatʼkoa, “Ape do noa dusiyete iń ṭhenpe ạguakadea baṅma uni do raj birudre hoṛkoe idiyetʼkoa. Menkhan iń do ape samaṅreń kuliakadea. Ar uni birudre okako gohape emetʼkan ona reakʼ mitʼṭente hõ dusireye paṛaokʼa mente jãhãn porman bạń ńameda. Herod hõ uniakʼ jãhãn dos bae ńamletʼtaea, ente uni do abo ṭhene kol ruạṛkedea. Arpe ńeletʼ kangea, gocʼ ocokʼ leka jãhãn bạṛicʼ kạmi hõ uni do bae kạmi akada. Onate sạjại kateń aṛakʼkaea.” Uni do noa iạteye menkeda ente sen-parom porobre jaoge mitʼṭen kạidiye aṛakʼedekan tahẽkana. Menkhan hoṛko do mitʼ jomkaote hohoateko menkeda, “Uni do pharakeme, ar Barabba aṛakʼaleme.” Nui Barabba do nagraha bhitrire hul ar khũn iạte hajotreye bhorao ocoakan tahẽkana. Pilạt do Jisu aṛageye menjoṅkan tahẽkante hoṛko arhõ inạ kathageye metatʼkoa. Menkhan onko do noa menkate hohoko dhurạuena, “Kruskae me, kruskaeme.” Pilạt do tesar dhao arhõ hoṛkoe metatʼkoa, “Cedakʼ, nui do cetʼe dos akada? Iń do uniakʼ jãhãn dosge bạń ńeletʼtaea, one onate gujukʼ sạjại iń emdaṛeke. Onate sạjại emkateń aṛakʼgotʼkaea.” Menkhan hoṛko do Jisu kruskae lạgitʼ hohotegeko tahẽyena, ar mucạtʼre onkoakʼ hohoge sorosentakoa. Ar Pilạt do hoṛkoakʼ kathage manao lạgitʼe goṭakeda. Ado khũn ar hul iạte okoe do hajotreye bhorao ocoakan tahẽkan hoṛko do unigeko khojkedea; ar Pilạt hõ unigeye aṛakʼatʼkoa, ar Jisu do hoṛkoakʼ sana leka goje lạgitʼ onkoakʼ tireye jimạkadea. Ado Jisuko idiyede kan tahẽkanre Kureniren Simon ńutuman mitʼ hoṛ do ato secʼ khone oḍok hijukʼkan tahẽkana. Unre palṭonko do uniko sapʼpaṭetʼkedete tarenre krusko ladeadea jemon Jisu tayomte onaye gokʼ idiy. Ar ạḍi utạr hoṛ do Jisuko pańja idiyede tahẽkana. Onko modre maejiuko hõko tahẽkana. Onko do koṛam ceṭakʼ ceṭakʼteko rakʼ homoretʼ tahẽkana. Jisu do onko secʼ ạcurenteye metatʼkoa, “E Jerusalemren hoponerako, iń lạgitʼ do alope raga. Ape do apnar lạgitʼ ar aperen gidrạko lạgitʼ rakʼjoṅpe, ente nonkan din darae kana unre hoṛkoko mena, ‘bhạgangeako bạńjhiko ar baṅ janam akatʼko kukhiko ar baṅ nunuakawatʼko toako do.’ Unre hoṛko do maraṅ burukoko metakʼa, ‘De ale cetanre dhasaokʼpe,’ ar huḍiń buruko doko metakʼa, ‘De danaṅlepe.’ Dare hạriạṛ tahenregeko nonkayetʼ khan, enḍekhan dare rohoṛlenre cetʼ baṅ bako cekae!” Palṭonko do barea dusi hoṛ hõ gocʼkin lạgitʼ Jisu soṅgeteko idiketʼkinạ. Ado khạpriko metakʼ jaegako seṭeren khan Jisu ar unkin banar dusi hoṛ hõko krus ketʼkinạ, mitʼ hoṛ do Jisuakʼ jojomti secʼre ar eṭagicʼ do uniakʼ leṅgati secʼre. Unre Jisui menkeda, “E baba, ikạkakome, ente bako baḍaea cetʼko cekayeda.” Onko do gulibãṭkate Jisuakʼ kicricʼko hạṭińana. Ar hoṛko do teṅgokateko ńeńelkan tahẽkana. Sostor baḍaeko do Jisu siṛogadeteko menkeda, “Uni ma eṭakʼkoe bańcaoetʼko tahẽkan. Uni do Mạsi, Isorren bachaoicʼ kanae menkhan; acʼ baṛeye bańcaokʼma!” Ar Palṭonko hõ uni siṛogaeko ehopʼena. Onko do Jisu sirkạko ńũ ocoye lạgitʼ idiyadeteko metadea, “Jihudikoren raj kan khanem, enḍekhan amte bańcaokʼme.” Ar uniakʼ bohokʼ coṭre mitʼṭecʼ olakʼ tahẽkana, “Nui do Jihudikoren raj.” Ar okoekin dusi hoṛ krusrekin aka ocoakan tahẽkan unkin modre mitʼ hoṛ do Jisu siṛogadeteye menkeda, “Amge baṅ Mạsi do? Enḍekhan am ar ạliń bańcao bonme.” Unre eṭagicʼ doe menkeda, “Am do cetʼ Isor bam botorae kana? Am hõ coṅ onkan sạjạigem ńametʼkan. Alaṅ ma lek reakʼ ar kạmi akatʼ lekage sạjại laṅ ńametʼ, menkhan nui do cetʼ hõ bae dos akada.” Tayomte uni doe menkeda, “E Jisu, amakʼ rajosṭirem ruạṛ hecʼlenre iń hõ disạime baṛe.” Jisu do uni roṛ ruạṛadeteye metadea, “Sạrigeń metam kana, am do teheńge Paradesrem iń tulujokʼa.” Unre tikin khon tarasiń hạbicʼ siń cando do bae marsalleda ar goṭa disạm ńutge tahẽyena. Ar Jerusalem mundil reakʼ orwal do tala talate oṛecʼente bar hạṭińena. Jisu do ãṭ aṛaṅte hohoateye menkeda, “E Baba amakʼ tire ińakʼ jiwiń jimạyetʼkana.” Ar noae roṛketʼ khan jiwi oḍokentaea. Noa ńelte Romren subedar do Isor sarhaokedeteye menkeda, “Sạrige nui do bin dusạngeye tahẽkana.” Ar okoeko onḍeko jarwa akan tahẽkan onko do noa ghoṭna ńelte koṛam ceṭakʼ ceṭakʼte onḍe khonko ruạṛ calaoena. Ar tinạkʼ do Jisuko oromakade tahẽkan ar Gạlil khon uni soṅgeteko hecʼlen sanamkoge sạṅgińre teṅgokate jotowakʼko ńeletʼkan tahẽkana. Joseph ńutuman mitʼṭen bhage ar dhorom hoṛ do maraṅ bạisiren sosolhaicʼe tahẽkana. Uni do Arimạthiạko metakʼ Jihudikoakʼ mitʼṭen atoren hoṛe tahẽkana. Uni do Jisu babotre bạisiren hoṛko tulucʼ bae mitʼ mot daṛeada. Ente uni hõ Isorakʼ raj lạgitʼe koyokʼ hor akatʼ tahẽkana. Uni do Pilạt ṭhen senkate Jisuakʼ mạ̃ṛĩye koekeda. Ar krus khon mạ̃ṛĩ pheḍkate kicricʼteye bedhaokeda ar dhirire kholao akatʼ mitʼṭen topareye dohokada. Ona topare do okoege tishõ bako doho akatʼko tahẽkana. Ona din do tahẽkana jirạukʼ mãhã reakʼ sapṛaokʼ din. Ar jirạukʼ mãhã do ehopʼ lạgidokʼkan tahẽkana. Ar Gạlil khon okoeko maejiu Jisu sãoteko hecʼlen tahẽkan onko do Joseph tayom tayomte senkate topa ar Jisuakʼ mạ̃ṛĩ cetʼleka doho akan onako ńelkeda. Ona tayom ruạṛ senkate uniakʼ hoṛmore lạgitʼ mahkaokʼ sunum ar mosolako tearkeda. Ar ona tayom do Moseakʼ hukum leka jirạukʼ mãhã hilokʼ doko jirạuena. Ado hapta reakʼ pạhil hilokʼ ạḍi setakʼre onko maejiu do ona mahkaokʼ mosolawante topa ṭhenko calaoena. Onko do topa reakʼ duạr khon dhiri ocokʼ akatʼko ńelkeda. Menkhan topa bhitriteko boloyen khan Probhu Jisuakʼ hoṛmo do bako ńel ńamleda. Ar hahaṛakʼ tulucʼ ona reaṅko hudisetʼkan tahẽkanre bijli leka pĩṛĩtʼ pĩṛĩtʼ kicricʼ horokʼ akatʼ bar hoṛ onko samaṅre hecʼkatekin teṅgoyena. Onate maejiuko do botorteko ombakʼena. Unkin dokin metatʼkoa, “Jiwetʼicʼ do gocʼko talare cedakʼpe ńam baṛayede kana? Nonḍe do bạnuea; uni doe jiwetʼ beretʼ akana. Gạlilreye tahẽkanre okae metatʼpe tahẽkan ona baṛe disạipe. Uniye menletʼa, Manwa Hopon do kại hoṛkoakʼ tireko soprotea. Ar ona tayom doko kruskaea ar tesar hilokʼ uni doe jiwetʼ beredokʼa.” Unre onko do ona katha disạ hecʼatʼkoa. Ar topa khon ruạṛ senkate gelmitʼ celako ar eṭakʼ sanamko noa kathako baḍae ocoketʼkoa. Onko maejiuko modre Magdalini Mạriạm, Johana ar Jakob eṅgat Mạriạm hõkin tahẽkana. Ar onko sãoteko tahẽkan eṭakʼ maejiuko hõ noa sanamakʼ katha do apostolko ṭhenko lạikeda. Menkhan onako katha do onko ṭhen ạuṛiakʼ lekage bujhạuena. Onate onko maejiukoakʼ kathate bako pạtiạulena. Menkhan Patras doe beretʼente topa ṭhene ńir calaoena are oyoṅketʼ khan eken kicricʼkogeye ńel ńamkeda. Ar oka hoeakan onate hahaṛakʼ tulucʼe ruạṛ hecʼena. Enhilokʼge barea cela do Emaoko metakʼ mitʼṭen atotekin calakʼ kan tahẽkana. Ona ato do Jerusalem khon eae mail sạṅgińre tahẽkana. Ar oka hoeakan ona reakʼkin galmarao kan tahẽkana. Ona jokhecʼ Jisu do unkin ṭhene hecʼ sorente unkin tulucʼe sen idiyena. Ar unkinakʼ mẽtʼ do akoṭ akan tahẽkante Jisu bạkin orom daṛeadea. Unre Jisui metatʼkinạ, “Cetʼ ben galmarao idiyetʼ kana?” Unkin cela do mulingekin teṅgo tahẽyena. Unre unkin modre Kleopa ńutuman mitʼ hoṛ do Jisui kulikedea, “Am eskarge cetʼ Jerusalemre upriạ menama ar niạko dinre onḍe hoeakanakʼko bam baḍaea?” Jisu do unkine metatʼkinạ, “Cetʼ hoeakana?” Ado Nasaretren Jisu babotre hoe akanakʼkin lạiadea. Uni do nạbiye tahẽkana. Kạmire ar kathate Isor ar sanam hoṛko ṭhen daṛeanicʼe tahẽkana. Aleren maraṅ naekeko ar sostor baḍaeko do Romren hoṛkoakʼ tireko soprotledea jemon bicạrete gujukʼ sạjạiko emae. Ar Jihudi mukhiyạko do uniko kruskedea. Menkhan alele asokʼkan tahẽkana uni do Israel jạtkoe chaḍaokoa. Ar eken ona do baṅ, teheń noako ghoṭna do pe din hoyokʼkana. Arhõ ale modren adom maejiuko do aleko hahaṛa ocoketʼlea. Onko do ạḍi setakʼre Jisuakʼ topa ṭhenko senlena, menkhan uniakʼ hoṛmo onḍe do bako ńamletʼtaea. Ar ruạṛ hecʼkateko lạikeda, onko do serma goḍetko ńelketʼkinạ ar unkin serma goḍet dokin lạiatʼkoa Jisu doe jiwetʼgea. Unre ale soṅgete tahẽkanko modre adomko do topa ṭhen senkate maejiuko lạiletʼ tahẽkan lekageko ńelkeda, menkhan Jisu do bako ńel ńamledea.” Khange Jisu do unkine metatʼkinạ, “Aben do cetʼge baben bujhạu akada. Abenakʼ mon do goṛdho akana, onate nạbikoko roṛakatʼ katha hõ baben pạtiạuakʼ kana. Mạsi do cetʼ noako duk jomkate ṭhonok ńam reakʼ katha baṅ tahẽkantaea?” Inạ tayom uni do Moseakʼ ar joto nạbikoakʼ olakʼ khon ehopʼkate sanam sonot sostorre acʼ reaṅ okako olakan ona jotoe bujhạuatʼkinạ. Ado okaṭakʼ atotekin calakʼkan tahẽkan, ona ato sorko hecʼen khan Jisu do arhõ laha secʼe sen idikʼkan tahẽkana. Unre unkin do nehõradete kin metadea, “Ber hõe danaṅena, ar ạyubokʼkana. Am do ạliń tulucʼ tahenme.” Onate uni do unkin tulucʼ tahen lạgitʼ oṛakʼteye boloyena. Ado unkin tulucʼ jojome duṛupʼenre uni do piṭhạ ataṅkate Isore gunmanao joharadea are kecakʼketʼteye ematʼkinạ. Unre unkinakʼ mẽtʼ do jhicʼgotʼena ar Jisukin oromkedea, menkhan ona são sãote uni do ar bae ńelena. Ado ạkin talarekin menjoṅana, “Horre uni do alaṅ sãoteye galmaraokan tahẽkanre ar sonot sostor reakʼe bujhạu alaṅkan tahekanre mon do cetʼ baṅ lolokʼkan tahẽkana?” Ar beretʼkate unkin do Jerusalamte kin calaoena ar onko gelmitʼ celako sãote eṭakʼko hõ mitʼ jaegarekin ńel ńamketʼkoa. Onko doko galmaraokan tahẽkana, Probhu do sạrigeye jiwetʼ beretʼ akana ar Simon ṭhene ńel ocoakana. Ar unkin cela do horre hoelenakʼ kin baḍae ocoketʼkoa. Unkin do arhõkin lạikeda, piṭhại kecakʼetʼ tahẽkanre cetʼlekate kin oromkedea. Ado noako reaṅko galmaraokan tahẽkanre Jisu do hecʼkate onko talare teṅgoyente sanamkoe metatʼkoa, “Suluk ape ma.” Onko do bhutko ńele kana menteko hudisketʼte ạḍiko botorena. Jisu do onkoe metatʼkoa, “Cedakʼpe toras akana ar monre cedakʼpe digdhạkʼkana? Ińakʼ ti ar jaṅga ńelpe. Tunum legayińpe, ińkangeạń, ente bhutakʼ do iń leka jel ar jaṅ bạnukʼtakoa.” Noa katha menkate Jisu do acʼakʼ ti ar jaṅgae udukʼatʼkoa. Menkhan nunạkʼko rạskạyena arko hahaṛayena je, onko do pạtiạu hõ bako pạtiạu daṛeakʼkan tahẽkana. Unre Jisui kuliketʼkoa, “Nonḍe jãhãn jomakʼ menakʼtapea?” Onko do mitʼ kuṭrạ rapakʼ hakoko emadea. Uni do ona ataṅkate onko samaṅreye jomkeda. Ar ona tayome metatʼkoa, “Iń do ape sãote tahẽkanreń menleda, Mose reakʼ ạnre, nạbikoakʼ olakʼre ar sereńkore iń reakʼ okako katha olakan ona sanamakʼ do purạukʼtehõ purạukʼgea.” Uni do sonot sostor bujhạu ocoko lạgitʼ celakoakʼ bude jhicʼketʼtakoteye metatʼkoa, “Ol menakʼa, Mạsi do duk jojom hoyokʼtaea ar pe din hilokʼre gocʼko khone jiwetʼ beredokʼa. Arhõ ol menakʼa, Jerusalem khon ehopʼkate sanam jạtko ṭhen kại ikạkʼ lạgitʼ mon ạcur porcarokʼa. Apege noa sanamakʼko reaṅ goha do. Ńelpe, ińren Baba okaṭakʼ emokʼ reakʼe gokʼakatʼ, onań kolapea. Serma khon daṛe ạuripe ńam hạbicʼ ape do noa nagraharege tahẽ hataṛokʼpe.” Jisu do acʼren celako sãote Bethaniạ hạbicʼe calaoena. Ar onḍe uni do acʼakʼ ti tiạrkate onkoe bhoratʼkoa. Are bhorakokan tulucʼge onkoe bạgiatʼkoa ar sermateye rakapʼ idi ocoyena. Unre onko do uniko sewawadea ar ạḍi rạskạ salakʼ Jerusalemteko ruạṛ senena. Ar jaoge mundilre hecʼkate Isorko sarhaoedekan tahẽkana. Etohopʼrege kathatetʼ tahẽkana, ar kathatetʼ do Isor ṭhen tahẽkana ar kathatetʼ do acʼge Isore tahẽkana. Etohopʼrege uni do Isor sãoteye tahẽkana. Sanamakʼge ona katha hotete sirjạu akana, ar oka sirjạu akan onako modre okaṭakʼ hõ uni begor do baṅ sirjạu akana. Onare jion tahẽkana ar ona jionge manwakoakʼ marsal tahẽkana. Ona marsal do ńutre jolokʼ kana ar ńut do marsal bae bhagao daṛeada. Isor do Johan ńutuman mitʼṭen hoṛe kolledea. Uni do marsal reaṅ goha emokʼ lạgitʼe hecʼlena jemon jotoko uniakʼ goha ańjomkateko pạtiạukʼ. Johan acʼtetʼ do ona marsal bae tahẽkana menkhan ona marsal reakʼ goha emokʼe hecʼlena. Unige sạri marsal do, one okoe mimitʼ manwako marsale emakokan, uni do dhạrtiteye hecʼlena. Uni do dhạrtireye tahẽkana ar dhạrti do uni hotetege sirjạu akana, enhõ dhạrtiren manwa do bako oromledea. Uni do acʼrenko ṭhene hecʼlena, menkhan acʼren hoṛge bako ataṅledea. Menkhan tinạkʼ do unireko pạtiạuen arko ataṅkede onko mimitʼko do Isorren gidrạ hoyokʼ reakʼ ektiạriye ematʼkoa. Noko hoṛkoakʼ janam do mãyãm khonakʼ do baṅ hoeakana, ar jel reakʼ sana se herel hoṛakʼ sana khon hõ baṅ, bickom Isor khonge hoeakana. Ar ona kathatetʼge manwa jạt lekateye janamena ar aboko talareye girobasena. Isor Babaren sadher Hopon lekate uniakʼ oka ṭhonok menakʼ ona do alele ńelakada. Uni do daya ar sạriakʼteye perecʼgea. Johan do uni reaṅ ãṭ aṛaṅte goha emetʼteye meneda, “Nui kangeae uni do one okoe reaṅ iń menletʼ, iń tayomteye daraekan ar iń khone maraṅge, ente uni do iń ạuri khonge menaea.” Abo jotokoge uniakʼ ona perecʼakʼ khon daya cetan daya bon ńam akada. Mose hotete ạn-ạriko em hoelena, menkhan daya ar sạritetʼ do Jisu Mạsi hotetege hecʼakana. Isor do okoe hõ tisge bako ńelakadea. Ar acʼ sãote menae uni sadher Hopon, one okoe do acʼtetʼgeye Isorkan, unige uni doe sodor akadea. Jihudi mukhiạko do Jerusalem nagraha khon naekeko ar Liwiko Johan ṭhenko kolketʼko khan Johan do onko ṭhen gohae emkeda. Onko doko kulikedea, “Am dom okoe kana?” Johan do bae baṅleda bickom aṅgocketʼteye menkeda, “Iń do Mạsi doń baṅkana.” Unre onko do Johanko kulikedea, “Okoe enḍekhan? Eliạ kanam?” Uni doe menkeda, “Baṅ, iń do Eliạ hõń baṅkana.” Onkoko metadea, “Enḍekhan am do cetʼ uni nạbi kanam?” Uniye roṛ ruạrkeda, “Baṅ.” Adoko metadea, “Enḍekhan am dom okoe kana? Ente ale okoeko kolakatʼle sen ruạṛkate onko lạiako hoyokʼtalea. Ar am reaṅ do cetʼem menkea?” Johane menkeda, “Ińge ona hohokạnicʼ reakʼ aṛaṅ do, one okoe reaṅ Jesaea nạbiye menakatʼ, Hahaṅkarre mitʼṭen hohokạnicʼ reakʼ aṛaṅe baḍae ocokʼkana, Probhuakʼ hor sojhekataepe.” Johan ṭhen okoeko kol ocolen onko do Phạrusiko tahẽkana. Onko do Johanko kulikedea, “Am do Mạsi hõ baṅ, Eliạ hõ baṅ, ar uni nạbi hõm baṅkan khan enḍekhan cedakʼem bạptisetʼkoa?” Johan do onko Phạrusikoe metatʼkoa, “Iń ma dakʼteń bạptisetʼpe, menkhan apeko modre nonkan mitʼ goṭene teṅgo akana okoe do bape oromede. Unikangea uni hoṛ do, one okoe iń tayomte hijukʼ reakʼ katha tahẽkantae. Iń do uniakʼ panahe reakʼ phitạ raṛaetae lekgeń baṅkana.” Noa do Jordan gaḍa eṭakʼ aṛe reakʼ Bethaniạ atore hoelena one okare Johan doe bạptisetʼko tahẽkan. Dosar hilokʼ Johan do Jisu acʼ ṭhen hijukʼkane ńelkede khane menkeda, “Hạni ńelepe Isorren Bheḍa Hopon, one uni manwakoakʼ sanam kạiye gokʼ idiyetʼkan. Nui kangea uni do one okoe reakʼ iń lạiletʼ okoe do iń tayomteye daraekan ar iń khon hõe maraṅge, ente uni do iń ạuri khonge menaea. Iń do bạń oromakade tahẽkana, menkhan uni do Israelko ṭhen jemone sodor ocokʼ onate iń do hecʼkate dakʼteń bạptisetʼpea.” Ona tayom Johan do noa gohae emkeda, “Iń do serma khon sonot Jiu parwa leka pheḍ hijukʼte uni cetanre apʼakaniń ńelkedea. Uni do bạń oromakade tahẽkana, menkhan okoe dakʼte bạptisko lạgitʼe kolakadiń unigeye men akadińa, ‘okoe cetanre sonot Jiu pheḍ hijukʼkanem ńelea, unige sonot Jiuteye bạptispea.’ Iń do onań ńelakada ar gohań emetʼkana nui kangeae Isorren Hopon.” Dosar hilokʼ Johan ar acʼren barea cela do arhõ onḍekin tahẽkana. Unre Jisui dãṛã baṛaekan tahẽkanre Johane menkeda, “Hạni ńele ben, Isorren Bheḍa Hopon.” Ado Johan noa katha roroṛkin ańjomkede khan unkin banar cela do Jisukin pańjakedea. Jisu do ạcurente pańjakane ńelketʼkinteye metatʼkinạ, “Cetʼben ńam kana?” Johanren cela dokin kulikedea, “E Rabbi, (torjomate) E Guru, am do okarem tahen kana?” Jisui metatʼkinạ, “Dela hijukʼte ńel idiben.” Unre unkin do senkate Jisui tahenkan jaegakin ńelkeda ar enhilokʼ do uni sãotegekin tahẽyena. Unre okte do pon baja gan hoeakan tahẽkana. Johanakʼ katha ańjomkate okoekin cela Jisukin pańjalede unkin modre mitʼ hoṛakʼ ńutum do tahẽkana Andreas. Uni do Simon Patrasren boehae tahẽkana. Andreas do pạhilre acʼren boeha Simone sendra ńamkedeteye metadea, “Ạliń do Mạsi liń (torjomate do Krisṭ) ńam akadea.” Ar Andreas do Jisu ṭhen Simone ạgukedea. Jisu do Simon beṅgetʼ adeteye metadea, “Am do Johan hopon Simon kanam, menkhan am do kephasem hoho ocokʼa.” Noa ńutum reakʼ mane do Patras, metakʼme dhiri. Dosar hilokʼ Jisu do Gạlil Prodeshte calakʼe goṭawana. Un jokhecʼ Philipe ńelkede khan uniye metadea, “Dela pańjayińme ar ińren cela hoyokʼme.” Philip do Bethsaeda atoren hoṛe tahẽkana, Andreas ar Patras hõ ona atorengekin tahẽkana. Philip do Nathanaele sendra ńamkedeteye metadea, “Mose do okoeakʼ katha ạn-ạrikoreye ol oṭo akatʼ ar nạbiko hõ okoe reaṅko olakatʼ uni do alele ńam akadea. Uni do Nasareth atoren Josephren hopon Jisu kanae.” Nathanael do Philipe metadea, “Nasaret khon do cetʼ jãhãn bhageakʼ hecʼ daṛekokʼa? Philip do uniye metadea, “Dela hijukʼte ńeleme.” Jisu do Nathanael acʼ ṭhen hijukʼkane ńelkede khane menkeda, “Hạni ńelepe, mitʼṭen sạri Israel. Uniakʼ monre jãhãn phạsiạratetʼge bạnukʼ anaṅ.” Nathanael do Jisui kulikedea, “Cekate iń dom oromkedińa?” Jisui roṛ ruạṛadea, “Philip ạuriye hohoamre, loa dare buṭạrem tahẽkanreń ńelletʼmea.” Noate Nathanael do Jisui metadea, “E Guru, am do Isorren Hopon kanam ar amge Israelkoren raj do.” Jisu do uniye metadea, “Loa dare buṭạreń ńelletʼme reakʼ kathań metatʼme iạtem pạtiạukʼ kana? Noa khon arhõ aema daṛeakʼkom ńela.” Jisui menkeda, “Sạrigeń metapekana, serma jhicʼ akanpe ńela ar Isorren goḍetko do Manwa Hopon ṭhen pheḍ hijukʼ ar rakapʼ calakʼkanpe ńelkoa.” Niạ bar din tayom Gạlil reakʼ Kana nagrahare mitʼṭen bapla hoyena. Ar Jisuren eṅgat hõ onḍeye tahẽkana. Ona baplare Jisu ar acʼren celako hõko neota ocoakan tahẽkana. Ado darkha rasa cabayentako khan Jisuren eṅgat do Jisui metadea, “Darkha rasa do bạnukʼtakoa.” Jisui menkeda, “Henda go noa babotre iń tulucʼ amakʼ do cetʼ? Ińakʼ okte do ńit hõ ạuriakʼa.” Unre Jisuren eṅgattetʼ do sapʼ dapʼkoe metatʼkoa, “Uni jãhãnakʼgeye metape onage onkaepe.” Jihudikoakʼ cạli leka ona jaegare apʼ ạbukokʼ lạgitʼ dhiri reakʼ turui goṭen dakʼ hanḍhako doṛomakatʼ tahẽkana. Onako reakʼ mimitʼ goṭecʼre do babar pepe mon leka dakʼ sahobokʼa. Jisu do onko sapʼdapʼkoe metatʼkoa, “Noako hanḍhare dakʼ dul perejpe. Unre sapʼdapʼko do dakʼko dul perecʼkeda. Ona tayom onkoe metatʼkoa, “Ma ńitokʼ do ona khon thoṛa bhurạgpe ar bhojren mukhiạ idiaepe.” Khan sapʼ dapʼko doko onkakeda. Ado ona darkha rasa, one oka do dakʼ khon hoeakan, ona bhoj mukhiạe cakha ạikạukeda. Menkhan oka khon hecʼena ona do bae baḍaelakʼa; eken okoe dakʼko dul perecʼletʼ onkogeko baḍaekan tahẽkana. Onate bhojren mukhiạ do Jãwãe beṭa hohoadeteye metadea, “Sanam hoṛge pạhilre do bhage darkha rasako calao maṛaṅa. Ar ona tayomko ńu bhagaolen khan lahatenakʼ khon thoṛa kom bogeakʼko emakoa. Menkhan am do ńit hạbicʼ bhageakʼ darkha rasam dohoakada. Jisu do Gạlil reakʼ Kana nagrahare noage cinhạ lekate pạhil hahaṛa kạmiye kạmiketʼte acʼakʼ ṭhonoke sodorkeda. Onate celako do unireko pạtiạuena. Ona tayom Jisu do acʼren eṅgattetʼ, boehako ar celako sãote Kapharnạhum nagrahateye calaoena, menkhan onḍe onko do ḍher din bako tahẽlena. Jihudikoakʼ sen-parom porob soren khan Jisu do Jerusalemteye rakapʼ calaoena. Uni do mundilre ḍaṅgra, bheḍa, parwa ạkhrińko ar ṭaka-poesa bodoletʼkan hoṛko duṛupʼ akane ńamketʼkoa. Ado noakoe ńelketʼ khan uni do baber reakʼ mitʼṭen cạbuke benaokeda, ar onate sanam ḍaṅgra, bheḍa ar hoṛko onḍe khone laga oḍokketʼkoa. Ar ṭaka bodolkoakʼ poesakoe chiṭạuketʼte mạciko hõe ulṭạu giḍikatʼtakoa. Uni do parwa ạkhrińkoe metatʼkoa “Men nonḍe khon noako idipe. Iń Babawakʼ oṛakʼ do bạnij-bepar oṛakʼ alope benaoa.” Onate celako do sonot sostorre olakan uniakʼ noa katha disạ hecʼatʼkoa: Amakʼ oṛakʼ lạgitʼ ińakʼ oka khạndri dulạṛtiń, ona dulạṛge ińakʼ ontor doe jal jalaotińạ. Unre Jihudi mukhiạko do Jisuko kulikedea, “Noako kạmi reakʼ ektiạriạ je sạrige menakʼtam ona reakʼ cinhạ lekate cetʼ hahaṛa kạmim udukʼ daṛealea?” Jisui roṛ ruạṛatʼkoa, “Isorakʼ oṛakʼ dhaṅ dhaserpe, ar pe mãhãte ona do arhõń beretʼ ruạṛa.” Noa katha ańjomkate Jihudi mukhiạko ko metadea, “Noa mundil benaote pongel turui bochor lagaolena, ar am do cetʼ noa pe mãhãtem beretʼ ruạṛa?” Jisu do menkhan Isorakʼ oṛakʼ mente acʼakʼ hoṛmo reakʼ kathageye roṛletʼa. Onate Jisu gocʼko khone jiwetʼ beretʼenre celakoko disạkeda uni do ona kathageye roṛletʼa mente. Unre celako do sonot sostor reakʼ katha ar Jisu okae roṛletʼ onareko pạtiạuena. Ado sen-parom porobre Jisu Jerusalemre tahẽkate okako hahaṛa kạmiye kạmiketʼ ona ńelte ạḍi utạr hoṛ do unireko pạtiạuena. Menkhan Jisu do onko ṭhen bae sodorlena, ente uni do joto hoṛe baḍae akatʼko tahẽkana. Ar manwa reaṅ okoeakʼ goha hõ baṅ jạruṛadea, ente manwakoakʼ monre oka menakʼ ona doe baḍaekan tahẽkana. Phạrusiko modre Nikodemus ńutuman Jihudikoren mitʼṭen mukhiạ hoṛe tahẽkana. Uni do mitʼ din ńindạ jokhecʼ Jisu ṭhen hecʼkateye menkeda, “E Guru, alele baḍaea am do mitʼṭen cecetʼicʼ leka Isor ṭhen khonem hecʼakana, ente okako hahaṛawakʼ kom kạmikan, ona do Isor soṅgete bae tahẽlen khan okoe hõ ohoe kạmi daṛelea.” Jisu do Nikodemuse metadea, “Sạrigeń metam kana, jãhãe hoṛ dosar karte bae janamlen khan Isorakʼ raj do ohoe ńel daṛelea.” Unre Nikodemus do uniye metadea, “Manwa do haṛamkate cekate arhõe janam daṛekokʼa? Dosar dhao eṅgatakʼ kukhire bolo ruạṛkate uni do cetʼ arhõe janam daṛeakʼa?” Jisui menkeda, “Sạrigeń metamkana, dakʼ ar sonot Jiu khon bae janamlen khan okoe hõ Isorakʼ rajte ohoe bolo daṛelena. Manwa khon janamicʼ do manwage ar Jiu khon janamicʼ do Jiuge. Dosar karte janamokʼ hoyokʼtapea menteń metatʼmete alom hahaṛakʼa. Hoe do oka secʼ sanaye ontegeye hoeyeda ar ona reakʼ saḍetetʼem ańjoma, menkhan oka khon hijukʼ kana ar okate calakʼa ona do bam baḍaea. Sonot Jiu khon okoeakʼ janam hoeakan onko do ṭhik onkageko hoyokʼa.” Nikodemus do Jisui kulikedea, “Noa do cekate hoedaṛekokʼa?” Unre Jisu do uniye metadea, “Israelkoren guru hoekatere hõ cetʼ noako bam bujhạueda?” Sạrigeń metamkana, ale do okale baḍae akatʼ onagele roṛeda ar okale ńelakatʼ ona reaṅge gohale emeda, menkhan ape do aleakʼ goha bape luturakʼ kana. Dhạrti reakʼakʼkoń lạiapere bape pạtiạukʼkan khan serma reakʼakʼ iń lạiapere cekatepe pạtiạukokʼa? Sermare okoeye tahenkan ar serma khon okoeye hecʼakan uni Manwa Hopon chaḍa ar okoe hõ sermate do bako rakapʼ akana. Cetʼleka Mose do hahaṅkarre bińe rakapʼlede onkage Manwa Hopon hõe rakapʼ ocokʼa, jemon jãhãege unireye pạtiạukʼ uni do jaejug jion tahentae. “Isor do manwa nunạkʼe dulạṛketʼkoa acʼren eskar janam Hopongeye emkedea, jemon unire pạtiạukʼ mitʼke mitʼ hoṛ aloko nosṭokʼ bickom jaejug jion tahentako. Uni do manwako dusire paṛaoko lạgitʼ acʼren Hopon bae kolakadea bickom Hopon hotete jemon kại khon bańcaoko ńam ona lạgitʼgeye kolakadea. Okoe uni Hoponreye pạtiạukʼ uniakʼ do jãhãn bicạr baṅ hoyokʼtaea, menkhan okoe bae pạtiạukʼ uni do dusi kanae mente laharegeye lekha ocoakana, ente uni do Isorren eskar janam Hoponre bae pạtiạu akana. Uni do dusi menteye lekha ocoakana ente dhạrtire marsal hecʼ akana, menkhan manwakoakʼ kạmiko bạṛicʼgete manwa do marsal khon ńutge bạ̃ṛtiko dulạṛetʼkana. Okoe bạṛicʼakʼe kạmikan uni do marsale hirkhạwakʼ kana. Ar bạṛicʼ kạmiko sodorokʼtae iạte marsal ṭhen do bae hijukʼ kana. Menkhan okoe sạri horteye calakʼkan uni do marsal ṭhene hijukʼ kana jemon uniakʼ kạmiko Isorakʼ sanaleka hoeakana mente sodorokʼtae.” Noa tayom Jisu ar uniren celako do Jihudạ disạmteko calaoena. Ar onḍe uni do acʼren celako sãote thoṛa dine tahẽyena ar hoṛko bạptiskoe ehopʼena. Unre Salem ńutumanakʼ mitʼṭen ato sor ṭhen Aenonko metakʼ mitʼṭen jaegare Johan hõe bạptisetʼko tahẽkana, ente ona jaegare do ḍher dakʼ tahẽkana ar hoṛko hõ hecʼkateko bạptis ocokʼkan tahẽkana. Ar un hạbicʼ Johan hõ hajotre bae bhorao ocoakan tahẽkana. Ona jokhecʼ dhorom reakʼ niạm lekate saphakʼ babotre Johanren celako do mitʼṭen Jihudi sãoteko reṭepeṭekʼkan tahẽkana. Onko do Johan ṭhen hecʼenteko menkeda, “E Guru, okoe do Jordan hanasare am sãoteye tahẽkan ar okoeṭakʼ reakʼ goham emletʼ, ńelme, uni doe bạptisetʼkoa ar sanam hoṛ uni ṭhengeko calakʼkana.” Unre Johane roṛ ruạṛkeda, “Serma khon baṅ emlen khan okoe hõ cetʼge ohoe ńam daṛelea. Apege roroṛpe ańjomakadiń je, Mạsi doń baṅkana, menkhan uni lahateń kol ocoakana. Okoe ṭhen bạhui jimạ ocoakan uni kangeae jãwãe do. Ar lomta koṛa do jãwãe beṭawakʼ kathae ańjoma ar uniakʼ aṛaṅ ańjomteye rạskạkʼa. Onkage ińakʼ rạskạ hõ teheń do purạu akantińạ. Uni do maraṅ idikʼtege hoyokʼtaea ar iń do ocogokʼ hoyokʼtińạ.” Coṭ khon hijukʼ kanicʼ do sanamko cetanren kanae. Okoe dhạrti khone hijukʼkan uni do dhạrtiren kanae, ar uni do dhạrti reakʼ kathageye roṛa. Menkhan okoe serma khone hijukʼkan uni do sanamko cetanren kanae. Uni do okae ńel akatʼ ar okae ańjomakatʼ ona reakʼ gohageye ema, menkhan okoe hõ uniakʼ goha do bako aṅgoctaea. Okoe uniakʼ gohae aṅgoc akatʼ uni do ona hotetegeye sodoreda je, Isor okae men ona do sạrikana mente. Isor okoeye kolakade uni do Isorakʼ kathageye roṛa, ente Isor do sonot Jiu soṅkate bae emekana. Baba do Hopone dulạṛede kana ar uniakʼ tirege jotowakʼe emakada. Hoponre pạtiạukʼicʼ do jaejug jion menakʼtaea, menkhan Hopon reakʼ bebataoicʼ do jion ohoe ńamlea, bickom Isorakʼ edre uni cetanre paṛaokʼa. Jisu do Johan khon hõ bạ̃ṛtiye celayetʼko are bạptisetʼkokan ona do Phạrusikoko ańjomakatʼ tahẽkana. Jisu do apnarte bae bạptisetʼko tahẽkana menkhan uniren celakogeko bạptisetʼko tahẽkana. Ado Jisu onae baḍaeketʼ khan Jihudạ Prodeshe bạgiatʼe arhõ Gạlilteye calaoena. Ar Gạlilteye calakʼkan tahẽkan jokhecʼ uni do Samariạ disạm talate sen paromokʼ hoyentaea. Uni do Samariạkoakʼ Sukhạrko metakʼ mitʼṭen nagrahateye hecʼena. Noa nagraha do Jakob acʼren hopon Joseph okaṭakʼ jaegae emade tahẽkan ona sorrege tahẽkana. Ona jaegare Jakobakʼ mitʼṭen kũń tahẽkana. Jisu do dãṛã dãṛãteye laṅgayen khan ona kũń aṛereye duṛupʼena. Unre ber do tikin amdaj tahẽkana. Ado Jisuren celako atote jomakʼ kirińko calao akan tahẽkanre mitʼṭen Samariạ maejiu do dakʼ loe hecʼena. Jisu do uniye metadea, “Den ńũi lạgitʼ dakʼ imạńme.” Uni Samariạ maejiue menkeda, “Iń mań Samariạ maejiukan. Ar Jihudi hoekate cekate am do dakʼem koeyeń kana?” Maejiu do noa iạteye menkeda ente Jihudi ar Samariạko do bako duṛupʼ teṅgonkan tahẽkana. Jisu do uni maejiue roṛ ruạṛadea, “Isorakʼ danem baḍaele khan ar okoe am ṭhen dakʼe kokoe kana enḍekhan amge honaṅ uni ṭhen dakʼem koekea ar uni do jiwetʼ dakʼe emkema.” Maejiue menkeda, “Menkhan amakʼ ma loloteakʼ hõ coṅ bạnukʼtam ar kũń ma khạndrige. Enḍekhan oka khon ona jiwetʼ dakʼ dom ńamkeda? Aleren baba Jakob khon do bam maraṅa. Noa kũń do unigeye emakatʼlea. Uni ar acʼren hoponko do noa kũń reakʼ dakʼko ńũiyetʼ tahẽkana ar uniren mihũ meromko hõko ńũiyetʼ tahẽkana.” Unre Jisui menkeda, “Jãhãege noa dakʼe ńũi uni do arhõ tetaṅea. Menkhan iń oka dakʼiń emokʼ, ar okoe onae ńũi uni do tisge oho tetaṅlea. Ona dakʼ do uniakʼ ontorre jaejug jion lạgitʼ bhumbukokʼkan jharna leka hoyokʼa.” Onate uni maejiu do Jisui metadea, “Enḍekhan ona dakʼ baṛe imạńme jemon alo tetaṅiń ar nonḍe dakʼ lo hijukʼ hõ alo hoyokʼ tiń.” Jisu do uniye metadea, “Do calakʼme, ar amren jãwãe hoho ạguyem.” Maejiue menkeda, “Jãwãe do bạnuitińạ.” Jisu do uniye metadea, “Ṭhikgem menakada jãwãe bạnuitama, ente niạ lahare amren do mõṛẽ goṭen jãwãeko tahẽkantama, ar ńit okoe menae uni hõ amren jãwãe doe baṅkana. Am do sạri kathagem menakada.” Unre maejiu do Jisui metadea, “Ńit iń baḍae daṛeakʼ kana am do mitʼṭen nạbi kanam. Aleren hapṛamko do noa burureko sewaletʼ tahẽkana, menkhan apepe meneda, Jerusalemrege sewa do lek kana.” Jisu do uniye metadea, “Ańjomme ar ińakʼ kathare pạtiạukʼme, ente nonkan okte hijukʼ kana unre Isor Baba do noa burure hõ baṅ ar Jerusalemre hõ bape sewawaea. Ente ape do okaṭakʼ bape baḍaekan onape sewawakʼ kana, menkhan ale okaṭakʼle baḍaeakatʼ onagele sewawakʼ kana, ente kại khon bańcaokʼ do Jihudiko khonge hecʼakana. Menkhan okte daraekana, ar ńit hõ kangea, one unre sạri sewako do Jiu ar sạriakʼte Babako sewawaea. Ar Baba hõ nonkan sewakogeye ńam baṛayetʼkoa. Isor doe Jiu kana; ar okoe uniko sewawaekan, onko do Jiu ar sạriakʼte sewa lek takoa.” Unre uni maejiue menkeda, “Baḍaegeạń, Mạsi, okoe do Krisṭko metaekan uni doe darae kana. Are hecʼlenre sanamakʼe baḍae ocobona.” Jisu do uniye metadea, “Iń kangeạń uni do, one okoe am tulucʼe galmaraokan.” Ar inạkʼtege Jisuren celako doko hecʼena, ar mitʼṭen maejiu tulucʼ Jisu galmaraoko ńelkede khan onko doko hahaṛayena. Menkhan enhõ okoege bako metadea, “Am do cetʼem khojkana se cedakʼ uni tulucʼ dom galmaraoeda?” Unre maejiu do acʼakʼ kanḍae bạgi oṭoatʼte atoteye senena ar hoṛkoe metatʼkoa, “Dela hijukʼte mitʼṭen hoṛ ńelepe. Uni do ińiń ceka akatʼ jotowakʼe lại ạdińa. Baṅ do nuigeye Mạsikan?” Onate hoṛko do ato khon oḍokkate Jisu ṭhen hijukʼko ehopʼena. Ar inạ takre celako do nehõradeteko metadea, “E Guru, thoṛa jom maṛaṅlem.” Jisu do onkoe metatʼkoa, “Iń ṭhen nonkan jomakʼ menakʼa one ona reakʼ ape do bape baḍaekan.” Onate celako doko menana, “Enḍekhan cetʼ jãhãe jomakʼko ạgu akawadea?” Unre Jisui metatʼkoa, “Okoeye kol akadiń uniakʼ sanaleka senakʼ ar uniakʼ kạmi purạutaege hoyokʼ kana ińakʼ jomakʼ do. Ape do cetʼ bape meneda, ‘ar pon cando khange phosol samṭao din do seṭerokʼa mente?’ Menkhan ińiń metapekana, mitʼ dhao khetko secʼ beṅgetʼakʼpe, phosol samṭao okte do hoeakana. Okoe phosole samṭaoetʼkan uni do ńitge kuṛạiye ńameda ar jaejug jion lạgitʼ phosole doho jarwayeda. Onate itạ erokʼicʼ ar phosol samṭaoicʼ, unkin banarge mitʼ sãotekin rạskạkʼ kana. Noate sạbudokʼ kana, ‘mitʼ hoṛ doe era ar eṭagicʼ doe samṭaoa.’ Iń do nonkan phosol samṭaoiń kolketʼpea one ona lạgitʼ ape do bape khaṭao akan. Ente eṭakʼko doko khaṭao akana ar ape do ona khaṭaoakʼ reakʼ phosolpe samṭaoeda.” Ado okoe maejiue gohayetʼ tahẽkan, acʼe ceka akatʼ ona jotowakʼ do uniye lạiakada mente, onate uniakʼ katha ańjomkate ona atoren ạḍi utạr Samariạ hoṛ do Jisureko pạtiạuena. Onko do Jisu ṭhen hecʼkate ako sãote tahen lạgitʼko nehõradea. Onate Jisu do onḍe bar dine tahẽyena. Unre uniakʼ katha ańjomkate arhõ ạḍi utạr hoṛko pạtiạuena. Onko do uni maejiuko metadea, “Ńitokʼ do eken amakʼ katha iạtele pạtiạukʼ kana ona do baṅ, menkhan uniakʼ katha ańjomkatele bujhạu daṛeakʼ kana, sạrige uni do manwakoren babańcaoicʼ kanae.” Ado one Jisui menletʼ tahẽkan baṅma, nij disạmre nạbiko do manot bako ńama; onate ona katha purạukʼ lạgitʼ uni do Samariạre bar din tahẽkate onḍe khon Gạlilteye calaoena. Ar Gạlilreye seṭeren khan Gạlilrenko do uniko ataṅ daramkedea. Ente porob jokhecʼ okoeko hoṛ Jerusalemteko senlen onko do Jisui kạmiletʼakʼ jotowakʼko ńelleda. Jisu do arhõ Gạlil reakʼ ona Kana atoteye calaoena. Nonḍege uni do dakʼe darkha rasa ocoletʼ tahẽkana. Ar Gạlil reakʼ Kapharnạhum nagrahare mitʼṭen raj kạmiạ hoṛren hopontetʼ doe ruạ kạhil akan tahẽkana. Uni raj kạmiạ hoṛ do Jisu Jihudiạ khon Gạlilteye hecʼakana menteye baḍaeketʼ khan uni do Jisu ṭhen senkateye nehõrena jemon Kapharnạhumte senkate gidrạye bogeye. Unre uniren gidrạ do gujukʼ dạkhile tahẽkana. Jisu do uni raj kạmiạ hoṛe metadea, “Jãhãn cinhạ se hahaṛa kạmi bape ńellekhan ape do okalekate hõ ohope pạtiạulena.” Unre uni raj kạmiạ hoṛ doe menkeda, “Ma dayakate ińren gidrạ ạuriye gujukʼrege hijukʼme.” Jisu do uniye metadea, “Do calakʼme, hoponme doe bogeyena.” Ar uni kạmiạ hoṛ do Jisuakʼ kathare pạtiạuenteye calaoena. Ado uni raj kạmiạ hoṛ do tinre oṛakʼe ruạṛ senokʼkan tahẽkana unre horrege uniren gutiko do hecʼkateko metadea, “Amren hoponme doe bogeyena,” Uni doe kuliketʼkoa, “Oka okteye bogeyena?” Adoko lạiadea, “Hola tikin mitʼ baja okte ruạ do chuṭạuentaea.” Ar inạtege gidrạren apattetʼe doe bujhạukeda, ṭhik ona okterege Jisu doe metade tahẽkana, “Amren gidrạ doe bogeyena.” Unre acʼ ar acʼakʼ gharońjren sanamko do Jisureko pạtiạuena. Ar Jihudạ khon Gạlilre hecʼen tayom Jisu do dosar dhao noa hahaṛa kạmiye kạmikeda. Niạ tayom Jisu do Jerusalemteye calaoena, ente ona jokhecʼ Jihudikoakʼ mitʼṭen porob tahẽkana. Jerusalemre bhiḍi-phaṭokʼ ṭhen mitʼṭen pukhri menakʼa; onḍe do mõṛẽ goṭen umul akatʼ jaega menakʼa. Ibri pạrsite ona pukhri reakʼ ńutum do Bethsaedako metakʼkana. Ar onako jaegare ạḍi utạr rugiko tahẽnkan tahẽkana. Kãṛãko, leḍhako, ar hoṛmo rohoṛ caba akan hoṛko hõ onko modreko tahẽkana. Ar mitʼṭen serma goḍet do okte oktere ona pukhrire pheḍkate dakʼe laṛao oṭokakʼkan tahẽkana ar ona tayom pạhilre okoe ona dakʼreye pheḍ maṛaṅokʼ uni do joto lekan rog khone boge utạrokʼ kan tahẽkana. Ar rugiko do dakʼ laṛaokʼ reakʼ koyokʼ horreko tahẽnkan tahẽkana. Onḍe do pe gel irạl bochor khon rogteye jạbun akan mitʼṭen hoṛe tahẽkana. Ar ḍher din khon onḍe menaea mente Jisui baḍaeketʼ khan uniye kulikedea, “Am do cetʼ bogekʼ sanayetʼmea?” Ruạkʼicʼ doe roṛ ruạṛkeda, “E baba, ińren do okoe hõ bạnukʼkoa, one okoe do dakʼ laṛaokʼ são sãote pukhriteko pheḍkạń. Ente ińiń pheḍokʼ pheḍokʼtege iń khon lahare ar mitʼ hoṛe pheḍ godokʼ kana.” Jisu do uniye metadea, “Ma beretʼme, ar amakʼ aṭetʼ kuṭuṅtam ar taṛamme.” Unre uni hoṛ doe boge utạrena ar acʼakʼ aṭetʼakʼ kuṭuṅkate taṛame ehopʼena. Ar enhilokʼ do jirạukʼ mãhã tahẽkana. Onate Jihudi mukhiạko do uni hoṛko metadea, “Teheń do jirạukʼ mãhã kana; ar dhorom reakʼ niạm lekate aṭetʼakʼ kuṭuṅ baṛae do lek baṅkana.” Unre uni do mukhiyạkoe metatʼkoa, “Menkhan okoeye boge akadiń unige ‘aṭetʼ kuṭuṅkate taṛam baṛaeye metadińạ.’ ” Onko do uni hoṛko kulikedea, “Okoe kanae uni hoṛ do, oneye metatʼme, ‘amakʼ aṭetʼakʼ kuṭuṅkate taṛamme?’ ” Menkhan boge ocoyenicʼ do bae baḍaeleda uni doe okoe kana mente, ente ona jaegare ạḍi utạr hoṛko bhiṛakatʼ tahẽkante Jisu do onḍe khone calaoena. Ona tayom Jisu do mundilre uni hoṛ ńel ńamkedeteye metadea, “Ńelme, am dom boge akana. Ar alom kạiya, jemon jãhãnakʼ bạṛicʼ alo hoyokʼtam.” Unre uni hoṛ do calaokate Jihudi mukhiyạkoe lạiatʼkoa, acʼ okoeye bogeakade uni doe Jisu kana. Jirạukʼ mãhãre Jisu do noakoe kạmiketʼte Jihudi mukhiạko do goje lạgitʼko kurumuṭukeda. Unre uni do onko mukhiyạkoe metatʼkoa, “Ińren Baba do jao ghuṛiye kạmi kana ar iń hoń onkayeda.” Jisuakʼ noa katha iạte mukhiạko do goje reakʼ artetʼ dão ńam baṛaeko ehopʼena, ente uni do eken jirạukʼ mãhã reakʼ niạme rạputʼeda ona do baṅ, bickom Isor do acʼren Baba menteye metaekante acʼ do Isor somane benaokʼkana. Onate Jisu do onko mukhiyạkoe metatʼkoa, “Sạrigeń metapekana, Hopon do acʼte cetʼge bae ceka daṛeakʼa. Baba okaṭakʼ kạmikane ńelekan eken onageye daṛeakʼa, ente Baba okae cekae Hopon hõ onageye onkayeda. Baba do Hopone dulạṛede kana ar acʼ jãhãnakʼgeye cekayetʼ, ona jotowakʼge Hopone ńel ocoyedea. Uni do noako khon hõ maraṅ maraṅakʼ kạmiko Hopone udukʼaea, jemon Hoponakʼ sanam kạmiko ńeltepe hahaṛakʼ. Baba do cetʼleka gocʼko jiwi emkateye beretʼetʼko onkage Hopon hõ jãhãerege sanayede unigeye jiwetʼ edekana. Baba do okoe hõ bae bicạrkoa, menkhan joto bicạr reakʼ dạyik do Hopone emakawadea, Baba cetʼlekako manotede onkage jemon Hopon hõko manote. Hopon okoe bae manotede, uni do kolakadińicʼ Baba hõ bae manotea. “Sạrigeń metapekana, Ińakʼ katha okoeye ańjom ar kol akadińicʼreye pạtiạukʼ uni do jaejug jion menakʼtaea. Uni do dusi mente bae lekhakʼa, ente uni do moron khon jionteye parom akana. Sạrigeń metapekana, nonkan okte hijukʼ kana, bickom ńitokʼkangea, tinre gocʼko do Isorren Hoponakʼ aṛaṅko ańjoma ar tinạkʼko ańjom onko doko jiwedokʼa. Ente, Baba do cetʼleka acʼre jion menakʼtae onkage uni do Hopon hõ jion tahentae lạgitʼe emakawadea. Baba do manwa bicạrko lạgitʼ ektiạri Hopone emakawadea, ente uni doe Manwa Hopon kana. Noa katha ańjomkate alope hahaṛakʼa, ente nonkan okte daraekana, okoe topare menakʼko onko sanamkoge manwa Hoponakʼ aṛaṅ ańjomteko oḍokʼ hijukʼa. Okoe bhageko kạmi akatʼ onko do jion ńam lạgitʼko beredokʼa, ar okoe bạṛicʼakʼ kạmikote okteko khemao akatʼ onko do sạjạiyokʼ lạgitʼgeko beredokʼa. Iń do apnarte cetʼge bạń ceka daṛeakʼa; cetʼlekań ańjoma onkageń bicạra. Iń do hok reakʼgeń bicạra, ente ińakʼ sana leka kạmi do bạń khojkana menkhan okoeye kolakadiń uniakʼ menjoṅ lekageń kạmia. Ińge apnar reaṅ gohań emle khan ona goha sạriakʼ do baṅkana. Eṭakʼ mitʼ hoṛ menaea okoe do iń reaṅ gohae emetʼkan, ar ińiń baḍaea uni oka gohae em ona do sạrigea. Ape do Johan ṭhen kathape kolleda, ar uni do sạri gohageye emakada. Iń do manwakoakʼ gohare bạń ṭehãḍokʼ kana, menkhan ape jemon kại khon bańcaope ńam onate noako katha doń roṛeda. Johange ona jolokʼkan diuheye tahẽkana one okaṭakʼ do ḍig ḍigạukʼkan tahẽkan; ar ape do thoṛa okte lạgitʼ uniakʼ ona marsalre hulạsokʼpe kusilena. Menkhan Johanakʼ khon hõ ińakʼ do maraṅ goha menakʼtińạ, ente okako kạmi Babae emakawạdiń onakogeń kạmi kana. Ar onako do iń reaṅ noa gohae emeda je, Babageye kolakadińạ. Uni Babage, one okoe do ińe kolakadiń, uni acʼge iń reaṅ gohae emakada. Ape do tis hõ uniakʼ aṛaṅ bape ańjom akatʼtaea ar mẽtʼãhã hõ bape ńelakada. Ona chaḍa uniakʼ kathako do apeakʼ ontorre baṅ tahen kana, ente okoeye kolakade unire bape pạtiạukʼkana. Ape do sonot sostorkope ḍunḍhạueda, entepe hudiseda ona hotetege jaejug jionpe ńama. Menkhan ona sostor ma coṅ iń reaṅge gohae emetʼkan; enrehõ ape do jion ńam lạgitʼ iń ṭhen hijukʼ baṅ sanayetʼpea. “Manwakoakʼ sabasi ńam lạgitʼ do bạń kurumuṭuyeda, menkhan iń do apeń baḍae akatʼpea. Ińiń baḍaea apeakʼ ontorre Isorakʼ dulạṛ do bạnukʼtapea. Iń do ińren Baba ńutumteń hecʼakana ar bape aṅgocedeń kana; menkhan eṭakʼ jãhãe acʼ nijakʼ ńutumteye hecʼlen khan uni dope aṅgocea. Ape do eṭakʼko ṭhen khon sarhao ocokʼpe ńamkana, menkhan okaṭakʼ sarhao eken Isor ṭhen khon ńamokʼ ona reakʼ do bape kurumuṭuyeda. Ar noa tayom do cekatepe pạtiạu daṛekokʼa? Alope hudisa, Baba ṭheniń dusipea; menkhan okoe Mose ṭhenpe as akan uni Mosege ape doe dusipea. Ape do Mosepe pạtiạuae khan honaṅ ińrehõpe pạtiạukokʼa, ente Mose do iń reaṅgeye olakada. Menkhan uniakʼ olakʼge bape pạtiạuakʼkan khan cekate ińakʼ kathako dope pạtiạuakʼa?” Ona tayom Jisu do Gạlil doreão hanasae parom calaoena. Noa doreãoge Tiberias doreão hõko metakʼkana. Ar ạḍi utạr hoṛ do Jisuko pańja idikedea, ente rugiko cetanre cinhạ kạmi lekate okako hahaṛa kạmiye kạmi akatʼ tahẽkan onko do onakoko ńelakatʼ tahẽkana. Ado Jisu ar acʼren celako do mitʼṭen burure rakapʼenteko duṛupʼena. Unre Jihudikoakʼ sen-parom porob do sor hecʼakan tahẽkana. Ado Jisui beṅgetʼ rakapʼketʼ khan gadel hoṛ acʼ ṭhen hijukʼkane ńelketʼkoa. Uni do Philipe metadea, “Noko hoṛ jom ocoko lạgitʼ piṭhạ do oka khon bon kiriń ạgukea?” Uni do Philip biḍạue lạgitʼ noa kathae metadea, ente cetʼe cekaea ona doe baḍaekan tahẽkana. Philip do Jisui metadea, “Onko mimitʼ hoṛ jauḍicʼkateko ńamlere hõ bar sae Dinar reakʼ piṭhạte hõ ohoko anṭaolena.” Jisuren celako modre mitʼ hoṛakʼ ńutum do Andreas tahẽkana. Uni do Simon Patrasren boehae tahẽkana. Uni do Jisui metadea, “Nonḍe mitʼṭen huḍiń koṛa ṭhen barea kạṭicʼ hako ar mõṛẽ goṭen jao reakʼ piṭhạ menakʼa, menkhan noate nunạkʼ hoṛakʼ do cetʼ hoyokʼa?” Jisui menkeda, “Hoṛko duṛupʼ ocokope.” Ona jaegare ḍher ghãs tahẽkana. Onate gadel hoṛ do ona cetanregeko duṛupʼena. Onḍe do mõṛẽ hajar herel hoṛko tahẽkana. Ona tayom Jisu do onako piṭhạ ataṅkate Isore gun manao joharadea ar duṛupʼ akankoe hạṭińatʼkoa. Onkage uni do hako reakʼ hõe ematʼkoa. Ar okoe tinạkʼko khojketʼ unạkʼgeko ńamkeda. Adoko jom biyen khan Jisu do acʼren celakoe metatʼkoa, “Sarecʼakʼ kecakʼko jarwaepe jemon cetʼge alo nosṭokʼ.” Adoko jomketʼ tayom ona mõṛẽ goṭen piṭhạ reakʼ okako sarecʼ tahẽkan celako do onako halaṅ samṭaoketʼte gelbar khạclạkʼko perecʼkeda. Jisuakʼ noa hahaṛa kạmi ńelte gadel hoṛkoko menkeda, “Dhạrtite okoeṭakʼ nạbi hijukʼ reakʼ katha menakʼtae sạrige uni nạbi doe nuikangea.” Noate Jisui bujhạukeda, hoṛko do raje lạgitʼko jormoṭe lạgidokʼ kana. Onate acʼ eskarge uni do arhõ ona buruteye rakapʼ calaoena. Ạyupʼen khan Jisuren celako do doreão aṛeteko calaoena, ar mitʼṭen lạukạre decʼkate onko do Kapharnạhum nagrahate senokʼ lạgitʼ doreão paromokʼko ehopʼena. Unre do ńut akan tahẽkana, ar unhạbicʼ hõ Jisu do onko ṭhen bae hecʼakan tahẽkana. Ar ạḍi tạpise hoeyetʼ tahẽkante doreãore maraṅ maraṅ ḍheoko rakabokʼ kan tahẽkana. Ado pe se pon mail gan lạukạko calao idiakatʼ tahẽkanre, Jisu do doreão cetante taṛamate lạukạ ṭhen hijukʼkanko ńelkedea. Ar uni ńelte celako do ạḍi bạṛicʼko botorena. Unre Jisui metatʼkoa, “Alope botorokʼa, iń kangeạń.” Celako do lạukạre Jisu deje sanaketʼkoa, ar okateko calakʼkan tahẽkan onḍeko seṭergotʼena. Ado doreão eṭakʼ aṛere okoeko hoṛko teṅgo akan tahẽkan, dosar hilokʼ onko doko bujhạu daṛekeda je, laha hilokʼ onḍe do mitʼṭen chaḍa ar eṭakʼ jãhãn lạukạ do baṅ tahẽkana. Onko do arhõko bujhạukeda je, Jisu do acʼren celako sãote ona lạukạre bae decʼlena bickom cela motogeko sen akan tahẽkana. Menkhan okare Probhu do gun manao joharkate hoṛko piṭhại jom ocoletʼko ona jaegare unre Tibiriạ nagraha khon eṭakʼ lạukạko hecʼena. Onate hoṛko do tinreko ńelkeda je, Jisu se uniren cela okoege onḍe bạnukʼkoa unre onko do onako lạukạre decʼkate Jisu ńame lạgitʼ Kapharnạhumteko calaoena. Onḍe seṭerkate onko do Jisu sendra ńamkedeteko metadea, “E Guru, tinre nonḍe dom hecʼakana?” Jisui roṛ ruạṛatʼkoa, “Sạrigeń metapekana, hahaṛa kạmipe ńelletʼ iạtepe ńam baṛayediń kana ona do baṅ, bickom piṭhạkotepe jom bilen iạtepe ńam baṛayedińa. Menkhan oka jomakʼ nosṭo giḍikʼ ona lạgitʼ uduṛ dhupuṛ baṛae reakʼ do cetʼ lab? Okaṭakʼ jomakʼ baṅ nosṭokʼ bickom jaejug jion tahentape ona lạgitʼ kạmipe. Ona do Manwa Hopongeye emapea, ente Isor Baba doe sạbud akada, noa kạmi reakʼ ektiạri do eken uniakʼge menakʼtaea mente. Noa iạte Jisuko kulikedea, “Enḍekhan Isorakʼ kạmi lạgitʼ ale do cetʼ cekae hoyokʼ talea?” Jisui metatʼkoa, “Isor okoeye kolakade unire pạtiạukʼge hoyokʼ kana Isorakʼ kạmi.” Unreko kulikedea, “Enḍekhan cetʼlekan hahaṛa kạmim udukʼ alete amrele pạtiạu daṛekokʼa? Ar am do cetʼem kạmiya? Aboren hapṛamko ma hahaṅkarre Mannako jomletʼ. Sonot sostorre olakana, ‘Isor do serma khon jom lạgitʼ piṭhại ematʼkoa,’ ” Jisu do onkoe metatʼkoa, “Sạrigeń metapekana, serma khon oka piṭhạpe ńamletʼ ona do Mose hõ bae emakatʼpea, menkhan ińren Babage sạri piṭhạ serma khone emapekana. Serma khon pheḍ hecʼkate manwako okoe jione emakokan unikangeae Isore emokʼkan piṭhạ do.” Ado hoṛko uniko metadea, “E Guru, enḍekhan jaoge noa piṭhạ emaleme baṛe.” Jisui metatʼkoa, “Ińge ona jion reakʼ piṭhạ do. Okoe iń ṭhene hijukʼ uni do tis hõ baṅ reṅgejea. Ar okoe ińreye pạtiạukʼkan uni do tisge baṅ tetaṅea. Iń doń lại akawatʼpea, ńel akadińạpe menkhan enhõ ape do bape pạtiạukʼkana. Baba okoekoe emawạń onko jotoge iń ṭhenko hijukʼa. Okoe iń ṭhene hijukʼ uni do oka lekate hõ ohoń oḍok giḍilea, ente ińakʼ sanaleka kạmi lạgitʼ do baṅ, bickom okoeye kol akadiń uniakʼ monejoṅ leka kạmi lạgitʼge serma khoniń pheḍ hecʼakana. Okoeye kolakadiń uniakʼ sana do noage je, uni okoekoe emakawạdiń onko modre mitʼṭen hõ alo jemoniń atʼko bickom mucạtʼ dinreń jiwetʼ beretʼkoa. Ińren Babawakʼ sana do nõkʼõe jemon Hoponko beṅgetʼae ar unire pạtiạukʼ mitʼke mitʼko do jaejug jion tahentako. Ińge onko do mucạtʼ dinreń jiwetʼ beretʼkoa.” Unre Jihudi mukhiạko do uni upạrteko karacʼ kurucʼena, ente Jisui metatʼko tahẽkana, “Serma khon oka piṭhạ pheḍ hecʼakan ona piṭhạ doń ińkangea.” Khan onko mukhiạko do memenko ehopʼena, “Nũi do cetʼ Josephren hopon Jisu doe baṅkana? Nuiren go-babakin ma coṅ bon oromakatʼ kinge. Enḍekhan cekateye meneda, ‘iń do serma khoniń pheḍ hecʼakana?’ ” Jisui metatʼkoa, “Ape apere alope karacʼ kurujokʼa. Ińren Baba, one okoeye kolakadiń uni bae orle khan okoe hõ iń ṭhen ohoe hecʼ daṛelena. Ar ińge mucạtʼ dinre uniń jiwetʼ beredea. Nạbikoakʼ puthire ol akana, ‘onko sanamkoge Isor ṭhen sikhạunako ńama.’ Baba ṭhen khon ańjomkate okoeye cetʼakatʼ unige iń ṭhene hijukʼa. Baba do okoe hõ bako ńel akadea, eken okoe Isor ṭhen khone hecʼakan unigeye ńelakadea. Sạrigeń metapekana, jãhãege ińreye pạtiạukʼ uni do unrege jaejug jione ńama.” “Ińge jion reakʼ piṭhạ do. Aperen hapṛamko do hahaṅkarre Mannako jomleda ar enhõko gocʼena. Menkhan noa kangea ona piṭhạ do one oka serma khon pheḍ hecʼakan, jemon manwa ona jomkate gujukʼ khon bańcaoko ńam. Ińge ona jiwetʼ reakʼ piṭhạ oka do serma khon pheḍ hecʼakan. Ar okoe noa piṭhại jom uni do jaejug hạbicʼ jione ńama. Ińakʼ hoṛmoge ona piṭhạ do. Manwa jemon jionko ńam ona lạgitʼ iń do ińakʼ hoṛmoń emokʼa.” Noa katha ańjomkate Jihudi mukhiạko do reṭe peṭekʼko ehopʼena. Onko doko menkeda, “Cekate nui hoṛ do acʼakʼ hoṛmo jom lạgitʼe em daṛekebona?” Jisui metatʼkoa, “Sạrigeń metapekana, Manwa Hoponakʼ jel bape jomle khan ar uniakʼ mãyãm bape ńule khan apere jion do bạnukʼanaṅ. Jãhãege ińakʼ jele jom ar mãyãme ńũi uni do jaejug jione ńama, ar mucạtʼ dinre uni doń jiwetʼ beredea. Ińakʼ jel do sạri jomakʼ kana ar ińakʼ mãyãm do sạri ńũiyakʼ kana. Okoe ińakʼ jele jom ar ińakʼ mãyãme ńũi uni do ińreye tahẽnkana ar iń hõ unire. Iń do jiwetʼicʼ Babageye kolakadińạ ar uni iạtege jiwetʼ minạńa. Onkage iń jojomicʼ hõ iń hotete jiwetʼe tahena. Noage serma khon pheḍ hecʼakan piṭhạ do. Aperen hapṛamko okaṭakʼ piṭhạ jomkateko gocʼen onkan piṭhạ noa do baṅkana. Noa okoeye jom uni do jaejug hạbicʼ jione ńama. Kapharnạhum reakʼ sunạgogreye cetʼako kan tahẽkanre Jisu do noa kathae roṛleda. Ar uniren celako modre ḍherkoge noa katha ańjomkateko menkeda, “Noa do ạḍi keṭecʼ sikhạuna kana. Ar noa do okoeye ańjom daṛekea?” Jisu do acʼren celako noa reakʼ karacʼ kurujokʼkane bujhạuketʼkoa. Onate uni doe metatʼkoa, “Noa iạte cetʼ monrepe tạkijokʼ kana? Enḍekhan Manwa Hopon pạhil okareye tahẽkan onḍe rakapʼ calakʼkanpe ńellere ape do cetʼpe mena? Manwa hoṛmo do oka kaj reakʼ hõ baṅkana; sonot Jiuge jione emokʼkana. Okako katha ape ṭheniń roṛakatʼ ona do jiu ar jion kana. Menkhan ape modre nonkanko menakʼkoa okoe do ińre bako pạtiạukʼkan.” Okoeko Jisure bako pạtiạukʼkan ar okoe hoteteye soprot ocokʼ, ona do Jisu pạhil khongeye baḍaekan tahẽkana. Ona iạteye menkeda, “Onateń metapekana, Ạpuń daṛe bae emape khan okoe hõ iń ṭhen do ohope hecʼ daṛelena.” Jisuakʼ noa katha iạte celako modre ḍherkoge pạcena ar uni tulucʼ ar bako dãṛãleda. Onate Jisu do onko gelbar celakoe metatʼkoa, “Ape hõ cetʼ ruạṛ joṅpe ńamkana?” Simon Patras do Jisui metadea, “E Probhu, ale do okoe ṭhenle calakʼa? Jaejug jion reakʼ katha ma coṅ am ṭhenge. Alele biswạs akana arle baḍae akada, am do Isorren uni sonoticʼ kanam.” Unre Jisu do onkoe metatʼkoa, “Ape gelbar goṭenge cetʼ bạń bachao akatʼpea? Menkhan ape modre mitʼṭen bạiri menaea.” Jisu do Simon Iskariotren hopon Jihudạwakʼ kathae menetʼ tahẽkana, ente unigeye soprote lạgidokʼkan tahẽkana. Ar uni do gelbarko modren mitʼ hoṛe tahẽkana. Noa tayom Jisu do Gạlilregeye dãṛãnkan tahẽkana. Ar Jihudi mukhiạko gojeko menetʼ tahẽkante uni do Jihudạ disạmre dãṛãne bạgikeda. Unre Jihudikoakʼ chạuni-porob do sor hecʼakan tahẽkana. Onate uniren boehakoko metadea, “Noa jaega bạgiyakʼte Jihudạ disạmte calakʼme, jemon okakom kạmikan ona do amren celakoko ńel daṛeakʼ. Jãhãe acʼte sodorokʼe menjoṅ khan uni do oko okote cetʼge bae kạmiya. Ado noakom kạmikante am do hoṛko samaṅre udugokʼme.” Ar acʼren boehako hõ Jisu do bako pạtiạuaekan tahẽkana. Onate Jisu do onkoe metatʼkoa, “Ińakʼ okte do ńit hõ ạuriạtińạ, menkhan ape do jaoge menakʼtapea. Dhạrtiren hoṛko ape do bako kurudapea menkhan iń doko kurudạńgea, ente onko reaṅ noa gohań emeda je, onkoakʼ joto kạmi do bạṛicʼgetakoa. Do, apege porobte calakʼpe. Ińakʼ okte do ńit hõ baṅ purạu akante bạń sen hataṛokʼ kana.” Noako katha menkate Jisu do Gạlilregeye tahẽyena. Ado acʼren boehako porobteko senen khan acʼ hõ onḍeye calaoena, menkhan sodorte do baṅ bickom oko okotege. Ar porobre Jihudi mukhiạko do Jisu ńam baṛayeko ehopʼena arko menkeda, “Uni hoṛ do okare menaea?” Ar hoṛko hõ bhiṛ talare Jisu reaṅko phasar phusuretʼ tahẽkana. Adomko doko menkeda, “Uni do bhage hoṛ kanae.” Arhõ adomko doko menkeda, “Baṅ, uni do hoṛkoe bulạuetʼkoa.” Menkhan Jihudi mukhiạko botorte okoe hõ uni reaṅ sodorte do cetʼge bako roṛetʼ tahẽkana. Ado porob adha ạdhiyen khan Jisu do mundilre bolokate cetʼakoe ehopʼena. Noate Jihudi mukhiạko do hahaṛayenteko menkeda, “Nui hoṛ do jãhãn sikhnạt bae ńamakatʼre hõ cekate noako reaṅ doe baḍaekana?” Jisu do onkoe metatʼkoa, “Oka cecetʼakʼ iń emokʼkan ona do ińakʼ do baṅkana, menkhan okoeye kolakadiń, uniakʼ kangea. Jãhãe uniakʼ sanaleka senokʼe menjoṅ khan enḍekhane bujhạu daṛeakʼa noa cecetʼakʼ do Isor secʼ khonakʼ kana se iń nij khoniń roṛeda. Okoe nij khon kathae roṛ uni do acʼakʼ sabasigeye ńam baṛaea, menkhan okoe kolakadiyicʼ reakʼ sabasiye ńam baṛayetʼkan uni doe sạrigea ar unire jãhãn eṛeakʼ do bạnukʼa. Mose do cetʼ ạn-ạriko bae emakatʼpea? Menkhan ape modre okoe hõ onako ạn do bape manaoeda. Enḍekhan cedakʼ gojeń lạgitʼ dope kurumuṭuyeda?” Onkoko roṛ ruạṛadea, “Amre do bhut menaea; okoe am gocʼme lạgitʼ doe kurumuṭu kana?” Jisui metatʼkoa, “Iń do mitʼṭen iń kạmi akatʼte sanamkope hahaṛakʼ kana. Mose do khatnakʼ reakʼ ạne emakatʼpea, ar jirạukʼ mãhãre hõ ape dope khatnayetʼkoa. Menkhan noa niạm do Mose khonakʼ do baṅkana, mare hapṛamko ṭhen khonge hecʼ ạguakana. Moseakʼ ạn alo rạpud lạgitʼ jirạukʼ mãhãre gidrạkope khatnayetʼko khan, enḍekhan jirạukʼ mãhãre mitʼṭen hoṛiń bogekedete cedakʼpe edreạń kana? Mẽtʼãhã ńelte do alope bicạra bickom hok reakʼge bicạrpe.” Unre Jerusalemren adom adom hoṛko menkeda, “Mukhiyạko gojeko menetʼkan hoṛ do cetʼ nui kangeae? Menkhan uni ma khulạsate kathae roroṛkan, ar mukhiạko hõ coṅ cetʼge bako metaekan. Enḍekhan onko do cetʼ sạrigeko baḍae oromkedea, nui doe Mạsi kana mente? Tobe abo mabon baḍaege nui do oka khone hecʼakana mente. Menkhan Mạsiye hecʼlenre okoe hõ bako baḍaeyea uni do oka khone hecʼakana.” Ona tayom Jisu do mundilreye cetʼakokan tahẽkanre ãṭ aṛaṅteye menkeda, “Ape do iń hõpe baḍae akadińạ, ar oka khoniń hecʼ akana ona hõpe baḍaegea. Ente ińte do bạń hecʼakana, menkhan sạri Isorgeye kolakadińa. Uni do bape baḍae akadea menkhan iń doń baḍae akadea, ente iń do uni ṭhen khongeń hecʼakana ar unige iń doe kolakadińạ.” Noa iạte onko hoṛ do Jisu sabeko menetʼ tahẽkana, menkhan un hạbicʼ hõ okte baṅ hoeakantae tahẽkante okoe hõ bako joṭetʼledea. Menkhan ḍher hoṛge Jisure pạtiạuenteko menkeda, “Nui do aema hahaṛawakʼkoe kạmi kana. Mạsiye hecʼlenre noako khon hõ bạ̃ṛti hahaṛawakʼko cetʼ bae kạmiya?” Hoṛko Jisu reaṅko phasar phusuretʼkan ona do Phạrusikoko ańjomkeda. Unre maraṅ naekeko ar Phạrusiko do Jisu sabe lạgitʼ peadakoko kolketʼkoa. Jisui metatʼkoa, “Ape talare ḍher din do bạnuńa. Ona tayom okoeye kolakadiń uni ṭheniń ruạṛ calakʼa. Arpe ńam baṛayińạ menkhan bape ńameńa, ar okareyiń tahen onḍe hõ ohogepe sen daṛelena.” Jisuakʼ noa kathate Jihudi mukhiạko do ako talareko menkeda, “Nui hoṛ do okateye calakʼte babon ńam daṛeaea? Baṅ do Junạniko talare chir chạtur akan Jihudiko ṭhen senkate Junạnikoe cetʼako? Enteye meneda, ‘ńam baṛańape menkhan bape ńameńa, ar iń okareń tahen onḍe do ohope sen daṛelena,’ noa katha reakʼ mane do cetʼkana?” Ado porob reakʼ mucạtʼ din do mitʼṭen asol din tahẽkana. Enhilokʼ Jisu doe teṅgoyente ãṭ aṛaṅteye menkeda, “Jãhãe hoṛ tetaṅede khan uni do iń ṭhene hijukʼma ar dakʼe ńũ idijoṅma. Ińre pạtiạukʼkạnicʼ do sonot sostor reakʼ katha leka uniakʼ ontor khon jiwetʼ dakʼ reakʼ gaḍa ạtu oḍokokʼa.” Noa do uni Jiu reaṅe roṛkeda, one okoe acʼre pạtiạukʼte sonot Jiuko ńame. Unre sonot Jiu do bae emakan tahẽkana, ente un hạbicʼ Jisu hõ bae ṭhonok ocoakan tahẽkana. Ado noako katha ańjomkate gadel hoṛko modre adomko doko menkeda, “Sạrige nui doe uni nạbi kana.” Ar eṭakʼko doko menkeda, “Nui kangeae Mạsi do.” Menkhan adomko doko menkeda, “Mạsi do cetʼ Gạlil khone hijukʼa? Sonot sostorre cetʼ bae meneda, Dạud bõs ar Dạude tahẽkan Betlehem khonge Mạsi doe janamokʼa mente?” Nonkate Jisu iạte hoṛko talare bhinạ bhini hoyena. Onko modre adomko do Jisu sabeko menetʼ tahẽkana menkhan okoe hõ unire hat bako lagaoleda. Ar okoe peadakoko kol ocolen onko do maraṅ naeke ar Phạrusiko ṭhenko ruạṛ hecʼen khanko kuli ocoyena, “Uni do cedakʼ bape ạguledea?” Adoko menkeda, “Uni hoṛ cetʼ lekae roṛetʼkan onka do okoe hõ tisge bako roṛakada.” Noate Phạrusiko do onko peadakoko metatʼkoa, “Ape hõpe bulạu ocoyena se cetʼ? Mukhiyạko se Phạrusiko modren okoe hõ coṅ unirema bacoko pạtiạu akan. Menkhan noko hoṛko, noko do Moseakʼ ạn-ạriko hõ bako baḍaea; nokore do sarap paṛao akana.” Nikodemus, okoe do lahare Jisu ṭhene senlen, uni do Phạrusiko modren mitʼ hoṛe tahẽkana. Uni doe metatʼkoa, “Jãhãe hoṛakʼ moca katha begor ańjomte ar cetʼe ceka kana begor baḍaete sạjại emae do cetʼ aboakʼ ạnre menakʼgea?” Phạrusiko do Nikodemusko roṛ ruạṛadea, “Am hõ cetʼ Gạlilren hoṛ kanam? Sonot sostor ḍunḍhạukate ńelme, Gạlilre jãhãe nạbi janamokʼ reakʼ katha do bạnukʼa.” Inạ tayom hoṛko do apan ạpin oṛakʼteko senbaṛayena, menkhan Jisu do Jạitun buruteye rakapʼ calaoena. Dosar hilokʼ Jisu do ạḍi setakʼre arhõ mundilteye hecʼen khan sanam hoṛ uni ṭhenko hecʼena. Unre Jisu do duṛupʼkate onko cetʼakoe ehopʼena. Adoe cetʼakokan tahẽkanre sostor baḍaeko ar Phạrusiko do mitʼṭen maejiuko ạgukedea. Uni maejiu do laṭghaṭreye sapʼ ocoakan tahẽkana. Onko do uni maejiu talareko teṅgokedete Jisuko metadea, “E Guru, nui maejiu do laṭghaṭreye sapʼ akana onkae tulucʼge. Ạn-ạrire Mose do nonkan maejiu dhirite tiń gocʼko reakʼe hukum akatʼbona. Menkhan am do cetʼem meneda?” Onko do Jisu biḍạue lạgitʼ noa kathako menkeda, jemon dusire paṛaoe lạgitʼ mitʼṭen karonko ńam daṛeakʼ. Unre Jisu do tumbutʼkate kạṭupʼte otre olokʼe ehopʼena. Ado kulitegeko tahẽyen khan uni do sojheyenteye metatʼkoa, “Apeko modre okoe bae kại akatʼ unige pạhilre dhiriteye tiń maṛaṅema.” Noa tayom uni do arhõe tumbutʼente otre olokʼe ehopʼena. Noa katha ańjomkate onko mukhiạko modre haṛam khon ehopʼkate mitʼ mitʼte jotoko calao cabayena. Eken Jisu eskargeye sarecʼ tahẽyena, ar acʼ samaṅre do uni maejiuge teṅgo akan. Jisu doe sojheyente uni maejiue metadea, “Okayenako onko do? Okoege cetʼ sạjại ńam lek mente bako bicạr dusiletʼmea?” Uni maejiue roṛ ruạṛkeda, “Okoe hõ baṅ Probhu.” Unre Jisui menkeda, “Iń hõ bạń dusiyetʼmea. Do calakʼme ar kạire jion alom khemaoa.” Jisu do arhõ hoṛkoe metatʼkoa, “Ińge dhạrti reakʼ marsal. Okoe ińakʼ horteye calakʼ uni do tis hõ ńutre bae taṛama, bickom jion reakʼ marsale ńama.” Onate Phạrusiko do Jisuko metadea, “Amakʼ goha do sạriakʼ do baṅkana, ente am do apnar reaṅ goham emeda.” Jisui roṛ ruạṛatʼkoa, “Iń do apnarte gohań emetʼkanre hõ ińakʼ goha do sạrigea, ente oka khoniń hecʼakana ar okateń calakʼkan ona doń baḍaegea. Menkhan ape do bape baḍaea oka khoniń hecʼakana ar okateń calakʼa mente. Manwa cetʼlekako bicạretʼkan onkage ape hõpe bicạretʼ kana, menkhan iń do okoe hõ bạń bicạretʼkoa. Ar jãhãtis iń bicạrlere hõ ińakʼ bicạr do sạrigea, ente iń do bạń eskara. Iń ma minạńge ar okoeye kolakadiń uni ińren Baba hõ soṅgete menaea. Apeakʼ ạnre ol menakʼa, bar hoṛ mitʼ gohakin emlekhan ona do sạrigea. Iń do iń reakʼ gohań emeda, ar ińe kolakadiń Baba hõ iń reakʼ gohae emeda.” Phạrusikoko metadea, “Amren Baba do okare menaea?” Jisui roṛ ruạṛatʼkoa, “Ape do iń hõ bape baḍae akadińạ ar ińren Baba hõ bape baḍae akadea. Ente ińpe baḍaeliń khan honaṅ ińren Baba hõpe baḍaekea.” Jisu do mundilreye cetʼakokan tahẽkan jokhecʼ dan samaṅokʼ jaegare noa doe metatʼkoa. Menkhan un hạbicʼ uniakʼ okte baṅ hoeakantae tahẽkante okoe hõ bako sapʼledea. Jisu do arhõ Phạrusikoe metatʼkoa, “Iń doń calakʼkana. Arpe ńam baṛańa, menkhan ape do apeakʼ kạirepe gujukʼa. Ar okateń calakʼkan onḍe do ohope sen daṛelena.” Unre Jihudi mukhiạko menkeda, “Acʼtegeye gujukʼa se cetʼ? Enteye meneda, ‘iń okateń calakʼkan onḍe do bape sen daṛeakʼa.’ ” Jisui metatʼkoa, “Iń do coṭ khoniń hecʼ akana ar ape do latar khonpe hecʼakana. Ape do noa dhạrtiren kanape, menkhan iń do noa dhạrtiren doń baṅkana. Onateń metapekana, ape do apeakʼ kạirepe gujukʼa. Ar ińkangeạń mente bape pạtiạukʼ kan khan apeakʼ kạiregepe gujukʼa.” Noa iạte mukhiạko do Jisuko kulikedea, “Am dom okoe kana?” Jisui metatʼkoa, “Pạhil khon okań metapekan iń doń uni kangea. Ape roṛpe reaṅ ar bicạrpe lạgitʼ ạḍi okocʼge menakʼtińạ. Menkhan okoeye kolakadiń unire eṛeteakʼ do bạnukʼa; ar uni ṭhen khon okań ańjomakatʼ onage manwakoń lạiako kana.” Onko do bako bujhạleda Jisu do Baba reaṅgeye lạiako kana mente. Onate Jisui metatʼkoa, “Manwa Hopon tinre coṭtepe rakabea unrepe baḍae daṛeakʼa, iń doń uni kangea. Ar noa hõpe bujhạu daṛeakʼa iń do ińte cetʼge bạń kạmikana, bickom Baba okae cetʼ akawạdiń onageń roṛeda. Okoe ińe kolakadiń unige iń sãote menaea. Uni do eskar bae bạgi akawạdińạ, ente okaṭakʼ kạmiye kusiyakʼkan onage siń sạṭupʼ iń kạmiyeda.” Jisu do noakoe galmarao akokan tahẽkanre ḍher hoṛge unireko pạtiạuena. Ado okoe Jihudikoko pạtiạuade Jisu do onkoe metatʼkoa, “Ińakʼ katha lekape senlen khan sạrige ińren celako kanape. Ona chaḍa ape do sạriakʼtetʼpe baḍae daṛeakʼa, ar ona sạriakʼtetʼge ape doe sạdhinpea.” Unre Jihudi mukhiạko do Jisuko metadea, “Ale do Abrahamren bõs kanale; ar tisge okoeren golam hõ bale hoeakana. Am do cekatem meneda, ale dole sạdhin ocokʼa?” Jisui roṛ ruạṛatʼkoa, “Sạrigeń metapekana, okoe kạireko tahenkan onko sanamkoge kạiren golam kanako. Golam do oṛakʼre jaejug bae tahena menkhan Hopon do jaejug hạbicʼe tahena. Onate Isorren Hopone sạdhinlepere sạrige ape do sạdhinpe hoyokʼa. Baḍaegeạń Abrahamren bõsko kanape, menkhan enhõ ape do gojeńpe menjoṅkana, ente ińakʼ katha do apeakʼ ontorre jaega bae ńameda. Iń do ińren Baba ṭhen okań ńelakatʼ onageń roṛeda, ar ape do aperen baba ṭhen khon okape ańjomakatʼ onagepe kạmi kana.” Onate onko Jihudi mukhiạko do Jisuko metadea, “Abraham doe aleren baba kana.” Jisui metatʼkoa, “Ape do Abrahamren hoponkope hoelen khan Abraham lekagepe kạmikea. Isor ṭhen khon oka sạriakʼtetʼ iń baḍae akatʼ onage ape doń lạiape kana, ar enhõ gojeńpe menetʼkana; menkhan Abraham do nonka bae kạmileda. Ape do aperen baba okae kạmikan ape hõ onagepe kạmikana.” Onko do Jisuko metadea, “Loṭghuṭire do bale janam akana. Aleren do mitʼ goṭenge baba menae talea, uni do Isorge.” Jisui metatʼkoa, “Isor do sạrige aperen babae hoelentape khan ińpe dulạṛkińạ, ente iń do Isor khoniń hecʼ akana ar ńitokʼ do ape talare minạńạ. Iń apnarte do bạń hecʼakana, menkhan unigeye kolakadińạ. Cetʼ iạte ińakʼ kathako bape bujhạueda? Ente ape do ińakʼ roṛ bape sahao daṛeakʼ kana. Soetange aperen baba do, ar ape do uniren hoponko kanape; onate uniakʼ sana purạupe menjoṅ kana. Soetan do pạhil khongeye khũniạhi kana. Uni do tisge sạriakʼre bae teṅgo akana, ente unire do sạriakʼtetʼge bạnukʼa. Uni do eṛe kathae roṛre acʼ khongeye roṛa, ente uni doe eṛeyicʼ kana ar sanam lekan eṛeakʼ do uni khonge janam akana. Menkhan sạri kathań roṛetʼte ape do bape pạtiạuạń kana. Ape modre kại hoṛ kạnạń mente jãhãeye sạbud daṛekińạ? Ar sạriakʼ iń roṛetʼ khan cedakʼ bape pạtiạuạń kana? Okoe hoṛ doe Isorren kan, uni do Isorakʼ kathageye ańjoma. Ape dope baṅkante Isorakʼ katha bape ańjomeda.” Unre Jihudi mukhiạko do Jisuko metadea, “Ale do cetʼ ṭhik kathage bale meneda baṅma, am dom Samariạ kana ar amre do bhut menaea mente?” Jisui roṛ ruạṛatʼkoa, “Ińre bhut do bạnuea. Iń do ińren Babań manot edekana, menkhan ape dope be manot edeńkana. Iń do apnarakʼ sabasi ńam lạgitʼ do bạń kurumuṭu kana, menkhan mitʼ goṭen menaea one okoe do manote emạńkan, ar uni kangea bicạricʼ do. Sạrigeń metapekana, jãhãege ińakʼ katha leka senokʼe menjoṅ enḍekhan uni do tis hõ bae gujukʼa.” Jihudi mukhiạko do uniko metadea, “Ale do ńitokʼ sạrigele bujhạueda je, amre do bhut menaea. Abraham ar nạbiko hõko gocʼena, ar am dom meneda, ‘jãhãege ińakʼ katha lekae senokʼ uni do tis hõ bae gujukʼa.’ Am do cetʼ baba Abraham khon hõm maraṅgea? Uni mae gocʼenge ar nạbiko hõko gocʼena. Am do apnarte celeyem benaokʼ kana?” Jisui roṛ ruạṛatʼkoa, “Iń do ińtegeń sabasikʼkan khan ona reakʼ do cetʼ damge bạnukʼa. Ińren Baba, one okoe do aperen Isor mentepe dạbiyetʼkan unige iń do manote emạń kana. Ape do tis hõ bape baḍae akadea, menkhan iń doń baḍae edekana. Ar bạń baḍae akadea menteń menlekan, ape leka eṛeyicʼgeń hoyokʼa. Menkhan iń doń baḍaeyede kana ar uniakʼ katha lekageń calakʼ kana. Aperen baba Abraham hõ ińakʼ dinko ńel lạgitʼe hulạslena. Menkhan uni doe ńelleda ar kusi hõe kusilena.” Jihudi mukhiạko do Jisuko metadea, “Amakʼ umer ma mõṛẽgel bochor hõ baṅ hoeakan, ar am do cetʼ Abrahamem ńelakadea?” Menkhan Jisui metatʼkoa, “Sạrigeń metapekana, iń do Abraham ạuriye janamokʼ khonge minạńạ.” Noa katha ańjomkate mukhiạko do Jisu tińe lạgitʼ dhiriko halaṅkeda. Menkhan Jisu do apnartetʼe danaṅente mundil khone oḍok calaoena. Ado horteye calakʼkan tahẽkan jokhecʼ Jisu do mitʼṭen kãṛã hoṛe ńel ńamkedea. Uni do janam khonge kãṛãgeye tahẽkana. Unre celako do Jisuko kulikedea, “E Probhu, okoeye kạiletʼte nui do kãṛãgeye janamena? Nui se nuiren go-babakin?” Jisui roṛ ruạṛkeda, “Nui hõ bae kại akada, ar nuiren go-baba hõ baṅ. Noa do hoeakana jemon Isorakʼ kạmi uni bhitrite sodorokʼ. Okoeye kolakadiń, uniakʼ do siń tahenrege kạmi hoyokʼ tabona. Ńindạ daraekana unre okoe hõ bako kạmi daṛeakʼa. Dhạrtire tinạkʼ din minạń iń do dhạrti reakʼ marsal kạnạń.” Ado noa menkate uni do otreye thokeda ar losotʼe benaokeda. Ar ona tayom do uniakʼ mẽtʼre thopramadeteye metadea, “Do Siloam pukhrire senkate abokʼme.” Siloam reakʼ mane do kol ocoakan. Uni hoṛ do senkateye apʼena ar ńeńele ehopʼen khane ruạṛ hecʼena. Noa ńelte aḍepaserenko ar okoe do kokoe hoṛ menteko ńellede onko sanamkogeko menkeda, nui do cetʼ uni hoṛ doe baṅkana, one okoe do duṛupʼkateye kokoekan tahẽkan?” Adomko doko menkeda, “Hẽ, nui hoṛ kangeae.” Arhõ adomko doko menkeda, “Nui do ńelokʼte uni lekanre hõe uni doe baṅkana.” Menkhan uni hoṛ do acʼgeye menkeda, “Hẽ, uni kangeạń.” Adoko metadea, “Enḍekhan cekate amakʼ mẽtʼ do beṅgetʼentama?” Uni doe roṛ ruạṛkeda, “Jisu ńutuman hoṛ do losotʼ benaokate ińakʼ mẽtʼreye lagao ạdińa ar Siloam pukhrire senkate abokʼe metadińạ. Iń do calao kateń apʼen khan ńeńeliń ehopʼena.” Onko doko metadea, “Okare menaea uni hoṛ do?” Uni doe menkeda, “Iń do bạń baḍaea.” Ado Phạrusiko ṭhenko idikedea. Jisu do oka hilokʼ losotʼ benaokate uni hoṛakʼ mẽtʼkine beṅgetʼ ocoketʼtae ona din do jirạukʼ mãhã tahẽkana. Onate Phạrusiko do arhõko kulikedea, “Am do cekatem ńeńelkana?” Khange Phạrusikoe metatʼkoa, “Uni do ińakʼ mẽtʼkinre losotʼe lagao ạdińạ ariń apʼen khan ńeńeliń ehopʼena.” Noate Phạrusiko modren adomko doko menkeda, “Uni hoṛ do Isor ṭhen khon bae hecʼakana, ente uni do jirạukʼ mãhã hõ bae manaoeda.” Eṭakʼ Phạrusiko doko menkeda, “Cekate mitʼṭen kại hoṛ do nonkan hahaṛawakʼe kạmi daṛekea?” Nonkate onko talare bhinạ bhini hoyena. Unre onko do arhõ uni hoṛko kuli doṛhakedea, “Am do uni reakʼ cetʼem menkea? Ente uni do amakʼ mẽtʼkine jhicʼ ocoakatʼtama.” Uni doe menkeda, “Mitʼṭen nạbi kanae.” Menkhan Jihudi mukhiạko do uniren go-baba ạuriko kulikin hạbicʼ bako pạtiạulena je, uni do jonom kãṛãye tahẽkana ar ńitokʼ doe ńeńelkana mente. Onko do uniren go-babako kuliketʼkinạ, “Nui do cetʼ abenren koṛa kanae one uni reaṅ ben menetʼkan uni do kãṛãgeye janamlena mente? Enḍekhan cekate ńitokʼ doe ńeńelkana?” Uniren go-babakin roṛ ruạṛatʼkoa, “Ạliń liń baḍaea nui do ạlińren koṛa kanae, ar kãṛãgeye janamlena. Menkhan cekate ńitokʼ doe ńeńelkana ona do bạliń baḍaea; ar okoe nuiakʼ mẽtʼe beṅgetʼ ocoakatʼtae ona hõ bạliń baḍaea. Uni doe sẽṛãgea, unige kuliyepe. Uni do acʼ reaṅ acʼtegeye lại ocoge.” Uniren go-baba do Jihudi mukhiạko botorte noa dokin menkeda, ente Jihudi mukhiạko do laha khongeko goṭa ạguakatʼ tahẽkana je, jãhãege Jisu do Mạsi menteye aṅgoce uni doe biṭlạha ocokʼa. Onate uniren go-baba dokin menkeda, “Uni doe sẽṛãgea, unige kuliyepe.” Ado okoe kãṛãgeye tahẽkan mukhiạko do arhõ dosar dhao hohoadeteko metadea, “Am do sạri katha roṛte Isorge sabasi emaeme. Alele baḍaea uni doe kại hoṛ kana.” Uniye roṛ ruạṛatʼkoa, “Kại hoṛ kanae se baṅ ona do bạń baḍaea; menkhan noań baḍaea, lahate iń do kãṛãgeń tahẽkana ar ńitokʼ doń ńeńelkana.” Mukhiyạko doko metadea, “Uni do cetʼe cekawatʼmea? Ar cekate mẽtʼ doe beṅgetʼ ocoketʼtama?” Uni hoṛ doe roṛ ruạṛatʼkoa, “Iń ma coṅ laharegeń lại akawatʼpe, menkhan ape do bape ańjomleda. Enḍekhan cedakʼ arhõ ańjom sanayetʼpea? Ape hõ cetʼ uniren cela hoyokʼ sanayetʼpea?” Onate mukhiạko do ruhạtʼkedeteko metadea, “Am kanam uni hoṛren cela do, menkhan ale do Moseren cela kanale.” Alele baḍaea Isor do Moseye galmaraoade tahẽkana, menkhan uni hoṛ do oka khone hecʼakana ona do bale baḍaea.” Unre uniye roṛ ruạṛatʼkoa, “Onage tho hahaṛa do! Ape hõ bape baḍaea uni do oka khone hecʼakana menkhan uni do ińakʼ mẽtʼe beṅgetʼ ocoketʼtińạ.” Baḍaegea bon Isor do kại hoṛakʼ katha bae ańjoma. Menkhan jãhãege Isor sewa hoṛe hoyokʼ ar uniakʼ sanalekae kạmi enḍekhan Isor do uniakʼe ańjomtaea. Dhạrti sirjạu khon tis hõ baṅ ańjom akana jonom kãṛã hoṛakʼ mẽtʼ jãhãeye jhicʼ akatʼa mente. Uni do Isor ṭhen khon bae hecʼlen khan honaṅ cetʼge ohoe ceka daṛelea.” Khange mukhiạko doko metadea, “Am ma kạirem janam akan ar alem cetʼale kana?” Noa menkate onko do somaj khonko oḍok gotʼkadea. Ado Jisui ańjomkeda je, mukhiạko do uni hoṛ bahreteko oḍok akadea. Tayomte Jisu do uni hoṛ sendra ńamkedeteye metadea, “Am do cetʼ Manwa Hoponrem pạtiạukʼ kana?” Uniye roṛ ruạṛkeda, “E Probhu, lạiạńme uni doe okoe kana, jemon unireń pạtiạukʼ.” Jisu do uniye metadea, “Uni dom ńelakadegea, ar unige am sãoteye galmarao kana.” Unre uni hoṛe menkeda, “E Probhu, iń doń pạtiạukʼ kangea.” Ar noa menkate Jisui sewawadea. Jisui menkeda, “Iń do dhạrtite bicạr lạgitʼ iń hecʼakana, jemon baṅ ńeńelkoko ńeńel ar okoeko ńeńelkan onko do kãṛãko hoyokʼ.” Adom Phạrusiko do Jisu sãoteko tahẽkana. Onko do noa katha ańjomte Jisuko metadea, “Enḍekhan ale hõ cetʼle kãṛãgea?” Jisui metatʼkoa, “Kãṛãpe tahen khan honaṅ kại do oho tahẽlen tapea. Menkhan apepe meneda ńeńel kangeale ar onatege apeakʼ kại do tahen kana. “Sạrigeń metape kana, jãhãege bhiḍi khạṛ reakʼ duạrte baṅ bolokate eṭakʼ secʼteye bolokʼ uni do kombṛo are ḍạku kana. Menkhan okoe duạr secʼte bhitriteye bolokʼkan unige bhiḍikoren gupiyicʼ do. Bhiḍikoakʼ khạṛ okoeye horhoyetʼkan uni do gupiyicʼge duạre jhicʼaea. Bhiḍiko do uniakʼ aṛaṅko ańjomtaea, ar gupiyicʼ do acʼren bhiḍiko ńutum ńumkateye hohoakote bahreteye oḍok idikoa. Ar acʼren sanam bhiḍikoe oḍokleko tayom onko laha lahateye calakʼa ar bhiḍiko do uniko pańja idiyea ente onko do uniakʼ aṛaṅko oromakatʼtaea. Onko do tis hõ ạnạṛi hoṛ ohoko pańjalea bickom uni khonko ńir pharakokʼa, ente ạnạṛi hoṛakʼ aṛaṅ do bako oromakada.” Onko Phạrusiko cetʼako lạgitʼ Jisu do noa kathae menkeda menkhan cetʼe lạiatʼkoa ona do bako bujhạuleda. Onate Jisu do arhõe metatʼkoa, “Sạrigeń metape kana, ińkangeạń bhiḍiko reakʼ duạr do. Iń lahate okoeko hecʼlen onko sanamkoge kombṛo arko ḍạku kana, menkhan bhiḍiko onkoakʼ katha do bako ańjomleda. Duạr do ińge. Ente jãhãege iń secʼte bhitriteye bolokʼ uni do bańcaoe ńama. Uni do bhitriteye bolokʼa ar bahreteye oḍokokʼa ar ạtiń lạgitʼ jaegae ńama. Kombṛo do eken kombṛo, khũn ar nonosṭo lạgitʼe hijukʼa. Iń doń hecʼakana jemon jionko ńam, ar ona jion jemon sareṛokʼtako. “Boge gupiyicʼ do ińge. Boge gupiyicʼ do acʼren bhiḍiko lạgitʼ acʼakʼ jiwiye alaetaea. Eken din ṭalao lạgitʼ okoe gupi kạmiye kạmikan uni do gupiyicʼe baṅkana ar bhiḍiko hõ acʼren doko baṅkana. Uni do hunḍạr hijukʼe ńellere bhiḍikoe ńir bạgiakoa, ente uni do eken din ṭalaotae lạgitʼ noae kạmikana ar bhiḍiko lạgitʼ hõ jãhãnakʼ bae dạndikʼa. Ar hunḍạr do onkoe ạtkirkoa ar bhiḍiko doko chir chạturokʼa. “Ińge boge gupiyicʼ. Baba do cetʼleka ińe baḍaeyediń onkage iń hõ Babań baḍaeyedea ar ińren bhiḍiko hõń baḍaeyetʼkoa ar onko hõ ińko baḍaeyediń kana. Iń do ińren bhiḍiko lạgitʼ ińakʼ jiwiyiń alayetʼtińạ. Arhõ bhiḍiko menakʼkotińạ one okoe do noa khạṛrenko baṅkan; onko hõ ạguko hoyokʼtińạ. Onko do ińakʼ aṛaṅko ańjoma ar onate mitʼ khạṛ bhiḍiko hoyokʼa ar gupiyicʼ hõ mitʼṭenge. Baba do noa iạteye dulạṛedeń kana, ente iń do ińakʼ jiwiyiń alayetʼtińa jemon arhõ onań ruạṛ ạgu daṛeakʼ. Okoe hõ ińakʼ jiwi iń khon do bako rejeńa, menkhan iń do ińtegeń alaeyeda. Iń do jiwi alae reakʼ ektiạri menakʼtiń arhõ jiwi hatao ruạṛ reakʼ hõ ektiạri menakʼtińạ. Noa dạyik do ińren Baba ṭhen khoniń ńamakada.” Jisuakʼ noa katha iạte Jihudiko talare arhõ bhinạ bhini hoyena. Onko modren ḍher hoṛko menkeda, “Unire do bhut menaea, uni doe bạulạha akana; cedakʼ uniakʼ katha dope ańjometʼtaea?” Eṭakʼko doko menkeda, “Noa do bhut capaṛ hoṛakʼ katha do baṅkana. Bhut do cetʼ kãṛã hoṛakʼ mẽtʼe beṅgetʼ oco daṛekea?” Noa tayom Jerusalemre mundil dhorom aroe reakʼ porob seṭerena. Unre rabaṅ din tahẽkana. Jisu do mundilre Solomonakʼ pinḍạreye dãṛã bãṛãekan tahẽkana. Unre Jihudi mukhiạko do Jisu esetʼ ạcurkedeteko metadea, “Ar tinạkʼ din digdhạrem dohokalea? Mạsi kanam menkhan enḍekhan pusṭạute lạialeme.” Jisui roṛ ruạṛatʼkoa, “Ape mań lại akawatʼpe, menkhan bape pạtiạukʼ kana. Ińren Baba ńutumte okakoń kạmikan onakoge iń reaṅ gohaye emeda. Menkhan ape do bape pạtiạukʼkana, ente ińren bhiḍiko dope baṅkana. Ińren bhiḍiko do ińakʼ aṛaṅko ańjomeda. Ar iń doń baḍae oromakatʼkoa ar onko do ińko pańjayediń kana. Iń do jaejug jioniń emakokana. Onko do tishõ ohoko nosṭolena ar okoe hõ iń khon ohoko recʼidi daṛelekoa. Ińren Baba, one okoe do onkoe emakawạdiń, uni do sanam khone maraṅa. Okoe hõ Babawakʼ ti khon do bako recʼ idi daṛeakoa. “Iń ar Baba doliń mitʼgea.” Unre Jihudi mukhiạko do tińe lạgitʼ dhiriko halaṅkeda. Jisu do onkoe metatʼkoa, “Babawakʼ hukumleka ạḍi okocʼ bhage kạmikoń udukʼ akawatʼpea Onako modre okalekanakʼ kạmi iạte dhirite tińińpe menetʼ kana?” Mukhiyạkoko menkeda, “Bhage kạmi iạte tińme do bale meneda, menkhan Isor birudre bemanot katham roṛetʼ iạtege. Ente am do manwa hoekate hõ Isorem benaokʼkana.” Jisui menkeda, “Apeakʼ ạnre cetʼ baṅ olakana, ‘Ińiń menakada, ape do Deb kanape?’ Isorakʼ katha okoe ṭhen hecʼlen onkoge coṅ uni ma Deb menteye metatʼko tahẽkan. Sonot sostor reakʼ katha do cetʼ mạutạ daṛekokʼa? Tis hõ baṅa. Enḍekhan Baba okoeye sonot akade ar dhạrtiteye kolkede uni ińge tinreń metapekana ‘Iń doń Isorren Hopon kana,’ unre cekatepe meneda, ‘am do Isor birudre bemanot katham roṛeda?’ Ińren Babawakʼ kạmiko bạń kạmiyetʼ khan alope pạtiạuạńạ. Menkhan ińiń kạmikan khan iń bape pạtiạuạńre hõ ińakʼ kạmiko baṛe pạtiạuakʼpe. Onatepe baḍaea arpe bujhạu daṛeakʼa, Baba do ińre menaea ar iń do Babare minạńa.” Unre Jihudi mukhiạko do Jisu sabe lạgitʼko kurumuṭukeda, menkhan uni do onkoakʼ ti khone paskao calaoena. Ona tayom uni do arhõ Jordan gaḍa hanasa senkateye tahẽyena. Johan do nonḍege pạhile bạptisetʼko kan tahẽkana. Ar ḍher hoṛ Jisu ṭhenko hecʼena arko menkeda, “Johan do jãhãn hahaṛa kạmi bae kạmileda, menkhan enhõ nui hoṛ reaṅ cetʼkoe lạiletʼ ona joto do sạrigea.” Ar onḍe ạḍi utạr hoṛ Jisureko pạtiạuena. Lasar ńutuman Bethaniạren mitʼṭen hoṛ do ruạteye kạhil akan tahẽkana. Mạriạm ar uniren boeha kuṛi Martha hõ ona atoregekin tahenkan tahẽkana. Nui doe uni Mạriạm kana one okoe do Probhuakʼ jaṅgare mahkaokʼ sunume ojokʼade tahẽkante acʼakʼ upʼte jaṅgakine jotʼletʼtae. Ar ruạte okoeye kạhil akan tahẽkan nui Lasar do Mạriạmren boehae tahẽkana. Onate unkin boeha kuṛi do Jisu ṭhen noa kathakin roṛgotʼkada, “E Probhu, okoeyem dulạṛedekan uni do ruạteye kạhil akana.” Noa katha ańjomkate Jisui menkeda, “Noa ruạ do gujukʼ lạgitʼ do baṅkana bickom Isorakʼ ṭhonok sodorokʼ lạgitʼge hoeakana, jemon noa hotete Isorren Hoponakʼ ṭhonok sodorokʼtae.” Jisu do Martha ar uniren bokot kuṛi ar Lasare dulạṛetʼko tahẽkana. Ado tinre Lasarakʼ ruạkʼ reakʼ kathae ańjomkeda unre uni do okareye tahẽkan onḍege arhõ bar dine tahẽyena. Ona tayom Jisu do celakoe metatʼkoa, “Dela bon, arhõ Jihudạte bon calakʼa.” Celakoko metadea, “E Guru, thoṛa din lahare mukhiạko dhirite tińmeko menetʼ tahẽkana, am do cetʼ arhõ onḍe calakʼem menjoṅ kana?” Jisui roṛ ruạṛatʼkoa, “Din reakʼ do cetʼ gelbar ghonṭa bạnukʼa? Jãhãege sińreye dãṛãn khan uni do bae tohodokʼa, ente uni do noa dhạrti reakʼ marsale ńeleda. Menkhan jãhãege ńindại dãṛãn uni doe tohodokʼa ente unire marsal do bạnukʼa.” Noako katha roṛ tayom celakoe metatʼkoa, “Aboren gate Lasar doe jạpitʼ akada, menkhan uni berede lạgitʼ iń calakʼkana.” Noa iạte celakoko metadea, “E Probhu, jạpitʼ akatʼ khane bańcaokʼa.” Jisu do Lasare gocʼ akan reakʼ kathae roṛkeda, menkhan uniren celako doko bujhạukeda jạpitʼ hataṛ reakʼ kathageye metatʼkoa. Unre Jisu do pusṭạuteye metatʼkoa, “Lasar doe gocʼ akana, menkhan apeakʼ katha hudiskate rạskạń bujhạueda, iń do onḍe bạń tahẽkana jemonpe pạtiạukʼ. Ado dela, Lasar ṭhen bon calakʼa.” Unre Thoma, okoe do jawako metae, uni do sãotenkoe metatʼkoa, “Delabon, abo hõbon calakʼa, jemon uni sãotebo gujukʼ.” Ado Jisu onḍe seṭeren khane baḍaekeda, Lasar do pon din lahareko topa akadea. Ar Jerusalem khon Bethaniạ do bar mail gan sạṅgińre tahẽkana. Jihudiko modren ḍher hoṛge Martha ar Mạriạmren boehae gocʼakan iạte jiwi raṛecʼ tạkin lạgitʼko hecʼakan tahẽkana. Ado Jisui hijukʼkane ańjomketʼ khan Martha do uni sãote ńapamokʼ lạgitʼe oḍok calaoena, menkhan Mạriạm do oṛakʼregeye duṛupʼ tahẽyena. Martha do Jisui metadea, “E Probhu, nonḍem tahẽlen khan bareń do ohoe gocʼlena. Menkhan ińiń baḍaea, am do ńit hõ Isor jãhãnakʼgem koeye Isor do onageye emama.” Jisu do uniye metadea, “Amren boeha do arhõe jiwetʼ beredokʼa” Unre Marthae menkeda, “Baḍaegeạń, mucạtʼ dinre gocʼko tinreko jiwetʼ beredokʼa unre uni hõe beredokʼa.” Jisu do uniye metadea, “Ińge beretʼ ruạṛokʼtetʼ ar jion do. Okoe ińreye pạtiạukʼ uni doe gocʼlenre hõ jiwetʼe tahena. Ar okoe jiwetʼ menae ar ińreye pạtiạukʼkan uni do tis hõ ohoe gocʼlena. Am do cetʼ noam pạtiạukʼ kangea?” Marthae menkeda, “Hẽ Probhu, iń doń pạtiạukʼ kangea, amge Isorren Hopon dhạrtite hijukʼicʼ do.” Noa katha menkate Martha doe calaoena ar bokot kuṛi Mạriạm danaṅre hohoadeteye metadea, “Gurui hecʼ akana are hohoam kana.” Mạriạm do noa katha ańjomtora usạra beretʼkate Jisu ṭhene senena. Jisu do un hạbicʼ hõ atote bae boloakan tahẽkana; Martha okareye ńapamlede uni do onḍegeye tahẽkana. Ar okoe Jihudiko Mạriạm tulucʼ oṛakʼreko tahẽkan ar jiwiko raṛecʼetʼtae tahẽkan onko do Mạriạm hako pako bahrete calakʼkanko ńelkede khanko pańjakedea. Onko doko hudiskeda, Mạriạm do topa ṭhen rakʼjoṅ lạgitʼe calakʼkana. Ado Jisu okareye tahẽkan onḍe Mạriạme hecʼena ar uniye ńelkede khan jaṅgare giḍiyenteye menkeda, “E Probhu, nonḍe baṛem tahẽlen khan bareń do ohoe gocʼlena.” Jisu do Mạriạm ar uni soṅgeteko hecʼakan Jihudiko rarakʼkane ńelketʼko khan jiwireye kạulạ kạuliyena. Uni do onkoe metatʼkoa, “Okare Lasarpe bae akadea?” Metadeako, “E Probhu, dela hecʼkate ńelme.” Unre Jisui rakʼkeda. Onate Jihudikoko menkeda, “Ma ńelepe, uni do Lasar tinạkʼe dulạṛede tahẽkana.” Menkhan Jihudiko modren adomko doko menkeda, “Okoe kãṛã hoṛakʼ mẽtʼẽ beṅgetʼ ocoketʼ uni do cetʼ nonkanakʼ bae kạmi daṛekea jemon Lasar aloe gocʼkokʼ?” Noate Jisuakʼ mon do arhõ kạulạ kạuliyentaea ar topa ṭhene calaoena. Topa do mitʼṭen dander tahẽkana. Ar ona dander duạrre mitʼṭen dhiri doho akan tahẽkana. Jisui metatʼkoa, “Dhiri ocogpe.” Ado gocʼakanicʼren misera Martha do Jisui metadea, “E Probhu, ńitokʼ doe soyena, ente gocʼkate teheń pon dine hoyokʼkana.” Jisu do Marthae metadea, “Am do cetʼ bạń metatʼmea pạtiạulen khan Isorakʼ ṭhonokem ńela?” Unre dhiriko ocokʼkeda. Ar Jisu do coṭ secʼ beṅgetʼ rakapʼkateye menkeda, “E Baba, ińakʼ katham ańjomketʼte iń do amiń gun manao joharam kana. Ińiń baḍaea am do jaoge ińakʼ katham ańjometʼtińa. Menkhan okoeko hoṛ beṛhaeteko teṅgo akan onko jemonko pạtiạukʼ amem kolakadińạ mente, ar onatege noa katha doń menkeda. Noa kathae menketʼ khan Jisu do ãṭ aṛaṅteye hohokeda, “E Lasar, oḍok hijukʼme.” Khange gocʼlenicʼ do topa khone oḍokʼ hecʼena. Uniakʼ ti-jaṅga do topa reakʼ kicricʼte bedhao akan ar mẽtʼãhã do gamchate tol poṭomge tahẽkantaea. Jisu do hoṛkoe metatʼkoa, “Raṛayepe ar sen ocoaepe. Mạriạm ṭhen okoe Jihudikoko hecʼakan tahẽkan onko modren ạḍi utạr hoṛ do Jisuakʼ noa kạmi ńelte unireko pạtiạuena. Menkhan onko modren adomko do Phạrusiko ṭhen senkate Jisu okae kạmiletʼ onako lạiatʼkoa. Unre maraṅ naekeko ar Phạrusiko do maraṅ bạisiren hoṛkoko jarwaketʼkoteko metatʼkoa, “Ńitokʼ do cetʼ bo cekaea? Nui hoṛ do ạḍi utạr hahaṛa kạmikoe kạmi kana. Ar nonkage bon aṛakʼ idiyae khan sanamkoge unireko pạtiạukʼa ar Romiko do hecʼkate aboakʼ mundil ar jạtko marao tabona.” Onko modren Kaeapha ńutuman mitʼ hoṛ do ona bochorren maraṅ naekeye tahẽkana. Uni doe metatʼkoa, “Ape do cetʼge bape baḍaea, ar hudis hõ bape hudisetʼ kana, goṭa jạt nosṭokʼ khon bickom sanam hoṛko bodolte mitʼ hoṛ gujukʼge bhagea.” Kaeapha do noa katha apnar khone roṛleda ona do baṅ menkhan uni do ona bochorren maraṅ naekeye tahẽkana. Onate uni doe nạbileda, Jihudi jạtko lạgitʼ Jisugeye gujukʼa mente. Ar eken Jihudi jạtko lạgitʼ do baṅ, menkhan Isorren chir chạtur akan gidrạko samṭaoko lạgitʼ hõ uni doe gujukʼa. Ado enhilokʼ khon Jihudi mukhiạko do Jisu goje lạgitʼ soṛojontroko ehopʼena. Onate Jisu do Jihudiko talare sodorte dãṛãne bạgikeda, ar ona jaega bạgikate hahaṅkar sor reakʼ Ephrạimko metakʼ mitʼṭen atoteye calaoena. Ar acʼren celako sãote onḍeye tahẽyena. Unre Jihudikoakʼ sen-parom porob do sor hecʼakan tahẽkana. Ar porob lahare saphakʼ lạgitʼ ạḍi utạr hoṛ do atoko khon Jerusalemteko calao akan tahẽkana. Ar onko hoṛ do Jisu ńam baṛayeko ehopʼena. Onko do mundilre teṅgokate kupulikʼko ehopʼena, “Noa porobre uni do cetʼ bae hijukʼa? Ape do cetʼpe hudiseda?” Maraṅ naekeko ar Phạrusiko doko hukumletʼ tahẽkana je, Jisu okare menaea mente jãhãegeye baḍaele khan uni do onkoe baḍae ocoko jemon onko do Jisuko sapʼ daṛeae. Ado sen-parom porob turui din lahare Jisu do Bethaniạ atoteye senena. Ar gocʼko khon okoeye jiwetʼ beretʼlede uni Lasar hõ Bethaniạ atoregeye girobasokʼkan tahẽkana. Onḍe onko do Jisu lạgitʼ jomakʼko tearkeda. Ar Martha doe sapʼsorako kan tahẽkana. Ar okoeko Jisu tulucʼ jojomko duṛupʼ akan tahẽkan onko modre Lasar hõe tahẽkana. Unre Mạriạm do tala ser gan ạḍi damanakʼ mahkaokʼ sunume ạgukeda ar Jisuakʼ jaṅgareye dulkeda ar acʼakʼ upʼteye jotʼketʼtaea. Ar ona mahkaokʼ sunum reakʼ mohokte goṭa oṛakʼ perecʼena. Jisuren celako modren mitʼ hoṛ, okoe do bạirikoakʼ tire Jisui soprot ocoye uni Jihudạ Iskariot doe menkeda, “Noa mahkaokʼ sunum do cedakʼ pe sae Dinarte baṅ ạkhrińlena, ar reṅgecʼ orecʼko baṅ ematʼkoa?” Jihudạ do reṅgecʼko lạgitʼ dạndikate noa kathae menleda ona do baṅ. Uni do kombṛoe tahẽkana. Ar uni jimạre ṭaka reakʼ baksa tahẽkante dohoakʼko khone kombṛoyetʼkan tahẽkana. Jisui menkeda, “Alope duk ocoyea. Ente topayiń jokhecʼ sajaoiń iạte uni do noae doholeda. Reṅgecʼko ma jaoge ape tulucʼ menakʼko, menkhan iń do jao okte bape ńameńạ.” Ado Jisu Bethaniạre menaea menteko baḍaeketʼ khan Jihudiko mod khon ạḍi utạr hoṛ do onḍeko hecʼena. Onko do eken Jisu lạgitʼ do baṅ, menkhan Jisu gocʼko khone jiwetʼ beretʼ akade uni Lasar ńele lạgitʼ hõko hecʼlena. Unre maraṅ naekeko do Lasar hõ goje lạgitʼko goṭakeda, ente Lasar iạte Jihudiko modren ḍher hoṛge mukhiạkoko bạgiatʼkote Jisureko pạtiạuena. Ado porobre okoeko hoṛko hecʼakan tahẽkan onko do dosar hilokʼko ańjomkeda Jisu do Jerusalemteye hijukʼ kana. Unre onko do khijur ḍạr sapʼkate daram ạguye lạgitʼko oḍok calaoena ar ãṭ aṛaṅte hohoate memenko ehopʼena, “Hosanna, bhorangeae Probhu ńutumte daraekạnicʼ, Israelkoren raj do.” Sonot sostor reakʼ katha leka Jisu do mitʼṭen gadha hopone ńamkedete unireye decʼena. Sostorre olakan leka, “E Sionren kuṛi, alom botorokʼa. Ńelme, amren raj do gadha hoponre decʼkateye hijukʼ kana.” Jisuren celako do pạhilre noako bako bujhạu daṛeada. Ado tinre Jisuakʼ ṭhonok sodorena unre onko doko disạkeda sonot sostor reakʼ ona katha do Jisu reaṅge olakan tahẽkana mente. Onko do arhõ disạ hecʼatʼkoa hoṛko do Jisu lạgitʼgeko onkaleda. Ado topa dander khon Lasare hoho oḍokkede ar gocʼko khone beretʼkede jokhecʼ okoeko hoṛ Jisu ṭhenko tahẽkan onkoge Lasarakʼ jiwetʼ beredokʼ reaṅ gohako emkeda. Onate gadel hoṛko do Jisu daram ạguye lạgitʼko oḍok calaolena, enteko ańjomakatʼ tahẽkana Jisuge ona hahaṛawakʼ kạmi doe kạmi akada. Noa ńelte Phạrusiko do ako akoreko men joṅana, “Aboakʼ do cetʼ labge baṅ hoyokʼkana. Ente ńelpe, goṭa duniạrenkoge uniakʼ dolreko calaoena.” Ona porobre okoeko sewa lạgitʼko hecʼakan tahẽkan onko modre adomko do Junạni hoṛko tahẽkana. Onko do Philip ṭhen hecʼkate nehõradeteko metadea, “E baba ale do Jisule ńelea.” Philip do Gạlil reakʼ Bethsaeda atoren hoṛe tahẽkana. Ar Philip do senkate Andrease lạiadea Ar Andreas ar Philip do senkate Jisukin metadea. Unre Jisu do Andreas ar Philipe metatʼkinạ, “Manwa Hopon do ṭhonok sodorokʼ reakʼ okte seṭer akanataea. Sạrigeń metaben kana, guhum jaṅ hasare ńurkate baṅ gocʼlen khan ona do eskarge tahena, menkhan gocʼlen khan do ạḍi utạr gele belekʼa. Okoe acʼakʼ jiwiye dulạṛ uni do acʼakʼ sạriakʼ reakʼ jione khuạutaea, menkhan okoe noa dhạrtire acʼakʼ jiwi bae dulạṛ uni do jaejug jion lạgitʼ acʼakʼ sạriakʼ reakʼ jione rukhiyạitaea. Jãhãege ińakʼe kạmikan khan uni do ińe pańjańma. Iń okareń tahena ińren kạmiạko hõ onḍegeko tahena. Jãhãege ińakʼe kạmikan khan Baba do uniye manotea. Ińakʼ jiwi do ńitokʼ khad badaokʼkan tińạ. Iń do cetʼ niạ kathageń mena, ‘E Baba, noa ghuṛi khon de bańcaoiń me?’ Menkhan niạ lạgitʼge coṅ noa okte hạbicʼ mań hecʼakana. E Baba, amakʼ ṭhonok sodorme baṛe.” Unre serma khon noa katha ańjomena, “Iń do ińakʼ ṭhonokiń sodor akada ar ona do arhõń sodora.” Ar okoeko hoṛ onḍeko teṅgo akan tahẽkan onko do ona ańjomkateko menkeda, “Rimil saḍeyena.” Adomko doko menkeda, “Jãhãe serma goḍet uni tulucʼ kathae roṛkeda.” Noa iạte Jisui menkeda, “Noa katha iń lạgitʼ do baṅ roṛakana, menkhan ape lạgitʼge roṛakana. Noa dhạrtiren hoṛkoakʼ bicạr reakʼ okte do seṭer akana, ar dhạrtiren rajakʼ ti khon ńitokʼ do recʼ ocokʼa. Iń do ot khon coṭteń rakapʼ ocokʼre sanamko iń ṭheniń or sorkoa.” Uni do cetʼlekan gujukʼ hoyokʼtaea ona bujhạu ocoko lạgitʼge noa katha doe roṛkeda. Unre hoṛko do Jisuko metadea, “Sonot sostor khonle baḍae akada Mạsi do jaejug hạbicʼe tahena. Enḍekhan am do cekatem meneda, Manwa Hopon do coṭte rakapʼ ocokʼ hoyokʼtaea? Enḍekhan nui Manwa Hopon doe okoe kana?” Jisui metatʼkoa, ar thoṛa dinge ape talare marsaltetʼ menakʼa. Ape ṭhen marsal menakʼrege dãṛãnpe, jemon apere ńut do aloe jitạu daṛeakʼ. Marsal ape ṭhen tahenrege marsalre pạtiạukʼpe jemon ona marsalren hoṛpe hoedaṛeakʼ.” Noako kathae lạiatʼko khan Jisu do onko khon apnartetʼe danaṅenteye calaoena. Menkhan onko samaṅre cinhạ lekate unạkʼ hahaṛawakʼkoe kạmiketʼre hõ hoṛko unire bako pạtiạulena. Noa do hoyena Jesaea nạbi hotete roṛlenakʼ katha jemon purạukʼ: E Probhu, alele ańjomakatʼakʼ do okoe baṅe pạtiạuatʼ? Ar okoe ṭhen Probhuakʼ daṛeanakʼ ti do sodor akana? Onko hoṛ do noa iạtege bako pạtiạu daṛeada, ente Jesaea cetʼ lekae roṛletʼ onkage, “Isor do onkoakʼ mẽtʼe kãṛã akatʼtakoa ar ontor doe goṛdho akatʼtakoa, jemon onko do mẽtʼte aloko ńeńel ar ontorte aloko bujhạu, ar bogekʼ lạgitʼ uni ṭhen aloko ruạṛ hijukʼ.” Jesaea do Jisuakʼ ṭhonoke ńelletʼte uni reaṅ noa kathae roṛleda. Enre hõ mukhiạko modren ḍher hoṛge unireko pạtiạuena, menkhan Phạrusiko ṭhen biṭlạha ocokʼ botorte bako aṅgocleda. Onko do Isor ṭhenakʼ man khon hoṛko ṭhenakʼ mange bạ̃ṛtiko kusiyakʼkan tahẽkana. Jisu do ãṭ aṛaṅteye menkeda, “Okoe ińreye pạtiạukʼkan uni do eken ińre do baṅ bickom okoeye kolakadiń unire hõe pạtiạukʼkana. Ar okoe ińe ńeleńkan, uni do kol akadinicʼgeye ńelekana. Iń do noa dhạrtire marsal lekań hecʼakana, jemon ińre okoeye pạtiạukʼ uni do ńutre aloe tahen. Jãhãege ińakʼ kathae ańjom ar onaleka bae senokʼ enḍekhan uni do bạń bicạrea, ente manwa dusiko lạgitʼ do baṅ, bickom kại khon bańcaoko lạgitʼgeń hecʼ akana. Okoe iń bae bạsutạń ar ińakʼ katha bae ańjom uni lạgitʼ do bicạricʼ menaea. Oka kathań roṛakatʼ ona kathage mucạtʼ dinre uni do dusi menteye sạbudea; ente iń do apnarte cetʼge bạń roṛakada, menkhan okoeye kolakadiń uni Babageye hukum akawạdińạ cetʼko roroṛ hoyokʼ tińạ mente. Ińiń baḍaea uniakʼ hukum do jaejug jion kana. Onate okako kathań roṛetʼkan ona do Babawakʼ hukum lekageń roṛeda.” Sen-parom porob thoṛa laha reakʼ ghoṭna. Jisu do noa dhạrti bạgikate Baba ṭhen calakʼ reakʼ okte seṭer akana menteye bujhạu daṛeatʼ tahẽkana. Ar dhạrtire okoeko acʼren hoṛko tahẽkan onkoe dulạṛetʼko tahẽkana ar mucạtʼ hạbicʼe dulạṛketʼkoa. Unre kedokʼ jokhecʼ. Soetan do Simon hopon Jihudạ Iskariotakʼ monre bạirikoakʼ tire Jisu soprote lạgitʼ sanae rakapʼ ocoletʼtaea. Jisu doe baḍaekan tahẽkana, Isor Baba do acʼakʼ tire jotowakʼe jimạ akada. Ar noa hõe baḍaekan tahẽkana, acʼ do Isor ṭhen khone hecʼakana ar uni ṭhengeye ruạṛ calao lạgidokʼ kana. Onate kedokʼ khone beretʼena ar oyonakʼe dohokeda ar mitʼṭen gamcha hataokate ḍanḍareye paṭheyena. Ona tayom gamlare dakʼe dulketʼte celako jaṅgae ạbuk ketʼkoa ar ḍanḍareye paṭhe akan tahẽkan gamchate jojotʼe ehopʼena. Ado Simon Patras ṭhene hecʼen khan Patras do uniye metadea, “E Probhu, am do cetʼ ińakʼ jaṅgam ạbuktińạ?” Jisui roṛ ruạṛadea, “Okań cekayetʼkan ona do ńitokʼ bam baḍaeyeda menkhan tayomtem bujhạua.” Patras do uniye metadea, “Ińakʼ jaṅga do tis hõ bam ạbuk ńama.” Jisu do Patrase metadea, “Bạń ạbukletam khan iń tulucʼ amakʼ bakhra do bạnukʼ tama.” Unre Simon Patrase menkeda, “E Probhu, enḍekhan eken jaṅga moto do alo, ińakʼ ti ar bohokʼ hõ ạbuk tińme.” Jisu do uniye metadea, “Um akanicʼ do jaṅga chaḍa ar cetʼge ạbukokʼ reakʼ jạruṛ bạnukʼtaea, ente uni do jotoge saphagetaea. Ape dope saphagea, menkhan sanamko do baṅ.” Okoe acʼe soprote uni doe baḍae akade tahẽkana. Onate uni doe menkeda, “Ape joto do bape saphawa.” Ado joto hoṛe ạbuk sạtketʼko khan Jisu do acʼakʼ oyonakʼ hataokate arhõ duṛupʼenteye metatʼkoa, “Iń cetʼ iń cekaketʼ ona dope bujhạuletʼgea? Ape do Guru ar Probhu mentepe hohowạńkana, ar ona do ṭhikgepe meneda, ente uni kangeạń. Menkhan iń do Probhu ar Guru hũyạte hõ cetʼ lekań ạbukketʼpe onkage ape hõ eṭakʼkoakʼ jaṅga ạbuk lek tapea. Iń do noań udukʼ atʼpea jemon apere cetʼlekań cekaketʼ ape hõpe onkae. Sạrigeń metapekana, guti do acʼren kisạ̃ṛ khon bae maraṅa. Ar kol ocoyicʼ hõ kokolicʼ khon bae maraṅa. Noako baḍaekate onako lekape kạmile khan enḍekhan ape dope bhạgangea. Ape sanamkoakʼ katha do bạń meneda. Iń okoeyiń bachao akatʼko onko doń baḍae akatʼkogea. Menkhan sonot sostor reakʼ noa katha do purạukʼtege hoyokʼa, ‘okoe iń tulucʼ piṭhại jojomkan unige iń birudre jaṅgae tulketʼtaea.’ Iń do noa hoyokʼ laharegeń lạiape kana, jemon hoelenrepe pạtiạukʼ baṅma, iń kangeạń. Sạrigeń metapekana, iń okoeyin kole, ar uni okoeye ataṅe, uni do ińgeye ataṅedińạ ar iń okoeye ataṅiń uni do kolakadińcʼgeye ataṅedekana.” Ado noako katha menkate Jisu do jiwireye khad badaoena. Uni do pusṭạuteye menkeda, “Sạrigeń metapekana, ape modren mitʼ hoṛ bạirikoakʼ tireye soprotińạ.” Jisu okoeakʼ kathae meneda ona bako bujhạu daṛeatʼte celako do ako akoreko beṅgetʼ baṛawana. Onko modren Jisu okoeye dulạṛede tahẽkan uni do Jisuakʼ koṛam pheḍreye ṭenḍar akan tahẽkana. Simon Patras do uni isạrawadeteye metadea, “Kuliyeme uni do okoe reaṅe roṛeda.” Unre uni cela do Jisure ṭenḍarenteye menkeda, “Henda Probhu, uni doe okoe kana?” Jisui roṛ ruạṛkeda, “Noa piṭhạ kecakʼ bạṭire topokate okoeyiń emae unikangeae uni hoṛ do.” Ado piṭhạ kecakʼ bạṭire topokate Simon Iskariotren hopon Jihudại emadea. Piṭhạ kecakʼe ńamketʼ khan Soetan do Jihudạreye boloyena. Jisu do uniye metadea, “Okaṭakʼ cekayem menetʼkan ma usạraeme.” Jisu sãote okoeko jojomkan tahẽkan onko do bako bujhạuleda cedakʼ Jisu do Jihudạ noa kathae metadea. Adomko doko bujhạukeda, porobre lạgitʼ jạruṛokʼakʼko kiriń ạgui se reṅgecʼ orecʼko jãhãnakʼ emako lạgitʼ Jisu do Jihudại metadea, ente ṭaka reakʼ baksa do Jihudạ ṭhenge tahẽkana. Ado piṭhạ kecakʼe hataoketʼ torage Jihudạ do bahreteye oḍok calaoena. Unre do ńindạ tahẽkana. Ado Jihudạ bahreteye calaoen khan Jisui menkeda, “Manwa Hoponakʼ ṭhonokokʼ reakʼ okte do seṭerena ar unire Isorakʼ ṭhonok do sodorokʼa. Isorakʼ ṭhonok tinre unire sodorokʼa unre Isor hõ Manwa Hoponakʼ ṭhonok acʼreye sodora ar usạrageye ṭhonok ocoyea. “E bachako, iń do ape tulucʼ ar thoṛa ghạṛicʼ minạńa. Ape do ińpe ńam baṛańạ, menkhan Jihudi mukhiạko cetʼlekań metatʼko tahẽkan, ‘okateń calakʼkan onḍe do ohope sen daṛelena,’ onkage ape hõ ńitiń metapekana. Mitʼṭen nawa hukumiń emape kana dupulạṛpe. Cetʼleka iń do apeń dulạṛakatʼpe onkage ape hõ dupulạṛpe. Nonkage ape apere dulạṛ tahen khan sanamkoko bujhạu daṛeakʼa ape do ińren celako kanape mente.” Simon Patras do Jisui metadea, “E Probhu am do okatem calakʼ kana?” Jisui roṛ ruạṛkeda, “Iń okateń calakʼkan, onḍe do ńitokʼ iń sãote ohope sen daṛelena, menkhan tayomtepe hijukʼa.” Patras do uniye metadea, “E Probhu, cedakʼ ńitokʼ do am sãote bạń calao daṛeakʼa? Am lạgitʼ ińakʼ jiwi hõń emokʼa.” Unre Jisui menkeda, “Iń lạgitʼ cetʼ jiwim alaetama? Sạrigeń metam kana, sim sạnḍi ạuriye ragre am do pe dhaoem baṅeńa. “Apeakʼ mon do alo khad badaokʼtape ma. Isorre pạtiạukʼpe ar ińre hõ pạtiạu akae tahenpe. Ińren Babawakʼ oṛakʼre ạḍi utạr tahen jaega menakʼa. Ona baṅ tahẽlen khaniń lạikepea, ape lạgitʼ jaega teariń calakʼ kana. Ar senkate ape lạgitʼ jaegań benaole khan arhõń ruạṛ hijukʼa ar iń ṭheniń ataṅ idipea, jemon iń okareń tahen ape hõ onḍepe tahen. Ar iń okateń calakʼkan ona reakʼ hor mape baḍaege.” Thoma do Jisui metadea, “E Probhu, bale baḍaea okatem calakʼkana, ente cekate hor dole baḍaea?” Jisu do Thomae metadea, “Ińge hortetʼ, sạriakʼtetʼ ar jion. Iń hotete baṅkhan okoe hõ Baba ṭhen ohoko calao daṛelena. Ińpe baḍaeliń khan ińren Baba hõpe baḍaekea. Ape do ńitokʼ unipe baḍae akadea ar ńel hõpe ńelakadea.” Philip do Jisui metadea, “E Probhu, Baba baṛe udukʼaleme, inạge ale lạgitʼ ḍhera.” Jisu do uniye metadea, “E Philip, nunạkʼ din ape tulucʼ minạńa, enrehõ cetʼ bape baḍae akadińạ? Okoe ińe ńelakadiń uni do Baba hõe ńelakadea. Am do cekatem meneda, ‘Baba baṛe udukʼaleme?’ Am do cetʼ bam pạtiạukʼ kana, iń do Babare minạńa ar Baba do ińre menaea mente? Iń okako kathań lại apekan ona do apnar khonakʼ do bạń roṛeda, menkhan ińre menae Babageye kạmi kana. Ińakʼ kathare pạtiạukʼpe je, iń do Babare ar Baba do ińre menaea mente. Ar baṅ khan ińakʼ noako kạmi iạte pạtiạuạńpe. “Sạrigeń metapekana, okoe ińreye pạtiạukʼkan uni do iń okakoń kạmikan uni hõ onakoe kạmiya. Ar Baba ṭheniń calakʼkante uni do noako khon arhõ maraṅ maraṅakʼkoe kạmiya. Jãhãnakʼge iń ńutumtepe koe iń do onań onkaea, jemon Babawakʼ ṭhonok Hopon hotete sodorokʼtae. Iń ńutumte jãhãnakʼgepe koe enḍekhan onań onkaea. “Ińpe dulạṛediń khan ińakʼ sanam hukumkope dohoea. Iń do Baba ṭheniń koeapea, ar uni do jaejug hạbicʼ mitʼṭen sohotʼicʼe kolapea. Uni sohotʼicʼ kangeae sạriakʼren Jiu do. Dhạrtiren hoṛko uni do ohoko ataṅ daṛelea, ente onko do ńelhõ bako ńelekana ar baḍae hõ bako baḍae akadea. Menkhan ape dope baḍae akadea, ente uni do ape são sãoteye tahẽkana ar apeakʼ ontorreye girobasokʼa. “Bạń ṭũạr oṭokapea; iń do ape ṭheniń hijukʼa. Ar thoṛa ghạṛicʼ khange dhạrtiren hoṛko do ar bako ńel ńameńa, menkhan ape dope ńeleńgea. Iń do jiwetʼge minạńte ape hõ jiwetʼpe tahena. Enhilokʼgepe baḍae daṛeakʼa, iń do Babare, ape do ińre ar iń do apere minạńa mente. Okoe ińakʼ hukumkoe baḍaekan ar onakoe manaoetʼkan unige iń doe dulạṛedeńa.” Ar okoe ińe dulạṛedeń ińren Baba hõ uniye dulạṛea. Iń hõ uniń dulạṛea ar uni ṭheniń sodorokʼa. Unre Jihudạ do (Iskariot do baṅ) uniye metadea, “E Probhu, am do cetʼ eken ale ṭhengem sodorokʼa, ar dhạrtiren hoṛko ṭhen do baṅ?” Jisu do uniye roṛ ruạṛadea, “Jãhãege ińe dulạṛiń uni do ińakʼ kathae dohoea. Ińren Baba do uniye dulạṛea ar uni ṭhen liń hijukʼte uni soṅgeteliń tahena. Okoe bae dulạṛiń uni do ińakʼ katha leka ohoe calaolena. Okaṭakʼ kathape ańjometʼkan ona do ińakʼ katha do baṅkana menkhan okoe ińe kolakadiń uni Babawakʼ katha kangea. Ape sãoteń tahenrege noako kathań galmarao akawatʼpea Uni sohotʼicʼ sonot Jiu one okoe do Baba iń ńutumteye kolape, unige sanamakʼkoe cetʼapea, ar okakoń lạiakawatʼpe onako joto doe disạ ocopea. “Iń do ape lạgitʼ suluk iń doho oṭokakʼ kana, ińakʼ sulukge apeń emape kana; dhạrti cetʼ lekae emokʼkan onka do bạń emokʼ kana. Apeakʼ ontor do alo khad badaokʼtapema ar monre botor hõ alo tahentape ma. Ańjom akadape ińiń menakatʼpea, ‘iń doń calakʼkana ar ape ṭhen arhõń ruạṛ hijukʼa.’ Ape do ińpe dulạṛliń khan Baba ṭheniń calakʼkan iạtepe rạskạkokʼa, ente Baba do iń khon hõe maraṅgea. Noako hoyokʼ laharege iń doń lại dohoakatʼpea jemon hoelenrepe pạtiạukʼ. Iń do ape tulucʼ ar ḍher ghạṛicʼ bạń galmaraoa, ente noa dhạrtiren raje hijukʼkana. Ińre uniakʼ jãhãn ektiạri do bạnukʼtaea. Menkhan noa do hoyokʼ kana jemon hoṛkoko baḍae daṛeakʼ je, iń do Babań dulạṛedekana ar Baba cetʼ lekae hukum akadiń onkage jotowakʼ iń kạmikana. Ma beredokʼpe, dela nonḍe khon bon calakʼa. “Ińge sạri darkha nạ̃ṛĩ ar ińren Baba doe mạli kana. Ińre okako ḍạr baṅ jokʼ onako doe getʼ giḍikakʼa, ar oka ḍạrko jokʼkan onako doe kamana jemon arhõ bạ̃ṛti jokʼ. Okaṭakʼ kathań galmarao akatʼpe onate ape do laharegepe saphagea. Ińre tahenpe ar iń hõ apeakʼ ontorreń tahena. Darkha nạ̃ṛĩre ḍạrko joṛao baṅ tahẽlen khan cetʼ leka apnarte baṅ jokʼ onkage ape hõ ińre bape tahẽlen khan apnarte ohope jo daṛelena. “Ińge darkha nạ̃ṛĩ ar ape do ḍạrko. Okoe ińreye tahenkan ar iń do unire enḍekhan uniakʼ jionre do ạḍi jo jokʼa, ente iń begor ape do cetʼ hõ bape ceka daṛeakʼa. Jãhãege ińre bae tahen khan uni do getʼ giḍiakatʼ ḍạr leka bahreteye giḍi ocokʼa ar ona do rohoṛokʼa. Unre ona ḍạr jarwakate seṅgelreko khadlekakʼa ar ona do lokʼa. Ińrepe tahẽlen khan ar ińakʼ kathako apeakʼ ontorre tahẽnlen khan enḍekhan jãhãnakʼge sanape, onage koepe; ar ona do hoeapea. Apeakʼ jionre ḍherpe jolen khan enḍekhan nonkate ape do ińren celape sạbudokʼa ar ińren Baba doe ṭhonok ocokʼa. Baba cetʼlekae dulạṛ akadiń ińhõ onkage apeń dulạṛakatʼpea. Ińakʼ dulạṛre tahenpe. Cetʼleka iń do Babawakʼ sanam hukumkoń dohoyetʼkante uniakʼ dulạṛre minạńa, onkage ińakʼ hukumkope dohole khan ape hõ ińakʼ dulạṛrepe tahena. Noako kathań menkeda jemon ińakʼ rạskạ do apeakʼ ontorre tahen ar apeakʼ rạskạ purạukʼtape. Ińakʼ hukum do nõkʼõe, cetʼlekań dulạṛakatʼpe onkage ape hõ dupulạṛpe. Jãhãege acʼren gateko lạgitʼ acʼakʼ jiwiye alaetae enḍekhan noa khon maraṅ dulạṛ do ar okoeakʼ hõ bạnukʼa. Okako hukumiń emape onakope dohole khan enḍekhan ape do ińren gatepe hoyokʼa. Iń do golam bạń metapekana, ente kisạ̃ṛ cetʼe cekakan golam do ona bae baḍaea; menkhan iń do gateń metapekana, ente Baba ṭhen khon okań ańjomakatʼ onage apeń baḍae ocoakatʼpea. Ape do bape bachao akadińạ, menkhan ińgeń bachao akatʼpete kạmireń dhurạu akatʼpea jemon apeakʼ jionrepe jokʼ ar ona jo do jemon tahẽ akae tahentape. Enḍekhan iń ńutumte Baba ṭhen jãhãnakʼgepe koe uni do onageye emapea. Iń do noa hukumiń emapekana, jemonpe dupulạṛ. “Dhạrtiren hoṛkoko kurudape khan, baḍaepe ape lahare onko do ińgeko kurudạńkana. Ape do noa dhạrtirenpe hoelen khan enḍekhan hoṛko do apnarren menteko dulạṛkepea. Menkhan noa dhạrtiren dope baṅkana, bickom iń do dhạrti khoniń bachao akatʼpete dhạrtiren hoṛko apeko kurudape kana. Ińakʼ noa katha do alope hiṛińa, guti do acʼren kisạ̃ṛ khon bae maraṅa. Onate hoṛko iń gojeńko kurumuṭuyetʼ khan ape hõko onkapea; ar ińakʼ kathako ańjom khan apeakʼ katha hõko ańjoma. Onko do iń iạteko onkapea, ente iń okoeye kolakadiń uni do bako baḍaeyedekana. “Iń aloń hecʼlen khan ar bạń galmaraoako khan onko do ohoko dusikokʼa; menkhan ńitokʼ do kại reakʼ jãhãn ạnḍuṅge bạnukʼtakoa. Okoe ińe kurudạń uni do ińren Babageye kurudae kana. Okako kạmi okoe tisge bako kạmiakatʼ onako kạmi onko samaṅre bạń kạmi lekhan onkoakʼ dos do oho hoekokʼa. Menkhan ńitokʼ onko do iń ar ińren Baba hõko ńelakadea arko kurud ạliń kana. Noa do hoeakana onkoakʼ ạn-ạrire olakan katha jemon purạukʼ, ‘onko do ạuṛiakʼte ińko kurudạń kana.’ “Okoe sohotʼicʼ Baba ṭhen khoniń kolape, uniye hecʼlenre unige iń reaṅ gohae ema. Uni doe hoyokʼ kana sạriakʼren Jiu one okoe do Baba ṭhen khone hijukʼkan. Ape hõ iń reaṅ gohape ema, ente pạhil khonge ape do iń são sãote menakʼpea. “Iń do noako joto kathań lạiatʼpea jemon monre alope tạkijokʼ. Sunạgog khonko oḍok idipea; ar nonkan okte hijukʼ kana one okoe apeko gocʼpe onko doko monejoṅa, Isorgeko sewawae kana mente. Onko do noa iạtegeko onkaea ente Baba hõ bako baḍaeakadea ar iń hõ bako baḍae akadińạ. Iń do noakoń galmaraowatʼpea jemon ona okte hecʼlenrepe disại, noa kathań metatʼpe tahẽkana. “Pạhil khon noako katha do bạń lại akawatʼpea, ente ape tulucʼ iń tahẽkana. Okoe ińe kolakadiń iń do ńitokʼ uni ṭhengeń calakʼ kana, ar apeko modren okoe hõ bape kuliyediń kana, ‘okatem calakʼ kana mente?’ Iń do noakoń lại akawatʼpe iạte apeakʼ mon do dukte perecʼ akana. Enre hõ sạri kathageń lạiape kana, ińakʼ calakʼ do ape lạgitʼ bhagegea, ente bạń senlen khan uni sohotʼicʼ do ape ṭhen bae hijukʼa. Menkhan ińiń senlenre uni do ape ṭheniń kolea. Uniye hecʼlenre dhạrtirenko do kại reaṅ, dhorom reaṅ ar Isorakʼ bicạr reaṅ cehaonae emakoa. Uni do kại reaṅ hõ cehaonae emakoa, ente hoṛko do ińre bako pạtiạukʼ kana; Isorakʼ sanaleka calakʼ reaṅ hõ cehaonae emakoa, ente iń do Baba ṭheniń calakʼ kana menkhan ape do ar bape ńel ńameńa; Bicạr reaṅ hõ cehaonae emokʼa, ente dhạrtiren rajakʼ bicạr do hoeakana. “Ape lại ape lạgitʼ arhõ ạḍi okocʼ kathako menakʼtińạ, menkhan ńitokʼ onako do ohope sahao daṛelea. Menkhan uni sạriakʼren Jiu tinreye hijukʼa unre uni do hore udukʼapete sạriakʼreye ạyurpea. Uni do acʼte bae roṛa, menkhan okaṭakʼe ańjom onageye roṛa ar okaṭakʼ hoyokʼ lạgidokʼ ona hõe baḍae ocopea. Uni sạriakʼren Jiuge ińakʼ ṭhonoke sodora, ente jãhãnakʼgeń cekae ariń roṛ onage uni do ape ṭhene sodora. Babawakʼ oka menakʼtae onako sanamakʼge ińakʼ kana. Ona iạteń meneda, jãhãnakʼgeń cekae ariń roṛ onage uni do apeye baḍae ocopea. “Thoṛa ghạṛicʼ khange bape ńel ńameńa, arhõ thoṛa ghạṛicʼ khangepe ńeleńa.” Ado noa katha ańjomkate Jisuren celako modren adomko do roṛ baṛaeko ehopʼena, “Nui do cetʼe metabon kana, ‘thoṛa ghạṛicʼ khange bape ńeleńa arhõ thoṛa ghạṛicʼ khangepe ńeleńa?’ Arhõ uni doe meneda, ‘Baba ṭheniń calakʼ kana.’ Ar one thoṛa ghạṛicʼ reakʼ kathae menetʼkan ona do cetʼ kana? Abo do babon bujhạu daṛeakʼ kana cetʼe meneda.” Ado celako noa reaṅ kuliyeko menjoṅ kana menteye bujhạuketʼ khan Jisu do onkoe metatʼkoa, “Ińiń menakatʼ, ‘thoṛa ghạṛicʼ khange bape ńeleńa arhõ thoṛa ghạṛicʼ khangepe ńeleńa,’ noa reaṅge cetʼ ape talare bape kupulikʼ kana? Sạrigeń metapekana, ape dope rakʼjoṅa arpe hae haeokʼa menkhan dhạrtiren hoṛ doko rạskạkʼa. Ape do dukpe ńama, menkhan apeakʼ noa duk do baṅ tahena; ona bodolte ape dope rạskạkʼa. Maejiu do gidrại janame jokhecʼ kosṭoe ńama, ente uniakʼ okte do seṭerentaea. Menkhan gidrại janamlere, dhạrtire mitʼṭen nawa manwae hecʼen reakʼ rạskạte ona kosṭo do ar bae disạea. Onkage ape hõ ńitokʼ do haron ar kosṭope ńameda; menkhan arhõ apeko sãoteń ńapamokʼa unre apeakʼ mon do rạskạte perejokʼa ar ona rạskạ do okoe hõ bako recʼ daṛeapea. Enhilokʼ ape do cetʼge bape kuliyińạ. Sạrigeń metapekana, iń ńutumte Baba ṭhen jãhãnakʼgepe koe uni do onae emapea. Ape do ńit hạbicʼ iń ńutumte jãhãnakʼge ạuripe koea. Koepe, adope ńama jemon apeakʼ rạskạ purạukʼtape. “Noako sikhạuna katha do phenkoteń galmaraoatʼpea. Ente nonkan okte hijukʼkana one unre iń do phenkote bạń galmaraoa, menkhan pusṭạute Baba reaṅ iń lạiapea. Enhilokʼ ape do iń ńutumtepe koea, ar bạń meneda, ińge ape lạgitʼ Baba ṭheniń nehõrok̕a. Baba ma coṅ acʼgeye dulạṛetʼpe, ente ape do ińpe dulạṛakadińạ arpe pạtiạu akana, iń do Baba Isor ṭhen khoniń hecʼakana. Sạrige iń do Baba ṭhen khon noa dhạrtiteń hecʼakana, arhõ noa dhạrti bạgikate Baba ṭhengeń calakʼ kana.” Unre uniren celakoko metadea, “Ńelme ńitokʼ do sodortegem roṛeda, jãhãn phente do bam lạiyeda. Nitokʼ dole bujhạu daṛeakʼkana, bin baḍaeakʼ do cetʼge bạnukʼtama, ar jãhãege jãhãnakʼe kulime ona reakʼ jạruṛ hõ bạnukʼtama. Ona iạtegele pạtiạukʼ kana am do Isor ṭhen khonem hecʼakana.” Jisu do acʼren celakoe metatʼkoa, “Enḍekhan ńitokʼ do cetʼ pạtiạukʼ kangeape? Ńelpe, ona okte do hijukʼkana, hẽ hecʼakangea, unre ape dope chir chạturokʼa ar iń eskarpe bạgi oṭowạńte apan ạpin jaegatepe calakʼa, enrehõ iń do bạń eskara, ente iń tulucʼ do Baba menaea. Iń do noakoń lạiatʼpea jemon iń tulucʼ mitʼ akanpe tahente monre sulukpe ńam. Noa dhạrtire ape do harkhet ar sasetre menakʼpea, menkhan khạtirokʼpe; ińge dhạrti doń jitạuakada.” Ado noako kathae roṛketʼ khan Jisu do serma secʼ beṅgetʼ rakapʼ kateye menkeda, “E Baba, okte do seṭerakana. Amren Hopon ṭhonok ocoyem jemon Hopon hõ amakʼ ṭhonoke sodortam. Am do sanam manwako cetanre ektiạriyem emakawadea, jemon okoekom emakawade onko sanamko jaejug jione emako. Ar jaejug jion do nõkʼõe, amge eskar sạri Isorko baḍaeme ar amem kolakade Jisu Mạsi. Am do okaṭakʼ kạmim emakawadiń ona sạtkate noa dhạrtireń ṭhonok ocoakatʼmea. E Baba, dhạrti ạuri sirjạure am sãote oka ṭhonok tahẽkantiń, ona ṭhonok arhõ emạńme baṛe. “Dhạrtirenko mod khon okoekom emakawạdiń onko ṭhen amiń sodor akatʼmea. Onko do amrengeko tahẽkana, ar am do ińem emakawạdińa. Onko do amakʼ kathako batao akada. Ar ńitokʼ doko bujhạu daṛeakada, jãhãnakʼgem emakawạdiń onako sanamakʼ do am ṭhen khon hecʼakana. Ente okako katha lạiakom metadiń tahẽkan iń do onakoń lại akawatʼkoa. Ar onko do onako ataṅketʼte sạrigeko baḍaekeda, iń do am ṭhen khoniń hecʼakana, arko pạtiạu akana, amge ińem kolakadińa. “Sanamko lạgitʼ do bạń nehõrokʼkana, menkhan okoekom emakawạdiń onko lạgitʼ iń nehõramkana, ente amren kangeako. Ińakʼ sanamakʼko do amakʼ kana, ar amakʼ sanamakʼ hõ ińakʼ kangea. Ar onkore ińakʼ ṭhonok do sodor akana. Iń do noa dhạrtire ar bạń tahen kana, menkhan onko do noa dhạrtire menakʼkoa; iń do am ṭheniń hijukʼkana. E sonoticʼ Baba, amakʼ oka ńutumem emakawạdiń ona ńutumte noko rukhiyạkom, jemon alaṅ cetʼ lekalaṅ mitʼge noko hõ onkage mitʼko tahen. Iń do tinạkʼ din onko sãoreń tahẽkan unạkʼ din amakʼ oka ńutumem emakawạdiń ona ńutumteń rukhiyạ ạguakatʼkoa. Iń doń horho akatʼkoa ar onko mod khon okoe hõ bako nosṭo akana. Eken okoeakʼ nosṭokʼ reakʼ katha tahẽkan unigeye nosṭo akana, jemon sonot sostor reakʼ katha purạukʼ. “Ńitokʼ do am ṭheniń hijukʼ kana, ar ińakʼ rạskạte onkoakʼ ontor jemon perejokʼtako onate dhạrtire tahenrege noako kathań roṛeda. Am okakom menakawạdiń onakogeń baḍae ocoakatʼkoa. Dhạrtiren hoṛ do onkoko kurud akatʼkoa, ente iń do cetʼleka noa dhạrtiren iń baṅkan onkage onko hõ noa dhạrtiren doko baṅkana. Noa dhạrti khon idiko lạgitʼ do bạń nehõram kana, bickom nehõrokʼ kạnạń, jemon Soetanakʼ ti khonem bańcaoko. Cetʼleka iń do noa dhạrtireniń baṅkan onkage onko hõ noa dhạrtiren doko baṅkana. “Sạriakʼ hotete am lạgitʼge onko do begar dohokom. Amakʼ katha kangea ona sạriakʼtetʼ do. Ar cetʼleka dhạrtitem kolakadiń onkage ińhõ dhạrtite nokoń kolakatʼkoa. Onko iạte am lạgitʼ iń doń begar akana jemon sạriakʼ hotete onko hõko begar ocokʼ. “Eken onko lạgitʼ iń nehõrokʼ kana ona do baṅ, menkhan okoe nokoakʼ kathate ińreko pạtiạukʼkan onko lạgitʼ hõń nehõrokʼkana, jemon onko sanamko mitʼko hoyokʼ. E Baba cetʼleka ińre jopoṛao menam ar ińhõ amre minạń onkage onko hõ jemon alaṅ soṅge jopoṛaoko tahen. Onate dhạrtiren hoṛkoko pạtiạukʼa je, amgem kolakadińạ. Oka ṭhonokem emakawạdiń ona do onkoń emakatʼkoa, jemon alaṅ cetʼleka mitʼ menakʼlaṅ onko hõ onka mitʼko tahen. Metakʼme iń do onkore, ar am do ińre, jemon nonkate onko do mitʼko hoyokʼ. Onate dhạrtiren hoṛko baḍae daṛeakʼa, amge ińem kolakadińa ar cetʼleka ińem dulạṛedeńkan onkage onko hõm dulạṛetʼkoa. “E Baba, menjoṅ kạnạń am okoekom emakawạdiń, ińakʼ ṭhonok ńel ocoko lạgitʼ onko do jemon iń okareń tahen onḍeko tahẽ daṛeakʼ. Ona ṭhonok do amgem emakawạdińa, ente dhạrti ạuri sirjạu khonge am dom dulạṛedeń kana. E dhoromren Baba, dhạrtiren hoṛko bako baḍae akatʼmea, menkhan iń doń baḍae akatʼmea. Ar nokoko baḍae akada amge ińem kolakadińạ. Iń do onko ṭheniń sodor akatʼmere hõ arhõń sodormea, jemon cetʼ lekam dulạṛ edeńkan onkan dulạṛ onkoakʼ ontorre tahentako ar iń do jemon onko tulucʼ mitʼ akaniń tahen. Ado noakoe roṛ sạtketʼ khan Jisu do acʼren celako sãote kedronko metakʼ mitʼṭen nala hanasae parom calaoena. Onḍe do mitʼṭen bagwan tahẽkana. Jisu ar acʼren celako do ona bagwanteko oḍok calaoena. Ar bạirikoakʼ tire okoeye soprotlede uni Jihudạ hõ ona jaega doe baḍaeakatʼ tahẽkana, ente ạḍi dhao Jisu do acʼren celako sãote onḍeye senokʼkan tahẽkana. Ar maraṅ naekeko ar Phạrusiko do Jihudạ soṅgete mitʼ dol palṭon ar kạmiạko kolketʼkoa. Unre Jihudạ do onko sãote diuhe, mosal ar khanḍa banḍawante onḍeye seṭerena. Jisu do acʼre hoe lạgidokʼkan jotowakʼ doe baḍaekan tahẽkana. Onate uni do oḍok hecʼkate onkoe metatʼkoa, “Okoepe ńam baṛayede kana?” Onkoko menkeda, “Nasaretren Jisu.” Jisui metatʼkoa, “Iń kangeạń uni do.” Ar bạirikoakʼ tire okoeye soprotlede uni Jihudạ hõ onko sãoteye teṅgo akan tahẽkana. Ado “Ińkangeạń,” menteye metatʼko khan onko doko pạcgotʼena ar otreko bhindạṛena. Jisu do arhõe kuliketʼkoa, “Okoepe ńam baṛayede kana?” Metadeako, “Nasaretren Jisu.” Unre Jisui metatʼkoa, “Iń ma coń metapekange uni kangeạń. Ar ińgepe ńam baṛayediń khan noko do sen ocoakope.” Noa do hoyena Jisui menletʼ katha jemon purạukʼ, “Okoekom emakawạdiń onko modre mitʼ hoṛ hõ bạń atʼakadea.” Simon Patras ṭhen mitʼṭen tarwaṛe tahẽkana. Patras do tarwaṛe bocʼkate maraṅ naekeren gutiakʼ jojom luture heseketʼtaea. Uni gutiakʼ ńutum do Malkus tahẽkana. Noa iạte Jisu do Patrase metadea, “Tarwaṛe do khapre bhoraokakʼme. Baba oka duk reakʼ bạ̃ṭiye emakawạdiń ona do cetʼ bạń ataṅa?” Unre palṭonko ar onkoren subedarko ar Jihudi mukhiạkoren kạmiạko do Jisu sapʼkedeteko tolkedea. Ar Hannas ṭhenko idi maṛaṅkedea, ente Hannas do ona bochorren maraṅ naeke Kaeapharen hońhartetʼe tahẽkana. Nui Kaeaphage Jihudi mukhiyạkoe solhawatʼko tahẽkana je, goṭa jạt bodolte mitʼ hoṛ gujukʼge boroṅ bhagea. Simon Patras ar eṭakʼ mitʼṭen cela do Jisukin pańja idikedea. Uni eṭakʼ cela do maraṅ naekeren oprom hoṛe tahẽkana. Uni cela do Jisu sãote maraṅ naekeakʼ bahre raca hạbicʼe bolo calaoena, menkhan Patras do bahre duạr ṭhene teṅgo tahẽyena. Unre maraṅ naekeren opromicʼ cela do bahrete senkate duạr horhoyicʼ kạ̃ṛmĩye galmaraoade khan bhitrite Patrase aderkedea. Uni kạ̃ṛmĩ do Patrase metadea, “Am hõ cetʼ uniren celako modren kanam?” Patrase menkeda, “Baṅ kạnạń.” Unre bes rabaṅ paṛao akan tahẽkana. Ona iạte golamko ar kạmiạko do koela seṅgel jolkate teṅgokateko jorogokʼkan tahẽkana. Ar Patras hõ onko sãote teṅgokate jorogokʼe ehopʼena. Unre maraṅ naeke do Jisu acʼren celako reaṅ ar acʼakʼ cecetʼakʼ reaṅe kulikedea. Jisui roṛ ruạṛkeda, “Iń do hoṛko ṭhen sodortegeń galmarao akada. Ar Jihudiko mitʼ sãote okareko jarwakʼ ona sunạgogkore ar mundilre iń do jaogeń cetʼ akatʼkoa. Ar danaṅre do cetʼge bạń roṛakada; enḍekhan cedakʼ iń dom kuliyediń kana? Ińakʼ katha okoeko ańjomakatʼ onkoge kulikom cetʼiń men akatʼkoa mente. Ar okań roṛakatʼ ona doko baḍaegea. Jisu noa kathae roṛketʼ khan sorre teṅgo akan tahẽkan kạmiạko modren mitʼ hoṛ do uniye thapakedeteye metadea, “Maraṅ naeke nonkam roṛ ruạṛae kana?” Jisu do uniye metadea, “Bạṛicʼ iń roṛketʼ khan udukʼạń me. Menkhan bhageakʼ iń menakatʼ khan cedakʼem daleńkana?” Unre Hannas do maraṅ naeke Kaeapha ṭhen tolgeye kolkadea. Ado Simon patras teṅgokate tinreye jorogokʼ kan tahẽkana unre hoṛko do uniko metadea, “Am hõ cetʼ uniren celako modren mitʼ hoṛ kanam?” Patras do baṅketʼteye menkeda, “Baṅ iń doń baṅkana.” Patras okoeakʼ luture heseletʼtae uniren mitʼ peṛa do maraṅ naekeren golame tahẽkana. Khan uniye menkeda, “Iń do bagwanre uni tulucʼ cetʼ bạń ńeletʼmea?” Patras do arhõe baṅkeda, ar unrege mitʼṭen sim sạnḍi doe rakʼgotʼkeda. Jihudi mukhiạko do ạḍi setakʼre Kaeapha ṭhen khon Romren disạm cakʼlaoicʼ Pilạtakʼ doṅgolte Jisuko idikedea. Menkhan onko do ona doṅgol bhitrite bako bololena jemon saphako tahente sen-parom porob reakʼ bhojko jom daṛeakʼ. Unre Pilạt do onko ṭhen bahrete oḍok hecʼenteye metatʼkoa, “Nui hoṛ do cetʼe dos akatʼtepe dusiyede kana?” Jihudi mukhiạkoko menkeda, “Bạṛicʼakʼ bae kạmile khan am ṭhen do ohole ạgukea.” Pilạte metatʼkoa, “Nui do idiyepe ar apeakʼ ạn leka bicạrepe.” Onate Jihudi mukhiạko do Pilạtko metadea, “Menkhan jãhãege gujukʼ sạjại emae reakʼ ektiạri aleakʼ do bạnukʼtalea.” Jisu do cetʼleka gujukʼ hoyokʼtaea ona do laharegeye lạiletʼa. Noa do hoyena uniakʼ ona katha jemon purạukʼ. Unre Pilạt do arhõ oṛakʼ bhitriteye boloyena ar Jisu hohoadeteye metadea, “Am do cetʼ Jihudikoren raj kanam?” Jisui menkeda, “Am do cetʼ apnarte noa katham roṛeda, se eṭakʼ hoṛ iń reaṅko lại akawatʼmea?” Pilạte roṛ ruạṛkeda, “Iń do cetʼ Jihudi kạnạń? Am jạtren hoṛ ar maraṅ naekekoge coṅ iń ṭhenko soprot akatʼme. Am do cetʼem ceka akada?” Jisui menkeda, “Ińakʼ raj do noa dhạrti reakʼ do baṅkana. Ente noa dhạrti reakʼ tahẽlen khan enḍekhan ińren hoṛko lạṛhạikokʼa jemon Jihudi mukhiạkoakʼ tire aloń paṛaokokʼ; menkhan ińakʼ raj do nonḍenakʼ do baṅkana.” Pilạt do Jisui metadea, “Enḍekhan am do cetʼ raj kanam?” Jisui roṛ ruạṛkeda, “Am do ṭhikgem menakada, iń doń raj kana. Iń do sạri goha emokʼ lạgitʼgeń janam akana ar ona lạgitʼge dhạrtiteń hecʼakana. Ar okoeye sạriakʼren kan uni do ińakʼ kathae ańjoma.” Pilạt do uniye metadea, “Sạriakʼ do cetʼ kana? Noa katha menkate uni do arhõ bahrete senkate Jihudi mukhiyạkoe metatʼkoa, “Iń do nuiakʼ cetʼ dosge bạń ńametʼtaea. Menkhan apeakʼ mitʼṭen niạm menakʼa, sen-parom porobre mitʼṭen kạidiń aṛakʼape. Ape do cetʼ Jihudikoren rajiń aṛakʼapepe khojkana?” Noa iạte sanamko ãṭ aṛaṅte hohoateko menkeda, “Uni do baṅ, Barabbage.” Uni Barabba do mitʼṭen ḍạkui tahẽkana. Unre Pilạt do Jisu idiyete cạbuke reakʼe hukumatʼkoa. Palṭonko do jạnum reakʼ mukuṭ galaṅkate bohokʼreko horokʼadea. Ar beguni roṅ reakʼ aṅgropko horokʼadete uni ṭhen senkateko menkeda, “Johar, Jihudikoren raj, jitạu hoyokʼtam ma!” Noa menkate onko doko thapa baṛakedea. Pilạt do arhõ bahrete oḍok hecʼkate hoṛkoe metatʼkoa, “Ńelpe, ape ṭheniń oḍok ạguyedea jemonpe bujhạu daṛeakʼ, uniakʼ jãhãn dosge bạń ńametʼtaea.” Ar Jisu do jạnum reakʼ mukuṭ ar beguni roṅanakʼ kicricʼ horokʼ akatʼge bahreteye oḍok hecʼena. Unre Pilạt do hoṛkoe metatʼkoa, “Nũkʼũi ńelepe, uni hoṛ.” Ado Jisuko ńelkede khan maraṅ naekeko ar kạmiạko do hohoateko menkeda, “Krus kaeme, uni do krus kaeme.” Pilạt do hoṛkoe metatʼkoa, “Apege idiyete krus kaepe, ente uniakʼ jãhãn dosge bạń ńametʼtaea.” Khange Jihudi mukhiạko do Pilạtko metadea, “Ale do mitʼṭen ạn menakʼtalea, ar ona ạn lekate uni do gocʼ ocokʼ lek kanae, ente uni do acʼte Isorren Hopone ńumogokʼ kana.” Pilạt do noa kathae ańjomketʼ khan artetʼgeye botorena. Uni do arhõ oṛakʼ bhitrite bolokate Jisui kulikedea, “Am do oka khonem hecʼakana?” Menkhan Jisu do cetʼge bae roṛ ruạṛleda. Onate Pilạt do Jisui metadea, “Iń tulucʼ bam roṛa? Am do cetʼ bam baḍaea aṛakʼme se kruskam reakʼ ektiạri menakʼtińạ mente?” Jisui roṛ ruạṛkeda, “Coṭ khon ektiạri baṅ emam khan iń cetanre jãhãn ektiạrige oho tahẽlentama.” Onate okoe amakʼ tireye soprot akadiń uniakʼ kại do ḍhergetaea.” Noa ańjomkate Pilạt do Jisu aṛage lạgitʼe kurumuṭukeda, menkhan Jihudi mukhiạko do hohoateko menkeda, “Nuiyem aṛakʼ lekhan enḍekhan maharaj Kạisạrren gate dom baṅkana. Jãhãege acʼte raj menteye benaokʼ khan uni do Kạisạrren bạiri kanae.” Noa katha ańjomkate Pilạt do Jisu bahreteye ạgukedea ar dhirite tolakʼ mitʼṭen bicạr jaegareye duṛupʼena. Ibrite ona jaega do Gabbathako metakʼkan tahẽkana. Enhilokʼ do sen-parom porob reakʼ sapṛaokʼ din tahẽkana. Unre tikin amdaj tahẽkana. Pilạt do Jihudi mukhiyạkoe metatʼkoa, “Nũk̕ũi ńelepe, aperen raj.” Onate onko do ãṭ aṛaṅte hohoateko menkeda, “Idiyem, idiyem ar krus kaeme.” Pilạte metatʼkoa, “Aperen raj do cetʼ ińiń kruskaea?” Maraṅ naekeko roṛ ruạṛadea, “Kạisạr chaḍa aleren do ar cele raj hõ bạnukʼkoa.” Unre Pilạt do kruse lạgitʼ onkoakʼ tireye soprotkadea. Unre palṭonko do Jisuko idikedea. Ar Jisu do acʼakʼ krus gokʼkate khạpriko metakʼ mitʼṭen jaegateye senena. Ona jaega reakʼ ńutum do Ibrite Golgothako metakʼkan tahẽkana. Onko do onḍe Jisuko kruskedea ar uni dene banar secʼre bar hoṛ hõko krusketʼkinạ. Ar Pilạt do mitʼṭen olakʼre olkate Jisuakʼ krus cetanreye bạisạu ocokeda. Onare ol tahẽkana, “Nasaretren Jisu Jihudikoren raj.” Okare Jisuko kruskede ona jaega do nagraha sorre tahẽkante Jihudiko modren ḍher hoṛge ona olakʼko paṛhaokeda. Ona do Ibri, Romi ar Junạni pạrsite olakan tahẽkana. Unre Jihudikoren maraṅ naekeko do Pilạtko metadea, “ ‘Jihudikoren raj,’ noa katha do alom ola, bickom olme, ‘uniye menetʼ tahẽkana, iń doń Jihudikoren raj kana.’ ” Pilạte metatʼkoa, “Okań ol akatʼ ona doń ol akada.” Ado Jisuko kruskede khan palṭonko do uniakʼ kicricʼ ako talare pon ṭhenko hạṭińana. Ar Jisuakʼ aṅgrop hõko hataokeda. Ona aṅgropre do jãhãn silạige baṅ tahẽkana, ona do coṭ khon pheḍ hạbicʼ jotoge teńakʼ tahẽkana. Ona ńelte palṭonko do akoreko menjoṅana, “Noa do babon oṛeja bickom gulibãṭkate bon ńela okoeakʼ hoyokʼa mente.” Noa do hoyena sonot sostor reakʼ katha jemon purạukʼ, Onko do ako talare ińakʼ kicricʼko hạṭińana, ińakʼ aṅgrop doko gulibãṭkeda. Ar palṭonko do sạrigeko onkakeda. Jisuren eṅgattetʼ, ar uniren eṅgattetʼren bokot kuṛi, Klopa rinicʼ Mạriạm, ar Magdalaren Mạriạm noko do Jisuakʼ krus ṭhenko teṅgo akan tahẽkana. Jisu do acʼren eṅgattetʼ ar uniye dulạṛedekan tahẽkan cela teṅgo akane ńelketʼkin khan eṅgattetʼe metadea, “E go, ńeleme nũkʼũitam hoponme.” Ona tayom uni celae metadea, “Ńeleme nũkʼũitam eṅgam.” Ar unrege uni cela do Jisuren eṅgattetʼ acʼakʼ oṛakʼteye idikedea. Inạ tayom sanamakʼ purạu akana menteye baḍaeketʼ khan sonot sostor reakʼ katha jemon purạukʼ onate Jisui menkeda, “Tetaṅedińa.” Ona jaegare sirkạte perecʼ mitʼṭen hanḍha tahẽkana. Unre onko do mitʼṭen ispońj ona sirkạreko topokeda ar husup ḍạr reakʼ agalre gutukate moca ṭhenko tomboṅadea. Jisu sirkại ńamketʼ khane menkeda, “Purạu akana.” Ar ona tayom do bohokʼe kuḍburketʼte Jiue jimạketʼtaea. Ona din do porob reakʼ sapṛaokʼ din tahẽkana. Ar dosar hilokʼ jirạukʼ mãhã tahẽkante Jihudi mukhiạko do ona dinre krus cetanre mạ̃ṛĩko tahen do bako khojlakʼa. Onate Pilạt ṭhenko nehõrena jemon krusre menakʼkoakʼ jaṅga rạputʼkate krus khonko pheḍ idiko. Unre palṭonko hecʼkate Jisu sãoteko krusletʼkin unkin bana hoṛakʼ jaṅgako rạputʼkeda. Ar Jisu ṭhenko hecʼen khan gocʼ hataṛ akanko ńelkedete uniakʼ jaṅga do bako rạputʼletʼtaea. Menkhan mitʼṭen palṭon do borlomte uniakʼ kokhareye sobokʼkedea ar onḍe khon mãyãm ar dakʼ oḍokena. Okoe nij mẽtʼte noakoe ńelletʼ unige gohae emakada, ar uniakʼ goha do sạrigea. Uni doe baḍaegea, acʼ okae roṛetʼ ona do sạrigea, ar ape hõ jemonpe pạtiạukʼ. Noa do hoyena sonot sostor reakʼ katha jemon purạukʼ, “Uniakʼ do mitʼṭen jaṅ hõ baṅ rạpudokʼtaea.” Arhõ sostor reakʼ ar mitʼṭen katha do noage, “Okoe uniko sobokʼ tapʼlede onkoge uniko beṅgetʼaea.” Noako sanamakʼ hoyen tayom Arimạthiạ atoren Joseph do Jisuakʼ mạ̃ṛĩ idiy lạgitʼ Pilạt ṭhene koekeda. Joseph hõ Jisuren celae tahẽkana menkhan sodorte do baṅ, ente uni do Jihudi mukhiyạkoe botorakokan tahẽkana. Ado Pilạte aṛakʼade khan uni do hecʼkate Jisuakʼ mạ̃ṛĩye idikeda. Ar lahate ạyupʼ jokhecʼ okoe do Jisu ṭhene hecʼlen uni Nikodemus hõ pe gel pe keji mesao akatʼ gondhoros ar oguruanteye hecʼena. Unkin do Jisuakʼ mạ̃ṛĩ hataokate Jihudikoakʼ topa reakʼ cạli leka ona sanam mosola salakʼ musnạ kicricʼte mạ̃ṛĩkin bedhaokeda. Ar Jisu okareko kruslede ona jaegare mitʼṭen bagwan tahẽkana ar onḍe do nawage kholao akatʼ mitʼṭen topa tahẽkana. Ona topare do okoege tis hõ bako dohoakatʼko tahẽkana. Ona din do Jihudikoakʼ porob reakʼ sapṛaokʼ din tahẽkana, ar topa hõ sorrege tahẽkante unkin do ona toparege Jisukin baekadea. Ado hapta reakʼ pạhil din ạḍi setakʼre, ńut tahẽkanrege Magdalaren Mạriạm do ona topa ṭhene hecʼena. Ar topa duạr khon dhiri do ocokʼ akatʼe ńelkeda. Onate uni do Simon Patras ar Jisui dulạṛedekan tahẽkan cela ṭhen ńir senkateye lạiatʼkinạ, “Probhu do topa khonko idiakadea. Ar okareko dohoakadea ona do bale baḍaea.” Unre Patras ar uni eṭakʼ cela do oḍokkate topa secʼkin calao idiyena. Ar mitʼtekin dạṛ idikeda. Uni eṭagicʼ cela do Patras laha lahate usạrateye ńir senente topa ṭhene seṭer maṛaṅena, menkhan topa bhitrite uni do bae bololena. Uni do eṅgotʼkateye oyoṅketʼ khan Jisuakʼ hoṛmore okaṭakʼ kicricʼ bedhao tahẽkan onako doho akane ńelkeda. Simon Patras hõ uni tayomte seṭerkate topa bhitriteye boloyena ar kicricʼko dohoakatʼe ńelketʼa. Uni do arhõe ńelkeda, bohokʼre okaṭakʼ rumạl bedhao tahẽkan ona do eṭakʼ kicricʼko sãote bạnukʼa, menkhan guṛhạ akatʼ mitʼ jaegare begar dohoakana. Ado okoeṭakʼ cela pạhilte topa ṭhene seṭerlen uni hõ topa bhitriteye boloyena are ńelketʼteye pạtiạuena. Ar gocʼko khon Jisuakʼ jiwetʼ beredokʼ reakʼ je jạruṛ menakʼ, ona sonot sostor reakʼ katha onko do lahare bako bujhạu akatʼ tahẽkana. Ona tayom unkin cela do oṛakʼtekin ruạṛ calaoena, menkhan Mạriạm do topa bahrere teṅgokateye rakʼjoṅkan tahẽkana. Uni do rarakʼ tulucʼ eṅgotʼkate topa bhitriye oyoṅketʼ khan, Jisuakʼ mạ̃ṛĩ okare dohoakan tahẽkan onḍe ponḍ kicricʼ horokʼ akatʼ barea serma goḍet duṛupʼ akane ńelketʼkinạ, mitʼṭen do bohokʼ secʼre ar eṭakʼicʼ do jaṅga secʼre. Unkin do Mạriạmkin metadea, “Cedakʼem rakʼeda?” Metatʼkinae, “Ińren Probhuko idiakadea ar okareko dohoakadea ona do bạń baḍaea.” Noa menkate tayom secʼe beṅgetʼ ạcurketʼ khan Jisu teṅgo akane ńelkedea, menkhan Jisu kanae mente bae bujhạu daṛeadea. Jisu do uniye metadea, “Cedakʼem rakʼeda? Ar okoeyem ńam baṛayede kana?” Mạriạm do Jisu bagwanren mạli hudiskedeteye metadea, “Amem idiakade khan dayakate lạiạńme okarem doho akadea. Iń do uniń idiyea.” Jisui menkeda, “Mạriạm.” Onate Mạriạm doe ạcurente Ibrite Jisui metadea, “Rạbbuni.” Mane do E Guru. Jisui menkeda, “Alom hạṛubińạ, ente ńit hõ sermaren Baba ṭhen ạuriń calakʼa. Am do senkate boehako lạiakome, okoe doe iń ar aperen Babakan ar okoe doe iń ar aperen Isorkan, iń do uni ṭheniń rakapʼ calakʼkana.” Unre Magdalani Mạriạm do celako ṭhen senkateye jạhiratʼkoa je, uni do Probhui ńelakadea ar Probhuge noako katha lại lạgitʼe menakawạdińa. Ado enhilokʼge, hapta reakʼ pạhil din ạyupʼ jokhecʼ celako do Jihudi mukhiạko botorte duạr sińkate mitʼ ṭhenko jarwa akan tahẽkana. Unre Jisu do hecʼkate onko talare teṅgoyenteye metatʼkoa, “Suluk apema.” Ar noa menkate uni do acʼakʼ banar ti ar kokhae udukʼatʼkoa. Ar Probhuko ńelkede khan celako do ạḍitetʼko rạskạyena. Jisu do arhõe metatʼkoa, “Suluk ape ma. Baba cetʼleka ińe kolakadiń onkage iń hõ apeń koletʼpea.” Noa menkate uni do celako oṅatʼkoteye metatʼkoa, “Sonot Jiu hatao joṅpe. Ape do jãhãekoakʼ kạipe ikạitako, enḍekhan onkoakʼ do ikạkʼtakoa. Ar jãhãekoakʼpe tahẽ ocoetako khan onkoakʼ do tahẽakan tahentakoa.” Jisu tinreye hecʼlen unre gelbarko modren Thoma ńutuman mitʼ hoṛ do onko soṅgere bae tahẽkana. Nui Thomage jawako metaekan tahẽkana. Ar eṭakʼ celako do Thomako lạiadea, “Ale do Probhule ńelakadea.” Khan Thoma do onkoe metatʼkoa, “Tin hạbicʼ uniakʼ banar tire jạlại reakʼ cinhạ bạń ńel, ar bhugạkʼre kạṭupʼ bạń gutui ar kokhare ti bạń sog unhạbicʼ ohogeń pạtiạulena.” Ado niạ mitʼ hapta tayom celako do arhõ oṛakʼ bhitrire mitʼ ṭhenko jarwayena, ar Thoma hõ onko sãoteye tahẽkana. Unre silpińko sińge tahẽkanre hõ Jisu do hecʼkate onko talare teṅgoyenteye metatʼkoa, “Suluk ape ma.” Ona tayom uni do Thomae metadea, “Amakʼ kạṭupʼ nonḍe ạguitam ar ińakʼ banar ti ńelme ar amakʼ ti tiạrkate kokhare sogeńme. Ar bin pạtiạricʼ do alom hoyokʼa bickom pạtiạuicʼge hoyokʼme.” Unre Thomae menkeda, “E ińren Probhu, E ińren Isor.” Jisu do uniye metadea, “Thoma, am do cetʼ ńel akadińtem pạtiạukʼ kana? Okoe begor ńelteko pạtiạukʼ onkogeko bhạgana.” Jisu do celako samaṅre arhõ ạḍi utạr cinhạ kạmiye kạmileda; one onako do noa puthire baṅ olakana. Menkhan noako olena jemonpe pạtiạukʼ, Jisu do Mạsi, Isorren Hopon kanae mente, arpe pạtiạukʼte uni hotete jion tahentape. Inạ tayom Jisu do Tiberias doreão aṛere celako ṭhen arhõe ńel ocoyena. Onḍe do nonka lekae sodorena. Simon Patras, ar jawako metae Thoma ar Gạlil reakʼ Kana nagraharen Nathaniel, Sabdaeren hoponkin ar Jisuren eṭakʼ barea cela onko do mitʼ soṅgeteko tahẽkana. Unre Simon Patrase metatʼkoa, “Iń do hako sasapʼiń calakʼ kana.” Onkoko metadea, “Ale hõ am sãotele calakʼa.” Unre onko do oḍok senkate lạukạreko decʼena, menkhan ona ńindạ do celege bako sapʼ daṛeatʼkoa. Ado aṅga hijukʼkan tahẽkanre Jisu do doreão aṛere hecʼenteye teṅgoyena. Menkhan celako do Jisu kanae mente bako oromledea. Uni do celakoe metatʼkoa, “E bachako jãhãn jomakʼ menakʼtapea? Metadeako, “Bạnukʼtalea.” Jisui metatʼkoa, “Lạukạ reakʼ jojomsa aṛe secʼ jhạli caḍoetape, khanpe ńamkoa.” Unre onko do jhạliko caḍoketʼa ar nunạkʼ hakoko beṛketʼkoa je, onko do bako or rakapʼ daṛeada. Ado Jisu okoeṭakʼ celae dulạṛedekan tahẽkan uni do Patrase metadea, “Uni doe Probhu kana.” Unre Simon Patras do koṭogeye tahẽkana. Onate “Probhu kanae” menteye baḍaeketʼ khan aṅgropte paṭheyente doreão dakʼreye don khadleyena. Onko do ghuṭu khon ḍher sạṅgińre do baṅ, eken bar sae mokagan sạṅgińreko tahẽkana. Onate eṭakʼ celako do hakote perecʼ jhạli or orte lạukạte aṛeteko hecʼena. Ado ghuṭuteko seṭeren khan kaṭ koela reakʼ seṅgel ar onare hako khadle akanko ńelkeda; ar onḍe do piṭhạ hõ tahẽkana. Unre Jisui metatʼkoa, “Ńitokʼpe sapʼketʼko hako khon thoṛa ạgukope.” Khan Simon Patras do lạukạreye decʼente aṛete jhạliye or ạgukeda. Ar jhạli do mitʼ sae mõṛẽgel pea lạṭu hakote perecʼ tahẽkana. Menkhan jhạlire nunạkʼ hakoko tahẽkanre hõ ona do baṅ oṛecʼlena. Jisui metatʼkoa, “Dela hijukʼpe ar jompe.” Menkhan celako modre okoe hõ dilkate bako kuliledea, “Am dom okoe kana mente?” Ente onko doko baḍaekan tahẽkana, uni doe Probhu kana. Jisu do hecʼkate piṭhại halaṅkeda are ematʼkoa, ar onkage hako hõ. Gocʼko khon beretʼ ruạṛ tayom Jisu do tesar dhao acʼren celako ṭhene ńel ocoyena. Adoko jom sạtketʼ khan Jisu do Simon Patrase metadea, “E Jona hopon Simon, noko khon bạ̃ṛtim dulạṛedeń kana?” Simon Patrase menkeda, “Hẽ Probhu, baḍaegeam tinạkʼiń dulạṛetʼmea mente.” Jisu do uniye metadea, “Ińren bhiḍiko gupikom.” Jisu do dosar dhao uniye metadea, “E Jona hopon Simon, ińem dulạṛedeń kangea? Simon Patrase menkeda, “Hẽ Probhu, baḍaegeam tinạkʼ iń dulạṛetʼmea mente.” Jisu do uniye metadea, “Ińren bhiḍiko jotonkom.” Uni do tesar dhao Simon Patrase metadea, “Jona hopon Simon, sạrigem dulạṛedeń kana?” Patras doe mon dukena, ente Jisu do tesar dhao uniye kulikedea, “Sạrigem dulạṛedeń kana?” Onate Patras do Jisui metadea, “E Probhu am do jotowakʼgem baḍaea, ar noa hõm baḍaegea amiń dulạṛetʼme kana.” Jisu do uniye metadea, “Ińren bhiḍiko gupikom. Sạrigeń metamkana, juạnem tahẽkanre amtem paṭhekʼkan tahẽkana ar jãhãtege sanayetʼme tahẽkan onḍegem calakʼkan tahẽkana. Menkhanem haṛamlenre am do amakʼ tim tiạr tama ar eṭagicʼ do ame tolmea ar okare calakʼ baṅ saname onḍegeye idimea.” Isorakʼ ṭhonok sodortae lạgitʼ Patrasakʼ cetʼleka gujukʼ hoyokʼtaea ona bujhạu ocoe lạgitʼ Jisu do noa kathae roṛkeda. Ar noae roṛketʼ khan Patrase metadea, “Dela pańjańme.” Patras do tayom secʼe beṅgetʼ ạcurketʼ khan, Jisui dulạṛedekan tahẽkan cela pańjakane ńelkedea. Nui celage, kedokʼ jokhecʼ Jisuakʼ koṛamre ṭenḍarkateye menletʼa, “E Probhu, bạirikoakʼ tireye soprotme, uni doe okoe kana?” Patras do uniye ńelkedete Jisui metadea, “E Probhu, nuiakʼ do cetʼ hoyokʼa?” Jisu do Patrase metadea, “Ạuriń ruạṛ hijukʼ hạbicʼe tahẽ hataṛokʼ khan amakʼ do cetʼ? Menkhan am do iń pańjańme.” Onate boehako talare katha pasnaoena je, uni cela do bae gujukʼa. Menkhan Jisu do Patras bae menakawadea uni do bae gujukʼa mente. Bickome metade tahẽkana, “Ạuriń ruạṛ hijukʼ hạbicʼe tahẽ hataṛokʼ iń menjoṅkan khan amakʼ do cetʼ?” Uni celage noako reaṅ gohae emetʼkana ar noakoe oletʼkana. Alele baḍaea uniakʼ goha do sạrigea. Jisu do arhõ ạḍi utạrakʼkoe kạmileda. Onako mitʼ mitʼte ollen khan nunạkʼ puthiko hoekokʼa je, ińakʼ bujre noa dhạrtire ohoge sahopʼlena. Manotan Theophil, Jisu sermate ạuriye rakapʼ ocokʼ hạbicʼ okakoe kạmiletʼ are cetʼkokan tahẽkan ona reakʼ sanamakʼge ińakʼ lahateakʼ puthireń ol akada. Uni do okoeko celakoe bachaowan tahẽkan, onko do acʼ sermate ạuriye rakapʼ ocokʼre sonot Jiu hoteteye hukumatʼko tahẽkana. Uni do acʼakʼ duk jom tayom nokoko hoṛ ṭhengeye ńel ocolena ar uni je jiwetʼge menae ona reakʼ ạḍi utạr biswạsteakʼ pormane emakada. Uni do pon gel din hạbicʼ celako ṭhene ńel ocoyente Isorakʼ raj reaṅe lạiatʼko tahẽkana. Onako oktere mitʼ din Jisu do celako sãoteye tahẽkanre noae hukumatʼko tahẽkana, “Ape do Jerusalem alope bạgiakʼa, bickom ińren Babawakʼ gokʼa oka dan reakʼ katha iń ṭhenpe ańjomakatʼ ona lạgitʼ koyokʼ hor akae tahenpe. Johan do dakʼteye bạptisetʼko tahẽkana, menkhan thoṛa din khange ape do Babawakʼ ona gokʼakʼ lekate sonot Jiutepe bạptis ocokʼa.” Ado celako hecʼ jarwakate Jisuko kulikedea, “E Probhu, niạ jokhecʼ am do cetʼ Israelko rajosṭim teṅgo ruạṛakoa?” Jisui metatʼkoa, “Okaṭakʼ din se okte Baba do acʼakʼ ektiạrireye dohoakatʼ ona do bape baḍae ocoakana. Menkhan sonot Jiu apereye hecʼlenre ape do daṛepe ńama, ar Jerusalem, goṭa Jihudạ, Samariạre, hẽ, dhạrti reakʼ mucạtʼ simạ hạbicʼge ińren gohakope hoyokʼa.” Noa kathae lạiatʼko khan celako samaṅrege Jisu doe rakapʼ ocoyena ar mitʼṭen rimil reakʼ danaṅteye calaoena. Ado Jisu coṭ secʼe rakapʼ calakʼkan tahẽkanre celako do serma secʼko koyokʼ uricʼ akatʼ tahẽkana. Ar unre ponḍ kicricʼ horokʼ akatʼ bar hoṛ do celako ṭhen teṅgoyentekin menkeda, E Gạlilren hoṛko nonḍe teṅgokate serma secʼ do cedakʼpe beṅgetʼ akada? Okoe ape ṭhen khone rakapʼ ocoyen ar cetʼleka sermate calakʼkanpe ńelkede onkage uni doe ruạṛ hijukʼa.” Unre celako do jạitun buru khon Jerusalemteko ruạṛ hecʼena. Jerusalem nagraha khon noa buru do mitʼ kilomiṭar saṅgińre tahẽkana. Ado nagrahateko boloyen khan onko do oka koṭha kandhareko tahẽkan onḍeko rakapʼena. Noko celakoakʼ ńutum do Patras, Johan, Jakob ar Andreas, Philip ar Thoma, Bartholomae ar Mathae, Alphaeren hopon Jakob ar moulobadi Simon ar Jakobren hopon Jihudạ. Onko jotoge biswạsi maejiuko ar Jisu eṅgat Mạriạm ar uniren boehako tulucʼ mitʼ monte koejoṅre jamaṛ akanko tahẽkana. Onako dinre Patras do Mạsire pạtiạu akan mitʼ sae bargel hoṛko talare teṅgoyente menkeda, “E boehako, ḍher din lahare sonot Jiu do Dạud rajakʼ mocate Jihudạ reaṅ oka kathae roṛletʼ, sonot sostor reakʼ ona katha do purạukʼ reakʼ jạruṛ tahẽkana. Ar okoeko Jisuko sapʼlede, onko do uni Jihudạge hore udukʼatʼko tahẽkana. Uni do alerenge mitʼ hoṛe tahẽkana ar ale sãote kạmi lạgitʼe bachao ocolena.” Bạṛicʼ kạmi iạte oka ṭakae ńamletʼ onate thoṛa hasae kirińkeda, ar onḍe uni doe tupucʼ ńũrenteye ṭhu oṛecʼena, ar uniakʼ lacʼko posakʼ oḍokentaea. Jerusalemren sanamkoge ona katha doko ańjomleda. Onate onkoakʼ pạrsite noa jumi do Akeldama se mãyãm reakʼ goḍako metakʼkana. Patrase menkeda “Sonot sostorre sereńko reakʼ puthire olakana, uniakʼ oṛakʼ do ujạṛokʼma; onare okoe hõ aloko tahenma, ar uniakʼ cetan hudạ do eṭakʼ hoṛe hataoma. “Onate Jisu je gocʼko khone jiwetʼ beretʼ akan ona reakʼ goha lekate eṭakʼ ar mitʼ hoṛ aboren, metakʼme apostol hudạre hataoe hoyokʼa. Johane bạptisetʼkokan tahẽkan khon ehopʼkate abo ṭhen khon ạuriye rakapʼ ocokʼ hạbicʼ, Probhu Jisu tinạkʼ din abo talareye tahẽkan unạkʼ din okoe hoṛ do aboakʼ dolreko tahẽkan, uni hoṛ do jemon onko modren mitʼ hoṛe hoyokʼ.” Unre celako do bar hoṛko teṅgoketʼkina, Barsabako metae Joseph, one okoe do Justuse bahnayen ar Mạthiạ. Ona tayom onko do noa menkateko koekeda, “E Probhu am do joto hoṛakʼ ontorem baḍaea. Jihudạ hõ acʼakʼ sạjại iạte apostol kạmiye aṛakʼ giḍikeda. Onate ńitokʼ nukin bar hoṛ mod khon ona hudạ lạgitʼ okoeṭakʼem bachao akawan uni baṛe udukʼ aleme.” Adoko gulibãṭketʼ khan Mạthiạ ńutum rakapʼena. Onate Mạthiạ do onko gelmitʼ apostolko sãoteye lekha mitʼena. Niạ thoṛa din tayom Pentekosṭ porob reakʼ dinre celako do mitʼ ṭhenko jarwa mitʼakan tahẽkana. Unre ackage serma khon tạpis hoe reakʼ hud hud saḍe leka mitʼṭen saḍe hecʼena ar onko okareko tahẽkan ona oṛakʼ do saḍete perecʼena. Ar celakoko ńelkeda seṅgel reakʼ alaṅ leka cetʼ coṅ hạṭińokʼkana ar onako do hoṛo hoṛo apʼatʼkoa. Onate onko jotoge sonot Jiuteko perecʼena ar uni Jiue danatʼko daṛe leka eṭakʼ eṭakʼ pạrsite roroṛko ehopʼena. Ona oktere dhạrti reakʼ aema disạm khon Isor bhokti Jihudiko do Jerusalemre hecʼkateko girobasokʼ kan tahẽkana. Onko do ona saḍeko ańjomkeda ar ḍherkoge onḍeko jarwayena. Ar apan ạpin pạrsite celako katha roroṛko ańjomketʼko khan onko doko tharbasaoena. Onko do ạḍi hahaṛayenteko menkeda, “Katha roroṛkanko do cetʼ jotoge Gạlilren doko baṅkana? Ar onka kan khan abo do cekate apan ạpin pạrsite onkoakʼ moca khon katha bon ańjomeda? Parthiko, Mediko, Elamiko ar Mesopotamiare berelakan hoṛko, Jihudạ ar Kapadokiạren, Pontos ar Asiạren, Phrugiạ ar Pamphuliạren, Misor ar Kurene senakʼ Lubiạ reakʼ adom jaegaren hoṛko, ar Rom nagrahare upriạ Jihudiko ar Jihudi dhoromreko pạtiạu akan boṅgan hoṛ jạtrenko, Kret dipren hoṛko ar Arobrenko; abo sanamkoge coṅ aboakʼ nij nij pạrsite Isorakʼ maraṅ kạmiko reakʼ katha roroṛkan bon ańjometʼko.” Onko do hahaṛa arko tharbasaoente ako akore kupulikʼko ehopʼena, “Noa reakʼ mane do cetʼ kana?” Arhõ eṭakʼko do celakoko cigạriatʼkoteko menkeda, “Onko do bubulakʼteko ńu bhuteṛ akana.” Unre Patras do onko gelmitʼ celako sãote teṅgokate ãṭ aṛaṅte hoṛkoe metatʼkoa, “E Jihudiren hoṛko ar okoe do Jerusalemrepe tahenkan, ape do baḍae dohokakʼpe ar monte ińakʼ kathako ańjompe. Ape dope hudisetʼkana noko doko bul akana, menkhan ona do baṅ; ente ńitokʼ ma setakʼ are baja hoeakan. Noa do ona ghoṭna leka, one okoeakʼ katha Joel nạbi hotete roṛlen, ‘Mucạtʼ dinkore iń do sanam hoṛko cetanre ińren Jiu iń dulea; onate aperen hopon ar hoponerako do nạbi lekate Isorakʼ kathako lạiya, ar aperen juạnko do dorsonko ńama, ar aperen murubiko do kukmuko ńela. Ona oktere ińren guti ar kạ̃ṛmĩko cetanre, iń do ińren Jiuiń dulakoa, ar onko do nạbi lekate kathako roṛa. Iń do coṭ sermare hahaṛawakʼ ghoṭnakoń uduga, ar dhạrtire hõ ạḍilekan cinhạkoń hoeocoya; metakʼme mãyãm, seṅgel ar aema dhuạ̃ń ńel ocoya. Probhuakʼ ona maraṅ ar ṭhonokte perecʼ dinko hijukʼ lahare, siń cando doe ńutokʼa; ar ńindạ cando do mãyãm lekae hoyokʼa. Ar bańcao ńam lạgitʼ, okoe Probhui hohowae uni doe bańcaokʼa.’ “E Israelko, noa katha ańjompe. Nasaretren Jisu hotete Isor do ape talare bhage ar hahaṛa kạmikote ape ṭhene sạbud akada je, uni do Jisui kolledea; ar noa katha do ape hõpe baḍaegea. Isor, okoe do laharege jotowakʼe baḍaekan, uni do laharegeye ṭhik dohoakatʼ tahẽkana je, apeakʼ tire Jisui soprotea. Ar ape hõ bạṛicʼ hoṛko hotete unipe kruskedea arpe gocʼ ocokedea. Menkhan Isor do gujukʼ reakʼ bedon khon khalaskate uniye jiwetʼ beretʼkedea, ente uni sapʼ dohoye reakʼ ektiạri gujukʼakʼ do bạnukʼtaea. Dạud do uni reaṅe menakada, ‘Probhu do jaoge iń samaṅreń ńelekana; uni do ińakʼ jojomsa aṛere menaete iń doń ṭarhao tahena. Noa iạte ińakʼ mon do rạskạte perecʼjokʼ kana, ińakʼ alaṅ do rạskạ reakʼ kathae roṛa, ar ińakʼ hoṛmo hõ aste bańcaokʼ tińạ; ente patal purire do bam giḍiyińạ, ar amren sonoticʼakʼ hoṛmo hõ bam nosṭo ocoya. Jion reakʼ horkom baḍae ocokedińạ; ar am ṭhen tahenge rạskạ reakʼ perecʼtetʼ do menakʼa.’ “E boehako, noa katha do khạṭigeń men daṛeakʼa je, raj bõsren baba Dạud doe gocʼena ar topa hõe topa ocoakana ar uniakʼ topa do teheń hõ nonḍe menakʼa. Uni do mitʼṭen nạbiye tahẽkana, are baḍaekan tahẽkana Isor do kiriạkate noae gokʼade tahẽkana je, uniakʼ siṅghạsonre uni bõsrenge mitʼṭen hoṛe duṛubea. Ar tayomte cetʼ hoyokʼa onae ńelletʼte uni do gocʼko khon Mạsiakʼ arhõ jiwetʼ beredokʼ reaṅe roṛleda je, Mạsi do patal purire hõ bae doho giḍi ocolena ar hoṛmo hõ baṅ sealentaea. Uni Jisuge Isor doe jiwetʼ beretʼkedea, ar ale do sanamkoge uniren gohako kanale. Isorakʼ jojomsa aṛere duṛubokʼ reakʼ ṭhonok do unigeye dan akawadea are gokʼade tahẽkan sonot Jiu do Isor Baba ṭhen khongeye ńam akadea; ar ńitokʼ ape okape ńeletʼkan arpe ańjometʼkan ona do Jisugeye emakana. Dạud acʼ do sermate bae rakapʼ calao akan tahẽkana, menkhan uni doe menakada, ‘Probhu do ińren Probhui metaekana, tin hạbicʼ amren bạiriko amakʼ jaṅga latarre bạń dohoko un hạbicʼ am do ińakʼ jojomsa aṛere durupʼme.’ “Onate sanam Israel jạtko noa katha khạṭiteko baḍaema je, ape okoepe kruslede Isor do uni Jisuge Probhu hõ ar Mạsi hõe hoeoco akedea.” Noa katha ańjomkate hoṛko do monre dukko ńamkeda. Onko do Patras ar eṭakʼ apostolkoko kuliketʼkoa, “E boehako, ale do cetʼle cekaya?” Patrase roṛ ruạṛatʼkoa, “Kại khon mon ạcurtape ar Jisu Mạsi ńutumte bạptisokʼpe. Ar ape do dan lekate sonot Jiupe ńamea. Ape lạgitʼ, aperen gidrạ lạgitʼ ar okoe do sạṅgińre menakʼko, metakʼme aboren Probhu Isor do okoeko acʼren hoṛ hoyokʼ lạgitʼe hohoako, onko sanamko lạgitʼ noa gokʼakʼ do emakana.” Ona chaḍa arhõ ạḍi utạr kathakote Patras do goha emokʼe ehopʼena. Uni do noa menkate bujhạu ocokoe kurumuṭukeda, “Niạ peṛta piṛhiren hoṛko khon apnarte bańcaokʼpe.” Ado uniakʼ kathare okoeko pạtiạuen onko doko bạptisena ar enhilokʼ onko sãote pe hajar hoṛko juṭucʼena. Onkoko hoṛ do apostolkoakʼ cecetʼakʼko ańjometʼkan tahẽkana, ar onko sãote mitʼte Probhu kedokʼko ataṅetʼ tahẽkana ar koejoṅre jamaṛ akanko tahẽyena. Ar sanamkoge botor caṛhaoatʼkoa, ar apostolko do ạḍi utạr hahaṛa kạmi ar cinhạ kạmiko ehopʼena. Ar sanam biswạsikoge mitʼ soṅgeteko tahenkan tahẽkana ar jotowakʼge apan ạpin jạruṛakokan lekako beboharetʼ tahẽkana. Onko do akoakʼ khet baṛge ar dhon-duribko ạkhrińkate mimitʼkoakʼ jạruṛokʼakʼ lekako em hạṭińakokan tahẽkana. Onko do din hilokʼ mundilreko jarwakʼkan tahẽkana ar oṛakʼ oṛakʼ piṭhạ kecag tulucʼ rạskạ salakʼ soṛa monte mitʼteko jom ńũiyetʼ tahẽkana. Onko do jao ghuṛi Isorko sarhaoede tahẽkana ar sanam hoṛge onkoko manotetʼkokan tahẽkana. Ar okoe kại khon bańcaokʼko ńametʼ tahẽkan Probhu do biswạsiko tulucʼ jao hilokʼ onkoe juṭucʼ idiketʼkoa. Mitʼ din Patras ar Johan do tarasiń okte reakʼ koejoṅre mundiltekin rakapʼ calakʼkan tahẽkana. Onḍe hoṛko do mundil reakʼ mońjko metakʼ duạr ṭhen dinạmge mitʼṭen hoṛ gokʼ ạgukateko dohokaekan tahẽkana. Uni do janam khonge leḍhageye tahẽkana. Ar mundilte bolokʼkanko ṭhen khon koe ńam lạgitʼ onḍeye doho ocokʼkan tahẽkana. Uni do Patras ar Johan mundilte bolokʼkane ńelketʼkin khan unkin ṭhene koekeda. Unre Patras ar Johan do unikin beṅgetʼ uricʼadea. Ona tayom Patrase menkeda, “Ạliń secʼ beṅgedme.” Unre uni hoṛ do jãhãnakʼe ńama aste unkin secʼe beṅgetʼkeda. Unre Patrase menkeda, “Sona ar rupạ do bạnukʼtińạ, menkhan okaṭakʼ menakʼtiń onageń emamkana. Nasaretren Jisu Mạsiakʼ ńutumte beretʼme ar taṛamme.” Ado jojom ti sapʼkateye beretʼkedea ar unrege uniakʼ jaṅga ar iḍi do keṭecʼentaea. Uni doe don beretʼena ar taṛam baṛaye ehopʼena. Tayomte uni do taṛam ar don donte Isor sarhao sarhaoete unkin sãote mundilteye boloyena. Ar hoṛko do uni taṛamkan ar Isor sarhaoedekanko ńelkede khanko oromkedea je, nui doe uni hoṛ kana, one okoe do mundil reakʼ mońjko metakʼ duạrre duṛupʼkateye kokoekan tahẽkan. Ar unire oka hoyen onate hoṛko doko ṭhak cabayena. Uni kokoe hoṛ do Patras ar Johan tạkin bae bạgiatʼkinạ. Ar hoṛko do Patrasakʼ kạmi iạteko hahaṛayente unkin ṭhenko ńir hecʼena. Unre onko do Solomonakʼ pinḍạreko tahẽkana. Ar Patras do onae ńelketʼ khan hoṛkoe metatʼkoa, “E Israelko, noa iạte cedakʼpe hahaṛakʼ kana? Ạlińakʼ daṛete se Isorakʼ bhoktite nui liń taṛam daṛe ocokedete cedakʼpe beṅgetʼ uricʼ ạliń kana? Abraham, Isạhak ar Jakobren Isor, metakʼme aboren hapṛamkoren Isorge noa kạmi hotete acʼren golam Jisuakʼ ṭhonoke sodor akada. Ape ma goje lạgitʼ mukhiyạkoakʼ tirepe soprotlede. Pilạt do aṛakʼkaegeye menleda, menkhan Pilạt samaṅre unipe baṅkedea. Ape do uni sonoticʼ ar dhoromicʼpe baṅkedete mitʼṭen khũniạhi aṛakʼape lạgitʼpe khojleda. Okoe doe jionren mạlik kan unigepe gocʼkedea, menkhan Isor do gocʼko khon uniye jiwetʼ beretʼakadea; ar ale do onaren gohako kanale. Nuipe ńelekan arpe baḍaeyede kan hoṛ do, Jisureye pạtiạuente, uniakʼ ńutumte daṛeye ńamkeda. Ar Jisu hotete oka pạtiạu hijukʼkan ona pạtiạuge uni do sanamko samaṅreye bogekedea. “E boehako, ńitokʼ ińiń baḍaea aperen murubiko leka ape hõ begor bujhạutege Jisupe krusledea. Menkhan Isor do ḍher din lahare sanam nạbiko hoteteye roṛleda Mạsi do duk jojom hoyokʼtaea; ar Isor do ona katha nonkageye purạukeda. Onate kại khon mon ạcurtape ar Isor secʼ ruạṛokʼpe jemon apeakʼ kạiko meṭaokʼtape; Ar ona iạte jemon Isor do uni Mạsi, metakʼme Jisui kol apeteye cerṭha ocope. Ente ape lạgitʼge uni doe bachao ocoakana. Isor do lahate leka sanamakʼ arhõe beretʼ ruạṛa mente ḍher laha khonge sonot nạbiko hoteteye roṛletʼa. Ar tin hạbicʼ acʼakʼ onako katha bae purạu unạkʼ hạbicʼ Jisu do sermare tahen hoyokʼtaea. Moseye menleda; ‘Aperen Probhu Isor do aperen boehako mod khon iń leka mitʼṭen nạbiye teṅgoapea. Ar uniakʼ katha leka ape do calakʼ hoyokʼtapea. Ar okoe uniakʼ katha bae ańjom uni do acʼren hoṛko khone marao giḍiyea.’ “Ona chaḍa Sạmuel khon ehopʼkate tinạkʼ nạbikoko roṛakatʼ, onko hõ niạ okte reakʼ katha lahareko lại oṭoakada, ar ape ma onko nạbikoren bõsko kanpe. Aperen hapṛamko lạgitʼ Isor okae bondobos akatʼ tahẽkan, ape hõ coṅ onaren bhạgiạdarko kanpe. Isor do Abraham noa kathateye bondobos akawade tahẽkana, ‘am bõsren hotete dhạrtiren sanam jạtkoge bhorko ńama.’ Ar ape mimitʼko apeakʼ bạṛicʼ hor khon ạcurokʼte bhorape lạgitʼge Isor do ape ṭhen acʼren Guti Jisui kolledea.” Patras ar Johan do tinre hoṛkokin galmarao akokan tahẽkana unre naekeko, mundilren mukhiyạko ar Sạdukiko hõ unkin ṭhenko hecʼena. Onko do ạḍiko edre akan tahẽkana, ente Patras ar Johan do hoṛkokin cetʼakokan tahẽkana ar Jisu hotete gocʼko arhõ jiwetʼ beredokʼ reaṅ kin porcaretʼ tahẽkana. Onko do Patras ar Johanko sapʼketʼkinạ ar ạyupʼ akan tahẽkante dosar hilokʼ hạbicʼ hajotreko dohokatʼkinạ. Menkhan okoeko Patrasakʼ kathako ańjomletʼ onko modren ḍher hoṛgeko pạtiạuena; ar nonkate biswạsikoko ḍher idiyente mõṛẽ hajarko hoyena. Ado dosar hilokʼ Jihudikoren maraṅ naekeko, murubiko ar sostor baḍaeko do Jerusalemreko jarwa mitʼena. Onḍe do maraṅ naeke Hannas hõe tahẽkana. Ona chaḍa Kaeapha, Johan, Aleksander ar maraṅ naekeakʼ gharońjren eṭakʼ hoṛko hõko tahẽkana. Onko do Patras ar Johan ako talareko teṅgoketʼkinteko kuliketʼkinạ, “Aben do cetʼ reakʼ daṛete se okoe ńutumte noa ben kạmi kana?” Unre Patras do sonot Jiuteye perecʼente onkoe metatʼkoa, “Maraṅ naekeko ar murubiko, ạliń do mitʼṭen leḍha hoṛliń bogekedete teheńpe kuliyetʼlińạ, uni hoṛ do cekateye bogeyena. Enḍekhan ape ar sanam Israelko noa katha baḍae dohokakʼpe je, Nasaretren Jisu Mạsi, okoe dope kruslede ar okoe do gocʼko khon Isore jiwetʼ beretʼkede, uniakʼ daṛetege nui hoṛ doe bogeyente ape samaṅreye teṅgo akana. Sonot sostor reakʼ katha leka Jisu Mạsi kangeae ‘ona dhiri do, one okaṭakʼ raj mistiriko, metakʼme apepe nihạt giḍiletʼ tahẽkan; ar onage konac reakʼ asolakʼ dhiri do hoyena.’ Kại khon bańcao do ar okoe ṭhen khon hõ oho ńamlena, ente serma latarre, manwako talare nonkan okoege bạnukʼkoa one uniakʼ ńutumte kại khon bańcao bon ńam daṛeke.” Ado Patras ar Johanakʼ dil ńelte ar bin bidiyạwan ar ne hoṛkanakin menteko baḍaeketʼ khan onko mukhiyạko doko hahaṛayena, ar noa hõko bujhạukeda je unkin hõ Jisu sãotekin tahẽkana. Ar okoeye boge ocoyen uni do Patras ar Johan sãote teṅgo akanko ńelkede khan unkin birudre roroṛ reakʼ ar cetʼge baṅ tahẽlen takoa. Onate onko do maraṅ bạisi khon oḍok calakʼ lạgitʼko hukumatʼ kinạ. Ar inạ tayom onko do mitʼ ṭhenko jarwayente sopolhako dhurạuena. Onkoko menkeda, “Nukin hoṛ do cetʼ bon cekakinạ? Ente Jerusalemre okoeko tahenkan onko do jotogeko baḍaekeda je, nukin do mitʼṭen hahaṛawakʼkin kạmi akada, ar ona do abo hõ babon baṅ daṛelea. Menkhan disạm hoṛko talare kathako jemon ar alo pasnaokʼ onate nukin hoṛ do botor udukʼ ạkin hoyokʼa, jemon Jisu reaṅ ar okoe hõ alokin galmaraoako.” Noa tayom Patras ar Johan do arhõ bhitrite hohoatʼkinte noako hukumatʼkinạ jemon unkin do Jisu reaṅ ar cetʼge alokin lạiako se alokin cetʼako. Patras ar Johankin roṛ ruạṛkeda, “Apeakʼ hukum liń manaoa se Isorakʼ hukumkoliń senakʼa? Isorakʼ mẽtʼãhã samaṅre okaṭakʼ ṭhika, ona do apege bicạrpe. Ạliń do okaliń ńelakat̕ arliń ańjomakatʼ ona begor lạite do oholiń tahẽdaṛelena.” Unre onko do Patras ar Johan arhõ botorko udukʼatʼkinte unkin doko aṛakʼkatʼkinạ. Onko do hoṛkoko botoratʼkote bako goṭa daṛeada cetʼ lekateko sạjạikinạ mente, ente oka hoeakan onate joto hoṛge Isorko sarhaoede kan tahẽkana. Ar okoe hoṛe bogeyen uniakʼ umer do pongel bochor khon hõ bạ̃ṛti tahẽkantaea. Ado onḍe khonkin aṛakʼ ocoyen khan unkin do ạkinren hoṛko ṭhenkin calaoena ar maraṅ naekeko ar murubiko cetʼ cetʼko metatʼkin tahẽkan ona sanamakʼ do onkokin baḍae ocoketʼkoa. Noa katha ańjomkate onko do mitʼ monte Isor ṭhen nonkako koekeda,” E Probhu, am do serma ar dhạrti ar jalapuri ar onare menakʼ jotowakʼem sirjạu akada. Am do sonot Jiu hotete amren golam aleren hapṛam Dạudakʼ mocatem menakada, ‘Sanam jạtren hoṛko do cetʼ iạte akbakteko kikiạukʼ kana? Ar cedakʼ hoṛko do ạuṛiakʼko soṛojontro kana? Probhu ar uniren Mạsi birudre dhạrtiren rapajko do mitʼsãoteko teṅgoyena, ar cakʼlaoko do mitʼ ṭhenko jarwayena.’ “Amren sonot Guti Jisu, okoe do Mạsi mentem bahal akade, uni upạrte Herod raj ar Pontus Pilạt do noa nagraharege boṅgan hoṛ jạtrenko ar Israelko sãote uni birudre tikin milạuleda. Amakʼ daṛe ar sanate oka hoyokʼa mentem goṭa doholetʼ tahẽkan onko do onageko onkakeda. Ar ńitokʼ do E Probhu, cetʼ lekako botor ocoyetʼle ona dom ńeletʼkangea. Amren gutiko nonkan daṛe baṛe emakom jemon dil salakʼ amakʼ kathako lại sodor daṛeakʼ. Amakʼ ti tiạrtam jemon amren sonot Guti Jisu ńutumte onko do hoṛkoko boge daṛeako ar hahaṛa kạmi ar cinhạkoko udukʼ daṛeakʼ.” Ado oka jaegare onkoko jarwa mitʼakan tahẽkan, koejoṅ tayom ona jaega do dal dalaoena. Ar onko sanamkoge sonot Jiuteko perecʼente dil salakʼ Isorakʼ katha lạlạiko ehopʼena. Mạsire pạtiạu akan sanamkoge mon ar jiwite mitʼko tahẽkana. Onko do okaṭakʼge apnarakʼ kana mente bako dạbiyetʼkan tahẽkana, bickom sanamakʼge apan ạpin jạruṛakokan lekako beoharetʼ tahẽkana. Ar apostolko do maraṅ daṛe salakʼ gohako emidiyetʼ tahẽkana je, Probhu Jisu do gocʼko khone jewetʼ beretʼ akana ar sanamko cetanre Isorakʼ maraṅ daya do tahẽkana. Onko modre okoe hõ reṅgecʼ do bako tahẽkana, ente okoekoakʼ ot-baṛge se oṛakʼ-duạr tahẽkan onko do onako ạkhrińkate ṭaka-poesa ạgukate apostolkoakʼ jaṅga ṭhenko dohoyetʼkan tahẽkana. Ar tayomte mimitʼ hoṛ jạruṛako lekako em hạṭiń akokan tahẽkana. Lewi bõsren Joseph ńutuman mitʼṭen hoṛe tahẽkana. Uni do Kupriko metakʼ dipre oṛakʼ tahẽkantaea. Apostolko do Barnabasko bahnakedea torjomate do jiwi raṛecʼren hoponko hohoaekan tahẽkana. Uni do mitʼṭen goḍa tahẽkantaea; ar onae ạkhrińketʼte ṭaka ạgukate apostolkoakʼ jaṅga ṭhene dohokeda. Unre Ananiạs ńutuman mitʼṭen hoṛ ar uniren bạhu Sạphira do mitʼṭen sompottikin ạkhrińkeda. Ar uniren bạhu baḍae tulucʼge ạkhriń akatʼ ṭaka reakʼ thoṛa hạṭiń do apnar lạgitʼ dohokate sarecʼ ṭaka do apostolkoe ematʼkoa. Unre Patrase menkeda, “Henda Ananiạs, Soetan do amakʼ mon cekate nonkae perecʼketʼ tamte, sonot Jiu ṭhen eṛe katham roṛkeda ar jumi ạkhriń reakʼ ṭaka khon thoṛa do am lạgitʼem dohokeda? Ạkhriń lahare jumi do cetʼ amakʼge baṅ tahẽkana? Ar ạkhriń tayom hõ ṭaka do cetʼ amakʼ tirege baṅ tahẽkana? Enḍekhan cedakʼ nonkan kạmi dom kạmikeda? Am do manwa ṭhen eṛe do bam roṛakada, menkhan Isor ṭhengem roṛakada.” Ananiạs do noa kathae ańjomketʼ torage otre bhindạṛenteye gocʼena. Ar noa ghoṭna reakʼ katha okoeko ańjomketʼ onko sanamkoge ạḍi botor caṛhaoatʼkoa. Ado juạn hoṛko do beretʼente uniakʼ hoṛmoko oyo poṭomketʼtaea ar bahrete idikateko topakadea. Inạ pe ghonṭa gan tayom Ananiạs ren bạhu do onḍeye hecʼ boloyena, menkhan cetʼ hoeakana ona do bae baḍaekan tahẽkana. Unre Patras do uniye kulikedea, “Mase lạime, am ar Ananiạs do cetʼ ona jumi inạkʼ tegeben ạkhriń akada?” Uniye menkeda, “Hẽ, inạkʼ ṭakatege.” Unre Patras do uniye metadea, “Probhuren Jiu biḍạue lạgitʼ cedakʼ ben mitʼ mot akana? Ńelme, okoeko hoṛ amren jãwãeko topakede onko do duạr ṭhenko hecʼ seṭerakana, ar amhõ bahreteko oḍok idimea.” Ar Sạphira do unrege Patrasakʼ jaṅga ṭhene bhindạṛena are gocʼena. Ar onko juạn hoṛko do bhitrite bolokate uni hõ gocʼgeko ńelkede khan bahrete idikate uniren jãwãetetʼ pantereko topakadea. Unre manḍerrenko ar eṭakʼ okoe do onako ańjomketʼ onko sanam hoṛge ạḍi botor caṛhaoatʼkoa. Apostolko do hoṛko talare ạḍi lekan cinhạko ar hahaṛa kạmiko kạmikan tahẽkana; ar sanam biswạsikoge mundil reakʼ Solomonakʼ pinḍạre mitʼ ṭhenko jarwakʼkan tahẽkana. Ar hoṛko do ạḍiko manotetʼko tahẽkanre hõ onko tulucʼ midokʼ do bako diletʼ tahẽkana. Ar enrehõ ạḍi utạr herel ar maejiuko Probhureko pạtiạuena ar biswạsiko tulucʼko juṭucʼ idiyena. Ado apostolko okako cekayetʼkan tahẽkan ona ńelte hoṛko do parkom ar cạukikote rugiko ạguketʼkoa ar hor horteko dohoketʼkoa, jemon Patrase parom calakʼ jokhecʼ uniakʼ umul do onkore paṛaokʼ. Ar Jerusalem reakʼ aḍe pase atoko khon ḍher hoṛ do akoren rugiko ar bạṛicʼ jiute sasetokʼkan hoṛkoko ạgu daraketʼkoa, ar onko sanamkogeko bogeyena. Unre maraṅ naeke ar acʼ sãoten Sạdukiko do ạḍi bạṛicʼko edreyena. Onko do apostolko sapʼkate hajotreko bhoraokatʼkoa. Menkhan ńindạ jokhecʼ Probhuren mitʼṭen goḍet do hajot reakʼ silpińkoe jhicʼkeda ar bahrete oḍok ạguketʼkoteye metatʼkoa, “Do calakʼpe, ar mundilre teṅgokate disạm hoṛko ṭhen jaejug jion reakʼ katha lại jạhirpe.” Onko do ona katha lekage ạḍi setakʼre mundilteko boloyena ar hoṛko lại cetʼkoko ehopʼena. Ar maraṅ naeke ar acʼ sãoten Sạdukiko do maraṅ bạisiko hohokeda, metakʼme Israelren murubiko dolren jotogeko hoho jarwaketʼkoa. Ona tayom apostolko ạguko lạgitʼ adom kạmiạkoko kolketʼkoa. Menkhan onko kạmiyạko do hajot oṛakʼte senkate apostolko bako ńamletʼkoa. Unre onko do ruạṛ hecʼkate noako lạikeda, “Ale dole ńelkeda hajot reakʼ duạr do kulup kajakge menakʼa ar duạr duạrkore pahradarko hõko teṅgo akana, menkhan duạrle jhicʼketʼ khan bhitrire do celege bale ńamletʼkoa.” Noa katha ańjomkate mundilren maraṅ kạmiạyicʼ ar maraṅ naekeko doko andesaleyena ar cetʼ coṅ hoyokʼa nahakʼ mente hudisokʼko ehopʼena. Unre mitʼṭen hoṛ do hecʼkateye menkeda, “Ńelpe, okoe hoṛko hajotrepe bhoraoletʼko onko do mundilre teṅgokate hoṛkoko cetʼako kana.” Unre maraṅ kạmiạyicʼ do acʼren kạmiạkoe idiketʼkote apostolkoe sapʼ ạguketʼkoa. Menkhan hoṛko do kạmiyạko dhiriteko tiń botecʼko botorte apostolko ạḍi bako jormoṭletʼkoa. Onko do apostolkoko ạguketʼko khan maraṅ bạisi samaṅreko teṅgoketʼkoa. Unre maraṅ naeke do apostolkoe metatʼkoa, “Uni hoṛ reaṅ alo cetʼako lạgitʼ kajaktele hukumatʼpe tahẽkana, menkhan ape do apeakʼ cecetʼakʼte Jerusalempe perecʼ akada ar uni hoṛakʼ mãyãm alere paṛao ocoepe mone akada.” Unre Patras ar eṭakʼ apostolkoko roṛ ruạṛkeda, “Manwakoakʼ hukum batao khon Isorakʼ hukumkoge batao lek tabona. Ape do okoeṭakʼ kaṭre aka katepe gocʼlede aboren hapṛamkoren Isor do uni Jisuge gocʼko khone jiwetʼ beretʼakadea. Isor do unige raj ar babańcaoicʼ menkate acʼakʼ jojomsa aṛere duṛube lạgitʼ ṭhonoke dan akawadea, jemon Israelkoakʼ mon ạcurtako lạgitʼ ạte emakote kại reakʼ ikại emako. Ale do noaren gohako kanale ar okoe Isorakʼko bataoetʼkan, ar okoe do sonot Jiue emakatʼko uni sonot Jiu hõ ona reaṅ goha kanae.” Noa katha ańjomkate mukhiyạko do ạḍiko raṅgaoena ar apostolko gocʼko lạgitʼko khojkeda, menkhan Gamaliel ńutuman Phạrusi dolren mitʼṭen hoṛ do maraṅ bạisi talareye teṅgoyena. Uni do mitʼṭen sostor baḍae hoṛe tahẽkana ar sanamkoge uniko manotedekan tahẽkana. Uni do apostolko thoṛa ghạṛicʼ bahrere dohoko lạgitʼe hukumkeda. Ona tayom maraṅ bạisiren hoṛkoe metatʼkoa, “E Israelko, men sontorokʼpe, noko hoṛko cetanre okaṭakʼ kạmipe menjoṅkan. Ente niạko din lahare Theudase ńutuman mitʼṭen hoṛ do hecʼkate apnarte mitʼṭen bises hoṛkanae menteye dạbileda, ar pon sae gan hoṛ uni tulucʼko seletʼlena. Uni doe gocʼ ocoyena ar uniren sanam soṅgetenko doko chir chạturena. Ar noate uni do joto ạuṛiakʼentaea. Ona tayom hoṛ lekhako jokhecʼ Gạlilren Jihudạ hõ hecʼkate hoṛko acʼ secʼe ạcurketʼkoa. Ar uni hõe gocʼena, ar uniren sãotenko hõ sanamko chir chạturena. Onateń metapekana, noko hoṛko cetanre cetʼge alope cekaya. Noko do aṛakʼkakope, ente nokoakʼ monsubạ ar kạmiko manwa secʼ khonakʼkan khan ona do maraokʼa. Menkhan Isor secʼ khonakʼ kan khan ohope thir ocodaṛelekoa. Ente hoedaṛeakʼa ape do Isor birudregepe lạṛhại kan.” Unre Gamalielakʼ katha leka mukhiyạko doko mitʼ motena. Onko do apostolko bhitrite hoho idikate dalko lạgitʼko hukumkeda. Ar ona tayom doko aṛakʼkatʼkoa arko hukumatʼkoa Jisu reaṅ jemon jãhãnakʼ ar aloko roṛ baṛae. Apostolko do Jisu ńutumte bemanot ocokʼ lek kanako menteko bujhạuketʼ khan rạskạte maraṅ bạisi khonko oḍok calaoena. Onko do jaoge mundilre ar oṛakʼ oṛakʼ senkate cetʼakoko ehopʼena ar Jisuge Mạsi kanae mente noa bhage sombat porcar iditegeko tahẽyena. Inạko dinre celako doko saṅge idikʼkan tahẽkana. Unre celako modre okoe Jihudiko Junạni pạrsiteko roṛetʼkan tahẽkana onko do Ibri pạrsite roroṛkan Jihudiko nonka mente dusikoko ehopʼena je, dinạmge jomakʼ emokʼ jokhecʼ onkoren rạnḍi maejiuko do cetʼge bako ńametʼa. Onate onko gelbar apostolko do joto cela mitʼ jaegare hoho jarwakateko metatʼkoa, “Isorakʼ katha porcar ḍhilạukate, jom ńũ reakʼ sapʼ dapʼ do baṅ ṭhika. E boehako, ape modkhon Jiu ar akelte perecʼ akan ar sanam hoṛko manotko nonkan eae goṭen hoṛ bachao joṅpe. Ale do onkoge noa sapʼ dapʼ kạmi reakʼ dạyikle emakoa ar ale do koejoṅ ar Isorakʼ katha porcar lạgitʼ jamaṛ akanle tahena.” Ado dolren sanamkoge noa katha do mońjko metatʼa. Onko do biswạs ar sonot Jiute perecʼakan Stephanko bachaokedea. Ona chaḍa Philip, Prokhorus, Nikanor, Timon, Parmenas ar Antiokiạren Nikolas hõko bachaokedea. Nui Nikolas do boṅgan jạtrene tahẽkanre hõ Jihudi dhorome pańjayetʼkan tahẽkana. Onko do apostol ṭhenko idiketʼkoa. Ar apostolko do onko lạgitʼko koekeda ar kạmire bahalko lạgitʼ capokateko bhoratʼkoa. Nonkate Isorakʼ katha do pasnao idiyena, ar Jerusalemre celako do lekhare ạḍi usạrako saṅge idiyena ar ạḍi utạr naekeko hõ Mạsiakʼ dhoromreko pạtiạuena. Stephan do Isorakʼ daya ar daṛeteye perecʼente hoṛko talare ạḍi lekan cinhạko ar hahaṛa kạmiko kạmiye ehopʼena. Ar okaṭakʼ sunạgog do sạdhin hoṛkoakʼ sunạgogko metakʼkan tahẽkan ona sunạgogren adom hoṛko do Stephan birudreko teṅgoyena. Onko do Kureni ar Alekasndriạ nagraharen ar Kilikiạ ar Asiạ disạmren Jihudikoko tahẽkana. Onko do Stephan sãote reṭepeṭekʼko ehopʼena, menkhan Stephan do sonot Jiu hotete akel salakʼe galmaraoatʼkoa. Onate onko do uni birudre bako teṅgo daṛeada. Unre onko Jihudiko do hape hapete adom hoṛko noa menkateko uskạuketʼkoa, “Stephan do Mose ar Isor birudre opoman reakʼ katha roroṛle ańjomakadea.” Nonkate onko do disạm hoṛko, murubiko ar sostor baḍaekoko ạulạuketʼkoa ar Stephanko sapʼkedete maraṅ bạisi samaṅreko ạgukedea. Onko do adom eṛe gohakoko teṅgoketʼkoa. Eṛe gohakoko menkeda, “Nui hoṛ do jaoge mundil birudre ar Moseakʼ ạn-ạri birudre kathae roṛeda. Ale do noa katha roroṛle ańjomakadea, Nasaretren uni Jisu do noa mundile rạputʼ giḍia ar Mose oka ạn-ạrikoe emakatʼbon onako hõe pheraoa.” Ado ona maraṅ bạisire okoeko duṛupʼ akan tahẽkan onko sanamkoge Stephanko beṅgetʼ uricʼade khan uniakʼ mẽtʼãhã do sermaren mitʼṭen goḍetakʼ mẽtʼãhã lekako ńelketʼtaea. Unre maraṅ naeke do Stephane kulikedea, “Noako katha do cetʼ sạrikangea?” Stephan do roṛ ruạṛketʼteye menkeda, “E boehako ar babako ińakʼ katha ańjompe. Aboren hapṛam Abraham do Haran nagrahare ạuriye berelokʼre Mesopotamiạ disạmreye tahẽkana ar unre ṭhonokren Isor do uni ṭhen ńel ocoyenteye metade tahẽkana, ‘am do amakʼ disạm ar peṛa pạrbhạko bạgikate okaṭakʼ disạmiń udukʼam ona disạmte calakʼme.’ “Onate uni do Kạldiakoakʼ disạm bạgikate Haran naṅgarhare senkateye berelena. Ar ńit oka disạmrepe girobasokʼkan Isor do Abraham nonḍegeye kolledea uniren apattetʼe gocʼen tayom. Ar acʼakʼ ạidạri lạgitʼ Isor do Abraham cetʼge bae emadea, jaṅga lebedokʼ leka jaega hõ baṅ. Menkhan Isor doe gokʼade tahẽkana je, uni ar uniren bõsko do ạidạrilekate ona disạme emakoa. Menkhan unhõ Abrahamren do cele gidrạge bako tahẽkantaea. Isor do uniye metadea, ‘amren bõsko do upriạko hoyokʼa. Hoṛko do golamko khaṭaokoa ar pon sae bochor hạbicʼko santaokoa.’ Isor do arhõe metadea, ‘okoe onko golamko khaṭaoko onko jạt doń sạjạikoa. Ar onko do ona disạm khonko oḍok hijukʼte noa jaegare ińko sewawạńạ.’ Ona tayom Isor do acʼakʼ bondobos reakʼ cinhạ lekate khatna reakʼ niạme emena. Inạ tayom Abrahamren hopon Isạhake janamena ar irạl din hilokʼreye khatna ocokedea. Ar Isahak do Jakobe khatna ocokedea ar Jakob do onko gelbar khũṭren hapṛamkoe khatna ocoketʼkoa. “Onko khũṭren hapṛamko do Josephko hiskạwadete golam lekate Misor disạmteko ạkhrińgotʼkadea. Menkhan Isor do Joseph sãote tahẽkate joto lekan duk ar kosṭo khone rukhiyạkedea. Ona chaḍa Isor do Joseph akele danadea ar Misorren raj Pharao samaṅre daya ar dulạṛe ńamkeda. Onate Pharao do Misorren disạm cakʼlaoicʼ ar acʼakʼ oṛakʼren mạlik hõe benaokedea. “Inạ tayom goṭa Misor ar Kanan disạmre akal hoyena. Onate ạḍi haron kosṭo hecʼ paṛaoena ar aboren hapṛamko do jomakʼ bako ńamleda. Menkhan Jakob do Misorre jomakʼ menakʼa menteye ańjomketʼ khan aboren hapṛamko pạhil dhao onḍeye kolletʼkoa. Ar dosar dhaore Joseph do boehakoe baḍae ocoketʼkoa acʼ doe okoe kana mente. Unre Pharao do Josephakʼ gharońj reaṅe baḍaekeda. Ona tayom Joseph do acʼren apat Jakob ar gharońjren eṭakʼ sanamkoe hoho ạgu ocoketʼkoa. Onko do lekhare eaegel mõṛẽ hoṛko tahẽkana. Ado Jakob hõ Misorteye calaoena, ar onḍe do uni ar aboren hapṛamko hõko gocʼena. Ar onkoakʼ mạ̃ṛĩko do Sikemre idikateko topakada. Noa mạ̃ṛĩ poḍa Abraham do Sikem nagraharen Hamorren hoponko ṭhen khone kirińleda. “Abraham ṭhen Isor okaṭakʼe gokʼletʼ tahẽkan ona purạukʼ reakʼ okte seṭeren khan Misorre aboren hoṛko doko saṅge idiyena. Inạ tayom Misorre ar mitʼ hoṛe rajena. Uni do Joseph reaṅ cetʼge bae baḍaekan tahẽkana. Uni raj do aboren hoṛkoe ṭhokayetʼko tahẽkana ar aboren hapṛamko hõ ạḍiye santaoketʼkoa. Ar onkoren bale gidrạkoko janamokʼkan tahẽkanre onko do gocʼko lạgitʼ bahreteye giḍi ocoketʼkoa. “Ona jokhecʼ Moseye janamena. Uni do ńelokʼte ạḍi mońje tahẽkana. Ar pe cando hạbicʼ acʼren apatakʼ oṛakʼreye ạsul ocoyena. Ar tinre bahreteye giḍi ocoyena unre Pharaoren hoponera do uniye hạr sãohãkedea ar acʼren gidrạ lekae joton harakedea. Mose do Misorrenkoakʼ sanamakʼ akelte akelanicʼe hoyena, ar acʼakʼ katha ar kạmikote uni do daṛeanicʼe tahẽkana. “Moseakʼ umer pongel bochor hoyentae khan uni do acʼren Israel boehako sãote ńapamokʼe menjoṅana. Unre mitʼṭen Misri hoṛ do mitʼṭen Israel hoṛ cetanre bạṛicʼ beoharetʼkane ńelkede khan uni Israel goṛowae lạgitʼe calaoena ar Misri hoṛe gocʼkedete uniakʼe hala ruạṛkeda. Mose doe hudisetʼ tahẽkana, acʼren hoṛkoko bujhạu daṛeakʼa Isor do acʼ hotete onkoe bańcaokoa mente, menkhan onko do bako bujhạu daṛeada. Dosar hilokʼ Mose do barea Israel hoṛ lạṛhạikane ńelketʼkinạ. Unre sulukokʼ lạgitʼe metatʼkinạ, ‘Henda ho, boehakan coṅ ben, enḍekhan aben talare cedakʼ nonka bạṛicʼ do ben beohareda?’ “Menkhan okoe bạṛicʼe beboharetʼ tahẽkan uni do Mose ṭhelao ocokʼkedeteye metadea, ‘okoe baṅ ạliń talare mukhiyạ ar bicạricʼe dohoakatʼme? Holanokʼ cetʼleka uni Misri hoṛem gocʼkede, onkage cetʼ iń hõ gojeńem menetʼkana?’ Ado Mose noa kathae ańjomketʼ khan Midiạn disạmteye dạṛkeda ar onḍegeye berelena. Ar onḍege uni do barea koṛa gidrại gidrạwana. “Ona tayom pongel bochor paromena. Ar Sinại buru ṭhen oka hahaṅkar jaega menakʼ onḍe mitʼṭen jạnum jhạwạre jolokʼkan seṅgelre mitʼṭen serma goḍet do Mose ṭhene ńelocoyena. Ona ńelte Mose doe hahaṛayena. Ar mońj okocʼte ńel lạgitʼe sen soren khan Probhuakʼ noa kathae ańjomkeda, ‘Iń do amren hapṛamkoren Isor kanạń, Abraham, Isahak ar Jakobren Isorge.’ Unre Mose do botorteye thar tharaoena; ar ńel lạgitʼ dil hõ bae dilleda. “Unre Probhu do uniye metadea, ‘amakʼ jaṅga khon panahi bojtam, ente onem teṅgo akan jaega do sonotgea. Misor disạmre ińren hoṛko cetanre oka santao hoyokʼkan ona doń ńelakada. Iń do onkoakʼ rakʼ iń ańjomakada ar onko chaḍaoko lạgitʼ iń pheḍ hecʼakana. Iń do ńitokʼ Misor disomteń kol ruạrmea.’ “Nui doe uni Mose kana one okoe do Israelkoko baṅlede, oneko menletʼ ‘okoe baṅ am do mukhiyạ ar bicạricʼe doho akatʼme?’ Ar okoeṭakʼ serma goḍet ona jhạwạ talare Mose ṭhene ńel ocolen uni hotete Isor acʼge Israelkoren Mukhiyạ ar chaḍaoicʼ menkate Misorte Moseye kolledea. Ar nui Mosege Misor disạm khon Israelkoe oḍok ạguletʼkoa ar Misor disạmre, arakʼ doreãore ar pongel bochor hạbicʼ hahaṅkarre ạḍi utạr hahaṛa kạmi ar cinhạkoe kạmileda. Nui kangea uni Mose one okoe do Israelkoe metatʼko tahẽkan, ‘aperen Isor do aperen Israel boehako mod khon iń lekanicʼ mitʼṭen nạbiye teṅgoapea.’ Nui Mosege hahaṅkarre Israelkoren ona dol modre aboren hapṛamko sãoteye tahẽkana. Ar okoeṭakʼ serma goḍet do sinại burure kathae roṛletʼ tahẽkan, onḍe do nui Mosege serma goḍet sãoteye tahẽkana. Ar abo emabon lạgitʼ jiwetʼ kathako do nui Mosege onḍegeye ńamleda. “Menkhan aboren hapṛamko do uniakʼ bataotae bako rebenlena. Ona bodol onko do Mose bạgikate Misor disạm secʼ monko ạcur ruạṛketʼtakote Aronko metadea, ‘abo laha lahate hor udukʼ abon lạgitʼ boṅgako benao abonme. Ente Misor disạm khon okoeye oḍok ạguketʼbon uniakʼ cetʼ hoeakana ona do babon baḍaea.’ Unre onko do mitʼṭen mĩhũ muṭhạn leka boṅgako benaoana. Ar ona muṭhạn ṭhen janwar dãṛẽko samaṅkeda ar akoakʼ titeko tearakatʼ kạmiko iạteko onko doko hesecʼ sekrecʼena. Menkhan Isor do ạcurente onkoe alae giḍikatʼkoa sermaren siń cando, ńindạ cando ar ipilko sewawako lạgitʼ. Ar inạ kathage nạbikoakʼ puthire olakana: E Israel hoponko, hahaṅkarre pongel bochor ape do cetʼ iń lạgitʼ janwar se eṭakʼ jãhãn dãṛẽkope samaṅleda? Baṅa, bickom ape do sewae lạgitʼ oka muṭhạnpe benaoletʼ tahẽkan uni Molok boṅga reakʼ muṭhạn ar Rophan boṅgaren ipilge ape dope gokʼ idiledea. Onatege iń do Babel disạmte bondi lekateń kolpea. “Goha reakʼ tạmbu do hahaṅkarre aboren hapṛamko sãote tahẽkana. Isor do Mose cetʼlekae hukumade tahẽkan ar Mose okaṭakʼ nạmunae ńelletʼ onkage noa tạmbu hõ tear akan tahẽkana. Aboren hapṛamko do ona tạmbu ńamkate akoren ạyuricʼ Josuạ tabere tahẽkate ako sãote aboakʼ noa disạmteko ạguleda. Un johkecʼ Isor do onko samaṅ khon eṭakʼ jạtkoe laga ńirketʼkoa ar onko do noa disạmko ạidạriana. Ar Dạud hạbicʼ ona tạmbu do noa disạmrege tahẽkana. Dạud do Isorakʼ daya ńamkate Jakobren Isorakʼ tahen jaega benao lạgitʼe koean tahẽkana; menkhan Solomonge uni lạgitʼ oṛakʼ doe benaoleda. “Menkhan maraṅ Isor do manwakoakʼ benaoakʼ oṛakʼre bae tahenkana. Nạbiye menetʼ leka, Probhui meneda, ‘serma do ińakʼ siṅghạson kana ar ot do ińakʼ jaṅga lebedokʼakʼ ganḍo kana; am do iń lạgitʼ cetʼlekan oṛakʼem benaoa? Ar ińakʼ jirạukʼ ṭhạ̃i do okare hoyokʼa? Noako jinis do cetʼ ińakʼ nij tite bạń benao akada?’ E keṭecʼ hoṭokʼanko! Be-Jihudiko lekage apeakʼ lutur ar ontor do, ar apehõ ṭhik aperen hapṛamko leka kanape. Ape do jaoge sonot Jiupe tạkicʼ daramedekana. Nonkan jãhãe nạbi menakʼkoa, one okoe do aperen hapṛamko bako santao akatʼko? Se uni dhoromicʼ hoṛ, metakʼme Mạsiakʼ hijukʼ reakʼ katha okoe doko lại lahaletʼ, onko hõko gocʼketʼkoa. Ar ńitokʼ ape do bạirikoakʼ tire Jisupe sapʼ ocokedete uni hõpe khũn ocokedea. Serma goḍetko hotete ape ṭhenge coṅ ạn-ạriko ma emlen, menkhan ape do ona bape manao akada.” Noako katha ańjomkate onko mukhiyạko do Stephan birudre ạḍi bạṛicʼko raṅgaoena ar uni birudreko togocʼ ḍaṭakeda. Menkhan Stephan do sonot Jiuteye perecʼen khan serma secʼe beṅgetʼkeda ar Isorakʼ ṭhonoke ńel ńamkeda. Uni do Isorakʼ jojomsa aṛere Jisu teṅgo akane ńelkede khane menkeda, “Ńelpe, iń do serma jhicʼ akan ar Manwa Hopon Isorakʼ jojomsa aṛere teṅgo akaniń ńelekana.” Noa iạte onko do akoakʼ luturko tubạtʼketʼtakoa ar ãṭ aṛaṅte hohoate mitʼ dhaote Stephanko jhapṭaokedea. Onko do dhirite tińe lạgitʼ nagraha bahreteko or oḍokkedea, ar gohako do akoakʼ kicricʼ totʼkate Sạul ńutuman mitʼṭen juạn hoṛakʼ jaṅga ṭhenko dohokeda. Arko tińekan tahẽkanre uni do nonkae koekeda, “E Probhu Jisu, ińakʼ jiwi ataṅ tińme baṛe.” Ar ikhṛumente ãṭ aṛaṅteye menkeda, “E Probhu, nokoakʼ noa kại do alom lekhawakoa,” Ar noa menkate uni doe gocʼena. Ar onḍe Sạul hõ uni gocʼ ocokʼre rạjigeye tahẽkana. Enhilokʼ Jerusalem manḍerren hoṛko upạrte maraṅ okocʼ khed ehopʼena. Onate apostolko chaḍa sanam biswạsiko do Jihudạ ar Samariạ disạm reakʼ ṭoṭhakoreko chir chạturena. Ar adom Isor bhokti hoṛ do Stephanko topakedea ar uni lạgitʼ ạḍiko rakʼ homorkeda. Menkhan Sạul do onako manḍer marao lạgitʼ oṛakʼ oṛakʼ bolokate manḍerren herel ar maejiuko or totʼkate hajotre bhoraokoe ehopʼena. Ado okoe biswạsiko chir chạtur akan tahẽkan onko do beṛhaete senkate Mạsiakʼ bhage sombat porcarko dhurạuena. Un jokhecʼ Philip do Samariạ disạm reakʼ mitʼṭen nagrahate senkate Mạsi reaṅe porcarkeda. Ar hoṛko do uniakʼ katha ańjomkate ar uniakʼ hahaṛa kạmiko ńelte uniakʼko luturatʼtaea. Ar ḍher hoṛko khon bạṛicʼ jiuko do ãṭ aṛaṅte hohoateko oḍokena ar mitʼkaṛ gocʼ hoṛ ar leḍhako hõko bogeyena. Onate ona nagraharen hoṛko do ạḍiko rạskạyena. Ona nagrahare Simon ńutuman mitʼṭen hoṛ do ḍher din khon jạduye udukʼ ạguyetʼkan tahẽkana. Onate Samariạren sanam hoṛkoko ṭhak caba akan tahẽkana. Ar acʼ do mitʼṭen maraṅ hoṛ menteye udugokʼkan tahẽkana, ar kisạ̃ṛko ar reṅgecʼko sanamkoge uniakʼ kathako hetawakʼkan tahẽkana. Hoṛko menetʼ tahẽkana, “Isor reakʼ maraṅ daṛe oka menogokʼkan nui hoṛ kangeae ona daṛe do.” Ar hoṛko hõ uniakʼ katha lekako calakʼkan tahẽkana, ente ḍher din khon uni do acʼakʼ jạduteye ṭhak caba akatʼko tahẽkana. Menkhan Philip do tinre Isorakʼ raj ar Jisu Mạsi reaṅ bhage sombate porcarkeda unre hoṛko do uniakʼ kathareko pạtiạuena ar herel ar maejiukoko bạptisena. Ar uni Simon hõe pạtiạuente bạptismae hataokeda ar Philip são sãote sanam jaegakoteye senena ar cinhạ kạmiko ar maraṅ maraṅ hahaṛa kạmiko ńelteye ṭhak utạrena. Ado Jerusalemren apostolko do tinreko ańjomkeda Samariạren hoṛko Isorakʼ kathako ataṅakada unre Patras ar Johan onko ṭhenko kolkatʼkinạ. Patras ar Johan do hecʼkate onko lạgitʼ kin koekeda jemon sonot Jiuko ńame, ente unhạbicʼ hõ onko cetanre sonot Jiu do bae hecʼakan tahẽkana; eken Probhu Jisu ńutumte onko doko bạptis ocoakan tahẽkana. Unre Patras ar Johan do onkokin capoketʼkoa, ar onko do sonot Jiuko ńamkedea. Ado apostolkin ti capokate sonot Jiukin emokʼkane ńeltʼketʼ khan Simon do unkin ṭhen ṭaka ạgukateye menkeda, “Iń hõ noa daṛe imạń ben jemon jãhãegeń capoye unige sonot Jiue ńame.” Unre Patras do uniye metadea, “Amakʼ ṭaka do am sãotege nosṭokʼma, ente am dom hudisetʼkana Isorakʼ dan do ṭakate kirińokʼa. Ạlińakʼ noa kạmire amakʼ bakhra se ạidạri do bạnukʼtama, ente Isor samaṅre amakʼ ontor do baṅ sojhetama. Amakʼ dusṭami khon mon ạcurtam ar Probhu ṭhen koejoṅme; enḍekhan amakʼ mon reakʼ noa bạṛicʼ hudis pasere pase uni doe ikại tam. Ińiń ńel ńameda, amakʼ mon do lalocte perecʼgea ar am do kại reakʼ tonolre menama.” Unre Simone roṛ ruạṛkeda, “Abenge Probhu ṭhen iń lạgitʼ koe ben jemon aben okaṭakʼ ben roṛakatʼ ona do ińre alo hoyokʼ.” Inạ tayom Patras ar Johan do Probhu reaṅ goha emkate Jerusalemtekin ruạṛ calaoena. Ar calakʼ calakʼte unkin do Samariạkoakʼ aema atokore bhage sombatkin porcar idikeda. Mitʼ din Probhuren mitʼṭen goḍet do Philipe metadea, “Ma beretʼme, ar dạkhin secʼ calakʼme, one okaṭakʼ hor do Jerusalem khon Gaja nagraha secʼ calao akan ona horte calakʼme.” Ona hor do nisungea. Unre Philip do ona secʼe calaoena. Ar horre Ithipiạ disạmren mitʼṭen maraṅ raj kạmiạyicʼ soṅgeteye ńapamena. Uni raj kạmiạyicʼ do cạkrại tahẽkana. Ithipiạren Kandake rạniakʼ dhon-duribko ńel todarot reakʼ bhar do nui hoṛ cetanrege tahẽkana. Uni kạmiạyicʼ do Isor sewawae lạgitʼ Jerusalemteye senlena. Ado oṛakʼteye ruạṛkan tahẽkanre uni do sadom gạḍire duṛupʼkate Jesaea nạbi reakʼ puthiye paṛhao joṅkan tahẽkana. Unre sonot Jiu do Philipe metadea, “Do ona gạḍi ṭhen sorokʼme ar uni sãote calakʼme.” Khange Philip do ona gạḍi ṭhene ńir sorena ar uni hoṛ do Jesaea nạbi puthi reakʼ paṛhaokʼ kane ańjomkedea. Adoe kulikedea, “Okaṭakʼem paṛhaoetʼkan ona do cetʼem bujhạu daṛeakʼ kangea?” Uni kạmiạyicʼe menkeda, “Jãhãe bae bujhạuạń khan cekateń bujhạu daṛekea?” Uni do Philipe nehõradea jemone dejokʼte acʼ ṭhene duṛupʼ. Uni kạmiạyicʼ do sonot sostor khon okae paṛhaoetʼ tahẽkan ona do noage; bheḍa do jabeye lạgitʼ cetʼlekae idi ocokʼ onkage uni doe idi ocoyena. Kạpciyicʼ samaṅre bhiḍi hopon cetʼleka thir akane tahen, onkage uni do moca bae jhicʼletʼtaea. Uni doe bemanot ocoyena, unire do hok reakʼ bicạr baṅ hoelena. Uni bõs reakʼ katha do ohoge lại daṛekokʼa, ente dhạrti khon uniakʼ jion hatao akantae tahẽkana. Uni kạmiạyicʼ do Philipe metadea, “Dayakate lạiạńme, nạbi do okoe reaṅ noa kathae roṛakada? Acʼ reaṅ, se eṭakʼ jãhãe reaṅ?” Unre Philip do sonot sostor reakʼ ona hạṭiń khon ehopʼkate uni ṭhen Jisu reaṅ bhage sombate porcarkeda. Ado hortekin calakʼkan tahẽkanre nonkan mitʼṭen jaegarekin hecʼena one okare do dakʼ tahẽkan. Unre uni kạmiạyicʼ doe menkeda, “Nõkʼõe ńelme, nonḍe do dakʼ menakʼa; ar ińiń bạptis ocokʼre tạkicʼakʼ jãhãnakʼ menakʼa?” Unre Philipe menkeda, amakʼ goṭa montem pạtiạu akan khan ma bogege. (Uni hoṛ do roṛ ruạṛketʼteye menkeda pạtiạukʼ kangeạń Jisu Mạsi do Isorren Hopon kanae mente). Uni do gạḍi teṅgoe lạgitʼe hukumkeda. Ona tayom Philip ar uni kạmiạyicʼ do dakʼrekin pheḍena ar uniye bạptiskedea. Ado dakʼ khonkin rakapʼen khan Probhuren Jiu do ackage Philipe idikedea. Ar uni cạkrạ hoṛ do ghuriạ Philip bae ńel ńamledea. Unre uni do rạskạte oṛakʼe calaoena. Menkhan Philip do Asdod nagrahareye ńelena. Ar uni do ato ato bhage sombat porcar porcarte mucạtʼre Kạisạriạteye calaoena. Ar Sạul do unhõ Probhuren celako gocʼko reakʼ botore udukʼakokan tahẽkana. Uni do Damesek nagraha reakʼ sunạgogkore jimạko lạgitʼ maraṅ naeke ṭhen senkate ciṭhiye koekeda. Ar tinạkʼ hoṛ Jisuakʼ horteko calakʼkan tahẽkan, baṅ do herel hoponko, baṅ do maejiuko, onko sanamko ńamlekore jemon tolkate Jerusalemteye ạgu daṛeako ona reakʼ ektiạri ńam lạgitʼge uni do ona ciṭhiye khojleda. Ado hor horteye calakʼkan tahẽkanre Damesek ṭhene seṭeren khan ackage serma khon mitʼṭen marsal uni beṛhaete bamberena. Uni do otreye bhindạṛena ar mitʼṭen aṛaṅ metaekane ańjomkeda, “E Sạul, E Sạul cedakʼem khedeń kana?” Sạul doe menkeda, “E Probhu, am dom okoe kana?” Uniye menkeda, “Iń doń Jisu kana, okoe amem khedeńkan. Ńitokʼ do beredokʼme ar nagrahate calakʼme. Ar cetʼ cekae hoyokʼtama ona dom lại ocokʼa.” Ar okoeko hoṛ Sạul sãoteko calakʼkan tahẽkan, onko do hahaṛakʼ tulucʼko teṅgo tahẽyena. Onko do kathako ańjomkeda menkhan okoege bako ńel ńamledea. Ado Sạul ot khone beretʼena, menkhan mẽtʼe beṅgetʼketʼ khan cetʼge bae ńel ńam daṛeada. Unre acʼren sãotenko do Damesekte uniko tiyạkʼ idikedea. Pe din hạbicʼ Sạul do mẽtʼte bae ńel ńamleda ar jom hõ cetʼge bae jomleda. Damesek nagrahare Ananiạs ńutuman mitʼṭen celae tahẽkana. Probhu do dorsonte uniye metadea, “Ananiạs.” Adoe menkeda, “Probhu, nõkʼõe minạńgea.” Probhu do uniye metadea, “Ma beretʼkate sojheko metakʼ kulhite calakʼme. Ar onḍe Jihudạwakʼ oṛakʼre Tạrsus nagraharen Sạul ńutuman mitʼṭen hoṛ khojeme. Uni doe koejoṅ kana ar dorsone ńel akada, Ananiạs ńutuman mitʼṭen hoṛ hecʼkate hoṛmoreye capoakadea jemon arhõe ńeńel.” Ananiạse menkeda, “E Probhu, ḍher hoṛkoakʼ moca khon nui hoṛ reaṅ iń ańjomakada, Jerusalemre amren hoṛko ạḍi bạṛicʼe khed akatʼkoa. Ona chaḍa am ńutumte koejoṅkanko sapʼko lạgitʼ maraṅ naekeko ṭhen khon ektiạri hataokate nonḍeye hecʼakana.” Menkhan Probhu do Ananiạse metadea, “Do calakʼme, ente boṅgan hoṛ jạtrenko ar onkoren rajko ar Israelko ṭhen porcar lạgitʼ, iń do uni hoṛgeń bachao akadea.” Ar iń iạte tinạkʼ duk jojom hoyokʼtaea onań udukʼaea.” Unre Ananiạs do senkate ona oṛakʼteye boloyena ar tikin capoadeteye metadea, “E boeha Sạul, nonḍe hijukʼ jokhecʼ horre okoe do am ṭhene ńel ocolen uni doe Probhu Jisu kana. Unige iń doe kol akadińạ jemon am dom ńeńel ar sonot Jiutem perejokʼ.” Unre Sạulakʼ mẽtʼ khon cuiạ̃kʼ leka phạnṭil ńurgotʼena ar ńeńele ehopʼena. Ona tayom uni do beretʼenteye bạptisena ar jom ńũketʼteye daṛeyena. Ar Sạul do Damesekren celako sãote thoṛa dine tahẽyena. Ona tayom uni do bin bilomte eṭakʼ eṭakʼ sunạgogkore noa menkate porcare ehopʼena je, Jisu kangea Isorren Hopon do. Ar okoe uniakʼ kathako ańjomketʼ onko sanamkoge hahaṛakʼ tulucʼko kulikan tahẽkana, “Nui do cetʼ uni doe baṅkana, one Jerusalemre Jisu ńutumte koejoṅkoe khedetʼko tahẽkan? Ar nonḍehõ okoeko onkayetʼkan onko tolkate maraṅ naekeko ṭhen idiko lạgitʼge cetʼ bae hecʼakana?” Menkhan Sạul do arhõe daṛe idiyena ar Jisuge Mạsikanae menteye sạbudkedea. Noate Damesekren Jihudiko doko tharbasaoena. Ado ḍher din tayom Jihudiko do uni goje reaṅko solhawana, Menkhan Sạul do onkoakʼ goṭawakʼe baḍaeketʼtakoa. Ar uni goje lạgitʼ Jihudiko do nagraha reakʼ Phoṭokkore siń ńindạ pahrako ehopʼena. Menkhan mitʼ din ạyupʼ jokhecʼ Sạulren celako do mitʼṭen khạclạkʼte pạcri reakʼ jalnate hanasako pheḍgotʼ kadea. Sạul do Jerusalem hecʼkate celako sãote gatekʼe kurumuṭukeda, menkhan onko do uniko botoraekan tahẽkana. Onko do bako pạtiạu daṛeakʼkan tahẽkana, Sạul do sạrige mitʼṭen celae hoeakana mente. Menkhan Barnabas do uniye soṅgekedete apostolko ṭhene idikedea are baḍae ocoketʼkoa, Damesek reakʼ horre Sạul do cetʼlekate Jisui ńelledea ar cetʼleka Probhu do uni sãoteye galmaraoleda, ar Damesekre Jisu reaṅ cetʼleka dilkateye porcarleda. Ona tayom Sạul do Jerusalemren celako sãoteye tahẽyena ar onko sãoteye bolo oḍokokʼkan tahẽkana ar goṭa Jerusaleme dãṛãketʼa ar Probhu reaṅ dilkateye porcaretʼ tahẽkana. Ar okoeko Jihudiko Junạni pạrsiteko roṛetʼkan tahẽkan uni do onko sãoteye galmarao kan tahẽkana are reṭe peṭekʼkan tahẽkana, menkhan noko Jihudikoge uni goje lạgitʼ kurumuṭuko ehopʼena. Ado biswạsi boehako noako ańjomketʼ khan Kạisạriạ nagrahateko idikedea ar tayomte Tạrsus nagrahateko kolkadea. Ona oktere Jihudạ, Gạlil ar Samariạ disạm reakʼ manḍerkore suluk tahẽkana, ar ona manḍerko benao rakabokʼkan tahẽkana. Onate Probhu botoraete ar sonot Jiu reakʼ uskurte onko doko saṅge idikʼkan tahẽkana. Patras do goṭa ṭạnḍi ạcur ạcurte Luddareko berelakan tahẽkan Isorren hoṛko ṭhene hecʼena. Ona atore Aeneas ńutuman mitʼ hoṛe tahẽkana. Uni do mitʼkaṛ gocʼ ruạte irạl bochor khon aṭetʼreye jaṛao akan tahẽkana. Patras do uni ńelkede khane metadea, “E Aeneas, Jisu Mạsi do ame bogeketʼmea. Ma beretʼme, ar amakʼ aṭetʼ kuṭuṅtam.” Khange uni do saṭmenteye beretʼena. Unre Ludda ar Sharon atoren sanam hoṛ do Aeneasko ńelkede khan Probhu secʼko ạcurena. Joppa nagrahare Tabitha ńutuman mitʼṭen maejiu celae tahẽkana. Junạni pạrsite noa ńutum reakʼ mane do Dorkas (se Posta). Uni do jaoge eṭakʼkoe bhạlạiyetʼko tahẽkana, ar reṅgecʼ orecʼko hõe goṛoakokan tahẽkana. Uni do ruạ kạhilenteye gocʼena arko um saphakedete mitʼṭen koṭha kandhareko dohoakade tahẽkana. Jappo do Ludda sorre tahẽkana; onate celako do Patras Luddare menaea menteko ańjomketʼ khan bar hoṛ uni ṭhen kolketʼkinteko nehõradea, “Am do usarate ale ṭhen baṛe hijukʼme.” Unre Patras do unkin soṅgeteye calaoena. Ar onḍeye seṭeren khan ona cetan koṭha kandhateko idikedea. Unre sanam rạnḍi maejiuko do Patras beṛhaete teṅgokate rarakʼko ehopʼena ar Dorkas jiwetʼe tahẽkanre okako aṅgrop ar eṭakʼ kicricʼkoe benao akatʼ tahẽkan onakoko udukʼadea. Unre Patras do sanamko oṛakʼ khone oḍokketʼkote ikhṛumenteye koekeda. Ona tayom gocʼ akan maejiu secʼ ạcur kateye menkeda, “E Tabitha ma beretʼme.” Ar inạtege Dorkas doe beṅgetʼkeda ar Patrase ńelkede khane duṛupʼena. Unre Patras do ti sapʼkate uniye beretʼkedea. Ar Isorren hoṛko ar rạnḍi maejiuko hohoatʼkote onkoe udukʼatʼkoa je, Dorkas doe jiwetʼena. Noa katha do Joppa nagraharen sanamko baḍaekeda ar ḍher hoṛge Probhureko pạtiạuena. Ar Patras do Joppare Simon ńutuman mitʼṭen hoṛakʼ oṛakʼre ḍher dine tahẽyena. Ar nui Simon do mitʼṭen camare tahẽkana. Kạisạriạ nagrahare Kornelius ńutuman mitʼṭen hoṛ do Itạliạ Palṭon dolren subedare tahẽkana. Uni do Jihudi hoṛe baṅkanre hõ Isor bhokti hoṛe tahẽkana ar acʼ gharońjren sanamkoge Isorko sewawaekan tahẽkana. Uni do reṅgecʼ orecʼko ṭaka-poesakoe dan akokan tahẽkana ar Isor ṭhen jaogeye koejoṅkan tahẽkana. Mitʼ din pe baja okte uni do mitʼṭen dorsone ńelkeda. Uni do pusṭạuteye ńelkeda Isorren mitʼṭen goḍet do hecʼkateye metaekana, “E Kornelius.” Kornelius doe botorente serma goḍet secʼ beṅgetʼkateye menkeda, “Roṛme, Probhu.” Serma goḍete menkeda, “Amakʼ koejoṅ ar reṅgecʼ orecʼkom dan akokan reakʼ katha do sermate seṭer akana ar Isor do onae disạ dohoakada. Ńitokʼ am do Joppa nagrahate hoṛ kolkom, ar Simon, one okoe do Patrasko metae uni hoho ạguyem. Onḍe jalapuri aṛere ar mitʼṭen Simon menaea. Uni do harta reakʼe kạmiya. Patras do uni Simonakʼ oṛakʼrege menaea.” Ado okoeṭakʼ serma goḍet sãoteye galmaraokan tahẽkan uniye calaoen khan Kornelius do barea guti ar mitʼṭen goṛoyicʼ palṭone hohoadea. Nui palṭon hõ Isor bhokti hoṛe tahẽkana. Ar sanamakʼe lại bujhạuatʼko khan uni do Joppateye kolkatʼkoa. Dosar hilokʼ onko hoṛ tinre Joppa nagraha secʼko hijukʼkan tahẽkana unre tikin okte tahẽkana. Un jokhecʼ Patras do koejoṅ lạgitʼ chatteye rakapʼena. Unre Patras do ạḍi reṅgecʼkedea ar thoṛa jojome menana. Ar tinre jomakʼ tearokʼkan tahẽkana unre mitʼṭen dorson paṛaoadea. Unre uni do serma jhicʼakan ar maraṅ mitʼṭen cador leka pon konare sapʼakatʼ otre pheḍ hijukʼkane ńelkeda. Onare joto lekan janwarko, ar otren leńokʼko ar coṭren uḍạukʼkoko tahẽkana. Inạ tayom okoe coṅ roroṛkane ańjomkedea, “E Patras, ma beredokʼme, ar gocʼkate jomkom.” Patrase menkeda, “Baṅa, Probhu, ohoge hoelena. Besapha ar chutakʼ jãhãnakʼge tis hõ bạń jomakada.” Unre arhõe ańjomkeda, “Isor okakoe sapha akatʼ ona do chutakʼ alom metakʼa.” Onkage pe dhao hoyen tayom ona cador do sermate rakapʼ ocoyena. Patras do okaṭakʼ dorsone ńelketʼ ona reakʼ cetʼ mane hoedaṛekokʼa menteye hudisokʼkan tahẽkanrege, Korneliuse kolakatʼko hoṛ do Simonakʼ oṛakʼ sendra ńamkate duạr ṭhenko teṅgoyena. Onko do hohokateko kuliyana, “Simon, okoe do Patrashõko metaekan, uni do cetʼ nonḍeye tahenkana?” Patras do unhõ dorson reakʼ kathae hudiskan tahẽkana, unre sonot Jiu do uniye metadea, “Ńelme, pe hoṛ amko khojetʼmea. Ma beretʼkate latarte pheḍokʼme. Ar jãhãnakʼ begor digdhạte onko soṅgete calakʼme, ente ińge onko doń kolakatʼkoa.” Unre Patras doe pheḍ hecʼente onko hoṛkoe metatʼkoa, “Ape okoepe ńam baṛayede uni hoṛ doń ińkangea. Ape do cetʼ lạgitʼpe hecʼakana?” Onko hoṛko menkeda, “Subedar Korneliusge ale doe kolakatʼlea. Uni do mitʼṭen dhorom ar Isor bhokti hoṛ kanae. Ar sanam Jihudikoge uniko sarhaoede kana. Isorren mitʼṭen goḍet do uniye hukumade tahẽkana jemon acʼakʼ oṛakʼte ame hoho idi ocomete amakʼ kathakoe ańjomtam.” Unre Patras do oṛakʼ bhitrite onko hoṛe hoho aderketʼkoa ar onkoakʼ tahen jaega ar jom-ńu reakʼe bebostawatʼkoa. Ado dosar hilokʼ Patras do onko tulucʼe senena. Ar Joppa nagraharen adom biswạsi boehako hõ uni sãoteko sen torayena. Ar tesar hilokʼ do Kạisạriateko seṭerena. Unre Kornelius do acʼren peṛa ar gateko hoho jarwakate onko lạgitʼe koyokʼ horakatʼ tahẽkana. Ado Patras oṛakʼteye boloyen khan Kornelius do uniakʼ ti jaṅgare giḍiyente uniye ḍobokʼadea. Menkhan Patras do uni beretʼkedeteye metadea, “Ma beretʼme, iń hõ coń manwakange.” Kornelius tulucʼ galmarao galmaraote Patras do bhitriteye boloyen khan onḍe aema hoṛ jarwa akane ńelketʼkoa. Uni doe metatʼkoa, “Ape mape baḍaege je, mitʼṭen Jihudi hoṛ do mitʼṭen boṅgan hoṛ sãote gatekʼ se uni sãote ńapamokʼ hõ aleakʼ dhorom reakʼ ạn-ạri birudkana. Menkhan Isor do ińe udukʼ akawạdińạ, okoe hõ besapha se chut mente metako do lek baṅkan tińạ. Onate tinre ińpe hohowạdińa unre begor ạnḍuṅte nonḍeń hecʼakana. Ar ńitokʼ iń kuliyetʼpea, cedakʼ iń dope hoho akadińạ?” Unre Korneliuse menkeda, “Pon din lahare ṭhik niạ jokhecʼ pe baja okte iń do ińakʼ oṛakʼreń koejoṅkan tahẽkana. Unre ackage pĩṛĩtʼ pĩṛĩtʼ ponḍ kicricʼ horokʼ akatʼ mitʼṭen hoṛ iń samaṅre hecʼenteye metadińạ, ‘Kornelius, Isor do amakʼ koejoṅe ańjom akada ar reṅgecʼ orecʼkom danakokan reakʼ katha hõ uni doe disạ akada. Ado ńitokʼ Joppate hoṛ kolkom, ar Simon, okoe do Patrasko metaekan uni hoho ạguyem. Uni do jalapuri aṛere Simon camarakʼ oṛakʼreye ḍera akana.’ Onate iń do am hoho ạgume lạgitʼ unrege hoṛiń kolketʼkoa, ar amem hecʼente dom bhageakatʼgea. Nonḍe ale do ńitokʼ sanamkoge Isor samaṅre menakʼlea. Ar Probhu okaṭakʼ ale ṭhen galmarao lạgitʼe hukum akatʼme ona jotowakʼgele ańjoma.” Unre Patras do roroṛe ehopʼena, “Iń do ńitokʼ sạrigeń bujhạu daṛeakʼ kana, Isorakʼ mẽtʼãhã samaṅre do jotogeko somangea. Ar mimitʼ jạtko mod khon okoe do uniko botoraekan ar uniakʼ mẽtʼãhã samaṅre dhoromko kạmikan uni do onkoe ataṅkoa. Isor do Israelko ṭhen noa bhage sombate kolletʼ tahẽkana je, Jisu Mạsi, one okoe do sanamkoren Probhu kane, uni hotetege suluk do ńamokʼa mente. Ar Johan do hoṛkoakʼ bạptisma ataṅ jạruṛa menteye porcarketʼ khan Gạlil khon ehopʼkate goṭa Jihudạre okako hoelen ona katha mape baḍaege. Ar noa hõpe baḍaegea je, Isor do Nasaretren Jisuge sonot Jiu ar daṛeteye ojokʼlede tahẽkana. Isor do uni tulucʼe tahẽkante bhageakʼkoe kạmiyetʼ tahẽkana ar Soetanakʼ tire okoeko kosṭoko ńametʼkan tahẽkan onko sanamkoe bogeyetʼko tahẽkana. “Jihudikoakʼ disạmre ar Jerusalemre uni okakoe kạmiletʼ onaren gohako do ale kangeale. Hoṛko do krusre akakate uniko gocʼkedea. Menkhan Isor do pe din hilokʼre gocʼko khon uniye jiwetʼ beretʼkedea ar sodorokʼ reakʼe danadea. Menkhan sanamko do bako ńelledea, eken okoe gohako Isor do lahareye bachao dohoakatʼko tahẽkan onkogeko ńelledea, metakʼme gocʼko khon jiwetʼ beretʼ tayom ale do uni sãotele jom-ńũleda ar alege unile ńelledea. Uni doe hukum akawatʼlea jemon Jihudiko ṭhenle porcar ar gohale em baṅma, Isor do unige jiwetʼko ar gocʼko bicạrko lạgitʼe niṭ akadea mente. Ar sanam nạbikoge uni reaṅ noa gohako emetʼkana, unire pạtiạukʼ mitʼke mitʼ hoṛ do uniakʼ ńutumte kại reakʼ ikạko ńama.” Patras do unhõ kathae roroṛkan tahẽkanre okoe kathako ańjomkan tahẽkan onko sanamkore sonot Jiu doe hecʼena. Ar okoe Jihudi biswạsiko Patras sãoteko hecʼlen onko do be-Jihudiko cetanrehõ sonot Jiu reakʼ dan dul oḍoken ńelteko hahaṛayena. Onko do onako bujhạu daṛeada ente noko be-Jihudiko hõ eṭakʼ eṭakʼ pạrsite roroṛkan ar Isor sabasiaekanko ańjomketʼkoa. Unre Patrase menkeda, “Dakʼte bạptisokʼ lạgitʼ noko hoṛ do cetʼ jãhãeye akoṭ daṛekea? Onko hõ coṅ abo leka sonot Jiuko ńamakade.” Unre uni do onko hoṛko Jisu Mạsi ńutumte bạptisokʼ lạgitʼe hukumatʼkoa. Ar ona tayom onko do ako ṭhen thoṛa din tahen lạgitʼ Patrasko nehõradea. Boṅgan hoṛ jạtrenko hõ Isorakʼ kathareko pạtiạu akana mente ona katha do apostolko ar goṭa Jihudạren biswạsi boehako hõko ańjomkeda. Onate Patras do Jerusalemteye hecʼen khan biswạsiko modren okoekoko khatna ocoakan tahẽkan onko do uni dusikedeteko metadea, “Am do begor khatna akan hoṛkoakʼ oṛakʼte senkate onko soṅgem jom-ńũyetʼ kana.” Unre Patras do pạhil khon ehopʼkate cetʼ cetʼko hoelen ona mitʼ mitʼte bujhạuatʼkoteye metatʼkoa, “Joppa nagrahareń koejoṅkan tahẽkanre mitʼṭen dorsoniń ńelkeda. Iń doń ńelkeda mitʼṭen cador lekanakʼ pon konare sapʼ akatʼ serma khon iń ṭhen pheḍ hecʼena. Ar mońjteń ạri bạndhiketʼ khan onare ạḍi lekan janwarko, bir janwarko, leńokʼko ar coṭren cẽṛẽko menakʼkoa menteń ńelkeda. Ar okoe coṅ memeniń ańjomkedea, ‘E Patras, ma beredokʼme ar gocʼkate jomkom.’ Iń doń menkeda, baṅa, Probhu, ohoge hoedaṛelena. Besapha ar chutakʼ jãhãnakʼge tishõ ińakʼ mocare do baṅ bolo akana. “Ona tayom serma khon dosar dhao roṛena, ‘Isor okaṭakʼe sapha akatʼ ona do be sonotakʼ alom metakʼa.’ Nonkage pe dhao hoyena, ar ona tayom jotowakʼ do arhõ sermate rakapʼ ocoyena. “Ar ona são sãote okaṭakʼ oṛakʼreń tahẽkan ona oṛakʼre pe hoṛ do hecʼkateko teṅgoyena. Onko do Kạisạriạ khonko kol ocoakan tahẽkana. Unre sonot Jiu do begor digdhạte onko sãote calakʼe metadińạ. Ar iń tulucʼ noko turui boeha hõko sen toralena. Ale do uni hoṛakʼ oṛakʼtele boloyena one okoe do ińe hohowạdiń tahẽkan. Uni do mitʼṭen serma goḍet acʼakʼ oṛakʼre cetʼlekae ńellede onae lạiyatʼlea. Uni serma goḍete metade tahẽkana, ‘Simon, okoe do Patrasko metaekan, uni hoho ạguye lạgitʼ am do Joppa nagrahate hoṛ kolkom. Ar uni okako kathae lạiam, ona kathatege am ar am gharońjren sanam hoṛ kại khon bańcaope ńama.’ “Sonot Jiu etohopʼre cetʼleka aboko cetanreye hecʼlen, onkage galmaraoiń ehopʼketʼ khan onko cetanreye hecʼena. Unre Probhui menletʼakʼ katha disạ hecʼạdińạ, ‘Johan do dakʼteye bạtisetʼkokan tahẽkana, menkhan ape do sonot Jiutepe bạptis ocokʼa.’ Enḍekhan Probhu Jisu Mạsire bon pạtiạulenre Isor okaṭakʼ dane ematʼbon tahẽkan inạ mitʼ dange uni do onko hõe ematʼko khan iń doń celekante, Isoriń akoṭ daṛekea?” Noa katha ańjomkate Jihudạren biswạsiko do begor ạnḍuṅte Isor sarhaoateko menkeda, “Isor do boṅgan hoṛ jạtrenko hõ kại khon mon ạcurkate jion ńam lạgitʼ ạte em akatʼkoa.” Ado Stephan babot hoyen santao iạte okoekoko chir chạtur akan tahẽkan onko do Phoenikiạ, Kupros ar Siriạ disạm reakʼ Antiokiạ hạbicʼ senkate eken Jihudiko ṭhenge Isorakʼ kathako lạikeda. Menkhan onko modre adomko do Antiokiạte senkate Junạni pạrsiren hoṛko ṭhen hõ Probhu Jisu reaṅ bhage sombat porcarko dhurạuena. Noko do Kupros dip ar Kurene nagraharen hoṛko tahẽkana. Isorakʼ ti onko cetanre tahẽkante ạḍi utạr hoṛ do Probhureko pạtiạuente uni secʼko ạcurena. Ado Jerusalem manḍerren hoṛko noa sombatko ańjomketʼ khan onko do Antiokiạte Barnabasko kolkadea. Ar Antiokiạren hoṛko Isorakʼ dayako ńamakada menteye ńelketʼ khan Barnabas do ạḍiye rạskạyena. Onko jemon goṭa ontorte Probhure biswạsko tahen onate uni do sanamkoe sikhạu paṛhaoketʼkoa. Barnabas do mitʼṭen bhage hoṛe tahẽkana uni do sonot Jiu ar biswạste hõ perecʼ akane tahẽkana. Unre Probhu do ḍher hoṛge acʼ apnar ṭhene ạguletʼkoa. Noa tayom Barnabas do Sạul ńame lạgitʼ Tạrsus nagrahateye calaoena, ar uniye ńamkede khan Antiokiạteye ạgukedea. Barnabas ar Sạul do goṭa bochor manḍerren hoṛko sãotekin tahẽyena ar ạḍi utạr hoṛkin cetʼatʼkoa. Ar noa Antiokiạrege celako do pạhil Khristanko ńumocoyena. Onako dinre adom nạbiko do Jerusalem khon Antiokiạteko hecʼena. Onko modren Agabus ńutuman mitʼ hoṛ doe teṅgoyente sonot Jiuakʼ ạyurteye lại lahakeda je, goṭa Rom disạmre mitʼṭen maraṅ akal hoyokʼa. (Ona do Klạudius raj oktere hoelena.) Unre celako doko goṭakeda, Jihudạ disạmren biswạsi boehako goṛoako lạgitʼ apan ạpin daṛe leka onko do jemon ṭakako kol. Arko onkaletʼgea. Onko do Barnabas ar Sạulakʼ tite Jihudạ manḍerren maraṅ mukhiyạko ṭhen ona goṛoko kolleda. Ona jokhecʼ Herod raj do santaoko lạgitʼ manḍerren adom hoṛkoe sapʼ ạguketʼkoa. Uni do Johanren boeha Jakob tarwaṛeteye khũn ocokedea. Onate Jihudikoko kusi akana menteye ńelketʼ khan uni do Patras hõ sabe lạgitʼe calaoena. Noa ghoṭna do bin khạmianakʼ piṭhạ porob jokhecʼ hoelena. Uni do Patras sapʼkate hajotreye bhoraokedea. Ar popon hoṛkate pạri pạrite horhoye lạgitʼ palṭonkoe bharatʼkoa. Herod doe goṭakeda, sen-parom porob tayom bicạre lạgitʼ Patras do hoṛko samaṅreye oḍok ạguyea. Onatege Patras do hajotreye doho ocokʼkan tahẽkana. Menkhan manḍerren hoṛko do uni lạgitʼ Isor ṭhen mitʼ monteko koejoṅkan tahẽkana. Oka hilokʼ Herod do Patras bicạre lạgitʼe oḍok ạguyea ona laha ńindạ Patras do barea palṭon talareye jạpitʼ akatʼ tahẽkana. Uni do barea sikṛiteko tolakade tahẽkana ar pahradarko do duạrreko pahrakan tahẽkana. Unre Probhuren mitʼṭen goḍet do ackage hecʼkate onḍeye teṅgoyena. Onate hajot oṛakʼ reakʼ ona kandhare marsal bamberena. Serma goḍet do Patras kokhare ceṭakʼkedeteye ebhenkedea are metadea, “Usạra beretʼ godokʼme.” Ar inạtege Patrasakʼ banar ti khon sikṛi do ńurgotʼena. Unre serma goḍet do Patrase metadea, “Ma paṭhe keṭejokʼme, ar jaṅgare panahi horogme.” Khan Patras doe onkakeda. Ar serma goḍet do uniye metadea, “Amakʼ oyonakʼte oyokʼme, ar pańjańme.” Patras do uni tayom tayomte hajot oṛakʼ khon bahreteye oḍok hecʼena, menkhan bae bujhạu daṛeada, serma goḍet hotete hoyokʼ kanakʼ do sạrikana mente. Uni doe hudiskeda dorsone ńeńelkana. Unkin do pạhil ar dosar pahradarko kin paromketʼko khan nagrahate bolokʼ mẽṛhẽtʼ silpiń duạr ṭhenkin seṭerena. Ar silpiń do acʼtege jhicʼena ar unkin do ona talatekin oḍok hecʼena. Ado mitʼṭen hortekin calakʼkan tahẽkanre serma goḍet do ackage Patrase bạgi oṭowadea. Unre Patras do disạ ạcurenteye menkeda, “Ńitokʼ sạrigeń bujhạu daṛeakʼ kana, Probhu do acʼren goḍete kolkedete Herodakʼ ti ar Jihudikoakʼ sanam bạṛicʼ phorphundi khone bańcao akadińạ.” Noa kathae bujhạuketʼ khan uni do Johanren eṅgat Mạriạmakʼ oṛakʼteye calaoena. Nui Johan do Mark hõko metaekan tahẽkana. Ar ona oṛakʼre do aema hoṛ mitʼ ṭhen jarwakateko koejoṅkan tahẽkana. Patras do bahre silpińe ṭhopʼ ṭhopʼketʼ khan Roda ńutuman mitʼṭen kạ̃ṛmĩ kuṛi silpiń jhicʼ lạgitʼe hecʼena. Uni do Patrasakʼ aṛaṅe oromketʼtae khan nunạkʼe rạskạyena je, silpiń jhicʼ baṅkate bhitrite ńir bolokateye lạiatʼkoa, “Patras do duạr ṭhene teṅgo akana mente.” Unre celako do kuṛiko metadea, “Amakʼ bohokʼ do bạṛicʼ akantama.” Menkhan uni do artetʼ murukteye menetʼkante onkoko menkeda, “Enḍekhan uni do Patrasren rukhiyạicʼ goḍet kanae.” Patras do silpiń ṭhopʼ ṭhopʼtegeye tahẽyena. Unre celako do silpińko jhicʼketʼ khan Patras ńelkedeteko ṭhak utạrena. Patras do thirokʼ lạgitʼ titeye isạrawatʼkoa ar hajot khon Probhu cetʼlekateye oḍok ạgukede onae baḍae ocoketʼkoa. Ar mucạtʼreye metatʼkoa, “Noa khobor do Jakob ar eṭakʼ boehako hõ lạiyakope.” Noa katha menkate uni doe oḍokente eṭakʼ jaegateye calaoena. Ado setakʼen khan Patrase okayena mente palṭonko talare gulmal hoyena. Herod do ạḍi mońjteye sendrakedea, menkhan bae ńamledete pahradarkoe kuliketʼkoa ar tayomte pahradarko gocʼko reaṅe hukumkeda. Ona tayom Herod do Jihudạ khon Kạisạriạteye calaoena ar onḍe thoṛa dine tahẽyena. Ona oktere Herod do Tur ar Sidon nagraharen hoṛko cetanre ạḍiye edreyena. Unre onḍenko hoṛ do riạu mitʼkate Herod sãote ńapamokʼ lạgitʼko calaoena. Ar Blastos ńutuman rajakʼ giticʼ oṛakʼren kạmiạyicʼko rạmjạukedete onko do raj sãote sulukokʼ reakʼko koekeda, ente Herod rajakʼ disạm khonge ako lạgitʼ jomakʼ do hijukʼ kan tahẽkana. Unre Herod do mitʼṭen dine goṭakeda. Ar ona dinre uni do raj kicricʼ horokʼkate siṅghạsonreye duṛupʼena ar onko hoṛe galmaraoatʼkoa. Onko do uniakʼ katha ańjomkate hohoateko menkeda, “Noa do debakʼ aṛaṅ kana, manwawakʼ do baṅa.” Herod do unre Isor bae sarhaoledete Probhuren mitʼṭen goḍet do uniye ńetʼkedea, arko tejokedete uni doe gocʼena. Menkhan Isorakʼ katha do pasnao idiyena ar aema hoṛ onateko pạtiạuena. Barnabas ar Sạul do sapʼdapʼ kạmikin purạuketʼ khan Johankin soṅge torakedete Jerusalemteko ruạṛ calaoena. Nui Johange Mark hõko metaekan tahẽkana. Antiokiạ manḍerre do thoṛa nạbi ar cecetʼkoko tahẽkana. Onkoakʼ ńutum do Barnabas, Nigerko metaekan Simeon, Kurene nagraharen Lukius, disạm cakʼlaoicʼ Herod sãoteye ạsul haralen Manaen ar Sạul. Onko do upạskate Probhuko sewawaekan tahẽkanre sonot Jiu do onkoe metatʼkoa, “Barnabas ar Sạul oka kạmi lạgitʼ iń hohoakatʼkin, ińakʼ ona kạmi lạgitʼ ńitokʼ unkin baṛe begarkinpe.” Unre onko do upạskateko koejoṅkeda arko capoketʼkinte unkinko bidạgotʼkakʼ kinạ. Ado sonot Jiu hotetekin kol ocoyen khan Barnabas ar Sạul do Seleukiạtekin rakapʼ calaoena. Ar onḍe khon jahajte unkin do Kupros diptekin senena. Salamisre seṭerkate unkin do Jihudikoakʼ sunạgogkore Isorakʼ kathakin porcarkeda. Unre goṛoyicʼ lekate Johan hõ unkin sãoteye tahẽkana. Ado goṭa dipkin dãṛã mucạtʼketʼ khan unkin do Paphos hạbicʼkin hecʼena ar onḍe do Bar-Jisu ńutuman mitʼṭen Jihudi jạdu udukʼicʼ eṛe nạbikin ńamkedea. Uni eṛe nạbi do Eluma, metakʼme jạdu alako metaekan tahẽkana. Uni jạdu udukʼicʼ do disạm cakʼlaoicʼ Sergius Pạulusren mitʼṭen gateye tahẽkana ar uni disạm cakʼlaoicʼ do mitʼṭen budan hoṛgeye tahẽkana. Uni do Isorakʼ katha ańjom lạgitʼ Barnabas ar Sạule hoho ạgu ocoketʼkina. Menkhan Eluma do Barnabas ar Sạul tạkicʼkine ehopʼkeda ar disạm cakʼlaoicʼ hõ Jisure pạtiạukʼ khon ruạṛe lạgitʼe kurumuṭukeda. Unre Sạul okoe do Pạulko metaekan uni do sonot Jiuteye perecʼente Eluma secʼ beṅgetʼ uricʼkateye metadea, “Am do Soetanren hopon ar joto bhageakʼren bạiri kanam. Amre do joto lekan phạsiara ar bedhorom menakʼa. Probhuakʼ sojhe horko konḍeae do cetʼ bam bạgiya? Ńelme, Probhuakʼ ti do am birudre rakapʼ akana. Am dom kãṛãkʼa ar thoṛa din hạbicʼ siń cando reakʼ marsal bam ńelńama.” Ar unrege dhund ar ńut paṛaoadete hoṛe ńamkoa mente onte note ṭạmḍạu baṛaye ehopʼena. Noako ńelte uni disạm cakʼlaoicʼ do Probhureye biswạsena, ente Probhu reaṅ oka cecetʼakʼe ńamletʼ onate uni doe hahaṛalena. Noa tayom Pạul ar uniren sãotenko do jahajte Paphos khon Pamphuliạ disạm reakʼ Perga nagrahateko calaoena. Unre Johan do onko bạgikate Jerusalemteye ruạṛ senena. Tayomte onko do Perga khon Pisidiạ disạm reakʼ Antiokiạ nagrahateko senena ar jirạukʼ mãhãre sunạgogre bolokateko duṛupʼena. Ado sonot sostor reakʼ ạn-ạri ar nạbikoakʼ puthi khon paṛhao sạten khan sunạgogren mukhiyạko do onkoko metatʼkoa, “E boehako, jãhãn sikhạuna katha menakʼtape khan ma roṛpe.” Unre Pạul doe teṅgoyena ar ti tulkateye menkeda, “E Israelko ar Isor botoraekan boṅgan hoṛ jạtrenko ańjompe baṛe. Israel jạtren Isor do aboren hapṛamkoe bachaoletʼkoa ar Misor disạmreko tahẽkanre uni doe usul ocoletʼkoa. Ar daṛeanakʼ tite ona disạm khone oḍok ạguketʼkoa ar pongel bochor hạbicʼ hahaṅkarre onkoakʼ bạṛicʼ colonkoe sahaoketʼtakoa. Ona tayom Kanan disạmren eae goṭen jạtkoe maraoketʼkote acʼren hoṛko ona disạm cetanre ạidạriye ematʼko tahẽkana. Noako sanamakʼ hoe purạukʼte pon sae mõṛẽgel bochor lagaolena. “Noa tayom Sạmuel nạbi hạbicʼ Isor do bicạricʼe ematʼko tahẽkana. Ona tayom disạmren hoṛko do rajko khojkedea. Unre uni do Benjamin khũṭren, Kisren hopon Sạulgeye ematʼkoa. Sạul do pongel bochor hạbicʼ raje calaoketʼa. Ona tayom Isor do Sạul ocokʼkate Dạude rajkedea. Uni do Dạud reaṅe menakada, ‘iń do Jisạiren hopon Dạudre ińakʼ mone lekan mitʼṭen hoṛiń ńamakadea. Uni do ińakʼ sanam monejoṅakʼe purạutińạ.’ Isor do acʼakʼ gokʼakʼ lekage noko hoṛkoakʼ bõs khon babańcaoicʼ Jisuge Israelko ṭhene sodorkedea. Jisu hijukʼ lahare sanam Israelko ṭhen Johan do noa menteye porcarleda je, hoṛko do kại khon mon ạcurkate bạptisma hatao lek takoa. Johan do acʼakʼ kạmiye mucạtʼ ạguyetʼ tahẽkanreye menleda, ‘iń doń okoe kana mentepe hudisetʼkana? Iń do uni Mạsi doń baṅkana. Uni do iń tayomteye daraekana, iń do uniakʼ panahi raṛaetae lek hõń baṅkana.’ “E boehako, Abrahamren hoponko ar Isor botoraekanko, kại khon bańcao reakʼ noa khobor do abon ṭhenge kolakana. Jerusalemren hoṛko ar onkoren mukhiyạko do Jisu bako oromledea. Noa chaḍa nạbikoakʼ okaṭakʼ katha jirạukʼ mãhãre jaoge paṛhao idikʼkan tahẽkan, ona katha hõ onko do bako bujhạu daṛeada; onate Jisuko dusikedete ona kathako purạukeda. Onko do Jisuakʼ gocʼ ocokʼ reaṅ jãhãn dos bako ńamletʼtaere hõ Pilạtko metadea jemon uniye goje. Sonot sostorre uni reaṅ cetʼko ol tahẽkan ona sanamakʼ purạuen khan onko do krus khon pheḍkedeteko topakadea. Menkhan Isor do gocʼko khon uniye jiwetʼ beretʼkedea. Gạlil khon okoeko uni sãote Jerusalemteko hecʼlen, onko do aema din hạbicʼ uniko ńelledea. Ar onkoge ńitokʼ do aboren hoṛko ṭhen uni reaṅ gohako emeda. “Ạliń do apeko ṭhen noa bhage sombat liń emape kana, aboren hapṛamko ṭhen Isor okaṭakʼe gokʼletʼ tahẽkan, ona do onkoren hoponko lạgitʼ, metakʼme abo lạgitʼ Jisu gocʼko khone jiwetʼ beretʼkedeteye purạu akada. Noa reaṅ do dosarakʼ sereńre olakana: Am dom ińren hopon kana, teheńge amren apatiń hoyena. Isor do gocʼko khon uniye jiwetʼ akadea ar uniakʼ hoṛmo do tishõ baṅ nosṭokʼtaea, ona kathakore Isore menakada, ‘Sonot ar sạriakʼ bhor reakʼ Dạud ṭhen okań kiriyạlen, ona do amiń emama.’ Ona reaṅ ar mitʼ jaegare olakana: Amren sonoticʼ do alom sea ocoaea. “Dạud do ona piṛhiren hoṛko modre Isorakʼ monejoṅakʼe purạuketʼ tayome gocʼena. Ar uniren hapṛamko sãoteko topakede khan uniakʼ hoṛmo do nosṭoyena. Menkhan Isor do okoe gocʼko khone jiwetʼ beretʼkede, uniakʼ hoṛmo do baṅ sealena. Onate E ińren boehako, ape do baḍae joṅpe, Jisu hotetege ape ṭhen kại reakʼ ikạ ńam reaṅ jạhirokʼ kana. Ape do Moseakʼ ạn-ạri hotete kại reakʼ sạjại khon bape rukhiyạu akana, menkhan jãhãege Jisureye pạtiạukʼ, uni do kại reakʼ sạjại khon bańcaoe ńama. Onate ape do sontorokʼpe, jemon nạbikoko roṛakatʼ noako apere alo paṛaokʼ: Ape okoe do Isor sãotepe khiloḍkan, ańjompe Ape do bhaṛokʼpe ar mohor meṭaokʼpe; ente ape bidạlrege iń do nonkanakʼ iń kạmiya one uniakʼ katha ohogepe pạtiạulen, jãhãeye lạiapere hõ baṅa.” Ado Pạul ar Barnabas sunạgog khonkin oḍok calakʼkan tahẽkan jokhecʼ hoṛkoko nehõratʼkinạ jemon hijukʼkan jirạukʼ mãhãre noako reaṅ arhõkin galmaraoako. Ar sunạgog khonko calao baṛayen khan ạḍi utạr Jihudiko ar Jihudi dhoromre pạtiạu akan Isor botoraekanko do Pạul ar Barnabas tạkinko pańjaketʼkinạ. Unre Pạul ar Barnabas do onkokin galmaraoatʼkoa, ar Isorakʼ dayare jemon khạtirko tahen ona lạgitʼ kin udgạuketʼkoa. Ado dosarakʼ jirạukʼ mãhãre nagraharen sanam hoṛko Isorakʼ katha ańjom lạgitʼ mitʼ sãoteko jarwayena. Ar nunạkʼ hoṛakʼ bhiṛ ńelte Jihudiko do hiskạteko perecʼena ar Pạul okae menetʼkan tahẽkan ona birudre aema lekan kathakote nisṛạueko ehopʼena. Unre Pạul ar Barnabas do dilkate kin roṛ ruạṛatʼkoa, “Pạhilre ape ṭhen Isorakʼ katha lạlại jạruṛ tahẽkan tạlińa, menkhan tinre ape do bape moneada ar jaejug jion ńam lạgitʼ apete lek bape bujhạulena unre ạliń do boṅgan hoṛ jạtrenko secʼliń ạcurokʼkana. Ente Probhu do noa kathae men akada, ‘boṅgan hoṛko ṭhen iń do mitʼṭen marsal lekań dohoakatʼmea, jemon am hotete goṭa dhạrtiren hoṛko kại khon bańcaoko ńam.’ ” Noa katha ańjomkate boṅgan hoṛ jạtrenko doko rạskạyena ar Probhuakʼ kathako sarhaokeda; ar jaejug jion ńam lạgitʼ Isor tinạkʼe niṭ dohoakatʼko tahẽkan onko doko pạtiạuena. Ar Probhuakʼ katha do onako ṭoṭha reakʼ sanam jaegakore pasnao idiyena. Menkhan Jihudiko do Isor bhoktiae bhodro maejiuko ar nagraharen manotan hoṛkoko udgạuketʼkoa. Nonkate onko do Pạul ar Barnabas upạrte khedko calaoketʼte ona ṭoṭha khonko oḍok gotʼkatʼ kinạ. Unre Pạul ar Barnabas do onko hoṛko upạrte ạkinakʼ jaṅga reakʼ dhuṛikin koṭa oṭokatʼte Ikonium nagrahatekin calaoena. Menkhan onḍenko cela do rạskạ ar sonot Jiuteko perecʼena. Ikonium nagrahare Pạul ar Barnabas do ạkinakʼ cạli leka Jihudikoakʼ sunạgogkote kin boloyena. Unkin do onḍe nonkan kathakin galmaraoatʼkoa je, Jihudiko ar Junạniko khon ạḍi utạr hoṛko pạtiạuena. Menkhan okoeko Jihudi bako pạtiạulen onko do boṅgan hoṛ jạtrenkoko uskạuketʼkote biswạsi boehako birudre onkoakʼ monko bạṛicʼketʼtakoa. Pạul ar Barnabas do ona nagrahare thoṛa dinkin tahẽyena ar dil salakʼ Probhuakʼ kathakin galmaraoatʼkoa. Ar Probhuakʼ daya reaṅ okakin porcaretʼ tahẽkan ona katha sạrikana mente sạbud lạgitʼ Probhu do Pạul ar Barnabas hotete cinhạko ar hahaṛawakʼkoe hoeocokeda. Onate nagraharen hoṛko doko begarena; adomko do Jihudiko secʼ ar adomko do apostol secʼko calaoena. Unre boṅgan hoṛ jạtrenko ar Jihudikoren mukhiyạko do jarwa mitʼkate Pạul ar Barnabas santaokin ar dhirite tińkin lạgitʼko solhawana. Menkhan Pạul ar Barnabas do onakin baḍaeketʼ khan Lukạuniạ Prodes reakʼ Lustrạ ar Derbe ar ona aḍe pase ṭoṭhatekin dạṛkeda. Onako ṭoṭhare unkin do Mạsi reaṅ bhage sombat porcarkin dhurạuena. Lustrạ nagrahare mitʼṭen leḍha hoṛe duṛupʼkokʼkan tahẽkana. Uni do jonom khonge leḍhae tahẽkana ar tis hõ bae taṛamakatʼ tahẽkana. Ar uni hõ Pạulakʼ galmaraoe ańjomkan tahẽkana. Unre Pạul do uni secʼ sojheteye beṅgetʼkeda ar boge ocokʼ lạgitʼ biswạs menakʼtaea menteye ńelkede khan ãṭ aṛaṅte hohoateye metadea, “Amakʼ jaṅgate sojhete teṅgonme.” Ar inạtege uni hoṛ doe don beretʼente taṛame dhurạuena. Pạul okae kạmiketʼ ona ńelte hoṛko do Lukạuniạ pạrsite hohoateko menkeda, “Debko manwa chinte abo ṭhenko pheḍ hecʼakana.” Onate Barnabas do Jupiter ar Pạul do kathae roroṛkan tahẽkante Merkuriko ńutumkedea. Jupiter debakʼ than do nagraha bahrere tahẽkana. Ar uni debren naeke do nagraha reakʼ duạr ṭhen daṅgra ar malae ạgukeda, ente naeke ar sanam hoṛko do Pạul ar Barnabas janwar dãṛẽ emakin lạgitʼko menetʼ tahẽkana. Barnabas ar Pạul do ona kathakin ańjomketʼ khan ạkinakʼ kicricʼkin oṛecʼketʼte hoṛko ṭhenkin ńir calaoena ar ãṭ aṛaṅtekin menkeda, “E ho gateko, ape do cedakʼ noakope onkayeda? Ạliń hõ coṅ ape leka duk suk jojom manwakangeliń. Ạliń do ape ṭhen bhage sombat liń porcareda jemon noa ạuṛiakʼko khon jiwetʼ Isor secʼpe, ạcurokʼ. Unige serma, dhạrti, jalapuri ar onakore menakʼ jotowakʼ doe sirjạu akada. Laha piṛhiren sanamkoge uni do akoakʼ sana lekageye sen ocowatʼko tahẽkana, menkhan enhõ uni do jao okte acʼ reaṅ gohae emakada. Ente uni do serma khon dakʼe emokʼkana ar okte nạpitre phosole dan abon kante dayae udukʼape kana. Uni do asambheṛ jomakʼe dan apekante apeakʼ mon do rạskạteye perecʼetʼtapea.” Noako katha kin galmaraoatʼkore hõ janwar dãṛẽ khon hoṛko thir ocoko lạgitʼ unkin do ạḍi haronokʼ hoyentạkina. Ado Antiokiạ ar Ikonium khon adom Jihudiko hecʼkate Pạul ar Barnabas birudre hoṛkoko bhiṅgṛạuketʼkoa. Unre Pạul do dhiriteko tińkedea ar gocʼenae hudiskate nagraha bahreteko or idikadea. Menkhan tayomte biswạsiko uni beṛhaeteko teṅgoyen khan uni doe beretʼente nagrahateye ruạṛ calaoena. Ar dosar hilokʼ acʼ ar Barnabas do Derbe nagrahatekin calaoena. Ado Derbere bhage sombat porcarkate Pạul ar Barnabas do ạḍi utạrkin celaketʼkoa. Ona tayom Lustra, Ikonium ar Pisidiạ Prodes reakʼ Antiokiạte ruạṛ senkate onḍenko celakoakʼ biswạskin kajakketʼte onkokin daṛe ocoketʼkoa ar pạtiạure ṭarhao tahen lạgitʼkin udgạuketʼkoa. Unkinkin menkeda, “Isorakʼ rajte bolokʼ lạgitʼ ạḍi utạr duk jojom hoyokʼ tabona.” Unkin do mitʼke mitʼ manḍerre maraṅ mukhiyạ kin bahalketʼkoa ar okoe Probhu cetanreko biswạs akan tahẽkan, koejoṅ ar upạste uni Probhuakʼ tirege manḍerren hoṛkokin jimạkatʼkoa. Tayomte Pạul ar Barnabas do Pisidiạ Prodes talatekin parom calaoente Pamphuliạ Prodeshte kin seṭerena. Unkin do Perga nagrahare Isorakʼ katha porcarkate Attaliạ bondortekin calaoena. Ar Attaliạ khon jahajte Siriạ disạm reakʼ Antiokiạ tekin ruạṛ hecʼena. Ar oka kạmi ńitkin mucạtʼketʼ ona kạmi lạgitʼge noa Antiokiạ khonge Isorakʼ dayarekin jimạ ocolena. Ado Antiokiạtekin seṭeren khan unkin do manḍerren sanamko mitʼ ṭhenkin jarwaketʼkoa ar Isor ạkin hotete okakoe kạmiketʼ ona sanamakʼ kin lạiatʼkoa. Ar cetʼlekate Isor do boṅgan hoṛ jạtrenko Mạsire biswạs reakʼ duạre jhicʼ akawatʼko ona reakʼ hõkin lạiatʼkoa. Ona tayom Pạul ar Barnabas do celako sãote onḍe ḍher dinkin tahẽyena. Jihudạ disạm khon adom hoṛ do Siriạ disạm reakʼ Antiokiạteko hecʼena ar biswạsi boehako noa menkate cetʼakoko ehopʼena, “Moseakʼ ạn-ạri lekate bape khatna ocolen khan kại khon bańcao do ohogepe ńamlea.” Onate Pạul ar Barnabas sãote onko hoṛko doko apṭha ạpṭhiyena. Onko doko goṭakeda je, Pạul ar Barnabas do Antiokiạren thoṛa biswạsiko soṅgekate Jerusalemkin calakʼa ar apostolko ar manḍerren mukhiyạko tulucʼ noa reaṅko galmaraoa. Antiokiạ manḍerrenko do onkoakʼ calakʼ reakʼko bebostakeda. Ado Phoenikiạ ar Samariạ Prodes talate calakʼ jokhecʼ Pạul ar Barnabas do hoṛkokin baḍae ocoketʼkoa, boṅgan hoṛ jạtrenko do Isor secʼ cetʼlekako ạcurokʼ kana mente. Ar noa khobor ańjomkate sanam biswạsikoge ạḍiko kusiyena. Pạul ar Barnabas Jerusalemtekin hecʼen khan manḍerren hoṛko, mukhiyạko ar apostolko do ạḍi rạskạ salakʼko ataṅ daramketʼkinạ. Ar unkin hotete Isor okakoe cekaletʼ tahẽkan ona sanamakʼkin lạiatʼkoa. Unre Phạrusikoren thoṛa hoṛ hõ biswạsiko tahẽkana. Onko do teṅgoyenteko menkeda, “Boṅgan hoṛ jạtrenko do khatnakʼ jạruṛgetakoa ar Moseakʼ ạn-ạri jemonko pańjae ona lạgitʼ hukum emako jạruṛa.” Unre apostolko ar manḍerren mukhiyạko do noa reaṅ hudis lạgitʼ mitʼ ṭhenko jarwayena. Ado aemako galmaraoketʼ khan Patras do teṅgoyenteye metatʼkoa, “E boehako, ape mape baḍaege, ḍher din lahare apeko tala khon Isor do ińe bachao akadińạ jemon boṅgan hoṛ jạtrenko hõ ińakʼ moca khon bhage sombat reakʼ katha ańjomkateko pạtiạukʼ. Isor do sanam hoṛkoakʼ mone baḍaea. Uni do cetʼleka sonot Jiue danatʼbon tahekan, onkage boṅgan hoṛ jạtrenko hõe danatʼkote gohae emakada je, onko hõ kại khon bańcaoko ńamakada. Uni do abo ar onko talare jãhãn begar do bae dohoakada, ente onkoko pạtiạu akante uni do onkoakʼ ontore sapha akatʼtakoa. Enḍekhan aboren hapṛamko se abo okaṭakʼ bojha babon gokʼ daṛe akatʼ ona bojha pạtiạu akan boṅgan hoṛ jạtrenkoakʼ tarenre gokʼakote cedakʼ ape do Isor biḍạue lạgitʼpe kurumuṭu kana? Alele pạtiạukʼ kana je, Probhu Jisuakʼ dayate pạtiạu akan boṅgan hoṛ jạtrenko do cetʼleka kại khon bańcaoko ńamakatʼ, onkage abon hõ bańcao bon ńamakada.” Unre bạisiren sanamko doko thir hapeyena ar Pạul ar Barnabas hotete boṅgan hoṛ jạtrenko talare Isor do okako hahaṛa kạmiye kạmi akatʼ ona unkinakʼ moca khon ańjomko ehopʼena. Adokin roṛ mucạtʼketʼ khan Jakobe menkeda, “E boehako, ańjompe. Isor do acʼren hoṛko hoyokʼ lạgitʼ boṅgan hoṛ jạtrenko modkhon thoṛa hoṛ bachaokateye udukʼakada je, boṅgan hoṛ jạtrenko lạgitʼ hõ uni doe dạndikʼ kana. Ar noa kathage Simon Patras do aboe lại akatʼ bona. Ar noa katha tulucʼ do nạbikoakʼ katha hõ jurikʼkana, ente sostorre olakana: ‘Noa tayom hecʼkate iń do Dạudakʼ lạnduṛ akan oṛakʼ arhõń benaoa ruạṛa. Oka dhaṅ dhaser akan ona do arhõń gathao ruạṛa, ona do arhoń teṅgo ruạṛa; Jemon eṭakʼ sanam hoṛko, metakʼme boṅgan hoṛ jạtrenko okoe do ińren menteko hoho ocokʼkan onko jemonko sendrayiń. Probhu, okoe do noakoe kạmikan, unige noako kathae menakada.’ Ar ḍher din laha khon noa do uniakʼ monre tahẽkana.” Jakob do arhõe menkeda, “Noa iạtege ińakʼ bujre boṅgan hoṛ jạtren okoeko Isor secʼko ạcurokʼkan onko duk emako lek do baṅkan tabona. Bickom onko ṭhen noa katha bon olma, jemon boṅga tulucʼ jopoṛao sanamakʼ ar joto lekan loṭghuṭi khon sahaṛ akanko tahen, ar limbạtʼ gocʼ janwarakʼ jel ar mãyãm jemon aloko jom. Noa hukum emakoge bhagea, ente Mose okae menakatʼ ona do mimitʼ nagrahakore ạḍi laha khonge porcarokʼ kana ar uni okae ol oṭoakatʼ ona do mimitʼ jirạukʼ mãhãre sunạgogkore paṛhao idikʼkana.” Unre apostolko, manḍerren murubiko ar manḍerren eṭakʼ sanam hoṛkoko goṭakeda je, onko do akoren adom hoṛko bachaokate Pạul ar Barnabas sãote Antiokiạteko kolkoa. Onko do Jihudạ ar Silạs tạkinko bachaoketʼkinạ. Nui Jihudạge Barsabako metaekan tahẽkana. Ente biswạsi boehako modre nukin bana hoṛge mukhiyạkin tahẽkana. Ado onko hotete noa ciṭhiko kolkeda: Antiokiạ, Siriạ ar Kilikiạren biswạs akan boṅgan hoṛ jạtren boehako ṭhen ale apostolko ar manḍerren murubiko, metakʼme aperen boehako do noa ciṭhile olape kana. Apeakʼ suluk hoyokʼma. “Alele ańjomkeda je, aleko mod khon adom hoṛ do senkate ạḍi lekan kathate apeakʼ monko ạulạuetʼte kosṭoko emapekana, menkhan ale do nonkan kạmi bale menakatʼkoa. Onate ale sanamkoge mitʼkate thoṛa hoṛ bachaokate aleren dulạṛiạ gate Barnabas ar Pạul sãote ape ṭhenle kolketʼkoa. Barnabas ar Pạul do aboren Probhu Jisu Mạsi iạte gujukʼrekin paṛaolena. Ale do Jihudạ ar Silạs tạkinle kolketʼkinạ jemon okale olakatʼ ona do mocate hõ kin lạiape. Sonot Jiu ar ale do noage mońjle metakʼ kana, noa jạruṛokʼakʼko reaṅ chaḍa ar okaṭakʼte hõ jemon ape cetanre bạ̃ṛti bojha aloko ladeape. Ona jạruṛokʼakʼko reaṅ do hoyokʼ kana: Boṅga ṭhen samaṅakʼ jãhãnakʼge alope joma, mãyãm hõ alope ńũiya, ar limbạtʼ gocʼkoakʼ jel hõ alope joma, ar sanam lekan loṭghuṭi khon sahaṛ akae tahenpe. Ar noako khon sạṅgińrepe tahen khan bhage hoyokʼtapea. Ma napaete tahen tabonpe.’’ Ado Pạul, Barnabas ar unkin hoṛko kolketʼkin khan onko do Antiokiạteko calaoena. Onḍe onko do manḍerren hoṛko mitʼ ṭhenko jarwaketʼkote ona ciṭhiko ematʼkoa. Hoṛko do ona ciṭhiko paṛhaokeda ar onare oka jiwi raṛecʼ reakʼ katha tahẽkan onate ạḍiko kusiyena. Jihudạ ar Silạs apnarhõ nạbi kin tahẽkana; onate unkin do aemakin galmaraoatʼkote onḍenko boehakin udgạuketʼkoa ar onkoakʼ pạtiạukin keṭecʼ ocoketʼtakoa. Unkin do Antiokiạre thoṛa din kin tahẽyena. Ar Jerusalemren okoe do Jihudạ ar Silạs Antiokiạteko kolletʼkin, Antiokiạren boehako do sulukteko bidạkatʼkinte Jihudạ ar Silạs do arhõ onko ṭhenko kol ruạṛkatʼkinạ, Menkhan Pạul ar Barnabas do Antiokiạrege kin tahẽyena. Onḍe unkin do arhõ aemako ṭhen Probhuakʼ katha cetʼako ar porcarkin dhurạuena. Thoṛa din tayom Pạul do Barnabase metadea, “Dela, okako jaegare Probhuakʼ katha laṅ porcarakatʼ, onako jaegate arhõ ruạṛ senkate boehako laṅ hirikoa ar cetʼleka menakʼkoa mente ona hõ laṅ ńeltorakoa.” Unre Barnabas do Johan soṅgetora joṅe menana. Nui Johan do Mark hõko metaekan tahẽkana. Menkhan Pạul do uni soṅgete iditoraye bhage do bae metatʼa, ente Mark do Pamphuliạreye bạgi oṭoatʼkin tahẽkana ar unkin sãote ar bae kạmileda. Unre Pạul ar Barnabas do mot baṅ mitʼlente unkin dokin begarena. Onate Barnabas do Marke soṅgekedete jahajte Kupros dipteye calaoena, ar Pạul do Silạse bachaoana. Unre Antiokiạren boehako do Pạul ar Silạs tạkin Probhuakʼ tireko jimạketʼkin khan unkin dokin mohḍhayena. Pạul do Siriạ ar Kilikiạ talateye parom calao idiyente sanam manḍerkore pạtiạukoe keṭecʼketʼtakoa are daṛe ocoketʼkoa. Tayomte Pạul do Derbe ar Lustrạ nagrahateye calaoena. Onḍe Timothi ńutuman mitʼṭen celae tahẽkana. Uniren eṅgattetʼ hõ Mạsire pạtiạu akan mitʼṭen Jihudi maejiue tahẽkana, menkhan apattetʼ do mitʼṭen Junạni hoṛge. Lustrạ ar Ikonium nagraharen pạtiạu akan boehako do Timothi ạḍiko sarhaoedekan tahẽkana. Ar Pạul do soṅgete Timothi iditoraye menjoṅante uniye khatna ocokedea, ente onako ṭoṭhare okoe Jihudikoko tahenkan tahẽkan onko doko baḍaekan tahẽkana Timothiren apattetʼ do mitʼṭen Junạni hoṛ kanae. Ar unkin do onako nagraha talatekin parom calaoena ar Jerusalemren apostolko ar manḍerren mukhiyạko okako ạnko goṭa akatʼ tahẽkan ona do hoṛkokin baḍae ocoketʼkoa ar pańjae lạgitʼkin metatʼkoa. Nonkate manḍerren hoṛko do biswạsreko keṭecʼ idiyena ar dinke dinko saṅge idiyena. Pạul ar uni sãotenko do sonot Jiu hoteteko mana ocoyente Asiạre do bako porcarleda. Unre onko do Phrugiạ ar Galatiạ Prodes reakʼ sanam jaegateko calaoena. Ado Musiạ aṛeteko hecʼen khan onko do Bethaniạ disạmte calakʼko kurumuṭukeda, menkhan Jisuren Jiu do bae sen ocowatʼkoa. Onate onko do Musiạ talate Troas nagrahateko calaoena. Ar Pạul do ńindạ mitʼṭecʼ dorsone ńelkeda, Makedoniạ disạmren mitʼṭen hoṛ do teṅgokate nehõr salakʼe meneda, “Makedoniạte parom hijukʼte dela goṛowaleme.” Ado Pạul noa dorsone ńelketʼ khan ale do Makedoniạte calakʼ lạgitʼ unregele sapṛaoena, entele bujhạu daṛeada Makedoniạren hoṛko ṭhen Mạsi reaṅ bhage sombat porcar lạgitʼ Isor doe hohoale kana. Tayomte ale do Troas bạgikate jahajte sojhe Samothrake diptele calaoena ar dosar hilokʼ do Neapolis nagrahatele hecʼena. Ar onḍe khon ale do Philipi nagrahatele calaoena. Noa Philipige Makedoniạ ṭoṭha reakʼ maraṅ nagraha tahẽkana. Ar onḍenko hoṛ do Rom rajren porjako tahẽkana. Ale do thoṛa din ona nagraharele tahẽyena. Ado jirạukʼ mãhãre ale do nagraha reakʼ phaṭok bahre gaḍa aṛe ṭhenle calaoena; entele hudisetʼ tahẽkana onḍe do Jihudikoakʼ sunạgog menakʼtakoa mente. Ar onḍe okoeko maejiuko jarwa akan tahẽkan onko ṭhen duṛupʼkate galmaraole ehopʼena. Ar okoekoko ańjometʼkan tahẽkan onko modre Thuạtirạ nagraharen Ludiạ ńutuman mitʼṭen maejiue tahẽkana. Uni do beguni roṅ reakʼ kicricʼe kiriń ạkrińetʼ tahẽkana. Ar Jihudi bae tahẽkanre hõ uni do Isore sewawaekan tahẽkana. Probhu do Ludiạwakʼ ontor nonkae jhicʼketʼtaea jemon uni do Pạulakʼ katha monteye ańjom are pạtiạukʼ. Ar noate uni ar acʼ gharońjren sanamkogeko bạptisena. Inạ tayom uni do noa menkateye neotaketʼlea, “Probhure biswạs akanpe hudisedeń khan dela ińakʼ oṛakʼre hijukʼte tahenpe.” Ar noa katha menkate acʼakʼ oṛakʼteye idiketʼlea. Mitʼ din ona koejoṅ jaegatele calakʼkan tahẽkanre mitʼṭen kạ̃ṛmĩ sãotele ńapamena. Uni do mitʼṭen bạṛicʼ jiue ńamakawan tahẽkante darakan dinko reakʼ sanamakʼe lại daṛeakʼkan tahẽkana. Onate acʼren kisạ̃ṛakʼ do ạḍi lab hoyokʼkantae tahẽkana. Uni kạ̃ṛmĩ do Pạul ar ale tayom tayomte hijukʼte hohoateye menetʼ tahẽkana, “Nukin hoṛ do maraṅ Isorren guti kanakin. Ar cetʼlekate kại khon bańcao ńamokʼa onagekin lạiape kana.” Uni do ḍher din hạbicʼe nonka idikeda. Mucạtʼre Pạul doe ạṛisen khan beṅgetʼ ạcurkate uni bạṛicʼ jiue metadea, “Jisu Mạsi ńutumteń hukumam kana, nui khon oḍok calakʼme.” Ar unrege uni bạṛicʼ jiu do uni khone oḍok calaoena. Ado rojgar cabayena menteko ńelketʼ khan uni kuṛiren kisạ̃ṛko do Pạul ar Silạs sapʼkate nagraharen mukhiyạ ṭhenko or idiketʼkinạ. Ona tayom disạm cakʼlaoicʼ ṭhen idiketʼkinteko menkeda, “Nukin hoṛ do aboakʼ nagrahare gulmalkin ehopʼakada. Nukin dokin Jihudi kana. Nukin do nonkan ạri-cạli reaṅ kin cetʼako kana okaṭakʼ do Romiko hoekate abo lạgitʼ ataṅ se batao do ạn birud kạmi kana.” Ado eṭakʼ hoṛko hõ onko sãote mitʼkate Pạul ar Silạs birudreko teṅgoyena. Unre disạm cakʼlaoicʼ doe hukumkeda unkinakʼ kicricʼ jemonko oṛejtạkin arko dalkin. Onko do kajak dalko dalketʼkinte hajotreko bhoraokatʼkinạ, ar kajakte pahrae lạgitʼ hajotren darogako hukumadea. Ar daroga do noa hukume ńamketʼ khan hajot reakʼ bhitri kandhareye idiketʼkinạ ar hạṛi paṭate jaṅgae aṭkaokatʼ tạkina. Un jokhecʼ do tala ńindạ okte tahẽkana. Pạul ar Silạs do Isorkin sarhaoedekan tahẽkana arkin koejoṅkan tahẽkana. Ar eṭakʼ kạidiko hõ onako ańjomkan tahẽkana. Unre ackage ạḍi botor dhạrti laṛaoena onate hajot oṛakʼ reakʼ rehetʼko sudhạ dal dalaoena. Ar hajot oṛakʼ reakʼ sanam silpińko jhicʼtʼena ar kạidikoakʼ sikṛiko hõ raṛayena. Unre hajot oṛakʼren daroga doe ebhenena ar hajot oṛakʼ reakʼ silpińko jhicʼgeye ńelketʼ khan tarwaṛe bocʼkate acʼte gujukʼe menana. Uni doe hudiskeda sanam kạidikoko dạṛ cabakeda. Unre Pạul do ãṭ aṛaṅte hohoateye metadea, “Thirokʼme, jiwi do alom loksantama; ale sanamkoge nonḍe menakʼlea.” Unre daroga do mitʼ hoṛ diuhe ạguye metadea ar acʼ do bhitriteye ńir boloyena ar botorte thar tharaokʼkan tulucʼ Pạul ar Silạs tạkinakʼ jaṅgareye giḍiyena. Ona tayom uni do Pạul ar Silạs tạkin bahreteye oḍok ạguketʼkinteye kuliketʼkina, “Ma lạiyạń ben, kại khon bańcao ńam lạgitʼ do cetʼ cekae hoyokʼ tińạ?” Adokin metadea, “Am ar amakʼ gharońjrenko Probhu Jisure pạtiạukʼpe, enḍekhan kại khon bańcaope ńama.” Unre Pạul ar Silạs do daroga ar uniakʼ oṛakʼren sanamko Probhuakʼ kathakin galmaraoatʼkoa. Ar inạ ńindạge daroga do Pạul ar Silạse idiketʼkinte unkinakʼ hoṛmo reakʼ ghạlkoe ạrupʼketʼ tạkina, ar acʼ gharońjren sanamkoko bạptisena. Ona tayom uni do acʼakʼ oṛakʼte Pạul ar Silạse idiketʼkinte unkine jom-ńũ ocoketʼkinạ. Ar acʼ gharońjrenko do Isorreko biswạsente ạḍitetʼko rạskạyena. Dosar hilokʼ setakʼ jokhecʼ hạkimko do akoren kạmiyạko hoteteko roṛgotʼkada “Unkin hoṛ do aṛakʼ kạkinpe.” Unre daroga do Pạule metadea, “Disạm cakʼlaoicʼ do Silạs ar am aṛakʼ ben lạgitʼe roṛgotʼ akada. Onate ma ńitokʼ do oḍokokʼ ben ar sulukte calao joṅben.” Unre Pạul do onko kạmiạkoe metatʼkoa, “Ạliń do Romi hoṛ kanaliń, ar begor bicạr dusite hoṛko samaṅreko dalketʼlińạ ar hajotreko bhoraokatʼlińạ. Ar ńitokʼ disạm cakʼlaoicʼ do hape hapete aṛakʼgotʼ kạlińe menjoṅ kana? Ona do baṅ hoyokʼa; onkoge apnarte hecʼkateko oḍok idi lińma.” Unre onko kạmiyạko do noa katha hạkimkoko baḍae ocoketʼkoa. Ar onko hạkimko do Romi hoṛ kanakin menteko baḍaeketʼ khan botor hecʼatʼkoa. Onko do Pạul ar Silạs ṭhen senkate ikạko koekeda ar hajot oṛakʼ khonko oḍok ketʼkinte nagraha bạgiyakʼ lạgitʼko nehõratʼkinạ. Pạul ar Silạs do hajot oṛakʼ khonkin oḍoken khan Ludiạwakʼ oṛakʼtekin senena. Onḍe unkin do biswạsi boehako sãotekin ńapamena. Ar boehakokin udgạuketʼkote onḍe khonkin calaoena. Pạul ar Silạs do Amphipolis ar Appoloniạ nagraha talate Thessalonikiạ nagrahatekin calaoena. Onḍe do Jihudikoakʼ mitʼṭen sunạgog tahẽkana. Pạul do acʼakʼ cạli leka ona sunạgogteye boloyena ar pe jirạukʼ mãhãre sonot sostor khon hoṛkoe galmaraoatʼkoa. Uni doe bujhạuatʼkoa are sạbudkeda je, Mạsi do duk jojom ar gocʼko khon jiwetʼ beredokʼ reakʼ jạruṛ tahẽkantaea. Uni doe metatʼkoa, “Ape ṭhen okoe Jisu reakʼ kathań lạiyetʼkan uni kangeae Mạsi do.” Noa katha ańjomkate adom Jihudiko doko pạtiạuente Pạul ar Silạs tạkin sãoteko mitʼena. Ona chaḍa Isor botorae aema Junạniko ar bhodro maejiuko hõ unkin sãoteko mitʼena. Menkhan Jihudiko do hiskạte bajar khon adom bạṛicʼ hoṛko ńam jarwaketʼkote nagrahare gulmalko ehopʼkeda. Ona tayom Pạul ar Silạs ńamkate hoṛko ṭhen ạgukin lạgitʼ onko do Jasonakʼ oṛakʼre jhapko emkeda, menkhan unkin do onḍe bako ńamletʼkina. Unre onko do Jason ar adom biswạsi boehako or oḍok idikate nagraha cakʼlaoko ṭhenko idiketʼkoa ar hohoateko menkeda, “Okoe hoṛ goṭa dhạrtiko gulmaletʼ onko do ńitokʼ nonḍe hõko hecʼakana; ar Jason do acʼakʼ oṛakʼre jaegae emakatʼkoa. Ar onko do sanamkoge Kạisạrakʼ hukum birudko kạmikana, arko meneda, uni chaḍa Jisu ńutumanicʼ ar mitʼṭen raj menaea.” Noako menketʼte onko Jihudiko do nagraha cakʼlaoko ar hoṛkoko toras ocoketʼkoa. Menkhan Jason ar eṭakʼko do jạmin reakʼ ṭakako emketʼ khan doko aṛakʼkatʼkoa. Ńindạyen khan biswạsi boehako do Pạul ar Silạs tạkin Beroeateko kolkatʼkinạ. Unkin do onḍe seṭerkate Jihudikoakʼ sunạgogtekin boloyena. Thessalonikiạren Jihudi khon Beroea nagraharen Jihudikoakʼ mon do bạ̃ṛti soṛage tahẽkantakoa. Onko do khaṛa monte Isorakʼ katha ańjomkateko ataṅkeda. Ar Pạul okae menakatʼ ona do sạri kana se baṅ ona ńel lạgitʼ dinạm hilokʼ sostorko ḍunḍhạuetʼkan tahẽkana. Unre ạḍi utạr Jihudiko do Jisureko pạtiạuena; ona chaḍa aema bhodro Junạni maejiuko ar herel hoponko hõko pạtiạuena. Thessalonikiạren Jihudiko do Pạul Beroeare Isorakʼ kathae porcareda menteko ańjomketʼ khan onko do onḍeko calaoena ar onḍenko hoṛko ạulạuketʼkote gulmalko hoe ocokeda. Unre biswạsi boehako do jalapuri aṛe secʼ Pạulko kolgotʼkadea, menkhan Silạs ar Timothi do Beroea regekin tahẽyena. Ar okoeko hoṛ do soṅgete Pạulko idiyede tahẽkan onko do Athens hạbicʼko ạgu seṭerkadea. Ona tayom onko do Silạs ar Timothi lạgitʼ noa hukumante Beroeateko ruạṛ calaoena je, Silạs ar Timothi do senkate usạra jemon Pạul sãotekin midokʼ. Pạul do Athens nagrahare Silạs ar Timothiye tạṅgiyetʼkin tahẽkanre ona nagraha do boṅga murtikote perecʼ akane ńelkeda. Onate uniakʼ mon do ạḍi jal jalaoentaea. Uni do sunạgogre Jihudiko ar Isor botoraekan Junạniko tulucʼ galmaraoe ehopʼena. Ona chaḍa bajarte okoekoko hijukʼkan tahẽkan, onko tulucʼ hõ din ke dine galmaraokan tahẽkana. Unre Epikuri ar Stoik ponḍitko modren adomko do Pạul tulucʼ reṭepeṭekʼko ehopʼena. Onko modren adomkoko menkeda, “Nui galbạjạriạ do cetʼe menetʼkana?” Arhõ eṭakʼko doko menkeda, “Uni do pasecʼ ạnạṛi boṅgako reakʼ kathae porcareda.” Onko do noa iạtegeko menkeda, ente Pạul do Jisu reaṅ ar gocʼko khon jewetʼ beredokʼ reaṅe porcarako kan tahẽkana. Unre onko guruko do Areopagos reakʼ bạisi samaṅre Pạulko idikedea. Arko kulikedea, “Okaṭakʼ nawa sikhnạtem emokʼkan ona do cetʼ le baḍae daṛekea? Ente adomakʼko nonkam galmaraoale kana one oka do ạnạṛigele ańjometʼ. Onate baḍae sanayetʼlea onako reakʼ mane do cetʼkana mente.” Onko do noa iạtegeko menkeda, ente Athensren sanam hoṛko ar ona nagrahare okoe upriạko tahẽkan onko do nawa nawanakʼ babotre katha roṛ ar ańjomte okteko khemaoetʼ tahẽkana. Unre Pạul do Areopagos reakʼ bạisire teṅgoyenteye menkeda, “E Athens nagraharen hoṛko ańjompe. Iń doń ńeletʼ kana, ape do joto secʼ khonge deb manaoko kanape, ente ińiń dãṛã baṛaekan tahẽkanre apeakʼ sewa jiniskoń ạribạndhiyetʼ tahẽkana ar nonkan mitʼṭen pinḍ hõń ńamkeda one ona cetanre ol akan, ‘Baṅ baḍae akadeicʼ deb lạgitʼ.’ Ar ape do bin baḍaete okoepe sewawaekan uni reaṅge iń doń porcarape kana. “Isor, one uni dhạrti ar onare menakʼ jotowakʼe benao akatʼ, unige serma ar dhạrtiren Probhu kanae. Uni do tite benaoakʼ okaṭakʼ mundilre hõ bae tahenkana. Uni do jãhãn reṅgecʼ bạnukʼtaea, onate manwakoakʼ tite pujạ hatao hõ baṅ jạruṛaea, ente unige sanam manwako jiwi, sahetʼ ar eṭakʼ jotowakʼkoe danako kana. Uni do mitʼṭen manwa khon sanam jạtren hoṛkoe sirjạu akatʼkoa jemon goṭa dhạrtireko girobasokʼ. Onko do tinre okakoreko girobasokʼa ona hõ acʼakʼ sana lekae goṭa dohoakada. Isor do noae kạmikeda jemon manwako ṭamḍạuate uniko ńam baṛaye. Menkhan sạrige abo khon sạṅgińre do bạnuia, ente uniakʼ daṛetege jion bon khemaoeda arbon dãṛãn kana ar jiwetʼ hõ menakʼ bona. Aperen adom sereń joṛaokoko menakada, ‘abon hõ uniren hoponko kana bon.’ “Enḍekhan uniren hoponkan khan bon Isor do manwa reakʼ kạrigol ar hudis bundiskote benao akatʼ sona, rupạ se dhiriren murti leka hudise do lek baṅkan tabona. Ente sedaeren hoṛ do bako baḍaekan tahẽkante Isor do noako secʼ bae beṅgetʼletʼa. Menkhan ńitokʼ uni do sanam jaegare joto hoṛge kại khon mon ạcur lạgitʼe hukumako kana, ente uni do nonkan mitʼṭen dine nenḍa akada one ona dinre acʼe bahal akade mitʼṭen hoṛ hotete manwako dhoromteye bicạrko. Uni do gocʼko khone jiwetʼ beretʼ akadete sanam manwako ṭhen noae sạbud akada.” Ado gocʼko arhõko jiwetʼ beredokʼa menteko ańjomketʼ khan onko modren adomko doko cigạriadea, menkhan eṭakʼko doko menkeda, “Ale do noa reaṅ arhõle ańjoma.” Unre Pạul do ona bạisi khone oḍok calaoena. Ar unre adomko hoṛ doko Pạul secʼena arko pạtiạuena. Onko biswạsiko modre Areaopagosren Dionusios ar Damaris ńutuman mitʼṭen maejiu hõe tahẽkana, ar unkin sãote arhõko tahẽkana. Niạ tayom Pạul do Athens khone oḍok senente Korinth nagrahateye calaoena. Onḍe do Akuilạ ńutuman mitʼṭen Jihudi sãoteye ńapamena. Nui Akuilạ do Pontus disạmreye janamlena. Maharaj Klạudius do sanam Jihudiko Rom khon oḍok calakʼ lạgitʼe hukumatʼko tahẽkana. Onate thoṛa din lahare Akuilạ do acʼren bạhu Priskillạ soṅgekate Itạliạ khon Korinth nagrahateye hecʼakan tahẽkana. Ar Pạul do unkin ṭhene calaoena. Uni do unkin leka tạmbu benao kạmiye baḍaekan tahẽkante unkin sãote tahẽkate kạmiye dhurạuena. Ar jao jirạukʼ mãhãre Pạul do sunạgogre bolokate Jisu reaṅe galmarao akokan tahẽkana ar Junạni ar Jihudiko Jisuakʼ horte ạguko lạgitʼe kurumuṭuyetʼ tahẽkana. Silạs ar Timothi Makedoniạ khonkin hecʼen khan Pạul do eken Isorakʼ katha porcarte acʼakʼ okteko khemaoe ehopʼena. Uni do Jihudiko ṭhen Jisuge Mạsi kanae mente gohae emetʼ tahẽkana. Menkhan Jihudiko do tinre Pạul birudre katha roṛ ar uni opomaneko ehopʼena unre Pạul do onko birudre acʼakʼ kicricʼkoe koṭakeda are metatʼkoa, “Apeakʼ mãyãm do apeakʼ bohokʼrege paṛaokʼma. Noa babotre ińakʼ jãhãn dos do bạnukʼtińạ. Ńit khon iń do boṅgan hoṛ jạtrenko ṭheniń calakʼa.” Inạ tayom Pạul do sunạgogre bạgikate Titus Jusṭu ńutuman mitʼṭen hoṛakʼ oṛakʼteye boloyena. Uni hoṛakʼ oṛakʼ do sunạgog sorrege tahẽkana ar boṅgan hoṛ jạtrene tahẽkanre hõ uni do Isore sewawaekan tahẽkana. Sunạgogren mukhiyạ Krispus ar acʼ gharońjren sanamkoge Probhureko pạtiạuena. Ona chaḍa Korinthiko modren ḍherkoge Pạulakʼ katha ańjomkateko pạtiạuena ar bạptismako ataṅkeda. Mitʼ din ńindạ jokhecʼ Probhu do mitʼṭen dorson hotete Pạul noa kathae metadea, “Alom botorokʼa, katha roroṛtege tahenme, alom thir hapekokʼa; ente iń do am sãote minạńa. Amre jhãp emkate okoe hõ ohoko hạnlema, ente noa nagrahare ạḍi utạr hoṛ menakʼkotińa.” Onate Pạul do mitʼ bochor turui cando ona nagrahare tahẽkate hoṛko Isorakʼ kathae cetʼatʼkoa. Ado Gallio tinre Akhaearen disạm cakʼlaoicʼ tahẽkana unre Jihudiko do jomkao mitʼkate Pạulko sapʼkedea ar bicạre lạgitʼ adalotteko ạgukedea. Onkoko menkeda, “Nui hoṛ do Isor sewawae lạgitʼ nonkae ạnḍicʼetʼkoa one oka do ạn-ạri birudkan.” Ado Pạul kathae roṛ lạgidokʼkan tahẽkanre Gallio do Jihudikoe metatʼkoa, “E Jihudiko, jãhãn behokakʼ se jãhãn dusiakʼ tahentape khan jạruṛgeń ańjomketapea. Menkhan jãhãnakʼ katha reakʼ, jãhãeakʼ ńutum reakʼ ar apeakʼ ạn-ạriko babot reakʼ kan khan, enḍekhan apetege phanḍaope baṛe. Onako babot reakʼ do bạń bicạrkatapea.” Noa katha menkate uni do adalot khon oḍokko lạgitʼe hukumkeda. Unre Jihudiko do sunạgogren mukhiyạ Sosthenesko sapʼkedete adalot samaṅregeko dalkedea; menkhan Gallio do cetʼge bae mẽtʼ luturada. Pạul do ḍher din Korinthreye khemaoketʼ khan biswạsi boehako ṭhen khon bidạye hataokeda ar Akuilạ ar Priskillạ sãote jahajte Siriạ disạme hecʼena. Pạul do mitʼṭecʼe goṭa dohoakatʼ tahẽkante mohnḍakʼ lahare Kenkhreare uni doe hoyo munḍrạyena. Ar Ephesus nagrahae seṭeren khan Priskillạ ar Akuilạ doe bạgiatʼkinạ. Ar sunạgogre bolokate Jihudiko sãote apnarge Jisu reaṅ galmaraoakoe ehopʼena. Unre Jihudiko ako sãote thoṛa din tahen lạgitʼko nehõradea, menkhan uni do tahen bae rebenlena. Menkhan onḍe khon calakʼ jokhecʼ uni doe metatʼkoa, “Isorakʼ sana hoelen khan iń do arhõń ruạṛ hijukʼa.” Ar ona tayom uni do Ephesus khon jahajteye mohnḍayena. Ado Kạisạriạ nagrahateye seṭeren khan jahaj khon pheḍekate uni do Jerusalemteye calaoena. Ar onḍe manḍerren hoṛkoe joharatʼko tayom uni do Antiokiạteye senena. Antiokiạre thoṛa din khemaokate onḍe khone mohnḍayente Galatiạ ar Phorugiạ Prodesh reakʼ mitʼ jaega khon eṭakʼ jaegae dãṛãketʼte celakoakʼ pạtiạue kajakketʼtakoa. Niạ oktere Apollos ńutuman mitʼṭen Jihudi do Ephesusteye hecʼena. Uniakʼ oṛakʼ do Alekasndriạ nagrahare tahẽkana. Uni do katha roroṛe mitʼṭen gạkhuṛ hoṛe tahẽkana ar sonot sostor hõ bes okocʼteye baḍaekan tahẽkana. Uni do Probhuakʼ hor reaṅ sikhnạte ńamakatʼ tahẽkana. Ar ạḍi mon lagaokate kathae roṛetʼ tahẽkana ar Jisu reaṅ ṭhiktegeye cetʼakokan tahẽkana, menkhan Johanakʼ bạptisma chaḍa ar eṭakʼ bạptisma reakʼ katha uni do bae baḍaekan tahẽkana. Uni do ạḍi dil salakʼ sunạgogre katha roroṛe ehopʼena. Unre Priskilla ar Akuilạ do Apollosakʼ kathakin ańjomketʼ khan ạkinakʼ oṛakʼtekin neota kedea ar Isorakʼ hor reakʼakʼko reaṅ arhõ mońjtekin bujhạuadea. Ar Apollos do Akhaeate calakʼe monean khan Ephesusren biswạsi boehako do udgạuko emadea. Ar Akhaearen celako jemon Apollosko ataṅe onate Ephesusren boehako do Akhaeate ciṭhiko olkeda. Isorakʼ dayate Akhaeare okoekoko pạtiạulen onḍe Apollose seṭeren khan uni do ạḍiye goṛowatʼkoa. Uni do sonot sostor khone sạbudkeda Jisu kangeae Mạsi do ar sanamko samaṅre ạḍi jothat reakʼe lạiatʼkote Jihudikoe bhagaoketʼkoa. Apollos Korinthreye tahẽkanre Pạul do Asiạ Prodes talate Ephesusteye hecʼena. Onḍe adom celakoe ńapamketʼkote onkoe kuliketʼkoa, “Probhu Jisurepe pạtiạulenre cetʼ sonot Jiupe ńamledea?” Metadeako, “Sonot Jiu je menae ona reakʼ katha do bale ańjomakada.” Unre Pạule metatʼkoa, “Enḍekhan okaṭakʼ bạptismape ńamleda?” Adoko metadea, “Johanakʼ bạptismage.” Khan Pạule metatʼkoa, “Kại khon mon ạcurkate okaṭakʼ bạptisma ataṅokʼ, ona do Johanakʼ bạptisma kana. Johan do hoṛkoe metatʼko tahẽkana, acʼ tayomte okoeye daraekan unire, metakʼme Jisure jemonko pạtiạukʼ.” Ado noa katha ańjomkate onko celako do Probhu Jisu ńutumte bạptismako ataṅkeda. Ar Pạul do onkoe capoketʼko khan onkore sonot Jiue hecʼena, ar onko do eṭakʼ eṭakʼ pạrsite roroṛkan ar nạbi leka Isorakʼ katha lạlạiko ehopʼena. Onko celako do lekhare gelbar goṭenko tahẽkana. Inạ tayom Pạul do sunạgogkoteye boloyena ar pe cando hạbicʼ dil salakʼ kathakoe galmaraoatʼkoa. Uni do Isorakʼ raj reaṅakʼko khode khod galmaraoatʼkote biswạs janam ocoetako lạgitʼe kurumuṭukeda. Menkhan onko modren adomkoakʼ mon do goṛdhoge tahẽkante bako pạtiạulena ar sanamko samaṅre Jisuakʼ hor reaṅ ạḍi leka opomanko ehopʼena. Unre Pạul do onko bạgiatʼkoteye calaoena. Uni do celakoe soṅgeketʼkote Turanus ńutuman mitʼṭen iskulre senkate dinạm hilokʼe lại bujhạuako kan tahẽkana. Ado bar bochor hạbicʼ onkage hoe idiyena. Onate okoe Jihudi ar Junạniko Asiạ Prodesreko tahẽkan onko sanamkoge Probhuakʼ kathako ańjomkeda. Ar Isor do Pạul hotete ạḍi hahaṛa hahaṛawakʼ kạmikoe ehopʼkeda. Uniakʼ gamcha ar oyonakʼ rugiko ṭhenko idiyetʼ tahẽkanre onkoakʼ ruạ do bogekʼkan tahẽkana ar bạṛicʼ jiuko hõko oḍok calakʼkan tahẽkana. Ar adom Jihudiko hõ jhaṛ ar husitʼte bạṛicʼ jiukoko oḍok giḍiyetʼko tahẽkana. Onko do Probhu Jisu ńutumte bạṛicʼ jiu capaṛ akawatʼ hoṛko bogeko reakʼ kurumuṭuko ehopʼena. Onkoko menetʼ tahẽkana, “Pạul okoe reaṅe porcaretʼkan, uni Jisu ńutumte oḍok calakʼ iń hukumam kana.” Onko modre Skewa ńutuman mitʼṭen Jihudikoren maraṅ naekeren eae goṭen koṛa do onkako kạmikan tahẽkana. Ado mitʼ dhaoko onkayetʼkan tahẽkanre bạṛicʼ jiu do onkoe metatʼkoa, “Iń do Jisu hõń baḍae akadea ar Pạul hõń oromakadea, menkhan ape dope okoe kana?” Ar okoe hoṛ bạṛicʼ jiue sapʼakade tahẽkan uni do onko eae boehako cetanreye don ladeyente nonkae ghạlketʼkoa je, onko do ghạl akan koṭoge ona oṛakʼ khonko dạṛkeda. Ado noa khobor Ephesusre girobas akan Jihudi ar Junạnikoko baḍaeketʼ khan sanamkoge ạḍiko botorena ar Probhu Jisuakʼ ńutum do maraṅentaea. Ar okoe do Probhu Jisureko pạtiạu akan tahẽkan nonka ḍher hoṛge hecʼkate akoakʼ bạṛicʼ kạmi reaṅ sodorteko aṅgockeda. Ar okoe do jạduko udukʼ baṛayetʼ tahẽkan onko modren ḍher hoṛge akoakʼ puthiko jarwakate jotoko samaṅre onako jeretʼ giḍikada. Ona puthi reakʼ dam hisạbkate ńelena ona reakʼ dam do mõṛẽ gel hajar Dinar. Nonkate Probhuakʼ katha do pasnao idiyena ar hoṛkoakʼ monre uniakʼ daṛe do arhõ bạ̃ṛti kạmiye ehopʼkeda. Ado noako hoe baṛayen khan Pạul do Makedoniạ ar Akhaea secʼte Jerusalemte calakʼ reakʼe goṭawana. Uni doe menkeda, “Jerusalemte calao tayom iń do Rom nagrahate hõ calakʼ hoyokʼ tińạ. Tayomte Timothi ar Erastus ńutuman acʼren barea goṛokin do Makedoniạteye kolketʼkinạ, ar acʼ do arhõ thoṛa din Asiạreye tahẽyena. Ona jokhecʼ Jisuakʼ hortetʼ babotre ạḍi gulmal ehopʼena. Demetrius ńutuman mitʼṭen sonhar do Artemis reakʼ mundil leka huḍiń huḍiń rupạ reakʼ mundilkoe benaoetʼ tahẽkana. Ar nonkate kạrigolkoakʼ ạḍi lab hoyokʼkan tahẽkana. Demetrius do onko kạrigolko ar onko lekan eṭakʼkoe jarwaketʼkoteye metatʼkoa, “E boehako, ape dope baḍaegea je, abo do noa kạmitege bon ạsulokʼ kana. Menkhan ape hõpe ńeletʼkana arpe ańjometʼgea, Pạul ńutuman uni hoṛ do aboakʼ noa Ephesusre ar goṭa Asiạ Prodesren ḍher hoṛkoe biswạs ocoyetʼkote bhul horteye idiyetʼkoa. Uni doe metako kana tite benaoetʼko deb-debi do cele hõko baṅkana. Noate eken aboakʼ ạsulokʼakʼ rojgar cabakʼa ona do baṅ, bickom maraṅ debi Artemis reakʼ mundil hõ ạuṛiagokʼa. Ar Asiạ disạmren sanam hoṛko, se dhạrtiren sanamkoge okoe debko sewawaekan uni hõ maraṅ do bae tahena.” Noa kathako ańjomketʼ khan onko do edreteko perecʼena ar ãṭ aṛaṅte memenko ehopʼena, “Ephesuskoren Artemis debgeye maraṅa.” Ar goṭa nagraha do usạra ạulạu cabayena. Unre Gạius ar Aristarkhos ńutuman Makedoniạren okoekin hoṛ do Pạul sãotekin calakʼkan tahẽkan, hoṛko do unkinko sapʼketʼkinạ ar sanamkoge bạisiteko gad gadao boloyena. Pạul do ṭhạurạ akan hoṛko ṭhen senokʼe menleda, menkhan celako do bako sen ocoadea. Ona disạmren adom raj kạmiyạko do Pạulren gateko tahẽkana. Onko hõ Pạul ṭhen khoborko kolketʼte uniko nehõradea jemon bạisite aloe calakʼ. Ar inạkʼtege bạisire gulmal ehopʼena. Unre adomko do mitʼ leka ar adomko do eṭakʼ lekako hohoyetʼ tahẽkana. Ar ḍher hoṛge bako baḍaekan tahẽkana cedakʼ bạisireko hecʼakana mente. Khange Jihudiko do Aleksander samaṅ secʼko ṭhelao idikede khan, cetʼe roṛa mente adom hoṛko lạiadea. Unre Aleksander do katha roṛ lạgitʼ titeye isạrawatʼkote thirokʼ lạgitʼe kurumuṭukeda. Menkhan hoṛko do Aleksander Jihudi kanae menteko baḍaeketʼ khan sanamkoge mitʼ sãote bar ghonṭa ganko hohokeda, “Ephesuskoren Artemis debgeye maraṅa” Ado mucạtʼre nagraharen mitʼṭen sorkari kạmiạyicʼ do hoṛkoe thir ocoketʼkoteye metatʼkoa, “E Ephesusren hoṛko, noa katha do sanam hoṛgeko baḍaea baṅma, maraṅ Artemis debakʼ mundil ar Jupiter khon uniakʼ oka muṭhạn ńur akan onaren rukhiyạko do Ephesus nagraharenge. Ar noa katha sạri kana mentepe aṅgoc khan lelhako leka kạmi baṅkate thir hapekokʼge lek tapea. Ente nukin hoṛ do aboakʼ mundil khon kombṛo hõ bạkin kombṛo akada ar aboren deb hõ bạkin neṅghao akadea, enhõ nukin hoṛ do nonḍepe ạguakatʼkinạ. Ado Demetrius ar uni sãoten kạrigolko do jãhãe birudre jãhãn katha menakʼtako khan enḍekhan kacahạrima jhicʼge ar hạkimko hõ coṅ menakʼkoge. Onate onko do onḍeko mambla daṛeakʼa. Menkhan arhõ jãhãnakʼ bạ̃ṛti roṛpe menetʼ khan ona do ạn bandhao bạisire chinḍạu hoyokʼtapea. Teheńakʼ gulmal babotre abo cetanrege dos paṛaokʼ reakʼ botor menakʼa. Ar nonkage hoelen khan noa gulmal reakʼ cetʼ karonge babon udukʼ daṛeakʼa, ente noa gulmal reakʼ do jãhãn karonge bạnukʼa.” Ado nonkae roṛketʼ khan uni do jarwa akan hoṛkoe bidạkatʼkoa. Gulmalko thiren khan Pạul do celakoe hoho ạguketʼkoa. Ar onkoe udgạuketʼko khan onko ṭhen khon bidạ hataokate uni do Makedoniạ secʼe mohnḍayena. Makedoniạ talateye parom calakʼkan tahẽkan jokhecʼ uni do ạḍi okocʼ kathakote hoṛkoe udgạuketʼkoa. Ar tayom uni do Junạni, metakʼme Akhaea Prodesteye seṭerena ar onḍe pe candoe tahẽyena. Inạ tayom uni do jahajte Siriạ disạmteye calakʼ lạgidokʼkan tahẽkanreye baḍaekeda je, Jihudiko do acʼ birudreko soṛojontro kana. Unre uni do arhõ Makedoniạ talate ruạṛ calakʼe goṭawana. Ado Beroearen Puros hopon Sopatros, Thessoloniki khon Aristarkhos ar Sekundus, Derberen Gaius, Timothi ar Asiạ khon Tukhikus ar Trophimus noko hõ Pạul sãoteko calaoena. Nokoko hoṛ do lahare senkate Troas nagrahare ale lạgitʼko tạṅgi akatʼ tahẽkana. Ar bin khamianakʼ piṭhạ porob tayom ale do Philipi khon jahajtele mohnḍayena ar mõṛẽ din tayom onko sãote Troasrele ńapamena. Ar Troasre ale do eae dinle tahẽkana. Ado hapta reakʼ pạhil din Probhuakʼ bhoj ataṅ lạgitʼ ale do mitʼ ṭhenle jarwayena. Unre Pạul do hoṛko porcarakoe ehopʼena. Uni do dosar hilokʼ calakʼ reakʼ katha tahẽkantaete tala ńindạ hạbicʼe galmarao idikeda. Ale do cetan koṭha reakʼ oka kandharele jarwa akan tahẽkan onḍe do ạḍi utạr diuhe tahẽkana. Ar Euthukus ńutuman mitʼṭen juạn koṛa do ona oṛakʼ reakʼ khiṛki cetanreye duṛupʼ akan tahẽkana. Ado Pạul ạḍi ghạṛicʼe galmaraoetʼ kan tahẽkante uni do dudṛumkedeteye jạpitʼkeda. Are jạpitʼ lạthiạuen khan pe tala khon latarteye ńurhạyena ar gocʼgeko tul rakapʼkedea. Unre Pạul do latarteye pheḍena ar uni koṛa taber loṭomkedeteye metatʼkoa, “Alope botorokʼa, uni do jiwetʼge menaea.” Inạ tayom Pạul do arhõ cetan kandhate rakapʼkate Probhuakʼ bhoje ataṅkeda ar ạḍi ghạṛicʼ aṅga marsalokʼ hạbicʼe galmaraoatʼko tayom uni doe calaoena. Ar hoṛko do uni koṛa jiwetʼge oṛakʼteko idikedea ar ạḍi jiwi raṛecʼko ńamkeda. Ale do lahare senkate jahajre decʼkate Assos bondor secʼle monḍhayena. Onḍe khon ale do Pạul deje reakʼ katha tahẽkantalea. Uni do onkageye metatʼle tahẽkana, ente taṛam horte onḍe calakʼe goṭawan tahẽkana. Ado Assosrele ńapamkede khan uni do jahajrele decʼkedea ar Mitulenetele hecʼena. Dosar hilokʼ ale do onḍe khon mohnḍakate Khios diprele seṭerena. Ar tesar hilokʼ do doreão paromkate Samos diptele calaoena. Inạ tayom din do Miletus bondortele seṭerena. Asiạ Prodeshre Pạul jemon aloe bilomokʼ onate uni do Ephesusre teṅgo baṅkate ona aṛete parom calakʼe goṭa akatʼ tahẽkana. Uni do Jerusalemte seṭerokʼ lạgitʼe usạrayetʼ tahẽkana jemon hoedaṛeakʼ khan penṭekosṭ hilokʼ do onḍeye tahẽdaṛeakʼ. Pạul do Miletus khon Ephesuste hoṛ kolkate ona manḍerren murubikoe hoho ạgu ocoketʼkoa. Ado onko onḍeko seṭeren khan Pạul do onkoe metatʼkoa, “Asiạ disạmreń hecʼen pạhil din khon ape sãote jaoge cetʼ lekań khemaoletʼ ona dope baḍaegea. Jihudikoakʼ ạḍi lekan phor phundi iạte bạṛicʼ biḍạukoreń paṛaolena, menkhan iń do nindhạn monte mẽtʼ dakʼ joro jorote Probhuren sapʼ dapʼicʼiń hoeakana. Apeakʼ okaṭakʼte porhoanakʼ hoyokʼ nonkan jãhãnakʼge ape baḍae ocope lạgitʼ do bạń pạclena, bickom bahrere sodorte apeakʼ oṛakʼreń cetʼakawatʼpea ariń porcar akada. Jihudi ar Junạniko ṭhen iń do jorkateń lại akada je, kại khon mon ạcurkate onko do Isor secʼ ruạṛokʼ hoyokʼtakoa ar Probhu Jisure biswạsokʼ jạruṛtakoa. “Sonot Jiureń tolakante iń do ńitokʼ Jerusalemiń calakʼ kana. Onḍe iń cetanre cetʼ hoyokʼa ona do bạń baḍaea. Eken niạ kathań baḍaea, sonot Jiu do sanam nagrahare noa kathae baḍae ocoyediń kana je, hajotokʼ ar duk jojom hoyokʼtińạ. Menkhan iń ṭhen do ińakʼ jiwi reakʼ jãhãn dam bạnukʼa. Ińakʼ sana do noage, jemon mucạtʼ hạbicʼ iń ṭarhao daṛeakʼ, metakʼme Probhu Jisu oka kạmi lạgitʼ dạyike emakawạdiń ona jemoniń purạu daṛeakʼ. Ona kạmi do hoyokʼ kana Isorakʼ daya reaṅ bhage sombat reakʼ goha emokʼge. “Iń do ńitokʼ noa kathań baḍaea je, ape okoeko ṭhen senkate Isorakʼ rajosṭi reakʼ iń porcar akatʼ onko okoege iń do ar bako ńeleńa. Onate teheń pusṭạuteń lạiape kana, iń do okoeakʼ mãyãm reakʼ hõ dạyik doń baṅkana, ente Isor okae khojkan ona baḍae ocope do tishõ bạń pạc akana. Ape do apnar lạgitʼ sontor akae tahenpe, ar okoe sonot Jiu biswạsikoren horhoyicʼ lekate ape cetanreye emakan onko lạgitʼ hõ sontor akae tahenpe. Gupiyicʼ do cetʼleka acʼakʼ palren bhiḍikoe ńel todarotetʼko onkage ape hõ Isorakʼ manḍerko ńel todarotpe. Ente Isor do acʼakʼ mãyãmte onako manḍerre kirińakada. Ińiń baḍaea je, iń sen tayom hoṛko do hunḍạr leka ape talareko hijukʼa ar palren bhiḍikoko loksankoa. Ape bhitriko khon hõ hoṛko teṅgonte Isorakʼ sạriakʼtetʼ do eṛeteakʼ benaoko kurumuṭuya jemon pạtiạu akanko ako secʼko or idi daṛeako. Onate ape do sontor akae tahenpe. Disạipe, pe bochor khon siń ńindạ mẽtʼ dakʼ joro joroteń sontor akatʼpea, ar tisge bạń thirakana. ‘‘Menkhan ńitokʼ do Isor ar uniakʼ kathareń jimạkape kana. Isorakʼ katha do uniakʼ daya reaṅe roṛa, ar apeko benao rakapʼpe reakʼ daṛe hõ ona katharege menakʼa. Ona chaḍa Isor do acʼren hoṛko lạgitʼ okae dohoakatʼ ona katha do apeko hõe em daṛeapea. Jãhãekoakʼ sona, rupạ se kicricʼ khạnḍwạkʼ cetanre iń do bạń lalocakana. Ape dope baḍaegea, noa banar ti do ińakʼ ar ińren sãotenkoakʼ sanam jạruṛokʼakʼe meṭao akada. Iń okań ceka akatʼ ona sanamakʼge ape koń udukʼakatʼpea je, nonkan kajak khaṭao hotete nijorko goṛowako do lek kana ar Probhu Jisuakʼ noa katha jemon disạ dohokʼ baṅma, ‘hatao khon emokʼrege bickom ḍher bhor do ńamokʼa.’” Noa katha menkate Pạul do sanamko sãote ikhṛumenteye koekeda. Ar manḍerren sanam mukhiyạko do Pạul hạṛupʼ kedeteko cokʼadea ar rarakʼko ehopʼena. Pạulakʼ mẽtʼãhã ar bako ńel ńam iạte ạḍitetʼko bhabnayena. Ar noa tayom onko do jahaj hạbicʼko koyokʼ gotʼkadea. Ado Ephesusren mukhiyạko ṭhen khon bidạ hataokate ale do jahajte mitʼ mohnḍa Kos diptele calaoena. Ar dosar hilokʼ do Rhodos diptele hecʼena. Ona tayom onḍe khon Patara nagrahatele calaoena. Onḍe do Phoenikiạte calakʼ lạgitʼ mitʼṭen jahajle ńamkeda. Unre ale do ona jahajre decʼkatele mohnḍayena. Kupros diple ńel ńamketʼ khan ona dạkhin secʼte ạcurkate Siriạ Prodes reakʼ Tur nagrahate senkate jahaj khonle pheḍena. Onḍege aleakʼ jahaj reakʼ bojha do pheḍ reakʼ katha tahẽkantalea. Ado onḍenko celale sendra ńamketʼko khan onko sãote eae dinle tahẽyena. Onko do sonot Jiu hotete Pạulko nehõradea jemon Jerusalemte aloe calakʼ. Onako din paromen khan ale do onkole bạgiatʼkote aleakʼ hortele mohnḍayena. Unre sanam celako ar onkoren bạhuko ar gidrạko do ale sãote nagraha bahre hạbicʼko oḍok hecʼena. Ar doreão aṛere ikhṛumentele koeyana. Ona tayom ale do bidạ hataokate jahajrele decʼena ar onko do akoakʼ oṛakʼkoteko ruạṛ calaoena. Ado Tur khonle mohnḍayente Ptolemaisrele seṭerena. Onḍe do biswạsi boehakole joharatʼkote onko sãote mitʼ dinle tahẽyena. Dosar hilokʼ dole oḍokente Kạisạriạtele hecʼena ar bhage sombat poporcaricʼ Philipakʼ oṛakʼrele tahẽyena. Uni do Jerusalem manḍerren eae goṭen sapʼ dapʼko modren mitʼ hoṛe tahẽkana. Uniren do ponea kũạ̃ri kuṛiko tahẽkantaea. Ar onko doko nạbi baṛayetʼ tahẽkana. Ale do thoṛa din onḍele tahẽyen khan Jihudạ khon Agabus ńutuman mitʼṭen nạbiye hecʼena. Uni do ale ṭhen hecʼkate Pạulakʼ ḍanḍa paṭheakʼe raṛaketʼtaea ar onate acʼakʼ ti jaṅga tolketʼtaeteye menkeda, “Sonot Jiue meneda, “Jerusalemren Jihudiko do noa paṭheakʼren mạlik hõ nonkageko tolea ar boṅgan hoṛ jạtrenkoakʼ tireko jimạyea.” Noa kathale ańjomketʼ khan onḍenko hoṛko ar ale hõ Pạul ạḍile nehõradea jemon uni do Jerusalemte aloe calakʼ. Unre Pạule menkeda, “Rakʼ rakʼte monre cedakʼ dukpe imạń kana? Probhu Jisu lạgitʼ iń do Jerusalemre eken bondi ocokʼ do baṅ, bickom gocʼ ocokʼ hõń sapṛaogea.” Ado bae rebenlente ale dole thir hapeyena ar tayomtele menkeda, “Probhuakʼ sana lekage baṛe hoyokʼma.” Niạ tayom moṭra jhoṭra tolkate ale do Jerusalemtele calaoena. Kạisạriạren adom celako hõ ale sãoteko calaoena ar Manason ńutuman Kupros dipren mitʼ hoṛakʼ oṛakʼteko idiketʼlea. Ar aleakʼ tahen reakʼ katha do uniakʼ oṛakʼrege tahẽkantalea. Uni do pạhil celako modren mitʼ hoṛe tahẽkana. Ado Jerusalemtele seṭeren khan biswạsi boehako do kusiteko ataṅ daramketʼlea. Ar dosar hilokʼ Pạul do ale sãote Jakob ńeńele senena. Onḍe do manḍerren sanam murubikoko tahẽkana. Pạul do onkoe joharatʼkoa ar acʼakʼ porcar talate cetʼleka Isor do boṅgan hoṛ jạtrenko talareye kạmi akada ona sanamakʼe lạiatʼkoa. Noa kathako ańjomketʼ khan onko murubiko do Isorko sarhaokedea ar Pạulko metadea, “E boeha, am mam ńeletʼkokange, tinạkʼ hajar hajar Jihudiko do Jisureko pạtiạu akana, ar onko sanamkoge Moseakʼ ạn-ạri pańja lạgitʼ ạḍiko ahkaokʼ kana. Onko do khoborko ańjomakada, boṅgan hoṛ jạtrenko talare okoe Jihudiko menakʼko onko do Mose reakʼ ạn-ạri bạgikate senokʼ reakʼ sikhnạtem memako kana, metakʼme am do onkoren gidrạko bam khatna ocoako kana ar Jihudikoakʼ cạli leka senokʼ hom baronetʼkoa. Ńitokʼ ale do cetʼle cekaya? Onko do khạṭigeko ańjoma amem hecʼ akana mente. Onate ńitokʼ okale metam, ona baṛe onkaeme. Ale talare nonkan pon hoṛ menakʼkoa one okoe do mitʼṭenko khạṭi akawan. Noko hoṛ am sãote iditorakom ar onko soṅgete am hõ saphakʼme ar onkoakʼ bohokʼ upʼ hoyo giḍikatako reakʼ khoroc emokʼme. Unre sanam hoṛko baḍaea daṛeakʼa je, am reaṅ oka khoborko ańjomakatʼ ona do ạuṛiakʼgea ar ạn-ạriko hõ ṭhik lekam manaoetʼkana mente. Menkhan boṅgan hoṛ jạtren biswạsiko lạgitʼ okale goṭa akatʼ ona reaṅ do nonka ol katele baḍae ocoakatʼkoa je, onko do boṅga ṭhen samaṅakʼ bako joma, mãyãm hõ baṅ, limbạtʼ gocʼ janwarakʼ jel hõ bako joma ar jãhãlekan loṭghuṭi hõ bako kạmiya.” Unre Pạul do onko hoṛe iditoraketʼkote acʼhõ onko sãoteye saphayena. Ar dosar hilokʼ uni do mundilteye calaoena, ar onkoakʼ saphakʼ reakʼ kạmi tis cabakʼa mente ar mimitʼko lạgitʼ tis janwar teṅgenko hoyokʼa onakoe baḍae ocoketʼkoa. Ado saphakʼ lạgitʼ ona eae din purạu lạgidokʼ kan tahẽkanre Asiạ Prodesren adom Jihudiko do mundilre Pạulko ńelkedea. Onko do onḍe sanam hoṛko ạulạuketʼkoa ar Pạulko sapʼkedea. Ar ãṭ aṛaṅte nonka memenko ehopʼena, “E Israelko, dela hijukʼpe. Sanam jaegaren hoṛko ṭhen aboakʼ jạt ar aboakʼ ạn-ạri ar mundil birudre okoe doe cetʼakokan uni hoṛ doe nui kangea. Ona chaḍa mundilre Junạnikoe aderetʼkote uni do noa sonot jaegaye bhõnḍ akada.” Onko do noa iạtegeko menkeda, ente noa lahare Ephesusren Trophimus hõ Pạul sãote nagrahareko ńelledea. Onateko hudiskeda, Pạul do Trophimus hõ mundilteye ạguakadea. Unre goṭa nagrahare gulmal ehopʼena. Hoṛko do mitʼ sãoteko ńir hecʼente Pạulko sapʼkedea ar mundil khonko or oḍok kedea ar ona são sãote mundil reakʼ duạrkoko sińkada. Hoṛko do Pạul gojeko kurumuṭu kan tahẽkanre, Romi palṭonkoren maraṅ subedar ṭhen khobor calaoena je, goṭa Jerusalem nagrahare gulmal hoyokʼkana. Unre Maraṅ subedar do adom subedarko ar palṭonko soṅgekate bhiṛ akatʼ ṭhene ńir calaoena. Ar hoṛko do maraṅ subedar ar palṭonkoko ńelketʼko khan Pạul dadalko thirena. Unre maraṅ subedar do senkate Pạule giriptarkedea ar barea sikṛite tole lạgitʼe hukumkeda. Ona tayom uni doe kuliketʼkoa, “Nui hoṛ doe okoe kana? Ar cetʼe ceka akada?” Unre hoṛko modre adomko do mitʼlekako arhõ adomko do eṭakʼ lekako hohoyetʼkan tahẽkana. Onate maraṅ subedar do sạri ghoṭna bae baḍae daṛeatʼte palṭon gaṛte Pạul idiye lạgitʼe hukumkeda. Ado Pạul siṛhi hạbicʼe seṭeren khan hoṛkoakʼ ti khon bańcaoe lạgitʼ palṭonko do gokʼ idiye hoyen takoa. Ar hoṛko do tayom tayomte ãṭ aṛaṅte hohoateko menkeda, “Uni do goje me.” Ado palṭon gaṛteko adere lạgidokʼkan tahẽkanre Pạul do maraṅ subedare metadea, “Am sãote thoṛa kathań roṛ daṛekea?” Maraṅ subedare menkeda, “Junạni pạrsim baḍaegea? Misor disạmren uni hoṛ okoe do thoṛa din lahare hulkate pon hajar dạkuko hahaṅkarteye idiletʼko am do cetʼ uni hoṛ dom baṅkana?” Unre Pạule roṛ ruạṛkeda, “Iń do Kilikiạ Prodes reakʼ Tạrsus nagraharen mitʼṭen Jihudi hoṛ kạnạń. Jãhãlekan nagraharen hoṛ doń baṅkana. Dayakate onko hoṛ sãote katha roṛ ocoạńme.” Ado maraṅ subedarakʼ hukume ńamketʼ khan Pạul do siṛhi cetanreye teṅgoyena ar ti tulkate hoṛko thirokʼ lạgitʼe isạrawatʼkoa. Arko thiren khan Pạul do Ibri pạrsiteye metatʼkoa. “E boehako ar Babako, ńitokʼ iń do apnarteń roṛ dogokʼ kana, ańjomtińpe baṛe.” Hoṛko do Ibri pạrsite roroṛko ańjomkede khan ekalteko thir hapeyena. Unre Pạul doe menkeda, “Iń doń Jihudi hoṛ kana. Kilikiạ reakʼ Tạrsus nagrahareń janamlena, menkhan noa nagraharegeń hara akana. Gamalielakʼ jaṅga pheḍre duṛupʼkate aboren hapṛamkoakʼ ạn-ạriko mońjteń cetʼakada. Isor reaṅ teheń ape cetʼ lekape gagojokʼkan onkage iń hõń gagojokʼkan tahẽkana. Jisuakʼ horte okoeko calakʼkan tahẽkan onko doń santaoetʼko tahẽkana ariń gocʼetʼko tahẽkana ar herel ar maejiuko sapʼ ạgukate hajotreń bhoraoetʼko tahẽkana. Noa katha do sạrikana je, onaren goha do maraṅ naekeko ar maraṅ bạisiren sanamkoge. Iń do onko ṭhen khon Damesek nagraharen dhorom mukhiyạko emako lạgitʼ ciṭhiń hataoleda ar onkan hoṛko tol ạgukate Jerusalemre sạjạiko lạgitʼge onḍeń calakʼkan tahẽkana. “Unre tikin okte tahẽkana” Iń do Damesek soriń seṭeren khan ackage serma khon iń beṛhaete mitʼṭen marsal bamberena. Ar iń do otreń bhindạṛena ar okoe coṅe mitạńkaniń ańjomkeda, ‘E Sạul, E Sạul cedakʼem khedeń kana?’ ‘‘Iń doń kulikedea, ‘Probhu am dom okoe kana?’ Uni doe roṛ ruạṛkeda, ‘iń do Nasaretren Jisu kạnạń, one okoeyem khedeńkan.’ Unre okoe iń sãoreko tahẽkan onko hõ ona marsalko ńelkeda, menkhan iń tulucʼ okoeye galmaraoketʼ uniakʼ katha do bako bujhạuleda. Adoń menkeda, ‘E Probhu iń do cetʼ iń cekaya?’ “Probhui menkeda, ‘ma beretʼme, ar Damesekte calakʼme. Ar am lạgitʼ oka ṭhik doho akan ona do onḍegem baḍae ocokʼa.’ Unre ińren soṅgetenko do tire sapʼkate Damesekteko tiạkʼ idikedeńa, ente ona jhãk jhãk marsal iạteń kãṛãyena. “Ado Ananiạs ńutuman mitʼṭen hoṛ iń ṭhene hecʼena. Uni do Moseakʼ ạn-ạriko manot salakʼe pańjayetʼ tahẽkana, ar onḍenko sanam Jihudiko ạḍiko manotedekan tahẽkana. Uni do hecʼkate iń aṛere teṅgoyenteye metadińa, ‘E boeha Sạul, amakʼ ńeńel reakʼ daṛe ruạṛ hijukʼtam ma.’ Ar inạtege iń do uniń ńel ńamkedea. “Unre Ananiạse menkeda, ‘aboren hapṛamkoren Isor do ame bachao akatʼmea jemon uniakʼ sanakom baḍae daṛeakʼ ar uni dhoromicʼ hoṛ, metakʼme Jisu Mạsim ńel ńame ar uniakʼ katham ańjomtae. Am do unirenge goham hoyokʼa ar okam ńelakat̕ arem ańjomakatʼ ona do sanam hoṛko ṭhenem lạiya. Am do ńitokʼ cedakʼem bilomeda? Ma beredokʼte bạptis ocokʼme ar uniakʼ ńutum dohaeakʼme ar amakʼ joto kạiko ạrupʼ saphaetam.’ “Jerusalemte ruạṛ hecʼkate mitʼ din mundilreń koejoṅkan tahẽkanre iń do mitʼṭen dorsoniń ńelkeda. Probhu do iń sãote galmarao kaniń ńelkedea. Uni doe metadińạ, ‘usạragodme ar ńitge Jerusalem khon oḍok calakʼme, ente iń reaṅ goha do hoṛko bako ataṅ tama.’ Ińiń menkeda, ‘E Probhu, noko hoṛko baḍaegea, okoe amreko pạtiạukʼkan tahẽkan onko dal ar tolkate hajotre bhoraoko lạgitʼ iń do mitʼ sunạgog khon eṭakʼ sunạgogteń calakʼkan tahẽkana. Ar amren gohayicʼ Stephanko gojekan tahẽkanre onḍegeń teṅgo akan tahẽkana ar uni gocʼ ocokʼre iń hõ rạjigeń tahẽkana, ar okoe uniko gojekan tahẽkana onkoakʼ kicricʼkoń horhoyetʼ tahẽkana.’ “Unre Probhu do ińe metadińạ, ‘Do calakʼme, ente iń do sạṅgińte boṅgan hoṛ jạtrenko ṭheniń kolmea.’ ” Hoṛko do un hạbicʼ Pạulakʼ kathako ańjomkan tahẽkana, menkhan boṅgan hoṛ jạtrenkoakʼ kathae roṛketʼ khan ãṭ aṛaṅte hohoate memenko ehopʼena, “Uni do dhạrti khon ocokʼ giḍikaepe; uni do jiwetʼ tahen lek doe baṅkana.” Ar rạgạu rạgạuko hohoyetʼkan tahẽkanre akoakʼ kicricʼko capatʼ giḍiyetʼ tahẽkana ar coṭte dhuṛiko oṭaṅetʼ tahẽkana, unre maraṅ subedar do palṭonkoakʼ gaṛte Pạul idiye lạgitʼe hukumkeda. Ar Pạul birudre cedakʼ nonkako hohoyeda ona baḍae lạgitʼ cạbuk baṛakate jeraye lạgitʼe hukumkeda. Ado cạbuke lạgitʼko tolkede khan Pạul do onḍeye teṅgo akan tahẽkan subedare metadea, “Romi hoṛ bin bicạr dusite cạbuke reakʼ hukum do cetʼ apeakʼ ạnre menakʼgea? Noa katha ańjomkate uni subedar do maraṅ subedar lạiyadeteye metadea, “Am do cetʼem cekae lạgidokʼ kana? Nui ma coṅe Romi hoṛkan.” Unre maraṅ subedar do Pạul ṭhen hecʼenteye kulikedea, “Lạiạńme am do cetʼ Romi kanam? Pạule menkeda, “Hẽ.” Maraṅ subedare menkeda, “Iń do ạḍi utạr ṭaka-poesa emkate Romren porja hoyokʼ reakʼ ạidạriń ńamakada.” Pạule menkeda, “Menkhan iń do janam khonge Romren porja kạnạń.” Noa kathako ańjomketʼ khan cạbuke lạgidokʼkanko do unreko calao baṛayena. Ar maraṅ subedar do mitʼṭen Romi hoṛe tol akadea menteye baḍaeketʼ khan botor hecʼadea. Jihudiko cedakʼ Pạulko dusiyede kana ona ṭhik lekate baḍae lạgitʼ dosar hilokʼ maraṅ subeder do Pạule raṛakedea ar maraṅ naekeko ar maraṅ bạisiren hoṛko mitʼ ṭhen jarwakʼ lạgitʼe hukumatʼkoa. Ona tayom Pạul ạgukate onko samaṅreye teṅgokedea. Pạul do maraṅ bạisiren hoṛko secʼ beṅgetʼkateye menkeda, “E ińren boehako, iń do teheń hạbicʼ bhage hudiste Isor samaṅre ińakʼ dạyikiń manao ạguakada.” Noa katha ańjomkate maraṅ naeke Ananiạs do sorre teṅgo akanko mocare thapaye lạgitʼe hukumatʼkoa. Unre Pạul do Ananiạse metadea, “E phạsiạra, Isor hõ ame thapamea. Ạn lekate ińakʼ bicạr lạgitʼ am do onḍem duṛupʼ akana, menkhan daleń reakʼem hukumetʼte amge coṅ ạn mam rạputʼetʼkan.” Pạul ṭhen teṅgo akanko doko menkeda, “Am do Isorren maraṅ naekeyem bemanot edekana?” Unre Pạule menkeda, “E boehako, bạń baḍaekan tahẽkana uni doe maraṅ naeke kana. Ariń baḍae lekhan ona katha do bạń menkea, ente sonot sostorre ol menakʼa, ‘am jạtren mukhiyạ reaṅ bạṛicʼ do alom roṛa.’ ” Ona bạisiren mitʼ dol do Sạdukiko ar eṭakʼ dol do Phạrusi menakʼkoa menteye baḍaeketʼ khan Pạul do maraṅ bạisi talare ãṭ aṛaṅteye menkeda, “E boehako, iń do mitʼṭen Phạrusi hoṛ kạnạń ar Phạrusikoren hoponge. Ińakʼ bicạr hoyokʼ kana, ente ińiń pạtiạukʼ kana, gocʼko do arhõko jiwetʼ beredokʼa.” Uniakʼ noa katha iạte Phạrusi ar Sạdukiko talare jhogṛa ehopʼena. Onate maraṅ bạisiren hoṛ doko hạṭińena, ente Sạdukikoko mena, “Gocʼko do ar bako jiwetʼ beredokʼa.” Ona chaḍa arhõko mena, serma goḍetko hõ bạnukʼkoa, jãhãn jiuko hõ bạnukʼkoa; menkhan Phạrusiko do noa sanamakʼgeko pạtiạuakʼa. Unre maraṅ gulmal hoyena ar Phạrusi dolren adom sostor baḍaeko doko teṅgoyente ạḍiko rapṭa rạpṭiyena. Onkoko menkeda, “Ale do nui hoṛakʼ jãhãn dosge bale ńametʼtaea. Hoedaṛeakʼa jãhãn jiu se sermaren goḍet do uni sãoteye galmarao akada.” Ona jhogṛa do nonka sạrdi idiyena je, maraṅ subedar doe botorena ente onko do Pạulko or cirạ botejea. Uni do palṭonkoe hukumatʼkoa jemon senkate hoṛkoakʼ ti khon Pạulko chingạu ạguyete palṭon gaṛteko idiye. Dosar hilokʼ ńindạ Probhu do Pạul ṭhen teṅgoyenteye metadea, “Dil joṅme, Jerusalemre cetʼleka iń reaṅ goham emakatʼ onkage Romre hõ ińakʼ goha emokʼ hoyokʼtama.” Ado dosar hilokʼ setakʼ bela Jihudiko do mitʼṭenko soṛojontrokeda ar Pạul ạuriko goje hạbicʼ cetʼge bako joma menteko kiriạyena. Onko do pongel khon hõ bạ̃ṛti hoṛko tahẽkana. Onko do maraṅ naekeko ar Jihudiren murubiko ṭhen senkateko menkeda, “Pạul ạurile goje hạbicʼ cetʼge bale joma mentele kiriyạ akana. Ńitokʼ ape ar maraṅ bạisiren hoṛko noa babotre arhõ mońj okocʼte tojbija mente ape samaṅre Pạul ạguye lạgitʼ maraṅ subedar ṭhen khobor kolpe. Ar ale do nonḍe ạuriye seṭerokʼrege uni goje lạgitʼ sapṛao akanle tahena.” Menkhan Pạul miseratren hopontetʼ do noa soṛojontro reakʼ katha ańjomkate palṭonkoakʼ gaṛteye calaoena ar ona katha Pạule baḍae ocokedea. Unre Pạul do mitʼṭen subedar hohoadeteye metadea, “Nui koṛa do maraṅ subedar ṭhen idiyem. Uni ṭhen thoṛa mementeakʼ menakʼtaea.” Unre subedar do uni koṛa maraṅ subedar ṭhene idikedea are metadea, “Pạul ińe hohoạdińte nui koṛa am ṭhen ạguye reakʼe metadińạ, ente uni do am ṭhen thoṛa roroṛteakʼ menakʼtaea.” Maraṅ subedar do tire sapʼkate mitʼ secʼe idikedeteye metadea, “Cetʼ mitạńem meneda?” Uni koṛa doe menkeda, “Jihudikoko goṭa akada, Pạul reaṅ mońj okocʼte tojbij lạgitʼ gapa arhõ maraṅ bạisite idiye lạgitʼko nehõrama. Am do onkoakʼ katha alom senakʼa, ente pongel khon hõ bạ̃ṛti hoṛ Pạul lạgitʼ tãṛãkʼ akan menakʼkoa. Noko hoṛ do Pạul ạuriko goje hạbicʼ cetʼge bako joma menteko kiriyạ akana. Arko sapṛao akana ar am ṭhen khon kathako ńel hohorkana.” Maraṅ subedar do uni koṛa noa menkateye bidạkadea, “Am do noa katha ińem baḍae ocoakadiń ona do okoe ṭhen hõ alom lạiya.” Maraṅ subeder do acʼren barea subedar hohoatʼkinteye metatʼkinạ, “Bar sae palṭon, eae gel aswariko ar barsae borlom palṭonko teheń ńindạ are baja okte Kạisạriạte calakʼ lạgitʼ ben sapṛao dohokoa. Ar Pạul hõ sadom ben bebostaea jemon napaete disạm cakʼlaoicʼ Pheliks ṭhenpe idi seṭer daṛeae.” Maraṅ subedar do noa ciṭhiye olkeda: “Iń do Klạudius Lusius, maraṅ disạm cakʼlaoicʼ Pheliks ṭhen noa ciṭhiń oletʼkana. Ińakʼ johar ataṅtińme. “Jihudiko do nui hoṛ sapʼkateko gojekan tahẽkana, menkhan iń do ińren palṭonko idikate uniyiń bańcao ạgukedea, enteń baḍaekeda uni do mitʼṭen Romi hoṛ kanae. Ar baḍae sanakedeńa cedakʼko dusiyede kana mente. Onate uni do onkoakʼ maraṅ bạisireń idikedea. Ariń baḍaekeda, onkoakʼ dhorom reakʼ ạn-ạriko babotre uniko dusikedea, menkhan gocʼ ocokʼ se hajotre bhorao ocokʼ leka jãhãn dos do bạnukʼtaea. Ar uni birudre soṛojontro reakʼ kathań baḍaeketʼ khan iń do am ṭheniń kolkedea. Ar okoe uniko dusiyedekan onko hõń hukumatʼkoa jemon nuiakʼ dos reaṅko lạiam.” Unre maraṅ subedarakʼ hukum leka Pạul do ńindạge ako sãote Antipatris nagraha hạbicʼko idikedea. Ar dosar hilokʼ onko do aswariko sãote Pạulko kolkedete palṭon gaṛteko ruạṛ calaoena. Ar aswariko do Kạisạriạreko seṭeren khan ciṭhi do disạm cakʼlaoicʼko emadea ar Pạul hõ uniakʼ tireko jimạkadea. Disạm cakʼlaoicʼ do ciṭhiye paṛhaoketʼ khan Pạul oka jaegaren hoṛ kanae menteye kulikedea. Ar Pạul do Kilikiạ disạmren hoṛ kanae menteye baḍaeketʼ khan uni doe menkeda, “Okoe hoṛko amko dusiakatʼme onko nonḍeko hecʼlen khan iń do amakʼ kathań ańjoma.” Tayomte uni do Herod rajakʼ hajotre Pạul horhoye lạgitʼe hukumatʼkoa. Mõṛẽ din tayom maraṅ naeke Ananiạs do Jihudikoren adom murubiko ar Tertullus ńutuman mitʼṭen ukil soṅgekate Kạisạriạteye calaoena ar Pạul birudre disạm cakʼlaoicʼ ṭhene lạliskeda. Ar Pạule hoho ạgu ocoyen khan Tertullus do noa menkate Pạulakʼ dosko udukʼaeye ehopʼena, “E manotan Pheliks ḍher din khon am tabere ale do ạḍi sulukre menakʼlea. Am do amakʼ akelte noko jạtrenko ḍherem hara rakapʼ ocoakatʼkoa. Onate ale do jaoge sanam jaegare khạndri ontor khon amle gun manao joharam kana. Menkhan amakʼ somoe jemon alo nosṭokʼtam onateń nehõram kana, dayakate aleakʼ katha ańjom taleme. Ale do thoṛa kathate jotowakʼle lạiama. “Alele ńṭoṭhadea nui hoṛ do mitʼṭen jhamelayicʼ kanae; uni do jao okte gulmale ehopʼeda. Uni do goṭa dhạrtiren Jihudiko talare gulmale ehopʼakada. Uni do Nasario dolren mitʼṭen ạyuricʼ kanae. Uni do mundil hõ bhõnḍ lạgitʼe kurumuṭiyetʼ tahẽkante ale do unile sapʼkedea ar aleakʼ ạn lekate bicạrile menetʼ tahẽkana, menkhan maraṅ suberdar Lusius doe ãṛgo hecʼena, ar jorkate aleakʼ ti khon uniye idikedea. Ar ale okakole dusiyedekan, ona do unim kulile khange jotowakʼem baḍae daṛeakʼa.” Ar Jihudiko hõ noa katha do sạri kana menteko suhi akada. Unre disạm cakʼlaoicʼ do Pạul roṛ lạgitʼe isạrawade khan roroṛe ehopʼena, “Ińiń baḍaea, ḍher bochor khon am do noko Jihudi jạtkoakʼem bicạr ạguyeda; onate ạḍi rạskạ salakʼ iń reakʼ iń roṛetʼkana. Teheń gelbar din khon bạ̃ṛti do baṅ hoeakana iń do sewae lạgitʼ Jerusalemteń rakapʼ calaolena. Arem suṭhik lekhan ona dom baḍae daṛeakʼa. Ar okoeko dusiyediń kan onko do mundilre okoe tulucʼ hõ rapṭa rạpṭikʼ do bako ńṭoṭhadińạ sunạgogre se nagrahare jãhãrege hoṛko ạulạuko hõ bako ńṭoṭhadińạ. Ar okaṭakʼ reakʼko dusiyedińkan ona reakʼ porman hõ onko do bako udukʼ daṛeama. Iń do noa katha am ṭheniń aṅgoceda je, Jisu Mạsiakʼ hor, okaṭakʼ do onko dhorom birudko metakʼkan, iń do ona horrege ińren hapṛamkoren Isoriń sewawae kana. Moseakʼ ạn-ạri sãote okaṭakʼ juri menakʼ onare ar nạbikoakʼ olakʼre hõń pạtiạukʼ kana. Onko cetʼlekako asokʼkan onkage iń hõ Isorre noa as menakʼtińạ je, dhorom ar bedhorom sanamkoge arhõko jiwetʼ beretʼ ocokʼa. Onate iń do Isor ar manwako samaṅre jaoge ińakʼ bibek sapha dohoe reakʼ iń kurumuṭuyeda. “Ḍher bochor tayom iń do Jerusalemteń senlena jemon iń jạtren reṅgecʼ-orecʼ hoṛko ṭaka-poesateń goṛo daṛeako ar dãṛẽ hõ jemoniń samaṅ daṛeakʼ. Ado ińiń saphayen tayom tinre onań kạmikan tahẽkana unre onko do mundilreko ńelledińa. Ar iń ṭhen hoṛko hõ bako ṭhạurạulena se iń iạte jãhãn gulmal hõ baṅ hoelena. Menkhan Asiạ Prodesren adom Jihudiko do onḍeko tahẽkana. Onkoge am ṭhen hijukʼ reakʼ jạruṛ tahẽkantakoa ar iń dusiyiń reakʼ jãhãnakʼ tahen tako khan onkogeko dusikińạ. Se okoeko nonḍe menakʼko onkogeko men ocoge, maraṅ bạisi samaṅre tinreń teṅgo akan tahẽkana unre cetʼ dosko ńamletʼtińạ mente. Eken noa mitʼṭen reaṅko dusi daṛeạńạ, iń do onko samaṅre teṅgokate ãṭ aṛaṅteń roṛletʼ tahẽkana, ‘gocʼko do arhõko jiwetʼ beredokʼa ar noa reaṅge teheń ape samaṅre bicạr hoyokʼ kantińạ.’ ” Jisuakʼ hortetʼ reakʼakʼko Pheliks hõ bes okocʼtegeye baḍaekan tahẽkana. Uni do bicạr kạmi bondkateye menkeda, “Maraṅ subedar Lusiuse hecʼlen tayom iń do apeakʼ noa bicạriń chinḍạukatapea.” Uni do Pạul horhoye lạgitʼ subedare hukumadea, menkhan thoṛa sạdhin macha dohoye reakʼ hõe metadea. Ar Pạulren gateko hõ hecʼkate jemon jạruṛleka uniko sapʼ sorae. Ado thoṛa din tayom Pheliks do acʼren Jihudi bạhu Drusilla soṅgekateye hecʼena. Uni do Pạule hoho ạgu ocokedete uni ṭhen khon Jisu Mạsire pạtiạukʼ reakʼ kathae ańjomkeda. Pạul do tinre dhorom horte calakʼ reakʼ, apnar sambṛaokʼ ar darakan bicạr reaṅe lạiadea, unre Pheliks do botorenteye menkeda, “Ma ńitokʼ do calakʼme; arhõ okte nạpitreń hohoama.” Uni doe asokʼkan tahẽkana Pạul do nahakʼ ghuse emaea. Onate ghane ghạṛicʼ Pạul hoho ạgukate uni tulucʼe galmaraokan tahẽkana. Ado bar bochor paromen khan Pheliks bodol Porkius Phestuse bahalena. Ar Pheliks do Jihudiko kusi ocoko lạgitʼ Pạul do hajotregeye doho oṭokadea. Ado Phestus ona ṭoṭhareye hecʼen khan pe din tayom Kạisạriạ khon Jerusalemteye rakapʼ calaoena. Unre maraṅ naekeko ar Jihudi mukhiyạko do uni ṭhen senkate Pạul birudreko lạlisadea. Onko do Phestus ạḍiko nehõradea jemon onkoreye dayakʼte Jerusalemte Pạule ạgu ocoye. Ona reakʼ karon do noage je, onko do horre tãṛãkʼkate Pạul goje reakʼko soṛojontrokan tahẽkana. Unre Phestuse menkeda, “Pạul do Kạisạriạ reakʼ hajotre menaea ar iń do usạrage onḍeń calakʼkana. Ar aperen adom ektiạrianko do iń sãoteko calakʼma ar uni hoṛ jãhãnakʼe dosakatʼ khan onakoko udukʼạńma.” Phestus do onko talare irạl se gel din tahẽkate Kạisạriạteye ruạṛ calaoena. Ar dosar hilokʼ uni do bicạr duṛupʼakʼreye duṛupʼente acʼ samaṅre Pạul ạguye lạgitʼe hukumkeda. Ar okoe Jihudiko Jerusalem khonko hecʼakan tahẽkan onko do Pạul onḍeye hecʼen khan uni beṛhaeteko teṅgo ạcurena ar ạḍi okocʼko dusikedea, menkhan onako reakʼ jãhãn porman do bako em daṛeada. Unre Pạul doe roṛ dokʼenteye menkeda, “Iń do Jihudikoakʼ ạn-ạri se mundil se Rom maharaj birudre jãhãnakʼ bạń behok akada.” Khan Phestus do Jihudiko kusi ocoko lạgitʼ Pạule metadea, “Noako dos reakʼ Jerusalemre jemoniń bicạr daṛeakʼ ona lạgitʼ cetʼ onḍe calakʼem khaṛagea?” Unre Pạul doe menkeda, “Iń do ńitokʼ Kạisạrakʼ bicạr duṛupʼakʼ samaṅreń teṅgo akana ar Rom sorkar ṭhen bicạr ocokʼge lek kantińạ. Am hõ bes okocʼtem baḍaegea je, Jihudiko cetanre jãhãn behokakʼ do bạń kạmi akada. Ar gujukʼ lek kạnạń mente jãhãnakʼ iń dos akatʼ khan iń do gujukʼ hõń rạjigea. Menkhan noko Jihudiko iń birudre okaṭakʼ dosteko dusiyedińkan ona judi sạriakʼ baṅ hoelen khan enḍekhan onko tire aṛakʼkạń reakʼ ektiạri do okoeakʼ hõ bạnukʼa. Iń do Kạisạrgeń dohaeae kana.” Khange Phestus do acʼren sopolhako tulucʼ solhakateye menkeda, “Am do Kạisạrem dohae akawadea; Kạisạr ṭhengem calakʼa.” Ado niạ thoṛa din tayom Jihudikoren Ạgrippa raj ar acʼren bạhu Bernike do Phestus johar emae lạgitʼ Kạisạriạtekin hecʼena. Ar ḍher din onḍekin tahẽkante Phestus do Pạul reaṅ raje baḍae ocokedea. Uni doe menkeda, “Pheliks do mitʼṭen hoṛ hajotreye doho oṭoakadea. Iń do tinre Jerusalemteń senlena unre maraṅ naekeko ar Jihudikoren mukhiyạko nui hoṛ birudre ạḍi okocʼko lạlisadiń tahẽkana ar sạjại emae lạgitʼko nehõradiń tahẽkana. “Iń do onkoń metatʼko tahẽkana, ‘jãhãe hoṛ birudre jãhãeye lạlis khan enḍekhan okoeko lạlis akatʼ onko samaṅre bin dusạn sạbudokʼ reakʼ ạt ạuriye ńam hạbicʼ sạjại emae do Romikoakʼ niạmre bạnukʼa.’ “Ado onko Jihudiko iń sãoteko hecʼen khan begor bilomte dosar hilokʼge bicạri lạgitʼ iń duṛupʼena ar uni hoṛ ạguye reakʼ iń hukumkeda. Ar okoe hoṛko uniko dusiyedekan tahẽkan onko do katha roṛ lạgitʼko teṅgoyen khan okań hudisetʼ tahẽkan onkan jãhãnakʼ do bako lạlisleda, Menkhan akoakʼ dhorom leka mitʼṭen gocʼen Jisu reaṅko dusikedea. Ar Pạul ńutuman uni hoṛ do jorkateye menetʼ tahẽkana je, Jisu do jiwetʼge menaea. Ar noako babotre cekateń tojbija ona bạń bujhạuletʼte uniń kulikedea, noako dusi reakʼ jemonem bicạrokʼ, onate Jerusalemte calakʼem khaṛagea se baṅ. Menkhan maharajakʼ ṭhen bicạr ocokʼ lạgitʼe dohaeketʼ khan uni ṭhen ạuri kolkae hạbicʼ horhoye reakʼ iń hukumakada.” Unre Agrippa do Phestuse metadea, “Iń hõ uni hoṛ reaṅ ańjom sanayediń kana.” Phestuse menkeda, “Gapagem ańjomtaea.” Dosar hilokʼ Agrippa raj ar Bernike do maraṅ subedarko ar nagraharen manotan hoṛko sãote ạḍi ṭhosok sajkate bạisitekin boloyena. Ar Phestuse hukumketʼ khan Pạul do onḍeye ạgu ocoyena. Unre Phestus doe menkeda, “E Agrippa raj ar nonḍe menakʼpe sanamkoge, ape do nui hoṛpe ńelekana; nui reaṅ Jihudiko do, Jerusalemre ar Kạisạriạre iń ṭhenko lạlis akada ar hohoateko menetʼ tahẽkana, nui hoṛ do jiwetʼ tahen lek doe baṅkana. Menkhan ińiń ńelakada, nui hoṛ do gujukʼ sạjại emae leka jãhãnakʼ bae dos akada. Ar tinre uni do Kạisạre dohae adea unre maharaj ṭhen kolkae lạgitʼ iń goṭakeda. Menkhan maraṅ maharaj ṭhen olokʼ leka nonkan cetʼge bạń ńamleda. Onate iń do Agrippa raj ar sanamko samaṅreń ạguakadea jemonpe kuliyete ol lạgitʼ jãhãnakʼ iń ńam daṛeakʼ; ente iń bujre jãhãe kạidi hoṛ calane jokhecʼ uni upạrte lạlis reakʼ karon udug do jạruṛgea.” Unre Agrippa do Pạule metadea, “Apnar reaṅ roroṛiń aṛakʼam kana.” Unre Pạul do ti tiạrkate acʼ reaṅ noa kathae roṛkeda, “E Agrippa raj, Jihudiko okako dusi akadiń ona birudre am samaṅre katha roṛ reakʼ ạtiń ńamketʼte bhạganiń bujhạukʼ kana, am do Jihudikoakʼ cạliko ar reṭe peṭekʼkan reaṅakʼko bes okocʼtegem baḍae kana. Onate jiwi hataṛkate ińakʼ kathako ańjom lạgitʼ biseskaeteń nehõram kana. “Iń do gidrạ khonge, metakʼme ińakʼ jion reakʼ pạhil khon ińakʼ disạmre ar tayomte Jerusalemren hoṛko talare cetʼlekan jioniń khemaoetʼ tahẽkan ona do sanam Jihudikoko baḍaegea. Onko do ḍher din khonge ińko orom akadińạ ar goha emokʼko menle khan noako emdaṛeakʼa je, iń do aleakʼ dhoromre Phạrusiko ńutuman okaṭakʼ dol menakʼ ona Phạrusi dhorom leka jioniń khemaoetʼ tahẽkana. Isor do aboren hapṛamko ṭhen okaṭakʼe gokʼletʼ tahẽkan onareń asokʼkante ńitokʼ ińakʼ bicạr hoyokʼkantińạ. Aleren gelbar khũṭren hoṛko do siń-ńindạ mon ar ontorte Isor sewawaete ona gokʼakʼ reakʼ purạukʼtetʼ ńel reakʼ asre menakʼkoa. E maharaj, ona as iạtege Jihudiko do ińko dusiyediń kana. Isor gocʼkoe jiwetʼ beretʼko noa katha do cedakʼ bape pạtiạuakʼ kana? “Iń do apnargeń pạtiạukʼkan tahẽkana, Nasaretren Jisu birudre okań daṛeakʼ ona jotoge kạmi lek tińạ mente, ar ṭhik onkage Jerusalemre hõń kạmiletʼgea. Maraṅ naekeko ṭhen khon ektiạri ńamkate Mạsire pạtiạukʼkan ḍherkoge hajotreń bhoraoletʼkoa ar onko gocʼ ocokore hõ rạjigeń tahẽkana. Onko sạjạiko lạgitʼ mitʼ sunạgog khon eṭakʼ sunạgog hạbicʼ iń calakʼkan tahẽkana ar Jisu birudre katha roṛ lạgitʼ iń jormoṭetʼko tahẽkana. Onko cetanre nunạkʼ ãṭ raṅgao tahẽkantińạ je, onko khedko lạgitʼ bides reakʼ nagrahako hạbicʼ hõń calakʼkan tahẽkana. “Nonkage mitʼ dhao maraṅ naekeko ṭhen khon ektiạri ar hukum ńamkate Damesekteń calakʼkan tahẽkana. Menkhan E maharaj, unre tikin okte tahẽkana. Ar horre siń cando khon hõ bạ̃ṛti jhak jhak mitʼṭen marsal serma khon iń ar iń sãotenko beṛhaete bamberena. Unre ale sanamkoge otrele bhindạṛena ar iń do mitʼṭen aṛaṅ Ibri pạrsite mitạń kaniń ańjomkeda, ‘E Sạul, E Sạul, cedakʼem khedeń kana? Jạnum bạisạu akatʼ ṭheṅgare kolsaete apnarakʼge cetʼ bam loksaneda?’ “Unreń menkeda, ‘E Probhu okoe kanam?’ “Probhui menkeda, ‘iń doń Jisu kana, onem khedeńkan. Ma ńitokʼ do beretʼme ar amakʼ jaṅgate teṅgokʼme. Sapʼ sosoricʼ ar goha lekate bahalme lạgitʼge iń do am ṭheniń ńelocoyena. Ar cetʼlekam ńelkedeń ar okaṭakʼ iń udukʼ am ona do eṭakʼko ṭhenem lạiya. Iń do amren hoṛko ar boṅgan hoṛ jạtrenkoakʼ ti khoniń rukhiyạmea. Onkoakʼ mẽtʼ saṛ ocoetako lạgitʼ ar ńut khon marsal secʼ ar Soetanakʼ ektiạri khon Isor secʼ ruạṛko lạgitʼ onko ṭheniń koletʼmea, jemon ińreko pạtiạukʼte kại reakʼ ikạko ńam ar Isor lạgitʼ okoeko begar ocoakan onko talare bakhrako ńam.’ “E Agrippa raj, onate serma khon noa dorson hotete okakoń men ocoakan ona doń batao ạguakada. Damesekre okoe menakʼko pạhilre onko ṭhen, ar ona tayom do Jerusalemrenko ar goṭa Jihudirenko ar boṅgan hoṛ jạtrenko ṭhen hõń porcar akada je, onko do kại khon mon ạcurkate Isor secʼ ruạṛokʼ lek takoa, ar nonkan kạmi lek takoa one okaṭakʼte sạbudokʼ baṅma onko do monko ạcur akada mente. Onatege Jihudiko do mundilre sapʼkate gojeń reakʼko kurumuṭuyetʼ tahẽkana. Menkhan Isor do teheń hạbicʼe goṛo akawạdińa ar onate nonḍe teṅgokate kạṭicʼ lạṭu sanamko ṭhen gohań emeda. Nạbiko ar Mose hõ okaṭakʼ hoyokʼgea menteko roṛakatʼ ona bahre do cetʼ hõ bạń roṛeda. Ar ona katha do hoyokʼkana, Mạsi do duk jojom hoyokʼtaea ar unige pạhilre gocʼko khone jewetʼ beredokʼte acʼ jạtrenko ar boṅgan hoṛ jạtrenko ṭhen marsalakʼ rajosṭi reaṅ lại jạhir hoyokʼtaea.” Ado Pạul nonkae roṛ dogokʼkan tahẽkanre Phestus do tạkicʼ daramkedete ãṭ aṛaṅteye menkeda, “E Pạul, am dom pagla akana. Ente ḍher bidiyạm hameṭ akada ar ona bidiyạgeye pagla oco akatʼmea.” Unre Pạule menkeda, “Manotan Phestus, iń do bạń pagla akana. Okań roṛetʼkan ona do sạriakʼ ar soteteakʼ kathageń roṛeda. Ente raj do noakoe baḍaegea ar iń do uni sãote sohosateń roṛ daṛeakʼa. Noa katha do khạṭigeń baḍaea je, noako mod khon okaṭakʼ hõ uni khon do baṅ okoakana, ente danaṅre noako do baṅ hoeakan. E Agrippa raj, am do cetʼ nạbikoakʼ katha rem pạtiạukʼ kangea? Ińiń baḍaea pạtiạuatako kangeam.” Khange Agrippa do Pạule metadea, “Am do cetʼ thoṛa okterege Isạiyiń lạgitʼem kurumuṭuyeda?” Pạule menkeda, “Thoṛare hõ se ḍherre hõ, iń do Isor ṭheniń koejoṅ kana, eken am eskar do baṅ bickom teheń tinạkʼ do ińakʼ kathako ańjometʼkan onko sanamko jemon iń lekako hoyokʼ, eken noa sikṛi chaḍa.” Unre raj doe beretʼena ar uni sãote disạm cakʼlaoicʼ Phestus ar Bernike ar onko sãote okoeko duṛupʼ akan tahẽkan onko sanamko hõko teṅgoyena. Ona tayom onko do ona oṛakʼ bạgikateko calaoena ar ako ako talare memenko ehopʼena, “Nui hoṛ do gocʼ ocokʼ se hajot ocokʼ leka cetʼ hõ bae ceka akada.” Ar Agrippa do Phestuse metadea, “Nui hoṛ do Kạisạr aloe dohaeae khane aṛakʼ ocokokʼgea.” Ado jahajte Itạliạte idileko goṭaketʼ khan Pạul ar eṭakʼ adom kạidiko do Julius ńutuman mitʼṭen subedarakʼ tireko jimạkatʼlea. Julius do maharaj Agustus palṭonko modren mitʼṭen subedare tahẽkana. Ale do Adramuttium bondorre mitʼṭen jahajre decʼkatele mohnḍayena. Ona do Asiạ reakʼ eṭakʼ eṭakʼ bondorkote calakʼ lạgitʼ sapṛaoge tahẽkana. Makedoniạ disạmren Thessalonikiạ nagraharen Aristarkhos hõ ale sãoteye tahẽkana. Dosar hilokʼ aleakʼ jahaj do Sidonrele teṅgokeda. Julius do Pạul sãote ạḍi mońje beoharkeda ar cerṭhakʼ lạgitʼ uniren gateko ṭhene sen ocoadea jemon acʼren gateko jạruṛokʼakʼ jiniskoko emdaṛeae. Ado onḍe khon arhõ jahajko laṛaoketʼtalea. Menkhan samaṅ secʼ khone hoyetʼ tahẽkante ale do Kupros dip aṛetele calao idiyena. Tayomte Kilikiạ ar Pamphuliạ aṛeteakʼ doreão paromkate Lukiạ Prodes reakʼ Murạ nagrahatele seṭerena. Onḍe Subedar do Alekasandriạ reakʼ mitʼṭen jahaje ńamkeda. Ona jahaj do Itạliạ disạmte calakʼkan tahẽkante uni do ona jahajre aleye decʼketʼlea. Aleakʼ jahaj do ḍher din hạbicʼ bại bạite calao idiyente ạḍi kosṭote Knidos nagraha sorle seṭerena, menkhan hoe do ar bae laha ocoatʼlea. Unre ale do Krete dip aṛete Salmone muhạ muhile calao idiyena. Ar doreão aṛe aṛetele calao idiyente bhage bondorko metakʼ mitʼṭen jaegarele hecʼena. Ona sorrege Lassaea nagraha do tahẽkana. Ado nonkate ḍher din parom calaoena. Ar upạs dinko paromente rabaṅ din hõ sor akan tahẽkana. Unre jahajte dãṛãn do muskilge hoyentalea. Onate Pạul do jahajren hoṛko sontorko lạgitʼe metatʼkoa, “E ho ńelpe, ińiń ńeletʼkana noa dãṛãnre ạḍi loksan hoyokʼ tabona. Ona loksan do eken jahaj ar mal-jal reakʼ do baṅ, aboakʼ jiwi hõ loksanokʼ tabona.” Menkhan subedar do Pạulakʼ katha bae luturatʼte jahaj calaoicʼ ar mạlikakʼ kathae ańjomkeda. Ona bondorre rabaṅ din khemao lạgitʼ lek lekan jaega baṅkante ḍher hoṛgeko goṭakeda je, onḍe khon mohnḍakate hoedaṛeakʼ khan Phoenikiạte senkate rabaṅ dinko khemaoa. Phoenikiạ do Krete dipre jahaj teṅgoe reakʼ jaega tahẽkana. Noa jaegare dạkhin pạchim ar utạr pạchim secʼ do phaelaoge tahẽkana. Ado tinre dạkhin khon hisitʼ hisitʼ hoeye ehopʼkeda unre onko doko hudiskeda ako okako khojkan tahẽkan onage hoeakana mente. Onate jahaj reakʼ loṅgorko rakapʼkeda ar Krete dip aṛe aṛeteko laha idiyena. Menkhan thoṛa tayom khange ona dip khon Eurakolonko metakʼ mitʼṭen kajak hoe ehopʼena, ar jahaj do ona hoere paṛaoena. Hoe iạte samaṅ secʼ do bale laha daṛeada; onate laha idikʼ kurumuṭu baṅkate jahaj do hoe rele ḍombol ocoada. Ar Klạudako metakʼ mitʼṭen kạṭicʼ dip oka secʼ do hoe baṅ tahẽkan ontele calao idiyena ar jahajre okaṭakʼ lạukạ tahen ona do ạḍi kosṭote rạpudokʼ khonle rukhiyạkeda. Hoṛko do jahajre onako or rakapʼketʼ khan barahikote jahaj reakʼ kholko tolkeda jemon ona reakʼ toktako alo begarokʼ. Ar Surtisko metakʼ doreão reakʼ bạl gadare gạḍiạukʼ botorte badamko raṛa pheḍketʼte jahaj do hoere ḍombolokʼ lạgitʼko aṛakʼada. Ar birbãote aleakʼ jahaj do nonka sokojokʼ ehopʼena je, dosar hilokʼ hoṛko do jahaj reakʼ bojhako dakʼreko giḍikada. Tesar hilokʼ hõ onko do akoakʼ tite jahaj reakʼ jisinkoko giḍikada. Ar ḍher din hạbicʼ siń cando se ipilko celege bako ńel ńamlena ar botorgeye hoe idiyetʼ tahẽyena. Ar mucạtʼre bańcaokʼ reakʼ as do cabayentalea. Hoṛko ḍher din khon cetʼge bako jomakatʼ tahẽkante Pạul do onko samaṅre teṅgoyenteye menkeda, “E ho, ape do ińakʼ katha ańjomkate Krete dip khon jahaj baṅ laṛaoge boge tahẽkantapea. Enḍekhan noa muskil ar loksanre do ohope paṛaolena. Menkhan ńitokʼ iń nehõrapekana, monre dil dohojoṅpe, ente ape modren okoe hõ bape gujukʼa; eken noa jahaj chaḍa. Ente ińiń okoeren kan ar okoeyiń sewawaekan uni Isorren mitʼṭen goḍet do ńindạ iń pheḍre teṅgoyenteye metadińạ, ‘E Pạul, alom botorokʼa. Am do Kạisạr samaṅre teṅgokʼ hoyokʼtama. Ar noa jahajre tinạkʼ do am sãoteko calakʼkan onko sanamkoakʼ jiwi Isor do dayateye dan akawatʼmea.’ Onate monre dil joṅpe. Isorre noa pạtiạu menakʼtińạ je, uni okae menakawạdiń ona do hoyokʼgea. Ar abo do oka dipre coṅ bon ḍhaṅokʼa.” Ale do Adriạ doreão cetante onkage calakʼtegele tahẽyena. Ar gelpon mãhã hilokʼ tala ńindạ okte jahaj calaoko doko onmankeda je, ghuṭu sorko hecʼakana mente. Onko do soṅkateko ńelkeda onḍe do irạlgel moka khạndri dakʼ tahẽkana. Arhõ thoṛa tayomko soṅkeda, onḍe do turui gel moka khạndri dakʼko ńamkeda. Ado dhirire bajaokʼ botorte jahaj reakʼ tayom secʼ khon ponea loṅgorko caḍokeda ar siń marsal lạgitʼ koejoṅko ehopʼena. Ar jahajren nạbiko do jahaj khon dạṛ reakʼko kurumuṭuketʼte samaṅ secʼ khon loṅgor caḍoea mente jahaj reakʼ lạukạ doreãoreko pheḍkeda. Unre Pạul do subedar ar palṭonkoe metatʼkoa, “Noko nạbiko jahajre bako tahen khan rukhiyạ ohope ńamlea.” Khan palṭonko do lạukạ reakʼ barahikoko samakʼ topakʼketʼte dakʼreko aṛakʼgotʼkada. Ado ạuri marsalokʼre Pạul do sanamko thoṛa jom lạgitʼ nehõratʼkoteye metatʼkoa, “Teheń gelpon din hoyokʼ kana, ar cetʼ hoyokʼa baṅ hoyokʼa ona reakʼ bhabnate upạsge menakʼpea ar cetʼge bape jom akada. Menkhan ńitokʼ do thoṛa jom reakʼ iń nehõrape kana. Ente bańcao tahen lạgitʼ jojom jạruṛtapea. Ente, apeakʼ bohokʼ reakʼ mitʼṭen upʼ hõ baṅ nosṭokʼtapea.” Ado noa katha menkate Pạul do piṭhạ hataokate onko samaṅre Isore gun manao joharadea ar ona kecakʼkate jojome ehopʼena. Unre onko sanamko dilko ńamketʼ khan jojomko dhurạuena. Jahajre jotote ale do bar sae eae gel turui hoṛle tahẽkana. Ar sanamkoko jom biyen khan jahaj reakʼ hamal komao lạgitʼ joto guhum do doreãoreko giḍikada. Ado setakʼ bela ona jaega do bako ńel orom daṛeada, menkhan onko do mitʼṭen huḍiń macha doreãoko ńel ńamkeda one ona reakʼ aṛe do gitilte perecʼge tahẽkan. Unreko goṭakeda jahaj do ona aṛere idikateko ḍhaṅkakʼa. Onate onko do jahaj reakʼ loṅgorko getʼkate doreãoreko giḍikada ar hạl reakʼ tonol doko raṛakada. Inạ tayom hoe ńam lạgitʼ laha reakʼ badomko rakapʼkeda ar aṛe secʼ laha idiyente ona do gitilre ḍhaṅena. Ar jahaj reakʼ samaṅ secʼ gạḍiạu uricʼente teṅgo hapeyena ar ḍheoko reakʼ tạpiste jahaj reakʼ tayom secʼ do rạpudokʼ ehopʼena. Unre palṭonko do kạidiko gocʼko reakʼko goṭakeda jemon onko modre okoe hõ paera oḍokokʼte aloko dạṛ daṛeakʼ. Menkhan subedar do Pạul bańcaoe lạgitʼ mon tahẽkantaete palṭonko akoakʼ sana leka bae kạmi ocoatʼkoa. Uni doe hukumkeda okoe paerakʼko baḍae onko do pạhilre jahaj khon don pheḍokʼte guṭuteko rakabokʼma, ar sarecʼko do jahaj reakʼ tokta se eṭakʼ jãhãnakʼ kaṭ kuṭrạ sapʼkateko paera rakabokʼma. Ar nonkate sanamko nirạite ghuṭuteko rakapʼena. Ado nirạite ghuṭutele rakapʼen khan ona do Malṭa dip kana mentele baḍaekeda. Ona dipren hoṛko do ale sãote ạḍi mońjko beoharkeda. Unreye dakʼetʼkan tahẽkana ar rabaṅkan tahẽkante onko do seṅgel jolkate sanamkoko hohoatʼlea. Pạul do mitʼ bojha rohoṛ jhuriko samṭaokate seṅgelreye khadleketʼ khan seṅgel reakʼ lolote mitʼṭen bisan biń do ona bojha khone oḍokena ar Pạulakʼ tireye gerbitʼena. Ado Pạulakʼ tire uni biń ḍhilwạṅ akanko ńelkede khan ona dipren hoṛ doko menana, “Nui hoṛ doe khũniạhi kana ente doreão khone bańcaoenre hõ hokren bicạricʼ do jiwetʼ bae tahẽ ocoaekana.” Menkhan Pạul do uni biń seṅgelreye irci giḍikadea ar cetʼ hõ bae hạnlena. Hoṛko doko hudisetʼ tahẽkana uniakʼ hoṛmo do phulạkʼtaea se ackageye gocʼ bhindạṛokʼa nahakʼ. Menkhan ḍher ghạṛicʼre hõ unire cetʼge baṅ hoyokʼkanko ńelketʼ khan hudis ạcurenteko menkeda, “Uni doe deb kana.” Ona jaegare sorre Publius ńutuman mitʼṭen napṛakʼ hoṛ do jumidari tahẽkantaea. Uni do acʼakʼ oṛakʼteye idiketʼlea ar pe din hạbicʼ ạḍi mońjteye peṛaketʼlea. Unre Publiusren apattetʼ do ruạ ar amasateye jaṛao akan tahẽkana. Pạul do bhitrite uni ṭhene boloyena are koeadea ar capokedeteye bogekedea. Ado noa ghoṭna tayom ona dipren sarecʼ sanam rugiko hecʼkateko boge ocoyena. Onko do ạḍi lekateko manotketʼlea ar tayomte jahaj laṛao jokhecʼ aleakʼ jạruṛokʼakʼko bojha gotʼatʼlea. Niạ pe cando tayom ale do mitʼṭen jahajtele mohnḍayena. Ona jahaj do inạ diprege rabaṅ dine ṭalao akatʼ tahẽkana. Ona do Alekasndriạ nagraha reakʼ jahaj tahẽkana ar ona reakʼ bohokʼre jawa debakʼ muṭhạn tahẽkana. Ale do Surạkusre jahajle teṅgoketʼte onḍe pe dinle tahẽyena. Ar onḍe khonle monḍhayente Regiumrele seṭerena. Ar dosar hilokʼ dạkhin secʼ khone hoeyetʼ tahẽkante tesar hilokʼ do Puteolitele seṭerena. Onḍe do thoṛa biswạsi boehakole ńamketʼkoa. Onko do ako sãote mitʼ hapta tahen lạgitʼko nehõratʼlea. Nonkate ale do Romtele hecʼena. Onḍenko biswạsi boehako do aleakʼ hijukʼ reaṅko ańjom akatʼ tahẽkana. Ar horte ale sãote soṅgekʼ lạgitʼ onkoren adomko do Appius Haṭ, ar adomko do Pe Sạrại ato hạbicʼ ale daramko oḍok hecʼena. Khan noko hoṛko ńelte Pạul do Isore sarhaokedea ar acʼ hõ monre udgạue ńamkeda. Ar Romtele seṭeren khan Pạul do acʼ eskar mitʼṭen oṛakʼre tahen lạgitʼ hukume ńamkeda. Ar mitʼṭen palṭon do uniye pahrayede kan tahẽkana. Pe din tayom Pạul do onḍenko Jihudiko mukhiyạko mitʼ ṭhene hoho jarwaketʼkoa. Adoko jarwayen khan Pạul do onkoe metatʼkoa, “E ińren boehako, iń do abo jạtrenko se hapṛamkoakʼ cạli birudre cetʼge bạń ceka akada, enhõ Jerusalemre sapʼ ocokate Romikoakʼ tireń jimạ ocoakana. Arko kuli baṛakediń khan onko do aṛakʼkạńgeko menleda, ente gocʼ ocokʼ lek jãhãn cetʼ dosge bạń kạmi akada. Menkhan Jihudikoko roṛ daramketʼ khan maharaj Kạisạr dohaeae lạgitʼ jạruṛ hoyentińạ. Menkhan iń jạtren hoṛko jãhãnakʼ dusiko lạgitʼ do bạń hecʼakana. Onate iń do apeko sãote ńapamokʼ ar galmarao lạgitʼ iń khojkeda. Ar Israel jạtkoakʼ oka as menakʼ ona lạgitʼge iń do noa sikṛiteń tol ocoakana.” Unre Jihudi mukhiyạkoko metadea, “Jihudạ khon am reaṅ do jãhãn ciṭhige bale ńam akada. Ar boehako modren okoe hõ onḍe hecʼkate am reaṅ cetʼge bako baḍae ocoakatʼlea se jãhãn bạṛicʼ do bako roṛakada. Menkhan ale do amakʼ mon reakʼ kathakole ańjomtama, ente alele baḍaea joto jaegarege hoṛko do ona dol reakʼ birudre kathako roṛeda.” Onko do Pạul são ńapamokʼ lạgitʼ mitʼṭen dinko goṭakeda. Ar Pạul okareye tahẽkan onḍe do onko chaḍa arhõ aema hoṛko hecʼena. Unre Pạul do setakʼ khon ạyupʼ hạbicʼ Isorakʼ raj reaṅe galmaraoatʼkoa are bujhạuatʼkoa. Uni do Moseakʼ ạn-ạri ar nạbikoakʼ puthi khon hõ Jisu reaṅe bujhạu akokan tahẽkana. Ar uni okakoe roṛketʼ onate adomko doko pạtiạuena ar adomko do bako pạtiạulena. Pạulakʼ kathate ako talare katha baṅ jurilente onko do onḍe khonko calaoena. Adoko calakʼ lahare Pạule menkeda, “Sonot Jiu do Jesaea nạbi hotete aperen hapṛamko ṭhen ṭhikgeye roṛlakʼa, Noko hoṛ senkate metakom, ańjom dope ańjomgea, menkhan bape bujhạua, ńeńel dope ńeńelgea menkhan bape oroma. Noko hoṛakʼ ontor do goṛdhoyentakoa, lutur hõ tepetʼ akan takoa, ar mẽtʼ doko jạpitʼ akatʼtakoa, jemon mẽtʼte aloko ńeńel, luturte aloko ańjom, ar ontorte aloko bujhạu, ar bogekʼ lạgitʼ iń ṭhen aloko ruạṛ hijukʼ. “Onate baḍae joṅpe, Isorakʼ noa bańcao do boṅgan hoṛ jạtrenko ṭhen kol akana; onkoge ańjom hõko ańjoma.” Ar Pạul do purạ bar bochor acʼakʼ bhaṛa oṛakʼreye tahẽkana ar acʼ ṭhen bolokʼ sanamkogeye ataṅetʼko kan tahẽkana. Uni do sohosate ar bin akoṭte Isorakʼ raj reakʼe porcaretʼ tahẽkana ar Probhu Jisu Mạsi reaṅe cetʼakokan tahẽkana. Iń Pạul Jisu Mạsiren golam do Rom nagraharen biswạsiko ṭhen noa ciṭhiń oletʼkana. Isor do acʼren apostol hoyokʼ lạgitʼe hoho akawạdińa ar uniakʼ bhage sombat porcar lạgitʼ hõe bachao akadińạ. Isor do acʼren nạbiko hotete sonot sostorkore noa bhage sombat reakʼ laharegeye gokʼ dohoakatʼ tahẽkana. Ona bhage sombat do hoyokʼ kana acʼren Hopon reaṅge. Ar uni Hopon kangeae Jisu Mạsi, ar aboren Probhu do. Hoṛmo secʼ lekate uni do Dạud bõsrengeye tahẽkana, ar acʼren sonot Jiute uni do maraṅ daṛe salakʼ gocʼko khone jiwetʼ beretʼente Isorren Hopon menteye sodorlena. Uni hotete ar uniakʼ ńutum iạte ale do daya ar apostol hudạle ńamakada, jemon sanam jạtren hoṛko pạtiạukʼte Isorakʼko bataotae. Onko hoṛko modre ape hõ menakʼpea. Jisu Mạsiren hoṛ hoyokʼ lạgitʼ Isorge ape doe hoho akawatʼpea. Rom nagraharen okoeko hoṛ do Isore dulạṛetʼko ar acʼren hoṛ hoyokʼ lạgitʼe hohoakatʼko, onko sanamko ṭhen, metakʼme ape ṭhenge iń do noa ciṭhiń oletʼkana. Aboren Isor Baba ar Probhu Jisu mạsi doe mãyã apema ar suluke dan apema. Pạhilrege iń do Jisu mạsi hotete ape sanamko iạte ińren Isoriń gunmanao joharae kana, ente apeakʼ biswạs reakʼ katha do goṭa dhạrtire pasnao akana. Isorren Hopon reaṅ bhage sombat porcarte ińakʼ goṭa ontorte iń do Isoriń sewawae kana. Iń do tinạkʼ dhaoiń koejoṅkan unạkʼ dhaoge apeń disạ akatʼpea, ar onaren goha do unige. Ińakʼ koejoṅ do noage, jãhã lekate Isor reakʼ monete jemon ape ṭheniń sen daṛeakʼ. Ar ape daṛe ocope lạgitʼ jemon jãhãn Jiuanakʼ daya daniń em hạṭiń daṛeape onate ape tulucʼ ńapamokʼ iń menjoṅ kana. Noa do hoyokʼ kana, abo sanamko jemon apan ạpin biswạs khon udgạu bon ńam. E boehako, noa katha baḍaepe, ḍher dhao ape ṭhen calakʼ sanaledińre hõ ńit hạbicʼ akoṭakʼko do hecʼạń kangea. Cetʼleka eṭakʼ eṭakʼ jaegakore boṅgan hoṛ jạtrenko talare porcarkate jo iń ńamakatʼ, onkage apeko talare hõ thoṛa jo ńam reakʼ aste ape ṭhen calakʼ iń menjoṅ kana. Sobbho ar osobbhoko, akelanko, bebujko ar sanamko ṭhenge iń do rinakatʼ hoṛ leka kạnạń. Onate okoe Romre menakʼpe ape ṭhen hõ Jisu Mạsi reaṅ bhage sombat jạhirape lạgitʼ doń khaṛagea. Jisu Mạsi reaṅ noa bhage sombat iạte iń do bạń lajaokʼ kana, ente noa bhage sombat do Isorakʼ daṛe kana one oka hotete uni do sanam biswạsiko kại khone bańcaoko. Pạhilte do Jihudiko, ar ona tayom do boṅgan hoṛ jạtrenkoge. Isor manwako cetʼlekate dhorom menteye ataṅko ona do bhage sombat hotete sodor akana. Etohopʼ khon mucạtʼ hạbicʼ pạtiạu hotetege manwa do eken dhorom menteye ataṅ ocokʼa. Sonot sostorre olakana; “Dhoromicʼ do pạtiạu hotete jione ńama.” Manwa do Isorakʼ sạriakʼtetʼ bedhoromteko ten esetʼeda, onate sanam bebhokti ar sanam bedhorom kạmiko iạte serma khon Isorakʼ edre do manwakore sodorokʼ kana. Isor reaṅ oka baḍaeyokʼakʼ ona do manwako ṭhen pusṭạugea, ente Isor acʼtetʼge onko ṭhen onae sodor akada. Isorakʼ oka gun mẽtʼte baṅ ńelokʼkan, metakʼme uniakʼ jaejug reakʼ daṛe ar uniakʼ Isortetʼ do sirjon reakʼ etohopʼ khonge pusṭạute sodorgea. Uniakʼ sirjon khonge manwa do bes okocʼte onako ńel oromeda arko bujhạu daṛeakʼ kana. Niạ tayom manwakoakʼ do ar jãhãn ạnḍuṅteakʼ baṅ tahena. Manwa do uni reakʼakʼko baḍaekatere hõ Isor mente bako mạhimawadea, ar bako gunmanao joharadea. Onkoakʼ hudisjoṅakʼko do ạuṛiakʼena ar onkoakʼ bebuj ontor do ńutte perecʼ akana. Onko do akote akelan hoṛ menteko lạiạgokʼkanre hõ asokaete onko doko lelhagea. Jaejug ṭhonokte perecʼicʼ Isor sewa bạgikate onko do manwako, cẽṛẽko, janwarko ar leńokʼ ṭunḍạṅokʼkoakʼ muṭhạnko sewawakʼ kana. Onate Isor do manwako akoakʼ ontor reakʼ bạṛicʼ sana ar hirkhạwakʼ kạmi lạgitʼe aṛakʼatʼkoa. Onate onko do ako akore hirkhạwakʼko kạmikante akoakʼ hoṛmoko bemanoteda. Isorakʼ sạriakʼtetʼ bạgikate eṛeakʼko ataṅ akawana. Sisirjạuicʼ bạgikate uniakʼ sirjạuakʼko sewawakʼ kana, menkhan sanam mạhima do jaejug hạbicʼ uni sisirjạuicʼakʼ kangea. Amen. Manwa noakoko kạmi akatʼte Isor do lajaote perecʼ rij roṅreye soprotkatʼkoa. Ente maejiuko do herel tulucʼ baṅkate eṭakʼ maejiuko tulucʼ bạṛicʼ ar lajao paṛaoakʼ kạmiko kạmi kana. Onkage herel hõ maejiuko baṅkate herel tulucʼ rij roṅteko jaljalaokʼ kana; ar herel do herel tulucʼ lajao paṛaoakʼ bạṛicʼ kạmiko kạmikana. Onate onko mitʼke mitʼ hoṛ do akoakʼ bạṛicʼ kạmi reakʼ sạjại akoregeko ńameda. Nonkate manwa do Isor bako manaoedete Isor hõ kại monreye soprotkatʼkoa, ar onatege manwa do be ṭhikakʼko kạmikana. Jotolekan bedhorom, dusṭạmi, laloc, nicạṛakʼ, hiskạ, khũn, kạphạriạu, eṛe ar eṭakʼkoakʼ loksan tako reakʼ sanateko perecʼ akana. Onko do eṭakʼ hoṛ reaṅko cuglia, eṭakʼkoakʼko oktawa ar Isorko hirkhạwaea. Onko do raṅgaokʼko, usul monanko ar bạḍạiko kanako. Bedhorom kạmi lạgitʼ nawa nawa ponthako ńamtotʼeda. Onko do go-baba bebataoko kanako, boge bạṛicʼ papachnao reakʼ akel bạnukʼtakoa, bepạtiạrko kanako. Gharońjrenko lạgitʼ dulạṛ do bạnukʼtakoa, enteko kumãyãgea. Isorakʼ bicạr reakʼ katha mońjtegeko baḍaea je, okoe nonkanakʼko kạmi onko do gujukʼ sạjại lek kanako mente. Ar noa katha baḍaekate hõ eken niạgeko kạmikana ona do baṅ, bickom eṭakʼko hõ onkan kạmi lạgitʼko sãhãkʼako kana. Jãhãege noa iạte eṭakʼkoe dusiko enḍekhan uniń metaea, amakʼ ạnḍuṅteakʼ do okortam? Am do eṭakʼkom dusiyetʼkore apnarge cetʼ dusi mente bam sạbudokʼ kana? Ente eṭakʼko dom dusiyetʼkoa menkhan am do onagem kạmikana. Baḍaegea bon okoe nonkanakʼko kạmikan Isor do onko hok reakʼgeye bicạrkoa. Oka kạmi lạgitʼ eṭakʼkom dusiyetʼko ona kạmige am hõm kạmiyetʼ khan enḍekhan cetʼ Isorakʼ sạjại khonem paskao daṛeakʼa? Am do Isorakʼ asambheṛ daya, sahao daṛe ar soborim neṅghaoetʼtaea. Am dom hiṛiń akada, Isorakʼ noa daya do kại khone ạcur ruạṛetʼmea mente. Menkhan amakʼ mon do keṭecʼgea; am do kại khon mon ạcur bam khojkana. Onate am do Isorakʼ edre tis sodorokʼ, enhilokʼ lạgitʼ amakʼ paona sạjạyem sõcjoṅkana. Ar unrege Isorakʼ dhorom bicạr do sodorokʼa. Uni do mitʼke mitʼ hoṛ akoakʼ kạmi lekae halawakoa. Okoe sombhuri salakʼ bhage kạmikote Isor ṭhen khon ṭhonok, man ar bin maraokʼ jionko khojkan, onkoge Isor do jaejug jione emakoa. Menkhan okoe akoakʼ sana lekako senokʼ, ar sạriakʼ baṅ bataokate bedhoromakʼko bataoetʼkan, Isor do onko ạḍi bạṛicʼe sạjạikoa. Okoe bạṛicʼakʼko kạmikan onko mimitʼko do duk saset ar santaoko ńama. Pạhilre Jihudiko, ar ona tayom do boṅgan hoṛ jạtrenko. Menkhan bhageakʼ kạmikanko do ṭhonok, man ar sulukko hameṭ joṅa. Pạhilre Jihudiko ar ona tayom do boṅgan hoṛ jạtrenkoge. Ente Isor ṭhen mẽtʼãhã beṅgetʼakʼ do bạnukʼ anaṅ. Moseakʼ ạn-ạri bahre tahẽkate okoeko kạiyetʼkan onko do begor ạntegeko nosṭokʼa. Menkhan okoe ạn bhitrire tahẽkateko kạiyetʼ onkoakʼ bicạr do ạn hotetege hoyokʼa. Okoe eken ạn reakʼ kathako ańjometʼkan onko do Isor samaṅre dhorom doko baṅkana, menkhan ạn lekate calakʼkankoge Isor do dhorom menteye ataṅkoa. Boṅgan hoṛ jạtrenko do Moseakʼ ạn bako ńamakada, menkhan enrehõ onko do apnar khonge ạn lekako kạmiyeda, ar ạn bako ńamakatʼre hõ onko do apnar lạgitʼ ạn kanako. Ente ạn lekate oka lekge ona do onkoakʼ ontorrege ol menakʼa. Ar onkoakʼ bibek hõ ona gohageye emetʼkana. Onkoakʼ hudisge oka oka jokhecʼ doe dusikoa, arhõ oka jokhecʼ doe onko sejokʼa. Oka hilokʼ Isor do Jisu Mạsi hotete manwakoakʼ okoakʼkoe bicạra enhilokʼge ona do sodorokʼa. Ar okaṭakʼ bhage sombatiń porcaretʼkan ona lekage bicạr do hoyokʼa. Am do apnarte Jihudiyem ńumogokʼ kana? Am do Moseakʼ ạn-ạrikorem hirlạ joṅkana ar apnarte Isorren hoṛ mentem gorbokʼ kana. Isor okae khojkan ona dom baḍaegea ar okaṭakʼ bhageakʼkan ona dom aṅgoceda, ente ạn-ạri khonge ona sikhnạt dom ńamakada. Am dom hudiseda kãṛãko horem udukʼ akokana. Ar ńutre okoe menakʼko onko ṭhen do marsal lekam hudisokʼ kana. Amakʼ hudisre, bebujko dom sudhrạuetʼkoa ar ạn-ạri reaṅ sikhạuna bako ńamakatʼ hoṛ dom cetʼako kana. Ạnre akel ar sạritetʼ menakʼ iạtege noako dom hudis aṭkareda. Bhagegea, eṭakʼ hoṛkom cetʼakokanre am do cedakʼ bam cetʼjoṅ kana? Am dom porcareda, “Alom kombṛoea,” Menkhan amge cetʼ bam kombṛoyeda? Am dom menetʼkana, “Alom laṭghaṭa,” Menkhan amge cetʼ bam laṭghaṭeda? Am ma murtikom hirkhạwako kan, menkhan amge cetʼ murtikoakʼ mundilte bolokate bam kombṛoyeda? Am do ạn-ạrikotem gorbokʼ kana, menkhan amge ạn bam bataoetʼte Isorge cetʼ bam opomanede kana? Sonot sostorre olakana, “Ape iạtege boṅgan hoṛ jạtrenko do Isorakʼ ńutumko opomanwakʼ kana.” Ạn-ạrikom senakʼkan khan enḍekhan khatna do porhoanakʼ kangea, menkhan ạn-ạri bam bataoetʼ khan khatna akanre hõm Isor samaṅre do bin khatna akan hoṛ lekanam. Onate jãhãe bin khatna hoṛ ạn-ạrikoe manaoetʼ khan enḍekhan Isor do cetʼ khatna akan hoṛ mente bae aṅgocea? Am ṭhen ma coṅ olakʼ ạnko menakʼge ar khatna hõm khatna ocoakange. Menkhan ạn-ạriko bam bataoetʼ khan okoe bin khatnare hõ ạnkoe manaoetʼ, uni do cetʼ ạn bam bataoetʼkante bae dusimea? Eken bahre secʼte okoeye Jihudikan uni do khạṭi Jihudi doe baṅkana. Ar hoṛmo bahre secʼte khatna akanicʼ hõ khạṭi khatnayicʼ doe baṅkana. Menkhan ontorte okoe doe Jihudikan uni kangeae khạṭi Jihudi. Ar khạṭi khatna akan reakʼ kạmi hõ ontorrege hoyokʼa. Ona do sonot Jiu reakʼakʼko kana, olakʼ ạnko pańjae reakʼ do baṅkana. Nonkan hoṛ do manwa secʼ khon sarhao bako ńama, menkhan Isor khon sarhao doko ńamgea. Ar onkage hoyokʼ khan enḍekhan Jihudikoakʼ do bises cetʼ porho hoeakana? Ar khatnakʼ reakʼ porho baṅ cetʼkan? Joto secʼ khonge porhowanakʼ hoeakana. Pạhilte Isor do acʼakʼ katha Jihudikogeye ematʼko tahẽkana. Onko modre adom hoṛ do bako pạtiạulena, menkhan onate do cekayena? Onko bako pạtiạu akan iạte Isor hõ cetʼ bepạtiạricʼe hoyokʼa? Khạṭige baṅa. Sanam manwako eṛegere hõ Isor do jao okteye sạrigea. Sonot sostorre ol menakʼa, jemon amakʼ kathakore dhoromem ṭarhaokʼ arem bicạrokʼre dom jitạukʼ. Menkhan aboakʼ behokakʼ kạmiko khon arhõ pusṭạute bujhạukʼ kana, Isor do jaoge hok reakʼe kạmikana. Enḍekhan cetʼ bon menkea, aboe sạjạiyetʼ bonre uni doe behokeda? Iń do manwa lekateń roṛeda, sạrige uni do tishõ bae behoka. Isorre behokle khan enḍekhan cekate uni do manwakoakʼe bicạra? Jãhãeye menkea, “Ińakʼ eṛe roṛ iạte Isorakʼ sạritetʼ do arhõ bes okocʼte sodorokʼ kana. Ar noate Isore mạhimakʼkan khan kại hoṛ mente cedakʼ iń doń dusi ocokʼ kana?” Enḍekhan cetʼ noa katha bon mena, “Dela, bạṛicʼakʼ bon kạmi idima jemon bạṛicʼakʼ hotete bhageakʼ hoyokʼtabon?” Adom adom hoṛko nisṛạuetʼbona je, abo do nonkan kathage bon roṛ baṛayeda. Onko do akoakʼ sạjạiko ńamjoṅa. Enḍekhan ńitokʼ cetʼbon menkea? Jihudi lekate cetʼ boṅgan hoṛ jạtrenko khonle sorosgea? Baṅa. Ente laharege coṅle menakatʼ Jihudiko ar boṅgan hoṛ jạtren sanamkoge kại gobolren kanako. Sonot sostorre olakana, dhorom do okoe hõ bạnukʼkoa, mitʼ hoṛ hõ baṅ; okoe hõ sạriakʼ reakʼ akelte do bako calakʼ kana. Ar okoe hõ Isorakʼ sana leka bako kạmi kana. Sanamkoge sạri hor khonko ocokʼ akana, ar jotoge mitʼ sãoteko bạṛicʼ akana. Bhageakʼ kạmiko do okoe hõ bạnukʼkoa, mitʼ hoṛ hõ baṅa. Onkoakʼ moca do oṭakʼ akatʼ topa lekana, onko do alaṅte eṛeko roṛa, ar luṭire do bińakʼ bis menakʼtakoa. Onkoakʼ moca do sarap ar haṛhatʼte perecʼgetakoa. Khũn lạgitʼ jaṅga do usạrate lahakʼtakoa, onkoakʼ horkore do jarkhar ar harkhetge menakʼa. Suluk reakʼ hor onko do bako baḍaea, onko do Isor hõ bako botoraea. Baḍaegea bon Moseakʼ ạn do onko lạgitʼge one okoe do ona ạn gobolre menakʼko. Onate Jihudi ar boṅgan hoṛ jạtrenko okoe hõ jãhãnakʼ mementeakʼ do bạnukʼtakoa, sanam manwage Isor samaṅreko dusigea. Ạn-ạri manao lekhange Isor do manwa dhorom menteye ataṅkoa ona do baṅ, menkhan ạn hotetege manwa do acʼakʼ kại reaṅ cehaonae ńameda. Isor do manwako ạn begorte cetʼlekate dhorom menteye ataṅkoa ona do ńitokʼ sodor akana. Moseakʼ ạnre ar nạbiko hõ ona reaṅ gohako emakada. Okoe Jisu Mạsireko pạtiạukʼkan onkoakʼ ona biswạs hotetege Isor do dhorom mente onkoe ataṅkoa. Jihudi ar boṅgan hoṛ jạtrenko sanamgeko somangea, ente sanamkogeko kại akada ar Isorakʼ sarhao ńam lạgitʼko be lekgea. Menkhan Jisu Mạsi do manwa kại khon chaḍaoko reakʼe bondobos akada ar ona chaḍao hotete pạtiạukʼko do daya dan lekate dhorom menteye ataṅetʼkoa. Isor doe sodorakatʼ tahẽkana je, okoeko pạtiạukʼkan onko lạgitʼ Jisu Mạsi do acʼakʼ mãyãm hotete, metakʼme acʼakʼ jiwiye alaeketʼte uniye kusi ocokedea. Nonkate Isor doe udukʼ akada acʼakʼ sahao gun iạte manwakoakʼ lahateakʼ kại reakʼ sạjại bae emlenre hõ uni doe dhoromgea. Onate ńitokʼ sạbudokʼ kana je, acʼ cetʼlekae dhoromge onkage Jisure pạtiạukʼicʼ hõ dhorom menteye ataṅea. Niạ tayom manwa do gorbokʼ reakʼ ar cetʼ menakʼtaea? Cetʼhõ baṅa. Menkhan cedakʼ bạnukʼa? Manwa do ạnkoe manaoetʼkante gorbokʼ reakʼ cetʼge bạnukʼtaea? Ona do baṅa. Sạri katha do noa kana, biswạsre gorbokʼ reakʼ jaega do bạnukʼa, ente bon baḍaegea, Isor do biswạs hotete manwa do dhorom menteye ataṅea, menkhan ạn-ạriko manaote do baṅ. Isor do cetʼ eken Jihudikoren kangeae, boṅgan hoṛ jạtrenko doe baṅkana? Hẽ, uni do boṅgan hoṛ jạtkoren hõ Isor kanae, ente Isor doe mitʼ goṭengea. Uni do Jihudiko cetʼleka biswạs hotete dhorom menteye ataṅ akatʼko onkage boṅgan hoṛ jạtrenko hõe dhorom ocokoa. Noa biswạs iạte cetʼ ạn-ạriko bon mạutạyeda? Tis hõ baṅ, bickom ạn reakʼ katha sạrikana mente bon sạbudetʼ kana. Enḍekhan aboren mare hapṛam Abraham reaṅ do cetʼ bon menkea? Noa babotre uni do cetʼe ńelleda? Abraham do kạmiko iạte dhorom menteye ataṅ ocoakan khan enḍekhan uniakʼ gorbokʼ reakʼ do menakʼgetaea. Menkhan Isor samaṅre acʼakʼ gorbokʼ reaṅ cetʼge bạnukʼtaea. Sonot sostorre olakana; “Abraham do Isorakʼ kathareye pạtiạuena ar onate Isor do dhorom menteye ataṅkedea.” Kạmikate okaṭakʼ kuṛại ńamokʼ, ona do dan do baṅkana, menkhan paona kana. Menkhan okoe acʼakʼ kạmire bhorsa baṅkate eken Isorreye pạtiạukʼkan, Isor do uniakʼ biswạs iạte dhorom menteye lekhayea, ente unige kại hoṛ do dhorom menteye lekha daṛeaea. Dạud hõ onkan hoṛ do bhạganicʼe metaekana one okoe Isor do begor kạmitege dhorom menteye lekhayede; enkathae, bhạgangeako onko do, one okoekoakʼ bedhoromakʼko ikạ akantako, ar okoeakʼ kạiko dapal akantako. Bhạgangeae uni hoṛ do, one okoeakʼ kạiko Probhui ikạ akatʼtae. Nonḍe do cetʼ eken khatna ocoakankoge bhạganko men ocoakana? Ar bin khatna akanko lạgitʼ hõ cetʼ baṅ men akana? Hẽ, onko hõ bhạgankoko men ocoakangea, ente bon meneda, “Abraham do biswạs iạte dhorom menteye lekha akana.” Oka obostare lekhayentaea? Khatna tayom se khatna ạurire? Khatna tayom do baṅ menkhan ạuriye khatnakʼrege. Khatna ạurire biswạs iạtege Isor do dhorom menteye lekhakedea ar onage tahẽkana uniakʼ sạbudokʼ reakʼ cinhạ. Enḍekhan ńelokʼkana, khatna begorte okoe do eken biswạs hotete dhorom menteko ataṅ ocokʼkan, onko sanamkoren hõ Abraham deo baba kana. Ona chaḍa, khatnakʼ lahare Abraham do cetʼleka biswạs reakʼ horreye taṛametʼ tahẽkan, onkage khatna akan okoe doko calakʼkan onkoren hõ Abraham doe baba kana. Abraham ar uniren bõsko ṭhen Isor doe gokʼleda je, noa dhạrti do Abrahamakʼge hoyokʼa. Ạn-ạriko pańjaete do baṅ, menkhan biswạs hotete uni do dhorom menteye lekhayena ar onatege ona gokʼakʼ do doholena. Ạn-ạriko pańjaete jãhãe dhạrti reakʼ ạidạriye ńam khan, enḍekhan pạtiạu do okạjuạgea ar Isorakʼ ona gokʼakʼ reakʼ hõ jãhãn damge baṅ tahena. Ente ạn-ạri do Isorakʼ sạjạiye ạguea. Sạri katha do noage, okare ạnko baṅ tahen onḍe do ạn bemanot reakʼ kukli hõ oho rakapʼlena. Onate manwakoakʼ biswạste noa gokʼakʼ do purạu akana, jemon noa do Isorakʼ daya reakʼ dan hoyokʼ. Onate Abraham bõsrenko lạgitʼ noa gokʼakʼ do khạṭige purạukʼa. Noa gokʼakʼ do eken ạn-tạriren hoṛko lạgitʼ purạukʼa ona do baṅ, menkhan okoeko hoṛ do Abraham leka inạ mitʼ pạtiạureko pạtiạu akan onko lạgitʼ hõ noa gokʼakʼ do khạṭige purạukʼa. Sonot sostorre olakan leka, “Iń do ạḍi utạr jạtkoren babageń hoe ocoakatʼmea,” Ona lekate Isor samaṅre Abraham do abo sanamkoren baba kanae. Okoe gocʼkoe jiwetʼetʼko ar bạnukʼakʼko hõ menakʼakʼko lekae metakʼkan uni Isorrege Abraham doe pạtiạulena. Abraham do baba hoyokʼ reakʼ jãhãn asge baṅ tahẽkantaere hõ uni do Isorre askate pạtiạu akane tahẽkana. Isor do uniye metade tahẽkana, “Amren bõsko do sermaren ipil leka saṅgeko hoyokʼa.” Ar ona katha lekage Abraham do ạḍi utạr jạtkoren babae hoelena. Mitʼ sae umerren haṛam Abraham doe bujhạu daṛeakʼ tahẽkana je, hoṛmo do okạjuạ akantaea ar Sara hõ gidrạ hoyokʼ reakʼ umer do bạnukʼtaea, ar enrehõ uni do biswạsre nijor bae tahẽkana. Isorakʼ gokʼakʼre uniakʼ monre tis hõ jãhãn digdhạ baṅ hecʼ akawade tahẽkana, bickom pạtiạure arhõ keṭecʼ tahente uni do Isore sarhaoedekan tahẽkana. Abraham do purạte noae pạtiạukʼkan tahẽkana je, Isor okaṭakʼe gokʼakawade ona purạu lạgitʼ daṛe do menakʼgetaea mente. Onate Abrahamakʼ biswạs do dhorom mente lekhayentaea. “Dhorom menteye lekhayena,” Noa katha do eken Abraham moto lạgitʼ do baṅ olakana, aboko lạgitʼ hõ olakana. Biswạs iạte Isor do abo hõ dhorom menteye lekha bona, ente aboren Probhu Jisu gocʼko khon okoeye jiwetʼ beretʼkede, abo do unirege bon pạtiạu akana. Aboakʼ kạiko iạte Jisu do gujukʼ tireye soprotʼlena ar dhorom mente ataṅ bon lạgitʼ uni do gocʼko khone jiwetʼ beretʼ ocoyena. Biswạs hotetege bon dhorom ocoakana ar ona iạtege Probhu Jisu Mạsi hotete Isor ar abo talare suluk hoeakana. Ńitokʼ Isorakʼ daya reakʼ oka horte bon calakʼkan onḍe do Mạsire pạtiạu iạte bon seṭer akana. Ar Isorakʼ ṭhonok ńam reakʼ asre bon rạskạkʼ kana. Eken ona do baṅ, harkhet sasetre hõ bon rạskạkʼ kana, ente bon baḍaea harkhet saset reakʼ jo do soboriye hoe ocoea, ar sobori reakʼ jo do bhage colon ar bhage colon reakʼ jo do asge. Noa as do bae lajao ocobona, ente Isore emakan sonot Jiu hotete aboakʼ ontor do acʼakʼ dulạṛteye perecʼ akada. Nijor bon tahẽkanre Mạsi do ṭhik okterege be-bhoktiae manwako lạgitʼ, metakʼme abon lạgitʼgeye gocʼlena. Jãhãe dhorom hoṛ lạgitʼ okoehõ jiwi do bako em lạgidokʼa. Okoe eṭakʼkoe bhạlạyetʼko onkan hoṛ lạgitʼ hoedaṛeakʼa jãhãe dilkate jiwi emreye hõ em daṛekea. Menkhan Isor je aboe dulạṛetʼ bon ona reakʼ cinhạ do noage, kại hoṛ bon tahẽkanrege Mạsi do abo lạgitʼ jiwiye emkeda. Enḍekhan Mạsiakʼ mãyãm hotete tinre abo do dhorom mente bon ataṅ ocoakana unre abon do Mạsi hotetege Isorakʼ sạjại khon khạṭige rukhiyạ bon ńama. Abo do Isorren bạiribon tahẽkanre acʼren Hoponakʼ gujukʼte uni tulucʼ bon samge ocoakana. Ar nonkage bon samge ocoakante Mạsiakʼ jionte khạṭige kại khon bańcao bon ńama. Eken ona do baṅ, okoe hotete Isor tulucʼ bon samge akan uni Probhu Jisu Mạsi hotete abo do Isor sãote bon rạskạ midokʼ kana. Mitʼṭen manwa hotete dhạrtire kại boloyena ar ona kại hotete gujukʼ hõ boloyena. Ente sanam manwako kại akatʼte sanamko ṭhenge gujukʼ hõ boloyena. Moseakʼ ạn ạuri tahen khonge dhạrtire do kại tahẽkana, menkhan ạn baṅ tahen khan kại do kại mente oho lekha lena. Enrehõ Adam khon ehopʼkate Mose hạbicʼ sanamko cetanrege gujukʼ do raje calaokeda. Isorakʼ hukum manao baṅkate okoe do Adam leka bako kại akatʼ onko cetanre hõ gujukʼ do raje calaoleda. Ar okoeakʼ hijukʼ reakʼ katha tahẽkan, uni Jisu Mạsiren nạmunage Adam doe tahẽkana. Menkhan Adamakʼ kại ghạṭko okaleka kan, Isorakʼ bin damanakʼ dan onka do baṅkana. Tinre mitʼṭen hoṛakʼ kại iạte aema doko gocʼena, unre Isorakʼ daya ar mitʼṭen manwa hotete oka dan hecʼen, ona do artetʼ aemako lạgitʼge sareṛena! Ar uni mitʼṭen manwa doe hoyokʼ kana Jisu Mạsi. Isorakʼ dan do Adamakʼ kại reakʼ jo leka do baṅkana, ente mitʼṭen kại reaṅ bicạr lekate sanam manwakoge sạjại lek kanako menteko lekha ocoakana, menkhan dhorom mente Isor ṭhen ataṅokʼ reakʼ nokʼoe noa daya dan, ona do ạḍi utạr kại iạte hecʼakana. Mitʼṭen manwawakʼ kại gunạkʼte gujukʼ ar uni mitʼ hoṛ hotetege rajokʼe ehopʼleda. Menkhan okoe do Isorakʼ asambheṛ daya ar dhorom menteko ataṅ ocokʼ, onko do uni mitʼ hoṛ, metakʼme Jisu Mạsi hotete sạri jion reakʼ perecʼtetʼ iạte khạṭigeko rajokʼa. Enḍekhan mitʼṭen kại hotete cetʼleka sanam manwako sạjại ńam lek kanako menteko lekhakʼ kan, onkage mitʼṭen dhorom kạmi hotete sanam manwakoge dhorom mente aṅgocko lạgitʼ bondobos hõ dohoakana ar ona reakʼ jo do hoyokʼ kana jaejug jion. Cetʼleka mitʼṭen manwawakʼ bebakʼtao hotete ḍherkoge kại hoṛ menteko lekhayen, onkage mitʼṭen manwawakʼ batao iạte ḍher hoṛ do dhorom menteko ataṅ ocokʼa. Ạn-ạriko emena jemon behokakʼko ḍherokʼ, menkhan okare behokakʼ ḍherena onḍege Isorakʼ daya hõ artetʼge bạ̃ṛtiyena. Ona daya do noa iạtege ḍherena jemon gujukʼ talate cetʼleka kại do raje calaoetʼ tahẽkan, onkage manwa hõ dhorom menteye aṅgocokʼte ńitokʼ uniakʼ daya do rajokʼ: ar ona reakʼ jo do hoyokʼkana aboren Probhu Jisu Mạsi hotete jaejug jion hameṭ joṅ. Enḍekhan cetʼ noa bon mena, Isorakʼ daya jemon bạ̃ṛtikʼ, onate kại iditege bon tahena? Khạṭige baṅa. Ente kại secʼte ma bon gocʼge; enḍekhan cekate abo do arhõ kại horte bon calakʼa? Noa katha do cetʼ bape baḍaea je, abo okoe Mạsi Jisure bon bạptis akan, abo do uniakʼ gujukʼre seletʼkatege bon onka akada mente? Onate bạptisma hotete Mạsi tulucʼ bon gocʼena arbon topayena, jemon Isor Baba cetʼleka acʼakʼ maraṅ daṛe hotete Mạsi gocʼko khone jiwetʼ beretʼakade onkage abo hõ jemon nãwã jion reakʼ hor rebon taṛam daṛeakʼ. Mạsi sãotebon gocʼente cetʼleka unire bon mitʼakan, ar cetʼleka gocʼko khone jiwetʼ beretʼ akan, ṭhik onkage abo hõ uni tulucʼ bon jiwetʼ beredokʼa. Baḍaegea bon, aboakʼ kại hoṛmo marao lạgitʼge aboren ‘mare hoṛtetʼ’ do Mạsi sãoteye krus ocoyena jemon kạiren golam ar alo bon tahen; ente okoeye gocʼ akan uni do kại khon chaḍaoe ńam akada. Abo do tinre Mạsi tulucʼ bon gocʼakana unre bon pạtiạukʼ kana je, uni tulucʼ jiwetʼ hõ bon tahena. Baḍaegea bon Mạsi do gocʼko khone jiwetʼ beretʼ ocoakante ar tishõ bae gujukʼa, metakʼme uni cetanre moron do ar bae mạlik daṛeakʼa. Uni tinreye gocʼlena unre uni do kại secʼteye gocʼlena; ar unire kại reakʼ jãhãnakʼ ar do baṅ tahẽlena. Ńitokʼ uni doe jewetʼ beretʼ akante Isor lạgitʼ bańcao menaea. Ṭhik onkage noa kathare pạtiạukʼpe je, Jisu Mạsi tulucʼpe mitʼ akante ape hõ kạirepe gocʼ akana, ar ńitokʼ do Isor lạgitʼ jiwetʼ menakʼpea. Onate apeakʼ gujukʼakʼ hoṛmore kại do raj alope calao ocoaea. Arpe calao ocoae khan apeakʼ hoṛmo reakʼ bạṛicʼ sana gobolrepe calao idikʼa. Hoṛmo reakʼ oka hạṭiń hõ behokakʼ kạmi reakʼ hạtiạr lekate kại reakʼ tire alope jimạkakʼa. Gocʼko khon jiwetʼ akan hoṛko lekate ape do Isor ṭhen gobolokʼpe ar dhorom kạmi reakʼ hạtiạr lekate apeakʼ goṭa hoṛmoge Isor emaepe. Ape do kạiren golam dope baṅkana, ente Isorakʼ daya tạriren kanape, ạn-tạriren dope baṅkana. Menkhan ạn-tạrire tahẽ baṅkate daya tạriren bon hoeakante cetʼ enḍekhan bon kạigea? Khạṭige baṅa. Ape do cetʼ bape baḍaea, golam leka jãhãeakʼ gobolrepe tahen ar uniakʼ hukumkope bataotae khan uniren golamkope hoyokʼ kana mente? Onkage ape do kạiren golam hoyokʼtepe gujukʼa, ar baṅkhan Isorren golam leka dhoromakʼkope kạmiya. Menkhan Isorakʼ sarhao hoyokʼma, ente ape do kạiren golampe tahẽkanre hõ, okaṭakʼ sikhạunape ńamakatʼ ona reakʼ do goṭa ontortepe batao akada. Kại khonpe sạdhinente dhoromren golampe hoeakana. Manwakoakʼ nijortetʼ iạte iń do manwako bujhạu ocoko lekage kathań roṛeda. Ape hõ cetʼleka lahate artetʼ behokakʼ kạmi lạgitʼ apeakʼ hoṛmo hạṭińko besapha ar bedhoromren golampe hoe ocoletʼ, onkage ńitokʼ do sonotre hara rakabokʼte apeakʼ hoṛmo hạṭińko dhorom kạmi lạgitʼ golam hoe ocoetape. Tinre ape do kạiren golampe tahẽkana unre dhoromren golam do bape tahẽkana. Lahateakʼ okako kạmi reakʼ kathako hudiskate ńitokʼpe lajaokʼkan onako kạmi khon apeakʼ do cetʼ porho hoekokʼa? Ona reakʼ mucạtʼ jo do hoyokʼ kana moron. Menkhan ńitokʼ do kại khonpe sạdhin akante Isorren golampe hoeakana. Onate porho do noage hoeakana, ape dope sonot ocokʼa, ar ona reakʼ mucạtʼ jo do hoyokʼ kana jaejug jion. Kại reakʼ kuṛại do moron kana, menkhan Isorakʼ daya dan do aboren Probhu Mạsi hotete jaejug jionge. E boehako ape ma ạn-ạrikope baḍaege. Ape do cetʼ bape baḍaea, manwa jiwetʼ tahen bhorge ạn do uni cetanreye mạlikokʼ kana mente? Jãwãetetʼ tinạkʼ din jiwetʼe tahen, unạkʼ din bạhu hõ ạn-tạrire tolgeye tahena. Menkhan jãwãetetʼe gocʼlen khan ona ạn-tạri reakʼ tonol khon bạhu doe sạdhinokʼa. Onate jãwãetetʼ jiwetʼ tahenrege eṭakʼ herel ṭhene jãwãelen khan enḍekhan uni do laṭghaṭicʼ menteye bikạukʼa. Menkhan jãwãetetʼe gocʼlen khan uni do ona ạn-tạri reakʼ tonol khone sạdhingea. Unre eṭakʼ jãhãe ṭhene jãwãelenre hõ uni do loṭghoṭiyicʼ bae hoyokʼa. Ṭhik onkage E ińren boehako, Mạsiakʼ hoṛmo secʼte ar Moseakʼ ạn-ạri lekate ape hõpe gocʼena. Onate ape do okoe gocʼko khone jiwetʼ beretʼ ocoakan uni Jisu Mạsiren pe hoeakana, jemon apeakʼ jion do Isor lạgitʼ jo daṛeakʼ. Kại gobolre bon tahẽkanre ạn-ạriko do abo talare kại reakʼ laloce rakapʼ ocoyetʼ tahẽkana ar ona lalocge aboakʼ hoṛmoreye kạmikan tahẽkana; onate aboakʼ jionre moron lạgitʼ bon jokʼ kan tahẽkana. Unre abo okaṭakʼko tol akawatʼbon tahẽkan onarege bon gocʼlena. Onate ńitokʼ do ạn khon bon sạdhingea. Ona iạte abo do olakʼ ạn-ạri reaṅ ona sedaeakʼ jion horren golam dobon baṅkana, menkhan sonot Jiu emakʼ nawa jion horren golam bon hoeakana. Enḍekhan cetʼ bon mena, ạn do bạṛicʼgea? Khạṭige baṅa; bickom noa katha do ṭhikgea je, ạnko baṅ tahẽlen khan kại do cetʼ kana mente ohoń baḍae daṛelea. “Alom laloca,” Ạn-ạrire noa katha baṅ lạilen khan laloc do cetʼ kana mente ona hõ ohoń baḍaelea. Menkhan kại do hukum reakʼ ạte ńamketʼte ińre joto lekan laloce omon ocokeda, ente ạnko baṅ tahẽlen khan kại do gocʼge tahẽkokʼa. Ińakʼ jionre ạnko hijukʼ lahare iń do jiwetʼgeń tahẽkana, menkhan hukum hijukʼ são sãote kại hõ jiwetʼ ruạṛena. Ar iń hõń gocʼena. Okaṭakʼ hukum iạte jion ńam reakʼ katha, ona do iń lạgitʼ gujukʼe ạgukeda, ente ona hukum reakʼ ạt iạte kại doe bulạukedeńa, ar ona hukum hotetege kại doe gocʼkedeńạ. Noa katha do khạṭigea je, ạn do sonotgea ar ona reakʼ hukum hõ sonot, dhorom ar bhagegea. Enḍekhan okaṭakʼ bhạlạiyakʼ kan ona hotete cetʼ iń doń gocʼena? Tisge baṅa, bickom bhạlạiyakʼ hotetege kại do ińakʼ gujukʼe hoeocokeda, jemon kại do kại kana mente oromokʼ. Ar kại je tinạkʼ bạṛicʼakʼ kana ona do hukum hotetege bujhạukʼ kana. Baḍaegea bon ạn do Jiu reaṅ kana, menkhan iń doń kại gobolren kante kạiren golamiń hoeakana. Iń okaṭakʼ iń kạmikan ona do iń nijạge bạń bujhạueda, ente okaṭakʼ cekayiń menetʼkan ona do bạń onkayeda bickom okakoń hirkhạwakʼ kan onakogeń onkayeda. Okaṭakʼ bạń khojkan, onageń kạmikan khan iń do noań aṅgocetʼ kana je, ạnko do bhagegea. Enḍekhan ńelokʼ kana apnarte noako do bạń kạmikana, menkhan ińre oka kại bolo akan unige onakoe kạmi ocoyediń kana. Ińiń baḍaea ińre, metakʼme ińakʼ jel reakʼ sanare bhage mente do cetʼge bạnukʼa. Ar okaṭakʼ sạrige bhageakʼkan ona kạmi reakʼ sana menakʼgea menkhan daṛe do bạnukʼtińa. Okako bhage kạmi sanańkan ona do bạń kạmiyeda, bickom ona bodolte oka bạń khojkan onako bạṛicʼ kạmiyiń kạmiyeda. Okaṭakʼ kạmi bạń menjoṅkan, onageń kạmikan khan apnarte ona do bạń kạmiyeda, bickom ińre berel akan kạige onae kạmi ocoyediń kana. Enḍekhan ińre mitʼṭen niạm kạmikaniń ńel ńameda. Ona niạm do noage okaṭakʼ bhageakʼ tinre kạmiń menjoṅ unre bạṛicʼakʼ do jao ghuṛi ińre tahenkana. Ińakʼ ontor do Isorakʼ ạn-ạrikoteye rạskạkʼ kana; enrehõ iń doń ńel ńameda je, mitʼṭen eṭakʼ lekan niạm do ińakʼ hoṛmoreye kạmikana. Oka bhageakʼkan ińakʼ mon do onage bhageakʼ menteye ataṅeda, menkhan noa eṭakʼ niạm do ińakʼ mon birudreye lạṛhại kana, are gobol akadińạ. Ińre oka kại menakʼ noage ona reakʼ niạm do. Hae iń dukhạliạ hoṛ do! Ińre noa kại, one oka do gujukʼe ạguyetʼ, ona khon okoeye rukhiyạińạ? Aboren Probhu Jisu Mạsi hotete iń do Isor iń sarhaoedekana je, uni do ińe rukhiyạ akadińạ. Enḍekhan ńelokʼ kana je, mon secʼte iń do Isorakʼ ạnren golam kạnạń, menkhan kại secʼte do kại reakʼ niạmren golamge. Okoe Jisu Mạsireko kolom mitʼakan Isor do onko sạjạyokʼ lek mente bae hudiskoa. Jionren mạlik sonot Jiu reakʼ niạmge Jisu Mạsi hotete kại ar gujukʼ reakʼ niạm khone chaḍao akadińạ. Manwawakʼ kại gunạkʼte ạnko do nijor akan tahẽkana, ona iạte ạn oka bae daṛeakʼkan tahẽkan, Isor ona do acʼgeye onka akada. Uni do kại meṭao lạgitʼ acʼren bin-dusạn Hopon manwa muṭhạn emkateye kolkedea ar acʼren Hoponakʼ gujukʼ hotete kại reakʼe bicạrketʼte ona reakʼ daṛeye ocokʼkeda. Uni do noa iạtegeye onkakeda, jemon kại gobolre tahẽ baṅkate sonot Jiuakʼ gobolre bon senokʼte abore ạnko purạukʼ. Okoe kại gobolre menakʼko onko do kại okae khoj ona reakʼgeko moneakʼa; ar okoe sonot Jiu gobolre menakʼko onko do sonot Jiu okae khoj ona reakʼgeko moneakʼa. Kại okae khojkan ona reakʼ monejoṅakʼ do moron kana, ar sonot Jiu reakʼ khojogokʼ leka senokʼ do jion ar sulukge. Okaṭakʼ mon do kại okae khoj onageye moneakʼ, ona mon do Isor birudgea, ente ona do Isorakʼ ạn bae bataoa ar manao hõ bae manaoa. Onate okoe kại reakʼ gobolre menakʼko onko do Isor ohoko kusi oco daṛelea. Menkhan Isorren Jiu apeakʼ ontorreye berel akan khan ape do kại gobolren dope baṅkana bickom sonot Jiu gobolren kanape. Okoeakʼ ontorre Mạsiren Jiu bạnui uni do Mạsiren doe baṅkana. Menkhan Mạsi apeakʼ ontorre menae khan enḍekhan kại iạte apeakʼ hoṛmo gocʼlenre hõ aperen Jiu doe jiwetʼgea, ente Isor do dhorom menteye ataṅ akatʼpea. Okoe do Jisu gocʼko khone jiwetʼ beretʼakade uni Isorren Jiu apeakʼ ontorreye girobas akan khan, enḍekhan Isor do acʼren uni Jiu hotete apeakʼ gujukʼakʼ hoṛmo hõe jiwetʼ ocoetapea. Onate E boehako, abo do dharaoko kana bon, menkhan ona dharaoakʼ do kại ṭhen do baṅ. Kại gobolre colon reakʼ jạruṛ do ar bạnukʼ anaṅ. Ape do kại gobolrepe colon khan jaejug lạgitʼpe gujukʼa. Menkhan sonot Jiu hotete hoṛmo reakʼ sanam bạṛicʼakʼ kạmikope marao giḍiletape khan, enḍekhan jaejug hạbicʼ jiwetʼpe tahena, ente okoe Isorren Jiu hoteteko ạyur ocokʼkan onkoge Isorren hoponko hoyokʼa. Ape ma golami reakʼ Jiu ma bape ńamakade one onatepe botorkokʼ; Ape do Isorren Jiupe ńam akadea one okoe do hopon hoyokʼ reakʼ ạidạriye emakatʼpe. Ona iạtege Isor do Abba, metakʼme Baba mente bon hohoaekana. Sonot Jiu hõ acʼge aboakʼ ontorre noa gohae emetʼkana je, abo do Isorren gidrạko kana bon. Ar gidrạko bon hoeakan khan, enḍekhan Isor acʼren gidrạko okaṭakʼ emokʼ reakʼe gokʼatʼko tahẽkan abo hõ ona bon ńama. Mạsige Isor ṭhen khon onae ńama ar abo hõ uni sãote ona bon ńama, ente Mạsi sãote bon harket sasetlen khan abo hõ uni sãote ṭhonokren bhạgiạdar bon hoyokʼ. Ińiń baḍaea, oka ṭhonok bon ńam ona tulucʼ jurikʼ lạgitʼ aboakʼ nahakʼ jug reakʼ harket ar sasetko do cetʼge baṅkana. Isorren hoponko tinre ona ṭhonokteko sodorokʼa ona lạgitʼ sanam sirjon do gagocokʼ tulucʼe ńel horeda. Ente sirjon do ạuṛiakʼ ṭhene tabe ocoyena. Acʼakʼ kusite do baṅ hoeakana, Isorge uni doe tabe ocoakadea. Menkhan ona são sãote noa as hõe emakana, sirjon do acʼ hõ nosṭokʼ reakʼ tonol khone chaḍao ocokʼte Isorren hoponkoakʼ ṭhonok reakʼ sạdhintetʼ lạgitʼ bhạgiạdare hoedaṛeakʼa. Baḍaegea bon, goṭa sirjonge bedonte ńit hạbicʼ mitʼteko kũhrạuetʼ kana. Eken ona do baṅ, menkhan oka mạhima tayomte bon ńam, ona reakʼ pạhil jo lekate sonot Jiu ńamkate abo hõ apnarakʼ ontorre bon kũhrạukʼ kana. Ona sãote ona din lạgitʼ hõ ńel horre menakʼbona one tinre abo do Isorren hoponko mente bon sodor ocokʼ, metakʼme nonosṭoakʼ ti khon aboakʼ hoṛmo do sạdhinokʼ tabona. Kại khon bańcao ńamkate abo do noa asge bon ńamakada. Ar oka lạgitʼ bon asakan ona bon ńamakatʼ khan enḍekhan ona as do ar asge baṅ tahẽlena. Oka ńam akan, ona lạgitʼ do ar okoeye asokʼa? Menkhan oka baṅ ńam akan ona reakʼ aboakʼ as tahen khan enḍekhan abo do sombhurikatere hõ ona lạgitʼ bon ńel hohorkana. Noa chaḍa aboakʼ nijortetʼre sonot Jiu doe goṛo abon kana. Ar cetʼ leka koejoṅ lek tabon ona do babon baḍae kana, menkhan oka roṛte baṅ sodorokʼ onkan kũhrạu tulucʼ sonot Jiu do acʼge abo lạgitʼe nehõrokʼ kana. Okoe manwakoakʼ ontore ńeletʼkan uni do sonot Jiuakʼ mon reakʼ katha hõe baḍaea, ente sonot Jiu do Isorakʼ sanalekage Isorren hoṛko lạgitʼe nehõrokʼkana. Baḍaegea bon okoe Isorko dulạṛede, metakʼme Isor acʼakʼ monsubạ leka okoekoe hohoakatʼko onko bhạlạiko lạgitʼ jotowakʼge mitʼ sãoteye kạmikana. Isor do okoeko lahareye bachao akatʼko onko do acʼren hopon hoyokʼ lạgitʼ laha khongeye ṭhik doho akatʼko tahẽkana, jemon uni Hopon do ạḍi utạr boehako modre maraṅicʼe hoyokʼ. Okoe laha khone ṭhik dohoakatʼko tahẽkan onko do hoho hõe hohoatʼkoa; ar okoeye hohoatʼko onko do dhorom mente ataṅ hõe ataṅketʼkoa; ar okoeko dhorom menteye ataṅketʼko onko do acʼakʼ ṭhonok hõe danatʼkoa. Enḍekhan noako babotre cetʼbon menkea? Isor abo tulucʼ menae khan enḍekhan jãhãeye hạn daṛekebona? Isor do acʼren Hopon hõ bae mãyãwadea bickom abo sanamko lạgitʼ gujukʼ tireye emkedea. Enḍekhan uni do cetʼ Hopon sãote ar sanamakʼko bae danabona? Isor okoekoe bachao akatʼko onko birudre do okoeye lạlisa? Isor acʼge coṅ onko ma dhorom menteye ataṅ akatʼko. Ar okoe hale onko do dusi menteye ṭahraokoa? Okoeye gocʼlen ar gocʼko khone jiwetʼ beretʼ ocoyen uni Mạsi Jisu do ńitokʼ Isorakʼ jojomsa aṛere menaea ar abon lạgitʼe nehõrokʼ kana. Nonkanakʼ cetʼ menakʼa one onate Mạsiakʼ dulạṛ khone begar daṛeabon? Saset? Mon reakʼ kosṭo? Santao? Reṅgecʼ? Kicricʼ khạnḍwạkʼ reakʼ okulạn? Muhin? Se gujukʼ? Sonot sostorre olakana, am iạte jaogele gocʼ ocokʼ kana: ar jabe ocokʼ bhiḍiko lekageko hudisetʼlea. Menkhan okoe apeye dulạṛetʼpe uni hotete noa sanamakʼ talate hõ abo do purạute bon jitạu akana. Iń do noa katha bes okocʼtegeń baḍaea, moron se jion, serma goḍet se Soetanren goḍet, menakʼakʼko se darakanakʼko se eṭakʼ jãhãn daṛeko, se serma cetan se dhạrti latar reakʼ jãhãnakʼ sirjạukʼge okoe hõ Isorakʼ dulạṛ khon ohoko begar daṛelebona. Isorakʼ noa dulạṛ do aboren Probhu Mạsi Jisurege menakʼa. Mạsi tulucʼ mitʼakanteń meneda, iń do ontorre ạḍi duk ar ạḍi kosṭoń ńameda, ar noa do sạri katha kana, eṛe do baṅa. Ińakʼ bibek hõ sonot Jiure jopoṛao tahẽkate inạ mitʼ gohageye emeda. Ińren boehako bodolte, metakʼme iń jạtren hoṛko bodolte hoedaṛeakʼ khan iń apnarge Mạsi ṭhen khon pharakokʼ reakʼ sarapiń hataokea. Onko ma Israel jạtren hoṛ kanako. Isor do hopon hoyokʼ reakʼ ạidạriye emakatʼkoa, uni do acʼakʼ ṭhonoke udukʼ akawatʼkoa, onko lạgitʼ bondobose dohoakada, ạn-ạrikoe emakada, acʼ sewawae reakʼ ponthae emakana ar ạḍi utạr gokʼakʼ hõe gokʼakawatʼkoa. Isorren maraṅ sewako do onkoren hapṛamkogeko tahẽkana ar manwa lekate Mạsi do onko bõsregeye janamlena. Uni kangeae Isor do, one uni sanamakʼ cetanre menae; jaejug hạbicʼ uniakʼge sarhao hoyokʼtae ma. Amen. Isorakʼ katha je eṛeteakʼ hoeakan ona do baṅa, ente okoe Israel jạtreko janamakan onko sanamkoge khạṭi Israel doko baṅkana. Onko doko Abrahamren bõskanre hõ uniren sạriakʼren hopon doko baṅkana, bickom sonot sostor reakʼ katha leka, “Isạhakren bõskoge amren bõs menteko ńumogokʼa.” Metakʼme, Israel jạtreko janam akanre hõ Isorren gidrạ doko baṅkana, menkhan Isorakʼ gokʼakʼ lekate okoekoakʼ janam hoeakan, onkoge Abrahamren bõs menteko lekhakʼa. Ona gokʼakʼ do noage, “Ṭhik oktereń ruạṛ hijukʼa ar Sararen do mitʼṭen koṛa gidrại hoyokʼtaea.” Eken ona do baṅ, Rebekaren jawa gidrạ hõ uni mitʼ herel hoṛren gidrạge kin tahẽkana. Uni herel hoṛ doe tahẽkana aboren mare hapṛam Isạhakge. Unkin gidrạ ạurikin janamokʼrege ar boge bạṛicʼ ạurikin kạmirege Isor do Rebekae metade tahẽkana, “Maraṅicʼ do huḍińicʼren golame hoyokʼa.” Noate Isor doe udukʼletʼ tahẽkana je, acʼakʼ monejoṅakʼ purạu lạgitʼgeye bachao joṅa; jãhãn kạmi iạte do bae onkaea bickom acʼakʼ kusilekage hoṛkoe hohoakoa. Onate sonot sostorre ol menakʼa, “Jakob doń dulạṛkedea, menkhan Esau do bạń moneae kana.” Enḍekhan cetʼ bon menkea Isor doe behoketʼ kana? Ekaltege baṅa. Uni do Moseye metade tahẽkana, “Okoe hoṛ iń dayawae unigeń dayawaea; ar okoe hoṛ iń mãyãwae unigeń mãyãwaea.” Enḍekhan noa do okoeakʼ kurumuṭu se sana lekate hõ baṅ hoyokʼkana, eken Isorakʼ daya cetanrege ṭehãḍokʼ kana. Sonot sostorre Isor do Pharao noa kathae metade tahẽkana, “Amiń raj akatʼmea jemon am hotete ińakʼ daṛeń udug ar goṭa dhạrtire jemon ińakʼ ńutum lại pasnaokʼ.” Onate Isor do acʼakʼ kusi leka okoeye daya akokan onkogeye daya akokana ar okoe keṭejeye menjoṅkan uni doe keṭecʼede kana. Hoedaṛeakʼa ape modre jãhãepe metạńa, “Cedakʼ enḍekhan ńit hõe dusi kana? Ar jãhãege cetʼ uniakʼ monejoṅakʼreye teṅgo daram daṛeakʼa?” Enḍekhaniń menkea, E manwa; am dom celekante Isor upạrtem roṛ ruạṛetʼkana? Jãhãe hoṛ mitʼṭecʼ jinise benao khan, enḍekhan ona benaoakʼ jinis do cetʼ uniye kuli daṛekea, “Cedakʼ nonka dom benao kedeńa?” Kuṅkạl do inạ hasa ḍhimbạ khonge mitʼ bhajan do manotakʼ lạgitʼ ar eṭagakʼ do bemanotakʼ lạgitʼ benao reakʼ ektiạri do cetʼ bạnukʼtaea? Ṭhik onkage Isor do acʼakʼ edre ar daṛe udug lạgitʼe monejoṅkan tahẽkana; enrehõ okoe hoṛko birudre acʼakʼ edre sodore menletʼ, onkoakʼ do ạḍi soborikateye sahaoketʼtakoa. Ente noko hoṛkoakʼ kuṛại do moron tahẽkana. Arhõ uni do acʼakʼ bin mucạtʼ ṭhonok reakʼ katha hõ baḍae ocokoe menletʼ tahẽkana. Okoe uniakʼ dayako ńamakatʼ onko do laha khongeye tear akatʼko tahẽkana acʼakʼ ṭhonok ńam lạgitʼ. Abokangea bon ona dayaren hoṛ do. Uni do Jihudiko mod khon eken abo eskar do bae hohoakatʼ bona, menkhan boṅgan hoṛ jạtrenko mod khon hõe hohoakatʼkoa. Ente Hosea nạbi puthire Isore menakada, “Okoe ińrenko baṅkan, onkoge ińren hoṛ menteń hohoakoa. Ar okoe bạń dulạṛakade, uni do dulạṛiạ menteń hohoaea. Oka jaegare onkoko menocolen; ‘ińren hoṛ dope baṅkana,’ onḍege onko do jiwetʼ Isorren hopon menteko hoho ocokʼa.” Jesaea nạbi hõ Israel jạtko reaṅe roṛeleda, “Israel hoponko reakʼ lekha do jalapuri reakʼ gitil unạkʼlenre hõ eken sarecʼkoge bańcaoko ńama. Probhu do ạḍi usạrage dhạrtiakʼ kuṛại purạteye emkataea.” Jesaea do arhõe roṛleda, “Sanam daṛeanicʼ Probhu do bõs aloe sarecʼ abon khan enḍekhan Sodom ar Gomora nagraha leka bon hoekokʼa.” Enḍekhan noa katha bon mena je, boṅgan hoṛ jạtrenko do Isorakʼ dhorom khudạu bako kurumuṭuletʼre hõ pạtiạu hotetege onko do Isorren dhoromko menteko lekha ocoyena. Menkhan Israelko do ạn-ạri hotete Isorakʼ dhoromko khudạuletʼ tahẽkana, menkhan bako hoedaṛeada. Cedakʼ bako daṛeada? Ente onko do biswạsre ṭehãḍ baṅkate kạmire ṭehãḍ akanko tahẽkana. Okaṭakʼ dhirire hoṛko tohodokʼ onarege onko hõko tohotʼlena. Noa reaṅ sonot sostorre olakana, Ńelpe, Sionre tohotʼakʼ dhiri ar tạkicʼakʼ cạṭạniń dohoyeda, unire pạtiạuicʼ do baṅgeye lajao ocokʼa. E boehako, Israelko lạgitʼ ińakʼ ontor reakʼ sana ar Isor ṭhen ińakʼ koejoṅ do noage, onko jemon kại khon bańcaoko ńam. Onko reaṅ do noa gohań emokʼ kana je, onko do Isor lạgitʼ ahkaokʼ mon menakʼgetakoa, menkhan Isor ṭhen cetʼ lekateko ataṅ ocokʼa ona do bako baḍaea. Isor do manwako cetʼ lekate dhorom menteye ataṅkoa ona katha luturakʼ baṅkate onko do akoakʼ kurumuṭute dhorom udugokʼko menjoṅkan tahẽkana. Onatege Isor okaṭakʼ ponthate manwa dhorom menteye aṅgoce ona do bako manaoleda. Mạsige ạnkoe purạuketʼte ona reakʼ daṛeye bạtilkeda, jemon acʼre okoeko pạtiạukʼ onko do Isor ṭhen dhorom menteko ataṅ ocokʼ. Ạn-ạriko pańjaete dhorom ocokʼ babotre Moseye olakada, “Okoe hoṛ ạn-ạriko lekae calakʼkan uni do ona hotetege jiwetʼe tahena.” Menkhan biswạs hotete manwa do Isor ṭhen cetʼlekate dhorom menteye ataṅokʼa ona reaṅ sonot sostorreye menakada, “Mon monte noa do alom mena, ‘sermate do okoeye dejokʼa?’ ” Metakʼme, serma khon Mạsi pheḍ ạguiye lạgitʼ okoe sermate doe dejokʼa? “Se alom mena, ‘patalte gocʼko ṭhen do okoeye pheḍokʼa?’ ” Metakʼme gocʼko khon Mạsi rakapʼ ạguiye lạgitʼ patalte do okoeye pheḍokʼa? Isor ṭhen dhorom mente ataṅokʼ reaṅ sostorre arhõe meneda, “Isor okae menakatʼ ona do am sãorege menakʼa, metakʼme amakʼ moca ar amakʼ ontorre menakʼa.” Okaṭakʼ biswạs reakʼ katha bon porcaretʼkan ona do Isorakʼ katha kangea. Ona katha do hoyokʼkana, Jisu do Probhu kanae mente amakʼ mocatem aṅgoce ar ontortem pạtiạukʼ baṅma, Isor do gocʼko khone jiwetʼ beretʼ akadea enḍekhan am do kại khon bańcaoem ńama; ente ontorre biswạs iạte Isor do manwa dhorom menteye lekhayea ar mocateye aṅgocetʼkante kại khone bańcaoea. Sonot sostorreye meneda, “Jãhãege unireye pạtiạukʼ uni do bae lajao ocokʼa.” Jihudi ar boṅgan hoṛ jạtrenko talare jãhãn begar do bạnukʼa, ente sanamkorenge ini mitʼ Probhu kanae. Okoe acʼko hohoaekan onkore uni do asambheṛ bhor dane dul akokana. Sonot sostorre menakʼa, “Bańcao ńam lạgitʼ jãhãege Probhui hohoae uni do bańcaoe ńama.” Menkhan okoere bako biswạs akan uni do cekateko hohoaea? Okoe reaṅ bako ańjomakatʼ unire cekateko pạtiạukʼa? Ar poporcaricʼ bae tahen khan onko do cekateko ańjoma? Ona chaḍa jãhãe bako kol ocolen khan cekate poporcarko doko porcara? Sonot sostorre olakana, “Bhạgangea onkoakʼ jaṅga do one okoe bhage sombat porcar lạgitʼko hijukʼkan.” Menkhan sanamko ona bhage sombat do bako luturada. Jesaea nạbiye menakada, “E Probhu, alele porcarakatʼ bhage sombat do okoeye pạtiạuada?” Enḍekhan ńelokʼkana, Isorakʼ katha ańjom iạtege biswạs do hijukʼkana, ar Mạsi reaṅ do porcar talate ańjomokʼ kana. Menkhan ińiń mena, Israelko do cetʼ ona katha bako ańjom ńamleda? Khạṭigeko ańjom akada. Sonot sostore meneda, Onkoakʼ aṛaṅ do goṭa dhạrtire ḍamḍahe akana, ar kathako hõ pasnao akana dhạrti reakʼ mucạtʼ hạbicʼge. Iń do arhõń mena, Israelko do cetʼ ona katha bako bujhạu daṛeada? Pạhilre Moseye menakada, “Okoe jạti do jãhãn jạtko baṅkan, onko jạtko hotetege iń do apeakʼ gagoc iń janam ocoea; ar mitʼṭen bebuj jạtko hotete apeakʼ pitiń caṛhao ocoya.” Ona tayom Jesaea do arhõ murukteye menakada, “Onko ṭhengeń tahẽkana, menkhan jãhãnakʼ goṛo ocokʼ lạgitʼ iń ṭhen do bako hecʼlena. Iń do onko hoṛko nehõrokʼ lạgitʼ ạtiń ematʼko tahẽkana, menkhan iń ṭhen cetʼge bako arojlakʼa.” Menkhan Israelko reaṅ doe meneda, “Bebatao ar ṭenḍosokʼ hoṛko secʼ ińakʼ ti do goṭa dingeń tiạrakada.” Adoń meneda, Isor do cetʼ acʼren hoṛkoe giḍisaeketʼ koa? Tisge baṅa. Ente iń hõ mitʼṭen Israel hoṛ kangeạń, Abraham bõsren ar Benjamin gusṭirenge. Isor do acʼren okoeko hoṛ laha khongeye bachao akatʼko tahẽkan onko do bae dea giḍiletʼkoa. Se bape baḍaea, sonot sostorre Eliạ nạbi reakʼ cetʼe meneda mente? Uni do Isor ṭhen Israel birudreye roṛleda, “E Probhu, noko do amren nạbikoko gocʼ akatʼkoa ar amakʼ pinḍko rạputʼ giḍiakada. Eken iń eskarge sarecʼ minạńa, ar iń hõ gojeń reakʼko kurumuṭukana.” Menkhan Isor do Eliạ cetʼe roṛ ruạṛade tahẽkana? Uniye metade tahẽkana, “Eae hajar herel hoponkoń sarecʼ doho akawana, one okoe do Bak̕al-deb ṭhen bako ikhṛum akan.” Isor do onkage ńit hõ Israelkoe daya akokanteye bachao doho akatʼkoa. Isor do dayategeye bachao dohoakatʼko khan, enḍekhan ona do jãhãn kạmi reakʼ jo do baṅkana. Ar onkage hoelen khan daya do daya mente baṅ tahẽkokʼa. Enḍekhan bujhạukʼ kana, Israelko okaṭakʼ ńam reakʼko kurumuṭuyetʼ tahẽkan ona do bako ńamleda, menkhan Isor okoekoe bachao doho akawan tahẽkan onkoge ona doko ńam akada, ar eṭakʼkoakʼ mon do dhiri leka keṭecʼ akan takoa. Sonot sostorre olakana, “Isor do onkoakʼ ontor nonkae goṛdhoketʼ takoa, teheń hạbicʼ onko do ńeńel tulucʼ bako ńeńel kana ar luturte ańjom tulucʼ bako ańjomeda.” Dạud raj hõe menleda, onkoakʼ jojom ar ńũńũakʼ do pạsi ar jhampa leka hoyokʼ ma; ona do jemon onkoakʼ tạkicʼakʼ hoyokʼtako, ar oka kuṛại menakʼtako onage jemonko ńam. Onkoakʼ mẽtʼ do kãṛãkʼtako ma jemon aloko ńeńel, ar onkoakʼ dea do jaejug kubjạ akan tahentakoma. Enḍekhan Jihudikoko tohotʼente cetʼ jaejug hạbicʼko gurena? Ekalte baṅa, bickom onkoakʼ kại gunạkʼtege boṅgan hoṛ jạtrenko do bańcaokʼ lạgitʼ ạtko ńamkeda jemon Jihudiko gagoj hecʼako. Enḍekhan ńelokʼ kana, Jihudikoakʼ kại gunạkʼte dhạrtiren hoṛkoakʼ ḍher lab hoeakana, ar onkoakʼ loksan iạte boṅgan hoṛ jạtrenko do Isorakʼ bhorko ńamkeda. Onate Jihudiko cetanre Isorakʼ purạ bhor hijukʼre boṅgan hoṛ jạtrenko hõ artetʼ bạ̃ṛti bhor hecʼakoa! E boṅgan hoṛ jạtrenko, metape kạnạń, boṅgan hoṛ jạtrenko ṭhen apostol lekate ińakʼ kạmiko do ạḍi manot salakʼ iń ńeleda. Ar nonkate jemon apnar jạtren hoṛkoń gagoj ocokote onko mod khon thoṛa hoṛ iń bańcao daṛeako. Isor do Jihudiko bae bạsutako khan ar onkoakʼ giḍi ocokʼ do dhạrtirenkoakʼ samgeakʼkan khan enḍekhan Jihudikoe ataṅkore cetʼ hoyokʼa? Ona do cetʼ gocʼko jionko ńamakatʼ leka do baṅa? Sipiakʼ holoṅ khon pạhil tearakʼ piṭhạge sonotge khan enḍekhan ma sanam sipiyakʼ holoṅ hõ sonotgea. Jạitun dare reakʼ rehetʼge sonotge khan ḍạrko hõ sonotgea. Judi ona jạitun dare reakʼ adom ḍạrko rạputʼ giḍikate onare am lekan bir jạitun dare reakʼ ḍạrko kolom mitʼlen khan am do asol jạitun dare reakʼ rehetʼ khon ros hatao joṅme, ar rạputʼ giḍiakatʼ ḍạrko khon apnar do maraṅ alom hudisokʼa. Arem hudisokʼkan khan enḍekhan disạime, rehetʼ do bam sapʼ ṭahraoetʼ kana bickom rehetʼge am doe sapʼ ṭahraoetʼmea. Am dom men botecʼkea, “Ińiń kolom mitʼ ocokʼ lạgitʼge ḍạrko do rạputʼ giḍi ocoakana.” Bhagegea. Menkhan onkoko rạputʼ giḍi ocoakana onkoakʼ bepạtiạu iạte ar am dom kolom mitʼ akana amakʼ pạtiạu iạte. Onate alom usul monokʼa bickom botorokʼme, ente Isor do asol ḍạrkoge bae mãyãwakʼ kan khan enḍekhan am hõ ohoe mãyãlema. Onate Isor do tinạkʼ dayakʼicʼ ar tinạkʼ ajhãṭicʼ kanae ona baṛe hudisme. Okoeko ńurhạ akan onko lạgitʼ doe ajhãṭena, menkhan am lạgitʼ do dayawạnicʼge, khạjuk uniakʼ daya latarrem tahen. Ar baṅ khan am hom makʼ giḍi ocokʼa. Onko do bepạtiạu khonko ạcur ruạṛlen khan enḍekhan akoakʼ dare sãote arhõko kolom mitʼ ocokʼa, ente noa kolom mitʼ reakʼ kạmi do Isorgeye daṛeakʼa. Am do mitʼṭen bir jạitun dare reakʼ ḍạrem tahẽkana, ar ona dare khonem makʼ ạgu ocoyente bagwan reakʼ jạitun darerem kolom mitʼ ocoakana. Enḍekhan okoe ona dareren asol ḍạrkoko tahẽkan, onko do tinạkʼ algatege arhõ akoakʼ darereko kolom mitʼ ocokʼa! E boehako, apnarte jemon budanko alope monejoṅ onate iń do mitʼṭen sạri okowakʼ baḍae ocopeń menjoṅ kana. Ona sạriakʼ do noage, boṅgan hoṛ jạtrenkoakʼ lekha ạuri purạukʼ hạbicʼ ḍher bhag Israelkoakʼ ontor do keṭecʼge tahena. Nonkate joto Israelko do bańcaoko ńama. Sonot sostorre olakana; Sion khon babańcaoicʼe hijukʼa; uni do Jakob bõsren hoṛko tala khon, bebhoktikoe ocokʼ giḍiya. Iń do tinre onkoakʼ kạikoń meṭao giḍiya unre onko tulucʼ noage ińakʼ bondobos do hoyokʼa. Bhage sombat secʼte apeakʼ bhạlại lạgitʼge onko do ńitokʼ Isorren bạiri kanako. Menkhan Isorakʼ bachao lekate onko do mare hapṛamko iạte Isorren dulạṛiạko kanako. Isor okae dan ar okoeye hohowae ona babotre acʼakʼ mon do bae bodoltaea. Mitʼ jokhecʼ ape do Isorakʼ bebataorepe tahẽkana, menkhan ńitokʼ do Jihudikoakʼ bebatao iạte Isorakʼ dayape ńamakada, ar onkaleka mãyãpe ńamakatʼte onko hõ ńitokʼ bebataokoko hoeakana jemonko mãyã ocokʼ. Isor jemon sanamkoe mãyãwako onate uni do sanamkoge bebataoreye bondi esetʼ akatʼkoa. Isorakʼ dhon do asambheṛgea. Uniakʼ bud ar akel do khạndrińgea. Uniakʼ bicạr ar sanam kạmiko do oho ḍunḍhạulena. Probhuakʼ mon do okoe haleye baḍaeakada? Ar okoe baṅ uniren sosolhayicʼe hoeakan? Isor birudre okoeakʼ dạbi menakʼa je, uniakʼ dạbi do manao hoyokʼtaea mente? Ente jotowakʼge coṅ uni khon ar uni hotetege hijukʼkan ar sanamakʼ do uni lạgitʼkangea. Uniakʼge jaejug ṭhonok hoyokʼtaema. Amen. Enḍekhan E boehako, Isorakʼ noako daya iạtege iń do asokaeteń nehõrape kana, apeakʼ hoṛmo do jiwetʼ, sonot ar Isore kusiyakʼ dãṛẽ menkate uni ṭhen samaṅpe. Ar onage apeakʼ lek reakʼ sewa do hoyokʼa. Noa bạṛicʼ piṛhirenko leka do alope colona, bickom Isorge apeakʼ mon nawate tear ocowaepe ar purạte nawa arokʼpe, jemon Isorakʼ monejoṅakʼpe baḍae daṛeakʼ. Isorakʼ monejoṅakʼko do bhagegea, ar purạ khạṭigea ar onate Isor doe kusikʼkana. Iń do Isor ṭhen khon oka dayań ńamakatʼ onate ape mimitʼkoń metapekana, apnar reaṅ okaṭakʼ lek kan ona khon bạ̃ṛti do alope hudisokʼa, bickom tinạkʼ lek mentepe bujhạukʼkan inạkʼge hudisokʼpe. Isor do okoe tinạkʼgan pạtiạukʼ reakʼ daṛeye emakawade ona khon bạ̃ṛti do okoe hõ jemon apnarte aloe hudisokʼma. Abo mimitʼkoakʼ hoṛmore do aema hạṭińko menakʼa, menkhan joto hạṭińko do mitʼ leka bae kạmiya; ṭhik onkage abo do lekhare bon ḍhergere hõ Mạsire bon mitʼ akante mitʼ hoṛmoge bon hoeakana. Ar abo mimitʼko do eṭakʼkoakʼ hoṛmo hạṭińko kana bon. Isorakʼ daya lekate abo do judạ judạ daya dan bon ńamakada. Ar ona daya dan do nạbi lekate katha roṛ reakʼ daṛe menakʼ khan enḍekhan biwạs lekate uni do Isorakʼ kathae lạima. Ar sapʼ dapʼ reakʼ daṛe hoyokʼ khan enḍekhan uni do sapʼ dapʼ giriye kạmi ma. Okoe cecetʼakʼ emokʼ reakʼ daṛeye ńamakatʼ uni doe cetʼakoma; okoe sikhạu paṛhao reakʼ daṛeye ńamakatʼ uni doe sikhạu paṛhaokoma; okoe eṭakʼko danako reakʼ daṛeye ńamakatʼ, uni do soṛa monteye emokʼma; okoe mukhiyạ hoyokʼ reakʼ daṛeye ńamakatʼ uni do jidkateye calaoma; ar okoe eṭakʼko goṛowako lạgitʼ daṛeye ńamakatʼ uni do kharsala monteye goṛoakoma. Dulạṛre phạsiạra do alo tahenma. Okaṭakʼ bạṛicʼakʼkan ona do hirkhạwakʼpe; ar bhageakʼre jamaṛ akae tahenpe. Ape ape talare boeha leka dupulạṛpe. Ar apnar khon eṭakʼko bạ̃ṛti manotkope. Probhu secʼ jao ghuṛi apeakʼ mon ahkaokʼtape ma. Apeakʼ ontor do bhoktite perecʼ tahen ma. Ar Probhuakʼ kạmire lạgiạ paṛao akan tahenpe. Apeakʼ okaṭakʼ as menakʼ, ona iạte rạskạkʼpe. Harkhet sasetre soboripe. Koejoṅre jamaṛakan tahenpe. Isorren hoṛko reṅgejokʼ oktere goṛowakope. Ar peṛakʼ gun dohojoṅpe. Okoeko khedetʼpe onko do alope sarapakoa bickom bhorakope. Okoeko rạskạkʼkan onko tulucʼ rạskạkʼpe; ar rakʼ joṅko tulucʼ do rakʼjoṅpe. Ape apere mitʼ mon tahentape ma. Usulakʼko do alope moneakʼa bickom nindhạnko tulucʼ helmelokʼpe. Apnarte budanko mente alope hudisokʼa. Bạṛicʼ bodol bạṛicʼ okoe hõ alope halawakoa. Sanam hoṛkoakʼ mẽtʼre okaṭakʼ bhageakʼ kan ona reaṅ moneakʼpe. Daṛeakʼ bhor sanam hoṛko sãote sulukte tahenpe. Dulạṛiạ boehako, okoe hõ alope hala ruạṛakoa, bickom Isorge sạjại lạgitʼ aṛakʼaepe. Sonot sostorre Probhui meneda, “Hala hạli sạjại emokʼ reakʼ ektiạri do eken ińakʼge menakʼa; ar ińgeń hala ruạṛakoa.” Sostor reakʼ katha leka, “Amren bạiri reṅgecʼlere jomakʼ emaeme; ar tetaṅlere ńũiyakʼ emaeme. Entem nonkale khan uniakʼ bohokʼre seṅgel aṅgram puńjiaea.” Bạṛicʼakʼte alom bhagao ocokʼa, bickom bhageakʼte bạṛicʼakʼ bhagaome. Sanamkoge disạm cakʼlaoko tabereko tahenma; ente Isor okoeye hoeocoye uni chaḍa ar okoe hõ ektiạrianicʼ do bae hoedaṛeakʼa. Isorge disạm cakʼlaokoe bahal akatʼkoa; Onate ektiạrianko birudre okoeye teṅgon, uni do Isorakʼ ḍanṭaoakʼko birudregeye teṅgon kana. Ar okoeko nonkayetʼkan onko do akotege sạjạiko ạgujoṅ kana. Okoe bhageakʼko kạmikan onko do ektiạrianko ohoko botorlekoa, menkhan okoe bạṛicʼakʼko kạmikan onkogeko botorokʼa. Ape do ektiạrianko begor botorakote senokʼpe khojkana? Enḍekhan bhageakʼko kạmipe, inạ khan onko ṭhen khon sabasipe ńama. Apeakʼ bhage lạgitʼge uni do Isorren sapʼdapʼicʼ lekae kạmiya. Ar bạṛicʼakʼpe kạmikan khan botorokʼpe, ente bạṛicʼakʼ kạmikanko sạjạiko reakʼ ektiạri do uniakʼ menakʼtaea. Uni doe Isorren sapʼdapʼicʼ kana; ar okoe bạṛicʼakʼko kạmikan onko do Isor lekate sạjạiye emakoa. Onate ektiạrianko tabere tahen do jạruṛgetapea. Isorakʼ sạjại botorte onkoakʼ gobolre tahenpe aṅgoceda ona do baṅ, apeakʼ bibek sapha dohoe lạgitʼ hõ onape onkayeda. Onatege ape do raj bhejape emetʼ kana, ente mạsul uṭhạuko do akoakʼ kạmi hotete Isorakʼko kạmikana. Okoeakʼ oka paona ona emkataepe. Khajna hataoicʼ do khajna; mạsul uṭhạuicʼ do mạsul; botorae lekicʼ do botor; ar manot emae lekicʼ do manot emaepe. Okoe ṭhen hõ jãhãnakʼge alope dharaoa, eken dulạṛ chaḍa. Okoe eṭakʼkoko dulạṛetʼko onko do Moseakʼ ạngeko pańja akada. Hukum menakʼa, “Alom laṭghaṭa, alom khũna; alom kombṛoea, alom lalocakʼa.” Noako ar noa lekan arhõ eṭakʼ hukumko do niạ katharege guṭ mitʼkate noage roṛakana je, “Am aḍepaseren hoṛ apnar leka dulạṛem.” Dulạṛ do okoeakʼ bạṛicʼ hõ bae khoja. Enḍekhan ńelokʼ kana dulạṛ hotetege sanam ạn do purạukʼ kana. Un ghạṛicʼ okań roṛketʼ, ńit reakʼ okteko bujhạukate onka leka calakʼpe. Jạpitʼ khon ebhenokʼ reakʼ okte hoeakana, ente abo tinre bon pạtiạulen, un khon boroṅ ńitokʼge bańcao ńam reakʼ okte do artetʼ sorakana. Ńindạ do caba hecʼena, aṅgakʼ lạgidokʼ kana; onate dela, ńut reakʼ kạmi bạgikate marsal reakʼ khanḍa banḍa bon horokʼ joṅma. Rij roṅ ar ńu bulokʼte do baṅ, loṭghuṭi ar lucạ lamoṭte do baṅ, reṭha reṭhi ar hiskạte do baṅ, menkhan siń marsalre dãṛãnkanko leka jion bon khemao ma. Ape do kicricʼ leka Probhu Jisu Mạsi horokʼjoṅpe; ar jel reakʼ sana purạu lạgitʼ do alope moneakʼa. Pạtiạure okoeye nijorge uni do ataṅ sãohãyepe; uniakʼ hudis bundis joṅre uni tulucʼ alope reṭe peṭekʼa. Jãhãeye hudiskea uni do jotowakʼe jom daṛeakʼa, menkhan okoe pạtiạureye nijorge uni do eken aṛakʼ sakamgeye jomeda. Jel jojom hoṛ do jel baṅ jojomicʼ hoṛ aloe nisṛạuema ar jel jojomicʼ hõ jel baṅ jojomicʼakʼ dos aloe sabtaema, ente Isor do unkin bana hoṛgeye ataṅ sãohã akatʼkinạ. Am dom celekante, eṭakʼ hoṛren gutim bicạrede kana? Uni doe teṅgo ṭahraokʼa, seye ńurocokʼa, ona do uniren kisạ̃ṛgeye bujhạua. Menkhan uni doe teṅgo ṭahraokʼa, Probhuge uni doe teṅgo ṭahrao ocoyea. Mitʼ hoṛ do mitʼ din eṭakʼ din khon sorose bujhạueda. Arhõ eṭakʼ hoṛ do joto dinge somangeye bujhạueda. Noa babotre okoe cetʼe cekae ar bae cekae, ona do monreye khạṭi joṅma. Din okoeye manaoetʼkan uni do Probhu kusi ocoye lạgitʼgeye onkayeda. Ar okoe sanamakʼe jometʼkan uni do Probhu kusi ocoye lạgitʼgeye jomeda, ente uni do Isore gunmanao joharae kana. Okoe sanamakʼ bae jometʼkan uni hõ Probhu kusi ocoye lạgitʼge bae jomeda, ar uni hõ Isore gun manao joharae kana. Aboko modre okoe hõ apnar lạgitʼ jiwetʼ babon tahenkana ar apnar lạgitʼ okoe hõ babon gujukʼ kana. Abo jiwetʼ bon tahen khan abo do Probhu lạgitʼge jiwetʼ bon tahenkana, ar bon gujukʼ kan khan Probhu lạgitʼge bon gujukʼ kana. Enḍekhan jiwetʼ bon tahen se bon gujukʼ, abo do Probhuren kangea bon. Mạsi doe gocʼlena are jiwetʼ beretʼena jemon uni do jiwetʼko ar gocʼkoren Probhui hoedaṛeakʼ. Enḍekhan cedakʼ am do amren boehamakʼ dosem sapʼeda? Ar cedakʼ amren boeha dom nihạtede kana? Bicạr lạgitʼ ma sanamkoge coṅ Isor samaṅre teṅgokʼ hoyokʼ tabon. Sonot sostorre olakana, “Probhui meneda, ‘ińiń jiwetʼgete mitʼke mitʼ gunṭhi do iń samaṅre ikhṛumokʼa, ar mitʼke mitʼ alaṅ do Isore sarhaoea.’ ” Enḍekhan ńelokʼ kana, abo mimitʼ hoṛ do apnar reaṅ lekha jokha Isor emae hoyokʼ tabona. Onate abo do mimitʼ hoṛakʼ dosko alo bon sabtakoma, ar nonkanakʼ alo bon kạmi ma one ona ńelte jãhãe boeha monreye tạkijokʼ se kạireye ńur botecʼkokʼ. Probhu Jisu tulucʼ bon kolom mitʼ akante iń do bes okocʼteń baḍaea je, okaṭakʼ jomakʼ hõ besaphawakʼ do baṅkana, menkhan jãhãe jãhãn jomakʼ besaphagea menteye hudisetʼ khan enḍekhan uni lạgitʼ ona jomakʼ do besaphagea. Jãhãn jomakʼ iạte amren boeham duk ocoyedekan khan am do bam dulạṛede kana. Okoe lạgitʼ Mạsiye gocʼlen, jomakʼ karonte uni do alom nasao ocoyea. Apeakʼ bhageakʼ do okoe hõ alo jemonko neṅghaotape. Isorakʼ rajre jom ar ńũ do maraṅakʼ do baṅkana; maraṅ katha do hoyokʼ kana, dhorom ar suluk ar rạskạge Sonot Jiure. Okoe nonkate Mạsi ṭhen golame khaṭaokʼkan, Isor do unireye kusikʼkana ar hoṛko hõ uni do bhageko metaekana. Onate okaṭakʼ kạmile khan suluk hoyokʼ ar okaṭakʼte sanamko bon gopoṛo daṛeakʼ, ona reakʼ bon kurumuṭuima. Jãhãn jomakʼ khạtirte Isorakʼ kạmiko do alope nosṭoea. Joto jomakʼge sonotgea, menkhan jãhãe jãhãnakʼ jomte eṭagicʼakʼ monre tạkicʼakʼe janam ocoyetʼ khan uni lạgitʼ ona jom do baṅ ṭhika. Jel jom, se darkha rasa ńũi se nonkanakʼ kạmi lek do baṅkana one okaṭakʼte amren boehae tạkicʼ botecʼkokʼ. Noa reaṅ am okaṭakʼ bhage mentem pạtiạukʼkan ona do Isor ar am talarege dohoeme. Ar bhageakʼ menkate jãhãnakʼ kạmi jokhecʼ jãhãeakʼ bibek hõ uni bako dusiye khan enḍekhan uni doe bhạgangea. Menkhan jãhãe digdhạkate jãhãnakʼe jom khan enḍekhan uni do dusiye hoyokʼa, ente uni do acʼakʼ biswạs leka bae kạmiyeda. Ente biswạs birudre jãhãnakʼ kạmige kại kana. Abo okoe dobon daṛeanko kan abo do bon dạyik kana bin daṛeankoakʼ nijorakʼkore teṅgo goṛoako lạgitʼ, ar eken apnar kusikʼ lạgitʼ do baṅ. Biswạsi boehako benao rakabe lạgitʼ abo sanamkoge jemon uniakʼ bhạlại lạgitʼ uni bon kusiocoye. Mạsi hõ apnartetʼ do bae kusi ocolena. Sonot sostorre olakana, “Okoe amko opomanetʼme onkoakʼ sanam opoman do ińrege paṛaokʼ kana.” Sonot sostorre okako ol lahalen ona do abo cetʼabon lạgitʼge ollena, jemon sostor khon sobori ar udgạu bon ńamte as tahen tabon. Jisu Mạsi sãote calakʼ horre sobori ar udgạuicʼren Isor do ape sanamkoakʼ mon baṛeye mitʼ ocoetapema. Enḍekhan ape do mitʼ monte ar mitʼ aṛaṅte aboren Probhu Jisu Mạsiren Isor Babape sarhao daṛeae. Isorakʼ ṭhonok jemon sodorokʼ, onate Mạsi cetʼlekae ataṅ sãohãketʼpe onkage ape hõ ape apere ataṅ sãohãkʼpe. Baḍaekakʼpe, Isorakʼ katha je sạriakʼkan ona sạbud lạgitʼge Mạsi do Jihudikoren sapʼ dapʼicʼe hoelena. Noa reakʼ monsubạ do tahẽkana, Isor do hapṛamko ṭhen okae gokʼletʼ tahẽkan ona jemon purạukʼ ar uniakʼ daya iạte boṅgan hoṛ jạtrenko hõ uniko sarhaoe. Sonot sostorre olakana, ona iạte iń do boṅgan hoṛ jạtrenko talareń sarhaomea, ar amakʼ ńutumiń õṛhẽytama. Arhõe meneda, E ape boṅgan hoṛ jạtrenko, ape do Isorren hoṛko tulucʼ uni sarhaoepe. Arhõ olakana, Probhu sarhaoepe, E sanam boṅgan hoṛ jạtrenko; ar jạt jạtrenko do uniko ńumema. Arhõ Jesaeae meneda, okoe doe Jisại reakʼ rehetʼkan, uni doe hijukʼa, uni do joto jạtkore rajokʼ lạgitʼe teṅgona. Ar sanam jạtren hoṛko do uniregeko bhorsakʼa. Okoe ase dan abon kan uni Isor do apeakʼ biswạs hotete asambheṛ rạskạ ar sulukteye perecʼpema. Enḍekhan sonot Jiu reakʼ daṛete apeakʼ ontor reakʼ as do sareṛokʼtapea. E ińren boehako, iń do noań pạtiạukʼ kana, apeakʼ ontor do bhageakʼte purun akana, ar joto lekan akeltehõpe perecʼgea, ente ape do mimitʼkope sikhạu paṛhao daṛeako kana. Enrehõ iń do mitʼ bar katha disạ ocope lạgitʼ dilkate noań olape kana, ente Isor do boṅgan hoṛ jạtrenko ṭhen Mạsi Jisuren sapʼ dapʼicʼ hoyokʼ reakʼ ạsirbade dan akawạdińa. Sonot Jiu hotete okoe Jihudikoko bachao doho ocoakan, onko do Isor ṭhen jemon samaṅokʼakʼko hoedaṛeakʼ ona iạte uniakʼ bhage sombat lại pasnaore naeke kạmiyiń kạmi kana. Iń do Isor lạgitʼ okaṭakʼ iń kạmikan onate Mạsi Jisu hotete ińakʼ sarhaokʼ reakʼ ạidạri do menakʼgetińạ. Iń hotete Mạsi okaṭakʼe kạmiakatʼ ona bahre jãhãn katha roṛ do ohoń dil daṛekea. Unige ińakʼ katha ar kạmite, hahaṛa kạmi ar cinhạko hotete ar sonot Jiu reakʼ daṛete boṅgan hoṛ jạtrenko do Isorreye tabe ocoakatʼkoa. Onate iń do Jerusalem khon ehopʼkate Illurikum hạbicʼ sanam jaegare Mạsiakʼ bhage sombat purạteń lại jạhirakada. Okare Mạsiakʼ ńutum tisge baṅ lại akan onḍege bhage sombat jạhirakoń jidkeda, jemon eṭakʼkoakʼ ehopʼakʼre aloń benao rakab. Sonot sostorre olakana, “okoe uni reaṅ baṅ lại akawatʼko, onko do onako ńel ńama, ar okoe tisge bako ańjomakatʼ, onko do onako bujhạu daṛeakʼa.” Ona iạtege ape ṭhen senokʼ do ạḍi dhao iń akoṭena. Menkhan ńitokʼ noako ṭoṭhare ińakʼ kạmi reakʼ jaega do ar bạnukʼa. Ar ḍher bochor khonge ape ṭhen senokʼ reakʼ sana menakʼtińạ, onate ńitokʼ Spaniạ disạmte parom calakʼ jokhecʼ ape ṭhen calakʼ iń menjoṅ kana. Ar asiń dohoyeda, ona horte sen paromokʼ jokhecʼ apeń ńel torapea ar ape tulucʼ thoṛa okte rạskạte khemao tayom apege Spaniạ disạmte calakʼ reakʼpe bondobosạńạ. Menkhan ńitokʼ do Isorren hoṛko goṛowako lạgitʼ Jerusalemteń calakʼ kana, ente Jerusalemre Isorren hoṛko modre okoe reṅgecʼ hoṛ menakʼko onko lạgitʼ Makedoniạ ar Akhaea manḍerren hoṛko do thoṛa danko uṭhạu akada. Onko do noa dan rạskạtegeko uṭhạu akada. Ona chaḍa noa manḍerko do Jerusalemren Isorren hoṛko ṭhenko rinigea, ente Jihudiko do akoakʼ Jiuteakʼ bhor dan reakʼ bhag tinre boṅgan hoṛ jạtrenkoko hạṭiń akatʼkoa unre boṅgan hoṛ jạtrenko hõ Jihudiko gharońj secʼte goṛowako do lek kantakoa. Ińakʼ noa kạmiń sạtle khan ar ona canda ṭhik leka seṭer akana menteń baḍaele khan ape secʼte Spainiạteń calakʼa. Ińiń baḍaea ape ṭheniń senlenre iń do Mạsiakʼ purạ puri bhoriń iditoraea. E boehako, aboren Probhu Jisu Mạsi hotete ar sonot Jiuakʼ dulạṛteń nehõrape kana, iń lạgitʼ Isor ṭhen koejoṅre iń sãote lạgiạ paṛaokʼpe. Koejoṅpe, Jihudiạre okoe do Isorko opomanekan onkoakʼ ti khon jemon rukhiyạń ńam, ar Jerusalemre Isorren hoṛko jemon ińakʼ noa goṛoko ataṅ. Unre Isorakʼ sanaleka iń do kusi monte ape ṭheniń calao daṛeakʼa ar ape sãote tahẽkate jiwiń ṭanḍhaetińa. Sulukren Isor do ape sanamko sãoteye tahenma. Amen. Niạ dhao iń do aboren misera Phoebe ape ṭheniń cinhạpkae kana. Uni do Kenkhrea manḍerren sapʼdapʼicʼ kanae. Ar cetʼleka Isorren hoṛko ataṅ daram lek kan onkage Probhu ńutumte ataṅepe. Ape ṭhen jãhãn goṛoye khoj khan goṛoaepe, ente uni do aema hoṛe goṛo akatʼkoa ar iń hõe goṛowạdiń tahẽkana. Priskạ ar Akuilạ hõ ińakʼ johar emakinpe. Unkin do Mạsi Jisuakʼ kạmire iń sãote ạḍikin khaṭao akana. Unkin do ińakʼ jiwi rukhiyạ khạtirte ạkinakʼ hoṭokʼkin alaeletʼa. Eken iń eskar do baṅ, menkhan sanam boṅgan hoṛ jạtrenkoakʼ joto manḍerrenko hõ unkinko gunmanao johar ạkin kana. Unkinakʼ oṛakʼre okoe do manḍerren lekate mitʼ ṭhenko jarwakʼkan onko hõ joharakope. Ińren dulạṛiạ gate Epaenetos hõ joharaepe, ente Asiạre unige pạhilte Mạsiye ataṅledea. Mạriạm hõ joharaepe, uni do ape lạgitʼ ạḍi ãṭe khaṭaolena. Ona chaḍa Andronikus ar Juniạ hõ joharakinpe. Unkin do iń leka Jihudi hoṛ kanakin ar iń sãote hajotrekin tahẽkana. Apostolko modre ạḍi manotan hoṛ kanakin. Unkin do iń khon hõ laharege Mạsiren kin hoeakana. Probhure ińren dulạṛiạ gate Ampliatus joharaepe. Urbanus, one okoe do abo sãote Mạsi lạgitʼe kạmikan, uni ar ińren dulạṛiạ gate Skatus hõ joharaepe. Apelles hõ joharaepe. Mạsiren hoṛ lekate uni doe biḍạu ocoakana. Aristobulus gharońjrenko hõ joharakope. Herodion, joharaepe, one okoe do iń lekae Jihudikan. Narkissus oṛakʼren okoe do Probhuren hoṛkanko onko hõ joharakope. Truphaena ar Truphosa joharạkinpe. Nukin maejiu do Probhu lạgitʼkin khaṭao akana. Dulạṛiạ Persis hõ joharaepe. Ente nui maejiu hõ Probhu lạgitʼ ḍhere khaṭao akana. Mạsire keṭecʼ pạtiạuicʼ mente okoeakʼ ńutum menakʼ uni Ruphus ar uniren eṅgattetʼ hõ joharạkinpe. Ente uniren eṅgattetʼ do ińren hõ gogoleka kanae. Asunkritus, Phelegon, Hermes, Patrobas, Hermas ar onko sãoren Mạsire pạtiạkʼkan eṭakʼ boehako hõ joharakope. Philologus ar Julia, Neresus ar uniren miserat, Olumpas ar onko sãote Isorren okoe hoṛko menakʼko onko sanamko joharakope. Sonot cokʼte jopoharpe. Mạsiakʼ sanam manḍerrenko do apeko joharape kana. E boehako, okaṭakʼ sikhnạtpe ńamakatʼ ona birudre okoe do kạphạriạu ar tạkicʼakʼko janam ocoyetʼkan onko oromkakope ar onko khon sahaṛokʼpe, ente nonkanko hoṛ do aboren Probhu Mạsiren golam hoyokʼ baṅkate apnar lacʼgeko moneakʼkana. Onko do sebel ar luhum suhum kathate sojhe monan hoṛko bulạuetʼkoa. Apepe bataoetʼ reakʼ katha do jotogeko ańjomakada, ar onate apereń kusi akana. Iń doń khojkana ape do jemon bhageakʼko oromkatepe ataṅ ar bạṛicʼakʼko khon pharakpe tahen. Sulukren Isor do ạḍi usạrage apeakʼ jaṅga latarre Soetane lebetʼ gańjaoea. Aboren Probhu Jisuakʼ daya do ape cetanre tahenma. Ińren são kạmiyạicʼ Timothi hõe joharape kana; Lukius, Jason ar Sosipatros hõ apeko joharapekana. Iń lekage onko hõ Jihudi jạtren hoṛ kanako. Iń Tertiusge, Pạulakʼ noa ciṭhi doń oletʼkana. Probhuren hoṛ lekate iń hõ apekoń joharape kana. Ar iń okoeakʼ oṛakʼreń tahenkan ar manḍerren hoṛko okoeakʼ oṛakʼrele jarwa midokʼkan, uni Gaius hõ apekoe joharape kana. Noa nagrahare ṭaka-poesa hisạb dohoe reakʼ bhar okoe cetanre menakʼ uni Erastus ar aboren boeha Kuartus hõ apekin joharape kana. Jisu Mạsi reaṅ oka bhage sombat iń porcaretʼkan ona bhage sombat hotete ṭarhao dohope reakʼ daṛe do Isorakʼ menakʼgetaea. Ar ḍher jug hạbicʼ Isor do acʼakʼ okoakʼko reaṅ okoege bae lại akawatʼkoa, menkhan ńitokʼ bhage sombat hotete ona do sodor akana ar ona lekage iń hõń porcareda. Ar jaejugicʼ Isorakʼ hukum leka nạbikoakʼ olakʼ hotete sanam jạtren hoṛko ṭhen ona do baḍae ocoakana, jemon onko do Mạsireko pạtiạukʼte Isorren bataokoko hoedaṛeakʼ. Eken uni eskargeae Isor do, ar unige akelanicʼ do. Jisu Mạsi hotete jaejug hạbicʼ uniakʼge ṭhonok hoyokʼtaema. Amen. Isorakʼ monejoṅ ar uni hohote iń Pạul do Mạsi Jisuren mitʼṭen celań hoeakana. Iń ar boeha Sosthenes do Korinthi nagraha reakʼ Isorakʼ manḍerren hoṛko ṭhen, metakʼme ape ṭhen liń oletʼkana. Mạsi Jisu sãote jopoṛao hotete Isor do acʼakʼ monsubạ leka apeye bachao doho akatʼpea ar acʼren hoṛko hoyokʼ lạgitʼe hohoakatʼpea. Ape ṭhen ar eṭakʼ sanam jaegare okoe do aboren Probhu Jisu Mạsi Probhu menteko aṅgocede onko ṭhen ạliń do noa ciṭhi liń oleda. Uni do aboren ar onkoren hõ Probhu kanae. Aboren Isor Baba ar Probhu Jisu Mạsiakʼ daya ar suluk do apeko tulucʼ baṛe tahenma. Iń do siń sạṭupʼ ape lạgitʼ ińren Isoriń gunmanao joharae kana, ente Mạsi Jisu tulucʼpe mitʼ akante ape do Isorakʼ dayape ńam akada. Ona daya do noage, ape do Mạsi tulucʼpe mitʼ akante joto secʼ khon metakʼme, sanamakʼ roṛ reakʼ daṛete ar akeltepe kisạ̃ṛ akana, ente Mạsi reaṅ aleakʼ goha do apeakʼ ontorre gathao akana. Onate aboren Probhu Jisu Mạsiakʼ sodorokʼ reakʼpe ńel hohorkanre okaṭakʼ dante hõ bape khaṭo ocokʼkana. Aboren Probhu Jisu Mạsige mucạtʼ hạbicʼe ṭarhao ocopea, onate uniakʼ hijukʼ dinre ape do sanam lekan bin dusạnkope hoyokʼa. Isor doe pạtiạrgea, ar unige ape doe hohoakatʼpea jemon uniren Hopon aboren Probhu Jisu Mạsi ar ape talare helmel tahen. E boehako, aboren Probhu Jisu Mạsi ńutumteń nehõrape kana, sanamkoge mitʼakan tahenpe, ape talare jãhãn dola duli alo tahen ma, bickom ape do mitʼmon ar mitʼakan tahenpe. E ińren boehako, iń do Kloe gharońjrenko hotete ape reaṅ iń baḍaekeda je, apeko talare reṭha reṭhi menakʼa mente. Iń do noań meneda, apeko modren adomkoko meneda, “Iń doń Pạulren kana” ar adomko doko meneda, “Apollosren kạnạń” ar adomko doko meneda, “Kephasren kạnạń” ar adomko doko meneda, “Iń doń Mạsiren kana.” Menkhan Mạsi do cetʼe hạṭiń akana? Ar Pạul do cetʼ ape lạgitʼe krus ocolena? Ape do cetʼ Pạul ńutumtepe bạptis ocoakana? Isoriń gunmanao joharae kana, iń do apeko modre Krispus ar Gaius chaḍa ar okoe hõ bạń bạptis akatʼkoa, jemon okoe hõ aloko lại daṛeakʼ, ape do iń ńutumtepe bạptis akana mente. Stephan gharońjren hõń bạptis akatʼkogea, menkhan ar jãhãe iń bạptis akatʼko reakʼ do bạń disạyeda. Mạsi do bạptisko lạgitʼ bae kolakadińa menkhan bhage sombat porcar lạgitʼgeye kolakadińạ. Ona bhage sombat do akel reakʼ kathate porcar do bae kol akadińạ, jemon Jisu Mạsiakʼ krus alo ạuṛiagokʼtae. Okoe nosṭokʼ reakʼ horteko taṛametʼ onko ṭhen Mạsiakʼ gujukʼ reakʼ katha do lelhawakʼ chaḍa ar cetʼge baṅkana; menkhan okoe bańcao bon ńam lạgidokʼkan abo ṭhen ona do Isorakʼ daṛe kana; Ente sostorre olakana, “Iń do akelankoakʼ akeliń maraotakoa, ar budankoakʼ bud iń ạuṛiagtakoa.” Menkhan akelanicʼ do ukuricʼ? Bidiạwạnicʼ hõ ukuricʼ? Noa piṛhiren esetʼicʼ hõ ukuricʼ? Noa dhạrti reakʼ akel je, lelhawakʼkan ona do cetʼ Isor bae udukʼ abon kana? Isor do acʼakʼ akele ṭarhao akatʼte dhạrtirenko do akoakʼ akelte Isor bako orom daṛeadea. Onate Isor do bhage sombat reakʼ lelhatetʼ iạte biswạsiko kại khon bańcaokoe kusiyena. Jihudiko do cinhạ lekate hahaṛa kạmi ńeńelko khojkana ar Junạniko do akelko ńam baṛayetʼ kana; menkhan ale do kruslen Mạsiakʼ kathale porcareda. Ona katha Jihudiko ṭhen do mitʼṭen tạkicʼakʼ kana ar boṅgan hoṛ jạtrenko ṭhen do lelhawakʼge, menkhan baṅ do Jihudige ar baṅ do Junạnige, Isor okoeye hoho akatʼko onko ṭhen do uni Mạsi kangeae Isorakʼ daṛe ar akeltetʼ. Isorakʼ lelhatetʼ do manwakoakʼ akel khon hõ bạ̃ṛti akelanakʼ kana, ar Isorakʼ nijortetʼ do manwakoakʼ daṛe khon hõ bạ̃ṛti jorana. E boehako, apepe hoho ocolenre cetʼ lekan hoṛpe tahẽkana ona disạipe. Manwa jạt lekate akelanko do ḍher bape hoho ocoakana, daṛeanko hõ baṅ ar bhodroko hõ ḍher do baṅ; menkhan dhạrti do okaṭakʼ lelhawakʼe metakʼkan, onage Isor doe bachaoana, jemon akelankoe lajao ocoko. Ar dhạrti okaṭakʼ nijorakʼe metakʼkan, onage Isor doe bachaoana jemon daṛeankoe lajao ocoko; dhạrti do okaṭakʼ nicạṛ, nihạtakʼ ar bạnukʼakʼe metakʼkan, onage Isor doe bachaoana, jemon dhạrtire menakʼakʼ koe ạuṛiakʼ ocoe; uni do onakogeye bachaoana jemon Isor samaṅre okoe manwa hõ aloe sarhaokʼ. Jisu Mạsi tulucʼpe mitʼakan ona do Isor khonge hoeakana. Jisu Mạsige abo lạgitʼ Isor ṭhen khone emakan akel do; unige aboren dhoromicʼ, sonoticʼ ar chaḍaoicʼ. Onatege sonot sostorre ol akana, “Sarhaokʼ kanicʼ do Probhureye sarhaokʼma.” E boehako, ape ṭheniń senlenre ar Isorakʼ bhage sombat iń jạhirape oktere mońj katha se ạḍi akelan hoṛ leka do bạń galmarao akatʼpea. Ińiń goṭawan tahẽkana, ape ṭhen tahen jokhecʼ Jisu Mạsige metakʼme, kruslediyicʼ Jisu Mạsi baḍaeye chaḍa ar cetʼge bạń baḍaea. Tinre apeko ṭheniń tahẽkana unre iń do nijorgeń ạikạuetʼ tahẽkana ar botorteń thar tharaokʼkan tahẽkana, ińakʼ porcar ar ińakʼ roṛre hoṛko rạmjạu ocoko leka akelte perecʼ bidiyạ hõ baṅ tahẽkana, bickom onare sonot Jiuakʼ daṛege ńelokʼkan tahẽkana, jemon apeakʼ biswạs do manwakoakʼ akelre ṭehãḍ baṅkate Isorakʼ daṛe cetanrege ṭehãḍokʼtape. Okoe Mạsiakʼ Jionreko hara sạbitʼ akan onko ṭhen do akel reakʼ kathagele roṛeda; menkhan ona akel do noa dhạrti reakʼ baṅkana, se noa jugren mukhiyạkoakʼ hõ baṅkana one okoe doko parom calakʼko kan; menkhan ale do Isorakʼ akelte perecʼ akan okoakʼ kathakole roṛeda, one oka do dhạrti ạuri sirjạu khon Isore niṭ dohoakatʼ tahẽkan jemon uniakʼ ṭhonok reakʼ bhạgiạdar bon hoedaṛeakʼ. Menkhan niạ jugren cakʼlaoko modre okoe hõ ona do bako baḍaeleda; enteko baḍaele khan ṭhonokren Probhu do ohoko kruslea. Menkhan sonot sostor reakʼ katha leka; “Isor okoeko dulạṛedekan onko lạgitʼ uni okakoe ṭhik dohoakatʼ, ona do okoe hõ mẽtʼte bako ńelakada, luturte bako ańjom akada ar hudis hõ bako hudis akada.” Menkhan Isor do acʼren Jiu hotete onako abo ṭhene sodor akada, ente sonot Jiu do bin baḍaeyakʼ mente cetʼge bạnukʼtaea; ente uni do Isorakʼ khạndriakʼko hõe baḍaegea. Manwako modre nonkan okoe menaea, one uni do eṭagicʼakʼ mon reakʼ kathae baḍaekan? Manware okoe Jiu menae eken unige acʼakʼ monejoṅakʼe baḍaea. Onkage Isorren Jiu chaḍa Isorakʼ monejoṅakʼko do eṭakʼ okoe hõ ohogeko baḍae daṛelea. Abo do dhạrtiren Jiu babon ńamakadea, bickom Isor khonakʼ uniren Jiuge bon ńamakadea, jemon Isor okae danakatʼ ona bon bujhạu daṛeakʼa; ar ona danko reakʼ kathage roṛ hõ bon roṛ baṛayeda. Ona roṛ lạgitʼ okako katha bon laṛcaṛetʼkan ona do manwakoakʼ akel khon cecetʼakʼ ńamkate do babon roṛeda, menkhan sonot Jiu reakʼ cecetʼakʼ hotete bon roṛeda. Jiu reakʼ sạri cecetʼakʼ lạgitʼ abo do Jiu reakʼ kathage bon roṛeda. Okoe Jiurene baṅkan, uni do Isorren Jiu ṭhen khon oka hijukʼ ona bae aṅgoca; ente uni ṭhen ona do lelhawakʼ kana. Uni do onako bae baḍae daṛeakʼa, ente sonot Jiu bae cetʼae khan onako do ohoe tojbij daṛelea. Okoe hoṛ doe Jiutenicʼ kan uni do jotowakʼkoe tojbijeda, menkhan okoe hõ uni do bako tojbij daṛeaea. Sonot sostorre olakana, “Probhuakʼ mone do okoeye baḍae akatʼte, uni doe sikhạu daṛekea?” Menkhan abo do Mạsiakʼ mon bon ńam akawana. E boehako, jiutenko ṭhen cetʼleka katha roroṛ hoyokʼ, onka do bạń galmarao daṛeakatʼpea, menkhan jel gobolrenko ṭhen cetʼleka roroṛ lek kan onkageń galmarao akatʼpea. Mạsire ape do bale gidrạko leka kanape, onate onkageń galmarao akatʼpea. Iń do keṭecʼ jomakʼ bạń ematʼpea, bickom toageń ńũatʼpea, ente unre ona keṭecʼ jomakʼ hajam lạgitʼ daṛe do baṅ tahẽkantapea. Ar ńit hõ ape do onkage menakʼpea, ente ńit hõ jel gobolrege menakʼpea. Ape talare hiskạ ar reṭha reṭhi menakʼ khan enḍekhan cetʼ jelrenko dope baṅkana? Manwako leka do cetʼ bape coloneda? Ape modre mitʼ hoṛ do Pạulren, ar mitʼ hoṛ do Apollossrene menetʼ khan enḍekhan unre cetʼ manwako leka dope baṅkana? Apolloss doe celekana? Ar Pạul baṅe celekan? Unkin makin sapʼ dapʼkin kan, one unkin hotetepe pạtiạu akan, ar Probhuge mimitʼ hoṛ apan ạpin kạmiye emakatʼkinạ. Iń doń rohoekeda, ar Apolloss do dakʼe emada, menkhan Isor do onae hara ocokeda. Onate rohoyicʼ hõ cele hoẽ baṅkana ar dakʼ emakʼicʼ hõ baṅ, menkhan okoeye hara ocoyetʼ uni do Isorge. Rohoyicʼ ar dakʼe emokʼicʼ unkinakʼ monsubạ do mitʼgea, menkhan unkin do apan ạpin kạmi leka kuṛạikin ńama, ente ale do Isor tulucʼle kạmikana. Ar ape do Isorakʼ goḍa kanape, Isorakʼ benao akan oṛakʼge. Isor ṭhen khon oka dayań ńamakatʼ ona hotetege iń do gạkhuṛ kạrigol leka rehetʼ iń bạisạu akada, ar eṭakʼko do ona cetanre oṛakʼko benao kana. Menkhan okoe okalekae benaokan ona reaṅ uni doe sontorokʼma. Okaṭakʼ rehetʼ laharege bạisạu akan ona chaḍa ar jãhãn rehetʼ okoe hõ bako bạisạu daṛeakʼa. Jisu Mạsigeye hoyokʼ kana ona reakʼ rehetʼ do. Ona rehetʼ cetanre sona, rupạ, damanakʼ dhiri, kaṭ, ghãs, lanḍha se busupʼ reakʼakʼe benao rakab, enḍekhan okoe oka lekae kạmi akatʼ ona do mońjte ńelokʼtaea. Ar bicạr dinre sodorokʼa, ente ona din reakʼ sodorokʼ do seṅgel talatege hoyokʼa. Ar okoeakʼ kạmi oka lekan ona do seṅgelgeye biḍạu aṭkara. Okoe okaṭakʼe benao akatʼ onage ṭikạu tahentae khan enḍekhan uni do kuṛạiye ńama; ar ona kạmiyakʼ atar giḍilentae khan enḍekhan uni do lokshan hoyokʼtaea. Acʼtetʼ doe bańcaokʼa, menkhan uniakʼ dosa do nonkan hoṛleka hoyokʼtaea one okoe do seṅgel talateye parom hecʼakan. Ape do cetʼ bape baḍaea, ape do Isorakʼ mundil kanape ar Isorren Jiu do apeakʼ ontorreye girobasokʼkana mente? Jãhãege Isorakʼ mundile bạṛij enḍekhan Isor hõ uniye bạṛijea, ente uniakʼ mundil do sonotgea, ar ona mundil dope ape kangea. Okoe hõ apnarte aloe bulạukʼma. Ape modren jãhãe niạ jugren akelanicʼ menteye hudisokʼkan khan, enḍekhan uni do lelhayicʼ lekae hoyokʼma, jemon sạri akelanicʼe hoedaṛeakʼ, ente Isor samaṅre noa dhạrti reakʼ akel do eken lelhawakʼ kana. Sonot sostorre ol menakʼa, “Isor do akelanko akoakʼ seantetʼreye sapʼetʼkoa.” Arhõ olakana, “Probhu doe baḍaegea, akelankoakʼ sanam hudis bundisko do ạuṛiakʼgetakoa mente.” Onate okoe hõ jãhãe manwa iạte alope sarhaokʼa, ente jotoge coṅ apeakʼkan; baṅ do Pạul, baṅ do Apolloss, baṅ do Kephas, baṅ do dhạrti, baṅ do jion, baṅ do moron, baṅ do ńit menakʼakʼko, baṅ do tayom daramakʼko, onako sanamakʼge apeakʼkana; ar ape do Mạsiren, ar Mạsi do Isorren. Hoṛ do nonka lekako bujhạule ma je, ale do Mạsiren sapʼdapʼko kanale ar Isorakʼ sạri okoakʼko baḍae ocoko reakʼ bhar do alerege emakana. Ar okoere bhar emakan onko do udugokʼ hoyokʼtakoa je, pạtiạranko kanako mente. Ińakʼ bicạr do apege bicạrpe baṅ do bạisiren hoṛko hotete hoyokʼ, onate ińakʼ do jãhãnakʼ cetʼge baṅ cekakʼtińạ; metakʼme iń hõ apnarte do bạń bicạrokʼ kana. Ińakʼ bibek do saphagea, menkhan onate noa do baṅ sạbudokʼ kana je, iń doń dhoromgea. Probhuge ińakʼe bicạrtińạ. Onate Probhu hijukʼ lahare, metakʼme ona niṭ akan din lahare okaṭakʼ hõ alope bicạra. Ńutre oka okoge menakʼ uni do unre ona marsalteye ạguya ar manwa ontor reakʼ okoakʼ monsubạkoe sodora. Unre mimitʼ hoṛ do Isor ṭhen khon sarhaoko ńama. E boehako, apeakʼ porho lạgitʼge iń do ińakʼ ar Apollossakʼ kathakoń roṛeda, jemon ạliń ṭhen khonpe cetʼ daṛeakʼ baṅma, oka olakan ona bahre calakʼ do baṅ ṭhika mente. Enḍekhan ape do mitʼ hoṛ bạgikate eṭagicʼ upạrte bape gorbokʼa. Am do eṭakʼko khonem begargea mente okoe hõ bako monejoṅ kana. Nonkanakʼ cetʼ menakʼtama one okaṭakʼ do dan lekate bam ńamakatʼ? Arem ńam akatʼ khan cedakʼ begor ńamicʼ leka dom sarhaokʼ kana? Ape ńelte ńelokʼ kana ape do laharege jotowakʼpe ńam akada, ar laharegepe kisạ̃ṛ akana, ar ale begortegepe raj akana. Arpe rajlen khan do bhagege hoekokʼa; enḍekhan ale hõ ape tulucʼle raj daṛekokʼa. Ińakʼ bujre Isor do ale apostolko ses utạrko menkateye udukʼ akatʼlea, gocʼ ocokʼ lạgitʼ ṭarhao akanko lekage. Ale do goṭa dhạrtirenko ṭhen, metakʼme sermaren goḍetko ar manwako ṭhen tamasa lekale hoeakana. Ale do Mạsi iạte lelhale hoeakana, menkhan ape do Mạsirepe mitʼakante budankope hoeakana. Ale do nijorkoge menkhan ape do joranko. Ape do sabasiankope hoeakana ar ale do bemanotkoge. Ale do ńitokʼ hõ reṅgecʼ ar tetaṅtele loraokʼ kana. Ale do reṅgecʼ arle laṅgaṭgea, kilạu ocokʼ kanale ar aleakʼ oṛakʼ duạr do bạnukʼtalea; ale do nij titele kạmiyeda arle khaṭaokʼ kana; ar hoṛkoko ruhetʼetʼlere hõ onko dole bhorako kana, arle khed ocokʼkanre hõ ale dole sahaoetʼ kana; arko bodnametʼlere hõ mạ̃hir seletʼle roṛ ruạṛako kana; ar ńit hạbicʼ hõ dhạrti reakʼ mạilạ ar sanamko reakʼ jobra lekagele hoeakana. Lajao ocope lạgitʼ do bạń oletʼ kana, bickom ińren dulạṛiạ gidrạko leka sontorpe lạgitʼgeń oleda. Mạsi reaṅ cetʼape lạgitʼ aperen do gel hajar gurukoko tahẽ daṛeakʼa; menkhan aema baba do bạnukʼkotapea; ińge bhage sombat hotete Mạsiakʼ jionre aperen Babań hoeakana. Onateń nehõrape kana, iń okakoń cekae, ape hõ onako onkaepe; onate ape ṭhen Timothiń kolkedea; uni do Probhure ińren dulạṛiạ ar pạtiạr gidrạ kanae. Uni do Jisu Mạsire ińakʼ cạl-colonkoe disạ ocopea. Iń do nonkage sanam jaega ar mimitʼ manḍerkore onako reaṅiń cetʼako kana. Ape ṭhen bạń calakʼkante adom adomko do demagteko phulạu akana. Menkhan Probhuakʼ sana hoelen khan ạḍi usạrage ape ṭheniń hijukʼa, ar onko phulạu akankoakʼ katha do baṅ, menkhan onkoakʼ daṛe hõ ńel lạgitʼgeń hijukʼa. Ente Isorakʼ raj do katha reakʼ do baṅkana, bickom daṛeteakʼge. Cetʼpe ńamkana? Ṭhengawante ape ṭheniń hijukʼa, se dulạṛ ar mạ̃hir monante? Ańjomokʼ kana, ape talare loṭghuṭi hoyokʼ kana, ar ona loṭghuṭi do nunạkʼ hirkhạge je, boṅgan hoṛ jạtrenko talare hõ onkanakʼ do bạnukʼanaṅ. Ente mitʼṭen hoṛ do kạki eṅgattetʼ acʼren bạhu menteye dohoakadea. Ar noa tayom hõ ape dope gorbokʼ kana! Bickom ape dope mon dukkokʼa honaṅ, jemon nonkae kạmiketʼicʼ do ape tala khone oḍok ocokʼ? Hoṛmo secʼte ape sãote hạjir bạnuńre hõ Jiu secʼte do hạjirge minạńa. Okoe nonkae kạmi akatʼ, uni do ape ṭhen minạń lekageń bicạr akadea. Ińakʼ bicạr do noage, aboren Probhu Jisu ńutumte mitʼ ṭhenpe jarwakʼre iń hõ Jiu secʼte ape tulucʼ iń tahena ar Probhu Jisuakʼ daṛe do abo cetanre tahena, unre uni hoṛ do Soetan tire jimạkae hoyokʼa, jemon uniakʼ hoṛmo ḍahao maraokʼtae menkhan Jiu do Probhu Jisuakʼ hijukʼ dinre bańcaoe ńam. Sarhaokʼ do ape lạgitʼ baṅ bhagea. Ape do cetʼ bape baḍaea je, kạṭicʼ culuṅ khạmi do joto sipiyakʼ holoṅgeye phulạu ocoea mente? Ape khon ona mare khạmi oḍok giḍikakʼpe; jemon nawa bin khạmianakʼ sipiyakʼ holoṅpe hoedaṛeakʼ; ar ape do bin khạmianko kangeape, ente aboakʼ sen-parom porobren dãṛẽ doe teṅgenena metakʼme Mạsige. Onate mare khạmi, metakʼme hiskạ ar bạṛicʼakʼ reakʼ khạmite do alo, menkhan nirạ ar sạriakʼ reakʼ bin khạmianakʼ piṭhạte bon porobokʼma. Ińakʼ ciṭhiren olatʼpe tahẽkana, loṭghuṭi hoṛko tulucʼ jemon alope mesaokʼ. Noa dhạrtiren loṭghuṭiko, lalocko, luluṭko se boṅga sewako tulucʼ gatekʼ do bạgi utạr hoyokʼtapea ona do baṅ, ente onka khan ma noa dhạrti khon bahrete calakʼ hoyokʼtape. Menkhan iń do okań olatʼpe tahẽkan ona do noage, okoe acʼte biswạsi boehae ńumogokʼ kan, menkhan uni do loṭghuṭiyicʼ se dhon lalocicʼ, se boṅga sewayicʼ se oktayicʼ se ńu bulokʼicʼ se luluṭicʼkan enḍekhan uni tulucʼ do gate hõ alope gatekʼa ar jom hõ alope jom-ńũiya. Manḍer bahreren hoṛko bicạrko reakʼ do cetʼ jạruṛ paṛao akawạdińa? Menkhan manḍerren hoṛko bicạrko do cetʼ lek baṅ kantapea? Okoeko bahreren kan onkoakʼ do Isorgeye bicạra. Sonot sostor reakʼ katha leka, “Ape mod khon uni bạṛicʼ hoṛ do oḍok giḍikaepe.” Ape modren jãhãe hoṛ eṭakʼ boeha upạrte lạlis reakʼ jãhãnakʼ menakʼtae khan, enḍekhan oka dilte uni do sonotko ṭhen calao baṅkate boṅgan hoṛko ṭhen bicạre khojkana? Ape do cetʼ bape baḍaea, Isorren hoṛkoge dhạrti reakʼko bicạra mente? Ar dhạrti reakʼpe bicạr khan, enḍekhan huḍiń utạrakʼko bicạr lạgitʼ do cedakʼpe belekgea? Ape do cetʼ bape baḍaea, abo do serma goḍetkoakʼ hõ bon bicạra mente? Ar onage hoyokʼ khan enḍekhan dhạrti reakʼko reaṅ ma coṅ thoṛawakʼkange. Apeakʼ nonkan jãhãn lạlis tahentape khan, enḍekhan okoe do manḍerrenko baṅkan onkankoge cetʼ bạisirepe duṛupʼ ocoyetʼkoa? Iń do lajao ocope lạgitʼge noa katha doń roṛeda. Ape talare akelan nonkanicʼ cetʼ jãhãe bạnuea, one okoe do apnar boehako talare gulmalkoe bicạr chinḍạu daṛeke? Ona bodolte ape do boeha birudrepe lạliskana, ar ona hõ bepạtiạrko ṭhenge! Ape do mimitʼ hoṛ birudrepe mamblakʼ kante noage sạbudokʼ kana je, ape dope bhagao ocoakana. Ona khon bickom behok ocokʼge cedakʼ bape sahaoeda? Ar cedakʼ bape recʼ ocokʼkana? Ona bodolte apegepe behokeda, arpe rerecʼ kana ar ona do aperen boehako cetanregepe onkayeda! Ape do cetʼ bape baḍaea, bedhoromko do Isorakʼ raj bako ạidạrijoṅa mente? Alope bulạukʼa; baṅ do loṭghuṭiko, baṅ do boṅga sewako, baṅ do laṭghaṭko, baṅ do laṅcạṅgiạko, baṅ do jojognako; baṅ do kombṛoko, baṅ do dhon lalociạko, baṅ do bulokʼko, baṅ do cokakʼ baklakʼ roroṛko, baṅ do luluṭko, onko do okoege Isorakʼ raj bako ạidạri joṅa. Ape modre adomko do onkageko tahẽkana, menkhan Probhu Jisu Mạsi ńutumte ar aboren Isorren Jiu hotete ape dope ạrupʼ sapha ocoakana, ar Isor lạgitʼpe sonot ocoakana arpe dhorom ocoakana. Adom adomko doko mena “Jotowakʼge ganokʼtińạ,” menkhan jotoakʼ do baṅ porhoana. Jotowakʼge ganokʼtińạ, menkhan okaṭakʼte hõ bạń tabe ocokʼa. Ar noa katha hõ roṛakana, “Jomakʼ do lacʼ lạgitʼ, ar lacʼ do jomakʼ lạgitʼge.” Menkhan mitʼ din Isor do noakin banargeye maraoa. Hoṛmo hõ loṭghuṭi lạgitʼ do baṅkana bickom ona do Probhu lạgitʼge ar Probhu do hoṛmo lạgitʼge. Isor do acʼakʼ daṛete gocʼko khon Probhui jiwetʼkedea ar abo hõe jiwetʼ beretʼ bona. Ape do cetʼ bape baḍaea, apeakʼ hoṛmo do Mạsiakʼ hoṛmo hạṭińko kana mente? Enḍekhan Mạsiakʼ hoṛmo hạṭińko hataokate cetʼ iń do kusmbiakʼ hoṛmo hạṭińkoń hoe ocoea? Tis hõ baṅa. Se bape baḍaea, kusmbire jamaṛ akanicʼ do uni tulucʼe mitʼ hoṛmokʼ kana mente? Ente sostorre olakana, “Unkin dokin mitʼ hoṛmokʼa.” Menkhan Probhu tulucʼ mitʼakanicʼ do uni tulucʼe mitʼ Jiugea. Sanam lekan loṭghuṭi khon ńir joṅpe. Ente manwa okakoe kạiyetʼkan ona do acʼakʼ hoṛmo bahrereye onkayeda; menkhan okoeye loṭghuṭiyetʼkan uni do acʼakʼ hoṛmo birudregeye kạiyeda. Se bape baḍaea, apeakʼ ontorre okoeye tahenkan ar okoe do Isor ṭhen khonpe ńamakade, uni sonot Jiuakʼ tahen mundilge apeakʼ hoṛmo hạṭińko kana mente? Ape do apnar lạgitʼ dope baṅkana; ente aema damtepe kiriń ocoakana; onate apeakʼ hoṛmo do Isorakʼ mạhimakʼ lạgitʼ emokʼpe. Ape okako reaṅpe ol akawạdiń, ona reakʼ roṛ ruạṛiń emape kana. Okoe bae baplakʼ enḍekhan uni doe bhageyetʼgea; Menkhan goṭa ṭạnḍige loṭghuṭi hoyokʼkana, onate mimitʼ herel hoṛren do rinicʼtetʼe tahentaema, ar mimitʼ maejiuren hõ jãwãetetʼe tahentaema. Hoṛmo secʼte herel do acʼ rinicʼtetʼ oka ńam lektae onae emaema; ar onkage rinicʼtetʼ hõ jãwãetetʼe emkataema. Rinicʼtetʼakʼ hoṛmo do eken acʼ eskarakʼ do baṅkana menkhan onare hereltetʼakʼ hõ ektiạri menakʼtaea ar onkaleka jãwãetetʼakʼ hoṛmo hõ acʼ eskarakʼ do baṅkana, menkhan onare rinicʼtetʼakʼ hõ ektiạri menakʼa. Alope apan ạpinokʼa; menkhan solha mitʼkate koejoṅ lạgitʼ thoṛa din apan ạpin tahẽ hataṛokʼpe; ona tayom do ar hõ mitʼ ṭhenokʼpe jemon apeakʼ bin sambṛao iạte Soetan aloe biḍạupe. Iń do bạń hukumape kana bickom aṛakʼape kan lekageń roṛeda. Sanam hoṛge iń lekako hoyokʼma! Menkhan Isor ṭhen khon mimitʼ hoṛ do apan ạpin daya danko ńamakada. Mitʼ hoṛakʼ dan do mitʼleka ar eṭagicʼakʼ dan do eṭakʼleka. Baṅ bapla akanko ar rạnḍi maejiukoń metako kana, onko hõ iń lekako tahẽlen khan onko lạgitʼ bhage hoekokʼa; menkhan apnarte okoe bako sambṛaokʼ daṛeakʼ onko doko baplakʼma, ente hoṛmo reakʼ sanate lokʼ khon baplakʼge bhagea. Bapla akanko do noageń hukumako kana, iń do baṅ menkhan Probhuge; bạhu do jãwãetetʼ ṭhen khon aloe chaḍaokʼma; menkhane chaḍao emanlen khan uni do ar aloe baplakʼma, menkhan jãwãetetʼ sãote arhõe mitʼ ruạṛokʼma. Jãwãe hõ bạhutetʼ aloe bạgiyema. Menkhan eṭakʼko do ińiń metako kana, Probhu do baṅ; jãhãe boeharen Mạsire bepạtiạuicʼ bạhu tahentae ar bạhutetʼ do uni tulucʼ tahene rạjige khan enḍekhan jãwãe do uni aloe bạgiyema; onkage rinicʼtetʼren hõ Mạsire bepạtiạuicʼ jãwãeye tahentae ar jãwãetetʼ do uni tulucʼ tahene rạjige khan enḍekhan uni do jãwãetetʼ aloe bạgiyema; ente rinicʼtetʼ hotete uni bepạtiạricʼ jãwãe ar jãwãetetʼ hotete uni bepạtiạricʼ rinicʼtetʼ doe sonot ocoakana; ar onka baṅ hoelen khan aperen gidrạko do besaphako hoekokʼa, menkhan Isor samaṅre onko do besapha doko baṅkana. Menkhan uni bepạtiạricʼ jãwãetetʼ se rinicʼtetʼ do chaḍaokʼe menetʼ khan uni doe chaḍaokʼma; ar nonkanakʼ obostare uni pạtiạricʼ boeha se misera do bae golam akana. Menkhan Isor do sulukte tahen lạgitʼgeye hohoakatʼ bona. E ayo, cekatem baḍaea, am do amren jãwãeyem bańcao daṛeaea se baṅ? Ar E baba am hõ cekatem baḍaea, amren bạhum bańcao daṛeaea se baṅ? Onate Probhu okoe okalekae dohoakade ar Isor okoe oka lạgitʼe hohoakawade, uni do onka lekageye calakʼma. Noa hukum do goṭa manḍerrenkogeń emakokana. Jãhãe hoṛ khatna akane hoho ocoakana? Enḍekhan aloe bin khatna ruạṛokʼma? Bin khatnage jãhãeye hoho ocoakana? Enḍekhan uni do aloe khatnakʼma. Khatna ar bin khatna do cetʼ hõ baṅkana, menkhan Isorakʼ hukum dohoge asolakʼ kana. Isor okoe oka lạgitʼe hohoakawade, uni do onarege tahẽ akane tahenma. Amem hoho ocolenre am do cetʼ golamem tahẽkana? Onate alom dukokʼa; ar sạdhinokʼ reakʼ ạtem ńam khan enḍekhan ona do hataome. Golam tahenre Probhu okoeye hohoakawade uni do Probhu hotetegeye sạdhin ocoakana. Onkage okoe sạdhin tahenreye hoho ocoakan uni do Mạsiren golame hoeakana. Ape do aema damtepe kiriń akana; onate manwakoren golam do ar alope hoyokʼa. E boehako, Isor okoe okalekae hohoakawade, uni do Isor samaṅre onalekageye tahenma. Kũạ̃ri kuṛiko reaṅ do Probhu ṭhen khon jãhãn hukum bạń ńam akada. Menkhan Isorakʼ daya ńamkate pạtiạr minạńte ińiń bujhạuetʼ lekageń roṛeda. Ạḍi harkhet ar saset reakʼ oka okte hijukʼkan ona lạgitʼ ińakʼ bujre okoe okaleka menakʼpe onka tahenge bogea. Am do cetʼ bạhu menae tama? Enḍekhan bạhu bạgiye reakʼ do alom kurumuṭuya. Am do cetʼ bạhu khonem chaḍao akana? Enḍekhan bạhu joṅ reakʼ alom kurumuṭuya. Menkhan amem baplalenre am do bam kạiyetʼ kana. Ar jãhãe kũạ̃ri kuṛiye baplalenre uni hõ bae kạiyeda. Menkhan okoeko baplakʼkan onko do hoṛmore jalako ńama, ar iń do ona khoniń rukhiyạkepea. E boehako, noageń meneda, okte do khaṭo akana. Onate ńit khon bạhuanko do begor bạhuanko lekako tahenma; ar rakʼetʼkanko do bin rarakʼkanko leka; ar rạskạkʼkanko do bin rạskạkʼkanko leka; ar kirińetʼkanko do cetʼge jemon aloko dohojoṅma; okoe dhạrti reakʼakʼko laṛcaṛetʼkan, onko do purạpuri aloko laṛcaṛma; ente noa dhạrti reakʼ rup do pheraokʼ kana. Menkhan iń doń menjoṅ kana, jemon nir dạndipe tahen. Bin bapla akanicʼ do Probhu reaṅe dạndikʼ kana, uni doe hudiseda cekate Probhui kusi ocoyea. Ar bapla akan hoṛge gharońj reakʼ doe dạndikʼ kana; cekate uni do rinicʼtetʼe kusi ocoea mente. Bạhu ar kũạ̃ri kuṛi reaṅ hõ begar menakʼa. Bin baplayicʼ maejiu do Probhu reakʼakʼko reaṅe dandokʼ kana, jemon hoṛmote ar Jiute sonote tahen; menkhan bapla akan kuṛi do gharońj reakʼe dandokʼkana, cekate uni do jãwãetetʼe kusi ocoyea. Noa katha do apeakʼ porho lạgitʼgeń roṛeda. Iń do bạń ladeape kana, bickom oka jạruṛa ar okaṭakʼ bhagea ona lạgitʼgeń udgạuetʼpea, jemon ape do goṭa monte Probhuakʼpe kạmi daṛeakʼ. Ar jãhãe acʼe cikhnạ akade acʼren kũạ̃ri kuṛi tulucʼ bin leke beohareda menteye bujhạuetʼ khan, ar kuṛiyakʼ baplakʼ umer hoeakan khan ar baplaye reakʼ jạruṛe bujhạu khan, enḍekhan uni do acʼakʼ sana lekae kạmi ma. Are onkae khan bae kạiyeda, bapla ocoakin. Menkhan jạruṛ bạnukʼtae iạte acʼakʼ monre ektiạri menakʼtaete jãhãeye mone muruk akatʼ ar ontorreye khạṭi akawan baṅma acʼren kũạ̃ri kuṛi bin baplaye tahẽ ocowaea mente, enḍekhan uni hõe beseda; onate okoe acʼe cikhnạ akade acʼren kũạ̃ri kuṛiye baplayede uni do artetʼe beseda. Jãwãetetʼ tinạkʼ din jiwetʼe tahen, unạkʼ din rinicʼtetʼ do tolgeye tahena, menkhan jãwãetetʼe gocʼlen khan uni doe sạdhinokʼa, ar jãhãegeye kusiae unigeye bapla daṛeaea, menkhan uni hoṛ do Probhurenge jemone hoyokʼ. Menkhan ińakʼ bujre uni do enkageye tahẽlen khan artetʼ bhạgane hoyokʼa; ariń meneda, iń do Isorren Jiu hotete noa kathań roṛeda. Iń do ńitokʼ boṅga ṭhen samaṅakʼ jomakʼko reaṅ iń roṛeda. Baḍaegeabon, sanamkoakʼge akel menakʼtabona. Akel do manwae phulạu ocoyea, menkhan dulạṛ doe benao rakapʼa. Jãhãe jãhãnakʼe baḍaea menteye menjoṅ kan khan, uni do cetʼleka baḍae jạruṛ tahẽkantae onka do ńit hõ bae baḍae akada. Menkhan okoe Isore dulạṛedekan, Isor do eken unigeye baḍaeyede kana. Ńitokʼ do boṅga ṭhen samaṅakʼ jomakʼ reaṅ iń roṛeda. Baḍaegeabon dhạrtire cele boṅgage bạnukʼkoa, ar mitʼ goṭen chaḍa ar cele Isor hõ bạnukʼkoa. Serma se dhạrtire deb-debi mente jãhãe menakʼko khan enḍekhan debota hõ aema ar Probhu hõ aema menakʼkoa. Enrehõ abo lạgitʼ do mitʼ goṭenge Isor menaea. Unige Baba do; ar uni ṭhen khonge jotowakʼ do hecʼakana ar uni lạgitʼge jiwetʼ menakʼ bona. Aboren Probhu hõe mitʼ goṭengea, uni do Jisu Mạsige. Uni hotetege jotowakʼ do hecʼakana ar uni hotetege jiwetʼ menakʼbona. Menkhan noa akel do jotokoakʼ do bạnukʼa. Boṅga sewa reakʼ hewa tahẽkante adomko do ńitokʼ hõ boṅga ṭhen samaṅakʼ jomakʼko jomeda. Onate onkoakʼ bibek hõ nijorgete bhõnḍokʼ kantakoa. Menkhan jomakʼ hotete Isor ṭhen do babo teṅgo ṭarhao daṛeakʼa. Ente babon jomle khan aboakʼ do cetʼ loksan hõ baṅ hoyokʼtabona; ar bon jom lekhan hõ jãhãn lab do bạnukʼa. Menkhan, sontor akan tahenpe, jemon apeakʼ noa sạdhintetʼ do nijorkoakʼ tạkicʼakʼ aloe hoeocoe. Amakʼ do akel menakʼtama, menkhan okoeakʼ bibek nijorge uni do boṅga mundilkore jojom duṛupʼe ńellem khan boṅga samaṅakʼ jom lạgitʼ uni hõ cetʼ dil bae ńama? Onkate amakʼ akel karonte nijoricʼ one okoe lạgitʼ Mạsiye gocʼlen, uni doe nosṭokʼa. Nonkate aperen boehako birudrepe kại ar onkoakʼ nijor bibekkope hạnletako khan enḍekhan ape do Mạsi birudregepe kạiya. Onate jomakʼte ińren boehae tạkijokʼ khan, enḍekhan iń do tis hõ jel do bạń joma, jemon ińren boeha aloe tạkijokʼ. Iń do cetʼ sạdhin doń baṅkana? Iń do cetʼ apostol doń baṅkana? Aboren Probhu Jisu do cetʼ bạń ńṭoṭhadea? Probhu lạgitʼ okaṭakʼ iń kạmi akatʼ ona reakʼ jo do cetʼ ape dope baṅkana? Eṭakʼko apostol mente bako aṅgocińre hõ ape do apostol mentepe aṅgocińạ. Ape je Probhuren hoṛpe hoeakan onage ińakʼ apostol hudạ reakʼ sạbudtetʼ do. Ar okoe ińakʼ apostol hoyokʼ reakʼ kukliye rakab onko ṭhen ińakʼ roṛ ruạṛ do noage, aleakʼ do cetʼ jom ńũi reakʼ hok bạnukʼtalea? Eṭakʼ sanam apostolko, Probhuren boehako ar Kephasteko cetʼ leka akoren bạhuko seletʼ porcarko oḍokokʼkan, onkage Mạsire pạtiạukʼ akan bạhuko seletʼ porcar oḍokokʼ reakʼ ạidạri do cetʼ bạnukʼtalea? Barnabas ar ińge cetʼ kạmikate jojom hoyokʼ tạlińa? Apnarakʼ poesa khorojkate palṭon kạmi do okoeye kạmi kana? Okoe darkha bagwane benaoetʼkan uni do cetʼ ona reakʼ jo bae jomeda? Se okoeye gupikan uni do cetʼ palrenkoakʼ toa bae ńũiya? Iń do cetʼ eken manwa dharatege noakoń roṛeda? Moseakʼ ạn-ạriko hõ cetʼ noako do bae menetʼkana? Onare olakana, “Enokʼkan daṅgra do moca alom toltaea.” Isor do cetʼ eken ḍaṅgarako lạgitʼgeye dandokʼ kana? Uni do cetʼ abo lạgitʼge noa katha do bae meneda? Hẽ noa katha do abo lạgitʼge olakana; ente siokʼkạnicʼ do askatege siokʼ lek taea; ar enokʼicʼ hõ bhag ńam reakʼ astege enokʼ hoyokʼtaea. Ale do apere Jiu reakʼ itạle erakatʼte ape ṭhen khon hoṛmo reakʼ jom-ńũle tear khan enḍekhan ona do cetʼ maraṅ katha kana? Noa lạgitʼ ape cetanre eṭakʼkoakʼ bakhra menakʼtako khan enḍekhan ale do artetʼ ńam lek dole baṅkana? Menkhan ona hok do bale laṛcaṛeda bickom sanamakʼle sahaoeda, jemon Mạsiakʼ bhage sombat porcarre jãhãn tạkicʼakʼ alole hoyokʼ. Ape do cetʼ bape baḍaea, okoe mundil reakʼko kạmikan onko do mundil khonge jomakʼko ńama, ar okoe pinḍreko kạmikan onko do pinḍre jãhãnakʼge samaṅokʼkan ona reakʼ hạṭińko ńama mente? Onkage Probhu do bhage sombat porcarko lạgitʼ noae hukum akada, okoe bhage sombatko porcaretʼkan onko do ona khonakʼge jom-ńũi reakʼko ńama. Menkhan iń do noa reakʼ cetʼge bạń beohar ạguakada. Ape do iń lạgitʼ nonkape hoeocoe reakʼ do bạń oletʼkana. Ente jãhãe ińakʼ sarhaoakʼko ạuṛiagtiń khan ona khon boroṅ gujukʼge bogetińạ. Iń do bhage sombatgeń porca akada, enrehõ onate sarhaokʼ reakʼ cetʼge bạnukʼtińạ, ente ona do kạmi lagaoạńgea. Bhage sombat bạń porcarle khan ińre do hae hae! Iń do apnar kusiteń porcaretʼ khan, enḍekhan kuṛại do menakʼgetińạ, ar apnar kusite bạń porcaretʼ kanrehõ iń cetanre ona bhar menakʼte onań kạmi kana. Enḍekhan ińakʼ kuṛại do cetʼ? Ona do noage je, bhage sombatiń porcar bodolte ińakʼ oka paona menakʼ ona hatao baṅkate begor poesate onań kạmi daṛeakʼ. Iń do jãhãeren golamiń baṅkanre hõ sanamkoren golamiń hoeakana, jemon Mạsi lạgitʼ ḍher hoṛiń lab daṛeako. Jihudiko labko lạgitʼ do Jihudiko ṭhen Jihudi lekań hoeakana. Ente Moseakʼ ạn-tạriren iń baṅkanre hõ okoe ạn-tạrire menakʼko onko labko lạgitʼ onko lekań hoeakana. Arhõ okoe ạn-tạri bahrere menakʼko onko labko lạgitʼ iń do ạn-tạri bahreren hoṛ lekań hoeakana. Onate Isorakʼ ạn bahrere minạńa ona do baṅ; iń do Mạisakʼ ạn taberege minạńa. Pạtiạure okoeko nijorge onko ṭhen do onko lekan hoṛiń hoeakana, jemon Mạsi lạgitʼ purạteń lab daṛeako. Metakʼme sanamko ṭhen iń do sanamakʼiń hoeakana jemon jãhãlekatege thoṛa hoṛiń bańcao daṛeako. Iń do bhage sombat lạgitʼge noakoń onkayeda jemon onaren bhạgiạdariń hoyokʼ. Ape do cetʼ bape baḍaea ńir enecʼre sanamkogeko seledokʼa, menkhan eken mitʼ hoṛge kuṛại doe ńama? Onate ape hõ nonka dạṛpe jemon kuṛạipe ńam daṛeakʼ. Okoe dạṛ enecʼreko seledokʼkan onko do laha khonge mitʼṭen niạm bhitriteko calakʼa. Onko do okaṭakʼ jid ṭupri mosodokʼ ona ńam lạgitʼko onkayeda, menkhan abo do bin mosodokʼ ṭupri ńam lạgitʼge one okaṭakʼ do tisge baṅ nosṭokʼ. Onate ạuṛiakʼ do bạń dạṛeda. Okoe hoeye daletʼkan onka do bạń kuhạueda. Iń do bickom hoṛmoń kuhạu gaṅetʼtińạ ar golam akae iń dohoyeda, jemon eṭakʼko ṭhen bhage sombat porcar tayom ińakʼ kuṛại ńam lạgitʼ belek bạń hoyokʼ. E boehako, iń doń khojkana jemonpe baḍae, aboren hapṛamko do jotoge ona rimil reakʼ umulreko tahẽkana ar sanamkoge doreão talateko paromlena. Mose tulucʼ midokʼ lạgitʼge onko do rimil ar doreãoreko bạptis ocolena. Isor emakʼ ona mitʼ jiuanakʼ jomakʼgeko jomleda; ar ona mitʼ jiuanakʼ ńũńũakʼgeko ńũleda. Isor emakʼ okaṭakʼ dhiri onko são sãote calakʼkan tahẽkan ona khonge ńũi lạgitʼ dakʼko ńametʼkan tahẽkana; ar Mạsige ona dhiri doe tahẽkana. Enrehõ Isor do onko modren ḍher hoṛko cetanre kusi bae tahẽkana. Onate onkoakʼ mạ̃ṛĩ do hahaṅkarrege giḍi ocoyentakoa. Ona ńelte abo jemon bon cetʼ daṛeakʼ ona lạgitʼge noako do hoelena, jemon onko cetʼleka bạṛicʼakʼko lalocatʼ tahẽkan onka alo bon kạmi. Cetʼleka onko modren adomko do boṅgako sewawako kan tahẽkan onka leka boṅga sewako do alope hoyokʼa. Olakan leka, “Hoṛko do jojom ar ńũńũko duṛupʼena, ar enejokʼko beretʼena.” Onko modre ḍher hoṛgeko laṭghaṭletʼte mitʼ dinre bargel pe hajar hoṛko gocʼlena. Abo do onka alo bon loṭghuṭiyma. Onko modre ḍherkoge Probhuko biḍạukedete cetʼleka biń gerteko gocʼlen, onka jemon Probhu alo bon biḍạue. Onko modre ạḍi hoṛgeko karacʼ kurucʼlente cetʼleka nonosṭoyicʼ goḍet hoteteko marao ocolen, ape do onaka alope karacʼ kurujokʼa. Eṭakʼ hoṛko jemon ńelkateko cetʼ daṛeakʼ onate onko cetanre noako do hoelena. Okoe jug reakʼ mucạtʼre bon seṭerakan, abo cehao bon lạgitʼge noako do olakana. Onate jãhãe kajakteye teṅgo akana menteye monejoṅkan khan, enḍekhan uni doe sontorokʼma jemon aloe bhindạṛokʼ. Manwa jionre okako biḍạu hoe emanokʼ ona chaḍa ar eṭakʼ jãhãn biḍạu do baṅ paṛao akawatʼpe. Isor doe pạtiạrgete, sahao daṛeakʼ khon bạ̃ṛti do bae biḍạupea, bickom biḍạu são sãote ona khon oḍokokʼ reakʼ hõe horapea, jemonpe sahao daṛeakʼ. Onate E ińren gateko, boṅga sewa khon men ńir joṅpe. Iń do budanko menteń baḍaeyetʼpete noakoń galmaraoape kana; ar okań roṛetʼkan, ona do apege bicạrpe. Probhu kedokʼ okte gunmanao joharate oka bhoranakʼ bạṭi khon bon ńũi, ona do cetʼ Mạsiakʼ mãyãmre bakhra seledokʼ leka do baṅkana? Ar oka piṭhạ kecakʼ katebon jometʼkan ona hõ cetʼ Mạsiakʼ hoṛmore bakhra seledokʼ leka do baṅkana? Ar bon aemagere hõ mitʼ hoṛmo kanabon, ente piṭhạ do mitʼ goṭengea, ar sanamkoge ona mitʼ piṭhạ reaṅ hạṭińge bon ataṅeda. Israel jạtko beṅgetʼakope. Onko modre okoe teṅgenakʼko jometʼkan onko do cetʼ ona pinḍ reakʼ jotoge bako bakhra joṅkana? Enḍekhan cetʼ iń roṛeda? Boṅga ṭhen teṅgenakʼ jomakʼ do jãhãnakʼ kana se muṭhạnge jãhãnakʼ kana? Ona do baṅ, bickom iń meneda, boṅgan hoṛko okako teṅgenetʼkan ona do Isor lạgitʼ do baṅ, ona do bạṛicʼ jiuko ṭhengeko onkayeda. Ar bạṛicʼ jiuko tulucʼpe gatekʼ do bạń khojkana. Probhuakʼ bạṭi ar bạṛicʼ jiukoakʼ bạṭi, noa banar khon baṅgepe jom daṛeakʼa. Probhuakʼ mej cetanre ar bạṛicʼ jiukoakʼ mej cetanre oka menakʼ ona banar reakʼ bakhra do ohogepe jom daṛelea. Noate do cetʼ Probhu bon ãṭ ocoyede kana? Abo do cetʼ uni khon bon daṛeangea? Adomkoko mena, “Jotowakʼge ganokʼgea.” Menkhan jotowakʼ do baṅ porhowana. Jotowakʼge ganokʼa; menkhan jotowakʼ do baṅ benao rakapʼa. Okoe hõ apnar bhạlại lạgitʼ aloe kurumuṭuima, menkhan eṭakʼkoakʼ bhạlạigeye ńam baṛaema. Bajarre ạkhrińokʼ jãhãnakʼge jompe; apeakʼ bibek khạtirte cetʼ hõ begor kulite; ente sonot sostor reakʼ katha leka, “Dhạrti ar onare menakʼakʼ jotowakʼge Probhuwakʼ kana.” Ar jãhãe bin pạtiạuicʼe neotalepere arpe calaolenre, bibek khạtirte cetʼ hõ begor kulite samaṅ akawatʼpe reakʼ jompe. Menkhan jãhãeko metape khan, “Noa do boṅga ṭhen teṅgenakʼ kana,” Enḍekhan one okoeye menakatʼpe uni iạte ar bibek khạtirte alope joma. Iń do apeakʼ bibek reakʼ katha do bạń roṛeda, eṭakʼ mitʼ hoṛakʼ bibek reakʼ kathań roṛeda. Menkhan eṭakʼ mitʼ hoṛakʼ bibek iạte cedakʼ ińakʼ sạdhintetʼreń bicạr ocokʼa? Ar gunmanao joharateń jomle khan, enḍekhan oka jomakʼ lạgitʼ gunmanao iń joharetʼkan ona lạgitʼ cedakʼiń opoman ocokʼa? Onate ape do jom-ńũi ar jãhãnakʼgepe cekae, jotowakʼge Isorakʼ ṭhonokʼ lạgitʼ kạmipe. Iń do cetʼleka sanam manwako jotowakʼte kusi ocoko lạgitʼ iń kurumuṭuyetʼ kan ape hõ onkage kurumuṭuipe; metakʼme Jihudi ar boṅgan hoṛ jạtrenko se Isorakʼ manḍerren hoṛko ṭhen tạkicʼako alope hoyokʼa. Iń do apnar porho lạgitʼ kurumuṭu baṅkate ḍher hoṛkoakʼ bhạlại lạgitʼgeń kurumuṭu kana jemon onko do kại khon bańcaoko ńam. Iń do cetʼleka Mạsireń calakʼkan, ape hõ onkage calakʼpe. Apeń sarhaoetʼpea, ente ape do sanamakʼkorepe disạyediń kana ar okań cetʼ akawatʼpe onape sapʼ dohoakatʼa. Iń doń menjoṅ kana jemonpe baḍae baṅma, mitʼ ke mitʼ herelkoren matha do Mạsige, ar maejiuren matha do jãwãetetʼ, ar Mạsiren matha do Isorge. Jãhãe herel hoṛ bohokʼ dapalkateye koejoṅ se nạbi leka Isorakʼ kathakoe lại, uni do acʼakʼ bohokʼe bemanoteda. Ar jãhãe maejiu bohokʼ begor ṭuṭurikateye koejoṅ se nạbi lekate kathae lại, uni do acʼakʼ bohokʼe bemanoteda, ente uni do hoyo poṭor akan maejiu lekageye hoeakana. Jãhãe maejiu bohokʼ bae ṭuṭurikʼ khan uni do acʼakʼ upʼe kạpci giḍikakʼma. Menkhan maejiuko lạgitʼ kạpcikʼ se hoyo poṭorokʼ do lajao paṛage khan onko doko ṭuṭurikʼma. Herelakʼ bohokʼ dapal do lek baṅkana, ente Isor do acʼlekage herele sirjạu akadea ar herel hotetege Isorakʼ ṭhonok do sodor akana. Menkhan maejiu hotete herelakʼ do ṭhonok sodorokʼa. Herel do maejiu khon bae hecʼakana, menkhan maejiuge herel khone hecʼakana. Maejiu lạgitʼ herel do bae sirjạu akana, menkhan herel lạgitʼge maejiu doe sirjạu akana. Onate maejiuko do serma goḍetko iạte akoakʼ bohokʼre gobolokʼ reakʼ cinhạ lekate bohokʼ ṭuṭurikʼ do lek takoa. Enrehõ Probhure herel do maejiu begorte cele hõe baṅkana ar maejiu hõ herel begorte cele hõe baṅkana; ente cetʼ leka herel khon maejiue hecʼakan onkage arhõ maejiu hotete herelakʼ janam do hoeakana. Menkhan sanamakʼ do Isor khonge. Ape apnarte baṛe bicạrpe, maejiuko begor ṭuṭurite Isor ṭhenko koejoṅ do cetʼ sajaokʼgea? Khaṭo budte cetʼ noa baṅ bujhạukʼ kana, herel do jhạl upʼ tahẽntako khan bemanot hoyokʼtakoa mente? Menkhan maejiuko jeleń upʼ tahentako khan ona do onko lạgitʼ ṭhonok kana, ente apnar dapalokʼ lạgitʼge maejiuko do jeleń upʼ emakatʼkoa. Ar jãhãe noa iạteko ṭhapa ṭhugokʼ khan noań menkea, eṭakʼ jãhãn niạm do abo talare bạnukʼa ar Isorakʼ manḍerkore hõ bạnukʼa. Menkhan ńitiń hukumape kanre do bạń sarhaoetʼpea, ente ape do manḍerre boge lạgitʼ do baṅ bickom bạṛijokʼ lạgitʼgepe jarwakʼ kana. Pạhilreń ańjomeda, manḍer jarwakʼre ape talare dola doli tahenkana, ar iń do thoṛ pạtiạu hõń pạtiạukʼkangea. Ente ape talare dola duli do tahengea, jemon Isor samaṅre ape modre biḍạukʼ ṭarhaokʼkoko sodorokʼ. Manḍer lekate mitʼ jaegare jarwakate okaṭakʼpe jometʼkan ona do Probhu bhoj do baṅkana, ente begor tạṅgitepe jomeda. Onate mitʼ hoṛakʼ do reṅgecʼ tahen kangea ar eṭagicʼ doe bulokʼkana. Jom ńũi lạgitʼ apeakʼ oṛakʼ do cetʼ bạnukʼtapea? Se Isorakʼ manḍerkope nihạteda ar okoeakʼ cetʼge bạnukʼtako onkope lajao ocoyetʼkoa? Iń do cetʼiń metapea? Noa iạteń sarhaopea? Khạṭige baṅa. Okaṭakʼ iń cetʼ akawatʼpe ona do Probhu ṭhen khongeń ńamakada. Oka ńindạ Probhu do bạirikoakʼ tireye sapʼ ocolen, ona ńindạ uni do piṭhạ ataṅkate Isore gunmanao joharadea ar onae kecakʼketʼteye menleda, “Noa do ińakʼ hoṛmo kana one ape lạgitʼ emogokʼkan; ar iń disạyiń lạgitʼge nonkaepe baṛe.” Kedokʼ tayom onkage bạṭi hõ halaṅkateye menleda, “Noa bạṭi do ińakʼ mãyãm hotete Isorakʼ nawa bondobos kana; tinạkʼ dhaope ńũi nonkaepe, iń disạyiń lạgitʼ.” Onate uni ạuriye hijukʼ hạbicʼ tinạkʼ dhao noa piṭhạpe jom ar noa bạṭi reakʼpe ńũi unạkʼ dhao Probhuakʼ gujukʼ reakʼ kathape porcara. Onate jãhãe belek lekate noa piṭhạ ar Probhuakʼ bạṭi khone jom uni do Probhuakʼ hoṛmo ar mãyãm reakʼ dạyike hoyokʼa. Onate manwa do piṭhạ ar bạṭi reakʼ jom lahare apnarteye biḍạukʼma, ente jojom jokhecʼ Probhuakʼ hoṛmo reaṅ bae bujhạu khan enḍekhan ona jomte uni do acʼ cetanre sạjạiye ạgujoṅa. Ar onatege ape talare ạḍi utạr nijor ar rugiko menakʼkoa, ar aemako gocʼ akana. Abo do apnarte bon biḍạulen khan enḍekhan Probhuakʼ bicạr khon bon rukhiyạkokʼa. Menkhan Probhui bicạrbonre uni doe ḍanṭaoetʼ bona, jemon dhạrtiren sanamko sãote dusi mente alo bon ṭarhaokʼ. Onate E ińren boehako, manḍerre jom lạgitʼpe jarwakʼre tạṅgikʼpe. Ar jãhãe reṅgeje khan uni do oṛakʼ khone jom ạguima, jemon manḍer jarwakʼ khạtirte sạjại aloe ńam; ar eṭakʼakʼ reaṅ do ińiń hecʼlenreń lạiapea. E boehako, sonot Jiuteakʼ dan reaṅ bin baḍaepe tahen do baṅ sanań kana. Baḍaegeape, Isor bape sewawaekan tahẽkanre ape do nonkan muṭhạnko secʼpe ạyur ocokʼkan tahẽkana one okoe doko guṅgạge. Ińiń baḍae ocoyetʼpea, Isorren Jiute roroṛkanko do okoe hõ bako mena, “Jisu do sarapicʼ kanae mente.” Ar sonot Jiu begor, “Jisuge Probhu” kanae mente okoe hõ bako men daṛeakʼa. Ini mitʼ sonot Jiuakʼ daya danko do judạ judạgea; ar judạ judạ dharate abo do ini mitʼ Probhuge bon sewawae kana. Abo mimitʼko do judạ judạ kạmi bon emocoakana, menkhan ini Isorge judạ judạ dharate mimitʼko talareye kạmikana. Sanamkoakʼ bhạlại lạgitʼge sonot Jiu do mimitʼ hoṛre mimitʼ lekae sodorokʼ kana. Adom adom hoṛ do uni sonot Jiu hotete akel reakʼ kathako roṛeda. Ar eṭakʼko do ini Jiu hotete pạtiạu se ruạ boge reakʼ daṛe se hahaṛa kạmi reakʼ daṛe se nạbi leka Isorakʼ katha roroṛ reakʼ daṛe se boge ar bạṛicʼ jiuko oromko reakʼ daṛe; ar adomko do judạ judạ pạrsite roṛ reakʼ daṛe se judạ judạ pạrsite torjoma reakʼ daṛe ini mitʼ Jiugeye kạmi ocoyeda. Noako joto kạmi do ini sonot Jiugeye kạmiyeda. Uni do cetʼleka sanayede kan onkage onako dan mimitʼko judạ judạye emako kana. Mitʼṭen hoṛmore cetʼleka aema hạṭińko tahen ar ona hạṭińko ḍhergere hõ cetʼleka mitʼṭen hoṛmoge hoyokʼ, Mạsi hõ ṭhik onkage. Abon do baṅ dobon Jihudikan, baṅ dobon boṅgan hoṛ jạtrenkokan, baṅ dobon golamko kan, baṅ dobon sạdhinko kan, jotoge ini mitʼ sonot Jiu hotete bon bạptis akana; ar jotokoge ini sonot Jiuge bon ńam akadea. Hoṛmo do eken mitʼṭen hạṭińte do baṅ benao akana, ona do aema hạṭińtege tearakana. Jaṅgae menkhan, “Ti doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa. Luture menkhan, “Mẽtʼ doń baṅkana, onate hoṛmo reakʼ hạṭiń hõń baṅkana,” Enḍekhan hoṛmo reakʼ hạṭiń baṅkana ona do baṅa. Ar goṭa hoṛmoge mẽtʼ hoelen khan, enḍekhan ańjom reakʼ daṛe do okare tahẽkokʼa? Ar goṭa hoṛmoge lutur hoelen khan, enḍekhan ji reakʼ daṛe do okare tahẽkokʼa? Isor do cetʼlekae monejoṅkan onkage hoṛmo reakʼ hạṭińko hoṛmoreye bạisạu akada. Ar joto hạṭińko mitʼ lekage hoelen khan, enḍekhan hoṛmo do okare tahẽkokʼa? Hạṭińko aemagere hõ, menkhan hoṛmo do mitʼṭengea. Mẽtʼ do ti ohoe men daṛelea, “Amakʼ do jạruṛ bạnukʼtińạ,” Bohokʼ hõ jaṅga ohoe men daṛelekina, “Abenakʼ do jạruṛ bạnukʼtińạ.” Menkhan hoṛmo reakʼ oka hạṭińko nijorge aṭkarokʼkan onage bạ̃ṛti jạruṛa. Hoṛmo reakʼ oka hạṭińko thoṛa manotakʼ bon metakʼkan, ona hạṭińkoge bạ̃ṛti manot bon udukʼeda; ar oka hạṭińko baṅ udugokʼkan onako do ạḍi manot salakʼ bon poṭom esetʼkakʼ kana, menkhan oka hạṭińko bahrere udugokʼ, ona do poṭom esetʼ reakʼ jãhãn jạruṛ bạnukʼa; ar hoṛmo reakʼ oka hạṭińko jãhãn manot bạnukʼ, Isor do onakoge bạ̃ṛti manote emakada ar sanam hạṭińkoe mitʼakada, jemon hoṛmo do alo bhaga bhạgikʼ, bickom hoṛmo hạṭińko mitʼ lekako dạndikʼ. Mitʼ hạṭiń dukokʼ khan ona sãote goṭa hạṭińge dukokʼa. Mitʼ hạṭiń manote ńam khan enḍekhan goṭa hạṭińge ona sãote hulạsokʼa. Ape do Mạsiakʼ hoṛmo kanape, ar mimitʼ hoṛ do ona hoṛmoren hạṭińkoge. Isor do manḍerre pạhilte apostolko, dosarte nạbiko, tesarte cecetʼkoe dohoketʼkoa. Ona tayom noko hoṛkoe bachaoketʼkoa, one okoe do hahaṛa kạmi reakʼ ektiạriko ńamakatʼ, ar okoe do ruạ boge reakʼ daṛe, ar okoe do goṛowako reakʼ daṛe, ar okoe do calao ganao reakʼ daṛe, okoe do pạrsi torjoma reakʼ daṛe, onko sanamkoge cetʼ apostol kanako? Sanamkoge cetʼ nạbi kanako? Jotoge cetʼ cecetʼko kanako? Sanamkoakʼge cetʼ hahaṛa kạmi reakʼ ektiạri menakʼtakoa? Sanamkoge cetʼ ruạ bogekʼ reakʼ ektiạri menakʼ takoa? Sanamkoge cetʼ aema lekan pạrsiteko roṛeda? Sanamkoge cetʼ ona reakʼ maneko bujhạuako kana? Khạṭige baṅa. Bickomiń mena, ape do joto khon jạruṛanakʼ danko ńam baṛae lạgitʼ gagojokʼpe. Iń do apeko artetʼ sorosakʼ mitʼṭecʼ hor iń udukʼape kana: Manwakoakʼ ar serma goḍetkoakʼ pạrsiteń roṛlere hõ dulạṛ bạnukʼtiń khan, raṛaṅ raṛaṅokʼkan ghonṭa ar chaṅ chaṅokʼkan kortaliń hoeakana. Nạbi leka roṛ reakʼ ektiạri tahentiń, ar sanam okoakʼ iń baḍae daṛeakʼ ar joto lekan akel tahentiń, se buruko ucạṛ daṛeakʼ leka purạ biswạs tahentiń, menkhan dulạṛ bạnukʼ tiń khan, cetʼ porho hõ bạnukʼtińạ. Jãhãnakʼge menakʼtiń ona joto do reṅgecʼ orecʼko jom ocoko lạgitʼ iń danlere ar atar giḍikʼ lạgitʼ ińakʼ hoṛmo hõń alaelere hõ, dulạṛ bạnukʼtiń khan cetʼ porho hõ bạnukʼtińạ. Dulạṛ doe soboria, dulạṛ doe susṭoba; dulạṛ do bae hiskạwa, dulạṛ do bae phulạukʼa, dulạṛ do bae becola, dulạṛ do bae hạr dogokʼa; dulạṛ do bae kaḍraokʼa; dulạṛ do bae adopa; dulạṛ do bạṛicʼ bae hisạba; dulạṛ do bedhoromakʼte bae rạskạkʼa bickom oka sạriakʼkan onateye rạskạ midokʼa. Dulạṛ do sanamakʼgeye sahaoa, sanamakʼgeye pạtiạuakʼa; sanamakʼrege ase dohoea; ar sanamakʼgeye sumbhrạua. Dulạṛ do tisge baṅ mucạdokʼa. Nạbi lekate roṛ reakʼ ektiạri cabakʼa, ar eṭakʼ pạrsite roṛ reakʼ ektiạri menakʼ khan ona do adokʼa; ar baḍaeakʼ menakʼ khan ona hõ mạutạkʼa; ente abon do jotowakʼ purạute babon baḍaea, ar nạbi lekate purạute hõ babon nạbiyeda. Menkhan purạwakʼ seṭerlen khan bin purạuwakʼ do mạutạkʼa. Iń do gidrạń tahẽkanre gidrạ lekań roṛetʼ tahẽkana, gidrạ lekań hudisetʼ tahẽkana ar gidrạ lekageń bicạretʼ tahẽkana; ar ńitokʼ doń sẽṛã akana, onate gidrạ reakʼakʼko doń bạgi akada. Abo do ńitokʼ ạrsire pusṭạute babo ńeleda, menkhan unre samna sạmni bon ńel ńama. Iń do ńitokʼ okań baḍaekan ona do purạute bạń baḍaea, menkhan Isor do cetʼleka purạteye baḍaeyediń kan, unre onkage purạteń baḍaea. Menkhan ńitokʼ do biswạs, as, ar dulạṛ, noako penege tahenkana; menkhan noako modre joto khon soros utạrakʼ do dulạṛkangea. Noa dulạṛ lạgitʼ ape do biseskaete kurumuṭuipe, ar sonot Jiu emakʼ dan, biseskaete nạbi lekate roṛ reakʼ ektiạri ńam lạgitʼ gagojokʼpe. Eṭakʼ pạrsite roroṛicʼ do manwako ṭhen katha bae roṛeda, menkhan Isor ṭhengeye roṛeda; ente ona do okoe hõ bako bujhạu daṛeakʼa; uni do Jiu hotete sạri okoakʼ reakʼ roṛeda. Menkhan nạbi lekate katha roroṛicʼ do manwako ṭhen nonkan kathae roṛa one okaṭakʼteye benao rakapʼko, are udgạuko ar jiwi raṛecʼe danako. Eṭakʼ pạrsite katha roroṛicʼ do apnargeye benao rakabokʼa, menkhan nạbi lekate roroṛicʼ do manḍerren hoṛkoe benao rakapʼkoa. Ińakʼ sana do jotoko jemon eṭakʼ eṭakʼ pạrsitepe roṛ daṛeakʼ, menkhan arhõ bạ̃ṛtiń khojkana nạbi lekate jemon kathape roṛ daṛeakʼ. Eṭakʼ pạrsikote roroṛicʼ do manḍerren hoṛko benao rakapʼko lạgitʼ bae torjomae khan, enḍekhan uni khon nạbi lekate okoe kathae roṛetʼ unigeye sorosa. Onate E boehako, ape ṭhen senkate eṭakʼ pạrsikoteń roṛle khan enḍekhan cetʼ iń porhokepea; sodorakʼ, se baḍaeakʼ, se nạbiakʼ, se sikhạuna reakʼakʼ bạń galmarao ape khan do? Tirioge cetʼ ar peṛesaṅge cetʼ onako do rạṛ aloko begarle khan cekate oroṅakʼ ar banamakʼ do baḍae oromokʼa? Lạṛhại siṅgạ pusṭạute baṅ saḍelen khan, enḍekhan lạṛhại lạgitʼ okoe haleye sapṛaokʼa? Onkage okaṭakʼ pạrsi hoṛ bako bujhạu ona pạrsitepe roṛle khan enḍekhan okaṭakʼpe roṛ ona do cekate bujhạukʼa? Ente unre okaṭakʼ kathape roṛ ona ma hoe ṭhengepe roṛetʼkan. Noa dhạrtire aema lekan pạrsiko menakʼa; onako modre okaṭakʼge okạjwạ do baṅkana. Onate jãhãn pạrsi reakʼ bhed bạń baḍaele khan enḍekhan uni roroṛicʼ ṭhen do eṭakʼ pạrsiren hoṛ lekań hoyokʼa ar uni hõ iń ṭhen do eṭakʼ pạrsiren hoṛ lekage. Apere hõ noa katha do sạrigea. Ape do sonot Jiu reakʼ dan ńam lạgitʼpe jidre okaṭakʼ dan hotete manḍer benao rakapʼ daṛekokʼ onako ḍherkaete ńam lạgitʼ kurumuṭuipe. Onate jãhãe hoṛ eṭakʼ pạrsite kathae roṛetʼ khan uni doe koejoṅma jemon ona reakʼ maneye bujhạu daṛeako. Iń do eṭakʼ pạrsiteń koejoṅ, enḍekhan ińren Jiugeye koejoṅkana menkhan ińakʼ mon do bae kạmikana. Enḍekhan cetʼ cekae jạruṛtińạ? Iń do Jiuteń koejoṅa, ar akelte hõń koejoṅa; ar Jiuteń sereńa ar akelte hõń sereńa. Am do Jiutem gunmanao johar khan ona pạrsi bin baḍaeyicʼ hoṛ onḍe hạjire tahenre cekate amakʼ gunmanao joharakʼre uni do Amene mena? Ente am cetʼem menetʼ uni do bae bujhạueda? Am do hoedaṛeakʼa bes okocʼtem gunmanao joharakʼ kana, menkhan onate uni eṭakʼ hoṛ do bae benao rakabokʼ kana. Iń do ape jotoko khon bạ̃ṛti eṭakʼ eṭakʼ pạrsiteń roṛ daṛeakʼkante Isoriń gunmanao joharae kana. Menkhan manḍer talare eṭakʼ eṭakʼ pạrsite hajar hajar kathań roṛ khon eṭakʼko cetʼako lạgitʼ bickom ińakʼ bud khon mõṛẽ goṭecʼ kathageń roṛa. E boehako, bujre gidrạko leka do alope hoyokʼa. Ar bạṛicʼakʼre apeakʼ mon do bale gidrạko leka hoyokʼtape ma, menkhan bujre do sẽṛã hoṛ lekankoge hoyokʼpe. Moseakʼ ạn-ạrire Probhui meneda, “Eṭakʼ pạrsiren hoṛko hotete ar eṭakʼkoakʼ mocate iń do noko jạtrenkoń galmarao akoa, menkhan enrehõ onko do ińakʼ katha bako ańjoma.” Enḍekhan ńelokʼ kana, biswạsiko lạgitʼ eṭakʼ eṭakʼ pạrsite katha roṛ do jãhãn cinhạ baṅkana, bickom bin pạtiạuko lạgitʼ do cinhạ kana; menkhan bin pạtiạukʼko lạgitʼ nạbi lekate katha roṛ jãhãn cinhạ do baṅkana, bickom pạtiạu akanko lạgitʼge. Manḍerren sanam hoṛ mitʼ ṭhen jarwakate jotoko eṭakʼ eṭakʼ pạrsite katha roroṛpe ehopʼlen khan ar manḍer bahreren hoṛko ar bin pạtiạuko bhitriteko bololen khan, enḍekhan onko do cetʼ pagla mente bako metapea? Menkhan sanamko nạbi leka kathakope roṛ ar jãhãe bin pạtiạuicʼ se manḍer bahreren hoṛ bhitriteye bololen khan enḍekhan uni do joto hoṛakʼ kathate apnar kại reaṅ cehaonae ńama ar onako katha hotetege acʼakʼ ontorreye bicạrokʼa. Onate acʼakʼ ontor reakʼ okoakʼko sodorokʼa, ar uni do otre ombakʼkate Isor sarhaoeteye mena, “Sạrige Isor do apere menaegea.” E boehako, enḍekhan cetʼ iń mena? Manḍerre mitʼ ṭhenpe jarwakʼre ape modre okoe do sarhaoakʼ sereń menakʼtaea, okoe do cecetʼakʼ menakʼtaea, okoe do Isorakʼ sạritetʼ sodorakʼ menakʼtaea, okoe do eṭakʼ pạrsite cecetʼakʼ menakʼtaea; arhõ okoe do ona reakʼ bhede bhaṅgaoetʼa. Onate jãhãe jãhãnakʼgeye ceka kan, ona jotowakʼ do jemon manḍer benao rakapʼakʼ mente hoyokʼ. Jãhãe eṭakʼ pạrsiteye roṛ khan bar hoṛ se ạḍi khan pe hoṛ pạri pạriteko roṛma, ar mitʼ hoṛ do onae torjomaema. Menkhan torjomayicʼ bae tahẽlen khan uni hoṛ do manḍer jarwakʼre katha aloe roṛ ma, eken apnarre ar Isor tulucʼ kathae roṛma. Okoe nạbi lekate kathako roṛ onko do bar hoṛ se pe hoṛko roṛma, ar eṭakʼko do onako tojbijtakoma. Duṛupʼ akanicʼ ṭhen Isorakʼ sạriakʼtetʼ sodorlen khan, enḍekhan katha roroṛicʼ doe thirokʼma, ente ape sanamkoge mimitʼ hoṛkate nạbi lekate kathape roṛ daṛeakʼa, jemon sanamkoge sikhạunako ńam ar sanamkogeko udgạu ocokʼ. Nạbikoakʼ Jiu do ako apnarakʼ gobolrege tahena. Isor do gulmalren Isor doe baṅkana, menkhan sulukren Isorge. Isorren hoṛko sanam manḍerkore cetʼ lekako tahenkan, onakage maejiuko hõ manḍer jarwakʼre hapegeko tahenma, ente onko do katha roṛ reakʼ hukum baṅ emakatʼkoa. Moseakʼ ạn-ạrire cetʼ lekae menetʼ onkage jemon gobolreko tahen. Ar jãhãnakʼ cetʼjoṅko menetʼ khan onko do oṛakʼre apan apin herel ṭhenko kulijoṅma, ente manḍer jarwakʼre maejiuko katha roṛ do lajao reakʼakʼ kana. Isorakʼ katha do cetʼ ape ṭhen khonge oḍok hecʼlena se ona do eken ape eskar ṭhenge hecʼakana? Jãhãege apnarte nạbi se Jiutenicʼ hoṛ kanae menteye bujhạukʼ khan enḍekhan uni doe aṅgocma, ape ṭhen okań olketʼ onako sanamakʼ do Probhuakʼ hukum kangea mente. Menkhan jãhãe noae neṅghao khan acʼ hõe neṅghao ocokʼa. Onate, E ińren boehako, ape do nạbi lekate katha roṛ lạgitʼ jidpe, ar eṭakʼ eṭakʼ pạrsite roroṛ alope manakoa. Menkhan noako sanamakʼ do ṭhik leka ar napaetege baṛe hoyokʼma. E boehako, ape oka bhage sombat iń porcaratʼpe tahẽkan, ona bhage sombat reakʼ kathageń disạ ocoyetʼpea. Ape do onape ataṅakada ar onarepe teṅgo ṭarhao akana. Okaṭakʼ kathań porcaratʼpe tahẽkan onage kajakte sapʼ akaepe tahen khan enḍekhan ona bhage sombat hotete kại khon bańcaope ńametʼa, khạjuk apeakʼ pạtiạu ạuṛiakʼ alo hoyokʼ. Ente okaṭakʼ iń ńamakatʼ ona do sanam khon jạruṛanakʼ mente ape hõń emakatʼpea; ona do hoyokʼ kana sonot sostor reakʼ katha leka Mạsi do aboakʼ kại gunạkʼteye gocʼlena, are topa ocolena, ar sonot sostor reakʼ katha leka pe mãhã hilokʼre gocʼko khone jiwetʼ beretʼ ocoyena, uni do Patras ar tayomte acʼren apostolko ṭhene ńel ocoyena. Ona tayom uni do mitʼ dhãote mõṛẽ sae khon hõ ḍher boehako ṭhene ńel ocolena. Onko modre adom doko gocʼ akanre hõ ḍher hoṛge ńitokʼ hõ jiwetʼ menakʼkoa. Ona tayom uni do Jakob ar tayomte sanam apostolko ṭhene ńel ocoyena. Ar sanamko tayom do iń lenda ṭũriạ ṭhen hõe ńel ocoyena. Ente apostolko modre ińge sanamko khoniń nicạṛgea, ar apostol ńumugokʼ lek hõń baṅkana, ente Isorakʼ manḍerren koń khedletʼkoa. Menkhan ńitokʼ okań hoeakan ona do Isorakʼ dayategeń hoeakana. Iń cetanre uniakʼ daya do baṅ ạuṛiakʼ akana; ar eṭakʼ sanam apostolko khon iń do ḍheriń khaṭao akana; ar eken ińiń khaṭao akan ona do baṅ bickom ińre Isorakʼ daya hõ tahẽkana. Ona iạte ińge baṅ cetʼ ar onkoge baṅ cetʼ, ale do noa reaṅle porcareda ar ape do onagepe pạtiạuada. Mạsi gocʼko khone jiwetʼ beretʼ ocoakan khan enḍekhan ape modren adomko do cekateko meneda gocʼkoakʼ jiwetʼ beredokʼ do bạnukʼ anaṅ? Gocʼko bako jiwetʼ beredokʼ khan enḍekhan Mạsi hõ bae jiwetʼ beretʼ ocoakana; ar Mạsi bae jiwetʼ beretʼ ocoakan khan aleakʼ porcar hõ ạuṛiakʼgea ar apeakʼ biswạs hõ ạuṛiakʼgea. Ona chaḍa noa kathage sạbudokʼ kana je, Isor reaṅ abo do eṛe goha bon emeda, ente aboakʼ goha do noage je, Isor do Mạsi gocʼko khone jiwetʼ beretʼ akadea. Menkhan gocʼkoakʼ jiwetʼ beredokʼ bạnukʼ khan uni do Mạsi hõ bae jiwetʼ beretʼ akadea, ente gocʼko bako jiwetʼ beretʼ ocoakan khan Mạsi hõ bae jiwetʼ beretʼ ocoakana. Ar Mạsige bae beretʼ ocoakan khan enḍekhan apeakʼ biswạs hõ ạuṛiakʼgea ar ńit hạbicʼ hõ ape do kạirege menakʼpea. Enḍekhan Mạsi sãote kolom mitʼkate okoeko gocʼakan onko hõko nosṭoyena. Mạsire asjoṅakʼ do eken niạ jion bhorge hoelen khan enḍekhan sanam manwako modre aboge joto khon bạ̃ṛti mãyãwan lek kanabon. Menkhan Mạsi do sạriakʼge gocʼko khone jiwetʼ beretʼ ocoakana; ar gocʼko modren unikangeae pạhilicʼ jo do. Mitʼṭen manwa hotete moron hoyente ar mitʼṭen manwa hotete gocʼkoakʼ jiwetʼ beredokʼ hõ hoeakana. Adam tulucʼ mitʼakante cetʼleka sanam manwageko gujukʼkan, onkage Mạsi tulucʼ mitʼakanko do jotogeko jiwetʼ beretʼ ocokʼa. Menkhan ona modre pạli menakʼa; pạhilre do Mạsige, ar ona tayom do Mạsirenko. Ar onko do uniakʼ seṭerokʼreko jiwetʼ beretʼ ocokʼa. Ona tayom Mạsi do sanam raj calao ar sanam ektiạri ar daṛeye maraote Isor Babawakʼ tire rajosṭiye jimạkakʼa ar unrege mucạdokʼa. Isor do tin hạbicʼ Mạsiren sanam bạiriko uniakʼ jaṅga latarre bae dohoko un hạbicʼ Mạsi doe rajokʼa. Ar sesicʼ bạiri moron, uni hõe marao ocokʼa. Sostor reakʼ katha leka, “Uni do sanamakʼge acʼakʼ jaṅga latarreye dohokeda.” Ar jotowakʼge gobolre dohoakana mente menle khan pusṭạute bujhạukʼ kana okoe jotowakʼko Mạsiakʼ gobolreye dohoakatʼ uni Isor do acʼtetʼ ona khone chaḍaogea. Tinre sanamakʼ do Mạsi gobolre dohokʼa, unre okoe Mạsi gobolre sanamakʼe doholetʼ uni Isorge jemon mạlike hoyokʼ onate Hopon do acʼ hõ Isorreye gobolokʼa. Menkhan gocʼko iạte okoeko bạptisokʼkan, onkoakʼ do cetʼ hoyokʼtakoa? Ente gocʼko bako jiwetʼ beretʼ ocokʼkan khan onko do cedakʼ gocʼko iạteko bạptisokʼ kana? Ar cedakʼ jao ghuṛi muhinre bon paṛaokʼkana? E boehako, aboren Probhu Jisu Mạsire ape reaṅ okaṭakʼle suhukʼetʼkan ona suhukʼre iń do dinạm hilokʼgeń gujukʼ kana. Ephesusre bir janwarko tulucʼ okań lạṛhạilen, ona judi manwako lekań onka lekhan enḍekhan cetʼ porho hoyokʼtińạ? Ar gocʼko bako jiwetʼ beredokʼ khan enḍekhan, “delabon jom ńũite okteko bon khemaoma; ente gapa dobon gujukʼa.” “Alope bulạukʼa, bạricʼakʼko tulucʼ gatekʼte bhage cạl-colonko hõ bạṛijokʼa.” Onate ape do apeakʼ monre cetaokʼpe ar alope kạiya. Ente ape modre adomko do Isor bako oromakadea; iń do lajao ocope lạgitʼge noa katha doń roṛeda. Jãhãeko men botecʼkea, “gocʼko do cekateko jiwetʼ beretʼ ocokokʼa? Ar cetʼ lekan hoṛmowateko beredokʼa?” E bebuj, oka itạm eretʼkan ona baṅ gocʼlen khan bacoṅ janam rakabokʼ. Ar amem eretʼ itạ khon oka janamokʼ ona do bam ereda, menkhan guhum se jãhãnage eken mitʼṭen jaṅgem ereda. Menkhan Isor do acʼakʼ monejoṅ leka ona itạre hoṛmoe emakʼ kana. Uni do acʼakʼ kusi lekage mimitʼ itạre hoṛmoe emakʼ kana. Joto jel do baṅ mitʼ lekana. Manwakoakʼ mitʼ leka, janwarkoakʼ eṭakʼ leka, cẽṛẽkoakʼ eṭakʼ leka ar hakokoakʼ eṭakʼleka. Sermare aema hoṛmoko menakʼa, ar dhạrtire hõ aema hoṛmoko menakʼa, menkhan sermare hoṛmoko reakʼ ṭhonok mitʼ leka ar dhạrtire hoṛmoko reakʼ ṭhonok do ar mitʼleka. Siń cando reakʼ ṭhonok mitʼ leka, ńindạ cando reakʼ ṭhonok eṭakʼ leka ar ipilko reakʼ ṭhonok ar mitʼ leka; ente ipil ipilre ṭhonok do judạ judạgea. Gocʼko reakʼ jiwetʼ beredokʼ hõ ṭhik onkage. Ente hoṛmo topale khan ona do seakʼa, menkhan ona hoṛmo do nonka lekae jiwetʼ beretʼ ocokʼa, one okaṭakʼ do ar tis hõ baṅ nosṭokʼ. Ona do bemanot lekate hasare topa ocokʼa, menkhan ṭhonokre jiwetʼ beretʼ ocokʼa; nijorre erogokʼa ar jorre jiwetʼ beretʼ ocokʼa. Jel reakʼ hoṛmo do hasare topa ocokʼa, menkhan jiu reakʼ hoṛmo do jiwetʼ beretʼ ocokʼa. Cetʼleka jel reakʼ hoṛmo menakʼa, onkage jiuteakʼ hoṛmo hõ menakʼgea. Sostorre nonkage olakana, “Pạhil manwa Adam do jiwetʼ jiwiyanicʼe hoyena.” Ar sesicʼ Adam do jiwetʼ Jiugeye hoyena. Menkhan oka jiuteakʼ kan ona do maraṅakʼ do baṅkana, bickom oka jiwiyanakʼ kan onage, ar ona tayom do jiuteakʼ. Pạhil manwa do ot khone hecʼlena ar hasa khongeye benaolena; Menkhan dosaricʼ manwa do serma khone hecʼlena. Dhạrtiren manwako do hasaren benao manwa leka, ar sermate calakʼko do sermaren manwa lekage. Cetʼleka abon do hasaren manwa bon hoeakan onkage sermaren manwa leka hõ bon hoyokʼa. E boehako, okań menetʼkan ona do noage, manwa do acʼakʼ jel ar mãyãmte Isorakʼ raj bae ạidạri daṛeakʼa; ar oka seakʼ ona do nonkanakʼ reakʼ ạidạri bae hoedaṛeakʼa one okaṭakʼ baṅ seakʼ. Ańjompe, iń do mitʼṭen okoakʼ iń lạiape kana. Sanamkoge bon gujukʼa ona do baṅa, menkhan bon pheraokʼa; ṭuṅ ghuṛite, mitʼ ripitʼrege, ses siṅgạ reakʼ saḍetege, ente siṅgạ saḍekʼa ar gocʼko do bin seageko jiwetʼ beretʼ ocokʼa ar abo do bon pheraokʼa. Seakʼakʼ do bin seakʼakʼko horokʼ hoyokʼtaea jemon alo seakʼ. Gujukʼ do bin gujukʼakʼ horokʼ hoyokʼtaea jemon aloe gujukʼ. Oka seakʼ ar okaṭakʼ gujukʼ, onako do onkage bodolokʼ khan sonot sostor reakʼ katha do purạukʼa je, gujukʼ do jitteye utʼ cabakeda. “E gujukʼ okortam jit do? E gujukʼ okortam suṅgạ do?” Gujukʼ reakʼ suṅgạ do kại kana, ar kại reakʼ daṛe do Moseakʼ ạnkoge. Menkhan Isore sarhaokʼma, one uni jite emabon kan aboren Probhu Jisu Mạsi hotete. Onate, E ińren boehako, kajakte teṅgo ṭak akae tahenpe; jemon okaṭakʼte hõ alope ocogokʼ; ar jaoge Probhuakʼ kạmire sareṛokʼpe, entepe baḍaegea, uniakʼ kạmire mehnot do baṅ ạuṛiagokʼ tapea. Nitokʼ do Isorren hoṛko goṛowako lạgitʼ canda uṭhạu reaṅ iń metapekana. Galatiạ Paradesh reakʼ manḍerren hoṛko cetʼ lekań hukum akatʼko ape hõ onkaepe baṛe. Ape mimitʼko apeakʼ daṛe leka thoṛa thoṛate doho jarwaepe hapta reakʼ pạhil dinre, jemon ińiń hecʼlenre canda uṭhạu alo lagaoape. Ar ape ṭheniń hecʼlenre apeakʼ ona dan do Jerusalemte idi lạgitʼ okoe lek mentepe bujhạuko, onko ciṭhiń olakote Jerusalemteń kolkoa. Ar iń hõ senokʼ reakʼ lekpe bujhạu liń khan enḍekhan onko do iń sãoteko sen daṛeakʼa. Makedoniạ Prodes talateń sen paromokʼre iń do ape ṭheniń hijukʼa, ente iń do Makedoniạ talategeń parom calakʼa. Menkhan ape ṭhen do thoṛa diniń tahena, ar rabaṅ din do ape ṭhenge pasecʼ iń khemaoa, jemon jãhã secʼgeń calakʼre unrepe bondobos daṛeạń. Parom calakʼ horre ape tulucʼ ńapamokʼ do bạń menjoṅ kana; enteń asokʼ kana, Probhui aṛakʼạń khan ape tulucʼ ḍher diniń tahena. Menkhan pentekosṭ hạbicʼ iń do Ephesusregeń tahena, ente oka kạmire ḍher jo ńamokʼ onkan kạmi lạgitʼge mitʼṭen maraṅ bhạg reakʼ duạr iń lạgitʼ do jhicʼ akana; menkhan noare ḍher hoṛgeko tạkicʼ daram edeńkana. Ńelpe, Timothiye hecʼlen khan apeko talare jemon bin botorteye tahẽ daṛeakʼ, ente cetʼleka Probhuakʼ iń kạmikan onkage uni hõe kạmikana. Onate okoe hõ jemon aloko neṅghaoema. Menkhan sulukte kolgotʼkaepe, jemon uni do iń ṭhene hecʼ daṛeakʼ. Ente uni do boehako sãoteye hijukʼa menteń ńel horekana. Ar boeha Apolloss reaṅ iń meneda. Iń do ạḍiń nehõrade tahẽkana jemon boehako sãote ape ṭhene calakʼ, menkhan ńitokʼ uni do calakʼ reakʼ mon bạnukʼtaea. Ar tayomteye opsorlen khan uni doe calakʼa. Ape do jagwar tahenpe, biswạsre keṭecʼte teṅgo akan tahenpe, jhũkokʼpe ar daṛeanko hoyokʼpe. Ar jãhãnakʼgepe cekae ona do dulạṛte onkaepe. E boehako baḍaegeape, Stephan gharońjren hoṛkoge Akhaearen pạhil biswạsi kanako mente, ar Isorren hoṛko sapʼ dapʼako lạgitʼ onko do apnargeko jamaṛ akana. Onate ape hõ nonkan hoṛko ṭhen gobolokʼ lạgitʼ iń nehõrape kana. Ar tinạkʼ do kạmireko gokʼṛokan, arko khaṭaokʼkan onko ṭhen hõ gobolokʼpe. Stephanos ar Phortunatus ar Akhaeakustekoko hecʼ akanteń rạskạkʼ kana; ente apeakʼ khạli jaega do onkogeko purun akada. Onko do ińakʼ ar apeakʼ jiuko khạtirketʼ tabona. Ape do nonkan hoṛge manotkope. Ạsiạ reakʼ manḍerrkoren hoṛko do apeko joharape kana. Akuilạ, ar Priskilạ do Probhure ạḍikin joharapekana, ạkinakʼ oṛakʼre menakʼ manḍerrenko salakʼ. Ar joto boehako hõ apeko joharape kana. Ape do sonot cokʼte jopoharpe. Johartetʼ do iń Pạul nij titeń olape kana. Jãhãe hoṛ Probhu bae dulạṛe khan sarapicʼe hoyokʼma. Maran atha [Probhui darae kana]. Probhu Jisu Mạsiakʼ daya ape sanamko tulucʼ baṛe tahenma. Ape sanamko tulucʼ Mạsi Jisure ińakʼ dulạṛ tahenma. Amen. Iń Pạul do Isorakʼ monejoṅ lekage Mạsi Jisuren mitʼṭen apostoliń hoeakana. Iń do aboren boeha Timothi ar Korinthi nagraha reakʼ Isorakʼ manḍer ar Akhaea Prodesre menakʼko Isorren sanam hoṛko ṭhen noa ciṭhiń oletʼkana. Aboren Baba Isor ar aboren Probhu Jisu Mạsi ape sanamko suluk ar bhore dan ape ma. Aboren Probhu Jisu Mạsiren Isor ar Babawakʼ sarhao hoyokʼtae ma. Uni kangeae mãyãwan Baba do; ar sanam jiwi raṛecʼren Isor hõ. Aleakʼ joto duk ar haronre uni do jiwi raṛecʼe emalekana, jemon uni ṭhen khonle ńamakatʼ jiwi raṛecʼakʼ do eṭakʼkoakʼ duk ar santaorele emdaṛeako. Mạsire cetʼleka ạḍi utạr dukle sahaoetʼkan onkage uni hotete ạḍi utạr jiwi raṛecʼhõle ńameda. Ale okaṭakʼ dukle jometʼkan ona do apeakʼ jiwi raṛecʼ ar bańcaope lạgitʼgele onkayeda; ar oka jiwiraṛecʼle ńametʼkan ona do ape lạgitʼgele ńametʼ kana. Ale leka tinre ona dukpe joma unre niạ jiwi raṛecʼ do ona duk sahao lạgitʼe goṛowapea. Apere purạ biswạs menakʼtalea, ente cetʼleka ape do aleakʼ duk sasetren bhạgiạdarpe hoyokʼkan onkage aleakʼ jiwi raṛecʼren bhạgiạdarko hõpe hoyokʼ kana. Ạsiạ Prodesre ale do oka santaorele paṛaolen, asjoṅ kanale ape hõ ona jemonpe baḍae daṛeakʼ. Onḍe do sahao daṛeakʼ khon hõ bạ̃ṛti caprele paṛaolena, ar bańcaokʼ reakʼ asge baṅ tahẽkantalea. Alele hudisetʼ tahẽkana, niạ dhao do khạṭigele gujukʼa. Menkhan ona dosa do noa lạgitʼge hoeatʼle tahẽkana jemon apnarre bhorsa baṅkate, okoe gocʼkoe jiwetʼ beretʼetʼko, uni Isorrele bhorsakʼ. Uni do maraṅ gujukʼ khone rukhiyạketʼlea ar ńit hoe rukhiyạlea. Ale do unire noa asle dohoyeda je, uni do jao ghuṛigeye rukhiyạlea. Ape hõ koejoṅre goṛowalepe. Enḍekhan ḍher hoṛakʼ koejoṅte oka bhorle ńam ona khạtirte ḍherkoge Isorko sarhaoea. Ale oka lạgitʼle sarhaokʼkan ona do noage, aleakʼ bibek do noa gohae emeda je, Isor reakʼ sonot ar soṛatetʼ iạte ale do sanam manwako talare, bạ̃ṛtikaete ape talare jionle khemao akada. Ar ona jion do jel reakʼ akelte do baṅ bickom Isorakʼ daya reakʼ ạyurtele khemao akada. Ape okape paṛhao daṛeakʼ sepe bujhạu daṛeakʼ ona khon bahre eṭakʼ jãhãnakʼ do bale olape kana. Iń do noań asokʼkana, cetʼleka thoṛaganpe bujhạu akatʼle, onkage ape do purạtepe bujhạu daṛeakʼa je, Probhu Jisu hijukʼ dinre cetʼleka aleren sarhaokʼakʼkope hoyokʼ onkage ale hõ aperen sarhaokʼakʼkole hoyokʼa. Ar noa katha sạrikana mente baḍaekate iń do laharege ape ṭhen calakʼ lạgitʼ iń goṭaleda, jemon bar dhao bhorpe ńam daṛeakʼ. Iń doń goṭa akatʼ tahẽkana, Makedoniạte calakʼ jokhecʼ ape sãoteń ńapam torakʼa ar Makedoniạ khon arhõ ape ṭheniń ruạṛ hijukʼa, jemon apege Jihudạte koleń reakʼpe bebostawạń. Cetʼpe hudiseda iń do tamasate noań ṭhik akada? Hoṛko cetʼleka mitʼ ghuṛite “Hẽ” arko “Baṅ” onkage cetʼ jãhãnakʼ iń hõń goṭayeda? Isor doe pạtiạrgea, noa katha cetʼleka sạrige onkage noa hõ sạrigea je, ape ṭhen ale do inạ mitʼ ghuṛire “Hẽ” ar “Baṅ” do bale roṛa. Okoeakʼ katha Siluạnus, Timothi ar iń do ape ṭhenle porcar akatʼ uni Jisu Mạsi, Isorren Hopon do mitʼ ghuṛire “Hẽ” ar “Baṅ” doe baṅkana; uni do jao ghuṛigeye “Hẽ” kana. Isorakʼ sanam gokʼakʼko do Mạsi hotete “Hẽ” hoeakana. Onate Isorakʼ ṭhonok lạgitʼ Mạsi hotete abo do “Amen” bon roṛeda. Okoe do Mạsire ale ar apeye jopoṛaoketʼ bonteye teṅgo keṭecʼketʼ bon uni doe Isor kana. Unige ale doe bahal akatʼlea, metakʼme uni do apnarakʼ dhon leka ale doe mohor chap akatʼlea; ar okaṭakʼe emale ona reakʼ pạhil hạṭiń lekate uni do aleakʼ ontorre sonot Jiue emakatʼlea. Iń do Isorge apnar jiwite goha menteń ńumekana, sạjại khon bańcaope lạgitʼge iń do Korinthite bạń sen ruạṛ akana. Mạlik leka apeakʼ biswạsrele tạkicʼ ocoyetʼpea ona do baṅ, bickompe rạskạkʼ onate apeko sãotele kạmikana, ente pạtiạure ape do khạṭikope hoeakana. Onate iń do mon monteń goṭawana, arhõ duk ocope lạgitʼ ape ṭhen do bạń calakʼa, ente apegeń duk ocolepe khan enḍekhan iń do okoeye rạskạ ocoyińạ? Ar okoekoń duk ocoko onko metakʼme ape chaḍa iń rạskạ ocoyiń leka do ar okoe menakʼkoa. Ińiń calakʼre okoeko ṭhen rạskạ ńamokʼ reakʼ katha onko ṭhen khon jemon duk aloń ńam, onate noako kathań olleda. Apere noa pạtiạu menakʼtińa je, iń okaṭakʼte rạskạń ńam ape hõ onatege rạskạpe ńama. Ạḍi duk ar mon reakʼ kosṭote mẽtʼ dakʼ joro joroteń olatʼpe tahẽkana. Ape duk ocope lạgitʼ do bạń oleda, bickom apere tinạkʼ khạndri dulạṛ menakʼtiń ona baḍae ocope lạgitʼgeń olletʼ tahẽkana. Jãhãeye duk ocoakadiń khan ajhaṭte do baṅ menkhan noageń mena je, uni do eken iń eskar do bae duk ocoakadińạ, menkhan ape sanamko hõ thoṛagan doe duk ocoakatʼpegea. Aperen ḍher hoṛko mitʼkate okaṭakʼ sạjạiko emakawade onage uni lạgitʼ do ḍhera. Menkhan ńitokʼ do ikạkaepe ar jiwi raṛecʼ emaepe, jemon dukte aloe hadosokʼ. Onate bạ̃ṛtikaeteń nehõrape kana, unipe dulạṛedekan khan ona baṛe sạbudtape. Iń do ńeńel sanań kana sanamakʼre sạri se nase hukum bataoko kanape mente, ar ona iạtege ape ṭheniń olleda. Ar jãhãnakʼ babotre judi jãhãeakʼgepe ikạitae enḍekhan iń hõ uniakʼ iń ikạitaea. Sạriakʼge iń do jãhãnakʼiń ikạ akatʼ khan enḍekhan Mạsi samaṅre ape lạgitʼgeń onka akada, jemon Soetan do abo bulạu bon lạgitʼ jãhãn dão aloe ńam. Ar uniakʼ monsubạ dobon baḍaegea. Iń do Troas nagrahare Mạsiakʼ bhage sombat porcar lạgitʼ senkateń ńelkeda, Probhu do onḍe kạmi lạgitʼ mitʼṭen ạte emakawạdińa. Menkhan enrehõ monre suluk bạń ńamletʼa, ente ińren boeha Titus do onḍe bae tahẽkana. Ona iạte iń do Troasren hoṛko ṭhen khon bidạ hataokate Makedoniạteń calaoena. Isoriń sarhaoede kana, Mạsi tulucʼ bon mitʼ akante ar Isor do acʼakʼ jitạuakʼre jaogeye ạyuretʼbon kana. Mạsi baḍaeye do mitʼṭen mahkaokʼ kan so leka. Isor do acʼakʼ jitạuwakʼre ona jut so ale hotete sanam jaegareye mahkao ocoyeda. Bańcaokʼkanko ar nosṭokʼkanko ṭhen ale do Isor secʼ khon sạrige Mạsiren jut so kanale. Menkhan okoeko nosṭokʼkan onko ṭhen aleakʼ so do moron leka; one ona reakʼ jo do jaejug moronkan; ar okoe bańcaoko ńametʼkan onko ṭhen do jion reakʼ jut so leka, one ona reakʼ jo do jaejug jionge. Noa kạmiren lekicʼ doe okoe kana? Apnarakʼ lab lạgitʼ okoe Isorakʼ kathako bạnijetʼkan onko lekanko dole baṅkana; bickom Mạsi tulucʼle mitʼ akante ale do Isor samaṅre Isorren kol ocoakan hoṛko lekage sạri ontor khon kathale roṛeda. Ale do noako kathate cetʼ arhõ apnarte sarhaokʼle ńamjoṅ kana? Adom adom hoṛko cetʼleka jạruṛakokan, onkage ale hõ cetʼ ape ṭhen khon sarhaokʼ reakʼ ciṭhi jạruṛale kana? Tis hõ baṅ. Aleakʼ ontorre olakan ciṭhi ma apege coṅ. Ona ciṭhi reakʼ katha do sanamkogeko baḍaegea ar sanamkogeko paṛhao akada. Apege Mạsiakʼ ciṭhi ar aleakʼ kạmiko reakʼ jo kanpe ona do pusṭạute ńelogokʼ kana. Noa ciṭhi kạlite olakʼ do baṅkana bickom jiwetʼ Isorren Jiu hotetege olakana. Noa do jãhãn dhiri paṭare baṅ olakana, menkhan manwa ontorrege olakana. Mạsi hotete Isorre ale do nonkan khạṭi biswạsge menakʼtalea. Menkhan apnarte jãhãnakʼ cekae reakʼ daṛe menakʼ talea mentele dạbi daṛeakʼa ona do baṅ, bickom ona lektetʼ do Isor ṭhen khonge hijukʼ kana. Mitʼṭen nawa bondobos reakʼ katha baḍae ocole lạgitʼ uni doe lek ocoketʼlea. Noa bondobos do eken ạn-ạriko manao reaṅ do baṅ, menkhan sonot Jiuakʼ ạyurte ontorre gobolokʼ reaṅ kana; ente ạn-ạrite do gogocʼgea menkhan sonot Jiu do jione emokʼa. Dhirire olakʼ oka bondobos hotete moron hijukʼkan ona bondobos emokʼ jokhecʼ Isorakʼ do ṭhonok sodorlena. Onate Moseakʼ mẽtãhã hõ Isorakʼ ṭhonokte perecʼlena. Ar ona ṭhonok do bại bạite kom idiyenre hõ Israelko do Moseakʼ mẽtʼãhã secʼ bako beṅgetʼ daṛeada. Ona bondobos reakʼ jo nunạkʼ ṭhonokanakʼ hoedaṛeakʼ khan, enḍekhan sonot Jiuakʼ kạmi reakʼ jo do cetʼ artetʼ ṭhonokanakʼ baṅ hoyokʼa? Oka bondobos hotete manwa dusi menteye ṭarhaokʼkan ar uniakʼ kạmiko ṭhonokte perecʼge khan, enḍekhan manwa dhorom menteye ataṅokʼre uniakʼ kạmiko do artetʼ ṭhonokte perejokʼtaea. Sạrige, okaṭakʼ do lahare ṭhonokte perecʼ tahẽkan, ńitokʼ ona reakʼ jãhãn ṭhonok do bạnukʼa, ente ona khon ńitokʼakʼ bondobos reaṅ ṭhonok do artetʼ ḍhergea. Ar caba hijukʼakʼ judi nunạkʼge ṭhonokte perecʼ tahẽkan khan enḍekhan okaṭakʼ jaejug hạbicʼ tahenkan ona do artetʼ ṭhonokte perecʼgea! Ale do nonkanakʼ as menakʼtalete sodortele roṛetʼkana. Ar Mose lekanko dole baṅkana, ente Mose do acʼakʼ mẽtʼãhãe betʼ esetʼetʼ tahẽkana, jemon acʼakʼ caba idikʼkan mẽtʼãhã reakʼ marsal Israelko aloko ńelńam. Menkhan onko hoṛkoakʼ mon do keṭecʼlen takoa. Onate teheń hạbicʼ hõ ona mare bondobos reakʼ katha paṛhao jokhecʼ onkoakʼ ontorre inạ mitʼ lekanakʼ bedokʼakʼ orwal do tahenkangea, ente eken Mạsi tulucʼ mitʼlen khange ona orwal do ocogokʼa. Menkhan teheń hạbicʼ Moseakʼ ạn-ạri puthiko paṛhao jokhecʼ Israelkoakʼ ontor do ona orwalte esetʼge tahenkana. Onko modre jãhãege Probhu secʼ mon ạcurlentakore ona orwal do ocogokʼa. Probhu kangeae sonot Jiu do; ar okare Probhuren Jiu onḍege sạdhintetʼ. Onate okoe Mạsi tulucʼ bon mitʼ akan, abo sanamko do bin betʼ mẽtʼãhã ạrsire ńelokʼkan muṭhạn leka Probhuakʼ ṭhonok ńel ńelte apnar hõ ṭhonokte hara rakabokʼte uni lekage bon hoyokʼkana. Probhu, metakʼme sonot Jiu reaṅ daṛetege noa do hoyokʼ kana. Noa bondobos reakʼ katha baḍae reakʼ bhar Isor do ale dayakateye emakatʼlete bale as chuṭạukʼ kana. Ar hoṛko danaṅre oka lajao paṛaoakʼko kạmikan ona do ekaltege bale kạmikana. Ale do okaṭakʼ kạmirege bale eṛeya, ar Isorakʼ kathare jãhãnakʼ ạuṛiakʼ hõ bale mesaletʼ kana. Bickom Isorakʼ sạriakʼtetʼ sodorkate uni samaṅre sanam hoṛkoakʼ bibek ṭhen ataṅokʼ lek mente apnarle sodorokʼ kana. Aleakʼ bhage sombat do danaṅ esetʼ akan khan enḍekhan nosṭokʼkanko lạgitʼge danaṅ esetʼ akana. Bin pạtiạukʼ hoṛkoakʼ mon niạ jugren Deb doe kãṛã akatʼtakoa jemon onko do bhage sombat reakʼ marsal aloko ńelńam. Noa bhage sombatre do Mạsiakʼ ṭhonok bamberokʼ kana, ar nui Mạsi kangeae Isorakʼ muṭhạn reakʼ sodorokʼtetʼ. Ale apnar reaṅ do bale porcareda, bickom Jisu Mạsi doe Probhu kana mentele porcarede kana ar Jisu lạgitʼge aperen golamle hoeakana. Ale do noale porcaretʼ kana, ente okoeye menletʼ tahẽkan, “Ńut khon marsal hoyokʼ ma,” Uni Isorge aboakʼ ontorreye bamberena, jemon uniakʼ mạhima bujhạu lạgitʼ marsal sodorokʼ. Ar noa mạhimage Mạsiakʼ mẽtʼãhãre menakʼa. Menkhan noa dhon do hasa bhajanre dohoakana, ar alege ona hasa reakʼ bhajan do. Hasa reakʼ bhajanre dohoakana jemon hoṛkoko bujhạu daṛeakʼ baṅma, noa asambheṛ daṛe do apnar khonakʼ do baṅ bickom Isor ṭhen khonge hecʼakana. Ale do sanam secʼ khongele cipạ ocokʼkanre hõ bale mon duk akana; arle andmandao akanre hõ bale as chuṭạu akana; khed ocokʼkan rehõle Isor do bae bạgi giḍiale kana; arle kaṛgo bindạṛ ocokʼkanre hõ bale marao akana. Ale do siń sạṭupʼ Probhu Jisuakʼ gujukʼtetʼ aleakʼ hoṛmorele asen baṛayeda, jemon Jisuakʼ jion hõ aleakʼ hoṛmore sodorokʼ. Ale jiwetʼle tahenkanko do siń sạṭupʼ Jisu khạtirte moron ṭhenle soprot ocokʼkana, jemon Jisuakʼ jion hõ aleakʼ gujukʼ hoṛmore sodorokʼ. Onate alere do morone kạmikana menkhan apere do jionge. Sonot sostorre ol menakʼa, “Ińiń pạtiạu akanteń roṛeda.” Ar inạ mitʼlekan biswạs menakʼtalete ale hõle pạtiạukʼkante kathale roṛeda, ente alele baḍaea, Probhu Jisu okoeye jiwetʼkede uni do Jisu sãote ale hõe jiwetʼ beretʼlea ar ape sãote ale hõ acʼ samaṅreye teṅgolea. Sanamakʼ do apeakʼ bhạlại lạgitʼge hoeakana, jemon Isorakʼ oka daya ḍher hoṛkore emakan ona daya iạte ḍher hoṛge arhõ bạ̃ṛti Isorko sarhaoedea ar nonkate Isorakʼ ṭhonok hoyokʼ kana. Onate ale do bale as chuṭạukʼ kana. Ente aleakʼ bahre hoṛmo nasao idikʼkanre hõ bhitri hoṛmo do din dinte nawa idikʼ kantalea. Ale do ńitokʼ mitʼ ghạṛi lạgitʼ okale dukokʼkan ona khạtirte jaejug ṭhonokle hameṭ joṅa. Noa ṭhonok do nunạkʼge ḍhera je, ona do ohoge soṅlena. Oka ńelokʼkan ona secʼ do bale beṅgetʼeda, bickom oka baṅ ńelokʼkan ona secʼgele beṅgetʼeda. Ar oka ńelokʼkan ona do eken thoṛa din lạgitʼkana, menkhan oka baṅ ńelogokʼkan ona do jaejug hạbicʼakʼ kana. Baḍaegeabon, noa dhạrtire oka kumbạ oṛakʼre bon tahenkan metakʼme, oka nijor hoṛmowante menakʼbon ona rạputʼlenre hõ aboakʼ do Isor emakʼ mitʼṭen oṛakʼ menakʼ tabona. Ona oṛakʼ do manwa tite benaoakʼ baṅkana, ona do jaejug khonge sermare menakʼa. Niạ hoṛmore tahen jokhecʼ abo dobon sãhetʼeda ar goṭa monte bon khojkana jemon serma reakʼ ona nawa hoṛmote bon abhran ocokʼ; ente noa katha do sạri kana je, ona hoṛmo bon ńamle khan laṅgaṭ do ar babon tahena. Sạrige noa laṅga hoṛmore tahen jokhecʼ hamal bojha iạte lologe bon sahẽtʼeda; ar koṭokʼ do baṅ sanayetʼ bona bickom oyo ocokʼgebon khojkana jemon abonakʼ gujukʼakʼ hoṛmo do jaejug jiwetʼ hoṛmote pheraokʼ. Ar noa lạgitʼge Isor doe sirjạu akatʼbona ar acʼakʼ pạhil hĩs lekate uni do acʼren sonot Jiu baena lekateye emakatʼbona. Onate aboakʼ dil do tishõ baṅ ṭonṭakʼkan tabona, ar bon bujhạu daṛeakʼ kana, niạ hoṛmo kumbạ oṛakʼre tinạkʼ din bon tahen unạkʼ din Probhu khon sạṅgińre bon tahenkana. Oka ńelokʼkan ona hotete do babon calakʼkana, bickom biswạs hotetebon dãṛãnkana. Aboakʼ dil do menakʼgea ar hoṛmo oṛakʼ khon pharakokʼte Probhu ṭhen thamgạḍi akanbon kusiyakʼ kana. Onate hoṛmo oṛakʼre bon tahen ar babon tahen, aboakʼ kurumuṭu do hoyokʼ kana Probhu kusi ocoyege. Ente Mạsiakʼ bicạr duṛupʼakʼ samaṅre abo sanamkoakʼ jotowakʼ do sodorokʼa, jemon abo mimitʼko noa hoṛmore tahẽkate oka bon kạmiakatʼ, baṅ do boge ar baṅ do bạṛicʼ ona lekage kuṛạibon ńama. Probhu bon botoraekante abo do apnar reaṅ manwakoakʼ monre biswạs janam ocoe lạgitʼ bon kurumuṭuyeda. Ar abo bon oka lekanko kan, ona do Probhu ṭhen sodorgea ar asiń dohoea apeakʼ bibek ṭhen hõ ona do pusṭạugea. Niạte ape ṭhen arhõ lek mente apnar do bale sarhaokʼkana bickom ale ńutumte sarhaokʼ reakʼ dãole emapekana, okoe ontor baṅ ńelkate bahre reakʼ rup ńelteko sarhaokʼkan onko jemonpe roṛ ruạṛ daṛeako. Alele pagla akan khan enḍekhan do Isor lạgitʼgele hoeakana, ar napae monankole hoeakan khan enḍekhan ape lạgitʼgele hoeakana. Mạsiakʼ dulạṛge ale doe gobol akatʼlea, ente khạṭigele bujhạuakada je, sanamko lạgitʼ mitʼ hoṛe gocʼena, ar ona iạte sanamkogeko gocʼena. Uni do sanamko ńutumteye gocʼlena jemon okoe jiwetʼ menakʼko onko do apnar lạgitʼ jiwetʼ aloko tahen, bickom okoe onko lạgitʼe gocʼlen are jiwetʼ beretʼen uni lạgitʼ jiwetʼko tahen. Onate ńit khon manwawakʼ bahre secʼ ńelte do bale bicạra. Ale hõ Mạsi do pạhilte onkagele baḍaeledea, menkhan ńitokʼ onka do ar bale baḍaeyede kana. Jãhãege Mạsi tulucʼe mitʼakan khan enḍekhan uni do nawateye sirjạukʼ kana. Ar mareakʼ sanamakʼko meṭao cabakʼkante jotowakʼ do nawa arokʼ kana. Noako do Isor secʼ khonge hoeakana. Uni do Mạsi hotete apnar tulucʼe samgeketʼ bona, ar acʼ tulucʼ eṭakʼ sanamko lạgitʼ dạyike emakatʼbona. Metakʼme, Isor do manwawakʼ ghạṭko bae lekhayetʼtakote Mạsi hotete acʼ tulucʼe samgeyetʼkoa, ar ona samge reakʼ kathako baḍae ocoko reakʼ dạyik do aleye emakatʼlea. Onate Mạsi ńutumte paṭhaonako lekate ale do kathale roṛeda. Isor hõ acʼge ale hotete hoṛko ṭhene nehõrokʼ kana. Onate Mạsi ńutumte noale ajijokʼ kana, “Jemon Isor tulucʼ pe mitʼ ruạṛokʼ.” Jisu Mạsire jãhãn kại do baṅ tahẽkana; menkhan Isor do aboakʼ kạiko unireye ladekeda ar unige kạiyicʼe hoe ocokedea, jemon Mạsi tulucʼ jopoṛao akan bon tahente Isorakʼ dhoromte dhorom bon hoyokʼ. Isorren são kạmiyạko lekate noale nehõrapekana, Isorakʼ okaṭakʼ dayape ńamakatʼ ona do alope ạuṛiakʼ ocoea. Isor do sonot sostorreye menakada, “Batar jokhecʼ iń do amakʼ kathań ańjomketʼtama ar kại khon bańcaokʼ reakʼ dinreń goṛo akatʼmea.” Ńelpe, oktetetʼ do ńitokʼkangea, ar teheńge bańcao ńam reakʼ din kana. Mạsi lạgitʼ okaṭakʼle kạmikan ona jemon alo nisṛạu ocokʼ, onate nonkanakʼko bale kạmikana one okaṭakʼte jãhãeko tạkicʼ botecʼkokʼ. Ona khon bickom jotowakʼre Isorren sapʼ dapʼko mente apnarle sạbudokʼ kana. Santaore, muskilre, joṅjalkore, dal jomre, hajotkore, hulmalre, khaṭaokʼre, jagwarre ar upạsre. Ona chaḍa aleakʼ khạṭi jion hotete, aleakʼ akelte, sahao daṛete, dayate, sonot Jiu hotete, khạṭi dulạṛte, sạri porcarte ar Isorakʼ daṛe hotete ale dole sạbutetʼkana je, sapʼ dapʼko kanale mente. Arhõ banar tite sạriakʼ reakʼ khanḍa bhanḍa sapʼkatele sạbudetʼ kana ale do Isorren sapʼ dapʼko kanale. Hoṛko manotle ar bako manotle, ale reaṅ mońjko roṛ ar bạṛicʼko roṛ, menkhan ale dole sạbud akada Isorren sapʼdapʼko kanale. Hoṛ do ṭhokko metalekana, menkhan ale do sạriakʼ horrele taṛameda. Hoṛ do ale oromle bako monejoṅ kana, menkhan sanamkoge ale doko orom akatʼlea. Ale do gujukʼ barag lekale hoeakanre hõ jiwetʼ menakʼlea. Arle dal ocokʼkanre hõ bale gocʼ ocokʼ kana. Ạḍi dukle ńametʼre hõ aleakʼ ontor do jao ghuṛi rạskạte perecʼgetalea. Ale do apnarle reṅgecʼgere hõ, ḍher hoṛkole kisạ̃ṛ ocoyetʼkoa. Cetʼge bạnukʼtalere hõ, jotowakʼren ạidạriko kanale. Ar nonkatele sodoretʼkana, ale do Isorren sapʼ dapʼko kanale. E Korinthiren biswạsiko, ale do khulạsategele roṛ akada ar ape ṭhen aleakʼ ontor do purạtele khulạu akada. Ale do ape lạgitʼ aleakʼ ontorle jhicʼ akada, menkhan ape do ale birudre apeakʼ ontorpe siń esetʼ akada. Ińren hopon lekateń metapekana, cetʼleka ape lạgitʼ aleakʼ ontorle jhicʼ akatʼ, onkage ape hõ ale lạgitʼ apeakʼ ontor jhicʼ dohoepe. Ape do bepạtiạuko sãote inạ mitʼ ãrãṛre alope joṛaokʼa. Dhorom tulucʼ bedhoromakʼ jopoṛao do okare? Marsal ar ńut talare cetʼ jopoṛao do menakʼgea? Mạsi tulucʼ Beliạlakʼ, metakʼme Soetanakʼ aṛaṅ do cetʼ jurikʼ kangea? Isorren hoṛko lekate biswạsikoakʼ oka bakhra onare cetʼ bin biswạsikoakʼ bakhra menakʼgea? Isorakʼ mundilre boṅga murtikoakʼ jaega do okare? Aboge coṅ jiwetʼ Isorakʼ tahen oṛakʼkan bon. Sonot sostore meneda, “Iń do ińren hoṛko talareń girobasokʼa, ar onko tulucʼ iń dãṛãna. Iń do onkoren Isorriń hoyokʼa, ar onko do ińren hoṛko hoyokʼa.” Arhõe meneda, “Onate ape do be pạtiạuko tala khon oḍok hijukʼpe ar begarokʼpe. Ar jãhãn besaphawakʼko alope joṭeda, enḍekhan ińgeń ataṅ darampea.” Ona chaḍa “Sanam daṛeanicʼ Probhui meneda, ińge aperen babań hoyokʼa, ar ape do ińren hopon ar hoponerakope hoyokʼtińạ.” E dulạṛiạ gateko, abon lạgitʼ noako gokʼakʼ menakʼte delabon, jel ar jiu reakʼ joto chut khon apnar bon saphakʼ ma, ar Isor botorae tulucʼ sonot reakʼ hortebon laha idikʼma. Apeakʼ monre jaega aṛakʼ alepe. Ale do okoe hõ bale behok akatʼkoa, okoeakʼ hõ bale loksan akatʼtakoa, ar okoe hõ bale eṛe lipukʼ akatʼkoa. Bicạr dusipe lạgitʼ noa katha do bạń roṛeda. Pạhilregeń menakatʼpea, ape do aleren nunạkʼ dulạṛiạko kanape je, ape tulucʼ gujukʼ hõle rạjigea ar jiwetʼ tahen hõle rạjigea. Apere ạḍi pạtiạu menakʼtińạ ar ape iạte ạḍitetʼ iń sarhaokʼ kana. Aleakʼ joto duk sasetre ińakʼ rạskạ do sareṛokʼ kana ar ạḍi jiwi raṛecʼ iń ńameda. Makedoniạte seṭerkatere hõ hoṛmore jãhãn aosan bale ńamlakʼa; ale do joto secʼ khonge dukle ńametʼ tahẽkana; ar sanam secʼge gulmal ar ontorre botor tahẽkana. Menkhan Isor, one okoe do dukokʼkanko jiwi raṛecʼe emakokan, uni do Titusakʼ hijukʼ hotete jiwi raṛecʼe ematʼtalea. Eken ona do baṅ, Titus acʼge ape hotete jiwi raṛecʼe ńamakatʼte ale hõ jiwi raṛecʼle ńamakada. Apeakʼ gagoj ar duk reakʼ katha uni doe lại akatʼlea are baḍae ocoakatʼlea, ape do ạḍipe uihạredeń kana, onate iń do artetʼ rạskạń ạikạukeda. Ińakʼ laha reakʼ ciṭhiteń mon duk ocoakatʼpere hõ iń do bạń kastaokʼkana. Enteń ńelkeda ona ciṭhite thoṛa ghạṛi lạgitʼpe mon duklena ar iń hõ thoṛa doń duklengea, menkhan ńitokʼ doń rạskạkʼ kana. Dukpe ńamletʼte do bạń rạskạkʼ kana, bickom duk iạte kại khon monpe ạcurakatʼteń rạskạkʼ kana. Isorakʼ mone lekatege noa duk dope ńamleda, onate ale hotete apeakʼ jãhãn loksan do baṅ hoeakana. Isor oka duke emokʼ onate do kại khon mon ạcur ruạṛokʼa ar bańcao ńamokʼa, ar dukokʼ reakʼ cetʼge baṅ tahena. Menkhan dhạrti reakʼ duk do manwakoakʼ morone ạguyeda. Hudiskate ńelpe, Isor duke ematʼpe tahẽkanre ape do bape pạclena, ar bin dusạnko mente sạbudokʼ lạgitʼ tinạkʼ jid tahẽkantapea, kạipe hirkhạwatʼ tahẽkana, monre botor tahẽkantapea, tinạkʼpe gagojlena, tinạkʼpe hudisokʼkan tahekana ar kại reakʼ sạjại lạgitʼ tinạkʼpe jidlena. Nonkate joto secʼtegepe sạbudleda je, ape dope bin dusạnko kana mente. Iń do ona ciṭhiń olletʼgea, menkhan okoeye behok ocoakan uni lạgitʼ do bạń olakada, bickom Isor samaṅre ape ṭhen sodorokʼma je, ape do sạrigepe dulạṛetʼlea. Ar noa hotete ale do jiwi raṛecʼle ńamakada. Ona jiwi raṛecʼ sãote Titusakʼ rạskạ ńelte ale hõle rạskạkʼ kana, ente ape sanamko ṭhen khon uni do monre ạḍi suluke ńamakada. Iń doń kusi akana, ente ape iạte uni ṭheniń sarhaolena, ar onate iń do bạń lajao ocolena. Ona bodolte ape ṭheniń lạiletʼ aleakʼ sanamakʼ katha cetʼleka sạri tahẽkan, onkage Titus ṭhen ape iạte aleakʼ sarhaokʼ hõ sạriakʼ mente sạbud akana. Ape sanamko cetʼleka botor ar manot salakʼ unipe ataṅkedete gobolre menakʼpea mentepe udukʼatʼle tahẽkan, ona disạte ape lạgitʼ uniakʼ dulạṛ do arhõ bạ̃ṛtiyentaea. Iń doń kusi akana, ente jotowakʼre ape cetanreń bhorsa daṛeakʼa. E boehako, Makedoniạ reakʼ manḍerkore Isor ṭhen khon oka daya ńamakan ona reaṅle baḍae ocoyetʼpea. Aema duk ar ạḍi okocʼ biḍạu talate ar reṅgecʼko tahẽkanre hõ onkoakʼ monre nunạkʼ rạskạ tahẽkana je, onko do asambheṛgeko danleda. Iń do onko lạgitʼ noa gohań emeda je, onko do daṛeakʼ bhor, hẽ daṛeakʼ khon hõ bạ̃ṛtige apnar kusi lekako danletʼ tahẽkana. Onko do ạḍi jid salakʼ ale ṭhenko nehõrlena jemon Isorren okoeko hoṛ reṅgecʼre menakʼko, onkoakʼ reṅgecʼ meṭaotako reakʼ kạmire jemon seledokʼ reakʼ ạtko ńam. Alele aslen tahẽkan khonakʼ hõ bạ̃ṛtiko danleda; onko do pạhilre Probhu ṭhen apnarko em maṛaṅena ar ona tayom do Isorakʼ sanaleka ale ṭhenko emleda. Noa ńelte ale do bạ̃ṛtikaete Titusle nehõrade tahẽkana, dan reaṅ oka kạmi ale talareye ehopʼletʼ tahẽkan ona jemon uni doe purạugotʼkakʼ. Jotowakʼge, metakʼme biswạs, Isorakʼ katha, akel, jid ar alere cetʼ leka apeakʼ asambheṛ dulạṛ menakʼ onkage jemon dan reakʼ gun hõ sareṛokʼ tape. Noań hukumape kana ona do baṅa, menkhan eṭakʼkoakʼ jid reakʼ katha baḍae ocopeteń biḍạu aṭkaretʼpe kana apeakʼ dulạṛ do tinạkʼgan khạṭi tapea mente. Ape do aboren Probhu Jisu Mạsiakʼ daya dan reakʼ kathape baḍaegea, uni do apnartetʼe kisạ̃ṛgere hõ ape khạtirteye reṅgecʼena, jemon uniakʼ reṅgejokʼ hotete apepe kisạ̃ṛ daṛeakʼ. Ape lạgitʼ okaṭakʼ bhageakʼkan ona reaṅ do ińiń bujhạuetʼkan lekageń baḍae ocoyetʼpea. Ar apege noa dan do calaoen bochor khon uṭhạupe ehopʼleda ar jid salakʼpe kạmileda. Menkhan ńitokʼ do ona kạmi purạutape. Ar oka khaṛa monte kạmi sanaletʼpe inạ khaṛa montege daṛeakʼ bhor purạugotʼkakʼpe. Jãhãeakʼ emokʼ reakʼ sana tahentae khan enḍekhan uni do oka menakʼtae ona lekage Isor uniakʼ dane ataṅtaea, ar oka bạnukʼtae ona do Isor bae khojkana. Eṭakʼko do sukre ar ape do dukrepe tahen ona do bạń khojkana, bickom ińakʼ monejoṅakʼ do okoeakʼ hõ jemon ṭonṭa alo tahentape. Ńitokʼ apeakʼ oka sareṛokʼakʼkan ona hotete onkoakʼ ṭonṭa do cabakʼtakoa, ar onkoakʼ sareṛokʼakʼre apeakʼ ṭonṭa hõ meṭaokʼtapea, nonkate sanamkoakʼ dosa do soman hoyokʼa. Sonot sostorre olakana, “Okoe ḍherko halaṅketʼ onko do baṅ bạ̃ṛtilena, ar okoe thoṛako halaṅketʼ onkoakʼ hõ baṅ komaolena.” Ape lạgitʼ ińakʼ ontorre oka jid menakʼ, Isor do Titusakʼ ontorre hõ ona jidgeye emakatʼte Isoriń sarhaoedekana. Titus do aleakʼ nehõre dohoakada, menkhan ona khon maraṅ katha do noage, uni do acʼakʼ sanaleka ạḍi jidkate ape ṭhene calakʼ kana. Ale do Titus sãote armitʼ boehale kolekana. Jisu Mạsi reaṅ bhage sombat porcar kạmire nui boeha do joto manḍerrenko sarhaoede kana. Niạ manḍerrenko hõ eken uniko sarhao edekana ona do baṅ, ale sãote noa dan idi lạgitʼ hõ manḍerrenko do uniko bachao akadea. Probhu gunmanao joharae ar eṭakʼko goṛowako lạgitʼ khaṛa mon menakʼtaete ale do noa dan idi lạgitʼle goṭa akadea. Noa maraṅ dan hạṭińako babotre okoe hõ jemon ale birudre jãhãnakʼ aloko bodnam daṛeakʼ onate nui boehale kolekana. Ale do eken Probhuakʼ mẽtʼãhã samaṅre do baṅ, menkhan manwa samaṅre hõ dhoromte calakʼ reakʼle kurumuṭuyeda. Ona chaḍa onko tulucʼ aleren armitʼ boeha hõle kolekana. Uni do calakʼ lạgitʼe khaṛagea, ente ạḍi dhaole biḍạu sạbud akadea; ar ape upạrte uniakʼ do ńitokʼ ạḍi pạtiạu hoeakante calakʼe khaṛagea. Titus reaṅ okaṭakʼ memenakʼ menakʼtiń ona do noage, uni do ińren gate kanae ar iń tulucʼ ape lạgitʼe kạmiyeda. Ar eṭakʼ boehako reaṅ oka memenakʼ menakʼtiń ona do noage, manḍerrenko do unkin bachaokateko koletʼkinạ. Nukin boeha hotete Mạsiye ṭhonokokʼma. Onateń mena, onko ṭhen apeakʼ dulạṛ do sodortege sạbud ocoetape ar udukʼakope cedakʼ ale do ape iạtele sarhaokʼkana, jemon manḍerrenko onako ńelńam. Isorren hoṛko lạgitʼ dan emokʼ reakʼ okaṭakʼ kạmi calakʼ kan ona reaṅ olape reakʼ jãhãn jạruṛ do bạnukʼtińạ, ente noa kạmire apeakʼ khaṛa moniń baḍaegea. Iń do ape iạte Makedoniạren hoṛko ṭhen noa menteń sarhaokʼ kana je, Akhaearen hoṛko do dinkalom khon, metakʼme noa dan lạgitʼ sapṛao menakʼpea. Apeakʼ noa khaṛa monge onkoren ḍher hoṛkoe udgạu akatʼkoa. Iń do noko boehakoń koletʼkoa jemon noa babotre ape ńutumte okaṭakʼ sarhaokʼakʼ menakʼtale ona onko ṭhen sạriakʼ mente sạbudokʼ, ar cetʼ lekań menakatʼ onkage jemon ape do sạrige sapṛao akaepe tahen. Ar baṅkhan Makedoniạren hoṛko iń sãoteko senlen khan ar begor sapṛao akanko ńellepe khan, enḍekhan apere aleakʼ nunạkʼ pạtiạu iạte ale do lajaorele paṛaokʼa; ar ape hõpe lajao ocokʼa. Onate noko boehako lahare ape ṭhen calakʼ lạgitʼ nehõrako reakʼ jạruṛiń hudiskeda, jemon okaṭakʼ maraṅ dan emokʼ lạgitʼpe gokʼletʼ tahẽkan ona reakʼ onko do laharegeko sapṛao hataṛkakʼ. Ar ape ṭhen khon jormoṭte jãhãnakʼ do baṅ hataokʼa, bickom dan lekate okape emokʼ onage laha khon sapṛao dohokakʼpe. Noa baḍaekakʼpe, okoe korocʼ moṭocʼkateye er, uni do korocʼ moṭocʼkatege ir hõe ira ar okoe ḍhere er uni do ḍhergeye ira. Mimitʼ hoṛ monre okaṭakʼe goṭa akatʼ onae onkaema; okoe hõ mon dukkate aloe emokʼma, ente kharsala monte emokʼkạnicʼge Isor doe dulạṛea. Isor do joto secʼte dayawape reakʼ daṛe menakʼtaea, jemon apeakʼ oka jạruṛ ona do jaoge tahentape; ar onate jemon joto lekan bhage kạmi lạgitʼ khulạsatepe dan daṛeakʼ. Sonot sostorre olakana, chiṭiạukedae, reṅgecʼ orecʼkoe ematʼkoa; ar uniakʼ dhorom do jaejug hạbicʼ tahenkana. Cacasicʼ lạgitʼ itạ ar jom lạgitʼ piṭhạ okoeye kulạu julạuetʼ, uni do erokʼ lạgitʼ itạ hõe kulạuapea are baḍhao ocoetapea; ar apeakʼ dhorom reakʼ phosole borket ocoetapea. Ape do joto secʼtegepe kisạ̃ṛokʼa jemon soṛa montepe dan daṛeakʼ, ar onatege ale hotete Isor do gunmanao johare em ocokʼa. Apeakʼ noa kạmi iạte eken Isorren hoṛkoakʼ ṭonṭa purunokʼtakoa ona do baṅ; Isor secʼ ạḍi utạr hoṛakʼ gunmanao johar hõ sareṛokʼa. Ar apeakʼ noa dangeye sạbudetʼ kana je, ape do biswạsiko kanape mente, ar ona ńelte onko do Isorko sarhaoea, ente ape do Mạsi reaṅ bhage sombatrepe pạtiạu akante uni gobolrenpe hoeakana ar soṛa monte onko ar eṭakʼko jotope dan akatʼkoa. Isor ṭhen khon okaṭakʼ asambheṛ dayape ńamakatʼ ona ńutumte onko do goṭa ontorteko koeapea. Ar oka dan reakʼ katha baṅ lạiyạgokʼ ona dan ńutumte Isorakʼ sarhao hoyokʼtaema. Mạsiakʼ mạ̃hir ar daya reakʼ katha disại tulucʼ iń Pạul do apeń nehõrape kana. Hoṛko mena, ape ṭhen tinreń tahen unre doń nindhạnokʼ kana, menkhan tinre bạń tahen unre do dilanicʼ iń hoyokʼ kana. Jel lekatele coloneda mente okoeko hudisetʼkan, onko birudre tinạkʼ dil udukʼ jạruṛ, ińiń hecʼlenre unạkʼ dil jemon udukʼ baṅ lagaoạń. Abo do jel ar mãyãmren hoṛ kanrehõ bon okaṭakʼ lạṛhại bon lạṛhạikan ona do jel ar mãyãm reakʼ do baṅkana. Jel ar mãyãm reakʼ gobolte manwa do okako khanḍa bhanḍawanteko lạṛhạikan onate ale do bale lạṛhại kana, menkhan Isorakʼ daṛete aleakʼ khanḍa bhanḍa ar kajak gaṛko hõ dhaṅ dhaserokʼa. Ale do manwawakʼ eṛeakʼle nosṭoyeda ar Isor baḍaeye horre tạkicʼakʼ leka oka hudis bundisko usulokʼe menjoṅ onale dhaṅ dhasereda; ar mon reakʼ mimitʼ hudis bundisko Mạsi ṭhenle gobol ocoyeda. Ape do tinre purạtepe gobolokʼa unre okoe bin gobolreko tahen onko sạjạiko lạgitʼle sapṛao tearokʼa. Ape do bahre reakʼ muṭhạngepe ńeleda. Ar jãhãege apnar do Mạsiren kanae menteye pạtiạukʼ khan, enḍekhan noa hõe hudisma, uni cetʼlekae Mạsirenkan onakage ale hõ Mạsiren kanale. Probhu okaṭakʼ ạidạriye emakatʼle ona ạidạri reakʼ monsubạ do hoyokʼ kana apeko benao rakapʼpe, menkhan lokshanpe lạgitʼ do baṅ. Ente noa ạidạri iạte thoṛań sarhaokʼre hõ ona lạgitʼ do bạń lajaokʼ ocokʼa. Ińakʼ noa katha iạte alope hudisa, ciṭhiteń botor ocoyetʼpea. Adom adom hoṛko meneda, “Uniakʼ ciṭhiko do monre gaḍaokʼ leka keṭecʼ ar jor anakʼ kana,, menkhan sorreye tahẽlen khan doe nijorgea ar uniakʼ roṛ do cetat reakʼ hõ baṅkana.” Ar onkan hoṛ doe bujhạuma, hạjir bạnukʼlere hõ aleakʼ ciṭhite oka kathale roṛetʼkan, onkage hạjirlenre hõle roṛa. Ape modren adomko do apnarko sarhaokʼ kana. Onko dolre apnar lekha midokʼ se onko tulucʼ jurikʼ do bale dileda. Onko doko bebujgea, ente apnarte oka bhageko hudisetʼ ona tulucʼgeko jurikʼ kana arko bicạrokʼ kana. Menkhan tinạkʼ sarhaokʼ lek kan ona bahre ale do bale sarhaokʼ kana, bickom Isor aleakʼ kạmi lạgitʼ okaṭakʼ simại ṭhik dohoakatʼ ona khongele sarhaokʼ kana; ar ape hõ ona simạ bhitrirege menakʼpea. Onate apeakʼ katha iạtele sarhaokʼre simạ bahre cetʼ hõ bale roṛeda. Ar ape ṭhen bale senlen khan aleakʼ nonkan sarhaoakʼ do simạ bahre hoekokʼtalea. Menkhan ale do Mạsi reaṅ bhage sombat porcar porcarte ape ṭhen hõle senlena. Ona chaḍa eṭakʼkoakʼ kạmi iạtehõ ale do bale sarhaokʼ kana, arle onka lekhan enḍekhan ona do simạ bahre hoekokʼtalea. Ale do noale asokʼ kana je, apeakʼ biswạs hara idikʼ são sãote ape talare arhõ bạ̃ṛtile kạmi daṛeakʼa. Onate ape ṭhen khon senkate sạṅgiń jaegakore arhõ bhage sombatle porcar daṛeakʼa. Onate okoe hõ bako men daṛeakʼa, ale do eṭakʼ hoṛko kạmi akatʼ ṭhenakʼ iạtele sarhaokʼ kana. Menkhan sostor reakʼ katha leka, “Sarhaokʼicʼ do Probhure baṛeye sarhaokʼma;” ente apnarte sarhaokʼicʼ do okoe hõ bhage mente bae sạbudokʼa, bickom Probhu okoeye sarhaoe unige bhage menteye sạbudokʼa. Ińakʼ kạticʼ talaṅ bebuj baṛe sahaokạtińpe. Hẽ sahao hõpe sahaoetʼkangea. Iń do ape lạgitʼ ińakʼ ontorre Isor reakʼ khạndri ãṭteń ãṭokʼkana, ente iń do eken mitʼ goṭen jãwãe tulucʼ, metakʼme Mạsi tulucʼge apeakʼ bapla reaṅ iń ṭhik dohoakada, jemon niphuṭ kũạ̃ri kuṛi leka uni tireń jimạ daṛeape. Menkhaniń botorokʼ kana, uni biń do acʼakʼ bạṛicʼ phorphundite cetʼleka Hawae bulạulede onkage Mạsire menakʼtape soṛatetʼ ar napaetetʼ khon apehõko bulạu botecʼpe. Ente okoe Jisu reakʼ kathale porcar akatʼ, uni chaḍa jãhãe eṭakʼ Jisuakʼ kathae porcarape se okoe sonot Jiupe ńamakade uni chaḍa eṭakʼ lekan Jiupe ńame, se oka bhage sombatpe ataṅakatʼ ona khon eṭakʼ lekan bhage sombatpe ńametʼkanre ape do ạḍi rạskạ salakʼge onape ataṅetʼ kana. Menkhan ińakʼ bujre onko “Soros utạr” apostolko khon do oka secʼte hõ bạń komaoa. Iń do ạḍi bes okocʼte katha roṛ bạń daṛeakʼre hõ akel do menakʼgetińa ar ona do joto secʼte ar joto lekate ape ṭheniń sodorakada. Isor emakʼ bhage sombat apeko ṭhen begor damteń porcar akatʼte apnariń copotʼ akana jemonpe usul ocokʼ. Noa iạte cetʼ iń doń kại akada? Ape sapʼ sorape lạgitʼ iń do eṭakʼ eṭakʼ manḍer khon goṛoń hatao akada, men daṛekeape luṭ hõń luṭ akada. Ape ṭhen tahẽkateń ṭonṭalenre okoe hõ bhar do bạń ladeatʼpe tahẽkana, ente Makedoniạ khon okoe boehako hecʼlen onkoge ińakʼ ṭonṭawakʼko purunletʼa. Ar okalekate hõ iń do aperen bojha bạń hoyokʼa ar bạń hoeakana. Ińre Mạsiakʼ oka sạriakʼtetʼ menakʼ ona lekateń menkea, Akhaea disạm reakʼ oka jaegare hõ ińakʼ noa sarhao do okoe hõ bako bond daṛeakʼa. Cetʼ iạteń meneda? Ape bạń dulạṛetʼpe iạte? Isor doe baḍaegea, apeń dulạṛetʼpea mente. Okoe apnarko sarhaokʼre ale somanko udugokʼkan onko jemon ona ạt aloko ńam onate okań kạmikan onageń kạmi idiya. Ente onkanko hoṛ do eṛe apostol ar phạsiara kạmiyạko kanako. Ar Mạsiren apostolko mente udugokʼ lạgitʼ onko do apnartetʼko bodolokʼ kana. Noate hahaṛakʼ reakʼ cetʼge bạnukʼa, ente Soetan hõ marsalre do serma goḍet leka udugokʼ lạgitʼ apnartetʼe bodolokʼ kana. Ar Soetanren sapʼ dapʼko hõ apnartetʼ bodolkate dhoromren sapʼdapʼ menteko udugokʼkan khan, enḍekhan hahaṛakʼ reaṅ cetʼ menakʼa? Onko do kạmi mucạtʼre oka kuṛại menakʼtako onageko ńama. Iń do arhõń meneda, okoe hõ bebuj jemon aloko hudisiń. Ar onkagepe bujhạuedeń khan enḍekhan bebuj mentege ataṅińpe, jemon thoṛaganiń sarhao daṛeakʼ. Ńitokʼ okań menetʼkan ona do Probhuakʼ hukum leka do bạń meneda, menkhan apnar reaṅakʼko sarhao iạte bebuj lekań roṛeda. Manwa okaṭakʼteko sarhaokʼ, onate ḍherkogeko sarhaokʼkan khan enḍekhan iń do cedakʼ bạń sarhaokʼa? Ape dope budanko kante bebujkoakʼ kusitepe sahaoetʼtakoa. Ar eken ona do baṅ, jãhãege golame benaolepere, jãhãegeye jom reṅgecʼlepere, jãhãegeye sapʼlepere, jãhãege acʼteye maraṅlenre ar jãhãege mẽtʼãhareye thapalepere, ape do sanamakʼpe sahaoetʼtakoa. Iń do lajaokʼ tulucʼ iń aṅgocetʼ kana, noako babotre ale do ape ṭhen nijorgele tahẽkana. Okaṭakʼte eṭakʼko sarhaokʼko diletʼkan onate iń hõ sarhaokʼ doń diletʼgea; ar noa katha do bebuj lekategeń roṛeda. Okoeko sarhaokʼkan onko do cetʼ Ibri kanako? Iń hõ kangeạń. Onko do cetʼ Israel kanako? Iń hõ kạnạń. Onko do cetʼ Abrahamren bõs kanako? Iń hõ kạnạń. Onko do cetʼ Mạsiren sapʼ dapʼko kanako? Iń do arhõ ḍhertetʼ kạnạń. Disạipe, iń do bạulạha hoṛ lekań roṛeda. Mạsiakʼ sapʼdapʼ kạmire iń do onko khon ḍheriń khaṭao akana, ar ạḍi dhaoiń hajot akana, arhõ ạḍi dhao daleń jomakada, ar ạḍi dhao gujukʼ dạkhilreń paṛaolena. Jihudiko ṭhen mõṛẽ dhao mitʼṭen kom pongel iń cạbuk ocolena, bẽtte pe dhaoiń dal ocolena. Dhirite mitʼ dhaoiń tiń ocolena; ar pe dhao ińakʼ jahaj unumlena. Mitʼ siń mitʼ ńindạ doreão reakʼ athantar dakʼreń tahẽkana. Aema disạmiń dãṛã akada. Ḍubạ dakʼ, ḍạkuko hotete, apnar jạtren hoṛ ar boṅgan hoṛ jạtrenko hotete muhinreń paṛaolena. Ona chaḍa iń do nagrahakore, hahaṅkar jaegare, doreãore ar phạsiạra boehako talarehõ muhinreń paṛaolena. Mạsiakʼ sapʼdapʼ kạmire kosṭoreń paṛaolenre hõ ạḍiń khaṭao akana. Aema ńindạ jagwariń tahẽkana, reṅgecʼ ar tetaṅreń paṛaolena begor jomteń tahẽkana, rabaṅ ar laṅgaṭteń kosṭolena. Noako chaḍa dinạmge sanam manḍerrenkoakʼ dạndi do iń cetanre ladekʼkan tahẽkana. Jãhãeye nijorlenre cetʼ uniakʼ nijortetʼre bạń bhạgiạdarokʼ kana? Jãhãeye kạireye ńurlenre cetʼ iń do jiwi baṅ lokʼkantińạ? Iń do sarhaokʼ jạruṛgetiń khan enḍekhan ińakʼ nijortetʼ iạtegeń sarhaokʼ kana. Isor, Probhu Jisu Mạsiren Baba, okoe do jaejug hạbicʼ ṭhonok ńam lek kane, uniye baḍaea iń do eṛe bạń roṛeda. Damesekre Aretas rajren disạm cakʼlaoicʼ do sabeń lạgitʼ Damesekrenkoakʼ nagraha pahra reakʼe hukumleda. Menkhan pạcrire oka jalna tahẽkan ona bhitrite mitʼṭen khạclạkʼte onko do bahreteko paromgotʼkạdińạ, ar nonkate iń do uniakʼ ti khoniń ńir bańcaolena. Iń do arhõ thoṛań sarhaokʼ kana. Ente jãhãn lab bạnukʼtińre hõ okako dorson Probhui ńel ocoakadiń ar okako iń ṭhene sodorakatʼ ona reaṅ iń do ńitokʼiń lạiya. Mạsire pạtiạuicʼ mitʼ hoṛiń baḍae akadea; uni do gelpon bochor lahare serma hạbicʼe rakapʼ ocolena. Unre uni do acʼakʼ hoṛmoreye tahẽkana se baṅ ona do bạń baḍaea, Isorgeye baḍaea. Ińiń baḍaea, uni hoṛ do Paradesteye rakapʼ ocolena. Uni do nonkanakʼ kathae ańjomleda one oka do lạite baṅ sodorokʼ, ar manwawakʼ hõ lạlại do baṅ ganokʼa. Unre uni do acʼakʼ hoṛmoreye tahẽkana se baṅ, ona do bạń baḍaea; Isorgeye baḍaea. Nonkan hoṛ lạgitʼ doń sarhaokʼa, menkhan iń apnar lạgitʼ do baṅ, eken ińakʼ nijortetʼ reaṅ iń sarhaokʼa. Menkhan ińiń sarhaokʼre bebuj do ohoń hoelena, ente iń do sạriakʼgeń roṛa. Enrehõ bạń sarhaokʼa, ente ińakʼ kạmi ńelte se ińakʼ katha ańjomte hoṛko okalekako bujhạuediń ona khon bạ̃ṛti jemon okoe hõ aloko bujhạuiń. Iń ṭhen ạḍi lekanakʼko sodorakante alo jemoniń usulokʼ, onate kosṭo emạń lạgitʼ ińakʼ hoṛmore mitʼṭen jạnum, metakʼme Soetanren goḍete emadiń tahẽkana. Probhu do pe dhaoiń nehõrade tahẽkana jemon iń ṭhen khon onae sahaṛkakʼ. Menkhan uni doe metadińa, “Ińakʼ dayage am lạgitʼ ḍhera, ente nijorrege ińakʼ daṛe do sodorokʼa.” Onate ińakʼ nijorakʼko reaṅakʼre ạḍi kusikateń sarhaokʼa, jemon Mạsiakʼ daṛe ińre tahen. Onate Mạsi iạte nijorakʼkore, bemanot ocokʼre, kucit ocokʼre, santao ar khed ocokʼre ar joṅjalkore iń doń rạskạkʼ kana, ente tinreń nijorokʼa, unrege daṛeanakʼiń hoyokʼa. Iń do bebujgeń hoeakana, menkhan apegepe jormoṭkedińa; ente apege sarhaoiń reakʼ lek tahẽkantapea. Ar cele hõń baṅkanre hõ enhõ aperen onko “Soros utạr” apostolko khon cetʼte hõ bạń komaoa. Ạḍi sombhuri salakʼ ape talare cinhạko ar hahaṛawakʼko ar daṛe kạmikote apostol kạnạń menteń sạbud akada. Eṭakʼ eṭakʼ manḍerko khon ape do oka secʼte hõ bape huḍińa; eken mitʼṭecʼtepe huḍińgea, ona do noage, aperen bojha bạń hoeakana. Ar noa behok do ikạ kạtińpe baṛe. Iń do ńitokʼ tesar dhao ape ṭhen calakʼ lạgitʼiń sapṛaogea. Ińakʼ bojha do apere bạń ladeapea, ente apeakʼ dhon do bạń khojkana, bickom apegeń khojetʼpea. Gidrạko do go-baba lạgitʼ ṭaka-poesa jarwae reakʼ dạyik kanako ona do baṅ, bickom gidrạko lạgitʼ jarwae do go-baba koakʼge lek kana. Iń do ạḍi kusikatege oka menakʼtiń ona jotowakʼ ape lạgitʼiń khoroca ar apnartetʼ hõń emokʼa. Asambheṛeń dulạṛetʼpe khan cetʼ ape do komgepe dulạṛińạ? Bogegea, aperen bojha do bạń hoeakana, menkhan jãhãeko men botecʼkea, iń do bondhekteń bulạu akatʼpea. Okoe ape ṭheniń kolletʼko onko modren jãhãe hotete cetʼ iń ṭhoka tanakʼ akatʼpea? Iń do Titus calakʼ lạgitʼ iń nehõrade tahẽkana, ar uni sãote uni boeha hõń kolledea. Titus do cetʼ apeye eṛe lipukʼ akatʼpea? Tishõ baṅ. Titus ar iń do mitʼ mon ar mitʼlekage cetʼ bạliń kạmi akada? Cetʼpe hudiseda, noa ciṭhite ale do apnarakʼ kathale roṛeda? Ale do Mạsirele mitʼ akante Isor samaṅrele roṛeda. E dulạṛiạ gateko, ape benao rakapʼpe lạgitʼge noakole roṛeda. Botorokʼ kạnạń, ape ṭheniń hijukʼre ińiń monejoṅ leka hoedaṛeakʼa bạń ńampea ar ape hõ cetʼleka ńeleńpe menjoṅkan onaka do bape ńameńa. Ente botorokʼ kạnạń, reṭha reṭhi, hiskạ, raṅgao, torpha-turphi, okta, cugli, phulạukʼ gulmalge pasecʼ apere ńamokʼ. Iń doń botorokʼ kana, pase ape ṭhen arhõń senlenre ińren Isor do ape samaṅreye lajao ocoyiń, ar okoeko lahateko kạiletʼ tahẽkan onko do pase loṭghuṭi, lucạ lamoṭ bin napaeakʼ khon mon bako ạcurakatʼtako, ar onko ḍherko iạte iń do dukiń ńama. Iń do nõkʼõe tesar dhao ape ṭheniń hijukʼ kana. Sostorre ol menakʼa “Barea se pea goha reakʼ mocate mimitʼ katha do ṭarhaokʼa.” Dosar dhao ape ṭheniń tahẽkanre okoe lahateko kại akatʼ onko ar eṭakʼko joto doń sontor akatʼko tahẽkana. Ar ńitokʼ hạjir bạnuńre hõ arhõń sontoretʼpe kana, iń do arhoń hijukʼre okoe hõ bạń mãyãwakoa, ente Mạsi iń hotete kathae roṛetʼkan ona reakʼ sạbudpe khojkana. Uni do apeakʼ babotre bae nijora, bickom uniakʼ daṛe do apereye udukʼeda. Uni do nijorreye krus ocolena, menkhan Isorakʼ daṛete jiwetʼ menaea. Ale do uni sãote mitʼakantele nijorakana, menkhan ape lạgitʼ Isorakʼ daṛete uni tulucʼ jiwetʼle tahena. Apnarge biḍạu aṭkarokʼpe, Mạsire sạri biswạs menakʼtapea se baṅ. Apnarge biḍạu sạbudokʼpe. Ape do cetʼ bape bujhạueda, Jisu Mạsi do apeakʼ ontorre menaea mente? Ar sạbudokʼre belek mente alope ṭarhaokʼa. Menkhan ińiń asokʼ kana apepe baḍae daṛeakʼa je, belek mente ale do bale biḍạu ṭarhao akana. Ale do Isor ṭhenle koejoṅ kana jemon bạṛicʼakʼ jãhãnakʼ alope kạmi. Eṭakʼko jemon khạṭi menteko bujhạule onate noale khojkana ona do baṅa. Aleakʼ monejoṅakʼ do noage, khạṭi mente bako bujhạulere hõ ape do jemon okaṭakʼ bhageakʼkan onape kạmi. Sạriakʼtetʼ birudre jãhãn ektiạri do bạnukʼtalea menkhan sạriakʼtetʼ lạgitʼ do menakʼtalegea. Ente alele nijorlenre ar ape do jorankope hoelenre unre ale dole rạskạkʼ kana. Arle koejoṅ kana jemon jotowakʼpe sudhrạute sạbit utạrokʼ secʼpe laha idikʼ. Onate ape ṭhen bạnuńre hõ noakoń olapekana, jemon ape ṭheniń senlenre Probhu okaṭakʼ ektiạriye emakawạdiń ona ajhaṭte aloń beohar. Ona ektiạri reakʼ monsubạ do apeko benao rakapʼpe lạgitʼge, dhaṅ-dhaserpe lạgitʼ do baṅa. E boehako, jotowakʼko sudhrạupe ar sạbitokʼpe. Ińakʼ katha luturakʼpe, ar mitʼ monokʼpe, ar sulukte tahenpe. Enḍekhan dulạṛren ar sulukren Isor do ape tulucʼe tahena. Sonot cokʼte jopoharpe. Isorren sanam hoṛ do apeko joharape kana. Aboren Probhu Jisu Mạsiakʼ daya ar Isorakʼ dulạṛ ar sonot Jiu reakʼ helmel ape jotoko tulucʼ baṛe tahenma. Iń Pạul do Mạsiren mitʼṭen apostol kạnạń. Noa apostol hudạ jãhãe manwa ṭhen khon se jãhãe manwa hotete do bạń ńamakada, bickom Jisu Mạsi ar Isor Baba, one okoe do Mạsi gocʼko khone jiwetʼ beretʼkede, uni hotetegeń ńamakada. Iń ar iń soṅgete okoe biswạsi boehako menakʼko, ale sanamkoge Galatiạ manḍerrenko lạgitʼ ciṭhile oleda. Isor Baba ar aboren Probhu Jisu Mạsi do daya ar suluke danape ma. Aboren Isor Babawakʼ sanaleka Mạsi do aboakʼ kạiko iạte apnarakʼ jiwiye emkeda, jemon noa bạṛicʼ piṛhirenko khone rukhiyạ bon. Jaejug hạbicʼ Isorakʼ ṭhonok baṛe hoyokʼma. Amen. Mạsiakʼ dayate okoe do acʼren hoṛ hoyokʼ lạgitʼe hohowatʼpe tahẽkan, uni bạgikate usạra eṭakʼ lekan bhage sombat secʼpe ạwil akan ńelte iń doń hahaṛakʼ kana. Ona do jãhãn bhage sombatge baṅkana. Enrehõ adom hoṛ menakʼkoa one okoe do sulukte bako tahẽ ocoape kan, ar Mạsi reaṅ bhage sombat bodolko monejoṅkan. Menkhan oka bhage sombat apele jạhir akatʼpe ona khon judạ lekan bhage sombat ape ṭhen porcarlen khan, ona do alele jạhirape se jãhãe serma goḍetgeye jạhirape, enḍekhan unire sarap paṛaokʼma. Iń do cetʼleka pạhilteń roṛakatʼ onkage ńitokʼ hõń roṛeda, ape oka bhage sombatpe ataṅakatʼ ona khon jãhãe judạ lekan bhage sombate porcar enḍekhan unire sarap paṛaokʼma. Noate iń do okoeakʼ sarhao ńamjoṅ iń kurumuṭuyeda, manwa se Isorakʼ? Se manwa kusi ocoye reakʼ iń kurumuṭu kana? Ar ńit hạbicʼ manwa kusi ocoko lạgitʼ iń kurumuṭuyetʼ khan enḍekhan Mạsiren golam doń baṅkana. E boehako, baḍae ocoyetʼpe kạnạń, oka bhage sombat iń jạhirakawatʼpe ona do jãhãe manwa hotete benaoakʼ katha do baṅkana. Jãhãe hoṛ ṭhen khon ona do bạń ńamakada se okoe hõ ona do bako cetʼ akawadińa, bickom Jisu Mạsi acʼtetʼge iń ṭhene sodorakada. Jihudi dhoromreń tahẽkanre cetʼ lekan jioniń khemaoetʼ tahẽkan ona dope ańjomakatʼgea. Ar noa hõpe ańjomakada, Isorakʼ manḍerrenko tinạkʼ bebạṛicʼ iń khedetʼkokan tahẽkana ar maraoko lạgitʼ iń kurumuṭuyetʼ tahẽkana mente. Iń umerren aema Jihudiko khon hõ ona dhoromre iń do ạḍitetʼiń laha idilena. Ona chaḍa ińren hapṛamko ṭhen khon okako ạri-cạli hecʼ ạguakan ona reaṅ hõ ạḍi jidiń tahẽkana. Menkhan Isor do janam khongeye bachao doho akadiń tahẽkana ar uniakʼ dayatege apostol hoyokʼ lạgitʼe hohoakadińạ. Jemon boṅgan hoṛ jạtrenko ṭhen Mạsi reaṅ bhage sombatiń porcar, onate Isor do acʼakʼ monejoṅ leka acʼren Hopon iń ṭhene sodorkedere okoe tulucʼ hõ bạń solhawana. Okoe iń lahate apostolko hoelen iń do Jerusalemre onko ṭhen hõ bạń senlena. Unre iń do Arob disạmteń senakan tahẽkana ar tayomte arhõ Damesek nagrahateń ruạṛ hecʼena. Ado pe bochor tayom pạhil dhao Patras sãote ńapamokʼ lạgitʼ Jerusalemteń senlena, ar uni tulucʼ onḍe gel mõṛẽ din iń tahẽkana. Unre Probhuren boeha Jakob chaḍa eṭakʼ jãhãe apostolko sãote ińakʼ ńapam do baṅ hoelena. Isorge goha do, ape ṭhen okakoń oletʼkan ona reaṅ okaṭakʼ hõ eṛeakʼ do baṅkana. Ona tayom iń do Suriạ ar Kilkiliạ reakʼ eṭakʼ eṭakʼ ṭoṭhakoteń senlena. Jihudi reakʼ Isại manḍerrenko ṭhen iń do oprom bạń tahẽkana. Onko do eken niạ kathako ańjomleda baṅma, “Okoe hoṛ aboe santaoetʼ bon tahẽkan uni do ńitokʼ Mạsire biswạsokʼ reakʼ kathae porcareda, menkhan lahate uni do marao lạgitʼe kurumuṭuleda.” Ar iń iạte onko do Isorko mạhimawadea. Gelpon bochor tayom iń do Barnabas sãote arhõ Jerusalemteń calaoena, ar Titus hõń soṅge torakedea. Isorakʼ monejoṅakʼ sodoren khan iń do onḍeń rakapʼ calaoena. Ar oka bhage sombat boṅgan hoṛ jạtrenko ṭheniń porcaretʼ tahẽkan onań lạiatʼkoa. Manḍerren manotan hoṛko do oko okote ona jotoń lạiatʼkoa, enteń botorokʼkan tahẽkana, hoedaṛeakʼa iń do ạuṛiakʼ iń khaṭao akana. Menkhan boṅgan jạtren hoṛkanre hõe iń soṅgetenicʼ Titus do khatnakʼ lạgitʼ bae jormoṭ ocolena. Adom eṛe boehako oko okoteko bololente katha do rakapʼlena. Jisu Mạsire biswạsiko lekate aboakʼ oka sạdhintetʼ menakʼ ona sạdhintetʼ reakʼ dosko sapʼ lạgitʼ onko do oko okoteko bololena jemon golamko benao daṛeabon. Menkhan bhage sombat reakʼ sạriạkʼtetʼ jemon ape lạgitʼle rukhiyạ daṛeakʼ onate mitʼ ghạṛi lạgitʼ hõ onkoakʼ katha do bale manaoleda. Manḍerren manotanko bikạukʼkan hoṛko do bhage sombat reaṅ nawanakʼ cetʼge bako baḍae ocoakadińạ. Menkhan onko do jãhãekangeko onate ińakʼ do cetʼge baṅ cekakʼtińạ. Isor do hoṛakʼ mẽtʼãhã ńelte bae bicạra. Bickom onkoko ńelkeda, Jihudiko ṭhen bhage sombat porcar reakʼ bhar cetʼleka Patras cetanre emlen, onkage Isor do boṅgan hoṛ jạtrenko ṭhen bhage sombat porcar reakʼ bhar ińreye emakada. Ente Jihudiko ṭhen apostolokʼ lạgitʼ Patrase daṛe ocokedeicʼ do boṅgan hoṛ jạtrenko lạgitʼ iń hõe daṛe ocokedińa. Onko manotan hoṛ, metakʼme Jakob, Kephas ar Johan do noako ńelteko bujhạu daṛeatʼ tahẽkana, Isor ṭhen khon dayań ńamakada mente. Onko ar ạliń talare oka helmel menakʼ ona udug lạgitʼ onko do Barnabas ar iń tulucʼ jojomtiko milạukeda. Arko rạjiyena, ạliń do boṅgan hoṛ jạtrenko ṭhenliń calakʼa ar onko do Jihudiko ṭhenge. Onkoakʼ mitʼṭen nehõr tahẽkana, ạliń do jemon reṅgecʼ orecʼkoliń disạko; ar ińakʼ hõ ona lạgitʼ ạḍi khaṛa mon tahẽkana. Patras do Siriạ Prodes reakʼ Antiokiạteye hecʼen khan, samaṅregeń roṛ daramkedea, ente uni doe behok akatʼ tahẽkana. Jihudikoren biswạsi okoeko dol do be Jihudiko khatna ocoko cetanre jorko emetʼ tahekan, onkoren adom hoṛko Jakob ṭhen khon ạuriko hijukʼre Patras do be-Jihudiko tulucʼe jom-ńuiyetʼ tahẽkana. Menkhan tinre onko dolren hoṛko hecʼena unre uni do onko botorte be-Jihudiko sãote gatekʼe bạgiketʼte apnar do onko khone begarena. Antiokiạren eṭakʼ biswạsi Jihudiko hõ Patras sãoteko phạsiara seletʼlena. Ar Barnabas sudhạ onkoakʼ phạsiaratetʼreye goḍoe torayena. Menkhan iń do, bhage sombat reakʼ sạriakʼtetʼ tulucʼ onkoakʼ kạmi reakʼ jãhãn jurige bạń ńelletʼre sanamko samaṅre Kephas iń metadea, “Am do Jihudi hoekate boṅgan hoṛ jạtrenko lekam colonetʼkan khan cekate boṅgan hoṛ jạtrenko do Jihudiko leka colon lạgitʼem ajhãṭetʼkoa? “Abo do jonomte Jihudi kana bon, ar boṅgan jạtren kạkạiko do bon baṅkana. Menkhan enhõ noa bon baḍaegea, Isor do manwa ạn-ạriko manaote dhorom mente bae aṅgocea, bickom Jisu Mạsire pạtiạukʼ hotetegeye aṅgocea. Onate abo hõ Mạsire bon pạtiạu akana, jemon ạn-ạriko manaote do baṅ bickom Jisu Mạsire pạtiạukʼte dhorom mente bon aṅgocokʼ kana; ente ạn-ạriko manaote okoe hõ dhorom mente ohoko aṅgoclena. “Mạsi hotete dhorom mente Isor ṭhen aṅgocokʼ lek hoyokʼ lạgitʼ bon kurumuṭuyetʼ khan, boṅgan hoṛ jạtrenko leka kạiyanko kana bon, enḍekhan cetʼ Mạsi do kạiren sapʼ dapʼicʼ kanae? Tishõ baṅa. Ente okakoń rạputʼ giḍiakatʼ onage arhõń benao ruạr khan enḍekhan iń do apnartetʼge dusi menteń sạbudokʼ kana. Ạn-ạriko hotete iń do ạn secʼteń gocʼena jemon Isor lạgitʼ jiwetʼ iń tahẽ daṛeakʼ. Iń do Mạsi tulucʼ iń krus ocoakana. Onate jiwetʼ do bạnuńa, menkhan Mạsige ińre jiwetʼ menaea. Ar okaṭakʼ hoṛmote jioniń khemaokan ona do Isorren Hoponre pạtiạu hotetegeń khemaoeda. Uni do ińe dulạṛkedeńte acʼ apnartetʼe emena. Isorakʼ noa daya do bạń ạuṛiakʼ ocoa, ente ạn-ạri manaote manwa do Isor ṭhen dhorome hoyokʼ khan enḍekhan Mạsi do ạuṛiakʼgeye gocʼlena.” E bebuj Galatiko, okoeye ahaketʼpea? Ape ma coṅ pusṭạutegeń porcar akatʼpe, Jisu Mạsi doe krus ocolena mente. Iń do eken ape ṭhen khon baḍae sanań kana, ạn-ạriko manaote cetʼ sonot Jiupe ńamledea, se bhage sombatre pạtiạu iạtepe ńamledea? Ape do cetʼ nunạkʼgepe bebujgea? Sonot Jiu hotete nawa jion ehopʼkate ńitokʼ do cetʼ apnarakʼ kurumuṭute sạbit utạrokʼpe ńamjoṅkana? Ape do cetʼ ạuṛiakʼge dukpe jomleda? Asiń dohoyeda apeakʼ duk jom do baṅ ạuṛiakʼ akantapea. Isor do sonot Jiu cedakʼe emakatʼpea ar ape talare nunạkʼ hahaṛawakʼkoe kạmiyeda ona baṛe hudispe. Uni do cetʼ ạn-ạrikope manaoetʼkante noakoe kạmi kana, se bhage sombatrepe pạtiạu akanteye onkayeda? Abraham disạyepe. Sonot sostorre olakana, “Abraham do Isorakʼ kathareye pạtiạuena ar Isor do dhorom menteye ataṅkedea.” Onate noa katha baḍaejoṅpe, okoe Isorreko pạtiạukʼkan eken onko kangeako Abrahamren hoponko do. Sonot sostorre laharege olakan tahẽkana, biswạs iạtege Isor do boṅgan hoṛ jạtrenko dhorom menteye aṅgockoa. Abraham do noa kathage bhage sombat menteye baḍae ocolen tahẽkana, “Am hotetege sanam jạtrenko do bhorko ńama.” Onkate ńelokʼ kana, Abraham do Isorreye pạtiạuente cetʼleka bhore ńamletʼ onkage uni tayom khon okoe do Isorreko pạtiạukʼkan onko hõ inạ bhorgeko ńameda. Sonot sostorre olakana, “Sarapanicʼ kanae uni do, one okoe ạn-ạri reakʼ mimitʼ hukumko leka bae senokʼkan.” Enḍekhan ńelokʼ kana, ạn-ạrire bhorsakʼkan sanamkorege noa sarap do menakʼa. Ona chaḍa noa hõ pusṭạugea je, ạn-ạri manaote Isor do okoe hõ dhorom mente bae ataṅkoa, ente sonot sostor reakʼ katha leka, “Okoe dhorom menteye ataṅ ocoakan uni do biswạs hotetege jione ńama.” Ente pạtiạu tulucʼ ạn-ạri reakʼ jãhãn jopoṛao do bạnukʼ anaṅ. Ạn-ạri doe meneda, “Okoe hoṛ ạn-ạrikoe manaoetʼkan uni do ona hotetege jiwetʼe tahena.” Ar ạn bon bebataoetʼte okako sarap abore tahẽkan, ona do Mạsi acʼgeye ladeyana are chaḍaoketʼ bona. Sonot sostorre noa olakana, “Darere aka ocoakanicʼ mitʼke mitʼ hoṛ doe sarapanicʼ kana.” Isor do Abraham oka bhore emade tahẽkan ona bhorge Jisu Mạsi hotete boṅgan hoṛ jạtrenko hõko ńam daṛeakʼa, ar abo hõ jemon biswạs hotete gokʼ akawatʼbon sonot Jiubon ńam daṛeae, onate Mạsi do ona sarap acʼreye ladeana. E boehako, iń do ạdi alga kathate noa reaṅ iń bujhạuape kana. Mitʼ dhao manwa talare jãhãnakʼ bondobos doholenre ona bondobos do okoe hõ bako bạtil daṛeakʼa se ona tulucʼ jãhãnakʼ hõ bako juṭucʼ daṛeakʼa. Abraham ar uniren bõsko ṭhen Isor doe gokʼleda. Sonot sostor do bae menakada, “Bõsko ṭhen,” Metakʼme ạḍi utạr bõsko ṭhen, bickome menakada, “Amren bõsko ṭhen” Metakʼme mitʼṭen bõs ṭhen, ar uni bõsren Hopon doe hoyokʼ kana Mạsige. Ińakʼ katha reakʼ mane do noage, Isor do Abraham oktere mitʼṭen kajak bondobose dohoakatʼ tahẽkana. Ar pon sae pe gel bochor tayom ạn-ạrikoe emena, ar onate laha reakʼ bondobos do baṅ bạtil lena; menkhan uniakʼ gokʼakʼ do bahal tahẽyena. Isorakʼ bhor ńamokʼ do ạn-ạrikore ṭehãḍokʼkan khan enḍekhan gokʼakʼre ona do baṅ ṭehãḍokʼ kana. Menkhan Isor do dayate mitʼṭecʼ gokʼakʼ hotete Abrahame bhorade tahẽkana. Enḍekhan cetʼ lạgitʼ ạn do? Ona do manwae kạiyetʼkante Isorakʼ gokʼakʼ tulucʼ ạne em juṭucʼena. Ar okoe reaṅe gokʼ dohoakatʼ tahẽkan uni Abrahamren bõs ạuriye hijukʼ hạbicʼ bahal tahen lạgitʼge ạn-ạriko do emlena. Serma goḍetko hotete mitʼṭen dene banarrenicʼ hotete noa ạn do bahal tahẽkana. Menkhan eken mitʼ hoṛe tahẽlen khan dene banarrenicʼakʼ jạruṛ do bạnukʼa; ar Isor doe mitʼgoṭengea. Enḍekhan ạn do cetʼ Isorakʼ gokʼakʼko birud reakʼ kana? Khạṭige baṅa. Isor do jiwetʼ daṛe oco reakʼ mitʼṭen ạne emlen khan enḍekhan khạṭige manwa do dhorom menteye bikạu ocokokʼa. Menkhan sonot sostor do sanamkoge kại iạte dusi menteye ṭarhao akatʼkoa, jemon Jisu Mạsire pạtiạukʼko do akoakʼ ona biswạs hotete gokʼ akawatʼko reakʼ bhorko ńam daṛeakʼa. Biswạs ạuri hijukʼre abo do ạn-ạrite bon esetʼ ạcur akan tahẽkana ar biswạsiko mente ạuri bon sodorokʼ hạbicʼ bon bond esetʼ ocoakan tahẽkana. Enḍekhan ńelokʼkana, Mạsi ṭhen seṭerokʼ lạgitʼ noa ạnge aboren ạyuricʼ do, jemon pạtiạu hotete dhorom mente bon ṭarhao ocokʼ. Menkhan ńitokʼ do pạtiạu hecʼakante ạn-ạri gobolre ar bạnukʼ bona. Mạsi Jisure biswạs hotete ape jotoge Isorren hoponkope hoeakana. Ente tinạkʼ hoṛ Mạsirepe bạptis akan, ape do kicricʼ leka Mạsipe horokʼ akawana. Jihudi ar boṅgan hoṛ jạtrenko talare, golam ar sạdhin hoṛko talare, maejiu ar herel talare jãhãn begar do bạnukʼa, ente Mạsi Jisu tulucʼpe joṛao mitʼ akante jotoko Mạsirepe mitʼgea. Mạsirenpe hoeakante Abraham bõsren hoponko hõpe hoeakana. Isor do Abraham oka emae reakʼe gokʼade tahẽkan ape hõ ona sanamakʼren ạidạrikope hoeakana. Ińakʼ katha reakʼ mane do noage, apatakʼ jotowakʼre hoponakʼ ạidạri menakʼtaere hõ tinạkʼ din gidrại tahen unạkʼ din uni ar golam talare jãhãn begar do bạnukʼa. Apattetʼ oka okteye niṭae un hạbicʼ uni do calaoko ar lonbonko tabere tahen hoyokʼtaea. Onka leka gidrạ bon tahẽkanre abo hõ dhạrti reakʼ ạḍi lekan ạri-cạliren golam bon tahẽkana. Menkhan oktetetʼ purạuen khan Isor do acʼren Hopone kolkedea. Uni Hopon do maejiuakʼ kukhireye janamena ar ạn gobolreye harayena. Jemon ạn gobolre tahenkan hoṛkoe kiriń chaḍaoko, ar Isorren hoponko menteye ataṅ bon. Ape dope hoponko kante Isor do acʼren Hoponren Jiu aboakʼ ontorreye kolkedea. Ar uni Jiu Isor do Abba, metakʼme Baba menteye hohoae kana. Onate ar golam dope baṅkana, menkhan hoponko kanape. Ar hoponkope hoeakan khan enḍekhan Isor oka emokʼ lạgitʼe gokʼakawatʼpe onaren ạidạriko kanape. Pạhilre Isor bape baḍae akade tahẽkanre okoepe sewawako kan tahẽkan onko do cele debgeko baṅkana. Menkhan ńitokʼ do Isorpe baḍae akadea; ar hẽ, Isorge apeye baḍaeketʼpea. Enḍekhan cekate arhõ dhạrti reakʼ ạḍi lekan nijor ar ạuṛiakʼ ạri-cạli secʼpe ạcur ruạṛokʼ kana? Ape do cetʼ arhõ onkoren golam hoyokʼpe menjoṅ kana? Ape ma dinko, candoko, ar bochorkope manaoetʼkan. Ape lạgitʼ noageń botorokʼ kana je, iń do ạuṛiakʼge ape lạgitʼ iń khaṭao akan coṅ cetʼ coṅ. E boehako, nehõrape kạnạń, iń leka baṛe hoyokʼpe, ente ińhõ ape lekań hoeakana. Ape do ińre jãhãnakʼ bape behok akada. Baḍaegeape, hoṛmo reakʼ nijor salakʼ pạhil dhao bhage sombatiń jạhiratʼpe tahẽkana. Ińakʼ ruạ iạtepe duklenre hõ bape hirkhạwạdiń tahẽkana, bickom Isorren goḍet se Jisu Mạsi cetʼlekape ataṅ akade onkage iń hõpe ataṅ sãohãledińa. Menkhan ńitokʼ apnarte bhạgankope ńumugokʼ reakʼ do okortape? Ape reaṅ noa gohań em daṛeakʼa je, hoedaṛeakʼ khan ape do unre apeakʼ mẽtʼ sudhạ hoṭor totʼkatepe emkińạ honaṅ. Ar ńitokʼ do cetʼ sạri katha roṛte aperen bạiriń hoeakana? Onko eṭakʼ hoṛ do ape lạgitʼko ãṭokʼkana, menkhan bhage monsubạ iạte do baṅ. Onko do iń khon ạcur ruạṛpeko khojkana, jemon onko lạgitʼpe ãṭokʼ. Tobe bhageakʼ lạgitʼ ãṭokʼ do bogegea. Eken ape talare hạjiriń tahenre do baṅ, menkhan jaoge ãṭokʼ do bogegea. E ińren gidrạko, Mạsi apere ạuriye muṭhạnokʼ hạbicʼ ape iạte arhõ bedonteń sasetokʼ kana. Ińakʼ monejoṅakʼ do noage, niạ ciṭhi olape bodolte ńitge ape talareń hạjirokʼte ape tulucʼ iń galmaraoa, ente ape reaṅ do bạń bujhạu daṛeakʼ kana cetʼiń cekaea mente. Ape okoe do ạn-tạrire tahen sanayetʼpe, mase lạiyạńpe, ạn-ạri okae menetʼ ona do cetʼ bape ańjom ńameda? Sostorre olakana Abrahamren do barea hoponkin tahẽkantaea, unkin modre mitʼṭenren eṅgatetʼ do kạ̃ṛmĩ erae tahẽkana ar eṭagicʼren eṅgatetʼ do Abrahamren sạdhin erageye tahẽkana. Uni kạ̃ṛmĩ era khonicʼ do jel lekateye janamena, menkhan sạdhin era khonicʼ do Isorakʼ gokʼakʼ hotetegeye janamlena. Iń do phenkote noakoń roṛeda. Nukin maejiu do barea bondobos kanakin. Mitʼṭen bondobos do sinại buru khone hecʼakana ar acʼ gobolren manwa do golam hoyokʼ lạgitʼe idiyetʼkoa. Ar uni kạ̃ṛmĩ era doe hoyokʼ kana Hagar. Hagar do Arob disạm reakʼ sinại buruye bujhạu ocoyeda. Hagar do nahakʼ reakʼ Jerusalem tulucʼ jurikʼkana, ente Jerusalem do acʼren gidrạko sãote kạ̃ṛmĩye khaṭaokʼ kana. Menkhan okaṭakʼ Jerusalem do serma reakʼ kan, uni doe sạdhingea; ar unige aboren gogo do. Sonot sostorre olakana, “Hulạsokʼme E bạńjhi maejiu, one tisge gidrạ bam janamakatʼko, ar tisge haso baṅ rakapʼ akatʼme, am do, sereń joṅme ar rạskạte andoṛme; ente herel menaetaicʼ khon bạgi giḍiyicʼren gidrạgeko saṅgegea.” E boehako, ape do Isahak lekage Isorakʼ gokʼakʼren hoponko kanape. Menkhan ona jokhecʼ jel lekate janamicʼ do sonot Jiu reakʼ daṛete janamlenicʼ upạrteye santaokan tahẽkana. Ar nahakʼ hõ onkage hoyokʼ kana. Menkhan sonot sostorre cetʼe meneda? Sonot sostorreye meneda, kạ̃ṛmĩ era ar uniren hopon do jemonkin laga oḍok ocokʼ; ente kạ̃ṛmĩ eraren hopon do oka lekate hõ sạdhin eraren hopon tulucʼ baṅgeye ạidạri joṅa. E boehako, enḍekhan ńelokʼ kana abo do kạ̃ṛmĩ eraren hoponko do bon baṅkana, menkhan sạdhin eraren gidrạko kana bon. Mạsi do aboe sạdhinketʼ bona jemon sạdhin bon tahẽ daṛeakʼ. Onate teṅgo keṭecʼ akan tahenpe, jemon okoe hõ golam ar aloko benao daṛeape. Ńelpe, iń Pạul do apeń metapekana, apepe khatnakʼ kan khan enḍekhan Mạsire jãhãn kuṛại do bạnukʼtapea. Sanamko ṭhen arhõ noa gohań emeda, okoeye khatnakʼkan uni do sanam lekan ạn-ạriko purạu reakʼ dae paṛaoaea. Ạn-ạriko pańjaete okoe do Isor ṭhen dhorom ocokʼpe menjoṅkan ape do Mạsi khonpe getʼ begar akana, ar Isorakʼ daya khonpe ocokʼ akana. Ente abo do Jiu hotete biswạste dhorom reakʼ asokʼakʼ bon ńel horeda; ente okoe doko Jisu Mạsirenkan, onko ṭhen khatna ar bin khatna reakʼ do cetʼ porhoge bạnukʼa, bickom oka biswạs do dulạṛ talateye kạmiyetʼkan ona biswạsge asolakʼ kana. Ape ma besge coṅpe dạṛetʼ tahẽkan; enḍekhan sạriakʼre gobolokʼ lạgitʼ do okoeye tạkicʼketʼpea? Okaṭakʼpe manao akatʼ, ar okoeye hohoakatʼpe uni Isor ṭhen khon ona do baṅ hecʼakana. Kạṭicʼ talaṅ khạmi do sipiyakʼ joto holoṅgeye phulạu ocoea. Ape reaṅ Probhure noa pạtiạu menakʼtińạ, ape do okaṭakʼ reakʼ hõ bape eṭakʼ monokʼa. Menkhan okoeye ạulạuetʼpe, uni doe jãhãe kange, uni do acʼakʼ kuṛạiye ńamgea. E boehako, ńitokʼ hõ khatnakʼ reakʼ iń porcaretʼ khan, enḍekhan cedakʼ ńitokʼ hõń santao ocokʼkana? Krus cetanre Mạsiakʼ gujukʼ reakʼ tạkicʼakʼ ma coṅ maraoen. Okoe apeko ạulạuetʼpe, onkore ińakʼ monejoṅ do noage, onko do apnarge jemonko getʼ begarokʼ. E boehako, sạdhin ocokʼ lạgitʼge Isor doe hohoakatʼpea. Menkhan apeakʼ jel reakʼ sana purạu lạgitʼ noa sạdhintetʼ do alope laṛcaṛa. Ona khon bickom dulạṛte mitʼ hoṛ eṭakʼ hoṛe sapʼ soraema, ente sanam ạn-ạriko do niạ mitʼ katharege guṭmitʼ akana, “Am aḍepaseren hoṛ apnar leka dulạṛem.” Menkhan ape apepe jhogṛakʼ arpe hipiskạ khan men sontorokʼpe! Arpe nonkae khan ape do apetegepe maraokʼa. Ińakʼ mone joṅ do noage, ape do sonot Jiu lekate colonpe. Arpe onkale khan jel reakʼ sana do bape purạutapea. Jel reakʼ sana do sonot Jiu birud ar sonot Jiu reakʼ sana do jel birudgeye khoja. Jel reakʼ sana ar sonot Jiu do ạkin birudrekin meneda ape okape monejoṅkan ona do alope kạmiya. Sonot Jiu hotetepe ạyur ocokʼkan khan enḍekhan ạn-tạriren dope baṅkana. Jel reakʼ kạmiko do pusṭạutege ńel ńamokʼ kana. Onako do hoyokʼ kana, laṭghaṭ, bin napae, lucạ lamoṭ, boṅga sewa, jạdu biddạ, bene bạiri, kạphạriạu mẽtʼ jolokʼ, raṅgao, torpha turphi, bhinạ bhini, dola duli, hiskạ, ńu bulokʼ, rij roṅ, arhõ onkanakʼko. Iń do cetʼ leka noa lahareń sontorletʼpe ńitokʼ hõ onkageń metapekana, ar nonka kạmikanko do Isorakʼ raj baṅgeko ạidạri joṅa. Menkhan sonot Jiu reakʼ jo do, dulạṛ, rạskạ, suluk, sobori, susṭob, bhạlại, pạtiạr, mạ̃hir ar sambṛaokʼ. Ar nonkanakʼko birudre ạn do bạnukʼ anaṅ. Okoe doko Jisu Mạsiren kan, onko do akoakʼ jel reakʼ sanako krus akatʼtakoa. Abo do sonot Jiu hotete jiwetʼ menakʼ bon khan enḍekhan dela, sonot Jiu leka bon taṛamma. Michạ man ńam baṛako leka do alo bon hoyokʼma, ar alo bon ạṛis ocokoma ar alo bon hipiskạma. E boehako, ape modre jãhãe hoṛ jãhãn dosreye paṛaolenre, enḍekhan okoe sonot Jiu tabere menakʼpe ape do onkanicʼ jut ruạṛepe. Menkhan dulạṛ monte noa kạmipe ar apnartetʼ sontor tahenpe jemon ape hõ kạire alope ńurokʼ. Bhạriạ gokʼ gopoṛope, ar nonkate ape do Mạsiakʼ ạnkope purạu daṛeakʼa. Jãhãe jãhãnicʼe baṅkanre hõ apnartetʼ jãhãnicʼ menteye hudisokʼkan khan uni do apnartegeye bulạukʼ kana. Mimitʼ hoṛ do akoakʼ kạmiko biḍạuma. Enḍekhan eṭakʼko sãote apnar aloko jurikʼma bickom acʼakʼ kạmi iạteye sarhaokʼma. Ente mimitʼ hoṛ do apan ạpin bojha gogokʼ hoyokʼ takoa. Okoe Isorakʼ kathae cetʼ ocokʼkan uni do acʼren cecetʼicʼ do acʼakʼ sanam bhageakʼ reakʼe hạṭińae. Ape do alope bulạukʼa, Isor do ohoe siṛog ocolena; ente okoe okaṭakʼe era; uni do inạgeye ira. Okoe acʼakʼ jel lạgitʼe era; uni do jel khonakʼ maraoakʼgeye irạ. Menkhan sonot Jiu lạgitʼe er khan uni do jaejug jiongeye ira. Bhageakʼ kạmi kạmite alo bon mokońokʼma, ente babon loraolen khan okte nạpitre phosol bon ńama. Ạt bon ńamle khan sanamko lạgitʼ bhageakʼ bon kạmima, bạ̃ṛtikaete Isorren gharońjren hoṛko bhạlạiko lạgitʼ jemon bon kạmi. Ńelpe, ińakʼ tite tinạkʼ lạṭu lạṭu akhorkoteń olapekana. Okoe hoṛmo bahre secʼ bhage udugokʼko menjoṅkan onkoge khatnakʼ lạgitʼko jormoṭetʼpea. Mạsiakʼ krus iạte jemon aloko khed ocokʼ onate onko do nonkako kạmiyeda. Khatna ocoakanko hõ coṅ ạn ma bacoko manaoetʼkan. Onko do khatna ocope lạgitʼ sanayetʼkoa jemon noa iạteko sarhao daṛeakʼ baṅma, ape hõ onko dolrepe hecʼakana mente. Probhu Jisu Mạsiakʼ krus chaḍa ar cetʼte hõ jemon aloń sarhaokʼ. Noa krus hotetege dhạrti do iń ṭhen gocʼgea ar iń hõ dhạrti ṭheniń gocʼgea. Khatna ar bin khatna do cetʼ hõ baṅkana, menkhan maraṅ katha do hoyokʼ kana Mạsi hotete nawa sirjonge. Okoe hoṛ noa ạn lekateko calakʼkan onkore, metakʼme Isorren sạri Israelko uni do suluk ar mãyãe dan akoma. Mucạtʼreń menkea, okoe hõ aloko duk ocoyińma, ente Jisuakʼ ghạl dagko reakʼ cinhạkoge ińakʼ hoṛmoreń asen baṛayeda. E boehako, aboren Probhu Jisu Mạsiakʼ daya apeakʼ ontorre tahẽ akan tahenma. Amen. Iń Pạul do Isorakʼ sanate Mạsi Jisuren mitʼṭen apostoliń hoeakana. Ephesus nagrahare okoe doko Isorren hoṛkan ar okoe do Jisu Mạsireko pạtiạu akan onko ṭhen noa ciṭhiń oletʼkana. Aboren Isor Baba ar Probhu Jisu Mạsi do suluk are bhor ape ma. Aboren Probhu Jisu Mạsiren Baba ar Isorakʼ sarhao hoyokʼtae ma. Abo do Mạsi tulucʼ bon kolom mitʼ akante Isor do serma reakʼ mitʼke mitʼ jiuanakʼ bhore dan akatʼbona. Isorakʼ mẽtʼãhã samaṅre sonot ar niphuṭko jemon bon hoyokʼ onate Isor do dhạrti ạuriye sirjạurege Mạsi hoteteye bachao akatʼbon tahẽkana. Uni do acʼakʼ dulạṛ ar kusite apnarakʼ monejoṅ leka laharegeye ṭhik dohoakatʼ tahẽkana je, Jisu Mạsi hotete acʼren hoponko lekateye ataṅ bona. Uni doe nonkaleda jemon acʼren dulạṛiạ Hopon hotete begor damte oka mạhimate perecʼ dayae dan akatʼbon uniakʼ sarhao hoyokʼtae. Isorakʼ bin mucạtʼ dayate Mạsi tulucʼ bon jopoṛao akante uniakʼ mãyãm hotete bon chaḍao ocoakana, metakʼme kại reakʼ ikạ bon ńam akada. Isor do noa daya acʼakʼ maraṅ bud ar akel salakʼe dan akatʼ bona. Uni do okalekae khojletʼ ar Mạsi hotete okaleka laha khongeye ṭhik doho akatʼ tahẽkan, onka lekage uni do acʼakʼ okoakʼ monsubạkoe baḍae ocoletʼ bon tahẽkana. Uni doe niṭ akatʼ tahẽkana je, okte purạulen khan ona monsubạ purạu lạgitʼ serma ar dhạrti reakʼ jotowakʼ mitʼkate Mạsiakʼ ḍanṭao gobolreye ạguya. Isor do acʼakʼ bud ar akelte apnarakʼ kusileka jotowakʼgeye kạmiyeda. Acʼakʼ monsubạ leka laha khon okaṭakʼe niṭ dohoakatʼ tahẽkan onkage Mạsi hotete acʼren hoṛko hoyokʼ lạgitʼ uni do aboe bachao dohoakatʼ bona. Okoe laha khon Mạsirele asakan, ale hotetege jemon Isorakʼ mạhima sodorokʼ ona lạgitʼge uni doe bachao akatʼlea. Ar apekohõ sạriakʼtetʼ reakʼ kathako kanape, metakʼme kại khon bańcao reakʼ bhage sombatpe ańjomketʼte Mạsirepe pạtiạu akana. Ar Mạsi tulucʼpe kolom mitʼakante Isor do acʼren gokʼicʼ sonot Jiu hoteteye mohor chap akatʼpea. Okoe do Isorren sompottikanko onko do mitʼṭen ạidạri emako lạgitʼe gokʼ akawatʼkoa. Ar tin hạbicʼ purạte chaḍao ạuriko ńam unhạbicʼ ona ạidạriren pạhil hĩs lekate onko do sonot Jiuko em ocoakana. Ar noako hotetege Isorakʼ ṭhonok reakʼ sabasi do sodorokʼa. Onate Probhu Jisure apeakʼ pạtiạu ar Isorren sanam hoṛkore apeakʼ dulạṛ reakʼ katha tinreń ańjomkeda, un khon ape ńutumte gun manao johar do tishõ bạń thir akana. Ar koejoṅ jokhecʼ apeakʼ katha do bạń hiṛińeda. Iń doń koejoṅ kana jemon aboren Probhu Jisu Mạsiren Isor, metakʼme uni ṭhonokren Baba do jiu reakʼ akel ar bujhạu lạgitʼ daṛeye danape, jemon uni do arhõ bạ̃ṛtipe baḍae daṛeae. Iń do arhõń koeyeda apeakʼ ontor reakʼ mẽtʼ baṛe jhijokʼtape, jemon uniye hohoapere apeakʼ ontorre okape as akan onape bujhạu daṛeakʼ; ar ona sãote noa hõ jemonpe bujhạu daṛeakʼ je, uni ṭhen uniren hoṛko do tinạkʼ maraṅ dhon kanako ar okoeko bon pạtiạu akan aboakʼ ontorre uniakʼ tinạkʼ maraṅ daṛe kạmiye kạmikana mente. Noa do inạ mitʼ maraṅ daṛege, one okoe hotete uni do gocʼko khon Mạsiye jiwetʼ beretʼkede ar sermare acʼakʼ jojomsa aṛereye duṛupʼ akade. Uni do serma reakʼakʼ sanam lekan ektiạri, daṛe ar mạlikiko Mạsi gobolreye dohokeda. Ar mitʼke mitʼ ńutum cetanre baṅ do nahakʼ jugre baṅ do darakan jugre, ona sanam cetanre Mạsiakʼ ńutume dohokeda. Isor do sanamakʼge Mạsiakʼ jaṅga latarreye dohoakada ar jotowakʼre ektiạriye emakawadea, ar unige manḍerren matha menteye dohokedea. Noa manḍer do Mạsiakʼ hoṛmo kana. Ar okoe sanam secʼ khon jotowakʼe perecʼetʼkan uni Mạsiakʼ perecʼtetʼge hoyokʼ kana noa manḍer do. Bebatao ar kại iạte ape do gocʼgepe tahẽkana. Dhạrti reakʼ cạli leka ape hõ pạhil do bebatao ar kạirepe dãṛãnkan tahẽkana. Ar okoe jiu do hoe reakʼ etkiạriren rajkan uni bạṛicʼ jiuge Isorren bebatao hoṛko talareye kạmikana, ar ape do uni jiugepe pańjayedekan tahẽkana. Abo sanamkoge abo do aboakʼ jel reakʼ sana bon purạuetʼ tahẽkante onko hoṛko talare mitʼ okte jion bon khemaoetʼ tahẽkana. Ar jel khon okako sana ar hudisko rakabokʼ ona lekage bon kạmikan tahẽkana. Noa colon iạtege abo hõ eṭakʼko leka Isor ṭhen khon sạjại ńam lek hoṛ bon tahẽkana. Menkhan Isor do mãyãteye perecʼgea; uni do ạḍiye dulạṛetʼ bona. Ar bebatao iạte tinre gocʼge bon tahẽkana unre Mạsi sãote uni doe jiwetʼketʼ bona. Isorakʼ dayate ape do kại khon bańcaope ńamakada. Abo do Jisu Mạsire bon kolom mitʼ akante Isor do Mạsi tulucʼe jiwetʼketʼbona ar Mạsi sãotege sermareye duṛupʼ akatʼbona. Uni do noae kạmikeda jemon acʼakʼ bin mucạtʼ daya darakan jugkoreye udukʼ daṛeakʼ. Uni do Mạsi Jisu hotete aboreye dayayente okaṭakʼe kạmiakatʼ onatege uniakʼ noa daya do sodor akana. Ente dayatepe bańcao akana biswạste. Ar ona do ape khonakʼ do baṅ, ona do Isorakʼ dan kana. Noa do kạmiteakʼ jo lekate hõ baṅ emakana, jemon okoege aloko sarhaokʼ. Abo do Isorakʼ tite bon benao akana. Isor do Jisu Mạsi sãoteye joṛaoketʼbonte nawateye sirjạuketʼbona jemon bhageakʼko bon kạmi. Uni do noa bhage kạmi laha khongeye ṭhik doho akatʼ tahẽkana, jemon ona kạmikote jion bon khemao. Janam secʼ lekate ape do boṅgan hoṛ jạtrenko kanape. Ar okoe titeko khatna ocoakan, metakʼme apnarte khatna akan hoṛ menteko ńumogokʼkan onko do bin khatna hoṛ menteko metapekana. Disạipe, lahate ape do Mạsi khon begargepe tahẽkana; jạt lekate Israelkoakʼ oka ạidạri menakʼ ona ạidạri khon bahrerepe tahẽkana; Isor do Israel jạtko lạgitʼ okae gokʼ dohoakatʼ tahẽkan ona sãote apeakʼ jãhãn bondobos baṅ tahẽkana; ar noa dhạrtire ape do Isor chaḍagepe tahẽkana. Mitʼ jokhecʼ ape do sạṅgińrepe tahẽkana, menkhan Mạsi Jisurepe kolom mitʼakante ńitokʼ do uniakʼ mãyãm ṭhenpe ạgu ocoakana. Unikangea aboren sulukicʼ do. Unige Jihudi ar be Jihudi, noa banare mitʼ akada. Uni do acʼe kruslen hoṛmo hotete sanam hukum ar niạm sudhạ Moseakʼ ạn-ạriko reakʼ daṛeye rạputʼkeda. Ar nonkate noakin banar talare okaṭakʼ do bạiri bhit leka tahẽkan onae lạnduṛ giḍikada. Uni doe nonkakeda jemon unkin hotete mitʼṭen nawa manwae sirjạue, ar nonkate unkin talare jemon suluk hoyokʼ. Uniakʼ monsubạ do tahẽkana jemon, acʼakʼ krusteakʼ gujukʼte ona banar mitʼkate Isor tulucʼ arhõe mitʼ ruạṛ daṛeakʼ, ente noa banar talare oka bạiri leka tahẽkan, ona do acʼakʼ krusteakʼ gujukʼ hoteteye maraokeda. Ape okoe sạṅgińrepe tahẽkan ar onko okoe do sorreko tahẽkan, jotoko ṭhenge uni do hecʼkate suluk reakʼ bhage sombate porcarleda. Uni hotete ini mitʼ sonot Jiure Baba ṭhen calakʼ reakʼ ạidạri do sanamkoakʼ menakʼ tabona. Onate bin opromko dope baṅkana, ar bedisiạ hõpe baṅkana; menkhan Isorren hoṛkoakʼ oka ạidạri menakʼ ape hõ onko sãote ona ạidạripe ńam akada ar Isor gharońjrenpe hoeakana. Apostol ar nạbiko do rehetʼ kanako, ar ona rehetʼren konac dhiri do Jisu acʼtetʼ kangeae. Ar ona rehetʼ cetanrege ape dope gathao ocoakana. Mạsi tulucʼ kolom mitʼ akante dolan reakʼ goṭa hĩs do mitʼ sãote jopoṛao akante Probhuakʼ tahen lạgitʼ mitʼṭen sonot oṛakʼ benao rakabokʼ kana. Ape do uni tulucʼgepe kolom mitʼakana ar onate ape hõ mitʼ sãotepe gathao rakapʼ ocokʼkana, jemon sonot Jiu hotete Isorakʼ mundilpe hoedaṛeakʼ. Noa iạte iń Pạul do Isor ṭheniń koejoṅ kana. Ape okoe do boṅgan hoṛ jạtrenko kanpe ape lạgitʼge iń do Mạsi Jisuren kạidiń hoeakana. Ape do khạṭigepe ańjomakada, Isor do acʼakʼ daya reakʼ bondobos baḍae ocope reakʼ bhar ińreye emakada mente. Uniakʼ okoakʼ monsubạ do mitʼ sodorakʼ hoteteye baḍae ocoakadińạ, ar noa reaṅ iń do ape ṭhen thoṛa kathateń olkeda. Ape do ona paṛhaokatepe bujhạu daṛeakʼa je, Mạsi reaṅ ona okoakʼ monsubạ bujhạu lạgitʼ ektiạri menakʼtińạ mente. Ona okoakʼ monsubạ do sonot Jiu hotete cetʼleka ńitokʼ uniren sonot apostolko ar nạbiko ṭhen sodor akan, onka do eṭakʼ piṛhiren hoṛko ṭhen baṅ sodorlena. Ar ona okoakʼ monsubạ do hoyokʼ kana, bhage sombat hotete boṅgan hoṛ jạtrenko Jisu Mạsi tulucʼko midokʼte Jihudiko sãote inạ mitʼ ạidạri, mitʼ hoṛmo hạṭińko, ar mitʼ gokʼakʼren bhạgiạdarkoko hoyokʼ. Isor do acʼakʼ maraṅ daṛete okaṭakʼe daya akadiń ona daya reakʼ dan lekate uni do bhage sombat porcar lạgitʼ kạmiye emakawạdińa. Isorren sanam hoṛko modre iń khon huḍińko ar bạnukʼkore hõ, enrehõ Mạsiakʼ okaṭakʼ dhon reakʼ katha purạpuri baṅ bujhạukʼ, ona dhon reakʼ bhage sombat boṅgan hoṛko baḍae ocoko reakʼ bhar Isor do dayate ińgeye emakadińạ. Ona chaḍa uniakʼ okoakʼ monsubạ okalekate kạmire lagao hoyokʼa ona sodor reakʼ dạyik hõ ińe emakawạdińa. Sanamakʼren sisirjạuicʼ Isor do nunạkʼ din hạbicʼ acʼakʼ ona monsubại oko dohoakatʼ tahẽkana. Uni doe onkaleda jemon Mạsiakʼ manḍer hotete sermaren sanam cakʼlaoko ar ektiạrianko ṭhen aema lekate sodor akan Isorakʼ akel ńitokʼ sodorokʼ. Ar noage uniakʼ do jaejug reakʼ monsubạ tahẽkantaea, ar ona monsubạge aboren Probhu Jisu Mạsi hoteteye purạukeda. Mạsi tulucʼ mitʼkate ar unire biswạs hotete abo do Isor samaṅre sohosate hạjirokʼ reakʼ ạidạri bon ńamakada. Onateń nehõrokʼ kana, ape lạgitʼ duk ar sasetiń jometʼte dil alope ada, ente ona jotowakʼ do apeakʼ man lạgitʼ hoeakana. Serma ar dhạrtiren sanam jiwiyanko modre mitʼke mitʼ gusṭiren okoe do uniren hopon menteko ńumogokʼkan uni Baba samaṅre iń doń ikṛumokʼkana. Iń doń koejoṅ kana jemon Isorakʼ asambheṛ ṭhonok lekate uni do nonkan daṛeye emape, jemon sonot Jiu hotete apeakʼ ontor daṛeanakʼ hoyokʼ, ar biswạs hotete Mạsi do apeakʼ monre purạte girobas akane tahen. Iń do arhoń koeyeda jemon Mạsiakʼ dulạṛre rehetʼ ar bạisạu akanpe tahen, ar Isorren sanam hoṛko sãote ape hõpe bujhạu daṛeakʼ baṅma, Mạsiakʼ dulạṛ reakʼ jãhãn mucạtʼtetʼ, osartetʼ, jeleńtetʼ, usultetʼ, ar khạndritetʼ do bạnukʼa. Mạsiakʼ dulạṛ do budte oho baḍaelena; enhõ iń doń koejoṅ kana jemon ona dulạṛpe bujhạu daṛeakʼ, ar Isorakʼ goṭa perecʼakʼtepe perejokʼ. Aboakʼ ontorre Isorakʼ oka daṛeye kạmiyetʼkan ona daṛe lekate uni do aboakʼ koejoṅ ar hudis khon hõ ạḍi bạ̃ṛtiye kạmiyeda. Jisu Mạsi hotete ar manḍer talate piṛhike piṛhi jaejug hạbicʼ Isorakʼ ṭhonok hoyokʼtae ma. Amen. Onate Probhure kạidi akanicʼ iń nehõrape kana, Isor oka lạgitʼe hohoakawatʼpe ona reakʼ lek leka colonpe. Apeakʼ colon do jemon purạte nindhạn ar mạ̃hir hoyokʼ. Sombhuripe ar dulạṛ monte mimitʼko tulucʼ sapahaokʼpe. Ar okaṭakʼ suluke mitʼ ocoakatʼ bon ona suluk hotete sonot Jiu reakʼ midokʼ dohoe lạgitʼ kurumuṭuipe. Isore hohoakatʼpe iạte apere eken mitʼṭen asge menakʼa, mitʼ hoṛmoge menakʼa ar mitʼ sonot Jiuge menaea, mitʼṭen Probhuge menaea, mitʼ patiạuge menakʼa, ar mitʼ bạptismage menakʼa, ar sanamkoren Isor Baba hõ onka leka mitʼ goṭenge menaea. Unige sanamko cetanre, sanamko talare ar sanamkoakʼ ontorre menaea. Menkhan Mạsi cetʼlekae ṭhik dohoakatʼ ona soṅ hạṭiń lekage abo mimitʼko do daya dan bon ńamakada. Onatege sonot sostorreye meneda, Uni do sermateye rakapʼenre, lạṛhại kạidikoe kạidi idiketʼkoa, ar manwako aema dane ematʼkoa. “Uni doe beretʼena,” Noa katha khon cetʼ noage baṅ bujhạukʼ kana je, Mạsi do dhạrti reakʼ latar utạrakʼkore hõe pheḍlena mente? Ar okoeye pheḍlen unige sanamakʼ purạu lạgitʼ arhõ sermako khon hõ cetanteye rakapʼena. Unige adom do apostolko, adom do nạbiko, adom do bhage sombat porcarko ar adom do sapʼdapʼko ar cecetʼko menkateye bahalketʼkoa. Uni do nokoye bahalketʼkoa jemon Isorren sanam hoṛko uniakʼ sapʼdapʼ lạgitʼko sapṛaokʼ ar nonkate Mạsiakʼ hoṛmo do benao rakabokʼa. Noa reakʼ monsubạ do hoyokʼ kana, sanamkoge jemon Isorren Hoponre bon pạtiạukʼte mońjtebon baḍaeye ar mitʼakae bon hoyokʼ; ar Mạsi cetʼleka sanamakʼteye perecʼge, onkage jemon abo hõ sanamakʼte bon perejokʼma. Unre gidrạ leka do ar babon tahena. Bạṛicʼ bulạuakʼte eṭakʼko bhul horte idiko lạgitʼ oka bhul sikhnạtko emakokan, ona bhul sikhnạt iạte abo do hoete sokojokʼkan ḍheoko leka hante nate alo bon sokojokʼma. Bickom dulạṛ monte Mạsi reaṅ sạri kathako bon roṛma ar sanamakʼre hara burukʼte Mạsi leka bon hoyokʼma. Uni kangeae hoṛmo reakʼ matha do. Goṭa hoṛmo do nonka tolakana je, mimitʼ hạṭińko apan ạpin jaegare tahẽkate hoṛmo tulucʼ joṛao akana. Ar mimitʼ hạṭińko tinre ṭhikleka kạmikʼa unre goṭa hoṛmoge bohokʼ reakʼ ạyurte hara idikʼa ar dulạṛte apnarre benao rakabokʼa. Onateń meneda, Probhu ńutumteń sikhạuetʼpe kana boṅgan hoṛ jạtrenko cetʼleka bạṛicʼ cintạ talate jionko khemaoetʼkan onka do alope khemaoa. Onkoakʼ mon do ńutre menakʼtakoa. Ar ontor keṭecʼgetakote Isor reaṅ cetʼge bako baḍaekana, ar onate onko do Isorakʼ emakʼ jion khon ạḍi sạńgińre menakʼkoa. Onkoakʼ bibek do goṛdho akantakoa, onate bin tirpitokʼ ahkao monte joto lekan bin napaeakʼ kạmi lạgitʼ onko do lucạ lamoṭreko capaoena. Menkhan Mạsire nonkan sikhnạt ape do bape ńamakada. Ape do uni reaṅpe ańjomleda, ar uni tulucʼ midokʼte unire oka sạritetʼ menakʼ ona lekagepe cetʼ ocoakana. Ar noa sikhnạtpe ńamleda je, apeakʼ pạhil cạl-colon lekaten “Mare hoṛtetʼ ” kicricʼ leka totʼ giḍikaepe, ente lilkạr reakʼ lalocte uni “Mare hoṛtetʼ ” doe bạṛijokʼkana. Ona bodolte Isorge apeakʼ mon nawate benao rakapʼ ocowaepe, ar Isore emakan “Nawa hoṛtet’” do nawa kicricʼ leka horokʼjoṅpe, one uni do Isor leka sạriakʼtetʼ reakʼ dhorom ar sonotreye sirjạu akan. Onate eṛeakʼ do bạgi giḍiyakʼpe ar ape apere sạri kathako roṛpe, ente jotokoge mimitʼko sãote bon jopoṛaogea. Arpe edre emanlen khan ona edre iạte alope kạiya; apeakʼ edre do siń cando ạuriye hạsurokʼrege cabakʼtapema, ar Soetan hõ jãhãn ạt alope aṛakʼaea. Kombṛoicʼ do ar aloe kombṛoe ma, bickom acʼakʼ nij tite bhageakʼ kạmikoreye khaṭaokʼma jemon okulạnan hoṛko em hạṭińako lạgitʼ tahentae. Apeakʼ moca khon bạṛicʼ roṛ do alo oḍokokʼma, bickom jạruṛakʼre eṭakʼko benao rakapʼko lạgitʼ okaṭakʼ bhageakʼkan ona kathage oḍokokʼma, jemon okoe onako ańjom onate onkoakʼ bhạlại hoyokʼtako. Isorren sonot Jiu do alope mon duk ocoyea, one uni hotete Isor do chaḍaokʼ reakʼ din hạbicʼ apeye mohor chap doho akatʼpe. Sanam lekan hewer haṛhatʼ, edre, raṅgao, kạumạu ar opoman, dusṭạmi, ar sanam lekan hiskạ ape khon sahaṛ akan tahenma. Ape apere mãyãwanko baṛe hoyokʼpe, eṭakʼkoakʼ dukte dukokʼpe, cetʼleka Isor do Mạsi hoteteye ikạ akatʼpe onkage ape hõ ape apere ipikạkʼpe. Isorren dulạṛiạ hoponko lekate ape do Isorakʼ lek leka hoyokʼpe. Mạsi cetʼlekae dulạṛaketʼ bon ar abon lạgitʼ Isor ńutumte jut so lạgitʼ samaṅokʼakʼ lekate acʼtetʼgeye emen, ṭhik onkage ape hõ dulạṛ horte taṛampe. Jãhãlekan loṭghuṭi, bin napaeakʼ se laloc reakʼ kathako ape talare jemon alo ańjomokʼ, ente noako katha do Isorren hoṛkoakʼ baṅ sajaokʼa. Ar sanam lekan lajao paṛao colon se lelha roṛ ar bạṛicʼ umtạ umti katha hõ ape talare alo hoyokʼma, ente noako do baṅ sajaokʼa. Ona khon bickom ape do Isor sarhaoepe. Khạṭigepe baḍaea, okoeko laṭghaṭetʼkan, okoeko bin napaege ar okoekoko lalociạkokan, metakʼme okoe do boṅga sewakoko ńumogokʼkan onko do Mạsi ar Isorakʼ rajre jãhãn ạidạri bạnukʼtakoa. Ạuṛi sạuṛi kathate okoe hõ alo jemonko bulạupe, ar eṭakʼ horte aloko idipe, ente okoe bebatao iạte onakoko kạmi onkorege Isorakʼ sạjại do paṛaokʼa. Ar nonkan hoṛko sãote do alogepe gatekʼa, ente pạhil do ńutrepe tahẽkana menkhan ńitokʼ do Probhurepe mitʼ akante marsaltepe hecʼakana. Marsalte perecʼ hoṛkoakʼ cetʼleka calakʼ lek kan onkage ape hõ calakʼpe, ente sanam lekan bhạlại ar dhorom ar sạriakʼ kangea marsal reakʼ jo do. Onate biḍạu aṭkarpe okaṭakʼ kạmi do Probhui kusikʼa mente. Ńut reakʼ bin joanakʼ kạmikore alope seledokʼa; bickom onako reakʼ dos udukʼakope, ente manwakoakʼ oko danaṅre kạmi akatʼ reakʼ noako katha roroṛ hõ lajao paṛaoakʼ kana. Marsal hotete jãhãn kạmi reakʼ dos udukʼlen khan ona do sodorokʼgea, ente marsalge jotowakʼe sodoreda. Onate sonot sostorre olakana, “Ebhenokʼme E jạpitʼ akatʼicʼ, ar gocʼko khon beretʼme; khan Mạsiye marsalama.” Ape cetʼlekape calakʼkan ona reaṅ mońjte hudiskate ńelpe. Bebuj hoṛko leka baṅ calaokate akelanko leka calakʼpe. Apeakʼ tire bhage kạmi reakʼ okaṭakʼ ạt menakʼ ona do purạte kạmire lagaope, ente noa piṛhi do bạṛicʼgea. Onateń meneda, ape do bebujko alope hoyokʼa, bickom Probhuakʼ sana cetʼ kana mente ona bujhạu joṅpe. Alope ńu bulokʼa, onate bin sambṛaokʼkope hoyokʼa. Ona khon bickom sonot Jiu tabere tahenpe, ape do sereńko reakʼ sereńte ar sarhao sereńkote ar Jiuteakʼ õṛhẽakʼkote ape apere gapal maraope; ar apeakʼ ontorte Probhu õṛhẽ sereńaepe. Siń sạṭupʼ aboren Probhu Jisu Mạsi ńutumte Isor Baba gun manao joharaepe. Mạsiakʼ dewa sewakore menakʼpete ape apere tabe akan tahenpe. E maejiuko, Probhurepe tabe akante apan ạpin jãwãe tabere tahenpe, ente Mạsi do cetʼleka manḍerren mathakane, metakʼme acʼakʼ hoṛmo reakʼ mathakane, onkage herel hõ maejiuren matha kanae. Ona chaḍa noa hoṛmoren babańcaoicʼ do Mạsige. Cetʼleka manḍer do Mạsiakʼ tabere menakʼa onkage maejiuko hõ jotowakʼre apan ạpin herel tabere tahen lek kanako. E jãwãeko, Mạsi cetʼ leka manḍere dulạṛletʼ ar ona lạgitʼ apnare emen ṭhik onkage ape hõ aperen bạhuko dulạṛkope. Mạsiakʼ monsubạ do hoyokʼ kana jemon uni do acʼakʼ kathate dakʼre um saphakate onae sonot jemon acʼge apnar lạgitʼ mitʼṭen ṭhonokanakʼ manḍerre samaṅ daṛeakʼ. Unre manḍerre bin dagan, se joṅgṛaoan se onkan jãhãnakʼge baṅ tahena, bickom ona do sonot ar niphuṭge hoyokʼa. Jãwãeko cetʼ leka apnarakʼ hoṛmoko dulạṛetʼkan ṭhik onkage apnarren bạhuko hõ dulạṛko lek kantakoa. Rinicʼtetʼe dulạṛedekan hoṛ do apnargeye dulạṛokʼ kana. Okoe hõ apnarakʼ hoṛmo bae hirkhạwakʼa, bickom uni do acʼakʼ hoṛmoe ạsul are jotona. Onkage Mạsi hõ acʼakʼ manḍer do ạsul are jotoneda. Ente abon do uniakʼ hoṛmo hạṭińko kana bon. Sonot sostorre olakana, “Noa iạtege herel do eṅgat-apat bạgikate acʼren bạhu tulucʼ mitʼakane tahena ar unkin banar do mitʼ hoṛmokin hoyokʼa.” Noa okoakʼ do maraṅgea, menkhan iń do Mạsi ar uniakʼ manḍer reaṅ kathań roṛeda. Menkhan ona katha do tahẽocoakʼge. Ape mimitʼko aperen bạhuko apnarleka dulạṛkope ar bạhu hõ onka leka acʼren jãwãeye manotema. E gidrạko, Probhu cetʼlekae khojkan onkage aperen gogo-babakoakʼ bataotakope, ente ona do lek kana. Sonot sostorre pạhilre okaṭakʼ hukum sãote gokʼakʼ menakʼ ona do noage, “Eṅgam-ạpum ganaokinme, jemon amakʼ bhage hoyokʼtam ar dhạrtire aema din jiwetʼem tahena.” E babako, aperen gidrạko alope ạṛis ocokoa, bickom Probhuakʼ ḍanṭao ar sikhạunate hara burukope. E golamko, ape do Mạsirepe gobol akante botor ar manot seletʼ ontor khon niạ dhạrtiren kisạ̃ṛkoakʼ batao takope. Hoṛ kusi ocoko lạgitʼ aperen kisạ̃ṛkoakʼ mẽtʼãhã samaṅre alope gobolokʼa; ona khon bickom Mạsiren golam leka Isorakʼ monsubạ do mon ar ontorte manaote aperen kisạ̃ṛko ṭhen tabekʼpe. Ente manwa ṭhen golam do bape khaṭaokʼ kana menkhan Probhu ṭhenge ar ona hudiskate rạskạ monte aperen kisạ̃ṛko ṭhen khaṭaokʼpe, entepe baḍaegea, mimitʼ hoṛ jãhãnakʼ bogeye kạmi khan onage Probhu ṭhen khon kuṛạiye ńama, baṅ doe golam kan ar baṅ doe sạdhinicʼ kan. E kisạ̃ṛko, aperen golamko sãote ape hõ ṭhik onkage beoharpe. Onko do botor alope udukʼakoa, entepe baḍaegea, onko ar aperen doe ini mitʼ Probhu kangeae ar uni do sermare menaea; uniakʼ mẽtʼãhã samaṅre do jotogeko somangea. Sarecʼ katha do nõkʼõe, Probhu sãote mitʼakae tahẽkate uni emakʼ maraṅ daṛete daṛeanko hoyokʼpe. Lạṛhại lạgitʼ Isorakʼ sanam saj-bajko horokʼ joṅpe, jemon Soetanakʼ joto lekan phor phundikorepe teṅgo daram daṛeakʼ. Aboakʼ noa lạṛhại do jãhãe manwa birudre do baṅkana, bickom ona do ńut rajosṭi reakʼ joto lekan cakʼlaoko ar ektiạrianko birudre, ńut dhạrtiren daṛean jiuko birudre, ar coṭren joto bạṛicʼ jiuko birudre. Onate ape do lạṛhại lạgitʼ Isore emakan sanam saj-bajko horokʼ joṅpe, jemon Soetane hạnlepere unipe teṅgo daram daṛeae arpe bhagaoete teṅgo ṭak akanpe tahen. Onate sạriakʼte ḍanḍa paṭhe keṭejokʼte, koṛam rukhiyạ lạgitʼ dhorom jionte koṛam aḍkate, suluk reakʼ bhage sombat porcar lạgitʼ jaṅga sapṛaokate teṅgo ṭak akan tahenpe. Ona chaḍa pạtiạu reakʼ ḍhal hõ sapʼ joṅpe; ona ḍhalte Soetanakʼ joto lekan seṅgel sarkope ĩṛĩcʼ daṛeakʼa. Ar bańcaokʼ lạgitʼ bohokʼ reakʼ aḍonakʼ hatao joṅpe ar sonot Jiu reakʼ tarwaṛege, metakʼme Isorakʼ katha ataṅ joṅpe. Sonot Jiu hotete ạyur ocokʼte mon ar ontorte jao ghuṛi koejoṅpe. Onate jagwar akae tahente Isorren sanam hoṛko lạgitʼ mitʼ talao koejoṅre jamaṛ akae tahenpe. Iń lạgitʼ hõ koejoṅpe jemon kathań roṛre Isor do nonkan pạrsiye emạń jemon dil salakʼ uniakʼ bhage sombat reakʼ sạri okoakʼkoń porcar daṛeakʼ. Noa bhage sombat porcar lạgitʼ iń do sikṛi akan raj paṭhaona kạnạń. Koejoṅpe jemon hajotre tahen jokhecʼ cetʼleka bhage sombat porcar reakʼ lek kantiń onkage dil salakʼ onań porcar daṛeakʼ. Cetʼleka minạńa ar ińakʼ dinko cetʼ leka paromokʼkan ona do dulạṛiạ boeha ar Probhure pạtiạu akan sapʼ dapʼicʼ Tukhikus ṭhenpe baḍae daṛeakʼa. Ar ale reaṅ jemonpe baḍae daṛeakʼ ar uni jemon udgạue emape onate iń do ape ṭheniń kolkedea. Isor Baba ar Probhu Jisu Mạsi do boehako suluk, pạtiạu, are dulạṛpema. Aboren Probhu Jisu Mạsire okoekoakʼ bin mucạtʼ dulạṛ menakʼ onko sanamkore Isorakʼ daya baṛe tahenma. Timothi ar iń Pạul do Jisu Mạsiren golam kanaliń. Ạliń do Jisu Mạsi tulucʼ kolom mitʼ akan Isorren okoeko hoṛ do Philipi nagrahare menakʼko onkoren gupiko ar sapʼdapʼko ṭhenliń oleda. Aboren Isor Baba ar Probhu Jisu Mạsi do daya ar suluke dan apema. Iń do tinạkʼ dhao apeakʼ kathań disại unạkʼ dhaoge ińren Isoriń sarhao edekana. Ape lạgitʼ iń koejoṅre jao ghuṛi rạskạ salakʼ iń koejoṅ kana, ente Jisu Mạsi reaṅ bhage sombat porcar kạmire ape do etohopʼ khon ńit hạbicʼpe goṛo ạguyạń kana. Noa pạtiạu menakʼtińạ, apeakʼ ontorre okoe bhage kạmiye ehopʼakatʼ uni do Mạsi Jisuakʼ hijukʼ din hạbicʼ onae calao iditeye mucạda. Ape sanamko lạgitʼ ińakʼ monejoṅakʼ do nonka leka hoyokʼge lek kana, ente ape do ińren dulạṛiạko kanape. Iń do hajotreń tahen se bhage sombatreń roṛ dogokʼre hõ ona reakʼ sạritetʼ iń gohayeda, ar onate ape sanamko iń tulucʼ Isorakʼ dayaren bhạgiạdarkope hoyokʼ kana. Mạsi Jisuakʼ mãyã monte ape tinạkʼ iń dulạṛetʼpe ona reakʼ goha do Isorge. Iń do noageń koejoṅ kana apeakʼ dulạṛ do jemon akel ar bud salakʼ hara idikʼtape. Enḍekhan okaṭakʼ do joto khon sạri bhageakʼkan ona bujhạukatepe bachao daṛeakʼ. Noate ape do Mạsi Jisu hotete dhorom reakʼ jotepe perejokʼte Mạsiakʼ hijukʼ din hạbicʼ khạṭi ar bin daganpe tahẽdaṛeakʼa, ar onate Isorakʼ ṭhonok ar sarhao hoyokʼtaea. E boehako, ińakʼ monejoṅakʼ do ape jemonpe baḍae daṛeakʼ, ińre oka hoeakan ona khạtirte bhage sombat porcar reakʼ kạmiko do arhõ laha idikʼkana. Onate nonḍe raj dolanren palṭonko ar eṭakʼ sanamkoko baḍae daṛeada je, Mạsi iạte iń do hajotre minạńa. Ona chaḍa noa hajotre minạń khạtirte ḍher boehakoge Probhure arhõ bạ̃ṛti ṭehãḍokʼko cetʼakada ar onate onko do begor botorokʼte Isorakʼ katha porcar lạgitʼ arhõ dilankoko hoeakana. Onko modre adomko do hiskạ ar dola doli monte Mạsi reaṅko porcareda, menkhan eṭakʼko do bhage monsubạtegeko kạmikana. Noko hoṛkoakʼ monre dulạṛ menakʼte Mạsi reaṅko porcareda, ente onkoko baḍaea, bhage sombat reakʼ katha lạlại lạgitʼge iń doń bachao ocoakana. Menkhan onko pạhil dolren hoṛko do akoakʼ sartho lạgitʼ Mạsi reaṅko porcareda, jãhãn bhage monsubạ iạte do baṅ. Onko doko monejoṅ kana, ińakʼ bondi dosare onko do dukko emdaṛeạńạ mente. Menkhan onate do cetʼ cekakʼa? Asol katha do hoyokʼ kana, jãhã baṅ jãhãlekatege Mạsi reaṅ porcarokʼ kan baṅ do eṛeakʼ lạgitʼ ar baṅ do sạriakʼ lạgitʼ; onatege ińakʼ rạskạ do. Ar ińakʼ noa rạskạ do tisge baṅ mucạdokʼa, ente ińiń baḍaea, iń cetanre oka hoeakan ona reakʼ mucạtʼ jo do hoyokʼ kana bańcaokʼ; ar ona do apeakʼ koejoṅ hotete ar Jisu Mạsiren Jiu hotetege hoyokʼa. Ińakʼ purạ biswạs menakʼtińạ je, okaṭakʼte hõ iń do bạń lajao ocokʼa, bickom dil menakʼtińạ, cetʼleka lahate iń hotete Mạsiakʼ ṭhonok sodorokʼkan tahẽkan onkage ńitokʼ hõ hoyokʼa baṅ doń gujukʼ ar baṅ doń jiwedokʼ; ente iń lạgitʼ jion do hoyokʼ kana Mạsige ar moron do porhotetʼ. Menkhan jiwetʼgeń tahen khan enḍekhan ona do nonkan mitʼṭen kạmi reakʼ ạte imạńa jemon bhage jo hoyokʼtiń. Ar okaṭakʼ iń bachao joṅa ona do bạń baḍaea. Banarge iń doe oreń kana. Iń do gujukʼte Mạsi tulucʼ tahen sanań kana, ente ona do artetʼge bhagea. Enhõ ape lạgitʼ bańcao tahen do arhõ bạ̃ṛti jạruṛtińa. Khạṭigeń baḍaea iń do jiwetʼ iń tahena ar ape sanamko sãotegeń tahena, jemon apeakʼ biswạs harakʼtape ar onatepe rạskạkʼ. Onate ape talare arhõń hijukʼte ape do Mạsi Jisu hotete iń khạtirte rạskạtepe perejokʼa. Joto khon maraṅ katha do hoyokʼ kana, ape do nonka leka jion khemaope one okaṭakʼte Mạsi reaṅ bhage sombat reakʼ lek kan. Enḍekhan iń apnarte hecʼkateń ńelpe se sạṅgiń khon apeakʼ kathań ańjom, ar iń baḍae baṅma, ape do mitʼ Jiurepe teṅgo ṭak akana mente ar bhage sombat hotete okaṭakʼ biswạs hijukʼkan ona lạgitʼ mitʼtepe khaṭaokʼ kana. Okoe ape birudre menakʼko onkoakʼ okaṭakʼtege ape do alope botorokʼa. Ar noatege sạbudokʼa, onko do nosṭokʼ secʼko calakʼ kana ar ape do bańcao secʼ; ar noa bańcao do Isor ṭhen khonge hijukʼ kana. Ape do eken Mạsirepe biswạs akante dayape ńam akada ona do baṅ, menkhan ona lạgitʼ duk jojom reakʼ daya hõpe emocoakana. Cetʼleka haron kosṭo sahaope ńṭoṭhadiń ar ńitokʼ hõ ona reaṅ okape ańjometʼkan, ape hõ inạ mitʼ lekan haron kosṭoregepe jopoṛao akana. Enḍekhan Mạsi tulucʼpe kolom mitʼakan iạte uskur mon ńamokʼkan khan, ar Mạsiakʼ dulạṛ iạte jiwire juḍạsi ńamokʼkan khan, sonot Jiu ar ape talare helmel menakʼ khan, apeakʼ ontorre mãyã ar daya menakʼ khan, enḍekhan nonkate ińakʼ rạskạ purạutińpe, ar ape sanamkoakʼ mon mitʼakae tahenma, ape mimitʼko dupulạṛpe ar mitʼ jiwi ar mitʼ monokʼpe. Apnarakʼ porho lạgitʼ se michạ bạḍạite cetʼ hõ alope cekaya, bickom nindhạn monte eṭakʼko apnar khon soros mente bujhạukope. Eken apnar eskar lạgitʼ do alo, bickom mimitʼ hoṛ etạkʼ hoṛko lạgitʼ hõ dạndikʼpe. Jisu Mạsiakʼ oka monsubạ tahẽkan apeakʼ ontorre hõ ona jemon tahen. Ente uni do Isor reakʼ rupane tahẽkanre Isor barabari tahen do luṭjoṅakʼ bae metatʼa. Bickom uni do golam reakʼ rupe hatawante manwa lekate janamkate acʼ doe khạliyena. Ona chaḍa manwa rup hataokate gujukʼ hạbicʼ, metakʼme krusre gujukʼ hạbicʼe bataoketʼte uni do nindhạngeye tahẽyena. Ar onatege Isor do sanam khon cetanreye dohokedea ar nonkan mitʼṭen ńutume emadea one ona do joto ńutum khon maraṅge, jemon sermarenko, dhạrtirenko ar ot latarreko tahenkan mitʼke mitʼkoakʼ gunṭhi do Jisu samaṅre ikhṛumokʼtako, ar mitʼke mitʼ alaṅko aṅgocma je, Isor Babawakʼ ṭhonok lạgitʼ Jisu Mạsigeye Probhu kanae mente. E ińren dulạṛiạ boehako, ape do jaogepe batao ạguakatʼa. Ar eken sãoreń tahẽkan oktere do baṅ, menkhan biseskaete ńit bạnuńre hõ botor ar thar tharaokʼ salakʼ apeakʼ kạmiko talate udugpe je, kại khon bańcaope ńamakada mente. Isor do apeakʼ monre nonkae kạmikana one onate uniye kusikʼ onkan kạmi reakʼ monsubạ ar daṛe hecʼape. Ape do begor karacʼ kurucʼ ar begor rapṭha rạpṭhite jotowakʼ kạmipe, jemon bin dusạn ar khạṭipe hoedaṛeakʼ ar niạ peṛta piṛhiren bạṛicʼ hoṛko talare Isorren niphuṭ gidrạkope hoedaṛeakʼ. Ape do onko hoṛko jion reakʼ kathape neakokante noa dhạrtire ipil lekape jolokʼkana. Onate Mạsiakʼ dinreń sarhao daṛeakʼa je, ińakʼ kurumuṭu ar mehnot do baṅ ạuṛiakʼ akana. Oka biswạs reakʼ samaṅokʼakʼte Isorpe sewawaekan onare ińakʼ mãyãm do dãṛẽ mente coḍorlen khan hõń kusikokʼa ar ape tulucʼ iń rạskạkokʼa. Onkage ape hõ iń tulucʼ kusi ar rạskạre seledokʼ lek kanape. Asokʼ kạnạń, Probhu Jisuakʼ sana hoelen khan ạḍi usạrage ape ṭhen Timothiyiń kolea, jemon apeakʼ sombat ńamkate iń hõ monre uskuriń ńam. Iń sãote nonkan ar okoe hõ bạnukʼkoa, one okoe do Timothi leka ape lạgitʼ sạrigeko dạndikokʼ. Ente eṭakʼ sanamkoge Jisu Mạsi reakʼakʼko ńam baṅkate apnar reakʼakʼko ńam baṛakana. Menkhan apepe baḍaegea, Timothi do acʼakʼ pạtiạrtetʼe sạbud akada, ente cetʼleka gidrạ do apat tulucʼe kạmiyetʼkan onkage uni do iń tulucʼ Jisu Mạsi reaṅ bhage sombat porcar kạmireye khaṭao akana. Onate ińakʼ dosa cetʼ hoyokʼa mente baḍae torage uni kolkae iń asokʼkana. Probhure noa pạtiạu menakʼtińạ je, iń apnar hõ usạrategeń hijukʼa. Iń do Epaphraditus ape ṭhen kole lạgitʼ jạruṛiń bujhạukeda. Uni do ińren pạtiạricʼ boeha kanae. Ạliń do mitʼtege liń kạmikana ar Mạsi lạgitʼ liń lạṛhại kana. Ape do sapʼdapʼicʼ lekate ińakʼ jạruṛokʼakʼko meṭao lạgitʼ unige iń ṭhenpe kolledea. Uni do sanamkoe uihạretʼpe kanteń kol ruạṛedekana. Ona chaḍa uniye ruạ kạhillen reakʼ kathape ańjomletʼ iạte uni do ạḍiye andesale akan tahẽkana. Sạrige uni do gujukʼ dạkhilgeye ruạ kạhillena, menkhan Isor do uniye mãyã akawadea ar eken uni eskargeye daya akawadea ona do baṅ, uni do iń hõe daya akawạdińa jemon duk cetan duk aloń ńam. Onate ạḍi jidkateń kolekana jemon unipe ńel ruạṛte arhõpe rạskạkʼ ar iń hõ aloń mon dukokʼ. Ona iạte Probhuren hoṛ lekate ạḍi rạskạ salakʼ ataṅ daramepe, ar nonkan hoṛ do manotkope. Mạsiakʼ kạmi lạgitʼ uni do gujukʼ dạkhille hoelena. Ar hạjir bape tahẽkante iń lạgitʼ oka bape ceka daṛeakatʼ tahẽkan ona lạgitʼ uni do acʼakʼ jiwi sudhạ emokʼ hõ rạjigeye tahẽkana. E ińren boehako, mucạtʼreń meneda, Probhu tulucʼ jopoṛao menakʼpete rạskạkʼpe. Ape ṭhen inạ kathage olape do bạń ạṛisokʼ kana, ar sontorpe lạgitʼ ona do bhagegea. Onko setako khon, metakʼme okoe bạṛicʼakʼko kạmikan ar khatna ocokʼ lạgitʼko ãṭokʼkan onko khon sontorokʼpe! Abo kangeabon sạriakʼren khatna akan hoṛ do, ente abo do Isorren Jiu hotete uni bon sewawae kana ar Mạsi Jisu iạte bon sarhaokʼ kana ar apnarre do babon bhorsakʼ kana. Iń do iạkhạ apnarreń bhorsa daṛekokʼgea. Menkhan jãhãe eṭakʼ hoṛ apnarre bhorsa menakʼtaea menteye hudisetʼ khan, uni doe baḍaema, iń do uni khon hõ bạ̃ṛti jạruṛ menakʼtińạ. Irạl mãhã hilokʼre iń doń khatna ocolena; Israel bõsren Benjamin khũṭreń janamakana; iń do mitʼṭen khạṭi Ibri hoṛ kangeạń; ar Moseakʼ ạn-ạriko manaore do mitʼṭen Phạrusi hoṛge; dhorom secʼte nonkan bạṛicʼ hoṛiń tahẽkana je, Mạsiakʼ manḍerrenkoń khedetʼkokan tahẽkana; ar Isor samaṅre dhoromicʼ hoyokʼ reakʼ aste Moseakʼ ạn-ạriko manaore okoe hõ bako dusiledińa. Menkhan okako iń lạgitʼ lab tahẽkan onako do ńitokʼ Mạsi khạtirte lokshangeń bujhạueda. Sạrige okoe lạgitʼ noako lokshaniń bujhạu akatʼ uni ińren Probhu Jisu Mạsi baḍaeyere oka asambheṛ bhor menakʼ, uni ńutumte jotowakʼge lokshan menteń hudiseda. Mạsi jemoniń lab daṛeae ar Mạsire jemoniń ńel ńamokʼ, onate onako do mạilạ lekań bujhạueda. Ạn-ạrikoń manaoetʼte dhoromiń hoeakana ona do baṅ, menkhan Mạsire biswạs khạtirte Isor do dhorom menteye ataṅ akadińạ. Noa dhorom do Isor ṭhen khonge hecʼakana ar biswạsre ṭehãḍokʼ kana. Iń do Mạsi baḍaeye sanań kana ar oka daṛe hotete gocʼko khone jiwetʼ beretʼ ocolen ona hõ baḍae sanań kana. Iń do uniakʼ duk sasetre bhạgiạdar hoyokʼ sanayediń kana. Ar oka monsubạteye gocʼlen iń hõ onkan monsubạge ńańam sanayediń kana. Onate jãhãnakʼge hoyokʼ iń do khạṭige gocʼko khoniń jiwetʼ beretʼ ruạṛ ocokʼa. Oka lạgitʼ iń kurumuṭukan ona do ńitgeń ńamakada se purạteń lab akada onka do baṅ. Menkhan oka lạgitʼ Jisu Mạsiye sapʼledeń ona sapʼ tiog lạgitʼge iń doń khudạu idikana. E boehako, onań sapʼ tiyokʼ akada mente do bạń meneda. Menkhan mitʼṭeniń kạmiyeda, ona do tayom reakʼ jotowakʼko hiṛińkate samaṅ senakʼko secʼ sohorkate mucạtʼ simạnako secʼ iń ńir calakʼkana. Onate Mạsi Jisu hotete Isorakʼ serma khonakʼ hoho reakʼ okaṭakʼ kuṛại menakʼ ona jemoniń ńam. Ona iạte dhorom secʼte okoe bon laha idikʼkan abo do inạ mitʼ monejoṅakʼge tahen lek tabona. Ar jãhãnakʼ reaṅ eṭakʼ lekape moneyetʼ khan Isor do ona hõe udukʼapea. Metakʼme, abo do dhoromokʼ lạgitʼ tinạkʼ hạbicʼ bon laha idiakan inạ dharatege taṛam idi lek tabona. E boehako, ape sanamko iń leka baṛe calakʼpe, ar okoe nonkako calakʼkan onko ńel oromkakope. Ar cetʼlekape calakʼa ona dole udukʼ akawatʼpea. Iń do aema dhaoiń lại akawatʼpea ar ńitokʼ hõ mẽtʼdakʼ joro joroteń lạiape kana, nonkan aema hoṛ menakʼkoa one okoe do Mạsiakʼ krusren bạiri lekako colonetʼkan. Onkoakʼ mucạtʼtetʼ do nosṭokʼge; lacʼgetako Isor do; ar oka do lajao paṛawakʼkan onatege onko doko sarhaokʼ kana; onko do eken dhạrti reakʼakʼkogeko moneakʼ kana. Menkhan aboakʼ rajosṭi do sermare; one onḍe khon abo do aboren babańcaoicʼ Probhu Jisu Mạsiakʼ hijukʼ bon ńel hohorkan. Uni do aboakʼ nijorte perecʼ hoṛmoe pherao tabona ar acʼakʼ ṭhonokanakʼ hoṛmo lekae hoe ocoea. Ar oka daṛete jotowakʼko acʼakʼ gobolreye ạguyetʼkan ona daṛetege uni do noae kạmiya. E boehako, iń do apeń dulạṛetʼpea ariń uihạretʼpea. Apege ińakʼ rạskạ, ar apege ińakʼ jitạukʼ reakʼ mala. E dulạṛiạko ape do Probhure teṅgo ṭak akae tahenpe. Euodiạ ar Suntukh, iń do biseskaete noań nehõraben kana, Probhu tulucʼ ben kolom mitʼ akante aben do mitʼ mon akae jemon ben tahen. E sạri juri ãrãṛtiń am hõń nehõram kana, am do nukin maejiu goṛowạkinme. Unkin do Mạsi reaṅ bhage sombat iạte iń tulucʼ, ar Klement ar ińren eṭakʼ são kạmiyạko tulucʼ kosṭokin sahao akada. Nokoakʼ ńutum do jion reakʼ puthire olakana. Probhurepe kolom mitʼakante ape do jaoge rạskạkʼpe. Arhõń mena, rạskạkʼpe baṛe. Apeakʼ mạ̃hirtetʼ do sanamko ṭhen baḍaeokʼma. Probhu do usạrageye daraekana. Jãhãnakʼ reakʼge alope dandokʼa, bickom apeakʼ joto arojko do koejoṅ ar nehõrate gunmanao johar salakʼ Isor baḍae ocoyepe. Ona iạte, Isorakʼ okaṭakʼ suluk reakʼ katha manwa do hudiskate hõ bako bujhạu daṛeakʼkan, ona suluk do Mạsi Jisu hotete apeakʼ mon ar ontore rukhiyạitapea. E boehako, mucạtʼre noageń mena, okaṭakʼ sạriakʼkan, okaṭakʼ do lek anakʼkan, okaṭakʼ do niphuṭ ar khạṭige, okaṭakʼ do mońjge, okaṭakʼ do manot ńam lek kan, metakʼme okaṭakʼ do bhageakʼkan ar sarhao ńamokʼ, onako secʼ moneakʼpe. Ape do iń ṭhen khon okaṭakʼpe cetʼakatʼ ar bhage mentepe ataṅ akatʼ ar ińre okaṭakʼpe ńelakat̕, ar ińakʼ mocate okaṭakʼpe ańjomakatʼ, onkage kạmipe. Enḍekhan sulukren Isor do ape tulucʼe tahena. Probhure ạḍitetʼgeń rạskạkʼ kana, ente ḍher din tayom ape do arhõpe disạ ruạṛkedińa. Sạrige ape do iń lạgitʼ jaogepe dạndikʼkan tahẽkana, menkhan ona ńel ocoetape lạgitʼ ạt do bape ńamleda. Ińakʼ jãhãn ṭonṭa iạte noa kathań roṛeda ona do baṅ, ente jãhã dosaregeń tahen inạrege kusi tahen iń cetʼakawana. Ṭonṭare ar sareṛokʼre hõ iń do sanamakʼren hitạu akan hoṛ kạnạń. Jombikʼre ar reṅgejokʼre, ar sareṛokʼre se ṭonṭakʼre hõ cetʼleka kusi tahen jạruṛa ona doń baḍaegea. Ar okoe daṛeye imạńkan uni hotetege iń do jotowakʼiń kạmi daṛeakʼ kana. Enhõ ape do ińakʼ duk sasetre bhạgiạdar hoeakantepe bhage akada. E Philipi manḍerren hoṛko, ape hõpe baḍaegea, bhage sombat lại saḍe reakʼ etohopʼre Makedoniạ khoniń oḍok calaolenre, ape eskar chaḍakate oka manḍerrenko hõ emokʼ ar hatao babotre iń tulucʼ bako bhạgiạrilena. Ar Thessalonikiạreń tahẽkanre hõ ape do mitʼ bar dhaope goṛowạdiń tahẽkante ińakʼ reṅgecʼpe purunletʼtińạ. Jãhãn daniń khojokʼ kana ona do baṅ, menkhan nonkan jotetʼ geń asokʼ kana one oka do ape ńutumte doho jarwa idikʼ. Ińakʼ jotogeń ńam caba akada. Ar ińakʼ oka jạruṛ ona khon hõ bạ̃ṛti menakʼtińạ. Ephaphroditus tite apeakʼ daniń ńamketʼte ińakʼ do ḍher hoeakantińạ. Noa danko do mońj so reakʼ mahkaokʼ ar samaṅoakʼge, ar noate Isor doe kusikʼ kana. Ińren Isor do acʼakʼ ṭhonokte perecʼ dhon lekate Mạsi Jisu hotete apeakʼ joto ṭonṭae cabaetapea. Aboren Baba ar Isorakʼge ṭhonok hoyokʼtae ma jug cetan jug hạbicʼ. Amen. Mạsi Jisu tulucʼ jopoṛao menakʼko Isorren mimitʼ hoṛ ińakʼ johar emakope. Iń soṅgere okoe boehako menakʼko onko hõ apeko joharape kana. Isorren sanam hoṛko okoe do nonḍe menakʼko, asokaete Kạisạr oṛakʼren hoṛko do apeko joharape kana. Probhu Jisu Mạsiakʼ daya apeakʼ ontorre baṛe tahenma. Iń Pạul do Isorakʼ sanate Jisu Mạsiren mitʼṭen apostoliń hoeakana. Kolossiạ nagrahare okoe doko Isorren hoṛkan ar Mạsire mitʼakan biswạsi boehakanko, onko ṭhen iń ar Timothi do noa ciṭhi liń oleda. Aboren Baba Isor do daya ar suluke dan apema. Mạsi Jisure apeakʼ biswạs ar Isorren sanam hoṛko lạgitʼ apeakʼ dulạṛ reakʼ katha liń ańjomakada, onate tinạkʼ dhao ape lạgitʼ liń koejoṅ kan unạkʼ dhaoge aboren Probhu Jisu Mạsiren Baba Isor liń gunmanao joharae kana. Sermare ape lạgitʼ okaṭakʼ jogao dohoakan ona ńam reakʼ as khonge ape talare noa pạtiạu ar dulạṛ do janamakana. Ar okaṭakʼ bhage sombat, metakʼme sạri katha ape ṭhen seṭer akan ona hotetege ape do noa as reakʼ kathape ańjom akada. Noa bhage sombat do goṭa dhạrtire pasnaoente jokʼ kana ar dinke din baḍhao idikʼ kana. Ar oka hilokʼ noa bhage sombatpe ańjomketʼ ar Isorakʼ daya reakʼ katha sạri mentepe baḍaeketʼ enhilokʼ khon ṭhik onkage ona do ape talare hõ kạmikʼ kana. Ona bhage sombat reakʼ katha do ạlińren dulạṛiạ Epaphrase ṭhenpe ańjomakada. Uni do ape lạgitʼ Mạsiren mitʼṭen pạtiạr sapʼdapʼicʼ kanae. Sonot Jiu do dulạṛ reakʼ okaṭakʼ mone danakatʼpe ona reaṅ Epaphrase do ạlińe baḍae ocoakatʼlińa. Onate ape reaṅ ańjom tayom khonge ạliń do jao ghuṛi ape lạgitʼ liń koejoṅ kana. Jiuteakʼ akel ar bud salakʼ Isorakʼ monejoṅakʼ jemon purạtepe bujhạu daṛeakʼ onate Isor ṭhenliń khojkana. Onate boge kạmikote bhage jope jokʼte Isor do arhõ jemon mońjtepe baḍae daṛeae; ar nonkate jotowakʼre Probhupe kusi ocoyete unire lek lekape colon. Noa do hoedaṛeakʼgea, ente Isor do acʼakʼ maraṅ daṛete apeye daṛe ocoakatʼpea jemon jao ghuṛi rạskạ salakʼ jotowakʼ sahao ar sombhurikate Isor Babape gun manao joharae. Marsal reakʼ rajosṭire Isorren hoṛko oka ạidạriko hameṭ joṅ ona reakʼ bhạgiạdar hoyokʼ lạgitʼ uni do lekmankoe hoeoco akatʼpea. Ente uni do ńut reakʼ rajosṭi khone bańcaoketʼbonte acʼren dulạṛiạ Hoponakʼ rajosṭiteye ucạṛ ạguketʼbona. Hopon tulucʼ bon kolom mitʼakante abo dobon chaḍao ocoakana, metakʼme kại ikạ bon ńam akada. Nui Hopon kangea bin ńelokʼ kan Isorren muṭhạntetʼ do. Ar unige sanamakʼ ạuri sirjạureye tahẽkana ar sanam sirjon cetanre unigeye mạlik kana. Ente sermare ar otre, oka ńelokʼkan ar oka baṅ ńelokʼ kan, jotowakʼge uni hotete sirjạu akana. Siṅghạsonkoge cetʼ, rajosṭikoge cetʼ, baṅ do rajkoge, baṅ do ektiạriankoge sanamakʼ do uni hotete uni lạgitʼge sirjạu akana. Uni do sanamakʼko khon laharen kanae ar unirege jotowakʼ do ṭarhao mitʼakana. Ona chaḍa unige acʼakʼ hoṛmoren, metakʼme manḍerren matha kanae. Unige pạhilicʼ ar unige pạhilre gocʼko khone jiwetʼ beretʼena, jemon unige jotowakʼren maraṅicʼe hoedaṛeakʼ. Isor doe goṭaletʼa jemon acʼakʼ joto lekanakʼ perecʼtetʼ Mạsire tahen. Ona chaḍa dhạrirege cetʼ ar sermarege cetʼ, Mạsi hotete jotowakʼge acʼ tulucʼ samge ocoye goṭaleda. Mạsi do krusre acʼakʼ mãyãme danketʼte suluke ạguketʼa ar onate Isor tulucʼ manwakoakʼ noa samge do hoeakana. Sedae do Isor ṭhen khon pharakrepe tahẽkana ar uni birudre apeakʼ monre bạiripe tahẽkana. Apeakʼ bạṛicʼ kạmiko hotete ona do sodor akana. Menkhan Mạsiakʼ gujukʼte uniakʼ hoṛmo hotete Isor do ńitokʼ acʼ tulucʼe mitʼ akatʼpea, jemon uni do sonot, niphuṭ ar bin dusạnko mente acʼ samaṅreye teṅgo ṭarhao ocope. Onate Mạsi reaṅ bhage sombat khon oka sạri aspe ńamakatʼ ona khon alo pharakokʼte pạtiạure teṅgo ṭarhao akae tahenpe. Ona bhage sombat do goṭa dhạrtire lại jạhir akana ar ape do onape ańjom akada. Ar iń Pạul do noa bhage sombatren porcaricʼ iń hoeakana. Ape lạgitʼ oka duk sasetiń jometʼkan onate iń doń rạskạkʼ kana. Mạsiakʼ hoṛmo reakʼ, metatʼme manḍerko lạgitʼ uniakʼ oka duk saset ńit hõ sarecʼ menakʼ ona do ińakʼ hoṛmoreń purạueda. Isor do acʼakʼ katha ape ṭhen purạte porcar reakʼ bhar ińreye emakatʼte iń do manḍerren mitʼṭen sapʼdapʼicʼ iń hoeakana. Isorakʼ kathare okaṭakʼ sạri okoakʼ sedaeren hoṛko ṭhen jug jug khon okoge tahẽkan, ńitokʼ acʼren hoṛko ṭhen ona do sodor akana. Isor doe khojkana, boṅgan hoṛ jạtrenko talare hõ uniakʼ noa sạri okoakʼ reakʼ maraṅ ṭhonok cetʼkana mente, ona jemon acʼren sanam hoṛko baḍae daṛeakʼ. Ona sạriakʼ do noage, Mạsi do apeakʼ ontorre menaete uniakʼ ṭhonok ńam reakʼpe asakana. Ale do uni Mạsi reaṅle porcareda, metakʼme Isorakʼ asambheṛ akel salakʼ mimitʼ hoṛle sontoretʼkoa arle cetʼako kana, jemon Mạsi hotetele purun daṛeako. Ar noa monsubạge Isorakʼ oka maraṅ daṛe ińreye kạmikan ona daṛe lekate iń do ạḍitetʼiń khaṭaokʼ kana. Iń doń menjoṅ kana jemonpe baḍae baṅma, iń do ape lạgitʼ ar Laodikiạ nagraha reakʼ manḍerren hoṛko lạgitʼ, ar okoe bako ńṭoṭhadiń onko sanamko lạgitʼ ạḍiń khaṭaokʼ kana mente. Ińakʼ monejoṅakʼ do noage jemon onko do ontorre udgạuko ńamte dulạṛreko tol midokʼ, ar Mạsi reaṅko bujhạute oka khạṭitetʼ ńamokʼ ona reaṅ purạ khạṭitetʼ jemon asambheṛko lab joṅ. Ar ona khạtirte Isorakʼ sạri okoakʼko, metakʼme Mạsiko baḍae orom daṛeaea. Mạsirege sanam lekan bud ar akelko oko menakʼa. Iń do noa kathań metapekana jemon okoe hõ ạuṛiakʼ kathakote bhul horte aloko ạnḍicʼ idipe. Iń do hoṛmo secʼte hạjir bạnuńre hõ Jiu secʼte doń hạjirgea ar apeakʼ bhage cạl-colon ar Mạsire apeakʼ kajaktetʼ ńeletʼteń rạskạkʼ kana. Ape do cetʼleka Jisu Mạsi Probhu mentepe ataṅakade onkage uni tulucʼ mitʼ tahente jion khemaope. Mạsire rehedokʼte unire benao rakabokʼpe. Ar cecetʼakʼ ńamkate okape pạtiạu akan onarege kajak akan tahenpe ar jao okte Isor gun manao joharaepe. Sontor akae tahenpe, jemon okoe hõ hoṛakʼ bidiyạ ar ạuṛi lilkạrte aloe siboṛpema. Mạsi tulucʼ ona cecetʼakʼ reakʼ do jãhãn jurige bạnukʼa; manwakoakʼ ạri-cạli ar dhạrti reakʼ ạḍi lekan ạn-ạrirege ona do ṭehãḍokʼ kana. Isorakʼ goṭa perecʼtetʼ do Mạsiakʼ hoṛmo rupteye girobasokʼ kana, ar Mạsi tulucʼpe kolom mitʼakante ape hõ ona perecʼtetʼpe ńamakada. Uni do serma cetanren sanam cakʼlaoko ar ektiạrikoren matha kanae. Ona chaḍa ape do Mạsi tulucʼpe kolom mitʼakante khatna hõpe khatna ocoakana. Jãhãe manwa tite do bape khatna ocoakana, Mạsi acʼgeye khatna akatʼpea; metakʼme hoṛmore jel reakʼ oka daṛe tahẽkan ona daṛe khon uni doe chaḍao akatʼpea. Bạptisma hotete Mạsi tulucʼpe topa ocoakana; ona do baṅ, menkhan okoe gocʼko khon Mạsiye jiwetʼ beretʼkede uni Isorakʼ daṛere pạtiạu hotete ape hõ Mạsi tulucʼpe jiwetʼ ocoakana. Kại ar bin khatna iạte ape do gocʼgepe tahẽkana, menkhan Isor do Mạsi sãoteye jiwetʼketʼpea. Uni do aboakʼ joto ghạṭkoe ikạketʼ tabona, ar abo birudre oka dolel olakan tahẽkan ona reakʼ jotowakʼe meṭaokeda. Ona dolel do krusre khil jalatʼketʼteye bạtil giḍikada. Uni do sanam bạṛicʼ rajosṭiko ar ektiạriankoakʼ daṛeye cabaketʼa. Nonkate uni do Mạsiakʼ krus hotete onko cetanreye jitạuena ar jotoko samaṅre onkoe bemanot ocoketʼkoa. Onate jom-ńu se jãhãn dhorom porob babot reakʼ se ambas reakʼ se jirạukʼ mãhãko reakʼ okoe hõ aloko bicạrpe ma. Onako do darakan dinkore oka hoyokʼ ona reakʼ umultetʼ kana, menkhan oka sạrikan ona do Mạsirege menakʼa. Okoe apnarakʼ hoṛmore kosṭoko emetʼkan ar serma goḍet sewawako reakʼ jạruṛko bujhạuetʼkan onko do apeakʼ jit siropa ńamokʼ horre tạkicʼakʼ jemon aloko hoeocoe. Nonkan hoṛ do okako ńelakat̕ menteko hudisetʼkan ona reaṅ ạḍi maraṅ maraṅ kathako roṛa ar ạuṛi bạḍạiteko phulạukʼa, ente onkoakʼ mon do jel reakʼ sanare gobol akantakoa. Onko do kajakte mathatetʼ, metakʼme Jisu Mạsi do bako sapʼ dohoyede kana, menkhan ona matha reakʼ ạyurte goṭa hoṛmo do jaṅ ar jel reakʼ tol midokʼkante Isorakʼ sana leka hara idikʼkana. Mạsi tulucʼpe gocʼente ape do dhạrti reakʼ aema lekan ạri-cạli khonpe pharak akana, menkhan enrehõ dhạrtiren hoṛko leka cedakʼ arhõ dhạrti reakʼ ạri-cạlirepe gobolokʼ kana? Okaṭakʼ jinis do jaoge beohar idite bạṛijokʼ onako reaṅ do nonka cạli menakʼa, alom saba, alom joma, alom joṭeda. Noako cạli do manwakoakʼ hukum ar cecetʼakʼ kana. Ar noako ạri-cạli ńelokʼte do akelte perecʼakʼ lekage bujhạukʼa, ente cetʼ leka sewae hoyokʼa, cetʼleka apnarte huḍińokʼ hoyokʼa, cetʼleka apnarakʼ hoṛmo kosṭo emokʼ hoyokʼa, ona do noa ạri-cạlikoe baḍae ocokoa, menkhan jel reakʼ sana koboj lạgitʼ noako do oka kaj reakʼ hõ baṅkana. Mạsi tulucʼ gocʼko khonpe jiwetʼ beretʼ ocoyen khan, enḍekhan Mạsi one sermare Isorakʼ jojomsa aṛereye duṛupʼ akan ona coṭ reakʼakʼko baṛe ńam baṛaepe. Ot reakʼko do baṅ bickom coṭ reakʼakʼkoge moneakʼpe. Ente ape dope gocʼena ar apeakʼ jion do Mạsi tulucʼ Isorre oko menakʼa. Okoe doe aperen jion kan uni Mạsiye sodorlenre ape hõ uni tulucʼ uniakʼ ṭhonokren bhạgiạdarko mentepe sodorokʼa. Onate apeakʼ jel reakʼ sana oka menakʼ ona marao giḍikakʼpe. Ente onare joto lekan loṭghuṭi, bin napaeakʼ, bạṛicʼ sana, bạṛicʼakʼ reakʼ laloc ar dhon reakʼ laloc menakʼa, one oka do boṅga sewakan. Ar okoe doko bebataokokan onko do ona iạtege Isorakʼ sạjại hecʼ paṛao akokana. Ape hõ pạhil do onkagepe colonetʼ tahẽkana, menkhan ńitokʼ do edre, raṅgao, dusṭạmi, opoman, ar nilạjiạ roṛ ape khon baṛe sahaṛokʼma. Alope eṛea, ente aperen “Mare hoṛtetʼpe” oḍok giḍi akadea ar uniakʼ kạmiko sudhạ kicricʼ lekape totʼ giḍi akada ar “Nawa hoṛtetʼpe” horokʼ akawana. Uni “Nawa hoṛtetʼ ” do arhõe nawa arokʼkante acʼren sisirjạuicʼ lekae hoyokʼkana jemon uni sisirjạuicʼ do purạtepe baḍae orom daṛeae. Nonkate boṅgan hoṛ jạtko talare se Jihudiko talare, khatna se bin khatna ocoakanko talare, osobbho, nicạṛ jạt, golam se sạdhinko talare jãhãn begar do bạnukʼa; onḍe do Mạsigeye asolicʼ kana ar uni do sanamko talare menaea. Onate Isor okoekoe bachao akawan onko sonotko ar dulạṛiạko lekate mãyãkʼ mon, dulạṛ, mạ̃hir, nindhạn ar soborite apnar sajaokʼpe. Ape apere sahaokʼpe ar jãhãe birudre apeakʼ jãhãn dos reakʼ menakʼtae khan uni do ikạkaepe. Probhu cetʼlekae ikạ akatʼpe onkage ape hõ eṭakʼko ikạkako lektapea. Ar onako sanamakʼ cetanre dulạṛte sajaokʼpe. Ente dulạṛge sạbit utạrokʼ reakʼ tonol kana. Mạsi okaṭakʼ suluke emokʼkan ona sulukge apeakʼ ontorre tahente ape mimitʼkoe ạyurpema. Sulukre tahen lạgitʼge coṅ sanamko mitʼ hoṛmorepe hoho ocoakana. Ar ape do gun manaoko baṛe hoyokʼpe. Mạsiakʼ katha apeakʼ ontorre purạte girobas ocoakʼpe. Isorakʼ akelte lại cecetʼ ar sipikhạukʼpe, sereńko, sarhao sereńko ar Jiuteakʼ õṛhẽakʼkote apeakʼ ontorre Isor gun manao tulucʼ sereńaepe. Jãhãnakʼgepe roṛ ar jãhãnakʼgepe cekae ona do Probhu Jisu ńutumte kạmipe ar uni hotete Isor Baba hõ gunmanao joharaepe. E bạhuko aperen jãwãeko tabere tahenpe, ente Probhuren hoṛ lekate noa do lek kana. E jãwãeko, apnar bạhuko dulạṛkope, ar alope haṛhatʼakoa. E gidrạko, sanamakʼre aperen gogo-babawakʼ bataotakope, ente noa do Probhui kusiyakʼa. E babako, aperen gidrạko alope edre ạṛis ocokoa. Jemon onko do aloko hulạs bhaṅgaokʼ. E golamko ape do jotowakʼre noa dhạrtiren kisạ̃ṛko ṭhen tabe akan tahenpe. Eken mẽtʼ samaṅre golam khaṭaokʼte hoṛ khusi ocoko leka do alo, menkhan khạṭi monte Probhu botorae tulucʼ onkore tabe akan tahenpe. Jãhãnakʼgepe cekae, manwako lạgitʼ do alo, bickom Probhu lạgitʼpe onkayetʼte mon ar ontorte kạmipe, entepe baḍaegea, Probhu acʼren hoṛko lạgitʼ okae doho akatʼ onage kuṛại lekate uni ṭhen khonpe ńama. Ar ape okoe ṭhenpe khaṭaokʼ kan uni doe Probhu Jisu kana. Ente behokicʼ do acʼe behokakatʼ reakʼe ńam ruạṛa; Probhu ṭhen mẽtʼãhã beṅgetʼakʼ do bạnukʼ anaṅ. E kisạ̃ṛko, sermare aperen hõ mitʼṭen kisạ̃ṛ menaea ar ona baḍaekate aperen golamko sãote bhage ar hok reakʼ beoharpe. Koejoṅre jamaṛakan ar gun manao johar salakʼ jagwar akae tahenpe; Ona sãote ale lạgitʼ hõ koejoṅpe jemon Mạsi reaṅ sạri okoakʼ reakʼ katha porcar lạgitʼ Isor do ạte emabon. Ar ona sạri okoakʼ lạgitʼge iń doń bondi ocoakana. Cetʼ leka pusṭạute noa reaṅ lại pasnao lek kan, koejoṅre disạyińpe jemon iń do onkageń roṛ daṛeakʼ. Okoe Isorren hoṛko baṅkan onko tulucʼ do akel salakʼ colonpe ar Mạsi reaṅ goha em reakʼ ạtko kạmire lagaope. Apeakʼ roṛ do siń sạṭupʼ dayateakʼ baṛe hoyokʼma, buluṅte adawakʼ leka, jemonpe baḍae daṛeakʼ okoe okaleka roṛ ruạṛako lektapea mente. Aboren dulạṛiạ boeha ar pạtiạr sapʼ dapʼicʼ ar Probhuakʼ kạmire abo sãoten golam Tukhikus do ińakʼ sanamakʼe baḍae ocopea. Ale reaṅakʼkope baḍaete uni do jemon udgạue emdaṛeape onate ape ṭheniń kolkedea. Tukhikus sãote iń do aboren pạtiạricʼ ar dulạṛiạ boeha Onesimus hõń kolkedea. Uni do ape modrenge mitʼ hoṛ kanae. Unkin do nonḍenakʼ jotowakʼge apekin baḍae ocopea. Iń soṅgete kạidi akan Aristarkhus ar Barnabasren mamo hatom boeha Mark hõ joharkin emapekana. Mark reaṅ ma laharege hukumpe ńamakatʼ baṅma, ape ṭhene senlenre dulạṛ salakʼ ataṅ daramete jemonpe sapʼsorae. Ar Justusko metae Jisu hõ apeye joharape kana. Jihudiko mod khon eken noko pene hoṛge Isorakʼ rajosṭi lạgitʼ iń tulucʼko kạmi kana. Onko do monre ạḍi uskurko dan akawạdińa. Epaphrase hõe joharape kana. Uni do aperen hoṛko modren mitʼ hoṛkanae ar uni do Jisu Mạsiren golamge. Uni do siń sạṭupʼ ape lạgitʼe koeyeda jemonpe sạbit utạrokʼ ar jotowakʼre Isorakʼ mone joṅakʼ baḍaekate khạṭi akanpe teṅgo ṭarhao daṛeakʼ. Epaphrase reaṅ do noa gohań meneda, ape lạgitʼ ar okoe do Laodikiạ ar Hierapolis reakʼ nagrahare menakʼko onko lạgitʼ uni do ạḍiye khaṭao akana. Ar dulạṛiạ raranicʼ Luk ar Demaskin hõ joharkin emapekana. Laodikiạren biswạsi boehako ar Numphạ ar uniakʼ oṛakʼre menakʼ manḍerrenko hõ johar emakope. Ape ṭhen noa ciṭhipe paṛhao sạt lekhan Laoidikiạ reakʼ manḍerre hõ noa ciṭhi paṛhao ocoakope, ar Laodikiạ manḍerre lạgitʼ okaṭakʼ ciṭhi kolokʼ ona hõ ape do paṛhao ańjompe. Arkippus do noa katha lạiaepe, “Probhuakʼ sapʼ dapʼ reakʼ okaṭakʼ kạmi emakatʼme ona purạu lạgitʼ moneakʼme.” Iń Pạul do ińakʼ tite noa johar kathań oleda. Disạipe iń doń kạidi kana. Isore dayawape ma. Isor Baba ar Probhu Jisu Mạsi tulucʼ mitʼakan Thessaloniki manḍerrenko ṭhen, Siluạnus, Timothi, ar iń Pạul do noa ciṭhile oleda. Aboren Isor Baba ar Probhu Jisu Mạsi do daya ar suluke dan ape ma. Koejoṅre sanamko siń sạṭupʼ disạpe tulucʼ ale do Isorle gun manao joharae kana. Biswạs khạtirte okape kạmikan, dulạṛ khạtirte okape mehnotetʼkan ar aboren Probhu Jisu Mạsire as akan iạte okape sombhuriyetʼ, ona katha do jaoge aboren Isor Baba samaṅre koejoṅrele disạyeda. Isorren dulạṛiạ boehakotiń, alele baḍaea, unige ape doe bachao akatʼpea, ente alele porcar akatʼ bhage sombat do eken katha motote do baṅ seṭer akatʼpea, menkhan daṛete, sonot Jiute ar purạ khạṭi salakʼ hecʼatʼpe tahẽkana. Ape sãote tahẽkan jokhecʼ apeakʼ bhạlại lạgitʼ cetʼ lekale colonetʼkan tahẽkan ona mape baḍaege. Ạḍi lekan santao talate hõ sonot Jiuakʼ rạskạ salakʼ ona bhage sombat ataṅkate ape do ale ar Probhurenko lekape coloneda. Onate Makedoniạ ar Akhaea Prodesren sanam biswạsiko ṭhen ape do mitʼṭen nạmunape hoeakana. Eken Makedoniạ ar Akhaea Prodes motorege ape ṭhen khon Probhuakʼ katha pasnao akana ona do baṅ, menkhan Isorre apeakʼ biswạs reakʼ katha hõ sanam jaegarege seṭer akana. Ar noa babotre aleakʼ do mementeakʼ cetʼge jạruṛ bạnukʼtalea, ente cetʼ lekape ataṅ daram akatʼle ona do hoṛkoko baḍae ocoyetʼlea. Onko do arhõko baḍae ocoakatʼlea je, ape do boṅga buruko ṭhen khon ruạṛkate cetʼleka jiwetʼ ar sạri Isor ṭhenpe hecʼakana jemon unipe sewawaete, serma khon uniren Hoponakʼ hijukʼpe ńel hor akae tahen. Uni Hopongeye hoyokʼ kana Jisu, one okoe do gocʼko khone jiwetʼ beretʼkede. Ar Isorakʼ oka sạjại pheḍ hijukʼkan ona sạjại khon uni Jisuge abo doe rukhiyạ bona. E boehako, baḍaegeape, ape ṭhen aleakʼ calakʼ do ạuṛiakʼ baṅ hoeakantalea. Ar noa katha hõpe baḍaegea, noa lahare ale do Philipi nagraharele khed ocolena ar bemanot hõle bemanot ocolena. Menkhan noa tạkicʼakʼko tahẽkanre hõ aboren Isor ṭhen khon dil ńamkate uniakʼ bhage sombat reakʼ katha ale do khulạsategele lạiyatʼpe tahẽkana. Aleakʼ solha do bulạuteakʼ do baṅkana, ar bạṛicʼ monsubạ hõ baṅa, se phor phunditeakʼ jãhãn katha hõ bale roṛeda; bickom lek kanale mente bhage sombat baḍae ocoko reakʼ bhar Isor do alereye emakatʼte ona lekatele roṛeda. Manwa kusi ocoko lạgitʼ do baṅ menkhan okoe aboakʼ ontore biḍạu aṭkaretʼ uni Isor kusi ocoye lạgitʼgele roṛeda. Baḍaegepe heṛem heṛem kathako do tishõ bale roṛakada, ar lalocakʼko okokate bulạuakʼ jãhãn katha hõ bale roṛakada, Isorge onaren goha do. Hoṛko ṭhen khon, metakʼme ape ṭhen se eṭakʼ jãhãeko ṭhen khon sarhao ńam reakʼ do bale kurumuṭu akada. Ale do Mạsiren apostolko lekate aleakʼ ạidạri ape cetanrele khaṭao daṛekea, menkhan ona bodolte cetʼleka gogo do acʼren gidrạkoe jotonetʼko, onkage ale hõ apeko talare tahen jokhecʼ lạlu bạcule beoharleda. Apere khạndri dulạṛ menakʼtalete eken Isorakʼ bhage sombat moto do bale emapekana, bickom ape lạgitʼ apnarakʼ jiwi sudhạ emokʼ lạgitʼ hõ rạjigele tahẽkana, ente aleren do ạḍi dulạṛiạko kanape. E boehako, aleakʼ mehnot ar kosṭo reakʼ katha do khạṭigepe disạ akada. Ape ṭhen Isorakʼ bhage sombat porcar jokhecʼ ale do siń ńindạle mehnot akada, jemon ape okoeren bojha hõ alole hoyokʼ. Ar okoekope pạtiạu akan, ape tulucʼ aleakʼ beohar do, sonot, dhorom ar niphuṭge tahẽkana, ar onaren gohako do Isor ar apege. Baḍaegeape, cetʼleka apat do acʼren gidrạkoe udgạuetʼko ar jiwi raṛecʼe emakokan are bintiyako kan, onkage ale hõ ape mimitʼkole ematʼpea, jemon Isorren hoṛ hoekate lek lekape colon. Isor do acʼakʼ nijakʼ rajosṭi ar ṭhonokren bhạgiạdarko hoyokʼ lạgitʼe hohoape kana. Ale do siń sạṭupʼ Isorle gun manao joharae kana, ente Isorakʼ katha ańjomkate tinrepe pạtiạulena unre manwawakʼ katha mente do baṅ, menkhan Isorakʼ katha mentegepe ataṅkeda. Ar sạrige ona do Isorakʼ katha kangea. Ape okoepe pạtiạu akan, apeakʼ ontorrege ona katha doe kạmiyeda. E boehako, Jihudạ Prodesre Mạsi Jisure kolom mitʼakan Isorakʼ oka manḍerko menakʼ, onkage ape hõpe hoeakana. Jihudikoakʼ tite onko do oka duk ar kosṭoko jomakatʼ, onkage ape hõ apnar disạmren hoṛkoakʼ tite duk ar kosṭope jomakada. Onko Jihudikoge Probhu Jisu ar nạbikoko gocʼ letʼkoa, ar ale hõko khedletʼlea. Onko do Isorko monduk ocoakadea, ar sanam manwako cetanre bạiri mon menakʼtakoa. Onko do aleko tạkicʼ darametʼlea jemon boṅgan hoṛ jạtrenko kại khon bańcaoko lạgitʼ jãhãn kathako alole lại daṛeako. Nonkate onko Jihudiko do siń sạṭupʼ kại cetan kạiko bojha joṅkana, ar Isorakʼ edre do purạte onkore hecʼ paṛaokʼ kana. Ado E boehako, mon secʼte baṅre hõ hoṛmo secʼte ape ṭhen khon thoṛa ghạṛicʼ lạgitʼle begar akana. Onate gagoc mon salakʼle kurumuṭuleda jemon arhõ ape tulucʼle ńepel ńapam daṛeakʼ. Onate ale do, asokaete iń Pạul do ạḍi dhaoge ape ṭhen hijukʼiń menletʼ tahẽkana, menkhan Soetan do aleye tạkicʼ daramletʼlea. Ente aboren Probhu Jisui hijukʼre apege cetʼ uni samaṅre aleakʼ as, rạskạ ar ṭhonok reakʼ mukuṭ dope baṅkana? Sạrige, apege aleakʼ ṭhonok ar apege aleakʼ rạskạ do. Ale do tinre ar bale sahao daṛeada unre Athens nagrahare eskarge tahenle goṭaketʼte aleren boeha Timothile kolledea. Uni do Mạsi reaṅ bhage sombat lại jạhir kạmire Isorren sapʼdapʼicʼ kanae. Ale dole kolledea jemon apeakʼ biswạse kajak ocoetape are udgạu daṛeape, jemon noako duk ar sasetrepe paṛaolenre okoe hõ alope pạc ruạrokʼ. Ar ape hõpe baḍaegea, duk ar saset do abon lạgitʼ dohoakana. Duk saset do abore hijukʼgea ona katha do ape tulucʼ tahẽkan jokhecʼre bar barteń lại akatʼpe tahẽkana, arpe baḍaegea, onkage hoeakana. Onate iń do tinre bạń sahao daṛeada unre pạtiạu secʼte oka dosare menakʼpe ona baḍae lạgitʼge Timothiń kolledea. Iń doń botorokʼkan tahẽkana, hoedaṛeakʼa Soetan do laloce udukʼakatʼpea ar aleakʼ sanam mehnot do ạuṛiakʼ akantalea. Ńitokʼ Timothi ape ṭhen khone ruạr hecʼen khan apeakʼ dulạṛ ar biswạs reaṅ bhage khoborgeye ematʼlea. Uni doe lạiyatʼlea jaoge ape do dulạṛ montepe disạyetʼlea, ar cetʼ lekale uihạretʼpe onkage ape hõpe uihạretʼlea. Onate E boehako, Timothiakʼ moca khon apeakʼ pạtiạu reaṅ katha ańjomkate joto lekan haron ar kosṭorehõ ale do jiwi raṛecʼle ńam akada. Probhure apeakʼ pạtiạu kajak akae tahen khan ale do bhạgankole hoyokʼa. Ape khạtirte Isor samaṅre aleakʼ oka rạskạ, ona bodolte okalekate ape iạte unile sarhaoea ona do bale baḍaea. Ale do siń ńindạ Isorle nehõrae kana, jemon ape tulucʼle ńepel ńapam daṛeakʼ ar apeakʼ biswạsre oka reṅgecʼ menakʼtape onale purun daṛeakʼ. Ado aboren Isor Baba do acʼ ar aboren Probhu Jisu ape ṭhen calakʼ hor jemone sạriạuale. Ale cetʼlekale dulạṛetʼpe ṭhik onkage Probhu hõ ape mimitʼkore jemon dulạṛe baḍhao ocoete sareṛokʼtape. Enḍekhan uni do apeakʼ ontore kajak ocoetapea, jemon aboren Probhu Jisu do acʼren sanam hoṛko soṅgekateye hijukʼre aboren Isor ar Baba samaṅre niphuṭ ar sonotkope hoyokʼa. Ado E boehako arhoń mena, Isor kusi ocoye lạgitʼ cetʼleka colon lek kan ona sikhạuna do ale ṭhen khonpe ńamakatʼgea, ar sạrige ape do onkagepe colonetʼ kana. Enhõ Probhu Jisu secʼte solha arle nehõrape kana jemon arhõ bạ̃ṛti onkalekape colon. Probhu Jisu ṭhen khon ạidạri ńamkate okakole hukum akawatʼpe ona dope baḍaegea. Isorakʼ monejoṅakʼ do noage, jemon sonotkope hoyokʼ, metakʼme sanam lekan loṭghuṭi khon sahaṛ akae tahenpe, ar okoe Isor bako baḍae akade onko boṅgan jạtren hoṛkoakʼ jel reakʼ sana leka do alope colona, bickom mimitʼko apnarakʼ hoṛmo sonot ar manot salakʼ sambṛao doho reakʼ cetʼ joṅpe. Noa babotre okoe hõ jemon jãhãe boeha behok lekate aloe ṭhokaye. Ale do laharegele lại akatʼpea arle sontorakatʼpea, noako behok iạtege Probhu doe sạjạipea, ente Isor do be sapha lekate calakʼ lạgitʼ do baṅ, menkhan sonot lekate senokʼ lạgitʼgeye hohoakatʼ bona. Onate okoe noa cecetʼakʼ bae hetawakʼ uni do manwa do baṅ, bickom okoe acʼren sonot Jiue dan akatʼpe uni Isorge bae hetawae kana. Boeha dulạṛ reaṅ olape do jãhãn jạruṛ bạnukʼa, ente Isorge ape mimitʼko dupulạṛokʼe cetʼ akatʼpea. Ape do sạrige Makedoniạ disạmren sanam boehakope dulạṛetʼkoa. Menkhan E boehako, ape ṭhen aleakʼ nehõr do noage, apeakʼ dulạṛ do arhõ sareṛokʼtape ma. Okaṭakʼle hukum akawatʼpe onaka leka nindhạn jion khemao, ar apnarakʼ kạmire jamaṛ akae tahente apnar tite mehnot reakʼ ahkaokʼpe, jemon apeakʼ noa bhage cạl-colon iạte bahreren hoṛko ṭhen manotpe ńam ar eṭakʼkore ṭehãḍokʼ reakʼ jạruṛ alo hoyokʼtape. E boehako, gocʼ akankoakʼ cetʼ hoyokʼ takoa ona reaṅ bin baḍaepe tahen do bale menjoṅ kana, jemon as bạnukʼtako hoṛko leka dukte alope hadosokʼ. Jisui gocʼlena are jiwetʼ beretʼena mente bon pạtiạukʼkanre abo do noa hõ bon pạtiạukʼ kana, okoe Jisu tulucʼ kolom mitʼkateko gocʼ akan Isor do onko hõ Jisu sãoteye idikoa. Probhuakʼ cecetʼakʼ lekatege apele lạiape kana, okoe jiwetʼ menakʼ bon ar Probhuakʼ ruạṛ hijukʼ hạbicʼ jiwetʼ bon tahen, abo do oka lekate hõ onko gocʼ akanko lahare oho bon calaolena. Ar ãṭ aṛaṅte hukum são sãote maraṅ utạricʼ goḍetakʼ hoho ar Isorakʼ siṅgạ reakʼ saḍe soṅgete Probhu do serma khone pheḍ hijukʼa. Ar okoe Mạsi tulucʼ mitʼkateko gocʼ akan onkoge pạhilreko jiwetʼ beredokʼa. Ona tayom do okoeko jiwetʼ ar sarecʼ menakʼ bon, abo hõ sermare Probhu sãote ńapamokʼ lạgitʼ onko tulucʼ rimilre bon rakapʼ ocokʼa. Ar nonkate abo do jaejug hạbicʼ Probhu sãote bon tahena. Ona iạte noako kathate ape apere jiwi raṛejtape. E boehako, oka okte ar oka dinre ona hoyokʼ, ona reaṅ thoṛa olape reakʼ do jãhãn jạruṛ bạnukʼa. Ape do pusṭạutepe baḍaegea, ńindạ cetʼleka kombṛoe hijukʼa, onkage Probhuakʼ ona din hõ hijukʼa. Ar tinre hoṛko mena, “Suluk hoeakana, botor reakʼ do cetʼge bạnukʼa,” Unre bhạrti hoṛmo maejiuko acka bedon rakapʼako leka onko hoṛ doko ḍahao maraokʼa. Ar oka lekate hõ bako rukhiyạ daṛeakʼa. Menkhan E boehako, ape do ńutre bạnukʼpea, onate ona din kombṛo leka hecʼ paṛaoapea mente. Ape sanamkoge marsal ar sińren hoṛ kanape. Ar ńindạ se ńutren hoṛ do bon baṅkana. Onate eṭakʼko leka alo bon jạpitʼ joṅma, bickom jagwar akae bon tahente apnar bon sambṛaokʼma. Okoeko jạpid onko do ńindạgeko jạpida, ar okoeko bulokʼ onko do ńindạgeko bulokʼa. Menkhan abo do sińren hoṛ kanabon; onate koṛam aḍ lạgitʼ pạtiạu ar dulạṛte koṛam aḍkate ar bohokʼ aḍ lạgitʼ bańcaokʼ reakʼ as bohokʼre horokʼkate delaṅ apnar bon sambṛaokʼma. Sạjại ńam lạgitʼ do baṅ bickom aboren Probhu Jisu Mạsi hotete bańcao ńam lạgitʼge Isor doe ṭhik dohoakatʼ bona. Mạsi do abo lạgitʼe gocʼlena, onate jiwetʼ bon tahen ar bon gujukʼ, abo do jemon uni tulucʼ jiwetʼ bon tahen. Onate ńitokʼ okape cekayetʼkan onkage mimitʼko udgạu emakope ar ape mimitʼko benao rakabokʼpe. E boehako, nehõrape kanale, okoe ape talareko mehnotetʼkan, ar Probhureko calaoetʼpe arko sikhạu paṛhaoetʼpe, onko baṛe manotkope. Onko okako cekayetʼkan ona lạgitʼ dulạṛ monte manotkope. Ar ape apere sulukte tahenpe. E boehako, ale do noale sikhạuetʼpe kana, okoeko kuṛhiạge onko sontorkope; ar okoeakʼ dil bạnukʼtako onko do dil emakope; okoeko nijorge onko goṛowakope ar sanamko secʼ sombhurikate sapahaope. Ńelpe, okoe hõ bạṛicʼ bodol bạṛicʼ jãhãe aloe halawaema. Ape do jaoge eṭakʼ sanamko lạgitʼ bhạlại reakʼ kurumuṭuipe. Jao okte rạskạkʼpe, ar mitʼ talao koejoṅpe, jotowakʼre Isor gunmanao joharaepe; ente Jisu Mạsi hotete ape lạgitʼ Isorakʼ monejoṅakʼ do noakangea. Sonot Jiu do alope ĩṛĩjea. Okoeko nạbi lekate Isorakʼ kathako lạiyetʼkan, onkoakʼ kathako alope nihạt giḍiya, bickom jotowakʼko biḍạu aṭkarpe. Bhageakʼ sapʼ doho joṅpe, ar joto lekan bạṛicʼakʼ khon sahaṛ akae tahenpe. Sulukren Isor do acʼgeye sonot utạrpema, ar aboren Probhu Jisu Mạsiye hijukʼre apeakʼ hoṛmo, mon ar jiu purạ puri bin dusạn baṛe dohoetape. Disạipe, okoeye hohoakawatʼpe uni doe pạtiạrgea; ar uni do khạṭigeye onkaea. E boehako, ale lạgitʼ koejoṅpe. Dulạṛ monte jotoko joharakope. Iń do Probhu ńutumte noań hukumape kana, jemon noa ciṭhi sanam boehako ṭhen paṛhao ańjomokʼ. Aboren Probhu Jisu Mạsiakʼ daya ape tulucʼ baṛe tahen ma. Isor Baba ar Probhu Jisu Mạsire kolom mitʼakan Thessoloniki manḍerrenko ṭhen iń Pạul, Siluạnus ar Timothi do noa ciṭhile oleda. Isor Baba ar Probhu Jisu Mạsi do daya ar suluke dan apema. E boehako, ape ńutumte jao okte Isor gun manao johar emae lek kantalea. Apeakʼ pạtiạu do ạḍitetʼ baḍhao idikʼ kana ar ape mimitʼkoakʼ dulạṛ ape apere sarhe idikʼkante ale do sarhao emokʼ lek kantalea. Ar onatege Isorakʼ manḍerkore ale do ape iạtele sarhaokʼkana, ente okako khed ar duk sasetpe sahaoetʼkan ona talare hõ apeakʼ sombhuri ar pạtiạu do ṭarhao menakʼa. Ar noakoge Isorakʼ dhorom bicạr reakʼ mitʼṭen porman kana. Noa reakʼ monsubạ do hoyokʼ kana, jemon Isorakʼ rajosṭire lekmanko mentepe lekhakʼ. Ar ona iạtege ape do nunạkʼ dukpe sahao akada. Isorakʼ dhorom bicạr do noage, okoe apeko duk ocoyetʼpe uni hõ onkoe duk ocokoa; ar ape okoe do dukpe ńametʼ uni do ale sãoteye aosanpea. Probhu Jisu do tinre acʼren daṛean serma goḍetko sãote jolokʼkan seṅgelre serma khone sodorokʼa unrege noako do hoyokʼa. Okoe Isor bako baḍae akade ar Probhu Jisu reaṅ bhage sombat reakʼ katha bako bataoetʼkan unre uni do onkoe sạjạikoa. Probhu tinreye hijukʼa unre nonkae sạjạikoa one onate onko do uniakʼ hạjirokʼ ar maraṅ daṛe khon bahrereko ńurokʼte jaejug hạbicʼko marao utạrokʼa. Ona dinre acʼren hoṛko hotete acʼakʼ ṭhonok sodorokʼa ar okoeko pạtiạu akan onko sanamko hotete uniakʼ man hoyokʼtaea. Ape hõ onko pạtiạu akanko modrenko kanape, ente ape do aleakʼ goharepe pạtiạu akana. Onate ale do jaoge ape lạgitʼle koejoṅ kana jemon aboren Isor do hoho ocokʼ lek menteye bujhạupe, ar acʼakʼ daṛete apeakʼ sanam bhage kạmi reakʼ monejoṅakʼe purạutape ar biswạsi iạte okakope kạmikan onare jemone sạbit utạrpe. Enḍekhan aboren Isor ar Probhu Jisu Mạsiakʼ dayate aboren Probhu Jisuakʼ ṭhonok do ape hotete sodorokʼa, ar apehõ uni hotetepe ṭhonok ocokʼa. E boehako, aboren Probhu Jisu Mạsi doe hijukʼa ar mitʼ sãote jarwakate acʼ ṭhene idibona. Ar noa babotre ale do noale nehõrape kana, “Probhuakʼ din do seṭer akana,” Noate nạbi lekate roṛakatʼ johar kathate se eṭakʼ jãhãeakʼ kathate se aleakʼ olakʼ menkate jãhãn ciṭhi iạte ape do usạrate alope bilbilạukʼa se alope botorokʼa. Okoe hõ jemon aloko bulạupe, ente ona din hijukʼ lahare Isor birudre maraṅ bhiṅgṛạu hoyokʼa, ar uni nonosṭoren hopon, one okoe do maraokʼ reakʼ katha menakʼtae uniye sodorokʼa. Isor mementeakʼ cetʼko menakʼ onako sanamakʼ birudre ar sewa ocokʼ jotowakʼ birudreye teṅgokʼte uni do apnarte maraṅe udugokʼa; ar Isorakʼ mundilre duṛupʼkate acʼge Isor menteye udugokʼa. Iń do tinre ape ṭheniń tahẽkana unre noako kathageń lạiape kan tahẽkan, ona do cetʼ bape disạyeda? Uni nonosṭoren hopon jemon okte lahare aloe sodorokʼ onate okaṭakʼte ńitokʼe akoṭ ocoakan ona mape baḍaege. Ape do noa hõpe baḍae akada je, nonosṭoren hoponakʼ okoakʼ kạmiko do ńithõ calakʼ kangea, menkhan okoe uniye akoṭ dohoakade uni ạuriye ocogokʼ hạbicʼ akoṭetegeye tahena. Ar ona tayom do uni nonosṭoren hopone sodorokʼa. Probhu Jisu do acʼakʼ moca reakʼ sãhetʼteye maraoe utạrea ar acʼakʼ ṭhonokteye sodorokʼte uniakʼ daṛeye cabaetaea. Ar nonosṭoren hopone hijukʼre uni soṅgete Soetan reakʼ daṛe hõ tahena. Ona daṛe do joto lekan eṛe cinhạ ar hahaṛa ar daṛe kạmi hotete sodorokʼa. Ar nosṭokʼkan horte laha akan hoṛko bulạuko reakʼ joto lekan bulạuakʼ hotete, noko hoṛ doko maraokʼa, ente kại khon bańcao ńam lạgitʼ sạriakʼtetʼ do bako dulạṛ akada ar ataṅ hõ bako ataṅ akada. Onate Isor do onko ṭhen nonkan mitʼṭen daṛeye kola onate bhul horteye idikoa, jemon eṛeakʼreko pạtiạukʼ. Ar okoe sạriakʼre pạtiạukʼ baṅkate behokakʼ kạmire rạskạko ńametʼkan onko sanamko uni doe bicạr dusikoa. Probhure dulạṛiạ boehako, ape ńutumte jaoge Isor gun manao joharae lek kantalea, ente kại khon bańcao ńam lạgitʼ Isor do pạhil khongeye bachao doho akatʼpea. Sonot Jiu hotete Isor lạgitʼe begar doho akatʼpete ar bhage sombat reakʼ sạriakʼre apeakʼ biswạs hotete kại khon bańcaope ńamakada. Ale oka bhage sombatle porcaretʼkan ona hotete bańcao ńam lạgitʼ uni doe hohoakatʼpea, jemon ape do aboren Probhu Jisu Mạsiakʼ ṭhonok reakʼ bhạgiạdarkope hoyokʼ. Onate E boehako, teṅgo ṭak akae tahenpe, ar aleakʼ ciṭhite se kathate okaṭakʼle lại cetʼ akawatʼpe ona sapʼ doho akae tahenpe. Aboren Probhu Jisu Mạsi ar Isor Baba do apeakʼ ontorreye udgạupema ar sanam bhage kạmi ar kathareye kajak ocopema. Unigeye dulạṛketʼ bona are dayawatʼbonte asambheṛ udgạu ar purạ rạskạ reakʼ ase dan akatʼ bona. E boehako mucạtʼ katha do noage, ale lạgitʼ koejoṅpe cetʼleka Probhuakʼ katha ape talare usạra pasnaolen onkage ona do pasnao idikʼte ṭhonokokʼtege tahena. Arhõ koealepe jemon becol ar bạṛicʼ hoṛakʼ ti khon rukhiyạle ńam, ente sanamkoge biswạs menakʼtakoa ona do baṅa. Menkhan Probhu doe pạtiạrgea; unige ape doe kajak ocopea ar Soetanakʼ ti khone rukhiyạpea. Probhu tulucʼ jopoṛao menakʼpete ape reaṅ noa pạtiạu menakʼtalea je, ale okakole hukum akatʼpe ona lekagepe kạmi kana ar kạmi iditegepe tahena. Probhu do apeakʼ ontor Isorakʼ dulạṛ horte ar Mạsiakʼ sombhuri horteye ạyur iditapema. E boehako, aboren Probhu Jisu Mạsi ńutumte noale hukumape kana, judi jãhãe ḍhilisiliye colonetʼ khan ar ale ṭhen khon oka cecetʼakʼpe ńamakatʼ ona bae senakʼ kan khan, enḍekhan uni tulucʼ do alope helmelokʼa. Baḍaegeape cetʼlekate ale leka colon lek tapea mente. Ape talarele tahẽkan jokhecʼ ale do ḍhilisili bale colonleda, se begor damte okoeakʼ jomakʼ hõ bale jomleda. Ale do siń ńindạle mehnot akada arle kosṭo akana, jemon aperen bojhako alole hoyokʼ. Ape ṭhen khon goṛo ńam reakʼ ạidạri bạnukʼtale ona do baṅa, menkhan jemon ale lekape colon onate nonka kạmikatele udukʼatʼpe tahẽkana. Ape ṭhen tahẽkan jokhecʼgele hukumatʼpe tahẽkana, jãhãe kạmi baṅ sanayede khan uni do jom hõ aloe jomma. Alele ańjomeda ape modre adomko do ḍhilisiliko coloneda, ar kạmige bako kạmikana, bickomko ajare baṛayeda. Aboren Probhu Jisu Mạsi iạte nonkan hoṛkole hukumako kana arle sikhạuetʼko kana, jemon onko do nindhạn monte kạmikate akoakʼ jomakʼ apnarteko jogaṛ joṅ. E boehako, bhageakʼ kạmi kạmite alope bhagaokʼa. Noa ciṭhire olakʼ aleakʼ katha jãhãe bae batao khan, enḍekhan uni do ńel oromkaepe. Ar uni tulucʼ ape do gate hõ alope gatekʼa jemone lajaokʼ. Menkhan uni do bạiri mente hõ alope hudisea, bickom boeha mente bujhạuaepe. Sulukren Probhu do acʼge sanam okte jotowakʼre suluke dan ape ma. Probhu do ape sanamko tulucʼe tahenma. Niạ johar katha do iń Pạulge apnarakʼ titeń oletʼkana. Ar noage ińakʼ mimitʼ ciṭhi reakʼ cinhạ do; ar nonkageń oletʼa. Aboren Probhu Jisu Mạsiakʼ daya ape sanamko tulucʼ baṛe tahenma. Iń pạul do aboren babańcaoicʼ Isor ar Jisu Mạsiakʼ hukumte apostoliń hoeakana. Ar aboakʼ sanam as do Mạsi Jisurege. Biswạsi lekate sạri gidrạtiń Timothi ṭhen noa ciṭhiń oleda. Aboren Isor Baba ar Probhu Jisu Mạsi do daya, mãyã ar suluke dan am ma. Makedoniạte calakʼ jokhecʼ cetʼ lekań galmaraoatʼme tahẽkan ńitokʼ hõ onkageń metam kana, am do Ephesus nagraharege tahẽ hataṛokʼme, jemon adom adom hoṛem hukumako onko do judạwakʼ alo jemonko lại cecetʼ. Ar noa hõm hukumakoa jemon onko do kạhniko ar maraṅ maraṅ bõs budạkore mon aloko lagao. Noako do Isorakʼ kạmi baṅkate ạḍi lekan roṛ ropoṛe janam ocoya menkhan Isor cetʼlekate acʼakʼ kạmiye ạyura ona do biswạs hotetege baḍaeyokʼa. Noa hukum reakʼ monsubạ do hoyokʼ kana dulạṛ udgạu ocoe. Noa dulạṛ do niphuṭ ontor, sapha bibek ar sạri biswạs khon hijukʼ kana. Adom hoṛ do noako khon ocokʼkate ạuṛi sạuṛi roṛ baṛae secʼgeko ghańjeṛ akana. Onko do nijạrakʼ kathage bako bujhạueda ar okaṭakʼ reaṅ murukteko roṛetʼkan ona do bako baḍaere hõ Moseakʼ ạn-ạriren guru hoyokʼko menjoṅkana. Baḍaegea bon ạn do bhagegea, khạjuk jãhãe ṭhik leka kạmireye lagao. Ar noa hõ bon baḍaea, jãhãe dhorom hoṛ lạgitʼ noa ạn do baṅ emakana; menkhan bemanotko, bebataoko, bebhoktiko, kại hoṛko, besonotko, bedhoromko, eṅgat-apat gogocʼko, khũniạhiko, loṭghuṭiko, jojognako, hoṛ kiriń-ạkhrińko, eṛe katha roroṛko, eṛe goha emokʼko, sạri sikhnạt birudre eṭakʼ jãhãnakʼko kạmikan onkanko lạgitʼge noa do emakana. Ṭhonokren Isorakʼ maraṅ bhage sombat lekate okaṭakʼ cecetʼakʼ menakʼ, onage hoyokʼ kana sạri cecetʼakʼ. Ar noa bhage sombat porcar reakʼ dạyik do iń cetanreye emakada. Aboren Probhu Jisu Mạsi, okoe do daṛeye emakawạdiń, uniń gunmanao joharae kana, ente uni do pạtiạricʼe bujhạukedeńte acʼakʼ sapʼdapʼ kạmireye dhurạu akadińạ. Lahate Mạsiyiń opomane kan ar khekhedicʼ ar ṭhok hoṛiń tahẽkanre hõ uni do noa kạmireye bahalkedińa. Uni do ińe daya akawạdińa, ente bepạtiạukʼ ar bin baḍae iạte iń do onakoń kạmikan tahẽkana. Aboren Probhu do asambheṛe daya akawạdińa ar Jisu Mạsi tulucʼ iń kolom mitʼakante oka biswạs ar dulạṛ menakʼ onae dan akawạdińa. Noa katha do sạrikana ar purạ puri ataṅ reakʼ hõ lek kana je, kại hoṛ bańcaoko lạgitʼge Jisu Mạsi do noa dhạrtiteye hecʼlena. Ar onko kạkạiko modre iń kangeạń maraṅ kạiyan hoṛ do. Onate Isor do ińe mãyã akawạdińa, jemon iń maraṅ kạiyan hotete Jisu Mạsi do acʼakʼ asambheṛ soboriye udukʼ daṛeakʼ. Ar unire pạtiạukʼ hotete okoe jaejug jionko ńam onko jemon iń ńelteko cetʼ daṛeakʼ onate uni do ińreye nonka akada. Okoe doe jaejugren rajkan, okoe doe bin maraokʼicʼkan ar one okoe do bae ńelokʼkan, uni mitʼ Isorakʼ man ar ṭhonokge jug cetan jug hoyokʼtae ma. Amen. E bachatiń Timothi, am reaṅ eṭakʼko nạbi lekate oka kathako lạiletʼ ona katha lekage iń do noań hukumam kana. Ar noa katha disạ dohoe tulucʼ am do Mạsi khạtirte jiwi alaekate ma lạṛhạime. Ona sãote biswạs ar bhage bibek dohojoṅme. Adom hoṛ do bibek reakʼ katha bako ańjometʼkante biswạsre tạkicʼakʼko janam ocoyeda. Onko hoṛ modre Humenaeos ar Aleksander hõ menakʼkinạ. Onate unkin do Soetanakʼ tireń aṛakʼ akatʼkinạ, jemon noa sikhạunakin ńam baṅma, Isor opomane do baṅ ṭhika. Pạhilregeń meneda, sanamko lạgitʼ nehõr, koe, aroj ar gun manao hoyokʼ ma. Nonka leka rapajko ar napṛakʼ hudạwanko lạgitʼ hõ koejoṅ hoyokʼa, jemon Isor bhokti ar dhoromte man salakʼ khạtir ar sulukte din bon khemao daṛeakʼ. Aboren babańcaoicʼ Isorakʼ mẽtʼãhã samaṅre ona do bhagegea ar onatege uni doe kusikʼa. Uni doe menjoṅkana sanamkoge jemon kại khon bańcaoko ńam ar Mạsi reaṅ sạri khạndritetʼko baḍae daṛeakʼ. Isor doe mitʼ goṭengea ar mitʼ goṭengeae Isor ar manwakoren dene banar renicʼ hõ. Uni doe hoyokʼ kana Jisu Mạsi. Uni do sanam manwako chaḍaoko reakʼ dam lekate acʼakʼ jiwigeye emena. Isore ṭhik dohoakatʼ oktere ona reaṅ goha do em akana, ar noa goha emokʼ lạgitʼ Isor do lại jạhiricʼ, apostol ar boṅgan hoṛ jạtrenko ṭhen biswạs ar sạriạkʼren cecetʼicʼe bahal akadińạ. Iń do sạriakʼgeń roṛeda, eṛe do baṅ. Ińakʼ monejoṅakʼ do noage herel hopon do sanam jaegare edre se jhogṛa baṅkate sapha monte sonot ti tulkate jemonko koejoṅ. Noa hõń khojkana maejiuko do mạ̃hir ar bhage bud akel salakʼ horokʼ bandere sambṛaokʼ ar lek lekako sajaokʼma. Onko do nana parkan galaṅ upʼ ar sona se mạnik se damanakʼ kicricʼkote aloko sajaokʼma. Ona bodol bhage kạmikoteko sajaokʼma. Okoe maejiu apnar do Isor bhokti kanako menteko monejoṅkan onko maejiu lạgitʼ do onka hoyokʼge lek kana. Maejiuko do hapegeko tahenma ar purạ puri tabere tahẽkateko cetʼ joṅma. Lại cecetʼre ar herel cetanre mạliki calao do okoe maejiu hõ bạń aṛakʼako kana. Bickom onko do thirgeko tahenma. Ente pạhilre Adamgeye gaṛhao maṛaṅlena; ar ona tayom do hawage. Ona chaḍa Adam do bae bulạu maṛaṅ ocolena, menkhan maejiugeye bulạu ocolena ar Isorakʼ hukume bebataokeda. Menkhan maejiuko do gidrạ janamko hoteteko bańcaokʼa; khạjuk sambṛao salakʼ biswạs ar dulạṛ ar sonotokʼreko tahẽ idikʼ. Noa katha do sạrikangea je, jãhãe manḍerren ạyuricʼ hoyokʼe menjoṅkan khan uni do mitʼṭen bhage kạmi lạgitʼgeye gagojokʼ kana. Onate manḍer ạyuricʼ do nonkanicʼ hoyokʼ jạruṛa jemon okoe hõ uni do aloko dusi daṛeae. Uniren do mitʼṭen erae tahentaema. Uni do sote ar apnarte sambṛaokʼicʼ ar bhage bud akel tahen jạruṛtaea. Uni do soṛa ar peṛayicʼ hoyokʼ jạruṛtaea. Ar eṭakʼko cetʼako reakʼ daṛe hõ tahen jạruṛtaea. Uni do ńu bulokʼicʼ ar dadalicʼ aloe hoyokʼma, jhogṛayicʼ ar ṭaka-poesa lalocicʼ hõ alo, bickom mạ̃hiranicʼe hoyokʼma. Uni do lek leka apnarakʼ gharońj reakʼ jotowakʼe ạyurma, uniren gidrạko do bataoko ar mạ̃hirankoko hoyokʼma. Jãhãe apnarakʼ gharońj calao bae baḍae khan uni do cekate Isorakʼ manḍer doe jotona? Manḍerren ạyuricʼ do nawa biswạsi hoṛ hõ alo jemone hoyokʼ, ente nawa biswạsicʼ do bạḍạiteye phulạukʼa ar Soetan reakʼ bicạrreye khańjo botecʼkokʼa. Bahre hoṛko ṭhen uniakʼ do bhage goha tahen jạruṛtaea, jemon durnamre ar Soetanakʼ jhạlire aloe ńurokʼ. Onkage sapʼdapʼko hõ manot ocokʼ lek jemonko hoyokʼ ar bar mocawanko leka do alo. Onko do ńu bulokʼko hõ jemon aloko hoyokʼma, ar laloc secʼ hõ alo jemonko ạwilokʼ. Onko do sapha bibekte jemon Mạsiakʼ dhorom biswạs reakʼ sạri okoakʼko sapʼ doho daṛeakʼ. Laharege biḍạu maṛaṅko hoyokʼa, ar inạ tayom bin dusạnko sạbudlen khan onko do sapʼ dapʼkoko hoedaṛeakʼa. Onkage onkoren bạhuko hõ manot ocokʼ lekko hoyokʼma. Onko do eṭakʼkoakʼ aloko okta baṛaema ar apnar sambṛao akanko tahenma. Ar jotowakʼre jemon pạtiạrankoko hoyokʼ. Sapʼdapʼicʼren hõ mitʼṭen bạhui tahentae ma. Uni do acʼren gidrạko ar acʼakʼ gharońj mońjteye calao ma. Okoe sapʼdapʼicʼ bhageye kạmikan uni do manote ńama ar Jisu Mạsire pạtiạu iạte uniakʼ ontor do dilte perejokʼtaea. Iń do asiń dohoyeda, usạrage am ṭheniń sen daṛeakʼa. Menkhan jãhãnakʼ iạteń bilom botejokʼ onate am ṭhen noakoń oleda, jemon am hõm baḍae daṛeakʼ Isorakʼ gharońjren hoṛkoakʼ do cetʼ leka colon lek takoa mente. Ar noa gharońj do hoyokʼ kana jiwetʼ Isorakʼ manḍer, one okaṭakʼ do tham-khunṭi ar rehetʼ leka Isorakʼ sạriakʼe sapʼ dohoyetʼkan. Isor bhokti reakʼ sạri okoakʼ je maraṅge ona do jotokogeko aṅgoca. Ona sạritetʼ do noage, Uni do manwa lekateye sodorena; ar Jiureye dhorom ocoyena; serma goḍet do uniko ńelledea; sanam jạtko ṭhen uni reaṅ porcarlena; dhạrtiren hoṛko do unireko pạtiạuena; ar serma ṭhonokre uni doe rakapʼ ocoyena. Sonot Jiu do pusṭạuteye menakada, darakan dinkore adom hoṛ do biswạs khonko bhingṛạukʼa ar bulạu jiuko ar bạṛicʼ jiukoakʼ bintiko moneakʼa. Bibek goṛdho akan nonkan eṛe hoṛkoakʼ phạsiạrate nonka do hoyokʼa. Noko do manwa baṅ baplakʼ lạgitʼko hukumako kana ar adom adom jomakʼ jojomko baron kana. Menkhan biswạsiko, okoe do Isorakʼ sạriakʼtetʼko baḍae akatʼ, onko do gun manao joharkateko jomma ar onatege Isor do noako jomakʼe sirjạu akada. Isore sirjạu akatʼ sanamakʼge bhagegea, onate okaṭakʼ hõ bạṛicʼ hudiskate giḍikakʼ lek do baṅkana; menkhan ona do jemon gun manao joharkate ataṅokʼ, ente Isorakʼ katha ar koete ona do sonot ocokʼ kana. Am do noako reaṅ boehakom bujhạuako khan enḍekhan Mạsiakʼ dhorom biswạs reakʼ okaṭakʼ sạri ar bhageakʼ sikhnạtem manaoetʼkan, onate Mạsi Jisuren mitʼṭen bhage sapʼ dapʼicʼem hoyokʼa. Bhõnḍ ar alatʼ bakatʼ kạhniko khon sahaṛ akae tahenme; ente onako do haṛam ar buḍhikoakʼ benaoakʼ kạhni kana. Ona khon bickom Isor bhokti lạgitʼ hewakʼme. Hoṛmo bhańjaore thoṛa porho do ńamokʼgea, menkhan Isor bhokti do joto secʼ khon porhowanakʼ kana; onare do nahakʼ reakʼ ar darakan jion reakʼ as menakʼa. Noa katha do sạrikangea ar sanam secʼte ataṅ reakʼ hõ lek kana. Onate murukte bon mehnoteda arbon lạgiạ paṛao akana, ente abo do jiwetʼ Isorre bon as akana. Uni do sanam manwakoren babańcaoicʼ kanae, asokaete okoe unireko pạtiạu akan. Ar noako babotre am do hukum emakom ar cetʼakome. Amakʼ koṛa umer do okoe hõ aloko neṅghaotam ma. Menkhan pạtiạuko lạgitʼ nạmuna hoyokʼme, amakʼ kathare, amakʼ cạl-colonre, amakʼ dulạṛre, amakʼ biswạsre ar sonotre. Ar iń ạuriń hijukʼ hạbicʼ am do biswạsikom sikhạu paṛhaokoa, sonot sostorkom paṛhao ańjomakoa, ar lại cecetʼakʼge moneakʼme. Manḍerren murubiko capokateko koeyatʼme tahẽkanre nạbi lekate katha roroṛ hotete okaṭakʼ dan ematʼme tahẽkan, ona daya dan do alom ḍhilạua. Noako kạmi idire mone lagaome; ar onakorege tahẽakan tahenme. Jemon sanamkoko ńelme, am dom laha idikʼkana mente. Am apnar reaṅ ar amakʼ lại cecetʼre sontor akae tahenme. Ar onakore tahẽ akae tahenme, entem onka lekhan apnar hõm bańcaokʼa, ar okoeko ańjomtam onko hõm bańcaokoa. Haṛam hoṛko dos udukʼakore ãṭ kathate alope metakoa; bickom baba leka ạjijakope. Ar juạnko do aperen boehako leka bujhạukope. Buḍhi hoṛko do gogo leka, ar kom umerren maejiuko do miserako leka napaete bujhạukope. Okoe rạnḍi maejiuren celege bạnukʼko onko tojbijkope. Menkhan jãhãe rạnḍi maejiuren gidrạ se goṛom gidrạko tahen khan onko gidrạko se goṛom gidrạkoge pạhilte jemon apan apin gharońjre Isor bhoktiko udugma. Nonkate onko do eṅgat-apat se baba haṛamkoakʼ dulạṛ reakʼ rinko hala ruạṛ daṛeakʼa, ar noatege Isor doe kusikʼa. Okoe rạnḍi maejiuren celege bạnukʼko uni do Isor ṭhen bhorsa akan ar siń sạṭupʼ koejoṅ ar nehõrakane tahenkana. Menkhan okoe rạnḍi maejiu acʼakʼ kusi leka jione khemaoetʼkan uni do jiwetʼ menaere hõ gocʼicʼ lekae hoeakana. Onko do noako babotre hukumakope jemon okoe hõ aloko dusi daṛeako. Okoe acʼren peṛako, asokaete apnar gharońjrenko bae ńel jutko uni do biswạse baṅ akada; ar bepạtiạuicʼ khon hoe bạṛicʼgea. Rạnḍi maejiu do pe isi bochore parom akatʼ khan ar mitʼ herelrege jãwãe akane tahẽkana mente baḍaelen khan enḍekhan uni do tạlikare ńutume ol caṛhao ocoetaema. Ona chaḍa bhage kạmire uniakʼ ńutum do tahen hoyokʼtaea. Ona bhage kạmiko modre gidrạ ạsul harako, bidesiạko peṛa sãohãko, sonot hoṛkoakʼ jaṅga ạbuktako, dukokʼko sohotʼko ar sanam lekan bhage kạmire uni do lạgiạ paṛao akae jemone tahen. Kom umerren rạnḍi maejiuko do alope ol caṛhaokoa, ente tinre hoṛmo reakʼ jala rakapʼakoa unre Mạsi bako botoraete, jãwãeyokʼgeko khoja. Noate onko do lahateakʼ gokʼakʼ rạputʼkate akore sạjạiko ạgujoṅa. Ona chaḍa onko do oṛakʼ oṛakʼko ajare baṛaete kuṛhnikʼko ceda. Eken kuṛhnikʼko ceda ona do baṅ, menkhan nilạjiạ katha ar eṭakʼkoakʼko oktawa ar baṅ ganoakʼ kathakoko roṛa. Onate iń do noań hukumape kana, kom umerren rạnḍi maejiu doko baplakʼma, arko gidrạ eṅgatokʼma, apan ạpin gharońjko ńel todarotma ar teṅgo daramicʼe oktae reakʼ jãhãn dão aloko emaema. Ente adom adom rạnḍi maejiuko do ńitrege Soetanakʼ hor secʼko ghańjeṛ akana. Mạsire biswạs akan jãhãe maejiuakʼ oṛakʼre rạnḍi maejiuko tahen khan unige onko maejiukoe ńel todarotko ma. Noko rạnḍi maejiuakʼ dạyik do manḍerre alo paṛaokʼma, menkhan okoe rạnḍi maejiuren celege bạnukʼko manḍer do onkoe ńel todarotkoma. Manḍerren maraṅ mukhiyạko okoe bes okocʼte manḍerko calaoetʼkan, ar okoe do Isorakʼ kathako porcaretʼkan ar lại cecetʼreko mehnotetʼkan, onko do dobṛa manot ocokʼ lek kanako. Sonot sostore meneda, “Phosol enokʼ jokhecʼ ḍaṅgra do moca alom toltaea.” Arhõ olakana, “Kạmiyicʼ do acʼakʼ kuṛại ńam lek kanae.” Bar se pe hoṛakʼ goha begorte manḍerren jãhãe mukhiyạ birudre jãhãn dos reakʼ katha alom luturakʼa. Okoe mukhiyạko kạkạitegeko tahen onko do manḍerren sanam hoṛko samaṅre nisṛạukom jemon eṭakʼ mukhiyạko hõ botor tahentako. Isor ar Jisu Mạsi ar bachao akan serma goḍetko samaṅreń kạjiạ̃uetʼme kana, okoe secʼ hõ baṅkate noako kạmime ar mẽtʼãhã beṅgetʼakʼte cetʼ hõ alom kạmiya. Usạrate okoe cetanre hõ ti capokate jãhãn hudạre alom bahalea, ar eṭakʼkoakʼ kạikore hõ alom bhạgiạrikʼa, ar napaete tahenme. Ghane ghanem nijorokʼkante hajam lạgitʼ thoṛa thoṛate darkha rasa ńũiyme, ar eken dakʼ do alom ńũiya. Adom adom hoṛakʼ kại do nunạkʼ sodorgea je, ona reakʼ bicạr do laharege hoeakana. Arhõ adom adom hoṛ do kạiye pańja idiyetʼkoa. Onkaleka bhage kạmiko do pusṭạute sodorgea; ar okako eṭakʼ lekateakʼ kan, onako hõ danaṅ do baṅ tahena. Okoe golamiko khạṭaokʼkan onko sanamkoge akoren kisạ̃ṛko manot ocokʼlek menteko bujhạukoma, jemon okoe hõ Isorakʼ ńutum ar aboakʼ sikhạuna aloko nindạu daṛeakʼ. Okoeṭakʼ golam Mạsire biswạs akan ar kisạ̃ṛakʼ gobolre menae uni do biswạsi boeha mente kisạ̃ṛ aloe nihạtema bickom artetʼ bes okocʼte uniakʼ golam reakʼe kạmima, ente uniakʼ kạmite okoeye upkạrokʼkan uni doe pạtiạrgea ar uniren do dulạṛiạ kanae. Ar am do noako katha cetʼakome ar sikhạu paṛhaokom. Jãhãe hoṛ judạwakʼe lại cecetʼ khan ar sạriakʼ kathako, metakʼme aboren Probhu Jisu Mạsiakʼ kathako ar Isor bhokti sikhạunako bae aṅgoc enḍekhan uni do bạḍạiteye phulạu akana. Uni do cetʼge bae baḍaere hõ jhogṛa ar katha rapṭa rạpṭire ạḍi bạ̃ṛtiye capao akana. Noako reakʼ jo do hiskạ, jhogṛa, nindạu, bạṛicʼ hudis, ar mon baṅgla bhat akantako hoṛko talare mitʼ talao gulmal. Noko hoṛkore Isorakʼ sạritetʼ do bạnukʼa; Mạsiakʼ dhorom pạtiạu onko do dhạrti secʼte mitʼṭen lab reakʼ upại menteko bujhạueda. Menkhan kusi monte Mạsiakʼ dhorom biswạs lekate colonle khan do maraṅ labjoṅakʼ kangea. Dhạrtire abo do cetʼge babon ạgu dara akada ar dhạrti khon hõ cetʼge babo idi daṛeakʼa. Onate jomakʼ ar horokʼ bandeakʼ tahen khan abo do dhirpur akae bon tahenma. Menkhan okoe kisạ̃ṛokʼ hoyokʼ sanayetʼko onko do aema lekan biḍạu ar jhạlikoreko paṛaokʼa, ar nonkan bebuj ar laloc mon janamakoa, one onate maraokʼ ar nosṭokʼre hoṛkoe unumetʼko. Ente sanam lekan bạṛicʼakʼ reakʼ rehetʼ do ṭaka-poesa bạ̃ṛti dulạṛ khonge. Ḍher hoṛge ona reakʼ lalocte Mạsiakʼ dhorom pạtiạu khonko ocokʼ akante apnarre ạḍi okocʼ dukteko sobokʼ tapʼakana. Menkhan am do Isorren hoṛ kanam; noako khon men ńirjoṅme. Ar dhorom, Isor bhokti, biswạs, dulạṛ, sobori, ar mạ̃hir baṛe khudạu me. Mạsire biswạs iạte bhage lạṛhại ma lạṛhạime. Oka jaejug jion lạgitʼ Isore hohoakatʼme ona sapʼakae tahenme. Am do ạḍi utạr hoṛko samaṅre amakʼ biswạs reakʼ goham emleda. Isor, okoe do sanamakʼe jiwetʼ ocoyetʼ ar Mạsi Jisu, one uni do Pontus Pilạt ṭhen sạriakʼ reakʼ gohae emletʼ, uni Isor ar Jisu Mạsi samaṅre iń do noań hukumam kana, aboren Probhu Jisu Mạsi ạuriye sodorokʼ hạbicʼ ińakʼ hukumko doho idime, jemon okoe hõ aloko neṅghao daṛeam. Uni maraṅ bhạgan Isor, one uni eskar cakʼlaoicʼ ar rapajkoren raj ar Probhukoren Probhu kan, unige acʼakʼ okte nạpitre Mạsiye sodorea. Isor do gujukʼ gobolren doe baṅkana. Uni do nonkan marsalreye tahenkana one okare okoe manwage bako sen daṛeakʼ. Ar okoe manwa hõ uni do tisge bako ńṭoṭhadea ar bako ńel daṛeaea; uniakʼge man ar jaejug daṛe do. Amen. Noa puriren kisạ̃ṛko hukumakome jemon onko do aloko usul monokʼ ar nasaokʼ dhonre aloko bhorsakʼma, menkhan Isorrege bhorsa akaeko tahenma. Unige mạṅgnite jotowakʼe kulạu anṭao abon kana rạskạte beohar joṅ lạgitʼ. Kisạ̃ṛko hukumakome onko do eṭakʼ hoṛ jemonko bhạlạiko, ar bhage kạmikoreko kisạ̃ṛokʼ, ar em hạṭińko ar mãyã monanko hoyokʼ. Noate apnar lạgitʼ nonkan dhonko jogao joṅa one oka do darakan dinko lạgitʼ mitʼṭen keṭecʼ rehetʼ lekako hoyokʼte, sạriakʼ reakʼ jionko sapʼ dohojoṅ. E Timothi, oka jogao doho lạgitʼ jimạ akawatʼme ona do bes okocʼte horho doho akae tahenme; ạuṛiakʼ akel reakʼ bebhokti roṛ ar eṛe cecetʼakʼ khon sahaṛ akae tahenme. Adom adom hoṛ do nonkan akel reakʼ dạbikate Mạsiakʼ dhorom pạtiạu khonko ocokʼ akana. Isore dayawape ma. Mạsi Jisu hotete jaejug jion reakʼ gokʼakʼ lekate Isorakʼ monejoṅ leka iń Pạul do Mạsi Jisuren mitʼṭen apostoliń hoeakana. Noa ciṭhi iń do ińren dulạriạ hopon Timothi ṭheniń oleda. Isor Baba ar aboren Probhu Jisu Mạsi do daya bhor ar suluke danamma. Ińren mare hapṛamko cetʼleka Isorko sewawaekan tahẽkan onkage ińhõ sapha bibekte Isoriń sewawae kana; ar am lạgitʼ siń sạṭupʼ koejoṅ jokhecʼ iń do uniń sarhaoede kana. Ar amakʼ mẽtʼ dakʼ disạkate am tulucʼ ńapamokʼ iń cuṭ cuṭokʼ kana, jemon ińakʼ mon rạskạte perejokʼtiń. Amakʼ ontorre menakʼ sạri biswạs reakʼ katha hõ disạ menakʼ getińa. Ar noa biswạs do amren goṛom ayo Loisre ar amren eṅgam Eunikere girobas akan tahẽkana, ar ińiń baḍaea, noa biswạs do amakʼ ontorre hõ menakʼgea. Onate iń do arhõ noa kathań disạ ocoyetʼme kana, jemon ińakʼ tikin capote amre menakʼ Isorakʼ daya danem salgao aroe. Ente Isor do ḍurukiạ jiu do bae emakatʼbona; bickom nonkan jiugeye emakana, one okaṭakʼre do daṛe, dulạṛ ar apnar sambṛaokʼ reakʼ ektiạri menakʼ. Onate aboren Probhu reaṅ goha emokʼ do alom lajaokʼa, ar uni iạte hajotre minạń, onate hõ alom lajaokʼa. Ona bodolte Isor okaṭakʼ daṛeye emakatʼme ona daṛete uniakʼ bhage sombat porcar lạgitʼ iń tulucʼ duk jomme. Isorge aboakʼ kại khone bańcao akatʼ bona ar sonot jion khemao lạgitʼe hohoakatʼbona. Aboakʼ jãhãn kạmiko lạgitʼ do baṅ, bickom uniakʼ monsubạ ar daya lạgitʼgeye kạmi akada. Dhạrti sirjạu laha khonge Mạsi Jisu hotete uni do acʼakʼ daya dane emakatʼ bona, Menkhan ńitokʼ aboren babańcaoicʼ Jisu Mạsi do noa dhạrtiteye hecʼente ona dayaye sodorakada. Mạsi do morone bhagao akada ar bhage sombat hotete bin maraokʼ jion reakʼ kathae sodorakada. Ar noa bhage sombat lạgitʼge uni do jạhiricʼ, apostol ar cecetʼicʼ menteye bahal akadińạ. Ar ona iạte noako dukiń jomakada; ar enrehõ bạń lajaokʼ kana, enteń baḍaea okoereń bhorsa akana mente. Iń doń khạṭi akawana, uni ṭhen okań dohoakatʼ ona do Mạsiakʼ hijukʼ din hạbicʼ rukhiyạ lạgitʼ daṛe menakʼtaea mente. Iń ṭhen khon okam ańjomakatʼ ona sạriakʼ reakʼ sikhnạt do nạmuna lekate sapʼ dohoeme; ar Mạsi Jisu tulucʼ jopoṛao iạte aboakʼ ontorre oka dulạṛ ar biswạs janamakan ona sapʼ dohojoṅme. Isor okaṭakʼ rukhiyại lạgitʼe emakatʼme ona horho doho akae tahenme aboreye girobas akan sonot Jiu hotete. Noa dom baḍaegea, Ạsiạ disạmren sanamkoge ińko dea giḍiakadińa. Onko modre Phugelus ar Hermogenes hõ menakʼkinạ. Onesiphoros gharońjrenko Probhui mãyã akoma; uni do ạḍi dhaoye cerṭha ocoakadińa, ar ińakʼ hajot iạte bae lajaolena. Romreye tahẽkanre uni do jidkateye sendra ńamledińạ. Ephesusre okalekae sapʼ dapʼetʼ tahẽkan, ona do bes okocʼtem baḍaegea. Probhui danae ma, jemon Mạsiakʼ hijukʼ dinre Probhu ṭhen khon mãyãe ńam. Ado E bachatiń, Mạsi Jisuakʼ dayate am do daṛeanicʼ hoyokʼme. Aema gohako talare ińakʼ mocate okako cecetʼakʼem ańjomakatʼ ona sapʼ dohoe lạgitʼ am do nonkan hoṛko jimạwakome one okoe do eṭakʼko hõko cetʼ daṛeako. Mạsi Jisuren mitʼṭen lek lekanicʼ sipạhi leka am do ale sãote duk sahaome. Lạṛhại senkate okoe hõ gharońj reakʼ do bako dạndikʼa, jemon sipạhi lekate okoeye bhurtikede uniye kusi ocoye. Onkage haparaokʼ enecʼre seletʼkate jãhãege niạm lekate bae enecʼ khan uni do jid ṭupri bae ńama. Mehnotetʼkan casage pạhilre do phosol reakʼ bhag hatao lek kanae. Iń okań menetʼkan ona do alom bhabnakʼa, ente Probhuge jotowakʼ reaṅ bujhạu lạgitʼ daṛeye emama. Jisu Mạsi reaṅ noa katha disạ dohoeme, uni do gocʼko khone jiwetʼ beretʼ ocolena ar Dạud bõsren hoṛe tahẽkana. Okaṭakʼ bhage sombat iń porcaretʼkan onarege noa katha do ol menakʼa, ar noa bhage sombat porcar iạte iń do duk sasetiń jomakada; ar dusiakatʼ hoṛ leka tol hõń tol ocolena. Menkhan Isorakʼ katha do baṅ tolakana. Onate Isor okoeye bachao akatʼko onko lạgitʼ jotowakʼ iń sahao akada, jemon onko hõ Jisu Mạsi hotete kại khon bańcaoko ńam ar jaejug ṭhonokko hameṭ joṅ. Noa katha do sạri kana je, Mạsi tulucʼ bon gocʼ akan khan, enḍekhan uni tulucʼ jiwetʼ hõ bon tahena. Sombhuri katebon sahao daṛeakʼ khan, enḍekhan uni tulucʼ raj hõ bon calaoa. Ar uni bon baṅle khan, enḍekhan uni hõ aboe baṅbona. Abo do bepạtiạrko bon hoelenre hõ uni do pạtiạricʼgeye tahena, ente acʼtetʼ do ohoe baṅ daṛelena. Noako katha do hoṛko disạ ocokom. Ar Isor samaṅre sontorkom jemon ạuṛiakʼ kathakote aloko reṭepeṭekʼ. Noa reakʼ do cetʼ damge bạnukʼa, bickom okoe onako ańjom onko doko bangla bhaṭokʼa. Okoe cetanre Isor doe dhirpurge, metakʼme, okoeakʼ do lajaokʼ reakʼ jãhãn karonge bạnukʼ onkan kạmiyạ hoṛ lekate ar sạriakʼ reakʼ katha ṭhikteye beoharetʼkan onkan hoṛ leka apnartetʼ Isor samaṅre teṅgokʼ lạgitʼ kurumuṭuime. Isor be bhokti ar bạṛicʼ kathako khon sahaṛokʼme, ente nonkan katha iạte hoṛkoakʼ monre Isor bhokti do kom idikʼa. Okoe nonkan kathako roṛ onkoakʼ cecetʼakʼ do sea buḍurokʼ ghao leka pasnao idikʼa. Ar nonkan hoṛko talarege Humenaeos ar Philetus hõ menakʼkinạ. Nukin do Isorakʼ sạriakʼ khonkin sạṅgiń akana. Unkin dokin meneda, biswạsiko do gocʼko khon laharegeko beretʼakana. Nukin do adomkoakʼ biswạskin nosṭoyetʼtakoa. Enrehõ Isorakʼ gathaoakʼ kajak rehetʼ do teṅgo akana, ar ona cetanre mohor chapakatʼ leka noa kathako ol menakʼa, “Probhu do acʼrenkoe baḍaeyetʼkoa, ar okoe do Mạsi Probhu menteko hohoaekan onko do sanam bedhorom kạmi khonko sahaṛokʼma.” Eken napṛakʼ oṛakʼrege sona ar rupạ reakʼ bhajanko tahena ona do baṅ, menkhan kaṭ ar hasa reakʼ bhajan hõ tahengea. Onako modre adomakʼ do manot lạgitʼ ar adomakʼ do bemanot lạgitʼ beoharokʼa. Okoe do noako nicạṛ kạmiyakʼ bhajan leka kanko, onko khon pharakokʼte jãhãe apnare saphakʼ enḍekhan uni do nonkanakʼ bhajan lekae hoyokʼa okaṭakʼ do manot lạgitʼ beoharokʼkan. Sonot lạgitʼge uni doe bachao doho ocokʼa, uni do Probhuakʼ kạmireye lagaokʼa ar sanam lekan bhage kạmi lạgitʼ tear akane tahena. Juạn umer reakʼ bạṛicʼ sanako khon ńirjoṅme ar sapha ontorte Probhuko hohoaekan onko tulucʼ dhorom, pạtiạr, dulạṛ ar suluk baṛe khudạume. Lelha, hohakʼ ar reṭe peṭekʼre alom seledokʼa, ente am dom baḍaegea onako do jhogṛae janam ocoea. Okoe doe Probhuren gutikan, uni do jhogṛakʼ baṅ lektaea, bickom sanamkore daya tahentaema. Uni do eṭakʼko cetʼako reakʼ daṛe ar sahao gun tahen hoyokʼtaea. Okoe uni birudreko teṅgokʼ onko do mạ̃hir salakʼe cetʼako ma. Ona cecetʼakʼ do noa asteye emakoma, Isor do mon ạcur reakʼ ạte emakote onko do Isorakʼ sạriakʼtetʼ reakʼ khạndritetʼ jemonko baḍae daṛeakʼ. Onate onko do Soetanakʼ jhạli khonko ńir paskaokʼa, ente Soetan do acʼakʼ sana purạu lạgitʼge onkoe sapʼ dohoakatʼko tahẽkana. Noa katha baḍaeme je, mucạtʼ dinkore ạḍi muhin reakʼ okteko hijukʼa. Manwa do eken apnargeko dulạṛokʼa, onko do ṭaka-poesako dulạṛa, usul monan ar nindạukoko hoyokʼa, durnamko gahaoa, ar eṅga apa bebataokoko hoyokʼa. Onko do bebatao ar bebhoktikoko hoyokʼa, onkore dulạṛ do baṅ tahena, onko doko jhogṛakʼa menkhan bako miṭmaṭa. Onko do eṭakʼko reakʼko oktawa, ar apnar do bako sambṛao daṛeakʼa, kurmutạhakoko hoyokʼa, ar bhageakʼ doko hirkhạwakʼa. Onko do eṛe, ṭhok ar bạḍạite phulạu akanko hoyokʼa. Isor bạgikate rij-roṅge bạ̃ṛtiko dulạṛa. Onkoakʼ bahretetʼem ńelle khan Isor bhokti menakʼtakoa mentem bujhạukea, menkhan Isor bhokti reakʼ daṛege onko doko baṅetʼkana. Nonkan hoṛko khon do pharak akae tahenme. Nonkan hoṛko modre adomko do oṛakʼ oṛakʼ bolokate lilhi ạimạiko hatetʼkoa, one okoe do kại ghạṭiteko ten akan; onko do nana parkan bạṛicʼ sanateko ạyur ocokʼkana. Onko do siń sạṭupʼ sikhnạt reakʼ kathako ańjomeda, menkhan tishõ Isorakʼ sạriakʼ reakʼ khạndritetʼ do bako bujhạu daṛeakʼ kana. Cetʼleka Jannes ar Jambres do Mose birudrekin teṅgolen onkage noko hoṛko hõ ona sạriakʼ birudreko teṅgon kana. Nokoakʼ mon do bạricʼgetakoa ar Mạsiakʼ dhorom biswạs reakʼ jãhãn cinhạge onkore baṅ ńamokʼ kana. Menkhan onko do ar bako laha daṛeakʼa, ente Jannes ar Jambresakʼ lelhatetʼ cetʼleka sanamko ṭhen pusṭạute sodorlen onkage onkoakʼ lelhatetʼ hõ sanamko ṭhen sodorokʼa. Am do ińakʼ sikhnạt, cạl-colon, monsubạ, biswạs, sahao daṛe, sombhuri ar dulạṛ do bestegem nirik akada. Ona chaḍa Antiokiạre, Ikoniumre ar Lustrạre paṛao ạdiń tahẽkan santaokoń sahao akatʼ reakʼ katha hõm baḍaegea, menkhan Probhu do onako khone rukhiyạ akadińạ. Okoe Mạsi Jisu tulucʼ joṛao mitʼkate Isor bhoktite din khemaoko menjoṅkan onko do jotogeko khed ocokʼa. Menkhan bạṛicʼko ar bhõnḍko do din din artetʼgeko bạṛicʼ idikʼa. Onko do eṭakʼko bhul horteko idikoa ar apnarhõ bhul horteko calakʼa. Menkhan am do okaṭakʼem cetʼakatʼ ar khạṭi montem biswạs akan onare ṭarhao akae tahenme, ente okoeko ṭhen khonem cetʼakatʼ ona mam baḍaege. Huḍiń tahen khonge am do sonot sostor khonem cetʼakawana. Ar noa sonot sostorge am do Jisu Mạsire biswạs iạte kại khon bańcao ńam reakʼ bude danama. Sonot sostor reakʼ mitʼke mitʼ katha do Isor ṭhen khon hecʼakana ar ona do cecetʼakʼre, udgạure, sudhrạukʼre ar dhoromre etokʼ lạgitʼ jạruṛgea, jemon Isorren hoṛ purạte lek leka hoekate bhage kạmi lạgitʼ sajakanicʼe hoedaṛeakʼ. Mạsire ruạṛ hijukʼ ar uniakʼ raj reaṅ disạ dohoete Isor samaṅre, okoe do jiwetʼko ar gocʼkoe bicạrko uni Jisu Mạsi samaṅre iń do noań hukumam kana. Isorakʼ katha lại jạhirme; batarre ar bin batarre, am do jao okte lại jạhir lạgitʼ sapṛao akae tahenme; ạḍi sobori salakʼ cetʼakote hoṛkoakʼ dosko udukʼakome, onko sontorkom ar sopolha emakom. Nonkan okteko hijukʼa tinre hoṛko do sạriakʼ reakʼ sikhnạt bako sahaoa, bickom akoakʼ sana purạu lạgitʼ nonkan aema gurukoko ḍạṅjoṅa okoe do onko kusi ocoko leka sikhnạtko emokʼ. Onko do Isorakʼ sạriakʼtetʼ reaṅ ańjom baṅkate kạhniko kusiyakʼa. Menkhan am do sanamakʼre sambṛao akae tahenme, duk sahaome ar Mạsi reaṅ bhage sombat porcarme, ar Isor okako kạmiye emakatʼme ona purạume. Ente iń do ńit hoń coḍor ocokʼ kana; ar ińakʼ gujukʼ somoe do seṭer akana. Bhage lạṛhại iń lạṛhại kana, iń lạgitʼ ṭhik akatʼ horre mucạtʼ hạbicʼ iń ńir calao akana ar Mạsiakʼ dhorom biswạsiń sapʼ dohoakada. Onate iń lạgitʼ dhorom reakʼ jit ṭupri dohoakana. Bicạr dinre dhorom bicạricʼ Probhu do ona kuṛại lekate jit reakʼ malae danạńạ. Ar eken iń eskargeye danạńạ ona do baṅ, menkhan okoe soborikate uniakʼ ruạṛ hijukʼ reakʼko koyokʼ horakatʼ onko sanamkoe danakoa. Am do kurumuṭuime, jemon hakopako iń ṭhenem hecʼ daṛeakʼ, ente Demas do nonḍenakʼ dhạrtiye dulạṛetʼkante iń bạgikate Thessolonikiteye calaoena. Ona chaḍa Kreskes do Galatiạteye calaoena ar Titus do Dalmatiạte; Eken Luk eskarge iń soṅgere menaea. Am do Mark soṅgekate ạgu darayem, ente ińakʼ kạmi lạgitʼ uniakʼ do ạḍi jạruṛ menakʼa. Tikhikus do Ephesusteń kolkedea. Troasre Karpos ṭhen hoṛmo reakʼ okaṭakʼ kicricʼ iń hiṛiń oṭowatʼ tahẽkan, hijukʼ jokhecʼ ona baṛe ạgu daraeme. Ona chaḍa guṛhe dohoakan puthiko, biseskaete hartare olakʼ, onako soṅge daraeme. Okoe Aleksander do tama reakʼe kạmikan uni do ińakʼ ạḍiye loksan akada. Uni okaṭakʼe ceka akatʼ ona do Probhugeye halawaea. Am hõ uni khon sontorakae tahenme, ente uni do aleakʼ kathako ạḍiye tạkicʼ darametʼ tahẽkana. Pạhil dhaoiń bicạr ocolenre okoe hõ bako goṛo ạdiń tahẽkana, bickom sanamkogeko bạgi giḍiwạdiń tahẽkana; ona do alo baṛe lekhakʼtako ma. Menkhan Probhu do iń sãoteye tahẽkana ar daṛeye dan ạdiń tahẽkana. Onate iń do purạte bhage sombatiń porcar daṛeakʼ tahẽkana ar sanam boṅgan hoṛ jạtrenkoko ańjomleda. Isor do dhạcri kulakʼ moca khone rukhiyạledińạ. Probhu do sanam bạṛicʼakʼ kạmi khone rukhiyạyińạ ar acʼakʼ serma rajreye idi seṭerińạ. Uniakʼge ṭhonok hoyokʼtaema jug cetan jug. Amen. Priskạ ar Ạkuilạtekin ar Onesiphoros gharońjrenko ińakʼ johar emakom. Erastus do Korinthreye tahẽyena, menkhan Trophimus do Miletusre ruạkʼgeń bạgi oṭoadea. Am do kurumuṭuime rabaṅ din ạurire jemon nonḍem hecʼ daṛeakʼ. Eubulus ar Pudens ar Linus ar Klaudiạ ar joto boehakoko joharam kana. Probhu do am tulucʼ baṛeye tahenma. Isorakʼ daya ape tulucʼ tahẽakan tahenma. Iń Pạul do Isorren golam ar Jisu Mạsiren mitʼṭen apostoliń hoeakana, jemon Isorre bachao hoṛko biswạs reakʼ horteń ạgu daṛeako, ar Isor bhokti sãote oka sạriakʼtetʼ menakʼ ona baḍae lạgitʼ iń goṛo daṛeako. Iń do jaejug jion ńam reakʼ aste Mạsiń sewawae kana. Dhạrti ạuri sirjạure bin eṛeyicʼ Isor do noa jion imạń reakʼe gokʼ akawạdińa. Aboren babańcaoicʼ Isorakʼ hukum leka okań lại jạhiretʼkan ona hotete Isor do acʼakʼ katha ṭhik okteregeye sodor akada. Mạsire biswạs iạte okoe iń tulucʼe mitʼakan, uni ińren sạriạkʼren hopon Titus ṭhen noa ciṭhiń oleda. Isor Baba ar aboren babańcaoicʼ Jisu Mạsi do daya ar suluke dan apema. Kret dipre okaṭakʼ kạmi ńit hõ ạuri sạtokʼ ona sạt lạgitʼge iń do amiń doho oṭoakatʼmea. Ar ińiń hukum akatʼme leka mitʼke mitʼ nagraha reakʼ manḍerkore maraṅ mukhiyạko kạmire bahalkom. Manḍerren maraṅ mukhiyạ do nonkanicʼ hoyokʼ jạruṛaea jemon uni do okoe hõ aloko dusi daṛeae. Uniren do eken mitʼṭen erae tahen ma. Uniren gidrạko do Mạsire biswạsiko hoyokʼ ma, onko do akoakʼ kusi sana leka aloko colon ma ar bebataoko aloko hoyokʼma. Isor ṭhen khon dạyike ńamakatʼ manḍer ạyuricʼ lekate nonka hoyokʼ jạruṛtaea jemon uni do okoe hõ aloko neṅghaoe. Uni do ḍiṭhạ̃uicʼ do alo, edre godokʼicʼ hõ alo, ńu bulokʼicʼ hõ alo, dalalicʼ hõ alo, lalocikʼ hõ aloe hoyokʼma. Menkhan uni do peṛayicʼ, bhageakʼ dulạṛicʼ, akelanicʼ, dhoromicʼ, sonoticʼ, ar sambṛaokʼicʼe hoyokʼma. Isorakʼ pạtiạr katha, okaṭakʼ iń cetʼ akawade, ona do kajakte sapʼ dohoe jạruṛaea, jemon sạriakʼ sikhnạt reaṅe porcar daṛeakʼ ar okoe ona birudreko teṅgokʼ onko jemon bhulkoe udukʼ daṛeako. Nonkan ḍher hoṛ menakʼkoa okoe do bin gobol ar bokbokaokʼ arko bulạukokan. Okoe do khatnakʼre jorko emetʼkan, iń do nonkanko hoṛakʼ kathageń meneda. Noko hoṛkoakʼ moca do tubetʼkatako jạruṛa, ente lab joṅ lạgitʼ baṅ ganokʼakʼko cetʼako kana; ar nonkate onko do gharońjkoko ạulạueda. Onko modren mitʼṭen nạbi do noa kathae meneda, “Kret dipren hoṛko doko eṛegea, bir janwar lekanako, asaṅpoḍa arko lebṛagea.” Ona goha do sạrigea. Onate ạḍi ajhaṭte onkoakʼ dosko udukʼakome jemon onko do dhorom biswạsre ṭhik lekako sapʼ doho akae tahen, ar Jihudikoakʼ kạhniko ar sạriakʼko dea giḍiakatʼ hoṛkoakʼ hukum aloko hetawakʼ ma. Okoeakʼ ontor napaege onko ṭhen do jotowakʼge napaegea, menkhan okoeakʼ ontor bạṛicʼ ar bepạtiạrge onko ṭhen cetʼge napaeakʼ do bạnukʼanaṅ, ente onkoakʼ mon ar bibek do mạilạgetakoa. Onko do Isorko baḍaeyede kana menteko lạiyạgokʼ kana, menkhan akoakʼ kạmi hotete uni doko baṅekana. Onko do hirkhạ ocokʼko ar bebataoko kanako ar sanam bhage kạmi lạgitʼ doko okạjuạgea. Am do nonka cetʼakome jemon amakʼ katha tulucʼ sạri cecetʼakʼ reakʼ juri tahen. Haṛam hoṛ do jotowakʼre soteko tahen ma; ar manot ńam lekko hoyokʼma; onko do bhage akelanko, sạri pạtiạu, dulạṛ ar sombhuri mon tahentako. Onkage buḍhikohõ Isor bhoktikoko hoyokʼma ar bhage sikhnạtkoko emokʼma. Ente eṭakʼko oktawako ar ńu bulokʼ do lek baṅkan takoa. Enḍekhan juạn maejiukoko lại cetʼ daṛeakoa jemon onko do akoren jãwãetetʼ ar gidrạkoko dulạṛko, ar apnartetʼko sambṛaokʼma, napaeko tahenma, gharońjko disạima, dayakʼkoko hoyokʼma ar jãwãe gobolreko tahenma, jemon okoe hõ Isorakʼ katha aloko bemanot. Onkage juạnko hõ hukumakome jemon apnartetʼko sambṛaokʼ. Sanamakʼrege am do onko ṭhen bhage kạmi reakʼ nạmuna hoyokʼme. Amakʼ cecetʼakʼre bạṛicʼ monsubạ ar baṅ moneakʼ mon jemon alo tahen. Okoe hõ aloko dusạu daṛeam onate onkan sạri cecetʼakʼ emokʼme, jemon am birudren hoṛko do lajaoreko paṛaokʼ, ente abon reaṅ bạṛicʼ roṛ reakʼ do cetʼge baṅ tahentakoa. Golamko sikhạu paṛhaokom jemon akoren nij kisạ̃ṛko ṭhen gobol akanko tahen, sanamakʼre kusi ocoko salakʼ, ar aloko ṭenḍosokʼma, kisạ̃ṛkoakʼ jinisko aloko kombṛoema, bickom sanamakʼre pạtiạr kanako menteko sạbudokʼma, jemon aboren babańcaoicʼ Isorakʼ oka cecetʼakʼ menakʼ ona joto secʼ khon mońj okocʼteko benao rakabokʼ. Isorakʼ oka daya hotete kại khon bańcao ńamokʼ ona do sanam manwako ṭhenge sodor akana. Noa dayage aboye cetʼabon kana jemon Isor bebhokti ar dhạrti reakʼ lalockobon baṅakʼte nahakʼ jugre apnar bon sambṛaokʼte Isor bhokti salakʼ dhorom jion bon khemao, ar aboren maraṅ Isor ar babańcaoicʼ Jisu Mạsiakʼ ṭhonok reakʼ sodorokʼ do rạskạte bon ńelhor akae tahen. Jisu Mạsi do abo lạgitʼ acʼakʼ jiwiye emkeda, jemon sanam kạiko khone chaḍao bon ar onate nonkan mitʼṭen jạte saphakote eken acʼrengeko hoyokʼte eṭakʼko bhạlại lạgitʼko ahkaokʼ. Onate am do purạ ektiạri salakʼ noako reaṅ sikhạu paṛhaokom, sopolha emakom ar dosko udukʼakome. Ar am do okoe hõ alo jemonko neṅghaome. Isorren hoṛko disạ ocokom jemon onko do mạliki ar ektiạri menakʼtako hoṛ gobolreko tahente, onkoakʼ hukumko batao ar hoṛkoakʼ sanam lekan bhage kạmi lạgitʼ sapṛao akanko tahen. Onko do okoeakʼ hõ jemon aloko nindạu se aloko jhogṛakoma, bickom soṛa monanko hoyokʼte sanamko tulucʼ mạ̃hir salakʼ jemonko beohar. Abo hõ pạhil do bebujko, bebataoko, bulạu ocokʼko, ạḍi lekanakʼ bạṛicʼ sana ar hạ̃s rạskạre golam akanko bon tahẽkana. Abo do dusṭạmi ar hiskạte din bon khemoetʼ tahẽkana. Ar eṭakʼko bon hirkhạwako kan tahẽkana. Menkhan aboren babańcaoicʼ Isorakʼ daya ar dulạṛ abore sodoren khan uni do kại khone bańcaoketʼ bona. Jãhãn bhage kạmi lạgitʼ do bae bańcao akatʼ bona, menkhan dayategeye bańcaoaketʼ bona. Sonot Jiu hotete nawa janamte ar nawa arokʼte uni do aboakʼ ontore ạrupʼ saphakeda, ar nonkateye bańcaoketʼ bona. Aboren babańcaoicʼ Jisu Mạsi hotete uni do sonot Jiue danatʼ bona. Jemon jaejug jion reakʼ aste Isorakʼ sanamakʼren ạidạriko bon hoyokʼ. Noa do eken Isorakʼ dayate dhorom mentebon lekha ocoakana. Noa do sạri katha kangea. Ińakʼ monejoṅakʼ do noage, am do noako babotre jor emakʼme, jemon Isorre okoeko biswạs akan onko do eṭakʼko bhạlạiko reakʼ kạmire lạgiạ paṛao akanko tahen. Noako do bhagegea ar hoṛko lạgitʼ porhoanakʼ kana. Menkhan bebuj leka ṭheṭa baṛae, bõs budạ, jhogṛa-jhạṭi ar ạn-ạrikote reṭepeṭekʼ khon am do sạṅgińre tahenme, ente noakore jãhãn lab do bạnukʼa; ar noako do ạuṛiakʼgea. Okoe hoṛ bhul cecetʼatʼte dola duliye hoeocoyetʼ uni do pạhilre mitʼ dhao, ar tayomte arhõ dosar dhao sontorkaeme. Ar noate kạmi baṅ hoelen khan uni tulucʼ do gate hõ alom gatekʼa. Baḍaegeam, nonkan hoṛkoakʼ hudis cintạ do bạṛicʼgetakoa. Uni doe kạikại hoṛkana; ar acʼ apnartege dusi menteye sạbudokʼ kana. Artemas se Tukhikus am ṭheniń kol lekinre am do Nikopoliste iń ṭhen hijukʼ lạgitʼ kurumuṭuime, ente Nikoposlirege rabaṅ din khemao doń goṭa akawana. Ạn guru Senas ar Apolloss do calakʼ horre goṛowạkinme, jemon jãhãn ṭonṭa alo hoyokʼ tạkin. Eṭakʼko bhạlạiko reakʼ kạmire lạgiạ paṛao akae tahen lạgitʼ aboren hoṛko cetʼako hoyokʼa, jemon onko do eṭakʼkoakʼ reṅgejokʼreko goṛo daṛeako. Arko nonka lekhan onko do jionreko jo bahakʼa. Iń tulucʼ menakʼko jotoge am doko joharam kana. Mạsire biswạs iạte okoe aleko dulạṛetʼle onko do aleakʼ johar emakom. Ape sanamko tulucʼ Isorakʼ daya baṛe tahenma. Iń Pạul do Mạsi Jisuren kạidiń hoeakana. Iń ar ạlińren pạtiạricʼ boeha Timothi do ạlińren dulạṛiạ gate ar são kạmiyicʼ Philemon ṭhen, Ạlińren misera Apphia ṭhen, ạlińren são palṭon Arkippus ṭhen ar amakʼ oṛakʼre tinạkʼ do manḍerren lekateko jarwakʼkan onko ṭhen noa ciṭhi liń oleda. Aboren Isor Baba ar Probhu Jisu Mạsi do daya ar suluke dan apema. Iń do jaoge koejoṅreń disạyetʼmete Isoriń gun manao joharae kana, Ente Probhu Jisure amakʼ biswạs ar Isorren hoṛko lạgitʼ amakʼ dulạṛ reakʼ kathań ańjomeda. Iń do noań koejoṅ kana, amakʼ biswạs khạtirte ar amakʼ dan hotete Mạsi jemone sarhaokʼ. Ona chaḍa Mạsi tulucʼ bon kolom mitʼ akante oka bhorbon ńamakatʼ ona purạtem bujhạu daṛeakʼte dan lạgitʼ kạmi jemon arhõ ḍherokʼtam. E boeha, amakʼ dulạṛ ńelte iń do ạḍiń rạskạkʼ kana ar udgạuiń ńamakada, ente am do Isorren hoṛkoakʼ ontorre nawate udgạu monem sagen ocoakada. Onate Mạsi hotete amakʼ dạyikʼ babotre ạḍi dil salakʼ iń hukum daṛekema, enhõ dulạṛ iạte iń do ona bodolte amiń nehõram kana. Mitʼṭen haṛam hoṛ lekate ar ńitokʼ Jisu Mạsi lạgitʼiń bondi akante iń Pạul do am ṭhen ińren hopon Onesimus lạgitʼ iń nehõram kana. Hajotre ińakʼ bondi dosare uni do biswạsi lekate ińren hopone hoeakana. Mitʼ jokhecʼ am ṭhen uniakʼ jãhãn damge baṅ tahẽkana, menkhan ńitokʼ uni do bana hoṛ ṭhenge porhowanicʼ kanae. Jaehok, am ṭheniń kolekana; uni do ińren dulạṛiạ gate kanae. Ińakʼ kạmi lạgitʼge iń ṭhen dohokayiń menetʼ tahẽkana, jemon bhage sombat porcar khạtirte ińakʼ noa bondi dosare uni do am huyạte ińe sapʼsor daṛeạńa. Menkhan amakʼ hukum begorte cetʼ cekaege bạń khojkana, jemon jormoṭte daya aloe ńam, bickom am apnar khonem dayawae. Ar jaejug lạgitʼ jemonem ńam ruạṛe, hoedaṛeakʼa onatege uni do thoṛa ghuṛi lạgitʼ am khone begarlena. Menkhan golam lekate do ar bam ńamea bickom golam khon hõ ḍher metakʼme, dulạṛiạ boeha lekatem ńamea. Ińren do ạḍi dulạṛiạ kanae, menkhan manwa ar biswạsi boeha lekate am ṭhen do artetʼge. Onate inạ mitʼ biswạsi mentem hudis edeńkan khan enḍekhan iń cetʼlekam ataṅedeń onkage Onesimus hõ ataṅeme. Ar amakʼ jãhãnakʼe lokshan akatʼtam khan se am ṭhen jãhãnakʼ babotre rin menakʼtae khan ona do ińakʼ rin kana mente bujhạume. Iń Pạul do nij tite noa ciṭhiń oleda ar ona rin reakʼ iń hala ruạṛ katama. Hẽ noa katha do roroṛ reakʼ jạruṛ bạnukʼa je, Mạsire biswạs babotre amge iń ṭhenem rinigea mente. E boeha, Probhuren bon hoeakante ińakʼ monejoṅakʼ do noage je, am do mitʼṭen upʼkạrińme. Biswạsi boeha lekate am do ińakʼ monre nawate udgạu ińme. Am do ińakʼ katham senakʼa menteń baḍaete noa ciṭhiń olam kana. Menkhan ińiń baḍaea, iń okań lạiamkan ona khon hõ am do ḍhergem onkaea. Ar mitʼṭen kathań metamkana, peṛakoakʼ kandha do iń lạgitʼ sapṛao dohokakʼme, ente asokʼ kạnạń, apeakʼ koejoṅte iń do ape ṭheniń kol ruạṛ ocokʼa. Epaphrase hõe joharam kana; uni do Jisu Mạsi iạte iń tulucʼ hajotre menaea. Ona chaḍa Mark, Aristarkhos, Demas ar Luk, ińren noko são kạmiyạko hõ amko joharam kana. Aboren Probhu Jisu Mạsiakʼ daya apeakʼ jiu tulucʼ baṛe tahenma. Ḍher din lahare nạbiko hotete Isor do aboren hapṛamko ṭhen ạḍi dhao ar ạḍi lekate thoṛa thoṛateye galmaraoatʼko tahẽkana. Menkhan sesa sisi dinkore uni do acʼren Hopon hotete abokoe galmaraoatʼ bona. Isor do acʼren Hopon sanamakʼren ạidạri hoyokʼ lạgitʼe dohokedea. Ar Hopon hotetege uni do sanamakʼe sirjạukeda. Isorakʼ sanam gun do uni Hopontetʼrege menakʼa; ar Hopontetʼ kangeae Isorren purạ nạmuna do. Hopon do acʼakʼ ektiạranakʼ kathate jotowakʼe calaoetʼ kana. Manwakoakʼ kại reakʼ puruchun meṭaokate Hopon do coṭ utạricʼren Isorakʼ jojomsa aṛereye duṛupʼena. Uni do acʼ apat ṭhen khon okaṭakʼ ńutume ńamakatʼ ar cetʼleka ona do serma goḍetkoakʼ ńutum khon hõ maraṅge, onkage uni do acʼtetʼ hõ serma goḍetko khon maraṅe hoeakana. Isor do jãhãtis cetʼ jãhãe serma goḍet noa kathae menakawadea, “Am do ińren hopon kanam, teheńge amren apatiń hoyena?” Arhõ uni do cetʼ noae menakada, “Iń do uniren apatiń hoyokʼa ar uni do ińren hopone hoyokʼa?” Baṅ, ona do bae menakada. Isor do acʼren dulạṛiạ Hopon noa dhạrtite kole jokhecʼe menakada, “Isorren sanam goḍetko do uniko sewawae ma.” Serma goḍetko reaṅ doe meneda, “Uni do hoe hõ acʼren goḍete hoe ocoyedea; ar jolokʼkan seṅgel do acʼren golame hoe ocoyedea.” Menkhan Hopontetʼ reaṅ doe meneda, “E Isor, amakʼ siṅghạson do jug cetan jugge; ar amakʼ ḍanṭao do hok reakʼ ḍanṭaokangea. Am do dhoromem dulạṛeda ar bedhorom dom kurudakʼ kana; onate Isor, amren Isor do, amren soṅgetenko khon hõ bạ̃ṛti hulạs sunum lekae ojokʼ akatʼmea.” Isor do arhõe menakada, “E Probhu, am do etohopʼrege dhạrti reakʼ rehetʼem bạisạu akada; ar serma hõ amakʼ titegem benao akada. Onako do dhaṅ dhaserokʼa, menkhan am do jaejug hạbicʼem tahena. Kicʼricʼ lekage onako do mare cabakʼa. Oyonakʼlekage onako dom guṛhe dohokakʼa, ar kicricʼ leka onako do pherao ocokʼa. Menkhan am do enkagem tahena, ar amakʼ dinko do tishõ baṅ mucạdokʼa.” Isor do tis baṅ jãhãe serma goḍet noa kathae menakawade, “Tin hạbicʼ amren bạiriko amakʼ jaṅga latarre bạń dohoko, unhạbicʼ am do ińakʼ jojomsa aṛere duṛupʼme?” Serma goḍetko do cetʼ sanamkoge sapʼ sosor Jiuko doko baṅkana? Okoe kại khon bańcaoko ńam onko sapʼ sorako lạgitʼge coṅ onko mako kol ocoakan. Onate akabon ańjomakatʼ ona manao lạgitʼ arhõ moneakʼ lek tabona, jemon ona khon alo bon pharakokʼ. Serma goḍet hotete okaṭakʼ katha lại jạhirlen ona ma bacoṅ hante natelen; ona chaḍa jãhãege Isorakʼ hukume bebatao akatʼ ar uniakʼ katha bae ańjometʼkan uni do acʼakʼ hok reakʼ kuṛạiye ńamakada. Enḍekhan kại khon bańcaokʼ lạgitʼ Isor okaṭakʼ maraṅ bondobose dohoakatʼ ar ona babon bạsutakʼ khan enḍekhan cekate bańcao bon ńama? Kại khon bańcao ńam reakʼ katha do pạhilre Probhu Jisugeye menleda ar okoe onako ańjomletʼ onko do ona bańcaokʼ reakʼ sạriạkʼtetʼ abo ṭhenko sạbud akada. Ona salakʼ Isor hõ ạḍi utạr cinhạko ar hahaṛawakʼko ar daṛe kạmiko ar acʼakʼ monejoṅ leka sonot Jiuakʼ daya dankote ona reaṅ gohae emakada. Darakan okaṭakʼ puri reakʼ kathale roṛetʼkan, Isor do ona serma goḍetkokoakʼ gobolre bae dohoakada. Sonot sostorre mitʼ hoṛ do noa gohae emakada; Manwa doe celekante, uni reakʼem dạndikʼ kana? Ar manwa Hopon baṅe okoekante, uniakʼ kom moneakʼkana? Manwa do serma goḍetko khon thoṛaganem huḍiń akadea. Ar uni do ṭhonok ar manot reakʼ mukuṭem horokʼ akawadea. Sanamakʼkoge uni jaṅga latarrem gobol akada. Isor do sanamakʼge tinre manwa gobolreye dohokeda unre ona khon do cetʼge bae sarecʼlakʼa. Menkhan ńitokʼ sanamakʼge manwa gobolre bon ńeletʼ kana ona do baṅ, menkhan abo do Jisu bon ńel ńame kana. Uni do serma goḍetko khon thoṛa ghạṛicʼe huḍiń ocolena, jemon Isorakʼ dayate mimitʼ manwako lạgitʼ jiwiye em daṛeakʼ. Uni do duk sahaokateye gocʼlente man ar ṭhonok reakʼ raj mukuṭe dan akawadea. Sanamakʼ do Isor lạgitʼ kangea ar uni hotetege sanamakʼ do hoeakana. Onate ạḍi utạr hoponko acʼakʼ mạhimaren bhạgiạdarko hoeocoko lạgitʼ Jisu do duk jom talate sạbit ocoye reakʼ lek tahẽkantaea. Ente sonot ocoicʼ hõ ar sonot ocokʼko hõ mitʼṭen khon kangeako. Onate Jisu do onko hoṛko boeha mente hohowako do bae lajaokʼ kana. Sonot sostorre uni do Isore metaekana, “Boehako ṭhen iń do am reaṅ iń lại jạhira, ar kạlisiạre amiń gun manao joharama.” Jisu do arhõe meneda, “Iń do Isor cetanre bhorsa akaniń tahena.” Ar mitʼ jaegare uni doe meneda, “Nokʼõe ńelme, iń ar onko hoponko one okoeko do Isore emakawạdiń.” Onko gidrạko doko hoyokʼkana mãyãm ar jelren manwage. Onate Jisu acʼtetʼ hõ jel ar mãyãmren manwae hoyena, jemon gujukʼ reakʼ daṛe okoeakʼ tire menakʼ uni Soetan do acʼakʼ gujukʼ hoteteye bhagaoe. Ar gujukʼ botorte okoe jiwetʼ jonom golamko tahẽkan onko jemone chaḍaoko. Jisu do serma goḍetko bae goṛowakoa, menkhan Abraham bõsrenkoge uni doe goṛowakoa. Onate Jisu do sanam secʼte acʼren boehako leka hoyokʼ hoelentaea, jemon uni do mãyãwan ar pạtiạranicʼ maraṅ naeke lekate Isorakʼkoe sapʼsor daṛeakʼ. Ar noa reakʼ monsubạ do hoyokʼ kana, jemon acʼakʼ gujukʼte manwakoakʼ kạiye ocogte Isore kusi ocoye. Ar acʼge biḍạu sahaokate sasete jomletʼte uni do biḍạu ocokʼkankoe goṛo daṛeakoa. Onate E sonot boehako, okoe do serma rajren ạidạriko hoyokʼ lạgitʼ uniakʼ hohoakʼren bakhradarkope hoeakan, ape do Jisu reaṅ moneakʼpe. Ente okoere bon pạtiạu akan uni kangeae Isor ṭhen khon kol ocoyicʼ do ar maraṅ naeke hõ unige. Isorakʼ gharońjren hoṛko ńel todarotkore Mose cetʼleka pạtiạricʼe tahẽkan onkage Jisu okoeye bachao bahallede uni Isor ṭhen hõ uni do pạtiạrgeye tahẽkana. Oṛakʼ benaokạnicʼ do cetʼleka ona oṛakʼ khon bạ̃ṛti manote ńametʼkan, onkaleka Isor do Mose khon hõ Jisuge bạ̃ṛti ṭhonok ńam lek kanae menteye hudiskedea. Mitʼ ke mitʼ oṛakʼ do jãhãe baṅ jãhãe hotete benaokʼ kana, menkhan Isorge sanamakʼ doe benaoakada. Sạrige Mose do Isorakʼ gharońjren sapʼdapʼicʼ lekate pạtiạricʼe tahẽkana, jemon uni do darakan dinkore okaṭakʼ roṛogokʼ ona reaṅ gohae emdaṛeakʼ. Menkhan Mạsi do ona gharońj reakʼ dạyike ńamakatʼ Hopon lekate pạtiạricʼe tahẽkana. Aboakʼ sạri as iạte monre oka dil ar rạskạ hijukʼ, onare mucạtʼ hạbicʼ teṅgo ṭak akan bon tahen, enḍekhan aboge Isorakʼ gharońjren hoṛ bon hoyokʼa. Ona iạte sonot Jiue menleda, “Teheń ape do uniakʼ aṛaṅpe ańjomle khan uniye meneda, aperen hapṛamko leka apeakʼ ontor do alope keṭejtapea. Onko do hahaṅkarre iń birudreko teṅgolente ińko biḍạuledińa. Aperen hapṛamko do onḍeko biḍạu aṭkarledińa, ar pongel serma hạbicʼ ona okteren hoṛko do ińakʼ kạmiko ńelleda. Iń do onko cetanre ạṛislenteń menleda, ‘noko hoṛakʼ ontor do bạṛicʼ secʼ ạcur baṛaekantakoa; onko do ińakʼ hor bako baḍaelakʼa.’ Onate iń do edrete kiriyạyenteń menleda, ‘onko do ińakʼ jirạukʼ jaegare baṅgeko bolo ńama.’ ” E boehako, sontor akae tahenpe! Ape modre okoeakʼ monrehõ bạṛicʼ ar bepạtiạu jemon alo tahen. Nonkan mon do jiwetʼ Isor khon pharakokʼa. Ona khon tinạkʼ din sonot sostorre “Teheń” katha menogokʼkan, ona reakʼ din hilokʼge ape do apekore udgạu emokʼpe, jemon ape modre okoeakʼ mon hõ kại reakʼ lilkạrte alo keṭejokʼtape. Ente pạhilre okaṭakʼ bhorsa tahẽkan, onare mucạtʼ hạbicʼ teṅgo ṭak akan bon tahẽlen khan, abo do Mạsi tulucʼ bakhradarko bon hoyokʼa. Ente ńit hõ nonka roṛogokʼ kana, teheń uniakʼ aṛaṅpe ańjomle khan, uniye meneda, “Aperen hapṛamko leka apeakʼ ontor do alope keṭejtapea.” Ar okoe baṅ Isorakʼ katha ańjomkate hõ uniko ạṛis ocolede? Onko do cetʼ noko hoṛ doko baṅkana one okoeko Mose do misor disạm khone oḍok ạguletʼko? Okoe upạrte Isor do pongel bochor hạbicʼe ạṛislena? Onko do cetʼ noko hoṛ doko baṅkana one okoe doko kại akatʼ tahẽkan, ar okoe do hahaṅkarre mạ̃ṛĩ tahẽkantako? Ar okoeko ṭhen baṅ Isor doe kiriyạlenteye metatʼko tahẽkan, onko do uniakʼ jirạukʼ joṅ jaegate bako bolo ńama? Onko do cetʼ nokoko hoṛ doko baṅkana one okoe do bako pạtiạuadeteko bemanotlede? Arbon ńeleda, bepạtiạu iạte onko do Isorakʼ jirạukʼ jaegate bako bolo daṛeada. Isorakʼ jirạu joṅ jaegate bolokʼ reakʼ oka gokʼakʼ tahẽkan ona gokʼakʼ do ńit hõ abo lạgitʼ menakʼgea. Onate abo do sontorakae tahen jạruṛ tabona, jemon okoe hõ ona gokʼakʼ reakʼ bhor khon bin lek mente aloe ńamokʼ. Israelko ṭhen cetʼleka bhage sombat lại jạhirlen, onkage abo ṭhen hõ lại jạhir akana. Menkhan ona bhage sombatre Israelkoakʼ jãhãn porho do baṅ hoeakana, ente onko do ańjomkate onare bako pạtiạulena. Menkhan abo do bon pạtiạu akana ar uniakʼ ona gokʼakʼ reakʼ jirạu joṅ jaegare bon bolo akana. Ar noa jirạu joṅ reaṅ do Isore menakada, “Onate iń do edrete kiriyạyenteń menleda, ‘onko do ińakʼ jirạukʼ joṅ jaegate ohoko bolo daṛelena.’ ” Menkhan noare jãhãn bhul bạnukʼa je, dhạrti sirjạu tayom Isorakʼ kạmi sạten khan jirạukʼ ehopʼena mente. Sonot sostorre mitʼ jaegare eae mãhã hilokʼ reaṅ nonka olakana, “Isor do eae mãhã hilokʼre cetʼge bae kạmileda.” Uni do arhõe menakada, “Onko do ińakʼ jirạukʼ joṅ jaegare baṅgeko bolo ńama.” Nitokʼ noa katha do ṭhikgea je, adom hoṛ do uniakʼ jirạu joṅ jaegareko bolokʼa; Menkhan okoe Israelko ṭhen pạhilte bhage sombat lại jạhirlen, onko do bebatao iạte Isorakʼ jirạu joṅ jaegare bako sen daṛeatʼ tahẽkana. Onate Isor do pạhilre Israelko ṭhen cetʼlekae menletʼ ṭhik onkage ḍher din tayom Dạud raj hotete arhõe menakada, teheń uniakʼ aṛaṅpe ańjomle khan, uniye meneda, “Apeakʼ ontor do alope keṭejtapea.” Noa kathate uniakʼ jirạu joṅ jaegare bolokʼ lạgitʼ Isor do ar mitʼṭen okteye niṭakatʼ tahẽkana ar ona reakʼ ńutume dohoakatʼ tahẽkana Teheń. Ente Josuạ do ona jirạu joṅ jaegare Israelkoe idileko khan honaṅ Isor do tayomte ar mitʼṭen eṭakʼ din reakʼ katha ohoe roṛlea. Enḍekhan ńelokʼkana, Isorren hoṛko lạgitʼ jirạukʼ reakʼ ạt do menakʼ hataṛgea, ente Isor do cetʼleka acʼakʼ sirjạu reakʼ kạmi sạtkateye jirạulena onkage okoe Isorakʼ jirạu joṅ jaegareye calakʼ, uni hõ uniakʼ kạmi khon jirạue ńama. Onate dela, ona jirạu ńam lạgitʼ bon ahkaokʼma. Okoe hõ jemon onko bebatao Israelko leka Isor bemanotete uniakʼ jirạu khon aloko eṛaṅokʼ. Isorakʼ katha do jiwetʼgea ar jojaoakʼ kangea ar dene banar dharanakʼ tarwaṛe khon hõ bạ̃ṛti lasergea. Noa katha do manwa jiwi ar jiu, uṭi ar tumul hạṭiń begar hạbicʼ hõ sobokʼakʼ kana ar manwa ontor reakʼ sanam monejoṅakʼ ar hudisko biḍạu aṭkarakʼ kana. Sirjon reakʼ okaṭakʼ hõ Isor ṭhen do okoanakʼ bạnukʼ anaṅ. Okoe ṭhen aboakʼ hisạb emokʼ hoyokʼ uni ṭhen do sanamakʼge oṭakʼgea ar sodorgea. Onate dela, abon do hamesate Isorren Hopon Jisure aboakʼ pạtiạu bon aṅgoc ma, ente uni kangeae aboren maraṅ naeke, one okoe do sermare senkate ńit Isor samaṅre menae. Aboren maraṅ naeke do nonkanicʼ doe baṅkana one okoe aboakʼ ńijortetʼre abo tulucʼ duk bae ńam, ente abo leka uni hõ joto secʼ khonge kại reakʼ biḍạu samaṅreye teṅgolena menkhan bae kạileda. Onate dela, dil salakʼ Isorakʼ daya reakʼ siṅghạson ṭhen bon sen sorokʼma, jemon jạruṛa bon oktere onḍe khon uniakʼ daya ar goṛo bon ńam daṛeakʼ. Hoṛko secʼ khon Isorakʼ sewae lạgitʼ mimitʼ maraṅ naeke do manwako mod khon bachaokateye bahalokʼ kana, jemon manwakoakʼ kại iạte janware dãṛẽye ar eṭakʼ danko hõe samaṅ. Okoe begor baḍaeteko kạiyetʼkan ar bạṛicʼ horteko calakʼkan onko sãote uni do mạ̃hire beohara, ente unire hõ nijortetʼ do menakʼgea. Uni do cetʼleka eṭakʼ hoṛkoakʼ kại lạgitʼ janware dãṛẽyedekan onkage acʼ apnartetʼ hõe nijorgete apnar lạgitʼ ona dãṛẽ samaṅ hoyokʼtaea. Maraṅ naeke hoyokʼ reakʼ man do okoe hõ apnarte bae hatao daṛeakʼa, menkhan Isor okoeye hohoae unige ona reakʼ man doe ńama, cetʼleka Isor do Aron maraṅ naeke hoyokʼ lạgitʼe hohoade tahẽkan. Katha do Mạsire hõ khaṭaokʼgea. Mạsi do apnarakʼ sanate maraṅ naeke hoyokʼ lạgitʼ apnarte do bae usullena, Isorge noa mente ona manote dan akawade tahẽkana. Am do ińren Hopon kanam, teheńge amren apatiń hoyena. Onkage Isor do ar mitʼ jaegareye menakada, am do jaejug hạbicʼ naeke kanam, Melkisedek reakʼ dhara lekate. Okoe gocʼko khone rukhiyạ daṛeae uni Isor ṭhen Jisu do noa dhạrtire tahen jokhecʼ ãṭ aṛaṅte rakʼateye nehõrade tahẽkana are koeleda. Ar bhokti sãote batao tahẽkantaete Isor do uniakʼ koejoṅe ańjomletʼtaea. Menkhan Isorren Hopon hoekatere hõ uni do duk saset talate bataoe cetʼleda. Nonkate tinreye sạbit ocoyena unre acʼakʼko bataotae sanamko lạgitʼ jaejug bańcaokʼ reakʼ hore hoyena. Isor do Melkisedek leka maraṅ naeke menteye ńumkedea. Noa reaṅ ạḍi utạr katha mementeakʼ menakʼ talea, menkhan ona reakʼ bhed bhaṅgao do muskilgea, ente Jiu reakʼ sạritetʼ ape do algate bape bujhạu daṛeakʼ kana. Nunạkʼ dinte ape do guru hoyokʼ lek tahẽkantapea, menkhan ona bodolte Isorakʼ katha reakʼ arhõ gonḍa khon sikhnạt emape lạgitʼ cecetʼicʼakʼ jạruṛ paṛao akana. Keṭecʼ jomakʼ bodolte kạṭicʼ gidrạko leka arhõ ape do toa ńu reakʼ jạruṛ paṛao akatʼpea. Okoe toa ńuteye ạsulokʼkan uni ma ńit hõe balege, ar dhorom jion reaṅ oka sikhnạt menakʼtae onate hõe balegea. Okoekoakʼ umer hoeakan eken onkoge keṭecʼ jomakʼko jom daṛeakʼa, metakʼme Isorakʼ katha reakʼ keṭecʼ sikhnạtko bujhạu daṛeakʼa. Ar ạḍi dhao hewakʼte onko do bhage bạṛicʼko bichnạu daṛeakʼa. Noa iạte etohopʼre Mạsi reaṅ oka cecetʼakʼ bon ńamakatʼ, ona bon parom idite sạbitokʼ secʼ bon laha idikʼma. Bin joanakʼ kạmiko khon mon ạcurkate, Isorre pạtiạukʼte, eṭakʼakʼ bạptisma reaṅ cecetʼakʼ, capo reakʼ, gocʼko jiwetʼ beredokʼ ar jaejug reakʼ sạjại; noako etohopʼ reakʼ kathate arhõ nawate jemon rehetʼ alo bon bạisạu. Menkhan Isore aṛakʼabo khan bon sạbit utạrokʼa; ente mitʼ dhao marsal ńelakat̕ko do, serma dan reakʼ sebel ar sonot Jiuakʼ elaṅko ńamakada, Isorakʼ mońj katha reakʼ sebelko ńamakada ar darakan jug reaṅ daṛe reakʼko baḍae akatʼa, inạ tayom Mạsi ṭhen khon pạc ruạṛ akanko arhõ nawate mon ạcurtako do beleṭecʼakʼ kangea. Noa do baṅ hoedaṛeakʼa, ente onko do Isorren Hopon arhõko krus edekana ar jotoko samaṅreko bemanot edekana. Okaṭakʼ ot do ạḍi dhao jạ̃ṛĩ dakʼ ańjetʼkate casakoakʼ jạruṛakʼ aṛakʼ sakame omon ocoyetʼ ona ot do Isorakʼ bhore ńameda. Menkhan okaṭakʼ ot do jạnum ar rạṅgạinikoe omon ocoyetʼ ona ot do okoḍagea ar onare sarapokʼ reakʼ botor tahena. Ar mucạtʼre hoṛ do onako atar giḍikakʼa. Dulạṛiạ gateko, ale do noako kathale menetʼrehõ enhõle pạtiạukʼ kana, apeakʼ dosa do onka baṅkana; kại khon bańcaokʼ reakʼ jo apeakʼ jionre ńelokʼ kangea. Isor doe hok bicạricʼ kana; onate apeakʼ kạmi ar uniren hoṛko sapʼ sohotʼakote okaṭakʼ dulạṛpe udukʼ akawade arpe udukʼetʼkan, ona do bae hiṛińa. Alele khojkana, ape mimitʼko jemon mucạtʼ hạbicʼ inạ jidge tahentape. Onate purạtepe khạṭi joṅa je, apeakʼ as do purạukʼtapea. Kuṛhiạpe tahen do bale khojkana; alele khojkana, okoe pạtiạu ar soborite Isorakʼ gokʼakʼ reakʼ bhorko ạidạri joṅkan, ape hõ onko leka hoyokʼpe. Isor do Abrahame gokʼade tahẽkanre acʼakʼ ńutumteye kiriyạlena, ente acʼ khon maraṅ okoe hõ bạnukʼkoa one uni ńutumteye kiriyạ daṛekokʼ. Uni do noa menteye kiriyạlena, “Iń do khạṭigeń bhorama ar amakʼ bõskoń baḍhao ocoetama.” Noa iạte Abraham doe sombhuriketʼ khan Isor oka emae lạgitʼe gokʼade tahẽkan onae ńamkeda. Manwa do acʼ khon okoeye maraṅa uni ńutumtegeye kiriạkʼ kana. Onate ona kiriyạ do noa khạṭitetʼe kajakaea, oka roṛakan ona do sạrigea mente, ar nonkate joto gulmal do cabakʼa. Isor oka emokʼ lạgitʼe gokʼletʼ, ar okoe onako ńam, onko do noa kiriyạ hotete ạḍi pusṭạute udukʼakoe menleda je, uni okaṭakʼe ṭhik akatʼ ona do ar baṅ bodolokʼa. Onate uni do kiriyạ hoteteye sạbudkeda okae ṭhikakatʼ ona do hoyokʼgea. Isorakʼ gokʼakʼ ar kiriyạ do tis hõ baṅ bodolokʼa. Okoe secʼ hõ Isor do eṛe bae roṛa, uni do noa gokʼakʼreye kiriyạ akana, jemon abo samaṅre oka as menakʼ ona kajakte sapʼ dohoe lạgitʼ bạ̃ṛti udgạu bon ńam. Noa as do aboakʼ jionre loṅgor leka khạṭi ar kajakgea, ar ona do sonot jaega reakʼ orwal tayomre, metakʼme Isor samaṅre seṭerokʼa. Jisuge abo hũyạte abon lahate ona jaegateye calao akana. Uni do jaejug hạbicʼ Melkisedek leka maraṅ naekeye hoeakana. Nui Melkisedek do Salemren raj ar maraṅ Isorren naekeye tahẽkana. Abraham do tinre rapajko bhagao kateye ruạṛ hijukʼkan tahẽkana unre nui Melkisedek tulucʼe ńapamlena. Ar Melkisedek do Abrahame bhorade tahẽkana, ar Abraham do joto jinisko reakʼ gel hĩs reakʼ mitʼ hĩs uniye emade tahẽkana. Melkisedek reakʼ mane do hoyokʼkana dhoromren raj. Melkisedek do Salemren hõ raje tahẽkana, ar ona reakʼ mane do hoyokʼ kana sulukren raj. Melkisedek do eṅgat-apat se jãhãn bõs budạge baṅ tahẽkantaea. Isorren Hopon leka uniakʼ jion reakʼ etohopʼ hõ baṅ tahẽkana, ar mucạtʼ hõ baṅ tahẽkana; uni do jaejug hạbicʼren naeke kanae. Ado ma ńelpe, Melkisedek do tinạkʼe maraṅa; aboren ạgil hapṛam Abraham hõ sanamakʼ reakʼ gel hạṭiń reakʼ mitʼ hạṭiń uniye emade tahẽkana. Lewi bõsko modre okoe do naekeko baṅkan, Israelko ṭhen khon, metakʼme onkoren boehako ṭhen khon ạn lekate gel hạṭiń reakʼ mitʼ hạṭiń hatao reakʼ hukum menakʼtakoa. Noko boehako do Abrahamren bõsko hoelenre hõ ona onkae hoyokʼtakoa. Menkhan nui Melkisedek do Lewi bõsrene baṅkanre hõ Abraham ṭhen khon gel hạṭiń reakʼ mitʼ hạṭińe hataoetʼkan tahẽkana ar Isor okoe ṭhene gokʼletʼ tahẽkan uni Abraham hõe bhorade tahẽkana. Noare jãhãn digdhạ bạnukʼa je, bhor ataṅicʼ khon bhor emokʼicʼgeye maraṅa mente. Nonḍema gujukʼ gobolren Lewikoge gel hạṭiń reakʼ mitʼ hạṭińko hataoetʼkan; menkhan, okoe do jiwetʼge menaea mente goha emakan uni, metakʼme Melkisedekge gel hạṭiń reakʼ mitʼ hạṭińe hataoakada. Onate nonka mendaṛekokʼa, Lewi bõsren okoe do gel hạṭiń reakʼ mitʼ hạṭińe hataoetʼkan uni hõ Abraham hotete gel hạṭiń reakʼ mitʼ hạṭiń do Melkisedeke emade tahẽkana. Ente Abraham sãote tinre Melkisedekakʼ ńapam hoelena unre nui Lewi do uniren hapṛam Abrahamakʼ hoṛmoreye tahẽkana. Okoe naeke reakʼko kạmikan tahẽkan onko Lewi bõsrenkoakʼ kạmi cetanrege Isor do Israelko acʼakʼ ạn-ạriye ematʼko tahẽkana. Ar Lewi bõsren naekekoakʼ kạmi hotete sạbit utạrlen khan, enḍekhan pạhil Lewi naeke Aron bodolte Melkisedek leka eṭakʼ ar mitʼṭen naeke hijukʼ reakʼ cetʼ jạruṛ tahẽkana? Ar naeke giri pherao hoelen khan ạn-ạri hõ pherao reakʼ jạruṛ hoyokʼa. Okoe reaṅ noako kathań roṛetʼkan Lewi bõs khon uni Jisu do bae hecʼlena, bickom eṭakʼ mitʼ bõs khone hecʼlena. Ona bõsren okoege tishõ naeke lekate pinḍre janwar dãṛẽ do bako samaṅ akatʼko tahẽkana. Noa do pusṭạugea je, aboren Probhu do Jihudạ bõs khone hecʼlena. Ar noa bõs khon jãhãe mitʼ hoṛ naekeye hoyokʼa ona katha Mose do tishõ bae menletʼ tahẽkana. Enḍekhan Melkisedek leka ar mitʼṭen naekeye teṅgo akanre abo okabon menakatʼ ona do arhõ pusṭạute bujhạukʼ kana. Uniakʼ naeke hoyokʼ babotre bõs reaṅ do jãhãn ạnre baṅ ṭẽhaḍokʼ kana, ona do uniakʼ baṅ maraokʼ jion reakʼ daṛe cetanre ṭẽhaḍokʼkana. Sonot sostorre noa gohae emeda, Am do jaejug hạbicʼ Melkisedek leka naeke kanam. Moseakʼ ạn-ạri do okaṭakʼge bae sạbit oco daṛeakada, onate pạhil teakʼ naeke kạmi reakʼ oka ạn tahẽkan ona do nijor ar bin porho iạteye bạtil akada. Ar ńitokʼ do ona jaegare uni khon maraṅ mitʼṭen as emakana. Ona as hotete abo do Isor ṭhen bon sen seṭer daṛeakʼa. Jisuakʼ naeke hudạ do Isor kiriạkateye ṭhik dohoakatʼ tahẽkana. Lewi bõsrenko naeke hoyokʼ oktere Isor do jãhãnakʼ bae kiriyạlena, menkhan Jisu maraṅ naekeye jokhecʼ doe kiriyạlena. Sonot sostorre noa reaṅ olakana, Probhui kiriyạyena, “Am do jaejug hạbicʼ naeke kanam.” Noa babotre uni do acʼakʼ mon bae pheraotaea. Noa khon bon bujhạu daṛeakʼ kana je, Jisu do arhõ maraṅ mitʼṭen bondobosren jạmine hoeakana. Lewiko modren ḍherkoge naekeko hoelena, ente gujukʼteko akoṭente okoe hõ jaejug hạbicʼ naeke giri do bako kạmi idi daṛeada. Menkhan Jisu do jaejug jiwetʼ menaete uniakʼ naeke giri do tishõ baṅ pheraokʼtaea. Onate okoe uni hotete Isor ṭhenko hijukʼkan onko do purạteye bańcao daṛeakoa, ente onko iạte nẽhorokʼ lạgitʼ uni do jaoge jiwetʼ menaea. Nonkan mitʼṭen sonoticʼ, bin dusiyicʼ ar niphuṭ utạricʼ maraṅ naekege jạruṛ tahẽkan tabona. Uni do kại hoṛko khone begargea ar Isor do serma khon hõ bạ̃ṛti usule rakapʼ akadea. Eṭakʼ maraṅ naekeko cetʼleka pạhilte apnar lạgitʼ ar tayomte eṭakʼkoakʼ kại lạgitʼ janwar dãṛẽko samaṅetʼkan tahẽkan, onka do nui naekeakʼ jạruṛ baṅ tahẽkana, ente uni do jaejug lạgitʼ mitʼ dhaoge acʼakʼ jiwiye emketʼte ona kạmiye purạukeda. Ạn-ạri do nijor monan hoṛkoge maraṅ naeke hudạreye ojokʼetʼkoa; menkhan ạn-ạri tayom okaṭakʼ kiriyạ hoelen ona do Isorren Hopone bahalkedea, one uni do jaejug hạbicʼe sạbit utạrakan. Abo oka bon menetʼkan ona reakʼ asol katha do noa kana je, aboren do nonkan mitʼṭen maraṅ naeke menaea one uni do sermare maraṅ Isorakʼ siṅghạson reakʼ jojomsa aṛereye duṛupʼakan. Uni do maraṅ sonot jaegare, metakʼme asol sewa tạmbure Isore sewawae kana. Ona sewa tạmbu do manwa bako beretʼakada, Probhugeye beretʼakada. Mimitʼ maraṅ naekeko do janwar dãṛẽ ar eṭakʼ eṭakʼ jinisko samaṅ lạgitʼko bahal ocokʼkana, onate nui maraṅ naekeakʼ hõ jãhãn dãṛẽ samaṅ reakʼ jạruṛ menakʼtaea. Menkhan ńit noa dhạrtireye tahẽlen khan uni do maraṅ naeke ohoe hoedaṛelena, ente nonḍe do ạn-ạri lekate dãṛẽ samaṅ lạgitʼ naeke ma menakʼkoge. Naeke lekate onkoakʼ noa kạmi do serma kạmi reakʼ mitʼṭen nạmuna ar umul leka. Onate Mose tinre sewa tạmbui benao lạgidokʼkan tahẽkana unre Isor do noa menteye sontorledea, “Sinại buru coṭre okaṭakʼ nạmunań udukʼatʼme tahẽkan ṭhik onkage jemon jotowakʼkom benao.” Menkhan ńitokʼ bon ńeletʼkana, Jisu oka naeke reakʼ kạmiye ńamakatʼ ona do onko naekekoakʼ kạmi khon hõ bạ̃ṛti sorosgea, cetʼleka uni do bondoboste denebanar secʼe hoeakan ona bondobos do lahateakʼ khon hõ sorosgea, ente noa bondobos do arhõ bhage gokʼakʼkore ṭẽhaḍokʼ kana. Pạhil teakʼ bondobos niphuṭge tahẽlen khan honaṅ dosar bondobos reakʼ jãhãn jạruṛge oho hoelena. Menkhan Isor do acʼren hoṛkoakʼ dos udukʼako lạgitʼ sonot sostorreye menakada: Probhui meneda, “Okte hijukʼ kana, iń do Israel ar Jihudạ hoṛko lạgitʼ mitʼṭen nawa bondobosiń dohoea. Misor disạm khon onkoren hapṛamko ti sapʼkateń oḍok ạguko jokhecʼ onko lạgitʼ oka bondobos iń doholetʼ tahẽkan, ona leka noa nawa bondobos do baṅ hoyokʼa. Ińakʼ ona bondobos leka bako calaolente onko secʼ do bạń beṅgetʼ ruạṛeda.” Probhu do noa kathae meneda. Probhu do arhõe meneda, “Iń do Israelko lạgitʼ noa bondobos iń dohoea. Ona do hoyokʼ kana, ińakʼ ạn-ạriko onkoakʼ monreń rebetʼakoa ar onkoakʼ ontorre hõń ol dohoea. Iń do onkoren Isoriń hoyokʼa, ar onko do ińren hoṛgeko hoyokʼa. Apnar ato oṛakʼrenko ar apnar boehako, okoe hõ noa menkate do ar tishõ bako cetʼakoa, ‘Probhu baḍaeyeme mente,’ ente sanamkoge iń doko oromińạ. Onate iń do onkoakʼ kạiyiń ikại takoa, ar tishõ onkoakʼ kại do bạń disạ dohoetakoa.” Isor do noa bondobos nawateye lại sodorketʼte lahateakʼ bondobos do mareakʼ menteye okoḍa ocokeda. Ar okaṭakʼ marege ar sedae reakʼ kana mente nosṭo cabakʼkan ona do usạrage danaṅokʼa. Isorakʼ dewa sewae lạgitʼ pạhilakʼ bondobosre mitʼ bar goṭecʼ ạn-ạriko em hoelena, ar noa dhạrtire sewae lạgitʼ mitʼṭen jaega reakʼ katha hõ onare tahẽkana. Ar ona lekatege mitʼṭen tạmbu do benao hoelena. Ona tạbmu reakʼ pạhil hạṭińre tahẽkana diuhe dohowakʼ ar mej ar samaṅakʼ piṭhạ. Noa pạhil hạṭiń reakʼ ńutum do tahẽkana sonot jaega. Dosarakʼ orwal tayomre tạmbu reakʼ ar mitʼ hạṭiń tahẽkana; ona reakʼ ńutum do sonot utạrakʼ jaega. Noa hạṭińre dhup jered lạgitʼ sona reakʼ pinḍ ar bondobos reakʼ sunduk tahẽkana. Ona sunduk do beṛhaete sonate tolakatʼ tahẽkana. Ar ona cetanre sona reakʼ bhajanre dohoakatʼ manna, ar Aronakʼ oka ṭheṅgare baha bhoṭokʼlen ona ṭheṅga, ar bondobos olakʼ dhiri reakʼ barea paṭa. Ona sunduk cetanre Isorakʼ ṭhonokte perecʼ sonaren barea Kerubkin tahẽkana. Unkinakʼ phạ̃kṛạ̃kte ona sunduk reakʼ ḍhakonkin umulakatʼ tahẽkana. Noa ḍhakonre do kạiko hạrupʼkakʼkan tahẽkana. Menkhan noako reakʼ ńitokʼ do khode khod babo roṛ daṛeakʼkana. Nonkate jotowakʼ benao sạtkate naekeko do jaoge tạmbu reakʼ pạhilakʼ jaegare bolokate Isorakʼko dewa sewayetʼkan tahẽkana. Menkhan dosarakʼ jaegare, metakʼme sonot utạrakʼ ṭhạ̃ire do eken maraṅ naeke motogeye bolokʼkan tahẽkana. Uni do bochorre eken mitʼ dhaoge dãṛẽ samaṅ akan janwarakʼ mãyãmante onḍeye bolokʼkan tahẽkana. Uni do acʼakʼ kại lạgitʼ ar bin baḍaeteko kại akatʼ hoṛkoakʼ kại lạgitʼ noa mãyãme coḍoretʼ tahẽkana. Noate sonot Jiue udukʼetʼkana je, tinạkʼ din noa sewa tạmbu tahen unạkʼ din ona sonot utạrakʼ ṭhạ̃ire bolokʼ reakʼ hor do jhicʼ baṅ tahena. Nahakʼ jug lạgitʼ noa do mitʼṭen cinhạ kana one oka doe lại abonkan je, dãṛẽ samaṅ akade janwar ar eṭakʼ eṭakʼ jinisko do dewa sewakoakʼ bibek ohoe sạbit utạr daṛeletakoa. Onako do eken hoṛmoteakʼ kana, metakʼme jom-ńũ ar dhorom reakʼ niạm lekate saphakʼ reaṅge. Onako do sanamakʼ jut aroe okte hạbicʼge kạmire lagaolena. Menkhan Mạsi do darakan joto bhageakʼren maraṅ naeke lekategeye hecʼlena. Uni do artetʼ bhage ar artetʼ mońj sewa tạmbure Isorakʼ sewa lạgitʼgeye hecʼlena. Noa tạmbu do manwa tite benaowakʼ do baṅkana, metakʼme ona do dhạrti reakʼ jãhãn jinis hõ baṅkana. Merom ar ḍaṅgrakoakʼ mãyãmte Mạsi do ona sonot utạrakʼ ṭhạ̃ire bae bololena. Uni do acʼakʼ mãyãmte mitʼ dhaoge onḍeye boloyena. Nonkate uni do jaejug lạgitʼ kại khon bańcaokʼ reakʼ hore tearkeda. Okoeko bhõnḍ akan tahẽkan onko cetanre merom ar ḍaṅgrawakʼ mãyãm se pheṭãṛ rapakʼ akade torocʼko chiṭạu akokan tahẽkana; onate onkoakʼ do eken bahre hoṛmo saphakʼkan tahẽkana. Menkhan okoe do jaejug sonot Jiu hotete Isor ṭhen acʼtetʼge niphuṭ dãṛẽ lekateye emen uni Jisuakʼ mãyãm do aboakʼ bibekre bin joanakʼ kạmi khon arhõ bạ̃ṛtiye sapha bona, jemon jiwetʼ Isor bon sewa daṛeae. Isor do okoeko hohokate jaejug ạidạri emako lạgitʼe gokʼatʼko tahẽkan onko jemon onako ńam onate Mạsi do mitʼṭen nawa bondobos reakʼ dene banar secʼrene hoyena. Noa ạidạri ńam do manwa lạgitʼ leṭejokʼakʼ hoeakana, ente pạhil bondobos bahal tahẽkanre manwa okako kại akatʼ onako kại khon chaḍao reakʼ dam lekate Mạsi do jiwiye emleda. Ạidạri oṭo akatʼ dolel kạmire lagao ocoe khan ạidạri dolel akatʼicʼakʼ gujukʼ reakʼ sạbudokʼ jạruṛa, ente manwae gocʼlen anecʼ ạidạri dolel do kạmire lagaokʼa. Ar okoe ạidạri dolele dolel oṭoakatʼ uni jiwetʼe tahen hạbicʼ ona ạidạri dolel do kạmire baṅ jojaokʼa. Ṭhik onkage pạhilakʼ bondobos hõ mãyãm chaḍakate kạmire oho lagaolena. Joto hoṛko ṭhen ạn-ạriko reakʼ mimitʼ hukum lại saḍe tayom Mose do pheṭãṛ ar meromkoakʼ mãyãme hataokeda ar ona sãote dakʼ mesalkate jeṅgetʼ arakʼ bheḍawakʼ up̕ ar husopʼ dạrte ona ạn-ạriko reakʼ puthire ar hoṛko cetanre onaye chiṭạukeda. Uni do ona onkae jokhecʼe menleda, “Noa do ona bondobos reakʼ mãyãm kana, one okaṭakʼ bondobos lekate kạmi lạgitʼ Isore hukumakatʼpe.” Sewa tạmbu ar dewa sewa kạmire beohar lạgitʼ joto jinisko cetanre Mose do inạ mitʼ lekage mãyãme chiṭạuleda. Moseakʼ ạn-ạri lekate sanam jiniskoge mãyãmte saphakʼ kana ar begor mãyãm jorote kại do oho ikạlena. Okaṭakʼ do serma reakʼakʼko reakʼ nokolakʼkan onako do janwar dãṛẽ hotete saphakʼ reakʼ jạruṛ tahẽkana menkhan okaṭakʼ do asolrege serma reakʼakʼko kan onako saphakʼ lạgitʼ do arhõ maraṅ dãṛẽ jạruṛa. Asolakʼ sonot jaega reakʼ nokolakʼ lekate manwa tite tearakʼ jãhãn sonot jaegare Mạsi do bae bololena, bickom ona bodolte uni do sermateye boloyena jemon abo iạte Isor samaṅre ńite hạjir daṛeakʼ. Maraṅ naeke do janwarkoakʼ mãyãmate cetʼleka jao bochor sonot utạrakʼ jaegareye bolokʼkan tahẽkan, Mạsi acʼhõ onkaleka bar bar dãṛẽ samaṅokʼ lạgitʼ sermate do bae bolo akana. Ar onkage hoyokʼ hoelentae khan enḍekhan dhạrti sirjạu khon ehopʼkate ạḍi dhaoge duk jomkate gujukʼ hoekokʼtaea; menkhan ńitokʼ sanam jugko reakʼ mucạtʼre uni do mitʼ dhaogeye sodorena jemon apnartetʼe dãṛẽkʼte kạikoe ocokʼ giḍikakʼ. Isor doe ṭhik dohoakada je, manwako mitʼ dhaoko gujukʼa, ar ona tayom do bicạr hoyokʼtakoa. Ṭhik onkage ạdi utạr hoṛakʼ kại reakʼ bojha gokʼ idi lạgitʼ Mạsi hõ mitʼ dhãogeye dãṛẽyena. Uni do dosar dhaoe hijukʼa, menkhan unre kại ńutumte gujukʼ lạgitʼ do baṅ, bickom acʼ ńel horekanko bańcaoko lạgitʼgeye hijukʼa. Ạn-ạrikore menakʼakʼko do darakan sanam bhageakʼko reaṅ umulkana; onare sạriakʼ reakʼ maraṅteakʼko do bạnukʼa. Onate okoe Isor sewa lạgitʼko hijukʼkan onko do ạn-ạrikote tishõ bochor ke bochor mitʼ lekan janwar dãṛẽte ohoe sạbit oco daṛelekoa. Ạn-ạriteko sạbit oco daṛelen khan, enḍekhan janwar dãṛẽge cabakokʼa honaṅ, ente dewa sewayetʼko do mitʼ dhaoregeko saphalen khan kại lạgitʼ apnar do dusi mente ohoko bujhạukokʼa. Menkhan noa janwar dãṛẽ do jao bochorge akoakʼ kại reakʼ kathakoe disạ ocokoa. Ente ḍaṅgra ar meromkoakʼ mãyãmte kại do tishõ baṅ meṭao daṛeakʼa. Onate Mạsi noa dhạrtiteye hijukʼ jokhecʼ Isore metade tahẽkana, “Janwar ar eṭakʼ dãṛẽ do bam khojlakʼa, menkhan iń lạgitʼ mitʼṭen hoṛmom tearkeda. Jeredokʼakʼ dãṛẽ ar kại lạgitʼ dãṛẽre am do bam kusilena. Tayomte ińiń menkeda, ‘nõkʼõe, iń hecʼakana; sostorre ińakʼ hijukʼ reaṅ olakana. E Isor, iń do amakʼ sana purạutam lạgitʼgeń hecʼakana.’ ” Cetan reakʼ kathakore pạhilte Mạsiye meneda, “Janwarko ar eṭakʼ dãṛẽko, jeredokʼakʼ dãṛẽko ar kại ńutumte dãṛẽko, am do bam khojlakʼa ar onare kusi hõ bam kusilena.” Noa dãṛẽko do ạn-ạri reakʼ hukum lekage hoyokʼkan tahẽkanre hõ uni do noa kathae roṛleda. Ona tayom Mạsiye meneda, “Ńelme, iń do amakʼ sana purạutam lạgitʼgeń hecʼakana.” Dosarakʼ bondobos bahal idi lạgitʼ uni do lahateakʼ bondobose bạtilkeda. Isorakʼ sana lekage Jisu Mạsiakʼ hoṛmo mitʼ dhao samaṅente abo dobon begar ocoakana. Mimitʼ naekeko do dinạmge teṅgokate Isorko sewawae kana ar mitʼ talao inạ mitʼlekage dãṛẽko samaṅeda, menkhan nonkan dãṛẽte kại do tishõ ohoko ocokʼ daṛelea. Menkhan Jisu do kại ńutumte jaejug lạgitʼ eken mitʼṭen dãṛẽye samaṅketʼe Isorakʼ jojomsa aṛereye duṛupʼena. Ar tin hạbicʼ acʼren bạiriko acʼakʼ jaṅga latarre bae dohoko un hạbicʼe ńel hohorkana, ente Isorakʼ monsubạ lekate okoeko begar ocoakan ona mitʼṭen dãṛẽ hotete uni do jaejug hạbicʼ onkoe sạbit ocoakatʼkoa. Sonot Jiu hõ noa reaṅ gohae emabon kana. Pạhilre uniye menakada, Probhui meneda, “Onko tulucʼ oka bondobos iń bandhaoa ona do noage, ińakʼ ạn-ạri do onkoakʼ ontoreń dohoea ar onkoakʼ monreń ol dohokakʼa.” Ona tayom sonot Jiue meneda, “Iń do onkoakʼ kại ar bedhoromakʼko tishõ baṅgeń disạ dohoetakoa.” Onate Isor do tinre kại ar bedhoromakʼkoe ikạya unre kại ńutumte dãṛẽ mente samaṅokʼ do ar cetʼge baṅ tahena. Ado E boehako, Jisu Mạsiakʼ mãyãm gunạkʼte ona sonot utạrakʼ jaegare bolokʼ reakʼ dil do menakʼ getabona. Mạsi do abo lạgitʼ mitʼṭen nawa ar jiwetʼ hore jhicʼ akada, jemon abo do orwal bhitrite, metakʼme uniakʼ hoṛmo talate Isor samaṅre bon seṭer daṛeakʼ. Ona chaḍa aboren do mitʼṭen maraṅ naeke hõ menae tabona, one okoere Isorakʼ gharońjren hoṛkoakʼ dạyike emakan. Onate pạtiạu talate oka khạṭitetʼ hijukʼkan, ona sạbit utạrakʼ khạṭi ontorte Isor samaṅre bon calakʼma; ente dusi bibek reakʼ ti khon aboakʼ ontor do mãyãm chiṭạukate sapha ocoakana ar phạriạ dakʼte hoṛmo do um sapha akan tabona. Biswạs lekate aboakʼ oka as menakʼ, onate dela, kajakte uniakʼ katha bon aṅgoc ma, ente okoeye gokʼ akatʼ uni doe pạtiạrgea. Dela, mimitʼko reaṅ bon dạndikʼma jemon dulạṛ ar bhage kạmi lạgitʼ mimitʼko uskur bon emako. Adom adom hoṛakʼ mitʼ ṭhecʼ jarwakʼ reakʼ cetʼleka heowa menakʼtako, onka leka jarwakʼ do alo bon bạgi ma, bickom Mạsiakʼ hijukʼ din hạbicʼ mimitʼko jemon arhõ bon udgạuko. Isorakʼ sạriakʼtetʼ baḍaekate hõ dikhitege bon kại khan, enḍekhan kại ńutumte ar jãhãn dãṛẽ do bạnukʼa; bickom eken bicạr reakʼ botoranakʼ ghuṛi ar Isorren bạiriko lo torocʼko leka jolokʼkan edrege ńelhor akae tahen hoyokʼa. Jãhãe Moseakʼ ạn-ạri bae aṅgoc khan uni do jãhãn daya baṅkate bar se pe hoṛakʼ goha iạteye gocʼ ocokʼa. Enḍekhan Isorren Hopon okoeye kurud akawade, oka mãyãmte uniye sapha akan Isorakʼ ona bondobos reakʼ mãyãm okoe be sonotakʼ menteye bujhạuetʼ ar okoe dayae emokʼkan uni sonot Jiu okoeye bemanot akade, enḍekhan hudispe, uni do tinạkʼ artetʼ sạjạyokʼ lek kanae! Ale do unile baḍae akadea one okoeye menetʼkan, “Hala hạli do ińakʼge, ińgeń hala ruạṛa; okoe okaṭakʼ ńam lek kane uni do onageń emaea.” Uni do arhõ mitʼ jaegareye meneda, “Probhuge acʼren hoṛko lạgitʼ hok reakʼe bicạrtakoa.” Jiwetʼ Isorakʼ tire paṛaokʼ do ạḍi botoranakʼ kangea. Laha dinko reakʼ katha disạipe. Unre marsal ńamkate ape do duk jom talate hõ teṅgo ṭak akaepe tahẽkana. Oka oka okte do sanamko samaṅre tamasakope hoeocolente opoman ar santao sahaokate dukpe jomleda; ar okoeko cetanre onkan beohar hoelen onko tulucʼ hõ ape do dukpe sahaokeda; ar okoeko hajot ocoakan tahẽkan onkoakʼ duktepe duklena. Apeakʼ jinisko luṭlenre rạskạ salakʼpe manaoleda, entepe baḍaekan tahẽkana, arhõ bhage ar jaejug dhon menakʼtapea mente. Onate ape do dil alope aṛakʼ giḍitapea, ente noa reakʼ kuṛại do maraṅgea. Ape do sombhuri reakʼ jạruṛ menakʼtapea, jemon Isorakʼ sana leka kạmi purạukate okae gokʼ akawatʼpe ona jemonpe ńam; ente Isorakʼ katha leka, “Okoeakʼ hijukʼ reakʼ katha menakʼtae uni do ar thoṛa din khangeye hijukʼa, ar bae biloma. Okoe hoṛ dhorom menteń ataṅ akade uni do pạtiạu hotetege jione ńama; menkhan jãhãegeye ruạṛ calakʼ khan unire do bạń kusikʼa.” Okoe ruạṛ senkateko maraokʼkan onko dolren dobon baṅkana; menkhan pạtiạukʼte okoe bańcaoko ńam onko dolren kangea bon. Okaṭakʼ ńama mentebon as akan ona dobon ńamgea ar ona reakʼ khạṭitetʼ do hoyokʼ kana pạtiạu. Ar ona pạtiạu hotete purạ puri bon bujhạu daṛeakʼa je, okaṭakʼ babon ńel ńametʼkan ona do sạrige menakʼgea mente. Biswạs iạtege aboren hapṛamko do Isorakʼ sarhaoko ńamleda. Ar biswạs hotetege bon bujhạu daṛeakʼ kana je, Isorakʼ moca reakʼ kathate noa dhạrti do sirjạulena. Onate bujhạukʼ kana, abo okaṭakʼ bon ńel ńametʼkan ona do jãhãn ńelakʼ jinis khon do baṅ sirjạu akana. Biswạs iạtege Kạin khon Abelakʼ dãṛẽ do Isor samaṅre arhõ bhageakʼ tahẽkana. Biswạs iạtege Isor do uniakʼ dãṛẽ aṅgockate uni reaṅ noa gohae emleda je, uni doe dhoromgea mente. Abele gocʼakanre hõ enhõ uniakʼ biswạs hotetege uni do ńit hõ kathae roṛeda. Biswạs iạtege Enok do bae gocʼlena; uni do sermateye rakapʼ ocoakana. Isor do uniye idiakade iạte bae sendra ńamlena. Enok idiye lahare Isor do noa gohae emleda je, Enok do uniye kusi ocoakadea. Biswạs begorte Isor kusi ocoye do baṅ hoedaṛeakʼa, ente Isor ṭhen okoeye calakʼ, uni do biswạsokʼ hoyokʼtaea je, Isor menaea ar uniakʼ katha leka calakʼko do uniakʼ ti khon kuṛạiko ńama. Okaṭakʼ do unrehõ baṅ ńṭoṭhan tahẽkan, ona reaṅ Isor do Noahae sontorledea. Noah do Isor bhokti hoṛe tahẽkante Isorakʼ kathare biswạskate mitʼṭen jahaje benaoleda, jemon acʼakʼ gharońjrenko rukhiyạko ńam. Noah do acʼakʼ biswạs hotetege dhạrtirenko dusi menteye sạbudletʼkoa ar Isor ṭhen dhorom mente ataṅokʼ reakʼ ạidạriye ńamleda, one oka do eken biswạs hotetege ńamokʼkan. Isor do Abrahame hohoade tahẽkanre biswạs iạtege Isorakʼ kathareye gobolena ar ạidạṛi lekate okaṭakʼ jaega ńam reakʼ katha tahẽkantae ona jaegateye calaolena. Unre bae bujhạu akatʼ tahẽkana okateye calakʼkana mente ar enhõ uni doe monḍhalena. Isor do okaṭakʼ disạm Abraham emae lạgitʼe gokʼade tahẽkana uni do biswạs iạtege bedisiạ hoṛ lekate onḍeye berelena. Ar uni sãote okoe do inạ mitʼ gokʼakʼren bhor reakʼ bhạgiạdarko tahẽkan Isạhak ar Jakob leka uni hõ tạmbukoreye ḍerakʼkan tahẽkana; ente oka nagraha tahẽ utạrokʼ uni do ona nagraha reakʼ koyokʼ horreye tahẽkana. Ona nagraha reakʼ noksa ar gathao rakab reakʼ kạmi do Isorgeye kạmiakada. Sara do gidrạ hoyokʼ reakʼ umer parom calaolentaere hõ biswạs iạtegeye bhạrti hoṛmolena, ente uni do biswạs tahẽkantaea, okoeye gokʼakawade uni doe pạtiạrgea mente. Onate umer secʼte gocʼ barag hoṛmo hoekatere hõ Abraham do sermaren ipil leka ar jalapuri aṛe reakʼ gitil leka ạḍi utạr gidrạkoren apate hoelena. Noko hoṛko do pạtiạu talate jion khemao kateko gocʼena. Isor okaṭakʼ emokʼ reakʼe gokʼatʼko tahẽkan ona do bako ńamleda, menkhan sạṅgiń khon onako ńelleda ar kusi hõko kusiyada. Noa dhạrtire bedisiạ ar upriạ lekako tahẽkan ona doko aṅgocletʼgea. Okoe onako aṅgocketʼ onko do pusṭạuteko bujhạu ocoyeda je, onko do ako lạgitʼ mitʼṭen disạmko ńam baṛakana. Ar oka disạm khonko oḍok hecʼlen ona disạmko uihạr ruạṛ lekhan, enḍekhan ona disạm ruạṛ calakʼ reakʼ joto ạtgeko ńamkea. Menkhan onko do arhõ bhage mitʼṭen disạm reakʼ, metakʼme jion puri reakʼko ńam baṛayetʼkan tahẽkana. Ona iạte Isor acʼtetʼ do onkoren Isor mente ńumogokʼ bae lajaokʼ kana, ente uni do onko lạgitʼge mitʼṭen nagrahae tear akatʼ tahẽkana. Abraham do biḍạu ocokʼ jokhecʼ Isorre pạtiạu iạtege Isahak doe samaṅledea. Okoe ṭhen Isore gokʼ akatʼ tahẽkan unige acʼren sadher hopon dãṛẽye lạgitʼe samaṅedekan tahẽkana. Nuige uni hopon do one okoe reaṅ Isore menakatʼ, “Isạhakren bõsge amren bõs menteko lekhakʼa.” Abraham do uni dãṛẽye lạgitʼe rạjiyena, ente uni doe pạtiạukʼkan tahẽkana Isor do gocʼko hõe jiwetʼ beretʼ daṛeakoa mente. Ar gujukʼ duạr khon Abraham do Isạhake ńam ruạṛkedea. Biswạstege Isạhak do tayom daramakʼko reaṅ Jakob ar Esaue bhoratʼkin tahẽkana. Biswạs iạtege Jakob do gujukʼ jokhecʼ Joshepren banar hopone bhoratʼkin tahẽkana ar ṭheṅgare tirupʼkate Isore sewawade tahẽkana. Biswạs iạtege Jakob do gujukʼ jokhecʼ Misor disạm khon Israelko oḍok calakʼ reakʼ kathae metatʼko tahẽkana ar acʼakʼ mạ̃ṛĩ cekae hoyokʼa mente ona hõe lạiatʼko tahẽkana. Moseakʼ janam tayom uniren eṅgat-apat do biswạs iạtege pe cando kin oko doholede tahẽkana, ente onkin dokin ńelkeda, gidrạ do ńelokʼteye mońjgea ar onate raj reakʼ hukum hõ bạkin botorada. Biswạs iạtege Mose doe sẽṛãyen khan, Pharao hoponeratren hoponko hohoae do bae khojkan tahẽkana. Uni do thoṛa din lạgitʼ kại reakʼ rạskạ bạgikate Isorren hoṛko sãote duk jojomgeye bachaoana. Uni do Misor reakʼ dhon durib khon Mạsi ńutumteakʼ opomange ạḍi bạ̃ṛtiye moneada, ente uni do kuṛại secʼe beṅgetʼ akatʼ tahẽkana. Isor cetanre biswạs iạtege uni do raj begor botoraete Misor disạme bạgiatʼ tahẽkana, ente baṅ ńelokʼicʼ ńelekan lekae sumbhrạukeda. Uni do biswạs iạtege sen-parom porob ar mãyãm chiṭạu reakʼ niạme manaoleda, jemon nonosṭoyicʼ goḍet do pạhil janamkoe gocʼlekore Israelrenko jemon aloe joṭetʼko. Biswạstege Israelko do rohoṛ ot leka Arakʼ jalapuriko taṛam paromleda menkhan Misriko do paromokʼ jokhecʼko unum gocʼena. Biswạs iạtege Israelko do eae din hạbicʼ Jerikho nagraha reakʼ pạcri beṛhaeteko dãṛã ạcurketʼ khan ona do bhindạṛena. Biswạs iạtege Rahab kusmbi do Jerikho nagrahareko tahẽkan bebatao hoṛko sãote bae nosṭolena, ente uni do unkin disạm ciyạkin peṛa lekae ataṅ aderletʼkinạ. Noa khon bạ̃ṛti do ar cetʼ iń lạiya? Gideon, Barak, Samson, Jeptha, Dạud, Sạmuel ar nạbikoakʼ katha galmarao lạgitʼ ińakʼ somoe do bạnukʼa. Biswạs hotetege onko do rajosṭiko jitạuleda, hok reakʼko bicạrleda, Isorakʼ gokʼakʼko ńamleda, dhạcri kulkoakʼ mocako bondletʼa, ar jolokʼ seṅgel reakʼ daṛeko nimbhạuleda, tarwaṛe khonko rukhiyạlena, nijor khonko daṛe ocolena, lạṛhạire daṛeko udukʼleda ar bidisiạ palṭonkoko laga ńirletʼkoa. Maejiuko do akoren gocʼ hoṛko arhõ jiwetʼgeko ńam ruạṛketʼkoa. Eṭakʼko do akotege hajot khon baṅ chaḍaokʼteko santao ocolena, jemon onko do gocʼko khon beretʼkate artetʼ mońj jionko ạidạri joṅ. Arhõ eṭakʼko do cigạri arko dal ur ocoyena, hẽ biṛikoteko tol ocolena ar hajot hõko hajot ocolena. Dhiriteko tiń ocoyena, ạriteko getʼ paṛakʼ ocoyena ar tarwaṛeteko gocʼ ocoyena. Onko doko santao ocolena ar bạṛicʼko beohar ocolena, ar akoṭreko paṛaoen khan bhiḍi ar meromakʼ harta horokʼkateko ạcur baṛaekan tahẽkana. Onko do hahaṅkarkore, burukore, danderkore ar khorloṅkoreko ńir oko baṛaekan tahẽkana. Noko hoṛko jaega emako reakʼ lek noa dhạrti reakʼ do baṅ tahẽkana. Biswạs iạtege onko sanamkogeko sarhao ocolena, menkhan Isor okaṭakʼ emako lạgitʼe gokʼletʼ tahẽkan ona do bako ńamlakʼa; ente Isor do abon lạgitʼ arhõ mońjakʼe ṭhik dohoakatʼ tahẽkana. Uni doe ṭhik doholeda je, abo begorte onko do ohoko sạbit utạr ocolena. Enḍekhan ńelokʼ kana, Isorre biswạs reakʼ goha lekate aema hoṛ do abo beṛhaeteko ṭhạurạ akana. Onate dela bon, mitʼke mitʼ tạkicʼakʼ ar oka kại abore laṭkao akan ona do sạṅgiń secʼ bon ṭhelao giḍikakʼte sombhuri salakʼ laha secʼ bon ńir calakʼma. Delabon, Jisu secʼ beṅgetʼ akae bon tahenma, one okoe do biswạs reakʼ rehetʼ are sạbit utạricʼ kan. Uni samaṅre oka rạskạ dohoakan ona lạgitʼge uni do manot secʼ bae moneyatʼte krusre gujukʼe sahaokeda ar ńitokʼ do Isorakʼ siṅghạson reakʼ jojomsa aṛereye duṛupʼ akana. Okoe do kại hoṛkoakʼ nunạkʼ maraṅ bạiriye sahaoketʼ, uni reaṅ hudisokʼpe, jemon apeakʼ mon alo nijorokʼ ar beasko alope hoyokʼ. Kại birudre lạṛhại lạṛhạite mãyãm jorokʼ hạbicʼ okte do apere ńithõ baṅ hoeakana. Isor do acʼren gidrạko lekae udgạu akatʼpete okae galmarao akatʼpe ona dope hiṛiń akada. Uni doe menakada, E beṭa, Probhuakʼ ḍanṭao do alom neṅghaoa, ar uniye egerlemre alom ạtruńokʼa; Ente Probhu do okoeye dulạṛe, unigeye ḍanṭaoea, ar gidrạ mente okoekoe aṅgocko, onko mitʼke mitʼ doe sạjạikoa. Ape do noako kosṭo ḍanṭao lekatepe jomakada. Isor do ape tulucʼ apat lekageye beohareda. Nonkan hopon jãhãe menakʼkoa one okoe do acʼren apat bae ḍanṭaoedekan? Sanam hopongeko ḍanṭao ocokʼa. Ar bape ḍanṭao ocoakan khan enḍekhan ape do bidhuạ hoponko kanape, sạriakʼren hoponko dope baṅkana. Ona chaḍa bon ńelakada, dhạrtiren babako do aboko ḍanṭaoetʼbon tahẽkana ar abo do onko bon manotetʼkokan tahẽkana. Enḍekhan okoe do sanam jiukoren Baba kane unire gobol tahen do cetʼ artetʼge lek baṅkan tabona, jemon jion bon ńam? Aboren dhạrtiren babako okaṭakʼ bhageko bujhạuletʼ, ona lekageko ḍanṭao akatʼbona, ar ona do thoṛa din lạgitʼge; menkhan aboakʼ bhage lạgitʼge Isor do aboe ḍanṭaoetʼbona jemon uni leka sonot bon hoyokʼ. Ḍanṭao do rạskạ reakʼ mente babon metakʼ kana, bickom duk reakʼ mentege bon bujhạueda; menkhan Isorakʼ ḍanṭao batao reakʼ jo do sulukte perecʼ dhorom jion kana. Onate apeakʼ borocʼ ti ar nijor gunṭhiko do daṛe ocoetape. Apeakʼ calakʼ hor sojhetape, jemon leḍha hoṛ do ar aloe mackaokʼ, bickome boge ruạṛokʼ. Sanam hoṛko tulucʼ sulukte tahen ar sonot hoyokʼ lạgitʼ ahkaokʼpe. Sonot begor Probhu do okoe hõ bako ńelńamea. Ńelpe, okoe hõ jemon Isorakʼ daya khon aloko eṛanokʼ. Ar hewer haṛhatʼ dare reakʼ rehetʼ leka omon rakabokʼte okoe hõ jemon duk janam ocoete ḍher hoṛ aloko bhõnḍko. Ńelpe, okoe hõ jemon Esau leka bedhoromicʼ aloe hoyokʼ se Isor bebhoktiyicʼ aloe hoyokʼ ma. Esau do mitʼ sańj jomakʼ lạgitʼ pạhil janam hoke ạkhrińletʼtaea. Baḍaegeape, tayomte rakʼ rakʼte ạsirbade koeletʼre hõ enhõ uni doe nihạt giḍi ocoyena, ente mon ạcur reakʼ ạt unre baṅ tahẽkana. Okaṭakʼ jolokʼkan buru joṭetʼ daṛekokʼ ona lekan buru ṭhen do bape hecʼakana. Ape do kaṛaṅ kucạṅ ńut ar birbão se jãhãn sakwa reakʼ saḍe ar katha reakʼ aṛaṅ ṭhen hõ bape hecʼakana. Okoe ona kathako ańjomletʼ tahẽkan onko do nehõrkateko menleda jemon onko ṭhen ar cetʼge alo roṛogokʼ, ente onko do noa hukum bako sahao daṛeada, cedakʼ je, “Janwar hõ janwar ona burureye jakʼle khan, enḍekhan dhiriteye tiń ocokʼa.” Okaṭakʼ ńellen tahẽkan ona do nunạkʼ botoranakʼ tahẽkana je, Moseye menleda, “Iń do botorteń thar tharaokʼ kana.” Ape do Sion buru ar jiwetʼ Isorakʼ nagraha ṭhenpe hecʼakana. Ona nagraha do hoyokʼ kana serma reakʼ Jerusalem. Ar hajar hajar serma goḍetkoakʼ rạskạ porob ṭhenpe hecʼakana; pạhil janam hopon reakʼ ạidạriko ńamakatʼ hoṛ lekate okoekoakʼ ńutum sermare ol akan, onko hotete benaoakʼ manḍer ṭhenpe hecʼakana; okoe doe sanamkoren bicạricʼkan uni Isor ṭhenpe hecʼakana; ar okoekoko sạbit ocoakan onko sanam dhorom hoṛkoakʼ jiu ṭhenpe hecʼakana; Okoe doe nawa bondobosren dene banaricʼ kan uni Jisu ṭhenpe hecʼakana; ar Abelakʼ mãyãm khon okaṭakʼ mãyãm do artetʼ bhage kathae roṛ, ona chiṭạu akan mãyãm ṭhenpe hecʼakana. Men sontorokʼpe, okoe kathae roroṛkan uniakʼ katha do alope phesṛaotaea. Mose do Isorakʼ sontor katha dhạrtirene baḍae ocoketʼko khan hoṛko do uniakʼ kathako phesṛaoletʼtaea ar rukhiyạ bako ńamleda, unre serma khon okoeye sontorakatʼ bon uniakʼ babon bataole khan cetʼtehõ rukhiyạ oho bon ńamlea. Unre Isorakʼ moca kathatege dhạrti do dal dalaolena, menkhan ńitokʼ uni do noae gokʼakada, “Iń do eken armitʼ dhao dhạrtiń dal dalao ocoea ona do baṅ, menkhan serma hõń dal dalaoa.” “Ar mitʼ dhao,” Noa banar kathate bujhạukʼ kana je, oka jinisko dal dalaokʼa, metakʼme oka sirjạu akan ona do pheraokʼa, jemon oka jinisko baṅ dal dalaokʼ onako do ṭarhao tahena. Onate okaṭakʼ rajosṭi baṅ dal dalaokʼ, ona rajosṭi bon ńam joṅkante dela, Isor bon gun manao joharaema. Enḍekhan Isor okalekae kusiyakʼ ona leka bhokti ar botor salakʼ bon sewa daṛeaea. Ente aboren Isor do ḍahao maraoakʼ seṅgel lekanae. Ape mimitʼko boeha leka dupulạṛpe. Ar peṛakʼ do alope hiṛińa; adom adomko do begor baḍaetege serma goḍetkoko peṛaletʼkoa. Okoe hajotre menakʼko onko sãote ape hõpe kạidi oco akana, ar khed ocokʼkanko sãote ape hõpe khed ocokʼkana mente hudiskate onkoakʼ katha disạipe. Sanamkoge bapla do manot salakʼko beṅgetʼakʼma. Jãwãe ar bạhu talare bapla tonol do sonot dohoe lek kana, ente jãhãlekan laṭghaṭge, ar jãhãe ona dusireko dusige khan Isor do onkoe sạjạikogea. Ṭaka-poesa reakʼ laloc khon sahaṛakae tahenpe. Apeakʼ oka menakʼtape onatege dhirpur akae tahenpe. Isore meneda, “Iń do tishõ bạń alaomea ar tishõ bạń giḍimea.” Onate abo do dilkate bon men daṛeakʼa, Probhu do ińren goṛoyicʼ, iń do bạń botorokʼa; manwa do cetʼko cekayińạ? Okoe ape ṭhen Isorakʼ kathako lại jạhirletʼ tahẽkan, onko mukhiyạkoakʼ kathako disạipe. Onkoakʼ jion cạrit reakʼ mucạtʼ jo mońjte beṅgetʼakʼpe ar onko leka biswạs dohoepe. Jisu Mạsi do hola cetʼlekae tahẽkan, teheń hõ onkage menaea ar jaejug hạbicʼ hõ onkageye tahena. Aema lekan nawa nawa cecetʼakʼte bhul horte jemon aloko bulạu idipe. Aboakʼ mon do dãṛẽ samaṅ akatʼ jomakʼre tahẽ baṅkate Isorakʼ dayare jemon kajakte ṭarhao akae tahen. Okoe ona jomakʼreko ṭehãḍokʼkan tahẽkan, onko do ona jomakʼ khon jãhãn porho baṅ hoelentakoa. Aboakʼ do mitʼṭen pinḍ menakʼa ar okoe Israelkoakʼ ona sewa tạmbureko kạmikan, onko do aboakʼ pinḍ cetanre samaṅ akatʼ jãhãnakʼge jojom reakʼ ạidạri bạnukʼtakoa. Kại ńutumte dãṛẽ samaṅ akatʼ janwarakʼ mãyãmante Israelren maraṅ naeke do sonot utạrakʼ jaegateye calakʼkan tahẽkana, menkhan janwarkoakʼ hoṛmo do Israelkoakʼ tahen jaega khon bahrete idikateko rapakʼ giḍikakʼkan tahẽkana. Onkage Jisu hõ Jerusalem nagraha bahrere duk jomkateye gocʼlena, jemon acʼakʼ mãyãm hotete manwako kại khone chaḍaoko. Onate dela bon, uniakʼ opomanbon gogte nagraha bahre uni ṭhen bon calakʼma, ente nonḍe do jaejug hạbicʼ jãhãn nagraha bạnukʼ tabona; menkhan okaṭakʼ nagraha daraekan ona lạgitʼ bon koyokʼ horakada. Onate delabon, Mạsi hotete Isor ṭhen sarhao reakʼ samaṅokʼakʼ jaoge bon samaṅma, metakʼme Isorren hoṛ mente okoe apnarteko aṅgocetʼkan onko do akoakʼ mocate Isorko gun manao joharae ma. Bhage kạmi lạgitʼ ar eṭakʼko reṅgejokʼre bhạlạiko reakʼ do alope hiṛińa, ente Isor do nonkan dãṛẽgeye kusiyakʼa. Aperen ạyurkoakʼ katha bataope ar onko gobolre tahenpe, ente okoe Isor ṭhen lekha jokhako em, onkan hoṛ lekatege coṅ onko ma apeko ńel todarotetʼpe kan. Onko ṭhen gobolokʼpe jemon onko do akoakʼ kạmi rạskạ salakʼko kạmi daṛeakʼ, menkhan duk salakʼ do baṅ. Ar duk salakʼge ona onkae hoyokʼ khan, enḍekhan onate apeakʼ do cetʼ porho hõ baṅ hoyokʼtapea. Ale lạgitʼ koejoṅpe. Sanamakʼkore dhorom lekate senokʼle menjoṅkan iạtele baḍaekana je, aleakʼ bibek do napaegetalea mente. Menkhan iń do apeko artetʼ bạ̃ṛti koejoṅ lạgitʼ iń nehõrape kana, jemon usạrate arhõ ape sãoteń ńepel ńapam daṛeakʼ. Oka mãyãmte sulukren Isorakʼ jaejug bondobos doho akan ona hotete Isor do aboren Probhu Jisu Mạsi, metakʼme bhiḍikoren maraṅ gupiyicʼ do gocʼko khone jiwetʼ beretʼkedea. Okaṭakʼ bhageakʼ kan onate uni do acʼakʼ monejoṅ leka calakʼ lạgitʼ apeko purạteye sạbit utạrpe ma. Uniakʼ mẽtʼãhã samaṅre okaṭakʼ bhageakʼkan Jisu Mạsi hotete aboakʼ ontorre uni do onageye kạmi ma. Jaejug hạbicʼ Isorakʼ ṭhonokʼ hoyokʼtae ma. Amen. E boehako, ape ṭhen ińakʼ bạ̃ṛti nehõr do noage je, ińakʼ noa sikhạuna kathako do bataotińpe. Ar ape ṭhen bạ̃ṛti katha do bạń oletʼkana. Iń do baḍae ocope sanayediń kana je, aboren boeha Timothi do khalase ńamakada. Are hecʼlen khan iń do uni soṅgekateń hiripea. Aperen sanam ạyurko ar Isorren sanam hoṛko aboakʼ johar emakope. Itạliạ disạmren Isorren hoṛko do apeko joharape kana. Ape sanamko tulucʼ Isorakʼ daya baṛe tahenma. Isor ar Probhu Jisu Mạsiren golam iń Jakob do dhạrti reakʼ sanam jaegareko chir chạtur akan Jihudikoren gel bar bõsrenko johariń emako kana. E ińren boehako, ạḍi lekan biḍạurepe paṛaokʼlenre ona do rạskạ reakʼ kana mente alope hudisa, entepe baḍaegea biswạs reakʼ biḍạuge apeakʼ soboriye baḍhao ocoyeda. Ar ona soborige apeakʼ jionre purạte kạmire lagaope, jemon gạkhuṛ arpe niphuṭ utạr daṛeakʼ, metakʼme apeakʼ colonre okulạn alo tahen ma. Apeko modre jãhãe akel reakʼ okulan menakʼtae khan uni do Isor ṭhene koejoṅma, ar Isor do onae emaea, ente uni do begor ạṛiste mimitʼko asambheṛe dan akoa. Menkhan begor digdhạte pạtiạukʼ salakʼ koejoṅ hoyokʼtaea, ente okoeye digdhạkʼ uni do hoete sokojokʼkan jalapuri reakʼ ḍheo lekanae; hoege uni doe ṭhelao idiyea. Nonkan hoṛ do Probhu ṭhen khon jãhãnakʼe ńama mente aloe asokʼma. Uni doe bar monan hoṛ kana ar joto kạmirege bae ṭarhaokʼa. Okoeṭakʼ biswạsi boeha doe nindhạnge, Isor do uniye usulkedete apnarte bhạganicʼe hudisokʼma. Ar okoeye kisạ̃ṛge, Isor do uniye nindhạnkedete uni hõ apnarte bhạganicʼe bujhạukʼma, ente uni do ghãs reakʼ baha lekageye mosotʼ cabakʼa. Siń cando jharla jhạrli setoṅanteye rakapʼlenre ghãsko do rohoṛokʼa ar ona reakʼ sajaotetʼ do nosṭo cabakʼa. Onkage kisạ̃ṛ hoṛ hõ acʼakʼ jion reakʼ horkoreye tolmocʼ cabakʼa. Bhạgangeae uni do one okoe biḍạureye sombhuriyetʼkan, ente lek kanae menteye sạbudlen khan uni do jit reakʼ mala lekate jione ńama. Ar okoe Isorko dulạṛedekan onko do jion emako lạgitʼe gokʼakatʼkoa. Jãhãege ontorre kại secʼe orokʼ kana menteye bujhạu khan aloe menma, “Isor do kại secʼe oreń kana.” Ente jãhãn bạṛicʼakʼge Isor do kại horte bae ididaṛeaea. Ontor reakʼ bạṛicʼ sanage manwa do kại secʼe or idiyedea ar ghaḍlakʼreye giḍiyea. Ona tayom bạṛicʼ sana purạulen khan kạiye janama, ar kại perecʼlen khan gujukʼe janam ocoea. E ińren dulạṛiạ boehako, alope bhula. Jion reakʼ mimitʼ bhage ar niphuṭ dan do serma khon pheḍ hijukʼ kana, ona do Isor ṭhen khonge hijukʼ kana, ar uni do sanam marsalkoren Baba kanae. Uni do parom calakʼkan umul leka bae pheraokʼa. Acʼakʼ nij sanate sạriakʼ katha hotete uni do acʼren gidrạkoe hoe ocoketʼbona, jemon uniakʼ sirjonre pạhil utạrakʼ jo bon hoyokʼ. Ińren dulạṛiạ boehako, ińakʼ noa katha hetawakʼpe, ape mimitʼko ańjom lạgitʼ gagojokʼpe, menkhan usạrate katha alope roṛgoda se alope raṅgao godokʼa; ente abo ṭhen khon Isor oka dhorom jione asokʼkan ona do raṅgao talate oho hecʼlena. Onate joto lekan bedhorom ar bạṛicʼakʼko ńit hõ apeakʼ jionre menakʼ khan ona do bạgiyakʼpe. Isorakʼ katha reakʼ itạ one oka do apeakʼ ontorre rohoe akan ona baṛe mạ̃hir salakʼ ataṅpe. Ar kại khon bańcaope reakʼ ektiạri do noa katharege menakʼa. Eken Isorakʼ katha ańjomkate do baṅ hoyokʼa, onaleka kạmi hõ lagaokʼa. Eken Isorakʼ kathagepe ańjom ar ona leka bape kạmi enḍekhan ape do apnartegepe ṭhokakʼ kana. Okoe eken ona kathae ańjom menkhan ona leka bae kạmi uni do nonkan hoṛ lekanae, okoe do ạrsire acʼakʼ rup ńelkate unregeye hiṛińgotʼetʼkan. Menkhan okaṭakʼ purạ ạn manwa do sạdhintetʼe danae ona secʼ okoe mońjteye beṅged are hetawakʼ, uni do ona ạn reakʼ katha ańjomkate bae hiṛińa bickom ona lekae kạmiya. Onate uni do acʼakʼ sanam kạmire bhore ńama. Okoe apnarte dhorome hudisokʼkan menkhan acʼakʼ alaṅ bae sambṛao daṛeakʼ uni do apnargeye bulạukʼkana. Ar uniakʼ dhorom korom do ạuṛiakʼgetaea. Rạnḍi maejiu ar tũạr amarko dukokʼre hiriko ar dhạrti reakʼ joto lekan bạṛicʼakʼ khon apnartetʼ sahaṛ akae tahenge hoyokʼ kana Isorakʼ mẽtʼre sạri dhorom ar khạṭitetʼ. E ińren boehako, aboren ṭhonokte perecʼ Probhu Jisu Mạsirepe pạtiạu akan khan sanamko somante beṅgetʼ akope. Mitʼṭen hoṛ do sona reakʼ mundạm ar mońj kicricʼ horokʼkate apeakʼ sunạgogteye hecʼena; onkage ar mitʼṭen reṅgecʼ hoṛ hõ mạilạ kiricʼ horokʼkateye hecʼena. Unre ape do mońj kicricʼ horokʼ akatʼ hoṛ bạ̃ṛti manot emaetepe metae, “Am do noa bhage jaegare duṛupʼme,” ar uni reṅgecʼ hoṛ dope metae, “Onḍe teṅgo hataṛokʼme,” se “Nonḍe jaṅga pheḍre duṛupʼme,” Enḍekhan apnar talare cetʼ kạṭicʼ ar lạṭu reakʼ bape sirjạueda ar bạṛicʼ monsubạte bape bicạreda? E ińren dulạṛiạ boehako, ańjomtińpe. Dhạrti secʼte okoeko reṅgecʼge, onkoge cetʼ Isor do biswạsre kisạ̃ṛokʼ lạgitʼ bae bachao akatʼkoa? Okoe Isorko dulạṛedekan onko do uni okaṭakʼ rajosṭi udukʼako lạgitʼe gokʼatʼko tahẽkan ona rajosṭiren bhạgiạdarko hoyokʼ lạgitʼ cetʼ noko reṅgecʼ hoṛko bae bachao akatʼkoa? Menkhan onko reṅgecʼ hoṛkoge ape dope bemanot akatʼkoa. Kĩsạ̃ṛ hoṛkoge cetʼ bako kosṭoyetʼpea ar adalotte bako or idiyetʼpea? Okoeakʼ ńutum lekatepe hoho ocokʼkan kĩsạ̃ṛko do cetʼ ona manot ńutum bako opomanwakʼkana? Sonot sostorre olakana, “Am aḍepaseren hoṛ apnar leka dulạṛem.” Ape do Mạsiakʼ rajosṭi reakʼ ạn sạṛigepe manaoetʼ khan enḍekhanpe bhageyetʼgea. Menkhan jotoko somante bape beṅgetʼakokan khan enḍekhanpe kạiyeda. Ar noa ạnge unre ạn bebataoko menteye dusipea. Okoe hoṛ ạn-ạri pańjakatere hõ eken mitʼṭen babotreye kại uni do joto ạn-ạrikogeye bebataoetʼ kana. Okoeye menakatʼ, “Alom loṭghuṭia,” Unige arhõe meneda, “Alom khũna.” Enḍekhan ape do loṭghuṭi baṅkatepe khũn khan enḍekhan ạn bebataoko do cetʼ bape hoyokʼ kana? Okaṭakʼ ạn do manwa sạdhine danako kan ar ona ạn hotete okoekoakʼ bicạr hoyokʼ, onko lekage katha roṛpe ar beoharpe; ente okoe bae daya akan, bicạrre uni hõ daya do bae ńama. Bicạr cetanre daya doe jitạukʼa. E ińren boehako, jãhãeye men uniakʼ do biswạs menakʼtaea menkhan kạmire ona bae udug enḍekhan ona reakʼ do cetʼ porho menakʼa? Ona biswạs do cetʼ kại khone bańcao daṛeaea? Ape modre jãhãe boeha se miserawakʼ oṛakʼre jomakʼ, ar horokʼ lạgitʼ kicricʼ hõ bạnukʼtae, ar jãhãe uniye metae, “Amakʼ bhage hoyokʼma, jom ńũkate mońjte tahenme,” Menkhan jạṛuṛakʼ jãhãnakʼge bape bebostawae enḍekhan onate uniakʼ do cetʼ jãhãn porho hoyokʼtaea? Ṭhik onkage, okaṭakʼ biswạs sãote kạmi reakʼ jopoṛao bạnukʼ ona biswạs do gocʼgea. Jãhãeko mendaṛekea, “Am do biswạs menakʼtama ar ińakʼ do kạmiko menakʼtińạ.” Kạmiko begorte amakʼ biswạs udukʼạńme ar iń do kạmi hotete ińakʼ biswạiń udukʼama. Am do mitʼ Isorrem pạtiạu akana? Bhagegea! Menkhan bạṛicʼ jiuko hõ coṅ ona mako pạtiạukʼkan ar botorteko dhak dhakaokʼkan. E lelha! Kạmi begor biswạs je gocʼge ona reakʼ cetʼ cinhạm khojkana? Aboren hapṛam Abraham do acʼren hopon Isạhak pinḍreye dãṛẽyede tahẽkanre ona kạmi lạgitʼ cetʼ uni do dhorom mente bae aṅgoclena? Am mam ńeletʼkangea je, biswạs ar kạmi unre uni do mitʼ dhaoteye kạmileda ar uniakʼ ona kạmige biswạsre perecʼtetʼe danadea. Nonkate sonot sostor reakʼ katha do purạulena, “Abraham do Isorakʼ kathae biswạsada ar onate Isor do dhorom menteye aṅgockedea.” Onate uni do Isorren dulạṛiạ menteye hoho ocolena. Enḍekhanpe ńeleda, eken biswạstege Isor do manwa dhorom menteye aṅgocea ona do baṅ, menkhan biswạs ar kạmi noa banar iạtege Isor do manwa dhorom menteye aṅgocedea. Rahab kusmbi do cekate dhorom menteye lekha ocolena? Uni do Jihudiren paṭhaonakine okoketʼ kinạ ar eṭakʼ horteye kolgotʼkatʼkinạ, ar noa kạmi iạte dhorom menteye aṅgocena. Jiwi begor hoṛmo cetʼleka gocʼge onkage kạmi begor biswạs hõ gocʼgea. E boehako, ape modre sanamkoge guru do alope hoyokʼa, entepe baḍaegea, abo do guru iạte eṭakʼko khon arhõ kajak bicạr hoyokʼtabona. Abo do sanamkoge ạḍi lekate bon behokeda. Jãhãe katha hotete bae behoketʼ khan enḍekhan uni doe dhoromgea; ar uni do goṭa hoṛmoe sambṛao daṛeakʼa. Sadomkoakʼ mocare jhinbo lagaole khan, jãhãrege sana bon onḍege bon idi daṛeakoa. Arhõ ńelpe, jahaj do maraṅgere hõ ar kajak hoete ṭhelao idikʼkanre hõ calaoicʼ do eken mitʼṭen huḍiń paṭwarte jãhãsecʼge monae ontegeye idi daṛeakʼ kana. Alaṅ hõ onkage; hoṛmo reakʼ mitʼṭen huḍiń utạrakʼ hạṭińkanre hõ ona do ạḍi maraṅ maraṅ kathakoe roṛa. Arhõ huḍiń huḍiń seṅgelte mitʼṭen napṛakʼ bire ḍahao marao daṛeakʼa! Onkage alaṅ hõ ṭhik seṅgel leka. Aboakʼ hoṛmore tinạkʼ hạṭińko menakʼ ona modre alaṅ do mitʼṭen bedhorom dhạrti lekana. Norok seṅgelre lokʼte ona do goṭa hoṛmoe nosṭoyeda ar jion reakʼ horre seṅgele salgaoeda. Manwa do joto lekan janwarko, cẽṛẽko, leńokʼ ṭunḍạńko ar dakʼren jiwiyankoe koboj daṛeakoa arko kobojetʼkogea, menkhan alaṅ do okoe hõ bae koboj daṛeakʼa. Ona do baṅ sambṛaokʼa, bạṛicʼ ar botor bisanakʼte perecʼgea. Noa alaṅte aboren Probhu, metakʼme Isor Baba bon sarhaoede kana, arhõ noa alaṅte uniakʼ muṭhạnte benao akan hoṛ bon sarapako kana. Aboakʼ inạ moca khonge sarhao ar sarap oḍokokʼ kana. E ińren boehako, nonka hoyokʼ do baṅ bhagea. Inạ mitʼ jaega khon ạtu oḍok hijukʼkan dakʼre do cetʼ heṛem ar haṛhatʼ dakʼ tahena? E boehako, loa darere jạitun jo do cetʼ jo daṛeakʼgea? Se darkha nạ̃ṛĩre cetʼ loa jo do jokʼgea? Onkage raham dakʼre heṛem dakʼ do baṅ ńamokʼa. Ape modre akel ar budan hoṛ doe okoe kana? Uni do acʼakʼ bhage cạl-colonte akel khon oḍokokʼkan mạ̃hirtetʼ reakʼ kạmiye udugma. Menkhan apeakʼ ontor do hiskạte haṛhatʼ ar dola duli menakʼ khan enḍekhan akel reakʼ do alope sarhaokʼa, ar sạriakʼ do alope ạuṛiaga. Nonkan akel serma khon do baṅ pheḍ hijukʼa, bickom ona reakʼ jopoṛao do dhạrti reakʼ bạṛicʼ sana ar bạṛicʼ jiuko sãotege; ente okare hiskạ ar dola duli tahen onḍege gulmal ar joto lekan bedhoromakʼko hõ tahena. Menkhan oka akel serma khon hijukʼkan ona do pạhilre khạṭi, ar ona tayom do sulukte perecʼgea; onare sahao daṛe ar mạ̃hirtetʼ tahena; ona do daya ar bhage kạmire perecʼtetʼge, bin digdhạ ar bin phạsiarawakʼge. Okoe sulukokʼ lạgitʼko kurumuṭukan onko do sulukte itạko ereda ar ona reakʼ jo do hoyokʼ kana dhorom jionge. Ape talare lạṛhại ar jhogṛa do oka khon hijukʼ kana? Okako rij roṅ apeakʼ hoṛmoreye lạṛhạikan ona khonge cetʼ onako do baṅ oḍok hijukʼ kana? Ape dope lalocakʼ kana menkhan bape ńameda. Ape dope khũneda arpe lalocetʼkana, menkhan okaṭakʼpe khojkan ona do bape ńameda. Ape do jhogṛa arpe lạṛhại kana, enhõ apeakʼ do cetʼge baṅ tahenkana, ente ape do Isor ṭhen bape khojeda. Ape dope koeyetʼkanre hõ bape ńameda, ente bạṛicʼ monsubạ iạtepe koeyeda, jemon apeakʼ rij roṅ purạukʼtape. E baṅ pạtiạukʼko, ape do cetʼ bape baḍaea, dhạrti tulucʼpe gatekʼ do Isorren bạiripe hoyokʼa mente? Onate jãhãe dhạrtiren gate hoyokʼe menjoṅkan khan uni do apnarte Isorren bạiriye hoyokʼkana. Ape do cetʼpe hudiseda, sonot sostorre ạuṛiakʼge noa kathae meneda je, sonot Jiu, one Isor do aboakʼ ontorreye emakade, uni do aboakʼ bhokti ńam lạgitʼe koyokʼ horakada mente? Menkhan Isorakʼ daya do arhõ ḍhergea. Onate sonot sostorre ol menakʼa, “Isor do phulạukʼkanko birudreye teṅgona, menkhan mạ̃hirko doe bhorakoa.” Onate Isorakʼ gobolre tahenpe. Ar Soetan teṅgo daramepe, enḍekhan uni do ape ṭhen khone ńir pharakokʼa. Isor ṭhen sorokʼpe, enḍekhan uni hõ ape ṭhene sorokʼa. E kạiyanko, ape do apnartege saphakʼpe. E bar monan hoṛko, apeakʼ ontor khạṭi dohoepe. Dukre bhabnakʼpe ar hae haeyokʼre rakʼjoṅpe. Apeakʼ landa do hae haete sodorpe ar rạskạ bodol do dukokʼpe. Probhu samaṅre nindhạnokʼpe, enḍekhan unigeye tul rakapʼpea. E boehako alope oktawa. Okoe boeha birudre kathae roṛ se boehawakʼ doskoe ńam baṛae uni do ạn birudre kathae roṛa ar ạn-ạri reakʼ doskoe ḍunḍhạu baṛaea. Am do ạn-ạri reakʼ doskom ńam baṛae khan enḍekhan ona do bam manaoeda bickom ona reakʼem bicạreda. Eken mitʼ hoṛge menaea okoe do ạn-ạrikoe emokʼkan are bicạrkan. Unigeye rukhiyạ daṛeakʼa are marao daṛeakʼa. Am dom okoe kante am aḍepaseren hoṛakʼ doskom ńam baṛayeda? Ape modre adomkoko men botecʼkea, “Teheń baṅkhan gapa do phalna nagraha senkate mitʼ bochor bon khemaoa ar onḍe bạnij bepar katebon labjoṅa.” Menkhan gapa cetʼ hoyokʼa ona do bape baḍaea. Apeakʼ jionge baṅ cetʼ kan? Kuṛhạkan cope, one oka do thoṛa ghạṛicʼ ńelokʼkan ar ona tayom do chanokʼkan. Ona khon bickom apeakʼ do noa katha roṛ lek kana, “Probhui menle khan ale do jiwetʼle tahena ar noa se hanale kạmiya.” Menkhan ape do phulạu ar usul montepe perecʼ akana. Ar nonkan joto phulạuakʼ do bạṛicʼgea. Onate bhage kạmi baḍaekate hõ okoe bae kạmi uni doe kạiyeda. E kisạ̃ṛko ańjompe. Apere okaṭakʼ kosṭo hijukʼkan ona lạgitʼ rakʼ homorpe ar hae haeyokʼpe. Apeakʼ dhon-durib do sea akantapea ar apeakʼ kicricʼko doko jạrnḍi akada. Apeakʼ sona ar rupạre joṅ dhorao akana, ar ona joṅ dhoraoge ape birudre gohae ema ar seṅgel leka apeakʼ jele jomtapea. Ape do sesa sisi dinkore dhon-duribpe sońj akawana. Apeakʼ khetre okoe kạmiyạko phosolko samṭao akatʼtape onko do kuṛại bape emakatʼkoa; ar ńelpe, ona kuṛại do ńitokʼ ãṭ aṛaṅteye dusiyetʼpea. Sanam daṛean Probhuakʼ luturre onko kạmiyạkoakʼ rakʼ do seṭerakana. Noa dhạrtire ạḍi nirạite dinpe ṭalaoeda ar bin sambṛaokʼtepe ten ocoakana. Gujukʼ din lạgitʼpe logno akana. Ape do dhorom hoṛkope dusi akatʼkoa arpe gocʼ akatʼkoa, ar onko do bako tạkicʼ daramletʼpea. Onate E boehako, tin hạbicʼ Probhu bae hijukʼ unhạbicʼ jiwi hataṛkate jotowakʼ sahaope. Cetʼleka casa do khet reakʼ damanakʼ phosol lạgitʼe ńel horetʼkan ar pạhil ar mucạtʼ dakʼ lạgitʼe sombhuriyetʼ, ona mape ńeletʼkange? Ape hõ onkage sombhuripe ar ontorre teṅgo ṭak akae tahenpe, ente Probhu do ạḍi usạrageye hijukʼ kana. E boehako, Isor jemon apeakʼ dosko aloe sabtape onate ape apere dos alope lade joṅa. Ńelpe, bicạricʼ do duạr sorreye hecʼakana. E boehako, okoe nạbiko Probhu secʼ khon kathako roṛakatʼ, ar kosṭo oktere cetʼlekako sombhuri akatʼ tahẽkana ona katha do hudiskate ńelpe. Okoe sombhurikateko sahao akatʼ onko do bhạgankole metako kana. Ape do Jobe sumbrạuletʼ reakʼ kathape ańjomakada ar Probhuakʼ kạmi reakʼ mucạtʼ jo do bhagegea mente ona hõpe ńelakada. Probhuakʼ daya ar mãyã reakʼ mucạtʼ do bạnukʼa. E ińren boehako, iń do asokaete noa kathań metapekana, ape do serma, ar ot se eṭakʼ jãhãnakʼ ńutumte alope kiriạkʼa. Ona khon bickom, “Hẽ khan hẽ, ar baṅ khan baṅ,” hoyokʼtape ma, jemon bicạrre alope paṛaokʼ. Ape modre cetʼ jãhãe duke jomeda? Uni doe koejoṅ ma. Jãhãe sukre menaea? Uni doe sarhao sereń ma. Jãhãe ruạreye paṛao akana? Uni do manḍerren mukhiyạkoe hoho jarwakoma. Onko do Probhu ńutumte uniakʼ bohokʼre sunumko ojokʼaete uniko koeyae ma. Ar pạtiạuteakʼ koejoṅ do uni ruạkʼkan hoṛe bogeyea; Probhuge uni doe bogeyea. Ar uniye kại akatʼ khan Isor do uniye ikạyea. Onate ape apere kạiko aṅgocpe ar ape ape lạgitʼ koejoṅpe, jemonpe bogekʼ. Isorakʼ sana leka okoeye calakʼkan uni do koejoṅ reakʼ daṛe menakʼtaete onae hoe ocoea. Eliạ do abo lekage mitʼṭen manwae tahẽkana. Ar nehõr salakʼe koekeda jemon dakʼ hõ alo dag, ar pe bochor tala disạmre bae dakʼleda. Uni do arhõe koekeda; unre serma do dakʼe emena ar ot do phosole omon ocokeda. E ińren boehako, ape modre jãhãe sạriakʼ khone chingạulen khan ar ape modren jãhãe uniye ạcur ruạṛle khan, enḍekhan noa katha baḍaekakʼpe, jãhãe mitʼṭen kại hoṛ bhul hor khone ruạṛ ạguiye uni do gujukʼ khone bańcaoea ar ạḍi utạr kạiye dapaltaea. Isorren bachao akan okoeko hoṛ do Pontus, Galatiạ, Kapadokiạ, Asiạ ar Bithuniạ Prodesre chir chạtur akan upriạ hoṛ lekako girạbasokʼkan, onko ṭhen iń Jisu Mạsiren apostol Patras do noa ciṭhiń oleda. Isor Baba do acʼakʼ monsubạ lekage apeye bachao akatʼpea, ar acʼ lạgitʼge sonot Jiu do apeye begar dohoakatʼpea. Noa reakʼ monsubạ do hoyokʼ kana, jemon ape do Jisu Mạsirepe gobolokʼ ar uniakʼ mãyãm reakʼ chiṭiạu hotetepe sapha ocokʼ. Isor do aema daya ar suluke danape ma. Aboren Probhu Jisu Mạsiren Isor ar Babawakʼ sarhao hoyokʼtae ma. Jisu Mạsi gocʼko khone jiwetʼ beretʼkedete Isor do acʼakʼ maraṅ dayate nawa janame dan akatʼbona. Ona iạte abo do mitʼṭen jiwetʼ as bon ńamakada, metakʼme darakan dinkore nonkan mitʼṭen dhon ńam reakʼ as bon ńamakada one oka do tishõ baṅ nosṭokʼ, onare bạṛicʼakʼ cetʼge baṅ tahena, ona do jaejug hạbicʼ nawage tahena. Ar noa dhon do sermare ape lạgitʼ doho jogao akana. Ar purạ puri bańcao ạuripe ńam hạbicʼ Isorakʼ daṛete biswạs hotete ape dope horho jaṅge ocoakana. Ar mucạtʼ oktere sodorokʼ lạgitʼ ona bańcaokʼ reakʼ do tear dohoakana. Ape do thoṛa ghạṛicʼre hõ aema lekan biḍạu talate dukpe ńameda, ar enrehõ bańcao ńam reakʼ aste apeakʼ mon do rạskạte perejokʼ kana. Noako biḍạu do hijukʼgea jemon apeakʼ biswạs khạṭi mente sạbudokʼtape, ar onate Jisu Mạsiye sodorokʼre ape do sarhao, ṭhonok ar manotpe ńama. Okaṭakʼ sona do heṛ idikʼ ona hõ seṅgelre khạṭi ocoe hoyokʼa; menkhan apeakʼ biswạs reakʼ dam do ona sona khon hõ artetʼ sorosgea. Mạsi bape ńṭoṭhadere hõ enhõ ape do unipe dulạṛede kana; ar ńit bape ńel ńamekanre hõ unirepe pạtiạu akana, ar okaṭakʼ rạskạ lạite baṅ sodorokʼ ar okaṭakʼ do serma reakʼ ṭhonokte perecʼge, ona rạskạtepe rạskạkʼ kana; Ente apeakʼ pạtiạu reakʼ jo dope ńam lạgidokʼ kana, ar ona mucạtʼ jo do apeakʼ purạ puri bańcaotetʼ kana. Okaṭakʼ bhor ńam reakʼ katha, ona babotre okoe nạbiko sedaereko roṛletʼ tahẽkan, onko do noa bańcaokʼ reaṅ baḍae joṅ lạgitʼ ạḍi khoj tolasko hataoleda arko kulikan tahẽkana. Onkoakʼ ontorre Mạsiren Jiu do laharege gohae emleda je, Mạsi do duk jojom hoyokʼtaea ar ona tayom do ṭhonoke ńama. Nạbiko baḍae sanaletʼkoa Mạsiren uni Jiu do oka okte ar oka dosa reakʼ kathae baḍae ocoyetʼkoa. Menkhan Isor doe udukʼatʼko tahẽkana je, onko okako kathako menletʼ ona hotete apnar lạgitʼ sapʼsor baṅkate apegeko sapʼsoratʼpe tahẽkana. Serma khon kolocoyicʼ sonot Jiuakʼ ạyurte okoe ape ṭhen Mạsi reaṅ bhage sombatko porcarakatʼ onko do nạbikoakʼ kathage apeko baḍae ocoakatʼpea. Ar serma goḍetko hõ noako reaṅ baḍae joṅ lạgitʼgeko gagojlena. Onate monre paṭhe keṭejokʼpe ar apnarte sambṛaokʼpe. Jisu Mạsiye sodorokʼre okaṭakʼ bhorpe ńam, ona lạgitʼ purạ puri as dohoete koyokʼ hor akae tahenpe. Isorakʼ hukum batao gidrạko kantepe lahateakʼ bạṛicʼ sana leka apeakʼ jion do alope khemaoa; ente unre apema Isor bape baḍae orom akade tahẽkan. Ona khon bickom okoeye hohoakatʼpe ar cetʼlekae sonotge, onkage ape hõ apeakʼ sanam cạl-colonte sonotko hoyokʼpe. Sonot sostorre Isore menakada, “Ińiń sonotgete ape hõ sonotko hoyokʼpe.’’ Isor Baba do mimitʼ manwakoakʼ kạmi lekae bicạrkoa, uni do mẽtʼãhã ńelte bae bicạra. Onate Baba mente unipe hohoaekan khan, enḍekhan noa dhạrtire tinạkʼ din upriạ leka menakʼpe unạkʼ din uni botorae salakʼ din khemaope. Baḍaegeape, jion horte calakʼ lạgitʼ aperen hapṛamko ṭhen khonpe ńamakatʼ bạṛicʼ colon khon sona se rupạ leka heṛokʼ jãhãn jiniste do bape kiriń chaḍao akana; ape dope kiriń chaḍao akana niphuṭ ar bedag Bheḍa Hopon Jisu Mạsiakʼ mãyãmte. Dhạrti ạuri sirjạurege Isor do noa lạgitʼe ṭhik doho akade tahẽkana, menkhan niạ mucạtʼ oktere uni do ape lạgitʼgeye sodorena. Isor do gocʼko khon uniye jiwetʼ beretʼkedete ṭhonoke danadea ar uni hotete ape do Isorrepe biswạs akana; ar onatege apeakʼ biswạs ar as do Isor cetanre menakʼtapea. Ńitokʼ do sạriạkʼtetʼpe manaoetʼte apeakʼ ontorpe sapha akada, ar onate biswạsi boehako do ape ṭhen dulạṛiạko kanako. Onateń meneda, ape mimitʼko khạndri ontorte dupulạṛpe. Okaṭakʼ itạ nosṭokʼ, onkan itạ khon nãwãte do bape janamakana, bickom okaṭakʼ itạ tis hõ baṅ maraokʼ ona khongepe janamakana. Ar ona itạge hoyokʼ kana Isorakʼ jiwetʼ ar jaejug hạbicʼ tahẽkan katha do. Sonot sostorre ol menakʼa, sanam manwa do ghãs leka kanako, ar ghãs reakʼ baha lekage onkoakʼ sanam ṭhonoktetʼ hõ; ghãs do rohoṛokʼa, ar baha hõ ńurokʼa, Menkhan Probhuakʼ katha do jaejug hạbicʼ tahena. Ar noa kangea ona bhage sombat do, one okaṭakʼ do ape ṭhen porcar akan. Onate eṭakʼkoakʼ lokshantako reakʼ joto lekan monejoṅakʼ, sanam lekan phorphundi, eṛeteakʼ, hiskạ ar sanam lekan nisṛạu kathako apeakʼ ontor khon oḍok giḍikakʼpe. Nawa janam bale gidrạ leka apeakʼ jiure hara rakabokʼ lạgitʼ khạṭi toa ńam reakʼ gagojokʼpe, jemon onatepe hara rakabokʼte purạ puri bańcaokʼ secʼpe laha idikʼ. Ar Probhuakʼ daya reakʼ sebeltetʼ mape cakha ạikạu akatʼge. Nonkan mitʼṭen jiwetʼ dhiri menakʼa one okaṭakʼ do Isore bachao akawan ar okaṭakʼ do uniakʼ mẽtʼre ạḍi damanakʼkan, menkhan hoṛko do uniko neṅghao akadea. Mạsigeye hoyokʼ kana ona dhiri do; ar uni ṭhenpe hecʼakante jiwetʼ dhiri leka ape hotete Isorakʼ tahen oṛakʼ do benaokʼ kana. Onate naeke lekate Isor lạgitʼpe begar ocoakana, jemon nonkan sanam jiuanakʼ dãṛẽpe samaṅ one okaṭakʼ do Jisu Mạsi hotete Isorre kusiyakʼ leka hoyokʼ. Sonot sostorre ol menakʼa, Ńelpe, mitʼṭen damanakʼ dhiriń bachao doho akawana; ona do Sion reakʼ konac dhiri lekateń, bạisạu akada. Ar okoe unireye pạtiạukʼ uni do okalekate hõ bae lajao ocokʼa. Onate apepe pạtiạu akante ape ṭhen ona dhiri do ạḍi damanakʼ kana; menkhan okoe bako pạtiạu akan onko lạgitʼ sostor reakʼ noa katha do ṭhikgea, Raj mistriko okaṭakʼ dhiriko nihạt giḍiletʼ, onage konac reakʼ asol dhiri hoyena. Sostor reakʼ noa katha hõ ṭhikgea, Ona do nonkan dhiri kana, one okaṭakʼ do hoṛkoakʼ tohodokʼ reakʼ karon hoyokʼ. Hoṛko do Isorakʼ katha bebatao iạteko tohodokʼ kana, ar ona iạtegeko dohoakana. Menkhan ape do “Bachao akan bõsko kanpe; ape hotete naekekoakʼ rajosṭi do benao akana; ape do Isorakʼ monsubạ lạgitʼ begar dohoakan jạt kanape ar uniren hoṛpe hoeakana,” Ńut khon acʼakʼ hahaṛa marsalte okoeye hoho ạguketʼpe unige jemonpe sarhao sereńae. Mitʼ jokhecʼ Isorren hoṛ do bape tahẽkana, menkhan ńitokʼ dope hoeakana; mitʼ jokhecʼ ape do daya bape ńamakatʼ tahẽkana, menkhan ńitokʼ dope ńamakada. E gateko, noa dhạrtire ape do upriạko kanape ar eṭakʼ disạmre thoṛa dinpe tahẽnkante iń do asokaeteń nehõrape kana, jel reakʼ sana khon sahaṛ akan tahenpe, ente onako do aperen Jiu birudreye lạṛhại kana. Okoe Isor bako baḍae akade onko talare ape do dhoromte colonpe jemon bedhoromko menteko dusạulepere hõ apeakʼ bhage kạmi ńelte ar bicạr dinre apeakʼ ona kạmiko iạte Isorko sarhaoe. Ape do Probhure gobol akae tahente disạm cakʼlaoko tabere tahen aṅgocpe. Ar maharaj do jotoko khone maraṅgete uni tabere hõ tahenpe; behok kạmikanko sạjạiko lạgitʼ ar okoe bhageko kạmikan onko sarhaoko lạgitʼ maharaj do okoe disạm cakʼlaokoe koletʼko onko tabere hõ tahenpe. Isorakʼ sana do noage, ape do bhage kạmite lelha hoṛkoakʼ bebuj kathako jemonpe cabaetako. Sạdhin hoṛko leka jion khemaope, menkhan dusṭạmi dapal lạgitʼ ona sạdhintetʼ do alope beohara. Ona bodolte Isorren golamko leka jion khemaope. Joto hoṛge manotkope, aperen biswạsi boehako dulạṛkope, Isor botoraepe, ar maharaj manotepe. Oṛakʼren guti ar kạ̃ṛmĩko, ape do aperen kisạ̃ṛko manotkope ar onko tabere tahenpe. Okoe kisạ̃ṛkoko bhagege arko dayakʼkokan eken onko taberepe tahen ona do baṅ, menkhan okoeko ajhaṭkokan onko tabere hõ tahenpe. Jãhãe behok lekate duke jometʼ khan ar Isore disạye tulucʼ onae sahaoetʼ khan, enḍekhan uni do Isorakʼ mẽtʼãhã samaṅre sarhaoanicʼe hoyokʼa. Behok kạmiko iạte dal jomkatepe sahaoetʼ khan, enḍekhan onate sarhaokʼ reakʼ cetʼ menakʼtapea? Menkhan bhage kạmi iạte duk jomkatepe sahaoetʼ khan, enḍekhan onage Isorakʼ mẽtʼãhã samaṅre sarhaoanakʼ hoyokʼa. Isor do noa lạgitʼgeye hohoakatʼpea, ente Mạsi hõ ape iạte duk jomkate ape lạgitʼ nạmunae doho oṭoakada, jemon uni lekape colon, Uni do bae kại akada uniakʼ mocare jãhãn phor phundi baṅ tahẽkana. Hoṛko tinre uniko bemanotkedea unre uni do onko bae bemanotletʼkoa, ar duk jom jokhecʼ hala ruạṛako lạgitʼ botor hõ bae udukʼatʼkoa, bickom acʼ do dhorom bicạricʼ ṭhene jimạyena. Krus cetanre acʼakʼ hoṛmore uni do aboakʼ kạiko reakʼ bojhae ladeana, jemon kạiko secʼ gocʼ kate Isorakʼ monejoṅ leka senakʼ lạgitʼbon bańcao tahen. Ente acʼakʼ hoṛmo reakʼ ghạlkote uni do aboe boge akatʼbona. Bhiḍiko lekape chingạu adokʼkan tahẽkana, menkhan ńitokʼ do okoe apeakʼ jiwikoe ńeletʼkan uni gupiyicʼ ṭhenpe ạcur ruạṛakana. Onkage E maejiuko, ape do aperen jãwãe ṭhen gobol akan tahenpe, jemon jãhãe hoṛ Isorakʼ kathare bako pạtiạulenre hõ apeakʼ colonte onko do Mạsi secʼko ạwilokʼ. Onate ape do mitʼṭen katha hõ roroṛ baṅ lagaoapea, ente onko do akotege apeakʼ sonot jion ar Isor secʼ bhoktiko ńel ńama. Nana parkan upʼ reakʼ paṭetʼ galaṅokʼ, sona abhranko se mońj mońj sapapʼte apnar sajaokʼ do alope monejoṅa, bickom okaṭakʼ reakʼ cehratetʼ baṅ maraokʼ, ona mạ̃hir ar nindhạn colonte apeakʼ ontor sajaotape. Isorakʼ mẽtʼãhã samaṅre onage bạ̃ṛti damanakʼ kana. Sedaeren Isor bhokti maejiuko hõ Isorre bhorsa akanko tahẽkana ar apan apin jãwãe tabere tahẽkate nonkageko sajaokʼkan tahẽkana; cetʼ leka Sara do Abraham gobolreye tahẽkana ar uni do mạlik menteye hohoaekan tahẽkana. Okaṭakʼ bhageakʼkan ona do bin botortepe kạmi idile khan, enḍekhan noage sạbudokʼa je, ape do Sararen hoponerako kanape mente. Onkage ape hõ E jãwãeko, ape do buj sujte bạhuko tulucʼ tahenpe. Onko do aperen nijor soṅgeten kanako, ar onko hõ ape tulucʼ Isorakʼ daya reakʼ dan lekate jionko ńama. Onate onko manotkope jemon apeakʼ koejoṅ alo akoṭokʼtape. Mucạtʼre katha do nõkʼõe, ape sanamkoakʼ mon jemon mitʼ lekage hoyokʼ. Ape do mimitʼkoakʼ dukre dukokʼpe, boeha leka dupulạṛpe, daya ar nindhạnko hoyokʼpe. Bạṛicʼ bodol okoe hõ bạṛicʼ alope hala ruạṛakoa se jãhãeko egerlepere alope eger ruạṛkoa, bickom bhorakope; ente bhor ńam lạgitʼge Isor doe hohoakatʼpea. Sonot sostorre olakana, Okoe sukte jion khemaoe menjoṅkan ar bhage din ńeljoṅ lạgitʼe asokʼkan, uni do bạṛicʼ kathako khon acʼakʼ alaṅ, ar eṛeakʼ kathako khon acʼakʼ luṭiye sambṛaotaema. Uni do bạṛicʼ kạmi khone sahaṛokʼ ma, ar bhageakʼe kạmima; suluk ńam lạgitʼe kurumuṭuima. Ar ona do aloe bạgiyakʼ ma. Okoe dhorom horteko calakʼkan Probhuakʼ mẽtʼ do onkore menakʼa, ar onkoakʼ koejoṅ ańjom lạgitʼ uniakʼ lutur do jhicʼge menakʼtaea; menkhan okoe bạṛicʼko kạmikan, Probhu do onko birudreye teṅgona. Bhage kạmi lạgitʼpe ahkaokʼkan khan, enḍekhan okoeye hạnkepea? Isorakʼ sana leka calakʼre dukpe jomle khan, enḍekhan ape dope bhạgangea. Okoe duk ar kosṭoko emapekan onko do alope botorakoa se duk sasetre alope torasokʼa, bickom Mạsi do apeakʼ ontorre Probhu mente jaega emaepe. Apeakʼ as ar bhorsa reaṅ jãhãeko kulipe khan, enḍekhan roṛ ruạṛako lạgitʼ jaoge sapṛao akae tahenpe, menkhan ona reakʼ roṛ ruạṛ do mạ̃hir ar bhodro salakʼ emakope. Apeakʼ bibek sapha dohoetape, jemon Mạsiren hoṛ lekate apeakʼ bhage colon iạte okoeko oktawape onko do lajaoreko paṛaokʼ. Bạṛicʼ kạmikate kosṭo ńam khon bickom Isorakʼ sanate bhageakʼ kạmikate kosṭo ńamge bhagea. Mạsi hõ kại iạte mitʼ dhaogeye gocʼlena. Isor ṭhen idibon lạgitʼ uni dhorom hoṛ do kại hoṛko lạgitʼ, metakʼme, abo lạgitʼe gocʼlena. Uni do hoṛmo secʼteye gocʼ ocolena, menkhan Jiu secʼteye jiwetʼ beretʼ ocoyena ar bondi akan jiuko ṭhen hõ senkateye porcarleda. Sedaere Noah do jahaje benaokan tahẽkanre Isor do sombhurikate tinreye ńel hohorkan tahẽkana unre okoeko bebataoletʼ noko jiuko do onkoren kangeako. Ar ona jahajreko decʼen eken thoṛa hoṛge, metakʼme eken irạl hoṛge ona dakʼ khon rukhiyạko ńamleda. Noa do hoyokʼ kana bạptisma reakʼ mitʼṭen nạmuna one okaṭakʼte ńitokʼe bańcaope. Bạptismate apeakʼ hoṛmo khon mạilạye ocokʼ giḍi daṛeakʼa ona do baṅ; Isor ṭhen noa do mitʼṭen bhage bibek reakʼ hohokana. Ape do Jisu Mạsiakʼ gujukʼ ar jiwetʼ beredokʼ hotetepe bańcao ocoakana. Jisu do sermateye calao akana ar ńitokʼ Isorakʼ jojomsa aṛere menaea, ar sermaren goḍetko, ar ektiạrianko ar daṛeanko do uniakʼ gobolre menakʼkoa. Onate Mạsi do hoṛmore duke sahaoletʼte ape hõ apnarakʼ ontorre inạ mitʼ monsubạge benao rakabtape, ente hoṛmore okoe duke jom akatʼ uni do kại reakʼ heowa khone thir akana. Onate noa dhạrti reakʼ sarecʼakʼ jion uni do dhạrti reakʼ rij roṅte bae khemaoa, bickom Isorakʼ monejoṅakʼ lekageye khemaoa. Okoe Isor bako baḍae akade onko leka ape hõ lahate umtạ umti, bạṛicʼ sana, ńu bhuteṛokʼ, rij roṅ, matalokʼ, ar hirkhạwakʼ boṅga sewarepe taṛametʼ tahẽkana. Menkhan ńitokʼ do onko hoṛge ape ńelteko hahaṛakʼ kana, ape do onkoakʼ bạṛicʼ lucạ lamoṭkore ar bape seledokʼkana, onate onko do apeko dusạuetʼpea. Menkhan okoe jiwetʼ ar gocʼko bicạrko lạgitʼe sapṛao tearakan, onko do uni ṭhen hisạb emokʼ hoyokʼtakoa. Gocʼko ṭhen hõ coṅ ona iạte Mạsi reaṅ bhage sombat porcarlen, jemon hoṛmo secʼte manwa leka bicạr hoelentakore hõ Jiu secʼte onko do Isor leka jiwetʼko tahẽdaṛeakʼa. Nitokʼ do sanamakʼ reakʼ mucạtʼ okte seṭerakana. Onate apeakʼ mon do kajak akae dohoepe ar apnarte sambṛaokʼpe jemonpe koejoṅ. Sanam khon maraṅ katha do hoyokʼ kana, ape apere khạndri dupulạṛ tahentape ma, ente dupulạṛ do ạḍi utạr kạiye dapala. Begor karacʼ kurujokʼte ape apere peṛakʼpe. Ar ạḍi lekate sodorokʼkan Isorakʼ daya ńamkate okoe hoṛ do pạtiạr salakʼ kạmire onae lagaoetʼkan, onkan hoṛ lekate ape do Isor ṭhen khon okalekan danpe ńamakatʼ ona baṛe ape apere sapʼ sopohotʼ lạgitʼ beoharpe. Jãhãeye porcar khan, enḍekhan nonka lekae porcar ma jemon uni do Isorakʼ moca reakʼ kathae roṛeda mente. Ar jãhãye sapʼ sopohotʼ khan enḍekhan Isor emakʼ daṛete uni doe sapʼ sopohotʼma, jemon Jisu Mạsi hotete jotowakʼre Isorge ṭhonoke ńam. Ente daṛe ar ṭhonok do jaejug hạbicʼ uniakʼge. Amen. E gateko, ńitokʼ biḍạu seṅgel talate calakʼ hoyokʼ kantapete hahaṛakʼ tulucʼ alope hudisa je, apere ạnạṛi jãhãnakʼ hoyokʼ kana mente. Ona khon bickom Mạsiakʼ duk jom reakʼ bhạgiạdarkope hoeakante rạskạkʼpe, jemon uniakʼ mạhima sodorokʼre ape do rạskạtepe perejokʼ. Mạsi iạtepe opoman ocokʼkan khan enḍekhan ape dope bhạgangea, ente Isorakʼ mạhimate perecʼ akan Jiu do apere menaea. Ape modre okoe hõ khũniạhi, kombṛo, bạṛicʼ kạmiyicʼ se eṭakʼkoakʼ babotre duk aloe jomma. Menkhan Khristan lekate jãhãe duke jomlere aloe lajaokʼma, bickom uniakʼ do ona ńutum menakʼtaete Isore sarhaoema. Bicạr reakʼ okte do hoeakana ar ona do Isorakʼ gharońjren hoṛko khonge ehobokʼa. Ar ona bicạr do abo khonge ehopʼlen khan, enḍekhan okoe Isorakʼ bhage sombat bako manao akatʼ onko do cetʼ dosa hoyokʼtakoa? Sostorre menakʼa, Isor bhokti hoṛkoakʼ bańcao ńam nunạkʼge keṭecʼge khan, kạkạiko ar Isor bebhoktiko do cetʼ dosa hoyokʼtakoa? Enḍekhan Isorakʼ monejoṅ lekate okoe dukko sahaoetʼkan, onko do akoren pạtiạricʼ sisirjạuicʼakʼ tire apnartetʼko jimạkʼma ar bhage kạmiko kạmi idima. Iń do Mạsiakʼ duk sasetren goha kạnạń ar Mạsiakʼ oka ṭhonok sodorokʼ onaren hõ bhạgiạdar kạnạń. Onate ape modre okoe doko manḍerren maraṅ mukhiyạkan iń do onkoren ar mitʼṭen maraṅ mukhiyạ lekate noa sikhạunań emako kana. Ape talare menakʼ Isorakʼ palren gupiko hoyokʼpe. Ńel todarotkope hoyokʼkante onkope ńelkoa ona do baṅ, bickom apnarakʼ monejoṅ lekatege gupikope, ente Isor do ape ṭhen onageye khojkana. Porho ńam lạgitʼ do alope kạmiya, menkhan gagoj monte kạmipe; ape tabere okoe menakʼko onko cetanre mạliki alope calaoa, bickom nonkanko hoyokʼpe jemon ape ńelteko cetʼ daṛeakʼ. Enḍekhan maraṅ gupiyicʼe ńel ocokʼre ape do jit reakʼ mala lekate uniakʼ ṭhonokren bhạgiạdarkope hoyokʼa, ar ona do tis hõ baṅ mosodokʼtapea. Onkage E juạnko, ape do aperen murubiko tabere tahenpe. Ar jotokoge nindhạn tahente mitʼke mitʼ sapʼ sopohotʼpe, ente sonot sostor reakʼ katha leka, “Isor do phulạukʼkankoe teṅgo darametʼkoa, menkhan nindhạnko doe dayawako kana.” Onate Isorakʼ ektiạri samaṅre apnartetʼ copodokʼpe, jemon ṭhik oktere uni doe usulpe. Apeakʼ sanam dạndi unire lade giḍikakʼpe, ente uni do ape reaṅe dạndikʼ kana. Apnar sambṛaokʼpe ar sontorakae tahenpe, ente aperen bạiri Soetan do hạnḍrạukʼkan dhạcri kul lekae dhãoṛa dhạ̃uṛi baṛaekana jãhãegeye utʼgotʼkaea mente. Pạtiạure jamaṛ akae tahente Soetan teṅgo daramepe, entepe baḍaegea, goṭa dhạrtire aperen biswạsi boehako do inạ mitʼ lekan duk sasetgeko jomeda. Joto secʼteye dayawape kan Isor do acʼakʼ jaejug ṭhonokren bhạgiạdarko hoyokʼ lạgitʼe hohoakatʼpea, ente ape do Mạsi tulucʼpe kolom mitʼ akana. Ar thoṛa din dukpe jomle anecʼ Isor do acʼgeye sạbit utạrpea are kajak ocopea, daṛeye emapea ar keṭecʼ rehetʼ cetanreye teṅgopea. Uniakʼ ektiạri do jaejug habicʼ tahẽakae tahen ma. Amen. Siluạnus, okoe do ińren pạtiạrạnicʼ boehań metaekan, uni hotete noa ciṭhi do thoṛa kathate ape ṭheniń olkeda, jemon iń do apeń udgạu daṛeape ar Isorakʼ sạriạkʼ reakʼ dayaren gohań em daṛeakʼ. Ape do Isorakʼ noa dayare ṭarhao akan tahenpe. Isor do ape sãote okoekoe bachao akatʼko Babel reakʼ ona manḍerren hoṛko do joharko emape kana, ar ińren hopon Mark hõe joharape kana. Dulạṛ reakʼ cokʼte jopoharpe. Ar okoe do Mạsirenpe hoeakan, ape jotoko tulucʼ suluk tahen ma. Iń Simon Patras do Jisu Mạsiren mitʼṭen golam ar apostolge. Aboren Isor ar babańcaoicʼ Jisu Mạsi doe dhoromgea, ar ona iạte ape hõ ale leka inạ bin mucạtʼ damrepe biswạs akana. Ar noa iạte ape ṭhen niạ ciṭhiń oleda. Isor ar aboren Probhu Jisu do khạndri ontor khon baḍaeyete apere asambheṛ daya ar suluk baṛe tahenma. Okoe acʼakʼ ṭhonok ar soros gunteye hoho akawatʼ bon, uniakʼ khạndriakʼko baḍae hotete acʼakʼ Isor daṛete nonkanakʼkoe dan akatʼbona, one ona hotete abo do Isor botoraete jion bon khemao daṛeakʼ. Uni do acʼakʼ ṭhonok ar soros gunte abo ṭhen ạḍi damanakʼ ar maraṅakʼe gokʼakada. Noa reakʼ monsubạ do hoyokʼ kana, manwakoakʼ bạṛicʼ sana khạtirte dhạrtire okako bạṛicʼakʼ perecʼ akan ona khonpe ńir pharakokʼte Isorakʼ boge colonren bhạgiạdarpe hoyokʼ. Onate ạḍi jidkate apeakʼ biswạsre bhage gun, ar bhage gunre do akel, ar akel tulucʼ apnar sambṛaokʼ ar sobori, Isor bhokti, ar bhokti tulucʼ boeha dulạṛ ar ona dulạṛ sãote arhõ khạndri dulạṛ mon juṭucʼakʼpe. Apeakʼ noako gun tahentape khan ar onako baḍhao idikʼkan khan, enḍekhan aboren Probhu Jisu Mạsi do khạndri ontor khon baḍaeyere okaj ar bin joanko do bape hoyokʼa. Okoe hoṛre noako gun bạnukʼ, uni do ḍher sạṅgiń bae ńel ńameda, ente uni doe kãṛãgea. Ar acʼakʼ lahateakʼ kại khone sapha ocoakan ona doe hiṛiń akada. Onate E boehako, sạrige Isor do apeye hohoakatʼpe are bachao akatʼpe ona khạṭi ocoe lạgitʼ arhõ bạ̃ṛti jid monanko hoyokʼpe. Ar noakope nonka lekhan tis hõ ohope tohotʼlena. Noa iạte aboren Probhu ar babańcaoicʼ Jisu Mạsiakʼ jaejug rajosṭire jid salakʼpe ataṅ ocokʼa. Onate noako reaṅ iń do jaogeń disạ ocoyetʼpea. Menkhan ape do noakope baḍaegea ar oka sạritetʼ apeakʼ ontorre menakʼ onarehõ kajak menakʼpea. Menkhan ińakʼ hudisre, tinạkʼ din noa kumbạ leka bin ṭikạukʼ hoṛmore jiwetʼiń tahen unạkʼ din noako reaṅiń disạite jagwar dohope do lek kantińạ; ente ḍher din noa hoṛmo kumbạre bạń tahena ona do aboren Probhu Jisu Mạsi pusṭạuteye baḍae ocoakadińạ. Ińakʼ gujukʼ tayom hõ jemon noako reaṅ jaogepe disạ dohoe, onate iń do ona bondobos lạgitʼ ạḍiń kurumuṭuya. Aboren Probhu Jisuakʼ daṛe ar uniakʼ hijukʼ reaṅ baḍae ocopere benaoakʼ jãhãn golpo do bale lại akada; ale do uniakʼ ṭhonok nij mẽtʼtele ńelakada. “Nuige ińren dulạṛiạ Hopon, one unireń kusi akan,” Serma khon roṛlen noa kathate Mạsi do Isor Baba ṭhen khon man ar ṭhonoke ńamleda. Ale do uni tulucʼ ona sonot bururele tahẽkanre serma khon roṛlen noako kathale ańjomleda. Sostorre nạbiko okakoko menakatʼ ona do ale ṭhen sạrikana mente sạbud akana. Ńutre apeakʼ mẽtʼ do cetʼleka diuhe secʼ tahenkan onkage, tin hạbicʼ baṅ setagokʼ ar apeakʼ ontorre bhurkạ ipil bae rakabokʼ, un hạbicʼ nạbikoakʼ kathape luturakʼ khan ape dope bhagekea. Enḍekhan jotowakʼ cetanre noa katha disạ dohoepe, sostor reakʼ okaṭakʼ kathage nạbikoakʼ benaoakʼ katha do baṅkana, ente nạbiko do akoakʼ sana leka jãhãn katha bako roṛakada; onko do sonot Jiu reakʼ ạyurtege Isorakʼ kathako roṛakada. Menkhan Israelko talare cetʼleka eṛe nạbikoko tahẽkan, onkage apeko talarehõ eṛe cecetʼkoko tahena. Onko do hape hapete nonkan bhul cecetʼakʼko ạguya one okaṭakʼte manwako nosṭokʼ; ar okoeye kiriń chaḍao akatʼko uni Probhu hõ bako aṅgocea. Nonkate onko do ạḍi usạra apnarte nosṭokʼko ạgujoṅa. Ar ḍher hoṛge onko ńelte lucạ lamoṭkoko hoyokʼa. Onko iạtege sạriakʼ reakʼ hor do nindạu ocokʼa. Lalocte eṛeteakʼ katha menkate akoakʼ porho lạgitʼ onko do kạmireko lagaopea. Onkoakʼ sạjại do ḍher din khonge jhulạu akana, ar onkoakʼ nosṭokʼ do bae duṛupʼ thirakana. Serma goḍetkoko kạiletʼre Isor do onko bae aṛakʼ giḍiletʼkoa, bickom norok reakʼ ńut ghaḍlakʼreye giḍiletʼkote bicạrko lạgitʼe dohoakatʼkoa. Uni do mare dhạrtirenko hõ bae aṛakʼletʼkoa, bickom Isor bin bhokti hoṛkore ḍubạ dakʼe hoe ocoleda; menkhan Noah ar eṭakʼ eae hoṛe bańcaoletʼkoa. Ar nui Noahge Isor bhokti reaṅe porcarleda. Sodom ar Gomora nagraha seṅgelte ḍahao maraokate Isor do ona nagraharen hoṛkoe sạjạiletʼkoa ar nonkate uni doe udukʼatʼkoa, okoe Isor bako bhoktiae onko do cetʼ dosa hoyokʼ takoa mente; Menkhan uni do Loṭe rukhiyạledea. Loṭ do Isor bhokti hoṛe tahẽkana. Uni do onḍenko ạn-ạri bebataoetʼkan hoṛkoakʼ lucạ lamoṭ iạte duke ńametʼ tahẽkana. Uni Isor bhoktiaekan hoṛ do onko talare tahẽkate dinke din onkoakʼ kạmiye ńeletʼkan tahẽkana ar onkoakʼ kathae ańjometʼ tahẽkana, ar ạn-ạri birudre onkoakʼ kạmi ńelte acʼakʼ dhorom jiwire ạḍi duke ńametʼ tahẽkana. Noako khon ńelokʼ kana, okoe Probhuko bhoktiaekan onko do biḍạu khon bańcaoko doe baḍaegea. Ona chaḍa okoe Isor bhoktikoko baṅkan, asokaete okoe do akoakʼ sanalekako calakʼkan ar ḍanṭao bako moneakʼkan, onko sạjạiko lạgitʼ uni do bicạr din hạbicʼ dohoko hõe baḍaegea. Noko eṛe cecetʼko do ạḍi dilanko kanako. Onko do akoakʼ kusi sana lekako calakʼa ar ṭhonokanko birudre bemanot katha roroṛ hõ bako botorokʼa. Menkhan serma goḍetko do daṛe ar ektiạriteko maraṅgere hõ Probhu ṭhen onko reaṅ nonkan jãhãnakʼ bako lạlisa one onare nindạu reakʼ katha menakʼ. Menkhan bin buj janwarko leka one onko do sobhabtege sapʼ ocokʼ ar gocʼ ocokʼ lạgitʼko janamakan, noko eṛe cecetʼko hõ onko lekage. Onko do okaṭakʼ bako bujhạu akatʼ ona reaṅ bạṛicʼ kathako roṛa. Ar akoakʼ bạṛicʼakʼrege onko doko ḍahao maraokʼa. Onkoakʼ bạṛicʼ kạmi reakʼ kuṛại lekate onko do kosṭoko joma. Noko hoṛ do siń marsalre bhojkore haha hihi ar ńũ bulokʼko kusiyakʼa. Ar ape tulucʼ jojomko duṛupʼlenre onko do umtạ umtikʼte bubulakʼko ńũńũte akoakʼ rij roṅte lajaokʼ ar bemanotko ạguya. Onkoakʼ mẽtʼ do loṭghuṭite perecʼgea ar tisge kạkại do bako bạgiya. Onko do dhoromre nijor monanko lalocko udukʼakote bhul horteko idikoa. Onkoakʼ ontor do eken lalocgeye cetʼakada. Onkore sarap menakʼa. Onko do sojhe hor bạgikate bhul hor secʼko ghańjeṛ akana. Onko do Beor hopon Balamakʼ hor secʼko mohnḍa akana. Balam do bạṛicʼ kạmi reakʼ kuṛại ńame menleda, menkhan acʼakʼ bạṛicʼ kạmi iạte uni do mitʼṭen abola gadha ṭhene dhomkao ocolena. Uni gadha do manwa leka kathae roṛketʼte uniakʼ koṅkatetʼe akoṭletʼtaea. Noko hoṛ do rohoṛokʼkan jharna ar hoete oṭanokʼkan kuṛhạ lekanako. Noko lạgitʼ do kaṛaṅ kucạṅ ńut dohoakana. Onko do ạuṛi sạuṛi ar lạṭu lạtu kathako roṛa ar manwakoakʼ jel reakʼ bạṛicʼ sanako rakapʼ ocoyetʼtakote onko do nonkan hoṛko bhul horteko idiyetʼkoa, okoe do bạṛicʼko talare menakʼko khonko oḍok hijukʼkan. Onko eṛe cecetʼko do onko hoṛko sạdhinokʼ reakʼko gokʼako kangea, menkhan ako do bạṛicʼ kạmire golam akanko tahenkana; ente jãhãe jãhãnakʼreye bhagao ocolen khan uni do onaren golame hoyokʼa. Aboren Probhu ar babańcaoicʼ Jisu Mạsi reaṅ baḍae khạtirte dhạrti reakʼ bạṛicʼakʼ khonko ńir pharakokʼkanre hõ onko do inạ bạṛicʼakʼregeko jhạlikʼkante arhõko bhagao ocokʼkana, ar onkoakʼ mucạtʼ dosa do pạhilakʼ khon artetʼ bạṛicʼ hoeakana. Onko do dhorom jion reakʼ horko baḍaekan tahẽkanre hõ okaṭakʼ sonot hukum ematʼko tahẽkan ona doko bebataoleda. Noa dosare onko lạgitʼ ṭhik hor baṅ baḍaege bickom bhage tahẽkana. Onko babotre noa katha do sạrige hoeakana, “Seta do acʼakʼ uchlạwakʼ secʼe ạcurokʼa,” ar “Sukri do ạrupʼ saphayere hõ leḍreye jobekʼa.” E dulạṛiạ boehako, ape ṭhen noa do ińakʼ dosar ciṭhi kana. Banar ciṭhirege iń do adomakʼko babotreń disạ ocoyetʼpete apeakʼ soṛa mon udgạu reakʼ iń kurumuṭuyeda. Sonot nạbiko okako katha lahateko menakatʼ onako ar aperen apostolko hotete aboren Probhu ar babańcaoicʼ okaṭakʼ hukume emakatʼ, ińakʼ monejonakʼ do jemon onape disạ dohoe. Pạhilre noa katha disạ dohoepe, bhageakʼko reaṅ okoe do nisṛạu reakʼ sobhabtako onko do sesa sisi dinrehõko nisṛạugea. Onko do akoakʼ bạṛicʼ sana lekako colona, arko mena, “Uniakʼ hijukʼ reakʼ oka gokʼakʼ tahẽkan ona reakʼ do cetʼ hoyena? Dhạrti sirjạu khon cetʼleka calao hijukʼkan tahẽkan ṭhik onkage aboren hapṛamko gocʼ tayom khon jotowakʼge coṅ inạ mitʼlekage calakʼkan.” Noko hoṛ do dhikhitegeko hiṛińeda je, sedaere Isorakʼ kathate serma do sirjạulena ar dakʼte ar dakʼ khonge dhạrti hõ sirjạulena mente. Un reakʼ ona dhạrti do ḍubạ dakʼte ḍahao maraolena. Ar Isorakʼ inạ mitʼ kathatege ńitokʼakʼ serma ar dhạrti do seṅgelte ḍahao maraokʼ lạgitʼ dohoakana; Isor bebhokti hoṛkoakʼ bicạr ar ḍahao marao din hạbicʼ ona do jogao dohoakana. Menkhan E dulạṛiạ boehako, noa katha do alope hiṛińa, Probhu ṭhen mitʼ din do hajar bochor somangea ar hajar bochor do mitʼ din somangea mente. Adom hoṛko hudiseda Probhu do acʼakʼ gokʼakʼ purạu lạgitʼe bilomeda, menkhan ona do baṅ. Asokaete uni do ape lạgitʼe soboriyeda, ente jãhãegeye nosṭokʼ do bae khoja, bickom sanamkoge jemon kại khon monko ạcurtako noageye khojkana. Menkhan Probhuakʼ din do kombṛo leka hijukʼa. Ona dinre serma do sãe sãe saḍete parom calakʼa ar siń cando, ńindạ cando, ipilko sanamge atarokʼa arko le cabakʼa. Dhạrti ar onare menakʼ sanamakʼge ḍahao maraokʼa. Sanamakʼge nonka marao lạgidokʼkan khan enḍekhan cetʼ lekanko hoyokʼ lektapea? Ape do gagojokʼ tulucʼ Isorakʼ din koyokʼ horre tahente sonot ar Isor bhoktite jion khemao lektapea. Unre serma do lokʼte ḍahao maraokʼa ar siń cando, ńindạ cando ar ipilko hõko atarokʼa arko galao cabakʼa. Menkhan abo do Isorakʼ gokʼakʼ lekate nawa serma ar nawa dhạrti lạgitʼ bon koyokʼ horeda. Onḍe do sanamakʼge Isorakʼ monejoṅakʼ leka hoyokʼa. E dulạṛiạ boehako, ape do ńitokʼ noako lạgitʼpe koyokʼ horetʼkante murukte kurumuṭuipe jemon uni do niphuṭ ar dhoromre sulukte tahẽakane hecʼńampe. Disạipe, manwako kại khon bańcaoko ńam lạgitʼ aboren Probhu doe sombhuriyeda. Ar inạ mitʼ kathage aboren dulạṛiạ boeha Pạul hõ Isore emakade akelte apeye olatʼpea. Uniakʼ joto ciṭhirege noako reaṅ inạ mitʼ kathageye oletʼkana. Onako modre adomakʼko babotre menakʼakʼ as bujhạu do muskilgea. Onate baṅ cetʼakatʼ ar baṅ kajak hoṛko do eṭakʼ eṭakʼ sostorko leka noako reakʼ mane hõko pẽṛtayetʼte nijạte nosṭokʼko ạgujoṅ kana. E dulạṛiạ boehako, ape do noa katha laharegepe baḍae akatʼte sontor akae tahenpe, jemon noko bạṛicʼ hoṛkoakʼ bhul horte aloko bulạu idipe, ar apeakʼ kajak mon khon alope ńurokʼ. Ape do aboren Probhu ar babańcaoicʼ Jisu Mạsiakʼ daya ar uni reaṅ akelte hara rakabokʼpe. Ńit ar jaejug hạbicʼ uniakʼge ṭhonok hoyokʼtae ma. Amen. Okoe pạhil khongeye tahẽkan, ar okoeakʼ moca reakʼ kathale ańjom akatʼ, okoe nij mẽtʼtele ńṭoṭhade, okoe do mońjtele ạri bạndhi akade, okoe do nij titele joṭetʼ akade, ona jion reakʼ kathage nonḍele oleda. Ona jion doe sodorlena. Ale do unile ńṭoṭhadea ar uni reaṅ gohale emeda. Okoe do Baba ṭhene tahẽkan ar ale ṭhene sodorlen ona jaejug jion reakʼ kathage apele baḍae ocoyetʼpea. Okoe alele ńṭoṭhade ar okoeakʼ moca reakʼ kathale ańjomakatʼ uni reaṅgele baḍae ocoyetʼpea. Ale do onale baḍae ocoyetʼpea jemon ape ar ale talare mitʼṭen helmel benao rakabokʼ. Noa do hoyokʼ kana Baba ar uniren Hopon Jisu Mạsi ar abo tala reakʼ helmel. Aleakʼ rạskạ jemon perejokʼ onate ale do noakole oleda. Okaṭakʼ katha Jisu Mạsi ṭhen khon ańjomkate apele baḍae ocoyetʼpe ona do noage, Isor doe marsal kana; ar unire ńut do bạnukʼanaṅ. Isor ar abo talare helmel menakʼa mentebo menetʼ khan ar ńutre bon taṛametʼ khan enḍekhan eṛe katha bon roṛeda, ar sạriakʼ horte do babon taṛameda. Menkhan Isor do cetʼleka marsalre menae ar onkage abo hõ marsalre bon taṛametʼkan khan enḍekhan abo talare helmel menakʼtabona ar uniren Hopon Jisuakʼ mãyãm do sanam kại khone sapha bona. Ar abore kại bạnukʼa mentebon menle khan enḍekhan abo do apnarge bon bulạukʼ kana. Onate noage bujhạukʼ kana je, aboakʼ ontorre Isorakʼ sạritetʼ do bạnukʼa. Abo do aboakʼ kạiko bon aṅgocle khan, enḍekhan uni do unrege kạikoe ikại tabona ar sanam bedhorom khone sapha bona, ente uni doe pạtiạrgea ar tis hõ bae bedhoroma. Ar babon kại akada mentebon menle khan, enḍekhan unige eṛeyicʼ bon benaoede kana, ar uniakʼ katha aboakʼ ontore do bạnukʼanaṅ. E ińren dulạṛiạ gidrạko, jemon alope kại, onate ape ṭhen noako kathań olede. Ar jãhãegeye kại eman akatʼ khan enḍekhan Baba ṭhen roṛ goṛo abon lạgitʼ mitʼ hoṛ menaea; uni do Jisu Mạsige, one uni doe dhoromicʼkan. Aboakʼ kạiko ocokʼgiḍiy tabon lạgitʼ Mạsi do acʼakʼ jiwi alaekate Isore kusi ocokedea. Eken aboakʼ kại iạte do baṅ, menkhan sanam manwakoakʼ kại ńutumte uni doe onkakeda. Uniakʼ sanam hukumko leka bon senlen khan, enḍekhan khạṭige bon bujhạua, abo do uni bon baḍae akadea. Ar okoeye menetʼkan, “Iń do uniń baḍae akadea,” Menkhan uniakʼ hukumko bae batao enḍekhan uni doe eṛeyicʼ kana; unire sạriakʼ do bạnukʼanaṅ. Menkhan okoe uniakʼ kathae manaoetʼkan uni do sạrige Isorakʼ dulạṛreye sạbitʼ akana. Ar jãhãye men acʼ do unire menaea, enḍekhan uni cetʼ lekae colonetʼ tahẽkan onkage acʼ hõ colon lektaea. Noa hotetege bon baḍae daṛeakʼa, abo do uni tulucʼ jopoṛao menakʼ bona mente. E dulạṛiạ gidrạkotiń, ape ṭhen jãhãn nawa hukum reakʼ katha do bạń oleda, bickom pạhil khonge okaṭakʼ hukum tahẽkan ona mare hukum reakʼ kathageń oleda. Ar okaṭakʼ katha lahatepe ańjomakatʼ ona kangea ona mareakʼ hukum do. Menkhan nõkʼõe okaṭakʼ hukum reakʼ katha ape ṭhen ńitokʼ iń oletʼkan ona do maregere hõ nawagea. Noa hukum reakʼ sạritetʼ do Jisu Mạsire ar apeakʼ jionre ńel akana, ente ńut do cabakʼ kana ar ona sạri marsal do ńitokʼ jolokʼ kana. Okoe hoṛ marsalre menaea menteye menetʼkan, ar acʼren boehae kurudaekan uni do ńit hõ ńutrege menaea. Okoe acʼren boehae dulạṛedekan uni do marsalreye tahenkana ar unire jãhãn tạkicʼakʼ do bạnukʼanaṅ. Menkhan okoe acʼren boehae kurudaekan uni do ńutre menaea ar ńutregeye dãṛãn kana. Uni do bae baḍaea okateye calakʼ kana mente, ente ńut do uniakʼ mẽtʼe kãṛã akatʼtaea. E gidrạko, Mạsi iạte apeakʼ kại ikạ akante ape ṭheniń oleda. E babako, ape do pạhil khonge okoe menae unipe baḍae akadeteń olapekana. E juạnko, Soetanpe bhagao akade iạteń olape kana. E gidrạko, apeń olapekana, ente ape do Isor Babape baḍae akadea. E babako, iń do apeń ol ape kana, ente okoe pạhil khon menae unipe baḍae akadea. E juạnko, apeń ol ape kana, ente ape dope daṛeanko kana ar Isorakʼ katha apeakʼ ontorre menakʼa, ar ape do Soetanpe bhagao akadea. Ape do dhạrti ar dhạrti reakʼ jãhãnakʼge alope dulạṛa. Ar jãhãe dhạrtiye dulạṛ khan, enḍekhan uni do Baba bae dulạṛede kana, ente dhạrtire menakʼakʼko do, hoṛmo reakʼ sana, mẽtʼ reakʼ laloc ar gharońj reaṅ bạḍại kana, noako reakʼ okaṭakʼ hõ Baba ṭhen khonakʼ do baṅ hijukʼ kana, menkhan dhạri khonakʼge hijukʼ kana. Dhạrti ar dhạrti reakʼ rij roṅ do caba hijukʼ kana, menkhan Isorakʼ sana leka okoeye senokʼkan uni do jaejug hạbicʼe tahena. E gidrạko, noa kangea mucạtʼ okte do. Apepe ańjom akada je, Mạsiren bạiriye hijukʼ kana mente, menkhan ńitrege uniren do arhõ aema bạiriko hecʼakana. Onate bon bujhạu daṛeakʼ kana, noa kangea mucạtʼ okte do. Mạsiren noko bạiriko do abo tala khonko oḍok akana. Menkhan onko do aboren hoṛ bako tahẽkana. Ente aborengeko tahẽlen khan, enḍekhan abo sãotegeko tahẽkokʼa honaṅ, menkhan onko doko oḍok sen akante bujhạukʼ kana okoe hõ aboren doko baṅkana. Menkhan ape do uni sonoticʼ ṭhen khonpe ojokʼ ocoakana, metakʼme sonot jiupe ńam akadea ar jotoge sạriakʼpe baḍae akada. Sạriakʼ bape baḍae akatʼte apeń ol ape kana ona do baṅ, menkhan ape do noa hõpe baḍaea, sạriakʼ khon eṛeakʼ do baṅ hijukʼa; ar ona iạtegeń olatʼpea. Okoeye menetʼkan, Jisu do Mạsiye baṅkana, uni doe eṛeyicʼ kana? Okoe Baba ar Hopon bae aṅgockin uni do Mạsiren bạiri kanae. Okoe Hopon bae aṅgoce uni tulucʼ Babawakʼ do jãhãn jopoṛao bạnukʼtaea, menkhan Hopon okoeye aṅgoce uni tulucʼ do Babawakʼ hõ jopoṛao menakʼtaea. Pạhil khon okaṭakʼpe ańjom ạguakatʼ ona apeakʼ ontore tahen khan, enḍekhan ape do Hopon ar Baba tulucʼ jopoṛao akanpe tahena. Noa kangea jaejug jion, one okaṭakʼ Mạsi do abo emabon lạgitʼe gokʼakatʼ. Okoe bạṛicʼ horte idipe lạgitʼko kurumuṭuyetʼkan, onko reaṅ iń do noakoń olatʼpea. Menkhan ape do Mạsi ṭhen khonpe ojokʼ ocoakana, metakʼme sonot Jiupe ńam akadea. Uni do apeakʼ ontoreye tahena. Onate eṭakʼ okoeakʼ hõ cecetʼakʼ do baṅ jạruṛapea. Sanamakʼ reaṅ sonot Jiugeye cetʼapea. Uni doe sạriyicʼ kana, ar bae eṛea. Onate cetʼleka Mạsire tahene cetʼape onkage Mạsire tahenpe. E gidrạko, onateń metapekana, ape do Mạsirege tahenpe jemon uniye sodorokʼre dil akae bon tahen are hijukʼre uni samaṅre lajaore alo bon paṛaokʼ. Baḍaegeape, uni doe dhoromgea, ar noa hõ baḍae dohokakʼpe, okoe dhorom kạmire apnarte lạgiạ paṛao akanko tahen, onko do Isor khongeko janamakana. Ma ńeltabonpe, Isor Baba do tinạkʼe dulạṛetʼ bon kana, uni do acʼren gidrạko menteye hohowabon kana, ar sạrige bon onka kangea. Onate dhạrti do bae baḍae akatʼ bona, ente dhạrti do Isor hõ bae baḍae akadea. E dulạṛiạ gidrạko, ńitokʼ do Isorren gidrạko kana bon, menkhan tayomte cetʼ hoyokʼa ona do ńit hõ baṅ sodor akana. Menkhan bon baḍaea, Mạsiye sodorokʼre abo do uni lekage bon hoyokʼa, ente uni doe okalekanicʼ kana, ona muṭhạntege bon ńelea. Okoe Mạsire noa ase dohoe uni do apnare khạṭikʼ kana cetʼleka Mạsiye khạṭige. Okoeko kạiyetʼkan onko do Isorakʼ katha bako bataoeda. Ar Isorakʼ katha bebataoge hoyokʼ kana kại do. Baḍaegeape, aboakʼ kạiko meṭao giḍikakʼ lạgitʼge Mạsi doe sodorlena. Mạsire do jãhãn kại bạnukʼ anaṅ. Okoe Mạsireko tahenkan onko do kạire bako tahenkana. Okoe kạireko jobe akan onko do Mạsi bako ńṭoṭhadea ar baḍae hõ bako baḍae akadea. E gidrạko, okoe hõ bạricʼ horte aloko bulạu idipe ma. Mạsi do bae bedhoroma, ar jãhãe bhageakʼe kạmiyetʼ khan uni hõ bae bedhoroma. Okoeye kại idiyetʼkan uni doe Soetanren kana, ente Soetan do etohopʼ khongeye kạiyeda. Ar Soetan kạmi marao giḍikakʼ lạgitʼge Isorren Hopon doe sodor akana. Isor khon janamicʼ do kạire bae tahena, ente Isorakʼ gun do unire tahenkana. Isor khone janamakante uni do kạire bae jobe tahẽ daṛeakʼa. Okoe bhage kạmire apnar bako lạgiạ paṛao akan tahen ar boeha bako dulạṛetʼko, onko do Isorren doko baṅkana. Ar noatege sodorokʼ kana okoe doko Isorren Hopon kana ar okoe doko Soetanren hopon kana. Okaṭakʼ katha pạhil khonpe ańjom ạguakatʼ ona do noage, abo mimitʼko jemon bon dupulạṛ. Onateń meneda, Kạin leka jemon alo bon hoyokʼ ma. Kạin do Soetanren hoṛe tahẽkana uni do acʼren boehae khũnledea. Menkhan cedakʼe khũn ledea? Ente uni do bạṛicʼakʼkoe kạmiyetʼkan tahẽkana, ar uniren boeha do dhorome kạmikan tahẽkana. E boehako, dhạrtiren hoṛko kurudapere ape do alope hahaṛakʼa. Abo do boehako bon dulạṛetʼkote, moron khon jionte parom hecʼakana mente bon bujhạu daṛeakʼ kana. Ar okoe bako dulạṛkan onko do gocʼko talareko tahenkana. Okoe boehae kurudaekan uni doe khũniạhi kana. Ar cele khũniạhire hõ jaejug jion baṅ tahen ona dope baḍaegea. Mạsi do abon lạgitʼ acʼakʼ jiwiye emena, onate dulạṛ do cetʼkana mente bon baḍae oromakada. Enḍekhan boeha lạgitʼ apnar jiwi emokʼ aboakʼ hõ lek kan tabona. Noa dhạrtire jiwetʼ tahen lạgitʼ okoeakʼ ạsulokʼakʼko menakʼtae, ar acʼren boehawakʼ reṅgecʼ ńelkate hõ bae beṅgetʼae enḍekhan cekate uniakʼ ontorre Isorakʼ dulạṛ do tahẽ daṛekokʼa? E gidrạko, abo do eken moca kathate dulạṛ baṅ udukʼkate kạmi hotete sạriakʼ reakʼ dulạṛ bon udugma. Khan noate bon baḍae daṛeakʼa, abo do sạriakʼren kana bon mente. Ona chaḍa jãhãnakʼ babotre aboakʼ ontor aboe dusi bon khan, enḍekhan Isor samaṅre aboakʼ ontorre jiwi raṛecʼ bon em daṛeaea. Isor do aboakʼ ontor khone maraṅgea ar jotowakʼgeye baḍaea. Dulạṛiạ gidrạko, aboakʼ ontor bae dusile bon khan, enḍekhan Isor samaṅre aboakʼ dil do tahengea. Onate okaṭakʼ bon khojokʼ uni ṭhen khon ona dobon ńamgea, ente uni okakoe hukum akatʼ onako bon manao ar okako kạmiye kusiakʼ onako bon kạmi. Uniakʼ hukum do naoge, jemon uniren Hopon Jisu Mạsire bon pạtiạukʼ ar abo abore bon dupulạṛ. Ar noa hukumge uni doe emoṭoakatʼ bona. Okoe uniakʼ hukume bataoetʼkan uni do unireye tahenkana ar acʼ hõ unireye tahenkana. Ar okoeṭakʼ sonot Jiue emakatʼ bon uni sonot Jiu hotete bon bujhạu daṛeakʼa, uni do aboakʼ ontorreye tahenkana mente. E dulạṛiạ gidrạkotiń, joto Jiu do alope pạtiạu akoa, bickom biḍạu aṭkarkope onko do Isor khonko hecʼakana se baṅ, ente dhạrtire aema eṛe nạbikoko oḍok akana. Isorren Jiu do nonkatepe orom daṛeakoa, okoe Jiu do Jisu Mạsi manwa lekateye hecʼlena menteye aṅgoce uni Jiuge Isor khon hecʼ akanicʼ do; Menkhan okoe Jiu Jisu bae aṅgoce uni Jiu do Isor khonicʼ doe baṅkana. Nui jiu do uni Mạsiren bạiri kanae. Ar okoeṭakʼ Jiue hijukʼkan, ona mape ańjomakatʼge, ar sạrige uni Jiu do ńit hõ dhạrtirege menaea. Menkhan E gidrạko, ape do Isorren kanape. Ape do onko eṛeko cetanrepe jitạu akana, ente noa dhạrtire okoe menae, uni khon apeakʼ ontorre menayicʼ doe maraṅgea. Onko eṛeko do noa dhạrtiren kanako; onate onko do noa dhạrti reakʼ kathako roṛa ar dhạrti do onkoakʼ kathae ańjoma. Abo do Isorren kana bon; okoe Isore baḍae akade uni do aboakʼ kathae ańjoma, menkhan okoe Isorrene baṅkan uni do aboakʼ katha bae ańjoma. Ar noatege abo do sạriakʼren Jiu ar bulạuren jiu bon orom daṛeaea. Dulạṛiạ gidrạko, abo mimitʼko jemon bon dupulạṛ, ente dulạṛ do Isor ṭhen khonge hijukʼ kana. Okoeakʼ ontorre dulạṛ menakʼtako, onko do Isor khongeko janamakana ar Isorko baḍae akadea. Okoeakʼ ontorre dulạṛ bạnukʼ, onko do Isor bako baḍae akadea, ente dulạṛ do Isor acʼtetʼ kangeae. Abo lạgitʼ Isorakʼ dulạṛ do nonkate sodor akana, uni do acʼren eskar janam Hopon noa dhạrtiteye kolkedea jemon uni hotete jion bon ńam. Isor do aboge bon dulạṛ akadea ona do baṅ, menkhan unigeye dulạṛketʼ bonte acʼren Hopone kolkedea, jemon Hopon do acʼakʼ jiwiye alaete aboakʼ kạiko meṭaokate Isore kusi ocoye. Ar noa kangea dulạṛ do. E dulạṛiạ gidrạko, Isor do nonkae dulạṛetʼ bon khan eḍekhan abo hõ mimitʼko dulạṛ lek kan tabona. Isor do okoege tishõ bako ńṭoṭhadea. Ar abo mimitʼko bon dupulạṛ khan, enḍekhan bon bujhạu daṛeakʼa, Isor do aboakʼ ontorre menaea ar uniakʼ dulạṛ do aboakʼ ontorre purạteye kạmiyeda. Uni do acʼren Jiue dan akatʼ bona, ar noatege bon baḍae daṛeakʼa je, abo do unire menakʼ bona ar uni hõ aboakʼ ontorre menaea mente. Alele ńṭoṭhadea ar gohale emetʼkana, Baba do manwakoren babańcaoicʼ mente Hopone kolkedea. Ar jãhãege Jisu do Isorren Hopon kanae menteye aṅgoce, Isor do unireye tahena ar uni hõ Isorreye tahenkana. Baḍaegea bon Isor do aboe dulạṛetʼ bona, ar uniakʼ dulạṛre aboakʼ biswạs menakʼ tabona mente. Isor do acʼtetʼgeye dulạṛ kana. Ar dulạṛre okoeye tahen kan, uni do Isorregeye tahenkana ar Isor do unireye tahenkana. Nonkatege dulạṛ do aboakʼ ontorre purạte hoeakana jemon bicạr hilokʼ dil bon ńam, ente noa dhạrtire aboakʼ jion do uniakʼ jion lekagea. Noa dulạṛre do botor bạnukʼa, bickom purạ dulạṛ do botore oḍok giḍiya, ente botorre do sạjại menakʼa. Okoeye botorokʼ kan uni do dulạṛre purạte bae sạbit utạr akana. Uni do pạhilre aboe dulạṛ maṛaṅketʼ bontege abo bon dulạṛede kana. Okoe Isore dulạṛede kana menteye menetʼkan, menkhan acʼren boehae kurudae kan uni doe eṛeyicʼ kana; ente mẽtʼte ńṭoṭhade boeha okoe bae dulạṛedekan uni do cekate baṅ ńṭoṭhade Isor doe dulạṛ daṛekea? Uni ṭhen khon noa hukum bon ńam akada, okoe Isorko dulạṛedekan onko do boehako hõ jemonko dulạṛko. Jisu do Mạsi kanae mente okoeko pạtiạukʼkan, onko do Isor khonko janamakana. Ar okoe Babako dulạṛedekan onko do uniren Hopon hõko dulạṛede kana. Abo do tinre Isor bon dulạṛede kana ar uniakʼ hukumko bon bataoetʼtaea unre bon baḍae kana je, Isorren gidrạko hõ bon dulạṛetʼkoa. Isorakʼ hukumko dohoege hoyokʼ kana Isor dulạṛ do. Uniakʼ hukum do hamal bojha leka do baṅkana, ente Isorren mitʼke mitʼ gidrạ do dhạrtiko bhagaoeda. Dhạrtire okaṭakʼe jitạu akan ona do aboakʼ pạtiạu. Okoeko pạtiạukʼkan Jisu do Isorren Hopon kanae mente, eken onkoge dhạrtiko bhagaoa. Nuikangeae Jisu Mạsi, one okoe do dakʼ ar mãyãm hoteteye hecʼlen. Eken dakʼ hotete do baṅ, bickom dakʼ ar mãyãm hoteteye hecʼlena. Sonot Jiu do noa reaṅ gohae emeda, ente uni do acʼgeye sạriakʼtetʼ kana. Sonot Jiu, dakʼ ar mãyãm, noa pea talate ona goha do hijukʼ kana ar ona pene goha do mitʼgea. Abo do manwawakʼ goha bon ataṅetʼ kana, menkhan Isorakʼ goha do ona khon hõ maraṅgea; uni do acʼren Hopon reaṅ gohae emakada. Isorren Hopon cetanre okoeye pạtiạukʼkan uniakʼ ontorre ona goha do menakʼa. Ar Isorre okoe bako pạtiạukʼkan onko do eṛeyicʼko benao akadea, ente Isor acʼren Hopon reaṅ oka gohae emakatʼ onare onko do bako pạtiạu akana. Ona goha do noage, Isor do jaejug jione emakatʼ bona ar ona jion do acʼren Hoponre menakʼa. Isorren Hopon okoeye ńamakade uni do jion hõe ńamakada; menkhan Isorren Hopon okoe bae ńamakade uni do ona jion hõ bae ńamakada. Ape okoeko Isorren Hoponrepe biswạs akan, ape ṭhen iń do noakoń olkeda jemonpe baḍae daṛeakʼ, ape do jaejug jionpe ńam akada mente. Isorre aboakʼ khạṭitetʼ do noage, uniakʼ monejoṅakʼ leka jãhãnakʼ bon koe lekhan, enḍekhan uni do aboakʼ kathae ańjoma. Baḍaegea bon, jãhãnakʼge bon koeye, uni do onae ańjoma, ar noa hõ bon baḍaegea, uni ṭhen okabon koeakatʼ ona do bon ńamakatʼgea. Jãhãege acʼren boeha nonka kạkạikane ńel lekhan one okaṭakʼ do gujukʼ senakʼ baṅkan, enḍekhan uni do Isor ṭhene koejoṅma ar onate uni do jiwetʼe dohoyea. Iń do nonḍe onkoakʼ kathageń roṛeda one okoe doko kạiyetʼkan, menkhan onkoakʼ kại do gujukʼ senakʼ do baṅkan. Menkhan gujukʼ senakʼ kại hõ menakʼgea. Ona reaṅ nehõrape reakʼ katha do bạń metapekana. Joto lekan bedhoromakʼge kại kana, menkhan joto kại do gujukʼ senakʼ do baṅkana. Baḍaeabon, Isor khon janamicʼ do kạire bae tahena. Ar okoe Isor khone janamakan unige uni doe rukhiạyea, ar Soetan do bae joṭetʼ daṛeaea. Baḍaeabon abo do Isorren kana bon, ar goṭa dhạrti do Soetanakʼ ektiạri latarre menakʼa. Arhõ bon baḍaea, Isorren Hopone hecʼente bujhạu reakʼ daṛeye emakatʼ bona jemon sạri Isor bon baḍae orom daṛeae. Okoe doe sạri Isor kan abo do uni tulucʼ bon kolom mitʼ akana, metakʼme uniren Hopon Jisu Mạsi tulucʼ menakʼ bona. Unige sạri Isor ar unige jaejug jion do. E bachakotiń, boṅgako tulucʼ apeakʼ do jãhãn jopoṛao alo tahen ma. Isor okoeye bachao akade uni maejiu ar uniren hoponko ṭhen iń murubi do noa ciṭhiń oletʼkana. Isorakʼ sạriạkʼtetʼ iạte iń do ape sanamkoń dulạṛetʼpea. Eken ińiń dulạṛetʼpea ona do baṅ, menkhan okoe Isorakʼ sạriakʼtetʼko baḍae oromakatʼ onko sanamkoge apeko dulạṛetʼpea. Oka sạriakʼtetʼ aboakʼ ontorre menakʼ ar jaejug hạbicʼ abo tulucʼ tahenkan ona sạriakʼtetʼ iạtege ale do apele dulạṛetʼpea. Isor Baba ar uniren Hopon Jisu Mạsi ṭhen khon sạriakʼ ar dulạṛte daya, mãyã ar sulukge abo tulucʼ tahenma. Baba okaṭakʼe hukumakatʼ bon ona lekage amren adom gidrạko do Isorakʼ sạri horte calakʼiń ńeletʼkote ạḍiń rạskạkʼ kana. Abo mimitʼko jemon bon dupulạṛ, noage am ṭhen ińakʼ nehõr do. E dulạṛiạ miserań, okań oletʼkan ona do jãhãn nawa hukum do baṅkana, bickom noa hukum do pạhil khonge bon ńam akada. Dulạṛ do hoyokʼ kana Isorakʼ hukum leka calakʼ. Pạhil khon okaṭakʼ hukum reakʼ kathape ańjom ạguakatʼ onkage ape do dulạṛ horte taṛam idipe. Dhạrtire nonkan aema hoṛko oḍok akana okoe doko bulạuko kan. Ente Jisu Mạsi manwa lekateye hecʼlen ona do bako aṅgoceda. Ar nonkan bulạukan hoṛge Mạsiren do bạiri kanako. Ape do sontor akae tahenpe, jemon apepe kạmiakatʼ reakʼ kuṛại purạtepe ńam daṛeakʼ. Okoe Mạsiakʼ sikhnạtko taṛam parom ar ona sikhnạtre ṭarhao akae bako tahen, onkoakʼ ontorre Isor do bạnugicʼan. Menkhan okoe ona sikhnạtre ṭarhao akane tahenkan uniakʼ ontorre do Baba ar Hopon bana hoṛge menakʼkinạ. Ar jãhãe hoṛ ape ṭhen hecʼkate ona sikhnạt bae emokʼ enḍekhan apeakʼ oṛakʼre uni do alope ataṅ daramea ar johar hõ alope joharaea. Okoe uniye joharae uni do uniakʼ bạṛicʼ kạmi reakʼ hõ bhạgiạdare hoyokʼa. Ape olape lạgitʼ ińakʼ aema katha menakʼre hõ enhõ kagoc ar kạlite olape do bạń menjoṅ kana. Ona khon bickom ape ṭhen senkate mocate galmarao reakʼ iń asokʼ kana, jemon aboakʼ rạskạ do purạukʼ tabon. Isorren bachao akan miseramren gidrạko do amko joharam kana. Isorakʼ sạriakʼtetʼ iạte okoeyiń dulạṛedekan, ińren uni dulạṛiạ gate Gạius ṭhen iń murubi do noa ciṭhiń oleda. Dulạṛiạ gate, koejoṅreń disạyetʼmea jemon amakʼ jotowakʼge mońjte calakʼ ar Jiu secʼ lekate cetʼlekam calakʼkan onkage jemon amakʼ hoṛmo hõ mońj tahentam. Iń do ạḍitetʼiń rạskạyena ente adom biswạsi boehako hecʼkate am reaṅ noa gohako emkeda je, am do Isorakʼ sạriakʼre pạtiạr menama ar ona lekam taṛameda. Ińren gidrạko je Isorakʼ sạriakʼ horteko taṛametʼkan, noa khon bạ̃ṛti maraṅ rạskạ do ińre ar bạnukʼanaṅ. Dulạṛiạ gate, am do begor oromte hõ biswạsi boehako lạgitʼ okaṭakʼem cekayetʼ ona do pạtiạrtegem onkayeda. Onko do manḍerre sanamko samaṅre amakʼ dulạṛ reakʼ kathako roṛeda. Ar Isor jemone kusikʼ onkaleka onko calakʼ reaṅem bebosta ako khan boge hoekokʼa. Onko do Mạsi lạgitʼgeko oḍok hecʼakana ar bepạtiạuko ṭhen khon cetʼge bako hatao akada. Onate nonkan hoṛ goṛowako do lek tabona, jemon Isorakʼ sạriakʼ lạgitʼ abo hõ onkoakʼ kạmire são kạmiyạko bon hoyokʼ. Iń do manḍerrenko ṭhen mitʼṭen ciṭhiń olleda, menkhan Diotrephes do manḍerren mukhiyạ hoyokʼe menetʼte aleakʼ katha do bae moneakʼ kana. Onate uni okaṭakʼe cekayetʼ ona do iń hecʼ tayom sanamkoń baḍae ocokoa. Uni do ale birudre hiskạte aema eṛe kathae roṛakada. Onate hõ bae suklente boehako hõ bae ataṅetʼkoa ar okoe onkoko ataṅetʼko onko hõe tạkicʼ darametʼkoa ar manḍer khone oḍoketʼkoa. Dulạṛiạ gate, bạṛicʼakʼko pańja baṅkate bickom bhageakʼ pańjaepe. Okoe bhageakʼe kạmikan uni doe Isorren hoṛ kana, ar okoe bạṛicʼakʼe kạmikan uni do Isor bae ńṭoṭhadea. Sanamkoge Demetriusko sarhaoede kana, ar Isorakʼ sạriakʼtetʼ hõe onkawae kana. Ale hõ unile sarhaoede kana. Am dom baḍaegea ale okaṭakʼle lại ona do sạrigea mente. Aema katha olam reakʼ menakʼtińạ, menkhan kạli ar kolomte ona olam do bạń monejoṅ kana. Asokʼ kạnạń usạrageń ńapam mea, ar unre samna sạmni laṅ galmaraoa. Suluk am ma. Amren gatekoko joharam kana. Onḍenko gateko do aleakʼ judạ judạ johar baṛe emakom. Iń do Jisu Mạsiren golam ar Jakobren boeha Jihudạ kạnạń. Isor Baba okoekoe hoho are dulạṛakatʼko ar Jisu Mạsi okoekoe rukhiyạ akatʼko onko ṭhen noa ciṭhiń oleda. Isor do daya, suluk ar dulạṛe dan ape ma. E dulạṛiạ gateko, kại khon sanamko oka bańcao bon ńamakatʼ ona bańcao reaṅ olape lạgitʼ ạḍi gagoj mon tahẽkantińạ. Menkhan enhõ Mạsi dhorom biswạsre, one okaṭakʼ Isor do acʼren hoṛko jaejug lạgitʼe emakatʼko, ona lạgitʼ mon murukte jemonpe lạṛhại ar ona udgạupe lạgitʼge noa ciṭhi olokʼ reakʼ jạruṛiń bujhạukeda. Noa do jạruṛgea, ente sedaere okoe hoṛkoakʼ sạjại reaṅ katha sostorre olakan onko do ape talare hape hapeteko bolo akana. Noko hoṛkore Isor bhokti do bạnukʼanaṅ; ar aboren Isorakʼ daya do lucạ lamoṭ menteko ạnḍuṅeda ar okoe aboren mitʼ goṭen mạlik are Probhu kan uni Jisu Mạsi do bako aṅgoc edekana. Ape do noako reaṅ bestegepe baḍaegea; enrehõ iń do noako kathań disạ ocoyetʼpe kana je, Misor disạm khon Israelko bańcaokate ạguko tayom okoe bako pạtiạulen Probhu do onkoe ḍahao maraoletʼkoa. Ona chaḍa okoe serma goḍetko do akoakʼ ạidạri rukhiyạ baṅkate apnarakʼ jaega bạgikateko calaolen onkoakʼ katha disạipe. Ona maraṅ din reakʼ bicạr lạgitʼ Isor do onko jaejug ńutreye tol doho akatʼkoa. Sodom, Gomora ar onakin beṛhaeteakʼ joto nagrahakoren hoṛko hõ ṭhik onko lekageko laṭghaṭetʼ tahẽkana. Okoe jaejug seṅgelre khadlekʼ reakʼ kuṛạiko ńam noko do onkoakʼ nạmunạgeko hoeakana. Enrehõ noko eṛe cecetʼko do onkage bạṛicʼ kukmukote apnarakʼ hoṛmoko bhõnḍetʼtakoa, serma goḍetkoakʼ ḍanṭaoko bebataoeda ar onko sarhaokʼ kanko birudre bemanot kathako roṛeda. Menkhan mukhiyạ serma goḍet Mikạyel do Moseakʼ hoṛmo iạte Soetan sãoteye reṭe peṭekʼkan tahẽkanre uni birudre jãhãn bemanot katha menkate dusiye do bae dilleda. Bickom uni doe menleda, “Probhui dhomkaome ma.” Menkhan noko bhõnḍ cecetʼko do oka bako bujhạu akatʼ ona reaṅ bạṛicʼ kathako roṛa ar bebuj janwarko leka akote okaṭakʼko bujhạuakatʼ onategeko marao utạrokʼa. Hae onko hoṛ do! Onko do Kạin reakʼ horteko calao akana, ar lab lạgitʼ Balamakʼ bulạureko khadle akana ar Korah reakʼ ṭhokteko nosṭoyena. Noko hoṛ do dilkate apeakʼ helmel bhojkoreko seletʼ emanlen khan ona bhojre mạilạ lekako hoyokʼa. Noko do eken ako reaṅakʼgeko dạndikʼa. Noko do hoete oṭaṅ calakʼkan bin dakʼan rimil leka kanako. Jo tiokʼ jokhecʼ bin joanakʼ dare kante rehetʼ sudhạ pạṭupʼ giḍi akatʼ leka noko do banar secʼ tegeko gocʼgea. Noko do birbão talare jalapuri reakʼ ḍheoko leka kanako; ar jalapuri reakʼ photo leka nokoakʼ lajao paṛao kạmiko do capekʼ kana. Noko do ạcur baṛaekan ipil lekanako; jaejug lạgitʼ kaṛaṅ kucạṅ ńutge noko lạgitʼ do jogao dohoakana. Adam bõsren eaeyicʼ metakʼme Enok hõ noko hoṛko reaṅ nạbiletʼteye menleda, “Ńelepe, Probhu do acʼren hajar hajar sonot goḍetkoante sanamko bicạrko lạgitʼe hijukʼ kana, ar bebhokti hoṛko do bebhokti lekate okako bạṛicʼ kạmiko kạmiakatʼ ar onko bebhokti kạiyan hoṛko Probhu birudre oka bạṛicʼ kathako roṛakatʼ, onate onko bicạr dusiko lạgitʼ uni doe hijukʼ kana.” Noko hoṛ do jaogeko karacʼ kurujokʼa, ar akoakʼ bhạgko dusiya ar ontor reakʼ bạṛicʼ sana lekako calakʼa. Onko do akoteko sarhaokʼa ar lab joṅ lạgitʼ hoṛko heṛemakoa. Menkhan E dulạṛiạ gateko, okako katha aboren Probhu Jisu Mạsiren apostolko lahareko lạiyakatʼ ona baṛe disạipe. Onko do noa kathako lạiape kan tahẽkana, “Okoe doko siṛog baṛayetʼ tahẽkan onko do mucạtʼ dinreko hijukʼa ar Isor bebhokti ar bạṛicʼ sanako senakʼa.” Noko hoṛ do dola duliko hoeocoya ar akoakʼ sana lekako calakʼa. Onkoakʼ ontorre sonot Jiu do bạnugicʼan. Menkhan E dulạṛiạ boehako, ape do apeakʼ sonot utạr biswạsre apete benao rakabokʼpe ar sonot Jiu reakʼ ạyurte koejoṅpe. Aboren Probhu Jisu Mạsiakʼ mãyã do jemon jaejug jion secʼe idipe ona ńel hor lạgitʼge ape do Isorakʼ dulạṛre tahenpe. Ape talare okoekoakʼ pạtiạu nijorgetako onko dayawakope. Ar adomko do seṅgel khon ạtkir oḍokkate bańcaokope. Jel reakʼ sanate okoeakʼ jion mạilạ akan onkoakʼ besapha kicricʼko hõ hirkhạwakʼpe ar apnar sontor akae tahente onko mãyãwakope. Eken mitʼ goṭen Isor okoe doe aboren babańcaoicʼ kan uni do apepe tohodokʼ khon bańcaokate niphuṭge acʼakʼ ṭhonok samaṅre rạskạteye hạjir daṛeape. Sanam jugko reakʼ pạhil khon cetʼ leka tahẽkan onkage ńit hõ ar jaejug hạbicʼ aboren Probhu Jisu Mạsi hotete Isorakʼge ṭhonok, mạhima, daṛe ar ektiạri tahen ma. Amen. Noa puthire okako olakan ona do Jisu Mạsigeye sodor akada. Noako reaṅ Isor do Mạsi ṭhene sodorleda, jemon thoṛa ghạṛicʼ khange hoyokʼ lạgidokʼkan ghoṭnako acʼren golamkoe baḍae ocoko. Mạsi do acʼren goḍete kolkedete acʼren golam Johan do noa reaṅakʼkoe baḍae ocoledea. Isorakʼ katha ar Jisu Mạsiakʼ goha reaṅ Johan okae ńelletʼ tahẽkan, onako reaṅ uni do nonḍe gohae emakada. Ar Isorakʼ okaṭakʼ katha nonḍe olakan, ar okoe noae paṛhao uni doe bhạgangea ar okoe onako ańjom arko manao onko hõko bhạgangea, ente okte do hecʼ seṭer akana. Iń Johan do Ạsiạ reakʼ eae goṭen manḍerko ṭheniń oleda. Okoe menae, okoeye tahẽkan ar okoeye hijukʼkan uni ar uniakʼ siṅghạson samaṅre okoe eae goṭen Jiuko tahenkan, onko ar Jisu Mạsi do daya ar sulukko dan apema. Jisu kangeae pạtiạricʼ goha do ar gocʼko khon unige pạhil dhaoe jiwetʼ beretʼlena, ar dhạrtiren rapajkoren raj doe uni kangea. Uni do aboe dulạṛetʼbona ar acʼakʼ mãyãmte kại khone chaḍaoketʼbona. Uni do aboko hotete mitʼṭen rajosṭiye benao rakapʼakada ar acʼren Baba ar Isorakʼ sewa lạgitʼ naekeye hoe ocoakatʼbona. Jaejug hạbicʼ Jisu Mạsiakʼge ṭhonok hoyokʼtaema ar jaejug hạbicʼ uniakʼ daṛe do tahẽ akae tahenma. Amen. Ńelpe, uni do rimilteye hijukʼkana. Ar mitʼke mitʼ mẽtʼ do uniko ńelea; ar okoeko sobokʼ bhugạkʼlede onko hõ uniko ńelea ar dhạrtiren sanam jạtko uni iạte koṛamko ceṭagokʼa. Onage hoyokʼ ma, Amen. Probhu Isore meneda, “Ińge Alpha ar Omega, one okoe do menae, are tahẽkan are hijukʼkan. Ar iń kangeạń sanam daṛeyicʼ do. Iń aperen boeha Johan do Jisu tulucʼ iń kolom mitʼ akante ape tulucʼ inạ duk, inạ rajosṭi ar inạ soboriren bhạgiạdariń hoeakana. Iń do Isorakʼ katha ar Jisuakʼ gohań porcarletʼte Patmosko metakʼ dipreń doho ocolena. Probhuakʼ dinre iń do Jiureń tahẽkana. Ar un jokhecʼ iń tayomre siṅgạ saḍe leka mitʼ hoṛakʼ aṛaṅiń ańjomkeda. Uni doe metadińạ, “Okaṭakʼem ńel ona do mitʼṭen puthire olme, ar Ephesus, Smurnạ, Pergamom, Thuạtirạ, Sạrdis, Philạdelphiạ, ar Laodhar, noa eae goṭen nagraha reakʼ eae goṭen manḍer ṭhen kolme.” Okoe kathae roroṛkan tahẽkan uni ńele lạgitʼ iń ạcuren khan sona reakʼ eae goṭecʼ diuhe dohowakʼ iń ńelkeda. Ona diuhe dohowakʼko talare manwa Hopon leka okoe coṅ mitʼ hoṛe tahẽkana. Uni do jaṅga hạbicʼ jeleń aṅgrop horokʼ akatʼ ar koṛam do sona reakʼ pạṭkạte tol ạcurakatʼ tahẽkantaea. Uniakʼ bohokʼ ar upʼ do ponḍge tahẽkana, ponḍ bhiḍi upʼ leka ar him lekage ar mẽtʼ do seṅgel lepʼ leka tahẽkana. Ar uniakʼ jaṅga do seṅgelre jhalkao akatʼ pitạl leka jhak jhak, ar aṛaṅ do aema dakʼko ạtukʼ reakʼ saḍe leka tahẽkana. Uni do acʼakʼ jojom tite eae goṭecʼ ipile sapʼakatʼko tahẽkana ar moca khon do banarsa dharanakʼ mitʼṭen laser tarwaṛe oḍokokʼkantae tahẽkana. Uniakʼ mẽtãhã do tạpiste jolokʼkan siń cando leka jhak jhakaokʼkan tahẽkana. Uni ńelte iń do gocʼicʼ leka uniakʼ jaṅga ṭheniń bhindạṛena. Unre uni do acʼakʼ jojomtite joṭetʼkedeńteye metadińạ, “Alom botorokʼa. Ińge pạhilicʼ ar mucạtʼicʼ, ar ińkangeạń jaejug jiwetʼicʼ. Iń doń gocʼlena, ar ńelme, jug cetan jug hạbicʼ jiwetʼ minạńa. Iń ṭhen do moron ar patal puri reakʼ choṛan menakʼa. Onate okam ńelketʼ, okaṭakʼ ńit hoyokʼkan ar noako tayom okaṭakʼ hoyokʼ onako ol dohokakʼme. Ar oka eae goṭecʼ sona reakʼ diuhe dohowakʼ ar ińakʼ jojomtire eae goṭecʼ ipilem ńelketʼko ona reakʼ bhed do noage, onko eae goṭecʼ ipil do, eae goṭecʼ manḍerren eae goṭen goḍet kanako ar eae goṭecʼ diuhe dohowakʼ do ona eae goṭen manḍer kana. “Ephesus nagraha reakʼ manḍerren goḍet ṭhen noa katha do olme: ‘‘Okoe acʼakʼ jojomtire eae goṭen ipil sapʼkate sona reakʼ eae goṭecʼ diuhe dohowakʼ talareye ạcur baṛaekan uni do noae meneda. Iń do amakʼ kạmi, mehnot ar sobori doń baḍaegea. Baḍaegeạń am do bạṛicʼ hoṛko bam ńel sahao daṛeakoa, ar okoe do apostolko baṅkanre hõ apnarte apostolko ńumugokʼkan onko dom biḍạu aṭkar akatʼkoa ar phạsiạra kanako mente hõm sạbud akatʼkoa. Amakʼ do sobori menakʼtamgea ar iń lạgitʼ hõ ạḍi kosṭom sahao akada, ar bam laṅga akana. Enrehõ am birudre noa katha roṛ reakʼ menakʼtińạ, ente lahate iń lạgitʼ cetʼ leka dulạṛ tahẽkantam ona dom atʼakada. Hudiskate ńelme, am do tinạkʼ usul khon tinạkʼ latartem pheḍakana. Noa khon mon ạcurtam ar lahate okakom kạmikan tahẽkan onare ruạṛme. Ar mon bam ạcurletam khan enḍekhan am ṭhen hecʼkate amakʼ diuhe dohowakʼ do ona jaega khoniń ocoga. Menkhan mitʼṭen gun menakʼtama ona do, Nikolạitiko okaṭakʼko cekayetʼkan ona dom hirkhạwakʼ kana, ar iń hõń hirkhạwakʼ kana. ‘‘Ańjom lạgitʼ lutur menakʼtayicʼ doe ańjomma, sonot Jiu manḍerrenko cetʼe metako kana mente! Jitạukʼicʼ do Isorakʼ Parades reakʼ jion dare reakʼ joń jom ocoyea. ‘‘Smurnạ naṅgrha reakʼ manḍerren goḍet ṭhen noa katha olme: ‘‘Okoe doe etohopʼ are mucạtʼicʼkan, ar okoe doe gocʼlen are jiwetʼ beretʼen, uni do noa kathae meneda. Amakʼ kosṭo ar reṅgecʼ reakʼ kathań baḍaegea, menkhan enhõ am dom kisạ̃ṛgea. Apnarte Jihudiko ńumugokʼkanre hõ okoe do Jihudiko baṅkan, bickom Soetan dolren kanko, onko do am birudre okako roṛetʼkan ona doń baḍaegea. Am do okako dukem jom lạgidokʼkan onate thoṛa hõ alom botorokʼa. Ańjomme, Soetan do ape modren adomko biḍạupe lạgitʼ hajotreye bhoraopea, ar gel din hạbicʼ ape do kosṭope joma. Am do gujukʼ hạbicʼ pạtiạr akae tahenme, enḍekhan jitạukʼ reakʼ mala leka jioniń emama. Ańjom lạgitʼ lutur menakʼtae hoṛ doe ańjomma, sonot Jiu manḍerrenko cetʼe metako kana mente. ‘‘Jitạukʼicʼ do dosar gujukʼte ohogeye hạnlena. “Pergamom nagraha reakʼ manḍerren goḍet ṭhen noa katha olme. Okaṭakʼ laser tarwaṛe banar secʼ dhar menakʼ ona ạidạrige noa kathae meneda: Am do okarem tahenkan ona doń baḍaegea; onḍe do Soetanakʼ siṅghạson menakʼa. Enhõ am do ińre pạtiạr menama ar iń cetanre amakʼ pạtiạu do bam baṅ akada. Okare Soetane tahenkan onḍe ińren pạtiạricʼ goha Antipas do ape samaṅreye khũn ocolenre hõ am do amakʼ pạtiạu bam baṅlakʼa. Menkhan enhõ am birudre ińakʼ roṛ reakʼ thoṛa menakʼtińạ. Onḍe am ṭhen nonkan hoṛko menakʼkoa okoe do Balamakʼ sikhnạt lekateko calakʼkan. Balak raj do Balame cetʼade tahẽkana jemon uni do boṅga samaṅakʼkoe jom ocoko ar laṭghaṭ kạmikote Israelko kại secʼe idiko. Ona chaḍa Nikoliạtikoakʼ cecetʼakʼ lekako calakʼkan nonkan adom adomko hõ am ṭhen menakʼkoa. Onate noa khon mon ạcurtam. Ar mon bam ạcurtam khan enḍekhan iń do usạrage am ṭheniń hijukʼkana ar ińakʼ moca reakʼ tarwaṛete onko birudreń lạṛhạiya. Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metako kana. Ar okoeye jitạukʼ uni do okoakatʼ manna khon thoṛa manna ar mitʼṭen ponḍ dhiriń emaea. Ona dhiri cetanre mitʼṭen nawa ńutum ol tahena one okoehõ ona do bako baḍaekan, eken okoe onae ńam unigeye baḍaea. “Thuạtirạ nagraha reakʼ manḍerren goḍet ṭhen noa katha olme, Isorren Hopon, one okoeakʼ mẽtʼ do seṅgel lepʼ leka ar jaṅga do jhak jhakaokʼkan pitạl leka uni do noa kathae meneda: Iń do amakʼ kạmi, amakʼ dulạṛ, amakʼ biswạs, amakʼ sapʼ dapʼ ar amakʼ sobori reakʼ kathań baḍaegea. Am do lahate okakom kạmikan tahẽkan, ona khon hõ ńitokʼ do arhõ bạ̃ṛtim kạmikan ona hõń baḍaegea. Enhõ am birudre ińakʼ noa katha roṛ reakʼ menakʼtińạ. Am do Jesebel ńutuman uni maejiuakʼ bedhoromem sahao akatʼa. Nui Jesebel do acʼte nạbiye ńumogokʼ kana. Ar acʼakʼ cecetʼakʼte uni do ińren gutikoe bulạuetʼkoa, jemon onko do laṭghaṭko kạmi ar boṅga ṭhen samaṅakʼko jom. Loṭghuṭi khon mon ạcurtae lạgitʼ iń do ạtiń emade tahẽkana, menkhan uni do mon bae ạcurletʼtaea. Onate iń do aṭetʼreń jaṛao ocoyea, ar okoe uni tulucʼko loṭghuṭiyetʼkan onko hõ loṭghuṭi khon mon bako ạcurletako khan enḍekhan ạḍi bạṛicʼ sasetreń khadlekoa. Ar uniren gidrạko hõń gocʼ giḍikakoa. Onate sanam manḍerrenko baḍae daṛeakʼa je, ińkangeạń manwakoakʼ mon ar ontor ḍunḍhạuicʼ do. Ar apeakʼ kạmiko leka mitʼke mitʼ hoṛ do joń emapea. E Thuạtirạren sarecʼ hoṛko, okoe ona sikhnạt leka bape calakʼkan ar Soetanakʼ oka khạnḍri cecetʼakʼko metakʼkan ona bape baḍae akatʼ, apeń metapekana: Ape cetanre ar eṭakʼ bojha do bạń ladeapea. Eken apeakʼ okaṭakʼ menakʼ, ona do iń ạuriń hijukʼ hạbicʼ kajakte sapʼ dohokakʼpe. Baba cetʼleka sanam jạtko cetanre ektiạriye emakawạdiń, onkage okoeye jitạukʼ ar mucạtʼ hạbicʼ ińakʼ sana lekae kạmi idi uni hõ ona ektiạriń emaea. Uni do mẽṛhẽtʼ ṭheṅgate onkoe ḍanṭaokoa ar hasa reakʼ bhajan lekae rạputʼgiḍikoa. Ar okoeye jitạukʼa unige iń do bhurkạ ipil hõń emaea. Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metakokana mente. “Sạrdis nagraha reakʼ manḍerren goḍet ṭhen noa katha olme, Isorren eae goṭen Jiu ar eae goṭecʼ ipilko okoeye sapʼ akatʼko uni do noa kathae meneda: iń do amakʼ kạmi reakʼ kathań baḍaegea. Ar jiwetʼ menamte am do ạḍi namḍak menakʼtama, menkhan am dom gocʼgea. Am do jagwar tahenme ar sarecʼakʼ okako gocʼakan leka menakʼ ona do daṛeanakʼ hoe ocoeme, ente ińren Isor samaṅre amakʼ jãhãn kạmige mucạdokʼ do bạń ńelakada. Onate okam ńamakatʼ arem ańjomakatʼ ona disạime ar manaome, ar ona khon mon ạcurtam. Ar jagwar bam tahen khan iń do kombṛo lekań hijukʼa, ar tinreń hijukʼa ona do baḍaege bam baḍae daṛeakʼa. Menkhan Sạrdisre thoṛa nonkan hoṛ menakʼkotama one okoe do akoakʼ kicʼricʼ khạnḍwạkʼ, metakʼme cạl-colon bako mạilạ akatʼtako. Onko doko lekman hoṛ kante ponḍ kicʼricʼ horokʼkate iń sãoteko dãṛãbaṛaea. Okoeye jitạukʼa uni do nonkan ponḍ kicricʼe horoga. Ar iń do jion reakʼ puthi khon uniakʼ ńutum tishõ bạń meṭaotaea, bickom ińren Baba ar uniren goḍetko samaṅreń aṅgocea. Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metakokana mente. “Philạḍelphiạ nagraha reakʼ manḍerren goḍet ṭhen noa katha olme: Okoe do sonot are sạriyicʼkan, ar okoe ṭhen Dạudakʼ choṛan menakʼ, one uniye jhicʼlere okoege bako siń daṛeakʼ are sińlere okoe hõ bako jhicʼ daṛeakʼ, uni do noa kathae meneda; iń do amakʼ kạmi reakʼ kathań baḍaea. Ńelme, iń do am lạgitʼ jhicʼ akatʼ mitʼṭen duạriń dohoakada, one oka siń reakʼ ektiạri do okoeakʼ hõ bạnukʼtako. Ińiń baḍaea amakʼ daṛe do thoṛagetama, menkhan enhõ am do ińakʼ katham dohoakada ar bam baṅ akadińạ. Okoe apnarte Jihudiko ńumugokʼkan, menkhan Jihudiko baṅkan, onko Soetanakʼ dolren eṛe hoṛko am ṭheniń ạgukoa ar amakʼ jaṅga ṭheniń sewa ocokoa, ariń baḍae ocokoa, iń do amiń dulạṛetʼmea. Sobori reakʼ okań hukumatʼme tahẽkan ona dom dohoakada; onate dhạrtire oka duk reakʼ ghuṛi daraekan ona khon iń doń rukhiyạmea. Ar okoe doko noa dhạrtirenkan onko biḍạuko lạgitʼge noa duk reakʼ okte do hijukʼa. Iń do ạḍi usạrageń darae kana. Amakʼ oka menakʼtam ona do sapʼ uricʼ akae tahenme, okoe hõ amakʼ jitạukʼ reakʼ kuṛại alo jemonko recʼme. Ar okoeye jitạukʼa unige ińren Isorakʼ oṛakʼ reakʼ mitʼṭen khũnṭiń teṅgoyea; uni do tisge bahrete bae calakʼa. Iń do unire ińren Isorakʼ ńutum ar ińren Isorakʼ nagraha reakʼ ńutumiń ola. Ona nagraha do nawa Jerusalemge. Serma khon ińren Isor ṭhen khon noa nagraha do pheḍ hijukʼa. Ar okoeye jitạukʼa, iń do unire ińakʼ ńutumiń ola. Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metako kana! ‘‘Laodikiạ nagraha reakʼ manḍerren goḍet ṭhen noa ciṭhi do olme, ‘‘Okoe do Amen, ar okoe do pạtiạricʼ are sạri gohakan, ar okoe do Isorakʼ sirjonren etohopʼ, uni do noa kathae meneda: iń do amakʼ kạmiko reakʼ iń baḍaea. Am do reaṛ hõ bam reaṛa ar lolo hõ bam loloa. Am do reaṛ se lolom hoelen khan honaṅ boge hoekokʼa! Menkhan am do reaṛ hõ bam reaṛa ar lolo hõ bam loloa, onate iń do moca khoniń thoyetʼkan lekań phurgiḍikama! Am dom meneda, kisạ̃ṛgeạń; ar maraṅ hoṛiń hoeakana, onate ińakʼ do cetʼ reakʼ reṅgecʼ hõ bạnukʼtińạ. Bogegea, menkhan bam baḍaea je, am dom reṅgecʼgea, kãṛãgea arem laṅgaṭgea mente. Onate noa solhań emam kana, am do iń ṭhen khon seṅgelre rapakʼakʼ khạṭi sona kirińjoṅme, jemonem kisạ̃ṛ daṛeakʼ. Iń ṭhen khon ponḍ kicricʼ kirińkate horogme jemon onem uluṅ akan reakʼ lajaotetʼ alo ńelokʼtam. Iń ṭhen khon mẽtʼre lagao lạgitʼ aenom kirińjoṅme, jemonem ńeńel. Okoeyiń dulạṛetʼko, onkoge doskoń udukʼakoa ariń ḍanṭaokoa. Onate noa khon mon ạcur lạgitʼ ahkaokʼme. Ńelme, iń do duạrre teṅgokate silpińiń ṭhopʼ ṭhopʼetʼ kana. Jãhãege ińakʼ aṛaṅ ańjomkate silpińe jhicʼạń, enḍekhan bhitrite uni ṭheniń bolokʼa ar uni tulucʼiń jom ńũiya, ar uni hõ iń tulucʼe joma. “Jitạukʼkate cetʼleka iń do ińren Baba tulucʼ uniakʼ siṅghạsonreń duṛupʼ akan, onkage okoeye jitạukʼa, uni do iń tulucʼ ińakʼ siṅghạsonre duṛupʼ reakʼ ạidạriń emaea. Ańjom lạgitʼ lutur menakʼtae hoṛ doe ańjomma, sonot Jiu do manḍerrenko cetʼe metako kana.” Noa tayom iń do serma reakʼ mitʼṭen duạr jhicʼ akatʼiń ńelkeda. Ar siṅgạ reakʼ saḍe leka okoeakʼ aṛaṅiń ańjomletʼ uni doe metadińạ, “Am do nonḍe rakapʼ hijukʼme. Ar noako tayom oka hoyokʼ lạgidokʼkan onań udukʼama.” Iń do unrege sonot Jiuteń perecʼente sermare mitʼṭen siṅghạsoniń ńel ńamkeda. Ona siṅghạsonre mitʼ hoṛ duṛupʼ akaniń ńelkedea. Uniakʼ rup do surjokanto ar lalkanto mạnik dhiri leka. Ar siṅghạson reakʼ beṛhaete mitʼṭen liṭạ akʼ tahẽkana; ona do ńelokʼte morokotʼ mạnik dhiri leka. Ona siṅghạson reakʼ beṛhaete arhõ bargel pon siṅghạson tahẽkana, ar ona siṅghạsonkore do bargel pon murubiko duṛupʼakan tahẽkana. Onkoakʼ kicricʼko do ponḍge tahẽkana ar bohokʼre do sona reakʼ mukuṭ tahẽkantakoa. Ona singhạson khon do bijliko, ar botoranakʼ aṛaṅ ar huḍur reakʼ saḍe oḍokokʼkan tahẽkana. Ar siṅghạson samaṅre eae goṭecʼ diuhe jolokʼkan tahẽkana. Ona diuheko do Isorren eae goṭen Jiu kanako. Ona siṅghạson samaṅre dhiri hisir leka kãc reakʼ jalapuri tahẽkana. Ona siṅghạsonko reakʼ talare menakʼ siṅghạson reakʼ beṛhaete ponea jiwiyanko tahẽkana. Onkoakʼ do samaṅ secʼ ar tayom secʼ mẽtʼkote perecʼ tahẽkana. Pạhil jiwiyanicʼakʼ rup do dhạcri kul leka, dosaricʼ do bạchur leka, tesaricʼ do manwa leka ar ponicʼ do uḍạukʼkan pajhaṛ cẽṛẽ leka. Noko ponea jiwiyanko do hoṛo hoṛo turui goṭecʼkate phạ̃kṛạ̃kʼ ar sanam jaegakore mẽtʼkote perecʼ tahẽkantakoa. Onko do siń ńindạ mitʼ kathageko menetʼ tahẽkana, “Sanam daṛeanicʼ Probhu Isor, okoe doe tahẽkan, okoe do menaege, okoe doe hijukʼkan uni doe sonot, sonot, sonotgea.” Onko jiwiyanko do siṅghạsonre duṛupʼakanicʼ one uni jug cetan jug jiwetʼe tahenkan ṭhonok ar man ar gun manao joharko emae jokhecʼ, onko bargel pon murubiko do siṅghạsonren ạidạriyicʼ, metakʼme okoe do jaejug hạbicʼ jiwetʼ menae uni do ombakʼkateko sewawae kana. Noko murubiko do ona siṅghạson samaṅre akoakʼ mukuṭ bocʼ dohokateko meneda, “E aleren Probhu ar Isor, amge man ar ṭhonok ar daṛe ńam lek kanam, ente jotowakʼgem sirjạu akada; ar amakʼ monelekage onako do sirjạu akana ar ṭikạu menakʼa.” Okoe ona siṅghạson cetanreye duṛupʼ akan tahẽkan uniakʼ jojomtire mitʼṭen puthiń ńelkeda. Puthi reakʼ bahre ar bhitrire do ol tahẽkana ar eae goṭecʼ mohorte chapakatʼ tahẽkana. Tayomte mitʼṭen daṛeanicʼ serma goḍet do ạ̃ṭ aṛaṅte noa katha roroṛkaniń ańjomkedea, “Noa mohor chapko raṛakate puthi oṭag lạgitʼ lekmanicʼ doe okoe kana?” Menkhan sermare se dhạrtire se ot latarren okoege noa puthi do bako oṭakʼ daṛeada, ar bhitri hõ bako ńel daṛeada. Unre iń do ạḍi ãṭ iń rakʼkeda, ente nonkan okoege bako ńamlena okoe do ona puthi oṭag se ńel lạgitʼko lek kan. Tayomte murubiko modren mitʼ hoṛe metadińạ, “Alom raga. Jihudạ bõsren dhạcri kul, one okoe doe Dạud bõsren kan, uni doe jitạu akana. Unige ona eae goṭecʼ mohor chapko raṛakate puthiye oṭakʼ daṛeakʼa.” Ponea jiwiyanko ar murubiko talare okaṭakʼ siṅghạson tahẽkan, ona cetanre mitʼṭen Bheḍa Hopon teṅgo akaniń ńelkedea. Ińiń hudisetʼ tahẽkana pasecʼ uni Bheḍa Hopon doe gocʼ ocolen tahẽkana. Uni Bheḍa Hoponakʼ do eae goṭecʼ dereń ar eae goṭecʼ mẽtʼ tahẽkana. Ar Isorren eae goṭen Jiu okoe do dhạrti reakʼ sanam jaegateko kol ocokʼkan ona mẽtʼko do onko eae goṭen Jiu kanako. Tayomte uni Bheḍa Hopon do hecʼkate siṅghạsonre okoeye duṛupʼ akan tahẽkan uniakʼ jojomti khon puthiye hataokeda. Ar puthiye hataoketʼ khan onko ponea jiwiyanko ar bargel pon murubiko do Bheḍa Hopon samaṅreko ombakʼena. Onko mimitʼkoakʼ tire do mimitʼ goṭecʼ peṛesaṅ ar mimitʼ goṭecʼ dhupte perecʼ sona reakʼ bạṭi tahẽkana. Ona dhupte perecʼ bạṭiko do Isorren hoṛkoakʼ koejoṅ kana. Onko do noa nawa sereńko sereńetʼkan tahẽkana: “Amge ona puthi hataokate mohor chapako raṛae reakʼ lek kanam, ente am dom gocʼ ocolena. Amge amakʼ mãyãmte mimitʼ bõsko, pạrsiko, disạmrenko ar jạtko mod khon Isor lạgitʼ hoṛkom kiriń akatʼkoa. Am do onko hotete mitʼṭen rajosṭim benao akada ar aboren Isorakʼ sewae lạgitʼ naekekom hoe ocoketʼkoa. Dhạrtire onkoge rajosṭiko calaoa.” Tayomteń ńelkeda; ona singhạson ar jiwiyanko ar murubiko beṛhaete aema serma goḍetkoakʼ aṛaṅ iń ańjomkeda. Onko serma goḍetko do lekhare hajar hajar, ar ojut ojutko tahẽkana. Onko do ãṭ aṛaṅte noa kathako menetʼkan tahẽkana: “Okoeṭakʼ Bheḍa Hopone gocʼ ocolen, unige ektiạri, dhon, akel, daṛe, manot, ṭhonok ar sarhao ńam lek kanae.” Ona tayom sermare, dhạrtire, ot latarre ar jalapurire tinạkʼ jiwiyan menakʼko, ar onare jãhãnakʼge menakʼ jotokoge noa katha roroṛkaniń ańjomketʼkoa: “Singhạsonre okoeye duṛupʼ akan Uniakʼ ar uni Bheḍa Hoponakʼ sarhao man ar ṭhonok ar daṛe do jaejug hạbicʼ tahenma.” Onko ponea jiwiyankoko menkeda, “Amen.” Ona tayom onko murubiko do ombakʼkateko sewakeda. Bheḍa Hopon do ona eae goṭecʼ mohor chapko reakʼ pạhilakʼe raṛaketʼ khan iń ńelkeda; onko ponea jiwiyanko modren mitʼṭen do huḍur reakʼ aṛaṅ leka roroṛkaniń ańjomkedea, “Dela hijukʼme.” Unre mitʼṭen ponḍ sadomiń ńel ńamkedea. Ar okoe unireye decʼ akan tahẽkan uniakʼ tire do mitʼṭen akʼ tahẽkana. Uni do mitʼṭen mukuṭko emadea ar jitạuicʼ lekae oḍok calaoena are jitạu idikeda. Bheḍa Hopon do dosarakʼ mohor chape raṛayetʼ tahẽkanre iń do dosaricʼ jiwiyanicʼ roroṛkaniń ańjomkedea, “Dela hijukʼme.” Unre seṅgel leka eṭakʼ mitʼṭen arakʼ sadome oḍok hecʼena. Okoe uni sadomreye decʼ akan tahẽkan uni do dhạrti khon suluk ocog lạgitʼ ektiạriye em ocoyena, jemon hoṛko do ako akoko gopocʼ. Uni do mitʼṭen maraṅ okocʼ tarwaṛe hõe emocoyena. Bheḍa Hopon do tesarakʼ mohor chape raṛayetʼ tahẽkanre tesaricʼ jiwiyanicʼ roroṛkaniń ańjomkedea, “Dela hijukʼme.” Ona tayom iń do mitʼṭen hende sadomiń ńel ńamkedea. Ar okoe uni sadomreye decʼakan tahẽkan uniakʼ tire do mitʼṭen tulạ tahẽkana. Onko ponea jiwiyanko talare okoe coṅ roroṛkaniń ańjomkedea, “Mitʼṭen din ṭalaoicʼakʼ mitʼ din reakʼ kuṛại do eken mitʼ ser guhum se pe ser jao. Sunum ar darkha rasa do alom nosṭoea.” Bheḍa Hopon do ponakʼ mohor chape raṛaketʼ khan ponicʼ jiwiyanicʼ roroṛkaniń ańjomkedea, “Dela hijukʼme.” Unre iń do mitʼṭen polso sasaṅ roṅan sadomiń ńel ńamkedea. Ar okoe uni sadomreye decʼakan tahẽkan uniakʼ ńutum do moron; ar patal puri do uni tayom tayomteye calakʼkan tahẽkana. Dhạrti reakʼ pon hạṭiń reakʼ mitʼ hạṭiń cetanre unkin do ektiạriko ematʼkinạ, jemon unkin do tarwaṛete, akalte, maha mạrite, ar dhạrtiren bir janwarko hotete hoṛkokin gocʼko. Ar mõṛẽakʼ mohor chape raṛayetʼ tahẽkanre iń do pinḍ latarre nonkan hoṛkoakʼ jiwikoń ńelkeda, one okoe do Isorakʼ katha ar goha iạteko gocʼ ocolen tahẽkan. Onko do ãṭ aṛaṅteko menkeda, “E sonoticʼ ar sạriyicʼ Probhu, okoe doko noa dhạrtirenkan, onko bicạrko lạgitʼ ar aleakʼ mãyãm reakʼ hala ruạṛako lạgitʼ ar tinạkʼem biloma? Unre onko mimitʼ hoṛ mitʼṭenkate ponḍ oyon kicricʼko ematʼkoa arko metatʼkoa, onkoren são gutiko ar boehako, okoe do ako lekako gocʼ ocokʼ onkoakʼ lekha ạuri purạukʼ hạbicʼ jemon arhõ thoṛa ghạṛicʼko ńel hor. Ona tayom iń ńelkeda, uni do turuiyakʼ mohor chape raṛaketʼ khan ạḍi ãṭ dhạrti laṛaoena. Siń cando do ekalteye hende cabayena ar ńindạ cando do mãyãm lekae arakʼena. Ar kajak hoete cetʼleka loa dare khon berel loa ńurokʼ, onkage sermaren ipilko hõ dhạrtireko ńurena. Guṛhạ dohoakan kagoc lekage serma do guṛhạyena; ar buru ar dipko do apan ạpin jaega khon ocokʼena. Dhạrtiren sanam rapajko, napṛakʼko, maraṅ subedarko, kisạ̃ṛko ar daṛean hoṛko, mitʼke mitʼ golam ar sạdhin hoṛko do danderkore ar buru reakʼ huṭupʼ dhirikoreko okoeyena. Onko do buruko ar dhirikoko metatʼa, “De ale cetanre bhindạṛokʼpe ar ona siṅghasonreye duṛupʼakan, uniakʼ mẽtʼãhã samaṅ khon ar Bheḍa Hoponakʼ edre khon oko dohokalepe, ente unkinakʼ edre sodor reakʼ ona maraṅ din do seṭerakana, ar uni samaṅre do okoeye teṅgo ṭarhao daṛekokʼa?” Niạ tayom iń do ponea serma goḍetko dhạrti reakʼ ponon konḍre teṅgo akaniń ńelketʼkoa. Onko do dhạrti ponon kona reakʼ hoeko esetʼ dohoakatʼ tahẽkana, jemon dhạrtire, jalapurire se jãhãn dare cetanre hoe hõ aloe hoe. Ona tayom mitʼṭen serma goḍet do purub secʼ khon rakapʼ hijukʼiń ńelkedea. Uni ṭhen do jiwetʼ Isorakʼ mohor chap tahẽkana. Ar okoe serma goḍetko do dhạrti ar jalapuri hạn reakʼ ektiạriko emoco akan onko ponea serma goḍetko ãṭ aṛaṅteye metatʼkoa, “Aboren Isorren golamkoakʼ moloṅre mohor chap ạuri emako hạbicʼ dhạrti, jalapuri ar dareko do alope hạna.” Ona tayom onko mohor chap akan hoṛkoakʼ lekhań ańjomkeda. Israelren sanam bõsko mod khon jotote mitʼ sae pongel pon hajar hoṛko mohor chap ocoakana: Jihudạ bõsko khon gelbar hajar. Ruben bõsko khon gelbar hajar. Gadren bõsko khon gelbar hajar. Aserren bõsko khon gelbar hajar. Naphtali bõsko khon gelbar hajar. Manasi bõsko khon gelbar hajar. Simeon bõsko khon gelbar hajar. Liwiren bõsko khon gelbar hajar. Isạkạrren bõsko khon gelbar hajar. Sạbulonren bõsko khon gelbar hajar. Josephren bõsko khon gelbar hajar. Benjaminren bõsko khon gelbar hajar. Inạ tayom sanam jạtko, bõsko, disạm ar pạrsiren modko khon nunạkʼ gadel hoṛkoń ńelketʼkoa je, onko do okoege bako lekha daṛeatʼkoa. Onko do ponḍ kicricʼ horokʼkate ona siṅghạson ar Bheḍa Hopon samaṅre khijur sakam sapʼkateko teṅgo akan tahẽkana. Ar ãṭ aṛaṅte hohokateko menetʼkan tahẽkana: “Okoe siṅghạsonreye duṛupʼ akan, aboren Isor ar Bheḍa Hopon titege kại khon bańcao do hoeakana.” Ona tayom sermaren goḍetko do sanamkoge ona siṅghạsonren, mukhiyạko ar ponea jiwiyanko beṛhaeteko teṅgoyena. Onko do siṅghạson samaṅre ombakʼkate Isor sewawadeteko menkeda, “Amen. Sarhao, ṭhonok, akel, gunmanao johar, man, ektiạri ar daṛe do jaejug hạbicʼ aboren Isorakʼge hoyokʼtaema. Amen.” Unre mitʼṭen murubi doe metadińạ, “Ponḍ kicricʼ horokʼakatʼ noko hoṛ doko okoe kana? Ar oka khonko hecʼakana?” Adoń metadea, “Ńelme, ona do amgem baḍaea.” Uni doe metadińạ, “Ona maraṅ saset khon okoeko hecʼakan onko doko noko kangea. Onko do akoakʼ kicricʼko Bheḍa Hoponakʼ mãyãmte ạrupʼkateko ponḍ akatʼtakoa. Onate noko do Isorakʼ siṅghạson samaṅre menakʼkoa ar serma reakʼ mundilre siń ńindạ uniko sewawae kana. Okoe siṅghạsonreye duṛupʼ akan unige noko cetanreye chạunikʼa. Noko do ar baṅ reṅgecʼkoa, baṅ tetaṅkoa; siń cando reakʼ dãk hõ hoṛmore baṅ paṛao akoa, ar bebạṛicʼ lolo hõ bako ạikạua, ente Bheḍa Hopon okoe do siṅghạsonre menae unige onkoren gupiyicʼe hoyokʼa. Ar jiwetʼ dakʼ reakʼ jharna ṭhene idikoa, ar Isor do onkoakʼ mẽtʼdakʼe jodtakoa.” Ona tayom Bheḍa Hopon do eaeakʼ mohor chape raṛaketʼ khan sermare adha ghonṭa gan jãhãn saḍege baṅ ańjomlena. Ar okoe eae goṭen serma goḍetko Isor samaṅreko teṅgo akan tahenkan onkoń ńelketʼkoa. Onko do tire eae goṭecʼ siṅgạko ematʼkoa. Inạ tayom ar mitʼṭen serma goḍet hecʼkate pinḍ samaṅreye teṅgoyena. Uniakʼ tire do sona reakʼ mitʼṭen dhup dani tahẽkana. Uni do ạḍi utạr dhupko emadea jemon siṅghạson samaṅre sona reakʼ pinḍre Isorren sanam hoṛkoakʼ koejoṅ sãote ona dhup jeretʼkateye samaṅ daṛeakʼ. Ar uni serma goḍetakʼ ti khon dhup reakʼ dhũạ do Isorren hoṛkoakʼ koejoṅ sãote coṭte Isor samaṅre rakapʼena. Unre serma goḍet do pinḍ khon seṅgel hataokate ona dhup daniye perecʼkeda ar dhạrtiteye lebda giḍikada. Onate huḍur ar eṭakʼakʼ botoranakʼ saḍe leka saḍeyena, ar bijli malkaoena ar dhạrti laṛaoena. Eae goṭen serma goḍetko ṭhen okaṭakʼ eae goṭecʼ siṅgạ tahẽkan, onko do ona oroṅ lạgitʼko sapṛaoena. Ar pạhilicʼ serma goḍet do acʼakʼ siṅgại oroṅketʼ khan mãyãm mesalakatʼ arel ar seṅgel do dhạrtirte lebda giḍiyena. Onate pe hạṭiń reakʼ mitʼ hạṭiń dhạrti, ar pe hạṭiń reakʼ mitʼ hạṭiń dareko ar sanam hạriạṛ ghãsko lo roṅgoyena. Inạ tayom dosaricʼ serma goḍet acʼakʼ siṅgại oroṅkeda. Unre maraṅ jolokʼkan buru leka mitʼṭen jinis do jalapurire khadle ocoyena. Onate jalapuri reakʼ pe hạṭiń reakʼ mitʼ hạṭiń dakʼ do mãyãm cabayena, ar jalapuriren pe hạṭiń reakʼ mitʼ hạṭiń jiwiyanko doko gocʼena, ar pe hạṭiń reakʼ mitʼ hạṭiń jahajko do bhaṅla bhaṭ cabayena. Tayomte tesaricʼ serma goḍet hõ siṅgại oroṅkeda. Unre maraṅ okocʼ mitʼṭen ipil do diuhe leka jolokʼte serma khone ńurhạyena. Uni ipilakʼ ńutum do Nagodana tahẽkana. Uni ipil do pe hạṭiń reakʼ mitʼ hạṭiń gaḍa ar dakʼ jharnakoreye ńurhạyena. Onate pe hạṭiń reakʼ mitʼ hạṭiń dakʼ do haṛhatʼena ar haṛhatʼ dakʼ iạte ạḍi utạr hoṛ doko gocʼena. Inạ tayom ponicʼ serma goḍet hõ acʼakʼ siṅgại oroṅkeda. Onate siń cando reakʼ pe hạṭiń reakʼ mitʼ hạṭiń, ńindạ cando reakʼ pe hạṭiń reakʼ mitʼ hạṭiń ar ipilko reakʼ pe hạṭiń reakʼ mitʼ hạṭiń do ńutena. Ar din reakʼ pe hạṭiń reakʼ mitʼ hạṭiń ar ńindạ reakʼ pe hạṭiń reakʼ mitʼ hạṭiń do jãhãn marsalge baṅ tahẽlena. Tayomte sermare mitʼṭen pajhaṛ cẽṛẽ ạḍi coṭte uḍạukʼkaniń ńelkedea, uni pajhaṛ do ãṭ aṛaṅte roroṛkaniń ańjomkedea, “Eṭakʼ okoe pea serma goḍet siṅgạko oroṅ lạgidokʼkan tahẽkan, onkoakʼ siṅgạ saḍelen khange dhạrtire tahenkanko lạgitʼ do hae hae.” Ona tayom mõṛẽyicʼ serma goḍet siṅgại oroṅkeda, ar unre mitʼṭen ipiliń ńel ńamkedea. Uni do serma khon dhạrtiteye ńurhạ akan tahẽkana. Ar uni ipil do athan kunḍ reakʼ choṛane emocoyena. Khan uni ipil do ona athan kunḍe jhicʼkeda; ar maraṅ okocʼ culhạ khon dhũạ oḍokokʼ leka, ona kunḍ khon dhũạ oḍokokʼ ehopʼena. Ona kunḍ reakʼ dhũạte siń cando ar serma do ńutena, ar ona dhũạ khon ạḍi utạr pohoko dhạrtiteko oḍok hecʼena. Onko do dhạrtiren kidiń kaṭkom leka ektiạriko emocoyena. Arko menocoyena dhạrti reakʼ ghãs se hạriạṛ jãhãnakʼ se jãhãn dareko alo jemonko nosṭoe; eken okoe hoṛkoakʼ moloṅre Isorakʼ mohor chap bạnukʼtako onkoko hạnko. Noko hoṛko gocʼko reakʼ jãhãn ektiạri do bako emocolena, menkhan mõṛẽ cando hạbicʼ saset emako reakʼ ektiạriko emocoyena. Kidiń kaṭkomkoko totoṛre cetʼleka hasoa, onkage noko pohoko hõko haso ocoa. Unre hoṛko do gujukʼko ńam baṛaea, menkhan okalekatege bako ńama; onko do gujukʼko khoja, menkhan gujukʼ do onko khone ńir pharakokʼa. Onko pohoko do ńelokʼte lạṛhại sapṛao akatʼko sadom leka. Onkoakʼ bohokʼre sona reakʼ mukuṭ lekanakʼ jinis tahẽkana, ar onkoakʼ mẽtʼãhã reakʼ rup do manwa leka tahẽkana. Onkoakʼ upʼ do maejiukoakʼ upʼ leka ar ḍaṭa do dhạcri kulakʼ ḍaṭa leka. Onkoakʼ koṛamre mẽṛhẽtʼ reakʼ aḍonakʼ leka kicricʼ tahẽkana. Ar ạḍi utạr sadomko lạṛhại gạḍiko kamsao idiyetʼ reakʼ sabad leka, onkoakʼ phạ̃kṛạ̃kʼ reakʼ sabad hõ tahẽkana. Onkoakʼ canḍbol ar suṅgạ do kidiń kaṭkomakʼ canḍbol ar suṅgạ leka tahẽkana. Mõṛẽ cando hạbicʼ hoṛko hạnko reakʼ ektiạri onkoakʼ canḍbolre tahẽkana. Ar athan kunḍren goḍetge noko pohokoren raje tahẽkana. Ibri pạrsite uni goḍetakʼ ńutum do tahẽkana Abaddon, ar Greek pạrsite do Appoluon, metakʼme ḍahao maraoicʼ. Pạhilakʼ muskilakʼ do parom calaoena. Ar ńelme, noa tayom do arhõ barea muskilakʼ hijukʼkana. Ona tayom turuyicʼ serma goḍet do acʼakʼ siṅgại oroṅkeda. Ar Isor samaṅre okaṭakʼ sona reakʼ pinḍ menakʼ ona pinḍ reakʼ ponea dereń khon mitʼṭen hoṛ do katha roroṛiń ańjomkedea. Okoe ṭhen siṅgạ tahẽkan, uni turuyicʼ serma goḍete metadea, “Okoe ponea goḍet maraṅ gaḍa Phurạt ṭhenko tolakan onko raṛakakome.” Unre onko ponea goḍet doko raṛa ocoyena. Niạ bochor reakʼ niạ cando, niạ din ar niạ ghonṭa lạgitʼ onko goḍet doko sapṛao doho ocoakan tahẽkana jemon onko do pe hạṭiń reakʼ mitʼ hạṭiń manwako gocʼko. Ar tayomteń ańjomkeda, sadomre decʼakan palṭonko do lekhare gel hajar gun gel hajar reakʼ dobṛa tahẽkana. Dorsonte sadomko ar onko cetanre decʼakanko onkoakʼ koṛam reakʼ aḍonakʼ do seṅgel leka arakʼ, lil ar gondhok leka sasaṅ iń ńelketʼtakoa. Sadomkoakʼ bohokʼ do dhạcri kulakʼ bohokʼ leka ar onkoakʼ moca khon do seṅgel, dhũạ ar gondhok oḍokokʼkan tahẽkana. Seṅgel, dhũạ ar gondhok, noa pea dukte manwa do pe hạṭiń reakʼ mitʼ hạṭińko gocʼ ocoyena. Onko sadomkoakʼ do moca ar canḍbolrege daṛe tahẽkana, ente onkoakʼ canḍbol do biń leka tahẽkana. Onko do canḍbolko reakʼ agalte manwakoko hạnetʼko kan tahẽkana. Menkhan noako duk tayom hõ okoeko manwa jiwetʼko tahẽyen, onko do apnar tite benao muṭhạnko khon mon bako ạcurletʼtakoa. Onko do bạṛicʼ jiuko ar baṅ ńeńelko, baṅ ańjomko, baṅ taṛam daṛeakʼ sona, rupạ, pitạl, dhiri ar kaṭren muṭhạnko benaokateko sewawakokan tahẽkana. Ona chaḍa khũn, jạdu, laṭghaṭ ar kombṛo, noako khon hõ mon bako ạcurleda. Ona tayom ar mitʼṭen daṛeanicʼ serma goḍet serma khon pheḍ hijukʼ kaniń ńelkedea. Uni do rimilte oyo akan, ar bohokʼre do liṭạ akʼ tahẽkantaea. Uniakʼ mẽtʼãhã do siń cando leka ar jaṅga do seṅgel reakʼ khũnṭi leka tahẽkana. Uniakʼ tire do oṭakʼ akatʼ mitʼṭecʼ huḍiń puthi tahẽkana. Uni do acʼakʼ jojom jaṅga jalapurire ar leṅga jaṅga do otre dohokate dhạcri kule hạnḍrạukʼkan leka ãṭ aṛaṅteye hohokeda. Uniakʼ hoho são sãote eae goṭecʼ huḍur saḍeyena. Ar eae goṭecʼ huḍur saḍeyen khan iń do olokʼ lạgitʼ iń sapṛaoena. Menkhan serma khon noa kathań men ocoyena, “Eae goṭecʼ huḍur oka kathae menketʼ ona do okoge dohokakʼme, alom ola.” Okoeṭakʼ serma goḍet do jalapuri ar otre teṅgo akaniń ńellede uni do acʼakʼ jojomti serma secʼe tulkeda. Ar jaejug hạbicʼ jiwetʼ menae serma, ot, jalapuri ar onakore menakʼ sanamakʼe sirjạuakatʼ, uniakʼ ńutumte kiriyạkate uni serma goḍet doe menkeda, “Ar baṅ bilomokʼa. Menkhan eaeyicʼ serma goḍetakʼ siṅgạ oroṅ dinkore Isorakʼ okoakʼ monsubạko do purạukʼa. Ar Isor do acʼren gutiko ṭhen, metakʼme nạbiko ṭhen okae baḍae ocoletʼ ṭhik onkage hoyokʼa.” Okoe serma khon katha roroṛiń ańjomlede, uni do arhõe metadińạ, “Okoeṭakʼ serma goḍet jalapuri ar otreye teṅgo akan, uni ṭhen senkate uniakʼ ti khon oṭakʼ akatʼ puthi hataome.” Unre iń do serma goḍet ṭhen senkate ona puthi imạń lạgitʼ iń metadea. Uni doe metadińạ, “Noa hataokate jom gotʼkakʼme. Noa do amakʼ lacʼe haṛhatʼ ocoetama, menkhan amakʼ mocare do dumur rasa leka heṛemem ạikạua.” Unre serma goḍetakʼ ti khon ona huḍiń puthi hataokateń jom gotʼkada. Ar mocare do dumur rasa lekań ạikạukeda, menkhaniń jomketʼ khan lacʼ do haṛhatʼentińạ. Ona tayom noa kathań menocoyena, “Am do arhõ ạḍi utạr disạmko, jạtko, pạrsiko ar rajko reaṅ nạbi kathako roroṛ hoyokʼtama.” Ona tayom sosoṅ ṭheṅga lekanakʼ mitʼṭen chuchi ṭheṅga em ocokateń men ocoyena, “Mundil ar pinḍ soṅme ar okoeko onḍe Isorko sewawaekan onko hõ lekhakom. Menkhan mundil bahrere okaṭakʼ raca menakʼ ona do badkakʼme, alom soṅa, ente ona do boṅgan hoṛ jạtrenkoko em ocoakana. Onko do pongel bar cando hạbicʼ sonot nagrahako lebetʼ gańjaoa. Menkhan ińren banar gohakin nonkan ektiạriń emakinạ onate unkin do gõṛẽ kicricʼ horokʼkate mitʼ hajar bar sae turui gel din hạbicʼ kin nạbiya.” Unkin gohakin dokin hoyokʼ kana barea jạitun dare ar barea diuhe dohowakʼ, one okoe do dhạrtiren Probhu samaṅrekin teṅgo akan. Jãhãe unkin hạnkinko menkhan, enḍekhan unkinakʼ moca khon seṅgel oḍokokʼte bạirikin atar giḍikoa. Okoe unkin hạnkine men uni do onkage gujukʼ hoyokʼtaea. Nukin hoṛ tinạkʼ din kin nạbiya unạkʼ din jemon aloe dag onate serma siń lạgitʼ ektiạri tahen tạkina. Ar dakʼ mãyãm ocoe ar tinạkʼ dhao sanakin unạkʼ dhao jãhãn dukte dhạrti hạn reakʼ ektiạri hõ tahen tạkina. Unkinakʼ goha emokʼ sạtlen khan ona athan kunḍ khon mitʼṭen janwar do rakapʼ hecʼkate unkin tulucʼe lạṛhạiya ar unkine bhagaokinteye gocʼkinạ. Unkinren Probhu oka nagrahareye krus ocolen ona maraṅ nagraha reakʼ horre unkinakʼ mạ̃ṛĩ do giḍi akan tahena. Ona nagraha reakʼ asol ńutum do Sodom ar Misor baṅkanre hõ, enhõ mitʼ lekangete ona nagraha do Sodom ar Misorko metakʼa. Unre sanam disạmren, jạt jạtren, khuṭren ar pạrsiren hoṛko do pe din tala hạbicʼ unkinakʼ mạ̃ṛĩko beṅgetʼakʼa. Onko do unkinakʼ mạ̃ṛĩ bako topa ocowakʼa. Ar unkin kin gocʼ akante noa dhạrtirenko doko kusikʼa arko rạskạkʼa. Hoṛko do sandesko kopola, ente okoe doko noa dhạrtiren kan onko do nukin barea nạbi iạte ạḍi ãṭ kosṭoko ńamleda. Menkhan noa pe din tala tayom Isor emakʼ jion reakʼ sahetʼ do unkinre boloyena. Onate unkin do ạkinakʼ jaṅgatekin teṅgoyena. Unre okoe unkinko ńelketʼkin onko do ạḍiko botorena. Tayomte unkin gohakin do serma khon ãṭ aṛaṅte noa kathakin ańjomkeda, “Nonḍe rakapʼ hijukʼ ben.” Unre unkin do ạkinren bạirikoakʼ mẽtʼãhã samaṅrege mitʼṭen rimilte sermatekin rakapʼ calaoena. Unre ạḍi botor dhạrti laṛaoena ar ona nagraha reakʼ gel hạṭiń reakʼ mitʼ hạṭiń do rạputʼ ńurena. Ar ona dhạrti laṛaore eae hajar hoṛko gocʼena. Onate sarecʼko sanamge botor caṛhaoatʼkote sermaren Isorko sarhaokedea. Nonkate dosarakʼ muhin do cabayena. Ar ńelpe, tesarakʼ muhin do usạrage darae kana. Tayomte eaeyicʼ serma goḍet do acʼakʼ siṅgại oroṅkeda. Unre sermare ãṭ aṛaṅte roṛena, “Dhạrti reakʼ rajosṭi do ńitokʼ aboren Probhu ar uniren Mạsiakʼ hoyena. Uni do jaejug hạbicʼe rajokʼa.” Ar okoe bargel pon mukhiyạko Isor samaṅre akoakʼ siṅghạsonreko duṛupʼ akan tahẽkan, onko do ombakʼente Isor sewawadeteko menkeda, “Sanam daṛeanicʼ Probhu Isor, am do menama arem tahẽkana. Ale do amle sarhaoetʼme kana, ente am do amakʼ maraṅ ektiạrianakʼ tite rajokʼem ehopʼkeda. Joto jạtkoko raṅgao akana, ar amakʼ edre sodorokʼ reakʼ ghuṛi hõ seṭer akana, ar amren golamko, metakʼme nạbiko ar amren hoṛko ar kạṭicʼ lạṭu jotokoge okoe amko bhoktiamkan onko kuṛại emako reakʼ okte hõ seṭer akana. Ona chaḍa okoe dhạrtiko hạn akatʼ, onko ḍahao maraoko reakʼ okte hõ seṭer akana.” Ona tayom serma reakʼ mundil do jhicʼena ar onḍe Isorakʼ bondobos reakʼ sunduk ńel ńamena. Unre bijli malkaokʼ ar botor saḍe ar huḍur ar dhạrti laṛao ar ạḍi bạṛicʼ arel ńurokʼ ehopʼena. Tayomte sermare mitʼṭen maraṅ cinhạ ńelena; mitʼṭen maejiu, one okoe do siń candoteye oyo akan ar uniakʼ jaṅga latare do ńindạ candoe tahẽkan. Uniakʼ bohokʼre do gelbar goṭecʼ ipilte gathao akatʼ mitʼṭen mukuṭ tahẽkana. Uni do bhạrti hoṛmoe tahẽkana ar hasoteye kikiạukʼkan tahẽkana. Ona tayom sermare armitʼṭen cinhạ ńelena; seṅgel leka maraṅ okocʼ mitʼṭen arakʼ bińge. Uniakʼ do eae goṭecʼ bohokʼ ar gel goṭecʼ dereń ar bohokʼre eae goṭecʼ mukuṭ tahẽkana. Uni do acʼakʼ canḍbolte sermaren pe hạṭiń reakʼ mitʼ hạṭiń ipilkoe or ạguketʼkote dhạrtiteye lebda giḍikatʼkoa. Ar okoe maejiuren gidrại hoy lạgidokʼkan tahẽkan uni samaṅre biń doe teṅgoyena jemom gidrại janam lekhangeye utʼgotʼkae. Ar maejiuren do mitʼṭen koṛa gidrại hoyena. Uni gidrạge mẽṛhẽtʼ reakʼ ṭheṅgate sanam jạtrenkoe ḍanṭaokoa. Uni Hopon do Isor ar uniakʼ siṅghạson ṭhene rakapʼ idi ocoyena, uni maejiu do hahaṅkarteye dạṛkeda. Isor do ona hahaṅkar jaegare uni lạgitʼ mitʼṭen jaegae ṭhik dohoakatʼ tahẽkana, jemon mitʼ hajar barsae turui gel din onḍeye ạsul ocokʼ. Ona tayom sermare lạṛhại hoyena. Mikạel ar uniren goḍetko do uni biń tulucʼko lạṛhạiyena ar uni bińren goḍetko hõ. Biń do bae daṛelena ar sermare onko do ar bako tahẽ ocowatʼkoa. Unre uni maraṅ okocʼ biń ar uniren soṅgeten goḍetko do dhạrtiteko lebda ńur ocoyena. Nui biń doe hoyokʼ kana uni mare bińge okoe do Diabol Soetanko metaekan. Uni do dhạrtiren sanam hoṛko bhul horteye idiyetʼkoa. Ona tayom iń do serma khon ãṭ aṛaṅte mitʼ hoṛ roroṛkaniń ańjomkedea, “Ńitokʼ do babańcao, daṛe ar aboren Isorakʼ rajosṭi ar uniren ojokʼicʼakʼ ektiạri hoeakana, ente okoe aboren boehakoe dusiyetʼko tahẽkan uni do serma khone lebda ńur ocoakana. Aboren Isor samaṅre siń ńindạ uni do onkoakʼ doskoe udukʼetʼ tahẽkana. Bheḍa Hoponakʼ mãyãm ar apnarakʼ gohate onko do uniko bhagao akadea. Onko do apnar dulạṛ baṅkate akoakʼ jiwi emokʼge rạjiko tahẽkana. “Onate E serma, hulạsokʼme; ar ape okoe do onḍepe tahenkan, hulạsokʼpe. Menkhan dhạrti ar jalapuri abenre do hae hae, ente Soetan do aben cetanreye pheḍ hecʼakana. Soetan do raṅgaoteye phulạu akana, enteye baḍaea uniakʼ do ḍher somoe bạnukʼtaea.” Ado uni biń tinreye ńelkeda je, acʼ do dhạrtiteye lebda ńur ocoakana unre okoe maejiuren koṛa gidrại hoelentae uni tayomreye lagaoena. Unre uni maejiu do maraṅ okocʼ mitʼṭen pajhaṛakʼ barea phạ̃krạ̃kʼe emocoyena jemon hahaṅkarte acʼakʼ jaegateye uḍạu calao daṛeakʼ. Ar onḍe uni do bińakʼ mẽtʼãhã samaṅ khon danaṅre pe bochor tala hạbicʼe ạsul ocokʼa. Unre uni biń do maejiue ạtu gotʼkae lạgitʼ acʼakʼ moca khon gaḍa dakʼ leka dakʼe ạtu oḍok ocokeda, menkhan dhạrti do uni maejiue goṛowadea. Ar uni biń do moca khon oka dakʼe oḍok ocoketʼ ona do dhạrti acʼakʼ mocae jhicʼketʼteye ańjetʼgotʼkada. Unre biń do uni maejiu cetanre ạḍi bạṛicʼe raṅgaoena. Ar uni maejiuakʼ bõsren sarecʼ hoṛko, metakʼme okoe do Isorakʼ hukumko manaoetʼkan ar Jisuakʼ sikhnạtko sapʼ dohoyetʼ onko birudre lạṛhại lạgitʼe oḍok calaoena ar jalapuri aṛereye teṅgo tahẽyena. Noa tayom iń do mitʼṭen janwar jalapuri khon rakapʼ hijukʼ kaniń ńelkedea. Uniakʼ do gel goṭecʼ dereń ar eae goṭecʼ bohokʼ tahẽkantaea. Ona dereńko cetanre gel goṭecʼ mukuṭ tahẽkana ar bohokʼko cetanre Isor bemanote reakʼ aema ńutum ol tahẽkana. Uni janwar do ńelokʼte citạ tạrupʼ lekae tahẽkana ar jaṅgako do banawakʼ leka ar moca do dhạcri kulakʼ moca leka tahẽkantaea. Ar biń do acʼakʼ daṛe, siṅghạson ar maraṅ ektiạri uni janware emadea. Uniakʼ bohokʼko modre mitʼ goṭen do gujukʼ dạkhil ghạl akantae tahẽkana, menkhan ona ghạl do bogeyentaea. Onate dhạrtiren sanam hoṛko hahaṛakʼ tulucʼ uni janwarko pańja idikedea. Biń do uni janwar ektiạriye emade tahẽkante hoṛko do uni biń Isor lekako sewawadea ar janwar hõ onkage sewawadeteko menkeda, “Nũi janwar leka cele menakʼkoa? Ar okoe baṅ uni sãoteye lạṛhại daṛeke?” Uni janwar do sarhaokʼ lạgitʼ ar Isor bemanote lạgitʼ daṛeye emocoyena. Ar pongel bar cando hạbicʼ acʼakʼ ektiạri jemone khaṭao daṛeakʼ ona lạgitʼ hukume em ocoyena. Unre uni janwar do Isor birudre, uniakʼ ńutum reakʼ ar uniakʼ tahen jaega birudre ar sermare tahenkanko birudre ạḍi bemanot kathako roroṛe ehopʼena. Isorren hoṛko lạṛhạikate bhagaoko reakʼ ektiạriye emocoyena ar mitʼke mitʼ bõsren, disạmren, pạrsiren ar jạtren hoṛko cetanre hõ ektiạriye emocoyena. Okoe doko noa dhạrtirenkan, metakʼme dhạrti rehetʼ khon gocʼ ocolen Bheḍa Hoponakʼ jion puthire okoekoakʼ ńutum ol bạnukʼtako onko sanamko do Isor leka uniko sewawaea. Ańjom lạgitʼ lutur menakʼtayicʼ do sostor reakʼ noako kathae ańjomma. Okoe kạidi hoyokʼ reakʼ katha menakʼtae uni do kạidiye hoyokʼa. Okoe tarwaṛeteye gogocʼ uni do tarwaṛetegeye khũn ocokʼa. Onate Isorren hoṛko do sombhuri ar pạtiạu reakʼ jạruṛ menakʼtakoa. Noa tayom iń do ot khon ar mitʼṭen janwar rakapʼ hijukʼkaniń ńelkedea. Uniakʼ do bheḍa leka barea dereń tahẽkantaea, menkhan uni do biń leka kathae roṛetʼkan tahẽkana. Nui janwar do pạhilicʼ janwar reakʼ joto ektiạri calaoe ehopʼena; ar okoe doko noa dhạrtiren kan onko hotete uni pạhilicʼ janwar, metakʼme okoeakʼ ghạl boge akantae uni do Isor menteko sewawadea. Uni do maraṅ maraṅ hahaṛa kạmikoe ehopʼkeda, ar hoṛko samaṅre serma khon dhạrtite seṅgele pheḍ ạgukeda. Ar okako hahaṛa kạmi lạgitʼ ektiạriye emocolen onako kạmikate hoṛko bhul horte idikoe ehopʼkeda. Ar Pạhilicʼ janwar okoe do tarwaṛeteye ghạl ocolenre hõ jiwetʼe tahẽkan, uni dosaricʼ janwar do hoṛkoe metatʼkoa jemon onko do uniakʼ muṭhạnko benaotae. Ar uni do ona muṭhạnre jiwi emokʼ reakʼ daṛe hõe emocoyena, jemon muṭhạn do kathae roṛ daṛeakʼ ar okoe ona muṭhạn bako sewawakʼ onko doko gocʼ ocokʼa. Uni do kạṭicʼ lạṭu, reṅgecʼ kisạ̃ṛ, sạdhinko ar golamko, sanamko jojom tire baṅkhan moloṅre mitʼṭen cinhại hatao ocoketʼkoa. Onate ona cinhạ metakʼme uniakʼ ńutum se cinhạ chaḍa okoe hõ cetʼge bako kiriń ạkriń daṛeada. Ona cinhạ do hoyokʼ kana uni janwarakʼ ńutum se uniakʼ ńutum reakʼ lekha. Noako bujhạu do bud reakʼ jạruṛ menakʼa. Okoeakʼ bud menakʼ uni do janwarakʼ lekhae hisạbma, ente ona do mitʼṭen manwawakʼ ńutum reakʼ lekha kana. Ar ona lekha do hoyokʼ kana turui sae turui gel turui. Ona tayom iń ńelkeda, Bheḍa Hopon do Sion buru coṭreye teṅgo akana. Uni soṅgere mitʼ sae pongel pon hajar hoṛ menakʼkoa. Onkoakʼ cạndire do Bheḍa Hoponakʼ ar uniren Babawakʼ ńutum ol menakʼa. Ona tayom serma khon had had ạtu calakʼkan ar huḍur reakʼ sạḍeń ańjomkeda. Ar okaṭakʼ saḍeń ańjomketʼ ona do peṛesaṅ banamko phetʼetʼkan lekań ańjomkeda. Ona siṅghạson ar onko ponea jiwiyanko ar onko mukhiyạko samaṅre onko do mitʼṭen nawa sereńko sereńkeda. Menkhan okoe hõ ona sereń do bako cetʼdaṛeada; eken onko mitʼ sae pongel pon hajar hoṛko cetʼdaṛeada okoe do dhạrtiren hoṛko khonko kiriń ocolen. Noko do onko hoṛ kanako, one okoe do maejiuko tulucʼ bako laṭghaṭ akatʼte saphage menakʼko. Ar jãhã secʼge Bheḍa Hopone calakʼ onko hõ uni tayomteko calakʼa. Isor ar Bheḍa Hopon ṭhen pạhil jo lekate dãṛẽ lạgitʼ hoṛko mod khon onko doko kiriń akan tahẽkana. Onko do tis hõ eṛe katha do bako roṛ akada, ar onko modre jãhãn dosge baṅ ńam akana. Ona tayom iń do arhõ mitʼṭen serma goḍet coṭ sermare uḍạukʼkaniń ńelkedea. Dhạrtiren tahenkan hoṛko ṭhen metakʼme mimitʼ jạtren, bõsren, pạrsiren, ar disạmren hoṛko ṭhen porcar lạgitʼ uni ṭhen jaejug hạbicʼ reakʼ bhage sombat tahẽkana. Uni do ãṭ aṛaṅte noa kathae menetʼ tahẽkana, “Isor botoraepe ar uni sarhaoepe, ente bicạr reakʼ okte do seṭer akana. Okoe dhạrti, serma, jalapuri, doreão ar jharna dakʼkoe sirjạu akatʼ uni sewawaepe.” Tayomte dosaricʼ ar mitʼṭen serma goḍet do uni tayom tayomte hecʼkateye menkeda, “Ona Babel nagraha do ḍahao maraoena. Okaṭakʼ nagraha do acʼakʼ loṭghuṭi reakʼ botoranakʼ bubulakʼ sanam jạtkoe ńu ocoletʼko ona naṅgrha do ḍahao marao akana.” Inạ tayom tesaricʼ ar mitʼṭen serma goḍet do onko tayom tayomte hecʼkate ãṭ aṛaṅteye menkeda, “Jãhãege uni janwar ar uniakʼ muṭhạne sewawakʼ ar uniakʼ cinhạ cạndire se tireye hatao, enḍekhan uni do Isorakʼ edre reakʼ bubulakʼ ńũńũi hoyokʼtaea. Ar noa bubulakʼ sãote dakʼ baṅ mesal akatʼ Isorakʼ edre reakʼ bạṭire dul akana. Sonot sermaren goḍetko ar Bheḍa Hopon samaṅre seṅgel ar gondhokte uni hoṛ doe saset ocokʼa. Okaṭakʼ seṅgel noko hoṛkoe sasetko ona seṅgel reakʼ dhũạ do jaejug hạbicʼ rakabokʼtege tahena. Okoe hoṛ uni janwar ar uniakʼ muṭhạne sewawakʼ ar uniakʼ ńutum reakʼ cinhại dohojoṅ uni do sińke ńindạ tishõ jirạu bae ńama.” Okoe Isorakʼ hukumko manaoetʼ ar Jisure pạtiạrko tahenkan Isorren onko hoṛge noa halotre sombhuri tahen jạruṛtakoa. Ona tayom iń do serma khon mitʼ hoṛ roroṛkaniń ańjomkedea, “Noa katha olme; ńit khon okoe do Probhu tulucʼ kolom mitʼkateko gujukʼkan onko do bhạganko kanako.” Sonot Jiu do noa kathae meneda, “Hẽ, onko doko bhạgangea. Onkoakʼ mehnot khon onko do jirạuko ńama, ente onkoakʼ kạmi reakʼ kuṛại do ako soṅgere tahena.” Tayomte iń do mitʼṭen ponḍ rimiliń ńelkeda, ar ona rimilre manwa Hopon leka mitʼ hoṛe duṛupʼ akan tahẽkana. Uniakʼ bohokʼre do jitạukʼ reakʼ sona mukuṭ ar tire do laser datrom tahẽkana. Ona tayom mitʼṭen serma goḍet mundil oṛakʼ khone oḍok hecʼena ar okoe ona rimilreye duṛupʼ akan tahẽkan uni ãṭ aṛaṅteye metadea, “Amakʼ datrom calaotam, phosol gedme, ente phosol samṭao reakʼ okte do hoeakana; ar dhạrti reakʼ phosol do purạte bele akana.” Unre okoe ona rimilreye duṛupʼ akan tahẽkan uni do dhạrtire acʼakʼ datrome calaokeda ar dhạrti reakʼ phosol do getʼ hoyena. Tayomte serma reakʼ mundil khon ar mitʼṭen serma goḍete oḍok hecʼena. Ar uniakʼ tire hõ mitʼṭen laser datrom tahẽkana. Ona tayom pinḍ khon ar mitʼṭen serma goḍete oḍok hecʼena. Uni do seṅgel cetanre ektiạri tahẽkantaea. Ar okoe serma goḍet ṭhen laser datrom tahẽkan uni serma goḍet do ãṭ aṛaṅte hohoadeteye metadea, “Amakʼ laser datrom calaotam ar dhạrti reakʼ darkha nạ̃ṛĩ khon darkha thoka gedme, ente darkha jo do bele akana.” Unre uni serma goḍet do dhạrtire acʼakʼ datrome calaokeda ar dhạti reakʼ darkha nạ̃ṛĩ khon joto darkha jo getʼkateye jarwakeda. Ar tayomte onako do darkha lelen kunḍreye bhoraokeda. Noa darkha jo roḍocʼ reakʼ kunḍ do Isorakʼ botoranakʼ edre kana. Ado nagraha bahrere darkha lelen kunḍre darkha jo len hoyen khan ona khon mãyãm oḍokena ar sadomkoakʼ jhin hạbicʼ rakapʼena. Onate pe sae mail hạbicʼ mãyãm do ạtu oḍokena. Tayomte iń do sermare ar mitʼṭen maraṅ ar hahaṛa cinhạń ńelkeda. Ona do eae goṭen serma goḍet ar onkoakʼ tire mucạtʼ eae goṭecʼ sạjại kana. Noako do mucạtʼ sạjại ńumogokʼ kana, ente noakote Isorakʼ edre do cabakʼa. Ona tayom iń do seṅgel mesal akatʼ mitʼṭen kãc reakʼ jalapuri lekań ńelkeda. Okoe uni janwar ar uniakʼ muṭhạn ar uniakʼ ńutum reakʼ lekha cetanreko jitạu akan onko hõń ńelketʼkoa. Isorakʼ peṛesaṅ tire sepeńkate onko do ona kãc reakʼ jalapuri aṛereko teṅgo akan tahẽkana. Onko do Isorren golam Mose ar uni Bheḍa Hoponakʼ noa sereńko sereńetʼ tahẽkana: “Sanam daṛean Probhu Isor, tinạkʼ maraṅ ar hahaṛagea amakʼ kạmiko do! E sanam jạtren raj, tinạkʼ dhorom ar sạriakʼgea amakʼ horko do! E Probhu okoe baṅ am do bae botoram? Ar okoe baṅ amakʼ ńutum bae sarhaotam? Eken amge coṅ sonoticʼ ma. Sanam jạtrenko do am ṭhenko hijukʼa, ar jotoge amko sewawama; ente amakʼ dhorom bicạr do sodor akana.” Noa tayom iń doń ńelkeda, serma reakʼ ona mundil, metakʼme goha tạmbu do jhicʼena. Unre onko eae goṭen serma goḍet do eae goṭecʼ sạjạiante mundil khonko oḍok hecʼena. Onko do sapha jhak jhak kicricʼko horokʼ akatʼ tahẽkana ar koṛam do sona reakʼ pạṭkạteko tol ạcurakan tahẽkana. Onko ponea jiwiyankoren mitʼṭen do onko eae goṭen serma goḍetko eae goṭecʼ bạṭiye ematʼkoa. Ar Isor, okoe do jug jug khon jaejug hạbicʼ jiwetʼ menae, uniakʼ edrete onako bạṭi do perecʼ akan tahẽkana. Isorakʼ mạhima ar daṛe khon okaṭakʼ dhũạ oḍokokʼkan tahẽkan ona dhũạte mundil oṛakʼ do perecʼena. Onko eae goṭen serma goḍetkoakʼ eae goṭecʼ sạjại ạuri cabakʼ hạbicʼ okoe hõ ona mundilre do bako bolo daṛeada. Inạ tayom iń doń ańjomkeda, ona mundil khon onko eae goṭen serma goḍetko do mitʼ hoṛ ãṭ aṛaṅteye metako kana, “Ape do senkate Isorakʼ edrete perecʼ eae goṭecʼ bạṭi dhạrtire dulpe.” Unre pạhilicʼ serma goḍet do senkate acʼakʼ bạṭi dhạrtireye dulkeda. Onate okoere uni janwarakʼ cinhạ tahẽkan ar okoe do uniakʼ muṭhạnko sewawakʼkan tahẽkan onkoakʼ hoṛmore ạḍi bạṛicʼ ar dạrun ghao ńamketʼkoa. Dosaricʼ serma goḍet do acʼakʼ bạṭi jalapurireye dulkeda. Unre jalapuri reakʼ dakʼ do gocʼ hoṛkoakʼ mãyãm leka hoyena ar jalapuriren sanam jiwiyanko doko gocʼena. Tayomte tesaricʼ serma goḍet do gaḍa dakʼ ar jharna dakʼ kore acʼakʼ bạṭiye dulkeda. Onate onako do mãyãm reakʼ gaḍa ar dakʼ jharnako hoyena. Ar dakʼ cetanre okoeṭakʼ serma goḍetakʼ ektiạri tahẽkantae uni do noa katha roroṛiń ańjomkedea: “E sonoticʼ, am do menamgea arem tahẽkana. Am dom dhoromgea, ente am do noako sạjạiyem emakana. Noko hoṛko do Isorren hoṛko ar nạbikoko khũnakatʼkoa. Onate am do onko noa mãyãm ńũi lạgitʼem emakatʼkoa ar noage onko lạgitʼ do lek kana.” Iń do pinḍ khon mitʼ hoṛ noa katha roroṛiń ańjomkedea: “Sanam daṛeạnicʼ Probhu Isor, amakʼ sanam bicạrko do sạrigea ar dhoromte perecʼgea.” Ponicʼ serma goḍet do siń cando cetanre acʼakʼ bạṭiye dulkeda. Onate siń cando do hoṛko seṅgelte jhạusạuko lạgitʼ ektiạriye emocoyena. Unre ãṭ elaṅte hoṛko loyena, ar noako sạjại cetanre okoeakʼ ektiạri menakʼtako onko do uni Isorko henostawadea. Menkhan onko do enrehõ mon bako ạcurleda ar Isor bako sabasiwadea. Tayomte mõṛẽyicʼ serma goḍet do uni janwarakʼ siṅghạson cetanre acʼakʼ bạṭi reakʼe dulkeda. Onate uni janwarakʼ rajosṭi do ńutena. Ar hasote hoṛko do akoakʼ alaṅko togocʼkeda ar haso ar ghao iạte onko do sermaren Isorko henostawadea, menkhan enrehõ akoakʼ bạṛicʼ kạmiko khon mon do bako ạcurletʼtakoa. Ona tayom turuyicʼ serma goḍet do maraṅ gaḍa Phurạtre acʼakʼ bạṭi reakʼe dulkeda. Onate purub disạmren rapajkoakʼ calakʼ hor tearokʼ lạgitʼ ona gaḍa reakʼ dakʼ do ańjetʼena. Unre iń do roṭe lekan pea bạṛicʼ jiu iń ńelketʼkoa. Onko do uni biń, uni janwar ar uni eṛe nạbiakʼ moca khonko oḍok hijukʼkan tahẽkana. Onko bạṛicʼ jiu do hahaṛa kạmiko kạmikan tahẽkana. Ar sanam daṛean Isorakʼ ona maraṅ dinre lạṛhại lạgitʼ onko do goṭa dhạrtiren rapajko mitʼ ṭhenko jarwaketʼkoa. Jisui meneda, “Ńelme, iń do kombṛo lekań hijukʼa. Bhạgangeae uni hoṛ, one okoe do jagware tahenkan ar acʼakʼ kicricʼkoe jogao dohoyetʼ, jemon laṅgaṭ alaoe dãṛãn ar hoṛko hõ uniakʼ lajaotetʼ aloko ńeltae.” Ibri pạrsite oka jaega reakʼ ńutum do Harmagedonko metakʼkan, bạṛicʼ jiuko do onko rapajko onḍeko jarwaketʼkoa. Ar eaeyicʼ goḍet do acʼakʼ bạṭi reakʼ hoe secʼe dulkeda. Unre mundil reakʼ siṅghạson khon ãṭ aṛaṅte noa katha roṛena, “Oka hoyokʼ reakʼ ona do hoyena.” Unre bijli malkaokʼ lagaoena, ạḍi botor saḍe ar huḍurko hoyena, ar ạḍi ãṭ dhạrti laṛaoena, one dhạrtire manwa sirjạu tayom ar tisge baṅ hoeakan. Ar ona dhạrti laṛao do ạḍi botorge tahẽkana. Ar ona maraṅ nagraha do pe hạṭińte hạṭińena ar jạt jạtrenkoakʼ nagrahako do lạnduṛena. Tayomte ona maraṅ nagraha Babel reakʼ katha Isor do disạ hecʼadea, uni do acʼakʼ edre reakʼ botoranakʼ bubulakʼte perecʼ bạṭi reakʼ ńũi lạgitʼ Babele emadea. Unre mitʼke mitʼ dip do ńir pharakena ar buruko do ar baṅ ńel ńamlena. Serma khon lạṭu lạtu dhiri lekan arel manwako cetanre ńurokʼ ehopʼena. Ona mitʼke mitʼ reakʼ hamal do mitʼ mongan tahẽkana. Noa arel reakʼ sạjạite hoṛko do Isorko henostawadea, ente ona arel reakʼ sạjại do ạḍi botorge tahẽkana. Okoe eae goṭen serma goḍetkoakʼ tire eae goṭecʼ bạṭi tahẽkan onko modren mitʼ hoṛ do hecʼkateye metadińạ, “Dela hijukʼme, aema dakʼ cetanre okoe kusmbiye duṛupʼakan uniakʼ sạjạiyiń udukʼama. Dhạrtiren rapajko do uni tulucʼko loṭghuṭileda, ar okoe doko noa dhạrtirenkan onko do uniakʼ loṭghuṭi reakʼ darkha rasateko ńũ bulakan tahẽkana.” Ona tayom uni serma goḍet do hahaṅkar jaegateye idikedeńạ. Unre iń do sonot Jiuakʼ ạyurreń tahẽkana. Onḍe mitʼṭen maejiu do mitʼṭen jeṅgetʼ arakʼ janwarre duṛupʼ akaniń ńelkedea. Ar Isor nindạwae reakʼ ạḍi utạr ńutum uni janwarre ol tahẽkana. Uniakʼ do eae goṭecʼ bohokʼ ar gel goṭecʼ dereń tahẽkantaea. Uni maejiu do beguni roṅakʼ kicricʼe horokʼ akatʼ tahẽkana ar hoṛmore do sona ar damanakʼ dhiri ar muti mạnikte abhran tahẽkantaea. Uniakʼ tire do hirkhạwakʼte perecʼ ar acʼakʼ loṭghuṭi ar besaphate perecʼ sona reakʼ bạṭi tahẽkana. Uniakʼ moloṅre nonkan ńutum ol tahẽkana one ona reaṅ mitʼṭen okoakʼ menakʼ. Ona ńutum do kana, “Maraṅ Babel, kusmbiko ar dhạrti reakʼ joto hirkhạwakʼkoren eṅgat.” Ariń ńelkedea, uni maejiu do Isorren hoṛkoakʼ mãyãm ar okoe do Jisu reaṅ gohako emakatʼ onkoakʼ mãyãm ńũteye bul akana. Uni ńelte iń do ạḍi ãṭiń hahaṛayena. Unre uni serma goḍet doe metadińạ, “Am do cedakʼem hahaṛakʼ kana? Maejiuakʼ ar okoe do uniye asen baṛayede kan uni janwarakʼ okoakʼ reakʼ bhediń bujhạuam kana. Nui doe uni janwar kana one okoeakʼ do eae goṭecʼ bohokʼ ar gel goṭecʼ dereń tahẽkantae. Ar okoe janwarem ńellede uni do lahateye tahẽkana, menkhan ńitokʼ do bạnuya. Tayomte ona athan kunḍ khon rakapʼ hecʼkate uni do jaejug hạbicʼ sạjạiye joma. Unre okoe doko noa dhạrtirenkan, metakʼme dhạrti sirjạu jokhecʼ khon okoekoakʼ ńutum do jion reakʼ puthire ol bạnukʼtako onko do uni janwar ńelteko hahaṛakʼa; ente janwar do pạhile tahẽkana, ńitokʼ do bạnuya, menkhan arhõe ńel ocokʼa. “Ńitokʼ oka lạiyạgokʼ ona bujhạu lạgitʼ do buj jạruṛa. Ona eae goṭen bohokʼ do hoyokʼ kana, eae goṭecʼ buru one onakore uni maejiu doe duṛupʼ akan. Ona eae goṭen bohokʼko do arhõ eae goṭen rapaj hõ kanako. Onko rapajko modre mõṛẽ goṭen do laharegeko ńur akana, ar mitʼ hoṛ do ńit hõ menaegea ar eṭakʼicʼ do ńit hõ bae hecʼakana. Ar uni raje hecʼlen khan uni do thoṛa din hạbicʼ tahentege hoyokʼtaea. Okoeṭakʼ janwar do pạhilreye tahẽkan, menkhan ńitokʼ bạnui uni do onko eae goṭen modrenkanre hõe uni doe irạlicʼ raj kana; ar jaejug hạbicʼ sạjạiye joma. “Oka gel goṭen bohokʼem ńelakat̕ onako do gel goṭen rapajko kanako. Onko do ńit hõ rajosṭi bako ńam akada, menkhan onko do uni janwar tulucʼ mitʼ ghuṛi lạgitʼ rapajko lekate ektiạriko ńama. Noko rajkoakʼ monsubạ do mitʼgea, ar onko do jotoge akoakʼ daṛe ar ektiạri uni janwarko emaea. Onko do Bheḍa Hopon birudreko lạṛhạiya ar Bheḍa Hopon do onkoe bhagaokoa, ente uni do Probhukoren Probhu ar raj koren raj kanae. Ar okoeko hoho ocoakan arko bachao ocoakan ar okoe doko pạtiạrkokan onkoge uni tulucʼko tahena.” Ona tayom uni serma goḍete metadińạ, “Am do oka dakʼem ńelketʼ, okare uni kusmbiye duṛupʼakan, ona do ạḍi utạr disạm kana, ạḍi utạr hoṛ kanako, ạḍi utạr jạt ar ạḍi utạr pạrsiko kana. Ar oka gel goṭen dereńem ńelketʼ onako ar uni janwar do uni kusmbiko hirkhạwaea. Onko do uniko maraoe giḍiyea arko uluṅea ar uniakʼ jelko joma; ona tayom uni do seṅgelreko rapakʼ giḍikaea. Noa reakʼ karon do kana, Isor do onkoakʼ monre nonkan monejoṅakʼe emakatʼkoa jemon uniakʼ katha purạukʼtae. Onate onko do mitʼ monte uni janwar ṭhen akoakʼ sanam daṛeko danaea, jemon Isorakʼ katha ạuri purạukʼ hạbicʼ uni doe raj daṛeakʼ. Ar okoeṭakʼ maejiuem ńellede uni doe hoyokʼ kana ona maraṅ nagraha, one okoe do dhạrtiren sanam rapajko cetanre rajosṭiye calaoetʼkan.” Inạ tayom ar mitʼṭen goḍet serma khon pheḍ hijukʼ kaniń ńelkedea. Uni do maraṅ ektiạri tahẽkantaea ar dhạrti do uniakʼ ṭhonokte marsalena. Uni do ãṭ aṛaṅte hohowateye menkeda, “Lạnduṛena, ona maraṅ nagraha Babel do lạnduṛena, ona do ńitokʼ bạṛicʼ jiukoakʼ tahen reakʼ jaega hoeakana ar mitʼke mitʼ bạṛicʼ jiuakʼ dander ar beshapha ar hirkhạwan cẽṛẽkoakʼ khańca hoeakana, ente uni do acʼakʼ loṭghuṭi reakʼ botoranakʼ bubulakʼ sanam jạtrenkoe ńũ ocoakatʼkoa. Dhạrtiren rapajko do uni tulucʼko loṭghuṭi akada, ar dhạrtiren bạnij bepariko hõ uniakʼ bin sambṛaokʼ reakʼ iricʼ cikijokʼ daṛeteko kisạ̃ṛ akana.” Ona tayom iń do serma khon ar mitʼ hoṛ roroṛ kaniń ańjomkedea, “E ińren hoṛko, ape do Babel khon oḍok hijukʼpe jemon uniakʼ kại reakʼ bhạgiạdarko alope hoyokʼ, ar okako sạjại unire ńurokʼ ona okaṭakʼge jemon alo paṛaoape. Uniakʼ kại do serma hạbicʼ usul akana ar uniakʼ bạṛicʼ kạmiko reakʼ katha do Isore disạ akatʼtaea. Ar eṭakʼko tulucʼ cetʼ lekae beoharakatʼ onkage acʼ sãote hõ beoharpe; uniakʼ kạmiko leka purạ puri kuṛại emaepe. Okaṭakʼ bạṭire uni do eṭakʼko lạgitʼ bạṛicʼakʼe mesaletʼ tahẽkan, onare uniakʼ purạ sạjại mesalkate jom ocoyepe. Uni do acʼakʼ reaṅ tinạkʼ bạ̃ṛtiye sabasilen, ar tinạkʼ bạ̃ṛtiye umtạ umtilen, ṭhik unạkʼge saset ar duk emaepe, ente monreye hudiseda, iń ma rạniń hoeakan, ar rạnḍi doń baṅkana; ar oka lekatege bạń dukokʼa. Onate unire joto sạjại mitʼ dintege paṛaokʼa; onako do hoyokʼ kana moron, duk ar mohamạri. Seṅgelte uni doe rapakʼ giḍi ocokʼa, ente okoe uniakʼe bicạrtae uni Probhu Isor doe daṛeanicʼ kana.” Ar dhạrtiren okoeko raj uni tulucʼko loṭghuṭi akatʼ arko umtạ umtilen onko do uni rapage jokhecʼ dhũạ ńelteko raga ar uni lạgitʼko dukokʼa. Onko do uniakʼ saset ńelte botorte sạṅgińre teṅgokateko mena, “Hae Babel, hae! Ona maraṅ nagraha, ar daṛeanakʼ nagraha do, ente mitʼ ghạṛite amakʼ sạjại do seṭerena!” Dhạrtiren bạnij bepariko hõ uni lạgitʼko raga arko dukokʼa, ente onkoakʼ jinisko do ar okoege bako hataoa. Onkoakʼ onako jinis modre sona, rupạ, damanakʼ dhiri ar muti mạnik, mĩhĩ musnạ kicricʼ, kurse baha roṅakʼ kicricʼ, lumạṅ kicricʼ ar jeṅgetʼ arakʼ kicʼricʼ; aema lekan mońj so kaṭko ar hạti ḍaṭate tearakʼ aema jinisko; damanakʼ kaṭ reakʼ tearakʼ jinisko, pitạl, mẽṛhẽtʼ ar mormor dhirite tear jinisko; darcini jut so mosola, dhup, mahkaokʼ sunum, kunduru, darkha rasa, jạitun reakʼ sunum, holoṅ ar guhum; ḍaṅgrako, bhiḍiko, sadomko ar gạḍiko ar golamkoge. Onko bạnij beparikoko mena, “Okaṭakʼ jo am do lab joṅem menletʼ tahẽkan ona do am ṭhen khon sạṅgiń akana; amakʼ joto dhon-durib ar sajaotetʼ do nosṭo akana. Ar hoṛko do tisge ona bako ńama.” Okoe noako jinis bạnij beparkateko kisạ̃ṛlen onko bepariko do uniakʼ saset ńelte botorte sạṅgińreko teṅgo tahena. Onko do bhabna ar rakʼ rakʼateko mena, “Hae, hae! Mĩhĩ musnạ kicricʼ ar beguni roṅakʼ ar jeṅgetʼ arakʼ kicricʼte bande akan ar sona, damanakʼ dhiri ar mạnikte abhran akan ona maraṅ nagraha do! Ente mitʼ ghạṛitege amakʼ joto dhon-durib do nosṭo cabayena!” Ar mitʼke mitʼ jahaj calaoko, ar jahajte dãṛãn hoṛko, ar lạuṛiạko, ar jalapurire okoe doko bạnij beparetʼkan onko sanamko do sạṅgińreko teṅgo tahẽyena. Ar uni rapage reakʼ dhũạ ńelte onko do ãṭ aṛaṅteko menkeda, “Okaṭakʼ nagraha do noa maraṅ nagraha lekana?” Onko do akoakʼ bohokʼre dhuṛiko er joṅa ar rakʼ rakʼteko mena, “Hae, hae, ona maraṅ nagraha do! Ar jalapurire okoekoakʼ jahaj menakʼtako onko do uniakʼ dhon-duribtegeko kisạ̃ṛlena; ar ńelpe mitʼ ghuṛitege ona do ḍahao maraoena!” Unre uni serma goḍet doe menkeda, “E serma, ona nagraha ḍahao maraoen iạte rạskạkʼme. E Isorren hoṛko, apostolko ar nạbiko hulạsokʼpe. Ape birudre uni okae cekaletʼ ona lạgitʼ Isor do uniye bicạr akadea.” Tayomte mitʼṭen daṛeanicʼ serma goḍet do maraṅ jante dhiri lekanakʼ mitʼṭen dhiri jalapurire lebda giḍikateye menkeda, “Nonkage ona maraṅ nagraha Babel do lebda giḍi ocokʼa. Ona do ar tishõ baṅ ńamokʼa. Okoe peṛesaṅko banam, arko sereń ar tiriạ ar siṅgạko oroṅ onkoakʼ saḍe do ar tishõ amre baṅ ańjomokʼa. Amre tishõ gạkhuṛ kạrigol do ar bako ńamokʼa. Ar amre jante reakʼ saḍe do ar tisge baṅ ańjomokʼa. Amre diuhe reakʼ marsal do tishõ baṅ jolokʼa. Jãwãe beṭa ar bạhu kuṛiyakʼ aṛaṅ amre ar tishõ baṅ ańjomokʼa. Amren bạnij bepariko do dhạrtire joto khon napṛakʼko tahẽkana, ar sanam jạtrenko do amakʼ jạduteko bulạulena. Nạbiko, Isorren hoṛko ar okoeko hoṛ do noa dhạrtireko gocʼ ocolen onkoakʼ mãyãm do noa Babelrege ńamakana.” Noa tayom iń do sermare ạḍi utạr hoṛkoakʼ sabad lekań ańjomkeda. Onko doko menetʼ tahẽkana, “Halleluyah! Bańcao, ṭhonok ar daṛe, jotoge aboren Isorakʼ kana, ente uniakʼ bicạr do sạri ar dhoromgea. Okoe acʼakʼ loṭghuṭite goṭa dhạrtiye bhõnḍ akatʼ tahẽkan uni maraṅ kusmbi do Isor sạjạiye emadea ar acʼren golamkoakʼ mãyãm reakʼ unireye halakeda.” Onko do dosar dhaoko menkeda, “Halleluyah! Ar uni khon dhũạ do jaejug hạbicʼ oḍokokʼtege tahena.” Isor, okoe do siṅghạsonreye duṛupʼ akan uni do onko pongel pon mukhiyạ ar onko ponea jiwiyanko ombakʼkate sewawadeteko menkeda, “Amen. Halleluyah!” Unre siṅghạson khon mitʼ hoṛe menkeda, “E Isorren golamko ar okoe do Isorpe sewawaekan, lạṭu ar kạṭicʼko ape jotoko aboren Isor sarhaoepe.” Ona tayom iń do ạḍi utạr hoṛkoakʼ sabad leka, ar had had ạtukʼ dakʼ reakʼ saḍe ar kajak huḍuretʼkan saḍe leka noa kathań ańjomkeda, “Halleluyah! Aboren sanam daṛeyicʼ Probhu Isor do rajokʼe ehopʼakada. Ar dela, kusite bon rạskạkʼma ar uni bon sarhaoea, ente Bheḍa Hoponakʼ baplakʼ reakʼ ghuṛi do seṭerena ar uniren bạhu doe sapṛao akana. Uni do jhalkaokʼkan, sapha ar mĩhĩ musnạ kicricʼ bandekʼ lạgitʼ emakawadea. Ona kicricʼ do Isorren hoṛkoakʼ dhorom kạmiko kana.” Ona tayom uni serma goḍet doe metadińạ, “Noa katha olme, Bheḍa Hoponakʼ bapla bhojre okoekoko neota ocoakan onko doko bhạgangea.” Uni do noa katha hõe menkeda, “Noako do Isorakʼ katha kana, ar ona do sạrigea.” Unre iń do uni serma goḍetakʼ jaṅga ṭhen ombakʼenteń sewawadea. Menkhan uni doe metadińạ, “Noa do cetʼem cekayeda? Iń do amren são kạmiyạicʼ kạnạń. Isorge sewawaeme. Amren biswạsi boehako, okoe do Jisuakʼ cecetʼakʼko sapʼ dohoakatʼ, iń do onko modren mitʼ hoṛ kạnạń. Jisuakʼ cecetʼakʼge tahẽkana nạbikoakʼ asol katha do.” Tayomte iń do serma jhicʼ akan, ar onḍe mitʼṭen ponḍ sadomiń ńelkedea. Ar okoe uni sadomreye decʼakan tahẽkan uniakʼ ńutum do pạtiạr ar sạriyicʼ. Uni do dhoromteye bicạreda are lạṛhại kana. Uniakʼ mẽtʼ do jolokʼkan seṅgel leka ar uniakʼ bohokʼre do ạḍi utạr mukuṭ tahẽkana. Uniakʼ hoṛmore nonkan mitʼṭen ńutum ol tahẽkana, one okaṭakʼ ńutum do acʼ chaḍa ar okoe hõ bako baḍae. Uni do mãyãmre topoakatʼ kicricʼe oyo akatʼ tahẽkana, ar uniakʼ ńutum do Isorakʼ katha kana. Sermaren palṭonko do ponḍ sapha musnạ kicricʼ horokʼkate ar ponḍ sadomre decʼkate uni tayom tayomteko calakʼkan tahẽkana. Sanam jạtko jemone ḍanṭao daṛeako ona lạgitʼ uniakʼ moca khon mitʼṭen laser tarwaṛe oḍokokʼkan tahẽkana. Uni do mẽṛhẽtʼ reakʼ ṭheṅgate sanam jạtkoe ḍanṭaokoa ar darkha jo do lelen kunḍre jaṅgateye lena. Noa darkha lelen kunḍ do hoyokʼ kana sanam daṛeyicʼ Isorakʼ botoranakʼ edre. Ar uniakʼ kicricʼre ar bulure noa ńutum ol menakʼa, “Rajkoren raj, ar Probhukoren Probhu.” Tayomte mitʼṭen serma goḍet siń cando talare teṅgo akaniń ńelkedea. Ar okoeko cẽṛẽ sermareko uḍạukʼkan tahẽkan onko sanamko ãṭ aṛaṅte hohoateye metatʼkoa, “Dela, Isorakʼ maraṅ bhoj jom lạgitʼ hecʼ jarwakʼpe! Jemon rapajko reakʼ, subedarkoakʼ, daṛean hoṛkoakʼ, sadomko ar sadomre decʼakan hoṛkoakʼ, sạdhinko ar golamko ar kạṭicʼ lạṭu sanam manwakoakʼ jelpe jom daṛeakʼ.’’ Ona tayomiń ńelkeda, okoe uni sadomreye decʼakan tahẽkan uni ar uniren palṭonko birudre lạṛhại lạgitʼ uni janwar ar dhạrtiren rapajko do akoren palṭonkowante mitʼ ṭhenko jarwayena. Ar uni janwar doe sapʼ ocoyena ar okoeṭakʼ bhonḍ nạbi uni ńutumte hahaṛa kạmikoe kạmiyetʼkan tahẽkan uni hõe sapʼ ocoyena. Ar okoe uni janwarakʼ cinhạko hatao akatʼ tahẽkan ar uniakʼ muṭhạnko sewawakʼkan tahẽkan, uni eṛe nạbi do hahaṛa kạmikote onkoe bulạu akatʼko tahẽkana. Unkin do jolokʼkan gondhokʼ seṅgel reakʼ doreãore jiwetʼtekin khadle ocoyena. Ar okoe uni ponḍ sadomreye decʼakan tahẽkan, ar uniakʼ moca khon okaṭakʼ tarwaṛe oḍokokʼkan tahẽkan onate unkinren eṭakʼ sanam soṅgetenkoko gocʼ ocoyena. Onate cẽṛẽko do onkoakʼ jel jomteko biyena. Inạ tayom mitʼṭen goḍet do serma khon pheḍ hijukʼ kaniń ńelkedea. Uniakʼ tire do ona athan kunḍ reakʼ choṛan ar mitʼṭen maraṅ okocʼ sikṛi tahẽkana. Uni do uni biń, metakʼme okoe do mare biń Diabol Soetanko metaekan uni sapʼkate mitʼ hajar bochor hạbicʼe tolkedea ar ona athan kunḍreye khadlekadea. Tayomte kulup oṭokate ona cetanreye chapada, jemon ona mitʼ hajar bochor ạuri mucạdokʼ hạbicʼ dhạrtire jạt jạtrenko eṭakʼ bhul horte bae idi daṛeako; ona tayom thoṛa din lạgitʼ uni doe aṛakʼ ocokʼa. Ona tayom adomakʼ siṅghạsonkoń ńelkeda, ar okoe onareko duṛupʼ akan tahẽkan onko do bicạr reakʼ ektiạriko em ocoakan tahẽkana. Isorakʼ katha ar Jisu reakʼ cecetʼakʼ lekate calakʼ iạte okoe do bohokʼko makʼ ńur ocoakan tahẽkan, onko hoṛakʼ jiwikoń ńelkeda. Onko do uni janwar ar uniakʼ muṭhạn hõ bako sewawakʼkan tahẽkana ar moloṅre se tire cinhạ hõ bako hataoleda. Onko doko jiwetʼente mitʼ hajar bochor hạbicʼ Mạsi tulucʼ rajosṭiko calaokeda. Noa do hoyokʼ kana pạhil dhao gocʼko khon jiwetʼ ruạṛokʼ ar niạ dhao okoeko jiwetʼ beretʼen onko doko bhạgangea arko sonotgea. Pạhil dhao okoeko jiwetʼ beretʼlen onko hoṛkore dosar gujukʼ reakʼ jãhãn daṛe do bạnukʼa, bickom onko do Isorren ar Mạsiren naekeko hoyokʼa ar hajar bochor hạbicʼ Mạsi tulucʼko rajokʼa. Menkhan ona hajar bochor ạuri purạukʼ hạbicʼ sarecʼ akan gocʼ hoṛko do bako jiwetʼlena. Ona hajar bochor purạulen khan Soetan do acʼakʼ hajot oṛakʼ khone raṛa ocokʼa. Unre uni do goṭa dhạrtire senkate jạt jạtrenko, metakʼme Gog ar Magoge bulạukinạ ar onko do lạṛhại lạgitʼe jarwakoa. Noko do lekhare jalapuri reakʼ gitil lekako hoyokʼa. Unreń ńelkeda, onko do samaṅ secʼ senkate Isorren hoṛkoakʼ tahen jaega ar uniakʼ ona dulạṛiạ nagrahako esetʼ ạcurkeda. Menkhan serma khon seṅgel pheḍ hecʼente onko doe rapakʼ maraoketʼkoa. Ar okoe onko eṭakʼ horteye bulạu idiletʼko tahẽkan uni Soetan do jolokʼkan gondhok reakʼ doreãoreye khadle ocoyena. Uni janwar ar eṛe nạbi do laharege onḍekin khadle ocoakan tahẽkana. Onko do onḍe jaejug hạbicʼko sasetokʼa. Ona tayom mitʼṭen maraṅ okocʼ ponḍ siṅghạson ar onare duṛupʼ akan mitʼ hoṛiń ńelkedea. Uni samaṅ khon dhạrti ar serma do ńir pharakena, ar onkinakʼ jaega do okarehõ baṅ ńamlena. Ona tayom iń do, kạṭicʼ lạṭu joto gocʼ hoṛko ona siṅghạson samaṅre teṅgo akaniń ńelketʼkoa. Inạ tayom do puthiko oṭakʼ ocoyena. Ona tayom ar mitʼṭen puthi oṭakʼ ocoyena. Ona do jion reakʼ puthi tahẽkana. Ar ona puthire noko gocʼ hoṛkoakʼ kạmi reaṅ cetʼleka ol akan tahẽkan ona lekage onkoakʼ bicạr do hoyena. Ar okoe gocʼ hoṛko do jalapurireko tahẽkan, onko do jalapuriye idiketʼkoa. Ona chaḍa moron ar patalpurire okoe gocʼakan hoṛko tahẽkan, onko dokin em ruạṛkatʼkoa. Ar mimitʼko do akoakʼ kạmi lekako bicạr ocoyena. Tayomte moron ar patal puri do seṅgel reakʼ doreão rekin khadle ocoyena. Noa seṅgel reakʼ doreãore ńurokʼge hoyokʼ kana dosar gujukʼ do. Ar okoeakʼ ńutum ona jion reakʼ puthire baṅ ńamlen, onko do seṅgel reakʼ doreãoreko khadle ocoyena. Ona tayom iń do mitʼṭen nawa serma ar mitʼṭen nawa dhạrtiń ńelkeda. Pạhilakʼ serma ar pạhilakʼ dhạrti do parom calaoena ar jalapuri hõ ar baṅ tahẽlena. Ar ona sonot nagraha, metakʼme nawa Jerusalem do serma khon ar Isor ṭhen khon pheḍ hijukʼ kaniń ńelkeda. Cetʼleka bạhu do acʼren jãwãe lạgitʼe sajaoakan, onkage noa nagraha hõ sajao ocoakan tahẽkana. Ona tayom mitʼ hoṛ do ona siṅghạson khon ãṭ aṛaṅate noa katha roroṛ kaniń ańjomkedea, “Nitokʼ do manwako talare Isorakʼ tahen jaega hoeakana. Uni do manwako sãoteye tahena ar onko do uniren hoṛko hoyokʼa. Uni do acʼge manwako sãoteye tahena ar onkoren Isore hoyokʼa. Uni do onkoakʼ mẽtʼ dakʼe jodtakoa. Moron do ar baṅ hoyokʼa; duk, haso ar rakʼ joṅ do ar baṅ tahena, ente pạhilakʼ joto do parom calao akana.” Okoe ona siṅghạsonreye duṛupʼ akan tahẽkan uni doe menkeda, “Ńelme, iń do jotowakʼge nawateń benao aroyeda.” Uni do arhõe menkeda, “Noa katha olme, ente noa kathako do pạtiạr ar sạrigea.” Uni do arhõe metadińạ, “Hoyena. Ińge Alpha ar Omega, etohopʼ ar mucạtʼ. Okoe tetaṅedekan uni do jiwetʼ dakʼ reakʼ jharna khon begor damteń ńu ocoyea. Ar okoeye jitạukʼa uni do noakoe ạidạri joṅa. Ińge uniren Isoriń hoyokʼa ar uni do ińren gidrại hoyokʼa. Menkhan botorokʼko, bepạtiạrko, hirkhạwakoko, gogocʼko, loṭghuṭiko, jạdu udukʼko, boṅga muṭhạn sewako ar joto lekan eṛekoakʼ mucạtʼ dosa do seṅgel ar gondhok reakʼ dõreaorege.” Ar noa kangea dosar gujukʼ do.” Ar okoe eae goṭecʼ serma goḍetkoakʼ tire mucạtʼ eae goṭecʼ dukte perecʼ bạṭi tahẽkan onko modren mitʼ hoṛ do iń ṭhen hecʼkateye menkeda, “Dela hijukʼme, bạhu kuṛiń udukʼama, metakʼme Bheḍa Hoponren bạhuń udukʼama.” Tayomte uni serma goḍet do mitʼṭen maraṅ ar usul buruteye idikedeńa. Unre iń do sonot Jiu reakʼ uskurreń tahẽkana. Ar Isorakʼ ṭhonokte jhalkaokʼkan ona sonot nagraha Jerusalem serma khon ar Isor ṭhen khon pheḍ hijukʼkane udukʼạdińa. Ona nagraha reakʼ marsal do ạḍi damanakʼ dhiri reakʼ marsal leka, ar surjokanto mạnik dhiri lekage. Ona nagraha reakʼ mitʼṭen maraṅ ar usul pạcri tahẽkana ar onare gelbar goṭecʼ duạr tahẽkana, ona duạrkore do gelbar goṭen serma goḍetko tahẽkana. Ar Israel jạtren gelbar bõsrenkoakʼ ńutum do ona duạrre ol tahẽkana. Duạrko modre pea do purub secʼre, pea do utạr secʼre, pea do dạkhin secʼre ar pea do pạchim secʼre tahẽkana. Ona nagraha reakʼ pạcrire gelbar goṭecʼ rehetʼ tahẽkana ar onako cetanre Bheḍa Hoponren gelbar goṭen apostolkoakʼ gelbar goṭecʼ ńutum tahẽkana. Ar okoe iń tulucʼ kathae roroṛkan tahẽkan uniakʼ tire do mitʼṭen sona reakʼ jokhawakʼ chuci tahẽkana, jemon uni do ona nagraha reakʼ duạrko ar ona reakʼ pạcriye jokha daṛeakʼ. Ar nagraha do ponon konḍge jeleń ar osarte somangea. Tayomte uni do ona jokhawakʼte nagrahae jokhaketʼ khan, ona do jeleńte, osarte ar usulte bar hajar ponsae kilomitar hoyena. Tayomte uni do pạcriye jokhaketʼa ar ona reakʼ usultetʼ do mitʼ sae pongel pon moka hoyena. Manwa cetʼlekako jokhae onkage uni serma goḍet hõe jokhakeda. Ona pạcri do surjokanto mạnik dhirite gathao akan tahẽkana ar nagraha do nirola kãc lekanakʼ khạṭi sonate benao tahẽkana. Ona nagraha reakʼ pạcri reakʼ rehetʼko do joto lekanakʼ damanakʼ dhirikote sajao tahẽkana. Pạhilakʼ rehetʼtetʼ do surjokanto, dosarakʼ do nilkanto, tesarakʼ do tamro, ponakʼ do morokot, mõṛẽakʼ do boidurjo, turuiyakʼ do lalkanto, eaeakʼ do sornokanto, irạlakʼ do gomedok, areakʼ do podmorag, gelakʼ dolosunio, gelmitʼakʼ do peroj, ar gelbarakʼ do koṭahelage. Ona gelbar duạrre gelbar muti tahẽkana. Mimitʼ duạr do mimitʼ goṭecʼ mutite tear akan tahẽkana. Ar nagraha reakʼ kulhi do sapha kãc leka khạṭi sonate tear tahẽkana. Ona nagrahare jãhãn mundilge bạń ńel ńamleda, ente sanam daṛeanicʼ Probhu Isor ar Bheḍa Hoponge ona nagraharen mundil do. Ona nagrahare marsalokʼ lạgitʼ siń cando se ńindạ cando reakʼ jạruṛ do bạnukʼa, ente Isorakʼ ṭhonokge onḍe doe marsala ar Bheḍa Hopon kangeae onḍenicʼ diuhe do; sanam jạtrenko ona marsalreko dãṛãna. Dhạrtiren rapajko do akoakʼ ṭhonokante ona nagrahateko hijukʼa. Din bhor nagraha reakʼ duạrko do tis hõ siń baṅ tahena ar onḍe do ńindạ hõ baṅ ńindạkʼa. Onḍe do sanam jạtkoakʼ man ar ṭhonok ạgukʼa. Besapha jãhãnakʼ se hirkhạwakʼ kạmiko se eṛe roroṛko nonkan okoe hoṛge onḍe do bako bolo daṛeakʼa; ar okoeakʼ ńutum Bheḍa Hoponakʼ jion reakʼ puthire ol menakʼ, eken onkoge onḍeko bolo daṛeakʼa. Ona tayom uni serma goḍet do jion dakʼ reakʼ gaḍae udukʼ ạdińạ. Ona do dhiri hisir leka rilạ mala tahẽkana ar Isor ar Bheḍa Hoponakʼ siṅghạson ṭhen khon ạtu oḍokkate nagraha reakʼ kulhi talate ạtukʼkan tahẽkana. Ona gaḍa reakʼ dene banar aṛere jion dare tahẽkana. Onare do gelbar lekan jo jokʼa. Ar jao candoge onare do jokʼa ar ona reakʼ sakamte sanam jạtren hoṛko bogekʼ kana. Sarap do ar baṅ tahena. Isor ar Bheḍa Hoponakʼ siṅghạson do ona nagrahare tahena ar uniren golamko do uniko sewawaea. Onko do uniakʼ mẽtʼãhãko ńeltaea ar uniakʼ ńutum do onkoakʼ moloṅre ol tahena. Ńindạ do ar baṅ tahena ar onko do diuhe reakʼ marsal se siń cando reakʼ marsal hõ baṅ jạruṛakoa, ente Probhu Isor do acʼge onkoren marsale hoyokʼa. Ar jaejug hạbicʼ onko do rajko calaoa. Tayomte uni serma goḍet doe metadińạ, “Noako katha do pạtiạr ar sạrigea. Probhu Isor, one okoe do nạbiko hoteteye roṛletʼ tahẽkan, uni do acʼren goḍete kolakadea, jemon thoṛa ghạṛicʼ khange okaṭakʼ hoy lạgidokʼkan, ona do acʼren golamkoe udukʼ daṛeako.” Jisui meneda, “Ńelpe, iń do ạḍi usạrageń hijukʼ kana. Noa puthi reakʼ sanam katha, metakʼme Isorakʼ kathako okoeye manao uni doe bhạgangea.” Iń Johan do noakoń ańjom akada ariń ńel akada. Ar jotowakʼ ańjom ar ńel tayom, okoeṭakʼ serma goḍet noakoe udukʼ ạdiń, uni sewawae lạgitʼ uniakʼ jaṅga ṭheniń ombakʼena. Menkhan uni doe metadińạ, “Men, alo; iń do am ar amren biswạsi boehako, metakʼme nạbiko ar okoe do noa puthi reakʼ sanamakʼ kathako manaoetʼkan onkoren são golam kạnạń. Isorge baṛe sewawae me.” Ona tayom uni doe metadińạ, “Noa puthi reakʼ sanamakʼ kathako, metakʼme Isorakʼ katha am do alom oko dohokakʼa, ente oktetetʼ do sor akana. Bedhoromicʼ do, bedhoromtegeye tahenma, ar okoe mạilạyicʼ uni do mạilạ iditegeye tahenma. Dhoromicʼ do dhorom iditegeye tahenma ar okoe doe sonotge uni do sonot iditegeye tahenma.” Jisui meneda, “Ńelme, hako pakogeń hijukʼkana ar mimitʼko akoakʼ kạmiko reakʼ kuṛại do iń soṅgerege menakʼa. Ińge Alpha ar Omega, pạhilicʼ ar sesicʼ, etohopʼ ar mucạtʼicʼ do. “Bhạgangeako onko do, one okoe do akoakʼ kicricʼko ạrupʼetʼkan jemon jion dare reakʼ jo jom reakʼ ạidạriko ńam ar duạr secʼte nagrahateko bolo daṛeakʼ. Setako lekan bạṛicʼ hoṛko, jạdu udukʼko, laṭghaṭko, khũniạhiko, murhutʼ sewako, eṛeakʼ dulạṛko ar eṛeakʼ kạmiko, onko sanamkoge bahrereko tahena. “Iń Jisuge ińren goḍet iń kolakadea, jemon uni do ape ṭhen manḍerko lạgitʼ noako reaṅ gohae em daṛeakʼ. Ińge Dạud reakʼ rehetʼ ar bõs, ar ḍag ḍagaokʼkan bhurkạ ipil do.” Sonot Jiu ar bạhu kuṛi dokin meneda, “Dela hijukʼme,” Ar okoe noa kathae ańjometʼ uni hõe menma, “Dela hijukʼme.” Okoe tetaṅede kan uni doe hijukʼma ar okoe dakʼ ńũi menetʼkan uni do begor damte jion dakʼe ńũ idi joṅma. Okoe hoṛ noa puthi reakʼ sanam katha, metakʼme Isorakʼ kathakoe ańjometʼkan, iń do uni ṭhen noa gohań emeda je, jãhãege noare jãhãnakʼe juṭicʼakʼ, enḍekhan Isor hõ noa puthire olakan sanam dukko uniakʼ jionreye juṭicʼaea. Ar noa puthi reakʼ sanam katha, metakʼme Isorakʼ katha khon jãhãege thoṛagane kaṭao enḍekhan Isor hõ noa puthire olakan jion dare ar ona sonot nagraha reakʼ ạidạri uniakʼ jion khone kaṭaoa. Okoe noako reaṅe gohayetʼkan uniye meneda, “Sạrige iń do hako pakogeń hijukʼkana.” Amen. Probhu Jisu, dela hijukʼme. Probhu Jisuakʼ bhor Isorren sanam hoṛko lạgitʼ tahenma. Amen.