Awa ndiwo makholo a dzindza ya Yezu Kirixtu, Mwana wa Dhavidhi, Mwana wa Abharaamu. Abharaamu abala Izaki, Izaki abala Djakobo, Djakobo abala Djudaa na abale ace. Djudaa na nkazi wace Tamari abala Peresi na Zara, Peresi abala Eziromu, Eziromu abala Arau. Arau abala Abhinadhabhi, Abhinadhabhi abala Naasomi, Naasomi abala Solomoni. Solomoni na nkazi wace Raabhi abala Bhowazi, Bhowazi na nkazi wace Ruti abala Obhedhi, Obhedhi abala Djesi, Djesi abala Mambo Dhavidhi. Dhavidhi abala Salomau na nkazi akhali wa Uriya, Salomau abala Robhuwau, Robhuwau abala Abhiya, Abhiya abala Aza. Aza abala Djosafati, Djosafati abala Djoramu, Djoramu abala Uziya. Uziya abala Djotamu, Djotamu abala Akasi, Akasi abala Ezekiya. Ezekiya abala Manase, Manase abala Amoni, Amoni abala Djosiya. Djosiya abala Djekoniya na abale ace, pa midzidzi ikhadatapatwa mbumba ya madjuda kwenda ku dziko ya Bhabhilonya. Pa kubuluka kwawo pa kutapatwa ku dziko ya Bhabhilonya, Djekoniya abala Salatiyeli, Salatiyeli abala Zorobhabheli. Zorobhabheli abala Abhiyudhi, Abhiyudhi abala Eliyakimu, Eliyakimu abala Azori. Azori abala Sadhoki, Sadhoki abala Akimu, Akimu abala Eliyudhi. Eliyudhi abala Eliazari, Eliazari abala Matani, Matani abala Djakobo. Djakobo abala Zuze, mamuna wace Mariya. Mariya abalambo Yezu, anacemerwa Kirixtu. Na tenepo, asagumanika makholo khumi na manai a dzindza ya madjuda, kutomera kuna Abharaamu mpaka kuna Dhavidhi. Kutomera kuna Dhavidhi mpaka kubuluka kwawo pa kutapatwa ku Bhabhilonya, asagumanika makholo khumi na manai. Pontho kubulukira ku Bhabhilonya mpaka kufikira pa kubaliwa kwa Kirixtu, asagumanika makholo khumi na manai. Kubalwa kudacitwa Yezu Kirixtu ndi tenepa: Mariya, mai wace Yezu, pa n'dzidzi ukhabvundzirana iwo na mamuna wace Zuze, amuona mbali na pathupi mbadzati kudziwana na iye. Mbwenye ipi pyacitika na mphambvu za Nzimu Wakucena. Zuze, mankhadzi wace Mariya, na thangwi ya kukhala munthu wakulungama, pontho toera akhonde kun'nyadzisa, anyerezera kun'khonda n'cibiso-biso. Mbwenye n'dzidzi unowu ukhanyerezera iye kun'khonda, Mulungu atuma anju wace, mbabwera mu ndoto mbampanga kuti: “Zuze, mwana wa Dhavidhi, leka kugopa kutambira Mariya kuti akhale nkazi wako, thangwi ipi pina iye pyacitika na mphambvu za Nzimu Wakucena. Iye anadza kabala mwana-mamuna, iwe unadza kan'thula dzina ya Yezu. Thangwi Iye anadza kapulumusa mbumba yace n'kudawa kwawo.” Pyonsene ipi pyacitika toera pisimbisiswe pire pikhadapangwa mporofeta kale ene na Mulungu kuti: “Lang'anani, mwali m'bodzi anadza kakhala na pathupi mbabala mwana-mamuna, dzina yace inadza kakhala Emanuweli.” Emanuweli ndi kubveka kuti: “Mulungu ali pakati pathu.” Zuze, mudadza iye kadzizimuka n'citulo, acita ninga mukhadampangira anju wa Mulungu, mbakwata nkazi wace. Mbwenye akhonda kudziwana na iye, mpaka kufikira kubaliwa kwa mwana. Buluka penepo, Zuze an'thula mwana dzina ya “Yezu.” Yezu abaliwa ku cisa ca Bheleya, ku dziko ya Djudeya, pa midzidzi ikhatonga mambo Herodhi. Pakupita ntsiku zingasi Yezu mbadabalwa kale, abwera ku Djerusalema anthu anyakudziwisa pya nyenyezi, a kumabulukira dzuwa. Pidafika iwo, abvundzisa tenepa: “Ali kupi mambo wa madjuda adabaliwa cincino? Thangwi ife taiona nyenyezi yace kumabulukira dzuwa. Na tenepo, tabwera kamulambira.” Mambo Herodhi, na kupibva pinthu penepi, atutumuka napyo pikulu iye na anthu anango onsene a mu nzinda unowu wa Djerusalema. Na thangwi eneyo, mambo Herodhi acemeresa akulu onsene aanyantsembe na anyakudziwisa a Mwambo a mbumba, mbaabvundza kuti: “Kodi ndipangeni, ndi kupi kunafuna baliwa Kirixtu?” Iwo antawira tenepa: “Anabaliwa ku Bheleya, mu dziko ya Djudeya.” Thangwi Mulungu alonga na mporofeta Mikeya kuti: “ ‘ Iwe Bheleya, cisa ca dziko ya Djudeya, leka kunyerezera kuti iwe ndiwe cinzinda cing'ono-ng'ono kakamwe pakati pa mizinda inango mikulu mu Djudeya. Thangwi n'dziko mwako, ndimo munafuna buluka N'tsogoleri anafuna kumbiza mbumba yanga ya Izarayeli.’ ” Buluka penepo, mambo Herodhi acemeresa pa khundu ale anyakudziwisa pya nyenyezi a kumabulukira dzuwa, mbaabvundzisa na kuaphemba kuti ampange mwadidi n'dzidzi udatoma iwo kuona nyenyezi. Pakumala penepi, aatuma kuti aende ku dziko ya Bheleya, mbaapanga tenepa: “Ndokoni mukhabvundzise mwadidi mwene, mungan'gumana, bwererani na kuno mundidziwisembo toera ine ndiyendembo kamulambire.” Pakumala kubva pyonsene pikhalonga mambo, anyakudziwisa nyenyezi abuluka mbaenda ulendo wawo. Penepo, iwo aona kuti nyenyezi ire ikhaatsogolera pakubuluka kwawo kumabulukira dzuwa, yaabulukira pontho kutsogolo kwawo mbikhaatsogolera mpaka kufikira kulimira cidzulu-dzulu pa nyumba ikhagumanika mwana. Na tenepo, iwo, na kuiona pontho nyenyezi, akomerwa pikulu kakamwe. Pidafika iwo penepo, apita n'nyumba, agumana mwana na Mariya, mai wace. Iwo atoma kugodamira mwana na kumulambira. Pidamala iwo, abulusa mbapereka miyoni yawo ya ntengo ukulu kakamwe, inacemerwa oro, insensu na mira. Buluka penepo, Mulungu aacenjeza mu ndoto kuti aleke kwenda kaonana pontho na mambo Herodhi. Na tenepo, iwo abwerera na njira inango kwenda ku dziko kwawo. Pikhabwerera iwo kwenda ku dziko kwawo, anju m'bodzi wa Mulungu abwera kuna Zuze, mu ndoto, mbampanga tenepa: “Lamuka, kwata mwana na mai wace uthawire ku Idjipitu. Khala kweneko mpaka kufikira ntsiku inalonga ine pontho kuti ubwerere, thangwi Herodhi anadza kasaka mwana toera amuphe.” Zuze alamuka, akwata mwana na mai wace, mbaenda na iwo ku Idjipitu na masiku, mbakhala kweneko mpaka kufa kwa mambo Herodhi. Na tenepo, pyacitika pire pikhadalonga Mulungu kale ene na mulomo wa mporofeta kuti: “Ndacemera mwana wanga kuti abuluke ku Idjipitu.” Mambo Herodhi mudapyona iye kuti anyengezwa na anthu anyakudziwisa pya nyenyezi a kumabulukira dzuwa, akhala wakuipirwa. Mbatoma kubulusa mwambo wace wa kuphesa ana onsene akhagumanika na pyaka piwiri kwenda pantsi mu dziko ya Bheleya na m'pisa pinango pya n'khundu-n'khundu, ninga mukhadapangirwa iye na amuna a kumabulukira dzuwa, pa thangwi ya n'dzidzi udatoma kuonekera nyenyezi. Na tenepo, pyasimbiswa pire pikhadalonga mporofeta Jeremiya kuti: “ Ku Ramaa kwabveka n'khuwo. Cikhali ciriro na kubva kupha pikulu kwa mai Rakeli, na thangwi ya kuferwa na anace. Na tenepo, iye asakhonda kumatamizwa thangwi anace onsene amala kufa.” Pa kufa kwa Herodhi, anju m'bodzi wa Mulungu aonekera kuna Zuze mu ndoto ku Idjipitu, mbampanga tenepa: “Lamuka, kwata mwana na mai wace uyende na iwo ku dziko ya Izarayeli, thangwi afa ale akhafuna kupha mwana.” Zuze alamuka, akwata mwana na mai wace, mbabwerera kwenda na iwo ku dziko ya Izarayeli. Mbwenye Zuze, na kubva kuti pa kufa kwa mambo Herodhi adapita pa mpando pace ndi mwana wace anacemerwa Arikilau, agopa kubwerera ku dziko eneyo. Na thangwi eneyo, Mulungu amulotesa pontho. Iye alamuka mbaenda ku dziko ya Galileya, mbaenda kakhala mu nzinda wa Nazareti. Tenepa, pyasimbiswa pire pikhadalongwa na maporofeta kuti: “Iye anadza kacemerwa wa ku Nazareti.” Pa midzidzi eneyo, abulukira Juwau Bhatixta mbakhamwaza mphangwa n'thando mu dziko ya Djudeya, mbakhalonga tenepa: “Chunyukani kudawa kwanu, thangwi Umambo wa kudzulu uli dhuzi.” Uyu ndiye akhalongwa na mporofeta Izaya kuti: “Fala iri kukhuwa n'thando mbilonga kuti: Sasanyirani njira ya Mbuya mbamundendemeza mipsalu yace.” Juwau akhabvala nguwo zakucitwa na uweya wa pinyama pinacemerwa kamelo, mbakhamanga bhande ya nthembe n'cunu mwace, mbakhadya nthete na uci wa n'tsanga. Na tenepo, anthu onsene a ku Djerusalema na anthu onsene akhagumanika m'pisa mwa dziko ya Djudeya, na anango anthu akhagumanika n'khundu-n'khundu mwa nyandza ya Djorodani, onsene akhaenda kuna iye. Akhadambula kudawa kwawo, Juwau mbakhaatambirisa batixmu mu nyandza ya Djorodani. Akhalipo madjuda anango anacemerwa afarisi na asadhusi, akhadza katambirambo batixmu. Pikhadza iwo, Juwau aapanga tenepa: “Dzindza ya m'bobo! Mbani akupangani kuthawa nyatwa zinafuna kudza? Citani pinthu pinapangisa kuti imwe mwachunyukadi. Lekani kunyerezera mwekha ene mbamulonga tenepa: ‘Tina baba wathu Abharaamu,’ thangwi ine ndisakupangani kuti Mulungu ana mphambvu za kusanduza myala iyi, mbikhalambo dzindza ya Abharaamu. Pontho ndisakupangani kuti mbadzo yamala kusasanyirwa toera kugwanda miti na michici ene. Na tenepo, miti yonsene inakhonda kubala misapu yadidi, inatemiwa mbiponyiwa pa moto. Ine ndisakutambirisani batixmu na madzi kuti muchunyuke kudawa kwanu. Mbwenye munthu unango anadza n'nduli mwanga, unowu ndiye ana mphambvu za kupiringana ine. Pontho ine sine cinthu pamaso pace kuti ndinakwanisa kukwata ntsapato zace. Unowu ndiye anadza kakutambirisani batixmu na Nzimu Wakucena na moto. Iye ana foxolo m'manja mwace toera kucenesa mbuwa yace. Pontho anakoya mapira n'cikwa, mbakwata dzungu yace mbaipisa pa moto wakukhonda kuthima.” Ntsiku ibodzi, Yezu abuluka ku dziko ya Galileya, mbaenda ku nyandza ya Djorodani, toera atambiriswembo batixmu na Juwau Bhatixta. Mbwenye Juwau akhafuna kun'khondera mbalonga tenepa: “Ine ndine anafuna kutambiriswa batixmu na imwe. Mphapo lero imwe ndimwe munadza kuna ine?” Mbwenye Yezu antawira tenepa: “Pa n'dzidzi uno siya tenepo. Thangwi mphyadidi ticite tenepa, toera pisimbiswe pinafuna Mulungu.” Mphapo Juwau na kubva tenepo, am'bvera mbantambirisa batixmu. Yezu pakumala kwace kutambira batixmu, abuluka m'madzi. Pa n'dzidzi unowu thambo yafunguka. Iye aona Nzimu wa Mulungu mbuchita ninga nkhangaiwa, mbum'phamira. Penepo yabveka fala kubulukira kudzulu mbilonga tenepa: “Uyu ndi mwana wanga wakufunika kakamwe, ananditsandzaisa.” Buluka penepo, Yezu akwatiwa na Nzimu Wakucena mbaenda n'thando, kuti aende kanyengererwe na Dyabu. Pidamala iye kupimana cakudya ntsiku makumanai, masiku na masikati, Yezu abva njala. Penepo, Dyabu nyakunyengerera, afendedzera Yezu dhuzi mbampanga tenepa: “Ngakhala iwe ndiwedi Mwana wa Mulungu sanduza myala iyi idze mikate.” Mbwenye Yezu antawira tenepa: “Pyalembwa m'Bukhu ya Mulungu kuti: ‘Si cakudya basi tayu cinapulumusa munthu, mbwenye na mafala onsene anabuluka pa mulomo wa Mulungu’” Buluka penepo, Dyabu ankwata mbaenda na iye ku nzinda wakucena, ankwiza padzulu kakamwe pa Nyumba ya Mulungu, mbampanga tenepa: “Ngakhala iwe ndiwe Mwana wa Mulungu, numpha padzulu pano ugwe pantsi, thangwi pyalembwa kuti: “ ‘Mulungu anadza kapanga anju zace pa thangwi yako, pontho iwo anakugampha na manja awo, toera ukhonde kuphekeka na myala.’” Mbwenye Yezu antawira tenepa: “Pyalembwambo n'kati mwa Bukhu kuti: ‘Leka kunyengerera Mbuya Mulungu wako.’” Penepo Dyabu akwata Yezu mbaenda na iye pa phiri yakulapha kakamwe, mbampangisa umambo onsene wa pantsi pano na mbiri zawo, mbampanga kuti: “Pyonsene ipi ndinakupasa, male ungandigodamira mbundilambira.” Yezu ampanga kuti: “Buluka, Sathani! Thangwi pyalembwa m'Bukhu ya Mulungu kuti: ‘Lambira Mbuya, Mulungu wako, pontho phatira basa iye ekha basi’” Penepo Dyabu ansiya, mbabwera maanju kudza kaphatira basa Yezu. Yezu na kupibva kuti Juwau Bhatixta afungirwa n'kaidi, abwerera mbaenda ku Galileya. Yezu abuluka ku Nazareti kukhakhala iye, mbaenda kakhala ku nzinda wa Kafaranaumi, ukhagumanika n'khundu-n'khundu mwa nyandza ya Galileya, ku dziko ya Zebhuloni na ya ku Nafitali, toera pisimbiswe pikhadalongwa na mporofeta Izaya kuti: Iwe dziko ya Zebhuloni na ya Nafitali, dziko inagumanika mu mbale mwa nyandza ya Galileya na ntunda unango wa nyandza ya Djorodani, iwe Galileya ya anthu adakhonda kukhala madjuda! Mbumba ikhakhala n'cidima, yaona cieza cikulu. Pontho kuna ale akhakhala mu mbuto ya cidima ca kufa, amwanikirwa na cieza. Kutomera n'dzidzi unowu kwenda kutsogolo, Yezu atoma kupfundzisa Mphangwa Zadidi mbakhalonga tenepa: “Chunyukani kudawa kwanu, thangwi Umambo wa kudzulu uli dhuzi.” Yezu pikhafamba iye dhuzi na nyandza ya Galileya, aona anyakokota awiri muubale mwawo, mbakhagwisira makokota awo n'nyandza. M'bodzi ndi Simau, anadziwika pontho na dzina ya Pedhru. Unango ndi Andereya. Yezu aapanga kuti: “Nditowereni, Ine ndinakucitani anyakokota a anthu.” Na tenepo, iwo pa n'dzidzi ubodzi-bodzi, asiya makokota awo mbantowera. Yezu pakufamba pang'ono kutsogolo, aona pontho anthu awiri muubale mwawo. Akhali Tiyago na Juwau, ana a Zebhedheu. Iwo akhali pabodzi na baba wawo m'bote mbakhasona makokota awo, Yezu mbaacemera. Penepo pene, iwo asiyiratu bote na baba wawo ene, mbaenda na Yezu. Na tenepo, Yezu akhafamba dziko yonsene ya Galileya, mbakhapfundzisa n'kati mwa nyumba za kuphemberera, mbakhalonga Mphangwa Zadidi za Umambo wa kudzulu, pontho mbakhawangisa nthenda zonsene na ale akhaduwala pakati pa mbumba. Mbiri yace yamwazika dziko yonsene ya Sirya. Na tenepo, anthu onsene akhaenda kuna Yezu na atenda awo akhathabuka na nthenda zakusiyana-siyana, ninga za mizimu yakuipa, za njiri, na za mpfutete. Zonsene izi Yezu akhaziwangisa. Na tenepo, mwinji ukulu wa anthu ukhantowera, kubulukira ku dziko ya Galileya, na ya Dhekapoli, na anthu a ku nzinda wa Djerusalema, na a ku Djudeya, pontho na anthu a ntunda unango wa nyandza ya Djorodani. Yezu na kuona mwinji wa anthu, akwira pa phiri mbakhala pantsi. Penepo, anyakupfundza ace anfendedzera. Yezu atoma kuapfundzisa mbalonga tenepa: “Mbatsandzaye ale anyakucherenga mu nzimu, thangwi Umambo wa kudzulu ndi wawo. Mbatsandzaye ale analira, thangwi anadza kamatamizwa na Mulungu. Mbatsandzaye ale anyakupicepesa, thangwi anadza kapasiwa unthaka wa dziko ya pantsi na Mulungu. Mbatsandzaye ale ana njala na nyota ya kucita kufuna kwa Mulungu, thangwi anadza kapasiwa pyonsene na Mulungu. Mbatsandzaye anabvera andzawo ntsisi, thangwi iwo anadza kabverwambo ntsisi na Mulungu. Mbatsandzaye anyakucena ntima, thangwi iwo anadza kaona Mulungu. Mbatsandzaye ale anasaka ntendere pakati pa anthu, thangwi iwo anadza kacemerwa ana a Mulungu. Mbatsandzaye ale anazondiwa na thangwi ya kucita kufuna kwa Mulungu, thangwi Umambo wa kudzulu ndi wawo. “Tsandzayani mungatikanwa, mungazondiwa, na kulongerwa uthambi wa kusiyana-siyana na thangwi ya kukhala anyakupfundza anga. Komerwani mbamudzala na kutsandzaya, thangwi muwoni wanu unakudikhirani kudzulu ndi ukulu. Thangwi maporofeta akale azondiwambo sawa-sawa ninga imwe.” “Imwe ndimwe munyu wa padziko. Lang'anani, munyu ungasuluka, unadza kadzipa tani pontho? Na tenepo, unamalisira taiwa, thangwi nkhabe cinango cakucita na iwo, mbumalisira kupwandiwa na anthu. “Imwe ndimwe cieza ca padziko. Nzinda udamangwa pa phiri nkhabe kubisalika. Pontho nkhabe munthu anagasa nyale yace mbaigudumira na citundu. Mbwenye anasaka mbuto ya padzulu toera kumwanikira mwadidi anthu onsene n'kati mwa nyumba. Sawa-sawa ninga imwembo, citani kuti cieza canu cimwanikire anthu onsene, toera aone mabasa anu adidi anacita imwe. Na tenepo, iwo anapasa mbiri Baba wanu ali kudzulu.” “Lekani kunyerezera kuti ndadza kamalisa mwambo wa Mozesi peno cipfundzo ca maporofeta akale. Sidadza kamalisa penepyo tayu, mbwenye ndadza kasimbisisa. Pontho dziwani kuti n'dzidzi uno unagumanika thambo na mataka, nkhabe cinthu cibodzi cing'ono n'kati mwa malemba, peno cidzindikiro cinango ca malemba cinafuna kubuluswa pa Mwambo wa Mozesi, pyonsene mbapidzati kucitika. Na thangwi eneyo, ule anakhonda kubvera mwambo, peno mbudakhala pyawo ung'ono tani, mbapfundzisambo andzace kucita pibodzi-bodzi, munthu unowu anaoniwa wang'ono mu Umambo wa kudzulu. Mbwenye ule anabvera mwambo na kupfundzisa andzace kucita pibodzi-bodzi, anakhala nkulu mu Umambo wa kudzulu. Pontho ndisakupangani kuti, imwe mungakhonda kucita mbamutoweza kufuna kwa Mulungu kupiringana anyakudziwisa a Mwambo wa Mozesi na afarisi, nkhabe m'bodzi anafuna kudza kapita mu Umambo wa kudzulu.” “Imwe mwabva pikhadalongwa kuli akulu anu akale kuti: ‘Leka kupha munthu.’ Ule anapha munthu, anatongwa. Mbwenye Ine ndisakupangani kuti munthu onsene anaipirwa na ndzace, anatongwa. Ule anatikana ndzace, anatongwa, pontho ule anacemera ndzace ‘dzemwa,’ asatongwa kwenda mu moto wa infernu. “Na tenepo, ngakhala iwe uli pa guwa ya ntsembe toera kupereka muwoni wako kuna Mulungu, penepo ungakumbuka kuti ndzako m'bodzi ana thangwi na iwe, siya muwoni wako pa guwa ya ntsembe, ndoko pakutoma ukhasekesane na iye. Ungamala, bwerera ukhapereke muwoni wako kuna Mulungu. “Pontho pa n'dzidzi unaenda iwe katongwa pabodzi na ndzako, saka kusekesana na mwansanga na nyamalwa wako, toera iye akhonde kukupereka m'manja mwa nkulu wa nyakutonga, iye mbakuperekambo m'manja mwa nsupai wace, mbufungirwa n'kaidi. Ndimo mwene ndisakupanga kuti iwe nkhabe kudza kabuluka mwenemu mbudzati kumalisa kulipa mangawa ako onsene.” “Imwe mwabva pidalongwa kuti: ‘Leka kucita upombo.’ Mbwenye Ine ndisakupangani kuti: Munthu onsene analang'ana nkazi mbansirira, n'dzidzi unowu ali kucita upombo na iye muntima mwace. Mphapo, ngakhala diso yako ya khundu ya madyo iri kukugwisa mwa kudawa, ibuluse mbuitaya kutali na iwe. Thangwi mphyadidi kuluza phindi ibodzi ya manungo ako, mbukhonda kuponyiwa manungo onsene mu infernu. Sawa-sawa, ngakhala manja ako a khundu ya madyo asakugwisa mwa kudawa, agwande mbuataya kutali na iwe. Thangwi mphyadidi kuluza phindi ibodzi ya manungo ako, mbukhonda kuponyiwa manungo onsene mu infernu.” “ Pyalongwambo pontho kuti: ‘Mamuna onsene anakhonda nkazi wace, asatongwa kumpasa tsamba ya kumwalana.’ Mbwenye Ine ndisakupangani kuti: Mamuna onsene anamwalana na nkazi wace, thangwi yace mbikhonda kukhala ya lukwali, ali kum'pfundzisa upombo. Mphapo mamuna onsene anacita banja na nkazi wa kumwaliwa, ali kucitambo upombo na iye.” “ Pontho imwe mwabva pidapangwa akulu anu akale kuti: ‘Leka kudumbira papezi, mbwenye usatongwa kucita pidadumbirira iwe pamaso pa Mbuya.’ Mbwenye Ine ndisakupangani pontho kuti: Siyani kudumbira konsene. Lekani kudumbira na dzina ya kudzulu, thangwi ndi mpando wa Umambo wa Mulungu. Peno na dzina ya pantsi, thangwi ndipo panaikha iye myendo yace. Peno na dzina ya Djerusalema, thangwi ndi nzinda wa Mambo wa nkulu. Pontho leka kudumbira na dzina ya nsolo wako, thangwi unacimwana kusanduza tsisi ibodzi mbidza yakuswipa, peno mbidza yakucena. Mbwenye mphyadidi kulonga tenepa: ‘Ande’, ‘ande’. ‘Nkhabe’, ‘nkhabe’. Pyonsene pinango kupiringana penepi, mphya Nyamalwa.” “ Mwabva pidalongwa kuti: ‘Diso na diso, dzino na dzino.’ Mbwenye Ine ndisakupangani kuti: lekani kubwerezera uipi kuli ale anakucitani uipi. Munthu angakumenya ku phutu ya khundu ya madyo, mpase akumenyembo khundu inango. Munthu angafuna kukusumira kwa atongi toera akupokosere kamiza, mpase pontho kazako yako. Munthu angakukakamiza kufamba na ntolo nsindzo ubodzi, famba na iye pontho misindzo miwiri. Munthu anakuphemba cinthu, mpase. Munthu anafuna kukubwereka cinthu, leka kumpasa nkhodolo.” “ Imwe mwabva pidalongwa kuti: ‘Funa ndzako, mbwenye ida nyamalwa wako.’ Mbwenye Ine ndisakupangani kuti: Funani anyamalwa anu, phembererani ale anakuzondani. Na tenepo, munakhaladi ana a Baba wanu wa kudzulu. Thangwi iye asagasira dzuwa yace anyakuipa na adidi, pontho asabvumbira anyakulungama na anyakukhonda kulungama. Thangwi mungafuna ale anakufunani basi, munapaswa m'bairo wanji na Mulungu? Anyakukumbusa misonkho asacitambo pibodzi-bodzi. Pontho, mungamwanyika abale anu basi, ndi ninji pinacita imwe kupiringana anango? Penepyo ndi pinacitambo ale anakhonda kutawira Mulungu. Na tenepo, imwe khalani akukwana, ninga Baba wanu wa kudzulu ndi wakukwana.” “Mungacita udidi, lekani kucita toera kusimbwa na anthu. Thangwi mungacita tenepo, nkhabe kudza kapaswabve m'bairo na Baba wanu wa kudzulu. “Na tenepo, ungapasa cinthu nyakucherenga leka kuimba kaluta, ninga pinacita anthu anyauthambi n'kati mwa nyumba za kuphemberera peno m'miseu, toera asimbwe na anthu. Ndimo mwene, Ine ndisakupangani kuti anthu enewa amala kale kutambira m'bairo wawo. Mbwenye iwe, ungapasa cinthu nyakucherenga, cita kuti manja ako a nkono wa bzere akhonde kudziwa pinacita nkono wa madyo, toera pinthu pidabulusa iwe pikhonde dziwika na anthu. Thangwi Baba wako asadziwa pyakubisala. Na tenepo, Iye anakupasa m'bairo.” “Mungaphembera lekani kucita ninga pinacita anthu a uthambi, anaphembera mbadalimira n'kati mwa nyumba za kuphemberera, na m'mphambano mwa miseu, toera aoniwe na anthu onsene. Ndimo mwene, Ine ndisakupangani kuti anthu enewa amala kale kutambira m'bairo wawo. Mbwenye iwe ungafuna kuphembera, pita n'nyumba mwako, funga citseko cako, mbuphembera kuna Baba wako anakhonda kuoneka. Na tenepo, Baba wako anaona pinacita iwe n'cibiso-biso, anakupasa m'bairo wako. Mungaphembera, lekani kumala midzidzi mizinji na kulonga mafala mabodzi ene, ninga pinacita anthu anakhonda kutawira Mulungu, thangwi iwo asanyerezera kuti na kulonga mafala mazinji, Mulungu anaabvera. Lekani kucita ninga iwo! Thangwi Mulungu, Baba wanu, asadziwa pinafuna imwe mbamudzati kum'phemba. Na tenepo, musatongwa kuphembera tenepa: “Baba wathu, muli kudzulu, dzina yanu mbikhale na mbiri. Umambo wanu mbudze kuna ife. Pinafuna imwe mbapicitwe, pantsi pano ninga kudzulu. Tipaseni cakudya cathu ntsiku na ntsiku. Tilekerereni madawi athu ninga ifembo tinalekerera andzathu madawi awo. Lekani kutisiya mbatigwa n'kudawa, mbwenye tipulumuseni mwa kuipa, [thangwi Umambo ndi wanu, na mphambvu, na mbiri yakukhaliratu. Ameni. ] Thangwi mungalekerera andzanu madawi awo, Baba wanu wa kudzulu anakulekereranimbo. Mbwenye mungakhonda kulekerera andzanu, Baba wanu wa kudzulu nkhabe kudza kakulekereranimbo madawi anu.” “Mungapimana cakudya toera kuphembera, lekani kupangisa nkhope ya kutsukwala ninga anthu a uthambi, anaphinduza nkhope zawo toera kupangisa kuli anthu onsene, kuti asapimana cakudya. Ndimo mwene ndisakupangani kuti, anthu enewa, atambira kale m'bairo wawo. Mbwenye iwe, ungapimana cakudya toera kuphembera, samba nkhope, mbusapula pyadidi tsisi yako, toera ukhonde kupangisa kuna anthu kuti usapimana cakudya, mbwenye kuna Baba wako anakhonda kuoneka. Na tenepo, Baba wako anaona pyonsene pyakubisala, anakupasa m'bairo.” “Lekani kukoya mpfuma zanu pa dziko ino panagumanika maberethi na furuju mbazifudza, pontho na panagumanika mambava mbaziba. Mbwenye koyani mpfuma zanu kudzulu kunakhonda kugumanika ucenje na furuju mbazifudza, peno mambava mbaswa mbaziba. Thangwi panagumanika mpfuma yanu, penepo ndipo panagumanikambo ntima wanu.” “Maso ndi nyale ya manungo. Na tenepo, ngakhala maso ako mbadidi, manungo ako onsene anadzala na cieza. Mbwenye ngakhala kulang'ana kwako ndi kwakuipa, manungo ako onsene anakhala n'cidima. Na tenepo, ngakhala cieza ciri muna iwe ndi cidima, cidima ceneci ndi cikulu kakamwe!” “Nkhabe munthu anakwanisa kuphatira basa ambuya awiri. Thangwi unaida m'bodzi mbufuna unango, peno unalemedza m'bodzi mbupwaza unango. Apo lekani kuphatira basa Mulungu, uku mbamuphatira pontho kobiri. “Na thangwi eneyi Ine ndisakupangani kuti: Lekani kunentseka na makhaliro anu pa thangwi ya pinafuna imwe kudya, peno na pinafuna imwe kumwa. Peno na manungo anu pa thangwi ya pinafuna imwe kubvala. Imwe nkhabe kupidziwa kuti moyo wanu na cakudya, cikulu ndi moyo wanu? Peno manungo anu na cakubvala, cikulu ndi manungo anu? Lang'anani mbalame za kudzulu. Nkhabe kubzala, nkhabe kubvuna pontho nkhabe koya n'pikwa. Mbwenye Baba wanu ali kudzulu ali kuzipasa cakudya. Imwe nkhabe funika pikulu kakamwe kupiringana mbalame? Mbani pakati panu, iye mbapifuna pyace, anakwanisa kuthimizira n'dzidzi ubodzi pa moyo wace?” “Pontho, thangwi yanji musakhala mbamudzudzumika na pya kubvala? Lang'anani kukula kunacita maluwa a n'tsanga! Iwo nkhabe kuphata basa pontho nkhabe kucita nguwo. Mbwenye ine ndisakupangani kuti Salomau, na mbiri yace yonsene ikhali na iye, acimwana kubvalira ninga maluwa awa. Lang'anani, ngakhala Mulungu asabvazika tenepa maluwa a n'tsanga, anacita kuti lero alipo, mangwana asaponyiwa pa moto, ndiye tani kuna imwe, anthu a cikhulupiro cing'ono? Na tenepo, lekani kunentseka mbamulonga kuti: ‘Tinadyanji?’ peno ‘Tinamwanji?’ peno ‘Tinabvalanji?’ Thangwi anasaka penepi ndi ale anakhonda kutawira Mulungu. Mbwenye Baba wanu wa kudzulu asadziwa pyonsene pinafuna imwe. Mbwenye sakani pakutoma Umambo wa Mulungu na kulungama kwace. Pyonsene ipi munadza kapithimizirwa. Mphapo lekani kudzudzumika na ntsiku ya mangwana, thangwi ntsiku ya mangwana ina pyayo. Ntsiku na ntsiku ina kuipa kwayo.” “Lekani kutonga munthu, toera mukhonde kutongwambo na Mulungu. Thangwi na matongero anacita imwe, munadza katongwambo sawa-sawa. Pontho na n'dida ubodzi-bodzi unapimira imwe andzanu, munadza kapimirwambo na n'dida unowu. Thangwi yanji usalang'ana cirombo cing'ono ciri n'diso mwa m'bale wako, mbukhonda kuona nkhuni iri n'diso mwako? Usakwanisa tani kupanga m'bale wako kuti: ‘Bwera ndikubuluse cirombo cing'ono ciri n'diso mwako,’ mbukhonda kuona nkhuni iri n'diso mwako? Nyauthambi! Pakutoma bulusa nkhuni iri n'diso mwako, na tenepo iwe unaona mwadidi toera ubulusembo cirombo ciri n'diso mwa m'bale wako. Lekani kupasa anambwa pinthu pyakucena! Thangwi iwo anadza kakuzungunukirani mbakulumani. Pontho, lekani kutaya mpfuma zanu muna nkhumba, thangwi izo zinadza kazipwanda.” “Phembani, munapaswa. Sakani, munapigumana. Gogodzani, munafungulirwa. Thangwi onsene anaphemba, anapaswa. Anasaka, anapigumana. Pontho ule anagogodza citseko, anafungulirwa. Mbani pakati panu anapasa mwana wace mwala, angam'phemba nkate? Peno mbampasa nyoka angam'phemba nyama ya m'madzi? Lang'anani, imwe ninga anthu a kuipa musakwanisa kupasa ana anu pinthu pyadidi, ndiye tani Baba wanu ali kudzulu, nkhabe bulusa pinthu pyadidi mbapasa ale anam'phemba? Na tenepo, pyonsene pinafuna imwe kuti mucitirwe na andzanu, acitirenimbo imwe pakutoma. Thangwi ipi ndipyo pinalonga Mwambo wa Mozesi na pinapfundzisa Maporofeta.” “Pitani na nsuwo ung'ono. Thangwi nsuwo ukulu na njira ikulu pisapitisa ku mbuto ya kutaika. Mbazinji anthu anapita na mwenemu. Mbwenye nsuwo ung'ono na njira yakupata zisafikisa ku mbuto ya upulumuki. Apo anthu ace anaigumana acepa.” “Cenjerani na maporofeta a uthambi! Thangwi ali kudza kuna imwe ninga mabira, mbwenye m'mitima mwawo ndi mibindzi ya ukali. Anthu enewa imwe munaadzindikira na misapu yawo. Pisakwanisika kuti munthu achode mauva pa miti ya minga, peno masambvu pa psepse? Na tenepo, muti onsene wadidi usabala misapu yadidi, muti wa kuipa unabalambo misapu ya kuipa. Pontho, nkhabe kucitika kuti muti wadidi ubale misapu ya kuipa, peno muti wa kuipa ubale misapu yadidi. Muti onsene unakhonda kubala misapu yadidi usagwandiwa mbuponyiwa pa moto. Na tenepo, munati muadziwe na misapu yawo.” “Si onsene tayu analonga ‘Mbuya, Mbuya’ anafuna kupita mu Umambo wa kudzulu, mbwenye ale basi anacita kufuna kwa Baba wanga ali kudzulu. Ntsiku eneyo ingafika, anthu azinji anati alonge kuna Ine kuti: ‘Mbuya, Mbuya! Kodi ife tikhalonga tayu Mphangwa Zadidi na dzina yanu? Tikhabulusa tayu madimonyo na dzina yanu? Tikhacita tayu pirengo pikulu na dzina yanu?’ Na tenepo, Ine ndinaapanga pakweca kuti: Nkhabe kukudziwani. Bulukani pano, imwe monsene munacita kuipa!” “Anthu onsene anabva mafala anga mbaacita, asalandana na mamuna m'bodzi wa ndzeru adamanga nyumba yace padzulu pa mwala. Na tenepo, mulungu abvumba, mikulo mbikuka na madzi, mbicibwera conzi cikulu kudza kamenya nyumba. Mbwenye iyo nkhabe kugwa, thangwi nyumba eneyo yamangwa pa mwala. Mbwenye ule anabva mafala anga mbakhonda kuacita, asalandana na mamuna m'bodzi wa kusoweka ndzeru, adamanga nyumba yace pa checa. Na tenepo, mulungu abvumba pikulu kakamwe, mikulo mbikuka na madzi, mbicibwera conzi cikulu kudza kamenya nyumba. Iyo yagwa, mbifudzika yonsene.” Yezu pidamala iye kulonga mafala awa, anthu onsene adzumatirwa na mapfundzisiro ace. Thangwi iye akhapfundzisa na mphambvu za utongi, mbakhonda kupfundzisa ninga anyakudziwisa a Mwambo. Yezu mukhachita iye pa phiri anthu azinji atoma kuntowera. Mamuna m'bodzi wa matanya afendedzera Yezu mban'godamira mbalonga kuti: “Mbuya, mungafuna munandiwangisa.” Yezu afuthula nkono wace, an'khuya mbalonga tenepa: “Ndisafuna, iwe waceneswa.” Pa n'dzidzi ubodzi-bodzi mamuna awangiswa matanya ace. Buluka penepo Yezu ampanga kuti: “Lang'ana, leka kupanga munthu penepi. Ndoko kuna nyantsembe, toera akudinkhe. Ungamala upereke ntsembe ninga mudapilongera Mozesi, toera anthu akudziwe kuti iwe wawangadi.” Yezu mudapita iye n'cisa ca Kafaranaumi, afendedzerwa na nkulu m'bodzi wa anyankhondo a ku Roma mbam'phemba tenepa: “Mbuya, nyabasa wanga ali kugona ku nyumba na kuthabuka pikulu kakamwe na nthenda ya mpfutete.” Yezu ampanga kuti: “Ndinaenda kweneko kamuwangisa.” Mbwenye nkulu wa anyankhondo antawira tenepa: “Mbuya, ine sine munthu kuti ndikutambireni n'nyumba mwanga. Mbwenye longani fala ibodzi basi, nyabasa wanga anawanga. Thangwi ine ndiri nawombo atsogoleri anga anabvera ine. Inembo ndisabverwa na anyankhondo anga. Na tenepo, ndisapanga nyankhondo wanga m'bodzi kuti: Ndoko kule, iye asaenda. Unangombo mbandimpanga kuti: Bwera kuno, iye asabwera. Pontho ndisapanga nyabasa wanga kuti: Cita ici, iye asacita.” Yezu na kubva penepyo, adzumatirwa napyo mbalonga kuna anthu akhantowera kuti: “Ndimo mwene ndisakupangani kuti: cipo ndidzati kugumana cikhulupiro ninga ici muno mu Izarayeli. Ndinakupangani pontho kuti anabwera anthu azinji a kumabulukira dzuwa na a kumadokero a dzuwa, mbadza kakhala pa thando ya kudya pabodzi pene na Abharaamu, na Izaki, na Djakobo, mu Umambo wa kudzulu. Mbwenye ana a Umambo, anati aponyiwe kunja, ku cidima. Mwenemu munadza kaoneka kulira na kukukuta mano.” Buluka penepo, Yezu alonga kuna nkulu wa anyankhondo kuti: “Ndoko ku nyumba, kutawira kwako kunacitika.” Na tenepo, pa n'dzidzi ubodzi-bodzi nyabasa wace awanga. Yezu pidafika iye pa nyumba ya Pedhru, agumana mebzala wace Pedhru mbakhagona, thangwi akhadaferuka. Yezu amphata manja ace, nthenda mbiwanga. Na tenepo, iye alamuka mbatoma kum'phatira basa. Na maulo mwace anthu an'dzesera atenda azinji akhali na mizimu ya kuipa. Mbwenye Yezu na fala yace basi aithamangisa mizimu ya kuipa mbaawangisa atenda onsene. Na tenepo, pyasimbiswa pire pikhadalonga mporofeta Izaya kuti: “Iye ene akwata kuduwala kwathu, na nthenda zathu zonsene.” Yezu na kuona mbumba ya anthu ikhadanzungulira, aapanga anyakutumwa ace kuti aende ntunda unango wa nyandza. Na tenepo, nyakudziwisa m'bodzi wa Mwambo anfendedzera dhuzi mbampanga kuti: “Mpfundzisi, ine ndinakutowerani konsene kunafuna imwe kwenda.” Mphapo Yezu antawira tenepa: “Minyenga ina mphako zawo, mbalame za kudzulu zinantsandza zawo, mbwenye Ine, Mwana wa Munthu, nkhabe pa kutsamisa nsolo.” M'bodzi wa anyakupfundza aphemba Yezu mbalonga kuti: “Mbuya, ndisiyeni pakutoma ndiyende kaikhise baba wanga.” Mbwenye Yezu antawira tenepa: “Iwe nditowere. Aleke anyakufa aikhane okha.” Na tenepo, Yezu akwira m'bote na anyakupfundza ace mbaenda na iwo pabodzi. Na mwansanga, caoneka conzi cikulu kakamwe n'nyandza, mabimbi mbakhamenya bote, mbakhafuna kuilowesa. Mbwenye pa n'dzidzi unowu Yezu akhagona pyace. Na thangwi eneyo anyakupfundza ace aenda kamulamusa mbakhakhuwa tenepa: “Mbuya, tipulumuseni! Tiri kufa ife!” Mbwenye Yezu aabvundza tenepa: “Thangwi yanji imwe musagopa tenepa, anthu a cikhulupiro cing'ono?” Buluka penepo, Yezu alamuka mbamatamisa conzi na mabimbi, pyonsene mbapimatamiratu. Anyakupfundza ace na kupiona, adzumatirwa mbalonga kuti: “Mbani unowu anafikira kubverwa na mphepo na mabimbi ene?” Yezu afika cisa cinango cinacemerwa Gadala, cinagumanika ntunda unango wa nyandza ya Galileya. Penepo, abwera kuna Iye amuna awiri anyansala akhali na mizimu ya kuipa kubulukira m'masiye, pontho akhali anthu akugopsa kakamwe. Na tenepo, njira ikhadafa thangwi anthu akhagopa kupita nayo. Mizimu ya kuipa ikhakhala muna anthu pidaona iyo Yezu, yatoma kukhuwa kuti: “Iwe, Mwana wa Mulungu, usafunanji na ife? Wabwera katithabusa n'dzidzi mbudzati kukwana?” Cifupi na penepo, ukhalipo nkumbi ukulu wa nkhumba mbukhasodza. Na tenepo, madimonyo aphemba kuna Yezu kuti: “Mungatibulusa, tipitiseni pyathu mu nkumbi wa nkhumba.” Yezu aatawira kuti: “Ndokoni!” Iwo abuluka muna anthu mbapita mu nkumbi wa nkhumba. Na tenepo, nkhumba zonsene zanumpha pa nkhomole, mbazilowa n'nyandza. Akumbidzi a nkhumba athawa, aenda mu nzinda mbalonga pyonsene, na pire pidacitika kuna amuna akhali na mizimu ya kuipa. Na tenepo, anthu onsene a mu nzinda aenda kalonga na Yezu. Pidamuona iwo am'phemba kuti iye abuluke pa cisa ceneci. Buluka penepo, Yezu apakira bote mbawambuka nyandza mpaka ntunda unango, mbaenda ku nzinda kwace. Penepo anthu an'dzesera mamuna m'bodzi wa mpfutete pa khangala. Yezu na kuona cikhulupiro cikhali na anthu awa, alonga kuna nyampfutete kuti: “Leka kugopa mwana wanga, madawi ako alekererwa.” Mbwenye anyakudziwisa a Mwambo anango akhalonga okha ene kuti: “Munthu uyu ali kuxola Mulungu!” Na tenepo, Yezu na kudziwa manyerezero awo, aapanga tenepa: “Thangwi yanji imwe muli kunyerezera pya kuipa m'mitima mwanu? Ndi ninji pinakhonda kunentsa? Kulonga kuna ntenda kuti: ‘Madawi ako alekererwa’ peno kumpanga kuti: ‘Lamuka ufambe?’ Mbwenye toera mudziwe kuti Ine, Mwana wa Munthu ndina mphambvu za kulekerera madawi,” ampanga nyampfutete kuti: “Lamuka, kwata khangala yako, ndoko ku nyumba kwako.” Iye alamuka mbaenda ku nyumba kwace. Mwinji wa anthu na kuona penepyo adzumatirwa napyo, mbapasa mbiri Mulungu adapasa anthu mphambvu zenezi. Buluka penepo, Yezu aona mamuna m'bodzi nyakukumbusa misonkho anacemerwa Mateu, akhakhala nawa pa mbuto ikhakumbuswa misonkho, mbampanga kuti: “Nditowere.” Iye alamuka, mbantowera. Mbwenye pa n'dzidzi ukhali Yezu na anyakupfundza ace pa nyumba ya Mateu, abwerambo azinji anyakukumbusa misonkho na anyakudawa, kudza kadya na iwo pabodzi. Afarisi na kupiona penepyo abvundzisa anyakupfundza a Yezu kuti: “Thangwi yanji mpfundzisi wanu ali kudya pabodzi na anyakukumbusa misonkho pontho na anyakudawa?” Yezu mudabva Iye penepyo aatawira tenepa: “Angumi nkhabe kusaka nkondzi, mbwenye ntenda ndiye anasaka nkondzi. Ndokoni mukhapfundze asalongeranji mafala awa: ‘Ntsisi na ntsembe, cinafuna Ine maka-maka ndi ntsisi.’ Thangwi Ine sidadza kacemera anyakulungama tayu, mbwenye ndadzera anyakudawa.” Pa n'dzidzi unowu, anyakupfundza a Juwau Bhatixta afendedzera Yezu mbam'bvundzisa kuti: “Thangwi yanji ife na afarisi tiri kupimana cakudya, mbwenye anyakupfundza anu nkhabe?” Yezu aatawira tenepa: “Pisacitika kuti adacemerwa ku phwandu ya banja akhale pontho mbadatsukwala, mwali wa mamuna mbali na iwo? Mbwenye zinafika ntsiku zinafuna iwo kukwatirwa mwali wa mamuna pakati pawo. Ntsiku zenezi iwo anati apimane cakudya. “Nkhabe munthu anaikha cigamba ca nguwo ipsa pa nguwo yakale. Thangwi cigamba cipsa cinathimiza pandula nguwo yakale, benga mbikula. Pontho nkhabe munthu anaikha vinyu ipsa m'pyombo pya nthembe zakale. Thangwi angacita penepyo, pyombo pinasweka, vinyu inataika pontho pyombo mbipibvungika. Mbwenye vinyu ipsa isatongwa kuti ikoyiwe m'pyombo pipsa. Na tenepo, vinyu na pyombo pyene pinakoyeka.” Yezu mukhalonga Iye na thangwi ya pinthu pinango, afika m'bodzi wa atsogoleri a nyumba ya kuphemberera, an'godamira mbam'phemba tenepa: “Mbuya, mwana wanga wa nkazi afa cincino pano. Bwerani mudze kansandzike manja anu, iye anapulumuka.” Yezu alamuka mbaenda na iye, pabodzi na anyakupfundza ace. Pa n'dzidzi ubodzi-bodzi abulukirambo nkazi m'bodzi akhathabuka na utenda wakubuluka ciropa pa pyaka khumi na piwiri. Iye abwera na kunduli kwace, anfendedzera mban'khuya nguwo zace. Thangwi iye akhalonga ekha ene kuti: “Male ndingakwanisa kun'khuya nguwo zace basi, ndinawanga.” Yezu azungunuka, amulang'ana mbampanga kuti: “Leka kugopa mwana wanga, Kukhulupira kwako kwakuwangisa!” Na tenepo, kubulukira pa n'dzidzi unowu nkazi awanga. Pidafika Yezu pa nyumba pa n'tsogoleri wa nyumba ya kuphemberera, na kuona anyakuimba pitoliro na mwinji wa anthu mbakhakhuwa, aapanga kuti: “Bulukani kunja! Ntsikana hadafa tayu, mbwenye ali kugona.” Onsene atoma kunseka. Pidabuluswa anthu kunja, Yezu apita n'nyumba mukhali ntsikana, amphata nkono wace, iye mbalamuka. Na tenepo, mphangwa zenezi zamwazika kuna anthu onsene a pa cisa ceneci. Buluka penepo, Yezu atowererwa n'nduli mwace na maboli-boli awiri, mbakhakhuwa tenepa: “Mwana wa Dhavidhi, tibverenimbo ntsisi!” Yezu mukhapita Iye n'nyumba, maboli-boli abodzi-bodzi anfendedzera. Na tenepo, Yezu aabvundza kuti: “Imwe musatawira kuti Ine ndinacita penepyo?” Iwo antawira tenepa: “Ande Mbuya, tisatawira.” Yezu aakhuya m'maso mwawo, mbalonga tenepa: “Mbapicitike kuna imwe ninga kukhulupira kwanu.” Na tenepo, maso awo afunguka mbaona. Mbwenye Yezu aacenjeza, mbaapanga na mphambvu zonsene kuti: “Lekani kupanga munthu.” Mbwenye iwo abuluka penepo, mbatoma kumwaza mphangwa cisa cenecire consene. Pa n'dzidzi ukhafuna iwo kubuluka, afika anthu anango kuna Yezu na bewewe m'bodzi akhali na nzimu wa kuipa. Mudathamangiswa dimonyo, bewewe atoma kulonga. Mwinji wa anthu wadzumatirwa napyo mbalonga tenepa: “Ipi cipo pidzati kuoneka muno mu Izarayeli.” Mbwenye afarisi akhadungunya, mbakhalonga kuti: “Ndi nkulu wa madimonyo anampasa mphambvu za kuthamangisa madimonyo.” Yezu akhafamba m'mizinda na m'pisa pyonsene mbakhapfundzisa n'kati mwa nyumba za kuphemberera, mbakhalonga Mphangwa Zadidi za Umambo wa Mulungu, na kukondza nthenda na mautenda akusiyana-siyana. Yezu na kuona mwinji wa anthu, aabvera ntsisi, thangwi iwo akhali akutsukwala na kukhala ninga mabira akusoweka nkumbidzi. Na tenepo, alonga kuna anyakupfundza ace kuti: “Munda wakula, mbwenye anyabasa acepa. Phembani mphapo kuna mwanacinthu munda, kuti atume anyabasa toera adze kabvune.” Yezu acemera anyakupfundza ace khumi na awiri, aapasa mphambvu za kuthamangisa mizimu ya kuipa, na kuwangisa nthenda za kusiyana-siyana. Madzina a apoxtolo khumi na awiri mbawa: Wakutoma ndi Simau, anacemerwa Pedhru, na Andereya, m'bale wace Pedhru, Tiyago na Juwau, ana a Zebhedheu, Filipi na Bhatolomeu, Tomasi na Mateu, nyakukumbusa misonkho, Tiyago, mwana wa Alufeu, na Tadheu, Simau, nyakukakamira mwambo wa Mulungu, na Djuda Xikariyoti, ule adasandukira Yezu. Yezu atuma khumi na awiri awa, na mafala awa: “Lekani kwenda kuna anthu anango adakhonda kukhala madjuda, peno kupita m'mizinda ya ku Samariya. Mbwenye pakutoma ndokoni kuna mabira a kutaika a dzindza ya Izarayeli. Kunaenda imwe ndokoni mbamulonga kuti Umambo wa kudzulu uli dhuzi. Wangisani atenda, lamusani anyakufa, wangisani anyamatanya, thamangisani madimonyo. Mwapasiwa pezi, apasenimbo pezi. Lekani kukwata oro, parata peno nkuwa n'cunu mwanu. Lekani kukwata malikofa pa ulendo, peno kukwata nguwo ziwiri, peno ntsapato, peno mpsimbo, thangwi nyabasa asatongwa kupaswa cakudya. Mungafika mu nzinda peno n'cisa, sakani munthu wakunyindirika mbamukhala pa nyumba pace mpaka kubuluka kwanu. Pakupita n'nyumba, amwanyikeni. Mungaona kuti anthu mbadidi, siyani ntendere wanu muna iwo. Mbwenye pezi, khalani na ntendere wanu. Mungapita mu nzinda peno n'nyumba ya munthu mbamukhonda kutambirwa peno kubverwa mafala anu, mungabuluka mwenemu, gubudzani pfumbi ya manyalo anu. Ndimo mwene, ndisakupangani kuti n'dzidzi wa kutongwa ungafika, nyatwa za dziko ya Sodhoma na Gomora zinacepa kupiringana nzinda unowu.” “Lang'anani, Ine ndisakutumani ninga mabira pakati pa mibindzi. Na tenepo, cenjerani ninga nyoka, pontho cepesekani ninga nkhangaiwa.” “Citani mphole na anthu, thangwi iwo anati akuperekeni m'manyumba a kutongera miseru, pontho mbakukwaxamulani n'kati mwa nyumba zawo za kuphemberera. Na thangwi yanga, munati muperekwe pamaso pa atongi na pa amambo ninga amboni kuna iwo, na kuna ale adakhonda kukhala madjuda. Mbwenye mungaperekwa, lekani kunentseka na kunyerezera kuti ‘Tinalonganji peno tinalonga tani?’ Thangwi pa n'dzidzi unowu Mulungu anakupangisani pinafuna imwe kulonga. Thangwi simwe anafuna kulonga tayu, mbwenye ndi Nzimu Wakucena wa Baba wanu, unafuna kukupfundzisani kulonga.” “Azinji anadza kaphesa abale awo ene. Ababa na amai anadza kaphesa anawo. Anambo anadza kasandukira ababa awo na amai awo, mbaapha. Anthu onsene anati akuideni na thangwi ya dzina yanga. Mbwenye ule anapirira mpaka pakumalisa, anapulumuswa. Mungaidiwa pa cisa cibodzi, thawirani cisa cinango. Thangwi ndimo mwene, ndisakupangani kuti mbamudzati kumala kuifamba mizinda yonsene ya Izarayeli, Ine, Mwana wa Munthu, ndinabwera.” “Nkhabe nyakupfundza anapita mpfundzisi wace, peno nyabasa anapita mbuya wace. Male nyakupfundza angakhala ninga mpfundzisi wace, pontho nyabasa akhale ninga mbuya wace. Ngakhala mwanacinthu nyumba acemerwa Bhelizebhu, ndiye tani imwembo anthu anango a pa nyumba!” “Na tenepo, imwe lekani kuagopa. Thangwi nkhabe cinthu cidabiswa cinakhonda kudza kapangizika, peno cidabisala mbacikhonda kudza kadziwika. Cire cinakupangani Ine n'cibiso-biso, cilongeni pakweca. Pontho na cire cinabva imwe n'ciwerewere, cilongeni pa ntsoyi. Lekani kugopa ale anapha manungo, mbacimwana kupha nzimu. Mbwenye gopani Mulungu, anapha nzimu na manungo ene mu infernu. Kodi nkhabe guliswa mbalame ziwiri na kobiri ibodzi? Mphapo nkhabe ibodzi inagwa pantsi Baba wanu mbakhonda kupifuna. Na tsisi yanu ene ya munsolo, yonsene yamala kulengeswa. Na tenepo, lekani kugopa. Imwe musafunika pikulu kakamwe kupiringana mbalame zizinji.” “Na tenepo, onsene ale anandicitira umboni pamaso pa anthu, Ine ndinaacitirambo pibodzi-bodzi pamaso pa Baba wanga ali kudzulu. Mbwenye ule anandikhonda pamaso pa anthu, Ine ndinadza kan'khondambo pamaso pa Baba wanga ali kudzulu.” “Lekani kunyerezera kuti ndabweresa ntendere pa dziko. Sidabweresa ntendere tayu, mbwenye ndabweresa nkhondo. Ndimo mwene, ndadzesadi kumwazana pakati pa “ ‘mwana-mamuna na baba wace, mwana-nkazi na mai wace, pontho nkwenya na mebzala wace. Na tenepo, anyamalwa a munthu anati akhale abale ace ene.’ “Ule anafuna baba wace peno mai wace kupita Ine, nkhabe cibverano na Ine. Ule anafuna mwana wace wa mamuna peno wa nkazi kupita Ine, unowu nkhabe cibverano na Ine. Ule anakhonda kukwata ntanda wace mbanditowera, nkhabe cibverano na Ine. Ule anasaka kukoya moyo wace, anauluza. Mbwenye ule analuza moyo wace na thangwi yanga, anaugumana.” “Ule anakutambirani, asatambira Ine. Ule ananditambira, asatambira ule adandituma. Ule anatambira mporofeta na kun'dziwa kuti ndi mporofeta, Mulungu anantambirisa muwoni ninga wa mporofeta. Pontho, ule anatambira munthu wakulungama na kun'dziwa kuti ndi wakulungama, anatambira muwoni ninga wa munthu wakulungama. Na ulembo anapasa ndiko ibodzi basi ya madzi a kutonthola m'bodzi wa ana awa na thangwi ya kukhala nyakupfundza wanga, ndimo mwene ndisakupangani kuti iye nkhabe kudza kaluza m'bairo wace.” Yezu pidamala Iye kupfundzisa penepyo kuli anyakupfundza ace khumi na awiri, abuluka penepo mbaenda kapfundzisa na kulonga fala ya Mulungu m'mizinda mwawo. Pa midzidzi ikhakhala Juwau Bhatixta n'kaidi, akhabva mabasa akhacita Kirixtu. Na tenepo, atuma anyakupfundza ace na m'bvundzo uyu: “Ndimwe akhalongwa kuti anabwera, peno tinadikhira unango?” Yezu aatawira tenepa: “Ndokoni mukhalonge kuna Juwau, pire pinabva imwe na pinaona imwe, kuti: Maboli-boli ali kuona, anyakulamala ali kufamba, anyamatanya ali kuwangiswa, anakhonda kubva ali kubva, anyakufa ali kulamuswa, pontho Mphangwa Zadidi ziri kulongwa kuna anyakucherenga. Mbatsandzaye ule analeka pita n'kudawa na thangwi yanga.” Pakubuluka kwa anyakupfundza a Juwau, Yezu atoma kulonga kuna mbumba pa thangwi ya Juwau kuti: “Ndi ninji cidaenda imwe kaona n'thando? Ndi phesi ya kutekenyeka na mphepo? Mphapo mukhadaenda kaona anji? Mamuna wa kubvalira? Dziwani kuti anthu a kubvalira tenepa asagumanika m'manyumba mwa amambo. Ndi ninji cidaenda imwe kaona mphapo? Mporofeta? Ande, Ine ndisakupangani, pontho apiringana mporofeta. Unowu ndiye adalembwa m'Bukhu kuti: “ ‘Ndinatuma ntumwi wanga patsogolo pako toera akusasanyire njira.’ Ndimo mwene ndisakupangani kuti: Pakati pa anthu onsene adabaliwa na nkazi, nkhabe nkulu kupiringana Juwau Bhatixta. Mbwenye ule ng'ono mu Umambo wa kudzulu, unowu ndiye nkulu kupita Juwau. Kutomera midzidzi ya Juwau Bhatixta mpaka lero, Umambo wa kudzulu usakwatiwa na mphambvu, pontho ale anacita mphambvu, asakwanisa kuukwata. Thangwi cipfundzo ca Mwambo wa Mozesi na ca Maporofeta, pikhadza mbapilonga penepyo mpaka pa midzidzi ya Juwau. Mbwenye dziwani kuti iye ndiyedi Eliya akhadikhirwa kuti anabwera. Ana makutu a kubva, mbabve!” Yezu athimiza na kulonga kuti: “Ndinaalandanisa na ani anthu awa a ntsiku zino? Iwo alandana na ana ang'ono anakhala nawa-nawa pa mphambano mbakhakhuwa kuna andzawo kuti: ‘Ife takuimbirani citoliro, mbwenye imwe mwakhonda kubvina. Takuimbirani nyimbo za paciriro, mbwenye imwe mwakhonda kulira.’ Thangwi Juwau abwera, asapimana cakudya mbakhonda kumwa vinyu. Imwe musalonga kuti: ‘Iye ana dimonyo.’ Ndabwera Ine, Mwana wa Munthu, mbandidya, mbandimwa. Na tenepo, musalonga kuti: ‘Lang'anani mamuna uyu! Ndi nyakudyesa, na nyakumwa, pontho ndi xamwali wa anyakukumbusa misonkho na anyakudawa!’ Mbwenye udziwisi wa Mulungu usasimbiswa na mabasa ace.” Na tenepo, Yezu apita mbasandika anthu a mizinda mukhadacita iye pirengo pizinji, thangwi iwo, anthu a mizinda eneyo, akhakhonda kuchunyuka kudawa kwawo. Penepo Yezu alonga kuti: “Unanyatwa iwe, nzinda wa Korazini! Unanyatwa iwe nzinda wa Bhetisaidha! Thangwi pirengo pidacitika pakati panu, mbapidacitika kuna mizinda ya Tiru na Sidhoni, anthu a mizinda eneyi mbadachunyuka kale cino kudawa kwawo, mbabvala masakha na kubulumunda pa dotha. Na thangwi eneyi ndisakupangani kuti ntsiku ya kutongwa, Mulungu anadza kakhala na ntsisi zikulu na Tiru na Sidhoni, kupiringana imwe Korazini na Bhetisaidha. Iwembo nzinda wa Kafaranaumi, usanyerezera kuti unakwira mpaka kudzulu? Nkhabe. Unati uponyiwe mu mbuto ya anyakufa! Thangwi pirengo pidacitika kuna iwe, mbapidacitika mu nzinda wa Sodhoma, unowu mbulipo mpaka n'dzidzi uno. Iwe Kafaranaumi, ndinakupanga kuti ntsiku ya kutongwa, nyatwa zako zinakula kakamwe kupita nyatwa za Sodhoma.” Pa n'dzidzi unowu, Yezu alonga tenepa: “Ndisapereka takhuta kuna Imwe Baba, Mbuya wa kudzulu na pantsi! Thangwi mwapangisa kuna ale adakhonda kupfundza, pire pidabisira Imwe anyakudziwisa na anyakupfundza, mbamupipangisa ana ang'ono. Ande, Baba, penepyo pyacitika na kufuna kwanu! “Pinthu pyonsene ndapipaswa na Baba wanga. Nkhabe munthu anan'dziwa Mwana, ndi Baba basi anan'dziwa. Pontho nkhabe munthu anan'dziwa Baba, anan'dziwa ndi Mwana basi na ule anafuna iye kuti an'dziwe. “Imwe monsene mudaneta, mbamupondererwa, bwerani kuna Ine. Ine ndinadza kakupumisani. Kwatani ntolo wanga, pontho pfundzani na Ine, thangwi Ine ndine wakukhurudzika pontho ndina ntima wakupicepesa. Na tenepo, munagumana kupuma n'kati mwa mitima yanu. Thangwi mwambo wanga nkhabe kunentsa, pontho ntolo wanga ndi wakululupa.” Ntsiku ibodzi ya Sabudu, Yezu apita na pakati pa munda wa tirigu. Anyakupfundza ace na kubva njala atoma kupuruza tirigu toera adye. Mbwenye afarisi na kupiona penepyo alonga kuna Yezu tenepa: “Lang'ana pinacita anyakupfundza ako. Ali kucita basa ntsiku ya Sabudu, pinthu pinakhondeswa kucita ntsiku ya Sabudu.” Yezu atawira tenepa: “Kodi imwe mudzati kuona pidalembwa, na thangwi ya pidacita Dhavidhi na andzace, mudabva iwo njala? Iye apita N'nyumba ya Mulungu, pabodzi na andzace, mbadya mikate ya ntsembe, pinthu kuti pisakhondeswa na mwambo, mbwenye mbanyantsembe basi akhatawiriswa kudya mikate eneyo. Peno panango mudzati kuona pidalembwa mu Mwambo wa Mozesi, kuti ntsiku za maSabudu anyantsembe mu Nyumba ya Mulungu, asaunumpha mwambo wa Sabudu, mbwenye iwo mbakhonda kupasiwa thangwi? Mphapo Ine ndisakupangani kuti: ali pano nkulu kupita Nyumba eneyi ya Mulungu. Imwe mbamudapidziwa pisalongeranji pinthu pidalembwa n'kati mwa Bukhu ya Mulungu kuti: ‘Ntsisi na ntsembe, pinafuna ine maka-maka ndi ntsisi,’ mbamudasiya kukonesa anthu a kusowa thangwi. Thangwi Ine, Mwana wa Munthu, ndine Mbuya wa Sabudu.” Yezu abuluka penepo mbapita n'nyumba ya kuphemberera. Akhalipo mwenemu mamuna m'bodzi wakulamala djanja. Afarisi akhakhala mwenemu, na kufuna kusaka thangwi ya kusumira nayo Yezu, atoma kumulesera mbam'bvundzisa kuti: “Kodi pisatawirirwa na mwambo, kukondza munthu ntsiku ya Sabudu?” Yezu aatawira tenepa: “Mbani pakati panu anagwerwa na bira yace m'mulindi ntsiku ya Sabudu, mbakhonda kuibulusa? Mphapo dziwani kuti munthu na bira, anafunika maka-maka ndi munthu. Na thangwi eneyo, pisatawirirwa kucita udidi ntsiku za Sabudu.” Na tenepo, Yezu alonga kuna mamuna kuti: “Fungula djanja yako.” Iye aifungula. Penepo pene yawanga, mbikhala sawa-sawa ninga inango. Na tenepo, afarisi abuluka mbatoma kusaka njira ya kupha nayo Yezu. Yezu mudabva iye penepi, abuluka penepo anthu azinji mbakhantowera. Pontho onsene akhaduwala, Yezu aawangisa nthenda zawo, mbakhaapanga kuti akhonde kumulonga. Penepyo toera pisimbiswe pire pidalonga Mulungu na mulomo wa mporofeta Izaya pa thangwi ya Yezu kuti: “Uyu ndiye nyabasa wanga, adasankhula Ine, wanga wakufunika, ule ananditsandzaisa. Ndinaikha Nzimu wanga muna Iye, pontho Iye anati alonge kuna madzindza onsene, kuti Ine ndinadza kacita kufuna kwanga. Iye nkhabe kudza kalongana na munthu peno kudza kakhuwa. Pontho fala yace nkhabe kudza kabveka na anthu m'miseu. Nkhabe kudza katema ntete wa kupanduka, pontho nkhabe kudza kathimisa nyale ya kupucira, mpaka kufuna kwanga kwakunda. Na tenepo, mbumba yonsene ya pantsi inadza kakhala na cidikhiro muna iye.” Na tenepo, anthu an'dzesera Yezu mamuna m'bodzi wa boli-boli pontho mbakhala bewewe akhadaphatwa na mizimu ya kuipa. Yezu amuwangisa, mamuna mbakwanisa kulonga na kuona. Anthu akhadzumatirwa napyo mbakhabvundzisa kuti: “Kodi siye unowu tayu mwana wa Dhavidhi?” Mbwenye afarisi na kubva penepyo, akhadungunya mbakhalonga tenepa: “Ndiye basi Bhelizebhu, nkulu wa madimonyo, anampasa mphambvu za kuthamangisa madimonyo.” Yezu na kudziwa manyerezero awo, aapanga tenepa: “Umambo onsene ungagawika okha-okha, unamalisira kufudzika. Sawa-sawambo na nzinda peno nyumba, ingagawika yokhene, inamalisira kufudzika. Ngakhala Sathani asathamangisa Sathani, nkhulongera kuti iye agawika ekha ene. Na tenepo, umambo wace unakhala tani pontho na mphambvu? Ngakhala Ine ndisathamangisa madimonyo na mphambvu za Bhelizebhu, ana anu asaathamangisa na mphambvu za ani? Na thangwi eneyo, iwo anati akukoneseni. Mbwenye ngakhala Ine ndisathamangisa mizimu ya kuipa na mphambvu za Nzimu wa Mulungu, nkhulongera kuti Umambo wa Mulungu wafika muna imwe. “Peno, munthu anakwanisa tani kuphweta nyumba ya ndzace wa mphambvu toera kum'bera pinthu pyace, pakutoma mbadzati kum'manga? Angamala, anakwanisa kum'bera n'nyumba mwace. “Anakhonda kukhala na Ine, unowu ndiye nyamalwa wanga. Anakhonda kundiphedza kugumanya, asamwaza. Na thangwi eneyo, ndisakupangani kuti: kudawa peno kuxola konsene kunalekererwa. Mbwenye ule anaxola Nzimu Wakucena, nkhabe kudza kalekererwa. Onsene ale anandilonga kuipa Ine, Mwana wa Munthu, anadza kalekererwa. Mbwenye ale anapokanya Nzimu Wakucena, nkhabe kudza kalekererwa, pantsi pano na kudzulu kwene.” “Lang'anani, muti wadidi usabala nsapu wadidi, pontho muti wa kuipa usabala nsapu wa kuipa. Thangwi muti usadziwika na nsapu wace. Dzindza ya m'bobo! Munalonga tani pinthu pyadidi, anthu a kuipa ninga imwe? Thangwi mulomo usalonga pire pidadzala muntima. Munthu wadidi asabulusa pinthu pyadidi pidakoya iye muntima wace wadidi. Mbwenye munthu wa kuipa asabulusambo pinthu pya kuipa pidakoya iye muntima wace wa kuipa. Ndinakupangani kuti ntsiku inatonga Mulungu dziko, m'bodzi na m'bodzi analimira pamaso pa Mulungu na mafala ace onsene a kuipa akhadalonga iye. Thangwi mafala ako ndiwo anadza kakupemberesa peno kakukonesa.” Na tenepo, anyakudziwisa a Mwambo na afarisi aphemba Yezu kuti: “Mpfundzisi, tipangizeni cidzindikiro cibodzi ca cirengo.” Yezu aatawira tenepa: “Anthu a midzidzi ino mbakuipa pontho mbakhonda kunyindirika! Asaphemba cidzindikiro ca cirengo, mbwenye nkhabe cidzindikiro cinango cinafuna kudza kaona iwo, kupiringana cidzindikiro ca mporofeta Djona. Thangwi sawa-sawa ninga Djona amala ntsiku zitatu, masiku na masikati m'mimba mwa nyama ikulu ya m'madzi, tenepambo Ine Mwana wa Munthu, ndinadza kakhala ntsiku zitatu, masiku na masikati, pantsi pa mataka. Pa ntsiku ya kutongwa kwa dziko na Mulungu, anthu a ku Ninivi anadza kalamuka mbakonesa anthu a dziko ino, thangwi abva kucenjezwa kwawo na Djona, mbachunyuka kudawa kwawo. Mbwenye ali pano nkulu kupiringana Djona. Pontho mambo wa nkazi wa ku khundu ya bangwe anati aatonge anthu a ntsiku zino mbaakonesa. Thangwi iye abwera kubulukira kudadhoroma dziko toera kudza kabva udziwisi wa Salomau, mphapo cincino lang'anani, ali pano nkulu kupiringana Salomau.” “Nzimu wa kuipa ungabuluka muna munthu, usaenda mbundzendza-ndzendza n'thando kusaka mbuto ya kupuma. Ungakhonda kugumana mbuto, usalonga kuti: ‘Ndinabwerera ku nyumba kwanga kudabuluka ine.’ Ungafika, asaigumana nkhabemo munthu, yamala kupsairwa na kusasanyirwa. Na tenepo, unabuluka mbuyenda kakwata mizimu inango minomwe ya kutekera kakamwe kupiringana iye, mbipita yonsene kakhala mwenemu. Penepo makhaliro ace munthu ule, anatekereratu kakamwe kupiringana makhaliro ace akutoma. Ndipyo pinafuna kudza kacitika kuna anthu awa a kuipa a ntsiku zino.” Pa n'dzidzi ukhalonga Yezu na mbumba, afika abale ace na mai wace mbakhala kunja, mbakhasaka kuti alonge na Iye. Na tenepo, munthu m'bodzi aenda kampanga Yezu kuti: “Mai wako na abale ako ali kunja uku, asafuna kulonga na iwe. ” Yezu abvundzisa tenepa: “Mbani mai wanga, pontho mbani abale anga?” Pakumala athonya anyakupfundza ace mbalonga tenepa: “Awa ndiwo mai wanga na abale anga. Thangwi ule anacita kufuna kwa Baba wanga ali kudzulu, unowu ndiye m'bale wanga wa mamuna, mwana-nkazi wanga, na mai wanga.” Ntsiku eneyi ibodzi-bodzi, Yezu abuluka ku nyumba mbaenda kakhala pantsi n'gombe mwa nyandza. Na tenepo, wagumanyikana mwinji ukulu wa anthu n'khundu mwace. Na thangwi eneyo, Iye akwira m'bote mbakhala pantsi, mbumba yonsene ikhakhala mbidalimira n'gombe mwa nyandza. Pontho, Iye akhapfundzisa pinthu pizinji na misanje, mbalonga tenepa: “Mamuna m'bodzi abuluka kwenda kawaza mbeu. Mukhawaza iye, mbeu zinango zagwa n'khundu mwa njira. Na tenepo, zabwera mbalame mbamala kuzidzonkhona. Khundu inango ya mbeu yagwa pa mbuto ya myala, pakhagumanika mataka pang'ono basi. Penepo mbeu yamera na mwansanga thangwi mataka akhadacepa. Mbwenye na kupisa kwa dzuwa, umera wamala kupya mbuuma na thangwi ya kusowa michici. Khundu inango ya mbeu yagwa pa minga. Minga yakula, mbeu mbizicimwana kufantsa. Mbwenye mbeu inango yagwa pa mataka adidi. Na tenepo, yabala misapu: makumatatu, makumatanthatu, inango dzana pa mbeu ibodzi.” Yezu athimiza na kulonga kuti: “Ule ana makutu a kubva, mbabve!” Na tenepo, Yezu abvundziswa na anyakupfundza ace kuti: “Thangwi yanji musalonga na misanje kuna anthu?” Yezu atawira tenepa: “Kuli imwe, mwapaswa udziwisi wa kudziwa pyakubisala pya Umambo wa kudzulu, mbwenye iwo nkhabe. Thangwi ule anapyo, anapaswa pontho pinango, pontho anakhala na pizinji. Mbwenye ule adapisowa, anapokoserwa na pire pyene pina iye. Ndi thangwi eneyo ndisaapanga na misanje. “ ‘Thangwi asaona, mbwenye nkhabe onesesa. Asabva, mbwenye nkhabe bvesera, pontho nkhabe bvesesa.’ Na tenepo, pyasimbiswa kuna iwo pire pikhadapangwa mporofeta Izaya na Mulungu kuti: “ ‘Imwe munabva, mbwenye nkhabe kudza kabvesesa tayu. Munaona, mbwenye nkhabe kudza kaonesesa tayu. Thangwi mbumba iyi yauma ntima. Yafunga makutu mbiphopa maso. Mbapidakhonda kukhala tenepa, maso awo mbadaona, makutu awo mbadabva. Pontho mbadakwanisa kudzindikira na ndzeru zawo, mbabwera kuna Ine, Ine mbidaawangisa.’ Mbwenye kutsandzaya nkhwanu imwe, thangwi maso anu ali kuona, makutu anu ali kubva. Thangwi ndimo mwene Ine ndisakupangani kuti: Maporofeta azinji, na anthu azinji akulungama, akhafunambo kuona penepi pinaona imwe, mbwenye acimwana kupiona. Pontho akhafunambo kubva pinabva imwe, mbwenye acimwana kupibva. “Bveserani, mphapo, pinalongera nsanje wa nyakuwaza mbeu. Ale anabva Mphangwa Zadidi za Umambo wa Mulungu mbakhonda kuzibvesesa, asabwera nyamalwa kudza kabulusa pire pidapita m'mitima. Eneyi ndiyo mbeu idagwa m'mbale mwa njira. Mbeu idagwa pa mataka a myala isalongera ale adabva Mphangwa Zadidi mbazitambira na kukomerwa. Mbwenye nkhabe khala n'dzidzi ukulu ene, thangwi nkhabe michici. Na tenepo, nyatwa zingaagwera, peno angachingwa na thangwi ya fala ya Mulungu, asabwerera n'nduli na mwansanga. Mbeu idabzalwa pakati pa minga, isalongera ale anabva Mphangwa Zadidi mbakhonda kubala misapu, na thangwi ya kukula kwa pinthu pya kunyerezera pya padziko ino, pontho na kusaka kupfuma, pisacita kuti fala ya Mulungu ikhonde kufantsa pontho ikhonde kubala misapu. Mbwenye mbeu idagwa pa mataka adidi isalongera ale anabva fala ya Mulungu mbaibvesesa. Na tenepo, awa asabaladi misapu yakukwana, makumatatu, anango makumatanthatu, anangombo dzana pa mbeu ibodzi.” Yezu alonga nsanje unango kuna anthu kuti: “Umambo wa kudzulu walandana na mamuna m'bodzi adabzala mbeu yadidi m'munda mwace. Mbwenye na masiku mwace, anthu onsene mbakhagona, abwera nyamalwa wace mbabzala tsanga ya nyakasongole pakati pa tirigu, mbaenda pyace. Pidakula umera wa tirigu mbutumbuka, tsanga ya nyakasongole yaonekambo. “Na tenepo, abwera anyabasa a mwanacinthu munda, mbampanga tenepa: ‘Mbuya, kodi mbeu idabzala imwe m'munda mwanu ikhali yadidi tayu? Mphapo tsanga iyi ya nyakasongole yabuluka kupi?’ “Mbwenye iye aatawira tenepa: ‘Ndi nyamalwa m'bodzi adacita penepi.’ “Na tenepo, anyabasa am'bvundza kuti: ‘Musafuna kuti tiyende kaidule?’ “Mwanacinthu munda aatawira kuti: ‘Nkhabe, isiyeni! Gopa pa kudula nyakasongole munadza kadulambo pabodzi na tirigu ene. Siyani pyonsene pikule pabodzi, mpaka n'dzidzi wa kubvuna. Pa kubvuna, ndinaapanga anyakubvuna kuti pakutoma agumanye nyakasongole mbamanga mapuli toera apisiwe na moto. Angamala agumanyembo tirigu aikhe n'cikwa mwanga.’ ” Yezu aapanga nsanje unango, mbalonga tenepa: “Umambo wa kudzulu walandana na mbeu ibodzi inacemerwa muxtarda idabzaliwa na mamuna m'bodzi m'munda mwace. Iyo ndi mbeu ing'ono kakamwe kupita mbeu zinango. Mbwenye ingamera isakuliratu kakamwe kupiringana mbeu zinango zonsene, mpaka kufikira kukhala muti wakukhalambo na nthawi. Mbalame mbizibwera kamanga ntsandza zawo mu nthawi zace.” Yezu aapanga nsanje unango, mbalonga kuti: “Umambo wa kudzulu walandana na ntombwe wa kutupisa mikate, udakwata nkazi mbaubvungaza na ntsengwa zitatu za ufa, mpaka kutupisa ufa onsene.” Yezu alonga kuna anthu, pinthu pyonsene ipi na misanje. Nkhabe cikhaapanga Iye mbakhonda kulonga na misanje. Pyonsene ipi ndi toera pisimbiswe pire pikhadalonga mporofeta kuti: “Ndinadza kalonga na misanje na iwo, pontho ndinadza kafokotoza pinthu pidabisala kutomera pakutoma kwa dziko.” Na tenepo, Yezu pakumala kupanganizana na mbumba, aenda ku nyumba. Penepo afika anyakupfundza ace mbam'phemba kuti: “Tipfundziseni pinalongera nsanje wa nyakasongole, m'munda.” Yezu aatawira tenepa: “Adabzala mbeu yadidi ndine, Mwana wa Munthu. Munda ndi dziko ya pantsi pano. Mbeu yadidi ndi ana a Umambo wa Mulungu. Tsanga ya nyakasongole ndi ana a Nyamalwa. Nyamalwa adabzala nyakasongole ndi Dyabu. Kubvuna ndi kumala kwa dziko. Anyakubvuna ndi anju za Mulungu. Ninga nyakasongole asagumanyiwa mbaenda kapisiwa pa moto, tenepa pinacitikambo pakumala kwa dziko. Ine, Mwana wa Munthu, ndinatuma anju zanga kwenda kabulusa mu umambo pyonsene pinagwegwedusa, na onsene anadawa, toera aaponye mu moto wa kugaka. Mwenemu anthu anati alire na kukukuta mano. Na tenepo, anthu akulungama anayetimira ninga dzuwa mu Umambo wa Babawo. Ana makutu a kubva mbabve.” “Umambo wa kudzulu walandana na mpfuma yakubisiwa m'munda. Munthu anailokota asaibisa pontho. Mbaenda na kukomerwa konsene kagulisa pinthu pyace pyonsene pina iye, mbagula munda unowu. Pontho Umambo wa kudzulu usalandaniswa na mamuna m'bodzi nyamalonda anasaka myala yakubalika kakamwe. Na tenepo, angaugumana mwala wa ntengo ukulu, asaenda kagulisa pinthu pyonsene pina iye, mbagula mwala unowu.” “Pontho, Umambo wa kudzulu usakhala ninga kokota inagwisirwa m'bara mbikokota nyama za m'madzi za ntundu onsene. Ingadzala kokota na nyama, anyakokota asaikwewa kuntunda, mbakhala pantsi, mbatoma kuzisankhula. Nyama zadidi mbaziyikha m'pitundu, mbwenye zakuipa mbazitaya kunja. Ndi sawa-sawambo ninga pinafuna kudza kacitika pakumala kwa dziko. Zinabwera anju za Mulungu, mbizibulusa anthu akuipa pakati pa anthu akulungama. Na tenepo, iwo anaaponya anthu akuipa mu moto wa kugaka. Mwenemu anthu anati alire na kukukuta mano.” Yezu aabvundza anyakupfundza ace kuti: “Mwapibvesa pyonsene ipi?” Iwo antawira tenepa: “Ande, Mbuya!” Na tenepo, Yezu aapanga kuti: “Na thangwi eneyo, nyakudziwisa onsene wa Mwambo, anatawira cipfundzo ca Umambo wa kudzulu, asalandana na baba wa pa nyumba anadziwa kubulusa pa mpfuma yace pinthu pipsa na pyakale.” Yezu pidamala iye kulonga misanje eneyo abuluka penepo. Pidafika iye ku dziko kwawo atoma kupfundzisa mbumba n'kati mwa nyumba ya kuphemberera. Ale akham'bvesera akhadzumatirwa napyo mbakhalonga tenepa: “Augumana kupi udziwisi unowu, na mphambvu zenezi za kucita pirengo? Siye unowu tayu mwana misiri karipintero? Mai wace siye Mariya tayu? Pontho abale ace siwo enewa anacemerwa Tiyago na Zuze na Simau na Djuda tayu? Anaakazi ace onsene nkhabe kukhala na ife kuno? Mphapo pyonsene ipi pyabulukira kupi?” Na tenepo, iwo akhaipirwa na thangwi yace. Mbwenye Yezu aapanga tenepa: “Mporofeta asalemebza mbuto zonsene. Mbwenye nkhabe kulemebza ku dziko kwace pontho na pa nyumba pace.” Na thangwi ya kukhonda kutawira kwawo, Yezu akhonda kucita pirengo pizinji kweneko. Pa n'dzidzi unowu, mambo Herodhi, ntongi wa dziko ya Galileya, abva mbiri ya Yezu. Na tenepo, aapanga anyabasa ace akhakhala na iye kuti: “Mamuna uyu ndi Juwau Bhatixta adalamuka pa kufa. Na thangwi eneyo, zisaoneka muna iye mphambvu za kucita pirengo.” Thangwi mambo Herodhi akhadatuma anthu kaphata Juwau, mbam'manga mbampitisa n'kaidi. Iye acita penepyo na thangwi ya Herodhiya, nkazi wa m'bale wace Herodhi, anacemerwa Filipi. Thangwi Juwau akhampanga kazinji kene Herodhi kuti: “Mphyakuipa kucita banja na nkazi wa m'bale wako.” Na tenepo, Herodhi akhafuna kumupha, mbwenye akhagopa mbumba, thangwi mbumba yonsene ikhan'dziwa Juwau kuti ndi mporofeta. Ntsiku idacita Herodhi caka, mwana wace Herodhiya wankazi, abvina kakamwe kwakudzumisa patsogolo pa anthu onsene. Na tenepo, Herodhi akomerwa pikulu kakamwe, mbapikira na kudumbira kuna mwana, kuti anadza kampasa pyonsene pinaphemba iye. Na tenepo, mwana, na kupangiwa na mai wace, alonga tenepa: “Ndisafuna kuti mundipase, m'mbale, nsolo wa Juwau Bhatixta.” Mambo Herodhi na kupibva, atsukwala napyo. Mbwenye na thangwi ya kudumbira kudacita iye, pontho na thangwi ya anthu akhali na iye pa phwandu, ansiya kuti apasiwe pire pikhaphemba iye. Na tenepo, atuma munthu kuti aende kagwande nsolo wa Juwau n'kaidi. Penepo an'dzesera nsolo m'mbale, mbaupasa ntsikana, iye mbaendambo kapasa mai wace. Anyakupfundza a Juwau abwera mbakwata manungo ace mbaenda kaaikha n'nthumbi. Buluka penepo aenda kalonga kuna Yezu. Yezu mudabva iye mphangwa zenezi, abuluka ekha ene na bote mbaenda mbuto inango ya kubisala yace ekha. Mbwenye mbumba na kupibva pinthu penepyo, yabuluka m'pisa, mbiyenda mbintowera na ntunda. Pakuchita m'bote, Yezu aona mwinji wa anthu, mbaabvera ntsisi pontho mbaakondzera atenda awo. Pikhadoka dzuwa, anyakupfundza ace anfendedzera mbalonga tenepa: “Dzuwa iri kudoka, pontho muno ndi n'thando. Apangeni anthu awa kuti aende pyawo m'pisa kagula pyakudya.” Mbwenye Yezu atawira kuti: “Nkhabe kufunika kuti anthu abuluke. Apaseni imwe cakudya toera adye.” Mbwenye iwo atawira kuti: “Ife pano tina mikate mixanu basi, na nyama ziwiri za m'madzi.” Na tenepo, Yezu aapanga kuti: “Ndipaseni kuno.” Penepo, aikhazika mbumba yonsene pantsi, pa cimbanjiri. Pakumala Yezu akwata mikate mixanu na nyama ziwiri, alang'ana kudzulu mbapereka takhuta kuna Mulungu. Buluka penepo, aimenya-menya mikate mbaipasa anyakupfundza ace, iwo mbaigawizambo mbumba. Onsene adya mbakhuta. Pakumala anyakupfundza alokotera mapindi adasala a mikate, mbadzaza na iwo pitundu khumi na piwiri. Nsoka udadya ukhali wa pikwi pixanu (5.000) pya amuna, mbakhonda kulengeswa akazi na ana. Na mwansanga, Yezu aapanga anyakupfundza ace kuti apakire m'bote, atsogole aende ntunda unango wa nyandza, Iye mbasala na panganizana na mbumba. Pakumala kupanganizana na mbumba, Yezu akwira pa phiri ekha ene kwenda kaphembera. Iye akhala penepo ekha ene mpaka kudoka kwa dzuwa. Na tenepo, bote ikhali kutali kakamwe na ntunda. Pontho ikhamenyiwa na mabimbi, thangwi akhaenda kukhabuluka mphepo. Mangwana mwace, m'bambakuca, Yezu aenda kuna iwo mbakhafamba padzulu pa madzi. Iwo na kumuona mbakhafamba padzulu pa madzi, atutumuka mbalonga kuti: “Ndi ciphoko!” Na tenepo, akhuwa onsene na kugopa. Mbwenye pa n'dzidzi ubodzi-bodzi Yezu aapanga kuti: “Khalani na cipapu! Ndine pano! Lekani kugopa!” Na tenepo, Pedhru alonga kuna Yezu kuti: “Mbuya, ngakhala ndimwe, ndicemereni ndidze kuna imwe mbandifambambo padzulu pa madzi.” Yezu ampanga kuti: “Bwera!” Pedhru achita m'bote, mbafamba padzulu pa madzi mbakhaenda kuna Yezu. Mbwenye na kuona kuti mphepo yawanga, agopa. Na tenepo, atoma kuririma, mbakhuwa tenepa: “Mbuya, ndipulumusenimbo!” Na mwansanga, Yezu afuthula nkono wace, amphata mbampanga kuti: “Munthu wa kukhulupira pang'ono, thangwi yanji wapenula muntima mwako?” Na tenepo, iwo apakira m'bote, mphepo mbimatama. Ale anyakupfundza akhali m'bote, amulambira Yezu, mbalonga kuti: “Imwe ndimwedi Mwana wa Mulungu!” Pidawambuka iwo ntunda unango wa nyandza, afika pa cisa ca Djenezareti. Pa n'dzidzi unowu anthu an'dzindikira Yezu, mbaenda kapangambo andzawo onsene a pa cisa. Na tenepo, anthu onsene akhadza na atenda awo kuna iye. Anthu akhaphemba Yezu kuti aasiye akhuye n'khundu mwa nguwo yace basi. Na tenepo, onsene akhan'khuya, akhawangiswa. Na tenepo, afarisi na anyakudziwisa a Mwambo anango akhabuluka ku Djerusalema, aenda kuna Yezu, mbam'bvundza tenepa: “Kodi ndi thangwi yanji anyakupfundza ako nkhabe funa kutoweza mitemo ya a mbuya athu? Thangwi iwo nkhabe samba manja pa kudya.” Yezu aatawira tenepa: “Thangwi yanji imwembo musakhonda kukoya matongero a Mulungu mbamutoweza mitemo yanu? Thangwi Mulungu alonga kuti: ‘Lemedza baba wako na mai wako’ pontho ‘ule anakhonda kulemedza baba wace peno mai wace, anatongwa kuphiwa.’ Mbwenye imwe musalonga kuti munthu angalonga kuna mai wace peno baba wace kuti: ‘Pinthu pikhafuna imwe kutambira na ine, ndi ntsembe ya Mulungu,’ munthu unowu nkhabe kutongwabve kulemedza baba wace na mai wace. Tenepa imwe musafudza fala ya Mulungu, na thangwi ya mitemo yanu idacita imwe. Anyauthambi! Ndimo mwene pidalonga mporofeta Izaya na thangwi yanu kuti: “ ‘Mbumba iyi isandisimba na mulomo wawo, mbwenye mitima yawo, iri kutali na ine. Iwo asandilambira pa pezi. Thangwi asapfundzisa mitemo yakucitwa na anthu.’ ” Yezu aucemeresa pontho mwinji wa anthu mbaapanga tenepa: “Bvani, pontho mubvesese! Cinthu cinaswipisa munthu, si cire cinapita na pa mulomo tayu. Mbwenye ndi cire cinabuluka pa mulomo pace. Ceneco ndico cinaswipisa munthu.” Na tenepo, anyakupfundza ace anfendedzera dhuzi mbampanga tenepa: “Kodi imwe musadziwa kuti afarisi aipirwa kakamwe na mafala anu?” Mbwenye Yezu aatawira kuti: “Miti yonsene idakhonda kuchekiwa na Baba wanga wa kudzulu inaduliwa. Asiyeni pyawo. Ndi maboli-boli anaphata nsenzi maboli-boli andzawo. Lang'anani, boli-boli angaphata nsenzi boli-boli ndzace, mu uwiri mwawo anadza kagwa n'djenje.” Penepo, Pedhru am'phemba kuti: “Mbuya, tichululireni nsanje unowu!” Mbwenye Yezu aapanga tenepa: “Na imwe ene mudzati kupibvesesa tayu? Kodi imwe nkhabe kupidziwa kuti pyonsene pinapita na pa mulomo pisaenda n'cifu, pingabuluka mwenemu, mbapitaiwa pontho kunja? Mbwenye pinthu pinabuluka pa mulomo pa munthu ndi pinthu pisabuluka muntima. Penepyo ndipyo pinaswipisa munthu. Thangwi muntima ndimo munabuluka manyerezero a kuipa, upandu, upombo, lukwali, umbava, kulonga uthambi, na kuxola Mulungu. Penepyo ndipyo pinaswipisa munthu. Mbwenye pyakukhonda kusamba manja pa kudya, penepyo nkhabe kuswipisa munthu.” Yezu abuluka penepo, mbaenda ku cisa cikhali dhuzi na nzinda wa Tiru na wa Sidhoni. Na tenepo, nkazi m'bodzi wa ku Khanani, akhakhala ku dziko eneyo, aenda kuna Yezu, mbam'phemba na kukhuwa tenepa: “Mbuya, Mwana wa Dhavidhi, ndibverenimbo ntsisi! Mwana wanga wankazi ali kuthabuka kakamwe na mizimu ya kuipa.” Mbwenye Yezu amatama mbakhonda kuntawira. Penepo anyakupfundza ace anfendedzera mbam'phemba, mbalonga kuti: “N'thamangiseni, thangwi nkhabe funa kumatama. Ali kudza mbakhuwa basi n'nduli mwathu.” Yezu aatawira kuti: “Ine ndatumiwa kuti ndiyende kuna mabira akutaika a ana a Izarayeli.” Mbwenye nkazi abwera kan'godamira mbam'phemba kuti: “Mbuya, ndiphedzenimbo!” Yezu antawira tenepa: “Si pyadidi tayu kubulusa nkate wa ana mbatiuponyera pinchinja pya anambwa.” Mbwenye nkazi antawira tenepa: “Ande Mbuya, mbwenye pinchinja pya anambwa, pisalokoterambo umbwera-mbwera unagwa pa thando panadya a mbuya awo.” Penepo Yezu antawira kuti: “Ande, mai, kukhulupira kwako nkhukulu. Mphapo mbapicitike ninga munafunira iwe.” Na tenepo, kubulukira pa n'dzidzi ubodzi-bodzi mwana wace awanga. Yezu abuluka penepo mbaenda na n'khundu-n'khundu mwa nyandza ya Galileya, mpaka pa phiri. Iye akwira pa phiri mbakhala pantsi. Penepo anthu azinji aenda kuna Iye na atenda awo a kusiyana-siyana, ninga anyampfutete, anyakulamala, maboli-boli, mabewewe na atenda anango azinji. Onsene akwatiwa mbaenda patsogolo pa Yezu, Iye mbaawangisa. Mbumba yonsene yadzumatirwa napyo, na kuona mabewewe mbalonga, anyakulamala mbawanga, anyampfutete mbafamba, maboli-boli mbaona. Na tenepo, akhakuza napyo Mulungu wa Izarayeli. Buluka penepo, Yezu acemera anyakupfundza ace mbaapanga tenepa: “Ndina ntsisi na mwinji wa anthu uyu, thangwi ana ntsiku zitatu mbali na Ine, pontho iwo nkhabe cakudya. Ine nkhabe funa kuaendesa na njala, gopa anakomoka n'njira.” Penepo anyakupfundza ace antawira tenepa: “Kodi n'thando ninga muno, inagumanika kupi mikate yakukwana kukhutisa mwinji uyu wa anthu onsene?” Yezu aabvundza tenepa: “Muna mikate mingasi penepo?” Iwo atawira kuti: “Tina mikate minomwe, na nyama zingasi za m'madzi.” Yezu aipanga mbumba kuti ikhale pantsi. Buluka penepo, akwata mikate minomwe ire na nyama za m'madzi, mbapereka takhuta kuna Mulungu, aigwanda mbaipasa anyakupfundza ace, iwo mbaigawirambo mbumba. Onsene adya mbakhuta. Pontho, na mapindi akhadasala, akwanisa kudzadza pitundu pinomwe. Ntengo wa anthu ukhadadya ukhali wa pikwi pinai (4.000) pya amuna basi, mbatikhonda kulengesa akazi na ana ang'ono. Mudamala Iye kuabweza, Yezu apakira m'bote, mbaenda ku cisa ca Magadani. Afarisi na asadhusi anango, abwera kuna Yezu kudza kamulesera, mbam'phemba kuti aapangize cirengo ca kudzulu. Mbwenye Yezu aatawira na mafala awa: “Na maulo munacita dzuwa sandza, mungaona kudzulu kwafuira, imwe musalonga kuti: ‘Mangwana kunacerwa mwadidi.’ Mangwana mwace na macibese, mungaona mitambo kudzulu, musalonga tenepa: ‘Lero kunja kwaipa.’ Musadziwa kuchulula pidzindikiro pya kudzulu, mbwenye musacimwana kuchulula pidzindikiro pya midzidzi ino! Anthu a midzidzi ino mbakuipa pontho mbakukhonda kunyindirika! Asaphemba cidzindikiro ca cirengo, mbwenye nkhabe cidzindikiro cinango cinafuna kudza kaona iwo, kupiringana cidzindikiro ca mporofeta Djona!” Buluka penepo, Yezu aasiya mbabuluka pyace. Pa kuwambuka kwenda ntunda unango wa nyandza, anyakupfundza a Yezu aduwala kukwata mikate. Penepo Yezu aapanga kuti: “Cenjerani pontho mucite mphole na ntombwe wa kutupisa mikate wa afarisi na wa asadhusi.” Mbwenye iwo akhaketesana okha-okha mbakhalonga kuti: “Iye asalonga penepi thangwi ife tidabweresa mikate tayu.” Yezu na kubva kuketesana kukhacita iwo, aabvundza tenepa: “Imwe anthu akukhulupira pang'ono! Thangwi yanji musaketesana mwekha-mwekha na thangwi ya kusowa mikate? Kodi mudzati kupibvesesa tayu? Imwe nkhabe kukumbuka mikate mixanu idadyesa ife nayo pikwi pixanu (5.000) pya anthu? Ndi pitundu pingasi pidadzaza imwe na mapindi akusala a mikate? Pontho imwe nkhabe kukumbuka mikate ire minomwe idadyesa ife nayo pikwi pinai (4.000) pya anthu? Ndi pitundu pingasi pidadzala na mapindi a kusala? Mwakhonda tani mphapo kupibvesa kuti Ine sidalongera na thangwi ya mikate? Mbwenye ndalonga kuti mucenjere na ntombwe wa kutupisa mikate wa afarisi na asadhusi.” Na tenepo, anyakupfundza ace adza kapibvesa kuti Yezu hakhalongera ntombwe wa kutupisa mikate tayu, mbwenye akhalongera na thangwi ya mapfundzisiro a afarisi na asadhusi. Yezu pa kufika dhuzi na nzinda wa Sezareya ya Filipi, abvundzisa anyakupfundza ace na mafala awa: “Kodi mbumba isalonga kuti Ine, Mwana wa Munthu, ndine ani?” Iwo atawira tenepa: “Anango asalonga kuti ndimwe Juwau Bhatixta. Anango, asalonga kuti ndimwe Eliya. Anangombo asalonga kuti ndimwe Jeremiya peno m'bodzi wa maporofeta.” Yezu aabvundza pontho kuti: “Kodi imwembo musalonga kuti Ine ndine ani?” Simau Pedhru atawira tenepa: “Imwe ndimwe Kirixtu, Mwana wa Mulungu wa m'maso.” Yezu antawira tenepa: “Lang'ana, Simau mwana wa Djona, kutsandzaya mbakukhale muna iwe. Thangwi penepyo hudachululirwa na munthu tayu, mbwenye na Baba wanga ali kudzulu. Pontho Ine ndinakupanga kuti: Iwe ndiwe Pedhru. Padzulu pa mwala unowu ndinamanga gereja yanga. Na tenepo, kufa nkhabe mphambvu za kukunda gereja yanga. Ine ndinakupasa cavi ca Umambo wa kudzulu. Pire pinamanga iwe pantsi pano, pinamangwambo kudzulu. Mbwenye pinasudzula iwe pantsi pano, pinasudzulwambo kudzulu.” Na tenepo, Yezu acenjeza anyakupfundza ace kuti aleke kupanga munthu unango kuti Iye ndi Kirixtu. Kubulukira n'dzidzi unowu, Yezu atoma kupangisa kuna anyakupfundza ace, kuti Iye asafunika aende ku Djerusalema, aone nyatwa zizinji na mathubu, na akulu aanyantsembe, na anyakudziwisa a Mwambo, pontho aphiwe. Mbwenye pakupita ntsiku zitatu, anadza kalamuka pa kufa. Penepo Pedhru acemera Yezu pa khundu, mbatoma kunsandika tenepa: “Mbuya, penepyo na lini pinadza kacitika kuna imwe!” Mbwenye Yezu azungunuka kuna Pedhru mbampanga kuti: “Buluka Sathani pamaso panga! Kwa Ine, iwe ndiwe mwala wa kundigwegwedusa. Thangwi pinanyerezera iwe si pya Mulungu tayu, mbwenye ndi pya anthu.” Buluka penepo, Yezu alonga kuna anyakupfundza ace mafala awa: “Ule anafuna kunditowera asatongwa akhondeke ekha ene, akwate ntanda wace anditowere. Thangwi ule anafuna kukoya moyo wace, anauluza. Mbwenye ule analuza moyo wace na thangwi yanga, anaugumana. Thangwi pinaphedzeranji kuna munthu kuwina dziko yonsene ya pantsi mbaluza nzimu wace? Peno ndi ninji cinanakwanisa kupereka munthu toera acinje na nzimu wace? Thangwi Ine, Mwana wa Munthu, ndinabwera na mbiri ya Baba wanga, pabodzi na anju zanga. Penepo ndinapasa m'bodzi na m'bodzi sawa-sawa na basa yace idacita iye. Ndimo mwene ndisakupangani kuti, anango ali pano, nkhabe kufa mbadzati kuona kubwera kwa Ine Mwana wa Munthu mu Umambo wanga.” Pakupita ntsiku zitanthatu, Yezu akwata Pedhru, na amuna awiri muubale mwawo anacemerwa Tiyago na Juwau, okha ene, mbaenda na iwo pa phiri yakulapha kakamwe. Penepo Yezu aphinduka makhaliro ace pamaso pawo. Nkhope yace yatoma kuyetima ninga dzuwa, nguwo zace zadza kaceneratu kakamwe ninga cieza. Pa n'dzidzi ubodzi-bodzi, abulukira patsogolo pawo Mozesi na Eliya, mbakhaceza na Yezu. Na tenepo, Pedhru alonga kuna Yezu kuti: “Mbuya, mphyadidi tikhale pyathu pano! Mungafuna ine ndinamanga makumbi matatu. Ibodzi yanu, ibodzi ya Mozesi, inango ya Eliya.” Pedhru mbadzati kumala kulonga, khole ibodzi ya kuyetimira yaagudumira. Pa khole pabveka fala ibodzi ikhalonga tenepa: “Uyu ndi Mwana wanga wakufunika ananditsandzaisa. M'bvereni!” Anyakupfundza a Yezu na kupibva, agopa kakamwe mbakotamisa nkhope mpaka pantsi, mbamulambira. Mbwenye Yezu aafendedzera dhuzi mbaakhuya mbalonga kuti: “Lamukani! Lekani gopa!” Pidalamuka iwo, hadaonabve munthu unango tayu. Aona Yezu ekha basi. Mukhachita iwo pa phiri, Yezu aapanga tenepa: “Lekani kupanga munthu m'bodzi pire pidaona imwe, mpaka kufikira kuti Ine, Mwana wa Munthu, ndalamuka pa kufa.” Na tenepo, anyakupfundza ace am'bvundzisa kuti: “Thangwi yanji mphapo anyakudziwisa a Mwambo asalonga kuti pisafunika Eliya abwere pa kutoma?” Yezu aatawira tenepa: “Ndimo mwene, Eliya anabwera kudza kasasanyira pinthu pyonsene. Mbwenye Ine ndisakupangani kuti: Eliya abwera kale, pontho iwo acimwana kun'dzindikira. Mbwenye ancitira pyonsene pikhafuna iwo. Tenepambo, Ine, Mwana wa Munthu, ndinadza kaoneswa nyatwa na iwo.” Kubulukira penepo, anyakupfundza ace adza kadzindikira kuti Yezu akhalonga Juwau Bhatixta. Mudafika iwo pa mbuto ikhakhala mwinji ukulu wa anthu, abwera mamuna m'bodzi kuna Yezu, mbagodama patsogolo pace, mbalonga tenepa: “Mbuya, ndibverenimbo ntsisi. Thangwi mwana wanga asagwa njiri mbathabuka pikulu. Kazinji kene asagwa pa moto, panango m'madzi. Ndabwera na iye kuna anyakupfundza anu, mbwenye iwo ancimwana kumuwangisa.” Yezu atawira tenepa: “Imwe anthu akusowa cikhulupiro! Ndinakhala na imwe mpaka lini? Mpaka lini ndinakuonerani nyatwa? M'bwereseni pano m'phale.” Na tenepo, Yezu aipwekera dimonyo, iyo mbibuluka m'manungo mwa m'phale. Kutomera n'dzidzi unowu, m'phale awanga. Buluka penepo anyakupfundza a Yezu anfendedzera mbam'bvundzisa pa khundu kuti: “Thangwi yanji ife taucimwana kuubulusa nzimu unowu?” Yezu aatawira tenepa: “Ndi thangwi kukhulupira kwanu kwacepa. Ndimo mwene ndisakupangani kuti mungakhala na cikhulupiro ca kulandana na thunga ya mbeu ing'ono, munakwanisa kupanga phiri iyi kuti: ‘Buluka pano uyende kule,’ iyo inaenda. Nkhabe cinthu cinacimwanika kuna imwe. [Mbwenye khaindi eneyi ya mizimu ya kuipa, isabuluka basi na miphembero na kupimana cakudya. ”] Pikhakhala Yezu Kirixtu pabodzi na anyakupfundza ace ku Galileya, aapanga tenepa: “Ine, Mwana wa Munthu ndinati ndiperekwe m'manja mwa anthu. Iwo anadza kandipha. Mbwenye pa ntsiku ya citatu ndinalamuka pa kufa.” Na tenepo anyakupfundza ace atsukwala napyo pikulu. Pidafika Yezu na anyakupfundza ace ku nzinda wa Kafaranaumi, anyakukumbusa misonkho a nyumba ya ntsembe afendedzera Pedhru mbam'bvundza kuti: “Mpfundzisi wanu nkhabe kulipa nsonkho wa nyumba ya ntsembe?” Pedhru aatawira kuti: “Ande, asalipa.” Pakupita kwace Pedhru n'nyumba, Yezu ndiye adatoma kum'bvundzisa kuti: “Simau, usaona tani? Ndi ani asatongwa kulipa nsonkho kuna amambo a padziko? Ndi anthu a dzindza ya mambo peno ndi anyaphena?” Pedhru antawira kuti: “Ndi anyaphena.” Yezu ampanga kuti: “Ngakhala ndi tenepa, anthu a dzindza ya mambo nkhabe tongwa kupereka nsonkho. Mbwenye toera anthu akhonde kunyerezera pyakuipa kuna ife, ndoko ku nyandza, ponya cimedzo cako m'madzi. Nyama yakutoma inamanga iwe na cimedzo, ibuluse uifungule n'kanwa mwace. Mwenemu unagumana kobiri ya parata, ibuluse uwapase toera kulipa nayo nsonkho wako na wanga.” Pa n'dzidzi unowu anyakupfundza ace Yezu anfendedzera dhuzi, mbam'bvundzisa tenepa: “Mbani nkulu mu Umambo wa kudzulu?” Yezu acemera mwana m'bodzi wang'ono mbamuikha pakati pawo, mbalonga tenepa: “Ndimo mwene, ndisakupangani kuti: Mungakhonda kusanduzika pontho mbamukhonda kukhala ninga ana ang'ono, nkhabe kudza kapita mu Umambo wa kudzulu. Na tenepo, ule anapicepesa mbakhala ninga mwana uyu, unowu ndiye nkulu mu Umambo wa kudzulu. Pontho, ule anatambira mwana m'bodzi wang'ono ninga uyu, na dzina yanga, asatambira Ine ene.” “Mbwenye munthu anagwisa n'kudawa m'bodzi wa ana ang'ono awa adanditawira, pikhali pyadidi kum'mangirira libwe ikulu n'khosi mwace, mbaponyiwa pakati pa bara. Ndi dzedze kuna dziko na thangwi ya pinthu pinapitisa n'kudawa! Ande, nkhabe kwanisika kuti pinthu penepi pikhonde kucitika, mbwenye ndi dzedze kuna ule anacita kuti penepi picitike. “Na tenepo, ngakhala manja ako peno mwendo wako pisakupitisa n'kudawa, pigwande upitaye kutali. Thangwi mphyadidi upite mu upulumuki wakukhonda kumala na manja mabodzi peno na mwendo ubodzi, kupiringana kukhala na manja onsene peno na myendo yonsene, mbuponyiwa napyo mu moto wa kukhonda kumala. Ngakhala ndi diso yako ibodzi inakucitisa kuti udawe, ibuluse uitaye kunja. Thangwi ndi pyadidi kukhala kudzulu na diso ibodzi basi, kupiringana kukhala na maso mawiri mbuponyiwa mu moto wa infernu.” “Cenjerani! Lekani kupwaza m'bodzi wa ana awa! Thangwi ndinakupangani kuti maanju awo ali kudzulu asaalag'anira pamaso pa Baba wanga wa kudzulu. [Ndimo mwene, thangwi Ine, Mwana wa Munthu, ndabwera kudza kapulumusa ule akhadataika. ] “Musaona tani? Mamuna m'bodzi angakhala na dzana ya mabira, mbatayikirwa na ibodzi, nkhabe kuasiya awa makumapfemba na mapfemba (99) m'mapiri, mbaenda kasaka eneyi ibodzi idataika? Ndimo mwene ndisakupangani kuti angakwanisa kuigumana, anakomerwa pikulu kakamwe kupita anango makumapfemba na mapfemba adakhonda kutaika. Sawa-sawambo na Baba wanu ali kudzulu. Nkhabe kufuna kuti m'bodzi wa ana ang'ono awa ataike.” “Ngakhala m'bale wako akudawisira, ndoko ukhalonge na iye panu mwekha umpangize cidakudawisira iye. Iye angakubvera, wamuwina m'bale wako. Mbwenye angakhonda kukubvera, kwata munthu m'bodzi peno awiri, ninga munalonga malemba a Mulungu kuti: ‘Mathangwi onsene a munthu asafunika abviwe na anyamaso awiri peno atatu.’ Mphapo, angakhonda kubvera anyamaso enewa, kwata mathangwi uyende na iwo kuna abale a gereja. Mbwenye angakhonda pontho kubvera abale a gereja, munthu unowu muoneni ninga munthu wakukhonda kutawira Mulungu peno ninga wa kudawa. “Ndimo mwene, ndisakupangani kuti: Pyonsene pinamanga imwe pantsi pano, pinamangwambo kudzulu. Mbwenye pyonsene pinasudzula imwe pantsi pano, pinasudzulwambo kudzulu. “Pontho ndisakupangani kuti: Ngakhala awiri pakati panu angabverana kuphemba cinthu pa miphembero yawo pantsi pano, Baba wanga ali kudzulu anaapasa. Thangwi panagumanyikana anthu awiri peno atatu na dzina yanga, Ine ndiri penepo pakati pawo.” Na tenepo, Pedhru afendedzera Yezu mbam'bvundza kuti: “Mbuya, kodi m'bale wanga angandidawisira, ndisatongwa ndimulekerere kangasi? Mpaka kanomwe?” Yezu antawira tenepa: “Nkhabe kukupanga kuti mpaka kanomwe, mbwenye mpaka makumanomwe mbalengeswa kanomwe.” “Ndi thangwi eneyo Umambo wa kudzulu usalandaniswa na mambo m'bodzi akhafuna kudziwa ntengo wa mangawa na anyabasa ace. Pidatoma iye kulengesa mangawa ace, abwereserwa nyamangawa m'bodzi akhanfiari pikwi na pikwi pya kobiri. Mambo na kuona kuti iye nkhabe kobiri ya kulipa nayo mangawa, apanga anyabasa ace kuti munthu unowu aguliswe iye na nkazi wace, na ana ace, na pinthu pyace pyonsene, toera akwate ntengo unowu alipe na iwo mangawa. Na tenepo, nyabasa uyu aenda patsogolo pa mambo mban'godamira mbam'phemba tenepa: ‘Mbuya, ndilekerereni. Ine ndinakubwezerani pyonsene.’ Mambo wa nyabasa ule am'bvera ntsisi, mbamulekerera mangawa ace onsene, mbamuleka mbaenda pyace. Mbwenye nyabasa uyu mukhabuluka iye, agumana ndzace wa pa basa akhadanfiyari cikwi cibodzi basi ca kobiri ya parata. Amphata, mban'khwipa n'khosi, mbampanga tenepa: ‘Ndibwezere mangawa anga.’ Penepo nyabasa ndzace agwa pantsi, am'phata myendo mbam'phemba tenepa: ‘Ndilekerere! Ndinadza kakubwezera pyonsene.’ Mbwenye iye akhonda kum'bvera. Na tenepo, ampitisa n'kaidi mpaka kufikira am'bwezera mangawa ace onsene. Anyabasa andzace mudapyona iwo, aipirwa napyo pikulu kakamwe, mbaenda kalonga pyonsene kuna mambo. Penepo mambo ancemeresa nyabasa unowu mbampanga tenepa: ‘Munthu wa kuipa ninga iwe! Ine ndakulekerera mangawa ako onsene ninga mudandiphembera iwe. Watani kukhonda kum'bverambo ndzako ntsisi ninga zidakubvera ine?’ Na tenepo, mambo aipirwa pikulu kakamwe mbam'pitisa n'kaidi kuti aoneswe nyatwa, mpaka kumala kulipa mangawa onsene. Mungakhonda kulekerera andzanu na ntima onsene, Baba wanga ali kudzulu anadza kakucitiranimbo pibodzi-bodzi.” Yezu pidamala iye kulonga pinthu penepyo, abuluka ku Galileya mbaenda ku cisa ca Djudeya, ntunda unango wa nyandza ya Djorodani. Anthu azinji akhantowera, penepo Iye mbakhaawangisa. Afarisi anango afendedzera Yezu toera kun'dida, mbam'bvundza kuti: “Pisatawirirwa mamuna kumwalana na nkazi wace na mathangwi a kusiyana-siyana?” Yezu aatawira, mbaapanga tenepa: “Cipo imwe mudzati kuona pidalembwa m'Bukhu ya Mulungu, kuti pakutoma kwa pantsi, Mulungu ‘aacita mamuna na nkazi,’ pontho alonga kuti: ‘Na thangwi eneyo, mamuna anasiya baba wace na mai wace, mbadza kaphatana na nkazi wace, pontho mu uwiri mwawo anadza kakhala nyama ibodzi basi?’ Na tenepo, iwo si anthu awiribve tayu, mbwenye ndi nyama ibodzi basi. Mphapo pidaphataniza Mulungu, munthu mbaleke kupimwaza.” Afarisi abvundzisa kuti: “Na tenepo, thangwi yanji mphapo Mozesi abulusa ntemo wa kuti mamuna anafuna kumwalana na nkazi wace, asatongwa alembe tsamba ya kumwalana nayo?” Yezu aatawira kuti: “Mozesi akusiyani mbamucita penepyo, ndi thangwi ya kuuma kwanu mitima. Mbwenye pakutoma kwa pantsi pikhakhala tenepa tayu. Na tenepo, ndisakupangani kuti mamuna anamwalana na nkazi wace, mbapikhonda kukhala na thangwi ya upombo, mbakwatana na unango mbacita na iye banja, asacita upombo.” Anyakupfundza a Yezu ampanga tenepa: “Mphapo, ngakhala ndi tenepa makhaliro a mamuna na nkazi, ndi pyadidi kukhonda kucita banja.” Mbwenye Yezu aatawira tenepa: “Si onsene tayu anacibvesesa cipfundzo ici, mbwenye ndi ale basi adapaswa ucenjeri unowu na Mulungu. Thangwi alipo anacimwana kucita banja na thangwi abaliwa tenepo. Anango acitiwa tenepo na anthu. Anangombo asakhonda pyawo na thangwi ya Umambo wa kudzulu. Ule anakwanisa tambira fala iyi, mbaitambire.” Pakumala penepo, abwera anthu anango na ana ang'ono kuna Yezu, toera iye aasandzikire manja na kuaphemberera. Mbwenye anyakupfundza ace akhaasandika. Yezu aapanga tenepa: “Asiyeni ana abwere kuna Ine, lekani kuakhondesa. Thangwi Umambo wa kudzulu ndi wa ale adalandana iwo.” Buluka penepo aasandzika ana manja, mbabuluka mbaenda. M'phale m'bodzi afendedzera Yezu mbam'bvundza kuti: “Mpfundzisi, ndisafuna ndicitenji pya udidi, toera ndikhale na upulumuki wakukhonda kumala?” Yezu antawira tenepa: “Thangwi yanji usandibvundza na thangwi ya pya udidi? Wadidi alipo m'bodzi basi. Ungafuna kukhala na upulumuki wakukhonda kumala, koya matongero.” Na tenepo, iye abvundzisa kuti: “Ndi matongero api?” Yezu atawira tenepa: “ ‘Leka kupha munthu, leka kucita upombo, leka kuba, leka kukhala nyamaso wa uthambi. Lemedza baba wako na mai wako,’ pontho ‘Funa ndzako ninga iwe ene. ’ ” Mphapo m'phale antawira tenepa: “Penepi pyonsene ine ndisapicita. Ndi ninji pontho cidasala?” Yezu ampanga tenepa: “Ungafuna kuti ukhale wakulungama, ndoko, gulisa pyonsene pina iwe, kobiri yace upase anyakucherenga. Tenepa unakhala na mpfuma kudzulu. Ungamala, bwera unditowere.” Mbwenye m'phale na kubva penepyo, abuluka mbatsukwala, thangwi akhali na mpfuma zizinji. Na tenepo, Yezu apanga anyakupfundza ace kuti: “Ndimo mwene ndisakupangani kuti, pisanentsa pikulu kakamwe kuti m'pfumi apite mu Umambo wa kudzulu. Pontho ndisakupangani kuti: Pisanentsa pikulu kakamwe kupitisa m'pfumi mu Umambo wa Mulungu, kupiringana kupitisa cinyama cinacemerwa kamelo mu benga ya ntsingano.” Anyakupfundza a Yezu na kubva penepyo adzumatirwa napyo, mbalonga kuti: “Pingakhala ndi tenepa, mbani anakwanisa kupulumuka?” Yezu aalang'anisa mbaapanga kuti: “Penepi pisacimwanika kuna anthu, mbwenye kuna Mulungu pyonsene pisakwanisika.” Penepo Pedhru ampanga kuti: “Lang'anani, ife tasiya pyonsene, mbatikutowerani. Tinakhala tani?” Yezu aatawira kuti: “Ndimo mwene Ine ndisakupangani kuti pa dziko ipsa inafuna kubwera, Ine Mwana wa Munthu, ndingadza kakhala pa mpando wanga wa mbiri, imwe mudanditowera munadza kakhalambo pa mipando ya umambo khumi na miwiri, kuti mutonge madzindza khumi na mawiri a Izarayeli. Na tenepo, onsene ale adasiya nyumba zawo, abale awo aamuna, abale awo aakazi, baba, mai, ana, peno minda, na thangwi ya dzina yanga, enewa anadza katambira pontho pinthu dzana padzulu pa pinthu pyawo. Pontho mbadza kapasiwa unthaka wakupulumuka kwenda na kwenda. Mbwenye azinji akutoma anadza kakhala akumalisira. Pontho akumalisira, anadza kakhala akutoma.” Yezu athimiza na kulonga pontho kuti: “Umambo wa kudzulu walandana na baba m'bodzi wa pa nyumba, adabuluka na macibese ene kakamwe toera kwenda kasaka anyabasa a kuphata m'munda wace wa mauva. Pakumala kubverana na anyabasa kuti iwo atambiriswe ntengo wa kobiri ibodzi ya parata pa ntsiku, aaendesa kumunda kwace. “Pa n'dzidzi upfemba wa macibese, iye abuluka mbaona amuna anango akusowa cakuphata akhali pa mphambano. Na tenepo, aapanga kuti: ‘Imwe ndokonimbo kaphate basa kumunda kwanga. Ine ndinakutambirisani ntengo unakwanirana na basa yanu.’ Iwo mbaenda. “Pidabuluka iye pontho, pa n'dzidzi khumi na uwiri wa masikati, na pa n'dzidzi wacitatu wa maulo, iye acita pibodzi-bodzi. Pidabuluka iye pontho kacitatu pa n'dzidzi uxanu wa kumaulo, agumana amuna anango pa mphambano a kuti nkhabe phata basa, mbaabvundza tenepa: ‘Thangwi yanji muli pano mbamukhonda kuphata basa ntsiku yonsene yamumphu?’ Iwo antawira tenepa: ‘Ndi thangwi nkhabe munthu adatilembera.’ Na tenepo, iye aapanga kuti: ‘Ndokonimbo imwe kumunda kwanga.’ “Pakufika n'dzidzi wa maulo, mwanacinthu munda apanga nyabasa wace wankulu kuti: ‘Cemera anyabasa uwatambirise kobiri zawo. Toma na ale adamalisira kulemberwa, mbumalisira ale adatoma.’ “ ‘Na tenepo, abwera ale adatoma kuphata basa pa n'dzidzi uxanu wa kumaulo, mbatambira kobiri ibodzi ya parata pa munthu.’ Pidafikambo ale adatoma kulemberwa, anyerezera kuti anadza katambira pikulu kupiringana andzawo. Mbwenye atambirambo sawa-sawa ninga andzawo, kobiri ibodzi ya parata pa munthu. Mbwenye iwo pa kuitambira, atoma kudungunyira mwanacinthu munda, mbalonga tenepa: ‘Awa ndiwo adamalisira kufika, mbaphata basa n'dzidzi ubodzi basi. Mbwenye iwe watambirisa sawa-sawa na ife adaphata basa ntsiku yonsene yamumphu pa dzuwa.’ “Penepo mwanacinthu munda atawira mbapanga m'bodzi wawo kuti: ‘Xamwali, ine sidakubera tayu. Lang'ana, ntengo udabverana ife siwo unowu tayu wa kobiri ibodzi ya parata? Tambira kobiri yako uyende pyako. Thangwi ndisafuna ndipase uyu adamalisira kulemberwa, sawa-sawa na pire pidakupasa ine. Pontho, ine nkhabe kukwanira kucita pinafuna ine na kobiri zanga? Peno panango iwe unabibvu thangwi ine ndine wadidi?’ “Na tenepo, akumalisira anadza kakhala akutoma, pontho akutoma anadza kakhala akumalisira. ” Yezu mukhaenda Iye ku Djerusalema, acemera pa khundu anyakupfundza ace khumi na awiri, mbaapanga tenepa: “Lang'anani, ife tiri kwenda ku Djerusalema. Kweneko, Ine, Mwana wa Munthu, ndinadza kaperekwa kuna akulu aanyantsembe na anyakudziwisa a Mwambo. Iwo anadza kandikonesa kuti ndiphiwe. Pontho ndinadza kaperekwa m'manja mwa anthu adakhonda kukhala madjuda. Iwo anadza kandisingirira, mbandikwapula na kundikhomera pa ntanda. Mbwenye pa ntsiku yacitatu ndinadza kalamuka pa kufa.” Na tenepo, afika kuna Yezu, nkazi wa Zebhedheu na ana ace awiri amuna, mbamulambira toera am'phembe cinthu. Yezu am'bvundza tenepa: “Usafunanji?” Nkazi antawira tenepa: “Ndisafuna kuti ananga awiri awa akhale mu Umambo wanu, m'bodzi ku nkono wanu wa madyo, unango ku nkono wanu wa bzere.” Mbwenye Yezu aatawira tenepa: “Imwe nkhabe kupidziwa pinaphemba imwe. Imwe munakwanisa kumwa ndiko inafuna kumwa Ine?” Iwo atawira kuti: “Tinakwanisa.” Yezu aapanga tenepa: “Ndimo mwene, imwe munadza kamwa ndiko yanga. Mbwenye pya kukhala ku nkono wanga wa madyo, peno ku nkono wanga wa bzere, penepi si pyanga tayu. Thangwi mbuto zenezi ndi za ale adamala sasanyirwa mbuto na Baba wanga.” Na tenepo, anyakupfundza anango khumi a Yezu na kupibva penepyo, aipirwa na ana awiri awa muubale mwawo. Penepo Yezu aacemera mbaapanga kuti: “Imwe musadziwa kuti atongi a mbumba, asaponderera mbumba. Pontho akulu-akulu, ana mphambvu za kuatonga. Pakati panu mbapikhonde kukhala tenepa. Mbwenye ule anafuna kukhala nkulu pakati panu, mbakhale n'dzakazi. Pontho ule anafuna kukhala wakutoma pakati panu, mbakhale n'dzakazi wanu. Ndi sawa-sawa na Ine, Mwana wa Munthu. Sidabwera kudza kaphatirwa basa tayu, mbwenye ndabwera kudza kaphatira basa anthu, na kupereka moyo wanga, toera kuombola anthu azinji.” Mukhabuluka iwo ku Djeriko, mwinji ukulu wa anthu ukhatowera Yezu. Penepo akhalipo amuna awiri maboli-boli akhakhala n'khundu mwa njira. Na kubva kuti Yezu ali kupita, atoma kukhuwa tenepa: “Mbuya, Mwana wa Dhavidhi, tibverenimbo ntsisi!” Mbumba ikhaasandika kuti: “Matamani!” Mbwenye iwo akhakhuwiratu kakamwe, mbakhalonga kuti: “Mbuya, Mwana wa Dhavidhi, tibverenimbo ntsisi!” Na tenepo, Yezu alimira mbaacemera, mbaabvundza kuti: “Musafuna ndikucitireninji?” Iwo alonga kuti: “Mbuya, tisafuna tione.” Yezu aabvera ntsisi, mbaakhuya m'maso mwawo. Na tenepo, pa n'dzidzi ubodzi ene maso awo atoma kuona pontho mbatowera Yezu. Mukhakhala iwo dhuzi na Djerusalema, mbafika pa cisa ca Bhetifaji, pa phiri ya Mulivera, Yezu atuma anyakupfundza ace awiri, mbaapanga tenepa: “Ndokoni ku cisa ciri kutsogolo kwanu. Pinacita imwe pite mwenemu, munagumana buru ikazi yakumangirwa, ina mwana wace. Asudzuleni mubwere na iwo kuno. Mungabvundziwa na munthu, longani kuti Mbuya asaafuna. Penepo pene anakusiyani mbamudza na iwo.” Ipi pyacitika toera pisimbiswe pikhadalongwa na mporofeta kuti: “ Longani kuna nzinda wa Siyau kuti: ‘Lang'ana, Mambo wako ali kudza kuna iwe! Ali kudza mbacepeseka padzulu pa buru, padzulu pa mwana wa buru, mwana wa cinyama cakukwata mitolo.’ ” Anyakupfundza ace aenda, mbacita ninga mudapangwa iwo na Yezu. Iwo aibweresa buru ikazi na mwana buru, mbakwata nguwo zawo mbaziyikha pa nsana pa pinyama, Yezu mbakwira mbakhala padzulu pa nguwo. Mwinji ukulu wa anthu ukhathasika nguwo zawo n'njira, anango mbakhatema masandzu a miti, mbakhaathasika n'njira. Na tenepo, mwinji wa anthu akhaenda kutsogolo, na ale akhabwera n'nduli mwa Yezu, akhakhuwa tenepa: “Hosana kuna Mwana wa Dhavidhi! Mbasimbwe ule anadza mu dzina ya Mbuya! Hosana kudzulu kakamwe!” Yezu mudapita Iye mu Djerusalema, anthu onsene a mwenemu adzudzumika mbakhabvundza kuti: “Mbani unowu uyu?” Mbumba ikhatawira tenepa: “Uyu ndi Yezu, mporofeta wa ku cisa ca Nazareti, ku nzinda wa Galileya.” Yezu apita mu Nyumba ya Mulungu, mbatoma kuthamangisa onsene akhagula na akhagulisa mwenemu. Abhoma meza za ale akhacinja kobiri, pontho na mipando ya ale akhagulisa nkhangaiwa, mbaapanga tenepa: “Pyalembwa m'Bukhu ya Mulungu kuti: ‘Nyumba yanga inadza kacemerwa nyumba ya kuphemberera,’ mbwenye imwe mwaisanduza kuti ikhale ‘mphako ya kubisalira mambava. ’ ” Mwenemu, mu Nyumba ya Mulungu, maboli-boli na anyakulamala akhaenda kuna Yezu, Iye mbaawangisa. Mbwenye akulu aanyantsembe na anyakudziwisa a Mwambo aipirwa pikulu na kuona pinthu pyakudzumisa pikhacita Yezu, pontho na kubva kukhuwa kukhacita ana ang'ono mu Nyumba ya Mulungu, mbakhalonga kuti: “Hosana Mwana wa Dhavidhi!” Na tenepo, iwo abvundzisa Yezu kuti: “Usapibva pinalonga ana awa?” Yezu aatawira tenepa: “Ande, ndisapibva. Imwe cipo mudzati kupiona pidalembwa n'kati mwa Bukhu ya Mulungu kuti: “Mulungu acita kuti ana ang'ono na ana a pabere apase mbiri Mulungu?” Na tenepo, Yezu aasiya mbabuluka mu nzinda unowu mbaenda kagona ku cisa ca Bhetanya. Mangwana mwace na macibese ene, pa kubwerera kwace kwenda ku nzinda, Yezu abva njala. Na kuona muti ubodzi wa nsambvu n'khundu-n'khundu mwa njira, aufendedzera dhuzi. Mbwenye agumana masamba basi, nkhabe misapu. Na tenepo, Yezu aupikirira mbaupanga kuti: “Na lini unadza kabala pontho nsapu!” Pa n'dzidzi ubodzi-bodzi muti wauma. Anyakupfundza a Yezu na kupiona penepyo, adzumatirwa napyo mbabvundzisa kuti: “Kodi wauma tani muti unowu wa nsambvu pa n'dzidzi ubodzi ene?” Mbwenye Yezu aatawira kuti: “Ndimo mwene ndisakupangani kuti, mungakhulupira mbamukhonda kupenula, munacita pinthu pikulu kakamwe kupiringana ipi pidacitira ine muti. Na tenepo, munakwanisa kupanga phiri iyi kuti: ‘Buluka penepo ugwe m'bara.’ Penepyo pinacitika. Mungakhala na cikhulupiro, munatambira pyonsene pinaphemba imwe pa miphembero.” Yezu apita mu Nyumba ya Mulungu, mbatoma kupfundzisa. Penepo anfendedzera dhuzi akulu aanyantsembe na mathubu a mbumba, mbam'bvundza tenepa: “Kodi iwe uli kucita pinthu penepi na mphambvu za utongi wa ani? Mbani akupasa mphambvu za utongi unowu?” Yezu atawira tenepa: “Ine ndisafunambo kukubvundzani. Munganditawira, Ine ndinakupangani mbani adandipasa mphambvu za utongi zinacita na Ine pinthu penepi. Batixmu ya Juwau ikhali ya kupi? Ya kudzulu peno ya anthu?” Iwo akhaketesana okha-okha, mbakhalonga tenepa: “Tingalonga kuti ndi ya kudzulu, iye anadza kabvundza kuti: ‘Mphapo thangwi yanji imwe mwakhonda kuntawira Juwau?’ Mbwenye tingalonga kuti: Ndi ya anthu, mbaticiteni mphole na mbumba. Thangwi onsene asan'dziwa Juwau ninga mporofeta.” Na tenepo, iwo antawira Yezu kuti: “Nkhabe kupidziwa.” Yezu aatawira kuti: “Inembo nkhabe kukupangani na pang'ono pene, kuti ndi mphambvu za utongi wa ani zinacita na Ine pinthu penepi.” “Musaona tani? Mamuna m'bodzi akhakhala na ana ace awiri amuna. Aenda kuna mwana wace wakutoma mbampanga kuti: ‘Mwana wanga, ndoko ukhaphate basa lero ku munda wa mauva.’ Iye atawira tenepa: ‘Nkhabe funa.’ Mbwenye pa kupita n'dzidzi pang'ono asandikika, mbaenda. Baba aenda kapanga mwana waciwiri pibodzi-bodzi. Iye antawira kuti: ‘Ande, ndinaenda.’ Mbwenye hadaenda tayu.” Yezu aabvundza: “Mbani pa ana awiri awa adacita kufuna kwa baba wace?” Iwo antawira kuti: “Ndi wakutoma.” Yezu aapanga kuti: “Ndimo mwene, Ine ndisakupangani kuti ale anyakukumbusa misonkho na ale akazi anacita ulukwali anakuthangirani kupita mu Umambo wa Mulungu. Thangwi Juwau abwera kudza kakupangisani njira yakulungama, imwe mwan'khonda. Mbwenye anyakukumbusa misonkho na akazi anacita ulukwali antawira. Pontho pa pyonsene pidamala kuona imwe ipi, imwe mwacimwana kuchunyuka, pontho mwakhonda kuntawira.” Bvani nsanje unango: “Akhalipo mamuna m'bodzi, baba wa pa nyumba, adacheka miti ya mauva m'munda mwace. Auzungulira na mpanda, mbacita mbuto ibodzi ya kukamuliramo mauva toera kucita vinyu, pontho mbamanga cirindo. Buluka penepo, akwata munda mbaurikisa na anthu anango anyakulima, pidamala iye mbaenda ulendo wace. Pidakwana iwo n'dzidzi wa kubulusa mauva, mwanacinthu munda atuma anyabasa ace kuna anyakulima, toera aende kapaswe misapu. “Mbwenye anyakulima aphata anyabasa ale, m'bodzi wawo mbaphekeswa, unango mbaphiwa, pontho unango mbamenyiwa na myala. Na tenepo, mwanacinthu munda atuma anyabasa anango azinji kupita akutoma. Mbwenye anyakulima aacita pibodzi-bodzi. Pakumalisa, aatumira mwana wace ene, mbalonga kuti: ‘Mwana wanga, iwo anati amulemedze.’ “Mbwenye anyakulima pidamuona iwo mwana, alonga okha-okha kuti: ‘Uyu ndiye mwanaciro unthaka! Tendeni timuphe, tisale na unthaka wace.’ Na tenepo, iwo amphata, mbamponya kunja kwa munda wa mauva, mbamupha. “Mphapo angabwera mwanacinthu munda, anaacita tani anyakulima enewa?” Iwo atawira tenepa: “Anaapha mwa upandu anthu enewa a kuipa, mbakwata munda wa mauva mbaurikisa na anyakulima anango, ale anakwanisa kumpasa phindi yace pa n'dzidzi wakubvuna.” Yezu aapanga tenepa: “Imwe cipo mudzati kuona pidalembwa m'Bukhu ya Mulungu kuti: “ ‘Mwala udakhondiwa na anyakumanga nyumba, ndiwo udadza kakhala mwala wakufunika kakamwe? Penepi pyabuluka kuna Mbuya, pontho ndi cinthu cakudzumisa kuna ife.’ ” “Na tenepo, ndisakupangani kuti Umambo wa Mulungu munadza kaupokoserwa, mbupaswa dzindza inango inabala misapu. Onsene anagwa padzulu pa mwala uyu, ananyedzeka, mbwenye ule anagwerwa na iwo, anapeyeka kudza pfumbi. ” Akulu aanyantsembe na afarisi, na kubva misanje eneyo, apidziwa kuti Yezu asalonga iwo. Na thangwi eneyo, iwo akhasaka kuti anam'manga tani, mbwenye akhagopa mbumba, thangwi Yezu akhadziwika na mbumba yonsene kuti ndi mporofeta. Yezu alonga pontho kuna anthu na misanje, mbaapanga tenepa: “Umambo wa kudzulu walandana na mambo m'bodzi adacitisa phwandu ya banja ya mwana wace wa mamuna. Na tenepo, mambo atuma anyabasa ace kuti aende kaapange ale akhadacemerwa toera adze kadye phwandu. Mbwenye iwo akhonda pyawo kubwera. “Buluka penepo, mambo atuma anyabasa anango na mphangwa izi: ‘Ndokoni mukhapange anthu onsene akhadacemerwa pa phwandu kuti pyonsene pyamala kusasanyirwa. Ndamala kuphesa ng'ombe na mphulu zakunenepa. Mphapo mbabwere adze kadye phwandu.’ “Mbwenye iwo akhonda kupitsalakana penepyo, mbaenda kacita pinthu pyawo. M'bodzi aenda kumunda kwace, unango mbaenda kacita malonda ace. Pontho anango aphata anyabasa ale a mambo, mbaamenya, mbaapha. Na tenepo, mambo aipirwa napyo. Atuma anyankhondo ace mbaenda kaapha mapanga enewa, mbaapisira nzinda wawo. “Buluka penepo, mambo alonga kuna anyabasa ace kuti: ‘Phwandu yamala sasanyirwa, mbwenye anthu adacemera ine hadakwanira kuti adye nanthu phwandu tayu. Na tenepo, ndokoni m'mphambano zonsene, mucemere onsene anagumana imwe toera adze kadye phwandu.’ Anyabasa aendadi m'miseu mbakwanisa kugumanya anthu onsene adagumana iwo, adidi na a kuipa. Na tenepo, nyumba ya phwandu yadzala na anthu adacemerwa. “Mambo, pakupita n'nyumba toera kuona anyaphwandu adacemerwa, mwenemu agumana mamuna m'bodzi adakhonda kubvala nguwo za pa phwandu ya banja. Na tenepo, am'bvundza kuti: ‘Kodi iwe, xamwali, wapita tani muno, mbukhonda kubvala nguwo za pa phwandu ya banja?’ Iye akhala wa kumatama. “Penepo, mambo apanga anyabasa ace kuti: ‘M'mangeni myendo na mikono, mbamumponya kunja, ku cidima. Kweneko kunabveka kulira na kukukuta mano.’ “Thangwi azinji ndiwo adacemerwa, mbwenye adasankhulwa ndi pang'ono.” Na tenepo, afarisi abverana pakati pawo kuti asake cinthu ca kupambazira naco Yezu. Penepo iwo atuma andzawo kuna Yezu, pabodzi na anthu anango a pa nsoka wa mambo Herodhi. Iwo atumwi, pidafika iwo, alonga tenepa kuna Yezu: “Mpfundzisi, ife tisadziwa kuti imwe ndimwe munthu wa ndimo mwene, pontho musapfundzisa pya ndimo mwene, pire pinafuna Mulungu mbamukhonda kunyengererwa na munthu unango, thangwi imwe nkhabe kulang'ana nkhope ya munthu. Mphapo, tipangeni manyerezero anu: Pisatawirirwa kulipa nsonkho kuna Mambo Sezari peno nkhabe?” Mbwenye Yezu, na kudziwa manyerezero awo a kuipa, aatawira tenepa: “Anyauthambi! Thangwi yanji imwe musandilesera? Ndipangiseni kobiri inalipa na imwe misonkho.” Iwo ampangisa kobiri ibodzi ya parata. Penepo Yezu aabvundza kuti: “Kodi nkhope na dzina iyi nja ani?” Iwo antawira kuti: “Mphya Sezari.” Penepo Yezu aapanga tenepa: “Na tenepo, pya Sezari, pasani Sezari, pya Mulungu, pasani Mulungu.” Iwo na kubva mafala awa adzumatirwa pikulu, mbansiya, mbabuluka mbaenda. Pa ntsiku ibodzi-bodzi, Asadhusi, ale analonga kuti anthu nkhabe kulamuka pa kufa, afendedzera Yezu mbampanga kuti: “Mpfundzisi, Mozesi alonga kuti, mamuna angafa mbakhonda kusiya ana, m'bale wace wa mamuna asatongwa kuti acite banja na manferwa wa nkazi, toera ansiyire dzindza. Akhalipo pakati pathu amuna anomwe muubale mwawo. Wakutoma acita banja, mbafa mbadzati khala na mwana. Na tenepo, adza kapitiswa kumusa, m'bale wace waciwiri. Pibodzi-bodzi pyacitikambo na waciwiri, na wacitatu mpaka wacinomwe. Pa kumalisira, pa kumala onsene, adza kafambo nkazi. Na tenepo, pa kulamuka kwa anyakufa, nkazi unowu anadza kakhala wa ani pa anomwe awa? Thangwi onsene acita na iye banja.” Yezu aatawira tenepa: “Mwadodomeka na thangwi yakukhonda kudziwa kwanu Bukhu ya Mulungu na mphambvu za Mulungu! Thangwi pa kulamuka kwa anyakufa, anthu nkhabe kudza kacitabve banja, peno kuperekwa m'mabanja. Mbwenye ndi ninga anju za kudzulu. Pa thangwi ya kulamuka kwa anyakufa, imwe mudzati kupiona pidalembwa m'Bukhu, pidakupangani Mulungu kuti: ‘ Ine ndine Mulungu wa Abharaamu, ndine Mulungu wa Izaki, pontho ndine Mulungu wa Djakobo?’ Iye si Mulungu wa anyakufa tayu, mbwenye ndi Mulungu wa am'maso.” Anthu, na kubva penepyo, adzumatirwa na cipfundzo cace. Na tenepo, afarisi na kubva kuti asadhusi acimwana kuntawira Yezu, penepo pene iwo agumanyikana. M'bodzi wawo, nyakudziwisa wa Mwambo, toera kulesera Yezu, am'bvundza tenepa: “Mpfundzisi, mbapi matongero makulu a Mwambo?” Yezu antawira kuti: “ ‘Funa Mbuya Mulungu wako na ntima wako onsene, na uunthu wako onsene, pontho na ndzeru zako zonsene.’ Awa ndiwo matongero makulu na akutoma, kupita onsene. Matongero aciwiri akulandana na akutoma ndi awa: ‘Funa ndzako ninga iwe ene.’ Mwambo onsene wa Mozesi na pipfundzo pya maporofeta pisabulukira n'kati mwa matongero mawiri awa.” Afarisi, pidagumanyikana iwo, Yezu aabvundza kuti: “Kodi musanyerezera tani na thangwi ya Kirixtu? Ndi wa dzindza ipi?” Iwo antawira kuti: “Ndi mwana wa Dhavidhi.” Yezu aabvundzisa pontho kuti: “Thangwi yanji mphapo iye ene Dhavidhi, pakulonga na Nzimu Wakucena, asancemera ‘Mbuya?’ Thangwi Dhavidhi alonga tenepa: “ Mbuya alonga kuna Mbuya wanga kuti: ‘Khala ku nkono wanga wa madyo, mpaka panaikha ine anyamalwa ako pantsi pa manyalo ako.’ Na tenepo, ngakhala iye ene Dhavidhi asancemera ‘Mbuya’, anakhala tani pontho mwana wace?” Penepo nkhabe munthu adakwanisa kuntawira cinthu. Kubulukira ntsiku eneyo kwenda kutsogolo, hadaonekabve tayu munthu akhali na cipapu ca kum'bvundzisa. Buluka penepo Yezu alonga na mwinji wa anthu na anyakupfundza ace kuti: “Anyakudziwisa a Mwambo na afarisi asagumanika mbatonga pa mpando wa Mozesi. Na tenepo, abvereni mbamucita pyonsene pinakupangani iwo. Mbwenye lekani kucita pinacita iwo, thangwi nkhabe kucita pinalonga iwo. Thangwi iwo asadziwa basi kupasa andzawo mitolo yakulemera mbaiyikha pa phewa pawo, mbwenye iwo ene nkhabe kukwanisa kuikwata. Pontho asacimwana kulamusa na cala cene cibodzi toera kuaphedza. Na tenepo, iwo asacita mabasa awo onsene, toera aoniwe na anthu. Lang'anani mafala adalemba iwo, mbaswetera pa nkhope pawo na m'mikono ya nguwo zawo! Pontho lang'anani pimbverere pya kulapha pya nguwo zawo! Pa maphwandu, asafuna mbuto zakutoma, pontho na mipando yakutoma n'kati mwa nyumba za kuphemberera. Asafuna kuti anthu aamwanyike na cilemedzo m'misika, pontho asafuna kucemerwa apfundzisi. Mbwenye imwe lekani kutawira kucemerwa apfundzisi, thangwi Mpfundzisi wanu ndi m'bodzi basi. Imwe monsene ndimwe ubale wanu. Pontho lekani kucemera baba, munthu wa pantsi pano. Thangwi Baba wanu ndi m'bodzi basi, ule ali kudzulu. Pontho lekani kucemerana atsogoleri, thangwi N'tsogoleri wanu ndi m'bodzi basi, Kirixtu. Mbwenye nkulu pakati panu, mbakhale n'dzakazi wanu. Na tenepo, munthu onsene anapikuza ekha, anadza kacepeswa, mbwenye ule anacepeseka, anadza kakuzwa.” Yezu aapanga kuti: “Muna nyatwa imwe, anyakudziwisa a Mwambo na afarisi a uthambi! Thangwi musafungira anthu Umambo wa kudzulu. Imwe ene nkhabe pita, pontho nkhabe siya kuti apite ale anafuna kupita. [“Muna nyatwa imwe anyakudziwisa a Mwambo, na afarisi a uthambi! Thangwi musatapata nyumba za akazi adaferwa na amuna awo, mbamuadhobha na kucita miphembero yakukhonda kugwandira. Na thangwi eneyo munati muoneswe nyatwa zikulu. ] “Muna nyatwa imwe, anyakudziwisa a Mwambo na afarisi a uthambi! Thangwi musafamba m'bara na kuntunda kwene, toera kunyengerera munthu kuti apite mu mwambo wanu. Mbwenye mungankwanisa, musancita kuti akhale munthu wa kupita mu infernu kawiri kupiringana imwe. “Muna nyatwa imwe, atsogoleri a kukhonda kuona, thangwi musapfundzisa kuti: ‘Munthu anadumbira na dzina ya Nyumba ya Mulungu, penepi nkhabe pinthu. Mbwenye ule anadumbira na dzina ya oro wa Nyumba ya Mulungu, unowu asatongwa kuti acite cire cidadumbirira iye.’ Imwe madzemwamwe pontho maboli-boli! Kodi cikulu ndi cipi? Oro, peno Nyumba ya Mulungu inacenesa oro? Pontho musapfundzisa kuti: ‘Munthu anadumbira na dzina ya guwa ya ntsembe, penepi nkhabe pinthu. Mbwenye ule anadumbira na dzina ya ntsembe inaikhwa pa guwa ya ntsembe, unowu asatongwa kucita cire cidadumbirira iye.’ Maboli-boli! Kodi cikulu ndi cipi? Ndi ntsembe peno guwa ya ntsembe inacenesa ntsembe? Na tenepo, anadumbira na dzina ya guwa ya ntsembe, asadumbirambo na dzina ya guwa ya ntsembe, na pyonsene pyene pinagumanika padzulu pace. Pontho ule anadumbira na dzina ya Nyumba ya Mulungu, asadumbirambo na dzina eneyo, na ya Mulungu anakhala mwenemu. Na tenepo, anadumbira na dzina ya kudzulu, asadumbirambo na dzina ya mpando wa Umambo wa Mulungu, pontho na dzina yace, Iye Mulungu anakhala penepo. “Muna nyatwa imwe anyakudziwisa a Mwambo na afarisi, ndimwe anyauthambi! Thangwi musapereka cacikhumi ca masamba a n'dimba mwanu, mbamupwaza pinthu pinafunika kakamwe pa mwambo, ninga: udidi, ntsisi na kunyindirika. Ipi ndipyo pikhafunika kuti mupicitembo pabodzi na pinthu pinango pinacita imwe. Imwe atsogoleri maboli-boli! Musasungula imbu, mbamumeza cinyama cikulu cinacemerwa kamelo. “Muna nyatwa imwe anyakudziwisa a Mwambo na afarisi, ndimwe anyauthambi! Thangwi musatsuka kunja kwa ndiko na kwa mbale, mbwenye iwo n'kati mwawo adzala na kusirira pontho na upandu. Iwe nfarisi boli-boli! Pakutoma tsuka n'kati mwa ndiko na mwa mbale, toera kunja kucenembo. “Muna nyatwa imwe anyakudziwisa a Mwambo na afarisi, ndimwe anyauthambi! Thangwi mwakhala ninga nthumbi za kukhwaziwa ntoto, mbizibalika kunja, mbwenye n'kati mwace mwadzala na magogodo a anthu a kufa na pinthu pyonsene pya kunyanyasa. Na tenepo, sawa-sawambo na imwe. Thangwi kunja musaoneka akulungama pamaso pa anthu, mbwenye n'kati mwanu mwadzala na uthambi pontho na uipi.” “Muna nyatwa imwe anyakudziwisa a Mwambo na afarisi, ndimwe anyauthambi! Thangwi musacitira nthumbi maporofeta, mbamuikha maluwa pa nthumbi za anthu akulungama, mbamulonga kuti: ‘Mbatidakhala pabodzi na ambuya athu pa midzidzi eneyo, ife mbatidakhala naanthu tayu pa kupha kudacita iwo maporofeta!’ Tenepa, musapicitira umboni mwekha kuti ndimwe ana a ale adapha maporofeta. Dzadzani mphapo n'dida udatoma ambuya anu. “Imwe nyoka! Ana a m'bobo! Munakwanisa tani kuthawa nyatwa za mu infernu? Na thangwi eneyo ine ndinakutumirani maporofeta, adziwisi na anyakudziwisa a Mwambo. Apo imwe, azinji awo munadza kaapha, anango munaakhomera pa ntanda, pontho anango munaakwapula n'kati mwa nyumba za kuphemberera, mbamuazonda m'mizinda na m'mizinda. Na tenepo, nyatwa zinati zikugwereni na thangwi ya ciropa cidataika pantsi ca onsene anyakulungama, kutomera ciropa ca munthu wakulungama Abheli, mpaka kuna ciropa ca Zakariya mwana wa Barakiya, ule adapha imwe pakati-na-kati, uku Nyumba ya Mulungu uku guwa ya ntsembe. Ndimo mwene, ndisakupangani kuti anthu a ntsiku zino anadza kagwerwa nazo nyatwa zenezi.” Yezu alonga tenepa: “Djerusalema, Djerusalema, iwe unapha maporofeta, pontho mbumenya na myala ale adatumirwa iwe na Mulungu! Kangasi mbandifuna kugumanya ana ako, ninga nkhuku isagumanya anapiye ace m'mapapido mwace, iwe mbukhonda! Lang'anani, nyumba yanu inadza kakhala madembe. Mphapo Ine ndisakupangani kuti imwe nkhabe kudza kandionabve tayu, mpaka n'dzidzi unadza imwe kalonga kuti: ‘Mbasimbwe ule anadza na dzina ya Mbuya!’ ” Pa kubuluka Yezu mu Nyumba ya Mulungu, n'dzidzi ukhaenda Iye, anfendedzera dhuzi anyakupfundza ace toera kumpangisa kumangwa kudacitwa Nyumba ya Mulungu. Penepo Yezu aapanga kuti: “Musaona pyonsene ipi? Ndimo mwene, ndisakupangani kuti pano nkhabe kudza kasala mwala padzulu pa mwala undzace. Pyonsene pinamala gwisiwa.” Yezu akhakhala nawa pa phiri ya Mulivera, anyakupfundza ace anfendedzera mbam'bvundzisa pa khundu kuti: “Tipangeni, pinacitika lini pinthu penepi? Pontho ndi cidzindikiro canji cinafuna kudza kaoneka pakubwera kwanu, na pakumala kwa dziko?” Yezu aatawira tenepa: “Cenjerani! Lekani kunyengezwa na munthu. Thangwi azinji anati abwere na dzina yanga mbalonga kuti: ‘Ine ndine Kirixtu,’ pontho anati anyengeze anthu azinji. Imwe munadza kabva mbapilongwa pya nkhondo na mabvabva a nkhondo. Pilang'aneni, mbwenye lekani kugopa tayu, thangwi pisafunika kuti picitike tenepo, mbwenye si kumala kwa pinthu tayu. Thangwi dziko na dziko inadza kamenyana, pontho umambo na umambo unadza kamenyana. Kunaoneka njala na piteke-teke mu mbuto zizinji. Mbwenye pyonsene ipi ndi kutoma kwa nyatwa. “Na tenepo, imwe munadza kaoneswa nyatwa, mbamuphiwa. Munadza kaidiwa na anthu onsene na thangwi ya dzina yanga. Pa n'dzidzi unowu anthu azinji anadza kasiya kutawira Mulungu. Pontho mbadza kasandukirana na kuzondana m'bodzi na m'bodzi. Na tenepo, anadza kabulukira maporofeta azinji a uthambi mbanyengerera anthu azinji. Na kuinjipa kwa uipi, kufunana kwa anthu azinji kunacepa. Mbwenye ule anapirira mpaka pa kumalisa, anapulumuswa. Na tenepo, Mphangwa Zadidi izi za Umambo wa Mulungu zinamwazwa pa dziko yonsene ya pantsi, toera zikhale ninga umboni kuna mbumba yonsene. Buluka penepo, inafika ntsiku ya kumalisa.” Yezu alonga pontho kuti: “Imwe mungadza kaona cinthu cakugopsa cidalonga mporofeta Dhanyeli, mbacikhala pa Mbuto Yakucena mu Nyumba ya Mulungu - anaona mafala awa mbaabvesese - na tenepo, ale anagumanika mu Djudeya mbathawire ku mapiri. Ule anagumanika pa ntsoyi ya nyumba yace, mbaleke kuchita toera kubulusa cinthu cibodzi n'nyumba mwace. Pontho ule anagumanika ku munda, mbaleke kubwerera n'nduli toera akhakwate nguwo zace. Ana nyatwa ikulu ale anagumanika na pathupi, pontho na ale anayamwisa ntsiku zenezo! Phemberani kuna Mulungu, kuti kuthawa kwanu kukhonde kucitika n'dzidzi wa khoni peno ntsiku ya Sabudu. Thangwi pa ntsiku zenezi, kunaoneka nyatwa ikulu kuti cipo idzati kuoneka, kutomera pakutoma kwa dziko mpaka n'dzidzi uno, pontho na lini inadza kaoneka pontho. Ntsiku zenezi mbazidakhonda kugwandirwa, nkhabe m'bodzi akhafuna kupulumuka. Mbwenye na thangwi ya anyakusankhulwa, ntsiku zenezi zinati zigwandire. Na tenepo, munthu angakupangani kuti: ‘Kirixtu ali pano!’ peno kuti: ‘Uyo ali kule!’ lekani kum'bvera. Thangwi anadza kabulukira akirixtu a uthambi na maporofeta a uthambi, kuti anadza kacita pirengo pikulu na pinthu pyakudzumisa, toera pingakwanisika, anyengeze na ale ene anyakusankhulwa a Mulungu. Lang'anani, ndakucenjezani pyonsene mbapidzati kucitika. Na tenepo, mungapangiwa kuti: ‘Iye ali n'thando!’ Lekani kwendako! Peno mungapangiwa kuti: ‘Ali n'kati mwa nyumba!’ Lekani kupitawira. Thangwi ninga njazi ingacetuma isaonekera kudzulu, kutomera kumabulukira dzuwa mpaka kumadokero, ndi sawa-sawambo na kubwera kunafuna cita Ine, Mwana wa Munthu. Thangwi pale panagumanika cinthu ca kufa, penepo ndipo panagumanyikana malezi.” “ Na tenepo, Yezu alonga kuti: Pakumala kwa nyatwa eneyo ikulu ya ntsiku zenezo, “ ‘dzuwa inaswipa, mwezi nkhabe kudza kagakabve, nyenyezi za kudzulu zinagwa, pontho mphambvu za kudzulu zinatekenyeka.’ “Penepo ndi panafuna kuoneka cidzindikiro kudzulu ca Ine Mwana wa Munthu. Madzindza onsene a pantsi anati alire, pontho anadza kaona Ine Mwana wa Munthu, mbandikhabwera padzulu pa makole a kudzulu, na mphambvu pontho na mbiri ikulu kakamwe. Na tenepo, Ine Mwana wa Munthu, pa kulira kaluta ndinadza katuma maanju anga, kuti agumanye anyakusankhulwa anga a makhundu manai a dziko, kutomera nkhomu ibodzi ya dziko, mpaka ku nkhomu inango.” Yezu alonga pontho kuti: “Pfundzani nsanje wa muti wa nsambvu. Mungaona nthawi zace mbazigubudzika, masamba ace mbatoma kuphwikira, imwe musadziwa kuti malimwe ali dhuzi. Tenepambo imwe, mungaona pinthu pyonsene ipi, dziwani kuti ali dhuzi, ali pa nsuwo. Ndimo mwene ndisakupangani kuti pyonsene ipi pinacitika, anthu a midzidzi ino mbadzati kumala. Kudzulu na pantsi panamala, mbwenye mafala anga nkhabe kudza kamala. “Mbwenye pya thangwi ya ntsiku eneyo na n'dzidzi nkhabe munthu anapidziwa. Izo anju za kudzulu, peno Ine Mwana wa Munthu, nkhabe kupidziwa. Anapidziwa ndi Baba ekha basi. Thangwi ninga pidacitika pa ntsiku za Nowa, pinacitikambo sawa-sawa pakubwera kwa Ine, Mwana wa Munthu. Thangwi madzi makulu mbadzati kudzala, anthu akhadya, akhamwa, amuna akhacita mabanja, akazi akhaperekwa m'mabanja, mpaka ntsiku idapita Nowa mu arika. Pontho, onsene amala kufa na madzi, thangwi nkhabe cinthu cikhadziwa iwo. Tenepa, Ine Mwana wa Munthu ndingabwera, pinacitikambo sawa-sawa. Na tenepo, amuna awiri anagumanika mbakhalima m'munda, m'bodzi anakwatiwa, unango anasiyiwa. Akazi awiri anagumanika mbakhapeya pa libwe, m'bodzi anakwatiwa, unango anasiyiwa. Na tenepo, lang'anirani, thangwi imwe nkhabe kuidziwa ntsiku ya kubwera kwa Mbuya wanu. Mbwenye kumbukani kuti: Mbidakhala mwanacinthu nyumba asaudziwa n'dzidzi wa kufika kwa mbava, mbadalang'anira pontho mbadasiya tayu kuti mbava aswe nyumba yace. Na thangwi eneyo, imwe khalanimbo akusasanyira. Thangwi n'dzidzi unakhonda imwe kudikhira, ndiwo unadza kafika Ine, Mwana wa Munthu.” Yezu athimiza pontho na kulonga kuti: “Mbani mphapo nyabasa wakunyindirika na wa ndzeru, adaikhwa na mbuya wace kuti aonerere anyabasa andzace, toera kuapasa cakudya n'dzidzi ungakwana? Mbatsandzaye nyabasa unowu anagumaniwa mbacita tenepa pakubwera kwa mbuya wace. Ndimo mwene ndisakupangani kuti, mbuya wace anadza kan'nyindira kuti aonere mpfuma yace yonsene. Ndiye tani mphapo nyabasa uyu angakhala wa kuipa, mbalonga ekha ene kuti: Mbuya wanga ali kudembuka, mbatoma kumenya anyabasa andzace, mbadya pontho mbamwa pabodzi na anyakuledzera? Penepo, mbuya wace anadza kabwera ntsiku inakhonda iye kun'dikhira, pa n'dzidzi unakhonda iye kudziwa. Iye anamuonesa nyatwa, mbamponya m'mbuto ibodzi ene na anyauthambi. Mwenemu anati alire na kugeda-geda mano.” Yezu alonga kuti: “Umambo wa kudzulu unadza kalandana na amyali khumi akhadakwata nyale zawo mbaenda kagumana na mwali wa mamuna. Axanu awo akhali madzemwa, axanu akhali a ndzeru. Madzemwa akwata nyale zawo, mbwenye aduwala kukwata mafuta. Mbwenye andzawo a ndzeru, akwata nyale zawo pabodzi na mafuta mu ntete. Na thangwi ya kudembuka kwa mwali wa mamuna, atsikana onsene aphatwa na citulo mbagona. “Mbwenye pa chiti-chiti, wabveka n'khuwo kuti: ‘Ali kudza mwali wa mamuna! Lamukani mukantambire!’ “Na tenepo, amyali onsene alamuka mbasasanyira nyale zawo. Penepo, amyali madzemwa atoma kuphemba andzawo a ndzeru kuti: ‘Tipasenimbo pang'ono mafuta anu, thangwi nyale zathu ziri kuthima.’ “Mbwenye amyali a ndzeru aatawira tenepa: ‘Nkhabe, gopa panango nkhabe kudza kakwana kuna ife na imwe ene. Ndokoni kagule kunaguliswa iwo’. “Mudabuluka iwo kwenda kagula mafuta, mwali wa mamuna afika. Amyali akhadamala kusasanyira apita na iye pabodzi mu phwandu ya banja. Penepo citseko cafungwa. “Buluka penepo, abwerambo andzawo mbalonga tenepa: ‘Mbuya, Mbuya, tifungulireni citseko!’ “Mbwenye mwali wa mamuna aatawira tenepa: ‘Ndimo mwene ndisakupangani kuti ine nkhabe kukudziwani!’ “Na tenepo, Yezu aapanga kuti: ‘Khalani mbamulang'anira. Thangwi imwe nkhabe kuidziwa ntsiku peno n'dzidzi.’ ” “Penepi pinakhala ninga mamuna m'bodzi adacita ulendo wace. Pakubuluka kwace, acemera anyabasa ace mbaasiyira mpfuma zace. Na tenepo, abulusa kobiri zixanu mbapasa munthu m'bodzi, kobiri ziwiri mbapasa unango, kobiri ibodzi mbapasambo unango m'bodzi. Munthu m'bodzi na m'bodzi apasiwa ntengo unakwanirana na ndzeru zace. Pakumala penepo, abuluka mbaenda. Ule adatambira kobiri zixanu azikwata, mbaenda na mwansanga kazicitisa malonda, mbawina zinango zixanu. Ule adatambira kobiri ziwiri acitambo pibodzi-bodzi, mbawinambo pontho kobiri ziwiri. Mbwenye ule adatambira kobiri ibodzi, akumba djenje pantsi, mbaibisa penepo kobiri idapaswa iye na mbuya wace. “Pakupita ntsiku zizinji, abwera mbuya wawo, mbaaphemba toera asake kudziwa pidacita iwo na kobiri zace. Na tenepo, abwera nyabasa ule akhadatambira kobiri zixanu mbalonga tenepa: ‘Mbuya, kobiri zixanu zidandipasa imwe ndi izi. Mbwenye pa ntengo unowu ndawina pontho zinango izi zixanu.’ Mbuya wace ampanga tenepa: ‘Wacita pyadidi! Ndiwe nyabasa wadidi na wakunyindirika. Wakwanisa kunyindirika pa pinthu ping'ono, ndinadza kakunyindira pa pinthu pikulu. Mphapo cincino bwera udze katsandzaye pabodzi na ine.’ Buluka penepo, abwerambo ule akhadatambira kobiri ziwiri, mbalonga tenepa: ‘Mbuya, kobiri ziwiri zikhadandipasa imwe ndi izi. Mbwenye pa ntengo unowu, ndawina pontho zinango izi ziwiri.’ Mbuya wace ampanga tenepa: ‘Wacita pyadidi! Ndiwe nyabasa wadidi na wakunyindirika. Na tenepo, wakwanisa kunyindirika pa pinthu ping'ono, ndinadza kakunyindirambo pa pinthu pikulu. Mphapo cincino bwera udze katsandzaye pabodzi na ine.’ Pakumalisa abwerambo ule akhadatambira kobiri ibodzi, mbalonga tenepa: ‘Mbuya, ine ndisakudziwani kuti imwe ndimwe munthu wakunentsa, thangwi musabvuna padakhonda imwe kubzala, pontho musagumanya padakhonda imwe kumwaza pinthu. Na thangwi eneyo ndagopa, mbandiibisa pantsi kobiri yanu. Mphapo lero kwatani kobiri yanu ixi.’ Penepo, mbuya wace antawira tenepa: ‘Iwe ndiwe nyabasa wa kuipa, pontho ndiwe wakupolola. Iwe ukhapidziwa kuti ine ndisabvuna padakhonda ine kubzala, pontho ndisagumanya padakhonda ine kuwaza mbeu. Na tenepo, watani mphapo wakhonda kuyikha kobiri yanga n'nyumba zinakoyera anthu kobiri? Pa kubwerera kwanga, mbidaipaswa na m'bairo. Mpokosereni kobiri yace, muipase ule ana kobiri khumi. Thangwi ule anapyo, anadza kapaswa pontho pinango, toera piyinjipiretu kakamwe pinthu pyace. Mbwenye ule adapisowa, anadza kapokoserwa na pire pyene pina iye. Na tenepo, nyabasa uyu wakukhonda kuphedzera cinthu, mponyeni kunja, n'cidima. Mwenemu munadza kabveka ciliro na kugeda-geda mano’.” Yezu alonga pontho kuti: “Ine Mwana wa Munthu ndingadza kabwera mu mbiri yanga pabodzi na maanju anga onsene, ndinadza kakhala pa mpando wanga wa umambo. Anthu a madziko onsene a pantsi anagumanyikana patsogolo panga. Penepo ndinaapambula pa nsoka wa andzawo sawa-sawa ninga nkumbidzi asapambula mbuzi pa nkumbi wa mabira. Pontho ndinadza kaikha mabira ku nkono wa madyo, mbuzi ku nkono wa bzere. Na tenepo, Ine Mambo wawo ndinalonga kuna ale ali ku nkono wanga wa madyo kuti: ‘Bwerani imwe anyakusimbwa a Baba wanga! Tambirani umambo udasasanyirwa imwe ninga unthaka na Baba wanga, kubulukira pakutoma kwa dziko. Thangwi ndikhabva njala, imwe mwandipasa ca kudya. Ndikhabva nyota, imwe mwandipasa ca kumwa. Pontho ndikhali munthu wakudza, imwe mwanditambira. Ndikhakhala na usiwa, imwe mwandipasa ca kubvala. Ndikhaduwala, imwe mukhadza kandiona. Ndikhakhala n'kaidi, pontho imwe mukhadza kandiona.’ “Penepo ale akulungama anadza kabvundza mbalonga tenepa: ‘Mbuya, takuonani lini na njala mbatikupasani ca kudya? Peno na nyota mbatikupasani ca kumwa? Pontho ndi lini takuonani ninga munthu wakudza, mbatikupasani mbuto ya kugona? Peno na usiwa mbatikupasani ca kubvala? Pontho takuonani lini mbamuduwala peno mbamuli n'kaidi, mbatidza kakuonani?’ “Mbwenye Ine ndinaatawira tenepa: ‘Ndimo mwene ndisakupangani kuti: pire pikhacitira imwe m'bodzi wa abale anga ang'ono, mukhapicitira Ine ene.’ “Buluka penepo ndinalongambo na ale ali ku nkono wanga wa bzere kuti: ‘Bulukani pano imwe anthu a kuipa! Ndokoni mu moto wakukhonda kumala, udacitirwa Sathani pabodzi na maanju ace. Thangwi ndikhakhala na njala, imwe mwandimana ca kudya. Ndikhakhala na nyota, imwe mwandimana madzi. Pontho ndikhali munthu wakudza, imwe mwakhonda kunditambira. Ndikhali na usiwa, imwe mwakhonda kundipasa ca kubvala. Pontho ndikhaduwala, imwe mwakhonda kundiona. Ndikhali n'kaidi, imwe mwakhonda kudza kandiona.’ “Na tenepo, iwo anadza kanditawirambo kuti: ‘Mbuya! Takuonani lini na njala, peno na nyota, peno ninga munthu wakudza, peno na usiwa, peno wa kuduwala, peno mbamuli n'kaidi, ife mbatikhonda kukuphedzani?’ “Mbwenye Ine ndinaatawira tenepa: ‘Ndimo mwene ndisakupangani kuti: Pire pidakhonda kucitira imwe kuna m'bodzi wa ana awa ang'ono kakamwe, mukhakhonda kucitira Ine.’ “Na tenepo, anthu awa anadza kaenda ku nyatwa yakukhonda kumala, mbwenye ale akulungama anadza kaenda ku mbuto ya upulumuki wakukhonda kumala.” Yezu pidamala Iye kupfundzisa pyonsene ipi, aapanga anyakupfundza ace kuti: “Musadziwa kuti zasala ntsiku ziwiri, kuti idyiwe phwandu ya Paxkwa. Mphapo Ine Mwana wa Munthu ndinati ndiperekwe toera ndikhomerwe pa ntanda.” Na tenepo, akulu aanyantsembe na mathubu a mbumba, agumanyikana n'nyumba mwa nkulu wa anyantsembe, anacemerwa Khaifasi. Iwo abverana kuti amphate Yezu na ucenjeri, amuphe. Mbwenye akhalonga tenepa: “Mbapileke kucitika pa n'dzidzi wa phwandu, gopa mbumba inacita cikuti.” Mukhakhala Yezu ku Bhetanya, ku nyumba ya Simau, akhacemerwa nyamatanya, pa n'dzidzi ukhadya iwo, nkazi m'bodzi afendedzera Yezu na ntete wace wa mafuta a kudzola, akununkhira kakamwe, mbaakhutulira munsolo mwa Yezu. Mafuta enewa akhali a ntengo ukulu kakamwe. Anyakupfundza a Yezu na kupiona penepyo aipirwa napyo, mbatoma kulonga tenepa: “Thangwi yanji ali kubvunga mafuta? Mafuta awa akhakwanira kuguliswa na ntengo ukulu, kobiri yace mbipaswa anyakucherenga.” Mbwenye Yezu na kuona kuti anyakupfundza ace aipirwa napyo, aapanga tenepa: “Thangwi yanji musansanya nkazi uyu? Iye andicitira cinthu cadidi kakamwe. Thangwi anyakucherenga imwe munakhala na iwo ntsiku zonsene, mbwenye Ine sinakhala na imwe ntsiku zonsene tayu. Lang'anani, mafuta adandikhutulira nkazi uyu m'manungo mwanga, ndi kusasanyira ntsiku ya kuikhwa kwanga. Ndimo mwene, ndisakupangani kuti m'mbuto zonsene zinafuna kudza kamwazwa Mphangwa Zadidi izi pantsi pano, pinati pilongwembo pidacita nkazi uyu, toera anthu ankumbukire.” Na tenepo, m'bodzi wa anyakupfundza khumi na awiri a Yezu, anacemerwa Djuda Xikariyoti, aenda kalonga na akulu aanyantsembe, mbalonga tenepa: “Ndingakupasani Yezu, imwe munandipasanji?” Iwo abulusa kobiri makumatatu za parata, mbampasa. Kubulukira n'dzidzi unowu kwenda kutsogolo, iye akhasaka n'dzidzi wadidi toera ampereke. Ntsiku yakutoma ya phwandu ya mikate ya kusoweka ntombwe wa kutupisa, anyakupfundza ace aenda kuna Yezu mbam'bvundza kuti: “Ndi kupi kunafuna imwe kuti tiyende kakusasanyireni phwandu ya Paxkwa?” Yezu aatawira kuti: “Ndokoni mu nzinda wa Djerusalema, kunyumba kwa mamuna m'bodzi, mumpange tenepa: ‘Mpfundzisi alonga kuti n'dzidzi wanga uli dhuzi. Phwandu ya Paxkwa ndinaidyera kunyumba kwako, Ine na anyakupfundza anga’. ” Iwo acita ninga mudaapangira Yezu, mbatoma kusasanyira phwandu ya Paxkwa. Pa kudoka kwa dzuwa, Yezu aenda kadya na anyakupfundza ace khumi na awiri. Mukhadya iwo Yezu alonga tenepa: “Ndimo mwene, ndinakupangani kuti m'bodzi wanu anati andisandukire.” Iwo na kubva penepyo akhala atsukwala pikulu, mbatoma m'bodzi na m'bodzi kum'bvundzisa kuti: “Kodi ndine Mbuya?” Yezu aatawira tenepa: “Ule anadya na ine mu mbale ibodzi ene, ndiye anafuna kundisandukira. Ndimo mwene, Ine Mwana wa Munthu, ndinati ndife ninga mudalemberwa ipyo m'Bukhu ya Mulungu na thangwi yanga. Mbwenye nyatwa ndi yace ule anafuna kusandukira, Ine Mwana wa Munthu! Mphyadidi mbadakhonda kubaliwa.” Na tenepo, Djuda, nyakunsandukira, am'bvundzambo kuti: “Kodi ndine Mbuya?” Yezu antawira tenepa: “Ande, ndiwe.” Mukhadya iwo, Yezu akwata nkate mbapereka takhuta kuna Mulungu, aumenya, mbaupasa anyakupfundza ace, mbalonga kuti: “Kwatani, dyaani, ici ndi manungo anga.” Buluka penepo, akwata ndiko, apereka takhuta kuna Mulungu, aipasa anyakupfundza ace, mbalonga kuti: “Mwaani monsene. Ici ndi ciropa canga ca cibverano cipsa. Ciropa cinacololekera anthu azinji, toera kulekerera madawi. Na tenepo, ndinakupangani kuti, kutomera lero mpaka kutsogolo, nkhabe kudza kamwabve vinyu iyi, mpaka ntsiku inadza kamwa Ine vinyu ipsa pabodzi na imwe, mu Umambo wa Baba wanga.” Pakumala kuimba nyimbo, abuluka mbaenda ku phiri ya Mulivera. Na tenepo Yezu alonga kuli anyakupfundza ace kuti: “Masiku ano, monsene munati mundithawe. Thangwi pyalembwa m'Bukhu ya Mulungu kuti: “ ‘Ndinadza kapha nkumbidzi, mabira a pa nkumbi mbamala kubalalika.’ Mbwenye ndingamala kulamuka pa kufa, ndinatsogola kwenda ku Galileya.” Penepo Pedhru ampanga tenepa: “Peno andzanga anakuthawani. Mbwenye ine cipo ndinadza kakuthawani.” Yezu antawira tenepa: “Ndimo mwene ndisakupanga kuti: Masiku ano ene, dzongwe mbidzati kulira, iwe unati undikhonde katatu.” Mbwenye Pedhru ampanga kuti: “Pingafunika kuti ine ndife pabodzi na imwe, ndinafa. Mbwenye ine nkhabe kudza kakukhondani.” Penepo, anyakupfundza onsene a Yezu alongambo pibodzi-bodzi. Buluka penepo, Yezu aenda na anyakupfundza ace ku mbuto ibodzi inacemerwa Djesimani, mbaapanga tenepa: “Khalani pano, Ine ndiri kwenda pale kaphembera.” Yezu akwata Pedhru na ana awiri a Zebhedheu. Penepo atoma kunentseka muntima mwace pontho mbakhatsukwala. Na tenepo aapanga kuti: “Khalani pano mbamulang'anira pabodzi na Ine, thangwi ntima wanga uli kutsukwala pikulu mpaka kufa.” Abuluka mbaenda patsogolo pang'ono, agodama mbalambira mpaka kufikisa nkhope yace pantsi, mbaphembera tenepa: “Baba wanga, pingakwanisika, ndithausireni ndiko iyi ya nyatwa! Mphapo mbapileke kucitika ninga munafunira Ine, mbwenye citani ninga munafunira imwe.” Buluka penepo, abwerera kuna anyakupfundza ace, mbaagumana mbakhagona. Iye alonga kuna Pedhru kuti: “Kodi imwe mwacimwana kulang'anira pabodzi na Ine pa n'dzidzi ubodzi basi? Lang'anirani pontho muphembere toera mukhonde kugwa m'manyengerero. Thangwi nzimu usafuna, mbwenye nyama yaneta.” Yezu abuluka pontho kaciwiri kwenda kaphembera, mbalonga tenepa: “Baba, ngakhala nkhabe kwanisika kuti ndiko iyi ya nyatwa ndikhonde kuimwa, mbakucitike kufuna kwanu.” Mudabwerera Iye, aagumana pontho mbakhagona, thangwi maso awo akhadalemerwa na citulo. Na tenepo, Yezu aasiya pontho anyakupfundza ace, mbaenda kaphembera kacitatu, mbalonga mafala mabodzi-bodzi. Buluka penepo, abwerera kuna anyakupfundza ace mbaapanga tenepa: “Kodi imwe muli kupuma mbamugona pyanu basi? Wafika n'dzidzi wa kuperekwa kwa Ine Mwana wa Munthu m'manja mwa anyakudawa. Lamukani tiyende. Thangwi ali kufika anafuna kundisandukira.” Mbwenye Yezu mbadzati kumala kulonga, afika Djuda, m'bodzi wa anyakupfundza khumi na awiri. Iye afika na mwinji ukulu wa anthu ukhali na matarasada na miti. Iwo akhadatumwa na akulu aanyantsembe na mathubu a mbumba. Mbwenye Djuda, nyakusandukira Yezu, akhadabverana na iwo cidzindikiro ici: “Ule anamwanyika ine na mpsompsono, ndiye unowu. M'mangeni.” Djuda aenda na mwansanga kuna Yezu mbalonga tenepa: “Mpfundzisi!” Mbampsompsona. Mbwenye Yezu ampanga tenepa: “Xamwali, wadzeranji?” Penepo andzace Djuda anfendedzera Yezu, mbam'phata. Pa n'dzidzi unowu, m'bodzi wa anyakupfundza a Yezu, abulusa tarasada mbaphekesa nyabasa wa nkulu wa anyantsembe, mban'gwanda khutu. Penepo Yezu ampanga kuti: “Koya tarasada yako mukhakhala iyo. Thangwi anthu onsene anathamangira tarasada, anadza kafambo na tarasada. Usanyerezera kuti Ine nkhabe kwanisa kuphemba Baba wanga kuti andiphedze? Mbidam'phemba mbadanditumira cincino pano anyankhondo ace a kupiringana pikwi na pikwi pya maanju. Mphapo mbapidasimbiswa tani pire pidalembwa m'Bukhu ya Mulungu kuti picitike?” Pa n'dzidzi unowu Yezu alonga kuna mbumba kuti: “Mwatani musandidzera na matarasada na miti, kudza kandimanga ninga Ine ndine phanga? Ntsiku zonsene ndikhakupfundzisa mu Nyumba ya Mulungu, imwe mudandimanga tayu! Mbwenye pyonsene ipi pyacitika toera pisimbiswe pire pidalembwa na maporofeta n'kati mwa Bukhu ya Mulungu.” Na tenepo, anyakupfundza ace onsene ansiya, mbathawa. Ale adam'manga Yezu, ankwata mbaenda na Iye ku nyumba ya nkulu wa anyantsembe, anacemerwa Khaifasi. Kweneko akhadagumanyikana anyakudziwisa a Mwambo na mathubu. Pedhru akhaenda mbatowera Yezu na kutali, mpaka kupita pa thando ya nyumba ya nkulu wa anyantsembe. Mwenemu akhala pantsi pakati pa nsoka wa anyabasa, toera aonese kumala kwa pinthu. Na tenepo, akulu aanyantsembe na nsoka onsene wa anyakutonga miseru, akhasaka mathangwi authambi akuphesa na iwo Yezu. Penepo akhagumanika anyamaso azinji a uthambi. Mbwenye nkhabe mathangwi a kuipa adagumanika muna Yezu. Na tenepo, pakumalisa adza kaonekambo anyamaso anango awiri, mbalonga tenepa: “Mamuna uyu alonga kuti: ‘Ine ndinaikwanisa kuifudza Nyumba ya Mulungu, mbandiimanga pontho pa ntsiku zitatu.’ ” Penepo nkulu wa anyantsembe alamuka mbalonga kuna Yezu kuti: “Kodi iwe nkhabe kutawira pa pyonsene pinakulongera iwo?” Mbwenye Yezu akhonda kutawira cinthu. Na tenepo, nkulu wa anyantsembe ampanga kuti: “Ine ndisakupanga kuti udumbire na dzina ya Mulungu wa m'maso, ngakhala iwe ndiwe Kirixtu Mwana wa Mulungu, tipange!” Yezu antawira kuti: “Ande, ndi tenepa ninga mudapilongera iwe. Mbwenye ndinakupangani pontho kuti: Kutomera cincino munati muone Ine Mwana wa Munthu, mbandikhala ku nkono wa madyo wa Mulungu wa Mphambvu, mbandibwera pa makole a kudzulu.” Na tenepo, nkulu wa anyantsembe pa kubva penepyo apandula nguwo zace, mbalonga kuti: “Iye axola Mulungu! Thangwi yanji tisafuna anyamaso anango? Mwabva mwekha cincino kuxola kudacita iye Mulungu. Musaona tani?” Iwo atawira tenepa: “Asatongwa aphiwe!” Na tenepo, anango atoma kum'phulira mata kunkhope, mbakham'menya na maxoko. Anangombo mbakham'menya kunkhope na manja, mbakhalonga kuti: “Iwe Kirixtu, ngakhala ndiwe mporofeta, lotera mbani akumenya?” Pedhru akhakhala nawa pa thando. Na tenepo, nyabasa m'bodzi wa nkazi anfendedzera mbampanga kuti: “Iwe ukhakhalambo pabodzi na Yezu wa ku Galileya!” Mbwenye Pedhru an'khonda pamaso pa anthu onsene, mbalonga tenepa: “Ine nkhabe kupidziwa pinalonga iwe.” Pikhabuluka iye pa nsuwo, nyabasa unango wa nkazi amulang'anisa mbalonga kuna anthu akhali penepo kuti: “Mamuna uyu akhali pabodzi na Yezu wa ku Nazareti!” Pedhru atuna pontho, mbakhonda na kudumbira kuti: “Nkhabe kun'dziwa mamuna unowu.” Pakupita n'dzidzi pang'ono, anthu akhakhala penepo aenda kuna Pedhru mbanfendedzera dhuzi mbampanga kuti: “Ndimo mwene, iwe ndiwe m'bodzi wawo, thangwi malongero ako asapangisa.” Pedhru atoma kupasika dzedze ekha ene mbakhadumbira kuti: “Ine nkhabe kun'dziwa mamuna uyu!” Pa n'dzidzi ubodzi-bodzi dzongwe yalira. Na tenepo, Pedhru akumbuka mafala akhadampanga Yezu kuti: “Dzongwe mbidzati kulira, iwe unadza kandikhonda katatu.” Penepo iye abuluka kunja mbalira pikulu kakamwe. Mudaca kunja, na macibese ene, akulu aanyantsembe na mathubu a mbumba, agumanyikana toera abverane kuti anam'pha tani Yezu. Iwo am'manga, ankwata mbaenda kampereka kuna Piratu, ntongi wa mu Roma. Djuda, nyakusandukira Yezu, na kuona kuti Yezu atongiwa kuti aphiwe, apaluka ntima na kugopa, mbaenda kuna akulu aanyantsembe na mathubu a mbumba, kwenda kaabwezera kobiri zawo makumatatu za parata. Mbalonga kuti: “Ine ndadawa, thangwi ndakupasani munthu wa kusoweka mathangwi, kuti aphiwe.” Mbwenye iwo atawira tenepa: “Tinapyonji ife penepyo? Mphyako penepyo!” Penepo Djuda akwata kobiri makumatatu za parata, azitaya mu Nyumba ya Mulungu, abuluka mbaenda kamangika, mbafa. Akulu aanyantsembe akwata kobiri izi za parata mbalonga kuti: “Nkhabe kutawirirwa mu mwambo wathu kuti tikwate kobiri iyi ya ciropa, tiibvunganize na kobiri zinango za N'nyumba ya Mulungu.” Na tenepo, iwo akhala pantsi mbabverana kuti: “Ndi pyadidi tikwate kobiri eneyi, tigule nayo munda wa mamuna m'bodzi akhali na basa ya kuumba pyombo pya dongo, toera munda unowu tiucite masiye a anthu akudza.” Ndi thangwi eneyo, munda unowu usacemerwa (munda wa ciropa), mpaka lero. Na tenepo, pyasimbiswa pire pikhadalonga Mulungu na mulomo wa mporofeta Jeremiya kuti: “Iwo akwata kobiri makumatatu za parata, ntengo ukhadaphemba mbumba ya Izarayeli, mbagula na iwo munda wa nyakuumba pyombo pya dongo, ninga mudandipangira Mbuya.” Yezu akhakhala dzololo pamaso pa ntongi. Iye ntongi atoma kum'bvundza Yezu kuti: “Iwe ndiwe mambo wa madjuda?” Yezu antawira tenepa: “Ndimwe analonga penepi.” Mbwenye, akulu aanyantsembe na mathubu pidamulongera iwo uthambi, Yezu akhonda kutawira cinthu. Na tenepo, Piratu am'bvundza Yezu kuti: “Iwe nkhabe kubva pyonsene ipi pinakupambazira iwo?” Yezu athimiza na kumatama, mbakhonda kutawira cinthu. Na tenepo, ntongi adzumatirwa napyo pikulu. Ungafika n'dzidzi wa phwandu ya Paxkwa, kukhali na nsambo ukhacita ntongi, wakukhuca munthu m'bodzi n'kaidi, ule anasankhulwa na mbumba. Pa n'dzidzi unowu, akhalipo nyan'kaidi m'bodzi wa mbiri akhacemerwa Bharabhasi. Ntongi Piratu abvundza mbumba ikhadagumanyikana penepo, mbalonga tenepa: “Mbani anafuna imwe kuti abuluswe? Bharabhasi, peno Yezu anacemerwa Kirixtu?” Thangwi Piratu akhapidziwa pyace, kuti iwo ampereka Yezu m'manja mwace na thangwi ya bibvu. Piratu mbali n'nyumba ya kutongera miseru, nkazi wace antumira mphangwa izi: “Leka kupipitira pinthu pya munthu uyu wakulungama, thangwi masiku ndaona nyatwa kakamwe mu ndoto, na thangwi yace.” Mbwenye akulu aanyantsembe na mathubu, akwanisa kunyengerera mbumba yonsene ya anthu, kuti iphembe Piratu abuluse Bharabhasi n'kaidi, mbaphesa Yezu. Na tenepo, ntongi Piratu abvundza anthu kuti: “Pa amuna awiri awa, mbani anafuna imwe kuti abuluswe n'kaidi?” Iwo atawira kuti: “Bharabhasi!” Piratu aabvundza pontho kuti: “Kodi ndinancitanji Yezu, anacemerwa Kirixtu?” Onsene atawira na kukhuwa kuti: “Mbakhomerwe pa ntanda!” Piratu aabvundza kuti: “Mphapo, nchanji ca kuipa cidacita Iye?” Mbwenye mbumba ikhakhuwiratu kakamwe kuti: “N'khomereni pa ntanda!” Mphapo Piratu na kuona kuti nkhabe cinthu cinakwanisa iye kucita, pontho na kuona kuti mwinji wa anthu unadza kansandukira, abweresa madzi mbasamba manja patsogolo pa anthu onsene, mbalonga tenepa: “Ine nkhabe kudza kakutawirira kufa kwa mamuna uyu! Citani pinafuna imwe.” Na tenepo, anthu onsene atawira kuti: “Ciropa cace mbacigwere kuna ife na kuna ana athu!” Na tenepo, Piratu aabulusira Bharabhasi. Buluka penepo, akwapulisa Yezu na n'chamu, mbampereka kuti akhomerwe pa ntanda. Na tenepo, anyankhondo a mambo Piratu ankwata Yezu mbaenda na iye ku nyumba ya ntongi wa ku Roma. Penepo anyankhondo onsene anzungulira. An'dulisa nguwo zace mbam'bvazika nkumi wakufuira. Aluka nthimba ya minga mbam'bvazika munsolo mwace. Pontho, akwata mpsimbo mbam'phatisa m'manja mwace a nkono wa madyo. Buluka penepo, iwo an'godamira patsogolo pace mbakhansingirira tenepa: “Bweraniko mambo wa madjuda!” Am'phulira mata, mbampokosera mpsimbo, mbakham'menya nayo munsolo. Pidamala iwo kunsingirira, an'dulisa nkumi mbam'bvazika pontho nguwo zace. Buluka penepo, ankwata mbaenda kan'khomera pa ntanda. Pikhabuluka iwo penepo agumana mamuna m'bodzi wa ku nzinda wa Sirene, anacemerwa Simau, mbankakamiza kuti akwate ntanda. Na tenepo, iwo afika ku mbuto ibodzi inacemerwa Gologota. Ndiko kubveka mbuto ikhataiwa madudu a misolo ya anthu a kufa. Kweneko anyankhondo apasa Yezu vinyu ya kubvungazwa na nyongo kuti amwe. Mbwenye Yezu, pidailawira iye, aikhonda kuimwa. Pidamala iwo kun'khomera pa ntanda, amenya ntsango, mbagawana nguwo zace. Buluka penepo, iwo akhala pantsi mbakhamuonera. Padzulu pa ntanda, dhuzi na nsolo wa Yezu, palembwa mathangwi adakhomererwa iye kuti: “UYU NDI YEZU, MAMBO WA MADJUDA.” Akhomerwambo pa ntanda pabodzi na Yezu mambava mawiri, m'bodzi ku nkono wa madyo, unango ku nkono wa bzere. Anthu akhapita na penepo, akhantikana mbakhasukusa misolo, mbakhalonga tenepa: “Iwe ukhalonga kuti unakwanisa kufudza Nyumba ya Mulungu mbuimanga pontho pa ntsiku zitatu, pulumusika wekha ene mphapo! Chita pa ntanda, ngakhala iwe ndiwedi Mwana wa Mulungu!” Sawa-sawa na akulu aanyantsembe na anyakudziwisa a Mwambo na mathubu akhansingirirambo Yezu mbakhalonga kuti: “Iye apulumusa anango, mbwenye asacimwana kupulumusika ekha ene! Ngakhala iye ndiye Mambo wa Izarayeli, mbachite mphapo cincino pa ntanda, ife tinantawira! Iye akhulupira Mulungu, pontho mbalonga kuti: ‘Ndine Mwana wa Mulungu.’ Ngakhala ndi tenepo, mbabwere mphapo Mulungu wace adze kamuombole cincino, ngakhala Mulungu asanfunadi.” Na mambava ene ale akhadakhomerwa pa ntanda pabodzi na Yezu, akhanxolambo. Kutomera pa n'dzidzi khumi na uwiri wa masikati, mpaka pa n'dzidzi utatu wa kumaulo, dziko yonsene yagudumirwa na cidima. Dhuzi na n'dzidzi utatu wa kumaulo, Yezu akhuwa mbalonga tenepa: “Eloyi, Eloyi, lama sabakitani?” Kweneku ndi kubveka “Mulungu wanga, Mulungu wanga, thangwi yanji wandisiya?” Anango akhali penepo, mudabva iwo penepi, akhalonga tenepa: “Iye asacemera Eliya!” Na mwansanga, m'bodzi wawo aenda mbathamanga kakwata thonje mbaibvika mu vinyu ya kudjamuka, mbaipfeka pa ntete, mbapasa Yezu kuti amwe. Mbwenye anango akhalonga tenepa: “Nsiyeni, timuone ngakhala Eliya anabwera kampulumusa.” Pakumala kukhuwa pontho, Yezu apereka nzimu wace. Pa n'dzidzi unowu, nguwo ikhasitira mbuto ya Mulungu mu Nyumba ya Mulungu, yapanduka nakati-na-kati kutomera kudzulu mpaka pantsi. Mataka atekenyeka, myala mbisweka. Nthumbi zafunguka, pontho manungo a anthu azinji a mbumba ya Mulungu akhadafa kale ene, alamuka pa kufa. Pakumala kulamuka Yezu pa kufa, iwo abuluka n'zinthumbi mbapita mu Djerusalema, mu nzinda wakucena, mbabulukira kuna anthu azinji. Nkulu wa anyankhondo a ku Roma na anyankhondo ace akhaonera Yezu, na kubva kutekenyeka kwa mataka na pyonsene pikhacitika, agopa pikulu kakamwe mbalonga tenepa: “Ndimo mwenedi, mamuna uyu akhali Mwana wa Mulungu!” Kweneko akhalipombo akazi azinji mbakhalang'anisa na kutali. Iwo akhatowerera Yezu kubulukira ku Galileya, toera kum'phatira basa. Pakati pawo akhalipo Mariya Madhalena, Mariya mai wace Tiyago na Zuze, pontho na nkazi wa Zebhedheu. Ca kumaulo, afika mamuna m'bodzi anacemerwa Zuze. Dziko yace ya kubaliwa ndi Arimateya. Iye akhali m'pfumi, pontho iye akhakhalambo nyakupfundza wa Yezu. Iye aenda kuna ntongi Piratu kwenda kaphemba manungo a Yezu. Piratu apanga anthu ace kuti ampase. Na tenepo, Zuze akwata manungo a Yezu mbaapyangirira na nguwo yakucena, mbaaikha mu nthumbi yace ipsa ikhadakumbisa iye pa mwala. Pakumala kuikha manungo, abulumundisa mwala ukulu mbafunga na iwo nthumbi. Buluka penepo mbaenda pyace. Mariya Madhalena na Mariya unango, akhakhala nawa pantsi, patsogolo pa nthumbi. Mangwana mwace na macibese, ikhali ntsiku ya sabudu, akulu aanyantsembe na nsoka unango wa afarisi aenda kuna Piratu, mbalonga kuti: “Tisakumbuka kuti nyauthambi ule mbali m'maso, alonga tenepa: ‘Pakupita ntsiku zitatu, Ine ndinadza kalamuka pa kufa.’ Na thangwi eneyi, mphyadidi mubuluse ntemo wa kuti nthumbi ionerwe na mphambvu, mpaka ntsiku yacitatu. Pezi anyakupfundza ace anaenda kaaba manungo, angamala mbapanga mbumba yonsene ya anthu kuti iye alamuka pa kufa! Na tenepo, uthambi uyu wakumalisa unakhala ukulu kakamwe kupita wa kutoma.” Piratu aapanga tenepa: “Anyankhondo munawo. Mphapo ndokoni mukhaonere nthumbi ninga munafunira imwe.” Na tenepo, iwo aenda, mbaikha cidzindikiro pa mwala ukhadafunga nthumbi, pontho mbasiya anyankhondo kuti aionere. Pa ntsiku ya Dimingu, m'bambakuca, Mariya Madhalena na Mariya unango aenda kaona ku nthumbi. Na mwansanga kwabveka citeke-teke cikulu, thangwi anju m'bodzi wa Mbuya achita kudzulu, mbabulumundisa mwala pa khundu ukhadafunga nsuwo wa nthumbi, mbaukhalira. Makhaliro ace anju akhali ninga kucetuma kwa njazi, nguwo zace zikhali zakucena ninga thonje. Anyankhondo akhaonera atoma kudzadzamira na kugopa, mbakhala ninga afa. Anju alonga na akazi kuti: “Lekani gopa, thangwi ine ndisadziwa kuti imwe muli kusaka Yezu adakhomerwa pa ntanda. Iye nkhabepo pano. Alamuka pa kufa ninga mukhadalongera Iye. Bwerani mudze kaone pakhadaikhwa Iye. Cincino ndokoni na mwansanga mukhapange anyakupfundza ace, kuti Iye alamuka pa kufa. Iye ali kutsogola kwenda ku Galileya. Ndi kweneko kunafuna imwe kamuona. Ndi penepi pikhafuna kukupangani ine.” Na tenepo, iwo abuluka na mwansanga pa nthumbi na kugopa, pontho na kukomerwa pikulu, aenda mbathamanga kalonga mphangwa kuna anyakupfundza ace. Pa n'dzidzi ubodzi-bodzi Yezu aenda kuna akazi mbaamwanyika. Penepo iwo anfendedzera mbam'phata myendo mbamulambira. Na tenepo, Yezu aapanga tenepa: “Lekani kugopa! Ndokoni kapange abale anga kuti aende ku Galileya. Kweneko anaonana na Ine.” Pa n'dzidzi ukhaenda akazi, anyankhondo anango akhaonera nthumbi abwerera ku nzinda, kwenda kalonga kuna akulu aanyantsembe pire pyonsene pikhadacitika. Na tenepo, akulu aanyantsembe agumanyikana mbakhala pantsi na mathubu. Penepo iwo abverana kudyekera anyankhondo na ntengo ukulu wa kobiri, mbaapanga tenepa: “Longani kuti: ‘Anyakupfundza ace abwera na masiku mbaaba manungo, ife mbatikhagona.’ Mbwenye ntongi Piratu angadza kapibva pinthu penepi, ife tinam'matamiza, mbaticita kuti imwe mukhonde kuoneswa nyatwa na thangwi eneyi.” Anyankhondo atawira kucita pidapangwa iwo, mbatambira kobiri. Na tenepo, uthambi unowu wamwazika pakati pa madjuda, mpaka na lero. Anyakupfundza khumi na m'bodzi aenda ku Galileya, pa phiri ikhadaapanga Yezu. Pidamuona Iwo, amulambira, mbwenye anango akhapenula. Na tenepo, Yezu aafendedzera mbaapanga kuti: “Ndapasiwa mphambvu zonsene za kutonga kudzulu na pantsi. Na tenepo, ndokoni mbamucita kuti madzindza onsene akhale anyakupfundza anga. Mbamuatambirisa batixmu onsene na dzina ya Baba na ya Mwana na ya Nzimu Wakucena, mbamuapfundzisa kukoya pyonsene pidakupangani Ine. Dziwani kuti Ine ndinakhala na imwe kwenda na kwenda, mpaka kumala kwa pantsi.” Kutoma kwa Mphangwa Zadidi za Yezu Kirixtu, Mwana wa Mulungu. Ninga mudazilembera mporofeta Izaya kuti: “Ndinatuma ntumwi wanga patsogolo pako, toera akusasanyire njira.” “ Fala iri kukhuwa n'thando mbilonga kuti: ‘Sasanyirani njira ya Mbuya mbamundendemeza mipsalu yace.’ ” Ndi tenepa kubulukira kudacita Juwau Bhatixta n'thando, mbakhamwaza mphangwa za kutambira batixmu ya kuchunyuka toera kulekererwa madawi. Anthu onsene a ku cisa ca ku Djudeya na a ku nzinda wa Djerusalema akhaenda kuna Juwau Bhatixta, mbakhadambula madawi awo, iye mbakhaatambirisa batixmu n'nyandza ya Djorodani. Juwau akhabvala nguwo zakucitwa na uweya wa pinyama pinacemerwa kamelo, mbakhamanga bhande ya nthembe n'cunu mwace, mbakhadya nthete na uci wa n'tsanga. Mbakhalonga kuna mbumba kuti: “N'nduli mwanga anabwera munthu unango na mphambvu zikulu za utongi za kupiringana ine. Pontho ine sine munthu wakukwanisa kunsudzula mithambo ya ntsapato zace. Ine ndisakutambirisani batixmu na madzi. Mbwenye Iye anakutambirisani batixmu na Nzimu Wakucena.” Pa ntsiku zenezo, Yezu akhabuluka ku nzinda wa Nazareti, ku dziko ya Galileya, mbaenda katambiriswa batixmu na Juwau Bhatixta mu nyandza ya Djorodani. Pa n'dzidzi ukhabuluka Yezu m'madzi, iye aona thambo yafunguka, penepo Nzimu Wakucena mbukhachita ninga nkhangaiwa, mbum'phamira. Na tenepo, kudzulu kwabveka n'khuwo mbulonga kuti: “Iwe ndiwe mwana wanga wakufunika, ananditsandzaisa.” Buluka penepo, na mwansanga Yezu aendeswa n'thando na Nzimu Wakucena. Mwenemu Yezu akhala ntsiku makumanai mbakhanyengererwa na Sathani. Iye akhakhala na pinyama pya n'tsanga, anju za Mulungu mbizikhamphatira basa. Pakumala kupitiswa Juwau Bhatixta n'kaidi, Yezu abwerera ku Galileya kalonga Mphangwa Zadidi za Mulungu. Iye akhalonga tenepa: “N'dzidzi wakwana. Umambo wa Mulungu uli dhuzi, chunyukani kudawa kwanu, mutawire Mphangwa Zadidi.” Yezu mukhapita Iye na mu mbale mwa nyandza ya Galileya, aona anyakokota awiri muubale mwawo mbakhagwisira kokota yawo n'nyandza. Iwo madzina awo ndi Simau Pedhru na Andereya. Yezu aapanga tenepa: “Nditowereni, Ine ndinakucitani anyakokota a anthu.” Iwo pa n'dzidzi ubodzi ene asiya makokota awo mbantowera. Pakufamba pang'ono patsogolo, Yezu aona amuna anango awiri muubale mwawo. Akhali Tiyago na Juwau, ana a Zebhedheu, mbakhasona makokota awo m'bote. Penepo pene Yezu aacemera. Iwo asiya baba wawo Zebhedheu na anyabasa ace m'bote, mbaenda mbatowera Yezu. Buluka penepo, Yezu na anyakupfundza ace aenda ku nzinda wa Kafaranaumi. Nsabudu mwace, apita n'nyumba ya kuphemberera, mbatoma kupfundzisa. Anthu onsene akhadzumatirwa na mapfundzisiro ace, thangwi akhalonga ninga anyakudziwisa a Mwambo tayu, mbwenye na mphambvu za utongi. Pa n'dzidzi unowu, aoneka mu nyumba ya kuphemberera mamuna m'bodzi akhali na nzimu wa kuipa, iye mbakhuwa kuti: “Yezu wa ku Nazareti, musafunanji na ife? Mwabwera kudza katifudza? Ine ndisakudziwani kuti ndimwe ani. Ndimwe Wakucena wa Mulungu!” Yezu aupwekera nzimu wa kuipa mbaupanga kuti: “Matama, pontho buluka muna munthu uyu!” Penepo nzimu wa kuipa wabhoma mamuna na mphambvu zonsene, mbukhuwa mbubuluka muna iye. Anthu onsene adzumatirwa napyo, mbabvundzana okha-okha kuti: “Ninji penepi? Cipfundzo cipsa? Lang'anani Iye ana mphambvu za kutonga na mizimu ene ya kuipa, iyo mbim'bvera.” Na thangwi eneyo mbiri yace Yezu yafika na mwansanga mu dziko yonsene ya Galileya. Na mwansanga, Yezu abuluka mu nyumba ya kuphemberera mbaenda pabodzi na Tiyago na Juwau, mpaka ku nyumba kwa Simau Pedhru na Andereya. Pidafika Yezu, iwo ampangiratu kuti mebzala wace Pedhru ali kugona thangwi aferuka. Yezu aenda pakhakhala iye mbam'phata nkono wace mbamulamusa. Penepo nthenda yawanga, iye mbatoma kuaphatira basa. Na maulo, mukhadoka dzuwa, mbumba ikhadzesa atenda azinji na anango akhakhala na mizimu ya kuipa. Mbumba yonsene ya mu nzinda yagumanyikana pa nsuwo wa nyumba. Iye awangisa anthu azinji akhali na nthenda zakusiyana-siyana, pontho na kuthamangisa madimonyo mazinji. Iwo madimonyo akhan'dziwa mbani Yezu. Ndi thangwi eneyo Iye akhaakhondesa kuti alonge. Na macibese, m'bambakuca, Yezu alamuka mbaenda kutali na anthu, pace ekha, kaphembera. Simau Pedhru aenda na andzace kasaka Yezu. Na tenepo, pidan'gumana iwo alonga tenepa: “Anthu onsene asakusakani.” Yezu aapanga tenepa: “Tendeni m'pisa pinango pya dhuzi-dhuzi, toera ndiapangembo Mphangwa Zadidi. Thangwi ndadzera penepyo.” Yezu akhaenda mbuto zonsene za Galileya, mbakhalonga Mphangwa Zadidi m'manyumba a kuphemberera, na kubulusa madimonyo. Penepo abwera mamuna m'bodzi nyamatanya kuna Yezu, an'godamira mbam'phemba tenepa: “Mbuya, mungafuna munandiwangisa.” Yezu am'bvera ntsisi zikulu, an'khuya na manja ace mbalonga tenepa: “Ndisafuna, iwe waceneswa.” Pa n'dzidzi ubodzi ene matanya amala, mamuna awanga. Buluka penepo, Yezu amuendesa mbampanga na mphambvu zonsene kuti: “Lang'ana leka kupanga munthu penepi. Ndoko kuna nyantsembe toera akudinkhe. Ungamala upereke ntsembe ninga mudapilongera Mozesi, toera anthu adziwe kuti iwe wawangadi.” Mbwenye mamuna uyu pidabuluka iye penepo, atoma kulonga pakweca pinthu pizinji, mbakhamwaza mphangwa za pyonsene pikhadacitika. Na thangwi eneyo, Yezu akhacimwana kupita m'mizinda na kutsandzaya. Mbwenye akhakhala kunja m'mbuto za kubisala. Anthu akhabuluka m'mbuto zonsene mbakhaenda kuna Iye. Pakupita ntsiku pang'ono, Yezu abwerera pontho ku Kafaranaumi. Penepo anthu abva kuti Yezu ali pa nyumba. Na tenepo, anthu azinji agumanyikana kweneko, mbapacimwana kuoneka mbuto na pa nsuwo pene, Iye mbakhaapfundzisa fala ya Mulungu. Amuna angasi abwera kuna Iye na nyampfutete m'bodzi mbakhatembetwa na amuna anai. Mbwenye iwo akhacimwana pita na iye mpaka kufika kuna Yezu, na thangwi ya mwinji wa anthu. Na tenepo, akwira pa ntsoyi, mbafudza ku khundu ikhakhala Yezu, mbafungula benga mbanchitisa na penepo ntenda akhabweresa iwo pa khangala. Yezu na kuona cikhulupiro cikhali na anthu awa, alonga kuna nyampfutete kuti: “Mwana wanga, madawi ako alekererwa.” Penepo, anyakudziwisa a Mwambo anango akhakhala pantsi, pidabva iwo penepyo atoma kunyerezera muntima mwawo mbalonga tenepa: “Thangwi yanji mamuna uyu asalonga tenepa? Iye asaxola Mulungu! Thangwi analekerera madawi ndi Mulungu basi, nkhabe munthu unango.” Pa n'dzidzi ubodzi ene, Yezu adziwa n'kati mwace pikhanyerezera iwo, mbaapanga kuti: “Thangwi yanji imwe musanyerezera pinthu penepi m'mitima mwanu? Ndi ninji pinakhonda kunentsa kulonga kuna nyampfutete: Madawi ako alekererwa, peno kumpanga kuti: Lamuka, kwata khangala yako, ndoko ku nyumba kwako? Mbwenye toera mudziwe kuti Ine, Mwana wa Munthu ndina mphambvu za kulekerera madawi,” ampanga nyampfutete kuti: “Lamuka, kwata khangala yako, ndoko ku nyumba kwako.” Pa n'dzidzi ubodzi-bodzi iye alamuka, akwata khangala yace mbabuluka pyace, anthu onsene mbamuona. Onsene adzumatirwa na pidaona iwo, mbapasa mbiri Mulungu mbalonga kuti: “Cipo tidzati kupiona pinthu ninga ipi!” Yezu abuluka pontho mbaenda ku gombe ya nyandza ya Galileya. Penepo mwinji wa anthu wanfendedzera, Iye mbatoma kuapfundzisa. Pikhafamba Iye aona Levi, mwana wa Alufeu, akhali nawa pa mbuto ikhakumbuswa misonkho, mbampanga kuti: “Nditowere.” Iye alamuka, mbantowera. Mukhadya Yezu na anyakupfundza ace ku nyumba kwa Levi, azinji anyakukumbusa misonkho na anyakudawa, akhadya na iwo pabodzi, thangwi mbazinji akhantowera. Anyakudziwisa a Mwambo a nsoka wa ndale wa afarisi, pikhaona iwo kuti Yezu ali kudya pabodzi na “anyakudawa’’ pontho na anyakukumbusa misonkho, abvundzisa anyakupfundza a Yezu kuti: “Thangwi yanji Iye asadya, mbamwa pabodzi na anyakukumbusa misonkho pontho na anyakudawa?” Yezu mudabva Iye penepyo aatawira kuti: “Angumi nkhabe kufuna nkondzi, mbwenye atenda ndiwo anafuna nkondzi. Ine sidabwera kudza kacemera akulungama tayu, mbwenye ndadzera anyakudawa toera achunyuke.” Ntsiku inango anyakupfundza a Juwau Bhatixta na afarisi akhapimana cakudya. Penepo anthu anango aenda kabvundza Yezu kuti: “Ndi thangwi yanji anyakupfundza a Juwau na afarisi asaphembera mbapimana cakudya, mbwenye anu nkhabe?” Yezu aatawira tenepa: “Pisacitika kuti adacemerwa ku phwandu ya banja apimane cakudya mwali wa mamuna mbali na iwo? Nkhabe citika. Mbwenye zinafika ntsiku zinafuna kukwatirwa iwo mwali wa mamuna pakati pawo, ntsiku zenezi iwo anati apimane cakudya. Nkhabe munthu anaikha cigamba ca nguwo ipsa pa nguwo yakale. Thangwi cigamba cipsa cinathimiza pandula nguwo yakale, benga mbikula. Pontho nkhabe munthu anaikha vinyu ipsa m'pyombo pya nthembe zakale. Thangwi angacita penepyo, vinyu inaswa pyombo, mbibvungika vinyu na pyombo pyene. Mbwenye vinyu ipsa isatongwa kuti ikoyiwe m'pyombo pipsa.” Ntsiku ibodzi ya Sabudu, Yezu akhapita na pakati pa munda wa tirigu. Mukhaenda iwo, anyakupfundza ace atoma kupuruza tirigu. Mbwenye afarisi abvundzisa Yezu kuti: “Kodi ndi thangwi yanji anyakupfundza ako asacita pire pinakhondeswa kucita ntsiku ya Sabudu?” Mbwenye Iye aatawira tenepa: “Kodi imwe cipo mudzati kuona pidalembwa na thangwi ya pidacita Dhavidhi na andzace mudabva iwo njala mbasowa cakudya? Pa n'dzidzi ukhakhala Abhiyatari ninga nkulu wa anyantsembe, Dhavidhi apita N'nyumba ya Mulungu, mbadya mikate ya ntsembe pontho mbapasambo andzace. Mbwenye anatawirirwa kudya mikate eneyo mbanyantsembe basi.” Yezu athimiza pontho na kuapanga tenepa: “Sabudu yacitwa na thangwi ya munthu, mbwenye munthu hadacitwa na thangwi ya Sabudu tayu. Na tenepo, Ine, Mwana wa Munthu, ndine Mbuya mpaka na ntsiku ya Sabudu ene.” Yezu apita pontho n'nyumba ya kuphemberera. Mwenemu agumana mamuna m'bodzi wakulamala djanja. Iwo akhamulang'anisa toera kumuona ngakhala anamuwangisa ntsiku ya Sabudu, kuti aone thangwi ya kusumira nayo Yezu. Penepo Yezu apanga mamuna nyakulamala djanja kuti: “Lamuka, bwera pano pakati.” Buluka penepo aabvundza kuti: “Ndi ninji pinatawirirwa kucita ntsiku ya Sabudu? Kucita udidi peno kucita uipi? Kupulumusa munthu peno kumupha?” Mbwenye nkhabe m'bodzi adantawira. Yezu alang'ana anthu akhali n'khundu mwace, na kuipirwa pontho na kutsukwala na thangwi ya kuuma kwawo mitima, mbampanga nyakulamala kuti: “Fungula djanja yako.” Iye afungula, djanja yawanga. Na tenepo, afarisi abuluka mbatoma kubverana na anthu a nsoka wa mambo Herodhi, kusaka njira ya kupha nayo Yezu. Yezu abuluka na anyakupfundza ace mbaenda ku nyandza, anthu azinji a ku Galileya mbakhantowera. Na kubva pyonsene pikhacita Iye, anthu azinji a ku Djudeya, na a ku Djerusalema, na a ku Idhumeya, na a ku pisa pya ntunda unango wa nyandza ya Djorodani, na a m'pisa pya dhuzi na Tiru na Sidhoni, akhaenda kuna Iye. Na thangwi ya mwinji wa anthu, Yezu apanga anyakupfundza ace kuti ansakire bote, toera akhonde kupfinyana na anthu. Thangwi Iye akhawangisa anthu azinji. Na tenepo, atenda onsene akhabhomana kusaka kuti an'khuye. Penepo, ale akhali na mizimu ya kuipa, angaona Yezu, akhan'gwera pa myendo pace mbamulambira mbakhakhuwa tenepa: “Imwe Mbuya ndimwe Mwana wa Mulungu.” Mbwenye Yezu aikhondesa na mphambvu zonsene kuti ikhonde kumulonga. Buluka penepo, Yezu akwira pa phiri mbacemera ale akhafuna iye. Iwo abwera dhuzi na Iye. Na tenepo, Yezu asankhula amuna khumi na awiri, toera akhale na Iye na kuatuma kwenda mbamwaza Mphangwa Zadidi, pontho toera akhale na mphambvu za kuthamangisa madimonyo. Madzina awo mbawa: Simau, anacemerwa Pedhru, Tiyago na Juwau, ana a Zebhedheu, iwo asadziwika na dzina ya Bhoanerijes, kweneko nkhubveka ana njazi. Andereya, Filipi, Bhatolomeu, Mateu, Tomasi, Tiyago, mwana wa Alufeu, Tadheu, Simau, nyakukakamira mwambo wa Mulungu, na Djuda Xikariyoti, ule adasandukira Yezu. Na tenepo, Yezu apita n'nyumba, mwinji wa anthu mbugumanyikana pontho penepo, Iye na anyakupfundza ace mbakhacimwana na kudya kwene. Abale ace Yezu pidabva iwo penepyo, aenda kuti akam'phate adze na Iye na mphambvu. Thangwi anthu anango akhalonga kuti: “Yezu ana nsala.” Anyakudziwisa a Mwambo akhadabuluka ku Djerusalema, akhalonga kuti: “Yezu ana Bhelizebhu nkulu wa madimonyo. Ndiye nkulu unowu wa madimonyo anampasa mphambvu za kuthamangisa madimonyo.” Na tenepo, Yezu acemera anthu onsene mbaapanga na misanje kuti: “Kodi Sathani anathamangisika ekha ene? Umambo ungagawika okha-okha, unamalisira kufudzika. Mudzi ungagawika okha-okha, mudzi unowu unamalisira kufudzikambo. Sathani angakanana ekha ene mbagawika, nkhabe kudza kaoneka, mbwenye anafudzika. Nkhabe munthu anaphweta nyumba ya ndzace wa mphambvu toera kum'bera pinthu pyace, pakutoma mbadzati kum'manga. Angamala, anakwanisa kum'bera n'nyumba mwace. Ndimo mwene Ine ndisakupangani kuti kudawa na kuxola kunacita ana anthu kuna Mulungu, kusakwanisika kulekererwa, mbwenye ule anaxola Nzimu Wakucena, cipo anadza kalekererwa. Thangwi madawi enewa mba kwenda na kwenda.” Yezu alonga ipi thangwi iwo akhalonga kuti: “Iye ana nzimu wa kuipa.” Na tenepo, afika mai wace na abale ace Yezu. Iwo akhala kunja, mbancemeresa. Akhalipo anthu azinji akhakhala pantsi n'khundu mwa Yezu. Penepo anango ampanga kuti: “Lang'anani, mai wako na abale ako ali kunja uku, asakusakani.” Yezu abvundzisa tenepa: “Mbani mai wanga, pontho mbani abale anga?” Penepo Yezu alang'ana anthu akhakhala pantsi n'khundu mwace, mbalonga tenepa: “Awa ndiwo mai wanga na abale anga. Thangwi ule anacita kufuna kwa Mulungu, unowu ndiye m'bale wanga wa mamuna, mwana-nkazi wanga na mai wanga.” Yezu atoma pontho kupfundzisa m'mbale mwa gombe. Penepo, wagumanyikana mwinji ukulu wa anthu n'khundu mwace. Iye apakira m'bote, akhala pantsi, mbafedza kutali pang'ono na gombe. Bote ikhakhala nyandza, mbwenye mbumba yonsene ikhakhala pa gombe. Iye akhaapfundzisa na misanje pinthu pizinji, mbakhalonga tenepa: “Bveserani! Mamuna m'bodzi abuluka kwenda kawaza mbeu. Mukhawaza iye, mbeu zinango zagwa n'khundu mwa njira. Na tenepo, zabwera mbalame mbamala kuzidzonkhona. Khundu inango ya mbeu yagwa pa mbuto ya myala, pakhagumanika mataka pang'ono basi. Penepo mbeu yamera na mwansanga thangwi mataka akhadacepa. Mbwenye na kupisa kwa dzuwa, umera wamala kupya mbuuma na thangwi ya kusowa michici. Khundu inango ya mbeu yagwa pa minga. Minga yakula, mbeu mbizicimwana kufantsa. Na tenepo, zacimwana kubala misapu. Mbwenye mbeu inango yagwa pa mataka adidi. Iyo yamera mbikula mbibala misapu makumatatu, makumatanthatu mpaka kufika dzana pa mbeu ibodzi.” Yezu athimiza na kulonga tenepa: “Ule ana makutu a kubva, mbabve!” Pidasala Iye ekha, anyakupfundza khumi na awiri, pabodzi na anthu anango akhali n'khundu mwace, am'phemba kuti aapange usalonganji nsanje unowu. Yezu aatawira tenepa: “Kuli imwe, mwapaswa kudziwa pyakubisala pya Umambo wa Mulungu, mbwenye kuli anthu a kunja pyonsene anapipfundziswa na misanje. Toera kuti: ‘kuona mbaona, mbakhonda kudzindikira. Kubva mbabva, mbakhonda kupibvesesa. Pontho toera akhonde kuzungunuka kuna Mulungu, Iye mbaalekerera kudawa kwawo.’ ” Na tenepo, Yezu aabvundza kuti: “Ngakhala imwe nkhabe kuubvesa nsanje uyu, misanje inango munaibvesesa tani? Nyakubzala, asabzala fala ya Mulungu. Mbeu zidagwa m'mbale mwa njira, ndi ale adabva fala, mbwenye na mwansanga asabwera Sathani mbabulusa fala ikhadabzalwa n'kati mwa iwo. Anthu anango alandana na mbeu idagwa pa mataka a myala. Angaibva fala asaitambiriratu na kukomerwa. Mbwenye asakhala n'dzidzi pang'ono, thangwi nkhabe michici. Na tenepo, nyatwa zingaagwera, peno angachingwa na thangwi ya fala ya Mulungu, asaisiyeratu. Anangombo alandana na mbeu idagwa pakati pa minga. Iwo asabva fala ya Mulungu, mbwenye na kukula kwa pinthu pya kunyerezera pya padziko ino, na pya mpfuma, na pinango pizinji pya kusirira, penepyo pisacita kuti fala ya Mulungu ikhonde kufantsa pontho ikhonde kubala misapu. Pontho anthu anango alandana na mbeu idagwa pa mataka adidi. Asabva fala ya Mulungu, mbaitawira, mbabala misapu inango makumatatu, inango makumatanthatu, mpaka kufika dzana, pa mbeu ibodzi.” Yezu athimiza na kuapfundzisa pontho tenepa: “Alipo munthu anagasa nyale mbaigudumira na citundu peno mbaiyikha pantsi pa talimba? Nkhabe citika. Mbwenye asaiyikha pakweca toera imwinikire pyadidi. Thangwi pyonsene pidabisala pinati pioneke. Pontho na pire pyonsene pinacitwa n'cibiso-biso pinati pidziwike. Ana makutu a kubva, mbabve.” Yezu athimiza pontho mbalonga tenepa: “Bvesesani mwadidi pire pinabva imwe! Na n'dida ubodzi-bodzi unapimira imwe andzanu, munadza kapimirwambo na n'dida unowu, pontho mbamuthimizirwa pinango. Thangwi ule anapyo, anati apaswe pontho pinango. Mbwenye ule adapisowa, anapokoserwa na pire pyene pina iye!” Yezu alonga pontho kuti: “Umambo wa Mulungu walandana na mamuna m'bodzi anawaza mbeu m'munda. Munthu, na masiku peno na masikati, asagona peno ali m'maso, asacimwana kudziwa kumera na kukula kunacita mbeu. Thangwi ndiwo mataka okha ene anapasa misapu. Pakutoma asabuluka masamba, thimize asathumburuka, pakumalisa asabala ngala ya kudzala na mbeu. Mbeu zingatokota munthu asazibvuniratu, thangwi wafika n'dzidzi wa kubvuna.” Yezu athimiza na kulonga tenepa: “Tinaulandanisa nanji Umambo wa Mulungu? Peno tinausangiza na nsanje wanji? Walandana na mbeu inacemerwa muxtarda, mbeu ing'ono kakamwe kupiringana mbeu zonsene zinabzaliwa pa mataka. Mbwenye ingabzaliwa isamera mbikula, mbivata kupiringana miti inango. Pontho isakhala na nthawi zikulu kakamwe, mbalame mbazikwanisa kumanga ntsandza mwenemu.” Na tenepo, Yezu akhaapfundzisa fala ya Mulungu na misanje mizinji ninga iyi, ikhakwanisa iwo kubva. Nkhabe cikhaapanga Iye mbakhonda kulonga na misanje, mbwenye angakhala ekha ene na anyakupfundza ace, akhaachululira pyonsenene. Ntsiku eneyo, mukhadoka dzuwa, Yezu apanga anyakupfundza ace kuti: “Tiwambukeni tiyende ntunda unango wa nyandza.” Na tenepo, iwo aisiya mbumba, mbapakira m'bote mukhakhala Yezu mbaenda na Iye. Penepo mabote anango mbakhantowerambo. Penepo caoneka conzi cikulu ca mphepo, mabimbi mbakhamenya bote, iyo mbikhatoma dzala na madzi. Yezu akhagona pyace n'nduli mwa bote mbakhatsamira nsago. Anyakupfundza ace amulamusa mbampanga tenepa: “Mpfundzisi, imwe nkhabe kutitsalakana kuti tiri kufa?” Iye alamuka mbaipwekera mphepo mbalonga kuna nyandza kuti: “Matama! Pfulika’’ Penepo mphepo yamatama, pontho pyonsene mbapimatamiratu. Penepo Yezu abvundza anyakupfundza ace kuti: “Thangwi yanji imwe musagopa tenepa? Na lero mudzati kukhala na cikhulupiro?” Iwo akhagopa pikulu pyene mbakhalonga okha-okha tenepa: “Mbani unowu anafikira kubverwa na mphepo na mabimbi ene?” Buluka penepo, Yezu na anyakupfundza ace afika ntunda unango wa nyandza ya Galileya, ku cisa ca Djeraza. Pa n'dzidzi unowu udachita Iye m'bote, abulukirambo na m'masiye mamuna m'bodzi akhali na mizimu ya kuipa, mbakhabwera kuna Yezu. Mamuna uyu akhagona n'zinthumbi, pontho nkhabe munthu akhankoza kum'phata peno kum'manga na unyolo. Thangwi akhaphatiwa kazinji kene, mbakhamangwa na unyolo myendo na mikono ene. Mbwenye iye akhathumula basi pyonsene. Na tenepo, nkhabe munthu akhakwanisa kunkunda. Ntsiku zonsene, masiku na masikati akhafamba mbakhuwa n'zinthumbi na m'mapiri, mbakhaphekeka ekha na myala. Penepo iye na kuona Yezu na kutali, an'thamangira mban'godamira, mbakhuwa tenepa: “Yezu, Mwana wa Mulungu wa kudzulu kakamwe, musafunanji na ine? Ndisaphemba na dzina ya Mulungu kuti mukhonde kundithabusa.” Penepyo, ndi thangwi Yezu akhadampanga kuti: “Buluka muna munthu uyu, iwe nzimu wa kuipa!” Pontho Yezu am'bvundza kuti: “Kodi iwe dzina yako ndiwe ani?” Iye atawira kuti: “Dzina yanga ndine Lejiyau, thangwi ndife azinji.” Na tenepo, iye akhathimiza basi na kudembetera kuna Yezu kuti akhonde kuithamangisa pa cisa ceneci. Cifupi na penepo, ukhalipo nkumbi ukulu wa nkhumba mbukhasodza pa phiri. Madimonyo adembetera kuna Yezu kuti: “Tisiyeni pyathu tikhapite muna nkhumba.” Yezu aatawirisa. Na tenepo, mizimu ya kuipa yabuluka muna munthu, mbipita mu nkumbi wa nkhumba. Nkumbi unowu ukhathamangira ku pikwi piwiri, izo zanumpha pa nkhomole mbazigwa n'nyandza, mbazimala kufa m'madzi. Akumbidzi a nkhumba athawa, mbaenda mbamwaza mphangwa zenezi mu nzinda na m'pisa. Anthu azinji aenda kaona ninji pikhadacitika. Mudafika iwo dhuzi na Yezu, aona mamuna unowu akhakhala na mizimu mizinji ya kuipa, mbali nawa, amala bvala nguwo pontho mbali na ndzeru zace za kubaliwa. Iwo mbakhadzadzamira na kugopa. Ale akhali penepo, alonga kuna mbumba, pire pikhadacitika kuna mamuna akhali na mizimu ya kuipa, pontho na pidacitika kuna nkumbi wa nkhumba. Na tenepo, anthu atoma kum'phemba Yezu kuti abuluke pa cisa ceneci. N'dzidzi ukhapakira Yezu m'bote, abwera mamuna ule akhakhala na mizimu ya kuipa, kudza kaphemba Yezu kuti aende na iye pabodzi. Mbwenye Yezu akhonda, mbampanga kuti: “Ndoko kwanu. Ndoko kapange abale ako pinthu pyonsene pidakucitira Mbuya, na ntsisi zidakubvera Iye.” Na tenepo, mamuna abuluka mbaenda ku Dhekapoli, mbalonga pire pyonsene pikhadancitira Yezu. Penepo anthu onsene adzumatirwa napyo. Yezu abwerera pontho na bote kwenda ntunda unango wa nyandza. Penepo anthu azinji atoma kugumanyikana pontho n'khundu mwace, pa gombe. Na tenepo, mamuna m'bodzi anacemerwa Djairo, m'bodzi wa atsogoleri a nyumba ya kuphemberera, pidaona iye Yezu, an'godamira pa myendo pace, mbam'phemba na kudembetera, mbalonga kuti: “Mwana wanga wankazi ali kufa. Bwerani mudze kamuikhe manja toera awange, pontho apulumuke.” Penepo Yezu aenda na iye. Mwinji wa anthu ukhantowerera mbakhapfinyana na Iye. Penepo akhalipo nkazi m'bodzi akhathabuka na utenda wakubuluka ciropa, pa pyaka khumi na piwiri. Iye aona nyatwa ikulu mbakhakodziwa na akondzi azinji, mbabvunga pyonsene pikhali na iye, mbwenye pa mbuto yakucita mbwenye, nthenda yace ikhatekereratu kakamwe. Nkazi na kubva mbiri ya Yezu, abwera na kunduli kwace, pakati pa mwinji wa anthu, afendedzera mban'khuya nguwo zace. Thangwi iye akhalonga ekha ene kuti: “Male ndingakwanisa kun'khuya nguwo zace basi, ndinawanga.” Pa n'dzidzi ubodzi ene, ciropa casiya kubuluka. Penepo iye abvadi kuti nthenda yawanga m'manungo mwace. Penepo pene, Yezu abva kuti mphambvu zace zapunguka muna Iye. Na tenepo, Iye azungunuka kuna mbumba, mbabvundzisa kuti: “Mbani adakhuya nguwo zanga?” Anyakupfundza ace antawira mbalonga kuti: “Imwe musaona kuti mbumba yonsene iyi isapfinyana na imwe. Musabvundza pyanu tenepa kuti: ‘Mbani adandikhuya?’ ” Mbwenye Yezu akhalang'anisa basi n'khundu mwace, toera aone mbani akhadan'khuya. Na tenepo, nkazi na kudzindikira pyonsene pidacitika kuna iye, agwa pa myendo pa Yezu, mbakhatetemera na kugopa, mbalonga pyonsene pya ndimo mwene. Penepo Yezu ampanga kuti: “Mwana wanga, kukhulupira kwako kwakuwangisa! Ndoko na ntendere, nyatwa yako mbimale.” Yezu mbadzati kumala kulonga, afika anthu anango a pa nyumba ya Djairo, n'tsogoleri wa nyumba ya kuphemberera, mbampanga kuti: “Mwana wanu wankazi afa. Lekani kunsanyabve Mpfundzisi.” Mbwenye Yezu akhonda kutsalakana pyonsene ipi, mbampanga Djairo kuti: “Leka gopa. Khulupira basi.” Penepo, Yezu abuluka na Pedhru na amuna awiri muubale mwawo, anacemerwa Tiyago na Juwau, mbakhondesa kuperekerwa na anthu anango. Pidafika iwo pa nyumba ya n'tsogoleri wa nyumba ya kuphemberera, agumana mwinji wa anthu mbukhakhuwa na kulira. Yezu apita n'nyumba, mbabvundza anthu akhali mwenemu kuti: “N'khuwo unowu na ciriro ceneci nchanji? Ntsikana hadafa tayu, mbwenye ali kugona.” Mbwenye onsene atoma kunseka. Penepo Iye aabulusisa anthu onsene akhali n'nyumba, mbapita Iye basi, na anyakupfundza ace atatu, na baba wace na mai wace mwana, mpaka ku mbuto kukhakhala mwana. Yezu amphata nkono wace, mbampanga kuti: “Talita kumi!” Uku ndiko kubveka kuti: “Ntsikana, Ine ndisakupanga, lamuka!” Penepo pene, ntsikana akhakhala na pyaka khumi na piwiri pyakubalwa, alamukiratu mbafamba. Anthu onsene adzumatirwa napyo pikulu kakamwe. Mbwenye Yezu aapanga kuti akhonde kupanga munthu penepyo. Buluka penepo aapanga kuti ampase mwana cakudya. Yezu na anyakupfundza ace abuluka penepo mbaenda ku nzinda udabalwa Iye. Pakufika ntsiku ya Sabudu, Yezu atoma kupfundzisa mu nyumba ya kuphemberera. Azinji anthu akham'bvesera pikhapfundzisa Iye, akhadzuma mbakhalonga kuti: “Pyabuluka kupi pyonsene ipi? Apaswa na ani udziwisi unowu? Asacita tani pirengo penepyo? Kodi siye unowu tayu karipintero mwana wa Mariya? Pontho abale ace aamuna siwo ale anacemerwa Tiyago, Zuze, Djuda na Simau? Anaakazi ace siwo ale anakhala na ife kuno tayu?” Na tenepo, iwo akhaipirwa na thangwi yace. Mbwenye Yezu aapanga kuti: “Mporofeta asalemebza mbuto zonsene. Mbwenye nkhabe kulemebza ku dziko kwace, pakati pa abale ace na pa nyumba pace.” Na tenepo, Yezu akhakhonda kucita pirengo ku Nazareti. Mbwenye akhatawira kuwangisa atenda anango na kuaikha manja basi. Yezu adzumatirwa na iwo na thangwi ya kukhonda kutawira kwawo. Na tenepo, anyerezera pyace kwenda kapfundzisa anthu anango a n'khundu. Yezu acemera anyakupfundza ace khumi na awiri, mbaatuma awiri-awiri, pontho na kuapasa mphambvu za kuthamangisa mizimu ya kuipa. Penepo Yezu aapanga kuti: “Pa ulendo wanu kwatani mpsimbo basi. Lekani kukwata nkate, malikofa peno kobiri n'cunu mwanu. Bvalani ntsapato zanu, mbwenye lekani kukwata nguwo inango pa khundu. Mungapita n'nyumba, khalani mwenemu mpaka buluka kwanu. Mungakhonda kutambirwa peno kubverwa na anthu, mungabuluka mwenemu, gubudzani pfumbi ya manyalo anu, ninga cidzindikiro ca kuapangisa kuti pidacita iwo mphyakuipa.” Na tenepo, anyakupfundza a Yezu abuluka, mbaenda mbalonga kuna anthu kuti achunyuke kudawa kwawo. Akhabulusa madimonyo azinji, akhawangisa atenda azinji na kuadzodza mafuta. Pyonsene ipyo pyafika m'makutu mwa mambo Herodhi, thangwi dzina ya Yezu ikhadziwika monsene. Anthu anango akhalonga kuti: “Juwau Bhatixta alamuka pa kufa. Na thangwi eneyo, zisaoneka muna iye mphambvu za kucita pirengo.” Anango akhalonga kuti ndi Eliya. Anangombo akhalonga kuti ndi mporofeta, ninga m'bodzi wa maporofeta akale. Mbwenye Herodhi mudabva iye pyonsene ipi, alonga kuti: “Ndimo mwene, uyu ndiyedi Juwau Bhatixta, ule akhadagwandisa ine nsolo. Alamuka pa kufa.” Thangwi Herodhi akhadam'mangisadi Juwau Bhatixta mbamuikhisa n'kaidi. Penepyo apicita na thangwi ya Herodhiya, nkazi wa m'bale wace Herodhi, anacemerwa Filipi. Iye Herodhi akhadankwata mbakhala nkazi wace. Na thangwi eneyo, Juwau Bhatixta akhadampanga Herodhi kuti: “Mwambo nkhabe kutawirisa tayu kuti ucite banja na nkazi wa m'bale wako.” Na tenepo, iye Herodhiya, atoma kupitirwa na nyongo na Juwau Bhatixta, mbakhafuna kum'phesa, mbwenye akhapicimwana. Thangwi iye Herodhi akhagopa Juwau Bhatixta, pontho akham'bvunulira, na kudziwa kuti Juwau akhali munthu wakulungama pontho wakucena. Na tenepo, Herodhi pikhamubva iye mbalonga, akhadzudzumika napyo, mbwenye akhakomerwa basi na kumubva. Ntsiku idacita Herodhi caka, acita phwandu ikulu kakamwe mbacemeresa akulu-akulu a utongi, na akulu a anyankhondo, na amambo a ku dziko ya Galileya. Penepo Herodhiya, nkazi wace Herodhi aona njira ya kupita nayo. Mudapita n'thando mwana wace Herodhiya wankazi mbabvina pikulu kakamwe, atsandzaisa Herodhi, na akulu onsene akhali penepo. Mambo ampanga ntsikana kuti: “Phemba pinafuna iwe, ine ndinakupasa.” Na tenepo, Herodhi alonga pontho na kudumbira kuti: “Ndinakupasa pyonsene pinandiphemba iwe, na phindi ene ya dziko yanga ungapifuna.” Mwana ntsikana abuluka mbaenda kabvundza mai wace kuti: “Ndina phemba anji?” Mai wace antawira kuti: “Phemba nsolo wa Juwau Bhatixta.” Na tenepo, ntsikana abwera na mwansanga mbaenda kuna mambo Herodhi mbaphemba kuti: “Ndisafuna kuti mundipase cincino pano, nsolo wa Juwau Bhatixta, m'mbale.” Penepo mambo atsukwala napyo pikulu. Mbwenye na thangwi ya kudumbira kudacita iye, pontho na anthu akhali na iye pa phwandu, acimwana kun'khondera. Na tenepo, mambo atuma nyankhondo wace na mwansanga toera am'bweresere nsolo wa Juwau. Penepo nyankhondo alamuka mbaenda kagwanda nsolo wa Juwau n'kaidi, mbauikha m'mbale mbaupasa ntsikana, iye mbaendambo kapasa mai wace. Anyakupfundza a Juwau na kubva mphangwa zenezi, abwera mbakwata manungo a nyakwenda mbaaikha n'nthumbi. Apoxtolo a Yezu abwerera mbaenda kampanga Yezu pyonsene pidacita iwo na pidapfundzisa iwo. Penepo pakhagumanika anthu azinji. Awa akhafika awa akhaenda, iwo mbakhasowa na n'dzidzi ene wa kudya. Na tenepo, Iye aapanga kuti: “Tendeni pa khundu, pathu tekha, tikhapume pang'ono.” Penepo, iwo abuluka onsene mbakwira m'bote mbaenda pa mbuto ibodzi, yawo okha. Mbwenye anthu azinji aaona kubuluka kwawo, mbaadzindikira kuti ndiwo. Na tenepo, anthu abuluka m'mizinda yonsene mbaenda mbathamanga na myendo mpaka pa mbuto eneyo, anyakupfundza a Yezu mbadzati kufika kweneko. Pakuchita m'bote, Yezu aona mwinji wa anthu, mbaabvera ntsisi, thangwi akhakhala ninga mabira akusoweka nkumbidzi. Na tenepo, atoma kuapfundzisa pinthu pizinji. Pikhadoka dzuwa, anyakupfundza ace anfendedzera mbalonga tenepa: “Dzuwa iri kudoka, pontho, muno ndi n'thando. Apangeni anthu awa kuti aende pyawo m'pisa na mbuto zinango za padhuzi, aende kagule pyakudya.” Mbwenye Yezu atawira kuti: “Apaseni imwe cakudya toera adye.” Mphapo anyakupfundza ace antawira kuti: “Toera kugula mikate inakwana kuli anthu onsene awa, tisafunika tikhale na madzana mawiri a kobiri ya parata. ” Penepo Yezu aapanga kuti: “Ndokoni mukhaone, muna mikate mingasi?” Iwo aenda kaona mbantawira kuti: “Ife tina mikate mixanu, na nyama ziwiri za m'madzi.” Na tenepo, Yezu apanga mbumba kuti ikhale pantsi nsoka-nsoka, pa tsanga ya cimbanjiri. Penepo onsene akhala pantsi mbagumanyana misoka ya makumaxanu ya anthu, inango ya dzana ya anthu. Pakumala, Yezu akwata mikate mixanu na nyama ziwiri za m'madzi, alang'ana kudzulu mbapereka takhuta kuna Mulungu mbaimenya-menya. Buluka penepo, aipasa anyakupfundza ace toera iwo aigawize mbumba. Pontho akwata nyama ziwiri za m'madzi mbazigawirambo anthu onsene. Onsene adya mbakhuta. Pakumala, anyakupfundza alokotera mapindi adasala a mikate na a nyama za m'madzi, mbadzaza na iwo pitundu khumi na piwiri. Nsoka udadya ukhali wa pikwi pixanu (5.000) pya amuna. Na mwansanga, Yezu apanga anyakupfundza ace kuti apakire m'bote, atsogole aende ku dziko ya Bhetisaidha, Iye mbasala na panganizana na mbumba. Pidamala Iye kupanga mbumba kuti iyende pyayo, akwira pa phiri kwenda kaphembera. Pakudoka dzuwa, bote ikhagumanika pakati pa nyandza, mbwenye Yezu akhakhala ekha ene pa ntunda. Mangwana mwace, m'bambakuca, Yezu aona kuti anyakupfundza ace aneta na kucapa, thangwi akhaenda kukhabuluka mphepo. Na tenepo, Yezu aenda kuna iwo mbakhafamba padzulu pa madzi, mbacita ninga asafuna kuapitirira. Iwo na kumuona mbakhafamba padzulu pa madzi, akhanyerezera kuti ndi nzukwa, mbatoma kukhuwa. Thangwi onsene akhadamuona atutumuka napyo. Mbwenye pa n'dzidzi ubodzi-bodzi Yezu aapanga kuti: “Khalani na cipapu! Ndine pano! Lekani kugopa!” Penepo Yezu apakira m'bote mbakhala pabodzi na anyakupfundza ace, mphepo mbimatama. Na tenepo, anyakupfundza onsene adzumatirwa napyo mbamala ndzeru. Thangwi cirengo ca mikate hakhadzati kucibvesesa. Pontho mitima yawo ikhadauma. Pidawambuka iwo ntunda unango wa nyandza, afika pa cisa ca Djenezareti, penepo atsamisa bote yawo pa gombe mbaimangira. Pidabuluka iwo m'bote, penepo pene anthu an'dzindikira Yezu. Na tenepo, iwo abuluka mbaenda mbafamba n'cisa cire consene, mbakhadzesa atenda awo m'makha, mbakhaakwata mbaenda na iwo m'mbuto zikhabva iwo kuti Yezu ali kweneku. Mbuto zonsene zikhafamba Yezu, kutomera m'mizinda, peno m'pisa peno m'minda, anthu onsene akhadzesa atenda mphambano, mbakhaphemba Yezu kuti aasiye akhuye n'khundu mwa nguwo yace basi. Na tenepo, onsene akhan'khuya, akhawangiswa. Ntsiku inango, afarisi na anyakudziwisa a Mwambo anango akhabuluka ku Djerusalema, agumanyikana pabodzi pene na Yezu. Iwo aona anyakupfundza anango a Yezu mbakhadya na manja akuswipa. Uku nkhubveka, mbadzati kusamba manja. (Thangwi madjuda onsene na afarisi, nkhabe kudya mbadzati kusamba pyadidi manja, toera kutoweza mwambo udapfundziswa iwo na a mbuya awo. Na tenepo, angabuluka ku nsika nkhabe kudya mbadzati samba. Pontho asatoweza mitemo inango mizinji ninga, kutsukwa kwa makhomico, milinga, na pyombo pinango pya nkuwa na matalimba.) Na tenepo, afarisi na anyakudziwisa a Mwambo abvundzisa Yezu kuti: “Thangwi yanji anyakupfundza ako nkhabe kutoweza mitemo ya a mbuya athu, mbadya mbakhonda samba manja?” Yezu aatawira tenepa: “Ndimo mwene pidalonga mporofeta Izaya na thangwi ya imwe anyauthambi, mbalemba kuti: ‘Mbumba iyi isandisimba na mulomo wawo, mbwenye mitima yawo iri kutali na ine. Iwo asandilambira pa pezi. Thangwi asapfundzisa mitemo yakucitwa na anthu.’ Imwe musapwaza matongero a Mulungu mbamutoweza myambo ya anthu.” Yezu alonga pontho tenepa: “Imwe kazinji kene musakoza kusiya pang'ono matongero a Mulungu, toera kutoweza myambo yanu inapfundzisa imwe. Thangwi Mozesi alonga tenepa: ‘Lemedza baba wako na mai wako,’ pontho ‘Ule anakhonda kulemedza baba wace peno mai wace, anatongwa kuphiwa. ’ Mbwenye imwe musalonga kuti munthu angalonga kuna mai wace peno baba wace kuti: ‘Pinthu pikhafuna imwe kutambira na ine mphya Korobhani,’ korobhani nkhubveka, ndi ntsembe ya Mulungu, munthu unowu imwe musan'khondesa kuti aleke kucitabve pinatongwa iye kucitira baba wace na mai wace. Tenepa, imwe musafudza fala ya Mulungu, mbamuicinja na mitemo yanu, idacita imwe. Pontho musacita pinthu pizinji pinango pyakulandana na penepyo.” Yezu aucemera pontho mwinji wa anthu mbaupanga tenepa: “Bveserani monsene mupiyikhe m'makutu pire pyonsene pinafuna kukupangani Ine kuti: Pyonsene pinabuluka kunja mbapipita muna munthu nkhabe ‘kunswipisa’. Mbwenye cire cinabuluka muntima, ceneco ndico ‘cinaswipisa’ munthu. Ana makutu a kubva, mbabve!” Yezu mudamwazana iye na mbumba, apita n'nyumba, anyakupfundza ace mbam'bvundza kuti usalongeranji nsanje unowu. Iye aapanga tenepa: “Na imwe ene mudapibvesesambo tayu? Kodi imwe nkhabe kupidziwa kuti pyonsene pinabuluka kunja mbapipita muna munthu nkhabe ‘kunswipisa’?” Thangwi penepyo nkhabe pita muntima, mbwenye pisaenda n'cifu pingamala mbapibuluka kunja. Na mafala awa, Yezu akhapangisa kuti pyakudya pyonsene pya ceneswa. Iye athimiza pontho kulonga tenepa: “Cinabuluka muna munthu ndico ‘cinanswipisa’. Thangwi muntima mwa munthu ndimo munabuluka manyerezero a kuipa, ulukwali, umbava, upandu, upombo, kusirira, kuipa ntima, uthambi, bibvu, pseda, kupikuza, kuzuda na kusoweka ndzeru. Pyonsene ipi pyakuipa pisabuluka muntima mwa munthu. Penepyo ndipyo pinaswipisa munthu.” Yezu abuluka, mbaenda m'pisa pya dhuzi na nzinda wa Tiru na wa Sidhoni. Iye hakhafuna tayu kuti anthu an'dziwe kuna Iye. Na tenepo, apita n'nyumba, mbwenye acimwana kubisala n'dzidzi ukulu ene. Nkazi m'bodzi, akhali na mwana wace wankazi akhali na nzimu wa kuipa, na kubva mbiri ya Yezu, na mwansanga aenda kan'godamira pa myendo pace. Nkazi akhali wa dzindza ya agerego, wa ku dziko ya Siro-Finisya. Akhaphemba kuna Yezu kuti aubuluse nzimu wa kuipa ukhali na mwana wace. Mbwenye Yezu antawira tenepa: “Cakutoma siya ana adye akhute. Thangwi si pyadidi tayu kubulusa nkate wa ana, mbatiuponyera pinchinja pya anambwa.” Nkazi atawira tenepa: “Ande Mbuya, mbwenye pinchinja pya anambwa, pa thando panadya a mbuya awo, pisalokoterambo umbwera-mbwera unagwisa ana.” Na tenepo, Yezu ampanga kuti: “Na thangwi ya matawiriro adacita iwe, ndoko. Nzimu wa kuipa wabuluka muna mwana wako.” Mudaenda nkazi ku nyumba kwace, agumana mwana wace ali lamba pa talimba, thangwi nzimu wa kuipa ukhadabuluka kale muna iye. Yezu abuluka pontho m'pisa pya padhuzi na nzinda wa Tiru, mbagwanda na pa nzinda wa Sidhoni mpaka ku nyandza ya Galileya na cisa ca Dhekapoli. Kweneko anthu an'dzesera mamuna m'bodzi wakukhonda kubva, pontho iye akhali na cibubu. Iwo am'phemba kuti amuikhe djanja toera amuwangise. Yezu am'bulusa mamuna pakati pa mbumba mbamuikha pyala m'makutu mwace. Buluka penepo, aphula mata mbaaikha pa lirimi ya mamuna. Na tenepo, alang'ana kudzulu, mbapuma na mphambvu, mbalonga tenepa: “Efata!” Ndiko kubveka: “Funguka!” Makutu a mamuna ule afunguka, pa n'dzidzi ubodzi-bodzi lirimi yace yasudzuka, mbatoma kulonga mwadidi mwene. Penepo Yezu akhondesa anthu onsene kumwaza mphangwa zenezi. Mbwenye pikhaakhondesa Iye, anthu akhalongeratu kakamwe. Na tenepo, onsene akhabva akhadzumatirwa napyo mbalonga tenepa: “Onani, asacita pyonsene mwadidi kakamwe! Anakhonda kubva, asabva, anakhonda kulonga, asalonga!” Pakupita ntsiku pang'ono, wagumanyikana pontho mwinji ukulu wa anthu. Na thangwi ya kusoweka cakudya, Yezu acemera anyakupfundza ace mbaapanga tenepa: “Ndina ntsisi na mwinji wa anthu uyu, thangwi ana ntsiku zitatu mbali na Ine, pontho iwo nkhabe cakudya. Ndingaabweza m'midzi mwawo tenepa na njala, ana komoka n'njira, thangwi anango abuluka kutali.” Mbwenye anyakupfundza ace antawira tenepa: “Tinaigumana kupi mikate yakukwana toera kudyesa anthu onsene awa, n'thando ninga muno?” Yezu aabvundza tenepa: “Muna mikate mingasi penepo?” Iwo atawira kuti: “Tina mikate minomwe.” Yezu aipanga mbumba kuti ikhale pantsi. Buluka penepo, akwata mikate minomwe ire mbapereka takhuta kuna Mulungu, aigwanda mbaipasa anyakupfundza ace toera iwo aigawirembo mbumba. Iwo penepyo apicita. Zikhalipombo nyama pang'ono za m'madzi. Yezu azikwata mbapereka takhuta kuna Mulungu, mbazipasa anyakupfundza ace, toera iwo azigawirembo mbumba. Mbumba yadya mbikhuta. Pontho, na mapindi akhadasala, akwanisa kudzadza pitundu pinomwe. Penepo pakhali na amuna akhathamangira pikwi pinai (4.000). Na tenepo, Yezu aabweza mbaenda. Buluka penepo, Yezu apakira m'bote na anyakupfundza ace mbaenda cisa ca Dhalimanuta. Afarisi abwera mbatoma kuketesana na Yezu. Toera kumulesera, am'phemba cirengo ca kudzulu. Mbwenye Yezu anentseka pikulu mbalonga kuti: “Thangwi yanji anthu awa asaphemba cidzindikiro ca cirengo? Mphapo Ine ndisakupangani pakweca kuti iwo nkhabe cidzindikiro cinango cinafuna kudza kaona iwo.” Penepo Yezu aasiya, mbapakira pyace pontho m'bote, mbaenda ntunda unango wa nyandza. Anyakupfundza a Yezu akhadaduwala kukwata mikate. Iwo akhali na nkate ubodzi basi m'bote. Penepo Yezu aacenjeza mbalonga kuti: “Cenjerani pontho mucite mphole na ntombwe wa kutupisa mikate wa afarisi na wa Herodhi.” Na tenepo, anyakupfundza na kubva penepyo akhaketesana okha-okha, mbakhalonga kuti: “Iye asalonga penepi thangwi ife nkhabe mikate.” Yezu na kubva kuketesana kukhacita iwo, aabvundza tenepa: “Thangwi yanji musaketesana na thangwi ya kusowa mikate? Kodi imwe mudzati kupidziwa na kupibvesesa tayu? Ndi thangwi yanji musauma mitima tenepa? Muna maso mbwenye nkhabe kuona? Muna makutu mbwenye nkhabe kubva? Imwe nkhabe kukumbuka, mikate mixanu idagawira ine anthu akukwana pikwi pixanu? Pitundu pingasi pidadzaza imwe na mapindi a kusala?” Iwo atawira kuti: “Khumi na piwiri.” “Pontho nkhabe kukumbuka, kuti Ine ndagawa mikate minomwe kuna anthu akukwana pikwi pinai? Pitundu pingasi pyakudzala na mapindi a mikate adagumanya imwe?” Iwo atawira kuti: “Pinomwe.” Yezu aabvundza kuti: “Mphapo imwe mudzati basi kupibvesa tayu?” Buluka penepo, Yezu na anyakupfundza ace afika ku dziko ya Bhetisaidha. Penepo anthu anango abweresa boli-boli m'bodzi, mbadembetera kuna Yezu kuti an'khuye. Yezu aphata nkono wa boli-boli mbamulamusa mbaenda na iye kunja kwa cisa. Kweneko Yezu aphula mata mban'khwaza m'maso mwace, ansandzika manja mbam'bvundza kuti: “Usaona pinthu?” Mamuna afungula maso ace mbalonga kuti: “Ande ndiri kuona anthu. Mbwenye ndiri kuaona ninga miti yakufamba.” Na tenepo, Yezu asandzika pontho manja m'maso mwa mamuna. Kubulukira penepo, mamuna awanga, mbatoma kuona mwadidi na kutali, pyonsene pikhali n'khundu mwace. Penepo Yezu amuendesa kunyumba kwace mbampanga kuti: “Leka kupita n'cisa. ” Buluka penepo, Yezu abuluka na anyakupfundza ace mbaenda m'pisa pya Sezareya ya Filipi. Mukhaenda iwo n'njira, Yezu aabvundza kuti: “Kodi anthu asalonga kuti Ine ndine ani?” Iwo atawira tenepa: “Anango asalonga ndimwe Juwau Bhatixta. Anango asalonga kuti ndimwe Eliya. Anangombo asalonga kuti ndimwe m'bodzi wa maporofeta.” Yezu aabvundza pontho kuti: “Kodi imwembo musalonga kuti Ine ndine ani?” Pedhru atawira tenepa: “Imwe ndimwe Kirixtu.” Penepo, Yezu aacenjeza kuti aleke kupanga munthu unango pinthu penepyo. Na tenepo, Yezu atoma kupfundzisa anyakupfundza ace mbaapanga kuti: “Ine, Mwana wa Munthu ndisafunika kuti ndione nyatwa zizinji, pontho ndikhondiwe na mathubu, na akulu aanyantsembe, na anyakudziwisa a Mwambo, mbandiphiwa, mbwenye pakupita ntsiku zitatu, ndinadza kalamuka pa kufa.” Iye akhalonga penepyo pakweca. Penepo Pedhru acemera Yezu pa khundu, mbatoma kunsandika. Mbwenye Yezu azungunuka mbalang'ana anyakupfundza ace, mbasandika Pedhru na kumulongera kuti: “Buluka Sathani pamaso panga! Thangwi pinanyerezera iwe si pya Mulungu tayu, mbwenye ndi pya anthu.” Na tenepo, Yezu acemera mbumba yonsene pabodzi na anyakupfundza ace, mbaapanga tenepa: “Ule anafuna kunditowera asatongwa akhondeke ekha ene, akwate ntanda wace anditowere. Thangwi ule anafuna kukoya moyo wace, anauluza. Mbwenye ule analuza moyo wace na thangwi yanga na ya Mphangwa Zadidi, anapulumuka. Thangwi pinaphedzeranji kuna munthu kuwina dziko yonsene ya pantsi, mbaluza nzimu wace? Peno ndi ninji cikhafuna kupereka munthu toera acinje na nzimu wace? Na tenepo, munthu anakhala na manyadzo na Ine pontho na mafala anga, pa midzidzi ino ya anthu a kuipa na anyakudawa, Ine, Mwana wa Munthu ndinadza kakhalambo na manyadzo na iye, ndingadza kabwera na mbiri ya Baba wanga pabodzi pene na anju zace zakucena.” Yezu athimiza na kuapanga kuti: “Ndimo mwene ndisakupangani kuti, anango ali pano, nkhabe kufa mbadzati kuona Umambo wa Mulungu mbubwera na mphambvu.” Pakupita ntsiku zitanthatu, Yezu akwata Pedhru, Tiyago, na Juwau, okha ene, mbaenda na iwo pa phiri yakulapha kakamwe. Penepo Yezu aphinduka makhaliro ace pamaso pawo. Nguwo zace zadza kaceneratu kakamwe mbaziyetimira. Nkhabe munthu wakudziwisa kufula pa dziko ino, anakwanisa kufula mbazicenesa tenepale. Penepo abulukira patsogolo pawo Eliya na Mozesi, mbakhaceza na Yezu. Na tenepo, Pedhru alonga kuna Yezu kuti: “Mpfundzisi, mphyadidi tikhale pyathu pano! Timange makumbi matatu. Ibodzi yanu, ibodzi ya Mozesi, inango ya Eliya.” Pedhru hakhapidziwa tayu pikhafuna iye kulonga, thangwi iwo onsene akhagopa. Penepo pene, yabwera khole ibodzi mbiagudumira. Pa khole, pabveka fala ibodzi ikhalonga tenepa: “Uyu ndi Mwana wanga wakufunika. M'bvereni!” Pa n'dzidzi ubodzi-bodzi, anyakupfundza ace alang'ana n'khundu hadaonabve munthu unango tayu. Aona Yezu ekha basi. Mukhachita iwo pa phiri, Yezu aapanga kuti aleke kupanga munthu m'bodzi pire pidaona iwo, mpaka kufikira kuti Iye, Mwana wa Munthu, alamuka pa kufa. Iwo acita ninga mudaapangira Yezu, mbwenye akhaketesana okha-okha na kufuna kudziwa kuti isabvekanji fala eneyi ya “kulamuka pa kufa’’. Na tenepo, iwo am'bvundzisa kuti: “Thangwi yanji anyakudziwisa a Mwambo asalonga kuti pisafunika Eliya abwere pa kutoma?” Yezu aatawira tenepa: “Ndimo mwene, Eliya anabwera pa kutoma, kudza kasasanyira pinthu pyonsene. Na tenepo, thangwi yanji mphapo Bukhu ya Mulungu isalonga kuti Ine, Mwana wa Munthu ndisafunika kuti ndidze kaone nyatwa zikulu mbandikhondiwa? Mbwenye Ine ndisakupangani kuti: Eliya abwera kale, pontho iwo ancitira pyonsene pikhafuna iwo, ninga mudalemberwa ipyo m'Bukhu ya Mulungu pa thangwi yace.” Mudafika iwo dhuzi na anyakupfundza andzawo, aona mwinji ukulu wa anthu ukhadaazungulira. Penepo anyakudziwisa a Mwambo akhaketesana na iwo. Penepo pene, mbumba yonsene pidaona iwo Yezu, yatutumuka mbithamanga kwenda kam'mwanyika. Na tenepo, Yezu abvundza kuti: “Ndi ninji pinaketesana imwe?” Mamuna m'bodzi pakati pa mwinji wa anthu antawira tenepa: “Mpfundzisi, ndakudzeserani mwana wanga wa mamuna thangwi iye ana nzimu wa kuipa, unancimwanisa kulonga. Kazinji kene nzimu wa kuipa ungam'phata, usan'gwisa pantsi. Penepo asatoma buluka mapobvu n'kanwa, mbaluma mano, manungo ace mbauma. Ine ndaphemba anyakupfundza anu kuti aubuluse nzimu unowu wa kuipa, mbwenye iwo aucimwana.” Yezu atawira tenepa: “Imwe anthu akusowa cikhulupiro! Ndinakhala na imwe mpaka lini? Mpaka lini ndinakuonerani nyatwa? M'bwereseni pano m'phale.” Na tenepo, iwo an'dzesera. Nzimu wa kuipa na kuona Yezu, penepo pene wabhoma m'phale na mphambvu mbagwa pantsi, mbatoma kubulumunda na kubuluka mapobvu n'kanwa. Penepo, Yezu abvundza baba wace mwana kuti: “Atoma nayo lini nthenda eneyo mwana wako?” Iye antawira kuti: “Atoma nayo mbali mwana. Kazinji kene nzimu wa kuipa usan'gwisa pa moto, na m'madzi, toera kumupha. Mbwenye mungakwanisa Mbuya tibverenimbo ntsisi mutiphedze.” Yezu antawira tenepa: “Mungakwanisa? Nkhabe cinthu cinacimwanika kuna munthu anakhulupira.” Penepo pene, baba wace m'phale akhuwa mbalonga tenepa: “Ine ndisatawira, mbwenye ndiphedzeni kusowa kwanga cikhulupiro!” Yezu na kuona mwinji wa anthu ukhanfendedzera, aupwekera nzimu wa kuipa mbaupanga kuti: “Iwe nzimu wakukhonda kubva na kulonga, buluka muna mwana uyu. Leka kupita pontho muna iye.” Nzimu wa kuipa wakhuwa mbubhoma mwana na mphambvu, mbubuluka muna iye mbansiya akomoka. Na thangwi eneyi, anthu onsene akhali penepo, akhalonga kuti mwana afa. Mbwenye Yezu amphata mwana pa nkono mbamulamusa, iye mbalimira. Pidapita Yezu n'nyumba, anyakupfundza ace am'bvundzisa pa khundu kuti: “Thangwi yanji ife taucimwana kuubulusa nzimu unowu?” Iye aatawira tenepa: “Khaindi eneyi ya mizimu ya kuipa isabuluka basi na miphembero pontho na kupimana cakudya. ” Yezu na anyakupfundza ace abuluka penepo mbapita na ku Galileya. Mbwenye Iye hakhafuna tayu kudziwika na munthu kukhakhala Iye. Thangwi Iye akhapfundzisa anyakupfundza ace, mbaapanga tenepa: “Ine, Mwana wa Munthu ndinati ndiperekwe m'manja mwa anthu. Iwo anandipha, mbwenye pakupita ntsiku zitatu, Ine ndinalamuka pa kufa.” Anyakupfundza ace hakhapibvesa mwadidi tayu pikhalonga Iye, mbwenye akhagopa kum'bvundzisa. Yezu na anyakupfundza ace afika ku nzinda wa Kafaranaumi. Pikhakhala iwo pa nyumba, Yezu abvundza anyakupfundza ace khumi na awiri tenepa: “Ndi ninji pikhadza imwe mbamuketesana na njira?” Mbwenye iwo amatama, thangwi n'njira akhadza mbaketesana kuti mbani nkulu pa nsoka wawo. Penepo Yezu akhala pantsi, acemera anyakupfundza ace khumi na awiri, mbaapanga tenepa: “Ule anafuna khala wakutoma, anakhala wakumalisa, pontho anakhala nyabasa wa onsene.” Penepo akwata mwana m'bodzi wang'ono mbamuikha pakati pawo. Yezu an'khumbatira mbalonga kuna anyakupfundza ace tenepa: “Ule anatambira mwana m'bodzi wang'ono ninga uyu na dzina yanga, asatambira Ine ene. Pontho ule ananditambira, hasatambira Ine basi tayu, mbwenye na ule ene adandituma.” Penepo Juwau ampanga Yezu tenepa: “Mpfundzisi, taona mamuna m'bodzi mbakhathamangisa mizimu ya kuipa na dzina yanu, mbwenye ife tan'khondesa, thangwi iye si ndzathu tayu.” Yezu aatawira tenepa: “Lekani kun'khondesa. Thangwi nkhabe munthu anakwanisa cita pirengo na dzina yanga, pa n'dzidzi ubodzi-bodzi mbandilonga pontho kuipa. Thangwi ule anakhonda kutipokanya, unowu ngwathu. Kumbukani kuti ule anakupasani ndiko ibodzi ya madzi na dzina yanga na thangwi ya kuti imwe ndimwe a Kirixtu, ndimo mwene ndisakupangani kuti iye nkhabe kudza kaluza m'bairo wace.” Yezu aapanga pontho kuti: “Munthu anagwisa n'kudawa m'bodzi wa ana ang'ono awa adanditawira, pikhali pyadidi kum'mangirira libwe ikulu n'khosi mwace mbaponyiwa m'bara. Mphapo ngakhala manja ako asakupitisa n'kudawa, agwande. Thangwi mphyadidi upite mu upulumuki wakukhonda kumala mbudalamala, kupiringana kukhala na manja ako mawiri, mbuyenda mu mbuto ya moto wakukhonda kuthima. [Mpfunye za mwenemu nkhabe kufa, pontho moto wace nkhabe thima. ] Ngakhala mwendo wako usakupitisa n'kudawa, ugwande. Thangwi mphyadidi upite mu upulumuki wakukhonda kumala mbudalamala, kupiringana kukhala na myendo yako miwiri, mbuponyiwa mu infernu. [Mpfunye za mwenemu nkhabe kufa, pontho moto wace nkhabe thima. ] Ngakhala ndi diso yako ibodzi inakucitisa kuti udawe, ibuluse. Thangwi ndi pyadidi upite mu Umambo wa Mulungu na diso ibodzi basi, kupiringana kukhala na maso mawiri mbuponyiwa mu infernu. Mpfunye za mwenemu nkhabe kufa, pontho moto wace nkhabe thima. “Thangwi m'bodzi na m'bodzi anadza kaikhwa munyu na moto. Munyu ngwadidi. Mbwenye ungasuluka unadza kadzipisa tani? Khalani na munyu n'kati mwanu mbamukhala na ntendere m'bodzi na m'bodzi.” Yezu abuluka penepo mbaenda ku cisa ca Djudeya, ntunda unango wa nyandza ya Djorodani. Penepo mwinji wa anthu watoma pontho kudzala n'khundu mwa Yezu. Na tenepo, Yezu atoma kuapfundzisa pontho anthu ninga nsambo wace. Afarisi anango afendedzera Yezu toera kun'dida, mbam'bvundza kuti: “Pisatawirirwa mamuna kumwalana na nkazi wace?” Yezu aatawira mbaabvundzisa kuti: “Kodi Mozesi akupanganinji?” Iwo atawira mbalonga kuti: “Mozesi atawirisa kuti mamuna alembe tsamba ya kumwalana nayo, angamala mbampereka mwawo.” Penepo Yezu aapanga kuti: “Mozesi akutawirisani mwambo unowu na thangwi ya kuuma kwanu mitima. Mbwenye pakutoma kwa pinthu pyonsene, Mulungu ‘aacita mamuna na nkazi.’ ‘Na thangwi eneyo mamuna anasiya baba wace na mai wace, mbadza kaphatana na nkazi wace, pontho mu uwiri mwawo anadza kakhala nyama ibodzi basi.’ Na tenepo, iwo si anthu awiribve tayu, mbwenye ndi nyama ibodzi basi. Mphapo pidaphataniza Mulungu, munthu mbaleke kupimwaza.” Pidafika iwo ku nyumba, anyakupfundza abvundzisa pontho Yezu na thangwi ibodzi ene. Yezu aatawira tenepa: “Mamuna onsene anamwalana na nkazi wace, mbakwatana na unango mbacita na iye banja, asacitira upombo nkazi wace wakutoma. Sawa-sawa na nkazi angamwalana na mamuna wace, mbakwatana na mamuna unango mbacita na iye banja, asacitambo upombo.” Buluka penepo, anthu anango akhadza na ana ang'ono kuna Yezu toera Iye aakhuye. Mbwenye anyakupfundza ace akhaasandika. Mphapo Yezu na kupiona asirizwa napyo mbaapanga kuti: “Asiyeni ana abwere kuna Ine, lekani kuakhondesa. Thangwi Umambo wa Mulungu ndi wa ale adalandana na iwo. Ndimo mwene, ndisakupangani kuti: Ule anakhonda kutambira Umambo wa Mulungu ninga mwana ng'ono, cipo anadza kapitamo.” Pakumala, Yezu akhumbatira ana ang'ono, aapasa nkhombo mbaasandzika manja. Mukhabuluka Yezu, mamuna m'bodzi abwera mbathamanga kuna Iye, an'godamira mbabvundza kuti: “Mpfundzisi Wadidi, ndisafuna ndicitenji toera ndikhale na upulumuki wakukhonda kumala?” Yezu antawira tenepa: “Thangwi yanji usandicemera wadidi? Wadidi ndi m'bodzi basi, ndiye Mulungu. Pontho iwe usadziwa matongero analonga tenepa: ‘Leka kupha munthu, leka kucita upombo, leka kuba, leka kukhala nyamaso wa uthambi, leka kunyengeza andzako, lemedza baba wako na mai wako.’ ” Penepo mamuna antawira mbalonga tenepa: “Mpfundzisi, penepi pyonsene ine ndisapicita kutomera mbandiri mwana.” Yezu amulang'ana na kunfuna konsene, mbapanga tenepa: “Casala cinthu cibodzi basi kuna iwe. Ndoko, gulisa pyonsene pina iwe, kobiri yace upase anyakucherenga. Tenepa unakhala na mpfuma kudzulu. Ungamala, bwera unditowere.” Mphapo iye na kubva mafala enewa, abuluka mbatsukwala, thangwi akhali na mpfuma zizinji. Na tenepo, Yezu alang'ana n'khundu mwace, mbapanga anyakupfundza ace kuti: “Pisanentsadi pikulu kakamwe kuna apfumi kuti apite mu Umambo wa Mulungu!” Anyakupfundza adzumatirwa na mafala enewa. Mbwenye Yezu athimiza basi na kulonga kuti: “Ananga, pisanentsadi pikulu kakamwe kupita mu Umambo wa Mulungu! Pisanentsa pikulu kakamwe kupitisa m'pfumi mu Umambo wa Mulungu, kupiringana kupitisa cinyama cinacemerwa kamelo mu benga ya ntsingano.” Anyakupfundza na kubva mafala enewa adzumatirwa na iwo pikulu kakamwe, mbakhabvundzana okha-okha kuti: “Pingakhala ndi tenepa, mbani anakwanisa kupulumuka?” Yezu aalang'ana anyakupfundza ace mbaapanga kuti: “Penepi pisacimwanika kuna anthu, mbwenye kuna Mulungu nkhabe. Thangwi kuna Mulungu pyonsene pisakwanisika.” Na tenepo, Pedhru atoma kumpanga Yezu kuti: “Lang'anani, ife tasiya pyonsene mbatikutowerani.” Yezu atawira tenepa: “Ndimo mwene, ndisakupangani kuti: Nkhabe munthu anasiya nyumba yace, abale ace aamuna, abale ace aakazi, baba, mai, ana, peno minda yace, na thangwi yanga na ya Mphangwa Zadidi, mbakhonda kutambira pa midzidzi ino, dzana na madzana a nyumba, dzana na madzana a abale amuna, abale aakazi, amai, ana, dzana na madzana a minda, na kuidiwa. Pontho mbakhonda kutambira upulumuki wakukhonda kumala pa midzidzi inafuna kudza. Mbwenye azinji akutoma, anadza kakhala akumalisira. Pontho akumalisira, anadza kakhala akutoma.” Yezu na anyakupfundza ace khumi na awiri, akhaenda ku Djerusalema. Iye kutsogolo, anyakupfundza ace mbakhantowera. Anyakupfundza ace akhadadzumatirwa, mbwenye anango akhaenda na iwo, akhagopa. Na tenepo, Yezu acemera pa khundu anyakupfundza ace khumi na awiri, mbatoma kuapanga pire pikhafuna kudza kacitika kuna Iye kuti: “Lang'anani, ife tiri kwenda ku Djerusalema. Kweneko, Ine, Mwana wa Munthu, ndinadza kaperekwa kuna akulu aanyantsembe na anyakudziwisa a Mwambo. Iwo anadza kandikonesa kuti ndiphiwe, mbandipereka kuna anthu adakhonda kukhala madjuda. Iwo anadza kandisingirira, anadza kandiphulira mata, anadza kandikwapula pontho mbandipha. Mbwenye pakupita ntsiku zitatu, ndinadza kalamuka pa kufa.” Penepo, anfendedzera Tiyago na Juwau, ana a Zebhedheu, mbampanga tenepa: “Mpfundzisi, tisaphemba kuti muticitire pinafuna kukumphembani ife.” Yezu aabvundza tenepa: “Musafuna kuti ndikucitireninji?” Iwo atawira kuti: “Tisafuna kuti mungakhala mu Umambo wanu wa mbiri mutisiye, m'bodzi akhale ku nkono wanu wa madyo, unango ku nkono wanu wa bzere.” Mbwenye Yezu aatawira tenepa: “Imwe nkhabe kupidziwa pinaphemba imwe. Imwe munakwanisa kumwa ndiko inamwa Ine, peno kutambira batixmu inatambira Ine?” Iwo atawira kuti: “Tinakwanisa.” Yezu aapanga tenepa: “Ndimo mwene, imwe munadza kamwa ndiko inamwa Ine, pontho munadza katambira batixmu inatambira Ine. Mbwenye pya kukhala ku nkono wanga wa madyo, peno ku nkono wanga wa bzere, penepi si pyanga tayu. Thangwi mbuto zenezi ndi za ale adamala sasanyirwa mbuto zenezi.” Anyakupfundza anango khumi, na kubva penepyo, aipirwa na Tiyago na Juwau. Na tenepo, Yezu aacemera mbaapanga kuti: “Imwe musadziwa kuti ale analongwa kuti mbatongi a mbumba, asaponderera mbumba. Pontho akulu-akulu, ana mphambvu za kuatonga. Pakati panu mbapikhonde kukhala tenepa. Mbwenye ule anafuna kukhala nkulu pakati panu, mbakhale n'dzakazi. Pontho ule anafuna kukhala wakutoma pakati panu, mbakhale n'dzakazi wa onsene. Thangwi Ine ene, Mwana wa Munthu, sidabwera kudza kaphatirwa basa tayu, mbwenye ndabwera kudza kaphatira basa anthu, na kupereka moyo wanga, toera kuombola anthu azinji.” Yezu na anyakupfundza ace afika ku nzinda wa Djeriko. Pikhabuluka Iye mu nzinda na anyakupfundza ace, pabodzi na mwinji ukulu wa anthu, agumana n'khundu mwa njira, boli-boli m'bodzi dzina yace ndi Bhartimeu, mwana wa Timeu, mbakhaphemba pinthu. Boli-boli pikhabva iye mbapilongwa kuti ndi Yezu wa ku Nazareti akhapita na njira, atoma kukhuwa mbalonga kuti: “Yezu, Mwana wa Dhavidhi, ndibverenimbo ntsisi!” Anthu azinji akhansandika toera amatame. Mbwenye iye akhakhuwiratu kakamwe mbakhalonga kuti: “Yezu, Mwana wa Dhavidhi, ndibverenimbo ntsisi!” Yezu alimira mbalonga kuti: “Ncemereni.” Iwo aenda kancemera mbampanga kuti: “Wangisira! Lamuka! Yezu asakucemera.” Na tenepo, boli-boli ataya cakufinika cace, alamuka na mwansanga, mbaenda kuna Yezu. Penepo Yezu am'bvundza kuti: “Usafuna kuti ndikucitirenji?” Iye antawira kuti: “Mpfundzisi, ine ndisafuna ndione.” Yezu ampanga kuti: “Ndoko. Kukhulupira kwako kwakuwangisa.” Pa n'dzidzi ubodzi ene, iye atoma kuona pontho, mbatowera Yezu pa ulendo wace. Mukhakhala iwo dhuzi na Djerusalema, mbafika pa cisa ca Bhetifaji na ca Bhetanya, dhuzi na phiri ya Mulivera, Yezu atuma anyakupfundza ace awiri, mbaapanga tenepa: “Ndokoni ku cisa ciri patsogolo panu. Pinacita imwe pite mwenemu, munagumana mwana buru wakumangirwa, kuti cipo adzati kupakirwa na munthu. Nsudzuleni mubwere na iye kuno. Mungabvundziwa na munthu kuti: ‘Thangwi yanji musacita penepi?’ Mpangeni kuti: Mbuya asanfuna, angamala anam'bweza pontho kuno.” Iwo aenda mbagumana mwana buru ali njira, wakumangirirwa pa nsuwo ukulu wa kunja. Mukhansudzula iwo, anthu anango akhakhala penepo aabvundza kuti: “Ninji pinacita imwe? Thangwi yanji musasudzula mwana buru?” Anyakupfundza atawira ninga mukhadapangwa iwo na Yezu. Tenepa iwo aasiya mbaenda. Iwo ankwata mwana buru mbaenda na iye kuna Yezu. Mbakwata nguwo zawo mbaziyikha pa nsana pa mwana buru, buluka penepo Yezu mbapakira. Anthu azinji akhathasika nguwo zawo n'njira, anango akhathasika masandzu akhagwanda iwo m'minda. Anthu akhaenda kutsogolo, na ale akhabwera n'nduli mwa Yezu, akhakhuwa tenepa: “Hosana!” “Mbasimbwe ule anadza na dzina ya Mbuya!” “Mbusimbwe umambo unafuna kudza wa baba wathu Dhavidhi!” “Hosana kudzulu kakamwe!” Yezu afika mu Djerusalema, mbapita mu Nyumba ya Mulungu. Alang'anisa pyonsene n'khundu mwace, mbabuluka kwenda ku cisa ca Bhetanya na anyakupfundza ace khumi na awiri, thangwi dzuwa ikhadoka. Mangwana mwace, mukhabwerera iwo buluka ku Bhetanya, Yezu abva njala. Iye aona na kutali muti wa nsambvu mbudadzala na masamba. Aenda penepo kwenda kaona ngakhala wabala misapu. Mudafika iye dhuzi, agumana masamba basi, thangwi n'dzidzi wa misapu ukhadzati kwana. Na tenepo, Yezu aupikirira mbaupanga kuti: “Na lini nsapu wako unadza kadyiwa pontho na munthu.” Penepo anyakupfundza ace amubva pikhalonga Iye penepyo. Mudafika iwo ku Djerusalema, Yezu apita mu Nyumba ya Mulungu, mbatoma kuthamangisa onsene akhagula na akhagulisa mwenemu. Abhoma meza za ale akhacinja kobiri, pontho na mipando ya ale akhagulisa nkhangaiwa. Nkhabe munthu m'bodzi akhasiya Iye kuti agwande na malonda ace mu Nyumba ya Mulungu. Buluka penepo, Iye atoma kupfundzisa anthu onsene kuti: “Pidalembwa tayu m'Bukhu ya Mulungu kuti: ‘Nyumba yanga inadza kacemerwa nyumba ya kuphemberera ya madzindza onsene?’ Mbwenye imwe musaisanduza kuti ikhale ‘mphako ya kubisalira mambava.’ ” Akulu aanyantsembe, na anyakudziwisa a Mwambo mudabva iwo penepyo atoma kusaka njira ya kupha nayo Yezu. Mbwenye akhan'gopa, thangwi mbumba ikhadadzumatirwa pikulu na mapfundzisiro ace. Mudadoka dzuwa, Yezu na anyakupfundza ace abuluka mu nzinda. Mangwana mwace na macibese, Yezu na anyakupfundza ace, mudapita iwo dhuzi na muti wa nsambvu, auona kuti iwo wamala kuuma na michici ene. Na tenepo, Pedhru akumbukira pire pikhadacitika, mbalonga tenepa kuna Yezu: “Lang'anani Mpfundzisi! Nsambvu udapikirira imwe, waumadi!” Penepo Yezu aapanga kuti: “Khulupirani Mulungu! Ndimo mwene ndisakupangani kuti mungapanga phiri iyi kuti: ‘Buluka penepo, ugwe m'bara,’ mbamuleka kupenula m'mitima mwanu, mbwenye mbamutawira kuti pinacitika pinalonga imwe, ipyo pinacitikadi. Mphapo Ine ndisakupangani kuti: Pyonsene pinaphemba imwe na maphembero, khulupirani kuti mwamala kupitambira, pontho pyonsene pinacitika. Na tenepo, mungakhala muli kuphembera, lekererani ale adakudawisirani, toera Baba wanu wa kudzulu akulekererenimbo kudawa kwanu. [Mbwenye mungakhonda kulekerera andzanu, Baba wanu wa kudzulu nkhabe kudza kakulekereranimbo madawi anu. ]” Pakumala, Yezu na anyakupfundza ace abwerera pontho ku Djerusalema. Pikhafamba Yezu mu Nyumba ya Mulungu, afendedzerwa dhuzi na akulu aanyantsembe na anyakudziwisa a Mwambo na mathubu, mbam'bvundza tenepa: “Kodi iwe uli kucita pinthu penepi na mphambvu za utongi wa ani? Mbani akupasa mphambvu za utongi toera kucita pinthu penepi?” Yezu atawira tenepa: “Ine ndisafuna ndikubvundzeni cinthu cibodzi. Nditawireni, Ine ndinakupangani mbani adandipasa mphambvu za utongi zinacita na Ine pinthu penepi. Nditawireni! Batixmu ya Juwau ikhali ya kudzulu peno ya anthu?” Iwo akhaketesana okha-okha mbakhalonga tenepa: “Tingalonga kuti ndi ya kudzulu, Iye anadza kabvundza kuti: Mphapo thangwi yanji imwe mwakhonda kuntawira Juwau? Mbwenye tingalonga kuti: Ndi ya anthu, mbaticiteni mphole na mbumba. Thangwi onsene akhan'dziwa Juwau ninga mporofeta.” Na thangwi eneyo, iwo antawira tenepa: “Ife nkhabe kupidziwa.” Na tenepo, Yezu alonga kuti: “Ine nkhabe kukupanganimbo na pang'ono pene, kuti ndi mphambvu za utongi wa ani zinacita na Ine pinthu penepi.” Buluka penepo, Yezu atoma kulonga na misanje kuti: “Mamuna m'bodzi acheka miti ya mauva m'munda mwace. Auzungulira na mpanda, mbacita mbuto ibodzi ya kukamuliramo mauva toera kucita vinyu, pontho mbamanga cirindo. Buluka penepo, akwata munda mbaurikisa na anthu anango anyakulima, pidamala iye mbaenda ulendo wace. Pidakwana iwo n'dzidzi wa kubulusa mauva, mwanacinthu munda atuma nyabasa wace m'bodzi kuna anyakulima, toera aende kapaswe na iwo phindi yace ya mauva. Mbwenye anyakulima amphata, am'menya, mbam'bweza cimanja-manja. Na tenepo, mwanacinthu munda atuma pontho nyabasa unango m'bodzi. Mbwenye anyakulima amphata nyabasa unowu, mbam'menya munsolo mbantikana. Penepo, mwanacinthu munda atuma pontho unango, mbwenye iwo amupha. Na tenepo, azinji adatumwa pa nsoka wawo, anango aphekeswa, anango aphiwa. Mwanacinthu munda akhadasala na mwana wace m'bodzi ekha basi wakufunika, toera kuntuma. Pakumalisa, iye atuma mwana wace mbalonga kuti: ‘Mwana wanga, iwo anati amulemedze.’ Mbwenye anyakulima alonga okha-okha kuti: ‘Uyu ndiye mwanaciro unthaka. Bwerani, tendeni timuphe, unthaka ukhale wathu.’ Na tenepo, iwo amphata, mbamupha, mbamponya kunja kwa munda wa mauva.” Penepo, Yezu abvundza kuti: “Ndi ninji pinafuna kucita mwanacinthu munda? Iye anabwera, mbapha anyakulima ale, mbakwata munda wa mauva mbaupasa anango. Imwe mudapyona tayu pidalembwa m'Bukhu ya Mulungu kuti: ‘Mwala udakhondiwa na anyakumanga nyumba, ndiwo udadza kakhala mwala wakufunika kakamwe? Penepi pyabuluka kuna Mbuya, pontho ndi cinthu cakudzumisa kuna ife.’ ” Akulu a madjuda akhapidziwa kuti nsanje unowu ukhalongera iwo. Na tenepo, akhasaka kuti anam'manga tani, mbwenye akhagopa mbumba. Na thangwi eneyo, ansiya, iwo mbaenda pyawo. Pakumala, madjuda atuma afarisi na anthu anango a pa nsoka wa mambo Herodhi kuna Yezu, toera amuone ngakhala anadodomeka pa malongero ace. Pidafika iwo pana Yezu ampanga tenepa: “Mpfundzisi, ife tisadziwa kuti imwe ndimwe munthu wa ndimo mwene, mbamukhonda kunyengererwa na munthu unango, thangwi imwe nkhabe kulang'ana nkhope ya munthu. Mbwenye musapfundzisa njira ya Mulungu mwa ndimo mwene. Mphapo tipangeni: Pisatawirirwa kulipa nsonkho kuna Mambo Sezari peno nkhabe? Pisatongwa peno nkhabe?” Mbwenye Yezu na kudziwa uthambi wawo, aatawira tenepa: “Thangwi yanji imwe musandilesera? Bweresani kobiri ibodzi ya parata ndiyone.” Iwo am'bweresera kobiri. Penepo Yezu aabvundza kuti: “Kodi nkhope na dzina iyi nja ani?” Iwo antawira kuti: “Mphya Sezari.” Na tenepo, Yezu aapanga tenepa: “Pya Sezari pasani Sezari, pya Mulungu pasani Mulungu.” Penepo iwo adzumatirwa na kutawira kudacita Yezu. Buluka penepo, nsoka wa asadhusi, ale analonga kuti anthu nkhabe kulamuka pa kufa, afendedzera Yezu mbampanga kuti: “Mpfundzisi, Mozesi asiya amala kutilembera mwambo wa kuti, mamuna angafa mbasiya nkazi mbadzati kubala na iye, m'bale wace wa mamuna asatongwa kuti acite banja na manferwa wa nkazi, toera ansiyire dzindza. Mphapo akhalipo amuna anomwe muubale mwawo. Wakutoma acita banja, mbafa mbakhonda kunsiya na ana. Penepo m'bale wace waciwiri akwata manferwa mbampitisa n'nyumba. Mbwenye iye afambo, mbakhonda kubala na iye ana. Pibodzi-bodzi pyacitikambo na wacitatu. Mphapo pa onsene anomwe muubale mwawo acita banja na nkazi m'bodzi ene, mbafa onsene mbakhonda kubala na iye ana. Pa kumalisira nkazi afambo. Mphapo, pa ntsiku ya kulamuka kwa anyakufa, nkazi unowu anadza kakhala wa ani? Thangwi pa unomwe wawo, acita na iye banja.” Yezu aatawira tenepa: “Mwadodomeka, na thangwi yakukhonda kudziwa kwanu Bukhu ya Mulungu na mphambvu za Mulungu! Thangwi anyakufa angalamuka pa kufa, nkhabe kudza kacitabve banja, peno kuperekwa m'mabanja. Mbwenye ndi ninga anju za kudzulu. Pa thangwi ya kulamuka kwa anyakufa, imwe mudzati kupiona pidalembwa m'bukhu ya Mozesi, pidalonga Mulungu pa thundudzi yakugaka mbampanga kuti: ‘Ine ndine Mulungu wa Abharaamu, ndine Mulungu wa Izaki, pontho ndine Mulungu wa Djakobo?’ Iye si Mulungu wa anyakufa tayu, mbwenye ndi Mulungu wa am'maso. Imwe mwadodomeka pikulu kakamwe!” M'bodzi wa anyakudziwisa a Mwambo aafendedzera dhuzi mbabva pikhaketesana iwo. Penepo, na kubva kuti Yezu akhatawira mwadidi, am'bvundza kuti: “Kodi mbapi matongero makulu kakamwe kupita onsene?” Yezu antawira kuti: “Matongero makulu kakamwe kupita onsene mbawa: ‘Bvesera iwe Izarayeli! Mbuya Mulungu wathu, ndiye basi Mbuya wathu. Funa Mbuya Mulungu wako na ntima wako onsene, na uunthu wako onsene, na ndzeru zako zonsene, pontho na mphambvu zako zonsene.’ Matongero aciwiri ndi awa: ‘Funa ndzako ninga iwe ene.’ Nkhabebve matongero anango makulu kupiringana awa.” Penepo, nyakudziwisa wa Mwambo alonga kuna Yezu kuti: “Ande, Mpfundzisi! Pinalonga imwe kuti Mulungu ndi m'bodzi basi ekha, nkhabebve unango kunja kwace, ndimo mwenedi. Pontho kufuna Mulungu na ntima wathu onsene, na ndzeru zathu zonsene, na mphambvu zathu zonsene, pontho na kufuna ndzako ninga iwe ene, mphyadidi kakamwe kupiringana kupisa ntsembe za pinyama na kucita ntsembe zinango.” Yezu na kuona kuti nyakudziwisa wa Mwambo atawira mwa ndzeru, ampanga kuti: “Iwe uli dhuzi na Umambo wa Mulungu.” Bulukira penepo kwenda kutsogolo, hadaonekabve tayu munthu akhali na cipapu ca kum'bvundzisa. Mukhapfundzisa Yezu mu Nyumba ya Mulungu, abvundzisa tenepa: “Kodi ndi thangwi yanji anyakudziwisa a Mwambo asalonga kuti, Kirixtu ndi mwana wa Dhavidhi? Thangwi iye ene Dhavidhi, alonga na mphambvu za Nzimu Wakucena kuti: ‘Mbuya alonga kuna Mbuya wanga kuti: Khala ku nkono wanga wa madyo, mpaka panaikha ine anyamalwa ako pantsi pa manyalo ako.’ Lang'anani, iye ene Dhavidhi asancemera ‘Mbuya’. Apo anakhala tani pontho mwana wace?” Penepo mbumba ikham'bvesera na kukomerwa. Pa kupfundzisa, Yezu akhalonga tenepa: “Citani mphole na anyakudziwisa a Mwambo. Iwo asafuna kufamba na nguwo zakulapha, asafuna kumwanyikwa na anthu m'mphambano, asafuna kusankhula mipando yakutoma mu nyumba za kuphemberera, pontho na kusankhula mbuto za kulemebza m'maphwandu. Iwo ndi anthu ana nsambo wa kukwata n'dzidzi ukulu na kuphembera m'manyumba mwa akazi adaferwa na amuna awo, toera kuatapata na kuabera pinthu pyawo. Enewa anadza kaoneswa nyatwa zikulu.” Ntsiku inango Yezu akhakhala mu Nyumba ya Mulungu. Iye akhakhala pantsi dhuzi na combo cinaikhirwa miyoni, mbakhalang'ana maikhiro akhacita mbumba kobiri zawo. Penepo anthu azinji akupfuma akhaikhambo kobiri zawo zizinji. Penepo afikambo nkazi m'bodzi wakucherenga adaferwa na mamuna wace, mbaikhambo pikobiri pyace piwiri pya ntengo ung'ono. Na tenepo, Yezu acemera anyakupfundza ace mbaapanga tenepa: “Ndimo mwene, ndisakupangani kuti nkazi uyu, manferwa wakucherenga, apasa pikulu kakamwe kupita onsene. Thangwi onsene awa apasa mbasala na pinango. Mbwenye nkazi uyu, na ucherengi wace, apereka pyonsene pikhakhala na iye, pire pikhafuna kudya iye.” Mukhabuluka Yezu mu Nyumba ya Mulungu, m'bodzi wa anyakupfundza ace ampanga tenepa: “Mpfundzisi, lang'anani kubalika kwa nyumba izi na myala zidamangwa na izo!” Mbwenye Yezu atawira tenepa: “Iwe usaziona nyumba zikulu izi? Pano nkhabe mwala ubodzi unafuna sala padzulu pa mwala unango. Pyonsene ipi pinamala kugomolwa.” Yezu akhakhala nawa pa phiri ya Mulivera, mbakhalang'ana ku Nyumba ya Mulungu, pa n'dzidzi ukhabvundziwa iye pa khundu na Pedhru, na Tiyago, na Juwau, na Andereya, kuti: “Pinacitika lini pinthu penepi? Pontho ndi cidzindikiro canji cinafuna kudza kaoneka, toera kupangisa kuti pyonsene ipi piri dhuzi na kufuna kucitika?” Yezu aapanga tenepa: “Cenjerani! Lekani kunyengezwa na munthu. Azinji anati abwere na dzina yanga mbalonga kuti: ‘Ndine pano,’ pontho anati anyengeze anthu azinji. Mphapo lekani kugopa mungabva mbapilongwa pya nkhondo na mabvabva a nkhondo. Pisafunika kuti picitike tenepo, mbwenye si kumala kwa pinthu tayu. Dziko na dziko inadza kamenyana, pontho umambo na umambo unadza kamenyana. Kunaoneka citeke-teke mu mbuto zizinji pontho na njala. Pinthu penepi ndi kutoma kwa nyatwa. Imwe musafuna mucenjere, thangwi munadza kaperekwa n'nyumba zakutongera miseru, mbamukwapulwa na michamu n'kati mwa nyumba zawo za kuphemberera. Na thangwi yanga, imwe munati muperekwe pamaso pa atongi na pa amambo, toera mukhale amboni anga. Thangwi pyonsene ipi mbipidzati kucitika, pakutoma pisafunika kuti Mphangwa Zadidi zimwazwe madziko onsene a pantsi pano. Mungadza kamangwa mbamuperekwa m'manja mwa anyakutonga, lekani kunentseka kuti munadza kalonganji. N'dzidzi ungafika longani pire basi pinadza kakupangani Mulungu n'dzidzi unowu. Thangwi simwe tayu anadza kafuna kulonga, mbwenye ndi Nzimu Wakucena. Anthu azinji anadza kapereka abale awo ene toera aphiwe, pontho ababa na amai anadza kacitambo pibodzi-bodzi kuna anawo. Anambo anadza kasandukira ababa awo na amai awo, mbaapha. Anthu onsene anati akuideni na thangwi ya dzina yanga. Mbwenye ule anapirira mpaka pa kumalisa, anapulumuswa.” Yezu athimiza pontho na kulonga kuti: “Imwe mungadza kaona cinthu cakugopsa cinafudza pya Mulungu mbacikhala pa mbuto ya kukhondeswa - anaona mafala awa, mbaabvesese - na tenepo, ale anagumanika mu Djudeya mbathawire ku mapiri. Ule anagumanika pa ntsoyi ya nyumba yace, mbaleke kuchita toera kubulusa cinthu cibodzi n'nyumba mwace. Ule anagumanika ku munda, mbaleke bwerera n'nduli toera akhakwate nguwo zace. Ntsiku zenezo zinati zikhale za nyatwa ikulu kuna ale ali na pathupi, na ale anayamwisa! Phemberani kuna Mulungu, kuti nyatwa zenezo zileke kucitika pa n'dzidzi wa khoni. Thangwi ntsiku zenezo zinadza kakhala za nyatwa ikulu kuti cipo idzati kuoneka, kutomera padacita Mulungu dziko mpaka n'dzidzi uno, pontho na lini inadza kaoneka pontho. Pontho Mbuya mbadakhonda kuzigwandira ntsiku zenezi, nkhabe m'bodzi akhafuna kupulumuka! Mbwenye na thangwi ya anyakusankhulwa adasankhula Iye, azigwandira ntsiku zenezi. “Na tenepo, munthu angakupangani kuti: ‘Kirixtu ali pano!’ peno kuti: ‘Uyo ali kule!’ lekani kum'bvera. Thangwi anadza kabulukira akirixtu a uthambi na maporofeta a uthambi kuti anadza kacita pirengo na pinthu pyakudzumisa, toera pingakwanisika, anyengeze na ale ene anyakusankhulwa a Mulungu. Na thangwi eneyo, cenjerani. Ndisakucenjezani pyonsene ipi mbipidzati kucitika.” “ Mbwenye pa ntsiku zenezo, pakumala kwa nyatwa eneyo ikulu, ‘dzuwa inaswipa, mwezi nkhabe kudza kagakabve, nyenyezi za kudzulu zinagwa, pontho mphambvu za kudzulu zinatekenyeka.’ Na tenepo, anadza kaona Ine, Mwana wa Munthu, mbandikhabwera m'makole na mphambvu zikulu za utongi, pontho na mbiri. Penepo, Ine, Mwana wa Munthu ndinadza katuma maanju anga, mbandigumanya anyakusankhulwa anga a makhundu manai a dziko, mpaka kudadhoroma mataka na thambo.” “Pfundzani nsanje wa muti wa nsambvu. Mungaona nthawi zace mbazigubudzika, masamba ace mbatoma kuphwikira, imwe musadziwa kuti malimwe ali dhuzi. Tenepambo imwe, mungaona mbapicitika pinthu penepi, dziwani kuti ali dhuzi, ali pa nsuwo. Ndimo mwene ndisakupangani kuti pinthu pyonsene ipi pinacitika, anthu a midzidzi ino mbadzati kumala. Kudzulu na pantsi panamala, mbwenye mafala anga nkhabe kudza kamala. “Mbwenye pya thangwi ya ntsiku eneyi peno pya n'dzidzi, nkhabe munthu anapidziwa. Izo anju kudzulu, peno Ine Mwana wa Munthu, nkhabe kupidziwa. Anapidziwa ndi Baba ekha basi. Lang'anirani! Khalani mbamudacenjera! Thangwi imwe nkhabe kupidziwa unafika lini n'dzidzi unowu. Pinakhala ninga mamuna m'bodzi adabuluka pa nyumba mbacita ulendo wa kutali. Mbwenye mbadzati kwenda, abulusa ntemo wace, mbagawiza mabasa kuna m'bodzi na m'bodzi, mbapanga nyakuonera pa nsuwo kuti aonere. Na tenepo, lang'anirani, thangwi imwe nkhabe kupidziwa kuti anabwera lini mwana cinthu nyumba. Peno na maulo, peno chiti-chiti, peno munalira madzongwe, peno na macibese. Kuti iye angabwera na mwansanga, akhonde kukugumanani mbamugona. Penepi pinakupangani Ine, ndisapanga anthu onsene kuti: Lang'anirani!” Zikhadasala ntsiku ziwiri basi kuti ifike ntsiku ya phwandu ya Paxkwa, ntsiku ikhadya iwo mikate yakusowa ntombwe wakutupisa. Akulu aanyantsembe na anyakudziwisa a Mwambo akhasaka njira ya kumanga nayo Yezu n'cibiso-biso na kumupha. Mbwenye akhalonga tenepa: “Mbapileke kucitika pa n'dzidzi wa phwandu, gopa mbumba inacita cikuti.” Yezu akhakhala ku Bhetanya, ku nyumba ya Simau akhacemerwa nyamatanya. Na tenepo, pa n'dzidzi ukhadya iwo, afika nkazi m'bodzi na ntete wace wa mafuta akudzola akucitwa na alabhaxtu, wakudzala na mafuta akununkhira, akucitwa na nardu wakukhonda kubvungazwa, a ntengo ukulu. Nkazi auswa ntete mbakhutula mafuta munsolo mwa Yezu. Anthu anango akhali penepo, atoma kuipirwa napyo mbakhalonga okha-okha kuti: “Thangwi yanji ali kubvunga mafuta onsene awa?” Iwo atoma kunsandika nkazi mbamulongera kuti: “Mafuta awa akhakwanira kuguliswa na ntengo wa kupiringana madzana matatu a kobiri ya parata, kobiri eneyo mbipaswa anyakucherenga.” Mbwenye Yezu aapanga kuti: “Nsiyeni nkazi acite pinafuna iye! Munansanyeranji? Iye andicitira cinthu cadidi kakamwe. Thangwi anyakucherenga imwe munakhala na iwo ntsiku zonsene, pontho munakwanisa kuaphedza ntsiku zonsene zinafuna imwe. Mbwenye Ine nkhabebve kudza kakhala na imwe midzidzi yonsene tayu. Nkazi uyu acita pidakwanisa iye kucita. Adzoza nyapantsi manungo anga na mafuta akununkhira, mbindidzati kufa, kusasanyira ntsiku ya kuikhwa kwanga n'nthumbi. Ndimo mwene ndisakupangani kuti m'mbuto zonsene zinafuna kudza kamwazwa Mphangwa Zadidi izi pantsi pano, pinati pilongwembo pidacita nkazi uyu, toera anthu ankumbukire.” Na tenepo, Djuda Xikariyoti, m'bodzi wa anyakupfundza khumi na awiri a Yezu, aenda kalonga na akulu aanyantsembe, toera kupereka Yezu m'manja mwawo. Penepyo iwo akomerwa napyo pikulu kakamwe mbabverana kumpasa kobiri. Na tenepo, iye akhasaka n'dzidzi wadidi toera ampereke. Ntsiku yakutoma ya phwandu ya mikate ya kusoweka ntombwe wa kutupisa, mukhaikha iwo ntsembe ya mwana bira wa Paxkwa, anyakupfundza a Yezu am'bvundzisa kuti: “Ndi kupi kunafuna imwe kuti tiyende kakusasanyireni phwandu ya Paxkwa?” Na tenepo, Yezu atuma anyakupfundza ace awiri, mbaapanga kuti: “Ndokoni mu nzinda. Mwenemu, anadza kuna imwe mamuna m'bodzi na nkhali ya madzi. Ntowereni. Mungafika longani na mwanacinthu nyumba inafuna pita iye kuti: Mpfundzisi ali kubvundzisa kuti: Iri kupi mbuto inafuna ine kudyera phwandu ya Paxkwa pabodzi na anyakupfundza anga? Iye anakupangisani mbuto ibodzi ikulu ya n'dzulu, yakumala kupakwa na pyombo pyonsene pinafunika. Sasanyirani mwenemu phwandu ya Paxkwa.” Na tenepo, anyakupfundza ace abulukadi mbapita mu nzinda, mbagumanadi pyonsene ninga mudalongera Yezu, mbatoma kusasanyira phwandu ya Paxkwa. Mukhadoka dzuwa Iye abwera na anyakupfundza ace khumi na awiri. Pikhadya iwo, Iye alonga kuti: “Ndimo mwene ndisakupangani kuti m'bodzi wanu anadya na ine pano, anati andisandukire.” Mphapo iwo akhala akutsukwala pikulu, mbatoma m'bodzi na m'bodzi kum'bvundzisa kuti: “Kodi ndine, Mbuya?” Penepo Yezu atawira kuti: “Ndi m'bodzi wa imwe khumi na awiri, ule anadya na Ine mu mbale ibodzi ene. Ndimo mwene. Ine, Mwana wa Munthu ndinati ndife, ninga mudalemberwa ipyo m'Bukhu ya Mulungu na thangwi yanga. Mbwenye nyatwa ndi yace ule anafuna kusandukira Ine, Mwana wa Munthu! Mphyadidi mbadakhonda kubaliwa.” Mukhadya iwo, Yezu akwata nkate mbapereka takhuta kuna Mulungu, aumenya, mbaupasa anyakupfundza ace, mbalonga kuti: “Kwatani, ici ndi manungo anga.” Buluka penepo, akwata ndiko, apereka takhuta kuna Mulungu, mbaipasa anyakupfundza ace, onsene mbamwa. Penepo Yezu aapanga kuti: “Ici ndi ciropa canga ca cibverano [cipsa. ] Ciropa cinacololekera anthu azinji. Ndimo mwene ndisakupangani kuti, Ine nkhabe kudza kamwabve vinyu iyi, mpaka ntsiku inadza kamwa ine vinyu ipsa mu Umambo wa Mulungu.” Pakumala kuimba nyimbo, abuluka mbaenda ku phiri ya Mulivera. Penepo Yezu apanga anyakupfundza ace kuti: “Imwe monsene munati mundithawe. Thangwi pyalembwa m'Bukhu ya Mulungu kuti: ‘Ndinadza kapha nkumbidzi, mabira mbamala kubalalika. ’ Mbwenye ndingamala kulamuka pa kufa, ndinatsogola kwenda ku Galileya.” Penepo Pedhru ampanga tenepa: “Peno andzanga anakuthawani. Mbwenye ine cipo ndinadza kakuthawani.” Mbwenye Yezu antawira tenepa: “Ndimo mwene ndisakupanga kuti lero ene, masiku ano, dzongwe mbidzati kulira kawiri, iwe unati undikhonde katatu.” Mbwenye Pedhru athimiza pontho na kulonga na mphambvu kuti: “Pingafunika kuti ine ndife pabodzi na imwe, ndinafa. Mbwenye ine nkhabe kudza kakukhondani.” Penepo andzace onsene atawirambo sawa-sawa. Buluka penepo, Yezu na anyakupfundza ace aenda ku mbuto ibodzi inacemerwa Djesimani. Mudafika iwo penepo, apanga anyakupfundza ace kuti: “Khalani pano, Ine ndiri kwenda kaphembera.” Penepo Yezu akwata Pedhru, na Tiyago, na Juwau, mbatoma kubva kunentseka na kutsukwala muntima. Iye alonga tenepa: “Khalani pano mbamulang'anira, thangwi ntima wanga uli kutsukwala pikulu mpaka kufa.” Abuluka mbaenda patsogolo pang'ono, agodama mbalambira mpaka kufikisa nkhope yace pantsi, mbakhaphembera kuti pingakwanisika abulusirwe n'dzidzi unowu wa nyatwa. Pontho akhaphembera tenepa: “Abha, Baba, imwe musakwanisa pyonsene. Ndithawisireni ndiko iyi ya nyatwa. Mphapo mbakuleke kucitika kufuna kwanga, mbwenye citani pinafuna imwe.” Buluka penepo, abwerera kuna anyakupfundza ace, mbaagumana mbakhagona. Penepo Yezu alonga kuna Pedhru kuti: “Simau, uli kugona? Nkhabe kwanisa kulang'anira pa n'dzidzi ubodzi basi? Lang'anirani pontho muphembere toera mukhonde kugwa m'manyengerero. Thangwi nzimu usafuna, mbwenye nyama yaneta.” Penepo Yezu abuluka pontho, aphembera mbakhalonga mafala mabodzi ene. Mudabwerera Iye, aagumana pontho mbakhagona, thangwi maso awo akhadalemerwa na citulo. Na tenepo, iwo akhasowa cakulonga kuna Yezu. Yezu pidabwerera Iye pontho kacitatu kuna anyakupfundza ace, aapanga tenepa: “Kodi imwe muli kupuma mbamugona pyanu basi? Pyakwana! Wafika n'dzidzi wa kuperekwa kwa Ine, Mwana wa Munthu m'manja mwa anyakudawa. Lamukani, tendeni! Thangwi ali kufika ule adandisandukira!” Yezu mbadzati kumala kulonga afika Djuda, m'bodzi wa anyakupfundza khumi na awiri a Yezu. Iye afika na mwinji wa anthu ukhali na matarasada na miti. Iwo akhadatumwa na akulu aanyantsembe, na anyakudziwisa a Mwambo na mathubu. Djuda, nyakusandukira Yezu, akhadabverana na iwo cidzindikiro ici: “Ule anamwanyika ine na mpsompsono, ndiye unowu. M'mangeni mum'phatisise mwende na iye.” Djuda aenda na mwansanga kuna Yezu mbalonga tenepa: “Mpfundzisi!” Mbampsompsona. Na tenepo, amuna amphata Yezu mbam'manga. Mbwenye m'bodzi wa ale akhali na Yezu, abulusa tarasada mbaphekesa nyabasa wa nkulu wa anyantsembe, pontho mban'gwanda khutu. Penepo Yezu aabvundza anthu kuti: “Mwatani musandidzera na matarasada, na miti, kudza kandimanga ninga Ine ndine phanga? Ntsiku zonsene Ine ndikhali na imwe mbandipfundzisa mu Nyumba ya Mulungu, imwe mudandimanga tayu! Mbwenye pisafunika kuti pisimbisiswe pidalembwa m'Bukhu ya Mulungu.” Na tenepo, anyakupfundza ace onsene ansiya, mbathawa. M'phale m'bodzi akhadabvala nkumi basi m'manungo mwace, akhatowera Yezu. Penepo anango akhafuna kum'manga. Mbwenye m'phale adula nkumi wace mbathawa cipezi-pezi. Buluka penepo, iwo akwata Yezu mpaka ku nyumba ya nkulu wa anyantsembe. Na tenepo, agumanyikana akulu onsene aanyantsembe, na mathubu, na anyakudziwisa a Mwambo. Pedhru akhaenda mbatowera Yezu na kutali, mpaka kupita pa thando ya nyumba ya nkulu wa anyantsembe. Mwenemu iye akhala pantsi mbakhaotha moto pabodzi na anyabasa. Na tenepo, akulu aanyantsembe na nsoka onsene wa anyakutonga miseru, akhasaka mathangwi akuphesa na iwo Yezu, mbwenye akhaasowa. Anthu azinji akhamulongera pya uthambi. Mbwenye pyonsene pikhalonga m'bodzi na m'bodzi wawo, pikhasyana. Penepo anango akhalamuka mbakhalonga uthambi wawo tenepa: “Ife tamubva mbakhalonga kuti: ‘Ine ndinati ndifudze Nyumba iyi ya Mulungu ya kucitwa na anthu. Mbwenye pa ntsiku zitatu ndinamanga pontho inango yakukhonda kucitwa na anthu.’ ” Mbwenye pa pyonsene ipi, uthambi wawo ukhasyana basi. Buluka penepo, nkulu wa anyantsembe alamuka pakati pa onsene, mbam'bvundzisa Yezu kuti: “Kodi iwe nkhabe kutawira pa pyonsene pinakulongera iwo?” Mbwenye Yezu akhonda kutawira cinthu. Na tenepo, nkulu wa anyantsembe am'bvundzisa pontho kuti: “Iwe ndiwe Kirixtu, Mwana wa Mulungu Wakusimbwa?” Apo Yezu antawira kuti: “Ndine. Munati muone Ine, Mwana wa Munthu, mbandikhala ku nkono wa madyo wa Mulungu wa Mphambvu, mbandibwera na makole a kudzulu.” Penepo nkulu wa anyantsembe apandula nguwo zace na kuipirwa, mbalonga kuti: “Thangwi yanji tisafuna anyamaso anango? Mwabva mwekha kuxola kudacita iye Mulungu! Musaona tani?” Iwo onsene, atawirira kuti Yezu aphiwe. Na tenepo, anango atoma kum'phulira mata, am'phopa maso ace, mbakham'menya na maxoko, mbakhalonga kuti: “Ngakhala ndiwe mporofeta, lotera!” Penepo anyabasa ankwata mbam'menya kunkhope na manja. Pedhru mbali pantsi, mu mpanda, abulukira mwenemu nyabasa m'bodzi wa nkazi, wa nkulu wa anyantsembe. Iye nyabasa wa nkazi pidaona iye Pedhru mbakhaotha moto amulang'anisa mbampanga kuti: “Iwe ukhakhalambo pabodzi na Yezu wa ku Nazareti.” Mbwenye Pedhru an'khonda mbalonga kuti: “Sinan'dziwa unowu tayu. Pontho ine nkhabe kupidziwa pinalonga iwe.” Na tenepo, Pedhru abuluka mbaenda m'berere. [Pa n'dzidzi unowu dzongwe yatoma kulira. ] Nyabasa unowu wa nkazi pidaona iye Pedhru mwenemu atoma pontho kumulongera kuli anthu akhali penepo kuti: “Mamuna uyu ndi m'bodzi wawo.” Mbwenye Pedhru akhonda pontho. Pakupita n'dzidzi pang'ono anthu akhakhala penepo atoma kun'thonya mbampanga pontho kuti: “Ndimo mwene, iwe ndiwe m'bodzi wawo, thangwi ndiwembo wa ku Galileya!” Penepo Pedhru atoma kupasika dzedze ekha ene mbakhadumbira kuti: “Ine nkhabe kun'dziwa mamuna uyu analonga imwe.” Pa n'dzidzi unowu, dzongwe yalira pontho kaciwiri. Penepo, iye akumbuka mafala akhadampanga Yezu kuti: “Dzongwe yaciwiri mbidzati kulira, iwe unadza kandikhonda katatu.” Na tenepo, Pedhru atoma kulira. Mangwana mwace na macibese ene, akulu aanyantsembe pabodzi na mathubu, na anyakudziwisa a Mwambo, na onsene nsoka wa nyumba yakutongera miseru, agumanyikana toera abverane kuti anancita tani Yezu. Pidamala iwo kum'manga, ankwata mbaenda kampereka kuna Piratu. Piratu am'bvundza Yezu tenepa: “Iwe ndiwe mambo wa madjuda?” Yezu antawira kuti: “Ndimwe analonga penepi.” Akulu aanyantsembe, akhampambazira pinthu pizinji. Na tenepo, Piratu am'bvundza pontho kuti: “Kodi iwe nkhabe tawira cinthu? Lang'ana pyonsene ipi pinakupambazira iwo!” Mbwenye Yezu nkhabe cibodzi cidatawira iye. Na tenepo, Piratu adzumatirwa napyo pikulu kakamwe. Ungafika n'dzidzi wa phwandu ya Paxkwa, kukhali na nsambo wakukhuca munthu m'bodzi n'kaidi, ule akhaphembwa na mbumba kuti abuluswe. Pa n'dzidzi unowu akhalipo n'kaidi, mamuna m'bodzi akhacemerwa Bharabhasi. Iye akhadafungirwa mwenemu pabodzi na andzace thangwi ya kupha munthu pa cikuti. Mwinji wa anthu wabwera mbutoma phemba kuti Piratu abuluse munthu m'bodzi n'kaidi, ninga nsambo unakhala iwo mbacita. Penepo, Piratu aabvundza tenepa: “Musafuna kuti ndikubulusireni mambo wa madjuda?” Thangwi iye akhapidziwa kuti akulu aanyantsembe akhadampereka Yezu m'manja mwace na thangwi ya bibvu. Mbwenye akulu aanyantsembe akhanyengerera mbumba kuti iphembe Piratu toera abuluse Bharabhasi n'kaidi, mbasiya Yezu. Na tenepo, Piratu aabvundza pontho kuti: “Musafuna ndincitenji mphapo mamuna uyu anacemera imwe mambo wa madjuda?” Penepo, mbumba yakhuwa kuti: “N'khomereni pa ntanda!” Piratu aabvundza kuti: “Mphapo nchanji ca kuipa cidacita iye?” Mbwenye mbumba ikhakhuwiratu kakamwe kuti: “N'khomereni pa ntanda!” Piratu, na kufuna kukoma kuna mbumba, aabulusira Bharabhasi. Buluka penepo akwapulisa Yezu na n'chamu, mbampereka kuti akhomerwe pa ntanda. Buluka penepo, anyankhondo akwata Yezu mbaenda na iye n'kati mwa nyumba ya ntongi, mwenemu agumanyikana anyankhondo onsene. Pakumala, am'bvazika nkumi wakufuira, mbaluka nthimba ya minga mbam'bvazika munsolo mwace. Mbatoma kum'mwanyika tenepa: “Bweraniko mambo wa madjuda!” Penepo akham'menya na mpsimbo munsolo mwace mbakham'phulira mata, mbagodama patsogolo pace ninga nkhumulambira. Pidamala iwo kunsingirira, an'dulisa nkumi wakufuira, mbam'bvazika pontho nguwo zace. Penepo ankwata mbaenda na iye kunja, toera akan'khomere pa ntanda. Mamuna m'bodzi wa ku nzinda wa Sirene, anacemerwa Simau, baba wa Alixande na Rufu, akhapita na penepo buluka ku munda, mbankakamiza kuti akwate ntanda. Na tenepo, iwo akwata Yezu mbaenda na iye ku mbuto ibodzi inacemerwa Gologota. Ndiko kubveka mbuto ikhataiwa madudu a misolo ya anthu a kufa. Kweneko, iwo ampasa vinyu ya kubvungazwa na ntombwe unacemerwa mira, mbwenye Iye akhonda kuimwa. Na tenepo, an'khomera pa ntanda, pontho pakumala kumenya ntsango, agawana nguwo zace toera adziwe cinafuna kwata munthu m'bodzi na m'bodzi. Ukhali n'dzidzi wacipfemba wa macibese mudan'khomera iwo pa ntanda. Padzulu pa ntanda pakhadalembwa, thangwi idakhomererwa Yezu, na mafala awa: MAMBO WA MADJUDA. Akhomerwambo pa ntanda pabodzi na Yezu mambava mawiri, m'bodzi ku nkono wa madyo, unango ku nkono wa bzere. [Na tenepo, pyasimbisiswa pikhadalembwa kale ene m'Bukhu ya Mulungu kuti: “Iye alengeswa ninga m'bodzi wa anthu a kuipa mitima. ]” Anthu akhapita na penepo akhantikana mbakhasukusa misolo, mbakhalonga tenepa: “Ha! Iwe ukhalonga kuti unakwanisa kufudza Nyumba ya Mulungu, mbuimanga pontho pa ntsiku zitatu! Apo chita mphapo pa ntanda upulumusike wekha ene.” Sawa-sawa na akulu aanyantsembe na anyakudziwisa a Mwambo, akhansingirirambo mbakhalonga okha-okha kuti: “Iye apulumusa anango, mbwenye asacimwana kupulumusika ekha ene. Kirixtu, mambo wa Izarayeli chita cincino pa ntanda tikuone, toera tikutawire!” Penepo, ale akhadakhomerwa pa ntanda pabodzi na Yezu, akhantikanambo. Kutomera pa n'dzidzi khumi na uwiri wa masikati, mpaka pa n'dzidzi utatu wa kumaulo, dziko yonsene yagudumirwa na cidima. Dhuzi na n'dzidzi utatu wa kumaulo, Yezu akhuwa mbalonga tenepa: “Eloyi, Eloyi, lama sabakitani?” Kweneku ndi kubveka “Mulungu wanga, Mulungu wanga, thangwi yanji wandisiya?” Anango akhali penepo mudabva iwo penepi, akhalonga tenepa: “Bveserani! Iye asacemera Eliya!” Penepo, mamuna m'bodzi aenda mbathamanga, mbatotesa thonje mu vinyu ya kudjamuka mbaipfeka pa ntete, mbapasa Yezu kuti amwe, mbalonga tenepa: “Nsiyeni, timuone ngakhala Eliya anabwera kam'bulusa penepo!” Mbwenye Yezu akhuwa pontho na mphambvu, mbafa. Penepo, nguwo ikhasitira mbuto ya Mulungu mu Nyumba ya Mulungu, yapanduka nakati-na-kati, kutomera kudzulu mpaka pantsi. Na tenepo, nkulu wa anyankhondo a ku Roma akhali patsogolo pa ntanda udakhomerwa Yezu, na kubva kukhuwa na kufa kudacita iye, alonga tenepa: “Ndimo mwenedi, mamuna uyu akhali Mwana wa Mulungu!” Penepo akhalipombo akazi anango mbakhalang'anisa na kutali. Pakati pawo akhalipo Mariya Madhalena, Salomee, na Mariya, mai wace Tiyago, ng'ono wace Zuze. Akazi enewa akhadza mbaperekera Yezu na kum'phatira basa mukhali iye ku Galileya. Pontho penepo akhalipombo akazi anango azinji akhadaenda na iye ku Djerusalema. Mukhadoka dzuwa, mukhasasanyira iwo ntsiku ya Sabudu, kweneku nkhulongera ntsiku ya cixanu ca kumaulo, Zuze wa ku nzinda wa Arimateya, munthu wa mbiri pa nsoka wa anyakutonga miseru, pontho akhadikhirambo Umambo wa Mulungu, aenda na cipapu consene kuna Piratu, mbaphemba manungo a Yezu. Piratu adzumatirwa napyo mudabva iye kuti Yezu afa. Penepo, acemeresa nkulu wa anyankhondo a ku Roma mbam'bvundzisa ngakhala Yezu afa kale ene. Pidamala iye kupangiwa na nkulu wa anyankhondo, apereka manungo a Yezu kuna Zuze wa ku nzinda wa Arimateya. Na tenepo, Zuze, aabulusa manungo a Yezu pa ntanda, mbaapyangirira na nguwo yakucena ikhadagula iye. Buluka penepo, aenda kaikha manungo mu nthumbi ikhadakumbwa pa mwala. Pidamala iye abulumundisa mwala ukulu, mbafunga na iwo pa nsuwo wa nthumbi. Mariya Madhalena, na Mariya mai wace Zuze, aona padaikhwa manungo a Yezu. Mudapita ntsiku ya Sabudu, Mariya Madhalena, na Salomee, na Mariya mai wace Tiyago, agula mafuta akununkhira toera kadzodza na iwo manungo a Yezu. Pa ntsiku ya Dimingu, na macibese ene, mukhabuluka dzuwa, iwo aenda ku nthumbi. Mukhaenda iwo na njira akhabvundzana tenepa: “Mbani anafuna kutibulusira mwala udafunga nthumbi?” Iwo akazi akhalonga penepyo, thangwi mwala ukhali ukulu kakamwe. Mbwenye mudafika iwo, aona kuti mwala ukhadabuluswa kale ene. Na tenepo, apita n'nthumbi, mbaona m'phale m'bodzi akhadabvala nguwo zakucena, akhali nawa ku khundu ya madyo. Penepo, iwo atutumuka mbagopa pikulu kakamwe. Mbwenye m'phale aapanga tenepa: “Lekani gopa! Muli kusaka Yezu wa ku Nazareti adakhomerwa pa ntanda? Iye alamuka pa kufa. Nkhabemo muno. Lang'anani pakhadaikhwa Iye apa. Cincino ndokoni mukhapange anyakupfundza ace na Pedhru kuti: Iye ali kutsogola kwenda ku Galileya. Kweneko munaenda kamuona ninga mudalongera Iye.” Na tenepo, akazi athawa mbabuluka pa nthumbi mbakhadzadzamira na kugopa. Na thangwi ya kugopa kukhali na iwo, acimwana kupanga munthu cinthu. Yezu alamuka pa kufa ntsiku ya Dimingu na macibese ene, mbaonekera pakutoma kuna Mariya Madhalena, ule akhadabulusa Iye mizimu minomwe ya kuipa. [ Mariya Madhalena aenda kalonga kuna andzace Yezu. Iwo akhatsukwala mbakhalira. Mudapibva iwo mbapilongwa kuti Yezu ali m'maso, pontho kuti akhadaonekera kuna Mariya Madhalena, iwo akhonda kupitawira. Buluka penepo, Yezu aonekera pontho na makhaliro anango kuli anyakupfundza ace awiri, mbakhaenda kunja kwa nzinda. Iwo abwerera mbaenda kalonga penepyo kuna anyakupfundza anango. Mbwenye iwo akhonda kupitawira pire pidalongwa na andzawo awiri. Pakumalisira, Yezu aonekera pontho kuli anyakupfundza ace khumi na m'bodzi pikhadya iwo. Yezu aasandika na thangwi yakukhonda kukhulupira kwawo, pontho na upoka wawo wakukhonda kutawira pinalonga andzawo akhadaona Yezu wakulamuka pa kufa. Yezu aapanga tenepa: “Ndokoni pa dziko yonsene ya pantsi pano, mbamumwaza Mphangwa Zadidi kuna anthu onsene. Ule anatawira mbatambira batixmu anapulumuka, mbwenye ule anakhonda kutawira, anatongwa. Kuli ale anatawira anadza kapaswa mphambvu za kucita pirengo ninga ipi: Na dzina yanga, anathamangisa mizimu ya kuipa, analonga malongero mapsa, anaphata nyoka, angamwa ntombwe wa kupha munthu, nkhabe kuacita pyakuipa, pontho angaphemberera atenda mbaasandzika manja, iwo ana wanga.” Pakumala kulonga penepyo na anyakupfundza ace, Mbuya Yezu akwatiwa mbaenda kudzulu, mbakhala ku khundu ya nkono wa madyo wa Mulungu. Na tenepo, anyakupfundza a Yezu aenda mbamwaza Mphangwa Zadidi m'makhundu onsene. Mbuya akhaaphedza na pirengo toera kusimbisisa mphangwa zikhalonga iwo kuti ndizodi.] Anthu azinji acita mphambvu za kulemba pinthu pidacitika pakati pathu, ninga mudapipangwa ife na ale akhali anyamaso kutomera pakutoma, pontho mbakhala anyabasa a fala ya Mulungu. Na tenepo, ine ndapipfundza pyonsene n'cidikho-dikho kutomera pakutoma. Pakumala, ndaona kuti mphyadidi ndikulembereni imwe wakulemebza Tiyofilu, cibodzi na cibodzi, pyonsene ninga mudacitikira ipyo, toera mukhonde kupenula pinthu pya ndimo mwene pidapfundziswa imwe. Pa n'dzidzi wa Herodhi mambo wa Djudeya, akhalipo nyantsembe m'bodzi akhacemerwa Zakariya. Iye akhali m'bodzi wa nsoka wa anyantsembe wa Abhiya. Nkazi wace akhali Zabere. Iye Zabere akhalimbo wa dzindza ya Arau. Zakariya na nkazi wace akhali anthu akulungama pamaso pa Mulungu. Iwo akhabvera mwakukwana myambo na matongero onsene a Mbuya. Mbwenye iwo hakhali na ana tayu, thangwi Zabere hakhabala tayu. Pontho mamuna na nkazi, akhadakulupala. Ntsiku inango, pa n'dzidzi ukhakhala nsoka wa Zakariya m'basa, iye akhacita basa yace ya unyantsembe patsogolo pana Mulungu. Ninga nsambo wa anyantsembe, iye amenyerwa ntsango mbasankhulwa toera apite mu Nyumba ya Mbuya, kuti aende kapisa pinthu pyakununkhira pinacemerwa isensu. Pa n'dzidzi ukhapiswa isensu, mbumba yonsene ikhaphembera kunja. Na tenepo, anju wa Mbuya abulukira pana Zakariya, mbalimira ku khundu ya madyo ya guwa ya ntsembe ikhapisirwa isensu. Zakariya na kuona anju, atutumuka mbagopa. Mbwenye anju ampanga kuti: “Leka gopa, Zakariya! Mulungu abva maphembero ako. Nkazi wako Zabere anadza kabala mwana-mamuna, dzina yace iwe unadza kan'thula Juwau. Kunaoneka kukomerwa na kutsandzaya muna iwe, na anangombo azinji anatsandzaya na kubaliwa kwace. Thangwi iye anakhala nkulu pamaso pa Mbuya. Pontho iye nkhabe kudza kamwa vinyu na pya kumwa pinango pya kuledzeresa. Anati adzale na Nzimu Wakucena kutomera m'mimba mwa mai wace. Na tenepo, anati aabweze pontho anthu azinji a mbumba ya Izarayeli aende kuna Mbuya Mulungu wawo. Iye anaenda patsogolo pa Mbuya, mu nzimu na mphambvu za Eliya, toera abweze mitima ya ababa kuna anawo, na kuna anthu akukhonda kubvera abwerere mwakulungama, kuti asasanyire mbumba toera iphatire basa Mbuya.” Mphapo Zakariya abvundzisa anju mbalonga kuti: “Ndinapidziwa tani pinthu penepi kuti ndimo mwenedi? Thangwi ine na nkazanga, tonsene ndife mankhalamba.” Anju antawira tenepa: “Ine ndine Gabhiriyeli, ndiri pamaso pa Mulungu midzidzi yonsene. Iye andituma ndilonge na iwe toera ndikupase mphangwa izi zadidi. Cincino iwe unakhala bewewe. Unacimwana kulonga mpaka ntsiku inacitika penepi. Thangwi wapokanya mafala anga, anadza kafuna kucitika n'dzidzi wace ungakwana.” Mukhacitika penepyo, mbumba yonsene ikhadikhira Zakariya, mbwenye ikhadzumatirwa na kuona kudembuka kukhacita iye mu Nyumba ya Mulungu. Pakubuluka kwace Zakariya mu Nyumba ya Mulungu, abuluka mbali bewewe mbakhacimwana kulonga. Penepo mbumba yonsene yadzindikira kuti piripo pikhadaoneswa iye na Nzimu Wakucena n'kati mwa Nyumba ya Mulungu. Na tenepo, Zakariya akhakwanisa kulonga na mbumba na manja basi. Pidamala izo ntsiku zace za kuphata basa mu Nyumba ya Mulungu, Zakariya abuluka mbaenda ku nyumba kwace. Buluka penepo, Zabere nkazi wa Zakariya akhala na pathupi. Na tenepo, amala myezi mixanu, mbakhakhala pa nyumba. Iye akhalonga tenepa: “Izi ndi nkhombo za Mbuya! Cincino Iye andionambo toera kundimwaza manyadzo patsogolo pa mbumba.” Zabere pikhakhala iye na pathupi myezi mitanthatu, Mulungu atuma anju Gabhiriyeli, kuti aende ku nzinda ubodzi unacemerwa Nazareti ku dziko ya Galileya, kuti aende kalonge na mwali m'bodzi anacemerwa Mariya, akhabvundzirana na Zuze, mwana wa dzindza ya mambo Dhavidhi. Anju afendedzera Mariya, am'mwanyika mbampanga tenepa: “Makolokoto iwe wakudzala na nkhombo! Mbuya ali na iwe.” Apo Mariya na kupibva, adzumatirwa pikulu kakamwe, mbakhasaka kudziwa kuti mamwanyikiro enewa asalonganji. Mbwenye anju ampanga kuti: “Leka kugopa Mariya, thangwi pidacitirwa iwe ndi kukoma ntima kwa Mulungu! Iwe unati ukhale na pathupi mbubala mwana-mamuna, dzina yace unadza kan'thula Yezu. Iye anakhala nkulu, mbadza kacemerwa Mwana wa Mulungu wa kudzulu kakamwe. Mulungu Mbuya anadza kampasa mpando wa umambo wa baba wace Dhavidhi. Pontho Iye anadza katonga kwenda na kwenda mbumba ya Djakobo. Umambo wace nkhabe kudza kamala.” Mphapo Mariya alonga kuna anju kuti: “Pinacitika tani penepi, thangwi ine ndidzati kudziwa mamuna?” Anju antawira tenepa: “Nzimu Wakucena unabwera muna iwe, pontho mphambvu za Mulungu wa kudzulu kakamwe zinakugudumira na n'thundzi wace. Na thangwi eneyo, mwana anafuna kudza kabalwa, anadza kacemerwa Wakucena, pontho anadza kacemerwa Mwana wa Mulungu. Pontho m'bale wako Zabere, anati akhale na mwana-mamuna pa unkhalamba wace. Ule akhalongwa kuti nkhabe kubala, lero iye ana pathupi, mwezi uno ndi wacitanthatu. Thangwi kuna Mulungu nkhabe cinthu cinacimwanika.” Penepo Mariya antawira tenepa: “Ndiri pano ine n'dzakazi wa Mbuya. Mphapo mbapicitike pyapyo kuna ine ninga mudapilongera imwe.” Na tenepo, anju aenda pyace. Pa ntsiku zenezo, Mariya acita ulendo wace na mwansanga, mbaenda ku nzinda ubodzi ukhagumanika ku cisa ca mapiri, ku dziko ya Djudeya. Kweneko, iye apita n'nyumba ya Zakariya mbamwanyika Zabere. Zabere na kubva kumwanyikwa kudacitwa iye na Mariya, mwana athaula m'mimba mwace. Na tenepo, Zabere adzala na Nzimu Wakucena, mbalonga na mphambvu kuti: “Iwe ndiwe wakusimbwa pakati pa akazi, pontho mwana anafuna kudza kabala iwe ndi wakusimbwambo! Mbwenye ndine ani ine kuti ndidze kaoniwa na mai wace Mbuya wanga? Pa n'dzidzi ubodzi ene udabva ine kumwanyikwa na iwe, mwana wanga atoma kuthaula m'mimba mwanga na kukomerwa. Kutsandzaya ndi kwako iwe Mariya adatawira kuti pinacitika pidakupanga Mbuya!” Na tenepo, Mariya alonga kuti: “Ntima wanga usakuza Mbuya. Pontho nzimu wanga usasekera Mulungu Mpulumusi wanga, thangwi Iye akumbukambo kucepeseka kwa ine, n'dzakazi wace. Apo kutomera lero mpaka kutsogolo, madzindza onsene anati andicemere nkazi wakudzala na nkhombo. Thangwi Mulungu wa mphambvu acita pinthu pikulu kakamwe kuna ine. Wakucena ndiyo dzina yace. Ntsisi zace asazipangisa kuna ale anan'gopa, kuna dzindza na dzindza. Iye acita pinthu pikulu na nkono wace, mbamwaza ale akhanyerezera pya umbirimi n'kati mwa mitima yawo. Agwisa amambo a mphambvu m'mipando mwawo ya umambo, mbakwiza anthu akupwazika. Akhutisa anyanjala na pinthu pyadidi, mbwenye athamangisa anyakupfuma cimanja-manja. Aphedza n'dzakazi wace Izarayeli, mbakumbukira ntsisi zace kuna Abharaamu na dzindza yace kwenda na kwenda, ninga mudapikirira Iye ambuya athu.” Mariya akhala na Zabere dhuzi na kuthamangira myezi mitatu, buluka penepo mbabwerera ku nyumba kwace. Pidakwana izo ntsiku zace za kubala, Zabere abala mwana-mamuna. Abale ace na anthu anango a pa cisa, abva kuti Mulungu am'bvera ntsisi zikulu, mbaenda onsene kancitira makolokoto. Pa ntsiku yacisere, anthu aenda kansidza mwana, mbakhafuna kumpasa dzina ya Zakariya, dzina ya baba wace mwana. Mbwenye mai wace atawira mbalonga tenepa: “Nkhabe! Iye anacemerwa Juwau.” Penepo iwo antawira nkazi kuti: “Ku dzindza kwako nkhabe munthu ana dzina eneyi.” Na tenepo, iwo atoma kulonga na manja na baba wace mwana, toera adziwe dzina yanji inafuna iye kupasa mwana wace. Zakariya aphemba citabwa kuti alemberepo dzina ya mwana. Penepo iye alemba tenepa: “Dzina yace ndi Juwau.” Na tenepo, onsene adzumatirwa napyo. Pa n'dzidzi ubodzi-bodzi, Zakariya lirimi yace yasudzuka, iye atoma kulonga mwadidi ninga mwakale, mbakhakuza Mulungu. Anthu onsene a pa cisa atoma kugopserwa pikulu. Na tenepo, mphangwa zenezo zamwazika n'cisa consene ca m'mapiri a ku Djudeya. Onsene akhabva mbapilongwa penepyo akhabvundzisana tenepa: “Kodi mwana uyu anadza kakhala ani?” Thangwi mphambvu za Mbuya zikhali na iye. Penepo Zakariya, babace mwana, adzazwa na Nzimu Wakucena mbatoma kulonga pinthu na Nzimu ubodzi-bodzi kuti: “Mbasimbwe Mbuya, Mulungu wa Izarayeli, thangwi iye abwera kudza kaona na kuombola mbumba yace. Iye atidzesera upulumuki wa mphambvu wa dzindza ya n'dzakazi wace Dhavidhi. (Ninga mudapilongera Mulungu kale na kale na milomo ya maporofeta ace akucena,) mbatipulumusa mwa anyamalwa athu na m'manja mwa onsene anatizonda, toera kupangisa ambuya athu ntsisi zace, pontho na kukumbuka cibverano cace cakucena, na cidumbiriro cidacita Iye kuna baba wathu Abharaamu, ca kutiombola m'manja mwa anyamalwa athu, toera tim'phatire basa na kukhonda kugopa, mwakulungama na mwa udidi pamaso pace, ntsiku zathu zonsene. Iwe mwana wanga, unati ucemerwe mporofeta wa Mulungu wa kudzulu kakamwe. Unaenda patsogolo pa Mbuya toera unsasanyire njira, toera kupasa mbumba yace udziwisi wa upulumuki, unabulukira pa kulekererwa kwa madawi awo, na thangwi ya ntsisi zikulu za Mulungu wathu, zinacita kuti atigasire dzuwa ya kudzulu, toera kumwanikira ale anakhala n'cidima na ali mu n'thundzi wa kufa, pontho toera kulondeza myendo yathu mu njira ya ntendere.” Mwana akhakula mbawanga mu nzimu. Pontho akhala n'thando mpaka ntsiku idabulukira iye pakweca, kuna mbumba ya Izarayeli. Pa n'dzidzi unowu, mambo Sezari Aguxtu wa ku Roma, amwaza ntemo n'dziko mwace wa kulonga kuti mbumba yonsene isatongwa ilemberwe. Uku ndi kulemberwa kwakutoma kwa anthu, kudacitika pa n'dzidzi ukhatonga mambo Kirinu dziko ya Sirya. Na tenepo, anthu onsene akhaenda ku mizinda yawo ya kubaliwa, toera akhalemberwe. Zuze, na thangwi ya kukhala wa dzindza ya Dhavidhi, abulukambo ku nzinda wa Nazareti, ku dziko ya Galileya, mbaenda ku dziko ya Djudeya, ku nzinda wa Bheleya, kudabaliwa mambo Dhavidhi. Kweneko, Zuze aenda pabodzi na mankhadzi wace Mariya mbali na pathupi, toera akhalemberwembo. Pa n'dzidzi ukhakhala iwo ku Bheleya, wakwanambo n'dzidzi kuti mwana abaliwe. Na tenepo, Mariya abala mwana wace wa utombo wa mamuna. Penepo mai wace anfinikiza na nguwo, mban'gonesa n'cimwadiya cikhadyera pifuyo, thangwi nyumba ya kufikira alendo ikhadadzala. Pa cisa ceneco, akhalipo akumbidzi n'thando, mbakhaonera pifuyo pyawo na masiku. Penepo anju wa Mbuya aabulukira, mbiri ya Mbuya yayetimira n'khundu mwawo, iwo mbagopa pikulu kakamwe. Mbwenye anju aapanga kuti: “Lekani kugopa! Ndakudzeserani Mphangwa Zadidi zakutsandzaisa pikulu kakamwe kuna anthu onsene. Thangwi lero, mu nzinda wa Dhavidhi, abalwa Mpulumusi wanu Kirixtu, Mbuya. Imwe munan'dzindikira na ici: Munagumana mwana wa ng'ono adabalwa cincino adafinikizwa na nguwo, mbagoneswa n'cimwadiya cakudyera pifuyo.” Na mwansanga, wabulukira mwinji wa anyankhondo a kudzulu, pabodzi na anju, mbakhakuza Mulungu na mafala awa: “Mbiri kuna Mulungu wa kudzulu, ntendere pa dziko kuna anthu ale anafuniwa na Iye.” Anju pidabwerera izo mbazyenda kudzulu, akumbidzi atoma kulonga okha-okha tenepa: “Tendeni ku Bheleya tikhaone ipi pidacitika, pontho tikhaone pidatipanga Mbuya.” Na tenepo, iwo athamanga mbaenda kweneku, mbagumana Mariya na Zuze, mwana mbakhagona n'cimwadiya cikhadyera pifuyo. Pidamala iwo kumuona, alonga kuna anthu onsene, pire pikhadapangwa iwo na anju, pa thangwi ya mwana unowu. Apo anthu onsene adapibva pikhalonga akumbidzi, adzumatirwa napyo. Mbwenye Mariya akhapikoya pinthu pyonsene pikhabva iye, mbakhapinyerezera mwadidi muntima mwace. Na tenepo, akumbidzi abwerera mbakhapasa mbiri na kukuza Mulungu pa pyonsene pikhabva iwo na pikhaona iwo, ninga mukhadapipangirwa iwo. Mudakwana izo ntsiku zisere toera kusidza mwana, athuliwa dzina ya Yezu, dzina ikhadapaswa iye na anju, mai wace mbadzati kukhala na pathupi. Mudakwana iwo n'dzidzi wa kuceneswa, ninga mudalongera mwambo wa Mozesi, Zuze na Mariya ankwata mwana mbaenda na iye ku Djerusalema, toera ampereke patsogolo pana Mbuya, (ninga mudalemberwa ipyo mu mwambo wa Mbuya kuti: “Ana a utombo onsene acimuna, asatongwa aperekwe m'manja mwa Mbuya.”) Pontho toera kupereka ntsembe za ana madjiwa awiri, peno ana nkhangaiwa awiri, ninga munalongera mwambo wa Mbuya. Apo ku Djerusalema, akhalipo mamuna m'bodzi akhacemerwa Simiyau. Iye akhali munthu wakulungama mbakhalemedza Mulungu, pontho akhadikhira kumatamizwa kwa mbumba ya Izarayeli. Nzimu Wakucena ukhakhala na iye. Pontho Nzimu Wakucena ukhadampangisa kuti iye nkhabe kufa, mbadzati kuona Kirixtu adapikirirwa na Mbuya. Simiyau, akwatwa na Nzimu Wakucena, mbaenda mu Nyumba ya Mulungu. Baba wace na mai wace, pidankwata iwo mwana mbaenda na iye mu Nyumba ya Mulungu toera kancitira pinalonga mwambo, Simiyau akwata mwana m'manja mwace mbakuza Mulungu, mbalonga tenepa: “Cincino Mbuya, siyani nyabasa wanu aende pyace na ntendere ninga mudampikirira imwe. Thangwi ndamuona ndekha na maso anga Mpulumusi, adasasanyira imwe pamaso pa mbumba zonsene. Cieza toera mwinikira mbumba zidakhonda kukhala madjuda, pontho na kupasa mbiri mbumba yanu ya Izarayeli.” Baba wace na mai wace mwana, akhala akudzumatirwa na pire pikhalongwa na thangwi ya mwana. Simiyau aphemba kuna Mulungu kuti aapase nkhombo, mbalonga kuna Mariya, mai wace Yezu kuti: “Mwana uyu asankhulwa kale ene na Mulungu toera kugwisa na kulamusa anthu azinji a dziko ya Izarayeli. Pontho mwana unowu anati akhale cidzindikiro ca Mulungu ca kukhonda kubverana. Na tenepo, manyerezero mazinji a m'mitima mwawo anadza kadziwika, pontho iwe unadza katsukwala ninga munthu adalaswa na tarasada muntima.” Akhalipo penepo mporofeta wankazi akhacemerwa Yana mwana wa Fanweli, wa dzindza ya Aseri. Iye akhali nkhalamba. Akhadaferwa na mamuna akhadakhala na iye pyaka pinomwe basi pa banja. Na tenepo, iye akhala na uzice wakuferwa na mamuna mpaka pyaka makumasere na pinai. Akhalambira Mulungu wace, mbakhaphembera na kupimana cakudya, masiku na masikati mbakhakhonda buluka mu Nyumba ya Mulungu. Pidafika iye mwenemu, pa n'dzidzi unowu ene, atoma kupereka takhuta kuna Mulungu, mbalonga na thangwi ya Mwana kuna anthu onsene akhadikhira kuombolwa kwa Djerusalema. Pakumala kucita pyonsene pya Mwambo wa Mbuya, Zuze na Mariya abwerera kwenda ku nzinda wawo wa Nazareti, ku dziko ya Galileya. Na tenepo, mwana akhakula mbakhakhala na mphambvu, mbadzala na udziwisi. Pontho kukoma ntima kwa Mulungu kukhali na Iye. Pyaka pyonsene, baba wace na mai wace Yezu akhaenda ku Djerusalema, pa phwandu ya Paxkwa. Yezu mudacita Iye pyaka khumi na piwiri, aenda na baba wace na mai wace ku phwandu ya Paxkwa ku Djerusalema, ninga nsambo wawo. Mudamala phwandu ya Paxkwa, pa kubwerera kwenda ku nyumba kwawo, Yezu akhadasalikira ku Djerusalema, baba wace na mai wace mbakhonda dziwa cinthu. Baba wace na mai wace, na kunyerezera kuti Iye ali kubwera na andzace n'njira, amala ntsiku yamumphu mbakhafamba. Na tenepo, iwo atoma kunsaka pakati pa abale na pa anthu a pa cisa. Pidansowa iwo, abwerera ku Djerusalema kansaka. Pakupita ntsiku zitatu, iwo an'gumana mu Nyumba ya Mulungu, mbali nawa pakati pa anyakudziwisa a Mwambo, mbakhaabvesera na kuabvundzisa. Penepo anthu onsene akhamubva akhadzumatirwa na thangwi ya ndzeru zace, pontho na kutawira kukhacita iye mibvundzo. Baba wace na mai wace pidamuona iwo, adzumatirwambo napyo. Penepo mai wace ampanga kuti: “Mwana wanga, thangwi yanji wacita penepi kuna ife? Baba wako na ine tikhadatsukwala pikulu na kukusaka.” Apo Yezu antawira tenepa: “Thangwi yanji mukhandisaka? Imwe nkhabe kupidziwa kuti Ine ndisatongwa ndicite pinthu pya Baba wanga?” Mbwenye iwo acimwana kupibvesesa pikhalonga Yezu. Na tenepo, Yezu abwerera pabodzi na baba wace na mai wace, kwenda ku Nazareti. Yezu akhali mwana wakuabvera. Mbwenye mai wace Yezu akhapikoya pyonsene ipi muntima mwace. Apo Yezu akhakula pa udziwisi, pa thupi, na pa kukoma ntima, pamaso pa Mulungu na pamaso pa anthu. Pa caka cacikhumi na pixanu ca umambo wa Tibheryo Sezari, Ponsyo Piratu mbali ntongi wa Djudeya, Herodhi mbali ntongi wa Galileya, m'bale wace Herodhi anacemerwa Filipi mbali ntongi wa Itureya na Tarakoniti, Lizanya mbali ntongi wa Abhileni, Anasi na Khaifasi mbali akulu aanyantsembe. Ndi caka ceneco cidalonga Mbuya n'thando kuna Juwau mwana Zakariya. Juwau afamba cisa consene dhuzi na nyandza ya Djorodani, mbakhamwaza mphangwa izi: “Tambirani batixmu, ninga cidzindikiro ca kuchunyuka toera kulekererwa madawi.” Ipi pyacitika ninga mudapilembera mporofeta Izaya m'bukhu mwace mbalonga tenepa: “Fala iri kukhuwa n'thando kuti: ‘Sasanyirani njira ya Mbuya mbamundendemeza mipsalu yace. Magowa onsene anatutirwa. Mapiri na nthunda zonsene zinazerezwa. Miseu ya magurayi inalungamiswa, njira za makolong'ondo zinazerezwa. Anthu onsene anati aone kupulumusa kwa Mulungu.’ ” Juwau akhapanga mwinji wa anthu ukhabwera katambira Batixmu kuna iye, mbalonga tenepa: “Dzindza ya m'bobo! Mbani akupangani kuthawa nyatwa zinafuna kudza? Citani pinthu pinapangisa kuti imwe mwachunyukadi. Lekani kunyerezera mbamulonga mwekha ene m'bodzi na m'bodzi tenepa: ‘Tina baba wathu Abharaamu.’ Thangwi ine ndisakupangani kuti Mulungu ana mphambvu za kusanduza myala iyi, mbikhalambo dzindza ya Abharaamu. Mbadzo yamala kusasanyirwa toera kugwanda miti na michici ene. Na tenepo, miti yonsene inakhonda kubala misapu yadidi, inatemiwa mbiponyiwa pa moto.” Penepo mbumba ikhabvundzisa Juwau Bhatixta mbilonga kuti: “Mphapo tisatongwa ticitenji?” Apo Juwau aatawira tenepa: “Ana nguwo ziwiri, mbapasembo ibodzi ndzace adaisowa. Pontho ule ana cakudya mbagawirane na ule adasowa cakudya.” Penepo, anango anyakukumbusa misonkho afikambo kuna Juwau toera kutambira batixmu, mbam'bvundza kuti: “Mpfundzisi, ndi ninji pinatongwa ife kucita?” Juwau aatawira tenepa: “Kumbusani ntengo unalonga mwambo basi.” Na tenepo, anyankhondo anango akhabvundzisambo kuti: “Kodi ife, tisatongwa ticitenji?” Penepo Juwau aatawira kuti: “Lekani kukwatira munthu kobiri yace na mphambvu, peno kumulongera pya uthambi. Mbwenye komerwani na ntengo wanu unatambira imwe.” Na tenepo, mbumba yatoma kukhala na cidikhiro cikulu, mbikhanyerezera kuti panango Juwau Bhatixta ndiye Kirixtu. Penepo Juwau apanga anthu onsene kuti: “Ine ndisakutambirisani batixmu na madzi, mbwenye ali kubwera munthu wa mphambvu ya utongi kakamwe kupita ine. Pontho ine sine munthu kuti ndinakwanisa kunsudzula mithambo ya ntsapato zace. Unowu anakutambirisani batixmu na Nzimu Wakucena, pontho na moto. Iye ana foxolo m'manja mwace toera kucenesa pa mbuwa, na kuikha mapira n'cikwa. Mbwenye anapisa dzungu na moto wakukhonda kuthima.” Juwau akhalanga mbumba na mafala anango mazinji, na kuapanga Mphangwa Zadidi. Mbwenye iye asandika Herodhi na thangwi ya Herodhiya, nkazi wa m'bale wace Herodhi, pontho na thangwi ya pyonsene pyakuipa pikhacita iye. Pontho Herodhi adza kathimiza kucita pyakuipa pikulu kakamwe, pa kupitisa Juwau n'kaidi. Pidamala mbumba yonsene kutambira batixmu, Yezu aendambo katambira batixmu. Apo penepo, Yezu pikhaphembera iye, thambo yafunguka. Na tenepo, Nzimu Wakucena waoneka mbuchita buluka kudzulu na manungo ninga a nkhangaiwa, mbum'phamira. Penepo, kudzulu kwabuluka fala, mbilonga tenepa: “Iwe ndiwe Mwana wanga wakufunika, ananditsandzaisa.” Yezu pidatoma Iye kuphata basa, akhathamangira pyaka makumatatu pyakubalwa. Iye akhali mwana wa Zuze, ninga mukhanyerezera anthu. Zuze akhali mwana wa Eli, Eli akhali mwana wa Matati, Matati mwana wa Levi, Levi mwana wa Meliki, Meliki mwana wa Djanai, Djanai mwana wa Zuze, Zuze akhali mwana wa Matatiya, Matatiya mwana wa Amosi, Amosi mwana wa Naumi, Naumi mwana wa Esili, Esili mwana wa Nagai, Nagai akhali mwana wa Maate, Maate mwana wa Matatiya, Matatiya mwana wa Simeyi, Simeyi mwana wa Djozeki, Djozeki mwana wa Djoda, Djoda akhali mwana wa Juwanani, Juwanani mwana wa Resa, Resa mwana wa Zorobhabheli, Zorobhabheli mwana wa Salatiyeli, Salatiyeli mwana wa Neri, Neri akhali mwana wa Meliki, Meliki mwana wa Adhi, Adhi mwana wa Koza, Koza mwana wa Elimadha, Elimadha mwana wa Eri, Eri akhali mwana wa Djosuwa, Djosuwa mwana wa Eliyezeri, Eliyezeri mwana wa Djorimi, Djorimi mwana wa Matati, Matati mwana wa Levi, Levi akhali mwana wa Simiyau, Simiyau mwana wa Djudaa, Djudaa mwana wa Zuze, Zuze mwana wa Djonami, Djonami mwana wa Eliakimu, Eliakimu akhali mwana wa Meleya, Meleya mwana wa Mena, Mena mwana wa Matata, Matata mwana wa Natani, Natani mwana wa Dhavidhi, Dhavidhi akhali mwana wa Djesi, Djesi mwana wa Obhedhi, Obhedhi mwana wa Bhowazi, Bhowazi mwana wa Solomoni, Solomoni mwana wa Naasomi, Naasomi akhali mwana wa Abhinadhabhi, Abhinadhabhi mwana wa Adhimimi, Adhimimi mwana wa Arini, Arini mwana wa Eziromu, Eziromu mwana wa Peresi, Peresi mwana wa Djudaa, Djudaa akhali mwana wa Djakobo, Djakobo mwana wa Izaki, Izaki mwana wa Abharaamu, Abharaamu mwana wa Tera, Tera mwana wa Naori, Naori akhali mwana wa Seruge, Seruge mwana wa Ragauu, Ragauu mwana wa Faleki, Faleki mwana wa Ebheri, Ebheri mwana wa Sala, Sala akhali mwana wa Kainaa, Kainaa mwana wa Arifaxadhi, Arifaxadhi mwana wa Semi, Semi mwana wa Nowa, Nowa mwana wa Lameki, Lameki akhali mwana wa Metusalemi, Metusalemi mwana wa Enoki, Enoki mwana wa Djaredi, Djaredi mwana wa Maalaleeli, Maalaleeli mwana wa Kainaa, Kainaa akhali mwana wa Enosi, Enosi mwana wa Seti, Seti mwana wa Adhamu, Adhamu mwana wa Mulungu. Yezu abuluka mu nyandza ya Djorodani wakudzala na Nzimu Wakucena, mbakwatiwa kwenda n'thando na Nzimu ubodzi-bodzi wa Mulungu. Mwenemu n'thando, Yezu anyengererwa na Dyabu ntsiku makumanai. Pa ntsiku zenezi, nkhabe cinthu cidadya Iye. Na tenepo, pakumala ntsiku zenezo Iye abva njala. Penepo Sathani ampanga kuti: “Ngakhala Iwe ndiwe Mwana wa Mulungu, panga mwala uyu kuti usanduke ubwere nkate.” Mbwenye Yezu antawira tenepa: “Pyalembwa m'Bukhu ya Mulungu kuti: ‘Si cakudya basi tayu cinapulumusa munthu.’ ” Penepo Dyabu akwata Yezu mbaenda na iye pa mbuto yakulapha, mbampangisa n'dzidzi ubodzi ene, umambo onsene wa pantsi pano, mbampanga kuti: “Ine ndinakupasa mphambvu ya utongi na mbiri yonsene iyi. Thangwi pyonsene ipi ndapasiwa, pontho ndinakwanisa kupasa anafuna ine. Na tenepo, ungandigodamira mbundilambira, pyonsene ipi pinakhala pyako.” Yezu antawira tenepa: “Pyalembwa kuti: ‘Lambira Mbuya Mulungu wako, mbuphatira basa Iye ekha basi.’ ” Buluka penepo, Dyabu ankwata mbaenda na iye ku Djerusalema, ankwiza padzulu kakamwe pa Nyumba ya Mulungu mbampanga tenepa: “Ngakhala iwe ndiwe Mwana wa Mulungu, numpha padzulu pano ugwe pantsi. Thangwi pyalembwa kuti: “ ‘Mulungu anadza kapanga anju zace, pa thangwi yako toera akukoye. Pontho, iwo anakugampha na manja awo, toera ukhonde kuphekeka na myala.’ ” Yezu antawira tenepa: “Pyalongwa kuti: ‘Leka kunyengerera Mbuya Mulungu wako.’ ” Pakumala manyengerero onsene awa, Sathani ansiya Yezu mbadikhira n'dzidzi unango. Na tenepo, Yezu abwerera ku Galileya wakudzala na mphambvu za Nzimu Wakucena, mbiri yace mbibvekera n'cisa ceneco consene. Iye akhapfundzisa n'kati mwa nyumba za kuphemberera za madjuda, anthu onsene mbakhansimba. Yezu aenda ku Nazareti kudakula Iye. Ntsiku ya Sabudu, Iye apita n'nyumba ya kuphemberera ya madjuda ninga nsambo wace. Penepo, Iye alamuka toera kuona pidalembwa m'Bukhu ya Mulungu. Na tenepo, Yezu apasiwa bukhu ya mporofeta Izaya. Aifungula, mbagumana mbuto ikhadalembwa tenepa: “Nzimu wa Mbuya uli na Ine, thangwi iye andidzodza toera ndilonge Mphangwa Zadidi kuna anyakucherenga. Iye andituma toera ndikhadziwise adamangwa kuti asudzulwa, pontho kuti maboli-boli akwanise kuona, na kuombola anyakupondererwa. Pontho na kudziwisa caka ca ntsisi za Mbuya.” Na tenepo, afunga Bukhu mbaibweza pontho kuna nyabasa wa mwenemu, mbakhala pyace pantsi. Onsene akhali mu nyumba ya kuphemberera atoma kumulang'anisa. Penepo, Yezu atoma kuapanga kuti: “Lero pyasimbiswa ipi pidamala imwe kubva m'Bukhu ya Mulungu.” Onsene atoma kunsimba Yezu mbakhadzumatirwa na mafala a kukoma ntima kwa Mulungu akhabuluka pa mulomo pace, mbakhabvundza kuti: “Kodi siye unowu tayu mwana wa Zuze?” Na tenepo, Yezu aapanga kuti: “Ndimo mwene, imwe munati mundilongere nsanje unalonga kuti: ‘Iwe nkondzi, kondzeka wekha. Citambo muno n'dziko mwako, pire pidabva ife kuti wapicita mu Kafaranaumi.’ ” Yezu athimiza pontho mbalonga kuti: “Ndimo mwene ndisakupangani kuti: Nkhabe mporofeta m'bodzi anatambirwa mwadidi ku dziko kwace. Ndimo mwene, ndinakudziwisani kuti: Pa midzidzi ya Eliya, akhalipo akazi azinji adaferwa na amuna awo mu dziko ya Izarayeli, caka cidaoneka cilala cidamala pyaka pitatu na hafu, mbakuoneka njala ikulu n'dziko yonsene. Apo nkhabe nkazi m'bodzi adaferwa na mamuna wace wa ku Izarayeli, adatumirwa Eliya. Mbwenye iye atumiwa kwenda ku dziko inango kuna nkazi m'bodzi basi adaferwa na mamuna wace, wa ku Sarapeta, ku cisa ca Sidhoni. Pontho akhalipombo anyamatanya azinji ku Izarayeli pa midzidzi ya mporofeta Elizeu, mbwenye nkhabe m'bodzi wawo adawangiswa. Adadza kawangiswa ndi Namani basi wa ku dziko ya Sirya.” Anthu onsene akhali n'nyumba ya kuphemberera, aipirwa pikulu na kubva penepyo. Na tenepo, anthu onsene alamuka mban'thamangisa mu nzinda, mbankwata mpaka padzulu pa phiri pakhadamangwa nzinda unowu, toera am'bhomere pantsi. Mbwenye Yezu apita na pakati pawo mbaenda pyace. Na tenepo, Yezu aenda ku Kafaranaumi ku nzinda wa Galileya, mbatoma kupfundzisa mbumba ntsiku ya Sabudu. Anthu onsene akhadzumatirwa na mapfundzisiro ace, thangwi akhalonga na mphambvu za utongi. N'nyumba ya kuphemberera, mukhali na mamuna m'bodzi akhadaphatwa na dimonyo, nzimu wa kuipa, mbakhuwa na mphambvu kuti: “Ha! Yezu wa ku Nazareti, musafunanji na ife? Mwabwera kudza katifudza? Ine ndisakudziwani kuti ndimwe ani. Ndimwe Wakucena wa Mulungu!” Penepo Yezu aupwekera nzimu wa kuipa, mbaupanga kuti: “Matama, pontho buluka muna munthu uyu!” Na tenepo, nzimu wa kuipa wam'bhoma munthu pantsi, pamaso pa anthu onsene, mbubuluka m'manungo mwace, munthu mbakhonda kuphekeka. Onsene anthu adzumatirwa napyo mbakhalonga okha-okha tenepa: “Mafala anji enewa anatonga na Iye mizimu ya kuipa na mphambvu na utongi, iyo mbibulukadi?” Na tenepo, mbiri yace Yezu ikhabvekera m'pisa pyonsene pya dhuzi. Yezu abuluka ku nyumba ya kuphemberera, mbaenda ku nyumba ya Simau. Mebzala wace Simau akhadaferuka pikulu pyene. Iwo aphemba kuna Yezu kuti am'phedze. Yezu alimira n'khundu mwa ntenda, akotama mbapwekera nthenda, iyo mbinsiya. Pa n'dzidzi ubodzi-bodzi ntenda alamuka, mbatoma kuaphatira basa. Mukhadoka dzuwa, mbumba ikhadzesa onsene akhakhala na nthenda zawo za kusiyana-siyana, kuna Yezu. Penepo Iye akhaawangisa na kuaikha manja m'bodzi na m'bodzi. Pontho, anthu azinji akhabuluka mizimu ya kuipa mbikhakhuwa tenepa: “Iwe ndiwe Mwana wa Mulungu!” Mbwenye Yezu akhaipwekera mbakhaikhondesa kulonga, thangwi iyo ikhadziwa kuti Iye ndi Kirixtu. Pidaca kunja, Yezu abuluka mbaenda kutali na anthu, pace ekha. Apo mbumba yatoma kunsaka. Mudafika iwo pakhakhala Iye, ankakamiza kuti akhonde kuasiya. Mbwenye Yezu aapanga tenepa: “Pisafunika kuti ine ndiyendembo kamwaza Mphangwa Zadidi za Umambo wa Mulungu m'mizinda inango. Thangwi ndipyo pidatumirwa Ine.” Na tenepo, Yezu akhaenda basi mbalonga Mphangwa Zadidi m'manyumba a kuphemberera a dziko ya Djudeya. Ntsiku ibodzi Yezu akhali dhuzi na pa gombe ya bara ikulu ya Djenezareti. Penepo mbumba ikhapfinyana toera kubva fala ya Mulungu. Yezu aona mabote mawiri m'madzi, dhuzi na gombe, akhadasiyiwa na anyakokota. Anacinthu akhadabuluka kwenda katsuka makokota awo. Na tenepo, Yezu apakira m'bote ibodzi ikhali ya Simau, mbaphemba Simau kuti abhome pang'ono bote yace pa nyandza. Mwenemu, Yezu akhala nawa na matako mbatoma kupfundzisa mbumba. Pidamala Yezu kupfundzisa, apanga Simau kuti: “Kwata bote yako uyende pakati pa boo. Penepo, iwe na andzako gwisirani makokota anu.” Apo Simau atawira tenepa: “Mpfundzisi, ife taphata basa masiku onsene, nkhabe nyama ibodzi idaphata ife. Mbwenye thangwi ndimwe adandipanga, ndinaagwisira.” Pidagwisira iwo makokota awo m'madzi, aphata nyama zizinji, za kuti makokota akhatoma kupanduka. Na tenepo, iwo acita cidzindikiro ca kucemera andzawo akhali m'bote inango, toera adze kaaphedze. Iwo andzawo abwera mbadzaza mabote mawiri ene na nyama, mpaka kufikira dhuzi na kufuna kulobzeka. Simau Pedhru na kuona pyonsene ipi pidacitika, agodama pa myendo pa Yezu mbalonga tenepa: “Mbuya, bulukani pana ine thangwi ndine munthu wakudawa.” Thangwi Simau na anango akhali na iye pabodzi, akhadzumatirwa na ntengo wa nyama zikhadapha iwo. Tiyago na Juwau, ana a Zebhedheu, ale akhali andzace Simau, adzumatirwambo. Na tenepo, Yezu ampanga Simau kuti: “Leka kugopa! Kutomera lero mpaka kutsogolo, iwe unati ukhale nyakokota wa anthu.” Penepo, amuna awa akwewa mabote awo mbaatsamisa pa gombe, mbasiya pyonsene mbatowera Yezu. Yezu pikhakhala Iye mu nzinda ubodzi, agwanda mamuna m'bodzi wakudzala na matanya m'manungo monsene. Nyamatanya pidaona iye Yezu, agodama patsogolo pace mbafikisa nkhope yace pantsi, mbam'phemba tenepa: “Mbuya, mungafuna munandiwangisa.” Yezu afuthula nkono wace, an'khuya mbalonga tenepa: “Ndisafuna, iwe waceneswa.” Pa n'dzidzi ubodzi-bodzi, matanya amala. Na tenepo, Yezu ampanga kuti: “Bvesera! Leka kupanga munthu penepi. Mbwenye ndoko kuna nyantsembe toera akudinkhe. Ungamala upereke ntsembe ninga mudapilongera Mozesi, toera anthu akudziwe kuti iwe wawangadi.” Mbwenye mbiri yace Yezu ikhamwazikiratu m'mbuto zonsene. Na tenepo, anthu azinji akhabwera kamubva na kuwangiswa nthenda zawo. Mphapo Yezu akhabuluka mbaenda n'thando kwenda kaphembera. Ntsiku ibodzi, mukhapfundzisa Yezu, akhalipo penepo afarisi na anyakudziwisa a Mwambo akhabuluka m'pisa pyonsene pya ku Galileya, pya ku Djudeya na pya ku Djerusalema, mbakhakhala pantsi. Apo mphambvu za Mbuya zikhakhala na Yezu toera kuwangisa nthenda. Amuna angasi abwera na mamuna m'bodzi nyampfutete pa khangala, mbakhasaka kuti apite na iye n'nyumba toera amuikhe patsogolo pa Yezu. Mbwenye iwo acimwana kupita na iye n'kati, na thangwi ya mwinji wa anthu. Na tenepo, akwira na iye pa ntsoyi, mbanchitisa na pa benga na khangala yace ene, mpaka pakati pa mwinji wa anthu, patsogolo pa Yezu. Yezu na kuona cikhulupiro cikhali na anthu awa, alonga kuna nyampfutete kuti: “Mamunawe, madawi ako alekererwa.” Apo anyakudziwisa a Mwambo na afarisi atoma kudungunya mbalonga tenepa: “Kodi mbanimbo mamuna unowu anaxola Mulungu tenepa? Thangwi analekerera madawi ndi Mulungu basi, nkhabe munthu unango.” Mphapo Yezu na kudziwa pire pikhanyerezera iwo aatawira, mbaapanga tenepa: “Thangwi yanji imwe musanyerezera penepyo m'mitima mwanu? Ndi ninji pinakhonda kunentsa? Kulonga kuna ntenda kuti: ‘Madawi ako alekererwa’ peno kumpanga kuti: ‘Lamuka ufambe?’ Mbwenye toera mudziwe kuti Ine, Mwana wa Munthu, ndina mphambvu za kulekerera madawi, ampanga nyampfutete kuti: ‘Lamuka, kwata khangala yako, ndoko ku nyumba kwako.’ ” Pa n'dzidzi ubodzi-bodzi, iye alamuka pamaso pa anthu onsene, mbakwata khangala yace, mbaenda ku nyumba mbakhapasa mbiri Mulungu. Onsene adzumatirwa napyo. Na kugopa konsene, apasa mbiri Mulungu mbalonga tenepa: “Lero taona pinthu pyakudzumisa!” Buluka penepo, Yezu abuluka mbaona mamuna m'bodzi nyakukumbusa misonkho, akhacemerwa Levi. Iye akhakhala nawa pa mbuto ikhakumbuswa misonkho, mbampanga kuti: “Nditowere.” Iye alamuka mbasiya pyonsene, mbantowera. Na tenepo, Levi, acitira Yezu phwandu ikulu kakamwe ku nyumba kwace. Penepo akhalipombo anyakukumbusa misonkho, na anthu anango azinji, mbakhadya na iwo. Mbwenye afarisi na ale anyakudziwisa a Mwambo a nsoka wawo, akhadungunya kuna anyakupfundza a Yezu, mbalonga tenepa: “Thangwi yanji imwe musadya mbamumwa pabodzi na anyakukumbusa misonkho, pontho na anyakudawa?” Yezu aatawira tenepa: “Angumi nkhabe kufuna nkondzi, mbwenye atenda ndiwo anafuna nkondzi. Ine sidadza kacemera anyakulungama tayu, mbwenye ndadzera anyakudawa toera achunyuke.” Na tenepo, iwo ampanga Yezu kuti: “Kazinji kene anyakupfundza a Juwau Bhatixta asaphembera na kupimana cakudya. Sawa-sawambo na anyakupfundza a afarisi. Mbwenye anu nkhabe. Asadya mbamwa pyawo.” Mbwenye Yezu aapanga tenepa: “Pisacitika kuti adacemerwa ku phwandu ya banja, apimane cakudya mwali wa mamuna mbali na iwo pabodzi? Mbwenye zinafika ntsiku zinafuna kukwatirwa iwo mwali wa mamuna pakati pawo. Ntsiku zenezo iwo anati apimane cakudya!” Yezu alonga pontho nsanje na mafala awa: “Nkhabe munthu anagwanda phindi ibodzi ya nguwo ipsa toera aikhe cigamba pa nguwo ya kale. Angacita penepyo anaibvunga nguwo ipsa. Pontho phindi ya cigamba cipsa, nkhabe kukhala mwadidi pa nguwo ya kale. Pontho nkhabe munthu anaikha vinyu ipsa m'pyombo pya nthembe zakale. Thangwi angacita penepyo, vinyu ipsa inaswa pyombo mbitaika, pontho pyombo mbapibvungika. Na tenepo, pisafunika kuti vinyu ipsa, iyikhwe m'pyombo pya nthembe zipsa. Pontho nkhabe munthu anamala kumwa vinyu ya kale mbakomerwa na vinyu ipsa, thangwi asalonga tenepa: ‘Vinyu ya kale ndiyo yadidi kakamwe.’ ” Ntsiku ibodzi ya Sabudu, mukhapita Yezu na pakati pa munda wa tirigu, anyakupfundza ace atoma kupuruza tirigu, mbakhaiting'inda na manja awo, mbakhadya. Na tenepo, afarisi anango abvundzisa mbalonga kuti: “Thangwi yanji imwe musacita pire pinakhondeswa kucita ntsiku ya Sabudu?” Yezu aatawira tenepa: “Kodi imwe cipo mudzati kuona pidalembwa na thangwi ya pidacita Dhavidhi na andzace, mudabva iwo njala? Iye apita N'nyumba ya Mulungu, akwata mikate ya ntsembe, mbadya pontho mbapasambo andzace. Mbwenye anatawirirwa kudya mikate eneyo mbanyantsembe basi.” Na tenepo, Yezu aapanga kuti: “Ine, Mwana wa Munthu, ndine Mbuya wa Sabudu.” Nsabudu inango, Yezu apita n'nyumba ya kuphemberera mbatoma kupfundzisa. Mwenemu mukhali na mamuna m'bodzi akhadalamala djanja ya nkono wa madyo. Afarisi na anyakudziwisa a Mwambo, akhasaka thangwi ya kusumira nayo Yezu. Na tenepo, akhamulang'anisa, toera amuone ngakhala Iye anamuwangisa ntsiku ya Sabudu. Mbwenye Yezu akhadziwa manyerezero awo. Na tenepo, ampanga mamuna nyakulamala manja kuti: “Lamuka, bwera pano pakati.” Iye alamuka mbakhala dzololo. Penepo Yezu aapanga kuti: “Ine ndisafuna ndikubvundzeni ici: Ndi ninji pinatawirirwa kucita ntsiku ya Sabudu? Kucita udidi, peno kucita uipi? Kupulumusa munthu peno kunsiya mbafa?” Na tenepo, Yezu alang'ana onsene akhali n'khundu mwace, mbampanga mamuna kuti: “Fungula djanja yako.” Iye afungula djanja yace, iyo mbiwanga. Mbwenye anthu aipirwa pikulu kakamwe, mbatoma kuketesana okha-okha na kusaka kuti ndi ninji pinafuna iwo kuncita Yezu. Pa ntsiku zenezo, Yezu akwira pa phiri kwenda kaphembera. Penepo, akhala masiku onsene mbakhaphembera Mulungu. Pidaca kunja, Yezu acemera anyakupfundza ace, mbasankhula khumi na awiri pakati pawo. Enewa, Yezu aathula apoxtolo. Iwo madzina awo mbawa: Simau, adapasa Iye dzina ya Pedhru, na Andereya m'bale wace Pedhru, Tiyago na Juwau, Filipi na Bhatolomeu, Mateu na Tomasi, Tiyago mwana wa Alufeu, Simau nyakukakamira mwambo wa Mulungu, Djuda mwana wa Tiyago, pontho na Djuda Xikariyoti, ule adadza kasandukira Yezu. Yezu achita pa phiri pabodzi pene na iwo, mbalimira pa mbuto ya kusoweka makata. Penepo akhalipo anyakupfundza ace azinji, na mwinji wa anthu ukhabuluka mu Djudeya monsene, mu Djerusalema na anthu akhali dhuzi na gombe ya Tiru na Sidhoni. Iwo akhadabwera kuna Yezu toera kudza kamubva na kukondziwa nthenda zawo. Ale akhanentseka na mizimu ya kuipa akhawangiswambo. Anthu onsene akhasaka kun'khuya, thangwi mphambvu zikhabuluka muna Yezu zikhawangisa onsene. Yezu alang'ana anyakupfundza ace mbaapanga kuti: “Anyakutsandzaya ndimwe anyakucherenga, thangwi Umambo wa Mulungu ndi wanu. Anyakutsandzaya ndimwe muna njala cincino, thangwi munati mukhute. Anyakutsandzaya ndimwe muna lira cincino, thangwi munati museke. Anyakutsandzaya ndimwe, iwo angakuidani, angakuthamangisani, angakutikanani, mbakhonda dzina yanu kuti ndimwe anthu a kuipa, na thangwi ya Ine, Mwana wa Munthu. “Tsandzayani mbamukomerwa pikulu kakamwe ntsiku eneyi, thangwi kudzulu mwakoyerwa muwoni wanu ukulu kakamwe. Thangwi a mbuya awo anthu enewa acitambo pibodzi-bodzi kuna maporofeta. “Mbwenye muna nyatwa imwe apfumi, thangwi mwamala matamizwa kale. Muna nyatwa imwe mudakhuta cincino, thangwi munati mukhale na njala. Muna nyatwa imwe munaseka cincino, thangwi munati mubulire mbumulira. Muna nyatwa imwe, mungasimbwa na anthu onsene, thangwi a mbuya awo asimbambo maporofeta a uthambi.” “Mbwenye Ine ndisakupangani imwe munandibva kuti: Funani anyamalwa anu, citirani udidi kuna ale anakuzondani. Acitireni udidi ale anakupasani dzedze, phembererani ale anakucitani kuipa. Munthu anakumenya phutu ibodzi, mpasembo phutu inango. Munthu anakukwatira kapoti wako, nsiye akukwatirembo na kamiza ene ya m'bwalo. Onsene anakuphemba cinthu apase. Pontho munthu anakukwatira cako leka kum'phemba kuti akubwezere. Citirani andzanu pyonsene pire pinafuna imwe kuti iwo akucitirenimbo. “Ngakhala imwe musafuna ale anakufunani basi, ndi muwoni wanji unadikhira imwe kutambira kuna Mulungu? Thangwi anyakudawa asafunambo ale anaafuna. Pontho ngakhala imwe musacita udidi kuna ale basi anakucitani udidi, ndi muwoni wanji unadikhira imwe kutambira kuna Mulungu? Thangwi anthu anyakudawa asacitambo pibodzi-bodzi. Pontho, ngakhala imwe musabwerekesa ale basi anadikhira imwe kuti iwo anadza kakubwerezerani, ndi muwoni wanji unadikhira imwe kutambira kuna Mulungu? Thangwi anyakudawa asabwerekesanambo, mbadikhira kuti abwezerwe pyonsene. Mphapo funani anyamalwa anu, acitireni udidi, muabwerekese mbamukhonda kudikhira kubwezerwa cinthu. Na tenepo, muwoni wanu unadza kakhala ukulu, pontho imwe munadza kakhala ana a Mulungu wa kudzulu kakamwe, thangwi Iye ndi wadidi kuna ale anakhonda kucita takhuta na anyakuipa mitima. Khalani anthu a ntsisi ninga Baba wanu ndi wa ntsisi. “Lekani kutonga andzanu, tenepa imwe nkhabe kudza katongwa na Mulungu. Lekani kukonesa andzanu, na tenepo imwe nkhabe kudza kakoneswa na Mulungu. Lekererani andzanu, tenepa imwe munadza kalekererwambo na Mulungu. Pasani andzanu, tenepa Mulungu anadza kakupasanimbo na n'dida wadidi, wakukhomerwa mbautsindirwa, pontho wa kudzala na mubvu. Thangwi na n'dida ubodzi-bodzi unapimira imwe andzanu, munadza kapimirwambo na n'dida unowu.” Pontho Yezu alonga nsanje uyu: “Kodi pisacitika boli-boli kuphatana nsenzi boli-boli ndzace? Mu uwiri mwawo nkhabe kudza kagwa n'djenje? Nkhabe nyakupfundza anapita mpfundzisi wace. Mbwenye iye nyakupfundza, angamala kupfundzambo pyonsene mwadidi, anakhala sawa-sawa na mpfundzisi wace. “Thangwi yanji usalang'ana cirombo cing'ono ciri n'diso mwa m'bale wako, mbukhonda kuona nkhuni iri n'diso mwako? Unakwanisa tani kupanga m'bale wako kuti: ‘M'bale, ndisiye ndikubuluse cirombo ciri n'diso mwako,’ ngakhala iwe nkhabe kwanisa kuona nkhuni iri n'diso mwako? Nyauthambi! Pakutoma bulusa nkhuni iri n'diso mwako, na tenepo iwe unaona mwadidi toera ubulusembo cirombo ciri n'diso mwa m'bale wako.” “Nkhabe muti wadidi unabala misapu ya kuipa, peno muti wa kuipa, unabala misapu yadidi. Thangwi miti yonsene isadziwika na misapu yawo. Nkhabe munthu anachoda malembe pa miti ya minga, peno mauva pa psepse. Munthu wadidi, asabulusa pinthu pyadidi pidakoya iye muntima mwace. Munthu wa kuipa, asabulusa pinthu pyakuipa pidakoya iye muntima mwace. Thangwi mulomo wace usalonga pire pidadzala muntima mwace. “Thangwi yanji imwe musandicemera ‘Mbuya, Mbuya’ mbamukhonda kucita pinalonga Ine? Ine ndinakupangisani mbani adalandana na ule anabwera kuna Ine, mbabva mafala anga na kuacita. Iye alandana na mamuna m'bodzi adamanga nyumba yace pa mwala. Akumba madjenje akuzika, mbaikha nchici. Madzi adzala mbamenya nyumba, mbwenye iyo hidatekenyeka tayu, thangwi ikhadamangwa mwadidi. Mbwenye ule anabva mafala anga mbakhonda kuacita, alandana na mamuna adamanga nyumba yace pa mataka mbakhonda kuikumbira mwadidi na kuiyikha nchici. Na tenepo, madzi pidamenya iwo nyumba ire, iyo yagwa, mbifudzikiratu yonsene.” Yezu pidamala iye kulonga penepyo kuna mbumba, apita mu nzinda wa Kafaranaumi. Mu nzinda unowu mukhali na nkulu m'bodzi wa anyankhondo a mu dziko ya Roma, akhali na nyabasa wace akhafuna iye kakamwe. Nyabasa unowu akhaduwala pikulu kakamwe, dhuzi na kufuna kufa. Iye nkulu wa anyankhondo pidabva iye na thangwi ya Yezu, atuma mathubu a madjuda toera aende kaphemba Yezu, kuti aende na iye kawangisa nyabasa wace. Atsogoleri a madjuda pidafika iwo kuna Yezu am'phemba na kudembetera mbankakamiza kuti: “Ndimo mwene, mamuna uyu asafunika mum'phedze, thangwi asafuna dziko yathu, pontho atimangira nyumba yathu ya kuphemberera.” Na tenepo, Yezu aenda na iwo. Mbwenye pidafika iye dhuzi na nyumba, nkulu wa anyankhondo atuma axamwali ace angasi kuna Yezu na mphangwa izi: “Mbuya, lekani kunentseka. Thangwi ine sine munthu kuti ndikutambireni n'nyumba mwanga. Pontho sine munthu kuti ine ndionane na imwe nkhope na nkhope. Mbwenye longani fala ibodzi basi, nyabasa wanga anawanga. Thangwi ine ndiri nawombo atsogoleri anga anabvera ine. Inembo ndisabverwa na anyankhondo anga. Na tenepo, ndisapanga nyankhondo wanga m'bodzi kuti: Ndoko kule, iye asaenda. Unangombo mbandimpanga kuti: Bwera kuno, iye asabwera. Pontho ndisapanga nyabasa wanga kuti: Cita ici, iye asacita.” Yezu na kubva penepyo, adzumatirwa napyo. Penepo azungunuka kuna mbumba ikhantowera mbaipanga kuti: “Ine ndisakupangani kuti cipo ndidzati kugumana cikhulupiro ninga ici muno mu Izarayeli.” Na tenepo, amuna akhadatumwa abwerera kwenda ku nyumba, mbagumana nyabasa awanga. Pakupita n'dzidzi pang'ono, Yezu aenda ku nzinda ubodzi unacemerwa Naimi, pabodzi na anyakupfundza ace na mbumba ikulu ya anthu. Mukhapita Yezu dhuzi na nsuwo ukulu wa nzinda, mwinji wa anthu ukhabulukambo na ntembo wa mwana-mamuna kwenda na iye ku masiye. Mwana unowu akhali m'bodzi basi wa nkazi adaferwa na mamuna wace. Mbuya pidaona iye manferwa, am'bvera ntsisi ikulu kakamwe, mbampanga kuti: “Leka kulira.” Penepo, Yezu aifendedzera dhuzi baulu mbaikhuya, anthu akhatembeta baulu mbalimira. Na tenepo, Yezu alonga kuna nyakufa kuti: “Iwe m'phale, lamuka!” Penepo m'phale akhala pantsi mbatoma kulonga, Yezu mbampasa mai wace. Anthu onsene agopserwa pikulu kakamwe, mbakhakuza Mulungu mbalonga kuti: “Lang'anani mporofeta wankulu adalamuka pakati pathu! Mulungu abwera kabvunulira mbumba yace.” Mbiri eneyi ya Yezu, yamwazika mu Djudeya monsene, na m'pisa pyonsene pya dhuzi. Anyakupfundza a Juwau Bhatixta ampanga pyonsene ipi. Na tenepo, Juwau Bhatixta acemera anyakupfundza awiri, mbaatuma kwenda kuna Yezu kambvundzisa kuti: “Ndimwe akhalongwa kuti anabwera, peno tinadikhira unango?” Penepo iwo aenda mpaka kuna Yezu, mbampanga kuti: “Juwau Bhatixta atituma toera kukubvundzani kuti: ‘Ndimwe akhalongwa kuti anabwera, peno tinadikhira unango?’ ” Pa n'dzidzi unoule Yezu awangisa anthu azinji akhanentseka na pyakuipa, na nthenda zikulu, na mizimu ya kuipa, pontho akhawangisa maboli-boli azinji. Na tenepo, Yezu aatawira mbaapanga kuti: “Ndokoni mukhalonge kuna Juwau, pire pidaona imwe na pidabva imwe. Maboli-boli ali kuona, anyakulamala ali kufamba, anyamatanya ali kuwangiswa, anakhonda kubva ali kubva, anyakufa ali kulamuswa, pontho Mphangwa Zadidi ziri kulongwa kuna anyakucherenga. Mbatsandzaye ule analeka pita n'kudawa na thangwi yanga.” Pidamala iwo kwenda anyakupfundza a Juwau, Yezu atoma kulonga kuna mbumba pa thangwi ya Juwau kuti: “Ndi ninji cidaenda imwe kaona n'thando? Ndi phesi ya kutekenyeka na mphepo? Mphapo mukhadaenda kaona anji? Mamuna wa kubvalira mwadidi? Dziwani kuti ale anabvalira mwadidi mbakhala na makhaliro adidi, anthu enewa asakhala m'manyumba mwa amambo. Mwaenda kaonanji mphapo? Mporofeta? Ande, Ine ndisakupangani, pontho apiringana mporofeta. Unowu ndiye adalembwa m'Bukhu kuti: “ ‘Ndinatuma ntumwi wanga patsogolo pako, toera akusasanyire njira.’ Pontho Ine ndisakupangani kuti: Pakati pa anthu onsene adabaliwa na nkazi, nkhabe nkulu kupiringana Juwau. Mbwenye ule ng'ono mu Umambo wa Mulungu, unowu ndiye nkulu kupiringana Juwau.” Pontho mbumba yonsene, na ale ene anyakukumbusa misonkho akhadatambira batixmu na Juwau, mudabva iwo mafala a Yezu, adzindikira kuti njira ya Mulungu ndi yakulungama. Mbwenye afarisi na anyakudziwisa a Mwambo apikhonda pire pikhafuna Mulungu kuna iwo, mbakhonda kutambiriswa batixmu na Juwau. Na thangwi eneyo, Yezu athimiza pontho mbalonga kuti: “Ndinaalandanisa na ani anthu a ntsiku zino? Anthu enewa alandana na ani? Iwo alandana na ana ang'ono anakhala nawa-nawa pa mphambano mbakhakhuwa kuna andzawo kuti: “ ‘Ife takuimbirani citoliro, mbwenye imwe mwakhonda kubvina. Takuimbirani nyimbo za paciriro, mbwenye imwe mwakhonda kulira.’ Thangwi Juwau Bhatixta abwera, asapimana cakudya mbakhonda kumwa vinyu. Imwe musalonga kuti: ‘Iye ana dimonyo.’ Ndabwera Ine, Mwana wa Munthu, mbandidya, mbandimwa. Na tenepo, musalonga kuti: ‘Lang'anani mamuna uyu! Ndi nyakudyesa na nyakumwa, pontho ndi xamwali wa anyakukumbusa misonkho na anyakudawa.’ Mbwenye udziwisi wa Mulungu, usasimbiswa na anyakupfundza ace onsene.” Nfarisi m'bodzi acemera Yezu toera aende kadya na iye. Yezu aenda ku nyumba kwa nfarisi, mbakhala pa thando toera adye. Mu nzinda unowu akhalipo nkazi m'bodzi nyakudawa. Apo pidapibva iye kuti Yezu ali kudya ku nyumba kwa nfarisi, aendambo kweneko na ntete wace wa mafuta a kudzola, akununkhira. Penepo nkazi akhala kunduli kwa Yezu, mbakhamulirira pa myendo pace. Iye atoma kuntotesa myendo yace na misozi. Pidamala iye penepo mbaipukuta misozi na tsisi yace, mbatoma kumpsompsona myendo, mbakhaidzoza mafuta. Nfarisi akhadacemera Yezu, na kuona pyonsene ipi, atoma kulonga ekha na muntima mwace kuti: “Mamuna uyu mbadakhaladi mporofeta, mbadan'dziwa nkazi unowu anan'gwedza kuti ndi nyakudawa.” Penepo Yezu ampanga nfarisi kuti: “Simau, ndisafuna kukupanga pinthu.” Apo Simau antawira kuti: “Longani Mpfundzisi.” Yezu alonga tenepa: “Akhalipo amuna awiri akhadakwata mangawa kuna munthu m'bodzi. Mamuna m'bodzi akwata mangawa a ntengo wa madzana maxanu a mbondo. Unango akhadakwata mbondo makumaxanu. Mbwenye pakati pawo nkhabe m'bodzi akhali na kobiri yakukwanira kuti alipe nayo mangawa. Na thangwi eneyo mwanacinthu kobiri aalekerera mangawa onsene, muwiri mwawo mwene. Apo pa awiri awa, mbani anadza kanfuna maka-maka mwanacinthu kobiri?” Penepo Simau antawira kuti: “Ine kuona kwanga, ndisanyerezera kuti ndi ule adalekererwa mangawa makulu.” Apo Yezu antawira kuti: “Ande, wanyerezera mwadidi.” Na tenepo, Yezu azungunuka kuna nkazi, mbapanga Simau kuti: “Usamuona nkazi uyu? Ine ndapita n'nyumba mwako, iwe wacimwana kundipasa madzi kuti nditsuke na iwo myendo yanga. Mbwenye iye anditsuka na misozi yace, pontho mbandipukuta na tsisi yace. Pidafika Ine, iwe wacimwana kundimpsompsona. Mbwenye iye nkhabe kupuma tayu na kundimpsompsona myendo yanga, kutomera n'dzidzi udapita Ine muno. Iwe wacimwana kundidzoza mafuta munsolo mwanga, mbwenye iye andidzodza myendo yanga na mafuta akununkhira. Na tenepo, Ine ndisakupanga kuti kufuna kukulu kudapangisa iye, kusapangisambo kuti kudawa kwace kuzinji kwalekererwa. Mbwenye munthu analekererwa pang'ono mafuniro ace mbakucepambo.” Penepo Yezu ampanga nkazi kuti: “Madawi ako alekererwa.” Apo anthu ale akhadya na iye pabodzi pa thando, atoma kulonga okha-okha kuti: “Mbanimbo unowu analekerera na madawi ene?” Mbwenye Yezu ampanga nkazi kuti: “Kukhulupira kwako kwakupulumusa. Ndoko na ntendere!” Buluka penepo, Yezu akhafamba m'mizinda na m'pisa, kwenda mbalonga Mphangwa Zadidi za Umambo wa Mulungu. Apoxtolo ace khumi na awiri akhaenda na iwo pabodzi. Pa nsoka unowu akhalipombo akazi anango akhadawangiswa nthenda zawo za mizimu ya kuipa na nthenda zinango. Akazi enewa mbawa: Mariya, anacemerwa Madhalena, ule akhadabulusiwa na Yezu mizimu minomwe ya kuipa. Na Juwana, nkazace Kuza, ule akhali nyabasa wa nkulu wa utongi wa mambo Herodhi, Suzana, na akazi anango azinji. Akazi enewa, akhaphedza Yezu na anyakupfundza ace ene, na mpfuma zawo. Anthu azinji a mizinda yakusiyana-siyana akhabwera kuna Yezu. Penepo Yezu atoma kulonga nsanje uyu: “Mamuna m'bodzi abuluka kwenda kawaza mbeu. Mukhawaza iye, mbeu zinango zagwa n'khundu mwa njira. Mwenemu izo zapwandiwa, mbalame za kudzulu mbazidzonkhona. Khundu inango ya mbeu yagwa padzulu pa myala. Na tenepo, pidatoma izo kumera, zauma na thangwi ya kusoweka ntota. Khundu inango ya mbeu yagwa pa minga. Minga yakula, mbeu mbizicimwana kufantsa. Mbwenye mbeu inango yagwa pa mataka adidi. Iyo yakula mbibala misapu dzana pa mbeu ibodzi.” Pakumalisa Yezu alonga na mphambvu kuti: “Ule ana makutu a kubva, mbabve!” Anyakupfundza ace Yezu am'bvundzisa kuti: “Usalongeranji nsanje unowu?” Apo Yezu aatawira tenepa: “Kuli imwe, mwapaswa udziwisi wa kudziwa pyakubisala pya Umambo wa Mulungu, mbwenye anango ndisaapanga na misanje. Penepyo toera “ ‘iwo aone, mbakhonda onesesa. Pontho abve, mbakhonda bvesesa.’ “Nsanje uyu usalongera ipi: Mbeu ndi fala ya Mulungu. Mbeu zidagwa m'mbale mwa njira, ndi anthu anabva fala ya Mulungu, mbwenye asabwera Sathani mbabulusa fala m'mitima mwawo toera akhonde kutawira Mulungu mbacimwana kupulumuswa. Mbeu idagwa padzulu pa myala ndi ale anabva fala ya Mulungu mbaitambira na kukomerwa. Mphapo na thangwi ya kusoweka michici, asakwanisa kutawira pa n'dzidzi ung'ono basi. Mbwenye pa n'dzidzi wa kuleserwa, asasiya pyonsene. Mbeu idagwa pakati pa minga, ndi ale anabva fala ya Mulungu, mbwenye pakumala ntsiku pang'ono, asabwerera na thangwi ya makhaliro a padziko ino, na mpfuma, na udidi wa padziko. Na tenepo, misapu inabala iwo, nkhabe tokota. Mbeu idagwa pa mataka adidi, ndi anthu anabva fala ya Mulungu mbaikoya na ntima wadidi na wakunyindirika. Na tenepo, anthu enewa asabala misapu na kupirira.” “Nkhabe munthu anagasa nyale, angamala mbaigudumira na citomba, peno mbaiyikha pantsi pa talimba. Mbwenye asaiyikha pa mbuto ya kuti anthu anapita akwanise kuona cieza. Thangwi pyonsene pidabiswa pinati pioneke. Pontho pyonsene piri n'cibiso-biso pinati pidziwike na kupangizika pakweca. Na tenepo, lang'anani mbamucita mphole-mphole na mabvero anu a pinthu penepyo. Thangwi ule anapyo, anati apaswe pontho pinango. Mbwenye ule adapisowa, anapokoserwa na pire pyene pinanyerezera iye kuti anapyo.” Mai wace na abale ace Yezu aenda kaonana na iye, mbwenye akhacimwana kunfendedzera dhuzi, na thangwi ya mwinji wa anthu. Na tenepo, munthu m'bodzi aenda kampanga Yezu kuti: “Mai wako na abale ako ali kunja uku, asafuna kuonana na Imwe.” Mbwenye Yezu atawira mbalonga kuti: “Mai wanga na abale anga ndi ale anabva fala ya Mulungu, mbacita pinalonga iyo.” Ntsiku inango Yezu apita m'bote pabodzi na anyakupfundza ace, mbaapanga tenepa: “Tendeni ntunda unango wa nyandza.” Na tenepo, iwo aenda. Pikhawambuka iwo nyandza, Yezu aphatwa na citulo mbagona. Penepo caoneka conzi cikulu n'nyandza, anthu mbakhafuna lobzeka, thangwi bote ikhadzala na madzi. Na tenepo, anyakupfundza ace Yezu anfendedzera dhuzi mbamulamusa, mbampanga kuti: “Mpfundzisi, Mpfundzisi, tiri kufa ife!” Iye alamuka mbapwekera mphepo na conzi kuti pimatame. Pyonsene pyamatama. Penepo Yezu apanga anyakupfundza ace kuti: “Kukhulupira kwanu kuli kupi?” Mbwenye iwo akhadadzumatirwa, mbagopa, mbakhalonga okha-okha kuti: “Mbani unowu anafikira kutonga mphepo na mabimbi ene, pyonsene mbapim'bvera?” Buluka penepo Yezu na anyakupfundza ace awambuka mbafika pa cisa ca Djeraza, cikhalang'anisana na Galileya ku ntunda unango wa nyandza. Yezu mudachita Iye m'bote, abwera kuna Iye mamuna m'bodzi wa mu nzinda unowu, akhadadzala na mizimu ya kuipa. Iye akhala ntsiku zizinji mbali cipezi-pezi, pontho akhakhonda kukhala pa nyumba, mbwenye akhakhala m'masiye. Mamuna unowu pidaona iye Yezu, akhuwa mbagwa patsogolo pace, mbakhuwa tenepa: “Yezu, Mwana wa Mulungu wa kudzulu kakamwe, musafunanji na ine? Ndisaphemba kuti mukhonde kundithabusa!” Iye alonga penepyo, thangwi Yezu akhadaupanga nzimu wa kuipa kuti ubuluke muna mamuna ule. Kazinji kene nzimu wa kuipa ukhamphata mamuna uyu, mpaka kufikira mangiwa myendo na mikono ene na unyolo. Mbwenye mamuna uyu akhauthumula basi unyolo, nzimu wa kuipa mbukhankwata kwenda na iye kutali na anthu. Na tenepo, Yezu am'bvundza kuti: “Kodi iwe dzina yako ndiwe ani?” Iye atawira kuti: “Dzina yanga ndine Lejiyau. ” Thangwi akhali na madimonyo mazinji m'manungo mwace. Apo iyo mizimu ya kuipa ikhaphemba Yezu kuti akhonde kuiyendesa n'djenje yakuzika kakamwe. Penepo ukhalipo nkumbi ukulu wa nkhumba mbukhasodza pa phiri. Madimonyo aphemba kuna Yezu kuti aasiye apite muna nkhumba. Yezu aatawirisa. Madimonyo ale abuluka muna mamuna, mbapita mu nkumbi wa nkhumba. Na tenepo, nkhumba zonsene zanumpha pa nkhomole, mbazilowa n'nyandza. Apo akumbidzi a nkhumba na kuona pidacitika, athawa mbaenda mbamwaza mphangwa zenezi mu nzinda na m'pisa. Na tenepo, mbumba yaenda kaona pikhadacitika. Mudafika iwo dhuzi na Yezu, aona kuti mamuna ule akhadabuluswa mizimu ya kuipa ali nawa n'khundu mwa Yezu, amala bvala nguwo, pontho mbali na ndzeru zace za kubaliwa. Iwo agopserwa napyo. Ale akhadapyona, alonga kuna mbumba kuwangiswa kudacitwa mamuna akhali na mizimu ya kuipa. Na tenepo, mbumba yonsene ya pa cisa ca Djeraza yaphemba kuna Yezu kuti abuluke pa cisa ceneci, thangwi iwo akhagopa pikulu kakamwe. Penepo, Yezu apita m'bote mbabwerera pyace. Mamuna akhadabuluswa mizimu ya kuipa akhaphemba Yezu kuti aende na iye pabodzi. Mbwenye Yezu am'bweza mbampanga kuti: “Bwerera ku nyumba kwako ulonge pire pyonsene pidakucitira Mulungu.” Na tenepo, mamuna abuluka mbaenda mu nzinda onsene kwenda mbalonga pire pyonsene pikhadancitira Yezu. Pakubwerera kwace Yezu, anthu azinji antambira na kukomerwa, thangwi akhan'dikhira. Na tenepo, afika mamuna m'bodzi anacemerwa Djairo. Iye akhali n'tsogoleri wa nyumba ya kuphemberera. Apo iye agwa patsogolo pa Yezu mbam'phemba pikulu kuti aende na iye ku nyumba kwace. Thangwi mwana wace m'bodzi basi wankazi, akhathamangira pyaka khumi na piwiri pya kubaliwa, akhali dhuzi na kufuna kufa. Apo Yezu mukhaenda Iye, akhaenda mbapfinyana na mwinji wa anthu. Penepo akhalipo nkazi m'bodzi akhathabuka na utenda wakubuluka ciropa pa pyaka khumi na piwiri. Iye akhadabvunga pyonsene pikhali na iye kuna anyakukondza, mbwenye nkhabe munthu m'bodzi akhadankwanisa kumuwangisa. Apo nkazi abwera na kunduli kwace, mban'khuya nguwo zace. Penepo pene ciropa casiya kubuluka, iye mbawangiratu. Penepo Yezu abvundzisa kuti: “Mbani adandikhuya?” Onsene akhonda. Apo Pedhru antawira mbalonga kuti: “Mpfundzisi, ndi anthu adadzala anapfinyana na imwe.” Mbwenye Yezu athimiza na kulonga kuti: “Alipo adandikhuya. Thangwi ndisabva mphambvu zanga zabuluka muna Ine.” Na tenepo, nkazi na kuona kuti aoniwa, acimwana kubisa. Abwera na kutetemera, agwa pa myendo pa Yezu, mbalonga pamaso pa anthu onsene, thangwi yanji an'khuya pontho na kuwangiswa kwa nthenda yace pa n'dzidzi ubodzi ene. Penepo Yezu ampanga kuti: “Mwana wanga, kukhulupira kwako kwakuwangisa! Ndoko na ntendere.” Yezu mbadzati kumala kulonga, afika munthu m'bodzi wa ku nyumba ya Djairo, n'tsogoleri wa nyumba ya kuphemberera, mbalonga kuti: “Mwana wanu wankazi afa. Lekani kunsanyabve Mpfundzisi.” Yezu pidabva iye penepyo apanga Djairo n'tsogoleri wa nyumba ya kuphemberera, kuti: “Leka gopa. Khulupira basi, mwana wako anapulumuka.” Yezu pidafika iye ku nyumba kwa Djairo, akhondesa anthu kupita na Iye n'nyumba. Mbwenye atawirisa kupita na Pedhru na Juwau na Tiyago basi ene, pontho na baba na mai wa mwana. Onsene akhali penepo, akhalira mbakhakhuwa na thangwi ya mwana. Mbwenye Yezu aapanga kuti: “Lekani kulira. Mwana hadafa tayu, mbwenye ali kugona.” Penepo onsene atoma kunseka, thangwi iwo akhapidziwa kuti mwana akhadafadi. Mbwenye Yezu amphata nkono wace, mbampanga na kukhuwa kuti: “Ntsikana, lamuka!” Penepo nzimu wace wabwera pontho, iye mbalamukiratu. Na tenepo, Yezu apanga anthu kuti ampase cakudya. Baba wace na mai wace mwana adzumatirwa napyo pikulu. Mbwenye Yezu aapanga kuti akhonde kupanga munthu pire pidacitika. Yezu acemera anyakupfundza ace khumi na awiri, mbaapasa mphambvu za utongi wa kuthamangisa mizimu yonsene ya kuipa, pontho na kuwangisa nthenda. Na tenepo, aatuma kwenda mbalonga Umambo wa Mulungu na kuwangisa atenda. Penepo aapanga kuti: “Pa ulendo wanu lekani kukwata cinthu tayu, ninga: mpsimbo, malikofa, cakudya, peno kobiri. Pontho lekani kukwata nguwo inango pa khundu. N'nyumba munapita imwe, khalani mwenemu mpaka buluka kwanu. Mungakhonda kutambirwa mu nzinda unapita imwe, pa kubuluka kwanu mwenemu gubudzani pfumbi ya manyalo anu, ninga cidzindikiro ca kuapangisa kuti pidacita iwo mphyakuipa.” Na tenepo, iwo abuluka mbaenda m'pisa na m'pisa mbalonga Mphangwa Zadidi, na kuwangisa atenda mbuto zonsene. Herodhi, ntongi wa dziko ya Galileya abva mbapilongwa pyonsene pikhacitika, pontho akhakhala wakudzudzumika, thangwi anthu anango akhalonga kuti Juwau Bhatixta alamuka pa kufa. Anango akhalonga kuti ndi Eliya akhadaonekera. Anangombo ndiwo akhalonga kuti ndi m'bodzi wa maporofeta akale akhadalamuka pa kufa. Mbwenye Herodhi alonga kuti: “Juwau, ine ndan'gwandisa nsolo. Mphapo ndi ani mamuna unowu anabva ine mbalongwa na thangwi ya pinthu penepi?” Pontho Herodhi akhafuna kuona Yezu. Pakubwerera kwa apoxtolo, alonga kuna Iye pyonsene pidacita iwo. Na tenepo, Yezu aakwata mbaenda na iwo ku nzinda unacemerwa Bhetisaidha, mbwenye mwinji wa anthu na kubva penepyo atoma kutowera Yezu. Iye aatambira mbakhaapanga pya Umambo wa Mulungu na kuwangisa nthenda za ale akhafuna kuwangiswa. Pikhadoka dzuwa, anyakupfundza khumi na awiri anfendedzera mbalonga tenepa: “Apangeni anthu awa kuti aende pyawo, toera akwanise kwenda m'pisa na mbuto zinango za padhuzi, kuti akhasake cakudya na pakukhala. Thangwi muno ndi n'thando.” Mbwenye Yezu atawira kuti: “Apaseni imwe cakudya toera adye.” Apo iwo antawira tenepa: “Pano ife tina mikate mixanu basi, na nyama ziwiri za m'madzi. Peno tiagulire ndife anthu onsene awa cakudya.” (Akhalipo penepo amuna akuthamangira pikwi pixanu. 5.000.) Mbwenye Yezu apanga anyakupfundza ace kuti: “Igaweni mbumba muikhazike pantsi nsoka-nsoka wa makumaxanu wa anthu.” Anyakupfundza acita ninga mudapangirwa iwo, mbaikhazika mbumba yonsene pantsi. Penepo Yezu akwata mikate mixanu na nyama ziwiri za m'madzi, alang'ana kudzulu mbapereka takhuta kuna Mulungu, mbaimenya-menya. Buluka penepo, aipasa anyakupfundza ace, toera iwo aigawize mbumba. Onsene adya mbakhuta. Pakumala anyakupfundza alokotera mapindi adasala mbadzaza na iwo pitundu khumi na piwiri. Ntsiku ibodzi Yezu akhaphembera pa khundu, pabodzi na anyakupfundza ace. Na tenepo, Yezu aabvundza kuti: “Kodi anthu asalonga kuti Ine ndine ani?” Iwo atawira tenepa: “Anango asalonga ndimwe Juwau Bhatixta. Anango asalonga kuti ndimwe Eliya. Anangombo asalonga kuti ndimwe m'bodzi wa maporofeta akale adalamuka pa kufa.” Yezu aabvundza pontho kuti: “Kodi imwembo musalonga kuti Ine ndine ani?” Pedhru atawira tenepa: “Imwe ndimwe Kirixtu adatumwa na Mulungu.” Penepo Yezu aacenjeza kuti aleke kupanga munthu unango pinthu penepyo. Pontho Iye athimiza na kulonga kuti: “Ine, Mwana wa Munthu, ndisafunika kuti ndione nyatwa zizinji, pontho ndikhondiwe na mathubu, na akulu aanyantsembe na anyakudziwisa a Mwambo, mbandiphiwa, mbwenye pakupita ntsiku zitatu, ndinadza kalamuka pa kufa.” Buluka penepo aapanga onsene kuti: “Ule anafuna kunditowera asatongwa akhondeke ekha ene, akwate ntanda wace ntsiku zonsene, pontho anditowere. Thangwi ule anafuna kukoya moyo wace, anauluza. Mbwenye ule analuza moyo wace na thangwi yanga, unowu anapulumuka. Thangwi pinaphedzeranji kuna munthu kuwina dziko yonsene ya pantsi, iye mbamalisira kutaika peno kufudzika? Mphapo munthu anakhala na manyadzo na Ine pontho na mafala anga, Ine, Mwana wa Munthu, ndinadza kakhalambo na manyadzo na iye, ndingabwera na mbiri yanga na ya Baba, na ya maanju ace akucena. Ndimo mwene, ndisakupangani kuti, anango ali pano, nkhabe kufa mbadzati kuona Umambo wa Mulungu.” Dhuzi na kuthamangira ntsiku zisere mbadamala kulonga kale mafala enewa, Yezu akwata Pedhru, Juwau na Tiyago mbakwira na iwo pa phiri kwenda kaphembera. Penepo, pikhaphembera Iye, nkhope yace yaphinduka, nguwo zace zadza kaceneratu kakamwe mbaziyetimira. Pa n'dzidzi ubodzi-bodzi, abulukira amuna awiri mbatoma kuceza na Yezu. Akhali Mozesi na Eliya. Iwo abulukira na cieza ca mbiri, mbakhalonga pya thangwi ya kufa kwa Yezu, kukhafuna kusimbiswa ku Djerusalema. Pedhru na andzace akhadaphatwa na citulo. Mbwenye pidalamuka iwo aona mbiri ya Yezu, na amuna awiri akhali na Iye. Mphapo mukhabuluka Mozesi na Eliya, Pedhru alonga kuna Yezu kuti: “Mpfundzisi, mphyadidi tikhale pyathu pano! Timange makumbi matatu. Ibodzi yanu, ibodzi ya Mozesi, inango ya Eliya.” (Pedhru hakhapidziwa tayu pikhalonga iye.) Pedhru mbadzati kumala kulonga, yabwera khole ibodzi mbiagudumira. Na kuona kuti agudumirwa na khole, iwo agopa pikulu kakamwe. Pa khole pabveka fala ikhalonga tenepa: “Uyu ndi Mwana wanga wakufunika, adasankhula ine. M'bvereni!” Pakubveka fala eneyo, Yezu agumanika kuti ali ekha ene. Pa midzidzi eneyo anyakupfundza a Yezu apikoya muntima mwawo pinthu penepi, mbakhonda kupanga munthu pire pikhadaona iwo. Mangwana mwace, pidachita iwo pa phiri, mwinji ukulu wa anthu wabwera kagumana na Yezu. Penepo, mamuna m'bodzi pakati pa mwinji wa anthu, akhuwa kuna Yezu mbalonga kuti: “Mpfundzisi, ndisakuphembani kuti mundionerembo mwana wanga, thangwi mwana wanga ndi m'bodzi basi. Ulipo nzimu wa kuipa unamphata. Na mwansanga iye asakhuwa mbum'bhoma pantsi, mbatoma kutatamuka na kubuluka mapobvu n'kanwa. Funa kunsiya usanentsa, usansiya nkhabe mphambvu. Ine ndaphemba anyakupfundza anu kuti aubuluse, mbwenye iwo aucimwana.” Yezu atawira tenepa: “Imwe anthu akuipa pontho akusowa cikhulupiro! Ndinakhala na imwe mpaka lini? Mpaka lini ndinakuonerani nyatwa? Bwera naye pano mwana wako.” Penepo mwana pikhafika iye dhuzi, aphatwa pontho na nzimu ule wa kuipa, mbun'gwisa pantsi mbatoma kutatamuka. Mbwenye Yezu aupwekera nzimu wa kuipa, awangisa mwana, mbampasa baba wace. Na tenepo, onsene adzumatirwa nazo mphambvu zikulu za Mulungu. Pa n'dzidzi unowu ukhadzumatirwa anthu onsene na thangwi ya pinthu pikhacita Yezu, iye apanga anyakupfundza ace kuti: “Bveserani mwadidi pinafuna Ine kukupangani. Ine, Mwana wa Munthu ndinati ndiperekwe m'manja mwa anthu.” Mbwenye anyakupfundza ace akhacimwana kuabvesesa akhalongeranji mafala enewa. Iwo akhadaabisirwa toera akhonde kuabvesesa. Pontho akhagopa kum'bvundzisa na thangwi ya mafala enewa. Anyakupfundza a Yezu atoma kuketesana okha-okha kuti adziwe ndi ani pakati pawo, nkulu wa onsene. Mbwenye Yezu akhapidziwa pikhanyerezera iwo muntima mwawo. Na tenepo, akwata mwana m'bodzi wang'ono mbamuikha n'khundu mwace, mbalonga kuti: “Ule anatambira mwana m'bodzi wang'ono ninga uyu na dzina yanga, asatambira Ine ene. Pontho ule ananditambira, asatambira ule adandituma. Thangwi ule anapicepesa pakati panu, unowu ndiye nkulu.” Penepo Juwau alonga kuti: “Mpfundzisi, taona mamuna m'bodzi mbakhathamangisa mizimu ya kuipa na dzina yanu, mbwenye ife tan'khondesa, thangwi iye si ndzathu tayu.” Yezu aatawira tenepa: “Lekani kun'khondesa. Thangwi ule anakhonda kukupokanyani, unowu ali na imwe.” Yezu na kuona kuti n'dzidzi wace wa kwenda kudzulu uli kufika, anyerezera ekha ene kwenda ku Djerusalema. Na tenepo, Yezu atuma anankate angasi mbaatsogolesa. Iwo aenda mbafika ku cisa cibodzi ca dziko ya Samariya, toera akwanise kusasanyira mbuto yakufikira. Mbwenye anthu a kucisa cenecire akhonda kuntambira, thangwi iwo aona kuti Yezu akhaenda ku Djerusalema. Apo anyakupfundza ace Yezu, Tiyago na Juwau, na kupiona penepyo, abvundza Yezu kuti: “Mbuya, musafuna kuti ife titume moto wa kudzulu udze kaapise?” Mbwenye Yezu azungunuka kuna iwo mbaasandika [kuti: “imwe nkhabe dziwa ndi nzimu wanji una imwe. Thangwi Ine, Mwana wa Munthu sidabwera kudza kapha anthu tayu, mbwenye toera kaapulumusa. ”] Na tenepo, aenda ku cisa cinango. Yezu na anyakupfundza ace pikhaenda iwo na njira, mamuna m'bodzi ampanga kuti: “Mbuya, ine ndinakutowerani konsene kunafuna Imwe kwenda.” Mphapo Yezu antawira tenepa: “Minyenga ina mphako zawo, mbalame za kudzulu zinantsandza zawo, mbwenye Ine, Mwana wa Munthu, nkhabe pa kutsamisa nsolo.” Penepo Yezu apanga mamuna unango kuti: “Nditowere.” Mbwenye iye antawira tenepa: “Mbuya, ndisiyeni pakutoma ndiyende kaikhise baba wanga.” Yezu antawira kuti: “Siya anyakufa aikhane okha-okha. Mbwenye iwe ndoko ukhalonge Umambo wa Mulungu.” Unangombo alonga tenepa: “Mbuya, ine ndinakutowerani. Mbwenye pakutoma ndisiyeni ndikhapangane abale anga.” Mphapo Yezu antawira kuti: “Munthu onsene anatoma kulima na ng'ombe mbalang'ana n'nduli, unowu nkhabe kufunika mu Umambo wa Mulungu.” Buluka penepo, Mbuya athonya anyakupfundza ace anango makumanomwe na awiri, mbaatuma patsogolo pace kuti aende awiri-awiri, m'mizinda na m'pisa mukhafuna kupita iye. Yezu aapanga tenepa: “Munda wakula, mbwenye anyabasa acepa. Phembani mphapo kuna mwanacinthu munda, kuti atume anyabasa toera adze kabvune. Ndokoni! Ine ndisakutumani ninga ana mabira pakati pa mibindzi. Lekani kukwata cikhwama, peno malikofa, peno ntsapato. Pontho lekani kumwanyika munthu n'njira. “Mungapita n'nyumba, pakutoma longani tenepa: ‘Ntendere mbukhale pa nyumba ino.’ Ngakhala mwenemu muna munthu wa ntendere, nsiyireni ntendere wanu. Mbwenye ngakhala nkhabemo munthu wa ntendere, kwatani pyanu ntendere wanu. Khalani nyumba ibodzi ene. Dyaani, mbamumwa pire pinapaswa imwe. Thangwi nyabasa asafunika atambiriswe. Lekani kufamba nyumba na nyumba. “Mungapita mu nzinda mbamutambirwa mwadidi, dyaani pire pinakupasani iwo. Wangisani atenda anagumanika mu nzinda unowu, mbamuapanga anthu a mwenemu kuti: ‘Umambo wa Mulungu uli dhuzi na imwe.’ Mbwenye mungapita mu nzinda mbamukhonda kutambirwa mwadidi, ndokoni na m'miseu mikulu yonsene mbamulonga tenepa: Na pfumbi ene ya nzinda iri m'manyalo mwathu, ife tinakugubudzirani! Mbwenye dziwani kuti Umambo wa Mulungu uli dhuzi! Ine ndisakupangani kuti, ntsiku inadza katongwa anthu, Mulungu anadza kacepesa nyatwa zikhafuna pasa iye nzinda wa Sodhoma, kupiringana nzinda unowu. “Unanyatwa iwe nzinda wa Korazini! Unanyatwa iwe nzinda wa Bhetisaidha! Thangwi pirengo pidacitika pakati panu, mbapidacitika kuna mizinda ya Tiru na Sidhoni, anthu a mizinda eneyi mbadachunyuka kale cino kudawa kwawo, mbabvala masakha, mbakwata dotha mbadzola. Mbwenye ntsiku inadza katongwa anthu, Mulungu anadza kakhala na ntsisi zikulu na Tiru na Sidhoni, kupiringana imwe Korazini na Bhetisaidha. Iwembo nzinda wa Kafaranaumi, usanyerezera kuti unakwira mpaka kudzulu? Nkhabe. Unati uponyiwe mu mbuto ya anyakufa! “Ule anakubverani, ali kubvera Ine. Ule anakukhondani, asakhonda Ine. Mbwenye ule anandikhonda, asakhonda ule adandituma.” Anyakupfundza makumanomwe na awiri ale, abwera kuna Yezu na kukomerwa pikulu kakamwe, mbalonga tenepa: “Mbuya, na dzina yanu, na mizimu ene ya kuipa ikhatibverambo!” Yezu aapanga kuti: “Ine ndaona Sathani mbakhabuluka kudzulu mbagwa pantsi ninga njazi. Lang'anani, Ine ndakupasani mphambvu za kuponda nyoka na makong'a, na za kukunda nazo mphambvu zonsene za nyamalwa. Nkhabe cinakwanisa kukucitani kuipa. Mphapo lekani kukomerwa na thangwi ya kukubverani kunacita mizimu ya kuipa. Mbwenye komerwani thangwi madzina anu alembwa kudzulu.” Pa n'dzidzi unowu, Yezu atsandzaya mu Nzimu Wakucena mbalonga tenepa: “Ndisapereka takhuta kuna Imwe Baba, Mbuya wa kudzulu na pantsi! Thangwi mwapangisa kuna ale adakhonda kupfundza, pire pidabisira imwe anyakudziwisa na anyakupfundza mbamupipangisa ana ang'ono. Ande Baba, penepyo pyacitika na kufuna kwanu. “Pinthu pyonsene ndapipaswa na Baba wanga. Nkhabe munthu anan'dziwa Mwana, ndi Baba basi anan'dziwa. Pontho nkhabe munthu anan'dziwa Baba, anan'dziwa ndi Mwana basi na ule anafuna iye kuti an'dziwe.” Na tenepo, Yezu azungunuka kuna anyakupfundza ace, mbalonga na iwo okha basi kuti: “Mbatsandzaye ale anakwanisa kuona pire pinaona imwe! Thangwi ndimo mwene Ine ndisakupangani kuti: Maporofeta azinji, na amambo azinji, akhafunambo kuona penepi pinaona imwe, mbwenye acimwana kupiona. Pontho akhafunambo kubva pinabva imwe, mbwenye acimwana kupibva.” Penepo, mamuna m'bodzi nyakudziwisa wa Mwambo, akhafuna kulesera Yezu. Iye alamuka mbam'bvundza kuti: “Mpfundzisi, ndisafuna ndicitenji toera ndikhale na upulumuki wakukhonda kumala?” Yezu atawira tenepa: “Ndi ninji pidalembwa mu Mwambo wa Mulungu? Iwembo usapyona tani?” Mamuna atawira tenepa: “ ‘Funa Mbuya Mulungu wako, na ntima wako onsene, na uunthu wako onsene, na mphambvu zako zonsene, na ndzeru zako zonsene,’ pontho ‘Funa ndzako ninga iwe ene. ’ ” Yezu ampanga tenepa: “Ndimwe mwene. Watawira mwadidi. Cita penepyo, unapulumuka.” Mbwenye nyakudziwisa wa Mwambo, na kufuna kumpangisa udziwisi wace, am'bvundza tenepa: “Mbani ndzanga?” Yezu antawira kuti: “Mamuna m'bodzi akhabuluka ku Djerusalema mbaenda ku Djeriko. Pikhaenda iye na njira, aphatwa na mapanga. Iwo an'dula nguwo zace, am'menya, mbansiya akomoka. Pa n'dzidzi unowu nyantsembe m'bodzi akhabwerambo na njira ibodzi-bodzi. Mudamuona iye, ancalira mbaenda pyace. Sawa-sawambo na mamuna m'bodzi wa dzindza ya Levi, apitambo na penepo. Amulang'ana, ancalirambo mbaenda pyace. Mbwenye mamuna m'bodzi wa ku Samariya akhapitambo na njira eneyo, afika mpaka penepo. Mudamuona iye am'bvera ntsisi. Anfendedzera dhuzi, mban'tsuka pironda pyace na mafuta, na vinyu mbapimanga na nguwo. Buluka penepo, an'thukula mbampakiza pa buru yace, mbaenda na iye mpaka pa nyumba ya kufikira alendo, mbansasanya mwadidi. Mangwana mwace, abulusa kobiri ziwiri za parata, apasa mwanacinthu nyumba, mbampanga tenepa: ‘Ndionerenimbo mamuna uyu. Mungadza kabvunga kobiri inango ya kupiringana iyi na thangwi yace, ndinadza kakubwezerani ndingabwerera.’ “Penepo, Yezu am'bvundza nyakudziwisa wa Mwambo kuti: ‘Kuona kwako, mbani ndzace mamuna uyu adaphatwa na mapanga, pa utatu wawo apa?’ ” Iye atawira kuti: “Ndi ule adam'bvera ntsisi.” Yezu ampanga tenepa: “Iwembo ndoko kacita pibodzi-bodzi.” Yezu na anyakupfundza ace apitiriza na ulendo wawo, mbafika pa cisa cibodzi padatambirwa iwo pa nyumba ya nkazi m'bodzi anacemerwa Marita. M'bale wace Marita anacemerwa Mariya, akhakhala pa myendo ya Mbuya mbakhabvesera mafala ace. Mbwenye Marita akhazunguzika na basa izinji ya pa nyumba. Na tenepo, afedza dhuzi na Yezu mbam'bvundza kuti: “Kodi Mbuya, muli kuona tayu kuti m'bale wanga ali kundisiyira ndekha basa? Mpangeni adze kandiphedzembo.” Penepo Yezu antawira tenepa: “Marita! Marita! Iwe uli kunentseka mbupingizika na pinthu pizinji. Mbwenye cinafunika ndi cibodzi basi. Mariya asankhula cinthu cadidi. Cinthu ceneci nkhabe anafuna kunkwatira.” Ntsiku inango Yezu akhaphembera pa mbuto ibodzi. Pidamala Iye, nyakupfundza wace m'bodzi am'phemba mbalonga kuti: “Mbuya, tipfundzisenimbo kuphembera, ninga pidacita Juwau Bhatixta apfundzisa anyakupfundza ace.” Yezu antawira kuti: “Mungafuna kuphembera, phemberani tenepa: “Baba, dzina yanu mbikhale na mbiri. Umambo wanu mbudze kuna ife. Tipaseni cakudya cathu ntsiku na ntsiku. Tilekerereni madawi athu, thangwi ifembo tisalekerera onsene ale anatidawisira. Pontho lekani kutisiya mbatigwa n'kudawa.” Na tenepo, Yezu alonga kuna anyakupfundza ace kuti: “Lang'anani, ngakhala m'bodzi wanu aenda ku nyumba kwa xamwali wace pa chiti-chiti ya masiku, mbam'phemba kuti: ‘Xamwali, ndibwerekembo mikate mitatu, thangwi ndafikirwa na xamwali wanga m'bodzi wa mulendo, apo ine nkhabe cinthu ca kumpasa.’ “Mphapo ndiye tani xamwali wace mbantawira n'kati mwa nyumba mbalonga kuti: ‘Leka kundinyangula! Citseko camala kufungwa, ine na ananga tiri kugona. Na tenepo, nkhabe kwanisa kuti ine ndilamuke, toera ndikupase mikate.’ Ine ndisakupangani kuti: Munthu uyu angakhonda kulamuka toera kumpasa nkate thangwi ndi xamwali wace, mbwenye na thangwi ya kun'nyangula kunacita xamwali wace, anati alamuke mbampasa pyonsene pinafuna iye. “Na thangwi ya ipyo, ndisakupangani kuti: Phembani, munapaswa. Sakani, munapigumana. Gogodzani, munafungulirwa. Thangwi onsene anaphemba, anapaswa. Anasaka, anapigumana. Pontho ule anagogodza citseko, anafungulirwa. “Mbani pakati panu, baba m'bodzi anapasa mwana wace nyoka, angam'phemba nyama ya m'madzi? Peno kong'a, angaphemba dzai? Lang'anani, imwe ninga anthu a kuipa musakwanisa kupasa ana anu pinthu pyadidi, ndiye tani Baba ali kudzulu, Iye nkhabe kwanisambo kupasa Nzimu Wakucena kuna ale anauphemba.” Yezu akhathamangisa nzimu wa kuipa muna munthu wa bewewe. Pidabuluka nzimu wa kuipa, mamuna atoma kulonga, mwinji wa anthu mbudzumatirwa napyo. Mbwenye anango alonga tenepa: “Ndiye Bhelizebhu, nkulu wa madimonyo, anampasa mphambvu za kuthamangisa madimonyo.” Anango, toera kumulesera, am'phemba kuti acite cirengo ca kudzulu. Mbwenye Yezu na kudziwa manyerezero awo aapanga kuti: “Umambo onsene ungagawika okha-okha, unamalisira kufudzika. Pontho mudzi, ungagawika okha-okha, unamalisirambo kufudzika. Mphapo Sathani angagawika ekha ene, umambo wace unakhala tani pontho na mphambvu? Ndisalonga penepi thangwi imwe musalonga kuti ine ndisathamangisa mizimu ya kuipa na mphambvu za Bhelizebhu. Ngakhala Ine ndisathamangisa madimonyo na mphambvu za Bhelizebhu, ana anu asaathamangisa na mphambvu za ani? Na thangwi eneyo, iwo anati akukoneseni. Mbwenye ngakhala ine ndisathamangisa mizimu ya kuipa na mphambvu za Mulungu, nkhulongera kuti Umambo wa Mulungu wafika muna imwe. “Mamuna angakhala na mphambvu pontho mbakhala na piphano, mbaonera nyumba yace, pinthu pyace pyonsene pinakoyeka mwadidi. Mbwenye angafikirwa na munthu unango wa mphambvu zikulu kupita iye, mbankunda, anampokosera piphano pyace pyonsene pikhanyindira iye, mbagawa pinthu pyonsene pidam'bera iye. “Anakhonda kukhala na ine, asandizonda. Apo ule anakhonda kundiphedza kugumanya, asamwaza. “Nzimu wa kuipa ungabuluka muna munthu, usaenda mbundzendza-ndzendza n'thando, kusaka mbuto ya kupuma. Ungakhonda kugumana mbuto, usalonga kuti: ‘Ndinabwerera ku nyumba kwanga kudabuluka ine.’ Ungafika usagumana nyumba yamala kupsairwa na kusasanyirwa mwadidi. Na tenepo, unabuluka mbuyenda kakwata mizimu inango minomwe ya kutekera kakamwe kupiringana iye, mbipita yonsene kakhala mwenemu. Penepo makhaliro ace munthu ule, anatekereratu kakamwe kupiringana makhaliro ace akutoma.” Yezu pidamala Iye kulonga penepyo, nkazi m'bodzi akhali pakati pa mbumba, akhuwa mbalonga kuti: “Mbitsandzaye mimba idakubala na bere idayamwa Iwe!” Mbwenye Yezu antawira kuti: “Mbwenye akutsandzaya ndi ale anabva fala ya Mulungu, mbaikoya.” Pidagumanyikana mbumba, Yezu atoma kulonga tenepa: “Anthu a ntsiku zino mbakuipa! Asaphemba cidzindikiro ca cirengo. Mbwenye nkhabe cidzindikiro cinango cinafuna kudza kaona iwo, kupiringana cidzindikiro ca mporofeta Djona. Thangwi sawa-sawa ninga Djona akhali cidzindikiro ca Mulungu kuli anthu a ku Ninivi, Inembo Mwana wa Munthu, ndinakhalambo cidzindikiro kuli anthu a ntsiku zino. Pontho mambo wa nkazi wa ku khundu ya bangwe anati aatonge anthu a ntsiku zino mbaakonesa. Thangwi iye abwera kubulukira kudadhoroma dziko toera kudza kabva udziwisi wa Salomau, mphapo cincino lang'anani, ali pano nkulu kupiringana Salomau. Pontho ntsiku ya kutongwa kwa dziko ya pantsi pano, anthu a ku Ninivi analamuka mbakukonesani. Thangwi iwo achunyuka kudawa kwawo, pidabva iwo mphangwa za Mulungu na Djona. Mphapo Ine ndisakupangani kuti munthu ali pano, ndi nkulu kakamwe kupita Djona.” Yezu athimiza pontho mbalonga kuti: “Nkhabe munthu anagasa nyale mbaiyikha pakubisala, peno mbaigudumira na citundu. Mbwenye asaiyikha pakweca, toera anthu anapita akwanise kuona cieza. Maso ndi nyale ya manungo. Ngakhala maso ako mbadidi, manungo onsene asadzala na cieza cikulu. Mbwenye maso angakhala mbakuipa, manungo ako onsene asadzala n'cidima. Na tenepo, citani mphole-mphole, kuti cieza ciri n'kati mwanu cikhonde kudza cidima. Ngakhala manungo ako onsene adzala na cieza, pontho nkhabe khundu ibodzi ya manungo iri n'cidima, manungo enewa anayetimira mbakhala ninga asamwanikirwa na cieza ca nyale.” Yezu pidamala Iye kulonga penepyo, nfarisi m'bodzi ankwata kuti aende kadye na iye ku nyumba kwace. Yezu aenda, mbakhala pantsi toera adye. Mbwenye nfarisi adzumatirwa, na kuona kuti Yezu hadasamba manja tayu pa kufuna kudya. Na tenepo, Mbuya Yezu alonga kuti: “Kodi imwe afarisi, musatsuka kunja kwa ndiko na kwa mbale, mbwenye n'kati mwanu mwadzala na umbava pontho na uipi. Imwe madzemwa! Adacita kunja siye m'bodzi ene adacita n'kati tayu? Pasani anyakucherenga pinthu pina imwe. Na tenepo, munaona kuti pyonsene pina imwe pinaceneswa. “Muna nyatwa imwe afarisi! Thangwi musapereka cacikhumi ca masamba a n'dimba mwanu, misapu yakununkhira, na khaindi yonsene ya masamba a kudya, mbamupwaza pyakulungama, mbamukhonda kufuna kwa Mulungu. Ande, citani penepyo pya kupereka cacikhumi, mbwenye mukhonde siya kucita ipi. “Muna nyatwa imwe afarisi! Thangwi musafuna mipando yakutoma n'kati mwa nyumba za kuphemberera, pontho musafuna kumwanyikwa na kulemebza m'mphambano. “Muna nyatwa imwe! Thangwi mwakhala ninga nthumbi zakukhonda kuoneka pakweca, mbazipwandiwa na anthu na kukhonda kudziwa kuti pana pinthu.” Na tenepo, nyakudziwisa m'bodzi wa Mwambo, alonga kuna Yezu kuti: “Mpfundzisi, pinalonga imwe tenepa, musaxola na ife ene.” Penepo Yezu antawira tenepa: “Na imwe ene, anyakudziwisa a Mwambo muna nyatwambo! Thangwi musakwatisa andzanu mitolo yakulemera kakamwe, yakupiringana mphambvu zawo. Pontho imwe mbamucimwana kulamusa na cala cene cibodzi toera kuaphedza.” “Muna nyatwa imwe! Thangwi musacitira nthumbi maporofeta adaphiwa na a mbuya anu. Na tenepo, imwe musacita umboni kuti mwapitawirira pidacita a mbuya anu. Thangwi iwo apha maporofeta, imwe mwaasasanyira nthumbi zawo.” Na thangwi eneyo, Mulungu na kudziwisa kwace, alonga kuti: “ ‘Ndinati ndiatumire maporofeta na apoxtolo. Apo iwo, anango anaapha, anango anaazonda.’ Na thangwi eneyi, anthu a ntsiku za lero anati atawirire ciropa ca maporofeta onsene adaphiwa kutomera pakutoma kwa dziko. Kutomera ciropa ca Abheli mpaka kuna ciropa ca Zakariya, ule adaphiwa mu Nyumba ya Mulungu, pakati-na-kati, uku guwa ya ntsembe uku mbuto yakucena. Ande, Ine ndisakupangani kuti mbumba ya ntsiku za lero, inati ipitawirire pyonsene ipi. “Muna nyatwa imwe, anyakudziwisa a Mwambo! Thangwi mwakwata cavi ca udziwisi wa Mulungu. Na tenepo, imwe ene nkhabe pita, pontho mwapingisa anango akhapita.” Yezu pidabuluka Iye penepo, anyakudziwisa a Mwambo na afarisi atoma kumulongera na kuipirwa mbakham'bvundzisa pinthu pizinji, toera asake mathangwi akumpambazira na iwo, akubuluka pa mulomo pace. Pa n'dzidzi unowu ung'ono, pikwi na pikwi pya anthu pyagumanyikana, mpaka kufikira pondana okha-okha. Na tenepo, Yezu, pakutoma apanga anyakupfundza ace kuti: “Cenjerani na ntombwe wa kutupisa mikate wa afarisi. Penepi ndi kubveka kuti: Na uthambi wawo. Nkhabe cinthu cidabiswa cinakhonda kudza kaoneka, peno cidabisala mbacikhonda kudza kadziwika. Thangwi pyonsene pinalonga imwe n'cibiso-biso pinadza kabveka pakweca. Na pyonsene pinalonga imwe nciwerewere n'nyumba, pinadza kalongwa pa ntsoyi.” “Yezu athimiza na kulonga kuti: Axamwali anga, Ine ndisakupangani kuti: Lekani kugopa ale anapha manungo, angamala mbacimwana kucita pinango. Mbwenye Ine, ndinakupangisani ndi ani anafuna imwe kugopa. Gopani ule anacita kuti angamala kupha manungo, ana mphambvu za kuaponya mu infernu. Ande, ndinathimiza na kukupangani kuti: Unowu n'gopeni! Kodi nkhabe guliswa mbalame zixanu na pikobiri piwiri? Mphapo Mulungu nkhabe ibodzi inaduwala Iye. Na tsisi yanu ene ya munsolo, yonsene yamala kulengeswa. Lekani kugopa. Imwe musafunika pikulu kakamwe kupiringana mbalame zizinji. “Yezu alonga pontho kuti: Ule anandicitira umboni pamaso pa anthu, Inembo Mwana wa Munthu, ndinancitirambo umboni pamaso pa anju za Mulungu. Mbwenye ule anandikhonda pamaso pa anthu, iye anadza kakhondiwambo pamaso pa anju za Mulungu. Onsene ale anandilonga kuipa Ine, Mwana wa Munthu, anadza kalekererwa. Mbwenye ale anaxola Nzimu Wakucena, nkhabe kudza kalekererwa. “Mungakwatiwa kwenda n'kati mwa nyumba za kuphemberera peno pamaso pa anyakutonga na pa akulu-akulu a utongi, lekani kunentseka kuti munaatawira tani, peno munalonga tani. Thangwi pa n'dzidzi unowu, Nzimu Wakucena unakupfundzisani pinafuna imwe kulonga.” Mamuna m'bodzi akhakhala pakati pa mbumba alonga kuna Yezu kuti: “Mpfundzisi, pangani m'bale wanga kuti ndigawane na iye unthaka udatisiyira baba wathu.” Mbwenye Yezu antawira tenepa: “Mamunawe, mbani adandisankhula kuti ndikhale ntongi wa nseru wanu, peno nyakugawa unthaka wanu?” Na tenepo, Yezu aapanga onsene kuti: “Bveserani. Citani mphole na kuumirwa! Thangwi makhaliro adidi a munthu, hali na kuinjipa kwa pinthu pyace tayu.” Na tenepo, Yezu aapanga nsanje uyu: “Munda wa mamuna m'bodzi m'pfumi wabuluka phoso izinji. Iye atoma kunyerezera mbalonga ekha ene kuti: ‘Ndinacita tani? Ine nkhabe mbuto yakukwanisa kukoya phoso yanga yonsene.’ “Na tenepo, iye alonga kuti: ‘Ha! Ndapidziwa pinafuna cita ine. Ndinafudza pyete pyanga pyonsene, mbandimanga pinango pikulu. Mwenemu ndinadza kakoya phoso yanga na pyonsene pina ine.’ Ndingamala ndinalonga ndekha ene kuti: ‘Iwe una pyakudya pya kuinjipa m'pyete mwako, pinakwana kuti umale napyo pyaka pizinji. Cincino puma pyako. Dya, mwa pyako, mbutsandzaya!’ “Mbwenye Mulungu ampanga tenepa: ‘Dzemwawe! Masiku ano iwe unafa. Mbani mphapo anafuna sala na pyonsene pidasasanyira iwe?’ ” Yezu amalisira na kulonga tenepa: “Penepi ndipyo pinacitika na ale anasasanya mpfuma yawo toera aphedzeke, mbwenye pamaso pa Mulungu mbacherengi.” Penepo Yezu apanga anyakupfundza ace kuti: “Na tenepo, Ine ndisakupangani kuti: Lekani kunentseka na makhaliro anu pa thangwi ya pinafuna imwe kudya, peno na manungo anu pa thangwi ya pinafuna imwe kubvala. Pinafunika pikulu kakamwe ndi moyo kupiringana cakudya, na manungo kupiringana nguwo. Lang'anani makhungubwe. Iwo nkhabe kubzala, nkhabe kubvuna, nkhabe pyete pontho nkhabe pikwa. Mbwenye Mulungu asaapasa cakudya. Imwe musafunika pikulu kakamwe kupiringana mbalame! Mbani pakati panu, iye mbapifuna pyace, anakwanisa kuthimizira n'dzidzi ubodzi pa moyo wace? Mphapo ngakhala imwe nkhabe kukwanisa kucita cing'ono ici basi, thangwi yanji musanentseka na pinango? “Lang'anani kukula kunacita maluwa: Iwo nkhabe kuphata basa pontho nkhabe kucita nguwo. Mbwenye Ine ndisakupangani kuti Salomau, na mbiri yonsene ikhali na iye, acimwana kubvalira ninga pidacita maluwa awa. Lang'anani, ngakhala Mulungu asabvazika tenepa maluwa a n'tsanga, anacita kuti lero alipo, mangwana asaponyiwa pa moto, ndiye tani kuna imwe, anthu a cikhulupiro cing'ono? Lekani kunentseka na kusaka kuti munadyanji, peno munamwanji. Thangwi anasaka penepi ndi ale anakhonda kutawira Mulungu. Mbwenye Baba wanu asadziwa pyonsene pinafuna imwe. Cakutoma sakani Umambo wa Mulungu, pyonsene ipi munadza kapithimizirwa.” Yezu athimiza na kulonga kuti: “Imwe nkumbi ung'ono, lekani kugopa tayu! Thangwi Baba wanu asakomerwa na kukupasani Umambo wace. Gulisani pyonsene pina imwe mukwate kobiri eneyi muipase anyakucherenga. Citani pikhwama pya kuti nkhabe kusakala, mbamukoya mpfuma yanu kudzulu. Kweneku iyo nkhabe kudza kamala. Thangwi kweneku mambava nkhabe kwanisa kuiba, pontho ucenje nkhabe kwanisa kuidya. Thangwi panagumanika mpfuma yanu, penepo ndipo panagumanikambo ntima wanu.” “Yezu athimiza pontho na kulonga kuti: Khalani mbamudasasanyira na nyale zanu zakugaka. Khalani ninga anyabasa anadikhira mbuya wawo, adaenda ku phwandu ya banja, kuti angabwera mbamenya citseko, iwo anfungulire na mwansanga. Mbatsandzaye ale anyabasa anagumanwa mbalang'anira na mbuya wawo pakubwera kwace. Ndinakupangani kuti, iye ene mbuya wawo, anasasanyikambo kuti aaphatire basa. Anaapanga kuti akhale pa thando, iye mbabweresa pyakudya mbaapasira. Pontho mbatsandzaye anyabasa anagumanwa mbakhalang'anira, mbuya wawo angabwera pa chiti-chiti peno m'bambakuca! Mbwenye kumbukani kuti: Mbidakhala mwanacinthu nyumba asaudziwa n'dzidzi unafuna kufika mbava, mbadasiya tayu kuti mbava aswe nyumba yace. Na imwembo, khalani akusasanyira, thangwi n'dzidzi unakhonda imwe kudikhira, ndiwo unadza kafika Ine, Mwana wa Munthu.” Na tenepo, Pedhru abvundza kuti: “Mbuya, nsanje unowu musapanga ife basi, peno musapangambo anthu onsene?” Mbuya atawira tenepa: “Mbani mphapo, nyabasa wakunyindirika na wa ndzeru adaikhwa na mbuya wace kuti aonerere anyabasa andzace, toera kuapasa cakudya n'dzidzi ungakwana? Mbatsandzaye nyabasa unowu anagumaniwa mbacita tenepa, pakubwera kwa mbuya wace. Ndimo mwene ndisakupangani kuti, mbuya wace anadza kan'nyindira kuti aonere mpfuma yace yonsene. Ndiye tani mphapo nyabasa uyu mbalonga ekha ene kuti: ‘Mbuya wanga ali kudembuka na kubwera,’ mbatoma kumenya anyabasa amuna na akazi, mbadya, mbamwa, mbaledzera pyace. Penepo, mbuya wace anadza kabwera ntsiku inakhonda iye kun'dikhira, pa n'dzidzi unakhonda iye kudziwa. Iye anamuonesa nyatwa mbamponya m'mbuto ibodzi ene na anyakukhonda kunyindirika. “Ule nyabasa anadziwa ndi ninji pinafuna mbuya wace, mbwenye mbakhonda kusasanyira kuti acite pinafuna iye, anati aoneswe nyatwa na michamu mizinji. Mbwenye ule anadodomeka na thangwi yakukhonda kudziwa pinafuna mbuya wace, unowu anaoneswa nyatwa na michamu pang'ono basi. Anapasiwa pizinji anaphembwa pizinji. Ananyindirwa pikulu, anaphembwambo pikulu. “Yezu athimiza na kulonga kuti: Ine ndabwera kudza kagasa moto pa dziko. Ndi pikhafuna Ine kuti ugake! Mbwenye ndisatongwa nditambire batixmu ya nyatwa. Na tenepo, ntima wanga nkhabe kukhurudzika, penepi mbapidzati kucitika! Imwe musanyerezera kuti ndabweresa ntendere pa dziko? Nkhabe, sidabweresa ntendere tayu, mbwenye ndabweresa kugawana. Thangwi kutomera lero kwenda kutsogolo, mudzi una anthu axanu, anagawana. Atatu anazondana na awiri, awiri anazondana na atatu. Baba anadza kazondana na mwana wace wa mamuna, mwana-mamuna anadza kazondana na baba wace. Mai anadza kazondana na mwana wace wankazi, na mwanambo wankazi anadza kazondana na mai wace. Mebzala anadza kazondana na nkwenya wace, nkwenyambo anadza kazondana na mebzala wace.” Yezu alongambo pontho kuna mbumba kuti: “Imwe mungaona khole mbaikwira kumadokero a dzuwa, musalonga tenepa: ‘Lero mulungu anabvumba,’ iye asabvumbadi. Mungabva mphepo ya bangwe mbimenya, musalonga tenepa: ‘Lero kuna pisa,’ kunja mbakupisadi. Imwe anyauthambi! Musadziwa kuchulula pidzindikiro pya kudzulu na pya pantsi. Mphapo ndi thangwi yanji musacimwana kuchulula pidzindikiro pya n'dzidzi uno? “Yezu athimiza na kulonga tenepa: ‘Thangwi yanji imwe munakhonda dzindikira mwekha ene pinthu pyakulungama? Ngakhala iwe uli kwenda katongesana na nyamalwa wako ku luwani, saka kusekesana na iye n'njira, toera ndzako akhonde kukukwata kwenda nawe kuna ntongi, iyembo ntongi akupereke kuna nsupai, nsupaimbo mbakufungira n'kaidi. Ndisakupanga kuti iwe nkhabe kudza kabuluka mwenemu mbudzati kumalisa kulipa mangawa ako onsene.’ ” Pa n'dzidzi unoule anthu anango abwera kuna Yezu mbampanga na thangwi ya amuna a ku Galileya, akhadaphiwa na ntongi Piratu pa n'dzidzi ukhaikha iwo ntsembe kuna Mulungu. Na tenepo, ciropa cawo cabvungazikana na ciropa ca ntsembe. Penepo Yezu aatawira mbaapanga kuti: “Kodi imwe musanyerezera kuti magalileu awa, ndiwo adadawa pikulu kakamwe kupita magalileu anango na thangwi ya nyatwa zenezi zidaona iwo? Simo tayu. Mbwenye Ine ndisakupangani kuti: Monsene imwe mungakhonda kuchunyuka kudawa kwanu, munafambo sawa-sawa ninga iwo. Peno musanyerezera kuti anthu ale khumi na asere a ku cisa ca Silowee, adafa thangwi ya kugwerwa na nyumba yakulapha, ndiwo ana thangwi ikulu kupita onsene anango akhakhala mu Djerusalema? Simo tayu. Ine ndisakupangani kuti monsene imwe mungakhonda kuchunyuka, munafa sawa-sawa ninga iwo.” Na tenepo, Yezu alonga nsanje uyu kuti: “Mamuna m'bodzi akhali na munda wace wa mauva. Mwenemu mukhali muti ubodzi wa nsambvu. Mudaenda iye kasaka misapu ya nsambvu uyu, hadagumanamo pinthu tayu. Na thangwi eneyo apanga mamuna akhaonera munda kuti: ‘Pyapita pyaka pitatu mbandikhadza pano kasaka misapu pa nsambvu uyu, mbandikhonda kugumana cinthu. Thangwi yanji tisausiya mbaupatisa munda pa pezi? Ugwande pyako.’ “Mbwenye nyabasa antawira kuti: ‘Mbuya, tomani kuusiya pontho caka cibodzi. Ine ndinaukuwirira n'khundu mwace mbandiuyikhira pinthu pyakupasa ndimu. Ungabala caka cinafuna kudza, mphyadidi. Ungakhonda bala, munautema pyanu.’ ” Ntsiku ibodzi ya Sabudu, Yezu akhapfundzisa mu nyumba ya kuphemberera. Akhalipo mwenemu nkazi m'bodzi akhaduwala pa pyaka khumi na pisere, na thangwi ya nzimu wa kuipa. Iye akhafamba na kukotama mbakhacimwana kufuthula nsana wace. Apo Yezu pidamuona iye nkazi ancemera mbampanga kuti: “Nkaziwe, nthenda yako yawanga.” Na tenepo, Yezu amuikha manja, penepo pene nsana wace wadzongoka, mbatoma kukuza Mulungu. Mbwenye n'tsogoleri wa nyumba ya kuphemberera aipirwa na kuona kuti Yezu awangisa munthu ntsiku ya Sabudu, mbapanga mbumba kuti: “Ziripo ntsiku zitanthatu zakuphata basa, bwerani ntsiku zenezi toera muwangiswe. Mbwenye lekani kubwera ntsiku za Sabudu.” Penepo Yezu antawira kuti: “Anyauthambi! Mbani pakati panu anakhonda kufungulira ng'ombe peno buru yace n'thanga ntsiku ya Sabudu, toera kwenda kaimwesa madzi? Mphapo nkazi uyu wa dzindza ya Abharaamu adamangwa na Sathani pyaka khumi na pisere, nkhabe kukwanira kuti iye akwanise kusudzulwa nthenda yace ntsiku ya Sabudu?” Pakumala kulonga penepyo, anyamalwa onsene a Yezu akhala na manyadzo na kutawira kudacita Iye. Mbwenye mbumba yonsene yakomerwa na pinthu pyakudzumisa pikhacita Yezu. Na tenepo, Yezu alonga kuti: “Walandana nanji Umambo wa Mulungu? Ndinaulandanisa nanji? Walandana na mbeu ibodzi ing'ono, idakwatiwa na mamuna m'bodzi mbaibzala n'dimba mwace. Mbeu yakula mbikhala muti, mbalame mbizibwera kamanga ntsandza zawo mu nthawi zace.” Yezu athimiza mbalonga kuti: “Ndinaulandanisa nanji Umambo wa Mulungu? Umambo wa Mulungu walandana na ntombwe wa kutupisa mikate, udabvungaza nkazi na ntsengwa zitatu za ufa, mpaka kutupisa ufa onsene.” Buluka penepo, Yezu akhafamba mbapfundzisa nzinda na nzinda, cisa na cisa, pa kwenda kwace ku Djerusalema. Munthu m'bodzi am'bvundzisa kuti: “Mbuya, ndi pang'ono anafuna kudza kapulumuka?” Yezu antawira kuti: “Citani mphambvu toera mupite na nsuwo ung'ono. Thangwi ndisakupangani kuti azinji anati asake kupita, mbwenye anati apicimwane. Mwanacinthu nyumba angalamuka mbafunga citseko, imwe munati mukhale kunja, mbumumenya citseko mbamulonga kuti: ‘Mbuya, tifungulireni citseko.’ “Mbwenye iye anatawira kuti: ‘Nkhabe kukudziwani. Pontho nkhabe kukudziwani ndimwe a kupi.’ “Na tenepo, imwe munati mulonge kuti: ‘Tadya, mbatimwa pabodzi na imwe. Pontho imwe mwapfundzisa m'miseu mwathu.’ “Mbwenye iye anakutawirani kuti: ‘Ine nkhabe kukudziwani. Pontho nkhabe kukudziwani ndimwe a kupi. Bulukani pano, imwe monsene munacita pyakuipa.’ “Penepo panadza kaoneka kulira na kukukuta mano, mungaona Abharaamu, Izaki na Djakobo na maporofeta onsene mu Umambo wa Mulungu, imwe mbumukhala kunja. Anthu azinji a kumabulukira dzuwa, na kumadokero a dzuwa, anati abwere mbaenda kakhala pa phwandu, mu Umambo wa Mulungu. Ndimo mwene, alipo anango akumalisira anati akhale akutoma. Alipombo anango akutoma, anati akhale akumalisira.” Pa n'dzidzi unoule afarisi anango anfendedzera Yezu mbampanga kuti: “Buluka pano uyende pyako, thangwi Herodhi asafuna kukupha.” Yezu aatawira tenepa: “Ndokoni mukhalonge kuna n'nyenga ule kuti Ine, lero na mangwana ndisathamangisa mizimu ya kuipa na kuwangisa atenda. Mphapo nkucauno, ndinamalisa basa yanga.” Apo Yezu athimiza na kulonga kuti: “Mbwenye Ine ndisafunika ndifambe lero, mangwana na nkucauno. Thangwi nkhabe funika kuti mporofeta afe kunja kwa Djerusalema. “Djerusalema, Djerusalema, iwe unapha maporofeta, pontho mbumenya na myala ale adatumirwa iwe na Mulungu! Kangasi mbandifuna kugumanya ana ako, ninga nkhuku isagumanya anapiye ace m'mapapido mwace, iwe mbukhonda! Lang'anani, nyumba yanu inadza kakhala madembe. Pontho ndisakupangani kuti imwe nkhabe kudza kandionabve tayu, mpaka n'dzidzi unadza imwe kalonga kuti: ‘Mbasimbwe ule anadza na dzina ya Mbuya!’ ” Ntsiku inango ya Sabudu, mudapita Yezu n'nyumba mwa nkulu wa afarisi kuti aende kadya, anthu onsene akhamulang'anisa. Patsogolo pace pakhakhala na mamuna m'bodzi akhali na nthenda ya kubzimba. Penepo, Yezu abvundzisa kuna anyakudziwisa a Mwambo na kuna afarisi kuti: “Kodi mwambo wathu usatawirisa kuwangisa munthu ntsiku ya Sabudu peno nkhabe?” Mbwenye iwo amatama. Na tenepo, Yezu amphata mamuna manja ace mbamuwangisa, mbampanga kuti ndoko pyako. Buluka penepo Yezu aabvundza kuti: “Ngakhala m'bodzi wanu ana mwana wace peno ng'ombe yace idagwa mu ncera ntsiku ya Sabudu, nkhabe kwenda kaibulusa na mwansanga?” Iwo acimwana kuntawira. Yezu pikhalang'anisa Iye anyaphwandu kusankhula kukhacita iwo mbuto zakutoma pa thando ya kudya, alonga nsanje uyu kuti: “Ungacemerwa na munthu ku phwandu ya banja, leka kukhala pa mbuto yakutoma. Thangwi panango alipombo unango adacemerwa, munthu wa mbiri kupiringana iwe. Mphapo, ule adakucemerani pa uwiri wanu funa akupange tenepa: ‘Buluka penepo upase ndzako mbuto.’ Penepo, iwe unakhala na manyadzo, mbuyenda kakhala pa mbuto yakumalisira. Mbwenye iwe ungacemerwa, khala pa mbuto ya kumalisira. Ule adakucemera anabwera kudza kakupanga kuti: ‘Xamwali, bwera kuno kutsogolo.’ Na tenepo, unalemedzeka pikulu pamaso pa onsene adacemerwa pa phwandu. Thangwi ule anapikuza, anadza kacepeswa. Ulembo anapicepesa, anadza kakuzwa.” Buluka penepo, Yezu apanga ule adancemera kuti: “Iwe ungafuna kucita phwandu na masikati, peno na masiku, leka kucemera axamwali ako, peno abale ako, peno a dzindza yako, peno andzako anyakupfuma anakhala na iwe dhuzi pa cisa. Thangwi ntsiku inango, iwo anadza kakucemerambo. Na tenepo, anakubwezera udidi onsene udacita iwe. Mbwenye iwe ungacita phwandu, cemera anyakucherenga, anyakulamala, anyakuchikama na maboli-boli. Tenepa iwe unadza katsandzaya, thangwi iwo anacimwana kukubwezera pire pidaacitira iwe. Mbwenye, unapaswa muwoni wako pa kulamuka pa kufa kwa anyakulungama.” Munthu m'bodzi akhakhala na iwo pa thando ya kudya, mudabva iye penepi, alonga kuna Yezu kuti: “Mbatsandzaye ale anadza kadya phwandu mu Umambo wa Mulungu.” Mbwenye Yezu alonga kuti: “Mamuna m'bodzi acita phwandu ikulu mbacemeresa anthu azinji. Mudakwana n'dzidzi wa phwandu, atuma nyabasa wace toera aende kapanga ale akhadacemerwa kuti: ‘Bwerani, thangwi pyonsene pyamala kusasanyirwa!’ “Mbwenye m'bodzi na m'bodzi atoma kuphemba kulekererwa. Wakutoma alonga tenepa: ‘Ndagula munda wanga, na tenepo ndisafunika ndiyende kauone. Ndisaphemba kuti mundilekerere.’ “Unango alonga tenepa: ‘Ndagula ng'ombe khumi zakulima nazo. Funa ndikhazione kuphata kwazo basa. Ndisaphemba kuti mundilekerere.’ “Unango alonga tenepa: ‘Ndamala kupaswa banja lero. Na thangwi eneyo ndinacimwana kwendako.’ Nyabasa abwerera mbaenda kalonga pyonsene kuna mbuya wace. Na tenepo, mbuya wace aipirwa pikulu kakamwe, mbalonga kuti: ‘Ndoko na mwansanga m'miseu na m'misika ya mu nzinda ukhacemere anyakucherenga, maboli-boli, anyakulamala na anyakuchikama.’ “Mudabwerera nyabasa, alonga tenepa: ‘Mbuya, ndamala kucita pyonsene pidandipanga imwe, mbwenye mbuto iciripo basi.’ Penepo, mbuya wace ampanga tenepa: ‘Ndoko m'miseu na n'njira zinango za cigwagwa. Akakamize anagumana iwe mwenemu kuti abwere, toera nyumba yanga idzale. Mbwenye ine ndisakupangani kuti nkhabe m'bodzi pa ale adacemerwa, anadza kalawira phwandu yanga.’ ” Penepo, mwinji wa anthu ukhatowera Yezu. Iye azungunuka mbalonga tenepa: “Ule anafuna kunditowera, mbakhonda kundifuna kupiringana baba wace na mai wace, nkazace, anace aamuna na aakazi, abale ace aamuna na aakazi, peno mbakhonda kundifuna kupiringana moyo wace, nkhabe kwanisa kukhala nyakupfundza wanga. Pontho ule anakhonda kukwata ntanda wace mbanditowera, nkhabe kwanisa kukhala nyakupfundza wanga.” “Ngakhala m'bodzi wanu asanyerezera kumanga nyumba yakulapha pikulu kakamwe, cakutoma nkhabe kukhala pantsi mbatoma kuona pinafuna kubvunga iye, toera angamala aone ngakhala kobiri zace zinakwana? Thangwi angakhonda kucita penepi, iye anaikha nchici, mbwenye anacimwana kuimalisa nyumba. Penepo, onsene adaona pidacitika, anatoma kunseka mbalonga tenepa: ‘Mamuna uyu aitoma nyumba, mbwenye acimwana kuimalisa!’ “Peno mbani mambo, kuti angafuna buluka kwenda ku nkhondo kamenyana na mambo ndzace, pakutoma nkhabe khala pantsi mbatoma kunyerezera kuti na anyankhondo pikwi khumi, ndinakwanisa kumenyana na ule anadza na pikwi makumawiri? Angakhonda kucita penepi, anamalisira kutuma mwana nkate kuna mambo ndzace mbali kutali, kuti abverane na iye pya ntendere. Na tenepo, nkhabe m'bodzi wanu anakwanisa kukhala nyakupfundza wanga, angakhonda kusiya pyonsene pina iye. “Munyu ngwadidi, mbwenye ungasuluka unadza kadzipa tani pontho? Nkhabe basabve ibodzi inafuna kucita iwo, peno pa mataka, peno kupasa ndimu mataka. Unakwatwa mbutayiwa kunja. “Ule ana makutu a kubva, mbabve.” Onsene anyakukumbusa misonkho na anyakudawa, akhafendedzera Yezu toera abve pikhalonga Iye. Mbwenye afarisi na anyakudziwisa a Mwambo, akhadungunya mbalonga tenepa: “Mamuna uyu asatambira anyakudawa, mbadya na iwo pabodzi!” Na tenepo, Yezu aapanga nsanje uyu: “Mbani pakati panu ana dzana ya mabira, ingataika ibodzi, mbakhonda kwenda kaisaka mpaka kuigumana, mbasiya makumapfemba na mapfemba n'thando? Angaigumana, asaikwata mbaiyikha pa phewa na kukomerwa, mbaenda nayo ku nyumba. Angafika, asacemera axamwali ace na andzace a pa cisa, mbalonga tenepa: ‘Tsandzayani pabodzi na ine, thangwi bira yanga ikhadataika, ndaigumana.’ Ine ndisakupangani kuti, ndi sawa-sawambo na kudzulu, Kunagumanika kutsandzaya kukulu kakamwe na thangwi ya nyakudawa m'bodzi adachunyuka kudawa kwace, kupiringana kutsandzaya kukhali na iwo na anthu makumapfemba na apfemba akulungama akusowa mathangwi akuchunyuka. “Peno mbani nkazi anakhala na kobiri khumi za ndzaya-ndzaya, angataikirwa na ibodzi, mbakhonda gasa nyale, na kupsaira n'nyumba mwace, mbaisaka mpaka kuigumana? Angaigumana, anacemeresa axamwali ace, na andzace a pa cisa mbaapanga tenepa: ‘Tsandzayani pabodzi na ine, thangwi ndaigumana kobiri yanga ikhadataika.’ Ndinakupangani kuti tenepa ndi sawa-sawambo na anju za Mulungu, zisatsandzaya na thangwi ya munthu m'bodzi nyakudawa angachunyuka.” Yezu alonga pontho kuti: “Mamuna m'bodzi akhali na anace awiri aamuna. Mwana wa ng'ono alonga tenepa kuna baba wace: ‘Baba, ndipaseni cincino, phindi yanga ya unthaka.’ Na tenepo, iye aagawaniza anace awiri ene mpfuma yace. “Mudapita ntsiku pang'ono, mwana wang'ono agumanya pyace pyonsene, mbaenda dziko inango ya kutali. Kweneko aenda kabvunga pyace pyonsene pikhakhala na iye, na makhaliro ace a kuipa akhacita iye. Mudamala iye kubvunga pyace pyonsene, mwaoneka njala ikulu n'dziko eneyo, iye mbatoma kuthabuka. Na thangwi eneyo, asaka basa kwa munthu m'bodzi wa kweneku, munthu unowu mbamuendesa kumunda kwace kuti akhadyese nkhumba. Kweneko, na njala ikakhala na iye, akhafuna kuti adye pyace pikhadya nkhumba, mbwenye na penepyo pyene nkhabe akhampasa. “Ekha-ekha, anyerezera tenepa: ‘Mbangasi anyabasa a baba ana phoso yakukwana, ine ndiri kuno mbandifa na njala! Ndinalamuka mbandibwerera kuna baba wanga, ndikhampange tenepa: Baba, ndadawa kudzulu na kuna imwe. Sidakwana kucemerwa pontho mwana wanu tayu. Nditambireni ninga m'bodzi wa nyabasa wanu.’ Buluka penepo alamuka mbabwerera pontho kuna baba wace. “Mbali kutali, baba wace amuona. Na kubva ntsisi zikulu na mwana wace, anthamangira mban'khumbatira na kumpsompsona. “Mwana alonga tenepa: ‘Baba, ndadawa kudzulu na kuna imwe. Sidakwana kuti mundicemere pontho mwana wanu.’ “Mbwenye baba apanga anyabasa ace tenepa: ‘Cimbizani! Bweresani nguwo zadidi kakamwe mum'bvazike. Muikheni mphete ibodzi n'cala mwace, mbamumbvazika ntsapato m'myendo mwace. Bweresani pontho mwana ng'ombe wa kunenepa, mumuphe ticite phwandu pontho tisekere. Thangwi mwana wanga uyu akhadafa, lero alamuka. Akhadataika, lero agumanika.’ Mbatoma kucita phwandu yawo. “Mukhacitwa penepi, mwana wankulu akhali ku munda. Mudabwerera iye mbafika dhuzi na pa nyumba, abva anthu ali kuimba mbakhabvina. Na tenepo, acemera nyabasa m'bodzi mbam'bvundza kuti: ‘Ndi ninji pinacitika?’ Nyabasa atawira tenepa: ‘M'bale wako abwera. Baba wako apha mwana ng'ombe wa kunenepa, thangwi antambira wa m'maso pontho na manungo ace akuwanga.’ “Mwana wankulu aipirwa pikulu kakamwe, mbakhonda na kupita kwene. Na tenepo, baba wace abuluka kunja mbakhankakamiza kuti apite. Mbwenye iye atawira tenepa: ‘Ndina pyaka pizinji mbandikuphatirani basa ninga bichu mbandikhonda kupwaza mwambo ubodzi wanu. Na tenepo, mudzati kundipasambo mbuzi ene ibodzi, toera ine ndicitembo phwandu na axamwali anga. Mbwenye mwana wanu uyu adamala kubvunga pinthu pyanu pyonsene, na akazi anyalukwali, lero abwera, imwe mwam'phera mwana ng'ombe wa kunenepa!’ “Baba antawira tenepa: ‘Mwana wanga, iwe usakhala na ine ntsiku zonsene, pontho pyonsene pina ine mphyakombo. Mbwenye tikhafunika ticite phwandu toera kupangisa kukomerwa kwathu. Thangwi m'bale wako uyu akhadafa, lero alamuka. Akhadataika, lero agumanika.’ ” Yezu aapanga anyakupfundza ace kuti: “Akhalipo mamuna m'bodzi wakupfuma, akhakhala na nyabasa wace m'bodzi akhamuonera mpfuma zace. Ntsiku ibodzi apangiwa kuti: ‘Nyabasa wako asabvunga mpfuma zako.’ Na tenepo, iye ancemera nyabasa wace mbam'bvundza kuti: ‘Ndi ninji penepi pinakhala ine kubva kuna iwe? Sasanyira basa yako, thangwi ndisafuna kukubulusa basa.’ “Penepo nyabasa atoma kunyerezera ekha ene kuti: ‘Kodi ndinacita anji ndingabuluswa basa? Lima, ine nkhabe kwanisa. Kwenda mbandiphemba cakudya, ndisabva manyadzo. Ha! Ndapidziwa pinafuna kucita ine, kuti ndingathamangiswa pa basa ndione anthu akunditambira m'manyumba mwawo.’ “Na tenepo, atoma kucemeresa anyamangawa onsene a mbuya wace. Penepo abvundzisa wakutoma kuti: ‘Iwe una mangawa a ntengo wanji na mbuya wanga?’ Iye atawira kuti: ‘Ndina mangawa a nkhali dzana za mafuta a kudya.’ “Penepo nyabasa ampanga tenepa: ‘Kwata tsamba yako, khala pantsi na kucimbiza, lemba makumaxanu.’ “Buluka penepo abvundzisa nyamangawa waciwiri kuti: ‘Iwembo una mangawa a ntengo wanji?’ Iye atawira tenepa: ‘Ndina mangawa a masakha dzana a tirigu.’ “Penepo nyabasa ampanga kuti: ‘Kwata tsamba yako, lemba makumasere.’ “Mbuya wa nyabasa uyu ansimba nyabasa wace wa kuipa na thangwi ya kucenjera kwace. Thangwi ana a dziko ino acenjera pikulu kakamwe pa kubverana kwawo, kupita ana a cieza. Na thangwi eneyo, Ine ndisakupangani kuti: dziwani kuziphatisa basa mpfuma za dziko ino ya kuipa, kuti muone axamwali, toera mudze katambirwe m'makumbi a kwenda na kwenda, mpfuma zanu zingadza kamala. “Ule ananyindirika pa pinthu ping'ono, ananyindirikambo pa pinthu pikulu. Mphapo anakhonda kunyindirika pa pinthu ping'ono, anacimwanikambo kunyindirika pa pinthu pikulu. Thangwi imwe mungakhonda kunyindirika pa mpfuma za dziko ino, mbani anafuna kukunyindirani pa mpfumadi ya maso? Pontho mungakhonda kunyindirika na pinthu pya andzanu, mbani anafuna kukupasani pinthu pyanu? “Nkhabe munthu anakwanisa kuphatira basa ambuya awiri. Thangwi anaida m'bodzi mbafuna unango, peno analemedza m'bodzi mbapwaza unango. Apo lekani kuphatira basa Mulungu, uku mbamuphatira pontho kobiri.” Afarisi, anthu akuumirwa na kobiri, akhabva pyonsene ipi, mbakhasingirira Yezu. Na tenepo, Yezu aapanga kuti: “Imwe musapangizika ninga adidi pamaso pa anthu. Mbwenye Mulungu asaidziwa mitima yanu. Thangwi pire pinanyerezera anthu kuti ndi pinthu pikulu kakamwe, pamaso pa Mulungu ndi pinthu pyakunyanyasa.” “Mwambo wa Mozesi na pipfundzo pya maporofeta pikhaphata basa mpaka pa midzidzi ya Juwau Bhatixta. Apo kutomera pa midzidzi eneyo kwenda kutsogolo, Mphangwa Zadidi za Umambo wa Mulungu, ziri kumwazwa. Pontho, anthu onsene asasaka kupitamo na mphambvu mu Umambo unowu. Kubulusa phindi ing'ono basi pa Mwambo wa Mulungu, pisanentsa pikulu kakamwe kupiringana kumalisa kudzulu na pantsi. “Mamuna onsene anamwalana na nkazi wace mbakwatana na unango mbacita na iye banja, ali kucita upombo. Ulembo anacita banja na nkazi wakumwaliwa na mamuna wace, asacitambo upombo.” Yezu athimiza na kulonga kuti: “Akhalipo mamuna m'bodzi m'pfumi akhabvala nguwo za ntengo ukulu, pontho akhakhala mbacita phwandu ntsiku zonsene. Pa nsuwo pa m'pfumi, pakhali na mamuna m'bodzi wa kucherenga, na pironda m'manungo, dzina yace ndi Lazaru, mbakhaphemba cakudya. Iye akhafuna kudya manyezu akhagwa pa thando pakhadya m'pfumi. Na anambwa ene akhadza kam'myanguta pironda pyace. “Mudakwana ntsiku yace, nyakucherenga afa mbakwatiwa na anju za Mulungu kwenda dhuzi na Abharaamu. Buluka penepo, m'pfumi adza kafambo mbaenda kaikhwa. Mu mbuto ya anyakufa, mukhathabuswa m'pfumi, pidathukula iye maso, aona na kutali Abharaamu, mbali pabodzi na Lazaru n'khundu mwace. Na tenepo, m'pfumi akhuwa mbalonga kuti: ‘Baba Abharaamu, ndibverenimbo ntsisi! Nditumirenimbo Lazaru abvike ntsonga ya cala cace m'madzi, toera adze kanditontholese lirimi yanga. Thangwi ndiri kuona nyatwa kakamwe m'moto muno.’ “Mbwenye Abharaamu antawira tenepa: ‘Mwana wanga, kumbuka kuti pikhakhala iwe m'maso, watambira pinthu pyadidi, mbwenye Lazaru akhatambira pinthu pyakuipa. Na tenepo, cincino iye pano ali kutsandzaya, mbwenye iwe uli kuonambo nyatwa. Pontho pakati apa, kubulukira kweneko kuna iwe mpaka pano, pana djenje yakuzika kakamwe. Na tenepo, nkhabe kwanisika kuti ale anafuna buluka kuna imwe adze kuna ife, peno ale anafuna buluka kuna ife adze kuna imwe.’ “Penepo m'pfumi alonga kuti: ‘Ngakhala ndi tenepo, baba Abharaamu, ndisakuphembani kuti munditumirembo Lazaru aende ku nyumba kwa baba wanga. Thangwi ine ndina abale anga axanu. Na tenepo, nsiyeni kuti aende kaacenjeze, toera iwo akhonde kubwerambo pa mbuto ino ya nyatwa.’ “Abharaamu antawira tenepa: ‘Abale ako ana Mwambo wa Mozesi na mabukhu a maporofeta. Mbaabvere.’ “Apo m'pfumi antawirambo kuti: ‘Baba Abharaamu, penepyo nkhabe kwana. Mbwenye munthu wakulamuka pa kufa, angaenda kalonga na iwo, iwo anachunyuka kudawa kwawo.’ “Mbwenye Abharaamu antawira kuti: ‘Iwo angacimwana kubvera Mozesi na maporofeta, pinacimwanikiratu kakamwe kuti iwo abvere munthu wakulamuka pa kufa.’ ” Yezu alonga kuna anyakupfundza ace kuti: “Ndimo mwene, pinthu pyonsene pinagwisa anthu n'kudawa, pinati picitike. Mbwenye dzedze nja ule anacita kuti pinthu penepi picitike. Pikhali pyadidi kum'mangirira libwe n'khosi mwace mbaponyiwa m'bara, kupiringana kugwisa n'kudawa mwana wang'ono ninga uyu. Citani mphole! “Ngakhala m'bale wako adawa, nsandike. Iye angachunyuka, mulekerere. Angakudawisira kanomwe pa ntsiku, iye mbabwera kuna iwe kanomwe, mbalonga tenepa: ‘Ndachunyuka.’ Iwe mulekerere.” Apoxtolo aphemba Yezu kuti: “Mbuya, tithimizireni kukhulupira kwathu!” Iye aatawira tenepa: “Ngakhala imwe muna cikhulupiro ca kulandana na thunga ya mbeu ing'ono, munakwanisa kupanga muti wa nsambvu uyu kuti: ‘Dulika uyende kachekeke m'bara,’ iwo unakubverani.” “Mbani mwa imwe angakhala na nyabasa m'bodzi anam'phatira basa ya kulima kumunda, peno ya kukumbiza mabira, iye angafika buluka kumunda mbampanga kuti: ‘Bwera pa thando, utome kudya?’ Nkhabe kucitika! Anampanga kuti asasanyike atome kum'phikira pyakudya, adye, amwe. Angamala anadza kampanga kuti adyembo mbamwambo. Musanyerezera kuti iye ana pereka takhuta kuna nyabasa, thangwi ya kuncitira pidantuma iye? Nkhabe. Na tenepo, imwe musafuna mucite pibodzi-bodzi. Mungamala kucita pyonsene pidatumwa imwe, longani tenepa: ‘Ife ndife anyabasa ene pyathu. Thangwi tacita pire basi pidapangwa ife kuti tipicite.’ ” Mukhaenda Yezu ku Djerusalema, apita na m'madire mwa Samariya na Galileya. Mukhapita iwo n'cisa cibodzi, anyamatanya khumi aenda kuna Iye, mbalimira na kutali, mbakhuwa tenepa: “Yezu, Mpfundzisi, tibvereni ntsisi!” Yezu aalang'ana mbaapanga tenepa: “Ndokoni mukhapangizike kuna anyantsembe kuti akudinkheni!” Mukhaenda iwo, awangiswa. M'bodzi wawo, mudaona iye kuti awangiswa, abwerera mbakhakuza Mulungu na mphambvu zonsene. Agodama pa myendo pa Yezu, mbapereka takhuta. Unowu akhali wa ku Samariya. Na tenepo, Yezu am'bvundza kuti: “Kodi si khumi tayu adawangiswa? Anango apfemba ali kupi? Ndi thangwi yanji abwerera kakuza Mulungu ndi munthu wakudza basi?” Na tenepo, Yezu ampanga kuti: “Lamuka, ndoko pyako. Kukhulupira kwako kwakupulumusa.” Afarisi anango, abvundzisa Yezu kuti: “Umambo wa Mulungu unafika lini?” Iye atawira tenepa: “Umambo wa Mulungu nkhabe bwera mbuoneka. Nkhabe anadza kalonga kuti: ‘Lang'anani! Uli pano.’ Peno ‘Uli kule.’ Thangwi Umambo wa Mulungu uli pakati panu.” Buluka penepo, Iye apanga anyakupfundza ace kuti: “Unadza kafika n'dzidzi wa kuti imwe munati mufune kuona ntsiku ibodzi ya kubwera kwa Ine, Mwana wa Munthu, mbwenye nkhabe kudza kaiona. Anango anakupangani kuti: ‘Lang'anani ali pano,’ peno ‘lang'anani ali pale.’ Mbwenye lekani kwenda mbamuatowera. Thangwi sawa-sawa ninga njazi isacetuma buluka pa nkhomu ibodzi ya kudzulu mpaka ku nkhomu inango, tenepa pinacitikambo pa ntsiku inadza kabwera Ine, Mwana wa Munthu. Mbwenye pakutoma, Ine ndisafunika ndithabuke, pontho ndikhondiwe na anthu a ntsiku zino. “Ninga pidacitika pa ntsiku za Nowa, pinacitikambo sawa-sawa pa ntsiku za Ine, Mwana wa Munthu. Anthu onsene akhadya, akhamwa. Amuna akhacita mabanja, akazi akhaperekwa m'mabanja, mpaka ntsiku idapita Nowa mu arika. Na tenepo, madzi adzala, onsene mbamala kufa na madzi. “Pibodzi-bodzi pyacitikambo pa n'dzidzi wa Loti. Anthu akhadya, akhamwa, akhagula, akhagulisa, akhacheka pontho akhamanga nyumba. Mbwenye pa ntsiku idabuluka Loti mu Sodhoma, kudzulu kwabvumba moto wa myala yakugaka, mbumala kupha onsene. “Na tenepo, pinacitikambo sawa-sawa ntsiku inafuna kubulukira Ine, Mwana wa Munthu. Ntsiku eneyo, ule anagumanika pa ntsoyi ya nyumba yace, mbaleke kuchita toera akhakwate pinthu pyace n'kati mwa nyumba. Sawa-sawa na ule ali ku munda, mbaleke bwerera n'nduli. Kumbukani nkazi wa Loti! Munthu anasaka kukoya moyo wace, anauluza. Mbwenye ule analuza moyo wace, anaugumana. Ndinakupangani kuti masiku enewa, anthu awiri anagumanika ali kugona pa talimba ibodzi ene, m'bodzi anakwatiwa, unango anasiyiwa. Akazi awiri anagumanika ali kupeya pabodzi pene, m'bodzi anakwatiwa, unango anasiyiwa. [Amuna awiri anagumanika ali kumunda, m'bodzi anakwatiwa, m'bodzi anasiyiwa.”] Na tenepo, anyakupfundza ace am'bvundza kuti: “Mbuya, pinacitika kupi penepi?” Iye atawira tenepa: “Pale panagumanika cinthu ca kufa, penepo ndipo panagumanyikana malezi.” Na tenepo, Yezu alonga kuna anyakupfundza ace nsanje ubodzi toera kuapangisa kuti asafunika aphembere mbakhonda kuneta. Iye atoma kulonga tenepa: “Akhalipo mu nzinda ubodzi nyakutonga miseru m'bodzi wakukhonda kugopa Mulungu, pontho akhali munthu akhakhonda kulemedza andzace. Mu nzinda unowu, akhalipombo nkazi m'bodzi adaferwa na mamuna wace, akhaenda kazinji kene kuna nyakutonga miseru unowu, mbakhalonga tenepa: ‘Nditongerenimbo nseru wanga una ine na nyamalwa wanga.’ ” “Nyakutonga miseru amala ntsiku zingasi mbakhakhonda. Mbwenye pakumalisa alonga ekha ene kuti: ‘Ine nkhabe gopa Mulungu, pontho nkhabe munthu m'bodzi analemedza ine pantsi pano. Mbwenye na thangwi ya kundinyangula kunandicita manferwa uyu, ine ndinati ndin'gwandire nseru wace, toera akhonde kudza kandisanya pontho.’ ” Penepo Mbuya athimiza pontho na kulonga kuti: “Bvani pinalonga ntongi uyu wa kuipa. Nkhulongera kuti Mulungu nkhabe kudza kagwanda miseru ya anthu ace adasankhula iye, anan'dembetera masiku na masikati? Musanyerezera kuti Iye anaasiya mbadikhira n'dzidzi ukulu ene? Ine ndisakupangani kuti Mulungu anaitonga miseru ya mbumba yace na mwansanga. Mphapo Ine, Mwana wa Munthu ndingabwera, nkhulongera kuti ndinati ndigumane kukhulupira pantsi pano?” Kuna ale akhanyerezera okha ene kuti mbakulungama, mbakhapwaza andzawo, Yezu aapanga nsanje uxu: “Amuna awiri aenda kaphembera mu Nyumba ya Mulungu. M'bodzi akhali nfarisi, m'bodzi akhali nyakukumbusa misonkho. Nfarisi alimira mbakhaphembera na muntima mwace tenepa: ‘Ho! Mulungu, ndisapereka takhuta kuli imwe, thangwi ine ndasyana na anthu anango ninga awa: Mambava, a kuipa, na anyaupombo. Pontho ndasyana na uyu nyakukumbusa misonkho. Ine ndisapimana cakudya kawiri pa sumana, pontho pa pinthu pyanga pyonsene pina wina ine, ndisabulusa cacikhumi.’ “Mbwenye nyakukumbusa misonkho akhala kutali, mbakhacimwana na kulang'ana kwene kudzulu, mbwenye akhamenya cifuwa cace mbakhalonga kuti: ‘Mulungu wanga, ndibverenimbo ntsisi, thangwi ndine nyakudawa.’ “Yezu amalisa na kulonga tenepa: Ine ndisakupangani kuti uyu nyakukumbusa misonkho, ndiye basi adalekererwa na Mulungu. Ndzace nkhabe. Thangwi ule anapikuza anadza kacepeswa. Apo ule anapicepesa anadza kakuzwa.” Penepo, anthu anango akhabweresa ana ang'ono kuna Yezu toera Iye aakhuye. Anyakupfundza ace na kuona penepyo, akhaasandika. Mbwenye Yezu acemera ana mbadza dhuzi na Iye, mbalonga kuti: “Asiyeni ana abwere kuna Ine, lekani kuakhondesa. Thangwi Umambo wa Mulungu ndi wa ale adalandana na iwo. Ndimo mwene, ndisakupangani kuti: Ule anakhonda kutambira Umambo wa Mulungu ninga mwana ng'ono, cipo anadza kapitamo.” Mamuna m'bodzi wa mbiri am'bvundza kuti: “Mpfundzisi Wadidi, ndisafuna ndicitenji toera ndikhale na upulumuki wakukhonda kumala?” Yezu antawira tenepa: “Thangwi yanji usandicemera wadidi? Wadidi ndi m'bodzi basi, ndiye Mulungu. Iwe usadziwa matongero analonga tenepa: ‘Leka kucita upombo, leka kupha munthu, leka kuba, leka kukhala nyamaso wa uthambi, lemedza baba wako na mai wako.’ ” Apo mamuna antawira tenepa: “Penepi pyonsene, ine ndisapicita kutomera mbandiri mwana.” Yezu pidabva Iye penepyo, ampanga tenepa: “Casala cinthu cibodzi kuna iwe. Gulisa pyonsene pina iwe, kobiri yace upase anyakucherenga. Tenepa unakhala na mpfuma kudzulu. Ungamala bwera, unditowere.” Mamuna na kubva penepyo, atsukwala pikulu, thangwi akhadapfuma pikulu kakamwe. Yezu na kumuona kutsukwala kwace alonga tenepa: “Pisanentsadi pikulu kakamwe kuna apfumi kuti apite mu Umambo wa Mulungu! Ndimo mwene, pisanentsa pikulu kakamwe kupitisa m'pfumi mu Umambo wa Mulungu, kupiringana kupitisa cinyama cikulu cinacemerwa kamelo mu benga ya ntsingano.” Anthu adabva penepyo atoma kubvundzisa kuti: “Na tenepo, mbani anakwanisa kupulumuka?” Apo Yezu atawira kuti: “Pinacimwanika kuna anthu, kuna Mulungu pisakwanisika.” Penepo Pedhru alonga kuti: “Lang'anani, ife tasiya nyumba zathu mbatikutowerani.” Yezu atawira tenepa: “Ndimo mwene, ndisakupangani kuti: Nkhabe munthu anasiya nyumba yace, nkazi wace, abale ace, ababa ace, peno ana ace na thangwi ya Umambo wa Mulungu, mbakhonda kubwezerwa pa midzidzi ino pinthu pizinji kakamwe, pontho mbakhonda kutambira upulumuki wakukhonda kumala pa midzidzi inafuna kudza.” Penepo Yezu acemera pa khundu anyakupfundza ace khumi na awiri, mbaapanga tenepa: “Lang'anani, ife tiri kwenda ku Djerusalema. Kweneko pinacitika pyonsene pidalemba maporofeta na thangwi yanga, Ine, Mwana wa Munthu. Ine ndinadza kaperekwa m'manja mwa anthu adakhonda kukhala madjuda. Iwo anadza kandisingirira, mbanditikana, na kundiphulira mata. Pontho anati andimenye na n'chamu, angamala mbadza kandipha. Mbwenye pa ntsiku yacitatu, ndinadza kalamuka pa kufa.” Mbwenye anyakupfundza acimwana kupibvesesa pinthu penepyo. Thangwi pikhalongera mafala enewa, pikhali pinthu pyakubisala kuna iwo, pontho iwo hakhapidziwa tayu ndi ninji pikhalongera Yezu. Yezu mukhafika iye dhuzi na nzinda wa Djeriko, agumana boli-boli m'bodzi mbali nawa pantsi, n'khundu mwa njira, mbakhaphemba pinthu. Mukhabva iye mbumba mbikhapita, iye abvundzisa kuti ndi ninji penepi. Apo anthu antawira kuti ndi Yezu wa ku Nazareti ali kupita. Na tenepo, boli-boli atoma kukhuwa mbakhalonga kuti: “Yezu, Mwana wa Dhavidhi, ndibverenimbo ntsisi!” Anthu akhaenda kutsogolo akhansandika toera amatame. Mbwenye iye akhakhuwiratu kakamwe, mbakhalonga kuti: “Yezu, Mwana wa Dhavidhi, ndibverenimbo ntsisi!” Yezu alimira mbancemeresa. Mphapo pidafika iye dhuzi Yezu am'bvundza kuti: “Usafuna kuti ndikucitirenji?” Iye atawira kuti: “Mbuya, ine ndisafuna ndione.” Yezu ampanga kuti: “Ona, wawanga! Kukhulupira kwako kwakuwangisa.” Pa n'dzidzi ubodzi ene, iye atoma kuona pontho, mbapasa mbiri Mulungu, mbatoma kutowera Yezu. Na tenepo, anthu onsene adapyona penepyo atoma kusimba Mulungu. Yezu apita mu Djeriko, mbakhagwanda na mu nzinda. Mwenemu mukhali na mamuna m'bodzi wa kupfuma, dzina yace ndi Zakeu, nkulu wa anyakukumbusa misonkho. Iye akhafuna kuona Yezu, mbwenye akhacimwana thangwi ya mwinji wa anthu, pontho iye akhadabvira. Na tenepo, Zakeu athamanga kutsogolo kwa mbumba, mbakwira m'muti wa nsambvu toera amuone, thangwi Yezu akhafuna kupita na penepo. Mudafika Yezu penepo, alang'ana n'dzulu mbalonga kuna Zakeu kuti: “Zakeu, chita na mwansanga thangwi lero ndisafuna ndikhale n'nyumba mwako.” Na tenepo, Zakeu achita na mwansanga, mbantambira na kukomerwa. Onsene adaona penepyo, atoma kudungunya mbalonga kuti: “Mamuna uyu aenda kaphemba dalo ku nyumba kwa nyakudawa!” Mbwenye Zakeu alamuka, mbalonga kuna Mbuya kuti: “Lang'anani Mbuya, kutomera lero ndinagawa pakati mpfuma yanga, phindi inango mbandiipasa anyakucherenga. Pontho ngakhala ndabera munthu, ndinam'bwezera kanai pa pidankwatira ine.” Na tenepo, Yezu alonga kuti: “Lero upulumuki wapita n'nyumba ino, thangwi mamuna uyu ndi wa dzindza ibodzi ene ya Abharaamu. Thangwi Ine, Mwana wa Munthu, ndabwera kakwata na kupulumusa ule adataika.” Yezu alonga nsanje ubodzi kuli ale akhabva pikhalonga Iye, thangwi akhali dhuzi na ku Djerusalema. Pontho, mbumba ikhanyerezera kuti Umambo wa Mulungu unafika na mwansanga. Na tenepo, Yezu aapanga kuti: “Mamuna m'bodzi wa dzindza ya kubvekera, abuluka mbaenda ku dziko inango ya kutali, toera kweneko aende kapaswe cidzo ca umambo, angamala abwerere. Na tenepo, acemera anyabasa ace khumi, aapasa kobiri khumi, mbaapanga tenepa: ‘Ifambiseni kobiri iyi mpaka kubwera kwanga.’ “Mbwenye anthu anango a n'dziko mwace, akhanzonda. Na tenepo, atuma anthu n'nduli mwace, kuti aende kalonge kukhaenda iye, na mphangwa izi: ‘Ife nkhabe kunfuna mamuna unowu kuti akhale mambo wathu.’ “Mamuna aupaswa umambo, mbabwerera ku nyumba. Penepo, acemeresa anyabasa ace akhadapasa iye kobiri, toera adziwe kuti awina ntengo wanji. “Wakutoma afika mbalonga tenepa: ‘Mbuya, kobiri yanu ire idandipasa imwe, ine ndawina nayo zinango khumi.’ “Mbuya wace atawira tenepa: ‘Wacita pyadidi. Ndiwe nyabasa wadidi! Thangwi wakwanisa kunyindirika pa pinthu ping'ono, unati utonge mizinda khumi.’ “Nyabasa waciwiri abwera mbalonga tenepa: ‘Mbuya, na kobiri yanu ire idandipasa imwe, ine ndawina nayo zinango zixanu.’ “Mbuya wace ampanga tenepa: ‘Iwe unadza katongambo mizinda mixanu.’ “Nyabasa unango afika mbalonga tenepa: ‘Mbuya, kobiri yanu ndi iyi. Ine ndaimangira pa cinguwo mbandiibisa. Ndikhakugopani, thangwi ndimwe munthu wakunentsa. Musabulusa pidakhonda ikha imwe, pontho musabvuna pidakhonda bzala imwe.’ “Mbuya wace atawira tenepa: ‘Iwe ndiwedi nyabasa wa kuipa! Ndinakukonesa na mafala ako pontho. Iwe ukhapidziwa kuti ndine munthu wa kunentsa. Ndisabulusa pidakhonda ikha ine, pontho ndisabvuna pidakhonda bzala ine. Ndi thangwi yanji mphapo, wakhonda kuiyikha kobiri yanga n'nyumba zinakoyera anthu kobiri? Na tenepo, pa kubwerera kwanga, mbidaipaswa na m'bairo.’ “Mbapanga ale akhakhala penepo kuti: ‘Mpokosereni kobiri yace muipase ule ana kobiri khumi.’ “Iwo atawira tenepa: ‘Mbuya, iye anazo kale kobiri khumi!’ “Mbuya wawo aapanga tenepa: ‘Ndinakupangani kuti ule anapyo, anadza kapaswa pontho pinango. Mbwenye ule adapisowa, anadza kapokoserwa na pire pyene pina Iye.’ Cincino, ndibwereseni kuno anyamalwa anga, ale akhakhonda kuti ine ndikhale mambo wawo. Apheni pamaso panga.” Yezu mudamala Iye kulonga penepyo, atsogola kwenda ku Djerusalema. Mukhakhala Iye dhuzi na cisa ca Bhetifaji na ca Bhetanya, pa phiri ya Mulivera, atuma anyakupfundza ace awiri, mbaapanga tenepa: “Ndokoni ku cisa ciri patsogolo panu. Pinacita imwe pite mwenemu, munagumana mwana buru wakumangirwa, kuti cipo adzati kupakirwa na munthu. Nsudzuleni, mubwere na iye kuno. Mungabvundziwa na munthu kuti: ‘Thangwi yanji musansudzula?’ Mpangeni kuti: Mbuya asanfuna.” Iwo aenda, mbagumana pyonsene ninga mukhadapangwa iwo na Yezu. Mukhansudzula iwo mwana buru, anacinthu abvundzisa kuti: “Thangwi yanji musasudzula mwana buru?” Iwo atawira tenepa: “Mbuya asanfuna.” Na tenepo, iwo ankwata mwana buru mpaka kuna Yezu. Akwata nguwo zawo mbaziyikha pa nsana wa mwana buru, mbaphedza Yezu kupakira. Mukhaenda Iye, mbumba ikhaenda mbithasika nguwo zawo n'njira. Mukhafika Yezu dhuzi na panterero wa phiri ya Mulivera, mwinji onsene wa anyakupfundza ace, watoma kukuza Mulungu na mphambvu na kukomerwa konsene, na thangwi ya pirengo pyonsene pikhadaona iwo, mbakhakhuwa tenepa: “Mbasimbwe Ule Mambo anadza na dzina ya Mbuya!” “Ntendere kudzulu, na mbiri kuna Mulungu!” Penepo, afarisi anango akhali pakati pa mbumba, alonga kuna Yezu kuti: “Mpfundzisi, matamisa anyakupfundza ako!” Yezu atawira tenepa: “Ine ndisakupangani kuti iwo angamatama, myala inakhuwa!” Yezu mudafika iye dhuzi na Djerusalema, aona nzinda, mbatoma kuulirira. Mbalonga tenepa: “Ha! Djerusalema! Mbudadziwa pyako lero ene cire cinadzesa ntendere! Mbwenye cincino iwe nkhabe kwanisa kupiona penepi na maso ako. Zinafika ntsiku za kuti anyamalwa ako anakucitira mpanda, mbakuzungulira na iwo na kukufungira m'makhundu onsene. Pontho anakugwisa pantsi iwe na ana ako ene. Nkhabe kudza kasala mwala padzulu pa mwala unango, thangwi iwe wakhonda kudzindikira n'dzidzi udadza kakupulumusa Mulungu.” Buluka penepo, Yezu apita mu Nyumba ya Mulungu, mbatoma kuthamangisa ale akhagulisa mwenemu, mbalonga tenepa: “Pyalembwa M'bukhu ya Mulungu kuti: ‘Nyumba yanga inadza kakhala nyumba ya kuphemberera.’ Mbwenye imwe mwaisanduza kuti ikhale ‘mphako ya kubisalira mambava. ’ ” Ntsiku zonsene, Yezu akhapfundzisa mu Nyumba ya Mulungu. Mbwenye akulu aanyantsembe, na anyakudziwisa a Mwambo, pabodzi na atsogoleri a mbumba, akhafuna kumupha. Mbwenye akhasaka kuti anapicita tani penepi. Thangwi mbumba yonsene ikhakomerwa na kubva mafala ace. Ntsiku inango, Yezu akhali mu Nyumba ya Mulungu mbakhapfundzisa mbumba, na kumwaza Mphangwa Zadidi. Na tenepo, afika penepo akulu aanyantsembe, na anyakudziwisa a Mwambo na mathubu, mbam'bvundza tenepa: “Kodi Iwe uli kucita pinthu penepi na mphambvu za utongi wa ani? Mbani akupasa mphambvu za utongi unowu?” Yezu atawira tenepa: “Ine ndisafunambo kukubvundzani. Ndipangeni: ‘Batixmu ya Juwau ikhali ya kudzulu peno ya anthu?’ ” Iwo akhaketesana okha-okha mbakhalonga tenepa: “Tingalonga kuti ndi ya kudzulu, Iye anadza kabvundza kuti: ‘Mphapo thangwi yanji imwe mwakhonda kuntawira Juwau?’ Mbwenye tingalonga kuti: Ndi ya anthu, mbumba yonsene iyi inatimenya na myala. Thangwi iwo asatawira kuti Juwau akhali mporofetadi.” Na thangwi eneyo, iwo atawira tenepa: “Ife nkhabe kupidziwa kuti ikhali ya ani.” Na tenepo, Yezu aapanga kuti: “Ine nkhabe kukupanganimbo na pang'ono pene, kuti ndi mphambvu za utongi wa ani zinacita na Ine pinthu penepi.” Buluka penepo, Yezu alonga kuna mbumba nsanje uyu: “Mamuna m'bodzi acheka miti ya mauva m'munda mwace, mbaurikisa na anthu anango anyakulima, pidamala iye acita ulendo mbakhala ntsiku zizinji. Pidakwana iwo n'dzidzi wa kubulusa mauva, iye atuma nyabasa wace m'bodzi kuna anyakulima, toera ampase phindi ya misapu ya mauva. Mbwenye anyakulima am'menya, mbam'bweza cimanja-manja. Mwanacinthu munda atuma nyabasa unango. Mbwenye iwo am'menya pontho, mban'nyadzisa, mbam'bweza cimanja-manja. Na tenepo, iye atuma pontho unango wacitatu. Mbwenye anyakulima am'phekesambo, mban'thamangisa. “Penepo mwanacinthu munda alonga kuti: ‘Ndinacitanji? Ndinatuma mwana wanga wa pa ntima, panango iwo angamuona, anamulemedza.’ “Mbwenye anyakulima mudaona iwo mwana, abverana okha-okha kuti: ‘Uyu ndiye mwanaciro unthaka. Tendeni timuphe, unthaka ukhale wathu.’ Na tenepo, iwo amponya kunja kwa munda wa mauva, mbamupha. “Mphapo ndi ninji pinafuna kuacita mwanacinthu munda? Iye anabwera, mbapha anyakulima ale, mbakwata munda wa mauva mbaupasa anango.” Na tenepo, mbumba mudabva iyo penepi yalonga kuti: “Penepi mbapileke kucitika.” Mbwenye Yezu aalang'anisa mwadidi mwene, mbaabvundza kuti: “Mphapo pisalongeranji pidalembwa m'Bukhu ya Mulungu kuti? “ ‘Mwala udakhondiwa na anyakumanga nyumba, ndiwo udadza kakhala mwala wakufunika kakamwe?’ Onsene anagwa padzulu pa mwala uyu ananyedzeka, mbwenye ule anagwerwa na iwo, anapeyeka kudza pfumbi.” Anyakudziwisa a Mwambo na akulu aanyantsembe, akhapidziwa kuti nsanje unowu ukhalongera iwo. Penepo pene, iwo akhasaka kuti anam'manga tani, mbwenye akhagopa mbumba. Na tenepo, atoma kunzonda. Atuma amuna kuna Yezu, mbakhala ninga anthu akulungama, kuti amuone ngakhala anadodomeka pa malongero ace, toera iwo akwanise kuona thangwi ya kumpereka m'manja mwa utongi wa ku Roma. Amuna enewa am'bvundza tenepa: “Mpfundzisi, ife tisadziwa kuti pire pinalonga imwe na pinapfundzisa imwe, ndimo mwene. Pontho tisadziwa kuti imwe nkhabe kutonga mbamulang'ana makhaliro a munthu. Mbwenye musapfundzisa njira ya Mulungu mwa ndimo mwene. Mphapo tipangeni: Pisatawirirwa kulipa nsonkho kuna Mambo Sezari, peno nkhabe?” Mbwenye Yezu, na kudziwa ucenjeri wawo, alonga tenepa: “Ndipangiseni kobiri ibodzi ya parata. Kodi nkhope na dzina iyi iri pa kobiri nja ani?” Iwo antawira kuti: “Mphya Sezari.” Penepo Yezu aapanga tenepa: “Pya Sezari, pasani Sezari, pya Mulungu, pasani Mulungu.” Iwo acimwana kuona mafala a kum'phata na iwo pamaso pa anthu. Na tenepo, amatama, mbadzumatirwa na matawiriro adacita Yezu. Asadhusi anango, ale analonga kuti anthu nkhabe kulamuka pa kufa, afendedzera Yezu, mbampanga kuti: “Mpfundzisi, Mozesi asiya amala kutilembera mwambo wa kuti, mamuna angafa, mbasiya nkazi mbadzati kubala na iye, m'bale wace wa mamuna asatongwa kuti apite kumusa na manferwa wa nkazi, toera ansiyire dzindza. Mphapo akhalipo amuna anomwe muubale mwawo. Wakutoma, apita kumusa, mbafa mbakhonda kunsiya na ana. Waciwiri, na wacitatu, na anango, apitambo na iye kumusa. Onsene pa unomwe wawo afa mbakhonda kubala na iye ana. Pa kumalisira nkazi afambo. Mphapo, pa ntsiku ya kulamuka kwa anyakufa, nkazi unowu anadza kakhala wa ani? Thangwi pa unomwe wawo apita na iye kumusa.” Yezu atawira tenepa: “Pantsi pano, ndipo panacita amuna mabanja, akazi mbaperekwa m'mabanja. Mbwenye anthu ale adakwanira kuti apite ku dziko ya kudzulu mbalamuka pa kufa, nkhabe kudza kacitabve banja, peno kuperekwa m'mabanja. Thangwi anadza kakhala ninga maanju, pontho hanadza kafabve tayu. Anakhala ana a Mulungu, thangwi ndi anthu a kulamuka pa kufa. Pontho, pya kuti anyakufa analamuka, Mozesi apipangisa kale padalonga Mulungu pa thundudzi, mbacemera Mbuya kuti ndi ‘Mulungu wa Abharaamu, Mulungu wa Izaki, pontho ndi Mulungu wa Djakobo.’ Penepi pisapangisa kuti Mulungu ndi Mulungu wa am'maso, si Mulungu wa anyakufa tayu. Thangwi kuna Iye onsene ali m'maso.” Anango anyakudziwisa a mwambo alonga tenepa: “Mwatawira mwadidi, Mpfundzisi!” Penepo, nkhabe munthu unango akhali na cipapu ca kum'bvundzisa. Na tenepo, Yezu aabvundza kuti: “Pisalongerwanji kuti Kirixtu ndi Mwana wa Dhavidhi?” “Thangwi iye ene Dhavidhi alonga m'bukhu ya Masalimu kuti: “ ‘Mbuya alonga kuna Mbuya wanga kuti: Khala ku nkono wanga wa madyo, mpaka pana ikha ine anyamalwa ako, ninga cinthu cakupwandira manyalo ako.’ Na tenepo, ngakhala Dhavidhi asancemera ‘Mbuya,’ anakhala tani pontho mwana wace?” Yezu mukhabveserwa Iye na mbumba yonsene, apanga anyakupfundza ace kuti: “Citani mphole na anyakudziwisa a Mwambo. Iwo asafuna kufamba na nguwo zakulapha, asafuna pikulu kakamwe kumwanyikwa na anthu m'mphambano, asafuna kusankhula mipando yakutoma mu nyumba za kuphemberera, pontho na kusankhula mbuto za kulemebza m'maphwandu. Asatapata nyumba za akazi adaferwa na amuna awo, mbaadhobha na kucita miphembero yakukhonda kugwandira. Anthu enewa, anati athabuswe pikulu kakamwe.” Yezu alang'ana mbaona apfumi mbakhaikha miyoni yawo n'combo cinaikhirwa miyoni. Mwenemu Yezu aonambo nkazi m'bodzi wakucherenga adaferwa na mamuna wace, mbaikhambo pikobiri pyace piwiri. Penepo Yezu alonga kuti: “Ndimo mwene, ndisakupangani kuti nkazi uyu, manferwa wakucherenga, apasa pikulu kakamwe kupita onsene. Thangwi onsene awa apasa mbasala na pinango. Mbwenye nkazi uyu, na ucherengi wace, apereka pyonsene pikhakhala na iye, pire pikhafuna kudya iye.” Anthu anango akhalonga na thangwi ya kubalikiswa kudacitwa Nyumba ya Mulungu na myala yadidi ya kubalika, pontho na miyoni ikhaperekwa kuna Mulungu. Mbwenye Yezu alonga kuti: “Musapiona pinthu ipi? Zinafika ntsiku kuti pyonsene ipi pinaona imwe, pinati pibodolwe. Nkhabe mwala ubodzi unafuna sala padzulu pa unango.” Penepo iwo atoma kum'bvundzisa Yezu kuti: “Mpfundzisi, pinacitika lini pinthu penepi? Pontho ndi cidzindikiro canji cinafuna kudza kaoneka, toera kupangisa kuti ipyo piri dhuzi na kufuna kucitika?” Yezu atawira tenepa: “Cenjerani! Lekani kunyengezwa na munthu. Thangwi azinji anati abwere na dzina yanga mbalonga kuti: ‘Ndine pano!’ Pontho mbalonga kuti: ‘Wafika n'dzidzi!’ Lekani kuatowerera. Pontho lekani kugopa mungabva mbapilongwa pya nkhondo na pya kusandukirana. Thangwi pisafunika kuti pakutoma picitike pinthu penepi, mbwenye si kulongera kumala kwa pantsi kunafikiratu n'dzidzi unowu tayu.” Na tenepo, Yezu athimiza na kulonga kuti: “Dziko na dziko inadza kamenyana, pontho umambo na umambo unadza kamenyana. Munadza kaoneka piteke-teke pikulu, njala na miliri mu mbuto zizinji. Pinadza kaoneka pinthu pyakugopsa, pontho na pidzindikiro pizinji kudzulu. “Mbwenye pinthu pyonsene ipi mbapidzati kucitika, munazondiwa mbamumangwa. Na tenepo, munatongiwa m'manyumba a kuphemberera, pontho mbakufungirani n'kaidi. Pontho imwe munati muperekwe pamaso pa amambo na atongi, na thangwi ya dzina yanga. Penepyo pinakucitani kuti imwe mukhale na n'dzidzi wa kundilongera umboni. Mbwenye Khurudzikani. Lekani kunentseka kuti munadza kalonganji. Thangwi Ine ndinakupasani mafala na ndzeru za kuti iwo anyamalwa anu onsene, anacimwana kukupokanyani peno kukukonesani. Imwe munati musandukirwe na ababanu, abale anu, na abale a dzindza, na axamwali. Pontho andzanu anango anati aphiwe na iwo. Anthu onsene anati akuideni na thangwi ya dzina yanga. Mbwenye nkhabe tsisi ibodzi ya munsolo mwanu inafuna kutaika. Mungawangisira, munapulumuka. “Mphapo mungaona nzinda wa Djerusalema mbuzungulirwa na anyankhondo, dziwani kuti uli dhuzi na kufudzika. Na tenepo, ale anagumanika mu Djudeya, mbathawire m'mapiri. Anagumanika mu nzinda mbabuluke, pontho ale anagumanika m'minda, mbaleke kupita mu nzinda. Thangwi ntsiku zenezo ndi za nyatwa, toera pisimbiswe pyonsene pidalembwa m'Bukhu ya Mulungu. Ntsiku zenezo zinati zikhale za nyatwa ikulu kuna ale ali na pathupi, na ale anayamwisa! Thangwi kunaoneka kutsukwala kukulu pa dziko, pontho Mulungu anadzesa nyatwa ikulu kakamwe kuna mbumba eneyi. Azinji anati aphiwe na tarasada, anango anakwatiwa mbaendeswa madziko onsene a pantsi ninga anyan'kaidi. Pontho mbumba idakhonda kukhala madjuda inati itapate dziko ya Djerusalema, mpaka kufikira wamala n'dzidzi wawo wa kutapata. “Pinaoneka pidzindikiro pa dzuwa, pa mwezi na pa nyenyezi. Pontho pantsi pano madziko onsene anatsukwala mbagopa na kutitimira kukulu kwa mabimbi a m'bara. Anthu azinji anati akomoke na kugopa pire pinafuna kudza kacitika pa dziko. Thangwi mphambvu za kudzulu zinatekenyeka. Na tenepo, anadza kaona Ine, Mwana wa Munthu mbandikhabwera padzulu pa khole na mphambvu, pontho na mbiri ikulu. Pinthu penepyo pingatoma kucitika, khalani dzololo mulamuse misolo yanu, thangwi muli dhuzi na kuombolwa.” Pakumala kulonga penepyo Yezu alonga nsanje uyu: “Lang'anani muti wa nsambvu na miti inango yonsene. Mungaiona mbitoma kuphwikira masamba ace, imwe ene musadziwiratu kuti malimwe ali dhuzi. Tenepambo, mungaona mbapicitika pinthu penepi, dziwani kuti Umambo wa Mulungu uli dhuzi.” “Ndimo mwene, ndisakupangani kuti pyonsene ipi pinacitika, anthu a midzidzi ino mbadzati kumala. Kudzulu na pantsi panamala, mbwenye mafala anga nkhabe kudza kamala.” Yezu amalisira na kulonga kuti: “Cenjerani! Lekani kudzudzumika na maphwandu a padziko, peno na pya kuledzeresa, peno na pinthu pinango pya dziko ino, toera mukhonde kututumuswa nayo ntsiku eneyo ingafika. Thangwi ntsiku eneyo inadzera anthu onsene a pantsi pano. Na tenepo, lang'anirani midzidzi yonsene mbamuphembera, toera mukhonde kugumana napyo pyonsene pinafuna kucitika, pontho mukhale dzololo pamaso pa Ine, Mwana wa Munthu.” Yezu akhapfundzisa anthu ntsiku zonsene mu Nyumba ya Mulungu. Mbwenye na masiku akhaenda kakhala pa phiri inacemerwa Mulivera mpaka mangwana mwace. Na macibese ene, mbumba yonsene ikhaenda kuna Yezu, mu Nyumba ya Mulungu kwenda kam'bvesera. Ikhali dhuzi phwandu ya Paxkwa, ntsiku ikhadya iwo mikate yakusowa ntombwe wakutupisa. Akulu aanyantsembe, na anyakudziwisa a Mwambo, akhasaka njira kuti anam'pha tani Yezu, thangwi iwo akhagopa mbumba. Na tenepo, Sathani apita muna Djuda anacemerwa Xikariyoti, m'bodzi wa anyakupfundza khumi na awiri a Yezu. Djuda aenda kabverana na akulu aanyantsembe, na atsogoleri a anthu anaonera Nyumba ya Mulungu, mbabverana na iwo njira ya kupereka Yezu m'manja mwawo. Penepyo iwo akomerwa napyo pikulu kakamwe, mbabverana kumpasa kobiri. Djuda apitawirira mbakhasaka n'dzidzi wadidi wa kumpereka, mbumba mbikhonda kupidziwa. Na tenepo, yafika ntsiku ya phwandu ya mikate ya kusoweka ntombwe wa kutupisa, ntsiku ikhatongwa madjuda kuikha ntsembe ya mwana bira wa Paxkwa. Yezu atuma Pedhru na Juwau mbaapanga kuti: “Ndokoni mukatisasanyire phwandu ya Paxkwa.” Mphapo iwo abvundzisa kuti: “Mbuya, ndi kupi kunafuna imwe kuti tiyende kaisasanyire?” Yezu aatawira tenepa: “Mungapita mu nzinda, munagumana mamuna m'bodzi adathuka nkhali yace ya madzi. Ntowereni mpaka n'nyumba inafuna kupita iye.” Mungafika longani na mwanacinthu nyumba tenepa: “Mpfundzisi ali kubvundzisa kuti: Iri kupi mbuto inafuna ine kudyera phwandu ya Paxkwa pabodzi na anyakupfundza anga? Iye anakupangisani mbuto ibodzi ikulu ya n'dzulu, yakumala kupakwa na pyombo pyonsene pinafunika. Sasanyirani mwenemu phwandu ya Paxkwa.” Anyakupfundza ace aenda, mbagumana pyonsene ninga mudaapangira Yezu, mbatoma kusasanyira phwandu ya Paxkwa. Pidakwana iwo n'dzidzi, Yezu aenda kadya na apoxtolo ace khumi na awiri. Penepo aapanga tenepa: “Ande, ndikhafunadi pikulu kakamwe kudya na imwe pabodzi phwandu iyi ya Paxkwa, mbandidzati kuona nyatwa! Thangwi ndisakupangani kuti, na lini Ine ndinadza kadya pontho phwandu iyi, mpaka ntsiku inafuna kudza kacitika iyo mu Umambo wa Mulungu.” Penepo, Yezu akwata ndiko ya vinyu, mbapereka takhuta kuna Mulungu, mbalonga kuti: “Kwatani ici, gawanani monsene. Thangwi Ine ndisakupangani kuti, kutomera lero mpaka kutsogolo, nkhabe kudza kamwabve vinyu iyi, mpaka kubwera kwa Umambo wa Mulungu.” Pakumala penepyo, akwata nkate mbapereka takhuta kuna Mulungu, aumenya mbaupasa anyakupfundza ace, mbalonga kuti: “Ici ndi manungo anga anaperekwa na thangwi yanu. Citani ipi mbamundikumbukira.” Mudamala iwo siyari, acita pibodzi-bodzi. Akwata ndiko, mbalonga tenepa: “Ndiko iyi ndi cibverano cipsa mu ciropa canga, cinacololekera imwe. “Mbwenye lang'anani, ule anafuna kundisandukira, ali pano na Ine pa thando ya kudya. Ndimo mwene, Ine, Mwana wa Munthu ndinati ndife, ninga mudapitongera Mulungu. Mbwenye nyatwa ndi yace ule anafuna kundisandukira!” Penepo anyakupfundza ace atoma kubvundzana okha-okha kuti: “Mbani pakati pathu anafuna kunsandukira?” Pontho pakati pa anyakupfundza a Yezu paonekambo mphoka inango, ya kufuna kudziwa mbani nkulu pakati pawo. Yezu aapanga tenepa: “Amambo a dziko ino, ana mphambvu za kuponderera mbumba. Pontho ale anatonga, asafuna kuti acemerwe anthu adidi. Mbwenye imwe si tenepo tayu. Pisatongwa kuti nkulu pakati panu akhale ninga mwana, pontho anatonga mbakhale ninga nyabasa. Mphapo mbani nkulu? Ndi ule anakhala pa thando ya kudya, peno ndi ule anan'dzesera cakudya? Ande, ndi ule anakhala pa thando ya kudya. Mbwenye pakati panu Ine ndakhala ninga ule anadzesa cakudya pa thando. Imwe ndimwe munakhala na ine pabodzi pa kuleserwa kwa nyatwa zanga. Na tenepo, thangwi Baba wanga andipasa Umambo, Ine ndinakupasanimbo Umambo ubodzi-bodzi, toera imwe mukwanise kudya mbamumwa pa thando yanga ya kudya, n'kati mwa Umambo wanga, na kukhala m'mipando ya Umambo, mbamutonga madzindza khumi na mawiri a Izarayeli.” Yezu athimiza na kulonga kuti: “Simau, Simau. Sathani aphemba kuti akupepeteni ninga tirigu. Mbwenye Ine ndakuphemberera kuna Mulungu kuti kukhulupira kwako kukhonde kumala. Na tenepo, ungazungunuka pontho kuna Ine mbundikhulupira, apasembo mphambvu abale ako.” Mbwenye Pedhru antawira kuti: “Ine ndiri dzololo kuti ndipite n'kaidi, na kufa pabodzi na imwe.” Yezu ampanga kuti: “Pedhru, Ine ndisakupanga kuti lero, dzongwe mbidzati kulira, iwe unati undikhonde katatu kuti nkhabe kundidziwa.” Na tenepo, Yezu aabvundza anyakupfundza ace kuti: “Kodi pidakutumani Ine mbamukhonda kukwata cikhwama, peno budu, peno ntsapato, ciripo cikhadasowa imwe?” Iwo antawira kuti: “Nkhabe!” Mbwenye Yezu aapanga kuti: “Mphapo cincino, ule ana cikhwama peno budu, mbaikwate. Pontho ule adasowa tarasada, mbagulise kapoti yace, toera na kobiri eneyo agule nayo tarasada ibodzi. Thangwi Bukhu ya Mulungu yalonga tenepa: ‘Iye alengeswa ninga m'bodzi wa mapanga.’ Apo Ine ndisakupangani kuti penepyo pisatongwa pisimbiswe muna Ine. Ande, pidalembiwa na thangwi yanga, pisafuna pisimbiswe.” Penepo anyakupfundza ace ampanga tenepa: “Mbuya, tinawo pano matarasada mawiri.” Yezu aatawira kuti: “Akwana!” Yezu abuluka mbaenda pa phiri ya Mulivera, pabodzi pene na anyakupfundza ace, ninga nsambo wace. Pidafika iye pa mbuto eneyo, Yezu aapanga anyakupfundza ace kuti: “Phemberani toera mukhonde kugwa m'manyengerero.” Na tenepo, Yezu aenda pang'ono pa khundu, nsindzo unakwana dhuzi na mathanyo makumatatu. Penepo, agodama mbatoma kuphembera, mbalonga tenepa: “Baba, mungafuna ndithausireni ndiko iyi ya nyatwa. Mphapo mbakuleke kucitika kufuna kwanga, mbwenye kufuna kwanu.” [Na tenepo, anju wa kudzulu abulukira mbakham'balangaza. Yezu pakati pa kutsukwala kukulu, atoma kuphembera na mphambvu zonsene. Penepo kaluma yace ikhadjodja pantsi ninga mathoto a ciropa.] Pakumala kuphembera, Yezu alamuka mbaenda kuna anyakupfundza ace, mbaagumana mbakhagona na thangwi ya kutsukwala. Na tenepo, Iye aabvundza kuti: “Thangwi yanji musagona? Lamukani, pontho muphembere toera mukhonde kugwa m'manyengerero.” Yezu mbadzati kumala kulonga, wafika mwinji wa anthu mbukhatsogolerwa na Djuda, m'bodzi wa anyakupfundza khumi na awiri a Yezu. Iye afika dhuzi na Yezu toera kumpsompsona. Mbwenye Yezu ampanga kuti: “Kodi iwe Djuda, usandigulisa Ine, Mwana wa Munthu na mpsompsono?” Ale akhakhala na Yezu, pidaona iwo pikhafuna kucitika, alonga tenepa: “Mbuya, tiateme na matarasada?” M'bodzi wawo aphekesa nyabasa wa nkulu wa anyantsembe, pontho mban'gwanda khutu ya madyo. Mbwenye Yezu atawira kuti: “Siyani, pyakwana.” Mbakhuya khutu ya mamuna, mbamuwangisa. Penepo Yezu abvundza kuna akulu aanyantsembe, kuna akulu anyakuonera Nyumba ya Mulungu, na kuna mathubu akhadza mbansaka, kuti: “Mwatani musandidzera na matarasada, na miti, ninga Ine ndine phanga? Ntsiku zonsene ndikhali na imwe mu Nyumba ya Mulungu, mbwenye imwe mudandiphata tayu. Apo uno ndiwo n'dzidzi wanu na wa mphambvu za cidima.” Na tenepo, am'manga mbankwata mbaenda na iye ku nyumba ya nkulu wa anyantsembe, Pedhru mbakhantowera na kutali. Mbwenye mudagasa iwo moto pakati pa thando onsene mbakhala pantsi, Pedhru akhalambo pantsi na iwo pabodzi. Nyabasa m'bodzi wankazi, amuona Pedhru mbakhaotha moto. Iye amulang'anisisa mbalonga tenepa: “Mamuna uyu akhali pabodzi na Yezu.” Mbwenye Pedhru akhonda, mbalonga kuti: “Nkaziwe, ine nkhabe kun'dziwa.” Thimize pang'ono, munthu unango amuona mbalonga tenepa: “Iwe ndiwembo m'bodzi wawo.” Pedhru antawira kuti: “Mamunawe, sine tayu!” Mudapita n'dzidzi ubodzi, unango alonga tenepa: “Ndimo mwenedi, mamuna uyu akhali na iye pabodzi, thangwi ndi wa kugalileyambo.” Pedhru atawira tenepa: “Mamunawe, ine nkhabe kupidziwa pinalonga iwe.” Mukhalonga iye penepyo, dzongwe yalira. Mbuya azungunuka mbalang'anisisa Pedhru. Penepo Pedhru akumbuka mafala akhadampanga Mbuya kuti: “Lero, dzongwe mbidzati kulira, iwe unandikhonda katatu.” Pedhru abuluka penepo, mbalira pikulu kakamwe. Amuna akhaonera Yezu, atoma kunsingirira mbakham'menya. Akhanfunga maso ace, mbakham'bvundza kuti: “Cincino iwe mporofeta, lotera! Mbani akumenya?” Iwo akhamulongera mafala anango mazinji a kuxola. Pidaca kunja, agumanyikana mathubu a mbumba, na anango akulu aanyantsembe, na anyakudziwisa a Mwambo, mbadzesa Yezu mu nyumba ya kutongera miseru. Iwo am'bvundzisa kuti: “Ngakhala iwe ndiwe Kirixtu, tipange.” Penepo Yezu aatawira tenepa: “Ndingakupangani, imwe nkhabe kunditawira. Pontho Ine ndingakubvundzani, imwe nkhabe kunditawira m'bvundzo wanga. Mbwenye kutomera cincino mpaka kutsogolo, Ine, Mwana wa Munthu, ndinati ndikhale ku nkono wa madyo wa Mulungu wa Mphambvu zonsene.” Onsene am'bvundza kuti: “Na tenepo, Iwe ndiwe Mwana wa Mulungu?” Iye aatawira tenepa: “Imwe ndimwe munalonga kuti Ine ndine.” Na tenepo, iwo alonga kuti: “Thangwi yanji tisafuna anyamaso anango? Tamala kubva tekha mbalonga na mulomo wace.” Na tenepo, nsoka wawo onsene walamuka, mbakwata Yezu mbaenda na iye kuna Piratu. Kweneko atoma kumpambazira kuti: “Mamuna uyu tam'phata mbakhanyengerera mbumba yathu kuti icite cikuti, mbakhaikhondesa kuti ileke kulipa nsonkho kuna mambo wa ku Roma, mbakhalonga kuti iye ndi Kirixtu Mambo.” Penepo Piratu abvundza Yezu kuti: “Iwe ndiwe mambo wa madjuda?” Yezu antawira kuti: “Ndimwe analonga penepi.” Na tenepo, Piratu alonga kuna akulu aanyantsembe na kuna mbumba kuti: “Nkhabe thangwi idaona ine kuti ndikonese nayo mamuna uyu.” Mbwenye iwo akhathimiza basi na kulonga kuti: “Iye asakuwizira mbumba mu Djudeya muno monsene na mapfundzisiro ace, kuti icite cikuti, kutomera ku Galileya mpaka kuno.” Piratu na kubva dzina ya Galileya, abvundzisa ngakhala Yezu ngwa ku Galileya. Mudabva iye kuti Yezu ngwa ku cisa cinatongwa na Herodhi, amuendesa kuna Herodhi, thangwi Herodhi n'dzidzi unowumbo, akhali mu Djerusalema. Herodhi mudaona iye Yezu akomerwa pikulu kakamwe, thangwi akhamubva mbakhalongwa, mbamala ntsiku zizinji mbakhasaka kuti amuone. Iye akhafuna kuti amuone mbacita cirengo cibodzi. Na tenepo, am'bvundza pinthu pizinji, mbwenye Yezu nkhabe cibodzi cidatawira iye. Akulu aanyantsembe, na anyakudziwisa a Mwambo akhakhalambo penepo, mbakhampambazira pinthu pikulu. Na tenepo, Herodhi, pabodzi na anyankhondo ace, atoma kunsingirira Yezu mbakhampwaza. Am'bvazika nguwo zakubalika mbam'bweza pontho kuna Piratu. Herodhi na Piratu akhali anyamalwa, mbwenye kubulukira ntsiku eneyo, adza kakhala axamwali. Piratu acemeresa akulu aanyantsembe, na atsogoleri a madjuda, na mbumba, mbaapanga tenepa: “Imwe mwandidzesera mamuna uyu mbamulonga kuti akhakuwizira mbumba kuti icite cikuti. Mbwenye ine ndam'bvundzisa kazinji kene pamaso panu, nkhabe thangwi ibodzi idagumana ine, pa pyonsene pinansumira imwe. Na iyembo Herodhi nkhabe thangwi ibodzi idagumana iye. Na thangwi eneyo am'bweza pontho kuna ife. Na tenepo, pisapangisa kuti mamuna uyu nkhabe cinthu cibodzi cidacita iye, kuti aphiwe naco. Na tenepo, ine ndinankwapulisa na michamu, ndingamala ndinansiya mbaenda pyace.” [Piratu akhali na nsambo wace wa kukhuca munthu m'bodzi n'kaidi, pa phwandu ya Paxkwa.] Mbwenye anthu onsene akhuwa pabodzi pene, mbalonga tenepa: “Mbaphiwe! Tibulusirene Bharabhasi!” Bharabhasi akhadafungirwa n'kaidi na thangwi ya cikuti cikhadacitika mu nzinda, pontho iye akhadapha munthu. Piratu, na kufuna kubulusa Yezu, alonga pontho na mwinji wa anthu. Mbwenye iwo athimiza na kukhuwa kuti: “N'khomereni pa ntanda! N'khomereni pa ntanda!” Kacitatu, Piratu athimiza na kuapanga kuti: “Ndi canji cakuipa cidacita munthu uyu? Ine nkhabe kuona thangwi kuti Iye aphiwe nayo. Ndinankwapulisa, ndingamala ndinsiye aende pyace.” Mbwenye iwo athimiza na kukhuwa na mphambvu kuti Yezu akhomerwe pa ntanda. Penepo kukhuwa kwawo kwakunda. Na tenepo, Piratu aatawirisa kuti acite kufuna kwawo. Piratu abulusa ule akhafuna iwo, akhadafungirwa n'kaidi na thangwi ya cikuti, pontho na thangwi ya kupha munthu, mbaapasa Yezu ninga mukhafunira iwo. Mukhankwata iwo, akakamiza mamuna m'bodzi akhacemerwa Simau, wa ku nzinda wa Sirene, akhabuluka ku munda, mbankwatisa ntanda pa phewa pace toera aende na iwo n'nduli mwa Yezu. Mwinji wa anthu ukhantowera, pabodzi na akazi akhakhuwa mbakhalira na thangwi yace. Na tenepo, Yezu azungunuka kuna akazi mbaapanga kuti: “Akazi a Djerusalema, lekani kundilira. Lirikani mwekha na ana anu! Thangwi unafika n'dzidzi unadza kafuna imwe longa kuti: ‘Mbatsandzaye akazi adakhonda paswa kubala, pontho na mimba zidakhonda kubala ana, na mabere a kuti cipo adzati kuyamwisa!’ “ ‘ Na tenepo, anati alonge kuna mapiri kuti: “Tigwereni!” Pontho analonga kuna pimapiri kuti: “Tigudumireni!” ’ Thangwi ngakhala asacita ipi na muti uwisi, ndiye tani kuna muti wakuuma?” Akwatiwambo amuna awiri, mapanga, kuti aende kaphiwe pabodzi na Yezu. Mudafika iwo pa mbuto inacemerwa Kavera, penepo an'khomera pa ntanda pabodzi pene na mapanga, m'bodzi ku nkono wa madyo, unango ku nkono wa bzere. [Penepo Yezu alonga kuti: “Baba, alekerereni, thangwi nkhabe kupidziwa pinacita iwo.”] Na tenepo, iwo, pakumala kumenya ntsango, agawana nguwo zace. Mbumba ikhakhala penepo, ikhalang'anisa pyonsene pire. Atsogoleri a madjuda akhasingirira Yezu mbalonga tenepa: “Iye apulumusa anango, mbapulumusikembo ekha ene ngakhala ndiyedi Kirixtu adasankhulwa na Mulungu.” Anyankhondo akhansingirirambo. Iwo akhafika dhuzi na Yezu mbakhampasa vinyu ya kudjamuka, mbalonga tenepa: “Ngakhala Iwe ndiwe mambo wa madjuda, pulumusika wekha ene!” Pa ntanda, padzulu pa nsolo wace, pakhadalembwa mafala awa: “UYU NDI MAMBO WA MADJUDA.” M'bodzi wa mapanga akhadakhomerwa pa ntanda, akhatikanambo Yezu mbalonga tenepa: “Iwe siwe Kirixtu tayu? Pulumusika mphapo wekha, mbupulumusambo ife!” Mbwenye unango ansandika mbalonga tenepa: “Iwe nkhabe gopa Mulungu? Iwe uli kuthabuswa sawa-sawa ninga iye. Ife tina thangwi ya kuthabuswa nayo. Mbwenye Iye nkhabe cakuipa cibodzi cidacita Iye.” Na tenepo, alonga kuna Yezu kuti: “Mbuya, ndikumbukirenimbo mungadza kapita mu Umambo Wanu!” Yezu atawira tenepa: “Ndimo mwene ndisakupanga kuti lero, iwe unadza kakhala na Ine m'paraizu.” Dhuzi na n'dzidzi khumi na uwiri wa masikati, mpaka n'dzidzi utatu wa kumaulo, dzuwa yathima, dziko yonsene mbigudumirwa na cidima. Dzuwa ya thima, nguwo ikhasitira mbuto ya Mulungu mu Nyumba ya Mulungu, yapanduka pakati-na-kati. Penepo, Yezu akhuwa mbalonga tenepa: “Baba, ndiri kupereka nzimu wanga m'manja mwanu.” Mudamala Iye kulonga penepyo, afa. Nkulu wa anyankhondo a ku Roma, mudaona iye pidacitika, apasa mbiri Mulungu mbalonga tenepa: “Ndimo mwenedi, mamuna uyu akhali wakulungama!” Mbumba yonsene ikhadagumanyikana penepo toera kuona pikhacitika, mudaona iwo penepyo abuluka mbakhamenya cifuwa, na kutsukwala. Mbwenye onsene akhan'dziwa Yezu, na akazi ene akhantowerera kubulukira ku Galileya, akhakhala kutali mbakhalang'anisa pinthu penepi. Akhalipo mamuna m'bodzi akhacemerwa Zuze. Iye akhali m'bodzi wa nsoka wa akulu anyakutonga miseru, munthu wadidi na wakulungama. Iye akhadakomerwa tayu na kugwandiwa kwa nseru, pontho na pidacita andzace. Zuze akhali wa ku nzinda wa Arimateya, ku Djudeya, iye akhadikhira Umambo wa Mulungu. Iye aenda kuna Piratu kaphemba manungo a Yezu. Na tenepo, abulusa manungo a Yezu pa ntanda, mbaapyangirira na nguwo yakucena. Penepo aaikha n'nthumbi ibodzi ikhadakumbwa pa mwala, kuti cipo ikhadadzati kuikhwa munthu. Penepi pyacitika ntsiku ya cixanu, ntsiku ya kusasanyira, thangwi Sabudu ikhafuna kutoma. Akazi akhaperekera Yezu kubulukira ku Galileya, aenda pabodzi na Zuze mbaonambo kuikhwa kudacitwa manungo a Yezu n'nthumbi. Buluka penepo, abwerera mbaenda ku nyumba kwawo kasasanyira mafuta akununkhira, toera akhadzoze manungo a Yezu. Mbwenye Nsabudu, iwo apuma, ninga mukhalongera mwambo. Pa ntsiku ya Dimingu, m'bambakuca, akazi aenda ku nthumbi ikhadaikhwa Yezu na mafuta akununkhira akhadasasanyira iwo. Iwo agumana mwala wabuluswa pa nthumbi. Mbwenye mudapita iwo, hadaagumana manungo a Mbuya Yezu tayu. Iwo adzumatirwa napyo, mbacimwana kudziwa pikhafuna iwo kucita. Na mwansanga, aona amuna awiri na nguwo zikhayetimira ninga dzuwa, mbalimira n'khundu mwawo. Na kugopa kukhacita iwo, akazi atsolomisa nkhope zawo pantsi, amuna mbaapanga tenepa: “Thangwi yanji imwe muli kusaka pakati pa anyakufa, munthu ali m'maso? Iye nkhabepo pano! Alamuka pa kufa! Kumbukani pikhakupangani Iye mbali na imwe ku dziko ya Galileya kuti: ‘Ine, Mwana wa Munthu ndisafunika kuti ndiperekwe m'manja mwa amuna anyakudawa, ndikhomerwe pa ntanda, toera ntsiku ya citatu ndilamuke pa kufa.’ ” Na tenepo, iwo akumbuka mafala a Yezu. Mudabwerera iwo buluka ku nthumbi, akazi alonga pinthu pyonsene ipi kuna apoxtolo khumi na m'bodzi, na kuna onsene anango. Akazi adalonga pinthu penepi kuna apoxtolo ndi awa: Mariya Madhalena, Juwana, Mariya mai wace Tiyago, na akazi anango akhakhala na iwo. Mbwenye iwo akhaapokanya akazi. Pikhalonga iwo, akhaabva ninga madzemwa. Mbwenye Pedhru alamuka, mbathamanga kwenda ku nthumbi. Mudakotama iye, aona mithambo yakucena basi. Abuluka mbabwerera na kudzumatirwa na pidacitika. Ntsiku ibodzi ene, anyakupfundza awiri a Yezu akhaenda ku cisa cibodzi cinacemerwa Emausi. Kubulukira ku Emausi mpaka ku Djerusalema, pakhali na nsindzo khumi na ubodzi wa makilometuru. Mukhaenda iwo na njira, akhaenda mbalonga na thangwi ya pyonsene pikhadacitika. Mukhaceza iwo mbakhaketesana, Iye ene Yezu aafendedzera dhuzi mbakhaenda na iwo pabodzi. Iwo akhamuona, mbwenye akhacimwana kun'dzindikira. Yezu aabvundza tenepa: “Mphyanji pinafamba imwe mbamuketesana na njira?” Iwo alimira na kutsukwala. M'bodzi wawo anacemerwa Kelopasi, am'bvundza kuti: “Ndiwe wekha basi nfambi mu Djerusalema muno, anacimwana kudziwa pinthu pinacitika mwenemu ntsiku zino?” Iye abvundzisa kuti: “Pinthu pyanji?” Iwo atawira tenepa: “Pidacitika na Yezu wa ku Nazareti. Iye akhali mporofeta wa mphambvu pa mafala na pa mabasa, patsogolo pa Mulungu na pa anthu onsene. Akulu aanyantsembe pabodzi na atongi athu, ampereka toera aphiwe, mban'khomera pa ntanda. Na tenepo, ife tikhadikhira kuti Iye ndiye anadza kafuna kuombola Izarayeli. Pontho na lero kwapita ntsiku zitatu penepyo mbapidamala kucitika kale. Akazi anango a pa nsoka wathu, lero atitutumusa. Abesa na macibese ene mbaenda ku nthumbi. Kweneko iwo hadaagumana manungo ace tayu. Abwerera mbatipanga kuti ninga ndoto, aona maanju adaapanga kuti Yezu ali m'maso. Andzathu anango aenda ku nthumbi, mbagumana pyonsene sawa-sawa ninga mukhadapilongera akazi, mbwenye Yezu hadamuona tayu.” Yezu aapanga tenepa: “Pisakunentsani tani kubvesesa, pontho mbamudembuka na kutawira pire pyonsene pidalongwa na maporofeta! Kodi pikhafunika tayu kuti Kirixtu aone nyatwa zenezi toera apite mu mbiri yace?” Na tenepo, atoma kuapanga pyonsene pidalembwa m'Bukhu ya Mulungu na thangwi yace, kutomera m'mabukhu a Mozesi na m'mabukhu a maporofeta onsene. Pakufika dhuzi na cisa cikhaenda iwo, Yezu acita ninga funa apitirire. Mbwenye iwo ankakamiza mbampanga kuti: “Khalani na ife thangwi n'dzidzi wa pita, dzuwa iri kudoka.” Na tenepo, Iye apita toera akhale na iwo. Mukhakhala iwo pa thando ya kudya, Yezu akwata nkate mbapereka takhuta, mbaumenya mbaapasa. Na tenepo, maso awo afunguka mban'dzindikira, mbwenye Yezu azambazika pamaso pawo. Iwo akhalonga okha-okha kuti: “Kodi mukhaabva tayu mafala ace akhagaka m'mitima mwathu ninga moto mukhalonga Iye n'njira, mbakhatipanga pidalembwa m'Bukhu ya Mulungu?” Iwo alamuka na mwansanga mbabwerera kwenda ku Djerusalema. Kweneko agumana apoxtolo khumi na m'bodzi na anango akhadagumanyikana, mbakhalonga kuti: “Ndimo mwene! Mbuya alamukadi pa kufa, pontho abulukira kuna Simau!” Na tenepo, ale awiri atoma kulonga pire pidaacitikira n'njira, pontho mbakhalonga kuti afikira tani kun'dzindikira pa n'dzidzi ukhamenya Iye nkate. Mukhalonga iwo pinthu penepyo, Iye ene Yezu abulukira pakati pawo mbalonga kuti: “Ntendere mbukhale na imwe!” Iwo atutumuka, pontho mbagopa mbanyerezera ninga asaona nzimu. Yezu aapanga kuti: “Ndi thangwi yanji musadzudzumika, pontho ndi thangwi yanji musapenula m'mitima mwanu? Lang'anani manja anga na myendo yanga. Ndine ene! Ndiphateni muone. Nzimu nkhabe nyama, pontho nkhabe magogodo ninga kuona kunandicita imwe. Ine ndinapyo.” Pakumala kulonga penepyo, aapangisa manja ace na myendo yace. Na kukhonda kutawira kwawo, na thangwi ya kudzumatirwa na kukomerwa kukhabva iwo, Yezu abvundza kuti: “Imwe munaco pano cinthu cakudya?” Iwo ampasa phindi ibodzi ya nyama ya kuocha ya m'madzi, Iye aikwata mbaidya pamaso pawo. Penepo aapanga kuti: “Ndi penepi pikhakupangani Ine mbandiri na imwe. Pikhafunika kuti picitike pyonsene pidalembwa na thangwi yanga mu Mwambo wa Mozesi, m'mabukhu a maporofeta na m'mabukhu a Masalimu.” Na tenepo, aapasa kudzindikira toera akwanise kubvesesa mwadidi pidalembwa m'Bukhu ya Mulungu. Mbaapanga tenepa: “Pyalembwa kuti Kirixtu anati aone nyatwa, mbalamuka pa kufa ingafika ntsiku ya citatu, pontho kuti na dzina Yace, zimwazwe mphangwa za kuchunyuka toera kulekerera madawi kuna madzindza onsene, kutomera mu Djerusalema. Imwe ndimwe amboni a pinthu penepi. Ine ndinakutumirani cipikiriro ca Baba wanga. Mbwenye khalani mu nzinda mpaka kudzabza na mphambvu za kudzulu.” Yezu aakwata, mbaenda na iwo mpaka dhuzi na nzinda wa Bhetanya, kweneko Iye alamusa manja mbaapasa nkhombo. Yezu mukhaapasa Iye nkhombo, aasiya, Iye mbakwira kudzulu. Na tenepo, iwo amulambira mbabwerera na kutsandzaya kukulu mpaka ku Djerusalema. Iwo akhakhala mu Nyumba ya Mulungu midzidzi yonsene mbakhakuza Mulungu. Pakutoma ikhali Fala. Fala ikhali na Mulungu, pontho Fala ikhali Mulungu. Iyo Fala ikhakhala na Mulungu kutomera pakutoma. Pinthu pyonsene pyacitwa na Iye, pontho pyonsene pidacitwa, nkhabe cibodzi cidakhonda citwa na Iye. Upulumuki ukhali muna Iye, Upulumuki unowu ukhali cieza ca anthu. Cieza cisagaka n'cidima, cidima cacimwana kukunda cieza. Aoneka mamuna m'bodzi adatumwa na Mulungu, dzina yace ikhali Juwau. Iye abwera ninga nyamaso, kuti acitire umboni cieza, toera na thangwi yace, anthu onsene atawire. Juwau akhali cieza tayu, mbwenye abwera ninga nyamaso wa cieza, cieza camaso cinamwinikira anthu onsene, cikhafika pa dziko. Fala ikhali pa dziko, dziko yacitwa na Iyo, mbwenye dziko aicimwana kuidzindikira. Yabwera n'dziko mwace, mbwenye andzace akhonda kuitambira. Mbwenye kuna ale onsene adantambira, ale adatawira dzina yace, apaswa mphambvu za utongi kuti akhale ana a Mulungu. Iwo hadabalwa ninga mabaliro a anthu onsene tayu, pontho hadabalwa na kufuna kwa nyama peno na kufuna kwa mamuna tayu, mbwenye abalwa na Mulungu. Fala yacitika munthu mbikhala pakati pathu. Taona mbiri yace, mbiri ninga ya Mwana m'bodzi ekha adabuluka kuna Baba, wakudzala na kukoma ntima pontho na Undimo mwene. Juwau ancitira umboni Yezu, mbakhakhuwa tenepa: “Uyu ndiye adalonga ine kuti: Ule anabwera n'nduli mwanga ndiye nkulu kupita ine, thangwi Iye akhalipo ine mbindidzati kubalwa.” Thangwi tonsene tatambira mwakukwana kukoma ntima kwace kwa kwenda na kwenda. Thangwi Mwambo taupaswa na Mozesi, mbwenye kukoma ntima na undimo mwene wabwera na Yezu Kirixtu. Cipo nkhabe munthu adaona Mulungu, mbwenye Mwana wace m'bodzi ekha basi wa pantima pace, ndiye adatidziwisa Mulungu. Uyu ndiwo umboni wa Juwau, pa n'dzidzi udatuma madjuda a ku Djerusalema, anyantsembe na malevita toera kum'bvundzisa kuti: “Iwe ndiwe ani?” Juwau aapanga, pontho hadakhonda tayu. Alonga pakweca kuti: “Ine sine Kirixtu tayu!” Na tenepo, iwo athimiza pontho na kum'bvundza kuti: “Iwe ndiwe ani mphapo? Ndiwe Eliya?” Iye alonga kuti: “Sine tayu.” “Ndiwe Mporofeta? ” Iye atawira kuti: “Nkhabe.” Pakumalisa iwo am'bvundza kuti: “Iwe ndiwe ani? Titawire toera tikhaapange ale adatituma. Usaona tani, longa wekha ene kuti iwe ndiwe ani?” Juwau atawira na mafala a mporofeta Izaya kuti: “Ine ndine fala inakhuwa n'thando mbilonga kuti: ‘Sasanyirani njira ya Mbuya.’ ” Afarisi anango akhadatumwa, abvundza Juwau kuti: “Ngakhala iwe siwe Kirixtu, siwe Eliya pontho siwe Mporofeta, mphapo thangwi yanji usatambirisa batixmu?” Juwau atawira kuti: “Ine ndisatambirisa batixmu na madzi, mbwenye pakati panu alipo m'bodzi anakhonda imwe dziwa. Iye ndi ule anadza n'nduli mwanga, mbwenye ine sine munthu wakukwanira kuti ndinsudzule mithambo ya ntsapato zace.” Pyonsene ipi pyacitika ku cisa ca Bhetanya, ntunda unango wa nyandza ya Djorodani, kukhatambirisa Juwau batixmu. Mangwana mwace Juwau aona Yezu mbakhanfendedzera. Juwau alonga tenepa: “Lang'anani! Ndi Mwana Bira wa Mulungu anabulusa kudawa kwa dziko. Uyu ndi ule akhalonga ine kuti n'nduli mwanga anabwera mamuna m'bodzi nkulu kupita ine, thangwi Iye akhalipo ine mbandidzati kubalwa. Ine ene sikhan'dziwa tayu, mbwenye ndi thangwi eneyo ndabwera mbandikhatambirisa batixmu na madzi, toera Iye akwanise kupangizika kuna mbumba ya Izarayeli.” Na tenepo, Juwau alonga umboni kuti: “Ine ndaona Nzimu Wakucena mbuchita kudzulu ninga nkhangaiwa mbum'phamira. Ine sikhan'dziwa tayu, mbwenye Ule adandituma kuti nditambirise batixmu na madzi ndiye adandipanga tenepa: ‘Ule anaona iwe Nzimu Wakucena mbuchita mbum'phamira, unowu ndiye anatambirisa batixmu na Nzimu Wakucena.’ Penepo ine ndaona, pontho ndisacita umboni kuti uyu ndiyedi Mwana wa Mulungu.” Mangwana mwace, Juwau akhakhala pontho penepo pabodzi na anyakupfundza ace awiri. Pidaona iye Yezu mbakhapita, alonga kuti: “Lang'anani! Ndi Mwana Bira wa Mulungu.” Anyakupfundza awiri a Juwau pidabva iwo mbalonga penepyo atowera Yezu. Yezu pidazungunuka Iye mbaona anyakupfundza a Juwau mbakhantowera, aabvundza kuti: “Imwe musafunanji?” Iwo alonga kuti: “Rabhii’’ (Ndiko kubveka “Mpfundzisi,”) “mwafikira kupi?” Yezu aatawira tenepa: “Bwerani muone.” Iwo aenda, pa n'dzidzi wacinai wa kumaulo mbaona padafikira Iye, mbakhala na Iye pabodzi ntsiku eneyo. Andereya, m'bale wace Simau Pedhru, akhali m'bodzi wa awiri akhadabva pire pikhalonga Juwau, pontho ndi ale akhadatowerera Yezu. Andereya, munthu wakutoma adaona iye ndi m'bale wace anacemerwa Simau, mbaapanga tenepa: “Tan'gumana Misiya’’ (uku ndiko kubveka Kirixtu.) Andereya ankwata mbaenda na iye kuna Yezu. Yezu amulang'ana mbalonga tenepa: “Iwe ndiwe Simau, mwana wa Juwau. Unadza kacemerwa Kefasi’’ (uku ndiko kubveka Pedhru.) Mangwana mwace Yezu anyerezera kwenda ku Galileya. Pidagumana Iye Filipi ampanga tenepa: “Nditowere.” Filipi, na Andereya na Pedhru, akhali a ku nzinda wa ku Bhetisaidha. Filipi agumana Natanyeli mbampanga kuti: “Tan'gumana ule adalembwa na Mozesi m'Bukhu ya Mwambo, pontho adalembwambo na maporofeta mbalonga kuti: Yezu wa ku Nazareti mwana wa Zuze.” Natanyeli abvundza mbalonga tenepa: “Ku Nazareti? Kunabulukambo pinthu pyadidi kweneku?” Filipi ampanga kuti: “Bwera uone.” Yezu pidaona iye Natanyeli mbakhanfendedzera dhuzi, alonga tenepa: “Onani, uyu ndiyedi mu Izarayeli, si wa uthambi tayu.” Natanyeli abvundza tenepa: “Musandidziwira kupi?” Yezu antawira mbalonga kuti: “Ine ndakuona pa n'dzidzi ukhakhala iwe pantsi pa muti wa nsambvu, Filipi mbadzati kukucemera.” Natanyeli atawira tenepa: “Mpfundzisi, Imwe ndimwe Mwana wa Mulungu, pontho Imwe ndimwe Mambo wa Izarayeli!” Yezu alonga kuti: “Iwe watawira thangwi pidakupanga Ine kuti ndakuona pantsi pa muti wa nsambvu? Iwe unati uone pinthu pikulu kupita penepi!” Na tenepo Iye athimiza na kulonga kuti: “Ndimo mwene, ndimo mwene Ine ndinakupangani tenepa: Imwe munati muone thambo mbifunguka, anju za Mulungu mbizikwira, mbizichita na pana Ine, Mwana wa Munthu.” Pakupita ntsiku ziwiri, yacitatu yace, kwacitwa phwandu ya banja ku nzinda wa Kanaa ya ku Galileya. Akhalipombo penepo mai wace Yezu. Yezu na anyakupfundza ace akhadacemerwambo ku phwandu eneyo. Pakumala kwa vinyu, mai wace Yezu ampanga tenepa: “Iwo nkhabebve vinyu.” Yezu atawira tenepa: “Nkaziwe, tinapyonji ife? N'dzidzi wanga udzati kukwana.” Mai wace apanga anyabasa kuti: “Citani pyonsene pinakupangani Iye.” Dhuzi na penepo pakhali na nkhali zitanthatu za myala. Nkhali zenezi ndizo zikhaphata basa na madjuda pa midzidzi ikhacita iwo ntsembe zawo za kuceneswa. Nkhali ibodzi ikhapita anyamagongwe makumasere peno anyamagongwe dzana na makumawiri a madzi. Yezu apanga anyabasa kuti: “Dzadzani nkhali na madzi.” Iwo azidzadza mpaka pa mulomo. Na tenepo, aapanga kuti: “Cincino, tungani pang'ono mwende kapasa n'tsogoleri wa phwandu.” Iwo apicita penepyo. N'tsogoleri wa phwandu aalawira madzi adasanduzwa kudza vinyu, mbakhonda kuidziwa yabuluka kupi, mbwenye anyabasa akhadaikha madzi akhapidziwa. Na tenepo, acemera mwali wa mamuna, mbampanga kuti: “Anthu onsene asapasa pakutoma vinyu yakudzipa, anyakucemerwa angamala kumwa mbakwana nayo, asadza kaapasa vinyu yakukhonda dzipa. Mbwenye iwe wakoya vinyu yakudzipa mpaka n'dzidzi wa kumalisira.” Cidzindikiro ceneci ca cirengo ca ku Kanaa ya ku Galileya, ndi cirengo cakutoma cidacita Yezu. Tenepa apangisa mbiri yace, anyakupfundza ace mbantawira. Buluka penepo, Yezu aterera kwenda Kafaranaumi pabodzi na mai wace, na abale ace, na anyakupfundza ace. Kweneko akhala ntsiku pang'ono. Dhuzi na kufika n'dzidzi wa phwandu ya Paxkwa ya madjuda, Yezu aenda ku Djerusalema. Pa thando ya Nyumba ya Mulungu, aona anango mbakhagulisa ng'ombe, mabira na nkhangaiwa, anango mbakhakhala nawa-nawa pantsi dhuzi na mameza, mbakhacinja kobiri. Na tenepo, Iye acita n'chamu wa nkhambala, mbathamangisa onsene mu Nyumba ya Mulungu, na mabira na ng'ombe zene. Awaza kobiri za ndzaya-ndzaya za ale akhacinja, mbabhoma meza zawo. Kuli ale akhagulisa nkhangaiwa aapanga tenepa: “Bulusani pano pinthu ipi! Lekani kucita nsika Nyumba ya Baba wanga!” Anyakupfundza ace akumbuka pikhadalembwa m'Bukhu ya Mulungu kuti: “Kufuna kukulu kunacita ine Nyumba yanu, kunandipisa ninga moto.” Na tenepo, madjuda am'bvundza kuti: “Ndi cidzindikiro canji ca cirengo cinafuna kutipangisa iwe, toera ucite pinthu penepi?” Yezu aatawira tenepa: “Fudzani Nyumba ya Mulungu iyi, Ine ndinaimanga pa ntsiku zitatu.” Madjuda atawira tenepa: “Nyumba iyi ya Mulungu yamala pyaka makumanai na pitanthatu mbikhamangwa. Iwe usalonga unaimanga pa ntsiku zitatu?” Mbwenye Nyumba ya Mulungu ikhalonga Yezu, akhali manungo ace. Mudadza kalamuka Iye pa kufa, anyakupfundza ace akumbuka pikhalonga Iye. Na tenepo, atawira pidalembwa m'Bukhu ya Mulungu pontho na fala ikhadalonga Yezu. Mukhakhala Iye ku Djerusalema pa phwandu ya Paxkwa, azinji mukhaona iwo pidzindikiro pya pirengo pikhacita Iye, atawira dzina yace. Mbwenye Yezu akhaanyindira tayu, thangwi akhaadziwa onsene. Pikhafunika tayu kuti munthu alonge umboni wa munthu unango, thangwi akhapidziwa mwadidi mwene pikhali muntima mwa munthu. Akhalipo nfarisi m'bodzi akhacemerwa Nikodhemu, n'tsogoleri wa madjuda. Iye abwera kuna Yezu na masiku, mbalonga kuti: “Rabhii, ife tisadziwa kuti Imwe ndimwe Mpfundzisi adabuluka kuna Mulungu. Thangwi nkhabe m'bodzi anakwanisa kucita pidzindikiro pya pirengo pinacita Imwe, Mulungu angakhonda kukhala na iye.” Yezu antawira tenepa: “Ndimo mwene, ndimo mwene ndisakupanga kuti: Nkhabe m'bodzi anakwanisa kuona Umambo wa Mulungu, angakhonda kubalwa kapsa. ” Nikodhemu abvundza kuti: “Munthu anabalwa tani, Iye mbali nkhalamba? Kodi anapita pontho m'mimba mwa mai wace mbabalwa kacikawiri?” Yezu atawira tenepa: “Ndimo mwene, ndimo mwene ndisakupanga kuti: Nkhabe m'bodzi anakwanisa kupita mu Umambo wa Mulungu, angakhonda kubaliwa m'madzi pontho na mu Nzimu Wakucena. Anabalwa mu nyama ndi wa nyama, anabalwa mu Nzimu ndi wa nzimu. Leka kudzumatirwa na pidalonga Ine kuti: Pisafunika kuti imwe mubalwe kapsa. Mphepo isaenda kunafuna iyo. Iwe usaibva, mbwenye nkhabe kuidziwa iri kubuluka kupi peno iri kwenda kupi. Tenepa pisacitikambo na onsene anabalwa mu Nzimu.” Nikodhemu abvundza tenepa: “Pinacitika tani penepi?” Yezu ampanga tenepa: “Iwe ndiwe mpfundzisi wa Izarayeli, nkhabe kupidziwa pinthu penepi? Ndimo mwene, ndimo mwene ndinakupanga kuti ife tisalonga pire pinadziwa ife pontho mbaticita umboni wa pire pidaona ife, mbwenye imwe nkhabe kutawira umboni wathu. Ine ndakupangani pire pya pantsi pano, imwe mwakhonda kupitawira. Munadza katawira tani ndingakupangani pya kudzulu? Nkhabe m'bodzi adakwira kudzulu, mbwenye ule basi adabwera buluka kudzulu, Ine Mwana wa Munthu. Sawa-sawa ninga Mozesi alamusa nyoka n'thando, tenepa pisafunikambo kuti Ine Mwana wa Munthu ndilamuswembo, toera onsene ale anantawira akhale na upulumuki wakukhonda kumala. “Thangwi Mulungu afuna dziko, mbafikira kupereka Mwana wace m'bodzi basi, toera ale onsene anantawira aleke kufa, mbwenye akhale na upulumuki wakukhonda kumala. Thangwi Mulungu atuma Mwana wace pa dziko, si kuti adze katonga miseru ya dziko tayu, mbwenye toera dziko ipulumuswe na Iye. Ule anantawira nkhabe kutongwa, mbwenye ule anakhonda kuntawira amala kutongwa kale, na thangwi yakukhonda kutawira kwace dzina ya Mwana m'bodzi basi wa Mulungu. Kutongwa kwace ndi uku: Cieza cabwera pa dziko, mbwenye anthu afuna cidima mbakhonda cieza, thangwi mabasa awo akhali a kuipa. Ule anacita pyakuipa asazonda cieza, pontho nkhabe fendedza pa cieza, gopa mabasa ace anaonekera pakweca. Mbwenye ule anacita pya ndimo mwene asabwera pa cieza, toera mabasa ace aoneke pakweca kuti asacitwa na mphambvu za Mulungu.” Buluka penepo, Yezu aenda na anyakupfundza ace ku dziko ya Djudeya. Kweneko akhala na iwo pabodzi, mbakhatambirisa anthu batixmu. Juwau akhatambirisambo batixmu ku Enomi, dhuzi na ku Salimi, thangwi kweneku kukhali na madzi mazinji, pontho mbumba ikhabwera penepo toera kutambira batixmu. (Penepi pyacitika Juwau mbadzati kupita n'kaidi.) Na tenepo, yasoseka mphoka pakati pa anyakupfundza a Juwau na n'djuda m'bodzi, na thangwi ya kuceneswa kwa madjuda. Iwo aenda kuna Juwau mbampanga kuti: “Mpfundzisi, mamuna ule akhakhala na imwe ntunda unango wa nyandza ya Djorodani, ule adaticitira imwe umboni, ali kutambirisa batixmu pontho anthu onsene ali kwenda kuna Iye!” Juwau atawira tenepa: “Munthu anatambira pire basi pidapaswa iye kudzulu. Imwe ene ndimwe anyamaso a pire pidalonga ine kuti: Ine sine Kirixtu tayu, mbwenye ndine ule adatumwa patsogolo pace. Mwanaciro mwali wankazi, ndi mwali wa mamuna. Xamwali wa mwali wa mamuna anam'phedza pontho mbam'bvesera, asakomerwa pikulu kakamwe angabva fala ya mwali wa mamuna. Uku ndi kutsandzaya kwanga kunadzadziswa cincino. Pisafunika kuti Iye akuzwe, ine ndicepeswe. “Ule adabuluka kudzulu ali padzulu pa onsene. Ule wa pantsi pano ndi wa pantsi pano, pontho asalonga pire pya pantsi pano. Ule adabuluka kudzulu ali padzulu pa onsene. Iye asacita umboni wa pire pidaona iye na pidabva iye, mbwenye nkhabe munthu anautawira umboni wace. Ule anautawira umboni unowu, asasimbisa kuti Mulungu ndi wamaso. Thangwi ule adatumwa na Mulungu asalonga Mafala a Mulungu, thangwi Mulungu asampasa Nzimu wace wa kusoweka n'dida. Baba asafuna Mwana wace mbampasa pyonsene m'manja mwace. Ule anatawira Mwana, ana upulumuki wakukhonda kumala. Mphapo ule anakhonda Mwana, nkhabe kudza kaona upulumuki, mbwenye kuipirwa kwa Mulungu kunakhala na iye.” Afarisi abva mbapilongwa kuti Yezu akhapfundzisa, mbakhatambirisa batixmu anyakupfundza azinji kupita Juwau. (Mphapo Yezu hakhatambirisa batixmu tayu, mbwenye akhatambirisa ndi anyakupfundza ace.) Mudabva Yezu penepyo, abuluka ku Djudeya mbabwerera pontho kwenda ku Galileya. Pikhafunika kuti Iye apite na kudziko ya Samariya. Na tenepo, afika ku nzinda ubodzi wa ku Samariya unacemerwa Sikari, dhuzi na zunde ikhadapaswa Zuze na baba wace Djakobo. Penepo pakhali na ncera wa Djakobo. Yezu na kuneta na ulendo, akhala pantsi dhuzi na ncera. Penepi pyacitika na masikati, pa n'dzidzi khumi na uwiri. Na tenepo, pabwera nkazi m'bodzi wa ku Samariya kudza katunga madzi. Yezu ampanga kuti: “Ndipasembo madzi pang'ono.” Thangwi anyakupfundza ace akhadaenda ku nzinda kagula pyakudya. Nkazi wa ku Samariya am'bvundza tenepa: “Pinacitika tani penepi, imwe ninga n'djuda musaphemba ine nkazi wa ku Samariya madzi a kumwa?” (Thangwi madjuda na a Samariya nkhabe kubverana.) Yezu antawira mbampanga tenepa: “Mbudadziwa muwoni wa Mulungu, pontho ndi ani anakuphemba madzi, mbudam'phemba ndiwe, Iye mbadakupasa madzi a upulumuki.” Nkazi atawira kuti: “Imwe Mbuya nkhabe n'thepu, pontho ncera wazika. Ndi kupi kunafuna imwe kwanisa madzi a upulumuki? Kodi imwe Mbuya ndimwe nkulu kupita baba wathu Djakobo, adatipasa ncera uyu, ukhamwa Iye ene pabodzi na ana ace, pontho na pifuyo pyace?” Yezu antawira tenepa: “Anamwa madzi awa anakhala pontho na nyota. Mbwenye anamwa madzi anafuna kumpasa Ine, nkhabebve kudza kakhala pontho na nyota. Thangwi madzi anafuna kumpasa Ine, anacitika muna iye mphuno ya madzi anabuluka upulumuki wakukhonda kumala.” Nkazi alonga kuti: “Mbuya ndipaseni madzi enewa, toera ndikhonde khala pontho na nyota, peno ndikhonde bwera pontho kudza katunga madzi.” Yezu ampanga tenepa: “Ndoko, kacemere mamuna wako ubwere na iye.” Nkazi atawira kuti: “Sinamamuna tayu.” Yezu ampanga nkazi kuti: “Iwe walonga pyadidi kuti nkhabe mamuna. Thangwi iwe ukhali na iwo kale axanu. Pontho ana iwe cincino si mamunako tayu. Pidalonga iwe ndimo mwene.” Nkazi alonga kuti: “Mbuya, ndisaona kuti ndimwe mporofeta. Ambuya athu akhaphembera pa phiri iyi, imwe madjuda musalonga kuti mbuto inaphemberwa ndi ku Djerusalema basi.” Yezu alonga kuti: “Nditawire, nkaziwe. N'dzidzi uli dhuzi, wa kuti imwe nkhabe kudza kamulambirabve Baba pa phiri ino, peno ku Djerusalema. Imwe a ku Samariya musalambira cinakhonda kudziwa imwe. Ife tisalambira cinadziwa ife, thangwi kupulumuswa kwabuluka kuna madjuda. Mbwenye uli kufika n'dzidzi, pontho wafika n'dzidzi wa kuti anyakumulambiradi Baba, anamulambira mu Nzimu na mu undimo mwene. Thangwi mbanewa anyakulambira anasaka Baba. Mulungu ndi Nzimu, apo pisafunika kuti anamulambira, amulambire mu Nzimu na mu undimo mwene.” Nkazi alonga kuti: “Ine ndisadziwa kuti Misiya (anacemerwa Kirixtu) anabwera. Iye angabwera, anatipanga pyonsene.” Na tenepo Yezu ampanga kuti: “Ine analonga na iwe, ndine pano!” Pa n'dzidzi unoule, anyakupfundza a Yezu abwerera mbadzumatirwa pikulu kakamwe na kugumana Yezu mbakhalonga na nkazi. Mbwenye nkhabe m'bodzi wawo adabvundzisa kuti: “Usafunanji?” Peno, bvundza Yezu kuti: “Thangwi yanji usaceza na iye?” Na tenepo, nkazi asiya nkhali yace, mbabwerera kwenda ku nzinda, mbalonga kuna mbumba kuti: “Bwerani mudze kaone mamuna adandipanga pyonsene pikhacita ine. Kodi unowu, siye tayu Kirixtu?” Na tenepo, anthu abuluka ku nzinda mbaenda kukakhala Yezu. Pa n'dzidzi unowu, anyakupfundza ace akhankakamiza mbam'phemba kuti: “Mpfundzisi, dyaani pang'ono.” Mbwenye Iye aatawira kuti: “Ndinaco cakudya, cinakhonda dziwa imwe.” Na tenepo, anyakupfundza ace akhabvundzana m'bodzi na m'bodzi kuti: “Kodi alipo adan'dzesera cakudya?” Yezu alonga kuti: “Cakudya canga nkhucita kufuna kwa ule adandituma, na kumalisa basa yace. Imwe nkhabe longa kuti: ‘Pakupita myezi minai anthu anabvuna?’ Lang'anani, Ine ndisakupangani kuti: Fungulani maso mulang'ane m'maminda! Pyakudya pyamala tokota, pisafuna bvuniwa. Ule anabvuna asatambireratu muwoni wace, pontho asabvuna misapu toera aone upulumuki wakukhonda kumala. Na tenepo, anabzala na anabvuna, onsene asatsandzaya pabodzi pene. Na tenepo, ndimo mwene nsangani unalonga kuti: ‘M'bodzi asabzala, unango asabvuna.’ Ine ndakutumani toera mubvune pire pidakhonda imwe kulima. Anango aphata basa yakuwanga, mbwenye imwe ndimwe mudadza katambira misapu ya basa yawo.” Azinji a ku nzinda wa Samariya atawira Yezu na thangwi ya umboni ukhalonga nkazi kuti: “Iye andipanga pyonsene pikhadacita ine.” Na tenepo, anthu a ku Samariya pidafendedzera iwo Yezu, akham'phemba kuti akhale na iwo. Penepo Yezu akhala na iwo ntsiku ziwiri. Pontho, na thangwi ya fala yace, azinji anango antawira. Iwo ampanga nkazi kuti: “Cincino tatawira, si thangwi pidalonga iwe basi tayu, mbwenye thangwi ife tabva tekha ene pontho tisadziwa kuti uyu ndiyedi Mpulumusi wa dziko.” Pakupita ntsiku ziwiri, Iye abuluka penepo mbaenda ku Galileya. (Iye ene Yezu akhadalonga kale kuti nkhabe Mporofeta anasimbwa ku dziko kwace.) Pidafika Yezu ku Galileya, anthu ku Galileya antambira mwadidi. Iwo akhadaona pyonsene pikhadacita Iye ku Djerusalema, pa n'dzidzi wa phwandu ya Paxkwa, thangwi iwo akhalipombo kweneko. Yezu aenda pontho ku nzinda wa Kanaa ya ku Galileya, kule kukhadaphinduza Iye madzi kudza vinyu. Pontho akhalipo nyabasa m'bodzi wa nkulu wa mambo, akhakhala na mwana wace akhabva kupha ku kafaranaumi. Mukhadabva iye kuti Yezu akhadafika ku Galileya bulukira ku Djudeya, ansaka mbam'phemba kuti aende na iye kawangisa mwana wace akhafuna kufa. Yezu ampanga kuti: “Imwe mungakhonda kuona pidzindikiro na pirengo, nkhabe kudza katawira.” Nyabasa wankulu wa mambo alonga tenepa: “Mbuya, bwerani mwana wanga mbadzati kufa!” Yezu antawira kuti: “Ndoko pyako. Mwana wako ali m'maso.” Mamuna akhulupira mafala adalonga Yezu, mbaenda. Mukhaenda iye na njira, anyabasa ace akhadza kuna iye na mphangwa za kulonga kuti mwana wace ali m'maso. Mudabvundzisa iye kuti ndi n'dzidzi wanji udacita mbwenye mwana, iwo ampanga tenepa: “Acita mbwenye dzulo pa n'dzidzi ubodzi wa kumaulo.” Na tenepo, baba wace mwana anyerezera kuti ndiwo n'dzidzi ukhadalonga Yezu kuti: “Mwana wako ali m'maso.” Penepo, iye na mudzi wace onsene atawira Yezu. Ici ndico cidzindikiro caciwiri ca cirengo cidacita Yezu. Acicita pidabuluka Iye ku Djudeya kwenda ku Galileya. Buluka penepo, Yezu aenda ku Djerusalema ku phwandu ya madjuda. Ku Djerusalema, dhuzi na Nsuwo wa Mabira, kuna thawala ibodzi inacemerwa nciebhereu, Bhetsaidha. N'khundu mwace mukhali na makumbi maxanu. Mwenemu mukhakhala atenda azinji: maboli-boli, anyakulamala, anyampfutete, [mbakhadikhira kutekenyeka kwa madzi. Midzidzi inango, anju m'bodzi wa Mbuya akhachita n'thawala mbakhabvundula madzi. Munthu wakutoma anagwera, pakumala kubvundulwa madzi na anju, akhawangiswa nthenda yace ipi na ipi. ] Penepo pakhali na mamuna m'bodzi akhali na pyaka makumatatu na pisere mbali na utenda. Yezu mudamuona iye mbakhagona, pontho na kun'dziwa kuti iye ali na utenda unowu pyaka pizinji, am'bvundza kuti: “Iwe usafuna uwange?” Nyampfutete antawira kuti: “Mbuya, nkhabe munthu wa kundiphedza kugwera n'thawala madzi angabvundulwa. N'dzidzi unaenda ine kagwera, asatoma ndi unango ine mbindisati kufika.” Na tenepo Yezu ampanga kuti: “Lamuka, kwata khangala yako uyende.” Na mwansanga mamuna awanga, akwata khangala yace mbatoma kufamba. Penepi pyacitika ntsiku ya Sabudu. Na thangwi eneyo, madjuda alonga kuna mamuna akhadawangiswa kuti: “Lero ndi Sabudu, nkhabe tawiriswa kuti ukwate khangala.” Mbwenye iye aatawira tenepa: “Mamuna adandiwangisa andipanga kuti: ‘Kwata khangala yako uyende.’ ” Na tenepo, iwo am'bvundza kuti: “Mbani mamuna unowu adakupanga kwata khangala yako uyende?” Mbwenye iye hakhandziwabve mbani adamuwangisa tayu, thangwi Yezu akhadabuluka mbakhonda kuoniwa pakati pa mwinji wa anthu akhali penepo. Buluka penepo, Yezu adza kan'gumana ali mu Nyumba ya Mulungu mbampanga kuti: “Lang'ana, iwe wawanga. Leka kudawa pontho, toera uleke kucitikirwa na pinango pyakupiringana penepi.” Mamuna aenda mbapanga madjuda, kuti ndi Yezu adamuwangisa. Na thangwi eneyo, madjuda atoma kuzonda Yezu, thangwi Iye akhacita penepi ntsiku ya Sabudu. Mbwenye Yezu aapanga tenepa: “Baba wanga na lero ali ciriri na kuphata basa, na Inembo na lero ndiri ciriri na kuphata basa.” Na thangwi eneyo, madjuda akhatekereratu kakamwe kusaka kumupha. Si thangwi ya kupwaza Sabudu basi tayu, mbwenye pontho akhalonga kuti Mulungu ndi Baba wace, mbacitika sawa-sawa na Mulungu. Mbwenye Yezu aatawira tenepa: “Ndimo mwene, ndimo mwene ndisakupangani kuti Mwana nkhabe kwanisa kucita cinthu ekha ene. Anacita pire basi pinaona Iye Baba wace mbacita. Thangwi pinacita Baba, Mwana asapicitambo. Thangwi Baba asafuna Mwana wace, mbampangisa pyonsene pinacita Iye. Pontho anati ampangize mabasa makulu kupiringana awa, toera imwe mudzumatirwe. Thangwi sawa-sawa ninga Baba asalamusa anyakufa mbaapasa upulumuki, Mwana anapasambo upulumuki, ule anafuna Iye. Pontho, Baba nkhabe tonga munthu, mbwenye mphambvu zonsene za utongi azipasa Mwana wace. Penepyo toera kuti onsene alemedze Mwana ninga munalemedza iwo Baba. Ule anakhonda kulemedza Mwana, asakhondambo kulemedza Baba adatuma Mwana. “Ndimo mwene, ndimo mwene ndisakupangani kuti: Ule anabva fala yanga mbatawira kuna ule adandituma, ana upulumuki wakukhonda kumala, pontho nkhabe kudza kakoneswa, mbwenye abuluka pa kufa kwenda pa upulumuki. Ndimo mwene, ndimo mwene ndisakupangani kuti n'dzidzi uli kufika, iwo wafika kale, wa kuti anyakufa anadza kabva fala ya Mwana wa Mulungu. Ale anaibva, anapulumuka. Thangwi ninga Baba ana upulumuki muna Iye ene, apasambo Mwana kuti akhale na upulumuki muna iyembo. Pontho ampasa mphambvu za kutonga thangwi Iye ndi Mwana wa Munthu. “Lekani dzumatirwa na penepi, thangwi n'dzidzi uli kufika, wa kuti onsene ali n'zinthumbi anati aibve fala yace, mbabuluka. Ale adacita udidi analamuka pa kufa toera akhale m'maso. Ale adacita pyakuipa analamuka pa kufa toera aoneswe nyatwa. Ndekha ene nkhabe cinafuna kwanisa ine kucita. Ine ndisatonga ninga pidabva ine basi, pontho kutonga kwanga ndi kwakulungama, thangwi nkhabe saka cita kufuna kwanga tayu, mbwenye kwa ule adandituma.” “Ndingapicitira umboni ndekha, umboni wanga ndi wa pezi. Alipo unango anandicitira umboni, pontho ndisadziwa kuti umboni unandicitira iye ndi wa ndimo mwene. “Imwe mwatuma atumwi kuna Juwau, pontho iye acita umboni wa ndimo mwene. Si kuti ndisafuna umboni wa munthu tayu, mbwenye ndisalonga penepi toera imwe mupulumuke. Juwau akhali nyale ibodzi ikhagaka mbikhamwinikira. Imwe mwafuna kutsandzaya pikulu na cieza cace pa n'dzidzi ung'ono. “Mbwenye Ine ndina umboni ukulu kupita wa Juwau. Thangwi mabasa anacita Ine, adandipasa Baba kuti ndiamalise, iwo asacita umboni kuti Baba andituma. Baba adandituma, Iye ene acita umboni na thangwi yanga. Imwe cipo mwabva fala yace, pontho nkhabe kun'dziwa akhala tani. Pontho fala yace nkhabe khala muna imwe, thangwi imwe nkhabe kuntawira ule adatuma Iye. Imwe musaipfundza mwadidi mwene Bukhu ya Mulungu, thangwi musanyerezera kuti n'kati mwayo, munagumanamo upulumuki wakukhonda kumala. Apo ndiyo Bukhu eneyo inacita umboni na thangwi yanga. Mbwenye imwe nkhabe funa bwera kuna Ine toera mukhale na upulumuki. “Ine nkhabe saka mbiri ya anthu, mbwenye Ine ndisakudziwani. Ndisadziwa kuti imwe nkhabe funa Mulungu. Ine ndabwera na dzina ya Baba, imwe mwakhonda kunditambira, mbwenye angabwera unango na dzina yace ekha, munantambira. Munakwanisa tani kutawira, ngakhala imwe musapasana mbiri mwekha ene, mbwenye mbamukhonda kusaka mbiri inabuluka kuna Mulungu m'bodzi ekha? “Lekani kunyerezera kuti ndinakusumirani kuna Baba. Anafuna kukusumirani ndi Mozesi, ule ananyindira imwe. Thangwi imwe mbamudatawira Mozesi, mbamudatawirambo Ine, thangwi iye alemba na thangwi yanga. Mbwenye ngakhala imwe mwakhonda pidalemba iye, munatawira tani mafala anga?” Buluka penepo, Yezu aenda kuntunda unango wa nyandza ya Galileya, inadziwika pontho na dzina ya Tibheriyadhi. Mwinji ukulu wa anthu ukhantowera, thangwi akhadaona pidzindikiro pya pirengo pikhacita Iye kuna atenda. Na tenepo, Yezu akwira pa phiri, mbakhala pantsi pabodzi na anyakupfundza ace. Phwandu ya Paxkwa ya madjuda ikhali dhuzi. Yezu pidalang'ana Iye mbaona mwinji wa anthu mbukhanfendedzera, Iye alonga kuna Filipi kuti: “Ndi kupi kunafuna ife gula mikate kuti anthu awa adye?” Iye acita m'bvundzo uyu kuna Filipi toera kumulesera, thangwi iye Yezu akhapidziwa kale pikhafuna iye kucita. Filipi antawira kuti: “Na ntengo wa madzana mawiri a kobiri ya parata, mbatigula mikate toera munthu m'bodzi na m'bodzi atambire phindi yace, mbapidakwana tayu.” Nyakupfundza wace unango anacemerwa Andereya, m'bale wace Simau Pedhru, atawirambo mbalonga kuti: “Pano alipo m'phale m'bodzi ana mikate mixanu na nyama ziwiri za m'madzi. Mbwenye pinakwananji penepi kuna anthu onsene?” Yezu alonga kuti: “Akhazikeni anthu pantsi.” Anthu onsene akhala pantsi, thangwi pakhali na cimbanjiri cizinji. Penepo pakhali na amuna akuthamangira pikwi pixanu (5.000). Na tenepo, Yezu akwata mikate mbapereka takhuta kuna Mulungu, mbaigawira anthu ninga mukhafunira iwo. Iye acitambo penepyo sawa-sawa na nyama za m'madzi. Onsene pidamala iwo kudya mbakhuta, Yezu apanga anyakupfundza ace kuti: “Gumanyani mapindi adasala. Lekani kutaya cinthu.” Na tenepo, iwo agumanya mapindi akhadasala a mikate mixanu ikhadadya iwo, mbadzaza na iwo pitundu khumi na piwiri. Pakumala kuona cidzindikiro ca cirengo cidacita Yezu, mbumba yatoma kulonga tenepa: “Ndimo mwenedi, uyu ndiye Mporofeta akhadikhirwa pa dziko.” Yezu na kupidziwa kuti iwo akhafuna kudza kankwata na mphambvu kuti amuikhe ninga Mambo, apotoka pyace ekha ene mbaenda pontho ku phiri. Pidadoka dzuwa, anyakupfundza ace achitira mbaenda ku nyandza. Apakira m'bote mbawambuka kwenda ku Kafaranaumi. Kunja kukhadaswipa, Yezu akhasati kwenda kagumana na iwo. Na tenepo, yaoneka mphepo ikulu kakamwe mbikhacita mabimbi. Pakumala kucapa n'nyandza nsindzo wa kukwana makilometuru maxanu peno matanthatu, aona Yezu mbakhafamba padzulu pa madzi, onsene mbagopa. Mbwenye Iye aapanga tenepa: “Ndine pano! Lekani kugopa!” Na tenepo, iwo antambira mwadidi m'bote, na mwansanga mbafika pa gombe ikhaenda iwo. Mangwana mwace, mwinji wa anthu ukhadasala ku ntunda unango wa nyandza, waona kuti penepo pakhali na bote ibodzi basi. Pontho Yezu hadapakira bote pabodzi na anyakupfundza ace tayu, mbwenye anyakupfundza ace akhadaenda okha ene. Na tenepo, mabote anango adabuluka ku nzinda wa Tibheriyadhi afika mbatsama dhuzi na pale pakhadadya mbumba mikate ire ikhadaphembererwa na Mbuya. Mbumba pidadziwa iyo kuti nkhabepo penepo Yezu peno anyakupfundza ace, yapakira m'mabote mbiyenda na saka Yezu ku Kafaranaumi. Anthu pidan'gumana iwo Yezu kuntunda unango wa nyandza, am'bvundza tenepa: “Mpfundzisi, mwafika lini pano?” Yezu atawira kuti: “Ndimo mwene, ndimo mwene kuti imwe musandisaka, si thangwi ya kuona pidzindikiro pya pirengo tayu, mbwenye ndi thangwi mwadya mikate mbamukhuta. Lekani kuphatira basa na thangwi ya cakudya cinamala, mbwenye phatirani cakudya cinakhonda kumala cinakhala na upulumuki wa kwenda na kwenda unafuna kukupasani Ine, Mwana wa Munthu. Thangwi Mulungu Baba amuikha cidhindo cakuntawirira.” Na tenepo, iwo am'bvundza kuti: “Ticitenji toera tiphate mabasa anafuna Mulungu?” Iye atawira kuti: “Basa ya Mulungu ndi ixi: Kutawira kuna ule adatuma Iye.” Na tenepo iwo am'bvundza kuti: “Ndi cidzindikiro canji ca cirengo cinafuna kutipangisa iwe, toera ticione pontho tikutawire? Ndi ninji pinafuna cita iwe? Ambuya athu adya manaa n'thando ninga mudalemberwa ipyo kuti: ‘Iye aadyesa nkate wa kudzulu.’ ” Yezu aapanga kuti: “Ndimo mwene, ndimo mwene ndisakupangani kuti: Mozesi siye adaapasa nkate udabuluka kudzulu tayu, mbwenye ndi Baba wanga anakupasani nkatedi wa kudzulu. Thangwi nkate wa Mulungu ndi ule udachita buluka kudzulu mbupasa upulumuki dziko.” Iwo alonga tenepa: “Mbuya, tipaseni mphapo nkate unowu ntsiku zonsene!” Na tenepo, Yezu aapanga kuti: “Ine ndine nkate wa upulumuki. Ule anadza kuna Ine, na lini anadza kabva pontho njala. Ule ananditawira, na lini anadza kabva pontho nyota. Ninga ndakupangani kale, imwe musandiona, mbwenye nkhabe kunditawira. Ale onsene anandipasa Baba, anadza kuna Ine. Ule anabwera kuna Ine, cipo ndinadza kan'khonda. Thangwi Ine ndachita buluka kudzulu sidabwera kudza kacita kufuna kwanga tayu, mbwenye ndabwera kacita kufuna kwa ule adandituma. Kufuna kwa ule adandituma ndi uku: kuti Ine ndikhonde taya munthu m'bodzi kwa ale adandipasa Iye, mbwenye ndialamuse pa kufa ntsiku yakumalisa. Thangwi kufuna kwa Baba wanga ndi kuti onsene ale analang'ana kuna Mwana mbantawira, anakhala na upulumuki wakukhonda kumala pontho Ine, ndinaalamusa pa ntsiku yakumalisa.” Na penepi, madjuda atoma kudungunya na thangwi ya kulonga kudacita Yezu kuti: “Ine ndine nkate udabuluka kudzulu.” Iwo akhalonga tenepa: “Kodi unowu siye tayu Yezu mwana wa Zuze? Baba wace na mai wace ife nkhabe kuadziwa? Mphapo thangwi yanji cincino asalonga kuti: ‘Ndachita buluka kudzulu?’ ” Yezu aatawira tenepa: “Matamani. Lekani kudungunya mwekha ene. Nkhabe anakwanisa kudza kuna Ine angakhonda bwereswa na Baba adandituma, pontho Ine ndinadza kamulamusa pa kufa ntsiku yakumalisa. Pyalembwa m'mabukhu a Maporofeta kuti: ‘Onsene anadza kapfundziswa na Mulungu.’ Mphapo onsene anabva Baba mbapfundza na Iye, anadza kuna Ine. Sikulongera kuti alipo adaona Baba tayu, mbwenye Ule basi adabuluka kuna Mulungu, ndiye ekha adaona Baba. Ndimo mwene, ndimo mwene ndisakupangani kuti: Ule ananditawira, ana upulumuki wakukhonda kumala. Ine ndine nkate wa upulumuki. Ambuya anu adya manaa n'thando, mbwenye adza kafa. Mbwenye pano ulipo nkate udabuluka kudzulu, toera ale anaudya akhonde kufa. Ine ndine nkate wa m'maso udachita buluka kudzulu. Anadya nkate unowu, ana upulumuki wakukhonda kumala. Nkate unowu unafuna kuapasa Ine, ndi nyama yanga ene, inafuna kuapasa ine toera dziko ipulumuke.” Na tenepo madjuda atoma kuketesana okha-okha mbalonga kuti: “Pinacitika tani kuti mamuna uyu atidyese nyama ya manungo ace?” Yezu aapanga kuti: “Ndimo mwene, ndimo mwene Ine ndisakupangani kuti, mungakhonda kudya nyama ya Ine Mwana wa Munthu, pontho mbamukhonda kumwa ciropa canga, muna imwe nkhabe kudza kakhala na upulumuki. Munthu onsene anadya nyama yanga mbamwa ciropa canga, ana upulumuki wakukhonda kumala, pontho ndinamulamusa pa ntsiku yakumalisa. Thangwi nyama yanga ndico cakudyadi kakamwe, na ciropa canga ndico cakumwadi kakamwe. Munthu onsene anadya nyama yanga mbamwa ciropa canga, anakhala muna Ine, Inembo ndinakhala muna iye. Sawa-sawa ninga Baba ali m'maso andituma, pontho Ine ndiri m'maso na thangwi ya Baba, na tenepo, ule anandidya anadza kakhala m'maso na thangwi yanga. Uyu ndiwo nkate udabuluka kudzulu, wakusyana na ule udadya a mbuya anu mbamala kufa, mbwenye ule anadya nkate uyu anakhala na upulumuki wakukhonda kumala.” Yezu alonga penepi mukhapfundzisa Iye mu nyumba ya kuphemberera ya ku Kafaranaumi. Anyakupfundza azinji a Yezu, mudabva iwo penepi alonga kuti: “Mafala awa anentsa! Mbani anakwanisa kupibvesa?” Yezu na kudziwa muntima mwace kuti anyakupfundza ace akhadungunya na thangwi ya mafala adalonga Iye, aapanga kuti: “Imwe mwaipirwa na pidalonga Ine? Ndiye tani imwe mungaona Ine, Mwana wa Munthu mbandikwira kwenda kukhakhala Ine kale ene? Nzimu usapasa upulumuki. Nyama nkhabe pinacita iyo. Mafala adakupangani Ine ndiwo nzimu na upulumuki. Mbwenye alipo anango pakati panu asakhonda kutawira.” Thangwi Yezu akhapidziwa kale ene mbani akhakhonda kutawira, pontho mbani akhafuna kunsandukira. Yezu athimiza mbalonga kuti: “Ndi thangwi eneyi pidakupangani Ine kuti, nkhabe munthu anafuna bwera kuna Ine angakhonda kupaswa penepi na Baba.” Bulukira n'dzidzi unowu kwenda kutsogolo, azinji anyakupfundza ace abwerera n'nduli mbakhonda kuntowera. Yezu abvundza anyakupfundza ace khumi na awiri kuti: “Imwe nkhabe funa kwendambo?” Penepo Simau Pedhru antawira kuti: “Mbuya tinenda kuna ani? Imwe ndimwe muna mafala anapasa upulumuki wakukhonda kumala. Ife tisatawira pontho tisadziwa kuti imwe ndimwe Wakucena wa Mulungu.” Na tenepo, Yezu aatawira kuti: “Ine sidakusankhulani khumi na awiri tayu? Mbwenye m'bodzi wanu ana Dyabu.” (Iye akhalongera Djuda mwana wa Simau Xikariyoti, m'bodzi wa anyakupfundza ace khumi na awiri, ule adadza kansandukira.) Pakumala penepyo, Yezu atoma kufamba mu Galileya. Iye akhakhonda kufamba mu Djudeya, thangwi kweneko madjuda akhafuna kumupha. Mbwenye dhuzi na kukwana n'dzidzi wa Phwandu ya Makumbi, ya madjuda abale ace Yezu ampanga tenepa: “Iwe usafunika ubuluke pano uyende ku Djudeya, toera anyakupfundza ako akwanise kuona mabasa anacita iwe. Thangwi nkhabe munthu anafuna kubvekera, mbacita pinthu n'cibiso-biso. Mphapo iwe usacita pinthu penepi, pangizika kuna anthu.” Thangwi na abale ace ene hakhantawira tayu. Na tenepo, Yezu aapanga kuti: “N'dzidzi wanga udzati kukwana, mbwenye kwa imwe midzidzi yonsene ndi yadidi. Anthu a padziko ino nkhabe kwanisa kukuzondani, mbwenye Ine asandizonda thangwi ndisaalongera kuti pinacita iwo mphyakuipa. Ndokoni ndimwe ku phwandu. Ine sinendako ku phwandu eneyi tayu, thangwi n'dzidzi wanga udzati kukwana.” Yezu mudamala Iye kulonga penepi, asala mu Galileya. Mbwenye abale ace pidamala iwo kwenda ku phwandu, iye aendambo n'cibiso-biso mbakhonda kupangizika. Pa phwandu, madjuda akhansaka Yezu mbakhabvundzisa kuti: “Mamuna ule ali kupi?” Pakati pa mbumba, azinji akhadungunya nciwerewere na thangwi yace. Anango akhalonga kuti: “Iye ndi munthu wadidi.” Anango akhatawira kuti: “Nkhabe, Iye asanyengeza mbumba.” Mbwenye nkhabe akhamulonga pakweca, thangwi akhagopa atsogoleri a madjuda. Pakati pa phwandu, Yezu aenda ku Nyumba ya Mulungu, mbatoma kupfundzisa. Madjuda adzumatirwa, mbabvundza kuti: “Mamuna uyu asadziwa tani pinthu penepi, iye pfundza nkhabe?” Yezu aatawira kuti: “Pinapfundzisa Ine si pyanga tayu. Piri kubuluka kuna ule adandituma. Munthu anafuna kucita kufuna kwa Mulungu, anadzindikira ngakhala pinapfundzisa Ine pyabuluka kuna Mulungu, peno ndisalonga pyanga ndekha. Ule anapilongera ekha ene, asasaka mbiri yace. Mbwenye ule anasaka mbiri ya ule adantuma, unowu ndi wa ndimo mwene. Nkhabe ca uthambi ciri muna iye. Mozesi adakupasani Mwambo tayu? Mphapo nkhabe m'bodzi wanu anatoweza Mwambo. Thangwi yanji imwe musasaka kundipha?” Mwinji wa anthu antawira tenepa: “Iwe una dimonyo. Mbani asasaka kukupha?” Yezu aapanga kuti: “Ndacita cirengo cibodzi, imwe monsene mwadzumatirwa. Na tenepo, imwe musasidza ana anu acimuna ntsiku ya Sabudu, thangwi Mozesi akusiyirani mwambo unowu. (Mbwenye adatoma na penepi ndi a mbuya anu, si Mozesi tayu.) Mphapo ngakhala musasidza ana anu acimuna ntsiku ya Sabudu toera kutoweza mwambo wa Mozesi, thangwi yanji musaipirwa na pidawangisa Ine manungo onsene a munthu ntsiku ya Sabudu? Lekani kutonga mbamulang'ana nkhope, mbwenye tongani mwakulungama.” Na tenepo, anthu anango a ku Djerusalema atoma kubvundza kuti: “Siye uyu tayu mamuna anasaka iwo kuti amuphe? Iye ali pano mbalonga pakweca, iwo nkhabe kulonga na iye cinthu. Penepi nkhulongera kuti akulu autongi adza kantawira kuti iye ndiyedi Kirixtu? Mbwenye ife tisan'dziwa ngwa kupi mamuna unowu. Kirixtu angadza kabwera, nkhabe anadza kan'dziwa ndi wa kupi.” Pa n'dzidzi ukhapfundzisa iye pa thando ya Nyumba ya Mulungu, Yezu akhuwa mbalonga kuti: “Ande, imwe musandidziwa, pontho musadziwa ndine wa kupi. Ine sidabwera na kufuna kwanga tayu, mbwenye ule adandituma ndi wa ndimo mwene. Imwe nkhabe kun'dziwa. Mbwenye Ine ndisan'dziwa thangwi ndabuluka kuna Iye, pontho Iye ndiye adandituma.” Na tenepo akhafuna kum'manga mbwenye nkhabe m'bodzi adamphata, thangwi n'dzidzi wace ukhadakwana tayu. Anthu azinji pakati pa mbumba atawira Yezu. Pontho iwo alonga kuti: “Kirixtu angadza kabwera anacita pidzindikiro pya pirengo pizinji kupiringana pidacita mamuna uyu?” Afarisi abva mbumba mbikhadungunya pinthu penepi na thangwi ya Yezu. Na tenepo akulu aanyantsembe pabodzi na afarisi, atuma ale akhaonerera Nyumba ya Mulungu toera aende kam'mange. Yezu aapanga tenepa: “Ndinakhala pontho na imwe n'dzidzi ung'ono basi. Buluka penepo ndinenda kuna ule adandituma. Imwe munadza kandisaka, mbwenye nkhabe kudza kandigumana. Kunakhala Ine, imwe nkhabe kwanisa kwendako.” Madjuda akhalonga okha-okha kuti: “Mamuna unowu ndi kupi kunafuna kwenda iye mbaticimwana kun'gumana? Kodi ali kwenda kwa madjuda adamala balalika mbabvungazikana na ale adakhonda kukhala madjuda toera akhaapfundzise? Akhafuna kulonganji iye na mafala a kuti: ‘Imwe munadza kandisaka, mbwenye nkhabe kudza kandigumana’, pontho ‘Kunafuna khala Ine, imwe nkhabe kwanisa kwendako?’ ” Pa ntsiku yakumalisa, ntsiku ikulu kakamwe ya phwandu, Yezu alimira mbalonga na kugaluza kuti: “Ngakhala alipo ana nyota mbabwere kuna Ine amwe. Ule ananditawira, ninga kulonga kunacita Bukhu ya Mulungu, n'kati mwace munabuluka mikulo ya kuwewa madzi a upulumuki.” Na mafala enewa, Yezu akhafuna kulonga kuti onsene anantawira, anadza katambira Nzimu Wakucena. Thangwi mpaka n'dzidzi unowu, Nzimu Wakucena ukhadadzati kutumwa, thangwi Yezu akhadzati kupaswa mbiri. Na tenepo, anthu azinji mudabva iwo mafala ace alonga kuti: “Ndimo mwenedi, mamuna uyu ndi Mporofeta.” Anango akhalonga tenepa: “Iye ndi Kirixtu.” Mbwenye anango akhabvundza kuti: “Kirixtu buluka ku Galileya? Bukhu ya Mulungu nkhabe kulonga kuti Kirixtu anabuluka ku dzindza ya Dhavidhi, ku nzinda wa Bheleya, kukhakhala Dhavidhi?” Na tenepo, mbumba yagawika na thangwi ya Yezu. Anango akhafuna kum'manga, mbwenye nkhabe m'bodzi adamphata. Pakumalisa, anyakuonera Nyumba ya Mulungu abwerera kuna akulu aanyantsembe na kuna afarisi. Penepo anyantsembe na afarisi aabvundza kuti: “Thangwi yanji imwe mwakhonda kudza na iye?” Anyakuonera atawira tenepa: “Cipo tidzati kubva munthu unango mbalonga ninga Iye.” Afarisi aabvundza tenepa: “Kodi na imwe ene mwamala nyengezwambo? Penepo alipo nkulu m'bodzi wa utongi peno wa afarisi adatawirambo? Nkhabe! Mbwenye anthu awa akupwazika akukhonda dziwa mwambo, anapaswa dzedze na Mulungu.” Nikodhemu, nkulu m'bodzi wa afarisi akhadaenda na anthu kasaka Yezu, aabvundza tenepa: “Mwambo wathu usatawirira kukonesa munthu, mbatidzati kumubva toera kudziwa pidacita iye?” Iwo atawira tenepa: “Kodi iwembo ndiwe wa ku Galileya? Lang'anisa malemba a Mulungu, unaona kuti nkhabe mporofeta m'bodzi anabuluka ku Galileya.” [Na tenepo, m'bodzi na m'bodzi aenda ku nyumba kwace. Mbwenye Yezu aenda ku phiri ya Mulivera. Na macibese ene, Yezu abwerera pontho mu Nyumba ya Mulungu, mudagumanyikana mbumba yonsene n'khundu mwace, Iye mbakhala pantsi toera aipfundzise. Anyakudziwisa a Mwambo na afarisi, am'bweresera nkazi m'bodzi adagumanizwa mbacita upombo, mbamulimisa patsogolo pa anthu onsene. Iwo alonga kuna Yezu kuti: “Mpfundzisi, nkazi uyu agumanizwa mbakhacita upombo. Mbwenye pa Mwambo wa Mozesi, akazi ninga awa asatongwa kuti amenyiwe na myala. Imwe Mbuya, musaona tani?” Iwo akhacita m'bvundzo unowu ninga kumulesera, toera asake thangwi ya kumpambazira nayo. Mbwenye Yezu akotama mbatoma kulemba pantsi na cala. Yezu na kuona kuti ali kuthimiza na kum'bvundza, alamuka mbaapanga tenepa: “Ngakhala alipo munthu pakati panu wakukhonda kudawa, mbatome ndiye kuponya mwala kuna nkazi.” Yezu akotama pontho mbatoma kulemba pantsi. Na kubva mafala enewa, atoma buluka m'bodzi na m'bodzi, kutomera kwa akulu mpaka akumalisira, mbasala Yezu ekha ene. Mbwenye nkazi asala dzololo, pakati pakhadaikhwa iye. Na tenepo, Yezu alamuka mbam'bvundza nkazi kuti: “Nkaziwe, ali kupi adakusumira? Nkhabe m'bodzi adakukonesa?” Nkazi atawira kuti: “Nkhabe, Mbuya.” Yezu ampanga tenepa: “Na inembo nkhabe kukukonesa. Cincino ndoko, leka dawa pontho. ”] Yezu aapanga pontho kuti: “Ine ndine cieza ca dziko. Ule ananditowera nkhabebve famba pontho n'cidima, mbwenye anakhala na cieza ca upulumuki.” Afarisi ampanga kuti: “Iwe usapicitira umboni wekha ene. Na tenepo, umboni wako si wa ndimo mwene tayu.” Yezu atawira kuti: “Ngakhala Ine ndisapicitira umboni wanga ndekha, umboni wanga ndi wa ndimo mwene, thangwi ndisadziwa kudabuluka Ine na kunaenda Ine. Mbwenye imwe nkhabe dziwa kudabuluka Ine, peno kunaenda Ine. Imwe musatonga mu nyama, Ine nkhabe tonga munthu tayu. Pontho Ine ndingatonga, matongero anga ndi a ndimo mwene, thangwi siri ndekha tayu, ndiri na Baba adandituma. Pa Mwambo wanu pyalembwa kuti umboni wa anthu awiri ndi wa ndimo mwene. Ine ndisapicitira umboni ndekha ene, unango anandicitira umboni ndi Baba adandituma.” Na tenepo iwo am'bvundza kuti: “Ali kupi Baba wako?” Yezu atawira kuti: “Imwe nkhabe kundidziwa pontho nkhabe kun'dziwa Baba wanga. Mbamudandidziwa Ine, mbamudadziwambo Baba wanga.” Yezu akhalonga mafala awa pa n'dzidzi ukhapfundzisa Iye mu Nyumba ya Mulungu, dhuzi na pakhaikhwa miyoni. Mbwenye nkhabe munthu adam'manga, thangwi n'dzidzi wace ukhadzati fika. Yezu athimiza na kuapanga kuti: “Ine ndiri kwenda, imwe munati mundisake, mbwenye munati mufere n'kati mwa kudawa kwanu. Kuna funa Ine kwenda, imwe nkhabe kwanisa kwendako.” Na tenepo, madjuda atoma bvundza kuti: “Kodi nkhulongera kuti iye funa apheke ekha ene? Thangwi iye asalonga kuti kunafuna Ine kwenda, imwe nkhabe kudza kaendako.” Mbwenye Yezu athimiza na kulonga kuti: “Imwe ndimwe a pantsi pano, INE NDINE wa kudzulu. Imwe ndimwe a padziko ino, Ine sine wa dziko ino tayu. Na thangwi eneyo, Ine ndakupangani kuti imwe munati mufere n'kati mwa madawi anu. Mungakhonda kutawira kuti Ine Ndine, munati mufere n'kati mwa madawi anu.” Iwo am'bvundza kuti: “Iwe ndiwe ani?” Yezu aatawira kuti: “Ndi pire pikhakupangani Ine midzidzi yonsene. Ndina pinthu pizinji pya kulonga na pya kukutongani. Mbwenye ule adandituma ndi wakunyindirika, pontho pire pidabva Ine kuna Iye, ndipyo pinalonga Ine pa dziko.” Mbwenye iwo hadapibvesa tayu kuti akhalonga na thangwi ya Baba wace. Na tenepo Yezu alonga kuti: “Mungalamusa Ine Mwana wa Munthu, munadza kadziwa kuti INE NDINE, pontho nkhabe cita cinthu canga ndekha, mbwenye ndisalonga sawa-sawa ninga mudandipfundzisira Baba. Ule adandituma ali na Ine. Nkhabe kundisiya ndekha ene, thangwi midzidzi yonsene Ine ndisacita pinan'tsandzaisa.” Mukhalonga Iye penepi, anthu azinji antawira. Yezu alonga kuna madjuda ale adantawira kuti: “Mungakhala mbamunyindira fala yanga, ndimwe anyakupfundza angadi. Na tenepo munati mudziwe pya ndimo mwene, pontho pya ndimo mwene pinadza kakusudzulani.” Iwo antawira kuti: “Ndife dzindza ya Abharaamu, pontho cipo tidzati khala adzakazi a munthu. Usalongeranji kuti tinati tikhale akusudzuka?” Yezu aatawira kuti: “Ndimo mwene, ndimo mwene ndisakupangani kuti: Munthu onsene anakhala mbadawa, ndi n'dzakazi wa kudawa. N'dzakazi hanakhala ninga mwana wa pa nyumba kwenda na kwenda tayu. Mbwenye mwana, ndi wa pa nyumba kwenda na kwenda. Na thangwi eneyo, Mwana angakusudzulani imwe munakhaladi akusudzuka. Ine ndisadziwa kuti ndimwe a dzindza ya Abharaamu, mbwenye musasaka kundipha, thangwi fala yanga nkhabe pita muna imwe. Ine ndisakupangani pidaona Ine kuna Baba wanga, mbwenye imwe musacita pidabva imwe kuna baba wanu.” Iwo atawira kuti: “Abharaamu ndi baba wathu.” Yezu aapanga tenepa: “Mbamudakhala ndimwe ana a Abharaamu, mbamudacita mabasa a Abharaamu. Mbwenye cincino musasaka kupha Ine anakupangani pya ndimo mwene, pidabva Ine kuna Mulungu. Abharaamu hadacita tenepo tayu. Imwe musacita mabasa a baba wanu.” Iwo ampanga tenepa: “Ife sife ana a upombo tayu, Baba wathu ndi m'bodzi basi, Iye Mulungu.” Yezu aapanga kuti: “Mulungu mbadakhala ndi Baba wanu, imwe mbamudandifuna, thangwi Ine ndabuluka kuna Mulungu, cincino ndiri pano. Ine sidabwera na kufuna kwanga tayu, mbwenye ndiye adandituma. Thangwi yanji imwe nkhabe bvesesa malongero anga? Thangwi imwe nkhabe kwanisa kubva pinalonga Ine. “Imwe muna baba wanu, ndi Dyabu, musafuna mucite kufuna kwace. Iye ndi phanga kutomera pakutoma, pontho iye nkhabe longa pya ndimo mwene. Angalonga uthambi, ndi makhaliro ace, thangwi iye ndi nyauthambi, pontho ndi baba wa uthambi. Mbwenye thangwi Ine ndisakupangani pyamaso, imwe nkhabe kunditawira. Mbani mwa imwe anakwanisa kupangisa pakweca kudawa kwanga? Ngakhala pinalonga Ine mphya ndimo mwene, thangwi yanji imwe nkhabe kunditawira? Ana a Mulungu anabva Mafala a Mulungu. Mbwenye imwe nkhabe kubva thangwi simwe a Mulungu tayu.” Madjuda antawira kuti: “Pinalonga ife simo mwene tayu kuti ndiwe wa ku Samariya pontho una dimonyo?” Yezu aatawira kuti: “Ine nkhabe dimonyo! Ine ndisalemedza Baba wanga, mbwenye imwe musandipwaza. Ine nkhabe saka mbiri yanga ndekha, mbwenye alipo anaisaka pontho mbatonga. Ndimo mwene, ndimo mwene ndisakupangani kuti, munthu anakoya fala yanga, nkhabe kudza kafabve kwenda na kwenda.” Na tenepo, madjuda alonga kuti: “Cincino takudziwa kuti iwe una dimonyo! Abharaamu na maporofeta afa, mbwenye iwe usalonga kuti munthu anakoya mafala anga, nkhabe kudza kafabve! Iwe ndiwe nkulu kupita baba wathu Abharaamu? Iye na maporofeta afa. Kodi iwe usafuna ukhale ani?” Yezu aatawira kuti: “Ngakhala ndisapasika mbiri ndekha, mbiri yanga nkhabe longa pinthu. Anandipasa mbiri ndi Baba, unowu analonga imwe kuti ndi Mulungu wanu. Imwe nkhabe kun'dziwa, mbwenye Ine ndisan'dziwa. Ndingalonga kuti Ine nkhabe kun'dziwa ndine nyauthambi ninga imwe, mbwenye Ine ndisan'dziwa mbandikoya mafala ace. Abharaamu baba wanu, atsandzaya na kufuna kuona ntsiku yanga. Iye aiona mbakomerwa.” Madjuda alonga kuti: “Iwe udzati kucita pyaka makumaxanu, wamuona tani Abharaamu?” Yezu atawira kuti: “Ndimo mwene, ndimo mwene ndisakupangani kuti Abharaamu mbadzati kubalwa, INE NDINE.” Na tenepo, madjuda alokota myala kuti am'menye, mbwenye Yezu abisalika mbabuluka mu Nyumba ya Mulungu. Yezu mukhapita iye aona mamuna m'bodzi adabalwa mbali boli-boli. Anyakupfundza ace am'bvundza kuti: “Mpfundzisi, mamuna uyu kuti abaliwe mbali boli-boli, mbani adadawa: Ndiye, peno ndi anyakubala?” Yezu aatawira kuti: “Iye peno anyakubala, hadadawa tayu. Mbwenye abaliwa mbali boli-boli, toera mabasa a Mulungu apangizike muna iye. Pisafunika tiphate basa ya ule adandituma, dzuwa mbiciripo. Masiku ali dhuzi a kuti nkhabe anadza kakwanisa kuphata basa. Mbandiri pa dziko pano, ndine cieza ca dziko.” Yezu pidamala iye longa penepi, aphula mata pantsi mbamunya matope na mata ace, mbaakhwaza m'maso mwa boli-boli. Na tenepo, ampanga kuti: “Ndoko kasambe mu thawala inacemerwa Silowee.” (Silowee ndi kubveka “kutumwa.”) Mbwenye mamuna aenda kasamba, mbabwerera mbakhaona. Andzace a pa cisa na anango akhamuona kale mbakhaphemba cakudya, akhabvundzisa kuti: “Mamuna uyu siye m'bodzi ene tayu, akhali na nsambo wa kukhala nawa mbakhaphemba cakudya?” Anango akhalonga kuti ndiye. Anango akhalonga kuti: “Siye tayu, nkhulandana.” Mbwenye iye mwanacinthu akhalonga kuti: “Ndine pano.” Na tenepo, iwo am'bvundzisa kuti: “Maso ako afunguka tani?” Iye aatawira mbalonga tenepa: “Mamuna anacemerwa Yezu amunya matope na mata ace, mbaakhwaza m'maso mwanga, mbandipanga kuti ndoko ku thawala inacemerwa Silowee ukhasambe. Ine ndaenda kasamba, mbatitoma kuona.” Iwo am'bvundzisa kuti: “Ali kupi mamuna unowu?” Boli-boli aatawira kuti: “Peno, nkhabe dziwako kuna iye.” Mamuna akhali boli-boli akwatiwa mbaenda kuna afarisi. Ntsiku idamunya Yezu matope na mata ace maso a boli-boli mbafunguka, ikhali ntsiku ya Sabudu. Na tenepo, afarisi am'bvundzambo kuti: “Maso ako awanga tani?” Iye aatawira tenepa: “Yezu amunya matope na mata ace mbaakhwaza m'maso mwanga, Ine mbandienda kasamba. Cincino ndiri kuona.” Afarisi anango alonga kuti: “Mamuna uyu si munthu wa Mulungu tayu, thangwi nkhabe kulemedza Sabudu.” Mbwenye anangombo akhabvundza kuti: “Pinacitikadi kuti nyakudawa acite pidzindikiro pya pirengo ninga penepi?” Na tenepo, paoneka kugawana pakati pawo. Afarisi athimiza kubvundza boli-boli kuti: “Usamuona tanimbo iwe mamuna unowu? Adafungulwa maso siwe.” Iye aatawira kuti: “Ndi mporofeta.” Madjuda mbadzati kucemeresa baba wace na mai wace, akhakhonda kutawira kuti mamuna uyu akhali boli-boli, cincino awangiswa. Na tenepo, iwo abvundza baba wace na mai wace kuti: “Ndiye uyu mwana wanu analonga imwe kuti abalwa mbali boli-boli? Iye adza kakwanisa tani kuona cincino?” Baba wace na mai wace aatawira kuti: “Ife tisadziwa kuti mwana uyu ngwathu, pontho iye abalwa mbali boli-boli. Mbwenye ife nkhabe dziwa kuti cincino adza kakwanisa tani kuona, peno mbani adanfungula maso. Na tenepo bvundzani iye, thangwi iye ndi nkulu, analonga ekha.” Baba wace na mai wace alonga penepi thangwi akhagopa madjuda. Thangwi madjuda akhadabverana kale kuti munthu analonga kuti Yezu ndi Kirixtu, anan'thamangisa n'nyumba ya kuphembera. Ndi thangwi eneyo idacita kuti baba wace na mai wace alonge kuti: “Iye ndi nkulu, bvundzani iye.” Madjuda ancemeresa kaciwiri mamuna akhali boli-boli, mbampanga tenepa: “Dumbira patsogolo pana Mulungu ngakhala ndimo mwene. Ife tisadziwa kuti mamuna uyu ndi nyakudawa.” Iye atawira tenepa: “Ine nkhabe kupidziwa kuti iye ndi nyakudawa peno nkhabe. Pinadziwa ine ndi kuti ine ndabaliwa mbandiri boli-boli, mbwenye cincino ndiri kuona.” Na tenepo am'bvundza kuti: “Akucitiranji Iye? Akufungula tani maso?” Iye atawira tenepa: “Ine ndakupangani kale, imwe nkhabe funa kundibva. Musafuna kubvanji pontho? Kodi imwe musafunambo mukhale anyakupfundza ace?” Penepo madjuda antikana mbalonga tenepa: “Nyakupfundza wace ndiwe! Mbwenye ife ndife anyakupfundza a Mozesi! Ife tisadziwa kuti Mulungu alonga na Mozesi, mbwenye mamuna unowu, ife nkhabe kun'dziwa na pang'ono pene kudabuluka iye.” Mamuna atawira tenepa: “Ipi ndi pinthu pinadzumisa! Imwe nkhabe kun'dziwa kudabuluka iye, mbwenye iye andifungula maso. Ife tisadziwa kuti Mulungu nkhabe kubva munthu wa kudawa, mbwenye asabva munthu anan'gopa mbacita kufuna kwace. “Pontho cipo pidzati kubveka kuti akhalipo munthu adafungula maso munthu adabalwa mbali boli-boli. Mamuna unowu mbadakhonda kukhala wa Mulungu, nkhabe cinthu cikhafuna kucita iye.” Mbwenye madjuda alonga tenepa: “Iwe wabalwa na kudawa kukulu. Ninji pontho pinafuna iwe kutipfundzisa?” Mban'thamangisa mu nyumba ya kuphemberera. Yezu pidabva Iye kuti mamuna athamangiswa, aenda kaonana na iye mbam'bvundza kuti: “Iwe usantawira Mwana wa Munthu? ” Mamuna akhali boli-boli atawira mbalonga tenepa: “Ndi ani iye Mbuya, toera ine ndintawire?” Yezu ampanga kuti: “Iwe ukhadamuona kale. Ndi unowu analonga na iwe.” Na tenepo, mamuna alonga kuti: “Mbuya, ndinatawira.” Mbamulambira. Yezu alonga tenepa: “Ine ndabwera pa dziko kudza katonga, toera maboli-boli aone, pontho ale anaona akhale maboli-boli.” Afarisi anango akhali na iye penepo, mudabva iwo mbakhalonga penepi am'bvundza kuti: “Kodi nkhulongera kuti ifembo ndife maboli-boli?” Yezu aapanga kuti: “Mbamudakhala maboli-boli, mbamudakhala na kudawa tayu. Mbwenye thangwi imwe musalonga kuti musakwanisa kuona, kudawa kwanu muli nako.” “Ndimo mwene, ndimo mwene ndisakupangani kuti ule anakhonda kupita na pa nsuwo n'thanga ya mabira, mbwenye mbakwira na panango, ndi mbava pontho ndi phanga. Ule anapita na pa nsuwo ndi nkumbidzi wa mabira. Nyakuonera pa nsuwo asanfungulira, pontho mabira asabva fala yace. Iye asacemera mabira ace na madzina awo, mbaakwata mbabuluka na iwo kunja. Angamala kuabulusa kunja mabira ace onsene, asapita patsogolo pawo, iwo mbantowera, thangwi fala yace asaidziwa. Mbwenye cipo anadza katowera munthu anakhonda iwo kudziwa. Anan'thawa, thangwi iwo nkhabe kudzindikira fala ya unango.” Yezu aapanga nsanje uyu, mbwenye iwo hadapibvesesa pikhafuna longa Yezu kuna iwo tayu. Na tenepo Yezu alonga pontho kuti: “Ndimo mwene, ndimo mwene, ndisakupangani kuti: Ine ndine nsuwo wa mabira. Onsene adabwera Ine mbindidzati kufika, akhali mambava na mapanga, mbwenye mabira hadaabvera tayu. Ine ndine nsuwo. Anapita na pana Ine, anapulumuka. Anapita mbabuluka, mbagumana thongwe. Mbava asabwera kudza kaba, kupha na kufudza basi ene. Mbwenye Ine ndabwera toera mabira akhale na upulumuki, upulumuki wakukwana. “Ine ndine nkumbidzi wadidi. Nkumbidzi wadidi asafera mabira ace. Nyabasa si nkumbidzi tayu. Pontho mabira si ace tayu. Na thangwi eneyo, angaona m'bindzi uli kufika, iye asaasiya mabira mbathawa. Na tenepo, m'bindzi unaphata mabira mbamala kuabalalisa. Iye asathawa, thangwi ndi nyabasa, pontho iye nkhabe tsalakana mabira. “Ine ndine nkumbidzi wadidi. Mabira anga ndisaadziwa pontho iwo asandidziwambo, sawa-sawa ninga Baba asandidziwa, Ine ndisan'dziwambo Baba, pontho ndisaperekeka toera kufera mabira anga. Ndina mabira anango adakhonda kukhala a thanga ino. Pisafunika kuti ndiakumbizembo. Iwo anadza kabva fala yanga, pontho unadza kakhala nkumbi ubodzi na nkumbidzi m'bodzi basi. Ndi thangwi eneyo Baba wanga asandifuna, thangwi ndisapereka moyo wanga, toera ndingamala ndiukwate pontho. Nkhabe munthu anafuna kundipokosera upulumuki wanga, mbwenye Ine ndinaupereka na kufuna kwanga. Ndina mphambvu za utongi zakupereka upulumuki wanga na zakuukwata pontho. Ntemo unowu ndautambira kuna Baba wanga.” Na thangwi ya mafala enewa madjuda atoma kugawika pontho pakati pawo. Azinji awo akhalonga tenepa: “Iye ana dimonyo, ampasa udzemwa. Thangwi yanji musam'bvesera?” Mbwenye anango akhalonga tenepa: “Mafala awa, si a munthu ana dimonyo tayu. Dimonyo anakwanisa fungula maso a maboli-boli?” N'Djerusalema mukhali na phwandu ya kuceneswa kwa Nyumba ya Mulungu. Ukhali n'dzidzi wa khoni. Yezu akhali mu Nyumba ya Mulungu mbakhafamba n'khonde ya Salomau. Madjuda agumanyikana n'khundu mwace, mbalonga tenepa: “Ngakhala iwe ndiwe Kirixtu tipange pakweca. Unatisiya mbatikhala anthu akupenula mpaka lini?” Yezu atawira tenepa: “Ine ndakupangani kale, mbwenye imwe nkhabe tawira. Mabasa anacita Ine na dzina ya Baba wanga, asandicitira umboni. Mbwenye imwe nkhabe tawira, thangwi simwe mabira anga tayu. Mabira anga asabva fala yanga. Ine ndisaadziwa, pontho iwo asanditowera. Ndinaapasa upulumuki wakukhonda kumala, pontho iwo na lini anadza kafa. Nkhabe munthu anafuna kundipokosera iwo m'manja mwanga. Baba wanga adandipasa mabira enewa, ndi nkulu kupiringana onsene. Nkhabe munthu anakwanisa kuapokosa m'manja mwa Baba wanga. Ine na Baba ndife m'bodzi.” Madjuda alokota pontho myala toera am'menye nayo, mbwenye Yezu aapanga tenepa: “Ine ndakupangisani mabasa mazinji adidi adabuluka kuna Baba wanga, ndi basa ipi inafuna kundimenyera imwe na myala?” Madjuda atawira tenepa: “Ife nkhabe kukumenyera thangwi ya mabasa adidi tayu, mbwenye na thangwi ya kuxola Mulungu. Thangwi Iwe ndiwe munthu, mbwenye usapicita ninga Mulungu.” Yezu aatawira tenepa: “Mu Mwambo wanu mudalembwa tayu kuti: ‘Ine ndalonga kuti: Imwe ndimwe ninga Mulungu?’ Mphapo ngakhala iye acemera ‘ninga Mulungu’ kuna ale adatumirwa fala ya Mulungu, (Pidalembwa m'Bukhu ya Mulungu nkhabe kumala.) Ndiye tani kuna ule adaperekeka kuna Baba mbantuma pa dziko? Musandilongeranji kuti ndaxola Mulungu thangwi pidalonga Ine kuti: Ndine Mwana wa Mulungu? Ine ndingakhonda kucita mabasa a Baba wanga, lekani kunditawira. Mbwenye ngakhala ndisaacita, mungacimwana kutawira Ine, tawirani mabasa, toera mukwanise kudziwa kuti Baba ali muna Ine, Ine ndiri muna Baba.” Iwo akhasaka pontho kum'phata, mbwenye Yezu abuluka pakati pawo. Na tenepo, Yezu awambuka pontho nyandza ya Djorodani, mbaenda ku mbuto ikhatambirisa Juwau batixmu kale ene, mbakhala kweneku. Anthu azinji aenda mpaka kukhakhala Iye, mbalonga tenepa: “Juwau nkhabe cidzindikiro ca cirengo cibodzi cidacita iye, mbwenye pyonsene pidalonga iye na thangwi ya mamuna uyu, ndimodi.” Penepo anthu azinji atawira Yezu. Akhalipo mamuna m'bodzi akhacemerwa Lazaru. Iye akhali wa ku Bhetanya, cisa cikhakhala anakazi ace Mariya na Marita. Ntsiku inango Lazaru aphatwa na nthenda. Mariya unowu akhali na m'bale wace Lazaru akhabva kupha, ndi m'bodzi ene adadzoza Yezu mafuta akununkhira, mbampukuta myendo na tsisi yace. Na tenepo, anakazi ace Lazaru, atuma anthu kwenda kalonga kuna Yezu kuti: “Mbuya, xamwali wanu ule anafuna Imwe, ali kubva kupha.” Yezu pidabva iye penepi, alonga tenepa: “Nthenda iyi si ya kufa nayo tayu, mbwenye ndi ya mbiri ya Mulungu, toera Mwana wa Mulungu apaswe nayo mbiri.” Mphapo Yezu akhafuna onsene, Marita, Mariya na Lazaru. Yezu na kubva kuti Lazaru ali kuduwala, amala pontho ntsiku ziwiri mbakhonda kwendako. Buluka penepo aapanga anyakupfundza ace kuti: “Tendeni tibwerere ku Djudeya.” Mbwenye anyakupfundza ace ampanga kuti: “Mpfundzisi, madjuda akhafuna kukumenyani cincino na myala, musafuna kwenda pontho kweneku?” Yezu aatawira kuti: “Kodi ntsiku iri na midzidzi khumi na miwiri tayu? Anafamba na masikati nkhabe gwegweduka, thangwi asaona cieza ca dziko ino. Mbwenye anafamba na masiku anagwegweduka, thangwi muna iye nkhabe cieza.” Pakumala kulonga penepyo, Yezu athimiza na kulonga kuti: “Xamwali wathu Lazaru agona, mbwenye ndiri kwenda kweneku kamulamusa!” Mphapo anyakupfundza ace alonga tenepa: “Ngakhala Lazaru agona, analamuka.” Yezu akhaapanga na thangwi ya kufa kwa Lazaru, mbwenye anyakupfundza ace akhanyerezera kuti akhalongera na thangwi ya citulo. Na tenepo, Yezu aapanga pakweca kuti: “Lazaru afa. Na thangwi yanu, Ine ndakomerwa thangwi sikhali kweneku tayu, toera imwe mutawire. Mbwenye tendeni kweneko kuna iye.” Tomasi, anacemerwa Dhidhimu, alonga kuna anyakupfundza andzace kuti: “Tendenimbo tikhafe na iye pabodzi.” Pidafika Yezu ku Bhetanya, agumana Lazaru akhali na ntsiku zinai mbali n'nthumbi. Buluka ku Bhetanya mpaka ku Djerusalema, pakhali na nsindzo wa makilometuru matatu, pontho azinji madjuda akhadaenda kamatamisa Marita na Mariya, na thangwi ya kufa kwa m'bale wawo. Na tenepo, Marita pidabva iye kuti Yezu ali kufika, aenda kagumana na iye, mbwenye Mariya akhadasala nawa pa nyumba. Marita alonga kuna Yezu kuti: “Mbuya, mbamudakhala pano m'bale wanga mbadafa tayu. Mbwenye ine ndisadziwa kuti mungafuna cincino, Mulungu anakupasani pyonsene pinafuna phemba imwe.” Yezu alonga kuti: “M'bale wako analamuka.” Marita atawira tenepa: “Ine ndisadziwa kuti iye analamuka pa kulamuka pa kufa kwa anthu ntsiku yakumalisa.” Yezu ampanga kuti: “Ine ndine kulamuka pa kufa na upulumuki. Ule ananditawira, peno mbadafa, anakhala m'maso. Ule ali m'maso, anganditawira, nkhabe kudza kafabve. Iwe unatawira penepi?” Marita atawira kuti: “Ande Mbuya, ine ndisatawira kuti Imwe ndimwe Kirixtu, Mwana wa Mulungu akhafuna bwera pa dziko.” Pidamala Marita kulonga penepi, aenda kuna Mariya m'bale wace mbancemera pa khundu, mbampanga kuti: “Mpfundzisi abwera, asakucemera.” Na tenepo Mariya na kubva mphangwa zenezi, alamuka na mwansanga, mbaenda kagumana na Yezu. Yezu akhadzati kupita n'cisa, mbwenye akhakhala pale pakhadan'gumana Marita. Madjuda akhali penepo pa nyumba toera kumatamisa Mariya, pidamuona iwo kuti alamuka na mwansanga mbabuluka, antowera mbanyerezera kuti ali kwenda kalira ku nthumbi. Mariya pidafika iye pa mbuto pakhakhala Yezu, na kumuona, amulambira pa myendo pace, mbalonga kuti: “Mbuya, Imwe mbamudakhala pano m'bale wanga mbadafa tayu.” Na tenepo, Yezu pidaona iye Mariya na madjuda akhamperekera mbakhalira, anentseka mbatsukwala pikulu kakamwe. Penepo Yezu abvundza kuti: “Mwamuikha papi?” Iwo antawira kuti: “Mbuya, bwerani, muone.” Yezu alira. Na tenepo, madjuda alonga kuti: “Lang'anani kufuna kukhancita iye!” Mbwenye anango pa nsoka wawo alonga kuti: “Iye adawangisa boli-boli, acimwana tani kucita kuti Lazaru akhonde kufa?” Yezu atsukwala pikulu kakamwe, mbaenda mpaka ku nthumbi. Nthumbi ikhali ya dzimba, nsuwo wace ukhadafungwa na mwala. Yezu alonga kuti: “Bulusani mwala.” Marita m'bale wace Lazaru alonga kuti: “Mbuya, ali kununkha. Thangwi ana ntsiku zinai mbadafa kale.” Yezu antawira kuti: “Ine sidakupanga tayu kuti iwe ungakhulupira unati uone mbiri ya Mulungu?” Na tenepo, anthu abulusa mwala. Yezu alang'ana kudzulu mbalonga kuti: “Baba, ndinapereka takhuta thangwi mwandibva. Ine ndisadziwa kuti imwe musandibva ntsiku zonsene, mbwenye ndalonga penepi thangwi ya mwinji uli pano, toera utawire kuti ndimwe mwandituma.” Pakumala kulonga penepyo Yezu akhuwa na mphambvu zonsene mbalonga kuti: “Lazaru, buluka kunja!” Nyakufa abuluka mbadamala pyangirirwa na miceka, myendo na manja ene, nkhope yace mbifinikizwa na nguwo. Na tenepo, Yezu aapanga kuti: “Nsudzuleni, munsiye aende.” Madjuda azinji, ale akhadabwera kudza kaona Mariya, na kuona pire pidacitika, atawira Yezu. Mbwenye madjuda anango, aenda kuna afarisi mbaapanga pikhadacita Yezu. Na tenepo, akulu aanyantsembe na afarisi, agumanya Nsoka wa Anyakutonga miseru mbalonga kuti: “Mphyanji pinacita ife? Mamuna uyu asacita pidzindikiro pya pirengo pizinji. Tingansiya tenepa anthu onsene anantawira. Na tenepo, umambo wa ku Roma unabwera mbutikwatira mbuto zathu, pontho mbatikwatira dziko yathu.” Apo m'bodzi wawo akhacemerwa Khaifasi, pa caka cenecire akhali nkulu wa anyantsembe alonga kuti: “Imwe nkhabe cinthu cinadziwa imwe! Imwe nkhabe dziwa kuti mphyadidi kuna imwe munthu m'bodzi afe, fera mbumba, toera anthu onsene a dziko yathu akhonde kufa.” Lang'anani, Khaifasi hakhalonga pya munsolo mwace tayu. Mbwenye iye, ninga nkulu wa anyantsembe pa caka ceneco, cikhali ciporofeta ca kuti Yezu anadza kafa fera mbumba ya madjuda. Yezu hanadza kafera mbumba eneyo basi tayu, mbwenye anadza kafera ana onsene a Mulungu adabalalika pa dziko yonsene, kuti aagumanye toera akhale mbumba ibodzi. Na tenepo, kutomera ntsiku eneyo kwenda kutsogolo, abverana kuti aphe Yezu. Na thangwi eneyo, Yezu akhafambabve pakweca mbaoneka na madjuda tayu. Mbwenye abuluka mbaenda ku cisa cikhali dhuzi na thando, ku nzinda unacemerwa Efaraimu, mbakhala kweneko na anyakupfundza ace. Phwandu ya Paxkwa ya madjuda ikhali dhuzi. Anthu azinji akhabuluka m'pisa penepyo mbakhaenda ku Djerusalema kacita mitemo yawo ya kuceneswa, Paxkwa mbidzati kufika. Madjuda akhansaka basi Yezu, mbakhabvundzana m'bodzi na m'bodzi mu Nyumba ya Mulungu kuti: “Musaona tani? Iye anati abwere ku phwandu?” Akulu aanyantsembe na afarisi akhadabulusa ntemo wa kuti: “Ule munthu anadziwa kunakhala Yezu mbatipange toera tiyende kam'mange.” Zikhadasala ntsiku zitanthatu kuti idyiwe phwandu ya Paxkwa. Yezu aenda ku Bhetanya kukhakhala Lazaru, ule akhadalamusa iye pa kufa. Penepo iwo ancitira siyari, Marita mbakhan'dzesera pyakudya. Lazaru akhali na anthu pabodzi na Yezu pa thando ya kudya. Na tenepo, Mariya akwata ntete wace wa mafuta akudzola akununkhira a nardu wakukhonda kubvungazwa, a ntengo ukulu. Iye adzoza na iwo myendo ya Yezu, mbampukuta na tsisi yace. Nyumba yonsene yadzala na khwema ya mafuta. Mbwenye nyakupfundza wace m'bodzi anacemerwa Djuda Xikariyoti, ule adadza kansandukira, alonga tenepa: “Thangwi yanji mafuta enewa akununkhira aleka kuagulisa na ntengo wa madzana matatu a kobiri ya parata, kobiri eneyo mbipaswa anyakucherenga?” Djuda alonga penepi si ntsisi na anyakucherenga tayu, mbwenye ndi thangwi iye akhali mbava. Ndiye akhali na cikhwama ca kobiri, mbakhabulusa kobiri ikhakoiwa mwenemu. Yezu alonga tenepa: “Nsiyeni pyace. Penepi mbapikoyere ntsiku ya kuikhwa kwanga n'nthumbi. Thangwi anyakucherenga imwe munakhala na iwo ntsiku zonsene, mbwenye Ine sinakhala na imwe ntsiku zonsene tayu.” Na tenepo, mwinji ukulu wa madjuda pidadzindikira iwo kuti Yezu ali kweneko, abwera. Iwo akhadzera Yezu basi tayu, mbwenye akhadzambo kaona Lazaru, ule akhadalamuswa na Yezu pa kufa. Mbwenye akulu aanyantsembe abverana kuti aphembo Lazaru, thangwi azinji madjuda na thangwi ya Lazaru, akhabuluka kuna iwo mbakhatawira Yezu. Mangwana mwace, mwinji ukulu wa anthu ukhadadza ku phwandu ya Paxkwa, wabva kuti Yezu ali kufika mu Djerusalema. Na thangwi eneyo, akwata masandzu a micindu mbaenda kantambira, mbakhakhuwa tenepa: “Hosana!” “Mbasimbwe ule anadza na dzina ya Mbuya!” “Mbasimbwe Mambo wa Izarayeli!” Yezu agumana mwana buru, mbampakira pa nsana pace, ninga mukhadalembwa ipyo m'Bukhu ya Mulungu kuti: “ Leka gopa, iwe nzinda wa Siyau! Lang'ana Mambo wako ali kudza mbapakira padzulu pa mwana buru.” Pakutoma, anyakupfundza ace hakhapidziwa penepi tayu. Mbwenye mudadza kapaswa mbiri Yezu, ndipo padakumbuka iwo kuti pinthu penepi pikhadalembwa na thangwi yace, pontho pyadza kacitika kuna Iye. Mwinji wa anthu ukhakhala na Yezu pa n'dzidzi ukhapanga iye Lazaru kuti abuluke n'nthumbi mbamulamusa pa kufa, ndiwo ukhaenda mbulonga pidacitika. Anthu azinji, na kubva mbapilongwa kuti Yezu ndiye akhadacita cidzindikiro ca cirengo ceneci, aenda kaonana na iye. Na tenepo, afarisi akhalonga okha-okha kuti: “Nkhabe cinthu cidakwanisa ife. Lang'anani, anthu onsene ali kwenda n'nduli mwace.” Pakati pa anthu ale akhadaenda kalambira Mulungu pa phwandu ya Paxkwa, akhalipo angasi adakhonda kukhala agerego. Iwo afendedzera Filipi, akhali wa ku Bhetisaidha ya Galileya, mbam'phemba tenepa: “Mbuya, tisafuna tione Yezu.” Filipi aenda kapilonga kuna Andereya. Andereya na Filipi mbapifikisa kuna Yezu. Yezu aatawira tenepa: “Wafika n'dzidzi wakupaswa mbiri Ine, Mwana wa Munthu. Ndimo mwene, ndimo mwene ndisakupangani kuti, mbeu ya tirigu ingakhonda kugwa pa mataka mbikhonda kufa, inakhala yokha basi. Mbwenye ingafa, inabala misapu mizinji. Ule anafuna moyo wace, anauluza. Mbwenye ule anazonda moyo wace pantsi pano, anati aukoyerwe upulumuki wakukhonda kumala. Ule anandiphatira basa, asafunika anditowere. Panakhala Ine, nyabasa wanga ali penepombo. Pontho ule anandiphatira basa, anati asimbwe na Baba wanga. “Cincino ntima wanga wanentseka pikulu kakamwe. Ndinalonganji? ‘Baba ndipulumuseni pa n'dzidzi uno?’ Nkhabe. Ine ndadzera penepi, ndadzera n'dzidzi unowu wa nyatwa. Baba, pasani mbiri dzina yanu!” Na tenepo, kudzulu kwabveka fala ikhalonga kuti: “Ine ndaipasa kale mbiri, pontho ndinadza kaipasa pontho mbiri.” Mwinji wa anthu ukhali penepo, mudabva iwo fala eneyi, alonga kuti ndi njazi. Anango akhalonga kuti ndi anju adalonga. Yezu alonga tenepa: “Fala iyi yabveka thangwi yanu, si thangwi yanga tayu. Wafika n'dzidzi wa kuti dziko ino itongwe. Cincino anathamangiswa nkulu wa dziko ino. Mbwenye Ine ndingadza kathukulwa pantsi pano, ndinacita kuti anthu onsene akundike adze kuna Ine.” Yezu alonga penepi, akhafuna pangisa mafero akhafuna cita Iye. Anthu azinji alonga tenepa: “Mwambo usatipfundzisa kuti Kirixtu anakhala kwenda na kwenda. Usalongeranji pontho kuti Mwana wa Munthu asafunika athukulwe? Ndi ani mwana wa munthu unowu?” Na tenepo, Yezu aapanga kuti: “Cieza cinakhala na imwe pa n'dzidzi ung'ono basi. Fambani, cieza mbiciripo, toera mukhonde kuphatwa na cidima. Ule anafamba n'cidima nkhabe dziwa nkhupi kunaenda iye. Cieza mbiciri na imwe, khulupirani cieza, toera mukhale ana a cieza.” Pakumala kulonga penepi, Yezu abuluka pyace, mbabisala. Na pidzindikiro pyonsene pya pirengo pikhacita Iye pamaso pawo, iwo akhonda kuntawira. Penepi pyacitika toera kusimbisa mafala adalonga mporofeta Izaya kuti: “Mbuya, mbani adatawira pikhalonga ife, pontho mbani adapangizwa mphambvu zanu?” Na thangwi eneyo akhacimwana kutawira, thangwi Izaya akhadalonga pontho kuti: “ Aafunga maso awo pontho mbaaumisa mitima yawo, toera akhonde kuona na maso, pontho mbapikhonda kupita muntima mwawo, mbacimwana zungunuka kuna Ine, Ine mbindiawangisa.” Izaya alonga penepi thangwi akhaiona kale mbiri ya Kirixtu, pontho mbalonga na thangwi ya Kirixtu. Pa pyonsene ipi, na akulu ene azinji a madjuda antawira Yezu. Mbwenye na thangwi ya afarisi, akhacimwana kupangisa pakweca kukhulupira kwawo, na kugopa kuti anadza kathamangiswa n'nyumba ya kuphembera. Thangwi akhafuna pikulu kakamwe mbiri ya anthu, kupiringana Mbiri ya Mulungu. Na tenepo, Yezu alonga na mphambvu kuti: “Ule ananditawira, asatawira Ine basi tayu, mbwenye asatawira ule adandituma. Ule anandiona, asaonambo ule adandituma. Ine ndabwera pa dziko ninga cieza, toera onsene ale ananditawira akhonde kukhala n'cidima. “Munthu anabva mafala anga mbakhonda kuakoya, Ine nkhabe kuntonga. Thangwi Ine sidabwera kudza katonga dziko tayu, mbwenye ndabwera kudza kaipulumusa. Alipo nyakutonga miseru m'bodzi kuna ale anandikhonda, na kuna ale anakhonda kutawira mafala anga. Fala ibodzi-bodzi idalonga Ine, ndiyo inadza kankonesa ntsiku yakumalisa. Thangwi Ine sidalonga pya munsolo mwanga tayu, mbwenye Baba adandituma, ndiye adandipanga kuti ndilonge pinakupangani Ine na pinalonga Ine. Ndisadziwa kuti ntemo wace ndi upulumuki wakukhonda kumala. Na tenepo, pinalonga Ine, ndisapilonga ninga mudapipangwa Ine na Baba kuti ndilonge.” Phwandu ya Paxkwa mbidzati kufika, Yezu na kudziwa kuti wakwana n'dzidzi wakufuna siya dziko aende kuna Baba, na kufuna kudacita iye anthu ace ali pa dziko, aafuna mpaka pakumalisira. Mukhasiyali Yezu, Sathani akhadamala nyengerera kale Djuda Xikariyoti mwana wa Simau, kuti asandukire Yezu. Yezu akhapidziwa kuti Baba wace akhadapereka pinthu pyonsene m'manja mwace, pontho akhapidziwa kuti abuluka kuna Mulungu, Iye ali kubwerera pontho kuna Mulungu. Na tenepo, Yezu alamuka pa thando ya kudya, abulusa nguwo yace ya kunja mbakwata nguwo ikulu ya kupukuta nayo manungo, mbaimanga n'cunu mwace. Buluka penepo, aikha madzi n'combo, mbatoma kutsuka myendo ya anyakupfundza ace, mbakhaapukuta na nguwo ikhadamanga Iye n'cunu. Yezu pidafika Iye pana Simau Pedhru, Simau alonga tenepa: “Mbuya, musafuna tsuka myendo yanga?” Yezu atawira kuti: “Pinacita Ine cincino, iwe nkhabe kupidziwa, mbwenye unadza kapidziwa kutsogolo.” Pedhru alonga kuti: “Nkhabe citika kuti imwe muntsuke myendo yanga.” Yezu antawira tenepa: “Ndingakhonda kukutsuka myendo, iwe nkhabe kudza kabveranabve na Ine.” Simau Pedhru atawira kuti: “Mbuya, ngakhala ndi tenepo, lekani kutsuka myendo yanga basi tayu, mbwenye tsukanimbo manja anga na nsolo wanga ene.” Yezu ampanga kuti: “Munthu anamala samba asatongwa kuti atsuke myendo basi, thangwi manungo ace onsene acena. Imwe mwacena, mbwenye simwe monsene tayu.” Thangwi Iye akhan'dziwa ndi ani akhafuna kunsandukira. Ndi thangwi eneyi idamulongesa kuti: “Simwe monsene mudacena tayu.” Yezu pidamala Iye kuatsuka myendo, abvala pontho nguwo yace, mbabwerera pakhakhala Iye. Na tenepo, aabvundza kuti: “Musapidziwa thangwi yanji ndakucitirani penepi? Imwe musandicemera Mpfundzisi pontho musandicemera Mbuya. Ndimo mwene Ine ndinedi. Mphapo Ine ninga Mbuya pontho ninga Mpfundzisi wanu ndakutsukani myendo, imwembo musatongwa mutsukanembo myendo m'bodzi na m'bodzi. Ine ndakupangisani macitiro ace, toera imwe mucitembo ninga pidakucitirani Ine. Ndimo mwene, ndimo mwene ndisakupangani kuti: Nkhabe n'dzakazi anapita mbuya wace, peno nkhabembo ntumwi anapita ule adantuma. Lang'anani, ngakhala imwe mwamala kupidziwa pinthu penepi, mungapicita munakhala akutsandzaya. “Siri kulonga imwe monsene tayu. Ndisaadziwa ale adasankhula Ine. Mbwenye ndi toera pisimbiswe pidalembwa m'Bukhu ya Mulungu kuti: ‘Ule akhadya na Ine pabodzi, ndiye adandisandukira. ’ “Kutomera cincino ndisakupangani mbapidzati kucitika, toera pingadza kacitika, mudze katawira kuti Ine Ndine. Ndimo mwene, ndimo mwene ndisakupangani kuti: Anatambira ule anatuma Ine, asatambira Ine. Ananditambira, asatambira ule adandituma.” Pakumala kulonga penepi, Yezu atsukwala pikulu kakamwe muntima mbalonga kuti: “Ndimo mwene, ndimo mwene ndisakupangani kuti, m'bodzi wanu anati andisandukire.” Mphapo anyakupfundza ace alang'anisana m'bodzi na m'bodzi, mbakhonda kun'dziwa mbani akhalonga Iye. M'bodzi wa anyakupfundza ace, ule akhafunika kakamwe na Yezu, akhali n'khundu mwace. Mphapo Simau Pedhru an'kodola nyakupfundza unowu, mbampanga kuti: “M'bvundze, mbani analonga Iye?” Nyakupfundza afendedzera Yezu, mbatsamira pa cifuwa cace, mbam'bvundza kuti: “Mbuya, ndi ani?” Yezu antawira kuti: “Ndi ule anafuna kupasa Ine phindi ya nkate inafuna pfonda Ine m'mbale.” Na tenepo, Yezu akwata phindi ya nkate mbapfonda m'bale, mbaipasa Djuda mwana wa Simau Xikariyoti. Djuda mudamala iye kudya nkate, pa n'dzidzi ubodzi-bodzi Sathani apita muna iye. Penepo Yezu ampanga Djuda kuti: “Pire pinafuna iwe cita, picite na mwansanga.” Mbwenye nkhabe m'bodzi akhali na iye pa thando ya kudya, akhapidziwa thangwi yanji Yezu apanga Djuda penepi. Djuda, na thangwi yakukhala nkoyi wa cikhwama ca kobiri, anyakupfundza anango a Yezu, akhanyerezera kuti Yezu ampanga kuti aende kagule pinthu toera adye pa phwandu, peno kuti apase pinthu anyakucherenga. Pidamala Djuda kudya phindi ya nkate, abuluka na mwansanga. Pontho akhali masiku. Pakubuluka kwa Djuda, Yezu alonga kuti: “Cincino Ine Mwana wa Munthu ndapaswa mbiri, pontho Mulungu apaswa mbiri muna Ine. Ngakhala Mulungu apaswa mbiri muna Mwana, Mulungu anampasambo mbiri muna Iye ene, pontho anati ampase mbiri na mwansanga. “Ananga, ndinakhala na imwe n'dzidzi pang'ono basi. Imwe munati mundisake. Ninga mudapanga Ine madjuda, cincino ndisakupanganimbo kuti: ‘Kunafuna Ine kwenda, imwe nkhabe kwanisa kwendako.’ “Ine ndinakupasani matongero mapsa kuti, mufunane m'bodzi na m'bodzi. Ninga mudakufunirani Ine, imwe musafunika mufunanembo m'bodzi na m'bodzi. Na tenepo, mungafunana m'bodzi na m'bodzi, onsene anati adziwe kuti imwe ndimwe anyakupfundza anga.” Mphapo Simau Pedhru am'bvundza kuti: “Mbuya, ndi kupi kunafuna imwe kwenda?” Yezu antawira kuti: “Kunafuna Ine kwenda imwe nkhabe kwanisa kunditowera cincino, mbwenye munanditowera kutsogolo.” Pedhru am'bvundza pontho kuti: “Mbuya, ndi thangwi yanji ndinacimwana kukutowerani cincino? Ine ndiri dzololo toera kukuferani!” Yezu antawira kuti: “Iwe unafa fera Ine? Ndimo mwene, ndimo mwene ndisakupanga kuti, dzongwe mbidzati kulira, iwe unati undikhonde katatu.” Yezu alonga kuti: “Lekani kunentseka m'mitima mwanu. Khulupirani Mulungu, mbamukhulupirambo Ine. Ku nyumba kwa Baba wanga kuna mbuto zizinji zakukhala, mbidakhala si tenepo, Ine mbidakupangani. Ndiri kwenda kakusasanyirani mbuto. Ine ndingaenda mbandikusasanyirani mbuto, ndinabwera pontho kudza kakukwatani mudze kuna Ine, toera imwe mukhalembo pale panakhala Ine. Kunaenda Ine, njira yace imwe musaidziwa.” Tomasi ampanga tenepa: “Mbuya, ife nkhabe dziwako kunaenda imwe, tinaidziwa tani njira?” Yezu atawira tenepa: “Ine ndine njira, ndine wa ndimo mwene pontho ndine upulumuki. Nkhabe m'bodzi anaenda kuna Baba, mbakhonda kupita na pana Ine. Imwe mbamudandidziwa, mbamudadziwambo Baba wanga. Cincino imwe musan'dziwa, pontho musamuona.” Filipi alonga tenepa: “Mbuya, tipangiseni Baba, penepi basi pyakwana kuna ife.” Yezu atawira kuti: “Ndakhala na imwe ntsiku zizinji Filipi, udzati kundidziwa basi? Ule anandiona, asaona Baba. Thangwi yanji usalonga kuti: ‘Tipangiseni Baba?’ Iwe nkhabe tawira kuti Ine ndiri muna Baba, pontho kuti Baba ali muna Ine? Mafala anakupangani Ine si anga ndekha tayu. Mbwenye Baba ali muna Ine, ndiye anacita mabasa ace. Nditawireni kuti Ine ndiri muna Baba, pontho Baba ali muna Ine. Mungacimwana pyonsene, nditawireni na thangwi ya mabasa mabodzi ene. Ndimo mwene, ndimo mwene ndisakupangani kuti: Ule ananditawira, anadza kacitambo mabasa anacita Ine. Anadza kacita pikulu kakamwe kupiringana ipi, thangwi Ine ndiri kwenda kuna Baba. Pontho pyonsene pinaphemba imwe na dzina yanga, Ine ndinadza kapicita, toera Baba apaswe mbiri muna Mwana. Pinaphemba imwe na dzina yanga, Ine ndinadza kapicita. “Ngakhala imwe musandifuna, munakoya mitemo yanga. Pontho Ine ndinaphemba Baba wanga, Iye mbadza kakupasani M'matamisi unango, toera adze kakhala na imwe kwenda na kwenda, Nzimu unadzesa undimo mwene. Dziko nkhabe kwanisa kuutambira, thangwi nkhabe kuuona pontho nkhabe kuudziwa. Mbwenye imwe musaudziwa, thangwi iwo usakhala na imwe, pontho unati ukhale muna imwe. Sinakusyani amphawi tayu. Ndinabwera pontho kuna imwe. Thimize pang'ono dziko inadza kandionabve tayu, mbwenye imwe munadza kandiona. Thangwi Ine ndiri m'maso, imwembo munakhala m'maso. Ntsiku eneyi munadzindikira kuti Ine ndiri muna Baba wanga, imwe muli muna Ine, inembo ndiri muna imwe. Ule anadziwa mitemo yanga mbaikoya, unowu ndiye anandifuna. Ule anandifuna, anafuniwa na Baba wanga, pontho Ine ndinanfunambo, mbandipangizika kuna Iye.” Na tenepo, Djuda, (si Djuda Xikariyoti tayu) alonga kuti: “Mbuya, thangwi yanji musafuna pangizika kuna ife mbamukhonda pangizika kuna dziko?” Yezu atawira tenepa: “Ngakhala alipo anandifuna anakoya fala yanga. Baba wanga anadza kanfuna, Ife tinadza kuna iye mbaticita nyumba muna iye. Ule anakhonda kundifuna nkhabe koya mafala anga. Mafala awa anabva imwe si anga tayu, mba Baba adandituma. “Pyonsene ipi ndisakupangani mbandiri pabodzi na imwe. Mbwenye M'matamisi, Nzimu Wakucena unafuna kukutumizirani Baba na dzina yanga, unadza kakupfundzisani pinthu pyonsene, mbukukumbusani pyonsene pidakupangani Ine. Ndisakusiyirani ntendere. Ntendere wanga ndisakupasani. Nkhabe kukupasani ninga pinacita dziko. Lekani kunentseka muntima mwanu, pontho lekani kugopa. “Imwe mwandibva mbandilonga kuti: Ndiri kwenda, mbwenye ndinabwera pontho kuna imwe. Mbamudakhala imwe musandifuna, mbumudakomerwa, thangwi ndiri kwenda kuna Baba. Thangwi Baba ndi nkulu kupiringana Ine. Ndisakupangani cincino, penepi mbapidzati kucitika, toera pingadza kacitika, imwe mupitawire. Nkhabebve n'dzidzi ukulu wakulonga na imwe, thangwi nkulu wa dziko ino ali kubwera. Iye nkhabe kundicita cinthu tayu, mbwenye dziko isafunika idziwe kuti Ine ndisafuna Baba, pontho ndisacita ninga pidandituma Baba. Lamukani, mbatibulukeni pano!” “Ine ndine mutidi wa mauva, Baba wanga ndi nyakulima. Nthawi zonsene ziri muna Ine, zinakhonda bala misapu, Iye anazigwanda. Pontho, nthawi zonsene zinabala misapu, anazisadzulira toera zibale misapu mizinji. Imwe mwaceneswa kale na fala idakupangani Ine. Khalani muna Ine, Ine ndinakhalambo muna imwe. Nkhabe nthawi inabala misapu yokha, ingakhonda kukhala pa muti wa mauva. Sawa-sawambo na imwe, nkhabe kubala misapu mungakhonda kukhala muna Ine. “Ine ndine muti wa mauva, imwe ndimwe nthawi. Ule anakhala muna Ine, Ine mbandikhala muna iye, unowu anabala misapu mizinji. Thangwi imwe mwekha ene, nkhabe cinthu cibodzi cinafuna cita imwe. Ule anakhonda khala muna Ine, anakhala ninga nthawi idataiwa kunja mbiuma. Nthawi zenezo zinakwatiwa, mbaziponyiwa pa moto mbazipya. Imwe mungakhala muna Ine, mafala anga mbakhala muna imwe, munaphemba pinafuna imwe mbamupicitirwa. Baba wanga anapaswa mbiri imwe mungabala misapu mizinji, pontho munakhala anyakupfundza anga. “Ninga Baba wanga andifuna, Ine ndakufunanimbo. Khalani n'kati mwa mafuniro anga. Imwe mungakoya mitemo yanga, munakhala n'kati mwa mafuniro anga, sawa-sawa ninga Ine ndisakoya mitemo ya Baba wanga, mbandikhala n'kati mwa mafuniro ace. Ndakupangani mafala awa, toera kutsandzaya kwanga kukhale na imwe, pontho kutsandzaya kwanu kukwane. Mwambo wanga ndi uxu: Mufunane m'bodzi na m'bodzi ninga Ine ndakufunani. Nkhabe munthu anako kufuna kukulu kupiringana ule anafera axamwali ace. Imwe munakhala axamwali anga, mungacita pire pinakupangani Ine. Ine nkhabe kukucemeranibve anyabasa tayu, thangwi nyabasa nkhabe dziwa pinacita mbuya wace. Ndinakucemerani axamwali. Thangwi pyonsene pidabva Ine na Baba, ndakupangani. Simwe adandisankhula tayu, mbwenye ndine adakusankhulani mbandikutumani kuti mwende, pontho mubale misapu, misapu yakukhaliratu, toera Baba akupaseni pinaphemba imwe, na dzina yanga. Matongero anga mbawa: Funanani m'bodzi na m'bodzi. “Ngakhala dziko isakuzondani, dziwani kuti yatoma kuzonda Ine. Imwe mbumudakhala a padziko, dziko mbidakufunani ninga anthu awo. Mphapo imwe simwe a padziko tayu, mbwenye Ine ndakusankhulani mbandikubulusani pa dziko. Na thangwi eneyo, dziko isakuzondani. Kumbukani mafala adakupangani Ine kuti: Nkhabe nyabasa m'bodzi anapita mbuya wace. Ngakhala Ine andizonda, anakuzondanimbo. Ngakhala Ine andibvera mafala anga, anabverambo mafala anu. Mbwenye anakucitani tenepo na thangwi ya dzina yanga, thangwi iwo nkhabe kun'dziwa ule adandituma. Ine mbandidakhonda kubwera mbandiapanga, mbadapaswa mphoswa ya kudawa tayu. Mbwenye cincino iwo nkhabebve pakutunira madawi awo. Ule anandizonda, ali kuzondambo Baba wanga. Ine mbindidakhonda kucita mabasa pakati pawo adakhonda kucitwa na unango, iwo mbadakhala na mphoswa ya kudawa tayu. Mbwenye cincino iwo aaona mabasa anga, mbazonda Ine na Baba wanga ene. Mbwenye penepi pyacitika toera pisimbiswe pire pidalembwa mu Mwambo wawo kuti: ‘Andizondera pezi.’ “Angabwera M'matamisi anafuna kukutumirani Ine bulukira kuna Baba, Nzimu unadzesa undimo mwene unabuluka kuna Baba, Iwo unandicitira umboni. Imwe munati mucitembo umboni, thangwi muli na Ine kutomera pakutoma.” “Ndisakupangani pyonsene ipi toera mukhonde kusiya cikhulupiro canu. Imwe munati muthamangiswe n'kati mwa nyumba za kuphembera. Ndimo mwene, unafika n'dzidzi wa kuti munthu akuphani, mbanyerezera kuti ali kuphata basa ya Mulungu. Iwo anati acite pinthu penepi, thangwi nkhabe kun'dziwa Baba, pontho nkhabe kudziwa Ine. Ine ndiri kukupangani ipi toera ungafika n'dzidzi, mukumbuke kuti ine ndikhadakupangani kale pinthu penepi. Ndacimwana kukupangani pakutoma, thangwi Ine ndikhakhala na imwe. “Mbwenye cincino ndiri kwenda kuna ule adandituma, pontho nkhabe m'bodzi wanu anafuna kundibvundza kuti: ‘Ndi kupi kunafuna iwe kwenda?’ Thangwi mitima yanu yadzala na kutsukwala pidakupangani Ine penepi. Mbwenye Ine ndisakupangani pya ndimo mwene kuti: Mphyadidi kakamwe kuna imwe kuti Ine ndiyende. Thangwi Ine ndingakhonda kwenda, M'matamisi nkhabe bwera kuna imwe. Mbwenye Ine ndingaenda, ndinakutumirani M'matamisi. Iye angabwera, anaidziwisa dziko pinthu pitatu: Kudawa, kulungama pontho na kutongwa na Mulungu. Kudawa, thangwi anthu nkhabe kunditawira. Kulungama, thangwi ndiri kwenda kuna Baba, pontho imwe nkhabe kudza kandionabve. Kutongwa, thangwi nkulu wa dziko ino amala kukoneswa kale. “Ndina pinthu pinango pizinji pya kukupangani, mbwenye imwe cincino nkhabe kwanisa kupipirira. Mbwenye ungabwera Nzimu unadzesa undimo mwene, Iwo unakupangisani pya ndimo mwene. Nkhabe longa pyawo okha, unalonga pire pidabva iwo, pontho unakupangani pire pinafuna kudza. Iwo unadza kandipasa mbiri, thangwi iwo unatambira pinthu pyanga, mbubwera kudza kakudzuwisani. Pyonsene pina Baba mphyanga. Ndi thangwi eneyi Ine ndakupangani kuti Nzimu unatambira pinthu pyanga mbubwera kudza kakudzuwisani. “Thimize pang'ono nkhabe kudza kandionabve, mbwenye thimize pontho pang'ono munadza kandiona pontho.” Na tenepo, anyakupfundza ace anango akhalonga m'bodzi na m'bodzi kuti: “Ndi ninji penepi pinalonga Iye kuna ife kuti: ‘Thimize pang'ono nkhabe kudza kandionabve’, pontho ‘thimize pang'ono munadza kandiona, thangwi ndiri kwenda kuna Baba?’ ” “Pisalonganji penepi ‘Thimize pontho pang'ono?’ Ife nkhabe kupibvesa pinalonga Iye.” Yezu adziwa kuti iwo akhafuna kum'bvundza na thangwi eneyo. Na tenepo, Iye aabvundza kuti: “Imwe musabvundzana mwekha ene kuti Ine ndikhafuna longanji na pidalonga Ine kuti: Thimize pang'ono nkhabe kudza kandionabve, mbwenye thimize pontho pang'ono munadza kandiona pontho? Ndimo mwene, ndimo mwene ndinakupangani kuti: Imwe munati mulire pontho mbamukhuwa, mbwenye dziko inati itsandzaye. Imwe munati mutsukwale, mbwenye kutsukwala kwanu kunadza kakhala kutsandzaya. Nkazi angafuna kubala asabva kupha, thangwi n'dzidzi wace wa nyatwa wafika. Mbwenye pakumala kubala mwana, iye asaiduwala nyatwa eneyi, thangwi ya kukomerwa na kubwera kwa mwana pa dziko. Na tenepo, imwembo cincino muli kutsukwala. Mbwenye ndinadza kakuonani pontho, mitima yanu mbidza katsandzaya, kutsandzaya kwanu nkhabe m'bodzi anafuna kukukwatirani. Pa ntsiku eneyo imwe nkhabe kudza kandibvundzabve cinthu tayu. Ndimo mwene, ndimo mwene Ine ndisakupangani kuti Baba wanga anakupasani pyonsene pinaphemba imwe na dzina yanga. Mpaka cincino, imwe mudzati kuphemba cinthu na dzina yanga. Phembani munatambira, toera kutsandzaya kwanu kukwane. “Ndakupangani penepi na misanje. Unafika n'dzidzi wa kuti sinalongabve na imwe na misanje tayu, mbwenye ndinati ndilonge pakweca, pa thangwi ya Baba wanga. Pa ntsiku eneyo, imwe munaphemba na dzina yanga. Nkhabe funikabve kuti Ine ndikuphemberereni pinafuna imwe kuna Baba. Thangwi Iye ene Baba asakufunani, pontho imwe mwandifuna mbamutawira kuti ndabuluka kuna Mulungu. Ine ndabuluka kuna Baba mbindibwera pa dziko. Cincino ndiri kusiya dziko, ndiri kwenda pontho kuna Baba.” Na tenepo, anyakupfundza a Yezu alonga kuti: “Cincino musalonga pakweca mbamukhonda kulonga na misanje. Cincino tisadziwa kuti imwe musadziwa pinthu pyonsene, pontho nkhabe funika kuti munthu akubvundzeni. Na thangwi eneyo tisatawira kuti mwabuluka kuna Mulungu.” Yezu aatawira kuti: “Cincino mwatawira? Lang'anani, n'dzidzi uli dhuzi pontho wafika, unafuna mwazika imwe, m'bodzi na m'bodzi mbaenda ku nyumba kwace, mbindisala ndekha ene. Mbwenye Ine siri ndekha tayu, thangwi Baba ali na Ine. “Ndakupangani pinthu penepi, toera mukhale na ntendere muna Ine. Pa dziko ino imwe munaona nyatwa, mbwenye wangisirani! Ine, ndakunda dziko.” Pakumala kulonga penepi, Yezu alang'ana kudzulu mbaphembera tenepa: “Baba, wakwana n'dzidzi. Pasa mbiri Mwana wako, toera Mwana wako akupasembo mbiri. Thangwi Imwe mwapasa Mwana wanu mphambvu za kutonga anthu onsene kuti apase upulumuki wakukhonda kumala kuna ale onsene adampasa imwe. Upulumuki wakukhonda kumala ndi uyu: Akudziweni kuti ndimwe ene basi Mulungu wa ndimo mwene, pontho na kudziwambo Yezu Kirixtu adatuma imwe. Ine ndakupasani mbiri pantsi pano, mbandimalisa basa idandipasa imwe kuti ndiicite. Na tenepo, cincino Baba, ndipaseni mbiri pamaso panu, mbiri ikhakhala na Ine pamaso panu, dziko mbidzati kucitwa. “Ine ndapangisa dzina yanu kuna anthu adabulusa imwe pa dziko mbamundipasa. Iwo akhali anu. Imwe mwaapasa Ine, iwo asabvera fala yanu. Cincino iwo asadziwa kuti pyonsene pidandipasa imwe pyabuluka kuna imwe. Thangwi Ine ndaapanga mafala adandipasa imwe, iwo aatawira. Ndimo mwene, iwo adzindikira kuti Ine ndabuluka kuna imwe, pontho atawira kuti ndimwe adandituma. Ine ndisaaphemberera. Siri kuphemberera dziko tayu, mbwenye ndisaphemberera ale adandipasa imwe, thangwi ndi anthu anu. Pyonsene pina Ine mphyanu, na pyonsene pina imwe mphyanga. Na tenepo, Ine ndisapaswa mbiri na thangwi yawo. Sinadza kakhala pontho pa dziko tayu, mbwenye iwo na lero ali pano pa dziko, pontho Ine ndiri kudza kuna imwe. Baba wakulungama, akoyeni mu dzina yanu, dzina ire idandipasa imwe, toera iwo akhale cinthu cibodzi, ninga ife ndife cibodzi. Pa n'dzidzi ukhakhala Ine na iwo, Ine ndaalang'anira mbindiakoya mu dzina yanu idandipasa imwe. Nkhabe m'bodzi wawo adataika. Adataika ndi ule basi akhadapambulika kale kuti ataike toera pisimbiswe pire pikhadalembwa m'Bukhu ya Mulungu. “Cincino ndiri kudza kuna imwe, mbwenye ndisalonga pinthu penepi mbandiri pano pa dziko, toera kutsandzaya kwanga kukwane muna iwo ene. Ine ndaapasa fala yanu, mbwenye dziko yaazonda, thangwi iwo si a padziko tayu, ninga Inembo sine wa padziko tayu. Siri kuphemba kuti muabuluse pa dziko tayu, mbwenye kuti muabvunulire mu mphambvu za Nyakuipa. Iwo si a padziko tayu, ninga inembo sine wa padziko tayu. Aciteni kuti aperekeke mwakukwana kuna imwe, thangwi fala yanu nja ndimo mwene. Sawa-sawa ninga mudandituma imwe kudza pa dziko, Ine ndisaatumambo kwenda n'dziko. Na thangwi ya iwo, Ine ndisaperekeka mwakukwana kuna imwe, toera iwo aperekekembo mwakukwana kuna imwe. “Maphembero anga sisaacitira kuli iwo basi tayu. Ndisaphemberambo kuli ale anafuna kudza kanditawira na thangwi ya fala yawo, toera onsene akhale cibodzi. Baba, ninga imwe muli muna Ine, pontho Ine ndiri muna imwe. Kuti iwo akhalembo muna ife, toera dziko itawire kuti imwe mwandituma. Ine ndaapasa mbiri idandipasa imwe, kuti iwo akhale cibodzi, ninga ife ndife cibodzi. Ine muna iwo, imwe muna Ine, kuti akwane pa kuphatana, toera dziko idziwe kuti mwandituma, pontho kuti mwaafuna sawa-sawa ninga imwe mwandifuna. “Baba, ndisafuna kuti ale adandipasa imwe akhale pale pana Ine kuti aone mbiri yanga, mbiri idandipasa imwe na kundifuna kwanu, dziko mbidzati kucitwa. “Baba wakulungama, dziko nkhabe kukudziwani, mbwenye Ine ndisakudziwani. Awa asadziwa kuti ndimwe adandituma. Ine ndaadziwisa kuti imwe ndimwe ani, pontho ndinathimiza basi na kuadziwisa, toera kufuna kudandicita imwe kukhale muna iwo, pontho Ine ndikhalembo muna iwo.” Yezu pidamala Iye kuphembera, abuluka pabodzi na anyakupfundza ace mbawambuka gowa ya Khedhoroni, mbaenda ntunda unango. Kweneko kukhakhala na tapada ibodzi, Iye mbapita mwenemu pabodzi na anyakupfundza ace. Djuda nyakusandukira Yezu, akhaidziwa mbuto eneyo, thangwi Yezu kazinji kene akhagumanyikana kweneko pabodzi na anyakupfundza ace. Na tenepo, Djuda aenda ku tapada eneyi mbakwata nsoka wa anyankhondo a ku Roma, na anango anyakuonera Nyumba ya Mulungu adatumwa na akulu aanyantsembe na afarisi. Iwo akwata pida pya nkhondo, nyale na ntsakali. Yezu, na kudziwa pyonsene pikhafuna kuncitikira, aafendedzera mbaabvundza kuti: “Mbani anasaka imwe?” Iwo atawira kuti: “Tiri kusaka Yezu wa ku Nazareti.” Yezu atawira kuti: “Ndine pano.” (Djuda, nyakusandukira Yezu, akhali pabodzi na iwo.) Pidatawira Yezu kuti ndine pano, iwo abwerera n'nduli, mbagwa pantsi. Yezu aabvundza pontho kuti: “Mbani anasaka imwe?” Iwo alonga kuti: “Tiri kusaka Yezu wa ku Nazareti.” Yezu aatawira tenepa: “Ine ndakupangani kale kuti ndine pano. Ngakhala muli kusaka Ine, siyani amuna awa aende pyawo.” Penepyo pyacitika toera asimbiswe mafala akhalonga Iye kuti: “Adandipasa imwe, nkhabe m'bodzi adataya Ine.” Penepo, Simau Pedhru, abulusa tarasada ikhali na iye, mbaphekesa nyabasa wa nkulu wa anyantsembe, mban'gwanda khutu ya madyo. Nyabasa unowu akhacemerwa Maliko. Mbwenye Yezu ampanga Pedhru kuti: “Koya tarasada yako! Ndiko iyi ya nyatwa idandipasa Baba, Ine nkhabe kudza kaimwa?” Na tenepo, anyankhondo, na nkulu wa nyankhondo, na anyakuonera atongi a madjuda, amphata Yezu mbamanga. Pakutoma ankwata mbaenda na iye kuna Anasi, akhali tebzala wa Khaifasi, nkulu wa anyantsembe pa caka ceneco. Khaifasi ndiye akhadalonga kuna madjuda kuti, mphyadidi munthu m'bodzi afe, fera mbumba. Simau Pedhru na nyakupfundza unango m'bodzi, akhatowera Yezu. Nyakupfundza unowu, na kudziwika kukhacita iye na nkulu wa anyantsembe, apita pabodzi na Yezu n'khonde mwa n'nyumba ya nkulu wa anyantsembe. Mbwenye Pedhru asala kunja, pa nsuwo. Nyakupfundza wa Yezu akhadziwika na nkulu wa anyantsembe, abwerera mbalonga na nyabasa wankazi akhaonera pa nsuwo, mbakwata Pedhru mbapita na iye n'kati. Na tenepo, nyabasa wankazi abvundzisa Pedhru kuti: “Iwe siwe m'bodzi wa anyakupfundza a mamuna uyu tayu?” Pedhru antawira kuti: “Sine tayu.” Na thangwi ya kutonthola, anyabasa na anyakuonera aphatisa moto wa makala mbakhaotha. Pedhru akhalipombo penepo dzololo, mbakhaotha pabodzi na iwo. Na tenepo, nkulu wa anyantsembe abvundzisa Yezu pa thangwi ya anyakupfundza ace, na mapfundzisiro akhacita Iye. Yezu antawira tenepa: “Ine ndalonga pakweca kuna anthu. Kazinji kene ndikhapfundzisa m'manyumba akuphemberera na mu Nyumba ya Mulungu, mukhagumanyikana madjuda onsene. Nkhabe cibodzi cidalonga Ine n'cibiso-biso. Thangwi yanji usandibvundza? Bvundza ale adapibva pidalonga Ine. Iwo asapidziwa mwadidi mwene pidaapanga Ine.” Yezu pidamala Iye kulonga penepyo, nyakuonera m'bodzi akhakhala dhuzi na penepo, ampasa mbama mbalonga kuti: “Unatawira tenepa nkulu wa anyantsembe?” Yezu atawira kuti: “Ngakhala ndalonga pyakuipa, longa uipi udacita Ine. Mbwenye ngakhala ndalonga mwadidi, thangwi yanji wandimenya?” Na tenepo, Anasi aendesa Yezu mbadamala mangwa mikono, kuna Khaifasi, nkulu wa anyantsembe. Penepo akhalipombo Simau Pedhru, mbakhaotha moto. Iye abvundziwa kuti: “Kodi iwe siwe nyakupfundza m'bodzi wa Yezu tayu?” Pedhru akhonda mbalonga kuti: “Sine tayu.” Mbwenye nyabasa m'bodzi wa nkulu wa anyantsembe, m'bale wa mamuna adagwandiwa khutu na Pedhru, am'bvundza kuti: “Ine sidakuona tayu n'tapada pabodzi na Iye?” Mbwenye Pedhru akhonda pontho. Pa n'dzidzi ubodzi-bodzi, dzongwe yalira. Buluka ku nyumba ya Khaifasi, iwo ankwata Yezu mbaenda na iye ku nyumba yakutongera miseru. Kunja kukhaeca. Madjuda akhonda kupita n'nyumba ikhakhala ntongi wa ku Roma, thangwi akhagopa numpha mwambo wawo, toera akwanise kudya phwandu ya Paxkwa. Na tenepo, ntongi Piratu abuluka toera alonge na iwo, mbaabvundza kuti: “Adawanji mamuna uyu anasumira imwe?” Iwo atawira tenepa: “Iye mbadakhonda cita cakuipa, mbatidampereka kuna imwe tayu.” Piratu aapanga kuti: “Nkwateni muntonge ninga munalongera mwambo wanu.” Madjuda atawira tenepa: “Ife nkhabe tawirirwa kupha munthu.” Penepi pyacitika toera kusimbisisa mafala akhadalonga Yezu, mbakhapangisa mafero akhafuna kucita Iye. Na tenepo, Piratu abwerera pontho mu nyumba ya kutongera miseru, acemera Yezu mbam'bvundza kuti: “Iwe ndiwe mambo wa madjuda?” Yezu atawira tenepa: “M'bvundzo unowu ndi wako ene, peno alipo anango adakupanga na thangwi yanga?” Piratu antawira tenepa: “Kodi usanyerezera kuti ine ndine n'djuda? Ndi akulu aanyantsembe na mbumba yako idakupereka kuna ine. Wacitanji iwe?” Yezu atawira kuti: “Umambo wanga si wa padziko ino tayu. Mbudakhala ndi wa padziko ino, anyabasa anga mbadamenyana na iwo, toera madjuda akhonde kundimanga. Mbwenye cincino umambo wanga si wa dziko ino tayu.” Piratu alonga kuti: “Na tenepo, Iwe ndiwe mambo!” Yezu antawira tenepa: “Iwe ndiwe anapilonga kuti Ine ndine Mambo. Ande, ndi thangwi eneyo ndabalwa, pontho mbandibwera pa dziko toera ndicite umboni wa undimo mwene. Onsene a ndimo mwene asandibva.” Piratu abvundza kuti: “Ndi ninji undimo mwene?” Pidamala iye kubvundza abuluka pontho kunja kukakhala madjuda, mbalonga tenepa: “Nkhabe kuiona thangwi idaipisa Iye. Mbwenye ninga pinalongera mitemo yanu, ine ndisatongwa kubulusa munthu m'bodzi n'kaidi n'dzidzi wa phwandu ya Paxkwa. Apo lero imwe musafuna ndikubulusireni mambo wa madjuda?” Na tenepo, onsene atoma kukhuwa pontho kuti: “Iye nkhabe. Tibulusireni Bharabhasi.” Mphapo Bharabhasi akhali phanga. Na tenepo, Piratu ankwapulisa Yezu. Anyankhondo aluka nthimba ya minga, amuikha munsolo mwace mbam'bvazika nguwo ya ropa. Iwo afika dhuzi na Iye mbakhalonga kuti: “Bweraniko, mambo wa madjuda!” Mbakhampasa mbama. Piratu abuluka pontho kunja mbalonga kuna madjuda tenepa: “Lang'anani, ine ndiri kudza na iye kunja kuno, toera imwe mudziwe kuti ine nkhabe kuiona thangwi idaipisa Iye.” Yezu mudabuluka Iye kunja, mbadamala bvazikwa nthimba ya minga na nguwo ya ropa, Piratu aapanga tenepa: “Lang'anani, ali pano mamuna uyu!” Pidamuona iwo, akulu aanyantsembe na anyakuonera, atoma kukhuwa mbalonga kuti: “N'khomereni pa ntanda! N'khomereni pa ntanda!” Mbwenye Piratu atawira kuti: “Nkwateni imwe munkhomere. Ine nkhabe kuiona thangwi idaipisa Iye.” Mphapo madjuda alonga kuti: “Ife tina mwambo, na mwambo unowu iye asatongwa aphiwe, thangwi alonga kuti: ‘Ine ndine Mwana wa Mulungu.’ ” Piratu pidabva iye penepi, agoperatu pikulu kakamwe. Iye abwerera pontho n'nyumba mukhakhala Yezu, mbam'bvundza kuti: “Iwe wabuluka kupi?” Mbwenye Yezu hadantawira tayu. Piratu ampanga kuti: “Iwe nkhabe funa kunditawira? Nkhabe dziwa kuti ine ndina mphambvu za kukubulusa na za kukukhomeresa pa ntanda?” Yezu antawira kuti: “Nkhabe mphambvu ibodzi ya utongi ikhafuna kukhala na iwe kuna ine, mbudakhonda paswa na Mulungu. Na thangwi eneyo, ule adandipereka kuna iwe ndiye adadawa pikulu.” Buluka penepo, Piratu akhasaka kusudzula Yezu, mbwenye madjuda akhakhuwa mbakhalonga tenepa: “Ungasudzula mamuna uyu, siwe xamwali wa Sezari tayu, thangwi ule anacitika mambo, ndi nyamalwa wa Sezari.” Piratu na kubva penepyo, abweresa Yezu kunja mbakhala pa mpando wa kutonga, pa Mbuto yakusasanyiwa na Myala, (na malongero a madjuda ndi Gabata.) Ikhali ntsiku ya kusasanyira sumana ya phwandu ya Paxkwa, pa n'dzidzi khumi na uwiri wa masikati. Na tenepo, Piratu alonga kuna madjuda kuti: “Lang'anani, ali pano mambo wanu.” Mbwenye iwo akhuwa kuti: “M'buluseni! M'buluseni! N'khomereni pa ntanda!” Piratu alonga kuti: “Ndikhomere mambo wanu?” Akulu aanyantsembe atawira tenepa: “Ife nkhabe mambo unango, mambo wathu ndi Sezari basi.” Pakumalisira, Piratu ampereka Yezu kuna iwo kuti akhomerwe pa ntanda. Na tenepo, anyankhondo ankwata. Yezu akwata ntanda wace, abuluka mbaenda ku mbuto inacemerwa Kavera, (Na malongero a madjuda ndi Gologota.) Kweneko iwo an'khomera pa ntanda, pabodzi na anthu anango awiri, m'bodzi ku nkono wa madyo, unango ku nkono wa bzere, Yezu pakati. Piratu asasanyisa tabwa, aikhomera pa ntanda mbailemba tenepa: “YEZU WA KU NAZARETI, MAMBO WA MADJUDA.” Madjuda azinji akhalang'ana pidalembwa pa citabwa, thangwi mbuto idakhomerwa Yezu pa ntanda, ikhali dhuzi na nzinda. Pa tabwa, pakhadalembwa na malongero matatu. A ciebhereu, a cilatii na a cigerego. Akulu aanyantsembe alonga kuna Piratu kuti: “Leka kulemba ‘Mambo wa madjuda,’ mbwenye lemba kuti Iye akhalongeka ekha kuti Ine ndine mambo wa madjuda.” Na tenepo, Piratu atawira kuti: “Pidalemba ine, ndapilemba.” Pidamala iwo kun'khomera pa ntanda, anyankhondo akwata nguwo za Yezu mbagawana anthu anai, m'bodzi na m'bodzi mbakwata phindi yace, mbisala nguwo ibodzi inacemerwa tunika. Nguwo eneyi ikhali na nsono tayu, ikhali nguwo ibodzi basi, buluka padzulu mpaka pantsi. Anyankhondo abverana okha-okha mbalonga tenepa: “Mbatilekeni kuipandula tayu. Tendeni timenye ntsango, tione mbani anafuna kuikwata.” Penepi pyacitika toera pisimbiswe pidalembwa m'Bukhu ya Mulungu kuti: “Iwo agawana nguwo zanga okha-okha, mbamenyera ntsango tunika yanga.” Ndi penepi pidacita anyankhondo. Dhuzi na ntanda wa Yezu, pakhali na akazi anai: Mai wace Yezu, na m'bale wa mai wace, Mariya nkazi wa Kolopasi, na Mariya Madhalena. Yezu pidaona iye mai wace penepo, pontho mbaona dhuzi na mai wace nyakupfundza m'bodzi akhafuna Iye, apanga mai wace kuti: “Nkaziwe, mwana wako uxu.” Buluka penepo alonga kuna nyakupfundza kuti: “Mai wako uxu.” Kutomera n'dzidzi unowu mpaka kutsogolo, nyakupfundza ule akwata mai wace Yezu mbakhala na iye pa nyumba pace. Buluka penepo, Yezu na kudziwa kuti pyonsene pyamala kale, toera kusimbisa pidalembwa m'Bukhu ya Mulungu, alonga tenepa: “Ndina nyota.” Penepo pakhali na combo cakudzala na vinagiri. Na tenepo, iwo abvika thonje mwenemu, mbaipfeka kuntsonga kwa muti unacemerwa isopo, mbaikha pa mulomo wa Yezu. Iye aimwa pang'ono mbalonga kuti: “Pyonsene pyamala!” Na tenepo, akotamisa nsolo wace, mbafa. Na tenepo, madjuda na kuona kuti ikhali ntsiku ya kusasanyira phwandu ya Paxkwa, pontho toera manungo aleke kukhala pa ntanda ntsiku ya Sabudu, thangwi Sabudu eneyi ikhali Sabudu ikulu, aphemba Piratu kuti anthu aswiwe magogodo a myendo yawo, abuluswe pa ntanda. Na tenepo, anyankhondo abwera mbakhumula myendo ya mamuna wakutoma adakhomerwa pa ntanda pabodzi na Yezu, buluka penepo mbaenda kakhumula myendo ya mamuna unango. Mudafika iwo pana Yezu, na kumuona kuti akhadafa kale, acimwana kuswa magogodo a myendo yace. Mbwenye m'bodzi wa anyankhondo akwata dipa mbam'phola pa khundu. Pa n'dzidzi ubodzi ene, penepo pabuluka ciropa na madzi. Ule adapyona ndiye adalonga umboni wa penepi. Umboni wace ndi wa ndimo mwene. Iye asadziwa kuti asalonga pya ndimo mwene, toera imwe mutawirembo. Pinthu penepi pyacitika toera pisimbiswe pidalembwa m'Bukhu ya Mulungu kuti: “Nkhabe gogodo yace ibodzi inafuna swiwa.” Pontho, pa mbuto inango Bukhu ya Mulungu yalonga kuti: “Anati amuone ule adalasa iwo na dipa.” Pakumala penepyo, abwera Zuze wa ku nzinda wa Arimateya, kudza kaphemba manungo a Yezu kuna Piratu. Zuze akhali nyakupfundza wa Yezu, n'cibiso-biso, thangwi akhagopa madjuda. Penepo, Piratu antawirisa, Zuze mbakwata manungo a Yezu mbaenda na iwo. Nikodhemu, ule akhadaenda na masiku kalonga na Yezu, aenda pabodzi na Zuze, mbakwata makilu makumatatu na manai a pinthu pyakununkhira pyakubvungazwa na alowesi na mira. Na tenepo, amuna awa awiri akwata manungo a Yezu mbaapyangirira na mithambo yakucena, mbaadzodza na mafuta akununkhira, ninga nsambo wawo madjuda pakuikha kwawo munthu wa kufa. Pa mbuto pakhadakhomerwa Yezu pa ntanda, pakhali na dimba ibodzi ya maluwa. Pontho mwenemu mukhali na nthumbi ibodzi ipsa ya kuti cipo ikhadadzati ikhwa munthu. Yezu aikhiwa mwenemu, thangwi nthumbi ikakhala dhuzi, pontho ntsiku eneyo ikhali ntsiku ya kusasanyira madjuda phwandu ya Paxkwa. M'bambakuca mwa ntsiku ya Dimingu, na macibese ene kunja mbakudaswipa, Mariya Madhalena aenda ku nthumbi mbaona kuti mwala ukhadaikhwa pa nsuwo wabuluswa. Na tenepo, Mariya Madhalena athamanga mbaenda kagumana na Simau Pedhru na nyakupfundza unango, ule akhafuniwa maka na Yezu, mbaapanga kuti: “Mbuya abuluswa n'nthumbi, ife nkhabe dziwako kudamuikha iwo.” Pedhru na nyakupfundza unango, abuluka mbaenda ku nthumbi. Anyakupfundza awa awiri akhathamanga pabodzi, mbwenye unango athamanga pikulu kupita Pedhru, mbatoma kufika ndiye pa nthumbi. Iye akotama mbalang'anisa n'kati mbaona mithambo yakucena iri mwenemu, mbwenye hadapitamo tayu. Buluka penepo, Simau Pedhru akhabwera n'nduli mwace, afika mbapita n'nthumbi, mbaona mithambo yakucena na nguwo ing'ono ikhadagudumira nsolo wa Yezu. Iyo ikhadamala funyiwa mbiyikhwa pa khundu pa mithambo yakucena. Buluka penepo, nyakupfundza unango, ule akhadafika pakutoma mbalimira kunja, apitambo. Iye aona, mbatawira. (Thangwi iwo akhadasati kupibvesesa mwadidi pikhadalembwa m'Bukhu ya Mulungu kuti, Yezu akhatongwa alamuke pa kufa.) Na tenepo, anyakupfundza abwerera mbaenda kunyumba. Mbwenye Mariya asala dhuzi na pa nsuwo wa nthumbi mbakhalira. Mukhalira iye, akotama mbalang'ana mu nthumbi, mbaona anju awiri akhadabvala nguwo zakucena, mbali nawa pale pakhakhala manungo a Yezu. M'bodzi akhali ku misolo, unango ku myendo. Maanju am'bvundza kuti: “Nkaziwe, usaliranji?” Iye atawira tenepa: “Anthu akwata Mbuya wanga, kudamuikha iwo ine nkhabe dziwako.” Pakumala kulonga penepyo Mariya azungunuka mbaona Yezu akhadalimira penepo. Mbwenye Mariya acimwana kun'dzindikira. Yezu am'bvundza kuti: “Nkaziwe, usaliranji? Mbani anasaka iwe?” Mariya na kunyerezera kuti ndi nyabasa wa n'dimba ya maluwa, ampanga tenepa: “Ngakhala ndimwe adankwata, ndipangeni kudamuikha imwe, ine ndinenda kankwata.” Yezu ampanga kuti: “Mariya!” Na tenepo, Mariya azungunuka kuna Iye, mbakhuwa na malongero a madjuda kuti: “Rabhoni!” (Ndiko kubveka, “Mpfundzisi.”) Yezu alonga kuti: “Leka kundiphata, thangwi ndidzati kukwira kuna Baba wanga. Mbwenye ndoko kuna abale anga ukhaapange kuti Ine ndiri kukwira kwenda kuna Baba wanga, ndiyembo Baba wanu. Kuna Mulungu wanga, ndiyembo Mulungu wanu.” Mariya Madhalena aenda kaapanga anyakupfundza a Yezu kuti: “Ine ndamuona Mbuya!” Mbalonga pikhadampanga Yezu. Na maulo a ntsiku ya Dimingu, anyakupfundza a Yezu akhadagumanyikana pabodzi pene n'nyumba, misuwo mbidamala kufungwa na thangwi ya kugopa madjuda. Yezu apita, akhala pakati pawo mbalonga kuti: “Ntendere mbukhale na imwe!” Pakumala kulonga penepyo, aapangisa manja ace na pa khundu pace. Na tenepo, anyakupfundza ace na kuona Mbuya, akomerwa pikulu kakamwe. Yezu aapanga pontho kuti: “Ntendere mbukhale na imwe! Ninga Baba andituma, Ine ndinakutumanimbo.” Pidamala Iye kulonga penepi, aapupusira mbalonga kuti: “Tambirani Nzimu Wakucena. Mungalekerera anthu kudawa kwawo, iwo analekererwambo madawi awo, mungakhonda kualekerera, iwo nkhabe kulekererwambo.” Apo pidabwera Yezu, Tomasi akhacemerwa Dhidhimu, m'bodzi wa anyakupfundza khumi na awiri a Yezu, akhali pabodzi na iwo tayu. Anyakupfundza andzace ampanga kuti: “Ife tamuona Mbuya!” Mbwenye iye atawira tenepa: “Ndingakhonda kuona mule mudapholwa iye na maperego m'manja mwace mbindipitisa cala canga, mbindikhonda kuikha djanja yanga pa khundu pace, ine cipo ndinadza katawira.” Pakumala sumana ibodzi, anyakupfundza a Yezu agumanyikana pontho n'nyumba ibodzi-bodzi, misuwo mbidamala fungwa. Pa n'dzidzi unowu, Tomasi akhali na anthu. Yezu apita mbakhala pakati pawo mbalonga kuti: “Ntendere mbukhale na Imwe!” Na tenepo, Yezu alonga kuna Tomasi kuti: “Pitisa cala cako apa. Lang'ana manja anga. Futhula djanja yako uipitise pa khundu panga. Siya kupenula, mbwenye tawira.” Tomasi atawira tenepa: “Mbuya wanga na Mulungu wanga!” Penepo Yezu ampanga kuti: “Watawira thangwi pidandiona iwe? Mbatsandzaye ale anatawira mbakhonda kundiona.” Yezu acita pidzindikiro pinango pizinji pya pirengo pamaso pa anyakupfundza ace, pidakhonda kulembwa mu bukhu iyi. Mbwenye ipi pyalembwa toera imwe mutawire kuti Yezu ndi Kirixtu Mwana wa Mulungu, pontho mungatawira mukhale na upulumuki mu dzina yace. Pakumala penepyo, Yezu abulukira pontho kuna anyakupfundza ace pa gombe ya bara ya Tibheriyadhi. Pyacitika tenepa: Onsene akhali pabodzi pene. Simau Pedhru, na Tomasi akhacemerwa Dhidhimu, Natanyeli wa ku nzinda wa Kanaa ya ku Galileya, na ana a Zebhedheu, na anyakupfundza ace anango awiri. Penepo, Simau Pedhru aapanga tenepa: “Ndiri kwenda kamedza.” Iwo alonga kuti: “Ife tinendambo na iwe.” Na tenepo, iwo aenda mbapakira m'bote, mbwenye masiku enewa hadaphata cinthu tayu. Mukhaca kunja, Yezu afika pa gombe, mbwenye anyakupfundza ace acimwana kun'dzindikira. Yezu aabvundza kuti: “Ananga, mwaphata nyama?” Iwo antawira kuti: “Nkhabe.” Na tenepo, Yezu aapanga kuti: “Gwisirani kokota ku khundu ya madyo ya bote, munaphata nyama.” Penepo iwo agwesera kokota, mbacimwana kuikwewa na thangwi ya kudzala kwa nyama. Nyakupfundza ule akhafuniwa na Yezu, apanga Pedhru kuti: “Ndi Mbuya!” Simau Pedhru, pidabva iye penepi, abvala nguwo yace ya kunja, thangwi akhadaidula, mbagwera m'madzi. Anyakupfundza anango abwera na bote mbakwewa kokota ikhadadzala na nyama, thangwi ukhadasala nsindzo wa meturu makumapfemba, na kufuna kufika n'gombe. Mudabuluka iwo m'bote, penepo aona moto wa makala na nyama ibodzi ya m'madzi padzulu pace, na nkate. Yezu aapanga kuti: “Bweresani nyama zinango za m'madzi zidapha imwe.” Simau Pedhru akwira m'bote, mbakwewa kokota kuntunda. Kokota ikhadadzala na nyama zikulu za m'madzi zakukwana dzana na makumaxanu na zitatu, mbwenye na nyama zonsene izi, kokota hidapanduka tayu. Penepo, Yezu aapanga kuti: “Bwerani mudye.” Nkhabe m'bodzi wa anyakupfundza ace akhali na cipapu ca kum'bvundza kuti: “Ndiwe ani?” Thangwi iwo akhan'dziwa kuti ndi Mbuya. Yezu aafendedzera, akwata nkate mbaapasa, mbacitambo pibodzi-bodzi na nyama ya m'madzi. Kutomera pakulamuka kwa Yezu pa kufa, kupangizika uku kudacita Iye kuna anyakupfundza ace, kukhali kwacitatu. Mudamala iwo kudya, Yezu abvundza Simau Pedhru kuti: “Simau, mwana wa Juwau, iwe usandifuna kupita awa?” Iye alonga kuti: “Ande Mbuya, Imwe musadziwa kuti ndisakufunani.” Yezu ampanga tenepa: “Dyesa ana mabira anga.” Yezu alonga pontho kaciwiri kuti: “Simau, mwana wa Juwau, iwe usandifuna?” Iye antawira kuti: “Ande Mbuya, Imwe musapidziwa kuti ine ndisakufunani.” Yezu ampanga kuti: “Kumbiza mabira anga.” Yezu am'bvundzisa pontho kacitatu mbalonga kuti: “Simau, mwana wa Juwau, iwe usandifuna?” Penepo, Pedhru atsukwala thangwi Yezu am'bvundza kacitatu kuti: “Iwe usandifuna?” Iye ampanga tenepa: “Mbuya, Imwe musadziwa pinthu pyonsene, pontho musadziwa kuti ndisakufunani.” Yezu ampanga kuti: “Dyesa mabira anga. Ndimo mwene, ndimo mwene ndinakupanga kuti: Pikhakhala iwe m'phale, ukhabvala wekha mbuyenda kukhafuna iwe. Mbwenye ungadza kakalamba, unathukula mikono yako mbubvazikwa na munthu unango, pontho mbakukwata mbaenda nawe kule kuna khonda iwe funa.” Penepi Yezu apilonga toera kupangisa mafero akhafuna cita Pedhru, akhafuna pasa na iye mbiri Mulungu. Buluka penepo, Yezu ampanga kuti: “Nditowere!” Pedhru azungunuka mbaona kuti akhatowererwa na ule nyakupfundza akhafuniwa maka na Yezu. Nyakupfundza unowu ndi ule akhali n'khundu mwa Yezu pa n'dzidzi ukhadya iwo, mbakhabvundzisa kuti: “Mbuya, mbani anafuna kukusandukirani?” Pedhru pidaona iye nyakupfundza ule, abvundza Yezu kuti: “Mbuya, ndi ninji pinafuna citika kuna uyu?” Yezu antawira tenepa: “Ine ndinganfuna kuti iye akhale m'maso kufikira Ine ndabwera, iwe unapyonji? Iwe nditowere!” Na tenepo, zikhadabveka mphangwa pakati pa abale, zakulonga kuti nyakupfundza unoule hanafabve tayu. Mbwenye Yezu hadampanga kuti hanafabve tayu. Pidalonga Iye ndi ipi basi: “Ine ndingafuna kuti iye akhale m'maso kufikira Ine ndabwera, unapyonji?” Nyakupfundza uyu ndiye anacita umboni wa pinthu ipi, mbapilemba, pontho ife tisadziwa kuti umboni wace ngwamaso. Yezu acitambo pontho pinthu pinango pizinji. Pyonsene mbapidalembwa cibodzi na cibodzi, ndisanyerezera kuti mabukhu akhafuna kulembwa, mbadakwanapo pa dziko yonsene tayu. Tiyofilu, mu bukhu yanga yakutoma, ndalemba pyonsene pidatoma kucita Yezu na pidapfundzisa Iye, mpaka ntsiku idakwatwa Iye kwenda kudzulu, pakumala kupfundzisa na mphambvu za Nzimu Wakucena apoxtolo ace akhadasankhula Iye. Pakumala kuona nyatwa, Yezu abulukira kuna apoxtolo ace, mbaapasa pidzindikiro pizinji pinakhonda kupokanyika kuti Iye ali m'maso. Abulukira kuna iwo pa ntsiku makumanai, mbakhalonga kuna iwo na thangwi ya Umambo wa Mulungu. Ntsiku ibodzi Yezu mukhadya Iye na apoxtolo ace, aapasa ntemo uxu: “Lekani buluka mu Djerusalema, mbwenye dikhirani pidakupikirirani Baba wanga, pire pidakupangani Ine. Thangwi Juwau atambirisa batixmu na madzi, mbwenye mbazidzati kumala ntsiku zizinji, imwe munadza katambiriswa batixmu na Nzimu Wakucena.” Na tenepo, ale akhadagumanyikana am'bvundza kuti: “Mbuya, ndi cincino munafuna imwe bwezera umambo kuna mbumba ya Izarayeli?” Yezu aatawira tenepa: “Pya kudziwa midzidzi peno ntsiku zidapaka Baba na mphambvu zace za utongi, penepi si pyanu tayu. Mbwenye imwe munadza katambira mphambvu za Nzimu Wakucena, ungadza kachita kuna imwe, mbamudza kakhala amboni anga ku Djerusalema, ku Djudeya na ku Samariya, mpaka kunadhroma dziko.” Yezu pidamala Iye kulonga penepi, akwatiwa kwenda kudzulu, iwo mbakhamulang'ana. Penepo khole ibodzi yan'gudumira, mbakhonda kuoneka. Mukhalang'anisa iwo kudzulu Yezu mbakhakwira, na mwansanga abulukira amuna awiri akhadabvala nguwo zakucena, mbaapanga tenepa: “Imwe amuna a ku Galileya, thangwi yanji musalang'anisa kudzulu? Yezu unowu adakwatiwa pakati panu kwenda kudzulu, anati abwere pontho sawa-sawa ninga mudamuonera imwe mbakhakwira.” Na tenepo iwo abwerera kwenda ku Djerusalema, bulukira ku phiri inacemerwa Mulivera, iri dhuzi na nzinda, pa nsindzo wa kilometuru ibodzi. Mudafika iwo kweneko, akwira n'nyumba ya n'dzulu ikhafikira iwo. Akhali na anthu penepo Pedhru, Juwau, Tiyago, Andereya, Filipi, Tomasi, Bhatolomeu, Mateu, Tiyago mwana wa Alufeu, Simau nyakukakamira mwambo wa Mulungu, na Djuda, mwana wa Tiyago. Onsene awa kazinji kene akhagumanyikana pabodzi pene pa kuphembera, na abale ace Yezu na Mariya mai wace Yezu, na akazi anango. Pa ntsiku zenezo, Pedhru alimira pakati pa abale a nsoka wakukwana dzana na makumawiri wa anthu, mbaapanga tenepa: “Abale anga, pikhatongwa kuti pisimbiswe pire pidalonga Nzimu Wakucena m'Bukhu ya Mulungu, pa mulomo wa mambo Dhavidhi na thangwi ya Djuda, ule adatsogolera ale anthu adamanga Yezu. Iye akhadalengeswa ninga m'bodzi wathu, pontho akhacitambo basa yathu.” (Djuda agula munda na kobiri ikhadatambira iye na kudawa kwace. Ndi mwenemu mudagwa iye, manungo ace mbasweka nakati-na-kati, utumbo wace onsene mbumwazika. Anthu onsene a ku Djerusalema apidziwa penepi. Na thangwi eneyo munda unowu aupasa dzina ya Akelidama na malongero awo. Kweneko ndi kubveka munda wa ciropa.) Pedhru athimiza na kulonga tenepa: “Thangwi pyalembwa m'bukhu ya Masalimu kuti: “ ‘Mbuto yace mbikhale dembe, mbasoweka na m'bodzi ene anafuna kuikhala.’ Panango palembwa tenepa: “ ‘Basa yace ya utsogoleri mbapite munthu unango. ’ Na tenepo, tisatongwa tisankhule mamuna m'bodzi, akhakhala na ife pa midzidzi yonsene ikhakhala Mbuya Yezu na ife, kutomera pa n'dzidzi ukhatambirisa Juwau batixmu, mpaka ntsiku idakwatwa Yezu pakati pathu mbaenda kudzulu, m'bodzi wawo akhale mboni pabodzi na ife wa kulamuka kwace pa kufa.” Na tenepo, asankhulwa amuna awiri. Zuze, anacemerwa Bharisabha, akhadziwika na dzina ya Djuxtu, na Matiya. Buluka penepo, aphembera mbalonga tenepa: “Mbuya, Imwe ndimwe anadziwa mitima ya onsene. Cincino tipangizeni pa awiri awa, ndi ani adasankhula imwe. Toera akhale pa mbuto ya basa ya upoxtolo idasiya Djuda, mbaenda pyace ku mbuto idankwanira.” Na tenepo, iwo amenya ntsango, mbawina ndi Matiya. Penepo iye aikhwa pa nsoka wa apoxtolo khumi na m'bodzi. Pidakwana iyo ntsiku ya phwandu ya Pentikoxti, onsene akhadagumanyikana pa mbuto ibodzi ene. Na mwansanga, kudzulu kwatitimira ninga conzi ca mphepo ikulu, conzi ceneci mbacidzadza n'nyumba monsene mukhakhala iwo nawa-nawa. Penepo, onsene atoma kuona pinthu pyakulandana na malirimi a moto, adamwazika mbaphamira m'bodzi na m'bodzi. Onsene adzala na Nzimu Wakucena, mbatoma kulonga malongero a kusiyana-siyana, ninga mukhapaswa iwo na Nzimu Wakucena. N'Djerusalema, akhalipo madjuda akugopa Mulungu, adabuluka m'madziko onsene a pantsi pano. Mudabveka iyo dungu ya mphepo, mwinji wa anthu wagumanyikana, onsene mbadzumatirwa napyo, thangwi m'bodzi na m'bodzi akhaabva akhalonga na malongero ace ene. Onsene atutumuka mbadzumatirwa napyo, mbakhalonga tenepa: “Kodi amuna awa onsene anabva ife mbalonga tenepa, si a ku Galileya tayu? Mphapo pyacitika tani kuti ife m'bodzi na m'bodzi tiabve na malongero athu adabalwa na ife? Pano tina anthu a ku madziko a Partiya, a ku Medhya, a ku Elami, a ku Mezopotamya, a ku Djudeya, a ku Kapadhosya, a ku Pontu, a ku Azya, a ku Firijya, a ku Panfilya, a ku Idjipitu, na a m'makhundu a Libhya dhuzi na Sirene, na anango adabuluka ku Roma. Anango ndi madjuda, anango ndi a madzindza anango adatawira kukhala madjuda. Anangombo abuluka ku Kereta, anango abuluka ku Arabhya. Ife tonsene tiri kuabva mbalonga pinthu pyakudzumisa pya Mulungu na malongero athu.” Onsene adzumatirwa napyo mbasowa pyakulonga, mbakhabvundzana okha-okha kuti: “Pisalonganji penepi?” Mbwenye anango akhaasingirira mbalonga tenepa: “Amuna awa amala ledzera.” Na tenepo, Pedhru alamuka pabodzi na andzace khumi na m'bodzi, mbalonga na mphambvu kuna mbumba yonsene kuti: “Imwe amuna a ku Djudeya, na monsene munakhala mu Djerusalema, bveserani mwadidi, funa ndikupangeni ici: Amuna awa hadaledzera tayu, ninga munaanyerezera imwe. N'dzidzi uno ndi macibese maka, ndi n'dzidzi wacipfemba wa macibese. Mbwenye ipi, ndi pire pidalongwa na mporofeta Djoweli kuti: “ ‘Mulungu alonga kuti pa ntsiku zakumalisa, ndinapasa Nzimu wanga anthu onsene. Ana anu amuna na akazi, analonga ciporofeta. Aphale anaoneswa pinthu mu Nzimu, mankhalamba analoteswa. Ndinapasa Nzimu wanga kuli anyabasa anga amuna na akazi. Pa ntsiku zenezo, iwo anati alonge ciporofeta. Ndinapangisa pinthu pyakudzumisa kudzulu, na pidzindikiro pantsi pano. Ciropa, moto na makole a uchi. Mbidzati kufika ntsiku ikulu na ya mbiri ya Mbuya, dzuwa inadza cidima, mwezi unadza ciropa. Na tenepo, onsene ale anacemera dzina ya Mbuya, anadza kapulumuswa!’ ” Pedhru athimiza pontho na kulonga tenepa: “Imwe amuna a Izarayeli, bveserani: Yezu wa ku Nazareti apendwa na Mulungu patsogolo panu na pirengo, na pinthu pyakudzumisa, na pidzindikiro pidacita Mulungu na Iye, ninga imwe ene musapidziwa. Mulungu na kufuna kwace, pontho na kudziwa kwace pikhafuna kucitika kutsogolo, ampereka mamuna uyu m'manja mwanu. Imwe mwam'phesa mbamunkhomeresa pa ntanda na anthu a kuipa. Mbwenye Mulungu amulamusa pa kufa, mbampulumusa pa nyatwa ya kufa, thangwi pikhacimwanika kuti Yezu akundiwe na kufa. Na thangwi ya Yezu, Dhavidhi alonga kuti: “ ‘Ine ndikhaona Mbuya ntsiku zonsene patsogolo panga. Thangwi Iye ali ku nkono wanga wa madyo, ine nkhabe kudza kagopa cinthu. Na thangwi eneyi ntima wanga usatsandzaya, mafala anga ndi mafala akukomerwa, pontho manungo anga anaendambo kapuma na kudikhira. Thangwi Imwe Mbuya nkhabe kudza kandisiya ndekha n'nthumbi. Pontho nkhabe kudza kasiya kuti Nyakulungama wanu abvunde. Imwe mwandidziwisa njira za upulumuki, pontho munadza kanditsandzaisa pikulu pamaso panu.’ ” Pedhru athimiza pontho na kulonga kuti: “Abale anga, ndisakupangani pakweca kuti mbuya wathu Dhavidhi afa mbaikhwa, na lero nthumbi yace iri pano na ife. Thangwi iye akhali mporofeta, pontho akhadziwa kuti Mulungu akhadampikirira na kudumbira kuti, m'bodzi wa dzindza yace anadza kakhala pa mpando wace wa umambo. Dhavidhi na kudziwa penepyo, akhadalonga kale na thangwi ya kulamuka pa kufa kwa Kirixtu, ule adakhonda kusiyiwa n'nthumbi, manungo ace mbakhonda kubvunda. Yezu unowu, Mulungu amulamusa pa kufa, ife tonsene ndife amboni a penepi. Na tenepo, Iye akuzwa mbaikhwa ku nkono wa madyo wa Mulungu, mbatambira Nzimu Wakucena kuna Baba wace ukhadapikirirwa Iye, mbatipasa pinaona imwe na pinabva imwe cincino. Thangwi Dhavidhi hadakwira kudzulu tayu, mbwenye iye ene Dhavidhi alonga kuti: “ ‘Mbuya apanga Mbuya wanga kuti: Khala ku nkono wanga wa madyo, mpaka ntsiku inaikha ine anyamalwa ako, mbakhala ninga cinthu cakupwandira manyalo ako.’ ” Pedhru athimiza pontho na kulonga kuti: “Imwe mbumba yonsene ya Izarayeli, dziwani mwadidi kuti Yezu unowu adakhomera imwe pa ntanda, Mulungu ancita kuti akhale Mbuya, pontho akhale Kirixtu.” Anthu mudabva iwo penepi, atsukwala napyo kakamwe m'mitima mwawo, mbatoma kubvundzisa Pedhru na apoxtolo andzace anango kuti: “Abale, tisafunika ticitenji?” Pedhru aatawira tenepa: “Chunyukani madawi anu, m'bodzi na m'bodzi atambire batixmu na dzina ya Yezu Kirixtu, toera mulekererwe madawi anu. Na tenepo, munadza katambira muwoni wa Nzimu Wakucena. Thangwi penepi Mulungu apipikirira kuna imwe, kuna ana anu, na kuna onsene ali kutali, pontho na kuna onsene anafuna kudza kacemerwa na Mbuya, Mulungu wathu.” Pedhru akhaapanga na mafala anango mazinji, mbakhaacenjeza kuti: “Bulukani mupulumuke pakati pa anthu awa akuipa!” Ale adatawira mphangwa zikhalonga Pedhru, atambira batixmu. Pa ntsiku eneyo, nsoka wawo wathimizirika na anthu akukwana dhuzi na pikwi pitatu. Onsene akhakakamira pa cipfundzo ca apoxtolo, mbakhakoya pyonsene pikhapfundziswa iwo, pa kuphatana kwawo muubale, pa kumenya nkate wa Mbuya, na pa kuphembera. Anthu onsene akhagopa, pontho apoxtolo akhacita pidzindikiro pizinji na pinthu pyakudzumisa. Onsene ale akhatawira, akhali anthu akuphatana, pontho pyonsene pikhakhala na iwo, pikhali pya iwo onsene. Akhagulisa pinthu pyawo na mpfuma zawo mbagawana onsene, mbakhalang'ana kusowa kwa m'bodzi na m'bodzi. Ntsiku zonsene, akhagumanyikana pabodzi pene mu Nyumba ya Mulungu. Akhamenya nkate wa Mbuya m'manyumba mwawo, pontho mbakhadya pyakudya pyawo na kukomerwa, na ntima wa kucepeseka. Akhakuza Mulungu, mbakhasimbwa na anthu onsene. Ntsiku na ntsiku Mbuya akhauthimizira nsoka wawo na anthu ale akhapulumuswa. Ntsiku ibodzi, pa n'dzidzi utatu wa kumaulo, n'dzidzi wakuphembera, Pedhru na Juwau akhaenda ku Nyumba ya Mulungu. Pa nsuwo wa Nyumba ya Mulungu ukhacemerwa Wakubalika, pakhakhala na mamuna m'bodzi akhadabalwa wa kulamala. Ntsiku zonsene, akhakwatiwa mbakhaikhwa penepo toera aphembe pinthu kuna ale akhapita mwenemu. Mudaona iye Pedhru na Juwau mbakhapita mu Nyumba ya Mulungu, akhaaphemba kuti ampase cinthu. Pedhru na Juwau amulang'anisa mwadidi mwene, mbampanga kuti: “Tilang'ane!” Mamuna uyu aalang'anisa, mbakhadikhira kutambira cinthu kuna iwo. Penepo, Pedhru ampanga tenepa: “Ine, nkhabe parata, nkhabe oro, mbwenye pina ine ndinakupasa. Na dzina ya Yezu Kirixtu wa ku Nazareti, lamuka ufambe!” Buluka penepo, Pedhru amphata manja ace a nkono wa madyo, mbam'phedza kumulamusa. Pa n'dzidzi ubodzi ene, myendo yace na mphundupundu zace zawanga. Na tenepo, iye anumpha, alimira na myendo yace, mbatoma kufamba. Buluka penepo, apita n'thando ya Nyumba ya Mulungu pabodzi na iwo, mbakhafamba uku mbakhanumpha, na kusimba Mulungu. Anthu onsene pidamuona iwo mamuna mbakhanumpha na kusimba Mulungu, an'dzindikira kuti mamuna uyu ndi unowu m'bodzi ene akhakhala na nsambo wa kuphemba pinthu pa nsuwo wa Nyumba ya Mulungu, unacemerwa Wakubalika. Onsene akhala akudzudzumika pontho mbadzumatirwa pikulu kakamwe na pire pikhadancitikira. Mamuna ule akhadawangiswa, akhasyana tayu kufamba pabodzi na Pedhru na Juwau. Anthu onsene akhadzumatirwa napyo, mbakhathamanga kwenda mu Nyumba ya Mulungu, ku mbuto inacemerwa khonde ya Salomau, mukhakhala iwo. Pedhru, mudapyona iye ipi, aapanga tenepa: “Imwe amuna a ku Izarayeli, musadzumanji mbamutilang'anisa tenepa? Musanyerezera kuti mamuna uyu pinafamba iye ndi mphambvu zathu, peno tisabvera maka Mulungu? Mulungu wa Abharaamu, wa Izaki na wa Djakobo, Mulungu wa ambuya athu akale, ndiye adapasa mbiri nyabasa wace Yezu, ule adapereka imwe kuti aphiwe, pontho adakhonda imwe pamaso pa Piratu, pikhafuna iye kunsudzula. Mbwenye imwe mwan'khonda pakweca Wakucena na Wakulungama, mbamuphemba kuti phanga ibuluswe n'kaidi. Na tenepo, imwe mwapha Ule anapasa upulumuki. Mbwenye Mulungu amulamusa pa kufa. Ife ndife anyamaso a penepi. Na kukhulupira kwace dzina ya Yezu, dzina eneyi ndiyo idamuwangisa mamuna uyu anaona imwe na anadziwa imwe. Kukhulupira kwace Yezu, kwancita kuti awange, ninga pinaona imwe monsene. “Cincino abale anga, ine ndisapidziwa kuti imwe na atsogoleri anu ene, mwacita penepi thangwi yakukhonda kudziwa. Mbwenye ndi tenepa kusimbisa kudacita Mulungu, pire pidalonga maporofeta onsene kale ene, kuti Kirixtu wace anati aone nyatwa. Na tenepo, chunyukani mubwere kuna Mulungu, kuti Iye akulekerereni madawi anu, toera ibwere midzidzi ya kupuma ku khundu ya Mbuya, pontho kuti Iye atume Kirixtu Yezu, unowu akhadasankhulirwa imwe. Asatongwa kuti Iye akhale kudzulu, mpaka ufike n'dzidzi unadza kasasanya Mbuya papsa pinthu pyonsene, ninga mukhadalonga Iye kale ene na maporofeta ace akucena. Thangwi Mozesi alonga kuti: ‘Pakati pa abale anu, Mulungu anati akusankhulireni mporofeta m'bodzi ninga ine. M'bvereni pyonsene pinafuna kukupangani iye. Munthu onsene anakhonda kum'bvera mporofeta unowu, anati abuluswe pa mbumba ya Mulungu.’ “Ndimo mwene, maporofeta onsene, kutomera kuna Samweli, na onsene adadza n'nduli mwace, m'bodzi na m'bodzi, alonga mbakudziwisani pinthu pikhafuna kucitika ntsiku zino. Imwe ndimwe ana a maporofeta, pontho ndimwe ana a cibverano cidacita Mulungu na ambuya anu, pa kulonga kwace kudacita Iye na Abharaamu kuti: ‘Madzindza onsene a pantsi pano, anapaswa nkhombo na thangwi ya dzindza yako.’ Na tenepo, Mulungu, mudamala Iye kulamusa Nyabasa Wace pa kufa, pakutoma antuma kuna imwe toera akupaseni nkhombo, kuti m'bodzi na m'bodzi azungunuke, mbasiya makhaliro ace akuipa.” Mukhalonga Pedhru na Juwau mafala awa kuna mbumba, afika anyantsembe na nkulu wa anyakuonera Nyumba ya Mulungu, pabodzi pene na nsoka unango wa madjuda unacemerwa asadhusi. Iwo akhadaipirwa pikulu kakamwe, thangwi Pedhru na Juwau akhapfundzisa mbumba mbakhalonga kuti, na kulamuka pa kufa kwa Yezu, pisapangisa kuti anyakufa analamuka. Penepo, aamanga mbaaikha n'kaidi mpaka mangwana mwace, thangwi dzuwa ikhadadoka. Mbwenye anthu azinji akhabva fala ya Mulungu, aitawira. Pa onsene adatawira, nsoka wawo ukhali dhuzi na kukwana pikwi pixanu pya amuna. Mangwana mwace, atongi a madjuda, na mathubu, pabodzi pene na anyakudziwisa a Mwambo, agumanyikana ku Djerusalema. Pa nsonkhano unowu, akhalipombo Anasi, nkulu wa anyantsembe, Khaifasi, Juwau, Alixande, na onsene ale akhali a dzindza ya nkulu wa anyantsembe. Penepo, iwo aakwata apoxtolo mbaiyikha patsogolo pawo, mbaabvundza tenepa: “Ndi mphambvu za ani, peno ndi na dzina ya ani inacita na imwe pinthu penepi?” Na tenepo, Pedhru adzala na Nzimu Wakucena, mbaatawira tenepa: “Imwe atongi na mathubu! Ngakhala ife lero tiri kubvundziwa na thangwi ya udidi udacitirwa mamuna m'bodzi wa ntenda kuti iye apulumuswa tani, dziwani imwe na mbumba yonsene ya Izarayeli, kuti mamuna uyu anaona imwe pano, awangiswa na dzina ya Yezu Kirixtu wa ku Nazareti, unowu adakhomera imwe pa ntanda, Mulungu mbamulamusa pa kufa. Yezu unowu, ndiwo “ ‘mwala udakhondiwa na imwe anyakumanga nyumba, pontho mbudza kakhala mwala wakufunika kakamwe.’ Nkhabebve upulumuki muna munthu unango, thangwi nkhabe dzina inango pantsi pano idapaswa anthu, kuti inakwanisa kutipulumusa.” Na kuona cipapu ca Pedhru na ca Juwau, pontho na kuadziwa kuti ndi anthu ene pyawo akukhonda kupfundza, adzumatirwa napyo, mbaadzindikira kuti iwo akhali atowereri a Yezu. Mbwenye iwo akhacimwana kupokanya Pedhru na Juwau, thangwi mamuna akhadawangiswa ule, akhali penepo dzololo pabodzi na iwo. Na tenepo, iwo apanga Pedhru na Juwau kuti abuluke mu nyumba ikhatongera iwo miseru, mbatoma kubverana okha-okha kuti: “Tinacitanji na amuna awa? Thangwi anthu onsene mu Djerusalema muno, asapidziwa kuti iwo acita cirengo cikulu, ca kuti ife nkhabe kwanisa kucikhonda. Mbwenye toera pinthu penepi pileke mwaziwa kuna mbumba, mbatiathuuseni akhonde pangabve munthu dzina eneyi.” Na tenepo, aacemera pontho, mbaakhondesa kuti aleke kulonga na kupfundzisa pontho cinthu na dzina ya Yezu. Mbwenye Pedhru na Juwau aatawira tenepa: “Nyerezerani mwadidi, ngakhala mphyakulungama pamaso pa Mulungu, kubvera imwe mbatikhonda kubvera Mulungu. Thangwi ife tinacimwana khonda kupilonga pire pidaona ife na pidabva ife.” Pakumala kuathusa pontho, aasiya mbaenda, mbakhasowa thangwi ya kuathabusa nayo, thangwi mbumba yonsene ikhakuza Mulungu na pire pikhadacitika. Thangwi mamuna uyu akhadawangiswa na cirengo ici, akhadapiringana pyaka makumanai pyakubalwa. Mudasiyiwa iwo mbaenda, Pedhru na Juwau abwerera kuna andzawo, mbalonga pyonsene pidapangwa iwo na akulu aanyantsembe pontho na mathubu. Mudabva iwo penepyo, onsene pabodzi pene, aphembera Mulungu mbalonga tenepa: “Mbuya, imwe ndimwe adacita kudzulu na pantsi, na bara na pyonsene piri mwenemu! Imwe mwalonga na Nzimu wanu, na mulomo wa nyabasa wanu baba wathu Dhavidhi kuti: “ ‘Thangwi yanji anthu adakhonda kukhala madjuda asaipirwa pikulu kakamwe, pontho thangwi yanji mbumba zisabverana kucita pyapezi? Amambo a dziko asasasanyira, pontho atongi asagumanyikana, toera acite nkhondo na Mbuya, pontho na Misiya wanu.’ Ndimo mwenedi, Herodhi na Ponsyo Piratu agumanyikana mu nzinda muno pabodzi na anthu adakhonda kukhala madjuda, na mbumba ya Izarayeli, mbazonda Yezu nyabasa wanu wakucena adadzoza imwe. Iwo acita pire pidatonga imwe kale kuti picitike na mphambvu zanu, na kufuna kwanu. Cincino Mbuya onani kuthusa kunacita iwo. Pasani ndzeru anyabasa anu, toera akwanise kumwaza fala yanu na cipapu, mbamukhafuthula djanja yanu, kuti mukondze na kucita pidzindikiro pontho na pirengo, na dzina ya Yezu nyabasa wanu wakucena.” Mudamalisa iwo kuphembera, penepo pakhali iwo patekenyeka. Na tenepo onsene adzazwa na Nzimu Wakucena, mbatoma kumwaza fala ya Mulungu na cipapu. Pa onsene adatawira, akhakhala ninga ana ntima ubodzi na ndzeru zibodzi. Nkhabe munthu akhalonga kuti pinthu ipi mphyanga. Mbwenye akhagawana m'bodzi na m'bodzi pyonsene pikhakhala na iwo. Na mphambvu zikulu apoxtolo akhaenda mbalonga na thangwi ya kulamuka pa kufa kwa Mbuya Yezu. Na tenepo, mwa iwo onsene mukhagumanika kukoma ntima kukulu kwa Mulungu. Pa nsoka wawo pakhali nkhabe nyakucherenga. Thangwi ale akhakhala na minda yawo peno nyumba zawo, akhazigulisa mbakhadzesa kobiri yace, mbakhaipereka kuna apoxtolo, iwombo akhaigawiza mbakhalang'ana kusowa kwa m'bodzi na m'bodzi. Mbwenye Zuze, m'bodzi wa dzindza ya Levi, wa ku ntsuwa ya Xipere, ule adapaswa dzina ya Bharnabhasi na apoxtolo, dzina inalongera “Nyakupasa cipapu,” agulisa munda wace, kobiri yace mbaidzesa kuna apoxtolo. Mbwenye mamuna m'bodzi anacemerwa Ananiya, na nkazace Safira, agulisambo munda wawo. Iye abverana na nkazace mbapambula kobiri inango mbasala nayo, kobiri inango aikwata mbaipereka kuna apoxtolo. Na tenepo, Pedhru am'bvundza kuti: “Ananiya, thangwi yanji wasiya Sathani mbapita muntima mwako, mbunyengeza Nzimu Wakucena, mbubisa kobiri inango idagulisa na iwe munda wako? Mpfuma ikhali yako tayu? Pontho pidamala iwe kuigulisa, kobiri ikhali na iwe tayu? Ndi thangwi yanji mphapo wanyerezera kucita penepi muntima mwako? Iwe udanyengeza anthu tayu, mbwenye wanyengeza Mulungu!” Na kubva penepi, Ananiya agwa pantsi, mbafa. Anthu onsene adapibva pikhadacitika, agopa pikulu kakamwe. Na tenepo, abwera aphale mban'gudumira manungo ace, mbaakwata mbaenda na iwo kunja, kaaikhisa. Pakumala midzidzi mitatu, nkazace Ananiya apitambo, mbakhonda kupidziwa pikhadacitika. Penepo Pedhru am'bvundza tenepa: “Ndipange. Imwe mwagulisa na ntengo unowu munda wanu?” Nkazi atawira kuti: “Ande, ndi unowu.” Mphapo Pedhru ampanga tenepa: “Ndi thangwi yanji imwe mwabverana kulesera Nzimu wa Mbuya? Lang'ana pa nsuwo aphale adaikhisa manungo a mamuna wako, iwo anakukwatambo cincino.” Pa n'dzidzi ubodzi ene iye agwa pa myendo ya Pedhru mbafa. Mudapita aphale an'gumana afa, mbankwata mbaenda kamuikhisa dhuzi na mamuna wace. Abale a gereja, na anthu onsene mudabva iwo penepi, agopa pikulu kakamwe. Apoxtolo a Yezu akhacita pirengo pizinji, na pinango pyakudzumisa pakati pa mbumba. Onsene adatawira akhali na nsambo wakugumanyikana pabodzi pene n'khonde mwa Salomau. Kuna anango adasala, nkhabe m'bodzi akhali na cipapu ca kwenda kagumanyikana pabodzi na iwo. Mbwenye mbumba yonsene ikhaasimba. Mwinji wa anthu anyakutawira Yezu ukhainjiperatu, amuna na akazi akhatawira Mbuya. Anthu azinji akhafikira kukwata atenda awo pa khangala peno pa mpfumba mbaenda kaaikha m'miseu, toera Pedhru angapita na penepo, panango n'thundzi wace ufike kuna atenda. Mwinji wa anthu, ukhabwera buluka m'mizinda ya dhuzi na Djerusalema, mbakhadzesa atenda awo na anango akhathabuswa na mizimu ya kuipa, onsene mbakhawangiswa. Na tenepo, nkulu wa anyantsembe, pabodzi na andzace akhali a nsoka wa asadhusi, akhala na bibvu ikulu. Na thangwi eneyo, apoxtolo aphatiwa mbaikhwa n'kaidi. Mbwenye na masiku, anju wa Mbuya afungula misuwo ya kaidi, akwata apoxtolo mbabuluka na iwo kunja, mbaapanga tenepa: “Ndokoni ku Nyumba ya Mulungu, mukhapange mbumba mphangwa zonsene za upulumuki uyu.” Mangwana mwace na macibese, iwo apita mu Nyumba ya Mulungu mbatoma kupfundzisa mbumba, ninga mukhadapangirwa iwo. Mudafika nkulu wa anyantsembe, pabodzi na andzace akhamperekera, acemeresa nsoka wa anyakutonga miseru, wa akulu a mbumba ya Izarayeli. Penepo, atumiwa anthu kuti aende kakwate apoxtolo n'kaidi. Mbwenye anyakuonera, mudafika iwo ku kaidi, hadaagumana apoxtolo tayu, mbabwerera mbaenda kalonga kuti: “Taenda kweneko, tagumana misuwo ya kaidi yafungwa mwadidi mwene, anyakuonera mbali pa nsuwo. Mbwenye pidafungula ife, n'kati mukhali na munthu tayu.” Nkulu wa anyakuonera Nyumba ya Mulungu, na akulu aanyantsembe, mudabva iwo penepyo atutumuka napyo, mbakhanyerezera kuti ndi ninji pidacitika. Pa n'dzidzi ubodzi-bodzi, munthu m'bodzi afika mbalonga tenepa: “Bveserani! Amuna adaikha imwe n'kaidi, ali kupfundzisa mbumba mu Nyumba ya Mulungu.” Na tenepo, nkulu wa anyakuonera Nyumba ya Mulungu, pabodzi na anthu ace, aenda kakwata apoxtolo awa a Yezu, mbabwera na iwo. Mbwenye iwo hadaakwata na mphambvu tayu, thangwi akhagopa ponyerwa myala na mbumba. Buluka penepo, aakwata mbaenda na iwo patsogolo pa nsoka wa akulu aanyakutonga miseru. Penepo, nkulu wa anyantsembe aabvundza kuti: “Ife takupasani ntemo kuti muleke kupfundzisa na pang'ono pene na dzina eneyi. Mbwenye imwe muli kumwaza mapfundzisiro anu mu nzinda wa Djerusalema uno onsene, pontho muli kufuna kutipasa thangwi na kufa kwa munthu unowu.” Penepo Pedhru na apoxtolo andzace atawira tenepa: “Pisafunika kubvera Mulungu, kupiringana kubvera anthu! Yezu adapha imwe mbamun'khomera pa ntanda, Mulungu wa ambuya athu amulamusa pa kufa. Mbwenye Mulungu ankwiza, mbamuikha ku khundu yace ya madyo ninga N'tsogoleri na Mpulumusi, toera apase mbumba ya Izarayeli n'dzidzi wa kuchunyuka na kulekererwa kwa madawi. Ife, ndife amboni a pinthu penepi. Ife, na Nzimu Wakucena udapasa iye ale anam'bvera.” Akulu aanyakutonga miseru, mudapibva iwo penepi aipirwa pikulu kakamwe, mbakhafuna kuapha. Mbwenye nfarisi m'bodzi anacemerwa Gamaliyeli, nyakudziwisa wa Mwambo, munthu wakulemebza na mbumba yonsene, alamuka pakati pa akulu aanyakutonga miseru mbaphemba kuti apoxtolo atome buluswa panja pa n'dzidzi ung'ono basi. Buluka penepo iye aapanga tenepa: “Imwe amuna a Izarayeli, nyerezerani mwadidi pinafuna imwe kuacita amuna awa. Thangwi n'nduli umu pikhadacitika na mamuna m'bodzi anacemerwa Teudhasi, mbakhalonga kuti sinakozeka, iye agumanya amuna madzana makumanai kuti akhale andzace. Mbwenye iye aphiwa, na onsene andzace akhantowera amala mwazika, pyonsene mbapifudzika. Buluka unowu, abwera ndi Djuda wa ku Galileya pa n'dzidzi ukhalemberwa anthu, adatsogolera nsoka ubodzi ukhacita cikuti. Mbwenye iye aphiwambo, andzace onsene akhantowera mbamala kumwazika. Cincino ndinakupangani tenepa: Lekani kuacita pinthu amuna awa. Asyeni aende pyawo. Thangwi ngakhala pinanyerezera iwo peno mabasa awo abuluka kuna anthu, pinamala. Mbwenye ngakhala pisabuluka kuna Mulungu, imwe munacimwana kupifudza, thangwi mungacita tenepo munakhala ninga muli kumenyana na Mulungu!” Iwo am'bvera. Acemera apoxtolo, aakwapulisa, mbaapanga kuti aleke longabve na dzina ya Yezu, mbaasiya mbaenda. Apoxtolo abuluka pa akulu anyakutonga miseru na kukomerwa, na thangwi ya kupwaziwa na dzina ya Yezu Kirixtu. Ntsiku zonsene mu Nyumba ya Mulungu pontho nyumba na nyumba, akhaenda mbapfundzisa mbakhalonga kuti Yezu ndi Kirixtu. Pa ntsiku zenezo, nsoka wa anthu akhatowera Yezu ukhainjipiratu kakamwe. Na tenepo, madjuda akhalonga cigerego, akhadungunya okha-okha kudungunyira madjuda akhalonga ciebhereu. Thangwi akazi a dzindza ya agerego adaferwa na amuna awo, akhaduwalika pa kutambiriswa pinthu pyakudya ntsiku zonsene. Na thangwi eneyo, apoxtolo khumi na awiri a Yezu, agumanya anyakupfundza a Yezu onsene mbalonga tenepa: “Si pyadidi tayu kuti ife tisiye kumwaza fala ya Mulungu, mbatitsalakana basi kugawiza pyakudya kuna anthu. Mbwenye abale, sankhulani pakati panu amuna anomwe ananyindira imwe, akudzala na Nzimu Wakucena pontho na udziwisi, toera tiasiyire basa iyi. Mbwenye ife, tinapitiriza basi na basa yathu ya kuphembera na ya kumwaza fala ya Mulungu.” Onsene apitawira pidalonga apoxtolo. Na tenepo, asankhula Xitevau, mamuna wakudzala na cikhulupiro na Nzimu Wakucena. Asankhulambo pontho Filipi, Porokoru, Nikanori, Timoni, Parimenasi, na Nikolau munthu wa ku Antiyokiya akhadapita mu mwambo wa madjuda. Amuna awa aenda kaikhwa patsogolo pa apoxtolo, iwo mbakhaaphemberera na kuaikha manja. Na tenepo, fala ya Mulungu ikhaenda mbibalalika. Mu Djerusalema, nsoka wa anyakutowera Yezu ukhakuleratu na mwansanga, pontho anyantsembe azinji a madjuda, akhatawirambo cikhulupiro ca anyakutawira Yezu. Xitevau, mamuna wakudzala na kukoma ntima pontho na mphambvu za Mulungu, akhacita pinthu pikulu pyakudzumisa, na pirengo pakati pa mbumba. Mbwenye amuna anango a nyumba ya kuphemberera ya madjuda ikhacemerwa ya “anthu akusudzulwa mu udzakazi,” na madjuda a dziko ya Sirene na a ku Alixandiriya, pontho na a ku dziko ya Silisya na a ku Azya, atoma kuketesana na Xitevau. Mbwenye iwo akhacimwana kunkonesa Xitevau, na thangwi ya udziwisi pontho na Nzimu Wakucena ukhalonga na iye. Na tenepo, iwo adyekera amuna angasi toera alonge kuti: “Ife tamubva mamuna uyu mbakhaxola Mozesi na Mulungu ene.” Na thangwi eneyo, mathubu na anyakudziwisa a Mwambo anyengerera mbumba kuti icite cikuti. Na tenepo, apomokera Xitevau, mbankwata na mphambvu mbaenda na iye kuna nsoka wa akulu anyakutonga miseru. Penepo, abweresa anyamaso authambi mbalonga tenepa: “Mamuna uyu nkhabe puma kuxola Nyumba ya Mulungu na mwambo wa Mozesi. Ife tamubva mbakhalonga kuti Yezu wa ku Nazareti anaifudza Nyumba ya Mulungu mbacinja mitemo idatipasa Mozesi.” Na tenepo, onsene akhali nawa-nawa mu nyumba ya kutongera miseru, amulang'anisa, mbaona kuti nkhope yace ikhali ninga nkhope ya anju. Na tenepo, nkulu wa anyantsembe abvundza Xitevau kuti: “Pinalongwa ipi ndimo mwene?” Xitevau atawira tenepa: “Abale na ababa, bveserani! Mulungu wa mbiri aonekera kuna baba wathu Abharaamu pikhakhala iye ku dziko ya Mezopotamya, mbadzati kwenda kakhala ku nzinda wa Arani. Mulungu ampanga tenepa: ‘Buluka ku dziko yako, pakati pa abale ako, uyende ku dziko inafuna kudza kakupangisa Ine.’ “Na tenepo, Iye abuluka ku dziko ya Kalidheya mbaenda kakhala ku nzinda wa Arani. Pa kufa kwa baba wace, Mulungu am'bweresa Abharaamu ku dziko ino inakhala imwe lero. Mulungu akhonda kunsiyira unthaka pontho na thanyo ene ibodzi ya mataka. Mbwenye Mulungu ampikirira kuti anadza kampasa dziko yonsene ya Khanani, kuti ikhale yace na ya dzindza yace, Abharaamu mbadzati kukhala na ana. Mulungu alonga kuna Abharaamu kuti: ‘Dzindza yako inadza katamira ku dziko inango. Pontho iyo inadza kacitwa udzakazi, mbiyoneswa nyatwa pa pyaka madzana manai. Mbwenye Ine ndinati ndiithabuse dziko eneyi inafuna kuacita udzakazi. Angamala, anabuluka kweneko mbadza kandilambira pa mbuto ino.’ Mulungu acita cibverano na Abharaamu, ca kusidza. Na thangwi eneyo, pakupita ntsiku zisere Izaki mbadamala kubalwa, Abharaamu ansidza. Izaki asidzambo Djakobo, iyembo acitambo sawa-sawa kuna anace khumi na awiri, makholo a madzindza. “Iwo akhali na bibvu na m'bale wawo Zuze, mban'gulisa ninga n'dzakazi ku dziko ya Idjipitu. Mbwenye Mulungu akhali na iye, mbampulumusa pa nyatwa zace zonsene, am'bvera ntsisi, mbampasa udziwisi patsogolo pa Farau, mambo wa ku Idjipitu. Iye Farau mbansankhula kuti akhale ntongi wa dziko ya Idjipitu, na nyumba yace yonsene. “Buluka penepo mwaoneka njala idadzesa nyatwa ikulu mu Idjipitu na ku Khanani, ambuya athu mbasowa na cakudya cene. Mbwenye mudabva Djakobo kuti mu Idjipitu muna phoso, pa ulendo wakutoma, atuma ambuya athu mbaenda kweneku. Pa ulendo wawo waciwiri, Zuze apangizika kuna abale ace toera an'dzindikire. Na tenepo, Farau adza kaadziwambo abale a Zuze. Buluka penepo, Zuze acemeresa Djakobo, baba wace, na dzindza yace yonsene toera aende ku Idjipitu. Onsene akhali anthu makumanomwe na axanu. Na tenepo, Djakobo aenda ku Idjipitu. Kweneku ndiko kudafa iye na ambuya athu ene. Manungo awo akwatwa mbaenda ku Sikee, mbaaikha n'nthumbi ikhadagula Abharaamu na kobiri zingasi kuna ana a Amori, ku Sikee. “Mukhakwana n'dzidzi wa kuti Mulungu acite pikhadapikirira Iye Abharaamu, mbumba yadza kakula mbinjipiratu mu Idjipitu. Na tenepo, mambo unango akhakhonda dziwa Zuze, atoma kutonga dziko ya Idjipitu. Mambo unowu, na ucenjeri wace wa kuipa, akhazonda mbumba yathu mbakhathabusa ambuya athu, mbakhaapanga na kuakakamiza kusiya akhombwani awo, kuti afe. “Pa n'dzidzi unowu abalwa Mozesi, mwana wakubalika kakamwe pamaso pa Mulungu. Iye abiswa myezi mitatu n'nyumba, mbakhalerwa na ababa ace. Mbwenye mudadza kasiyiwa iye, mwana wace Farau wankazi, amulokota mbanfuya ninga mwana wace wa kubala. Na tenepo, Mozesi apfundziswa udziwisi onsene wa mu Idjipitu, mbakhala munthu wa mphambvu pa kulonga na pa kucita pinthu. “Mukhafungisa Mozesi pyaka makumanai pyakubalwa, anyerezera kuti aende kaona abale ace, ana a Izarayeli. Kweneko, mudaona iye ndzawo m'bodzi mbakhathabuswa na mamuna wa ku Idjipitu, aenda kam'bvunulira mbapha mamuna wa ku Idjipitu. Mozesi akhanyerezera kuti abale ace anadzindikira kuti iye ndi dombo adatuma Mulungu, toera aaombole. Mbwenye iwo acimwana kupidziwa penepi. Mangwana mwace, Mozesi akhaenda kuna ana a Izarayeli awiri akhamenyana. Iye akhasaka kuabvunulira kuti asekesane, mbaapanga tenepa: ‘Amunamwe, imwe ndi ubale wanu. Thangwi yanji musamenyana?’ “Mbwenye ule akhamenya ndzace abhoma Mozesi kule, mbampanga tenepa: ‘Ndi ani adakuikha ninga n'tsogoleri, pontho ninga ntongi wa miseru yathu? Iwe usafuna kundipha ninga pidacita iwe mamuna wa ku Idjipitu dzulo?’ Mozesi mudabva iye penepi, athawa mu Idjipitu mbaenda kakhala ninga nthami mu dziko ya Midhiyani. Kweneko abala anace awiri amuna. “Pakupita pyaka makumanai, anju m'bodzi aonekera kuna Mozesi n'thando, pakati pa malirimi a moto ukhagaka pa thundudzi dhuzi na phiri ya Sinai. Mozesi adzumatirwa na pikhaona iye, afendedzera dhuzi toera apyonese mwadidi. Penepo abva fala ya Mulungu mbikhalonga tenepa: ‘ Ine ndine Mulungu wa ambuyako, Mulungu wa Abharaamu, wa Izaki na wa Djakobo.’ Mozesi akhatetemera na kugopa, mbacimwana na kulang'ana kwene. “ Na tenepo, Mbuya ampanga kuti: ‘Bulusa ntsapato m'myendo mwako, thangwi mbuto ino ina iwe ndi mbuto yakucena. Ndimo mwene, Ine ndaona kuthabuswa kunacitwa mbumba yanga mu Idjipitu. Ndisabva kubulira kwawo, na tenepo ndachita toera ndiapulumuse. Cincino bwera kuno, thangwi ndisafuna kukutuma uyende ku Idjipitu.’ “Mozesi unowu ndiye akhadakhondiwa na iwo, mbalonga tenepa: ‘Ndi ani adakuikha ninga n'tsogoleri, pontho ninga ntongi wa miseru yathu?’ Iye atumwa na Mulungu toera akhale n'tsogoleri na muomboli wawo, na mphambvu za anju akhadam'bulukira pa thundudzi. Ndiye adaabulusa ku Idjipitu, mbacita pinthu pya kudzumisa na pirengo mu Idjipitu, m'Bara ya Kufuira na n'thando, pa pyaka makumanai. “ Ndiye Mozesi m'bodzi ene adapanga ana a Izarayeli kuti: ‘Pakati pa abale anu, Mulungu anakusankhulirani mporofeta m'bodzi ninga ine.’ Ndiye Mozesi akhali pabodzi na mbumba n'thando, na anju akhalonga na iye pa phiri ya Sinai, pontho na ambuya athu, mbatambira mafala a upulumuki toera aapangembo ife. “Mbwenye ambuya athu akhonda kum'bvera. Mban'khonda mbakhanyerezera m'mitima mwawo kubwerera ku Idjipitu, mbalonga tenepa kuna Arau: ‘Ticitire alungu toera atitsogolere. Thangwi ife nkhabe kupidziwa pidacitika na Mozesi, adatibulusa ku dziko ya Idjipitu!’ Pa ntsiku zenezo, iwo acita dzimunthu ya mwana buru, mbaikhira ntsembe. Buluka penepo acita phwandu ya kulambira dzimunthu ikhadacita iwo na manja awo. Mbwenye Mulungu athauka mbaasiya kuti alambire pyawo nyenyezi za kudzulu, ninga mukhadalemberwa ipyo m'bukhu ya maporofeta kuti: “ ‘Imwe mbumba ya Izarayeli! Pinyama pikhapha imwe mbamucita ntsembe pa pyaka makumanai pidamala imwe n'thando, mukhacitira Ine? Pontho mwathuka khumbi ya Moloki, na nyenyezi ya mulungu wace Refani, madzimunthu adacita imwe toera kualambira! Na thangwi eneyo, ndinadza kakusiyani mbamutamira kunja kwa Bhabhilonya.’ ” “N'thando, ambuya athu akhali na khumbi ya ntsembe ya Mulungu ikhalonga umboni, ikhadacitwa ninga mukhadapangwa Mozesi na Mulungu, kuti aicite sawa-sawa ninga mukhadapangizwa iye. Ambuya athu, pabodzi na Djosuwa, aitambira Nyumba ya Ntsembe mbaikwata, pa n'dzidzi udatapata iwo dziko ya madzindza adathamangisa Mulungu patsogolo pawo. Nyumba ya Ntsembe eneyi yakhala pa dziko eneyo, mpaka pa midzidzi ya Dhavidhi. Dhavidhi agumana kukoma ntima kwa Mulungu, mbam'phemba kuti ansiye amange Nyumba ya Mulungu wa Djakobo. Mbwenye ndi Salomau adadza kamanga nyumba eneyi. “Mphapo Mulungu wa kudzulu kakamwe, nkhabe khala n'nyumba ya kumangwa na anthu. Ninga mudalonga mporofeta kuti: “Mulungu alonga tenepa: ‘Kudzulu ndi mpando wanga wa umambo. Pantsi pano ndi mbuto ya kupondera myendo yanga. Ndi khaindi yanji ya nyumba inafuna kundimangira imwe? Peno ndi mbuto ipi inafuna Ine kupumira? Kodi si manja anga awa tayu adacita pinthu pyonsene ipi?’ “Imwe mbumba ya upoka, ya kuuma mitima na yakukhonda kubva! Imwe mwalandana na ambuya anu. Muli ciriri basi na kupokanya Nzimu Wakucena! Mbani mporofeta adakhonda kuchingwa na ambuya anu? Iwo apha ale akhadza mbalonga na thangwi ya kudza kwa Nyakulungama, Unowu adasandukira imwe mbamum'pha. Imwe mudatambira mwambo wa Mulungu na maanju, mbwenye mwacimwana kuukoya.” Iwo na kubva penepi aipirwa, mbaluma mano lumira Xitevau. Mbwenye Xitevau, na kudzabza na Nzimu Wakucena, alang'ana kudzulu mbaona mbiri ya Mulungu, pontho aona Yezu ali dzololo ku khundu ya nkono wa madyo wa Mulungu. Penepo iye alonga tenepa: “Ine ndisaona kudzulu kwafunguka. Mwana wa Munthu ali dzololo ku khundu ya madyo ya Mulungu!” Mbwenye iwo afunga makutu mbakhakhuwa, onsene pabodzi pene mbanumphira Xitevau. Buluka penepo ankwekweta mbaenda na iye kunja kwa nzinda, mbatoma kum'menya na myala. Anyamaso asiya nguwo zawo pa myendo pa m'phale m'bodzi anacemerwa Saulo. Mukhamenyiwa iye na myala, Xitevau akhaphembera mbalonga tenepa: “Mbuya Yezu, tambirani nzimu wanga!” Na tenepo, agodama mbakhuwa na mphambvu kuti: “Mbuya! Lekani kuapasa thangwi ya kudawa kwawo uku!” Pidamala iye kulonga penepi, agona muna Mbuya. Saulo akhali penepo mbatawirirambo kuphiwa kwa Xitevau. Pa ntsiku zenezo, abale a gereja ya ku Djerusalema atoma kuchingwa pikulu kakamwe. Onsene amala balalika m'pisa pya Djudeya na pya ku Samariya, mbasala apoxtolo basi. Amuna anango anyakulemedza Mulungu aenda kamuikha Xitevau, mbamulira pikulu kakamwe. Mbwenye Saulo akhafuna kuti amwaze abale a gereja. Akhaenda nyumba na nyumba, mbakhakwekweta amuna na akazi, mbaenda kaaponya n'kaidi. Ale akhadamala balalika, akhaenda mbamwaza fala ya Mulungu monsene mukhaenda iwo. Filipi mudaenda iye ku nzinda wa Samariya, atoma kulonga na thangwi ya Kirixtu kuna anthu a kweneko. Mwinji wa anthu mudabva iwo na kuona pirengo pikhacita Filipi, onsene atoma kum'bvesera pikhalonga iye. Mizimu ya kuipa ikhabuluka muna anthu azinji mbikhakhuwa, pontho anyakulamala na anyampfutete akhawangiswa. Na tenepo, mwaoneka kutsandzaya kukulu mu nzinda unowu. Mwenemu mukhakhala mamuna m'bodzi akhacemerwa Simau, akhacita masalapita ace. Amala ntsiku zizinji mbakhanyengeza napyo anthu a ku Samariya, mbakhalonga kuti ndi munthu wa mbiri ikulu kakamwe. Mbumba yonsene, mwana na nkulu akham'bvesera mwadidi mwene, mbakhalonga kuti: “Mamuna uyu ndi mphambvu ya Mulungu, inadziwika na dzina ya Mphambvu Ikulu.” Iwo akhantowera, thangwi amala ntsiku zizinji mbakhanyengezwa na masalapita ace. Mbwenye mudatoma Filipi kuapanga Mphangwa Zadidi za Umambo wa Mulungu na za dzina ya Yezu Kirixtu, iwo antawira mbatambira batixmu amuna na akazi. Na iye ene Simau atawirambo, mbatambira batixmu. Pontho akhaenda mbatowerera Filipi mbuto zonsene, mbakhadzumatirwa na kuona pidzindikiro na pirengo pikulu pikhacita Filipi. Apoxtolo ku Djerusalema na kubva kuti mbumba ya ku Samariya ikhadatawira fala ya Mulungu, atuma Pedhru na Juwau mbaenda kweneko. Pedhru na Juwau mudafika iwo kweneko, aphembera toera anthu a ku Samariya atambire Nzimu Wakucena. Thangwi anthu a ku samariya akhadamala tambira batixmu na dzina ya Mbuya Yezu basi, mbwenye nkhabe m'bodzi wawo akhadatambira Nzimu Wakucena. Na tenepo, Pedhru na Juwau aaikha manja anthu ale, mbatambira Nzimu Wakucena. Simau, na kuona kuti anthu akhatambira Nzimu Wakucena na kuikhwa manja na apoxtolo, aapasa kobiri, mbaampanga tenepa: “Ndipasenimbo mphambvu eneyi, toera munthu anaikha ine manja, atambirembo Nzimu Wakucena.” Mbwenye Pedhru antawira tenepa: “Na thangwi ya kunyerezera kuti unakwanisa kugula muwoni wa Mulungu na kobiri, iwe na kobiri zako zene, ndoko kafe. Iwe nkhabe tawirirwa, pontho nkhabe lengeswa pa nsoka wa basa yathu, thangwi ntima wako si wakulungama tayu patsogolo pa Mulungu. Chunyuka macitiro ako a kuipa uphembere kuna Mbuya. Panango anakulekerera manyerezero a kuipa ali muntima mwako. Thangwi ndaona kuti iwe wadzala na bibvu, pontho uli n'kati mwa kudawa.” Penepo Simau atawira tenepa: “Ndiphemberereni ndimwe kuna Mbuya, toera pikhonde kundicitikira pyonsene pidamala imwe kulonga.” Pidamala iwo kulonga umboni na kumwaza fala ya Mbuya, Pedhru na Juwau abwerera ku Djerusalema, mbakhaenda na mwaza Mphangwa Zadidi, m'pisa pizinji pya ku Samariya. Anju m'bodzi wa Mbuya alonga tenepa kuna Filipi: “Lamuka uyende khundu ya bangwe, na njira ya kale inachitira ku Djerusalema mpaka ku nzinda wa Gaza.” Filipi alamuka mbaenda. N'njira, iye agumana mamuna m'bodzi wa dziko ya Ityopya, nyabasa wa mbiri, akhaonerera mpfuma zonsene za Khandasi, mambo wankazi wa ku Ityopya. Mamuna unowu, akhadaenda ku Djerusalema kalambira Mulungu. Pa kubwerera kwenda ku nyumba, akhaona pidalembwa m'bukhu ya mporofeta Izaya, mbali nawa mu ngolo mwace. Na tenepo, Nzimu Wakucena wapanga Filipi kuti: “Fendedzera dhuzi ngolo iyi, uitowerere.” Filipi athamanga mbaenda dhuzi na ngolo, mbabva mamuna mbakhalonga pikhaona iye m'bukhu ya mporofeta Izaya. Penepo iye am'bvundza tenepa: “Musapibvesa mwadidi pinaona imwe m'bukhu?” Iye antawira tenepa: “Ndinapibvesa tani? Ine nkhabe munthu wa kundilondezera.” Penepo aphemba Filipi kuti apakire mu ngolo mwace toera akhale na iye pabodzi. Mafala akhaona iye m'Bukhu ya Mulungu, akhalonga tenepa: “Iye akwatiwa ninga bira ya kwenda kaphiwa, pontho ninga mwana bira wakukhonda lira pa kupaliwa uweya, mbakhonda kufungula mulomo wace. Iye apwaziwa mbakhonda kutongwa mwakulungama. Mbani anafuna kulonga pya dzindza yace? Thangwi moyo wace wakwatiwa pa dziko ino.” Nyabasa wa mambo wankazi abvundza Filipi kuti: “Ndaphata myendo, ndipangeni: Kodi mporofeta asalonga ani? Asalongera iye ene, peno asalongera unango?” Na tenepo, na mafala ale akhaona iye m'Bukhu ya Mulungu, Filipi atoma kumpanga Mphangwa Zadidi za Yezu. Mukhaenda iwo ulendo wawo, afika pa mbuto inango ikhali na madzi. Penepo nyabasa wa mambo wankazi alonga tenepa: “Lang'anani, pano pana madzi. Ndi ninji cinafuna kundipingiza kutambiriswa batixmu?” [Filipi ampanga tenepa: “Ungatawira na ntima wako onsene, nkhabe cibodzi cinafuna kukupingiza.” Iye atawira tenepa: “Ine ndisatawira kuti Yezu Kirixtu ndi Mwana wa Mulungu. ”] Penepo nyabasa wa mambo wankazi alimisisa ngolo yace. Na tenepo, mu uwiri mwawo agwera m'madzi, Filipi mbantambirisa batixmu. Mudabuluka iwo m'madzi, Nzimu Wakucena wakwata Filipi, Filipi mbakhonda kuoneka na nyabasa. Mbwenye nyabasa aenda ulendo wace na kutsandzaya. Mbwenye Filipi aenda kabulukira ku nzinda wa Azotu, mbakhaenda na mwaza Mphangwa Zadidi m'mizinda yonsene, mpaka fika ku nzinda wa Sezareya. Saulo akhatekereratu kakamwe na kuipirwa kuti aphe ale akhatowerera Yezu. Iye aenda kalonga na nkulu wa anyantsembe, mbam'phemba matsamba toera aenda m'manyumba a kuphemberera a madjuda a ku Dhamaxku, kuti aphate amuna na akazi akhatowera Njira ya Mbuya, akhafuna iye kugumana mwenemu, aakwate aende na iwo ku Djerusalema. Pa ulendo wace, mudafika iye dhuzi na nzinda wa Dhamaxku, na mwansanga cieza ca kudzulu cagaka n'khundu mwace. Iye agwa pantsi, mbabva fala ikhalonga tenepa: “Saulo, Saulo, thangwi yanji usandifambira n'nduli?” Saulo abvundza tenepa: “Ndimwe ani, Mbuya?” Iye antawira tenepa: “Ine ndine Yezu, ule anafambira iwe n'nduli. Lamuka, upite mu nzinda, mwenemu unapangwa pinatongwa iwe kucita.” Amuna akhaenda na Saulo, alimira mbacimwana kulonga. Iwo fala aibva, mbwenye munthu wace adamuona tayu. Saulo alamuka pantsi, afungula maso, mbwenye acimwana kuona cinthu. Penepo iwo amphata nsenzi mbaenda na iye ku Dhamaxku. Iye amala ntsiku zitatu mbali boli-boli. Pa ntsiku zenezo, hadadya cinthu pontho hadamwa cinthu tayu. Ku Dhamaxku, kukakhala nyakupfundza wa Yezu m'bodzi, dzina yace ndi Ananiya. Mbuya ancemera mu Nzimu mbampanga kuti: “Ananiya!” Iye atawira tenepa: “Ndiri pano Mbuya.” Mbuya ampanga tenepa: “Lamuka uyende mpaka ku nyumba kwa Djuda, ku nseu unacemerwa Wakulungama, ubvundzise mamuna m'bodzi wa ku Tarisu, anacemerwa Saulo. Iye ali kuphembera. Saulo, aoneswa na Nzimu Wakucena mamuna m'bodzi anacemerwa Ananiya, mbakhapita mwenemu, mbamuikha manja toera akwanise kuona pontho.” Ananiya atawira tenepa: “Mbuya, ndisabva na anthu azinji pa thangwi ya mamuna unowu, pontho na uipi onsene unacita iye ku Djerusalema, kuna mbumba yanu. Iye afika kuno na kutawiriswa kudacita iye na akulu aanyantsembe, toera amange ale onsene anacemera dzina yanu.” Mbwenye Mbuya alonga kuna Ananiya kuti: “Ndoko. Thangwi mamuna uyu ndi combo canga cidasankhula Ine kuti akwate dzina yanga aende nayo kuna ale adakhonda kukhala madjuda, kuna amambo, na kuna mbumba ya Izarayeli. Ine ndinadza kampangisa nyatwa zikulu zinatongwa kuona iye na dzina yanga.” Na tenepo, Ananiya aenda, apita n'nyumba, ansandzika manja ace, mbampanga tenepa: “Saulo m'bale wanga, Mbuya Yezu adakubulukira n'njira mukhabwera iwe, andituma toera maso ako aone pontho, mbudzazwa na Nzimu Wakucena.” Pa n'dzidzi ubodzi ene, m'maso mwa Saulo, mwagwa pinthu pyakulandana ninga makoko a nyama za m'madzi, iye alamuka, mbatambiriswa batixmu. Pidamala iye kudya, awanga mphambvu. Saulo amala ntsiku pang'ono na anyakupfundza a Yezu ku Dhamaxku. Penepo pene, atoma kumwaza Mphangwa za Yezu m'manyumba a kuphemberera a madjuda, kuti Iye ndi Mwana wa Mulungu. Onsene akhamubva akhadzumatirwa mbabvundza kuti: “Siye mamuna unowu tayu akhasaka kufudza ale akhacemera dzina eneyi mu Djerusalema? Si penepi tayu pidadzera iye kuno, kuti aamange toera aakwate aende na iwo kuna akulu aanyantsembe?” Mbwenye Saulo akhalongeratu na mphambvu, mbakhakunda madjuda akhakhala ku Dhamaxku, na kuapangisa kuti Yezu ndi Kirixtu. Pakupita ntsiku zizinji, madjuda abverana kuti amuphe. Mbwenye Saulo apipangwa penepi. Masiku na masikati, iwo akhaonerera misuwo ya nzinda, toera amuphe. Mbwenye anyakupfundza ace ankwata na masiku mbamuikha n'citundu, mbanchitisa na pa benga ya mpanda wa nzinda. Pidafika Saulo ku Djerusalema, akhasaka kuti agumanyikane na anyakupfundza a Yezu, mbwenye onsene akhan'gopa, mbakhakhonda kutawira kuti iye ndi nyakupfundzambo wa Yezu. Na tenepo, Bharnabhasi ankwata mbaenda na iye kuna apoxtolo, mbaapanga kuona kudacita Saulo Mbuya n'njira mbalonga na iye, pontho na cipapu cidacita iye ku Dhamaxku cakumwaza mphangwa na dzina ya Yezu. Tenepa, Saulo akhala na iwo pabodzi, pontho akhapita mbakhabuluka mu nzinda wa Djerusalema, mbakhamwaza mphangwa na cipapu consene, na dzina ya Mbuya. Pontho iye akhalonga mbaketesana na madjuda akhalonga cigerego, mbwenye iwo akhasaka njira ya kumupha nayo. Abale anyakutawira Yezu, mudapibva iwo penepyo, ankwata Saulo mbaenda na iye ku nzinda wa Sezareya. Buluka kweneko mbamuendesa ku nzinda wa Tarisu. Abale a gereja yonsene ya ku Djudeya, ya ku Galileya, na ya ku Samariya, akhakhala mu ntendere. Iwo akhakula mbakhafamba na kugopa Mbuya, pontho mbakhaphebza na Nzimu Wakucena, nsoka wawo mbukhainjipa. Pedhru akhafamba konsene kwene. Ntsiku inango aenda kaonambo mbumba ya Mulungu ya ku cisa ca Lidha. Kweneko agumana mamuna m'bodzi anacemerwa Eneya. Mamuna unowu amala pyaka pisere mbali pa bonde, thangwi akhali nyampfutete. Penepo Pedhru ampanga kuti: “Eneya, Yezu Kirixtu anakuwangisa. Lamuka ufunye bonde yako.” Penepo pene, Eneya alamuka. Na tenepo, anthu onsene akhakhala ku Lidha na ku Saroni amuona, mbazungunukira kuna Mbuya. Ku nzinda wa Djopi kukhali na nkazi m'bodzi nyakutowera Yezu, akhacemerwa Tabhita. (Dzina eneyi ncigerego ndi Dhorika.) Nkazi uyu akhacita udidi mbakhaphedza anyakucherenga na pinthu pyace. Pa ntsiku zenezo, Dhorika aphatwa na utenda mbafa. Pakumala sambiswa, manungo ace akwatiwa mbaikhiwa n'nyumba ya n'dzulu. Lidha ndi nzinda ukhakhala dhuzi na Djopi. Anyakupfundza a Yezu, pidabva iwo kuti Pedhru ali ku nzinda wa Lidha, atuma amuna awiri kuti aende kampange abwere na mwansanga adze kaonane na iwo. Na tenepo, Pedhru alamuka mbaenda na iwo pabodzi. Mudafika iye kweneko, akwira na iwo pabodzi n'nyumba ya n'dzulu. Akazi onsene adaferwa na amuna awo anzungulira mbakhalira, uku mbakhampangisa pyakubvala na nguwo zinango zikhaasonera Dhorika mbali m'maso. Penepo, Pedhru abulusa anthu onsene akhali n'nyumba. Pidamala iye agodama mbaphembera. Buluka penepo azungunuka kuna manungo a nkazi wa kufa mbalonga tenepa: “Tabhita, lamuka!” Penepo iye afungula maso. Na kuona Pedhru, Tabhita akhala pantsi. Pedhru amphata pa nkono, mbamulimisa. Buluka penepo, acemera mbumba ya Mulungu yonsene, pabodzi na akazi adaferwa na amuna awo, mbaapangisa Tabhita wa m'maso. Mphangwa izi zamwazika mu nzinda onsene wa Djopi, anthu azinji mbatawira Mbuya. Pedhru akhala kweneko ntsiku zizinji ku nyumba kwa mamuna m'bodzi anacemerwa Simau, nyakufukuta nthembe. Ku nzinda wa Sezareya, kukhali na mamuna m'bodzi akhacemerwa Korenelyu, akhali nkulu wa anyankhondo a nsoka wa ku Roma, ukhali na dzina ya “Italya.” Iye na mudzi wace onsene, akhali anthu akuphembera na akugopa Mulungu. Pontho kazinji kene akhaphedza na pinthu pyace mbumba yakucherenga, mbakhaphembera Mulungu midzidzi yonsene. Ntsiku inango, dhuzi na n'dzidzi utatu wa kumaulo, Koronelyu apangizwa mwadidi mwene mu Nzimu, anju wa Mulungu mbakhadza kuna iye mbampanga kuti: “Korenelyu!” Korenelyu amulang'ana anju na kugopa, mbam'bvundza tenepa: “Ninji Mbuya?” Anju antawira tenepa: “Maphembero ako, na kuphedza kunacita iwe anyakucherenga, pyafika pamaso pa Mulungu. Iye nkhabe kukuduwala. Cincino tuma amuna angasi aende ku nzinda wa Djopi, akhakwate mamuna m'bodzi anacemerwa Simau, anadziwika na dzina ya Pedhru. Iye afikira pa nyumba ya Simau nyakufukuta nthembe, anakhala dhuzi na bara.” Mudabuluka anju ikhampanga, Koronelyu acemera anyabasa awiri na nyankhondo m'bodzi wakuphembera, ule akhamphatira basa. Penepo, Korenelyu aapanga pyonsene pidancitikira, pidamala iye mbaatuma kwenda ku Djopi. Mangwana mwace, pa n'dzidzi khumi na uwiri wa masikati, mukhaenda iwo mbafamba na njira, dhuzi na kufika pa nzinda wa Djopi, Pedhru akwira n'nyumba ya n'dzulu toera kuphembera. Na njala ikhakhala na iye, akhafuna kudya. Mukhamphikira iwo cakudya, Pedhru aphatwa na Nzimu Wakucena. Aona thambo yafunguka, pontho na combo cakulandana na nguwo ikulu idamangwa nkhomu zace zinai mbicikhachita pantsi. N'kati mwa nguwo eneyi, mukhali na ntundu onsene wa pinyama pya myendo minai, pinango pya kufamba na mimba, na mbalame za kudzulu. Na tenepo, Pedhru abva fala ikhalonga kuti: “Lamuka Pedhru! Pha udye!” Mbwenye Pedhru atawira kuti: “Nkhabe citika Mbuya! Ine cipo ndidzati kudya cinthu cakukhonda kuceneswa na Mwambo, peno cakunyanyasa!” Mphapo fala yabveka pontho kaciwiri mbilonga tenepa: “Leka kulonga kuti ndi pyakukhonda kuceneswa na mwambo, pire pidaceneswa na Mulungu.” Penepi pyacitika katatu. Buluka penepo, nguwo ire yakwira pontho kudzulu. Pa n'dzidzi ukhabvundzika Pedhru ekha ene kuti pisalongeranji pidaoneswa iye mu Nzimu, amuna adatumwa na Korenelyu akhadafika pa nsuwo mbakhadza mbabvundzisa nyumba ya Simau. Iwo acemera m'bodzi wa mwenemu, mbam'bvundzisa kuti: “Kodi afikira pano mamuna anacemerwa Simau, anadziwika na dzina ya Pedhru?” Pedhru mukhanyerezera iye kuti pisalonganji pidaoneswa iye mu Nzimu, Nzimu Wakucena wampanga tenepa: “Lang'ana Pedhru, alipo amuna atatu asakusaka. Lamuka, chita uyende na iwo. Leka penula, thangwi ndine adaatuma.” Penepo, Pedhru achita mbaapanga amuna kuti: “Munthu anasaka imwe ndine. Mwadzeranji?” Iwo atawira tenepa: “Adatituma ndi nkulu wa anyankhondo anacemerwa Korenelyu. Iye ndi munthu wakulungama. Asagopa Mulungu, mbalemebza pikulu kakamwe na mbumba yonsene ya madjuda. Anju m'bodzi wa Mulungu ampanga kuti acemerese imwe mwende mpaka ku nyumba kwace, toera abve pinafuna imwe kulonga.” Penepo, Pedhru aatambira mbaapitisa n'nyumba. Mangwana mwace, Pedhru alamuka mbaenda na iwo, mbaperekerwa na abale anango a ku Djopi. Nkucauno mwace, afika ku nzinda wa Sezareya. Korenelyu na abale ace, na axamwali ace a pa ntima akhadacemera iye, akhaadikhira. Mukhapita Pedhru n'nyumba, Korenelyu abwera kantambira mbagodama patsogolo pace, mbamulambira. Mbwenye Pedhru amulamusa mbampanga kuti: “Lamuka, thangwi ine ndine munthu ninga iwembo.” Mukhaceza iye na Korenelyu, Pedhru apita n'nyumba mbagumana mwinji wa anthu wagumanyikana mwenemu. Penepo, Pedhru aapanga onsene kuti: “Imwe musadziwa mwadidi mwene kuti mwambo wathu nkhabe tawirira kuti n'djuda aphatane uxamwali na munthu adakhonda kukhala n'djuda, peno kwenda kamuona ku nyumba kwace. Mbwenye Mulungu andipangisa kuti leka longa kuna munthu kuti hudaceneswa pa mwambo, peno waswipa pa mwambo. Na thangwi eneyo, pidandicemera imwe, ndabwera na ntima wanga onsene. Cincino ndisafuna ndidziwe thangwi yanji mwandicemeresa?” Korenelyu atawira tenepa: “Kwapita ntsiku zitatu na ya lero ndi ya cinai, ine ndikhaphembera n'nyumba mwanga muno, pa n'dzidzi utatu wa kumaulo. Na mwansanga, mamuna m'bodzi akhadabvala nguwo zakucena, alimira patsogolo panga, mbalonga kuti: ‘Korenelyu, Mulungu abva maphembero ako, pontho mbakumbuka pinthu pyako pidapasa iwe anyakucherenga. Tuma munthu m'bodzi aende ku Djopi, kacemera Simau anadziwika na dzina ya Pedhru. Iye afikira pa nyumba ya Simau nyakufukuta nthembe, anakhala dhuzi na bara.’ Na thangwi eneyo, ndakucemeresani na mwansanga. Mwacita mwadidi pidabwera imwe. Cincino tagumanyikana tonsene muno patsogolo pana Mulungu, toera tibve pyonsene pidapangwa imwe na Mbuya.” Na tenepo, Pedhru atoma kulonga tenepa: “Cincino ndisadziwadi kuti Mulungu nkhabe tsankhulo. Mbwenye pa madziko onsene a pantsi, Mulungu asatawira onsene ale anan'gopa, na anacita pinthu pyakulungama. Imwe musazidziwa mphangwa zidatumiza Mulungu kuna mbumba ya Izarayeli, zinalonga na thangwi ya Mphangwa Zadidi za ntendere zidadza na Yezu Kirixtu. Unowu ndi Mbuya wa onsene. Pontho pakumala kumwazwa mphangwa za batixmu na Juwau, imwe musapidziwa pidacitika n'dziko yonsene ya Djudeya, kutomera ku Galileya. Kudzodza kudacita Mulungu, kuna Yezu wa ku Nazareti na Nzimu Wakucena, pontho na mphambvu za utongi, na kufamba kudacita Iye makhundu onsene, mbakhacita udidi na kuwangisa ale onsene akhathabuswa na Sathani, thangwi Mulungu akhali na Iye. “Ife ndife amboni a pyonsene pidacita Iye n'dziko ya madjuda na mu Djerusalema mwene. Penepo iwo am'pha mban'khomera pa ntanda. Mbwenye Mulungu, pa kupita ntsiku zitatu, amulamusa pa kufa mbacita kuti Iye aoniwe. Iye hadaonana na mbumba yonsene tayu, mbwenye aonana na ife, amboni akhadasankhula Mulungu kale ene. Ife tadya na Iye mbatimwa na Iye, mudamala Iye kulamuswa na Mulungu pa kufa. Iye atituma toera tikhamwaze Mphangwa Zadidi kuna mbumba, mbaticita umboni kuti Yezu unowu, ndiye adaikhwa na Mulungu ninga ntongi wa miseru ya anthu ali m'maso na akufa. Yezu unowu, ndiye adalongwa na maporofeta onsene kuti ale onsene anantawira, analekererwa madawi awo na dzina yace.” Mukhalonga Pedhru mafala enewa, Nzimu Wakucena wachita kuna anthu onsene akhabva fala. Madjuda akhadatawira Yezu, ale adabwera pabodzi na Pedhru, adzumatirwa napyo na kuona muwoni wa Nzimu Wakucena ukhapaswambo anthu akukhonda kukhala madjuda. Thangwi iwo akhaabva mbakhalonga na malongero anango, mbakhapasa mbiri na kukuza Mulungu. Penepo Pedhru alonga kuti: “Anthu awa atambira Nzimu Wakucena ninga mudautambira ifembo. Kodi alipo m'bodzi pano anakwanisa kukhondesa madzi, mbapingiza kuti awa akhonde kutambira batixmu?” Na tenepo, Pedhru aapanga kuti atambire batixmu na dzina ya Yezu Kirixtu. Pakumala, iwo aphemba kuna Pedhru kuti athimize kukhala ntsiku zingasi pabodzi na iwo. Apoxtolo a Yezu, na abale a ku Djudeya konsene, abva kuti anthu akukhonda kukhala madjuda atambirambo fala ya Mulungu. Na tenepo, mudabwerera Pedhru kwenda ku Djerusalema, ale akhali ku khundu ya anyakusibza, akhansandika mbalonga kuti: “Iwe wapita n'nyumba za amuna akukhonda sibza, pontho mbudya na iwo pabodzi!” Penepo, Pedhru atoma kuapanga pyonsene cibodzi na cibodzi, ninga mudacitikira ipyo, mbalonga kuti: “Ine ndikhali ku nzinda wa Djopi mbandikhaphembera. Kweneko ndaphatwa na Nzimu Wakucena, mbindioneswa mu Nzimu, cinthu cakulandana na nguwo ikulu ikhadamangwa nkhomu zace zinai, mbikhachita buluka kudzulu mbifika dhuzi na ine. Ine ndalang'anisa n'kati mwayo, mbandiona pinyama pya padziko pya myendo minai, pinyama pya n'tsanga, pinyama pya kufamba na mimba, na mbalame za kudzulu. “Penepo ndabva fala ikhalonga kuti: ‘Pedhru, lamuka! Pha udye.’ “Mbwenye ine ndatawira tenepa: ‘Nkhabe citika Mbuya! Ine cipo ndidzati kudya cinthu cakukhondeswa na mwambo, peno cakukhonda kuceneswa!’ Penepo fala ya kudzulu yandipanga pontho kaciwiri kuti: ‘Leka kulonga kuti mphyakukhonda kuceneswa, pire pidacenesa Mulungu.’ “Penepi pyacitika katatu. Na tenepo, pyonsene pyakwatiwa pontho kwenda kudzulu. Pa n'dzidzi ubodzi ene, afika amuna atatu pa nyumba padafikira ine. Iwo akhadatumirwa ine kubuluka ku Sezareya. Nzimu Wakucena wandipanga kuti ndikhonde kupenula kwenda pabodzi na iwo. Na tenepo, abale awa atanthatu aendambo pabodzi na ine, mbatipita n'nyumba mwa mamuna ule. Penepo, iye atipanga kuona kudacita iye anju mbali n'nyumba mwace dzololo, mbampanga kuti: ‘Tuma anthu aende ku Djopi, akhacemere Simau anadziwika na dzina ya Pedhru. Iye anakupasa mphangwa zinadza kapulumusa iwe na nyumba yako yonsene.’ “Mudatoma ine kulonga, Nzimu Wakucena wachita kuna iwo, sawa-sawa ninga mudatidzerambo iwo pakutoma. Na tenepo, ine ndakumbukira pikhadalonga Mbuya kuti: ‘Juwau atambirisa batixmu na madzi, mbwenye imwe munati mutambiriswe batixmu na Nzimu Wakucena.’ Mphapo ngakhala Mulungu aapasa muwoni ubodzi ene ukhadapaswa ife pakutawira kwathu Mbuya Yezu Kirixtu, ndikhali animbo ine kuti ndipokanye Mulungu?” Mudabva iwo penepyo, iwo akhurudzika mbatoma kukuza Mulungu mbalonga kuti: “Ndimo mwene, na ale ene adakhonda kukhala madjuda, Mulungu aapasa kuchunyuka toera apulumuke!” Na tenepo, ale akhabalalika na thangwi ya kufambirwa n'nduli kudatomera pa kufa kwa Xitevau, afika ku Finisya, ku Xipere na ku Antiyokiya, mbakhalonga fala ya Mulungu kuna madjuda basi. Mbwenye amuna anango a pa nsoka wawo, a ku Xipere na a ku Sirene, aenda ku Antiyokiya mbatoma kulongambo kuna agerego, mbakhaapanga Mphangwa Zadidi za Mbuya Yezu. Mphambvu za Mbuya zikhali na iwo. Na tenepo, anthu azinji atawira, mbazungunukira kuna Mbuya. Mphangwa zenezi zafikambo kuna abale a gereja ya ku Djerusalema, iwo mbatuma Bharnabhasi kwenda ku Antiyokiya. Pidafika iye kweneko mbaona kukoma ntima kwa Mulungu, Bharnabhasi akomerwa pikulu kakamwe, mbaapanga kuti athimize kutowerera Mbuya na ntima wawo onsene. Bharnabhasi akhali munthu wadidi, mbadzala na Nzimu Wakucena na cikhulupiro. Na tenepo, anthu azinji atawira Mbuya. Buluka penepo, Bharnabhasi aenda mpaka ku nzinda wa Tarisu, kasaka Saulo. Pidan'gumana iye, adza na iye mpaka ku Antiyokiya. Na tenepo, Bharnabhasi na Saulo akhala pabodzi pene caka camumphu. Iwo agumanyikana na abale a gereja, pontho apfundzisa anthu azinji. Ku Antiyokiya, ndiko kudatoma kucemerwa anyakupfundza a Yezu dzina ya makirixtu. Pa ntsiku zenezo, maporofeta anango abuluka ku Djerusalema mbaenda ku Antiyokiya. Na mphambvu za Nzimu Wakucena, m'bodzi wawo anacemerwa Agabhu, alamuka mbalonga nyapantsi kuti: “Kunadza kaoneka njala ikulu dziko yonsene.” (Ipi pyacitika pa n'dzidzi ukhatonga mambo Kalaudhyo.) Penepo, anyakutowera Yezu abverana kuti atumize pinthu, m'bodzi na m'bodzi abuluse pale padakwanisa na iye, kuti aphedze napyo abale a ku Djudeya. Penepyo iwo apicita, mbatumiza pinthu pyawo na Bharnabhasi na Saulo, toera aende kapipereke kuna akulu a gereja. Pa n'dzidzi unowu, mambo Herodhi amanga abale anango a gereja, toera aathabuse. Iye aphesa Tiyago m'bale wace Juwau na tarasada. Pidaona iye kuti penepi madjuda akomerwa napyo, athimiza, mbamangisambo Pedhru, pa n'dzidzi wa phwandu ya mikate yakusowa ntombwe wa kutupisa. Herodhi, pidamala iye kumangisa Pedhru, ampitisa n'kaidi, mbampereka kuti aonererwe na misoka minai ya anyankhondo. Nsoka ubodzi ukhali na anyankhondo anai. Thangwi Herodhi akhafuna antonge pamaso pa mbumba pakumala kwa Paxkwa. Na tenepo, Pedhru akhaonererwa n'kaidi, mbwenye abale agereja, akham'phemberera na mphambvu kuna Mulungu. Na masiku, mbidzati fika ntsiku ikhafuna Herodhi kuti antonge pamaso pa mbumba, Pedhru, akhagona pakati pa anyankhondo awiri, wakumangwa na unyolo uwiri, mbakhaonererwa na anyankhondo pa nsuwo wa kaidi. Na mwansanga, afika anju wa Mbuya, n'kaidi mbamuoneka cieza. Anju an'gwedza Pedhru pa khundu pace, amulamusa mbampanga tenepa: “Lamuka na mwansanga!” Penepo, maunyolo akhadamangwa na iye m'manja mwace, agwa. Anju ampanga tenepa: “Manga bhande yako, ubvale ntsapato zako.” Pedhru acita pidapangwa iye na anju. Penepo anju ampanga pontho kuti: “Bvala kapoti wako unditowere.” Penepo, Pedhru abuluka mbantowerera. Mbwenye iye akhapidziwa tayu kuti anju ali kum'bulusadi. Pyonsene pikhacitika, akhanyerezera ali kupioneswa mu Nzimu. Iwo apiringana nyakuonera wakutoma na waciwiri, mbafika pa citseko cikulu ca utale cikhalang'anisana na nzinda. Citseko cafunguka cokha cene, iwo mbabuluka. Akhafamba mu nseu un'gono, pa n'dzidzi ubodzi ene, anju mbansiya. Penepo, Pedhru aphepuka mbalonga ekha ene kuti: “Cincino ndadziwa kuti ndimo mwene, Mulungu atuma anju wace mbandiombola m'manja mwa Herodhi na pyonsene pikhafuna kundicita madjuda.” Pedhru mukhanyerezera iye penepi, aenda ku nyumba kwa Mariya, mai wace Juwau akhacemerwa Marku. Anthu azinji akhadagumanyikana penepo mbakhaphembera. Iye amenya citseko ca kunja, nyabasa wankazi anacemerwa Rodhe, mbaenda kaona kuti ndi ani. Nyabasa mudadzindikira iye kuti fala ndi ya Pedhru, akomerwa pikulu kakamwe, mbacimwana na kufungula kwene citseko, mbabwerera na kuthamanga kwenda kapanga anthu kuti: “Pedhru ali pa nsuwo.” Mbwenye iwo alonga kuti: “Iwe ndiwe bendzi!” Mphapo iye akhalonga basi kuti ndimo mwene. Penepo iwo antawira kuti: “Panango ndi anju wace!” Mbwenye Pedhru akhamenya basi citseko. Mudafungula iwo citseko, aona Pedhru, mbadzumatirwa. Penepo, Pedhru aapasa cidzindikiro na manja toera amatame, mbaapanga kuti abuluswa tani n'kaidi na Mbuya, mbalonga kuti: “Panganimbo penepi Tiyago na abale anango.” Na tenepo, iye abuluka mbaenda mbuto inango. Mangwana mwace na macibese, anyankhondo anentseka pikulu kakamwe, thangwi akhasaka kudziwa ndi ninji pidacitika kuna Pedhru! Herodhi atuma anthu kwenda mbansaka, mbwenye iwo hadan'gumana tayu. Na thangwi eneyo, Herodhi, pakumala kuasanya anyakuonera, aatonga kuti aphiwe. Buluka penepo, Herodhi abuluka ku Djudeya mbaenda kakhala ntsiku zingasi ku nzinda wa Sezareya. Mambo Herodhi akhaidana pikulu na mbumba ya mu nzinda wa Tiru na wa Sidhoni. Mbwenye mbumba ikhadagumanyikana pabodzi pene mbikhasaka kuonana na iye. Iyo yaphemba kuti asekesane na mambo mbaphebza na Bhalaxtu, mamuna akhanyidirika na mambo, thangwi pikhadya iwo pikhabuluka n'dziko ya mambo Herodhi. Ntsiku idabverana iwo, Herodhi abvala nguwo zace za ciumambo, akhala pa mpando wace wa umambo, mbatoma kulonga na mbumba. Penepo, mbumba yatoma kukhuwa kuti: “Fala iyi nja mulungu, si ya munthu tayu!” Pa n'dzidzi ubodzi ene udatawira iye kupaswa mbiri ninga mulungu, anju wa Mulungu agwisa nyatwa kuna Herodhi, adyiwa na mpfunye, mbafa. Na tenepo, fala ya Mulungu ikhalongwa konsene kwene mbikhaenda mbimwazika. Bharnabhasi na Saulo pakumala mabasa awo, abwerera buluka ku Djerusalema, pabodzi na Juwau anacemerwa Marku. Pa abale a gereja ya ku Antiyokiya, pakhali na maporofeta na apfundzisi. Madzina awo ndi Bharnabhasi, Simiyau akhacemerwa Nijeri, Lusyo wa ku Sirene, Manaeni, akhafuiwa na ntongi Herodhi, na Saulo. Mukhalambira iwo Mbuya mbakhapimana cakudya, Nzimu Wakucena walonga tenepa: “Ndisankhulireni Bharnabhasi na Saulo toera aende kaphata basa idaacemerera Ine.” Na tenepo, mudamala iwo kupimana cakudya na kuphembera, aikha manja kuna Bharnabhasi na Saulo, mbaatuma. Bharnabhasi na Saulo pidatumwa iwo na Nzimu Wakucena, aenda ku nzinda wa Seleusya. Buluka kweneko awambuka mbaenda pa ntsuwa ya Xipere. Mudafika iwo ku nzinda wa Salamina, atoma kulonga fala ya Mulungu n'kati mwa nyumba za kuphemberera za madjuda. Juwau akhali na iwombo pabodzi toera aaphedze. Iwo afamba ntsuwa yonsene, mpaka ku nzinda wa Pafu. Mwenemu agumana n'djuda m'bodzi nyamasalapita, mporofeta wa uthambi, anacemerwa Bharyezu. Iye akhakhala pabodzi na ntongi akhacemerwa Seriju Paulu, ntongi wakudziwisa. Ntongi unowu acemeresa Bharnabhasi na Saulo, thangwi akhafuna kubva fala ya Mulungu. Mbwenye nyamasalapita Elima (eneyi ndiyo dzina yace ncigerego) akhaapokanyisa apoxtolo, mbakhasaka kupingiza ntongi kuti akhonde kutawira pya cikirixtu. Na tenepo, Saulo, akhacemerwa Paulu, wakudzala na Nzimu Wakucena, alang'anisa Elima mbampanga tenepa: “Iwe mwana Dyabu, nyamalwa wa pyonsene pyakulungama! Iwe wakudzala na kuipa na uthambi! Unasiya lini kupingiza njira zakulungama za Mbuya? Cincino, dziwa kuti Mbuya anakuthabusa mbukhala boli-boli ntsiku zingasi, mbucimwana kuona dzuwa.” Pa n'dzidzi ubodzi-bodzi, Elima atoma kuona nkhungwi na cidima m'maso mwace, mbatoma kuzungulira mbakhasaka kuti ndi ani anafuna kum'phata nsenzi. Ntongi, na kuona pidacitika, atawira mbadzumatirwa pikulu na cipfundzo ca Mbuya. Paulu na andzace abuluka ku nzinda wa Pafu mbawambuka mpaka ku Peridji, ku dziko ya Panfilya. Mbwenye Juwau aasiya kweneku mbabwerera kwenda ku Djerusalema. Buluka ku Peridji, Bharnabhasi na Paulu athimiza na ulendo wawo mpaka ku nzinda wa Antiyokiya, ku dziko ya Pizidhya. Nsabudu mwace apita mu nyumba ya kuphemberera ya madjuda, mbakhala pantsi. Pakumala kuoniwa malemba a Mwambo wa Mozesi na malemba a mabukhu a Maporofeta, akulu a nyumba ya kuphemberera ya madjuda aatumira mphangwa izi: “Abale, ngakhala muna mafala akupasa na iwo cipapu mbumba, longani.” Penepo, Paulu alamuka mbacita cidzindikiro na manja, cakumatamisa anthu, mbalonga tenepa: “Imwe amuna a mu Izarayeli, na imwembo anango munagopa Mulungu, ndibvesereni. Mulungu wa mbumba ya Izarayeli, asankhula ambuya athu mbaacita mbumba ikulu, pa n'dzidzi ukhakhala iwo ku Idjipitu ninga anthu akudza. Na mphambvu zace zikulu, aabulusa n'dziko eneyi, mbaalera n'thando pyaka makumanai. Pontho Mulungu afudza madzindza manomwe n'dziko ya Khanani, mbakwata dziko eneyi mbaipasa ambuya athu, ninga unthaka wa mbumba yace. Pyonsene ipi pyamala pyaka madzana manai na makumaxanu. “Buluka penepo, Mulungu aapasa atongi mpaka pa n'dzidzi wa mporofeta Samweli. Na tenepo, mbumba yaphemba mambo m'bodzi, penepo Mulungu mbaapasa Sauli mwana wa Khisi, wa dzindza ya Bhenjamini, mbatonga pa pyaka makumanai. Mudabuluswa Sauli, Mulungu aapasa Dhavidhi ninga mambo, mbalonga na thangwi yace tenepa: ‘Ndan'gumana Dhavidhi mwana wa Djesi, mamuna wa pa ntima panga. Iye anadza kacita pyonsene pinafuna ine.’ “Mu dzindza ya Dhavidhi Mulungu alamusa Yezu Mpulumusi wa Izarayeli, ninga mukhadapikirira Iye. Yezu mbadzati kudza, Juwau amwaza mphangwa kuna mbumba yonsene ya Izarayeli, mbaapanga kuti achunyuke toera atambire batixmu. Mbwenye mukhamalisa Juwau basa yace, alonga tenepa kuna mbumba: ‘Kodi imwe musanyerezera kuti ine ndine ani? Ine sine unowu ananyerezera imwe tayu. Mbwenye lang'anani, Iye ali kubwera n'nduli mwanga. Ine sine munthu wakukwanira kusudzula ntsapato za m'myendo mwace.’ “Paulu athimiza na kulonga kuti: Abale anga, ana a dzindza ya Abharaamu na imwembo anango munagopa Mulungu, fala iyi ya upulumuki wakukhonda kumala, yatumizirwa ife. Mbumba ya Djerusalema na atongi awo, acimwana kun'dzindikira Yezu. Mbwenye pa kunkonesa kwawo, asimbisa mafala a maporofeta analongwa m'maSabudu onsene. Na kusowa kudacita iwo thangwi ya kum'pha nayo, aenda basi kaphemba kuna Piratu kuti aphiwe. Pidamala iwo kucita pyonsene pinalonga Bukhu ya Mulungu pa thangwi yace, iwo am'bulusa pa ntanda mbamuikha n'nthumbi. Mbwenye Mulungu amulamusa pa kufa, na tenepo, Yezu aoneka ntsiku zizinji na anthu ale akhadaenda na Iye buluka ku Galileya kwenda ku Djerusalema. Cincino anthu enewa ndiwo amboni analonga na thangwi yace, kuna mbumba ya Izarayeli. “Na tenepo, ife tiri pano toera tikupangeni Mphangwa Zadidi zidapikirira Mulungu kuna ambuya athu. Cincino, pidapikirira Iye apisimbisa kuna ife anace, pa kulamusa kwace Yezu pa kufa, ninga mudalemberwa ipyo n'kati mwa bukhu ya Masalimu pa cipambuko caciwiri kuti: “ ‘Iwe ndiwe Mwana wanga, lero, ine ndakubala.’ Pontho ndi penepi pidalonga Mulungu na thangwi ya kulamuswa kudacita Yezu pa kufa, kuti Iye cipo anadza kabvunda m'masiye, mbalonga kuti: “ ‘Ine ndinakupasani nkhombo zakucena na za kunyindirika zidapikirirwa Dhavidhi.’ Na tenepo, pa khundu inango ya Bukhu ya Mulungu Iye alonga pontho kuti: “ ‘Imwe nkhabe kudza kasiya kuti nyabasa wanu Wakulungama abvunde.’ “Paulu alonga pontho kuti: Thangwi Dhavidhi pa n'dzidzi wace, mudamala iye kuphata basa idampasa Mulungu, afa mbaikhwa dhuzi na ambuya ace, mbabvunda. Mbwenye ule adalamuswa na Mulungu pa kufa, hadabvunda tayu. “Na tenepo, abale anga, dziwani kuti na Yezu Kirixtu, mphangwa za kulekererwa madawi zamwazwa kuna imwe. Pontho musafunambo mudziwe kuti na Yezu Kirixtu, ale anatawira, analekererwa kudawa kwawo konsene kudacimwana iwo kulekererwa na mwambo wa Mozesi. Na tenepo, citani mphole toera pikhonde kucitika kuna imwe pire pidalonga maporofeta kuti: “ ‘ Lang'anani imwe anapwaza Mulungu. Dzumatirwani mufe! Thangwi pinafuna cita Ine cincino, ndi pinthu pya kuti mungapipangwa na munthu, imwe na lini munadza kapitawira.’ ” Paulu na Bharnabhasi, mukhabuluka iwo mu nyumba ya kuphemberera ya madjuda, mbumba ikhaaphemba kuti abwere pontho Sabudu inafuna kudza, adze kaapange pibodzi-bodzi. Pidamala iwo kupanganizana, azinji madjuda, na anthu anango adakhonda kukhala madjuda mbakhatowera mwambo wa madjuda, atowera Paulu na Bharnabhasi. Awa akhaapanga kuti atawire kukakamira kukhala n'kati mwa kukoma ntima kwa Mulungu. Pidafika Sabudu inango, anthu azinji a mu nzinda agumanyikana toera abve fala ya Mulungu. Madjuda mudaona iwo mwinji ule wa anthu, akhala na bibvu ikulu. Penepo, atoma kutikana mbakhapokanya pikhalonga Paulu. Na tenepo, Paulu na Bharnabhasi akhalonga na cipapu consene, mbaapanga tenepa: “Pikhali pyadidi kuti fala ya Mulungu itome kupangwa imwe madjuda. Mbwenye na kukhonda kunaicita imwe, pontho na kunyerezera kuti simwe anthu akukwanira kutambira upulumuki wakukhonda kumala, cincino ife tinaenda pyathu kuna ale adakhonda kukhala madjuda. Thangwi Mbuya atipanga mwambo uxu: “ ‘Ine ndakucita toera ukhale cieza ca anthu adakhonda kukhala madjuda, toera iwe ukwate upulumuki uumwaze mpaka kudadhoroma dziko.’ ” Ale adakhonda kukhala madjuda, pidabva iwo penepi, akomerwa pikulu kakamwe, mbasimba fala ya Mbuya. Penepo, atawira ale onsene adasankhulwa toera akhale na upulumuki wakukhonda kumala. Na tenepo, fala ya Mbuya ikhamwazika n'dziko eneyo yonsene. Mbwenye madjuda anyengerera akazi a mbiri akugopa Mulungu, na akulu-akulu a mu nzinda. Na tenepo, iwo atoma kukuwizira kuzonda Paulu na Bharnabhasi, mbaathamangisa n'dziko mwawo. Penepo, Paulu na Bharnabhasi agubudza pfumbi ya manyalo awo, kupangisa cidzindikiro cakupokanya kwawo, mbaenda ku nzinda wa Ikonyo. Na tenepo, anyakutowera Yezu akhadakomerwa pikulu kakamwe, mbadzala na Nzimu Wakucena. Ku nzinda wa Ikonyo, Paulu na Bharnabhasi, ninga nsambo wawo, apita n'nyumba ya kuphemberera ya madjuda. Mwenemu, iwo alonga mpaka mwinji ukulu wa madjuda na wa ale adakhonda kukhala madjuda afikira kutawira Mbuya. Mbwenye madjuda akhakhonda kutawira Yezu, akhakuwizira ale adakhonda kukhala madjuda, kuti aipirwe na abale anyakutawira Yezu. Paulu na Bharnabhasi amala ntsiku zizinji ku Ikonyo, mbakhalonga na cipapu consene na thangwi ya Mbuya. Penepo, Mbuya akhasimbisa mphangwa za kukoma ntima kwace, mbakhaapasa mphambvu za kucita pidzindikiro na pirengo na manja awo. Mbumba ya mu nzinda ikhadagawika. Anango akhali ku khundu ya madjuda, anango akhali ku khundu ya apoxtolo. Na tenepo, ale adakhonda kukhala madjuda, pabodzi pene na madjuda na atsogoleri awo, abverana toera kuathabusa, na kuamenya na myala. Paulu na Bharnabhasi mudabva iwo penepi, athawira ku Lixtara na ku Dherbhi, mizinda ya Likaonya, na m'madziko a n'khundu-n'khundu. Kweneko iwo mbakhamwaza Mphangwa Zadidi. Mu nzinda wa Lixtara, mukhali na nyampfutete. Iye akhakhala nawa thangwi akhadalamala myendo, pontho cipo mbabalwa akhadasati kufamba. Mamuna uyu, akhabva mafala a Paulu. Paulu mudamulang'anisa iye mwadidi mwene, amuona kuti akhakhala na cikhulupiro cakuwangiswa, ampanga na mphambvu kuti: “Lamuka, ulimire!” Mamuna anumpha, mbatoma kufamba. Anthu mudaona iwo pidacita Paulu, atoma kukhuwa na malongero a cilikaonya kuti: “Awa mbalungu adasanduka kudza anthu, mbachita kudza kuna ife.” Penepo, Bharnabhasi apaswa dzina ya mulungu anacemerwa Djupiteri, Paulu mbapaswa dzina ya mulungu anacemerwa Merikuryo, thangwi Paulu ndiye akhabulukira pa kulonga. Nyantsembe wa mulungu Djupiteri, akhakhala na nyumba ya ntsembe ikhalang'anisana na nzinda, abweresa n'gombe na nkhata za maluwa pa nsuwo wa nzinda, thangwi iye na mbumba akhafuna kupha n'gombe zenezi, acitire ntsembe Paulu na Bharnabhasi. Mbwenye ma apoxtolo Paulu na Bharnabhasi mudabva iwo penepi apandula nguwo zawo, mbathamanga mpaka pakati pa mbumba, mbakhuwa tenepa: “Amunamwe, thangwi yanji musacita penepi? Ife ndife anthu ninga na imwembo! Ife tisakudzeserani Mphangwa Zadidi, mbatikupangani kuti musiye pinthu pyapezi, muzungunukire kuna Mulungu wa m'maso, adacita kudzulu na pantsi, na bara, na pyonsene piri mwenemu. Kale ene Mulungu aasiya madzindza onsene kuti acite kufuna kwawo. Mbwenye Mulungu hadasiya kupicitikira umboni tayu. Iye apangisa udidi wace, akubvumbirani na madzi akubuluka kudzulu, akumereserani mbeu zanu, akudyesani misapu, mbamutsandzaya m'mitima mwanu.” Na mafala onsene awa, apoxtolo pikhaanentsa kuakhondesa anthu kuti aacitire ntsembe. Penepo, abwera madjuda angasi a ku Antiyokiya na a ku Ikonyo. Iwo akwanisa kunyengerera mbumba, mbamenya Paulu na myala, mbankwekweta mpaka kunja kwa nzinda, thangwi akhanyerezera kuti afa. Mbwenye pidazungulirwa Paulu n'khundu mwace na anyakutowera Yezu, iye alamuka mbapita pontho mu nzinda. Mangwana mwace, iye na Bharnabhasi aenda ku nzinda wa Dherbhi. Paulu na Bharnabhasi amwaza Mphangwa Zadidi mu nzinda wa Dherbhi, anthu azinji mbadza kakhala anyakupfundza a Yezu. Na tenepo, abwerera kwenda ku mizinda ya Lixtara, Ikonyo na Antiyokiya, mbakhapasa mphambvu anyakutowera Yezu, na kuapasa cipapu kuti akhale ciriri pa kukhulupira, mbakhalonga kuti: “Pisatongwa kuti tione nyatwa zizinji, toera tipite mu Umambo wa Mulungu.” Pa abale a gereja ibodzi na ibodzi, Paulu na Bharnabhasi akhaasiya mbakhasankhula akulu akuatsogolera. Iwo akhaphembera na kupimana cakudya, mbakhaaikha patsogolo pa Mbuya ule akhakhulupira iwo. Buluka penepo, Paulu na Bharnabhasi agwanda na n'dziko ya Pizidhya, mbaenda ku dziko ya Panfilya. Pidamala iwo kumwaza fala ku nzinda wa Peridji, aenda ku gombe ya Atalya. Buluka pa Atalya, apakira xitima ya m'madzi mbaenda ku Antiyokiya wa ku Sirya, kule kukhadaperekwa iwo n'kati mwa kukoma ntima kwa Mulungu kuti kuaphedze pa basa eneyi idamala iwo kucita. Mudafika iwo kweneko, acemera abale onsene a gereja, mbaapanga pyonsene pidaacitisa Mulungu na manja awo, pontho na kufungula nsuwo kudacita Iye kuli ale adakhonda kukhala madjuda, kuti akhulupirembo. Kweneko, Paulu na Bharnabhasi akhala ntsiku zizinji pabodzi pene na abale anyakutowera Yezu. Amuna anango abuluka ku Djudeya kwenda ku Antiyokiya mbaenda na pfundzisa abale anyakutawira Yezu kuti: “Mungakhonda kusibza ninga munalongera mwambo wa Mozesi, nkhabe kupulumuswa.” Penepi pyacita kuti Paulu na Bharnabhasi alongane na iwo pikulu, mbaketesana na iwo. Na tenepo, asankhula Paulu na Bharnabhasi pabodzi na anango, kuti aenda ku Djerusalema akhapfundzisane penepi pabodzi na apoxtolo, na akulu a magereja. Penepo, abale a gereja ya ku Antiyokiya aatuma mbaenda. Mbwenye pakupita kwawo na ku dziko ya Finisya na ya Samariya, alonga na thangwi ya kutawira Mulungu kudacita anthu ale adakhonda kukhala madjuda. Na tenepo, abale akomerwa pikulu kakamwe na mphangwa zenezi. Mudafika iwo ku Djerusalema, atambirwa mwadidi na abale a gereja, na apoxtolo, pabodzi na akulu a magereja, mbaapanga pyonsene pidacita iwo na mphambvu za Mulungu. Na tenepo, anthu anango a pa nsoka wa ndale wa afarisi, akhadatawirambo Yezu, alamuka mbalonga tenepa: “Pisatongwa kuti ale adakhonda kukhala madjuda asibze, pontho atowezembo Mwambo wa Mozesi.” Penepo, apoxtolo na akulu-akulu, agumanyikana toera apfundzisane penepi. Pakumala kuketesana pikulu kakamwe, Pedhru alamuka mbaapanga tenepa: “Abale anga, imwe musadziwa kuti Mulungu andisankhula kale ene pakati panu toera anthu ale adakhonda kukhala madjuda, akwanise kubva na ine Mphangwa Zadidi, mbazitawira. Tenepa Mulungu, nyakudziwa mitima ya anthu onsene, apangisa kuti ale adakhonda kukhala madjuda Iye aatambira, mbaapasambo Nzimu Wakucena, sawa-sawa ninga mudatipasira Iye pakutoma. Mulungu nkhabe tsankhulo ibodzi idacita Iye pakati pa iwo na ife, thangwi acenesa mitima yawo, na kukhulupira kwawo. Na tenepo, ndi thangwi yanji cincino imwe musafuna kulesera Mulungu, mbamukakamiza anyakutowera Yezu kuthuka mitolo ya kuti ambuya athu na ife, taicimwana kuithuka? Mbwenye ife tisatawira kuti tapulumuswa na kukoma ntima kwa Mbuya wathu Yezu, sawa-sawambo ninga iwo.” Na tenepo, anthu onsene akhali mwenemu amatama, mbakhabvesera Bharnabhasi na Paulu mbakhalonga pirengo na pyakudzumisa pinango pikhadaacitisa Mulungu na manja awo, pakati pa ale adakhonda kukhala madjuda. Pidamala iwo kulonga, Tiyago atawira mbalongambo tenepa: “Abale anga, ndibvesereni: Simau amala kutipanga pano kukumbuka kudacita Mulungu pakutoma kuli ale adakhonda kukhala madjuda, toera pakati pawo agumanye mbumba ibodzi kuti ikhale yace. Penepi ndi sawa-sawa na mafala adalembwa na maporofeta kuti: “ ‘Pakumala penepi, ndinabwera pontho mbandimanga papsa umambo wa Dhavidhi udagwa ninga nyumba ya ntsembe. Ndinagumanya mapindi ace, mbandiulamusa pontho, toera anthu anango adasala asake Mbuya, na onsene adakhonda kukhala madjuda akhadacemerwa na dzina yanga. Ndipyo pidalonga Mbuya, anacita pinthu penepi,’ pyakudziwika kutomera kale na kale. “Na tenepo, ndisaona kuti mphyadidi tikhonde kuapingiza anthu awa adakhonda kukhala madjuda, anatawira Mulungu. Mbwenye mphyadidi tialembere tsamba kuti akhonde kudya pinthu pidaikhirwa ntsembe alungu apezi, akhonde cita lukwali, akhonde kudya nyama ya kufa na kububunyulwa khosi, pontho akhonde kudya ciropa. Thangwi kutomera kale na kale akhagumanika anthu akhalonga mwambo wa Mozesi m'mizinda yonsene, pontho mbukhaoniwa m'maSabudu onsene m'manyumba a kuphemberera.” Na tenepo, apoxtolo na akulu-akulu, pabodzi na abale onsene a gereja, abverana kuti asankhule amuna angasi pakati pawo kuti aatume ku Antiyokiya, pabodzi na Paulu na Bharnabhasi. Iwo asankhula Djuda anacemerwa Bharisabha, pabodzi na Silasi. Amuna awiri awa, akhali akulu akulemedzeka pakati pa abale anyakutawira Yezu. Atumiza na iwo tsamba ikhalonga tenepa: “Ife abale anu apoxtolo, na akulu a misoka ya anyakutawira Yezu, tisawangisa onsene anyakutawira Yezu adakhonda kukhala madjuda, ali ku Antiyokiya na m'pisa pinango pya Sirya na pya Silisya. Tabva kuti anango a pa nsoka wathu abwera kweneko kakudzudzumisani mbakuzunguzani manyerezero anu, na pire pikhalonga iwo. Anthu enewa sife adaatuma kudza kacita penepi tayu. Na tenepo, ife tonsene taona kuti mphyadidi tisankhule amuna angasi mbatikutumirani, pabodzi na abale athu akufunika Paulu na Bharnabhasi. Amuna awa ndiwo adaperekeka pa moyo wawo na dzina ya Mbuya wathu Yezu Kirixtu. Na tenepo, tiri kukutumizirani Djuda na Silasi toera akupangeni na mulomo wawo pyonsene ipi pinakulemberani ife. Thangwi Nzimu Wakucena pabodzi na ife, tanyerezera kuti sipyadidi tayu kukuthukisani ntolo unango kupiringana matongero enewa awa akufunika, a kuti: Lekani kudya pinthu pidaikhirwa ntsembe alungu apezi, lekani kudya ciropa, lekani kudya nyama ya pinyama pya kufa na kububunyulwa khosi, pontho lekani kucita pyalukwali. Penepi mungapithunda, musacita pyadidi. Tisakuwangisani monsene.” Buluka penepo, apoxtolo alamuka mbaenda ku Antiyokiya. Kweneko iwo acemeresa anyakutawira Yezu onsene, mbaapasa tsamba. Abale anyakutawira Yezu, pidamala iwo kuiona tsamba, akomerwa pikulu kakamwe na mphangwa za kuapasa mphambvu zidabva iwo pa tsamba. Djuda na Silasi, ale akhali maporofeta, na mafala mazinji, apasa abale cipapu na mphambvu. Pidamala iwo kweneko midzidzi mingasi, apanganizana na abale, mbaenda na ntendere kuna ale akhadaatuma. [Mbwenye Silasi aona kuti mphyadidi asale pyace kweneko. ] Paulu na Bharnabhasi akhala ku Antiyokiya. Kweneku, iwo na andzawo anango azinji, akhapfundzisa mbakhamwaza fala ya Mbuya. Pakupita ntsiku zingasi, Paulu apanga Bharnabhasi kuti: “Mbatibwerere tiyende kaone abale m'mizinda monsene mudapita na ife mbatimwaza fala ya Mbuya, toera tikhaaone kuti ali tani.” Bharnabhasi akhafuna kuti aende pabodzi pene na Juwau, akhadziwika na dzina ya Marku. Mbwenye Paulu hakhafuna tayu, thangwi Marku akhadaathawa ku Panfilya mbaasiya okha, mbakhonda kukhala na anthu pa basa. Na tenepo, aketesana pikulu pyene, mpaka kufikira kumwazana. Bharnabhasi akwatana na Juwau anacemerwa Marku, mbawambuka kwenda ntsuwa ya Xipere. Mbwenye Paulu asankhula Silasi mbaenda, pakumala kuperekwa n'kati mwa kukoma ntima kwa Mulungu na abale anyakutawira Yezu. Na tenepo, Paulu apita na n'dziko ya Sirya na ya Silisya, mbakhaenda mbapasa mphambvu abale a magereja. Buluka kweneko, Paulu afika ku mizinda ya Dherbhi na Lixtara, kule kukakhala nyakutowera Yezu m'bodzi anacemerwa Timoti. Mai wace akhali n'djuda wakutawira Yezu, mbwenye baba wace akhali n'gerego. Timoti akhasimbwa pikulu na abale akhakhala ku Lixtara na ku Ikonyo. Paulu, na kufuna kuti aende na iye pabodzi, ansidza na thangwi ya madjuda a ku cisa ceneco. Thangwi iwo onsene akhadziwa kuti baba wace Timoti, akhali wa dzindza ya agerego. M'mizinda monsene mukhapita na iwo, akhapanga Anyakutawira Yezu pire pidabverana iwo ku Djerusalema na apoxtolo, pabodzi pene na akulu a misoka ya anyakutawira Yezu, mbakhaapanga kuti apitoweze. Na tenepo, abale a magereja akhapaswa mphambvu pa kukhulupira kwawo, pontho mbakhainjipa ntsiku na ntsiku. Paulu na andzace apita na m'pisa pya Firijya na Galasya, mbakhondeswa na Nzimu Wakucena kumwaza fala mu dziko ya Azya. Mudafika iwo dhuzi na cisa ca Mizya, akhafuna kuti aende ku Bhitinya, mbwenye Nzimu wa Yezu waakhondesa. Na tenepo iwo agwanda na cisa ca Mizya mbafika mpaka ku gombe ya Thorowadhi. Na masiku a ntsiku eneyo, Paulu aoneswa mu Nzimu mamuna m'bodzi wa ku Masedhonya akhali dzololo, mbakham'phemba tenepa: “Bwerani ku Masedhonya mudze katiphedzembo.” Paulu, pakumala kuoneswa penepi mu Nzimu, ife tasasanyira na mwansanga kuti tiyende ku Masedhonya, thangwi tikhadziwa kuti ndi Mulungu anaticemera kuti tiyende kamwaza Mphangwa Zadidi kuna iwo. Ku Thorowadhi, ife tapakira xitima ya m'madzi mbatiyenderatu ku nzinda wa Samotarasya. Mangwana mwace mbatiyenda ku nzinda wa Neyapolisi. Buluka penepo taenda ku Filipi, nzinda unango ukulu wa Masedhonya ukhatapatwa na Aroma. Kweneko takhala ntsiku zizinji. Nsabudu mwace tabuluka mu nzinda mbatiyenda n'gombe mwa nyandza. Tikhanyerezera kuti kweneko tinagumanako mbuto ya kuphembera. Takhala pantsi mbatitoma kuceza na akazi akhadagumanyikana penepo. M'bodzi wawo akhacemerwa Lidhya, akhatibvesera. Iye akhali wa ku nzinda wa Tiyatira, akhagulisa nguwo za ntundu wa ropa za ntengo ukulu. Lidhya akhagopa Mulungu. Na tenepo, Mbuya afungula ntima wace toera abvesese pikhalonga Paulu. Lidhya, pakumala kutambiriswa batixmu na onsene anthu a m'mudzi mwace, iye atiphemba mbalonga tenepa: “Ngakhala imwe mwaonadi kuti ine ndine nyakutawira Mbuya, bwerani mukhale pa nyumba panga.” Na kutikakamiza, ife tatawira. Ntsiku inango, mukhaenda ife kaphembera, tagumanikana na n'dzakazi m'bodzi wankazi akhali na nzimu wa kuipa ukhalotera pinafuna kucitika. Na tenepo, na kulotera kwace, iye akhapitisa kobiri zizinji kuna a mbuya ace. Ntsikana atoma kutowera Paulu na ife mbakhakhuwa tenepa: “Amuna awa ndi anyabasa a Mulungu wa kudzulu kakamwe! Iwo asakupangani njira ya upulumuki.” Iye akhapicita penepi ntsiku zizinji zene. Pakumalisa Paulu aipirwa, azungunuka mbaupanga nzimu kuti: “Na dzina ya Yezu Kirixtu ndiri kukupanga kuti buluka muna ntsikana uyu!” Pa n'dzidzi ubodzi ene nzimu wabuluka. Ambuya wace ntsikana mudaona iwo kuti nkhabe tambirabve kobiri na kulotera kwace, aphata Paulu na Silasi mbaakwekweta mpaka pa nsika ukulu wa pamphambano, pamaso pa anyakutonga. Mudaapereka iwo m'manja mwa anyakutonga miseru, alonga tenepa: “Madjuda awa asapingiza anthu mu nzinda mwathu muno. Iwo ali kupfundzisa anthu mitemo inakhondeswa na mwambo wathu. Ife ndife Aroma, tinacimwana kuitawira na kuitoweza mitemo eneyi.” Penepo mbumba yagumanyikana, toera kumenya Paulu na Silasi. Anyakutonga miseru aapandulira nguwo zawo, mbaakwapulisa na michamu. Pakumala kuamenya pikulu pyene, aaponya n'kaidi, mbapanga nyakuonera pa nsuwo kuti aaonerere mwadidi mwene. Mudamala iye kupangwa tenepo, nyakuonera pa nsuwo aakwata mbaenda na iwo n'kati kakamwe, mbaamangirira myendo yawo pa goo. Mukhacita dhuzi na chiti-chiti, Paulu na Silasi akhaphembera mbakhaimbira Mulungu, anyan'kaidi andzawo mbakhaabvesera. Pa n'dzidzi ubodzi-bodzi, kwaoneka citeke-teke cikulu, kufikira kuti nchici za n'kaidi zatekenyekambo. N'dzidzi unowu misuwo yonsene yafunguka, na maunyolo onsene akhamangiwa na anyan'kaidi, athumuka. Penepo, nyakuonera n'kaidi alamuka n'citulo. Na kuona kuti misuwo ya n'kaidi yamala funguka, abulusa tarasada mbakhafuna pheka ekha ene, thangwi akhanyerezera kuti anyan'kaidi amala thawa. Mbwenye Paulu akhuwa mbampanga tenepa: “Leka pheka wekha ene! Ife tonsene tiri muno!” Penepo nyakuonera n'kaidi aphemba nyale, apita na mwansanga mbagodama pa myendo ya Paulu na Silasi, uku mbakhatetemera. Na tenepo aakwata muwiri mwawo mbabuluka na iwo kunja, mbaabvundza tenepa: “Ambuya, ndisatongwa ndicitenji toera ndipulumuswe?” Iwo antawira tenepa: “Tawira Mbuya Yezu, unapulumuka, iwe na mudzi wako onsene.” Penepo, Paulu na Silasi ampanga nyakuonera kaidi fala ya Mulungu, pabodzi na onsene anthu a pa nyumba pace. Pa n'dzidzi wa masiku mabodzi ene ale, nyakuonera kaidi aatsuka pironda pyawo. Buluka penepo, iye na anthu onsene a pa nyumba pace atambira batixmu. Na tenepo, akwata Paulu na Silasi mbaenda na iwo kaapasa cakudya ku nyumba kwace. Nyakuonera n'kaidi, pabodzi na abale onsene a pa nyumba pace, akomerwa pikulu kakamwe, thangwi iwo atawira Mulungu. Pidaca kunja, akulu a utongi wa ku Roma atuma anyankhondo kuna nyakuonera kaidi na mphangwa izi: “Asudzule amuna awa.” Penepo, nyakuonera n'kaidi apanga Paulu kuti: “Anyakutonga atumizira mphangwa kuti ndikubuluseni. Na tenepo, ndokoni pyanu mbamutsandzaya.” Mbwenye Paulu aapanga anyankhondo kuti: “Ife ndife a ku Roma, pontho nkhabe cibodzi cidakoneswa na ife. Mbwenye iwo atikwapulisa pamaso pa anthu onsene, pidamala iwo mbatiyikha n'kaidi. Lero asafuna atibuluse n'cibiso-biso? Penepi ife nkhabe kupitawira! Iwo abodzi-bodzi mbabwere adze katibuluse.” Anyankhondo aenda kalonga penepi kuna anyakutonga. Mudabva iwo kuti Paulu na Silasi mba ku Roma, agopa pikulu kakamwe. Na tenepo, aenda kaaphemba kuti aalekerere, mbaabulusa n'kaidi. Penepo aaphemba kuti abuluke mu nzinda. Paulu na Silasi pakubuluka n'kaidi aenda mpaka ku nyumba ya Lidhya. Kweneko aonana na abale, mbamala kuakhurudza mitima, mbaenda pyawo. Mudapita iwo na ku nzinda wa Anfipolisi na wa Apolonya, afika ku Tesalonika, kule kukhali na nyumba ibodzi ya kuphemberera ya madjuda. Paulu, ninga nsambo wace, aenda ku nyumba ya kuphemberera ya madjuda, mbamala maSabudu matatu mbakhaketesana na iwo na thangwi ya pya m'Bukhu ya Mulungu. Iye akhaachululira mbakhaapangisa kuti Misiya akhatongwa aone nyatwa, mbalamuka pa akufa. Mbathimiza na kuapanga kuti: “Yezu unowu anakupangani ine, ndiye Kirixtu.” Madjuda anango atawira pikhalonga Paulu na Silasi, mbaenda kagumanyikana na iwo, pabodzi na azinji agerego akhagopa Mulungu, na akazi azinji a mbiri. Mbwenye madjuda akhala na bibvu. Na tenepo, iwo akwata amuna angasi pakati pa anyakuipa mitima a m'miseu, agumanya mwinji wa anthu, mbatoma kucita cikuti mu nzinda. Apita na mphambvu n'nyumba mwa Djasoni kasaka Paulu na Silasi, toera aakwate adze na iwo pakati pa mbumba. Pidaasowa iwo mwenemu, akwata Djasoni na abale anango, mpaka pamaso pa akulu a mu nzinda, mbakhakhuwa tenepa: “Amuna awa anakhala mbacita cikuti n'dziko yonsene, lero afikambo mu nzinda mwathu muno. Djasoni ndiye aatambira amuna enewa pa nyumba pace. Iwo onsene asacita pinthu pyakusyana na matongero a Sezari, mbakhalonga kuti alipo mambo unango anacemerwa Yezu.” Penepo, mbumba pabodzi pene na akulu a mu nzinda, na kubva penepi, azunguzika napyo. Na tenepo, Djasoni na andzace abulusa kobiri ikhatongwa iwo kubulusa pa thangwi ya nseru wawo, pidamala iwo aasiya mbaenda. Pa n'dzidzi ubodzi-bodzi udadoka dzuwa, abale atuma Paulu na Silasi mbaenda ku nzinda wa Bhereya. Mudafika iwo kweneko, aenda ku nyumba ya kuphemberera ya madjuda. Anthu a ku Bhereya, akhali anthu akhasaka kudziwa kupiringana anthu a ku Tesalonika, thangwi atambira fala na ntima wawo onsene, mbakhadinkhisa ntsiku zonsene Bukhu ya Mulungu, toera aone ngakhala pyonsene ndimo mwenedi. Na tenepo, azinji awo atawira. Penepo, pakati pa agerego, azinji atawirambo, akazi a mbiri na amuna azinji. Mbwenye madjuda a ku Tesalonika, mudabva iwo kuti Paulu akhamwaza fala ya Mulungu ku Bhereya, iwo aendambo mpaka kweneko, mbatoma kunyengerera anthu kuti acite cikuti. Na mwansanga abale atuma Paulu mbaenda ku bara, mbwenye Silasi na Timoti asala ku Bhereya. Amuna akhaperekera Paulu, ankwata mbaenda na iye mpaka ku Atena. Buluka penepo, iwo abwerera na mphangwa zidatumizwa iwo, kuti pingakwanisika, Silasi na Timoti aende na mwansanga kagumanikana na Paulu. Paulu, pikhadikhira iye kufika kwa Silasi na Timoti ku nzinda wa Atena, akhaipirwa muntima mwace pikulu kakamwe, na kuona kuti nzinda ukhadadzala na madzimunthu akhalambira iwo. Na thangwi eneyo, akhaketesana na madjuda mu nyumba ya kuphemberera, na agerego akhagopa Mulungu, pontho ntsiku zonsene akhaketesana na ale anthu akhagumanyikana na iye m'misika. Anyakudziwisa anango a nsoka wa apikureu na a nsoka wa exitoiku, atoma kuketesana na iye. Anango akham'bvundza kuti: “Kodi asathanda longanji munthu wakukhonda kudziwa pinthu ninga unowu?” Anango akhalongambo tenepa: “Tisamuona kuti asafuna longa alungu a madzindza anango,” thangwi Paulu akhaapanga Mphangwa Zadidi za Yezu na za kulamuka kwace pa akufa. Na tenepo, ankwata mbaenda na iye ku mbuto ya kutongerwa miseru inacemerwa Ariyopagu. Kweneko iwo am'bvundza tenepa: “Kodi unakwanisa kutipanga mapfundzisiro enewa mapsa anatipanga iwe mbanji? Thangwi iwe usatipanga pinthu pyakukhonda dziwika. Ife tisafuna tidziwe pisalongeranji penepi.” Thangwi anthu onsene a ku Atena na anthu akudza akhakhala mwenemu, akhanyerezera kulonga peno kubva pinthu pipsa basi. Na tenepo, Paulu alimira pa Ariyopagu, mbalonga tenepa: “Imwe anthu a ku Atena! Pa pyonsene pidaona ine, pyandipangisa kuti pa makhaliro anu onsene, imwe ndimwe anthu akuphembera pikulu kakamwe. Thangwi pikhafamba ine mu nzinda, mbandilang'anisa mbuto zanu za kuphembera, ndagumana guwa ya ntsembe idalembwa tenepa: ‘KUNA MULUNGU WAKUKHONDA KUDZIWIKA.’ Mphapo Mulungu unowu analambira imwe mbamukhonda kun'dziwa, ndiye unowu anakupangani ine. “Mulungu adacita dziko na pyonsene piri mwenemu, ndiye Mbuya wa kudzulu na pantsi. Iye nkhabe kukhala mu nyumba za ntsembe zakucitwa na anthu tayu. Iye nkhabe phatirwa basa na manja a anthu, ninga munthu wakusowa cinthu, thangwi ndiye anapasa moyo anthu onsene, apume, na pinango pyonsene. Pa munthu m'bodzi basi, Mulungu acita madzindza onsene kuti akhale pantsi pano ponsene. Ndiye adapaka midzidzi kale na kale, mbaikha madire kuti iwo adze kakhale. Mulungu acita penepi toera anthu akwanise kunsaka peno kum'phambasira panango anakwanisa kun'gumana, Iye mbali dhuzi ene na ife. Thangwi tisakhala muna Iye, mbatifamba muna Iye, mbationeka m'maso tenepano. Ninga mudalonga andzanu anyakulemba kuti: ‘Ife ndifembo a dzindza yace.’ “Na tenepo, ife, na thangwi yakukhala dzindza ya Mulungu, mbatilekeni kunyerezera kuti Umulungu walandana na dzimunthu ya oro, peno ya parata peno ya myala idacitwa na udziwisi peno na manyerezero a anthu. Kale ene Mulungu hakhatsalakana tayu na kukhonda kudziwa kwa anthu. Mbwenye cincino, Iye asapanga anthu onsene, mu mbuto zonsene kuti iwo achunyuke. Thangwi Iye asankhula ntsiku ibodzi inafuna kudza katongwa dziko mwakulungama na Mamuna adasankhula Iye. Penepi apisimbisa kuna anthu onsene, pakulamusa kwace Mamuna unowu pa akufa.” Mudabva iwo Paulu mbakhalonga thangwi ya kulamuka pa akufa, anango awo akhansingirira, mbwenye anango akhalonga tenepa: “Na thangwi ya penepi unatipanga pontho ntsiku inango.” Na tenepo, Paulu abuluka pakati pawo mbaenda pyace. Amuna anango atawira mbagumanyikana na Paulu. Pa amuna enewa akhalipombo Diniju, m'bodzi wa anyakutonga miseru pa mbuto inacemerwa Ariyopagu, pontho na nkazi m'bodzi anacemerwa Dhamarisi, na anango akhali na iwo. Buluka penepo, Paulu abuluka ku Atena, mbaenda ku nzinda wa Korintu. Kweneko agumana n'djuda m'bodzi anacemerwa Akila, akhali wa ku cisa ca Pontu. Iye akhafika kwene buluka ku Italya pabodzi pene na nkazace Pirisila, thangwi Kalaudhyo, mambo wankulu wa ku Roma, akhadabulusa ntemo wa kuti madjuda onsene abuluke mu Roma. Paulu aenda kaaona. Na tenepo, Paulu, na kuona kuti basa yawo ndi ibodzi ene, akhala penepo mbaphata na iwo pabodzi. Thangwi mabasa awo akhali a kusona makumbi a nthembe. Masabudu onsene, Paulu akhaketesana na madjuda na agerego mu nyumba ya kuphemberera, mbakhaakonesa. Mudafika Silasi na Timoti buluka ku Masedhonya, Paulu atoma kuphata basa ya kumwaza Mphangwa basi, mbakhalonga kuna madjuda kuti Kirixtu ndi Yezu. Mbwenye kupokanya kwawo pontho na kuxola kukhacita iwo, Paulu agubudza nguwo zace, mbalonga tenepa: “Ciropa canu mbacigwere pa nsolo panu! Ine nkhabe thangwi na penepi. Bulukira lero kwenda kutsogolo ndinaenda kuna ale adakhonda kukhala madjuda.” Na tenepo, Paulu abuluka n'nyumba ya kuphemberera ya madjuda, mbaenda ku nyumba kwa mamuna m'bodzi wakugopa Mulungu, akhacemerwa Tisyo Djuxtu. Mamuna unowu nyumba yace ikhakhala n'khundu-n'khundu mwa nyumba ya kuphemberera ya madjuda. N'tsogoleri wa nyumba ya kuphemberera anacemerwa Kirixpu, atawira Mbuya, iye na mudzi wace onsene. Pontho, anthu a mu nzinda wa Korintu akhabva, azinji atawirambo mbatambiriswa batixmu. Ntsiku inango, na masiku, Mbuya apanga Paulu mu Nzimu kuti: “Leka gopa, mbwenye pitiriza na kulonga, pontho leka matama. Thangwi Ine ndiri na iwe. Nkhabe m'bodzi anafuna kukuphekesa peno kukucita kuipa, thangwi ndina anthu azinji mu nzinda muno.” Na tenepo, Paulu akhala mwenemu caka na myezi mitanthatu, mbakhaapfundzisa fala ya Mulungu. Pa n'dzidzi ukhakhala Galyo ntongi wa ku Akaya, madjuda onsene agumanyikana pabodzi pene mbakutira Paulu, mbankwata mbaenda na iye kunatongerwa miseru, mbakhalonga kuti: “Mamuna uyu, asanyengerera mbumba kuti alambire Mulungu mwakusiyana na mwambo!” Paulu mukhafuna iye toma kulonga, Galyo aapanga tenepa madjuda: “Imwe madjuda, ipi mbapidakhala ndi nseru ukulu kakamwe, peno pinthu pya upandu, mbidakubveserani. Mbwenye ndisaona kuti nseru wanu ndi thangwi ya mafala, na ya madzina na ya mwambo wanu. Penepi tonganani mwekha. Ine sinafuna tonga nseru unowu tayu.” Buluka penepo, aathamangisa n'nyumba mwa kutongera miseru. Na tenepo, onsene akutira Soxiteni nkulu wa nyumba ya kuphemberera, mbam'menya patsogolo pa nyumba yakutongera miseru. Mbwenye Galyo hadapitsalakana penepi tayu. Paulu akhala ntsiku zizinji ku Korintu. Buluka penepo apanganizana na abale mbawambuka kwenda ku Sirya, pabodzi na Pirisila na Akila. Mbadzati buluka ku Senkereya, Paulu apala tsisi yace, na thangwi ya cidumbiriro cikhadacita iye kuna Mulungu. Mudafika iwo ku nzinda wa Efesu, Paulu asiya penepo Pirisila na Akila. Mbwenye iye apita n'nyumba ya kuphemberera mbatoma kuketesana na madjuda. Penepo iwo am'phemba kuti akhale na iye pabodzi ntsiku zizinji. Mbwenye Paulu akhonda. Mphapo mukhabuluka iye, Paulu aapanga tenepa: “Ine ndinabwera pontho Mulungu angafuna.” Na tenepo, Paulu abuluka ku Efesu mbapakira xitima ya m'madzi mbaenda. Mudafika iye ku nzinda wa Sezareya aenda ku Djerusalema, mbamwanyikana na nsoka wa anyakutawira Yezu. Buluka kweneko aenda ku nzinda wa Antiyokiya. Pidamala iye ntsiku zingasi mu Antiyokiya, Paulu abuluka mbaenda. Apita na m'pisa pyonsene pya Galasya na pya Firijya mbaenda na pasa mphambvu abale anyakutowera Yezu. Penepo afika ku Efesu n'djuda m'bodzi wa ku dziko ya Alixandiriya anacemerwa Apolo. Iye akhali munthu akhalonga mwadidi, pontho wakudziwisa malemba a m'Bukhu ya Mulungu. Iye akhadapfundziswambo pya Njira ya Mbuya, mbakhalonga pya Yezu na kupfundzisa mwakukwana na mphambvu za Nzimu Wakucena. Mbwenye iye akhadziwa batixmu ya Juwau basi. Penepo pene, Apolo atoma kulonga na cipapu n'nyumba ya kuphemberera ya madjuda. Pirisila na Akila mudamubva iwo, ankwata mbaenda na iye ku nyumba kwawo mbam'pfundzisa mwakukwana Njira ya Mulungu. Mukhafuna kwenda iye ku Akaya, abale a ku Efesu ampasa cipapu, mbalemba matsamba kuli anyakupfundza a Yezu kuti antambire. Mudafika iye kweneko, aphedza pikulu kakamwe ale akhadatawira na kukoma ntima kwa Mulungu. Thangwi Apolo akhaakonesa pakweca madjuda pakuketesana kwawo, na kuapangisa pidalembwa n'kati mwa Bukhu ya Mulungu, kuti Kirixtu ndi Yezu. Apolo mukhakhala iye mu nzinda wa Korintu, Paulu apita na m'pisa pinango pya Azya, mbafika ku Efesu. Kweneko agumana anyakutowera Yezu angasi, mbaabvundza tenepa: “Kodi pidatawira imwe, mwatambira Nzimu Wakucena?” Iwo atawira kuti: “Nkhabe, ife tidzati na kuubva kwene kuti ulipo Nzimu Wakucena.” Paulu aabvundza pontho kuti: “Mphapo mwatambira batixmu yanji?” Iwo atawira kuti: “Tatambira batixmu ya Juwau.” Penepo Paulu aapanga kuti: “Batixmu ya Juwau ikhali ninga cidzindikiro ca kuchunyuka. Iye akhapanga mbumba kuti itawire ule anafuna kudza n'nduli mwace. Unowu, ndi Yezu.” Anthu mudamala iwo kubva penepi, atambiriswa batixmu na dzina ya Mbuya Yezu. Penepo Paulu aaikha manja, Nzimu Wakucena mbudza kuna iwo, onsene mbatoma kulonga malongero anango akukhonda kudziwika, pontho na kulonga ciporofeta. Onsene, panango anacita amuna khumi na awiri. Paulu apita n'nyumba ya kuphemberera ya madjuda, mwenemu mbalonga na ntima wace onsene, pa myezi mitatu mbakhaketesana na iwo, mbakhasaka kuakonesa pa thangwi ya Umambo wa Mulungu. Mbwenye anango pakati pawo auma mitima mbakhonda kutawira. Na tenepo, iwo atoma kulonga kuipa Njira ya Mbuya pamaso pa mwinji wa anthu. Penepo, Paulu abuluka pa nsoka pawo mbakwata anyakutowera Yezu mbaenda na iwo kaapfundzisa ntsiku zonsene mu Xikola ya mamuna m'bodzi anacemerwa Tiranu. Amala pyaka piwiri mbakhacita penepi, mpaka kufikira kuti madjuda onsene na agerego akhakhala mu Azya, abva fala ya Mbuya. Mulungu akhacita pirengo pyakudzumisa na manja a Paulu. Anthu akhafikira kukwata nguwo zikhaphata basa na Paulu, mbaenda nazo kuna atenda. Iwo angazikhuya akhawanga, pontho mizimu ya kuipa ikhabuluka muna iwo. Madjuda anango akhafamba mbabulusa mizimu ya kuipa, akhaleserambo kucita pibodzi-bodzi na dzina ya Mbuya Yezu kuna ale ana mizimu ya kuipa, mbakhalonga kuti: “Ndisakuthamangisani na dzina ya Yezu unowu analonga Paulu.” Amuna enewa akhacita penepi akhali ana anomwe a Seva, nkulu m'bodzi wa anyantsembe a madjuda. Ntsiku ibodzi nzimu wa kuipa waatawira tenepa: “Ine ndisan'dziwa Yezu, pontho ine ndisadziwambo mbani Paulu. Mbwenye imwembo ndimwe ani?” Na tenepo, mamuna akhakhala na nzimu wa kuipa aanumphira mbaakunda, mbaamenya na mphambvu zonsene mbaaphekesa, iwo mbabuluka n'nyumba mbathawa cipezi-pezi. Anthu onsene akhakhala mu Efesu, madjuda na agerego, apibva penepi mbagopa pikulu kakamwe. Penepo, dzina ya Mbuya Yezu ikhakuzwa. Anthu azinji akhatawira, akhabwera mbadambula pamaso pa anthu onsene pinthu pyakuipa pikhacita iwo. Pontho anthu azinji akhacita masalapita, agumanya mabukhu awo akhacita na iwo masalapita, mbaabweresa toera apiswe pamaso pa anthu onsene. Penepo, ungasangizwa ntengo wa mabukhu onsene, ukhakwana pikwi na pikwi pya kobiri za parata. Na tenepo, fala ya Mbuya ikhamwazika mbisimbiswa pikulu kakamwe. Mudamala citika penepi, Paulu anyerezera muntima mwace kwenda ku Djerusalema, mbapita na m'pisa pya Masedhonya na pya Akaya. Iye akhalonga tenepa: “Ndingabuluka ku Djerusalema, ndisatongwa ndiyende ku Roma.” Na tenepo, Paulu atuma andzace akhamphedza awiri, Timoti na Eraxtu kuti aende ku Masedhonya. Mbwenye iye amala pontho ntsiku zingasi mu Azya. Ndi n'dzidzi unowu udaoneka cinkutubvu cikulu mu nzinda wa Efesu na thangwi ya Njira ya Mbuya. Mulivi m'bodzi anacemerwa Dhemetiru, ule akhafula pinthu pya parata pyakulandana na nyumba ya ntsembe ya mulungu wankazi anacemerwa Aritemisi, mbakhapfumisa napyo pikulu kakamwe anyabasa akhaphata na iye, aagumanya, pabodzi na onsene akhaphata mabasa enewa, mbaapanga tenepa: “Imwe musadziwa kuti mpfuma yathu isabuluka pa basa eneyi. Pontho musaona mbamubva pinacita munthu uyu anacemerwa Paulu. Ali kunyengerera na kutaisa mwinji wa anthu, si muno mu Efesu basi tayu, mbwenye na mbuto zizinji za dziko yonsene ya Azya. Iye ali kwenda mbalonga kuti alungu adacitwa na manja a anthu, si alungu tayu. Penepi pisacita kuti malonda athu akhonde kufamba mwadidi. Pontho tisagopa kuti nyumba ya ntsembe ya mulungu wankulu wankazi anacemerwa Aritemisi, ikhonde kulemebza. Si penepi basi tayu. Penepi pinacita kuti mulungu wathu analambirwa n'dziko yonsene ya Azya na dziko yonsene ya pantsi, akhonde kupaswa mbiri ya ulungu wace.” Mbumba mudabva iyo penepi, yaipirwa mbitoma kukhuwa tenepa: “Nkulu ndi Aritemisi wa maefesu!” Pa n'dzidzi ung'ono basi, nzinda onsene ukhali via-via. Pabodzi pene mbumba yaenda na mwansanga pa thando ya kucitira pisango, mbikwekweta Gayo na Arixitariku, amuna awiri a ku Masedhonya akhafamba na Paulu. Paulu akhafuna kuti aende kuna mbumba, mbwenye anyakupfundza an'khondesa. Akulu a utongi a dziko, axamwali ace Paulu, atumiza mphangwa mbaphemba kuti Paulu aleke kwenda ku mbuto inacitirwa pisango. Mukhacitika penepi, mbumba ikhali penepo ikhali via-via. Anango akhakhuwa ipi, anango akhakhuwa pinangombo. Thangwi azinji hakhapidziwa tayu pikhakhalira iwo penepo. Na tenepo, madjuda abulusa Alixande mbam'bhoma kutsogolo. Penepo, Alixande acita cidzindikiro ca kumatamisa anthu, toera akwanise kuapanga mathangwi adapambazirwa iye. Mbwenye mudan'dzindikira iwo kuti ndi n'djuda, amala midzidzi miwiri, mbakhakhuwa onsene pabodzi pene kuti: “Nkulu ndi Aritemisi wa maefesu.” Nyakulemba wa mu nzinda aamatamisa anthu, mbaapanga tenepa: “Imwe anthu a ku Efesu! Mbani anakhonda dziwa kuti nzinda wathu wa Efesu usakoya nyumba ya ntsembe ya Aritemisi wankulu, na dzimunthu yace idagwa buluka kudzulu? Nkhabe m'bodzi anapikhonda penepi. Na tenepo, pfulikani. Lekani thamangira cita cinthu mbamukhonda nyerezera mwadidi. Imwe mwaadzesa pezi amuna awa pano. Nkhabe cinthu cidaba iwo mu nyumba ya ntsembe, pontho hadaxola mulungu wathu wankazi tayu. Ngakhala Dhemetiru na andzace a basa asafuna kusumira munthu, kuna mbuto zakutongera miseru, pontho akulu anyakutonga alipo. Iwo angafuna, mbaende kasumirane kweneko. Mbwenye ngakhala piripo pinango pinafuna imwe, penepi pinagwandika ntsiku ya nsonkhano wa mbumba, ninga munalongera mwambo. Thangwi pinacitika lero ipi tinadza katongwa napyo, mbatilongwa kuti ndife anadzudzumisa makhaliro adidi a mbumba, mbaticimwana kudza kapitawira kwace. Thangwi nkhabe mathangwi a maso.” Pidamala iye kulonga penepi, apanga anthu kuti amwazike. Pidamala cinkutubvu ceneco, Paulu acemeresa anyakutowera Yezu mbaapasa cipapu. Buluka penepo apanganizana na iwo mbaenda ku Masedhonya. Iye afamba cisa cenecire consene, mbakhapasa cipapu abale anyakutawira na mafala mazinji. Pakumalisa afika ku dziko ya Geresya. Kweneko iye amala myezi mitatu. Mukhadamala iye kupaka ulendo wace kuti aende ku Sirya, abva kuti madjuda amala kubverana kuti ancite kuipa. Na thangwi eneyo, anyerezera kuti abwerere pontho na ku cisa ca Masedhonya. Pa ulendo unowu akhaperekerwa na Sopateri, mwana wa Piru, wa ku nzinda wa Bhereya. Pontho akhaperekerwa na Arixitariku na Sekundu, a ku Tesalonika, na Gayo wa ku Dherbhi, na Timoti, pabodzi na Tikiku na Torofimu, a ku dziko ya Azya. Amuna awa atsogola mbaenda katidikhira ku Thorowadhi. Mudamala phwandu ya mikate ya kusowa ntombwe wakutupisa, ife tapakira xitima ya m'madzi buluka ku nzinda wa ku Filipi. Pakumala ntsiku zixanu tagumanikana pontho na iwo ku Thorowadhi. Kweneko tamalako ntsiku zinomwe. Ntsiku ya Dimingu, ife tagumanyikana toera timenye nkate. Paulu alonga kuna mbumba mpaka chiti-chiti, thangwi mangwana mwace akhali na ulendo. N'nyumba ya n'dzulu mukhakhala ife, mukhali na nyale zizinji zikhagaka. M'phale m'bodzi anacemerwa Eutiku, akhakhala nawa pa janera. Mukhapitiriza Paulu na kulonga, m'phale aodzira. Iye aphatwa na citulo cikulu, mbagwa buluka n'nyumba ya n'dzulu kudza pantsi. Mudanthukula iwo, iye akhadafa. Na tenepo, Paulu achita pantsi, agodama mbakhumbatira m'phale, mbalonga tenepa: “Lekani gopa, iye ali m'maso.” Buluka penepo, Paulu akwira pontho, mbamenya nkate mbadya. Aphuphudza na kulonga mpaka kuca. Pidamala iye mbaenda pyace. Penepo iwo, ankwata m'phale mbaenda na iye wa m'maso. Penepi iwo amatamizika napyo pikulu kakamwe. Mbwenye ife taenda mpaka ku xitima ya m'madzi mbatipakira kwenda ku nzinda wa Aso, kule kudaenda ife katambira Paulu. Iye akhadatipanga kuti ticite tenepo, thangwi akhafuna bwera na kuntunda. Mudatigumana iye ku Aso, ife tantambira mu xitima ya m'madzi, mbatipitiriza na ulendo wathu mpaka ku nzinda wa Mitileni. Buluka penepo, mangwana mwace tapita dhuzi na ntsuwa ya Kiyo. Nkucauno mwace tawambuka mbatiyenda pa ntsuwa ya Samu. Pakupita ntsiku ibodzi, mangwana mwace tafika pa gombe ya Miletu. Thangwi Paulu akhadalonga kale kuti tikhonde kulimira mu nzinda wa Efesu, toera akhonde kudembuka n'dziko ya Azya, thangwi akhathamangira kuti pingakwanisika, afike ku Djerusalema phwandu ya Pentikoxti mbidzati. Paulu mukhakhala iye ku Miletu, acemeresa akulu a gereja ya ku Efesu. Mudafika iwo, Paulu aapanga tenepa: “Imwe musadziwa kukhala kukhacita ine pakati panu, kubulukira ntsiku yakutoma idafika ine mu dziko ino ya Azya. Ndaphatira basa Mbuya na kupicepesa konsene, pontho na misozi ya kuleserwa kukulu pa makunje adacitirwa ine na madjuda. Imwe musadziwa kuti ine sidasiya tayu kukupangani pire pyonsene pyadidi, mbwenye ndakupfundzisani pyonsene pakweca, pontho nyumba na nyumba. Ine ndaafotokozera madjuda na agerego, kuti iwo asafuna achunyuke kudawa kwawo, mbabwerera kuna Mulungu, mbakhulupira Mbuya wathu Yezu. [Kirixtu. ] “Cincino, na kukakamizwa na Nzimu Wakucena, ndiri kwenda ku Djerusalema, mbandikhonda kupidziwa mphyanji pinafuna kundicitikira kweneku. Pinadziwa ine ndi kuti m'mizinda monsene Nzimu Wakucena usandipangisa kuti, kupita n'kaidi pontho na nyatwa, pisandidikhira. Mbwenye upulumuki wanga pa nyama, ine sinawo basa tayu. Cikulu kwa ine nkhufikisa pa nkhomu basa idandipasa Mbuya Yezu kuti ndiicite. Basa ya kumwaza Mphangwa Zadidi za kukoma ntima kwa Mulungu. “Cincino ndisadziwa kuti, kuli imwe monsene adamwazira ine Umambo wa Mulungu, nkhabe kudza kaionabve nkhope yanga. Na tenepo, lero ndisakudumbirirani kuti, m'bodzi wanu angataika, thangwi si yanga tayu. Thangwi sidasiya tayu kukupangani pyonsene pidapaka Mulungu. M'bodzi na m'bodzi mbapilang'anire ekha ene, pontho alang'anirembo nkumbi onsene wa mabira udaikhirwa imwe na Nzimu Wakucena kuti mukhale anyakuonerera abale a gereja, idagula Iye na ciropa cace. Thangwi ndisadziwa kuti pa kubuluka kwanga, inabwera mibindzi pakati panu, mbileka kukhala na ntsisi na nkumbi wa mabira. Pakati panu, anadza kaoneka anthu anadza kalonga pya uthambi, toera akwate anyakutowera Yezu aende kuna iwo. Na tenepo, lang'anirani! Kumbukani kuti ndamala pyaka pitatu mbandikhonda puma kukucenjezani na misozi m'maso kuna m'bodzi na m'bodzi, masiku na masikati. “Mphapo cincino, ine ndiri kukuperekani m'manja mwa Mulungu na mwa fala ya kukoma ntima kwace. Iye anakucitani kuti mukule mu Nzimu, na kukupasani unthaka pakati pa onsene anyakulungama. Ine sidasirira parata, peno oro, peno nguwo za munthu. Imwe ene musadziwa kuti ine ndaphata basa na manja anga, toera ndikwanise pikhasowa ine, pontho na pikhasowa andzanga. Pa pyonsene pidacita ine, ndakupangisani kuti tingaphata basa, tisatongwa kuphedza anyakucherenga. Kumbukani mafala adalonga Mbuya Yezu kuti: ‘Kupasa kusatsandzaisa pikulu kakamwe kupiringana kutambira.’ ” Paulu mudamala iye kulonga penepi, agodama pabodzi pene na abale, iye mbaphembera. Na tenepo, onsene alira pikulu kakamwe, mban'khumbatira na kumpsompsona. Pidaatsukwalisa pikulu, ndi kulonga kudacita iye kuti nkhope yanga munadza kaionabve tayu. Buluka penepo, amperekera mpaka pa xitima ya m'madzi. Mudamala ife kupanganizana na iwo, tapakira xitima ya m'madzi mbatiyenderatu ku ntsuwa ya Khosi. Mangwana mwace taenda ku ntsuwa ya Rodhi. Buluka penepo mbatifika ku Patara. Kweneko tagumana xitima ya m'madzi ikhaenda ku dziko ya Finisya, mbatipakira mbatiyenda ulendo wathu. Mukhaona ife ntsuwa ya Xipere na kutali, mbatikhaenda na kukhundu ya ku bangwe, taenda katsamira ku Sirya. Buluka penepo, tachita ku Tiru, kule kukhafuna chitisa mitolo xitima ya m'madzi. Mu nzinda unowu, tagumana anyakutowera Yezu, mbatikhala na iwo pabodzi ntsiku zinomwe. Na tenepo, iwo na kucenjezwa na Nzimu Wakucena, apanga Paulu kuti akhonde kwenda ku Djerusalema. Mbwenye mudakwana ntsiku yathu ya kwenda, tabuluka mbatipitiriza na ulendo wathu. Penepo, abale onsene anyakutowera Yezu na akazi awo, pabodzi na ana awo, atiperekera mpaka kunja kwa nzinda. Kweneko ku gombe, tonsene tagodama mbatiphembera. Pidamala ife panganizana, tapakira xitima ya m'madzi iwo mbabwerera kwenda ku nyumba kwawo. Buluka penepo, tapitiriza na ulendo wathu, tabuluka ku Tiru mbatifika ku Potolemaidha. Kweneko tamwanyikana na abale, mbatikhala na iwo pabodzi ntsiku yamumphu. Mangwana mwace tabuluka mbatifika ku Sezareya, mbatikhala ku nyumba kwa Filipi nyakumwaza Mphangwa Zadidi, m'bodzi wa pa nsoka wa anomwe. Iye akhali na ana ace anai amyali, akhalonga ciporofeta. Pidamala ife ntsiku zizinji, afika kweneko mporofeta m'bodzi adabuluka ku Djudeya, anacemerwa Agabhu. Iye afika dhuzi na ife, akwata bhande ya Paulu mbamangika ekha ene myendo yace na mikono yace, mbalonga tenepa: “Nzimu Wakucena usalonga kuti: ‘Mwanacinthu bhande iyi, madjuda anati am'mange tenepa ku Djerusalema, mbampereka m'manja mwa ale adakhonda kukhala madjuda.’ ” Mudabva ife penepi, ife na abale a kweneko tikhaphemba Paulu kuti aleke kwenda ku Djerusalema. Penepo Paulu, atitawira tenepa: “Thangwi yanji imwe musalira mbamutsukwalisa pikulu ntima wanga? Ine ndiri dzololo, si toera kumangwa basi tayu, mbwenye na kufa kwene mu Djerusalema na thangwi ya dzina ya Mbuya Yezu.” Mbwenye na kukhonda kutibvera, ife tansiya mbatilonga tenepa: “Mbuya mbacite kufuna kwace.” Pakumala penepyo, tasasanyira ulendo wathu mbatiyenda ku Djerusalema. Abale anango adatawira Yezu a ku Sezareya, atiperekera mbatikwata mpaka ku nyumba kwa Manasoni, kukhafuna kufikira ife. Manasoni akhali wa ku Xipere. Iye akhali m'bodzi wakutoma kutawira Yezu. Mudafika ife ku Djerusalema, abale atitambira na kukomerwa konsene. Mangwana mwace, Paulu aenda na ife pabodzi toera akhaonane na Tiyago. Akulu onsene a nsoka wa anyakutawira Yezu, akhali kweneko. Na tenepo, Paulu aamwanyika mbaapanga cibodzi na cibodzi, pyonsene pikhadacita Mulungu na basa yace, pakati pa anthu adakhonda kukhala madjuda. Mudabva iwo penepyo, onsene akuza Mulungu mbalonga kuna Paulu kuti: “Lang'ana m'bale, kuna pikwi na pikwi pya madjuda adatawira Kirixtu, pontho asakakamira Mwambo wa Mozesi. Iwo asabva mbapilongwa kuti imwe musapfundzisa madjuda ali pabodzi na ale adakhonda kukhala madjuda, kuti asiye Mwambo wa Mozesi, mbamuapanga kuti iwo akhonde kusidza ana awo, pontho na kuakhondesa kutoweza mitemo yathu ya kale. Iwo anati abve kuti imwe mwafika muno. Mphapo tinacita tani? Na tenepo, cita pinafuna ife kukupanga. Tinawo pano amuna anai adacita cidumbiriro kuna Mulungu. Ndoko ukhacite na iwo pabodzi ntsembe ya kuceneswa kwawo, uwabulusire ndiwe ntengo wawo wa kulipa, toera apalwe tsisi. Na tenepo, onsene anapidziwa kuti pikhakulongera anthu mphya uthambi, pontho anapidziwa kuti iwe usakakamira mbutoweza Mwambo wa Mozesi. Mbwenye kuli ale adatawira Kirixtu adakhonda kukhala madjuda, ife tamala kualembera kale tsamba mbatiapanga pidabverana ife, kuti iwo akhonde kudya nyama ya pinyama pidaikhirwa ntsembe alungu apezi, akhonde kudya ciropa, akhonde kudya nyama ya pinyama pya kucita bubunyulwa khosi, pontho akhonde kucita pyalukwali.” Mangwana mwace, Paulu akwatana na amuna ale, mbaenda kacita na iwo pabodzi ntsembe ya kuceneswa. Buluka penepo, aenda onsene ku Nyumba ya Mulungu, kwenda kalonga ntsiku inafuna malisirwa iwo kuceneswa na ya kutambira miyoni yawo m'bodzi na m'bodzi. Pikhali izo dhuzi na kumala ntsiku zinomwe, madjuda anango a ku Azya, mudaona iwo Paulu mu Nyumba ya Mulungu, anyengerera anthu onsene, mbam'phata, mbakhakhuwa tenepa: “Imwe amuna a Izarayeli, tiphedzenimbo! Mamuna uyu ndi unowu anapfundzisa anthu onsene m'mbuto zonsene, pire pinakhonda mbumba yathu, pire pinakhondesa Mwambo wa Mozesi, na pinakhondeswa pa mbuto ino. Sipyo basi tayu. Iye asiya agerego mbapita mu Nyumba ya Mulungu, mbaswipisa mbuto ino yakucena pa mwambo.” Iwo alonga penepi, thangwi akhadaona Torofimu mamuna wa ku Efesu mu nzinda, pabodzi pene na Paulu. Na tenepo, akhanyerezera kuti Paulu akhadankwata mbapita na iye mu Nyumba ya Mulungu. Uvia-via unowu wamwazika mu nzinda onsene, anthu mbabwera na kuthamanga. Iwo aphata Paulu, mbam'mburutha mpaka kunja kwa Nyumba ya Mulungu, pa n'dzidzi ubodzi-bodzi misuwo mbifungwa. Mukhafuna iwo kumupha, nkulu wa cikwi ca anyankhondo a ku Roma atambira mphangwa za kuti anthu onsene a mu Djerusalema ali n'cikuti. Iye acemeresa na mwansanga anyankhondo na nkulu wa anyankhondo, mbathamanga na iwo mpaka pakati pa mbumba. Anthu mudaona iwo nkulu wa cikwi ca anyankhondo na anyankhondo ace, asiya kumenya Paulu. Penepo nkulu wa cikwi ca anyankhondo afika dhuzi na Paulu, amphata mbam'manga na unyolo uwiri. Buluka penepo abvundza tenepa: “Mbani mamuna uyu? Acitanji?” Pa mwinji wa anthu, anango akhakhuwa ipi, anango akhakhuwa ipi. Nkulu wa cikwi ca anyankhondo, na kukhonda kupidziwa mwadidi pidacitika thangwi ya uvia-via wa anthu, atuma anyankhondo ace kuti akwate Paulu apite na iye mu mpanda wa nyumba ya anyankhondo. Mudafika iwo pa nkwiriro wa nyumba ya anyankhondo, Paulu acita kwatiwa na anyankhondo, thangwi cikuti ca mbumba cikhadatekera. Mwinji wa anthu ukhantowera, ukhakhuwa tenepa: “Mupheni! Mupheni!” Anyankhondo mukhafuna iwo kumpitisa mu mpanda wa nyumba yawo, Paulu abvundza nkulu wa cikwi ca anyankhondo kuti: “Munandisiya kuti ndilonge na imwe?” Nkulu wa cikwi ca anyankhondo antawira mbam'bvundza tenepa: “Iwe usalonga cigerego? Siwe tayu mamuna ule wa ku Idjipitu adatoma na cikuti ntsiku izi zidapita, mbukwata pikwi pinai pya mapanga mbuyenda na iwo n'thando?” Paulu atawira tenepa: “Ine ndine n'djuda. Ndabalwa ku Tarisu, nzinda wa mbiri ikulu kakamwe wa Silisya. Ndisakuphembani kuti mundisiye ndilonge na mbumba.” Na tenepo, nkulu wa cikwi ca anyankhondo antawirisa kuti alonge. Paulu alamuka mbalimira pa nkwiriro, mbacita cidzindikiro na manja ace kuna mbumba. Penepo, anthu onsene amatama, Paulu mbatoma kulonga na malongero awo a ciebhereu kuti: “Imwe abale anga na ababa anga. Bveserani, cincino funa nditawire pamaso panu pire pidandipambazira iwo.” Mudambva iwo mbakhaapanga na malongero a ciebhereu, iwo apfulikeratu kakamwe. Na tenepo, Paulu alonga kuti: “Ine ndine n'djuda. Ndabalwa ku Tarisu, ku dziko ya Silisya. Mbwenye ndalerwa mu Djerusalema muno. Gamaliyeli ndiye adandipfundzisa mwakukwana mwambo wa akulu athu akale, mbandikhala munthu wa kukakamira kakamwe kucita pinafuna Mulungu, ninga imwembo lero. Ndikhaazonda anthu akhatowera Njira eneyi mpaka kuapha, mbandimanga amuna na akazi mbandiaponya n'kaidi. Nkulu wa anyantsembe, na nsoka wa akulu anyakutonga miseru asapidziwa, pontho anakwanisa kucita umboni wa pinthu penepi. Iwo andipasa matsamba adalembera iwo abale awo a ku nzinda wa Dhamaxku, mbandienda mpaka kweneko kakwata anthu akhatowerera N'njira ya Mbuya, mbandibwera na iwo mu Djerusalema muno ninga anyan'kaidi, toera athabuswe. “Dhuzi na n'dzidzi khumi na uwiri wa ku masikati, mbindiri dhuzi na nzinda wa Dhamaxku, na mwansanga ndaona cieza cikulu cidabuluka kudzulu, mbicindimwanikira n'khundu mwanga. Na tenepo, ine ndagwa pantsi mbandibva fala ikhalonga kuti: ‘Saulo, Saulo, thangwi yanji usandizonda?’ Penepo ine ndam'bvundza kuti: ‘Imwe ndimwe ani Mbuya?’ Iye atawira tenepa: ‘Ine ndine Yezu wa ku Nazareti, ule anazonda iwe!’ Amuna akhaenda na ine aciona cieza, mbwenye fala ya ule akhalonga na ine hadaibvesesa tayu. “Na tenepo, ndabvundza kuti: ‘Mbuya, mphyanji pinafuna kucita ine?’ Mbuya atawira tenepa: ‘Lamuka upite mu nzinda wa Dhamaxku. Mwenemu unapangwa pyonsene pinatongwa iwe kucita.’ Kuyetimira kwa cieza kwandipha maso. Andzanga akhali na ine andiphata nsenzi mpaka ku Dhamaxku. “Mu nzinda unowu, mukhali na mamuna m'bodzi anacemerwa Ananiya. Iye akhali munthu wakuphembera ninga munalongera mwambo, pontho akhali munthu wa kulemebza na madjuda onsene akhali mu nzinda unowu. Iye abwera kudza kaonana na ine. Mudafika iye dhuzi na ine andipanga tenepa: ‘Saulo m'bale wanga, maso ako mbaone.’ Pa n'dzidzi ubodzi ene ndakwanisa kumuona. “Iye andipanga tenepa: ‘Saulo, Mulungu wa ambuya athu akusankhula toera udziwe pinafuna Iye, uone Wakulungama, pontho ubve pinafuna longa Iye na mulomo wace. Thangwi iwe unadza kakhala m'mboni wace kuna anthu onsene, wa pire pidaona iwe, na pidabva iwe. Mphapo cincino usadikhiranji? Lamuka utambiriswe batixmu, utsuke kudawa kwako, mbuphemba na dzina ya Mbuya.’ “Mudabwerera ine ku Djerusalema, mbandikhaphembera mu Nyumba ya Mulungu, ndaphatwa na Nzimu Wakucena, mbindioneswa Mbuya mbakhandipanga tenepa: ‘Cimbiza, buluka na mwansanga mu Djerusalema muno, thangwi iwo nkhabe kudza kakubvera pinafuna iwe longa na thangwi yanga.’ “Ine ndatawira tenepa: ‘Mbuya, amuna awa asapidziwa kuti ine ndikhaenda nyumba na nyumba za kuphemberera za madjuda, mbandikhamanga na kumenya ale akhakutawirani. Mukhapha iwo m'mboni wanu Xitevau, ine ndikhalimbo penepo, mbandikhatawirirambo kufa kwace. Pontho ndine akhakoya nguwo za ale akhamupha! “Na tenepo, Mbuya andipanga kuti: ‘Ndoko, thangwi ine funa ndikutume uyende kutali, kuna ale adakhonda kukhala madjuda.’ ” Mbumba ikham'bvesera. Mbwenye mudatoma iye kulonga mafala enewa, mbumba yatoma kukhuwa tenepa: “Mamuna uyu mbaphiwe! Nkhabe funika akhale m'maso!” Iwo akhakhuwa, mbakhaponya nguwo zawo, uku mbakhawaza mataka kudzulu. Na tenepo, nkulu wa cikwi ca anyankhondo apanga anyankhondo ace kuti akwate Paulu apite na iye mu mpanda wa nyumba ya anyankhondo, ankwapule na kum'bvundzisa toera adziwe ndi thangwi yanji mbumba isakhuwa tenepa kuna Paulu. Mbwenye mukham'manga iwo toera ankwapule, Paulu abvundza kuna nkulu wa anyankhondo a ku Roma akhali dhuzi na iye kuti: “Kodi mwambo wanu usatawirira kumenya munthu wa ku Roma iye mbadzati kutongwa?” Nkulu ule wa anyankhondo mudabva iye penepi, aenda kuna nkulu wa cikwi ca anyankhondo mbampanga tenepa: “Nyerezera mwadidi pinafuna iwe kucita! Mamuna uyu ndi mu Roma!” Na tenepo, nkulu wa cikwi ca anyankhondo aenda kalonga na Paulu mbam'bvundza tenepa: “Ndipange, kodi iwe ndiwe mu Roma?” Paulu atawira kuti: “Ande, ndine mu Roma.” Penepo, nkulu wa cikwi ca anyankhondo alonga tenepa: “Ine toera ndithuliwe mu Roma, ndabvunga kobiri zizinji.” Mbwenye Paulu atawira kuti: “Ine ndine mu Roma wa kubaliwa.” Na mwansanga, onsene akhafuna kunkwapula ansiya. Na iye ene nkulu wa cikwi ca anyankhondo agopa, na kubva kuti Paulu uyu akhadamanga iwo, ndi mu Roma. Nkulu wa cikwi ca anyankhondo akhafuna kudziwa mwadidi mwene ndi thangwi yanji madjuda asumira Paulu. Na tenepo, mangwana mwace, apanga anthu ace kuti ansudzule unyolo ukhadamangwa na iye, mbacemeresa akulu aanyantsembe, na akulu onsene anyakutonga miseru, kuti agumanyikane. Buluka penepo, acemeresa Paulu mbamuikha patsogolo pawo. Na tenepo, Paulu aalang'anisa mwadidi mwene akulu anyakutonga miseru, mbalonga tenepa: “Abale anga! Mpaka lero ndisacita pinafuna Mulungu na manyerezero anga adidi onsene a muntima.” Mbwenye Ananiya, nkulu wa anyantsembe, apanga anthu akhali dhuzi na Paulu kuti am'menye pa mulomo. Na tenepo, Paulu ampanga Ananiya kuti: “Ndiwe nyauthambi. Mulungu anakuonesa nyatwa. Iwe wakhala penepo toera unditonge ninga munalongera mwambo, mphapo iwe usandimenyesa pontho? Penepi si pya mwambo tayu!” Amuna akhali dhuzi na Paulu alonga tenepa: “Iwe, uli kutikana nkulu wa anyantsembe wa Mulungu?” Paulu atawira tenepa: “Abale anga, ine sikhapidziwa tayu kuti iye ndi nkulu wa anyantsembe. Thangwi Bukhu ya Mulungu isalonga kuti: ‘Leka kulonga pyakuipa kuna atongi a mbumba yako.’ ” Na tenepo, Paulu na kudziwa kuti anango pa anyakutonga miseru akhali a nsoka wa ndale wa asadhusi, anango akhali a nsoka wa ndale wa afarisi, akhuwa mbalonga tenepa: “Abale anga, ine ndine nfarisi, pontho ndine mwana wa afarisi. Ndisatongwa pano, na thangwi ya cidikhiro cina ine ca kuti anyakufa analamuka!” Mudamala iye kulonga penepi, afarisi na asadhusi atoma kuketesana, nsoka wa anyakutonga mbugawana. (Thangwi asadhusi nkhabe tawira kuti anyakufa analamuka, pontho nkhabe tawira kuti alipo maanju peno mizimu. Mbwenye afarisi asatawira pyonsene ipi.) Na tenepo, onsene atoma kukhuwa pikulu kakamwe. Penepo, anyakudziwisa anango a Mwambo a nsoka wa ndale wa afarisi, alamuka mbatoma kuketesana pikulu kakamwe, mbalonga tenepa: “Nkhabe cakuipa cibodzi cidaona ife kuna mamuna uyu. Mbani anapidziwa kuti ndi anju peno ndi nzimu udampanga penepi?” Kuketesana kweneku kukhadatekereratu kakamwe, kufikira kuti nkulu wa cikwi ca anyankhondo mbakhagopa kuti Paulu anati aphiwe na manja. Na thangwi eneyo, apanga anyankhondo kuti achite toera am'buluse Paulu na mphambvu pakati pawo, ankwate aende na iye mu mpanda wa nyumba ya anyankhondo. Na masiku mwace, Mbuya abwera kuna Paulu mbampanga tenepa: “Leka gopa! Ninga umboni udandicitira iwe mu Djerusalema muno, usafunika uyende kandicitirembo ku Roma.” Mangwana mwace na macibese, madjuda abverana kucita makunje, mbadumbira pamaso pa Mulungu kuti iwo nkhabe kumwa peno kudya cinthu mbadzati kupha Paulu. Amuna akhadabverana kucita makunje enewa, akhadapiringana makumanai. Iwo aenda kalonga na akulu aanyantsembe, na mathubu kuti: “Ife tadumbira pamaso pa Mulungu mbatipikira kuti nkhabe kudya cinthu, mbatidzati kupha Paulu. Cincino, imwe na akulu anyakutonga miseru, phembani nkulu wa cikwi ca anyankhondo kuti an'dzese Paulu patsogolo panu, mucite ninga musafuna kuubvesesa mwadidi nseru wace. Iye mbadzati kufika pano, ife anatigumana tamala sasanyira kuti timuphe.” Mbwenye n'dzukulu wace Paulu wa mamuna, kubala kwa mwana-nkazi wace, aabva makunje enewa. Penepo, abuluka mbapita mu mpanda wa nyumba ya anyankhondo, mbalonga pyonsene kuna Paulu. Na tenepo, Paulu acemera nkulu m'bodzi wa anyankhondo, mbampanga kuti: “Kwata m'phale uyu uyende na iye kuna nkulu wa cikwi ca anyankhondo. Thangwi iye ana pinthu pyakufuna kumpanga.” Nkulu wa anyankhondo, ankwata mwana mbaenda na iye kuna nkulu wa cikwi ca anyankhondo, mbalonga tenepa: “Paulu adamangiwa ule, andicemera mbandiphemba kuti ndikwate m'phale uyu ndidze na iye kuna imwe, thangwi iye ana pinthu pyakufuna kukupangani.” Nkulu wa cikwi ca anyankhondo, aphata mwana pa nkono mbaenda na iye pa khundu, mbam'bvundza tenepa: “Ninji pinafuna iwe kundipanga?” Iye atawira kuti: “Madjuda abverana kukuphembani toera mukwate Paulu mangwana, mwende na iye kuna akulu anyakutonga, mbapambazira kuti asafuna kuubvesesa mwadidi nseru wace. Mbwenye imwe lekani kupitawira penepi. Thangwi amuna akupiringana makumanai anabisala mbadikhira Paulu kuti ancite makunje. Iwo onsene amala dumbira patsogolo pana Mulungu kuti nkhabe kumwa peno kudya cinthu, mbadzati kupha Paulu. Pa n'dzidzi uno, onsene amala sasanyira kuti acite penepi. Asadikhira imwe basi kuti muatawirise.” Nkulu wa cikwi ca anyankhondo ampanga kuti: “Ndoko pyako. Leka kupanga munthu kuti iwe wandipanga penepi.” Na tenepo, nkulu wa cikwi ca anyankhondo acemera atsogoleri awiri aanyankhondo, mbaapanga kuti: “Gumanyani madzana mawiri a anyankhondo, na anyamakavalo makumanomwe, na madzana mawiri a anyamadipa, toera masiku ano, pa n'dzidzi upfemba, abuluke aende ku nzinda wa Sezareya. Sasanyiranimbo makavalo toera Paulu akwatiwe na iwo, mbamumwonerera mwadidi mpaka kuna ntongi Feliji.” Buluka penepo, nkulu wa cikwi ca anyankhondo alemba tsamba ikhalonga tenepa: “Ndine pano Kalaudhyo Lisiyasi. Ndisakumwanyikani imwe wakulemedzeka, ntongi Feliji. Mamuna uyu akhadamangwa na madjuda mbakhafuna kumupha. Ine na anyankhondo anga mudafika ife tampulumusa, thangwi tabva kuti iye ndi wa ku Roma. Ine ndikhafuna dziwa kuti ndi thangwi yanji iwo ansumira. Na tenepo, ndanyerezera kunkwata mbandienda na iye kuna nsoka wa akulu awo anyakutonga miseru. Penepo ndi padadziwa ine kuti thangwi idansumira iwo ikhali ya mwambo wawo basi. Nkhabe cinthu ca upandu cidacita iye kuti atongerwe kuphiwa, peno apitiswe naco n'kaidi. Mudapibva ine kuti madjuda asafuna kuncita makunje, na mwansanga ndantumiza kuna imwe. Pontho ndapanga ale adansumira kuti abwere kuna imwe, adze kalonga thangwi idansumira iwo.” Na tenepo, anyankhondo acita pire pidapangwa iwo. Ankwata Paulu na masiku, mpaka ku Antipatirisi. Mangwana mwace, asiya anyamakavalo mbapitiriza na ulendo wa kwenda na Paulu, iwo mbabwerera ku mpanda wa nyumba ya anyankhondo. Pidafika iwo ku Sezareya, apereka tsamba na Paulu ene kuna ntongi. Ntongi, pakumala kuona tsamba, abvundza Paulu kuti asakhala dziko ipi. Mudan'dziwa iye kuti Paulu ndi wa ku dziko ya Silisya, alonga tenepa: “Ale adakusumira angafika pano, ndinadza kaubva nseru wako.” Buluka penepo, abulusa ntemo kuti Paulu aende kaonererwe mu nyumba ya mambo Herodhi. Pakumala ntsiku zixanu, Ananiya, nkulu wa anyantsembe, aenda ku Sezareya pabodzi pene na mathubu angasi a madjuda, pontho na nyakubvunulira miseru m'bodzi anacemerwa Teritulo. Iwo aenda kasumira Paulu kuna ntongi Feliji. Mudacemerwa Paulu, Teritulo asuma kuna Feliji mbalonga tenepa: “Utongi wanu watidzesera n'dzidzi ukulu wa ntendere, pontho ndzeru zanu za kutonga zacita kuti aoneke makhaliro mapsa a udidi kuna mbumba. Tisapereka takhuta kuna imwe wakulemedzeka pikulu, ntongi Feliji, na pyonsene pidatambira ife mu mbuto zonsene. Mbwenye ine, toera ndikhonde kukuberani n'dzidzi, ndisakuphembani na ntsisi zanu zonsene kuti mutibveserembo pang'ono basi. Ife tisaona kuti mamuna uyu asatisosera kulonga pakati pathu. Asanyengerera madjuda onsene a pantsi pano kuti acite pikuti. Ndiye n'tsogoleri wakutoma wa nsoka wa ku Nazareti. Pontho iye akhadalesera kuswipisa pa mwambo Nyumba ya Mulungu. Na tenepo, ife tam'manga [mbatikhafuna kuntonga ninga munalongera mwambo wathu. ] Mbwenye Lisiyasi, nkulu wa cikwi ca anyankhondo, abwera mbatipokosera m'manja mwathu na mphambvu, mbapanga anyakunsumira kuti abwere kabulukire pamaso panu. Imwe mungam'bvundzisa penepi mamuna uyu, munaona kuti pyonsene pinansumira ife, ndimo mwene.” Na madjuda ene, apitawirirambo kuti pidalonga Teritulo, ndimo mwene. Ntongi acita cidzindikiro toera Paulu alongembo. Penepo, Paulu alonga kuti: “Ine ndisadziwa kuti muna pyaka pizinji mbamutonga miseru n'dziko ino. Na thangwi eneyi, ndinalonga pamaso panu na kukomerwa konsene, mathangwi adandisumira iwo. Sakani, munapidziwa, kuti zapita ntsiku khumi na ziwiri basi, mudaenda ine kalambira Mulungu ku Djerusalema. Nkhabe m'bodzi wawo awa adandisumira, andiona mbandikhaketesana na munthu mu Nyumba ya Mulungu, peno kunyengerera mwinji wa anthu m'manyumba a kuphemberera a madjuda, peno m'mbuto zinango za mu nzinda. Pontho iwo anacimwana kupangisa cibodzi pakweca, pa pinthu pire pyonsene pinandisumira iwo. Mphapo cibodzi cinafuna ine kukupangani ndi ici: Ine ndisalambira Mulungu wa a mbuya athu, mbanditowera njira inacemera iwo ya uthambi. Ndisatawira pyonsene pinabverana na mwambo wa Mozesi, na m'mabukhu a maporofeta. Pontho ndina cidikhiro cibodzicene kuna Mulungu ninga cawo, cinalonga kuti: Kunaoneka kulamuka pa kufa kwa anyakulungama na kwa anyakukhonda kulungama. Na thangwi eneyo, ndisacita pyonsene midzidzi yonsene, toera ndikhonde kukhala na thangwi pa manyerezero anga a muntima pamaso pa Mulungu, na pamaso pa anthu. “Pakupita pyaka pizinji mbindiri kunja kwa nzinda wa Djerusalema, ndabwerera pontho kweneko toera ndikhapase pinthu anyakucherenga a mbumba yanga, na kupereka ntsembe kuna Mulungu. Mukhacita ine penepi, pakumala kucita mwambo wa kupicenesa, iwo andigumana mu Nyumba ya Mulungu. Sikhali na nsoka wa anthu, pontho sikhacita cikuti tayu. Mbwenye madjuda anango a ku Azya akhali penepo. Enewa ndiwo akhatongwa kuti adze kasume patsogolo panu, ngakhala ana cinthu ca kundisumira. Peno mbalonge iwo amuna ali pano awa, ngakhala ciripo ca upandu cidacita ine ntsiku eneyo, pikhakhala ine patsogolo pa akulu anyakutonga miseru. Peno ndi thangwi ya mafala awa: Mukhali ine dzololo patsogolo pawo, ndalonga na mphambvu kuti: ‘Lero musanditonga pano, thangwi ndisatawira kuti anyakufa analamuka pa kufa.’ ” Na tenepo, Feliji, na kuti akhapidziwa mwadidi mwene pya Njira ya Mbuya, adaumalisirabve tayu kuutonga nseru, mbalonga tenepa: “Angafika Lisiyasi, nkulu wa cikwi ca anyankhondo, ndinadza kautonga nseru wanu.” Iye apanga nkulu wa anyankhondo kuti Paulu aonererwe, mbwenye amulekerere pang'ono, pontho aleke kukhondesa axamwali ace kum'bweresera pinthu. Pakumala ntsiku zingasi, Feliji na nkazace wa n'djuda, anacemerwa Dhurusira, acemeresa Paulu toera amubve mbalonga na thangwi ya kukhulupira muna Kirixtu Yezu. Paulu mudatoma iye kulonga na thangwi yakulungama, na ya kupiphata ntima, na ya ntsiku ya kutongwa kunafuna kudza, Feliji agopa, mbalonga tenepa: “Pa ntsiku ya lero pyakwana, ndoko pyako. Pingafunika, ndinadza kakucemeresa pontho.” Si thangwi eneyi basi tayu. Feliji akhadikhira kuti Paulu ampasembo kobiri. Na thangwi eneyo, akhancemeresa kazinji kene toera aceze na iye. Pakupita pyaka piwiri, Porisyo Fextu apita pa mbuto ya Feliji, mbakhala ntongi. Mbwenye Feliji, toera akome kuna madjuda, asiya Paulu n'kaidi. Pakupita ntsiku zitatu, Fextu mbadamala kufika kale mu Sezareya, abuluka mbaenda ku Djerusalema. Kweneko, akulu aanyantsembe na atsogoleri a madjuda, aenda kuna Fextu kasumira Paulu. Iwo aphemba kuna Fextu kuti aabvere ntsisi, abuluse Paulu amwendese ku Djerusalema, Paulu mbakhonda kupifuna, thangwi iwo akhadamala bverana kale kuti aphe Paulu n'njira. Mbwenye Fextu aatawira tenepa: “Paulu ali n'kaidi ku Sezareya. Ine cincino ndinenda kweneku. Ndipase atsogoleri ako angasi ndiyende na iwo kweneko, aende kalonge pinthu pyakuipa pidaona iwo kuna mamuna uyu, ngakhala iye acitadi pyakuipa.” Pakupita na iwo pabodzi ntsiku zisere peno khumi, Fextu abuluka mbabwerera kwenda ku Sezareya. Mangwana mwace, akhala mu nyumba ya kutongera miseru, pontho acemeresa Paulu kuti akhalembo penepo. Pidafika Paulu, madjuda akhadabwera buluka ku Djerusalema, anzungulira mbatoma kumpambazira pinthu pizinji pyakugopsa. Mbwenye nkhabe cibodzi cidakwanisa iwo kupangisa pakweca. Na tenepo, Paulu atoma kutawira pikhampambazira iwo mbalonga kuti: “Ine nkhabe cibodzi cidacita ine cakuipa cakupwaza mwambo wa madjuda, peno kuxola Nyumba ya Mulungu, peno kuxola mambo Sezari.” Fextu toera akome kuna madjuda, abvundza Paulu kuti: “Iwe nkhabe funa kwenda ku Djerusalema, ukhatongerwe kweneku nseru wako pamaso panga?” Paulu atawira tenepa: “Ndiri pano pa thando ya kutongera miseru ya mambo Sezari. Pano ndipo panafunika ine kuti nditongwe. Imwe musapidziwa kuti nkhabe cakuipa cibodzi cidacita ine kuna madjuda. Ngakhala ndadawisa, peno ciripo cinthu cidacita ine cakutongerwa kuphiwa naco, sinakhonda kufa tayu. Mbwenye ngakhala sipyo tayu, nkhabe m'bodzi anafuna kundipereka kwa iwo, ndisaphemba kuti nditongwe na mambo Sezari.” Pakumala kulonga na mapungu ace, Fextu alonga tenepa: “Iwe waphemba kwenda kuna Sezari! Unati uyende kuna Sezari.” Pakupita ntsiku zingasi, mambo Agiripa na Bherenise, afika ku Sezareya toera kamwanyikana na Fextu. Na thangwi ya ntsiku zizinji zikhadakhala iwo mwenemu, Fextu atoma kulonga nseru wa Paulu kuna mambo Agiripa kuti: “Pano pana mamuna m'bodzi adasiyiwa n'kaidi na Feliji. Mudaenda ine ku Djerusalema, akulu aanyantsembe na mathubu a madjuda, adza kansumira mbandiphemba kuti ndintonge na kunkonesa. “Mbwenye ine ndaapanga kuti Aroma nkhabe nsambo wakukonesa munthu, mbadzati pakutoma kubva anyakusuma, pamaso pa nyakusumirwa, toera nyakusumirwa akwanise kutawira pidapambazirwa iye. Pakubwera kwawo kuno iwo na ine, sidadembukabve tayu. Mangwana mwace ndakhala mu nyumba ya kutongera miseru, mbandincemeresa mamuna unowu. Anyakusuma mudatoma iwo kulonga, nkhabe ca upandu cidamulongera iwo, ninga mukhanyerezera ine. Cibodzi cidansumira iwo maka-maka cikhali ca thangwi ya kuphembera kwawo, pontho na thangwi ya mamuna unango m'bodzi adafa anacemerwa Yezu, analonga Paulu kuti ali m'maso. Ine, ndzeru za kusaka kudziwa nseru wace, zikhadandimalira. Na thangwi eneyo, ndam'bvundza Paulu ngakhala asafuna kwenda katongwa ku Djerusalema pire pidasumirwa iye. Mbwenye na kuphemba kudacita Paulu kuti atongwe na mambo Sezari, ndabulusa ntemo kuti aonererwe, mpaka ntsiku inafuna ine kumuyendesa kuna Sezari.” Na tenepo, Agiripa apanga Fextu kuti: “Ine ndikhafunambo ndimubve mamuna unowu.” Fextu atawira tenepa: “Mangwana imwe munamubva.” Mangwana mwace, Agiripa na Bherenise atambirwa na mbiri ya cilemedzo consene ca utongi, mbapita n'nyumba mukhabviwa miseru ya anthu pabodzi na akulu a cikwi ca anyankhondo, na amuna akulu-akulu a mu nzinda, Fextu mbacemeresa Paulu. Na tenepo, Fextu alonga kuti: “Mambo Agiripa na monsene muli pano, mwamuona mamuna uyu! Madjuda onsene a muno mu Sezareya na a ku Djerusalema, asandiphemba kuti mamuna uyu aphiwe. Mbwenye ine ndaona kuti nkhabe cibodzi cidadawa iye cakutongerwa kuphiwa naco, pontho na thangwi ya kuphemba kudacita iye kuti atongwe na mambo Sezari, ndantawirira kuti aende ku Roma. Mphapo mpaka lero, nkhabe kupidziwa mwadidi pinafuna kulemba ine kuna imwe mbuya Sezari, pa thangwi ya nseru wace. Na thangwi eneyo, ndam'bweresa pano patsogolo panu, maka-maka kuna imwe mambo Agiripa, kuti mum'bvundze mwadidi, toera ndikwanise kuona cinthu cakulemba. Thangwi ndisaona kuti si pyadidi tayu kupereka nyamiseru, mbatikhonda kualonga mwadidi mathangwi adasumirwa iye.” Na tenepo, mambo Agiripa apanga Paulu kuti: “Watawirirwa kuti ulonge nseru wako tiubve.” Penepo Paulu acita cidzindikiro na manja ace mbatoma kulonga mathangwi ace tenepa: “Mambo Agiripa! Ndakomerwa pikulu kakamwe lero, na kukhala patsogolo panu, kuti ndilonge mathangwi a pyonsene pidandipambazira madjuda. Maka-maka thangwi imwe musadziwa mwadidi mwene, mitemo yonsene ya madjuda na kukhonda kubverana kwawo. Na tenepo, ndisaphemba kuti mundibvesere na kukhurudzika. “Madjuda onsene asadziwa makhaliro anga pakati pawo, kutomera pa uwana wanga mpaka lero, ku dziko idabalwa ine na ku Djerusalema kwene. Iwo asandidziwa na kale ene, angafuna kundicitira umboni, iwo analonga kuti ine ndikhali m'bodzi wa afarisi, nsoka wa ndale wakutoweza pikulu kakamwe pa mwambo wathu wa kuphembera. Cincino ndiri pano mbanditongwa, na thangwi ya cidikhiro cina ine ca cipikiriro cidacita Mulungu kuna a mbuya athu. Madzindza athu khumi na mawiri analambira Mulungu masiku na masikati, akhadikhirambo kuti acione cipikiro ceneci. Ndi thangwi ya cidikhiro ceneci mambo, cinasumirwa ine na madjuda. Kodi ndi thangwi yanji imwe musanyerezera kuti nkhabe kwanisika kuna Mulungu kulamusa anthu a kufa? “Na inembo ndikhadamala sasanyira pyonsene pikhafunika, toera kupingiza kubvekera kwa dzina ya Yezu wa ku Nazareti. Penepi ndipyo pidacita ine ku Djerusalema. Ndatawiriswa na akulu aanyantsembe, mbandikwata mbumba izinji ya Mulungu mbindiyikha n'kaidi. Angatongwa kuti aphiwe, ine ndikhatawirirambo kuti aphiwe. Kazinji kene ndikhaenda mbandiathabusa m'manyumba mwawo a kuphemberera, mbandikhaakakamiza kuti axole Mulungu. Na kuipirwa na iwo kukulu kukhakhala na ine, ndafikira kwenda mbindiafambira n'nduli m'mizinda ya madziko anango. “Na thangwi eneyi, ndaenda mpaka ku nzinda wa Dhamaxku, na mphambvu za kutawiriswa kudacita ine na akulu aanyantsembe. Lang'anani mambo, pikhaenda ine na mu nseu, pa n'dzidzi khumi na uwiri wa masikati, ndaona cieza kudzulu cakuyetimira pikulu kakamwe kupiringana dzuwa. Cieza ceneci cagaka mbacigudumira ine na ale akhaenda na ine. Tonsene tagwa pantsi. Na tenepo, ine ndabva fala ikhandipanga na malongero a ciebhereu mbilonga kuti: ‘Saulo, Saulo! Thangwi yanji usandichinga? Ungakakamira menyana na Ine, unaona nyatwa!’ “Penepo ine ndabvundza kuti: ‘Ndimwe ani Mbuya?’ “Mbuya atawira tenepa: ‘Ine ndine Yezu, ule anachinga iwe. Cincino, lamuka ulimire na myendo yako. Ine ndadza kuna iwe kakusankhula kuti ukhale nyabasa wanga, na m'mboni wanga wa pinthu pidaona iwe, na pinango pinadza kafuna kukupangisa ine. Ine ndinakuombola kuna madjuda, pontho na kwa ale adakhonda kukhala madjuda, kule kunafuna kukutuma ine. Iwe unenda kaafungula maso awo, toera uwabwerese buluka n'cidima kudza n'cieza, pontho uwabuluse mu mphambvu za Sathani adze kuna Mulungu, toera alekererwe madawi pontho atambire unthaka pakati pa ale adaceneswa na thangwi ya kundikhulupira.’ “Na tenepo mambo Agiripa, ine ndacimwana khonda kubvera pinthu pya kudzulu pidaoneswa ine mu Nzimu. Mbwenye Mphangwa zenezi, pakutoma ndazimwaza ku Dhamaxku. Buluka kweneku mbandiyenda ku Djerusalema na m'pisa pyonsene pya Djudeya, pontho na kuli ale adakhonda kukhala madjuda. Onsene ndikhaapanga kuti achunyuke kudawa kwawo, abwerere kuna Mulungu, acite pinthu pinapangisa kuti iwo achunyukadi. Ndi thangwi eneyi idandiphatira madjuda pikhakhala ine mu Nyumba ya Mulungu, mbakhafuna kundipha. Mbwenye mpaka lero Mulungu ali kundiphedza. Ndi thangwi eneyi lero ndiri pano mbindicita umboni kuna imwe monsene anyakupwazika na anyakulemedzeka. Nkhabe cibodzi cidalonga ine kupiringana pidalonga maporofeta na Mozesi, kuti pinadza kacitika. Thangwi iwo akhalonga kuti Kirixtu anati aone nyatwa, pontho atome ndiye kulamuka pa kufa, amwaze cieza ca upulumuki kuna madjuda na kuna ale adakhonda kukhala madjuda.” Paulu mukhatawira iye pikhapambazirwa iye, pa n'dzidzi ubodzi ene Fextu akhuwa mbalonga tenepa: “Paulu, iwe ndiwe nyansala! Wapfundza maka, mbwenye kupfundza kwako, kusakupasa nsala!” Paulu atawira tenepa: “Ine sinansala tayu, imwe wakulemedzeka mambo Fextu. Pinalonga ine ndimo mwene, pontho ndi pya ndzeru. Mambo Agiripa, asapidziwa pyonsene, pontho siri kum'bisira cinthu tayu. Ine ndisadziwa kuti iye apibva pyonsene ipi, thangwi pidacitika pakubisala tayu. Mambo Agiripa, imwe musatawira pidalonga maporofeta? Ine ndisadziwa kuti imwe musapitawira!” Na tenepo, Agiripa ampanga Paulu kuti: “Iwe usanyerezera kuti pa n'dzidzi ung'ono basi, unakwanisa kundinyengerera mbundikunda kuti nditawire Kirixtu?” Paulu atawira tenepa: “Ine ndiri kuphemba Mulungu kuti pa n'dzidzi ung'ono peno ukulu, si kuna imwe basi tayu, mbwenye kuli anthu onsene anandibvesera lero, adze kakhalembo ninga ine, mbwenye mbakhonda kumangwa na njema.” Penepo mambo Agiripa alamuka, pabodzi na ntongi, na Bherenise na onsene akhakhala na iwo. Abuluka mbalonga okha-okha kuti: “Mamuna uyu nkhabe cinthu cidacita iye cakutongerwa kuphiwa, peno apitiswe naco n'kaidi.” Na tenepo, Agiripa apanga Fextu kuti: “Mbadakhonda phemba kuti atongwe na Sezari, mbadabuluswa n'kaidi.” Mudakwana iwo n'dzidzi udatongwa ife kubuluka kuti tiyende na xitima ya m'madzi ku dziko ya Italya, Paulu na anango akhali n'kaidi, aperekwa m'manja mwa nkulu wa anyankhondo anacemerwa Djulyo, akhali wa nsoka wa anyankhondo a Sezari. Ife tabuluka ku Sezareya mbatipakira xitima ya m'madzi, ya ku nzinda wa Adharamitu, ikhafuna buluka kwenda mbuto zinango za madziko a Azya. Tabuluka mbatiyenda pabodzi na Arixitariku, m'bodzi wa ku Masedhonya, wa mu nzinda wa Tesalonika. Mangwana mwace, tafika pa gombe ya Sidhoni. Djulyo, apangisa kukoma ntima kwace kuna Paulu, mbantawirisa kuti abuluke aende kaonana na axamwali ace, toera iwo am'phedze. Mudabuluka ife mu Sidhoni, taenda na kunkwiriro kwa ntsuwa ya Xipere, thangwi tikhatanda mphepo ikhadza kuna ife. Tawambuka bara, mbatipita na n'khundu-n'khundu mwa dziko ya Silisya na ya Panfilya, mbatifika ku nzinda wa Mira, ku dziko ya Lisya. Kweneko, nkulu wa anyankhondo a ku Roma, agumana xitima ya m'madzi ya ku nzinda wa Alixandiriya ikhaenda ku Italya, mbatipakiza mwenemu. Tamala ntsiku zizinji mbatiyenda na nentseka cimadzi-madzi pang'ono-pang'ono, mpaka kufika dhuzi na nzinda wa Kinidhu. Mbwenye na kuona kuti mphepo ikhadza kuna ife ikhatinentsa pikulu kakamwe, tacimwana kupitiriza na ulendo wathu, mbatichinduka kutanda mphepo, mbatiyenda na khundu ya kubangwe kwa ntsuwa ya Kereta, dhuzi na Salomona. Na tenepo, taenda mbatinentseka na n'khundu-n'khundu mwa gombe, mbatifika pa mbuto inango inacemerwa Magombe Adidi, dhuzi na nzinda unacemerwa Lazeya. Penepo takhalapo ntsiku zizinji, pontho pikhali pyakugopsa kupitiriza na ulendo wathu thangwi ntsiku za condzi zikhafika. Na thangwi eneyo, Paulu aacenjeza mbalonga tenepa: “Amunamwe, ndiri kuona kuti kubulukira pano kwenda kutsogolo, ulendo wathu unati unentse. Tinaluza xitima ya m'madzi, mitolo, pontho na ife ene.” Mbwenye nkulu wa anyankhondo a ku Roma, akhakhulupira pikulu kakamwe kuna nyakutekenya na mwanaciro xitima ya m'madzi, kupiringana pikhalonga Paulu. Na thangwi yakusoweka mbuto yadidi pa gombe, pa n'dzidzi wa khoni, azinji anyerezera kuti apitirire pyawo, aone ngakhala anakwanisa fika ku Fenise, toera n'dzidzi wa khoni uwamalire kweneku. Nzinda unowu ndi gombe ya ku Kereta ikhakhala na khundu ibodzi ikhalang'anira ku bangwe, khundu inango ikhalang'anira ku mbalu. Yatoma kumenya mphepo pang'ono ya bangwe. Na tenepo, iwo anyerezera kuti pikhafuna iwo pyakwana. Na thangwi eneyo, abulusa nangula, mbaenda na n'khundu-n'khundu mwa gombe ya Kereta. Mbwenye na mwansanga, cabwera conzi cikulu kakamwe ca mphepo inacemerwa Mulolo, ikhabuluka ku ntsuwa. Xitima ya m'madzi yakwekwetwa na conzi, mbiicimwana kukunda mphepo. Na tenepo, tasiya kuzungunusa mbatiileka mbiyenda pyayo mbiberuka. Mukhatanda ife mphepo, tapita na kukhundu ya bangwe kwa ntsuwa ing'ono inacemerwa Kaudha. Na kunentseka konsene, takwanisa kuphatirira mwadiya wathu. Anyakutekenya xitima ya m'madzi acita mphambvu zonsene, akwata mwadiya mbauikha mu xitima ya m'madzi, mbamangira xitima ya m'madzi na nkhambala zakuwanga gopa inasweka. Iwo akhagopa kuti xitima ya m'madzi inadza kakwekwetwa mbiyenda kacherera m'macheca a ku Sirite. Na tenepo, afunya mathanga, mbasiya xitima ya m'madzi kuti iyende pyayo mbiberuka na mphepo. Na thangwi ya kumenyiwa na conzi cikulu, mangwana mwace tatoma kutaya mitolo m'madzi. Nkuca uno mwace, anyakutekenya apitaya m'bara na manja awo, pyombo pya xitima ya m'madzi. Tamala ntsiku zizinji mbatikhonda kuona dzuwa peno nyenyezi, pontho conzi cikhatimenya basi. Pakumalisa, tikhadikhirabve kuti tinapulumuka pontho tayu. Na thangwi ya kumala ntsiku zizinji anthu mbakhonda kudya cinthu, Paulu alimira pakati pawo mbalonga tenepa: “Amunamwe, imwe mbamudandibvera pidalonga ine kuti tikhonde kubuluka ku Kereta, nyatwa izi na pidaluza ife, mbapidaoneka tayu. Mbwenye cincino ndisakuphembani kuti mukhale na cipapu, thangwi nkhabe m'bodzi wanu anafuna kufa. Tinaluza xitima ya m'madzi basi. Ndisalonga penepi, thangwi masiku, abwera kuna ine anju wa Mulungu wanga anaphatira ine basa, mbandipanga tenepa: ‘Paulu, leka gopa! Iwe usatongwa uyende kabulukira kuna Sezari, pontho Mulungu na kukoma ntima kwace, akupasa upulumuki pa nyama, wa onsene ali na iwe pa ulendo.’ Na tenepo, amunamwe, khalani na cipapu! Ine ndisakhulupira Mulungu kuti pinacitika sawa-sawa ninga mudandipangira Iye. Mbwenye tisatongwa tiyende kabulukira pa ntsuwa ibodzi.” Tamala ntsiku khumi na zinai mbatikhabhomiwa na conzi ca mphepo khundu na khundu, mu bara inacemerwa Adhiriyatiku. Mukhacita chiti-chiti ya masiku, anyakutekenya xitima ya m'madzi atoma kubva kuti tiri kufika dhuzi na kuntunda. Na tenepo, aponya m'bara nkhambala ya n'dida wa madzi, mbaona kuti kuzika kwa madzi kukhali kwa makono makumawiri. Mudacita iwo thimize patsogolo, aponya pontho, mbakwana makono khumi na maxanu. Na kugopa kuti inadza kaenda kamenya pa myala, aponya m'madzi nangula zinai na ku domu ya n'nduli, toera kulimisa nayo xitima ya m'madzi, mbakhaphembera kuti kuce na mwansanga. Na tenepo, anyakutekenya xitima ya m'madzi, akhasaka kuti athawe. Atereza mwadiya m'bara, mbapambazira kuti ali kwenda kagwisira nangula ku domu ya kutsogolo. Mphapo Paulu alonga kuna nkulu wa anyankhondo na kuna anyankhondo ace kuti: “Anyakutekenya xitima ya m'madzi angakhonda kukhala muno, imwe nkhabe kupulumuka.” Penepo, anyankhondo agwanda nkhambala zikhamanga mwadiya, mbausiya mwadiya mbugwa m'madzi. M'bambakuca, Paulu aaphemba onsene kuti adye pang'ono, mbalonga tenepa: “Muna ntsiku khumi na zinai mbamudikhira. Pa ntsiku zonsene izi, nkhabe cibodzi cidadya imwe. Ndaphata myendo, cincino ndisakuphembani kuti mudye pang'ono, toera mukwanise kupulumuka. Thangwi nkhabe m'bodzi wanu anafuna luza tsisi ibodzi ya munsolo mwace.” Pakumala kulonga penepyo, Paulu akwata nkate mbapereka takhuta kuna Mulungu pamaso pa anthu onsene, mbaumenya mbatoma ndiye kudya. Penepo, onsene akhala na cipapu, mbadyambo. Mu xitima ya m'madzi, mukhali na anthu madzana mawiri na makumanomwe na atanthatu. Pidamala iwo kudya mbakhuta, ataya tirigu m'madzi, toera xitima ya m'madzi ilulupe. Mudaca kunja, anyakutekenya xitima ya m'madzi acimwana kudzindikira ntunda, mbwenye aona gombe, mbanyerezera kuti pingakwanisika, aende katsamisa xitima ya m'madzi penepale. Iwo agwanda nkhambala zikhadamangirira nangula mbazitaya m'madzi, mbasudzula ng'ombo zikhazungunusa xitima ya m'madzi. Buluka penepo, afuthula thanga ku domu ya kutsogolo, toera akwanise kukwatwa na mphepo aende ku gombe. Mbwenye xitima ya m'madzi yaenda kacherera pa checa. Domu ya kutsogolo yapita m'macheca mbiicimwana kubuluka. Domu ya n'nduli yatoma kusweka na mphambvu za mabimbi. Anyankhondo akhadabverana kuti aphe anyan'kaidi onsene, gopa angawambuka na kusambirira anamala thawa. Mbwenye nkulu wa anyankhondo, na kufuna kupulumusa Paulu, aakhondesa kucita pikhafuna iwo, mbaapanga kuti onsene anadziwa sambirira atome ndiwo kugwa m'madzi, asambirire mpaka kuntunda. Mbapangambo anango kuti aphatirire matabwa na mapindi anango a xitima ya m'madzi, toera akwanise kupulumuka. Na tenepo, onsene akwanisa kupulumuka mbafika kuntunda. Mudapulumuswa ife, ndi mudadzindikira ife kuti ntsuwa eneyi isacemerwa Malata. Anthu a pa ntsuwa eneyi, apangisa kuna ife kukoma ntima kwawo kukulu kakamwe. Iwo atitambira mwadidi mwene, mbatigasira moto, thangwi ikhali ntsiku ya mitambo, pontho kukhatonthola. Paulu, agumanya nsumbu wa nkhuni. Mukhaziyikha iye pa moto, nyoka ya m'bobo, na kuthawa kupisa kwa moto, yabuluka mbimpyangirira pa nkono. Anthu a pa ntsuwa eneyi, mudaona iwo nyoka ya m'bobo iri dedzu-dedzu m'manja mwa Paulu, atoma kulonga m'bodzi na m'bodzi kuti: “Ndimo mwenedi, mamuna uyu ndi phanga. Thangwi apulumuka m'bara, na lero mulungu wathu wakulungama nkhabe funa kunsiya kuti akhale m'maso.” Mbwenye Paulu aigubudza nyoka pa moto, mbakhonda citika cinthu cibodzi cakuipa. Iwo akhadikhira kuti iye anadza kabzimba, peno pa n'dzidzi ubodzi-bodzi, anaferatu. Mbwenye pidadikhira iwo n'dzidzi ukulu ene mbaona kuti nkhabe cibodzi cakuipa cidacitika kuna iye, atoma kunyerezera pinango mbalonga tenepa: “Mamuna uyu ndi mulungu!” Dhuzi na penepo, pakhali na zunde ya mamuna m'bodzi anacemerwa Pubhilyo, nkulu wa ntsuwa eneyi. Iye atitambira mwadidi mwene, mbatikhala ntsiku zitatu pa nyumba pace. Baba wace akhali pa bonde, thangwi akhadaferuka pontho akhaphandza. Paulu, apita mwenemu kwenda kamuona, am'phemberera na kumuikha manja, mbamuwangisa. Buluka penepo, atenda a pa ntsuwa akhabwera kuna Paulu, mbakhawangiswa. Iwo akhatilemedza mbakhatiphedza pikulu kakamwe. Pontho mukhafuna ife kwenda, atipaka na pyonsene pikhafuna ife pa ulendo wathu. Pakumala myezi mitatu, tapakira xitima ya m'madzi ikakhala pa ntsuwa pa n'dzidzi wa khoni. Xitima eneyi ikhali ya ku nzinda wa Alixandiriya. Iyo ikhali na cidzindikiro ca dzimunthu ya alungu a mamphasa anacemerwa Kaxitori na Poluxu. Mudafika ife mu nzinda wa Sirakusa, tamalamo ntsiku zitatu. Buluka penepo, tapitiriza ulendo wathu mbatifika ku nzinda wa Rejyo. Mangwana mwace, yatoma kumenya mphepo ya bangwe, mbatifika ku Putiyoli pa ntsiku yaciwiri. Mu nzinda unowu, tagumanamo abale angasi, adatiphemba kuti tikhale na iwo pabodzi sumana yamumphu. Buluka penepo taenda ku Roma. Abale a ku Roma mudabva iwo kuti ife tiri kufika, iwo abwera mpaka pa nsika wa Apyu, na ku nyumba zitatu za kutambira alendo, toera tionane na iwo. Paulu na kuaona, awanga manungo mbapereka takhuta kuna Mulungu. Mudafika ife ku Roma, Paulu atawirirwa kukhala pa nyumba yace ekha, mbakhaonererwa na nyankhondo m'bodzi. Mudamala ntsiku zitatu, Paulu acemeresa atsogoleri a madjuda. Mudagumanyikana iwo, iye aapanga tenepa: “Abale anga, nkhabe cibodzi cidadawisa ine kuna mbumba yathu, peno kuna mitemo idatambira ife na akulu athu akale. Mbwenye madjuda andimanga ku Djerusalema, mbandipereka m'manja mwa anthu a ku Roma. Iwo andibvundzisa, mbakhafuna kundibulusa n'kaidi, na kuti nkhabe thangwi ibodzi ikhadaona iwo ya kundipha nayo. Mbwenye madjuda akhakhonda. Na thangwi eneyo, ndaphemba kuti nditongwe na mambo Sezari. Mbwenye sikulongera kuti ndisafuna ndisumire mbumba yanga tayu. Na thangwi eneyi, ndakuphembani kuti ndionane na imwe pontho ticeze. Pidamangirwa ine, ndi thangwi ya cidikhiro ca mbumba ya Izarayeli.” Penepo iwo atawira tenepa: “Nkhabe tsamba ibodzi ya ku Djudeya idatambira ife idatipanga penepi, peno mbilonga na thangwi yako. Pontho nkhabe m'bale m'bodzi adabuluka kweneku mbatipanga na thangwi ya kuipa kudacita iwe. Mbwenye tisafuna tibvembo pa mulomo pako, ninji pinanyerezera iwe. Thangwi tisapidziwa kuti m'mbuto zonsene, kuna anthu analonga kuipa nsoka unowu wa ndale.” Na tenepo, iwo abverana ntsiku kuti adze kagumane na Paulu. Ntsiku eneyi, mwinji wa anthu waenda kudafikira Paulu. Iye akhaapanga mbakhaacitira umboni wa Umambo wa Mulungu, mbakhasaka ndzeru za kuti iwo atawire pya Yezu, na kuapangisa Mwambo wa Mozesi na wa Maporofeta, kutomera ca macibese mpaka ca maulo. Anango apitawira pikhalonga iye, mbwenye anango apikhonda. Na tenepo, iwo atoma kuketesana okha-okha. Mbwenye mukhabuluka iwo, Paulu alonga mafala akumalisa kuti: “Ndimo mwene pidalonga Nzimu Wakucena kuna a mbuya anu na mulomo wa mporofeta Izaya kuti: “ ‘Ndoko kuna mbumba iyi ukhaipange kuti: Imwe munabva, mbwenye nkhabe kudza kabvesesa tayu. Munaona, mbwenye nkhabe kudza kaonesesa tayu. Thangwi mbumba iyi yauma ntima. Afunga makutu, mbaphopa maso. Mbapidakhonda kukhala tenepa, maso awo mbadaona, makutu awo mbadabva, pontho mbadakwanisa kudzindikira na ndzeru zawo, mbabwera kuna Ine, tenepa Ine mbindiawangisa.’ “Mphapo dziwani kuti upulumuki unowu wa Mulungu watumizwa kuna ale adakhonda kukhala madjuda. Iwo anaubva!” [Mudamala kulonga Paulu penepi, madjuda amwazana mbaenda na kuketesana pikulu kakamwe okha-okha. ] Paulu amala kweneku pyaka piwiri mbakhakhala pa nyumba ya kulipwa kobiri. Iye akhatambira onsene akhadza kamuona. Akhalonga Umambo wa Mulungu, pontho mbakhapfundzisa pya Mbuya Yezu Kirixtu pakweca, mbakhonda kupingizwa. Ine Paulu, n'dzakazi wa Kirixtu Yezu, adacemerwa toera ndikhale mpoxtolo, mbandipambulwa toera ndimwaze Mphangwa Zadidi za Mulungu. Mphangwa zenezi ndizo zikhadapikirirwa na Mulungu kale ene, mbazilongwa na maporofeta mu Bukhu ya Mulungu, pa thangwi ya Mwana wace. Iye ninga munthu, ndi wa dzindza ya Dhavidhi, mbacemerwa Mwana wa Mulungu mu mphambvu, kubulukira mu Nzimu Wakucena, pa kulamuka kwace pa kufa, Yezu Kirixtu Mbuya wathu. Kubulukira mwa Iye, pontho na thangwi ya dzina yace, tatambira kukoma ntima kwa Mulungu kuti tikhale apoxtolo, toera ticemere anthu a madziko onsene kuti akhale akubvera kunabulukira pa kukhulupira. Pa nsoka unowu, imwembo muli na anthu pa anyakucemerwa, toera mukhale a Yezu Kirixtu. Ndisalembera imwe monsene muli mu nzinda wa Roma, musafuniwa na Mulungu, pontho musacemerwa toera mukhale mbumba yace. Kukoma ntima, na ntendere unabulukira kuna Mulungu Baba wathu, na kuna Mbuya Yezu Kirixtu, mbapikhale na imwe. Pakutoma, ndisapereka takhuta kuna Mulungu wanga muna Yezu Kirixtu, pa thangwi ya imwe monsene, thangwi kukhulupira kwanu kusabvekera pantsi pano ponsene. Mulungu analambira ine na ntima wanga onsene, mbandimwaza Mphangwa Zadidi za Mwana wace, ndiye anandicitira umboni pa thangwi ya kukunyerezerani kunakucitani ine ntsiku zonsene, pa maphembero anga onsene. Pontho ndisaphemba kuti cincino, pakumalisa, na kufuna kwa Mulungu, ndifungulirwe njira ya kudza kakuonani. Thangwi ndisafuna pikulu kakamwe ndikuoneni, toera ndidze kakupasani muwoni wa mu Nzimu, kuti ukupaseni mphambvu. Penepi nkhubveka kuti ine na imwe, tipasane mphambvu m'bodzi na m'bodzi na thangwi ya kukhulupira. Abale anga, ndisafuna mudziwe kuti kazinji kene ndikhanyerezera kudza kakuonani, mbwenye ndapingizika mpaka n'dzidzi uno. Pikhanyerezera ine nkhufuna kudza kachodambo misapu pakati panu, ninga pikhadza ine mbindicita pakati pa ale anango adakhonda kukhala madjuda. Ndina mangawa kuna agerego na kuna ale akhapwaziwa na agerego, kuna akupfundza na kuna ale adakhonda kupfundza. Na thangwi eneyo, ndamala sasanyira, kuti ndimwazembo Mphangwa Zadidi kuna imwe muli mu Roma. Mphapo ine nkhabe manyadzo na Mphangwa Zadidi, thangwi ndi mphambvu za Mulungu toera kupulumusa ale onsene anatawira, pakutoma kuna n'djuda, pakumalisa kuna agerego. Thangwi kulungama kwa Mulungu kusapangizika n'kati mwa Mphangwa Zadidi. Kulungama kweneku kusabulukira pa kukhulupira, kutomera pakutoma mpaka pakumalisa ninga mudalembwa ipyo kuti: “Nyakulungama anapulumuka na thangwi ya kukhulupira.” Na tenepo, kuipirwa kwa Mulungu kusapangizika kubulukira kudzulu, mbukugwera anthu onsene anacita kuipa kunapingiza andzawo kudziwa pya ndimo mwene. Thangwi pire pyonsene pya Mulungu pinakwanisa dziwika, pisapangizika pakati pawo, thangwi Mulungu aapangisa. Thangwi kutomera pakucitwa kwa dziko, makhaliro akukhonda kuoneka a Mulungu, mphambvu zace zakukhonda kumala, na umulungu wace, pisaonekera pakweca mbapidziwika na thangwi ya pinthu pidacita Iye. Na tenepo, anthu enewa nkhabe pakutunira. Thangwi iwo akhapidziwa kuti Mulungu alipo, mbwenye akhonda kumpasa mbiri ninga Mulungu, peno kuncita takhuta. Ndzeru zawo zatoma kunyerezera pyapezi, na ntima wawo wa udzemwa waswipa. Mbalonga kuti ndife anyakudziwisa, mbwenye adza kakhala madzemwa. Pontho asanduza mbiri ya Mulungu wakukhonda kufa, mbailandanisa na dzimunthu inacitwa na munthu anafa, ninga mbalame, pinyama pyonsene pina myendo minai, pontho na pire pinafamba na mimba. Na thangwi eneyo, Mulungu aasiya kuti acite pyalukwali ninga mafuniro akuipa a mitima yawo, toera anyadzise manungo awo okha ene. Asanduza pya ndimo mwene pya Mulungu, kudza pya uthambi, pontho mbalambira na kuphatira basa pinthu pidacita Mulungu, mbakhonda kulambira iye ene Mulungu wakusimbwa kwenda na kwenda. Ameni! Na thangwi eneyo, Mulungu aasiya mbacita kufuna kwawo kwakupasa manyadzo. Na akazi awo ene asanduza mapitiro awo m'bonde adabalwa na iwo, mbacita pinango pyakusyana na mudabalirwa iwo. Sawa-sawambo na amuna. Asiya kupita kwawo m'mabonde na akazi, mbatoma kusirirana okha ene. Atoma kucita pinthu pyamanyadzo mamuna na mamuna, na thangwi eneyo atambira okha ene nyatwa ya kukwanirana na kudawa kwawo. Pontho, na thangwi ya kupwaza kudziwa Mulungu, Iye aasiya mbakupwa, toera acite pinthu pyakukhonda kucitika. Adzala na kukhonda kulungama kwakusiyana-siyana. Uipi, kusaka kupfuma, na kudzowerera kucita kuipa. Adzala na bibvu, kuphana, kuidana, kudhobha na kuzondana. Ndi anthu anyapseda, akupambazira andzawo, anyamalwa a Mulungu, akukhonda kulangika, anyakupikuza na akudungudza. Asasaka kuti anacita tani kuipa, mbakhonda kubvera ababawo. Ndi madzemwa, anthu akukhonda kunyindirika, akukhonda kufuna abale awo, akusowa ntsisi. Iwo asadziwa matongero akulungama a Mulungu, kuti anthu anacita penepi asatongwa aphiwe. Mbwenye asakakamira na kupicita, pontho asakomerwambo basi na ale anapicita. Na tenepo, iwe unatonga andzako nkhabe pakutunira. Thangwi usakoneseka wekha pa pire pinatonga iwe, thangwi iwe unatonga, usacita pibodzi-bodzi. Ife tisadziwa kuti kutonga kwa Mulungu kuna ale anacita pinthu penepi, nkhwa ndimo mwene. Na tenepo, ngakhala iwe munthu pyako, usaakonesa andzako iwe mbucita pibodzi-bodzi, usanyerezera kuti unakwanisa kuthawa ntsiku ya kutongwa na Mulungu? Peno nkhulongera kuti iwe usapwaza udidi ukulu wa Mulungu, kuphata ntima kwace, na kupirira kwace, mbukhonda dzindikira kuti udidi wa Mulungu ndiwo unakukwata kuti iwe uchunyuke kudawa kwako? Mbwenye na thangwi ya upoka wako na kuuma kwako ntima, usanjipisa kuipirwa kwa Mulungu kuna iwe wekha ene, pa ntsiku eneyi ya kuipirwa kwa Mulungu angadza kapangisa kutonga kwace kwakulungama. Mulungu anabwezera m'bodzi na m'bodzi, na pire pidacita iye. Iye anadza kapasa upulumuki wakukhonda kumala kuna ale anakakamira kucita udidi, anasaka mbiri, anasaka cilemedzo na kukhala m'maso kwenda na kwenda. Mbwenye kunadza kaoneka kuipirwa na kusirizwa kwa Mulungu kuna ale anyaumbirimi, anakhonda kubvera pya ndimo mwene mbatowera pyakuipa. Nyatwa na kutsukwala kukulu kunadza kaoneka kuna anthu onsene anacita kuipa. Kutomera kuna madjuda, mpaka kuna agerego. Mbwenye mbiri, na kulemebza, na ntendere pinadza kaoneka kuna onsene anacita udidi. Kutomera kuna madjuda, mpaka kuna agerego. Thangwi kuna Mulungu nkhabeko tsankhulo. Onsene anadawa mbasowa mwambo, na kusowa kwawo Mwambo, anafambo. Mbwenye onsene anadawa mbadziwa Mwambo, anatongwa na Mwambo. Thangwi anyakulungama pamaso pa Mulungu si ale anabva mwambo tayu, mbwenye ale anautoweza, ndiwo anafuna kucemerwa anyakulungama. Ndimo mwene, ngakhala ale adakhonda kukhala madjuda adasoweka mwambo, asacita na manyerezero a munsolo mwawo pire pinatongwa na mwambo iwo mbasowa mwambo, penepi pyene ndiwo mwambo wawo. Iwo asapangisa na macitiro awo kuti, pinatongwa na mwambo pyalembwa muntima mwawo. Manyerezero awo a muntima asaapangisa kuti penepi ndimo mwene, pontho ndzeru zawo zinacita panango mbaziakonesa, panango mbaziabvunulira, zisapangisambo penepi. Pyonsene ipi pinati pioneke pa ntsiku inafuna tonga Mulungu pinthu pyakubisala pya anthu, kubulukira muna Mwana wace Kirixtu Yezu, ninga Mphangwa Zadidi zinalonga ine. Apo iwe unalonga kuti “ndine n'djuda,” mbuphatirira mwambo pontho mbugaya na Mulungu, iwe unadziwa kufuna kwa Mulungu pontho usadziwa kusankhula cadidi ndi cipi, thangwi mwambo usakupfundzisa, pontho iwe usanyinda kuti ndiwe anaphata nsenzi maboli-boli, ninga cieza ca ale ali n'cidima, nyakulanga anthu akusoweka ndzeru, mpfundzisi wa ana ang'ono, thangwi usanyindira kuti mu mwambo, unako kudziwa kwakukwana na undimo mwene. Kodi iwe unapfundzisa andzako, watani khonda pfundzisika wekha ene? Iwe usalonga lekani kuba, usaba? Iwe usakhondesa upombo, usapomba? Iwe anaipirwa na alungu apezi, usaabera pinthu pya n'nyumba zawo za ntsembe? Iwe unagaya na mwambo, usapwaza Mulungu na kukhonda kubvera mwambo? Thangwi ninga mudalembwa ipyo m'Bukhu ya Mulungu kuti: “Na thangwi yanu, dzina ya Mulungu isaxoliwa pakati pa anthu adakhonda kukhala madjuda.” Kusibza ndi kwadidi, ungakoya mwambo. Mbwenye iwe ungakhonda kukoya mwambo, kusibza kwako ndi kwapezi. Ngakhala ale adakhonda kusibza asakoya pinalonga mwambo, Mulungu nkhabe kuaona ninga asibza? Na tenepo, ule adacita cipo adzati kusibza mbwenye asakoya Mwambo, anadza kakonesa iwe una Mwambo wakulembwa na udasibza, thangwi wakhonda kutoweza mwambo. Thangwi kukhala n'djuda si kupangizika manungo basi tayu, pontho kusibza si kule kwa manungo basi tayu. Nkhabe! Cinacitisa munthu n'djuda ndi cire ciri n'kati, pontho kusibza kwa munthu kuli muntima. Penepi pisabulukira mu Nzimu, nkhabe bulukira mu Mwambo wakulembwa. Munthu unowu nkhabe simbwa na anthu tayu, mbwenye asasimbwa na Mulungu. Na tenepo, pisaphedzeranji kukhala n'djuda, peno pinabasa yanji kusibza? Pisaphedzera mabasa mazinji akusiyana-siyana! Maka-maka thangwi Mulungu asiya mafala ace m'manja mwa madjuda. Pinabasa yanji ngakhala anango awo akhonda kunyindira? Kukhonda kunyindirika kwawo kunacita kuti Mulungu akhonde kunyindirika? Nkhabe citika! Mulungu mbakhale wa ndimo mwene, anthu onsene akhale anyauthambi, ninga mudalemberwa ipyo m'Bukhu ya Mulungu kuti: “Toera Imwe Mulungu mulungamiswe pa mafala anu, pontho toera mupembere pakutongwa.” Mbwenye ngakhala kukhonda kulungama kwathu kusapangisa pakweca kulungama kwa Mulungu, tinalonganji? Kuti Mulungu ngwa kuipa na thangwi ya kutionesa nyatwa? (Ndisalonga ninga munthu). Nkhabe citika! Mbapidakhala ndi tenepo, Mulungu mbadaitonga tani dziko? Ngakhala uthambi wanga usapangisa pakweca undimo mwene wa Mulungu toera mbiri yace ithimizirike, thangwi yanji pontho ine ndisakoneswa ninga nyakudawa? Thangwi yanji khonda kulonga ninga anango analonga uthambi kuti ife tisalonga tenepa: “Mbaticiteni kudawa, toera udidi utidzere.” Enewa angakoneswa, mphyadidi. Na tenepo, tinacita tani? Nkhulongera kuti ife madjuda ndife adidi kupiringana agerego? Nkhabe! Thangwi tapilonga kale kuti madjuda, na agerego, tonsene ndife anyakudawa. Ninga mudalemberwa ipyo m'Bukhu ya Mulungu kuti: “Nkhabe munthu wakulungama. Nkhabepo na m'bodzi ene. Nkhabe m'bodzi anabvesesa, pontho nkhabe m'bodzi anasaka Mulungu. Onsene amala kutaika, nkhabe cinthu cinaphedzera iwo. Nkhabe m'bodzi anacita udidi. Nkhabe na m'bodzi ene.” “ Makholongo awo akhala ninga nthumbi za kufunguka, na malirimi awo asanyengeta anthu.” “M'milomo mwawo musakhala ninga muna nyongo ya m'bobo. ” “ N'kanwa mwawo mwadzala na dzedze, pontho na nyongo.” “Myendo yawo isathamanga toera kugwisa ciropa. Njira zawo zadzala na kufudza pontho na nyatwa. Njira ya ntendere iwo nkhabe kuidziwa.” “ Iwo nkhabe gopa Mulungu na pang'ono pene.” Tisadziwa kuti pyonsene pinalonga Mwambo, pisalongera ale ali pantsi pa Mwambo, toera anthu onsene afunge mulomo, pontho toera dziko yonsene idzindikire kudawa kwayo, patsogolo pana Mulungu. Thangwi nkhabe anafuna kulungamiswa patsogolo pana Mulungu, na thangwi ya kutoweza mwambo. Na thangwi ya mwambo, tisadziwa kuti ife ndife anyakudawa. Mbwenye cincino kwapangizika kulungama kwa Mulungu kudaleka bulukira pa mwambo. Kulungama kudacitirwa umboni na Mwambo wa Mozesi na Mabukhu a Maporofeta. Ulungami wa Mulungu udabulukira pa kukhulupira kwathu Yezu Kirixtu, kuna onsene ale anatawira. Nkhabepo tsankhulo. Thangwi onsene adawa, pontho anacimwana kuona mbiri ya Mulungu. Mbwenye alungamiswa na kukoma ntima kwace, pakuombolwa kudacitwa iwo muna Kirixtu Yezu, mbakhonda kulipa cinthu. Mulungu ampereka mu ciropa cace ninga ntsembe yakufudza madawi, kubulukira pa kukhulupira, toera kupangisa kulungama kwace. Na thangwi yakudembuka kwace na kuipirwa, Mulungu aalekerera kudawa kwawo kwa kale. Mbwenye Mulungu asapangisa kulungama kwace pa midzidzi ino, toera Iye akhale wakulungama na wakulungamisa ule anakhulupira Yezu. Na tenepo, ciri kupi cinakugaisani? Camala. Na mwambo wanji? Na thangwi ya mabasa? Nkhabe. Mbwenye na mitemo ya kukhulupira. Thangwi tisatawiradi kuti munthu asalungamiswa na kukhulupira kwace, si na mabasa a mwambo tayu. Kodi Mulungu unowu ndi Mulungu wa madjuda basi? Si Mulungumbo wa ale adakhonda kukhala madjuda tayu? Ande, ale adakhonda kukhala madjuda, ndi Mulungu waombo. Thangwi Mulungu ndi m'bodzi basi, analungamisa anyakusibza na ale adakhonda kusibza, male angakhulupira. Na tenepo, tafudza Mwambo na thangwi ya kukhulupira kwathu? Nkhabe citika! Mbwenye tisausimbisa. Na tenepo, tinalonga kuti baba wathu wa pa nyama Abharaamu akwanisanji? Ngakhala Mulungu alungamisa Abharaamu na mabasa, iye anakwanisa kugaya, mbwenye si pamaso pa Mulungu tayu. Apo Bukhu ya Mulungu isalonganji? “Abharaamu akhulupira Mulungu, penepi pyancita kuti iye akhale wakulungama.” Lang'anani, kobiri inatambiriswa nyabasa si ya kupaswa pezi tayu, mbwenye yakhala ninga mangawa. Mbwenye kuna ule anakhonda phata basa mbakhulupira Mulungu analungamisa nyakudawa, na kukhulupira kwace, asatawirirwa ninga nyakulungama. Ndipyo pidalonga Dhavidhi, pa thangwi ya kutsandzaya kwa munthu anatawirirwa na Mulungu kulungama kwace kudakhonda kucitika na thangwi ya mabasa, mbalonga kuti: “Mbatsandzaye ale adalekererwa kudodomesa kwawo, mbafudzirwa madawi awo. Mbatsandzaye ule anakhonda kupaswa thangwi na Mbuya.” Kodi kutsandzaya kweneku kwadzera anyakusibza basi, peno na alembo adakhonda kusibza? Tapilonga kale kuti pa thangwi ya Abharaamu, kukhulupira kwace kwacita kuti adziwikembo ninga wakulungama. Pyacitika tani penepi? Abharaamu mbadamala kusibza kale, peno mbadzati kusibza? Ndimo mwene, pyacitika mbadzati kusibza. Abharaamu atambira kusibza, ninga cidzindikiro pontho ninga cidhindo cakulungama cikhakhala na iye pa kukhulupira kwace, mbadzati kusibza. Na tenepo, iye ndi baba wa onsene ale anatawira mbakhonda kusibza, toera atawirirwembo kulungama kwawo. Pontho ndiye m'bodzi ene baba wa anyakusibza. Si thangwi kukhala anyakusibza basi tayu, mbwenye asafambambo na njira ibodzi ene ya kukhulupira, idafamba na Abharaamu baba wathu, mbadzati kusibza. Si thangwi ya mwambo tayu, idacita kuti Abharaamu na dzindza yace apikirirwe kupaswa unthaka wa dziko, mbwenye ndi thangwi ya kulungama kudabulukira pa kukhulupira. Thangwi ngakhala anacinthu unthaka ndi ale basi anatoweza mwambo, kukhulupira nkhwapezi, pontho cipikiriro nkhabe basa. Thangwi mwambo usadzesa kuipirwa kwa Mulungu. Mbwenye panakhonda kukhala mwambo, nkhabepo kudodomesa mwambo. Na tenepo, cipikiriro cabulukira pa kukhulupira, toera cikhale sawa-sawa na kukoma ntima kwa Mulungu, pontho toera cikhale cakunyindirika kuna dzindza yonsene ya Abharaamu. Si thangwi ya kukhala mu mwambo basi tayu, mbwenye anacombo cikhulupiro ca Abharaamu, baba wa ife tonsene. Ninga pinalonga Bukhu ya Mulungu kuti: “Ine ndakuikha kuti ukhale baba wa madziko mazinji.” Iye ndi baba wathu pamaso pa Mulungu adatawira iye, Mulungu analamusa anyakufa, pontho adacita kuti pioneke pinthu pidakhonda kukhalapo, mbapikhala ninga piripo. Abharaamu atawira mbadikhira pinthu pikhakhonda iye kudikhira kuti pinacitika. Na tenepo, iye adza kakhala baba wa madziko mazinji ninga munalongera Bukhu ya Mulungu na thangwi yace kuti: “Dzindza yako inadza kainjipa tenepa.” Abharaamu akhadziwa kuti manungo ace akhadakalamba, mbakhathamangira pyaka dzana pyakubalwa. Pontho akhadziwa kuti Sara, nkazi wace, pyaka pyace pyakubala pikhadapita. Mbwenye iye hadamala mphambvu pa kukhulupira tayu. Abharaamu pa cidumbiriro cidacitirwa iye na Mulungu, hadapenula na kukhonda kukhulupira tayu. Mbwenye na cikhulupiro cace, adzala na mphambvu mbapasa mbiri Mulungu. Thangwi iye akhanyindira pikulu kakamwe kuti, Mulungu ana mphambvu za kucita pyonsene pidan'dumbirira Iye. Na thangwi ya kukhulupira kwace, iye atawirirwa na Mulungu ninga wakulungama. Mafala awa analonga kuti “iye atawirirwa’’ hadalemberwa na thangwi ya Abharaamu basi tayu. Mbwenye asalongerambo ife anafuna kudza katawirirwambo. Ife adatawira Mulungu adalamusa pa kufa Yezu Mbuya wathu. Yezu unowu, adaperekwa mbaphiwa na thangwi ya kudawa kwathu, pontho mbalamuswa pa kufa toera tikhale akulungama. Mphapo pa kulungamiswa kudacitwa ife na cikhulupiro, tina ntendere na Mulungu, na thangwi ya Mbuya wathu Yezu Kirixtu, adakwanisa kutipitisa mwa kukoma ntima uku kwa Mulungu na thangwi ya cikhulupiro, mudakhala ife cincino dzololo, pontho mbatitsandzaya na kudikhira mbiri ya Mulungu. Si penepi basi tayu. Ife tisatsandzayambo pa nyatwa, thangwi tisadziwa kuti nyatwa isabala kupirira, kupirira kusabala uunthu wakufunika, uunthu wakufunika usabala kudikhira. Cidikhiro nkhabe kutinyengeza, thangwi Mulungu atikhutulira m'mitima mwathu kutifuna kudaticita Iye, kubulukira mu Nzimu Wakucena udatipasa Iye. Thangwi mukhasowa ife mphambvu, mudakwana iwo n'dzidzi wace, Kirixtu afera anyakudawa. Pisanentsa pikulu kakamwe gumanika munthu anafera munthu ndzace wakulungama. Ande, panango asagumanika munthu anafuna kufera munthu wadidi. Mbwenye Mulungu asapangisa kufuna kudaticita Iye, pa kutifera kudacita Kirixtu, ife mbatiri anyakudawa. Ninga cincino talungamiswa na ciropa ca Kirixtu, ndimo mwenedi kuti na Iye, tinapulumuswa n'kati mwa kuipirwa kwa Mulungu! Thangwi ngakhala pa n'dzidzi ukhakhala ife anyamalwa a Mulungu, tadza kasekesana na Iye na thangwi ya kufa kwa Mwana wace, ndiye tani cincino, pakumala kusekesana kwathu na Mulungu, tinati tipulumuswedi na upulumuki wa Kirixtu. Si penepi basi tayu, mbwenye tisatsandzayambo muna Mulungu na thangwi ya Mbuya wathu Yezu Kirixtu, ule adaticitisa kuti cincino tisekesane na Mulungu. Na tenepo, ninga kudawa kwapita pantsi pano na mamuna m'bodzi basi, kudawa kweneku mbukubala kufa, tenepambo kufa kwapita kuli anthu onsene, thangwi onsene adawa. Thangwi anthu mbadzati kupaswa Mwambo, kudawa kukhalipo kale pantsi pano. Mbwenye kudawa kwakhonda kutsalakanwa, na kusoweka kwa mwambo. Mbwenye kufa kukhatonga kuna anthu onsene, kutomera midzidzi ya Adhamu mpaka ya Mozesi, na kuna ale ene adakhonda kucita kudawa kwakulandana na kukhonda kubvera kwa Adhamu. Adhamu unowu akhali cithundzi-thundzi ca ule akhafuna kudza. Mbwenye muwoni udatipasa Mulungu pezi pyene, wasyana na kudawa kwa Adhamu. Thangwi ngakhala azinji asafa na thangwi ya kudodomeka kwa m'bodzi basi, ndiye tani kukoma ntima kwa Mulungu, ndi kukulu kakamwe. Pontho muwoni wa kukoma ntima kwa mamuna m'bodzi Yezu Kirixtu, wadzala na kutaikira kuna azinji. Muwoni wa Mulungu si sawa-sawa na nyatwa zidadzeswa na kudawa kwa mamuna m'bodzi basi tayu. Thangwi na kudawa kwa munthu m'bodzi, kwabwera kutongwa kudadzesa kukoneswa. Mbwenye kukoma ntima kwa Mulungu kwakunda kudawa kwa anthu azinji, mbukudzesa kulungama. Ngakhala na kudawa kwa munthu m'bodzi basi, kufa kwatoma kutonga na thangwi yace, ndiye tani ale adatambira kuna Mulungu kukoma ntima kwace kukulu kakamwe na muwoni wakulungama? Iwo anati atonge mu upulumuki upsa na mphambvu za munthu m'bodzi basi, Yezu Kirixtu. Na tenepo, ninga kudawa kabodzi basi kwacita kuti anthu onsene akoneswe, tenepambo na cibodzi basi cakulungama, cacita kuti kukoma ntima kwa Mulungu kubwere kuna anthu onsene. Na tenepo, ninga kukhonda kubvera kwa mamuna m'bodzi basi azinji acitwa kuti akhale anyakudawa, sawa-sawambo na thangwi ya kubvera kwa munthu m'bodzi basi, azinji anadza kakhala akulungama. Mwambo wabwera toera kudodomeka kuinjipe. Mbwenye panainjipa kudawa, kukoma ntima kwa Mulungu kusadzaleratu kakamwe mbakutaikira, ninga kudawa kwakunda mbukubweresa kufa, tenepambo kukoma ntima kwa Mulungu kukundembo na thangwi yakulungama, toera kupasa upulumuki wakukhonda kumala muna Yezu Kirixtu Mbuya wathu. Tinalonganji mphapo? Tisatongwa basi kukhala n'kudawa toera kukoma ntima kwa Mulungu kuinjipe? Nkhabe citika! Ife takhala ninga anthu akufa pa pinthu pyakudawa, tinakhala tani pontho n'kudawa? Kodi imwe nkhabe kupidziwa kuti ife tonsene tidatambira batixmu muna Kirixtu Yezu, tatambiriswa batixmu na kufa kwace? Na tenepo, taikhwa pabodzi na Iye pa kufa kubulukira pa kutambira batixmu, toera ninga Kirixtu alamuswa pa kufa kubulukira mu mbiri ya Baba, ifembo tinakhala na upulumuki upsa. Ngakhala taphatanizwa na Yezu pa kulandana na kufa kwace, tinaphatanizwambo na Iye pa kulandana na kulamuka kwace pa kufa. Thangwi tisadziwa kuti munthu wathu wakale akhomerwa pa ntanda pabodzi na Iye, toera manungo athu a kudawa afudziwe, pontho tikhonde khala adzakazi a madawi. Thangwi ule adafa, asudzuka pa mphambvu za madawi. Ngakhala cincino tafa pabodzi na Kirixtu, tinatawirambo kuti tinadza kakhala m'maso pabodzi na Iye. Thangwi ife tisadziwa kuti, Kirixtu pakulamuka kwace pa kufa, nkhabe kudza kafa pontho. Iye nkhabe kudza kakundiwabve na kufa. Thangwi pa kufa kwace, Kirixtu afa kabodzi basi toera kukunda kudawa, mbwenye cincino, ali m'maso toera acite kufuna kwa Mulungu. Sawa-sawa na imwembo, dziwani kuti ndimwe akufa kuna madawi, mbwenye ndimwe a m'maso kuna Mulungu muna Kirixtu Yezu. Na tenepo, lekani kusiya kuti manungo anu akufa anyanye kukundwa na kudawa, mbukukukwatani kuti mucite kufuna kwawo kwakuipa. Lekani kupereka mapindi a manungo anu mwa kudawa, ninga pida pyakucita napyo kuipa. Mbwenye perekekani kuna Mulungu ninga anthu adabuluka pa kufa kwenda ku upulumuki. Pontho perekani mapindi a manungo anu kuna Iye ninga pida pyakulungama. Thangwi kudawa nkhabe kudza kakukundani, thangwi imwe muli pantsi pa mwambo tayu, mbwenye muli pantsi pa kukoma ntima kwa Mulungu. Mphapo ndiye tani? Tinadawa pyathu thangwi tiri pantsibve pa Mwambo tayu, mbwenye tiri pantsi pa kukoma ntima kwa Mulungu? Nkhabe citika! Imwe nkhabe dziwa kuti mungaperekeka kuna munthu kuti mum'bvere ninga adzakazi, musakhala adzakazi a ule anabvera imwe? Ngakhala ndimwe adzakazi a madawi, anakupitisani mwa kufa. Ngakhala ndimwe adzakazi a kubvera, kunakupitisani mwakulungama. Mbwenye tisapereka takhuta kuna Mulungu thangwi imwe kale ene mukhali adzakazi a madawi, cincino musabvera na ntima wanu onsene cipfundzo cidatambira imwe. Imwe mwasudzulwa n'kudawa, cincino ndimwe adzakazi a Mulungu toera kucita pyakulungama. Ndisalonga ninga munthu, na thangwi yakukhonda dziwa kwanu. Sawa-sawa ninga imwe mukhadapereka mapindi a manungo anu kuti akhale adzakazi a pyakunyanyasa, na pyakuipa pinango pinakukwatani kuti mucite kuipa, cincino aciteni kuti akhale adzakazi a udidi toera kuperekeka kuna Mulungu. Thangwi pa n'dzidzi ukhakhala imwe adzakazi a madawi, mukhatsalakana kucita udidi tayu. Na tenepo, ndi ninji pidawina imwe pa pinthu penepi pinakupasani manyadzo cincino? Kumalisira kwapyo ndi kufa. Mbwenye cincino, pakumala kusudzulwa kwanu n'kudawa mbamudza kakhala adzakazi a Mulungu, misapu inasaka imwe isakucitani kuti mukhale anthu akuperekeka toera kuphatira Mulungu, pontho kumalisira kwayo ndi upulumuki wakukhonda kumala. Thangwi kutambiriswa kwa kudawa ndi kufa. Mbwenye muwoni wa kupaswa pezi wa Mulungu ndi upulumuki wakukhonda kumala muna Kirixtu Yezu, Mbuya wathu. Abale anga, ndisalonga na imwe ninga anthu akudziwa mwambo. Kodi imwe nkhabe dziwa kuti mwambo una mphambvu kuna munthu pa n'dzidzi onsene unakhala iye m'maso? Ndi ninga tenepa: Pa mwambo, nkazi wa pa banja asatongwa kuti akhale pabodzi na mamuna wace mbali m'maso. Mbwenye mamuna angafa, iye asudzuka pa mwambo wa pa banja. Na thangwi eneyo, iye angagumana na mamuna unango mbacita na iye banja mamuna wace mbali m'maso, asalongwa kuti asacita upombo. Mbwenye mamuna wace angafa, iye asudzuka pa mwambo. Na tenepo, angasembwa na mamuna unango, nkhabe anafuna kumulonga kuti ali kucita upombo. Tenepa, abale anga, imwe mwafambo pa Mwambo, pa thangwi ya manungo a Kirixtu, toera mukhale wa mamuna unango, ule adalamuka pa kufa, kuti tibale misapu kuna Mulungu. Thangwi pikhatongwa ife na nyama, kusirira kuipa kukhaphata basa m'manungo mwathu kwalamusirwa na mwambo, mbatikhabala misapu ikhatiyendesa kwa kufa. Mbwenye cincino, na kufa pa pire pikhatimanga kale, tasudzuka pa Mwambo toera tiphate basa na makhaliro mapsa a Nzimu Wakucena, mbatikhonda kutoweza makhaliro akale a Mwambo wakulembwa. Tinalonganji mphapo? Kuti Mwambo ndi kudawa? Nkhabe citika! Ndimo mwene, mwambo mbudakhonda kundipangisa kudawa, ine mbidacimwana dziwa kudawa. Thangwi mwambo mbudakhonda kulonga kuti: “Leka sirira.” Kusirira ine mbidakudziwa tayu. Mbwenye kudawa, na kuona njira idapangizwa iye na mitemo, kwabala kusirira konsene kwa kusiyana-siyana n'kati mwanga. Thangwi ungasoweka Mwambo, kudawa kwafa. Kale ene ine sikhali na Mwambo tayu. Mbwenye mudabwera ntemo, kudawa kwalamuka pontho, ine mbandifa. Iwo ene ntemo ukhafuna kudzesa upulumuki, wandidzesera kufa. Thangwi kudawa, na kuona njira idapangizwa iye na ntemo unowu, kwandinyengerera, kwandipha. Ndimo mwene, Mwambo ndi wakucena, pontho mitemo ndi yakucena, yakulungama na yadidi. Na tenepo, cadidi candidzesera kufa? Nkhabe citika! Mbwenye toera kudawa kupangizike kuti ndi kudawa, kwandisosera kufa kubulukira pa udidi. Na tenepo, na thangwi ya mitemo, kudawa kwapangizikeratu kudawa kwace. Thangwi tisadziwa kuti Mwambo ndi wa nzimu, mbwenye ine ndine wa nyama, ndaguliswa kuna kudawa ninga n'dzakazi wa madawi. Ine nkhabe kupidziwa pinacita ine. Thangwi siri kucita pinafuna ine tayu, mbwenye ndiri kucita pire pinazonda ine. Mphapo ngakhala ndisacita pire pinakhonda funa ine, ndisatawirira kuti mwambo ndi wadidi. Na tenepo, sinebve anapicita tayu, mbwenye ndi kudawa kuli muna ine. Ndisadziwa kuti muna ine, peno tilonge kuti, m'manungo mwanga, nkhabemo udidi. Thangwi ine ndisafuna kucita udidi, mbwenye ndisacimwana kuucita. Thangwi pinacita ine si udidi unafuna ine tayu, mbwenye kuipa kunakhonda ine, ndiko kunacita ine. Mphapo ngakhala ndisacita pinakhonda funa ine, anapicita sinebve tayu, mbwenye ndi kudawa kuli muna ine. Na tenepo, ndisagumana n'kati mwanga mwambo uxu: Ndingafuna cita udidi, kudawa kuli pabodzi na ine. Thangwi n'kati mwanga ndisafuna Mwambo wa Mulungu, mbwenye ndisaona mwambo unango mbuphata basa m'manungo mwanga, mbugwa nkhondo na mwambo wa ndzeru zanga, mbundicita n'dzakazi wa mwambo wa kudawa kunaphata basa m'mapindi a manungo anga. Munthu wakucherenga ninga ine! Mbani anafuna kundiombola pa manungo awa a kufa? Ndisapereka takhuta kuna Mulungu na thangwi ya Yezu Kirixtu Mbuya wathu. Na tenepo, ine ndekha mu ndzeru zanga, ndine n'dzakazi wa Mwambo wa Mulungu. Mbwenye pa nyama, ine ndine n'dzakazi wa mwambo wa kudawa. Na tenepo, cincino ale ali muna Kirixtu Yezu, nkhabebve thangwi yakukoneswa nayo. Thangwi muna Kirixtu Yezu, mwambo wa Nzimu wa upulumuki, wakusudzula pa mwambo wa kudawa na pa kufa. Thangwi pire pidacimwana kucita Mwambo na thangwi ya kusowa mphambvu kwa nyama yathu, Mulungu apicita pa kutuma Mwana wace mbamulandanisa na munthu wa kudawa, ninga ntsembe ya kukunda kudawa. Na tenepo, akonesa kudawa pa nyama, toera pinthu pyakulungama pinaphembwa na Mwambo, pikwanise kucitika muna ife anakhonda kutoweza makhaliro a nyama, mbwenye mbatitoweza makhaliro a Nzimu Wakucena. Ale anakhala mu nyama, ndzeru zawo zisanyerezera kucita pinafuna nyama, mbwenye ale anakhala mu Nzimu Wakucena, ndzeru zawo zisanyerezera kucita pinafuna Nzimu Wakucena. Thangwi manyerezero a nyama ndi kufa, mbwenye manyerezero a Nzimu Wakucena ndi upulumuki na ntendere. Na thangwi eneyo, manyerezero a nyama asaidana na Mulungu, thangwi nkhabe kubvera Mwambo wa Mulungu pontho nkhabe kwanisa kuubvera. Anabvera pinafuna nyama nkhabe kwanisa tsandzaisa Mulungu. Imwe nkhabe kundiwabve na nyama tayu, mbwenye musakundiwa na Nzimu, ngakhaladi Nzimu wa Mulungu uli muna imwe. Pontho, ngakhala munthu nkhabe Nzimu wa Kirixtu, munthu unowu si wa Kirixtu tayu. Mbwenye ngakhala Kirixtu ali muna imwe, manungo anu akhala ninga afa na thangwi ya kudawa, mbwenye nzimu wanu uli m'maso na thangwi ya kulungama. Na tenepo, ngakhala Nzimu wa Ule udalamusa Yezu pa kufa uli muna imwe, Unowu ubodzi-bodzi udalamusa Kirixtu pa kufa, unalamusambo manungo anu akufa, na Nzimu wace ubodzi-bodzi uli muna imwe. Na tenepo, abale anga ife tina mangawa, mbwenye si na nyama tayu, kuti tikhale mbatitoweza pontho pya nyama. Thangwi mungakhala mu nyama munafa, mbwenye na mphambvu za Nzimu mungapha mabasa a nyama, munapulumuka. Thangwi onsene anatsogolerwa na Nzimu wa Mulungu ndi ana a Mulungu. Thangwi imwe mudatambira nzimu wa udzakazi toera mugope pontho tayu, mbwenye mwatambira Nzimu Wakucena udakucitani kuti mukhale ana a Mulungu. Nzimu unowu ndiwo unacemera na ife “Aba,” ndiko kubveka, “Baba.” Nzimu unowu wa Mulungu ndiwo unaticitira umboni kuna nzimu wathu, kuti ife ndife ana a Mulungu. Ngakhala ndife ana a Mulungu, na tenepo ndifembo ana a unthaka. A unthaka a Mulungu, pontho ana a unthaka pabodzi na Kirixtu. Ngakhala taona nyatwa pabodzi na Iye, tinapaswambo mbiri pabodzi na Iye. Thangwi ine ndisadziwa kuti nyatwa zinaona ife cincino, nkhabe kudza kakhala sawa-sawa na mbiri inafuna kudza kapangizika mwa ife tayu. Pyonsene pidalengwa na Mulungu, pisadikhira na kufuna kukulu ntsiku eneyi inafuna kudza kapangisa Mulungu ana ace. Thangwi pidalengwa pyacitwa kuti pikhale pyakusowa basa, si kufuna kwa ipyo tayu, mbwenye ndi thangwi ya kufuna kwa Mulungu adapicita na cidikhiro, ca kuti ipyo pidalengwa pinati pibuluke mu udzakazi wakufubza uli na iwo, mbapitambira ufulu wa mbiri ya ana a Mulungu. Thangwi tisadziwa kuti pyonsene pidalengwa, mpaka lero pisabulira ninga nkazi wakubva kupha pakufuna kubala. Si penepi basi tayu, mbwenye na ife ene ana Nzimu Wakucena ninga misapu yakutoma, tisabulira n'kati mwathu mbitidikhira kucitwa kwathu ana a Mulungu, ndiko kuombolwa kwa manungo athu. Thangwi mu cidikhiro ceneci, ife tapulumuswa. Mbwenye kudikhira cinthu cinaoneka, si kudikhira tayu. Mbani munthu anadikhira cinthu cinaona iye? Mbwenye ngakhala tiri kudikhira cinthu kuti tidzati kuciona, tisacidikhira na kunyindira. Sawa-sawambo na Nzimu Wakucena, usatiphedza pa kupolola kwathu, thangwi ife nkhabe dziwa kuphembera ninga munafunika, mbwenye Nzimu ubodzi-bodzi usatiphemberera mbubulira na mafala akukhonda kulongeka. Mphapo ule anasaka kudziwa piri m'mitima mwathu, asadziwa ndi ninji pinafuna Nzimu, thangwi Nzimu Wakucena usaphemberera mbumba yace ninga munafunira Mulungu. Tisadziwa kuti pinthu pyonsene pisaphedzera udidi kuna ale anafuna Mulungu, ale adacemerwa kuti picitike ninga mudafunira Mulungu. Thangwi ale adadziwiwa kale na Mulungu, akhadasankhulwa kale kuti akhale akulandana na Mwana wace, toera Mwana unowu akhale wa utombo pakati pa abale ace azinji. Ale akhadasankhulwa kale, Iye aacemerambo. Ale adacemera Iye, aalungamisambo. Ale adalungamisa Iye, aapasambo mbiri. Tinalonganji mphapo pa pinthu penepi? Ngakhala Mulungu ali na ife, mbani anafuna kutikunda? Ule adaleka kukhondesa Mwana wace ene kuti atifere, mbwenye mbampereka na thangwi yathu tonsene, anakhonda tani kutipasa pezi pabodzi pene na Iye, pinthu pyonsene? Mbani anafuna kuapasa thangwi anyakusankhulwa a Mulungu? Ndi Mulungu anaalungamisa. Mbani anafuna kuakonesa? Nkhabe m'bodzi anafuna kuakonesa. Thangwi Kirixtu Yezu afa mbalamuka pa kufa, mbakhala ku nkono wa madyo wa Mulungu, pontho asatiphembererambo. Mbani anakwanisa kutimwazanisa pakufunana na Kirixtu? Ndi nyatwa, ndi kutsukwala, ndi kuchingwa, ndi njala, ndi usiwa, ndi kugopsa, peno ndi tarasada? Ninga pidalembwa m'Bukhu ya Mulungu kuti: “Na thangwi ya kukufunani tiri kufa ntsiku zonsene, mbaticitwa ninga mabira anaenda kaphiwa.” Mbwenye pa penepi pyonsene, ndife anyakukunda kupiringana anango, na thangwi ya ule adatifuna. Thangwi ndisatawira kuti kufa, peno kukhala m'maso, peno maanju, peno mizimu ya kuipa, peno pyacincino, peno pinafuna kudza, peno mphambvu zinango, peno pyakudzulu, peno pyapantsi pa mataka, peno pinthu pinango pyakulengwa, nkhabe cibodzi cinakwanisa kutimwazanisa pa kufuna kunaticita Mulungu, muna Kirixtu Yezu Mbuya wathu. Ndisalonga pya ndimo mwene muna Kirixtu, siri kulonga uthambi tayu. Manyerezero anga a muntima asandipanga penepi, mu Nzimu Wakucena kuti: Ndisatsukwala pikulu kakamwe, pontho ntima wanga usakhala mbundipha. Thangwi mbipidakwanisika, ine ene ndikhafuna ndipaswe pyanga dzedze, ndipambulike pyanga na Kirixtu, na thangwi ya kufuna abale anga a dzindza yanga, mbumba ya Izarayeli. Iwo asankhulwa kuti akhale ana a Mulungu, pontho Mulungu aapasa mbiri yace, pibverano pyace, Mwambo wace, malambiriro ace mu Nyumba ya Mulungu, na pipikiriro. Iwo ndi akulu a dzindza ya Izarayeli. Pontho Kirixtu, ninga munthu, ndi wa dzindza yawo. Ndiye Mulungu wa pyonsene, wakusimbwa kwenda na kwenda! Ameni. Si kulongera kuti fala ya Mulungu yadodomeka tayu. Thangwi mbumba yonsene ya Izarayeli, si dzindza ya Izarayeli tayu. Pontho onsene a dzindza ya Abharaamu, si ana a Abharaamu tayu. Thangwi Mulungu akhadalonga kuna Abharaamu kuti: “Dzindza yako inabulukira kuna Izaki.” Penepi nkhulongera kuti: anacemerwa ana a Mulungu, si ale adabalwa pa nyama tayu, mbwenye ana akupikirirwa ndiwo anacemerwa a dzindzadi ya Abharaamu. Thangwi fala ya cipikiriro yalonga tenepa: “N'dzidzi wace ungakwana, ndinabwera pontho. Sara anadza kabala mwana-mamuna.” Si penepi basi tayu. Pyacitikambo na ana awiri a mamphasa a Rabheka. Baba wawo, akhali m'bodzi ene mbuya wathu Izaki. Mbwenye ana enewa mbadzati kubalwa, mbadzati cita cibodzi cakuipa peno cadidi - toera kucitike kufuna kwa Mulungu pa kusankhula kwace, si na mabasa tayu, mbwenye ndi thangwi ya ule anacemera Rabheka apangwa na Mulungu kuti: “Mwana wako wankulu, anaphatira basa mwana wako wang'ono.” Ninga mudalemberwa ipyo m'Bukhu ya Mulungu kuti: “Ndafuna Djakobo, mbwenye ndakhonda Izauu.” Tinalonganji mphapo? Kuti Mulungu si wakulungama tayu? Nkhabe citika! Thangwi Iye alonga kuna Mozesi kuti: “Ndinabvera ntsisi kuna ule anafuna Ine kuti ndim'bvere ntsisi. Ndinakoma ntima kuna ule anafuna Ine kuti ndikome ntima.” Na tenepo, penepi hapinandawa na kufuna kwa munthu, peno na mphambvu za munthu tayu. Mbwenye pina ndawa na Mulungu pontho na ntsisi zace. Thangwi Bukhu ya Mulungu yalonga kuna Farau kuti: “Ine ndakulamusa na thangwi eneyi, toera mwa iwe ndipangize mphambvu zanga, pontho toera dzina yanga imwazwe pantsi pano ponsene.” Na tenepo, Mulungu asabvera ntsisi kuna ule anafuna Iye, pontho asaumisa ntima ule anafuna Iye. Mbwenye m'bodzi wanu anandibvundza tenepa: “Thangwi yanji mphapo Mulungu asatipasa thangwi? Mbani anapokanya pinafuna Iye?” Mbwenye ndiwe ani iwe munthu, kuti uketesane na Mulungu? “Kodi combo cinakwanisa longa kuna ule adacicita kuti: ‘Wandicitiranji tenepa?’ ” Kodi nyakuumba pyombo nkhabe kwanisa kukwata dongo ibodzi-bodzi mbaumba nayo combo cibodzi ca pinthu pyakupasa mbiri, cinango ca pinthu pyakupwazika? Mphapo ngakhala Mulungu na kufuna kupangisa kuipirwa kwace, pontho na kufuna kudziwisa mphambvu zace, apirira na kulekerera kukulu kakamwe pyombo pikhadatongera Iye kuonesa nyatwa kuti apifudze, tinalonganji mphapo ngakhala Iye acita penepi toera apangizembo upfumi wa mbiri yace, kuna pyombo pya ntsisi zace pidasasanyira Iye kale toera kupaswa mbiri, peno tilonge, kuna ife adacemerwambo na Iye, si kuna ale madjuda basi tayu, mbwenye na ale ene adakhonda kukhala madjuda? Ninga munalonga Iye mu bukhu ya Ozeya kuti: “Ndinadza kacemera ‘mbumba yanga’ ale adakhonda kukhala mbumba yanga. Pontho ndinadza kacemera ‘nyakufunika wanga’ ule adakhonda kufuniwa na Ine.” Pontho, “pa mbuto ibodzi-bodzi idapangwa iwo kuti: ‘imwe simwe mbumba yanga,’ penepo iwo anadza kacemerwa ‘ana a Mulungu wa m'maso.’ ” Pa thangwi ya Izarayeli, Izaya akhuwa mbalonga kuti: “Na kuinjipa kudacita mbumba ya Izarayeli ninga checa ya m'bara, mbwenye anafuna pulumuswa ndi pang'ono basi. Thangwi Mbuya anati acite na mwansanga pantsi pano, pyonsene pidalonga Iye.” Ninga iye Izaya akhadapilonga kale kuti: “Mbuya wa Anyankhondo mbadakhonda kutisiyira dzindza, mbatidakhala ninga nzinda wa Sodhoma, pontho sawa-sawa ninga nzinda wa Gomora.” Tinalonganji mphapo? Tinalonga kuti ale adakhonda kukhala madjuda, mbakhakhonda kusaka kulungama, adza kagumanako kulungama. Mbwenye ndi kulungama kudabulukira pa cikhulupiro. Mbwenye Izarayeli akhasaka kulungama kubulukira pa mwambo, hadadza kapikwanisa tayu. Thangwi yanji? Thangwi akhapisaka na mabasa awo. Hakhapisaka na kukhulupira tayu. Agwegweduka na “mwala wa kugwegwedusa.” Ninga mudalembwa ipyo kuti: “Lang'anani! Ndiri kuikha mu Siyau mwala ubodzi wakugwegwedusa, mwala ukulu unagwisisa. Pontho ule anaukhulupira, nkhabebve kudza kasandikika.” Abale anga, pinafuna ine muntima mwanga, na maphembero anacita ine kuna Mulungu, mba kuti ana a Izarayeli apulumuswe. Ndinaacitira umboni kuti iwo asakakamira kakamwe pya Mulungu, mbwenye iwo asapicita mbakhonda kudziwa. Thangwi na kukhonda dziwa kulungama kunabuluka kuna Mulungu, pontho na kusaka kucita kulungama kwawo, akhonda kubvera kulungama kwa Mulungu. Thangwi kumalisira kwa mwambo ndi Kirixtu, toera onsene adatawira akhale akulungama. Lang'anani, Mozesi alemba kuti: “Munthu anacita kulungama kunabulukira pa mwambo, anakhala m'maso.” Mbwenye kulungama kunabuluka pa kukhulupira kusalonga tenepa: “Leka kulonga muntima mwako kuti: ‘Mbani anafuna kwira kudzulu?’ Penepi nkhubveka kuti: Toera atichitisire Kirixtu, peno ‘Mbani anafuna chitira n'djenje ya cidima?’ Penepi nkhubveka kuti: Toera atilamusire Kirixtu pa anyakufa.” Mbwenye fala ya Mulungu isalonganji? “Fala iri dhuzi na iwe. Iri pa mulomo pako na muntima mwako.” Iyi ndiyo fala ya cikhulupiro inamwaza ife. Iwe ungalonga na mulomo wako kuti Yezu ndi Mbuya, pontho mbutawira na ntima wako kuti Mulungu amulamusa pa kufa, unapulumuswa. Thangwi kulungama kusadza na kutawira kwa muntima, kupulumuka kusadza na kulonga na mulomo wathu. Ninga pinalonga Bukhu ya Mulungu kuti: “Onsene anan'khulupira nkhabebve kudza kasandikika.” Madjuda na ale adakhonda kukhala madjuda hadasyana tayu. Thangwi Mbuya wa anthu onsene ndi m'bodzi ene pontho ndi m'pfumi kuna onsene anancemera. Thangwi “onsene ale anacemera dzina ya Mbuya, anapulumuswa.” Mphapo anancemera tani munthu anakhonda iwo kukhulupira? Pontho anan'khulupira tani munthu anakhonda iwo kum'bva mbalongwa? Pontho anam'bva tani angasoweka munthu wakumwaza Mphangwa? Pontho anthu anamwaza tani Mphangwa angakhonda kutumwa? Ninga pidalembwa m'Bukhu ya Mulungu kuti: “Ndi pinthu pyadidi kakamwe kuona anthu anaenda mbamwaza Mphangwa Zadidi!” Mbwenye si onsene tayu adatawira Mphangwa Zadidi. Thangwi Izaya alonga kuti: “Mbuya, mbani adatawira Mphangwa zathu?” Na thangwi eneyo, kukhulupira kusabwera na kubva, kubva mafala a Kirixtu. Mbwenye ine ndisabvundza kuti: Iwo hadabva tayu? Ande abva! Thangwi pyalembwa kuti: “Kukhuwa kwawo kwabveka pantsi pano ponsene, pontho mafala awo afika mpaka kudadhoroma dziko.” Ndiri kubvundza pontho kuti: Nkhulongera kuti Izarayeli hadapibvesesa tayu? Pakutoma Mozesi alonga kuti: “Ine ndinati ndicite kuti imwe mukhale na bibvu na mbumba yakupwazika. Pontho ndinakucitani kuti imwe muipirwe na mbumba yakusowa ndzeru.” Izaya akhala na cipapu mbalonga tenepa: “Ine ndagumaniwa na ale akhakhonda kundisaka. Pontho ndabulukira kuna ale akhakhonda kundibvundzisa.” Mbwenye pa thangwi ya Izarayeli, Iye alonga tenepa: “Ntsiku zonsene ndafuthula manja kuna mbumba yakukhonda kubvera na ya upoka.” Apo cincino funa ndibvundze: Kodi nkhulongera kuti Mulungu aikhonda mbumba yace? Nkhabe citika! Ine ene ndine muizarayeli, dzindza ya Abharaamu, nkhonde ya Bhenjamini. Mulungu hadaikhonda tayu mbumba yace idadziwa Iye kale ene. Kodi imwe nkhabe kupidziwa pidalonga Eliya kuna Mulungu kusumira Izarayeli, ninga mudalembwa ipyo m'Bukhu ya Mulungu kuti: “ Mbuya, awa apha maporofeta anu mbafudza maguwa anu a ntsembe. Adasala ndine basi, pontho cincino asasaka kupha na ine ene?” Mphapo Mulungu antawira tani? Antawira tenepa: “Ndapambula pikwi pinomwe pya amuna adakhonda godamira mulungu wapezi anacemerwa Bhaali.” Ndi penepi pinacitikambo na lero. Asala ana adasankhulwa na thangwi ya kukoma ntima kwa Mulungu. Ngakhala pyacitika na thangwi ya kukoma ntima kwa Mulungu, pinacitikabve na thangwi ya mabasa tayu. Mbapidakhala ndi na mabasa, kukoma ntima kwa Mulungu mbukudakhalabve kukoma ntima tayu. Tinalonganji mphapo? Tinalonga kuti mbumba ya Izarayeli apicimwana pire pikhasaka iwo, mbwenye ale adasankhulwa apikwanisa. Anango aumiswa mitima, ninga munalongera Bukhu ya Mulungu kuti: “Mulungu aapasa nzimu wa citulo. Aapasa maso akukhonda kuona, na makutu akukhonda kubva, mpaka lero.” Pontho Dhavidhi alonga kuti: “Pa thando inadyera iwo, mbapakhale ninga ukonde, ninga nsampha, cakugwegwedusa na cakubwezera nyatwa kuna iwo. Maso awo mbakhale na cidima toera acimwane kuona, na misana yawo mbikhale yakukotama kwenda na kwenda.” Mphapo cincino funa ndibvundze pontho kuti: Kodi iwo agwegweduka toera agwe mbacimwana kulamuka pontho? Nkhabe citika! Mbwenye na thangwi ya kudodomeka kwawo, ndiko kudabweresa upulumuki kuna ale adakhonda kukhala madjuda, toera mbumba ya Izarayeli ikhale na bibvu. Mbwenye ngakhala kudodomeka kwawo ndi mpfuma kuna dziko, pontho kupolola kwawo ndi mpfuma kuna ale adakhonda kukhala madjuda, ndiye tani n'dzidzi wawo ungakwana! Cincino ndisalonga na imwe adakhonda kukhala madjuda. Thangwi ndine mpoxtolo wa Yezu, kuna ale adakhonda kukhala madjuda, ndisapasa mbiri basa yanga, mbandidikhira kuti panango ndikwanise kucitisa mbumba yanga kuti ikhale na bibvu, anango mbapulumuka. Thangwi ngakhala kukhondiwa kwawo na Mulungu kwadzesa kusekesana kwa dziko na Mulungu, ndiye tani kutawirirwa kwawo? Kunapulumusa anyakufa. Ngakhala phindi ya nkate wa pyakudya pyakutoma pya m'munda waceneswa, na nkate ene onsene waceneswambo. Ngakhala n'chici waceneswa, na nthawi zace zene zaceneswambo. Ngakhala nthawi zinango zagwandiwa, iwembo ninga muti wa mulivera wa n'tsanga wachekwambo pakati pa nthawi zinango, cincino mbumwambo pabodzi pene nthombvu zinabuluka ku n'chici wa muti wa mulivera wa m'mudzi, leka kupikuza mbupwaza nthawi zenezi zidagwandiwa tayu. Mphapo ungapikuza dziwa kuti anadyesa n'chici siwe tayu, mbwenye n'chici ndiwo unakudyesa. Na tenepo, iwe unati ulonge kuti: “Nthawi zamala gwandiwa, toera ine ndipfekererwe.” Ndimo mwene. Iwo agwandiwa na thangwi yakukhonda kutawira kwawo. Mbwenye iwe uciri penepo ndi thangwi ya kukhulupira kwako. Leka kupikuza, mbwenye ugope. Thangwi ngakhala Mulungu agwanda nthawi zakubalwa penepo, dziwa kuti anakugwandambo. Onani mphapo udidi wa Mulungu na kukala ntima kwace. Asakala ntima na ale adagwa, mbwenye asakoma ntima na iwe, male unganyanya kunyindira kukoma ntima kwace. Pezi pyene, na iwe ene unadza kagwandiwambo. Na iwombo, angasiya kuuma ntima kwawo, anapfekerwambo. Thangwi Mulungu anamphambvu za kuapfekerera pontho. Thangwi ngakhala iwe wagwandiwa pa muti wa mulivera wa n'tsanga, mbubuluswa padamera iwe mbupfekererwa pa muti wa mulivera wa m'mudzi, pinthu pyakukhonda kucitika, ndiye tani kuna nthawi za penepo! Zinapfekererwa pontho pa muti ubodzi-bodzi. Abale anga, ine nkhabe funa kuti imwe mukhale ninga anthu akukhonda dziwa pinthu ipi pyakubisala pya Mulungu, toera mukhonde nyerezera kuti ndimwe adziwisi. Kuuma ntima uku kung'ono kwabwera kuna mbumba ya Izarayeli, mpaka kufikira wakwana nsoka wa ale adakhonda kukhala madjuda atawirembo Mulungu. Na tenepo, mbumba yonsene ya Izarayeli inapulumuswa, ninga mudalemberwa ipyo m'Bukhu ya Mulungu kuti: “Mpulumusi anabuluka ku Siyau, mbadza kabulusa kuipa konsene kwa dzindza ya Djakobo. Ici ndi cibverano canga na iwo ndingadza kabulusa madawi awo.” Pa Mphangwa Zadidi, iwo mbanyamalwa a Mulungu na thangwi yanu, mbwenye pakusankhulwa na Mulungu iwo ndi anyakufunika, na thangwi ya ambuya awo. Thangwi Mulungu nkhabe kutipokosera miyoni idatipasa Iye peno kucemera kudaticita Iye. Ninga imwe kale ene mukhakhonda kubvera Mulungu, mbwenye cincino mwatambira ntsisi zace na thangwi yakukhonda kubvera kwa madjuda, tenepambo, cincino iwo akhonda kubvera Mulungu toera abverwembo ntsisi, na thangwi ya ntsisi za Mulungu zidacita Iye kuna imwe. Thangwi Mulungu aafungira onsene n'kati mwakukhonda kubvera kwawo, toera Iye apangize ntsisi zace kuna onsene. Ho, lang'anani upfumi ukulu, wa udziwisi na ucenjeri wa Mulungu! Mbani anakwanisa kuchulula pinatonga Mulungu! Pontho mbani anadziwa njira zace! “ Ndi ani anadziwa ndzeru za Mbuya? Peno ndi ani anakwanisa kumulanga?” “ Mbani adatoma kumpasa cinthu, toera angamala abwezerwe?” Thangwi pyonsene pyabuluka kuna Iye, pyacitwa na Iye, pontho pyonsene mphyace. Mbiri kuna Mulungu kwenda na kwenda! Ameni. Na tenepo, abale anga, ndisakuphembani na ntsisi za Mulungu, kuti mupereke manungo anu ninga ntsembe za m'maso, zakucena na zakukoma kuna Mulungu. Kweneku ndiko kulambira kunafunika kuna Mulungu. Lekani kusangizira dziko, mbwenye cinjikani mukhale anthu apsa pa manyerezero anu, toera mukwanise kulesera na kudzindikira kufuna kwadidi, kwakukoma na kwakukwana kwa Mulungu. Na thangwi eneyo, na kukoma ntima kwa Mulungu kudapaswa ine, ndisakupangani imwe monsene kuti: Lekani kunyerezera kuti ndimwe adidi kakamwe kupiringana makhaliro ana imwe. Mbwenye munyerezere na kukhurudzika, na n'dida wa cikhulupiro cidapaswa imwe na Mulungu. Thangwi ninga manungo mabodzi ana mapindi mazinji, mapindi enewa onsene nkhabe cita basa ibodzi ene. Na tenepo, ifembo na kuinjipa konsene kudacita ife, ndife manungo mabodzi muna Kirixtu, pontho phindi ibodzi na ibodzi yaphatana na onsene anango. Tina miyoni yakusiyana-siyana, idapaswa ife na kukoma ntima kwa Mulungu. Ngakhala alipo apaswa muwoni wa ciporofeta, mbacite sawa-sawa na kukhulupira kwace. Ngakhala wapaswa muwoni wa kuphata basa, phata. Ngakhala wapaswa muwoni wa kupfundzisa, pfundzisa. Ngakhala wapaswa muwoni wakupasa cipapu andzako, apase, peno wapaswa muwoni wakupasa, pasa na ntima wako onsene, ngakhala wapaswa muwoni wakutsogolera, tsogolera mwadidi, ngakhala wapaswa ntsisi zakuphedza acherengi, phedza na kukomerwa. Kufunana kwanu mbukuleke kukhala kwakunyengezana. Zondani kuipa, kakamirani udidi. Wangisani na kufunana muubale m'bodzi na m'bodzi. Sakani maka-maka kulemedza andzanu, mbamukhonda kusaka kulemedzeka mwekha. Phatani basa na kutsandzaya, khalani akuwanga mu nzimu mbamuphatira basa Mbuya. Khalani akutsandzaya pa kudikhira kwanu, pirirani pa nyatwa, wangisirani pa kuphembera. Phedzani mbumba ya Mulungu na pire pina imwe, pa pire pidasowa iwo. Tambirani alendo. Pasani nkhombo ale anakuzondani. Apaseni nkhombo mbamukhonda kuapaswa dzedze. Tsandzayani na anatsandzaya, lirani na analira. Khalani na makhaliro mabodzi ene m'bodzi na m'bodzi. Lekani kupikuza, mbwenye funani kuphatana na anthu akupwazika. Lekani kukhala na manyerezero a udziwisi n'kati mwanu. Lekani kubwerezera kuipa munthu anakucitirani kuipa. Sakani kucita udidi pamaso pa anthu onsene. Citani pyonsene pinakwanisika kwa imwe, toera mukhale na ntendere na onsene. Anyakufunika, lekani kuatonga ndimwe ale anakucitani kuipa, mbwenye siyani Mulungu aipirwe ndiye, thangwi pyalembwa kuti: “Anafuna kuathabusa ndine. Ine ndine anafuna kuatonga.” Ndipyo pidalonga Mbuya. Mbwenye “ngakhala nyamalwa wako ana njala, mpase cakudya. Ngakhala ana nyota mpase madzi. Ungacita penepi, iwe usamuikha makala a moto pa nsolo pace.” Leka kukundiwa na kuipa, mbwenye kunda kuipa na kucita udidi. Anthu onsene asatongwa kubvera utongi wa dziko. Thangwi nkhabe utongi udakhonda buluka kuna Mulungu. Utongi onsene uli pa dziko waikhwa na Mulungu. Na tenepo, ule anakhonda kubvera utongi, asakhonda kubvera pire pidaikhwa na Mulungu, pontho ale anacita penepi anadza kakoneswa. Thangwi atongi nkhabe funika kuti agopeke na ale anacita udidi, mbwenye na ale anacita kuipa. Kodi iwe usafuna kuti ukhonde kugopa atongi? Cita pyadidi, iwo anakusimba. Thangwi utongi ndi nyabasa wa Mulungu, toera udidi uoneke kuna iwe. Mbwenye iwe ungacita kuipa, khala mbugopa, thangwi mphambvu zakuthabusa zina utongi ndi zakulungama. Utongi ndi nyabasa wa Mulungu, nyakutonga miseru toera kuthabusa ale anacita kuipa. Na tenepo, pisafunika kuti ife tibvere utongi. Si kugopera kuthabuswa basi tayu, mbwenye pontho manyerezero athu a muntima, asatipanga kuti tiabvere. Pontho ndi thangwi eneyo imwe musalipa misonkho, thangwi atongi asaphatira basa Mulungu ntsiku zonsene, mbakakamira kuphata basa eneyi. Alipeni onsene pire pinatongwa iwo kulipwa. Ngakhala ndi nsonkho, lipani nsonkho. Ngakhala ndi nsonkho-nsonkho, citani nsonkho-nsonkho. Ngakhala ndi kugopa, agopeni. Ngakhala ndi kulemedza, alemedzeni. Lekani kukhala na mangawa na munthu. Mangawa anafuna khala na imwe mbakufunana m'bodzi na m'bodzi. Thangwi ule anafuna ndzace, asalemedza Mwambo. Thangwi matongero analonga kuti: “Leka kucita upombo,” “Leka kupha munthu,” “Leka kuba,” “Leka sirira,” pontho na matongero anango, onsene asalongera ncigwagwa kuti: “Funa ndzako ninga iwe ene. ” Anafuna ndzace nkhabe kuncitira kuipa. Na tenepo, kufunana ndiko kumalisira kwa mwambo. Citani penepi mbamudziwa n'dzidzi una ife. Wafika n'dzidzi wanu wa kulamuka n'citulo, thangwi cincino upulumuki wathu uli dhuzi kakamwe kupiringana ntsiku idatawira ife Yezu. Masiku ali kumala, kunja kuli kuca. Na tenepo, mbatisiyeni mabasa a n'cidima, tikwate piphano pya cieza. Mbatifambeni na makhaliro adidi, ninga anthu anafamba na masikati, mbatisiya kuledzera na maphwandu akunyanyasa, lukwali, pyakupasa manyadzo, kucita nthonga, na bibvu. Mbwenye bvalani Mbuya Yezu Kirixtu. Lekani kukhala mbamunyerezera kucita pinafuna nyama. Atambireni ale anasowa mphambvu pa kukhulupira, mbamukhonda kuketesana na iwo pa pire pinapenula iwo. Unango asatawira kudya pyonsene. Mbwenye unango anasowa mphambvu pa kukhulupira, asadya masamba basi. Ule anadya pyonsene mbaleke pwaza ule anakhonda kupidya. Ulembo anakhonda kudya pyonsene, mbaleke pasa thangwi ule anadya, thangwi iye atambirwambo na Mulungu. Ndiwe ani iwe unapasa thangwi nyabasa wa ndzako? Angagwa, peno angakhala dzololo, penepi mphyace na mbuya wace. Mbwenye iye anakhala dzololo, thangwi iye ene Mbuya ana mphambvu zakun'khalisa dzololo. Unango asasiyanisa ntsiku ibodzi na indzace. Unango asanyerezera kuti ntsiku zonsene ndi sawa-sawa. M'bodzi na m'bodzi akhonde kupenula pinampanga ntima wace. Ule anasyanisa ntsiku ibodzi na inango, asapicitira Mbuya. Ule anadya nyama, asadyera Mbuya, thangwi asasimba napyo Mulungu. Pontho ule anakhonda kudya, asakhondera Mbuya, mbasimba napyo Mulungu. Thangwi nkhabe m'bodzi anapikhalira m'maso ekha ene. Pontho nkhabe m'bodzi anapifera ekha ene. Thangwi tingakhala m'maso, ndife a Mbuya. Tingafa, ndife a Mbuya. Na tenepo, peno takhala m'maso, peno tafa, ndife a Mbuya. Ndi thangwi eneyo idafera Kirixtu mbalamuka pa kufa, toera akhale Mbuya wa akufa na a m'maso. Na tenepo, iwe usapaseranji thangwi m'bale wako? Pontho usapwazeranji m'bale wako? Thangwi ife tonsene tinati tibulukire patsogolo pa mbuto inatongera Mulungu miseru. Thangwi pyalembwa kuti: “Mbuya alonga tenepa: ‘Ndinadumbira na dzina yanga kuti anthu onsene anati andigodamire, pontho anthu onsene anati asimbe Mulungu.’ ” Mphapo, m'bodzi na m'bodzi wathu, anati atawire ekha ene pikhacita iye patsogolo pana Mulungu. Na tenepo, mbatilekeni kupasana thangwi m'bodzi na m'bodzi. Mbwenye mbatisakeni kuti tikhonde ikha cinthu cakugwegwedusa peno kugwisa n'kudawa m'bale wathu. Ine ndisadziwa, pontho ndisatawiradi muna Mbuya Yezu, kuti nkhabe cakudya cibodzi cinaoneka cokha kuti caswipa. Mbwenye ngakhala alipo munthu ananyerezera kuti cakudya ici caswipa, caswipa kuna iye. Ngakhala na thangwi ya cakudya usatsukwalisa m'bale wako, penepi si macitiro a kufunana tayu. Leka siya kuti ule adaferwa na Kirixtu ataike na thangwi ya cakudya. Pinthu pyadidi kuna imwe, lekani kupicita kuti pikhale pinthu pyakulongwa napyo kuipa. Thangwi Umambo wa Mulungu si cakudya peno si cakumwa tayu, mbwenye ndi kulungama, ndi ntendere na kutsandzaya mu Nzimu Wakucena. Ule anaphatira basa tenepo Kirixtu, Mulungu asakomerwa na iye, pontho anthu asansimba. Na thangwi eneyo, mbatisakeni pinthu pinatidzesera ntendere na pinatimanga muna Kirixtu m'bodzi na m'bodzi. Lekani fudza basa ya Mulungu na thangwi ya cakudya tayu. Ndimo mwene, pyakudya pyonsene pyaceneswa, mbwenye si pyadidi tayu kudya cinthu cinango cinagwisa ndzako n'kudawa. Ndi pyadidi kukhonda kudya nyama, peno kukhonda kumwa vinyu, peno kucita cinthu cinango cinagwisa m'bale wako n'kudawa. Pire pinakhulupira iwe muntima mwako na thangwi ya pinthu penepi, mbapikhale muna iwe na Mulungu wako. Mbatsandzaye ule anakhonda kututumuka kuti ndadawa na pire pidatawira iye. Mbwenye ule anadya mbapenula, ana mphoswa. Thangwi nkhabe kudya na cikhulupiro. Na tenepo, pyonsene pinakhonda bulukira pa cikhulupiro, ndi kudawa. Ife anyakuwangisira pakutawira, tisatongwa tipirire kupolola kwa ale adasowa mphambvu pakutawira, mbatikhonda kucita pinatsandzaisa ife tekha ene. M'bodzi na m'bodzi wa ife, asafunika atsandzaise ndzace, toera ndzace akhale mwadidi pontho akule pa kukhulupira. Thangwi na Iyenembo Kirixtu hadasaka kutsandzaya kwace basi tayu, mbwenye ninga pidalembwa m'Bukhu ya Mulungu kuti: “Kutikana kwa ale anakutikana, kwagwera Ine.” Thangwi pyonsene pidalembwa kale ene pyalembwa toera kutipfundzisa, kuti kubulukira pa kupirira pontho na pa kubalangazwa na Bukhu ya Mulungu, tikoye cidikhiro cathu. Mulungu anapasa kupirira na kubalangaza, mbakupaseni nzimu wakubverana m'bodzi na m'bodzi, ninga munafuna Kirixtu Yezu, toera na ntima ubodzi basi, pontho na mulomo ubodzi basi, mukuze Mulungu, Baba wa Mbuya wathu Yezu Kirixtu. Na tenepo, tambiranani m'bodzi na m'bodzi ninga Kirixtu akutambirani, toera mupase mbiri Mulungu. Ine ndisakupangani kuti Kirixtu acitika nyabasa wa anyakusibza, na kufuna undimo mwene wa Mulungu, toera kusimbisisa cipikiriro cidacita Iye na a mbuya awo, kuti ale adakhonda kukhala madjuda akuze Mulungu na thangwi ya ntsisi zace, ninga pidalembwa m'Bukhu ya Mulungu kuti: “Na thangwi eneyo, ndinakukuzani pakati pa anthu adakhonda kukhala madjuda, mbandikuimbirani nyimbo za kukuza dzina yanu.” Pontho pyalembwa kuti: “Imwe, mbumba idakhonda kukhala madjuda, tsandzayani na mbumba ya Mulungu.” Pyalembwa pontho kuti: “Imwe monsene mudakhonda kukhala madjuda kuzani Mbuya. Kuzani Mbuya imwe mbumba zonsene.” Mporofeta Izaya alembambo kuti: “Anadza kabalwa mu dzindza ya Djesi, ule anadza kalamuka toera kudza kakhala ntongi wa ale adakhonda kukhala madjuda. Iwo anadza kan'dikhira.” Mulungu wa cidikhiro, mbakudzazeni na kutsandzaya konsene, na ntendere, pa kun'khulupira kwanu, toera mukhale na cidikhiro cikulu, na mphambvu za Nzimu Wakucena. Abale anga, ine ene ndisatawira kuti imwe mwadzala na udidi pontho ndimwe anthu ana udziwisi kakamwe, mbamukwanisa kulangana m'bodzi na m'bodzi. Mbwenye ndakulemberani ipi na cipapu consene, maka-maka toera ndikukumbuseni pontho penepi, na thangwi ya kukoma ntima kwa Mulungu kudandicitira Iye. Ntsisi zenezi ndi zakukhala nyabasa wa Kirixtu Yezu pakati pa ale adakhonda kukhala madjuda. Basa yanga ikulu ninga nyantsembe, ndi ya kulonga Mphangwa Zadidi za Mulungu, toera ale adakhonda kukhala madjuda, akwanise kukhala ntsembe yakufunika kuna Mulungu, pontho yakuceneswa na Nzimu Wakucena. Na tenepo, ndina gaya muna Kirixtu Yezu, na thangwi ya basa ya Mulungu. Ine nkhabe cipapu cakukwanisa kulonga, kupiringana pire pidacita Kirixtu bulukira muna ine, na mafala peno na kucita, toera kukwata ale adakhonda kukhala madjuda abvere Mulungu, na thangwi ya mphambvu ya pidzindikiro na ya pirengo, pontho na mphambvu za Nzimu Wakucena. Na tenepo, kubulukira Djerusalema na m'pisa pyace pya dhuzi, mpaka ku cisa ca Iliriku, ndamala kumwaza mwakukwana Mphangwa Zadidi za Kirixtu. Ine ndikhasirira kakamwe kumwaza Mphangwa Zadidi mule mukhakhonda dziwika Kirixtu, kuti ndikhonde kulimisa basa mule mudamala kulimiswa kale na unango. Mbwenye ninga pidalembwa m'Bukhu ya Mulungu kuti: “Ale adakhonda kumubva mbalongwa anadza kamuona, pontho ale adakhonda kum'bvesera, anadza kam'bvesesa.” Ndi thangwi eneyo idandicitambo kuti kazinji kene ndapingizwa kudza kakuonani. Mbwenye cincino, na kumala kwa basa n'kati mwa pisa pino, pontho na thangwi ya kupita pyaka pizinji mbandifuna kukuonani, ndisasaka kuti ndidze kakuonani ndingaenda ku dziko ya Xipanya. Thangwi ndisadikhira kukuonani pa kupita kwanga na kweneku, pontho toera mundiphedze pa ulendo wanga wa kwenda kweneku, pakumala kuceza pang'ono na imwe. Mbwenye cincino ndiri pa ulendo kwenda ku Djerusalema, kaphatira basa mbumba ya Mulungu. Thangwi abale a ku Masedhonya na a ku Akaya, na kutsandzaya kwawo konsene, acita nsonkho-nsonkho toera kuphedza abale anyakucherenga, pakati pa mbumba ya Mulungu ya ku Djerusalema. Iwo akomerwa na kucita penepi, pontho ndimo mwene, iwo mbanyamangawa kuna mbumba ya Mulungu ya ku Djerusalema. Thangwi ngakhala ale adakhonda kukhala madjuda ali nazombo nkhombo za mu nzimu za madjuda, iwombo asatongwa kuphedza madjuda na pinthu pyawo pina iwo. Na tenepo, pakumala basa eneyo, pontho mbandidziwa kuti iwo aitambiradi miyoni eneyi, ndinaenda ku Xipanya, mbandipita mbindikuonani. Ine ndisadziwa kuti ndingabwera kudza kakuonani, ndinadza mbidadzala na nkhombo za Kirixtu. Abale anga, ndisakuphembani na dzina ya Mbuya wathu Yezu Kirixtu, pontho na kufuna kwa Nzimu Wakucena, kuti mumenye nkhondo pabodzi na ine pa miphembero inandicitira imwe kuna Mulungu. Ndiphemberereni kuti ndiombolwe m'manja mwa anyakukhonda kutawira Yezu a ku Djudeya, pontho toera basa yanga ku Djerusalema, ikwanise kutawirwa na mbumba ya Mulungu. Na tenepo, Mulungu angafuna, ndinakuonani na kukomerwa konsene, pontho mbindikwanisa kupuma pang'ono pabodzi na imwe. Mulungu wa ntendere mbakhale na imwe monsene. Ameni. Ndisakutumirani mwana-nkazi wathu Febhe, nyabasa wa abale a gereja ya ku nzinda wa Senkereya, muntambire mwadidi mu dzina ya Mbuya ninga munatambirwa mbumba ya Mulungu, pontho m'phedzeni na pyonsene pinadza kafuna iye kwa imwe, thangwi asaphedza anthu azinji, na ine ene. Munandiwangisira Pirisila na mamuna wace Akila, anyabasa andzanga muna Kirixtu Yezu. Iwo hadagopa kuphiwa na thangwi yanga tayu. Ndisapereka takhuta kuna iwo. Sine basi anapereka takhuta tayu, mbwenye na abale onsene a magereja, adakhonda kukhala madjuda. Munawangisambo abale a gereja anakhala mbagumanyikana pa nyumba pawo. Mbaende kawange Epinetu, m'bale wanga wakufunika wakutoma kutawira Kirixtu mu dziko ya Azya. Mbaende kawange Mariya, adakuphatirani basa ikulu. Mbawange Andoroniku na mwana-nkazi wathu Djuniya, andzanga akhakhala na ine pabodzi n'kaidi, a dzindza yanga, anthu akusankhulika pakati pa apoxtolo. Ine mbandidzati kutawira Kirixtu, iwo akhadantawira kale ene. Mbaende kawange Ampilyatu, m'bale wanga wakufunika muna Mbuya. Mbawange Urubhanu, nyabasa ndzathu muna Kirixtu, pabodzi na Xitaki m'bale wanga wakufunika. Mbawange Apelesi, adatawirirwa muna Kirixtu. Wangisanimbo anthu a pa nyumba ya Arixitobhulu. Mbawange Herodhiyau, wa dzindza yanga. Mbawange anthu ali muna Mbuya pa nyumba ya Narisizu. Wangisanimbo Tirifena na Tirifoza, akazi anaphata basa ikulu kuna Mbuya. Wangisani mwana-nkazi wathu wakufunika Perisidhe, adaphata basa ikulu kuna Mbuya. Mbaende kawange Rufu, mamuna adasankhulwa muna Mbuya, na mai wace adakhala ninga ndi mai wangambo. Mbawange Ansikiritu, Felegonte, Erimesi, Patorobha, Erimasi na abale ali na iwo pabodzi. Mbaende kawange Filologu, Djulya, Nereu na m'bale wace wa nkazi, pontho pabodzi na Olimpa, na mbumba ya Mulungu yonsene iri na iwo. Mwanyikanani m'bodzi na m'bodzi na mpsompsono wa ciubale. Magereja onsene a Kirixtu asakumwanyikani. Abale anga, ndisakuphembani kuti mucite mphole-mphole na ale anasaka kuti mugawane pontho mugwegweduke, mbapingiza cipfundzo cidatambira imwe. Enewa athaweni. Thangwi anthu enewa hali kuphatira basa Kirixtu Mbuya wathu tayu, mbwenye asaphatira mimba zawo basi. Na mafala awo akukoma na kutapira kwawo n'kanwa, asanyengerera anthu akufewa ntima. Anthu onsene asakubvani mbamulongwa na thangwi ya kubvera kwanu. Na thangwi eneyo, ndatsandzaya pikulu kakamwe. Mbwenye ndisafuna kuti mukhale anyakudziwisa pa pire pyadidi, mbamusowa ndzeru pa pire pyakuipa. Cincino pano, Mulungu wa ntendere anadza kanting'inda Sathani pantsi pa myendo yanu. Kukoma ntima kwa Mbuya wathu Yezu, mbakukhale na imwe. Timoti, ndzanga wa pabasa, pabodzi na Lusyo, Djasoni na Sosipateri, a dzindza yanga, asakumwanyikani. Ine Terisyo adalemba tsamba iyi, ndisakumwanyikani imwe muna Mbuya. Asakumwanyikani Gayo, panafikira ine, na nsoka onsene wa anyakutawira Yezu. Eraxtu, nyabasa wakukoya kobiri ya mu nzinda, pabodzi na m'bale wathu Kwartu, asakumwanyikani monsene. [Kukoma ntima kwa Mbuya wathu Yezu Kirixtu, mbakukhale na imwe monsene. Ameni. ] Ndi Mulungu, ule anakwanisa kukukhalisani dzololo kakamwe pa kukhulupira, ninga Mphangwa Zadidi zidakupangani ine pontho na fala ya Yezu Kirixtu, sawa-sawa ninga mudadziwiswa ife pinthu pyakubisala kale na kale. Mbwenye cincino, pyapangizika mbipidziwiswa na maporofeta m'Bukhu ya Mulungu, pontho na thangwi ya kufuna kwa Mulungu wa kwenda na kwenda, fala eneyi yakubisala yalongwa kuna madzindza onsene, toera afike pakum'bvera na pakun'khulupira. Ande, Mulungu ekha basi wa udziwisi, mbapaswe mbiri ya kwenda na kwenda, kubulukira muna Yezu Kirixtu. Ameni. Ine Paulu, adacemerwa na kufuna kwa Mulungu kuti ndikhale mpoxtolo wa Kirixtu Yezu, ndiri pabodzi na m'bale wathu Soxiteni. Ndisalembera abale a gereja ya Mulungu iri ku nzinda wa Korintu, kuna iwo adaceneswa muna Kirixtu Yezu, mbacemerwa kuti akhale mbumba ya Mulungu, pabodzi na onsene ale anacemera m'makhundu onsene dzina ya Mbuya Yezu Kirixtu, Mbuya wawo na wathu. Kukoma ntima na ntendere unabulukira kuna Mulungu Baba wathu, na kuna Mbuya Yezu Kirixtu, mbipikhale na imwe. Kazinji kene ndisapereka takhuta kuna Mulungu wanga pa thangwi yanu, na thangwi ya kukoma ntima kwace kudakupasani Iye muna Kirixtu Yezu. Thangwi muna Iye imwe mwapfumiswa pa pyonsene, pa fala yonsene na pa kudziwa konsene, thangwi umboni wa Kirixtu wasimbisiswa muna imwe, toera mukhonde kusowa muwoni ubodzi wa mu Nzimu, pa n'dzidzi unadikhira imwe kupangizika kwa Mbuya wathu Yezu Kirixtu. Pontho Iye anadza kakupasani phinga mpaka pakumalisa, kuti mukhonde kukhala anthu akusandikwa pa ntsiku ya kubwera kwa Mbuya wathu Yezu Kirixtu. Mulungu, adakucemerani kuti muphatane na Mwana wace Yezu Kirixtu, Mbuya wathu, ndi wakunyindirika. Abale anga, ndisakuphembani pikulu kakamwe na dzina ya Mbuya wathu Yezu Kirixtu, kuti monsene mulonge cinthu cibodzicene, toera pakhonde kuoneka phambulo pakati panu, mbwenye muphatane pa manyerezero anu, na ndzeru zibodzi zene. Abale anga, anthu anango a pa nyumba ya Kolowe, andipanga kuti pakati panu imwe nkhabe kubverana. Ndisalonga thangwi m'bodzi na m'bodzi wanu asalonga kuti: “Ine ndine wa Paulu,” unango, “Ine ndine wa Apolo,” peno “Ine ndine wa Pedhru. ” Pontho anango asalonga kuti: “Ine ndine wa Kirixtu.” Kodi Kirixtu agawika? Nkhulongera kuti Paulu akhomerwa pa ntanda na thangwi yanu? Mwatambira batixmu na dzina ya Paulu? Ndisapereka takhuta kuna Mulungu, thangwi nkhabe m'bodzi wanu adatambirisa ine batixmu. Adatambirisa ine batixmu ndi Kirixpu na Gayo basi, na tenepo nkhabe munthu anafuna kulonga kuti atambira batixmu na dzina yanga. Pontho ndatambirisambo batixmu mudzi wa Xitefana. Ndiwo basi anakumbukira ine kuti ndaatambirisa batixmu, nkhabebve anango anakumbukira ine. Thangwi Kirixtu hadandituma kwenda katambirisa batixmu tayu, mbwenye andituma kwenda kamwaza Mphangwa Zadidi. Si na mafala a udziwisi wa anthu tayu, toera ntanda wa Kirixtu ukhonde kupwazwa. Thangwi mphangwa za ntanda wa Kirixtu, ndi udzemwa kuna ale anataika, mbwenye kuna ife anapulumuswa, ndi mphambvu za Mulungu. Thangwi pyalembwa kuti: “Ndinafudza udziwisi wa anyakudziwisa, mbandimalisa ndzeru za anyandzeru.” Ali kupi nyandzeru? Ali kupi nyakudziwisa mwambo? Ali kupi nyakubvundzisa wa midzidzi ino? Kodi udziwisi wa dziko ino, Mulungu hadaucita udzemwa tayu? Thangwi Mulungu, na udziwisi wace, hadasiya kuti anthu an'dziwe na udziwisi wawo tayu, mbakomerwa kupulumusa ale anatawira, kubulukira pa mphangwa zinacemera iwo za udzemwa. Madjuda asaphemba pidzindikiro pya pirengo, agerego asasaka udziwisi, mbwenye ife tisamwaza mphangwa za Kirixtu adakhomerwa pa ntanda. Kirixtu unowu, kuna madjuda nkhuxola, pontho kuna ale adakhonda kukhala madjuda ndi udzemwa. Mbwenye kuna ale adacemerwa, madjuda na agerego ene, Kirixtu ndi mphambvu za Mulungu na udziwisi wa Mulungu. Thangwi cire cinaoneka ninga ndi udzemwa wa Mulungu, ndi udziwisi ukulu kakamwe kupiringana udziwisi wa anthu, pontho cire cinaoneka ninga ndi kupolola kwa Mulungu, ndi kuwanga kukulu kakamwe kupiringana kuwanga kwa anthu. Abale anga, lang'anani kucemerwa kudacitwa imwe na Mulungu. Mukhali pang'ono anyakudziwisa pamaso pa anthu, pang'ono anyamphambvu, pontho pang'ono adabalwa na anthu a mbiri. Mbwenye Mulungu asankhula pire pya udzemwa pikhanyerezera anthu, toera kupasa manyadzo anyakudziwisa, pontho asankhula pire pinaona anthu kuti ndi pyakusowa mphambvu, toera kupasa manyadzo anyamphambvu. Iye asankhula pinthu pyakucepeseka pa dziko, pyakupwazika, na pyakusowa basa, kuti afudze pire pinabasa, toera asoweke munthu wa kugaya patsogolo pana Mulungu. Mbwenye ndi thangwi yace idacita kuti imwe mukhale muna Kirixtu Yezu, unowu adadza kakhala udziwisi wa Mulungu kuna ife, ulungami, kuperekeka kuna Mulungu na kuombolwa, ninga mudalemberwa ipyo kuti: “Ule anagaya, mbagaye muna Mbuya.” Abale anga, ine ene pikhakhala ine pakati panu, sidabwera na malongero a udziwisi, peno na udziwisi ukulu toera kukupangani pyakubisala pya Mulungu tayu. Thangwi ndaona kuti mphyadidi ndikhonde dziwa pinthu pinango pakati panu, mbwenye ndidziwe Yezu Kirixtu basi, maka-maka kukhomerwa kwace pa ntanda. Pontho pikhakhala ine pakati panu, ndikhasowa mphambvu, ndikhagopa pontho ndikhadzadzamira pikulu. Mafala anga na mphangwa zadidi zikhakupangani ine, zikhali za udziwisi toera kukukundani tayu, mbwenye zikhali zakupangisa mphambvu za Nzimu Wakucena, toera kukhulupira kwanu kukhonde kubulukira pa udziwisi wa anthu, mbwenye pa mphambvu za Mulungu. Cincino tisalonga mphangwa za udziwisi pakati pa anthu adakula kale mu nzimu, si udziwisi wa midzidzi ino peno wa anyamphambvu a midzidzi ino tayu, thangwi iwo ali kwenda mbamala. Mbwenye ndisalonga pinthu pyakubisala pya udziwisi wa Mulungu, pikhakhonda kudziwika kale ene, pire pikhadapaka Mulungu kale na kale, toera ife tikhale na mbiri. Nkhabe nyamphambvu m'bodzi wa midzidzi ino adadziwa udziwisi unowu. Thangwi mbadaudziwa, mbadan'khomera tayu pa ntanda, Mbuya wa mbiri. Mbwenye ninga mudalemberwa ipyo kuti: “Pire pidakhonda kuona maso, pire pidakhonda kubva makutu pire pidakhonda kudziwika na manyerezero a munthu, ndipyo pidasasanyira Mulungu kuna ale ananfuna.” Mbwenye Mulungu atipangisa na Nzimu wace. Thangwi Nzimu Wakucena usadinkha pyonsene, mpaka na pya n'kati pyene pya Mulungu. Thangwi mbani anadziwa pinanyerezera munthu? Nkhabe unango. Ndi nzimu basi uli muna iye. Sawa-sawambo, nkhabe munthu anadziwa pinanyerezera Mulungu. Anapidziwa ndi Nzimu wa Mulungu basi. Apo ife tidatambira nzimu wa dziko tayu, mbwenye tatambira Nzimu udabuluka kuna Mulungu, toera tikwanise kupibvesesa pinthu pidapaswa ife pezi na Mulungu. Pa pinthu penepi tisapilongambo. Nkhabe kupilonga na mafala a kupfundziswa na udziwisi wa anthu, mbwenye na mafala a kupfundziswa na Nzimu Wakucena, mbatichulula pinthu pya mu nzimu kuna ale ali mu nzimu. Munthu wakusoweka Nzimu Wakucena, nkhabe kutawira pinthu pinabuluka kuna Nzimu wa Mulungu, thangwi ndi pya udzemwa kuna iye. Pontho iye nkhabe kukwanisa kupibvesesa, thangwi pinthu penepi pisadzindikirwa mwadidi mu Nzimu. Mbwenye munthu ana Nzimu Wakucena, asadzindikira pinthu pyonsene. Mbwenye iye ene nkhabe munthu anakwanisa kun'dzindikira mwadidi. Thangwi “mbani adadziwa manyerezero a Mbuya toera akwanise kum'pfundzisa?” Mbwenye ife tina manyerezero a Kirixtu. Abale anga, ndacimwana kukupangani ninga anthu a mu nzimu, mbwenye ninga anthu a mu nyama, ninga ana ang'ono muna Kirixtu. Ndakupasani nkaka mumwe, mbandikhonda kukupasani cakudya cakuuma, thangwi mbamudakwanisa kucidya tayu. Ndimo mwene, na cincino ene munacikwanisa tayu, thangwi muciri mu nyama. Kodi pangaoneka bibvu na kugawana pakati panu, penepi nkhabe kupangisa kuti muli mu nyama, pontho musacita ninga anthu a padziko ino? Kodi munthu angalonga kuti: “Ine ndine wa Paulu,” unango mbalonga kuti: “Ine ndine wa Apolo,” penepi nkhabe kupangisa kuti musacita ninga anthu a padziko ino? Kodi mbani Apolo? Mbani Paulu? Ndi anyabasa ene pyawo basi a Mulungu, adakucitani kuti imwe mutawire, ninga basa idapaswa iwo na Mbuya, m'bodzi na m'bodzi. Ine ndacheka, Apolo ndiye adathirira, mbwenye Mulungu ndiye adapikulisa. Na tenepo, adacheka na adathirira si pinthu tayu, mbwenye Mulungu basi, ule anapikulisa. Anacheka na anathirira ndi cinthu cibodzi. M'bodzi na m'bodzi anadza katambira na basa idacita iye. Thangwi ife ndife anyakuphata basa pabodzi na Mulungu. Imwe ndimwe munda wa Mulungu, pontho ndimwe Nyumba ya Mulungu. Na kukoma ntima kwa Mulungu kudapaswa ine, ninga nyakudziwisa kumanga nyumba, ndachimika nchici, unango ali kuimanga. Mbwenye m'bodzi na m'bodzi, asafuna aone kuti ali kuimanga tani. Thangwi nkhabe munthu anakwanisa ikha nchici inango yakusyana na ire idaikhiwa kale. Nchici eneyo, ndi Yezu Kirixtu. Munthu angamanga padzulu pa nchici ibodzi ene na oro, na parata, na myala ya kubalika, na miti, na maudzu peno na tsanga, basa ya m'bodzi na m'bodzi inadza kaoneka, thangwi Ntsiku eneyo, pyonsene pinadzeswa pakweca mbapipangizwa na moto. Pontho basa ya munthu m'bodzi na m'bodzi inadza kapendwa na moto. Ngakhala pire pidamanga munthu nkhabe kupya, anapaswa muwoni wace. Ngakhala pidamanga iye pyapya, analuza m'bairo mbwenye iye anapulumuswa, mbwenye ninga munthu wakubuluka pa moto. Imwe nkhabe kupidziwa kuti ndimwe Nyumba ya Mulungu, pontho kuti Nzimu wa Mulungu usakhala muna imwe? Munthu angafudza Nyumba ya Mulungu, anafubzambo na Mulungu. Thangwi Nyumba ya Mulungu ndi yakucena. Nyumba eneyi ndimwe. Lekani nyengezeka. Ngakhala m'bodzi wanu asanyerezera kuti ndi nyakudziwisa pa dziko ino, mbakhale ninga dzemwa, toera adze kakhale wakudziwisa. Thangwi udziwisi wa dziko ino, ndi udzemwa pamaso pa Mulungu. Thangwi pyalembwa kuti: “Iye asaaphata anyakudziwisa pa ucenjeri wawo.” Pyalembwa pontho kuti: “Mbuya asadziwa manyerezero a anyakudziwisa kuti mbapezi.” Na tenepo, mbaleke oneka munthu anagaya na dzina ya anthu, thangwi pyonsene mphyanu. Peno ndi Paulu, peno Apolo, peno Pedhru, peno dziko, peno kukhala m'maso, peno kufa, peno pya cincino, peno pinafuna kudza, pyonsene mphyanu, pontho imwe ndimwe a Kirixtu, Kirixtu ndi wa Mulungu. Na tenepo, pinafunika ndi kuti anthu onsene atidziwe ninga anyabasa a Kirixtu, pontho ninga akunyindirika pakulonga pinthu pyakubisala pya Mulungu. Lang'anani, pinafunika kuna atsogoleri enewa, ndi kuti iwo akhale akunyindirika. Ine sinapyo basa kutongwa na imwe peno mu nyumba inango yakutongera miseru anthu. Ndimo mwene, na ine ene nkhabe kutongeka ndekha ene. Ande, nkhabe cakuipa cibodzi cinabva ine muntima mwanga. Mbwenye pa pyonsene ipi, ndinacimwana kupilongera ndekha ene kuti ndine wakulungama. Mbuya ndiye anafuna kunditonga. Na tenepo, lekani kutonga cinthu n'dzidzi wace mbudzati kukwana. Dikhirani mpaka kubwera kwa Mbuya. Iye anapidzesa pakweca pire pidabisala n'cidima, pontho anati apangize pire pinanyerezera mitima. Pa n'dzidzi unowu, m'bodzi na m'bodzi anatambira mbiri yace kuna Mulungu. Abale, ndalonga pyonsene ipi mbandiikha dzina yanga na ya Apolo, na thangwi ya kukufunani, toera mupfundze kuna ife, asalongeranji mafala awa analonga kuti: “Lekani kupiringana pire pidalembwa.” Na tenepo, nkhabe munthu anafuna kupikuza na thangwi ya munthu m'bodzi, mbapwaza unango. Ndi ninji cidasyana iwe na unango? Ndi ninji cina iwe cidakhonda iwe kupasiwa? Ngakhala wacipaswa, thangwi yanji usagaya mbukhala ninga hudacita kupaswa? Imwe munapyo kale pyonsene pinafuna imwe! Mwapfuma kale. Mwafikira kukhala amambo - ife mbatikhonda kukhalapo! Ine ndikhafunadi kuti imwe mukhale amambo, toera ife titongembo pabodzi na imwe. Thangwi ndisaona kuti ife apoxtolo, Mulungu atiyikha mbuto yakumalisa, ninga anthu akutongerwa kufa. Tadza kacitwa pisango kuna dziko, patsogolo pa maanju na pa anthu. Ife ndife madzemwa na thangwi ya Kirixtu, mbwenye imwe ndimwe anthu a ndzeru muna Kirixtu! Ife ndife anthu akusowa mphambvu, mbwenye imwe ndimwe anthu a mphambvu! Imwe ndimwe anthu akulemebza, mbwenye ife ndife anthu akupwaziwa! Mpaka na lero tisabva njala, tisabva nyota, tina usiwa, tisamenyiwa, pontho nkhabe mbuto yakukhala. Pontho tisaphata basa yakuwanga na manja athu. Tingaxoliwa, ife tisalonga udidi. Tingafambirwa n'nduli, tisapirira. Tingalongwa pseda tisatawira na kukhurudzika. Mpaka na lero, takhala anthu akupwazika a pantsi pano, pontho ninga khuku ya padziko. Pa kulemba pinthu ipi siri kusaka kukupasani manyadzo tayu. Mbwenye ndiri kusaka kukusandikani ninga ananga akufunika. Peno mbamudakhala na pikwi khumi pya amakayaya muna Kirixtu, si kulongera kuti imwe muna ababa azinji tayu, thangwi kubulukira mu Mphangwa Zadidi, ine ene ndine adakubalani muna Kirixtu Yezu. Na tenepo, ndisakuphembani pikulu kakamwe kuti mundikwatire luso. Ndi thangwi eneyo ndisakutumirani Timoti, mwana wanga wakufunika na wakunyindirika muna Mbuya. Iye anakukumbusani makhaliro anga muna Kirixtu Yezu, sawa-sawa ninga munapfundzisira ine m'mbuto zonsene, na m'misoka yonsene ya anyakutawira Yezu. Andzanu anango atoma kupikuza, ninga ine nkhabe bwerabve kudza kakuonani. Mbwenye ndinabwera cincino Mbuya angapifuna. Na tenepo, ndinati ndidziwe, si pinalonga iwo anyakupikuza basi tayu, mbwenye pontho na mphambvu zina iwo. Thangwi Umambo wa Mulungu si mafala tayu, mbwenye ndi mphambvu. Ndi ninji pinafuna imwe maka-maka? Ndibwere kuna imwe na n'chamu, peno na kufunana pontho na ntima wa kupipoloza? Pisabveka konsene kwene, kuti pakati panu pana ulukwali. Ulukwali kuti na anthu ene anakhonda kudziwa Mulungu nkhabe kuucita, kufikira kuti m'bodzi wanu akwata nkazi wa babace. Penepi imwe musagaya napyo? Mukhafunika mutsukwale pikulu kakamwe, mbamunthamangisa pakati pa nsoka wanu, munthu unowu adacita penepi. Ine siri na imwe pabodzi pa nyama tayu, mbwenye mu nzimu ndiri na imwe. Pontho ndamala kunkonesa kale ule adacita pinthu penepi, ninga ndiri na imwe pabodzi. Imwe mungagumanyikana pabodzi pene mu dzina ya Mbuya Yezu, ine mbindikhala na imwe pabodzi mu nzimu, mphambvu za Mbuya wathu Yezu mbizikhalambo penepo, mamuna unowu mperekeni kuna Sathani, toera nyama yace ifudziwe, nzimu wace upulumuke pa ntsiku inabwera Mbuya. Kugaya kwanu si kwadidi tayu. Imwe nkhabe kupidziwa kuti ntombwe pang'ono basi wa kutupisa na iwo mikate, usatupisa ufa onsene wa kumunyiwa? Tayani ntombwe wakale wa kutupisa na iwo mikate, toera mukhale ufa upsa wakumunyiwa, ninga imwe ndimwedi ufa wakumunyiwa wakusowa ntombwe. Thangwi Kirixtu, Mwana Bira wathu wa Paxkwa, acitwa ntsembe. Na thangwi eneyo, ticiteni phwandu ya Paxkwa, si na ntombwe wakale wa kutupisa na iwo mikate tayu, si na ntombwe wa pyakuipa peno wa madawi tayu, mbwenye ndi na mikate yakusowa ntombwe, ya kulungama na ya ndimo mwene. Ndakupangani kale pa tsamba idakulemberani ine, kuti imwe lekani kubvungazikana na anthu anacita pyalukwali. Na tenepo, siri kulongera kuna anthu anacita pyalukwali adakhonda kudziwa Mulungu tayu. Si kuna anthu a dziko ino akuumirwa na kobiri, kuna mambava, peno kuna analambira alungu a pezi tayu. Mbidakhala ndi tenepo, imwe mukhafunika mubuluke pa dziko ino. Mbwenye cincino ndisakulemberani kuti muleke kubvungazikana na ule analonga kuti ndi m'bale wanu mbacita pontho pyalukwali, mbakhala nyakuumirwa na kobiri, nyakulambira alungu a pezi, nyapseda, nyakuledzera, peno mbakhala mbava. Na anthu enewa, lekani na kudya na iwo kwene. Ndinakwanisa tani ine kutonga anthu ali kunja kwa abale a gereja? Imwe nkhabe tonga ale ali n'kati mwa nsoka wanu? A kunja anadza katongwa na Mulungu. “N'thamangiseni mphapo pakati panu munthu unowu wa kuipa.” Ngakhala m'bodzi wa pa nsoka wanu ana nseru na m'bale unango, musaukwatiranji nseru unowu mbamuenda na iwo katongwa kuna anthu anakhonda kudziwa Mulungu, mbumukhonda kuukwata kwenda na iwo kuna mbumba ya Mulungu? Imwe nkhabe dziwa kuti mbumba ya Mulungu inadza katonga dziko? Mphapo ngakhala imwe munadza katonga dziko, munacimwana tani kutonga pinthu ping'ono? Imwe nkhabe dziwa kuti ife tinadza katonga maanju? Ndiye tani mphapo pinthu pya dziko ino! Na tenepo, ngakhala imwe muna nseru wa kutongesana thangwi pinthu pyanu pya dziko ino, sankhulani abale a gereja, peno mbadakhala pyawo anthu akukhonda kubvekera, kuti akhale anyakutonga miseru. Ndisalonga penepi toera kukunyadzisani. Kodi nkhabepo pakati panu m'bodzi wa ndzeru zakukwanira, kuti akwanise kutonga miseru muubale mwanu? Mbwenye musasiya penepi mbumwenda kasumirana muubale mwanu patsogolo pa anthu anakhonda kudziwa Mulungu! Na thangwi ya kusumirana kunaoneka pakati panu, pisapangiziratu kuti mwakundiwa mwadidi mwene. Mwakhonderanji kutawira kunyengezwa pyanu? Mwakhonderanji kutawira kuluza pyanu? Mbwenye imwe ene, musacita pyakuipa mbumunyengezana muubale mwanu! Imwe nkhabe dziwa kuti anyakukhonda kulungama nkhabe kudza kadya unthaka mu Umambo wa Mulungu? Lekani kunyengezwa. Ale anyalukwali, analambira alungu a pezi, anyaupombo, amuna anacita banja na amuna andzawo, mambava, anyakuumirwa na kobiri, anyakuledzera, anyapseda na ale anadhobha andzawo, nkhabe kudza kadya unthaka mu Umambo wa Mulungu. Ndi penepi pikhacita andzanu anango. Mbwenye imwe mwatsukiwa, mwaceneswa, mbumulungamiswa, mu dzina ya Mbuya Yezu Kirixtu, na mu Nzimu Wakucena wathu. “Pinthu pyonsene ndatawirirwa kupicita.” Mbwenye si pyonsene pinaphedzera tayu. “Pinthu pyonsene ndatawirirwa kupicita.” Mbwenye ine nkhabe siya cibodzi kuti cindikunde. “Pyakudya pyacitirwa cifu, cifu cacitirwa pyakudya,” mbwenye pyonsene Mulungu anadza kapifudza. Mphapo manungo athu si toera kucita na iwo pyalukwali tayu, mbwenye ndi toera kuphatira Mbuya, pontho Mbuya ndiye mwanaciro manungo athu. Na mphambvu zace, Mulungu alamusa Mbuya pa kufa, pontho Iye anadza katilamusambo pa kufa. Imwe nkhabe kupidziwa kuti manungo anu ndi mapindi a Kirixtu? Ine ndinakwata mapindi a Kirixtu mbandiacita kuti akhale mapindi a nkazi wa lukwali? Nkhabe citika! Imwe nkhabe kupidziwa kuti ule anadziwana na nkazi wa lukwali, manungo awo anakhala mabodzi ene? Thangwi pyalembwa kuti: “Mu uwiri mwawo anadza kakhala nyama ibodzi.” Mbwenye ule anaphatana na Mbuya, nzimu wawo ndi ubodzi ene na Iye. Thawani pyalukwali. Kudawa kunango konsene kunacita munthu, asakucita kunja kwa manungo ace, mbwenye anacita pyalukwali, asadawisira manungo ace ene. Kodi imwe nkhabe kupidziwa kuti manungo anu ndi nyumba ya Nzimu Wakucena uli muna imwe, udapaswa imwe na Mulungu, pontho kuti imwe nkhabe tongereka mwekha? Imwe mwaguliwa na ntengo ukulu. Na tenepo, pasani mbiri Mulungu m'manungo mwanu. Pa thangwi ya pinthu pidandilembera imwe, ndi pyadidi kuti mamuna akhonde kudziwa nkazi. Mbwenye na thangwi ya lukwali, pikhali pyadidi mamuna akhale na nkazi wace, nkazimbo akhale na mamuna wace. Mamuna asatongwa kucitira nkazi wace pyonsene pinatongwa iye kucita n'kati mwa nyumba. Nkazi asatongwambo acite sawa-sawa kuna mamuna wace. Nkazi nkhabe mphambvu za kutonga manungo ace, mbwenye anaatonga ndi mamuna wace. Sawa-sawambo na mamuna, nkhabe mphambvu za kutonga manungo ace, mbwenye anaatonga ndi nkazi wace. Lekani kukhonderana n'kati mwa nyumba, m'bodzi na m'bodzi. Penepi pisatawirirwa male mungabverana pa n'dzidzi ung'ono toera munyerezere kuphembera. Mungamala, munagumana pontho toera mukhonde kunyengererwa na Sathani, na thangwi ya kusowa kwanu mphambvu za kupirira. Siri kulonga ipi ninga matongero tayu, mbwenye ndinakutawirirani. Ndikhafuna kuti anthu onsene akhale ninga ine. Mbwenye m'bodzi na m'bodzi ana muwoni wace udapaswa iye na Mulungu. M'bodzi asapaswa na njira iyi, unango asapaswa na njira inango. Mphapo ndisalonga kuna ale adasowa banja, pontho na kuna akazi adaferwa na amuna awo, kuti pikhali pyadidi iwo akhale pyawo tenepo ninga ine. Mbwenye angapicimwana, mphyadidi acite banja. Thangwi mphyadidi kakamwe kucita banja, kupiringana kuthabuka na kusirira. Mphapo kuna ale ali pa banja, ndisaapasa matongero awa, si anga tayu, mbwenye mba Mbuya, kuti: nkazi akhonde kumwalana na mamuna wace. Mbwenye angamwalana, mbakhale tenepo, mbakhonda kucita pontho banja ipsa. Peno angafuna, mbasekesane abwererane pontho na mamuna wace. Mamunambo, mbaleke kumwalana na nkazi wace. Kuna anangombo, ine ene ndisaapanga ipi, si Mbuya tayu, kuti: ngakhala m'bale m'bodzi wa mamuna ana nkazi adakhonda kutawira Yezu, mbwenye iye asafuna kukhala na mamuna wace, mamuna mbaleke kumwalana na iye. Ngakhala ndi nkazimbo ana mamuna adakhonda kutawira Yezu, mbwenye iye asafuna kukhala na nkazi wace, nkazi mbaleke kumwalana na iye. Thangwi mamuna wakukhonda kutawira Yezu, anaceneswa na thangwi ya nkazi wace. Sawa-sawambo na nkazi wakukhonda kutawira Yezu, anaceneswa na thangwi ya mamuna wace. Mbapidakhonda kukhala tenepa, ana awo mbadakhala ana akukhonda kuceneswa pamaso pa Mulungu. Mbwenye cincino, iwo aceneswa. Mphapo ngakhala ule adakhonda kutawira Yezu asafuna pyakumwalana, mbamwalane. Pa mathangwi enewa, m'bale wakutawira Yezu wa mamuna, peno wa nkazi, nkhabebve mwambo unaakakamiza kukhala pabodzi. Thangwi Mulungu akucemerani toera mukhale mu ntendere. Iwe nkazi, usapidziwa tani kuti unadza kapulumusa mamuna wako? Peno iwembo mamuna usapidziwa tani kuti unadza kapulumusa nkazi wako? Na tenepo, m'bodzi na m'bodzi mbakakamire kufamba na mule mudansankhulira Mbuya, pontho ninga mudancemerera Mulungu. Ipi ndipyo pinapanga ine abale m'magereja onsene. Alipo munthu adacemerwa mbadamala kusibza kale? Mbaleke kusaka kusasanyira pontho manungo ace. Alipo adacemerwa mbadzati kusibza? Mbaleke kusibzabve. Kusibza na kukhonda kusibza, pyonsene nkhabe kulonga pinthu. Pinafunika ndi kubvera matongero a Mulungu. M'bodzi na m'bodzi asatongwa akakamire kukhala na makhaliro adagumanwa na iye pa kucemerwa na Mulungu. Wacemerwa mbuli n'dzakazi? Leka kunentseka napyo. Mphapo ungakwanisa kubulukamo ndi pyadidi ucite penepi. Thangwi adacemerwa na Mbuya mbali n'dzakazi, ndi ntumbe muna Mbuya. Sawa-sawambo na ule adacemerwa mbali ntumbe, ndi n'dzakazi wa Kirixtu. Imwe mwaguliwa na ntengo ukulu. Na tenepo, lekani kubwerera kakhala adzakazi a anthu. Abale, m'bodzi na m'bodzi asatongwa akakamire kukhala patsogolo pa Mulungu na makhaliro ace adagumanwa na iye pa kucemerwa kwace. Pa thangwi ya amyali, ine nkhabe matongero a Mbuya, mbwenye na kuona kwanga ndisakupangani ninga m'bodzi wakunyindirika na ntsisi za Mulungu. Na thangwi za nyatwa za cincino, ndisanyerezera kuti ndi pyadidi mamuna akhale pyace tenepo ninga mudakhalira iye. Wacita banja? Leka kumwalana na nkazi wako. Ndiwe nzice? Leka kusakabve nkazi. Mbwenye ungacita banja, si kudawa tayu. Apo mwali angacitambo banja na mamuna wace, si kudawa tayu. Mbwenye ale anacita banja anadza kaona nyatwa pa makhaliro awo, Ine ndisafuna ndikugugumireni nyatwa zenezi. Abale anga, pinafuna ine kukupangani ndi kuti: N'dzidzi wacepa. Kutomera cincino kwenda kutsogolo, ale ana akazi, mbakhale ninga anthu akusowa akazi. Ale analira, akhale ninga nkhabe kulira. Ale anatsandzaya, akhale ninga nkhabe kutsandzaya. Ale anagula pinthu, akhale ninga nkhabe pinthu. Ale anaphatisa basa pinthu pya dziko ino, akhonde kupikakamira. Thangwi makhaliro a cincino a dziko ali kulamala. Ine ndisafuna kuti mukhale anthu akusowa pinthu pya kukunentsani. Thangwi mamuna wakusowa nkazi, asanyerezera pinthu pya Mbuya, kuti anatsandzaisa tani Mbuya. Mbwenye mamuna ana nkazi, asanyerezera pinthu pya dziko ino, kuti anatsandzaisa tani nkazi wace. Na tenepo, munthu asakhala wakugawika. Nkazi wa nzice, peno mwali, asanyerezera pinthu pya Mbuya, toera akhale wakucena pa manungo na pa nzimu ene. Mbwenye nkazi ana mamuna, asanyerezera pinthu pya dziko ino, kuti anatsandzaisa tani mamuna wace. Ndisalonga ipi, ndi udidi kuna imwe. Si kukukakamizani tayu, mbwenye toera imwe mukhale na makhaliro adidi, mbamukhonda kupingizika. Ngakhala alipo munthu asaona kuti pinacita iye si pyadidi tayu kuna mwali anabvundzirana na iye, pontho mbaona kuti pyaka pya mankhadzi wace piri kupita, mbanyerezera kucita banja, mbacite ninga munafunira iye. Nkhabe kudawa na penepi tayu. Mbacite pyawo banja. Mphapo ule adafuna mwakukwana muntima mwace mbakhonda kubva ninga asakakamizwa, mbwenye asakwanisa kuphata ntima, pontho mbanyerezera kuti akhonde kucita banja na mwali, unowu asacitambo mwadidi. Na tenepo, ule anacita banja na mankhadzi wace wa mwali, asacita mwadidi. Mbwenye ule anakhonda kucita banja, asacita mwadidi kakamwe. Nkazi asakhala wakumangwa na mwambo wa pa banja, pa n'dzidzi onsene unakhala mamuna wace m'maso. Mbwenye mamuna angafa, iye anakhala wakusudzuka kuti asembwe na mamuna unango anafuna iye, male ngakhala mamuna ndi wakutawira Yezu. Mbwenye kuona kwanga, iye anakhala wakutsandzaya kakamwe angakhonda kucita pontho banja. Ndisaona kuti ndiri nawombo Nzimu wa Mulungu. Pa thangwi ya pyakudya pinaikhirwa ntsembe madzimunthu, tisadzindikira kuti tonsene tinako “kudziwa’’. Mphapo kudziwa kweneku kusadzesa kupikuza, mbwenye kufunana kusamanga. Ule ananyerezera kuti asadziwa cinthu, adzati kucidziwa ninga munafunikira ico tayu. Mbwenye ule anafuna Mulungu, unowu asadziwika na Mulungu. Na tenepo, na thangwi ya pyakudya pinaikhirwa ntsembe madzimunthu, tisadziwa kuti dzimunthu si cinthu pa dziko tayu, pontho alipo Mulungu m'bodzi basi, nkhabebve unango. Thangwi ngakhala kudzulu peno pantsi pano alipo anacemerwa alungu, alipodi “alungu’’ azinji na “a mbuya’’ azinji, mbwenye kwa ife alipo Mulungu m'bodzi basi, Baba, adacita pinthu pyonsene, pontho tiri m'maso toera ticite kufuna kwace. Pontho alipo Mbuya m'bodzi basi, Yezu Kirixtu, adabwera na pinthu pyonsene, pontho tiri m'maso kubulukira muna Iye. Mbwenye si onsene anadziwa penepi tayu. Anango adadzowerera madzimunthu, na lero asadya pyakudya penepi ninga ntsembe ya madzimunthu. Pontho na kucepa kwa manyerezero awo a muntima, pisaaswipisa. Mbwenye si cakudya cinaticita kuti Mulungu atitawire tayu. Thangwi tingakhonda kudya, nkhabe cinaluza ife, tingadya, nkhabe cinawina ife. Mbwenye citani mphole kuti kusudzuka kwanu, kukhonde kukhala cinthu cakugwegwedusa ale adasowa mphambvu. Thangwi ngakhala unango ali kuona iwe unapidziwa mwadidi uli pa thando ya kudya inaikhirwa ntsembe madzimunthu, ana manyerezero akucepa a muntima, nkhabe kukundiwa mbadza kadyambo pyakudya pidaikhirwa ntsembe madzimunthu? Tenepa, usapha m'bale wako adaferwambo na Kirixtu, ana manyerezero akucepa a muntima, na thangwi ya kudziwa kwako. Na tenepo, mungadawisira abale anu mbamuataisa manyerezero awo akucepa a muntima, musadawisira Kirixtu. Na thangwi eneyo, ngakhala cire cinadya ine cisagwegwedusa m'bale wanga, sinadyabve nyama tayu, toera ndikhonde kugwegwedusa m'bale wanga. Kodi ine sine wakusudzuka tayu? Sine mpoxtolo tayu? Ine sidamuona Mbuya wathu Yezu tayu? Imwe simwe misapu ya basa inacita ine muna Mbuya tayu? Ngakhala kuna anango ine sine mpoxtolo tayu, kuna imwe ine ndinedi mpoxtolo! Thangwi imwe ndimwe cidzindikiro ca upoxtolo wanga muna Mbuya. Kuna ale anandisandika, mafala anandibvunulira ndi awa: Ife nkhabe tawirirwa kudya na kumwa? Ife nkhabe kutawirirwa kusemba nkazi wakutawira Yezu mbatiperekera pa ulendo wathu, ninga pinacita apoxtolo anango azinji, abale a Mbuya, pontho na Pedhru? Kodi ndine basi na Bharnabhasi anatawirirwa kuphata basa toera tikwanise kudya? Mbani anaenda ku nkhondo, mbatambirisika ekha ene? Mbani anacheka miti ya mauva, mbakhonda kudya misapu yace? Mbani anakumbiza pifuyo mbakhonda kumwa nkaka wace? Penepi ndisapilonga ninga munthu ene pyanga? Kodi Mwambo nkhabe longambo pinthu penepi? Thangwi mu Mwambo wa Mozesi mwalembwa kuti: “Leka kumanga mulomo wa ng'ombe pa n'dzidzi unating'inda iyo tirigu na nyondo.” Kodi Mulungu alonga penepi na thangwi ya kutsalakana ng'ombe basi? Simo mwene kuti penepi asapilongera thangwi ya ife tayu? Ndimo mwene kuti penepi pyalembwa na thangwi ya ife. Thangwi nyakulima angalima, pontho nyakuting'inda angating'inda, asatongwa apicite na kudikhira kuti anadza kapidyambo. Ngakhala pakati panu ife tabzala pinthu pya mu nzimu, si pyadidi tayu tidikhire kubvuna kuna imwe pinthu pinatiphedza pa nyama? Ngakhala anango asatawirirwa kuphedziwa na imwe, akhakwana kucitirwa penepi sife tayu kupiringana iwo? Mbwenye ife cipo tacitirwa penepi. Mbwenye pa pyonsene ipi tisapirira pyathu, toera tikhonde kupingiza Mphangwa Zadidi za Kirixtu. Imwe nkhabe dziwa kuti ale anaphata basa mu Nyumba ya Mulungu, asadya pinthu pya N'nyumba ya Mulungu? Pontho nkhabe dziwa kuti anyabasa a pa guwa ya ntsembe, asadya pinthu pinadza kaikhwa pa guwa ya ntsembe? Tenepa, Mbuya apangambo ale anamwaza Mphangwa Zadidi, kuti adyeswe na basa ya kumwaza Mphangwa Zadidi. Mbwenye ine nkhabe cibodzi cidacitirwa ine pa pinthu penepi. Siri kulemba mbindidikhira kuti imwe mundicitire penepi tayu. Mphyadidi kufa pyanga, kupiringana kuluziswa na unango kugaya kunacita ine. Mphapo ngakhala ndisamwaza Mphangwa Zadidi, sinafunika ndigaye tayu, thangwi ine ndisatongwa kumwaza Mphangwa Zadidi. Ndi nyatwa kuna ine ndingakhonda kumwaza Mphangwa Zadidi! Thangwi mbidasankhula ndekha kumwaza Mphangwa Zadidi, mbidapaswa m'bairo. Mbwenye cincino ninga ndisamwaza na kukakamizwa, ndisacita ninga mudaipasirwa ine na Mulungu. Ngwanji mphapo m'bairo wanga? Ndi uyu basi: Wa kuti pakumwaza Mphangwa Zadidi, ndizimwaze pezi pyene, mbandikhonda kuphemba pire pinatongwa ine kucitirwa pa kumwaza Mphangwa Zadidi. Thangwi ine, ninga munthu wakusudzuka kuli anthu onsene, ndacitika n'dzakazi wa anthu onsene, toera ndikwanise kuwina anthu azinji. Ndacitika n'djuda kuna madjuda, toera ndikwanise kuwina madjuda adze kuna Kirixtu. Kuna ale ali pantsi pa Mwambo, ndakhala ninga ndiri pantsi pa Mwambo, [mbindidziwa pyanga kuti ine siri pantsi pa Mwambo tayu, ] toera ndikwanise kuwina ale anatowerera Mwambo. Kuna ale adasowa Mwambo, ndacitika ninga sinamwambo, mbindidziwa pyanga kuti sidasudzuka pa mwambo wa Mulungu tayu, mbwenye ndiri pantsi pa mwambo wa Kirixtu, toera ndikwanise kuwina ale adasowa Mwambo. Kuna ale adasowa mphambvu, ndacitika munthu wakusowa mphambvu, toera ndikwanise kuwina ale adasowa mphambvu. Na tenepo, ndacitika pyonsene kuna anthu onsene, toera na njira zonsene, ndikwanise kupulumusa anango. Ndisacita pyonsene ipi, na thangwi ya Mphangwa Zadidi, toera ndikhale na iye pabodzi. Imwe nkhabe dziwa kuti pa mapika a kuthamanga, onsene asathamanga, mbwenye anapaswa muwoni ndi m'bodzi basi? Thamangani na mphambvu, toera mupaswe muwoni. Anyakuthamanga onsene pa mapika, asatoma kusasanyika mwakukwana, toera kuwina nthimba ya kuti kutsogolo inadza kabvunda, mbwenye ife, tisapicita toera kuwina nthimba ya kwenda na kwenda. Na thangwi eneyo, ine sisathamanga ninga munthu anakhonda dziwa cinafuna iye tayu. Pontho nkhabe cita mapika a maxoko ninga munthu ana ponya maxoko n'dzulu tayu. Mbwenye ndisaponya maxoko ponyera manungo anga ene, mbandiacita n'dzakazi wanga, toera pakumala kumwaza Mphangwa Zadidi kuna anango, ine ene ndikhonde kudza kaluza. Abale anga, ine nkhabe funa kuti imwe muduwale pidacitwa na a mbuya athu kale. Iwo onsene akhakhala pantsi pa khole, pontho onsene awambuka bara. Pa kuphatana kwawo na Mozesi, onsene atambira batixmu mu khole na m'bara. Onsene adya cakudya cibodzicene ca mu nzimu. Pontho amwa cakumwa cibodzicene ca mu nzimu. Thangwi akhamwa madzi a pa mwala wa mu nzimu, ukhaaperekera. Mwala unowu ukhali Kirixtu. Mbwenye Mulungu hadakomerwa na azinji awo tayu, pontho mbamala kufa n'thando. Pinthu penepi pyacitika toera kutipangisa kuti tikhonde kusirira pyakuipa ninga iwo. Lekani kulambira alungu apezi, ninga pidacita anango awo, ninga mudalemberwa ipyo kuti: “Mbumba yakhala pantsi toera kudya na kumwa. Pakumala yalamuka mbibvina.” Mbatilekeni kucita pyalukwali ninga pidacita anango awo, mbafa pikwi makumawiri na pitatu pya anthu pa ntsiku ibodzi basi. Mbatilekeni kulesera Kirixtu ninga pidacita anango awo, mbamalisira kuphiwa na nyoka. Lekani kudungunya ninga pidacita anango awo, mbamala kuphiwa na nyakufudza. Pinthu penepi pyacitika kuna iwo ninga cipangizo, pontho pyalembwa toera kuticenjeza ife adafika ntsiku zakumalisa. Na tenepo, ule ananyerezera kuti ali dzololo, mbacite mphole toera akhonde kugwa. Manyengerero anabva imwe, ndiwo anabvambo anthu anango. Pontho Mulungu ndi wakunyindirika. Iye nkhabe kukusiyani mbamunyengererwa kupiringana mphambvu zanu. Mbwenye mungapita mwakunyengererwa, Iye ene Mulungu anakusakirani njira ya kubuluka nayo, toera mukwanise kupirira. Na thangwi eneyo, imwe abale akufunika, thawani pya kulambira alungu apezi. Ndisalonga na anthu a ndzeru. Nyerezerani mwekha ene pire pinalonga ine. Kodi ndiko ya nkhombo inakuza na ife Mulungu, si kuphatana na ciropa ca Kirixtu tayu? Nkate unamenyerana ife, si kuphatana na manungo a Kirixtu tayu? Ife pakukhala kwathu azinji ndife manungo mabodzi basi. Thangwi ulipo n'kati ubodzi basi, pontho tonsene tisadya nkate ubodzi ene. Lang'anani mbumba ya Izarayeli. Ale anadya pya ntsembe, hali pabodzi tayu pa guwa ya ntsembe? Na tenepo, ndi ninji pinalonga ine? Kuti ntsembe inayikhirwa dzimunthu ndi pinthu? Peno dzimunthu ndi cinthu? Nkhabe! Ine ndisalonga kuti ntsembe zinaikhirwa madzimunthu, hasazipereka kuna Mulungu tayu, mbwenye kuna mizimu ya kuipa. Pontho ine nkhabe funa kuti imwe muphatane na mizimu ya kuipa. Nkhabe kucitika kumwa ndiko ya Mbuya na ndiko ya mizimu ya kuipa. Pontho lekani kudya pa thando ya Mbuya na pa thando ya mizimu ya kuipa. Kodi tinansosera nchanje Mbuya? Ife tina mphambvu za kupiringana Iye? Anango asalonga tenepa: “Pyonsene pisatawiriswa,” mbwenye si pyonsene pinaphedzera tayu. “Pyonsene pisatawiriswa,” mbwenye si pyonsene pinamanga tayu. Mbakhonde kuoneka munthu anasaka udidi wace, mbwenye mbaoneke anasaka udidi wa ndzace. Dyaani pyonsene pinaguliswa m'misika mbamukhonda kubvundzisa, na thangwi ya manyerezero anu a muntima. Thangwi “dziko, na pyonsene pina iyo, ndi pya Mbuya.” Ungacemerwa kwenda kadya na nyakukhonda kutawira Yezu, ungapifuna ndoko, mbudya pyonsene pinakupasa iye, mbukhonda kubvundza cinthu, na thangwi ya manyerezero ako a muntima. Mbwenye munthu angakupanga kuti: “Ipi pyaikhirwa ntsembe madzimunthu,” leka kudya. Na thangwi ya ule adakupanga, pontho na thangwi ya manyerezero a muntima. Siri kulongera manyerezero a muntima mwako tayu, mbwenye a munthu unango. Mphapo thangwi yanji kusudzuka kwanga kusatongwa na manyerezero a muntima a munthu unango? Ngakhala ine ndiri kudya mbindipereka takhuta kuna Mulungu, thangwi yanji pontho ndiri kusandikwa na pire pidaperekera ine takhuta kuna Mulungu? Na tenepo, imwe mungadya, mungamwa, peno mungacita cinthu cinango, citani pyonsene toera kupasa mbiri Mulungu. Lekani kugwegwedusa madjuda, peno agerego, peno abale a Gereja ya Mulungu. Pontho ine ndisasaka na njira zonsene kutsandzaisa anthu onsene. Thangwi siri kusaka udidi wanga ndekha tayu, mbwenye udidi wa anthu onsene, toera iwo apulumuswe. Kwatirani luso ine, ninga ine ndisakwatirambo luso Kirixtu. Ine ndisakusimbani, thangwi pa pyonsene musandikumbukira, pontho musakoya mitemo sawa-sawa ninga mudakupangirani ine. Mbwenye ndisafuna mudziwe kuti nsolo wa mamuna onsene ndi Kirixtu, nsolo wa nkazi ndi mamuna, nsolo wa Kirixtu ndi Mulungu. Mamuna onsene anaphembera peno mbalonga ciporofeta na nsolo wakugudumirwa, asapwaza nsolo wace. Mbwenye nkazi onsene anaphembera peno mbalonga ciporofeta mbakhonda kugudumira nsolo, asapwaza nsolo wace, thangwi asakhala ninga acingwa mpala. Ngakhala nkazi nkhabe kufinikiza nsolo wace, mbacingwembo tsisi yace. Mbwenye ngakhala pisapasa manyadzo kuna nkazi kucinga tsisi peno kupala tsisi, mbafinikize nsolo wace. Mamuna mbaleke kufinikiza nsolo wace tayu, thangwi iye ndi uunthu na mbiri ya Mulungu. Mbwenye nkazi ndi mbiri ya mamuna. Thangwi mamuna hadabuluka kuna nkazi tayu, mbwenye nkazi ndiye adabuluka kuna mamuna. Pontho, mamuna hadacitiwa na thangwi ya nkazi tayu, mbwenye nkazi ndiye adacitiwa na thangwi ya mamuna. Na thangwi eneyo, pontho na thangwi ya maanju, nkazi asafunika akhale na cidzindikiro ca cilemedzo mu nsolo mwace. Muna Mbuya, nkazi si cinthu tayu patsogolo pana mamuna, mamunambo si cinthu tayu patsogolo pana nkazi. Thangwi sawa-sawa ninga nkazi abuluka kuna mamuna, mamuna abaliwambo na nkazi. Mbwenye pyonsene pyabulukira kuna Mulungu. Nyerezeranimbo imwe pakati panu, mphyadidi kuna nkazi kuphembera Mulungu mbali na nsolo pakweca? Kodi makhaliro ene a pinthu pya padziko, nkhabe kukupfundzisani kuti mphyakupwazika kuna mamuna kukhala na tsisi yakulapha, pontho kuti nkazi angakhala na tsisi yakulapha ndi mbiri? Thangwi apaswa tsisi yakulapha ikhale ninga nguwo yakugudumira nsolo wace. Mbwenye ngakhala alipo munthu anafuna kupokanya pinthu penepi, mbadziwe kuti ife, peno abale a magereja, nkhabe nsambo unowu. Mphapo pa pire pinafuna kukupangani ine, nkhabe kukusimbani. Thangwi m'misonkhano mwanu, musatekera kucita kuipa kupiringana kucita udidi. Pakutoma ndisabva kuti imwe mukhagumanyikana ninga abale a gereja, pakati panu pasaoneka phambulo. Khundu inango ine ndisapitawira. Thangwi pisafunika kuti phambulo iyoneke pakati panu, toera adziwike mbani pakati panu anyakutawiradi Yezu mwakukwana. Mphapo mungagumanyikana pabodzi pene, inadya imwe si Seya ya Mbuya tayu. Thangwi m'bodzi na m'bodzi asadya phwandu yace mbakhonda kudikhira andzace. Na tenepo, m'bodzi asakhala na njala, unango asaledzera. Kodi imwe nkhabe nyumba za kudyera na za kumwera? Peno musapwaza abale a Gereja ya Mulungu pontho mbamupasa manyadzo ale adasowa pinthu? Ndinalonganji kuna imwe? Ndinakusimbani na thangwi ya penepi? Nkhabe, na pang'ono pene. Thangwi ndatambira kuna Mbuya, pire pidakupangani ine kuti: Mbuya Yezu, na masiku adasandukirwa Iye, akwata nkate, pakumala kupereka takhuta, aumenya mbalonga tenepa: “Ici ndi manungo anga anaperekwa na thangwi yanu. Citani ipi mbamundikumbukira.” Mudamala iwo siyari, acita pibodzi-bodzi. Akwata ndiko mbalonga tenepa: “Ndiko iyi ndi cibverano cipsa mu ciropa canga. Citani penepi midzidzi yonsene inamwa imwe, mbamundikumbukira.” Thangwi midzidzi yonsene inadya imwe nkate uyu, mbamumwa ndiko iyi, imwe musalonga kufa kwa Mbuya, mpaka kubwera kwace. Na thangwi eneyo, ule anadya nkate mbamwa ndiko ya Mbuya mbakhonda kukwanira, asadawisira manungo na ciropa ca Mbuya. Munthu m'bodzi na m'bodzi, mbapidinkhisike ekha ene, na tenepo, mbadye nkate pontho amwe ndiko. Thangwi munthu anadya mbamwa, mbakhonda dzindikira manungo a Mbuya, asadya na kumwera nyatwa zace ekha ene. Na thangwi eneyo, alipo azinji anamala mphambvu na anyakuduwala pakati panu, pontho azinji amala kufa. Mbwenye ngakhala ife mbidadinkhisika mwadidi tekha ene, mbatidatongwa tayu. Mbwenye tingatongwa, tiri kusandikwa na Mbuya toera tikhonde kukoneswa pabodzi na dziko. Na tenepo, abale anga, pakugumanyikana kwanu kuti mudye Seya ya Mbuya, dikhiranani m'bodzi na m'bodzi. Ngakhala alipo ana njala, mbadye ku nyumba, toera imwe mungagumanyikana, penepi pikhonde kukukonesani. Pinango, ine ndingabwera ndinadza kapiona. Abale anga, sinafuna tayu kuti mukhale anthu akukhonda kudziwa pa thangwi ya miyoni ya mu nzimu. Imwe musadziwa kuti, pikhakhala imwe anthu akukhonda kutawira Yezu, mukhadodomeswa na makhaliro mazinji, kuti mulambire madzimunthu akukhonda kulonga. Na thangwi eneyo, dziwani kuti nkhabe munthu analonga na Nzimu wa Mulungu kuti: “Yezu mbapaswe dzedze,” pontho nkhabe munthu anakwanisa kulonga kuti: “Yezu ndi Mbuya,” mbakhonda tsogolerwa na Nzimu Wakucena. Iripo miyoni yakusiyana-siyana, mbwenye Nzimu Wakucena ndi ubodzi ene. Alipo mabasa a Mulungu akusiyana-siyana, mbwenye Mbuya ndi m'bodzi ene. Alipo maphatiro akusiyana-siyana, mbwenye ndi Mulungu m'bodzi ene, anaphata pyonsene muna onsene. Mbwenye mabasa a Nzimu Wakucena asapangizika muna munthu m'bodzi na m'bodzi, toera uoneke udidi kuna onsene. Thangwi na Nzimu Wakucena, m'bodzi asapaswa fala ya udziwisi. Unango, na Nzimu ubodzi ene wa Mulungu, asapaswa fala ya kudziwa. Unango, na Nzimu ubodzi ene, asapaswa cikhulupiro. Unango, na Nzimu ubodzi ene, asapaswa miyoni ya kuwangisa nthenda, unango apaswa mphambvu za kucita pirengo, unango apaswa kulonga ciporofeta, unango apaswa muwoni wa kudzindikira mizimu, unango apaswa malongero a kusiyana-siyana, unango apaswa kuchulula malongero a kusiyana-siyana. Mbwenye pinthu pyonsene ipi, pisacitika na Nzimu Wakucena ubodzi ene basi, pontho usagawiza kuna m'bodzi na m'bodzi ninga munafunira Iwo Nzimu. Na tenepo, ninga manungo ndi mabodzi basi, iwo ana mapindi mazinji, mbwenye mapindi onsene awa, pakukhala kwawo mazinji, acitwa manungo mabodzi. Penepi ndi sawa-sawambo na Kirixtu. Thangwi ife tonsene, madjuda na ale adakhonda kukhala madjuda, adzakazi na atumbe, tatambira batixmu na Nzimu ubodzi basi, toera tikhale manungo mabodzi basi. Pontho tonsene tamweswa Nzimu ubodzi ene. Thangwi manungo hadacitwa na phindi ibodzi basi tayu, mbwenye na mapindi mazinji. Mwendo ungalonga kuti: “Thangwi yakukhonda kukhala manja, ine sine wa manungo tayu,” penepi nkhabe kucita kuti ukhonde kukhala phindi ya manungo. Pontho khutu ingalonga kuti: “Thangwi yakukhonda kukhala diso, ine sine wa manungo tayu,” penepi nkhabe kucita kuti ikhonde kukhala phindi ya manungo. Manungo onsene mbadakhala diso, mbitidakwanisa tani kubva? Pontho manungo onsene mbadakhala khutu, mbitidakwanisa tani kubva khwema? Mbwenye Mulungu aikha phindi ibodzi na ibodzi m'manungo, ninga mudafunira Iye. Pyonsene mbipidakhala ndi phindi ibodzi basi, manungo mbadakhala kupi? Ande, mapindi ndi mazinji, mbwenye manungo ndi mabodzi basi. Diso mbileke kulonga kuna manja kuti: “Ine nkhabe kukufuna!” Nsolombo mbuleke kulonga kuna miyendo kuti: “Ine nkhabe kukufunani!” Mbwenye mapindi a m'manungo anakhala ninga akusowa mphambvu, ndiwo anafunika kakamwe. Pontho mapindi ananyerezera ife m'manungo kuti asafunika kulemebza pang'ono, ndiwo analemedza ife mwadidi. Alembo anapasa manyadzo muna ife, ndiwo analemedza ife mwadidi. Apo mapindi anakhonda kupasa manyadzo muna ife, nkhabe funika kulemebza mwadidi. Mbwenye Mulungu aphataniza manungo onsene, mbalemedza pikulu kakamwe mapindi onsene anapasa manyadzo muna ife, toera pakhonde kuoneka phambulo m'manungo, mbwenye mapindi onsene akhale akuonerana, mbaphedzana ibodzi na ibodzi. Phindi ibodzi ingaona nyatwa, mapindi anango onsene asaonambo nyatwa nayo pabodzi. Phindi ibodzi ingasimbwa, onsene asatsandzaya nayo pabodzi. Lang'anani, imwe ndimwe manungo a Kirixtu, pontho m'bodzi na m'bodzi wanu, ndi phindi ya manungo enewa. Tenepa, pa abale a gereja, pakutoma Mulungu aikha apoxtolo, pa mbuto yaciwiri aikha maporofeta, pa mbuto yacitatu aikha apfundzisi. Buluka penepo aikha anyakucita pirengo, na ale adapaswa muwoni wa kuwangisa atenda, na ale adapaswa muwoni wa kuphedza andzawo, na ale anatsogolera, na anango adapaswa muwoni wa malongero akusiyana-siyana. Kodi onsene ndi apoxtolo? Onsene ndi maporofeta? Onsene ndi apfundzisi? Onsene ana muwoni wa kucita pirengo? Onsene ana muwoni wa kuwangisa atenda? Onsene asalonga malongero akusiyana-siyana? Onsene asachulula malongero? Mphapo sakani miyoni yakufunika kakamwe. Cincino ndinakupangisani njira ibodzi yadidi kakamwe. Mbidakhala ine ndisakwanisa kulonga malongero onsene a anthu na a maanju, mbandisowa kufunana, ndinakhala ninga simbi, peno ninga ng'oma inalira. Mbidakhala ine ndina muwoni wakulonga ciporofeta, mbandidziwa pyakubisala pyonsene na kudziwa konsene, pontho mbandikhala na cikhulupiro cakukwanisa kuthukusa mapiri, mbandisowa kufunana, mbidakhala cinthu tayu. Mbidapasa anyakucherenga pyonsene pina ine, pontho mbandipereka manungo anga toera apisiwe, mbandisowa kufunana, nkhabe cibodzi cikhafuna kundiphedzera. Kufunana kusabala kupirira, kufunana kusabala udidi. Nkhabe kubala bibvu, nkhabe kubala kugaya, nkhabe kubala kupikuza. Nkhabe kucitira ndzace pyakuipa, nkhabe saka kucita kufuna kwace, nkhabe cimbiza na kuipirwa, nkhabe koyera ndzace nyongo. Kufunana nkhabe kukomerwa na pyakukhonda kulungama, mbwenye asakomerwa na pya ndimo mwene. Kufunana kusaphimbira pyonsene, kusakhulupira pyonsene, kusadikhira pyonsene, kusawangisira pyonsene. Kufunana cipo kusamala. Mbwenye kulonga ciporofeta kusadza kamala, kulonga malongero akusiyana-siyana kunadza kamala, kudziwa kunadza kamala. Thangwi pinadziwa ife, na ciporofeta cinalonga ife, si pyakukwana tayu. Mbwenye cingadza kabwera cakukwana, cire cidakhonda kukhala cakukwana cinadza kamala. Pikhali ine mwana, ndikhalonga ninga mwana, ndikhanyerezera ninga mwana, ndikhali na ndzeru za ciwana. Pidakula ine, ndasiya kucita pya ciwana. Thangwi cincino tisaona ninga pa supeyo, nkhabe kuonesa mwadidi. Mbwenye pa n'dzidzi unowu ungafika, tinadza kamuona mwakukwana nkhope na nkhope. Cincino ndisadziwa pang'ono, mbwenye kutsogolo ndinati ndidziwe mwakukwana ninga munadziwika ine. Na tenepo, cincino pinasala ipi pitatu: Kukhulupira, kudikhira na kufunana. Mbwenye pa pyonsene ipi, cikulu kakamwe ndi kufunana. Fambani na njira ya kufunana, sakani mwakukwana miyoni ya mu nzimu, maka-maka muwoni wa kulonga ciporofeta. Thangwi ule analonga na malongero anango, hali kulonga kuna anthu tayu, mbwenye ali kulonga kuna Mulungu, thangwi nkhabe munthu anapibvesesa. Mu Nzimu asalonga pyakubisala. Mbwenye analonga ciporofeta asapicita toera kuphedza, kupasa cipapu na kubalangaza anthu. Munthu analonga malongero akusiyana-siyana, asaphedzereka iye ekha. Mbwenye analonga ciporofeta, asaphedza nsoka wa anyakutawira Yezu. Ine ndikhafuna kuti monsene mulonge na malongero akusiyana-siyana, mbwenye maka-maka ndisafuna mulonge ciporofeta. Ule analonga ciporofeta, ndi nkulu kupiringana ule analonga malongero akusiyana-siyana, peno angaoneka unango wakupichulura, toera abale a gereja aphedzeke. Cincino abale anga, ine ndingadza kakuonani mbandilonga malongero akusiyana-siyana, ndi ninji pinafuna kukuphedzerani ine, ndingakhonda kukupangani na mafala a mu Nzimu, a udziwisi, a ciporofeta, peno a cipfundzo? Penepi pisacitikambo na pinthu pya kuimbwa pinakhonda kupuma, ninga citoliro peno bhangwe. Munthu anadzindikira tani pinaimbwa, pingadyana kulira kwapyo? Pontho ngakhala ule analiza kaluta ya anyankhondo angakhonda kuiliza mwadidi, anyankhondo anasasanyira tani kuti aende ku nkhondo? Penepi pisacitikambo kuna imwe. Mungakhonda kulonga pinthu pyakubveka na malongero anu, munthu anapibvesa tani pinalongwa? Musakhala ninga musalonga papezi. Ndimo mwene, alipo malongero mazinji pa dziko, mbwenye nkhabe malongero anakhonda kulonga pinthu. Mphapo ngakhala ine nkhabe kupibva pinalonga munthu unango, ine ndine munthu wakudza kuna ule analonga, iyembo ndi munthu wakudza kuna ine. Penepi ndipyo pinacitika na imwe. Na tenepo, imwe, na kufuna kunacita imwe miyoni ya mu Nzimu, sakani kukula pa pire pinaphedzera abale a gereja. Na thangwi eneyo, munthu analonga na malongero anango, mbaphembere kuna Mulungu kuti akwanise kuachulula. Thangwi ngakhala ndisaphembera na malongero anango, nzimu wanga usaphembera, mbwenye ndzeru zanga nkhabe kuphedzeka. Ndinacita tani mphapo? Ndinaphembera mu nzimu, mbwenye pontho mbindiphemberambo na ndzeru. Ndinaimba mu nzimu, mbwenye pontho mbindiyimbambo na ndzeru. Ngakhala iwe usakuza Mulungu mu nzimu basi, anatawira tani “Ameni’’ ule anakhonda kudziwa, pa cire cinaperekera iwe takhuta kuna Mulungu, thangwi iye nkhabe kupibva pire pinalonga iwe? Panango iwe usapereka takhuta mwadidi mwene kuna Mulungu, mbwenye ndzako nkhabe phedzeka napyo. Ine ndisapereka ndakhuta kuna Mulungu, na thangwi ya kulonga malongero akusiyana-siyana a mu nzimu kupita imwe monsene. Mbwenye ine, pa abale a gereja, ndisakomerwa na kulonga mafala maxanu basi a ndzeru akubveka na anthu, toera kupfundzisa anango, kupiringana kulonga mafala pikwi khumi na malongero anango. Abale, siyani manyerezero aciwana. Pa pyakuipa khalani ninga ana. Mbwenye pa kunyerezera, khalani ninga akulu. Thangwi pyalembwa mu Mwambo wa Mulungu kuti: “Kubulukira kuna anthu a malongero anango, pontho na milomo ya mbumba inango, ndinati ndilonge kuli mbumba iyi mbwenye iwo, nkhabe kudza kandibvera basi tayu,” ndipyo pidalonga Mbuya. Na tenepo, malongero akusiyana-siyana ndi cidzindikiro kuna ale adakhonda kutawira Yezu, si kuna ale adatawira Yezu tayu. Mbwenye ciporofeta ndi cidzindikiro kuna anyakutawira Yezu, si kuna ale adakhonda kutawira Yezu tayu. Abale onsene a Gereja angagumanyikana, pontho onsene mbalonga na malongero akusiyana-siyana, mbapita anthu anango anakhonda kudziwa peno adakhonda kutawira Yezu, iwo nkhabe kulonga kuti imwe ndimwe madzemwa? Mbwenye ngakhala monsene muli kulonga ciporofeta, mbapita munthu adakhonda kutawira Yezu, peno wakukhonda kudziwa, onsene anakwanisa kun'dzindikirisa kuti ndi nyakudawa, pontho onsene anakwanisa kunkonesa. Pontho pinthu piri muntima mwace pyakukhonda kudziwika, pinadziwika. Na tenepo, iye anagodama mbagwa pantsi, mbalambira Mulungu, mbalonga kuti: “Ndimo mwenedi, Mulungu ali na imwe!” Na tenepo, tinacitanji abale anga? Imwe mungagumanyikana pabodzi pene, m'bodzi wanu ana nyimbo, peno m'bodzi wanu ana fala ya kupfundzisa, m'bodzi wanu ana mafala a mu Nzimu, m'bodzi wanu ana fala ya malongero akusiyana-siyana, peno ya kuchulula mafala a malongero akusiyana-siyana, pyonsene ipi mbipicitwe toera kuphedzera abale a gereja. Mbwenye ngakhala alipo munthu analonga na malongero akusiyana-siyana, asatongwa kuti alonge anthu awiri peno atatu basi, m'bodzi na m'bodzi pa n'dzidzi wace, pontho paoneke nyakuchulula. Ngakhala nkhabe nyakuchulula, mbamatame pa abale a gereja, mbalonge kuna iye ekha ene na kuna Mulungu wace. Pa thangwi ya maporofeta, mbalonge awiri peno atatu, anango mbanyerezere mwadidi pinalongwa. Ngakhala alipo munthu unango adakhala pantsi mbapangizwa mu Nzimu, ule wakutoma mbamatame. Thangwi imwe monsene mwatawiriswa kulonga ciporofeta, mbamupitisirana m'bodzi na m'bodzi, kuti imwe monsene mupfundze pontho mukhale na cipapu. Mizimu ya maporofeta isabvera maporofeta. Thangwi Mulungu si wa nthonga tayu, mbwenye ndi wa ntendere. Ninga m'magereja onsene a mbumba ya Mulungu, akazi mbakhale akumatama pakati pa abale a gereja, thangwi iwo nkhabe kutawirirwa kuti alonge. Mbwenye mbakhale akubvera, ninga munalonga Mwambo. Ngakhala asafuna kupfundza pinthu, mbabvundze amuna awo kunyumba. Thangwi mphya manyadzo nkazi kulonga pa abale a gereja. Kodi fala ya Mulungu yabulukira kuna imwe? Peno yafikira imwe mwekha? Ngakhala alipo munthu ananyerezera kuti ndi mporofeta wa Mulungu, peno kuti ana Nzimu Wakucena, mbadzindikire kuti pire pinakulemberani ine ndi matongero a Mbuya. Angakhonda kudziwa penepi, iye nkhabe dziwikambo. Na tenepo, abale anga, sakani maka-maka muwoni wa ciporofeta, mbamuleka kukhondesa analonga malongero akusiyana-siyana. Mbwenye pyonsene mbapicitwe mwakulemedzeka, cibodzi na cibodzi. Abale, ndisafuna ndikukumbuseni Mphangwa Zadidi zidakupangani ine. Mphangwa zenezi ndizo zidatambira imwe, pontho ndi mwenemu munalimirira imwe. Na Mphangwa izi Zadidi, imwe mwapulumuswa, male mungaikoya mwadidi fala eneyo ninga mudakupangirani ine. Mungakhonda kucita penepyo, mwatawira pa pezi. Thangwi pire pidakupangani ine pakutoma, ndipyo pidatambirambo ine kuti: Kirixtu afera madawi athu, ninga munalongera Bukhu ya Mulungu. Ayikhwa n'nthumbi, ntsiku ya citatu mbalamuswa pa kufa, ninga mudalongera Bukhu ya Mulungu. Iye aonekera kuna Pedhru, pakumala mbaonekerambo kuna Apoxtolo khumi na awiri. Buluka penepo, aonekera kuna abale akupiringana madzana maxanu pa n'dzidzi ubodzi ene. Azinji awo ali m'maso, mbwenye anango amala kufa. Buluka penepo, aonekera kuna Tiyago na kuna apoxtolo onsene. Pakumalisira aonekerambo kuna ine, ninga ine ndine mwana wakubaliwa ntsiku zanga mbazidzati kukwana. Ndimo mwene, ine ndine mwana kakamwe pa apoxtolo, pontho nkhabe kukwanira na pang'ono pene kuti ndicemerwe mpoxtolo, thangwi ndazonda abale a gereja ya Mulungu. Mbwenye na thangwi ya kukoma ntima kwa Mulungu, cincino ndiri ninga munandionera imwe. Pontho, kukoma ntima kudandipasa Iye si kwa pezi tayu. Mbwenye ndaphata basa ikulu kakamwe kupiringana iwo onsene. Mphapo sine tayu, ndi kukoma ntima kwa Mulungu kuli na ine. Na tenepo, peno ine, peno iwo, penepi ndipyo pinamwaza ife, pontho ndi penepi pidatawira imwe. Lang'anani, ngakhala mphangwa ziri kumwazwa kuti Kirixtu alamuswa pa kufa, asalongeranji andzanu anango kuti nkhabepo kulamuka kwa anyakufa? Ngakhala nkhabepo kulamuka kwa anyakufa, Kirixtu hadalamuswambo pa kufa tayu. Pontho ngakhala Kirixtu hadalamuswa pa kufa tayu, na tenepo pinamwaza ife mphyapezi, pontho cikhulupiro canumbo nchapezi. Pontho tenepa, tinaoniwa ninga ndife amboni authambi a Mulungu. Thangwi talonga umboni wa uthambi kuna Mulungu kuti Iye alamusa Kirixtu pa kufa. Mbwenye ngakhala ndimodi kuti anyakufa nkhabe kulamuswa, Mulungu hadalamusambo Kirixtu pa kufa tayu. Thangwi anyakufa ngakhala nkhabe kulamuswa, na Kirixtu ene hadalamuswambo pa kufa tayu. Apo ngakhala Kirixtu hadalamuswa tayu pa kufa, kukhulupira kwanu nkhwapezi, pontho madawi anu muciri na iwo. Na tenepo, ale adagona muna Kirixtu amala kutaikambo. Ngakhala cidikhiro cathu muna Kirixtu ndi ca makhaliro a dziko ino basi, ndife acherengi kupiringana anthu onsene. Mbwenye ndimo mwene, Kirixtu alamukadi pa kufa. Iye ndiye wakutoma kulamuka pakati pa anyakufa. Thangwi kufa kwabwera na mamuna m'bodzi, kulamuka pa kufa kwabwerambo na mamuna m'bodzi. Thangwi sawa-sawa ninga muna Adhamu onsene asafa, tenepambo muna Kirixtu onsene anati apulumuswe. Mbwenye m'bodzi na m'bodzi pa n'dzidzi wace: Kirixtu ndiye wakutoma. Buluka penepo, pakubwera kwace, analamukambo ale ace. Buluka penepo, zinati zifike ntsiku zakumalisa, Iye angapereka Umambo kuna Mulungu Baba, pakumala kufudza umambo onsene, utongi na mphambvu zonsene. Thangwi pisafunika kuti Iye atonge mpaka kufikira kuti anyamalwa ace onsene aikhwa pantsi pa manyalo ace. Nyamalwa wakumalisira kufubza ndi kufa. Thangwi Iye “aikha pyonsene pantsi pa manyalo ace.” Mbwenye pa kulonga kuti “pyonsene’’ piri pantsi pace, dziwani kuti penepi sikulongera na Mulungu ene tayu, ule adacita kuti pyonsene pikhale pantsi pa Kirixtu. Mbwenye pyonsene pingadza kakhala pantsi pace, na tenepo Iye ene Mwana, anadza kakhalambo pantsi pa ule adacita kuti pinthu pyonsene pikhale pantsi pa Mwana, toera Mulungu akhale pyonsene muna onsene. Ngakhala nkhabepo kulamuka pa kufa, anadza kacitanji ale anatambirira batixmu anyakufa? Ngakhala anyakufa nkhabe kulamukadi pa kufa, thangwi yanji iwo asaatambirira batixmu? Ifembo, thangwi yanji tisaperekeka mwa kugopsa pa midzidzi yonsene? Abale, ntsiku zonsene ndisamenyana na kufa. Ndisadumbira na kugaya kunacita ine na thangwi yanu, muna Kirixtu Yezu, Mbuya wathu. Ngakhala ndamenyana na pikala ku Efesu na mathangwi a anthu basi, ndawinanji na penepyo? Ngakhala anyakufa nkhabe kulamuka, “tendeni timwe pyathu mbatidya pyathu, thangwi mangwana tinafa.” Lekani kunyengezwa. “Kufamba na anthu a kuipa kusafudza makhaliro adidi.” Ninga anthu akulungama, tomani pontho kunyerezera mwadidi, pontho siyani kudawa. Thangwi alipo anango anakhonda kudziwa Mulungu. Ndisalonga penepi toera mukhale na manyadzo. Mbwenye unango anati abvundze kuti: “Kodi anyakufa analamuka tani? Pontho analamuka na manungo a khaindi yanji?” Iwe dzemwa! Pinabzala iwe nkhabe mera pingakhonda kufa. Pontho iwe ungabzala, nkhabe bzala manungo anafuna kudza kamera, mbwenye ndi mbeu ibodzi basi ninga ya tirigu, peno mbeu inango. Mbwenye Mulungu asaipasa manungo ninga mudapitongera Iye, pontho pa mbeu ibodzi na ibodzi manungo ace akunkwanira. Nyama zonsene si sawa-sawa tayu. Anthu ana khaindi yawo ya nyama, pinyama pina khaindi yawo, mbalame zina khaindi yawo, pontho nyama za m'madzi zina khaindi yawombo ya nyama. Alipo manungo a kudzulu, alipombo manungo a pantsi pano. Mbwenye kuyetimira kwa manungo a kudzulu ndi kunango, kuyetimira kwa manungo a pantsi pano ndi kunangombo. Kulipo kuyetimira kwa dzuwa, kulipo kuyetimira kwa mwezi, kulipo kuyetimira kwa nyenyezi. Pontho pakati pa nyenyezi zonsene, zisasyana pakuyetimira kwazo ibodzi na ibodzi. Ndi tenepa pinadza kacitika pa kulamuka kwa anyakufa. Manungo anabzaliwa asabvunda, mbwenye analamuka mbakukhonda kubvunda. Asabzaliwa akupwazika, mbalamuka a mbiri. Asabzaliwa akusoweka mphambvu, mbalamuka a mphambvu. Asabzaliwa manungo akubalwa na iwo, mbalamuka a nzimu. Ngakhala alipo manungo akubalwa na iwo, alipombo manungo a nzimu. Na tenepo, pyalembwa kuti: “Mamuna wakutoma, Adhamu, acitwa munthu wa m'maso,” Adhamu wakumalisa acitwa nzimu wakupulumusa. Pidatoma si pya nzimu tayu, mbwenye ndi pya manungo akubalwa na iwo. Pya nzimu mbipimalisira. Mamuna wakutoma acitwa na mataka, ndi wa pantsi pano. Mamuna waciwiri ndi wa kudzulu. Ale a pantsi pano, alandana na mamuna wa pantsi pano. Ale a kudzulu, alandana na mamuna wa kudzulu. Ninga ife talandana na mamuna wa pantsi pano, tinadza kalandanambo na mamuna wa kudzulu. Abale, ndisakupangani kuti nyama na ciropa nkhabe kukwanisa kutambira unthaka wa Mulungu. Pontho pinthu pinabvunda, nkhabe kukwanisa kutambira unthaka wa pinthu pyakukhonda kubvunda. Bvani pyakubisala pinafuna ine kukupangani: Si tonsene tayu anafuna kudza kafa, mbwenye tonsene tinadza kaphinduka, pa n'dzidzi ubodzi ene, pakuphoira kwa diso, pa kulizwa kwa kaluta yakumalisa. Thangwi kaluta inati ilire, anyakufa analamuka na manungo akukhonda kubvunda, pontho ife tinaphinduka. Thangwi pisafunika kuti cire cinabvunda cibvazikwe cakukhonda kubvunda. Pontho cire cinafa cibvazikwe cakukhonda kufa. Pontho cakubvunda cingabvala cinthu cakukhonda kubvunda, peno cinafa cingabvala cinthu cakukhonda kufa, inasimbiswa fala idalembwa kuti: “Kufa kwamezwa na kuwina.” “ Iwe kufa, kukunda kwako kuli kupi? Iwe kufa, mphambvu zako ziri kupi?” Mphambvu za kufa ndi kudawa. Anapasa mphambvu za madawi ndi Mwambo. Tisapereka takhuta kuna Mulungu, adatipasa kukunda kubulukira muna Mbuya wathu Yezu Kirixtu. Na tenepo, abale anga akufunika, khalani dzololo, lekani kuzunguzwa, mudzale na kutaikira pa mabasa a Mbuya, thangwi imwe musadziwa kuti muna Mbuya, basa yanu si ya pezi tayu. Pa thangwi ya nsonkho-nsonkho unacitirwa mbumba ya Mulungu, citani ninga mudalonga ine kuna abale a magereja a ku dziko ya Galasya. Pa ntsiku ya Dimingu, m'bodzi na m'bodzi wanu, mbapambule ntengo wa pire pidawina iye mbapiyikha pa khundu, toera muleke kusonkhesana n'dzidzi unafika ine. Na tenepo, ine ndingafika, ndinalemba matsamba mbandiapasa amuna adasankhula imwe, mbindiatuma kwenda ku Djerusalema na miyoni yanu. Ndingaona kuti pisafunika kuti ine ndiyendembo, iwo anaenda pabodzi na ine. Ndingamala kupita na kudziko ya Masedhonya, ndinadza kakuonani, thangwi ndinapita na kweneku. Panango ine ndinakhala na imwe n'dzidzi pang'ono, peno ndinakhala mpaka kupita na imwe pabodzi n'dzidzi wa khoni, toera mundiphedze pa ulendo, kule kunafuna kwenda ine. Cincino sinafuna kupita mbindikuonani basi tayu, thangwi ndisadikhira kukhala midzidzi mingasi na imwe, Mbuya angapifuna. Mbwenye ndinakhala mu Efesu mpaka pa phwandu ya Pentikoxti, thangwi ndafungulirwa nsuwo ukulu toera ndikwanise kuphata basa mwadidi, pontho alipo anyamalwa azinji. Timoti angafika kuna imwe, ncitireni pyonsene toera iye akhonde gopa cinthu pa n'dzidzi unakhala iye pabodzi na imwe, thangwi iye asaphatira basa Mbuya sawa-sawa ninga ine. Na tenepo, mbaleke oneka munthu wakumpwaza. M'phedzeni kuti apitirize na ulendo mu ntendere, toera iye akwanise kubwerera pontho kuna ine. Ine ndisan'dikhira pabodzi na abale. Pa thangwi ya m'bale wathu Apolo, ndankakamiza kuti abwere pabodzi na abale kudza kakuonani. Iye akhonderatu kakamwe kwenda cincino, mbwenye anadza kaenda n'dzidzi wace ungakwana. Lang'anirani, mbamukhala dzololo pa kukhulupira. Khalani amuna a cipapu, pontho mukhale a mphambvu. Citani pyonsene na kufunana. Imwe musadziwa kuti mudzi wa Xitefana ndiwo udatoma kutawira Yezu mu dziko ya Akaya, pontho iwo ali kutsalakana kuphatira basa mwadidi mbumba ya Mulungu. Ndisakuphembani abale anga, kuti muabvere anthu ninga enewa, na onsene anabverana mbaphata basa pabodzi na iwo. Ndatsandzaya na kubwera kwa Xitefana, Furutunatu na Akaiku, thangwi iwo andicitira pikhadasala kuti imwe mundicitire. Iwo akhurudza ntima wanga, pontho akhurudzambo mitima yanu. Asimbeni anthu ninga enewa. Abale a magereja a ku dziko ya Azya, asakumwanyikani. Akila na Pirisila asakumwanyikani pikulu muna Mbuya, pontho na nsoka wa anyakutawira Yezu unakhala mbugumanyikana pa nyumba pawo. Abale onsene a kuno asakumwanyikani. Mwanyikanani m'bodzi na m'bodzi na mpsompsono wa ciubale. Ine Paulu ndisalemba m'mwanyikiro uyu na manja anga. Ngakhala alipo anakhonda kufuna Mbuya, mbapaswe dzedze. Bwerani Mbuya! Kukoma ntima kwa Mbuya Yezu, mbakukhale na imwe. Tambirani kukufunani kunakucitani ine monsene, muna Kirixtu Yezu. Ameni. Ine Paulu, mpoxtolo wa Kirixtu Yezu na kufuna kwa Mulungu, pabodzi na m'bale Timoti, tisalembera abale a gereja ya Mulungu iri ku nzinda wa Korintu, na kuna mbumba ya Mulungu yonsene ya ku dziko yonsene ya Akaya. Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbipikhale na imwe. Mbasimbwe Mulungu Baba wa Mbuya wathu Yezu Kirixtu, Baba wa ntsisi, pontho Mulungu wa kumatamiza konsene, ule anatimatamiza pa nyatwa zathu zonsene, toera kuti na kumatamiza kudatambira ife ene kuna Mulungu, tikwanise kumatamiza ale ali mu nyatwa zakusiyana-siyana. Thangwi ninga nyatwa za Kirixtu zadzala mbizitaikira kuna ife, kumatamizwa kwathu kwadzalambo mbukutaikira kubulukira muna Kirixtu. Mbwenye ngakhala tisaona nyatwa, ndi toera imwe mumatamizwe pontho mupulumuswe. Ngakhala tisamatamizwa, ndi toera imwe mumatamizwembo, kumatamizwa kweneku kunakupasani kupirira toera muwangisire nyatwa zibodzi zene zinaona ife. Pontho kudikhira kwathu pa thangwi yanu kuli dzololo, thangwi tisadziwa kuti sawa-sawa ninga imwe musakhala nanthu pa nyatwa zathu, munakhalambo nanthu pa kumatamizwa kwathu. Abale anga, ife nkhabe funa kuti imwe mukhale anthu akukhonda kudziwa nyatwa zidaona ife ku dziko ya Azya. Nyatwa zenezi zapiringana kakamwe mphambvu zathu za kupirira, mbatifikira kunyerezera kuti nkhabe kudza kapulumukabve. Ndimo mwene, ife tikhadatongerwa kale kufa, toera tikhonde kunyindirika tekha ene, mbwenye tinyindire Mulungu, analamusa anyakufa. Iye atiombola pontho anati atiombole pa nyatwa eneyi ikulu ya kufa. Muna Iye tinaco cidikhiro ca kuti anati apitirize basi na kutiombola, pa n'dzidzi unatiphedza imwe na miphembero yanu. Na tenepo, azinji anati apereke takhuta na thangwi yathu, na udidi udacitirwa ife na azinji. Kugaya kwathu ndi uku: Kuti manyerezero athu a muntima asacita umboni wa kuti ife tisafamba n'dziko, maka-maka pa kubverana kwathu na imwe mwakukwana pontho na mwa ndimo mwene udabulukira kuna Mulungu, mbukhonda kukhala ninga munafunira udziwisi wa anthu, mbwenye ndi kukoma ntima kwa Mulungu. Thangwi nkhabe pinthu pinakulemberani ife kuti imwe nkhabe kwanisa kupiona peno kupibvesesa. Pontho ndisadikhira kuti munapibvesesa pyonsene, ninga imwembo mwapibva pinango pidalonga ife, kuti ndife mbiri yanu, sawa-sawa ninga imwe ndimwe mbiri yathu, pa Ntsiku ya Yezu Mbuya wathu. Na cinyindiro ceneci, pakutoma ndikhanyerezera kudza kakuonani toera mupaswe nkhombo kawiri pa kwenda kwanga ku dziko ya Masedhonya, na pakubwerera kwanga kuna imwe ndingabuluka kweneko, toera mundiphedze pa ulendo wanga wa kwenda ku dziko ya Djudeya. Pidanyerezera ine penepi, nkhulongera kuti ndikhacita pya mu nsolo mwanga? Peno nkhulongera ndisapicita ninga munapicitira anthu a dziko, mbandilonga pa n'dzidzi ubodzi ene “ande’’, peno “nkhabe?” Mbwenye ninga Mulungu ndi wakunyindirika, sawa-sawa mphangwa zathu kuna imwe si za kuti “ande’’ peno “nkhabe’’ tayu, thangwi Mwana wa Mulungu, Yezu Kirixtu analonga ife pakati panu, ine na Silivano pontho na Timoti, si wa “Ande’’ peno wa “nkhabe’’ tayu. Mbwenye mwa Iye, “Ande’’ asagumanika kale na kale. Thangwi pipikiriro pyonsene pidacita Mulungu, pyonsene pyagumana “ande’’ muna Kirixtu. Na thangwi eneyo, kubulukira muna Iye, tisalongambo “Ameni’’, toera kupasa mbiri Mulungu. Mbwenye ndiye Mulungu anacita kuti ife na imwe tikhale dzololo muna Kirixtu. Iye atidzodza mbatidhinda toera tikhale ace, mbaikha Nzimu wace m'mitima mwathu ninga cipanda. Mulungu mbandiphe pyace, ngakhala ndi uthambi pinalonga ine kuti pidakhonda ine kupita pontho na ku Korintu, ndi toera udidi wanu. Si kuti tisafuna tikunde kukhulupira kwanu tayu, mbwenye tisaphedzana na imwe kuti mukhale akutsandzaya. Thangwi na cikhulupiro, imwe muli dzololo. Na thangwi eneyi, ndanyerezera kuti ndikhonde kukucitirani ulendo unango wa kutsukwalisa. Thangwi ndingakutsukwalisani, mbani anafuna kunditsandzaisa, mbakhonda kukhala imwe abodzi-bodzi anatsukwalisa ine? Ndalemba ipi ninga mudalembera ine, toera ndingaenda, ndikhonde kutsukwaliswa na ale akhatongwa kunditsandzaisa. Ndikhanyindira kuti imwe monsene, kutsandzaya kwanga kunakutsandzaisanimbo. Thangwi ndakulemberani na kuthabuka kukulu na kutsukwala muntima, pontho na misozi. Si toera kukutsukwalisani tayu, mbwenye toera mudziwe kuti ine ndisakufunani pikulu kakamwe. Ngakhala m'bodzi wanu acita pyakutsukwalisa, hadacitira ine basi tayu, mbwenye khundu inango, toera ndikhonde kupitekeresa pyanga, atsukwalisambo imwe monsene. Kuthabuswa kudacitwa iye na anthu azinji kwakwana. Mbwenye musafunika mumulekerere mbamum'matamisa, toera iye akhonde kukundika na kutsukwala kukulu kakamwe. Na tenepo, ndisakuphembani kuti muthimize kumpangisa kunfuna kunancita imwe. Pontho ndi thangwi eneyo ndakulemberani toera kukuleserani, ngakhala ndimwe akubvera pa pinthu pyonsene. Ule analekerera imwe, ine ndinamulekererambo. Thangwi ndimo mwene, pire pinalekerera ine, ngakhala ndisalekerera, ndisapicita patsogolo pana Kirixtu, na thangwi yanu toera Sathani akhonde kutinyengeza, thangwi manyerezero ace akuipa tisaadziwa. Mudafika ine ku nzinda wa Thorowadhi toera kumwaza Mphangwa Zadidi za Kirixtu, ndaona kuti Mbuya akhadandifungulira nsuwo ubodzi. Mbwenye ntima wanga hudapuma tayu, na thangwi yakukhonda kun'gumana kweneko m'bale wanga Titu. Na tenepo, ndaapangana mbindiyenda ku Masedhonya. Mbwenye Mulungu mbakuzwe, anatitsogolera na kuwina konsene muna Kirixtu, pontho kubulukira muna ife asamwaza mu mbuto zonsene, khwema yadidi ya kudziwa kwace. Thangwi kuna Mulungu ndife khwema yadidi ya Kirixtu, pakati pa ale anapulumuswa na pa ale anataika. Kuna ale anyakutaika, tisanunkha khwema ya kufa inaendesa kwa kufa. Kuna ale anapulumuka tisanunkhira khwema ya upulumuki inaendesa ku upulumuki. Mbwenye mbani anakwanisa kucita pinthu penepi? Thangwi ife tasiyana na azinji anango anacita malonda fala ya Mulungu. Mbwenye muna Kirixtu, ife tisalonga pamaso pa Mulungu mwa ndimo mwene, ninga anthu akutumwa na Mulungu. Kodi nkhulongera kuti tiri kutoma pontho kusimbika tekha ene? Peno nkhulongera pisafunika matsamba a kuticitira umboni kuna imwe, peno tsamba yakubuluka kuna imwe, ninga pinacita anthu anango? Imwe ene ndimwe tsamba yathu, idalembwa m'mitima mwathu, yakudziwika pontho mbioniwa na anthu onsene. Imwe musapangisa kuti ndimwe tsamba ibodzi ya Kirixtu idabulukira pa basa yathu, idakhonda kulembwa na tinta, mbwenye na Nzimu Wakucena wa m'maso, pontho idakhonda kulembwa pa matabwa a mwala mbwenye m'matabwa a mitima ya anthu. Ceneco ndi cinyindiro cina ife patsogolo pana Mulungu, kubulukira muna Kirixtu. Si kuti tinakwanisa tekha ene kunyerezera pinthu ninga pisabulukira muna ife tayu, mbwenye mphambvu zathu zisabuluka kuna Mulungu. Iye atipasa mphambvu toera tikhale anyabasa a cibverano cipsa, cidakhonda kukhala ca Mwambo wakulembwa, mbwenye ca Nzimu. Thangwi Mwambo wakulembwa usapha, Nzimu usapulumusa. Basa idadzesa kufa yalembwa pa myala na malemba, mbwenye basa eneyi yabwera na mbiri kakamwe, ya kuti ana a Izarayeli akhacimwana kulang'anisa nkhope ya Mozesi na maso awo, na thangwi ya kuyetimira kwa nkhope yace. Mbwenye kuyetimira kweneku kukhali kwakumala. Ndiye tani basa ya Nzimu, nkhabe khala ya mbiri ikulu kakamwe? Ngakhala basa idadzesa kutongwa ikhali ya mbiri, ndiye tani mbiri inafuna kudza kakhala na basa inabala ulungami! Thangwi pire pikhakhala na mbiri kale ene, cincino nkhabebve mbiri, tingalandanisa na mbiri ikulu kakamwe ya cincino. Ngakhala pire pyakumala pyapangizika na mbiri, ndiye tani mbiri inafuna kudza kakhala na pire pya kwenda na kwenda! Na tenepo, na thangwi ya cidikhiro cathu ceneco, tisalonga mbatikhonda kugopa cinthu. Ife nkhabe kucita ninga Mozesi, akhagudumira nkhope yace na nguwo toera ana a Izarayeli akhonde kuona kuti kuyetimira kuli kumala. Ndimo mwene, manyerezero awo afungwa, mpaka lero nguwo eneyi ibodzi-bodzi iciripo angaona mabukhu a cibverano cakale. Nguwo eneyi hidabuluswa tayu, thangwi iyo isabuluswa ungakhala muna Kirixtu basi. Ndimo mwene, na lero, iwo angaona mwambo wa Mozesi, nguwo isagudumira mitima yawo. Mbwenye munthu angazungunuka mbatawira Mbuya, nguwo isabuluswa. Lang'anani, Mbuya ndi Nzimu, pontho panakhala Nzimu wa Mbuya, penepo pana kusudzuka. Pontho ife tonsene, pakulang'ana mbiri ya Mbuya ninga pa supeyo na nkhope yakukhonda kugudumirwa, tisacinjiwa toera tikhale cipangizo cace. Tenepa, mbiri isakula muna ife ntsiku na ntsiku. Mbiri eneyi isabuluka kuna Mbuya, Iye Nzimu. Na tenepo, pakupaswa kwathu basa iyi na ntsisi zidabverwa ife, mbatilekeni kumala mphambvu. Mbwenye ife tisakhonda macitiro akubisala na akupasa manyadzo. Tisakhonda kulonga pya uthambi, peno kudodomesa fala ya Mulungu. Mbwenye tisapangisa pakweca pyonsene pya ndimo mwene patsogolo pana Mulungu, kuti munthu ana manyerezero adidi a muntima, akhonde kupenula. Mbwenye ngakhala Mphangwa zathu Zadidi zinalonga ife zabisala, zabisalira ale anataika. Iye mulungu wa dziko ino, afunga ndzeru za anyakukhonda kutawira, toera akhonde kuona cieza ca Mphangwa Zadidi za mbiri ya Kirixtu, cipangizo ca Mulungu. Thangwi mphangwa zinamwaza ife si zathu tayu, mbwenye tisalonga Yezu Kirixtu ninga Mbuya, pontho ife ndife adzakazi kwa imwe na thangwi ya Yezu. Thangwi Mulungu adalonga kuti: “Pa cidima mbapagake cieza,” Iye ene agaka m'mitima mwathu, toera kutipasa cieza ca kudziwa mbiri ya Mulungu inaonekera pa nkhope ya Kirixtu. Mbwenye tinayo mpfuma eneyi mu pyombo pya dongo, toera kupangisa kuti mphambvu eneyi yakupiringana pyonsene yabuluka kuna Mulungu, si kuna ife tayu. M'makhundu onsene tisathabuswa, mbwenye nkhabe kukundiwa. Panango tisakhala na kupenula, mbwenye nkhabe kumala mphambvu. Tisazondiwa, mbwenye nkhabe kusiyiwa. Tisaphekeswa, mbwenye nkhabe kuphiwa. Tisadzesa kazinji kene m'manungo mwathu kufa kwa Yezu, toera upulumuki wa Yezu upangizikembo m'manungo mwathu. Thangwi, ife tiri m'maso, tisaperekwa kazinji kene pa kufa na thangwi ya Yezu, toera kuti upulumuki wace uonekerembo m'manungo mwathu a kufa. Nkhulongera kuti muna ife kufa kusaphata basa, mbwenye muna imwe upulumuki usaphata basa. Bukhu ya Mulungu yalonga kuti: “Ine ndatawira, na thangwi eneyo ndapilonga.” Na nzimu ubodzi ene wakukhulupira, ife tisatawirambo, na thangwi eneyo tisapilonga. Thangwi ife tisapidziwa kuti Ule adalamusa Mbuya Yezu pa kufa, anatilamusambo ife pabodzi na Yezu mbatipangisa patsogolo pace pabodzi na imwe. Thangwi pyonsene ipi ndi udidi kuna imwe, toera tenepa, kukoma ntima kwa Kirixtu kudzale na kutaikira kuna anthu azinji, kuti anthu apereka takhuta wankulu toera kupasa mbiri Mulungu. Na thangwi eneyi, mbatilekeni kumala mphambvu. Mbitidziwa kuti manungo athu ali kumala, mbwenye n'kati mwathu musasasanyirwa papsa ntsiku na ntsiku, thangwi nyatwa zathu zing'ono pontho zakupita zinaona ife, zisabala kuna ife mbiri ya kwenda na kwenda, ikulu kakamwe kupita nyatwa zonsene. Tenepo, ife nkhabe kulang'anisisa na maso athu pire pinaoneka, mbwenye pinakhonda kuoneka, thangwi pire pinaoneka ndi pyakupita, mbwenye pire pinakhonda kuoneka ndi pya kwenda na kwenda. Tisadziwa kuti khumbi yathu ya padziko inakhala ife ingafudzika, tinayo nyumba inango kuna Mulungu, nyumba ya kwenda na kwenda kudzulu, yakukhonda kumangwa na manja a anthu. Thangwi pa n'dzidzi uno, ife tisatetemera na kufuna kuti tibvazikwe nyumba yathu ya kudzulu. Pontho tingabvazikwa nkhabe kudza kagumanika tiri cipezi-pezi. Mphapo mbatiri mu khumbi iyi, tiri kutetemera mbatitsukwala, thangwi ife nkhabe funa kuti tiduliswe tayu, mbwenye tibvazikwe nyumba yathu ya kudzulu, toera cire cinafa cibvale cakukhonda kufa. Ndi thangwi eneyodi idatisasanyira Mulungu, pontho mbatipasa Nzimu ninga cipanda. Na tenepo, cinyindiro tinaco basi, pontho tisadziwa kuti mbatiri na manungo awa, tiri kutali na Mbuya. Thangwi tiri kufamba na kukhulupira, nkhabe kufamba na pinaona ife. Thangwi tinako kunyindira pontho tisafuna kakamwe kusiya manungo awa mbatikhala na Mbuya. Thangwi pa pyonsene ipi, tisafuna kakamwe kuti titsandzaise Mbuya, peno tingakhala na manungo ano, peno tingaasiya. Thangwi tonsene tisatongwa kubulukira patsogolo pa mpando wa kutongera miseru wa Kirixtu, toera kuti m'bodzi na m'bodzi atambire pidankwanira na mabasa adacita iye na manungo ace, peno adidi peno akuipa. Na thangwi ya kudziwa kwathu kugopa Mbuya, tisasaka kuti anthu atawire kutibvera. Patsogolo pa Mulungu ife tisadziwika kuti ndife ani, pontho ife tisadikhira kuti tidziwikembo n'kati mwa manyerezero anu a muntima. Ife nkhabe kusaka kusimbika pontho tekha ene kuna imwe, mbwenye tisakupasani n'dzidzi kuti mugaye muna ife, toera mukhale na cinthu cakutawira kuna ale anagaya na pire pinaona iwo pa nkhope, mbapikhonda kukhala pya muntima. Thangwi ngakhala ndife madzemwa, ndi thangwi ya Mulungu, ngakhala tina ndzeru, ndi thangwi yanu. Thangwi kufuna kwa Kirixtu kusatikakamiza, thangwi tisatawiradi kuti alipo m'bodzi adafera onsene, na mwenemu onsene afambo. Iye afera onsene toera kuti ale ali m'maso akhonde kupikhalira m'maso okha ene, mbwenye apikhalire m'maso kuna ule adaafera na kulamuswa pa kufa. Na tenepo, ife kutomera lero mpaka kutsogolo, tikhonde kudziwa pontho munthu ninga munadziwa dziko. Pontho ngakhala kale ene tadziwa Kirixtu ninga munan'dziwa dziko, cincino nkhabebve kun'dziwa tenepo tayu. Na tenepo, munthu ali muna Kirixtu alengwa papsa. Pinthu pyonsene pyakale pyamala, cincino pyabwera pipsa! Pyonsene ipi pisabulukira kuna Mulungu, adacita kuti tisekesane na Iye na thangwi ya Kirixtu, pontho mbatipasa basa ya kulonga pya kusekesana. Uku ndiko kubveka kuti, kubulukira muna Kirixtu, Mulungu akhasekesana na dziko mbakhonda kulang'ana kudawa kwa anthu, pontho atisiyira mphangwa za kusekesana. Na tenepo, ife ndife atumwi a Kirixtu, pyakhala ninga Mulungu ali kuphemba kuti alonge pinafuna iye kubulukira muna ife. Na dzina ya Kirixtu ife tisakuphembani kuti: Musekesane na Mulungu. Kuna Ule adakhonda dziwa kudawa, Mulungu aikha kudawa muna iye na thangwi yathu, toera muna Iye tikwanise kulungamiswa na Mulungu. Ninga anyakuphedzera basa ya Mulungu, tinathimiza pontho na kukupangani toera mukhonde kutambira papezi kukoma ntima kwa Mulungu. Thangwi Mulungu alonga tenepa: “Ine ndakubva pa n'dzidzi wadidi, pontho ndakuphedza pa ntsiku ya kupulumuswa.” Lang'anani, cincino ndiwo n'dzidzi wadidi, cincino ndiyo ntsiku ya kupulumuswa! Ife nkhabe cita kuti munthu apite mwakudodomeka pa cinthu cibodzi, gopesera kuti basa yathu ikhonde kupwazika. Mbwenye ife ninga anyabasa a Mulungu, tisapangizika pa pyonsene, ninga: kupirira kukulu, pa nyatwa, pa kuthabuka na pakutsukwala, pa kukwapulwa, pa kupitiswa n'kaidi na kucitirwa cikuti, pa mabasa akuwanga, pa kukhonda kugona na masiku, na kupimana cakudya, pa kucena ntima, pa kudziwa, pa kupirira kwa kulekerera, pa udidi, pa Nzimu Wakucena, na pa kufunana kwa ndimo mwene, pa fala ya ndimo mwene, pontho na pa mphambvu za Mulungu, na pida pyakulungama, nkono wa bzere peno nkono wa madyo, pa kulemebza na pa kupwaziwa, pa kulongwa kuipa na pa kusimbwa, mbiticemerwa anyauthambi mbatiri anthu a ndimo mwene. Ninga anthu akukhonda kudziwika, mbatiri anthu ene akudziwika, ninga tiri kufa, mbwenye tiri m'maso! Tiri kumenyiwa mbwenye nkhabe kufa. Tisakhala ninga tatsukwala, mbwenye kutsandzaya tinako basi, ninga anyakucherenga, mbwenye tisapfumisa anango azinji, ninga nkhabe cinthu, mbwenye tinapyo pyonsene. Tisalonga pakweca na imwe abale a ku Korintu, mbatikufungulirani mitima yathu yonsene. Ife tidakufungirani mitima yathu tayu, mbwenye imwe ndimwe mudatifungira. Ndisalonga na imwe ninga ananga, kuti citani pibodzi-bodzi pidakucitirani ife, mbamufungulambo mitima yanu kuna ife. Lekani kumangirirwa pa golopingo ibodzi ene na anyakukhonda kutawira Yezu. Thangwi ndi ninji cinaphataniza pyakulungama na pyakuipa? Peno pisakwanisika kuti cieza cibverane na cidima? Uxamwali wanji una Kirixtu na Bheliyali? Ndi ninji cinaphataniza nyakutawira Yezu, na nyakukhonda kutawira? Ndi cibverano canji cina Nyumba ya Mulungu na ya madzimunthu? Thangwi ife ndife Nyumba ya Mulungu wa m'maso, ninga mudalongera Mulungu kuti: “Ndinakhala na iwo, mbandifamba pakati pawo. Ine ndinakhala Mulungu wawo, iwo anakhala mbumba yanga.” Na tenepo, “bulukani pakati pawo, pontho mumwazane na iwo,” alonga Mbuya. “Lekani kugwedza pinthu pyakukhonda kuceneswa, na tenepo, Ine ndinadza kakutambirani.” “ Pontho Ine ndinakhala Baba wanu, imwe munakhala ana anga aamuna na aakazi,” alonga Mbuya wa mphambvu zonsene. Abale anyakufunika, na thangwi ya pipikiriro pinaife, mbaticenesekeni pa pyonsene pinaswipisa manungo na nzimu, toera tikhale anthu akuperekeka mwakukwana kuna Mulungu mbatin'gopa. Tipaseni mbuto m'mitima mwanu. Nkhabe munthu adaluzisa ife pinthu, nkhabe munthu adacitira ife kuipa, nkhabe munthu adakwatira ife pezi pinthu pyace. Siri kulonga penepi toera kukukonesani tayu. Thangwi ndakupangani kale kuti imwe muli muntima mwathu, toera tife pabodzi peno tikhale m'maso pabodzi. Ine ndisakunyindirani pikulu kakamwe, pontho ndisagaya na imwe. Ndisapasika cipapu cikulu, mbandikomerwa pikulu kakamwe pakati pa kuthabuka kwathu konsene. Thangwi pidafika ife ku Masedhonya, tacimwana kupuma, mbwenye taoneswa nyatwa zakusiyana-siyana ninga izi: Kunja tikhali na nthonga, n'kati mwa mitima yathu tikhagopa. Mbwenye Mulungu m'matamisi wa anyakutsukwala, atimatamizambo ife na kufika kwa Titu. Pontho si thangwi ya kubwera kwace basi tayu, mbwenye ndi thangwi ya kum'balangazambo kudancita imwe. Iye alonga kuna ife na thangwi ya citsuwo, kutsukwala, pontho na thangwi ya kunentseka kwanu na thangwi yanga. Na tenepo, kukomerwa kwanga kwatekereratu kakamwe. Ngakhala tsamba yanga yakutsukwalisani, ine nkhabe kusandikika. Ndimo mwene, pakutoma ndasandikika thangwi ndadziwa kuti tsamba yanga yakutsukwalisani, mbwenye yakutsukwalisani pa n'dzidzi ung'ono. Mbwenye cincino ndakomerwa, si thangwi ya kutsukwala kwanu tayu, mbwenye thangwi kutsukwala kwakukwatani kuti muchunyuke. Thangwi imwe mwatsukwala ninga mukhafunira Mulungu. Na tenepo, mudaluza pinthu na thangwi yathu tayu. Kutsukwala kudabulukira kuna Mulungu nkhabe palusa ntima, mbwenye kusabala kuchunyuka kuti munthu apulumuke. Mbwenye kutsukwala kwa dziko ino kusabala kufa. Lang'anani pidacitika muna imwe pa thangwi ya kutsukwala kwanu kudabulukira kuna Mulungu! Penepyo pyabala kusaka kubvunulirika, kuipirwa, kugopa, citsuwo, kunentseka, kukakamira mwambo, na kuonesa nyatwa nyakudawa. Pa pyonsene ipi, imwe mwapangisa kuti nkhabe thangwi na penepi. Na tenepo, ngakhala ndakulemberani, si thangwi ya ule adacita kuipa peno adacitiwa kuipa tayu, mbwenye ndakulemberani toera kuti imwe mukwanise kuona mwekha ene kutitsalakana kunaticita imwe pamaso pa Mulungu. Na thangwi ya penepi pyonsene, takhala na mphambvu. Tidakhala na mphambvu basi tayu, mbwenye takomerwambo pontho pikulu kakamwe na kuona kutsandzaya kwa Titu, thangwi ntima wace watsandzaya kakamwe na pyonsene pidancitira imwe. Ine ndikhagaya kuna Tito na thangwi yanu, pontho imwe mudandipasa manyadzo tayu. Ninga pyonsene pidakupangani ife pikhali pya ndimo mwene, kugayambo kunacita ife na thangwi yanu patsogolo pa Titu, nkhwa ndimo mwene. Pontho kufuna kunakucitani iye kunatekereratu kakamwe, angakumbuka kuti imwe monsene mwam'bvera, mbamuntambira na kugopa pontho na cilemedzo cikulu. Ndisatsandzaya thangwi ndisakunyindirani pa pyonsene. Cincino abale anga, tisafuna kuti imwe mudziwe kukoma ntima kudacita Mulungu kuna abale a magereja a ku Masedhonya. Abale a kweneku asakhala akuleserwa na nyatwa zizinji zinabva iwo. Mbwenye kutsandzaya kwawo kwakula kakamwe, kuti pakati pa ucherengi ukulu una iwo, iwo apereka miyoni yawo na ntima onsene. Thangwi ine ndisacita umboni kuti iwo apasa pyonsene ninga mudakwanisira iwo, mpaka kupiringana pikhafuna kucita iwo. Na kufuna kwawo, atiphemba na kudembetera kukulu kuti akhalembo nanthu pa nkhombo zakuphedza mbumba ya Mulungu. Hadacita pire pikhadikhira ife basi tayu, mbwenye pakutoma aperekeka iwo ene kuna Mbuya, mbaperekekambo kuna ife, na kufuna kwa Mulungu. Na tenepo, taphemba Titu kuti ninga iye akhadatoma kale, amalisirembo basa eneyi ya kukoma ntima kwa Mulungu pakati panu. Mbwenye ninga imwe mwapangisa kupfuma kukulu pa pinthu pyonsene ninga: pa kukhulupira, pa fala, pa kudziwa, pa kuwangisira pa basa, na pa kutifuna kunaticita imwe, pangizikanimbo pontho pa kukoma ntima. Siri kukutongani tayu, mbwenye ndisafuna ndione kufunadi kwanu, mbandikusangizani na kuwangisira kwa anango. Thangwi imwe musadziwa kukoma ntima kwa Mbuya wathu Yezu Kirixtu kuti, Iye mbali m'pfumi, apicita n'cherengi na thangwi yanu, toera na ucherengi wace imwe mupfume. Ine ndinakulangani tenepa: Mphyadidi kuti imwe musonkhe, thangwi kutomera caka cidamala, imwe mwakhala akutoma, si pakusonkha basi tayu, mbwenye pontho na pakufuna kucita penepi. Cincino malisani basa, toera kufuna kwanu kukulu kwakucita basa eneyi kukhale sawa-sawa na kufuna kupimalisa, mbamupicita na pire pina imwe. Thangwi ngakhala kulipo kufuna kwakupasa, kusonkha kusatawirirwa na pire pina iye munthu, si na pire pidasowa iye tayu. Pinafuna ife si kuti anango alulupirwe imwe mbamulemerwa tayu, mbwenye mukhale sawa-sawa. Pa n'dzidzi uno, kuinjipa kwa pinthu pyanu kunaphedza kusowa kwawo, toera na iwombo kuinjipa kwa pinthu pyawo kuphedze kusowa kwanu. Na tenepo, munakhala sawa-sawa, ninga pidalembwa m'Bukhu ya Mulungu kuti: “Ule akhadalokota pizinji, akhali na pinango kupiringana penepi tayu, pontho akhadalokota pang'ono nkhabe cinthu cidasowa iye.” Ndisapereka takhuta kuna Mulungu thangwi apasa Titu ntima ubodzi-bodzi wakukufunani ninga kunakucitani ine, thangwi Titu hadatawira pidam'phemba ife basi tayu, mbwenye asabwera mpaka kuna imwe, na kutsandzaya kukulu pontho na kufuna kwace. Tiri kutuma na iye pabodzi, m'bale wakusimbwa na abale onsene a magereja pa basa ya Mphangwa Zadidi. Si penepi basi tayu, mbwenye iye asankhulwambo na abale a magereja toera atiperekere pa kwenda kwathu kapereka miyoni iyi yadidi, inacita ife toera kupasa mbiri Iye ene Mbuya, pontho toera kufuna kwathu kupangizike. Tisafuna ticite mphole gopa tinasandikwa na anango, pakuphatisa kwathu basa miyoni iyi ikulu. Thangwi ife tisasaka kuti ticite udidi onsene, si pamaso pa Mbuya basi tayu, mbwenye na pamaso pa anthu pene. Na iwo tiri kutumambo m'bale wathu adalesera ife kazinji kene na njira zakusiyana-siyana kuti ndi munthu wakuphata basa mwadidi, maka-maka cincino na thangwi ya kunyindira kwace kukulu kuna imwe. Pa thangwi ya Titu, iye ndi ndzanga anaphata na ine basa pabodzi pakati panu. Pa thangwi ya abale athu, iwo ndi atumwi a magereja, pontho ndi mbiri kuna Kirixtu. Na tenepo, patsogolo pa magereja, apangizeni abale enewa cidzindikiro ca kufunana kwanu, pontho muapangize kugaya kunacita ife na thangwi yanu. Lang'anani, pa thangwi ya kuphedza kunacita imwe mbumba ya Mulungu ku Djudeya, nkhabe funika kukulemberani. Ndisadziwa kuti musafuna muphedze, pontho ine ndapangisa kale kuna abale a kudziko ya Masedhonya, kugaya kunacita ine na thangwi yanu, kuti kutomera caka cidamala, imwe a ku Akaya, mukhadamala kusasanyira kuti mucite nsonkho-nsonkho. Pontho kufuna kwanu kupasa, kwacita kuti kupasembo mphambvu anthu azinji. Mbwenye ndiri kutuma abale awa toera kugaya kwathu na thangwi yanu kukhonde kukhala kwapezi, toera imwe mukhale akusasanyira, ninga mukhadakupangirani ine kale, toera kuti panango, ndingabwera pabodzi na abale a ku Masedhonya, mbakugumanani kuti mudzati kusasanyira, ife, mbatikhonda pyathu kulonga imwe, tikhonde kukhala na manyadzo na thangwi ya cinyindiro cikulu cikhali na ife kuna imwe. Tenepa, ndapiona kuti mphyadidi kutuma abale adze kakuonani, mbumudzati kumala sasanyira miyoni yanu yadidi idapikirira imwe. Na tenepo, nsonkho-nsonkho unowu unakhala wakumala kusasanyirwa ninga muwoni wakubulukira muntima, mbukhonda kukhala ninga muwoni wakubulukira pakukakamizwa. Kumbukani kuti: Ule anabzala pang'ono, anabvunambo pang'ono, pontho ule anabzala pizinji, anabvunambo pizinji. M'bodzi na m'bodzi mbapase na pinanyerezera iye muntima mwace, akhonde kucita na kutsukwala peno na kukakamizwa, thangwi Mulungu asafuna anapasa na kutsandzaya. Mulungu ndi wa mphambvu toera kuinjipisa kukoma ntima kwace konsene kuna imwe, kuti pa pinthu pyonsene, pa midzidzi yonsene, mukhale na pyonsene pinafunika, imwe mudzale na kutaikira pa mabasa onsene adidi. Ninga pidalembwa kuti: “Agawa, mbapasa anyakucherenga. Kulungama kwace kusakhala kwenda na kwenda.” Ule anapasa mbeu nyakubzala, na anapasa nkate toera kudya, anaapasambo pontho mbainjipisa mbeu, pontho anakulisa misapu yakulungama kwace. Imwe munapfumiswa pa pyonsene, toera mukhale akukoma ntima pa midzidzi yonsene inafunika, pontho na thangwi yathu, kukoma ntima kwanu kubale kupereka takhuta kuna Mulungu. Basa ya kuphedza inacita imwe, nkhabe kumalisa kusowa kwa mbumba ya Mulungu basi tayu, mbwenye isataikirambo toera anthu apereke takhuta kazinji kene kuna Mulungu. Na kupangizika kwa basa eneyi, anango anapasa mbiri Mulungu na kubvera kunacita imwe, kunapangisa pire pinalonga imwe pa thangwi ya Mphangwa Zadidi za Kirixtu, pontho na kukoma ntima kwanu kunaphedza imwe, iwo na onsene. Na miphembero inacita iwo kuna imwe, iwo anakufunani pikulu kakamwe na thangwi ya kukoma ntima kukulu kakamwe kudakucitirani Mulungu. Tinapereka takhuta kuna Mulungu na muwoni wace ukulu wakukhonda kulongeka! Ine Paulu, munthu wa mafala “akufewa’’ ndingakhala na imwe nkhope na nkhope, mbwenye ndingakhala kutali ndisalonga mafala “akuuma’’, ndisakuphembani na kupicepesa pontho na kukhurudzika kwa Kirixtu! Pontho ndisakuphembani kuti, ndingakhala na imwe pabodzi, lekani kundikakamiza kuti ndilonge pinthu pyakuuma kakamwe, sawa-sawa ninga cipapu cinanyerezera ine kucita kuna anango ananyerezera kuti ife tisapicita ninga anthu a dziko ino. Ande, ife ndife anthu ene pyathu, mbwenye mamenyero athu a nkhondo, asiyana na anacita anthu. Pida pinamenya na ife nkhondo si pya dziko ino tayu, mbwenye pina mphambvu muna Mulungu za kufudza mipanda ya anyankhondo. Tisafudza ndzeru pontho na kupikuza konsene kunapingiza njira zonsene za kudziwa Mulungu, mbatitapata manyerezero awo onsene kuti akhale akubvera Kirixtu. Pontho tinakhala akusasanyika toera kuchunyusa kukhonda kubvera konsene, male mungadziwa kuti imwe mwakwana pakubvera. Imwe musalang'ana pinthu piri pakweca basi. Ngakhala munthu asanyinda kuti ndi wa Kirixtu, asafunika anyerezere pontho ekha ene kuti ifembo ndife a Kirixtu ninga iye. Thangwi ngakhala ine ndisapikuza pikulu na thangwi ya mphambvu za utongi zidapaswa ine na Mbuya, sinamanyadzo napyo tayu, thangwi mphambvu zenezi ndi toera kukuwangisani, si toera kukufudzani tayu. Ine nkhabe funa kuti pikhale ninga ndisasaka kukuthusani na matsamba anga anakulemberani ine. Thangwi anango asalonga tenepa: “Mafala analemba iye mbakuuma pontho ana mphambvu, mbwenye munthu wace ungamuona nkhabe pangisa, pontho mafala ace mbakupwazika.” Anthu enewa analonga tenepo, mbadziwe kuti pire pinalonga ife pa tsamba mbatiri kutali na imwe, ndi penepi pinafuna kucita ife tingakhala dhuzi. Thangwi ife nkhabe kupikuza kuti tikhale sawa-sawa peno tilandane na anango anasimbika okha ene. Mbwenye anthu enewa angapipima mbalandanisika okha ene, asapicita na kusowa kwawo ndzeru. Mphapo ife nkhabe kupikuza kupiringana migano inafunika, mbwenye kupikuza kwathu kusamalisira pa basa idatipasa Mulungu, inafika na kuna imwe enembo. Ife nkhabe kupitiriza kwenda kutsogolo na kugaya kwathu tayu, ninga mbidakhonda kufika kuna imwe, thangwi ife tafika kale mpaka kuna imwe na Mphangwa Zadidi za Kirixtu. Tenepo, ife nkhabe kupiringana migano yathu, mbatipikuza na mabasa anacita anango. Cidikhiro cathu ndi ca kuti: Pa n'dzidzi unaenda mbicikula cikhulupiro canu, mabasa athu akule kakamwe pakati panu, toera tikwanise kumwaza Mphangwa Zadidi m'pisa pinango piri kutali na imwe, mbatikhonda kupikuza na basa idamala kucitwa kale m'pisa pya anango. Mbwenye, “Ule anagaya, mbagaye muna Mbuya,” thangwi munthu nkhabe kusimbwa angasimbika ekha ene, mbwenye asasimbwa na Mulungu. Ndisadikhira kuti imwe munandilekerera pang'ono udzemwa wanga. Ande, ndaphata myendo, ndilekerereni. Nchanje inabva ine kuna imwe, ndi nchanje inabuluka kuna Mulungu. Ine ndakupikirirani mamuna m'bodzi basi, ndiye Kirixtu, mbandifuna kukuperekani ninga mwali wakulungama kuna Iye. Cinagopa ine ndi ca kuti, sawa-sawa ninga nyoka yanyengerera Eva na ucenjeri wace, ndzeru zanumbo zikhonde kudodomeswa mbamutayika pa kukhulupira kwanu muna Kirixtu, kwa ndimo mwene na kwakulungama. Thangwi angabwera munthu kudza kakupangani Yezu unango adakhonda kukhala ule adakupangani ife, peno mungatambira nzimu unango wakusyana na ule udatambira imwe, peno Mphangwa Zadidi zakusyana na zire zidatawira imwe, imwe munaalekerera pyanu. Mbwenye ine, nkhabe kunyerezera na pang'ono pene kuti ndine mwana kwa apoxtolo enewa analongwa kuti ndi “akulu-akulu.” Ndisadziwa kuti ine nkhabe kwanisa kulonga mwadidi pamaso pa anthu tayu, mbwenye kudziwa ndinako. Ande, penepyo takupangisani kale pa makhaliro onsene akusiyana-siyana. Kodi nkhulongera kuti ine ndadawa pidacepeseka ine toera imwe mukuzwe, pakukupangani Mphangwa Zadidi za Mulungu mbandikhonda kukuphembani cinthu? Pa n'dzidzi ukhaphata ine basa pakati panu, ndatambiriswa na magereja anango. Penepi pyakhala ninga ndikhaabera toera kuphedza imwe. Pikhakhala ine pakati panu mbandikhasowa pinthu, sikhanentsa munthu tayu. Thangwi abale pidabuluka iwo ku Masedhonya, akwanisa kundipasa pikhasowa ine. Ndacita pyonsene toera ndikhonde kukunentsani, pontho ine ndinathimiza na kucita tenepo. Ande, ninga undimo mwene wa Kirixtu uli muna ine, nkhabe munthu anafuna kundipingiza kugaya kuno, m'pisa pya Akaya. Thangwi yanji ndisalonga penepi? Thangwi ine nkhabe kukufunani? Mulungu asadziwa kuti ndisakufunani! Pinacita ine ndinathimiza basi na kupicita, toera ndikhonde kupasa n'dzidzi ale anasaka kudziwika kuti ndi sawa-sawa na ife, pa pire pinagaya na iwo. Thangwi anthu enewa ndi apoxtolo a uthambi, anyabasa akunyengeza anthu, mbakhasangizira ninga apoxtolo a Kirixtu. Penepyo nkhabe kudzumisa, thangwi na Sathani ene asangizirambo ninga anju wa cieza. Na tenepo, nkhabe kudzumisa kuti anyabasa awo asangizirembo ninga anyabasa a pinthu pyakulungama. Mbwenye kumalisira kwawo kunati kukhale sawa-sawa na mabasa awo. Ndisathimiza na kulonga pontho kuti: Mbaleke kuoneka m'bodzi wakunyerezera kuti ine ndine dzemwa. Mbwenye ngakhala imwe musandinyerezera tenepo, nditambireni ninga musatambira dzemwa, toera ine ndigayembo pang'ono. Pyakugaya pinalonga ine ipi, siri kupilonga ninga munafunira Mbuya tayu, mbwenye ndiri kupilonga ninga dzemwa. Thangwi azinji ali kugaya na pinacitika pa dziko, ine ndinati ndigayembo. Na thangwi ya kukhala anthu a ndzeru, imwe musakwanisa kupirira mwadidi pinthu pya madzemwa! Ande, imwe musakwanisa kupirira anakucitani udzakazi, peno anakudyerani manja, anakunyengezani, anapikuza peno anakumenyani kunkhope. Na manyadzo onsene, ndisatawira kuti ife tapolola pikulu kakamwe pa thangwi eneyo, ninga munationera imwe. Pire pinathanda onsene anango kuti agaye napyo, ndisalonga ninga dzemwa, ine ndisapithandambo. Iwo ndi mahebhereu? Inembo ndine muhebhereu. Iwo ndi maizarayeli? Inembo ndine muizarayeli. Iwo ndi a dzindza ya Abharaamu? Inembo ndine wa dzindza ya Abharaamu. Iwo ndi anyabasa a Kirixtu? Ine mbandilonga ninga nyansala, ndine nyabasa kupita iwo. Ndaphata basa ikulu kakamwe, ndapitiswa n'kaidi kazinji kene, ndakwapulwa pikulu kakamwe, mbandikhafuna kufa kazinji kene. Madjuda andikwapula na michamu makumatatu na mipfemba, kaxanu. Ndakwapulwa katatu na mpsimbo, ndamenyiwa na myala kabodzi, ndalobzeka m'bara katatu. Ndamala masiku mabodzi, na masikati mabodzi mbandiberuka pakati pa bara. Ndikhacita ulendo kazinji kene. Ndatambana na pyakugopsa n'nyandza, kugopsa kwa mapanga, kwa madjuda andzanga, kwa adakhonda kukhala madjuda, n'kati mwa nzinda, n'thando, m'bara, pontho na kugopsa kwa abale a uthambi. Ndaphata basa na mphambvu zonsene, kazinji kene ndacimwana kugona, ndakhala kazinji kene na njala na nyota, kazinji kene ndikhasowa cakudya, mbandibva mphepo pontho na usiwa. Pontho ndisabva kupha muntima mwanga ntsiku zonsene, na kunentseka na thangwi ya magereja onsene. Mbani adamala mphambvu, ine mbindikhonda kumala na iye mphambvu pabodzi? Mbani anagwiswa n'kudawa, ine mbindikhonda kuipirwa n'kati mwanga? Ngakhala pisafunika ndigaye, mbukukhale kugaya na pire pinapangisa kupolola kwanga. Mulungu Baba wa Mbuya Yezu, Ule wakusimbwa kwenda na kwenda, asadziwa kuti pinalonga ine si pya uthambi tayu. Ku nzinda wa Dhamaxku, ntongi adasankhulwa na mambo Areta, aikha asupai kuti aonere nzinda toera andimange. Mbwenye ndakwanisa kupulumuka m'manja mwace, thangwi anthu anango andipitisa m'malikofa wankulu, mbandichitisa na pa benga ya mpanda wa nzinda. Pisafunika kuti ine ndithimize kupasika mbiri ndekha na penepi. Ndisadziwa kuti nkhabe kuwina cinthu na penepi, mbwenye ndinati ndilonge pinaoneswa ine na pinapangizwa ine na Mbuya. Pyapita pyaka khumi na pinai, mudadziwa ine mamuna m'bodzi muna Kirixtu, adakwatiwa mpaka ku thambo yacitatu. Ngakhala aenda na manungo ene peno mu nzimu, ine nkhabe kupidziwa, Mulungu ndiye anan'dziwa. Pontho ndisadziwa kuti mamuna unowu, ngakhala aenda na manungo ene peno mu nzimu, ine nkhabe kupidziwa, mbwenye Mulungu ndiye anan'dziwa. Akwatiwa kwenda m'paraizu mbabva pinthu pyakukhonda kulongeka, pinthu pya kuti munthu nkhabe tawirirwa kupilonga. Mamuna unowu ndisagaya na iye, mbwenye ine ndekha nkhabe kugaya, ndinagaya na thangwi ya kupolola kwanga basi. Mbidafuna kugaya mbidakhala dzemwa tayu, thangwi mbidalonga pya ndimo mwene. Mbwenye ine nkhabe funa kucita penepi, toera akhonde kuoneka munthu wakunyerezera ine, kupiringana pinaona iwo na pinabva iwo kwa ine. Toera ine ndikhonde kupikuza na thangwi ya kupangizwa kweneku kwa mu Nzimu, ndaikhwa munga m'manungo mwanga, ninga mwanankati m'bodzi wa Sathani kuti undithabuse, toera ndikhonde kupikuza. Ndaphemba katatu kuna Mbuya kuti andibulusire nyatwa eneyo. Mbwenye Mbuya andipanga tenepa: “Kukoma ntima kwanga wakwana nako, thangwi mphambvu zanga zisapangizika mwakukwana pa kupolola.” Na tenepo, ine ndinapasika mbiri na kutsandzaya konsene pa kupolola kwanga, toera mphambvu za Kirixtu zikhale muna ine. Na thangwi eneyo, ndisatsandzaya na kupolola, na kutikanwa, na kusowa, na kuzondiwa, pontho na nyatwa zidaona ine na thangwi ya Kirixtu. Thangwi ndingapolola, ndi munawanga ine. Ine ndakhala ninga dzemwa, mbwenye ndimwe adandikakamiza penepi. Imwe ndimwe mukhatongwa kundisimba, thangwi ine sine mwana tayu kwa apoxtolo enewa analongwa kuti ndi “akulu-akulu,” mbandidziwa pyanga kuti ine sine cinthu. Pinthu pinapangisa basa ya upoxtolo wanga, ninga pidzindikiro, pinthu pyakudzumisa, na pirengo, pyapangizika pakati panu na kupirira kukulu. Ndi canji cidakupwazisani kupita magereja anango, mbindikhonda kulonga pyanga na thangwi yakukhonda kukulemerani? Ndilekerereni kudodomeka kwanga! Cincino ndamala kusasanyira kuti ndibwere kudza kakuonani pontho kacitatu, pontho sinabwera kudza kakulemerani tayu. Thangwi pinafuna ine si pinthu pyanu tayu, mbwenye ndisafuna imwe. Pontho, ana nkhabe kugumanya mpfuma gumanyira ababa awo, mbwenye ababa ndiwo anagumanya mpfuma gumanyira ana awo. Na tenepo, ndinabvunga pyonsene pina ine na ine ene na ntima wanga onsene, na thangwi ya kukufunani. Ngakhala ine ndisakufunani pikulu kakamwe, ine ndinafuniwa pang'ono? Ndimo mwene, ine sidakulemerani tayu. Mbwenye ine ninga nyakucenjera, ndakumangani na ucenjeri wanga. Kodi ine ndakudyerani pinthu pyanu na munthu adakutumirani ine kweneku? Ndatuma Titu kuti adze kakuoneni, mbaperekerwa na m'bale unango. Nkhulongera kuti akudyerani pinthu pyanu? Tidapicita na nzimu ubodzi ene, pontho mbatifamba na njira ibodzi ene tayu? Imwe musanyerezera kuti pa n'dzidzi unowu onsene ife tiri kusaka kubvunulirika patsogolo panu? Tisalonga patsogolo pa Mulungu ninga anthu ali muna Kirixtu, pontho pyonsene pinacita ife, abale anyakufunika, ndi toera kukupasani mphambvu. Thangwi ndisagopa kuti, ndingadza kakuonani, ndikhonde kukugumanani ninga mukhadikhira ine, pontho imwe mukhondembo kundigumana ninga mukhadikhira imwe. Ndisagopa kuti pakati panu paoneke nthonga, mabibvu, kuipirwa, kupambulana, kulongerana pyakuipa, mapseda, kupikuza, na kukhonda kubverana. Ndisagopa kuti ndingadza kakuonani pontho, Mulungu wanga anandicepesa patsogolo panu, pontho ine mbindilira na thangwi ya azinji adadawa kale ene mbakhonda kuchunyuka kucita pyakunyanyasa pyawo, lukwali na kuzuda kukhacita iwo. Uyu ndi ulendo wanga wacitatu unadza ine kakuonani. “Pinthu pyonsene pisafunika pitawirirwe na amboni awiri peno atatu.” Ndakucenjezani kale pikhali ine kaciwiri pabodzi na imwe. Cincino, mbindiri kutali, ndisalembera ale akhadawa kale pontho na kuna anango kuti: Ndingabwerera, sinakubveranibve ntsisi tayu, thangwi imwe musasaka cidzindikiro cinapangisa kuti Kirixtu asalonga muna ine. Iye si wakusowa mphambvu kuna imwe tayu, mbwenye ndi wa mphambvu pakati panu. Thangwi ndimo mwene, Iye akhomerwa pa ntanda na kusowa mphambvu, mbwenye ali m'maso na mphambvu za Mulungu. Sawa-sawa na ifembo, ndife akusowa mphambvu muna Iye, mbwenye tinakhala m'maso na Iye kuna imwe na mphambvu za Mulungu. Lang'anisikani mwekha ene makhaliro anu muone ngakhala muli pakukhulupiradi. Bvundzikani mwekha. Nkhabe dziwa kuti Yezu Kirixtu ali muna imwe? Peno panango musapidziwa kale kuti mwadodomeka! Ndisadikhira kuti imwe munadziwa kuti ife tidadodomeka tayu. Cincino, tiri kuphembera kuna Mulungu toera imwe mukhonde kucita cibodzi cakuipa. Si toera anango aone kuti ife tapikwanisa tayu, mbwenye toera imwe mucite pyadidi, ife mbitioniwa pyathu ninga tadodomeka. Thangwi ife nkhabe kwanisa kupokanya pya ndimo mwene, mbwenye tinakwanisa kutawirira pya ndimo mwene basi. Tisakhala akutsandzaya midzidzi yonsene inamala ife mphambvu, imwe mbamukhala akuwanga. Maphembero athu mba kuti imwe mukule mu nzimu. Na thangwi eneyi, ndakulemberani pinthu ipi mbindiri kutali, toera kuti ine ndingabwera, pikhonde kufunika kuti ine ndinyanye kucita mphambvu za utongi zidapaswa ine na Mbuya kuti zikuwangiseni mu nzimu, mbizikhonda kukhala za kukufudzani. Nkhabe pinango abale anga, tsandzayani! Kulani mu nzimu, matamizanani, khalani na manyerezero mabodzi ene, khalani mu ntendere. Mulungu wa kufunana na wa ntendere anakhala na imwe. Mwanyikanani m'bodzi na m'bodzi na mpsompsono wa ciubale. Mbumba yonsene ya Mulungu isakumwanyikani. Kukoma ntima kwa Mbuya Yezu Kirixtu, na kufuna kwa Mulungu, pontho na kuphatana kwa Nzimu Wakucena, mbapikhale na imwe monsene. Ine Paulu, mpoxtolo adakhonda kutumwa na anthu peno kuphebza na munthu, mbwenye wakusankhulwa na Yezu Kirixtu pontho na Mulungu Baba adalamusa Yezu pa kufa, pabodzi na abale onsene ali na ine, ndisalemba tsamba iyi kuna magereja a ku dziko ya ku Galasya. Kukoma ntima na ntendere unabulukira kuna Mulungu Baba wathu, na kuna Mbuya Yezu Kirixtu, mbazikhale na imwe. Kirixtu aperekeka ekha ene na thangwi ya madawi athu, toera kutiombola pa dziko ino yakuipa, na kufuna kwa Mulungu, Baba wathu, Iye anakwana kupaswa mbiri kwenda na kwenda. Ameni. Ndiri kudzumatirwa kusiya kunacita imwe na mwansanga Ule adakucemerani na kukoma ntima kwa Kirixtu, mbamutowerera mphangwa zinango, kuti si Mphangwadi Zadidi tayu. Pinacitika ndi kuti anthu anango asakudzudzumisani, mbafuna kusanduza Mphangwa Zadidi za Kirixtu. Mbwenye ngakhala peno ife ene, peno anju m'bodzi wa kudzulu mbalonga mphangwa zadidi zakusyana na zire zidakupangani ife, mbapaswe dzedze! Ninga mudalonga ife kale, cincino ndinathimiza pontho na kulonga kuti: Ngakhala alipo munthu anakupangani mphangwa zinango zakusyana na zire zidatambira imwe kale, mbapaswe dzedze! Kodi ine cincino ndiri kusaka kusimbwa na anthu, peno na Mulungu? Peno ndisasaka ndikome na anthu? Mbidakhala ine ndisasaka kukoma kuna anthu basi, mbidakhala nyabasa wa Kirixtu tayu. Abale anga, ndisafuna mudziwe kuti Mphangwa Zadidi zinamwaza ine, zidabulukira kuna anthu tayu. Sidazitambira na munthu, peno cita kuzipfundziswa tayu. Mbwenye ndazitambira na Yezu Kirixtu pa kuoneswa kwanga mu Nzimu. Imwe mwabva pikhacita ine kale mu mwambo wa madjuda, ninga kuzonda kukulu kukhacita ine abale a gereja ya Mulungu, mbindikhasaka kuifudza. Mu mwambo wa madjuda, ine ndikhapiringana madjuda azinji a thunga yanga, pontho ndikhali munthu wakukakamira kakamwe mitemo ya ambuya anga. Mbwenye Mulungu andisankhula mbindiri m'mimba mwa mai wanga, mbandicemera na kukoma ntima kwace. Mudafuna Iye kupangisa mu Nzimu Mwana wace muna ine kuti ndimulonge pakati pa anthu adakhonda kukhala madjuda, sidabvundza munthu unango tayu. Pontho sidenda ku Djerusalema kwenda kaona ale adatoma kukhala apoxtolo ine mbindidzati, mbwenye buluka penepo ndaenderatu ku dziko ya Arabhya, mbindibwerera pontho ku nzinda wa Dhamaxku. Pakumala pyaka pitatu, ndaenda ku Djerusalema kwenda kaonana na Pedhru, mbandikhala na iye ntsiku khumi na zixanu. Sidaonabve mpoxtolo unango tayu, mbwenye ndaona Tiyago basi, m'bale wace Mbuya. Ndisadumbira patsogolo pana Mulungu, kuti pinakulemberani ine, si pya uthambi tayu. Buluka penepo, ndaenda ku madziko a ku Sirya na a ku Silisya. Ine sikhadziwika tayu nkhope yanga na abale a magereja a ku Djudeya, ali muna Kirixtu. Akhabva kwene mbapilongwa kuti: “Ule akhatizonda kale ene, cincino asaenda mbalonga cikhulupiro cikhasaka iye kufudza kale ene.” Pontho akhapasa mbiri Mulungu na thangwi yanga. Pakupita pyaka khumi na pinai, ndaenda pontho ku Djerusalema pabodzi na Bharnabhasi, mbandikwatambo Titu mbandiyenda na iye pabodzi. Ndaenda kweneku na thangwi ya kupangizwa kudacitwa ine mu Nzimu, mbandilonga patsogolo pawo Mphangwa Zadidi zinamwaza ine pakati pa ale adakhonda kukhala madjuda. Mbwenye ndazilonga pa khundu kuna ale akhabvekera pikulu kakamwe, toera basa idacita ine na ikhacita ine ikhonde kukhala yapezi. Na iye ene Titu akhakhala na ine pabodzi akhali mugerego. Mbwenye pa pyonsene ipi, iye hadakakamizwa kuti asibze tayu. Penepi pyacitika na thangwi ya abale anango authambi apitambo pakati pathu, mbabvungazikana na ife kudza kasuzumira ufulu una ife muna Kirixtu Yezu, toera atipitise mu udzakazi. Ife takhonda kuabvera abale enewa na pang'ono pene, toera undimo mwene wa Mphangwa Zadidi ukhale muna imwe. Pa thangwi ya ale anthu akhaoneka ninga akubvekera - ine sinawo basa na kufuna kwadziwa kuti akhali ani kale, thangwi Mulungu nkhabe kutonga mbalang'ana nkhope - apo iwo anthu enewa akubvekera, nkhabe cinthu cipsa cidandipanga iwo. Mbwenye padzulu pa pyonsene ipi, iwo adzindikira kuti ine ndikhadanyindirwa na Mulungu kwenda kamwaza Mphangwa Zadidi kuna ale adakhonda kusibza, sawa-sawambo ninga kunyindirwa kudacitwa Pedhru kwenda kamwaza Mphangwa Zadidi kuna anyakusibza. Thangwi Mulungu adaphata basa muna Pedhru ninga mpoxtolo wa anyakusibza, Mulungu m'bodzi-bodzi aphatambo basa muna ine, kuna ale adakhonda kusibza. Na kudzindikira kukoma ntima kwa Mulungu kukhadacitirwa ine, Tiyago, Pedhru na Juwau, ale anadziwika ninga machikwa, atipasa manja na nkono wawo wa madyo ine na Bharnabhasi, ninga cidzindikiro cakuphatana. Penepo, iwo atawira kuti ife tisatongwa kwenda kuna anthu adakhonda kusibza, iwo mbaenda kuna anyakusibza. Iwo atiphemba cibodzi basi: Kuti tikumbuke anyakucherenga. Penepi ndipyo pikhasaka ine kucita. Mbwenye Pedhru pidadza iye ku nzinda wa Antiyokiya, ndamulongera pakweca, na thangwi ya pyakuipa pidacita iye. Thangwi mbadzati kufika anthu anango adabuluka kuna Tiyago, Pedhru akhadya na ale adakhonda kukhala madjuda. Mbwenye pidadza kafika iwo, Pedhru atoma kukhala pa khundu, mbathawana na ale adakhonda kukhala madjuda, na thangwi ya kugopa ale adasibza. Madjuda anango atomambo kupita mu uthambi unowu na iye pabodzi, kufikira Bharnabhasi akwatiwambo na mayengerero awo. Pidaona ine kuti iwo nkhabe kufamba mu njira ya ndimo mwene ya Mphangwa Zadidi, ndampanga Pedhru pamaso pa anthu onsene kuti: “Iwe ndiwe n'djuda, mbwenye usakhala ninga siwe n'djuda, iwe mbuli n'djuda ene. Thangwi yanji usakakamiza ale adakhonda kukhala madjuda, kuti akhale na makhaliro a madjuda?” “Ife, madjuda akubaliwa, mbatikhonda kukhala ‘mbumba ya anyakudawa’ idakhonda kukhala madjuda, tisadziwa kuti nkhabe munthu anakwanisa kukhala wakulungama pamaso pa Mulungu na thangwi yakubvera Mwambo, mbwenye pinakwanisika na kukhulupira Yezu Kirixtu. Na tenepo, ifembo tisatawira Kirixtu Yezu toera ticitwembo anthu akulungama, na thangwi ya kukhulupira Kirixtu, si thangwi ya kubvera Mwambo tayu. Thangwi na kubvera Mwambo, nkhabe munthu anakwanisa kukhala wakulungama pamaso pa Mulungu. “Mphapo ngakhala ife pakusaka kwathu kulungamiswa muna Kirixtu tadzindikira kuti ife ene ndife anyakudawa, nkhulongera kuti Kirixtu ndi nyabasa wa kudawa? Nkhabe citika! Ngakhala ndisamanga pontho papsa cire cidafudza ine, ndisapangisa kuti ine ndine nyakudawa. Na thangwi ya Mwambo, ine ndafa kufera Mwambo, toera ndikhale m'maso kuna Mulungu. Ndakhomerwa pa ntanda pabodzi na Kirixtu. Tenepa, sinebve ali m'maso tayu, mbwenye ndi Kirixtu ali m'maso muna ine. Upulumuki uli na ine cincino pa nyama, ndiri na iwo na thangwi ya kukhulupira Mwana wa Mulungu, adandifuna mbaperekeka na thangwi yanga. Ine nkhabe kufudza kukoma ntima kwa Mulungu, thangwi ngakhala kulungama kusabulukira pa Mwambo, Kirixtu atifera pezi.” Imwe madzemwa a ku Galata! Mbani adakulodzani? Kodi kukhomerwa kwa Yezu Kirixtu pa ntanda kudapangizwa tayu pamaso panu? Ine ndisafuna ndidziwe cinthu cibodzi basi kuna imwe: Mwatambira Nzimu Wakucena na thangwi ya kucita mabasa a Mwambo, peno na thangwi ya kukhulupira pire pidabva imwe? Kodi imwe ndimwe madzemwadi kakamwe a kuti pakumala kutoma na Nzimu Wakucena, cincino musafuna mumalisire na mphambvu zanu? Kodi nyatwa zonsene zidaona imwe ndi zapezi? Ine nkhabe tawira! Mulungu anakupasani Nzimu wace pontho mbacita pirengo pakati panu, asacita pinthu penepi na mabasa a Mwambo, peno asapicita na thangwi ya kukhulupira kudatambira na imwe fala? Nyerezerani pidacita Abharaamu: “Iye akhulupira Mulungu. Penepi pyancita kuti iye akhale wakulungama.” Na tenepo, dziwani kuti ale ana kukhulupira, enewa ndiwo ana a Abharaamu. Bukhu ya Mulungu na kudziwa nyapantsi kuti, Mulungu anadza kalungamisa ale adakhonda kukhala madjuda na thangwi ya kukhulupira kwawo, apanga Abharaamu nyapantsi mphangwa zadidi zinalonga tenepa: “Na thangwi yako madzindza onsene anakhala na nkhombo.” Na tenepo, anakhulupira asapaswa nkhombo pabodzi na Abharaamu, mamuna wa kukhulupira. Ale onsene ananyindira mabasa a Mwambo ali na dzedze, thangwi pyalembwa kuti: “Mbapaswe dzedze ale onsene anakhonda kuangisira kucita pyonsene pidalembwa mu bukhu ya Mwambo.” Ndimo mwene, patsogolo pana Mulungu nkhabe munthu analungamiswa na Mwambo, thangwi “nyakulungama anapulumuka na thangwi ya kukhulupira.” Mwambo nkhabe kubulukira pa kukhulupira, mbwenye “ule anacita pinafuna Mwambo, anapulumuka napyo.” Kirixtu atiombola pa dzedze ya Mwambo, pidacitika Iye nyadzedze pa mbuto yathu, thangwi pyalembwa kuti: “Ana dzedze ale onsene anamanikwa pa ntanda.” Penepi, toera muna Kirixtu Yezu nkhombo za Abharaamu zifikembo kuna anthu adakhonda kukhala madjuda, kuti titambire cipikiriro ca Nzimu Wakucena na thangwi ya kukhulupira. Abale anga, ndisalonga ninga pinacitika kuna anthu. Nkhabe m'bodzi anakwanisa kufudza peno kuthimizira cibverano cidamala kumangwa kale na anthu. Lang'anani, Mulungu acita pipikiriro kuna Abharaamu na kuna dzindza yace. Bukhu ya Mulungu nkhabe kulonga kuti: “Kuna madzindza ako, ” ninga ali kulongera mazinji, mbwenye isalonga kuti: “Kuna dzindza yako,” kupangisa kuti pisalongera munthu m'bodzi basi, kulongera Kirixtu. Ndisafuna ndilonge ici: Mwambo udabwera pakupita pyaka madzana manai na makumatatu, nkhabe kubulusa mphambvu ya cibverano cidamangwa kale ene na Mulungu, kuti udze kafudze cipikiriro ca Mulungu. Ngakhala unthaka usatongwa na Mwambo, nkhabebve tongwa na cipikiriro. Mbwenye Mulungu aupasa Abharaamu pezi na thangwi ya cidumbiriro. Mphapo Mwambo waciterwanji? Mwambo wathimizirwa toera kupangisa kudodomeka kwa anthu, mpaka kubwera kwa munthu m'bodzi wa pa dzindza, Ule akhadapikirirwa. Pontho Mwambo unowu waperekwa na maanju m'manja mwa nkhoswe m'bodzi. Mphapo nkhoswe nkhabe limirira munthu basi tayu, mbwenye Mulungu ndi m'bodzi. Na tenepo, Mwambo nkhabe bverana na pipikiriro pidacita Mulungu? Nkhabe citika! Thangwi mbidakhala anthu akhadapaswa mwambo una mphambvu za kupulumusa, ndimo mwenedi kuti iwo mbadakhala akulungama pamaso pa Mulungu na thangwi ya mwambo. Mbwenye Bukhu ya Mulungu yafungira pyonsene pantsi pa madawi, toera kuti cidumbiriro cinabulukira pa kukhulupira Yezu Kirixtu, cipaswe ale anatawira. Cikhulupiro ceneci mbicidzati kubwera, tikhadamangwa na Mwambo mbatifungirwa mu Mwambo, mpaka cikhulupiro cikhafuna kudza, cipangizike. Na tenepo, mwambo ukhali ninga makayaya, mbutikwata mpaka kuna Kirixtu, toera tilungamiswe na cikhulupiro. Mbwenye cincino, na kubwera kwa cikhulupiro, tinatongwabve na makayaya tayu. Thangwi Imwe monsene ndimwe ana a Mulungu kubulukira pa kukhulupira kwanu muna Kirixtu Yezu, thangwi onsene adatambira batixmu muna Kirixtu, abvala Kirixtu. Nkhabebve n'djuda peno n'gerego, n'dzakazi peno ntumbe, mamuna peno nkazi. Thangwi imwe monsene ndimwe cinthu cibodzi muna Kirixtu Yezu. Pontho ngakhala imwe ndimwe a Kirixtu, ndimwembo a dzindza ya Abharaamu, anaciro unthaka ninga mudapikirirwa ipyo. Ndisakupangani kuti mwanacinthu unthaka mbali mwana, nkhabe kusyana na n'dzakazi wace, iye mbali mwanacinthu pinthu pyonsene. Mbwenye iye asabvera ale ananfuya na anaonerera mpfuma yace, mpaka kufikira n'dzidzi udalongwa na baba wace. Na tenepo ifembo, pikhali ife ana ang'ono, tikhacitwa adzakazi a mitemo yakutoma ya dziko. Mbwenye pidafika iwo n'dzidzi wace, Mulungu atuma Mwana wace, adabalwa na nkazi pontho adabalwa pantsi pa Mwambo, toera kuombola ale akhali pantsi pa Mwambo, kuti tikwanise kucitika ana a Mulungu. Pontho, thangwi yakukhala ana, Mulungu atuma Nzimu wa Mwana wace m'mitima mwathu, iwo usakhuwa mbulonga kuti: “Abha ” Baba. Na tenepo, iwe siwe n'dzakazibve tayu, mbwenye ndiwe mwana. Apo na thangwi yakukhala mwana, Mulungu akucitambo kuti ukhale nyaunthaka. Mbwenye kale ene imwe mbamudzati kun'dziwa Mulungu, mukhali adzakazi a alungu a pezi, a kuti si alungudi tayu. Mphapo cincino na kudziwa Mulungu, peno tilonge, na kudziwika na Iye, musabwerera tani pontho m'pipfundzo pyanu pyakufewa na pyakusowa mphambvu? Musafuna kucitiswa pontho udzakazi na iyo? Imwe musakoya mbamulemedza matongero a ntsiku, myezi, midzidzi na pyaka! Ndisagopa kuti panango ndaphata basa pezi kuna imwe. Ine ndisaphemba na kudembetera kuna imwe abale anga, kuti mukhale ninga ine, thangwi ine ndakhalambo ninga imwe. Nkhabe cibodzi cidandidawisira imwe. Ninga musadziwa, ine ndakumwazirani Mphangwa Zadidi pakutoma, ndi thangwi ya utenda. Pakati pa nthenda ikhali na ine idakucitani kuti imwe muleserwe nayo, imwe hamudandipwaza peno kundikhonda tayu. Mbwenye mwanditambira ninga anju m'bodzi wa Mulungu, peno ninga Kirixtu Yezu ene. Kutsandzaya kwanu kwa kale kuli kupi? Ndisatawiradi kuti mbapidakwanisika, imwe mbamudabulusa maso anu toera mundipase. Ine ndadza kakhala nyamalwa wanu na thangwi ya kukupangani pya ndimo mwene? Ale anacita mphambvu zonsene toera akome kuna imwe, hali kupicita mwadidi tayu, mbwenye asafuna kuti imwe mukhonde kuphatana na ine, toera imwe mutsalakane iwo. Mphyadidi kutsalakana udidi midzidzi yonsene, mbamukhonda kupicita pamaso panga basi. Ananga, ndisabva pontho kupha na thangwi yanu ninga nkazi wakufuna kubala, mpaka kufikira mwakula muna Kirixtu. Ine ndikhafuna kuti ndikhale pabodzi na imwe cincino, pontho mbandicinja malongero anga. Thangwi ine nkhabe kupidziwa pinafuna ine kucita na imwe. Imwe munafuna kukhala pantsi pa Mwambo ndipangeni cibodzi: Kodi imwe nkhabe kubva pinalonga Mwambo? Thangwi pyalembwa kuti Abharaamu akhali na ana awiri aamuna. M'bodzi mai wace ndi bichu, unango mai wace ndi ntumbe. Mwana wa bichu abalwa ninga anthu onsene, mbwenye mwana wa ntumbe abalwa na thangwi ya kupikirirwa. Ipi pisalongera tenepa: Akazi awiri awa, asalongera pibverano piwiri. Cibverano cibodzi cisabuluka ku phiri ya Sinai, pontho cisabala ana toera kukhala mu udzakazi. Cibverano ceneco ndi Agari. Agari asalongera phiri ya Sinai, ku dziko ya Arabhya, pontho ndi cidzindikiro ca nzinda wa cincino wa Djerusalema, uli mu udzakazi pabodzi pene na ana ace. Mbwenye Djerusalema wa kudzulu ndi ntumbe, unowu ndiye mai wathu. Thangwi pyalembwa kuti: “Tsandzaya pyako, iwe nkazi wakukhonda kubala, iwe kuti cipo udzati kubala mwana. Khuwa na kukomerwa, iwe kuti cipo udzati kubva kupha kwa kubala. Thangwi azinji ndi ana a nkazi wakukhondiwa kupiringana ana a ule nkazi ana mamuna wace.” Mbwenye imwe abale, ndimwe ana akupikirirwa ninga Izaki. Ninga pa n'dzidzi unoule, mwana adabaliwa na mabaliro a anthu onsene akhazonda mwana adabaliwa na kufuna kwa Nzimu Wakucena, pibodzi-bodzi pisacitika cincino. Mbwenye Bukhu ya Mulungu isalonganji? “Thamangisa bichu wankazi, na mwana wace ene. Thangwi mwana wa bichu, cipo anadza kadya unthaka pabodzi na mwana wa ntumbe.” Na tenepo, abale, ife sife ana a nkazi wa bichu tayu, mbwenye ndife ana a nkazi wa ntumbe. Kirixtu atisudzula toera tikhale akusudzuka. Na tenepo, khalani dzololo mbamukhonda kutawira kukhala pontho pantsi pa udzakazi. Bveserani mwadidi pinakupangani ine Paulu kuti: Mungatawira kusibza, Kirixtu nkhabe kukuphedzerani cinthu tayu. Ndisathimiza pontho kulonga kuna amuna onsene anatawira kusibza, kuti asatongwa atoweze Mwambo onsene. Imwe anasaka kulungamiswa na Mwambo, mwamwazana na Kirixtu, mwabuluka pa kukoma ntima kwa Mulungu. Thangwi ife, na mphambvu za Nzimu Wakucena, tisadikhira na cidikhiro consene, kulungama kunabulukira pa cikhulupiro. Thangwi muna Kirixtu Yezu, kusibza peno kukhonda kusibza, nkhabe phedzera cinthu. Mbwenye pinaphedzera cinthu ndi cikhulupiro cinaphata basa na kufunana. Imwe mukhafamba mwadidi. Mbani adakupingizani kuti mukhonde kubvera pya ndimo mwene? Adakucitani kuti mutawire penepi, si Ule anakucemerani tayu. Ntombwe pang'ono basi wakutupisa na iwo mikate, usatupisa ufa onsene wakumunyiwa. Ine ndisakunyindirani muna Mbuya, kuti imwe nkhabe kudza kanyerezera pinango. Mbwenye ule anakunyengererani, peno akhale ani pyace, anati athabuswe na Mulungu. Abale anga, ngakhala na lero ndiri kukupangani pyakusibza, thangwi yanji ndisachingiwa pontho? Na tenepo, kupingizwa kukhali na iwo na thangwi ya ntanda wa Yezu, kwamala. Enewa anakunyengererani, mphyadidi akapaliki pyawo! Abale anga, imwe mwacemerwa toera musudzuke. Lekani kukwata kusudzuka kweneku, mucite nako pinafuna nyama, mbwenye phedzanani m'bodzi na m'bodzi na kufunana. Thangwi Mwambo onsene usatowezwa na matongero awa basi: “Funa ndzako ninga iwe ene.” Mbwenye ngakhala imwe musalumana mbamudyana m'bodzi na m'bodzi, mpholeni gopa munafudzana m'bodzi na m'bodzi. Mbwenye ndinakupangani kuti: Fambani mu Nzimu Wakucena, lekani kucita na pang'ono pene pinafuna nyama. Thangwi pinafuna nyama, si pinafuna Nzimu Wakucena tayu. Pontho pinafuna Nzimu Wakucena, si pinafuna nyama tayu. Pinthu ipi pisazondana cibodzi na cibodzi, toera imwe mucimwane kucita pinafuna imwe. Mbwenye ngakhala imwe musatsogolerwa na Nzimu Wakucena, muli pantsi pa Mwambo tayu. Lang'anani, mabasa a nyama asapangizika pakweca. Mabasa ace ndi awa: Lukwali, unyambi, kuzuda, kulambira alungu a pezi, ufiti, kuzondana, nthonga, nchanje, kuipirwa, kupikuza, kukhonda kubverana, kumwazana, bibvu, kuledzera, kucita maphwandu a kunyanyasa, na pinango pyakulandana na penepi. Ine ndisakucenjezani ninga mukhadakucenjezani ine kale ene kuti: Ale anacita pinthu penepi, nkhabe kudza kadya unthaka wa Umambo wa Mulungu. Mbwenye nsapu wa Nzimu Wakucena ndi kufunana, kutsandzaya, ntendere, kupirira, kukoma ntima, udidi, kunyindirika, kupfulika na kuphata ntima. Nkhabe mwambo unakhonda kubverana na pinthu penepi. Ale ali muna Kirixtu Yezu, akhomera nyama yawo pa ntanda pabodzi na pinasirira iwo pontho na pinafuna iwo. Ngakhala tiri m'maso na thangwi ya Nzimu Wakucena, mbatifambenimbo na Nzimu Wakucena. Mbatilekeni kupikuza, mbatikhonda kusiririsana pontho na kucitirana bibvu m'bodzi na m'bodzi. Abale anga, ngakhala m'bodzi wanu agumanizwa mbacita kuipa, imwe muli na Nzimu Wakucena musafunika mum'bweze na ntima wa kukhurudzika. Mbwenye m'bodzi na m'bodzi mbacite mphole, gopa anadza kanyengererwambo. Musafunika muphedzane kuthukula mitolo ya m'bodzi na m'bodzi, tenepa musabvera mwambo wa Kirixtu. Ule ananyerezera kuti ndine munthu wa mbiri, mbakhonda kukhala cinthu, asanyengezeka ekha ene. M'bodzi na m'bodzi mbalang'anise mabasa ace. Na tenepo, anakwanisa kupikuza ekha ene, mbakhonda kusangizana na unango, thangwi m'bodzi na m'bodzi asatongwa athuke ntolo wace. Ule anapfundziswa fala, mbagawane pinthu pyadidi pyonsene na ule anampfundzisa. Lekani nyengezwa. Mulungu si munthu wa kusendzeka na iye tayu. Thangwi pire pinabzala munthu, ndipyo pinafuna kudza kabvunambo iye. Ule anabzala pire pinafuna nyama, anabvuna pyakubvunda. Mbwenye ule anabzala pire pinafuna Nzimu Wakucena, anabvuna upulumuki wakukhonda kumala. Pontho mbatilekeni kuneta na kucita udidi, thangwi n'dzidzi wace ungakwana tinabvuna, male tingakhonda kumala mphambvu. Na tenepo, n'dzidzi mbulipo, mbaticiteni udidi kuna anthu onsene, maka-maka kuna abale athu pa kukhulupira. Lang'anani malemba makulu anakulemberani ine na manja anga! Onsene ale anapangizika kuti mbadidi pa nyama mbakukakamizani kusibza, asacita penepi toera akhonde kuchingiwa na thangwi ya ntanda wa Kirixtu basi ene. Thangwi na iwo ene adasibza, nkhabe kuutoweza Mwambo. Mbwenye asafuna kuti imwe musibze, toera iwo agaye na manungo anu. Kwa ine, cipo ndinadza kagaya. Mbwenye ndinagaya na ntanda wa Mbuya wathu Yezu Kirixtu basi ene, udacita kuti dziko ikhomerwe pa ntanda pa thangwi yanga, inembo ndikhomerwe pa ntanda pa thangwi ya dziko. Na tenepo kusibza peno kukhonda kusibza, si pinthu tayu. Cinafunika maka-maka ndi kulengwa papsa. Kuna onsene anafamba sawa-sawa na ntemo unowu, pontho na kuna Izarayeli wa Mulungu, ntendere na ntsisi mbapikhale na iwo. Kutomera lero mbaleke oneka unango wa kundinentsa, thangwi madazi ali na ine m'manungo mwanga, asapangisa kuti ndinedi wa Yezu. Abale anga, kukoma ntima kwa Mbuya wathu Yezu Kirixtu mbukukhale na nzimu wanu. Ameni. Ine Paulu, mpoxtolo wa Kirixtu Yezu na kufuna kwa Mulungu, ndisalembera imwe mbumba ya Mulungu na akunyindirika muna Kirixtu Yezu muli mu nzinda wa Efesu. Kukoma ntima na ntendere unabulukira kuna Mulungu Baba wathu, na kuna Mbuya Yezu Kirixtu, mbapikhale na imwe. Mbasimbwe Mulungu, Baba wa Mbuya wathu Yezu Kirixtu, adatipasa nkhombo zonsene za mu nzimu ku mbuto za kudzulu muna Kirixtu, ninga Mulungu atisankhula muna Kirixtu, dziko mbidzati kucitwa, toera tikhale akucena na akukhonda kusandikwa patsogolo pace mwakufunana. Iye akhadatitongera kale kuti aticite ninga ana ace, kubulukira muna Yezu Kirixtu, sawa-sawa ninga manyerezero adidi a kufuna kwace, toera kukuza mbiri ya kukoma ntima kwa Mulungu, kudatipasa Iye pezi pyene, muna Mwana wace Wakufunika. Muna Iye tinako kuombolwa, kulekererwa kwa madawi, kubulukira mu ciropa cace, ninga kuinjipa kwa kukoma ntima kwa Mulungu, zidatikhutulira Iye na udziwisi onsene pontho na ndzeru zonsene. Pontho atidziwisa pinthu pyakubisala pinafuna Iye, ninga manyerezero ace adidi adapaka Iye muna Kirixtu. Uku nkhubveka kuti, agumanye pinthu pyonsene muna Kirixtu, pya kudzulu na pya pantsi, n'dzidzi wace ungakwana. Muna Iye tacemerwa kuti tikhale ana a unthaka, pakumala kusankhulwa kale ninga mukhadapitongera ule adacita pinthu pyonsene, sawa-sawa ninga manyerezero anafuna Iye, toera ife, adatoma kudikhira muna Kirixtu, tikhale anyakukuza a mbiri yace. Muna Iye imwe mwabva fala ya ndimo mwene, Mphangwa Zadidi zidakupulumusani, imwe mwatawira, mbamudhindwa muna Kirixtu na Nzimu Wakucena udadumbirirwa. Nzimu unowu, ndi cipanda ca unthaka mpaka ntsiku ya kuombolwa kwa mbumba ya Mulungu, toera kukuza mbiri yace. Na thangwi eneyo, kutomera ntsiku idabva ine kulongwa cikhulupiro cina imwe kuna Mbuya Yezu, pontho na kufuna kunacita imwe mbumba ya Mulungu, ine nkhabe neta kupereka takhuta na thangwi yanu, mbindikulongani pa miphembero yanga. Ndisaphemba kuti Mulungu wa Mbuya Yezu Kirixtu, Baba wa mbiri, akupaseni nzimu wa udziwisi pontho na wa kukupangisani mu nzimu, toera mun'dziwe mwakukwana. Ndisaphemberambo kuti mumwanikirwe maso anu a muntima, toera imwe mudziwe kudikhira kudakucemererani Iye, na mpfuma ya mbiri ya unthaka wace kuna mbumba ya Mulungu, pontho na mphambvu yace ikulu kakamwe kuna ife anatawira, sawa-sawa ninga kuphata basa kwa mphambvu yace ikulu. Mphambvu eneyi Iye aicitira muna Kirixtu, pakumulamusa pa kufa mbancita kuti akhale ku nkono wace wa madyo, ku mbuto za kudzulu, padzulu kakamwe pa umambo na pa utongi onsene, na mphambvu na kutonga konsene, pontho na madzina onsene a mbiri a padziko, si pa n'dzidzi uno basi tayu, mbwenye na pa midzidzi inafuna kudza. Mulungu aikha pinthu pyonsene pantsi pa manyalo a Kirixtu, pontho mbamuikha padzulu pa pinthu pyonsene, mbancita nsolo wa Gereja. Gereja eneyo, ndiyo manungo ace, pontho Iye asadzadza dziko yonsene pa mbuto zonsene za kusiyana-siyana. Imwe mukhadafa n'kati mwa kukhonda kubvera kwanu, pontho na m'madawi mwanu, mwenemu mukhakhala imwe kale ene pikhatowerera imwe makhaliro a dziko ino, pontho na nkulu wa mizimu ya kuipa inakhala cidzulu-dzulu, nzimu unaphata basa cincino muna ana anakhonda kubvera. Kale ene tonsene ife tikhakhalambo pakati pawo, mbatikhacita kufuna kwa nyama yathu, mbatitowerera kufuna kwa nyama na manyerezero ayo. Ife ninga anthu, tikhakwanira kuoneswa nyatwa na Mulungu ninga anangombo. Mbwenye Mulungu, na ntsisi zace zikulu, pontho na kutifuna kukulu kudaticita Iye, ife mbatiri anthu a kufa n'kati mwa madawi athu, atipasa upulumuki pabodzi na Kirixtu - mwapulumuswa na kukoma ntima kwa Mulungu. Mulungu atilamusa pa kufa pabodzi na Kirixtu, pontho atikhazika pabodzi na Iye mu mbuto za kudzulu muna Kirixtu Yezu, toera kupangisa pa midzidzi inafuna kudza, kukoma ntima kwace kukulu kakamwe, kudapangizika pa udidi wace kuna ife, muna Kirixtu Yezu. Thangwi mwapulumuswa na kukoma ntima kwa Mulungu, kubulukira pa kukhulupira. Penepi pidabulukira kuna imwe tayu, mbwenye ndi muwoni wa Mulungu. Pontho penepyo si thangwi ya mabasa tayu, toera munthu akhonde kugaya. Thangwi ife ndife basa ya Mulungu, tacitwa muna Kirixtu Yezu, toera kuphata mabasa adidi adasasanya Mulungu kale ene, toera ife tiacite. Na tenepo, kumbukani kuti kale ene imwe, mukhali anthu adakhonda kukhala madjuda pakubalwa, mbamucemerwa anthu akukhonda kusibza pa nyama, na ale akhacemerwa anyakusibza na manja a anthu, pontho pa n'dzidzi unowu imwe mukhali na Kirixtu tayu, mbamumwazana na mbumba ya Izarayeli, mbamukhala anthu akudza pa thangwi ya pibverano pya cipikiriro, mbamusowa cidikhiro, pontho mbamusowa Mulungu pa dziko. Mbwenye cincino, muna Kirixtu Yezu, imwe mukhali kutali kale ene, mwadzeswa dhuzi kubulukira mu ciropa ca Kirixtu. Thangwi Kirixtu ndi ntendere wathu, ndiye adacita kuti madjuda na ale adakhonda kukhala madjuda, akhale cinthu cibodzi, mbafudza mpanda wa kuidana ukhaamwazanisa pakati pawo. Yezu afudza na manungo ace Mwambo wa matongero mazinji. Pikhafuna Iye ndi kuti muna Iye, pa awiri awa, acitike munthu m'bodzi mupsa, mbadzesa ntendere pontho, kubulukira pa ntanda wa Yezu, asekesane mu uwiri mwawo na Mulungu m'manungo mabodzi, adamalisa na Iye kuidana. Yezu abwera, mbalonga ntendere kuna imwe mukhali kutali na kuna ale akhali dhuzi, thangwi kubulukira muna Iye, ife na imwe tinayo njira ya kwenda kuna Baba, na Nzimu ubodzi basi wa Mulungu. Na tenepo, imwe cincino simwebve anthu akudza peno afambi tayu, mbwenye ndimwe anthu a dziko ibodzi ene ya mbumba ya Mulungu, pontho ndimwe ana a nyumba ibodzi ene ya Mulungu, nyumba idamangwa padzulu pa myala yakutsidzikira idaikhwa na apoxtolo na maporofeta, Kirixtu Yezu mbakhala mwala wa pa nkhomu. Pa mwala unowu, nyumba yonsene isamangwa cibodzi na cibodzi mbikula, toera ikhale Nyumba ya Mulungu yakucena muna Mbuya. Muna Iye, imwembo muli kumangwa pabodzi, toera mudze kakhale Nyumba ya Mulungu mu Nzimu Wakucena. Na thangwi eneyo, ine Paulu, ndine nyakufungirwa n'kaidi wa Kirixtu Yezu na thangwi yanu, imwe adakhonda kukhala madjuda. Ndimo mwene, imwe mwabva mbapilongwa pya basa ya kukoma ntima kwa Mulungu kudanyindirwa pa thangwi yanu. Uku ndi kubveka pinthu pyakubisala pidadziwiswa ine mu nzimu, ninga mudakulemberani ine kale n'cigwagwa. Mungaona pidakulemberani ine, imwe munakwanisa kupibvesa mwadidi pyakubisala pinadziwa ine pya thangwi ya Kirixtu. Pyakubisala penepi, pa midzidzi ya kale pikhadapangizwa anthu tayu. Mbwenye cincino pyapangizwa na Nzimu Wakucena kuna apoxtolo na maporofeta akucena. Nkhulongera kuti, na Mphangwa Zadidi, anthu adakhonda kukhala madjuda anadya pabodzi unthaka na Izarayeli, mapindi a manungo mabodzi ene, pontho anakhalambo pabodzi pa cipikiriro muna Kirixtu Yezu. Pa Mphangwa Zadidi zenezi, ndadza kakhala nyabasa na thangwi ya muwoni wa kukoma ntima kwa Mulungu kudacitirwa ine, kunaphata basa na mphambvu zace. Ine, wang'ono pa mbumba ya Mulungu yonsene, ndapaswa kukoma ntima kweneku kwa Mulungu, kwa kumwaza Mphangwa Zadidi za mpfuma zikulu zakukhonda kulengeseka za Kirixtu, kuna anthu adakhonda kukhala madjuda, pontho mbindipangisa anthu onsene kucitika kwa pinthu penepi pyakubisala, pya kuti kale na kale, pikhabiswa muna Mulungu adacita pinthu pyonsene. Manyerezero a ntsisi zenezi ndi kuti cincino, pa thangwi ya mbumba ya Mulungu, udziwisi wakusiyana-siyana wa Mulungu, udziwike kuna mphambvu na kuna utongi wa mbuto za kudzulu, sawa-sawa ninga mukhadapipaka Iye kale na kale, mbapicita muna Kirixtu Yezu, Mbuya wathu, anakwanisa kutipitisa kuna Mulungu na kunyindira mbatikhonda kupingizwa, na kukhulupira kwathu Iye. Na tenepo, ndisakuphembani kuti muleke kumala mphambvu pa thangwi ya nyatwa zinakuthabukirani ine, thangwi izo ndi mbiri kwa imwe. Na thangwi eneyo, ndisagodama patsogolo pana Baba, anapasa dzina madzindza onsene, kudzulu na pantsi. Ndisaphembera toera na mbiri yace ikulu kakamwe, Iye akuwangiseni n'kati mwanu, na mphambvu za Nzimu wace, toera Kirixtu akhale m'mitima mwanu kubulukira pa kukhulupira. Pontho ndisaphembera kuti mungakhala na michici, pontho na nchici zakuwanga pa kufunana, imwe munakwanisa kudziwa pabodzi na mbumba ya Mulungu yonsene, ugugumi, ulaphi, cengo na kuzika kwa ntsisi za Kirixtu, pontho munadziwa kutifuna kunaticita Kirixtu kunapiringana kudziwa konsene, toera imwe mukhale na kudzala kwakukwana konsene kwa Mulungu. Kuna ule ana mphambvu za kukwanisa kucita pizinji kupiringana pyonsene pidaphemba ife peno pidanyerezera ife, ninga munafunira mphambvu zace zinaphata basa muna ife, unowu mbapaswe mbiri pa mbumba ya Mulungu pontho muna Kirixtu Yezu, pa madzindza onsene, kwenda na kwenda! Ameni! Ine ninga munthu wa n'kaidi muna Mbuya, ndisakuphembani kuti mufambe na mafambiro adidi adacemerwa na imwe, Khalani akucepeseka kakamwe na akukhurudzika, pontho mukhale akuwangisira, m'bodzi na m'bodzi mbapirira ndzace na kufunana. Citani mphambvu zonsene toera mukoye kuphatana kwanu kwa mu Nzimu kunamangiwa na ntendere. Alipo manungo mabodzi basi na Nzimu ubodzi basi, sawa-sawambo ninga cidikhiro cidacemererwa imwe ndi cibodzi basi. Alipo Mbuya m'bodzi basi, cikhulupiro cibodzi basi, na batixmu ibodzi basi, na Mulungu m'bodzi basi Baba wa onsene, unowu ali padzulu pa onsene, kubulukira mwa onsene, pontho Iye ali mwa onsene. Pontho kukoma ntima kweneku kwa Mulungu kwacitirwa m'bodzi na m'bodzi wathu, sawa-sawa ninga muwoni udapimirwa iye na Kirixtu. Na thangwi eneyo, Bukhu ya Mulungu isalonga kuti: “Mudakwira Iye kudzulu kwa mathambo onsene, atapata anthu azinji mbaenda nawo, pontho mbapasa anthu miyoni.” Pisalongeranji “Iye akwira,” sikulongera kuti Iye akhadachitambo mpaka pantsi kakamwe pa mataka tayu? Ule adachita ndiye m'bodzi ene adakwira kudzulu kwa mathambo onsene, toera adzadze pinthu pyonsene. Pontho Iye ene aikha anango kuti akhale apoxtolo, anango maporofeta, anango anyakumwaza Mphangwa Zadidi, pontho anango kuti akhale akumbidzi na apfundzisi, na kufuna kusasanyira mbumba ya Mulungu kuti iphate mabasa ace toera manungo a Kirixtu amangike, mpaka tonsene tafikira kuphatana pa kukhulupira na pakudziwa Mwana wa Mulungu, mbatikwanisa kukula mpaka kufikira thunga yakukwana ya Kirixtu, toera tikhonde kukhala pontho ninga ana ang'ono, mbatikwatiwa na mabimbi kwenda uku-na-uku, peno mbatigwinyiwa na mphepo ya pipfundzo pyakusiyana-siyana, mbatinyengererwa na ucenjeri wa anthu toera kutipitisa mu njira za kudodoma. Mbwenye titowerere pya ndimo mwene mwa kufunana, tikule mwa pyonsene kuna ule nsolo, Iye Kirixtu. Manungo onsene angagumanyizwa pontho mbaphatanizwa na kuphedziwa kwa m'mafunyiro onsene, asakula mbamangika okha ene mwa kufunana, pa n'dzidzi unaphata phindi ibodzi na ibodzi basa yace. Na tenepo, ine ndinakupangani, pontho mbandithimiza na kukupangani muna Mbuya, kuti lekani kukhala ninga anthu akukhonda kudziwa Mulungu, anakhala na manyerezero apezi. Iwo manyerezero awo mban'cidima, pontho apambulwa pa upulumuki wa Mulungu na thangwi yakukhonda kudziwa kwawo, kudabulukira pa kuuma kwawo ntima. Na kusowa kwawo manyadzo, aperekeka m'makhaliro akuipa, mbacita na kufuna kukulu, pyakunyanyasa pyonsene pyakusiyana-siyana. Mbwenye si penepyo pidapfundza imwe pa thangwi Kirixtu tayu. Ndimo mwene, imwe mwam'bva mbalongwa pontho mwapfundziswa muna Iye sawa-sawa na undimo mwene uli muna Yezu. Pa thangwi ya makhaliro anu akale, imwe mwapfundziswa kuti mubuluse munthu wakale anapitiswa mwa kuipa na mafuniro a uthambi, toera mucinjike mu nzimu manyerezero anu, pontho mubvale munthu mupsa, adasasanyiwa toera alandane na Mulungu mwakulungama na mwa kucena kunabulukira mwa ndimo mwene. Na tenepo, m'bodzi na m'bodzi wanu asatongwa asiye uthambi alonge pya ndimo mwene kuna ndzace, thangwi tonsene ndife mapindi a manungo mabodzi ene. “ Imwe mungaipirwa, lekani kudawa.” Lekani kukhala mbumudaipirwa mpaka kufikira dzuwa yadoka, pontho lekani kupasa mbuto Dyabu. Ule akhaba mbaleke kubabve, mbwenye mbaphate basa na manja ace mbacita cinthu cadidi, toera akhale na cinthu cakuphedza naco anyakusowa. Pa mulomo panu mbapaleke kubuluka fala ibodzi ya kuipa, mbwenye mbibuluke basi ire fala yadidi inaphedza anango ninga munafunika, toera ipase kukoma ntima kwa Mulungu kuna ale anaibva. Lekani kutsukwalisa Nzimu Wakucena wa Mulungu, ule udadhindwa na imwe mpaka ntsiku ya kuombolwa. Bulusani nyongo yonsene, bibvu, kuipirwa, ukali, kulongera ndzako pyapezi, na kuzondana konsene. Khalani anthu adidi pontho mubverane ntsisi m'bodzi na m'bodzi, mbamulekererana m'bodzi na m'bodzi, ninga Mulungu akulekereranimbo muna Kirixtu. Na tenepo, imwe ningambo ana akufunika, khalani anthu akutoweza Mulungu, pontho mukhale akufunana ninga Kirixtu atifunambo, mbaperekeka na thangwi yathu ninga muwoni na ntsembe yakununkhira mwadidi kuna Mulungu. Pakati panu pisatongwa kuti pakhonde kuoneka na pang'ono pene kulongwa pyalukwali pontho pakhonde kuoneka cibodzi cakunyanyasa na pyakusirira. Thangwi pinthu penepi, si pya mbumba ya Mulungu tayu. Mbapakhonde kuoneka makani akupasa manyadzo, peno makani a udzemwa, peno makani akuzuda, pinthu pinakhonda kufunika. Mbwenye pa mbuto ya penepi, perekani takhuta kuna Mulungu. Thangwi imwe musafuna mudziwe ipi: Nkhabe nyalukwali m'bodzi, peno nyakuzuda, peno nyaugungulu, anatawirirwa kudya unthaka pa Umambo wa Kirixtu na wa Mulungu, thangwi pyonsene ipi ndi kulambira madzimunthu. Lekani kunyengezwa na mafala akusowa basa, thangwi na pinthu penepi kuipirwa kwa Mulungu kusabwera kuli anthu anakhonda kubvera. Na tenepo, lekani kucita na iwo pabodzi pinthu penepi. Thangwi kale ene imwe mukhali cidima, mbwenye cincino ndimwe cieza muna Mbuya. Fambani ninga ana a cieza, thangwi nsapu wa cieza, ndi udidi onsene, kulungama na undimo mwene. Pfundzani kudzindikira pire pinakomerwa na Mbuya. Lekani kukhala nanthu pa mabasa a ncidima anakhonda kubala misapu, mbwenye apangizeni pa cieza. Thangwi pinacita iwo n'cibiso-biso, na kupilonga kwene pisapasa manyadzo. Mbwenye pyonsene pinaikhwa pakweca na cieza pisaonekera, thangwi cieza cisapangisa pinthu pyonsene pakweca. Ndi thangwi eneyo pyalongwa kuti: “Lamuka iwe unagona, lamuka pakati pa anyakufa Kirixtu anakumwanikira.” Citani mphole na makhaliro anu. Lekani kukhala ninga anthu akusoweka ndzeru, mbwenye mukhale anthu a ndzeru, mbamubandziratu kakamwe n'dzidzi, thangwi ntsiku zino ndi zakuipa. Na tenepo, lekani kukhala anthu akukhonda kudziwa, mbwenye sakani kudziwa ninji pinafuna Mbuya. Lekani kuledzera na vinyu, inabala uipi wakusiyana-siyana, mbwenye dzalani na Nzimu Wakucena, mbamulonga mwekha-mwekha na masalimu, na nyimbo za kukuza nazo Mulungu, pontho na nyimbo za mu Nzimu, mbamuimba na kukuza Mbuya na muntima, mbamupereka takhuta midzidzi yonsene kuna Mulungu Baba na thangwi ya pinthu pyonsene, mu dzina ya Mbuya wathu Yezu Kirixtu. M'bodzi na m'bodzi mbabvere ndzace, na kugopa Kirixtu. Imwe akazi, bverani amuna anu ninga pinabvera imwe Mbuya, thangwi mamuna ndi nsolo wa nkazi, ningambo Kirixtu ndi nsolo wa Gereja, iyo ndi manungo ace, Iye ene mbakhala Mpulumusi wa manungo enewa. Na tenepo, ninga abale a gereja asabvera Kirixtu, akazimbo mbakhale akubvera amuna awo pa pyonsene. Imwe amuna, funani akazi anu, ninga Kirixtu afuna abale a gereja pontho mbaperekeka kuna iwo, toera akhale ace, pakumala kuacenesa na kuatsuka na madzi kubulukira pa fala yace, pontho toera aapangize kuna Iye ene ninga abale a gereja ya mbiri, yakusoweka midonthi, yakusoweka makhunyari peno pinthu pidalandana na penepi, mbwenye ikhale yakucena, na yakusoweka mathangwi. Tenepambo, mamuna asatongwa afune nkazi wace ninga manungo ace ene. Mamuna anafuna nkazi wace, asafunika ekha ene. Thangwi nkhabe m'bodzi anazonda manungo ace ene. Mbwenye asaadyesa mbaakoya ninga pinacitambo Kirixtu kuna abale a gereja, thangwi ndife mapindi a manungo ace. “ Na thangwi eneyo, mamuna anasiya baba wace na mai wace, mbadza kaphatana na nkazi wace, muwiri mwawo anadza kakhala nyama ibodzi.” Ipi ndi pinthu pyakubisala kakamwe. Mbwenye ndisalonga pa thangwi ya Kirixtu na abale a gereja. Na tenepo, m'bodzi na m'bodzi wanu mbafunembo nkazi wace ninga iye ene, pontho nkazi mbalemedze mamuna wace. Imwe ana, bverani ababa anu muna Mbuya, thangwi penepi ndi pyakulungama. “Lemedza baba wako na mai wako.” Awa ndiyo matongero akutoma anacidumbiriro, “ toera pyonsene pikufambire mwadidi, pontho ukhale m'maso ntsiku zizinji pa dziko.” Ababa, lekani kusosa ana anu kuti aipirwe, mbwenye alereni mbamualanga na kuasandika ninga munafunira Mbuya. Imwe adzakazi, bverani ambuya anu a pantsi pano na kualemedza pontho mbamuagopa, na ntima wanu onsene, ninga munaphatira imwe Kirixtu. Abvereni mbamukhonda kusaka kusimbwa na iwo basi angakuonani, mbwenye ninga adzakazi a Kirixtu, citani kufuna kwa Mulungu na ntima wanu onsene. Phatani basa na kufuna kwanu konsene ninga musaphatira basa Mbuya, mbamukhonda kucita ninga musaphatira anthu. Thangwi imwe musadziwa kuti Mbuya anadza kapasa m'bairo m'bodzi na m'bodzi na udidi udacita iye, peno bichu, peno ntumbe. Imwe a mbuya, citani pibodzi-bodzi kuna adzakazi anu. Lekani kuathusa, thangwi musadziwa kuti imwe na iwo, Mbuya wanu ndi m'bodzi ene ali kudzulu, pontho Iye nkhabe tsankhulo. Pakumalisa, wangisirani muna Mbuya, na mphambvu zace zikulu. Bvalani piphano pyonsene pya Mulungu, toera mukwanise kukunda manyengerero a Dyabu, thangwi nkhondo yathu si yakumenyana na ale ana ciropa na nyama tayu, mbwenye ndi yakumenyana na mphambvu na utongi na ale anatapata dziko ino ya cidima, pontho na mphambvu za mizimu ya kuipa iri m'mbuto za kudzulu. Na thangwi eneyo, bvalani piphano pyonsene pya Mulungu, toera mukwanise kuwangisira pa ntsiku ya kuipa pontho mukhonde kutekenyeka, pakumala kumenya kwanu nkhondo yonsene. Na tenepo, khalani dzololo mbamumanga undimo mwene n'cunu mwanu ninga bhande, mbamubvala kulungama ninga nthembe yakugugumira nthimandzi yanu pontho kusasanyira kwanu kwa kwenda kamwaza Mphangwa Zadidi za ntendere, mbakukhale ninga ntsapato m'myendo mwanu. Midzidzi yonsene kwatani cikhulupiro ninga cigugumiro canu, toera imwe mukwanise kuthimisa mapsimu akugaka a Nyamalwa. Bvalani upulumuki ninga capeu ca utale, pontho na tarasada ya mu Nzimu, ndiyo fala ya Mulungu. Phemberani mu Nzimu pa midzidzi yonsene, na maphembero onsene pontho na kudembetera konsene. Citani mphole pa pinthu ipi, wangisirani kakamwe kuphemberera mbumba yonsene ya Mulungu. Ndiphembererenimbo kuti ine pakulonga ndipaswe fala, toera na cipapu consene ndipangize pakweca pyakubisala pya Mphangwa Zadidi. Na thangwi ya penepi, ndine ntumwi wakumangwa na unyolo. Phemberani toera ine ndilonge penepi na cipapu ninga munatongwa ine kucita. Tikiku, m'bale wakufunika pontho nyabasa wakunyindirika wa Mbuya, anakupangani pyonsene, toera imwembo mudziwe makhaliro anga pontho na pinacita ine. Ndantuma kuna imwe na thangwi eneyi, toera mudziwe kuti ife tiri tani, pontho toera iye abalangaze mitima yanu. Ntendere mbukhale na imwe abale, pontho na kufunana na kukhulupira kunabulukira kuna Mulungu Baba na kuna Mbuya Yezu Kirixtu. Kukoma ntima kwa Mulungu mbukukhale na onsene anafuna Mbuya wathu Yezu Kirixtu na kufunana kunakhonda kumala. Ine Paulu, na Timoti, adzakazi a Kirixtu Yezu, ndisalembera mbumba yonsene ya Mulungu muna Kirixtu Yezu ali ku Filipi, pabodzi na atsogoleri na madhiyakoni. Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbapikhale na imwe. Ndisapereka takhuta kuna Mulungu wanga midzidzi yonsene inakukumbukani ine. Midzidzi yonsene, pa miphembero yanga yonsene inacita ine kuna imwe, ndisaphembera na kukomerwa konsene, na thangwi ya kundiphedza kwanu pa Mphangwa Zadidi, kutomera ntsiku yakutoma mpaka cincino. Ine ndisatawira kuti Mulungu adatoma basa yadidi muna imwe, anati aimalisire mpaka Ntsiku ya Kirixtu Yezu. Mphyadidi kuti ine ndinyerezere tenepo pa thangwi yanu monsene, thangwi imwe muli n'kati mwa ntima wanga, peno pa kumangwa kwanga, peno pakubvunulira na pakulonga kwanga Mphangwa Zadidi, monsene muli pabodzi na ine pa kukoma ntima kwa Mulungu. Mulungu ndiye m'mboni wanga wa citsuwo cina ine kuna imwe monsene, na ntsisi zikulu zinabulukira muna Kirixtu Yezu. Maphembero anga ndi awa: Kuti kufunana kwanu kukule ntsiku na ntsiku pa kudziwa na pa ndzeru zakukwana, toera mukwanise kudzindikira pinthu pikulu kakamwe, kuti mukhale anthu akulungama na akusowa mathangwi akusandikwa na iwo Ntsiku ya Kirixtu, mbamudzala na misapu yakulungama inabwera na Yezu Kirixtu, toera Mulungu asimbwe mbapaswa mbiri. Abale anga, dziwani kuti pire pidacitika kuna ine, pyaphedza pikulu kakamwe kuti basa ya Mphangwa Zadidi iyende kutsogolo. Na thangwi eneyo, pyonsene pyadziwika kuna anyakuonera onsene a nyumba ya mambo Sezari, na kuna onsene anango, kuti ine ndiri n'kaidi na thangwi ya Kirixtu. Pontho abale azinji, na kunyindira muna Mbuya pa thangwi ya kupitiswa kwanga n'kaidi, ali kumwaziratu kakamwe fala ya Mulungu na cipapu consene mbakhonda kugopa. Ndimo mwene, anthu anango asapfundzisa pya Kirixtu na bibvu pontho na kuzondana, mbwenye anango asapicita na ntima wadidi. Awa anapicita na ntima wadidi asapicita na kufunana, thangwi asadziwa kuti ine ndiri muno toera kubvunulira Mphangwa Zadidi. Mbwenye ale anango asamwaza pya Kirixtu na mapika pontho na uthambi, mbakhanyerezera kuti anakwanisa kundisosera nyatwa mbandiri muno n'kaidi. Mbwenye penepi pinabasa yanji? Pinafunika ndi kuti na njira zakusiyana-siyana, peno mwa uthambi peno mwa ndimo mwene, Kirixtu ali kulongwa. Na thangwi eneyo, ine ndisakomerwa napyo. Ndimo mwene, ine ndinathimiza basi na kutsandzaya, thangwi ine ndisadziwa kuti pire pidacitika kuna ine pinati pindiombole na thangwi ya miphembero yanu, pontho na kuphedziwa na Nzimu wa Yezu Kirixtu. Ndisadikhira na ntima onsene pontho mbanditawira kuti nkhabe cinthu cinafuna kudza kandipasa manyadzo. Mbwenye na cipapu canga consene cikhadza na ine, cincino Kirixtu anakuzwambo m'manungo mwanga, peno pa kukhala m'maso peno pa kufa. Thangwi kuna ine, kukhala m'maso ndi Kirixtu, kufa ndi kuwina. Ndingathimiza kukhala m'maso, ndinati ndibale misapu pa basa yanga. Na tenepo, sinapidziwabve pinafuna ine kusankhula tayu. Ndisanentseka na pinthu piwiri: Ndisafuna kwenda kakhala na Kirixtu, ndipyo pyadidi kakamwe kupiringana pyonsene, mbwenye na thangwi yanu, pisafunika kakamwe kuti ine ndithimize kukhala m'maso. Na kutawira penepi, ndisadziwa kuti ndinati ndikhale m'maso mbandithimiza kukhala na imwe monsene, toera mukule pontho mutsandzaye pa kukhulupira, toera ndingabwera pontho kuna imwe, kutsandzaya kwanu muna Kirixtu Yezu kukuleretu kakamwe na thangwi yanga. Pa pyonsene ipi, khalani na makhaliro adidi ninga munafunira Mphangwa Zadidi za Kirixtu, toera peno pakudza kwanga kakuonani, peno pakukhonda kukhala kwanga dhuzi na imwe, ndikubveni kuti muli dzololo na nzimu ubodzi basi ninga munthu m'bodzi basi, mbamugwa nkhondo pabodzi na thangwi ya cikhulupiro ca Mphangwa Zadidi, pontho mbamukhonda kuthuswa na anyamalwa anu. Thangwi kuna iwo, ceneci ndi cidzindikiro ca kutaika, mbwenye kuna imwe ndi cidzindikiro ca upulumuki, pontho penepi pyabulukira kuna Mulungu. Thangwi imwe mudapaswa udidi wa kukhulupira Kirixtu basi tayu, mbwenye wakuonambo nyatwa na thangwi yace, thangwi muli kugwa nkhondo ibodzi ene idaona imwe kuna ine, pontho na cincino ene muli kuibva kuti ndiri kuigwa. Ngakhala na thangwi ya kukhala kwathu muna Kirixtu tina cinthu ca kutipasa mphambvu, tina cinthu ca kutimatamiza mwa kufunana, tina cinthu cinatiphataniza mu Nzimu Wakucena, tina cinthu cikulu ca kufunana pontho na kubverana ntsisi, dzazani kutsandzaya kwanga, mukhale na ndzeru zibodzi zene, na kufunana kubodzi kwene, na nzimu ubodzi ene pontho na manyerezero mabodzi ene. Lekani kucita cinthu na umbirimi peno na kupikuza, mbwenye mucite na kupicepesa, mbamudziwa kuti alipombo anango kupita imwe. M'bodzi na m'bodzi mbaleke kutsalakana udidi wace ekha basi, mbwenye mbatsalakanembo udidi wa andzace. Macitiro anu mbakhale mabodzi ene ninga Kirixtu Yezu. Iye mbali Mulungu, hadatsalakana kuti kukhala sawa-sawa na Mulungu ndi cinthu kuti Iye acikakamire, mbwenye acepeseka ekha ene, mbadza kacitika n'dzakazi, mbalandana na anthu. Pontho, pakugumanika kwace ninga munthu, acepesekeratu kakamwe mbakhala wakubvera mpaka kufa, kufa pa ntanda. Na thangwi eneyo, Mulungu ankuza pikulu kakamwe, pontho mbampasa dzina yakupiringana madzina onsene, toera mabondo onsene ali kudzulu na pantsi, pontho na ali pantsi pa mataka, agodamire dzina ya Yezu, pontho anthu onsene alonge pakweca kuti Yezu Kirixtu ndi Mbuya, toera kupasa mbiri Mulungu Baba. Na tenepo, anyakufunika anga, ninga imwe mwabvera midzidzi yonsene, si pamaso panga basi tayu mbwenye maka-maka cincino mbandiri kutali, phatisani basa upulumuki wanu na kugopa pontho na kutetemera, thangwi ndi Mulungu anaphata basa muna imwe, pa kufuna na kucita, sawa-sawa ninga munafunira Iye. Citani pyonsene mbamukhonda kudungunya peno kulongana, toera imwe mudze kakhala anthu akukhonda kusandikwa, akulungama pontho na ana a Mulungu akusowa thangwi pakati pa dzindza yakuipa na yakudawa, panayetimira imwe ninga nyenyezi pa dziko, mbamuphatisisa fala ya upulumuki. Na tenepo, pa Ntsiku ya Kirixtu, ine ndinadza kagaya kuti kuthamanga pontho na mphambvu zidacita ine si za pezi tayu. Peno ciropa canga cingathirirwa ninga ntsembe padzulu pa basa idabulukira pa kukhulupira kwanu, ntsembe inapereka imwe kuna Mulungu, ndinakomerwa pontho ndisatsandzaya na imwe monsene. Imwe khalanimbo akukomerwa, pontho mutsandzaye na ine. Ndisadikhira muna Mbuya Yezu kukutumirani Timoti cincino, toera inembo ndikomerwe ndingatambira mphangwa zanu. Ine nkhabe munthu unango ana manyerezero mabodzi ene, ananentseka mwakukwana na udidi wa makhaliro anu, thangwi onsene asasaka udidi wawo, mbakhonda kusaka udidi wa Yezu Kirixtu. Mbwenye imwe musadziwa kuti Timoti anyindirwa, thangwi aphata basa ya Mphangwa Zadidi pabodzi na ine, ninga mwana n'khundu mwa baba wace. Na tenepo, ndiye anadikhira ine kuti ndintume na mwansanga, pakumala kudziwa ninji pinafuna kucitika kuna ine, mbandinyindira muna Mbuya kuti na mwansanga ndinadza kabwerambo kweneko. Mbwenye ndanyerezera kuti pikhali pyadidi ndikutumireni pontho m'bale wanga Epaforodhitu, ndzanga wa basa, pontho anamenya na ine pabodzi nkhondo, ntumwi adanditumira imwe toera kudza kandiphedza pikhasowa ine. Thangwi iye ana citsuwo na imwe monsene, pontho asanentseka na kudziwa kuti imwe mwapibva kuti iye akhabva kupha. Ndimo mwene, iye akhabva kupha, dhuzi na kufuna kufa. Mbwenye Mulungu am'bvera ntsisi, si na iye basi tayu, mbwenye abverambo ntsisi na ine ene, toera ine ndikhonde kutsukwala pikulu kakamwe. Na thangwi eneyi, ndinati ndintume na mwansanga, toera mungaonana na iye pontho, imwe mutsandzaye, inembo ndipume. Pontho ndisakuphembani kuti muntambire muna Mbuya na kutsandzaya konsene, mbamualemedza anthu ninga enewa, thangwi iye akhali dhuzi na kufuna kufa na thangwi ya mabasa a Kirixtu, mbakhonda kutsalakana moyo wace toera kundiphedza na pire pikhacimwana imwe kundipasa. Pakumalisa, abale anga, tsandzayani muna Mbuya! Ndisakulemberani pontho kapsa pibodzi-bodzi, ine nkhabe kundinetesa, pontho ndi citsidzikiro kuna imwe. Citani mphole na “anambwa’’, citani mphole na enewa anacita kuipa, citani mphole na anyakusibza a uthambi! Thangwi ife ndife anyakusibzadi, ife analambira na Nzimu Wakucena, ife anapasika mbiri muna Kirixtu Yezu, pontho ife anakhonda kunyindira pinthu pya nyama, mbandidziwa pyanga kuti ine ndinawo mathangwi akunyindira pya nyama. Ngakhala alipo munthu ananyerezera na kunyindira pinthu pya nyama, ine ndine akhakwanira kakamwe kunyindira pinthu pya nyama. Kusibza, ndasibzambo pa ntsiku yacisere pakumala kwanga kubaliwa, ndine wa mbumba ya Izarayeli dzindza ya Bhenjamini, muhebhereu wakukwana, pa Mwambo ndine wa afarisi, pa thangwi ya kukakamira kutoweza Mwambo, ndikhali munthu wakuzonda abale a gereja. Pa thangwi yakulungama pa Mwambo, ndikhali munthu wakubvera mwakukwana. Mbwenye pire pikhakhala ninga kuwina kwa ine, ndapiona ndi kuluza, na thangwi ya Kirixtu. Ande, si penepi basi tayu, mbwenye pa pyonsene ipi ndaona ninga nkhuluza, ndingapilandanisa na nkhombo zikulu kakamwe za kudziwa Kirixtu Yezu, Mbuya wanga, adandiluzisa pinthu pyonsene. Ine ndisapyona ninga khuku, toera ndikwanise kuwina Kirixtu, pontho ndigumanike muna Iye, mbandikhonda kukhala na kulungama kwanga kokha kunabulukira pa Mwambo, mbwenye kulungama kunabulukira pa thangwi ya kukhulupira Kirixtu, na kulungama kunabulukira kuna Mulungu pontho na pa kukhulupira. Ndisafuna ndidziwe Kirixtu, ndidziwe mphambvu za kulamuka kwace pa kufa, pontho na kuphatana na Iye pabodzi pa nyatwa zace, mbandikhala ninga Iye pa kufa kwace, toera na njira zakusiyana-siyana ndikwanise kulamuswa pakati pa anyakufa. Si kuti ine ndapikwanisa kale pyonsene ipi, peno ndikhadakhala wakukwana tayu, mbwenye ndisathimiza na kupisaka toera ndipikwanise, thangwi ndakwaniswambo na Kirixtu Yezu kuti ndicite penepi. Abale anga, ine nkhabe kunyerezera kuti ine ene ndapikwanisa, mbwenye cibodzi cinacita ine ndi ici: Kuduwala pinthu pidasala n'nduli, mbindiwangisira kufikira pinthu piri kutsogolo, mbandithimiza kwenda kutsogolo, toera ndikwanise pinafuna ine kuti ndiwine muwoni wa kucemerwa na Mulungu kudzulu muna Kirixtu Yezu. Tonsene ife tidakula mu Nzimu, tisatongwa tipione tenepo pinthu penepi, pontho, ngakhala pa pinthu penepi imwe muna manyerezero anango akusiyana, penepi Mulungu anati akupangizenimbo. Mbwenye mbatifambeni sawa-sawa na mule mudakwanisa ife kale. Abale anga, landirani makhaliro anga na kuphatana, pontho mulang'anise ale ana makhaliro adalandana na makhaliro adakupangisani ife. Thangwi, ninga ndakupangani kale kazinji kene, cincino ndisathimiza kulonga na misozi m'maso, kuti alipo azinji ana makhaliro a anyamalwa a ntanda wa Kirixtu. Kumalisira kwawo ndi kutaika, mulungu wawo ndi mimba zawo, pontho iwo asagaya na pire pinapasa manyadzo. Asanyerezera pinthu pya pantsi pano basi. Mbwenye dziko yathu iri kudzulu, ndi kunadikhira ife Mpulumusi, Mbuya Yezu Kirixtu. Na mphambvu zinancita kuti aikhe pinthu pyonsene pantsi pa utongi wace, Iye anati acinje manungo athu akupwazika, mbakhala sawa-sawa na manungo ace a mbiri. Na tenepo, abale anga akufunika, ndina citsuwo cikulu na imwe. Imwe ndimwe ananditsandzaisa pontho ndimwe nthimba yanga, khalani tenepo dzololo muna Mbuya, imwe anyakufunika. Cinaphemba ine kuna Ivodhya na kuna Sintike ndi ca kuti mukhale anthu akubverana muna Mbuya. Ndimo mwene, pontho ndisaphemba kuna iwe ndzanga wakunyindirika pa basa, kuti uwaphedze. Thangwi iwo, pabodzi na Kelementi na anango andzanga a pa basa, ndamenya na iwo pabodzi nkhondo pa thangwi ya Mphangwa Zadidi. Iwo madzina awo asagumanika mu Bukhu ya Upulumuki. Tsandzayani muna Mbuya midzidzi yonsene. Ndisakupangani pontho kuti: Tsandzayani! Kukhurudzika kwanu mbakukhale kwakudziwika na anthu onsene. Mbuya ali dhuzi. Lekani kunentseka na cinthu, mbwenye pa pyonsene phembani kuna Mulungu na miphembero na kudembetera, pontho na kupereka takhuta. Pontho ntendere wa Mulungu unapiringana manyerezero onsene unati ukoye mitima yanu na ndzeru zanu muna Kirixtu Yezu. Pakumalisira abale anga, pyonsene pya ndimo mwene, pyonsene pyakulemedzeka, pyonsene pyakulungama, pyonsene pyakucena, pyonsene pyakufunika, pyonsene pyakupasa mbiri yadidi, ngakhala kuna cinthu cadidi, peno cinthu cakusimbwa, nyerezerani pinthu penepi. Piphatiseni basa pyonsene pinapfundza imwe, pidatambira imwe, pidabva imwe na pidaona imwe kuna ine. Tenepo Mulungu wa ntendere anakhala na imwe. Ndisatsandzaya pikulu kakamwe muna Mbuya, thangwi cincino imwe mwatoma pontho kunditsalakana. Ndimo mwene, imwe mukhanditsalakana kale, mbwenye mukhasowa n'dzidzi wakupipangisa. Ndisalonga penepi sikulongera kuti ndasowa pinthu tayu, thangwi ndadzowerera kutsandzaya na makhaliro onsene akusiyana-siyana. Ine ndisadziwa kusowa ndi ninji, pontho ndisadziwa kukhala na pizinji ndi ninji. Ndadzowerera kukhala wakutsandzaya pa makhaliro onsene akusiyana-siyana, peno pa kukhuta peno pakukhala na njala, peno pakukhala na pinthu pizinji, peno pakusowa pinthu. Pyonsene ndisapikwanisa na mphambvu za ule anandiwangisa. Mbwenye imwe mwacita pyadidi pa kundiphedza pa nyatwa zanga. Imwe anthu a ku nzinda wa Filipi, ninga musadziwa kale, pakutoma kwa Mphangwa Zadidi, pidabuluka ine ku dziko yanu ya Masedhonya nkhabe abale a gereja ibodzi idandiphedza, pakupasa peno pakutambira. Ndimwe basi anandiphedza. Thangwi pikhakhala ine ku Tesalonika, imwe mwandiphedza na pire pikhasowa ine, si kabodzi basi tayu. Sikulongera kuti ine ndisafuna muwoni wanu tayu, mbwenye ndisasaka nsapu wakuthimizira nkhombo zanu. Ndatambira pyonsene, pontho pina ine pyapiringana pire pikhafunika. Kusowa kwanga kwamaliratu cincino, pidatambira ine miyoni yanu idanditumizira imwe na Epaforodhitu. Ndi muwoni wakununkhira, ntsembe yakutawirirwa na Mulungu mbakomerwa nayo. Pontho Mulungu wanga, anati amalise kusowa kwanu konsene, kubulukira mu upfumi wa mbiri yace muna Kirixtu Yezu. Mulungu wathu pontho na Baba wathu mbapaswe mbiri kwenda na kwenda, Ameni. Mbiyende kawange mbumba ya Mulungu yonsene muna Kirixtu Yezu. Abale ana ine kuno, asakuwangisani. Mbumba ya Mulungu yonsene isakuwangisani, maka-maka abale ali ku nyumba kwa mambo Sezari. Kukoma ntima kwa Mbuya Yezu Kirixtu mbakukhale na nzimu wanu. Ine Paulu, mpoxtolo wa Kirixtu Yezu na kufuna kwa Mulungu, pabodzi na m'bale wanga Timoti. Ndisalembera imwe mbumba ya Mulungu pontho yakunyindirika muna Kirixtu iri mu nzinda wa Kolosi. Kukoma ntima na ntendere unabulukira kuna Mulungu Baba, mbapikhale na imwe. Ntsiku zonsene tisapereka takhuta kuna Mulungu, Baba wa Mbuya wathu Yezu Kirixtu, tingakuphembererani, thangwi tisabva anthu mbalonga kukhulupira kunacita imwe muna Kirixtu Yezu, pontho na kufuna kunacita imwe mbumba ya Mulungu yonsene, na thangwi ya cidikhiro ca pire pidakoyerwa imwe kudzulu, cidabva imwe na fala ya ndimo mwene ya Mphangwa Zadidi zidafika mpaka kuna imwe. Pa dziko yonsene Mphangwa zenezi Zadidi zisabala misapu pontho mbikula ninga pinacitikambo kuna imwe, kutomera pa ntsiku idazibva imwe, mbamubvesesa kukoma ntima kwa Mulungu na undimo mwene wace onsene. Imwe mwapipfundza na Epafara, bichu ndzathu wakufunika, nyabasa wakunyindirika wa Kirixtu kuna imwe, adatipangambo pyakufunana kunacita imwe mu Nzimu Wakucena. Na thangwi eneyi, kutomera ntsiku idapibva ife, nkhabe neta kukuphembererani, pontho na kuphemba kuti mudzale na kudziwa pinafuna Mulungu, na udziwisi onsene pontho na kubvesesa kwa mu Nzimu. Penepi ndi toera mufambe ninga munafunira Mbuya, pontho pyonsene pikhale pyakun'tsandzaisa, mbamubala misapu ya mabasa onsene adidi, mbamukula na kudziwa Mulungu, mbamuwangiswa na mphambvu zonsene, ninga munafunira mphambvu za mbiri yace, toera mukhale na kuwangisira konsene pontho mukhale na kupirira kwa kutsandzaya, mbamupereka takhuta kuna Baba, adakucitani kuti mukwanire kudya unthaka wa mbumba ya Mulungu mu Umambo wa Cieza. Thangwi Iye atiombola mu mphambvu za n'cidima mbatikwata mbatiyendesa mu Umambo wa Mwana wace wakufunika. Muna Iye tinagumana kuombolwa, ndiko kulekererwa kwa madawi. Iye ndi cipangizo ca Mulungu wakukhonda kuoneka, mwana wa utombo wa pyonsene pidacitwa thangwi muna Iye pyacitwa pinthu pyonsene pya kudzulu na pantsi, pinaoneka na pinakhonda kuoneka, mipando ya umambo, peno mphambvu za utongi, mphambvu za mizimu peno atongi, pinthu pyonsene pyacitwa na Iye pontho ndi pyace. Iye ndiye wakutoma pa pinthu pyonsene, pontho muna Iye pyonsene piciripo. Iye ndi nsolo wa manungo, ndiyo gereja. Ndiye wakutoma, pontho ndi mwana wa utombo adalamuka pakati pa anyakufa, toera pa pyonsene akhale wakutoma. Thangwi ndi kufuna kwa Mulungu kuti pyonsene pikwane muna Iye, pontho na thangwi yace, pisekesane na Iye pinthu pyonsene piri pantsi pano na piri kudzulu, mbadzesa ntendere kubulukira mu ciropa cace cidacololeka pa ntanda. Kale ene imwe mukhadamwazana na Mulungu, pontho mu ndzeru zanu mukhali anyamalwa ace, mbamucita mabasa a kuipa. Mbwenye cincino, kubulukira pa kufa kwa Mwana wace, mwasekesana na Iye ene Mulungu, toera akupangizeni patsogolo pace ninga mbumba yace, yakusowa thangwi pontho yakukhonda kusandikwa, male mungakakamira kuwangisira mbamukhala dzololo pa kukhulupira, mbamukhonda kubuluka pa cidikhiro ca Mphangwa Zadidi zidabva imwe, zidamwaziwa kuna anthu onsene ali pantsi pa thambo. Ine Paulu ndadza kakhala nyabasa wa Mphangwa zenezi Zadidi. Cincino ndiri kutsandzaya pa nyatwa zanga na thangwi yanu, pontho ndisamalisira m'manungo mwanga pire pidasalikira pa nyatwa za Kirixtu, pa thangwi ya manungo ace, manungo enewa ndi gereja. Ndiyo idacitirwa ine kuti ndikhale nyabasa, ninga basa ya Mulungu idandinyindira Iye pa thangwi yanu, toera ndikupangizeni mwakukwana fala ya Mulungu. Fala eneyi, ndi cinthu cakubisala cikhakhonda kudziwika pa midzidzi yakutoma na anthu akale, mbwenye cincino capangizwa kuna mbumba ya Mulungu. Mulungu afuna kupasa kudziwa mbumba yace, mpfuma ya mbiri ya cinthu ceneci cakubisala kuna anthu adakhonda kukhala madjuda. Cinthu ceneci ndi Kirixtu ali muna imwe, cidikhiro ca mbiri. Ife tisamulonga, mbaticenjeza na kupfundzisa m'bodzi na m'bodzi na udziwisi onsene, toera anthu onsene akhale akukwana muna Kirixtu. Na thangwi eneyo, ine ndisawangisira mbandimenya nkhondo na mphambvu zace, zinaphata basa na kuwanga muna ine. Ndisafuna mudziwe nkhondo yonsene inagwa ine na thangwi yanu, pontho kuna ale ali ku nzinda wa Laudhiseya na kuna ale onsene anakhonda kudziwa nkhope yanga. Ndisawangisira toera iwo akhale na mphambvu muntima mwawo, akhale akuphatana pa kufunana, pontho toera akwanise mpfuma yonsene ya ndzeru zakukwana, toera adziwe cinthu cakubisala ca Mulungu. Cinthu ceneci ndi Kirixtu. Mpfuma zonsene za udziwisi na za kudziwa zabisalika muna Iye. Ine ndisakupangani penepi toera akhonde kuoneka munthu wa kukunyengezani na mafala adidi, mbwenye mbakhala authambi. Thangwi ine ndisapidziwa kuti ndiri kutali na imwe, mbwenye mu nzimu tiri pabodzi, pontho ndiri kutsandzaya na kuona makhaliro anu akubverana na kulimira kwa cikhulupiro canu muna Kirixtu. Na tenepo, ninga kutambira kudacita imwe Kirixtu Yezu, Mbuya, nyanyani kukhala muna Iye, mbamukhala na michici pontho na kukula muna Iye, mbamulimira pa kukhulupira ninga mudapfundzisirwa imwe, mbamukhala na kupereka takhuta kukulu. Citani mphole kuti pakhonde kuoneka munthu wakukucitani udzakazi wa udziwisi wa pezi wa uthambi, unabulukira pa mitemo ya anthu pontho na pipfundzo pya anthu a dziko ino, mbapikhonda kubulukira muna Kirixtu. Thangwi umulungu onsene usagumanika m'manungo mwa Kirixtu, pontho imwe ndimwe akukwana muna Iye. Iye ndi nsolo wa mphambvu na utongi onsene. Muna Iye, imwe mwasibzambo, si kusibza kudacitwa na manja a anthu tayu, mbwenye ndi kusibza kudacitwa na Kirixtu, ndiko kubuluswa kwa manungo a nyama. Penepi pyacitika pakutambiriswa kwanu batixmu, pa n'dzidzi udaikhwa imwe n'nthumbi pabodzi na Kirixtu, pontho na Iye mwalamuswa pa kufa, na thangwi ya kukhulupira mphambvu za Mulungu adamulamusa pakati pa anyakufa. Kuna imwe mukhadafa na thangwi ya kudawa kwanu pontho na thangwi yakukhonda kusibza kwanu pa nyama, Mulungu akupasani upulumuki pabodzi na Kirixtu. Iye atilekerera kudawa kwathu konsene, pontho afudza mangawa akhadalembwa, akhakhala ninga mitemo yakukhonda kubverana na ife. Iye aabulusa mbaakhomera pa ntanda, pontho, pakumala kutapata mphambvu na utongi wa mizimu, aapasa manyadzo pamaso pa anthu onsene, mbaakunda pakukhomerwa kwace pa ntanda. Na tenepo, lekani kusiya munthu m'bodzi mbakutongani na pinthu pinadya imwe peno na pinamwa imwe, peno na thangwi ya maphwandu anango a anthu akuphembera peno na maphwandu a mitemo ya kubalwa kwa mwezi, peno na ya ntsiku ya Sabudu. Pinthu penepi ndi pithundzi-thundzi pya pire pikhafuna kudza. Pithundzi-thundzi penepi pisalongera Kirixtu. Lekani kusiya kuti munthu na kufuna kwace kupangisa kucepeseka kwakusangizira pontho na kulambira kwace maanju, akupingizeni kutambira muwoni. Munthu unowu asalonga cibodzi na cibodzi pidaoneswa iye mu nzimu, pontho manyerezero ace a munyama asancita kuti akhale wakupikuza papezi. Ndi munthu adakhonda kuphatana na Nsolo, kubulukira pa Nsolo unowu, manungo onsene asakoiwa mbaphatanizwa na mphindo na m'mafunyiro, mbakula na makuliro anabuluka kuna Mulungu. Ngakhala imwe mwafa pabodzi na Kirixtu pa pinthu pya pipfundzo pya anthu a dziko ino, thangwi yanji musakhala ninga muli n'dziko, mbamubvera pontho mitemo ninga ixi: “Leka kuphata ipi!” “Leka kulawira ipi!” “Leka kukhuya ipi!” Pinthu pyonsene ipi pingaphatiswa basa pisamala, thangwi pisabulukira pa mitemo na pipfundzo pya anthu. Mitemo eneyo ungaiona isakhala ninga ndi udziwisi, isakhala ninga ndi pinthu pyawo pyakulambira napyo Mulungu, kusangizira kupicepesa, pontho na kuonesa nyatwa manungo, mbwenye penepi nkhabe basa ibodzi inaphedzera ipyo toera kukunda kusirira kwa nyama. Na tenepo, ngakhala mwalamuswa pa kufa pabodzi na Kirixtu, sakani pinthu pya kudzulu, kule kunakhala Kirixtu ku khundu ya nkono wa madyo wa Mulungu. Khalani na manyerezero a pinthu pya kudzulu, mbamusiya pinthu pya pantsi pano. Thangwi imwe mwafa, apo cincino upulumuki wanu wabisalika pabodzi na Kirixtu muna Mulungu. Kirixtu, upulumuki wanu, angapangizika pakweca, imwembo munadza kapangizikambo na Iye mu mbiri yace. Na tenepo, phaani pyonsene pyakuipa pya makhaliro anu akale a padziko, ninga: pyalukwali, pyakuzuda, pyakusirira, pyakufuna kuipa, na ntima wakufunisisa pinthu, ndiko kulambira alungu apezi. Ndi thangwi ya penepi pyonsene pinaipirwa na Mulungu kuna ale anakhonda kubvera. Pinthu penepyo ndipyo pikhacitambo imwe kale ene pa n'dzidzi ukhakhala imwe n'kati mwa pinthu penepyo. Mbwenye cincino siyani pyonsene ipi ninga: Kuipirwa, ukali, kukoya pyakuipa muntima, kutikana na makani akupasa manyadzo pa malongero anu. Lekani kulongerana uthambi m'bodzi na m'bodzi, thangwi imwe mwabulusa kale munthu wakale na macitiro ace ene, pontho mwabvala munthu mupsa, anakhala mbasasanyirwa papsa pa udziwisi, mbalandaniswa na ule Adancita. Pa makhaliro enewa mapsa, nkhabe kudza kasiyana n'djuda na ule adakhonda kukhala n'djuda, adasibza na ule adakhonda kusibza, anthu akudza na anthu a ku dziko ya Sita, n'dzakazi na ntumbe. Mbwenye Kirixtu ndiye pyonsene pontho ali muna onsene. Na tenepo, ninga anyakusankhulwa a Mulungu, mbumba ya Mulungu na akufunika, khalani na ntsisi zikulu, na udidi, na kupicepesa, na kupipoloza pontho na kupirira. M'bodzi na m'bodzi aphate ntima angaipisirana na ndzace mbamulekererana pyakuipa pidacitirana imwe. Lekereranani ninga Mbuya akulekereranimbo. Mbwenye pa pyonsene ipi, khalanimbo na ntima wa kufunana. Ndiyo pfundo inakumangani mwakukwana. Pontho kuti ntendere wa Kirixtu utonge n'kati mwa mitima yanu. Thangwi imwe mwacemerwa toera mukhale na ntendere, ninga mapindi a manungo mabodzi basi, mbamupereka takhuta. Fala ya Kirixtu mbidzale na kutaikira muna imwe. Pfundzisanani mbamulangana m'bodzi na m'bodzi na udziwisi onsene, mbamuimba masalimu, na nyimbo za kukuza nazo Mulungu, pontho na nyimbo za mu nzimu, mbamupereka takhuta kuna Mulungu na muntima mwanu. Pyonsene pinacita imwe, peno na mafala peno na mabasa, piciteni na dzina ya Mbuya Yezu, mbamupereka takhuta kubulukira muna Iye kuna Mulungu Baba. Imwe akazi, bverani amuna anu ninga pinafunika kuna ale ali muna Mbuya. Imwe amuna, funani akazi anu mbamukhonda kualongera na ukali. Imwe ana, bverani ababa anu na amai anu pa pyonsene, thangwi penepi ndipyo pinakomerwa na Mbuya. Imwe ababa, lekani kusosa ana anu kuti aipirwe, toera akhonde kumala mphambvu. Imwe adzakazi, bverani a mbuya anu a pantsi pano pa pyonsene. Lekani kuabvera pamaso pawo basi tayu toera akusimbeni, mbwenye abvereni na ntima onsene, mbamugopa Mbuya. Pyonsene pinacita imwe, citani na ntima onsene, ninga musacitira Mbuya, mbamukhonda kuona ninga musacitira anthu, mbamudziwa kuti Mbuya ndiye anafuna kudza kakupasani unthaka ninga m'bairo wanu. Anaphatira imwe basa, ndiye Kirixtu Mbuya. Anacita pinthu pyakukhonda kulungama, anadza katambirambo pinthu pyakukhonda kulungama pidacita iye, pontho Mulungu nkhabe kudza kalang'ana nkhope ya munthu. Imwe a mbuya, citirani adzakazi anu pinthu pyakulungama na pinaakwanira, mbamudziwa kuti imwembo muna Mbuya m'bodzi kudzulu. Wangisirani na kuphembera, mbamukhala akulang'anira pa kuphembera kwanu, pontho mbamupereka takhuta. Pontho, pa n'dzidzi ubodziyene, phembereranimbo ife, toera Mulungu afungulire nsuwo mphangwa zathu, kuti tilonge cinthu cakubisala ca Kirixtu cidamangirwa ine. Phemberani toera ine ndikwanise kucipangisa pakweca, ninga munatongerwa ine kupicita. Khalani na udziwisi pa makhaliro anu na anthu a kunja, mbamubandza n'dzidzi. Malongero anu mbakhale akukoma pontho adzipe ninga munyu, toera mudziwe kutawira kunafuna kucita imwe kuna munthu m'bodzi na m'bodzi. Tikiku anakupangani pinthu pyonsene pa thangwi yanga. Iye ndi m'bale wakufunika, nyabasa wakunyindirika pontho ndi bichu ndzathu pa basa ya Mbuya. Ine ndisantuma kuna imwe na thangwi ya cinthu cibodzi basi, kuti akudziwiseni makhaliro athu, pontho toera awangise mitima yanu. Iye anabwera na Onezimu, m'bodzi wanu, m'bale wakunyindirika pontho wakufunika. Iwo anakupangani pyonsene pinacitika kuno. Arixitariku, ndzanga ali na ine n'kaidi, pabodzi na Marku m'bale wace Bharnabhasi, asakuwangisani. Pa thangwi ya Marku, imwe mwapipangwa kale, iye angabwera kudza kakuonani, ntambireni. Yezu, anacemerwa Djuxtu, asakuwangisanimbo. Enewa ndiwo basi adasibza anaphatira basa Ufumu wa Mulungu pabodzi na ine. Iwo ndiwo anakhala mbandibalangaza. Epafara, m'bodzi wanu, pontho bichu wa Kirixtu Yezu, asakuwangisani. Midzidzi yonsene iye asamenya nkhondo na kukuphembererani, toera kuti imwe, ninga anthu akukula mu nzimu, pontho adatawiradi mwakukwana, munyanye kukhala dzololo pa pyonsene pinafuna Mulungu. Ine ndisancitira umboni kuti asawangisira kakamwe na thangwi yanu, pontho na kuna ale ali ku nzinda wa Laudhiseya na ali ku nzinda wa Hiyerapolisi. Luka, nkondzi wakufunika, na Dhema, asakuwangisani. Wangisani abale a ku Laudhiseya, pabodzi na Ninfa, pontho na abale a gereja anakhala mbagumanyikana pa nyumba pace. Pakumala kuoniwa tsamba iyi pakati panu, citani kuti iwoniwembo na abale a gereja ya ku Laudhiseya, pontho imwe muonembo tsamba ya ku Laudhiseya. Mpangeni Arikipu kuti: “Asake kucita basa idatambira iye muna Mbuya.” Ine Paulu, ndalemba na manja anga mafala awa akukumwanyikani. Kumbukani kuti ine ndiri n'kaidi. Kukoma ntima kwa Mulungu mbukukhale na imwe. Ine Paulu, pabodzi na Silivano na Timoti, ndisalembera abale a gereja ya ku Tesalonika, muna Mulungu Baba pontho na muna Mbuya Yezu Kirixtu. Kukoma ntima na ntendere mbapikhale na imwe. Midzidzi yonsene tisapereka takhuta kuna Mulungu na thangwi ya imwe monsene, na kukulongani pa maphembero athu, mbatikhonda kupuma, mbatikumbuka patsogolo pana Mulungu Baba wathu, basa inabulukira pa kukhulupira kwanu, na mphambvu inabulukira pa kufunana, pontho na kuwangisira kunabulukira pa kudikhira Mbuya wathu Yezu Kirixtu. Tisadziwa, imwe abale akufunika a Mulungu, kuti Iye akusankhulani thangwi Mphangwa Zadidi zidakupangani ife zidafika kuna imwe na mafala basi tayu, mbwenye zafikambo na mphambvu, na Nzimu Wakucena pontho na kunyindira konsene. Imwe musadziwa pidacita ife pakati panu, pa thangwi yanu. Pontho imwe mwakhala anthu akutikwatira luso na akukwatira luso Mbuya. Pakati pa nyatwa zizinji, imwe mwatambira fala na kutsandzaya kudabuluka kuna Nzimu Wakucena. Na tenepo, mwakhala anthu akukwatirwa luso kuna onsene anyakutawira Yezu ali ku dziko ya Masedhonya na ali ku dziko ya Akaya. Thangwi kubulukira kwa imwe, fala ya Mbuya yamwazika ku Masedhonya na ku Akaya. Si ku Masedhonya na ku Akaya basi tayu, mbwenye pontho kukhulupira kwanu kuna Mulungu kwadziwika mu mbuto zonsene. Pa thangwi eneyi, taona kuti nkhabe funikabve kuti tilonge pontho pinango, thangwi iwo ene asalonga kutambira kudaticita imwe, pontho na kuzungunuka kwanu kuna Mulungu, mbamusiya alungu apezi kuti muphatire basa Mulungu wa m'maso na wa ndimo mwene, pontho na kudikhira Mwana wace anafuna buluka kudzulu, adalamusa Iye pa kufa, ndiye Yezu, anadza katiombola pa kuipirwa kwa Mulungu kunafuna kudza. Abale, imwe ene musadziwa kuti ulendo wathu udacita ife kudza kakuonani, si wa pezi tayu. Imwe musadziwa kuthabuswa na kuoneswa nyatwa kudacitwa ife ku nzinda wa ku Filipi, mbwenye ife na kuphebza na Mulungu, takwanisa kukhala na cipapu ca kukumwazirani Mphangwa Zadidi za Mulungu, pakati pa kuidiwa kukulu. Thangwi kukucenjezani kwathu kudabulukira pa kudodomeka, peno pa manyerezero a kuipa, peno pa kusaka kukunyengezani tayu, mbwenye ninga anthu adatawirirwa na Mulungu kuti tinyindirwe Mphangwa Zadidi, nkhabe kuzilongera toera tisimbwe na anthu tayu, mbwenye na Mulungu analang'ana mitima yathu. Imwe musadziwa mwadidi mwene kuti cipo talonga mafala akutapira toera kukunyengezani, peno kusaka kukudhobhani pinthu pyanu. Mulungu ndiye m'mboni wathu. Pontho tiri kusaka kupaswa mbiri na anthu tayu, peno na imwe peno na anango. Ife ninga apoxtolo a Kirixtu tikhakwanira kukuphembani pinthu. Mbwenye takhala anthu akukhurudzika pakati panu, sawa-sawa ninga mai analera ana ace. Na tenepo, na kukufunani kukulu, tanyerezera kuti tikhonde kukupasani Mphangwa Zadidi za Mulungu basi, mbwenye pontho tikupasenimbo na moyo wathu ene, thangwi imwe mwadza kakhala anthu akufunika kakamwe na ife. Abale, ndimo mwene, imwe musakumbuka basa yathu yakuwanga, na kuneta kwathu. Taphata basa masiku na masikati toera tikhonde kulemera munthu, pa midzidzi ikhakumwazirani ife Mphangwa Zadidi za Mulungu. Imwe, pabodzi na Mulungu, ndimwe amboni a makhaliro athu adidi na akulungama na akukhonda kusandikwa pakati panu, imwe anyakutawira. Thangwi imwe musadziwa macitiro athu kuna m'bodzi na m'bodzi ninga pinacita baba kuna ana ace, asaalanga, asaamatamisa pontho asaasandika toera imwe mufambe ninga munafuna Mulungu, adakucemerani mu Umambo wace na mu mbiri yace. Pontho tisapereka takhuta kuna Mulungu mbatikhonda kuneta na thangwi ya kuti pakutambira kwanu kuna ife fala ya Mulungu, imwe mwaitawira, si ninga fala ya anthu tayu, mbwenye ninga faladi ya Mulungu, inaphata basa muna imwe adatawira. Thangwi imwe abale, mwakhala sawa-sawa na magereja a Mulungu muna Kirixtu Yezu, ale ali ku Djudeya. Thangwi kuoneswa nyatwa kudacita imwe na andzanu a dziko ibodziyene, ndi sawa-sawambo na pidacitika na abale anyakutawira adaoneswa nyatwa na andzawo a ku Djudeya, ale adapha Mbuya Yezu na maporofeta pontho iwo atizondambo. Iwo nkhabe kutsandzaisa Mulungu pontho ndi anyamalwa a anthu onsene, mbacita mphambvu zonsene toera kutipingiza kuti ife tikhonde kulonga kuna ale adakhonda kukhala madjuda, toera enewa akhonde kupulumuswa. Na tenepo, asainjipisiratu basi madawi awo. Mbwenye pakumalisira, kuipirwa kwa Mulungu kwaagwera. Mbwenye ife, abale anga, tamwazana na imwe pa nkhope n'dzidzi ung'ono, mbwenye si muntima tayu. Tisawangisira kakamwe toera tikuoneni nkhope na nkhope, na thangwi ya citsuwo cina ife na imwe. Tikhafuna kudza kakuonani. Ine ene Paulu ndapifuna, si kabodzi basi tayu. Mbwenye Sathani atipingiza. Thangwi ndi cipi cidikhiro cathu, ndi cipi cinafuna kutitsandzayisa peno nthimba inafuna kutipasa mbiri patsogolo pa Mbuya Yezu pakubwera kwace? Kodi simwe tayu? Ndimo mwene, imwe ndimwe mbiri yathu na kutsandzaya kwathu. Na thangwi eneyi, pidacimwana ife kupirira, taona kuti mphyadidi kukhala pyathu tekha ene ku nzinda wa Atena. Pontho tatuma Timoti, m'bale wathu, nyabasa wa Mulungu pa Mphangwa Zadidi za Kirixtu, toera kuti akuwangiseni pontho akuphedzeni pa cikhulupiro canu, toera akhonde kuoneka munthu wakuzunguzika na nyatwa zenezi. Imwe musadziwa mwadidi mwene kuti ife tacemererwa thangwi eneyi. Thangwi pikhakhala ife pabodzi na imwe, tikhakupangani kale kuti tinadza kazondiwa, ndipyo pidadza kacitikadi, ninga musapidziwa. Na thangwi eneyo, na kucimwana kupirira, ndatuma Timoti toera adziwe cikhulupiro canu ciri tani, na kugopa kuti nyakunyengerera akwanisa kukuleserani, mbacita kuti basa yathu ikhali ya pezi. Mbwenye cincino, Timoti ali kufika kwene buluka kuna imwe, mbatipasa mphangwa zadidi pa thangwi ya cikhulupiro pontho na kufunana kunacitana imwe pakati panu. Iye atipanga kuti imwe musatikumbukira basi, mbamufuna kutiona, ninga ife tisafunambo kukuonani. Na thangwi eneyo, abale anga, pidabva ife cikhulupiro canu, pakusowa kwathu konsene pontho na pa nyatwa zathu, takhala anthu akumatamizika na thangwi yanu. Cincino tina mphambvu, thangwi imwe muli dzololo muna Mbuya. Tinapereka tani takhuta mwakukwana kuna Mulungu pa thangwi yanu, na kutsandzaya konsene kuna ife na thangwi yanu patsogolo pana Mulungu? Masiku na masikati tiri ciriri na kuphembera toera tikwanise kukuonani na maso athu, pontho tidzadzise pidaperewera pa cikhulupiro canu. Kuti Iye ene Mulungu, Baba wathu, na Mbuya wathu Yezu asasanyire njira yathu mpaka kuna imwe. Mbuya mbacite kuti kufunana kwanu kukule kakamwe kuna m'bodzi na m'bodzi, pontho na kuna anthu onsene, ninga pinacita ifembo kuna imwe. Kuti Iye awangise mitima yanu pa kuperekeka kuna Mulungu, toera mukhale anthu akukhonda kusandikwa patsogolo pana Mulungu, Baba wathu, pakubwera kwa Mbuya wathu Yezu pabodzi na mbumba yace onsene. Pakumalisa, abale anga, ife takupfundzisani kale kuti munakhala tani toera kutsandzaisa Mulungu, pontho ndimo mwene, imwe musacita penepi. Cincino tiri kuphemba na kukucenjezani muna Mbuya Yezu, kuti mupitirize kuthimiza na kucita penepi. Thangwi imwe musadziwa mitemo idakupasani ife na mphambvu za utongi wa Mbuya Yezu. Kufuna kwa Mulungu ndi kuti imwe mukhale akucena mbamukhonda kucita pyalukwali. M'bodzi na m'bodzi mbadziwe kukoya manungo ace na makhaliro akucena pontho akulemedzeka, mbamukhonda kukundwa na kusirira pyakuipa, ninga anthu anakhonda kudziwa Mulungu. Pa thangwi eneyo, mbaleke kuoneka munthu wa kudawisira m'bale wace, peno kum'bera na ucenjeri. Thangwi ninga takupangani kale pontho mbatikucenjezani, Mbuya anadza kaonesa nyatwa onsene anacita penepi. Thangwi Mulungu hadaticemerera pyakuzuda tayu, mbwenye aticemerera kuceneswa. Na tenepo, ule anakhonda pinthu penepi, ali kukhonda munthu tayu, mbwenye ali kukhonda Mulungu anakupasani Nzimu Wakucena. Pa thangwi ya kufunana muubale, nkhabe funika tikulembereni pinango, thangwi imwe ene mwamala kupfundziswa kale na Mulungu kuti mufunane m'bodzi na m'bodzi. Pontho ndimo mwene, imwe musafuna abale onsene a ku dziko ya Masedhonya. Mbwenye tisakupangani abale anga, kuti mupitirize kuthimiza na kucita tenepo. Wangisani toera mukhale na makhaliro akupfulika, mbamuonerera pinthu pyanu pontho mbamuphata basa na manja anu ene, ninga mudakupangani ife, toera mufambe mwakulungama pamaso pa anyakunja, pontho mukhonde kusowa cinthu. Abale anga, ife nkhabe funa kuti mukhale anthu akukhonda kudziwa pa thangwi ya ale anagona, toera muleke kutsukwala ninga anango adasowa cidikhiro. Ngakhala tisatawira kuti Yezu afa, pontho alamuka, tisatawirambo kuti ale anagona muna Yezu, Mulungu anaadzesa pontho pabodzi na Iye. Pinafuna ife kukupangani na fala ya Mbuya ndi kuti, ife tinafuna gumanika mbatiri m'maso, ife tinafuna sala mpaka kubwera kwa Mbuya, nkhabe kuathangira ale anagona. Thangwi pakubveka kwa n'khuwo wa utongi, na fala ya anju wankulu, na pakuimbwa kwa kaluta ya Mulungu, Iye ene Mbuya anadza kachita buluka kudzulu, pontho adafa muna Kirixtu ndiwo anadza katoma kulamuka. Buluka penepo, ife tinafuna gumanika mbatiri m'maso, ife tinafuna sala, tinadza kakwatiwa na mphambvu pabodzi na iwo mbatiyenda m'makole kagumana cidzulu-dzulu na Mbuya. Na tenepo, tinadza kakhala na Mbuya kwenda na kwenda. Na tenepo, matamizanani m'bodzi na m'bodzi na mafala enewa. Abale anga, pa thangwi ya ntsiku na midzidzi inafuna kucitika ipyo, nkhabe funika kukulemberani, thangwi imwe ene musadziwa kakamwe kuti Ntsiku ya Mbuya inabwera ninga mbava na masiku. Pa n'dzidzi unalonga iwo kuti: “Tina ntendere na kukhazikika’’, ndi n'dzidzi unafuna kudza kafubza iwo na mwansanga, ninga kupha kunabva nkazi wakufuna kubala. Nkhabe munthu m'bodzi anafuna kudza kaithawa. Mbwenye imwe, abale anga, muli n'cidima tayu, kuti ntsiku eneyi ikututumuseni ninga mbava. Thangwi imwe monsene ndimwe ana a cieza pontho ndimwe ana a masikati. Sife a masiku peno a n'cidima tayu. Na tenepo, mbatilekeni kugona ninga anthu anango, mbwenye mbatikhaleni akulang'anira pontho na ndzeru. Thangwi ale anagona, asagona na masiku, pontho ale analedzera, asaledzera na masiku. Mbwenye ife anthu a masikati, mbitikhaleni a ndzeru, mbatibvala cikhulupiro na kufunana ninga nguwo za nkhondo, pontho mbatibvala cidikhiro ca upulumuki ninga capeu ca utale. Thangwi Mulungu hadatipikirira kutithabusa tayu, mbwenye toera titambire upulumuki kubulukira muna Mbuya wathu Yezu Kirixtu. Iye atifera toera kuti, peno tiri m'maso, peno tafa, tikhale akuphatana muna Iye. Na thangwi eneyo, pasanani mphambvu pontho muphedzane m'bodzi na m'bodzi, sawa-sawa ninga munacitira imwe. Cincino, ndisakuphembani abale anga, kuti mulemedze ale anakhonda kuneta pakati panu, na basa ya kukutsogolerani na ya kukulangani muna Mbuya. Alemedzeni pikulu kakamwe na kuafuna na thangwi ya mabasa awo. Khalani mu ntendere m'bodzi na m'bodzi. Tisakupangani abale anga, kuti musandike anyakupunguluma, pasani cipapu anyakugopa, phedzani anyakusowa mphambvu, khalani akupirira kuna onsene. Citani mphole kuti akhonde kuoneka munthu wa kubwezera ndzace kuipa na kuipa, mbwenye sakani udidi kuna m'bodzi na m'bodzi, pontho na kuna anthu onsene. Tsandzayani midzidzi yonsene, lekani kuneta na kuphembera, perekani takhuta pa pinthu pyonsene, thangwi kweneku ndi kufuna kwa Mulungu kuna imwe muna Kirixtu Yezu. Lekani kuthimisa Nzimu Wakucena. Lekani kupwaza mafala a ciporofeta, mbwenye leserani pinthu pyonsene, mbamukoya pire pyadidi. Thundani pinthu pyonsene pyakuipa. Iye ene Mulungu wa ntendere akuciteni kuti mukhale akuperekeka kuna Iye pa pyonsene, kuti nzimu wanu, upulumuki wanu onsene, na manungo anu, akoyeke toera mukhonde kusandikwa pakubwera kwa Mbuya wathu Yezu Kirixtu. Ule anakucemerani ndi wakunyindirika, Iye anapicita penepi. Abale anga, tiphembererenimbo. Mwanyikani abale onsene na mpsompsono wa ciubale. Ndaphata myendo, ndisakuphembani patsogolo pana Mbuya, kuti muione tsamba iyi, ibviwe pamaso pa abale onsene. Kukoma ntima kwa Mbuya wathu Yezu Kirixtu mbukukhale na imwe. Ine Paulu, pabodzi na Silivano, na Timoti, ndisalembera abale a gereja ya ku Tesalonika, muna Mulungu Baba wathu, pontho na muna Mbuya Yezu Kirixtu. Kukoma ntima na ntendere unabulukira kuna Mulungu Baba, na kuna Mbuya Yezu Kirixtu, mbapikhale na imwe. Abale anga, tisatongwa kupereka takhuta midzidzi yonsene kuna Mulungu pa thangwi yanu. Penepi ndi pyadidi, thangwi cikhulupiro cina imwe cisakuliratu kakamwe, pontho kufunana kwanu monsene m'bodzi na m'bodzi, kusakuleratu kakamwe. Na thangwi eneyo, tisagaya na imwe pakati pa abale a magereja a Mulungu, thangwi ya kuwangisira kwanu pontho na cikhulupiro canu cinapangisa imwe pakuzondiwa konsene, na pa nyatwa zonsene zinapirira imwe. Penepyo pisapangisa kutonga kwakulungama kwa Mulungu, toera mukhale anthu akukwanira mu Umambo wa Mulungu, unowu unaonerambo imwe nyatwa. Mphyakulungama kuna Mulungu kubwezera nyatwa ale anakuonesani nyatwa, pontho mbapasa kupuma kuli imwe munathabuswa, pontho na ifeenembo. Penepyo pinacitika Mbuya Yezu angaonekera kudzulu, pabodzi na maanju ace a mphambvu, pakati pa malirimi a moto, toera kuonesa nyatwa ale anakhonda kudziwa Mulungu, pontho mbakhonda kubvera Mphangwa Zadidi za Mbuya wathu Yezu. Iwo anaoneswa nyatwa za kufudziwa kwenda na kwenda, nyatwa zakukhala kutali na nkhope ya Mbuya, pontho kutali na mbiri ya mphambvu yace. Penepyo pinadza kacitika ntsiku inafuna kudza kabwera Iye toera kudza kapaswa mbiri n'kati mwa mbumba yace, pontho mbadzumisa kuna onsene adantawira, pabodzi na imwembo adatawira umboni wathu. Na thangwi eneyo, tisakuphembereranimbo midzidzi yonsene, toera Mulungu wathu akuciteni kuti mukhale anthu akukwanira kukhala mudacemererwa imwe, pontho, na mphambvu zace, mukwanise kucita udidi onsene unafuna imwe, pontho na mabasa onsene anabulukira pa cikhulupiro. Na tenepo, dzina ya Mbuya wathu Yezu inapaswa mbiri muna imwe, imwembo munapaswa mbiri muna Iye, ninga kukoma ntima kwa Mulungu wathu na kwa Mbuya Yezu Kirixtu. Cincino abale anga, pa thangwi yakubwera kwa Mbuya wathu Yezu Kirixtu pontho na pakugumanikana kwathu na Iye, tisaphemba kuna imwe kuti mukhonde kuzunguzika na kucimbiza kututumuka, peno na ciporofeta, peno na mafala, peno na tsamba inalongwa kuti yakubuluka kuna ife, ninga Ntsiku ya Mbuya yafika kale. Lekani kusiya munthu kuti akunyengezeni na pang'ono pene. Thangwi mbidzati kufika Ntsiku eneyi, kunaoneka kukhondiwa kwa pinthu pya Mulungu, na tenepo, anati apangizike munthu wa kupwaza mwambo, mwana wakutaika. Unowu asakhonda pontho mbapikuza kupiringana pyonsene pire pinacemerwa Mulungu, peno cinthu cakulambirwa, mpaka kufikira kukhala pa mpando wace mu Nyumba ya Mulungu, mbalonga pakweca kuti iye ene ndi Mulungu. Imwe nkhabe kukumbuka kuti pikhakhala ine na imwe ndikhakupangani pinthu penepi? Pontho cincino imwe musadziwa cinampingiza, toera iye apangizwe pa n'dzidzi wace ungafika. Thangwi pinthu pyakubisala pya munthu wa kupwaza mwambo pyatoma kuphata basa, pidasala ndi kuti abuluswe ule anampingiza cincino. Na tenepo, munthu wa kupwaza mwambo anati apangizwe, ndiye anafuna kudza kaphiwa na Mbuya Yezu pa kumpupusira na muya wa pa mulomo pace, pontho anadza kanfudza na kubwera kwace kwa mbiri. Kubwera kwa munthu unowu wakupwaza Mwambo, kunabulukira pa mabasa a Sathani, na mphambvu zonsene na pidzindikiro pontho na pirengo pya uthambi. Iye anati acite pyonsene pya uthambi pyakusiyana-siyana pyakukhonda kulungama kuli ale anataika, thangwi akhonda kufuna pya ndimo mwene pikhafuna kuapulumusa. Na thangwi eneyo, Mulungu aatumira kunyengerera kukulu, toera atawire uthambi, pontho akoneswe onsene ale adakhonda kutawira pya ndimo mwene, mbwenye akomerwa na pyakukhonda kulungama. Mbwenye ife tisafunika tipereke takhuta kuna Mulungu pa thangwi yanu, imwe abale akufunika na Mbuya, thangwi Mulungu akusankhulani ninga misapu yakutoma toera mupulumuswe kubulukira pa basa ya Nzimu, ya kuperekeka kuna Mulungu, pontho na kukhulupira undimo mwene. Iye akucemererani penepi kubulukira mu Mphangwa Zadidi zidakumwazirani ife, toera mupaswe mbiri ya Mbuya wathu Yezu Kirixtu. Na tenepo, abale anga, khalani dzololo pontho muphatisise mitemo ire idapfundza imwe, peno na mafala, peno na tsamba idakulemberani ife kale. Kuti Iye ene Mbuya wathu Yezu Kirixtu na Mulungu Baba wathu, adatifuna, mbatibalangazana kukoma ntima kwace kwenda na kwenda, pontho mbatipasa cidikhiro cadidi, apase cipapu mitima yanu, pontho akuwangiseni pa udidi onsene, peno pa mabasa, peno pakulonga. Pakumalisa, abale anga, tiphemberereni, toera fala ya Mbuya imwazike na mwansanga pontho ipaswe mbiri, ninga mudacitika kuna imwe. Tiphembererenimbo toera tiombolwe pa anthu anyakudawa na akuipa mitima, thangwi si anthu onsene ana cikhulupiro tayu. Mbwenye Mbuya ndi wakunyindirika. Iye anakupasani mphambvu mbakugugumirani kuna Nyamalwa. Ifembo tisakunyindirani muna Mbuya, kuti imwe musacita, pontho munathimiza basi na kucita pinthu pidakupangani ife. Mbuya mbatsogolere mitima yanu ipite mwakufuna kwa Mulungu na mwakupirira kwa Kirixtu. Abale, tisakupangani mu dzina ya Mbuya wathu Yezu Kirixtu, kuti mucalire abale onsene anyakupolola, pontho mbakhonda kucita sawa-sawa na ntemo udatambira iwo kuna ife. Imwe ene musadziwa kuti musafunika kutoweza pire pidacita ife, thangwi pikhakhala ife na imwe tikhakhala kwene mbatikhonda kuphata basa tayu. Pontho tikhadya ca munthu pezi pyene tayu. Mbwenye masiku na masikati tikhaphata basa ikulu na kuneta, toera tikhonde kulemera m'bodzi wanu. Sikulongera kuti ife nkhabe tawirirwa kuti ticitirwe penepi tayu, mbwenye ndi cipfundzo kwa imwe toera mutikwatire luso. Thangwi mukhakhala ife pabodzi na imwe, tikhakupangani tenepa: Munthu anakhonda kuphata basa, mbalekembo kudya. Thangwi tabva kuti anango pakati panu mbanyakupolola. Iwo nkhabe phata basa, mbwenye mbacita pinthu pyapezi. Anthu enewa, tisaapanga mbitialanga muna Mbuya Yezu Kirixtu, kuti aphate basa mwakupfulika, mbadya pinaphata iwo na manja awo. Mbwenye kuna imwe abale, lekani kuneta na kucita udidi. Ngakhala alipo m'bodzi anakhonda kubvera pidalonga ife pa tsamba iyi, mulang'aniseni mwadidi, pontho lekani kukhala na iye pabodzi, toera akhale na manyadzo. Mphapo lekani kuncita ninga ndi nyamalwa, mbwenye nsandikeni ninga m'bale. Iye ene Mbuya wa ntendere, mbakupaseni ntendere pa midzidzi yonsene pontho na makhaliro onsene akusiyana-siyana. Mbuya mbakhale na imwe monsene. Ine Paulu ndisalemba m'mwanyikiro uyu na manja anga. Ici ndico cidzindikiro canga pa matsamba anga onsene. Malembero anga mbanewa. Kukoma ntima kwa Mbuya wathu Yezu Kirixtu mbukukhale na imwe monsene. Ine Paulu, mpoxtolo wa Kirixtu Yezu, adatumwa na Mulungu Mpulumusi wathu, pontho na Yezu Kirixtu, cidikhiro cathu, ndisalembera iwe Timoti, mwanangadi pa kukhulupira Yezu. Kukoma ntima, ntsisi na ntendere unabuluka kuna Mulungu Baba na kuna Kirixtu Yezu, Mbuya wathu, mbapikhale na iwe. Ine ndisakuphemba kuti ukhale basi mu nzinda wa Efesu, toera upange anthu anango kuti akhonde kupfundzisa pipfundzo pya uthambi, ninga mudakuphemba ine pakwenda kwanga ku dziko ya Masedhonya, pontho kuti akhonde kutsalakana pithankano na madzina akukhonda kumala a ambuya awo, anasosa mphoka yakukhonda kumala, mbapikhonda kumanga basa ya Mulungu inacitwa na cikhulupiro. Cikhafuna ine pa kukulembera ntemo uyu, ndi kufunana kunabulukira muntima wakucena, kunabulukira pa manyerezero adidi a muntima, pontho na pa cikhulupiro ca ndimo mwene. Anthu anango asiya pinthu penepi, mbakakamira mphoka zakusoweka basa, na kufuna kukhala anyakudziwisa a Mwambo, mbakhonda kudziwa pinalonga iwo peno pinatawirira iwo na cinyindiro consene. Tisadziwa kuti Mwambo ndi wadidi, ngakhala munthu asauphatisa basa mwadidi. Pontho tisadziwa kuti mwambo hudacitirwa anyakulungama tayu, mbwenye wacitirwa anyakudodomesa, na anyakukhonda kubvera, na anyakuipa mitima, na anyakudawa, na ale anapwaza pya Mulungu na pyakuphembera, na ale anapha ababa awo na amai awo, na mapanga, na anacita pyalukwali, pontho na anacita lukwali mamuna na mamuna ndzace, na anaba anthu, na anyauthambi, na anyakudumbira pyapezi, na onsene ale anakhonda cipfundzo cadidi. Cipfundzo ici cadidi cisaoneka mu Mphangwa Zadidi za mbiri ya Mulungu wakusimbwa, zidapaswa ine pakunyindirwa. Ndisapereka ndakhuta kuna Kirixtu Yezu Mbuya wathu, adandipasa mphambvu pontho mbandinyindira kuti ndine wakulungama, mbandisankhula toera ndiphate basa, ine munthu wa kuxola kale ene, wakuzonda, pontho munthu wakuchinga, mbwenye ndabverwa ntsisi thangwi ndikhapicita na kukhonda kudziwa, pontho na kukhonda kutawira kwanga. Mphapo kukoma ntima kwa Mbuya wathu kwadzala mbakutaikira muna ine, na cikhulupiro pontho na kufunana kuli muna Kirixtu Yezu. Iyi ndi fala ya kunyindirika, pontho ndi ya kukwanira kutawirirwa konsene kuti: Kirixtu Yezu abwera pa dziko toera kupulumusa anyakudawa, ine ndine adatekereratu pakati pawo. Mbwenye na thangwi eneyi ndabverwa ntsisi, toera muna ine, nyakudawa wankulu, Kirixtu Yezu apangize ukulu wace onsene wa kupirira kwace, mbandicita ninga cipangizo kuna ale anafuna kudza kantawira toera akhale na upulumuki wa kwenda na kwenda. Kuna Iye Mambo wa kwenda na kwenda, Mulungu m'bodzi basi, wakukhonda kufa na wakukhonda kuoneka, mbakuzwe, pontho mbapaswe mbiri kwenda na kwenda. Ameni. Timoti mwana wanga, ndisakupasa ntemo uyu ninga mudalongera ciporofeta pa thangwi yako, toera ungacitoweza, iwe umenye nkhondo yadidi, mbukoya cikhulupiro na manyerezero adidi a muntima adakhondiwa na anango, pontho, na thangwi eneyo, iwo alobzeka pa kukhulupira. Pakati pawo, alipo Imineu na Alixande, enewa ndaapereka kuna Sathani toera apfundze kukhonda kuxola Mulungu. Pakutoma, ndisaphemba kuti mudembetere, muphembere, muphembererane na kuperekera takhuta kuna Mulungu pa thangwi ya anthu onsene, kuli amambo na kuli onsene ale anaphata basa ya utongi, toera tikhale na makhaliro a kutsandzaya na ntendere, pontho na kugopa Mulungu na cilemedzo consene. Penepyo mphyadidi pontho mphyakutsandzaisa patsogolo pana Mulungu, Mpulumusi wathu, anafuna kuti anthu onsene apulumuke, pontho afike pakudziwa undimo mwene. Thangwi alipo Mulungu m'bodzi basi pontho alipo nkhoswe m'bodzi basi, anakhala pakati-na-kati uku Mulungu uku anthu ndiye mamuna Kirixtu Yezu, unowu adaperekeka ekha ene toera kuombola anthu onsene. Uyu ndiwo umboni udacitwa pa n'dzidzi wace. Na thangwi eneyo, ine ndasankhulwa kuti ndikhale nyakumwaza Mphangwa Zadidi, pontho ndikhale mpoxtolo, ndisalonga pya ndimo mwene, si uthambi tayu, ndasankhulwa kuti ndikhale mpfundzisi wa ale adakhonda kukhala madjuda, pa kukhulupira na pa undimo mwene. Na tenepo, ine ndisafuna kuti amuna aphembere m'mbuto zonsene, mbakhalamusa manja awo akucena, mbakhonda kuipirwa pontho mbakhonda kulongana. Sawa-sawambo kuna akazi, ndisafuna kuti iwo akhale akazi akubvala mwadidi, mwakulemedzeka na kwakukhonda kupasa manyadzo pontho. Akhonde kupibalikisa na kumanga tsisi, na kubvala pya oro, na myala inacemerwa perola, peno na nguwo za ntengo ukulu. Mbwenye apibalikise na mabasa adidi, ninga pinafunika kuna akazi analonga kuti: “tisalambira Mulungu.” Nkazi asatongwa apfundze wakumatama, na kubvera konsene. Ine nkhabe kutawirisa kuti nkazi apfundzise peno atonge mamuna, mbwenye mbakhale wakumatama. Thangwi adacitwa pakutoma ndi Adhamu, mbamalisira Eva. Pontho si Adhamu adanyengererwa tayu, mbwenye ndi nkazi. Pakumala kunyengererwa, agwa n'kudawa. Mbwenye nkazi anadza kapulumuswa pakubala ana, male iye angakakamira pa kukhulupira, pakufunana, na pakuperekeka kuna Mulungu. Fala iyi ndi ya kunyindirika, kuti: Ngakhala munthu asankhula kukhala n'tsogoleri, asankhula basa yadidi. Mphapo pisafunika kuti n'tsogoleri akhonde kukhala munthu wakusandikwa, mamuna wankazi m'bodzi basi, munthu wa ndzeru, munthu wakukhurudzika, munthu wakulemedzeka, munthu wakutambira alendo, pontho akhale munthu wakukwanira kupfundzisa, munthu wakukhonda kukundwa na vinyu, wakukhonda kumenyana na andzace, munthu wakufunika, munthu wakukhonda kusosa nthonga, pontho wakukhonda kuumirwa na kobiri. Iye akhale munthu wakutonga mwadidi mudzi wace, mbakhala na ana akum'bvera na akumulemedza konsene. Thangwi munthu angakhonda kwanisa kutonga mudzi wace, anakwanisa tani kutsogolera abale a gereja ya Mulungu? Akhonde kukhala mupsa pakutawira Yezu, toera akhonde kupikuza mbagwa m'bodzi mwene mudakoneswa Dyabu. Pontho asafunika akhale munthu wakulemebza na anthu a kunja, toera akhonde kupwazwa mbamangwa na nsampha wa Sathani. Sawa-sawambo kuna madhiyakoni, asatongwa akhale anthu akukwanira kulemebza, akukhonda kukhala na mafala mawiri, akukhonda kukhala na uxamwali maka na vinyu, anthu akufuna maka mpfuma. Akhale anthu akutoweza pinthu pyakubisala pya cikhulupiro na manyerezero awo adidi a muntima. Anthu enewa, cakutoma asafunika aleserwe. Angamala, ingasoweka thangwi kuna iwo, mbaphate basa ninga dhiyakoni. Sawa-sawambo na akazi, mbakhale anthu akulemedzeka, akusowa mapseda na akunyindirika, mbakhulupirika pa pyonsene. Dhiyakoni asafunika akhale na nkazi m'bodzi basi, pontho mbatonga mwadidi ana ace na mudzi wace. Ale anaphata basa mwadidi, anadza kakhala na mbiri yadidi, pontho anadza kakhala na cipapu cikulu pa kukhulupira muna Kirixtu Yezu. Ndisakulembera pinthu ipi, mbandidikhira kudza kakuona cincino, toera ndingadembuka, udziwe kuti munthu anakhala tani mu Nyumba ya Mulungu. Nyumba eneyi, ndiwo gereja ya Mulungu wa m'maso, nzati na citsidzikiro ca ndimo mwene. Ndimo mwene, ndi pikulu pinthu ipi pyakubisala, pyakuphembera pya kuti: Iye apangizika mbacitika munthu, alungamiswa na Nzimu Wakucena, aoniwa na maanju, alongiwa pakati pa ale adakhonda kukhala madjuda, akhulupirwa pa dziko, pontho atambirwa mu mbiri. Nzimu Wakucena usalonga pakweca kuti pa midzidzi yakumalisa anthu anango anasiya kukhulupira, mbatowerera mizimu yakunyengerera na pipfundzo pya mizimu ya kuipa. Pipfundzo penepi pisabuluka kuna anthu anyakunyengeza na anyauthambi, ana manyerezero awo a muntima akumala kupya na makala a moto, mbakhondesa anthu kucita mabanja na kudya pinthu pidacita Mulungu, toera pitambirwe mbapiperekerwa takhuta na ale anatawira pontho mbadziwa pya ndimo mwene. Thangwi pyonsene pidacita Mulungu ndi pyadidi, nkhabe cibodzi cinafuna kukhondeswa cingaperekerwa takhuta, thangwi cisaceneswa na fala ya Mulungu pontho na m'phembero. Iwe ungaapfundzisa abale pinthu penepi, unakhala nyabasa wadidi wa Kirixtu Yezu, mbudyeswa na mafala a cikhulupiro, pontho na cipfundzo cadidi cinatowerera iwe. Mbwenye ukhonde pithankano pyakusowa basa kuna Mulungu pontho na pya udzemwa, mbukhala na nsambo wakudzowerera kulemedza Mulungu. Thangwi ungakhala na nsambo wa kudzowereza kucita pinafuna manungo, pisaphedzera pang'ono basi. Mbwenye pyakuphembera Mulungu, pisaphedzera pa pinthu pyonsene, thangwi pina cidumbiriro ca upulumuki wa cincino na unafuna kudza. Iyi ndi fala yakunyindirika pontho ndi yakukwanira kutawirirwa konsene. Ngakhala tisaphata basa mbatigwa nkhondo, ndi thangwi taikha cidikhiro cathu muna Mulungu wa m'maso, Mpulumusi wa anthu onsene, maka-maka wa anyakutawira Yezu. Apange, pontho uwapfundzise pinthu penepi. Mbapaleke kuoneka munthu wakukupwaza na thangwi yakukhala m'phale, mbwenye cita kuti ale anyakutawira Yezu akwanise kukutoweza makhaliro ako adidi, pa fala, pa macitiro, pa kufunana, pa kukhulupira pontho na pa kulungama. Mpaka kubwerera kwanga, khala mbuona Bukhu ya Mulungu mbulonga pakweca kuna abale, mbukhalanga na kupfundzisa. Leka kupwaza muwoni udapaswa iwe na mafala a ciporofeta mbuyikhwa manja na nsoka wa atsogoleri. Nyerezera pinthu ipi. Khala mbucita penepi basi, toera anthu onsene aone kukula kwako mu nzimu. Ucite mphole na makhaliro ako na pinapfundzisa iwe. Wangisira pa pinthu penepi, thangwi ungacita penepi, pinapulumusa iwe na ale ene anakubva. Leka kusandika mamuna nkulu na ukali, mbwenye umulange ninga babako ene. Langa aphale ninga abale ako. Langa akazi akulu ninga amai wako, pontho langa atsikana na ntima wakucena, ninga abale ako aakazi. Koya akazi adaferwa na amuna awo, ale anyakusoadi. Mbwenye ngakhala nkazi adaferwa na mamuna ana anace, peno ana adzukulu ace, asatongwa kuti atome ndiwo kupfundza kuncitira ntsisi pa nyumba pawo, mbaabwezera udidi udacitirwa iwo na anyakubala, thangwi penepi ndi pinakomerwa na Mulungu. Nkazi adaferwa na mamuna, ule adacherengadi pontho mbasowa munthu wakum'phedza, asaikha cidikhiro cace kuna Mulungu, pontho asakakamira kuphembera na kudembetera masiku na masikati. Mbwenye kuna ule anasaka pyadziko ino basi, asakhala ninga ali m'maso mbwenye iye afa. Apange pinthu penepi toera akhonde kukhala akusandikwa. Ngakhala alipo munthu anakhonda kukoya abale ace, maka-maka a pa nyumba pace, akhonda cikhulupiro, pontho apiringana ule adakhonda kutawira Yezu. Nkhabe nkazi m'bodzi anafuna kulemberwa dzina yace pa tsamba ya anyakuferwa na amuna, mbakhonda kukhala na pyaka makumatanthatu pyakubalwa, mbakhala na mamuna m'bodzi basi, pontho akhale wakudziwika pa mabasa ace adidi, ninga akukoya ana, akutambira alendo, akutsuka myendo mbumba ya Mulungu, akuphedza ali pa nyatwa, pontho mbacita basa yonsene yadidi. Mbwenye leka kulembera akazi ang'ono adaferwa na amuna awo, thangwi cidadumbirira iwo Kirixtu cingakundiwa na pinthu pya nyama, asafuna acite pontho banja. Na tenepo, iwo anakhala anthu akutongwa, na thangwi ya kusiya cidumbiriro cawo cidacita iwo pakutoma. Si basi penepi tayu, asapfundza kupolola, mbafamba nyumba na nyumba. Pontho si kupolola basi tayu, mbwenye ndi anyapseda asapitirira pinthu kuti si pyawo, mbalonga pinthu pyakukhondeswa kulonga. Na tenepo, ndisafuna kuti akazi ang'ono adaferwa na amuna awo, akhale na banja, alere ana awo, akhonde kupasa nyamalwa njira ya kutixola nayo. Thangwi anango amala buluka mbaenda mbatowera Sathani. Ngakhala alipo nkazi wakutawira Yezu ana abale adaferwa na amuna awo, asafunika aaphedze. Mbaleke kupasa basa abale a gereja, toera akazi adaferwa na amuna awo akusowadi anyakuaphedza, aphedziwe. Akulu anatsogolera mwadidi gereja, asafunika alemebze kawiri, maka-maka ale anacita basa yakumwaza Mphangwa Zadidi na ya kupfundzisa, thangwi Bukhu ya Mulungu isalonga kuti: “Leka kumanga mulomo wa ng'ombe, pa n'dzidzi unating'inda iyo tirigu na nyondo.” Pontho isalonga kuti: “Nyabasa asatongwa atambiriswe.” Leka kubvera munthu anasumira nkulu awa gereja, angakhonda kukhala na anyamaso awiri peno atatu. Ale anadawa asandike pakweca, toera anangombo agope. Ndisakupanga mwakukwana patsogolo pa Mulungu na pa Kirixtu Yezu, pontho na pa maanju adasankhulwa, kuti ukoye mitemo ixi, mbumukhonda kusankhula peno kulang'ana nkhope. Leka kucimbiza kuikha munthu manja, pontho leka kukhala pa nsoka wa anthu anango anacita kudawa. Khala munthu wakucena ntima. Leka kukhala mbumwa madzi basi tayu, mwambo pang'ono vinyu na thangwi ya m'mimba mwako, pontho na thangwi ya kuduwala kunakhala mbucita iwe. Kudawa kwa anango kusaonekera pakweca mbadzati kutongwa. Mbwenye kwa anango, kusaonekera pakumalisa. Sawa-sawambo mabasa adidi asaonekera, pontho ale anakhonda kuonekera, aleke kukhala akubisala. Onsene ale anagumanika pantsi pa udzakazi, asatongwa kulemedza a mbuya awo ninga munafunika na cilemedzo consene, toera dzina ya Mulungu na pinapfundzisa ife pyonsene pikhonde kuxolwa. Ale ana a mbuya awo adatawira Yezu mbaleke kuapwaza na thangwi ya kukhala abale, mbwenye asatongwa aaphatire basa mwadidi kakamwe, thangwi anafuna kuadyera mabasa anu ndi anyakutawira Yezu akufunika. Pfundzisa pontho uwapange pinthu penepi. Munthu angapfundzisa pipfundzo pya uthambi mbapikhonda kubverana na mafala adidi a Mbuya wathu Yezu Kirixtu, pontho na cipfundzo cakukhonda kubverana na kuphembera kwathu Mulungu, unowu ndi munthu wa kupikuza, pontho nkhabe cinthu cinadziwa iye. Kulongana na kuketesana pa thangwi ya mafala, ndi ninga nthenda kuna iye. Penepo ndi panabuluka bibvu, nthonga, kutikanizana, kunyerezera ndzako kuipa, kuidana kwakukhonda kumala pakati pa ale ana ndzeru zakutaika na adasoweka undimo mwene, ale ananyerezera kuti pyakuphembera ndi pinthu pyakusaka napyo kuwina. Ndimo mwene, kuphembera na kutsandzaya ndi pinthu pikulu pinapasa kuwina, thangwi nkhabe cinthu cidadza na ife pa dziko ino, pontho nkhabe cinthu cinakwanisa ife kukwata. Na thangwi eneyo, ngakhala tina cakudya na cakubvala, mbatikomerweni napyo. Mbwenye anafuna kukhala apfumi asagwa m'manyengerero, na m'misampha na mwakufuna pizinji pyakusowa ndzeru na pyakugopsa, pinakwata anthu kuti agwe mu nyatwa na mwakutaika. Thangwi kufuna maka kobiri ndi n'chici wa pyakuipa pyonsene. Anthu anango, na thangwi ya kusirira maka kobiri, asiya kukhulupira mbathabuka okha ene na nyatwa zizinji. Mbwenye iwe, munthu wa Mulungu, thawa pyonsene ipi, saka kulungama, kuphembera, kukhulupira, kufuna, kupirira na kumatama. Menya nkhondo yadidi ya kukhulupira, kwata upulumuki wa kwenda na kwenda Ule udacemererwa iwe, pontho mbuucitira umboni wadidi patsogolo pa anyamaso azinji. Ndisakupanga pamaso pa Mulungu, Ule anapasa moyo pinthu pyonsene, pontho na pamaso pa Kirixtu Yezu, Ule adalonga umboni wadidi pamaso pa Ponsyo Piratu, kuti: Koya matongero awa adidi na akulungama, mpaka kupangizika kwa Mbuya wathu Yezu Kirixtu. Kupangizika kweneku, Mulungu anati akusimbise n'dzidzi wace ungakwana. Mulungu mbasimbwe, pontho ndiye basi Ntongi ekha, Mambo wa amambo, Mbuya wa a mbuya, ndiye basi anakhonda kufa, pontho asakhala pa cieza cakukhonda kufikika, Iye nkhabe munthu adamuona pontho nkhabe kwanisa kumuona. Kukuzwa, pontho na mphambvu za kwenda na kwenda mbizikhale na Iye. Ameni. Apange anyakupfuma a pantsi pano kuti akhonde kugaya, pontho akhonde kunyindira mpfuma zawo za ntsiku ibodzi, mbwenye anyindire Mulungu. Iye anakwanisa kutipasa na ntima onsene pyonsene pinatitsandzaisa. Apange kuti iwo acite udidi, akhale apfumi pa mabasa adidi, akhale anthu akukoma ntima pontho na kudziwa kupasa. Na tenepo, iwo anagumanya mpfuma zawo gumanyira iwo ene, mbazikhala dzololo mpaka midzidzi inafuna kudza, pontho tenepa anadza kakhala na upulumuki wa ndimo mwene. Iwe Timoti, koya pidanyindirwa iwe. Calira makani akuipa akusowa basa, pontho na ndzeru zakukhonda kubverana zinacemera iwo pyawo mwauthambi kuti ndi kudziwa. Anango na kupicita, amalisira kutaika pa kukhulupira. Ntsisi za Mulungu mbizikhale na imwe. Ine Paulu, mpoxtolo wa Kirixtu Yezu na kufuna kwa Mulungu, ninga cipikiriro ca upulumuki ciri muna Kirixtu Yezu, ndisalembera iwe Timoti, mwana wanga wakufunika, kukoma ntima, ntsisi na ntendere wa Mulungu Baba na wa Kirixtu Yezu Mbuya wathu, mbipikhale na iwe. Ndisapereka takhuta kuna Mulungu, anaphatira ine basa na manyerezero adidi a muntima, ninga mukhamphatira a mbuya anga, pa kukumbuka kwanga iwe kazinji kene masiku na masikati, pa miphembero yanga. Ndisakumbuka misozi yako, mbandifuna kuonana na iwe, toera nditsandzaye pikulu kakamwe. Ndisakumbuka cikhulupiro cako ca ndimo mwene, cikhakhala pakutoma na mbuya wako wankazi Loidhe na mai wako Eunise, pontho ndisatawira kuti iwe uli nacombo. Na thangwi eneyo, ndisakukumbusa pontho kuti ulamusire muwoni wa Mulungu uli muna iwe, udakuphemberera ine pa kukusandzika manja anga. Thangwi Mulungu hadatipasa Nzimu wa kugopa tayu, mbwenye atipasa Nzimu wa mphambvu, wa kufunana na wa kukhurudzika. Na tenepo, leka kukhala na manyadzo na kucitira umboni Mbuya wathu, peno na kucitira ine nyaperezo wace, mbwenye na mphambvu za Mulungu, uone nyatwa pabodzi na ine na thangwi ya Mphangwa Zadidi. Iye atipulumusa mbaticemera toera kukhala mbumba ya Mulungu. Si na thangwi ya mabasa athu tayu, mbwenye ndi na thangwi ya kufuna kwace pontho na ntsisi zace. Kukoma ntima kweneku takupaswa muna Kirixtu Yezu, kutomera midzidzi ya kale na kale, mbukupangizika cincino na thangwi ya kubwera kwa Mpulumusi wathu Kirixtu Yezu. Na thangwi ya Mphangwa Zadidi, Iye akunda kufa mbabweresa pakweca upulumuki, pontho na kukhonda kufa kwa kwenda na kwenda. Pa Mphangwa zenezi Zadidi, ndacitwa kuti ndikhale nyakumwaza mphangwa, mpoxtolo, pontho ndikhale mpfundzisi. Na thangwi eneyo, ndisathabuka, mbwenye sinamanyadzo tayu, thangwi ndisan'dziwa mbani anakhulupira ine, pontho ndisatawira kuti Iye ana mphambvu za kukoya pire pinanyindira ine mpaka Ntsiku eneyo. Phatisisa ukwatire luso cipfundzo cadidi cidabva iwe kuna ine pa kukhulupira pontho na pa kufunana muna Kirixtu Yezu. Koya cinthu cadidi cidanyindirwa iwe na thangwi ya Nzimu Wakucena uli muna ife. Iwe usadziwa kuti anthu onsene a dziko ya Azya amala kundithawa, pabodzi na Fijelu, na Erimojeni. Mbuya mbaubvere ntsisi mudzi wa Oneziforu, thangwi kazinji kene iye andipasa cipapu, mbakhonda kukhala na manyadzo na kumangwa kwanga. Mbwenye mudafika iye ku Roma andisaka mbakhonda kuneta, mpaka kundigumana. Mbuya mbam'phedze kuti Ntsiku eneyo agumane ntsisi, kuna Mbuya! Iwe usadziwa mwadidi mwene, mabasa mazinji adandiphatira iye ku Efesu. Na tenepo, iwe mwana wanga, wangisira na kukoma ntima kuli muna Kirixtu Yezu. Pontho, mafala adabva iwe kuna ine pamaso pa amboni azinji, apange anthu akunyindirika anakwanisa kupfundzisambo andzawo. Thabuka pabodzi na ine, ninga nyankhondo wadidi wa Kirixtu Yezu. Nkhabe nyankhondo m'bodzi anaenda kunkhondo mbapingizika na pinthu pyakukhonda kukhala pya nkhondo, thangwi asafuna akome kuna ule adamuendesa ku nkhondo. Pontho nkhabe nyakuthamanga m'bodzi pa mapika anafuna kutambira nthimba ninga nyakuwina, angakhonda kuthamanga ninga munalongera mitemo yawo. Nyakulima anaphata basa na mphambvu zonsene, ndiye anatongwa kudya pakutoma misapu ya m'munda. Pinyerezere mwadidi pidakupanga ine, thangwi Mbuya anakudziwisa pyonsene. Kumbuka Yezu Kirixtu wa dzindza ya Dhavidhi, adalamuka pa kufa, ninga Mphangwa zanga Zadidi zinamwaza ine. Ndi thangwi eneyi idathabukira ine mpaka kumangwa ninga nsumankha. Mbwenye fala ya Mulungu hidamangwa tayu. Na thangwi eneyo, ndisapirira pa pyonsene na thangwi ya anyakusankhulwa, toera kuti iwombo agumane upulumuki uli muna Kirixtu Yezu, na mbiri ya kwenda na kwenda. Fala ya kunyindirika ndi ixi: Ngakhala tafa na Iye, tinakhalambo m'maso na Iye. Tingapirira, tinatongambo pabodzi na Iye. Tingan'khonda, Iye anatikhondambo. Tingakhonda kukhala akunyindirika, Iye anakhala wakunyindirika basi, thangwi anacimwana kukhondeka ekha ene. Akumbuse anthu onsene pinthu penepi, mbuacenjeza mwakukwana patsogolo pana Mulungu, kuti akhonde kuketesana na thangwi ya mafala. Penepi nkhabe kuphedzera cinthu, mbwenye pisataisa ale anabva. Saka kupangizika mwakukwana kuna Mulungu ninga nyabasa wakusowa cinthu cakupasisa manyadzo, pontho mbupfundzisa mwadidi fala ya ndimo mwene. Calira makani akusowa basa na akuipa, thangwi anatowerera penepi, asatekereratu kupwaza Mulungu. Mapfundzisiro awo asanyeka ninga cironda ca diro. Pa nsoka wawo alipo Imineu na Filetu. Enewa asiya pya ndimo mwene, mbalonga kuti kulamuka pa kufa kwamala kucitika kale. Na tenepo, asazunguza kukhulupira kwa anango. Mbwenye miyala yakutsidzikira idaikhwa na Mulungu, na lero nkhabe kutekenyeka, pontho yadhindwa na malemba awa: “Mbuya asadziwa anthu ace,” pontho “Ale onsene analonga dzina ya Mbuya, mbathauke pa pinthu pyakuipa.” Lang'anani, mu nyumba ikulu nkhabe gumanika pyombo pya oro na pya parata basi tayu. Mbwenye pisagumanikambo pya miti na pya dongo. Pinango toera kupasa napyo mbiri, pinango pyakukhonda kupasa mbiri. Munthu anaceneseka pa pinthu penepi, anakhala combo cakupasa mbiri, cidapambulwa, cakufunika kuna Mbuya, pontho mbacisasanyirwa toera kucita basa yonsene yadidi. Thawa kufuna pya kuipa pya uphale, utowere pyakulungama, pyakukhulupira, pyakufunana na pya ntendere na ale anacemera Mbuya na ntima wawo wakucena. Calira panalongwa makani a ciudzemwa, na akusowa basa, thangwi iwe usaadziwa kuti asasosa nthonga. Pisatongwa kuti nyabasa wa Mbuya akhonde kukhala mbasosa nthonga, mbwenye mbakhale munthu wadidi kuna onsene, munthu wakukwana toera kupfundzisa, na wakupirira, asatongwa asandike na kukhurudzika ale anapokanya, na cidikhiro ca kuti Mulungu anaapasa kuchunyuka, mbaakwata kuti adziwe mwadidi pya ndimo mwene, toera tenepa, ndzeru zawo zibwere pontho pakubalwa, mbabuluka pa nsampha wa Dyabu, adaamanga toera iwo acite kufuna kwace. Mbwenye dziwa pinthu ipi: pa ntsiku zakumalisa, inafika midzidzi yakunentsa. Anthu anadza kafuna pyawo basi, anadza kakhala akuumirwa na kobiri, akudungudza, akupikuza, akuxola, akukhonda kubvera anyakubala, akukhonda kusimba, anyakuipa mitima, akukhonda kufuna andzawo, akukhonda kulekererana, anyapseda, akukhonda kuphata ntima, asumankha, anyamalwa a udidi, anyakusandukira andzawo, anyakucimbizira pinthu, anyakugaya, anyakufuna pikulu kakamwe na pinatsandzaisa manungo, kupiringana kucita uxamwali na Mulungu, mbakhala ninga ana cilemedzo na pyakuphembera, mbwenye asakhonda mphambvu zace. Anthu enewa athawembo. Anango pa nsoka wawo ndiwo anapita m'manyumba nyembere-nyembere mbaenda na nyengerera akazi akusowa ndzeru, akudzala na madawi, anthu akutowerera pyonsene pinasirira iwo. Midzidzi yonsene akazi enewa asakhala mbapfundza, mbwenye nkhabe kwanisa kufikira kudziwa pya ndimo mwene. Ninga Djanasi na Djamberi akhapokanyisa Mozesi, iwombo awa onsene asakhonda kubvera pya ndimo mwene. Ndzeru zawo zamala kutaika. Pinakhulupira iwo mphyapezi. Mbwenye iwo hanafika kutali tayu. Thangwi udzemwa wawo, unapangizika kuna anthu onsene, ninga pidacitikambo kuna ale. Mbwenye iwe usatowerera mwadidi mapfundzisiro anga, makhaliro anga, pinanyerezera ine kucita, kukhulupira kwanga, kupirira kwanga, kufuna kunacita ine abale, kuwangisira kwanga, kuzondiwa kwanga, pontho na nyatwa zidaona ine, pinthu pidandicitikira ku mizinda ya Antiyokiya, Ikonyo na Lixtara. Kangasi mbindipirira kuzondiwa! Mbwenye Mbuya andipulumusa pa pyonsene ipi. Ndimo mwene, ale onsene anafuna kukhala mwakuphembera muna Kirixtu Yezu, anazondiwa. Mphapo anyakuipa mitima, na anyakunyengeza andzawo, anadza katekereratu kunyengeza iwo mbanyengezwambo. Mbwenye iwe, kakamira pinthu pidapfundza iwe, pire pidakupita muntima, thangwi usaadziwa mbani adakupfundzisa. Thangwi kutomera pa uwana wako, iwe usapidziwa pidalembwa m'Bukhu ya Mulungu, pinakwanisa kukukhalisa na udziwisi toera upulumuke, kubulukira pa kukhulupira kudacita iwe muna Kirixtu Yezu. Pyonsene piri m'Bukhu ya Mulungu ndi pya Nzimu wa Mulungu, pontho mphyadidi toera kupfundzisa, kusandika, kulanga, na kupfundzisa mwakulungama, toera munthu wa Mulungu akhale wakukwana, na wakusasanyika kakamwe toera kucita basa yonsene yadidi. Ndisakupanga pamaso pa Mulungu na pa Kirixtu Yezu, anafuna kudza katonga ali m'maso na akufa, pakupangizika kwace na pa Umambo wace, kuti: Mwaza fala, khala mbudasasanyira, pa n'dzidzi wadidi peno pa n'dzidzi wakuipa, asandike, apokanyise, alange mbuapfundzisa na kukhurudzika konsene. Thangwi unafika n'dzidzi unafuna kukhonda iwo mapfundzisiro adidi. Mbwenye na kubva ninga kunyangulwa m'makutu, anasaka apfundzisi awo, ninga munapifunira iwo. Iwo anadza kakhonda kubvera pya ndimo mwene, mbatowerera pyapezi. Mbwenye iwe, pa pyonsene ipi, pfulika, pirira pa nyatwa, cita basa ya kumwaza Mphangwa Zadidi, mbutoweza mwadidi basa yako. Mbwenye ine ndiri kuperekwa ninga ntsembe. N'dzidzi wanga wa kwenda uli dhuzi. Ndamenya nkhondo yadidi, ndamalisa mapika a kuthamanga, ndakoya cikhulupiro. Cincino ndakoyerwa nthimba yakulungama inafuna kundipasa Mbuya, Ntongi Wakulungama wa miseru, pa ntsiku eneyo. Pontho sine basi tayu, mbwenye na onsene ale anakomerwa na kubwera kwace. Saka kuti udze kuna ine na mwansanga. Thangwi Dhema, na kufuna dziko ino, andithawa mbaenda ku Tesalonika. Kerexisente aenda ku Galasya, pontho Titu aenda ku Dhalamasya. Adasala na ine ndi Luka basi. Bwera pabodzi na Marku, thangwi iye ndi wadidi pa basa kuna ine. Pontho Tikiku ndantuma kwenda ku Efesu. Iwe ungabwera, bweresa kapoti wanga adasiya ine ku Thorowadhi pa nyumba ya Karipu, na mabukhu anga, maka-maka ale a nthembe. Alixande, nyakukhoma migoro, andicitira pyakuipa pizinji. Mbuya anam'bwezera na pire pidacita iye. Iwe citambo mphole na iye, thangwi akhapokanya pikulu kakamwe mafala athu. Ntsiku yakutoma idatawira ine mathangwi adandipambazira iwo, nkhabe m'bodzi adabulukira toera kundiphedza, mbwenye onsene amala kundithawa. Mulungu mbaleke kuapasa thangwi na penepi. Mbwenye Mbuya akhala na ine mbandipasa mphambvu, toera kuti ine ndilonge mphangwa mwakukwana, pontho, onsene adakhonda kukhala madjuda azibve. Na tenepo, ine ndapulumuswa n'kanwa mwa nkhalamu. Mbuya anandipulumusa pa mabasa onsene a kuipa pontho mbandikwata wakulungama kwenda ku Umambo wace wa kudzulu. Mbiri mbikhale na iye kwenda na kwenda. Ameni. Mbawange Pirisila, na Akila, na mudzi wa Oneziforu. Eraxtu asala ku Korintu, mbwenye Torofimu ndansiya ali kubva kupha ku Miletu. Saka kuti udze n'dzidzi wa khoni mbudzati kufika. Ebhulu, Purudhenti, Linu, Kalaudhya na abale onsene asakuwangisani. Mbuya mbakhale na nzimu wako. Kukoma ntima kwa Mulungu mbakukhale na imwe. Ine Paulu, bichu wa Mulungu, pontho mpoxtolo wa Yezu Kirixtu toera ndiphedze kuwangisa cikhulupiro ca anyakusankhulwa a Mulungu, pontho adziwe undimo mwene unafikisa pa cilemedzo ca kuphembera, pa cikhulupiro pontho na kudziwa kunabulukira pa cidikhiro ca upulumuki wakukhonda kumala, udatipikirira Mulungu wakukhonda kulonga uthambi, kutomera midzidzi ya kale na kale. Mbwenye pa kukwana n'dzidzi wace, apangisa fala yace pakweca, kubulukira pa kumwazwa kwa fala idanyindirwa ine, pa kutumwa na Mulungu Mpulumusi wathu. Ndisalembera iwe Titu mwana wangadi mwakukhulupira kwathu tonsene. Kukoma ntima na ntendere wa Mulungu Baba, na wa Kirixtu Yezu Mpulumusi wathu, mbukukhale na iwe. Thangwi idakusiyira ine ku Kereta, ndi ya kuti iwe usasanyire pinango pikhadasala, pontho wende mbuyikha akulu nzinda ubodzi na ubodzi, ninga mudakupangira ine. Pisafunika kuti nkulu akhale munthu wakukhonda kusandikwa, akhale na nkazi m'bodzi basi, akhale na ana akutawira Yezu, akukhonda kupambazirwa pyakuipa, peno akukhonda kubvera. Pontho na thangwi yakukhala muonereri wa basa ya Mulungu, pisafunika kuti n'tsogoleri akhale wakukhonda kusandikwa, wakukhonda kupikuza, wakukhonda cimbiza na kuipirwa, wakukhonda kukundwa na vinyu, wakukhonda kukhala nyanthonga, pontho akhonde kukhala munthu wakusirira kobiri. Mbwenye pisafunika kuti akhale munthu wakutambira alendo, xamwali wa udidi, wakukhurudzika, wakulungama, wakulemedza pyakuphembera, pontho akhale munthu wakuphata ntima. Pontho asafunika kuti akhale dzololo pa fala yakunyindirika, ninga mudapfundzisirwa iwo, toera akwanise kupasa cipapu andzace na cipfundzo cakulungama, akwanise kupokanyisa ale anaikhonda. Thangwi alipo azinji akukhonda kubvera, anyakulonga pya pezi na pya kunyengerera, maka-maka ale a nsoka wa anyakusibza. Pisafunika kuti iwo amatamiswe, thangwi iwo ali kwenda mbafudza midzi ya anthu, mbapfundzisa pinthu pinakhonda kwanira kupfundziswa, pyonsene toera kuwina kobiri. M'bodzi wa maporofeta awo ene, afikira kulonga tenepa: “Anthu a ku Kereta mbauthambi, akhala ninga pinyama pya n'tsanga, anyakudyesa pontho mbanyakupolola.” Pidalongiwa ndipyodi. Na tenepo, asandike anthu enewa na mphambvu, toera awange pa cikhulupiro cawo, pontho lekani kutsalakana pithankano pinalonga madjuda peno mitemo ya anthu anakhonda undimo mwene. Kuna anthu adaceneswa, pinthu pyonsene pyaceneswa. Mbwenye kuna anthu adakhonda kuceneswa na adakhonda kutawira Yezu, nkhabe cinthu cidaceneswa. Ndimo mwene, kuna anthu enewa, ndzeru zawo na manyerezero awo onsene a muntima, mbakuipa. Iwo asalonga kuti asadziwa Mulungu, mbwenye na mabasa awo asan'khonda. Ndi anthu akunyanyasa, nkhabe kubvera, pontho asacimwana kucita basa yonsene yadidi. Mbwenye iwe Titu, longa ninga munalongera cipfundzo cakulungama. Apfundzise amuna akulu akhale anthu a ndzeru, akulemedzeka, akukhurudzika, akunyindirika, akulungama pa kukhulupira, na pa kufunana na pa kupirira. Ndi pibodzi-bodzi kuna akazi akulu, apfundzise kuti akhale na makhaliro akuphembera Mulungu, mbakhonda kulonga mapseda, pontho akhonde kukundwa na vinyu, mbwenye akhale akazi akupfundzisa udidi, toera apfundzise akazi ang'ono kuti afune amuna awo na ana awo, akhale akukhurudzika, akucena ntima, mbakoya nyumba zawo, akhale adidi pontho akubvera amuna awo, toera fala ya Mulungu ikhonde kuxolwa. Ndi pibodzi-bodzi kuna aphale, apase cipapu kuti akhale akukhurudzika. Pa pyonsene, cita mabasa adidi kuti iwo akwate luso kuna iwe. Kupfundzisa kwako kukhale kwakukwana, pontho kwa ndimo mwene. Khala na malongero akulungama, a kuti nkhabe munthu anafuna kuasandika, toera ale anakupokanya akhale na manyadzo na thangwi yakusowa cinthu ca kutilonga kuipa. Adzakazi asafunika abvere a mbuya awo pa pyonsene, asake kuatsandzaisa, akhonde kupokanyisana na iwo, akhonde kubera a mbuya awo, mbwenye apangize kuti ndi anthu akunyindirika mwakukwana, toera tenepa, cipfundzo ca Mulungu Mpulumusi wathu cisirirwe pa pyonsene. Thangwi kukoma ntima kwa Mulungu kunapulumusa, kwapangizwa anthu onsene. Ntsisi zenezi zisatipfundzisa kuti tisiye kuipa na kusirira pinthu pya padziko, toera tikhale na kukhurudzika, na kulungama, na kulemedza pya kuphembera pa midzidzi ino, pa n'dzidzi unadikhira ife kubwera kwa mbiri ya Mulungu wathu wa nkulu, Mpulumusi wathu Yezu Kirixtu, ndico cidikhiro cathu ca kutsandzaya. Iye aperekeka pa thangwi yathu toera atiombole pa madawi athu onsene, pontho aticenese kuti tikhale mbumba ibodzi yace basi, toera tikhale anthu akufuna kuphata mabasa adidi. Penepi ndipyo pinatongwa iwe kupfundzisa, na kualanga mbuasandika na mphambvu zonsene za utongi. Mbakhonde kuoneka munthu wa kukupwaza. Akumbusireni onsene kuti akhale pantsi pa mwambo wa anyakutonga dziko na mafumu, akhale akubvera, mbakhala akusasanyika midzidzi yonsene toera kucita mabasa onsene adidi, akhonde kulonga pseda munthu, akhale akusowa nthonga, akulekerera, pontho mbapangisa kukhurudzika kwakukwana kuna anthu onsene. Thangwi ifembo kale ene tikhali akusowa ndzeru mbatikhakhonda kubvera, tikhanyengezwa, pontho tikhali adzakazi a pyonsene pyakusirira na pyakutikomera, mbatikhakhala n'kuipa na m'mabibvu, mbatikhakhala akuzondiwa, pontho mbatizondana m'bodzi na m'bodzi. Mbwenye mudadza kapangizika udidi wa Mulungu, Mpulumusi wathu, na kufuna kudacita iye anthu, si thangwi ya mabasa akulungama adacita ife tayu, mbwenye na thangwi ya ntsisi zace, Iye atipulumusa na Nzimu wace udatisambisa na Iye, udaticita kuti tibalwe kapsa pontho tikhale anthu apsa, mbatipasa Nzimu unowu mwakuinjipa, kubulukira muna Mwana wace Yezu Kirixtu, Mpulumusi wathu. Iye acita penepi toera pa kulungamiswa na kukoma ntima kwace, tidze kakhale a unthaka wace, mbatikhala na cidikhiro ca upulumuki wakukhonda kumala. Mafala awa ndi akunyindirika, ndisafuna kuti uwapange pinthu penepi mwakukwana, toera ale anatawira Mulungu akhale mbacita mabasa adidi. Pinthu ipi mphyadidi, pontho pinaphedza anthu. Mbwenye calira makani aciudzemwa, a madzindza a ambuya athu, peno kulongana na kutikanizana pa thangwi ya Mwambo, thangwi pinthu penepi pina basa tayu, pontho nkhabe phedzera cinthu. Kuna ule anacitisa uphambulo pa nsoka, nsandike pakutoma na kaciwiri, angakhonda kubva, n'khondeni. Iwe usadziwa kuti munthu unowu ataika, pontho ali n'kudawa. Iye amala kukoneseka ekha ene. Ndingatuma Aritema peno Titiko mbadza kweneko, usafunika usake n'dzidzi wa kudza kaonana na ine ku nzinda wa Nikopoli, thangwi ndaona kuti n'dzidzi wa khoni ndinaumalira kweneko. Cita pyonsene kuti uphedze Zena, nyakudziwisa wa Mwambo, na Apolo, toera akhonde kusowa cinthu pa ulendo wawo. Kuna ale andzathu, mbapfundzembo kucita mabasa adidi akuphedza na iwo anyakusowa, mbaleka kukhala anthu akukhonda kubala misapu. Onsene ali pabodzi na ine kuno, asakumwanyika. Mwanyikambo ale anatifuna pa kukhulupira. Kukoma ntima kwa Mulungu mbakukhale na imwe monsene. Ine Paulu, nyakufungirwa n'kaidi na thangwi ya Kirixtu Yezu, pabodzi na m'bale wathu Timoti, ndisalemba tsamba iyi kuna iwe Filimoni, ndzathu wakufunika pa basa, pontho na kuna mwana-nkazi wathu Afya, na kuna Arikipu ndzathu wa pa nkhondo, na kuna abale a gereja anaphembera na iwe pa nyumba pako. Kukoma ntima na ntendere unabulukira kuna Mulungu Baba wathu na kuna Mbuya Yezu Kirixtu, mbipikhale na imwe. Ndisapereka takhuta kuna Mulungu wanga kwenda na kwenda, mbandikukumbuka pa maphembero anga, thangwi ndisabva anthu mbalonga kufuna kunacita iwe mbumba yonsene ya Mulungu, na kukhulupira kunacita iwe Mbuya Yezu. Ndisaphembera kuna Mulungu kuti kuphatana kwathu kudabulukira pa cikhulupiro cako, kukhale na mphambvu pa kudziwa mwakukwana udidi onsene uli na ife muna Kirixtu. Mafuniro ako anacita iwe anthu asanditsandzaisa na kundibalangaza, thangwi iwe m'bale wanga usapasa cipapu mitima ya mbumba ya Mulungu. Na thangwi eneyi, ine ndina mphambvu zonsene muna Kirixtu, zakukwanisa kukupanga kuti iwe ucite pire pinatongwa iwe kucita. Mbwenye na thangwi ya kufunana, ndanyerezera kuti ndicite kukuphemba. Ine Paulu ninga nkhalamba, pontho cincino ninga nyaperezo na thangwi ya Kirixtu Yezu, ndisakuphemba na thangwi ya mwana wanga Onezimu, adabala ine mu Nzimu mbindiri n'kaidi. Kale ene, iye akhali munthu wakukhonda kufunika kuna iwe, mbwenye cincino ndi munthu wakufunika kuna iwe na kuna ine. Ndisam'bweza pontho kuna iwe, ntambire ninga usatambira ntima wanga. Ndikhanfuna kuti akhale na ine toera andiphedze pa mbuto yako, pa n'dzidzi uno unakhala ine n'kaidi na thangwi ya Mphangwa Zadidi. Mbwenye ndakhonda cita cinthu ndekha ene, mbindikhonda kubverana na iwe, toera udidi wako ukhonde kukhala wa kukakamizwa, mbwenye upicite na kufuna kwako. Panango ndi thangwi eneyi ikhadamwazana iye na iwe pa n'dzidzi unowu ung'ono, toera angabwerera, ukhale na iye kwenda na kwenda, si ninga n'dzakazi pontho tayu, mbwenye apiringana pa udzakazi, ndi ninga m'bale wakufunika. Kwa ine ndi m'bale wakufunika kakamwe, maka-maka kwa iwe, ninga munthu pontho ninga nyakutawira Mbuya. Na tenepo, ngakhala iwe usandiona ninga ndzako pa kukhulupira, ntambire ninga usatambira ine. Ngakhala Onezimu akudawisira cinthu, peno ana mangawa na iwe, pinthu penepi mbipikhale kuna ine. Ine Paulu, ndisalemba na manja anga. Ine ndinakubwezera pyonsene. Kweneku nkhucimwana kukupanga kuti iwe ene, unamangawa na ine pa upulumuki wako. Ande m'bale wanga, ndikhafuna undibverembo ntsisi muna Mbuya. Pasa cipapu ntima wanga muna Kirixtu. Ndisakulembera tsamba iyi mbindinyinda kuti iwe unandibvera, pontho ndisadziwa kuti unacita pizinji kupiringana penepi pinakuphemba ine. Ndisaphemba pontho kuti mundisasanyire pakufikira, thangwi na maphembero anu, ndisadikhira kuti ndinati ndibwezwe pontho kuna imwe. Epafara, ndzanga ali na ine pabodzi n'kaidi na thangwi ya Kirixtu Yezu, asakuwangisa. Asakuwangisambo pontho Marku, Arixitariku, Dhema na Luka, andzanga a pa basa. Kukoma ntima kwa Mbuya Yezu Kirixtu mbakukhale na nzimu wanu. Kale ene Mulungu alonga kazinji kene na maporofeta kuna ambuya athu, na njira za kusiyana-siyana. Mbwenye ntsiku zino zakumalisa, Iye alonga kuli ife na mulomo wa Mwana wace, ule adapasa iye unthaka wa pinthu pyonsene, pontho adacita na iye dziko yonsene. Mwana unowu ndi kuyetimira kwa mbiri yace, pontho ndiye anapangisa uunthu wakukwana wa Mulungu mbaphata dziko yonsene na fala yace ya mphambvu. Iye, pakumala kucenesa anthu madawi awo, aenda kakhala kudzulu, ku nkono wa madyo wa Mulungu wa mphambvu zonsene. Mbakhala nkulu kakamwe kupita maanju, pontho na dzina idapaswa Iye ndi ikulu kakamwe kupita madzina awo. Thangwi mbani m'bodzi wa maanju akhadapangwa ntsiku inango na Mulungu kuti: “Iwe ndiwe Mwana wanga, lero, Ine ndakubala?” Peno mbampanga pontho kuti: “Ine ndinakhala Baba wace, Iye anakhala Mwana wanga?” Pontho Mulungu mudapereka Iye Mwana wace wa utombo pa dziko alonga tenepa: “Maanju onsene a Mulungu mbamulambire.” Pa thangwi ya maanju, Mulungu alonga tenepa: “Iye asacita maanju ace akhale mphepo, anyabasa ace, akhale malirimi a moto.” Mbwenye pa thangwi ya Mwana alonga tenepa: “Imwe Mulungu, mpando wanu wa umambo unakhala kwenda na kwenda. Mpsimbo yakulungama ndi mpsimbo ya umambo wanu. Musafuna kulungama, musaipirwa na pyakukhonda kulungama. Na thangwi eneyo, Mulungu, Iye Mulungu wanu, akusankhulani pakati pa andzanu, mbakudzodzani na mafuta akutsandzaisa.” Pontho alonga kuti: “Imwe Mbuya, pakutoma mwacita pantsi pano, pontho kudzulu ndi basa ya manja anu. Pyonsene ipi pinadza kamala, mbwenye Imwe ndimwe wa kwenda na kwenda. Pyonsene pinadza kasakala ninga nguwo. Imwe munadza kaafunya ninga kapoti, iwombo anadza kacinjiwa ninga nguwo. Mbwenye Imwe nkhabe kudza kacinjika, pontho ntsiku zanu cipo zinadza kamala.” Mbani m'bodzi wa maanju akhadapangwa ntsiku inango na Mulungu kuti: “Khala ku nkono wanga wa madyo, mpaka panaikha ine anyamalwa ako, ninga cinthu cakupwandira manyalo ako?” Kodi maanju enewa onsene awa, siwo tayu mizimu inaphatira basa Mulungu, idatumiwa toera kuphedzera ale anafuna kudza katambira unthaka wa upulumuki? Na thangwi eneyo, tisafunika tipibvesese kakamwe pire pidabva ife, kuti na lini tikhonde kutaika. Thangwi ngakhala mphangwa zidalongwa na maanju zapangizika kuti ndi za maso, pontho ale adadodomeka na ale adakhonda kuzibvera, aoneswa nyatwa za kuakwanira, tinaomboleka tanimbo ife, tingapwaza kupulumuswa uku kukulu kakamwe? Kupulumuswa kweneku kukhadalongwa pakutoma na Mbuya, ale adapibva mbatipangambo kuti mphyamaso. Mulungu acitambo umboni wa penepi na pidzindikiro, na pyakudzumisa, na pirengo pizinji, pontho na miyoni ya Nzimu Wakucena ukhagawiza Iye ninga munafuna ntima wace. Dziko eneyi inafuna kudza, Mulungu hadaipasa maanju kuti aitonge tayu, mbwenye alipo adacita umboni pa mbuto ibodzi mbalonga kuti: “Kodi ndi ani munthu, kuti Imwe munkumbuke? Peno ndi ani mwana wa munthu kuti muntsalakane? Imwe mwancepesa pa n'dzidzi pang'ono kupita maanju, pontho mbamumpasa mbiri na kunkuza. Pyonsene mwapiyikha pantsi pa manyalo ace.” Pakuikha kwace pinthu pyonsene pantsi pa manyalo ace, nkhabe cibodzi cidasiya Iye kuti cikhonde kukhala pantsi pace. Mphapo cincino, tidzati kupiona kuti pinthu pyonsene piri pantsi pace. Mbwenye anaona ife ndi Yezu, adacepeswa pa n'dzidzi ung'ono, mbaikhwa pantsi pa maanju, toera na kukoma ntima kwa Mulungu, Iye afe, fera anthu onsene. Cincino Iye apaswa mbiri na kukuzwa na thangwi ya kufa kwace. Thangwi Mulungu nciti na nkoyi wa pinthu pyonsene, acita kuti Yezu, pa nyatwa zidaona Iye, akwanire kukhala mwanacinthu upulumuki, na tenepo mbakwanisa kukwata ana azinji mpaka ku mbuto ya mbiri. Apo ule anacenesa na ale anaceneswa, onsene asabuluka kuna m'bodzi basi. Ndi thangwi eneyo, Yezu nkhabe khala na manyadzo na kuacemera abale. Iye alonga tenepa: “Ndinalonga dzina yanu kuna abale anga. Pa nsonkhano wawo ndinakusimbani.” Alonga pontho kuti: “Ine ndinanyindira Iye.” Mbathimiza pontho na kulonga kuti: “Ine ndiri pano, pabodzi na ana adandipasa Mulungu.” Na tenepo, thangwi ana ndi anthu ana nyama na ciropa, Iye akhalambo ninga munthu ana nyama na ciropa, toera na kufa kwace akunde Dyabu, ule ana mphambvu za kupha, pontho asudzule ale a kuti ntsiku zonsene akhacitwa udzakazi, na thangwi ya kugopa kufa. Thangwi ndimo mwene, pisapangizika pakweca kuti anaphedza Iye si maanju tayu, mbwenye asaphedza a dzindza ya Abharaamu. Na thangwi eneyo, pikhafunika kuti akhale sawa-sawa na abale ace pa pyonsene, toera adze kakhale nkulu wa anyantsembe, wa ntsisi, pontho na wakunyindirika na Mulungu, toera kufudza madawi a mbumba. Thangwi na nyatwa zidaona Iye ene pa kunyengererwa kwace, anakwanisa kuphedzambo ale ananyengererwa. Na tenepo, abale anga, mbumba ya Mulungu, imwe muli pabodzi pa kucemerwa kudzulu, nyerezerani Yezu, Mpoxtolo wa Mulungu pontho mbakhala Nkulu wa Anyantsembe anacitira ife umboni. Iye akhali wakunyindirika na ule adamuikha, ninga Mozesi akhala wakunyindirika, na nyumba yonsene ya Mulungu. Yezu alemebza mbapaswa mbiri ikulu kakamwe kupita Mozesi, sawa-sawa ninga nyakumanga nyumba asalemebza pikulu kakamwe kupita nyumba idamanga iye. Thangwi nyumba yonsene isamangwa na munthu, mbwenye Mulungu ndiye adacita pinthu pyonsene. Na tenepo, Mozesi akhali wakunyindirika ninga n'dzakazi pa nyumba yonsene ya Mulungu, mbacita umboni wa pire pikhafuna kudza kalongwa kutsogolo, mbwenye Kirixtu ndi wakunyindirika ninga Mwana, pa Nyumba ya Mulungu. Nyumba eneyi ndife pano, ngakhala tanyindiradi mbatidikhiradi pire pinatipasa mbiri. Tenepo, pinalonga Nzimu Wakucena kuti: “Lero, imwe mungabva fala yace, lekani kuumisa mitima yanu, ninga pidacita ambuya anu pa cikuti, pa n'dzidzi wakuleserwa kwawo n'thando. Ndi mwenemu mudandinyengerera ambuya anu mbandilesera, pakumala kuona mabasa adacita Ine pa pyaka makumanai. Na thangwi eneyo, Ine ndaipirwa na anthu enewa mbindiapanga kuti: Awa mitima yawo isakhala mbidodomeka, iwo nkhabe kudzindikira njira zanga. Na tenepo, Ine ndaipirwa mbindidumbira kuti: Iwo cipo anadza kapita pa mbuto yanga ya kupuma.” Citani mphole abale anga, kuti pakhonde kuoneka m'bodzi wanu na ntima wa kuipa na wakukhonda kutawira, mbasiya Mulungu wa m'maso. Mbwenye pisafunika kuti mupasane cipapu m'bodzi na m'bodzi ntsiku zonsene, pa n'dzidzi unacemerwa “lero’’, toera pakhonde kuoneka m'bodzi wanu aumiswe ntima na thangwi ya kunyengezwa na madawi, thangwi tadza kakhala andzace Kirixtu, male ngakhala ife tanyindiradi mbatiwangisiradi mpaka pakumalisira, ninga mukhanyindira ife pakutoma. Ndi thangwi eneyo pyalongwa kuti: “Ngakhala imwe lero mwabva fala yace, lekani kuumisa mitima yanu, ninga pa cikuti.” Lang'anani, mbani adabva fala ya Mulungu mbacita cikuti? Si ale onsene tayu adabulusa Mozesi mu Idjipitu? Mulungu akhadaipirwa na ani pa pyaka makumanai? Si na ale tayu adadawa mbamala kufa n'thando? Pontho mbani akhadadumbirirwa na Mulungu kuti cipo anadza kapita pa mbuto yace ya kupuma? Siwo ale akhakhonda kubvera tayu? Na tenepo, taona kuti na thangwi yakukhonda kutawira, acimwana kupita. Mphapo mbatigopeni, kuti pakusiyirwa kwathu cidumbiriro ca kupita pa kupuma kunabuluka kuna Mulungu, paleke kuoneka m'bodzi wanu wakuluza. Thangwi Mphangwa Zadidi zidatambira ife, ndi zibodzi-bodzi ninga zidatambira iwo, mbwenye iwo zidaaphedzera cinthu tayu, thangwi azibva mbakhonda kuzitambira na cikhulupiro. Mphapo ife adatawira, ndife anafuna pita pa kupuma kweneku, ninga mudalongera Mulungu kuti: “Na tenepo, ndadumbira na kuipirwa kuti: Cipo iwo anadza kapita pa mbuto yanga ya kupuma.” Mbwenye Mulungu akhadamala kale kucita mabasa ace, kubulukira pakucitwa kwa dziko. Thangwi pa mbuto inango iye alonga pa thangwi ya ntsiku yacinomwe na mafala awa: “Pa ntsiku yacinomwe, Mulungu apuma pa mabasa ace onsene.” Pibodzi-bodzi pyalongwa pontho kuti: “Cipo iwo anadza kapita pa mbuto yanga ya kupuma.” Na tenepo, asala anango kuti apite pa mbuto eneyi yakupuma. Ale akutoma adabva Mphangwa Zadidi acimwana kupita, na thangwi yakukhonda kubvera. Na thangwi eneyo, Mulungu aikha pontho ntsiku ibodzi mbaicemera “lero’’, pakulonga na Dhavidhi pa kupita pyaka pizinji, ninga mukhadalongerwa ipyo kuti: “Ngakhala imwe lero mwabva fala yace, lekani kuumisa mitima yanu.” Thangwi ngakhala Djosuwa akhadaapasa kupuma, Mulungu mbadalongabve tayu pa thangwi ya ntsiku inango. Na tenepo, kuna mbumba ya Mulungu, yasala pontho ntsiku ibodzi ya kupuma, ninga ntsiku yacinomwe. Thangwi onsene ale anapita pa mbuto ya kupuma ya Mulungu, asapumambo pa mabasa awo, ninga Mulungu apuma pa mabasa ace. Na tenepo, mbitiwangisireni kuti tipite pa mbuto eneyi ya kupuma, toera pakhonde kuoneka munthu wa kugwa, mbatoweza macitiro a ale ambuya anu adakhonda kubvera. Thangwi fala ya Mulungu isapulumusa, pontho inamphambvu. Iyo nja kutwa kakamwe kupita matarasada onsene anaceka khundu na khundu. Isapita mpaka pakati-na-kati padagawika nzimu na ndzeru, m'mafunyiro a magogodo na mu unong'o-nong'o, mbiweza manyerezero na ndzeru za muntima. Nkhabepo cinthu cidacitwa mbicikhonda dziwika na Mulungu. Pyonsene pisadziwika, pontho piri pakweca pamaso pa Ule anafuna kutonga mabasa athu. Na tenepo, tinaye nkulu m'bodzi wa anyantsembe adapita kudzulu kakamwe, ndiye Yezu, Mwana wa Mulungu. Na thangwi eneyo mbatiphatisiseni cikhulupiro cinacitira ife umboni. Thangwi nkulu wathu unowu wa anyantsembe, si munthu ene wakukhonda kukhala na ntsisi na kusowa kwathu mphambvu tayu. Mbwenye iye ndi munthu ninga na ife, adapita pa kunyengererwa konsene, mbakhonda kupita n'kudawa. Na tenepo, mbatifendedzereni pa mpando wa umambo, wa kukoma ntima kwa Mulungu na kunyindira konsene, toera tibverwe ntsisi pontho tigumane kukoma ntima kwa Mulungu kunatiphedza pa n'dzidzi wakufunika. Thangwi nkulu onsene wa anyantsembe, asasankhulwa pakati pa anthu, mbathonyiwa kuti akhale muonereri wa anthu pa pinthu pya Mulungu, toera apereke miyoni na ntsembe pa thangwi ya madawi. Iye asakwanisa kubvera ntsisi kuna ale anakhonda kudziwa mbataika, thangwi iye ene anakombo kupolola. Na thangwi eneyo, iye asafunika aikhe ntsembe ya madawi, a mbumba na ace ene. Nkhabe munthu anaikhika ekha ene kuti akhale nkulu wa anyantsembe. Mbwenye asatongwa acemerwe na Mulungu, ninga pidacitikambo kuna Arau. Sawa-sawa na Kirixtu, hadapasika mbiri ekha ene kuti akhale nkulu wa anyantsembe tayu, mbwenye apaswa na Mulungu adampanga kuti: “Iwe ndiwe Mwana wanga, lero, ine ndakubala.” Ninga pidalembwambo m'Bukhu ya Mulungu kuti: “Iwe ndiwe nyantsembe wa kwenda na kwenda ninga unyantsembe wa Melikizedheki.” Yezu pikhakhala Iye pano pa dziko, aphembera mbadembetera, misozi mbibuluka, mbakhuwa pikulu kuna ule akhafuna kukwanisa kumpulumusa pa kufa, mbatawirwa na thangwi ya kubvera kwace. Iye mbali Mwana wa Mulungu, apfundza kubvera pa pinthu pidaonera Iye nyatwa. Onsene adam'bvera atambira upulumuki wakukhonda kumala bulukira muna Iye, mbasankhulwa na Mulungu kuti akhale nkulu wa anyantsembe, ninga unyantsembe wa Melikizedheki. Pa thangwi eneyo, tina pinthu pizinji pya kufuna kulonga, pinthu pyakunentsa na kuchulula, thangwi imwe mwakhala anthu akudembuka na kubvesesa. Thangwi pa midzidzi yonsene idamala imwe, imwe mukhakwanira kukhala apfundzisi, mbwenye asafunika munthu akupfundziseni pontho cipfundzo cakutoma ca fala ya Mulungu. Imwe musafunika basi mupaswe nkaka, nkhabe kwanisa kudya pinthu pyakuuma. Anamwa nkaka aciri mwana basi, thangwi nkhabe cinadziwa iye pa cipfundzo cakulungama. Mbwenye anadya cakuuma ndi akulu. Iwo, na kudzowerera kucita basa, asakhala anthu a kudziwa na akuweza pinthu pyadidi na pyakuipa. Na thangwi eneyo, tendeni kutsogolo na pipfundzo pyacikulu mbatisiya pipfundzo pyakutoma pya thangwi ya Kirixtu. Tikhonde kuikha pontho nchici zakutoma ninga: pya kuchunyuka kucita mabasa anatiyendesa mwa kufa, pya thangwi ya kukhulupira Mulungu, pya thangwi ya pipfundzo pya mabatixmu, pya kusandzika manja, pya kulamuka kwa anyakufa, na pya kutongwa kwa kwenda na kwenda. Tenepa tinenda kutsogolo, Mulungu angafuna. Lang'anani, nkhabe kwanisika kuna ale adamwanikirwa kale, adalawira kale muwoni wa kudzulu, akhali nanthu pa kuphata basa kwa Nzimu Wakucena, adalawira kale udidi wa fala ya Mulungu pontho na mphambvu za midzidzi inafuna kudza, mbwenye mbagwa pa kukhulupira, kuti acemerwe pontho kwenda kachunyuka. Thangwi kuna iwo ene, asan'khomera pontho papsa pa ntanda Mwana wa Mulungu, mban'nyadzisa pakweca. Thangwi mataka anabvumbirwa kazinji kene na mulungu, mbabala misapu ya kuinjipa kuna nyakulima, enewa asatambira nkhombo za Mulungu. Mbwenye mataka anabala minga na tsanga ya kuipa, mataka enewa nkhabebve basa, pontho anati apaswe dzedze mbamalisira kupisiwa. Abale akufunika, pa pyonsene pidalonga ife, tisatawira kuti mwasankhula pinthu pyadidi kuna imwe, pinthudi pya upulumuki. Mulungu ndi wakulungama. Iye nkhabe kudza kaduwala basa yanu, na kunfuna kudampangisa imwe. Thangwi mwakwanisa kuphatira basa mbumba ya Mulungu, pontho na lero musaiphatira. Tisafuna kuti m'bodzi na m'bodzi wanu, apangize phinga ibodzi ene mpaka pakumalisira, toera mukhale na kudikhira kwakukwana. Na tenepo, mukhonde kukhala anthu a kupolola, mbwenye mutoweze ale a kuti kubulukira pa kukhulupira na pa kupirira kwawo, asatambira pidapikirirwa iwo na Mulungu. Mulungu pidapikirira Iye Abharaamu, na kusoweka unango wankulu kupita Iye kuti adumbire na dzina yace, adumbirika ekha ene, mbalonga tenepa: “Dziwa kuti Ine ndinati ndikupase nkhombo, pontho mbandicita kuti dzindza yako ikule kakamwe.” Na tenepo, pakumala kudikhira na kupirira konsene, Abharaamu atambira pikhadapikirirwa iye na Mulungu. Anthu asadumbira na dzina ya unango munthu wankulu kupiringana iwo. Kudumbira nkhulongera kuti pidalongwa ndimo mwene, mbakumalisa mphoka yonsene. Na thangwi eneyo, Mulungu, mukhafuna Iye kupangisa mwakukwana kuna anyaunthaka akupikirirwa kuti pinafuna Iye nkhabe cinjika, apisimbisa na kudumbira. Pa pinthu piwiri ipi pinakhonda kucinja, pikirira na kudumbirira, Mulungu nkhabe kwanisa kulonga uthambi. Tenepo tinakhala dzololo na kuwangisira, ife adathawira muna Iye toera tikwate cidikhiro ciri patsogolo pathu. Cidikhiro cakhala ninga nangula pa makhaliro athu. Ico ndi cakuwanga pontho ciri dzololo. Cidikhiro ceneco cisapita mpaka kunduli kwa nguwo yakusitira inagumanika mu nyumba ya ntsembe, kudapita Yezu adatitsogolera pa mbuto yathu, mbakhala nkulu wa anyantsembe wa kwenda na kwenda, ninga unyantsembe wa Melikizedheki. Melikizedheki unowu, mambo wa Salemu, pontho mbakhala nyantsembe wa Mulungu wa Kudzulu kakamwe, agumana na Abharaamu, mukhabwerera Abharaamu pakumala kukunda amambo, iye mbapasa nkhombo Abharaamu. Abharaamu ampasa Melikizedheki cacikhumi ca pyonsene pikhadatapata iye ku nkhondo. Pakutoma, dzina ya Melikizedheki, nkhubveka “Mambo wakulungama,” Mambo wa Salemu, nkhubveka “Mambo wa ntendere.” Nkhabe lembwa dzina ya baba wace, ya mai wace, peno ya dzindza yace. Nkhabe dziwika kudabalwa iye peno kudafera iye. Acitwa wakulandana na Mwana wa Mulungu. Iye ndi nyantsembe wa kwenda na kwenda. Nyerezerani mwadidi mbiri ikulu ikhali na mamuna uyu. Na iyenembo mbuya wathu Abharaamu afikira kumpasa cacikhumi ca pinthu pidatapata iye! Mwambo wa Mozesi usalonga kuti anyantsembe pakati pa ana a Levi, ndiwo anafunika kuti atambire cacikhumi ca mbumba. Uku nkhubveka, ca abale awo, mbwenye iwo mbali a dzindza ibodzi ene ya Abharaamu. Mbwenye mamuna unowu adakhonda kukhala wa dzindza ya Levi, atambira cacikhumi ca pinthu pya Abharaamu, pontho mbapasa nkhombo Abharaamu ule akhadapikirirwa na Mulungu. Tonsene tisapidziwa kale kuti wa ng'ono asapaswa nkhombo na wankulu. Pakutoma, anyantsembe ale akhatambira cacikhumi, akhali anthu a kuti anadza kafa. Mbwenye pa thangwi yaciwiri, cacikhumi catambirwa na Melikizedheki, ule analongwa kuti ali m'maso. Kweneku nkhubveka kuti iye Levi anatambira pyacikhumi pya mbumba, aperekerwambo cacikhumi cace na Abharaamu, thangwi Melikizedheki mudagumana iye na Abharaamu, Levi akhadzati kubalwa. Mbidakhala pisakwanisika kulungamiswa na unyantsembe wa malevita, pikhafunikeranji pontho oneka nyantsembe unango ninga unyantsembe wa Melikizedheki, mbakhonda kukhala wa dzindza ya Arau? Thangwi na unyantsembe wa malevita, mbumba ya Izarayeli yatambira mwambo. Thangwi unyantsembe ungacinjika, pisafunika kuti mwambo ucinjikembo. Lang'anani, unowu analongerwa pinthu penepi ipi, akhali wa dzindza inangombo ya kuti cipo m'bodzi wawo akhadzati phata basa patsogolo pa guwa ya ntsembe. Thangwi pisadziwika mwadidi mwene kuti Mbuya wathu ndi wa dzindza ya Djudaa, dzindza ya kuti Mozesi hadailonga pa thangwi ya unyantsembe tayu. Ipi pidamala ife kulonga, pinadza kadziwikiratu mwadidi kakamwe angadza kabulukira nyantsembe unango adalandana na Melikizedheki, ule adacitika nyantsembe mbakhonda kutoweza mitemo ya dzindza, mbwenye mbatoweza mphambvu za makhaliro akukhonda kumala. Na tenepo, pyalongwa pa thangwi yace kuti: “Iwe ndiwe nyantsembe wa kwenda na kwenda, ninga unyantsembe wa Melikizedheki.” Mitemo ya kale yasiyiwa, thangwi ikhali nkhabe mphambvu, pontho ikhali na basabve tayu, thangwi Mwambo ukhadalungamisa cinthu tayu. Mbwenye cincino, Mulungu atipasa cidikhiro cikulu, cinakwanisa kutifikisa kuna Iye. Pontho penepi pyacitika na kudumbirirwa. Anango, akhala anyantsembe mbakhonda kudumbirirwa, mbwenye Iye adza kakhala nyantsembe wakudumbirirwa, pa kupangwa na Mulungu kuti: “Mbuya adumbira, pontho Iye nkhabe kudza kasandikika. Iye alonga kuti: ‘Iwe ndiwe nyantsembe wa kwenda na kwenda. ’ ” Na thangwi eneyo, Yezu ndiye ananyindirika pa cibverano ceneci cikulu. Pontho, anyantsembe enewa akhaikhiwa m'bodzi na m'bodzi kufikira ainjipa, thangwi kufa kukhaacimwanisa kupitiriza na basa yawo. Mbwenye na thangwi Yezu ali m'maso kwenda na kwenda, unyantsembe wacembo ndi wakukwana. Na tenepo, Iye anakwanisa kupulumusa mwakukwana ale anapita na pana Iye mbafika kuna Mulungu, thangwi Iye ali m'maso kwenda na kwenda mbakhala na kuaphemberera. Ndi ninga unowu nkulu wa anyantsembe akhafunika, Wakucena, Wakusowa thangwi, Wakukhonda thapula kudawa, Wakupambulwa pa anyakudawa, mbakwizwa kudzulu kakamwe. Mbwenye asiyana na akulu anango aanyantsembe. Kuna Iye nkhabe funika kuti apereke ntsembe ntsiku zonsene, ninga pikhacita iwo, kuti pakutoma akhapereka ntsembe na thangwi ya madawi awo, angamala, mbaperekambo na thangwi ya madawi a mbumba, thangwi Kirixtu apicita kabodzi basi, mbapikwaneratu pyonsene pa kuperekeka kwace Iye ekha. Thangwi Mwambo usaikha akulu aanyantsembe, anthu akusowa mphambvu. Mbwenye cidumbiriro cidabwera pakumala kwa Mwambo, cisaikha Mwana, wakulungama kwenda na kwenda. Cikulu maka-maka cinalonga ife ndi ca kuti, tinaye nkulu wa anyantsembe ninga unowu, adakhala ku nkono wa madyo pa mpando wa Umambo wa Mphambvu za kudzulu. Pontho Iye ndi nyabasa mu mbuto ya Mulungu, nyumbadi ya ntsembe ya Mulungu idamangwa na Mbuya, mbikhonda kucitwa na munthu. Nkulu onsene wa anyantsembe asaikhwa toera kupereka miyoni na ntsembe. Na thangwi eneyo, pikhafunika kuti Iye nyantsembe unowu akhalembo na cinthu ca kupereka. Yezu mbadakhala ali pantsi pano, mbadakhala nyantsembe tayu, thangwi alipo kale ale anapereka miyoni ninga munalongera Mwambo. Iwo asaphata basa mu mbuto ya Mulungu yakusangizira, pontho ndi cithundzi-thundzi ca mbuto ire iri kudzulu, sawa-sawa ninga mudapangirwa Mozesi mukhafuna iye kumanga nyumba ya ntsembe ya Mulungu kuti: “Cita mphole, usafunika ucite pyonsene sawa-sawa ninga mudapangizwa iwe pa phiri.” Mbwenye cincino, basa idapaswa Yezu ndi ikulu kakamwe kupita yawo. Sawa-sawambo na cibverano cidacitira unkhoswe Yezu ndi cikulumbo kupita cakale, thangwi cisabulukira pa pipikiriro pikulumbo. Thangwi cibverano cakutoma mbicidakhala ndi cakukwanira, mbipidafunika kusaka cibverano cinango cipsa tayu. Mbwenye Mulungu aona kuti pidakwana tayu, mbalonga tenepa: “Lang'anani, ziri kufika ntsiku zinafuna Ine kucita cibverano cipsa na mbumba ya Izarayeli pontho na mbumba ya Djudaa. Nkhabe kudza kakhala ninga cibverano cidacita Ine na ambuya awo mudaaphata Ine na manja anga, toera kuabulusa mu dziko ya Idjipitu. Thangwi iwo asiya kubvera cibverano canga, Ine mbindiasiya Ndipyo pidalonga Mbuya. Mbuya alonga tenepa: Ceneci ndi cibverano cinadza kacita Ine na mbumba ya izarayeli, pakupita ntsiku zenezo. Ndinaikha myambo yanga mu ndzeru zawo, pontho mbandiilembera m'mitima mwawo. Ndinati ndikhale Mulungu wawo, iwo anati akhale mbumba yanga. Nkhabebve kudza kapfundzisana, peno m'bale wace mbalonga kuti: ‘Dziwani Mbuya’, thangwi iwo onsene anati andidziwe, kutomera kuna ang'ono mpaka kuna akulu. Thangwi Ine ndinadza kaabvera ntsisi kuipisa kwawo, pontho nkhabe kudza kakumbukabve madawi awo.” Mulungu pa kucicemera “cipsa’’ cibverano ici, nkhulongera kuti cakutoma cadza cakale. Cinthu cinacitika cakale peno cinakulupala, ciri dhuzi na kufuna kumala. Lang'anani, cibverano cakutoma cikhali na mitemo yace ya kulambira nayo Mulungu, pontho cikhali na mbuto ya Mulungu pantsi pano. Yamangwa khumbi ya ntsembe ya Mulungu. Ku khundu ya kutsogolo, mule munacemerwa Mbuto Yakucena, mukhali na nyale ikulu, na meza ikhaikhirwa mikate. Kuntsi kwa nguwo yaciwiri yakusitira, kukhali na mbuto ikhacemerwa Mbuto Yakuceneratu Kakamwe. Mwenemu mukhagumanika guwa ya ntsembe ya oro, ikhapisirwa ntsembe ya pinthu pyakununkhira pinacemerwa isensu. Mukhagumanikambo kaxa ya cibverano yakumala finikizwa na oro. N'kati mwa kaxa eneyi mukhali na mulinga wa oro ukhali na manaa, mpsimbo ya Arau ikhadaphwikira, pontho na matabwa a myala a cibverano za Mbiri, zikhadagudumira na mithundzi yawo mbuto ikhalekererwa madawi. Pa pinthu penepi, nkhabe kwana kupilonga cincino cibodzi na cibodzi tayu. Pyonsene ipi pingamala sasanyirwa, anyantsembe akhapita kazinji kene mu Mbuto Yakucena, N'khumbi ya ntsembe ya Mulungu, kwenda kaphatisa basa yawo. Mbwenye ku Mbuto Yakuceneratu Kakamwe, akhapitako ndi nkulu wa anyantsembe basi, kabodzi basi pa caka. Iye nkhabe pitamo mbakhonda kukwata ciropa ca cinyama, cikhaikha iye ntsembe ikhira iye ekha ene, pontho mbakhaikhirambo kudawa kukhacita mbumba mbakhonda kupidziwa. Na penepi, Nzimu Wakucena ukhapangisa kuti njira ya kwenda ku Mbutodi Yakuceneratu Kakamwe ikhadadzati kufungulwa, pa n'dzidzi ukhaphatiswa basa khumbi yakutoma ya ntsembe ya Mulungu. Penepi ndi cipangizo ca ntsiku zathu za lero, cinapangisa kuti miyoni na ntsembe zikhaikhwa, nkhabe kwanisa kupasa nyakulambira, manyerezero akukwana a muntima. Eneyi ikhali mitemo ya pyakudya basi, na ya pyakumwa, na ya pinango pikhacita iwo pyakucenesa pinthu na madzi. Mitemo eneyo ya kucenesa kunja, ikhatongwa kutowezwa mpaka kupita kwa midzidzi ipsa. Mbwenye Kirixtu pakubwera kwace ninga nkulu wa anyantsembe wa udidi unaona ife cincino, apita mu khumbi ikulu ya ntsembe ya Mulungu yakukwana kakamwe, yakukhonda mangwa na munthu, uku nkhubveka kuti: Si nyumba ya pantsi pano tayu. Hadapitamo na ciropa ca bokho, peno ca mwana ng'ombe tayu, mbwenye na ciropa cace cene, Iye apita kabodzi basi mu Mbuto Yakuceneratu Kakamwe, mbakwanisa kutiombola kwenda na kwenda. Mphapo ngakhala ciropa ca bokho na ca ng'ombe, pontho na madotha a mwana ng'ombe, pingawazirwa kuna ale adakhonda kuceneswa pa mwambo pikhaacenesa pa manungo awo, ndiye tani ciropa ca Kirixtu adasowa madawi, cidapereka Iye na Nzimu wa kwenda na kwenda kuna Mulungu! Cinati cikwanise kutsuka manyerezero athu a muntima pa mabasa anatiyendesa n'kufa, toera tiphatire basa Mulungu wa m'maso. Na thangwi eneyo, Kirixtu ndiye nkhoswe wa cibverano cipsa toera kuti ale adacemerwa, atambire cidumbiriro ca unthaka wakukhonda kumala, thangwi Iye afa ninga muomboli wa madawi adacita iwo mu cibverano cakutoma. Pa thangwi ya cibverano, pisafunika kuti kufa kwa ule adacita cibverano, kudziwikedi na anthu. Thangwi cibverano ca kuphatana cinatoma kuphata basa pa kufa kwa munthu. Ico nkhabe kuphata basa mwanacinthu adacicita mbali m'maso. Na thangwi eneyo, cibverano cakale kuti citome kuoneka, cikhafunikambo ciropa. Mozesi, pakumala kupanga mbumba yonsene mitemo yonsene ya Mwambo, akwata ciropa ca ng'ombe na ciropa ca mabokho pontho na madzi, mbakwata uweya wa kufuira na tsandzu ya muti unacemerwa isopo, mbawazira na iwo bukhu ya Mwambo na mbumba yonsene, mbakhalonga tenepa: “Ici ndi ciropa ca cibverano cidalonga Mulungu kuti imwe mucibvere.” Na ciropa, awazirambo sawa-sawa khumbi ya ntsembe ya Mulungu, na pyombo pyonsene pyakulambira napyo Mulungu. Ndimo mwene, ninga munalongera Mwambo, pinthu pizinji pisaceneswa na ciropa, pontho pangakhonda kutaika ciropa, nkhabepo kulekererwa. Na tenepo, pikhafunika kuti pinthu pidalandana na pinthu pya kudzulu piceneswe na ntsembe zenezi, mbwenye ipyo pyene pinthu pya kudzulu, piceneswembo na ntsembe ikulu kakamwe. Thangwi Kirixtu hadapita mu nyumba ya ntsembe yakucitwa na anthu, ire ikhali cithundzi-thundzi ca ndimo mwene tayu. Mbwenye Iye apita kudzulu, toera cincino atibulukirire patsogolo pana Mulungu. Pontho si kuti aende kaperekeke pontho kazinji kene, sawa-sawa ninga nkulu wa anyantsembe anakhala mbapita pyaka pyonsene, mu Mbuto Yakuceneratu Kakamwe na ciropa ca unango tayu. Mbidakhala ndi tenepo, Kirixtu akhafunika aone nyatwa kazinji kene, kutomera pakutoma kwa dziko. Mbwenye cincino Iye apangizika kabodzi basi, pakumala kwa midzidzi, toera abuluse kudawa na ntsembe idaperekeka Iye ekha. Sawa-sawa ninga munthu asatongwa kuti afe kabodzi basi, angamala mbadikhira kutongwa, tenepambo Kirixtu aperekeka ntsembe kabodzi basi, toera kubulusa madawi a azinji. Iye anadza kabwera pontho kacikawiri, si kudza kabulusa pontho kudawa tayu, mbwenye toera adzese upulumuki kuna ale anan'dikhira. Mwambo usadzesa cithundzi-thundzi basi ca udidi unafuna kudza, mbwenye sipyodi tayu. Na thangwi eneyo, Mwambo, na lini unacita kuti anthu afike pakukwanira kulambira Mulungu, na ntsembe zibodzi zene zinaikha iwo kazinji kene, caka na caka. Mbidakhala Mwambo usakwanisa kulungamisa, ale anacita pinthu penepi mbadacenesweratu kabodzi kene kwenda na kwenda, pontho mbadanentsekabve tayu m'mitima mwawo kuti ndi anyakudawa. Na tenepo, ntsembe mbidafunikabve tayu. Mbwenye ntsembe zenezi zisakumbusira madawi, kabodzi pa caka. Thangwi pisacimwanika kuti ciropa ca ng'ombe na ca mbuzi cibuluse madawi. Ndi thangwi eneyo, pidabwera Kirixtu pa dziko alonga tenepa: “Wakhonda ntsembe na muwoni, mbwenye wandisasanyira manungo. Pontho hudakomerwa tayu na ntsembe za kupiswa kwa pinyama na ntsembe za kufudza kudawa. Na tenepo, Ine ndalonga kuti: Ndiri pano, Mulungu wanga, ndabwera toera kucita kufuna kwanu, ninga mudalemberwa ipyo m'Bukhu pa thangwi yanga. ” Pakutoma Iye alonga kuti: “Ntsembe, miyoni, ntsembe zakupiswa pinyama, na ntsembe za kufudza kudawa, wakhonda.” Pontho hudakomerwa napyo pinthu penepi pikhacitwa ninga mukhalongera Mwambo. Na tenepo, athimiza kulonga kuti: “Ndiri pano. Ndabwera toera kucita kufuna kwanu.” Iye amalisa wakutoma toera aikhe waciwiri. Na thangwi ya kufuna kwace, ife taceneswa na ntsembe ya manungo a Yezu Kirixtu, adaperekwa kabodzi basi kwenda na kwenda. Ntsiku zonsene, nyantsembe m'bodzi na m'bodzi asaenda kacita mabasa ace a unyantsembe. Pontho kazinji kene asapereka ntsembe ibodzi-bodzi, inacita kuti cipo inakwanisa kufudza madawi. Mbwenye Yezu pidamala Iye kupereka ntsembe yace ibodzi basi ya kwenda na kwenda pa thangwi ya madawi, akhala pantsi ku nkono wa madyo wa Mulungu. Kutomera penepo kwenda kutsogolo, Yezu ali kudikhira, mpaka pana ikhwa anyamalwa ace ninga cinthu cakupwandira manyalo ace. Thangwi na ntsembe ibodzi basi, Iye alungamisa kwenda na kwenda onsene ale anaceneswa. Nzimu Wakucena usaticitirambo umboni pa thangwi eneyo. Pakutoma Iwo walonga kuti: “ Mbuya alonga tenepa: Ici ndi cibverano cinafuna kudza kacita Ine na iwo pakupita ntsiku zenezi. Ndinaikha myambo yanga m'mitima mwawo, pontho mbindiilembera mu ndzeru zawo.” Pontho athimiza mbalonga kuti: “Madawi awo na kuipisa kwawo, sinadza kapikumbukabve tayu.” Lang'anani, panalekererwa kudawa, nkhabe kufunikabve kuperekwa ntsembe ya kufudza madawi. Na tenepo abale anga, tinaco cinyindiro cakupita mu Mbuto Yakuceneratu Kakamwe ya Mulungu, na thangwi ya ciropa ca Yezu, pontho na thangwi ya njira ipsa na ya m'maso idatifungulira Iye na nguwo yakusitira, ndiko kubveka, na manungo ace. Thangwi tinaye nkulu wa anyantsembe pa Nyumba ya Mulungu. Na tenepo, mbatifendedzereni kuna Mulungu na ntima onsene, na kukhulupiradi kwakukwana, na kuceneswa kwa manyerezero onsene a kudawa a muntima, pontho na manungo akutsukwa na madzi akucena. Mbatiphatisiseni mwakukwana cidikhiro cinacitira ife umboni, thangwi ule adapikirira ndi wakunyindirika. Na tenepo, tisafunika tinyerezere kuti tinapasana tani cipapu m'bodzi na m'bodzi, toera tifunane mbaticita mabasa adidi. Mbatilekeni kusiya kugumanyikana kwathu ninga abale a gereja, ninga nsambo unacita anango. Mbwenye mbatisakeni kupasana cipapu m'bodzi na m'bodzi, maka-maka mungaona kuti Ntsiku ya Mbuya iri dhuzi. Tingathimiza basi kukhala n'kudawa cakhomu, pakumala kudziwa kale pinthu pya ndimo mwene, nkhabe kudza kaonekabve ntsembe inango ya kufudza nayo madawi enewa tayu. Mbwenye tinadza kadikhira na kugopa kukulu, kutongwa pontho na moto ukulu unadza kapisa anyamalwa a Mulungu. Munthu akhakhonda kubvera Mwambo wa Mozesi, akhaphiwa mbakhonda kubverwa ntsisi, male pingatawirirwa na anyamaso awiri peno atatu. Musaona tani, ndi nyatwa yanji inafuna kudza kaona ale adapwanda Mwana wa Mulungu na manyalo, adaxola ciropa ca cibverano cidaceneswa na iye, peno ule adatikana Nzimu wa kukoma ntima kwa Mulungu? Thangwi tisan'dziwa ule adalonga kuti: “Anafuna kuathabusa ndine. Ine ndinaabwezera.” Pontho alonga kuti: “Mbuya anadza katonga Mbumba yace. ” Ndi pinthu pyakugopsa kakamwe kugwa m'manja mwa Mulungu wa m'maso! Mbwenye kumbukani ntsiku zakutoma pakumala kwanu kumwanikirwa, imwe mwakwanisa kupirira nkhondo ya nyatwa zikulu. Kazinji kene imwe mwatikanwa mbamuoneswa nyatwa pakweca. Pa midzidzi inango mukhakhala ku khundu kwa ale akhaoneswa nyatwa. Thangwi imwe mukhabvera ntsisi ale akhale n'kaidi, pontho mwatawira na kukomerwa konsene pa kupokoserwa mpfuma zanu zene, thangwi mukhapidziwa kuti mpfuma iri na imwe ndi ikulu pontho ndi yakukhonda kumala. Na tenepo, lekani kusiya kunyindira kwanu. Thangwi na kunyindira, munadza kapasiwa m'bairo wanu ukulu. Pinafunika kuna imwe ndi kuwangisira, toera mungadza kacita kufuna kwa Mulungu, mutambire pire pidapikirira Iye. Thangwi cincino, cincino pano, “Ule anafuna kudza anadza kabwera, nkhabe kudembuka. Mbwenye wanga wakulungama anapulumuka na thangwi ya kukhulupira. Pontho, angabwerera n'nduli, Ine nkhabe kudza kakomerwabve na iye.” Mphapo ife, sife anthu a kubwerera n'nduli toera titaike tayu, mbwenye ndife anthu a kukhulupira toera kupulumuswa. Lang'anani, kukhulupira ndi kukhonda kupenula pire pinadikhira ife, pontho ndi undimo mwene wa pinthu pire pinakhonda kuona ife. Thangwi na kukhulupira, anthu akale asimbwa na Mulungu. Na kukhulupira, tisadziwa kuti dziko yonsene yacitwa na fala ya Mulungu. Na tenepo, pire pinakwanisa kuoneka, pyacitwa na pire pinakhonda kuoneka. Na kukhulupira, Abheli apereka ntsembe ikulu kuna Mulungu kupiringana ya Kainu. Na kukhulupira, iye asimbwa ninga wakulungama, pa kutambirwa kwa ntsembe yace na Mulungu. Iye afa, mbwenye na kukhulupira kwace, na lero ali kulonga. Na kukhulupira, Enoki akwatwa wa m'maso kuti akhonde kufa. “Pontho hadadza kaonekabve tayu, thangwi Mulungu akhadankwata.” Thangwi mbadzati kukwatiwa, asimbwa kuti iye atsandzaisa Mulungu. Cingasoweka cikhulupiro, nkhabe kwanisika tsandzaisa Mulungu, thangwi ule anafendedzera kuna Iye, asafunika atawire kuti Mulungu alipo, pontho kuti Iye asapasa m'bairo ale anansaka. Na kukhulupira, Nowa, pa kucenjezwa kwace mu Nzimu pa pinthu pikhafuna kudza kacitika, na kugopa kwace Mulungu, asasanya Arika toera kupulumusa mudzi wace. Na kukhulupira, iye akonesa dziko pontho adza kakhala mwanacinthu unthaka wakulungama kudabuluka pa cikhulupiro. Na kukhulupira, Abharaamu mudacemerwa iye na Mulungu, abvera mbaenda ku mbuto ya unthaka ikhafuna kudza kapaswa iye, mbakhonda dziwako ndi kupi kukhaenda iye. Na kukhulupira, Abharaamu atama mbaenda kakhala ku dziko idapikirirwa iye, mbakhala m'makumbi ninga munthu wakudza pabodzi na Izaki na Djakobo, ale akhadadumbirirwambo unthaka pabodzi na iye. Thangwi iye akhadikhira nzinda wakutsidzikirwa na machikwa akuwanga, kuti nyakutanda na nyakumanga nzinda unowu ndi Mulungu. Na kukhulupira, Abharaamu na iyenembo Sara, na kukhonda kubala kukhali na iye, pontho na kukalamba kukhali na iye, apaswa mphambvu za kubala mwana-mamuna, thangwi iye akhanyindira ule akhadampikirira. Na tenepo, pa munthu unowu m'bodzi, wa kuti akhali nkhabebve mphambvu, adza kabalwa madzindza mazinji ninga nyenyezi za kudzulu, pontho mbacimwana kulengeseka ninga checa ya m'bara. Onsene awa afa mbakhakhulupira, mbacimwana kutambira pire pidapikirirwa iwo. Mbwenye iwo apyona na kutali mbakomerwa napyo, mbacita umboni kuti ndi anthu akudza pontho ndi anyakutama pa dziko. Analonga tenepa asapangisa kuti asasaka dziko yakukhala. Mbidakhala akhainyerezera dziko ire idabuluka iwo, mbadakwanisa kubwererako pontho. Mbwenye iwo akhadikhira na kukomerwa, dziko yadidi kakamwe, uku nkhubveka kuti: akhadikhira dziko yakubuluka kudzulu. Na thangwi eneyo, Mulungu nkhabe kukhala na manyadzo angacemerwa Mulungu wawo, pontho Iye aasasanyira nzinda. Na kukhulupira, Abharaamu mudaleserwa iye na Mulungu, apereka Izaki ninga ntsembe. Ule akhadapikirirwa, akhadamala kusasanyika kuti apereke mwana wace m'bodzi ekha basi, pakumala kupangwa kale na Mulungu kuti: “Dzindza yako inabulukira kuna Izaki.” Abharaamu akhatawira kuti Mulungu ana mphambvu za kulamusa anyakufa, peno tilonge kuti, ampaswa pontho Izaki ninga mwana wakulamuswa pa kufa. Na kukhulupira, Izaki apasa nkhombo Djakobo na Izauu, pa thangwi ya makhaliro awo akutsogolo. Na kukhulupira, Djakobo, mukhali iye dhuzi na kufuna kufa, apasa nkhombo ana a Zuze, m'bodzi na m'bodzi. Iye atsamira pa ntsonga ya mpsimbo yace, mbalambira Mulungu. Na kukhulupira, Zuze, mukhafuna iye kufa, alonga pa thangwi ya kubuluka kwa ana a Izarayeli mu Idjipitu, pontho mbaapanga pikhafuna kucita iwo na magogodo ace. Na kukhulupira, Mozesi, iye mbali khombwani, abisiwa myezi mitatu na babace na mace, thangwi iwo amuona kuti mwana ndi wakubalika, pontho mbakhonda kugopa ntemo ukhadalonga mambo. Na kukhulupira, Mozesi mbali nkulu kale, akhonda kucemerwa mwana wa mwanace Farau wa nkazi, mbatawira pyace kuthabuswa pabodzi na mbumba ya Mulungu, kupiringana kutsandzaya pa n'dzidzi ung'ono basi na pyakudawa. Mozesi, aona kupwazwa kwa Kirixtu ninga mpfuma ikulu kupiringana mpfuma ya mu Idjipitu, thangwi akhalang'anisa m'bairo wace kudzulu. Na kukhulupira, abuluka mu Idjipitu mbakhonda kugopa kuipirwa kwa mambo, mbakhala na phinga thangwi akhaona Ule akhacimwana kuoneka. Na kukhulupira, Mozesi acita phwandu ya Paxkwa, mbakhwaza ciropa m'misuwo, toera nyakupha akhonde kufika kuna ana a utombo a Izarayeli. Na kukhulupira, mbumba ya Izarayeli yawambuka Bara Yakufuira, ninga ali kufamba pa ntunda. Mbwenye ana a mu Idjipitu mukhafuna leserambo iwo kupicita, amala kufa na madzi. Na kukhulupira, ana a Izarayeli amala ntsiku zinomwe mbakhazungulira nzinda wa Djeriko, mipanda ya nzinda mbigomoka. Na kukhulupira, Raabhi nkazi wa lukwali, aatambira mwadidi anthu akhadza katapa nduwa, mbakhonda kuphiwa pabodzi na anyakukhonda kubvera. Ndinalonganji pontho? Nkhabe n'dzidzi wa kulonga pya Gidhiyoni, pya Bharaki, pya Sansau, pya Djefete, pya Dhavidhi, pya Samweli na pya maporofeta. Enewa, na kukhulupira, anango atapata madziko a amambo, acita pyakulungama, apipaswa pidapikirirwa iwo, afunga milomo ya nkhalamu, akunda mphambvu ya moto, pontho apulumuka pa kuphiwa na tarasada. Pa mbuto ya kusowa mphambvu, adza kawanga, mbadza kakhala na mphambvu za kucita nkhondo, mbathamangisa anyankhondo a madziko a kunja. Na kukhulupira, alipo akazi adatambira anyakufa awo adalamuswa pa kufa. Anango athabuswa mpaka kufa mbakhonda kutawira kuombolwa, toera akwanise kuona kulamuka kukulu pa kufa. Anango apirira kusingirirwa na kukwapulwa, amangwa na unyolo mbafungirwa n'kaidi, aphiwa na myala, agwandiwa pakati na saroti, aleserwa, aphiwa na matarasada. Akhafamba balala-balala, mbakhabvala nthembe za mabira, na za mbuzi. Akhacherenga, akhazondiwa, pontho mbakhathabuswa. Iwo akhakhondiwa pa dziko ino yakuipa. Akhaenda mbandzendza n'thando, m'mapiri, m'madzimba na m'madjenje. Awa onsene, asimbwa na thangwi ya kukhulupira kwawo, mbwenye nkhabe m'bodzi wawo adatambira pikhadapikirirwa iwo. Mulungu akhadamala sasanyira kale pinthu pyadidi kakamwe kuna ife, toera iwo akhale akukwana pabodzi na ife. Ngakhala ndi tenepo, na ifembo, na thangwi ya kuzungulirwa na mwinji uyu ukulu wa amboni, mbatisiyeni pyonsene pinatipingiza, pontho na madawi anatimanga. Mbatithamangeni na phinga yonsene pa ndima idapaswa ife, mbatilang'anisa maso athu kuna Yezu, adatoma na kumalisira cikhulupiro cathu. Na kutsandzaya kukhadakoyerwa Iye, apirira nyatwa ya pa ntanda, mbakhonda kutsalakana manyadzo, pontho mbakhala ku nkono wa madyo wa mpando wa Umambo wa Mulungu. Toera imwe mukhonde kuneta n'kati mwanu, pontho mukhonde kumala mphambvu, nyerezerani mwadidi Ule adapirira kuzondiwa kudacitirwa Iye ene na anyakudawa. Pa kumenyana kwanu na kudawa, imwe musati kupirira mpaka kubuluka ciropa canu cene. Imwe mwaduwala mafala akulanga adakupangani iye ninga anace kuti: “Mwana wanga, leka kupwaza kulanga kwa Mbuya, pontho leka kuneta na kusandika kwace angakuthabusa. Thangwi Mbuya asasandika ule anafunika na Iye, pontho asamenya onsene ule anatawira kukhala ninga mwanace.” Pirirani nyatwa, mbamuzitambira ninga muli kulangwa. Mulungu asakucitani ninga ana ace. Thangwi mbani baba anakhonda kusandika mwana wace? Kusandikwa kusagumanika kuna ana onsene. Imwe mungakhonda kusandikwa, nkhulongera kuti imwe simwe anacedi tayu, mbwenye ndimwe ana akudza. Pontho ife tikhali na ababa athu a pa nyama, akhatisandika ife mbatikhaalemedza. Apo ndiye tani, ife nkhabe kufunika tim'bvere Baba wathu wa munzimu, toera tikhale na upulumuki? Ababa athu akhatisandika pa n'dzidzi ung'ono pa pire pinaona iwo kuti mphyadidi. Mbwenye Mulungu asatisandika toera uoneke udidi kuna ife, pontho toera ife tikhale akucena ninga Iye. Kusandikwa konsene, pakutoma nkhabe kutsandzaisa munthu, mbwenye kusapha muntima. Apo pakupita ntsiku zingasi, kusandikwa kusabala kulungama na ntendere, kuna ale adadzowerereswa kulangwa. Na tenepo, wangisani manja anu akusowa mphambvu na mabondo anu akuneta. Sasanyirani njira zakulungama zinafuna kupita na imwe, toera anyakulamala myendo akhonde kububunyuka, mbwenye awangiswe. Wangisirani kukhala mu ntendere na onsene, pontho mbamuperekeka kuna Mulungu. Thangwi mungakhonda kuperekeka kuna Mulungu, nkhabe munthu anadza kaona Mbuya. Cenjerani kuti akhonde kugumanika munthu m'bodzi wakupambulika pa kukoma ntima kwa Mulungu. Pontho pakati panu pakhonde kugumanika n'chici ubodzi wakuwawa kuti ungaphwikira, ukunentseni mbuthapulisa uipi kuna anthu azinji. Pontho mbakhonde kugumanika munthu m'bodzi wakuzuda peno wakupwaza pya Mulungu, ninga pidacita Izauu adagulisa ukulu wace wa mwana wa utombo, na mbale ibodzi basi ya cakudya. Ninga pinadziwa imwe kale, pakumala penepo, mukhafuna iye kutambira nkhombo, akhonderwa. Iye acita pyonsene, kulira na kulira, mbwenye acimwana kusanduza pire pikhadacitika. Imwe mudafika tayu pa phiri ya Sinai ikhakwanisika kugwedzeka iyo mbikhagaka moto, pontho mudafika pa kuswipa, pa cidima, pa conzi ca mphepo, pa kulira kwa kaluta, pa kubveka kwa mafala adacita kuti ale akhaabva, akhaphemba kuti akhonde kuapangwabve. Thangwi akhacimwana kupirira pire pikhatongwa iwo kucita kuti: “Na cinyama cene, cingagwedza phiri, cisatongwa ciphiwe na myala.” Pyonsene pikhacitika pikhali pinthu pyakugopsa kakamwe, mpaka kufikira Mozesi mbalonga kuti: “Ndisadzadzamira na kugopa!” Mbwenye imwe mwafika ku phiri ya Siyau, ku Djerusalema ya kudzulu, ku nzinda wa Mulungu wa m'maso, mwafika kuna pikwi na pikwi pya maanju pa nsonkhano wakutsandzaya, pa gereja ya ana a utombo a Mulungu, ale adalembwa madzina awo kudzulu. Mwafika pana Mulungu, ntongi wa miseru ya anthu onsene. Mwafika kuna mizimu ya anyakulungama akukwana. Mwafika pana Yezu, nkhoswe wa cibverano cipsa. Mwafika pa ciropa cakuwaziwa, cinalonga mwadidi kakamwe kupita ciropa ca Abheli. Cenjerani! Lekani kupokanya Ule analonga. Thangwi, ngakhala ale adakhonda kubvera Ule adaacenjeza pantsi pano aoneswa nyatwa, ndiye tanimbo ife tingathawa Ule anaticenjeza kudzulu? Ule adacita kuti ntsiku inango, na fala yace atekenyesa mataka, lero asapikirira mbalonga kuti: “Ndinati nditekenyese pontho mataka na kudzulu kwene.” Mafala enewa analonga kuti: “Ndinati ndicite pontho papsa’’ asapangisa kufudza pire pinakwanisa kutekenyeswa. Uku ndi kubveka pinthu pyakulengwa, toera pisale pinakhonda kutekenyeka. Na tenepo, na kutambira kunacita ife lero Umambo wakukhonda kutekenyeka, tiperekeni takhuta, pontho mbatilambira Mulungu mwakufunika, na cilemedzo pontho na kun'gopa. Thangwi Mulungu wathu ndi moto unafudza! Khalani basi na kufunana muubale wa Kirixtu. Lekani kuduwala kukhala na ntima wakutambira alendo. Thangwi anango, na kucita penepyo, akwanisa kutambira maanju, iwo mbakhonda kupidziwa. Kumbukani ali n'kaidi ninga muli na iwo pabodzi. Kumbukani anaoneswa nyatwa, ninga ndimwe ene munaoneswa nyatwa. Banja mbikhale yakulemedzeka kuna anthu onsene. Bonde ya banja mbikhale yakulungama, thangwi Mulungu anadza katonga anyalukwali na anyaupombo. Lekani kukundwa na ntima wa kufuna kobiri, mbwenye komerwani na pina imwe, thangwi Iye ene Mulungu alonga kuti: “Cipo ndinadza kakusiya, pontho cipo ndinadza kakuthawa.” Thangwi tinakwanisa kulonga na kunyindira konsene kuti: “Mbuya ndiye nyakundiphedza, ine nkhabe kudza kagopa cinthu. Munthu anandicitanji?” Kumbukani atsogoleri anu, adakupangani fala ya Mulungu. Lang'anisani mwadidi makhaliro akhacita iwo, pontho towezani kukhulupira kwawo. Yezu Kirixtu ndi m'bodzi ene dzulo, lero na kwenda na kwenda. Lekani kutowerera pipfundzo pyapezi pyakusiyana-siyana. Thangwi pyadidi nkhuwangisira mitima yathu na kukoma ntima kwa Mulungu, mbatikhonda kuwangisira na mitemo ya pyakudya, pinakhonda kuphedzera kuna ale anapidya. Ife tinayo guwa ya ntsembe. Penepo nkhabe kutawirirwa kuti adyerepo ale anaphata basa mu khumbi ya ntsembe ya Mulungu. Nkulu wa anyantsembe asakwata ciropa ca pinyama mpaka ku Mbuto Yakuceneratu Kakamwe, ninga ntsembe yakulekerera madawi. Mbwenye manungo a pinyama asapisiwa kunja kwa makumbi. Ndi thangwi eneyo Yezu aonambo nyatwa kunja kwa nsuwo wa nzinda wa Djerusalema, toera kucenesa mbumba na ciropa cace. Na tenepo, mbatibulukeni tiyende kuna Yezu, kunja kwa makumbi, mbatipirirambo kunyadziswa kudapirira Iye. Thangwi pano, ife nkhabe nzinda ubodzi wa kwenda na kwenda, mbwenye tisasaka nzinda unafuna kudza. Na tenepo, na mphambvu za Yezu mbatiperekeni ntsiku zonsene kuna Mulungu ntsembe ya kunsimba nayo. Unowu ndiwo nsapu wa milomo inakuza dzina yace. Lekani kuduwala kucita udidi, mbamugawana pina imwe m'bodzi na m'bodzi, thangwi ntsembe zenezi ndizo zinakomerwa na Mulungu. Bverani atsogoleri anu, mbamucita pinakupangani iwo. Iwo ndiwo anakuonererani ninga ale anafuna kukutawirirani kuna Mulungu. Abvereni, toera mabasa awo akhale akutsandzaya, mbakhonda kualemera. Thangwi angaalemera, nkhabe kukuphedzerani cinthu. Tiphemberereni. Ife tisadziwa kuti tina manyerezero a muntima adidi, pontho tisafuna kukhala na makhaliro akulemedzeka pa pyonsene. Maka-maka kuna ine, ndisakuphembani kuti mundiphemberere toera ndibwerere pontho kuna imwe na mwansanga. Mulungu wa ntendere, adalamusa pa kufa Mbuya wathu Yezu, Nkumbidzi wankulu wa mabira, na thangwi ya ciropa ca cibverano ca kwenda na kwenda, mbakuciteni kuti mukhale anthu akukwana pa udidi onsene, toera mucite kufuna kwace, pontho acite muna ife pire pinan'tsandzaisa patsogolo pace, na thangwi ya Yezu Kirixtu, Ule anafunika kupaswa mbiri ya kwenda na kwenda. Ameni. Abale anga, ndisakuphembani kuti mupirire mafala anga akukulangani. Ndimo mwene, ipi pidakulemberani ine ndi ping'ono. Ndisafuna kukudziwisani kuti m'bale wathu Timoti akhuciwa n'kaidi. Angafika cincino, ndinadza kakuonani pabodzi na iye. Munawangisa atsogoleri anu onsene, na mbumba ya Mulungu yonsene. Abale a ku dziko ya Italya asakuwangisani. Kukoma ntima kwa Mulungu mbukukhale na imwe monsene. Ndine Tiyago, n'dzakazi wa Mulungu na wa Mbuya Yezu Kirixtu. Ndisalembera madzindza khumi na mawiri adamwazika pa dziko yonsene kuti: Mbawange. Abale anga, mphyakutsandzaisa kakamwe mungagwerwa na nyatwa za kuleserwa kwakusiyana-siyana, thangwi imwe musadziwa kuti kuleserwa kwa cikhulupiro canu, kusabala kupirira. Kupirira kweneku mbukukhale kwakukwana, toera imwe mukule pontho mulungame, mbamukhonda kusowa cinthu cibodzi. Ngakhala m'bodzi wanu nkhabe ndzeru, mbaziphembe kuna Mulungu. Iye asapasa onsene na ntima wakucena, mbakhonda kukupasani manyadzo. Munthu unowu, anadza kazitambira. Mbwenye mbaphembe na kukhulupira, mbakhonda kupenula. Thangwi ule anapenula alandana na bimbi ya m'bara, inakwatiwa na mphepo mbiyenda uku na uku. Munthu unowu mbaleke kunyerezera kuti anapaswa cinthu na Mbuya, thangwi ana ndzeru ziwiri, pontho nkhabe kupidziwa pinafuna iye, pa pyonsene pinacita iye. Mbwenye m'bale wakupicepesa, mbatsandzaye pa kukuzwa kwace na Mulungu. Pontho m'bale m'pfumi mbatsandzaye pa kupwazwa kwa mpfuma yace na Mulungu, thangwi iye anadza kauma ninga maluwa a n'tsanga. Thangwi dzuwa isagaka mbipisa, tsanga isauma. Na tenepo, maluwa ace asagwa, kubalika kwawo kusamala. Sawa-sawambo na m'pfumi, anadza kanyala pakati pa mabasa ace. Mbatsandzaye ule munthu anapirira pa kuleserwa, thangwi angakunda kuleserwa, anadza katambira nthimba ya upulumuki idapikirira Mulungu kuna ale ananfuna. Munthu anganyengererwa, mbaleke kulonga kuti: “Ndisanyengererwa na Mulungu.” Thangwi Mulungu nkhabe kwanisa kunyengererwa na kuipa, pontho nkhabe nyengerera munthu. Mbwenye m'bodzi na m'bodzi asanyengererwa na pyakuipa pinasirira iye, ndipyo pinankwewa mbipin'nyengerera. Na tenepo, kusirira kweneku angakutawira, kusabala kudawa. Kudawa kungakula, kusabala kufa. Abale anga akufunika, lekani kunyengezwa tayu. Miyoni yonsene yadidi na yakukwana inapaswa ife, isabuluka kudzulu, mbichita buluka kuna Baba wa cieza consene. Iye nkhabe cinjika makhaliro ace ninga mithundzi inakhala mbicinjika. Na kufuna kwace, Iye atibala na fala ya ndimo mwene, toera tikhale ninga misapu yakutoma pa pyonsene pidacita Iye. Abale anga akufunika, dziwani kuti: Monsene khalani akusasanyika toera kubva, mudembuke na kulonga, pontho mudembuke na kuipirwa, thangwi kuipirwa kwa munthu nkhabe kubala kulungama kunafuna Mulungu. Na tenepo, siyani pyakunyanyasa pyonsene na kuipa kuzinji kudasala na imwe, mbumutambira na kupicepesa konsene fala idachekwa muna imwe inamphambvu za kukupulumusani. Khalani anthu akucita pinalonga fala, mukhonde kukhala anyakubva basi, mbumunyengezeka mwekha ene. Ule anabva fala mbwenye mbakhonda kucita pinalonga iyo, asalandana na munthu analang'ana nkhope yace pa supeyo, pontho angamala lang'anisika ekha ene, asabuluka, pa n'dzidzi ubodzi-bodzi mbaduwala makhaliro a nkhope yace. Mbwenye munthu analang'anisisa mwadidi mwambo wakukwana unadzesa ufulu, mbapirira na kuutoweza mwambo unowu, mbakhonda kuduwala pidabva iye mbwenye mbaucita, anakhala na kutsandzaya na pire pinaphata iye. Munthu ananyerezera kuti ndi nyakulambira Mulungu, mbwenye mbakhonda kuphata lirimi yace, asanyengezeka ekha ene. Kulambira kwace nkhwapezi! Kulambira kwa ndimo mwene na kwakukwana kunafuna Mulungu Baba wathu ndi uku: kuphedza amphawi, na akazi adaferwa na amuna awo pa nyatwa zinaona iwo, pontho mbukhonda kuswipiswa na pinthu pyakunyanyasa pya padziko. Abale anga, ninga anyakukhulupira Yezu Kirixtu Mbuya wathu wa mbiri, lekani kusankhulana peno kulang'ana nkhope ya munthu. Tendeni tione, ngakhala pa nsonkhano wanu apita munthu m'bodzi na mphete n'cala ya oro na nguwo zakubalika, mbapitambo n'cherengi na nguwo zakusakala pontho mbaziswipa, imwe mbumulang'anisa ule adabvala nguwo zakubalika mbumumpanga tenepa: “Imwe khalani apa pa mbuto yadidi,” mbwenye mbumupanga n'cherengi kuti: “Iwe khala dzololo apo,” peno kuti: “Khala pantsi dhuzi na panasandzikira ine myendo yanga.” Tenepa sikusankhulana tayu, mbumukhala anyakutonga miseru a manyerezero akuipa? Bvani abale anga akufunika: Mulungu hadasankhula anaoniwa acherengi pa dziko toera akhale apfumi pa kukhulupira, pontho adye unthaka wa Umambo udapikirira Iye kuna ale ananfuna tayu? Mbwenye imwe musapwaza n'cherengi. Kodi siwo anyakupfuma anakupondererani tayu? Siwo enewa tayu anakukakamizani kwenda ku nyumba zakutongera miseru? Siwo enewa tayu anaxola dzina yadidi idapaswa imwe? Ngakhala imwe musabveradi mwambo wa Umambo unagumanika m'Bukhu ya Mulungu, unalonga kuti: “Funa ndzako ninga iwe ene,” musacita mwadidi. Mbwenye mungasankhulana, muli kudawa, pontho munakoneswa na mwambo ninga anthu akupwaza mwambo. Thangwi ule anakoya mwambo onsene, mbwenye mbapwaza pa matongero mabodzi basi, adawa pa mwambo onsene. Thangwi ule adalonga kuti: “Leka kucita upombo,” alongambo kuti: “Leka kupha munthu.” Ngakhala iwe hudacita upombo tayu, mbwenye wapha munthu, ndiwe nyakupwaza mwambo. Longani, pontho mucite ninga anthu anadza katongwa na mwambo wa ufulu. Thangwi kuna ale adasowa ntsisi kunaoneka kutongwa kwakusowa ntsisi. Ntsisi zinakunda kutongwa! Abale anga, pisaphedzeranji munthu angalonga kuti ndina cikhulupiro mbasowa mabasa? Kodi cikhulupiro ceneci cinakwanisa kumpulumusa? Ngakhala m'bale wathu wa mamuna peno wankazi asowa cakubvala, peno cakudya ca ntsiku na ntsiku, m'bodzi wanu mbampanga tenepa: “Kafikeni mwadidi. Kapisirweni, mudye mbumukhuta,” mbakhonda kumpasa cinthu, penepi pisaphedzeranji? Sawa-sawambo, cikhulupiro cokha cene, cingasowa mabasa, cafa. Mbwenye unango analonga tenepa: “Iwe una cikhulupiro, ine ndina mabasa.” Ndipangize cikhulupiro cako cakusoweka mabasa, ine ndikupangize cikhulupiro canga na mabasa. Iwe usatawira kuti Mulungu ndi m'bodzi basi? Ndimo mwene! Na iyo ene mizimu yakuipa isatawira, pontho mbidzadzamira! Iwe dzemwa! Usafuna udziwe mwadidi kuti cikhulupiro cingasowa mabasa nkhabe kuphedzera cinthu? Kodi Baba wathu Abharaamu hadalungamiswa na mabasa tayu, mudapereka iye mwana wace Izaki pa guwa ya ntsembe? Lang'ana kuti kukhulupira na mabasa pikhaphata basa pabodzi, pontho kukhulupira kwadzadziswa na mabasa. Tenepa, pyasimbiswa m'Bukhu ya Mulungu kuti: “Abharaamu akhulupira Mulungu, penepi pyancita kuti iye atawirirwembo kukhala nyakulungama,” pontho iye adza kacemerwa xamwali wa Mulungu. Onani kuti munthu asalungamiswa na mabasa, si na kukhulupira basi tayu. Pibodzi-bodzi pyacitika na Raabhi nkazi wa lukwali. Iye hadalungamiswa na mabasa tayu, mudatambira iye a ntapa-nduwa mbaabulusa na njira inango? Na tenepo, ninga manungo angasowa nzimu afa, tenepambo cikhulupiro cingasowa mabasa, cafa. Abale anga, azinji anu mbaleke kukhala apfundzisi, thangwi imwe musadziwa kuti ife anapfundzisa tinatongwa pikulu kakamwe. Thangwi tonsene tisadodomeka pa pinthu pizinji. Ngakhala nkhabe anadodomeka pa kulonga, unowu ngwakulungama, pontho anakwanisambo kukunda manungo ace onsene. Tingaikha nkhambala pa mulomo wa kavalo toera iyo itibvere, manungo ace onsene tisakwanisa kuatonga. Kwatiranimbo luso maxitima a m'madzi. Iwo ndi makulu kakamwe mbakwekwetwa na mphepo zikulu, mbwenye asazungunuswa na cing'ombo basi, mbaenda kunafuna nyakutekenya. Ndi sawa-sawambo na lirimi. Ndi phindi ing'ono basi ya m'manungo, mbwenye isagaya na pinthu pikulu pinacita iyo. Lang'anani, nsitu ukulu usapiswa na cimoto cing'ono basi. Na tenepombo, lirimi ndi moto. Ndi dziko yakudzala na kuipa. Yaikhwa pakati pa mapindi a manungo athu mbithapulisa manungo onsene. Isagasa makhaliro onsene a munthu, iyo ene mbipiswa na moto wa mu infernu. Thangwi pinyama pyonsene pyakusiyana-siyana pya n'tsanga, mbalame, pinafamba na mimba, na pya m'bara, pisafuika pontho munthu asakwanisa kupifuya. Mbwenye lirimi, nkhabe munthu anakwanisa kuiphata. Ndi cakuipa cinacimwana kukundika cakudzala na ntombwe wa kupha munthu. Tisasimba nayo Mbuya, Baba wathu, tisapasa nayo dzedze anthu adacitwa mbalandaniswa na Mulungu. Pa mulomo ubodzi-bodzi pasabuluka nkhombo na dzedze. Abale anga, penepi mbapileke kucitika! Kodi pisacitika pa mphuno ibodzi ene ya madzi, mbapabuluka madzi akutapira na madzi akuwawa? Abale anga, pisakwanisika kuti muti wa nsambvu mbubala misapu ya mulivera, peno muti wa mauva mbubala masambvu? Sawa-sawambo na mphuno ya madzi a munyu, nkhabe buluka madzi akutapira. Mbani adacenjera, pontho mbani ana ndzeru pakati panu? Mbapipangize na makhaliro ace adidi, na mabasa anacita iye na kucepeseka kunabulukira pa udziwisi. Mbwenye mungakoya muntima bibvu ya nyongo, na ugungulu, lekani kugaya na penepi, pontho lekani kukhonda pya ndimo mwene. “Ndzeru’’ zenezi, zidabuluka kudzulu tayu, mbwenye ndi za pantsi pano. Si za Nzimu Wakucena tayu, mbwenye ndi za mizimu yakuipa. Thangwi pana bibvu na ugungulu, penepo pana nthonga na uipi wakusiyana-siyana. Mbwenye ndzeru zidabuluka kudzulu, pakutoma ndi zakucena, mbizidza za ntendere, za kulekerera, za kubverana, zakudzala na ntsisi, pontho na za misapu yadidi, zakusowa tsankhulo na zakusowa uthambi. Nsapu wakulungama usabzalwa mu ntendere, kuna ale anasaka kuti uoneke ntendere. Kodi nkhondo na nthonga ziri pakati panu, zisabulukira kupi? Nkhabe bulukira pakusirira kunamenyana n'kati mwanu tayu? Imwe musasirira pinthu, mbwenye nkhabe pina imwe. Musapha, musakhala na bibvu, mbwenye nkhabe kwanisa pinafuna imwe. Imwe musakhala mbamumenyana na kucita nkhondo. Imwe nkhabe pinthu, thangwi nkhabe phemba. Mungaphemba nkhabe kupipaswa, thangwi musapiphemba mwadidi tayu. Musapiphemba toera kupibvunga na pinasirira imwe. Imwe anyaupombo, nkhabe dziwa kuti kucita uxamwali na dziko nkhukhala nyamalwa wa Mulungu? Ule anafuna kukhala xamwali wa dziko, asakhala nyamalwa wa Mulungu. Kodi musanyerezera mphyapezi pinalonga Bukhu ya Mulungu kuti: “Nzimu udaikha Iye muna ife, una nchanje ikulu kakamwe?” Mbwenye Iye asatipangisa kukoma ntima kwace kukulu. Na thangwi eneyo Bukhu ya Mulungu isalonga tenepa: “Mulungu asaidana na anapikuza, mbwenye asapangisa kukoma ntima kwace ale anacepeseka.” Na tenepo, bverani Mulungu. Khondani Dyabu, iye anakuthawani. Fendedzerani Mulungu, Iye anakufendedzeranimbo. Imwe anyakudawa, sambani manja. Cenesani mitima yanu imwe ana ndzeru ziwiri. Tsukwalani, bulirani pontho lirani. Cinjani kuseka kwanu kudze kulira, kutsandzaya kwanu kudze kutsukwala. Cepesekani patsogolo pa Mbuya, Iye anadza kakukuzani. Abale anga, lekani kulongana kuipa m'bodzi na m'bodzi. Analonga ndzace kuipa peno mbakonesa m'bale wace, ali kulonga kuipa mwambo, pontho asakonesa mwambo. Mphapo ngakhala iwe usakonesa mwambo, huli kutoweza mwambo tayu, mbwenye usakhala ninga nyakutonga mwambo. Alipo m'bodzi basi anacita mwambo na anatonga miseru, ule anakwanisa kupulumusa na kupha. Mbwenye iwe ndiwe ani kuti ukonese ndzako? Cincino bveserani imwe analonga kuti: “Lero peno mangwana tinaenda ku nzinda uyu peno ku nzinda ule. Kweneko tinakhala caka cibodzi mbaticita malonda anthu, pontho tinawina kobiri.” Imwe nkhabe kupidziwa pire pinafuna kukucitikirani mangwana! Upulumuki wanu pa nyama ndi ninji? Imwe musakhala ninga nkhungwi, isaoneka n'dzidzi pang'ono, ingamala mbimwazika. Imwe musatongwa kulonga tenepa: “Mbuya angafuna, tinakhala m'maso pontho tinacita ipi peno ipi.” Mbwenye cincino imwe musagaya na manyerezero anu. Kugaya konsene ninga uku, nkhwakuipa. Na tenepo, ule anadziwa kuti asatongwa kucita udidi mbakhonda kuucita, ali kudawa. Cincino bveserani imwe apfumi! Lirani mbamukhuwa, na thangwi ya ucherengi unafuna kukugwerani. Mpfuma zanu zabvunda, pontho nguwo zanu zamala dyiwa na ucenje. Ma oro anu na parata zanu pyamala dzala furuju, pontho furuju zace zinakucitirani umboni wa kuipa. Umboni unowu unadza kapisa manungo anu ninga moto. Imwe mwagumanya mpfuma ntsiku zino zakumalisa. Lang'anani ntengo udatambirisa imwe anyabasa adabvuna minda yanu mbumuabera, uli kukulirirani. Kulira kwa anyakubvuna, kwafika m'makutu mwa Mbuya wa Anyankhondo. Imwe mwakhala mwadidi kakamwe mbamudungudza pa dziko, mbamucita pinafuna imwe, pontho mbamunenepa ninga pifuyo pa ntsiku yakufuna kwenda kaphiwa. Mwankonesa nyakulungama mbamum'pha, iye mbakhonda kucita mphambvu kuna imwe. Na tenepo, abale anga, khalani akupirira mpaka kubwera kwa Mbuya. Lang'anani kudikhira na kupirira kunacita nyakulima misapu yadidi ya m'munda mwace, mpaka kubvumba kwa mulungu wakutoma na wakumalisa wa pacaka. Khalanimbo a kupirira mbumuwangisa mitima yanu, thangwi kubwera kwa Mbuya kuli dhuzi. Abale anga, lekani kusumirana m'bodzi na m'bodzi, toera mukhonde kutongwa. Lang'anani nyakutonga miseru ali pa nsuwo! Abale, kwatirani luso maporofeta adalonga na dzina ya Mbuya, kupirira kudacita iwo pa nyatwa. Ninga imwe musapidziwa, ife tisadziwa kuti anyakutsandzaya ndi ale anapangisa kupirira kwawo. Imwe mwabva kupirira kwa Djobo, pontho mwaona pidancitira Mbuya pakumalisa. Thangwi Mbuya ndi wa ntsisi pontho ndi wakukoma ntima. Maka-maka abale anga, lekani kudumbira, peno kudumbira na kudzulu, peno na pantsi pano, peno kudumbira na dzina ya cinthu cinango. Mbwenye kulonga kwanu mbukukhale “ande,” ande, “nkhabe,” nkhabe, toera mukhonde kutongwa. Alipo anathabuka pakati panu? Mbaphembere. Alipo adakomerwa? Mbaimbe nyimbo zakukuza nazo Mulungu. Alipo anaduwala pakati panu? Mbacemere akulu a gereja kuti am'phemberere, mban'dzoza mafuta na dzina ya Mbuya. Maphembero anacitwa na kukhulupira, anawangisa ntenda. Mbuya anamulamusa. Pontho ngakhala iye adawa, analekererwa. Na tenepo, dambulani madawi anu kuna m'bodzi na m'bodzi, mbamuphembererana m'bodzi na m'bodzi, toera muwangiswe. Kuphembera kwa munthu wakulungama kuna mphambvu zikulu. Eliya akhali munthu ninga ife. Iye aphembera na mphambvu toera mulungu akhonde kubvumba. Na tenepo, pyapita pyaka pitatu na myezi mitanthatu, mulungu mbakhonda kubvumba pantsi pano. Iye aphembera pontho, mulungu mbabvumba, mataka mbabala pontho misapu yawo. Abale anga, m'bodzi wanu angasiya pya ndimo mwene unango mbam'bweza pontho, dziwani kuti: Anakwanisa kubweza nyakudawa ku njira yakutaika, anapulumusa munthu unowu pa kufa, pontho penepi, pisacita kuti madawi mazinji alekererwe. Ine Pedhru, mpoxtolo wa Yezu Kirixtu, ndisalembera ale adasankhulwa na Mulungu, anyakutama adamwazika ku dziko ya Pontu, ali ku Galasya, ali ku Kapadhosya, ali ku dziko ya Azya pontho na ali ku Bhitinya, adasankhulwa kale na kufuna kwa Mulungu Baba, na basa ya Nzimu ya kuperekeka kuna Mulungu toera kubvera Yezu Kirixtu, pontho mutsukwe na ciropa cace. Kukoma ntima na ntendere mbakuinjipe muna imwe. Mbasimbwe Mulungu Baba wa Mbuya wathu Yezu Kirixtu! Na thangwi ya ntsisi zace zikulu, Iye atibala papsa toera tikhale na cidikhiro ca m'maso, na thangwi ya kulamuka kwa Yezu Kirixtu pa akufa, toera tikhale na unthaka wakukhonda kubvunda, wakusoweka midonthi, pontho wakukhonda kumala, udakoyerwa imwe kudzulu kuti, kubulukira pa kukhulupira, musakoiwa na mphambvu za Mulungu mpaka kufika kwa upulumuki uli dhuzi na kupangizwa pa n'dzidzi wakumalisa. Na thangwi eneyo imwe tsandzayani, mbwenye tisapidziwa kuti cincino, pa n'dzidzi ung'ono basi, musatongwa mutsukwale na kuleserwa kwakusiyana-siyana. Penepi pisacitika toera kulesera cikhulupiro cina imwe, cikulu kakamwe kupiringana oro wakusungulwa na moto mbwenye usamala, ndi ca ndimo mwene pontho cinabala kukuzwa, na mbiri, pontho na kusimbwa Yezu Kirixtu angadza kapangizika. Imwe cipo mudzati kumuona, mbwenye musanfuna. Imwe musacimwana kumuona cincino, mbwenye musan'khulupira pontho musankuza na kukomerwa kwakukhonda kulongeka na kwa mbiri, thangwi imwe muli kutambira misapu ya cikhulupiro canu, ndiko kupulumuswa kwa mizimu yanu. Ndi thangwi ya kupulumuswa kweneku kudacita kuti maporofeta adalonga pya thangwi ya kukoma ntima kwa Mulungu kukhadakoyerwa imwe, apipfundza pontho mbapinyerezera mwadidi, mbakhasaka kudziwa n'dzidzi na makhaliro ale akhaapangisa Nzimu wa Kirixtu ukhakhala muna iwo, mukhaapanga iwo nyapantsi nyatwa za Kirixtu mbazidzati kucitika, pontho na mbiri zikhafuna kucitika kutsogolo kwa nyatwa zenezo. Iwo apangizwa mu Nzimu kuti basa inacita iwo asaphatira iwo ene tayu, mbwenye asaphatira imwe, mukhalonga iwo pinthu pinapangwa imwe cincino na ale adakupangani Mphangwa Zadidi na mphambvu za Nzimu Wakucena udatumwa buluka kudzulu. Pinthu pya kuti na anju zene zisafunambo kupidziwa. Na tenepo, khalani akusasanyira mwadidi manyerezero anu pa pire pinafuna imwe kucita. Cenjerani, pontho mbamudikhira kukoma kwa Mulungu kunafuna kupaswa imwe na Yezu Kirixtu pa kupangizika kwace. Ninga ana akubvera Mulungu, lekani kusangizira pontho pinthu pyakuipa pikhasirira imwe kale ene, mbamudzati kudziwa pya ndimo mwene. Mbwenye ninga Ule adakucemerani ndi wakucena ntima, imwe khalanimbo akucena ntima pa pyonsene pinacita imwe, thangwi pyalembwa kuti: “Khalani akucena ntima, thangwi Ine ndine wakucena ntima.” Lang'anani, ngakhala imwe musancemera Baba ule anatonga mbalang'ana mabasa a m'bodzi na m'bodzi basi, mbakhonda kulang'ana nkhope ya munthu, fambani na kugopa pa ulendo wanu pano pa dziko. Thangwi imwe musadziwa kuti si na pinthu pyakumala ninga parata, peno oro, pidaombolwa na imwe pa makhaliro anu apezi a kupulumuka, adakusiyirani ambuya anu tayu, mbwenye mwaombolwa na ciropa cakufunika kakamwe ca Kirixtu, ninga ca mwana bira wakusowa madamba pontho wakukhonda kulamala, wakudziwika dziko mbidzati kucitwa, mbwenye apangizika pa midzidzi ino yakumalisa pa thangwi yanu. Na thangwi yace, imwe mwatawira Mulungu adamulamusa pa akufa, pontho mbampasa mbiri, kuti kukhulupira na kudikhira kwanu kuli muna Mulungu. Cincino imwe pakumala kuceneswa makhaliro anu pakubvera pya ndimo mwene, toera kufunana muubale mwa ndimo mwene, mufunanedi m'bodzi na m'bodzi pontho na ntima onsene. Imwe mwabalwa kapsa, si na mbeu inafa tayu mbwenye inakhonda kufa, na thangwi ya fala ya m'maso ya Mulungu, pontho ya kwenda na kwenda. Thangwi “anthu onsene akhala ninga tsanga, pontho mbiri yawo yonsene, ninga maluwa a n'tsanga. Tsanga isanyala, maluwa ace mbagwa, mbwenye fala ya Mbuya isakhala kwenda na kwenda.” Iyi ndiyo fala idapangwa imwe. Na tenepo, bulukani pa uipi onsene pontho na pakunyengererana konsene, pa uthambi, pa mabibvu, pontho na pa mapseda onsene akusiyana-siyana. Funani na ntima onsene nkaka wa mu nzimu wakukhonda kubvungazwa na pinango, ninga ana a pabere, toera na nkaka unowu mukule mbamupulumuka, thangwi mwadzindikira kale kuti Mbuya ndi udidi. pakufendedzera kwanu kuna Iye, mwala wa m'maso, udakhondiwa na anthu, mbwenye wasankhulwa na wakufunika na Mulungu. Imwembo musacitwa ninga myala ya m'maso, pakumangwa nyumba ibodzi ya mu nzimu, toera mukhale anyantsembe akuphatira basa Mulungu, kuti muikhe ntsembe za mu nzimu, zakutawirirwa na Mulungu, na thangwi ya Yezu Kirixtu. Thangwi Bukhu ya Mulungu isalonga tenepa: “Lang'anani, ndinaikha pa phiri ya Siyau mwala wa pa nkhomu, wakusankhulwa pontho wakufunika kakamwe. Apo ule anaukhulupira nkhabebve kudza kasandikika.” Na tenepo, kuna imwe anakhulupira, mwala uyu ndi wakufunika kakamwe. Mbwenye kuna ale anakhonda kukhulupira, “mwala udakhondiwa na anyakumanga nyumba, wacitika mwala wa pa nkhomu,” pontho wacitika “mwala wakugwegwedusa, na mwala ukulu unagwisa.” Iwo asagwegweduka thangwi nkhabe kutawira fala ya Mulungu, thangwi ndi penepi pikhafuna Mulungu kuna iwo. Mbwenye imwe ndimwe dzindza yakusankhulwa, anyantsembe a Mambo, mbumba yakulungama, mbumba ya Mulungu, toera kumwaza mabasa akudzumisa a Ule adakucemerani n'cidima kwenda ku cieza cace cakudzumisa. Kale ene imwe mukhali mbumba tayu, mbwenye cincino ndimwe mbumba ya Mulungu. Imwe mukhabverwa ntsisi na Iye tayu, mbwenye cincino mwabverwa ntsisi. Abale akufunika, imwe ninga anthu akudza, peno anyakutama pa dziko, ndisakuphembani kuti muthunde pinafuna nyama, pinagwa nkhondo na nzimu. Pangisani makhaliro adidi pakati pa ale anakhonda kutawira Yezu, toera kuti angakupambazirani pyakuipa, aone udidi unacita imwe mbakuza napyo Mulungu ntsiku yakubwera kwace. Na thangwi ya Mbuya, bverani utongi onsene wa padziko. Peno kuna mambo ninga ntongi wankulu, peno atongi akutumwa na iye toera kuthabusa ale anacita kuipa, na kusimba ale anacita udidi. Thangwi Mulungu asafuna kuti na kucita kwanu udidi, madzemwa anakhonda kudziwa, asowe pyakulonga kuna imwe. Khalani ninga anthu akusudzuka, mbwenye lekani kupambazira kusudzuka kwanu toera muone njira yakucita nayo kuipa. Khalani ninga adzakazi a Mulungu. Lemedzani anthu onsene, funani abale onsene muna Kirixtu, gopani Mulungu, lemedzani mambo. Imwe adzakazi, bverani ambuya anu na kualemedza konsene. Si kuna ale basi adidi na analekerera tayu, mbwenye na kuna alembo akuipa ntima. Thangwi mphyadidi kuna munthu kupirira nyatwa mbasoweka mathangwi, mbadziwa kuti ndi kufuna kwa Mulungu. Thangwi ninji cinafuna kuwina munthu angapirira kuthabuswa na thangwi ya kucita pyakuipa? Mbwenye mungapirira na kuona nyatwa na thangwi ya kucita udidi, penepyo mphyakusimbwa patsogolo pa Mulungu. Penepi ndipyo pidacemererwa imwe, thangwi Kirixtu aonambo nyatwa pa thangwi yanu. Iye acita penepyo toera mumulandire, kuti mulonde manyalo ace. “ Iye nkhabe kudawa kubodzi kudacita Iye, pontho nkhabe uthambi ubodzi udalonga Iye na mulomo wace.” Angatikanwa, hakhabwezerambo tayu. Pikhaona Iye nyatwa, hadaathusa tayu, mbwenye akhapereka pyonsene m'manja mwa Ule anatonga mwakulungama. Iye ene Kirixtu akwata madawi athu m'manungo mwace mbaenda na iwo pa ntanda, toera tikhale anthu akufa pa madawi, mbatikhala am'maso pa pinthu pyakulungama. Na pironda pyace, imwe mwawangiswa. Thangwi imwe mukhakhala ninga mabira akutaika. Mbwenye cincino mwazungunuka kuna Nkumbidzi pontho Muonereri wa mizimu yanu. Sawa-sawambo imwe akazi, bverani amuna anu, toera ngakhala iwo adzati kutawira fala, akundike na macitiro adidi a akazi awo mbamukhonda kulonga cinthu, pakulang'ana makhaliro anu adidi pontho akulemedzeka. Kubalika kwanu mbakuleke kukhala kwa kunja, ninga kwakumanga tsisi, pontho na kubvala mphete za oro, peno na nguwo za ntengo ukulu. Mbwenye kubalika kwanu kwakukhonda kumala mbakukhale n'kati mwa ntima, kubalika kunapangisa nzimu wakubverana na wakukhurudzika, penepyo ndipyo pinafunika kakamwe kuna Mulungu. Thangwi akazi akale akulungama, ale akhadikhira Mulungu, akhakhala na nsambo wakubvalirambo tenepo. Iwo, m'bodzi na m'bodzi akhabvera amuna awo, ninga Sara, akhabvera Abharaamu pontho mbakhancemera mbuya. Imwe munakhala ana ace, mungacita udidi pontho mungakhonda kugopa. Sawa-sawambo na imwe amuna, dziwani kukhala na akazi anu, mbamualemedza ninga combo cakukhonda nentsa kusweka, pontho iwo apaswambo muwoni wa kukoma ntima kwa Mulungu wa kudya unthaka wa upulumuki, kuti miphembero yanu ikhonde kupingizwa. Pakumalisa, khalani monsene na manyerezero mabodzi ene, mubalangazane, mbamufunana muubale, mukhale anthu akubvera ntsisi pontho na akupicepesa. Lekani kubwezerana kuipa na kuipa, peno kutikanizana na kutikanizana, mbwenye phembereranani m'bodzi na m'bodzi. Thangwi imwe mwacemererwa penepi, toera mutambire nkhombo za unthaka. Thangwi “ule anafuna kukhala mwadidi na kuona ntsiku za kutsandzaya, mbakoye lirimi yace pa pinthu pyakuipa pontho na mulomo wace pa pinthu pya uthambi. Thawa pyakuipa, cita udidi, saka ntendere mbutowerera. Thangwi maso a Mbuya asalang'ana anyakulungama pontho makutu ace ali kubvesera miphembero yawo, mbwenye Mbuya asapasira nkhodolo ale anacita kuipa.” Imwe mungakakamira kucita udidi, mbani anafuna kukucitani kuipa? Mbwenye mungadza kaona nyatwa thangwi mwacita udidi, imwe munadza katsandzaya. “Lekani kuagopa, lekani kuthuswa.” Mbwenye simbani Kirixtu m'mitima mwanu ninga Mbuya. Khalani basi mbamudasasanyira toera mutawire munthu onsene anasaka kudziwa pa thangwi ya cidikhiro cina imwe. Mbwenye piciteni na kupfulika pontho na cilemedzo, mbamukoya manyerezero adidi a muntima, kuti analonga kuipa macitiro anu adidi muna Kirixtu, akhale na manyadzo na pire pinakulongani iwo. Thangwi ngakhala ndi kufuna kwa Mulungu, mphyadidi muone nyatwa na thangwi ya kucita udidi, kupiringana kuona nyatwa na thangwi ya kucita kuipa. Thangwi Kirixtu aonambo nyatwa kabodzi basi, na thangwi ya madawi athu. Munthu wakulungama, kufera adakhonda kulungama, toera akuyendeseni kuna Mulungu. Iye aphiwa pa nyama, mbwenye alamuswa mu nzimu. Mu nzimu unowu aendambo, pontho amwaza Mphangwa Zadidi kuna mizimu iri n'kaidi, idakhonda kubvera kale ene pa n'dzidzi ukhadikhira Mulungu na ntima wakulekerera ntsiku za Nowa, mukhamangwa Arika. Mwenemu adapulumuswa ndi anthu pang'ono basi, peno tilonge anthu asere adapulumuswa na madzi, pontho penepi pisalongera na thangwi ya batixmu ire inakupulumusanimbo cincino - si kubulusa pinaswipisa manungo tayu, mbwenye ndi cidumbiriro ca manyerezero adidi a muntima patsogolo pana Mulungu - na thangwi ya kulamuka pa kufa kwa Yezu Kirixtu, adakwira kudzulu pontho ali ku nkono wa madyo wa Mulungu. Iye asabverwa na maanju, na utongi, na mphambvu za kudzulu. Na tenepo, ninga Kirixtu aona nyatwa pa nyama, na imwembo khalani dzololo na manyerezero mabodzi ene a Kirixtu, thangwi ule adaona nyatwa pa nyama amwazana na kudawa, toera pa ntsiku zanu zidasala pa nyama, mukhonde kukhala pontho sawa-sawa ninga munafunira anthu, mbwenye mukhale ninga munafunira Mulungu. Kale ene, imwe mwamala midzidzi mizinji mbamucita pire pinatsandzaisa ale anakhonda kutawira Yezu. Pa midzidzi eneyo, imwe mukhacita pyakuzuda, pyalukwali, pyakuledzeresa, maphwandu akunyanyasa, maphwandu akuledzeresa, na pyakulambira alungu apezi kwakupasa manyadzo. Iwo asadzuma, thangwi imwe nkhabebve kufamba pabodzi na iwo mu njira zawo za lukwali ikulu, na thangwi eneyo, iwo asakutikanani. Mbwenye iwo anati apitawire okha kuna Ule adamala kusasanyira kuti atonge ali m'maso na akufa. Na thangwi eneyo, Mphangwa Zadidi zamwazwambo kuli anyakufa, toera iwo atongwe pa nyama ninga munatongerwa anthu, apulumuswembo mu nzimu ninga munafunira Mulungu. Kumala kwa pinthu pyonsene kuli dhuzi. Na tenepo, khalani na ndzeru pontho mukhale akucenjera, toera mukwanise kuphembera. Maka-maka funanani mwakukwana m'bodzi na m'bodzi, thangwi kufunana kusalekerera madawi mazinji. Tambiranani m'manyumba mwanu m'bodzi na m'bodzi, mbamukhonda kudungunya. M'bodzi na m'bodzi mbaphatise basa muwoni udatambira iye toera kuphedza na iwo andzace, mbaonerera mwadidi basa ya kukoma ntima kwa Mulungu kwakusiyana-siyana. Ngakhala munthu ali kulonga, mbalonge ninga ali kumwaza fala ya Mulungu. Ngakhala munthu ali kuphata basa, mbaphate na mphambvu zinampasa Mulungu, toera pa pinthu pyonsene Mulungu apaswe mbiri na thangwi ya Yezu Kirixtu, Ule anapaswa mbiri na mphambvu kwenda na kwenda. Ameni. Abale akufunika, lekani kudzumatirwa na moto unaoneka pakati panu toera kukuleserani, ninga ndi cinthu cakukhonda kudziwika cinacitika pakati panu. Mbwenye tsandzayani pa n'dzidzi unakhala imwe nanthu pa nyatwa za Kirixtu, toera kuti mbiri yace ingapangizika, imwe mukhalembo na kutsandzaya kukulu. Ngakhala imwe musaxoliwa na thangwi ya dzina ya Kirixtu, tsandzayani, thangwi Nzimu wa mbiri, Iwo Nzimu Wakucena, uli na imwe. Mphapo mbaleke kuona nyatwa m'bodzi wanu ninga phanga, peno mbava, peno mphandu, peno ninga munthu anapitira mathangwi a munthu unango. Mbwenye ngakhala munthu asaona nyatwa na thangwi ya kukhala nyakutawira Yezu, mbaleke kukhala na manyadzo, mbwenye mbapase mbiri Mulungu na thangwi ya kucemerwa nyakutawira Yezu. Thangwi wafika n'dzidzi wa ana Mulungu atome kutongwa. Lang'anani, ngakhala watoma kuna ife, ndiye tani kuna ale anakhonda kubvera Mphangwa Zadidi za Mulungu? Pontho, “ngakhala kuna nyakulungama pisanentsa kupulumuswa, ndiye tani kuna nyakuipa ntima na nyakudawa?” Na thangwi eneyo, ale anaona nyatwa ninga munafunira Mulungu, asatongwa anyindire nzimu wawo kuna N'citi wawo wakunyindirika pontho mbacita udidi. Na tenepo, ndisaphemba kuna akulu a gereja ali pakati panu, pontho ndisapicita ninga nkulu sawa-sawa na iwo, na mboni wa nyatwa za Kirixtu, ninga m'bodzi anafuna kukhala nanthu pa mbiri inafuna kudza kapangizika kuti: Kumbizani nkumbi wa mabira a Mulungu anaonera imwe. Aonereni mbamukhonda kukakamizwa, mbwenye mucite na ntima wanu onsene, ninga munafunira Mulungu. Lekani kucita penepi na ntima wakufuna cinthu, mbwenye mucite na ntima wanu onsene. Lekani kucita ninga anyakuponderera ale adanyindirwa imwe, mbwenye muapangize macitiro anu adidi toera akutowezeni. Angadza kapangizika Nkumbidzi Wankulu, imwe munadza katambira nthimba ya mbiri yakukhonda kubvunda. Sawa-sawambo kuna imwe ang'ono, bverani akulu anu. Monsene khalani akucepeseka kuna m'bodzi na m'bodzi, thangwi “Mulungu asaidana na anapikuza, mbwenye asapangisa kukoma ntima kuna ale anacepeseka.” Na tenepo, cepesekani mukhale pantsi pa manja a mphambvu a Mulungu, toera Iye akukuzeni n'dzidzi wace ungakwana. Perekani m'manja mwa Mulungu pyonsene pinakunentsani, thangwi ndiye anakukoyani. Khalani akucenjera mbamulang'anira. Dyabu nyamalwa wanu, asafamba n'khundu ninga nkhalamu mbakhuwa, kusaka mbani anafuna iye kudya. Wangisirani na kun'khonda mbamukhala dzololo pa kukhulupira, mbamudziwa kuti abale anu anagumanika n'dziko yonsene ya pantsi, ali kuona nyatwa zibodzi-bodzi. Pakumala kuthabuka n'dzidzi ung'ono, Mulungu wa kukoma ntima konsene, adakucemerani ku mbiri yace ya kwenda na kwenda muna Kirixtu Yezu, anakulamusani pontho, anakuwangisani, anakupasani mphambvu mbamukhala akukhonda kutekenyeka. Mulungu mbakhale na mphambvu kwenda na kwenda, Ameni. Na kuphebza na Silivano, ule m'bale ananyindira ine, ndakulemberani n'cigwagwa mbandikupasani cipapu, pontho mbandicita umboni wa kuti uku ndi kukoma ntimadi kwa Mulungu. Khalani dzololo n'kati mwa kukoma ntima kweneku. Nsoka wa anyakutawira Yezu wa ku Bhabhilonya, usakumwanyikani, pabodzi na mwana wanga Marku, muna Kirixtu. Mwanyikanani m'bodzi na m'bodzi na mpsompsono wakufunana muna Kirixtu. Ntendere mbukhale na imwe monsene ali muna Kirixtu. Ine Simau Pedhru, bichu pontho mpoxtolo wa Yezu Kirixtu. Ndisalemba tsamba iyi kuli ale adatambira sawa-sawa pabodzi na ife cikhulupiro cikulu, na thangwi ya ulungami wa Mulungu wathu pontho Mpulumusi wathu Yezu Kirixtu, Kukoma ntima na ntendere mbapinjipe kuna imwe, pa thangwi ya kun'dziwa kwathu Mulungu na Yezu Mbuya wathu mwakukwana. Na mphambvu za umulungu wace, atipasa pyonsene pinafunika pa upulumuki wathu na pakuphembera, na thangwi ya kun'dziwa kwathu mwakukwana Ule adaticemera ku mbiri yace ene pontho na ku udidi wace. Tenepa, Iye atipasa pipikiriro pyace pikulu pontho pyadidi, toera na penepi imwe mudze kakhala nanthu pa makhaliro a ciumulungu, pontho muthawe kuipa kuli pa dziko, kunasoswa na kusirira. Na thangwi eneyo, citani mphambvu zonsene toera muthimizire udidi pa cikhulupiro canu, pa udidi muthimizire kudziwa. Pa kudziwa muthimizire kuphata ntima, pa kuphata ntima, muthimizire kupirira, pa kupirira, muthimizire kuphembera. Pa kuphembera, muthimizire kubverana muubale, pa kubverana muubale, muthimizire kufunana. Thangwi pingaoneka pinthu penepi pakati panu mbipikula muna imwe, ipyo pinakucitani kuti muphate basa pontho mwende kutsogolo, na kudziwa kwanu mwakukwana Mbuya wathu Yezu Kirixtu. Mbwenye ule anasowa pinthu penepi ndi boli-boli, asaona pire basi piri dhuzi na iye, mbaduwala pyakuceneswa kwa madawi ace akale. Na thangwi eneyo, abale anga, wangisani pikulu kakamwe toera kusimbisa kucemerwa kwanu na kusankhulwa kwanu. Thangwi mungacita penepi, nkhabebve kudza kagwegweduka. Thangwi tenepa, imwe munafungulirwa mwadidi, toera kupita mu Umambo wa kwenda na kwenda, wa Mbuya wathu na Mpulumusi wathu Yezu Kirixtu. Na thangwi eneyo, ndinakhala mbindikukumbusani kazinji kene pinthu penepi. Mbwenye imwe musapidziwa kale, pontho mwakhazikika pa pya ndimo mwene pidatambira imwe. Ndisanyerezera kuti mphyadidi kukukumbusani mbindiri m'maso, thangwi ndisadziwa kuti cincino pano ndinaasiya manungo awa, ninga mudapangizwa ine kale na Mbuya wathu Yezu Kirixtu. Mbwenye ine ndinacita mphambvu zonsene, kuti ndingaenda, midzidzi yonsene imwe mukwanise kupikumbukira pinthu penepi. Ndimo mwene, pinakupangani ife na thangwi ya mphambvu na ya kubwera kwa Mbuya wathu Yezu Kirixtu, sikutowerera pithankano pya ucenjeri wa anthu tayu, mbwenye ife ene ndife amboni adaona na maso mphambvu zace za mbiri. Iye asimbwa pontho apaswa mbiri idabuluka kuna Mulungu Baba, pakupangwa kwace na fala ya Mbiri Ikulu mbilonga kuti: “Uyu ndi Mwana wanga wakufunika, ananditsandzaisa.” Ife ene, taibva fala eneyi idabuluka kudzulu, pikhali ife na iye pabodzi pa phiri ya Mulungu. Tenepa, tisanyindira kakamwe fala ya maporofeta, pontho imwe munacita pyadidi mungaibvesera, thangwi ndi ninga nyale inagaka pa mbuto ya cidima mpaka kunja kuca, pontho mpaka nthondowa ya macibese ingabalwa muntima mwanu. Cakutoma dziwani kuti nkhabe ciporofeta cibodzi cidalembwa m'Bukhu ya Mulungu, cidabulukira pa udziwisi wa munthu, thangwi nkhabe ciporofeta cibodzi cidadza na kufuna kwa munthu, mbwenye anthu akhaphatwa na Nzimu Wakucena, mbakhalonga pya Mulungu. Ninga pa ntsiku zidapita kwaoneka maporofeta a uthambi pakati pa mbumba Izarayeli, tenepa pakati panu panaonekambo apfundzisi a uthambi. Anapitisa n'cibiso-biso pipfundzo pya uthambi pyakufudza, mbafikira kukhonda Mbuya wawo wankulu adaaombola, na mwansanga iwo ene mbataika. Anthu azinji anadza katowerera macitiro awo a manyadzo, pontho, na thangwi yawo, njira yakulungama inaxoliwa. Na kusirira kwawo mpfuma, apfundzisi enewa anakudyerani manja na mafala awo a uthambi. Kutongwa kwawo kwamala kale, pontho kuphiwa kwawo kuli dhuzi. Thangwi Mulungu hadaalekerera maanju adadawa tayu, mbwenye aaponya mu infernu, aamanga mbaaikha mu djenje ya cidima cikulu, toera akoyerwe ntsiku ya kutongwa. Iye hadailekerera dziko ya kale tayu, mudadzesa Iye madzi makulu kuna mbumba ire ya kuipa ntima, mbwenye akoya Nowa nyakumwaza mphangwa zakulungama, pontho na anthu anomwe. Pontho aitongera kuifudza mizinda ya Sodhoma na Gomora, mbaipisa kudza dotha, kupangisa pire pinafuna kudza kacitika kuna anyakuipa mitima. Mbwenye apulumusa Loti mamuna wakulungama, akhatsukwala na pyakuzuda pikhacita anthu akusowa ntemo. Thangwi mukhakhala iye pakati pawo, mamuna unowu wakulungama, ntsiku zonsene ntima wace ukhamupha na pyakuipa pikhabva iye na pikhaona iye. Na tenepo, tisaona kuti Mbuya asadziwa kuombola pa kuleserwa ale anamulambira, pontho asasiya mu nyatwa ale anacita kuipa mpaka ntsiku ya kutongwa, maka-maka kuna ale anatowerera pyakuipa pinafuna nyama, mbapwaza utongi. Ndi anthu anyamalango, anyakugaya, nkhabe gopa kuxola atongi a mbiri. Mbwenye maanju, akulu pa utongi na pa mphambvu, nkhabe kuapasa thangwi peno kuaxola pamaso pa Mbuya. Mbwenye iwo, asaxola pinthu pinakhonda iwo kudziwa, pontho akhala ninga pinyama pyakusowa ndzeru, pidacitwa toera kuphatiwa mbapiphiwa. Pa pyonsene ipi, iwo anati aphiwe ninga pinyama pya n'tsanga. Iwo anabwezerwa pyakuipa na thangwi ya pyakuipa pidacita iwo. Asacita pinthu pyamanyadzo na masikati, mbanyerezera kuti nkhutsandzaya. Mphyakunyanyasa na pyamanyadzo angakhala pabodzi na imwe pa maphwandu anu, mbatsandzaya na macitiro awo a uthambi. Maso awo adzala na upombo, pontho iwo nkhabe siya kudawa. Asanyengerera anthu adakhonda kutawira mwadidi, pontho mitima yawo yadzowerera kusirira. Ndi anthu a dzedze! Iwo asiya njira yakulungama, mbapeuka kutowerera njira ya Bhalamu, mwana wa Bheori, adakomerwa na kutambira kobiri toera kucita pyakukhonda kulungama, mbwenye na thangwi ya kudawisa kwace, asandikwa na buru, cinyama cakukhonda kulonga mbacilonga ninga munthu, mbamalisa udzemwa wa mporofeta. Amuna enewa ndi ninga micera yakusowa madzi, pontho ndi ninga makole anakwatiwa na conzi ca mphepo. Kuswipa kwa cidima cikulu kwakoyerwa iwo. Thangwi iwo, na mafala awo akugaya na apezi, asasosesa kusirira pyakuzuda pinafuna nyama, toera kunyengerera napyo anthu ali dhuzi na kukwanisa kuthawa ale anakhala mbadodomesa. Asaapikirira ufulu, iwo ene mbakhala adzakazi a pinthu pyakuipa, thangwi munthu ndi n'dzakazi wa pire pinankunda. Na tenepo, ngakhala pakumala kuthawa uipi wa padziko ino na thangwi ya kudziwa kwanu Mbuya wathu na Mpulumusi wathu Yezu Kirixtu, musasiya mbamumangwa napyo, pontho mbapikukundani, makhaliro anu a cincino anatekereratu kakamwe kupiringana akale. Thangwi pikhali pyadidi kwa iwo mbadakhonda kudziwa njira yakulungama, kupiringana pakumala kuidziwa, mbapasira nkhodolo ntemo wakulungama ukhadapangwa iwo kale. Pidacitika kuna iwo ndi sawa-sawa na pinalonga nsangani uyu kuti: “Mwanambwa adya matapiko ace pontho.” “Nkhumba yakumala kusambiswa, yabulumunda pontho m'matope.” Abale akufunika, iyi ndi tsamba yaciwiri inakulemberani ine cincino. Pa matsamba mawiri awa, ndisasaka kuti ndikukumbuseni toera kulamusira ndzeru zanu zadidi, toera imwe mukumbuke mafala adalongwa kale ene na maporofeta a Mulungu, pontho toera mukumbuke matongero a Mbuya, Mpulumusi wathu, ale adakupfundzisani apoxtolo anu. Pakutoma dziwani kuti ntsiku zakumalisa, anabulukira anyakusingirira mbakusingirirani, pontho mbatowerera kucita pinafuna iwo, mbalonga tenepa: “Ciri kupi cipikiriro cidacita Iye kuti anabwera pontho? Thangwi kutomera pa kufa kwa ambuya athu, pyonsene piri sawa-sawa ninga pakutoma kwa dziko.” Mbwenye iwo asaduwala cakhomu kuti na fala ya Mulungu, kutomera kale na kale, kudzulu na pantsi kukhalipo. Mataka apambulwa pa madzi mbacitwa kubulukira pa madzi. Pontho dziko eneyo ya kale yamala kudyiwa na madzi makulu, mbifudzika. Na fala ibodzi-bodzi, kudzulu na pantsi kunaona ife cincino kwakoyerwa moto, kwakoyiwa mpaka ntsiku ya kutongwa na ya kufubza kwa anyakuipa mitima. Mbwenye abale anga akufunika, lekani kuduwala ici: Kuti ntsiku ibodzi kuna Mbuya, ndi ninga pyaka cikwi cibodzi, pontho pyaka cikwi cibodzi, ndi ninga ntsiku ibodzi. Mbuya nkhabe kudembuka na kucita pire pidapikirira Iye, ninga munanyerezera anthu anango. Mbwenye Iye ana ntsisi na imwe, thangwi nkhabe funa kuti munthu m'bodzi ataike, mbwenye asafuna kuti onsene afikire n'dzidzi wakuchunyuka. Mphapo Ntsiku ya Mbuya inabwera ninga mbava. Kudzulu kunafudzika na kutitimira kukulu. Pinthu pyonsene pya kudzulu pinamala kufudziwa na kupisa, pontho pantsi pano na pyonsene piri pano, pinapiswa. Thangwi kufubza kweneku kunafuna kucitwa pinthu pyonsene, imwembo musafunika mukhale tani? Makhaliro anu mbakhale akulungama na akuperekeka kuna Mulungu, mbamudikhira na kulang'anira Ntsiku ya Mulungu, pontho mbamucita kuti ifike na mwansanga. Ntsiku eneyo, kudzulu kunafudziwa na moto, pontho na pinthu pyonsene piri kudzulu pinamala kunyunguluka na kupisa. Mbwenye ninga mudapikirira Iye, tisadikhira kudzulu kupsa na pantsi papsa, kule kunagumanika kulungama. Na tenepo, abale anga akufunika, pa n'dzidzi unadikhira imwe penepi, wangisirani toera mugumaniwe na Iye mu ntendere, mbamusowa madawi na mathangwi. Dziwani kuti kupirira kwa Mbuya wathu ndi upulumuki kwa anthu, ninga mudakulemberanimbo m'bale wathu wakufunika, Paulu, na udziwisi udampasa Mulungu. Iye asalemba sawa-sawa m'matsamba ace onsene, mbalonga pinthu penepi. Matsamba ace ana pinthu pinango pyakunentsa kupibvesesa, pinacita kuti anthu akukhonda kudziwa pinthu na akufewa pa kukhulupira asadodomesa, ninga pinacita iwombo na malemba anango a m'Bukhu ya Mulungu, mbataika napyo. Na tenepo, abale anga akufunika, ninga musadziwa kale, citani mphole gopa munanyengezwa mbamukwekwetwa na pya uthambi pya anthu akusowa ntemo, mbamusiya kunyindira kwanu, mbamugwa. Mbwenye kulani mwa kukoma ntima kwa Mulungu pa kudziwa Mbuya wathu na Mpulumusi wathu Yezu Kirixtu. Mbiri mbikhale na Iye, cincino na kwenda na kwenda. Ameni! Pire pikhalipo kutomera pakutoma, pire pidabva ife, pire pidaona ife na maso athu, pire pidadinkhisa ife pontho manja athu mbapiphata, ipi tisapilonga pa thangwi ya Fala ya upulumuki. Upulumuki unowu wapangizika. Ife tauona, pontho ndi unowu unacitira ife umboni, mbatikupangani upulumuki wakukhonda kumala ukhali na Baba, pontho mbupangizika kuna ife. Ife tisakupangani pire pidaona ife na pidabva ife, toera muphatanembo na ife. Kuphatana kwathu ndi na Mulungu Baba, pontho na Mwana wace Yezu Kirixtu. Pontho tisakulemberani pinthu ipi toera kutsandzaya kwathu kudzadziswe. Apo mphangwa zidabva ife kuna Kirixtu zinakupangani ife ndi izi: Mulungu ndi cieza. Muna Iye nkhabemo cidima na pang'ono pene. Na tenepo, tingalonga kuti taphatana na Mulungu khundu inango mbatifamba n'cidima, dziwani kuti tiri kulonga uthambi mbatikhonda kucita pya ndimo mwene. Mbwenye tingafamba mu cieza, ninga Iye ali mu cieza, ife tonsene taphatana m'bodzi na m'bodzi, pontho ciropa ca Yezu Mwana wa Mulungu, cinatitsuka kudawa konsene. Tingalonga kuti ife nkhabe kudawa, tiri kunyengezana tekha ene, pontho muna ife nkhabemo pya ndimo mwene. Mbwenye tingadambula madawi athu kuna Mulungu, Iye ndi wakunyindirika na wakulungama, toera kulekerera madawi athu, na kutitsuka kuipa konsene. Tingalonga kuti cipo tidzati kudawa, tisalonga kuti Mulungu ndi nyauthambi, pontho mafala ace nkhabemo muna ife. Ananga, ndisakulemberani pinthu ipi toera mukhonde kugwa n'kudawa. Mbwenye munthu m'bodzi angadawa, tinaye munthu wa kutibvunulira patsogolo pana Baba, ndiye Yezu Kirixtu Wakulungama. Iye ndi ntsembe inafudza madawi athu. Pontho si yakufudza madawi athu basi tayu, mbwenye pontho na madawi a anthu onsene. Tingabvera matongero ace, tisapangisa kuti tisan'dziwadi Mulungu. Ule analonga kuti: “Ine ndisan'dziwa,” mbwenye mbakhonda kubvera matongero ace, unowu ndi nyauthambi. Pontho nkhabemo pya ndimo mwene muna iye. Mbwenye munthu anabvera fala yace, kufuna kwa Mulungu kwadzala muna iye. Na tenepo, tisadziwa kuti tiri muna Iye. Ule analonga kuti ali kukhala muna Iye, asatongwa kuti afambe ninga Iye. Anyakufunika, matongero awa anakulemberani ine, si mapsa tayu, mbwenye ndi matongero akale ali na imwe kutomera pakutoma. Ndizo Mphangwa zidabva imwe. Mbwenye ipi pinakulemberani ine, ndi matongero mapsa. Matongero enewa mba ndimo mwene muna Iye na muna imwe. Thangwi cidima ciri kumala, cieza ca ndimo mwene ciri kuyetimira. Munthu analonga kuti ali kukhala mu cieza, mbwenye mbaida m'bale wace, unowu adzati kubuluka n'cidima. Mphapo ule anafuna m'bale wace, unowu ali mu cieza. Na tenepo, muna iye nkhabe cinthu ca kun'gwegwedusa. Mbwenye ule anakhala mbaida m'bale wace, ali n'cidima, pontho asafamba n'cidima. Na tenepo, nkhabe dziwako kunaenda iye, thangwi cidima campasa uboli-boli. Ananga, ndisakulemberani ipi thangwi madawi anu alekererwa, na thangwi ya dzina ya Yezu. Ababa, ndisakulemberani ipi thangwi imwe musan'dziwa Ule akhalipo kale dziko mbidzati kucitwa. Imwe aphale, ndisakulemberani thangwi mwankunda Wakuipa. Ananga, ndakulemberani thangwi musan'dziwa Baba. Ndakulemberani imwe ababa, thangwi imwe musan'dziwa ule akhalipo kale ene dziko mbidzati kucitwa. Ndakulemberani imwe aphale thangwi imwe ndimwe a mphambvu. Na tenepo, fala ya Mulungu iri muna imwe, pontho mwankunda Wakuipa. Lekani kufuna dziko, pontho na pinthu piri n'dziko. Thangwi munthu anafuna dziko, kufuna kwa Mulungu Baba nkhabemo muna iye. Thangwi pyonsene piri pa dziko, ninga pinasirira nyama, pinasirira maso, pontho na kupikuza thangwi ya mpfuma, penepi pidabuluka kuna Baba tayu, mbwenye pyabuluka pa dziko. Dziko, na pyonsene pire pinasirira iyo, pinamala. Mbwenye ule anacita kufuna kwa Mulungu, anakhala kwenda na kwenda. Ananga, uno ndi n'dzidzi wakumalisa. Pontho ninga mwapibva kuti nyamalwa wa Kirixtu ali kubwera, apo lero dziwani kuti ali kuoneka azinji anyamalwa a Kirixtu. Na thangwi eneyo, tisadziwa kuti uno ndi n'dzidzi wakumalisa. Iwo abuluka muna ife, mbwenye akhali andzathudi tayu. Thangwi mbadakhala andzathu, mbadakhala na ife. Mbwenye na thangwi ya kubuluka kwawo, pisapangisa kuti onsene akhali andzathu tayu. Mbwenye imwe mwadzobza na Mulungu Wakucena, pontho monsene musadziwa. Siri kukulemberani na thangwi yakukhonda dziwa kwanu pinthu pya ndimo mwene tayu, mbwenye thangwi musapidziwa, pontho thangwi musadziwa kuti pinthu pyonsene pya ndimo mwene nkhabe kubala uthambi. Mbani nyauthambi? Ndi ule anakhonda kuti Yezu si Kirixtu tayu. Unowu ndiye nyamalwa wa Kirixtu, ule anakhonda Baba na Mwana ene. Onsene anakhonda Mwana, unowu nkhabembo Baba. Mbwenye ule anamulonga pakweca, unowu ana Baba. Imwembo koyani m'mitima mwanu pyonsene pidabva imwe kutomera pakutoma. Pire pyonsene pidabva imwe kutomera pakutoma mungakhala napyo m'mitima mwanu, imwe munati mukhalembo pabodzi na Mwana pontho na Baba. Pidatipikirira Iye ndi ipi: Upulumuki wakukhonda kumala. Ine ndisakulemberani pinthu ipi, na thangwi ya ale anafuna kukunyengererani. Pa thangwi yanu, kudzobza kudatambira imwe kuna iye kuli muna imwe, pontho nkhabe funika munthu akupfundziseni. Mbwenye ninga kudzobza kwace kudatambira imwe muna Iye nkhwa ndimo mwene si kwa uthambi tayu, kunakupfundzisani pa thangwi ya pinthu pyonsene. Khalani muna Iye ninga mudakupfundzisirani Iye. Ananga, cincino khalani muna Kirixtu, toera Iye angapangizika tin'nyindire, tikhonde kupasika manyadzo pamaso pace, pakubwera kwace. Ngakhala imwe musadziwa kuti Yezu ndi wakulungama, dziwanimbo kuti onsene ale anacita pyakulungama abalwa na Mulungu. Lang'anani kutifuna kukulu kudacita Baba, na kuticita kuti ife ticemerwe ana a Mulungu. Ndimo mwene, ndifedi ana a Mulungu. Ndi thangwi eneyo dziko nkhabe kutidziwa, thangwi iyo nkhabe kun'dziwambo tayu. Anyakufunika, ife cincino ndife ana a Mulungu, pontho pidzati kudziwika kuti tinadza kakhala tani. Mbwenye tisadziwa kuti Kirixtu angadza kapangizika, ife tinadza kalandana na iye. Thangwi tinadza kamuona kukhala kudacita iye. Mphapo munthu onsene ana cidikhiro ceneci muna Kirixtu, asatongwa kuti akhale wakucena, ninga Kirixtu ndi wakucena. Munthu onsene anacita kudawa, anumpha Mwambo wa Mulungu. Ndimo mwene, kudawa ndi kunumpha Mwambo. Imwe musapidziwa kuti Kirixtu abwera kudza kabulusa madawi athu, pontho muna Iye nkhabe kudawa. Onsene ale anakhala muna Kirixtu, nkhabe kukhala n'kudawa. Onsene ale anakhala n'kudawa, adzati kumuona, pontho adzati kun'dziwa. Ananga, lekani kunyengezwa na munthu. Ule anacita pinthu pyakulungama ndi wakulungama, sawa-sawa ninga Kirixtu ndi wakulungama. Apo ule anakhala mbadawa, unowu ndi munthu wa Sathani. Thangwi Sathani adza mbadawa kutomera kale na kale. Ndi thangwi eneyo Mwana wa Mulungu abwera, toera kufudza mabasa a Sathani. Onsene adabalwa na Mulungu nkhabe kukhala mbacita kudawa, thangwi mbeu ya Mulungu iri muna iye. Na mwenemu, unowu nkhabe kwanisa kukhala mbacita kudawa, thangwi abalwa na Mulungu. Na tenepo, tisadziwa mbani ana a Mulungu, peno mbani ana a Sathani. Onsene ale anakhonda kucita pinthu pyakulungama, na onsene anakhonda funa m'bale wace, hadabuluka kuna Mulungu tayu. Izi ndizo mphangwa zidabva imwe kutomera pakutoma kuti: Tifunane m'bodzi na m'bodzi. Mbatilekeni kukhala ninga Kainu, munthu wa Sathani, adapha m'bale wace. Apo thangwi yanji iye apha m'bale wace? Amupha thangwi mabasa ace akhali akuipa, mbwenye mabasa a m'bale wace akhali akulungama. Abale anga, lekani kudzudzumika mungazondiwa na dziko. Tisadziwa kuti ife tabuluka pa kufa, mbwenye cincino tapulumuka thangwi tisafuna abale athu. Mphapo ule anakhonda funa m'bale wace, ali n'kufa. Munthu onsene anazonda m'bale wace ndi phanga. Pontho imwe musadziwa kuti phanga nkhabe upulumuki wakukhonda kumala muna iye. Na tenepo, ife tisadziwa ndi ninji kufunana: Yezu Kirixtu apereka moyo wace na thangwi yathu. Na tenepo, ife tisatongwambo kupereka moyo wathu na thangwi ya abale athu. Munthu wakupfuma pa dziko ino mbaona m'bale wace ali kucherenga mbakhonda kum'bvera ntsisi, munthu unowu analonga kuti asafuna Mulungu? Ananga, kufunana kwathu mbukuleke kukhala kwa mafala na mulomo basi tayu, mbwenye mbukukhale kwa mabasa na mwa ndimo mwene. Na tenepo, tinadziwa kuti ife ndife a ndimo mwene, pontho tinakhurudzisa ntima wathu patsogolo pana Mulungu, ntima wathu ungatipanga kuti tadawa. Mulungu ndi nkulu kakamwe kupita ntima wathu, pontho asadziwa pinthu pyonsene. Axamwali anga akufunika, ntima wathu ungakhonda kutipanga kuti tadawa, tina cinyindiro patsogolo pana Mulungu. Pontho pyonsene pinaphemba ife anatipasa, thangwi tisabvera matongero ace pontho tisacita pinafuna Iye. Matongero ace ndi awa: Kuti titawire dzina ya Yezu Kirixtu Mwana wace, pontho tifunane m'bodzi na m'bodzi, ninga mudatipangira Iye. Ule anabvera matongero a Mulungu, asakhala muna Mulungu, Mulungumbo asakhala muna iye. Na tenepo, tisadziwa kuti Iye asakhala muna ife, na thangwi ya Nzimu udatipasa Iye. Anyakufunika, lekani kubvera mizimu yonsene, mbwenye ilang'aniseni mwadidi toera muione ngakhala yabuluka kuna Mulungu. Thangwi maporofeta azinji a uthambi ali kubalalika n'dziko muno. Nzimu wa Mulungu, imwe munakwanisa kuudzindikira tenepa: Nzimu onsene unalonga kuti Yezu Kirixtu acitika munthu, nzimu unowu wabuluka kuna Mulungu. Mbwenye nzimu onsene unakhonda kulonga penepi, hudabuluka kuna Mulungu tayu. Unowu ndi nzimu wa nyamalwa wa Kirixtu, ule udabva imwe kuti uli kubwera, apo cincino uli pano pa dziko. Ananga, imwe ndimwe a Mulungu, pontho mwaikunda mizimu ya uthambi. Thangwi ule ali muna imwe, ana mphambvu kupita ule ali pa dziko. Iwo abuluka n'dziko. Na thangwi eneyo, pire pinalonga iwo pisabuluka n'dziko, pontho dziko isaabvera. Ife ndife a Mulungu, onsene ale anadziwa Mulungu asatibvera. Mbwenye ule adakhonda buluka kuna Mulungu, nkhabe kutibvera. Na tenepo, tisakwanisa kudzindikira Nzimu wa ndimo mwene, na nzimu wa uthambi. Axamwali akufunika, mbatifunaneni m'bodzi na m'bodzi, thangwi kufunana kusabuluka kuna Mulungu. Ule anafuna ndzace, abalwa na Mulungu, pontho asan'dziwa Mulungu. Mphapo ule anakhonda kufuna ndzace nkhabe kun'dziwa Mulungu, thangwi Mulungu ndi kufunana. Mulungu apangisa kufuna kwace pakati pathu tenepa: Atuma Mwana wace m'bodzi ekha pa dziko, toera iye aticite kuti tikhale m'maso. Kufunana kwacitika tenepa: Sife adafuna Mulungu tayu, mbwenye ndiye adatifuna mbatitumira Mwana wace, toera kufudza madawi athu. Axamwali anga akufunika, na kutifuna kudaticita Mulungu, ifembo tisatongwa tifunane m'bodzi na m'bodzi. Cipo nkhabe munthu adaona Mulungu. Mphapo tingafunana m'bodzi na m'bodzi, Mulungu anakhala muna ife, pontho kufuna kwace kunadzaliratu kakamwe muna ife. Ife tisadziwa kuti tiri muna Mulungu, Iyembo ali muna ife, thangwi Iye atipasa Nzimu wace. Na tenepo, ife tamuona, pontho tisaenda mbatilonga umboni kuti Baba atuma Mwana wace, toera akhale Mpulumusi wa dziko. Munthu analonga pakweca kuti Yezu ndi Mwana wa Mulungu, munthu unowu Mulungu anakhala muna iye, iyembo anakhala muna Mulungu. Na tenepo, ife tisadziwa kutifuna kunaticita Mulungu, pontho kutifuna kweneku tisanyindirako. Mulungu ndi kufunana. Onsene anakhala mwa kufunana ali muna Mulungu, pontho Mulungu ali muna iye. Na tenepo, kufunana kwadzala pakati pathu toera ntsiku ya kutongwa tikhale na kunyindira. Thangwi pa dziko ino ndife sawa-sawa ninga iye. Pana kufunana nkhabe gumanika kugopa. Pontho kufunana kwakukwana kusamalisa kugopa. Thangwi ale anagopa, asagopa kuthabuswa. Ule anagopa nkhabe kufunana kwakukwana. Ife tisanfuna, thangwi Iye ndiye adatifuna pakutoma. Munthu analonga kuti: “Ine ndisafuna Mulungu,” mbwenye mbaida m'bale wace, unowu ndi nyauthambi. Thangwi munthu anakhonda funa m'bale wace anaona iye na maso ace, anacimwana kufuna Mulungu anakhonda kuona iye. Iye atisiyira matongero awa: Kuti ule anafuna Mulungu, mbafunembo m'bale wace. Munthu onsene anatawira kuti Yezu ndi Kirixtu, unowu abalwa na Mulungu. Pontho munthu onsene anafuna Baba, mbafunembo Mwana wace. Tingafuna Mulungu mbatibvera matongero ace, penepi ndipyo pinapangisa kuti tisaafuna ana a Mulungu. Thangwi kufuna Mulungu nkhubvera matongero ace, pontho matongero ace nkhabe lemera. Thangwi ule anabalwa na Mulungu asakunda dziko. Tisakwanisa kukunda dziko na kukhulupira kwathu. Ndi ani anakwanisa kukunda dziko? Ndi ule basi anatawira kuti Yezu ndi Mwana wa Mulungu. Yezu Kirixtu ndi unowu adabwera na madzi na ciropa. Si na madzi basi tayu, mbwenye ndi na madzi na ciropa. Pontho Nzimu Wakucena ndiwo unacita umboni, thangwi Nzimu Wakucena ndi wa ndimo mwene. Piripo pinthu pitatu pinacita umboni [kudzulu. Baba, Fala na Nzimu Wakucena. Pitatu ipi, pisabverana. Pontho pitatu ipi, ndipyo pinacita umboni pa dziko. ] Nzimu Wakucena, madzi na ciropa. Pitatu ipi, ndi cinthu cibodzi basi. Ife tisatawira umboni wa anthu, mbwenye umboni wa Mulungu ndiwo ukulu, thangwi ndi umboni unacitira iye Mwana wace. Munthu anatawira Mwana wa Mulungu, anawo umboni unowu muntima mwace. Mbwenye ule anakhonda kutawira Mulungu, asacita Mulungu ninga ndi nyauthambi. Thangwi asakhonda umboni udatipasa Mulungu na thangwi ya Mwana wace. Umboni wa Mulungu ndi uyu: Kuti Mulungu atipasa upulumuki wakukhonda kumala. Upulumuki unowu uli muna Mwana wace. Ule ana Mwana wa Mulungu, anawo upulumuki. Mbwenye anasowa Mwana wa Mulungu, nkhabe upulumuki. Ine ndakulemberani pyonsene ipi, toera imwe mudatawira dzina ya Mwana wa Mulungu, mudziwe kuti munawo upulumuki wakukhonda kumala. Cinyindiro cina ife muna Iye ndi ici: Kuti tingam'phemba cinthu ninga munafunira Iye, Iye asatibva. Pontho tingadziwa kuti Iye asatibva pa pyonsene pinam'phemba ife, tisadziwa kuti tapasiwa pyonsene pidam'phemba ife. Munthu anaona m'bale wace mbacita kudawa kunakhonda kubala kufa, mbam'phemberere, Mulungu anampulumusa. Penepi ndisalongera kuna ale kuti kudawa kwawo nkhabe kubala kufa. Thangwi kulipo kudawa kunabala kufa. Siri kulonga enewa tayu. Kuna anthu enewa, lekani kuaphemberera. Pinthu pyonsene pyakukhonda kulungama ndi kudawa. Mbwenye kulipo kudawa kunakhonda kubala kufa. Tisadziwa kuti onsene adabalwa na Mulungu nkhabe kukhala n'kudawa, thangwi Mwana wa Mulungu anaakoya. Na tenepo, Sathani nkhabe kuacita kuipa. Tisadziwa kuti ife ndife a Mulungu, pontho dziko yonsene isatongwa na Sathani. Tisadziwambo kuti Mwana wa Mulungu abwera, mbatipasa ndzeru toera tidziwe Mulungu wa ndimo mwene. Pontho ife tiri muna Mulungu wa ndimo mwene, muna Mwana wace Yezu Kirixtu. Yezu Kirixtu unowu, ndiyedi Mulungu na upulumuki wakukhonda kumala. Ananga, citani mphole na alungu apezi. Ndine nkulu, ndisalemba tsamba iyi kuna mbuya wa nkazi adasankhulwa, na kuna anace anafunikadi na ine mwa ndimo mwene. Sine basi tayu anaafuna, mbwenye asafuniwambo na onsene ale anadziwa pya ndimo mwene, na thangwi ya undimo mwene uli muna ife, pontho unadza kakhala na ife kwenda na kwenda. Kukoma ntima, ntsisi na ntendere wa Mulungu Baba na wa Mwana wace Yezu Kirixtu, mbapikhale na ife mwa ndimo mwene na mwakufunana. Ndakomerwa pikulu kakamwe pidagumana ine anako anango mbafamba mwa ndimo mwene, ninga munalongera matongero adatambira ife kuna Baba. Cincino ndisakuphembani mbuya wa nkazi, kuti tifunane m'bodzi na m'bodzi. Si kuti ndiri kukulemberani mwambo upsa tayu. Mbwenye matongero enewa ndiwo akhali na ife kutomera pakutoma. Kufunana ndi uku: Kuti tifambe ninga munalongera matongero ace. Ninga mwaabva kale na kale, matongero ace ndi awa: Kuti mufambe na kufunana kweneku. Ndimo mwene, alipo anyauthambi azinji asabulukira pa dziko, mbakhonda kuti Yezu Kirixtu acitika munthu. Anthu enewa ndi anyakunyengerera na anyamalwa a Kirixtu. Citani mphole, gopa munadza kaluza misapu ya basa yathu, mbwenye toera mupaswe m'bairo wanu wamumphu. Onsene ale anakhonda kukhala mu cipfundzo ca Kirixtu mbwenye mbabuluka kunja, enewa nkhabe Mulungu. Ule anakhala mu cipfundzo ca Kirixtu, ana Baba pontho na Mwana. Munthu anadza kuna imwe mbakhonda kudza na cipfundzo ceneci, lekani kuntambira pa nyumba panu, pontho lekani kum'mwanyika. Thangwi ule anam'mwanyika anaphatana na iye pa mabasa ace a kuipa. Ndina pizinji kuti ndikulembereni, mbwenye sikhafuna kuti ndicite kupilemba pa tsamba tayu. Thangwi ndisadikhira kudza kakuonani, toera ndilonge na imwe nkhope na nkhope, toera kutsandzaya kwathu kudzadziswe. Ana a mwana-nkazi wako wakusankhulwa, asakuwangisa. Ndine nkulu, ndisalemba tsamba iyi kuna wakufunika Gayo, unowu anafuna ine mwa ndimo mwene. Wanga wakufunika, ndisaphembera kuti ukhale manungo akuwanga, pyonsene pikufambire mwadidi, ninga nzimu wako uli mwadidi. Ndatsandzaya pikulu kakamwe mudatambira ine abale anango mbandipanga na thangwi ya kukhulupira kwako, na kufamba mwa ndimo mwene kunacita iwe. Nkhabe kutsandzaya kunango kwa ine, kunapiringana kubva kudacita ine kuti ananga ali kufamba mwa ndimo mwene. Wanga wakufunika, iwe ndiwe wakunyindirika pa pire pinacita iwe kuli abale, iwo mbakhala anthu anyakutama. Iwo acita umboni pamaso pa abale a gereja, mbalonga pya thangwi ya kukoma ntima kwawo. Mphyadidi uwaphedze kufamba pa ulendo wawo, toera Mulungu atsandzaye napyo. Thangwi na dzina ya Yezu, iwo abuluka, mbakhonda tawira kuphebza cinthu cibodzi na ale adakhonda kutawira Yezu. Thangwi tisatongwa tiatambire na ntsisi abale ninga enewa, toera tikhale anthu akuphatana pa kuphata basa ya kumwaza pya ndimo mwene. Ndalemba tsamba kuna abale a gereja, mbwenye Dhiyoterefi, na kufuna kwace ukulu pa nsoka wawo, akhonda kutitambira. Na tenepo, ine ndingafika kweneku ndinansandika, na thangwi ya pinacita iye na mafala ace a kuipa anatilongera iye. Mbwenye iye nkhabe komerwa basi na penepi tayu. Abale angafika kweneku iye nkhabe kuatambira. Pontho munthu unango angafuna kuatambira, iye asan'khondesa mpaka kufikira kun'thamangisa pa abale gereja. Wanga wakufunika, leka towerera pyakuipa, mbwenye towerera pyadidi. Ule anacita pyadidi ndi wa Mulungu, mbwenye ule anacita pyakuipa adzati kuona Mulungu. Mbwenye Dhemetiru, anthu onsene asansimba. Pyamaso pinaphata iye pisancitira umboni. Na ifeenembo tisancitira umboni. Pontho iwe usadziwa kuti umboni wathu ndi wa ndimo mwene. Ndikhali na pinthu pizinji pya kufuna kukulembera, mbwenye sinafuna cita kupilemba tayu, thangwi ndisadikhira kudza kakuona cincino. Na tenepo, tinadza kaceza mwadidi tingadza kaonana nkhope na nkhope. Ntendere mbukhale na iwe. Axamwali a kuno asakuwangisa. Wangisambo axamwali a kweneko, m'bodzi na m'bodzi. Ndine Djuda, n'dzakazi wa Yezu Kirixtu, m'bale wace Tiyago. Ndisalemba tsamba iyi kuna ale adacemerwa, adafuniwa na Mulungu Baba, mbakoiwa muna Yezu Kirixtu. Ntsisi, ntendere na kufunana mbapinjipe kuna imwe. Anyakufunika, mukhacita ine mphambvu zonsene toera kukulemberani pa thangwi ya upulumuki wathu uli na ife pabodzi pene, ndanyerezera kuti pikhafunika ndikulembereni cincino toera kukupasani cipapu kuti mugwe nkhondo, kugwera kukhulupira kudanyindirwa mbumba ya Mulungu kabodzi basi. Thangwi anthu anango akhadamala kulemberwa kale ene kuti akoneswe, apita pakati panu na ucenjeri. Anthu enewa ndi anyakuipa mitima. Iwo aphinduza kukoma ntima kwa Mulungu wathu toera acite pyakuipa pinafuna manungo awo, pontho asakhonda Yezu Kirixtu, Ntongi pontho Mbuya wathu m'bodzi ekha. Ine ndisadziwa kuti imwe musapidziwa kale pyonsene ipi, mbwenye ndisafuna kukukumbusani kuti Mbuya apulumusa mbumba ibodzi mbaibulusa mu dziko ya Idjipitu. Buluka penepo, apha ale adakhonda kutawira. Kuna alembo maanju adacimwana kulemedza pidzo pidapaswa iwo, mbwenye mbasiya mbuto yawo, Mulungu ali kuakoya n'cidima, mbaamanga na unyolo kwenda na kwenda, mpaka Ntsiku ikulu ya kutongwa kwawo. Sawa-sawa na mizinda ya Sodhoma na Gomora, na mizinda ya cifupi na eneyi ikhacita pyalukwali ninga iwo, na pinango pyakuzuda pidakhonda kukhala pyaciunthu, yaoneswa nyatwa ya moto wakukhonda kumala toera kucenjeza anthu. Sawa-sawambo na iwo, na kunyindira ndoto zawo, asapsipisa manungo awo ene, asakhonda utongi, pontho mbaxola mphambvu za kudzulu. Mbwenye pa nthonga idacita anju wankulu anacemerwa Migeli na Dyabu, na thangwi ya manungo a Mozesi, iye hadalesera kumulongera mafala akuxola tayu, mbwenye ampanga kuti: “Mulungu mbakusandike!” Mbwenye anthu enewa asaxola pyonsene pire pinakhonda iwo kudziwa. Pontho pinthu pinadziwa iwo na manyerezero akusowa ndzeru ninga pinyama, penepi ndipyo pinaapitisa mu njira yakutaika. Ana nyatwa anthu enewa! Thangwi akwata njira ya Kainu. Na kufuna kwawo kobiri, iwo agwera mu njira yakuipa ya Bhalamu, pontho mbafudziwa ninga pa cikuti ca Koraa. Amuna enewa akhala ninga myala yakugopsa m'bara, pa maphwandu a ciubale anacita imwe, mbadya na imwe pabodzi mwakupasa manyadzo. Ndi akumbidzi anakumbizika okha ene, pontho akhala ninga makole akusoweka madzi, mbagwinyiwa na mphepo. Akhala ninga miti yakusowa misapu pa n'dzidzi wakubala misapu, mbifa kawiri, mbiduliwa na michici ene. Akhala ninga mabimbi akugopsa a m'bara, anabulusa mapobvu a mabasa awo akupasa manyadzo. Akhala ninga nyenyezi zakutaika, zidakoyerwa cidima cikulu ca kwenda na kwenda. Enoki, munthu wa dzindza yacinomwe kubulukira pa Adhamu, apilonga na ciporofeta pa thangwi yawo kuti: “Lang'anani, Mbuya ali kubwera na pikwi na pikwi pya mbumba yace, kudza katonga onsene, mbakonesa anthu onsene, pa thangwi ya mabasa awo akuipa adacita iwo na kuipa kwawo mitima, pontho pa thangwi ya mafala onsene a magwandu akhamulongera anyakudawa akuipa mitima.” Anthu enewa asakhala mbadungunya, mbakhonda kukomerwa na cinthu, mbatowera mafuniro awo akuipa. Ndi anthu analonga mafala akupikuza, mbasimba kwakunyengerera nako anango, toera apaswe pinthu. Mbwenye imwe, anyakufunika, kumbukani mafala akhadalongwa kale ene na apoxtolo a Mbuya wathu Yezu Kirixtu. Iwo akhakupangani kuti: “Pa midzidzi yakumalisa, anaoneka anyakusingirira anadza katoweza mafuniro awo akuipa.” Enewa ndiwo anasosa phambulo pakati panu. Pinafuna iwo mphya nyama, pontho iwo nkhabe Nzimu Wakucena. Mbwenye imwe, anyakufunika, pitirizani na kukula pa cikhulupiro canu ca kuceneswa kakamwe, mbamuphembera mu Nzimu Wakucena. Khalani mwa kufunana kwa Mulungu, pa midzidzi ino inadikhira imwe ntsisi za Mbuya wathu Yezu Kirixtu, kuti zikukwateni kwenda ku upulumuki wakukhonda kumala. Khalani na ntsisi na ale anapenula. Pulumusani anango mbamuabulusa na mphambvu pa moto. Anangombo acitireni ntsisi, mbwenye mucite mphole, pontho mbamuthunda na nguwo zawo zene sidaswipa na macitiro awo a kuipa. Mulungu, Ule ana mphambvu za kukukoyani kuti muleke kugwa, na za kukupangisani patsogolo pa mbiri yace ninga anthu akusowa midonthi pontho na kutsandzaya kukulu, kuna Iye Mulungu m'bodzi ekha, Mpulumusi wathu, kubulukira muna Yezu Kirixtu, Mbuya wathu, mbapaswe mbiri, cidzo, mphambvu na utongi, kutomera kale na kale mpaka cincino, na kwenda na kwenda, Ameni. Cidziwiso ca Yezu Kirixtu, cidapaswa Iye na Mulungu toera adziwise adzakazi ace pire pinafuna kucitika cincino. Iye atuma anju wace toera apidziwise kuna Juwau, n'dzakazi wace, adacita umboni wa pyonsene pidaona iye, kweneku ndi kubveka kuti: Fala ya Mulungu, na umboni wa Yezu Kirixtu. Mbatsandzaye ule anaona na ale anabva mafala awa a ciporofeta, pontho mbakoya pinthu pidalembwa mwenemu, thangwi n'dzidzi uli dhuzi. Ine Juwau, ndiri kulembera magereja manomwe a ku dziko ya Azya. Kukoma ntima kwa Mulungu na ntendere mbapikhale kuna imwe, ku khundu kwa Ule alipo, Ule akhalipo, na Ule anafuna kudza, na kuna mizimu minomwe inagumanika patsogolo pa mpando wace wa umambo, pontho na ku khundu kwa Yezu Kirixtu, nyamaso wakunyindirika, wakutoma kulamuka pa akufa, pontho nkulu wa amambo a pantsi. Iye asatifuna, pontho atiombola m'madawi mwathu na ciropa cace, mbaticita umambo na anyantsembe, toera tiphatire basa Mulungu wace na Baba wace. Unowu, mbapaswe mbiri na mphambvu za kwenda na kwenda! Ameni. Lang'anani, Iye ali kudza m'makole. Anthu onsene anamuona, na ale ene adamulasa. Madzindza onsene a pantsi anati alire na thangwi yace. Tenepa pinacitika! Ameni. Mulungu Mbuya alonga tenepa: “Ine ndine Alufa na Omega, ” Iye alipo, Iye akhalipo, Iye ndiye anafuna kudza, Ule ana mphambvu zonsene. Ine Juwau m'bale wanu, pontho ndzanu pa nyatwa mu Umambo na pakupirira muna Yezu, ndikhali pa ntsuwa ya Patimosi, na thangwi ya fala ya Mulungu, pontho na kucitira umboni Yezu. Pa Ntsiku ya Mbuya, ine ndaphatiwa na Nzimu Wakucena. Ndabva n'nduli mwanga fala ya mphambvu ninga kaluta, mbikhalonga kuti: “Pinaona iwe pilembe mu bukhu ibodzi, upitumize kuna magereja manomwe a ku Azya: Efesu, Ejimirina, Perigamu, Tiyatira, Saridhi, Filadhelifya na a ku Laudhiseya.” Ndazungunuka toera ndione ndi ani akhalonga na ine. Mudazungunuka ine, ndaona nyale zinomwe za oro. Pakati pa nyale zenezo, pakhali m'bodzi “adalandana na mwana wa munthu,” akhadabvala nguwo zace zikhadafika mpaka m'manyalo, mbazimanga na bhande ya oro ncifuwa mwace. Nsolo wace, na tsisi yace, ikhadacena kakamwe ninga thonje. Maso ace, akhali ninga malirimi a moto. Myendo yace ikhali ninga nkuwa wakupukutwa, wakusungulwa pa moto wakugaka. Fala yace ikhatitimira ninga madzi makulu. N'djanja yace ya madyo, akhali na nyenyezi zinomwe. N'kanwa mwace mukhabuluka tarasada yakunozwa khundu na khundu. Nkhope yace ikhagaka ninga dzuwa yakugaka na mphambvu. Mudamuona ine, ndagwa pa myendo pace ninga munthu wa kufa. Mbwenye iye andisandzika djanja yace ya madyo, mbalonga kuti: “Leka gopa. Ine ndine Wakutoma na Wakumalisa. Ine ndine ule ali m'maso. Ndikhadafa, mbwenye lang'anani, cincino ndiri m'maso kwenda na kwenda! Pontho ndina pyavi pya kufa na pya dziko ya anyakufa.” “Lemba mphapo pinthu pidaona iwe, pire pinacitika cincino, na pire pinafuna kudza kacitika kutsogolo. Nyenyezi zinomwe zire zidaona iwe n'djanja yanga ya madyo, na nyale zinomwe zire za oro, pisalongera ipi: ‘Nyenyezi zinomwe, ndi anju za magereja manomwe, pontho nyale zinomwe, ndi magereja manomwe.’ ” Lemba kuli anju wa abale a gereja ya ku Efesu kuti: “Mafala awa mba ule adaphata nyenyezi zinomwe m'manja mwace a nkono wa madyo, mbakhafamba pakati pa nyale zinomwe za oro. Ine ndisadziwa pinacita iwe, ndisadziwa basa yako yakuwanga pontho na kuwangisira kwako. Ndisadziwa kuti iwe nkhabe siya kuti anthu acite kuipa. Ndisadziwa kuti waalesera ale analonga kuti ndife apoxtolo, mbakhonda kukhala apoxtolo, pontho mbuadzindikira kuti iwo ndi anyauthambi. Iwe wawangisira mbupirira pa nyatwa na thangwi ya dzina yanga, mbukhonda kumala mphambvu. “Mbwenye cidakhonda kukomerwa na ine kwa iwe, ndi ici: Iwe wasiya mafuniro ako akutoma. Kumbuka ndi papi padagwa iwe! Chunyuka ucite mabasa akhacita iwe pakutoma. Ungakhonda kuchunyuka, ndinakudzera mbandibulusa nyale yako pale pakhakhala iyo. Mbwenye ciripo cinthu cibodzi cidakomerwa na ine kwa iwe, ndi ici: Iwe usazonda pinacita nsoka wa Nikolau, ninga ine ndisapizondambo. “Ule ana makutu akubva, mbabve pinalonga Nzimu Wakucena kuna abale a magereja. Anakunda, ndinampasa kuti adye muti wa upulumuki uli m'paraizu ya Mulungu. “Lemba kuli anju wa abale a Gereja ya ku Ejimirina kuti: “Awa ndiwo mafala a ule Wakutoma na Wakumalisa, akhadafa pontho mbadza kakhala m'maso. Ndisadziwa nyatwa zako na kucherenga kwako. Mbwenye iwe ndiwe m'pfumi! Ndisadziwa kuxola kunacita ale analonga kuti ndi madjuda iwo mbakhonda kukhala madjuda, mbwenye ndi nyumba za kuphemberera za Sathani. Leka kugopa nyatwa zinafuna kudza kaona iwe. Lang'anani, Dyabu anati akwate andzanu anango mbaaikha n'kaidi toera kualesera. Imwe munati muone nyatwa pa ntsiku khumi. Khala wakunyindirika mpaka kufa, ine ndinakupasa nthimba ya upulumuki. “Ule ana makutu akubva, mbabve pinalonga Nzimu Wakucena kuna magereja. Anakunda, cipo anadza kaona pontho kufa kwaciwiri. “Lemba kuli anju wa abale a Gereja ya ku Perigamu kuti: “Awa ndi mafala a ule ana tarasada yakunozwa khundu na khundu. Ndisadziwa panakhala iwe, kule kunakhala mpando wa umambo wa Sathani. Mbwenye iwe usakhala mbunyindira dzina yanga, mbukhonda kusiya kundikhulupira mpaka kufikira kuphiwa kwa Antipa, mboni wanga wakunyindirika, ku nzinda unowu unakhala Sathani. “ Mbwenye pyakuipa ping'ono pidaona ine kuna iwe ndi ipi: Iwe uli na iwo mwenemu anthu anatowerera mapfundzisiro a Bhalamu, ule adapfundzisa Bhalaki kunyengerera ana a Izarayeli kuti adye pyakudya pya kuikhirwa ntsembe madzimunthu, pontho na kuapfundzisa kucita pyalukwali. Tenepa, unaombo pakati pako ale anatowera mapfundzisiro a nsoka wa Nikolau. Na tenepo, chunyuka! Ungakhonda kuchunyuka, ine ndinabwera na mwansanga mpaka kuna iwe, pontho ndinagwa na iwo nkhondo na tarasada inabuluka pa mulomo panga. “ Ule ana makutu akubva, mbabve pinalonga Nzimu Wakucena kuna magereja. Anakunda, ndinampasa manaa adabisiwa. Pontho ndinati ndimpase mwala ubodzi wakucena wakulembwa dzina ipsa, inadziwika basi na ale anaitambira. “Lemba kuli anju wa abale a Gereja ya ku nzinda wa Tiyatira kuti: “Awa ndi mafala a Mwana wa Mulungu, ana maso ninga malirimi a moto, pontho ana myendo ninga nkuwa wa kuyetimira. Ine ndisadziwa pinacita iwe, na mafuniro ako, na kukhulupira kwako, na mabasa ako, na kuwangisira kwako, pontho ndisadziwa kuti cincino, iwe usacita pikulu kakamwe kupiringana pakutoma. “Na tenepo, cakuipa cidaona ine kwa iwe ndi ici: Usasiya Jezebheli, nkazi analonga kuti ndi mporofeta, mbacita kufuna kwace. Na pipfundzo pyace, iye asanyengerera adzakazi anga kuti acite pyalukwali, na kudya pinthu pidaikhirwa ntsembe madzimunthu. Ine ndampasa n'dzidzi toera achunyuke ulukwali unacita iye, mbwenye iye nkhabe funa kuchunyuka. Na thangwi eneyi, ndinati ndimpase utenda pontho mbandidzesa nyatwa zikulu kuna ale anacita na iye upombo, male angakhonda kuchunyuka mabasa anacita iye. Ndinati ndiaphe ana a nkazi unowu. Na tenepo, abale a magereja onsene anati adziwe kuti ine ndine ule anadziwa manyerezero a anthu, na mitima yawo, pontho m'bodzi na m'bodzi ndinam'bwezera ninga mudacita iye. Na imwe anango ali ku Tiyatira, imwe munakhonda kutowerera mapfundzisiro ace, pontho mbamukhonda kupipfundza pinthu pyakubisala kakamwe pya Sathani, ninga munapilongera iwo, ndisakupangani kuti: Imwe nkhabe kukupasani ntolo unango. Mbwenye phatisisani mbumuwangisira na pire basi pina imwe, mpaka kubwera kwanga. “Ule anakunda mbacita kufuna kwanga mpaka pakumalisa, ndinampasa mphambvu za kutonga madziko. “ ‘ Iye anaatonga na mpsimbo ya utale mbaanyedza ninga asanyedza combo ca dongo.’ “Ine ndinampasa utongi ubodzi-bodzi udapaswa ine na Baba wanga. Pontho ndinampasa nyenyezi ya macibese. Ule ana makutu akubva, mbabve pinalonga Nzimu Wakucena kuna magereja.” “Lemba kuli anju wa abale a Gereja ya ku Saridhi kuti: “Awa ndiwo mafala a ule ana mizimu minomwe ya Mulungu na nyenyezi zinomwe. Ine ndisadziwa pinacita iwe. Iwe usabvekera kuti uli m'maso, mbwenye ndiwe wakufa. Khala wakulang'anira! Pasa mphambvu pire pidasala piri dhuzi na kufuna kufa, thangwi ndaona kuti mabasa ako hadalungama tayu pamaso pa Mulungu wanga. Mphapo kumbuka pidatambira iwe na pidabva iwe, bvera mbuchunyuka. Mbwenye iwe ungakhonda kulang'anira, ine ndinabwera ninga mbava, iwe mbukhonda kudziwa na pang'ono pene ndi n'dzidzi wanji unafuna ine kubwera kuna iwe. “Mbwenye iwe unawo kweneku ku Saridhi anthu anango pang'ono, adakhonda kuswipisa nguwo zawo. Iwo anati afambe na ine na nguwo zakucena, thangwi ndiwo adakwana kucitirwa penepi. “Anakunda anati abvazikwembo sawa-sawa nguwo zakucena. Cipo ndinadza kafudza dzina yace mu Bukhu ya Upulumuki, mbwenye ndinampangisa patsogolo pa Baba wanga na pa maanju ace. Ule ana makutu akubva, mbabve pinalonga Nzimu Wakucena kuna abale a magereja. “ Lemba kuli anju wa abale a Gereja ya ku Filadhelifya kuti: “Awa ndiwo mafala a ule wakucena na wa ndimo mwene, ana cavi ca Dhavidhi. Cinafungula iye, nkhabe anakwanisa kucifunga, pontho cinafunga iye nkhabe anakwanisa kucifungula. Ine ndisadziwa pinacita iwe. Lang'ana, ndaikha patsogolo pako nsuwo wakufunguka kuti nkhabe munthu anakwanisa kuufunga. Ndisadziwa kuti iwe mphambvu zako zacepa. Mbwenye wakoya fala yanga, pontho dzina yanga hudaikhonda tayu. Lang'anani pinafuna cita ine na ale a nyumba ya kuphemberera ya Sathani, analonga kuti ndife madjuda, mbakhonda kukhala madjuda, mbwenye asalonga uthambi. Ndinaacita kuti abwere kudza kalambira pa myendo pako, pontho mbadziwa kuti ine ndakufuna. Thangwi iwe wakoya fala yanga idakupanga ine kuti uwangisire, inembo ndinakukoya pa n'dzidzi wa kuleserwa unafuna kudza pa dziko yonsene, toera kulesera anthu a pantsi pano. “Ndinabwera na mwansanga! Koya pire pina iwe, toera paleke kuoneka unango wa kukukwatira nthimba yako. Ule anakunda, ndinancita chikwa ya nyumba ya ntsembe ya Mulungu wanga, pontho penepo iye nkhabe kudza kabulukabve. Ine ndinadza kamulemba dzina ya Mulungu wanga m'manungo mwace, na ya nzinda wa Mulungu wanga unacemerwa Djerusalema ipsa, unachita buluka kudzulu kuna Mulungu, pontho ndinamulembambo dzina yanga ipsa. “Ule ana makutu akubva, mbabve pinalonga Nzimu Wakucena kuna abale a magereja. “Lemba kuli anju wa abale a Gereja ya ku Laudhiseya kuti: “Awa ndiwo mafala a Ameni, ndiye m'mboni wakunyindirika na wa ndimo mwene, mwanacinthu wa pidacitwa na Mulungu. Ine ndisadziwa pinacita iwe. Iwe siwe wakutonthola, siwe wakupisa. Pikhali pyadidi mbudakhala pyako wakutonthola, peno wakupisa! Na tenepo, thangwi ndiwe wakupisira pang'ono, nkhabe kupisa maka, pontho nkhabe kutonthola, ndinati ndikutapike pa mulomo panga. Iwe usalonga kuti: ‘Ndine m'pfumi, ndapasiwa mpfuma, nkhabe cinthu cinasowa ine.’ Nkhabe dzindikira kuti ndiwe wakusowa pyonsene, wakupasa ntsisi, n'cherengi, boli-boli, pontho kuti uli cipezi-pezi. Na tenepo, ndiri kukulanga kuti ugule na ine oro wakusungulwa na moto toera upfume. Gula nguwo zakucena ubvale, toera ukhonde kuoneka pezi kwakupasa manyadzo, pontho ugule ntombwe wa m'maso udzoze m'maso mwako, toera ukwanise kuona. “Ine ndisasandika mbandidzudza ale anafuna ine. Na tenepo, wangisira pontho uchunyuke. Lang'anani! Ine ndiri pa nsuwo, ndiri kugogodza. Munthu anabva fala yanga mbafungula citseko, ine ndinapita n'nyumba mwace, mbandidya pabodzi pene iye na Ine. “Ule anakunda, ndinansiya kuti akhale na ine pabodzi pa mpando wanga wa umambo, ninga inembo ndakunda mbindikhala pabodzi na Baba wanga pa mpando wace wa umambo. Ule ana makutu akubva, mbabve pinalonga Nzimu Wakucena kuna magereja.” Pakumala kwa pinthu penepi, ndalang'ana mbindiona kudzulu nsuwo ubodzi wakufunguka! Fala idabva ine pakutoma mbikhalonga ninga kaluta, yandipanga tenepa: “Kwira pano, ine ndinakupangisa pire pinafuna kudza kacitika pakumala kwa pinthu ipi.” Na mwansanga ndaphatiwa na Nzimu Wakucena, ndalang'ana mbindiona mpando ubodzi wa umambo, kudzulu! Penepo pakhakhala munthu. Munthu akhakhala pa mpando wa umambo, akhadalandana na mwala wakuyetimira unacemerwa djaxpe, na unango unacemerwa saridhonyo. Mpando wa umambo, ukhadazungulirwa na utazimu wakulandana na mwala wakuyetimira unacemerwa ejimeradha. Pa mpando unowu wa umambo, n'khundu mwace ukhadazungulirwa na mipando inango ya umambo, makumawiri na minai. Mwenemu mukhadakhaliwa na akulu-akulu makumawiri na anai, akhadabvala nguwo zakucena na nthimba za oro m'misolo mwawo. Pa mpando wa umambo, pakhabuluka kucetuma na kudhima. Pontho patsogolo pa mpando, pakhagaka nyale zinomwe za moto. Nyale zenezi ndizo Mizimu minomwe ya Mulungu. Pontho patsogolo pa mpando wa umambo, pakhali na cinthu cakulandana na bara ya vidhuru, mbiciphenekera ninga matalala. Nakati-na-kati, n'khundu mwa mpando wa umambo, mukhadazungulirwa na pinthu pinai pya m'maso, pyakudzala na maso kutsogolo na n'nduli mwene. Cinthu cakutoma ca m'maso calandana na nkhalamu, caciwiri calandana na n'gombe, cacitatu cikhali na nkhope ninga ya munthu, cacinai calandana na mbalame inacemerwa capungu mbakhamburuka. Cibodzi na cibodzi pa pinthu penepi, pikhali na mapapido matanthatu, na maso mazinji n'khundu na pantsi pa mapapido. Masiku na masikati nkhabe matama, mbakhalonga tenepa: “Wakucena, Wakucena, Wakucena ndi Mbuya, Mulungu wa mphambvu zonsene, Ule akhalipo, Ule alipo na Ule anafuna kudza.” Kazinji kene, pinthu pya m'maso mukhapasa ipyo mbiri mbapikhakuza na kupereka takhuta kuna ule anagumanika pa mpando wa umambo, pontho mbakhala m'maso kwenda na kwenda, akulu-akulu makumawiri na anai asagwa pantsi patsogolo pa ule ali pa mpando wa umambo pontho mbalambira ule ali m'maso kwenda na kwenda. Iwo asabulusa nthimba zawo mu nsolo mbaziyikha patsogolo pa mpando wa umambo, mbalonga tenepa: “Imwe Mbuya, pontho Mulungu wathu, ndimwe adakwanira kupaswa mbiri, kukuzwa, na mphambvu, thangwi pinthu pyonsene ndimwe mudapicita, pontho na thangwi ya kufuna kwanu ipyo pyaoneka mbapicitika.” Na tenepo, ndaona m'manja a nkono wa madyo a ule ali pa mpando wa umambo, bukhu ibodzi yakulembwa n'kati na kunja, mbifungwa kanomwe na upula. Ndaona pontho anju m'bodzi wa mphambvu, mbakhakhuwa na mphambvu zonsene kuti: “Mbani anakwanira kukaula upula na kufungula bukhu?” Mbwenye nkhabe munthu m'bodzi adaoneka kudzulu peno pantsi pano, peno pantsi pa mataka, adakwanira kufungula bukhu peno kuilang'ana. Apo ine ndikhalira pikulu, na thangwi yakukhonda kugumanika munthu m'bodzi adakwanira kufungula bukhu na kuilang'ana. Na tenepo, m'bodzi wa akulu-akulu andipanga tenepa: “Leka kulira! Lang'ana, nkhalamu ya dzindza ya Djudaa, N'chici wa Dhavidhi! Akunda toera afungule bukhu, pontho na kukaula upula udafungwa na iyo kanomwe.” Pakumala, ndaona Mwana Bira m'bodzi ninga wakufa, mbali dzololo pakati pa mpando wa umambo, mbazungulirwa na pinthu pinai pya m'maso na akulu-akulu. Mwana Bira akhali na nyanga zinomwe na maso manomwe. Penepyo ndipyo Mizimu minomwe ya Mulungu idatumwa pantsi pano ponsene. Na tenepo, Mwana Bira afendedzera mbatambira bukhu ikhali m'manja a nkono wa madyo a ule akhakhala pa mpando wa umambo. Mwana Bira pidaitambira iye bukhu, pinthu pinai pya m'maso, na akulu-akulu makumawiri na anai, pyonsene pyagwa pantsi mbipimulambira. Penepo m'bodzi na m'bodzi akhali na bhangwe wace, na ndiko za oro zakudzala na pinthu pyakununkhira pinacemerwa “isensu,” ndipyo pinapangisa miphembero ya mbumba ya Mulungu. Iwo akhaimba nyimbo ipsa tenepa: “Imwe ndimwe munakwanira kutambira bukhu, na kukaula upula wace. Thangwi mwaphiwa, pontho na ciropa canu mbumugula anthu a madzindza onsene, a malongero onsene, a madziko onsene na a mbumba yonsene, gulira Mulungu. Imwe mwaacita kuti iwo akhale umambo pontho akhale anyantsembe kuna Mulungu wathu. Pontho iwo anati atonge pantsi pano.” Na tenepo, ndalang'ana mbandibva fala ya maanju azinji, pikwi na pikwi pyakukhonda kulengeseka. Iwo akhazungulira mpando wa umambo, akhazungulira pinthu pya m'maso na akulu-akulu. Pontho akhaimba na kugaluza tenepa: “Mwana Bira adaphiwa ndiye anakwanira kutambira mphambvu za utongi, mpfuma, udziwisi, na mphambvu, kulemebza, kupaswa mbiri na kukuzwa!” Buluka penepo, ndabva pinthu pyonsene pidacitwa kudzulu, pantsi pano, pantsi pa mataka, m'bara, na pyonsene piri mwenemu, pikhalonga tenepa: “Kuna ule adakhala pa mpando wa umambo na kuna Mwana Bira, mbakuzwe, mbasimbwe, mbapaswe mbiri na mphambvu za utongi kwenda na kwenda!” Pinthu pinai pya m'maso pyalonga tenepa: “Ameni!” Penepo, akulu-akulu agwa pantsi mbamulambira. Ine ndalang'anisa mukhafungula Mwana Bira cidhindo cakutoma pa pidhindo pinomwe. Na tenepo, pa nsoka wa pinthu pinai pya m'maso, ndabva cibodzi mbicilonga na fala ninga ya njazi kuti: “Bwera!” Ndalang'ana mbindiona patsogolo panga kavalo ibodzi yakucena. Akhaipakira akhali na uta ubodzi, pontho apaswa nthimba ibodzi mbakhafamba ninga munthu wakuwina, na cipapu ca kuwina. Mudafungula Mwana Bira cidhindo caciwiri, ndabva cinthu cam'maso caciwiri mbicilonga tenepa: “Bwera!” Penepo pabuluka kavalo inango yakufuira. Mwanaciro kavalo atambira mphambvu ya kubulusa ntendere pa dziko, mbacita kuti anthu aphane okha-okha. Iye apasiwa tarasada ikulu. Mudafungula Mwana Bira cidhindo cacitatu, ndabva cinthu cam'maso cacitatu mbicilonga tenepa: “Bwera!” Ndalang'ana, mbindiona patsogolo panga kavalo ibodzi yakuswipa. Munthu akhadaipakira akhali na n'dida m'manja mwace. Ndabva cinthu cakulandana ninga fala pakati pa pinthu pinai pya m'maso, mbicikhalonga tenepa: “Aphate basa ntsiku yamumphu toera kutambira nyamagongwe m'bodzi wa ufa wa tirigu, pontho aphate basa ntsiku yamumphu toera kutambira anyamagongwe atatu a sevadha. Mbwenye leka kupungula mafuta na vinyu.” Mudafungula Mwana Bira cidhindo cacinai, ndabva fala ya cinthu cacinai pa nsoka wa pinthu pya m'maso mbicilonga tenepa: “Bwera!” Ndalang'ana mbindiona patsogolo panga kavalo ibodzi ya nsoswe. Ule akhadaipakira akhacemerwa Kufa, pontho dziko ya Anyakufa ikhantowera. Iye apaswa mphambvu za kupha phindi ya cinai ya anthu a padziko na tarasada, na njala, na muliri pontho na pinyama pya n'tsanga pya padziko. Mwana Bira pidafungula Iye cidhindo cacixanu, ndaona pantsi pa guwa ya ntsembe, mizimu ya ale adaphiwa na thangwi ya kulonga fala ya Mulungu, pontho na umboni wawo udalonga iwo. Iwo akhakhuwa na mphambvu kuti: “Mpaka lini Mbuya, imwe wakucena na wakunyindirika, munadikhira kutonga anthu a padziko mbumuaonesambo nyatwa thangwi ya ciropa cathu?” Na tenepo, m'bodzi na m'bodzi wawo atambira nguwo zakucena zakulapha, pontho iwo apangwa kuti adikhire pang'ono mpaka kuti nsoka wa adzakazi andzawo, pontho mbakhala abale awo muna Kirixtu, anafuna kudza kaphiwambo ninga iwo, ukwane. Ndalag'anisa mukhafungula Mwana Bira cidhindo cacitanthatu. Kwaoneka citeke-teke cikulu. Dzuwa yaswipa ninga nguwo yakuswipa, mwezi onsene mbudza kafuira ninga ciropa. Pontho nyenyezi za kudzulu zagwa pantsi pano, ninga kugwa kunagwa masambvu mawisi pa kutekenyeswa na mphepo ikulu. Thambo yakununduka mbipoterezeka ninga mpfumba yakufunyiwa, pontho mapiri onsene na ntsuwa zonsene, zabuluswa pa mbuto zawo. Na tenepo, amambo a padziko, na atongi, na akulu anyankhondo, na anyakupfuma, na anyamphambvu, na onsene, adzakazi na atumbe, abisala n'dzimba na pakati pa myala ya m'mapiri. Iwo akhakhuwa kuna mapiri na kuna myala kuti: “Tigwereni pyathu mutibise, tikhonde kuoneka pa nkhope pa ule adakhala pa mpando wa umambo, pontho kuti tithawe kuipirwa kwa Mwana Bira! Thangwi yafika ntsiku ikulu ya kuchunyuswa kwawo. Pontho mbani anafuna kwanisa kuwangisira?” Pakumala penepyo, ndaona anju zinai ziri dzololo mu nkhomu zinai za dziko, mbiziphata mphepo zinai za dziko, toera kupingiza kuti ikhonde oneka mphepo ibodzi ya kupepesa pa dziko, m'bara peno kupepesa miti inango. Na tenepo, ndaona anju unango mbakhakwira kumabulukira dzuwa na cidhindo m'manja ca Mulungu wa m'maso. Iye akhuwa pikulu kakamwe kuna anju zinai zire zikhadapaswa mphambvu za kufudza dziko na bara, mbazipanga tenepa: “Lekani kufudza dziko, peno bara, peno miti, mpaka panamala ife kudhinda nkhope za anyabasa a Mulungu wathu.” Na tenepo, ndabva kulengeswa kwa ale adadhindwa. Akhali pikwi dzana na makumanai na pinai pya anthu a madzindza onsene a ana a Izarayeli. Dzindza ya Djudaa, adadhindwa ndi pikwi khumi na piwiri. Dzindza ya Rubheni, pikwi khumi na piwiri. Dzindza ya Gadhi, pikwi khumi na piwiri. Dzindza ya Aseri, pikwi khumi na piwiri. Dzindza ya Nafitali, pikwi khumi na piwiri. Dzindza ya Manase, pikwi khumi na piwiri. Dzindza ya Simiyau, pikwi khumi na piwiri. Dzindza ya Levi, pikwi khumi na piwiri. Dzindza ya Isakari, pikwi khumi na piwiri. Dzindza ya Zebhuloni, pikwi khumi na piwiri. Dzindza ya Zuze, pikwi khumi na piwiri. Dzindza ya Bhenjamini, pikwi khumi na piwiri. Pakumala penepyo ndalang'ana, mbandiona patsogolo panga mwinji wa anthu a madziko onsene, a madzindza onsene, a mbumba zonsene na a malongero onsene, kuti nkhabe munthu akhakwanisa kualengesa. Akhadalimira patsogolo pa mpando wa umambo, na patsogolo pa Mwana Bira. Iwo akhadabvala nguwo zakucena zakulapha, mbaphata micindu m'manja mwawo. Iwo akhakhuwa pikulu kakamwe mbalonga tenepa: “Upulumuki ndi wa Mulungu wathu adakhala pa mpando wa umambo, pontho ndi wa Mwana Bira.” Anju zonsene zikhadalimira mbazizungulira mpando wa umambo, akulu-akulu, na pinthu pinai pya m'maso. Izo zagodama patsogolo pa mpando wa umambo, mbizigwa pantsi na nkhope, mbizilambira Mulungu, mbizilonga tenepa: “Ameni! Kukuzwa, mbiri, udziwisi, kupereka takhuta, kulemebza, utongi na mphambvu mbapikhale na Mulungu wathu kwenda na kwenda. Ameni!” Na tenepo, m'bodzi wa akulu-akulu andibvundza tenepa: “Mbani awa adabvala nguwo zakucena zakulapha, pontho abuluka kupi?” Ine ndatawira tenepa: Mbuya, imwe ndimwe munaadziwa. Iye alonga tenepa: “Awa ndiwo adabuluka ku nyatwa ikulu, afula nguwo zawo zakulapha mbazicenesa mu ciropa ca Mwana Bira. Na thangwi eneyo, “iwo ali patsogolo pa mpando wa umambo wa Mulungu, mbam'phatira basa masiku na masikati mu nyumba yace ya ntsembe. Pontho ule adakhala pa mpando wa umambo anaakoya mu khumbi yace ya ntsembe. Cipo anadza kabva pontho njala, cipo anadza kabva pontho nyota. Dzuwa, na kupisa, nkhabe kudza kaathabusa, thangwi Mwana Bira ali pakati pa mpando wa umambo, anadza kakhala nkumbidzi wawo. Iye anadza kaakumbiza mbaenda na iwo kuna mphuno za madzi a upulumuki. Pontho Mulungu anaapukuta misozi yonsene iri m'maso mwawo.” Mwana Bira pidafungula iye cidhindo cacinomwe, pyonsene pikhakhala kudzulu pyamatama, pa n'dzidzi ung'ono. Penepo ndaona anju zinomwe mbizidalimira patsogolo pana Mulungu. Izo zapasiwa makaluta manomwe. Anju unango akhadza na combo cibodzi ca oro cinapisirwa pinthu pya kununkhira pinacemerwa isensu. Iye afendedzera mbalimira dhuzi na guwa ya ntsembe. Pontho iye apasiwa isensu izinji, toera aipereke pabodzi pene na miphembero ya mbumba yonsene ya Mulungu, pa guwa ya ntsembe ya oro, patsogolo pa mpando wa umambo. Penepo, uchi wa isensu wakwira mpaka kuna Mulungu pabodzi na miphembero ya mbumba ya Mulungu, kubulukira mu combo cikhali m'manja mwa anju. Na tenepo, anju akwata combo ca pinthu pyakununkhira, mbacidzadza na moto wa pa guwa ya ntsembe, mbauponya pantsi pano. Penepo paoneka kucetuma, kudhima, njazi na citeke-teke. Na tenepo, anju zinomwe zikhakhala na makaluta manomwe, zatoma kusasanyira toera ziyimbe. Anju wakutoma aimba kaluta yace. Penepo matalala na moto wakubvungazikana na ciropa, pyaponyiwa pantsi pano. Phindi ibodzi yacitatu ya mataka, na phindi ibodzi yacitatu ya miti, na tsanga yonsene iwisi, pyonsene pyamala kupya. Anju waciwiri aimba kaluta yace. Penepo, cinthu cinango cakulandana ninga phiri ikulu mbikhagaka moto, caponyiwa m'bara. Phindi ibodzi yacitatu ya bara yacinjika kudza ciropa. Phindi ibodzi yacitatu ya pinyama pya m'bara, pyafa. Pontho phindi ibodzi yacitatu ya maxitima a m'madzi, amala kufudziwa. Anju wacitatu aimba kaluta yace. Penepo, yagwa buluka kudzulu nyenyezi ibodzi ikulu ikhapya ninga ntsakali, mbigwera phindi ibodzi yacitatu ya mikulo na ya mphuno za madzi. Nyenyezi eneyo isacemerwa “Kuwawa. ” Phindi ibodzi yacitatu ya khundu ibodzi ya madzi, adza akuwawa. Na tenepo, anthu azinji amala kufa na thangwi ya kuwawa kwa madzi. Anju wacinai aimba kaluta yace. Penepo, aphekesa phindi ibodzi yacitatu ya dzuwa, na phindi ibodzi yacitatu ya mwezi, na phindi ibodzi yacitatu ya nyenyezi. Na tenepo, phindi ibodzi yacitatu ya pinthu penepyo pyamala kuswipa. Phindi ibodzi yacitatu ya masikati yathima, sawa-sawambo na phindi ibodzi yacitatu ya cieza ca masiku. Pikhalang'ana ine, ndabva capungu cikhamburuka kudzulu kakamwe mbicikhalonga na kukhuwa kuti: “Nyatwa, nyatwa, nyatwa kuna ale anakhala pantsi pano, na thangwi ya makaluta anafuna kuimbwa cincino na maanju anango atatu!” Anju wacixanu aimba kaluta yace, mbindiona nyenyezi ikhadagwa pantsi buluka kudzulu. Nyenyezi yapaswa cavi ca kufungula naco djenje yakuzika kakamwe. Nyenyezi mudafungula iyo djenje yakuzika kakamwe ire, mwenemu mwabuluka uchi ninga wa pa foruno ikulu kakamwe. Dzuwa na kudzulu pyaswipa na uchi ukhabuluka mu djenje eneyi yakuzika kakamwe. Pa uchi pabuluka anyadzombe mbadza pa dziko, mbapaswa mphambvu ninga za akong'a a padziko. Iwo apangwa kuti aleke bvunga thongwe ya pantsi pano, aleke kudya masamba anango mawisi peno miti, mbwenye alume ale anthu adasoweka cidhindo ca Mulungu pa nkhope pawo. Iwo hadapaswa mphambvu za kuapha tayu, mbwenye apaswa mphambvu za kuathabusa pa myezi mixanu. Nyatwa zikhabva iwo, zikhali ninga za kong'a angaluma munthu. Pa ntsiku zenezo anthu anasaka kufa, mbwenye hanakugumana tayu. Anadza kafuna kuti afe, mbwenye kufa kunaathawa. Anyadzombe akhakhala ninga makavalo akumala kusasanyirwa kuti aende ku nkhondo. M'misolo mwawo mukhali na pinthu ninga nthimba za oro, pontho nkhope zawo zikhali ninga za anthu. Tsisi yawo ikhali ninga tsisi ya nkazi, pontho mano awo akhali ninga mano a nkhalamu. Pa cifuwa pawo akhadabvala cinthu cakugugumira, ninga ca utale. Kulira kwa mapapido awo, kukhabveka ninga makavalo mazinji ali kuthamanga na ngolo zawo kwenda ku nkhondo. Akhali na micira na mbolera ninga za kong'a, pontho m'micira mwawo mukhali na mphambvu za kuthabusa anthu pa myezi mixanu. Akhali na mambo wawo m'bodzi, anju wa djenje yakuzika kakamwe, dzina yace nciebhereu ndi Abhadhoni, ncigerego ndi Apoliyoni. Nyatwa yakutoma yamala, zinango ziwiri zisafuna kudza. Anju yacitanthatu yaimba kaluta yace, mbandibva fala ikhabuluka mu nkhomu zinai za pa guwa ya ntsembe ya oro iri patsogolo pana Mulungu. Fala eneyi yalonga kuna anju m'bodzi-bodzi wacitanthatu akhali na kaluta kuti: “Sudzula anju zinai zidamangirirwa dhuzi na nyandza ikulu ya Eufarati.” Anju zinai zikhadamala sasanyika, mbizikhadikhira n'dzidzi unowu, ntsiku eneyi, mwezi unowu na caka ceneci, zasudzulwa toera ziphe phindi ibodzi yacitatu ya anthu. Nsoka wa anyamakavalo a anyankhondo, ukhali wa pikwi na pikwi pya anyankhondo. Ine ndabva kulengeswa kwawo. Makavalo na anyamakavalo adaoneswa ine mu Nzimu akhali tenepa: Pinthu pya kugugumira cifuwa pikhadabvala iwo, pikhali pyakufuyira ninga moto, pya bhurumu ninga mwala wakuyetimira unacemerwa jasintu, pontho pya nsoswe ninga inxofiri. Misolo ya makavalo ikhadalandana ninga nsolo wa nkhalamu, pontho n'kanwa mwawo mukhabuluka moto, uchi na inxofiri. Phindi ibodzi yacitatu ya anthu yafa na nyatwa zenezi zitatu: Nyatwa za moto, nyatwa za uchi, na nyatwa za inxofiri zikhabuluka n'kanwa mwawo. Mphambvu za makavalo zikhali n'kanwa na kuncira, thangwi micira yawo ikhali ninga nyoka. Ikhali na misolo ikhaluma na iwo anthu. Anthu anango akhadasala mbakhonda kufa na nyatwa zenezi, hadachunyuka pontho hadasiya kulambira alungu a pezi akhacita iwo na manja awo tayu. Iwo akhathimiza basi kulambira mizimu ya kuipa na madzimunthu a oro, a parata na a nkuwa, a myala na a miti, madzimunthu anakhonda kuona, anakhonda kubva peno kufamba. Pontho akhonda kuchunyuka uphanga wawo, ufiti wawo, ulukwali wawo, na umbava wawo. Na tenepo, ndaona anju unango wa mphambvu, mbakhachita buluka kudzulu. Iye akhadafinikizwa na khole, pontho padzulu pa nsolo wace pakhali na utazimu. Nkhope yace ikhali ninga dzuwa, myendo yace ikhali ninga mizati ya moto. Iye akhadaphata bukhu ing'ono m'manja mwace, yakufungulwa. Aikha mwendo wace wa madyo padzulu pa bara, mwendo wace wa bzere kuntunda. Penepo, akhuwa pikulu ninga kulira kwa nkhalamu. Pidakhuwa iye, njazi zinomwe zatoma kulonga. Pa n'dzidzi ubodzi ene ukhalonga njazi zinomwe, ine ndikhadasasanyira kuti ndilembe. Mbwenye ndabva fala ya kudzulu mbikhalonga tenepa: “Koya muntima mwako pidalonga njazi zinomwe. Leka kupilemba.” Na tenepo, anju akhadaona ine mbalimira padzulu pa bara na kuntunda, athukula kudzulu nkono wace wa madyo. Penepo, iye adumbira na dzina ya Mulungu ule ali m'maso kwenda na kwenda, adacita kudzulu na pantsi, na bara, na pyonsene pinagumanika mwenemu, mbalonga tenepa: “Nkhabe kudza kadembukabve. Mbwenye pa ntsiku zinafuna kuimba anju wacinomwe kaluta yace, pyakubisala pya Mulungu pinadza kasimbiswa, ninga mudapilongera Iye kuna maporofeta, anyabasa ace.” Buluka penepo, fala ikhadabva ine mbilonga kudzulu, yalonga pontho na ine tenepa: “Ndoko, kwata bukhu ya Mulungu idafungulwa, iri m'manja mwa anju anagumanika dzololo padzulu pa bara na kuntunda.” Na tenepo, ndafendedzera anju mbandimphemba kuti andipase bukhu ing'ono ya Mulungu. Penepo, iye andipanga tenepa: “Kwata, uidye! Iyo inawawa m'mimba mwako, mbwenye n'kanwa mwako inatapira ninga uci.” Ine ndakwata bukhu ing'ono ya Mulungu ikhali m'manja mwa anju, mbandiidya. Iyo ikhanditapirira n'kanwa mwanga ninga uci, mbwenye pakuidya, ndabva kuti m'mimba mwanga muli kuwawa. Na tenepo, ndapangwa kuti: “Pisafunika kuti iwe ulonge ciporofeta, pa thangwi ya mbumba zizinji, madziko mazinji, malongero mazinji, na amambo azinji.” Ndapaswa ntete ubodzi wakulandana na mpsimbo ya kupima nayo, mbindipangwa tenepa: “Ndoko, pima Nyumba ya Mulungu na guwa ya ntsembe, pontho ulengese anyakulambira ali mwenemu. Siya khonde yace, leka kuipima, thangwi yapaswa ale adakhonda kukhala madjuda. Iwo anaupwanda nzinda wa Mulungu pa myezi makumanai na miwiri. Ndinapasa mphambvu kuna amboni anga awiri, mbabvala masakha, kuti alonge ciporofeta, pa cikwi na madzana mawiri na makumatanthatu a ntsiku.” Amboni enewa ndiyo miti miwiri ya mulivera na nyale ziwiri ziri patsogolo pana Mulungu Mbuya wa dziko yonsene. Ngakhala alipo anafuna kuacita kuipa, n'kanwa mwawo munabuluka moto mbupisa anyamalwa. Ndi tenepa kufa kunafuna kucita onsene anafuna kuacita kuipa. Amuna enewa ana mphambvu za kufunga kudzulu kuti madzi akhonde kubvumba pa n'dzidzi unalonga iwo ciporofeta, pontho anakhala na mphambvu za kusanduza madzi mbadza ciropa, na za kuthabusa mataka na nyatwa zonsene, pa midzidzi yonsene inafuna iwo. Angamala kucita umboni wawo, cinyama cakugopsa cinabuluka mu djenje yakuzika kakamwe mbicienda kamenyana na iwo, mbaakunda pontho mbaapha. Manungo awo anaponyiwa mu nseu ukulu wa mu nzinda ukulu unacemerwa na dzina ya misanje, Sodhoma na Idjipitu, pale padakhomerwambo Mbuya wawo pa ntanda. Manungo awo akhala penepo ntsiku zitatu na hafu, anthu a mbumba zonsene, a madzindza onsene, a malongero onsene, na a madziko onsene anaaona mbaakhondesa kwenda kaikhwa m'masiye. Anthu a pantsi pano anakomerwa na thangwi ya kufa kwawo mbacita phwandu, mbatumizirana miyoni m'bodzi na m'bodzi, thangwi maporofeta enewa awa awiri akhadathabusa anthu a pantsi pano. Mbwenye pakumala ntsiku zitatu na hafu, wapita pontho muna iwo nzimu wa upulumuki udabuluka kuna Mulungu, iwo mbalimira, anthu onsene adaaona mbagopa pikulu kakamwe. Na tenepo, iwo abva fala ya kudzulu mbilonga na mphambvu mbiapanga tenepa: “Kwirani kuno.” Penepo, mukhaalang'ana anyamalwa awo, iwo akwira padzulu pa khole mbaenda kudzulu. Pa n'dzidzi unowu ene paoneka citeke-teke cikulu kakamwe, phindi ya cikhumi ya nzinda yagwa. Pikwi pinomwe pya anthu pyafa pa citeke-teke ceneci. Adasala m'maso agopa pikulu kakamwe mbapasa mbiri Mulungu wa kudzulu. Nyatwa yaciwiri yamala. Yacitatu iri kubwera cincino pano. Anju wacinomwe aliza kaluta yace, kudzulu mbukubveka mafala akhalonga na mphambvu kuti: “Umambo wa padziko wadza kakhala wa Mulungu Mbuya wathu na wa Kirixtu wace, pontho Iye anadza katonga kwenda na kwenda.” Akulu-akulu makumawiri na anai ale akhakhala nawa-nawa m'mipando mwawo ya umambo patsogolo pana Mulungu, agwa pantsi na nkhope mbalambira Mulungu, mbalonga tenepa: “Tisapereka takhuta kuna Imwe Mbuya Mulungu wa mphambvu zonsene Imwe ndimwe, pontho mukhali imwe, thangwi mwapangisa mphambvu zanu zikulu, mbamutoma kutonga. Madziko aipirwa, pontho wafika n'dzidzi wa kuipirwa kwanu. Wafika n'dzidzi wanu wa kutonga anyakufa, na wakupasa muwoni anyabasa anu, maporofeta anu, mbumba yanu, na ale anagopa dzina yanu, akulu na ang'ono ene, pontho ndi n'dzidzi wa kupha ale anafudza dziko.” Na tenepo, Nyumba ya Mulungu yafungulwa kudzulu, n'kati mwayo mbumuoneka kaxa ya cibverano cace. Penepo paoneka kucetuma, kudhima, njazi, citeke-teke, conzi cikulu na matalala. Caoneka kudzulu cidzindikiro cakudzumisa ninga ici: Nkazi m'bodzi akhadabvala dzuwa, pantsi pa myendo yace pakhali mwezi, munsolo mwace akhadabvala nthimba ya nyenyezi khumi na ziwiri. Iye akhali na pathupi, mbakhakhuwa na kubva kupha thangwi akhafuna kubala. Na tenepo, caoneka kudzulu cidzindikiro cinango ninga ici: Nyangumi nkulu wakufuira akhali na misolo minomwe na nyanga khumi. Padzulu pa misolo yace pakhakhala na nthimba zinomwe. Na ncira wace akhakwewa na iwo phindi ibodzi yacitatu ya nyenyezi za kudzulu, mbaziponya pantsi. Nyangumi aenda kakhala patsogolo pa nkazi akhafuna kubala, toera pa n'dzidzi ukhafuna kubala iye, am'mezere mwana wace. Nkazi abala mwana-mamuna, anafuna kudza katonga madziko onsene na mpsimbo yace ya utale. Mwana wace adza kakwatwa na mwansanga kwenda kuna Mulungu, pa mpando wace wa umambo. Nkazi athawira n'thando ku mbuto ikhadasasanyirwa iye na Mulungu, kuti mwenemu akwanise kukoyiwa na kudyesiwa, pa ntsiku cikwi na madzana mawiri na makumatanthatu. Na tenepo, kwaoneka nkhondo kudzulu. Migeli na anju zace amenya nkhondo na nyangumi. Iyembo nyangumi na anju zace, amenyanambo na Migeli. Mbwenye nyangumi na anju zace zikhali na mphambvu zakukwana tayu. Na tenepo, aluza mbuto yawo kudzulu. Nyangumi wankulu ataiwa kunja. Iye ndiyo nyoka ya kale inacemerwa Dyabu peno Sathani, inanyengerera dziko yonsene. Iye na anju zace ataiwa pantsi pano. Na tenepo, ndabva fala ikulu ya kudzulu mbikhalonga tenepa: “Cincino wabwera upulumuki, mphambvu na umambo wa Mulungu wathu, pontho na mphambvu za utongi za Kirixtu wace, thangwi ataiwa kunja nyakupambazira abale athu, ule akhaapambazira patsogolo pana Mulungu wathu, masiku na masikati. Iwo akunda nyangumi na ciropa ca Mwana Bira pontho na fala ya umboni idacita iwo. Atawira kufa mbakhonda kutsalakana moyo wawo. Na tenepo, tsandzayani imwe kudzulu na onsene anakhala kweneko! Mbwenye nyatwa ntsanu imwe mataka na bara, thangwi Dyabu achita mpaka kuna imwe! Iye aipirwa pikulu kakamwe, thangwi asadziwa kuti kuna iye zasala ntsiku pang'ono.” Nyangumi pidaona iye kuti ndaponyiwa pantsi pano, atoma kufambira n'nduli nkazi akhadabala mwana-mamuna. Penepo nkazi apaswa mapapido mawiri a capungu cikulu, toera amburuke na iwo kwenda n'thando, ku mbuto ikhadasasanyirwa iye. Mwenemu ndimo mukhafuna kudyeswa iye pa pyaka pitatu na hafu, kutali na nyoka. Na tenepo, nyoka yabulusa madzi n'kanwa mwace mbaenda n'nduli mwa nkazi ninga nyandza, toera nkazi akwatiwe na ngulula ya madzi. Mbwenye mataka aphedza nkazi, mbafungula mulomo mbameza nyandza ikhadabuluka n'kanwa mwa nyangumi. Nyangumi aipirwa na nkazi, mbabuluka kwenda kamenya nkhondo na adasala a dzindza ya nkazi, ale anabvera matongero a Mulungu, pontho mbakhala dzololo pa umboni wa Yezu. Na tenepo, nyangumi alimira pa checa ya m'bara. Ndaona cinyama cakugopsa mbicikhabuluka m'bara. Cikhali na nyanga khumi, misolo minomwe, na nthimba khumi padzulu pa nyanga zace, pontho pa nsolo ubodzi na ubodzi, pakhali na dzina ya kuxola Mulungu. Cinyama cakugopsa cidaona ine, cikhadalandana na nyalugwe, mbwenye myendo yace ikhadalandana na cinyama cinacemerwa urusu, mulomo wace ninga wa nkhalamu. Nyangumi apereka mphambvu zace, mpando wace wa umambo, na utongi wace ukulu kuna cinyama cakugopsa. Nsolo ubodzi wa cinyama ceneci cakugopsa, ukhali ninga ukhadaphekeswa kwa kufa, mbwenye cironda cace cikhadapola. Dziko yonsene yadzumatirwa napyo, mbitowera cinyama cakugopsa. Alambira nyangumi thangwi akhadapereka utongi wace kuna cinyama cakugopsa, pontho mbalambirambo cinyama cakugopsa, mbalonga tenepa: “Mbani ana mphambvu ninga cinyama cakugopsa ici? Mbani anakwanisa menyana naco?” Cinyama cakugopsa capaswa mulomo toera kulonga mafala akupikuza na akuxola Mulungu, pontho toera atonge pa myezi makumanai na miwiri. Ico catoma kuxola Mulungu na kuxola dzina yace, pontho na kuxola khumbi ya ntsembe ya Mulungu, na ale ali kudzulu. Capaswa mphambvu za kumenyana na mbumba ya Mulungu na za kuikunda. Capaswa mphambvu za kutonga madzindza onsene, mbumba zonsene, malongero onsene na madziko onsene. Anthu onsene a pantsi pano anacilambira cinyama ceneci cakugopsa, ale onsene adakhonda kulembwa madzina awo mu Bukhu ya Upulumuki ya Mwana Bira adaphiwa, kutomera pakutoma kwa dziko. Ule ana makutu akubva mbabve. Ngakhala alipo anatongwa kutapatwa, anati atapatwe. Ngakhala alipo anatongwa kufa na tarasada, anati afe na tarasada. Ndi n'dzidzi wa phinga na wa cikhulupiro kuna mbumba ya Mulungu. Na tenepo, ndaona cinyama cinango cakugopsa cikhabuluka pantsi, cikhali na nyanga ziwiri ninga Mwana Bira, mbwenye cikhalonga ninga nyangumi. Cikhacita utongi onsene wa cinyama cakugopsa cakutoma na dzina yaco, mbacikakamiza dziko na anthu ace kuti alambire cinyama cakugopsa cakutoma, cire cikhadaphekeswa mbicikhafuna kufa, mbiciwangiswa pontho. Cikhacita pidzindikiro pikulu, mpaka kufikira kugwisa moto buluka kudzulu kudza pantsi, pamaso pa anthu onsene. Na thangwi ya pidzindikiro pidasiyiwa iye kuti acite na dzina ya cinyama cakugopsa, ico canyengerera anthu a pantsi pano, mbaapanga kuti acite dzimunthu ibodzi toera kupasa mbiri cinyama cakugopsa cikhadaphekeswa na tarasada, mbwenye mbicidza kapulumuka. Capaswa mphambvu za kupasa muya dzimunthu ya cinyama cakugopsa cakutoma, mpaka mbicifikira kwanisa kulonga, pontho na kucita kuti onsene anakhonda kulambira dzimunthu aphiwe. Pontho akakamiza onsene, akulu na ang'ono, apfumi na anyakucherenga, adzakazi na atumbe, kuti atambire cidzindikiro m'manja a nkono wadidi peno pa nkhope, toera onsene angakhonda kukhala na cidzindikiro ca dzina ya cinyama ceneci cakugopsa, peno mangasi malemba adalembwa na dzina yace, acimwane kugula na kugulisa. Uyu ndi n'dzidzi wa udziwisi. Ule ana ndzeru, mbachulule ndi mangasi malemba a cinyama cakugopsa, thangwi ndi malengesero a munthu. Ntengo wace ndi madzana matanthatu, na makumatanthatu na pitanthatu. Na tenepo, ndalang'ana, mbandiona patsogolo panga pakhali na Mwana Bira akhadalimira pa phiri ya Siyau, pabodzi na anthu akukwana pikwi dzana na makumanai na pinai, akhadamala kulembwa pa nkhope dzina yace na dzina ya Baba wace. Ndabva kutitimira kudzulu ninga kutitimira kwa madzi makulu, pontho ninga kulira kukulu kwa njazi. Dungu idabva ine ikhali ninga ya anyabhangwe mbakhaimba mabhangwe awo. Iwo akhaimba nyimbo ipsa patsogolo pa mpando wa umambo, na pa pinyama pinai pya m'maso, na pa akulu-akulu. Nkhabe m'bodzi akhakwanisa kuiyimba nyimbo eneyi. Akhaikwanisa kuiyimba ndi pikwi dzana na makumanai na pinai basi pya anthu ale akhadaguliwa pa dziko. Awa ndiwo ale anthu adathunda pyalukwali, thangwi cipo adzati pita m'mabonde, pontho asatowera Mwana Bira monsene munaenda Iye. Aguliwa pa nsoka wa anthu ninga ntsembe yakutoma kuna Mulungu na kuna Mwana Bira. Nkhabe uthambi ubodzi udabuluka pa mulomo pawo, ndi anthu akulungama. Na tenepo, ndaona anju unango mbakhamburuka kudzulu kakamwe. Iye akhali na Mphangwa Zadidi za kwenda na kwenda toera azimwaze kuna anthu a pantsi pano, kuna dziko yonsene, madzindza onsene, malongero na mbumba yonsene. Anju alonga na mphambvu kuti: “Gopani Mulungu pontho mumpase mbiri, thangwi wafika n'dzidzi wa kutonga kwace. Lambirani ule adacita kudzulu na pantsi, na bara, pontho na mphuno za madzi.” Anju waciwiri antowera mbalonga tenepa: “Agwa! Agwa Bhabhilonya wankulu, adamwesa madziko onsene vinyu ya ulukwali wace ukulu!” Anju wacitatu aatowererambo mbalonga na kugaluza kuti: “Ule analambira cinyama cakugopsa na dzimunthu yace, pontho mbaikhwa cidzindikiro cace m'manja peno pa nkhope, unowu anamwambo vinyu ya kuipirwa kwa Mulungu, idakhutulwa n'ndiko mwace ya kuipirwa mbikhonda kubvungazwa. Pontho anadza kathabuswa na moto wa inxofiri, pamaso pa anju a Mulungu na pamaso pa Mwana Bira. Pontho uchi wa nyatwa za anthu enewa, unakwira kwenda na kwenda. Kuna onsene analambira cinyama cakugopsa na dzimunthu yace, na kuna ule adatambira cidzindikiro ca dzina yace, masiku na masikati nkhabe kupuma.” Ndi n'dzidzi wa phinga ya mbumba ya Mulungu inabvera matongero a Mulungu, pontho mbikhala yakunyindira Yezu. Na tenepo, ndabva fala ya kudzulu mbilonga tenepa: “Lemba: Mbatsandzaye anyakufa, anafa muna Mbuya kutomera cincino kwenda kutsogolo.” Nzimu Wakucena walonga kuti: “Ande, iwo anadza kapuma kuneta kwawo, thangwi mabasa awo anaatowera.” Ndalang'ana, mbandiona patsogolo panga pakhali na khole yakucena, padzulu pa khole pakhali na munthu nawa “wakulandana na mwana wa munthu.” Iye akhali na nthimba ibodzi ya oro mu nsolo, na sekeya yakunozwa m'manja. Na tenepo, anju unango abuluka mu Nyumba ya Mulungu mbakhuwa na mphambvu kuna ule akhali padzulu pa khole kuti: “Kwata sekeya yako ubvune, thangwi n'dzidzi wa kubvuna wakwana, pontho phoso yatokota pa dziko.” Na tenepo, ule akhakhala padzulu pa khole atoma kuceka na sekeya yace, pantsi pano mbapabvuniwa. Anju unango abuluka mu Nyumba ya Mulungu ya kudzulu. Iye akhakhalambo na sekeya ibodzi yakunozwa. Abulukira pontho pa guwa ya ntsembe anju unango akhali na mphambvu za kutonga moto, mbakhuwa na mphambvu khuwira ule akhali na sekeya yakunozwa, mbalonga tenepa: “Kwata sekeya yako yakunozwa ugwande ngala za mauva a miti yonsene ya mauva a pantsi pano, thangwi mauva awo amala tokota.” Anju akhali na sekeya yakunozwa, atoma kubvuna na sekeya yace pantsi pano, agumanya mauva mbaaponya mu mbuto ikulu yakukamulira mauva a kuipirwa kwa Mulungu. Mauva akamulwa mu mbuto yakukamulirwa mauva kunja kwa nzinda, mwenemu mbumubuluka ciropa mpaka kufika pa mulomo wa kavalo, pa nsindzo wakukwana madzana matatu, anacemerwa makilometuru ncizungu. Ndaona kudzulu cidzindikiro cinango cikulu cakudzumisa. Cikhali anju zinomwe, pabodzi na nyatwa zinomwe zakumalisira. Thangwi na nyatwa zenezi ndiko kuipirwa kwakumalisira kwa Mulungu. Ndaona pontho cinthu cinango cakulandana na bara ya vidhuru yakubvungazika na moto. N'khundu-n'khundu mwa bara, ndaonambo mbadalimira dzololo, ale akhadakunda cinyama cakugopsa na dzimunthu yace, na malengesero a malemba a dzina yace. Iwo anyakukunda akhakhala na mabhangwe, akhadapaswa iwo na Mulungu, pontho iwo akhaimba nyimbo ya Mozesi, n'dzakazi wa Mulungu, na nyimbo ya Mwana Bira tenepa: “Mabasa anu ndi makulu pontho ndi akudzumisa, Mbuya, Mulungu wa mphambvu zonsene. Njira zanu ndi zakulungama na za ndimo mwene, Imwe Mambo wa madziko. Mbani anakhonda kukugopani Imwe Mbuya? Mbani anakhonda kupasa mbiri dzina yanu? Thangwi ndimwe basi wakulungama. Madziko onsene anabwera patsogolo panu mbakulambirani, thangwi mabasa anu akulungama apangizika.” Pakumala penepyo, ndalang'ana mbandiona mbuto yakucena ya nyumba ya ntsembe ya Mulungu ikhacita umboni, yafunguka kudzulu. Zabuluka mu nyumba ya ntsembe ya Mulungu, anju zinomwe zikhakhala na nyatwa zinomwe. Izo zikhadabvala nguwo zakucena mbiziyetimira. Pontho akhadabvala mabhande a oro ncifuwa mwawo. Na tenepo, pa pinthu pinai pya m'maso, cibodzi cabulusa ndiko zinomwe za oro zakudzala na kuipirwa kwa Mulungu wa m'maso kwenda na kwenda, mbazipasa anju zinomwe. Mbuto yakucena ya Nyumba ya Mulungu, yadzala na uchi wa mbiri ya Mulungu na wa mphambvu zace. Pontho nkhabe munthu akhakwanisa kupita mwenemu, mpaka kumala nyatwa zinomwe zikhakhala na anju zinomwe. Na tenepo, ndabva fala ikhabuluka mu Nyumba ya Mulungu mbilonga na mphambvu kuna anju zinomwe kuti: “Ndokoni mukhakhutule pantsi kuipirwa kwa Mulungu kuli n'ndiko zinomwe za oro.” Anju wakutoma aenda, akhutula ndiko yace ya oro pa dziko, ale akhali na cidzindikiro ca cinyama cakugopsa pontho mbalambira dzimunthu yace, aphatwa na pironda pya diro pya kupha pikulu pyene. Anju waciwiri akhutula ndiko yace m'bara, madzi mbasanduzika kudza ciropa ninga ca munthu wakuphiwa, pinyama pyonsene pikhakhala m'bara mbipimala kufa. Anju wacitatu akhutula ndiko yace mu nyandza na m'mphuno za madzi, madzi mbasanduzika kudza ciropa. Na tenepo, ine ndabva anju akhali na mphambvu za kukunda madzi, mbalonga tenepa: “Imwe ndimwe wakulungama, Imwe Wakucena, mulipo cincino pontho mukhalipo na kale ene, thangwi mwapitonga pinthu ipi. Thangwi iwo amwaza ciropa ca mbumba ya Mulungu na ca maporofeta ako. Na thangwi eneyo, Imwembo mwaapasa ciropa toera amwe, Iwo asatambira pire pidaakwanira.” Ndabva pontho fala ikhabuluka pa guwa ya ntsembe mbikhalonga tenepa: “Ande Mbuya Mulungu wa mphambvu zonsene, kutonga kwanu ndi kwa ndimo mwene pontho ndi kwakulungama.” Anju wacinai akhutula ndiko yace pa dzuwa, na tenepo dzuwa yapaswa mphambvu za kupisa anthu. Anthu apya na kupisa kukulu, mbaxola dzina ya Mulungu ana mphambvu za kukunda muliri unowu, mbwenye iwo akhonda kuchunyuka, pontho akhonda kupasa mbiri Mulungu. Anju wacixanu, ndiko yace aikhutulira pa mpando wa umambo wa cinyama cakugopsa, umambo wace mbukhala n'cidima, mbakhaluma malirimi awo na thangwi ya kubva kupha kukhabva iwo. Iwo akhaxola Mulungu wa kudzulu na thangwi ya kubva kupha kwawo, pontho na thangwi ya pironda pyawo, mbwenye akhonda kuchunyuka mabasa awo akhacita iwo. Anju wacitanthatu akhutulira ndiko yace mu nyandza ikulu inacemerwa Eufarati, madzi a nyandza mbauma, toera kusasanyira njira ya amambo a kumabulukira dzuwa. Na tenepo, ndaona pa mulomo pa nyangumi, na pa mulomo wa cinyama cakugopsa, na pa mulomo wa mporofeta wa uthambi, mbapakhabuluka mizimu mitatu ya kuipa idalandana na mathesi. Ndi mizimu ya kuipa inacita pirengo. Iyo isaenda muna amambo a dziko yonsene toera aagumanye pa nkhondo ya ntsiku ikulu ya Mulungu wa mphambvu zonsene. “Lang'anani. Ine ndinabwera ninga mbava! Mbatsandzaye ule analang'anira, mbakoya nguwo zace toera akhonde kufamba cipezi-pezi, mbapasika manyadzo pamaso pa anthu.” Na tenepo, iyo yagumanya amambo pa mbuto inacemerwa Arimadjedoni nciebhereu. Anju wacinomwe akhutula ndiko yace cidzulu-dzulu. Na tenepo, mu Nyumba ya Mulungu mwabveka fala ikhabuluka ku mpando wa umambo mbikhalonga na mphambvu kuti: “Pyamala!” Penepo paoneka kucetuma, kudhima, njazi na citeke-teke cikulu. Kutomera pa n'dzidzi udaikhwa anthu pantsi pano, cipo cidzati kuoneka citeke-teke cikulu ninga ceneci. Nzinda ukulu wagawika mapindi matatu, pontho mizinda ya m'madziko yamala kugomoka. Mulungu akumbukira Bhabhilonya wankulu, mbampasa ndiko ya vinyu ya kuipirwa kwace kukulu. Ntsuwa zonsene zasoweka, pontho mapiri onsene asoweka. Myala mikulu ya matalala akulemera makilu makumanai mwala ubodzi, yagwa buluka kudzulu gwera anthu. Iwo axola Mulungu na thangwi ya nyatwa ya matalala, thangwi nyatwa yace ikhali yakugopsa pikulu kakamwe. Pa anju zinomwe, ibodzi yawo ikhakhala na ndiko zinomwe, yandifendedzera mbandipanga tenepa: “Bwera ndikupangize kuthabuswa kunafuna citwa nkazi wa lukwali ikulu, ule ali nawa padzulu pa madzi mazinji. Amambo a pantsi pano acita lukwali na nkazi unowu. Anthu a pantsi pano aledzera na vinyu ya ulukwali yace.” Na tenepo, anju andikwata mu Nzimu Wakucena kwenda n'thando. Mwenemu ndaona nkazi m'bodzi adapakira cinyama cakugopsa cakufuyira, mbadzala na kulembwa madzina akuxola. Pontho iye akhali na misolo minomwe na nyanga khumi. Nkazi akhadabvala nguwo ya bhurumu na ya kufuira, pontho mbabvala pinthu pyakubalikisa pya oro, pya myala yakubalika ya ntengo ukulu, na myala inango inacemerwa perola. M'manja mwace akhali na ndiko ya oro, yakudzala na pinthu pyakunyanyasa na pyakuipa pya lukwali yace. Pa nkhope pace, pakhadalembwa dzina ibodzi ya misanje inalonga tenepa: BHABHILONYA WA NKULU. MAI WA ANYALUKWALI, NA WA PYAKUNYANYASA PINACITWA PANTSI PANO. Na tenepo, ndaona nkazi akhadaledzera na ciropa ca mbumba ya Mulungu na ca anthu akhacitira umboni Yezu. Pidamuona ine, ndadzumatirwa pikulu. Mphapo anju andipanga kuti: “Thangwi yanji iwe usadzumatirwa? Ine ndinati ndikuchululire pinthu pyakubisala pya nkazi uyu, na pya cinyama cakugopsa cidapakira iye, cinamisolo minomwe na nyanga khumi. Cinyama cakugopsa cidaona iwe, cikhalipo kale ene mbwenye cincino nkhabebve. Ico ciri kufuna buluka n'djenje yakuzika kakamwe kwenda njira yakutaika. Anthu a pantsi pano, adacita kuti cipo madzina awo adzati kulembwa m'Bukhu ya Upulumuki kutomera padacitwa dziko, anadza kadzumatirwa na kuciona cinyama cakugopsa. Thangwi cikhalipo, cincino nkhabebve. Mbwenye cinati cibwere pontho. “Pano pasafunika ndzeru za udziwisi. Misolo minomwe, nkhulongera pimapiri pinomwe pidakhalira nkazi. Pontho ndi amambo anomwe. Axanu awo amala kugwa. M'bodzi na lero ali m'maso, unango adzati kubulukira. Mbwenye angabulukira, anati akhale ntsiku pang'ono basi. Cinyama cakugopsa cire, cikhalipo kale ene mbwenye cincino nkhabebve, ndi mambo wacisere. Pontho ndi m'bodzi wacinomwe, mbwenye ali kwenda kataika. “Nyanga khumi zidaona iwe, ndi amambo khumi, kuti adzati kutambira umambo. Mbwenye pa n'dzidzi ubodzi, anati atambire mphambvu za utongi ninga amambo, pabodzi na cinyama cakugopsa. Iwo asanyerezera cibodzi cene, cakubulusa mphambvu za utongi wawo, mbaupasa cinyama cakugopsa. Iwo anati agwe nkhondo na Mwana Bira, mbwenye Mwana Bira anaakunda, thangwi Iye ndi Mbuya wa ambuya, Mambo wa amambo. Pontho pabodzi na Iye, ale adacemerwa, anyakusankhulwa na anyakunyindira, anakundambo.” Na tenepo, anju andipanga pontho mbalonga tenepa: “Madzi adaona iwe, pale padakhala nawa nkazi wa lukwali, nkhulongera mbumba, mwinji wa anthu, madziko na malongero. Cinyama cakugopsa na nyanga khumi zidaona iwe, pyonsene pinati pizonde nkazi wa lukwali. Iwo anati ankwatire pinthu pyonsene mbansiya cipezi-pezi, anadya nyama yace, pontho mbaipisa na moto. Thangwi Mulungu aikha m'mitima mwawo, kufuna kwa kucita pire pinafuna Iye. Mbaakwata kuti iwo atawire kubulusa mphambvu zawo za utongi azipase cinyama cakugopsa, mpaka Mafala a Mulungu asimbiswe. Nkazi adaona iwe, ndi nzinda ukulu unatonga amambo a pantsi pano.” Pakumala penepyo, ndaona anju unango mbakhachita buluka kudzulu. Akhali na mphambvu zikulu za utongi, pantsi ponsene mbapamwinikirwa na cieza cace. Na tenepo, anju akhuwa na mphambvu mbalonga tenepa: “Agwa! Agwa Bhabhilonya wankulu! Adza kakhala nyumba ya mizimu ya kuipa, dzimba ya mizimu yonsene ya kuipa, dzimba ya mbalame zonsene zinakhondeswa na mwambo na ya pyakunyanyasa, thangwi madziko onsene amwa vinyu ya ulukwali wace ukulu. Amambo a padziko acita na iye lukwali. Anyamalonda a pantsi pano apfuma na upfumi wace ukulu kakamwe.” Na tenepo, ndabva fala inango kudzulu mbilonga tenepa: “Bulukani pana iye imwe mbumba yanga, kuti mukhonde kukhala nanthu pa madawi ace, toera nyatwa zinafuna kun'gwera zikhonde kukuphatani! Thangwi madawi a Bhabhilonya asandzikirana mpaka fika kudzulu, pontho Mulungu akumbuka upandu wace. M'bwezereni pibodzi-bodzi, sawa-sawa. Mulipeni kawiri na pire pidacita iye. N'ndiko mudathatanyira iye pyakumwa, n'thatanyireni ipitirize kuwanga kawiri. Mpaseni nyatwa na kutsukwala kukulu, sawa-sawa ninga mbiri na upfumi ukhali na iye. Muntima mwace iye akhagaya mbalonga kuti: ‘Ndiri nawa ninga mambo wankazi. Sine nkazi wakuferwa na mamuna, pontho cipo ndinadza katsukwala.’ Na thangwi eneyo, pa ntsiku ibodzi basi, nyatwa zace zinan'gwera ninga izi: Kufa, kutsukwala, na njala. Iye anapiswa na moto, thangwi wa mphambvu ndi Mbuya Mulungu anantonga.” “Amambo a pantsi pano adacita na iye pyalukwali pyace, mbafambisa na iwo pabodzi mpfuma zawo, angaona uchi wa kupiswa kwace, anamulira mbatsukwala. Na kugopa thangwi ya kuthabuka kwace, anakhala kutali mbakhuwa tenepa: “Mama ine! Nzinda ukulu! Bhabhilonya, nzinda wa mphambvu! Pa n'dzidzi ubodzi basi kwafika kuthabuswa kwako!” Anyamalonda a pantsi pano analira pikulu kakamwe na thangwi yace, thangwi nkhabebve unango anafuna gula malonda ako ninga awa: A oro, a parata, a myala yakufunika ya ntengo ukulu, na myala inacemerwa perola. A nguwo zawo za ntengo ukulu ninga: za linyu, za ropa, za seda na zakufuira. Malonda a miti inacemerwa sedhro, a pinthu pyakucitwa na nyanga za ndzou, miti ya ntengo ukulu, na pyakucitwa na safuli. Malonda a pinthu pya utale, na pyakucitwa na myala yakubalika. Mafuta akununkhira a miti inacemerwa kanela, na a pinango pyakugwadira, a isensu, a mira na a pyakununkhira. A vinyu, a mafuta a oliva, a ufa wakunerika, tirigu, ng'ombe na a mabira. A makavalo na ngolo zawo, a adzakazi pontho na manungo a anthu. Iwo analonga tenepa: “Misapu yakutokota ikhafuna iwe maka yakumalira! Upfumi wako onsene na mbiri yako pyakumalira, nkhabe kudza kapionabve.” Anyamalonda a pinthu penepi, adapfumiswa na iye, anati akhale kutali na kugopa nyatwa zinaoneswa iye, pontho analira pikulu kakamwe, mbakhuwa tenepa: “ ‘Mama ine! Nzinda ukulu ukhadabvala nguwo za linyu, za kufuirira, za ropa na pinthu pya oro, myala ya kuyetimira, na myala yakufunika ya ntengo ukulu! Pa n'dzidzi ubodzi basi, upfumi wace ukulu onsene wamala fudziwa!’ “Atsogoleri akulu a xitima ya m'madzi, na anthu anyaulendo akhadapakira mwenemu, na anyabasa a xitima ya m'madzi, na onsene anaphata basa m'bara, anati akhale kutali. Mudaona iwo uchi wa kupiswa kwace, akhuwa mbalonga kuti: ‘Ndi nzinda upi pontho udalandana na nzinda uxu ukulu?’ Iwo akhaponya pfumbi mu nsolo mwawo, mbakhakhuwa na kulira pikulu kakamwe kuti: “ ‘Mama ine! Nzinda ukulu! Na thangwi ya kupfuma kwawo, onsene akhali na xitima zawo m'bara, apfuma mwenemu! Pa n'dzidzi ubodzi basi, iwo wamala fudzika. Tsandzayani imwe kudzulu, na pire pidacitirwa nzinda! Tsandzayani imwe Mbumba ya Mulungu, apoxtolo, na maporofeta! Mulungu autonga nzinda. Aubwezera pire pidacita iwo kuna imwe.’ ” Na tenepo, anju m'bodzi wa mphambvu athukula mwala ubodzi, udakula ninga mwala wa libwe ikulu. Auponya m'bara mbalonga tenepa: “Na mwansanga, na mphambvu ninga iyi, unati ugwisiwe pantsi nzinda ukulu wa Bhabhilonya, pontho na lini unadza kaoneka pontho. N'kati mwawo, na lini munadza kabveka pontho kulira kwa mabhangwe, kwa anyakuimba, kulira kwa pitoliro na kwa anyakuimba kaluta. N'kati mwa nzinda, na lini munadza kagumanika pontho mesiri m'bodzi wa kudziwa sasanya cinthu. N'kati mwawo, na lini munadza kabveka pontho kulira kwa mpheyo ya libwe. N'kati mwawo, na lini munadza kaoneka pontho cieza ca nyale. Na lini mwenemu munadza kabveka pontho fala ya mwali wa mamuna na ya mwali wankazi. Anyamalonda ako akhali akulu a padziko. Madziko onsene amala kunyengererwa na ufiti wako. Mwenemu mwagumanika ciropa ca maporofeta na ca mbumba ya Mulungu, pontho na ciropa ca onsene adaphiwa pantsi pano.” Pakumala pinthu penepyo, ndabva ninga kutitimira kukulu kudzulu kwa mwinji wa anthu, mbakhakhuwa tenepa: “Aleluya! Kupulumuswa, mbiri, na mphambvu mphya Mulungu wathu, thangwi kutonga kwace ndi kwa ndimo mwene pontho ndi kwakulungama. Iye athabusa nkazi wa lukwali ikulu akhanyengerera dziko na pya ulukwali pyace. Iye amulongosa ciropa cidagwisa iye na manja ace kuna anyabasa ace.” Mbumba yathimiza pontho kukhuwa tenepa: “Aleluya! Uchi unabuluka kuna iye, unakwira kwenda na kwenda.” Akulu-akulu makumawiri na anai, na pinthu pinai pya m'maso, agwa pantsi mbalambira Mulungu akhakhala pa mpando wa umambo, mbakhuwa tenepa: “Ameni, Aleluya!” Pa mpando wa umambo pabuluka fala ikhalonga tenepa: “Kuzani Mulungu wathu imwe anyabasa ace onsene, imwe munan'gopa, akulu na ang'ono!” Na tenepo, ndabva pinthu pyakulandana ninga kutitimira kwa mwinji ukulu wa anthu, ninga kutitimira kwa madzi makulu na kulira kukulu kwa njazi, mbikhalonga tenepa: “Aleluya! Thangwi anatonga ndi Mbuya Mulungu wathu, ana mphambvu zonsene. Mbatitsandzayeni! Tendeni tisekere, pontho mbatimpasa mbiri! Thangwi wakwana n'dzidzi wa kuti Mwana Bira acite banja, pontho mwali wankazi amala sasanyira. Iye apaswa nguwo zakucena mbiziyetimira toera abvale.” Nguwo zenezi zakucena mbiziyetimira, ndi mabasa akulungama a mbumba ya Mulungu. Anju andipanga tenepa: “Lemba kuti: Mbatsandzaye adacemerwa ku phwandu ya banja ya Mwana Bira!” Mbathimiza pontho kulonga kuti: “Awa ndi mafala a ndimo mwene a Mulungu.” Na tenepo, ndagwa pa myendo pace toera ndimulambire, mbwenye iye andipanga tenepa: “Leka cita penepi! Ndine nyabasa ninga iwe, pontho ninga abale ako anakoya umboni wa Yezu. Lambira Mulungu! Thangwi umboni wa Yezu ndi nzimu wa ciporofeta. ” Ndaona thambo yafunguka, pontho patsogolo panga pakhali na kavalo ibodzi yakucena, nyakuipakira asacemerwa Wakunyindirika na wa Ndimo Mwene. Iye asatonga mbacita nkhondo mwakulungama. Maso ace ndi ninga malirimi a moto, mu nsolo mwace muna nthimba zizinji, pontho Iye alembwa dzina ibodzi kuti nkhabe unango anaidziwa, anaidziwa ndiye basi. Abvala nkumi wakumala kukhwazwa na ciropa, pontho dzina yace ndi Fala ya Mulungu. Anyankhondo azinji a kudzulu akhantowera. Akhadabvala nguwo za linyu zakucena kakamwe, mbakhafamba na makavalo akucena. N'kanwa mwace, musabuluka tarasada yakunozwa inafuna kuthabusa na iye madziko. “Iye anaatonga na mpsimbo ya utale’’ pontho anaponda mu mbuto yakukamulirwa vinyu ya kuipirwa kukulu kwa Mulungu wa mphambvu zonsene. Pa nguwo yace ya nkumi, n'khundu mwa nchafu, palembwa dzina iyi: MAMBO WA AMAMBO NA MBUYA WA AMBUYA. Ndaona anju m'bodzi ali dzololo pa dzuwa, mbakhakhuwa kuna mbalame zonsene zikhamburuka kudzulu kakamwe kuti: “Bwerani, gumanyikanani mudze ku phwandu ikulu ya Mulungu, toera mudze kadya nyama ya amambo, ya akulu aanyankhondo na ya anyamphambvu, nyama ya makavalo na ya anyamakavalo ace, nyama za onsene - adzakazi na atumbe, akulu na ang'ono.” Pontho, ndaona cinyama cire cakugopsa na amambo a padziko, na anyankhondo awo amala gumanyikana toera acite nkhondo na ule adapakira pa kavalo, na anyankhondo ace. Mbwenye cinyama cakugopsa camangwa, pabodzi na mporofeta wa uthambi akhadacita pirengo na dzina yace, pikhanyengeza na iye ale akhadatambira cidzindikiro ca cinyama cakugopsa pontho mbalambira dzimunthu yace. Mu uwiri mwawo aponyiwa a m'maso n'thawala ya moto unagaka na inxofiri. Adasala aphiwa na tarasada ikhabuluka pa mulomo wa ule adapakira pa kavalo, mbalame zonsene mbizikhuta na nyama za anthu adafa. Ndaona anju m'bodzi mbakhachita kudzulu, mbakhadza na cavi ca djenje yakuzika kakamwe m'manja mwace, na unyolo ubodzi ukulu. Iye am'manga nyangumi, nyoka ya kale, Dyabu, Sathani, mbam'manga na unyolo pa pyaka cikwi cibodzi. Buluka penepo, anju amponya n'djenje yakuzika kakamwe mbanfungira, pontho mbaikha cidhindo toera akhonde kunyengeza madziko a pantsi pano, mpaka kumala pyaka cikwi cibodzi. Pakumala penepyo, pisafunika kuti iye asudzulwe pa n'dzidzi ung'ono. Penepo ndaona mipando ya utongi ikhadakhalira ale akhadapaswa mphambvu za kutonga. Ndaona mizimu ya anthu adagwandwa misolo na thangwi yakucitira umboni Yezu, pontho na thangwi ya fala ya Mulungu. Iwo akhadakhonda kucilambira cinyama cakugopsa, na dzimunthu yace ene. Pontho iwo akhadakhonda kutambira cidzindikiro pa nkhope peno m'manja. Na tenepo, iwo alamuka pa kufa mbatonga pabodzi na Kirixtu pa pyaka cikwi cibodzi. Anyakufa anango acimwana kulamuka pa kufa, mpaka kukwana pyaka cikwi cibodzi. Uku ndi kulamuka pa kufa kwakutoma. Akutsandzaya na akucena ndi ale ali na anthu pa kulamuka pa kufa kwakutoma! Kufa kwaciwiri nkhabe mphambvu kuna iwo. Pontho iwo anati akhale anyantsembe a Mulungu na a Kirixtu, mbatonga pabodzi na Iye pa pyaka cikwi cibodzi. Pingamala pyaka cikwi cibodzi, Sathani anasudzulwa mbabuluswa n'kaidi. Pontho anabuluka toera kunyengerera madziko anagumanika m'makhundu manai a pantsi, anacemerwa Gogi na Magogi, kuti aagumanye amenye nkhondo. Mwinji wawo ndi ninga checa ya m'bara. Mwinji unowu wamwazika pantsi pano ponsene, pontho mbuzungulira nsasa wa mbumba ya Mulungu, nzinda wakufunika. Mbwenye wabwera moto wa kudzulu mbupha mwinji onsene. Dyabu, ule akhaanyengerera, aponyiwa n'thawala ya moto unagaka na inxofiri, mule mukhadaponyiwa cinyama cakugopsa na mporofeta wa uthambi. Mwenemu iwo anati athabuswe masiku na masikati, kwenda na kwenda. Pakumala, ndaona mpando ubodzi ukulu wakucena wa umambo, na Ule akhaukhalira. Mataka na thambo pyamala kun'thawa pamaso pace, mbapikhonda kugumana mbuto. Ndaonambo pontho anthu a kufa akulu na ang'ono, mbadalimira patsogolo pa mpando wa umambo. Penepo mabukhu afungulwa. Bukhu inango ya Upulumuki yafungulwambo. Anyakufa atoma kutongwa na pire pikhadacita iwo, ninga mudalemberwa ipyo m'mabukhu. Bara yapereka anyakufa akhali na iye mwenemu. Kufa na dziko ya anyakufa apereka anyakufa akhali na iwo mwenemu, m'bodzi na m'bodzi mbatongwa na pire pikhadacita iye. Na tenepo, kufa na dziko ya anyakufa pyaponyiwa n'thawala ya moto. N'thawala ya moto ndiko kufa kwaciwiri. Ale adakhonda kulembwa madzina awo m'Bukhu ya Upulumuki, aponyiwa n'thawala ya moto. Na tenepo, ndaona kudzulu kupsa na pantsi papsa, thangwi kudzulu kwakutoma na pantsi pakutoma pakhadamala, pontho bara ikhalipobve tayu. Ndaona Nzinda wakucena, Djerusalema ipsa, mbukhachita buluka kudzulu kuna Mulungu, mbudamala sasanyika ninga mwali wa nkazi wakumala bvazikwa, kuti aonane na mamuna wace. Penepo, ndabva fala ikulu ikhabuluka ku mpando wa umambo, mbikhalonga na mphambvu kuti: “Cincino khumbi ya ntsembe ya Mulungu iri na anthu! Mulungu anakhala na iwo. Iwo anakhala mbumba yace. Iye ene Mulungu anadza kakhala na iwo [pontho anadza kakhala Mulungu wawo. ] Iye anapukuta misozi yonsene ya m'maso mwawo. Kufa, kutsukwala, kulira peno kubva kupha, nkhabe kudza kaonekabve, thangwi pinthu pya kale pyamala.” Ule akhakhala nawa pa mpando wa umambo alonga tenepa: “Lang'anani, ndisacita pinthu pyonsene papsa!” Mbathimiza pontho na kulonga kuti: “Pilembe ipi, thangwi mafala awa mba ndimo mwene na akunyindirika.” Andipanga pontho tenepa: “Pyamala kucitwa. Ine ndine Alufa na Omega, ndine Wakutoma na Wakumalisa. Kuna ule ana nyota, Ine ndinadza kampasa pezi mbamwa mphuno ya madzi a upulumuki. Anakunda, anadza kakhala mwanacinthu unthaka wa pyonsene ipi, pontho Ine ndinadza kakhala Mulungu wace, iye anadza kakhala mwana wanga. Mbwenye anyakugopa, anyakukhonda kutawira, anyakucita pyakunyanyasa, mapanga, anyalukwali, anyaufiti, anyakulambira madzimunthu, na onsene anyauthambi, mbuto yawo inadza kakhala n'thawala ya moto unagaka na inxofiri. Uku ndi kufa kwaciwiri.” M'bodzi wa anju zinomwe zire, zikhali na ndiko zinomwe zakudzala na nyatwa zinomwe zakumalisa, andifendedzera mbandipanga tenepa: “Bwera, ine ndinakupangisa mwali wankazi, nkazace Mwana Bira.” Iye andikwata mu Nzimu mpaka pa phiri ikulu yakulapha, mbandipangisa Djerusalema, Nzinda wa Mulungu, mbukhachita buluka kudzulu kuna Mulungu. Nzinda ukhayetimira na mbiri ya Mulungu. Kuyetimira kwace kukhali ninga kwa mwala wakubalika, ninga kwa mwala wa djaxpe, wakuphenekera ninga matalala. Ukhali na mpanda ukulu wakulapha, na misuwo mikulu khumi na miwiri, pontho pakhali na anju khumi na ziwiri, m'bodzi na m'bodzi mbakhalimira pa nsuwo wace. M'misuwo mukhadalembwa madzina a madzindza khumi na mawiri a ana a Izarayeli. Ku mabulukira dzuwa, kukhali na misuwo mikulu mitatu. Ku khundu ya kubangwe, kukhali na misuwo mitatu. Ku madokera dzuwa, kukhali na misuwo mitatu na ku khundu ya mbalu kukhali na misuwo mitatu. Mpanda wa nzinda ukhadamangwa padzulu pa myala khumi na miwiri. Pa mwala ubodzi na ubodzi, pakhadalembwa dzina ibodzi ya apoxtolo khumi na awiri a Mwana Bira. Anju akhalonga na ine akhali na mpsimbo ibodzi ya kupima nayo, yakucitwa na oro, toera kupima nayo nzinda, misuwo yace mikulu, na mipanda yace. Nzinda ukhali na makhundu manai. Ulaphi wace na ugugumi wace ukhali sawa-sawa. Iye aupima nzinda na mpsimbo yace. Ulaphi wace ukhali wa pikwi piwiri na madzana mawiri anacemerwa makilometuru ncizungu. Ugugumi wace na cengo cace, pikhali sawa-sawa na ulaphi wace. Iye apimambo mpanda, mbukwana meturu makumatanthatu na zixanu. Anju akhapima na mapimiro a anthu. Mpanda ukhadacitwa na myala yakubalika inacemerwa djaxpe, pontho nzinda ukhali wa oro wakukhonda kubvungazwa, mbulandana na vidhuru yakucena. Myala ikhatsidzikira mipanda ya nzinda ikhadabalikiswa na myala yakubalika yakusiyana-siyana. Mwala wakutsidzikira wakutoma ukhadabalikiswa na myala inacemerwa djaxpe. Mwala wakutsidzikira waciwiri ukhadabalikiswa na myala ya safira. Wacitatu ukhadabalikiswa na myala ya kalisedhonya. Wacinai ukhadabalikiswa na ejimiradha. Mwala wakutsidzikira wacixanu ukhadabalikiswa na myala ya saridhonyo, wacitanthatu na myala ya saridhyo, wacinomwe na myala ya kirizolito. Mwala wakutsidzikira wacisere ukhadabalikiswa na myala ya bherilo, wacipfemba na myala ya topazyo, wacikhumi na ya kirizoparazo. Wacikhumi na ubodzi ukhadabalikiswa na myala ya jasintu, wacikhumi na miwiri ukhadabalikiswa na myala ya ametixta. Misuwo mikulu khumi na miwiri, ikhali ya myala yakubalika inacemerwa perola. Nsuwo ubodzi na ubodzi, ukhadacitwa na mwala ubodzi basi. Nseu ukulu kakamwe wa nzinda, ukhali wa oro wakukhonda kubvungazwa, wakuphenekera ninga vidhuru. Mu nzinda sidaonamo Nyumba ya Mulungu tayu, thangwi Mbuya Mulungu wa mphambvu zonsene na Mwana Bira, ndiwo Nyumba yawo ya Mulungu. Nzinda nkhabe funika kuti umwanikwe na dzuwa peno na mwezi, thangwi cieza ca Mulungu cinaumwanika, pontho Mwana Bira ndi nyale yawo. Mbumba zinadza kafamba n'cieza ca nzinda, pontho amambo a pantsi pano anaudzesera mbiri yawo. Misuwo mikulu ya nzinda nkhabe kudza kafungwabve ntsiku zonsene, thangwi mwenemu nkhabe kudza kaonekabve masiku. Madziko anadza kaulemedza na kuupasa mbiri. Mwenemu cipo munadza kapita cinthu cakukhonda kuceneswa, peno kupita unango anacita pyakunyanyasa peno pyauthambi. Mbwenye anafuna pita mwenemu ndi ale basi a kuti madzina awo alembwa mu Bukhu ya Upulumuki ya Mwana Bira. Na tenepo, anju andipangisa nyandza ya madzi a upulumuki akuphenekera ninga vidhuru, mbakhawewa buluka ku mpando wa Umambo wa Mulungu na wa Mwana Bira, pakati pa nseu ukulu wa mu nzinda. Ntunda na ntunda wa nyandza, kukhali na muti wa upulumuki, ukhabala misapu khumi na kawiri pa caka, kabodzi pa mwezi. Masamba ace ana basa ya kukondza mbumba. Nkhabe kudza kaonekabve dzedze. Mpando wa Umambo wa Mulungu na wa Mwana Bira unati ukhale mu nzinda, pontho anyabasa ace anam'phatira. Iwo anadza kamuona nkhope yace, pontho dzina yace inadza kalembwa pa nkhope pawo. Nkhabe kudza kaonekabve masiku. Cieza ca nyale peno ca dzuwa iwo nkhabe kudza kacifuna pontho, thangwi Mulungu Mbuya anaamwinika, pontho iwo anadza katonga kwenda na kwenda. Anju andipanga tenepa: “Mafala awa mba ndimo mwene pontho mbakunyindirika. Mbuya, Mulungu wa mizimu ya maporofeta, atuma anju wace toera kupangisa kuna anyabasa ace pinthu pinafuna kucitika cincino.” “Lang'anani! Ine ndinabwera cincino! Mbatsandzaye ule anakoya mafala awa akuoneswa mu Nzimu a m'bukhu iyi.” Ine Juwau, ndine adabva pinthu penepi, pontho adapyona. Mudapibva ine mbindipyona, ndagwa pa myendo ya anju adandipangisa pyonsene pire, toera kumulambira. Mbwenye iye andipanga tenepa: “Leka cita penepi! Ndine nyabasa ninga iwe na abale ako, ninga maporofeta pontho ninga ale anakoya mafala a m'bukhu iyi. Lambira Mulungu!” Na tenepo, iye andipanga tenepa: “Leka kuabisa mafala a ciporofeta ali m'bukhu iyi, thangwi n'dzidzi uli dhuzi. Nyakukhonda kulungama, mbanyanye kucita pyakukhonda kulungama. Ule anacita pinthu pyakuipa, mbanyanye na kupicita. Wakulungama, mbanyanye na kucita kulungama kwace. Ule wakucena, mbanyanye kupicenesa.” “Lang'anani! Ine ndinabwera cincino! Pontho ndinabwera na m'bairo wanga kudza kapasa m'bodzi na m'bodzi, pire pinakwanirana na pidacita iye. Ine ndine Alufa na Omega, Wakutoma na Wakumalisa, Wapatsogolo na Wan'nduli. “Mbatsandzaye ale anafula nguwo zawo [mu ciropa ca Mwana Bira,] toera iwo atawirirwe kudya muti wa upulumuki, pontho akwanise kupita mu nzinda na pa nsuwo. Anafuna sala kunja ndi anambwa, analodza, anacita pyalukwali, mapanga, analambira alungu a pezi, na onsene anafuna pontho mbacita pyauthambi. “Ine Yezu, ndatuma anju wanga kuti adze kalonge umboni kuna imwe pa thangwi ya magereja. Ine ndine N'chici pontho ndine wa Dzindza ya Dhavidhi, Nyenyezi Yakuyetimira ya Macibese.” Nzimu na mwali wankazi asalonga tenepa: “Bwera!” Na munthu onsene anabva mbalonge tenepa: “Bwera!” Ana nyota, mbabwere. Pontho ule anafuna, mbamwe madzi a pezi a upulumuki. Ndisacenjeza kuna onsene anabva mafala a ciporofeta ali mu bukhu iyi kuti: “Munthu angathimizira cinthu mu bukhu iyi, Mulungu anan'thimizirambo nyatwa zidalembwa mu bukhu eneyi. Ule anabulusa fala ya ciporofeta ya m'bukhu iyi, Mulungu anam'bulusambo phindi yace ya muti wa upulumuki, na mu Nzinda wa Mulungu udalembwa mu bukhu iyi.” Ule anacita umboni wa pinthu penepi, asalonga tenepa: “Ande, ndinabwera cincino!” Ameni. Bwerani Mbuya Yezu! Kukoma ntima kwa Mbuya Yezu mbakukhale na onsene.