अब्राहम का बेटा, दाऊद का बेटा ईसु मसी ताँई की पिडी अंय्यां ह: अब्राहम को बेटो इसाक अर इसाक को बेटो याकूब अर याकूब क यहूदा अर बिका भाई होया। फरिस अर जोरह यहूदा का बेटा हा अर आकी माँ को नाम तामार हो। फरिस हेजरोन को बाप हो। हेजरोन ऐराम को बाप हो। ऐराम अमिनादाब को बाप हो। अमिनादाब नहसोन को बाप हो। नहसोन सलमोन को बाप हो। सलमोन अर बिकी लूगाई राहाब क बोआज जलम लिआ। बोआज अर बिकी लूगाई रूत क ओबेद पैदा होयो। ओबेद यिसै को बाप हो। अर यिसै राजा दाऊद को बाप हो। सुलेमान दाऊद को बेटो हो। जखो बि लूगाई क जलम लिओ जखी पेल्या उरीया की लूगाई ही। सुलेमान रहबाम को बाप हो। अर रहबाम अबिया को बाप हो। अबिया को बेटो असाफ हो। अर असाफ ओसापात को बाप हो। अर ओसापात को बेटो ओराम हो। अर ओराम उजिया को बाप हो। उजिया ओताम को बाप हो। अर ओताम अहाज को बाप हो। अर अहाज हिजकिया को बाप हो। अर हिजकिया मनसे को बाप हो। मनसे अमोन को बाप हो। अर अमोन ओसिया को बाप हो। इजरायल का मिनखानै गुलाम बणार जद बेबिलोन लेज्यायो जार्यो हो जणा बि टेम का ओसिया क यकुन्या अर बिकाळा भाई होया। बेबिलोन म लेजाबा क पाछै यकुन्या क सालतिएल होयो। अर सालतिएल को बेटो जरूबाबील हो। जरूबाबील अबिउद को बाप हो। अबिउद इल्याकीम को बाप हो। अर इल्याकीम अजोर को बाप हो। अजोर को बेटो सदोक हो। सदोक अखीम को अर अखीम अलिऊद को बाप हो। अलिऊद को बेटो एलिआजर हो। अर एलिआजर मतान को बाप हो। अर मतान को बेटो याकूब हो। अर याकूब युसूफ को बाप हो। जखो मरीयम को मोट्यार हो। मरीयम क ईसु जलम लिओ जखो मसी खुवावै ह। अर अंय्यां अब्राहमऊँ लेर दाऊद ताँई चोदा पिडी जलम लिनी। दाऊदऊँ लेर बंदि बणार बेबिलोन लेजाया जाबा ताँई चोदा पिडी होई। बठै पुग्या पाछै मसी क जलम ताँई चोदा पिडी होई। ईसु मसी को जलम अंय्यां होयो; जद बिकी माँ मरीयम की सगाई युसूफ क सागै होई जणा बाको ब्या होबाऊँ पेली मरीयम पबितर आत्मा की सक्‍तिऊँ आसऊँ होई। जणा बिको होबाळो मोट्यार युसूफ आपकी धारमिक्‍ता क चलतै मरीयमऊँ सगाई तोड़बा की मन म करी। पण बो लोगा म मरीयम की बदनामी बी कोनी चातो हो इ ताँई बो बिनै चुपचालोई छोडबा को बिचार कर्यो। युसूफ बा बाता क बारां म सोचर्योई हो क परबु को ईस्बर नगरी दुत युसूफ क सपना म आर बोल्यो, “युसूफ! दाऊद का बेटा, तू मरीयमनै ब्यार ल्याबा म मना डर, क्युं क जखो बिकै पेट म ह बो मिनखऊँ कोनी पण पबितर आत्मा की सक्‍तिऊँ ह। बा एक बेटो जलमसी जखो आपका मिनखानै बाका पापऊँ बचासी। तू बिको नाम ईसु राखजे, जिको मतबल ह! परबु आपका मिनखानै बचावै।” ओ इ ताँई होयो ह क्युं क जखा बचन परबु आपका दासा क जरिए बोल्यो ह, बे पूरा होवै: “देखो, एक कुंआरी छोरी आसऊँ होसी अर एक बेटो जलमसी अर बिको नाम इम्मानुअल राख्यो ज्यासी बिको मतबल ह परमेसर म्हारै सागै ह।” जद युसूफ निंदऊँ जाग्यो जणा बो बंय्यांई कर्यो जंय्यां ईस्बर नगरी दुत बिनै करबा को हुकम दिओ हो। बो मरीयमनै ब्यार आपकै घरा लिआयो। पण जद ताँई बा बेटो नइ जलमी युसूफ बिकन कोनी गयो। अर युसूफ बेटा को नाम ईसु राख्यो। हेरोद राजा क राज करबा का दिना म यहूदिआ क बेतलम म ईसु को जलम होयो जणा अगुणी दिसाऊँ क्युंक ज्योतसी जखा चाँद-तारा को ज्ञान राखता हा यरूसलेम म आया। बे बुज्या, “यहूदि मिनखा को राजा होबा ताँई जलम्यो बो टाबरियो कठै ह? बिको तारो अगुणी दिसा म उग्यो जणा म्हें बि तारानै देख्या। म्हें बि टाबर की भगती करबा आया हा।” इ बात का समचार जद हेरोद राजानै लाग्या जणा बो अर यरूसलेम का बोळा मिनख घबरागा। जणा बो सगळा परधान याजक अर सास्तरानै सीखाबाळानै भेळा कर बाऊँ बुजबा लाग्यो, “मसी को जलम कठै होणो चाए?” बे बिऊँ बोल्या, “यहूदिआ क बेतलम म” क्युं क परमेसर की खेबाळो अंय्यां मांड्यो ह: “हे यहूदिआ दिसावर की बेतलम नगरी का मिनखो, थारी नगरी दुसरी नगर्याऊँ ख्याई कम कोनी; क्युं क इमैऊँ एक मिनख राजा बणसी, जखो इजरायल म रेह्बाळा मेरा मिनखा की मुख्याई करसी।” जणा राजा हेरोद ज्योतस्याँनै छानैसीक बुलार बुजबा लाग्यो क तारो सऊँ पेली की टेम चमक्यो। अर बो बानै अंय्यां ओडार बेतलम भेज्यो क, “बि टाबर क बारां म पाछा आर मनै ठिक-ठिक खबर दिज्यो जिऊँ क म बिकै धोक खार आऊँ।” बे राजा की बात सुणर चलेगा अर जखो तारो बानै अगुणी दिसा म दिख्यो हो। बो बाकै आगै-आगै चाल्यो अर जठै टाबर हो बि झघा जार रूकगो। जद बे बि तारानै देख्या जणा बोळा राजी होया। बे घर म जार बि टाबरनै बिकी माँ मरीयम कनै देख्या, अर बि टाबर क आगै धोक खाई। अर आप-आपका झोळानै खोलर बिकै सोनो, लोबान अर धूप की भेंट चढाई। जद ज्योतसी सोर्या हा जणा सपना म परमेसर बानै चेतायो क, हेरोद कनै मना जायो, जणा बे दुसरा गेलाऊँ आपकै देस चलेग्या। ज्योतस्याँ क चल्या जाबा क पाछै परबु को एक ईस्बर नगरी दुत युसूफनै सपना म दरसाव देर ओडायो, “उठ अर टाबर अर बिकी माँनै लेर मिसर देस म भागज्या अर जद ताँई म तेरूँ नइ बोलुँ जद ताँई बठैई रेह्जे; क्युं क राजा हेरोद इ टाबरनै ढुंढर्यो ह। बो इनै मारबो चावै ह।” जणा बो रातनैई उठर टाबर अर बिकी माँनै लेर मिसर देस कानि चाल पड़्यो। अर जद ताँई हेरोद राजा कोनी मर्यो बे बठैई रिह्या। जिऊँ क बो बचन जखो परमेसर की खेबाळो बोल्यो हो पूरो होवै क, “म मेरा बेटानै मिसरऊँ बुलायो हूँ।” जद राजा हेरोद आ देख्यो क ज्योतसी मनै बावळो बणाग्या हीं जणा बो लाल-तातो होगो अर लोगानै भेजर ज्योतस्याँ क बताएड़ा टेम म बेतलम अर बिका आस-पास का सगळा टाबरानै जखा दो बरस अर बिऊँ छोटा हा बानै मरवा गेर्या। जणा जखा बचन यरमिआ परमेसर की खेबाळो खयो हो पूरा होया: “राहेल की नगरी रामा म बार-घोड़ो होर्यो ह; बा आपका टाबरा ताँई रोरी ह, अर चुप कोनी होबो चावै, क्युं क बिका टाबरिया इब इ दुनिया म कोनी रिह्या।” राजा हेरोद क मरबा क पाछै परबु को ईस्बर नगरी दुत मिसर म युसूफनै सपना म दरसाव दिओ, अर बोल्यो, “उठ टाबर अर बिकी माँनै लेर इजरायल देस म चल्योजा, क्युं क जखा टाबर का पिराण लेबो चावै हा बे मरगा हीं।” जणा युसूफ टाबर अर बिकी माँनै सागै लेर इजरायल देस म आगो। पण आ सुणर क अरखिलाउस आपका बाप हेरोद की झघा प यहूदिआ दिसावर प राज करबा लाग्यो ह, बठै जाबाऊँ डर्यो। अर ओज्यु सपना म परमेसर क खया गेल गलिल दिसावर म चलेगो। अर नासरत नाम की नगरी म जा बस्यो, जणा बो बचन पूरो होयो, जखो परमेसर की खेबाळो बोल्यो हो: “बो नासरी खुवासी।” जद ईसु नासरत नगरी म हो, बा दिना म यहूदिआ नगरी का उजाड़ म पाणी को बतिस्मो देबाळो यहून्ना आयो। अर आ खेर परचार कर्यो क, “थे थारा पापऊँ तौबा करो! क्युं क ईस्बर नगरी को राज सांकड़ै ह।” ओ बोई मिनख ह जिकै बारां म यसाया परमेसर की खेबाळो खयो ह: “उजाड़ म एक हलकारो हेलो मारै ह, परबु ताँई गेलो बणाओ, अर बिको गेलो सिदो-सपाट करो।” यहून्ना ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बांद्‍या करतो हो। बो टिड्या अर जंगली सहद खाया करतो हो। यहूदिआ दिसावर, यरदन नदि क आस-पास की झघा का अर यरूसलेम नगरी का घणकराक मिनख बिकी सुणबा बिकन गया। बे आपका पापनै मानर यरदन नदि म यहून्नाऊँ पाणी को बतिस्मो लिओ। जद बो देख्यो क बोळासारा फरिसी अर सदुकी पाणी को बतिस्मो लेबा ताँई बिकन आर्या हीं, जणा बो बाऊँ बोल्यो, “अरै सपोलो, परमेसर की सजाऊँ थे बच सको हो इ बात क बारां म थानै कूण बता दिओ? थारा करमाऊँ ओ बेरो पड़णो चाए क थे थारा हियानै पाप का गेलाऊँ फेर लिआ हो। अर थे थारा हिया म अंय्यां मना सोचो क म्हारो बाप अब्राहम ह इ ताँई परमेसर म्हानै कोनी दंडसी; क्युं क म थारूँ बोलुँ हूँ क परमेसर आ भाठाऊँ बी अब्राहम ताँई टाबर पैदा कर सकै ह। इब कुहाड़ो दरख्त की जड़्या प रखेड़ो ह, इ ताँई जखो दरख्त चोखो फळ कोनी देवै, बिनै का'टर आग म बाळ दिओ ज्यासी। म तो थानै पाणी को बतिस्मो द्‍युँ हूँ, जिऊँ ओ बेरोपाट सकै क थे थारा पापऊँ तौबा कर लिआ हो। पण जखो मेरै पाछै आबाळो ह बो मेरूँ बोळो म्हान ह; म तो बिकाळा जूता का सळू खोलबा जोगोई कोनी। बो थानै आग अर पबितर आत्मा को बतिस्मो देसी। बिको छाजळो बिकै हात म ह अर बो ग्युंआ मऊँ डूण्डळी साप करसी, ग्युंनै ओबरी म भेळा करसी पण डूण्डळ्यानै आग म बाळसी। अर बा आग बुत्तबा की कोनी।” बि टेम ईसु गलिलऊँ यरदन किनारै यहून्नाऊँ पाणी को बतिस्मो लेबा आयो। पण यहून्ना अंय्यां बोलर बिनै रोकबा लाग्यो, “मनै तो थारै हातऊँ पबितर आत्मा को बतिस्मो लेबा की जुर्त ह अर थे मेरै कनै आया हो!” ईसु बिनै अंय्यां ओडायो, “इब तो अंय्यांई होबा दे, क्युं क जखी परमेसर चावै ह बोई आपानै करनो ह।” जणा बो बिकी बात मान लिनी। अर ईसु पाणी को बतिस्मो लेर जंय्यांई पाणी मऊँ बारनै आयो अकास खुलग्यो, अर ईसु परमेसर की पबितर आत्मानै कबूतर क रूप म आपकै उपर उतरता देख्यो। जणा अकासऊँ हेलो आयो, “ओ मेरो लाडलो बेटो ह, जिऊँ म बोळो राजी हूँ।” जणा पबितर आत्मा ईसुनै उजाड़ म लेगी जिऊँ सेतानऊँ बो बिचास्यो जावै। बो चाळिस दिन अर चाळिस रात निरहार रिह्यो। अर जद भूखऊँ बिकी आंतड़ी ऐठबा लागी। जणा बिचास्बाळो सेतान बिकन आर ओडायो, “ज तू परमेसर को बेटो ह जणा आ भाठाऊँ बोल क रोटी बण जावै।” ईसु बिनै जुबाब दिओ, पबितर सास्तर म मांडेड़ो ह क, “मिनख रोटीऊँई कोनी जीवै पण बो हरेक बि बचनऊँ जखा परमेसर आपका मुंडाऊँ बोलै ह जीवै ह।” बिकै पाछै सेतान बिनै पबितर नगरी यरूसलेम म लेगो अर मनदर की चोटी प खड़्यो कर दिओ। अर बिऊँ बोल्यो, “ज तू सचमई परमेसर को बेटो ह जणा अठैऊँ तळै कुदज्या।” क्युं क पबितर सास्तर म मांडेड़ो ह क, “परमेसर आपका ईस्बर नगरी दुतानै हुकम देसी, अर तेरा पगा म कांकरो गडै इऊँ पेलीई बे तनै हात्युहात बोचलेसी।” ईसु बिऊँ बोल्यो, “पबितर सास्तर म ओबी मांडेड़ो ह क: “‘तू तेरा परबु परमेसरनै मना बिचासजे।’ ” बिकै पाछै सेतान बिनै एक उचासा डूँगर प लेगो अर सगळो जगत को राजपाट अर ठाट-बाट दिखायो। अर बोल्यो, “ज तू मेरै आगै गोडा टे'कर मनै धोकै जणा म ओ सगळो राजपाट तनै दे देस्युँ।” जणा ईसु बिनै बोल्यो, “हे सेतान दूर भागज्या!” पबितर सास्तर म मांडेड़ो ह: “तू परबु परमेसर किई भगती करजे अर बिकिई सेवा करजे।” जणा सेतान बिकनऊँ चलेगो अर, ईस्बर नगरी दुत आर बिकी देखभाळ करबा लाग्या। जद ईसु अंय्यां सुण्यो क यहून्नानै केद कर लिओ गयो ह जणा बो गलिल म चलेगो। अर बो नासरतनै छोडर कफरनूम नगर म जखो दरिआव क किनारै जबलुन अर नपताली दिसावर म ह बठै जार रेह्बा लाग्यो, जिऊँ यसाया परमेसर की खेबाळो जखा बचन बोल्या हा बे पूरा होवै, “जबलुन अर नपताली दिसावर जखो यरदन नदि क अगुणी दिसा म ह। गलिल जखी परमेसरनै नइ ध्यारबाळा मिनखा की भौम ह। जखा अँधेरा म बेठ्या हा, बे च्यानणो देख्या; अर जखा मोत का काळ म हा बाकै उपर बी च्यानणो चमक्यो।” जद ईसु कफरनूम म हा बि टेमई परचार करबो चालू कर्यो, “थे पापऊँ तौबा करो! क्युं क ईस्बर नगरी को राज सांकड़ै ह।” एक बर ईसु गलिल दरिआव क किनारै-किनारै जार्यो हो जणा दो भायानै देख्यो बामैऊँ एक को नाम समोन जिनै पतरस बी खेता हा; अर बिकाळो भाई अंदरिआस हो बे दरिआव म जाळ गेरर्या हा; क्युं क बे मछी पकड़बाळा हा। ईसु बाऊँ बोल्यो, “मेरै गेल आओ, म थानै मिनखानै भेळा करबा की सीख देस्युँ।” बे तावळासा आपका जाळ फेकर ईसु क गेल होलिआ। बठैऊँ क्युंक दूर चालबा क पाछै ईसु देख्यो क जब्दि का बेटा याकूब अर बिको भाई यहून्ना आपका बाप क सागै न्याव म जाळ सुदार्या हा बानै आपकै कनै बुलायो। बे बी तावळासा न्याव अर आपका बापनै छोडर बिकै गेल होलिआ। ईसु गलिल नगरी की सगळी झघा म घूमतो होयो अर अरदास करबाळी झघा म परमेसर का राज का चोखा समचार क बारां म बतातो अर लोगा का रोग अर कमजोरीनै दूर करतो रिह्यो। सगळा सिरीया देस म बिकी चरचा फेलगी अर लोग सगळा रोगलानै जखा भात-भात का रोगाऊँ रोगला हा, जखा पिड़ा म पड़्या हा, फेंट होईड़ा, जामै दोरा आता हा अर हवा भेयड़ा मिनखानै बिकन ल्याया अर बो बा सगळानै निरोगो कर दिओ। इ बजेऊँ गलिल अर दिकापुलिस, यरूसलेम, यहूदिआ अर यरदन नदि क परलै नाकै की नगर्या का मिनख हा बाकी घणीसारी भीड़ की भीड़ बाकै गेल होगी। जद ईसु बि भीड़नै देख्यो जणा डूँगर क उपर चढगो अर आपका चेलानै सीख देबा ताँई बठै बेठगो। बे बिकी सुणबा ताँई बिकन आया। जणा ईसु बानै सीख देबा लाग्यो, “भागहाळा ह बे मिनख जखा आत्मा का भूखा हीं; क्युं क ईस्बर नगरी को राजपाट बाकोई ह! भागहाळा ह बे जखा रोवै ह; क्युं क परमेसर बानै स्यांती देसी! भागहाळा ह बे जखा सूदा हीं; बे धरती का हकदार होसी! भागहाळा ह बे जखा धरम का काम करबा ताँई भूखा हीं; परमेसर बाकी इंछ्या पूरी करसी! भागहाळा ह बे जखा दयालु ह; क्युं क बापै दया करी ज्यासी! भागहाळा ह बे जाको मन परमेसर की नजर्या म पबितर ह; बे परमेसरनै देखसी! भागहाळा ह बे जखा मेळमिलाप करावै ह; बे परमेसर का टाबर खुवासी! भागहाळा ह बे जखा धारमिक्‍ता की बजेऊँ सताया जावै ह, क्युं क ईस्बर नगरी को राजपाट बाकोई ह! भागहाळा हो थे जखा मनै मानबा की बजेऊँ मिनख थानै सतावै ह, थारी बेजती करै अर झूठ बोलर हर बाता म थानै बुरा बतावीं हीं। जणा थे राजी होज्यो क्युं क ईस्बर नगरी म थानै इको फळ मिलसी। क्युं क बे तो परमेसर की खेबाळानै बी जखा थारूँ पेली हा बानै बी अंय्यांई सताया हा। “थे धरती का सगळा मिनखा ताँई लुण हो; पण जद लुण मऊँ सुवाद चल्योजा जणा बिनै ओज्यु चरचरो कोनी बणायो जा सकै। अर नइ बो कोई काम आवै। पण बिनै फेक दिओ जावै ह, जिऊँ बो लोगा क पगा तळै मसळ्यो जावै ह। थे जगत का मिनखा ताँई च्यानणा हो। अर जखी नगरी डूँगर प ह बा कोनी लुख सकै। मिनख दिओ जळार कुंडा तळै कोनी म्हेलीं पण आळ्या म म्हेलीं हीं जिऊँ घर म आबा-जाबाळा मिनखानै च्यानणो दिख सकै। थारा चोखा काम बि दिआ क च्यानणा की जंय्यां चमकणा चाए जिऊँ दुसरा मिनख भला कामानै थारै जरिए देख सकै अर थारा परम-पिता की जखो ईस्बर नगरी म ह बिकी बडाई करै। “थे ओ मना सोचो क म नेम-कायदा नहिस परमेसर की खेबाळा की मांडेड़ी पोथ्यानै नास करबा आयो हूँ। म बानै नास करबा कोनी आयो पण बानै पूरो करबा आयो हूँ। म थारूँ सची बोलुँ हूँ अकास अर धरती टळ सकै ह पण नेम-कायदा म मंडेड़ो आंक पूरो होया बिना कोनी रेह्‍वै। इ ताँई जखो बी मिनख आ छोटाऊँ छोटा आदेसा मऊँ एकनैई कोनी मानै अर बो बंय्यांई दुसरा मिनखानै बी करबा की सीख देवै बो ईस्बर नगरी म छोटाऊँ बी छोटो खुवासी। पण जखो मिनख बा बातानै मानै ह अर दुसरा मिनखानै बी मानबा ताँई सीखावै ह बो ईस्बर नगरी राज म बडो खुवासी। म थारूँ साची बोलुँ हूँ ज थारा नेकी का काम सास्तरी अर फरिसीया की नेकिऊँ बेसी कोनी ह जणा थे ईस्बर नगरी का राज म कदैई कोनी जा सकोगा। “थे सुण्या हो, क आपणा बडकानै ओडायो गयो हो, ‘हत्या मना करज्यो’ अर ज कोई हत्या करसी बिको न्याय होसी। पण म थारूँ खेऊँ हूँ क ज कोई मिनख कोई पाड़ोसी भाईड़ा प झाळ काडै बिको न्याय होसी। अर ज कोई मिनख कोईकी बेजती करै बिको न्याय पंचायत करसी; अर ज कोई मिनख कोईनै बावळो खेवै बिनै परमेसर नरक की आग म गेरसी। इ ताँई जद बेदी प चढावो चढाती टेम तनै याद आवै क तेरा पाड़ोसी भाई का मन म तेरै खिलाप कुटळाई ह। जणा तू तेरा बि चढावानै बेदी क आगै धर'र पेल्या तेरा पाड़ोसी भाईऊँ मेळमिलाप करले अर बिकै पाछै तू तेरा चढावानै चढाजे। अर ज कोई तनै कचेरी म लेज्यावै जणा तू बिकै सागै गेला मई सुळजेटो कर लिए कदै अंय्यां नइ होज्या क बो तनै पंचा क सामै पेस करै अर पंच सिपाईड़ानै सूपै अर सिपाईड़ा तनै काळ-कोठड़ी म पटकै। म तनै सची बोलुँ हूँ ज तू एक बार बी काळ-कोठड़ी म चलेगो जणा जद ताँई तू पाई-पाई नइ चुका दे जद ताँई तू बठैऊँ कोनी छुट सकै। “थे जाणो हो थानै ओडायो गयो हो क थे कुकरम मना करज्यो।” पण म थारूँ अंय्यां बोलुँ हूँ क ज कोई मिनख पराई लूगाईनै बुरी नजर्याऊँ देखै ह जणा बो आपका हिया म बि लूगाईऊँ कुकरम कर लिआ। इ ताँई ज तेरी दाइणी आँख तनै पाप करावै जणा तू बिनै फोड़ दे; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक म जाबाऊँ बच जावै। अर ज तेरो दाइणो हात तनै पाप करावै जणा बिनै काट फेक; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक की आग म जाबाऊँ बच जावै। “थानै अंय्यां बी ओडायो गयो हो; क ज कोई आपकी लूगाईनै छोडबो चावै, जणा बिनै आपकी लूगाईनै तलाकनामो देणो चाए। पण सुणो, ज कोई मिनख आपकी लूगाईनै कुकरम क अलावा कोई ओर बजेऊँ छोडै ह अर बा लूगाई दुसरा मोट्यार क सागै रेह्‍वै जणा बिको कुकरमी होबा को जिमेबार बिको पेलड़ो मोट्यार ह अर बि छोडेड़ी लूगाईऊँ ब्या करबाळो बी कुकरम करै। “थे आ बी जाणो हो क आपणा बडकानै ओडायो गयो हो क थे सोगन मना तोड़ज्यो पण बिनै परबु का नाम म पूरो करज्यो। पण म थानै खेऊँ हूँ क थे कदैई सोगन मना खाज्यो; नइ तो ईस्बर नगरी की क्युं क ओ परमेसर को सिंघासन ह। अर नइ इ धरती की क्युं क आ परबु क पगा की चोकी ह। अर नइ यरूसलेम नगरी की क्युं क इको राजा परमेसर ह। थे थारा सीर की सोगन बी मना खाज्यो क्युं क थे थारा बाळा मऊँ एक बी बाळ नइ तो धोळो अर नइ काळो कर सको हो। पण थारी बात ‘हाँ’ की ‘हाँ’ अर ‘ना’ की ‘ना’ हो। क्युं क जखो मिनख इकै अलावा क्युं बोलै ह जणा बो सेतान कानिऊँ ह। “थे जाणो हो थानै ओडायो गयो हो क, ‘आँख क बदलै आँख अर दांत क बदलै दांत।’ पण म थारूँ खेऊँ हूँ थे थारै सागै बुराई करबाळा क सागै बुराई मना करज्यो। पण ज कोई थारै दाया गाल प थपड़ मारै जणा बिकै कानि दुसरो गाल बी आगै कर दिज्यो। अर ज कोई मिनख न्याय ताँई तेर प मुकदमो चलार तेरो कुर्तीयो लेबो चावै जणा बिनै तेरो कोट बी दे दिजे। अर जखो मिनख जबरदस्ती आपको समान तनै पकड़ा'र एक कोस पैदल लेज्यावै जणा बिकै सागै दो कोस चल्यो जाए। अर ज कोई मिनख तेरूँ क्युं माँगै जणा बिनै दिजे। अर ज कोई मिनख तेरूँ उधारो लेबो चावै जणा बिनै बी मना मत करजे। “थारूँ ओ बी ओडायो गयो हो क, ‘थे थारा पड़ोसीऊँ परेम करज्यो अर थारा दुस्मनाऊँ नफरत करिओ।’ पण म थानै खेऊँ हूँ क थे थारा दुस्मनाऊँ परेम करज्यो। अर जखो थानै सतावै, बा ताँई बी अरदास करज्यो। जिऊँ थे ईस्बर नगरी म रेह्बाळा थारा परम-पिता की ओलाद बण सको। क्युं क परमेसर भला अर बुरा दोन्यु जंय्यां का मिनखा प सूरज को च्यानणो करै ह। अर धरमी अर पापी दोन्यु प म्हें बरसावै ह। अंय्यां म इ ताँई खेऊँ हूँ क्युं क ज थे थारूँ प्यार-परेम करबाळा क सागैई परेम करस्यो जणा थानै बिको काँई फळ मिलसी। अंय्यां तो चुंगी लेबाळा बी कोनी करै के? अर ज थे थारा भाई-भाणा किई आवभगत करो हो जणा इमै काँई गुण-एसान? अंय्यां तो परमेसरनै नइ ध्यारबाळा मिनख बी कोनी करै के? इ ताँई थानै सिद बणबो चाए, जंय्यां की ईस्बर नगरी म रेह्बाळो थारो परम-पिता सिद ह। “चोकन्ना रेह्ओ! परमेसर आ चावै ह क थे लोगानै दिखाबा ताँई धरम का काम मना करज्यो अर ज अंय्यां करस्यो जणा थानै परम-पिता जखो ईस्बर नगरी म ह बो बाको फळ कोनी देसी।” इ ताँई जद थे दान द्‍यो जणा बिको ढींढोरो मना पिटज्यो, जंय्यां क ढोंगी मिनख अरदास करबाळी झघा अर गळी-कुचळ्या म खुदकी मिनखाऊँ बडाई कराबा ताँई करै ह। म थारूँ सची बोलुँ हूँ बानै बाको फळ पेली मिलगो। पण जद तू दान देवै जणा जखो तेरो दाइणो हात करै बिको तेरा बाया हातनै बेरो नइ पड़ै। जिऊँ तेरो दान ओला म रेह्‍वै अर तेरो परम-पिता परमेसर तनै देखसी अर जखो तू ओला म दिओ ह बिको फळ तनै देसी। “जद थे अरदास करो, जणा ढोंग्या की जंय्यां मना करज्यो। क्युं क बे अरदास करबाळी झघा म अर गुवाड़ म खड़्या होर अरदास करै ह जिऊँ लोग बानै देख सकै। म थानै सची खेऊँ हूँ क बानै इको फळ मिलगो। पण जद तू अरदास करै जणा तू तेरा खुदका कोठा म जा कुआड़ जुड़'र परम-पिताऊँ जिनै कोई कोनी देख सकै अर जखो तेरा ओला म करेड़ा कामानै देखै ह। बो तनै बाको फळ देसी। जद थे अरदास करो जणा परमेसरनै नइ ध्यारबाळा मिनखा की जंय्यां मना करज्यो क्युं क बे आ सोचर अंय्यां करीं हीं क बाकै बार-बार बोलबा की बजेऊँ बाकी सुणली ज्यासी। इ ताँई थे बाकी जंय्यां मना बणज्यो क्युं क थारो परम-पिता थारै माँगबाऊँ पेल्याई जाणै ह क थारी जुर्त काँई ह। थे अंय्यां अरदास करो: “ईस्बर नगरी म रेह्बाळा म्हारा परम-पिता, थारो पबितर नाम उचो मान्यो जाय। थारो राज आवै। जंय्यां थारी इंछ्या ईस्बर नगरी म पूरी होवै ह बंय्यांई धरती प बी होवै। थे आज म्हारी रोजकी रोटी म्हानै द्‍यो। अर जंय्यां म्हें म्हारै खिलाप बुराई करबाळानै माफ कर्या हा बंय्यांई थे म्हानै माफ करो। अर थे म्हानै बिचासबा मना द्‍यो पण बुराईऊँ बचाओ। “ज थे मिनखा का पापनै जखा थारै खिलाप कर्या गया बानै माफ करस्यो जणाई थारो ईस्बर नगरी परम-पिता बी थारा पापनै माफ करसी। अर ज थे दुसरा मिनखानै माफ कोनी करस्यो जणा थारो ईस्बर नगरी परम-पिता बी थारा पाप माफ कोनी करसी। “जद थे बरत करो जणा ढोंग्या की जंय्यां मुंडा प उदासी मना ल्याज्यो, क्युं क बे आ दिखावै ह क बे बरत कर राख्या हीं म थानै सची खेऊँ हूँ, क बानै बाको फळ मिलगो। पण जद तू बरत करै जणा मुंडो धोर सीर प तेल लगार खुदको अभिसेक कर। जिऊँ मिनखानै नइ पण तेरा ईस्बर नगरी परम-पितानै जखो ओला म ह बिनै तेरा बरत क बारां म बेरो चालै जणा बो तनै इको फळ देसी। “इ धरती प थे धन भेळो मना करो। क्युं क अठै इकै दिवळ अर जर लागज्यावै ह अर चोर चुरार लेज्यावै ह। इकै बदलै अंय्यां का काम करो जखा परमेसरनै भावै अंय्यां करबो ईस्बर नगरी म धन भेळो करबा की जंय्यां ह जठै बिकै नइ तो दिवळ लागै नइ जर अर नइ बिनै चोर चुरावै। क्युं क जठै थारो धन होसी बठैई थारो मन होसी। “थारी काया को दिओ आँख ह इ ताँई ज थारी आँख निरोगी ह तो थारी सगळी काया म बी च्यानणो रेह्सी। ज तेरी नजर्या बुरी होज्या जणा तेरी सगळी काया म अँधेरो होज्यासी। इ ताँई जखो च्यानणो थारै मांयनै ह ज बोई बुत्तज्यासी जणा थारो काँई गेलो? “कोईबी मिनख एक सागै दो मालिका की सेवा कोनी कर सकै। क्युं क बो एकऊँ तो परेम राखसी अर दुसराऊँ नफरत करसी, एकऊँ तो बफादार रेह्सी दुसरानै छोटो जाणसी। अंय्यांई थे परमेसर अर धन की सेवा एक सागै कोनी कर सको। “म थारूँ खेऊँ हूँ, थे थारा जीव की चिंत्या मना करज्यो की काँई खास्यो अर काँई पीस्यो? अर नइ काया की चिंत्या करज्यो की इनै किऊँ ढकस्युं? क्युं क गाबाऊँ काया अर रोट्याऊँ जीव बडो ह। थे अकास का पंछ्यानै देखो बे नइ तो बोवै ह अर नइ काटै, अर नइ बे आपकी ओबरी म नाज भेळो करै, जणा बी थारो ईस्बर नगरी परम-पिता बाको पेट भरै ह। के थे बाऊँ बेसी कोनी? थारै म अंय्यां को कूण ह जखो चिंत्या कर खुदकी उमर म एक घड़ी बी बढा सकै? गाबल्या की चिंत्या क्युं करो हो? रोई म उगबाळा रोईड़ा का बोजानै देखो बे कंय्यां खिल्या रेह्‍वै ह। बे नइ तो काम करीं अर नइ बे खुद ताँई गाबा सिवीं। म थारूँ खेऊँ सुलेमान राजा बी आपका राजपाट की स्यान-सोरत म बामैऊँ एक की जंय्यां का बी गाबा कोनी पेर सक्यो। मैदान म उगबाळी घासनै देखो जखो आज ह पण काल बिनै भटी म झोक दिओ जावै ह बिनै परमेसर चोखा गाबा पिरावै ह जणा थोड़ो बिस्वास राखबाळा मिनखो परमेसर थानै बी पक्काई चोखा गाबा पिरासी। इ ताँई थे खाबा-पीबा की अर गाबा की चिंत्या मना करज्यो। परमेसरनै नइ ध्यारबाळा मिनख आ सगळी चिजा क गेल भागता रेह्‍वै ह पण थारो ईस्बर नगरी परम-पिता थारी सगळी जुर्तानै जाणै ह। सऊँ पेल्या परमेसर का राजनै ढुंढो अर सई गेला प चालो, जिऊँ थानै अ सगळी चिजा मिल ज्यासी। काल की चिंत्या मना करो, क्युं क काल ताँई काल किई चिंत्या घणी ह। अर हरेक दिन की चिंत्या बि दिन ताँई घणिई होवै ह। “कोईका बी पाप भर्या करमा को न्याय मना करो जिऊँ परमेसर बी थारा पाप भर्या करमा को न्याय कोनी करसी। क्युं क थारो बी फेसलो बंय्यांई कर्यो जासी, जंय्यां थे न्याय करबाळी टेम दुसरा मिनखा क सागै करो हो। अर जि नापऊँ थे दुसरा ताँई नापो हो बि नापऊँई थारै ताँई बी नाप्यो ज्यासी। तनै डूँगर बळती तो दिखै पण पगा बळती कोनी दिखै। तनै खुदकी बडी-बडी गळत्या तो सुजैई कोनी अर चाल्यो दुसरा की छोटी-छोटी गळत्यानै सुदारबा जणा पाछै तू कंय्यां खे सकै ह आ भाईड़ा म तेरी गळत्यानै सुदार द्‍युँ। ओ ढोंगी पेली खुदकी बडी-बडी गळत्यानै तो सुदारले जणा पाछै कठै जार तू ओरा की छोटी-छोटी गळत्यानै पिछाणर बानै सुदारबा म बाकी मदद कर सकै ह। “पबितर चिजा गंडक्ड़ा क आगै मना गेरो। अर नइ सूल्डा क आगै मोती बखेरो। क्युं क ज थे अंय्यां करस्यो जणा बे सूल्डा आ मोत्यानै आपका पगा तळै रूंदसी, अर गंडक्ड़ा बी पाछै मुड़र थानै पाड़ गेरसी।” “परमेसरऊँ माँगो, जणा थानै दिओ जासी। अर ढुंढो जणा थानै लाधसी अर खुड़काओ जणा थारै ताँई खोल्यो जासी। क्युं क जखो माँगै, बिनै मिलै ह, जखो ढुंढै ह बिनै लाधै ह, जखो खुड़कावै ह बि ताँई खोल्यो जावै ह। थारै म अंय्यां को कूणसो बाप ह जिऊँ बिको बेटो रोटी माँगै जणा बो बिनै भाठा देवै ह? अर नइ अंय्यां को बाप ह जिऊँ बिको बेटो मछी माँगै जणा बिनै साँप पकड़ावै। ज थे बुरा होर बी थारा टाबर टिकरानै चोखी चिज देबो जाणो हो। जणा थारो परम-पिता जखो ईस्बर नगरी म बिराजै ह बे बाऊँ माँगबाळा मिनखानै चोखी चिजा क्युं कोनी देसी? इ ताँई थे मिनखाऊँ बंय्यां को बरताव करो जंय्यां को थे बाऊँ चाओ हो। क्युं क ओ नेम-कायदा अर परमेसर की खेबाळा क जरिए परमेसर दिओ ह। “सकड़ा बारना क गेलाऊँ बड़ो क्युं क चोड़ा बारना को गेलो नास कानि लेज्यावै ह। बोळा मिनख ह जखा चोड़ा बारना का गेलाऊँ जार्या हीं। पण सकड़ा बारना को गेलो जीवन कानि जार्यो ह। अर थोड़ा मिनख इ गेलै जार्या हीं। “थे बा परमेसर की खेबाळाऊँ बचर रेहज्यो जखा झूठ बोलै ह! बे लल्डी की खोळ म पाड़ खाबाळा ल्याळी हीं। पण थे बानै बाका करमाऊँ पिछाण लेस्यो। क्युं क थे जाणो हो क झाड़ी क अँगूर कोनी लागै अर नइ केर क अंजीर। अंय्यांई चोखा दरख्त क चोखा फळ अर बुरा दरख्त क बुरा फळ लागै। अर नइ एक चोखा दरख्त क बुरो फळ लाग सकै ह अर नइ एक बुरा दरख्त क चोखा फळ लाग सकै ह। पण जि दरख्त क चोखा फळ कोनी लागै, बिनै का'टर आग क मांयनै बाळ्यो जावै ह। इ ताँई म थानै ओज्यु खेऊँ हूँ क थे बा मिनखानै बाका करमा का फळाऊँ पिछाण लेस्यो। “परबु-परबु करबाळा सगळा मिनख ईस्बर नगरी राज म कोनी ज्यासी। पण जखो बी मिनख ईस्बर नगरी म रेह्बाळा मेरा परम-पिता की इंछ्या गेल चालै ह, बोई बिमै ज्यासी। बि न्यायहाळै दिन बोळा मिनख मनै खेसी, ‘परबु हे परबु! म्हें थारै नामऊँ थारी बाता कोनी बताया हा के? अर थारै नामऊँ ओपरी बलायानै कोनी भगाया के? अर थारै नामऊँ बोळासारा ताजूब का काम कोनी कर्या हा के?’ जणा म बानै साप-साप खेस्युं क, ‘म थानै कोनी जाणू। हे बुरा करम करबाळो मेरै कनैऊँ चल्या जाओ।’ “इ ताँई जखो बी मेरा बचनानै सुणै ह अर बापै चालै ह बिकी बराबरी बि बुदीमान मिनखऊँ करी गई ह जखो आपको घर ढाड प बणायो, जणा मी बरस्यो, बाढ आई, भाळ की फटकार लागी पण बो ढयो कोनी क्युं क बि घर की निम ढाड प धरेड़ी ही। पण जखो बी मिनख मेरा बचनानै सुणै तो ह पण बापै चालै कोनी, बो बि बावळा मिनख की जंय्यां ह जखो आपको घर बाळू प बणायो, अर जद मी बरस्यो, बाढ आई, भाळ की फटकार लागी जणा बो घर ढेग्यो।” अर जद ईसु आपकी बाता बानै खे सुणाई, जणा बि भीड़नै ईसु की सीख प ताजूब होयो। क्युं क ईसु बानै यहूदि नेता की जंय्यां कोनी पण एक अधिकार क सागै सीख देर्यो हो। इकै पाछै जद ईसु डूँगरऊँ तळै उतर्यो जणा मिनखा की भीड़ बाकै गेल होलिनी। बामै एक कोढी बी हो। बो ईसु कनै आयो अर बाकै पगा म धोक खार बोल्यो, “म्हराज, ज थे चाओ तो मेरो कोढ धो सको हो।” आ सुणर ईसु बिपै हात धर बिऊँ खयो, “म चाऊँ हूँ क तेरो कोढ धुपज्या!” अर जदकी जदई बिको कोढ धुपगो। पण ईसु बिनै ओडायो, “इ बात क बारां म खिनई मना खिजे। पण याजक क कनै जार खुदनै दिखा अर मूसा की रीत गेल भेंट चढा जिऊँ मिनखानै तेरै निरोगो होबा को सबूत मिलै।” अर जद ईसु कफरनूम नगरी आयो, जणा रोमी सुबेदार जखो सो सिपाईड़ा प हो, ईसु कनै आर अरदास करबा लाग्यो, “म्हराज मेरो एक दास घर क मांयनै रोगलो पड़्यो ह। बिकै हवा भेगी इ बजेऊँ बिनै पिड़ा होरी ह।” जणा ईसु बिऊँ खयो, “म बठै आर बिनै निरोगो करस्युं।” जणा बो सुबेदार ईसुऊँ बोल्यो, “म्हराज म इ जोगो कोनी क थे मेरै घरा पधारो। थे तो अठैऊँई आदेस करद्‍यो जणा मेरो दास निरोगो होज्यासी। क्युं क म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा ’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै ह। अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।” आ सुणर ईसुनै बि मिनख प ताजूब होयो अर बि भीड़ऊँ बोल्यो जखी बाकै गेल आरी ही, “म थानै सची खेऊँ हूँ इ जंय्यांको पक्को बिस्वास तो म इजरायल का मिनखा म बी कोनी देख्यो। म थानै बताऊँ हूँ क, बोळा मिनख अगुणी अर पाछुणी दिसाऊँ आसी अर बे ईस्बर नगरी राज म अब्राहम, इसाक अर याकूब क सागै जिमबा बेठसी। पण जखी पिडीनै राज मिलबाळो हो बिनै अँधेरा म गेर दिओ ज्यासी जठै रोबो अर दांत पिसबो होसी।” इकै पाछै ईसु बि सुबेदारनै ओडायो, “चल्योजा जंय्यां को तेरो बिस्वास ह बंय्यांई तेरै सागै होसी।” जणा बि टेमई बिको दास निरोगो होगो। जद ईसु पतरस क घरा गयो बठै पतरस की सासू बुखार म पड़ी ही। जणा ईसु बिकै हात अड़ायो अर बा निरोगी होगी। अर बा खड़ी होर बाकी सेवा-पाणी करबा लागी। जद दिन आथगो जणा लोग बा मिनखानै जामै फेंट होईड़ी ही बाकन लेर आया। ईसु बा ओपरी बलायानै हुकम देतो अर बे बाको हुकम मानर बाकै मांयनैऊँ निकळ ज्याती। अर बे बा सगळा मिनखानै निरोगो कर्या जखा रोगला हा। अंय्यां इ ताँई होयो क्युं क यसाया परमेसर की खेबाळो जखो खयो हो बो पूरो होवै: बे आपणा रोगानै खुद प लेर अर आपणी बिमार्यानै सेण कर दूर कर दिनी। जद ईसु आपकै च्यारूमेर भीड़ देखी जणा बे आपका चेलानै दरिआव क परलै-पार जाबा को हुकम दिओ। बि टेम क एक यहूदि जिनै सास्तर को ज्ञान हो, बो ईसु कनै आर बोल्यो, “म्हराज थे जठै बी जास्यो म बी थारै गेल जास्युं।” बे बिकी इ बातनै सुणर बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।” अर ईसु को एक चेलो बाऊँ खयो, “ओ म्हराज मनै पेली जाबा दे की म मेरा बापनै गाड्याऊँ।” पण ईसु बिनै ओडायो, “मेरै गेल होले क्युं क परमेसर बा मिनखानै जाकै कनै जुग-जुग को जीवन कोनी बानै मरेड़ो समजै ह बा मरेड़ा मिनखानै बाका मरेड़ानै गाडबा दे।” बिकै पाछै बे एक न्याव म जार बेठगा। बाकै सागै बाका चेला बी हा। जद बे न्याव क मांयनै हा बि टेम क दरिआव क मांयनै जोरको तौफान आयो अर न्याव म पाणी भरबा लाग्यो पण ईसु सोर्यो हो। जणा बे ईसु कनै गया अर बानै जगार बाऊँ बोल्या, “परबु म्हानै बचाओ। क्युं क आपा मरबाळा हां!” जणा ईसु बाऊँ बोल्या, “हे कम बिस्वास राखबाळो! थे अंय्यां क्युं डरो हो?” बिकै पाछै बे भाळनै अर दरिआवनै दकाल्या जिऊँ सक्यु स्यांत होगो। बे मिनख ताजूब म पड़गा, अर आपसरी म बतळाबा लाग्या, “ओ कूण ह? जिकी बाता तौफान अर दरिआव बी मानै ह!” बिकै पाछै ईसु गदरेनिया दिसावर म पुग्या, ओ दिसावर दरिआव क परलै नाकै हो। जणा बठै दो मिनख बानै मिल्या जखा मूसाणा मऊँ निकळर आर्या हा बाकै फेंट होईड़ी ही। बे अंय्यां का खतरनाक मिनख हा की बाकै बजेऊँ बि गेलै कोईबी कोनी जातो हो। बे जोरऊँ बोल्या, “हे परमेसर का बेटा, थारो म्हारो काँई लेणदेण? के थे थारा टेमऊँ पेल्याई म्हानै नास करबा आया हो?” अर बठैई क्युंक दूर एक सूल्डा को रेवड़ चरै हो। इ ताँई बे ओपरी बलाय बाऊँ अरदास कर बोली, “ज थे म्हानै आमऊँ काडो हो जणा बा सूल्डा का रेवड़ म भेज द्‍यो।” जणा ईसु बानै ओडायो, “जाओ!” जणा बे बा मिनखाऊँ निकळर बा सूल्डा का रेवड़ म रळगी। इकै बजेऊँ बे सूल्डा ढळानऊँ गुड़ता गुड़ता दरिआव क मांयनै जा पड़्या अर मरगा। अर सूल्डानै चराबाळा नगरी म जार जोक्यु बठै होयो हो बिकै बारां म अर जखा मिनखा म फेंट होईड़ी ही बाकै सागै काँई होयो बिकै बारां म खे सुणायो। आ सुणर बि नगरी का मिनख ईसु कनै आगा अर बाऊँ अरदास करबा लाग्या क बो अठैऊँ चल्यो जावै। ईसु एक न्याव म बेठर दरिआव क परलै नाकै खुदकी नगरी कफरनूम म आग्या। जणा लोग एक भाळ भेयड़ा मिनखनै खाटली म घालर बाकन ल्याया। ईसु बाका बिस्वासनै देखर बि हवा भेयड़ा मिनखनै ओडायो, “हिमत राख, तेरा पाप धुपगा!” जणा क्युंक सास्तरानै सीखाबाळा यहूदि मिनख आपसरी म बतळाबा लाग्या, “ओ अंय्यां बोलर परमेसर की बुराई करै ह।” ईसु बाकी हिया की बातानै जा'णर बाऊँ बोल्यो, “थे थारा हिया म बुरो क्युं सोचो हो? सोरो काँई ह? के अंय्यां ओडाबो ‘तेरा पाप धुपगा’ नहिस अंय्यां ओडाबो, ‘खड़्यो होर डोल-फिर?’ जिऊँ थे आ जाण सको की इ धरती प पाप धोबा को हक मिनख का बेटा कनै ह।” इकै पाछै ईसु बि हवा भेयड़ा मिनखनै बोल्यो, “खड़्यो होर तेरी खाटलीनै लेर तेरै घरा चल्योजा।” बो मिनख खड़्यो होर आपकै घरा चलेगो। लोग आ देखर डरग्या। बे परमेसर की जे-जैकार करबा लाग्या क बे मिनखनै ताजूब का काम करबा को हक दिओ ह। जद ईसु बठैऊँ जार्यो हो जणा बे चुंगी चोकी प एक मिनखनै बेठ्या देख्या। बिको नाम मत्ती हो। ईसु बिऊँ बोल्यो, “मेरै गेल होले।” जणा बो खड़्यो होर बाकै गेल होलिओ। अर जद ईसु आपका चेला क सागै मत्ती क घरा रोटी खाबा ताँई बेठ्या जणा बठै बाकै सागै रोटी खाबा ताँई चुंगी लेबाळा अर पापी मिनख बी बेठ्या। बानै सागै बेठ्या देखर क्युंक फरिसी ईसु का चेलानै खया, “थारो गरूजी तो चुंगी लेबाळा अर पापी मिनखा क सागै खावै अर उठा-बेठी करै ह?” आ सुणर ईसु बाऊँ बोल्यो, “निरोगा मिनखानै बेद की जुर्त कोनी होवै, रोगलानैई बेद की जुर्त पड़ै ह। इ ताँई थे जाओ अर सास्तर म मांडेड़ा इ बचन को मतबल काँई ह बिनै समजो, ‘म बलिदान कोनी चाऊँ पण दया चाऊँ हूँ। म धरम्या ताँई कोनी आयो पण पाप्यानै बुलाबा आयो हूँ।’” इकै पाछै यहून्ना बतिस्मो देबाळा का चेला ईसु कनै गया अर बानै बुजबा लाग्या, “थारा चेला बरत क्युं कोनी करै? जदकी म्हें अर फरिसी बार-बार बरत करां हां।” जणा ईसु बानै खेबा लाग्या, “ब्या की टेम जद बिंद आपका भाईला क सागै ह जणा बिका भाईला दुख मनावै ह के? पण बे दिन आसी जद बनड़ो बाऊँ न्यारो कर्यो जासी जणा बे बरत करसी। कोईबी पुराणा गाबा प नया सुती गाबा की कारी कोनी लगावै, अर ज कोई लगा बी ले जणा नई कारी भेळी होर बि गाबल्यानै दुणो पाड़ गेरै। अंय्यांई नई अँगूरी पुराणी बखाल म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर अँगूरी अर बखाल दोन्युई खराब हो जावै। इ ताँई लोग नई अँगूरी नई बखाल मई भरीं हीं।” ईसु जद अ बाता बानै बतार्याई हा क अत्ता मई एक यहूदि सभा को एक परधान बाकन आयो अर बाकै धोक खार बाऊँ अरदास करतो बोल्यो, “इबी-इबी मेरी छोरी मरी ह। ज थे चालर बिकै उपर हात धरद्‍यो जणा बा ओज्यु जी ज्यासी।” बिकी बाता सुणर ईसु खड़्यो होर आपका चेलानै सागै लेर बिकै सागै चालबा लाग्यो। बठै एक लूगाई ही जिकै बारा बरसाऊँ न्याह्णी को रोग हो। बा ईसु क गेलनै आर बाका कुर्ता की कोर क हात अड़ा दिनी। क्युं क बा सोच्या करती ही क, “ज म ईसु का कुर्ता की कोर क हात अड़ा देस्युँ जणा म निरोगी होज्यास्युं।” गेलनै मुड़र ईसु बिनै देखर बोल्यो, “बेटी हिमत राख। तू तेरा बिस्वास की बजेऊँ निरोगी करी गई ह।” अर बा लूगाई जदकी जद निरोगी होगी। जद ईसु बि यहूदि परधान क घरा पुग्या जणा बे देख्या क लोग बि छोरी क मरबा की बजेऊँ रोइ पिटी करबा लागर्या हीं। जणा ईसु बा मिनखाऊँ बोल्या, “थे अठैऊँ बारनै चल्या जाओ आ छोरी मरी कोनी पण सोवै ह।” आ सुणर लोग बाको मजाक उडाबा लाग्या। अर जद लोगानै बठैऊँ बारनै काड दिओ गयो जणा ईसु मांयनै जार बि छोरी को हात पकड़्यो जिऊँ बा छोरी जीगी। इ बात की चरचा च्यारूमेर फेलगी। अर जद ईसु बठैऊँ जार्या हा जणा दो आँदा मिनख बाकै गेल होलिआ अर हेलो देर खेबा लाग्या, “हे दाऊद का बेटा, म्हारै प दया कर।” अर जद ईसु घर क मांयनै बड़गा जणा बे मिनख बी बाकन गया। बानै देखर ईसु बाऊँ बुज्यो, “के थानै बिस्वास ह क म थानै ओज्यु आँख्या दे सकूँ हूँ?” बे बोल्या, “हाँ म्हराज!” जणा ईसु बाकी आँख्या क हात अड़ार खयो, “जंय्यां थारो बिस्वास ह बंय्यांई थारै सागै होवै।” अर बे आँदा देखबा लाग्या। अर ईसु बानै अंय्यां चेतायो क, “इकै बारां म खिनई मना खिज्यो।” पण बे बठैऊँ जार बि झघा म बा बाता को ढींढोरो पिट दिओ। जद ईसु बठैऊँ जार्या हा जणा लोग एक गुँगानै जिकै फेंट होईड़ी ही बिनै ईसु कनै लेर आया। अर जद बिकै मांयनैऊँ बी ओपरी बलायनै काड दिनी जणा बो मिनख बोलबा लाग्यो, जणा बठै भीड़ ही जखी ताजूब कर खेबा लागी, “म्हें इजरायल म अंय्यां को काम पेली कदैई कोनी देख्यो।” पण बठै खड़्या फरिसी खेबा लाग्या, “क ओ भूता का नाथ की सक्‍तिऊँ ओपरी बलायानै काडै ह।” ईसु नगरी-नगरी गाँव-गाँव जार अरदास करबाळी झघा म सीखातो हो अर परमेसर क राज क बारां म चोखा समचार को हेलो पाड़तो, लोगा का रोगनै दूर करतो होयो फिर्या करतो हो। अर ईसु जद बी भीड़नै देखतो बानै बापै तरस आतो क्युं क बे बि लल्डी की जंय्यां हा जिको गुवाळ्यो कोनी होवै ह जिकै बजेऊँ बा अठिनै-बठिनै रूळती फिरै ह। जणा ईसु आपका चेलानै खेबा लाग्यो, “लावणी आएड़ा खेत तो बोळा हीं पण ध्यानग्या थोड़ा हीं। इ ताँई थे खेत का धणी परमेसरऊँ अरदास करो जिऊँ बे लावणी करबा ताँई ध्यानग्यानै भेजै।” ईसु आपका बारा चेलानै आपकै कनै बुलार बानै सूगली ओपरी बलायानै काडबा की अर रोगलानै निरोगो करबा अर कमजोरीनै दूर करबा को अधिकार दिओ। बा बारानै भेजेड़ा चेला खेर बुलायो जाका नाम अंय्यां ह: सऊँ पेल्या तो समोन जिनै पतरस बी खेवै ह बिको भाईड़ो अंदरिआस, जब्दि को बेटो याकूब अर बिको भाईड़ो यहून्ना, फलिपूस, बरतुल्मै, थोमा, चुंगी लेबाळो मत्ती, हलफई को बेटो याकूब अर तद्दे, देस भगत समोन, अर यहूदा इस्करोती ओ बोई ह जखो ईसुनै धोकाऊँ पकड़ायो हो। ईसु बा बारानै ओ अधिकार दिओ अर हुकम देर भेज्यो: “गैर-यहूदि मिनखा की नगरी म मना जायो अर नइ सामरी नगरी म जायो। पण इजरायल का मिनखा क कनैई जायो जखा गुमेड़ी लल्ड्या की जंय्यां ह। अर बाकन जाओ अर हेलो पाड़ो क ‘ईस्बर नगरी को राज सांकड़ै आगो ह’ अर रोगलानै निरोगा करो, मरेड़ानै जीवाओ, कोढ्या का कोढनै धोवो अर ओपरी बलायानै भगाओ। जंय्यां थानै सितमित म मिल्यो ह थे बी सितमित म द्‍यो। थे नइ तो सोनो-चाँदी ल्यो नइ तामा का सीक्का अर नइ बटूओ लिज्यो। अर नइ गेला ताँई झोळो नइ कुर्तो, नइ चपल नइ हात म लाठी लिज्यो, क्युं क ध्यानग्यानै रोट्या को तो हक होवैई ह। थे जद बी कोई नगरी नहिस गाँव म जाओ जणा पेल्या बेरो करज्यो क बठै गत को मिनख कूण ह। अर जद ताँई थे बठैऊँ नइ जाओ बाकै सागैई रेहज्यो। जि घर की थळी प पग धरो जणा बि घर का मिनखानै आसिरबाद दिज्यो। ज बि घर का मिनखा म एक जणो बी आसिरबाद क जोगो होसी जणा थारो आसिरबाद बिकै लागसी। नहिस तो थारो आसिरबाद ओज्यु थारै कनै आज्यासी। अर ज कोई थारो मान कोनी करै अर नइ थारी बाता सुणै जणा थे बि घर अर बि नगरीऊँ बारनै आर थारी पगा की धूळ झाड़ दिज्यो। अंय्यां कर थे बानै आ चेता दिज्यो क परमेसर बानै सजा देसी क्युं क बे बिकी बात कोनी सुणी। म थारूँ सची खेऊँ हूँ जद न्याय होसी, बि दिन बि नगरी की दसा सदोम अर अमोरा नगरीऊँ बी बेकार होसी। “सुणो म थानै ल्याळ्या क मांयनै लल्ड्या की जंय्यां भेजर्यो हूँ। इ ताँई थे साँप जंय्यां चलाक अर कबूतर की जंय्यां भोळा रेहज्यो। अर थे मिनखाऊँ हुस्यार रेहज्यो क्युं क बे थानै पकड़र पंचा क हाता सूप देसी अर बे थानै अरदास करबाळी झघा लेज्यार बेत पड़वासी। थे मेरै बारां म सीख द्‍यो हो इ बजेऊँ थानै राजा अर अधिकार्या क सामै लेज्यायो जासी, पण थानै बि टेम यहूदि अर गैर-यहूदि मिनखा म मनै साबित करबा को मोको मिलसी। जद बे थानै पकड़सी जणा थे आ चिंत्या मना करज्यो क थानै इब काँई खेणो ह क्युं क बि घड़ी पबितर आत्मा थानै बतासी काँई खेणो ह। क्युं क बोलबाळा थे कोनी पण थारा परम-पिता की पबितर आत्मा थारै मऊँ होर बोलसी। सागे भाई-भाण भाई-भाणानै पकड़ा'र मरवासी, माँ-बाप टाबरानै मरवासी अर टाबर माँ-बापा क सामै होर बानै मरवा गेरसी। मेरा नाम की बजेऊँ लोग थारूँ नफरत करसी पण जखो मिनख आपकी अंतघड़ी ताँई सक्यु सेह्सी बोई बचायो ज्यासी। बे थानै थारी एक नगरी म सतावै जणा थे दुसरी नगरी म भागजाज्यो। अर म थारूँ सची खेऊँ हूँ इजरायल देस की सगळी नगर्या म थारै घूमबाऊँ पेलीई मिनख को बेटो आज्यासी। क्युं क चेलो गरूऊँ बडो कोनी होवै अर नइ दास आपका मालिकऊँ बडो होवै ह। इ ताँई चेलानै गरूजी क बराबर होबा म अर दासनै मालिक क बराबर होबा मई सबर राखबो चाए। अर जद बे मिनख घर का मालिकनैई बालजबुल खेवै ह जणा बिका घर का मिनखा क सागै तो ओर बी बुरो सलुक करसी! “इ ताँई थे बा मिनखाऊँ मना डरो, क्युं क जोक्यु बी लुखेड़ो ह बिनै परमेसर चोड़ामै ल्यासी अर जखो बी ओला म ह बिनै सामै ल्यासी। इ ताँई म जोक्यु बी थानै अँधेरा म बोल्यो हूँ थे बिनै दिन का च्यानणा म जोरऊँ बोलो अर जखी बाता म थानै ओला म खेऊँ हूँ बाको थे कोठा प चढर हेलो पाड़ो।” “थे बा मिनखाऊँ मना डरो जखा थारी कायानै नास कर सकीं हीं पण थारी आत्मानै नास कोनी कर सकीं। पण परमेसरऊँ डरो जखो थारी आत्मा अर काया दोन्यानै नरक म गेर'र नास कर सकै ह। क्युं क एक डबली हाळा सीक्का की दो चिड़कल्या कोनी बिकै के? पण बामैऊँ एक बी धरती प मरै ह जणा बाकै बारां म थारा परम-पितानै बेरो होवै ह। अठै ताँई क परमेसर थारै सीर का एक-एक बाळ बी गिण राख्या ह। इ ताँई डरो मना क्युं क परमेसर की नजर्या म थारो मोल तो चिड़कल्याऊँ बी बोळो ह। “जखो बी मिनख लोगा क सामै मनै मान लेसी जणा म बी ईस्बर नगरी म रेह्बाळा परम-पिता क सामै बानै मानस्युं। पण जखो बी मिनख मनै लोगा क सामै कोनी मानसी जणा म बी ईस्बर नगरी म रेह्बाळा परम-पिता क सामै बिनै कोनी मानस्युं। “थे अंय्यां मना सोचो क म धरती प मिनखा को सुळजेटो कराबा आयो हूँ पण म तो बानै लड़ाबा आया हूँ । म ओ करबा आयो हूँ क बेटो बाप क खिलाप, बेटी माँ क खिलाप अर भू सासू क खिलाप होवै। मिनख का बेरी बिका घरकाई होसी।” “जखो बी मिनख मेरूँ बेत्ती आपका माँ-बापानै नहिस आपका बाळबच्चानै परेम करै बो मेरै जोगो कोनी।” अर जखो बी मेरै ताँई दुख दरद सेह्बा ताँई अर मरबानै त्यार कोनी बो मेरो चेलो होबा जोगो कोनी। “जखो बी आपका पिराण बचावै ह बो बिकी हानी उठावै ह, अर जखो बी मेरी बजेऊँ आपका पिराण देवै ह बो बिनै पासी। “जखो बी थारो मान करै ह, बो मेरो बी मान करै ह; अर जखो मेरो मान करै ह बो मनै अधिकार क सागै भेजबाळा परमेसर को बी मान करै ह। जखो बी परमेसर की खेबाळा को आ जा'णर मान करै ह की बो परमेसर की खेबाळो ह बिनै बोई फळ मिलसी जखो परमेसर की खेबाळानै मिलै ह। अर जखो बी धरमी मिनख को आ सोचर मान करै ह क बो धरमी मिनख ह जणा बिनै बी बोई फळ मिलसी जखो धरमी मिनखनै मिलणो चाए। अर म थानै सची खेऊँ हूँ ज कोई आ छोटा मऊँ एकनै बी मेरो चेलो जा'णर एक गिलास पाणी प्यावै, बिनै बिको फळ मिलसी।” ईसु आपका बारा चेलानै हुकम देबा क पाछै बठैऊँ परचार करबा अर सीख देबा ताँई नगर्या म चलेगो। जद यहून्ना काळ-कोठड़ी म मसी का कामा की चरचा सुणी जणा बो आपका चेलानै ईसु कनै आ बुजबा ताँई भेज्यो, “थे बेई हो के जखा आबाळा हा नहिस म्हें ओरनै उडिकां?” ईसु बाऊँ बोल्यो, “थे जोक्यु बी सुणो अर देखो हो बो सक्यु यहून्नानै जार बताद्‍यो। आँदा ओज्यु देखीं हीं, लंगड़ा चालीं हीं, कोढ्या को कोढ धोयो जार्यो ह। बैरा सुणर्या हीं, मुरदानै जीवायो जार्यो ह अर गरीबा म चोखा समचार को परचार कर्यो जार्यो ह। भागहाळा ह बे जखा मेरै प बिस्वास करै ह।” अर जद यहून्ना का चेला बठैऊँ चाल पड़्या जणा ईसु लोगानै बतिस्मो देबाळा यहून्ना क बारां म खेबा लाग्यो, “थे उजाड़ म काँई देखबा गया हा, भाळऊँ हालता कूचानै? जणा काँई देखबा गया हा? के किमती गाबा पेरेड़ा मिनखनै? सुणो जखा किमती गाबा पेरीं हीं बे राजा का म्हेलमाळ्या म रेह्‍वै। जणा काँई देखबा गया हा? के परमेसर की खेबाळानै, पण म थानै बोलुँ हूँ जिनै थे देखबा गया हा बो परमेसर की खेबाळाऊँ बी बढकै ह। ओ बो ह जिकै बारां म पबितर सास्तर म मंडर्यो ह: “देख म मेरा हलकारानै अधिकार क सागै तेरै अगाऊ भेजूँ हूँ। जखो लोगा का हियानै तेरै ताँई त्यार करसी।” “म थानै सची खेऊँ हूँ लूगाईऊँ जलमेड़ा सगळा मिनखा म बतिस्मो देबाळा यहून्नाऊँ बडो कोई मिनख कोनी जलम्यो। पण ईस्बर नगरी का राज म छोटाऊँ छोटो बी बिऊँ बडो ह। बतिस्मो देबाळा यहून्ना की टेमऊँ लेर परमेसर का राज क सागै मारपीट करी जावै ह अर बे मारपीट करबाळा जोरामादी बि राजनै लेबा की कोसिस करै ह। यहून्ना की टेम ताँई सगळा परमेसर की खेबाळा अर मूसा का नेम-कायदा परमेसर को समचार देता हा। ज थारै मऊँ कोई इ बातनै मानबो चावै क आबाळो एलिआ ओई ह, जणा बो इनै मानले। जिकै कान ह बो बानै खोलल्यो। म इ पिडी का मिनखा की बराबरी किऊँ करूं? अ तो गुवाड़ म बेठ्या बा टाबरा की जंय्यां ह जखा एक दुसरानै हेलो देर खेवै ह। ‘म्हें थारै ताँई बाजो बजाया पण थे नाच्याई कोनी। म्हें थारै ताँई बार घाली पण थे रोयाई कोनी।’ बतिस्मो देबाळो यहून्ना आयो बो ओरा की जंय्यां नइ तो चोखो खातो हो अर नइ अँगूरी पीतो हो जणा बी लोग खया इकै मांयनै ओपरी बलाय ह। मिनख को बेटो ओरा की जंय्यां खातो-पीतो आयो अर बे खेवै ह, ‘ओ पेटू अर दारूड़ो ह चुंगी लेबाळा अर पाप्या को भाईलो ह।’ परमेसर की बुदी प चालबाळा आपका करमाऊँ बिकी बुदीनै सई साबित करै ह।” ईसु बा नगर्यानै दिदकारबा लाग्यो जाकै मांयनै बे बोळासारा चमत्कार कर्या हा। क्युं क बठै का मिनख आपका पापऊँ तौबा कोनी कर्या। “खुराजीन अर बेतसदा म रेह्बाळा मिनखा प हाय ह अत्ता-अत्ता ताजूब का काम आ नगर्या म कर्या गया, ज अ काम सूर अर सैदा नगर्या म कर्या जाता जणा बठै का मिनख बोरी का गाबा पेर'र खुद प राख बुरकार, कदकाई दिखा देता क बे पापऊँ तौबा कर लिआ हीं। पण न्यायहाळै दिन थारी दसा सूर अर सैदाऊँ बोळी बेत्ती बुरी होसी। अर कफरनूम म रेह्बाळो थे के राजी होवो हो, की ईस्बर नगरी जास्यो? पण थानै तो सिदो नरक म पटक्यो जासी। क्युं क थारै मांयनै जखा चमत्कार कर्या गया हा बे सदोम नगरी म कर्या जाता जणा बा नगरी आज ताँई भसी रेह्ती। पण म थारूँ खेऊँ हूँ न्यायहाळै दिन थारा मिनखा की दसा सदोम नगरी का मिनखाऊँ बेत्ती खराब होसी।” बठैई ईसु बोल्यो “ओ परम-पिता ईस्बर नगरी अर धरती का मालिक म तेरो गुणगान करूं की तू आ बातानै ज्ञान्याऊँ अर स्याणाऊँ लखोर राखी अर गुठा छाप प आका भेदानै खोल्या। क्युं क ओ थारी नजर्या म चोखो हो। मेरै हाता म मेरो परम-पिता सक्यु सूप्यो ह अर परम-पिता क अलावा कोईबी बेटानै कोनी जाणै अर कोईबी बेटा क अलावा परम-पितानै कोनी जाणै। अर बे मिनख बापनै जाणै ह जिनै बेटो बतावै ह।” ईसु बाऊँ बोल्यो, “हे आखता होयड़ो अर बोजऊँ दबेड़ा मिनखो मेरै कनै आओ म थानै अराम देस्युँ। थे मेरी हाळीनै लेल्यो अर बिनै लादल्यो अर थे मेरूँ सीखो क्युं क म सिदो-सादो अर मेरो हियो दयाऊँ भरेड़ो ह। जिऊँ थानै बी अराम मिलसी क्युं क मेरी हाळी अराम दायक अर मेरो बोज हळको ह।” यहूदिआ मिनखा क अरामहाळा दिन ईसु अर बाकाळा चेला खेता क मांयनैऊँ जार्या हा जणा चेलानै भूख लागी इ ताँई बे खेत मऊँ ग्युं की बाळ्या तोड़-तो'ड़र खाबा लाग्या। फरिसी बानै अंय्यां करता देख ईसुनै बोल्या, “थारा चेला अरामहाळा दिन बो काम क्युं करै जखो आपणा नेम-कायदा म बरजेड़ो ह।” ईसु बाकी बाता सुणर बानै बोल्यो, “थे सास्तर म ओ कोनी बाच्या क जद दाऊद अर बिकाळा सिरी भूखा हा जणा बे काँई कर्या हा? बो आपका सात्या क सागै परमेसर का तम्मू म जार परमेसर क चढाईड़ी रोट्या खाई जानै याजक सिवाय ओरनै बरजेड़ो हो। थे मूसा का नेम-कायदा म ओ कोनी बाच्या क अरामहाळा दिन मनदर का याजकई बिमै अरामहाळा दिन का नियमनै तोड़ै ह जणा बी बानै कोई क्युंई कोनी बोलै। पण म थानै खेऊँ हूँ अठै जखो ह बो मनदरऊँ बी बडो ह। ज थे सास्तरा म जखो मांडेड़ो ह बिकै बारां म जाणता तो थे ओ बी जाणता की म मिनखाऊँ ओ चाऊँ हूँ क बे दया करीं नइ क ज्यानबरा की बलि चढावीं। जिऊँ थे बा मिनखानै जखा खरा हीं दोसी नइ बताओ। क्युं क मिनख को बेटो अरामहाळा दिन को बी परबु ह।” ईसु बठैऊँ चालर यहूदि मिनखा की अरदास करबाळी झघा गयो। बठै एक मिनख हो बिकै एक हात क हवा भेगी ही, बठै क्युंक मिनख हा बे ईसु प दोस लगाबा ताँई बुज्या, “अरामहाळा दिन खिनै निरोगो करबो ठिक ह के?” ईसु बानै बोल्यो, “म थानै बुजूँ हूँ जिकै कनै एक लल्डी हो अर बा खाडा म पड़ज्या जणा थे अरामहाळा दिन बिनै बारनै कोनी काडो के? जदकी मिनख को मोल तो लल्डीऊँ बेत्ती ह। इ ताँई अरामहाळा दिन भलाई करबो चोखो ह।” जणा ईसु बि हवा भेयड़ा मिनखनै बोल्यो, “तेरा हातनै सिदो करले।” बो हातनै सिदो कर लिओ अर बिको हात दुसरा हात की जंय्यां पेली हो बंय्यांई निरोगो होगो। जणा बे फरिसी बठैऊँ चलेग्या अर ईसुनै कंय्यांसिक मारां इकी साजिस रचबा लाग्या। ईसु बाकी चाल समजगो अर बठैऊँ चलेगो। पण भीड़ बाकै गेल होलिनी। ईसु सगळा रोगलानै निरोगो कर्यो। ईसु बा मिनखानै चेतायो, “थे मनै परगट मना करो।” ओ इ ताँई होयो जंय्यां क यसाया परमेसर की खेबाळो जखो बचन खया ह बे पूरा होवै, “देखो ओ मेरो दास ह जिनै म टाळ्यो हूँ, ओ मेरो लाडलो ह, जिऊँ म बोळो राजी हूँ। म मेरी पबितर आत्मा इकै उपर उतारस्युं, अर ओ धरती का सगळा मिनखा म हेलो पाड़सी क परमेसर ईमानदारीऊँ बाको न्याय करसी। ओ नइ तो खिऊँ लड़सी, अर नइ गळी-कुचळ्या म कूकसी। जद ताँई बो धरती प धारमिक्‍ता नइ फेलादे बो खिनई नास कोनी करै। चाए कोई अटकेड़ी पान्नी की जंय्यां हो नहिस दिआ की बुत्तबाळी लोय की जंय्यां कमजोर हो। अर धरती का सगळा मिनख बिका नाम पई आस लगासी।” लोग ईसु कनै एक मिनखनै ल्याया जिमै फेंट होईड़ी ही जिकी बजेऊँ बो आँदो अर गुँगो हो अर ईसु बिनै निरोगो कर दिओ जिकी बजेऊँ बो देखबा अर बोलबा लागगो। लोग इनै देखर ताजूब म पड़गा अर खेबा लाग्या क, “ओ दाऊद को बेटा मसी ह?” पण फरिसी बाकी बातानै सुणर खेबा लाग्या, “ईसु भूता का नाथ बालजबुल की सक्‍तिऊँ बानै काडै ह।” ईसु बाकी हिया की बातानै जा'णर बाऊँ बोल्यो, “जि राजपाट म फूट पड़ज्या जणा बिको नास होज्यावै ह। अर जि नगरी नहिस घर म फूट पड़ज्या जणा बो कंय्यां बस्यो रेह सकै ह? अर ज सेतान सेतान कोई बेरी होबा लाग्यो जणा बिको राज कंय्यां बण्यो रेह्सी? अर ज म बालजबुल की मददऊँ ओपरी बलायानै भगाऊँ, जणा थाकाळा चेला बी बालजबुल की सक्‍तिऊँ भगाता होगा? जणा इ बात ताँई बेई थानै गळत साबित करसी। अर ज म परमेसर की पबितर आत्माऊँ ओपरी बलायानै भगाऊँ, जणा इऊँ आ साबित होवै ह क परमेसर को राज थारै सांकड़ैई ह। ज कोई मिनख कोई तगड़ा मिनख को घर लूटबो चावै ह जणा पेली बि घर का तगड़ा मिनखनै बांदसी बिकै पाछैई बि घरनै लूट सकै ह। जखो मेरै सागै कोनी बो मेरै खिलाप अर जखो मिनखानै मेरा चेला होबा ताँई भेळो कोनी करै बो बानै मेरूँ दूर लेज्यावै ह। इ ताँई म थानै खेऊँ हूँ मिनखा का मुंडाऊँ करेड़ी सगळी बुराई अर पाप माफ हो सकीं हीं, पण जखो पबितर आत्मा की बुराई करै ह बिनै माफी कोनी। अर ज कोई मिनख का बेटानै भलो-बुरो खेवै ह जणा बिनै परमेसर माफ कर सकै ह। पण जखो मिनख पबितर आत्मा क खिलाप क्युं खेवै ह जणा बिनै नइ तो इ जुग म अर नइ आबाळा जुग म माफी ह। “थे जाणो हो ज थानै फळ खाणो ह तो थानै फळ कोई दरख्त लगाणो पड़सी, क्युं क हर दरख्त क खाबाळा फळ कोनी लागै। अर दरख्त आपका फळाऊँ पिछाण्यो जावै ह। हे सपोलो! जद थेई बुरा हो जणा थारै मुंडाऊँ चोखी बाता कंय्यां बोलस्यो? क्युं क जखो मांयनै होसी बोई बारनै आसी। चोखो मिनख आपका चितऊँ चोखी बात काडै अर बुरो बुरीई चितै। पण न्यायहाळै दिन सगळा मिनखानै आपकी खेईड़ी बुरी बाता को लेखो देणो पड़सी। क्युं क तेरी खेईड़ी बाता की बजेऊँई तनै दोसी नहिस निरदोस साबित कर्यो ज्यासी।” सास्तरानै सीखाबाळा अर फरिसी ईसु कनै आया अर बे ईसुऊँ बोल्या, “ओ गरूजी थे म्हानै कोई ईस्बर नगरी की सेलाणी दिखाओ।” पण ईसु बाऊँ बोल्यो, “इ जुग की बुरी अर कुकरमी पिडी ईस्बर नगरी की सेलाणी माँगै ह। पण म थानै खेऊँ हूँ योना परमेसर की खेबाळा की बातानै छोडर कोई सेलाणी आ लोगानै कोनी दिखाई ज्यासी जंय्यां योना तीन दिना ताँई मछी क पेट म रिह्यो हो बंय्यांई मिनख को बेटो बी तीन दिना ताँई धरती तळै रेह्सी। जद न्याय होसी बि दिन निनवे नगरी का मिनख इ जुग का मिनखा क सागै खड़्या होसी अर आपै दोस लगासी क्युं क निनवे का मिनख योना को परचार सुणर पापऊँ तौबा कर लिआ हा। पण अठै जखो ह बो योनाऊँ बी बडो ह। सिबा की राणी न्यायहाळै दिन इ पिडी प दोस मंढसी क्युं क बा धरती का इ कूणाऊँ बि कूणा म सुलेमान कनै ज्ञान लेबा गई ही पण अठै जखो ह बो सुलेमानऊँ बी बोळो बडो ह। “जद कोई सूगली ओपरी बलाय मिनख मऊँ निकळै ह। जणा बा अराम ढुंढती उजाड़ म डोलै अर जद बिनै बठैबी अराम कोनी मिलै। जणा बा खेवै ह म मेरा पुराणीया घर म जिमैऊँ म आई हूँ पाछी चली जास्युं। अर बा पाछी आवै जणा बो बिनै भार्यो-झाड़्यो अर जच्यो-जचायो लाधै। जणा बा जार खुदऊँ बी सात बुरी ओपरी बलायानै आपकै सागै कर बिकै मांयनै बड़ जावै। अर बि आदमी की दसा पेलड़ीऊँ घणी बुरी होज्यावै। इ जुग का मिनखा की दसा बी अंय्यांई होसी।” जद ईसु भीड़ऊँ बतळार्यो हो जणा बठै बाकी माँ अर भाईड़ा आर बारनै खड़्या होगा। बे ईसुऊँ बातचित करबा ताँई बिनै उडिकबा लाग्या। जणा भीड़ मऊँ कोई मिनख ईसुनै बोल्यो, “थारी माँ अर भाईड़ा बारनै खड़्या हीं बे थारूँ बाताचिता करबो चावै ह।” ईसु बिकी इ बातनै सुणर बिनै बोल्या, “कूण मेरी माँ ह अर कूण मेरो भाई ह?” अर ईसु आपका चेला कानि हात कर बोल्यो, “देखो अ मेरी माँ अर भाईड़ा हीं। क्युं क जखा बी मिनख मेरा ईस्बर नगरी परम-पिता की इंछ्या गेल चालै ह बेई मेरा सागे भाई-भाण अर माँ ह।” जनाड़ैई ईसु आपका चेला क सागै दरिआव क किनारै जार बेठगो। जणा बाकै च्यारूमेर भीड़ भेळी होगी इ ताँई बे एक न्याव प चढगा। पण बा भीड़ किनारै पई खड़ी री। ईसु बानै मिसाल म कई बाता खई। बे बानै खया, “एक बर एक किसान बीज बोबानै गयो। क्युंक बीज गेला क सारै पड़्या जिऊँ चिड़कल्या बानै चूगलेगी। अर क्युंक कांकरा म पड़्या अर बानै चाए जत्ती माटी कोनी मिली जि बजेऊँ बे तावळाई निपज्यावै। पण सूरज उगताई तावड़ीऊँ बळगा क्युं क बे जड़ कोनी पकड़्या। अर क्युंक झाड़्या म जार पड़्या अर झाड़ी बाकै सागै बढर बानै दाब दिनी। अर क्युंक बीज उपळी माटी प पड़्या जिऊँ बे सो गुणा, साठ गुणा अर तीस गुणा फळ्या। जिकै कान ह बो बानै खोलल्यो।” चेला ईसुऊँ बुज्या, “थे लोगाऊँ मिसाल देरई बाता क्युं करो हो।” ईसु बाऊँ बोल्यो, “थानै तो ईस्बर नगरी राज का भेद को ज्ञान दिओ गयो ह पण बानै कोनी दिओ गयो। जिकनै ह बिनै ओर दिओ जासी, अर जिकै कनै कोनी बिऊँ जोक्यु बिकन ह बो बी ले लिओ जासी। म बानै मिसाल देर इ ताँई खेऊँ हूँ क्युं क म जोक्यु करूं हूँ बो बानै सुजै ह पण समळै कोनी अर जखो खेऊँ हूँ बे सुणै पण बिनै समजै कोनी। बाकै ताँई परमेसर की खेबाळा यसाया की बाता सई साबित होई: “थे सुणस्यो अर सुणताई रेहस्यो पण थारै समज म क्युंई कोनी आसी। थे देखता रेहस्यो पण थानै क्युंई कोनी सुजसी। क्युं क आ मिनखा को मन काठो होगो आनै कानाऊँ सुणबो बंद होगो आकी आँख्या क पटी बंदगी नहिस बाकी आँख्या देखती, अर बाका कान सुणता अर बाका मन समजता जिऊँ बे पापऊँ मन फेर'र मेरै कनै आता जिऊँ म बानै छुटकारो देतो। “पण थे भागहाळा हो, क्युं क थे देखो अर समजो हो। क्युं क म थानै सची खेऊँ हूँ, परमेसर की खेबाळा अर धरमी मिनख आ बातानै देखबो अर सुणबो चावा हा पण बे ना तो सुण सक्या अर नइ देख सक्या। “बीज हाळी मिसाल को भेद सुणो। गेला क बिचमै पड़्या बीज बा मिनखानै परगट करै, जखा सुणै ह क परमेसर मिनखा क मना म कंय्यां राज करै ह पण बिनै समजै कोनी बे जोक्यु सुण्या बिनै आर सेतान भूला देवै ह। अर जखा बीज कांकरा म पड़्या बे बा मिनखानै परगट करै जखा बचनानै राजी होर तावळासा मानै ह, पण बचन हिया क मांयनै कोनी भसावै जद परमेसर प बिस्वास करबा की बजेऊँ मिनख बाऊँ बुरो बरताव अर बानै सतावै जणा बे थोड़ाई दिना म बिस्वास करबो छोड देवै ह। अर जखा बीज झाड़्या क मांयनै पड़्या अ बा मिनखानै परगट करै जखा परमेसर का बचन सुणै तो हीं पण इ दुनियादारी की चिंत्या अर धन-दोलत को लालच परमेसर का बचनानै भूला देवै ह क परमेसर बाऊँ काँई चावै ह। जखा बीज उपळी माटी प पड़्या अ बा मिनखा परगट करै, जखा मेरा बचनानै सुणै ह अर बानै समजै अर बिकै गेल फळ ल्यावै ह। जिऊँ बे सो गुणा, साठ अर तीस गुणा फळै ह।” ईसु बानै एक ओर मिसाल दिनी, “ईस्बर नगरी को राज बी मिनख की जंय्यां ह जखो आपका खेत म चोखा बीज बोयो। पण जद मिनख सोर्या हा जणा बि आदमी को बेरी आर ग्युं क बिचमै खरप्तवार बोर चलेगो। अर जद ग्युं उग्यो अर बिकै बाळी आबा लागी जणा खरप्तवार बी उग्याई। जणा मजुरिया आपका मालिक कनै आर खेबा लाग्या, ‘थे तो खेत म चोखो बीज कोनी बोयो के जणा आ खरप्तवार कठैऊँ आई?’ बो मालिक बाऊँ बोल्यो, ‘ओ काम तो कोई बेरी को लागै।’ जणा मजुरिया बिऊँ बुज्या, ‘थे बोलो तो म्हें बि खरप्तवारनै उपाड़ फेका।’ बो बोल्यो, ‘अंय्यां मना करज्यो क्युं क थे खरप्तवार क सागै ग्युं बी उपाड़ देस्यो। जद ताँई फसल त्यार नइ होज्यावै आनै ग्युंकै सागैई बढबा द्‍यो, लावणी की टेम म मजुरियाऊँ खेस्युं क बे पेली खरप्तवारनै का'टर बाकी पुळी बणार बिनै बाळदे बिकै पाछै ग्युं की लावणी कर बिनै ओबरी म भेळो करो।’” ईसु बानै एकोर मिसाल सुणाई, “ईस्बर नगरी को राज सरस्यु का बीज की जंय्यां ह, जिनै कोई मिनख आपका खेत म बोयो। ओ सगळा बीजाऊँ छोटो होवै पण उगबा क पाछै सगळा साग-पात म सऊँ उचो बोजो होवै अर इकी डाळ्यां प अकास का पंछी घुरस्ळो घालै ह।” ईसु बानै एकोर बात मिसाल देर खई, “ईस्बर नगरी को राज खमिर की जंय्यां ह। एक लूगाई चिनोसोक खमिर लेर बिनै घणासारा आटा म मिलार म्हेलदि अर बि सगळा आटा को खमिर उठगो।” ईसु अ सगळी बाता लोगाऊँ मिसाल देर बोल्या करता हा बे भीड़नै बिना निती-कथा क क्युंई कोनी बोलता हा। अंय्यां बे इ ताँई करता हा क्युं क परमेसर की खेबाळा जखो बचन बोल्या हा बे पूरा हो, “म मेरो मुंडो मिसाल देबा ताँई खोलस्युं। अर इ सरस्टि की रचनाऊँ जखा भेद ओलामै हा बानै म सामै ल्यास्युं।” इकै पाछै ईसु बि भीड़नै बिदा कर घरा चलेगो। जणा बाका चेला बाऊँ बोल्या, “गरूजी म्हानै खरप्तवार बीज की मिसाल को मतबल समजाओ।” ईसु बानै बोल्यो, “जखो चोखा बीज बोया बो मिनख को बेटो ह। खेत इ जगतनै दिखावै ह अर चोखा बीज ह बे परमेसर का राज का टाबर हीं अर खरप्तवार सेतान की ओलाद ह। जखो खरप्तवार बोवै ह बो बेरी सेतान ह। लावणी को टेम इ दुनिया को अंत ह। लावणी करबाळा ईस्बर नगरी दुत हीं। अर जंय्यां खरप्तवारनै भेळी कर बाळ्यो गयो बंय्यांई इ दुनिया क आखरी म होसी। मिनख को बेटो आपका ईस्बर नगरी दुतानै अधिकार क सागै भेजसी बे बिका राज का सगळा मिनखानै भेळा करसी जखा दुसरा मिनखाऊँ पाप करवावै ह अर जखा परमेसर की इंछ्या कोनी मानै। बानै भेळा कर आग का कूंड म गेर दिओ ज्यासी जठै रोबो अर दांत पिसबो होसी। पण धरमी मिनख परम-पिता का राज म सूरज की जंय्यां चमकसी। जिकै कान ह बो बानै खोलल्यो। “ईस्बर नगरी को राज खेत म गाडेड़ा धन की जंय्यां ह। ओ एक मिनखनै लाध्यो पण बो बिनै ओज्यु बठैई लुखा दिओ। अर बो राजी होर जोक्यु बी बिकन हो बो बिनै बेचर बि खेतनै मोल ले लिओ। ईस्बर नगरी को राज बि जोहरी की जंय्यां ह जखो चोखा मोत्या की खोज म हो। अर जद बिनै एक किमती मोती मिल्यो जणा बो आपको सक्यु बेच बाचर बि मोतीनै मोल ले लिओ। “ईस्बर नगरी को राज अंय्यां ह जंय्यां क क्युंक मछवारा आपका जाळनै दरिआव म गेर्या जिमै सगळी भात की मछ्या फसगी। अर जद बो जाळ भरगो जणा बिनै किनारै प खींच लिआ। अर बेठर बा मऊँ चोखी-चोखी मछ्यानै तो छाबड़ा म भेळी करली अर जखी क्युंई काम की कोनी ही बानै फेक दि। इ दुनिया की अंत घड़ी बी अंय्यांई होसी ईस्बर नगरी दुत आसी अर बे धरम्यानै पापी मिनखाऊँ न्यारा करसी। अर पाप्यानै आग का कूंड म गेर दिओ ज्यासी जठै रोबो अर दांत पिसबो होसी।” ईसु बुज्यो, “थे आ बातानै समजो हो के?” बे बोल्या, “हाँ।” जणा ईसु बाऊँ खयो, “जत्ता बी सास्तरानै सीखाबाळा ज्ञानी परमेसर का राज का चेला बण्या हीं बे बि घर का मालिक की जंय्यां ह, जखो बक्साऊँ नई अर पुराणी चिजा निकाळै ह।” ईसु मिसाल खेबा क पाछै बठैऊँ चलेगो। आपकी नगरी नासरत म आर अरदास करबाळी झघा म परचार करबा लाग्यो। जणा बे ताजूब कर खेबा लाग्या, “इनै अंय्यां की बुदी अर चमत्कार करबाकी सक्‍ति कठैऊँ मिली। के ओ खाती को छोरो कोनी? के इकी माँ को नाम मरीयम अर इकै भाईड़ा को नाम याकूब, युसूफ, समोन अर यहूदा कोनी। इका सगळा भाई-भाणा आपणै बिच मई कोनी रेह्‍वै के? जणा इकै कनै आ बुदी अर चमत्कार करबा की सक्‍ति कठैऊँ आई?” इ ताँई बे ईसु को मान कोनी कर्या। ईसु बोल्यो, “परमेसर की खेबाळानै बिकी खुदकी भौम अर परवारनै छोडर सगळी झघा मान मिलै ह।” बाकै भेम की बजेऊँ ईसु बठै ओर ताजूब का काम कोनी कर्यो। जद राजा हेरोद गलिल को राजा हो जणा बो ईसु क बारां म सुण्यो। अर बो आपका दासाऊँ बोल्यो, “के ओ बो बतिस्मो देबाळो यहून्ना ह? ओ मरेड़ाऊँ ओज्यु जिंदो होगो दिखै। इ बजेऊँ बिकै मांयनै चमत्कारी सक्‍ति काम करै ह।” क्युं क हेरोद आपका भाई पिळीपुस क जिंदा होतासोता बिकी लूगाईऊँ ब्या कर लिओ हो इ ताँई यहून्ना हेरोदनै ओळमो दिओ। जणा हेरोदिआस क खया म आर बिनै कोठड़ी म गिरवा दिओ। अर बो यहून्नानै मारबो चावै हो, पण बो लोगाऊँ डरतो हो क्युं क बे यहून्नानै परमेसर की खेबाळो मानता हा। पण जद हेरोद राजा को जलम दिन आयो जणा हेरोदिआस की बेटी दरबार म नाचर राजा हेरोदनै बोळो राजी कर दिओ। अर बो बिऊँ सोगन खार बोल्यो, “माँग जोक्यु बी तू माँगसी बो म तनै देस्युँ।” अर बा आपकी माँ का खेबा म आर बोली, “मनै बतिस्मो देबाळा यहून्ना को सीर थाळी म धर दिओ जावै।” आ बात सुणर राजा बोळो दुखी होयो पण बो दियड़ी आपकी जबान अर म्हेमाना क सामै बोलेड़ी बात की बजेऊँ बिकी माँगनै पूरी करबा ताँई हुकम दे दिओ। बो आपका आदम्यानै काळ-कोठड़ी क मांयनै भेज्यो जिऊँ क बे यहून्ना का सीरनै का'टर ल्यावै। अर यहून्ना को सीर का'टर थाळी म धर ल्यायो गयो अर बि छोरीनै दिओ गयो अर बा छोरी आपकी माँनै लेज्यार दे दिनी। अर यहून्ना का चेला आर बाकी लासनै लेज्यार गाड दिआ। अर ईसु कनै जार ओ समचार दिओ। जद ईसुनै ओ समचार लाग्यो जणा बे न्याव म चढर उजाड़ म चलेग्या। जणा मिनख आपकी नगर्याऊँ निकळर बाकै गेल होलिआ। अर जद ईसु न्यावऊँ किनारै प उतर्या जणा बे भीड़नै सामै खड़ी देखी। बानै बि भीड़ प तरस आयो अर बठै जत्ता बी रोगला हा ईसु बानै निरोगो कर्या। अर जद दिन ढळगो जणा चेला ईसु कनै आर खेबा लाग्या, “आपा उजाड़ म हां अर बोळो मोड़ो बी होगो ह इ ताँई थे इ भीड़नै बिदा करो जिऊँ क अ कनै का गाँवा म जार खाबा ताँई मोल लेर खा सकीं।” पण ईसु बोल्यो, “आनै कठैई जाबा की जुर्त कोनी, थेई आनै खाबा ताँई द्‍यो।” बे खेबा लाग्या, “म्हारै कनै दो मछी अर पाच रोट्या क सिवाय क्युंई कोनी ह।” ईसु ओडायो, “बानै मेरै कनै ल्याओ।” अर बे भीड़ का मिनखानै ओडाया, “थे घास प बेठ ज्याओ।” बिकै पाछै बे बा पाच रोट्यानै अर दो मछ्यानै लेर ईस्बर नगरी क कानि देख्या अर परमेसरनै धनेवाद देर बा रोट्या का अर मछ्या का टुकड़ा कर आपका चेलानै देता गया अर चेला लोगानै देता गया। सगळा मिनख धा'पर खा लिआ। बिकै पाछै बी बे बचेड़ा टुकड़ाऊँ बारा चोल्या भर'र उठाया। बठै लूगाया अर टाबरानै छोडर खाबाळा म मोट्यार-मोट्यार की गिणती पाच झार ही। बा बाता क पाछै ईसु आपका चेलानै बोल्यो, “थे न्याव म बेठर दरिआव क परलै नाकै चालो म आ मिनखानै बिदा कर आऊँ हूँ।” अर बे मिनखानै बिदा कर डूँगर प अरदास करबा ताँई चलेग्या। बो मोड़ै ताँई एकलोई हो। अर बाका चेला न्याव म बेठर किनाराऊँ कोसा दूर चलेग्या अर न्याव लेहराऊँ झोला खाबा लागी। क्युं क सामै की भाळ ही। भागपाट्या ईसु पाणी प चालतो होयो बाकन गयो। चेला बानै पाणी प चालता देख्या जणा डरग्या अर आपसरी म खेबा लाग्या, “ओ तो भूत ह!” अर आ खेर बे सगळा डर क मारै चिलाटी घालबा लाग्या। ईसु तावळोसो बाऊँ बोल्यो, “हिमत राखो म हूँ! थे मना डरो।” पतरस बाकी इ बातानै सुणर बोल्यो, “परबु ज थे हो तो मनै बी इ पाणी प चालर थारै कनै आबा ताँई हुकम द्‍यो।” ईसु बिनै ओडायो, “आज्या।” अर पतरस न्यावऊँ उतर ईसु कानि चाल पड़्यो। पण जद बिको ध्यान लेहरा कानि गयो जणा बो डरगो अर डूबबा लाग्यो। जणा बो जोरऊँ बोल्यो, “परबु मनै बचाओ।” ईसु तावळासा हात बढार बिनै पकड़ लिआ अर बिऊँ बोल्या, “हे थोड़ो बिस्वास राखबाळा तू भेम क्युं कर्यो?” बिकै पाछै बे न्याव प आगा अर भाळ थमगी। अर न्याव म जत्ता बी मिनख हा बे सगळा बाकी जे-जैकार करता होया बानै खेबा लाग्या, “थे सचमई परमेसर का बेटा हो।” बे दरिआव पार कर गनेसरत नगरी का किनारा प पुग्या। जणा बठै का मिनख ईसुनै पिछाण्गा अर बाकै आबा की खबर आस-पास की झघा म फेला दिनी। जिऊँ लोग सगळा रोगलानै बठै ले आया। अर बे ईसुऊँ अरदास करै हा क बो बानै आपका गाबा की कोर क हात अड़ाबा दे अर जत्ता बी बिकै हात अड़ाया बे निरोगा होगा। यरूसलेमऊँ क्युंक फरिसी अर सास्तरानै सीखाबाळा आर ईसुऊँ बुज्या, “थारा चेला म्हारा बूडा बडका की रिती-रिवाजनै क्युं कोनी मानै। बे रोटी खाबाऊँ पेली आपणी रिती गेल हात क्युं कोनी धोवै?” ईसु बाऊँ बोल्यो, “थे थारा बडका का रिती-रिवाजनै मानर परमेसर का हुकमानै तोड़ द्‍यो हो। क्युं क परमेसर बोल्यो ह, ‘थे थारा माँ-बापा को मान करज्यो। अर ज कोई मिनख आपका माँ-बापा को मान कोनी करै बिनै मार देणो चाए।’ पण थे मिनखानै सीखाओ हो क, ‘ज थारा माँ-बाप थारूँ क्युं माँगै जणा बाऊँ खेवो क बा तो म परमेसरनै चढा दिनी ह।’ इ बात की बजेऊँ बिनै बिका माँ-बाप को मान करबा की जुर्त कोनी अंय्यां कर थे थारा रिती-रिवाजऊँ परमेसर का हुकमानै कोनी मानो। ओ ढोंग्यो थारा बारां म परमेसर की खेबाळो यसाया सई खयो ह, “अ मिनख होठाऊँ तो मेरो मान करै ह; पण आको हियो मेरूँ बोळो दूर ह। अ बेकार म मेरी भगती करै ह, लोगा का आदेसानै धरम की सीख बोलर सीखावै ह।” बिकै पाछै ईसु भीड़नै आपकै कनै बुलायो अर खेबा लाग्यो, “सुणो अर समजो। मिनख मुंडा म जोक्यु बी खावै ह बो बिनै सूगलो कोनी करै, पण बिका मुंडाऊँ निकळबाळा सबद बिनै सूगलो करै ह।” जणा चेला ईसु कनै आर खेबा लाग्या, “गरूजी थानै बेरो ह के फरिसी थारी बाताऊँ चिड़गा?” जणा ईसु बोल्यो, “जि बोजानै मेरो ईस्बर नगरी परम-पिता कोनी लगायो बो उपाड़्यो ज्यासी। बाकी बातई मना करो क्युं क बे आँदा मिनखा का नेता बण्या फिरै ह। अर ज आँदो आँदानै गेलो दिखावै जणा बे दोन्यु खाडा म जा पड़ै।” पतरस बोल्यो, “गरूजी म्हानै बि सूगलो करबाळी बात की मिसाल को मतबल समजाओ।” ईसु बोल्यो, “थे इब ताँई अणभोळ म पड़्या हो के? थे कोनी जाणो मुंडा म खाईड़ी चिजा हिया म कोनी जावै पण पेट क मांयनै जावै अर निकळ जावै ह। पण जखी बाता मिनखा का मुंडाऊँ बारनै निकळै ह बे बाता बाका हियाऊँ आवै ह अर बेई मिनखानै सूगलो करै ह। क्युं क हियाऊँ बुरा बिचार, हत्या, रंडीबाजी, कुकरम, चोरी, झूठी गुवाई अर बुराई निकळै ह। बिना हात धोया रोटी खाबो मिनखनै सूगलो कोनी करै पण अ बाताई मिनखा का हियानै सूगलो करै ह।” ईसु बठैऊँ चालर सूर अर सैदा गयो। बठै एक कनानी कूणबा की लूगाई ईसुनै हेलो देर बोली, “परबु दाऊद का बेटा, मेर प दया कर! मेरी छोरीनै ओपरी बलाय दिन घालरी ह।” पण ईसु बिऊँ क्युंई कोनी बोल्यो, जणा ईसु का चेला ईसु कनै आया अर अरदास कर खया, “आ लूगाई आपणै गेल-गेल कूकती आरी ह इनै भेजो।” जणा ईसु बि लूगाईऊँ बोल्यो, “मनै परमेसर खाली इजरायल का मिनखा ताँई भेज्यो ह। बे गुमेड़ी लल्ड्या की जंय्यां ह क्युं क बे परमेसर का राज को गेलो भूलगा।” जणा बा लूगाई ईसु क आगै गोडा टेक अर हात जो'ड़र खई, “ओ परबु मेरी मदद करो।” ईसु बिऊँ बोल्यो, “टाबरा की रोटी गंडक्ड़ा क आगै गेरबो चोखो कोनी।” जणा बा बोली, “आ तो सई बात ह परबु, पण मालिक की थाळीऊँ बचेड़ी झूठ गंडक्ड़ाई तो खावै ह।” ईसु बिकी इ बातनै सुणर बोल्यो, “हे लूगाई तू बोळो बिस्वास करै ह। इ ताँई जा जंय्यां तू चावै ह बंय्यांई तेरै सागै होवै।” अर बिकी छोरी जदकी जदई निरोगी होगी। ईसु बठैऊँ गलिल दरिआव क किनारै गयो अर डूँगरी प चढर बेठगो। अर मिनखा की भीड़ बिकन भेळी होती जारी ही। कोई तो आपका लंगड़ा लुलानै, कोई आँदानै, कोई गुँगा-बोळानै, अर कई भात-भात का रोगलानै बिकन ल्यार बिकै पगा म गेरर्या हा अर बो बा सगळा रोगलानै निरोगो करो हो। लंगड़ा-लुला चालै लाग्या, बैरा सुणबा लाग्या, गुँगा बोलबा लाग्या अर आँदा देखबा लाग्या। आ कामानै देखर बे सगळा मिनख ताजूब कर्या अर इजरायल का परमेसर की जे-जैकार करी। ईसु चेलानै कनै बुलार बानै बोल्यो, “मनै इ भीड़ प तरस आर्यो ह, क्युं क अ मिनख तीन दिनाऊँ मेरै सागै हीं अर आकै कनै खाबा ताँई बी क्युंई कोनी म आनै भूखा पेट बिदा कोनी करूं, क्युं क ज म आनै अंय्यां भेजस्युं जणा अ भूखा मरता चकर खार गिर पड़सी।” चेला बोल्या, “इ उजाड़ म अत्ता मिनखा को पेट भरबा ताँई रोटी कठैऊँ आसी?” ईसु बानै बुज्यो, “थारै कनै कत्ती रोट्या ह?” बे बोल्या, “सात रोटी अर क्युंक छोटी मछ्या ह।” जणा ईसु बा मिनखानै जमीन प तळै बेठबा ताँई हुकम दिओ। अर बा सात रोट्या अर मछ्यानै लेर परमेसर को धनेवाद कर्यो। अर बानै तोड़-तो'ड़र चेलानै देतो गयो अर चेला लोगानै परोसता गया। सगळा मिनख खार धापगा अर चेला रोट्याऊँ भरेड़ा सात चोल्या बठैऊँ उठाया। जदकी खाबाळा म लूगाया अर टाबरा क अलावा च्यार झार तो मोट्यार-मोट्यारई हा। ईसु बा मिनखानै बिदा करबा क पाछै न्याव म बेठर मगदन दिसावर चलेगो। फरिसी अर सदुकी ईसु कनै आया। क्युं क बे ईसुनै फसाबो चावा हा इ ताँई बे ईसुनै बोल्या, “थानै परमेसर भेज्यो ह इ बातनै साबित करबा ताँई म्हानै कोई ईस्बर नगरी की सेलाणी दिखाओ।” ईसु बाऊँ बोल्यो, “जद सूरज ढळज्यावै ह जणा थे अकासनै लाल देखर खेवो हो मोसम चोखो रेह्सी। अर दिन उगताई जद थे अकासनै काळो-पिळो देखो जणा बोलो हो आज तो बरसात आसी। थे अकासनै देखर मोसम को हाल तो बताद्‍यो हो पण आ दिना म परमेसर काँई करर्यो ह बिनै कोनी समज सको। इ जुग की बुरी अर कुकरमी पिडी ईस्बर नगरी की सेलाणी माँगै ह। पण योना की बातानै छोडर कोईबी सेलाणी कोनी दिखाई ज्यासी।” ईसु का चेला दरिआव क परलै नाकै चलेग्या पण बे आपकै सागै रोटी लेबो भूलगा। जणा ईसु बानै चेतार ओडायो, “थे फरिसी अर सदुकीया का खमिरऊँ बचर रेहज्यो।” पण बे आपसरी म सोचबा लाग्या क, “ईसु आ बात इ ताँई बोलै ह क्युं क आपा रोटी कोनी ल्याया।” ईसु बाकी इ बातनै भापगो अर बाऊँ बोल्यो, “थोड़ो बिस्वास राखबाळो थे आ क्युं सोचो हो क म्हें रोट्या लेबो भूलगा? थारै हाल बी क्युंई पलै कोनी पड़ी के? थानै याद कोनी के, जद म पाच झार मिनखानै पाच रोट्याऊँ धपायो हो जणा बचेड़ी रोट्या का टुकड़ा का थे कत्ता चोल्या भर'र उठाया हा? अर जद म च्यार झार मिनखानै सात रोट्याऊँ धपायो हो जणा बचेड़ी रोट्या का टुकड़ा का थे कत्ता चोल्या भर'र उठाया हा? थारै क्युंई पलै कोनी पड़ै, म थानै रोट्या ताँई कोनी पण थानै फरिसीया अर सदुकीया की बातानै नइ मानबा ताँई बोलुँ हूँ। क्युं क आकी बाता खमिर की जंय्यां काम करै ह।” जणा जार बाकै पलै पड़ी क ईसु बानै रोट्या ताँई कोनी खियो पण फरिसीया अर सदुकीया की गळत सीखऊँ बचबा ताँई ओडायो ह। ईसु जद कैसरिया फलिपी नगरी म आयो जणा बो चेलानै बुजबा लाग्यो क, “लोग मेरा बारां म काँई खेवै ह क म कूण हूँ?” बे बोल्या, “कई तो थानै बतिस्मो देबाळो यहून्ना, कई एलिआ, कई यरमिआ अर कई परमेसर की खेबाळा मऊँ एक खेवै ह।” जणा ईसु बानै बोल्यो, “पण थे मनै काँई खेवो हो?” समोन पतरस बोल्यो, “थे सऊँ सक्‍तिसाली अर जीवता परमेसर का बेटा मसी हो।” ईसु अंय्यां सुणर बिनै बोल्यो, “ओ समोन योना का बेटा तू भागहाळो ह क्युं क आ बात तू कोई मिनख की सुणर कोनी बोली पण तेर प ईस्बर नगरी म रेह्बाळो मेरो परम-पिता परगट करी ह। म तेरूँ आबी बोलुँ हूँ तू पतरस ह जिको मतबल ढाड होवै ह। तू निम की जंय्यां होसी जिपै म मेरी बिस्वासी मंडळी बणास्युं अर इपै पताळ को जोर कोनी चालसी। म तनै परमेसर का राज की ताळ्या दि ह, जिऊँ जोक्यु तू धरती प बंद करसी बिनै परमेसर ईस्बर नगरी म बंद कर देसी अर जोक्यु तू धरती प खोलसी बिनै परमेसर ईस्बर नगरी म बी खोल देसी।” आ बाता क पाछै ईसु आपका चेलानै चेतार ओडायो क थे कोईनैई मना खिज्यो क म मसी हूँ। बि टेमई ईसु चेलानै बताबा लाग्यो क, “मनै यरूसलेम जाणो पड़सी अर बठै परधान याजक, यहूदि नेता अर सास्तरानै सीखाबाळा मनै बोळो दुख देसी, अर मार गेरसी पण म तीसरा दिन ओज्यु जिंदो हो जास्युं।” आ बात सुणर पतरस बानै एकला म लेगो अर दकालर बोल्यो, “परबु थारै सागै अंय्यां कदैई नइ होवै।” ईसु पतरस कानि मुड़र बोल्यो, “सेतान! मेरै कनैऊँ चल्योजा, तू मनै अंय्यां करबाऊँ रोकबो चावै ह, क्युं क तू परमेसर की जंय्यां कोनी सोचै पण मिनखा की जंय्यां सोचै ह।” ईसु चेलानै खेबा लाग्यो, “जखो बी मेरै गेल होबो चावै ह बो खुदनै तज'र, आपकी सुळी उठार मेरै गेल होले। जखो बी खुदका पिराण बचाबो चावै ह बो बिनै खोसी अर जखो बी मेर ताँई खुदका पिराण तजसी, बो आपका पिराण बचासी। अर ज कोई मिनख आपका पिराणा की हानी उठार सगळा जगतनै जीत ले जणा बिनै काँई फाईदो? कोई चिज क बदला म मिनख खुदका पिराण दे सकै ह के? जद मिनख को बेटो ईस्बर नगरी दुता क सागै परम-पिता की मेमा म आसी जणा बो मिनखानै बाका कामा गेल फळ देसी।” ईसु बाऊँ बोल्यो, “म थानै सची खेऊँ हूँ अठै खड़्या मिनखा मऊँ कई तो अंय्यां का हीं क बे जद ताँई मिनख का बेटानै बिका राज म आतो नइ देखलीं जद ताँई बे कोनी मरै।” छ दिना क पाछै ईसु आपका चेला मऊँ पतरस, याकूब अर बिका भाई यहून्नानै सागै लेर डूँगरी प गयो। बठै बा चेला क सामै ईसु को रूप बदलगो। बिको मुंडो बी सूरज की जंय्यां भळका मारबा लाग्यो अर गाबा चमकबा लाग्या। अर बठै बाकै सामै एलिआ अर मूसा परगट होया, बे ईसुऊँ बतळावै हा। पतरस बानै देखर ईसुऊँ बोल्यो, “ओ परबु आ कत्ती चोखी बात ह क आपा अठै हां! ज थे चाओ तो म अठै तीन पंडाळ बणा द्‍युँ एक थारै ताँई एक मूसा ताँई अर एक एलिआ ताँई।” पतरस अंय्यां बोलर्योई हो क एक भळकतो बादळ आर बानै ढक लिओ अर बि बादळ मऊँ हेलो आयो, “ओ मेरो लाडलो बेटो ह। जिऊँ म बोळो राजी हूँ थे इकी मानो।” अर चेला ओ हेलो सुणर बोळा डरग्या अर उंदा मुंडै गिरगा। जणा ईसु बाकै हात अड़ार ओडायो, “खड़्या होवो डरो मना।” अर बे उठर देख्या जणा बानै बठै ईसुनै छोडर कोईबी कोनी दिख्यो। अर जद बे डूँगरीऊँ तळै आर्या हा जणा ईसु बा तीन्यानै चेतार हुकम दिओ, “जोक्यु बी थे देख्या हो बिकै बारां म कोईनैई क्युंई मना खिज्यो जद ताँई क मिनख को बेटो मरेड़ा मऊँ ओज्यु जीवतो नइ होज्या।” जणा चेला बिनै बुज्या, “यहूदि धरमसास्तरी क्याले बोलै ह क, ‘एलिआ को पेल्या आबो पक्को ह?’” ईसु बाऊँ बोल्यो, “आ सची ह क्युं क परमेसर कोल बचन कर्यो ह क मसी क आबा ताँई लोगा का हियानै त्यार करबा एलिआ आसी। पण म थारूँ खेऊँ हूँ एलिआ तो आरई गयो। पण आपणा नेता बिनै देखर बी कोनी पिछाण्या अर जंय्यां बे बिकै सागै करबो चावा हा बंय्यांई बिकै सागै कर्यो। अर बे मिनख का बेटा क सागै बी बंय्यांई करसी।” पण चेला समज्या क, “ओ आपानै बतिस्मो देबाळा यहून्ना क बारां म बोलर्यो ह।” जद ईसु भीड़ कनै आयो जणा बठै एक मिनख बिकन आयो अर धोक खाई। अर बोल्यो, “हे परबु थे माखाळा छोरा प दया करो! बिनै जद बी मिरगी आवै ह जणा बो बोळो तड़फै ह अर बो आग अर पाणी म गिर जावै ह। म बिनै थारा चेला कनै ल्याओ हो पण बे बिनै निरोगो कोनी कर सक्या।” ईसु बिकी बात सुणर बोल्यो, “अरै भेम करबाळो अर कुटिचर मिनखो, म कद ताँई थारै सागै रेहस्युं? अर थानै भोगस्युं? बि छोरानै मेरै कनै ल्याओ।” ईसु बि ओपरी बलायनै बि छोरा मऊँ निकळबा ताँई दकाल्यो अर बा बलाय बिमैऊँ निकळगी अर बो छोरो बि घड़ीई निरोगो होगो। अर जद ईसु एकलो हो जणा चेला बिनै बुज्या, “म्हें बि बलायनै क्युं कोनी काड सक्या?” ईसु बाऊँ बोल्यो, “थारै म बिस्वास की कमी ही। म थारूँ सची खेऊँ हूँ ज थारै म राई क दाणो जत्तो बी बिस्वास होसी अर थे इ डूँगरऊँ बोलस्यो अठैऊँ हटर बठै चल्योजा जणा बो चल्यो ज्यासी। थारै ताँई क्युंई बी अणहोतो कोनी।” ईसु आपका चेला क सागै गलिल म गयो अर बानै खयो, “मिनख को बेटो मिनखा क हाता म सूप्यो जाबाळो ह। बे बिनै मार गेरसी पण परमेसर तीसरा दिन बिनै ओज्यु जिंदो कर देसी।” चेला आ बात सुणर दुखी होया। जद बे कफरनूम म आया जणा मनदर को कर लेबाळा, पतरसनै बुज्यो, “थारो गरूजी मनदर को कर देवै ह के?” पतरस बोल्यो, “हाँ देवै ह।” अर जद पतरस घरा आयो जणा बिकै कर हाळी बात चलाबाऊँ पेलीई ईसु बिनै बोल्यो, “ओ समोन तू काँई सोचै ह? इ धरती का राजा किऊँ-किऊँ लगान लेवै ह? आपका बेटाऊँ नहिस पराया मिनखाऊँ।” पतरस बोल्यो, “परायाऊँ लेवै ह।” अंय्यां सुणर ईसु बोल्यो, “जणा तो बेटा कर कोनी देवीं। पण आपा आको अपमान कोनी करां इ ताँई दरिआव क किनारै काँटो गेर अर जखी पेली मछी हात आवै बिको मुंडो पा'ड़र देखजे तनै बिकै मुंडा म एक सीक्को मिलसी। बिनै तेरै अर मेरै ताँई कर म दे दिजे।” बि टेमई चेला ईसु कनै आर खया, “जद परमेसर थानै राजा बणासी बि टेम म्हारै मऊँ सऊँ बडो कूण होसी?” जणा ईसु एक टाबरियानै कनै बुलार म्हारै बिचमै खड़्यो कर्यो। अर बोल्यो, “म थारूँ सची खेऊँ हूँ ज थे थारी सोचनै बदलर इ नान्या की जंय्यां कोनी बणो जणा ताँई थे परमेसर का राज म कोनी बड़ सकोगा। इ ताँई जखो बी इ नान्या की जंय्यां नरमाईऊँ जीवन जीवै ह बोई ईस्बर नगरी राज म सऊँ बडो होसी। अर जखो इ टाबर की जंय्यां का टाबरानै मेरी बजेऊँ अपणावै ह बो परमेसर की नजर्या म मनै अपणावै ह। “पण मेर प बिस्वास करबाळानै पाप म गेरबा को ज कोई कारण बणै ह। जणा बि ताँई चोखो ह क बिकै नाड़ म घरट घालर समदर क मांयनै गेर दिओ जावै। हाय ह जगत का मिनखा प जखा मेर प बिस्वास करबाळा ताँई आखळी बणै ह। आतो हो कोनी सकै क मेर प बिस्वास करबाळा मिनखानै बिस्वास म कमजोर करबाळा मिनख नइ मिलै। पण अंय्यां करबाळा प हाय पड़सी। इ ताँई ज तेरो हात नहिस पग तनै पाप म गेरै जणा बानै काट फेक। क्युं क हात-पग होतासोता बी कदैई नइ बुत्तबाळी आग म बळबाऊँ तो लुलो-लंगड़ो होर जीवन म बड़बो चोखो ह। ज तेरी आँख तनै पाप म गेरै जणा बिनै फोड़ दे, क्युं क दो आँख्या होतासोता नरक की आग म पड़बाऊँ तो काणो होर जीवन म बड़बो चोखो ह। “सुणो थे मेरो खयो मानबाळानै निचो मना जाणो क्युं क ईस्बर नगरी दुत थारो लेखो-जोखो मेरा परम-पितानै देवै ह। म थानै बुजूँ हूँ ज खिकन सो लल्डी हो अर बामैऊँ एक लल्डी गुमज्या जणा बो बा निन्याणमनै डूँगर म छोडर बि लल्डीनै ढुंढबा कोनी ज्यासी के? बो पक्कोई ज्यासी। म थारूँ सची खेऊँ हूँ जद बा लल्डी बिनै लाध्यावै जणा बो बा निन्याणमऊँ बेत्ती बि लाधेड़ी लल्डीऊँ राजी होसी। अंय्यांई थारो परम-पिता जखो ईस्बर नगरी म ह। बो बी कोनी चावै क आ अणभोळ मिनखा मऊँ एक बी नास होवै। “ज तेरो बिस्वासी भाई तेरै सागै बुरो करै जणा तू बिनै एकला म लेज्यार बिनै बिकी गळती बता, अर जद बो थारी बात सुणर बिनै मानले जणा तू बिनै नास होबाऊँ बचा लिओ ह। पण ज बो तेरी बात कोनी मानै जणा तू एक नहिस दो जणानै सागै लेर बिकन जा जिऊँ सास्तर म मंड्या गेल दो नहिस बिऊँ बेत्ती गुवा की गुवाईऊँ बिपै आरोप सिद होज्या। अर ज बो बाकी बात बी कोनी मानै जणा बिस्वासी मंडळी का मिनखानै बिकै बारां म बता। अर बो ज बिस्वासी मंडळी का मिनखा की बात बी कोनी मानै तो थे बिकै सागै बंय्यां को बरताव करो जंय्यां की चुंगी लेबाळा अर परमेसरनै नइ ध्यारबाळा क सागै कर्यो जावै ह। म थानै सची खेऊँ हूँ जोक्यु तू धरती प बंद करसी बिनै परमेसर ईस्बर नगरी म बंद कर देसी अर जोक्यु तू धरती प खोलसी बिनै परमेसर ईस्बर नगरी म बी खोल देसी। अर म थारूँ सची खेऊँ हूँ ज दो मिनख इ धरती प एक मन होर मेरा परम-पिताऊँ जखो ईस्बर नगरी म ह बिऊँ जोक्यु माँगसी जणा बो देसी। क्युं क जठै दो नहिस तीन मेरै नामनै लेबा ताँई भेळा होसी जणा म बठै बाकै सागै होस्युं।” पतरस ईसु कनै जार बाऊँ बुजबा लाग्यो, “ओ परबु, ज मेरो पाड़ोसी भाईड़ो मेरो बुरो करै जणा म बिनै कत्ती बार माफ करूं? म बिनै सात बार माफ करूं के?” ईसु बिनै खयो, “सात बारई नइ, पण सात का सत्तर गुणा बार माफ करजे। ईस्बर नगरी का राज की बराबरी बि राजा क सागै करी जा सकै जखो आपका दासाऊँ लेखो-जोखो लेबा की सोची। अर जद बो बा दासाऊँ लेखो-जोखो लेर्यो हो जणा एक मिनख बिकै सामै ल्याओ गयो जिकै बो दस हझार चाँदी का सीक्का माँगतो हो। पण बि मिनख क कनै राजानै चुकाबा ताँई कोडोई कोनी हो, इ ताँई बो राजा सिपाईड़ानै हुकम दिओ, ‘इ मिनखनै इकी लूगाई अर टाबर-टिकरा क सागै बेचर मेरो हिसाब पूरो करद्‍यो।’ आ सुणर बो मिनख राजा क पगा म पड़र अरदास कर खेबा लाग्यो, ‘हे मेरा मालिक थे थ्यावस राखो म थारी पाई-पाई चुका देस्युँ।’ राजानै बिपै तरस आयो इ ताँई बे बिनै छोड दिओ। अर बिको करजो बी माफ कर दिओ। पण जद बो मिनख बठैऊँ जार्यो हो जणा आपका सागैहाळा एक दासऊँ मिल्यो जिकै बो सो दिनार माँग्या करतो हो, बो बिनै पकड़र खयो, ‘मेरा रिपीआ चुका।’ जणा बो दास बिकै पगा म पड़र बोल्यो, ‘थे थ्यावस राख्यो म थारी पाई-पाई चुका देस्युँ।’ पण बो बिकी एक बी कोनी सुणी अर बिनै लेज्यार काळ-कोठड़ी म गेर दिओ। अर बिऊँ खयो, ‘जद ताँई तू मेरी पाई-पाई नइ चुका दे अठैई सिड़सी।’ बिनै अंय्यां करता देख दुसरा दास बोळा दुखी होया अर बठै जोक्यु बी होयो हो बिकै बारां म राजानै खे सुणाई। जणा राजा बि पेलड़ा दासनै आपकै कनै बुलार बिऊँ खयो, ‘हे कुटिचर मिनख जद तू मेरूँ अरदास करी जणा म तनै अर तेरो सगळो करजो माफ कर दिओ हो। इ ताँई जंय्यां म तेर प दया करी ही बंय्यांई तनै बी तेरा सागैहाळा दास प दया करबो चाए हो।’ अर बो राजा झाळ्या म भर'र बि मिनखनै सिपाईड़ा क हाता सूप दिओ अर खयो, ‘जद ताँई ओ पाई-पाई नइ चुका दे इनै केद राखो।’ इ ताँई ज थे बी थारा पाड़ोसी भाईड़ानै मनऊँ माफ कोनी करस्यो जणा मेरो परम-पिता जखो ईस्बर नगरी म रेह्‍वै ह बो बी थारै सागै बंय्यांई करसी।” ईसु अ बाता खेर गलिलऊँ चलेग्या अर यरदन नदि क पार यहूदि भौम म आगा। जणा बोळीसारी भीड़ बाकै गेल होलिनी, अर बे रोगलानै निरोगा कर्या। जणा फरिसी ईसुनै बिचासबा ताँई बाऊँ बुज्या क, “नेम-कायदो कोई मिनखनै कोई बी बजेऊँ तलाकनामो देबा ताँई खेवै ह के?” ईसु बानै बोल्यो, “थे ओ कोनी बाच्या के? बानै बणाबाळो सरूआतऊँई बानै नर अर नारी कर बणायो ह। जणाई तो मिनख आपका माँ-बापऊँ न्यारो होर बी आपकी लूगाई क सागै रेह्‍वै ह। अर बे एक जीव होवै ह। जणा बे इब दो कोनी, पण एक जीव ह। इ ताँई जिनै परमेसर जोड़्यो ह, बिनै मिनख न्यारो नइ करै।” बे ईसुनै बोल्या, “जणा मूसा क्याले अंय्यां हुकम दिओ ह, क तलाकनामो देर बिनै छोड द्‍यो।” ईसु बानै बोल्यो, “मूसा मिनखा का मन की कल्डाईनै देखता बाकी लूगाईनै छोडबा ताँई खयो हो, पण सरूआत म अंय्यां कोनी हो। अर म थानै खेऊँ हूँ ज कोई लूगाई कुकरमी कोनी अर बिको मोट्यार बिनै छोडर दुसरीनै ब्याले ह जणा बो कुकरम करै ह।” आ बात सुणर चेला ईसुऊँ बोल्या, “ज आ बात साची ह, जणा चोखो तो ओ ह क मोट्यार ब्या नइ करै।” ईसु बानै बोल्यो, “हर कोई इ सीख प कोनी चाल सकै, पण बेई मिनख चाल सकै जखानै परमेसर अंय्यां करबा की सक्‍ति दिनी ह। क्युं क कई तो अंय्यां का हीं जखा माँ का पेटऊँ नामरद होवीं हीं, अर कई अंय्यां का हीं जिनै लोगई नामरद बणा देवीं हीं। अर कई बे हीं जखा ईस्बर नगरी राज ताँई खुदई ब्या कोनी करै। जखो बी आ बचनानै लेबो चावै ह बो लेले।” बि टेमई मिनख आप-आपका टाबरानै ईसु कनै लेर आया जिऊँ बे बाका माथा प हात धर'र आसिरबाद देर अरदास करै पण चेला बानै दकाल्या। पण ईसु ओडायो, “टाबरानै आबा द्‍यो आनै मना मत करो क्युं क ईस्बर नगरी को राज अंय्यां का कोई ह।” अर बे टाबरा क माथा प हात धर'र बठैऊँ चलेग्या। एक मिनख ईसु कनै आर बोल्यो, “हे गरूजी अजर-अमर जीवन पाबा ताँई म कूणसो भलो काम करूं?” ईसु बिऊँ बोल्यो, “भलो कूण ह, इकै बारां म मेरूँ क्युं बुजै ह? पण भलो तो एकई ह अर ज तू अजर-अमर को जीवन चावै ह तो परमेसर का हुकमानै मान।” बो बुज्यो, “कूणसा हुकम?” ईसु बोल्यो, “हत्या मना करजे, कुकरम मना करजे, चोरी मना करजे, झूठी गुवाई मना दिजे, माँ-बाप को मान करजे अर जंय्यां तू खुदऊँ परेम करै ह बंय्यांई तेरा पड़ोसीऊँ परेम करजे।” बो मोट्यार बोल्यो, “म तो आ सगळी बातानै मानू हूँ इब मेर म कूणसी कमी ह?” ईसु बोल्यो, “ज तू सिद होबो चावै ह जणा जार तेरी जमीन-जायजादा बेचर गरीबा म बाट दे इकै साटा को धन तनै ईस्बर नगरी म मिलज्यासी अर आर मेरै गेल होले।” अंय्यां सुणर बिको मुंडो उतरगो अर बो दुखी होर बठैऊँ चलेगो। क्युं क बिकन अणाप-सणाप जायजाद ही। जणा ईसु चेलानै खेबा लाग्यो, “म थानै सची-सची खेऊँ हूँ, क पिसाळा मिनख को ईस्बर नगरी का राज म जाबो बोळो ओखो ह। पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।” अंय्यां सुणर चेला ताजूब करता होया बोल्या, “जणा कूण बचायो ज्यासी?” ईसु बाकै कानि देखर बोल्यो, “आ मिनखाऊँ अणहोती बात ह, पण परमेसर सक्यु कर सकै ह।” पतरस इ बातनै सुणर बोल्यो, “म्हें सक्यु तज'र तेरै गेल होलिआ हां म्हानै काँई मिलसी?” ईसु बानै खयो, “म थानै सची-सची खेऊँ हूँ, नया जुग म जद मिनख को बेटो मेमाभर्या सिंघासन प बेठसी जणा थे बी जखा मेरै गेल होलिआ हो बारा सिंघासना प बेठर इजरायल का बारा गोता को न्याय करस्यो। अर जखो बी मेरै ताँई आपका घरबार, सागे भाई-भाणा, माँ-बापानै, टाबरानै अर जमीन-जायजादनै तज्यो ह बिनै सो गुणा मिलसी। अर बो अजर-अमर जीवन जिसी। पण बोळा हीं जखा आगै हीं बे पिछै होसी अर जखा पिछै हीं बे आगै होसी। “ईस्बर नगरी को राज एक जमीदार की जंय्यां ह। बो एक दिन सुआरै उठर आपका अँगूरा का बाग म काम कराबा ताँई मजुरियानै ढुंढबा निकळ्यो। बो मजुरानै दिन की एक दिनार म पुक्‍तो कर काम करबा ताँई आपका अँगूरा का बाग म भेज दिओ। नो बजैसीक बो जमीदार ओज्यु आपका घराऊँ निकळ्यो, अर बिनै बजार म क्युंक ठाला-भुला मिनख मिल्या। अर बानै ओडायो, ‘थे माखाळा अँगूरा का बाग म जार काम प लागज्याओ म थानै बाजीब मजुरी देस्युँ।’ दोपारासिक अर तीनेक बजैसीक बो ओज्यु बजार गयो। अर बिनै ओर मजुर मिल्या बानै बी बो बंय्यांई खयो। अर बो जमीदार पाचेक बजैसीक ओज्यु आपका घराऊँ निकळ्यो अर बिनै बजार म क्युंक मिनख अठिनै-बठिनै डोलता-फिरता मिल्या। बो बानै बुज्यो, ‘थे दिनभर ठाला-भुला क्याले हांडर्या हो?’ बे बोल्या, ‘म्हानै कोई मजुरी पई कोनी राख्यो।’ बो जमीदार बोल्यो, ‘थे माखाळा अँगूरा का बाग म जार काम प लागज्याओ।’ अर संज्या क अँगूरा का बाग को मालिक आर मुनिमनै बोल्यो, ‘मजुरियानै बुलार बाको हिसाब कर दे, सुण जखा सऊँ आखरी म आया हा बानै सऊँ पेली दिजे अर जखा पेली आया बानै सऊँ आखरी म दिजे।’ जणा बो बा मजुरियानै जखा पाचेक बजैसीक आया हा बानै एक-एक दिनार मजुरी दिनी। जणा सऊँ पेली काम प लागबाळा मजुरिया आ सोचर आया क, ‘म्हानै तो आऊँ बेत्ती मिलसी’ पण बानै बी एक-एक दिनार मजुरी मिली। अर बे सीक्का तो ले लिआ पण जमीदार प बड़बड़ाबा लाग्या। अर खेबा लाग्या, ‘म्हें तो दिनभर तपती तावड़ी म काम कर्या अर बे मजुर तो एक घंटाई काम कर्या। अर थे म्हानै बाकै बराबरई मजुरी दिनी।’ जणा बो जमीदार बामैऊँ एक मजुरियानै खयो, ‘म तेरै सागै काँई बुरो कर्यो हूँ। जद म तनै काम प राख्यो हो जणा तनै मजुरी म एक दिनार म पुक्‍तो कोनी कर्यो हो के? जखो थारो बणै ह बिनै लेज्या, अर म बानै बी जखा थारै पाछै आर काम कर्या हा थारा बराबर देबो चाऊँ हूँ। मेरा धन क सागै म क्युं बी करूं इको हक मनै कोनी के? म चोखो मिनख हूँ इ ताँई तू जळै ह के?’ अंय्यांई जखा पिछै हीं बे आगै होसी अर जखा आगै हीं बे पिछै होसी।” ईसु आपका बारा चेला क सागै यरूसलेम जार्यो हो जणा बो बानै एक नाकै लेगो अर चालतो-चालतो खेबा लाग्यो, “सुणो आपा यरूसलेम जार्यां हां बठै मिनख को बेटो धोकाऊँ परधान याजका अर धरमसास्तरी क हाता सूप्यो ज्यासी। बे बिनै मोत की सजा सुणार, परमेसरनै नइ ध्यारबाळा मिनखा क हाता म सूप देसी अर बे बिको तमासो बणासी अर बिकै तड़ा मारसी। अर सुळी प चढासी। पण बो तीसरा दिन ओज्यु जिंदो होज्यासी।” बि टेमई जब्दि का बेटा की माँ आपका बेटानै लेर ईसु कनै आई। अर धोक खार बोली, “म थारूँ क्युं माँगबो चाऊँ हूँ।” जणा ईसु बिनै बुज्यो, “तू काँई चावै ह?” बा बोली, “थे मनै बचन द्‍यो, थे थारा राज म मेरा आ दोन्यु बेटा म एकनै थारा दाया अर दुसरानै बाया हात बिठास्यो।” ईसु बोल्यो, “थे कोनी जाणो थे काँई माँगो हो? म जखी पिड़ा भोगबाळो हूँ, थे बिनै भोग सको हो के?” बे बोल्या, “हाँ भोग सकां हां।” ईसु खयो, “थे पक्काई भोगस्यो पण मेरै दाया-बाया बिठाबा को हक म कोनी दे सकूँ। मेरै दाया-बाया तो बेई बेठसी जिनै मेरो परम-पिता बिठासी।” जणा दसु चेला आ बात सुणर बा दोन्यु भाईड़ा प लाल-ताता होगा। जणा ईसु बानै कनै बुलार खेयो, “थे जाणो हो परमेसरनै नइ ध्यारबाळा मिनखा का परधान आपका निचला प हुकम चलार आ दिखावै ह क बे राजाऊँ बेसी हीं। पण थे अंय्यां मना करज्यो। ज थारै म कोई बडो होबो चावै बो सगळा को दास बणै। अर थारै म जखो बी सऊँ पेलो होबो चावै बो थारो दास बणै। थे मिनख का बेटा की जंय्यां बणो जखो सेवा-पाणी कराबा ताँई कोनी आयो। पण सेवा-पाणी करबा अर बोळासारा मिनखानै छुटाबा ताँई आपका पिराण देबा आयो ह।” जद बे यरियो नगरीऊँ जार्या हा जणा बोळीसारी भीड़ बाकै गेल होलिनी। बठैई गेला म दो आँदा मिनख बेठ्या हा। अर जद बे सुण्या क ईसु अठैऊँ जार्यो ह। जणा बे जोरऊँ हेलो मार्यो, “परबु! दाऊद का बेटा म्हारै प दया करजे!” बानै अंय्यां बोलतो देखर भीड़ बानै दकालर बोली, “चुपचाला रेह्ओ।” पण बे ओर बी जोरऊँ हेलो देबा लाग्या, “परबु! दाऊद का बेटा म्हारै प दया कर!” जणा ईसु रूक'र बानै बुलायो अर बाऊँ बोल्यो, “थे काँई चाओ हो, म थारै ताँई करूं?” बे बोल्या, “परबु म्हें देखबो चावां हां।” ईसुनै बापै तरस आयो अर बे बाकी आँख्या क हात अड़ायो अर बे जदकी जदई देखबा लाग्या। अर ईसु क गेल होलिआ। जद ईसु अर बाकाळा चेला यरूसलेम क सांकड़ै जेतून डूँगरी की ढळान प बेतफगे अर बेतनिया क कनै आया। जणा ईसु आपका चेला मऊँ दो जणानै अंय्यां बोलर भेज्यो, “सामला गाँव म जाओ। थानै बि गाँव म एक गधेड़ी अर बिको बच्यो बांदेड़ो मिलसी बानै खोलर मेरै कनै ल्याओ। अर थानै कोई बुजै थे ओ काँई करो हो? जणा बिनै बोलज्यो, परबुनै इकी जुर्त ह जणा बो थारै सागै बानै भेज देसी।” ओ इ ताँई होयो ह, क्युं क परमेसर की खेबाळा का बचन पूरा हो: सिओन की छोरीऊँ खेओ क बिको राजा बिकन आर्यो ह; बो खुदनै छोटो कर्यो ह, हाँ बो गधेड़ी का बच्या प बेठ्यो ह। बिकै पाछै बे चेला गया अर जंय्यां ईसु बानै ओडायो हो बंय्यांई कर्यो। अर बे बि गधेड़ी अर बिका बच्यानै ले आया अर बापै बेठबा ताँई बाकै उपर गाबा गेर्या जणा ईसु गधेड़ी का बच्या प बेठगो। बोळा मिनख गेला म आपका गाबा बिछा दिआ। अर कई दरख्ताऊँ डाळ्यां तोड़-तो'ड़र गेला म बिछा दिनी। अर जखा मिनख बाकै आगै-पिछै चालर्या हा बे जोर-जोरऊँ खेर्या हा; “दाऊद का बेटा की जे हो! परबु क नामऊँ आबाळो धने ह। ईस्बर नगरी म रेह्बाळा की जे हो।” अर जद बे यरूसलेम म बड़्या जणा सगळी नगरी म खळबळी माचगी। अर लोग बुजबा लाग्या, “ओ कूण ह?” अर लोगई जुबाब देर्या हा, “ओ गलिल का नासरत को परमेसर की खेबाळो ईसु ह।” ईसु मनदर म गयो अर बठै जत्ताबी बेचबाळा अर खरीदबाळा हा, बानै बठैऊँ बारनै काडबा लाग्यो। बो रिपीआ को लेणदेण करबाळा का पाटियानै बगा दिओ अर कबूतर बेचबाळा का तक्‍तानै उंदो कर दिओ। इकै पाछै बो बानै बोल्यो, “पबितर सास्तर म मंडर्यो ह: “‘मेरो मनदर अरदास करबा को घर खुवासी। पण थे इनै डाकूआ की खोळ बणा दि।’” मनदर म क्युंक आँदा, लुला-लंगड़ा हा बे ईसु कनै आया अर बो बानै निरोगो कर्यो। जद परधान याजक अर यहूदि धरमसास्तरी बा ताजूब का कामानै देख्या। जणा बे टाबरानै मनदर म जोर-जोरऊँ आ खेता सुण्या क, “दाऊद का बेटा की जे हो! ओ धने ह।” आ सुणर बे झाळ्या म भरगा। अर ईसुऊँ बुजबा लाग्या, “तनै सुणै ह के बे काँई खेर्या हीं?” ईसु बाऊँ बोल्यो, “हाँ सुणू हूँ। थे सास्तर म ओ कोनी बाच्यो, बो टाबर टिकराऊँ अर दुद पिता नान्याऊँ आपकी मेमा कराई ह।” अर ईसु बानै बठैई छोडर बेतनिया चलेगो अर रातनै बठैई रिह्यो। भागपाट्याई जद ईसु यरूसलेम नगरी म जार्यो हो जणा बिनै भूख लागी। गेला म एक अंजीर को दरख्त देखर ईसु बिकन गयो, पण बि दरख्त म पत्तानै छोडर क्युंई कोनी लाध्यो। जणा बो बि दरख्तऊँ बोल्यो, “तेरै कदैई फळ कोनी लागै!” अर बो दरख्त जदकी जदई सूकगो। अर चेला आ देखर ताजूब करताई ईसुनै बुज्या, “ओ अंजीर को दरख्त हात की हात कंय्यां सूकगो?” जणा ईसु बानै बोल्यो, “म थानै सची खेऊँ हूँ, ज थे बिस्वास करो अर भेम नइ करो। जणा जखो म कर्यो हूँ बोई नइ पण ज थे इ डूँगरऊँ खेस्यो क समदर क मांयनै जा पड़ जणा बंय्यांई होज्यासी। बिस्वासऊँ अरदास म जोक्यु बी माँगस्यो, बो थानै मिलसी।” जद ईसु मनदर म सीख देर्यो हो जणा परधान याजक अर यहूदि नेता ईसु कनै आर बुज्या, “थे अ बाता की अधिकारऊँ करो हो? अर थानै ओ अधिकार कूण दिओ?” ईसु बाऊँ बोल्यो, “म थानै एक सुवाल बुजूँ हूँ, ज थे मनै बिको जुबाब देद्‍यो। जणा म बी थानै बता देस्युँ क म की अधिकार करूं हूँ। यहून्नानै पाणी को बतिस्मो देबा को अधिकार कठैऊँ मिल्यो? परमेसरऊँ नहिस मिनखाऊँ?” अर बे आपसरी म बतळाता होया खेबा लाग्या, “ज आपा खेवां क परमेसरऊँ जणा बो आपानै खेसी बिको बिस्वास क्युं कोनी कर्या? अर ज आपा खेस्यां मिनखाऊँ जणा मिनखा को डर ह, क्युं क मिनख बिनै परमेसर की खेबाळो मानी हीं।” जणा बे ईसुनै बोल्या, “म्हानै कोनी बेरो।” इपै ईसु बी बाऊँ बोल्यो, “जणा म बी कोनी बताऊँ क म अ बाता की अधिकारऊँ करूं हूँ! “थे काँई सोचो हो? एक मिनख क दो छोरा हा। बो बडोड़ा छोरा क कनै गयो अर बिनै ओडायो, ‘अँगूरा का बाग म जा अर काम कर।’ पण बो बोल्यो, ‘मेरो मन कोनी।’ बिकै पाछै बी बो चलेगो। अर बो बाप दुसरा छोरा कनै गयो अर बिनै बी बंय्यांई ओडायो। अर बो छोरो बोल्यो, ‘हाँ जास्युं।’ पण कोनी गयो। बताओ आ दोन्या म कूणसो ह, जखो बाप चाओ हो बो कर्यो?” बे बोल्या, “बडोड़ियो छोरो कर्यो।” जणा ईसु बाऊँ बोल्यो, “म थानै सची खेऊँ हूँ, चुंगी लेबाळा अर बेस्या परमेसर का राज म थारूँ पेल्या ज्यासी। अंय्यां म इ ताँई खेर्यो हूँ क्युं क यहून्ना बतिस्मो देबाळो थानै धारमिक्‍ता को गेलो दिखाबा ताँई आयो पण थे बिको बिस्वास कोनी कर्या। पण चुंगी लेबाळा अर बेस्या बिको बिस्वास कर्या। पण थे बानै देखर बी थारा हियानै कोनी बदल्या अर नइ बिपै बिस्वास कर्या। “एक मिसाल ओर सुणो: एक जमीदार हो। बो अँगूरा को बाग लगायो अर बिकै च्यारूमेर बाड़ बांदी। अर अँगूरा को रस काडबा ताँई खाडो खोदर एक घरट लगायो अर रूखाळी ताँई एक मचाण बणाई। अर अँगूरा का बागनै किराया प देर दूर दिसावर चलेगो। अर जद अँगूर लागबा की रुत आई जणा बो मालिक ठेकेदारा कनै आपका दासानै अधिकार क सागै भेज्यो क बे अँगूरा को हिस्सो लेर आवै। पण बे ठेकेदार बा दासानै पकड़र कयानै तो पिट्या, कया क भाठा मार्या अर कयानै ज्यानऊँ मार गेर्या। अर बो मालिक ओज्यु बा दासाऊँ बेत्ती दासानै अधिकार क सागै बाकन भेज्यो पण बे ठेकेदार बाकै सागै बी बोई बरताव कर्यो। आखीर म बो आपका बेटानै बाकन आ सोचर भेज्यो क बे इको तो मान करसी। पण जद बे ठेकेदार बिका बेटानै देख्या जणा आपसरी म खेबा लाग्या, ‘ओ तो बिको वारिस ह, आओ इनै मारद्‍यां अर इकी जायजादनै हड़पल्यां।’ अर बे बिनै पकड़र बिकै धका मार'र अँगूरा का बागऊँ बारनै लेग्या अर मार गेर्या। जणा इब थे बताओ जद बो अँगूरा का बाग को मालिक आसी जणा बा ठेकेदारा क सागै काँई करसी?” जणा बे ईसुऊँ बोल्या, “बे कुटिचर हा इ ताँई बो बानै बेरहमीऊँ मारसी अर अँगूरा को बाग दुसरानै ठेका प दे देसी जखा बिनै अँगूरा की रुत म बिकी पाँती दे।” ईसु बाऊँ बोल्यो, “थे सास्तर को ओ बचन कोनी बाच्या के: “‘जि भाठानै चेजारा ख्याई जोगो कोनी समज्यो, बोई कूणा को भाठो निकळ्यो? अर ओ परबु कर्यो ह जखो आपणी आँख्या क सामै अचम्मो ह।’ “इ ताँई म थारूँ खेऊँ हूँ, परमेसर को राज थारूँ खोस लिओ ज्यासी अर बा मिनखानै दे दिओ ज्यासी जखा बिकै खया गेल बरताव करै ह। अर जखो बी इ ढाड प पड़सी, बो टुकड़ा-टुकड़ा होज्यासी अर आ ढाड जिपै पड़सी बिनै पिस गेरसी।” परधान याजक अर बडका आ मिसालानै सुण्या जणा बे समजगा क ओ आपणा बारामई बोलर्यो ह। जणा बे ईसुनै पकड़बा की कोसिस करी। पण मिनखाऊँ डरग्या क्युं क मिनख ईसुनै परमेसर की खेबाळो मानता हा। ईसु बानै एक ओर मिसाल दिनी, “ईस्बर नगरी को राज बि राजा की जंय्यां ह। जखो आपका बेटा का ब्या की रोटी की त्यारी करी। अर बो आपका दासानै भेज्यो क बे बा मिनखानै जानै नूतो दिओ गयो हो बानै जिमबा ताँई बुलार ल्यावीं। पण बे कोनी आया। बो राजा ओज्यु आपका दासानै आ ओडार भेज्यो क, ‘बाकन जार खेवो क पेसारो त्यार ह, इ ताँई आओ अर जिमो।’ जद जार बे दास बानै खया जणा बे बाकी बाता प गोर कोनी दिआ। अर आप-आपका खेत म अर काम-धंधा प चलेग्या। अर कई मिनख तो बा दासा क सागै मारा पिटी कर बाकी जान लेली। अर जद राजानै इ बात को बेरो चाल्यो जणा बो झाळ्या म भरगो अर आपका सिपाईड़ानै भेजर बा कुटिचर मिनखानै मरवा दिओ अर बाकी नगरी म आग लगवा दिनी। जणा राजा दासाऊँ बोल्यो, ‘पेसारो तो त्यार ह पण जिमबाळाई कुटिचर निकळ्या।’ इ ताँई बो आपका दासानै बोल्यो, ‘थे गळी-कुचळ्या म जायो अर जत्ताबी मिनख थानै बठै मिलै बानै जिमबा ताँई बुलार ल्याओ।’ बे दास गया अर बानै जत्ता बी भला-बुरा मिनख मिल्या बा सगळानै लेर आया अर बाऊँ तम्मू भरगो। राजा बानै देखबा ताँई मांयनै आयो जणा बो बठै एक मिनखनै देख्यो जखो बे गाबा कोनी पेर राख्यो हो जखा ब्या म आबाळा म्हेमानानै सिमा'र दिआ गया हा, जणा राजा बिनै बोल्यो, ‘तू ब्या हाळा गाबा पेर्या बिनाई मांयनै क्याले आगो।’ पण बो मिनख क्युंई कोनी बोल्यो। बिनै चुपचालो देखर राजा आपका दासानै ओडायो, ‘इका हात पगानै बांदके बारनै अँधेरा म फेक द्‍यो जठै ओ दांत पिससी अर बार घालसी।’” जणा ईसु बोल्यो, “इ निती-कथानै खेबा को मतबल ओ ह, क परमेसर बोळानै बुलाया ह पण टाळेड़ा क्युंकई ह।” फरिसी भेळा होर बतळाबा लाग्या, “ईसुनै कंय्यांसिक बिकिई बात म फसायो जावै।” जणा बे हेरोद का गुट का क्युंक मिनखा क सागै आपका चेलानै ईसु कनै भेज्या। अर बे ईसुनै कह्या, “गरूजी म्हें जाणा हां थे सचा हो अर परमेसर आपणाऊँ काँई चावै बिनै खराईऊँ बताओ हो। म्हें आबी जाणा हां थे मुंडो देखर टिको कोनी काडो अर नइ खिकी परवा करो हो। इ ताँई थे म्हानै बताओ कैसरनै चुंगी देणी चाए क नइ?” बो बाकी चाल भापगो अर बाऊँ बोल्यो, “कपट्यो थे मनै क्युं बिचासो हो? थे मनै एक सीक्को दिखाओ। जिनै थे चुंगी म दिआ करो हो” जणा बे बिनै एक दिनार दि। अर ईसु बाऊँ बुज्यो, “इपै किको चितर अर किको आंक ह?” बे बोल्या, “रोम का समराट को” जणा ईसु बोल्यो, “जखो समराट को ह बो समराटनै द्‍यो अर जखो परमेसर को ह बो परमेसरनै द्‍यो।” आ सुणर बे ताजूब म पड़गा अर बठैऊँ चलेग्या। जनाड़ैई सदुकी बी ईसु कनै आया। बे मरेड़ा मऊँ ओज्यु जी उठबानै कोनी मानता हा। बे ईसुनै बुज्या, “गरूजी मूसा ओडायो ह, जिको भाईड़ो बिना आस ओलादई मरज्यावै जणा बिको भाईड़ो बिकी लूगाईनै ब्याले। अर आपका भाईड़ा का वंसनै आगै बढावै। म्हारै अठै सात भाईड़ा हा बा मऊँ बडोड़ा को ब्या होयो अर क्युंक दिना क पाछै बो बिना आस ओलादई मरगो। जणा बिको छोटक्यो भाईड़ो बिकी लूगाईनै ब्याली। जणा बो दुसरो अर इकै पाछै तीसरो बी बिना आस ओलादई मरगो। अंय्यांई बा सात्यु भाईड़ा क सागै होयो। अर आखीर म बा लूगाई बी मरगी। जणा थे बताओ जद मिनख मरेड़ा मऊँ ओज्यु जी उठसी जणा बि लूगाई को मोट्यार बा सात्यु भाईड़ा मऊँ कूणसो होसी। क्युं क बे सात्युई बिनै ब्याली ही।” ईसु बाऊँ बोल्यो, “थे गळत हो। थे नइ तो सास्तरानै जाणो अर नइ परमेसर की सक्‍तिनै। सच तो ओ ह क मरेड़ा मऊँ ओज्यु जी उठबा क पाछै बा लूगाई बा मऊँ कोईसा किई लूगाई कोनी होसी। क्युं क ओज्यु जी उठबा क पाछै लूगाई-मोट्यारा म ब्या कोनी होवै पण बे ईस्बर नगरी दुता की जंय्यां होज्यासी। जठै ताँई मरेड़ा मऊँ ओज्यु जी उठबा को सुवाल ह, जणा के थे ओ कोनी बाच्यो? परमेसर खयो ह, ‘म अब्राहम को परमेसर इसाक को परमेसर अर याकूब को परमेसर हूँ।’ बो मर्या खप्या को कोनी पण जीवता को परमेसर ह।” बे ईसु की इ सीखनै सुणर ताजूब म पड़गा। जद फरिसी सुण्या की ईसु सदुकीयानै चोखो जुबाब देर बाको मुंडो बंद कर दिओ ह। जणा बे एक सागै भेळा होया। अर बामैऊँ एक यहूदि सास्तरी ईसुनै अळजाबा ताँई बुज्यो, “गरूजी नेम-कायदा म सऊँ बडो हुकम कूणसो ह?” ईसु बिऊँ बोल्यो, “तू तेरा परबु परमेसरऊँ सगळा हिया, सगळा पिराण अर सगळी बुदीऊँ परेम कर। ओई सऊँ बडो अर पेलो हुकम ह। अर दुसरो हुकम बी इ झिसोई ह थारा पड़ोसीऊँ जंय्यां तू खुदऊँ परेम करै ह बंय्यांई परेम करजे। नेम-कायदा अर परमेसर की खेबाळा की पोथ्या आ दो हुकमा पई टिकरी ह।” जद फरिसी भेळा हा, जणाई ईसु बाऊँ एक सुवाल बुज्यो, “मसी किको बेटो ह थे बिकै बारां म काँई सोचो हो?” बे बोल्या “दाऊद को बेटो ह।” जणा बो बाऊँ बोल्यो, “दाऊद पबितर आत्माऊँ भर'र बिनै परबु क्युं खेवै ह अर ओ मांडेड़ो बी ह; “परबु मेरा परबुऊँ खेवै ह तू मेरै दायणै हात बेठ्यो रेह जद ताँई म तेरा दुस्मनानै तेरै पगा तळै नइ कर द्‍युँ। “जद दाऊद बिनै परबु बोलै ह जणा बो बिको बेटो कंय्यां हो सकै ह?” ईसु की बातानै सुणर बाको मुंडो बंद होगो अर बि दिन क पाछै बामैऊँ कोईसाकी ईसुऊँ ओज्यु सुवाल बुजबा की हिमत कोनी होई। जणा ईसु चेला अर भीड़ऊँ बोल्यो, “परमेसर का नेम-कायदानै सीखाबाळा मूसा क पाछै इब सास्तरी अर फरिसी बिनै समजावीं हीं। इ ताँई बे जखो बी ओडावै बिनै मानज्यो अर बंय्यांई करज्यो। पण बे जखो करीं हीं बो मना करज्यो। क्युं क बे जखो बोलीं हीं बे खुद कोनी करीं। बे लोगा प बोळा नेम-कायदा लादीं हीं जानै मानबो मुसकील ह। पण बे बा नियमाऊँ एकनैई मानबा म कोईनैई आँगळी को सारोई कोनी देवै ह। बे जोक्यु बी करै ह बे मिनखानै दिखाबा ताँई करीं हीं। हात अर माथा प बांदबाळा ताबिजानै जिमै धरमसास्तर की पोथ्या धरी जावै ह, क्युं बेत्तीई चोड़ी करवावीं। अर आपका चोळानै बेत्तीई लामो करवावीं हीं। जिऊँ मिनख बानै धरमी जाणी। बे जिमणार अर अरदास करबाळी झघा म सऊँ चोखी झघा म बेठणो चावीं हीं। अर बे चावीं हीं क बजारा म मिनख बानै ईज्जत देर नमस्कार करै अर गरूजी खेर बुलावीं। “थे जखा मेरा चेला हो खुदनै गरूजी मना खुवायो क्युं क थारो गरूजी एक ह अर बो म हूँ। थे सगळा भाई-भाण हो। थे धरती प कोईनैई बाप खेर मान मना दिज्यो क्युं क थारा सगळा को आत्मिक परम-पिता ईस्बर नगरी म रेह्बाळो परमेसर ह। अर नइ थे खुदनै सीख देबाळा खुवाज्यो क्युं क थानै सीख देबाळो एक ह अर बो मसी ह। थारै मऊँ जखो बी बडो होबो चावै बो दास बणै। अर जखो बी बडो बणबो चासी बिनै छोटो कर्यो ज्यासी अर जखो बी छोटो बणसी बो बडो कर्यो ज्यासी। “हे कपट राखबाळो धरमसास्तर्यो अर फरिसीयो! थार प धिक्कार ह। थे लोगा का ईस्बर नगरी राज म जाबाळा गेलानै रोको हो। थे नइ तो खुद बि गेलै जाओ अर नइ लोगानै बि गेलै जाबा द्‍यो। “हे कपट राखबाळा धरमसास्तर्यो अर फरिसीयो! थार प धिक्कार ह। थे कोईनै चेलो बणाबा ताँई बिकै हात धोर गेल होज्याओ हो अर जद बो यहूदि धरम पंथ म रळज्यावै ह। जणा थे बिनै थारूँ बेत्ती नरक म झोक द्‍यो हो। “यहूदि मिनखा का सरदारो थार प बी धिक्कार ह। थे बा आँदा मिनखा की जंय्यां हो जखा दुसरानै गेलो दिखाबा की कोसिस करीं हीं। जखा खेवो हो, ‘ज कोई मनदर की सोगन खावै बिनै बा सोगन कोनी लागै। पण ज कोई मनदर म रखेड़ा सोना की सोगन खावै ह बिनै बा सोगन लागसी।’ अरै आँदो, बडो काँई ह? मनदर म धरेड़ो सोनो नहिस बडो अरदास घर जखो सोनानै पबितर बणावै ह? अर थे बोलो हो क, ‘ज कोई बेदी की सोगन खावै बिनै बा सोगन कोनी लागै पण बिपै रखेड़ा चढावा की सोगन लागसी।’ अरै आँदो, आमै बडो काँई ह, चढाईड़ो चढावो नहिस बा बेदी जखी बिनै पबितर बणावै ह? इ ताँई जखो बेदी की सोगन खावै ह बो बिपै चढाईड़ा चढावा की बी खावै ह। अर जखा मनदर की सोगन खावै ह बो मनदर अर बिमै रेह्बाळा परमेसर की बी सोगन खावै ह। अर जखा ईस्बर नगरी की सोगन खावै ह, बे सिंघासन अर बिपै बेठबाळा परमेसर की सोगन खावै ह। “हे कपट राखबाळा सास्तर्यो अर फरिसीयो! थार प धिक्कार ह। थे पोदिना, जीरा, अर सूंप को दसवो हिस्सो परमेसरनै द्‍यो हो। पण खास नेम-कायदानै मानबो टाळ द्‍यो जंय्यां क न्याय, दया अर बिस्वास, चोखो तो ओ होतो क थे बाकै सागै आनै बी मानता। ओ आँदा सरदारो थे मछरनै तो छाणो हो पण ऊँटनै गिट ज्याओ हो। “सास्तर्यो अर फरिसीयो! थार प धिक्कार ह, थे लालची अर मतलबी हो। थे बि कचोळा अर थाळी की जंय्यां हो जखा मांयनैऊँ नइ पण बारनै-बारनैऊँ मांज्या जावीं हीं। ओ आँदो फरिसीयो जंय्यां कचोळा अर थाळीनै पेली मांयनैऊँ मांज्यो जावै जणा बे बारनैऊँ बी साप होज्यावीं हीं। जणा पेली थे थारा लालच अर मतबलनै छोडो। जणा पाछै थे धरम का काम करबा जोगा होज्यास्यो। “हे कपट्यो धिक्कार ह थार प, थे चुनाऊँ पोतेड़ी कबर की जंय्यां हो। बे बारनैऊँ तो सोवणी लागै ह पण बाकै मांयनै मुरदो सिडै़ ह। अंय्यांई थे बारनैऊँ तो धरमी दिखो हो पण थारै मांयनै बुराई भरी ह। “हे कपटी धरमसास्तर्यो अर फरिसीयो! थार प धिक्कार ह, थे परमेसर की खेबाळा की कबर बणाओ हो, अर धरमी मिनखा की समादिनै सजाओ हो। अर खेवो हो, ‘ज म्हें म्हारा बडका की टेम होता जणा परमेसर की खेबाळानै मारबा ताँई बाका साती कोनी होता।’ अंय्यां खेर थे खुदई थारै खिलाप गुवाई द्‍यो हो क परमेसर की खेबाळानै मारबाळा की ओलाद हो। जणा इब थारै बडका की कसर पूरी करल्यो। “हे सपोलो थे काँई सोचो हो, के थे नरकऊँ बच ज्यास्यो। इ ताँई म थानै खेऊँ हूँ, म थारै कनै परमेसर की खेबाळानै, बुदीमानानै अर गरूजीआनै भेजस्युं। पण थे बामैऊँ कया क तो अरदास करबाळी झघा म बेत मारस्यो, कयानै सतास्यो, कयानै सुळी प चढास्यो, कयानै मार गेरस्यो अर नगरी-नगरी थे बाको पिछो करस्यो। इ ताँई थे हाबिलऊँ लेर बराखिया का बेटा जकरयाह ताँई जिनै थे मनदर अर बेदी क बिचमै मार्या हा जत्ता बी धरमी मिनखा की हत्या इ धरती प होई ह। बाकी सजा भोगस्यो। म थानै सची बोलुँ हूँ अ सगळी बाता की सजा इ पिडी का मिनख भोगसी। “ओ यरूसलेम का मिनखो थे परमेसर की खेबाळानै मारगेर्या अर जिनै परमेसर थारै कनै भेज्या बानै बी थे भाठा मार'र मारगेर्या हो। जंय्यां मुरगी आपका चुजानै पांखड़ा तळै भेळो करै ह बंय्यांई परमेसर बी कत्ती बार भेळो करबो चायो पण थे ओ कोनी चाया। इ ताँई थारो बडो अरदास घर तज दिओ ज्यासी अर बो खाली होज्यासी। म थानै सची बोलुँ हूँ थे इबऊँ मनै जद ताँई कोनी देखस्यो जद ताँई थे थारा मुंडाऊँ अंय्यां नइ खेदेस्यो क बो धने ह जखो परबु क नामऊँ आवै ह।” जद ईसु मनदरऊँ बारनै जार्यो हो जणा चेला बाकन आर बोल्या, “देखो ओ बडो अरदास घर कतो सोवणो ह।” ईसु बानै बोल्यो, “थे इ हेलीनै खड़ी देखो हो? म थानै सची बोलुँ हूँ अठै एक भाठो बी कोनी रेह्सी। सगळा भाठा ढा दिआ जासी।” जद ईसु जेतून की डूँगरी प बेठ्यो हो जणा चेला एकला म आर बाऊँ बोल्या, “म्हानै बता अ बाता कद घटसी। तेरै आबा अर इ दुनिया का अंत को काँई सेलाणी होसी?” ईसु बानै बोल्यो, “थे समळर रेहज्यो थानै कोई छळ नइ ले। म थानै अंय्यां इ ताँई बोलुँ हूँ क्युं क मेरै नामऊँ बोळा आसी अर खेसी, ‘म मसी हूँ।’ अंय्यां बोलर बे बोळा मिनखानै धोको देसी। थे जद राड़ अर बिकी अफवा सुणो जणा मना डरज्यो। क्युं क आ बाता को होबो ते ह। पण बा घड़ी नास की कोनी होसी। मिनख-मिनख प अर राज-राज प चढाई करसी। अर हर कठैई भूचाळ आसी अर काळ पड़सी। पण अ सगळी बाता तो पिड़ा की सरूआतई ह। बा दिना म थानै सजा दिलाबा ताँई बे पकड़ासी अर मार गेरसी। क्युं क थे मेर प बिस्वास करो हो। इ ताँई सगळी दुनिया थारूँ नफरत करसी। बा दिना म बोळा मिनख बिस्वास करबो छोड देसी। एक दुसरानै धोकाऊँ पकड़ासी अर एक दुसराऊँ नफरत करसी। बोळा झूठा परमेसर की खेबाळा आसी अर लोगानै भटकासी। बुराई बढज्यासी अर बोळा मिनखा मऊँ प्यार-परेम जातो रेह्सी। पण जखा आखरी ताँई सबर करसी बे बचाया ज्यासी। परमेसर का राज का चोखा समचार को हेलो पूरा जगत म पाड़्यो ज्यासी। जिऊँ जगत का सगळा मिनख परमेसर को बचन सुणै। जणा पाछै जार इ धरती को अंत होसी। “इ ताँई थे उजाड़बाळी सूगली चिजानै जठै नइ होणी चाए ही बठै देखो जिकै बारां म परमेसर की खेबाळो दानिअल बतायो हो। बाचबाळो आ बातानै हळकी नइ ले। जणा जखा यहूदिआ म होवै, बानै डूँगरा म भाग ज्याणो चाए। अर जखा मिनख छात प होवै बे घर क मांय आपकी चिज लेबा नइ जावै। अर जखा खेत म होवै बे गरम गाबा लेबा ताँई ओटा नइ आवै। अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी। थे अरदास कर्या करो क थानै अरामहाळा दिन नहिस स्याळा का दिना म नइ भागणो पड़ै। बा दिना म अंय्यां को कळेस होसी जखो नइ इ सरस्टि की सरूआतऊँ लेर इब ताँई कदै होयो अर नइ कदै होसी। ज परमेसर बा दिनानै कम नइ करतो जणा कोईबी कोनी बचतो। पण बिका टाळेड़ा मिनखा की बजेऊँ परमेसर बा दिनानै कम कर दिओ ह। बा दिना म थानै कोई खेवै, ‘देखो मसी अठै ह! नहिस बठै ह!’ जणा बाको बिस्वास मना करज्यो। क्युं क झूठा मसी अर झूठा परमेसर की खेबाळा आसी, बे सेलाणी-चमत्कार अर ताजूब का काम दिखासी। अर ज होयो तो बे टाळेड़ा मिनखानै बी छळबा की कोसिस करसी। पण थे सुणो म थानै अ सगळी बाता होबाऊँ पेल्याई बता दिनी ह। इ ताँई ज कोई थानै खेवै क, ‘सुणो बो उजाड़ म ह’ जणा थे बठै मना जायो। अर ज कोई खेवै, ‘सुणो बो कोठा म लुखर्यो ह’ जणा बाको बिस्वास मना करज्यो। जंय्यां अकास म बिजळी अगुणी दिसाऊँ लेर पाछुणी दिसा ताँई चमकै ह। अर सगळा मिनख बिनै देखै ह, बंय्यांई जद मिनख को बेटो आसी, जणा बिनै सगळा देखसी। जठै क्युं मरेड़ो पड़्यो रेह्‍वै ह बठै गिरज कांवळा भेळा होवै ह। “बा दिना म, बि कळेस क पाछै सूरज उजाळानै खो देसी अर चाँद बी कोनी चमकसी। अर अकास मऊँ तारा बी तळै पड़ मरसी। अर अकास की सक्‍तिया हलाई जासी जिऊँ बे आपकी झघा छोड देसी। बि टेम अकास म मिनख का बेटा की आबा की सेलाणी दिखसी, जणा धरती का सगळा कूणबा का मिनख छाती पिटसी अर मिनख का बेटानै मेमा अर सक्‍ति क सागै बादळा म आतो देखसी। नरसिंगो फुक्यो जासी अर बो आपका ईस्बर नगरी दुतानै धरती प च्यारूमेर भेजसी। अर बे सगळी धरती पऊँ टाळेड़ा मिनखानै भेळा करसी। “थे अंजीर का दरख्तऊँ सीखो जद बिकी डाळ्यां नरम होवै अर बिकै कुपळ फूटबा लागै ह। जणा थे बिनै देखर जाणज्याओ हो क उंदयाळो आबाळो ह। अंय्यांई जद थे अ बातानै होता देखो जणा जाणज्याज्यो क मेरै ओज्यु आबा को टेम सांकड़ैई ह। म थानै सची खेऊँ हूँ, जद ताँई अ बाता कोनी बितसी इ पिडी को नास कोनी होसी। अकास अर धरती टळ ज्यासी पण मेरी बाता कोनी टळै। “बि दिन अर बि घड़ी क बारां म कोईबी कोनी जाणै। नइ तो ईस्बर नगरी दुत अर नइ बेटो पण परम-पिताई जाणै ह। जंय्यां नूह का टेम म होयो हो। बंय्यांई मिनख का बेटा क ओज्यु आबा की टेम होसी। क्युं क जळ-परलै क पेली जद ताँई नूह झाज म कोनी चढ्यो हो बि घड़ी ताँई लोग खार्या-पीर्या हा अर ब्याया जार्या हा। अर बानै बेरोई कोनी पड़्यो क कद जळ-परलै आर बानै भालेगो अंय्यांई मिनख का बेटा क ओज्यु आबा की टेम होसी। बि टेम दो जणा खेत म होसी बामैऊँ जिको मेर प बिस्वास होसी बिनै सागै ले लिओ जासी दुसरानै छोड दिओ जासी। बंय्यांई दो लूगाई चाकी म दाणा पिसती रेह्सी बामैऊँ एकनै जिको मेर प बिस्वास ह बिनै सागै ले लिओ जासी अर दुसरीनै छोड दिओ जासी। इ ताँई थे चेता म रेह्ओ क्युं क थे कोनी जाणो क थारो परबु कद आसी। ज घर का मालिकनै ओ बेरो होतो की चोर की टेम आसी जणा बो चोरनै घर म आबाई कोनी देतो। इ ताँई थे समळर रेहज्यो क्युं क मिनख को बेटो बि टेम आसी जि टेम क बारां म थे बिचारई कोनी कर सको। “बो बिस्वास जोगो अर स्याणो दास कूण ह? जिनै बिको मालिक नोकर-चाकरा प मुखियो बणायो। जिऊँ बो बानै टेमुटेम रोटी-टुक देवै। भागहाळो ह बो दास जखो आपका मालिक क पाछो आबा प बिनै बिका कह्या गेल करतो लाधै। म थानै सची बोलुँ हूँ, बो मालिक बिनै आपकी सगळी जायजाद प मुनिम बणा देसी। पण जखो कुटिचर दास होवै ह। बो मन म आ सोचर क मेरा मालिकनै तो हाल आबा म टेम ह। अर नोकर-चाकरानै मारबा-कुटबा लाग्यो अर दारूकुट्या क सागै खाबा-पीबा लाग्यो। जणा बिको मालिक अंय्यां क दिन आसी जि दिन अर जि घड़ी क बारां म बो सोच्योई कोनी। बो आर बिनै भेंकर सजा देसी अर बिको भाग कपट्या क सागै गिणसी जठै रोबो अर दांत पिसणो पड़सी। “बि टेम ईस्बर नगरी को राज अंय्यां होसी मानो दस कुंआरी छोर्या आपको दिओ लेर बिंदऊँ मिलबा ताँई चाली। आमै पाच तो स्याणी अर पाच नासमज ही। नासमज छोर्या दिओ तो ले लिनी पण सागै तेल कोनी ली। पण स्याणी छोर्या आपका दिआ क सागै कुप्या म तेल बी भर लिनी। जद बिंदनै आबा म मोड़ो होयो जणा बे सगळी उंगबा लागी अर सोगी। आदी रात क रोळो माच्यो बिंद आर्यो ह बारनै चालर बिऊँ मिलो जणा बे छोर्या खड़ी होर आप-आपका दिआनै समाळी। अर जखी नासमज ही बे स्याणी छोर्याऊँ बोली, ‘थारा तेल मऊँ म्हानै बी द्‍यो। क्युं क म्हारो दिओ बुत्तबाळो ह।’ पण बे बोली, ‘म्हारै कनै अत्तो तेल कोनी जिऊँ थानै अर म्हानै पूरो पड़ै, इ ताँई थे जार बेचबाळाऊँ मोल लेल्यो।’ जद बे मोल लेबा ताँई जारी ही अत्ता मई बिंद आगो। अर जखी छोर्या त्यार ही बानै बिकै सागै ब्या हाळा कोठा म भेजर कुआड़ ढक दिआ गया। जणा पाछै बे नासमज छोर्या बी आर खेबा लागी, ‘मालिक म्हारै ताँई कुआड़ खोलो।’ पण बिंद बोल्यो , ‘म थानै सची बोलुँ हूँ, म थानै कोनी जाणू।’ इ ताँई थे चेता म रेहज्यो क्युं क थे नइ तो बि दिन क बारां म अर नइ बि घड़ी क बारां म जाणो हो। “ईस्बर नगरी को राज बि मिनख की जंय्यां ह। जखो दिसावर जाबाऊँ पेली आपका दासानै बुलार बानै क्युंक पिसो-टक्को दिओ। बो बानै बाकी उजमा गेल पिसा दिआ। एकनै चाँदी हाळा सीक्काऊँ भरेड़ी पाच थेली, दुसरानै दो अर तीसरानै एक देर दिसावर चलेगो। अर जिनै पाच थेली मिली ही बो बाऊँ पाच ओर कमाली। अर जिनै दो मिली ही बो बाऊँ दो ओर कमाली। पण जिनै एक मिली ही बो बिनै जमीन म खाडो खोदर गाड दिओ। बोळा दिना क पाछै बाको मालिक आयो। अर बाऊँ हिसाब-किताब माँगबा लाग्यो। जणा जिनै पाच थेली मिली ही बो ओर पाच थेल्या क सागै आयो अर खयो, ‘मालिक म थारी पाच थेल्याऊँ ओर पाच थेल्या कमाली।’ बिकी इ बातनै सुणर मालिक खयो, ‘स्याबास तू बिस्वास जोगो अर चोखो दास ह। तू थोड़ा म बिस्वास राख्यो इ ताँई म तनै ओर बोळी चिजा प अधिकार देस्युँ। आर मेरै सागै खुसी मना।’ बिकै पाछै दो थेली हाळो आर खयो, ‘मालिक थे मनै दो थेली दिआ हा। जिऊँ म दो ओर कमाली।’ मालिक बिनै बी बोल्यो, ‘स्याबास तू बी बिस्वास जोगो अर चोखो दास ह। तू बी थोड़ा म बिस्वास राख्यो इ ताँई म तनै बी बोळी चिजा प अधिकार देस्युँ। आर मेरै सागै खुसी मना।’ बिकै पाछै एक थेली हाळो दास आयो अर खयो, ‘मालिक थे बोळा निरदई हो। थे जठै कोनी बोओ बठैऊँ काटो हो, अर जठै कोनी बिखेर्यो बठैऊँ सोरो हो। इ ताँई म डरगो अर इ धननै लेज्यार जमीन म गाड दिओ। ओ ल्यो थारो धन।’ बो मालिक बिऊँ खयो, ‘तू आळसी अर ख्याई जोगो कोनी, तू मनै जाणता बुजता बी क, म जठै कोनी बोऊँ बठैऊँ काटूँ हूँ जठै कोनी बिखेरूँ बठैऊँ सोरूँ हूँ। इ ताँई तनै अंय्यां करबो चाए हो क मेरा धननै साऊकारनै ब्याजुणा दे देतो। जिऊँ म आर बाऊँ ब्याज समेत ओटो ले लेतो। इकै कनैऊँ आ थेली लेल्यो अर जिकै कनै दस थेल्या ह बिनै देद्‍यो। क्युं क जिकनै ह बिनै ओर दिओ जासी, अर जिकै कनै कोनी बिऊँ जोक्यु बिकन ह बो बी ले लिओ जासी। इ ताँई इ दासनै जखो ख्याई जोगो कोनी बारनै काडो अर अँधेरा म पटक्याओ। जठै मिनख बार घाली अर दांत पिसै ह।’ “मिनख को बेटो जद ओज्यु आसी। जणा बो आपकी मेमा अर ईस्बर नगरी दुता क सागै आसी। बो एक राजा की जंय्यां आपका मेमाभर्या सिंघासन प बेठसी। जणा बिकै सामै धरती का सगळा मिनख आसी। अर बो बानै अंय्यां एक दुसराऊँ न्यारा करसी जंय्यां गुवाळ्यो बकर्याऊँ लल्ड्यानै न्यारो करै ह। बो धरमी मिनखानै दाया नाकै अर अधरम्यानै बाया नाकै राखसी। जंय्यां क गुवाळ्यो लल्ड्यानै अर बकर्यानै न्यारै-न्यारै राखै ह। जणा बो राजा आपकै दाया कानि खड़्या मिनखाऊँ बोलसी, ‘मेरा परम-पिताऊँ आसिरबाद लियड़ा मिनखो थे आओ अर बा आसिरबादानै लेल्यो जखा इ सरस्टि की सरूआतऊँ थारै ताँई ह। क्युं क जद म भूखो हो जणा थे मनै खाबा ताँई दिआ अर जद म तिसायो हो जणा थे मनै पीबा ताँई दिआ, जद म अणजाण हो जणा थे मनै थारै घर म बासो दिआ। जद म उघाड़ो हो जणा पेरबा ताँई गाबा दिआ। अर जद म रोगलो हो जणा मेरी खेचळ करी अर जद म केद हो जणा मेरूँ मिलबा आया।’ जणा धरमी मिनख बुजसी, ‘मालिक म्हें थानै कद भूखो देखर खाबा ताँई दिआ अर कद थानै तिसायो देखर पीबा ताँई दिआ? अर कद म्हें थानै अणजाण देखर म्हारै घरा म बासो दिआ? कद थानै उघाड़ो देखर पेरबा ताँई गाबा दिआ? थे कद रोगला हा अर केद म हा जखो म्हें थारूँ मिलबा आया?’ जणा बो राजा खेसी, ‘म थारूँ सची बोलर्यो हूँ, जोक्यु बी थे थारा भोळा-ढाळा भाई-भाणा ताँई कर्या हो बो थे मेर ताँई कर्या हो।’ बाकै पाछै बो राजा आपकै बाया हात खड़्या मिनखाऊँ खेसी, ‘हाय ह थार प। थे मेरै कनैऊँ चल्या जाओ। अर जखी कदैई नइ बुत्तबाळी आग सेतान अर बिका दुता ताँई बाळ राखी ह बिमै पड़ मरो। क्युं क जद म भूखो हो जणा थे मनै खाबा ताँई कोनी दिओ। अर जद म तिसायो हो जणा पीबा ताँई कोनी दिआ। अर जद म अणजाण हो जणा थे मनै थारै घरा म बासो कोनी दिआ। जद म उघाड़ो हो जणा पेरबा ताँई गाबा कोनी दिआ। अर जद म रोगलो अर केद म हो जणा थे मेरी समाळ कोनी करी।’ जणा बे बुजसी, ‘परबु थे कद तो भूखा, अर कद तिसाया, अर कद अणजाण, अर कद थानै गाबा की जुर्त ही, अर कद थे रोगला हा अर कद थे केद म हा जखो म्हें थारी तिथ कोनी ली?’ म थारूँ सची खेऊँ हूँ, जद कदै बी थे मेरा भोळा-ढाळा मिनखा मऊँ एक को बी भलो कोनी कर्या इको मतबल ओई ह क थे मरै ताँई क्युंई कोनी कर्या। जणा बे मिनख कदैई नइ खतम होबाळी सजा पासी अर धरमी मिनख अजर-अमर जीवन पासी।” बे बाता खेबा क पाछै ईसु चेलाऊँ खयो, “थानै बेरो ह दो दिना क पाछै फसै को त्युंहार ह। अर मिनख को बेटो धोकाऊँ सुळी प चढाबा ताँई पकड़ायो जासी।” जणा परधान याजक अर यहूदि नेता केफा नाम का म्हायाजक क घर का आँगणा म भेळा होया। अर बे बठै जाळ-साजी करी क ईसुनै कंय्यांसिक छळऊँ पकड़र मारां। पण बे आपसरी म बतळाया, “आपा ईसुनै त्युंहार क दिन कोनी मारां। ज आपा त्युंहार क दिन इनै मारां जणा के बेरो जनता दंगो कर दे।” जद ईसु बेतनिया म समोन क घरा हो। ओ बोई समोन ह जिको कोढ ईसु धोयो हो। जद ईसु रोटी खार्यो हो जणा बठै एक लूगाई संगमरमर की बरनी म जटामासी को मेंगो ईतर लेर आई। अर बा लूगाई बि बरतननै खोलर बिकै मांयनै जत्तो बी ईतर हो बिनै ईसु क सीर प उंदका दिनी। चेला अंय्यां देखर चिड़गा अर खया, “आ लूगाई इ ईतरनै क्याले खराब करी ह? इनै चोखा दामा म बेचर इऊँ जखा रिपीआ मिलता बानै गरीबा म बाट्यो जा सको हो।” ईसु बाकी इ बातनै भापर बानै बोल्यो, “थे इ लूगाईनै क्युं तंग करो हो? आ तो मेरो मान करी ह। गरीब तो थारै सागै सदाई रेह्सी, पण म थारै सागै सदाई कोनी रेहस्युं। आ मनै गाडबाऊँ पेल्याई मेरी काया प ईतर उंदकाई ह। म थानै सची खेऊँ हूँ, सगळा जगत म जठै बी चोखो समचार को हेलो पाड़्यो ज्यासी, बठै इ लूगाईनै अर इका कामनै याद कर्यो ज्यासी।” जणा यहूदा इस्करोती जखो बारा चेला मऊँ एक हो परधान याजका क कनै गयो अर बाऊँ बोल्यो, “ज म ईसुनै थारै हात पकड़ा द्‍युँ जणा थे मनै काँई देस्यो?” जणा बे बिनै चाँदी हाळा तीस सीक्का देबा की बात प राजी होगा अर बिनै तीस सीक्का गिणर दे दिआ। बि टेमऊँई यहूदा ईसुनै पकड़ाबा की ताक म मोको ढुंढबा लाग्यो। बिना खमिर की रोटी हाळै त्युंहार क पेला दिन चेला ईसु कनै आर बुज्या, “तू कठै चावै ह क म्हें तेरै ताँई फसै की रोटी खाबा की त्यारी करां?” ईसु बानै ओडायो, “नगरी क मांय फलाणीया मिनख क कनै जायो अर बिऊँ बोलज्यो, ‘गरूजी खयो ह, मेरो टेम सांकड़ै ह, म मेरा चेला क सागै तेरै घरा फसै को त्युंहार मनास्युं।’” अर बे चेला ईसु क खया गेल बि नगरी म फसै की रोटी त्यार करी। जद दिन आथगो ईसु बारा चेला क सागै रोटी खाबा बेठ्यो। जद बे सागै बेठर रोटी खार्या हा। जणा ईसु आपका चेलानै बोल्यो, “म थानै सची खेऊँ हूँ थारै मऊँ एक जणो जखो अठै मेरै सागै जिमर्यो ह बो मनै धोकाऊँ पकड़ासी।” बे ईसु की इ बातनै सुणर बोळा दुखी होया अर बे ईसुनै एक-एक कर बुजबा लाग्या, “परबु बो म तो कोनीनै?” पण ईसु बोल्यो, “जखो मेरै सागै इ कचोळा म टिमोवै ह बोई मनै धोकाऊँ पकड़ासी। मिनख का बेटानै तो मरनोई ह जंय्यां क पबितर सास्तर म मंडेड़ो ह। पण कत्ती बुरी दसा ह बि मिनख की जिकी बजेऊँ मिनख को बेटो पकड़ायो जासी। इऊँ चोखो तो ओ होतो क बो मिनख जलमतोई नइ।” जणा बिनै धोकाऊँ पकड़ाबाळो यहूदा बोल्यो, “हे गरूजी बो म हूँ के?” ईसु बोल्यो, “हाँ अंय्यांई जंय्यां तू बोल्यो ह।” बे जिमर्याई हा क ईसु रोटी लेर परमेसरनै धनेवाद देर रोटीनै तोड़्यो अर आपका चेलानै आ खेतो रोटी बाटी, “ल्यो आ मेरी काया ह।” इकै पाछै ईसु कचोळो लिओ अर परमेसरनै धनेवाद देर बो कचोळो आपका चेलानै दिओ अर खयो, “थे सगळा इमैऊँ पीओ। क्युं क इ कचोळा की अँगूरी मेरा लोय को नयो करार ह। ओ लोय बोळा मिनखानै पापऊँ माफ करबा ताँई बहायो ज्यासी। म थानै सची खेऊँ हूँ म इबऊँ आ अँगूरी जद ताँई कोनी पीस्युं जद ताँई मेरा परम-पिता का राज म थारै सागै नई नइ पीऊँ।” इकै पाछै बे एक गीत गार जेतून का डूँगर प चलेग्या। जद बे गेला म हा जणा ईसु चेलाऊँ बोल्यो, “थे सगळा कानि-कानि होज्यास्यो। क्युं क पबितर सास्तर म मंडेड़ो ह: “‘म गुवाळ्यानै मारस्युं अर लल्ड्या तीनतेरा होज्यासी।’ “ पण म ओज्यु जिंदो होर थारूँ अगाऊ गलिल जास्युं।” जणा पतरस खयो, “चाए सगळा तनै छोडर भाग जावै पण म तनै कोनी छोडूँ।” ईसु बिऊँ खयो, “म तनै सची खेऊँ हूँ आज रात मुरगा क बांग देबाऊँ पेल्या तू तीन बार मेरै बारां म खेसी क, ‘म इनै कोनी जाणू।’” जणा पतरस खयो, “ज मनै थारै सागै ज्यान बी देणी पड़ी जणा बी म पिछै कोनी हटूँ।” अर बाकी का सगळा चेला बी अंय्यांई बोल्या। इकै पाछै चेला ईसु क सागै गतसमनी नाम की झघा गया अर बठै ईसु आपका चेलानै बोल्यो, “म बठै जार अरदास करूं थे अठैई बेठ्या रेहज्यो।” ईसु आपकै सागै पतरस अर जब्दि का दोन्यु छोरा याकूब अर यहून्नानै लेगो। ईसु बोळो दुख-दुबळो होर्यो हो। ईसु बाऊँ बोल्यो, “मेरो हियो बोळो उदास ह अठै ताँई की म मरबाळोसो होर्यो हूँ। थे अठैई मेरै सागै चेता म रेहज्यो।” इकै पाछै ईसु बठैऊँ चिनोसोक दूर जार धरती प मोदो पसर अरदास करबा लाग्यो, “मेरा परम-पिता ज आ हो सकै तो मनै इ पिड़ा म मना गेरो पण म चाऊँ जंय्यां नइ पण थे चाओ बंय्यांई होवै।” ईसु अरदास कर आपका चेला कनै गयो। अर बानै सुत्यो देखर पतरसनै बोल्यो, “थे बोळा कचा निकळ्या जखो थे मेरै सागै थोड़ी-घणी देरई कोनी जाग सक्या? थे जागता रेह्ओ अर अरदास करो जिऊँ थे बिचास्या नइ जाओ। आत्मा तो चावै ह पण आ काया माड़ी ह।” अर ईसु दुसरकै अरदास करबा ताँई चलेगो अर अरदास म खयो, “परम-पिता ज मेरो दुख भोगबो जरूरी ह जणा थे जखो चाओ हो बोई मेरै सागै होवै।” अर ओज्यु बो चेला कनै गयो अर बानै सुत्यो देख्यो बाकै आँख्या म निंद चढरी ही। बो बानै छोडर ओज्यु गयो। अर जंय्यां पेल्या अरदास करी बंय्यांई बोलर बो तीसरकै बी अरदास करी। ओज्यु ईसु चेला क कनै गयो अर बोल्यो, “हाल बी थे अरामऊँ सुत्या हो। देखो बा घड़ी आगी जद मिनख को बेटो पाप्या क हात म सूप्यो जार्यो ह। थे खड़्या होवो अर देखो मनै पकड़ाबाळो आबाळो ह।” ईसु अंय्यां बोलर्योई हो, क यहूदा जखो बारा चेला मऊँ एक हो बो आपकै सागै परधान याजक, सास्तरीआ अर यहूदि नेता का हुकमऊँ घणीसारी भीड़ लेर बठै आयो। बाकन तलवार अर लाठ्या बी ही। धोकाऊँ पकड़ाबाळो पेल्याई भीड़नै बता दिओ हो क, “जिको म माखो ल्युं बोई ईसु ह थे बिनै पकड़ लिज्यो।” अर यहूदा तावळोसो ईसु कनै जार खयो, “गरूजी नमस्कार” अर बो बिको माखो लिओ। ईसु बिनै खयो, “जि काम ताँई तू आयो ह बो काम कर।” जणा बे बिनै पकड़ लिआ। ईसु क सागैहाळा मऊँ एक जणो तलवार का'डर म्हायाजक का एक दास को कान काट गेर्यो। जणा ईसु बिनै बोल्यो, “तेरी तलवार ओटी घाल ले जखा तलवारऊँ मारै ह बो तलवारऊँ मार्यो ज्यासी। के थे कोनी जाणो म मेरा परम-पितानै मदद करबा ताँई बुला सकूँ हूँ। अर बो ईस्बर नगरी दुता की बारा सेनाऊँ बी बेत्ती मेरै ताँई भेज देसी। ज म अंय्यां करस्युं जणा सास्तर म मंडेड़ो कंय्यां पूरो होसी क्युं क अंय्यां होणोई ह?” बि टेमई ईसु भीड़नै खेबा लाग्यो, “म कोई डाकू हूँ के जखो थे मनै पकड़बा ताँई तलवार अर लाठ्या लेर आया हो? म रोजकी मनदर म रेह्तो अर सीख देतो हो जणा तो थे मनै कोनी पकड़्या। पण अ सगळी बाता जखी परमेसर की खेबाळा पबितर सास्तर म मांडी ह बानै पूरो होणोई ह।” अर ईसु का चेला बिनै छोडर भागगा। बे ईसुनै केफा नाम का म्हायाजक क कनै लेग्या अर बठै बडा परधान याजक अर यहूदि नेता अर सास्तरी आर भेळा होगा। पतरस बाकै गेल-गेल आयो अर म्हायाजक क आँगणा म चोकीदारा क सागै आ देखबा ताँई क इब काँई होसी बठै बेठगो। परधान याजक अर सगळी पंचायत का मिनख ईसुनै मारबा ताँई बिकै खिलाप झूठी गुवाई देबाळानै ढुंढबा लाग्या। पण बानै अंय्यां की कोई गुवाई कोनी मिली जखी बाकै काम आ सकै। जदकी बोळा मिनख बाकै खिलाप झूठी गुवाई दि ही। आखीर म दो मिनख आगै आया अर बे खया, “ओ खेवै ह म परमेसर का मनदरनै ढार बिनै तीन दिना क पाछै ओज्यु खड़्यो कर सकूँ हूँ।” जणा म्हायाजक खड़्यो होर ईसुनै बुजबा लाग्यो, “तू जुबाब क्युं कोनी देवै अ सगळा तेरै खिलाप गुवाई देर्या हीं।” पण ईसु चुपचालोई रिह्यो। जणा ओज्यु म्हायाजक बिऊँ बोल्यो, “म थानै जीवता परमेसर की सोगन देऊँ हूँ, म्हानै बता तू परमेसर को बेटो मसी ह के?” ईसु बोल्यो, “हाँ जंय्यां थे बोलो हो म बोई हूँ। अर थे मिनख का बेटानै सऊँ सक्‍तिसाली परमेसर क दाया हात बेठर राज करता देखस्यो। अर थे मनै ईस्बर नगरीऊँ बादळा मऊँ आतो बी देखस्यो।” म्हायाजक बिकी आ बात सुणर आपका गाबल्या पाड़र खयो, “इब ओर गुवा की जुर्त कोनी ह। ओ अंय्यां खेर परमेसर की बुराई करै ह अर थे सगळा इकी बाता सुण्या हो। इब थारो काँई फेसलो ह?” जणा बे खया, “ओ तो मोत को हकदार ह।” जणा पाछै बामैऊँ कई बिकै मुंडा प थूक्यो अर बिकै मुका मार्या अर बिकै थपड़ मार्या, अर खया, “तू मसी हनै इब भबिस्वाणी कर बता तनै कूण मार्यो?” हाल पतरस बारला आँगणा म बेठ्यो हो, जणा एक दासी बिकन आर बोली, “तू बी तो बि गलिली ईसु क सागै हो।” पण पतरस सगळा क सामै नटगो अर बोल्यो, “तू जखो बोलरी ह बा मेरै तो क्युंई पलै कोनी पड़ै।” अर बो बारली गुवाड़ी का बारना कनै चलेगो जणा एक ओर दासी बिनै देखर बठै खड़्या मिनखानै बोली, “ओ मिनख ईसु नासरी क सागै हो।” ओज्यु पतरस नटगो अर सोगन खार बोल्यो, “म बिनै कोनी जाणू।” क्युंक देर पाछै बठै खड़्या मिनख पतरस क कनै गया अर खया, “सचमई तू ईसु क सागैहाळा मऊँ एक ह क्युं क तेरी बोलीऊँ बेरो चालै ह क तू गलिल को ह।” जणा पतरस सोगन खार बोल्यो, “म बि मिनखनै कोनी जाणू ज म बिनै जाणू तो परमेसर मनै सजा देवै।” अत्ता मई मुरगो बांग दिनी। जणा पतरसनै ईसु की खेईड़ी बा बात याद आई क, “मुरगा क बांग देबाऊँ पेल्या तू तीन बार मेर ताँई खेसी म इनै कोनी जाणू।” अर बो बारनै चलेगो अर पछाड़ा घा'लर रोबा लाग्यो। दिन उगताई परधान याजक अर यहूदि नेता एक मत होया क ईसुनै कंय्यांसिक मोत की सजा दिवाई जावै। अर बे ईसु का हातानै बांदके रोमी राजपाल पीळातुस कनै लेग्या। अर बिकै हाता म बिनै सूप दिआ। ईसुनै धोकाऊँ पकड़बाळो यहूदा जद आ सुण्यो क ईसुनै दोसी गिण्यो गयो ह। जणा बो पछतायो अर परधान याजक अर यहूदि नेता कनै चाँदी हाळा तीस सीक्का लेर ओटो गयो। अर खयो, “म निरदोस मिनखनै धोकाऊँ पकड़ार पाप कर्यो हूँ।” अंय्यां सुणर बे बोल्या, “म्हानै इऊँ काँई लेणो ओ तो तेरो मामलो ह।” अंय्यां सुणर यहूदा बा चाँदी का सीक्कानै मनदर क मांयनै फेकर चलेगो अर जार खुद क फासी लगाली। जणा परधान याजक बा सीक्कानै उठार खया, “आ सीक्काऊँ एक मिनखनै मारबा ताँई मोल लेयड़ो ह। अर आपणो बिधी-बिधान आनै मनदर की दान पेटी म धरबा की इजाजत कोनी देवै।” इ ताँई बे आपसरी म फेसलो कर आ सीक्काऊँ एक खुमार को खेत मोल लिआ जिऊँ यरूसलेम म आबाळा पराया मिनखा क मरबा क पाछै बानै गाड सकै। इ ताँई बो खेत आज ताँई “लोय को खेत” खुवावै ह। अर अंय्यां परमेसर का खेबाळा यरमिआ को मांडेड़ो बो आंक बी पूरो होयो; “बे चाँदी का तीस सीक्का लिआ, आ बा रकम ह जखी बि खातर इजरायल का मिनख देबा ताँई त्यार होया। अर जंय्यां परबु मनै हुकम दिओ हो बे बंय्यांई बि रकमऊँ खुमार को खेत मोल लिआ।” ईसुनै बे राजपाल पीळातुस क सामै लेग्या अर बो बिऊँ बुज्यो, “के तू यहूदिआ को राजा ह?” ईसु बोल्यो, “हाँ म हूँ जंय्यां थे बोल्या हो।” अर जद परधान याजक अर यहूदि नेता बिपै बोळी बाता को दोस लगावा हा बि टेम ईसु क्युंई कोनी बोल्यो। जणा पीळातुस बोल्यो, “तू सुणै हनै अ तेर प कत्ता दोस लगार्या हीं?” पण ईसु पीळातुसनै क्युंई जुबाब कोनी दिओ। आ देखर बिनै बिपै ताजूब होयो। फसै का त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो। बि टेम बरअबा नाम को एक केदि बठै हो जिनै सगळा जाणता हा। अर बठै भीड़ भेळी होगी जणा पीळातुस बाऊँ बुज्यो, “थे काँई चाओ हो क म थारै ताँई किनै छोडूँ बरअबानै नहिस ईसुनै जिनै थारै मऊँ क्युंक मसी बतावै ह?” बो ओ सुवाल इ ताँई बुज्यो, क्युं क बो जाणतो हो यहूदि अधिकारी जळता-बळता ईसुनै पकड़ाया ह। अर जद पीळातुस न्यायहाळा सिंघासन प बेठ्यो हो जणा बिकी लूगाई बिकन एक संदेसो भेज्यो। जिमै मंडर्यो हो क, “सुआरैसिक म सूपना म इ मिनख की बजेऊँ बोळो दुख पाई हूँ। जणा इ धरमी मिनख क सागै क्युंई बुरो मना करज्यो।” पण परधान याजक अर यहूदि नेता जनतानै उकसाया क म्हारै ताँई बरअबानै छोड दे अर ईसुनै मार। जणा राजपाल पीळातुस बाऊँ बुज्यो, “थे आ दोन्या मऊँ कूणसानै छुटाबो चाओ हो?” बे बोल्या, “बरअबानै!” जणा पीळातुस बाऊँ बुज्यो, “म इ ईसु को जखो मसी खुवावै ह काँई करूं?” बे सगळा बोल्या, “इनै सुळी प चढा द्‍यो।” पीळातुस बुज्यो, “क्युं ओ लाय काँई बुरो कर्यो ह?” पण बे ओर बी जोरऊँ बोल्या, “इनै सुळी प चढावो।” पीळातुस आ देखर सोच्यो इब क्युंई कोनी हो सकै ज म भीड़ क खिलाप जास्युं तो दंगो हो सकै ह। इ ताँई बो पाणी लेर भीड़ क सामै हात धोर खयो, “इ मिनख की मोत म मेरो कोई लेणदेण कोनी आ थारी करनी ह।” जणा बे सगळा बोल्या, “इका जिमेबार म्हें अर म्हारा टाबर-टिकर हीं।” जणा पीळातुस बा ताँई बरअबानै तो दिओ छोड अर ईसु क बेत पड़वार सुळी प चढाबा को हुकम दे दिओ। सिपाईड़ा ईसुनै राजपाल पीळातुस क गड का आँगणा म लेग्या। अर बिकै च्यारूमेर सिपाईड़ा की सगळी पलटण भेळी होगी। बे बिका गाबा उतार बिनै उजळा लाल रंग को गाबो पिराया। जणा बे बिका सीर प काटाहाळी डाळ्यां को मुकट बणार धर दिओ। अर बिका दाया हात म कामड़ी पकड़ा दिनी अर बिकै आगै गोडा टे'कर हसताई खया, “यहूदिआ का राजा नमस्कार।” बे बिपै थूकर्या अर बा कामड़ी लेर बिकै सीर प मार्या। अर बे बिको मजाक उडार बिका बो गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई चाल पड़्या। अर जद बे बारनै निकळर क्युंक दूर गया जणा बानै कुरेन को रेह्बाळो समोन नाम को एक मिनख मिल्यो। अर बिनै धमकार खया, “ईसु की सुळी उठार चाल।” अर जद बे गुलगुता जिको मतबल खोपड़ी की झघा ह पुग्या। जणा बे ईसुनै पित मिलेड़ी अँगूरी पिलाबा ताँई दिआ। पण ईसु बिनै चाख्यो जणा कोनी पीयो। इकै पाछै बे ईसुनै सुळी प चढा दिओ, अर ईसु का गाबा प परची गेर'र आपसरी म बाट लिआ। अर बे बठैई बेठगा अर पेरो देबा लागगा। बे बिको दोस पतर सुळी प चिपका दिओ जिपै मंडर्यो हो “ओ यहूदि मिनखा को राजा ईसु ह।” बि टेमई ईसु क सागै दो डाकू बी सुळी प चढाया गया हा एकनै तो ईसु क दाया नाकै अर दुसरानै बाया नाकै। आबाळा जाबाळा नाड़ हला-हलार ईसु की बुराई करा हा। अर खेर्या हा, “मनदरनै ढाबाळा अर तीन दिना म ओज्यु बणाबाळा खुदनै बचा, परमेसर का बेटा सुळीऊँ तळै उतर्या।” अंय्यांई बोलर परधान याजक, सास्तरानै सीखाबाळा अर यहूदि नेता क सागै मिलर बिको तमासो करर्या हा। अर खेर्या हा, “दुसरानै बचाबाळा पेल्या खुदनै तो बचा! ज तू यहूदिआ को राजा ह जणा सुळी पऊँ तळै उतर्या। जणा म्हें तेर प बिस्वास करस्यां। ओ बोळो परमेसर प बिस्वास कर्या करतो हो। ओ खेतो हो क म परमेसर को बेटो हूँ जणा ज परमेसर चावै तो इनै बचावै।” अर बे डाकू बी जखा बिकै सागै सुळी प चढाया गया हा बिको तमासो करर्या हा। दोपारा बारा बजेऊँ लेर तीन बजै ताँई सगळा देस म अँधेरो छायो रिह्यो। अर करीब तीन बजैसीक ईसु जोरकी उवाज म चिलाटी घाली, “इलोई, इलोई, लमा सबकतनी?” जिको मतबल ह, “हे मेरा परमेसर तू मनै क्युं तज दिओ?” अर जखा मिनख बठै खड़्या हा बे अंय्यां सुणर खेबा लाग्या, “ओ परमेसर की खेबाळा एलिआनै बुलातो दिखै ह।” जणा एक मिनख तावळोसो भागर चुखानै खाटी अँगूरी म भेर लाठी प टां'गर ल्यायो अर ईसुनै चुसबा ताँई दिओ। अर कई मिनख खया, “डटो आपा देखस्यां इनै एलिआ बचाबा आवै ह क कोनी।” अर ईसु जोरऊँ चिलाटी मार'र पिराण तज दिओ। अर बि टेमई मनदर को परदो उपरऊँ लेर निचै ताँई पा'टर दो भाग होगो। धरती हालगी अर ढाड बी तिड़कगी। अर अठै ताँई क क्युंक कबरा बी खुलगी अर परमेसर का बोळा मरेड़ा मिनख ओज्यु जीगा। बे कबराऊँ निकळर ईसु क जीबा क पाछै पबितर यरूसलेम म जार बोळानै दिख्या। रोमी सेना को सुबेदार अर ईसु क पेरो देबाळा मिनख भूचाळ अर जखो बठै घट्यो हो बिनै देखर डरग्या। अर खया, “ओ सचमई परमेसर को बेटो हो।” बठै घणीसारी लूगाया बी ही बे ईसुनै परैऊँई खड़ी-खड़ी देखै ही बे बिकी सेवा करबा ताँई गलिलऊँ बिकै गेल आई ही। बा लूगाया म मरीयम मगदलिनी, याकूब अर युसूफ की माँ मरीयम अर याकूब अर यहून्ना की माँ ही। जद दिन आथगो जणा अरमतिया नगरऊँ युसूफ नाम को एक पिसाळो मिनख आयो। ओ ईसु को चेलो हो। ओ पीळातुस कनै गयो अर बाऊँ ईसु की लास माँगी। जणा पीळातुस हुकम दिओ इनै लास दे दि जाय। युसूफ लासनै लिओ अर बिनै एकदम साप गाबा म लपेट्यो, बिकी लासनै बि कबर म धर्यो जिनै बो ताजाई ढाडनै खोदर बणवायो हो अर कबर का मुंडानै बडासारका गोळ भाठाऊँ ढकर चलेगो। मरीयम मगदलिनी अर दुसरी मरीयम आर बि कबर क सामै बेठगी। सकरवार क आगलै दिन जखो यहूदि मिनखा को अरामहाळो दिन हो बि दिन परधान याजक अर फरिसी पीळातुस कनै गया। अर खया, “म्हराज, म्हानै याद ह जद बो धोकेबाज जीताजी हो जणा खेतो हो क मेरी मोत क पाछै म तीसरै दिन ओज्यु जिंदो होज्यास्युं। इ ताँई थे हुकम द्‍यो क तीन दिना ताँई कबर की पेरेदारी करी जाय। क्युं क कदै अंय्यां नइ होज्या क बिका चेला बिकी लास चुरा लेज्यावै अर मिनखाऊँ खेबा लागीं क बो मरेड़ा मऊँ जीगो ह। अर ओ काम बिका पेलड़ा कामाऊँ बी बुरो होसी।” जणा पीळातुस खयो, “थे पेरो लगाबा ताँई सिपाईड़ा लेज्याओ अर जंय्यां थे चाओ हो बंय्यांई पेरो द्‍यो।” जणा बे जार कबर प लगाईड़ा भाठा प छाप लगा दिनी अर पेरो देबा ताँई सिपाईड़ानै बठैई बिठा दिआ जिऊँ बे बिकी निगा राख सकै। अरामहाळा दिन क पाछै सपता का पेला दिन दितबारनै, सुआरै मरीयम मगदलिनी अर बा दुसरी मरीयम बी ईसुनै कबर म देखबा ताँई गई। अर चाणचुकई एक जोरको भूचाळ आयो अर बि टेमई ईस्बर नगरी दुत धरती प आयो बो कबर प जार बिका मुंडापै लागेड़ा भाठानै हटार बिपै बेठगो। बिको मुंडो अकास की बिजळी जंय्यां भळका मारै हो अर बिका गाबा बी बरफ जंय्यां धोळा धप हा। बे सिपाईड़ा जखा पेरो देर्या हा बे डर क मारै धुजबा लाग्या अर मरेड़ा समान होगा। जणा बो ईस्बर नगरी दुत जखो बठै बेठ्यो हो बा लूगायानै ओडायो, “डरो मना म जाणू हूँ क थे ईसुनै ढुंढो हो जिनै सुळी प चढायो गयो हो। बो अठै कोनी। परमेसर बिनै ओज्यु जिंदो कर दिओ ह। जंय्यां क बो थारूँ बोल्या करतो हो। आओ अर देखो जठै बिकी लास धरेड़ी ही। जणा इब तावळिसी जार बिका चेलानै ओ समचार सुणाओ क बो मरेड़ा मऊँ जी उठ्यो ह। अर बो थारै अगाऊ गलिल जासी, अर थे बिनै बठैई देखस्यो, म जखो थानै खयो हूँ बिपै गोर करो।” बे लूगाया तावळिसी कबरऊँ निकळी बे डररी अर राजी बी होरी ही अर चेलानै ओ समचार देबा ताँई भागरी ही। जणा चाणचुकई ईसु बानै मिल्यो अर खेयो, “नमस्कार” अर बे बिकै पगा म धोक खार बाकै पगानै पकड़ लिनी। जणा ईसु बाऊँ बोल्यो, “डरो मना थे मेरा भाई-भाणाऊँ बोलो क गलिल जाबा ताँई रवानगी करो अर बे मनै बठैई देखसी।” जद बे लूगाया गेला मई ही, जणा बे सिपाईड़ा जखा पेरो देर्या हा नगरी म गया। अर जोक्यु बठै होयो बिकै बारां म परधान याजकानै खे सुणाया। बे परधान याजक यहूदि नेता क सागै मिलर साजिस घड़ी। अर बा सिपाईड़ानै घणासारा पिसा देर, बाऊँ खया, “थे लोगानै खिज्यो क रातनै जद म्हें सोर्या हा जणा ईसु का चेला आर बिकी लासनै चुरा लेग्या। अर ज थारी आ बात राजपाल ताँई जासी जणा म्हें बिनै समजा देस्यां। थे बेफिकर रह्यो, म्हें थारो बाळई बाको कोनी होबा देवां।” पेरेदार पिसा लेर बंय्यांई कर्या जंय्यां बाऊँ खयो गयो हो। अर इ बातनै यहूदि मिनख आज ताँई मानै। ग्यारा चेला गलिल की बि डूँगरी प गया जठै जाबा ताँई ईसु बानै खयो हो। अर जद बे बिनै बठै देख्या जणा बे बिकै आगै धोक खाई। पण कया क हिया म सक बी हो। जणा ईसु बाकन आर खेयो, “ईस्बर नगरी अर धरती को सगळो अधिकार मनै दिओ गयो ह। इ ताँई थे जाओ अर धरती का सगळा कूणबा का मिनखानै मेरा चेला बणाओ अर परम-पिता, बेटा अर पबितर आत्मा क नाम म बतिस्मो द्‍यो। म थानै जखो हुकम दिओ हूँ बे सगळी बाता बानै मानबो सीखाओ। अर याद राखज्यो इ दुनिया की अंत घड़ी ताँई सदाई म थारै सागै रेहस्युं।” परमेसर का बेटा ईसु मसी को चोखो समचार अंय्यां चालू होयो। जंय्यां क यसाया परमेसर की खेबाळा की पोथी म मंडर्यो ह: “देख म तेरो गेलो बणाबा ताँई तेरै पेल्या मेरा हलकारानै भेजूँ हूँ। उजाड़ म एक हलकारो हेलो मारै ह क, ‘परबु ताँई गेलो बणाओ, अर बिको गेलो सिदो-सपाट करो।’” पाणी को बतिस्मा देबाळो यहून्ना उजाड़ क मांय आयो अर बो बठै पाणी को बतिस्मो देतो अर परचार करतो हो क, “थे थारा पापऊँ तौबा कर पाणी को बतिस्मो लेल्यो। जिऊँ परमेसर थारा पापनै माफ कर देसी।” यहूदिआ दिसावर अर यरूसलेम नगरी का घणकराक मिनख बिकी सुणबा बिकन गया। अर बे बठै जार आपका पापनै मान्या जिऊँ बो बानै यरदन नदि म पाणी को बतिस्मो दिओ। यहून्ना ऊँट क बाळाऊँ बणेड़ा गाबा पेरतो हो अर कमर प चमड़ा को पट्टो बांद्‍या करतो हो। बो टिड्या अर जंगली सहद खाया करतो हो। अर बो मिनखा म परचार करतो हो क, “मेरै पाछै एक जणो आर्यो ह। बो मेरूँ बोळो म्हान ह, अर म तो बिकाळा जूता का सळू खोलबा जोगोई कोनी अर म तो थानै पाणी को बतिस्मो द्‍युँ हूँ। पण बो थानै पबितर आत्मा को बतिस्मो देसी।” बा दिना म अंय्यां होयो ईसु गलिल का नासरतऊँ आयो अर बठै यरदन नदि म यहून्नाऊँ पाणी को बतिस्मो लिओ। जंय्यांई बो पाणी मऊँ बारनै निकळ्यो बो देख्यो की अकास खुलगो अर पबितर आत्मा कबूतर की जंय्यां बिपै उतरी। अर बादळा मऊँ हेलो आयो, “तू मेरो लाडलो बेटो ह, म तेरूँ बोळो राजी हूँ।” इकै पाछै पबितर आत्मा बिनै हात्युहात जोर देर उजाड़ म लेगी। उजाड़ म चाळिस दिना ताँई सेतान बिनै बिचासतो रिह्यो अर बो बठै जंगली जिनावरा क सागै रेह्तो अर ईस्बर नगरी दुत बिकी खेचळ करता हा। ईसु क गलिल जाबाऊँ पेली यहून्नानै कोठड़ी क मांयनै बंद कर दिओ गयो हो। ईसु गलिल म जार बठै परमेसर को चोखो समचार लोगानै सुणाबा लाग्यो। बो खयो, “परमेसर को राज सांकड़ै आबा को ठिक टेम आगो ह। जिमै परमेसर राज करसी। इ ताँई थे पापऊँ तौबा करो अर परमेसर का चोखा समचार प बिस्वास करो।” जद ईसु गलिल दरिआव क किनारै-किनारै जार्यो हो। जणा बो समोन अर समोन का भाई अंदरिआसनै देख्यो। बे मछी पकड़बाळा हा, अर बि टेम बे मछी पकड़बा ताँई दरिआव म जाळ गेरर्या हा। ईसु बाऊँ बोल्यो, “मेरै गेल आओ म थानै परमेसर ताँई मिनखानै ल्याबाळो बणास्युं।” बे जाळनै छोडर बिकै गेल होलिआ। अर बे जंय्यांई थोड़ासा आगै ढळ्याक जणा बानै जब्दि को बेटो याकूब अर बिको भाई यहून्ना दिख्यो बे न्याव म जाळ सुदार्या हा। ईसु बानै तावळोसो आपकै कनै बुलायो अर बे आपका बाप जब्दिनै मजुरा क कनै छोडर खुद बिकै गेल होगा। अर बे कफरनूम नगर गया अर यहूदिआ का आबाळा अरामहाळा दिन ईसु अरदास करबाळी झघा गयो अर मिनखानै परबचन सीखाबा लाग्यो। लोग बिका बचनानै सुणर ताजूब म पड़गा। क्युं क बो बानै सास्तरानै सीखाबाळा की जंय्यां परबचन कोनी देतो हो, पण अधिकार क सागै सीख देतो हो। बा यहूदिआ का अरदास घर म एक मिनख हो जिकै मांय सूगली ओपरी बलाय ही अर बो चाणचुक्योई जोरऊँ बार घालर बोल्यो, “ओ ईसु नासरी थारो म्हारो काँई लेणदेण के तू म्हानै तबा करबा ताँई आयो ह, म जाणू हूँ क तू परमेसर को खरो मिनख ह!” बिकै अंय्यां बोलताई ईसु बिनै दकाल्यो अर बिनै खयो, “तू चुपचाली रेह अर इमैऊँ बारनै निकळज्या।” सूगली ओपरी बलाय बि मिनखनै मरोड़र बार घालती बिमैऊँ निकळगी। इ बातऊँ सगळा मिनख चोरंगा होगा। अर आपसरी म बुजबा लाग्या, “आ बेधड़क सीखाबाळी नई सीख काँई ह? अर ओ सूगली ओपरी बलायनै बी अधिकार क सागै ओडावै ह, अर बे इको खयो मानै ह।” अर आ कारनामा की टो-टो गलिल अर बिकन का सगळा गाँवा म होगी। बो तावळोसो यहूदिआ का अरदास घरऊँ निकळर याकूब अर यहून्ना क सागै समोन अर अंदरिआस क घरा गयो। समोन की सासू क उन होरी ही जि बजेऊँ बा बिछावणा म पड़ी ही बिकै बारां म बे ईसुनै जदकी जद बताया ईसु बिकन जार बिको बावळ्यो पकड़र बिनै उठायो अर बा निरोगी होगी अर जणा बा बाकी सेवा-पाणी करबा लागी। दिन आथ्या पाछै लोग रोगलानै अर जिकै मांयनै फेंट होईड़ी ही बानै बिकन ल्याया। अर पूरी की पूरी नगरी बारना क आगै उल्ट पड़ी। ईसु बा रोगलानै निरोगो कर्यो जखा भात-भात की पिड़ा म हा। अर ओपरी बलाय बी काडी। अर बो बा ओपरी बलायनै बोलबा कोनी देतो हो क्युं क बे बिनै जाणै ही। बो भागपाट्याई आपका घरनै छोडर उजाड़ म चलेगो अर बो बठै अरदास करबा लाग्यो। समोन अर बिका साती-संगी ईसुनै ढुंढबा निकळ्या। बे बिनै ढुंढ लिओ अर बोल्या, “सगळा मिनख तनै ढुंढै ह।” इ बातनै सुणर ईसु बाऊँ बोल्यो, “आओ ल्यो आपा दुसरी नगर्या म चालां, जिऊँ म बठै का मिनखानै बी चोखो समचार दे सकूँ इ ताँई तो म आयो हूँ।” अर बो गलिल की सगळी अरदास करबाळी झघा म परमेसर को हेलो देतो गयो अर कई मिनखा मऊँ ओपरी बलायानै भगायो। ईसु कनै एक कोढी आयो अर बो ईसुऊँ हात जो'ड़र अरदास करबा लाग्यो अर बोल्यो, “ज थे चाओ तो मेरो कोढ धो सको हो।” ईसुनै बिपै तरस आयो अर बो बिपै हात धर बिऊँ खयो, “म चाऊँ हूँ, तेरो कोढ धुपज्या।” अर बि कोढी को कोढ हात्युहातई धुपगो। ईसु बिनै चेतार ओडायो, “देख तू इ बात क बारां म कोईनैई मना खिजे अर याजक क कनै जार खुदनै दिखा, अर मूसा की रीत गेल जंय्यां मंडेड़ो ह तेरो कोढ धुपबा की गुवाई म तू चढावो चढा।” पण बो बारनै जार सगळा म आ बात फेला दि जिऊँ ईसु बि नगरी म चोड़ै-धाड़ै कोनी जा सक्यो। पण बो उजाड़ म रिह्यो। अर बठै बी लोग च्यारूमेरूँ बिकन आर्या हा। क्युंक दिना क पाछै ओज्यु ईसु कफरनूम म आयो। अर मिनखानै इ बात को बेरो चाल्यो क बो घरा ह। अर बि घर क मांयनै अर बारनै अत्ता मिनख भेळा होया क बठै तिल धरबा की बी झघा कोनी री। अर ईसु मिनखानै परबचन देर्यो हो। अत्ती बारामई बठै च्यार मिनख एक भाळ भेयड़ा मिनखनै उठार ल्याया। पण घणीसारी भीड़ की बजेऊँ बे बिनै ईसु कनै कोनी लेज्या सक्या। जणा बे अंय्यां कर्या क बे बि कोठा की छात प चढगा अर जठै ईसु हो बठैऊँ बि छातनै हटाया अर बे बिनै खाटली प सुवार रस्सा क बळ ईसु कनै लटका दिओ ईसु बाकाळा बिस्वासनै देखर बि हवा भेयड़ा मिनखऊँ बोल्यो, “बेटा तेरा पाप धुपगा।” बि बठै सास्तरानै सीखाबाळा बी बेठ्या हा। बे आप-आपका हिया म सोचबा लाग्या, “ओ मिनख अंय्यां की बात क्युं बोलै ह। ओ तो परमेसर की बुराई करै ह, परमेसर क अलावा किकी मजाल क बो पापनै धो सकै?” ईसु आपकी आत्मा म जाणगो क बे आपका हिया म काँई सोचर्या हीं। अर बो बाऊँ बोल्यो, “थे थारा हिया म ओ काँई सोचर्या हो। सोरो काँई ह, इ हवा भेयड़ानै ओ खेबो क तेरा पाप धुपगा। नहिस ओ ओडाबो क खड़्यो हो अर तेरी खाटली उठार चाल पड़। पण म थानै सची बोलुँ हूँ क, मिनख का बेटानै इ धरती प पाप धोबा को हक ह।” अर ईसु हवा भेयड़ा मिनखनै बोल्यो, “म तनै बोलुँ हूँ खड़्यो होर तेरी गुद्ड़ी लेर तेरै घरा चल्यो जा।” अर बो खड़्यो होर तावळोसो आपहाळी खाटलीनै उठार सगळा की आँख्या क आगैई चलेगो। अंय्यां को काम देखर बाकै ताजूब होयो अर बे आ बोलर परमेसर की जे-जैकार करी क, “म्हें अंय्यां को कार कदैई कोनी देख्या।” ईसु ओज्यु गलिल दरिआव क किनारै गयो अर भीड़ बी बिकै गेल आरी ही जणा ईसु बानै सीख देबा लाग्यो। अर चालता-चालता ईसु हलफई का बेटा लेवीनै चुंगी चोकी प बेठ्यो देखर, बिनै बोल्यो, “मेरै गेल आ।” अर बो खड़्यो होर बिकै गेल होगो। इकै पाछै ईसु लेवी क घरा जार जिमबा लाग्यो। अर बठै बिकै अर बिका चेला क सागै चुंगी लेबाळा अर पापी बी जिमर्या हा क्युं क अंय्यां का घणकराक बिकै गेल आग्या हा। आ देखर फरिसी अर सास्तरानै सीखाबाळा बिका चेलाऊँ बोल्या, “ईसु चुंगी लेबाळा अर पापी मिनखा क सागै खावै पिवै ह!” बाकी बाता सुणर ईसु बाऊँ बोल्यो, “निरोगा मिनखानै बेद की जुर्त कोनी होवै। रोगलानैई बेद की जुर्त पड़ै ह। म धरम्या ताँई कोनी आयो पण पाप्या अर अछूता ताँई आयो हूँ।” एक बर अंय्यां होयो क, यहून्ना अर फरिसीया का चेला ईसु कनै आया। अर बा दिना म अंय्यां होतो हो क, यहून्ना अर फरिसीया का चेला बरत करता हा जणा बे ईसुनै बुजबा लाग्या, “यहून्ना अर फरिसीया का चेला तो बरत करीं हीं, पण तेरा चेला बरत क्युं कोनी करै?” ईसु बोल्यो, “कदै अंय्यां होयो हो के बिंद सागै अर बरात भूखी रेह्‍वै? जद ताँई बराती बिंद क सागै ह बे बरत कोनी करीं। पण अंय्यां का दिन बी आबाळा हीं जद बनड़ो बाऊँ न्यारो कर्यो जासी बे दिन बा ताँई बरत करबाळा होसी। “कोईबी पुराणा गाबा प नया सुती गाबा की कारी कोनी लगावै, अर कोई लगा बी ले जणा धोबा क पाछै बा नई कारी भेळी होर बि गाबल्यानै दुणो पाड़ गेरै। अंय्यांई नई अँगूरी पुराणी बखाल (खल्लड़) म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर दाखरस अर बखाल (खल्लड़) दोन्युई खराब हो जावै। इ ताँई नयो दाखरस नई बखाल (खल्लड़) मई भर्यो जावै ह।” अंय्यां होयो क, ईसु अर बिका चेला यहूदिआ का अरामहाळा दिन खेत मऊँ जार्या हा अर चेला चालता-चालता बाळी तोड़बा लाग्या। फरिसी बानै अंय्यां करता देखर ईसुऊँ बोल्या, “देख थारा चेला जखो काम अरामहाळा दिन बरजेड़ो ह बो काम क्युं करीं हीं?” ईसु बाऊँ बोल्यो, “थे ओ कोनी बाच्या क, जनाड़ै दाऊद अर बिकाळा सिरी भूखा हा अर बानै रोट्या की जुर्त पड़ी जणा बो के कर्यो? बो कंय्यां म्हायाजक अबियातार क टेम म परमेसर का घर म गयो। अर भेंट चढाईड़ी रोट्या खाई अर आपका साती-संग्यानै बी खुवाई, जानै याजक क अलावा कोईनै बी खाबा की इजाजत कोनी ही।” अर ईसु बाऊँ बोल्यो, “अरामहाळो दिन मिनखा क भला ताँई बणायो गयो ह मिनख अरामहाळा दिन ताँई कोनी बणायो गयो। इ ताँई मिनख को बेटो अरामहाळा दिन को बी परबु ह।” ईसु ओज्यु यहूदिआ का अरदास करबाळी झघा म गयो बठै एक मिनख हो जखो टुंडो हो। क्युंक मिनख ईसु प दोस लगाबा की ताक म बेठ्या हा। बे देखबो चावा हा क ईसु बि मिनखनै अरामहाळा दिन निरोगो करै क कोनी करै। ईसु टुंडा मिनखऊँ बोल्यो, “मिनखा क मांय खड़्यो हो।” अर ईसु बाऊँ बुजबा लाग्यो, “चोखो काँई ह? अरामहाळा दिन भलो करबो क बुरो करबो? कोईनै बचाबो क मारबो?” पण बाकी बोलती बंद होगी। ईसु झाळ्या म भर'र च्यारूमेर देख्यो अर बाका हियानै काठो देखर बो बोळो दुखी होयो। अर ईसु टुंडा मिनखनै बोल्यो, “तेरा हातनै सिदो करले।” अर बो आपका हातनै सिदो कर लिओ। अर बिको हात ओज्यु ठिक होगो। इकै पाछै फरिसी बठैऊँ चलेग्या अर हेरोद का गुट का मिनखा क सागै एको कर साजिस घड़ी क, ईसुनै कंय्यांसिक मारां। ईसु आपका चेला क सागै गलिल दरिआव क कनै गयो अर घणीसारी भीड़ बिकै गेल होगी जिमै गलिल, यहूदिआ, यरूसलेम, इदुमिया अर यरदन नदि क परलै नाकै का अर सूर-सैदा क कनै का मिनख हा। अर बे ईसु का कारनामानै जखा बो कर्या करतो हो बानै सुणर बिकै गेल आया हा। भीड़ बिनै चिथ नइ सकै इ बजेऊँ ईसु आपका चेलानै बोल्यो, “मेरै ताँई एक छोटीसी न्याव को जोगाड़ लगाओ।” ईसु बोळासारा मिनखानै निरोगो कर्यो हो इ ताँई घणासारा रोगला बिकै हात अड़ाबानै बिपै पड़र्या हा। जखा मिनखा म सूगली ओपरी बलाय होती बे बिनै देखताई बिकै पगा म धोक खाता अर सूगली ओपरी बलाय चिलाटी घालर बोलती, “तू परमेसर को बेटो ह।” पण बो बानै जोर देर चेतायो, “थे मनै परगट मना करो।” ईसु डूँगरी प चढगो अर बो जिनै चावै हो बानै आपकै कनै बुलायो, अर बे बिकन गया। बा मऊँ बो बारानै टाळर बानै आपका भेजेड़ा चेला बणायो। ईसु बानै इ ताँई टाळ्यो क बे बिकै सागै-सागै चालीं। अर बानै बो चोखो समचार सुणाबा ताँई भेज सकै। अर बे ओपरी बलायनै भगाबा को हक बी राख सकीं। जाका नाम अंय्यां हा, समोन जिको नाम बो पतरस काड्यो जब्दि को बेटो याकूब अर याकूब को भाई यहून्ना जिको नाम बो बूनरगीस काड्यो जिको मतबल “गाज को बेटो” होवै ह। अंदरिआस, फलिपूस, बरतुल्मै, मत्ती, थोमा, हलफई, हलफई को बेटो याकूब, तद्दे अर देस भगत समोन अर यहूदा इस्करोती ओ बोई ह जखो ईसुनै धोकाऊँ पकड़ायो हो। जद बो घरा गयो अर बठै ओज्यु घणीसारी भीड़ भेळी होगी इ बजेऊँ ईसु अर बिकाळा चेलानै रोटी खाबा को बी ओसाण कोनी हो। जणा ईसु का घरका सुण्या क ईसु बठै आएड़ो ह जणा बे बिनै लेबा ताँई आया। क्युं क लोग ईसु क बारां म खेता हा इको चित ठिकाणै कोनी। यरूसलेमऊँ आएड़ा धरमसास्तरी खेता हा क, “ईसु क मांयनै भूता को नाथ बालजबुल रळर्यो ह।” क्युं क ईसु बिकी सक्‍तिऊँ ओपरी बलायनै काडै ह। ईसु बानै बुलार मिसाल देर खेबा लाग्यो क, “सेताननै सेतान कंय्यां काड सकै। ज कोई राजपाट म फूट पड़ज्या जणा बो राजपाट कंय्यां चाल सकै ह। अर घरका क मांयनै फूट पड़ज्या जणा बो घर कंय्यां बस्यो रेह सकै ह। ज अंय्यांई सेतान खुद म फूट गेर खुद क सामै खड़्यो होज्या जणा बिको राज कंय्यां बण्यो रेह सकै ह? आ ढंगा तो बो तबा होज्यासी। ज कोई तगड़ा मिनख का घरनै लूटबो चावै जणा पेल्या बी तगड़ा मिनखनै बांदणो पड़सी जणा पाछैई बिको घर लूट्यो जा सकै ह। म थानै सची-सची खेऊँ हूँ क, मिनखा का सगळा पाप अठै ताँई परमेसर की बुराई करेड़ी बी माफ हो सकै ह पण जखो पबितर आत्मा की बुराई करै बिको पाप कदैई कोनी माफ कर्यो जा सकै। अर जखो अंय्यां को पाप करै बो जुग-जुग को पापी हो जावै।” ईसु आ बात इ ताँई बोल्यो क्युं क बठै खड़्या मिनख बोलर्या हा क इमै सूगली ओपरी बलाय रळरी ह। ईसु की माँ अर भाई बठै आया, अर बारनैई खड़्या होर बिनै बुलावो भेज्यो ईसु क च्यारूमेर भीड़ ही बे ईसुनै बोल्या, “तेरी माँ, भाणा अर तेरा भाईड़ा तनै बारनै बुलावै ह।” ईसु बाऊँ बोल्यो, “मेरी माँ अर भाई कूण ह?” ईसु आपकै च्यारूमेर बेठ्या मिनखानै देखर बोल्यो, “देखो अ मेरी माँ अर मेरा भाई हीं। जखो परमेसर क कह्या गेल चालै बोई मेरो सागे भाई-भाण अर माँ ह।” दरिआव क किनारै ईसु ओज्यु सीख देबा लाग्यो। अर बिकै च्यारूमेर घणीसारी भीड़ भेळी होगी। इ बजेऊँ बो दरिआव म खड़ी न्याव क मांयनै बेठगो अर लोग दरिआव किनारै खड़्या होगा। ईसु बानै सीख देबाळी मिसाल म कई बाता सीखातो हो, अर बो बानै अंय्यां सीखायो क, “सुणो, एक बार की बात ह एक किसान हो अर बो बीज बोबा ताँई गयो। अर जद बो बीज बोबा लाग्यो, जणा क्युंक बीज गेला क सारै पड़्या अर चिड़कल्या बानै चूगलेगी। अर क्युंक बीज कांकरा म पड़्या अर बानै चाए जत्ती माटी कोनी मिली जि बजेऊँ बे तावळाई निपज्या। पण सूरज उगताई तावड़ीऊँ बळगा क्युं क बे जड़ कोनी पकड़्या। अर क्युंक झाड़्या म जार पड़्या अर झाड़ी बाकै सागै बढर बानै दाब दिनी। जिऊँ बे कोनी फळ्या। अर क्युंक बीज उपळी माटी म पड़्या अर उपज्या जिऊँ खूब पणप्या, अर बाऊँ तीसुणा साठुणा अर सो गुणा पैदावार होई।” अर ईसु बानै बोल्यो, “जिकै कान ह बो बानै खोलल्यो।” जद ईसु एकलो हो जणा बिका कनै का मिनख बा बारा चेला क सागै बिऊँ मिसाल क बारां म बुजबा लाग्या ईसु बानै खेबा लाग्यो, “थानै तो परमेसर का राज को भेद खोलेड़ो ह पण दुसरा मिनखा ताँई तो सगळी बाता मिसाल देरई बोली ज्यावै ह।” जणाई तो, “देखता-देखता बानै कोनी सुजै अर सुणता-सुणता कोनी समळै अर जणाई तो बे आपका हियानै कुगेलाऊँ कोनी बदलै अर परमेसर बानै माफ कोनी करै।” ईसु बाऊँ बोल्यो, “आ मिसाल थारै पलै कोनी पड़ी जणा बाकी की मिसाला कंय्यां पलै पड़सी? किसान जखो उगावै ह बो तो परमेसर को बचन ह। जखा बीज गेला क मांयनै पड़्या अ बे लोग ह जखा बचन सुणै ह पण सेतान आर बि बचननै चुरा लेज्यावै ह। जखा बीज कांकरा म पड़्या अ बे लोग ह जखा बचननै सुणी हीं अर बिनै राजी-पेटाऊँ मानी बी हीं पण बो बचन बाकै हिया म जड़ कोनी पकड़ै जि बजेऊँ जद बापै दुख अर सताव आवै जणा बाको बिस्वास मर जावै ह। जखा बीज झाड़्या क मांयनै बोया गया अ बे लोग ह जखा बचन सुणी। पण जीबा को घ्यार, मो-माया को लालच अर मन की बुरी बाता बाका हिया मई बचननै दबा देवै ह, इ ताँई बे बीज फळै कोनी। अर जखा बीज उपळी माटी म बोया गया अ बे लोग हीं जखा बचन सुणर बिनै मानी हीं अर बिकै गेल फळीं, जिऊँ बे तीसुणा, साठुणा, सोगुणा अर सो गुणाऊँ बी घणो फळ ल्यावीं।” ईसु बाऊँ बोल्यो, “कोईनै दिओ जळार बिनै खाट अर कुंडा तळै म्हेलता देख्या हा के? पण बिनै आळ्या म म्हेलीं हीं जिऊँ बो सगळा कोठा म च्यानणो दे। जोक्यु बी ओला म ह बो चोड़ा म ल्यायो जासी अर जोक्यु ढकेड़ो ह बिनै खोल्यो ज्यासी। जिकै कान ह बो बानै खोलल्यो।” बो बाऊँ बोल्यो गोर कर सुणज्यो, “जंय्यां थे लोगा क सागै करो हो बंय्यांई परमेसर थारै सागै करसी अर बिऊँ बी बेसी करसी। जिकनै ह बिनै ओर दिओ जासी, अर जिकै कनै कोनी बिऊँ जोक्यु बिकन ह बो बी ले लिओ जासी।” ईसु बोल्यो, “परमेसर को राज माटी म बीज बोवणिया मिनख की जंय्यां ह। अर बो तो रातनै सोतो अर दिन म जागतो। अर कद बा बीजा म कुपळ आई अर कद बे बढ्या बिनै तो कोई बात की खबरई कोनी पड़ी। माटी खुदई उपजावै पेल्या कुपळ आवै जिकै पाछै बाळी अर बाळ्या म खूब दाणा। अर जद दाणा पक जावै ह जणा बो बेगोसो दांतळी लेर काटबा लागज्या क्युं क लावणी को टेम आ जावै ह।” ईसु ओज्यु बोल्यो, “आपा परमेसर का राजनै किऊँ परगट कर सकां हां, अर बिनै किकी मिसाल देर समजा सकां हां? ओ राई क दाणा की जंय्यां को ह जिनै माटी म बोयो जावै अर ओ दाणो सगळा बीजा मऊँ छोटो होवै। पण जद इनै बोयो जावै जणा ओ दाणो उगबा क पाछै धरती का सगळा बोजा मऊँ बडो होज्यावै ह। इकी डाळ्यां अत्ती बडी होवै क अकास का पंछी बापै घुरस्ळो घालै।” अंय्यां की मिसाल देर बो बानै बचन सुणाया करतो हो, अर बो बानै बाकी बुदी गेलई सीखातो हो। बिना मिसाल देर क्युंई कोनी सीखातो हो पण जद बो आपका चेला क सागै एकलो होतो जणा बो बानै सगळी बाता को भेद समजाया करतो हो। जनाड़ै आथण्या ईसु चेलानै बोल्यो, “आओ ल्यो आपा दरिआव क परलै-पार चालां।” इ बजेऊँ बे भीड़नै बठैई छोडर ईसु जि न्याव म बेठ्यो हो बि न्याव मई बिनै लेर रवाना होया। बठै ओर बी न्याव ही। बाकै रवाना होबा क पाछै जोरऊँ तौफान चालबा लाग्यो। अर दरिआव म झाल उठबा लागी अर न्याव क पछाड़ा मारबा लागी अर न्याव म पाणी भरबा लाग्यो। पण ईसु न्याव क गेलड़ै नाकै सुत्यो हो। चेला बिनै जगाया अर बिऊँ बोल्या, “ओ गरूजी थानै क्युंई परवा कोनी के? म्हें डूबबाळा हां।” ईसु खड़्यो होर तौफाननै दकाल्यो अर झालनै ओडायो, “थमज्या” अर तौफान थमग्यो अर बठै सक्यु स्यांत होगो। अर ईसु बाऊँ बोल्यो, “थे क्याले डरो हो? थानै हालबी बिस्वास कोनी के?” बे डरग्या अर आपसरी म बुजबा लाग्या, “ओ कूण ह? जिको खयो हवा अर पाणी बी मानै ह।” बे दरिआव क परलै नाकै गिरासेनिया नाम का परदेस म गया, ईसु जद न्याव मऊँ उतर्यो जणा बठै एक मिनख मूसाणा मऊँ ईसु कनै आयो बिकै मांयनै नुगरी ओपरी बलाय ही बो मूसाणा क मांयनै रेह्तो हो बिनै कोईबी साँकळाऊँ कोनी बांद सक्यो। क्युं क बिनै बोळी बार साँकळाऊँ बांद्‍या हा पण बो साँकळानै तोड़ देतो अर बानै पिस गेरतो, बिनै कोईबी बस म कोनी कर सक्यो। बो मूसाणा अर डूँगरा म चिलाटी घालतो भटकतो, अर खुदनै भाठाऊँ मारतो हो। बो ईसुनै परैऊँ देखर बिकन भागर गयो अर बिकै धोक खाई अर बार घालतो बोल्यो, “ओ ईसु परमपिता परमेसर का बेटा थारो म्हारो काँई लेणदेण? ज मनै दिन घाल्या तो, थानै परमेसर की सोगन लागै।” (क्युं क ईसु बिनै खयो हो, “हे नुगरी इकै मांयनैऊँ निकळज्या।”) अर ईसु बिनै बुज्यो, “तेरो नाम काँई ह?” बो ईसुऊँ बोल्यो, “मेरो नाम पलटण ह क्युं क म्हें घणीसारी हां।” अर बो ईसुऊँ हात जो'ड़र अरदास करबा लाग्यो, “म्हानै देस निकाळो मना दे।” अर बि टेम बठै डूँगर प सूल्डा को रेवड़ चरै हो। जणा बा पलटण ईसुऊँ अरदास कर बोली, “म्हानै तू बामै जाबा दे जिऊँ म्हें बामै रळज्यावां।” जणा बो बानै हुकम दिओ अर बे सूगली ओपरी बलाय बि मिनख मऊँ निकळर बा सूल्डा क मांयनै जा रळी। सूल्डा करीब दो झार हा। बे सूल्डा डूँगर क उपरऊँई गुळगची खार दरिआव क मांयनै जार पड़्या अर डूबर मरगा। सूल्डानै चराबाळा भागर नगरी अर बिकै सारली ढाणी-ढ़फाण्या म जार ओ समचार सगळानै खे सुणायो। बठै जखो होयो हो बिनै देखबा ताँई लोग भेळा होगा। बे ईसु कनै आर देख्या जणा बो मिनख जिमै बे नुगरी-आत्मा ही बो पूरा गाबा पेर्या अर सतूना म बेठ्यो हो। अर बे बिनै देखर डरग्या। अर बि घटनानै देखबाळा बा मिनखानै बताबा लाग्या क जिकै मांयनै नुगरी-आत्मा ही बिकै सागै अर सूल्डा क सागै काँई होयो? लोग ईसुऊँ अरदास करबा लाग्या क, “तू अठैऊँ चल्यो जा।” जणा ईसु न्याव म चढबा लाग्यो जणा बो मिनख जिमै पेल्या नुगरी-आत्मा ही ईसुऊँ अरदास करबा लाग्यो, “मनै बी तेरै सागै लेचाल।” पण ईसु बिनै नट्यो अर बिनै बोल्यो, “तेरा घरा जा अर तेरा मिनखानै अ सगळी बाता बता जखो परबु तेरै ताँई कर्यो ह। अर बानै अंय्यां बी बता क परबु कंय्यांसिक तेर प दया करी ह।” अर बो मिनख चलेगो अर दस नगर्या म जार बठै का मिनखानै बताबा लाग्यो क ईसु बि ताँई कतो बडो चमत्कार कर्यो ह। इ काम की बजेऊँ मिनखानै ताजूब होयो। ईसु ओज्यु दरिआव पार कर किनारै प हो जदई बिकै च्यारूमेर घणीसारी भीड़ भेळी होगी। जणा यहूदि अरदास घर का अधिकारी मऊँ याईर नाम को कोई मिनख हो, बो बठै आयो अर बो ईसुनै देख्यो अर बिकै पगा पड़र अरदास करतो बोल्यो, “मेरी नानी छोरी मरबाळी ह, म तेरूँ हात जोड़ खेऊँ हूँ मेरै सागै चालर तेरो हात बिपै धरदे जिऊँ बा बच जावै।” जणा ईसु बिकै सागै चाल पड़्यो अर घणीसारी भीड़ बी बिकै गेल होली। अर लोग बिपै टूटर पड़ै हा। बामै एक लूगाई ही जिकी बारा बरसाऊँ न्याह्णी कोनी थमरी ही। बा सगळा जतन कर देखली अर भात-भात का बेदा की दवाई लेर देखली पण भापड़ी क क्युंई अराम कोनी हो। अर जोक्यु बिकन पुण-पावलो हो बो बी इ बिमारी की दवा-दारू म बोया बेठी ही। पण बिकी दसा घणी खराब होगी। जद बा ईसु क बारां म सुण्यो जणा बा भीड़ क मांयनैऊँ ईसु क गेल आई, क्युं क बा आपका हिया म ध्यार राखी ही, “ज म ईसु का कुर्ता की कोर क हात अड़ा द्‍युँ जणा म निरोगी होज्यास्युं।” अर जंय्यांई बा बिका गाबा क हात अड़ायो। बिको हात्युहात लोय भेबो बंद होगो अर बा आपकी काया म जाणगी क म निरोगी होगी हूँ। अर जदकी जद ईसुनै बी लाग्यो क बिकै मांयनैऊँ सक्‍ति निकळी ह। ईसु गेलनै मुड़र बुजबा लाग्यो, “मेरा गाबा क कूण हात अड़ायो ह?” जणा ईसु का चेला बिनै बोल्या, “तू देखर्यो ह क भीड़ तनै च्यारूमेरूँ दबाया जारी ह। अर तू बुजै ह क थारै कूण हात अड़ायो?” पण ईसु च्यारूमेर देख्तो रिह्यो क अंय्यां को काम कूण कर्यो ह। बा लूगाई जाणती ही क बिकै सागै काँई होयो ह? बा डरती-डरती आई अर ईसु क पगा म पड़र सगळी बाता सची-सची बता दि। अर ईसु बिऊँ बोल्यो, “बेटी तू तेरा बिस्वास की बजेऊँ निरोगी करी गई ह, सुकऊँ चली जा अर बिमारीऊँ बची रेह।” बो अंय्यां बोलई रिह्यो हो अत्ता मई यहूदि अरदास घर का अधिकारी क घराऊँ लोग आया अर बे याईरऊँ बोल्या, “इब गरूजीनै दिन मना घालो क्युं क थारी छोरी तो चलती री।” ईसु बाकी बातानै सुण्यो अर याईरऊँ बोल्यो, “डरै मना बस तू तो बिस्वास राख।” अर ईसु बठै सगळानै छोड आपकै सागै पतरस, याकूब अर याकूब का भाई यहून्नानै लेर याईर क घरा गयो। अर बठै देख्यो क लोग जोर-जोरऊँ बार-घोड़ो मचा राख्यो ह। बो मांयनै गयो अर बाऊँ बोल्यो, “थे क्युं बार-तोबा मचार्या हो? छोरी तो मरी कोनी पण सुती ह।” बिकी इ बातनै सुणर लोग बिको तमासो करबा लाग्या। पण ईसु मिनखानै बारनै का'डर छोरी का माँ-बाप अर आपका चेलानै सागै लेर बठै गयो जि कोठा म छोरी ही। ईसु छोरी को हात पकड़्यो अर बोल्यो, “तलीता कूमी! (इको मतबल ह नानी छोरी) म तनै बोलुँ हूँ खड़ी होज्या।” अर बा नानी छोरी तावळिसी खड़ी होगी अर अठिनै-बठिनै चालबा-फिरबा लागी। (बा छोरी बारा बरस की ही) बे बिनै देखर ताजूब म पड़गा। ईसु क सागै जखा हा बानै बो चेतार ओडायो क इ बात क बारां म कोईनैई मना खिज्यो अर बो बोल्यो, “इ छोरीनै खाबा ताँई क्युं द्‍यो।” इकै पाछै ईसु बि झघानै छोडर आपकी नगरी क मांयनै गयो। बिका चेला बी बिकै सागै हा। यहूदिआ का अरामहाळा दिन ईसु यहूदिआ का अरदास घर म गयो अर बठै परबचन सीखाबा लाग्यो। ईसु को परबचन सुणर लोग ताजूब म पड़गा। बे बोलबा लाग्या, “इकै कनै अ बाता कठैऊँ आई। अर इनै ओ कूणसो ज्ञान देयड़ो ह, अर ओ बडा-बडा चमत्कार कंय्यां करै ह? के ओ बोई खाती कोनी? जखो मरीयम को बेटो अर याकूब, युसूफ, यहूदा अर समोन को भाई ह। इकी भाणा आपणै सारैई कोनी रेह्‍वै के?” इ बजेऊँ बे लोग ईसु की कोनी सुणी। ईसु बाऊँ बोल्यो, “परमेसर की खेबाळानै बिकी खुदकी भौम, रिस्तेदार अर परवारनै छोडर सगळी झघा मान मिलै ह।” अर बो बठै क्युंई चमत्कार कोनी कर सक्यो। पण क्युंक बिमारा प हात धर'र बानै ठिक कर्यो। बाका भेम की बजेऊँ ईसुनै बापै ताजूब होयो अर बो कनै का गाँवा म जातो अर सीखातो हो। ईसु आपका बारा चेलानै आपकै कनै बुलायो। अर बो बानै दो-दो जणानै बारनै भेजबा लाग्यो अर बो बानै सूगली ओपरी बलायानै काडबा को अधिकार दिओ। अर बानै हुकम दिओ, “थे थारी लाठीनै छोडर क्युंबी सागै मना लिओ नइ रोटी, नइ झोळी अर नइ बटूआ म रिपीआ थे लीतरा तो पेरल्यो पण दुसरो कुर्तो सागै मना लिओ। जिकै बी घरा थे जाओ बठैई बासो लेता रिह्यो जद ताँई थे बि नगरी म रेह्ओ। अर कोई गाँव अर नगरी म थारी आवभगत नइ होवै जणा थे बि नगरी अर गाँवऊँ बारनै चल्या जाओ अर बाकै खिलाप बानै चेताबा ताँई थे थारै पगा की धूळ बी बठैई झाड़ दिज्यो।” अर बे बठैऊँ जार पापऊँ तौबा करबा को हेलो पाड़्यो। अर बे घणीसारी ओपरी बलाय निकाळी अर घणासारा रोगलानै जेतून का तेलऊँ अभिसेक कर निरोगा कर्या। राजा हेरोद ईसु क बारां म सुण्यो, क्युं क ईसु की बाता सगळी झघा फेलगी ही। कई मिनख बोलता हा क, “पाणी को बतिस्मो देबाळो यहून्ना मरेड़ा मऊँ ओज्यु जिंदो होगो। इ बजेऊँ बिकै मांयनै चमत्कारी सक्‍ति काम करै ह।” पण कई बोलता हा क, “बो एलिआ ह।” अर कई बोलता हा क, “ओ कोई पुराणा टेम को परमेसर की खेबाळा की जंय्यां को एक ह।” पण हेरोद बिकै बारां म सुण्यो जणा बो बोल्यो, “ओ तो यहून्ना ह जिको सीर म कटवा दिओ हो, ओ ओज्यु जिंदो होगो।” हेरोदिआस क खया म आर हेरोद राजा खुदका सिपाईड़ानै भेजर यहून्नानै बांदके कोठड़ी म गिरवा दिओ। क्युं क हेरोद आपका भाई पिळीपुस क जिंदा होतासोता बिकी लूगाई हेरोदिआसऊँ ब्या कर लिआ हो। इ बजेऊँ यहून्ना हेरोदनै ओळमो दिओ क, “तू जखो अंय्यां को काम कर्यो ह ओ ठिक कोनी ह। तू तेरा भाई की लूगाईनै ब्याली ह।” इ बजेऊँ हेरोदिआ यहून्नाऊँ बेर राखबा लागी। अर चाती ही क यहून्ना मार्यो जावै। पण बा बिनै मार कोनी सकी। क्युं क हेरोद राजा यहून्नाऊँ डरतो हो। अर जाणतो हो क यहून्ना एक परमेसर को खरो अर धरमी मिनख ह। इ बजेऊँ बो बिकी रूखाळी करतो हो। अर हेरोद यहून्ना की बातानै सुणर बोळो घबरातो हो। इकै पाछै बी बिनै यहून्ना की बाता चोखी लागती ही। कुदरती हेरोदिआस क हात अंय्यां को मोको लाग्यो क एक दिन ओ हेरोद राजा खुदका जलमदिन प दरबारिआनै, सेनापत्यानै अर गलिल का मान्या-थान्या मिनखानै बुलायो। बि दिन हेरोदिआस की छोरी (बेटी) बठै आई अर नाचर, जिमबा आया सगळा मिनखानै अर राजा हेरोदनै राजी कर दि। इ बजेऊँ राजा बिनै बोल्यो, “माँग तू काँई चावै ह जखो तू माँगसी म तनै देस्युँ।” बो बचन देर बिनै बोल्यो, “तू माँग! ज तू मेरो आदो राजपाट बी माँगसी जणा म तनै दे देस्युँ।” अर बा आपकी माँ क कनै गई अर बिऊँ बुजबा लागी, “मनै काँई माँगबो चाए?” बिकी माँ बिनै बोली, “पाणी को बतिस्मो देबाळा यहून्ना को सीर।” अर बा तावळिसी भागर राजा क कनै गई अर बा राजाऊँ बोली, “मनै बतिस्मो देबाळा यहून्ना को सीर कटवार थाळी म धर'र इबकी स्यात दिओ जावै।” इ बातनै सुणर राजा बोळो दुखी होयो। पण हेरोद राजा होबा की बजेऊँ आपकी जबान अर म्हेमाना की बजेऊँ बो आपकी बेटीनै मना कोनी कर सक्यो। अर राजा एक जलादनै हुकम दिओ क बो यहून्ना को सीर का'टर ल्यावै। अर बो जलाद कोठड़ी क मांयनै गयो अर यहून्ना को सीर का'टर बिनै थाळी म धर बि छोरीनै दिओ। अर बा छोरी बिनै आपकी माँनै देदि। अर यहून्ना का चेला जद इ बात क बारां म सुण्या जणा बे बठै आर बिकी लासनै लेज्यार बिनै एक कबर क मांयनै धर दि। भेजेड़ा चेला भेळा होर ईसु कनै आया। अर जोक्यु बे कर्या अर सीखाया हा बो बिनै सक्यु खे सुणायो। बाकन मिनखा को रेळो लागर्यो हो। अर बानै रोटी खाबा को बी ओसाण कोनी हो। इ बजेऊँ ईसु बानै ओडायो, “आओ ल्यो आपा कोई उजाड़ म जार अराम करल्याँ।” बे न्याव म चढर उजाड़ म चलेग्या। बानै जाता देख लोग बानै पिछाण्गा अर सगळी नगर्या का मिनख भेळा होर भागर बिकै अगाऊ बठै पुग्या। जद ईसु न्यावऊँ किनारै प उतर्या जणा बे भीड़नै सामै खड़ी देखी। बानै बि भीड़ प तरस आयो क्युं क बे बि लल्डी की जंय्यां हा, जिको गुवाळ्यो कोनी होवै। अर ईसु बानै घणी सारकी बाता सीखाबा लाग्यो। अर जद दिन आथबा लाग्यो जणा ईसु का चेला बिकन आर बोल्या, “आ तो उजाड़ ह अर मोड़ो बी बोळो होगो। इ ताँई तू आ मिनखानै बिदा कर दे जिऊँ बे कनै का गाँव बसत्या म जार खुद ताँई रोटी मोल ले सकीं।” बो बाऊँ बोल्यो, “थेई आनै खाबा ताँई द्‍यो।” बे बिऊँ बोल्या, “के म्हें दो सो दिनारा की रोटी मोल लेर आवां अर बानै खुवावां?” ईसु बाऊँ बोल्यो, “जाओ अर देखो थारै कनै कत्ती रोटी ह।” अर बे बेरोपाड़र बिनै बताया क म्हारै कनै पाच रोटी अर दो मछी ह। अर बो बानै हुकम दिओ क सगळानै घास प पंगत म बिठा द्‍यो। अर बे सो-सो की अर पचास-पचास की पंगता बणार बेठगा। ईसु पाच रोटी अर दो मछीनै हात म लिओ अर ईस्बर नगरी कानि देखर परमेसर को धनेवाद कर्यो, अर बिकै पाछै बो रोट्या ली अर रोट्या का टुक-टुक कर चेलानै देतो गयो, जिऊँ बे मिनखानै जिमा सकै अर बा दो मछ्यानै बी बा सगळा म बाट दि। सगळा जणा खार धापगा। बिकै पाछै बी रोट्या अर मछ्याऊँ भरेड़ा बारा चोल्या बचगा। रोटी खाबाळा म पाच झार तो मोट्यार-मोट्यार हा। ईसु चेलानै बोल्यो क, “तावळासा न्याव म चढ ज्याओ अर बेतसदा जखो दरिआव क परलै नाकै ह बठै मेरूँ अगाऊ पुगो अर म आनै बिदा कर आऊँ हूँ।” बानै बिदा कर ईसु डूँगर प अरदास करबा चलेगो। अर दिन आथगो, न्याव दरिआव क बिचमै ही, जद ईसु किनारा प एकलो हो। अर ईसु देख्यो क चेला न्याव चलाता-चलाता सांस फुलगा हीं। क्युं क सामै की भाळ चालरी ही ईसु भागपाट्या दरिआव प चालतो होयो बाकन आयो अर बो बाऊँ अगाऊ जाबो चावै हो। पण बे बिनै दरिआव प चालतो देखर बिचार्या, “ओ तो भूत ह” अर बे कूकबा लाग्या। क्युं क बे सगळा बिनै देखर डरग्या। पण ईसु तावळोसो बाऊँ बाता कर्यो अर बोल्यो, “हिमत राखो, म हूँ, डरो मना।” अर बो बाकन न्याव प गयो अर भाळ थमगी अर बे ताजूब करबा लाग्या। अर बाकै रोट्या क चमत्कार क बारां म बी कोनी पलै पड़ी क्युं क बाकी मती बंदरी ही। अर बे दरिआव पार कर गनेसरत नगरी का किनारा प पुग्या अर बठैई न्यावनै बांद दि। अर न्यावऊँ उतर ताँई लोग बिनै पिछाण्गा। अर सारै की बसत्या म भागर गया अर बठैका मिनखानै बताया बे रोगलानै खाटल्या म घालर बिकन ल्याया। ईसु जि गाँव, नगरी अर बसत्या म जातो हो लोग बठैई रोगलानै बजारा म ल्यार बिऊँ अरदास करता हा क बो बानै आपका गाबा की कोर क हात अड़ाबा दे अर जत्ता बी बिकै हात अड़ाता हा बे निरोगा होज्याता हा। फरिसी अर सास्तरानै सीखाबाळा जखा यरूसलेमऊँ आया हा अर बे ईसु कनै भेळा होया अर बे ईसु का चेलानै हात धोया बिना रोटी खाता देख्या। (फरिसी अर सगळा यहूदि आपका बूडा बडका की लीक पिट्या करता हा, अर बे बिना हात धोया रोटी कोनी खाता हा। अर बे बजार म जार आता जणा बी बिना न्हाई-धोई कर्या रोटी-टुक कोनी खाता। अर आ बातानै छोडर ओर बी बोळी बाता ही जिनै बे निभाता हा, जंय्यां लोटा, घड़ा अर तामा का भांढानै धोबो अर मांजबो ) इ बजेऊँ बे फरिसी अर सास्तरानै सीखाबाळा ईसुनै बुज्या, “थारा चेला बूडा बडका का रिती-रिवाज प क्युं कोनी चालै, अर सूल हात धोया बिनाई रोटी खावै ह?” ईसु बाऊँ बोल्यो, “यसाया परमेसर की खेबाळो थारा जंय्यां का दोगला मिनखा ताँई परमेसर कानिऊँ ठिकई बोल्यो हो। जंय्यां पबितर सास्तर म मंडर्यो ह: ‘अ लोग होठाऊँ तो मेरो मान करीं हीं पण आको हियो मेरूँ दूर ह। अ बेकामई मेरी भगती करीं हीं। अर मिनखा का बणाएड़ा आदेसानै मेरा कर सीखावीं हीं।’ “थे परमेसर का हुकमानै टाळर मिनखा का रिती-रिवाजानै मानो हो। थे बोळा चतर हो जखा परमेसर का हुकमानै टाळर थाकाळा रिती-रिवाजानै मनवाबाळा हो। जंय्यां मूसा ओडायो ह, ‘थे थारी माँ अर बाप की ईज्जत करो, अर कोईबी मिनख आपकी माँ अर बाप को बुरो करै बिनै मार देणो चाए।’ “पण थे मिनखानै अंय्यां सीखार्या हो क जद थारा माँ-बाप थारै कनैऊँ कोई चिज माँगै जणा थे बानै बोलो हो क बा तो कोर्बान ह। (जिको मतबल परमेसरनै चढाईड़ी ह) अंय्यां बोलर थे थारा माँ-बापा की सेवा करबाऊँ बरी होज्यास्यो। अर थे अंय्यां सीखार मिनखानै बाका माँ-बापा की सेवा कोनी करबा द्‍यो अर थे अंय्यां का रिती-रिवाजाऊँ जखा थारा बणाएड़ा हीं आनै निभाबा ताँई परमेसर का बचननै टाळ द्‍यो हो। अर अंय्यां-अंय्यां का ओर बी घणासारा काम ह जखा थे करो हो।” ईसु ओज्यु भीड़नै बुलायो अर बो बोल्यो, “थे सगळा मेरी सुणो अर समजो। अंय्यां की कोईबी चिज कोनी ह जखी मिनखनै बारनैऊँ बिकै मांय जार बिनै सूगलो करै।” (पण जखी चिजा मिनखा क मांयनैऊँ निकळै ह बे बिनै सूगलो करै ह। जिकै कान ह बो बानै खोलल्यो।) अर ईसु भीड़नै बठैई छोडर घर क मांयनै गयो अर बिका चेला बिनै इ मिसाल क बार म बुजबा लाग्या। ईसु बाऊँ बोल्यो, “के थारै बी कोनी पलै पड़ी? के थे कोनी जाणो क जखी चिज बारनैऊँ मिनख क मांयनै जावै ह बा बिनै सूगलो कोनी करै। बे चिजा हिया म कोनी जावै पण पेट क मांयनै जावै अर निकळ जावै ह।” अर बो अंय्यां बोलर खाबाळी सगळी चिजानै सुद बतायो। पाछै ईसु बोल्यो, “मिनख हियाऊँ जखो बिचारै ह बो बिनै सूगलो करै ह। मिनख क हियाऊँ बुरा-बुरा बिचार, कुकरम, चोरी, हत्या, व्यबिचार, लोभ, कमिणोपुणो, दोगलोपुणो, ठगणो, बेहूदोपुणो, बळोकड़ोपूणो, कोईकी बुराई करबो, गुमान अर गोबुपुणो (मोथोपुणो) बारनै निकळ ह। अ सगळी बुरी-बुरी बाता मिनख क मांयनैऊँ निकळर बिनै सूगलो करै ह।” ईसु बि झघानै छोडर सूर नाम की नगरी म एक घर क मांयनै गयो। अर बो चावै हो क बिकै आबा को बेरो कोईनैई नइ पड़ै, पण बो कोनी छापळ सक्यो। ईसु क बारां म सुणर एक लूगाई जिकी छोरी म सूगली ओपरी बलाय ही बठै बेगीसी आर ईसु का पगा म पड़गी। आ लूगाई यूनानी ही अर इको जलम सिरीया क फनिकी परदेस म होयो हो, आनै यहूदि अछूत मानता हा। बा लूगाई ईसुऊँ अरदास करती बोली मेरी छोरी मऊँ ओपरी बलाय काड दे। ईसु बी लूगाईऊँ बोल्यो, “पेल्या टाबरानै धापबादे, टाबरा की रोट्यानै गंडक्ड़ा क आगै बगाबो चोखो कोनी।” बा लूगाई ईसुऊँ बोली, “परबु थाकाळी बी सची ह पण टाबर की रोटी का बिखरेड़ा माखणा गंडक्ड़ाई तो खावीं हीं।” ईसु बिकी बातनै सुणर बिऊँ बोल्यो, “तेरी इ बात की बजेऊँ थाकाळी छोरी क मांयनैऊँ ओपरी बलाय भागगी ह, इब तू राजी-खुसी जा।” अर बा लूगाई घरा जार आपहाळी छोरीनै देखी क, बिमैऊँ ओपरी बलाय भागगी अर बा खाट म आडी होरी ही। ईसु सूर नाम की नगरीऊँ बिदा होर, सैदाऊँ दस नगरी होतो होयो गलिल दरिआव क कनै पुग्यो। जणा लोग एक बोळानै जखो काबो बी हो ईसु कनै ल्याया। अर ईसुऊँ अरदास कर बोल्या, “ईसु थे थारो हात इपै धरद्‍यो।” ईसु बी बोळानै भीड़ऊँ नाकै लेगो अर आपकी आँगळ्या बिकै काना म घाल्यो अर थूकर बिकी जीब क हात अड़ायो। अर ईसु ईस्बर नगरी कानि देखर दयाऊँ भर'र सांस खिंची अर बिऊँ बोल्यो, “इप्फथा!” इको मतबल ह, खुलज्या। अंय्यां बोलताई बिका कान खुलगा अर जीब की आटी बी खुलगी अर बो चोखा ढंगऊँ बोलबा लाग्यो। अर ईसु बानै चेतार ओडायो क, “थे इ बात क बारां म कोईनैई मना खिज्यो।” पण बो बानै जत्तो नइ बताबा ताँई बोल्यो हो, बे बिऊँ बी घणी बी बातनै फिलाई। लोग ताजूब कर बोलबा लाग्या, “ईसु भलो-भलोई करै, अठै ताँई क बो बोळानै सुणबा अर गुँगानै बोलबा की सक्‍ति देवै ह।” बा दिना म एक बार ओज्यु ईसु कनै घणीसारी भीड़ भेळी होई। अर बाकन खाबा ताँई क्युंई कोनी हो। इ बजेऊँ ईसु आपका चेलानै बुलायो अर बानै बोल्यो, “मनै आपै तरस आर्यो ह क्युं क अ मिनख तीन दिनाऊँ मेरै सागै हीं अर आकै कनै खाबा ताँई क्युंई कोनी। अर म आनै भूखानैई घरा भेजूँ तो अ गेला मई आखता होर बठैई गोडा टेक देसी। क्युं क कई तो बोळी दूरऊँ आएड़ा हीं।” चेला ईसुनै बोल्या, “इ उजाड़ म म्हें रोटी कठैऊँ ल्यावां, जिऊँ आको पेट भर सकां।” ईसु बाऊँ बुज्यो, “थारै कनै कत्ती रोट्या ह?” बे बोल्या, “म्हारै कनै सात रोट्या ह।” ईसु भीड़नै हुकम दिओ थे पंगत बणार जमीन प बेठ ज्याओ। अर इकै पाछै ईसु बा सात रोट्यानै हात म लेर परमेसरनै धनेवाद देर बा रोट्या का टुक कर-कर आपका चेलानै देतो गयो अर चेला भीड़नै परोसता गया। बाकन थोड़ीसिक मछी बी ही ईसु बानै बी लिओ अर परमेसरनै धनेवाद देर चेलानै दिओ अर चेला मिनखानै देता गया। बे सगळा खार धापगा अर चेला रोट्याऊँ भरेड़ा सात चोल्या बठैऊँ उठाया। बठै करीब च्यार झार मिनख हा इकै पाछै ईसु बानै बठैऊँ बिदा कर्यो। अर खुद आपका चेला क सागै न्याव म चढर दलमनूता दिसावर चलेगो। फरिसी ईसु कनै जार बिऊँ जिदबा लाग्या क, तू सचमई परमेसर कानिऊँ भेजेड़ो ह जणा म्हानै ईस्बर नगरी की कोई सेलाणी दिखा। क्युं क बे ईसुनै फसाबो चावै हा। ईसु बाकी इ बातनै सुणर आपकी आत्मा म जोरऊँ हूँकार भर'र बाऊँ बोल्यो, “इ पिडी का लोग चमत्कार क्युं माँगै ह? आनै सचमई ईस्बर नगरी की कोई सेलाणी कोनी दिज्यासी।” इकै पाछै बो बानै छोडर ओज्यु न्याव प चढगो अर दरिआव क परलै नाकै चलेगो। चेला आपकै सागै रोटी लेबो भूलगा पण बाकन न्याव म एकई रोटी ही अर इनै छोडर बाकन खाबा ताँई क्युंई कोनी हो। ईसु बानै चेतार ओडायो क, “थे फरिसीया अर हेरोद का खमिरऊँ बचर रेहज्यो।” चेला आपसरी म बतळाबा लाग्या क ईसु आ बात इ ताँई बोलै ह क्युं क आपणा कनै रोटी कोनी ह। ईसु बाकी इ बातनै भापगो अर बाऊँ बोल्यो, “थे आपसरी म अंय्यां क्युं सोचो हो क म्हारै कनै खमिर हाळी रोटी कोनी ह? थारै हालबी क्युंई कोनी पलै पड़ी? थारी मती क्युं बंदगी। थारै आँख्या होतासोता बी थानै कोनी सुजै? अर थारै कान होतासोता बी थानै कोनी सुणै? थानै क्युंई याद कोनी? जनाड़ै म पाच झार मिनखानै पाच रोटीऊँ खुवायो हो बी दिन थे रोट्याऊँ भरेड़ा कत्ता चोल्या उठाया हा?” अर बे ईसुनै बोल्या, “बारा चोल्या।” “अर जनाड़ै म च्यार झार मिनखानै सात रोट्याऊँ धपायो हो बी दिन थे रोट्याऊँ भरेड़ा कत्ता चोल्या उठाया हा?” बे बोल्या, “सात चोल्या।” ईसु बाऊँ बोल्यो, “थारै हालबी पलै कोनी पड़ी के?” बे बेतसदा पुग्या अर बठै लोग एक आँदानै ईसु कनै ल्याया अर ईसुऊँ अरदास करता बोल्या बिपै हात धरद्‍यो। ईसु बी आँदा मिनख को हात पकड़्यो अर बिनै गाँव क बारनै लेगो। अर बिकी आँख्या म थूक्यो अर आपका हात बिपै धर्यो अर इकै पाछै बिनै बुज्यो, “तनै क्युं सुजै ह के?” बो बोल्यो, “मनै हाल तो धुन्दो-धुन्दो सुजै ह। मनै मिनख चालता दरख्ता की जंय्यां सुजीं हीं।” ईसु ओज्यु बिकी आँख्या प हात धर्यो जणा बो गोर कर देख्यो अर पाछै बिनै सूल सुजबा लाग्यो। अर बो सगळी चिजानै सूल ढंगऊँ देखबा लाग्यो। बो बिनै आ खेर घरा भेज्यो, “गाँव म मना जाए।” ईसु अर बिकाळा चेला कैसरिया फलिपी गाँव म जार्या हा गेला म ईसु बानै बुज्यो लोग मनै काँई खेवीं हीं, “म कूण हूँ।” बे ईसुनै बोल्या, “कई तो थानै बतिस्मो देबाळो यहून्ना अर कई एलिआ अर कई परमेसर की खेबाळा मऊँ एक समजै ह।” ईसु बाऊँ बोल्यो, “थे मनै काँई समजो हो?” पतरस बोल्यो, “थे मसी हो।” ईसु बानै चेतायो क, “थे इ बात क बारां म कोईनैई मना खिज्यो।” ईसु आपका चेलानै बताबा लाग्यो क मिनख का बेटानै दुख भोगणो ह। बो बोळो दुख भोगसी अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी। अंय्यां बोलर ईसु आपका चेलानै खुद क बारां म सगळी बाता सची-सची बता दिओ। जणा पतरस ईसुनै एकला म लेगो अर ईसुनै दकाल्यो। पण ईसु पाछो मुड़र आपका चेलानै देख्यो अर पतरसनै दकालर बोल्यो, “सेतान! मेरै कनैऊँ चल्योजा। तू परमेसर की जंय्यां कोनी सोचै पण मिनखा की जंय्यां सोचै ह।” ईसु आपका चेला अर भीड़नै आपकै कनै बुलार बानै बोलबा लाग्यो, “ज कोई मेरै गेल आबो चावै ह बो खुदनै तज'र, आपकी सुळी उठार मेरै गेल होले। जखो बी आपको पिराण बचाबो चावै ह बो आपका पिराणा की हानी उठासी। अर जखो बी मेर ताँई अर चोखा समचार ताँई आपका पिराण तजसी, बो बिनै बचासी। कोई मिनख आपका पिराणा की हानी उठार सगळा जगतनै जीत ले जणा बिनै काँई फाईदो? कोई चिज क बदला म मिनख खुदका पिराण दे सकै ह के?” ईसु बाऊँ बोल्यो, “जखो बी इ कुकरमी अर सचा परमेसरनै कोनी ध्यार बाळी पिडी मऊँ, मेरूँ अर मेरा बचनाऊँ मुंडो फेरसी जणा मिनख को बेटो बी जद बो पबितर ईस्बर नगरी दुता क सागै अर आपका परम-पिता की मेमा म आसी बो बी बा मिनखाऊँ मुंडो फेर लेसी।” ईसु बाऊँ बोल्यो, “म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह क बे जद ताँई परमेसर का राजनै बिकी सक्‍ति क सागै नइ देखले जद ताँई बानै मोत कोनी आसी।” छ दिना क पाछै ईसु आपका चेला मऊँ पतरस, याकूब अर यहून्नानै सागै लेर एकला म बो बानै उचासा डूँगर प लेगो। बठै बाकै सामै ईसु को रूप बदल्यो गयो अर ईसु का गाबा चमकबा लाग्या अर अंय्यां का धोळा होया जंय्यां का इ धरती को कोई धोबी कोनी धो सकै। ईसु क सागै एलिआ अर मूसा बी परगट होया। अर बे ईसुऊँ बतळार्या हा। पतरस बानै बतळातो देखर ईसुनै बोलबा लाग्यो, “ओ गरूजी ओ कतो चोखो ह क, आपा अठै हां। म्हानै अठै तीन पंडाळ बणाबा दे एक तेरो, एक मूसा को अर एक एलिआ को।” बे डरग्या हा इ ताँई पतरस आ बात बोली। जदई एक बादळ आयो अर बानै ढक लिओ अर बादळा मऊँ हेलो आयो, “ओ मेरो लाडलो बेटो ह। थे इकी सुणो।” अर बे तावळासा च्यारूमेर देखबा लाग्या बे आपकै सागै ईसुनै देख्या अर बानै बठै ओर कोईबी कोनी दिख्यो। जद बे डूँगरऊँ निचै आर्या हा ईसु बा तीन्यानै चेतार ओडायो क, थे जोक्यु बठै देख्यो हो बिकै बारां म जद ताँई मना खिज्यो जद ताँई मिनख को बेटो मरेड़ा मऊँ ओज्यु नइ जीज्या। अर बे इ बातनै आपका हिया क मांयनैई राखी पण बे सोचबा लाग्या क मरबा क पाछै जीबा को काँई मतबल ह? इ ताँई पाछै बे ईसुनै बुज्या, “यहूदि धरमसास्तरी क्याले बोलै ह क एलिआ को पेल्या आबो पक्को ह?” ईसु बाऊँ बोल्यो, “सगळी बातानै सई करबा ताँई पक्कोई एलिआ पेल्या आसी। पण मिनख का बेटा क बारां म पबितर सास्तर म ओ क्युं मंडर्यो ह क बिनै बोळो दुख भोगणो पड़सी। अर लोग बिनै ठुकरासी? म थानै बताऊँ हूँ, एलिआ तो पेल्याई आलिओ अर लोग जखो चावा हा बो बिकै सागै कर करालिओ जंय्यां की बिकै बारां म पबितर सास्तर म मंडर्यो ह।” जद बे बाकी का चेला कनै आया जणा बे देख्या क चेला क च्यारूमेर घणीसारी भीड़ भेळी होरी ह अर कई सास्तरानै सीखाबाळा बाकै सागै जिदर्या हीं। अर बे ईसुनै बठै देखर ताजूब करताई भागर बिकन गया, अर बिऊँ नमस्कार कर्यो। ईसु बाऊँ बोल्यो, “थे आऊँ क्युं जिदर्या हो।” भीड़ क मांयनैऊँ एक जणो बोल्यो, “ओ गरूजी म मेरो छोरो जिकै मांयनै गुँगी ओपरी बलाय ह बिनै तेरै कनै ल्यायो हो। आ गुँगी बलाय मेरा छोरा क हर कठैई फेट मार दे, अर इको मुंडो झागऊँ भरज्या अर ओ दांत पिसबा लागज्या अर ओ दिन-दिन सूक्यो जार्यो ह। म थाकाळा चेलानै खियो हो क बे इ बलायनै इकै मांयनैऊँ काड दे, पण बे इ बलायनै इमैऊँ कोनी काड सक्या।” ईसु बिकी बात सुणर बोल्यो, “अरै भेम करबाळो मिनखो, म कद ताँई थारै सागै रेहस्युं? अर थानै भोगस्युं? बि छोरानै मेरै कनै ल्याओ।” अर ओपरी बलाय जद ईसुनै देखी जणा बा छोरा क मरोड़ी देर बिनै जमीन प आडो पटक दिओ अर बिकै मुंडाऊँ झाग आबा लाग्या। ईसु बि छोरा का बापऊँ बुज्यो, “इकी आ दसा कदऊँ ह?” बो बोल्यो, “टाबरपुणाऊँई इकी दसा अंय्यां की ह। अर आ गुँगी बलाय इको नास करबा ताँई कदै तो इनै पाणी म अर कदै आग म पटकै ह पण म तेरूँ अरदास करूं हूँ क ज तू इको जापतो कर सकै ह तो जापतो करदे अर म्हारै प तरस खार म्हारो भलो कर दे।” ईसु बिनै बोल्यो, “तू अंय्यां क्युं खेवै ह कर सकै ह तो, बिस्वास करबाळा ताँई तो सक्यु हो सकै ह।” बि छोरा को बाप रोयो अर ईसुऊँ बोल्यो, “ओ परबु म बिस्वास राखूँ हूँ, पण मेरा भेमनै दूर करदे।” अर ईसु देखबा लाग्यो क बठै मिनखा की भीड़ लागबा लागी ह बो बि गुँगी-बेरी सूगली ओपरी बलायनै दकालर बोल्यो, “ए गुँगी-बेरी बलाय म तनै हुकम द्‍युँ हूँ इकै मांयनैऊँ निकळज्या अर इकै मांयनै कदैई मना आजे।” अर बा गुँगी बलाय बार घालर बि छोरा क मरोड़ी देर बिकै मांयनैऊँ निकळगी अर बो छोरो मरबाळोसो होगो कई मिनख तो खेबा लाग्या क ओ छोरो तो मरग्यो। पण ईसु बि छोरा को बावळ्यो पकड़र बिनै खड़्यो कर्यो अर बो छोरो खड़्यो होगो। अर जद ईसु घरा आयो जणा बिकाळा चेला एकला म बिनै बुज्या, “म्हें बि बलायनै क्युं कोनी काड सक्या?” ईसु बाऊँ बोल्यो, “अरदासनै छोडर अंय्यां की कुजातनै काडबा को कोई उपाय कोनी।” इकै पाछै बे बठैऊँ चलेग्या अर बे गलिल क मांयनैऊँ होर जार्या हा अर ईसु कोनी चावै हो क बिनै कोई पिछाणै, क्युं क ईसु आपका चेलानै सीखार्यो हो क, “मिनख को बेटो मिनखा क हाता धोकाऊँ पकड़ायो ज्यासी अर बे बिनै मार देसी पण बो तीन दिना क पाछै मोतऊँ जी उठ खड़्यो होसी।” पण आ बात बाकै पलै कोनी पड़ी अर बे बिऊँ ओज्यु बुजबा ताँई डरै हा। बे कफरनूम म आया अर ईसु आपहाळा चेलानै बुज्यो, “थे गेला क मांयनै काँई बतळार्या हा?” बे चुपचाला होगा क्युं क बे गेला क मांयनै आपसरी म बतळार्या हा क आपणा मऊँ कूणसो बडो ह। ईसु बेठ्यो होर बा बारानै आपकै कनै बुलायो अर बाऊँ बोल्यो, “थारै मऊँ ज कोई बडो बणबो चावै ह जणा बिनै सगळाऊँ छोटो अर सगळा को दास बणबो चाए।” अर ईसु बाकै सामै एक टाबरियानै खड़्यो कर्यो अर बिकै कांधा प हात धर बाऊँ बोल्यो, “जखो बी मेरा नामऊँ टाबरा को मान करै ह बो मेरो बी मान करै ह अर मनै भेजबाळा को बी मान करै ह।” यहून्ना ईसुनै बोल्यो, “ओ गरूजी म्हें एक मिनखनै तेरै नामऊँ ओपरी बलाय निकाळता देख्या अर म्हें बिनै इ बजेऊँ रोक्या क बो मिनख आपणा मऊँ कोनी हो।” पण ईसु बानै ओडायो, “थे बिनै रोको मना जखो बी मेरै नामऊँ चमत्कार करै ह बो मेरै बारां म तावळोसो बुरी बाता कोनी करै। अर जखो आपणै सामै कोनी बो आपणोई ह। अर सचमई जखा बी मिनख थानै मसी को जा'णर एक गिलास पाणी प्यावै ह जणा आ कोनी हो सकै क इको फळ कोनी मिलै। “मेर प बिस्वास करबाळा आ नान्या मऊँ कोई एकनै बी पाप म गेरबा ताँई आखळी बणै ह बि ताँई ओई चोखो ह क बिकै नाड़ म घरट घालर बिनै समदर क मांय फेक दिओ जावै। ज तेरो हात तनै ठोकर खुवावै बिनै काट फेक। क्युं क तेरै दो हात होतो सोता बी तू नरक का दरिआव म गेर्यो जावै जिकी आग कदैई कोनी बुजै इऊँ तो तेरो टुंडोई ईस्बर नगरी म बड़बो चोखो ह। [अर बठै को किड़ो मरै कोनी अर बठै की आग बूझै कोनी।] अर तेरो पग तनै ठोकर खुवावै जणा बिनै काट दे अर लंगड़ोई ईस्बर नगरी म बड़बो चोखो ह, इऊँ ओ भलो ह क दो पग होतासोता बी नरक का दरिआव क मांयनै गेर्यो जावै। [बठै को किड़ो ना तो मरै अर ना बठै की आग बूझै] ज तेरी आँख तनै पाप म गेरै जणा बिनै फोड़ दे। काणो होर परमेसर का राज म बड़बो तेरै ताँई चोखो ह। इऊँ क तेरै दो आँख होतासोता तू नरक म गेर्यो जावै। बठै मिनखानै खाबाळो किड़ो कोनी मरै अर मिनखनै जळाबाळी आग कोनी बूझै। जंय्यां लुण बलिनै पबितर करै ह बंय्यांई सगळा मिनखानै आगऊँ सुद कर्यो ज्यासी। लुण चोखो ह पण लुण मऊँ सुवाद चल्योजा जणा बिनै कंय्यां चरचरो कर सकां हां? थे थारै म लुण जंय्यां को सुवाद राखो अर आपसरी म स्यांतीऊँ रिह्यो।” इकै पाछै ईसु बठैऊँ बिदा होर यरदन नदि क पार यहूदि भौम म आगो। अर भीड़ की भीड़ बिकन भेळी होगी, ईसु बानै आपकी बाण गेल सीखाबा लाग्यो। जदई फरिसी बिकन आर ईसुनै बिचासबा ताँई बिऊँ बुजबा लाग्या क आपणा बिधान म कोई मोट्यार आपकी लूगाईनै छोड सकै ह के? ईसु बाऊँ बोल्यो, “मूसा थानै काँई हुकम दिओ ह?” बे बोल्या, “मूसा तो तलाकनामो मांडर देबा ताँई बोल्यो ह।” ईसु बाऊँ बोल्यो, “मूसा आ आदेसानै थारै मन की कल्डाईनै देखता मांड्यो ह। पण जद परमेसर आ सरस्टि बणायो हो जदऊँई बो बानै: ‘नर अर नारी कर बणायो हो। इ ताँई मोट्यार आपका माँ-बापनै छोडर आपकी लूगाई क सागै रेह्‍वै अर बे दोन्यु एक जीव होज्यासी, अर बे इब दो कोनी, पण एक जीव ह।’ “इ ताँई जिनै परमेसर जोड़्यो ह, बिनै मिनख न्यारो नइ करै।” जद ईसु घर क मांयनै हो जणा चेला बिनै इ बात क बारां म ओज्यु बुजबा लाग्या। ईसु बाऊँ बोल्यो, “जखो मिनख आपकी लूगाईनै छोडर दुसरो ब्या करै ह बो कुकरम करै ह क्युं क बो आपकी पेलड़ी लूगाई क बिस्वास जोगो कोनी। अर लूगाई आपका मोट्यारनै छोडर दुसरो ब्या करै ह जणा बा बी कुकरम करै ह।” लोग टाबरानै ईसु कनै लेर आया बे चावै हा क ईसु बा टाबरा क सीर प हात म्हेलै पण चेला बानै दकाल्या। ईसु झाळ्या म भर'र चेलानै ओडायो, “थे टाबरानै मेरै कनै आबा द्‍यो। अर आ टाबरानै मना नटो, क्युं क परमेसर को राज आ जंय्यां कोई ह।” ईसु बाऊँ बोल्यो, “म थानै सची-सची खेऊँ हूँ क जखो मिनख परमेसर का राजनै टाबरा की जंय्यां कोनी अपणावै बो परमेसर का राज म कोनी बड़ सकै।” ईसु बा टाबरानै कनै लेर बाकै सीर प हात धर'र बानै आसिरबाद दिओ। जद ईसु बठैऊँ निकळर गेला म जार्यो हो बठै एक मिनख भागतो होयो ईसु कनै आयो अर बो गोडा टे'कर हात जोड़र ईसुऊँ बुजबा लाग्यो, “ओ चोखा गरूजी म अजर-अमर जीवन पाबा ताँई काँई करूं?” ईसु बिऊँ बोल्यो, “तू मनै चोखो क्युं बोलै ह? परमेसरनै छोडर कोईबी चोखो कोनी, तू परमेसर का हुकमनै तो जाणै ह जंय्यां मंडेड़ो ह: ‘तू कुकरम मना करजे, चोरी मना करजे, हत्या मना करजे, झूठी गुवाई मना दिजे, छळ मना करजे, अर माँ-बापा को मान करजे।’” बो मिनख ईसुनै बोल्यो, “ओ म्हान गरूजी अ हुकम तो म टाबरपुणाऊँई मानतो आयो हूँ।” ईसु बिकै कानि देख्यो अर बिनै परेमऊँ बोल्यो, “तेरै मांयनै एक बात की कमी ह। तू जा अर तेरै कनै जोक्यु बी ह बिनै बेचर गरीबानै देदे। तनै ईस्बर नगरी म धन मिलसी, अर तू मेरै गेल होले।” इ बातनै सुणर बिको मुंडो लटकग्यो अर बो दुखी होर बठैऊँ चलेगो, बो पिसाळो मिनख हो। ईसु च्यारूमेर देखर आपका चेलानै बोल्यो, “जखा मिनखा को मो धन म ह बा मिनखा को ईस्बर नगरी म जाणो बोळो ओखो ह।” चेला ईसु की इ बातनै सुणर ताजूब करबा लाग्या इ ताँई ईसु बाऊँ ओज्यु बोल्यो, “मेरा टाबरो परमेसर का राज म जाणो कतो ओखो ह? पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।” बे बोळो ताजूब कर आपसरी म बतळाबा लाग्या, “ज अंय्यां की बात ह जणा कूण बचायो ज्यासी?” ईसु बाकै कानि देखर बोल्यो, “आ मिनखाऊँ अणहोती बात ह, पण परमेसर सक्यु कर सकै ह।” जणा पतरस ईसुनै बोल्यो, “म्हें सक्यु तज'र तेरै गेल आया हा।” ईसु बोल्यो, “म थानै सची-सची खेऊँ हूँ ज कोई मेरै ताँई अर चोखा समचार ताँई घर, सागे भाई-भाण, माँ-बापा, टाबर-टिकरा, अर खेतनै छोड दिओ ह बिनै अठैई इ जुग म सो गुणा घर, सागे भाई-भाण, माँ, टाबर-टिकर अर खेत मिलसी अर सागै की सागै अजर-अमर जीवन मिलसी। पण बोळा ह जखा की आज बूज ह बाकी बूज कोनी होसी अर जखा की बूज कोनी बाकी बूज होज्यासी।” बे यरूसलेम जार्या हा गेला म ईसु आपका चेला क आगै-आगै चालर्यो हो। चेला ताजूब म पड़ग्या अर बाकै सागै जखा मिनख हा बे डरर्या हा। ईसु आपका बारा चेलानै एक कानि लेगो अर बानै बताबा लाग्यो क मेरै सागै काँई-काँई बितबाळी ह। ईसु बानै बोल्यो, “थे सुणो आपा यरूसलेम म जार्यां हां, मिनख का बेटानै धोकाऊँ पकड़र परधान याजका अर सास्तरानै सीखाबाळानै सूप दिओ ज्यासी। अर बे बिनै जानऊँ मारबा की सजा देर परमेसरनै नइ ध्यारबाळा मिनखा का हाता म सूप देसी। बिको तमासो बणायो जासी अर बिपै थूकिंगा अर तड़ा मारसी बिनै जानऊँ मार देसी पण बो तीसरा दिन ओज्यु जिंदो होज्यासी।” जब्दि का बेटा याकूब अर यहून्ना ईसु कनै आया अर ईसुऊँ बोलबा लाग्या, “ओ गरूजी म्हें चावां हां क जोक्यु बी म्हें थारूँ माँगा, बो थे म्हानै द्‍यो।” ईसु बिनै बुज्यो, “थे मेरूँ काँई चाओ हो?” बे ईसुनै बोल्या, “थारै मेमाभर्या राज म थे म्हानै थारै दाया-बाया बेठबा को सोभाग द्‍यो।” ईसु बाऊँ बोल्यो, “थे कोनी जाणो क थे काँई माँगो हो। जखो पिड़ाऊँ भर्यो बाटको म पीबा जार्यो हूँ के थे बिनै पी सको हो? अर जखो दुखा को बतिस्मो म लेबा जार्यो हूँ के थे बिनै ले सको हो?” बे ईसुनै बोल्या, “म्हें अंय्यां कर सकां हां!” ईसु बाऊँ बोल्यो, “थे ओ बाटको बी पीस्यो अर ओ दुखा को बतिस्मो बी लेस्यो जखो म लेबाळो हूँ। पण मेरै दाया अर बाया बेठबा को हक म कोनी दे सकूँ क्युं क जखा ताँई परमेसर आ झघा बणाई ह बानैई बो आ झघा देसी।” जद दस चेला इ बातनै सुण्या जणा बे याकूब अर यहून्ना प लाल-ताता होगा। ईसु बानै आपकै कनै बुलायो अर बाऊँ बोलबा लाग्यो, “थे जाणो हो क परमेसरनै नइ ध्यारबाळा मिनखा का राजा मिनखा प हुकम चलावीं हीं अर बाका सरदार जोर जमावीं हीं। पण थारै म अंय्यां कोनी थारै म जखो बी बडो बणबो चावै बो सगळा को दास बणै। अर थारै म जखो बी सऊँ पेलो होबो चावै बो सगळा को दास बणै। मिनख को बेटो सेवा-पाणी कराबा ताँई कोनी आयो। पण सेवा-पाणी करबा अर बोळासारा मिनखानै छुटाबा ताँई आपका पिराण देबा आयो ह।” बे यरियो गाँव क मांयनै आया अर ईसु क सागै बिका चेला अर घणीसारी भीड़ ही बे यरियो मऊँ निकळर जार्या हा, जणा तिमाई को बेटो बरतिमाई जखो आँदो मंगतो हो बो सड़क क किनारै बेठ्यो हो जद बो सुण्यो क ईसु नासरी अठैऊँ जार्यो ह बो जोर-जोरऊँ खेबा लाग्यो, “ओ दाऊद का बेटा ईसु मेर प दया करजे।” लोग बिनै दकालर बोल्या, “तू चुपचालो रेह पण बो ओर बी जोर-जोरऊँ खेबा लाग्यो ओ दाऊद का बेटा मेर प दया करजे।” ईसु बिकी सुणर डटगो अर ओडायो, “बिनै मेरै कनै ल्याओ।” अर बे लोग बी आँदानै बुलाया अर बिनै बोल्या, “राजी हो अर खड़्यो हो तनै ईसु बुलावै ह।” बो आपका गाबा बगार बेगोसो उठ्यो अर ईसु कनै आयो। ईसु बिनै बोल्यो, “तू के चावै ह क म तेरै ताँई करूं?” बो आँदो मिनख बोल्यो, “ओ गरूजी म देखबो चाऊँ हूँ।” ईसु बोल्यो, “चल्यो जा तेरो बिस्वास तनै निरोगो कर दिओ ह।” जणा बो बठैई देखबा लागगो अर ईसु क गेल होलिओ। जद बे यरूसलेम क सांकड़ै जेतून डूँगर की ढाळ प बसेड़ी बेतफगे अर बेतनिया नगरी क कनै आया जणा ईसु आपका चेला मऊँ दो जणानै अंय्यां बोलर अगाऊ भेज्यो, “थे आगला गाँव म जाओ। थानै बि गाँव म एक गधेड़ी को बच्यो बांदेड़ो मिलसी जिनै इब ताँई कोई काम म कोनी लिओ ह बिनै खोलर ल्याओ। अर थानै कोई बुजै थे ओ काँई करो हो? थे बानै बोलज्यो ‘ओ परबुनै चाए ह’ अर बे थारै सागै बिनै भेज देसी।” बे जार बि गधेड़ी का बच्यानै गळिआरा म कुआड़ा क भंदेड़ो देखर बिनै खोलबा लाग्या बठै खड़्या मिनखा मऊँ कई मिनख बानै बोल्या, “थे काँई करो हो, इनै क्याले खोलर्या हो?” जंय्यां ईसु बानै आदेस दिआ हा, बंय्यांई बे बा मिनखानै बोल्या अर बे बाकी बात सुणर बानै गधेड़ी का बच्यानै लेज्याबा दिओ। बे गधेड़ी का बच्यानै ईसु कनै लेग्या, अर बिपै आपका गाबा गेर्या अर ईसु बिपै बेठगो। जद ईसु बि बच्या प बेठर जार्यो हो जणा लोग गेला म आपका गाबा बिछाबा लाग्या अर कई लोग खेताऊँ हरी-भरी डाळ्यां का'टर आवभगत करबा ताँई बिछा दि। अर जत्ताबी मिनख ईसु क आगै-पिछै हा बे जोर-जोरऊँ जे-जैकार कर बोलर्या हा, “परबु की मेमा हो, ओ परबु क नामऊँ आर्यो ह इनै परमेसर आसिरबाद दे। म्हारा बडका दाऊद को राज आर्यो ह इनै परमेसर आसिरबाद दे। ओ म्हान ह ईस्बर नगरी म परबु की मेमा हो!” ईसु यरूसलेम पुग्यो अर बठै मनदर म गयो अर बठै बो च्यारूमेर की सगळी चिजानै देख्यो अर मोड़ो होगो जणा बो आपका चेला क सागै बेतनिया गयो। आगला दिन जद बे बेतनिया मऊँ चाल पड़्या जणा ईसुनै भूख लागी। ईसु दूरऊँ एक अंजीर को पेड़ देख्यो जखो हर्यो-भर्यो हो बो बिकन गयो जिऊँ बिका फळ खा सकै। पण बि पेड़ म पत्तानै छोडर क्युंई कोनी हो। क्युं क बा अंजीर का फळा की रुत कोनी ही। ईसु बि पेड़ऊँ बोल्यो, “इबऊँ तेरो फळ कोई कदैई कोनी खासी।” अर इ बातनै ईसु का चेला सुणर्या हा। जद बे यरूसलेम आया, जणा ईसु मनदर म गयो अर बठै जत्ताबी बेचबाळा अर खरीदबाळा हा बानै बठैऊँ बारनै काडबा लाग्यो। रिपीआ को लेणदेण करबाळा का पाटियानै बगा दिओ अर कबूतर बेचबाळा का पाटियानै उंदो कर दिओ। अर मनदर मऊँ कोईनैई क्युंई कोनी लेज्याबा दिओ। इकै पाछै बो बानै सीख देतो होयो बाऊँ बोल्यो, “पबितर सास्तर म मंडर्यो ह, ‘मेरो मनदर धरती का सगळा कूणबा का मिनखा ताँई अरदास को घर होसी।’ पण थे इ घरनै डाकूआ की खोळ बणा दि।” अर जद परधान याजक अर धरमसास्तरी ईसु की इ बातनै सुणी बे ईसुनै मारबा को गेलो ढुंढबा लाग्या। पण भीड़ ईसु क परबचना म रमर बिकै सागै ही इ बजेऊँ बे ईसुनै मारबाऊँ डरै हा। अर दिन आथगो जणा बे यरूसलेम नगरीऊँ बारनै चलेग्या। आगला दिन जद ईसु आपका चेला क सागै जार्यो हो जद बे बि अंजीर का पेड़नै पत्ताऊँ लेर जड़ ताँई सूकेड़ो देख्यो अर पतरसनै ईसु की बोलेड़ी बात याद आई बो ईसुनै बोल्यो, “ओ गरूजी देखो जि पेड़नै थे दूरसिस दिआ हा बो सूकग्यो ह!” ईसु बाऊँ बोल्यो, “परमेसर म बिस्वास राखो म थानै सची-सची खेऊँ हूँ ज कोई इ डूँगरऊँ ओडावै क ‘तू अठैऊँ हटर समदर क मांयनै डूबज्या’ अर बि मिनख क हिया म इ बात प जमाई भेम नइ होवै पण इकै बदला म पूरो बिस्वास होवै जणा जंय्यां बो आपका मुंडाऊँ बोल्यो बि ताँई बंय्यांई होज्यासी। जणाई म थानै खेऊँ हूँ थे अरदास म ओ बिस्वास कर माँग्या करो क थे जोक्यु बी माँगर्या हो बो थानै मिलगो ह जणा बो थानै मिल ज्यासी। अर जद थे अरदास करबा लागो जदई थे बा मिनखानै माफ करो जखा थारो बुरो कर्यो ह जिऊँ थारो परम-पिता जखो ईस्बर नगरी म ह बो थारा पाप माफ करसी। (अर थे बिनै माफ कोनी करो जणा थारो बाप जखो ईस्बर नगरी म ह बो बी थारा पाप माफ कोनी करसी।”) बे ओज्यु यरूसलेम म आया। ईसु मनदर म घूमर्यो हो जद परधान याजक, सास्तरानै सीखाबाळा अर यहूदि नेता ईसु कनै आया। अर बे ईसुनै बोलबा लाग्या, “तू अ काम किका हकऊँ करै ह अर ओ हक तनै कूण दिओ ह?” ईसु बाऊँ बोल्यो, “म बी थानै एक सुवाल बुजूँ ज थे मनै इ सुवाल को जुबाब देद्‍यो जणा म बी थानै बता देस्युँ क म ओ काम किका हकऊँ करूं हूँ? थे बताओ यहून्नानै पाणी को बतिस्मो देबा को हक परमेसरऊँ मिल्यो क मिनखाऊँ?” बे ईसु की इ बातनै सुणर आपसरी म बतळाबा लाग्या, बे बोल्या, “ज आपा खेवां बिनै परमेसरऊँ हक मिल्यो ह जणा ईसु आपानै खेसी क, ‘थे बिपै बिस्वास क्युं कोनी कर्या।’ अर आपा खेवां, बिनै मिनखाऊँ हक मिल्यो हो जणा अ लोग आपणा प झाळ काडसी, क्युं क अ लोग यहून्नानै परमेसर की खेबाळो मानी हीं।” इ बजेऊँ बे ईसुनै बोल्या, “म्हें कोनी जाणा क बिनै ओ हक कठैऊँ मिल्यो हो?” ईसु बाकी इ बातनै सुणर बाऊँ बोल्यो, “म बी थानै कोनी बताऊँ क म किका हकऊँ ओ काम करूं हूँ।” ईसु बाऊँ मिसाल देर खेबा लाग्यो, “एक बार अंय्यां होयो एक मिनख अँगूरा को बाग लगायो अर बि बाग क च्यारूमेर बाड़ बांदी। अर बठैई अँगूरा को रस काडबा ताँई कूंड अर निगरानी करबा ताँई एक मचाण बणायो। अर इकै पाछै बो इ बागनै ठेका प देर दिसावर चलेगो। अँगूर पकबा की रुत म बो मिनख दिसावरऊँ आपका दासनै बा किसाना क कनै अँगूरा का बाग म भेज्यो जिऊँ बे बा किसानाऊँ अँगूरा को हिसाब ले सकै। पण बे किसान बि दासनै पकड़र मार्या अर बिनै रितोई भेज दिओ। इकै पाछै अँगूरा का बाग को मालिक दुसरा दासनै बठै भेज्यो पण बे किसान बिनै बी मार्या अर बिको सीर फोड़र बिकी बेजती कर्या। बो मालिक तीसरा दासनै बठै भेज्यो पण बे किसान बि दासनै मार गेर्या। अंय्यांई बो बोळा दासानै भेज्यो पण बे किसान कयानै तो पिट्या अर कयाकी जान लेली। इकै पाछै बि बाग का मालिक क कनै भेजबा ताँई बिको लाडलो बेटोई बच्यो। अर बो आ सोचर क बे इको तो आदर करसी। इ बजेऊँ बो आपका बेटानै बठै भेज्यो। बे किसान मालिक का बेटानै आतो देख आपसरी म बतळाबा लाग्या, ‘ओ अठै को वारिस ह। आओ आपा मिलर इनै मार देवां। अंय्यां करबाऊँ अँगूरा को बाग आपणो होज्यासी।’ अर बे सगळा किसान मिलर बिनै मार दिओ अर अँगूरा का बाग क बारनै बगा दिओ। इ बातनै सुणर अँगूरा का बाग को मालिक बा किसाना क सागै काँई करसी?” बो बठै ज्यासी अर बा किसानानै मारसी अर अँगूरा को बाग दुसरा किसानानै दे देसी। थे सास्तर म ओ बचन कोनी बाच्यो के: “जि भाठानै कारिगर ख्याई जोगो कोनी जाण्या बोई भाठो कूणानै समाबाळो निकळ्यो। अर ओ आँख्या क सामै अजूबो ह इनै परबु कर्यो ह।” बठै खड़्या सास्तरी समजगा क ओ आ मिसाल बापैई बोली ह। इ बजेऊँ बे ईसुनै केद करबा ताँई कोई गेलो ढुंढबा लाग्या। पण बे मिनखाऊँ डरता हा जिऊँ बे बिनै बठैई छोडर चलेग्या। बे ईसुनै फसाबा ताँई फरिसीया अर हेरोद का गुट का क्युंक मिनखानै बिकन भेज्या। बे ईसु कनै गया अर बिऊँ बोलबा लाग्या, “ओ गरूजी म्हें जाणा हां क तू बोळो ईमानदार ह अर तू इ बात की परवा कोनी करै क लोग तनै काँई खेवै ह अर तेरा बारां म काँई सोचै ह। अर तू मिनखा को मुंडो देखर बाता कोनी करै पण परमेसर क कनै जाबा ताँई जखो गेलो ह बिनै तू सच-सच बतावै ह। पण म्हें तनै बुजां हां क कैसरनै चुंगी देणी चाए क कोनी?” ईसु बाकी चालनै भापगो अर बाऊँ बोल्यो, “थे मनै क्युं बिचासो हो? थे मेर कनै एक सीक्को ल्याओ जिऊँ म देखूँ।” बे ईसुनै एक सीक्को दिओ। अर ईसु बाऊँ बुज्यो, “इपै किकी सकल अर किको नाम ह?” बे बोल्या, “कैसर की।” ईसु बाकी इ बातनै सुणर बोल्यो, “जखो कैसर को ह बो कैसरनै द्‍यो अर जखो परमेसर को ह बो परमेसरनै द्‍यो।” बे ईसु की इ बातनै सुणर ताजूब म पड़गा। इकै पाछै सदुकी ईसु कनै आया अ मानी हीं क मरेड़ी काया ओज्यु कोनी जीवै अर बे ईसुनै बुजबा लाग्या, “ओ गरूजी मूसा म्हारै ताँई मांड्यो ह क जिको भाई मर जावै अर बिकी लूगाई क कोई टाबर नइ होवै जणा मरबाळा को भाई बिकी लूगाईऊँ ब्या करले जिऊँ बो आपका भाई को वंस बढावै। एक बार सात भाई हा। बामैऊँ बडोड़ा को ब्या होयो अर क्युंक दिना क पाछै बो मरग्यो बिकी लूगाई क कोई टाबर-टिकर कोनी हो। बिको दुसरो भाई बिऊँ ब्या कर लिओ अर बो बी क्युंक दिना क पाछै मरग्यो अर बिऊँ बी बिकै कोई टाबर कोनी होयो। तीसरो भाई बी अंय्यांई कर्यो अर बिकै सागै बी बोई होयो। अर अंय्यांई सात्यु का सात्यु बे ओलादई मरगा अर बिकै पाछै बा लूगाई बी मरगी। बे ईसुनै बुजबा लाग्या क सगळी मरेड़ी काया ओज्यु जिसी बि दिन बा सात मऊँ किकी लूगाई होसी। क्युं क बे सात्युई बिनै ब्याली ही।” ईसु बाऊँ बोल्यो, “थे आ बातानै गळत लेली क्युं क थे सास्तरानै अर परमेसर की सक्‍तिनै कोनी जाणो। जद मरेड़ी काया ओज्यु जिसी जणा बाको ब्या कोनी होसी पण बे ईस्बर नगरी म ईस्बर नगरी दुता की जंय्यां होसी। अर जठै ताँई मरेड़ी काया क जीबा को सुवाल ह, थे मूसा की पोथी म ओ कोनी बाच्यो के? जद परमेसर बळती झाड़ी मऊँ बिऊँ खयो: ‘म अब्राहम को परमेसर हूँ, इसाक को परमेसर हूँ अर याकूब को परमेसर हूँ।’ “इको मतबल ओ ह क बे मरगा पण बे मरेड़ा कोनी जिंदा हीं जणाई बो मर्या खप्या को कोनी पण जीता-जागता को परमेसर ह। थे तो भेम म पड़्या हो।” बठै एक यहूदि सास्तरानै सीखाबाळो आयो अर बो बानै बठै जिरै करता अर ईसु बा सदुकीयानै सागेड़ो जुबाब देर्यो हो आ देखर बो ईसुनै बुज्यो, “सगळा हुकमा मऊँ कूणसो बडो ह?” ईसु बिऊँ बोल्यो, “सगळा मऊँ बडोड़ो ओ ह। ‘सुणो इजरायलीओ आपणा परमेसरनै छोडर कोई परबु कोनी ह। अर थे आपका सगळा हियाऊँ सगळी आत्माऊँ सगळी बुदीऊँ अर आपकी सगळी सक्‍तिऊँ परमेसरऊँ परेम करो।’ अर दुसरो हुकम ओ ह ‘तू तेरा पड़ोसीऊँ बंय्यांई परेम कर जंय्यां तू खुदऊँ परेम करै ह।’ “आ हुकमाऊँ बडो कोईबी हुकम कोनी।” यहूदि सास्तरानै सीखाबाळा ईसु की इ बातनै सुणर बोल्या, “ओ गरूजी थारो ओ खेबो बी सच ह क परमेसर एकई ह अर बिनै छोड दुसरो कोई कोनी। आपका सगळा हियाऊँ सगळी बुदीऊँ अर आपकी सगळी सक्‍तिऊँ परमेसरऊँ परेम करो अर आपका पड़ोसीऊँ खुदकी जंय्यां परेम करो। अर अ दोन्यु सगळा होमबली अर चढावाऊँ बढकै ह।” जि चतराईऊँ बो जुबाब दिओ हो बिकी सुणर ईसु बिऊँ खयो, “तू परमेसर का राजऊँ घणी दूर कोनी।” इकै पाछै कोईसाकी ईसुऊँ सुवाल बुजबा की हिमत कोनी बगी। इकै पाछै ईसु मनदर म परबचन देतोई बोल्यो, “सास्तरानै सीखाबाळा क्याले बोलीं हीं क, मसी दाऊद को बेटो ह? पण दाऊद खुद पबितर आत्माऊँ भर'र बोल्यो हो: ‘परबु (परमेसर) मेरा परबुऊँ खियो जद ताँई म तेरा दुस्मनानै तेरै पगा तळै नइ कर द्‍युँ मेरै दाया हात बेठ्यो रेह।’ “दाऊद खुदई मसीनै परबु बोलै ह जणा मसी दाऊद को बेटो कंय्यां हो सकै ह?” घणीसारी भीड़ ईसु की बातानै राजी हियाऊँ सुणै ही। ईसु बानै सीखातोई बोल्यो, “थे सास्तरानै सीखाबाळाऊँ बचज्यो जानै लामा-लामा चोळा पेरबो अर घूमबो चोखो लागै ह अर बे चावीं हीं क लोग बजारा म बाको आदर करीं। अर बे अरदास करबाळी झघा अर जिमणार म उची गद्दि प बिराजबा की मनस्या राखै ह। बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।” ईसु मनदर की दानपेटी क सामै बेठर देखर्यो हो क लोग दानपेटी म कंय्यां दान घालीं हीं। पिसाळा तो बढचढ'र दान घालर्या हा। बाकै पाछै बठै एक गरीबणी खाली होईड़ी आई अर बा बी दानपेटी क मांय दो डबली हाळा सीक्का घाली अ सीक्का क्युंक पिसा जत्ता होता हा। ईसु आपका चेलानै आपकै कनै बुलायो अर बाऊँ बोल्यो, “म थारूँ सची बोलुँ हूँ आ गरीबणी खाली होईड़ी लूगाई दुसरा सगळा मिनखाऊँ बेत्ती दान घाली ह। क्युं क सगळा तो आपकी बढती मऊँ घाल्या पण आ खाली होईड़ी आपकी सगळी कमाई इमै घाल दि। इकै कनै अत्तोई हो जिऊँ इको चूलो बळतो।” जद ईसु यरूसलेम का मनदर क मांयनैऊँ बारनै जार्यो हो जणा बि टेम बिकाळा चेला मऊँ एक चेलो ईसुनै बोल्यो, “ओ गरूजी देख अ भाठा अर आ हेली कत्ती सोवणी ह।” ईसु बिकी इ बातनै सुणर बिनै बोल्यो, “के तू इ बडीसारी हेलीनै देखै ह? अठै एक बी भाठो कोनी रेह्सी सगळा भाठा ढा दिआ जासी।” जद ईसु जेतून का डूँगर प मनदर क सामै बेठ्यो हो जणा बिऊँ पतरस, याकूब, अर अंदरिआस एकला म बुज्या बे ईसुनै बुज्या, “अ बाता कद घटसी? अर आ बाता क होबा की सेलाणी काँई होसी?” बाकी बाता सुणर ईसु बानै बोल्यो, “थे समळर रेहज्यो थारै सागै कोई छळ नइ करज्या। मेरा नामऊँ बोळासारा आसी अर खेसी ‘म मसी हूँ’ अंय्यां बोलर बे बोळासारा मिनखानै भंगरासी। अर जद थे राड़ अर लड़ायां की खबरा सुणो जणा मना डरज्यो, क्युं क आ बाता को होबो ते ह पण बा घड़ी नास की कोनी होसी। अर जात्या-जात्या प अर देस-देस प चढाई करसी। अर कठै-कठै तो भूचाळ आसी अर काळ पड़सी अर अ सगळी बाता हाल तो जच्चा क सरूका उठबाळा दरद जंय्यां की ह। पण थे समळर रेहज्यो, थानै पकड़र कचेरी म सूप्यो ज्यासी अर थानै अरदास करबाळी झघा म पिट्यो जासी अर थानै मेरा नाम अर चोखा समचार की बजेऊँ पंचा, राजा अर हाकीमा क सामै खड़्यो कर दिओ जासी जिऊँ थे बानै चोखो समचार बता सको। पण आ पक्की ह क आऊँ पेल्या धरती का सगळा कूणबानै चोखो समचार सुणायो जासी। अर जद थानै पकड़र लोग कचेरी क हवालै करीं जणा थे इ बात की जमाई चिंत्या मना करज्यो क थानै काँई खेणो ह? बी घड़ी पबितर आत्मा जखा सबद दे बेई बोलज्यो क्युं क बोलबाळा थे कोनी पण पबितर आत्मा होसी। भाई-भाईनै पकड़ा'र मरवासी अर अंय्यांई बाप आपका टाबरा क सागै करसी अर टाबर आपका माँ-बाप क खिलाप होर बानै मरवासी। अर मेरा नाम की बजेऊँ सगळा मिनख थारूँ बेर राखसी, पण जखो आखीर ताँई सबर करसी बोई बचायो जासी।” जद थे उजाड़बाळी सूगली चिजानै जठै नइ होणी चाए ही बठै देखो (बाचबाळो खुदई जाणले इको मतबल काँई ह?) जणा जखो यहूदिआ म होवै, बानै डूँगरा म भाग जाणो चाए। अर जखा मिनख आपकी छात प होवै बे आपका घरा म क्युंई चिज ल्याबा ताँई नइ उतरै। अर जखो खेत म होवै बो आपका गाबा लेबा ताँई नइ मुड़ै। अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी। थे अरदास कर्या करो क अ बाता स्याळा म नइ हो। बा दिना म अंय्यां को कळेस आसी जखो जुगाद म जद परमेसर इ दुनियानै रची जदऊँ लेर नइ तो हाल ताँई आयो अर नइ इकै पाछै कदै आसी। ज परमेसर बा दिनानै कम नइ करतो जणा कोईबी कोनी बचतो। पण बिका टाळेड़ा मिनखा की बजेऊँ परमेसर बा दिनानै कम कर दिओ ह। बा दिना म थानै कोई खेवै, “देखो अठै ह मसी नहिस बठै ह मसी।” जद थे बिको बिस्वास मना करज्यो। थानै बा दिना म झूठा मसी अर झूठा परमेसर की खेबाळा दिखबा म आसी। अर बे सेलाणी-चमत्कार दिखार टाळेड़ा मिनखानै बी भेकाबा की कोसिस करसी। पण थे समळर रिह्यो म थानै अ सगळी बाता पेल्याऊँई बता दिनी ह। बा दिना म, बि कळेस क पाछै सूरज उजाळानै खो देसी अर चाँद बी कोनी चमकसी। अर अकास मऊँ तारा बी तळै पड़ मरसी। अर अकास की सक्‍तिया हलाई जासी जिऊँ बे आपकी झघा छोड देसी। जणा लोग मिनख का बेटानै महासक्‍ति अर मेमा क सागै बादळा प आतो देखसी। “अर बो आपका ईस्बर नगरी दुतानै भेजसी क बे धरती अर अकास प जार च्यारूमेरूँ बिका टाळेड़ा मिनखानै भेळा करीं।” “थे अंजीर का दरख्तऊँ सीखो जद बिकी डाळ्यां नरम होवै अर बिकै कुपळ फूटबा लागै जणा थे बिनै देखर जाणज्याओ हो क उंदयाळो आबाळो ह। अंय्यांई जद थे आ बातानै होता देखो जणा जाणज्याज्यो क बा घड़ी सांकड़ैई ह, अर थळी पई ह। म थानै सची खेऊँ हूँ, जद ताँई अ बाता कोनी बितसी इ पिडी को नास कोनी होसी। अकास अर धरती टळ ज्यासी पण मेरी बाता कोनी टळै। “बि दिन अर बि घड़ी क बारां म कोईबी कोनी जाणै, नइ तो ईस्बर नगरी दुत अर नइ बेटो पण परम-पिताई बिकै बारां म जाणै ह। इ बजेऊँ थे समळर जागता रेहज्यो थानै कोनी बेरो क बो दिन कद आसी अर नइ थे बि दिन क बारां म जाणो। ओ अंय्यां होसी जंय्यां कोई मिनख दिसावर जाबाऊँ पेल्या आपका घरनै आपका दास क हवालै कर बानै न्यारो-न्यारो काम बाटर चल्यो जावै अर चोकीदारनै पेरो लगाबा को हुकम देर अंय्यां बोलर क जद ताँई म कोनी आऊँ तू घर की समाळ करजे। इ ताँई थे चेता म रेह्ओ क्युं क थे कोनी जाणो क घर को मालिक कद आसी। आथण्या आसी क मज रात म आसी क भागपाट्या आसी नहिस दिन चढ्या आसी। अर अंय्यां नइ होज्या कदै बो चाणचुक्यो आर थानै सोतो देखै। अर जखी बाता म थानै खेऊँ हूँ बेई बात म सगळानै खेऊँ हूँ क थे सगळा जागता रेहज्यो।” दो दिना क पाछै फसै को त्युंहार अर बिना खमिर की रोटी को त्युंहार आबाळो हो। परधान याजक अर सास्तरी ईसुनै धोकाऊँ पकड़र मारबा की साजिस घड़र्या हा। पण बे आपसरी म खेबा लाग्या, “आपा ईसुनै त्युंहार क दिना म कोनी मारां। आपा त्युंहार क दिना म इनै मारां जणा के बेरो जनता भड़क जावै।” जद ईसु बेतनिया म समोन जखो पेल्या कोढी हो बिकै घरा रोटी खाबा बेठ्यो, बठै एक लूगाई संगमरमर की बरनी म जटामासी (बाळ झड़) को मेंगो अर खरो ईतर लेर आई। अर बा लूगाई बि बरतननै खोलर बिकै मांयनै जत्तो बी ईतर हो बिनै ईसु क सीर प उंदका दि। बठै खड़्या मिनखा म क्युंक चिड़गा अर खया, “आ लूगाई इ ईतरनै क्याले खराब करी ह? इ ईतरनै तीन सो चाँदी का सीक्काऊँ बी बेत्ती म बेच्यो जा सकै हो अर इऊँ जखा रिपीआ मिलता बिनै गरीबा म बाट्यो जाणो चाए हो।” अर बे बिनै दकालबा लाग्या। ईसु बाकी इ बातनै सुणर बानै बोल्यो, “थे इ लूगाईनै क्याले तंग करो हो? थे इनै छोड द्‍यो। आ तो मेर सागै भलो करी ह। गरीब तो थारै सागै सदाई रेह्सी। थे जद चाओ बाको भलो कर सको हो, पण म थारै सागै सदाई कोनी रेहस्युं। अर जोक्यु बिकै बस म हो बा करी। आ मनै गाडबाऊँ पेल्या मेरी काया प ईतर उंदकार मेरो अभिसेक करी ह। म थानै सची खेऊँ हूँ सगळा जगत म जठै बी चोखो समचार परचार कर्यो ज्यासी, बठै इ लूगाईनै अर इका कामनै याद कर्यो ज्यासी।” यहूदा इस्करोती बारा चेला मऊँ एक हो, ओ परधान याजक क कनै ईसुनै पकड़ाबा की बातचित करबा ताँई गयो। यहूदा की इ बातनै सुणर याजक खुस होयो अर बे यहूदानै रिपीआ देबा की जबान करी। यहूदा ह जखो ईसुनै पकड़ाबा की ताक म मोको ढुंढबा लाग्यो। बिना खमिर की रोटी हाळै त्युंहार क पेलड़ा दिन जद फसै का त्युंहार प लल्डी का बच्या की बलि दि जाती ही बि दिन चेला ईसुनै बुज्या, “तू कठै चावै ह क म्हें तेरै ताँई फसै की रोटी खाबा की त्यारी करां?” बामैऊँ दो चेलानै ईसु अंय्यां बोलर भेज्यो, “थे गाँव क मांयनै जाओ अर थानै बठै एक मिनख पाणीऊँ भरेड़ो घड़ो लिआ मिलसी थे बिकै गेल होलिओ अर बो जि घर म जावै, थे बी बि घर म जार घर का मालिकनै बोलज्यो गरूजी बोल्यो ह, ‘मेरो फसै की रोटी खाबा को कोठो कठै ह जठै म आपका चेला क सागै फसै खा सकूँ।’ बो थानै बडोसारो अर सक्यु जच्यो-जचाईड़ो चोबारो दिखासी बिमैई आपणा ताँई सक्यु त्यार करज्यो।” अर बे चेला बि गाँव क मांयनै गया अर जंय्यां ईसु बानै बतायो हो बंय्यांई बे बठै देख्यो अर बे बठै फसै की रोटी खाबा की त्यारी करी। अर दिन आथबा क सागैई ईसु बारा चेला क सागै बठै गयो अर जद बे सागै बेठर रोटी खार्या हा ईसु आपका चेलानै बोल्यो, “म थानै सची खेऊँ हूँ थारै मऊँ एक जणो जखो अठै मेरै सागै जिमर्यो ह बो मनै पकड़ासी।” बे ईसु की इ बातनै सुणर दुखी होया अर बे ईसुनै एक-एक कर बुजबा लाग्या, “म्हराज बो म हूँ के?” ईसु बाऊँ बोल्यो, “बो थारै बारामऊँ एक ह। बो मेरै सागै कचोळा मऊँ टिमोवै ह। मिनख का बेटानै तो मरनोई ह जंय्यां की पबितर सास्तर म मंडेड़ो ह। पण कत्ती बुरी दसा ह बि मिनख की जिकै बजेऊँ मिनख को बेटो पकड़ायो जासी। इऊँ चोखो तो ओ होतो क बो मिनख कोनी जलमतो।” बे जिमर्याई हा क ईसु रोटी लेर परबुनै धनेवाद देर रोटीनै तोड़्यो अर ईसु आपका चेलानै आ खेतो रोटी बाटी, “ल्यो आ मेरी काया ह।” इकै पाछै ईसु कचोळो लिओ अर परबुनै धनेवाद देर बो कचोळो आपका चेलानै दिओ बे सगळा बिमैऊँ पीआ अर ईसु बाऊँ बोल्यो, “ओ मेरो लोय ह ओ परमेसर का नया करार की सेलाणी ह जखो बोळा ताँई बहायो जार्यो ह। म थानै सची खेऊँ म आ अँगूरी जद ताँई कोनी पीस्युं जद ताँई परमेसर का राज म नई कोनी पीऊँ।” इकै पाछै बे एक गीत गार जेतून का डूँगर प चलेग्या। ईसु आपका चेलाऊँ बोल्यो, “थे सगळा कानि-कानि होज्यास्यो। क्युं क पबितर सास्तर म मंडेड़ो ह, ‘म गुवाळ्यानै मारस्युं अर लल्ड्या तीनतेरा होज्यासी।’ “ पण म ओज्यु जिंदो होर थारूँ अगाऊ गलिल जास्युं।” जणा पतरस बोल्यो, “चाए सगळा तनै छोडर भाग जावै पण म थारै सागै डट्यो रेहस्युं।” ईसु पतरस की इ बातनै सुणर बिऊँ बोल्यो, “म तनै सची खेऊँ हूँ आज की रातई मुरगा क दो बार बांग देबाऊँ पेल्या तू तीन बार मनै पिछाण्बाऊँ मना करसी।” पतरस ईसु की बात सुणर ओर जोरऊँ बोल्यो, “ज मनै थारै सागै ज्यान बी देणी पड़ी जणा बी म पिछै कोनी हटूँ।” अर सगळा चेला बी आई बात बोल्या। इकै पाछै बे गतसमनी नाम की झघा गया अर बठै ईसु आपका चेलानै बोल्यो, “थे अठैई बेठ्या रिह्यो जद ताँई म अरदास करूं।” ईसु आपकै सागै पतरस, याकूब अर यहून्नानै लेगो। ईसु बोळो दुख-दुबळो होर्यो हो। ईसु बाऊँ बोल्यो, “मेरो हियो बोळो उदास ह, अठै ताँई म मरबाळोसो होर्यो हूँ। थे अठैई बेठ ज्याओ अर जागता रिह्यो।” इकै पाछै ईसु बठैऊँ चिनेक दूर जार धरती प मोदो पसर अरदास करबा लाग्यो अर बोल्यो, “ज हो सकै तो आ घड़ी मेरूँ टळ जावै जणा चोखो हो जावै।” अर बो बोलबा लाग्यो, “अब्बा ओ परम-पिता थारै ताँई क्युंई ओखो कोनी। इ दुख का कचोळानै मेरूँ नाकै कर दे, पण जंय्यां म चाऊँ बंय्यां नइ हो पण जंय्यां तू चावै बंय्यांई होवै।” ईसु अरदास कर आपका चेला कनै गयो अर बानै सुत्यो देखर पतरसनै बोल्यो, “ओ समोन तू सोर्यो ह के? के तू घंटा भर बी कोनी जाग सक्यो? थे जागता रिह्यो अर अरदास करो जिऊँ थे बिचास्या नइ जाओ। आत्मा तो जखो सई ह बो करनो चावै ह पण आ काया माड़ी ह।” ईसु ओज्यु अरदास करबानै चलेगो अर जंय्यां पेल्या अरदास करी बंय्यांई बो अरदास करबा लाग्यो। अर ईसु ओज्यु चेला कनै गयो अर बिनै बे सुत्या लाध्या अर बाकी आँख्या म निंद चढरी ही अर बानै बेरो कोनी हो क बे ईसुनै काँई जुबाब दि। ईसु तीसरी बार आर बानै बोल्यो, “बस बोळा सोलिआ हालबी थे अरामऊँ सुत्या हो। देखो बा घड़ी आगी जद मिनख को बेटो पाप्या क हात पकड़ायो जार्यो ह। थे उठो अर देखो मनै पकड़ाबाळो अठैई ह।” ईसु अंय्यां बोलर्योई हो क यहूदा जखो बारा चेला मऊँ एक हो बो आपकै सागै परधान याजक अर सास्तरानै सीखाबाळा अर यहूदि नेता का हुकमऊँ घणीसारी भीड़ लेर बठै आयो बाकन तलवार अर लाठ्या बी ही। धोकाऊँ पकड़ाबाळो पेल्याई बि भीड़नै बता दिओ हो क जिको म माखो ल्युं बोई ईसु ह थे बिनै पकड़र ध्यानऊँ सिपाया की निगरानी म लेर जायो। अर जंय्यांई यहूदा बठै आयो अर बो ईसु कनै जार बोल्यो, “गरूजी” अर बो ईसु को माखो लिओ। इकै पाछै बा भीड़ बिनै पकड़र आपका कब्जा म लेली। ईसु कनै खड़्यो एक चेलो आपकी तलवार काडी अर म्हायाजक का एक दास को कानड़ो काट गेर्यो। ईसु बाऊँ बोल्यो, “म कोई डाकू हूँ के थे मनै पकड़बा ताँई तलवार अर लाठी ल्याया हो? म रोजकी मनदर म थानै सीखातो, थारै सागैई रिह्या करतो हो जद थे मनै कोनी पकड़्या, पण ओ पबितर सास्तर म मंडेड़ो ह जिनै पूरो होणोई ह।” ईसु का चेला बिनै छोडर भागगा। एक मोट्यार आपकी उघाड़ी काया प चादरो ओड ईसु क गेल-गेल होर्यो हो लोग बिनै पकड़बा ताँई बिकै गेल भाग्या जणा बो चादरो बगार उघाड़ोई भाग छुट्यो। ईसुनै म्हायाजक क कनै लेग्या, अर बठै परधान याजक अर यहूदि नेता अर सगळा सास्तरी आर भेळा होया। पतरस क्युंक दूरी बणार बाकै गेल-गेल आयो अर म्हायाजक क आँगणा क मांयनै आर बठै चोकीदार क सागै तपबा लाग्यो। परधान याजक अर सगळा म्हापंचायत का लोग ईसुनै जानऊँ मारबा ताँई बिकै खिलाप गुवाई ढुंढबा लाग्या। पण बानै कोई गुवाई कोनी मिली। घणासारा लोग ईसु क खिलाप गुवाई बी देर्या हा पण बाकी गुवाई झूठी ही अर एकसी बी कोनी ही। क्युंक खड़्या होर ईसु क खिलाप झूठी गुवाई देबा लाग्या। बे खेबा लाग्या, “म्हें इका मुंडाऊँ सुण्या हां ओ खेवै ह, ‘म हातऊँ बणेड़ा मनदरनै ढा देस्युँ अर तीन दिना क पाछै दुसरो बणा देस्युँ बो बडो अरदास घर हाताऊँ बणाएड़ो कोनी होसी।’” अर इ बर बी बाकी गुवाई एकसी कोनी निकळी। बाकी बाता सुणर म्हायाजक खड़्यो होर ईसुनै बुजबा लाग्यो, “तू जुबाब क्युं कोनी देवै अ सगळा तेरै खिलाप गुवाई देर्या हीं।” पण ईसु चुपचालो बाकी सुणतो रिह्यो अर बो बानै जुबाब कोनी दिओ। म्हायाजक ईसुऊँ ओज्यु बुज्यो, “तू बि परमेसर को बेटो मसी ह के जखो धने ह?” ईसु बोल्यो, “हाँ म बोई हूँ अर थे मिनख का बेटानै सऊँ सक्‍तिसाली परमेसर क दाया हात बेठ्यो अर अकास म बादळा क सागै आतो देखस्यो।” म्हायाजक आपका गाबा पाड़्यो अर बोल्यो, “इब गुवाई देबा की जुर्त कोनी। थे खुदई इका मुंडाऊँ परमेसर की बुराई सुण लिआ हो इब थे काँई चाओ हो?” अर बे सगळा बोल्या, “इनै मार देणो चाए।” अर कई लोग ईसु प थूकबा लाग्या अर कई ईसु की आँख्या प गाबो बांदके मुका मारबा लाग्या अर बिको तमासो बणार बोल्या, “तू भबिस्वाणी करतो फिरतो हो, इब बता तनै कूण मार्यो” अर चोकीदार ईसुनै पकड़र थपड़ मार्या। पतरस निचै आँगणा म बेठ्यो जणा बठै म्हायाजक की एक दासी आई। अर बा पतरसनै तपता देखर पतरसनै बोली, “तू बी तो ईसु नासरी क सागै हो।” पण पतरस नटगो अर बोल्यो, “म ईसु नासरीनै कोनी जाणू अर तू जोक्यु बोलरी ह बा मेरै तो क्युंई पलै कोनी पड़री।” अर बो अंय्यां बोलतो आँगणा की थळी प पुग्योई हो [अत्ता मई मुरगो बांग दिनी] बा दासी ओज्यु पतरसनै देखी अर बठै खड़्या मिनखाऊँ बोली, “ओ बी बामैऊँई ह।” पतरस ओज्यु नटगो थोड़ी देर क पाछै बठै खड़्या मिनखा मऊँ कई बोल्या, “सचमई तू बामैऊँ एक ह, क्युं क तू बी तो गलिल को ह।” पतरस बाकी बाता सुणर सोगन खार बोल्यो, “म बि मिनखनै जिकी थे बाता करो हो कोनी जाणू ज म झूठ बोलुँ तो परमेसर मनै सजा दे।” अर जदई दुसरी बार मुरगो बांग दिनी। जणा पतरस माथो पकड़्यो अर बिनै ईसु की खेईड़ी बा बात याद आई क मुरगा क दो बार बांग देबाऊँ पेल्या तू तीन बार मेरै ताँई खेसी म इनै कोनी जाणू, अर बो इ बातनै सोचर बळ-बळ रोबा लाग्यो। दिन उगताई परधान याजक अर यहूदि नेता, सास्तरी अर सगळा महासभा का पंच ईसुनै बांदके पीळातुस कनै लेज्यार हाजिर कर्यो। पीळातुस ईसुऊँ बुज्यो, “तू यहूदिआ को राजा ह के?” ईसु बिनै खयो, “तू खुदई तो बोलै ह।” परधान याजक ईसु प बोळी बाता को दोस लगार्या हा। पीळातुस ईसुनै ओज्यु बोल्यो, “तू बोल-बाल्यो कंय्यां खड़्यो ह अ सगळा तो तेर प दोस लगाबा लागर्या हीं।” पण ईसु बिनै जुबाब कोनी दिओ ईसुनै बोल-बाल्यो देखर पीळातुसनै ताजूब होयो। फसै हाळा त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो। बि टेम बरअबा नाम को एक मिनख बगावत्या क सागै केद म हो क्युं क बो एक बगावत म एक मिनखनै मार गेर्यो हो। जद लोग पीळातुस क कनै जार बिऊँ कह्या जंय्यां तू म्हारै ताँई करतो आयो ह बंय्यांई कर। जणा पीळातुस बाऊँ खयो, “के थे चाओ हो के म थारै ताँई यहूदिआ का राजानै छोड द्‍युँ?” पीळातुस अंय्यां इ बजेऊँ बोल्यो क्युं क बो जाणतो हो क अ परधान याजक जळता-बळता इनै पकड़ाया हीं। पण परधान याजक बरअबानै पीळातुसऊँ छुटाबा ताँई भीड़नै पेल्याऊँ उकसा राख्यो हो। पीळातुस बाऊँ ओज्यु बुज्यो, “थे जिनै यहूदिआ को राजा खेओ हो बिको म काँई करूं थे बताओ थे काँई चाओ हो?” बे कू'कर बोल्या, “इनै सुळी प चढा द्‍यो!” पीळातुस बाऊँ बोल्यो, “म इनै क्युं सुळी प चढाऊँ ओ लाई कूणसी बुराई करी ह।” पण बे मिनख बुर्यां करबा लाग्या, “इनै सुळी प चढा द्‍यो।” पीळातुस भीड़नै राजी करबा ताँई बरअबानै छोड दिओ अर ईसु क कोड़ा मरवाया जिकै पाछै सुळी प चढाबा को हुकम दिओ। सिपाईड़ा ईसुनै राजपाल क गड का आँगणा म लेग्या। अर बे सगळी पलटणनै भेळी करली। बे ईसुनै बैंगणी रंग को गाबो पिरार बिकाळा सीर प काटा को मुकट गूंथर धर दिओ। बे ईसु को तमासो बणाबा ताँई जे-जैकार करबा लाग्या अर बे बोल्या, “ओ यहूदिआ का राजा तेरी जे हो।” बे ईसु क सीर प डंडा मार'र, बिपै थूकर, गोडा टे'कर बिनै नमस्कार कर्या। बे ईसु को मजाक उडार बिको बैंगणी गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई बारनै लेग्या। सिकन्दर अर रूफुस को बाप जिको नाम समोन हो, ओ कुरेन गाँव को हो इनै गाँवऊँ आतो देख बे सिपाईड़ा बिनै जोरामादी ईसु की सुळीनै लेज्याबा ताँई बोल्या बे ईसुनै गुलगुता नाम की झघा प लेग्या जिको मतबल खोपड़ी की झघा ह। बे ईसुनै मिर नाम की दवाई मिलेड़ी अँगूरी पिलाबा लाग्या पण ईसु कोनी पीओ। इकै पाछै बे ईसुनै सुळी प चढा दिओ, ईसु का गाबा लेबा ताँई बे परची गेरी अर आपसरी म बानै बाट लिआ। जद बे ईसुनै सुळी प चढाया जणा दिनग्या का नो बजर्या हा। अर बठै बिको दोस पतर हो जिपै मंडर्यो हो, “यहूदिआ को राजा।” ईसु क सागै दो डाकू बी सुळी चढाया गया एक ईसु क दाया नाकै अर दुसरो बाया नाकै लटकायो गयो। [अर पबितर सास्तर क मांयनै जखा बचन मंडेड़ा हा बे पूरा होया क, ईसु अपराद्‍या क सागै लटकायो जासी।] अर गेला मऊँ जाबाळा आपका सीरानै हला-हलार ईसु की बुराई कर ईसुनै खेर्या हा, “मनदरनै तोड़बाळा अर तीन दिन म ओज्यु बणाबाळा सुळी पऊँ तळै उतर्या अर खुदनै बचाले ” अर अंय्यांई परधान याजक अर सास्तरानै सीखाबाळा बी ईसु को मजाक उड़ार्या हा। अर बे आपसरी म बतळाबा लाग्या, “ओ दुसरा मिनखानै बचायो पण खुदनै कोनी बचा सक्यो।” अर बे ईसुनै खेवै हा, “ओ इजरायल का राजा मसी सुळीऊँ तळै उतर क दिखा जणा म्हें बिस्वास कर लेस्यां” अर जखा डाकू ईसु क सागै सुळी चढाया गया हा बे बी ईसु को मजाक उड़ार्या अर बिकी बेजती करर्या हा। दोपारा बारा बजताई सगळा देस क मांयनै अँधेरो छायो अर करीब तीन बजै ताँई अँधकार छायो रिह्यो। ईसु तीन बजै जोरऊँ बार घालर खयो “इलोई, इलोई, लमा सबकतनी।” जिको मतबल ह, “ओ मेरा परमेसर ओ मेरा परमेसर तू मनै क्याले छोड दिओ?” अर जखा मिनख बठै खड़्या हा बे ईसुनै अंय्यां बोलता सुण्या जणा बे खया, “सुणो, ओ एलिआनै बुलार्यो ह।” एक मिनख भागर चुखानै खाटो उठायड़ा अँगूरा का रस म डूबार लाठी प टां'गर ल्याओ अर ईसुनै पीबा ताँई दिओ अर खयो, “आपा देखस्यां इनै उतारबा ताँई एलिआ आवै क कोनी।” जणा ईसु जोरऊँ बार घालर पिराण तज दिआ। अर मनदर को परदो उपरऊँ लेर तळै ताँई पा'टर दो टुकड़ा होगो। एक सुबेदार ईसु क सामै खड़्यो हो, ओ ईसु की बातानै सुण्यो अर देख्यो क ईसु कंय्यां आपका पिराण तज्या। अर बो बोलबा लाग्यो, “ओ मिनख सचमई परमेसर को बेटो हो।” बठै लूगाया बी ही बे ईसुनै दूरऊँ खड़ी-खड़ी देखै ही बा लूगाया म मरीयम मगदलिनी, छोटक्यो याकूब अर युसूफ की माँ मरीयम अर सलोमी ही। ईसु जद गलिल क मांयनै हो जणा बि बठै अ लूगाया ईसु क गेल चालबाळी ही अर अ ईसु की सेवा करती ही। अर बठै ओर बी कई लूगाया ही जखी ईसु क सागै यरूसलेम ताँई आई ही। दिन आथगो हो अर ओ अरामहाळा दिनऊँ पेलड़ो दिन हो जिनै त्यारी करबाळो दिन बी बोलै ह। इ बजेऊँ अरमतिया को युसूफ आयो। ओ मिनख यहूदि म्हापंचायत को मान्यो-थान्यो हो अर परमेसर का राजनै उडिकै हो। ओ ठाडी छाती कर पीळातुस कनै गयो अर बिऊँ ईसु की लास माँगी। पीळातुसनै ताजूब होयो क ईसु अत्तो तावळो कंय्यां मरग्यो। अर बो सुबेदारनै आपकै कनै बुलायो अर बिऊँ बुज्यो, “बिनै मर्या बोळी देर होगी के?” अर पीळातुस सुबेदारऊँ समचार लेर ईसु की लासनै युसूफनै लेज्याबा को हुकम दे दिओ। युसूफ मखमल को चादरो खरीद्‍यो अर लासनै सुळीऊँ उतार बि चादरा म बिनै लपेटर ढाड क मांय खोदेड़ी कबर म धर दिओ। अर कबर का मुंडा प बडोसारो भाठो लगा दिओ। मरीयम मगदलिनी अर युसूफ की माँ मरीयम देखै ही क बो ईसु की लासनै कठै धरर्यो ह। अरामहाळा दिन क पाछै मरीयम मगदलिनी, सलोमी अर याकूब की माँ मरीयम ईसु की लास को अभिसेक करबा ताँई सुगंद आबाळी चिज मोल ली अर बे सपता का पेला दिन दितबारनै, सुआरै सूरज निकळताई कबर प गई। बे आपसरी म खेबा लागी, “कबर क मुंडा आगै का भाठानै कूण सरकासी?” अर बे सामै देखी जणा भाठो तो सरकेड़ो हो। बो भाठो बोळो बडो हो। बे बेगीसी कबर क मांयनै जार देखी क एक मोट्यार धोळा गाबा पेर्या दाया नाकै बेठ्यो हो अर बे बिनै देखर उकचुक होगी। अर बो मोट्यार बानै खयो, “थे डरो मना थे जि ईसु नासरीनै ढुंढो हो, जिनै सुळी प चढायो गयो हो बो अठै कोनी ह बो मरग्यो हो पण इब जी उठ्यो ज बिस्वास नइ होवै जणा बि झघानै देखल्यो जठै बे बिकी लासनै धर्या हा। थे अठैऊँ जाओ अर ईसु का चेलानै अर पतरसनै ओ समचार द्‍यो क बो थारै अगाऊ गलिल जासी जंय्यां बो थानै पेल्याई बोल्यो हो। बो थानै बठैई मिलसी।” अर बे डरगी अर ताजूब करतीई कबरऊँ भागर निकळी, अर बे कोईनैई क्युंई कोनी बतायो क्युं क बे सचमई डरगी ही। ईसु जिंदो होबा क पाछै सपता का पेला दिन दितबारनै, मरीयम मगदलिनी जिमैऊँ ईसु सात ओपरी बलाय काडी ही बिनै दिख्यो। बा जार ईसु का सात्यानै जखा बोळा दुखी हा अर रोवा हा बानै ओ समचार दिओ। अर बे बिकी इ बातनै सुणर क बो ओज्यु जिंदो होगो ह अर बिनै दिख्यो ह बे बिकी बाता प बिस्वास कोनी कर्या। इकै पाछै दुसरा रूप म ईसु चेला मऊँ दोनै दिख्यो जखा यरूसलेमऊँ आपका गाँव जार्या हा। बे पाछा आर ओरानै इ बात को समचार दिओ पण बे बाको बी बिस्वास कोनी कर्यो। इकै पाछै रोटी खाबा की टेम ईसु बा ग्यारा चेलानै बी दिख्यो। ईसु बाका भेम अर हिया की कल्डाई प बानै दकाल्यो। क्युं क बे ईसु क जिंदो होबा को समचार देबाळा की बाता प बिस्वास कोनी कर्या। जणा पाछै ईसु बानै ओडायो, “थे सगळा जगत म जार चोखा समचार को हेलो द्‍यो। अर जखो बी थारी बाता प बिस्वास करसी अर बतिस्मो लेसी बिको छुटकारो होसी अर जखो बिस्वास कोनी करसी बो पापी रेह्सी अर सजा भोगसी। मेर प बिस्वास करबाळा म अ सेलाणी होसी क बे मेरा नामऊँ ओपरी बलायानै भगासी अर बे नई-नई भासा बोलसी। ज बे आपका हाताऊँ साँप बी पकड़ै अर झेर बी पीज्यावै जणा बी बाकै क्युंई कोनी होसी, अर बे रोगला प हात धरसी जणा बे ठिक होज्यासी।” अ सारी बाता बोलबा क पाछै ईसु ईस्बर नगरी म उठा लिओ गयो अर परमेसर क दाया नाकै जार बेठगो। अर बिका चेला झघा-झघा जार परबु को परबचन दिओ। बाकै सागै परबु काम करर्यो हो। अर बो चमत्कारी सेलाणीऊँ बचनानै सच करर्यो। अजी थियूफिलूस, बोळाजणा आपणै मांयनै बितेड़ी बातानै मांडबा की कोसिस करी। अ सगळी बाता आपानै बे पुगाई जखा आ सगळी बातानै सरूँ घटता देखी। अर जखा बचन को हेलो पाड़बाळा होया। इ बजेऊँ मनै लाग्यो क म बी थारै ताँई आ सगळी बातानै सूल मांडू। क्युं क म आ सगळी बातानै सरूआतऊँ सूल परखेड़ो हूँ। म चाऊँ, थे आ जाण सको क थानै सीखायड़ी बाता पुक्‍ता हीं। यहूदिआ का राजा हेरोद क दिना म याजक समाज का अबिया टोळी का कूणबा मऊँ एक जकरयाह नाम को याजक हो अर बिकी लूगाई इलिसीबा बी हारुण का कूणबा मऊँ ही। परमेसर की नजर्या म बे दोन्युई धरमी हा अर बे परबु का सगळा हुकमानै मानबा म खरा हा। बाकै कोई आस-ओलाद तो ही कोनी, क्युं क इलिसीबा बांझड़ी ही अर बे दोन्यु बूडा हा। एकर जद बो आपकी टोळी का सरा म परमेसर क सामै याजक को काम करर्यो हो। जणा याजका की रीत गेल परबु का मनदर म धूप जळाबा ताँई परची गेरी अर परची जकरयाह का नाम निकळी। धूप जळाबा क टेम सगळा मिनखा की टोळी भेळी होर बारनै अरदास कर'री ही। बि टेम का जकरयाहनै परबु का एक ईस्बर नगरी दुत को दरसाव होयो अर बो दुत धूप जळाबाळी बेदी का दाया नाकै खड़्यो हो बि दुतनै देखर जकरयाह धुजगो अर बिऊँ बो बोळो डरगो। पण ईस्बर नगरी दुत बिऊँ खयो, “जकरयाह डरै मना थारी अरदास सुणली अर थारी लूगाई इलिसीबा एक छोरानै जलम देसी जिको नाम तू यहून्ना राखजे। जिऊँ थे राजी होस्यो अर सागै क सागैई बिकै होबाऊँ ओर बी बोळाजणा राजी होसी, परमेसर की नजर्या म बो म्हान होसी अर बो अँगूरी अर नसिली चिजा कदैई कोनी पिसी, अर बो आपकी माँ का पेटऊँई पबितर आत्माऊँ भरेड़ो होसी। बो ह जखो इजरायल का घणकराक मिनखानै बाका परबु परमेसर क कनै फेर ल्यासी बो एलिआ जंय्यां की सक्‍ति अर आत्मा म परबु क आगै-आगै चालसी। बो बापा को मन बाका टाबरा कानि मोड़ देसी अर खयो नइ करबाळानै धारमिक्‍ता की बुदी कानि लेज्यासी अर मिनखानै परबु ताँई त्यार करसी।” जणा जकरयाह ह जखो बि ईस्बर नगरी दुतऊँ खयो, “आ बात म कंय्यां मानू? क्युं क म तो बूडो-ठेरो हूँ अर मेरी लूगाई बी बूडी-ठेरी होगी।” जणा बो ईस्बर नगरी दुत हो जखो बिऊँ बोल्यो, “म हूँ जिबराइल जखो परमेसर क सामै तण्यो खड़्यो रेह्ऊँ हूँ। अर मनै ईस्बर तनै इ चोखा समचार को हेलो पाड़बा ताँई भेज्यो हो। देख तू ह जखो मेरी बातानै साची तो मानी कोनी मेरा बोलेड़ा बचन तो आपका टेम म पूरा होसीई पण मेरी बाता प बिस्वास कोनी करबा की बजेऊँ आ बाता का घटबाळा दिन ताँई तू गुँगो रेह्सी।” बठिनै मिनख हा जखा मनदर क बारनै जकरयाहनै उडिकर्या हा अर बा सगळा क ताजूब होर्यो क बिनै अत्तो टेम कंय्यां लागगो अर जद बो बारनै आर बाऊँ बोल कोनी सक्यो जणा बे जाणग्या, हो ना हो , ओ मनदर म कोई दरसाव देख्यो ह। बो गुँगो होगो अर इसाराऊँ बात करतो। जद मनदर म बिका सेवा का दिन पूरा होगा जणा बो आपकै घरा चलेगो। क्युंक दिना पाछै बिकी घरहाळी ही जखी आसऊँ होई। अर पाच म्हेना ताँई घराऊँ बारनैई कोनी निकळी। अर अंय्यां बोलरी ही, “मिनखा म मेरी ईज्जत राखबा ताँई, परबु आ दिना म मेर प म्हेर करी ह।” जद जकरयाह की घरहाळीनै छठो म्हेनो लागर्यो हो। जणा परमेसर जिबराइल ईस्बर नगरी दुतनै गलिल देस का नासरत नगर म एक मरीयम नाम की छोरी क कनै भेज्यो। बा हाल कुंआरी ही। बिकी सगाई दाऊद क कूणबा का युसूफ नाम का एक मिनखऊँ होईड़ी ही। ईस्बर नगरी दुत बिकन आर बोल्यो, “राजी रेह, थार प परबु की म्हेर होई ह अर बे थारै सागै ह।” आ बचनाऊँ बा घबरागी अर बा सोचबा लागी अंय्यां बोलबा को इको काँई मतबल ह। जणा ईस्बर नगरी दुत बिऊँ खयो, “मरीयम डरै मना परमेसर की दया तेरै प होरी ह। सुण तू आसऊँ होसी अर एक छोरो जणसी अर तू बिनै ईसु खेर बुलासी। बो म्हान होसी अर बो परम-परधान को बेटो खुवासी, परबु परमेसर बानै बडका दाऊद की गद्दि प बिठासी अर बो याकूब का कूणबा प सदाई राज करसी, अर बिको राज कदैई कोनी मिटसी।” जणा मरीयम ईस्बर नगरी दुतऊँ बोली, “ओ कंय्यां हो सकै ह? हाल तो म कुंआरी हूँ।” ईस्बर नगरी दुत खयो, “पबितर आत्मा तेरै प उतरसी अर परम-परधान की सक्‍ति तनै आपकी ओट म ले लेसी, इ बजेऊँ बो पबितर टाबर परमेसर को बेटो खुवासी, सुण तेरी रिस्तेदार इलिसीबानै सगळा बांझड़ी-बांझड़ी बोलता हा, अर आज बा बूडापा म आसऊँ ह अर बिनै ओ छठो म्हेनो लागर्यो ह। क्युं क परमेसर ताँई क्युंई अणहोतो कोनी।” अर मरीयम बोली, “म परबु की दासी हूँ, थारै खया गेल मेरै सागै होवै।” अर ईस्बर नगरी दुत बिकनऊँ चलेगो। क्युंक दिना पाछै मरीयम त्यार होर बेगीसी यहूदिआ का पहाड़ी इलाका की एक नगरी म चलगी। अर जकरयाह क घरा जार बिकाळी लूगाई इलिसीबाऊँ नमस्कार करी। जद इलिसीबा क काना म मरीयम को नमस्कार पड़्यो जणा इलिसीबा का पेट को टाबरियो उछळबा लाग्यो अर इलिसीबा पबितर आत्माऊँ भरगी। अर जोरऊँ बोली, “तू धरती की सगळी लूगाया म भागहाळी ह अर तेरै पेट को टाबर बी भागहाळो ह। मेरो अत्तो बडो भाग? क मेरै परबु की माँ मेरै कनै आई। क्युं क थारी उवाज म्हारै काना म पड़ताई म्हारै पेट को टाबरियो राजी होर उछळबा लागगो तू भागहाळी ह क्युं क तू परमेसर की खेईड़ी बात प बिस्वास करी क बे पूरी होसी।” जणा मरीयम बोली, “मेरो पिराण परबु की बडाई करै ह। अर मेरी आत्मा मनै बचाबाळा परमेसर म राजी ह। क्युं क बो आपकी इ गरीबणी दासीनै याद कर्यो ह, अर इ मानऊँ राजी कर्यो ह, क इबऊँ लेर जुग-जुग का मिनख मनै भागहाळी खेसी, अत्तो बडो काम सऊँ सक्‍तिसाली परमेसर मेरै सागै कर्यो ह, इ बजेऊँ बिको नाम पबितर ह। अर बिनै मान देबाळा प बाकी दया बाकी पिड्या ताँई रेह्‍वै ह। बो आपका हाताऊँ बडा-बडा काम कर बानै जखा आपका मन म गुमान करता हा निचो दिखायो। बे राज करबाळानै गद्दिऊँ तळै पटक्यो अर बोदानै उचो उठायो। बो भूखानै चोखी-चोखी चिजाऊँ भर्यापूरा अर धायानै रिता फांका भेज दिओ। बानै बे बाता याद ही जखी बो आपणा बडका अब्राहम अर बिकी पिडीऊँ करी ही, क म अब्राहम अर बिकी पिडी प सदाई दया करस्युं। अर बे आपका कह्या गेल आपका दास इजरायलनै याद राखर मदद करी।” मरीयम करीब तीन म्हेना इलिसीबा क कनै रेह्‍र पाछी आपकै घरा आगी। जद इलिसीबा क जापा की घड़ी आई अर बा एक छोरानै जलमी। परमेसर बिपै दया दिखाई ह, इ बात को समचार बिका रिस्तेदारानै अर जाणकारानै लाग्यो जणा बे सगळा बिकै सागै खूब राजी होया। इकै पाछै आठवा दिन बे सगळा मिनख बि छोरा को नाम काडबा अर बिकी सुन्नत करबा ताँई भेळा होया। बे बिको नाम बिकाळा बापू क नाम प जकरयाह काडबो चावै हा। पण बिकाळी माँ बोलपड़ी, “नइ इको नाम तो यहून्ना काडणो ह।” जणा बे सगळा बिऊँ बोल्या, “तेरा कूणबा म इ नाम को कोई कोनी।” अर इकै पाछै बे बिकाळा बापूनै इसारो कर्यो क इको नाम काँई होणो चाए। जणा जकरयाह हो जखो पटी मंगार बिपै बिको नाम यहून्ना मांड दिओ आ देख बे सगळा ताजूब म पड़गा। अंय्यां करताई बिकी जीब की आटी खुलगी अर बो परमेसर को गुणगान करबा लाग्यो। आ बाता क बजेऊँ आस-पास का रेह्बाळा डरग्या अर आ बाता की चरचा यहूदिआ का पहाड़ी इलाका म च्यारूमेर फेलगी। अर जत्ता बी बठै हा बाकै रेह-रेह ओई बिचार होवै हो क, “ओ टाबरियो ह जखो काँई बणसी?” इको कारण ओ ह क इकै सीर प परबु को हात ह। बिको बाप जकरयाह पबितर आत्माऊँ भरगो अर बो परमेसर कानिऊँ खेबा लागगो, “इजरायल का परबु परमेसर की जे हो क बे आपका मिनखा प निगा करी अर बानै छुटायो। बे आपका भगत दाऊद का कूणबा मऊँ आपणा ताँई एक पराकरमी छुटकारो करबाळो खड़्यो कर्यो, जंय्यां क बे बोळी पेल्याई परमेसर की खेबाळा पबितर मिनखा का मुंडाऊँ खुवा दिआ हा, बे म्हानै म्हारा दुस्मनाऊँ अर म्हारूँ नफरत राखबाळा की सक्‍तिऊँ बचासी। बे आपका पबितर करारनै ध्यान म राख्यो ह क बो आपणा बडका प दया करसी। आ सोगन बो आपणा बडका अब्राहमऊँ खाई, क पक्काई म्हारो छुटकारो म्हारा दुस्मनाऊँ होसी। अर परबु की सेवा करबा ताँई म्हानै कोई डर नइ होवै, अर सगळी उमर आपा रोजकी बिकै सामै पबितर अर धरमी रेह्‍वां। ओ मेरा छोरा यहून्ना तू परम-परधान परमेसर की खेबाळो खुवासी। क्युं क तू परबु को गेलो त्यार करबा ताँई बिकै आगै-आगै चालसी, अर बानै सीखासी क थारा पाप की माफी मिलबा की बजेऊँ थे बचाया जास्यो। अर आपणा परमेसर की बडी दयाऊँ आपणा प छुटकारो देबाळो एक उगता सूरज का च्यानणा की जंय्यां ईस्बर नगरीऊँ चिलकसी। जिऊँ बो च्यानणो मोत की छाया म सोबाळा अर अँधकार म जिबाळा प चमकसी अर आपानै स्यांती म लेज्यासी।” अंय्यां बो टाबरियो होळ्या-होळ्या सागेड़ो मोट्यार होगो अर आत्मा म बी बढगो, अर इजरायली लोगा क सामै आबा क दिन ताँई बो उजाड़ मई रिह्यो। बा दिना राजा अगस्तुस ओ आदेस बटवायो क सगळा रोमी राज का मिनखा को नाम दरज कर्यो जावै । आ रोमी राज की पेली जणगणना ही। आ बि टेम का होई, जि टेम सिरीया को जमीदार कबरीनियुस हो। जणा सगळा मिनख नाम दरज कराबा आप-आप क गाँव गया। जणा युसूफ बी गलिल का नासरत नगरऊँ यहूदिआ म दाऊद की जन्मभौम बेतलम गयो क्युं क बो दाऊद का कूणबा अर बिकी पिडी को हो। नाम दरज कराबा बो मरीयम क सागै गयो जिकै सागै बिकी सगाई हो राखी ही अर बा आसऊँ ही अंय्यां होयो क बठैई मरीयम क जापा की घड़ी आगी। अर बिकै पेलीपोत को छोरो होयो जिनै बा गाबा म लपेटर ल्हास म सुवायो क्युं क बानै रेह्बा की झघा कोनी मिली। अर रातनै बि इलाका की रोई म गुवाळ्या आप-आपका रेवड़ा की रूखाळी करर्या हा। अर परबु को एक ईस्बर नगरी दुत बाकै सारै आर खड़्यो होगो अर बाकै च्यारूमेर परबु की मेमा को तेज चमक्यो जिऊँ बे डर क मारै धुजबा लागगा। जणा बो ईस्बर नगरी दुत बाऊँ बोल्यो, “डरो मना म थानै चोखो समचार सुणाऊँ हूँ, जखो सगळा मिनखा ताँई होसी। क्युं क थानै बचाबाळा मसी परबु को जलम आज दाऊद की नगरी म होगो ह। अर इकी पिछाण आ ह क थानै बो जलम्यो टाबर ल्हास म गाबा म लिपटेड़ो मिलसी।” अत्ता मई बठै ईस्बर नगरी दुत क सागै ईस्बर नगरी दुता की भीड़ की भीड़ परगट होई अर अंय्यां बोलर परमेसर को गुणगान करबा लागी क, “ईस्बर नगरी म परमेसर की जे-जैकार हो अर धरती प बा मिनखानै स्यांती मिलै जिऊँ बो राजी ह।” जद बे ईस्बर नगरी दुत बठैऊँ ओटा ईस्बर नगरी चलेग्या जणा बे गुवाळ्या आपसरी म बतळाया क, “आओ क्युंनै आपा इ बातनै बेतलम चालर देखां जखी आपानै परबु बताई ह।” जणा बे तावळासा जार मरीयम, युसूफनै अर ल्हास म बि टाबरियानै देख्या। अर देखर बे गुवाळ्या इ टाबरिया क बारां म बोलेड़ी बाता बानै बताई। अर जत्ता बी गुवाळ्यानै सुण्या बे ताजूब कर्या। पण मरीयम बा सगळी बातानै आपका हिया म राखर बिचार्या करती ही। अर बे गुवाळ्या जंय्यां की बाऊँ बोल्यो गयो हो बंय्यांई सगळी बातानै देखर परमेसर को गुणगान करता पाछा चलेग्या। आठवा दिन जद बि टाबर की सुन्नत करबा को टेम आयो जणा बिको नाम ईसु काड्यो, ओ नाम ईस्बर नगरी दुत बिकै पेट म पड़बाऊँ पेलीई बता दिओ हो। जणा मूसा का नेम-कायदा गेल जच्चा को सुद होबा को दिन आयो बि टेम युसूफ अर मरीयम बि टाबरनै परमेसर क सामै हाजिर करबानै यरूसलेम लेग्या। जंय्यां परबु का नेम-कायदा म मंडर्यो ह, “हर पेलीपोत का छोरानै परमेसर की सेवा ताँई टाळबो पड़सी।” अर बे बि परबु का नेम-कायदा गेल मोडी को एक जोड़ो नहिस कबूतरा को जोड़ो बलि चढाबा गया। यरूसलेम म पबितर आत्माऊँ भरेड़ो समोन नाम को एक खरो अर भगत मिनख हो जखो इजरायल की अजादिनै उडिकर्यो हो। अर पबितर आत्मा बिनै आ बता राखी ही क परबु का भेजेड़ा मसीनै देख्या बिना तनै मोत कोनी आवै। अर पबितर आत्मा बिनै बडा अरदास घर म ल्याई। अर बि टेमई ईसु मसी का माँ-बाप नेम-कायदा की रिती पूरी करबा ताँई ईसुनै ल्याया। जणा समोन बि टाबरनै आपकी गोद्‍या म लेर, परमेसर को गुणगान कर बोल्यो, “परबु थे थारा कह्यानै पूरो कर्या हो इब थारो दास सुक-स्यांतीऊँ मर सकै ह। क्युं क मेरी आँख्या थारा भेजेड़ा छुटकारो देबाळानै देखली। जिनै थे सगळा मिनखा की आँख्या क सामै रच्यो ह। ओ बा गैर-यहूदि मिनखा ताँई थारो गेलो दिखाबाळो उजाळो अर थारा इजरायल का मिनखा ताँई मेमा ह।” बिकै बारां म आ बातानै सुणर बिका माँ-बाप ताजूब कर्या। आ बात होबा क पाछै समोन बानै आसिरबाद देर बिकी माँ मरीयमऊँ बोल्यो, “इ टाबरनै इजरायल म कयानै डूबाबा अर तारबा को कारण बणबा अर परमेसर की पिछाण बणबा ताँई जिको बिरोद कर्यो ज्यासी पैदा कर्यो गयो ह। जिऊँ कया की पोल चोड़ै आसी। अर तेरी आत्मा तड़पसी।” अर बठै हन्ना नाम की परमेसर की खेबाळी एक बूडी लूगाई ही। अर बा आसेर का कूणबा का फानूल की छोरी ही। अर बा आपकै ब्या क सात बरसा ताँई सुहागण ही। इब बा चोरासी बरस की होरी ही। अर बा कदैई मनदरनै कोनी तज्यो बा रात-दिन बरत अर अरदास क सागै परबु की भगती करती। बि टेम बा आर परमेसर को धनेवाद दिओ अर बा सगळानै जखा यरूसलेम का छुटकारानै उडिकर्या हा बि टाबर क बारां म बतायो। परबु का नेम-कायदा गेल सक्यु सलटार बे पाछा गलिल म आपकी नगरी नासरत म आग्या। अर बो टाबरियो होळ्या-होळ्या सागेड़ो मोट्यार होगो अर बुदी म बढतो गयो अर बिपै परमेसर की दया ही। बिका माँ-बाप फसै का त्युंहार प आई बरस यरूसलेम जाया करता हा। जद बो बारा बरसा को होयोक जणा बे फसै का त्युंहार की रीत गेल यरूसलेम गया। जद त्युंहार खतम होयो जणा बे घरा जाबा लाग्या पण ईसु बठैई रेह्गो अर बिका माँ-बापनै इको बेरो कोनी हो। अर बिकाळा माँ-बाप इ भेम म हा क बो अठैई आपणा कोईसा सागैहाळा क सागै होसी। अंय्यां करता-करता एक दिन बितगो। जणा बे आपका सगा-सम्बंदिआ अर जाणकारा म बिनै ढुंढबा लागगा। अर बो बानै लाध्योई कोनी जणा बे बिनै ढुंढता-ढुंढता ओज्यु यरूसलेम आया। तीन दिना क पाछै बो बानै ज्ञानीधान्या म बेठ्यो बाकी सुणतो अर बाऊँ सुवाल जुबाब करतो मनदर म लाध्यो। अर जत्ता बी बिनै सुणै हाक बे सगळा बिका समजदारी भर्या जुबाबा प ताजूब कर्यो। बिका माँ-बाप बिनै देखर भोचंगा होगा अर बिकी माँ बिऊँ बोली, “मेरा लाल तू म्हारै म आ काँई करी? तेरो बापू अर म तनै ढुंढता-ढुंढता हिरान होगा।” जणा ईसु बाऊँ बोल्यो, “थे मनै क्याले ढुंढा हा? थानै बेरो कोनी के? मनै मेरा परम-पिता क घरा होणोई ह।” पण ईसु की बात बाकै पलै कोनी पड़ी। अर इकै पाछै बो बाकै सागै पाछो नासरत आगो अर बाकै कह्या म चालतो हो। बिकी माँ आ सगळी बातानै आपका हिया म धर राखी ही। ईसु काया, बुदी, परमेसर अर मिनखा की छतर-छाया म बढतो गयो। आ बात जणा की ह जद तिबिरियुस कैसर का राज-काज को पन्दरवो बरस हो, जद यहूदिआ को राजपाल पिन्तुस पीळातुस हो, अर गलिल को राजपाल हेरोद हो, अर बिको भाई फलिपूस इतूरिया अर तरखोमीतिस को, अर अबिलेन को राज-काज लिसानियास क तळै हो। बि टेम हन्ना अर केफा म्हायाजक हा, बा दिना म जकरयाह का छोरा यहून्नानै उजाड़ म परमेसर का समचार लाग्या। अर बो यरदन नदि अर बिकै आसपड़ोस की सगळी झघा म घूम-घूम परचार करतो हो क, “थारा पापऊँ तौबा कर पाणी को बतिस्मो लेल्यो जिऊँ परमेसर थारा पापनै माफ कर देसी। जंय्यां की यसाया परमेसर की खेबाळा का बचना हाळी पोथी म मंडर्यो ह क, ‘कोई उजाड़ म हेलो देवै ह, परबु ताँई गेलो बणाओ अर बिको गेलो सिदो-सपाट करो। सगळी घाट्या को भराव कर इकसार कर्यो जाणो, टेडा-मेडा गेला सिदा कर्या जाणा अर बेढंग का गेलानै ढंग का बणाया जाणा जरूरी ह। अर सगळा मिनख परमेसर का छुटकारा का कामनै देखसी।’” जत्ता बी यहून्ना क कनै पाणी को बतिस्मो लेबा आता बा सगळानै बो एकई बात बोलतो, “अरै सपोलो थानै, थार प पड़बाळी परमेसर की झाळऊँ बचबा ताँई कूण बता दिओ? जणा इब थारा करमाऊँ ओ बेरो पड़णो चाए क थे पाप करबो छोड दिआ हो। अर अंय्यां मना जताओ की म्हें अब्राहम की ओलाद हां। क्युं क म जाणू हूँ अर थारूँ बी बोलुँ हूँ परमेसर आ भाठाऊँ बी अब्राहम ताँई ओलाद पैदा कर सकै ह। इब कुहाड़ो दरख्त की जड़्या प ह जखो बोजो चोखो फळ कोनी ल्यावै बिनै का'टर आग म बाळ दिओ ज्यासी।” जणा बा भीड़ बिऊँ बुजी, “म्हानै काँई करबो चाए?” बो बोल्यो, “जिकनै दो कुर्ता हीं बे बिकै सागै बाट ले जिकनै कोनी। अर जिकनै रोटी ह बो बी अंय्यांई करै।” चुंगी लेबाळा बी बिकन पाणी को बतिस्मो लेबा आया अर बिऊँ बुज्या, “म्हानै काँई करबो चाए म्हराज?” बो बानै ओडायो, “जत्तो थानै बताएड़ो ह बिऊँ बेत्ती मना लिज्यो।” सिपाईड़ा बी बिऊँ बुज्यो, “म्हें काँई करां?” बिको जुबाब ओ हो क, “थे पिसा ताँई मिनखानै मना डराज्यो बस थारी तनखा म राजी रेहज्यो अर कोई प झूठो दोस मना लगाज्यो।” इब मिनखा की आस बढबा लागी क मसी परगट होबाळो ह। अर बे सोचबा लागर्या हा क, “कदै ओई तो मसी कोनी ह?” जणा यहून्ना बा सगळाऊँ बोल्यो, “म तो थानै पाणी को बतिस्मो देर्यो हूँ पण जखो आबाळो ह बो बोळो सक्‍तिसाली ह म तो बिकाळा जूता का सळू खोलबा जोगोई कोनी। अर बो थानै लाय अर पबितर आत्मा को बतिस्मो देसी। अर बो छाजळो लेर त्यार ह जिऊँ बो ग्युंआ मऊँ डूण्डळी साप करसी, जिऊँ ग्युंनै तो आपकी ओबरी म धर देसी अर डूण्डळ्यानै बाळबा ताँई कदैई कोनी बुत्तबाळी लाय म गेर देसी।” अर बो मिनखानै ओर बोळी बाताऊँ समजार चोखो समचार सुणातो रिह्यो। पण जद यहून्ना राजपाल हेरोदनै बिका भाईड़ा की लूगाई हेरोदिआसऊँ ब्या करबा अर बिका सूगला कामा क पेटै ओळमो दिओ। जणा हेरोद सऊँ बुरो काम ओ कर्यो की यहून्नानै काळ-कोठड़ी म गिरवा दिओ। जद सगळा मिनख पाणी को बतिस्मो लेर्या हा, बाकै पाछै ईसु बी पाणी को बतिस्मो लिओ। अर जंय्यांई ईसु अरदास कर्यो बि टेम परमेसर अकासनै खोल दिओ। अर पबितर आत्मा कबूतर की काया को रूप लेर बिपै उतर्यो, जणा अकासऊँ हेलो आयो “तू मेरो लाडलो बेटो ह, म तेरूँ बोळो राजी हूँ।” ईसु करीब तीस बरस को होयो हो जणा बो बचन की सीख देबो चालू कर्यो। ईसु मिनखा की नजर्या म युसूफ को बेटो हो अर युसूफ एली को छोरो हो, एली जखो मत्तात की, मत्तात लेवी की, लेवी मलकी की, मलकी यन्ना की, यन्ना जखो युसूफ की, युसूफ जखो मत्तीया की, मत्तीया आमोस की, आमोस नहूम की नहूम असल्याह की, असल्याह नोगह की, नोगह जखो मात की, मात जखो मत्तीया की, मत्तीया जखो सिमी की, सिमी योसेख की, योसेख योदहा की, योदहा योनान की, योनान रेसा की, रेसा जरूबाबील की, जरूबाबील बरसतियेल की, बरसतियेल नेरी की, नेरी मलकी की, मलकी अद्दि की, अद्दि कोसाम की, कोसाम इलमोदाम की, इलमोदाम ऐर की, ऐर जखो यहोसू की, यहोसू एलीयाजर की, एलीयाजर योरीम की योरीम मत्तात की, मत्तात लेवी की, लेवी समोन की, समोन यहूदा की, यहूदा युसूफ की, युसूफ योनान की, योनान इल्याकीम की। इल्याकीम मलेआ की, मलेआ मिन्नाह की, मिन्नाह मत्तात की मत्तात नातान की, नातान दाऊद की, दाऊद यिसै की, यिसै ओबेद की, ओबेद बोआज की, बोआज सलमोन की, सलमोन नहसोन की, नहसोन अमिनादाब की, अमिनादाब ऐराम की, ऐराम हेजरोन की, हेजरोन फरिस की, फरिस यहूदा की यहूदा याकूब की, याकूब इसाक की, इसाक अब्राहम की अब्राहम तिरह की, तिरह नाहोर की, नाहोर जखो सरूग की, सरूग रऊ की, रऊ फिलीग की, फिलीग एबिर की, एबिर सिलह की, सिलह केनान की, केनान अरफछद की, अरफछद सेम की सेम नूह की, नूह लिमिक की, लिमिक मथूसिलह की, मथूसिलह हनोक की हनोक यिरिंद की, यिरिंद महलेल की, महलेल केनान की, केनान जखो एनोस की एनोस जखो सेत की, सेत जखो आदम की ओलाद ही, आदम जिनै परमेसर रच्यो। ईसु पबितर आत्माऊँ भर'र यरदन नदिऊँ पाछो आयो। अर पबितर आत्मा बिनै उजाड़ म लेगो। अर उजाड़ म ईसुनै चाळिस दिना ताँई सेतान बिचास्यो। बा दिना म बो क्युंई कोनी खायो जि बजेऊँ आ चाळिस दिना पाछै बिनै भूख लागी। अर सेतान बिऊँ बोल्यो, “ज तू असल मई परमेसर को बेटो ह जणा इ भाठानै बोल क ओ रोटी बण जावै।” इपै ईसु बिनै जुबाब दिओ, “सास्तर म अंय्यां मंडर्यो ह क, ‘मिनख रोटीऊँई कोनी जीवै।’” जणा सेतान बिनै उची झघा म लेज्यार आँख मीचताई जगत को सगळो राज दिखायो अर बिऊँ बोल्यो, “इकै उपर को सगळो अधिकार अर ठाट-बाट तनै दे देस्युँ क्युं क ओ मनै दियड़ो ह अर म जिनै चाऊँ बिनै दे सकूँ हूँ जणा इब अ सगळी चिजा तेरी हो सकै ह ज तू मनै धोकै।” ईसु बिनै जुबाब दिओ, “सास्तर म अंय्यां मंडर्यो ह, ‘तनै तेरा परबु परमेसर की सेवा करबो चाए अर बिनैई ध्यारबो चाए।’” जणा बो बिनै यरूसलेम का मनदर की सऊँ उपली चोटी प लेज्यार खड़्यो कर दिओ। अर बिऊँ बोल्यो, “ज तू सचमई परमेसर को बेटो ह जणा अठैऊँ तळै कुदज्या। क्युं क सास्तर म मंडर्यो ह क, ‘परमेसर आपका ईस्बर नगरी दुतानै तनै बचाबा भेज देसी,’ अर बे तेरा पग कोई कांकरा प पड़ै बिऊँ पेली तनै आपका हाता म उठा लेसी।” पण ईसु बिऊँ बोल्यो, “ओ बी मंडर्यो ह क, ‘तू तेरा परबु परमेसरनै मना बिचासजे।’” जणा सेतान बिनै हरतर्याऊँ बिचासर चोखो मोको आबा ताँई बिनै छोडर चलेगो। जणा पाछै ईसु पबितर आत्मा की ताकतऊँ भरेड़ो गलिल म पाछो आयो। अर बिकी चरचा बि इलाका म च्यारूमेर फेलगी। बो अरदास करबाळी झघा म सीख देतो अर सगळा बिकी बडाई करता। जणा पाछै बो नासरत नगरी म आयो जठै बो पळ्यो-बढ्यो हो, अर आपकी बाण गेल यहूदि मिनखा क अरामहाळा दिन अरदास करबाळी झघा गयो अर बो पाठ बाचबा ताँई खड़्यो होयो। अर बाचबा ताँई बिनै परमेसर की खेबाळा यसाया की पोथी दि गई। अर बो पोथी खोलर बा झघा काडी जठै ओ मंडर्यो हो, “परबु की पबितर आत्मा मेर प ह, क्युं क बे मेरो अभिसेक करर भेज्यो ह, क म बोदानै चोखो समचार सुणाऊँ, केद्‍या की अजादि को हेलो पाड़ूँ, आँदानै आँख्या द्‍युँ, दब्या-चिथ्यानै उठाऊँ, अर बि टेम को हेलो पाड़ूँ जिमै परमेसर आपका मिनखानै बचासी।” इकै पाछै बो पोथी बंद कर बा तो दे दि बि सेवकनै, अर खुद निचै बेठगो। अर जत्ता बी बठै हा बा सगळा को ध्यान बिपैई हो। जणा बो बाऊँ बोल्यो, “आज सास्तर म मंडेड़ा अ बचन पूरा होया जंय्यां की थे सुणर्या हो।” सगळा बिकी वाह-वाई करर्या हा। अर बिका मुंडाऊँ निकळबाळा दयाऊँ भरेड़ा बचना प ताजूब करर्या हा। अर बोलर्या हा, “के ओ युसूफ को छोरो कोनी?” बो बाऊँ बोल्यो, “थे मनै आ बात बोलस्यो, ‘ओ बेद खुदनै निरोगो कर अर आबी बोलस्यो जोक्यु थे कफरनूम म कर्या हो बो थारी खुदकी नगरी म बी करो’ म थारूँ सची-सची बोलुँ हूँ खुदकी भौम म परमेसर की खेबाळा की जमाई कदर कोनी होवै। म थारूँ साची बोलुँ हूँ, एलिआ का टेम जद साडे तीन बरसा ताँई एक छाँटई कोनी गिरी अर सगळा देस क मांयनै सागेड़ो काळ पड़्यो बि टेम का इजरायल म घणिई खाली होईड़ी लूगाया ही। पण सैदा नगरी का सारला गाँव सारपत की एक खाली होईड़ीनै छोडर एलिआनै बामैऊँ ओर कोईसा कनै कोनी भेज्यो गयो। अर अंय्यांई परमेसर की खेबाळा एलिसा का टेम म इजरायल म बोळा कोढी हा पण सिरीया देस का नामाननै छोडर दुसरा कोईको बी कोढ कोनी धोयो गयो।” जत्ता बी अरदास करबाळी झघा म हा बे अ बाता सुणर झाळ्या म भरगा। बे खड़्या होर बिनै धकामार नगरी क बारनै डूँगरी की चोटी प लेग्या जि डूँगरी प बाकी नगरी बसेड़ी ही जिऊँ क बे बिनै खड़ी चोटीऊँ तळै पटक सकै। पण बो चुपचाप बाकै मांयनैऊँ चलेगो। इकै पाछै बो गलिल का कफरनूम नगर म गयो। अर यहूदि मिनखा क अरामहाळा दिन लोगानै परबचन देर्यो हो। बे बिका बचनाऊँ ताजूब करर्या हा क्युं क बो अधिकार क सागै सीख देतो हो। बठै अरदास करबाळी झघा म एक मिनख हो जिमै एक सूगली ओपरी बलाय ही। बो जोरऊँ चिलाटी घाल्यो, “ओ ईसु नासरी थारो म्हारो काँई लेणदेण? तू के म्हानै नास करबा आयो ह? म तनै जाणू हूँ तू कूण ह? तू परमेसर को पबितर मिनख ह।” ईसु बिनै दकालर बोल्यो, “चुप रेह अर इमैऊँ निकळज्या।” जणा बा बलाय बिनै पटक'र बिको कोई नुकसान कर्या बिनाई बिमैऊँ निकळगी। आ देखर देखबाळा ताजूब करबा लाग्या अर सगळा आपसरी म बतळाबा लाग्या क, “ओ काँई बचन ह? अधिकार अर सक्‍ति क सागै ओ मिनख सूगली ओपरी बलायनै हुकम देवै अर बे निकळर भाग ज्यावीं।” अर ईसु की चरचा बि इलाका म च्यारूमेर फेलगी। ईसु अरदास करबाळी झघाऊँ समोन क घरा गयो। अर समोन की सासू बि टेम बुखार म पड़ी ही, अर बे ईसुऊँ हात जो'ड़र खयो म्हराज इनै निरोगी करो। अर ईसु बिकै सीराणै खड़्यो होर अधिकारऊँ बुखारनै उतरबा ताँई दकाल लगाई अर बुखार हात्युहात उतरगी। अर बा जदकी जदई खड़ी होर बाकी सेवा-पाणी करबा लागगी। अर दिन आथबा की टेम लोग बा सगळानै ईसु कनै ल्याया जखा भात-भात की बिमार्या म पड़्या हा अर बो बा सगळा क माथा प हात धर'र सगळानै निरोगो कर्यो। अर बामैऊँ घणकराक मऊँ ओपरी बलाय अंय्यां चिलाटी मारती निकळगी क, “तू परमेसर को बेटो ह।” पण ईसु बानै दकालतो अर बोलबा कोनी देतो, क्युं क बे जाणती ही की ओ मसी ह। भागपाट्याई बो एक उजाड़ म चलेगो। पण भीड़ बिनै ढुंढती-ढुंढती बिकन पुगी। अर बे सगळा बिका न्होरा खाया क बो बानै छोडर नइ जावै। पण बो बाऊँ बोल्यो, “परमेसर का राज को चोखो समचार मनै दुसरी नगर्या म बी सुणाणो ह, अर मनै इ ताँई धरती प भेज्यो गयो।” अर अंय्यां करता-करता बो यहूदिआ देस म अरदास करबाळी झघा म हेलो पाड़बा लागगो। एकर ईसु गनेसरत झिल क किनारै खड़्यो हो, अर परमेसर को बचन सुणबा ताँई भीड़ बिनै च्यारूमेरूँ ढक राख्यो हो, जणा बो दो न्याव देखी जामै मछवारा निकळर आपका जाळ साप करर्या हा। बा न्यावा मऊँ समोन हाळी न्याव प चढर बो न्यावनै किनाराऊँ क्युंक थोड़ी घणी हटाबा ताँई खयो। अर पाछै बि खड़ी न्याव प बेठर बो जनतानै सीखाबा लाग्यो। सीखाबा क पाछै बो समोनऊँ बोल्यो, “इ न्यावनै गेरा पाणी म लेचाल अर मछी पकड़बा ताँई थारा जाळ गेरो।” समोन बोल्यो, “मालिक म्हें सारी रात जाळ गेर-गेर दुखी होलिआ अर क्युंई हात कोनी लाग्यो पण थे खेर्या हो जणा एक बर ओर जाळ गेर देस्युँ।” अर जद बे जाळ गेर्यो जणा बिमै घणीसारी मछ्या फसगी अर जाळ पाटबा लागगो। जणा बे दुसरी न्याव प सवार आपका सात्यानै इसारो कर मदद ताँई बुलाया अर बे दोन्यु न्यावानै अत्ती ठाडी भरली क न्याव डूबबा लागगी। आ देखर समोन पतरस ईसु क पगा म पड़गो अर बोल्यो, “परबु म पापी हूँ मेरूँ दूर रेह्ओ।” इकी आ बजे ही क बो अर बिकै सागैहाळा अत्ती मछ्या पकड़ी जणा बानै ताजूब होयो हो। अंय्यांई जब्दि का बेटा याकूब अर यहून्नानै बी ताजूब होयो जखा समोन का साती हा। इपै ईसु समोनऊँ कह्या, “डरै मना, इबऊँ तू परमेसर का राज म मिनखानै ल्याबाळो बणसी।” अर बे न्यावनै पाणी क बारनै किनारा प लिआया, अर सक्यु छोड-छाडर ईसु क गेल होलिआ। जद ईसु एक नगरी म हो, जणा बठै एक आदमी हो जिकै कोढ होर्यो हो, अर बो ईसुनै देखताई बिकै पगा म पड़गो अर हात जो'ड़र खेबा लाग्यो, “म्हराज, ज थे चाओ तो मेरो कोढ धो सको हो।” जणा ईसु बिपै हात धर बिऊँ खयो, “म चाऊँ हूँ क तेरो कोढ धुपज्या।” अत्तो खेताई बिको कोढ धुपगो। जणा ईसु बिनै हुकम दिओ, “तू आ बात कोईनैई मना खिजे पण तू याजकनै दिखार मूसा का हुकम गेल जखो चढावो चढाबा ताँई बता राख्यो ह बो चढा जिऊँ लोगानै तेरै कोढ धुपबा को सबूत मिल सकै।” पण ईसु की चरचा दिन दुणी अर रात चोगुणी फेलती जारी ही अर लोगा की भीड़ की भीड़ बिनै सुणबा अर रोगाऊँ निरोगा होबा ताँई भेळी होरी ही। पण ईसु उजाड़ म एकलो जार अरदास करतो हो। एक बर जद ईसु सीख देर्यो हो जणा बठै गलिल, यहूदिआ, अर यरूसलेम का सगळा नगर्याऊँ आएड़ा फरिसी अर धरम की सीख देबाळा बठै बेठ्या हा। अर रोगलानै निरोगा करबा ताँई परबु परमेसर की सक्‍ति बिकै सागै ही। बि टेम च्यार-पाचेक जणा एक भाळ भेयड़ा मिनखनै खाटली म घालर ल्याया अर बे बिनै ईसु कनै मांयनै लेज्याबा की ताक म हा। अर बठै भीड़ अत्ती जोरकी ही क बे मांयनै कोनी बड़ सक्या जणा बे छात प जार खपर्यो हटार खाटली समेतई बिनै ईसु क सामै निचै उतार दिओ। बाका बिस्वासनै देखर बो बिऊँ खयो, “भाईड़ा तेरा पाप धुपगा।” जणा सास्तरी अर फरिसी आपसरी म बुजबा लाग्या क, “ओ पाप धोबाळो कूण होवै ह पाप तो परमेसरई धो सकै ह जणा ओ क्युं परमेसर की बुराई करै ह।” ईसु बाकी मना की बात जाणगो अर खयो, “थे अंय्यां थारै मना म क्युंर-क्युं क्याले सोचो हो। सोरो काँई ह? ओ खेबो क, ‘तेरा पाप धुपगा’ नहिस, ‘खड़्यो हो अर डोल फिर।’ पण इ ताँई क थे जाणल्यो क मिनख का बेटानै धरती प पाप धोबा को बी हक मिलेड़ो ह। अर म तेरूँ बोलुँ हूँ खड़्यो हो अर तेरी गुद्ड़ी लेर तेरै घरा चल्योजा।” आ खेताई बो खट उठ्यो अर आपकी खाटली जिमै बो पड़्यो हो बा उठार आपकै घरा परमेसर को गुणगान गातो चलेगो। आ देखर सगळा धोळा होगा अर परमेसर की जे-जैकार करबा लागगा। अर डरता-डरता बोल्या, “आज तो म्हें अनोरीई बात देखी ह।” इकै पाछै ईसु बठैऊँ बारनै गयो अर चुंगी चोकी प लेवी नाम का चुंगी लेबाळानै बेठ्यो देखर बिनै खयो, “मेरै गेल होले।” अर बो खड़्यो होर सक्यु छोड-छाडर बिकै गेल होलिओ। इपै लेवी ईसु क सनमान म एक दावत दि अर बि दावत म चुंगी लेबाळा अर दुसरा मिनखा की चोखी भीड़ होरी ही। जखा बिकै सागै रोटी खाबा बेठ्या हा। इ बात प फरिसी अर सास्तरी बिका चेलानै ओळमो दिआ क, “थे चुंगी लेबाळा अर पापी मिनखा क सागै खाई-पी क्युं करो हो?” इका जुबाब म ईसु बाऊँ बोल्यो, “निरोगा मिनखानै बेद की जुर्त कोनी होवै। रोगलानैई बेद की जुर्त पड़ै ह। म धरमी मिनखा का मनानै नइ पण पाप्या का मनानै पापऊँ हटार परमेसर म लगाबानै आयो हूँ।” क्युंक मिनख बिऊँ खया, “यहून्ना अर फरिसीया का चेला तो बरत राखीं अर अरदास करीं, पण तेरा चेला तो सूल खावीं पीवीं हीं।” ईसु बाऊँ खयो, “बिंद क होतासोता थे बरात्यानै भूखा राख सको हो के? पण बे दिन बी आसी जद बनड़ो बाऊँ न्यारो कर्यो ज्यासी अर बि टेम बे बरत करसी।” बो बानै एकोर बात बोली क, “कोईनै बी पुराणा गाबा प नया गाबा मऊँ कातर का'टर कारी लगाता देख्या हा के? अर अंय्यां कर बी दे जणा नयो गाबो तो पाटै जखो पाटै बा नई कारी पुराणीया गाबा प चोखी बी कोनी लागै। अर नइ ताजा अँगूरी पुराणी बखाल म भरीं अर अंय्यां करदे जणा ताजा अँगूरी उठर बखालनै पा'ड़र ढूळज्या अर बखाल को बी नुकसान करदे। जणाई तो लोग ताजा अँगूरीनै नई बखाल म भरीं हीं। अर पुराणी अँगूरी पीर कोई मिनख नई कोनी माँगै क्युं क बिनै बिमै घणो सुवाद आवै इ ताँई बो बोलै हनै, पुराणीई चोखी ह।” अरामहाळा दिन ईसु अर बिका चेला ग्युंवा का खेता मऊँ जार्या हा, जणा बिका चेला हा जखा बाळ्या तोड़-तोड़ बानै हाताऊँ मसळता जाय अर बाको फांको मारता जाय। जणा क्युंक फरिसी बाऊँ बोल्या, “थे बो काम क्युं कर्या हो? जखो अरामहाळा दिन करबो बरजेड़ो ह।” जणा जुबाब म ईसु बानै कह्या, “जद दाऊद अर बिकाळा सिरी भूखा हा, जणा दाऊद काँई कर्यो हो? के थे आ कोनी बाच्या? अर बो कंय्यां परमेसर का घर म जार चढावा म चढेड़ी रोटी खाई अर आपका सिर्यानै बी खुवाई। थे तो जाणोई हो बा रोट्यानै याजक क सिवाय दुसरा को खाणो बरजेड़ो ह।” अर बो बाऊँ बोल्यो, “मिनख को बेटो अरामहाळा दिन को बी परबु ह।” दुसरा अरामहाळा दिन बो अरदास करबाळी झघा म परबचन देर्यो हो। अर बठै एक अंय्यां को मिनख आयो जिको दाइणो हात सूकेड़ो हो। सास्तरी अर फरिसी आँख गाड राखी क बो बिनै अरामहाळा दिन निरोगो करै क कोनी करै। क्युं क बे तो बिपै दोस मंढबा की तक म हा। पण बो तो बाकै मना की बात जाणतोई हो जणा बो बि टुंडा मिनखऊँ बोल्यो, “खड़्यो हो अर सकै सामै आज्या” अर खेताई बो खड़्यो होगो। जणा ईसु मिनखाऊँ बोल्यो, “म थारूँ बुजूँ हूँ अरामहाळा दिन बिधी गेल काँई ह कोईको भलो करबो नहिस बुरो करबो? कोईकी ज्यान बचाबाऊँ मारबो चोखो ह के?” अर ईसु च्यारूमेर बानै देख-दाख, बिऊँ कह्यो, “तेरा हातनै सिदो करले।” अर ईसु क कह्या गेल बंय्यांई बो आपका हातनै सिदो कर लिओ अर बिको हात ओज्यु ठिक होगो। अंय्यां देखर बे लाल-ताता होगा अर भेळा होर बतळाबा लागगा की, “ईसु को काँई करां?” बा दिना म बो अरदास करबा डूँगरी प गयो। अर सगळी रात परमेसरऊँ अरदास करतो-करतो आँख्या मई काड दि। अर दिन उगताई बो आपका चेलानै बुलाया अर बामैऊँ बारानै टाळर बानै भेजेड़ा चेला नाम दिओ, अर बाका नाम अ हीं समोन जिको दुसरो नाम पतरस जखो नाम ईसु को काडेड़ो हो। अर बिका भाईड़ा अंदरिआस, याकूब अर यहून्ना, फलिपूस, अर बरतुल्मै, अर मत्ती, अर थोमा, अर हलफई को छोरो याकूब, अर देस भगत समोन। अर याकूब को छोरो यहूदा, अर यहूदा इस्करोती जखो ईसुनै धोकाऊँ पकड़ाबाळो हो। जणा बो डूँगरी पऊँ बाकै सागै तळै उतर्यो अर मैदान म आर खड़्यो होयो, अर बठै बिका बोळा चेला क सागैई सगळा यहूदिआ, यरूसलेम, सूर अर सैदा क समदर किनारा का मिनखा की घणीसारी भीड़ भेळी होरी ही। बे बिनै सुणबा अर बिमार्याऊँ निरोगा होबा ताँई बठै भेळा होया हा, अर सूगली ओपरी बलायऊँ दुखी मिनखा को जापतो बी बठै होयो हो। अर सगळा बिकै अड़बो चावा हा क्युं क बिमैऊँ सक्‍ति निकळरी ही जखी सगळानै निरोगो कर'री ही। इकै पाछै बो आपका चेला कानि देखर बोल्यो, “थे गरीब हो जणाई भागहाळा हो, इ बजेऊँई परमेसर को राज थारो ह। थे भागहाळा हो जखा भूखा हो, थानै धपायो ज्यासी। थे भागहाळा हो जखा आज रोर्या हो, क्युं क आगै थे हसस्यो। थे भागहाळा हो जद मिनख का बेटानै मानबा की बजेऊँ दुसरा मिनख थारूँ बेर राखीं, थानै समाज क बारनै करीं, थारी बेजती करीं अर थानै बुरा बतावीं हीं। बि दिन थे राजी होर नाचा-कूदि करज्यो क्युं क ईस्बर नगरी म थारै ताँई बडोसारो इनाम ह अर बाका बाप-दादा बी परमेसर की खेबाळा क सागै अंय्यांई करता हा। थार प हाय ह, थे जखा पिसाळा हो, क्युं क थे मजा ले लिआ हो। हाय थार प जखा धापेड़ा हो क्युं क थे बास्या मरस्यो हाय ह थार प जखा हसो हो, क्युं क पाछै थे बार घालता रोस्यो हाय ह थार प जाकी सगळा मिनख बडाई करीं हीं, क्युं क बाका बाप-दादा बी बा मिनखा क सागै अंय्यांई करता हा जखा खेता हा, म्हें परमेसर कानिऊँ बोलां हां पण बे सचमई परमेसर की खेबा की बजाय खुदकी खेता हा। “सुणबाळो म थारूँ बोलुँ हूँ, दुस्मनाऊँ परेम करो जखा थारो बुरो करीं, बाको भलो करो। थानै सराप दे बिनै आसिरबाद द्‍यो अर जखा थारै सागै बुरो बरताव करै बा ताँई अरदास करो। अर कोई थारा गाल प थपड़ मारै जणा दुसरो गाल बी आगै करद्‍यो अर जखो थारो कोट खोसै बिनै थारो कुर्तीयो लेबाऊँ बी मना मत करो। अर जखो थारूँ क्युं माँगै थे बो देद्‍यो अर जखो थारी कोई चिज खोसले बा बिऊँ पाछी लेबा की कोसिस मना करो। मिनखाऊँ बंय्यां को बरताव करो जंय्यां को थे बाऊँ चाओ हो। अर थे बाऊँई जखा थारूँ प्यार-परेम राखै ह प्यार-परेम करो जणा काँई गुण-एसान? क्युं क आपकाऊँ तो पापी बी प्यार-परेम राखै। अर थे थारो भलो करबाळा को भलो करो जणा इमै काँई गुण-एसान? अंय्यां तो पापीई करीं हीं। थे थारा बिस्वास हाळानैई करजो द्‍यो हो इमै काँई गुण-एसान? क्युं क पापी बी तो पाप्यानै करजो देवीं हीं, क बे बत्तोई ओटो चूक सकै। पण थारा दुस्मनाऊँ बी प्यार-परेम राखो, बाकै सागै बी भलाई करो, अर क्युं बी पाछो नइ आबा की आस कर बानै करजो द्‍यो। अर अंय्यां करस्योक जणा थारै ताँई बडो इनाम होसी। अर थे परम-परधान परमेसर का टाबर खुवास्यो क्युं क बो तो बुरा अर बिको धनेवाद नइ करबाळा प बी दया दिखावै ह। जंय्यां थारो परम-पिता दयालु ह बंय्यांई थे बी दयालु बणो। “कोईको भलो-बुरो कर न्याय मना करो जणा परमेसर बी थारो न्याय कोनी करसी। गळत मना बताओ जणा परमेसर थानै बी कोनी बतासी। माफ करो जणा परमेसर थानै बी माफ करसी। दुसरानै दिआ करो जणा परमेसर थानै बी निका नाप तोलर दबा-दबा अर हला-हला चोखी ढाळ उंदकतो देसी। क्युं क जि नापऊँ थे दुसरानै द्‍यो हो बि नापऊँई थानै दिओ जासी।” जणा बो एक बात बोली, “आँदो-आँदानै गेलो दिखा सकै ह के? अंय्यां करसी जणा के बे दोन्युई खाडा म जार कोनी पड़सी? चेला गरूऊँ बडा कोनी, पण जखो चेलो पूरो ज्ञान लेले जणा बो आपका गरूजी जंय्यां को होज्या। तनै डूँगर बळती तो दिखै पण पगा बळती कोनी दिखै। थारी खुदकी गळत्या तो थानै दिखई कोनी अर चाल्या दुसरा की गळत्या सुदारबा। ओ ढोंगी पेली खुदकी बडी-बडी गळत्यानै तो सुदारले जणा पाछै कठै जार तू ओरा की छोटी-छोटी गळत्यानै पिछाण्बा म अर बानै सुदारबा म बाकी मदद कर सकै ह। जणा पाछै तू कंय्यां खे सकै ह आ भाईड़ा म तेरी गळत्यानै सुदार द्‍युँ। “चोखा दरख्त प चोखा फळ लागै अर बुरा दरख्त प बुरा फळ लागै। इ बजेऊँई तो सगळा पेड़ आपका फळाऊँई पिछाण्या जावै ह मतबल ओ ह क झाड़ी क अंजीर कोनी लागै अर नइ झाड़ी क अँगूर लागै। चोखो मिनख आपका चितऊँ चोखी बात काडै अर बुरो बुरीई चितै, मतबल ओ ह क जखो मांयनै होसी बोई बारनै आसी। “जद थे मेरो खेणो मानोई कोनी जणा पाछै मनै हे परबु हे परबु क्याले बोलो हो? जखो मेरै कनै आवै अर मेरी सुणै अर मानै ह बिनै म बतास्युं बो कंय्यां को ह, बो बि मिनख की जंय्यां ह जखो आपको घर ढाड प बणायो। अर जद बाढ आई जणा पाणी की टकर बिकै लागी पण बि मकाननै हला कोनी सकी क्युं क बो पक्को चिणेड़ो हो। पण जखो सुणर कोनी मानै बो बि मिनख की जंय्यां ह जखो माटी प बिना निम क घर चिण्यो अर जद पाणी की धार लागी जणा बो हात्युहात तबा होगो अर सक्यु ढेग्यो।” मिनखानै आपहाळी सुणाबा क पाछै ईसु कफरनूम गयो। बि बठै एक सुबेदार हो जिको एक दास बिमारीऊँ मरबाळोसो होर्यो हो इ दासऊँ सुबेदारनै लगाव बी बोळो हो। बि सुबेदार क काना म ईसु की चरचा पड़ी, जणा बो यहूदि मिनखा का यहूदि नेतानै बाऊँ मिन्नत करबा भेज्यो क बे आर बिकाळा दास का पिराण बचा लेवै। जणा बे आर ईसुऊँ सचा मनऊँ मिन्नत करी क, “म्हराज थे सुबेदार की मदद करो क्युं क बो इ जोगो ह। क्युं क बो म्हारा यहूदि मिनखाऊँ प्यार-परेम राखै ह अर बो म्हानै अरदास करबा ताँई ठिडो बणार दिओ ह।” जणा बे बाकै सागै होलिआ। पण जद बे बिकाळा घरा क सांकड़ै लाग्याक बि टेम बो सुबेदार क्युंक भाईला क हात आ खुवा भेजी क, “परबु म अत्तो बडो आदमी कोनी, क थे मेरी छात क तळै आओ। इ बजेऊँई तो म खुद थारै कनै आबा की कोनी बिचारी। पण थे तो बस खे द्‍यो, मेरो दास निरोगो होज्यासी। म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै, अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।” आ सुणर ईसुनै बि मिनख प ताजूब होयो, बे मुड़र बाकै गेल आर्या मिनखाऊँ खया, “इ जंय्यांको पक्को बिस्वास तो म इजरायल का मिनखा म बी कोनी देख्यो।” बे संदेसो लेर आबाळा जद पाछा घरा पुग्या, जणा बो दास बानै निरोगो लाध्यो। इकै आगला दिन ईसु नाइन नाम की नगरी म गयो, जठै बाका चेला अर एक बडी भीड़ बाकै सागै होरी ही बे जंय्यांई नगरी का दरूजा प पुग्याक, जणा देख्या क बठिकी एक अरथी जारी ही, अर बो एक खाली होईड़ी को एकलोतो बेटो हो जि बजेऊँ नगरी का घणकराक बिका दाग म सामिल हा। जणा बि खाली होईड़ीनै देखर ईसुनै बिपै तरस आयो अर बे बिऊँ बोल्या, “रोवै मना।” जणा ईसु गया अर अरथी क हात लगाया अर कांध्या हा जखा डटगा। जणा ईसु बोल्या, “मोट्यार म तेरूँ खेऊँ हूँ उठ।” अत्ता मई बो मरेड़ो आदमी उठर बेठ्यो होगो अर बाता करबा लागगो, ईसु बिनै बिकी माँनै समळा दिआ। आ बातानै देख बे सगळा मिनख डरग्या अर ईस्बर को गुणगान गाबा लागगा। बे कह्या, “आपणै मांयनै एक बडो परमेसर की खेबाळो परगट होयो ह। परमेसर आपका मिनखानै बचाबा आयो ह।” ईसु की आ खबर सगळा यहूदिआ दिसावर अर बिका च्यारूमेर का इलाका म फेलगी। अ बात यहून्नानै बिका चेला बताया, जणा यहून्ना आपका दो चेलानै बुलार बानै ईसु कनै ओ बेरो पाड़बानै भेज्यो क, “थे कूण हो? कदै थे आबाळा बेई तो मसी कोनी हो नहिस फेर म्हें कोई ओरनै उडिकां?” जणा बे ईसु कनै जार बाऊँ खया, “बतिस्मो देबाळो यहून्ना म्हानै थारूँ आ बुजबा ताँई भेज्या हीं क थे आबाळा मसी हो के, नहिस म्हें कोई दुसरानै उडिकां?” बि टेमई ईसु बोळा रोगलानै बाकी पिड़ाऊँ निरोगा कर्या, ओपरी बलायाऊँ मिनखानै छुटाया अर बोळा आँदानै आँख्या दि। जणा ईसु बाऊँ कह्या, “जोक्यु थे सुण्या अर देख्या हो बो जार यहून्नानै खे द्‍यो क आँदा ओज्यु देखीं हीं, लंगड़ा चालीं हीं, कोढ्या को कोढ धोयो जार्यो ह अर बेरा सुणर्या हीं, मुरदानै जीवायो जार्यो ह अर गरीबा म चोखा समचार को परचार कर्यो जार्यो ह। भागहाळा ह बे जखा मेरै प बिस्वास करै ह।” बा चेला क जाबा क पाछै, ईसु बठै बेठी भीड़नै यहून्ना क बारां म बताबा लाग्या, “थे उजाड़ म काँई देखबा गया हा, के भाळऊँ हालता कूचानै? नइ, जणा थे काँई देखबा गया हा? के कोई चोखा गाबल्या पेरेड़ा मिनखनै? चोखा गाबल्या पेरबाळा अर मोजऊँ जिबाळा तो म्हेला म मिली हीं। जणा थेई बताओ, थे काँई देखबा गया हा? के कोई परमेसर की खेबाळानै? हाँ, थे जिनै देख्या बो परमेसर की खेबाळाऊँ बी बढकै ह। यहून्ना बोई ह जिकै बारां म पबितर सास्तर म ओ मंडर्यो ह, ‘देख म तेरूँ पेली मेरा हलकारानै भेजूँ हूँ जखो तेरो गेलो त्यार करसी।’ म थारूँ बोलुँ हूँ, ‘लूगाईऊँ जलमेड़ा म यहून्नाऊँ बडो कोई कोनी। पण ईस्बर नगरी का राज म रेह्बाळो छोटाऊँ छोटो मिनख बी बिऊँ बडो ह।’” जणाई हर कोई अठै ताँई चुंगी लेबाळा बी बिनै सुणर परमेसर का गेलानै सचो मान लिआ क्युं क बे यहून्नाऊँ पाणी को बतिस्मो लिआ हा। पण फरिसी अर सास्तरानै सीखाबाळा, यहून्नाऊँ पाणी को बतिस्मो नइ लेर परमेसर बा ताँई जोक्यु ध्यार राखी ही बिनै टाळ दिआ। ईसु ओज्यु बोल्यो, “जणा म इ पिडी का मिनखा की बराबरी किकै सागै कर सकूँ हूँ? क बे बिकी जंय्यां ह? बे बजार म बेठ्या बा टाबरा की जंय्यां हीं जखा एक दुसरानै हेलो देर बोलीं हीं, ‘म्हें थारै ताँई बाजो बजाया पण थे नाच्याई कोनी। म्हें थारै ताँई बार घाली पण थे रोयाई कोनी।’ खेबा को मतबल ओ ह क बतिस्मो देबाळो यहून्ना रोटी कोनी खातो अर नइ अँगूरी पीतो, अर थे बोलो हो बिमै ओपरी बलाय ह। अर इकै पाछै मिनख को बेटो आयो जखो खातो-पीतो हो, जिनै थे डचु अर दारूड़ो बतायो, चुंगी लेबाळा अर पाप्या को भाईलो बतायो। परमेसर की बुदी गेल चालबाळा बिकी बुदीनै सई साबित करीं हीं।” एक फरिसी ईसुनै आपकै घरा मिजमानी को नूतो दिओ। जणा बे फरिसी क घरा गया अर मिजमानी खाबा बेठगा। अर बि नगरी म एक पापण ही, बिनै जद बेरो पड़्यो क ईसु फरिसी क घरा मिजमानी खार्या हीं, जणा बा संगमरमर की एक बरनी म ईतर लेर आई। बा बाकै गेलऊँ आर बाका पगा कनै खड़ी होगी। अर बा रोती जाय, अर आपका आसुआऊँ बाका पग धोती जाय, पग धोर आपका बाळाऊँ पगानै पु'छर पग पकड़ लिआ अर बि ईतरनै बिका पगा प उंदका दिनी। आ देखर ईसुनै मिजमानी घालबाळो फरिसी आपका हिया म बिचार्यो, “ज ओ परमेसर की खेबाळो होतो जणा जाण ज्यातो क आकै हात अड़ाबाळी आ कूण ह? अर कंय्यांकी ह? ओ जाणज्यातो क आ पापण ह।” जणा ईसु समोनऊँ खया, “समोन मनै तेरूँ क्युं खेणो ह।” इपै समोन खयो, “बोलो म्हराज।” ईसु बोल्या, “सुण एक साऊकारऊँ दो मिनख करजो लिओ एक तो पानसो चाँदी हाळा सीक्का लिआ अर दुसरो पचास सीक्का। पण बे दोन्युई बिको करजो कोनी चुकतो कर सक्या जणा साऊकारनै बापै दया आगी अर बो दोन्या को करजो माफ कर दिओ। इब तू बता बा दोन्या मऊँ बिनै बेत्ती परेम कूणसो करसी?” समोन खयो, “मेरा बिचारऊँ जिका बेत्ती पिसा माफ कर्या घणो प्यार तो बोई करसी।” जणा ईसु खया, “तेरो फेसलो सई ह।” जणा बि लूगाई कानि घू'मर ईसु समोनऊँ बोल्या, “तू इ लूगाईनै देखर्यो ह के? म तेरै घरा आयो अर तू मनै पग धोबा ताँई पाणी ताँई की कोनी बुजी अर आ मेरा पगानै आसुआऊँ धोर बानै आपका बाळाऊँ पुछी ह। तू मेरा स्वागत म मनै माखोई कोनी दिओ अर जदऊँ म आयो हूँ आ मेरा पगानै छोडरी कोनी। तू मेरा सीर प तेलऊँ अभिसेक कोनी कर्यो पण आ मेरा पगा प ईतर उंदकाई। जणा म तेरूँ बोलुँ हूँ क इको ओ आँदो परेम ओ दिखावै ह क इका बोळासारा पाप माफ कर्या गया हीं। पण जिका थोड़ा पाप माफ कर्या गया हीं बो थोड़ो प्यार दिखावै ह।” जणा ईसु बि लूगाईऊँ बोल्या, “तेरा पाप धुपगा हीं।” जणा बे जखा ईसु क सागै मिजमानी खार्या हा, बे आपका मन म सोच्या, “ओ कूण ह जखो पापनै बी धोवै ह?” पण ईसु बि लूगाईऊँ खया, “तू राजी-खुसी जा क्युं क तेरो बिस्वासई तनै बचायो ह।” इकै पाछै ईसु परमेसर का राज का चोखा समचार को हेलो पाड़ता गाँव-गाँव अर नगर-नगर मऊँ गया। अर बिका बारा चेला बी बिकै सागै-सागै रेह्ता। अर बिनै मानबाळी क्युंक लूगाया बी बिकै सागै ही, जानै बो ओपरी बलाय अर बिमारीऊँ छुटायो हो, बामैऊँ एक लूगाई ही जिको नाम मरीयम मगदलिनी हो जिमैऊँ बो सात ओपरी बलाय काडी। अर हेरोद का मुनिम खुजा की लूगाई योअन्ना, अर सुसन्ना ओर बी बोळी ही। अ सगळी लूगाया आपका बळबूता पई ईसु अर बिका चेला की मदद करती। जद नगरी-नगरी का मिनखा को एक बडो रेळो ईसु कनै आर भेळो होयो जणा बो बानै एक मिसाल दिनी: “एक बर एक किसान हो बो बीज बोबानै गयो। जद बो बीजानै फेक्यो जणा क्युंक बीज गेला क सारै पड़्या जखा पगा क तळै आर मसळ्या गया। अर चिड़कल्या बानै चूगलेगी अर क्युंक कांकरा म जार पड़्या बे उग्या तो सई पण नमी नइ मिलबा की बजेऊँ बळगा। अर क्युंक झाड़्या म जार पड़्या अर झाड़ी बाकै सागै बढर बानै दाब दिनी। अर क्युंक उपळी माटी प पड़्या अर बे सो गुणा फळ्या।” अत्तो खेताई बो जोरऊँ हेलो मार'र खयो, “जिकै कान ह बो बानै खोलल्यो।” बिका चेला बिऊँ बुज्या, “इ मिसाल को काँई मतबल ह?” जणा बे खया, “परमेसर क राज का भेद को ज्ञान थानै दियड़ो ह पण दुसरानै म अ भेद मिसाल देर बताऊँ हूँ। जिऊँ बे देखर बी कोनी देख सकीं अर सुणर बी कोनी सुण सकीं। “इ मिसाल को मतबल ओ ह क बीज ह जखा परमेसर का बचन हीं। बे बीज जखा गेला क सारै पड़्या, अ बे मिनख हीं जखा बचन सुणी, पण सेतान आर बाका मना मऊँ बिनै काडले क्युं क बो कोनी चावै क बे बिस्वास कर बच जावै। कांकरा प पड़बाळा बीज बे हीं जखा बचन सुणर बिनै राजी होर मानली। पण बाकै मना म बो गेराई कोनी पकड़ै बे थोड़ी देर ताँई बिस्वास करीं पण जद बानै बिचास्यो जावै जणा बे ओटा सरक ज्यावै। अर जखा बीज झाड़्या म पड़्या बिको मतबल ओ ह की बे मिनख जखा बचननै सुणी पण जद बे बापै चाली जणा चिंत्या, धन-दोलत अर जिंदगी का मजा बानै दबा देवै ह जिऊँ बे सूल कोनी फळै। अर उपळी माटी प पड़्या बीज बे हीं जखा बचन सुणर बिनै चोखा अर खरा हियाऊँ मानै अर थ्यावस राखर समाळर राखीं हीं जद ताँई क बाका करम बि बचन गेल नइ होज्यावै। “कोईबी दिआनै कुंडा तळै कोनी म्हेलीं अर नइ माचा तळै सरकावै पण बिनै आळ्या म म्हेलीं जिऊँ मांयनै आबाळानै बिऊँ च्यानणो मिल सकै। क्युं क क्युंबी ओलामै कोनी जिनै चोड़ा म नइ ल्यायो जा सकै अर नइ क्युं ढकेड़ो ह जखो उघाड़्यो नइ जावै। इ ताँई चेता म रेह्ओ जिकनै ह बिनै ओर दिओ ज्यासी अर जिकनै कोनी बिऊँ जोक्यु ह बो बी ले लिओ जासी।” बि टेम ईसु की माँ अर बिकाळा भाईड़ा बिऊँ मिलबा ताँई आया पण भीड़ अत्ती जोरकी ही बे बिकन पुग कोनी सक्या। जणा बिनै बतायो गयो की, “तेरा भाईड़ा अर तेरी माँ तेरूँ मिलबा ताँई बारनै खड़्या हीं।” इपै ईसु बानै बोल्यो, “मेरी माँ अर मेरा भाईड़ा तो बे हीं जखा परमेसर का बचनानै सुणी अर बिपै चालीं।” एक दिन ईसु आपका चेला क सागै न्याव म चढगो अर बानै खयो, “आओ आपा झिल क परलै-पार चालां।” जणा चेला ह जखा न्याव हांक दिनी। अर चालती न्याव म ईसुनै निंद आगी। अर आँधी चालबा लागगी, जिऊँ न्याव म पाणी भरबा लागगो अर बे सागेड़ी आफत म फसगा। जणा बे बिकन आया अर बिनै जगार खया, “म्हराज, म्हराज आपा डूबबाळा हां।” जणा बो उबो होर आँधी अर पाणी की झालनै दकाल्यो जिऊँ सक्यु स्यांत होगो। जणा बो बाऊँ बुज्यो, “कठै गयो थारो बिस्वास?” पण बे ईसु अर बिकाळी सक्‍तिऊँ डरै हा अर जोक्यु बो कर्यो बिपै ताजूब करर्या हा। अर आपसरी म बतळार्या हा, “ओ कूण ह? जखो भाळ अर पाणी दोन्या प हुकम चलावै, अर बे इको खयो करै।” अर बे गलिल क परलै नाकै गिरासेनिया नाम का परदेस म न्यावऊँ पुग्या। जंय्यांई बो किनारा प उतर्यो, बानै बि नगरी को एक आदमी मिल्यो जिमै ओपरी बलाया ही जि बजेऊँ कई दिनाऊँ नइ तो बो गाबा पेर्या अर नइ घरा रिह्यो बो तो मूसाणा क मांयनै रेह्तो। ईसुनै देखर बो बिका पगा म पड़गो अर जोर-जोरऊँ बार घालतो बोल्यो, “थारो म्हारो काँई लेणदेण? ओ परमपिता परमेसर का बेटा ईसु म थारै हात जोड़ूँ मनै दिन मना घालै।” क्युं क बो बि सूगली ओपरी बलायनै बिमैऊँ निकळबा को हुकम दिओ। आ ओपरी बलाय बार-बार बिमै रळ जाती, जणा अंय्यां होतो क बि आदमीनै साँकळाऊँ बांद देता पण बा ही जखी साँकळानै तोड़र बिनै उजाड़ म ले ज्याती। अर ईसु बिऊँ बुज्यो, “तू कूण ह?” बा खई, “सेना” क्युं क बिमै बोळीसारी ओपरी बलाया रळरी ही। बे ईसु क सामै हात जो'ड़र बोली क, “म्हानै पताळ म मना भेजै।” बि टेम सारैई डूँगरी प सूल्डा को रेवड़ चरै हो, जणा बे बि रेवड़ म जाबा ताँई ईसुऊँ हात जो'ड़र बोली। अर ईसु बानै बि रेवड़ म जाबा की हामळ भर दि। जणा बे बि आदमी की खोळ तो दि छोड अर बा सूल्डा म जार बड़गी। अर सूल्डा को रेवड़ बठैऊँ गुळगची खार जोड़ा म डूब मर्यो। सूल्डानै चराबाळा जोक्यु होयो हो बिनै देखर बठैऊँ भागर नगरी अर बिकै सारली ढाणी-ढ़फाण्या म खे सुणायो। जणा जोक्यु बठै घट्यो बिनै देखबा ताँई लोग गया, अर जद बे ईसु कनै पुग्या जणा बि आदमीनै जिमैऊँ ओपरी बलाय भागगी ही बिनै ईसु क पगा म, पूरा गाबा पेर्या अर सतूना म बेठ्यो देखर बे सगळा का सगळा डरग्या। जत्ता बी, इ बातनै होता देखी बे बठै आएड़ा मिनखानै बताया क ओ कंय्यां चोखो होयो। जणा गिरासेनिया का रेह्बाळा ईसुऊँ हात जो'ड़र बोल्या क, “तू अठैऊँ चल्यो जा।” क्युं क बे सगळा डरग्या हा जणा ईसु न्याव म बेठर चालबा लाग्योक बि टेम का बो मिनख जिमैऊँ ओपरी बलाय भागी ही बो ईसुऊँ हात जो'ड़र खयो, “मनै बी थारै सागै ले चालो” पण ईसु बिनै आ खेर पाछो भेज दिओ क, “घरा जार आ बात सगळानै बता क परमेसर तेरै आडो आयो।” अर बो जार नगरी म हेलो पाड़्यो क ईसु बि ताँई काँई कर्यो? झिल क परलै नाकै लोग बिनै उडिकर्या हा अर जद ईसु पाछो आयोक जणा लोग बिऊँ राजी होर मिल्या। बि टेम का याईर नाम को कोई मिनख आर बिकै पगा पड़ग्यो जखो बठैका यहूदि मिनखा का अरदास करबा का घर को परधान हो अर बिनै आपका घरा चालबा ताँई हात जो'ड़र खयो। क्युं क बिकै बारा बरस की एक छोरी ही अर बा मरबाळी ही अर ईसु जद जार्या हा जणा भीड़ उपर-तळी बापै टूटर पड़री ही। अर बठैई एक लूगाई बी ही जिकी बारा बरसाऊँ न्याह्णी थमरी कोनी ही अर जोक्यु बी बिकन हो बिनै बा बेदानै बोया बेठी ही अर बिनै कोईबी निरोगो कोनी कर सक्यो। जणा बा गेलऊँ जार ईसु का कुर्ता की कोर क हात लगाई अर हात लगाताई बिको लोय भेबो थमगो। जणा ईसु बुज्यो, “मेरै कूण हात अड़ायो?” जद सगळा नटगा जणा पतरस बोल्यो, “म्हराज भीड़ की भीड़ तो थार प टूटर पड़री ह।” पण ईसु खया, “कोई तो मेरै पक्काई हात अड़ायो ह क्युं क मेर मऊँ सक्‍ति निकळी ह।” जद बि लूगाईनै अंय्यां लाग्यो क म कोनी लुख सकूँ जणा बा धुजती-धुजती आई अर ईसु क पगा म पड़गी। अर सगळा क सामै ईसुनै बताई क बा बिकै क्याले हात लगाई ही अर कंय्यां बा हात्युहात निरोगी होगी। ईसु बिऊँ बोल्यो, “बेटी तू तेरा बिस्वास की बजेऊँ निरोगी करी गई ह इब राजी-खुसी जा।” बो हाल बोलर्योई हो क अत्ता मई यहूदि मिनखा का अरदास घर का अधिकारी क घराऊँ एक जणो आर बोल्यो क, “तेरी छोरी तो मरगी, इब गरूजीनै ओर तंग मना करै।” ईसु आ बात सुणली अर याईरऊँ खया, “डरै मना, खाली बिस्वास राख, तेरी छोरी बच ज्यासी।” जद ईसु बिका घर म आयोक जणा बो मांयनै कोठा म आपकै सागै पतरस, याकूब, यहून्ना अर बि छोरी का माँ-बापा क सिवाय ओर दुसरानै आबा की इजाजत कोनी दि। अर जत्ता बी बठै हा बे जोर-जोरऊँ बार घालर रोर्या हा। ईसु बोल्यो, “रोओ मना आ मरी कोनी ह, आ सुती ह।” जणा बे बिपै हस पड़्या। क्युं क बानै बेरो हो क छोरी मरगी। पण ईसु मांयनै गयो अर बि छोरी को हात पकड़र जोरऊँ खयो, “बेटा खड़ी हो।” अत्तो खेताई बिमै पाछा पिराण पड़ग्या अर बि टेमई बा खड़ी होगी जणा ईसु ओडायो, “इनै क्युं खाबा ताँई देद्‍यो।” इ चमत्कारनै देखर बिका माँ-बाप ताजूब म पड़गा पण ईसु बानै हुकम दिओ, “इ बात को जिकर कोईऊँ मना करज्यो।” ईसु आपका बारा चेलानै एक सागै बुलार, बानै ओपरी बलायानै काडबा अर रोगलानै निरोगा करबा की सक्‍ति अर अधिकार दिओ। इकै पाछै बो बानै परमेसर का राज को हेलो पाड़बा अर रोगलानै निरोगो करबा को अधिकार देर बारनै भेज्या। अर बो बानै खयो, “गेला ताँई थारी जुर्त को क्युंई समान मना ल्यो नइ तो लाठी नइ झोळो, नइ रोटी-टुक, नइ रिपीआ अर नइ पेरबा ताँई न्यारा कुर्ता। थानै जि घर म आदरमानऊँ बुलायो जावै, जणा थे बि घर मई रेहज्यो जद ताँई की थे बा नगरी नइ छोड द्‍यो। अर जि जठै थारी सुणाई कोनी होवैक जणा बठै का मिनखानै चेताबा ताँई थारा पगा की धूळ झाड़ दिज्यो।” जणा बे बठैऊँ बिदा लेर गाँव-गाँव जार परमेसर को चोखो समचार सुणाया अर मिनखानै निरोगा कर्या। अर जोक्यु होर्यो हो बि बात की भणक जद गलिल का राजपाल हेरोदनै लागी जणा बो घबरागो क्युं क क्युंक खेर्या हा क “यहून्ना मरेड़ाऊँ ओज्यु जिंदो होगो।” अर क्युंक खेर्या हा क, “एलिआ धरती प उतर्यो ह।” क्युंक खेर्या हा क, “परमेसर की खेबाळा पुराणीया मऊँ कोई जिंदो होयो ह।” पण हेरोद बोल्यो, “यहून्ना को सीर तो म खुद कटवा दिओ हो। इब ओ कूण आगो जिका बारां म, म अ बाता सुणर्यो हूँ?” जणा हेरोद बिऊँ मिलबा की कोसिस करी। जणा पाछै ईसु कनै आर बे भेजेड़ा चेला जोक्यु बे कर्या बिकी जाणकारी बिनै दि। जणा बो बानै आपकै सागै लिओ अर बे चुपचाला बेतसदा नाम की नगरी म गया। पण इ बात को बेरो लोगानै पड़गो अर भीड़ की भीड़ बिकै गेल-गेल होली। बो राजी-राजी बाऊँ मिल्यो अर बानै परमेसर का राज क बारां म बतायो अर जखा रोगला हा बानै निरोगो कर्यो। जद दिन आथबा लाग्योक जणा बे बारा का बारा बिकन आर बोल्या, “इ भीड़नै इब बिदा कर जिऊँ अ आसपड़ोस का गाँव अर ढाण्यां म जार आपका खाबा-पीबा अर आसरा को जोगाड़ करीं क्युं क आपा इ उजाड़ म पड़्या हां।” बो बोल्यो, “थेई आनै खाबा ताँई क्युं द्‍यो।” जणा जुबाब म चेला बोल्या, “आपणै कनै तो बस पाच रोटी अर दो मछी ह पण आ तो हो सकै क, म्हें जावां अर आ सगळा ताँई रोटी मोल ल्यावां।” बठै लगभग पाच झार तो मोट्यार-मोट्यारई हा। जणा ईसु चेलानै ओडाया, “आनै पचास-पचास की पंगत म बिठा द्‍यो।” बे बंय्यांई कर्या जंय्यां बाऊँ खयो गयो। बे सगळानै पंगत म बिठा दिआ। जणा ईसु बा पाच रोट्या अर दो मछ्यानै लेर उपर देखर परमेसर को धनेवाद कर्यो अर बाका टुकड़ा कर-कर चेलानै देतो गयो क बे लोगानै जिमावै। अर जद सगळा खार धापगा जणा बचेड़ा रोट्या का टुकड़ाऊँ चेला बारा चोल्या भर्या। एक बार ईसु एकलो अरदास करर्यो हो बि टेम बिका चेला बिकन आया, जणा ईसु बाऊँ बुज्यो, “म कूण हूँ, इ बारां म लोग काँई खेवै ह?” बे खया, “घणकराक तो तनै बतिस्मो देबाळो यहून्ना खेवै। पण क्युंक बोलीं तू एलिआ ह। अर क्युंक तो तनै पुराणा जमाना को परमेसर की खेबाळो समजीं हीं जखो जिंदो होर आगो।” बो बाऊँ बोल्यो, “इब आ बताओ थे मेरै बारां म काँई समजो हो क, म कूण हूँ?” जणा पतरस खयो, “तू परमेसर कानिऊँ भेजेड़ो मसी ह।” ईसु बा सगळानै सूल चेतार हुकम दिओ, “इकै बारां म कोईनैई मना खिज्यो।” ईसु आपका चेलानै खियो, “आ तो होणी ह क मिनख को बेटो बोळा दुख उठासी। अर यहूदि नेता, परधान याजक अर सास्तरानै सीखाबाळा बिनै तजसी अर जिकै पाछै बो मार्यो जासी। पण बो तीसरा दिन मरेड़ा मऊँ जिज्यासी।” बो बा सगळाऊँ खयो, “ज कोई मेरै गेल आबो चावै ह बो खुदनै तज'र, आपकी सुळी उठार मेरै गेल होले। इऊँ ओ होसी क जखो बी आपका पिराण बचाबो चावै बो बाकी हानी उठासी। अर जखो बी मेरै ताँई आपका पिराण तजसी बो बिनै बचासी। ज आदमी सगळी दुनियानै जीत ले अर आत्मानै खोदे नहिस बिकी हानी उठावै जणा बिनै काँई फाईदो? जखो बी, मिनखा क सामै मनै अर मेरा बचनानै मानबाऊँ सरम करसी, जणा मिनख को बेटो बी बाऊँ नातो राखबो आपकी बेजती मानसी जद बो पबितर ईस्बर नगरी दुता, आपका परम-पिता अर खुदकी मेमा म आसी। म थानै सची खेऊँ हूँ, अठै खड़्या मिनखा मऊँ कई-कई तो अंय्यां का ह की बे जद ताँई परमेसर का राजनै कोनी देखले जद ताँई बानै मोत कोनी आवै।” आ बाता क सपता भर पाछै ईसु पतरस याकूब अर यहून्नानै सागै लेर डूँगर प अरदास करबा गयो। अर जद बो अरदास करर्यो हो जणा बिकी सकल बदलगी अर बिका गाबा भळका मारता धोळा धप होगा। अर बठै दो जणा परमेसर का परताब क सागै परगट होया जिमैऊँ एक मूसा अर दुसरो एलिआ हो। बे ईसु की मोत क बारां म ईसुऊँ बतळार्या हा जिनै बो परमेसर की मरजी यरूसलेम म पूरी करबाळो हो। पतरस अर बिकाळा साती निन्दा म हा जद बे सूल चेतो कर्यो जणा बे बिकी मेमा का तेज अर बा दो जणानै जखा बिकै सागै खड़्या हा देख्या। अर जंय्यांई बे बिऊँ बिदा ले हाक, जणा बि टेम पतरस बिऊँ बोल्यो, “म्हराज कतो चोखो ह क म्हें अठै हां! म्हानै तीन पंडाळ बणाबा दे, एक थारै ताँई, एक मूसा ताँई, एक एलिआ ताँई।” बो सचमई कोनी जाणतो हो क बो काँई बोलर्यो हो। बो हाल ताँई खेर्योई हो क अत्ता मई एक बादळी आई अर बा सगळानै ढकली जिऊँ चेला डरग्या। बि टेम हात्युहात बादळा मऊँ हेलो आयो, “ओ मेरो बेटो ह जिनै म टाळ्यो हूँ थे इकी सुणो।” ओ हेलो होबा क पाछै बानै ईसु क सिवाय बठै कोई कोनी दिख्यो। अर बे अ बात आप ताँई राखी। अर जोक्यु बे देख्या बिको जिकर बा दिना म बे खिनई कोनी कर्या। आगलै दिन जद ईसु अर बिका तीन चेला डूँगरीऊँ तळै उतर्या जणा बानै मिनखा को रेळो अगाऊ लाध्यो। बि रेळा मऊँ एक जणो कू'कर बोल्यो, “गरूजी म थारूँ हात जोड़ खेऊँ हूँ मेरा छोरा की तिथ ल्यो। मेरै तो बो एकई ह। बिमै क्युं रळेड़ो ह अर बो आपको असर दिखावै जणा मेरो छोरो बूताऊँ बारनै होज्यावै, अर मुंडा होर झाग बगावै, बिनै बुर्या तरोड़ै-मरोडै़ अर छोरानै छोडबा को नामई कोनी ले अर बिनै दिन घालरी ह। म थाकाळा चेलाऊँ अरदास करी क बिमैऊँ बिनै काड दे पण बाऊँ तो पार कोनी पड़ी।” जणा ईसु बोल्यो, “अरै भेम करबाळो अर कुटिचर मिनखो, म कद ताँई थारै सागै रेहस्युं अर थानै भोगस्युं? जा अर तेरा छोरानै अठै ल्या।” जद बो छोरो आर्यो हो जणा बिच मई बा सूगली ओपरी बलाय बिनै रोड़ली अर मरोड़ी देर जमीन प दे मारी। जणा ईसु जोरऊँ बि बलायनै दकालर बि छोरा मऊँ बिनै काड दि। अर छोरानै राजी-खुसी बिका बापनै समळा दिओ। बे सगळा परमेसर का इ बडा कामऊँ ताजूब म पड़गा। अर जद मिनख ईसु का करेड़ा सगळा कामा प ताजूब करर्या हा, बि टेमई ईसु आपका चेलाऊँ बोल्यो, “थे इ बात प कान लगाओ क मिनख को बेटो मिनखा क हाता म सूप्यो जासी।” पण अ बाता बाकै पलै कोनी पड़ी। अर अ बाता बाऊँ लुखायड़ी ही जणा बे कोनी जाण सक्या। अर बे आ बातानै बुजबाऊँ डरता हा। एक बर अंय्यां होई क, ईसु का चेला आपसरी म इ बात प जिदबा लागगा क, आपणा म सऊँ बडो कूण? पण ईसु बाका मना का बिचार जाणतो हो जणा बो एक टाबरियानै लेर आपकै कनै खड़्यो कर्यो, अर बाऊँ बोल्यो, “जखो कोई मेरै ताँई इ टाबरिया को मान करै बो मेरो बी मान करै। अर जखा मेरो मान करीं बे मनै भेजबाळा परमेसर को बी मान करीं हीं। इ बजेऊँ जखो थार मऊँ सऊँ छोटो ह बोई सऊँ बडो ह।” जणा यहून्ना बोल्यो, “ओ म्हराज, म्हें एक आदमीनै देख्या जखो तेरा नामऊँ ओपरी बलाय काडर्यो हो, अर म्हें बिनै अंय्यां करबा ताँई नट्या क्युं क बो आपणै मालो कोनी हो।” ईसु बोल्यो, “बिनै मना रोको क्युं क जखो थारै सामै कोनी बो थारै कानि ह।” जद ईसु का ईस्बर नगरी म उठाया जाबा का दिन सांकड़ै हा जणा बो यरूसलेम जाबा ताँई आपका हियानै पक्को कर लिओ। अर बो आपकै अगाऊ दुत भेज्या जखा रेह्बा खाबा को सलिको देखबा सामरीया का एक गाँव म गया। पण सामरीया का मिनख बठै बानै बड़बा कोनी दिआ क्युं क बो यरूसलेम जार्यो हो। आ देखर बिकाळा चेला याकूब अर यहून्ना बिऊँ बोल्यो, “थे बोलो तो म्हें हुकम करां क अकासऊँ आग बरसै अर आनै बाळ गेरै।” पण बो पाछो मुड़र बानै दकाल्यो जणा पाछै ईसु अर बिकाळा चेला दुसरा गाँव चलेग्या। जद बे गेला म जार्या हा, जणा एक मिनख ईसुऊँ बोल्यो, “थे जठै बी जास्यो म बी थारै गेल जास्युं।” ईसु बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।” बो दुसरा मिनखनै बोल्यो, “मेरै गेल होले।” जणा बो मिनख बोल्यो, “ओ म्हराज मनै पेली जाबा दे की म मेरा बापनै गाड्याऊँ।” जणा ईसु बोल्यो, “मरेड़ा मिनखानै बाका मरेड़ानै गाडबा दे। पण तू जा अर परमेसर का राज को हेलो पाड़।” एक जणो ओर बोल्यो, “ओ परबु म तेरै गेल चल्यो चालस्युं पण पेली मनै मेरा घरकाऊँ बिदा लेबा दे।” जणा ईसु बोल्यो, “जखो मिनख आपको हात हळ प धर'र गेलनै देखै बो परमेसर का राज जोगो कोनी।” इकै पाछै परबु, जि नगरी अर झघा जाबाळो हो बठै जाबाऊँ पेली बो ओर भत्तर मिनखानै टाळर आपकै अगाऊ बानै दो-दो कर बा नगर्या अर झघा म भेज्या। अर बो बानै बोल्यो, “लावणी आएड़ा खेत तो बोळा हीं पण ध्यानग्या थोड़ा हीं। इ ताँई थे खेत का धणी परमेसरऊँ अरदास करो जिऊँ बे लावणी करबा ताँई ध्यानग्यानै भेजै। जाओ, पण ध्यान रेह्‍वै म थानै ल्याळ्या क मांयनै उन्या की जंय्यां भेजर्यो हूँ। थे बटूओ, झोळी अर लीतरा मना लिज्यो अर नइ गेला म खड़्या होर खिनै नमस्कार करज्यो। अर जि घर म जाओ बिमै बड़ता पेलीई खिज्यो, ‘इ घर को भलो होवै।’ थारा आसिरबाद जोगो ज कोई बि घर म होसीक जणा थारो आसिरबाद बिकै लागसी नहिस बो पाछो थारै कनै आज्यासी। अर जोक्यु बे थानै दे, बिनै खा-पीर बठैई रेहज्यो, क्युं क ध्यानग्यानै ध्यानगी को हक ह। अर बासो लेबा ताँई घर-घर मना भटकज्यो। अर जि नगरी म थारी आवभगत होवै। अर थारै सामै जोक्यु परूस्यो जाय बोई खाज्यो। अर बि बठै का रोगलानै निरोगो कर बानै बोलो परमेसर को राज सांकड़ोई ह। अर जि नगरी म थारी आवभगत कोनी होवै। जणा बठै का गळिआरा म जार बोलो, ‘थारी नगरी की धूळ जखी म्हारै पगा क लागरी ह, बा म्हें थानै चेताबा ताँई थारै सामैई झाड़ां हां। पण कान खोलर सुणल्यो परमेसर को राज सांकड़ैई आग्यो ह।’ म थानै बिस्वास दिवाऊँ हूँ न्यायहाळै दिन सदोमऊँ बेत्ती, बि नगरी की दसा बुरी होसी। “खुराजीन अर बेतसदा म रेह्बाळा मिनखा प हाय ह अत्ता-अत्ता ताजूब का काम आ नगर्या म कर्या गया, ज अ काम सूर अर सैदा म कर्या जाता जणा बठै का मिनख बोरी का गाबा पेर'र खुद प राख बुरकार, कदकाई दिखा देता क बे पापऊँ तौबा कर लिआ हीं। पण न्यायहाळै दिन सूर अर सैदा की दसा थारी दसाऊँ बोळा बाटा चोखी होसी। अर कफरनूम म रेह्बाळो थे के राजी होवो हो, की ईस्बर नगरी जास्यो? पण थानै तो सिदो नरक म पटक्यो जासी।” ईसु आपका चेलाऊँ बोल्यो, “जखो थारी सुणै, बो मेरी बी सुणै। अर जखो थानै कोनी बद्दै, बो मनै बी कोनी बद्दै, अर जखो मनै कोनी बद्दै, बो मनै भेजबाळानै बी कोनी बद्दै।” बे भत्तर का भत्तर राजी होता ओटा आर ईसुऊँ बोल्या, “परबु जद थारा नामऊँ म्हें ओपरी बलायनै ओडावां हां जणा बा बी बिनै मानै ह।” ईसु बाऊँ बोल्यो, “म ईस्बर नगरीऊँ बिजळी की जंय्यां सेताननै तळै पड़ता देख्यो हूँ। अर सुणो, म थानै साँप अर बिछूआनै एडी तळै मसळबा अर बेरी सेतान की सगळी सक्‍तिनै थारै बस म करूँ। थारो कोई क्युंई कोनी बिगाड़ सकै। पण इ बात प राजी मना होवो की ओपरी बलाया थारै बळ म ह पण इ बात प राजी होवो की थारा नाम ईस्बर नगरी म मंडर्या हीं।” बि घड़ी ईसु पबितर आत्माऊँ भर'र राजी होर बोल्यो, “ओ परम-पिता ईस्बर नगरी अर धरती का मालिक म तेरो गुणगान करूं की तू आ बातानै ज्ञानीद्यान्याऊँ लखोर राखी अर गुठा छाप प आका भेदानै खोल्या। क्युं क ओ थारी नजर्या म चोखो हो। “मेरो परम-पिता मनै सक्यु दे दिओ अर परम-पिता क सिवाय कोई कोनी जाणै क बेटो ईसु कूण ह? अर बेटा ईसु क सिवाय कोई कोनी जाणै क परम-पिता कूण ह? अर के बो जाणै जिनै बेटो ईसु बतावै।” जणा पाछै ईसु चेला कानि मुड़र छानैसीक बोल्यो, “थे बडा भागहाळा हो जखो थानै अ बाता देखबा को सोभाग मिल्यो। क्युं क म थानै बताऊँ हूँ, थे जखो देखो हो बानै बोळा परमेसर की खेबाळा अर राजा देखबो चावै हा। पण बे देख कोनी सक्या अर जखो थे सुणो हो बा बे कोनी सुण सक्या।” एक दिन सास्तरानै सीखाबाळो बठै आर ईसुनै फसाबा ताँई बिऊँ बुज्यो, “गरूजी, अजर-अमर जीवन पाबा ताँई म काँई करूं?” इपै ईसु बिनै जुबाब दिओ, “इ बारां म नेम-कायदा म काँई मंडर्यो ह? अर तू बिऊँ काँई समजै ह?” बो बोल्यो, “तू परबु थारा परमेसरऊँ सगळा हिया अर सगळा पिराण सगळी ज्यान अर सगळा मनऊँ प्यार-परेम कर। अर सागैई खुदका पड़ोसीऊँ बी खुदकी जंय्यां प्यार कर।” ईसु बिऊँ बोल्यो, “तू ठिक बोलर्यो ह, इब तू तेरै कह्या गेल करै, जणा तनै अजर-अमर जीवन मिलसी।” पण बो खुदनै सई दिखाबा क चकर म ईसुऊँ बोल्यो, “मेरो पड़ोसी कूण ह?” जणा ईसु बिनै एक निती-कथा सुणाई, “एक आदमी यरूसलेमऊँ यरियो जार्यो हो। जणा गेला मई बिनै डाकू मिलग्या। अर बिका गाबल्या काड लिआ अर जोक्यु बिकन हो, बो सक्यु लूट-लाट बिनै ठोक-ठाक अदमर्यो कर बठैई गेरगा। कुदरती बठिकी एक याजक निकळ्यो पण बो बिनै देखर मुंडो फेर आपका गेलै चलेगो। अंय्यांई एक मनदर को सेवादार बी बठिकी आयो पण बि याजक की जंय्यांई बो बी मुंडो फेर चलेगो। इकै पाछै बठिकी एक सामरी मूसापिर आयो। अर बो बि आदमीनै देख्योक जणा बिनै बिपै तरस आयो। जणा बो बिकन आर बिका घावा प जेतून को तेल अर अँगूरी गेर'र पटी बांदी। इकै पाछै बिनै आपकी सवारी प चढार एक धरमसाळ म लेगो। अर बठै बिकी चोखी दवा-दारू करी। अर आगलै दिन बो धरमसाळ का मालिकनै दो चाँदी हाळा सीक्का का'डर दिआ अर बोल्यो, ‘इकी दवा-दारू करज्यो अर जोक्यु उपर ओर लागै तो लगा दिज्यो म ओटो आर चुकता कर देस्युँ।’” ईसु अंय्यां बतार बिऊँ बुज्यो, “तेरा बिचारऊँ जिनै डाकू ठोक्या बि आदमी को बा तीन्या मऊँ पाड़ोसी कूण होयो?” जणा बो सास्तरानै सीखाबाळो बोल्यो, “जखो बिपै दया करी।” जणा ईसु बोल्यो, “जा अर तूबी बंय्यांई कर।” जद ईसु अर बिकाळा चेला आपका गेला जार्या हा, जणा बो एक गाँव म पुग्या। बठै एक मारथा नाम की लूगाई आपका घर म बिकी मनवार करी। अर बिकी एक भाण ही जिको नाम मरीयम हो, बा परबु का पगा कनै बेठर बिका बचन सुणरी ही। अर मारथा मिजमानी की करेड़ी त्यारी क बारां म चिंत्या म डूबेड़ी बठै आई अर बोली, “परबु मेरी भाणनै मेरो हात बटाबा ताँई खेओ, आ सगळो काम मेर पई गेर दिओ।” जणा परबु बोल्यो, “मारथा सुण तू बोळी बातानै सोचै ह अर बाकी चिंत्या करै ह। पण बस एक बात की जुर्त होवै ह। अर मरीयम जखो चोखो ह, बिनै आप ताँई टाळी ह अर बो बिऊँ खोस्यो कोनी जावै।” एक दिन अंय्यां होयो क ईसु एक झघा अरदास करर्यो हो। जद बो अरदास कर हट्योक जणा बिका चेला मऊँ एक बोल्यो, “परबु म्हानै बी आ अरदास करबो सीखाओ। जंय्यां की बतिस्मो देबाळो यहून्ना आपका चेलानै सीखायो हो।” बो बाऊँ बोल्यो, “जद थे अरदास करो जणा अंय्यां बोलज्यो: परम-पिता, थारो पबितर नाम उचो मान्यो जाय, थारो राज आवै। म्हारी रोजकी रोटी रोजकी म्हानै द्‍यो। म्हारा पापनै माफ करो, जंय्यां म्हें म्हारो बुरो करबाळानै माफ कर्या हा। अर म्हें बिचास्या नइ जावां इ बातऊँ बचाओ।” अर ईसु आपका चेलाऊँ बोल्यो, “मानल्यो थारै मऊँ कोईसा क एक भाईलो होवै, अर बिकन आदी रातनै जार बिनै बोलै, ‘ओ भाईला मनै तीन रोट्या दे। क्युं क मेरो एक भाईलो सफर मऊँ इबी-इबी मेरै कनै पुग्यो ह अर बिकै सामै परूसबा ताँई मेर कनै क्युंई कोनी।’ अर मांयनैऊँ उवाज आवै, ‘मनै दुखी मना करै, म सक्यु ढक ढकार मेरा टाबरा क सागै बिछावणा म हूँ। अर इ टेम उठर तनै क्युंई कोनी दे सकूँ।’ म थानै बोलुँ, थारो भाईलो होबा क नातै बो कोनी उठै अर क्युंई कोनी दे। पण थारै बेसरमा होर बार-बार माँगबा की बजेऊँ बोई उठर थानै थारी जुर्त गेल देसी। “अर इ ताँई म थारूँ बोलुँ हूँ, माँगो थानै मिलसी, ढुंढो थानै लाधसी, कुआड़ खुड़काओ जणा थारै ताँई खोल्यो जासी। क्युं क जखो माँगै ह बिनै मिलै। जखो ढुंढै बिनै लाधै। अर जखो खुड़कावै बि ताँई कुआड़ खोल्यो जावै। थारै मऊँ अंय्यां को बाप कूण ह जिको बेटो मछी माँगै जणा बिनै साँप पकड़ा दे? अर ज बो अंडो माँगै जणा बिकै हात म बिछू धरदे। ज थे बुरा होर बी थारा टाबर टिकरानै चोखी चिज देबो जाणो हो। जणा थारो परम-पिता जखो ईस्बर नगरी म बिराजै ह आपका माँगबाळानै पबितर आत्मा क्युं कोनी देसी?” एक दिन ईसु एक मिनख मऊँ गुँगी ओपरी बलायनै काडी। जद बा बलाय निकळी जणा गुँगो मिनख बोलबा लाग्यो, अर आ देखर लोग ताजूब म पड़गा। पण बामैऊँ क्युंक बोल्या, “ओ तो भूता का नाथ बालजबुल की सक्‍तिऊँ आनै काडै ह।” दुसरा बिनै परखबो चावै हा इ ताँई बे ईसुऊँ माँग करी क, “तू म्हानै ईस्बर नगरी की कोई सेलाणी दिखा जिऊँ ओ बेरोपाट सकै क तू ईस्बर कानिऊँ भेजेड़ो ह।” ईसु जाणतो हो, की बे काँई सोचर्या हीं। जणा बो बाऊँ बोल्यो, “जि राज म फूट पड़ज्या बो राज खतम हो जावै ह। अर बंय्यांई जि घर म फूट होवै बो घर उजड़ जावै ह। अंय्यांई ज सेतान का राज म फूट पड़ज्या जणा बिको राज कंय्यां बण्यो रेह्सी? क्युं क थे मेरै बारां म बोलो हो क म ओपरी बलाया का सरदार बालजबुल की सक्‍तिऊँ बलायानै भगाऊँ। अर ज अंय्यां ह जणा थाकाळा चेला बी बालजबुल की सक्‍तिऊँ भगाता होगा? जणा इ बात ताँई बेई थानै गळत साबित करसी। पण ज म परमेसर की सक्‍तिऊँ ओपरी बलायानै भगाऊँ हूँ, जणा इऊँ आ साबित होवै ह क परमेसर को राज थारै सांकड़ैई ह। जद तगड़ो मिनख राछ लेर आपका घर की रूखाळी करै। जणा बिको घरबार बच्यो रेह्‍वै ह। पण जद सेरनै सवा सेर मिलज्या जणा बो बिपै हमलो कर बिनै हरार बिका सगळा राछ जापै बो भरोसो राखतो हो खोसर बिकी चिजानै ओरा म बाट दे ह। जखो मेरै सागै कोनी बो मेरै खिलाप ह अर जखो मिनखानै मेरा चेला होबा ताँई भेळो कोनी करै बो बानै मेरूँ दूर लेज्यावै ह। “जद कोई सूगली ओपरी बलाय मिनख मऊँ निकळै ह। जणा बा अराम ढुंढती उजाड़ म डोलै अर जद बिनै बठैबी अराम कोनी मिलै। जणा बा खेवै ह म मेरा पुराणीया घर म जिमैऊँ म आई हूँ पाछी चली जास्युं। अर बा पाछी आवै जणा बो बिनै भार्यो-झाड़्यो अर जच्यो-जचायो लाधै। जणा बा जार खुदऊँ बी सात बुरी ओपरी बलायानै आपकै सागै कर बिकै मांयनै बड़ जावै। अर बि आदमी की दसा पेलड़ीऊँ घणी बुरी होज्यावै।” अ बाता सुणर भीड़ मऊँ एक लूगाई ईसुऊँ बोली, “तनै जलम देर दुद प्याबाळी माँ बडा भागहाळी ह।” पण ईसु बोल्यो, “इऊँ बी बडा भागहाळा तो बे हीं जखा परमेसर का बचनानै सुणी अर बिपै चालीं हीं।” ईसु क च्यारूमेर भीड़ भेळी होगी ही। जणा बो बोल्यो, “आ पिडी बोळी बुरी ह। जखो अ सेलाणी माँगै ह। पण योना की बातानै छोडर आनै ओर कोई सेलाण कोनी दिज्यासी। जंय्यां निनवे का मिनखा ताँई योना सेलाण हो। बंय्यांई इ पिडी का मिनखा ताँई मिनख को बेटो सेलाण होसी। सिबा की राणी न्यायहाळै दिन इ पिडी प दोस मंढसी क्युं क बा धरती का इ कूणाऊँ बि कूणा म सुलेमान कनै ज्ञान लेबा गई ही पण अठै जखो ह बो सुलेमानऊँ बी बोळो बडो ह। न्यायहाळा दिन निनवे का मिनख बी खड़्या होर इ पिडी का मिनखा प दोस मंढसी। क्युं क निनवे का मिनख योना को परचार सुणर पापऊँ तौबा कर लिआ हा। पण अठै जखो ह बो योनाऊँ बी बडो ह। “दिआनै जळार कोईबी बिनै ओला म कोनी राखै। अर नइ कुंडा तळै म्हेलीं, पण बिनै उचासा आळ्या म म्हेलीं जिऊँ मांयनै आबाळानै च्यानणो दिखै। अंय्यांई थारी काया को दिओ थारी आँख ह। इ ताँई जद ताँई थारी आँख्या सई ह, थारी काया म बी च्यानणो ह, अर जनाड़ै, अ खराब होज्या बि दिनऊँई थारी पूरी काया म अँधेरो होज्यासी। इ ताँई चेता म रेह्ओ थारै मांय को च्यानणो अँधेरा म नइ बदल जावै। ज थारी सगळी काया म च्यानणो ह। अर इका कोईसाई कूणा म अँधेरो कोनी जणा ओ थार प जळता दिआ की जंय्यां जगमगासी।” ईसु आपकी सुणार चुप होयो, जणा एक फरिसी बिनै आपकै घरा रोटी खाबा ताँई नूत्यो। जणा बे बिकै घरा जार चोकी प रोटी खाबानै बेठगा। पण आ देखर की ईसु रोटी खाबाऊँ पेली बाका सुद होबा का रिती-रिवाज गेल हात कोनी धोया बि फरिसीनै ताजूब होयो। जणा ईसु बिऊँ बोल्यो, “थे फरिसी हो जखा थाळी कचोळानै बारनै-बारनैऊँ तो मांजो हो। पण बो मांयनैऊँ तो गंदो को गंदो रेह बंय्यांई हात धोया काँई जद थारै मांयनै लालच अर बुराई भरी पड़ी ह। अरै बावळो, जखो बारला हिस्सानै बणायो बो मांयलानै कोनी बणावै के? पण जखो-क्युं मांयनै ह बिको दान कर द्‍यो, जिऊँ थारै ताँई सक्यु सुद होज्यासी। पण ओ फरिसीयो, थार प हाय ह! थे पोदिनो, कड़ी-पत्ता अर भात-भात की सारी जड़ी-बुटी को दसवो हिस्सो तो परमेसरनै द्‍यो हो। पण परमेसर ताँई थारा प्यार-परेम अर न्यायनै टाळ द्‍यो हो। होणो तो अंय्यां चायो हो की थे दुसरी बातानै छोडर आ सगळी बातानै करता। फरिसीयो थार प हाय ह! क्युं क थानै अरदास करबाळी झघा म उची झघा अर बजारा म लोग थारै सामै हात जोड़ै अंय्यां भावै। धिक्कार ह थार प! क्युं क थे बा नइ दिखबाळी कबरा की जंय्यां हो जिपै लोग अणभोळ म चालीं हीं।” एक सास्तरानै सीखाबाळो बोल्यो, “गरूजी अंय्यां खेर थे म्हारी बेजती करो हो।” जणा ईसु बिनै टक्कोसो जुबाब दिओ, “ओ सास्तरानै सीखाबाळो थार प बी हाय ह। क्युं क थे मिनखा प अंय्यां का बोज लादो हो। जिनै उठाबो कलडो ह। अर थे बि बोजनै उठाबा ताँई बानै आँगळी को सारोई कोनी द्‍यो। थार प हाय ह! थे बा परमेसर की खेबाळा मिनखा की कबर बणाओ जानै थारा बडका मारगेर्या। अंय्यां कर थे आ दिखाओ हो क थे थारा बाप-दादा क गेल चालर्या हो। क्युं क बे तो बानै मार्या अर थे बाकी कबर बणाओ हो। जणाई तो परमेसर को ज्ञान बोलै ह, ‘म बाकन परमेसर की खेबाळा अर बानै भेजस्युं जखा भेजेड़ा खुवावीं हीं।’ अर बे बामैऊँ क्युंकनै तो मार देसी अर क्युंकनै दिन घालसी। इ सरस्टि की रचनाऊँ लेर जत्ता बी परमेसर की खेबाळा को लोय बहायो गयो। बा सगळा का लोय को हिसाब इ पिडी का मिनखाऊँ चुक्यो ज्यासी। म थानै बोलुँ हूँ, हाबिलऊँ लेर जकरयाह ताँई की मोत को हिसाब, जिनै मनदर अर बलिनै जळाबा की बेदी क बिचमै मार्यो गयो हो। बा सगळा ताँई इ पिडी का मिनखाऊँ लेखो लिओ जासी। सास्तरानै सीखाबाळो हाय ह थार प! थे थारा हात म ज्ञान हाळा घर का ताळा की ताळी तो लेली। पण खुदबी कोनी बड़्या अर नइ दुसरानै बड़बा दिआ।” अर जद ईसु बठैऊँ चलेगो जणा बे फरिसी अर सास्तरी बिऊँ बेर बांद लिआ अर बोळी बाता म बिऊँ उळजबा लागगा। क्युं क बे हा जखा बिनै बिकिई बात म फसाबा की फिराक म हा। जद झारा की तादाद म मिनख एक सागै भेळा होया। जणा बठै पग धरबाकी झघा कोनी ही जणा सऊँ पेली ईसु आपका चेलानै बोल्यो, “फरिसीया का खमिरऊँ बचर रेह्ओ मेरो मतबल बाकै ढोंगऊँ ह। जोक्यु बंद ह बो खोल्यो ज्यासी। अर जोक्यु ओला म ह बो चोड़ा म ल्यायो ज्यासी। जोक्यु थे अँधेरा म बोल्यो बो दिन का च्यानणा म सुण्यो ज्यासी। अर जोक्यु थे कोठा म बड़र होळ्या-होळ्या काना म बोली ही बिको हेलो छात पऊँ पाड़्यो ज्यासी। “मेरा भाईड़ो म थारूँ बोलुँ हूँ, बाऊँ मना डरो जखा थारी कायानै नुकसान करबा क अलावा ओर क्युंई कोनी कर सकीं। पण म थानै चेताऊँ हूँ, परमेसरऊँ डरो जखो थानै मार'र नरक म गेरबा को हक राखै ह, सगळा बिऊँई डरो। दो तामा का सीक्का की पाच चिड़कल्या कोनी बिकै के? इकै बावजुद बी परमेसर एकनैई कोनी भूलै। थारै सीर को एक-एक बाळ बी गिणेड़ो ह। डरो मना थे तो चिड़कल्याऊँ बढर हो। “म थानै खेऊँ हूँ, जखो कोई मिनखा क सामै मनै मान लेसी। जणा म मिनख को बेटो बी परमेसर का ईस्बर नगरी दुता क सामै बिनै अपणा लेसी। पण जखो मिनखा क सामै मनै कोनी मानसी। जणा म बी बिनै परमेसर का ईस्बर नगरी दुता क सामै कोनी अपणास्युं। एक मोसर बि मिनखनै तो माफ कर्यो जा सकै जखो मिनख का बेटा क बारां म क्युं बुरो बोलै। पण जखो पबितर आत्मा की बुराई करै बिनै माफ कोनी कर्यो जासी। जद थानै पकड़र अरदास करबाळी झघा का परधान क सामै नहिस राजा अर अधिकारीया क सामै लेज्यावै। बि टेम थे चिंत्या मना करज्यो की थानै थारा बचाव म काँई बोलबो ह? क्युं क पबितर आत्मा बि घड़ी थानै खुदई सीखा देसी की थानै काँई खेणो चाए।” भीड़ मऊँ एक जणो ईसुऊँ बोल्यो, “गरूजी मेरा भाईड़ानै बोल की बो बाप की जायजाद की पाँती करले।” आ सुणर ईसु बोल्यो, “अरै भला मिनख मनै थारी पाँती करबाळो नहिस पंच कूण बणायो?” अर ईसु बोल्यो, “चेता म रेह्ओ अर सगळा भात का लोभ लालचऊँ बच्या रेह्ओ क्युं क जीवन म धन दोलतई सक्यु कोनी।” बो बानै मिसाल देर बोल्यो, “एक पिसाळा मिनख क चोखी पैदावार होई। जणा बो आपका मन म सोचबा लाग्यो की, ‘नाजनै म कठै धरूँ। क्युं क मेर कनै तो इनै धरबा ताँई कोई झघाई कोनी।’ पाछै बो बोल्यो, ‘म अंय्यां करस्युं क बखार्यानै तोड़र आऊँ बडी-बडी बखार्या चिणवास्युँ अर बठैई मेरो ओ सगळो नाज अर बाकी की चिजा धरस्युँ।’ अर म मेरा जीवड़ाऊँ बोलस्युं, ‘अरै जीवड़ा तेरै कनै अत्तो नाज अर धन-दोलत ह क बरसाई कोनी निमडै़। जणा अराम कर मजाऊँ खा-पीर अर मजा लूट।’ पण परमेसर बिऊँ बोल्यो, ‘अरै बावळा आजई तेरो जीव तेरै मऊँ काड लिओ जाय जणा तेरा इ धन-दोलत को काँई होसी।’ बो मिनख बी अंय्यां ह जखो आप ताँई धन भेळो करै, पण परमेसर की नजर्या म बो क्युंई कोनी।” जणा ईसु आपका चेलाऊँ बोल्यो, “थे थारा जीव की चिंत्या करबो छोडद्‍यो क थे काँई खास्यो अर किऊँ थारी कायानै ढकस्यो? क्युं क गाबाऊँ काया अर रोट्याऊँ जीव बडो ह। कागलानै देखो बे नइ तो बोवै अर नइ काटै अर नइ बाकन भेळो करबा ताँई नाज की बखार्या इकै पाछै बी परमेसर बानै चूगो देवै। जणा पाछै थे तो पंछ्याऊँ बोळा-बोळा बढर हो। थारै म अंय्यां को कूण ह जखो चिंत्या कर आपकी उमरनै चिनीसिक बी बढा सकै? थे अत्तोई कोनी कर सको जणा पाछै दुसरी बाता की चिंत्या क्युं कर्या करो हो? जंगली फूलानै देखो बे कंय्यां बढ्या जावीं हीं! बे नइ तो क्युं मेनत करीं अर नइ खुद ताँई गाबा बणावीं। अर म थारूँ खेऊँ सुलेमान राजा बी आपका राजपाट म बामैऊँ एक क जंय्यांकाई गाबा कोनी पेर्या। ओ थोड़ो बिस्वास राखबाळो जंगल म उगबाळी घास जखी आज ह अर तड़कै बाळी जासी बिनैई परमेसर चोखा गाबा पिरावै। जणा पाछै बो थानै इऊँ कत्ताई चोखा गाबा क्युं कोनी पिरासी? अर थे इ बात की चिंत्या मना करो की काँई खास्यो अर काँई पीस्यो। क्युं क परमेसरनै नइ ध्यारबाळा सगळा मिनख आ चिजा क गेल भागर्या हीं। पण थारा परम-पितानै ओ बेरो ह की थानै आ चिजा की जुर्त ह। पण थे तो परमेसर का राजनै ढुंढो, बाकी की सगळी चिजा थानै खुदई दे दि जासी। “मेरा छोटा रेवड़ डरै मना, थारो परम-पिता थानै आपको राज देबो चावै। अर थारी सगळी चिजानै बेचर जखो धन मिलै बिनै गरीबा म बाट द्‍यो। अर खुद ताँई अंय्यां का बटूआ सिमो जखा कदैई पुराणा कोनी होवै। मतबल ओ ह की कदैई नइ निमड़बाळो धन ईस्बर नगरी म भेळो करो। जठै बिकै चोर कोनी लागै अर नइ किड़ा मकोड़ा। क्युं क जठै थारो धन ह बठैई थारो मन रेह्सी। “कड़त्यु बांदल्यो अर दिआ जळार राखो, अर थे बा दासा की जंय्यां इनै उडिकता रेह्ओ क बाको मालिक ब्या मऊँ के बेरो कद आर कुआड़ बजावै। अर बे जदई बि ताँई कुआड़ खोल दे।” बे दास बडा भागहाळा हीं, जखा मालिकनै चेता म लाधै। अर म सची-सची बोलुँ हूँ, “बो बी आपको गमछो खोलर बानै बिठार रोटी परूससी। जणा इब चाए बो आदी क आवै अर चाए आदी क पाछै ज बो बानै चेता म पावै जणा बे दास बडा भागहाळा हीं। पण आ जाणल्यो ज घर का मालिकनै ओ बेरो होतो की चोर की टेम आसी जणा बो चोरनै घर म आबाई कोनी देतो। इब थे बी चेता म रेह्ओ क्युं क मिनख को बेटो बी बि टेम आसी जि टेम क बारां म थे बिचारई कोनी कर सको।” जणा पतरस बोल्यो, “ओ परबु आ मिसाल थे म्हारै ताँई बोलो हो, नहिस सगळा ताँई?” आ बात सुणर ईसु बोल्यो, “समजदार अर बिस्वास जोगो दास कूण ह? जिनै बिको मालिक घर चलाबा अर दुसरा दासानै टेमुटेम रोटी-टुक देबा ताँई भंडारी बणावै ह।” अर बो दास भागहाळो ह। जखो आपका मालिक क पाछो आबा प बिनै बिका कह्या गेल करतो लाधै। म सची-सची बोलुँ हूँ बो बिनै आपकी सगळी जमीन-जायजाद प मुनिम बणा देसी। पण ज बो दास मन म आ सोचर क मेरा मालिकनै तो हाल आबा म टेम ह, अर बो पीआ चरी कर दुसरा दास दास्यानै मारबा-कुटबा लागज्यावै। जणा बिको मालिक बि दिन आज्यासी जि दिन क बारां म बो सोच्योई कोनी। अर बिको मालिक बिका टुक-टुक कर देसी अर बिको भाग भेम करबाळा क सागै होसी। बो दास जखो आपका मालिक की इंछ्या जा'णर बिका कह्या गेल कोनी रिह्यो बिपै जोरकी मार पड़सी। अर जखो दास मार खाबा को काम कर्यो पण मालिक की इंछ्याऊँ अणजाण हो बिकै थोड़ी मारई पड़सी। जणाई तो म बोलुँ हूँ जिनै घणो दे राख्यो ह बिऊँ घणो माँगसी, अर जिनै बोळो सूप राख्यो ह बिऊँ बोळो लेसी। “म धरती प लाय लगाबा आयो हूँ, अर मेरी आ इंछ्या ही क आ इबकी स्यातई सूलग जावै। पण मनै तो एक दुखा को बतिस्मो लेणो ह अर जद ताँई म बिनै नइ लेल्युँ मनै चेन कठै? थे काँई सोचो हो की म धरती प सुळजेटो कराबा आयो हूँ? नइ, पण म तो फूट गेरबा आयो हूँ। क्युं क इबऊँ एक घर म ज पाच जणा ही जणा बे एक दुसरा क खिलाप होज्यासी, तीन ह जखा दो क अर दो ह जखा तीन क। बाप बेटा क अर बेटो बाप क, माँ बेटी क अर बेटी माँ क सासू भू क अर भू सासू क खिलाप होज्यासी।” बो भीड़ऊँ बी बोल्यो, “जद थे अगुणाऊँ बादळानै आतो देखो। जणा झट बोलो हो क आज तो मी आसी अर सचमई मी आवै। अर जद अगुणी भाळ चालै जणा बोलो हो लू चालसी अर अंय्यांई होवै। जणा ओ कपट्यो जद धरती अकास का रंग-रूपनै देखर बिका हाल बताद्‍यो हो। जणा पाछै इ जुग म काँई होर्यो ह बिनै क्युं कोनी जाणो? “काँई सई ह अर काँई गळत ह इकै बारां म थे खुदई फेसलो क्युं कोनी करल्यो? ज कोई तेरै खिलापत म मुकदमो लेर आवै। अर तनै कचेरी म लेज्यावै जणा चोखो ओई ह क बिऊँ कचेरी म जाबाऊँ पेल्याई सुळजेटो करले। नहिस बो तनै पंच क कनै लेज्यासी। अर पंच तनै परधान क हाता म देदेसी। अर परधान तनै काळ-कोठड़ी म बंद कर देसी। म तनै बोलुँ हूँ, तू बठैऊँ जद ताँई कोनी छुटसी जद ताँई पाई-पाई कोनी चुकती करदे।” बि टेम बठै भेळा होयड़ा मिनखाऊँ क्युंक ईसुऊँ कह्या, पीळातुस क्युंक गलिल का मिनखानै मराबा को हुकम दिओ अर बाको लोय बाकाई चढावा म मिला दिओ हो। आ सुण ईसु बानै जुबाब दिओ, “थे काँई सोचो हो बे अ सगळी बाता भूगत्या, जणा काँई बे दुसरा गलिली मिनखाऊँ घणा पापी हा? नइ, पण म था सगळाऊँ खेऊँ हूँ, ज थे बी थारा पापऊँ तौबा कोनी करस्यो। जणा थारै म बी आई होसी जंय्यां बे मर्या हा बंय्यांई थे बी मरस्यो। अर थे काँई समजो हो, की जद सिलोह को गुम्मट गिरै हो, बि टेम का बिकै निचै दबर मरबाळा अठारा जणा दुसरा यरूसलेम म रेह्बाळा जिंदा मिनखाऊँ घणा पापी हा के? नइ, पण म थारूँ खेऊँ हूँ ज थे बी पापऊँ तौबा कोनी करस्यो। जणा थारै सागै बी अंय्यांई होसी जंय्यां बे मर्या बंय्यांई थे बी मरस्यो।” पाछै बो बानै समजाबा ताँई एक मिसाल दिनी, “कोई आदमी हो अर बिकै एक अँगूरा को बाग हो। अर बि बाड़ी म एक अंजीर को दरख्त लागर्यो हो। जणा बो बि दरख्त का फळ तोड़बानै आयो पण बिनै बिमै एकई फळ कोनी दिख्यो। आ देखर बो मालिक बि बाड़ीनै समाळबाळा माळीऊँ बोल्यो, ‘मनै तीन बरस होगा इ बोजानै देखता इमै एकई फळ कोनी लाग्यो। इब तू अंय्यां कर इनै काट दे क्युं क ओ झूठीई जमीन रोक राखी ह।’ जणा बो माळी बि मालिकऊँ हात जो'ड़र बोल्यो, ‘इनै इ बरस तो ओर देखल्यो म इमै इबकै खोदि देर ओर खाद देस्युँ। इकै पाछै ओ फळ दे तो ठिक नहिस इनै काट दिज्यो।’” अरामहाळा दिन ईसु अरदास करबाळी एक झघा सीख देर्यो हो। बठै एक लूगाई ही जिमै अठारा बरसाऊँ ओपरी बलाय रळरी ही। अर बा बलाय बिनै अपाईज कर राखी ही। अर बा आपकी बिमारी की बजेऊँ लुळेड़ी रेह्ती। ईसु बिनै देखर आपकै कनै बुलार बोल्यो, “माई जा तू तेरी बिमारीऊँ निरोगी होगी।” अत्तो खेर बो बिका माथा प आपको हात धर्यो। अर धरताई बा सिदी होगी अर नाचती गाती परमेसर को गुणगान गाबा लागगी। ईसु बिनै अरामहाळा दिन निरोगो कर्यो आ बात यहूदि अरदास घर का अधिकारी क कोनी जची, जणा बो रीस खार बठै भेळा होयड़ा मिनखाऊँ खड़्यो होर खेबा लाग्यो, “काम करबा ताँई छ दिन ह अर बा छ दिना मई आर आप-आपकी बिमारीऊँ गेल छुटाओ पण अरामहाळा दिन निरोगा होबा मना आओ।” जणा परबु बानै जुबाब दिओ, “अरै ओ कपट्यो, थे कंय्यां अरामहाळा दिन थाकाळा गधेड़ा अर बळदनै ठाण मऊँ खोलर पाणी प्याबा लेज्याओ हो। थे जद अरामहाळा दिन अंय्यां का काम करो। जणा फेर बा लूगाई जखी अब्राहम की छोरी ह, जिनै सेतान अठारा बरसाऊँ बांद राखी ही बिनै सेतानऊँ अरामहाळा दिन कोनी छुटाबो चाए के?” बो जद अंय्यां बोल्यो, जणा बा बोलबाळा की गुद्दि निची होगी। अर बठिनै भीड़ ही जखी बिका करेड़ा ताजूबभर्या कामानै देख-देखर राजी होरी ही। ईसु बुज्यो, “परमेसर को राज किकै जंय्यां को ह अर म बिकी बराबरी किऊँ करूं? बो तो राई क दाणा की जंय्यां को ह, जिनै एक मिनख आपकी बाड़ी म बोयो अर बो बढर बोजो होयो, चिड़कल्या अर उडबाळा ज्यानबर बिकी डाळ्यां प घुरस्ळो घाल्या।” ओज्यु ईसु बुज्यो, “म परमेसर का राज की बराबरी किऊँ करूं? ओ बि चिनासाक खमिर की जंय्यां ह, जिनै लेर एक लूगाई घणा सारका आटा म रळाई अर देखता-देखता सगळा आटा को खमिर उठगो।” ईसु जद नगर्या-नगर्या अर गाँव-गाँव का मिनखानै परमेसर की सीख देतो यरूसलेम जार्यो हो। जणा बि टेम कोई बिऊँ बुज्यो, “म्हराज के थोड़ाई मिनख बचाया जासी?” ईसु बिऊँ बोल्यो, “सकड़ा बारना होर परमेसर का राज म बड़बा ताँई मेनत करो क्युं क बोळाजणा मांयनै बड़बो चासी पण कोनी बड़ सकींगा। जद घर को मालिक खड़्यो होर बारनो ढक लेसी, अर जणा थे बारनै खड़्या होर कुआड़ खुड़कास्यो अर गिड़गिड़ास्यो, ‘म्हराज, म्हारै ताँई कुआड़ खोल द्‍यो।’ पण बो थानै खेसी, ‘मनै कोनी बेरो थे कूण हो अर कठैऊँ आया हो।’ जणा थे खेस्यो, ‘म्हें तेरै सागै खाया-पीआ अर तू म्हारा गळिआरा म म्हानै सीख दिनी ही।’ पण बो तो एकई बात खेसी, ‘म थानै कोनी जाणू थे कूण हो अर कठैऊँ आया हो। अरै बुरा काम करबाळो मेरी आँख्या क आगैऊँ चल्या जाओ।’ थे अब्राहम, इसाक, याकूब अर दुसरा परमेसर की खेबाळानै परमेसर का राज म देखस्यो। पण थानै बठैऊँ बारनै काड्यो जासी जठै रोबो अर दांत पिसबो होसी। इकै पाछै अगुणी अर पाछुणी, उतराद अर दिखणाद दिसाऊँ मिनख आर परमेसर का राज म जिमबा बेठसी। अर जखा बठै आगै हीं बे गेलनै अर गेलड़ा आगै होज्यासी।” बि टेमई ईसु कनै क्युंक फरिसी आर बोल्या, “हेरोद तनै ज्यानऊँ मारबो चावै ह इ ताँई तू अठैऊँ परै चल्योजा।” जणा बो बाऊँ बोल्यो, “जार बि लूंगटीनै बोलद्‍यो म आज अर तड़कै ओपरी बलायानै लोगा मऊँ भगास्युं अर रोगलानै निरोगो करस्युं। अर तीसरै दिन मेरो काम पूरो करस्युं। इकै पाछै बी मनै आज तड़कै अर परस्युं चालतोई रेह्णो पड़सी। क्युं क परमेसर की खेबाळा पक्काई यरूसलेम मई मरै ह। “ओ यरूसलेम! ओ यरूसलेम! तू परमेसर की खेबाळानै मारै ह अर जानै परमेसर तेरै कनै भेजै, बापै भाठा बगावै ह। जंय्यां मुरगी आपका चुजानै पांखड़ा क तळै लुखार राखै ह बंय्यांई म कत्ती बार तेरा मिनखानै मेरी छाया म भेळो करबो चायो पण तू आ कोनी होबा दि। इ ताँई थारो बडो अरदास घर तज दिओ ज्यासी अर बो खाली होज्यासी अर म थानै सची बोलुँ हूँ थे इबऊँ मनै जद ताँई कोनी देखस्यो जद ताँई थे थारा मुंडाऊँ अंय्यां नइ खेदेस्यो क, ‘बो धने ह जखो परबु क नामऊँ आवै ह।’” एक बर यहूदि मिनखा क अरामहाळा दिन ईसु मान्या-थान्या फरिसीया मऊँ एक परधान क घरा रोटी जिमबा गयो, अर बठै लोग बिपै आँख धर्या बेठ्याई हा। बठै एक आदमी बिकी आँख्या क सामै हो। जिका हात-पग पाणी भरबा की बजेऊँ सूजर्या हा। आ देखर ईसु सास्तरानै सीखाबाळा अर फरिसीयाऊँ बुज्यो, “अरामहाळा दिन कोईनै निरोगो करबो नेम-कायदा गेल सई ह क कोनी?” पण बे क्युंई कोनी बोल्या, जणा ईसु बिनै पकड़्यो अर निरोगो कर बिनै भेज दिओ। जणा पाछै बो बानै बोल्यो, “ज थारो छोरो नहिस बळद कुआ म पड़ज्या जणा थे अरामहाळा दिन होबा की बजेऊँ बिनै तावळासा कुआ मऊँ कोनी काडो के?” पण इ बात को बाकन कोई जुबाब कोनी हो। जद ईसु आ देख्यो की बुलाईड़ा पावणा जिमबा बेठबा ताँई चोखी-चोखी झघा टोर्या हा। जणा ईसु बानै सीखाबा ताँई एक मिसाल दिनी, “जद थानै कोई ब्या म जिमबा ताँई बुलावै जणा थे खुद जार चोखी झघा प मना बेठज्यो, क्युं क अंय्यां नइ होवै क बो तेरूँ बी बडानै नूत राख्यो होवै। अर थारै दोन्यानै नूतबाळो आर तेरूँ खेवै इनै अठै बेठबा दे। जणा तनै सरमऊँ आँख्या झुकार सऊँ निचली झघा म बेठणो पड़सी। इ ताँई जद थानै नूतो मिलै जणा थे जार सऊँ निचली झघा बेठज्यो, क्युं क थानै नूतो देबाळो थानै आर देखसी जणा बो खेसी, ‘ओ भाईला अठै क्याले बेठ्यो ह उपर आर बेठ।’ जणा थारै सागै बेठबाळा म तेरो मान ओर बढ ज्यासी। क्युं क जखो खुदनै उचो दिखासी बिको सीर सकै सामै निचो कर्यो ज्यासी अर जखो खुदनै निचो दिखासी बिको सीर उचो कर्यो ज्यासी।” इकै पाछै ईसु आपका नूतबाळाऊँ बोल्यो, “जद बी तेरै कोई काण-ठिचो होवै जणा तू सगा-सम्बंदिआ, सागे भाई-भाणा अर पिसा हाळा मिनखा, अर भाईलानै मना बुलाजे क्युं क बे बी आपका ठिचा म तनै नूतर इको बदलो उतार देसी। पण तू कोई काण करै जणा गरीब, लंगड़ा-लुला अर आँदानै बुला। आ बात तेरै ताँई आसिरबाद होसी क्युं क बाकन तेरो बदलो उतारबा ताँई क्युंई कोनी। अर इको बदलो परमेसर तनै बि दिन देसी जि दिन धरमी मर्या पाछै ओज्यु जी उठसी।” ईसु की सुणर बिकै सागै चोकी प बेठर जिमबाळो एक जणो बिऊँ बोल्यो, “बे कत्ता भागहाळा हीं जखा परमेसर का राज म बेठर जिमसी।” जणा ईसु बिऊँ बोल्यो, “कोई मिनख बडो ठिचो करर्यो हो, अर बो बिमै आबा ताँई बोळा जणानै नूतो दिओ। जद बा जिमबा की घड़ी आई जणा बो जिमबा ताँई सगळानै आपको आदमी भेजर बुलावो दिवा भेज्यो, क आओ सक्यु त्यार ह। “पण बे सगळा का सगळा टाळमटोळ करबा लागगा। पेलो बोल्यो, ‘म एक खेत मोल लिओ हूँ अर बि खेतनै जार मनै समाळनो ह, म तो माफी चाऊँ हूँ।’ पाछै बो दुसरा कनै गयो जणा बो बोल्यो, ‘म तो आजई पाच जोड़ी बळद मोल लिआ हीं अर म बानै बिचासबा जार्यो हूँ। दया कर मनै माफ करो।’ “एक जणो ओर बोल्यो, ‘म तो लूगाई ब्यार ल्यायो हूँ जणा म कोनी आ सकूँ।’ “जणा बो दास हो जखो सगळी बात आर आपका मालिकऊँ बोली आ सुण झाळा भर'र बो मालिक हो जखो आदेस दिआ क, ‘तावळोसो जा अर नगरी क मांयनै जत्ताबी गळिआरा अर बजारा म लुला-लंगड़ा अर मंगता हीं बानै बुलाल्या।’ दास पाछो आर बिऊँ बोल्यो, ‘मालिक जखो ओडायो हो बो म कर दिओ पण इब बी बोळी झघा बचगी।’ जणा बो मालिक हो जखो ओज्यु बिनै बोल्यो, ‘तू जा अर गळिआरा अर सड़का प जत्ता बी मिनख लाधै बानै हात जो'ड़र अठै लिआ, जिऊँ मेरो घर भर्यो-भर्यो दिखै।’ अर म थारूँ बोलुँ हूँ, जिनै म सऊँ पेली नूतो भेज्यो हो बामैऊँ एक जणोई, इ जिमणार को गास्योई कोनी खा।” जद ईसु क गेल-गेल भीड़ की भीड़ जारी ही बि टेम ईसु गेलनै मुड़्यो अर भीड़ऊँ बोल्यो, “ज कोई मेरो चेलो बणबा की इंछ्या राखै ह। अर मेरूँ बेत्ती आपका माँ-बापानै, बाळ-बच्यानै, सागे भाई-भाणानै अर खुदका पिराणाऊँ परेम करै ह जणा बो मेरो चेलो कोनी बण सकै। अर जखो बी मेर ताँई दुख उठाबा अर मरबानै त्यार कोनी बो मेरो चेलो कोनी हो सकै। ज थारै मऊँ कोई बडीसारी मचाण बणाबो चावै जणा के बो पेली आपको हिसाब-किताब जो'ड़र आ कोनी देखसी क मेर कनै इनै बणाबा ताँई पिसा-पाई पूरा हीं क कोनी? कदै अंय्यां नइ होज्या बो निम-निम भरके रेहज्या, ज अंय्यां हो जावै तो देखबाळा आ खेर बिकी हसी उडासी। ओ बणाबा तो लागगो पण बिनै पूरो कोनी बणा सक्यो। नहिस कोई अंय्यां को राजा ह, जखो दुसरा राजाऊँ बिस झार की सेना लेर लड़बा जावै। अर बिकै चढाई करबाऊँ पेलीई बिको सामलो राजा ओ कोनी बिचारै के? क, म दस झार की सेनाऊँ बिकी बिस झार की सेना को सामनो कर लेस्युं क कोनी? नहिस बो बि राजा की सेना क दूर रेह्ताई आपको दुत भेजर सुळजेटो कर लेसी। अंय्यांई सक्यु तज्या पेली थे मेरा चेला कोनी बण सको। “लुण चोखो ह पण ज लुण मऊँ सुवाद चल्योजा जणा बिनै कंय्यां चरचरो कर्यो जा सकै ह? बो नइ तो माटी अर नइ खाद क काम आ सकै। लोग बिनै अंय्यांई बारनै बगादी हीं। जिकै कान ह बो बानै खोलल्यो।” एक बर चुंगी लेबाळा अर पापी ईसुनै सुणबा ताँई भेळा होया। जणा फरिसी अर सास्तरानै सीखाबाळा आपसरी म बड़बड़ाबा लाग्या, “ओ तो पाप्याऊँ मिलै अर बाकै सागै खावै।” जणा ईसु बानै एक मिसाल दिनी: “मानल्यो थारै मऊँ कोईसा क कनै सो लल्ड्या हीं अर बामैऊँ एक गुमज्या जणा थे काँई करस्यो? के बा निन्याणमनै उजाड़ म छोडर जद ताँई बा गुमेड़ी लल्डी कोनी मिलज्यावै बिनै कोनी ढुंढस्यो? अर जद बा गुमेड़ी लल्डी लाध जावै जणा थे बिनै राजी होर थारा कांधा प चढार थारै घरा ल्याओ हो। अर घरा आबा क पाछै थारा आसपड़ोस अर थारा भाईलानै बुलार बाकै सागै लल्डी मिलबा की खुसी मनाओ हो। “म थानै बोलुँ हूँ अंय्यांई पापऊँ तौबा करबाळा पापी की खुसी ईस्बर नगरी म ओर बी घणी होसी। जत्तो की बा निन्याणमै धरम्या क बदलै कोनी होवै जानै मन फेरबा की जुर्तई कोनी। “नहिस तो अंय्यां सोचो एक लूगाई ह अर बिकन दस चाँदी का सीक्का हीं जिमैऊँ एक गुमज्या, जणा बा जद ताँई बो सीक्को मिल नइ जा घरनै झाड़ती भारती अर दिओ लेर बिनै सूल टोती कोनी रेह्‍वै के? अर जद बा बि सीक्कानै ढुंढले। जणा पाछै बा राजी होर आपकी भाईल्या अर आसपड़ोसनै बुलार बानै बोलै ह, ‘मेरो गुमेड़ो सीक्को पाछो मिलगो।’ म थारूँ बोलुँ हूँ ठिक अंय्यांई जद कोई पापी पापऊँ तौबा करै ह, जणा परमेसर का ईस्बर नगरी दुता क सामै खुसी मनाई जावै ह।” इकै पाछै ईसु बोल्यो, “कोई मिनख हो बिकै दो छोरा हा। छोटक्यो छोरो हो जखो आपका बापऊँ आपकी पाँती माँग ली जणा बो बाप आपकी सगळी जायजाद दोन्यु बेटा म बाट दि। “थोड़ाई दिन बित्या जणा बो छोटक्यो छोरो आपकी पाँती को सगळो धन भेळो कर दूर दिसावर चलेगो। अर बठै बि धननै उदफेली म उडा दिओ। अर जद बो सगळो धन बिलै लगा दिओ, जणा बा दिना म बि देस म घणो जोरको काळ पड़्यो। अर बिकै तो खाबा का लाला पड़गा। जणा बो बि देस का एक मिनख क मजुरी करबा गयो। अर बो बिनै आपका खेत म सूल्डा चराबा को काम दिओ। बो आ सोचर की कमऊँ कम बठै पेट भरबा ताँई मटर का छिलकाई मिलज्यासी। जिनै सूल्डा खाया करीं हीं, पण कोई बिनै एक छिलकोई कोनी दिओ। जद बो आपका आपा म आयो तो बड़बड़ाबा लाग्यो, ‘मेरा बाप क कनै कत्ताई मजुर ह जखा धापर खावीं हीं बिकै पाछै बी बाकन बच जावै ह। अर म अठै बास्यो मरूँ हूँ। जणा इब म मेरा बापूजी क कनै जास्युं। अर बाऊँ खेस्युं बापूजी म परमेसर क अर थारै खिलाप पाप कर्यो हूँ। मेरा करम अंय्यां का कोनी की इब म थारो बेटो खुवाऊँ। इब थारूँ हात जो'ड़र अरदास ह की थे मनै थारो मजुर समजर राखल्यो।’ आ ध्यार बो आपका बाप कनै चाल पड़्यो, अर बो जद घराऊँ क्युंक दूर हो जणा बिका बाप की निगा बिपै पड़ी, आपका छोरानै देखर बिको हेज पावस्यायो अर बो भागर बिनै आपकी छातीऊँ लगार बिका माखा लिआ। जणा पाछै बो छोरो आपका बापऊँ बोल्यो, ‘बापूजी म परमेसर अर थारै खिलाप बोळा पाप कर्यो हूँ, जणा इब म, इ जोगो कोनी की थे मनै बेटो खेओ।’ पण बिको बाप आपका दासानै बोल्यो, ‘जाओ अर तावळासा बडियाऊँ बडिया गाबो ल्यार मेरा छोरानै पिराओ इका हाता म मुन्दड़ी अर पगा म जुती पिराओ। अर मोटो तगड़ो ज्यानबर काटो अर बिनै आपा सगळा मिलर खास्यां अर खुसी मणास्यां। क्युं क मेरो छोरो जखो म्हारै कानि को मर्या समान हो, बो पाछो जीयायो ओ गुमगो हो, जखो इब लाध्यो ह।’ अर बे सगळा मिलर खुसी मनाबा लाग्या। अर बि टेम बिको बडोड़ो बेटो जखो खेतऊँ घरा आर्यो हो अर जंय्यांई बो घरा क कनै पुग्यो जणा बिकै काना म नाचबा-गाबा को रोळो पड़्यो। जणा बो एक दासनै बुलार बुज्यो, ‘ओ काँई होर्यो ह?’ दास बिऊँ बोल्यो, ‘तेरो भाईड़ो पाछो घरा आगो ह। अर तेरो बाप बिकै राजी-खुसी आबा की बजेऊँ एक मोटो तगड़ो ज्यानबर कटायो ह।’ अत्ती सुणताई बो लाल-तातो होगो अर मरोड़ कर मांयनैई कोनी गयो, जणा बिको बाप हो जखो बारनै आर बिनै मनाबा लाग्यो। बो आपका बापऊँ बोल्यो, ‘म बरसाऊँ थारी सेवा एक दास की जंय्यां करतो आर्यो हूँ, अर थारो अंय्यां को कोई हुकम कोनी जखो म कोनी मान्यो हो, इकै बावजुद बी थे मनै कदैई एक टाट को बच्योई कोनी दिओ की म बिनै मेरा भाईला क सागै मिलर खाऊँ। पण तेरो ओ बेटो जखो तेरी धन-दोलतनै रांडबाजी म उडा दि, बो आयो जणा मोटो-ताजा ज्यानबर कटवा दिओ।’ जणा बो बाप बोल्यो, ‘बेटा तू सदाई मेरै सागै हो अर जोक्यु मेरो ह बो सक्यु तेरोई तो ह। पण इब आपानै राजी होणो अर खुसी मनाबो चाए। क्युं क ओ तेरो भाईड़ो जखो आपणै कानि को मर्यो समान हो पाछो जीयायो ओ गुमगो हो इब लाध्यायो।’” ईसु आपका चेलाऊँ बोल्यो, “कोई साऊकार हो! बिकै एक भंडारी हो जिपै ओ बलेम लगायो गयो क बो बिका धननै सनकै-सनकै ठिडै लगार्यो ह। जणा बो साऊकार हो जखो बिनै बुलार बोल्यो, ‘म तेरा बारां म आ काँई सुणर्यो हूँ? इब तू अंय्यां कर बे बही-खाता ल्यार मनै हिसाब-किताब दे, क्युं क इब म तनै भंडारीपुणा प कोनी राख सकूँ।’ जणा बो भंडारी आपका मना मई बोल्यो, ‘आ तो गड़बड़ होगी इब म काँई करस्युं? क्युं क इब साऊकार मनै भंडारीपुणा प तो राखै कोनी अर तगारी मेरूँ गिरै कोनी, माँग के खाबा म मनै सरम आवै। इब म जाणगो मनै काँई करबो चाए जिऊँ मेरो भंडारीपुणो छुटबा क पाछै लोग आपकै घरा म मेरी आवभगत करीं।’ जणा बो साऊकार का सगळा करजदारानै एक-एक कर बुलाया। अर पेला मिनखनै बुज्यो, ‘तेर प मेरा मालिक को कतो करजो ह?’ जणा बो बोल्यो, ‘मुनिम जी मेर प तो साऊकार का सो पिपा तेल मंडर्या हीं।’ जणा बो मुनिम बोल्यो, ‘आ ले बही अर तावळोसो इनै पचास पिपा करदे।’ अंय्यांई दुसराऊँ बुज्यो, ‘हाँ बोल तेर प कतो करजो ह?’ बो बोल्यो, ‘मालिक अड़सट मण ग्युं।’ जणा बो बोल्यो, ‘आ ले बही अर अड़सट को चोवन मांड दे।’ आ देखर बो साऊकार बि बेईमान भंडारीनै खूब सरायो क्युं क बो तेजपुणाऊँ काम कर्यो। दुनिया का मिनख परमेसर का मिनखाऊँ बरताव म तेज पड़ी हीं। जणा म थारूँ बोलुँ हूँ दुनिया का धनऊँ भाईला बणाओ, इको ओ फाईदो होसी की जि दिन ओ धन निमड़ ज्यासी जणा थारी आवभगत जुग-जुग रेह्बाळा घर म करी जासी। जखो थोड़ा म बिस्वास जोगो ह, बो बोळा म बी बिस्वास जोगो ह, अर जखो थोड़ा म बिस्वास जोगो कोनी बो बोळा म बी कोनी रेह्‍वै? खेबा को मतबल ओ ह की जद थे दुनिया का धन मई बिस्वास जोगा कोनी रिह्या जणा थार प कूण बिस्वास करसी क थे बि सचा धन म बिस्वास जोगा हो सको हो? जद थे बि पराया धन मई बिस्वास जोगा कोनी रिह्या जणा जखो थारै ताँई धरेड़ो ह बो थानै कूण देसी? कोईबी नोकर दो मालिका की सेवा एक सागै कोनी कर सकै, अंय्यां होसी तो एकऊँ तो बेर राखसी अर दुसराऊँ परेम, बो एक क सागै तो बफादार रेह्सी अर दुसरानै छोटो जाणसी। अंय्यांई थे परमेसर अर धन की सेवा एक सागै कोनी कर सको।” पिसा का भूखा फरिसी आ सुणर ईसु को मजाक उडाबा लागगा। ईसु बाऊँ बोल्यो, “थे तो मिनखा म देख-दिखावा का धरमी हो। पण परमेसर तो थारा हियानै जाणै ह, क्युं क जखी चिज मिनखा की नजर्या म बोळी खास ह बिको परमेसर की नजर्या म काँई मोल? “नेम-कायदा अर परमेसर की खेबाळा की मांडेड़ी बाता को हेलो बतिस्मो देबाळा यहून्ना का दिना ताँई पाड़्यो गयो। पण बतिस्मो देबाळा यहून्ना का टेमऊँ परमेसर का चोखा समचार को हेलो पाड़्यो जार्यो ह। अर सगळानै परमेसर का राज म बड़बा ताँई न्होरा खार नूतो दिओ जार्यो ह। ईस्बर नगरी अर धरती मिट सकै ह पण नेम-कायदा को एक आंकई कोनी मिटै। “जणा जखो बी मोट्यार आपकी लूगाईनै छोडर दुसरो ब्या करै बो कुकरम करै ह। अंय्यांई छोडेड़ी लूगाईऊँ ब्या करबाळो मिनख बी कुकरम करै ह। “एक साऊकार हो। अर बो मेंगा-मेंगा गाबा पेरतो अर रोजकी म्हेफिल बाजी करतो। अर बठै एक लाजर नाम को गरीब मिनख बी हो। जिकै झघा-झघा गुमड़ा निकळर्या हा बिनै बि साऊकार की थळी प ल्यार छोड दिओ जातो हो। अर बिका घावानै गंडक्ड़ा चाटता रेह्ता। अर बो आपको पेट भरबा ताँई बि साऊकार की जूंठ का माखणा ताँई तरसतो हो। एक दिन बो गरीब लाजर मरगो। अर बिनै लेज्याबा ताँई ईस्बर नगरी दुत आर बिनै सिदा अब्राहम की गोदि म लेग्या। एक दिन बो साऊकार बी मर्यो अर बिनै लोग लेज्यार गाड्याया। इब साय बो सिदो नरक म अर बि लाय म तोबा तिल्ली घालतो जद बो उपरनै देख्यो जणा बिनै अब्राहम की गोदि म लाजर दिख्यो। जणा बो बठैऊँ हेलो मार'र बोल्यो, ‘ओ बाबा अब्राहम मेर प तरस खा। अर लाजरनै भेजर बिनै बोल की बो आपकी आँगळी डबोर एक बूँद पाणी की मेरी जीब प गेर'र बिनै सिळी करै क्युं क, इ आग म, म बळर्यो हूँ।’ पण अब्राहम बोल्यो, ‘बेटा याद राख की तू तेरी जिंदगी म सदाई चोखी-चोखी चिजा भोगी जदकी ओ बिचारो सदाई आपकी जिंदगी म दुख देख्यो। पण इब अठै ओ मजाऊँ ह, अर तू पिड़ा म। अ सगळी बात तो बळी बुझी इकै अलावा म्हारै अर तेरै बिच एक उंडी खाई ह जि बजेऊँ नइ तो अठिनैऊँ परनै कोई जा सकै अर नइ परनैऊँ अठिनै कोई आ सकै।’ जणा बो बोल्यो, ‘ओ बाबा अब्राहम म हात जो'ड़र थारूँ बोलुँ हूँ थे लाजरनै मेरा बाप क घरा भेज द्‍यो। क्युं क मेरै पाच भाईड़ा ओर हीं ओ जार बानै चेतासी कमऊँ कम बे, इ पिड़ा हाळी झघा म आबाऊँ बच ज्यासी।’ अब्राहम बिऊँ बोल्यो, ‘बानै मूसा अर दुसरा परमेसर की खेबाळा की पोथ्या की बातानै सुणबो अर मानबो चाए।’ जणा बो बोल्यो, ‘इऊँ पार कोनी पड़ै बाबा अब्राहम पण ज मरेड़ा मऊँ कोई बाकन जासी जणा बे पक्काई पापऊँ तौबा कर लेसी।’ जणा बो बिऊँ बोल्यो, ‘जद बे मूसा अर परमेसर की खेबाळा की पोथ्या की बातानै कोनी मानी जणा बे मर्या पाछै जिबाळा की कंय्यां मानसी?’” ईसु आपका चेलाऊँ बोल्यो, “आ तो हो कोनी सकै क मिनखानै भंगराबाळी बाता कोनी बितै, पण अंय्यां का मिनख प हाय ह जिकी बजेऊँ बे बाता होवीं हीं। आ नान्या मऊँ एकनै बी पाप म गेरबाळा ताँई ओ चोखो ह क बिकी नाड़ म घरट घालर बिनै समदर म गेर दिओ जावै। चेता म रेह्‍वो ज थारो पाड़ोसी भाईड़ो पाप करै जणा बिनै दकालो अर पापऊँ तौबा करै जणा बिनै माफ करो। ज बो रोजकी सात बार तेरो बुरो करै, अर सात्युई बार पाछो आर तेरूँ बोलै, ‘मेरूँ गळती होगी मनै माफ करो।’ जणा तू बिनै माफ कर।” बे चेला जानै भेजेड़ा चेला क नामऊँ बोल्या जाता हा बे कह्या, “परबु म्हारा बिस्वासनै बढा।” परबु कह्या, “म थारूँ बोलुँ हूँ ज थारै म राई क दाणा जत्तो बी बिस्वास होतो तो थे, इ सेसुत का दरख्तऊँ बोलता जड़ समेत उपड़'र समदर म लागज्या, जणा बो थारी बात मान ज्यातो। “मानल्यो थार मऊँ कोईसा क एक दास ह जखो खेत म हळ बावै अर लल्ड्या को रेवड़ चरावै ह। जद दास खेतऊँ आवै जणा काँई बिको मालिक बिनै अंय्यां खेवै ह क आ बेठ अर रोटी खाले? पण इकी बजाय बो खेसी, ‘रोटी-टुक बणाले अर जद ताँई म रोटी खाई-पी करूं जणा ताँई तू मेरी सेवा म खड़्यो रेह। इकै पाछै तू बी रोटी खा लिए।’ बिको ओडायो करबा क पाछै के बो बि दास को गुण-एसान मानसी? अंय्यांई थारै सागै ह, बे सगळा काम जखा थानै करबा बेई ओडाया गया हीं। बानै करबा क पाछै थे आई खिज्यो, म्हें तो ख्याई जोगा दास कोनी अर म्हें तो म्हारो फरज निभायो ह।” ईसु सामरीया अर गलिल नगर्या का काकड़ होर यरूसलेम जार्यो हो। जणा बठै बिनै एक गाँव म भेळाई दस कोढी मिल्या, बे बिऊँ परैई खड़्या हा। अर जोर-जोरऊँ बोलबा लाग्या, “ओ म्हराज ईसु म्हारै प दया कर।” जणा बो बानै देखर बोल्यो, “जाओ अर खुदनै याजकानै जार दिखाओ।” अर गेला मई बाको कोढ धुपगो। जणा बामैऊँ एक जणो आ देखर की म निरोगो होगो हूँ। बो परमेसर को जोरऊँ गुणगान गातो पाछो आयो। बो मुंडावाणी ईसु का पगा म पड़गो अर बिको जेकारो लगाबा लागगो। अर बो एक सामरी हो। ईसु बिऊँ बुज्यो, “बे नो कठै हीं, के दस का दस को कोढ कोनी धुप्यो? इ परदेसी मिनखनै छोडर कोईसोई अंय्यां को कोनी जखो आर परमेसर की जे-जैकार करतो?” जणा ईसु पाछो बिऊँ बोल्यो, “खड़्यो हो अर जा तनै तेरो बिस्वास निरोगो कर्यो ह।” एक बार क्युंक फरिसी ईसुनै बुज्या क, “परमेसर को राज कद आसी?” जणा बो बानै बोल्यो, “परमेसर को राज दिखबाळा रूप म कोनी आवै। कोई आ कोनी खे सकै, की देखो परमेसर को राज ओर्यो नहिस बोर्यो, क्युं क परमेसर को राज तो थारै मांयनैई ह।” जणा बो चेलानै बतायो, “अंय्यां की घड़ी बी आसी जद थे मिनख का बेटानै देखबो चास्यो पण बिनै देख कोनी सकोगा। अर अंय्यां का बी होसी जखा थानै खेसी, ‘देखो बो बठै ह! नइ बो अठै ह!’ पण थे बाकी मना मानज्यो। क्युं क जंय्यां बिजळी अकास का एक कूणा म चमक सगळा अकासनै चमका दे ह, बंय्यांई मिनख को बेटो आपका दिन म होसी जि दिन बो आसी। पण पेली बो बोळो दुख देखसी अर इ जुग का मिनख बिनै तज देसी। जंय्यां नूह क दिना म होयो हो बंय्यांई मिनख का बेटा का दिना म होसी। जि दिन ताँई नूह झाज प कोनी चढगो हो बि दिन ताँई मिनख खाता पिता हा, बामै ब्या होर्या हा। पण परले आई अर सक्यानै नास कर दिनी। अंय्यांई लुत क दिना म होयो हो। जद बी मिनख खार्या-पीर्या हा, मोल खरीदता अर बेचता हा खेती करता अर घर बणार्या हा। पण जि दिन लुत सदोमऊँ बारनै पग धर्यो बि दिनई अकासऊँ परमेसर आग अर भबकता तिजाब भर्या खिरा बरसाया अर बे सक्यानै बाळ गेर्या। बि दिन बी अंय्यां होसी जि दिन मिनख को बेटो परगट होसी। बि दिन जखो मिनख छात प होवै अर बिको समान घर म होवै जणा बो बिनै लेबा तळै नइ उतरै। अर बंय्यांई जखो खेत म होवै बो पाछो नइ आवै। याद राखो लुत की लूगाई क सागै काँई होयो, जखो आपको पिराण बचासी बो बिनै खोसी अर जखो बिनै मेरी बजेऊँ खोसी बो बिनै अजर-अमर का जीवन ताँई बचासी। म थानै बताऊँ हूँ बि रात एक खाटली प दो मिनख सुत्या रेह्सी। बामैऊँ जिको मेर प बिस्वास होसी बिनै सागै ले लिआ जासी दुसरानै छोड दिओ जासी। एक सागै चाकी म दाणा पिसती दो लूगाया मऊँ एक लेली जासी अर दुसरी बठैई छोड दि जासी। खेत म काम करता दो जणा मऊँ एक ले लिओ जासी अर दुसरो छोड दिओ जासी।” अ बाता सुणर चेला बुज्या, “परबु अ बाता कठै होसी?” बो बाऊँ बोल्यो, “जठै क्युं मरेड़ो पड़्यो ह बठै गिरज कांवळा भेळा होसी।” जणा ईसु चेलानै आ बताबा ताँई की बे रोजकी अरदास करता रेह्‍वै। अर हिमत नइ छोडीं एक मिसाल दिनी: “कोई नगरी ही बिमै एक पंच रिह्या करतो हो, जखो नइ तो परमेसरऊँ डरतो अर नइ कोई मिनख की परवा करतो। अर बि नगरी म एक खाली होईड़ी बी रेह्ती बा बार-बार बिकी छाती प आर खेती मेरो न्याय कर। कई दिना ताँई तो बो बिकी सुणाई कोनी कर्यो। पण हार'र आपका मन म सोची, ‘म नइ तो परमेसरऊँ डरूँ अर नइ कोई मिनख की परवा करूं, जणा बी आ खाली होईड़ी मेरा कान खागी, इ ताँई म इको न्याय चुकास्युं नहिस तो आ घड़ी-घड़ी आर मनै दुखी कर देसी।’” परबु बोल्या, “सुणो बो बेईमान पंच काँई बोल्यो हो? जणा पाछै परमेसर आपका टाळेड़ा मिनखानै न्याय कोनी देसी के जखा रात-दिन परमेसर की रो-रो दुहाई दि हीं? बानै न्याय देबा म के बो देर करसी? म थारूँ खेऊँ हूँ बो बेगोई बाको न्याय चुकासी। पण मिनख का बेटानै जद बो इ धरती प आसी जणा बिस्वास लाधसी के?” ईसु बानै जखा खुदकी धारमिक्‍ता प भरोसो राखबाळा अर दुसरानै क्युंई कोनी समजता हा, बानै एक मिसाल दिनी, “एक बर मनदर म दो जणा अरदास करबा गया। बामैऊँ एक फरिसी अर दुसरो चुंगी लेबाळो हो। बो फरिसी नाकैई खड़्यो होर अंय्यां खेर अरदास करबा लाग्यो, ‘परमेसर थारी जे हो, क म दुसरा की जंय्यां लोभी, दुसरा को बुरो करबाळो, कुकरमी कोनी अर नइ म इ चुंगी लेबाळा की जंय्यां हूँ। म सपता म दो बार बरत करूं अर मेरी सगळी कमाई को दसवो भाग दान द्‍युँ हूँ।’ पण बो दुसरो जखो चुंगी लेबाळो हो बो दूर खड़्यो होर आपकी छाती कुट-कुटर खेबा लाग्यो, ‘परमेसर मेर प दया करो म पापी हूँ।’ बो खुदनै ईस्बर नगरी कानि मुंडो उठार देखबा जोगोई कोनी जाण्यो। म थानै सची-सची बोलुँ हूँ परमेसर की नजर्या म फरिसी नइ, पण ओ चुंगी लेबाळोई धरमी होर आपकै घरा गयो। क्युं क जखो खुदनै बडो मानसी बिनै छोटो अर जखो खुदनै छोटो मानसी बिनै बडो कर्यो ज्यासी।” एक दिन मिनख आपका नान्यानै ईसु कनै ल्याया। बे चावै हा क ईसु बा टाबरा क सीर प हात म्हेलै। पण आ देखर चेला बानै दकाल दिआ। जणा ईसु टाबरानै आपकै कनै बुलार चेलाऊँ कह्या, “टाबरानै मेरै कनै आबा द्‍यो, आनै आबाऊँ मना नटो, क्युं क परमेसर को राज अंय्यां का मिनखा ताँई ह। याद राखज्यो क जखो परमेसर का राजनै टाबरा की जंय्यां कोनी मानसी बो बिमै कोनी बड़सी।” एक यहूदि परधान ईसुऊँ बुज्यो, “चोखा गरूजी , अजर-अमर जीवन पाबा ताँई म काँई करूं?” ईसु बिऊँ बोल्यो, “तू मनै चोखो क्युं बोलै ह? परमेसरनै छोडर कोईबी चोखो कोनी। तू परमेसर का हुकमानै जाणै ह, जंय्यां पराई लूगाई क सागै कुकरम मना करजे, हत्या मना करजे, झूठी गुवाई मना दिजे, चोरी-चकारी मना करजे अर माँ-बाप को मान करजे।” बो बोल्यो, “आ सगळी बातानै म टाबरपुणाऊँई मानतो आयो हूँ।” आ सुणर ईसु बिऊँ बोल्यो, “तेरै म हाल ताँई एक बात की कमी ह, तेरै कनै जोक्यु बी ह बिनै बेचर बिऊँ मिलेड़ा रिपीआनै गरीबा म बाट दे अर तू मेरै गेल होले इकै साटा को धन तनै ईस्बर नगरी म मिल ज्यासी।” पण आ सुण ताँई बो बोळो दुखी होगो, क्युं क बिकन अणाप-सणाप धन हो। ईसु बिनै देखर बोल्यो, “परमेसर का राज म पिसाळा को बड़बो बोळो ओखो ह, पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।” आ सुणर बे सुणबाळा हा जखा बुज्या, “जणा पाछै कूण बचायो ज्यासी?” जणा बो बोल्यो, “जखो मिनखा क बसको कोनी बिनै परमेसर कर सकै ह।” इ बात प पतरस बोल्यो, “देखो म्हें तो म्हारो घरबार छोडर थारै गेल आया हा।” ईसु बानै बोल्यो, “अंय्यां को कोई कोनी जखो आपका घरबार, लूगाई अर सागे भाई-भाण, माँ-बाप अर आपका टाबरानै परमेसर का राज ताँई छोड्यो हो अर बिनै इ जुग म कई गुणा बेत्ती अर आबाळा जुग म अजर-अमर जीवन नइ मिलै।” ईसु आपका बारा चेलानै एक नाकै लेज्यार बोल्यो, “सुणो! आपा यरूसलेम जार्या हां जठै जोक्यु मिनख का बेटा क बारां म परमेसर की खेबाळा मांडी ह बे बाता पूरी होसी। बो परमेसरनै नइ ध्यारबाळा मिनखा क हाता म सूप्यो जासी। बे बिको तमासो बणासी, बिकी बेजती करसी, बिपै थूकसी, बिकै तड़ा मारसी अर बिनै ज्यानऊँ मार गेरसी। पण बो तीसरा दिन ओज्यु जिंदो होज्यासी।” चेला क आ बाता मऊँ क्युंई पलै कोनी पड़ी आ बाता को मतबल बाकै कानि को तो लुखेड़ोई रेह्गो, ईसु किकै बारां म बोलर्या हीं बे कोनी जाण्या। ईसु जद यरियो क सांकड़ै पुग्यो जणा बिनै भीक माँगतो एक आँदो गेला क सारै बेठ्यो मिल्यो। जणा बो आँदो मंगतो भीड़ क पगा की उवाज सुणर बुज्यो, “ओ काँई होर्यो ह?” बे बिऊँ कह्या, “ईसु नासरी जार्यो ह।” जणा बो आँदो हेलो मारतोई बोल्यो, “ओ दाऊद का बेटा ईसु, मेर प दया कर।” आगै-आगै चालबाळा बिनै चुप होबा ताँई दकाल्या, पण बो ओर बी जोरऊँ हेला मारबा लागगो, “दाऊद का बेटा! मेर प दया कर!” जणा ईसु बठैई डटर बि आँदानै आपकै कनै ल्याबा ताँई बोल्यो, बिकै आताई बो बिऊँ बुज्यो, “तू काँई चावै ह जखो म तेरै ताँई करूं?” बो बोल्यो, “परबु म ओज्यु देखबो चाऊँ।” ईसु बिऊँ बोल्यो, “देखबा लागज्या तेरो बिस्वासई तनै आँख्या दिनी ह।” जणा अत्ती खेताई बो देखबा लागगो अर परमेसर की बडाई करतो बिकै गेल होलिओ। देखबाळा आ देखर परमेसर को गुणगान गाबा लागगा। जद ईसु यरियो नगरी होतो होयो जार्यो हो। जणा बठै जक्कई नाम को एक मिनख हो जखो चुंगी लेबाळा को सरदार हो अर बो पिसाळो हो। बो ईसुनै देखबा की तक म हो पण भापड़ो देख कोनी पार्यो, क्युं क भीड़ रेह्गी घणी अर बो रेह्गो बावन्यो। जणा बो ईसुनै देखबा ताँई भीड़ऊँ अगाऊ भागर ईसु, जि गेलाऊँ जाबाळो हो बि गेला म एक अंजीर का दरख्त प जार चढगो। जद ईसु बि दरख्त क कनै पुग्यो जणा बो बठै खड़्यो होर उपरनै देखर जक्कईऊँ बोल्यो, “जक्कई बेगोसो तळै उतर्या क्युं क आज म तेरै घराई बासो लेस्युं।” जणा जक्कई बेगोसोक दरख्तऊँ तळै उतर्यो, अर बानै राजी-राजी आपकै घरा लेगो। आ देखर जत्ता बी बठै भेळा होर्या हा बे सगळा आपसरी म बड़बड़ाबा लागगा क, “ओ तो पापी क घरा पावणा-पुड़ी खाबा गयो ह।” पण जक्कई ह जखो भापड़ो खड़्यो होर परबुऊँ बोल्यो, “ओ म्हराज मेर कनै जत्ती बी धन-दोलत ह बिको आदो म गरीबा म बाट देस्युँ अर ज बेईमानीऊँ कोई भाईड़ा को क्युं बी दाब लिओ हो जणा म बिको बिनै चोगुणो पाछो दे देस्युँ।” अत्ती सुणर ईसु बिनै बोल्यो, “इ कूणबा म आज छुटकारो आगो ह क्युं क ओ बिस्वास कर दिखा दिओ की ओ अब्राहम की ओलाद ह। क्युं क मिनख को बेटो गुमेड़ानै ढुंढबा अर बानै बचाबाई धरती प आयो ह।” जद बे बिकी बाता सुणर्या हा जणाई बो बानै एक मिसाल ओर दिनी क्युं क ईसु यरूसलेम क सांकड़ैई हो अर मिनख आ मन म कर राखी ही क परमेसर को राज बस परगट होबाळोई ह। जणा बो खेबा लाग्यो, “एक आदमी जिकनै अणाप-सणाप धन-दोलत ही बो राज करबा की सीख लेबा ताँई दूर दिसावर चलेगो। जाबाऊँ पेल्या बो आपका दस दासानै बुलाया, अर बुलार बानै एक-एक सोना की म्होर दिनी अर बोल्यो, ‘म जि दिन ताँई पाछो नइ आऊँ बि दिन ताँई आऊँ लेणदेण करज्यो।’ पण बिकी नगरी का दुसरा मिनख बिऊँ जळता-बळता हा बे बिकै गेल एक टोळी क हात आ खुवा भेज्यो की, ‘म्हें कोनी चावां क ओ म्हारै प राज करै।’ “पण बो राजा बणर पाछो आपकै घरा आग्यो। अर आताई बो बा दासानै बुलायो जानै बो सोना की म्होर देर गयो हो क्युं क बो आ जाणबो चावै हो क बे बा म्होराऊँ क्यु कमाया हीं क कोनी। जणा पेलो आर बोल्यो, ‘मालिक थारी एक म्होरऊँ म दस म्होरा ओर कमाली।’ जणा बो मालिक बि दासनै बोल्यो, ‘तू मेरो चोखो दास ह जखो तू अत्तीसी बात म बी मेरै बिस्वास जोगो रिह्यो। जणा इब म तनै दस नगरा प हक द्‍युँ हूँ।’ दुसरो आर बोल्यो, ‘मालिक थारी म्होरऊँ म पाच ओर कमाई।’ पेला की जंय्यांई बो बिनै बी बोल्यो, ‘तू पाच नगरा प जमीदार होसी।’ इब तीसरो आर बोल्यो, ‘अ ल्यो थारी म्होर जिनै म बि दिन इ गमछा म आटी देर बांद लिनी ही। क्युं क म डरगो हो, थे हो जखा अंय्यां का आदमी हो जखो थारो कोनी बिनै लेल्यो अर जखो थे कोनी बोयो बिनै काटल्यो।’ जणा बो मालिक बिऊँ बोल्यो, ‘तू बुरो दास ह! म तेरा कह्या गेलई तेरै सागै करस्युं। तू जाणता बुजता क म टेडो आदमी हूँ जखो म कोनी धरूँ बिनै लेल्युँ अर जखो कोनी बोऊँ बिनै काट ल्युं। तू बिनै ब्याजुणा क्युं कोनी दिओ? जिऊँ म पाछो आर बानै ब्याज समेत ले लेतो।’ जणा जखा बठै बिकन खड़्या हा बाऊँ बो बोल्यो, ‘इकी म्होर इऊँ पाछी लेल्यो अर जखो दस कमाई ह बिनै देद्‍यो।’ आ सुणर बे बोल्या, ‘मालिक इकन तो पेलीऊँ दस म्होरा हीं।’ मालिक बोल्यो, ‘म थानै बोलुँ हूँ जिकनै ह बिनै ओर दिओ जासी अर जिकनै कोनी बिऊँ जोक्यु बिकन ह बो बी पाछो खोस लिओ जासी। अर बे जखा मेरा बेरी हीं जखा मनै, इ राजगद्दि प बेठ्यो कोनी देख सकै बानै मेरै सामै ल्यार बाका सीर धड़ऊँ नाकै कर द्‍यो।’” अ सगळी बाता खे-खार ईसु यरूसलेम कानि बाऊँ पेली आपका पाऊंडा बढाया। अर जद बो जेतून डूँगर प बेतफगे अर बेतनिया क सांकड़ै पुग्यो जणा बो आपका चेला मऊँ दोनै आ खेर भेज्यो, “सामला गाँव म जाओ अर जंय्यांई थे बड़स्यो थानै एक गधेड़ी को बच्यो भंदेड़ो लाधसी जिपै आज ताँई कोई कोनी बेठ्यो बिनै खोलर ल्याओ। ज थानै कोई बुजै की थे इनै क्याले खोलर्या हो जणा थे बिनै बोल दिज्यो परबुनै इकी जुर्त ह।” जानै भेज्या बे जार बठै देख्या जणा बानै ठिक बंय्यांई जंय्यां बानै बो बोल्यो हो लाध्यो। जंय्यांई बे बिनै खोलर्या हा जणा बि गधेड़ी का बच्या का धणी बाऊँ बुज्या, “इ बच्यानै क्याले खोलो हो?” जणा बे बोल्या, “परबुनै इकी जुर्त ह।” अर बे बि गधेड़ी का बच्यानै ईसु कनै ल्याया अर आपका गाबा बिपै गेर बिपै ईसुनै बिठा दिआ। अर ईसु जि गेलाऊँ जार्या हा बि गेला म ईसु क आगै-आगै लोग आपका गाबा बिछाता जार्या हा। अर जद बो जेतून की डूँगरी की ढाळ म आयो जणा सगळा का सगळा चेला राजी हो होर जोरऊँ परमेसर की बडाई करबा लागगा क्युं क बे बिका सगळा ताजूब का कामानै देख्या हा। बे जोर-जोरऊँ कह्या, “धने ह बो राजा जखो परबु क नामऊँ आवै। ईस्बर नगरी म स्यांती अर परमेसर की जे-जैकार होवै।” जणा भीड़ मऊँ क्युंक फरिसी बोल्या, “म्हराज थारा चेलानै थामो।” बो बानै जुबाब दिओ, “ज अ चुप होज्यासी जणा भाठा चिला उठसी।” अर कनै आर जद बो यरूसलेमनै देख्यो जणा बिनै बिपै रोज आयो। अर बोल्यो, “ज तू आज आ जाणतो क तनै स्यांती किऊँ मिलसी! पण हाल बिनै तू तेरी आँख्याऊँ कोनी देख सकै! अर बे दिन बी आसी जद तेरा बेरी तेरै च्यारूमेर आडी देर तनै दबोच लेसी। बे तनै अर तेरा टाबरानै धूळ म मिला देसी। अर तेरै मांयनै भाठा प भाठोई कोनी छोडसी। क्युं क तू बि टेमनै कोनी जाण्यो जद परमेसर तनै बचाबा आयो।” जणा ईसु मनदर का आँगणा म जार ब्योपारिआनै बारनै काडबा लागगो। अर बानै बोल्यो, “सास्तरा म मंडर्यो ह, ‘मेरा मनदरनै अरदास को घर बोल्यो ज्यासी।’ पण थे इनै डाकूआ की खोळ बणा लिनी ह।” अर ईसु रोजकी मनदर म सीख देतो हो। पण परधान याजक, सास्तरानै सीखाबाळा अर लोगा का नेता बिनै मारबा की ताक म रेह्बा लागगा। पण बाकै अंय्यां करबा को कोई मोको हात कोनी लाग्यो। क्युं क सगळा मिनख बिका बचनानै बोळा मानता हा। एक दिन ईसु मनदर म मिनखानै सीख देर्यो हो। अर चोखो समचार सुणार्यो हो जणा परधान याजक अर सास्तरानै सीखाबाळा यहूदि नेता क सागै भेळा होर बिकन आया। अर बे बिऊँ खेबा लाग्या, “म्हानै बता तू अ सगळा काम कूणसा अधिकारऊँ करै ह? बो कूण ह जखो तनै अंय्यां करबा को अधिकार दिओ?” जणा ईसु बानै बोल्यो, “म बी थानै एक सुवाल बुजूँ हूँ। थे आ बताओ यहून्नानै पाणी को बतिस्मो देबा को हक ईस्बरऊँ मिल्यो नहिस मिनखाऊँ?” इपै बे आपसरी म बतळाबा लागगा, “ज आपा खेवां की ईस्बर नगरीऊँ जणा ओ खेसी पाछै थे बिको बिस्वास क्युं कोनी कर्या? अर ज आपा अंय्यां खेस्यां की बिनै ओ काम मिनख दिओ जणा आ सगळी भीड़ आपणा प भाठा बगासी, क्युं क अ सगळा यहून्नानै परमेसर की खेबाळो मानै ह।” जणा बे कह्या, “म्हें तो कोनी जाणा की बिनै ओ हक कूण दिओ।” बाको जुबाब सुणर ईसु बानै बोल्यो, “जणा म बी थानै कोनी बताऊँ की म ओ काम की हकऊँ करूं हूँ।” जणा बो मिनखानै एक मिसाल दिनी, “एक आदमी अँगूरा को बाग लगार बिनै किसानानै ठेका प देर बोळी दूर चलेगो। जद अँगूर लागबा की रुत आई। जणा बो अँगूरा मऊँ आपको हिस्सो लेबा ताँई एक नोकरनै अँगूरा का बाग म भेज्यो। पण बे ठेकेदार बिनै मार कुटर रितो-फाकोई पाछो काड दिओ। जणा बो एक दुसरा दासनै ओज्यु बाकन भेज्यो। पण बे बिनै बी मारकूटर बिकी दुरगती कर रितो-फाकोई पाछो काड दिओ। अंय्यांई बो तीसरानै भेज्यो पण बे बिनै बी अदमर्यो कर बारनै फेक दिओ। जणा अँगूरा का बाग को मालिक बोल्यो, ‘म काँई करूं? म इब मेरा लाडला छोरानै भेजस्युं। कमऊँ कम बिको तो बे लिहाज राखसी!’ पण जद बे बिनै देख्या जणा आपसरी म खेबा लाग्या, ‘इब क तो मालिक को छोरोई आर्यो ह, आओ आपा मिलर इनै मार देवां। अर इ बाड़ी प कब्जो करल्याँ।’ अर बे बिनै अँगूरा का बागऊँ बारनै का'डर मार गेर्या।” जणा ईसु बाऊँ बुज्यो, “इब बाग को मालिक बाकै सागै काँई करसी? बो आर बा ठेकेदारानै मार अँगूरा को बाग दुसरानै समाळबा ताँई दे देसी।” आ बात सुण बे बोल्या, “अंय्यां कदैई नइ हो।” जणा ईसु बाकै कानि देखर बोल्यो, “जणा सास्तर म मंडेड़ा इ आंक को काँई मतबल ह, “‘जि भाठानै चेजारा क्युंई जोगो कोनी जाण्या, बोई कूणानै समाळबाळो होगो।’ “जखा बी, इ भाठा प पड़सी बे टुकड़ा-टुकड़ा होज्यासी। अर ओ भाठो जिपै पड़सी बिनै ओ पिस गेरसी।” बि घड़ीई सास्तरनै सीखाबाळा अर परधान याजक बिनै पकड़बो चावा हा। क्युं क बे समजगा हा की बो आ बात म्हारै प बोली ह, पण बे मिनखाऊँ डरता। अर बे सगळा इ ताक म रेह्बा लागगा की बो कोई गळती करै। बे जासुसानै हक देर बिकै गेल छोड्या। जखा ईमानदारी ताँई जाण्या जाता हा। अर इ आस म की बे ईसुनै बाता म फसार बिऊँ क्युं गळत खुवा देसी। जिऊँ बे बिनै रोमी सरकार क हाता म सूप दिं। जणा बे जासुस बिनै फसाबा ताँई सुवाल बुज्यो, “गरूजी म्हें जाणा, तू जखी बी बोलै अर सीखावै बे साची ह अर तू कोईनै छोटो बडो देखर कोईको पक्सपात कोनी करै पण परमेसर को गेलो ईमानदारीऊँ बतावै ह , जणा थे म्हानै बताओ आपणा नेम-कायदा गेल रोमी समराटनै लगान देबो ठिक ह क कोनी?” ईसु बाकी बात पकड़ लिओ अर बाऊँ बोल्यो, “मनै एक रोमी सरकार को सीक्को दिखाओ। अर इनै देखर बताओ इपै किको नाम अर सकल ह?” बे कह्या, “रोमी समराट की।” जणा बो बोल्यो, “जखो रोमी समराट को ह बो समराटनै अर जखो परमेसर को ह बो परमेसरनै द्‍यो।” बिको जुबाब सुणर बे सूना होगा अर मिनखा क सामै इ बात म बिनै कोनी पकड़ सक्या। इब क्युंक सदुकी ईसु कनै आया, सदुकी बे हा जखा मर्या पाछै जी उठबानै कोनी मान्या करता हा। बे बिऊँ बुज्या, “गरूजी मूसा को म्हारै ताँई ओ नियम मांडेड़ो ह, क कोईको भाईड़ो आपकी लूगाई क होतासोता बिना ओलाद क मर जावै। जणा बिको भाई बिकी लूगाईनै ब्याले अर आपका भाईड़ा ताँई टाबर पैदा करै। इब देखो कोई सात भाईड़ा हा। पेलो हो जखो एक लूगाईऊँ ब्या कर बिना आस ओलादई मरगो। अर बिकै मर्या पाछै दुसरो भाई बिनै ब्याली। पण बो बी बिना ओलादई मरगो। इब तीसरो बी अंय्यांई मरगो, अंय्यां करता-करता बे सात्यु का सात्यु भाईड़ा हा जखा बिना ओलादई मरगा। अर आखरी म बा लूगाई बी मरगी। इब तू म्हानै आ बता बि दिन जद मरेड़ा ओज्यु जिसी जणा बा बामैऊँ कूणसा की लूगाई होसी? क्युं क बिका तो सात्यु का सात्युई धणी हा।” जणा ईसु जुबाब म बोल्यो, “इ जुग म तो ब्या सादि होवीं हीं, पण बे मिनख जखा मरेड़ा मऊँ ओज्यु जी उठबा क जोगा हीं आबाळा जुग म बाकी ब्या सादि कोनी होसी। अर बे मरेड़ा मऊँ ओज्यु जी उठबा की बजेऊँ परमेसर की ओलाद होसी। बिकै पाछै बे कदैई कोनी मरसी जिकी बजेऊँ बे ईस्बर नगरी दुता क जंय्यां होसी। अर मरेड़ा क जी उठबा की बातनै मूसा बी बळती झाड़ी हाळा आंक म परगट करी ह। क्युं क बो परमेसरनै अब्राहम, इसाक अर याकूब को परमेसर बतायो ह। परमेसर मरेड़ा को कोनी पण जीवता को परमेसर ह। क्युं क सगळा बि ताँई जीवता रेह्‍वै।” आ सुणर सास्तरनै सीखाबाळा मऊँ क्युंक बोल्या, “आ बात तो थे चोखी बोली गरूजी।” अर इकै पाछै बाकी ओर कोई सुवाल बुजबा की हिमत कोनी बगी। ईसु बाऊँ बोल्यो, “बे बोलीं हीं, आ कंय्यां हो सकै ह की मसी दाऊद की ओलाद होसी? क्युं क भजना हाळी पोथी म खुद दाऊद अंय्यां बोलै ह: ‘परबु मेरा परबुऊँ बोल्यो, मेरा दाया हात बेठ, जद ताँई म तेरा बेरीयानै तेरै पगा तळै को पाटो नइ कर द्‍युँ।’ “दाऊद खुद बिनै परबु बोलै, जणा बो बिकी ओलाद कंय्यां हो सकै ह?” सगळा सुणर्या हा जणा बो आपका चेलाऊँ बोल्यो, “सास्तरनै सीखाबाळाऊँ बचज्यो जानै लामा-लामा चोळा पेरबो, बजारा म आदरमान, अरदास करबाळी झघा म उची अर ब्या-सावा म मानहाळी झघा भावै ह। बे खाली होईड़ी लूगाया का घरानै खाज्यावीं अर देख-दिखावा ताँई लामी-लामी अरदास करीं हीं, आकी बोळी बुरी दसा होसी।” ईसु आपकी आँख्या उठार देख्यो क पिसाळा आप-आपको दान दानहाळी पेटी म घालै हा। बो एक गरीबणी खाली होईड़ी लूगाईनै बी बिमै तामा का दो सीक्का घालता देख्यो। जणा बो बोल्यो, “म थारूँ सची बोलुँ हूँ आ गरीबणी खाली होईड़ी लूगाई दुसरा सगळा मिनखाऊँ बेत्ती दान घाली ह। क्युं क सगळा तो आपकी बढती मऊँ घाल्या पण आ खाली होईड़ी आपकी सगळी कमाई इमै घाल दि। इकै कनै अत्तोई हो जिऊँ इको चूलो बळतो।” जद क्युंक जणा मनदर क बारां म चरचा करर्या हा, की बडो अरदास घर सोवणा सोवणा भाठा अर परमेसरनै चढाईड़ी चिजाऊँ कतो सोवणो लागर्यो ह। जद ईसु बोल्यो, “बे दिन बी आसी जामै थे जोक्यु बी देखर्या हो बामै एक भाठा प भाठो बी कोनी टिक्यो रेह्सी। बा सगळानै ढाह दिओ जासी।” जणा बे बिऊँ बुज्या क, “गरूजी अ बात कद घटसी? अर अ बाता जखी होबाळी ह बाकी काँई सेलाणी होसी?” ईसु बोल्यो, “चोकन्ना रेहज्यो कदै कोई थानै भंगर्या म नइ गेर दे, क्युं क मेरा नामऊँ बोळा आसी अर खेसी बे मसी हीं, अर बा घड़ी आगी ह। पण थे बाकै गेल मना होज्याज्यो। राड़ अर बगावत की खबरा सुणर डरज्यो मना, क्युं क आ अंत की घड़ी कोनी होसी अर अ बाता तो पेली होणी जरूरी ह।” बो बाऊँ खेबा लाग्यो, “एक राज दुसरा राज प चढाई करसी अर देस-देसऊँ लड़सी अर। सगळी झघा खतरनाक भूचाळ आसी, काळ पड़सी अर मरी फेलसी, बठै अकासऊँ अजिब-अजिब अर डराबाळी चिजा आसी। पण आ सगळी बाता क होबाऊँ पेली हर कठै थानै मेरी बजेऊँ पकड़्यो अर सतायो जासी। थानै अरदास करबाळी झघा म सूप्यो जासी अर जेळ म बंद कर्यो जासी थानै राजा अर राज करबाळा क सामै लेर जासी। ओ थारै कनै चोखा समचारनै बोलबा को मोको होसी। जणा आ बाता क होबाऊँ पेली थे थारा मननै त्यार करल्यो। अर थे थारो बचाव कंय्यां करस्यो इ बात की चिंत्या मना करो। क्युं क म थानै अंय्यां का बचन अर बुदी देस्युँ जिऊँ जोक्यु बी थे बोलस्यो जणा थारा बेरी थारै सामै कोनी खड़्या रेह सकींगा अर नइ बिनै गळत साबित कर सकींगा। थारा खुदका माँ-बाप, सगा-सम्बंदि, भाई-भाण अर भाईलाई थानै पकड़ासी अर थारै मऊँ क्युंकनै तो मरवा गेरसी। अर मेरी बजेऊँ सगळा थानै देखबोई पसंद कोनी करसी। पण थारा सीर को एक बाळई बाको कोनी होसी। थे पक्का रेहज्यो जिऊँ थे खुदनै बचास्यो। “थे जद सेनानै यरूसलेम क बारकी फिरेड़ी देखो। जणा जाण जाज्यो यरूसलेम को उजाड़ होबाळो ह।” बि घड़ी जखा यहूदिआ दिसावर म रेह्‍वै बानै डूँगरी प भाग ज्याणो चाए। अर जखा यरूसलेम नगरी म होवीं बानै नगरी छोड देणी चाए। अर जखा गाँव म रेह्‍वै बे गाँव छोड नगरी म नइ जावीं। क्युं क बा ताँई बे दिन सजा भोगबा का होसी, जिऊँ पबितर सास्तर म मंडेड़ा सगळा आंक पूरा कर्या जासी। अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी। क्युं क बे इऊँ कोनी बच सकिंगी। क्युं क आ दिना म, इ धरती प परकोप होसी अर बा मिनखा प परमेसरनै घणी झाळ आसी। मिनख तलवाराऊँ काट्या जासी अर बाकी सगळा दुसरा देसा का केदि होसी। अर जद ताँई परमेसरनै नइ ध्यारबाळा मिनखा को टेम पूरो कोनी होसी बे यरूसलेमनै पगा तळै मसळींगा। “बि टेम सूरज चाँद अर तारा म अनोरी बाता होसी अर धरती प झघा-झघा मिनखा म दुख आसी। अर समदर क गरजबाऊँ झाल उठसी अर बा झालाऊँ धरती का सगळा मिनख डर ज्यासी। लोग दुनिया प पड़बाळी मुसीबत अर डर की बजेऊँ निरास होज्यासी। अर आगै काँई होबाळो ह, इ डर म जिसी क्युं क अकास की सक्‍तिया आपकी झघाऊँ हटा दि जासी। जणा पाछै लोग मिनख का बेटानै मेमा भरी सक्‍ति क सागै बादळा म आता देखसी। थे जद अ सगळी बाता होबा लागै जणा बि टेम थे थारा सीरनै उपर उठाज्यो, क्युं क थारो छुटकारो सांकड़ैई होसी।” बो बानै एक मिसाल दिनी, “अंजीर का दरख्त अर आ सगळा दरख्तानै देखो। जंय्यांई बामै कुपळा फूटै जणा थे खुदई जाण ज्याओ क उंदयाळो आबाळो ह। अंय्यांई जद थे आ बातानै होता देखो जणा जाणज्याज्यो परमेसर को राज आबाळो ह। म थानै साची खेऊँ हूँ, जद ताँई अ सगळी बाता नइ होवीं जद ताँई इ पिडी को अंत कोनी होवै। अकास अर धरती टळ सकीं पण मेरो बोल्यो कदैई कोनी टळै। “इ ताँई चेता म रेह्‍वो, कदै अंय्यां नइ होज्या क थे तो लाग्या रेह्‍वो पीबा-खाबा अर आटा चून की चिंत्या म अर बो दिन थार प फंदा की जंय्यां आ पड़ै। क्युं क सगळी धरती का मिनख इ दिननै भोगसी। इ ताँई सदाई चेता म रेह्ओ अर सदाई अरदास करता रेह्ओ जिऊँ थे सगळी होबाळी बाताऊँ बच सको अर मिनख का बेटा क सामै खड़्या हो सको।” दिन म तो बो मनदर म उपदेस देतो अर रातनै जेतून नाम का डूँगरपै रेह्तो। अर सगळा रोजकी सुआरैई मनदर म बिका उपदेस सुणबा जाता हा। बिना खमिर की रोटी को त्युंहार जिनै फसै बोलता हा बो आर्यो हो। अर परधान याजक अर सास्तरी इ फिराक म रेह्बा लाग्या क बिनै कंय्यांसिक मारां क्युं क बे मिनखाऊँ डरता हा। ईसु का बारा चेला मऊँ यहूदा जिनै इस्करोती बी खेता हा बिमै सेतान बड़गो। अर बो मनदर का परधान याजक, अधिकार्या अर सिपाईड़ा कनै जार बाऊँ ईसुनै कंय्यांसिक पकड़ाऊँ इपै बतळायो। इ बात प बाकै तो घी का दिआ जळगा क्युं क बे तो आई चावा हा अर बे इकै बदला म बिनै रिपीआ देबा की बात बोली। यहूदा इ बात म आपकी हामी मिलादि अर मोका की फिराक म रेह्बा लाग्यो क ओ कद भीड़ऊँ न्यारो होवै। अर म इनै धोकाऊँ पकड़ाऊँ। इब बिना खमिर की रोटी को दिन आगो। बि दिन फसै ताँई उन्या की बलि दि जाती ही। जणा बो पतरस अर यहून्नानै बोल्यो, “जार आपणा ताँई फसै की रोटी बणाओ।” बे कह्या, “आ कठै बणाणी ह।” जणा बो बोल्यो, “थे जंय्यांई नगरी म बड़स्यो बंय्यांई थानै एक आदमी पाणी को घड़ो लिआ मिलसी थे तो बिकै गेल-गेल होज्याज्यो अर जि घर म बो जावै थे बी, बि घर म बड़ ज्यायो। अर बि घर का धणीऊँ बोलज्यो, ‘गरूजी आ बुजबा भेज्या हीं क बा बेठख कठै ह जठै म मेरा चेला क सागै फसै की रोटी खास्युं?’ जणा बो आदमी थानै बडोसारो जच्यो-जचाईड़ो चोबारो दिखासी। थे दोन्यु बठैई सक्यु त्यार करज्यो।” जणा बे चलेग्या अर जंय्यां बानै बोल्यो गयो हो बंय्यांई सक्यु मिल्यो जणा बे फसै की रोटी बणाई। जद बा घड़ी आई जणा ईसु आपका बा चेला क सागै रोटी खाबा बेठ्यो जखा भेजेड़ा चेला खुवाता हा। अर बो बाऊँ बोल्यो, “पिड़ा भोगबाऊँ पेली म चाऊँ हूँ क म थारै सागै फसै की रोटी खाऊँ। क्युं क जद ताँई परमेसर का राज म इ रोटी को मतबल पूरो नइ होज्या आज क पाछै बि दिन ताँई म ओज्यु आ रोटी कोनी खास्युं।” जणा बो कचोळो लेर अरदास करीं अर बोल्यो, “ल्यो इनै आपसरी म बाट ल्यो। क्युं क आजऊँ लेर जद ताँई परमेसर को राज नइ आज्यावै बि दिन ताँई म ओज्यु आ अँगूरी कोनी पीऊँ।” इकै पाछै बो रोटी लेर अरदास करी अर बिका टुकड़ा कर बानै देर बोल्यो, “ल्यो आ मेरी काया ह जखी थारै ताँई दि गई ह मेरी याद म अंय्यांई करज्यो।” अंय्यांई रोटी खाबा क पाछै बो कचोळो लेर बानै बोल्यो, “ल्यो ओ कचोळो मेरा लोयऊँ करेड़ा नया करार की निसाणी ह। जखो थारै ताँई बहायो जार्यो ह। पण मनै पकड़ाबाळो मेरै सागैई खाबा लागर्यो ह। मिनख का बेटानै तो मरनोई ह जंय्यां की परमेसर ते कर्यो ह। पण हाय बि मिनख प जखो बिनै पकड़ासी।” इ बात प बे एक दुसराऊँ बुजबा लाग्या, “आपणा मऊँ बो कूणसो ह जखो अंय्यां करसी।” चेला म इ बात प खिचा-ताणी होई क बामै कूणसो बडो मान्यो जावै। ईसु बोल्यो, “परमेसरनै नइ ध्यारबाळा राजा आपकी परजा प हक जमावीं। अर राज करबाळा मिनखा का भाईला खुवावीं। पण थे अंय्यां का कोनी, इकै बदलै थारै मऊँ जखो बडो ह बो छोटा की जंय्यां अर परधान ह बो दास की जंय्यां बणज्यो। बडो कूण? जखो खाबा ताँई चोकी प बेठ्यो ह, नहिस परूसगारो? के बो कोनी जखो खाबा बेठ्यो ह, पण म तो थारै मांयनै परूसगारा की जंय्यां हूँ। पण थे बे हो जखा मेरा दुख म सदाई मेरै सागै रिह्या हो। राज करबा ताँई म थानै बो हक देर्यो हूँ जखो मेरा परम-पिताऊँ मनै मिलेड़ो ह। क्युं क मेरा राज म थे मेरी चोकी प खाई-पी करस्यो अर राजगद्‍या प बेठर इजरायल का बारा गोता को न्याय करस्यो।” ईसु पतरसऊँ बोल्यो, “समोन ओ समोन! मेरी बात सुण! जंय्यां एक किसान ग्युंनै फटकार बिनै तुड़ीऊँ न्यारो करै ह। बंय्यांई थानै सगळानै बिचासबा की हामी सेतान ले लिओ ह। पण म तेरै ताँई परमेसरऊँ अरदास करी ह की तेरो बिस्वास बण्यो रेह्‍वै अर जद तू पाछो जीवन का गेला प आवै जणा तेरा भाई-भाणानै बिस्वास म पक्को करजे।” पतरस बोल्यो, “परबु म तेरै सागै जेळ जाबा अर मरबानै बी त्यार हूँ।” जणा ईसु बोल्यो, “मेरी बात सुण जद ताँई तू तीन बार मेरै ताँई कोनी नट देसी आज मुरगो बांग कोनी देसी।” इकै पाछै बो आपका चेलाऊँ बुज्यो, “म जद थानै बिना बटूआ, झोळा अर चपल्या क भेज्यो जणा थानै क्युं चिज की कमी पड़ी ही के?” बे कह्या, “ख्याकीई कमी कोनी होई।” पण इब म बोलुँ हूँ, “जिकनै बटूओ ह बो बिनै लेले अर अंय्यांई झोळो अर जिकै कनै तलवार कोनी बो आपका गाबा बेचर बिनै मोल लेले। क्युं क सास्तर म मंडेड़ी बाता मेरै ताँई पूरी होसी क बो अपराद्‍या म गिण्यो जासी अ मंडेड़ी बाता पूरी होबा जारी ह।” चेला कह्या, “परबु आ देखो अठै दो तलवार पड़ी ह।” इपै बो बोल्यो, “अ तो बोळी।” ईसु नगरीनै छोडर आपकी बाण गेल जेतून का डूँगरपै चलेगो। अर चेला बिकै गेल-गेल, बठै पुग्या पाछै बो बाऊँ बोल्यो, “अरदास करो की थे बिचास्या नइ जाओ।” जत्ती दूर भाठो बगायो जा सकै ह बो बेत्ती दूर बाऊँ न्यारो जार गोडा क पाण बेठर अरदास करबा लागगो, “परम-पिता ज थे चाओ तो इ दुख का कचोळाऊँ मनै बचा सको हो, पण मेरी नइ थारी इंछ्या पूरी होणी चाए।” जणा बठै बिकै सामै एक ईस्बर नगरी दुत परगट होयो अर बिनै हिमत बंधायो। अर बो बोळो दुखी होर ओर बी बेत्ती लगन क सागै अरदास करबा लाग्यो। अर बिको पसिनो लोय का टपका की जंय्यां धरती प गिरै हो। अर जद बो अरदासऊँ उठर आपका चेला कनै गयो जणा बे बिनै दुख क मार्या आखता होर सुत्या लाध्या। जणा बो बानै बोल्यो, “सोर्या क्याले हो खड़्या होर अरदास म लागज्याओ जिऊँ थे बिचास्या नइ जाओ।” बो हाल बोलर्योई हो, क बठै भीड़ भेळी होगी अर बि भीड़ क आगै-आगै यहूदा होर्यो जखो बा बारा चेला मऊँ एक हो। बो ईसु कनै आर बिको माखो ले लिओ। पण ईसु बिनै बोल्यो, “यहूदा मेरो माखो लेर के तू मिनख का बेटानै धोकाऊँ पकड़ावै ह?” जणा बिका चेला आ भापर की आगै काँई होबाळो हो कह्या परबु म्हें तलवार काडल्याँ के? अर बामैऊँ एक आपकी तलवार काड म्हायाजक का दास को दाइणो कान काट दिओ। इपै ईसु बोल्यो, “बस चुपचाल्या रेह्‍वो!” अर बो बिका कान क हात अड़ार बिनै ओज्यु जोप दिओ। जणा पाछै बो बिपै चढाई करबा आया परधान याजक, मनदर का सिपाईड़ा का अधिकारी अर यहूदि नेताऊँ बोल्यो, “म डाकू हूँ के? जखो थे तलवार अर लाठी लेर मेर कनै आया हो। जद म रोजकी थारै सागै मनदर म रेह्तो हो बि टेम तो थे मेर प हात कोनी घाल्यो। पण आज थारो टेम ह जिपै अँधकार की ताकत को हक ह।” इकै पाछै बे बिनै पकड़र म्हायाजक क घरा लेग्या। अर पतरस छापळतो छापळतो बाकै गेल होर्यो हो। याजक हाळी गुवाड़ी क बिचमै जार बे आग सूलगाई अर जखा आग क च्यारूमेर बेठ्या हा बाकै सागै पतरस बी बेठगो। जणा एक दासी बिनै आग का च्यानणा म पिछाणर बोली, “ओ आदमी बी तो ईसु क सागैई हो।” पण पतरस नटतो नटतो बोल्यो, “ए स्याणी म बिनै कोनी जाणू।” चिनेक देर पाछै एक ओर मिनख पतरसनै देखर बोल्यो, “तू बी तो बामैऊँई ह।” पण इबकै बी पतरस बोल्यो, “अरै भला मानस म बो कोनी।” अर घंटा भर पाछै एक जणो ओर जोर देर बोल्यो, “ओ तो साच्याई बामैऊँई ह। क्युं क ओ बी गलिली ह।” पण पतरस बोल्यो, “भला मानस मेरै क्युंई पलै कोनी पड़री, थे की ताँई बोलर्या हो।” बो आ खेर्योई हो क मुरगो बांग दि। जणा ईसु बिनै आपकी नाड़ घूमार देख्यो। अर देख ताँई पतरसनै परबु की बोलेड़ी बात याद आगी क, “आज मुरगा क बांग देबाऊँ पेली तू मेरै ताँई तीन बार नटसी।” जणा बो बारनै आर बुर्या रोबा लागगो। जखा ईसुनै पकड़ राख्या हा बे बिको मजाक उडाबा अर पिटबा लागगा। बे बिकी आँख्या प पटी बांद दि अर कह्या, “बूजा काड क तनै कूण मारै ह?” अर बे बिको निरादर करबा ताँई ओर बी बोळी बाता बोली। दिन उगताई यहूदि नेता, परधान याजक अर सास्तरनै सीखाबाळा भेळा होया अर ईसुनै बी पंचायत म पेस कर्यो गयो। अर बिऊँ सुवाल कर्यो, “तू मसी ह के?” ईसु बोल्यो, “ज म बोलुँ जणा थे मेरो बिस्वास कोनी करस्यो। अर ज म थानै बुजूँ जणा थे जुबाब कोनी देस्यो। पण इबऊँई मिनख को बेटो परम-परधान परमेसर क दाया हात कानि बेठसी।” बे सगळा कह्या, “जणा के तू परमेसर को बेटो ह?” ईसु बोल्यो, “जंय्यां की थे खुद खेर्या हो, क बो म हूँ।” जणा बे कह्या, “आपानै ओर सबूत की कोई जुर्त कोनी क्युं क आपा अ बात तो इकै मुंडाऊँई सुण लिआ हां।” इकै पाछै सगळी पंचायत खड़ी होगी अर बिनै पीळातुस क कनै लेगी। बे बिपै बलेम लगाया, “म्हें इनै यहूदि मिनखानै भंगराता पकड़्या हां क समराटनै लगान नइ देणो चाए अर ओ खुदनै मसी राजा बतावै ह।” जणा पीळातुस बिऊँ बुज्यो, “तू यहूदिआ को राजा ह के?” ईसु बोल्यो, “जंय्यां तू खुदई खेर्यो ह।” जणा पीळातुस मिनखा अर परधान याजकऊँ बोल्यो, “मनै तो इ आदमी म क्युंई गळत कोनी दिखर्यो।” पण बे आपकी बात प अड़्या रिह्या, “नइ ओ गलिल दिसावरऊँ लेर सगळा यहूदिआ दिसावर अर अठै का मिनखानै आपकी सीखऊँ भड़कायो ह।” आ सुणर पीळातुस बोल्यो, “के ओ गलिल को रेह्बाळो ह?” अर आ जा'णर क बो हेरोद का इलाका को ह जणा बो बिनै हेरोद क कनै भेज दिओ जखो बा दिना म यरूसलेम मई हो। ईसुनै देखर हेरोद राजी होयो क्युं क बो बोळी पेलीऊँ बिकै बारां म सुण राख्यो हो बो बिऊँ मिलबो चातो हो अर बिऊँ क्युं चमत्कार देखबो चातो हो। जणा बो ईसुऊँ बोळी बाता बुजी पण बो एक कोई जुबाब कोनी दिओ। परधान याजक अर सास्तरनै सीखाबाळा बठै खड़्या-खड़्या एक की दो लगाता रिह्या। जणा हेरोद अर बिका सिपाईड़ा बिको मजाक उडायो। अर बिको निरादर कर बिनै एक मेंगो चोळो पिरा'र ओटो पीळातुस क कनै भेज दिओ। बि दिनई हेरोद अर पीळातुस एक दुसरा का भाईला बणगा इऊँ पेली बाकी कदैई कोनी बणी। पीळातुस परधान याजका, यहूदि नेता अर मिनखानै भेळा कर बाऊँ बोल्यो, “थे इ आदमीनै, मिनखानै भंगराबा का जुरम म मेरै कनै ल्याया। अर म थारै सामैई, इ बात की जाच पड़ताळ करी पण म बिमै अंय्यां की कोई बातई कोनी पकड़ी। अर नइ हेरोदनै इमै क्युं मिल्यो जणाई तो बो इनै पाछो आपणै कनै भेज दिओ। ओ अंय्यां को क्युंई कोनी कर्यो जिकै चलतै ओ मोत की सजा भोगै। जणा म इकै तड़ा मरवार छोड द्‍युँ?” पीळातुस आई बरस फसै का त्युंहार प यहूदि मिनखा ताँई एक केदिनै छोडतो हो। जणा सगळा जोरऊँ एक सागै कह्या, “तू म्हारै ताँई बरअबानै छोड दे पण इको काम जचा।” बरअबानै नगरी म सरकार क खिलाप बगावत अर हत्या का जुरम म जेळ म गेर राख्यो हो। पण पीळातुस ईसुनै छोडबो चावै हो। जणाई बो लोगानै ओज्यु बोल्यो। पण बे एकई रट लगा राखी, “इनै सुळी प चढा द्‍यो।” पीळातुस तीसरका बोल्यो, “क्युं बो अंय्यां को कूणसो पाप कर्यो ह? जखो म इनै मोत की सजा द्‍युँ! क्युं क मनै तो इमै अंय्यां की कोई बुराई कोनी दिखी जणा फेर म इकै तड़ा लगवार छोड द्‍युँ।” पण बे ओर बी जोरऊँ चिलाबा लागगा, “नइ इनै तो सुळी प चढाओ” अर बाकी जीत होई। पीळातुस आदेस काड दिआ क आकी माँग पूरी होवै। अर बो एक आदेस ओर काड्यो क बरअबानै छोड दिओ जावै जिनै मिनख छोडबा की माँग करर्या हा जखो सरकार क खिलाप बगावत अर हत्या का जुरम म जेळ म पड़्यो हो अर ईसुनै बाका हाता म सूप दिओ जिऊँ बे बिकै सागै बा कर सकै जखो बे चावै हा। सिपाईड़ा जद ईसुनै ले जार्या हा। जणा बे समोन नाम का एक कुरेनीनै देख्यो जखो ढाणीऊँ आर्यो हो अर बे बिनै पकड़र बिपै सुळी धर दिआ अर बिनै ईसु क गेल-गेल कर लिओ। अर मिनखा की भीड़ की भीड़ बिकै गेल-गेल होरी, जिमै बोळी लूगाया अंय्यां की ही जखी ईसु ताँई रोरी अर बिलखरी ही। इपै ईसु पाछै मुड़र बाऊँ बोल्यो, “यरूसलेम म रेह्बाळी लूगायो थे मेरै ताँई मना रोओ पण थे खुद ताँई अर थारा टाबरा ताँई रोओ। क्युं क बा घड़ी बी आबाळी ह जद मिनख खेसी भागहाळी हीं बे लूगाया जखी बांझड़ी ह। अर बा कोख जखी टाबर कोनी जणी अर बा छाती जखी कदैई कोनी चुंघाई। बि घड़ी मिनख डूँगरऊँ बोलसी म्हारै प पड़ मरो अर डूँगर्याऊँ बोलसी म्हानै लुखाले। क्युं क जद मिनख हर्या दरख्तनै कोनी बकसै जणा फेर सूका को तो खेबोई के?” बे बिकै सागै दो अपराद्‍यानै बी मारबानै जार्या हा। अर जद बे बि झघा पुग्या जिनै भोडी खेता हा, बे ईसु अर बा दो कुकरमीयानै सुळी चढा दिआ बा दोन्या मऊँ एकनै बिकै दायणा अर दुसरानै बाया हात कानि सुळी प चढा दिआ। इपै ईसु बोल्यो, “परम-पिता आनै माफ कर द्‍यो क्युं क आनै कोनी बेरो क अ काँई कर्या हीं।” अर बे सिपाईड़ा पासो फेकर बिका गाबानै आपसरी म बाट लिआ। बठै खड़्या मिनख देखर्या हा, अर बठै खड़्या यहूदि नेता आ बोलर बिको मजाक उडार्या हा क, “ओ ओरानै बचायो ज ओ सचमई परमेसर को टाळेड़ो मसी ह जणा खुदनै बचार दिखावै।” सिपाईड़ा बी बिको मजाक उडायो अर बिनै सस्ती अँगूरी पीबा ताँई दि। अर कह्या, “तू सचमई यहूदिआ को राजा ह जणा खुदनै बचाले।” अर बिकै सीर क उपरनै एक बात मांड दि ही की ओ यहूदि मिनखा को राजा ह। बिकै सागै लटकायड़ा दो अपराद्‍या मऊँ एक जणो बिकी बुराई करतोई बोल्यो, “तू मसी कोनी के? जणा पाछै खुदबी बच अर म्हानै बी बचा।” जणा दुसरो हो जखो बिनै दकालर बोल्यो, “तनै जमाई परमेसर को डर कोनी? तू बी तो बाई सजा भोगर्यो ह जखी ओ भोगर्यो ह। क्युं क आपानै आपणी करनी गेल फळ मिलर्यो ह, पण ओ लाय तो क्युं कर्योई कोनी।” पाछै बो बोल्यो, “ईसु जद तू तेरा राज म आसी जणा मनै याद राखजे।” जणा ईसु बिऊँ बोल्यो, “म तनै बचन देऊँ हूँ क आज तू मेरै सागै परलोक म होसी।” बि दिन दोपारा बारा बजेऊँ लेर तीन बजै ताँई सगळा इलाका प अँधेरो घट घूमर होगो। सूरज काळो होगो। अर मनदर को परदो पा'टर दो टुकड़ा होगा। ईसु जोरकी उवाज म बोल्यो, “परम-पिता म मेरी आत्मा थारा हाता म देऊँ हूँ आ खेताई, बो पिराण तज दिआ।” अठै जोक्यु होयो बिनै देखर सुबेदार परमेसर की बडाई कर बोल्यो, “ओ पक्कोई धरमी मिनख हो।” अर बठै भेळा होयड़ा मिनख बठै जोक्यु होयो बिनै देखर बि दुख म छाती कुटताई आपकै घरा बावड़्याया। पण बिका जाण-पिछाण का मिनख अर बे लूगाया जखी गलिलऊँ बिकै सागै आई बे दूर खड़ी होर सक्यु देखरी ही। यहूदिआ दिसावर म अरमतिया नगरी को रेह्बाळो युसूफ नाम को एक मिनख हो। जखो यहूदि पंचायत को सदस्य हो। पण बो सभा का दुसरा मिनखा की बाता म सामिल कोनी हो जिमै ईसुनै मारबा प हामी होई ही ओ धरमी अर लोगा म मान्यो-थान्यो हो। अर ओ परमेसर का राजनै उडिकर्यो हो। बो ईसु की लास माँगबा पीळातुस क कनै गयो। अर ईसु की लास सुळी पऊँ उतार बिपै मखमल को चादरो पळेटर बिनै ढाड म खोदेड़ी कबर म धर दिनी। जिमै इऊँ पेली कोईकिई लास कोनी धरी गई ही। बि दिन सकरवार हो अर अरामहाळो दिन लागबाळो हो। बे लूगाया जखी गलिलऊँ चालर आई ही बे युसूफ क गेल जार बि कबरनै देखी अर आ बी देखी की बिकी लास कंय्यां धरी गई ह। जणा पाछै बे ओटी आर लास प लगाबा ताँई सुगंद देबाळो लेव बणाई। अर हुकमानै मानबा गेल बे अरामहाळा दिन अराम करी। सपता का पेला दिन दितबारनै, भागपाट्याई बे लूगाया जखी बो सुगंद देबाळो लेव जिनै बे त्यार करी ही बिनै लेर कबर प गई। बानै कबर का मुंडा आगै को भाठो सरकेड़ो लाध्यो। जणा बे मांयनै जार देखी पण बानै बठै परबु ईसु की लास कोनी लाधी। बे खड़ी-खड़ी सोचबा लागी क, “ईसु की लास कठै गई,” अत्ती बारां मई बाकन दो आदमी आर खड़्या होगा जाका गाबा भळका मारै हा। जणा बे बानै देखर डर क मारी धरती म निची घूण घाली। बे दोन्यु जणा बाऊँ कह्या, “जखो जिंदो ह बिनै मरेड़ा म क्युं ढुंढो हो? बो अठै कोनी। बो जी उठ्यो। बा बात याद करो जखी बो मरबाऊँ पेली गलिल म थारूँ बोली ही। बो बोल्यो हो, ‘आ तो होणी ह क मिनख को बेटो पाप्या क हाता म पड़सी बिनै सुळी प चढायो जासी पण तीसरै दिन जी उठसी।’” जणा बा लूगाया क बिकी बाता याद आई। अर बठैऊँ पाछी आर बे बा ग्यारा चेला अर दुसरानै बे सगळी बाता बताई। अ बाता बताबाळी लूगाया म मरीयम मगदलिनी, योअन्ना अर याकूब की माँ मरीयम अर ओर बी ही जखी बा चेलानै जखा भेजेड़ा चेला खुवाता हा अ बाता बतारी ही। पण बाकी बाता बानै फांप लागी अर बे बाकी बाता प भरोसो कोनी कर्या। पण पतरस आ सुणर भाग्यो जखो कबर प जार थम्यो अर बो झुकर देख्यो जणा बठै गाबा क अलावा क्युंई कोनी हो। जणा बो जोक्यु बठै देख्यो बिपै ताजूब करतो घरा चलेगो। बि दिनई बिका चेला मऊँ दो जणा यरूसलेमऊँ करीब सात कोस परै इमाउस गाँव जार्या हा। अर बे जोक्यु होयो हो बिपै चालता-चालता आपसरी म बतळार्या हा। अर जद बे बतळार्या हा जणा ईसु बाकै कनै आर बाकै सागै होलिओ। पण बे बिनै देखर बी कोनी पिछाण सक्या। ईसु बाऊँ बुज्यो, “थे चालता-चालता आपसरी म काँई बतळार्या हो?” जणा बे दुखी होर बठैई खड़्या होगा। बामैऊँ किल्युपास नाम को एक आदमी हो बो बोल्यो, “तू एकलोई अंय्यां को आबाळो जाबाळो मिनख ह जिनै गेलड़ा दिना म यरूसलेम म जोक्यु घट्यो बिकै बारां म कोनी बेरो?” जणा ईसु बोल्यो, “अंय्यां को काँई होगो?” जणा बे बिनै बताबा लाग्या क, “अ बाता ईसु नासरी क बारां म ह जखो सगळा मिनखा अर परमेसर की नजर्या म खेबा अर करबा म सक्‍तिसाली अर परमेसर की खेबाळो हो। बिनै म्हारा यहूदि नेता अर परधान याजक पकड़ा'र बिनै मोत की सजा दिवा दिआ अर बिनै सुळी प चढा दिओ गयो। अर म्हें इ बात की आस लगाया बेठ्या हा, की ओई इजरायलनै छुटाबाळो मिनख ह, आ बातानै होया निमड़्या आज तीसरो दिन ह। अर म्हारी टोळी की लूगाया म्हानै ताजूब म गेर दिनी। होयो अंय्यां की आज भागपाट्याई बे कबर प गई। अर बानै बठै बिकी लास कोनी मिली। बे पाछी आर म्हानै आ बोली क म्हानै ईस्बर नगरी दुता को दरसाव होयो ह जखो म्हानै आ बताई की बो तो जीवै ह। जणा म्हारै मऊँ क्युंक कबर प गया पण जंय्यां लूगाया बताई ही बठै ठिक बंय्यांई हो, अर बिको क्युंई अतो-पतो कोनी हो।” जणा ईसु बानै बोल्यो, “थे कंय्यां का बादु अर परमेसर की खेबाळा की बाता प बिस्वास करबा म ढिला हो। काँई मसी ताँई ओ जरूरी कोनी हो क बो आ दुख-तकलिफानै भोगै अर आपकी मेमा धारण करै?” अर बो बानै मूसाऊँ लेर सगळा परमेसर की खेबाळा की बे बाता खोलर बताई जखी पबितर सास्तर म बिकै बारां म मंडरी ह। जद बे बि गाँव क सांकड़ा पुग्या जठै बे जावै हा। जणा ईसु क्युं अंय्यां को बरताव कर्यो जंय्यां बिनै आगै जाणो होवै। पण बे बिनै जिदा-जादि कर आ खेर डाट लिआ की, “इब दिन आथगो ह।” जणा बो मांयनै गयो अर बाकन डटगो। अर जद रोटी खाबा बो बाकै सागै चोकी प बेठ्यो जणा रोटी उठार परमेसर को धनेवाद कर्यो अर रोटी तोड़र बानै दिनी। बि घड़ीई बा सगळा की आँख्या खुलगी अर बे बिनै पिछाण्गा। पण बो बाकै सामैऊँ गायब होगो। जणा बे आपसरी म बतळाबा लागगा, “बो गेला म जद आपणाऊँ बातचित कर्यो हो। अर आपानै सास्तर की बाता समजार्यो हो। बि टेम आपणा मन म जोस पैदा कोनी होर्यो हो के?” जदकी जदई बे खड़्या होर यरूसलेम रवाना होगा। अर बठै बानै बे ग्यारा चेला अर बाकी का एक सागै भेळा होयड़ा मिल्या। बे बोलर्या हा, “परबु सचमई जीगो क्युं क समोन बिनै जीवतानै देख्यो ह।” जणा बे दोन्यु जणा जोक्यु बाकै सागै गेला म होयो बानै बतायो अर आ बी बता दिनी की बे कंय्यां बिनै रोटी तोड़ता टेम पिछाण्या। हाल बे आ बाता क बारां म बतळार्याई हा क ईसु खुद बाकै मांय आर खड़्यो होगो अर बाऊँ बोल्यो, “थानै स्यांती मिलै।” पण बे बुरी ढाळ डरग्या जंय्यां कोई भूत देख लिओ होवै। जणा बो बानै बोल्यो, “थे क्याले चित उठा राख्या हो? अर थारा मना म ओ भेम कठैऊँ आग्यो? मेरै हात लगार मेरा हात पगानै देखो। क्युं क भूत म हाड-मास कोनी होवै जंय्यां थे मेर म देखर्या हो।” अंय्यां बोलर बो बानै आपका हात-पग दिखाया। पण बे खुसी अर ताजूब क मार्या हाल ताँई बिपै बिस्वास कोनी कर सक्या, जणा बो बानै बुज्यो, “थारै कनै खाबा ताँई क्युं ह के?” बे बिनै भुंदेड़ी मछी को टुक दिओ। बो बिनै लेर बाकै सामै खायो। अर बाऊँ बोल्यो, “अ बे बाता हीं जखी म जनाड़ै बोली ही जद म थारै सागै हो। अ सगळी बात जखी मूसा का नेम-कायदा म, परमेसर की खेबाळा अर भजना की पोथी म मंडरी ह सगळी पूरी होणीई ही।” अर बो पबितर सास्तरनै समजाबा ताँई बाकी बुदी का पाट खोल दिआ। अर बो बानै बोल्यो, “अ बेई बाता हीं जखी पबितर सास्तर म मंडेड़ी ह की, ‘मसी दुख भोगसी अर मर्या पाछै तीसरै दिन ओज्यु जी उठसी।’ अर बिका नामऊँ पाप की माफी ताँई मन फेरबा का चोखा समचार को यरूसलेमऊँ लेर धरती का सगळा कूणबा म परचार कर्यो जासी। थे आ बाता का गुवा हो। अर जिको करार मेरो परम-पिता मेरूँ कर्यो ह बा पबितर आत्मा म थारै ताँई भेजस्युं। पण थे बि दिन ताँई इ नगरी मई टिक्या रेहज्यो जद ताँई थानै पबितर आत्माऊँ सक्‍ति कोनी मिलज्या।” जणा बो बानै बेतनिया गाँव ताँई बारनै लेगो। अर बो बानै हात बढार आसिरबाद दिओ। अर बानै आसिरबाद देतानैई नाकै कर ईस्बर नगरी म उठा लिओ गयो। जणा बे बिकी भगती करी अर राजी-खुसी यरूसलेम बावड़्याया। अर बे मनदर म परमेसर को गुणगान करता आपको टेम काटबा लागगा। क्युबी रच्या जाबाऊँ पेली बचन हो। बचन परमेसर क सागै हो, अर बचनई परमेसर हो। क्युबी रच्या जाबाऊँ पेली बो परमेसर क सागै हो। बिकै जरिए परमेसर सगळी चिजा बणाई। सगळी सरस्टि म एक बी अंय्यां की चिज कोनी जखी इकै बिना रची गई हो। बिमै जीव हो। अर बो जीव सगळा मिनखा को च्यानणो हो। च्यानणो अँधेरा म चमकै ह, अर अँधेरो बिनै कोनी बुझा सक्यो। यहून्ना नाम का एक मिनखनै परमेसर भेज्यो। यहून्ना मिनखा म बि च्यानणा की गुवाई देबानै गुवा बणर आयो। जिऊँ मिनख बिका हेलानै सुणी अर बिस्वास करीं। बो खुद च्यानणो कोनी हो। पण बो बि च्यानणा की गुवाई देबानै आयो हो। सगळा मिनखानै च्यानणो दिखाबाळो, सचो च्यानणो जगत की नजर्या म आर्यो हो। बचन जगत म हो, पण कोई बिनै कोनी जाण्यो, जदकी परमेसर बिकै जरिए इ सरस्टि की रचना करी। बो आपका मिनखा म आयो। पण बे बिनै कोनी अपणाया। इकै बावजुद जत्ता बी बिनै अपणाया अर बिका नाम प बिस्वास कर्या, बानै बो परमेसर का टाबरिया होबा को हक दिओ। एक टाबर, जंय्यां मिनखऊँ बिकी इंछ्या गेल जलमै ह, बि तरिकाऊँ जलम'र बे परमेसर का टाबर कोनी बण्या, पण परमेसर की इंछ्याऊँ आत्मिक रूपऊँ जलम लेर परमेसर का टाबर बण्या हीं। बचन देधारी होयो। बो दया अर सच क सागै म्हारै मांयनै रिह्यो। अर म्हें बिकी अंय्यां की मेमा देखी जंय्यां परम-पिता का इकलोता बेटा की मेमा। यहून्ना बिकै बारां म गुवाई दिनी। बो हेलो पाड़्यो, “ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो।’” बिकी दया की भरपुरीऊँ आपानै एक क पाछै एक आसिरबाद मिल्यो ह। मूसा क जरिए परमेसर नेम-कायदा दिआ। पण दया अर सच ईसु मसी की बजेऊँ आयो। परमेसरनै कदैई कोई कोनी देख्यो। पण परमेसर को इकलोतो बेटो जखो परमेसर की छाती तळै ह, अर बो परमेसरई ह। बोई परमेसरनै परगट कर्यो। यरूसलेमऊँ यहूदि अधिकारी जद याजका अर लेवीयानै यहून्ना कनै आ बुजबा भेज्या क, “तू कूण ह?” जणा यहून्ना बाकै मुंडा प सच बोल्यो क, “म मसी कोनी।” बे बिऊँ बुज्या, “जणा तू कूण ह? के तू एलिआ ह?” बो बोल्यो, “म एलिआ कोनी।” जणा बे बुज्या, “के तू परमेसर की खेबाळो ह?” बो बोल्यो, “नइ, म बो बी कोनी।” बे बिऊँ बोल्या, “जणा पाछै तू कूण ह म्हानै बता? जिऊँ म्हें म्हानै भेजबाळानै जुबाब देवां। तू खुद तेरै बारां म काँई खेवै ह?” यसाया परमेसर की खेबाळा क खया गेल यहून्ना बानै जुबाब दिओ: “म उजाड़ म, हेलो देबाळा को हेलो हूँ। ‘परबु क चालबा ताँई गेलो सिदो करो।’ ” फरिसी, जानै भेज्या गया हा बे बिऊँ बुज्या, “जद तू नइ तो मसी अर नइ एलिआ अर नइ परमेसर की खेबाळो, जणा पाछै तू पाणी को बतिस्मो क्याले देवै ह?” यहून्ना बानै जुबाब दिओ, “म तो पाणी को बतिस्मो देऊँ हूँ। पण थारै बिचमै एक मिनख खड़्यो ह, जिनै थे कोनी जाणो। बो मेरै पाछै आर्यो ह। पण म तो बिकाळा जूता का सळू खोलबा जोगोई कोनी।” अ सगळी बाता यरदन नदि क परली पार बेतनिया म होई। जठै यहून्ना पाणी को बतिस्मो दिआ कर्तो हो। आगलै दिन ईसुनै आप कानि आतो देखर यहून्ना बोल्यो, “देखो, ओ परमेसर को उन्यो ह, जखो जगत का मिनखा का पाप ताँई बलिदान होसी। ओ बोई ह जिकै बारां म, म बोल्यो हो, ‘बो जखो मेरै पाछै आवै ह बो मेरूँ बडो ह, क्युं क बो मेरै जलमऊँ पेली बी मौजूद हो। पेली म बी बिनै कोनी जाण्तो हो क बो कूण ह? पण म इ ताँई पाणी को बतिस्मो देतो आयो क, बो इजरायल प परगट होवै।’” जणा पाछै यहून्ना आ गुवाई दिनी, “म आसमानऊँ पबितर आत्मानै कबूतर की जंय्यां बिपै उतरता देखी। म तो बिनै कोनी पिछाण्तो हो। पण परमेसर जखो मनै पाणी को बतिस्मो देबा भेज्यो, बोई मेरूँ बोल्यो, ‘जिपै तू पबितर आत्मानै उतरता अर रूकता देखै, जणा जाण जाजै क पबितर आत्मा को बतिस्मो देबाळो ओई ह।’ म आ बातानै होता देखी, जणाई गुवाई देऊँ हूँ क ओई परमेसर को बेटो ह।” आगलै दिन यहून्ना अर बिका दो चेला ओज्यु बठैई हा। अर बो ईसुनै बठिकी जातो देखर बोल्यो, “देखो, परमेसर को उन्यो जार्यो ह।” बिकी आ बात सुणर, बे दोन्यु चेला ईसु क गेल होलिआ। ईसु गेलनै मुड़र बानै आपकै गेल आतो देखर बाऊँ बुज्यो, “काँई बात ह?” बे बोल्या, “ओ गरूजी, थे कठै रेह्‍वो हो?” बो बोल्यो, “आओ अर देखल्यो।” आ बात संज्या च्यारेक बजे की ह जणा बे बिकै सागै जार देख्या क बो कठै रेह्‍वै ह अर बे बि दिन बिकै सागैई रिह्या। यहून्ना की बात सुणर ईसु क गेल चालबाळा दोन्या मऊँ, एक जणो अंदरिआस हो जखो समोन पतरस को भाई हो। बो सऊँ पेली आपका भाई समोननै ढुंढर बोल्यो, “म्हानै मसी मिलगो ह।” मसी को मतबल टाळेड़ो होवै। जणा बो बिनै ईसु कनै ल्यायो। ईसु बिनै देखर बोल्या, “तू यहून्ना को बेटो समोन ह, तू केफा खुवासी।” केफा जिनै पतरस बी बोलै ह जिको मतबल ढाड होवै ह। आगलै दिन ईसु गलिल जाबा की मन म करी। फलिपूसनै देखर बो बिऊँ बोल्यो, “मेरै गेल होले।” फलिपूस, अंदरिआस अर पतरस की नगरी बेतसदा को रेह्बाळो हो। फलिपूस नतनएलऊँ मिलर बिऊँ बोल्यो, “म्हानै बो मिलगो ह, जिकै बारां म मूसा नेम-कायदा म मांड्यो अर जिकै बारां म परमेसर की खेबाळा बताया हीं। बो युसूफ को बेटो नासरत को रेह्बाळो ईसु ह।” नतनएल बुज्यो, “नासरत! नासरतऊँ कोई चोखी चिज निकळ सकै ह के?” फलिपूस बोल्यो, “आर खुदई देखले।” ईसु नतनएलनै आपकै कनै आतो देखर बोल्यो, “देखो, ओ सचमई इजरायली ह, जिमै क्युंई कपट कोनी।” नतनएल ईसुऊँ बुज्यो, “थे मनै कंय्यां जाणो हो?” ईसु बिऊँ बोल्यो, “फलिपूसनै बुलाबाऊँ पेली, म तनै अंजीर का दरखत क तळै देख्यो हो।” नतनएल बिऊँ बोल्यो, “गरूजी थे परमेसर का बेटा हो, थे इजरायल का राजा हो।” ईसु बोल्यो, “म तनै बोल्यो क म तनै अंजीर का दरखत तळै देख्यो, के तू जणाई मेर प बिस्वास करै ह? तू इऊँ बी बडा-बडा काम देखसी।” अर बो बाऊँ बोल्यो, “म थारूँ सच बोलर्यो हूँ, थे ईस्बर नगरीनै खुली अर परमेसर का ईस्बर नगरी दुतानै मिनख का बेटा क सामै आता-जाता देखस्यो।” आ बाता क होबा क पाछै तीसरै दिन गलिल का काना नगरी म कोई ब्या हो। अर ईसु की माँ बी बठै ही। ईसु अर बिका चेलानै बी इ ब्या म नूतेड़ो हो। अर जद अँगूरी निमड़गी जणा, ईसु की माँ बिऊँ बोली, “आकै कनै अँगूरी निमड़गी।” ईसु बोल्यो, “मावड़ी, मेरूँ क्युं बी करबा ताँई मना बोल। हाल मेरो टेम कोनी आयो।” ईसु की माँ नोकर-चाकराऊँ बोली, “जोक्यु बो थानै करबा ताँई बोलै बंय्यांई करज्यो।” बिधी-बिधान गेल न्हाबा-धोबा ताँई यहूदि मिनखा की एक रीत ही, जि ताँई बठै भाठा की छ बडी-बडी झाल म्हेलेड़ी ही। बा हरेक म करीब सो लिटर पाणी नावड़तो हो। ईसु नोकर-चाकराऊँ बोल्यो, “आ झालानै पाणीऊँ भरद्‍यो।” जणा बे बाकै पोळ लगा दिनी। जणा पाछै बो बोल्यो, “इब इमैऊँ का'डर कोठ्यारी कनै लेज्याओ।” अर बे लेग्या, अर जद बो कोठ्यारी बि पाणीनै पीयो जखो अँगूरी बणगो हो। बो कोनी जाणतो हो क आ अँगूरी कठैऊँ आई। पण जखा नोकर-चाकर बि पाणीनै काड्या हा बे जाण्ता हा। जणा बो कोठ्यारी बनड़ानै बुलायो अर बोल्यो, “सगळा मिनख पेली चोखी अँगूरी परोसी हीं, अर मिनखा क पीर धाप्या पाछै हळकी। पण तू तो चोखी अँगूरी हाल ताँई राख राखी ह।” अंय्यां गलिल का काना नगरी म ईसु पेलो चमत्कार कर आपकी मेमा दिखाई। अर बिका चेला बिपै बिस्वास कर्या। इकै पाछै ईसु अर बिकी माँ अर बिका भाई अर बिका चेला कफरनूम नगर जार बठै क्युंक दिन रिह्या। यहूदिआ को फसै को त्युंहार साकडैई हो, जि बजेऊँ ईसु यरूसलेम गयो। ईसु बठै मनदर का चोक म आर काँई देखै ह क, ढांडा, लल्डी, कबूतर बेचबाळा अर रिपीआ-पिसा को लेणदेण करबाळा आपकी दुकान लगा राखी ह। जणा ईसु जेवड़ी को कोल्डो बणार, लल्ड्या क सागै बा सगळा ढांडानै मनदर का चोक क बारनै घेर्यायो। अर पाछो मुड़र पिसा को लेणदेण करबाळा का सीक्का खिन्डा दिआ। अर बाका पाटिया उन्दा मार दिआ। अर कबूतर बेचबाळानै बोल्यो, “आनै लेर अठैऊँ चल्या जाओ। मेरा परम-पिता का घरनै बजार बणाबा की थारी हिमत कंय्यां होई?” जणा बिका चेलानै पबितर सास्तर म मंडेड़ी बात याद आई, “तेरै घर को मो मनै खाज्यासी।” यहूदि अधिकारी ईसु कनै पाछा आर एक सुवाल कर्यो, “तू काँई चमत्कार दिखा सकै ह? जिऊँ ओ साबित होवै क, तनै अंय्यां करबा को हक ह।” ईसु जुबाब दिओ, “इ मनदरनै ढा द्‍यो, अर म तीन दिना म इनै पाछो खड़्यो कर देस्युँ।” बे बिऊँ बोल्या, “के तू इनै तीन दिना म खड़्यो कर देसी? इ मनदरनै बणाबा म छियाळिस बरस लाग्या हा।” पण ईसु जि मनदर की बात करर्यो हो बा बिकी काया ही। अर जद बो मरेड़ा मऊँ जी उठ्यो जणा बिका चेलानै याद आयो क इकै बारां म बो बानै बोल्यो हो। अर बे धरमसास्तर प अर ईसु जखो बोल्यो हो बिपै बिस्वास कर्या। फसै का त्युंहार की टेम जद ईसु यरूसलेम हो, बोळा हा जखा बिका चमत्कारानै देखर जानै बो कर्या करतो हो बिस्वास कर्या। पण ईसु खुदनै बाकै भरोसै कोनी छोड्यो, क्युं क बो सगळानै जाणतो हो। बिनै इकी जुर्त कोनी ही क, कोई मिनख दुसरा मिनख क बारां म बतावै, क्युं क बो खुद जाण्या कर्तो हो क मिनखा क मन म काँई चालर्यो ह। बठै निकेदेमुस नाम को यहूदि नेता हो, जखो एक फरिसी हो। एक रात बो ईसु कनै गयो अर बिऊँ बोल्यो, “गरूजी, म्हें जाणा हां क म्हानै सीखाबा ताँई परमेसर तनै भेज्यो ह। अर ज परमेसर थारै सागै नइ होतो तो थे चमत्कार कोनी कर सका हा।” ईसु जुबाब दिओ, “म तेरूँ सची बोलुँ हूँ जद ताँई कोई मिनख ओज्यु नइ जलमै जद ताँई बो परमेसर का राजनै कोनी देख सकै।” जणा निकेदेमुस बोल्यो, “एक बूडो मिनख ओज्यु आपकी माँ का पेट म जार कंय्यां जलम ले सकै ह?” ईसु बोल्यो, “म थारूँ सची-सची बोलुँ हूँ, पबितर आत्मा अर पाणीऊँ जलम्या बिना कोईबी मिनख परमेसर का राज म कोनी बड़ सकै। मिनख मिनखनै जलम दे सकै ह, पण बा पबितर आत्मा ह जिकै जरिए बो आत्मिक रूप म जलमै ह। था सगळानै ओज्यु जलम लेणोई ह, मेरी इ बात प ताजूब मना करो। भाळ जठै चावै बठै भेवै ह, जिकी उवाज थे सुणो हो, पण थे आ कोनी जाणो क बा कठैऊँ आवै अर कठै जावै ह। पबितर आत्माऊँ जलम लेबाळो हरेक मिनख इकी जंय्यांई ह।” निकेदेमुस बोल्यो, “ओ कंय्यां हो सकै ह?” ईसु बिऊँ बोल्यो, “तू इजरायल्यानै सीख देबाळो होर बी, आ बातानै क्युं कोनी समज सक्यो? म तनै सची बोलुँ हूँ, म्हें जोक्यु जाणा बो बोलां हां, अर जोक्यु देखां बिकी गुवाई देवां हां, इकै बावजुद बी थे म्हारी बातानै कोनी मानो। थे जद इ धरती की बाता पई बिस्वास कोनी करो जखी म थानै बताऊँ हूँ। जणा पाछै ज म थानै ईस्बर नगरी की बाता बताऊँ, थे बापै कंय्यां बिस्वास करस्यो? बो जखो ईस्बर नगरीऊँ उतर्यो बि मिनख का बेटा क अलावा कोई ईस्बर नगरी म कोनी चढ्यो। जंय्यां मूसा बि उजाड़ म कांसा का साँपनै उचो उठायो हो बंय्यांई मिनख को बेटो बी उचो उठायो ज्यासी। जिऊँ जखो बी बिपै बिस्वास करै बो अजर-अमर जीवन पावै।” “क्युं क परमेसर जगत का मिनखाऊँ अंय्यां को परेम कर्यो, जिकै चलतै बो आपको इकलोतो बेटो दे दिओ। जिऊँ जखो बी बिपै बिस्वास करै बो नास नइ होवै पण अजर-अमर जीवन पावै। परमेसर आपका बेटानै, जगत का मिनखानै सजा देबा को हुकम देबा ताँई कोनी भेज्यो। पण बानै बचाबा ताँई भेज्यो ह। जत्ता बी बिपै बिस्वास करै ह, बानै परमेसर माफ करै ह। पण जखा बिपै बिस्वास कोनी करै बे सजा का भागी ह, क्युं क बे परमेसर का इकलोता बेटा प बिस्वास कोनी कर्या। बाको न्याय इ आधार प ह क ईस्बर नगरीऊँ च्यानणो धरती प आयो। पण बे च्यानणाऊँ बेत्ती अँधकारऊँ लगाव राख्या। क्युं क बाका करम बुरा हा। जखो बुराई करै ह, बो च्यानणाऊँ नफरत राखै ह। अर च्यानणा म कोनी आवै, क्युं क बो डरै ह क बिका करम चोड़ा म नइ आज्यावै। पण जखा खराई प चालै ह, बे च्यानणा म आवै ह। जिऊँ ओ सामै आ सकै, क जोक्यु परमेसर चातो हो बोई बे कर्या।” आ बाता क होबा क पाछै ईसु आपका चेला क सागै यहूदिआ का निचला इलाका म आयो। अर बठै बाकै सागै रिह्यो अर पाणी को बतिस्मो दिओ। सलेम नगरी क सांकड़ैई एनोन नाम की झघा एक कूंड हो जठै यहून्ना बी पाणी को बतिस्मो दिआ करतो हो, क्युं क इ झघा म बोळो पाणी हो। मिनख बिकन आर पाणी को बतिस्मो लेता हा। अ यहून्नानै केद म लेबाऊँ पेली की बाता हीं। सुद होबा का रिवाजा क बारां म यहून्ना का क्युंक चेला एक यहूदि अधिकारीऊँ जिरै करर्या हा। जणा बे यहून्ना कनै जार बिऊँ बोल्या, “गरूजी जखो मिनख यरदन क परलै नाकै तेरै सागै हो जिकै बारां म तू बोल्यो हो, इब बो पाणी को बतिस्मो देर्यो ह अर हरेक जणो पाणी को बतिस्मो लेबा बिकन जार्यो ह।” यहून्ना जुबाब दिओ, “जद ताँई परमेसर नइ दे, कोईनै क्युंई कोनी मिलै। थे खुद मेरा गुवा हो, म थानै बोल्यो हो क, ‘म मसी कोनी पण बिकै अगाऊ भेजेड़ो हूँ।’ बिंद बोई ह जिकै बिनणी ह। पण बिंद को भाईलो जखो खड़्यो होर बिकी सुणै ह, बो जद बिंद बोलै जणा बिकी उवाज सुणर राजी होज्यावै ह। ठिक बंय्यांई म बी राजी होयो। आ जरूरी ह क मिनखा म ईसु को मान बढै अर मेरो घटै। “जखो उपरऊँ आवै ह, बो सऊँ बढर ह। जखो मिनख धरतीऊँ आवै बो धरती को ह अर बो धरती की बाता करै ह। पण जखो ईस्बर नगरीऊँ आवै बो सऊँ उपर ह। बो जोक्यु देख्यो अर सुण्यो बिनैई बोलै ह, पण कोईबी मिनख बिकी बातानै कोनी मानै। जखो बी बिकी बातानै मानै ह, बो आ दिखावै ह क परमेसर सचो ह। क्युं क जिनै परमेसर भेज्यो ह, बो परमेसर का बोल बोलै ह। क्युं क परमेसर बिनै बेथां पबितर आत्माऊँ भर्यो ह। परम-पिता आपका बेटाऊँ परेम करै ह अर बिकै हाता म सक्यु सूप दिओ ह। जखो मिनख परमेसर का बेटा प बिस्वास करै, बिनै अजर-अमर जीवन मिलसी। पण जखो बिकी कोनी मानै, बि ताँई जीवन कोनी अर बो परमेसर की झाळ भोगसी।” फरिसी आ सुणी क, ईसु यहून्नाऊँ बेत्ती चेला बणावै अर बानै पाणी को बतिस्मो देवै ह। पण ईसु खुद आपकै हाता कोईनैई पाणी को बतिस्मो कोनी देतो हो। ओ काम बिका चेला कर्या करता हा। ईसुनै जद बेरो पड़्यो क फरिसी बिकै बारां म काँई सुण्या हीं, जणा बो यहूदिआ इलाकानै छोडर पाछो गलिल इलाका म चलेगो। पण बिनै सामरीया इलाका म होर जाणो पड़्यो। जणा बो सामरीया इलाका की एक नगरी म पुग्यो, जिको नाम सूखार हो, आ नगरी बि झघा क कनै ही जिनै बडको याकूब आपका बेटा युसूफनै दि ही। अर बडका याकूब को कुओ बी बठैई हो, जणा सफर की थकान क चलतै ईसु कुआ क कनै बेठगो। आ करीब दोपारा की सी बात ही। अत्ता मई एक सामरी लूगाई बठै पाणी भरबानै आई, जणा ईसु बिनै बोल्यो, “मनै पाणी प्या।” बि टेम बिकाळा चेला खाबा ताँई क्यु मोल ल्याबानै नगरी म गयड़ा हा। बा दिना यहूदि मिनख खुदपै सामरी मिनखा की छायाई कोनी पड़बा देता हा। इ बजेऊँ बा सामरी लूगाई बिनै जुबाब दिनी, “तू एक यहूदि ह, अर म सामरी जणा पाछै तू पीबा ताँई मेरूँ पाणी कंय्यां माँग सकै ह?” ईसु जुबाब म बोल्यो, “ज तू परमेसर का बरदाननै जाणती अर आबी क, ‘जखो तेरूँ पीबा ताँई पाणी माँगर्यो ह बो कूण ह, जणा तू बिऊँ माँगती अर बो तनै जीवन देबाळो पाणी देतो।’” बा लूगाई बोली, “स्याणो, पाणी भरबा ताँई थारै कनै क्युंई कोनी, अर ओ कुओ बी बोळो उन्डो ह। जणा पाछै बो जीवन देबाळो पाणी तेरै कनै कठैऊँ आयो? के तू म्हारा बडका याकूबऊँ बडो ह, जखो म्हानै ओ कुओ दिओ अर जिमैऊँ बो खुद, बिका बेटा अर बिका ढांडा पाणी पीआ हा?” ईसु जुबाब दिओ, “जखो बी इ पाणी मऊँ पिसी बिनै ओज्यु तिस लागसी, पण ज मेरा दियड़ा पाणी मऊँ कोई पिसी जणा बो ओज्यु कदैई कोनी तिसायो होसी। बि पाणीऊँ जखो म बानै देस्युँ, बिऊँ बे अजर-अमर जीवन ताँई जीवन देबाळा पाणी को झरनो बणज्यासी।” बा लूगाई बोली, “म्हराज जणा तो बो पाणी मनै बी द्‍यो, जिऊँ मनै कदैई तिस नइ लागै अर नइ पाणी खिचबानै अठै आणो पड़ै।” जणा ईसु बिऊँ बोल्यो, “जा तेरा मोट्यारनै बुलाल्या।” बा बोली, “मेरै मोट्यार कोनी।” जणा ईसु बोल्यो, “तू ठिक बोलै ह तेरै मोट्यार कोनी। तू पाच क सागै ब्या करी अर जिकै सागै तू हाल रेह्‍री ह बो बी तेरो मोट्यार कोनी। तू मेरूँ सच बोली ह।” बा लूगाई ईसुनै बोली, “म्हराज मनै तो लागै ह क थे कोई परमेसर की खेबाळा हो। म्हारा बडका इ डूँगर प परमेसर की भगती कर्या करता हा, पण थे यहूदि अंय्यां बोलो हो क, यरूसलेमई बा झघा ह जठै परमेसर की भगती करी जाणी जरूरी ह।” ईसु बिऊँ बोल्यो, “स्याणी, मेरो बिस्वास कर, बो टेम आर्यो ह जद मिनख नइ तो परम-पिता की भगती इ डूँगर प अर नइ यरूसलेम म करसी। थे सामरी सचमई कोनी जाणो, क थे किकी भगती करो हो। पण म्हें यहूदि जाणा हा क, म्हें किकी भगती करां हां। क्युं क छुटकारो यहूदि मिनखा मऊँ आवै ह। पण बो टेम आर्यो ह, आर्यो के ह आग्यो, जद भगत आत्माऊँ परम-पिता की सची भगती करसी , जखी भगती बो चावै ह। परमेसर आत्मा ह, जणा ओ जरूरी ह क, बिकी भगती आत्मा अर सचाईऊँ करी जावै।” लूगाई बिऊँ बोली, “म जाणू हूँ क, मसी जखो परमेसर को टाळेड़ो ह आसी। जद बो आसी जणा आपानै सगळी बाता बतासी।” ईसु जुबाब दिओ, “म जखो तेरै सागै बतळार्यो हूँ, म बोई हूँ।” बि टेमई ईसु का चेला बठै आग्या अर बे आ देखर क ईसु एक लूगाई क सागै बतळार्यो ह, इ बात प ताजूब कर्या। पण कोईसोई बि लूगाईऊँ कोनी बुज्यो क, “तनै काँई चाए?” अर नइ ईसुऊँ बुज्या क, “तू बिऊँ कय्यालै बतळार्यो ह?” बा लूगाई आपको घड़ो बठैई छोडर पाछी नगरी म जार मिनखानै खेबा लागी, “आर एक मिनखनै देखो, बो बे सगळी बाता बता दिनी जखी म करी। के ओई तो मसी कोनी?” बे नगरीऊँ निकळर बिकन जाबा लाग्या। अर बठिनै बिका चेला बिऊँ हात जोड़र खया, “गरूजी, क्यु खाल्यो।” पण ईसु जुबाब दिओ, “मेरै कनै खाबा ताँई अंय्यां को खाणो ह, जिकै बारां म थे कोनी जाणो।” जणा चेला आपसरी म बतळाबा लाग्या, “के आनै कोई रोटी ल्यार दिनी ह?” ईसु बाऊँ बोल्यो, “मेरी रोटी आ ह क, म मेरा भेजबाळा की इंछ्या मानू अर बिको काम पूरो करूं। के थे कोनी बोलो, ‘इब लावणी का च्यार म्हेनाई रेह्गा ?’ म थारूँ बोलुँ हूँ, खेता कानि देखो बे लावण्या आगा हीं। लावणी करबाळानै मजुरी मिलरी ह अर बो अजर-अमर जीवन ताँई फसल भेळी करै ह। जिऊँ बीज बोबाळो अर काटबाळो दोन्युई मिलर खुसी मना सकै। क्युं क अठै आ बात सची बेठै ह, ‘बोयो कोई, अर काट्यो कोई।’ म थानै बि खेत की लावणी करबानै भेज्यो जिमै थे मेनत कोनी करी। दुसरा बिमै मेनत करी पण इब बि खेत का फळ म थारी बी पाँती ह।” बि लूगाई की इ बात की गुवाई देबा की बजेऊँ क, “जोक्यु म करी हूँ बे सगळी बाता बो मनै बता दिओ।” बि नगरी का बोळा सामरी मिनख ईसु प बिस्वास कर्या। अर जद सामरी आर बिऊँ हात जोड़र बोल्या क बो बाकै सागै रेह्‍वै, जणा बो दो दिन ताँई बाकै सागै रिह्यो। अर ओर बी बोळा मिनख हा जखा ईसु का बचनानै सुणर बिपै बिस्वास कर्या। जणा बे मिनख बि लूगाईऊँ बोल्या, “तेरै खेबा की बजेऊँई म्हें बिपै बिस्वास कोनी कर्या, पण म्हें खुद इनै सुणर जाणगा हां क, जगत का मिनखानै बचाबाळो सचमई ओई ह।” बा दो दिना क पाछै बो बठैऊँ गलिल चलेगो। क्युं क ईसु खुदई बोल्यो हो, “परमेसर की खेबाळानै खुदकी भौम म मान-समान कोनी मिलै।” जद बो गलिल पुग्यो, जणा गलिल का मिनख बिकी आवभगत करी। बे मिनख बा सगळा कामानै पेलीऊँ देख्या हा, जानै फसै का त्युंहार क दिना म बो यरूसलेम म कर्यो हो, क्युं क बे बी बि टेम बठैई हा। जणा पाछै बो गलिल इलाका की काना नगरी म गयो, जठै बो पाणीनै अँगूरी बणाई ही। बठै एक सरकारी अधिकारी हो, जिको बेटो कफरनूम नगरी म बिमार पड़्यो हो। अर जद बो मिनख आ सुणी क, ईसु यहूदिआऊँ गलिल म आयड़ो ह। जणा बो बिकन जार बिऊँ हात जोड़र बोल्यो, “चालर मेरा छोरानै निरोगो करद्‍यो क्युं क बो मरबाळो ह।” इ बात प ईसु बिऊँ बोल्यो, “थारै मऊँ कोईबी जद ताँई चमत्कार अर ताजूब का काम नइ देखले, बिस्वास कोनी करो।” बो अधिकारी ईसुऊँ बोल्यो, “म्हराज मेरा बेटा क मरबाऊँ पेली थे मेरै सागै चालो।” ईसु बिऊँ बोल्यो, “तू जा, तेरो छोरो कोनी मरै।” बो ईसु की बाता प बिस्वास कर्यो अर चलेगो। अर जद सरकारी अधिकारी गेला मई हो, जणा बिका दास बिनै आ खबर दिनी क, “तेरो बेटो निरोगो होगो।” जणा बो बाऊँ बुज्यो, “अ कतीक बजे की बाता ही।” बे बिऊँ बोल्या, “काल करीब एक बजैसीक बिकी बुखार उतरगी अर बो निरोगो होगो हो।” जणा बिकै याद आई क ओ तो बोई टेम ह, जि टेम ईसु बोल्यो हो क, “तू जा, तेरो छोरो कोनी मरै।” जणा बो अर बिको सगळो परवार बिस्वास कर्यो। यहूदिआऊँ गलिल आबा क पाछै ईसु को ओ दुसरो चमत्कार हो। क्युंक दिना पाछै यहूदि मिनखा को एक त्युंहार आयो जि बजेऊँ ईसु यरूसलेम गयो। यरूसलेम म लल्डी फाटक क कनै एक जोह्ड़ी ह। जिनै इबरानी भासा म बेतसदाई खेवीं हीं, इकै च्यारूमेर पाच टपर्या ही। अपाईज मिनखा की भीड़ की भीड़ जामै आँदा, लंगड़ा, भाळ भेयड़ा बठै बा टपर्या म पड़्या रेह्ता हा। (बे पाणी का हालबानै उडिकता हा, क्युं क बाको बिस्वास हो क टेम-टेम परमेसर आपका दुतनै पाणी हलाबा ताँई भेजतो हो। अर जद पाणी हालतो जणा जखो बी मिनख पेली बिकै मांयनै उतरतो बो निरोगो होज्यातो हो। चाए बिकै किसोई रोग क्युं नइ हो।) बठै एक मिनख हो जखो अड़तीस बरसाऊँ अपाईज हो। जद ईसु बिनै बठै पड़्या देख्यो अर जाणगो क ओ मिनख बोळा लामा टेमऊँ इ दसा म ह। जणा बो मिनखऊँ बुज्यो, “तू निरोगो होबो चावै ह के?” बो अपाईज बोल्यो, “स्याणो, मेरै कनै कोई कोनी जखो पाणी हालताई मनै इ जोह्ड़ी म उतार सकै। अर जद ताँई म खुद कोसिस करूं बिऊँ पेलीई कोई दुसरो इमै कूद पड़ै ह।” ईसु बोल्यो, “खड़्यो हो, तेरी गुद्ड़ी उठा, अर चाल।” बो मिनख जदकी जदई निरोगो होगो अर आपकी गुद्ड़ी उठार चालबा लाग्यो। ओ यहूदि मिनखा को अरामहाळो दिन हो, जणा यहूदि अधिकारी निरोगो होबाळा बि मिनखऊँ बोल्या, “तेरो अंय्यां गुद्ड़ी उठार चालबो आपणा नेम-कायदा क खिलाप ह, क्युं क आज अरामहाळो दिन ह।” पण बो बोल्यो, “जखो मिनख मनै निरोगो कर्यो ह बो मेरूँ बोल्यो ह, ‘तेरी गुद्ड़ी उठा अर चाल फिर।’” बे बिऊँ बुज्या, “तनै अंय्यां करबा ताँई खेबाळो मिनख कूण ह क, ‘तेरी गुद्ड़ी उठा अर चाल फिर?’” पण जखो मिनख निरोगो होयो हो बो ईसुनै कोनी जाणतो हो, बि झघा बोळी भीड़ ही अर ईसु बठैऊँ चलेगो हो। इकै पाछै बो ईसुनै मनदर म मिल्यो, जणा ईसु बिऊँ बोल्यो, “देख, इब तू निरोगो होगो ह, जणा पाप करबो छोडदे, कदै अंय्यां नइ होज्या क इऊँ बी भारी तुमत तेर प आ पड़ै।” जणा बो मिनख यहूदि अधिकारीयानै आर आ बताई क, “मनै निरोगो करबाळो ईसु ह।” जणा यहूदि अधिकारी ईसुनै सताबा लाग्या, क्युं क बो आ कामानै यहूदि मिनखा का अरामहाळा दिनई करतो हो। पण ईसु बानै जुबाब दिओ, “मेरो परम-पिता कदैई काम करनो बंद कोनी करै, इ ताँई म बी काम करर्यो हूँ।” आ बात यहूदि अधिकारीया क ओर घणी गडगी जि बजेऊँ बे बिनै मारबा ताँई ओर बेत्ती मोका ढुंढबा लाग्या। क्युं क बो बाकी नजर्या म यहूदि मिनखा का अरामहाळा दिन कोई नियम कोनी तोड़्यो, पण खुदनै परमेसर को बेटो बतार परमेसर की बराबरी कर्यो। जणा ईसु बाऊँ बोल्यो, “म थारूँ सची-सची बोलुँ हूँ, बेटो खुद क्युंई कोनी कर सकै, बो बोई करै ह जखो परम-पितानै करता देखै ह, अर जोक्यु परम-पिता करै ह बो बेटो बी करै ह। क्युं क परम-पिता बेटाऊँ प्यार करै ह अर बो बिनै सक्यु दिखावै जखो बो करै ह। अर इऊँ बी बडा-बडा काम बिनै देसी जिऊँ थे ताजूब करस्यो। जंय्यां परम-पिता मरेड़ानै जीवावै ह, बंय्यांई बेटो बी जिनै चावै बिनै जीवन देवै ह। परम-पिता खुद कोईकोई न्याय कोनी करै। न्याय करबा को सारो हक बो आपका बेटानै सूप दिओ ह। जिऊँ सगळा, बि बेटा को बंय्यांई मान-समान करै जंय्यां परम-पिता को मान-समान करीं हीं। जखो बी बेटा को मान-समान कोनी करै बो परम-पिता को मान-समान बी कोनी करै जखो बिनै भेज्यो ह। “म थारूँ सची बोलुँ हूँ, जखा मेरी सुणर मनै भेजबाळा प बिस्वास करीं हीं, अजर-अमर जीवन बाको ह अर बो मिनख सजाऊँ बचज्यासी। बो मोतऊँ पार होर जीवन म बड़गो ह। म थारूँ सची बोलुँ हूँ, बो टेम आर्यो ह, आर्यो के ह बो टेम आगो, जद मरेड़ा परमेसर का बेटा की उवाज सुणसी अर जखा बी बिकी सुणसी बे जिज्यासी। क्युं क जंय्यां परम-पिता जीवनदाता ह, ठिक बंय्यांई बो आपका बेटानै बी जीवन देबा को अधिकार दे राख्यो ह। अर बो बिनै न्याय करबा को बी अधिकार दे राख्यो ह। क्युं क बो मिनख को बेटो ह। “इपै ताजूब मना करो क्युं क टेम आर्यो ह, जद बे सगळा जखा कबरा म हीं बे बिका बचननै सुणसी, अर कबराऊँ बारनै आज्यासी। जखा चोखा करम कर्या हीं बे अजर-अमर जीवन ताँई ओज्यु जी उठसी, अर जखा बुरा करम कर्या हीं बे सजा भोगबा ताँई जी उठसी। म खुदऊँ क्युंई कोनी कर सकूँ। जंय्यां म सुणू हूँ, बंय्यांई न्याय करूं हूँ। मेरो न्याय सचो ह, क्युं क म मेरी कोनी पण मनै भेजबाळा की मन की चाऊँ हूँ। “ज म मेरा बारां मई गुवाई द्‍युँ; जणा बा सची कोनी मानी जावै। पण मेरै बारां म गुवाई देबाळो म कोनी पण ओरई मेरी गुवाई देवै ह, अर म जाणू हूँ क, मेरै बारां म बिकी गुवाई सची ह। “जद थे यहून्ना कनै थारै मिनखानै बुजबा ताँई भेज्या हा जणा बो सच की गुवाई दि। पण इको ओ मतबल कोनी क म मेर ताँई मिनखा की गुवाई चाऊँ हूँ। पण अ बाता म इ ताँई बोलुँ हूँ क थे बच ज्याओ। यहून्ना तो बळता अर भळकता दिआ की जंय्यां हो अर थे थोड़ी देर बिका च्यानणा म राजी होबो चावा हा। “पण मेरै कनै एक ओर गुवा ह, जिकी गुवाई यहून्ना की गुवाईऊँ बढर ह। क्युं क परम-पिता जखो काम मनै करबा ताँई सूप्यो ह, जखा काम म करूं हूँ। बेई मेरै बारां म गुवाई देवीं ही क, परम-पिता मनै भेज्यो ह। मनै भेजबाळो परम-पिता मेरै बारां म गुवाई देवै ह। थे नइ तो कदै बिकी सुण्या अर नइ बिनै देख्या, अर बिका बचन थारै मन म कोनी, क्युं क जिनै बो भेज्यो ह, थे बिको बिस्वास कोनी करो। थे पबितर सास्तर का आंक बाचो हो, क्युं क थे सोचो हो क आ आंका म थानै अजर-अमर जीवन मिलसी। पण अ आंक बी मेरै बारां मई मांडेड़ा हीं। जणा बी थे अजर-अमर जीवन पाबा ताँई मेरै कनै कोनी आबो चाओ। “म मिनखाऊँ जे-जैकार कोनी ल्युं, क्युं क म थानै जाणू हूँ क थारै म परमेसर को परेम कोनी। म मेरा परम-पिता का नामऊँ आयो हूँ पण थे मनै कोनी अपणायो। ज कोई खुदका नामऊँ आज्या जणा थे बिकै गेल होज्यास्यो। थे कंय्यां बिस्वास कर सको हो? थानै तो एक दुसराऊँ मान-समान भावै ह। पण खाली परमेसरऊँ मिलबाळा मान-समान ताँई थे लापरवा हो। “पण आ मना सोचो क परम-पिता क सामै म थार प दोस लगास्युं। पण थार प दोस लगाबाळो मूसा ह जिपै थे आस राखो हो। क्युं क ज थे मूसा को बिस्वास करता, जणा मेरो बी बिस्वास करता, क्युं क बो मेरै बारां मई मांड्यो ह। पण ज थे बिकी मांडेड़ी बाता प बिस्वास कोनी करो, जणा मेरी बाता प कंय्यां बिस्वास कर सको हो?” अ बाता होबा क क्युंक दिना पाछै, ईसु गलिल झिल जिनै तिबरिआस बी खेवै ह, क परली पार चलेगो। अर मिनखा की भीड़ बिकै गेल होरी ही क्युं क बे बा चमत्कारानै देख्या हा, जाकै जरिए बो रोगलानै निरोगो कर्यो हो। जणा ईसु डूँगरी प चढर आपका चेला क सागै बठै बेठगो। यहूदि मिनखा को फसै को त्युंहार आबाळो हो। अर जद ईसु नजर घूमार बि घणीसारी भीड़नै आपकै कनै आती देख्यो। जणा फलिपूसऊँ बोल्यो, “आपा आ ताँई रोटी कठैऊँ मोल ल्यावां?” आ बात ईसु बस फलिपूसनै बिचासबा ताँई बुज्यो हो। क्युं क असल म ईसु जाणतो हो क काँई करनो ह। फलिपूस बोल्यो, “आपा दो सो चाँदी का सीक्का की बी रोट्या ल्यावां जणा कम पड़सी। अर बे अत्ता मिनखा म थोड़ी-थोड़ी बी पाँती कोनी आवै।” ईसु को एकोर चेलो अंदरिआस जखो समोन को भाई हो ईसुऊँ बोल्यो, “अठै एक छोरो ह जिकै कनै जौवां की पाच रोट्या अर दो मछी ह। पण अत्ता मिनखा म अ कठै लागै?” ईसु बोल्यो, “मिनखानै बिठा द्‍यो।” बठै बोळी घास ही जणा बे बठै बेठगा। अर बामै करीब पाच झार तो मोट्यार-मोट्यार हा। जणा ईसु रोटी ली अर परमेसरनै धनेवाद देर जखा बेठ्या हा बा मिनखा म जत्ती बे चावा हा बाट दि। अर अंय्यांई बो मछी ली अर धनेवाद देर बाट दि। जद बे सगळा खार धापगा, जणा ईसु आपका चेलानै बोल्यो, “बचेड़ी रोटी भेळी करल्यो, जिऊँ क्युंई बेकार नइ जावै।” जणा बे भेळो कर्या अर पाच जौवां की रोटीऊँ बचेड़ी रोटी का बारा चोल्या भेळा होया। मिनख ईसु का इ चमत्कारनै देखर बोल्या, “सचमई ओ बोई परमेसर की खेबाळो ह, जखो जगत म आबाळो हो।” जणा ईसु आ भापर क बे बिनै ठडाईऊँ राजा बणाबा ताँई लेज्याबा आर्या हीं, जणा बो ऐकलोई डूँगरी प चलेगो। जद दिन आथगो जणा बिका चेला झिल क किनारै गया, अर अँधेरो होगो हो पण हाल ताँई ईसु बाकन कोनी आयो हो। जणा बे न्याव प चढर झिल क परली पार कफरनूम कानि रवानगी करी। जोरकी आँधी की बजेऊँ झिल म झाल उठबा लागी। अर जद बे दोएक कोस चलेगा हा जणा बे ईसुनै पाणी प चालता, अर न्याव क कनै आता देख्या, अर बे डरग्या। पण बो बाऊँ बोल्यो, “डरो मना, म हूँ।” जणा बे बिनै राजी मनऊँ जंय्यांई न्याव म चढाया, चढाताई न्याव किनारा पुगगी। आगलै दिन झिल क उरलै नाकै जखी भीड़ रेह्गी ही, बानै ओ बेरो पड़्यो क बठै एक न्याव ही। अर ओ बी बेरो पड़्यो क ईसु चेला क सागै बि न्याव प कोनी चढ्यो। पण चेला बिकै बिनाई चलेगा। जणा तिबरिआस नगरीऊँ क्युंक न्यावा बि झघा आई, जठै परबु क धनेवाद देबा क पाछै मिनख रोटी खाई ही। जद भीड़ आ देखी क नइ तो बठै ईसु ह अर नइ बिका चेला जणा बे सगळा बा न्यावा म चढर ईसुनै ढुंढता-ढुंढता कफरनूम आ पुग्या। अर जद बे बिनै झिल क परली पार देख्या, जणा बिऊँ बोल्या, “गरूजी, थे अठै कद आया?” ईसु बाऊँ बोल्यो, “म थानै सची खेऊँ हूँ, थे मेरा चमत्कारा की बजेऊँ मेरै गेल कोनी आया। पण म थानै धपार रोटी खुवाई, इ ताँई थे मेरै गेल आया हो। रोट्या ताँई मेनत मना करो क्युं क बे तो बुसज्यावै, पण अजर-अमर जीवन देबाळी रोटी ताँई मेनत करो। आ बा रोटी ह जखी मिनख को बेटो थानै देसी, क्युं क परम-पिता परमेसर बिनै ओ अधिकार दिओ ह।” जणा बे बिऊँ बोल्या, “परमेसर जखो चावै ह, बो करबा ताँई म्हें काँई करां?” ईसु जुबाब म बाऊँ बोल्यो, “परमेसर चावै ह क, जिनै बो भेज्यो ह, बिपै थे बिस्वास करो।” जणा बे बिऊँ बोल्या, “म्हानै चमत्कार दिखा जिनै देखर म्हें तेरै प बिस्वास करां। तू काँई कर सकै ह? म्हारा बडका उजाड़ म मन्नो खाया, जंय्यां क पबितर सास्तर म मंडेड़ो ह, ‘बो बाकै खाबा ताँई आसमानऊँ रोटी बरसाई।’ ” जणा ईसु बाऊँ बोल्यो, “म थारूँ सची बोलुँ हूँ, ईस्बर नगरीऊँ रोटी देबाळो मूसा कोनी हो। पण बो मेरो परम-पिता ह जखो ईस्बर नगरीऊँ थानै सची रोटी देवै ह। जखी रोटी परमेसर देवै ह, बा ईस्बर नगरीऊँ उतरी ह, अर बा जगत का मिनखानै जीवन देवै ह।” जणा बे बिऊँ बोल्या, “म्हराज थे आ रोटी म्हानै सदाई दिआ करो।” ईसु बाऊँ बोल्यो, “जीवन की रोटी म हूँ। जखो मेरै कनै आसी बो भूखो कोनी रेह्सी, अर बो जखो मेर प बिस्वास करसी कदैई तिसायो कोनी मरसी। पण जंय्यां क थानै ओबी खयो हो, थे मनै देखलिआ हो, पण हाल ताँई मेर प बिस्वास कोनी करो। जोक्यु परम-पिता मनै देवै ह, बो मेरै कनै आसी अर म बिऊँ मुंडो कोनी फेरूं। क्युं क म मेरी इंछ्या नइ पण मनै भेजबाळा की इंछ्यानै पूरी करबा ताँई ईस्बर नगरीऊँ धरती प उतर्यो हूँ। अर जखो मनै भेज्यो ह, बिकी इंछ्या आ ह क जोक्यु बो मनै दिओ ह बिमैऊँ क्युंई नइ खोऊँ। पण आखरी दिन म बानै जीवाऊँ। क्युं क मेरा परम-पिता की इंछ्या आ ह क जखो बी बेटानै देखै ह। अर बिपै बिस्वास ल्यावै ह बिनै अजर-अमर जीवन मिलै, अर आखरी दिन म खुद बिनै जीवा देस्युँ।” जणा यहूदि बिपै बल्डाबा लाग्या, क्युं क बो बोल्यो हो क, “जखी रोटी ईस्बर नगरीऊँ उतरी ह बा म हूँ।” अर बोलबा लाग्या, “ओ युसूफ को छोरो ईसु कोनी के, जिका माँ-बापनै आपा जाणा हां? जणा इब ओ कंय्यां खे सकै ह क, ‘म ईस्बर नगरीऊँ उतर्यो हूँ?’” ईसु जुबाब म बोल्यो, “आपसरी म मना बल्डाओ। मेरै कनै कोई कोनी आ सकै। जद ताँई क मेरो परम-पिता जखो मनै भेज्यो ह बो बिनै मेरै कनै नइ ल्यावै, अर आखरी दिन म बिनै जिंदो कर देस्युँ। परमेसर की खेबाळा पबितर सास्तर म आ मांडी ह, ‘सगळानै परमेसरई सीखासी।’ अर मेरै कनै बोई आवै ह जखो परम-पिताऊँ सुणै अर सीखै ह। पण जखो परमेसर कानिऊँ आवै ह बोई परम-पितानै देख्यो ह बिकै अलावा कोई कोनी देख्यो। “म थारूँ सची बोलुँ हूँ, जखो मेर प बिस्वास करै ह, अजर-अमर जीवन बि ताँई ह। जीवन की रोटी म हूँ। थारा बडका उजाड़ म मन्नो खाया, बिकै पाछै बी बे मरगा। पण आ बा रोटी ह जखी परमेसर ईस्बर नगरीऊँ उतारी, जखो बी इ रोटी मऊँ खासी बो कोनी मरसी। बा जीवती रोटी म हूँ जखी ईस्बर नगरीऊँ उतरी। जखो बी इ रोटीनै खासी बो सदाई जिंदो रेह्सी। अर इ जगत का मिनखानै जीबा ताँई जखी रोटी म देस्युँ, बो मेरो मास ह।” इ बात प यहूदि आपसरी म आ खेर जिरै करबा लाग्या, “ओ मिनख आपानै आपको मास खाबा ताँई कंय्यां दे सकै ह?” ईसु बाऊँ बोल्यो, “म थारूँ सची बोलुँ हूँ, जद ताँई थे मिनख का बेटा को मास कोनी खाल्यो अर बिको लोय कोनी पील्यो, थारै म जीवन कोनी आ सकै। जखो बी मेरो मास खावै अर मेरो लोय पिवै अजर-अमर जीवन बिको ह। अर आखरी दिन, म बिनै जीवास्युं। क्युं क मेरो मास सची रोटी अर मेरो लोय सची पीबा की चिज ह। जखो मिनख मेरो मास खावै अर मेरो लोय पिवै बो मेरै म अर म बिमै बण्यो रेह्ऊँ हूँ। जंय्यां जीवतो परम-पिता मनै भेज्यो ह, अर मेरा परम-पिता की बजेऊँ म जिंदो हूँ। ठिक बंय्यांई जखो मेरी काया खासी, बो बी मेरी बजेऊँ जिंदो रेह्सी। जखी रोटी ईस्बर नगरीऊँ उतरी ह, बा आई ह। आ बि मन्ना की जंय्यां कोनी, जिनै थारा बडका खाया अर मरगा, पण जखो बी आ रोटी खासी बो सदाई जिंदो रेह्सी।” अ बाता बो कफरनूम म अरदास करबाळी झघा म सीखाई। बिका घणकराक चेला आ सुणर बोल्या, “आ कल्डी सीख ह। इपै कूण चाल सकै ह?” ईसु आपका मन म आ भापर क मेरा चेला आपसरी म इ बात प बल्डावै ह, जणा बाऊँ बुज्यो, “आ बात थानै बुरी लागी के? जणा थे काँई करस्यो जद थे मिनख का बेटानै आसमान म उपर जाता देखस्यो, जठै बो पेली हो? परमेसर की आत्मा तो जीवन देवै ह, पण मिनख की ताकत ख्याई काम की कोनी। जखी बात म थारूँ खई ह, बे परमेसर की आत्माऊँ ह अर जीवन देवै ह। पण थारै मऊँ क्युंक अंय्यां का हीं जखा बिस्वास कोनी करीं।” क्युं क ईसु सरूआतऊँई बानै जाणतो हो, जखा बिस्वास कोनी करीं अर बो कूण ह जखो बिनै धोकाऊँ पकड़ासी। अर बो बोल्यो, “जणाई तो म थारूँ बोल्यो हो क, जद ताँई खुद परम-पिता कोईनै मेरै कनै आबा कोनी देवै, जद ताँई कोई मेरै कनै कोनी आ सकै।” इ बात की बजेऊँ बिका चेला मऊँ बोळाजणा बिकै पिछै चालबो छोड दिआ। जणा ईसु बा बाराऊँ बोल्यो, “थे बी जाबो चाओ हो के?” समोन पतरस बिनै जुबाब दिओ, “परबु, म्हें किकै कनै जावां? अजर-अमर जीवन देबाळी बाता तो तेरैई कनै ह। अर म्हें बिस्वास कर्यो अर जाणगा हां क थेई परमेसर का पबितर मिनख हो।” ईसु बाऊँ बोल्यो, “म थानै बारवांनै कोनी टाळ्यो के? इकै बावजुद थारै मांयनै एक जणो सेतान ह।” आ बात बो समोन इस्करोती का बेटा यहूदा क बारां म बोली ही, क्युं क बा बारा मऊँ बोई बिनै धोकाऊँ पकड़ाबाळो हो। आ बाता क पाछै ईसु गलिल म सफर करतो रिह्यो। बो यहूदिआ इलाका म कोनी जाबो चातो हो। क्युं क यहूदि अधिकारी बिनै मारबा की तक म हा। यहूदि मिनखा को मंडपा को त्युंहार आबाळो हो। जणा बिका भाईड़ा बिऊँ बोल्या, “अठैऊँ यहूदिआ चल्योजा। जिऊँ तेरा चेला बी बा कामानै देख सकै, जिनै तू करै ह। क्युं क अंय्यां को कोई कोनी जखो आपको नाम करबो चावै, अर ओलैछानै क्युं करतो हो। अर ज तू आ कामानै करै ह, जणा इ दुनिया का मिनखा प खुदनै परगट कर।” क्युं क बिकाळा भाई बी बिपै बिस्वास कोनी करता हा। जणा ईसु बाऊँ बोल्यो, “हाल त्युंहार म जाबा ताँई मेरो टेम कोनी आयो। पण थारै ताँई सगळो टेम सिद ह। जगत थारूँ नफरत कोनी करै, पण मेरूँ करै ह, क्युं क म खेऊँ हूँ क, ‘तेरा करम बुरा हीं।’ त्युंहार मनाबा थेई जाओ। म हाल कोनी आऊँ, क्युं क हाल मेर ताँई सई टेम कोनी आयो।” अ बाता बोलबा क पाछै बो गलिल म रेहग्यो। पण बिका भायां क त्युंहार म जाबा क पाछै, छानैसीक बो बी त्युंहार म गयो। अर यहूदि अधिकारी बिनै त्युंहार म ढुंढै हा। अर बोलर्या हा क, “बो कठै ह?” अर भीड़ बी बिकै बारां म कानाफुसी करबा लागरी ही। क्युंक बोलर्या हा क, “बो चोखो मिनख ह।” क्युंक बोलर्या हा, “नइ, बो तो मिनखानै भंगरावै ह।” पण कोईबी बिकै बारां म चोड़ै-धाड़ै कोनी बतळावै हा, क्युं क बे यहूदि अधिकारीयाऊँ डरता हा। पण जद त्युंहार का आदाक दिन बितगा। जणा बो मनदर म गयो अर सीख देबा लाग्यो। जणा यहूदि अधिकारी ताजूब कर खेबा लाग्या, “ओ मिनख बिना सीख्याई ज्ञानी कंय्यां बणगो?” जणा ईसु जुबाब देतोई बोल्यो, “आ सीख मेरी कोनी पण बिकी ह, जखो मनै भेज्यो ह। ज कोई मिनख बिकी इंछ्या पूरी करबा ताँई राजी ह। जणा बो जाण ज्यासी क आ सीख मेरै कानिऊँ ह क परमेसर कानिऊँ। जखो बी खुदकी मरजीऊँ बोलै ह, बो खुदकी बडाई चावै ह। पण जखो आपका भेजबाळा को मान चावै ह बो सचो ह। अर बिमै बुराई कोनी। मूसा थानै नेम-कायदा कोनी दिओ हो के? इकै बावजुद बी थारै मऊँ कोई बी नेम-कायदानै कोनी मानै। थे क्याले मनै मारबा क चकरां म हो?” भीड़ मऊँ उवाज आई, “तेरै म तो भूत-पलीत रळर्यो ह! तनै मारबा की फिराक म कूण ह?” ईसु बानै बोल्यो, “म एक चमत्कार कर्यो, अर थे सगळा बिपै ताजूब कर्यो। अरामहाळा दिन मूसा का हुकम गेल, आदमी की सुन्नत कर थे बी तो काम करो हो। पण आ रीत तो मूसा का नियमऊँ पेली आपणा बडका का टेमऊँ चालती आरी ह। ज अरामहाळा दिन एक आदमी की सुन्नत करबा की बजेऊँ नेम-कायदा कोनी टूटै, जणा अराम हाळै दिन एक मिनखनै सागेड़ो निरोगो करबाऊँ, थे मेरै प झाळ्या क्याले काडर्या हो? मुंडा देखर टीका मना काडो, पण धरम गेल न्याय करो।” जणा यरूसलेम का क्युंक मिनख बोलबा लाग्या, “के ओ बोई मिनख ह जिनै बे मारबा की तक म हीं? पण देखो बो तो चोड़ै-धाड़ै बतळार्यो ह अर बे इनै नामई कोनी लेर्या। कदै यहूदि नेतानै बी तो कोनी बेरो पड़गो, क ओई मसी ह? आपा जाणा हा क ओ मिनख कठै को ह। पण जद मसी आसी, जणा कोई कोनी जाणसी क बो कठैऊँ आयो ह।” जणा ईसु जोरकी उवाज म मनदर म सीख देता टेम बोल्यो, “के थे सचमई जाणो हो क म कूण हूँ अर कठैको हूँ? म मेरी मरजीऊँ कोनी आयो, पण जखो मनै भेज्यो ह बो सचो ह, जिनै थे कोनी जाणो। म बिनै जाणू हूँ। क्युं क म बिकनऊँ आयो हूँ, अर मनै भेजबाळो बी बोई ह।” जणा बे बिनै पकड़बा की कोसिस करबा लाग्या, पण कोई बिकै हात कोनी घाल सक्यो, क्युं क हाल बा घड़ी कोनी आई। भीड़ मऊँ बोळाजणा बिपै बिस्वास कर्या अर बोल्या, “ओ मसी ह , जणाई तो बडा-बडा चमत्कार दिखाया हीं। कोई दुसरो अंय्यां का चमत्कार दिखा सकै ह के?” फरिसी जद ईसु क बारां म मिनखानै अ सगळी बाता ओलै-छानै करता सुण्या। जणा बे अर परधान याजक ईसुनै पकड़बा ताँई क्युंक मनदर का रूखाळानै भेज्या। ईसु बोल्यो, “म थोड़ी-घणी टेम ताँई ओर थारै सागै हूँ। इकै पाछै म मेरै भेजबाळा क कनै चल्यो ज्यास्युं। थे मनै ढुंढस्यो पण म थानै कोनी लाधूं। क्युं क जठै म रेहस्युं, बठै थे कोनी जा सको।” जणा यहूदि अधिकारी आपसरी म बोलबा लाग्या, “ओ कठै जाबा की करै ह जिऊँ आपा इनै ढुंढ कोनी सकां? के ओ यूनानी नगर्या म जासी जठै आपणा मिनख रेह्‍वै ह, अर यूनानीयानै सीखासी? आ काँई बात ह जखी बो बोली ह, ‘थे मनै ढुंढस्यो पण म लाधूं कोनी,’ अर ‘जठै म हूँ बठै थे कोनी जा सको?’” त्युंहार का आखरी दिन, जखो त्युंहार को बडो दिन हो। बि दिन ईसु खड़्यो होर जोरकी उवाज म बोल्यो, “जखो तिसायो ह बो मेरै कनै आवै अर पिवै। जखो बी मेर प बिस्वास करै ह, बिमैऊँ जीवन देबाळो पाणी को झरनो उजळबा लागज्यासी, जंय्यां क सास्तर म मंडेड़ो ह।” ईसु आ बात पबितर आत्मा क बारां म कही, जखी बिपै बिस्वास करबाळानै मिलबाळी ही। इ टेम ताँई पबितर आत्मा कोईनैई कोनी मिली ही, क्युं क ईसु हाल ताँई आपकी मेमा म कोनी उठायो गयो हो। ईसुनै सुणर भीड़ मऊँ क्युंक मिनख बोल्या, “ओ सचमई बोई परमेसर की खेबाळो ह।” क्युंक बोलर्या हा, “ओ मसी ह!” पण क्युंक बोलर्या हा, “मसी गलिलऊँ थोड़ी आसी! सास्तर म मंडेड़ो ह, क मसी राजा दाऊद का कूणबाऊँ होसी। अर बेतलम म जलमसी जठै दाऊद रिह्या करतो हो।” जणा ईसु की बजेऊँ मिनखा म फूट पड़गी। क्युंक बिनै पकड़बो चावै हा, पण कोईबी बिकै हात कोनी घाल सक्यो। अर जद मनदर का पेरेदार पाछा आगा जणा परधान याजक अर फरिसी बाऊँ बुज्या, “खाली हातई कंय्यां आगा?” मनदर का पेरेदार बोल्या, “बि जंय्यां की बाता आज ताँई कोई कोनी करी!” फरिसी बानै बोल्या, “थे बी बावळा बणगा के? के थे एक बी फरिसी नहिस यहूदि नेतानै जाणो हो जखो बिपै बिस्वास कर्यो होवै? आ भीड़ मूसा का नेम-कायदानै कोनी जाणै। जणाई तो बे परमेसर का सराप तळै आगा हीं!” बठै फरिसीया मऊँ निकेदेमुस नाम को एक मिनख हो। जखो पेली ईसु क कनै गयो हो, बो ओराऊँ बोल्यो, “के ओ आपणा नेम-कायदा गेल सई ह क, आपा कोईकी सुणाई कर्या पेली, अर आ जाण्या पेली क बो काँई कर्यो ह, बिपै दोस लगा सकां?” जणा बे बिनै जुबाब म बोल्या, “के तू बी तो गलिल को कोनी ह? सास्तरनै बाचर बेरो पाड़, परमेसर की खेबाळो गलिल म तो पैदा होबाऊँ रिह्यो।” जणा बे सगळा आप-आपकै घरा चलेगा । पण ईसु जेतून डूँगरी प गयो। आगलै दिन भागपाट्याई बो ओज्यु मनदर गयो। सगळा बिनै च्यारूमेरूँ घेर लिआ, अर बो तळै बेठर बानै सीखाबा लाग्यो। जणा बठै फरिसी अर सास्तरानै सीखाबाळा एक लूगाईनै पकड़र ल्याया अर बिनै सगळा क बिचमै खड़्यो कर दिओ। आ लूगाई कुकरम करती पकड़ी गई ही। बे ईसुऊँ बोल्या, “गरूजी, आ लूगाई कुकरम करती पकड़ी गई ह। मूसा का नेम-कायदा गेल अंय्यांलकी लूगाईनै भाठा मार-मार जानऊँ मारबा को हुकम ह। इ बारां म थे काँई बोलो हो?” बे ईसुनै फसाबा ताँई अंय्यां बुजर्या हा जिऊँ बे बिपै दोस लगा सकै। पण ईसु उकड़ू बेठर जमीन प आँगळीऊँ क्यु मांड्यो। पण जद बे रटोई लगा लिआ, जणा बो सिदो खड़्यो होर बाऊँ बोल्यो, “थारै मऊँ जखो दुद को धुलेड़ो ह बोई इकै पेलो भाठो मारै।” जणा पाछै बो ओज्यु उकड़ू बेठर जमीन प मांड्यो। आ सुणर बडोड़ाऊँ लेर छोटा ताँई एक-एक कर सरक लिआ अर बूडीया सऊँ पेली। आखीर म बि लूगाई अर ईसुनै छोडर बठै कोई कोनी बच्यो। बो सिदो खड़्यो होर बिऊँ बुज्यो, “बे कठै हीं? के तनै सजा देबाळो कोई कोनी बच्यो?” बा बोली, “कोई कोनी म्हराज।” जणा ईसु बोल्यो, “म बी तनै सजा कोनी द्‍युँ। जा, आगैऊँ कदैई पाप मना करजे।” ईसु ओज्यु बोल्यो, “म इ जगत का मिनखा को च्यानणो हूँ। जखो बी मेरै गेल चालसी बो सचो जीवन जिसी, अर बो कदैई पाप का गेला प कोनी जावै।” फरिसी बिऊँ बोल्या, “तू तेरी गुवाई खुदई देवै ह, आ सची कोनी मानी जावै।” ईसु बोल्यो, “नइ, जदकी म मेरी गुवाई खुदई देऊँ हूँ पण मेरी गुवाई सची ह। क्युं क म जाणू हूँ, क म कठैऊँ आयो अर कठै जास्युं। पण थे इनै कोनी जाणो क म कठैऊँ आयो अर कठै जार्यो हूँ। थे मिनखा का बणाएड़ा तरिकाऊँ न्याय करो हो। पण म कोईकोई न्याय कोनी करूं। अर ज म न्याय बी करूं, जणा बो सचो ह। क्युं क इनै करबाळो म एकलो कोनी हूँ, पण मेरै सागै मनै भेजबाळो पिता-परमेसर ह। अर जंय्यां क थारा नेम-कायदा म बी मंडर्यो ह, ज कोई दो गुवा एकसी गुवाई देवै जणा बाकी बात सची ह। मेरा पक्ष म, म खुदई गुवाई देऊँ हूँ। अर इकै सागैई मेरो परम-पिता जखो मनै भेज्यो ह, बो मेरै पक्ष म गुवाई देवै ह।” बे बिऊँ बोल्या, “तेरो परम-पिता कठै ह?” ईसु बाऊँ बोल्यो, “नइ तो थे मनै जाणो अर नइ मेरा परम-पितानै। अर ज थे मनै जाणता जणा मेरा परम-पितानै बी जाणता।” आ सीख ईसु मनदर का बि कोठा म दि, जठै दानहाळी पेटी पड़ी ही। अर कोईबी बिपै हात कोनी घाल सक्यो। क्युं क हाल बा घड़ी कोनी आई ही। ईसु ओज्यु बाऊँ बोल्यो, “म जास्युं अर थे मनै ढुंढस्यो पण थे थारा पाप मई मरज्यास्यो। जठै म जार्यो हूँ बठै थे कोनी आ सको।” इपै यहूदि अधिकारी बोल्या, “कदै ओ खुदनै मारबा की बात तो कोनी करर्यो, क्युं क ओ बोलै ह क जठै बो जार्यो ह बठै म्हें कोनी जा सकां?” ईसु बोल्यो, “म इ दुनिया को कोनी जिका थे हो। थे धरती का हो पण म ईस्बर नगरीऊँ आयो हूँ। ज थे इ बात प बिस्वास कोनी करो क म बोई हूँ। जणा थे थारा पाप मई मरज्यास्यो। अर इ बजेऊँई म थारूँ आ बात कही क थे थारा पाप मई मरज्यास्यो।” जणा बे बिऊँ बुज्या, “तू कूण ह?” ईसु बाऊँ बोल्यो, “म सरूआतऊँ थानै बतातो आर्यो हूँ क म कूण हूँ। मेरै कनै थारा बारां म बोलबा ताँई बोळी बाता ह। अर बोळी बाता ह जा ताँई थानै सजा देणी ह। मनै भेजबाळो सचो ह अर म इ जगत का मिनखानै बाई खेवूँ हूँ जखी म बिऊँ सुण्यो।” बे आ कोनी समज सक्या क, ईसु परम-पिता का बारां म बाता करर्यो हो। जणा बो बाऊँ बोल्यो, “थे जद मिनख का बेटानै उचो उठास्यो, जणा थारी समज म आज्यासी क म कूण हूँ। अर बि टेम थे आबी जाण जास्यो क म मेरी मरजीऊँ क्युंई कोनी करूं। पण म तो बाई बोलुँ हूँ जखी परम-पिता मनै बोलबा ताँई बोलै ह। अर जखो मनै भेज्यो ह बो मेरै सागै ह। बो मनै ऐकलो कोनी छोडै, क्युं क म सदाई बोई करूं हूँ, जखो बिनै राजी करै ह।” ईसु जद अ बाता बोल्यो जणा बिनै सुणबाळा बोळाजणा बिपै बिस्वास कर्यो। जणा ईसु बाऊँ बोल्यो जखा बिपै बिस्वास कर्या हा, “ज थे मेरी सीख प चालो हो जणा सचमई थे मेरा चेला हो। थे सचनै जाणस्यो, अर सच थानै अजाद करसी।” बे बोल्या, “म्हें तो अब्राहम का कूणबाऊँ हां अर म्हें कदैई कोईकाई गुलाम कोनी बण्या। जणा पाछै थे आ कय्यालै बोलो हो क, ‘थे अजाद होज्यास्यो?’” ईसु बाऊँ बोल्यो, “म थानै बोलुँ हूँ, जखो बी पाप करै ह, बो पाप को गुलाम ह। अर एक गुलामनै बिका मालिक का घर म क्युबी अधिकार कोनी होवै पण मालिक का बेटानै सदाई सक्या प अधिकार होवै। जणा ज बेटो थानै अजाद करै, थे सचमई अजाद हो जास्यो। म जाणू हूँ क थे अब्राहम क कूणबा का हो, पण इब थे मनै मारबा की तक म हो, क्युं क थे मेरी सीख प कोनी चालो। म बोई बोलुँ हूँ, जखी परम-पिता मनै दिखाई, पण थे बो करो हो जखो थे थारै बापऊँ सुण्या हो।” बे बिनै बोल्या, “म्हें अब्राहम की ओलाद हां।” जणा ईसु बोल्यो, “ज थे सचमई अब्राहम की ओलाद होता, जणा थे अब्राहम जंय्यांकाई करम करता। अर इब थे मनै मारबा की तक म हो क्युं क म थानै परमेसरऊँ सुणर सच बतायो। अब्राहम तो अंय्यां क्युंई कोनी कर्यो हो। थे बोई करो हो जखो थारो बाप कर्यो।” बे बोल्या, “म्हें कुकरम की ओलाद कोनी, पण परमेसरई म्हारो सचो परम-पिता ह।” ईसु बाऊँ बोल्यो, “ज सचमई परमेसर थारो परम-पिता होतो, जणा थे मेरूँ प्यार-परेम करता क्युं क म परमेसर क कनैऊँ आयो हूँ। म अठै मेरी मरजीऊँ कोनी आयो, पण बो मनै भेज्यो ह। म जोक्यु बी बोलुँ हूँ, थे मेरी सीखनै कोनी समजो, क्युं क थे मेरी बात कोनी सुणो। थारो बाप सेतान ह, अर थे बिकी इंछ्या प चालबो चाओ हो। बो तो सरूसई हत्यारो ह अर कदैई सच कानि कोनी रिह्यो क्युं क बिमै सच कोनी। बिको झूठ बोलबाळो सुभाव ह क्युं क बो झूठो अर झूठ को बाप ह, पण म साची बोलुँ हूँ, इ ताँई थे मेरो बिस्वास कोनी करो। थारै मऊँ कूण मेर प पापी होबा को दोस लगावै ह? ज म साची बोलुँ हूँ, जणा पाछै थे मेरो बिस्वास क्युं कोनी करो? जखो परमेसर को ह, बो परमेसर की बाता सुणै ह। अर थे इ ताँई कोनी सुणो, क्युं क थे परमेसर का कोनी।” बे ईसुऊँ बुज्या, “के म्हें सच कोनी बोलर्या क, तू एक सामरी ह अर तेरै मांयनै ओपरी बलाय ह?” ईसु बाऊँ बोल्यो, “मेर म तो कोई ओपरी बलाय कोनी। म मेरा परम-पिता को मान करूं हूँ। अर थे मनै बद्दोई कोनी। म मेरो मान कोनी चाऊँ, पण एक ह जखो मेर ताँई मान चावै ह अर बोई न्याय करै ह। म थारूँ सची बोलुँ हूँ, जखो बी मेरी सीखनै मानसी बो कदैई कोनी मरसी।” बे बिऊँ बोल्या, “इब तो पुक्‍ता होगो तेरै म ओपरी बलाय ह। अब्राहम अर परमेसर की खेबाळा मरग्या अर तू बोलै ह क, ‘जखो बी मेरी सीखनै मानसी बो कदैई कोनी मरै।’ तू म्हारा अब्राहमऊँ बडो कोनी। बो मरगो अर परमेसर की खेबाळा बी मरगा। तू खुदनै काँई समजै ह?” ईसु बोल्यो, “ज म खुद मेरो मान करूं, जणा बो कोई मान म मान ह के? पण मनै मान देबाळो मेरो परम-पिता ह, जिनै थे थारो परमेसर बतायो हो। थे बिनै कोनी जाण्या, पण म बिनै जाणू हूँ। अर ज म बोलतो क म बिनै कोनी जाणू, जणा म बी थारी जंय्यांई झूठो होतो। पण म बिनै जाणू हूँ, अर बिका खयानै मानू हूँ। थारो बाप अब्राहम, मेरा आबा का दिननै देखबा ताँई राजी होयो। बो देख्यो, अर राजी होयो।” बे बिऊँ बोल्या, “तू हाल पचास को बी कोनी जणा तू अब्राहमनै कंय्यां देख लिओ?” ईसु बोल्यो, “म थारूँ सची खेऊँ हूँ, अब्राहम क जलम्बाऊँ पेली, म हूँ।” जणा बे भाठा उठार बिनै मारबा ताँई त्यार होया, पण ईसु छानैसीक मनदरऊँ चलेगो। जद ईसु जार्यो हो, जणा बो एक मिनखनै देख्यो जखो जलमऊँ आँदो हो। बिका चेला बिऊँ बुज्या, “गरूजी, किका पाप की बजेऊँ ओ जलमऊँ आँदो ह, इका खुदका पाप, नहिस इका माँ-बाप का?” ईसु बोल्यो, “ओ नइ तो आपका माँ-बाप क अर नइ खुदका पाप की बजेऊँ आँदो ह। पण ओ इ ताँई आँदो ह, क इपै परमेसर को काम परगट हो सकै अर मिनख बिनै देखै। आ जरूरी ह क जखो मनै भेज्यो, बिका काम आपा दिन-दिनऊँ करल्या क्युं क रात होबाळी ह जद कोई काम कोनी करसी। जद ताँई म इ जगत म हूँ, म इ जगत का मिनखा को च्यानणो हूँ।” आ बोलर बो जमीन प थूक्यो अर बि थूकऊँ माटीनै सणी अर बा माटी बि आँदा मिनख की आँख्या प लगाई। अर बिऊँ बोल्यो, “जार सिलोह कूंड म धोले।” (सिलोह को मतबल “भेजेड़ो”) जणा बो मिनख जार आपकी आँख्या धोई अर देखबा लाग्यो अर पाछो आगो। जणा बिका आसपड़ोस का अर बे जखा बिनै पेली भीक माँगता देख्या हा बोल्या, “ओ बोई कोनी के जखो बेठ्यो-बेठ्यो भीक माँग्या करतो हो?” क्युंक बोलर्या हा, “ओ बोई ह।” पण दुसरा बोलर्या हा, “नइ ओ बिकी जंय्यां को लागै ह, पण बो कोनी।” जणा बो मिनख खुद बोल्यो, “म बोई हूँ।” बे बिऊँ बुज्या, “तनै इब कंय्यां दिखबा लाग्यो?” बो मिनख बोल्यो, “एक मिनख जिनै ईसु बोलीं हीं। बो माटी लेर बिनै सणी, अर मेरी आँख्या प मसळ दि अर मेरूँ बोल्यो, ‘जार सिलोह कूंड म धोले।’ जणा म जार धोयो अर मनै सुजबा लाग्यो।” बे बिऊँ बुज्या, “बो कठै ह?” बो बोल्यो, “मनै कोनी बेरो।” जणा मिनख बिनै, जखो पेला आँदो हो फरिसीया क कनै लेगा। जि दिन ईसु माटी सणर बिनै निरोगो कर्यो हो, बो अरामहाळो दिन हो। जणा फरिसी बी बि मिनखनै बुज्या, “तनै दिखबा कंय्यां लाग्यो?” बो बाऊँ बोल्यो, “बो क्युंक आली माटी मेरी आँख्या प मसळी, म धोई अर इब म देख सकूँ हूँ।” क्युंक फरिसी बोल्या, “जखो मिनख ओ कर्यो ह। बो परमेसर कानिऊँ कोनी हो सकै क्युं क बो अरामहाळा दिन को मान कोनी करै।” पण क्युंक दुसरा बोलबा लाग्या क, “एक पापी मिनख ओ चमत्कार कंय्यां दिखा सकै ह?” इ बात प बामै फूट पड़गी। जणा फरिसी बि मिनखनै एक बार ओज्यु बुज्या, “तू बिकै बारां म काँई बोलै ह, जखो तनै आँख्या दि?” बो बोल्यो, “बो परमेसर की खेबाळो ह।” इ बात की बजेऊँ बे यहूदि अधिकारी बि मिनख की बात प क, बो आँदो हो अर इब देखबा लाग्यो जद ताँई बिस्वास कोनी कर्या जद ताँई बिका माँ-बापनै बुलार, आ कोनी बुज्या क, “के ओ थारो छोरो ह? के ओ आँदो जलम्यो हो? ज हो, जणा थे बताओ इब कंय्यां देख सकै ह।” बिका माँ-बाप बोल्या, “ओ म्हारोई छोरो ह। अर ओ जलमऊँ आँदो हो। पण म्हें कोनी जाणा इब ओ कंय्यां देखबा लाग्यो अर नइ म्हें आ जाणा क इनै कूण आँख्या दि। इब ओ टाबर तो आथ कोनी। ओ खुदई जुबाब दे सकै ह।” बिका घरका आ बात इ ताँई बोल्या, क्युं क बे यहूदि अधिकारीयाऊँ डरता हा। क्युं क बे सगळा एक मत होर्या हा, क जखो बी ईसुनै मसी कर मानसी बिनै अरदास करबाळी झघा म बड़बा कोनी दिओ जासी। जणाई तो बिका घरका खया हा क, “ओ टाबर तो आथ कोनी। ओ खुदई बता देसी!” दुसरका बे, बि मिनखनै बुलाया जखो जलमऊँ आँदो हो अर बिऊँ बोल्या, “तनै आँख्या मिली इ ताँई परमेसर की जे-जैकार कर! बि मिनख को नइ क्युं क म्हें जाणा हा बो मिनख पापी ह।” बो बोल्यो, “म कोनी जाणू क बो पापी ह क कोनी पण म एक बात जाणू हूँ क, म पेली आँदो हो अर इब देख सकूँ हूँ।” जणा बे बिऊँ बुज्या, “बो तेरै सागै काँई कर्यो? कंय्यांसिक बो तनै आँख्या दि?” बो बोल्यो, “म तो थानै सगळी बाता पेलीई खेदी, पण थे कोनी सुण्या। जणा पाछै इब ओज्यु थे कय्यालै सुण्बो चाओ हो? के थे बी बिका चेला बणबो चाओ हो?” बे बिकी बेजती करी अर बोल्या, “तूई होगो बिको चेलो, म्हें तो मूसा का चेला हां। म्हें जाणा हां क परमेसर मूसाऊँ बतळायो हो, पण इकै बारां म कोनी जाणा क ओ कठैऊँ आयो ह।” बो मिनख बोल्यो, “आ तो ताजूब की बात ह! थे बि मिनख क बारां म जाणोई कोनी क, बो कठैऊँ आयो ह। पण देखल्यो, बो मेरी आँख्या खोल दि। म्हें जाणा हा क परमेसर पाप्या की कोनी सुणै, पण भगता की जखा बोई करै जखो बो बाऊँ चावै ह, अंय्यांलका की परमेसर सुणै ह। इ सरस्टि की सरूआतऊँ कदैई सुणबा म कोनी आयो क, कोई जलम का आँदानै आँख्या दि। ज ओ मिनख परमेसर कानिऊँ नइ होतो जणा क्युंई कोनी कर सकै हो।” बे बिऊँ बोल्या, “तू तो पापऊँ जलम्यो ह, तू म्हानै काँई सीखावै ह ?” अर बे बिनै अरदास करबाळी झघाऊँ बारनै काड दिआ। जद ईसु, जोक्यु होयो बिकै बारां म सुण्यो, जणा बो बिऊँ मिलर बोल्यो, “के तू मिनख का बेटा प बिस्वास करै ह?” बो मिनख बोल्यो, “म्हराज, थे मनै बताओ बो कूण ह, जिऊँ म बिपै बिस्वास करूं।” ईसु बिऊँ बोल्यो, “तू बिनै देख लिओ, अर जखो तेरै सागै बतळार्यो ह।” बो बोल्यो, “परबु, म बिस्वास करूं हूँ!” अर बिकै पगा म धोक खाई। ईसु बोल्यो, “म इ जगत म न्याय करबा आयो हूँ, जिऊँ आँदा देख सकै अर आँख्या हाळा आँदा होज्या।” क्युंक फरिसी जखा बिकन खड़्या हा, बे अ बाता सुणर बोल्या, “के तू म्हानै आँदा बतार्यो ह?” ईसु बाऊँ बोल्यो, “ज थे आँदा होता जणा पापी कोनी होता। पण बोलो हो क, ‘म्हानै सुजै ह’ जणाई तो थारो पाप बण्यो रेह्‍वै ह।” ईसु ओज्यु बोल्यो, “म थारूँ सची बोलुँ हूँ, जखो मिनख रेवाड़ा म दरूजा की बजाय डोळी डाकर बड़ै बो मिनख चोर अर डाकू ह। अर जखो मिनख दरूजा होर रेवाड़ा म बड़ै, बो लल्ड्या को गुवाळ्यो ह। दरूजा प पेरोदेबाळो बि ताँई दरवाजो खोलै ह, बो हरेक लल्डीनै नाम लेर बुलावै अर लल्ड्या बिकी बोली पिछाणै ह। बो बानै बारनै लेज्यावै ह। जद बो बानै बारनै लेर आवै, जणा बो बाकै आगै-आगै चालै ह, अर लल्डी बिकै गेल-गेल, क्युं क बे बिकी बोली पिछाणै ह। बे कदैई कोई दुसरा क गेल कोनी जावै पण बिऊँ बिदकै ह। क्युं क बे बिकी बोली कोनी पिछाणै।” ईसु बाऊँ आ निती-कथा कही, पण बे बिको मतबल कोनी समज सक्या। जणा ईसु ओज्यु बोल्यो, “म थारूँ सची बोलुँ हूँ, लल्ड्या ताँई बारनो म हूँ। अर बे सगळा जखा मेरूँ पेली आया बे चोर अर डाकू हा, पण लल्ड्या बाकै गेल कोनी होई। बारनो म हूँ, अर जखो बी मेरै जरिए मांयनै आसी बो बचायो जासी। बो बार-भीतर आई-जाई करसी अर धपायो जासी। चोर चोरी करबा, मारबा, अर नास करबानै आवै ह। पण म जीवन देबा आयो हूँ, जखो भर्योपूरो जीवन ह। “म चोखो गुवाळ्यो हूँ, चोखो गुवाळ्यो खुदकी लल्ड्या ताँई पिराण देवै। पण बो मिनख जखो मजुरी प लल्ड्यानै चरावै ह, जखो बाको असली मालिक कोनी। बो ल्याळीनै कनै आता देखर लल्ड्यानै एकलोई छोडर भाग छुटै ह। अर ल्याळी बापै झपटो मार बानै तीनतेरा कर दे ह। बंधाणी प लल्ड्या को गुवाळ्यो भाग छुटै ह, क्युं क बो तो एक मजुर ह। अर बिनै लल्ड्या की कोई परवा कोनी होवै। “म चोखो गुवाळ्यो हूँ। क्युं क म मेरी लल्ड्यानै जाणू हूँ अर बे मनै। ठिक बंय्यांई जंय्यां परम-पिता मनै जाणै ह अर म बिनै, अर म मेरी लल्ड्या ताँई पिराण द्‍युँ हूँ। मेरी ओर बी लल्ड्या हीं, जखी इ रेवड़ की कोनी। मनै बानै बी ल्याणो जरूरी ह, बे मेरी सुणसी अर जणा बाको एक रेवड़ अर एकई गुवाळ्यो होसी। परम-पिता मेरूँ प्यार-परेम करै ह क्युं क म मेरी मरजीऊँ पिराण द्‍युँ हूँ, जिऊँ मेरो पिराण पाछो मिल सकै। मेरा पिराणा मेरूँ कोई कोनी ले सकै, पण बिनै म खुदई देऊँ हूँ। मनै ओ हक ह क म इनै दे सकूँ अर इनै पाछो ले सकूँ। अंय्यां करबा को हुकम मनै परम-पिता दिओ ह।” इ बात की बजेऊँ ओज्यु यहूदि मिनखा म फूट पड़गी। बोळा हा जखा अंय्यां बोलर्या हा, “इमै कोई भूत-पलीत रळेड़ो ह! ओ बावळो ह! थे इकी क्याले सुणो हो?” पण दुसरा बोलर्या हा, “भूत-पलीत रळेड़ो मिनख इकी जंय्यां कोनी बोल सकै! अर भूत-पलीत आँदा मिनखनै आँख्या कंय्यां दे सकै ह?” ओ स्याळा को टेम हो, अर बि टेम यरूसलेम म मनदर की जेनती मनाई जारी ही। ईसु मनदर म सुलेमान का बरामदा म घूमर्यो हो। जणा यहूदि मिनख बिकै च्यारूमेर भेळा होगा। अर बिऊँ बुज्या, “तू कद ताँई म्हानै दो मता म राखसी? म्हानै साप-साप बता दे। तू मसी ह के?” ईसु बोल्यो, “म थानै पेलीई खे दिओ हो, पण थे मेरो बिस्वास कोनी कर्या। जखा काम म परम-पिता का नाम का हकऊँ करूं हूँ, बे मेरै पक्ष म गुवाई देवीं हीं। थे बिस्वास कोनी करो क्युं क थे मेरी लल्ड्या कोनी हो। मेरी लल्ड्या मेरी बोली पिछाणै ह, म बानै जाणू हूँ, अर बे मेरै गेल-गेल चालै ह। म बानै अजर-अमर जीवन द्‍युँ हूँ, अर बे कदैई कोनी मरसी। बानै मेरूँ कोई कोनी खोस सकै। मेरो परम-पिता जखो बानै मनै दिओ ह, बो सगळी चिजाऊँ बढर ह। अर कोईबी बानै बिका हाताऊँ कोनी खोस सकै। म अर मेरो परम-पिता एकई हां।” जणा ओज्यु यहूदि नेता बिपै बगाबा ताँई भाठा उठाया। ईसु बाऊँ बोल्यो, “म थारै बिचमै बोळा चोखा काम कर्यो, जखा परम-पिता मनै करबा ताँई दिओ हो। बामैऊँ कूणसा ताँई थे मेर प भाठा बगाबो चाओ हो?” बे बोल्या, “म्हें तेरा चोखा कामा ताँई तेर प भाठा कोनी बगावां, पण तू मिनख होर खुदनै परमेसर बतार परमेसर की बुराई करै ह।” ईसु बोल्यो, “ओ थारा पबितर सास्तर म मंडर्यो ह जंय्यां परमेसर बोलै ह, ‘थे परमेसर जंय्यां का हो।’ परमेसर बा मिनखानै परमेसर जंय्यां का खयो, जानै बिको बचन दिओ गयो अर आपा जाणा हां क पबितर सास्तर म मंडेड़ी बात कदैई झूठी कोनी होवै। जद म अंय्यां खयो क म परमेसर को बेटो हूँ, जणा थे क्युं खया म परमेसर की बुराई करूं हूँ। मनै टाळर इ जगत म भेजबाळो परम-पिताई तो ह। ज म मेरा परम-पिता का काम जखा बो मेरूँ चावै ह बानै कोनी करूं, जणा थे मेर प बिस्वास मना करो। ज म बे करूं, इकै बावजुद बी थे मेर प बिस्वास कोनी करो, पण कमऊँ कम मेरा कामा प तो बिस्वास करो। जिऊँ थे जाण सको क परम-पिता मेर म ह, अर म परम-पिता म।” एक बार ओज्यु बे ईसुनै पकड़बा की कोसिस करी पण बो बाका हाताऊँ बच निकळ्यो। जणा ईसु ओज्यु यरदन नदि पार चलेगो, जठै यहून्ना पाणी को बतिस्मो दिआ करतो। अर ईसु बठै क्युं क टेम ताँई रिह्यो। बोळा मिनख बिकै कनै आर खेता हा, “यहून्ना कोई चमत्कार कोनी दिखायो, पण जखी बी बात यहून्ना इ मिनख क बारां म खई ह, बे सगळी सच ह।” अर बठै बोळा मिनख बिपै बिस्वास कर्या। बेतनिया नगरी म लाजर नाम को एक रोगलो मिनख आपकी भाणा मारथा अर मरीयम क सागै रिह्या करतो हो। मरीयम बिमार लाजर की भाण ही, जखी परबु ईसु को ईतर उंदकार अभिसेक करी अर बिका पगानै आपका बाळाऊँ पुछी ही। अ भाणा ईसुनै समचार पुगायो क, “परबु, थारो पक्को भाईलो बिमार ह।” जद ईसु इकै बारां म सुण्यो जणा बोल्यो, “आ बिमारी लाजर की मोत ताँई कोनी ह, पण आ परमेसर की मेमा ताँई ह, जिऊँ क बिका बेटा की मेमा हो।” ईसु, मारथा बिकी भाण मरीयम अर लाजरऊँ प्यार-परेम राखतो हो। ईसुनै लाजर की बिमारी का समचार लाग्या पाछै बी, जठै बो हो बठै दो दिन ओर रिह्यो। इकै पाछै बो आपका चेलाऊँ बोल्यो, “आयो ल्यो आपा पाछा यहूदिआ चालां।” चेला बोल्या, “गरूजी, क्युंक दिना पेली यहूदि थार प भाठा बगाबो चावै हा, अर थे बठै ओज्यु जाबा की करो हो।” ईसु बोल्यो, “दिन म बारा घंटा च्यानणा का होवै ह। जणा जखा दिन का च्यानणा म चाली हीं बे आखड़'र कोनी पड़ै, क्युं क बानै दिन का च्यानणा म सक्यु सुजै ह। पण ज बे अँधेरा म चालीं जणा आखड़'र पड़ै, क्युं क अँधेरा म सुजै कोनी।” अंय्यां खेर बो बाऊँ बोल्यो, “आपणो भाईलो लाजर निंद लेर्यो ह, पण म जार बिनै जगास्युं।” चेला जुबाब म बोल्या, “परबु ज बो सोवै ह, जणा बो तावळोई निरोगो होज्यासी।” ईसु क खेबा को मतबल हो क लाजर मरगो, पण चेला समज्या लाजर सुत्यो ह। जणा ईसु बाऊँ साप-साप बोल्यो, “लाजर मरगो। थारै कारण म राजी हूँ क म बठै कोनी हो, क्युं क इब थारो बिस्वास ओर बी बढ ज्यासी। आओ ल्यो आपा बिकन चालां।” थोमा जिनै जोड़लो खेता हा। बो आपकै सागैहाळा चेलाऊँ बोल्यो, “ल्यो आपा बी गरूजी क सागै मरबा चालां।” ईसु क बठै पुगबा क च्यार दिन पेल्याई लाजर की लासनै गुफा म धर दिआ हा। बेतनिया नगरी यरूसलेमऊँ करीब कोसेक दूर ही। अर बोळा यहूदि मिनख मारथा अर मरीयमनै बाका भाई की मोत प तसली देबा आया हा। जद मारथा आ सुणी की ईसु आर्यो ह जणा बा बिऊँ मिलबानै बारनै गई, पण मरीयम घराई रेह्गी। मारथा ईसुऊँ बोली, “परबु ज थे अठै होता जणा मेरो भाई कोनी मरतो! पण म जाणू हूँ क, इब बी थे जोक्यु बी परमेसरऊँ माँगस्यो बो थानै देसी।” ईसु बिऊँ बोल्यो, “तेरो भाई, जी ज्यासी।” इपै बा बोली, “हां म जाणू हूँ, आखरी दिन बो ओज्यु जी ज्यासी।” ईसु बिऊँ बोल्यो, “म जीवन हूँ अर मर्या पाछै ओज्यु जी उठबो मेरै मई ह। जखा बी मेर प बिस्वास करसी, बे मर्या पाछै बी ओज्यु जी ज्यासी। अर जखा मेर म जिवीं अर बिस्वास करी हीं बे कदैई कोनी मरसी। के तू इ बात प बिस्वास करै ह?” बा बोली, “हाँ परबु, म बिस्वास करूं हूँ क, तू परमेसर को बेटो मसी ह जखो इ जगत म आबाळो हो।” आ बोलर मारथा आपकै घरा पाछी जार आपकी भाण मरीयमनै छानैसीक बुलार बोली, “गरूजी अठैई ह, अर बो तेरै बारां म बुजर्यो हो।” आ सुणर मरीयम खड़ी होर तावळिसी बिऊँ मिलबा गई। हाल ताँई ईसु नगरी म कोनी पुग्यो हो। बे बठैई हा जठै मारथा बिऊँ मिली ही। मरीयमनै तावळिसीक बारनै जाता देखर बे मिनख जखा तसली देबा मरीयम क सागै घरा हा, बे आ सोचर क आ कबर प रोबा जारी ह बिकै गेल होलिआ। मरीयम जठै ईसु हो बठै पुगर बिनै देखताई बिकै पगा म पड़र कही, “परबु, ज थे अठै होता जणा मेरो भाई कोनी मरतो!” मरीयम अर बिकै सागैहाळा को रोज देखर ईसु को काळज्यो पसीजगो अर बिकी अन्तर-आत्मा दुखी होई। ईसु बाऊँ बुज्यो, “बिकी लास कठै ह?” बे बोल्या, “परबु, आओ ल्यो चालर देखल्यो।” ईसु की आँख्या म आसु आगा। आ देखर बे मिनख बोल्या, “देखो ओ बिऊँ कतो प्यार करै ह!” पण बामैऊँ क्युंक बोल्या, “ओ कयानै आँख्या दि जणा के ओ लाजरनै मरबाऊँ कोनी बचा सकै हो?” ओज्यु ईसु बोळो दुखी होयो अर कबर प गयो। बा एक गुफा ही अर बिका मुंडा प भाठो धरेड़ो हो। ईसु बोल्यो, “भाठो हटाओ!” मरेड़ा लाजर की भाण मारथा बोली, “परबु इमैऊँ बोळी बुरी बाँस आसी, क्युं क इनै मर्या च्यार दिन होगा!” ईसु बिऊँ बोल्यो, “के म तेरूँ कोनी बोल्यो हो, ज तू बिस्वास करै जणा परमेसर की मेमा देखसी?” बे भाठानै हटायो, अर ईसु उपरनै देखर बोल्यो, “परम-पिता थारी जे हो, जखो थे मेरी सुणो हो। म जाणू क थे सदाई मेरी सुणो हो। पण आ बात म अठै खड़्या मिनखा की बजेऊँ बोल्यो जिऊँ अ बिस्वास करै क थे मनै भेज्या हो।” आ बोलर बो जोरऊँ हेलो दिओ, “लाजर, बारनै आ!” जणा बो कफन म लिपटेड़ोई बारनै निकळ्यायो, अर बिको मुंडो गाबाऊँ ढकर्यो हो। ईसु बोल्यो, “इनै खोलो जिऊँ ओ चाल सकै।” जखा यहूदि मरीयमनै तसली देबा आया हा, बा मिनखा म बोळाजणा ईसु का इ कामनै देखर बिपै प बिस्वास कर्या। पण बामैऊँ क्युंक फरिसीया क कनै जार, बानै ईसु का इ काम को समचार दिओ। जणा फरिसी अर परधान याजक, सभा बुलाई अर बोल्या, “आपानै काँई करनो चाए? ओ मिनख तो बोळा चमत्कार करर्यो ह! ज आपा अंय्यांई हात प हात धर्या बेठ्या रेहस्यां, जणा हरेक बिपै बिस्वास करबा लागसी। जणा रोमी सरकार हरकत म आज्यासी, अर आपणा मनदर अर यहूदि मिनखानै तबा कर देसी।” बामैऊँ केफा नाम को, जखो बि बरस म्हायाजक हो बोल्यो, “अरै बावळो, थे क्युंई कोनी जाणो! अर नइ इ बातनै समजो क, सगळा क बदला म एक को मरबो चोखो ह, जिऊँ यहूदि मिनख नास होबाऊँ बच जावै।” बो खुदऊँ आ बात कोनी बोली, पण इ ताँई बोली ही, क बो बि बरस म्हायाजक हो, अर बो अगाऊई खेदी क, ईसु यहूदि मिनखा ताँई मरसी। अर खाली यहूदि मिनखा ताँई नइ पण तीनतेरा होईड़ा परमेसर का मिनखानै एक काया की जंय्यां एक सागै भेळा करबा ताँई बी मरसी। अर बि दिनऊँई यहूदि नेता बिनै मारबा की तरकीब ढुंढबा लाग्या। जि बजेऊँ यहूदिआ म ईसु चोड़ै-धाड़ै कोनी घूमतो हो। पण बो यहूदिआ इलाकानै छोडर एक अफरैम नाम की नगरी क कनै का उजाड़ क सारै बसेड़ी ढाणी म आपका चेला क सागै रिह्यो। फसै को त्युंहार सांकड़ै हो। सगळा देसऊँ यहूदि मिनख यरूसलेम म त्युंहारऊँ पेली सुद करबा की सूण निभाबा जार्या हा। बे मनदर का चोक म भेळा होर ईसुनै उडिकर्या हा। अर बे एक दुसराऊँ बोल्या, “काँई सोचो हो? बो त्युंहार म आसी क कोनी?” परधान याजक अर फरिसी आदेस काड दिआ हीं क, ज कोई आ जाणै क ईसु कठै ह, जणा बिको समचार दे, जिऊँ बे बिनै पकड़ सकै। फसै का त्युंहार क छ दिन पेल्या ईसु बेतनिया नगरी म लाजर क घरा गयो, जिनै बो मोतऊँ जीलायो हो। बे बि ताँई रोटी बणाई, मारथा रोटी परोसरी ही। लाजर बी बाकै सागै बेठगो जखा ईसु क सागै रोटी खार्या हा। जणा मरीयम एक बरनी म खरो जटामासी को बणेड़ो मेंगो ईतर ल्याई अर बिनै ईसु क पगा प उंदका दिनी। अर आपका बाळाऊँ बानै पुछी। ईतर की बा बडिया सुगंद सगळा घर म फेलगी। यहूदा इस्करोती नाम को ईसु को एक चेलो जखो आगै चालर बिनै पकड़वायो हो बो बोल्यो, “ओ ईतर तीन सो चाँदी का सीक्का म बेच्यो जाणो चाए हो अर बे पिसा गरीबा म बाटबा चाए हा।” बो आ बात इ ताँई कोनी कही, क बिनै गरीबा की परवा ही, पण बो एक चोर हो। बो रिपीआळी थेली समाळतो हो अर बोळी बार बो बि मऊँ रिपीआ काड लेतो हो। पण ईसु बोल्यो, “इनै मना रोको। मनै गाडबा का दिन को सूण आ पेलीई कर दिनी ह। गरीब तो सदाई थारै सागै रेह्सी, पण म थारै सागै सदाई कोनी रेहस्युं।” जद मिनख सुण्या क ईसु बेतनिया नगरी म ह, जणा बे बठै इ बजेऊँई कोनी, क ईसु बठै ह पण बे लाजरनै बी देखबा गया जिनै ईसु मोतऊँ जीवायो हो। जणा परधान याजक लाजरनै बी मारबा की तरकीब रची। क्युं क लाजर की बजेऊँ बोळा यहूदि मिनख बानै छोडर ईसु क गेल चालबा अर बिस्वास करबा लाग्या। दुसरा दिन बोळी भीड़ जखी फसै का त्युंहार ताँई आईड़ी ही सुणी क, ईसु यरूसलेम आर्यो ह। जणा बे खजूर का दरख्त की डाळ्यां लेर बिऊँ मिलबा गया, अर जोरऊँ बोलर्या हा, “परमेसर की जे हो!” “परबु का नामऊँ आबाळानै परमेसर आसिरबाद दे!” “इजरायल का राजानै परमेसर आसिरबाद दे!” ईसुनै एक गधो दिख्यो अर बो बिपै बेठगो, जंय्यां क पबितर सास्तर म मंडर्यो ह, “यरूसलेम का मिनखो! मना डरो; जवान गधेड़ा प सवार होर, थारो राजा आर्यो ह।” बि टेम बिका चेला बा बातानै कोनी समज सक्या, पण जद ईसु मेमा म उठायो गयो जणा बाकै याद आई क, पबितर सास्तर म बिकै बारां म मांड्यो गयो जणाई बे मिनख बिकै सागै अंय्यां कर्या हा। भीड़ मऊँ बे मिनख जखा ईसु क सागै बि टेम हा जद बो लाजरनै बोल्यो हो कबरऊँ बारनै आज्या अर बिनै मोतऊँ जीवा दिओ हो इ बात को समचार दुसरा मिनखानै दिआ। भीड़ की बिऊँ मिलबा की बजे आ ही क, बे सुण्या हा, क बो ओ चमत्कार कर्यो ह। फरिसी एक दुसराऊँ बोल्या, “थे देखो, आपा क्युंई कोनी कर सक्या! जगत का मिनख बिकै गेल होर्या हीं।” क्युंक यूनानी बी बा मिनखा म हा जखा त्युंहार की टेम भगती करबा यरूसलेम गयड़ा हा। बे गलिल का बेतसदा का रेह्बाळा फलिपूस क कनै गया अर बोल्या, “साय, म्हें ईसुऊँ मिलबो चावां हां।” फलिपूस अंदरिआस क कनै जार बिऊँ बोल्यो, अर बे दोन्यु ईसु कनै गया अर बिनै बोल्यो। ईसु बाऊँ बोल्यो, “बा घड़ी आगी ह जद मिनख का बेटा की मेमा होवै। म थारूँ सची बोलर्यो हूँ, ग्युं को दाणो जद ताँई माटी म नइ पड़ै अर नइ मरै, बो एकलोई रेह्‍वै ह। पण मर्या पाछै बो बोळो फळै ह। जखा आपका जीवऊँ परेम करी हीं बे बिनै खोसी। अर जखा इ दुनिया म आपका जीवऊँ नफरत करी हीं, बे बिनै अजर-अमर जीवन ताँई राखसी। जखो बी मेरी सेवा करबो चावै ह, बिनै मेरै गेल चालनो पड़सी जिऊँ क मेरा दास मेरै सागैई रेह्‍वै। जखो मेरी सेवा करसी, बानै मेरो परम-पिता मान देसी। “मेरो जीव इब दुखी ह। मनै काँई बोलबो चाए? के म अंय्यां बोलुँ, ‘परम-पिता, थे मनै इ घड़ीऊँ बचाओ?’ नइ, पण इ घड़ी की पिड़ानै भोगबाई आयो हूँ। परम-पिता, थारै नाम की मेमा होवै!” जणा ईस्बर नगरीऊँ एक उवाज आई, “म मेरी मेमा दिखादि अर ओज्यु दिखास्युं।” बठै खड़ी भीड़ आ उवाज सुणी अर बामैऊँ क्युंक जणा अंय्यां बोल्या कोई बादळ गरज्यो दिखै , पण दुसरा बोल्या, “ईस्बर नगरी दुत इऊँ बतळायो दिखै!” पण ईसु बाऊँ बोल्यो, “आ उवाज मेरै फाईदा की कोनी ह, पण थारा फाईदा की ह। ओ जगत का मिनखा ताँई न्याय को टेम ह, अर इब जगत का राजा सेतान को तक्‍तो पलट्यो जासी। जद म उचो उठायो जास्युं जणा म सगळानै धरती पऊँ मेरै कानि खींच लेस्युं।” अंय्यां बोलर बो बता दिओ, क बो कंय्यां की मोत मरबाळो ह। भीड़ बोली, “म्हारो पबितर सास्तर बतावै ह क, मसी सदाई जिंदो रेह्सी। जणा थे कंय्यां बोल सको हो क मिनख को बेटो उचो उठायो जासी ? ओ कूणसो मिनख को बेटो ह?” ईसु बोल्यो, “क्युं क टेम ताँई थारै बिचमै च्यानणो होसी। जद ताँई थारै कनै च्यानणो ह, थारा गेला प चालता रेह्ओ जिऊँ अँधकार थारै कनै नइ आ सकै। जखो अँधकार म चालै ह बो कोनी जाणै क बो कठै जार्यो ह। च्यानणा प बिस्वास करो, जद ताँई बो थारै कनै ह जिऊँ क थे च्यानणा का मिनख बणो।” आ बोलर ईसु चलेगो अर खुद बाऊँ लुखर रिह्यो। बो बाकै सामै बोळा चमत्कार कर्यो इकै बावजुद बी बे बिपै बिस्वास कोनी कर्या। जिऊँ यसाया परमेसर की खेबाळा का बोलेड़ा बचन पूरा हो सकै: “ओ परबु, म्हारा समचार प कूण बिस्वास कर्यो? अर परबु की ताकत किपै परगट होई?” इ बजेऊँ बे बिस्वास कोनी कर सक्या। जंय्यां यसाया आ बी बोल्यो ह क, “परमेसर बाकी आँख्यानै आँदी, अर बाका मनानै काठो कर दिओ, जिऊँ क बाकी आँख्या देख कोनी सकै, अर बाको मन समज कोनी सकै, कदै अंय्यां नइ होवै क बे खुदको मन मेर म लगावीं, अर म बानै निरोगो करूं।” यसाया अंय्यां इ ताँई बोल्यो हो, क्युं क बो ईसु की मेमा देख लिओ हो, अर बिकै बारां म बोल्यो। बोळा यहूदि नेता बी ईसु प बिस्वास कर्या। पण फरिसीया की बजेऊँ बे चोड़ै म इपै बात कोनी करता हा। क्युं क बानै डर हो क बे बानै अरदास हाळी झघाऊँ बारनै काड देसी। बे परमेसर की बजाय मिनखाऊँ बेत्ती मान चाता हा। ईसु जोरकी उवाज म बोल्यो, “जखा बी मेर प बिस्वास करै ह, बे मेर पई नइ पण मनै भेजबाळा प बी बिस्वास करै ह। जखा मनै देखी हीं बे मनैई नइ पण मनै भेजबाळानै बी देखै ह। म जगत म च्यानणा की जंय्यां आयो, जिऊँ मेर प बिस्वास करबाळा अँधेरा म नइ पड़्या रेह्‍वै। “जखा बी मिनख मेरा बचनानै सुणर बानै कोनी मानै, म बाको न्याय कोनी करूं। म इ जगत का मिनखा को न्याय करबानै कोनी आयो पण आनै बचाबानै आयो हूँ। बे जखा मनै अर मेरा बचनानै कोनी मानी, बाको न्याय करबाळो एक ह, बोई बाको न्याय करसी। मेरा बोल जखा म बोल्यो हो, बेई बानै आखरी दिन दोसी बतासी! ओ सच ह, क्युं क म मेरी मरजीऊँ क्युंई कोनी बोल्यो, पण मनै भेजबाळा परम-पिता का हुकमऊँ जखो मनै बोलबो चाए हो, बोई बोल्यो। अर म जाणू हूँ क, बिको हुकम अजर-अमर जीवन कानि लेज्यावै। म बोई बोलुँ हूँ, जखो परम-पिता मनै बोलबा ताँई बोलै ह।” फसै का त्युंहार क पेलीई ईसु आ जा'णर क, “मेर ताँई बा घड़ी आगी जद म इ दुनियानै तजर मेरा परम-पिता कनै जाऊँ।” बो धरती प जत्ता बी बिका हा बाऊँ आखरी ताँई एकसोई परेम करतो रिह्यो। ईसु अर बिका चेला आथण्या रोटी खार्या हा, जणा सेतान समोन का बेटा यहूदा इस्करोती क मन म ईसुनै धोकाऊँ पकड़ाबा की बात घाल दिओ हो। ईसु जाणतो हो क परम-पिता बिकै हाता म सक्यु सूप दिओ ह। अर बो परमेसर क कनैऊँ आयो अर बिकनई पाछो जार्यो ह। जणा बो आपकी खाबाळी चोकीऊँ खड़्यो होयो अर आपको कोटियो उतार एक गमछ्यो आपकी कड़त्यु प बांद्‍यो। जणा पाछै बो बठळ म पाणी भर आपका चेला का पग धोबा लाग्यो, अर कड़त्यु प भंदेड़ा गमछ्याऊँ बानै पुछ्यो। जद बो समोन पतरस क कनै आयो, समोन बोल्यो, “परबु, थे मेरा पग धोस्यो?” ईसु बिनै जुबाब दिओ, “म जखो करूं हूँ बिनै तू हाल कोनी समज सकै, पण पाछै तेरै समज म आसी।” पतरस बिऊँ बोल्यो, “नइ आ कदैई कोनी हो सकै क, थे मेरा पग धोओ!” ईसु बोल्यो, “ज म तेरा पग नइ धोऊँ जणा तू मेरो चेलो कोनी।” समोन पतरस बोल्यो, “जणा परबु तू मेरा पगई क्युं, हात अर माथो बी धो दे!” ईसु बोल्यो, “जखो न्हा लिओ बिनै पग धोबा किई जुर्त ह, क्युं क बो पूरो पबितर ह। एकनै छोडर थे सगळा साप हो।” ईसु पेल्याऊँ जाणतो हो क, बिनै कूण पकड़ासी जणाई तो बो बोल्यो हो क, “एकनै छोडर सगळा पबितर हो।” चेला का पग धोया पाछै, बो आपको कोटियो पेर पाछो आपकी झघा प जार बेठगो। बो बुज्यो, “म जखो थारै सागै कर्यो बिनै समज्या के? थे मनै गरूजी अर परबु बोलो हो, आ बात सई ह, क्युं क म हूँ। म थारो परबु अर गरूजी होर थारा पग धोयो, जणा थानै बी एक दुसरा का पग धोणो चाए। म अंय्यां कर थारै सामै एक मिसाल दिनी ह। जिऊँ थे बी बंय्यांई करो जंय्यां म थारै सागै कर्यो हूँ। म थारूँ साची बोलुँ हूँ, कोईबी दास आपका मालिकऊँ बडो कोनी, अर नइ भेजेड़ो आपका भेजबाळाऊँ बडो। इब थे अ बाता जाणग्या हो, जद थे आनै करस्योक जणा परमेसर थानै आसिरबाद देसी। “म थारी सगळा की बात कोनी करूं, म बानै जाणू हूँ जानै म टाळ्या हूँ। सास्तर म मंडेड़ो आंक पूरो होसी, ‘जखो मेरी रोटी खाई बोई मेरै लात मारी।’ “इकै होबाऊँ पेलीई म थानै आ बतार्यो हूँ, जिऊँ जद अ बाता होवै जणा थे बिस्वास करो क म बोई हूँ। म थारूँ सची बोलुँ हूँ, जखो बी बानै मानै जखानै म भेजूँ हूँ बो मनै बी मानै ह अर जखो बी मनै मानै, बो मनै भेजबाळानै बी मानै ह।” आ खेबा क पाछै ईसु आपकी आत्मा म बोळो दुखी होया। अर साप-साप बोल्यो, “म थारूँ सची बोलुँ हूँ, थार मऊँ एक जणो मनै धोकाऊँ पकड़ासी।” चेला एक दुसरा को मुंडो देखबा लाग्या, अर सोच म पड़गा क बिको इसारो की कानि ह। बाका चेला मऊँ एक जणो, जखो लाडलो खुवातो हो। बो ईसु क सारै बेठ्यो हो। समोन पतरस बिकै कानि इसारो कर बोल्यो, “ईसुऊँ बुज बो किकै बारां म खेर्यो ह।” जणा बो चेलो ईसु क कान क कनैसिक मुंडो कर बाऊँ बुज्यो, “परबु, बो कूण ह?” ईसु बोल्यो, “म ओ रोटी को टुक इ कचोळा म डूबार जिनै देस्युँ, बोई बो मिनख ह।” जणा बे रोटी को टुक तोड़र बिनै डबोर समोन का बेटा यहूदा इस्करोतीनै दिआ। रोटी को टुक लेताई यहूदा म सेतान बड़गो। जणा ईसु बिऊँ बोल्यो, “तू जखो करबो चावै ह, बो तावळोसो करकरा ले।” खाबा बेठ्या दुसरा चेला मऊँ कोईसा कई आ पलै कोनी पड़ी की ईसु बिऊँ आ बात क्युं बोली। यहूदा कनै रिपीआळी थेली रेह्ती ही, इ बजेऊँ क्युंक चेला सोच्या क ईसु बिनै इ बजेऊँ खेवै ह की बो जार त्युंहार ताँई बानै जखो चाए बिनै मोल लिआवै नहिस गरीबा म क्युं बाट देवै। रोटी को टुक लेताई यहूदा बारनै चलेगो। बो रात को टेम हो। यहूदा क जाबा क पाछै, ईसु बोल्यो, “टेम आगो जद मिनख का बेटा की मेमा परगट होसी, अर बिकै जरिए परमेसर की मेमा परगट होसी। ज परमेसर की मेमा बिकै जरिए होवै। जणा तावळोई परमेसर मिनख का बेटा की मेमा परगट करसी। “मेरा टाबरो म क्युंक टेम ताँई थारै सागै हूँ। थे मनै ढुंढस्यो, अर इब म थानै बी बात बोलुँ हूँ जखी यहूदि बडकाऊँ कही ही, क जठै म जार्यो हूँ, बठै थे कोनी आ सको। “अर इ टेम म थानै नयो हुकम देऊँ हूँ क एक दुसराऊँ प्यार-परेम राखो। जंय्यां को प्यार-परेम म थारूँ कर्यो, बंय्यांई आपसरी म थे बी करो। ज थे आपसरी म प्यार-परेम राखस्यो, जणा सगळा जाणसी की थे मेरा चेला हो।” समोन पतरस बुज्यो, “परबु थे कठै जार्या हो?” ईसु बोल्यो, “जठै म जार्यो हूँ बठै हाल तू मेरै गेल कोनी आ सकै पण पाछै तू बठै मेरै गेल आसी।” पतरस बोल्यो, “परबु इ टेम म थारै सागै क्युं कोनी चाल सकूँ? इबकी स्यात म थारै ताँई मेरा पिराण दे सकूँ हूँ!” ईसु बिऊँ बोल्यो, “के तू साच्याई मेर ताँई पिराण दे सकै ह? पण म तेरूँ साची बोलर्यो हूँ, मुरगा क बांग देबाऊँ पेली तीन बार तू मनै पिछाण्बाऊँ मना कर देसी।” ईसु आपका चेलाऊँ बोल्यो, “मन म चिंत्या कर उदास मना होवो , पण परमेसर अर मेर प बी बिस्वास करो। म ईस्बर नगरी म थारै रेह्बा की झघा बणाबा जार्यो हूँ। परम-पिता का घर म घणिई झघा ह ज अंय्यां नइ होतो तो म थानै कोनी बोलतो। बठै थारै ताँई झघा बणाया पाछै म थानै लेबा आस्युं। बिकै पाछै आपा सागैई रेहस्यां। म जठै जार्यो हूँ, बठै पुगबा को गेलो थे जाणो हो।” थोमा बाऊँ बोल्यो, “परबु, थे कठै जार्या हो म्हें कोनी जाणा। जणा बठै जाबाळा गेलानै म्हें कंय्यां जाण सकां हां?” ईसु बिऊँ बोल्यो, “सच, जीवन अर गेलो मई हूँ। मेरै बिना कोई परम-पिता कनै कोनी जा सकै।” बो बाऊँ बोल्यो, “इब ज थे मनै जाणग्या हो जणा परम-पितानै बी जाणस्यो। अर इबऊँ थे बिनै जाणो अर देखो हो।” फलिपूस बाऊँ बोल्यो, “परबु, म्हानै परम-पिता का दरसण करा, अत्तो तो म्हारै ताँई घणो।” ईसु बोल्यो, “मनै कितना दिन तो होगा थारै सागै रेह्ता पाछै बी फलिपूस तू हाल ताँई कोनी जाण सक्यो क, म कूण हूँ? जखो बी मनै देख्यो ह बो बापनै बी देख्यो ह अर तू बोलै ह क, म्हानै बाप का दरसण करा दे। फलिपूस, तू के इ बात प बिस्वास कोनी करै क म परम-पिता म अर परम-पिता मेर म बास करै ह?” ईसु आपका चेलानै बोल्यो, “जखी बाता म थारूँ बोलुँ हूँ, अ बाता मेर कानिऊँ नइ, पण परम-पिता कानिऊँ ह, जखो मेर म होर आपको काम करै ह। जदकी म बोलुँ हूँ क, म परम-पिता म अर परम-पिता मेर म ह जणा बिस्वास करो, अर ज नइ करो जणा कमऊँ कम मेरा करमानै देखर तो करल्यो। म थारूँ सच बोलुँ हूँ, जखो बी मेर म बिस्वास करै ह, बो बे सगळा काम करसी जखा म करूं हूँ। बो आऊँ बी बडा काम करसी, क्युं क म परम-पिता कनै जाऊँ हूँ। अर थे जोक्यु बी मेरा नामऊँ माँगस्यो म करस्युं, क्युं क परम-पिता की मेमा बेटा क जरिए दिखाई ज्यासी। ज थे मेरूँ मेरा नामऊँ क्युंबी माँगस्यो, जणा म बिनै करस्युं।” ईसु आपका चेलाऊँ बोल्यो, “ज थे मेरूँ परेम करो हो, जणा थे मेरै हुकमा प चालज्यो। म थारै ताँई परम-पिताऊँ एक मददगार की माँग करस्युं, जखो सदाई थारै सागै रेह्सी। बा पबितर आत्मा ह, जखी परमेसर की सचाई थार प परगट करसी। बा इ दुनियानै कोनी मिल सकै, क्युंक आ दुनिया बिनै नइ तो देख सकै अर नइ जाण सकै, पण थे बिनै जाणस्यो, क्युंक बा थारै सागै थारै मांयनै रेह्सी। म थानै अनाथ की जंय्यां एकलो कोनी छोडूँ। म थारै कनै पाछो आस्युं। क्युंक टेम पाछै आ सरस्टि मनै कोनी देखसी, पण थे मनै देखस्यो। क्युं क म जीऊँ हूँ, अर थे बी जिस्यो। बो दिन आसी जणा थे जाण जास्यो, क म परम-पिता म अर थे मेर म, बंय्यांई म थारै म हूँ। जखा बी मेरा हुकमानै मानर बिपै चाली हीं, बे बामै हीं जखा मेरूँ परेम करी हीं, जखा मेरूँ परेम करी हीं बाऊँ परम-पिता परेम करसी अर म बी बाऊँ परेम करस्युं। अर खुदनै बापै परगट करस्युं।” दुसरो यहूदा, जखो यहूदा इस्करोती कोनी हो बो बोल्यो, “परबु ओ कंय्यां हो सकै ह क, थे म्हानै दिखस्यो पण इ दुनिया का मिनखानै कोनी दिखो?” ईसु बिऊँ बोल्यो, “जखा मेरूँ परेम करी हीं, बे मेरा खयानै मानसी। परम-पिता बाऊँ परेम करसी अर म्हें आर बाकै सागै रेहस्यां। अर जखा मेरूँ परेम कोनी करै, बे मेरा खयानै कोनी मानै। अर जखी सीख थे मेरा मुंडाऊँ सुण्या हो बा मेरी कोनी ह, बा तो मनै भेजबाळा परम-पिता की ह। “थारै सागै रेह्तासोता म अ बाता बोल दि ह। मदद करबाळी पबितर आत्मा, जिनै परम-पिता मेरा नामऊँ भेजसी थानै सगळी बाता सीखासी। अर जखी बाता म थारूँ बोल्यो हो बे सगळी थानै याद दिवासी। थानै चिंत्या अर डरबा की जुर्त कोनी, क्युं क म थानै स्यांती देस्युँ। आ इ दुनिया की स्यांती की जंय्यां की कोनी, आ बा स्यांती ह, जखी मई दे सकूँ हूँ। “थे मनै अंय्यां बोलता सुण्या हो, ‘म जार्यो हूँ, पण म थारै कनै ओज्यु आस्युं।’ ज थे मेरूँ परेम करो हो जणा थे इ बातऊँ राजी होस्यो क म परम-पिता कनै जार्यो हूँ क्युं क बो मेरूँ बडो ह। अ सगळी बाता होबाऊँ पेली म थानै आकै बारां म बता दिओ हूँ, अर जद अ बाता घटसी जणा थे बिस्वास करस्यो। इब ओर बेत्ती म थारूँ बात कोनी कर सकूँ क्युं क इ दुनिया को राजा सेतान आर्यो ह, पण मेर प बिको बस कोनी चालै। जद बो आसी जणा इ जगत का मिनख जाणसी क म परम-पिताऊँ परेम राखूँ हूँ, अर बे सगळी बाता करूं हूँ, जखी करबा ताँई बो मनै हुकम दिओ ह। “आओ ल्यो आपा अठैऊँ चालां। “सची अँगूर की बेल म हूँ। अर परम-पिता इ बाग को माळी। बो माली हरेक बी डाळीनै काटै ह, जखी फळ कोनी ल्यावै, अर बि डाळीनै छांगर साप करै जखी फळ ल्यावै ह, जिऊँ बा ओरबी फळै। अंय्यांई थानै मेरा खया प चालबा की बजेऊँ पेलीई पबितर कर दिओ गयो ह। थे मेर म बण्या रेह्ओ, जणा म बी थारै म बण्यो रेहस्युं। एक डाळी खुदऊँ कोनी फळ सकै, फळबा ताँई बिनै बोजा म लाग्यो रेह्णो पड़ै ह। अंय्यांई थे मेरै बिना कोनी फळ सको। “म अँगूरा की बेल हूँ अर थे डाळ्यां हो। जखा बी मेर म अर म बामै बण्यो रेह्ऊँ जणा बे बोळा फळसी क्युं क मेरै बिना थे क्युंई कोनी कर सको। जखा मेर म कोनी बण्या रेह्‍वै, बे बेकार डाळ्यां की जंय्यां हीं जानै सूकबा ताँई फेक दिओ जावै। अंय्यां की डाळ्यां आग म बाळी जावै ह। ज थे मेर म अर मेरा बचन थारै म बण्या रेह्सी, जणा थे जोक्यु बी थारी इंछ्या गेल माँगस्यो बो थानै मिलसी। जखी परम-पिता चावै ह, थे बंय्यांई करो जणा इऊँ परम-पितानै मान मिलसी अर जणाई बेरो पड़सी क थे मेरा चेला हो। “जंय्यां परम-पिता मेरूँ परेम करै ह, बंय्यांई म बी थारूँ परेम करूं हूँ। मेरा परेम म बण्या रेह्ओ। ज थे मेरा हुकमानै मानस्यो, जणा मेरै परेम म बण्या रेहस्यो जंय्यां क म परम-पिता का हुकमानै मानू हूँ, अर बिका परेम म बण्यो रेह्ऊँ हूँ। म आ बात थारूँ इ ताँई बोल्यो, क मेरी खुसी थानै मिलै, अर थे सची खुसीऊँ भरपूर होज्याओ। मेरो हुकम ओ ह, थे आपसरी म परेम राखो, जंय्यां क म थारूँ परेम करूं हूँ। भाईला ताँई पिराण देबो सऊँ बडो परेम ह। ज थे मेरा बताया गेला प चालो जणा थे मेरा भाईला हो। म इबऊँ थानै दास कोनी खेऊँ, क्युं क दास कोनी जाणै क बिको मालिक काँई करै ह। पण म थानै भाईला खेस्युं, क्युं क म थानै बे सगळी बाता बता दिनी ह जखी म परम-पिताऊँ सुणी। थे मनै कोनी टाळ्या पण म थानै टाळ्यो हूँ, अर थानै बोळा सारका फळ ल्याबा को काम सूप्यो हूँ। अंय्यां का फळ फळो जखा सदाई बण्या रेह्‍वै, अर इ बजेऊँ परम-पिता बो सक्यु देसी, जोक्यु बी थे मेरा नामऊँ बिऊँ माँगस्यो। जणाई म थानै हुकम देऊँ हूँ, क थे आपसरी म परेम राखो। “ज जगत थारूँ बैर राखै, जणा थे आ ध्यान म राखज्यो थारूँ पेली बो मेरूँ बैर राखै ह। ज थे इ जगतऊँ लगाव राखता जणा ओ जगत थारूँ परेम करतो। पण म थानै इ जगतऊँ टाळ लिआ क्युं क थे इ जगत का कोनी जणाई ओ थारूँ बैर राखै ह। जोक्यु बी म थानै बोल्यो हूँ बिनै ध्यान म राखज्यो, ‘दास आपका मालिकऊँ बडो कोनी होवै।’ ज मिनख मनै दिन घाल सकै ह, जणा थानै बी दिन घालसी, अर ज बे मेरी सुणै जणा थारी बी सुणसी। थे मेरा हो इ बजेऊँ बे थारै सागै बुरो करसी, क्युं क बे मनै भेजबाळानै कोनी जाणै। ज म नइ आयो होतो अर बाका पाप क बारां म नइ बतायो होतो जणा बापै कोई बात को दोस कोनी लागतो पण इब बाकन इऊँ बचबा को क्युंई भानो कोनी। जखा मेरूँ बेर राखै, बे परम-पिताऊँ बी बेर राखै ह। ज म बाकै बिचमै बे काम कोनी करतो जखा म कर्या हीं जणा बे पाप का भागी कोनी होता। पण इब जद बे बा कामानै देख लिआ हीं, जणा बी बे मेरूँ अर मेरा परम-पिताऊँ, म्हारै दोन्याऊँ बेर राखै ह। अ बाता इ ताँई घटी क्युं क पबितर सास्तर म मंडेड़ी बाता पूरी हो क, ‘बे बेकामई मेरूँ बेर राख्यो।’ “जद बो मददगार आसी जखी पबितर आत्मा ह, परम-पिता को सच परगट करसी, अर बा बिकी भेजेड़ीई आसी। बि पबितर आत्मानै म भेजस्युं अर बा मेरै बारां मई बोलसी। थे बी मेरी गुवाई देस्यो, क्युं क थे सरूआतऊँई मेरै सागै हो। “अ बाता म थारूँ इ ताँई बोली ह जिऊँ थे पाप म नइ पड़ो। थे अरदास करबाळी झघाऊँ काड्या जास्यो अर बो टेम आसी जद थानै मारबाळा सोचसी क थानै मार'र बे परमेसर की सेवा करीं हीं। मिनख अंय्यां इ ताँई करसी, क्युं क नइ तो बे मनै जाणै अर नइ परम-पितानै। म थारूँ अ बाता इ ताँई बोली ह क जद बा घड़ी आवै जणा थानै याद आवै क म पेल्याई थानै अ बाता बता दिनी ही। अ बाता म थानै पेली इ ताँई कोनी बताई क्युं क म थारै सागै हो। “इब बा घड़ी आगी ह, जद म मेरा भेजबाळा क कनै जार्यो हूँ, अर थे कोईबी मना बुजो क म कठै जार्यो हूँ। जदकी म थानै अ सगळी बाता बोल दिओ हूँ इ ताँई थारो मन दुखी नइ होवै। पण म थारूँ सची बोलर्यो हूँ ओ थारै ताँई चोखो ह, क म जाऊँ हूँ, क्युं क ज म नइ जाऊँ जणा बो मददगार कोनी आ सकै, जि मददगारनै म जार भेजस्युं। अर जद बो आसी जणा आ साबित करसी क पाप, धारमिक्‍ता अर परमेसर का न्याय क बारां म इ जगत का मिनख गळत ह। बो मिनखानै बतासी क मेर प बिस्वास नइ करबो पाप ह। बो धारमिक्‍ता क बारां बतासी क्युं क म परम-पिता कनै जार्यो हूँ अर थे मनै ओज्यु कोनी देखस्यो। अर बो न्याय क बारां म बतासी क परमेसर इ दुनिया का राजा सेतान को न्याय पेलाऊँ कर दिओ ह। “बताबा ताँई मेरै कनै बोळी बाता हीं पण थे बानै इबी कोनी सेह सको। पण जद सच की आत्मा आसी जणा बा, थारी सगळी सची बाता को गेलो दिखासी। बा थानै अगाऊ होबाळी बाता क बारां म बतासी। बा खुद क्युंई कोनी खेसी पण जोक्यु बा सुणै बाई खेसी। बा मेरो मान करसी क्युं क बा जोक्यु मेरूँ सुणसी बाई थानै बतासी। बे सगळी चिजा मेरी ह जखी परम-पिता की ह जणाई तो म बोल्यो क पबितर आत्मा जोक्यु मेरूँ सुणसी बाई थानै बतासी। “क्युंक देर पाछै थे मनै कोनी देखस्यो। अर इकै क्युंक देर पाछै थे मनै ओज्यु देखस्यो।” जणा बिका चेला आपसरी म बतळाबा लाग्या, “ओ आ काँई बात बोलै ह क, ‘क्युंक देर पाछै मनै कोनी देखस्यो, अर बिकै क्युंक देर पाछै ओज्यु देखस्यो,’ अर ‘म परम-पिता क कनै जाऊँ हूँ?’ ओ क्युंक देर पाछै काँई ह, जिकी ओ बात करै ह? म्हें कोनी जाणा ओ काँई बोलै ह।” ईसु जाणगो क बे बिऊँ सुवाल बुजबो चावीं हीं जणा बाऊँ बोल्यो, “के थे आपसरी म मेरी इ बात क बारां म बुजर्या हो क, ‘थे मनै क्युंक देर पाछै कोनी देखो अर क्युंक देर पाछै देखस्यो?’ म थारूँ सची बोलुँ हूँ, थे रोस्यो अर छाती पिटस्यो अर ओ जगत राजी होसी। थे दुखी होस्यो पण थारो दुख, सुक म बदल ज्यासी। जद एक लूगाई टाबर जलमै जणा बिनै पिड़ा होवै ह, क्युं क बा बिकी पिड़ा की घड़ी होवै ह। पण टाबर जलम्बा क पाछै एक टाबर क इ धरती प आबा की खुसी म बा आपकी सगळी पिड़ानै भूलर राजी होवै ह। ठिक बंय्यांई थे सगळा बी दुखी हो पण म थारूँ ओज्यु मिलस्युं जणा थारा हिया राजी होसी अर थारी खुसी थारूँ कोई कोनी खोससी। बि दिन थे मेरूँ क्युंई कोनी बुजस्यो। म थानै सची बोलुँ हूँ, मेरा नामऊँ जोक्यु बी थे परम-पिताऊँ माँगस्यो बो थानै देसी। हाल ताँई थे मेरा नामऊँ क्युंई कोनी माँग्या। माँगो थानै मिलसी जिऊँ थे राजी-खुसी रेह्‍वो। “म अ सगळी बाता थानै निती-कथा म बोली ह पण इब जखो टेम आर्यो बिमै म निती-कथा म कोनी बोलस्युं पण परम-पिता क बारां म थानै साप-साप बतास्युं। बि दिन थे मेरा नामऊँ माँगस्यो। मनै परम-पिताऊँ थारै ताँई माँगबा की जुर्त कोनी पड़सी। परम-पिता तो खुदई थारूँ परेम करै ह क्युं क थे मेरूँ परेम अर बिस्वास करो हो क म परमेसर कानिऊँ आयो हूँ। म परम-पिता कानिऊँई इ जगत म आयो। इब म इ जगतनै छोडर परम-पिता कनै जार्यो हूँ।” बिका चेला बोल्या, “हाँ इब थे बातनै साप-साप, बिना घूमाया बतार्या हो। इब म्हें समजगा क थे सक्यु जाणो हो। इब कोईनै बी थारूँ क्युंई बुजबा की जुर्त कोनी। म्हानै ओ बिस्वास ह क थे परमेसर कानिऊँ आयो हो।” इ बात प ईसु बाऊँ बोल्यो, “के थे सचमई बिस्वास करो हो? सुणो टेम आर्यो ह आर्यो के ह आगो जद थे सगळा तीनतेरा होज्यास्यो। थे सगळा मनै एकलो छोडर आप-आप क घरा चल्या जास्यो पण म एकलो कोनी हूँ मेरो परम-पिता मेरै सागै ह। “म अ बाता थारूँ इ ताँई बोल्यो क थानै स्यांती मिलै। जगत म तो थानै दुखई मिल्यो ह पण हिमत राखो म जगतनै जीत लिओ हूँ।” अ सगळी बाता बोलर ईसु आसमान कानि देखर बोल्या, “ओ परम-पिताजी, बा घड़ी आगी ह, तेरा बेटानै मेमा द्‍यो जिऊँ थारो बेटो थारी मेमा कर सकै। थे बिनै सगळा मिनखा प अधिकार दिओ ह जिऊँ बो बा मिनखानै अजर-अमर जीवन देवै जानै थे टाळ्या हो। अजर-अमर जीवन ओ ह क बे थानै, जखा इकलोता सचा परमेसर हो, अर ईसु मसीनै जाणै जिनै थे भेज्या हो। जोक्यु थे मनै करबा ताँई इ धरती प सूप्या हा, बे सगळा काम कर म थारी मेमा करी ह। अर इब, ओ परम-पिताजी, सरस्टि की सरूआतऊँ पेली आपा जखी मेमा म हा, बि मेमा म मनै लेज्याओ। इ जगत का मिनखा मऊँ जखा मिनख थे मनै दिआ, बानै म थारा नाम की सक्‍ति को ज्ञान करवायो। बे सगळा थाराई मिनख हा। थे बानै मनै दिआ अर बे तेरा खयानै मान्या। अर इब बे जाणी हीं क हरेक चिज जखी थे मनै दिआ हो, बा थारै कानिऊँ आवै ह। म बानै बाई सीख दिनी, जखी थे मनै सीखाया हो, अर बे बिपै चाली हीं। बे सूल्या जाणी हीं क म थारै कानिऊँ आयो हूँ अर बानै इ बात को बिस्वास होगो ह क मनै भेजबाळा थेई हो। “म बा ताँई अरदास करूं हूँ। म जगत ताँई अरदास कोनी करर्यो पण म तो बा ताँई अरदास करूं जानै थे मनै दिआ हो क्युं क बे थारा हीं। बे सगळा जखा मेरा ह बे थारा हीं अर जखा थारा हीं बे मेरा ह, बाकै जरिए मनै मेमा मिली। इब म इ जगतनै छोडर थारै कनै आर्यो हूँ पण बे इ जगत म हीं। पबितर परम-पिता थारा बि नाम की सक्‍तिऊँ जखो थे मनै दिआ हो, बानै बचार राखो जिऊँ बे थारी-म्हारी जंय्यां एक हो सकै। जद म बाकै सागै हो म थारा बि नाम की सक्‍तिऊँ जखो थे मनै दिआ हा बानै बचायो। बामैऊँ कोईबी नास कोनी होयो सिवाय बि मिनख क जखो बि गेला प चाल्यो जखो नास कानि लेज्यावै ह, जिऊँ क सास्तर को आंक पूरो होवै। “इब म थारै कनै आर्यो हूँ पण अ बाता म इ जगत म रेह्ता-सेह्ता बोलुँ हूँ, जिऊँ क बाको हियो मेरी खुसीऊँ भरज्या। म थारी सीख बानै दिनी। पण ओ जगत बाऊँ नफरत करै ह क्युं क बे इ जगत का कोनी, जंय्यां म इ जगत को कोनी। म आ अरदास कोनी करूं क थे बानै इ धरतीऊँ उठाल्यो, पण म अरदास करूं हूँ थे बानै बुराईऊँ बचार राखो। बे इ जगत का कोनी जंय्यां म इ जगत को कोनी। सच क जरिए थे बानै थारी सेवा करबा ताँई पबितर करो। थारा बचन सचा हीं। जंय्यां थे मनै इ जगत म भेज्या हो बंय्यांई म बानै जगत म न्यारी-न्यारी झघा म भेज्यो हूँ। म बा ताँई खुदनै पबितर कर थारी सेवा करूँ हूँ, जिऊँ सच क जरिए बे बी पबितर होर थारी सेवा कर सकीं। “म बा खातरई अरदास कोनी करूं पण बा ताँई बी कर्यो हूँ, जखा बाकी सीख की बजेऊँ मेर प बिस्वास करसी। ओ परम-पिताजी, म चाऊँ हूँ क बा सगळा म एको होवै, ठिक बंय्यांई जंय्यां म थारै म ओर थे मेर म हो। बे बी आपणा म एक होवीं जिऊँ क इ जगत का मिनख बिस्वास करै क थे मनै भेज्या हो। बा मेमा जखी थे मनै दिआ हो, बा म बानै दिओ हूँ जिऊँ बे बी एक हो सकीं जंय्यां आपा एक हा। म बामै हूँ अर थे मेर म, जिऊँ बे पूरीतर्या एक होर आपणै म रळज्यावै। अर इ जगत का मिनख जाणै, क मनै भेजबाळा थे हो। थे बानै बी बंय्यांई परेम करो जंय्यां थे मेरूँ परेम करो हो। ओ परम-पिताजी, जखा मिनख थे मनै सूप्या हो म चाऊँ हूँ क बे बी बठै मेरै सागै होवीं जठै म हूँ, जिऊँ क बे बि मेमानै देख सकीं जखी थे मनै दिआ हो, क्युं क इ सरस्टिनै रचबाऊँ पेली थे मेरूँ परेम कर्यो। “ओ परम-पिताजी, थे जखा धरमी हो, ओ जगत थानै कोनी जाणै पण म थानै जाणू हूँ, अर मेरा मिनख जाणी हीं क मनै भेजबाळा थे हो। म, बानै थारा नाम की सक्‍ति को ज्ञान करायो अर करवातो रेहस्युं, जिऊँ जखो परेम थे मेर प दरसाया हो बो बामै बी हो अर म बामै बण्यो रेह्ऊँ।” आ अरदास कर ईसु आपका चेला क सागै कीद्रोन घाटी क परली पार एक बाग म गयो। अर बि झघा क बारां म बिनै धोकाऊँ पकड़ाबाळो यहूदा बी जाणतो हो क्युंक घणकरी बार ईसु आपका चेलाऊँ बठैई मिल्या करतो हो। जणा यहूदा रोमी सिपाईड़ा की एक टुकड़ी अर परधान याजक अर फरिसीया का भेजेड़ा मनदर का पेरेदारा क सागै बठै आयो। बाकै हाता म मसाल, लालटेन अर राछ हा। जणा पाछै ईसु जखो सक्यु जाणता हो आगै आर बाऊँ बोल्यो, “थे किनै ढुंढो हो?” बे बोल्या, “ईसु नासरीनै।” जणा बो बाऊँ बोल्यो, “बो म हूँ।” बिनै पकड़ाबाळो यहूदा बी बाकै सागै हो। ईसु क अंय्यां बोलताई, “बो म हूँ,” बे चिमकर जमीन प पड़गा। जणा एक बार ओज्यु ईसु बाऊँ बुज्यो, “थे किनै ढुंढो हो?” बे बोल्या, “ईसु नासरीनै।” ईसु बोल्यो, “म बोल्यो तो हो, बो मई हूँ। ज थे मनै ढुंढो हो जणा आ मिनखानै जाबा द्‍यो।” अंय्यां बो इ ताँई बोल्यो जिऊँ जोक्यु बो बोल्यो हो बो सच होवै, “म बामैऊँ एकनैई कोनी खोयो जखा थे मनै सूप्या हा।” इकै पाछै समोन पतरस, जिकै कनै तलवार ही, बो तलवार काडी अर म्हायाजक का दास को दाइणो कान काट गेर्यो। बिको नाम मलखुस हो। जणा ईसु पतरसऊँ बोल्यो, “तेरी तलवारनै म्यान म घाल ले! के म पिड़ा को बो प्यालो कोनी पीऊँ जखो मेरो परम-पिता मनै दिओ ह?” इकै पाछै रोमी टुकड़ी का सिपाईड़ा, सुबेदार, यहूदि अर मनदर का पेरेदार मिलर ईसुनै गिरफदार कर लिआ अर बिनै बां'दर, पेली अनास क कनै लेग्या, जखो बि बरस का म्हायाजक केफा को सुसरो हो। ओ केफा बोई मिनख हो जखो यहूदि नेतानै राय दि ही क, “सगळा क बदला म एक को मरबो चोखो ह।” समोन पतरस अर एक ओर चेलो ईसु क गेल होलिओ। म्हायाजक इ चेलानै सूल्या जाणतो हो, इ ताँई बो ईसु क गेल म्हायाजक क आँगणा म बड़गो। पण पतरस बारनै बारना क कनैई डटगो जणा पाछै म्हायाजक की जाण-पिछाण हाळो दुसरो चेलो बारनै आयो अर बारना प खड़ी पेरेदारनीनै बोलर पतरसनै मांयनै लेगो। इपै बा पेरेदारनी बोली, “मनै तू ईसु को चेलो लागै ह। के ओ सच ह?” पतरस जुबाब दिओ, “नइ, म कोनी।” जाडा की बजेऊँ दास अर मनदर का पेरेदार बास्ते बाळर बठै खड़्या-खड़्या तपै हा, अर पतरस बी बाकै सागै खड़्यो होर तपै हो। जणा पाछै म्हायाजक ईसुऊँ बिका चेला-चपाटी अर बिकी सीख क बारां म बुज्यो। ईसु बिऊँ बोल्यो, “म हर बार दुनिया का मिनखा म खुलर बोल्यो हूँ। म अरदास करबाळी झघा अर मनदर म जठै सगळा मिनख भेळा होवीं हीं सीखायो हूँ। म कदैई ओला म कोनी बोल्यो। जणा पाछै तू मेरूँ क्याले बुजै ह? म काँई बोल्यो ज ओ जाणबो चावै ह जणा बाऊँ बुज जखा मनै सुण्या हीं। म काँई बोल्यो बे जाणी हीं।” आ सुणर बठै खड़्यो मनदर को एक पेरेदार ईसु क रेपटो मारतोई बोल्यो, “म्हायाजक क सागै जबान लड़ाबा की तेरी हिमत कंय्यां होई?” ईसु बिऊँ बोल्यो, “ज म क्युं गळत बोल्यो हूँ, जणा साबित कर। अर ज म सई बोल्यो हूँ, जणा तू मनै क्याले मारै ह?” इकै पाछै अनास बिनै भंदेड़ानैई म्हायाजक केफा क कनै भेज दिओ। जद पतरस ताव क आगै तपै हो, बि टेम बिऊँ बुज्यो गयो, “तू बी तो बिका चेला मऊँ एक ह, के आ बात सई कोनी?” पण पतरस नटगो अर बोल्यो, “म बामैऊँ कोनी।” म्हायाजक को एक दास जखो बि मिनख को रिस्तेदार हो जिको पतरस कान काट्यो हो। बिऊँ बोल्यो, “के म तनै बिकै सागै बाग म कोनी देख्यो?” जणा पतरस ओज्यु नट्यो अर नटता क सागैई मुरगो बांग दिनी। इकै पाछै बे सुआरै ईसुनै केफा क घराऊँ रोमी राजपाल का दरबार म लेग्या पण यहूदि अधिकारी मांयनै कोनी गया, क्युं क बे खुदनै असुद कोनी करबो चावै हा, जिऊँ क बे फसै की रोटी खा सकै। जणा पीळातुस बारनै आर बाऊँ बोल्यो, “ओ काँई अपराद कर्यो ह?” जणा बे जुबाब दिआ, “ज ओ क्युंई अपराद नइ कर्यो होतो जणा म्हें इनै अठै कोनी ल्याता।” जणा पीळातुस बाऊँ बोल्यो, “थे इनै अठैऊँ लेज्याओ अर थारा नेम-कायदा गेल इको न्याय करो।” यहूदि बोल्या, “म्हानै ओ अधिकार कोनी क म्हें कोईनै मोत की सजा सुणावां।” अंय्यां इ ताँई होयो क ईसु की आपकी मोत क बारां म बोलेड़ी बात पूरी हो। जणा पीळातुस दरबार म पाछो गयो अर ईसुनै बुलार बुज्यो, “तू यहूदि मिनखा को राजा ह के?” ईसु बोल्यो, “आ बात तू मनै जाणबा ताँई बुजी ह नहिस कोई आ बुजबा ताँई तनै बोल्यो ह?” पीळातुस बोल्यो, “के म यहूदि हूँ? तेराई यहूदि मिनख अर परधान याजक तनै मेरै हाता म सूप्या हीं। तू अंय्यां को काँई कर्यो ह?” ईसु बोल्यो, “मेरो राज इ दुनिया को कोनी। ज मरो राज अठै को होतो जणा मेरै गेल चालबाळा मनै यहूदि मिनखा क हाता म पड़बाऊँ बचाबा ताँई लोय भवाता। पण मेरो राज अठै को कोनी।” इपै पीळातुस बिऊँ बोल्यो, “इको मतबल तू राजा ह के?” ईसु बोल्यो, “तू बोलै ह क म राजा हूँ। म सच की गुवाई देबा ताँई इ धरती प जलम्यो अर आयो हूँ। जखा बी सचा ह बे मेरा बचन सुणै ह।” पीळातुस बिऊँ बुज्यो, “सच काँई ह?” आ खेर बो ओज्यु यहूदि मिनखा क कनै बारनै गयो अर बाऊँ बोल्यो, “मनै इ मिनख म कोई खोट कोनी लाधी। पण थारी आ रीत ह क, फसै का त्युंहार प म थारै ताँई कोई एक केदिनै अजाद करूं, ज थे चाओ तो, के म इ यहूदि मिनखा का राजानै थारै ताँई छोड द्‍युँ?” ओज्यु बे एक सागै चिलाया, “इनै नइ पण बरअबानै छोड दे।” बरअबा एक बागी हो। जणा पीळातुस ईसुनै पकड़ा'र कोड़ा लगवाया। जणा पाछै सिपाईड़ा काटा की डाळीनै गूंथर एक मुकट बणार बिका सीर प धर दिआ। अर बिनै स्याही पोसाक पिराया। अर बिकन आर खेबा लाग्या, “यहूदिआ का राजा की जे हो!” अर बिकै रेपटा मार्या। पीळातुस ओज्यु बारनै आयो अर बाऊँ बोल्यो, “सुणो म बिनै थारै कनै बारनै ल्यार्यो हूँ, जिऊँ क थे जाण सको क मनै बिमै कोई खोट कोनी लाधी।” जणा पाछै ईसु बारनै आयो। बे काटा को मुकट अर स्याही पोसाक पेर राख्या हा। जणा पीळातुस बोल्यो, “ओर्यो बो मिनख।” बिनै देखर परधान याजक अर मनदर का पेरेदार चिलार बोल्या, “इनै सुळी प चढाओ। इनै सुळी प चढाओ।” पीळातुस बाऊँ बोल्यो, “थे इनै लेज्याओ अर सुळी चढाओ, मनै तो इमै कोई खोट कोनी दिखै।” यहूदि मिनख बिऊँ बोल्या, “म्हारै नियमा गेल इनै मार देणो चाए, क्युं क ओ परमेसर को बेटो होबा को दावो कर्यो ह।” आ सुणर पीळातुस बोळो डरगो। अर दरबार क मांयनै जार ईसुऊँ बोल्यो, “तू कठैऊँ आयो ह?” पण ईसु बिनै जुबाब कोनी दिओ। जणा पीळातुस बिऊँ बोल्यो, “तू मेरूँ बात क्युं कोनी करै? याद राख तनै सुळी प चढाबो अर छोडबो मेरै बस म ह।” ईसु बिऊँ बोल्यो, “ज परमेसर मनै थारै बस म नइ देतो जणा थे क्युंई कोनी कर सका हा। इ ताँई जखो मिनख मनै तेरै हाता म सूप्यो ह बो तेरूँ बी बडो पापी ह।” आ सुणर पीळातुस बिनै छोडबा को जुगाड़ ढुंढबा लाग्यो पण यहूदि नेता चिलाया, “ज तू इनै छोडसी, जणा तू रोम का राजा को भाईलो कोनी अर जखो बी खुद राजा होबा को दावो करै ह, बो रोमी समराट को बिरोदि ह।” आ सुणर पीळातुस ईसुनै बारनै ल्याओ अर न्यायहाळी गद्दि प बेठगो, इ झघानै “भाठा को चबूतरो” खेता हा। इनै इबरानी भासा म “गब्बतो” बी खेवै ह। ओ फसै का त्युंहार की त्यारी को दिन हो । दोपारासिक को टेम हो। पीळातुस यहूदि मिनखाऊँ बोल्यो, “ओर्यो थारो राजा!” बे ओज्यु चिलाया, “इनै मार द्‍यो! इनै मार द्‍यो। इनै सुळी प चढाओ!” पीळातुस बाऊँ बोल्यो, “के थे चाओ हो क थारा राजानै सुळी दि जावै?” जणा परधान याजक बोल्या, “रोमी म्हराजनै छोडर म्हारो कोई राजा कोनी।” जणा पाछै पीळातुस बिनै सुळी प चढाबा ताँई बाकै हाता म सूप दिओ। अंय्यां सिपाईड़ा ईसुनै हिरासत म ले लिआ। बो आपकी सुळी लिआ-लिआ बि झघा ताँई गयो जिनै, “खोपड़ी की झघा” बोल्या करता हा। इनै इबरानी भासा म “गुलगुता” बी बोलता हा। बठै बे बिनै दो जणा क सागै सुळी प चढाया। एकनै दाया नाकै की सुळी प, दुजानै बाया नाकै की सुळी प अर बिच की सुळी प ईसुनै। पीळातुस एक तकती प “ईसु नासरी, यहूदिआ को राजा” आ मांडर सुळी प टंगवा दिओ। बोळा सारका यहूदि मिनख बि तकती प मांडेड़ा इ एलाननै बाच्या क्युं क जि झघा ईसुनै सुळी प चढायो गयो हो बा नगरी क सारै ही। अर ओ एलान इबरानी, यूनानी अर लतीनी म मांडेड़ो हो। जणा परधान याजक पीळातुस कनै जार बोल्या, “थे जखो तकती प, ‘यहूदिआ को राजा’ मंडवायो ह। बिनै बदलार ओ मंडवाओ क, ‘ओ खुद बोलै ह म यहूदि मिनखा को राजा हूँ।’ ” पीळातुस बोल्यो, “म जखो मंडवा दिओ सो मंडवा दिओ।” ईसुनै सुळी प चढाबा क पाछै बे बिका गाबल्या उतार लिआ अर बाकी च्यार पाँती कर आपसरी म एक-एक बांट लिआ। इकै पाछै बे कुर्तो लिआ, बो कुर्तो बिना सिलाई को उपरऊँ निचै ताँई बुंदेड़ो हो। जिकी बजेऊँ बे आपसरी म बोल्या, “इनै पाड़बाऊँ चोखो तो इनै कूण ले, इ खातर आपा पासा गेरल्यां।” ओ इ ताँई होयो जिऊँ पबितर सास्तर को आंक पूरो होवै: “बे मेरा गाबल्यानै आपसरी म बांट लिआ अर मेरा कुर्तानै बाटबा ताँई पासा गेर्या।” जणा बे सिपाईड़ा अंय्यांई कर्या। ईसु की सुळी क कनै बिकी माँ, मासी, क्लोपास की घराळी मरीयम अर मरीयम मगदलिनी खड़ी ही। जद ईसु आपकी माँ अर बि चेलानै जखो लाडलो खुवातो हो, बानै कनै खड़्यो देख्यो जणा आपकी माँऊँ बोल्यो, “मावड़ी, ओ थारो बेटो ह।” इकै पाछै आपका चेलाऊँ बोल्यो, “आ तेरी माँ।” अर इकै पाछै बो चेलो बिनै आपकै घरा लेगो। इकै पाछै ईसु जाणग्यो क सक्यु पूरो होलिओ ह, जणा सास्तर का आंक सच होवै इ ताँई बो बोल्यो, “म तिसायो हूँ।” बठै खाटी अँगूरीऊँ भरेड़ो एक बरतन पड़्यो हो। जणा बे एक फोवानै बिमै भेर हिस्सप मतबल जूफे की डाळी प धर'र उपरनै कर्या अर बिकै मुंडा क अड़ाया। ईसु बा खाटी अँगूरी चांखबा क पाछै बोल्यो, “पूरो होयो।” जणा बे आपकी नाड़ गेर दि अर पिराण तज दिआ। ओ अरामहाळा दिन की त्यारी को दिन हो। अराम हाळै दिन बिकी लास सुळी प नइ टंगी रेह, इ ताँई यहूदि अधिकारी पीळातुसऊँ हात जो'ड़र बोल्या क बो हुकम देवै जिऊँ क बाकी टांग्या तोड़र बाकी लासानै सुळीऊँ उतार बठैऊँ हटायो जावै। क्युं क फसै को त्युंहार होबा की बजेऊँ ओ अरामहाळो दिन बोळो खास दिन हो। जणा सिपाईड़ा आया अर ईसु क सागै सुळी प चढाया गया हा बा दो मिनखा की टांग्या तोड़ दिनी। पण जंय्यांई बे ईसु कनै आर देख्या क बे पेल्याई पिराण तज दिआ हीं जणा बे बाकी टांग्या कोनी तोड़ी। पण बामैऊँ एक सिपाईड़ो ईसु की कोल म भालो घोप्यो जिऊँ लोय अर पाणी भे निकळ्यो। आ बताबाळो बो ह, जखो अंय्यां होता देख्यो, जिऊँ क थे बी बिस्वास करो। बो जोक्यु बोल्यो हो बो सच हो अर बो जाणै ह क बो सच बोल्यो। ओ इ ताँई होयो क सास्तर म मंडेड़ो आंक पूरो होवै, “बिकी एक बी हाडी कोनी तोड़ी ज्यासी।” अर नेम-कायदा म मंडेड़ो ह, “जिकै बे भालो घोप्या बे बिनै देखसी।” इकै पाछै अरमतिया नगरी को रेह्बाळो युसूफ जखो ईसु को चेलो हो पण यहूदि अधिकारीया क डर की बजेऊँ बो ओला म हो। बो पीळातुस कनै जार बिऊँ अरदास करी क बो बिनै ईसु की लास लेज्याबा दे जणा पीळातुस बिनै बोल्यो, “लेज्या।” जणा बो आर ईसु की लास लेगो। निकेदेमुस, जखो सऊँ पेली रातनै ईसुनै देखबा गयो हो, बो बठै गंधरस अर अरख मिलार बणाएड़ो लेप लेर आयो जखो करीब पेंतिस किलो हो। अर बे बिकी लास लेज्यार यहूदि मिनखा की लास गाडबा की रीत गेल बिनै सुगंद देबाळी चिजा क सागै कफन म लपेट दिआ। जठै ईसुनै सुळी प चढायो गयो हो, बिकै सारैई एक बाग हो अर बि बाग क मांयनै ढाड म खुदेड़ी एक कबर ही जिमै हाल ताँई कोईनैई कोनी धर्यो गयो हो। क्युं क अरामहाळो दिन होबाळो हो अर बा कबर बी कनै ही, इ ताँई बे ईसु की लासनै बिकै मांयनै धर दिआ। सपता का पेला दिन दितबारनै, भागपाट्याई मरीयम मगदलिनी कबर प आई अर देखी क कबर का मुंडा को भाठो हटेड़ो ह। जणा बा भागर समोन पतरस अर बि दुसरा चेला क, जखो लाडलो खुवातो हो कनै गई। अर बाऊँ बोली, “बे परबुनै कबरऊँ काड लेग्या हीं अर म्हानै कोनी बेरो क बानै कठै धर्या हीं।” इकै पाछै पतरस अर बो दुसरो चेलो कबर प जाबा ताँई रवाना होया। बे दोन्यु एक सागै भागर्या हा पण दुसरो चेलो पतरसनै गेलनै छोडगो अर कबर प बिऊँ अगाऊ जा पुग्यो। बो झुकर देख्यो क बठै कफन हाळा गाबल्या पड़्या हीं पण बो मांयनै कोनी गयो। जणा बि टेमई समोन बी बठै आ पुग्यो अर कबर क मांयनै जार देख्यो क बठै कफन हाळा गाबल्या पड़्या हीं। अर जखो गाबो कबर म म्हेलती टेम बाकै सीर प हो बो कफन क सागै कोनी हो, पण एक झघा सामटेड़ो पड़्यो हो। इकै पाछै बो दुसरो चेलो जखो कबर प पेल्या पुग्यो हो, मांयनै जार देख्यो अर बिस्वास कर्यो। बे हाल बी सास्तर का आंकनै कोनी समज्या क, “बो मरेड़ा मऊँ पक्कोई जी उठसी।” इकै पाछै बे चेला पाछा घरा चलेगा। मरीयम रोती कूकती कबर क बारनै खड़ी ही अर रोती कूकती बा कबर क मांयनै झुकाळी मारी। जणा बिनै जठै ईसु की लास पड़ी ही बठै दो ईस्बर नगरी दुत भळका मारता गाबा पेर्या दिख्या। एक तो सीराणै हो अर दुसरो पगात्या बेठ्यो हो। बे बिऊँ बुज्या, “स्याणी, तू क्याले रोवै ह?” बा बोली, “बे मेरा परबुनै उठा लेग्या अर मनै बेरो बी कोनी क, बे बानै कठै धर्या।” आ बोलर बा मुड़ी अर बा देखी क बठै ईसु खड़्या हीं पण बा कोनी जाणी क बो ईसु ह। ईसु बिऊँ बोल्यो, “स्याणी, तू क्याले रोवै ह अर तू किनै ढुंढै ह?” बा आ सोचर क ओ माळी ह, बाऊँ बोली, “स्याणो ज थे बानै कठिनै धर्या हो जणा मनै बताओ क थे बानै कठै धर्या हो? म बानै मेरै सागै लेज्यास्युं।” ईसु बिऊँ बोल्यो, “मरीयम।” बा गेलनै घूमी अर इबरानी भासा म बोली, “रब्बूनी,” जिको मतबल “गरूजी ह।” ईसु बिऊँ बोल्यो, “मेरै हात मना अड़ा क्युं क म हाल ताँई परम-पिता क कनै उपर कोनी गयो हूँ। तू तो अंय्यां कर मेरा भाई-भाणा कनै जा अर बानै बता, ‘म मेरा अर थारा परम-पिता, परमेसर क कनै उपर जार्यो हूँ।’ ” मरीयम मगदलिनी आ बोलतीई चेला कनै आई क, “म परबुनै देखी हूँ।” अर जोक्यु ईसु बिऊँ बोल्यो हो बे बाता बानै खे सुणाई। सपता का पेला दिन दितबारनै, आथण्या बिका चेला यहूदि नेता क डर का मारै किवाड़ जड़र मांयनै बड़र्या हा। बि टेमई ईसु बठै मांयनै आर बाकै बिचमै खड़्यो होगो अर बाऊँ बोल्यो, “थानै स्यांती मिलै।” आ बोलर बे बानै आपका हाता का अर पासळ्या का घाव दिखाया। चेला जद परबुनै देख्या जणा बे बोळा राजी होया। जणा ईसु बाऊँ ओज्यु बोल्यो, “थानै स्यांती मिलै। जंय्यां परम-पिता मनै भेज्यो ह, ठिक बंय्यांई म थानै भेजूँ हूँ।” आ खेर बे बापै फूंक मारी अर बाऊँ बोल्यो, “पबितर आत्मानै ल्यो। जखा मिनखा का पाप थे माफ करस्यो बानै माफी मिलसी अर जाका पाप थे माफ कोनी करो बे माफ कोनी कर्या ज्यासी।” थोमा बा बारां मऊँ एक हो जिनै जोड़लो बी खेवै ह, बो ईसु क आबा की टेम बठै बा चेला क सागै कोनी हो। जणा बे दुसरा चेला बिऊँ बोल्या, “म्हें परबुनै देख्या हां।” पण बो बानै बोल्यो, “जद ताँई म बाकै हाता म किलां का निसान नइ देखल्युं अर बामै मेरी आँगळी नइ घालल्युं अर बिकी कोल म मेरो हात नइ घालर देखल्युं जद ताँई मनै बिस्वास कोनी होवै।” जणा आठ दिना का पाछै ईसु का चेला ओज्यु घर क मांयनै हा। इबकै थोमा बी बाकै सागै हो अर किवाड़ बंद हा। जणा ईसु आगो अर बाकै बिचमै आर बोल्यो, “थानै स्यांती मिलै।” जणा बो थोमाऊँ बोल्यो, “आ, अर तेरी आँगळ्या घालर मेरा हात देख अर तेरा हातनै मेरी कोल म घाल। भेम करबो छोड अर बिस्वास राख।” जणा जुबाब म थोमा बोल्यो, “ओ मेरा परबु, ओ मेरा परमेसर।” ईसु बिऊँ बोल्या, “तू मनै देखर मेर प बिस्वास कर्यो ह। पण भागहाळा हीं बे मिनख जखा मनै बिना देख्या बिस्वास करीं हीं।” ईसु ओर बी बोळा चमत्कार आपका चेलानै दिखाया जाको जिकर इ पोथी म कोनी मांड्यो गयो। अर जखी बाता अठै मांडेड़ी ह बे इ ताँई ह क, थे बिस्वास करो क ईसुई परमेसर को बेटो मसी ह अर बिस्वास करके, थे बिका नाम म जीवन पाओ। इकै पाछै ईसु आपका चेलानै तिबरिआस झिल का किनारा प ओज्यु दरसण दिओ। अर आ बात अंय्यां होई, समोन पतरस, थोमा जखो जोड़लो खुवातो हो, गलिल का काना को नतनएल, जब्दि को बेटो अर ईसु का दो ओर चेला बठै भेळा हा। समोन पतरस बाऊँ बोल्यो, “म मछी पकड़बा जाऊँ हूँ।” बे बिऊँ बोल्या, “म्हें बी तेरै सागै चालस्यां।” अर बे अंय्यां खेर बिकै सागै होलिआ अर न्याव म बेठगा। पण बि रात बाकै क्युंई कोनी हात्यायो। अंय्यां करता-करता दिन होगो, बि टेमई ईसु बठै किनारा प आर खड़्यो होगो पण बे चेला कोनी जाण्या क बो ईसु ह। जणा ईसु बाऊँ बोल्यो, “भाईड़ो, थारै कनै मछ्या ह के?” बे बोल्या, “कोनी।” जणा बो बाऊँ बोल्यो, “न्याव क दाया नाकै जाळ फेको अर थानै मिलसी।” जणा बिका बोल्या गेल बे जाळ फेक्या पण बोळी मछ्या की बजेऊँ बे जाळनै पाछा कोनी खींच सक्या। जणा पाछै लाडलो चेलो पतरसऊँ बोल्यो, “अ तो परबुई ह।” आ सुणताई क, “अ तो परबुई ह,” बो कोई परवा करै बिनाई लंगोट प बारलो गाबो लपेटर पाणी म कुदगो जिऊँ तावळोसो किनारा प पुग सकै। जणा दुसरा चेला बिकै गेल मछ्याऊँ भरेड़ो जाळ खिंचर न्यावऊँ किनारा प ले आया क्युं क बे किनारैऊँ कोई सोएक गज दूर हा। किनारा प आताई बानै सिलगता कोयला की आग दिखी जापै मछी सिकरी ही अर रोटी बी पड़ी ही। ईसु बाऊँ बोल्यो, “जखी मछ्या थे इबी पकड़ी ह बामैऊँ क्युंक लिआओ।” जणा समोन पतरस न्याव प गयो अर एक सो तरेपन बडी मछ्याऊँ भरेड़ा जाळनै किनारा प खिंच्यो। अत्ती सारी मछ्या होबा क पाछै बी जाळ फाट्यो कोनी। ईसु बाऊँ बोल्यो, “अठै आओ अर रोटी जिमो।” बिका चेला मऊँ कोईसा किई हिमत कोनी बगी क बिऊँ बुजै “थे कूण हो?” क्युं क बे जाणगा हा क बे परबुई ह। जणा ईसु खड़्या होया अर रोट्या लेर बानै परूसी अर अंय्यांई मछ्या बी। अर ओ तीसरकै हो क मरेड़ा मऊँ जीबा क पाछै ईसु आपकै चेला क सामै परगट होया। रोटी खाबा क पाछै ईसु समोन पतरसऊँ बोल्यो, “यहून्ना का बेटा समोन, जत्तो परेम अ मेरूँ करीं हीं, तू मेरूँ बाऊँ बेत्ती परेम करै ह के?” पतरस ईसुऊँ बोल्यो, “हाँ परबु, थे जाणो हो क म थारूँ परेम करूं हूँ।” जणा ईसु पतरसऊँ बोल्यो, “मेरा उन्यानै चरा।” बो बिऊँ ओज्यु बोल्यो, “यहून्ना का बेटा समोन, तू मेरूँ परेम करै ह के?” जणा पतरस बोल्यो, “हाँ परबु, थे जाणो हो क म थारूँ परेम करूं हूँ।” जणा ईसु पतरसऊँ बोल्यो, “मेरी लल्ड्या की रूखाळी कर।” ईसु तीसरका पतरसऊँ बोल्यो, “यहून्ना का बेटा समोन, तू मेरूँ परेम करै ह के?” पतरस बोळो दुखी होयो क्युं क ईसु तीसरका बिऊँ आ बात बुजी ही, “तू मेरूँ परेम करै ह के?” जणा पतरस ईसुऊँ बोल्यो, “परबु थे तो सक्यु जाणो हो थे जाणो हो क म थारूँ परेम करूं हूँ।” ईसु बिऊँ बोल्यो, “मेरी लल्ड्यानै चरा। म तनै सची बोलुँ हूँ, जद तू मोट्यार हो, जणा तू तेरी कमर प सापी कसर जठै मरजी चल जातो हो। पण जद तू बूडो होसी जणा तू हात पसारसी अर दुसरा तनै बां'दर जठै तू कोनी जाणो चावै बठै लेज्यासी।” बो आ बात आ दरसाबा ताँई बोल्यो क पतरस कंय्यां की मोत मर'र परमेसर की मेमा करसी। आ बोलर बो बिऊँ बोल्यो, “मेरै गेल आ।” पतरस गेलनै बावड़र देख्यो क बो चेलो जखो लाडलो खुवातो हो, बिकै गेल आर्यो ह। ओ बोई हो जखो रोटी जिम्ती टेम बिकै कान क कनैसिक मुंडो कर बाऊँ बुज्यो, “परबु बो कूण ह जखो थानै धोकाऊँ पकड़ासी?” बिनै देखर पतरस ईसुऊँ बोल्यो, “परबु, इको काँई होसी?” ईसु बिऊँ बोल्यो, “ज म आ चाऊँ क मेरै पाछै आबा ताँई, ओ अठैई रेह्‍वै जणा तनै इऊँ काँई? तू तो मेरै गेल आ।” जणा आ बात चेला म इ हद ताँई फेलगी क बो चेलो कोनी मरै। ईसु ओ कोनी बोल्या हा, क बो कोनी मरसी। पण बाको मतबल ओ हो क, “ज म आ चाऊँ क जद ताँई म आऊँ, ओ अठैई रेह्‍वै जणा तनै इऊँ काँई?” ओ बो चेलो ह जखो आ सगळी बाता की गुवाई देवै ह, अर जखो आ सगळी बातानै मांडी ह। म्हें जाणा हा क बिकी गुवाई सची ह। ईसु ओर बी बोळा काम कर्या। ज बे सगळा एक-एक कर मांड्या जावै जणा म समजूँ हूँ क बा किताब अत्ती बडी होती की सगळी सरस्टि प कोनी नावड़ती। प्यारा थियूफिलूस, म मेरी पेलड़ी पोथी म बे सगळी बाता मांडी, जानै ईसु बि दिनऊँ करतो अर बानै सीखातो आयो जि दिनऊँ बो आपको सेवा को काम चालू कर ईस्बर नगरी म उठाया जाबाऊँ पेली बो पबितर आत्मा की सक्‍तिऊँ खुदका ग्यारा भेजेड़ा चेलानै जानै बो टाळ्या बानै काँई-काँई करबो ह , बा कामा को हुकम दिओ। बिकै सुळी प दुख भोगर मरबा क पाछै, बो बोळा पुक्‍ता सबूत देर खुदनै मरेड़ा मऊँ जिंदो साबित कर्यो, अर बो चाळिस दिना ताँई बानै दिखतो रिह्यो अर बाऊँ परमेसर का राज क बारां म बतळातो रिह्यो। एक खास मोका प जद बे बिकै सागै जिमर्या हा जणा ईसु बानै हुकम दिओ, “थे यरूसलेम क बारनै पग मना धरज्यो, पण जि बरदान क बारां म थे मेरा मुंडाऊँ सुण्या हो बिकी बाट जोता रेहज्यो क्युं क बि बात को करार परम-पिता कर्यो ह। अर यहून्ना तो पाणी को बतिस्मो दिआ करतो हो, पण आबाळा दिना म थानै पबितर आत्मा को बतिस्मो मिलसी।” बे भेळा होर बिऊँ बुज्या, “परबु, के तू इ टेमई इजरायली मिनखानै राज पाछो देसी?” जणा बो बोल्यो, “बि दिन अर बि घड़ीनै जाणबा को काम थारो कोनी, क्युं क बा परम-पिता का हक तळै ह। पण जद पबितर आत्मा थानै मिलसी जणा थारै म परमेसर की सक्‍ति आज्यासी अर थे यरूसलेम, सगळा यहूदिआ, सामरीया का इलाका अर धरती का इ कूणाऊँ बि कूणा ताँई मेरा गुवा होस्यो।” आ खेर बो बाकै देखता-देखताई ईस्बर नगरी म उठा लिओ गयो अर एक बादळी बिनै ढक लिनी। अर बे बिनै जातानै एकटोर आसमान कानि देखर्या हा जणा अत्ता मई दो मिनख एकदम धोळा गाबा म बाकन आर खड़्या होगा। अर बाऊँ बोल्या, “अरै गलिली मिनखो, खड़्या-खड़्या आसमान म काँई देखर्या हो? ओ ईसु जिनै थारै मऊँ ईस्बर नगरी म उठायो गयो ह ओ जंय्यां गयो ह बंय्यांई पाछो आसी।” जणा पाछै बे जेतून डूँगरी पऊँ जखी यरूसलेमऊँ करीब आदेक कोस परै ही, बठैऊँ ओटा यरूसलेम आया, अर बठै पुगताई बे उपला चोबारा म चलेगा, जठै पतरस, यहून्ना, याकूब, अंदरिआस, फलिपूस, थोमा, बरतुल्मै, मत्ती, हलफई को छोरो याकूब, देस भगत समोन अर याकूब को छोरो यहूदा रेह्ता हा। अर आकै सागै क्युंक लूगाया बी ही, अ सगळा एक चित होर अरदास करबा म लाग्या रेह्ता हा। बामै ईसु की माँ मरीयम अर बिको भाई बी हो। जणा पाछै बा दिना म पतरस बा बिस्वासी भाई-भाणा म खड़्यो होर बोल्यो जखा गिणत-माणत का एक सो बिस हा, “मेरा यहूदि भाई-भाणो पबितर सास्तर को लेख जखो यहूदा (जखो ईसुनै पकड़बाळा की मदद करी ही) क बारां म मंडेड़ो ह, जिनै बोळी पेल्या पबितर आत्मा दाऊद क मुंडा होर बोल्यो हो, बो तो पूरो होणोई हो। बो आपणा मालोई हो, अर इ सेवा म बिको बी हिस्सो हो। बो आपकी पाप की कमाईऊँ एक खेत मोल लिओ, अर बो सीरवाणी पड़्यो जिऊँ बिकी काया पाटगी अर बिका सगळा आंतड़ा-ओजड़ा बारनै आ पड़्या। इ बात को बेरो सगळी यरूसलेम नगरीनै पड़्यो। जणाई तो बाकी बोली म बि खेत को नाम हकलदमा पड़्यो जिको मतबल ‘लोय को खेत होवै ह।’ अर भजना की पोथी म अंय्यां मंडर्यो ह, ‘बिको घर उजड़ जावै, अर बिमै कोई कोनी बसै।’ अर अंय्यां बी मंडर्यो ह की ‘बिको ओदो कोई दुसरो लेले।’ “जणा आ जरूरी ह क, जद ईसु आपणै सागै हो अर बि टेम जखा सदाई आपणै सागै रेह्ता हा बा दिना म, यहून्ना पाणी को बतिस्मो देबो चालू कर्यो हो, बि दिनऊँ लेर ईसुनै आपणा मऊँ ईस्बर नगरी म उठाया जाबा का दिन ताँई बामैऊँ आपानै एक जणो गुवा होबा ताँई टाळ लेणो चाए।” जणा बे दो जणानै खड़्या कर्या, जामैऊँ एक युसूफ हो जिनै बरसबा खेता हा, जिको दुसरो नाम यूसतुस हो, दुसरो जणो मत्तीया हो, अर बे आ खेर अरदास करबा लागगा क, “परबु थे सगळा का हियानै जाणो हो थे म्हानै बताओ क थे आ दोन्या मऊँ किनै टाळ्या हो। जिऊँ बो थारी सेवा करबा ताँई इ भेजेड़ा चेला का ओदानै ले सकै, जिनै यहूदा छोडर जि झघा जोगो हो बठैई चलेगो।” जणा बे बा दोन्या क बारां म परची गेरी अर परची मत्तीया क नाम प खुली जिकै पाछै बो बा ग्यारा भेजेड़ा चेला म गिण्यो गयो। पेन्तिकूस का त्युंहार हाळै दिन बे सगळा बिस्वासी एक झघा भेळा होर्या हा। अत्ती बारां मई आसमानऊँ आँधी की सी उवाज होई अर बो सगळो घर जठै बे बेठ्या हा गुँजबा लागगो। अर बानै आग की लपटा जीब की जंय्यां फेलती दिखी, अर बे लपटा एक-एक प आर डटगी। बे सगळा पबितर आत्माऊँ भरगा अर जंय्यां पबितर आत्मा बानै बोलबा की सक्‍ति दि बे बंय्यांई दुसरी भासा म बोलबा लाग्या। बि टेम यरूसलेम म दुनिया का सगळा देसाऊँ यहूदि भगत आएड़ा हा। जद बे बा उवाज सुण्या जणा बठै घणीसारी भीड़ भेळी होगी अर बे आ सुणर ताजूब म पड़ग्या क अ सगळा तो म्हारीई भासा म बोलर्या ह। बे सगळा ऊक-चूक होगा अर ताजूब म पड़र बोल्या, “अ सगळा जखा बोलर्या ह अ गलिली कोनी के? जणा ओ कंय्यां होयो क आपा सगळा आनै आपणी भासा म बोलता सुणर्या हां। आपा जखा पारसी, मेदि, अर एलामी, मिसोपोटामिआ, यहूदिआ अर कपुदूकिया, पिन्तुस अर एसिया, फरूगिया अर पंफुलिया, मिसर अर साईरिन क सारै पड़बाळा लिबिया का रेह्बाळा। अर आपणा मऊँ क्युंक रोमऊँ आएड़ा मूसापिर हा। जामैऊँ जलमजात यहूदि अर यहूदि धरमनै मानबाळा हां, अर आपणा मऊँ क्युंक करेती अर अरबऊँ बी आएड़ा हीं। पण आपा सगळा अठै परमेसर का ताजूब का कामा की चरचा आपणी खुदकी भासा मई सुणर्या हां।” बे ऊक-चूक होगा अर ताजूब कर आपसरी म बुजबा लाग्या क, “अठै ओ काँई होर्यो ह?” पण क्युंक जणा बिस्वास्या की हसी उडाबा लाग्या अर बोल्या, “अ तो पीएड़ा हीं।” जणा पतरस बा ग्यारा भेजेड़ा चेला क सागै खड़्यो होर जोरऊँ बोलबा लाग्यो, “यहूदिओ अर यरूसलेम का रेह्बाळो मनै खेबा द्‍यो, क अठै काँई होर्यो ह, अर मेरी बातानै गोर लगार सुणो। थे जंय्यां समजर्या हो बंय्यां कोनी ह आ मऊँ कोईसोई कोनी पीएड़ो अर बंय्यां बी हाल तो दिन का नोई बज्या ह। पण आ तो बा भबिस्वाणी ह जखी योएल परमेसर की खेबाळो बोली ही: “‘परमेसर बोलै ह आखरी दिना म, म मेरी पबितर आत्मा सगळा प उतारस्युं। अर थारा छोरा-छोरी परमेसर की बाता बतासी। अर थारा जवान दरसाव देखसी अर बूडा-ठेरा सपना देखसी। अर म मेरा दास दास्यानै बा दिना म मेरी पबितर आत्माऊँ भर देस्युँ। अर बे भबिस्वाणी करसी। म उपर अकास म चमत्कार अर निचै धरती प अचरजभर्या काम करस्युं। बा दिना म लोय, लाय अर धुँआ को बादळ होसी। परबु क पाछो आबा का बि म्हान अर मेमाभर्या दिन क आबाऊँ पेली सूरज काळो अर चाँद लोय की जंय्यां लाल होज्यासी। अर जखा बी परबु को नाम लेवै ह, बानै बचायो ज्यासी।’ “इजरायल का रेह्बाळो, ईसु नासरी क बारां म आ बचनानै सुणो। परमेसर ईसु क हाता सेलाणी-चमत्कार अर अचरजभर्या काम कर आ साबित कर्यो क बो परमेसर कानिऊँ थारै ताँई भेजेड़ो मिनख हो। जंय्यां की थे सगळा जाणो हो। परमेसर आपका मकसद अर आबाळी बातानै जाणबाळा ज्ञानऊँ पेल्याई ते कर्यो, क ईसु थारा हाता म सूप्यो ज्यासी अर थे पापी मिनखा क हाता बिनै पकड़र बिका हाता म किलां ठोकर बिनै सुळी प चढार मार गेरस्यो। पण परमेसर बिनै मोतऊँ ओज्यु जीवा दिओ क्युं क आ होय कोनी सकै ही क मोत बिकै जेवड़ो घाल्या राखती। बि ताँई दाऊद खेवै ह: “‘म सदाई परबुनै मेरै सामै देखूँ हूँ। क्युं क बो मेरै सागै ह। इ ताँई म कोनी डिगुं। इ ताँई मेरो जीवड़ो राजी ह। अर मेरी जबान राजी-खुसी की बात करसी। अर म आस म जिस्युं। क्युं क तू मेरी आत्मानै पताळ म कोनी छोडसी। अर नइ तू तेरा पबितर दासनै कबर म सिड़बा देसी। तू मनै जुग-जुग जीबा को गेलो दिखायो ह। अर तेरी संगत मनै राजी कर देसी।’ “मेरा यहूदि भाई-भाणो सुणो, म थानै आपणा कूणबा का बडका मऊँ राजा दाऊद क बारां म साप-साप बताऊँ हूँ। बो मर्यो अर बिनै गाड दिओ। बिकी कबर हाल ताँई आपणै अठैई ह। बो एक परमेसर की खेबाळो हो। अर बो बि वादानै जाणतो हो जखो परमेसर बिकै सागै कर्यो हो। क परमेसर दाऊद का कूणबा मऊँ एकनै बिकी जंय्यां राजगद्दि प बिठासी। अर दाऊद होबाळी बातानै पेल्याई देखर मसी क मर्या पाछै ओज्यु जीबा की बात बोल दिनी ही। क बिनै पताळ म कोनी छोड्यो जासी अर नइ बिकी काया कबर म सिड़बा देसी। अर इ ईसुनै परमेसर मरेड़ा मऊँ जीवायो, अर इ बात का आपा सगळा गुवा हां। परमेसर ईसुनै उठार आपकै दाया हात बिठायो जखी आदर की सऊँ उची झघा ह। अर परम-पिता का करार गेल बिनै पबितर आत्मा मिली अर बि आत्मानै बो आपणै उपर पूर दिओ। जिनै थे इब देखर्या अर सुणर्या हो। क्युं क दाऊद ईस्बर नगरी कोनी गयो, पण बो खुद बोलै ह, ‘परबु मेरा परबुऊँ बोल्यो; जद ताँई म तेरा दुस्मननै तेरै पगा तळै को पाटो कोनी करद्‍युं मेरै दाया हात कानि बेठ।’ “आ बात म इ ताँई खेऊँ हूँ, क इजरायल का रेह्बाळा आ बात ढंगऊँ जाणज्यावै क जि ईसुनै थे सुळी प चढायो हो। बिनैई परमेसर परबु अर मसी बणायो हो।” अत्ती सुणताई बे पाणी-पाणी होगा अर पतरस अर दुसरा भेजेड़ा चेलाऊँ बुजबा लाग्या क, “यहूदि भाईड़ो इब म्हानै काँई करबो चाए।” जणा पतरस बोल्यो, “थे थारा पापऊँ तौबा करो ईसु मसी का नाम म बतिस्मो लेल्यो जिऊँ थारा पाप धोया जासी। अर थानै पबितर आत्मा को बरदान मिलसी क्युं क ओ करार थारै अर थारा टाबरा अर बा सगळा ताँई ह जखा आंतरै हीं। अर ओ बा सगळा ताँई बी ह जानै परबु आपणो परमेसर आपकै कनै बुलावै ह।” पतरस ओर बी बोळी बाता बोलर बानै चेतायो। अर अरदास कर बोल्यो, “इ कुटिचर पिडी प पड़बाळा न्यायऊँ खुदनै बचाओ।” बोळाजणा बिकी बाता प बिस्वास कर्या अर हात्युहात बतिस्मो ले लिआ, अर बि दिन करीब तीन झार मिनख बाकी टोळी म सामिल होया। अर बे भेजेड़ा चेलाऊँ उपदेस सुणबा, संगती करबा, एक सागै परबुनै याद करबा ताँई रोटी तोड़बा अर अरदास करबा म रमग्या। भेजेड़ा चेला क हाता चमत्कार अर नइ होबाळा काम बी होर्या हा। इ बजेऊँ सगळा ताजूब करता अर परमेसर को डर मानता। सगळा बिस्वास करबाळा एक मन अर एक चित होर संगती करता हा। अर जोक्यु बाकन हो बिनै आपसरी म बाट लेता। बे आपकी जमीन-जायजाद अर चिज-बस्त बेचर जिकी जंय्यां जुर्त होती बिनै बंय्यांई बाट लेता हा। बे रोजकी एक टोळी की जंय्यां मनदर म मिलता, एक-दुसरा का घरा म रोटी तोड़ता। राजी-खुसी अर सिदा मनऊँ एक सागै रळमिल रोटी खाता। अर परमेसर को गुणगान गाता। बे सगळा इ दान दयाऊँ राजी हा। अर जखो बी परमेसर क जरिए छुटकारो पातो, परमेसर बिनै रोजकी बाकी टोळी म जोड़ देतो। पतरस अर यहून्ना दोपारा क तीन बजै मनदर म अरदास करबा ताँई जार्या हा। अर बठै क्युंक मिनख एक जलम का लंगड़ा मिनखनै रोजकी ल्यार मनदर क बारना म बिठा देता। अर बि बारनानै बठै का मिनख “सोवणो बारनो” खेता हा जठै बो मनदर म जाबाळाऊँ भीक माँगतो हो। बो जद पतरस अर यहून्नानै मनदर क मांयनै जाता देख्यो। जणा बो बाऊँ क्युं मिलबा की आस म बाकै सामै हात फिलाया। जणा पतरस यहून्ना क सागै बिपै गोर धर्यो अर बिऊँ बोल्यो, “म्हारै कानि देख।” जणा बो बाऊँ क्युं मिलबा की आस म बाकै कानि आँख्या गाड दिनी। जणा पतरस बिऊँ बोल्यो, “पिसो-टक्को तो मेर कनै आथ कोनी। पण जोक्यु मेर कनै ह बो म तनै जरूर देस्युँ ईसु मसी नासरी का नामऊँ खड़्यो हो अर डोला फिरी कर।” जणा बो बिको दाइणो बावळ्यो पकड़र बिनै खड़्यो कर्यो अर अंय्यां करताई बिका टकणा अर टांगड़ा म सत आग्यो। जिऊँ बो उछळर आपका पगा प खड़्यो होगो अर बाकै च्यारूमेर डोलबा-फिरबा लाग्यो। जणा पाछै बो नाचतो कुदतो अर परमेसर को गुणगान गातो बाकै सागै मनदर म गयो। अर बठै का सगळा मिनख बिनै डोलता-फिरता अर परमेसर को गुणगान गाता देखर पिछाण्गा क ओ तो बोई ह जखो मनदर का सोवणा बारना म बेठ्यो-बेठ्यो भीक माँग्या करतो हो। बिकै सागै जोक्यु होयो बिनै देखर बे सगळा ताजूब म पड़गा। अर बो पतरस अर यहून्ना को हात पकड़्या बाकै सागै हो, जणा लोग ताजूब कर बाकन भागर आया अर बि दरूजा क कनै भेळा होगा जिनै सुलेमान को दरूजो बोल्या करता हा। आ देखर पतरस बा मिनखाऊँ बोल्यो, “अरै इजरायल का रेह्बाळो थे सगळा क्याले ताजूब करो हो। अर म्हानै अंय्यां आँख्या पा'ड़र क्याले देखर्या हो जंय्यां म्हेई इनै म्हारी सक्‍ति अर भगतीऊँ निरोगो कर्या होवां? अब्राहम, इसाक अर याकूब को परमेसर आपणा बाप-दादा को परमेसर अंय्यां कर आपका दास ईसु की मेमा करी ह। जिनै थे अधिकार्यानै पकड़ा दिआ अर जद पीळातुस बिनै छोडबो चातो हो, पण थे बिनै तज दिओ। बो पबितर अर धरमी हो। पण थे बिनै तज दिआ, अर एक हत्यारानै छोडबा की पीळातुसऊँ दरखास्त करी। अर बि जिंदगी देबाळानै मार गेर्यो पण परमेसर बिनै मोतऊँ जिंदो कर दिओ, अर इ बात का म्हें गुवा हा। अर ईसु हाळा नाम प बिस्वास करबाऊँई, ईसु इ मिनख म सत गेर्यो अर बो समुळो निरोगो होगो, जिनै थे सगळा जाणो अर देखो हो। अर यहूदि भाई-भाणो, म जाणू हूँ क थे अर थारा यहूदि नेता जोक्यु बी कर्या बो अणभोळ म कर्या हा। पण इ बातनै परमेसर बोळी पेल्याई परमेसर की खेबाळा क मुंडाऊँ खुवा दिओ हो, क मसी पिड़ा भोगसी जणा परमेसर बानै अंय्यांई पूरी कर्यो। इ ताँई थे थारा पापऊँ तौबा करो अर हियानै ईस्बर कानि लगाओ जिऊँ परमेसर थारा पाप धो देसी। जद थे अंय्यां करस्यो जणा परबु क होतासोता स्यांती को टेम आज्यासी अर परमेसर मसी ईसुनै भेजसी जिनै बो थारै ताँई टाळ राख्यो ह। मसी बि दिन ताँई ईस्बर नगरी म रेह्सी जद ताँई बे सगळी बाता पेली जंय्यां कोनी होज्यावै। जानै परमेसर आपकी खेबाळा पबितर मिनखा क मुंडाऊँ बोळी पेल्याई खुवायो ह। जंय्यां मूसा आपणा बडकाऊँ बोल्यो हो, ‘परबु परमेसर थारै ताँई जंय्यां मनै भेज्यो बंय्यांई एक परमेसर की खेबाळो भेजसी। जखो थारा मालोई होसी। अर बो जोक्यु थानै बोलै थे बा सगळी बातानै मानज्यो। अर जखो बी बिकी कोनी सुणसीक, बिनै परमेसर का मिनखा मऊँ नाकै कर नास कर दिओ ज्यासी।’ अर सेमुएल अर बिकै पाछै आएड़ा सगळा परमेसर की खेबाळा आ दिना क बारां मई बताया हा। अर थेई बा करार का वारिस हो जानै परमेसर आपका खेबाळा क जरिए कर्यो हो। ओ करार थारै ताँई ह जिनै परमेसर थारा बडकाऊँ कर्यो हो जंय्यां बो अब्राहमऊँ करार कर्यो हो क तेरी ओलादऊँ सगळी धरतीनै आसिरबाद मिलसी। अर परमेसर आपका दास ईसुनै टाळर बिनै सऊँ पेली थारै कनै भेज्यो। जिऊँ बो थानै थारा कुगेलाऊँ न्यारो कर आसिरबाद दे सकै।” जद पतरस अर यहून्ना मिनखानै बतार्या हा जणाई याजक, मनदर का सिपाईड़ा को सरदार अर क्युंक सदुकी बठै आया अर बे आ दो चेलाऊँ आखता होगा, क्युं क बे बठै मिनखानै आ सीख देर्या हा क ईसु मर के ओज्यु जिंदो होगो अर ओ इ बात को सबूत ह की मरेड़ा ओज्यु जिज्यासी। जणा बे बानै पकड़र आगला दिन ताँई काळ-कोठड़ी म गेर दिओ क्युं क दिन आथगो हो। पण जत्ता बाकी सुण्या हा बामै बोळाजणा बिस्वास कर्यो जिऊँ बाकी गिणती बढर करीब पाच झार होगी। आगला दिन यहूदि नेता, बडका अर नेम-कायदानै सीखाबाळा यरूसलेम म भेळा होया अर बे याजका म सऊँ परधान म्हायाजक हन्ना, केफा, यहून्ना, सिकन्दर अर परधान याजका का परवार का घणकराक मिनखाऊँ मिल्या। अर बा भेजेड़ा चेलानै आकै सामै हाजिर कर बाऊँ बुजबा लाग्या, “थे ओ काम किका नाम अर किकी सक्‍तिऊँ कर्यो।” जणा पतरस पबितर आत्माऊँ भर'र जुबाब देबा लाग्यो, “ओ यहूदि नेता अर बडको ज आ थे इ लंगड़ा मिनख क सागै होई भलाई क बारां म पुछाताछी करर्या हो क बो कंय्यां निरोगो होयो। जणा थानै अर इजरायल का सगळा रेह्बाळानै ओ बेरो होज्याणो चाए, क ओ मिनख जखो थारी आँख्या क आगै चोखो-भलो निरोगो खड़्यो ह ओ ईसु मसी नासरी का नामऊँ निरोगो होयो ह। ओ बोई ईसु ह जिनै थे सुळी प चढायो हो अर जिनै परमेसर मर्या पाछै ओज्यु जीवायो हो। ओ बोई ईसु ह जिकै बारां म सास्तरा म मंडर्यो ह की, ‘ओ बो भाठो ह, जिनै मिस्तरी ख्याई जोगो कोनी जाण्यो, पण बोई कूणा को भाठो होयो।’” “ईसु क सिवाय आपानै पापऊँ कोईबी कोनी बचा सकै। अर इ धरती प अंय्यां को दुसरो नाम आथई कोनी जखो मिनखानै बचा सकै। क्युं क परमेसर मिनखानै बचाबा ताँई ईसुनैई भेज्यो ह, अर बोई आपानै बचा सकै ह।” जद पंचानै ओ बेरो पड़्यो क पतरस अर यहून्ना दोन्यु कम पढ्या-लिख्या आम आदमी हीं जणा बे बाकी हिमत देखर ताजूब म पड़गा। अर पाछै बानै बेरो पड़्यो क अ दोन्यु ईसु क सागै रेह्ता हा। पतरस अर यहून्ना क आगै बाकी पावली कोनी चाली क्युं क जखो निरोगो होयो हो बो मिनख बठैई खड़्यो हो। जणा बे बानै पंचायतऊँ बारनै भेज दिआ अर आपसरी म बतळाबा लाग्या क, “आपा आकै सागै काँई कर सकां हां। क्युं क यरूसलेम का सगळा जणा जाणै ह क आकै हाता नइ होबाळो चमत्कार होयो ह अर बिनै आपा अनदेख्यो कोनी कर सकां। पण आ बात ओर नइ फेलै इ ताँई आपा आनै धमकार छोड देवां क बे आईंदा ईसु क नाम की चरचा कोईसई नइ करीं।” जणा बे बानै मांयनै बुलार आदेस दिआ, “ईसु का नामऊँ नइ तो कोईनै क्युं बतळाज्यो अर नइ बिका नामऊँ सीखाज्यो।” पण पतरस अर यहून्ना बानै जुबाब दिओ, “इ बात को थेई न्याय करो क परमेसर की नजर्या म काँई चोखो रेह्सी थारी बात मानबो नहिस परमेसर की? क्युं क आ तो होय कोनी सकै क जोक्यु म्हें देख्यो अर सुण्यो ह बिनै कोनी खेवां।” जणा पंच बानै सूल चेतार छोड दिआ, अर बानै सजा देबा को गेलो कोनी लाध्यो, क्युं क जोक्यु होयो हो बिकी बजेऊँ लोग परमेसर को गुणगान गार्या हा। अर जि मिनख प ओ निरोगो होबा को चमत्कार होयो हो बो चाळिस क पार हो। बठैऊँ छुट-छुटार पतरस अर यहून्ना सिदा आपकी टोळी म जार बानै बे बाता बताई जखी परधान याजक अर यहूदि नेता बानै बोल्या हा। आ सुणताई बे सगळा बिस्वासी एक सागै एक चित होर परमेसरऊँ अरदास करबा लागगा क, “ओ मालिक तूई अकास अर धरती, समदर अर जोक्यु आमै ह बानै बणायो ह। अर थे थारी पबितर आत्माऊँ म्हारा कूणबा का बडका अर थारा दास दाऊद क मुंडा बुलवायो हो, ‘अ जखा परमेसरनै नइ ध्यारबाळा हीं बे क्याले झाळ्या भर्या? अर क्याले मिनख बेकार की बाता घड़ीं हीं? धरती का राजा अर राज करबाळा आपसरी म एको कर परबु परमेसर अर बिका अभिसेक करेड़ा मसी क सामै होगा।’ सचमई थारा अभिसेक करेड़ा पबितर दास ईसु क खिलाप हेरोद अर पिन्तुस को पीळातुस इ नगरी क मांय इजरायल का मिनखा अर गैर-यहूदिआ क सागै कांदाऊँ कांदो मिलार खड़्या होगा। जोक्यु तू तेरी सक्‍ति अर इंछ्याऊँ पेलीई ते कर राख्यो हो, बिनैई बे पूरो कर्या। इब परबु जी थे गोर धरो अर थारा दासानै हिमत क सागै थारा बचनानै सुणाबा की सक्‍ति द्‍यो। थारा पबितर दास ईसु का नामऊँ मिनखानै निरोगा करबा ताँई, नइ होबाळा काम अर चमत्कार करबा ताँई थारा हात बढाओ।” बाकै अरदास करताई बा झघा जठै बे भेळा होर्या हा हालबा लागगी अर बे सगळा पबितर आत्माऊँ भरगा अर हिमत क सागै परमेसर का बचनानै बोलबा लागगा। बिस्वास्या की टोळी एक हिया अर एक बिचार की ही जोक्यु बाकन होतो बे बिनै आपसरी म बाट लेता हा, अर कोईबी तेरी मेरी कोनी करतो। भेजेड़ा चेला हिमतऊँ ईसु क ओज्यु जी उठबा की गुवाई देता रिह्या, अर बा सगळा प परमेसर की बोळी दया अर आसिरबाद हो। बाकी टोळी म कोईबी गरीब कोनी हो क्युं क जिकै कनै जमीन अर घर हा बे बानै बेचर बिकेड़ी चिजा का दाम ल्यार भेजेड़ा चेला क हाता म देता हा। अर बे बा दामानै जिकी जंय्यां जुर्त होती बामै बंय्यांई बाट देता हा। जणा बामै युसूफ नाम को लेवी हो जखो साईपरस को रेह्बाळो हो। जिनै भेजेड़ा चेला बरनाबास खेता हा, जिको मतबल हिमत देबाळो होवै ह। बिकन जमीन को एक टुकड़ो हो जिनै बो बेचर बिका दाम भेजेड़ा चेला क हाता म ल्यार दे दिआ। बठै एक मिनख हो जिको नाम हनन्या हो अर बिकी लूगाई सफिरा नाम की ही बे दोन्यु मिलर आपकी जमीन को एक टुकड़ो बेच्यो। जणा बे दोन्यु जणा मिलर बि जमीन का रिपीआ मऊँ क्युंक थोड़ा घणा रिपीआ आपकै कनै राखलिआ अर बाकी का लेज्यार भेजेड़ा चेला क आगै कर दिआ। जणा पतरस बिऊँ बोल्यो, “हनन्या तेरा मन प सेतान कंय्यां कबजो कर लिओ क तू जमीन क बिकबाऊँ मिल्या पिसा म सक्यु राख'र पबितर आत्माऊँ झूठ बोलगो। बेचबाऊँ पेली इ जमीन प तेरोई हक हो अर बिकबा क पाछै बी बिका दाम तेराई हा। जणा पाछै तू तेरा मन म आ बात क्याले घड़ीं? अंय्यां कर तू मिनखाऊँ नइ पण परमेसरऊँ झूठ बोल्यो ह।” आ सुणताई हनन्या पड़गो अर पड़ताई पिराण तज दिआ। अर जत्ता बी आ सुणी अर देखी बा सगळा म डर बड़गो। अर क्युंक जवान मोट्यार आगै आर बिकी लासनै कफन म लपेटी अर बारनै लेज्यार बिनै गाड दिओ। करीब तीनेक घंटा पाछै बिकाळी लूगाई बी बठै आई अर जोक्यु बठै होयो बा बाता को बिनै कोनी बेरो हो। जणा पतरस बिनै बुज्यो, “तू बता थे बा जमीन अत्ता मई बेची ही के?” बा बोली, “हाँ, अत्ता मई बेची ही।” जणा पतरस बिऊँ बोल्यो, “थे दोन्यु परबु की पबितर आत्मानै बिचासबा ताँई क्याले सोची? इब देख तेरा मोट्यारनै गाडबाळा बारना मई खड़्या हीं अर बे तनै बी लेज्यासी।” जणा बा जदकी जद बिका पगा म पड़गी अर पड़ताई मरगी। जवान मोट्यार मांयनै आया जणा बा बानै मरेड़ी लाधी। जणा बे बिनै उठार बिका मोट्यार क कनैई बिनै बी गाड दिओ। सगळी बिस्वासी मंडळी अर जत्ता बी इ बातनै सुणबाळा हा, बा सगळा म इ बात को डर बड़गो। भेजेड़ा चेला क हाता बोळी सेलाणी अर चमत्कार मिनखा म होर्या हा अर बे एक चित होर सुलेमान का बरिंडा म भेळा होता हा। बाकै सागै होबा की हिमत कोई मई कोनी ही पण इकै बावजुद बी लोग बाकी बडाई करता। अर बठिनै परबु प बिस्वास करबाळा लूगाई अर मिनख रोजकी बाकी टोळी म मिलता जार्या हा। भेजेड़ा चेला जोक्यु कर्या हा बिको नतिजो ओ होयो क लोग रोगलानै सड़का प खाट अर बिछावणा बिछार बापै सुवा देता क्युं क जद पतरस बठिकी जावै जणा बिकी छाया बापै पड़ सकै। यरूसलेम क आस-पास की नगर्याऊँ बी रोगला अर सूगली ओपरी बलाय रळेड़ा मिनखानै लेर आबा लाग्या। अर बे सगळा निरोगा होता हा। जणा म्हायाजक अर बाकै सागै का सदुकी पंथहाळा मिनख भेजेड़ा चेला प जळबा लागगा। जिकै चलतै बे बाकै खिलाप क्युं कारवाई करबा की सोची। अर बे बा भेजेड़ा चेलानै पकड़र कोठड़ी म बंद करवा दिआ। पण जंय्यांई रात होई जणा ईस्बर नगरी दुत आर बि कोठड़ी का कुआड़ानै खोल दिओ अर बा भेजेड़ा चेलानै बारनै लेज्यार बाऊँ बोल्यो, “मनदर म जार खड़्या होवो अर इ नया जीवन की सगळी बाता मिनखानै सुणाओ।” जणा बे बिकी बात मानर भागपाट्याई मनदर म जा लिआ अर बठै सीख देबा लागगा। बठिनै म्हायाजक अर बिकाळा साती, इजरायल म रेह्बाळा सगळा बूडा-ठेरा की पंचायत बुलार बानै भेळा कर्या अर कोठड़ी म खुवा भेज्यो क बानै पंचायत क सामै हाजिर करो। जणा सिपाईड़ा बानै ल्याबा ताँई कोठड़ी म गया। पण बे बानै बठै कोनी लाध्या, जणा सिपाईड़ा ओटा आर इ बात की खबर पंचायतनै दि। अर कह्या, “म्हें कोठड़ी का बारना म पुग्याक जणा म्हानै बारना प कसर ताळो लागेड़ो लाध्यो अर पेरेदार बी पेरो देताई लाध्या पण जंय्यांई म्हें ताळो खोलर मांयनै बड़्याक जणा म्हानै बठै कोई कोनी लाध्यो।” मनदर की रूखाळी करबाळा अर परधान याजक आ बात सुणर चकर म पड़ग्या क आखीरक बाकै सागै होयो तो होयो काँई? अत्ता मई कोई आर बानै बतायो, “थे जानै कोठड़ी म बंद कर्या हा बे तो मनदर म मिनखानै सीख देर्या हीं।” जणा मनदर की रूखाळी करबाळा सिपाईड़ा को सरदार आपहाळी सेना का क्युंक सिपाईड़ा क सागै गयो अर भेजेड़ा चेलानै बठैऊँ प्यारऊँ लिआयो। क्युं क बे मिनखाऊँ डरता हा इ ताँई बठै जोर-जबरदस्ती तो चाल कोनी सकै ही क कदै बे भाठा नइ बगाबा लागज्या। बे बानै ल्यार बडी पंचायत क सामै हाजिर कर दिआ, जणा म्हायाजक बाऊँ बोल्या, “म्हें थानै ठोक बजार आदेस दिन्यो हो क, बि मिनख का नाम की सीख मना दिज्यो, पण थारै काना प तो जुंई कोनी रिंगी। अर थे सगळा यरूसलेमनै बिकी सीखऊँ भर दिओ, थे काँई चाओ हो? बिको लोय म्हारै माथा मंढबो चाओ हो के?” जणा पतरस अर दुसरा भेजेड़ा चेला बोल्या, “मिनखऊँ पेली परमेसर की बातनै मानबो जरूरी ह। म्हारा बाप-दादा को परमेसर थारै हाता सुळी प चढार मार्या गया ईसुनै मोतऊँ ओज्यु जीवायो। अर परमेसर बिनैई आपका दाया हात कानि उचा पद प बिठार राजकुमार अर बचाबाळो बणायो ह। बो इजरायल का मिनखानै पापऊँ मन फेरबा को मोको अर पाप की माफी देसी। अर आ बाता का गुवा म्हें हा, बंय्यांई पबितर आत्मा बी गुवा ह जिनै परमेसर बिका मानबाळानै दि ह।” आ सुणर पंचायत का सदस्य लाल-ताता होर बानै मारबा की सोची। पण बामै गमलिएल नाम को एक फरिसी जखो यहूदि नेम-कायदा सीखाबाळो हो अर सगळा मिनख बिकी ईज्जत करता हा। बो पंचायत म खड़्यो होर बा चेलानै चिनेक देर बारनै लेज्याबा ताँई हुकम दिओ। जणा पाछै बो बोल्यो, “इजरायल का मिनखो, थे जखो आ मिनखा क सागै करबा जार्या हो बो सोच समजर करज्यो। थानै याद होवै तो क्युंक बरसा पेली थियूदास आ खेतो होयो चमक्यो क म बी क्युं हूँ अर करीब च्यार सो मिनख बिकै गेल होलिआ, पण बो मार्यो गयो अर जत्ता बिनै मानता हा बे सगळा खिंडगा अर बिको आनदोलन मिटगो। अर बंय्यांई नाम दरज कराबाळा दिना म गलिली यहूदा चमक्यो अर क्युंक मिनखानै बो बी आपकै गेल कर्यो पण बो बी मिटगो अर जत्ता बिनै मानता हा बे बी खिंडगा। जणा म खेऊँ हूँ इमै टांग मना अड़ाओ अर आ मिनखानै खुला छोड द्‍यो क्युं क ओ काम ज मिनख कानिऊँ ह जणा अ सगळा मतैई मिट ज्यासी। पण ज इमै परमेसर की मरजी ह जणा थे आनै कोनी रोक सकोगा। कदै अंय्यां नइ होज्या क थे परमेसरऊँ लड़बाळा बाज ज्याओ।” जणा बे बिकाळी बात मानर बानै बुलवाया अर बाकै तड़ा पड़वार आ खेर छोड दिआ, अर आदेस दिओ क, “आईंदा इ ईसु नामऊँ कोई बात मना करज्यो।” बे राजी-खुसी पंचायतऊँ चलेगा क्युं क ईसु नामऊँ परमेसर बानै पिड़ा अर बेजती भोगबा जोगा समज्या। बे रोजकी मनदर अर मिनखा क घरा म सीखाता अर चोखा समचार को परचार करता कोनी थक्या क ईसुई मसी ह। बा दिना म जद परमेसरनै मानबाळा बिस्वास्या की गिणती बढरी ही, जणा यूनानी रिती-रिवाजानै मानबाळा यहूदि इबरानी रिती-रिवाजानै मानबाळा यहूदिआ प बड़बड़ाबा लाग्या क म्हारी खाली होईड़ीया क सागै रोजकी बरतबाळी चिजा बाटबा म दोगलचारो होर्यो ह। जणा बे बारा भेजेड़ा चेला सगळा बिस्वास्यानै एक सागै बुलार बोल्या, “म्हारै ताँई ओ चोखो कोनी क म्हें परमेसर का बचन को परचार छोडर थारै ताँई खाबा-पीबा की चिजा को बाटो करां। इ ताँई यहूदि भाई-भाणो, थारै मऊँ थे सात चोखी पेठहाळा मिनखानै टाळल्यो जखा म पबितर आत्मा अर बुदी होवै अर बानै इ काम की जिमेदारी आपा दे देस्यां। अर म्हें म्हारो सगळो टेम अरदास करबा अर बचन को परचार करबा अर सीखाबा म लगास्यां।” भेजेड़ा चेला की आ बात सगळी बिस्वासी मंडळीनै चोखी लागी। जणा बे सतफनुस नाम का एक मिनखनै जखो बिस्वास अर पबितर आत्माऊँ भरेड़ो हो, अर फिलीप, परखोरस, निकानोर, तिमोन, परमिनास अर अंताकीया को रेह्बाळो निकोलस जखो यहूदि धरम पंथ म रळगो हो, आनै टाळ लिआ। अर आनै भेजेड़ा चेला क सामै लेज्यार खड़्या कर दिआ जणा बे बापै हात धर'र अरदास कर दिनी। अंय्यां यरूसलेम म परमेसर को बचन दिन-दिन फेलतो गयो। अर परमेसरनै मानबाळा की गिणती दिन-दिन बढती गई, अर घणकराक याजक बी ईसु प बिस्वास करबा लाग्या। सतफनुस परमेसर की दया अर बिकाळी ताकतऊँ भरेड़ो हो अर मिनखा म बडा-बडा चमत्कार अर अचरजभर्या काम कर्या करतो हो। पण अजाद बिस्वासी मंडळी नाम की एक यहूदि अरदास करबाळी झघा का क्युंक यहूदि मिनख जखा कुरेन, सिकन्दरिआ, कलिकीया नगर्याऊँ अर एसिया परदेसऊँ आएड़ा हा, बे बिकै सागै जिरै करबा लाग्या। पण सतफनुसनै जखी पबितर आत्मा दियड़ी ही अर जि बुदीऊँ बो बाता कर्या करतो जणा बे बिकै सामै कोनी टिक सक्या। जणा बे क्युंक मिनखानै बिकै खिलाप भड़कार खुवायो क, “म्हें इनै मूसा अर परमेसर की बुराई करता सुण्या हा।” अंय्यां कर बे यहूदि मिनखा, यहूदि नेता अर सास्तरानै सीखाबाळा का कान भर दिआ जिऊँ बे भड़कग्या अर चिड़गा अर बिनै पकड़र यहूदि पंचायत म लेग्या। अर बे झूठी गुवाई देर बोल्या क, “ओ मिनख सदाई पबितर मनदर अर मूसा का नेम-कायदा क खिलाप बोलै ह। म्हें इनै आ खेता सुण्या हा क नासरत को ईसु इ मनदरनै ढाह देसी अर मूसा का दियड़ा रिती-रिवाजानै बदल देसी।” जणा पंचायत म बेठ्या सगळा मिनख आपकी आँख्या बिका मुंडा प गाड दिनी अर बानै बिको मुंडो ईस्बर नगरी दुत की जंय्यां दिख्यो। अर म्हायाजक बिऊँ बुज्यो, “अ बाता सची ह के?” जणा सतफनुस बोल्यो, “यहूदि भाई-भाणो अर मेरा बाप समान बडको मेरी सुणो। थानै बेरो होवै तो जद आपणो बाप अब्राहम हारान देस म बसबाऊँ पेली मिसोपोटामिआ म हो। जणा मेमाऊँ भरेड़ो परमेसर बिकै सामै परगट होयो। अर बिनै बोल्यो, ‘तू तेरा देस अर तेरा कूणबानै छोड-छाडर बि भौम म चल्योजा जखी म तनै दिखास्युं।’ जणा बो परमेसर क कह्या गेल कसदिआ का देसनै छोडर हारान देस म चलेगो अर बिका बाप क मर्या पाछै परमेसर बिनै इ देस म ल्यायो जिमै आज थे रेहर्या हो। पण परमेसर बिनै बापोत म क्युंई कोनी दिओ अठै ताँई पग म्हेलबा की झघा बी कोनी दिनी। पण बिऊँ करार कर्यो क, ‘म तनै अर तेरै पाछै तेरा कूणबानै ओ देस देस्युँ।’ जद परमेसर अब्राहमऊँ ओ करार कर्यो हो बि टेम बिकै कोई आस-ओलाद कोनी ही। अर परमेसर बिऊँ अंय्यां बोल्यो, ‘तेरी ओलाद दिसावर म च्यार सो बरस ताँई गुलामी म रेह्सी अर बठै का मिनख बानै दिन घालसी। तेरा टाबरानै दिन घालबाळा देस को म न्याय करस्युं जणा पाछै बे बि देसऊँ अजाद होर अठै आर मेरी भगती करसी।’ परमेसर अब्राहमऊँ बोल्यो क, ‘आपणा बिच होयड़ा करार की सेलाण आ ह की तेरा कूणबा का सगळा छोरा की सुन्नत होणी चाए।’ इ बजेऊँ अब्राहम इसाक का जलम क पाछै आठवा दिन बिकी सुन्नत करी। अर अंय्यांई इसाक याकूब की अर याकूब आपका बारा छोरा की सुन्नत करी जखा आपणा बारा गोता का बाप-दादा हा। आपणा गोता का बाप-दादा आपका भाईड़ा युसूफ प जळता हा। जणा बे बिनै मिसर देस का मिनखानै बेच दिआ पण परमेसर बिकै सागै हो। अर बो बिनै सगळी तुम्ताऊँ बचायो। परमेसर बिनै बुदी देर मिसर का राजा की नजर्या म उठायो, जिऊँ राजा बिनै आपको खास आदमी बणा लिओ, जणा इब राज-काज की अर राज महल की सगळी जिमेदारी बिनैई सूप दिनी। इकै पाछै बठै मिसर अर कनान देस म काळ पड़्यो जिऊँ तराई-तराई माचगी। अर आपणा बडकानै खाबा का लाला पड़गा। अर जद याकूब क काना म आ बात पड़ी क मिसर म अनाज ह जणा बो पेली आपणा बाप-दादा जखा बिका बेटा हीं बानै दाणा का जोगाड़ म मिसर भेज्यो। अर जद बे दुसर क मिसर आया जणा युसूफ आपका भायानै आपकी पिछाण बताई अर मिसर का राजानै बी जणाई बिका परवार का बारां म बेरो पड़्यो। जणा युसूफ आपका बाप याकूब अर आपका कूणबानै जखा कुल मिलार पिच्चेतर जणा हा, बा सगळानै मिसर बुलवालिआ। जणा याकूब अर बे सगळा मिसर गया, अर बो अर आपणा बाप-दादा बठैई पिराण तज्या। बठैऊँ बाकी हाड्यानै सेकेन ल्यार बि कबर म धर्या जिनै अब्राहम हमोर का बेटाऊँ मोल ली ही। अर जद अब्राहम क सागै परमेसर का करेड़ा करार क पूरो होबा को टेम आयो जणा मिसर म आपणा मिनखा की गिणती बोळी बढगी ही। जणा पाछै मिसर म दुसरो राजा होयो जखो युसूफनै कोनी जाणतो हो। बो आपणा मिनखा को फाईदो उठार बानै बोळो दिन घाल्यो, जिऊँ आपणा बडका आपका टाबरानै मरबा ताँई बारनै बगाबा प बेबस होगा। अर बा दिना मई मूसा को जलम होयो, अर बो परमेसर क सामै बोळो सोवणो हो। अर तीन म्हेना ताँई बिका माँ-बाप बिनै घर मई पाळ्यो-पोस्यो। अर जद बिका माँ-बाप बिनै बारनै छोड्याया हा जणा बिनै मिसर का राजा की छोरी उठार आपकै सागै लेगी अर बिनै आपको टाबर कर पाळबा लागगी। अर बिनै मिसरी मिनखा की सगळी बिद्‍या सीखाई गई ही, अर बो खेबा अर काम करबा म सागेड़ो होगो। जद बो चाळिसेक बरस को होयो जणा बिको मन आपका इजरायल का यहूदि भाई-भाणाऊँ मिलबा को कर्यो। जणा बो आ देख्यो क एक मिसरी मिनख एक इजरायली मिनख क सागै बुरो बरताव बरतर्यो ह, जणा बो बिनै बचायो अर बि मिसरी मिनखनै मार बिको बदलो लिआ अर बो आ देखी क इब बिका यहूदि भाई-भाण आ जाण ज्यासी क परमेसर बिनै बाका छुटकारा ताँई भेज्यो ह, पण बाकै क्युंई पलै कोनी पड़ी। आगलै दिन बो दो इजरायली यहूदि भाईड़ानै घुळता देख्यो जणा बो बानै छुटाबा ताँई बोल्यो थे तो दोन्यु इजरायली हो जणा पाछै आपसरी म क्युं घुळो हो। पण बामैऊँ जखो बुरो बरताव बरतै हो बो मूसा क धको मार बोल्यो, ‘तनै म्हारै प कूण परधान अर न्याय करबाळो बणायो ह? काल जंय्यां बि मिसरी मिनखनै मार्यो हो बंय्यांई तू मनै बी मारबो चावै ह के?’ आ सुणर मूसा भागर मिधान देस म बसगो, जठै बिकै दो टाबर होया। चाळिस बरस ओर बितगा जणा बिनै सीनै डूँगरी क कनै उजाड़ म एक बळती झाड़ी की आँच म ईस्बर नगरी दुत दरसाव दिओ। आ देख ताँई मूसा ऊक-चूक होगो, जणा ओर सूल देखबा ताँई झाड़ी क कनै गयो, जणा बिनै परबु की उवाज सुणी, ‘म तेरा बाप-दादा को परमेसर हूँ, म अब्राहम, इसाक अर याकूब को परमेसर हूँ,’ आ सुणताई मूसा तो थर-थर धुजबा लाग्यो अर बिकी क्युं देखबा की हिमत कोनी होई। परबु बिऊँ बोल्यो, ‘पगा मऊँ खुसड़ा काड दे क्युं क जि धरती प तू खड़्यो ह बा पबितर झघा ह। म मेरा मिनख, जखा मिसर म हीं बाकी दुरदसा देख्यो हूँ अर बाको बार-घोड़ो सुण्यो हूँ, जणाई तो म बानै बठैऊँ छुटाबा ताँई तळै उतर्यो हूँ, इब तू आज्या म तनै मिसर म भेजस्युं।’ ओ बोई मूसा ह जिनै बे ओ खेर भगा दिओ हो क तनै कूण म्हारै प परधान अर न्याय करबाळो बणायो ह? बिनैई परमेसर बि ईस्बर नगरी दुत क जरिए जखो बिनै झाड़ी म दरसाव दिओ हो, राजकरबा अर अजाद करबा ताँई भेज्यो। ओ बोई मूसा ह जखो बानै मिसर देस, लाल समदर अर बि उजाड़ म चाळिस बरसा ताँई सेलाणी-चमत्कार दिखार बानै लिआयो। ओ बोई मूसा ह जखो इजरायल का मिनखानै बोल्यो हो, ‘परमेसर थारा यहूदि भाया मऊँ मेरी जंय्यां को परमेसर की खेबाळो भेजसी।’ ओ बोई ह जखो उजाड़ म इजरायली मिनखा की मंडळी क सागै हो, जिऊँ सीनै डूँगरी प ईस्बर नगरी दुत बतळायो हो अर बो आपणा बाप-दादा क सागै बी हो। अर जिनै आपणा ताँई परमेसरऊँ जीवन देबाळा बचन मिल्या। पण आपणा बाप-दादा बिकी कोनी मानी, अर बे बिनै तज'र आपका मननै बदलर ओज्यु मिसर जाबो चावै हा। अर हारुणऊँ बोल्या, ‘म्हारै ताँई अंय्यां को देवता बणा जखो म्हारै आगै-आगै चालै, क्युं क जखो मूसा म्हानै मिसर देसऊँ ल्यायो म्हें कोनी जाणा क बिकै सागै काँई होयो?’ बा दिना म बे आप ताँई एक गाय का बाछ्या की मूरती घड़र धर लिनी अर बिकै बलि चढार खुदका हाताऊँ बणाएड़ी मूरती प खुसी मनाई। जणा परमेसर बाऊँ मुंडो फेर लिओ, अर बानै आसमान का चाँद-तारानै धोकबा ताँई छोड दिओ जंय्यां की परमेसर की खेबाळा की पोथ्या म मंडर्यो ह, ‘ओ इजरायल का कूणबा का मिनखो, थे उजाड़ म चाळिस बरसा म मनै ज्यानबर अर चढावो चढाया हो के? पण थे तो मोलेक देवता का तम्मू अर तारा देवता रिफान की मूरतीनै सागै लिआ हांडता हा जखी मूरत्यानै थे धोकबा ताँई बणाई ही, इ ताँई म थानै बेबिलोन क परै लेज्यार गुलामी म देस्युँ।’ बि उजाड़ म परमेसर को तम्मू जिमै आपणा बापदादा परमेसरऊँ अरदास करता हा बो बी आपणा बाप-दादा क सागै हो। अर ओ ठिक बंय्यांई हो जंय्यां परमेसर मूसानै दिखार बिनै बणाबा ताँई ओडायो हो। इकै पाछै आपणा बाप-दादानै ओ तम्मू बाका बापदादाऊँ मिल्यो अर जद बे यहोसू क सागै अठै आया अर बिकाळी निगा म बे बा जात्याऊँ इ देसनै ले लिओ हो, जानै आपणा बाप-दादा क सामैऊँ परमेसर भगा दिओ हो, अर बो तम्मू दाऊद क जमाना ताँई अठैई रिह्यो। परमेसर दाऊद प दया करी, जणा बो बिऊँ इजरायल का मिनखा ताँई परमेसर को बडो अरदास घर बणाबा की अरदास करी। पण परमेसर का मनदरनै राजा सुलेमान बणायो हो। पण परम-परधान परमेसर तो हाताऊँ बणाएड़ा मनदर म कोनी रेह्‍वै। जंय्यां की परमेसर की खेबाळा बोल्यो ह, परबु खेवै ह, ‘ईस्बर नगरी मेरो सिंघासन अर आ धरती मेरा पगा तळै की चोकी ह, थे मेर ताँई कंय्यां को घर बणास्यो? धरती प अंय्यां की कोई झघा ह के जठै म अराम कर सकूँ? अ सगळी चिजा मेरीई तो बणाएड़ी ह।’” आ खेर सतफनुस बानै सुणाबा लाग्यो, “परमेसरनै कोनी मानबाळा अर बिका बचनानै नइ सुणबाळा ढिट मिनखो, थे सदाई थारा बाप-दादा की जंय्यां पबितर आत्मा को बिरोद करता आया हो। अंय्यां को कोई परमेसर की खेबाळो होयो हो के जिनै थारा बाप-दादा कोनी सताया हो? बे बा परमेसर की खेबाळानै मार गेर्या जखा बि परमेसर का धरमी दास क आबा को समचार पेल्याई दिआ करता हा। अर ठिक बंय्यांई थे बी बिनै धोकाऊँ पकड़ाबाळा अर मारबाळा होया। थानै ईस्बर नगरी दुताऊँ नेम-कायदा का हुकम तो मिलग्या पण थे आनै कोनी मानो।” अ बाता सुणताई बे सतफनुस प लाल-ताता होगा, अर आँख्या का'डर जाड़ भीचबा लागगा। पण बो तो पबितर आत्माऊँ भर'र ईस्बर नगरी कानि देख्यो, जणा बो परमेसर की मेमा का तेज अर परमेसर क दाया हात कानि ईसुनै खड़्यो देखर बोल्यो, “सुणो म ईस्बर नगरीनै खुली अर मिनख का बेटानै परमेसर क दाया हात कानि खड़्यो देखर्यो हूँ।” आ सुणताई बे आपका कान बंद कर लिआ अर जोरऊँ चिलाटी घालर एक सागै बिपै टूटर पड़्या। बे बिकै सागै धका-मुकी करताई बिनै नगरी क बारनै लेग्या अर बिपै भाठा बगाबा लाग्या। अर बिकै खिलाप हाळा गुवा आप-आपका गाबा साऊल क पगा म म्हेल दिआ। अर बे बिपै भाठा बगाबा लागर्या हा बि टेमई बो परमेसरऊँ आ खेतो अरदास करबा लाग्यो, “ओ परबु ईसु मेरा पिराणानै थारै कनै बुलाल्यो।” इकै पाछै बो गोडावाणी पड़्यो अर जोरऊँ बोल्यो, “परबु ओ पाप आपै मना मंढो।” आ खेर बो पिराण तज दिआ। सतफनुस की मोतनै साऊल सई बतायो। बि दिनऊँई बिस्वासी मंडळ्या प तुमत आ पड़ी जिऊँ ईसु का भेजेड़ा चेलानै छोडर बाकी सगळा बिस्वासी यहूदिआ अर सामरीया म बिखरगा। बामैऊँ क्युं क भगत सतफनुसनै गाड्या अर बिकै मरबा को म्हातम मनायो। अर साऊल हो जखो बिस्वासी मंडळ्यानै उजाड़तो फिरतो हो अर बो घरा मऊँ काड-काडर घिसर मोट्यार-लूगायानै जेळ म बंद करबा लाग्यो। अर दुसरी कानि बे बिखरेड़ा बिस्वासी जठै बी गया बठैई ईसु को चोखो समचार सुणाबा लागगा। फलिपूस सामरीया नाम की नगरी म जार बठै ईसुई मसी ह इकै बारां म परचार करबा लाग्यो। फलिपूस की बातानै सुणर अर बिका सेलाणी चमत्कारानै देखर लोग बिकी बाता प गोर धर्या। क्युं क बिका हाताऊँ बोळाजणा मऊँ सूगली ओपरी बलाया बार घालतीई निकळै ही। अर बोळा भाळ भेयड़ा अर लंगड़ा बिका हाताऊँ निरोगा होया। इ बजेऊँ नगरी का मिनख बोळा राजी होया। बि नगरी म समोन नाम को एक मिनख हो, जखो मिनखानै जादू दिखार ताजूब म गेर देतो। अर खुदनै बडो आदमी बतातो। छोटाऊँ लेर बडा ताँई सगळा बिकी बाता प गोर धरता हा, अर बिका बारां म खेता हा क, “बो परमेसर की बा सक्‍ति ह जखी बोळी तगड़ी खुवावै ह।” क्युं क बो बोळा दिना ताँई बा मिनखानै जादू दिखार ताजूब म गेर राख्यो हो इ ताँई मिनख बिकाळी बाता प गोर धरता हा। पण जद फलिपूस मिनखानै परमेसर का राज अर ईसु मसी का नाम को चोखो समचार सुणायो जणा बे बिकी बाता प बिस्वास कर्या अर सगळा मोट्यार लूगाई बतिस्मो लिओ। आ देखर समोन खुदबी बिकी बाता प बिस्वास कर्यो अर ईसु मसी का नामऊँ बतिस्मो लेर बिकै गेल होलिओ, अर बो बा बडा-बडा सेलाणी-चमत्कारा अर अचरजभर्या कामानै देखर चोरंगो होज्यातो हो। अर जद ईसु का भेजेड़ा चेलानै ओ बेरो पड़्यो क सामरीया का रेह्बाळा परमेसर का बचनानै मानबा लागगा हीं जणा बे पतरस अर यहून्नानै बाकन भेज्या। अर बे बठै जार बा सगळा ताँई अरदास करी क बा सगळानै पबितर आत्मा मिलै। क्युं क हाल ताँई बे परबु ईसु का नामऊँ बतिस्मोई लिआ हा, बामैऊँ कोईसानैई परमेसर को आत्मा कोनी मिल्यो हो। जणा पतरस अर यहून्ना बापै हात धर्या अर बानै पबितर आत्मा मिलगो। समोन आ देख्यो क बाकै हात धरबाऊँ मिनखानै पबितर आत्मा मिल जावै ह जणा बो बाकै सामै रिपीआ धर'र बोल्यो, “अल्यो रिपीआ अर आ सक्‍ति मनै बी द्‍यो जिऊँ म बी जिपै हात धरूँ बिनै पबितर आत्मा मिलै।” जणा पतरस बोल्यो, “तेरा रिपीआ बी तेरै सागै नास होज्यावै क्युं क तू परमेसर का बरदाननै रिपीआऊँ मोल लेबो चावै ह। इ चिज म तेरी कोई पाँती कोनी क्युं क परमेसर ताँई तेरै हिया म पेटा पाप ह। इ ताँई तू बुरा कामाऊँ तौबा कर अर परबुऊँ अरदास कर जिऊँ तेरा हिया का बुरा बिचार माफ होज्यासी। क्युं क तू बळोकड़ो ह अर पाप म उळजर्यो ह।” जणा समोन बाऊँ बोल्यो, “थे मेर ताँई अरदास करो क थारा मुंडाऊँ निकळेड़ी कोईबी बात मेर प नइ पड़ै।” जणा पाछै बे आपकी गुवाई देर अर परमेसर को बचन सुणार यरूसलेम हाळा गेला म सामरीया का कई गाँवा म ईसु को उपदेस सुणाता ओटा यरूसलेम पुगग्या। जणा पाछै परमेसर को एक ईस्बर नगरी दुत फलिपूसनै आर बोल्यो, “खड़्यो हो अर दिखणाद कानि बि सुन्ना गेला म जा जखो यरूसलेमऊँ गाजा नगरी म जावै ह।” जणा बो त्यार होर चाल पड़्यो अर बि गेला मई कूस देस को एक मिनख भगती कर यरूसलेमऊँ आर्यो हो जिनै हिंजड़ो बणायो गयो हो अर ओ कूस देस की राणी कन्दाकी का सगळा खजाना को अधिकारी हो। बि टेम बो आपका रथ म बेठ्यो-बेठ्यो यसाया परमेसर की खेबाळा की पोथी मऊँ बाचर्यो हो। जणा पबितर आत्मा फलिपूसऊँ बोल्यो, “इ रथ क सागै होले।” जणा बो भागर बि रथ क कनै गयो जणा बो बिनै यसाया की पोथी बाचता सुण्यो अर आ सुणर बो बिनै बुज्यो, “तू जखा बाचै ह बानै समजै ह के?” जणा बो फलिपूसऊँ बोल्यो, “जद ताँई कोई मनै आ बचनानै कोनी समजावै जद ताँई म कंय्यां आका भेदानै जाणू।” अर बो बिऊँ बोल्यो, “थे उपर मेर कनै आर बिराजो।” सास्तरऊँ जखो लेख बो बाचर्यो हो बो अंय्यां हो, “बिनै मारबा ताँई बि लल्डी की जंय्यां लेर गयो जखी कटबाळी होवै, अर जंय्यां उन्यो ऊन कतरबाळा क आगै चुपचालो सिदो खड़्यो रेह्‍वै ह बंय्यांई बो बी आपको मुंडो कोनी खोल्यो। बिकी दुरदसा करी गई। बिनै न्याय कोनी मिल्यो। इ धरतीऊँ बिको जीव तो खोस लिओ गयो। अर इब बिकी पिडी क बारां म कूण बतावै?” इपै बो हिंजड़ो हो जखो फलिपूसऊँ अरदास कर बुज्यो, “मनै अंय्यां बता अठै आ बात की ताँई बोली गई ह, ओ परमेसर की खेबाळो आपकी बात करै ह, क ओर कोईकी।” जणा फलिपूस बोलबा लाग्यो अर बिनै सास्तर की आ बाताऊँ लेर ईसु का चोखा समचार ताँई सुणा दिओ। अर बे चालता-चालता एक पाणी हाळी झघा पुग्या, जणा पाणीनै देखर हिंजड़ो बिऊँ बोल्यो, “अठै पाणी तो हई, जणा पाछै मनै बतिस्मो लेबा म काँई ढिलाई ह।” (फलिपूस बिनै जुबाब दिओ, “तू तेरा मनऊँ पूरो बिस्वास करै जणा तनै कूण डाट सकै ह।” बो बोल्यो, “हाँ म मेरा पूरा मनऊँ मानू हूँ क परबु ईसु मसीई परमेसर को बेटो ह।”) जणा पाछै हिंजड़ो रथनै रोकबा ताँई ओडायो अर बे दोन्यु जणा पाणी म उतर्या अर फलिपूस बिनै बतिस्मो दिओ। अर जंय्यांई बे पाणी क बारनै निकळ्याक परबु की पबितर आत्मा फलिपूसनै उठा लेगो अर बिकै पाछै बो हिंजड़ो बिनै कोनी देख्यो अर बो राजी-खुसी आपका गेलै चलेगो। अर दुसरी कानि फलिपूस खुदनै असदोद नगरी म पायो, अर नगरी-नगरी ईसु को चोखो समचार सुणातो-सुणातो कैसरिया पुगग्यो। हाल बी साऊल नाम को मिनख जखो ईसु का चेलानै धमकार्यो हो अर जानऊँ मार्यो हो, बो म्हायाजक क कनै गयो। अर दमिसक नगरी की अरदास करबाळी झघा का नामऊँ इ बात को अधिकार कागद माँग्यो क ज कोई मिनख बिनै परबु का इ पंथ म लाधै चाए बो मोट्यार हो चाए लूगाई, सगळानै बां'दर यरूसलेम ल्या सकै। अर जद चालता-चालता बो दमिसक क सांकड़ै लाग्योक जणा चाणचुकई आसमान मऊँ एक च्यानणो बिपै चमक्यो। अर जि बजेऊँ बो धरती प पड़ग्यो। बिका काना म उवाज आई, “ओ साऊल, ओ साऊल तू मनै क्याले दिन घालै ह?” जणा साऊल बुज्यो “परबु थे कूण हो?” जणा उवाज आई, “म ईसु हूँ जिनै तू सतावै ह। पण इब खड़्यो होर नगरी क मांय चल्योजा अर बठै तनै काँई करबो ह बो तनै बता दिओ जासी।” जणा जखा मिनख बिकै सागै हा बे एक झघाई खड़्या होगा अर बाकी जबान कोनी उपड़ी क्युं क बानै उवाज तो सुणै पण कोई दिखै कोनी। जणा पाछै साऊल धरती पऊँ खड़्यो होयो अर जंय्यांई बो आपकी आँख्या खोली बिनै क्युंई कोनी सुज्यो अर बिनै बिकै सागै हाळाई बिको हात पकड़र दमिसक नगरी म लेग्या। तीन दिना ताँई बिनै क्युंई कोनी सुज्यो अर आ तीन दिना म बो बिना खाया पीयाई रिह्यो। बि दमिसक नगरी क मांयनै एक चेलो हो जिको नाम हनन्या हो बिनै परबु दरसाव देर बोल्यो, “हनन्या” जणा बो बोल्यो, “परबु म अठै हूँ” जणा परबु बिऊँ बोल्यो, “खड़्यो होर सिदी नाम की गळी क मांयनै यहूदा क घरा जार तरसुस का रेह्बाळा साऊल नाम का एक मिनख क बारां म बुज। देख, बो इब अरदास करर्यो ह अर बिनै दरसाव म दिखर्यो ह क हनन्या नाम को एक मिनख बिकन आर बिपै हात धर्यो ह जिऊँ बो पाछो देख सकै।” पण हनन्या जुबाब देवै ह क, “परबु म तो बोळा मिनखाऊँ इ मिनख क बारां म सुण्यो हूँ, क ओ मिनख यरूसलेम म तेरा मिनखानै बोळो दिन घाल्यो ह। अर अठै बी ओ परधान याजकाऊँ अधिकार लेर तेरो नाम लेबाळानै गिरफदार करबा ताँई आयो ह।” पण परबु बिनै बोल्यो, “तू तो जा! क्युं क म इनै गैर-यहूदि, राजा-म्हराजा अर इजरायली मिनखा म मेरो नाम फेलाबा ताँई मेरो दास कर टाळ्यो हूँ। अर मेरा नामऊँ दुख उठाबो कतो जरूरी ह आ बात म खुद बिनै दिखास्युं।” इकै पाछै हनन्या खड़्यो होर बि घर म गयो जठै साऊल हो अर बिपै आपका हात धर'र बोल्यो, “मेरा लाडला बिस्वासी भाईड़ा, मनै परबु ईसु जखो गेला म तेरै सामै परगट होयो हो बो भेज्यो ह, जिऊँ तू ओज्यु देखबा लागै अर पबितर आत्माऊँ भर जावै।” अर जदकी जद मछी का छिलका जंय्यां की कोई चिज बिकी आँख्याऊँ गिरी अर बिनै सुजबा लागगो जणा बो खड़्यो होयो अर बतिस्मो लिओ। इकै पाछै रोटी टुकड़ो खार बिमै ओज्यु सत आग्यो। अर बो कई दिना ताँई चेला क सागै दमिसक नगरी मई टिक्यो रिह्यो। अर बो बिना देर कर्या दमिसक नगरी की अरदास करबाळी झघा म जार परचार कर्यो क ईसु परमेसर को बेटो ह। अर जखा बी बिकी सुणता बे ताजूब करता अर खेता, “ओ बोई कोनी के जखो यरूसलेम म ईसु को नाम लेबाळानै जानऊँ मार गेर्यो हो? अर के अठै बी ओ बिको नाम लेबाळानै पकड़र परधान याजक क कनै लेज्याबा ताँई कोनी आयो के?” पण साऊल को परचार ओर बी तगड़ो होतो गयो अर ईसुई मसी ह इ बात का सबूत देर बो दमिसक नगरी का यहूदिआनै बोलबा जोगोई कोनी छोड्यो। पण क्युं क दिन बित्याक जणा यहूदि मिनख बिनै मारबा की साजिस घड़ी। अर साऊलनै इ बात को बेरो पड़ग्यो, क बे नगरी का दरूजा प बिनै मारबा की ताक म दिन-रात रेह्‍वै। जणा रातनै बिकाळा चेला-चपाटी बिनै नगरी की भीत पऊँ बडासारा चोल्या म बिठायो अर रस्सा क सारै लटकार बठैऊँ पार कर दिओ। अर बो यरूसलेम गयो। इकै पाछै बो चेला म मिलबा की कोसिस करी पण चेला बिऊँ डरता हा क्युं क बानै ओ बिस्वास कोनी होर्यो हो क ओबी इब ईसु को चेलो बणगो। जणा बरनाबास बिनै भेजेड़ा चेला कनै लेगो अर बानै बतायो क कंय्यां ओ गेला म परबुनै देख्यो, अर कंय्यां परबु बिऊँ बतळायो। अर इकै पाछै कंय्यां ओ हिमत क सागै दमिसक नगरी म ईसु का नाम को परचार कर्यो। जणा साऊल बाकै सागै सगळा यरूसलेम म आतो जातो हो अर बेधड़क परबु का नाम म परचार करतो हो। अर यूनानी भासा बोलबाळा क सागै जिरै बाजी करतो हो, जि बजेऊँ बे बिनै मारबा की ताक म रेह्बा लागगा। अर जद बिस्वासी भाई-भाणानै इ बात को बेरो पड़्यो जणा बे बिनै कैसरिया लिआया अर बठैऊँ तरसुस भेज दिआ। जणा अंय्यां सगळा यहूदिआ, गलिल, अर सामरीया की बिस्वासी मंडळ्यानै स्यांती मिली। अर बिस्वास्या की बिस्वासी मंडळी मजबूत होती गई अर परमेसर का गुणगान करती गई। अर पबितर आत्मा का हियावऊँ गिणती म बढती गई अर परमेसर का डर म रेह्ती। पतरस च्यारूमेर होर लुद्दा नगरी का परमेसर का मिनखाऊँ मिलबा आयो। बठै बिनै आठ बरसाऊँ खाटली म पड़्यो, एनियास नाम को एक मिनख मिल्यो जिमै भाळ भेयड़ी ही। बिनै पतरस बोल्यो, “एनियास खड़्यो हो अर तेरा बिछावणा समेट क्युं क परबु ईसु मसी तनै निरोगो करै ह।” अत्ती बोलताई बो खड़्यो होगो। अर बिनै देखर लुद्दा अर सरोन नगरी का रेह्बाळा परबु प बिस्वास कर्या। बठै याफा नगरी म तबिता नाम की एक बिस्वासी रिह्या करती ही जिनै यूनानी भासा म दोरकास खेवै ह जिको मतबल हिरणी होवै। बा बोळा चोखा-चोखा काम कर्या करती अर गरीबानै दान दिआ करती ही। बा दिना म बा बिमार पड़ी अर पिराण तज दिआ अर लोग बिकी लासनै नुहार चोबारा म धर दिआ। याफा नगरी लुद्दा नगरी क सारैई ही, चेला आ सुण क पतरस लुद्दा नगरी म आयड़ो ह बिकन दो मिनखानै भेज्या क बे बिऊँ अरदास करै क, “बिना देर कर्या दया कर म्हारै कनै आज्या।” जणा पतरस त्यार होर बाकै सागै होलिओ अर बिकै बठै पुगताई बे बिनै चोबारा म लेग्या अर बे सगळी खाली होईड़ी बार घालती पतरस क च्यारूमेर खड़ी होगी अर बिनै बे कुर्ता अर गाबा दिखाबा लागगी जखा दोरकास जीता जी बणाई ही। जणा पतरस बा सगळानै कोठा क बारनै भेज्यो अर आपका गोडा टे'कर अरदास करी अर बि लास कानि देखर बोल्यो, “तबिता उठ।” जणा बा आपकी आँख खोली अर पतरसनै देखर बेठी होगी। जणा बो बिनै हात को सारो देर खड़्यो कर्यो अर परमेसर का मिनखा अर खाली होईड़ीयानै बुलार जीती जागती बानै सूप दि। आ बात सगळा याफा नगरी म फेलगी अर बोळाजणा परबु का नाम प बिस्वास कर्या। अर पतरस याफा नगरी म चमड़ा को धंधो करबाळा समोन नाम का एक मिनख क घरा बोळा दिना ताँई रिह्यो। कैसरिया म कुरनेलियुस नाम को एक मिनख हो, जखो सो सिपाईड़ा की रोमी फोज की इटाली पलटण को सुबेदार हो। बो परमेसर को भगत हो जखो आपका पूरा परवार समेत ईस्बर को डर मानतो हो, बो सदाई गरीबानै दान दिआ करतो हो अर परमेसरऊँ अरदास कर्या करतो हो। जणा एक दिन बिनै दिन का तीन बजै दरसाव होयो क परमेसर को एक ईस्बर नगरी दुत बिकन आर बिऊँ बोल्यो, “ओ कुरनेलियुस!” जणा कुरनेलियुस डरतोई बिकै कानि देखर बोल्यो, “ओ परबु काँई ह?” जणा बो बोल्यो, “तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह। अर इब तू अंय्यां कर याफा म क्युंक मिनख भेजर समोन जिनै लोग पतरस बोली हीं बुलवा ले। बो चमड़ा को धंधो करबाळा समोन क घरा रूकर्यो ह जिको घर समदर क किनारा प ह।” परमेसर का ईस्बर नगरी दुत क जाबा क पाछै बो आपका दो नोकरानै अर एक सिपाईनै जखो एक भगत हो अर बिको खास सेवक हो बिनै बुलवायो। अर बानै सक्यु बतार याफा भेज्यो। आगला दिन बे चालता-चालता दोपारी म नगरी क सांकड़ै लाग्या अर ठिक बि टेमई पतरस अरदास करबा छात प चढ्यो। इकै पाछै बिनै भूख लाग्याई अर बो क्युं खाबा की मन म करी। अर जद रोटी बणावा हा जणा बिनै दरसाव होयो। अर बिनै दिख्यो क आसमान खुलगो अर च्यारू कूणाऊँ लटकायड़ी एक बडीसारकी चादर निचै धरती प उतररी ही। बिपै धरती का च्यार टांगा हाळा अर रिंगबाळा ज्यानबर अर आसमान का पंछी हा। बिनै सुण्यो, “पतरस खड़्यो हो आनै मार'र खाले।” जणा पतरस बोल्यो, “नइ परबु कदैई नइ क्युं क म हाल ताँई कोईबी सूगली अर बरजेड़ी चिज कोनी खाई।” इकै पाछै ओज्यु बिका काना म उवाज आई, “जोक्यु परमेसर सुद कर्यो ह बिनै बरजेड़ो मना खे।” तीन बर अंय्यांई होबा क पाछै हात्युहातई बि चादरासानै आसमान म उठा लिओ गयो। पतरस बि दरसाव क बारां म सोचई रिह्यो हो क ओ काँई होबो चाए अत्ता मई कुरनेलियुस का भेजेड़ा मिनख समोन का घर को ठिडो बुजता बिका बारना पई आर खड़्या होगा। अर हेलो देर कह्या, “समोन जिनै पतरस बोलीं हीं बो अठैई ह के?” पतरस हाल बि दरसाव क बारां म बिचार करर्योई हो क पबितर आत्मा बिनै बोली , “देख बारनै तीन मिनख तनै ढुंढीं हीं। जणा इब तू खड़्यो होर तळै जा अर बिना झिजकै बाकै सागै होले क्युं क बानै मई भेज्यो हूँ।” आ सुणर पतरस तळै आगो अर बाऊँ बोल्यो, “जिनै थे ढुंढो हो बो मई हूँ बोलो थारै आबा क पिछै काँई बात ह?” जणा बे बिऊँ बोल्या, “म्हारी पलटण को सुबेदार कुरनेलियुस जखो धरमी अर परमेसरऊँ डरबाळो मिनख ह, सगळा यहूदि मिनखा म जिकी बूज ह बो एक परमेसर का पबितर ईस्बर नगरी दुतनै दरसाव म देख्यो अर बो दुत बिनै बोल्यो ह की बो तनै बुलार तेरूँ परमेसर को बचन सुणै।” जणा बो बानै मांयनै बुलार बाकी आवभगत करी। दुसरा दिन बो उठर बाकै सागै गयो अर क्युंक याफा का भाईड़ा बी बिकै सागै होलिआ। आगला दिन बे कैसरिया म पुग्या अर कुरनेलियुस आपका रिस्तेदारानै अर भाईलानै भेळा कर बानै उडिकर्यो हो। जद पतरस मांयनै बड़र्यो हो जणा कुरनेलियुस पतरसऊँ मिल्यो अर बिकै पगा म माथो टेकर बिकै धोक खाई; जणा पतरस बिनै खड़्यो कर बोल्यो, “म बी तेरी जंय्यां एक मिनखई तो हूँ।” जणा पाछै पतरस बिऊँ बतळातो मांयनै आयो अर बठै बोळा सारका मिनख भेळा होर्या हा। जणा बो बाऊँ बोल्यो, “जंय्यां क थे पेलीऊँ जाणोई हो क एक यहूदि मिनख को गैर-यहूदि मिनखऊँ कोई समंद राखबो अर बिका घरा आबो जाबो बरजेड़ो ह, पण परमेसर मनै दिखायो ह क, नइ तो कोई मिनख सूगलो ह अर नइ निची जात को ह। जणाई तो थे जद मनै बुलाया जणा म बिना क्युं बोल्याई आगो। इब थे मनै बताओ, मनै क्याले बुलवाया हो?” जणा कुरनेलियुस खेबा लाग्यो, “आजऊँ ठिक च्यार दिन पेल्या जद म दिन का तीन बजै मेरै घरा अरदास करबा लागर्यो हो जणा म देख्यो क एक मिनख मेरै सामै आर खड़्यो होगो बिका गाबा भळका मारर्या हा। अर बो मेरूँ बोलबा लाग्यो कुरनेलियुस तेरी अरदास अर दिन दुख्यानै दियड़ो तेरो दान परमेसर क कनै पुगगो ह अर बिनै बो बोळो चोखो लाग्यो ह। जणा तू इब अंय्यां कर याफा म कोईनै भेजर समोन नाम का मिनख जिनै पतरस बी बोलीं हीं बुलाबा भेज, बो चमड़ा को धंधो करबाळा समोन क घरा डटर्यो ह। जणा म हात की हात तेरै कनै मिनख भेज्या, अर तू बी ठिक कर्यो जखो आकै सागै आगो। अर इब म्हें परमेसर क आगै इ ताँई भेळा होर्या की जोक्यु तनै परबु ओडायो ह बे सगळी बाता तेरूँ सुण सकां।” जणा पतरस खेबा लाग्यो, “इब मनै पक्को बेरो पड़गो की परमेसर कोई भेद-भाव कोनी करै। बो धरती का सगळा मिनखानै अपणावै जखा बिको डर मानै अर नेक काम करै चाए बो कोईबी हो। परमेसर इजरायली मिनखानै चोखा समचार को संदेस दिओ क ईसु मसीऊँ थानै स्यांती मिलसी। जखो सगळा को परबु ह। यहून्ना लोगानै पाणी को बतिस्मो लेबा क बारां म परचार करबा क पाछैऊँ, गलिलऊँ चालू होर सगळा यहूदिआ म जखी बाता होई बानै थे जाणो हो। जंय्यां क थे जाणोई हो क परमेसर, कंय्यां पबितर आत्मा अर सक्‍तिऊँ ईसु नासरी को अभिसेक कर्यो। बो च्यारूमेर जार भलाई करतो अर सेतान का सतायड़ा सगळानै निरोगो करतो क्युं क परमेसर बिकै सागै हो। म्हें बा सगळा कामा का गुवा हा जखा बो यहूदिआ अर यरूसलेम म कर्यो हो अर बिनैई बे सुळी प लटकार मार गेर्यो। पण तीसरा दिन बिनै परमेसर ओज्यु जिंदो कर म्हारै प परगट कर्यो। सगळा प नइ पण बा गुवा प जानै परमेसर पेल्याऊँ टाळ राख्या हा, अर जखा बिकै ओज्यु जीबा क पाछै बिकै सागै खाया अर पीआ हा। अर बो म्हानै हेलो पाड़बा अर गुवाई देबा को आदेस दिओ की परमेसर बिनैई मरेड़ा अर जीवता को न्याय करबाळो बणायो ह। अर सगळा परमेसर की खेबाळा बिकै बारां म गुवाई दि ही की जखो बी बिपै बिस्वास करसी बिका पाप ईसु मसी क नाम म धुप ज्यासी।” पतरस बोलर्योई हो, अत्ती बारां मई बा सगळा सुणबाळा प पबितर आत्मा उतर्यो। पतरस क सागै आएड़ा सुन्नत होयड़ा यहूदि बिस्वासी आ देखर ऊक-चूक होगा की पबितर आत्मा को बरदान जखा गैर-यहूदि हीं बानै बी दिओ जार्यो ह। क्युं क बे बानै भात-भात की बोली म परमेसर को गुणगान करता सुणर्या हा। जणा पतरस बोल्यो, “आ सगळानै आपणी जंय्यांई पबितर आत्मा मिली ह, जणा इब कोई आनै पाणी को बतिस्मो लेबाऊँ मना कर सकै ह के?” अर जणा पाछै पतरस बानै ईसु मसी क नाम म पाणीऊँ बतिस्मो लेबा ताँई हुकम दिओ। इकै पाछै बे सगळा पतरसऊँ हात जो'ड़र कह्या की बो थोड़ा घणा दिन ओर बाकै सागै रेह्‍वै। परमेसर का बचननै गैर-यहूदि मिनख बी मानली ह, आ बात ईसु का भेजेड़ा चेला अर यहूदिआ का सगळा बिस्वासी भाई-भाणा का काना म पड़ी। जणा पतरस क यरूसलेम पुगताई सुन्नत होयड़ा यहूदि बिस्वासी बिकै सागै जिरै करी। अर बोल्या, “पेली बात तो तू गैर-यहूदि मिनखा क घरा गयो अर उपरऊँ बाकै सागै खायो पीयो।” जणा पतरस जोक्यु बठै घट्यो बो बानै सुणाबा लाग्यो: “म जद याफा नगरी म अरदास करर्यो हो जणा मनै दरसाव होयो अर म काँई देख्यो की आसमानऊँ च्यारू कूणाऊँ लटकायड़ी एक बडीसारकी चादर की जंय्यां कोई चिज आसमानऊँ उतर मेर कनै आई। अर म काँई देख्यो क बिमै धरती का च्यार टांगा का ज्यानबर, रिंगबाळा अर आसमान म उडबाळा पंछी हा। अर इकै पाछै मेरै काना म एक उवाज पड़ी, ‘पतरस खड़्यो हो आनै मार'र खाले।’ पण म खयो, ‘नइ परबु कदैई नइ क्युं क म हाल ताँई कोईबी सूगली अर बरजेड़ी चिज कोनी खाई।’ जणा आसमानऊँ दुसर क उवाज आई, ‘जोक्यु परमेसर सुद कर्यो ह बिनै सूगली मना खे।’ तीन बर अंय्यांई होबा क पाछै हात्युहातई बि चादरासानै आसमान म उठा लिओ गयो। बि टेमई जठै म रूकर्यो हो बठै कैसरियाऊँ भेजेड़ा तीन मिनख मेर कनै आया। अर पबितर आत्मा मनै बाकै सागै बिना झिजक क जाबा ताँई बोल्यो, अर अ छ बिस्वासी भाईड़ा बी मेरै सागै होलिआ, अर म्हें बि मिनख क घरा गया। बो म्हानै बतायो की बो एक ईस्बर नगरी दुतनै आपकै घरा खड़्यो देख्यो जखो बिऊँ बोल्यो क, ‘याफा म मिनख भेजर समोन जिनै पतरस बी बोलीं हीं बुला ले। बो तनै बचन सुणासी जिऊँ तेरो अर तेरा कूणबा को छुटकारो होसी।’ अर जद म परमेसर का बचन बानै सुणाबा लाग्यो, जणा ठिक बंय्यांई बापै पबितर आत्मा उतर्यो जंय्यां सरूआत म आपणा प उतर्यो हो। जणा मनै परबु की बोलेड़ी बात याद आई क यहून्ना तो पाणी को बतिस्मो दिओ पण थानै पबितर आत्मा को बतिस्मो दिओ जासी। अर परमेसर बानै बी बोई बरदान दिओ जखो आपानै परबु ईसु मसी प बिस्वास करबाऊँ मिल्यो हो जणा फेर मेरी काँई हिमत क म परमेसरनै रोकतो।” अ बाता सुणर बे बिऊँ जिरै करबो बंद कर दिओ अर सगळा परमेसर की आ खेर बडाई करबा लागगा की, “परमेसर गैर-यहूदि मिनखानै बी सचो जीवन जीबा ताँई पापऊँ मन फेरबा को दान दिओ ह।” सतफनुस क मोत क पाछै बिस्वास्या म आया सताव की बजेऊँ बे तीनतेरा होगा। अर बे फिनीके, साईपरस अर अंताकीया ताँई जा पुग्या। अर ईसु को समचार सुणाता हा पण अ यहूदि मिनखानैई ईसु को समचार सुणाता हा। आमऊँ क्युंक साईपरस अर कुरेन का हा। अर जद बे अंताकीया म आया जणा बे यूनानी मिनखा म बी ईसु को समचार सुणाबा लागगा। परबु को हात बा प हो, जिकी बजेऊँ घणासारा मिनख बिस्वास कर ईसु क कानि मुड़्या। अर जद बाकी चरचा यरूसलेम की बिस्वासी मंडळी क काना म पड़ी जणा बे बरनाबासनै अंताकीया भेज्या। बरनाबास बठै परमेसर की दयानै देखर राजी होयो। अर बानै उपदेस दिओ की तन मनऊँ बिस्वास जोगा अर परमेसर म बण्या रेह्ओ। बो पबितर आत्मा अर बिस्वासऊँ भरेड़ो एक भलो मिनख हो। इकै पाछै ओर बोळा मिनख परमेसर प बिस्वास कर्या। बरनाबास साऊलनै टोबा तरसुस नगरी चलेगो। अर जद साऊल बिनै लाध्यायो जणा बो बिनै लेर अंताकीया आगो। अर बे पूरा बरस भर बिस्वासी मंडळ्याऊँ मिलता अर बोळासारा मिनखानै उपदेस देता रिह्या अर चेला सऊँ पेली अंताकीया मई मसी का मिनख बाज्या। आ दिना मई क्युं परमेसर की खेबाळा यरूसलेमऊँ अंताकीया म आया। बामैऊँ एक जिको नाम अगबुस हो बो पबितर आत्मा क कह्या गेल बतायो की सगळा जगत म काळ पड़सी अर ओ काळ राजा कलोदियुस क टेम म पड़्यो । जणा सगळा चेला जत्ता बी बठै हा बे आपकी पायना गेल यहूदिआ म रेह्बाळा भाई-भाणा ताँई मदद भेजबा को फेसलो कर्यो। अर बरनाबास अर साऊल क हाताऊँ यरूसलेम की बिस्वासी मंडळी का मुखिया क कनै थोड़ी घणी मदद भेजी। बि टेम को राजा हेरोद बिस्वासी मंडळी का क्युंक मिनखानै सताबो चालू कर दिओ। बो यहून्ना का भाई याकूबनै तलवारऊँ मरवा दिन्यो। अर आ देखर क अंय्यां करबाऊँ यहूदि मिनख राजी होवीं हीं जणा बो पतरसनै बी पकड़ाबा की मन म करी, अर बे बिना खमिर की रोटी खाबाळा त्युंहार का दिन हा। अर बो बिनै पकड़र कोठड़ी म बंद करवार बिपै च्यार-च्यार सिपाईड़ा का च्यार पेरा बिठा दिओ, अर मन म करी की फसै का त्युंहार क पाछै बिनै मिनखा क सामै ल्यावै। अर जद पतरस कोठड़ी म बंद हो बि टेम सगळी बिस्वासी मंडळी बि ताँई पूरा मनऊँ परमेसरऊँ अरदास करबा लागरी ही। जद हेरोद पतरस प मुकदमो चलाबा ताँई बिनै ल्याबाळो हो, बि रात पतरस दो साँकळाऊँ बांदेड़ो दो सिपाईड़ा क बिच म सुत्यो हो। अर कोठड़ी क बारना प रूखाळा पेरो देर्या हा। अर बठै चाणचुकई के होयो क परबु को एक ईस्बर नगरी दुत बि कोठड़ी म परगट होयो। जिऊँ बि कोठड़ी म जोरको च्यानणो होगो अर बो पतरस की पासड़्या प हात धर बिनै जगार बोल्यो, “बेगोसो खड़्यो हो।” अत्ता मई बिकै हातऊँ साँकळा खुलर पड़गी। अर ईस्बर नगरी दुत बिऊँ बोल्यो, “तेरो कोटियो, कमर पट्टो बां'दर जुती पेरले अर फटाफट त्यार होज्या।” जणा पतरस बिकै कह्या गेल हात्युहात त्यार होगो जणा पाछै बो बिनै आपकै गेल आबा ताँई बोल्यो। अर बो बिकै गेल होगो पण बो आ कोनी समज सक्यो क ओ जोक्यु बो परबु को ईस्बर नगरी दुत करर्यो हो बो सच ह के? बिकै भाऊँ तो ओ एक दरसावई हो। बे पेला अर दुसरा पेराऊँ निकळर लौ का बारना क कनै पुग्या जखो नगरी म खुलतो हो। बि बारना को दरूजो बा ताँई मतैई खुलगो, अर बे बठैऊँ एक गळी मांयकी गया, इकै पाछै ईस्बर नगरी दुत बिनै छोडर चलेगो। जणा जार पतरस चेता म आयो अर आपका मुंडाऊँ बोल्यो, “इब म जाणगो क सचमई परबु ईस्बर नगरी दुतनै भेजर मनै हेरोद क हातऊँ छुटा लिओ अर यहूदि मिनखा की सगळी मनस्या प पाणी फेर दिओ।” आ जा'णर बो यहून्ना जिनै मरकुस बोलै ह बिकी माँ मरीयम क घरा आयो, बठै पेल्याऊँई बोळासारा मिनख भेळा होर अरदास करबा लागर्या हा। बिकै कुआड़ खुड़काबा प रूदे नाम की एक दासी बारना प आई। पतरस की उवाज पिछाणर बा कुआड़ तो खोली कोनी पण राजी होर पेली मांयनै गई अर सगळानै खे सुणाई क पतरस बारना म खड़्यो ह। बे बिऊँ कह्या, “तू बावळी तो कोनी होगी ह? ओ कंय्यां हो सकै ह।” पण बा तो आपकी बात प अड़ी री जणा जार बे कह्या, “हो सकै ह क ओ बिको ईस्बर नगरी दुत होगो।” अर बठिनै पतरस कुआड़ खुड़कातो रिह्यो जणा बे कुआड़ खोल्या अर बिनै सामै देखर सुन्ना होगा। जणा बो मुंडा प आँगळी धर बानै इसारो कर्यो क चुप रेह्‍वै अर बो बानै बे सगळी बाता बताई क परबु कंय्यां बिनै जेळऊँ अजाद कर्यो। अर ओ ओडार क, “याकूब अर दुसरा भाई-भाणानै बी आ बात बता दिज्यो,” बो बठैऊँ दुसरी झघा चलेगो। दिन उगताई बा सिपाईड़ा क घालामेली लागगी क पतरस को काँई होयो बो कठै चलेगो। हेरोद बिकी खोज करवाई पण बो बिकै हात कोनी लाग्यो, जणा बो बा रूखाळानै बुलाया अर बाऊँ पुछाताछी कर बानै मारबा को हुकम काड्या। अर हेरोद यहूदिआनै छोडर कैसरिया म जार क्युंक दिना ताँई बसगो। हेरोद सूर अर सैदा म रेह्बाळा मिनखाऊँ नराज हो जि बजेऊँ बे सगळा मिलर बलास्तूस जखो राजा की राण्या की देखभाळ करबाळो खास करमचारी हो। बिनै बुलार बिऊँ सुळजेटो करबो चायो क्युं क राजा क देसऊँई बाका देस म खाबाळो समान भेज्यो जातो हो। एक दिन हेरोद राजा हाळी पोसाक धारण कर न्यायहाळा सिंघासन प बेठर जनतानै भासण देबा लागर्यो हो। जणा बिकी सुणर लोग जोरऊँ बोलबा लाग्या क, “आ बाणी तो कोई देवता की ह मिनख की तो आथ कोनी।” बि टेमई परबु को ईस्बर नगरी दुत बिनै मार्यो क्युं क बो परमेसरनै मेमा कोनी दि। अर बिकी काया म किड़ा पड़्या अर बिनै खाबा लाग्या जिऊँ बो मरगो। पण परमेसर को बचन फेलतो अर बढतो गयो। बरनाबास अर साऊल यरूसलेम म आपको काम खतम कर यहून्नानै जिनै मरकुस खेता हा आपकै सागै अंताकीया लेर आया। अंताकीया की बिस्वासी मंडळी म परमेसर की खेबाळा अर उपदेस देबाळा कई हा, जंय्यां की बरनाबास, समोन जिनै काळ्यो बी बोलता हा अर कुरेन को लूकियुस अर देस की चोथी पाँती को राजपाल हेरोद को गोद आयड़ो भाई मनाएम, अर साऊल। जद बे बरत क सागै परमेसर की भगती करर्या हा बि टेमई पबितर आत्मा बाऊँ बोली, “मेर ताँई बरनाबास अर साऊलनै बि काम ताँई नाकै टाळो जि काम ताँई बानै बुलायो गयो ह।” जणा बे बरत अर अरदास कर बाकै माथा प हात म्हेलर बानै बिदा कर्या। पबितर आत्मा क कह्या गेल बरनाबास अर साऊल सिलूकीया गया जठैऊँ झाज म बेठर साईपरस नाम का टापू प पुग्या। अर बे बि टापू की सलमीस नगरी म पुगर बठै यहूदिआ की अरदास करबाळी झघा म परमेसर का बचन सुणाया, अर यहून्ना जिनै मरकुस बी बोलीं हीं, एक मददगार की जंय्यां बाकै सागै हो। अर बे, बि सगळा टापूऊँ होताहोया बि टापू क परलै नाकै की नगरी पाफुस म पुग्या। जठै बानै बार-ईसु नाम को एक यहूदि जादूगर अर झूठो परमेसर की खेबाळो मिनख मिल्यो। अर बो राजपाल सिरगियुस-पोलुस जखो दिमागऊँ बोळो तेज हो बिकै सागै हाळो मिनख हो, ओ सिरगियुस-पोलुस बरनाबास अर साऊलनै आपकै कनै बुलार बाऊँ परमेसर को बचन सुणबो चातो हो। पण बार-ईसु जादूगर जिको नाम यूनानी भासा म अलिमास हो, बो बाको बिरोद कर टापू का राजपालनै परमेसर प बिस्वास करबाऊँ रोकबो चायो। जणा साऊल पबितर आत्माऊँ भर'र जिनै पोलुस बी बोलीं हीं बिकै कानि एक टक देख्यो। अर बोल्यो, “सगळा छळ कपटऊँ भरेड़ा सेतान की ओलाद, भलाई का बेरी। तू परमेसर का सचा अर सिदा गेलानै तोड़बो मोड़बो कोनी छोडै के?” जणा ले इब तेरै प परमेसर को हात पड़्यो ह, अर इब तू आँदो होज्यासी अर क्युंक टेम ताँई दिन का च्यानणानै कोनी देखसी। अत्ती खेताई बिकी आँख्या क आगै अँधेरोसो होगो अर अठिनै-बठिनै टपटोळा मारबा लागगो जिऊँ कोई बिको हात पकड़र बिनै लेज्यावै। जणा टापू को राजपाल आ देखर परबु की सीख प ताजूब क सागै बिस्वास कर्यो। पोलुस अर बिकाळा साती पाफुसऊँ झाज म बेठर पंफुलिया की पिराग नगरी म आया; पण यहून्ना जिनै मरकुस बोलता हा बानै छोडर यरूसलेम चलेगो। अर बे बठैऊँ चालर पिसदिआ का अंताकीया म आया अर अरामहाळा दिन अरदास करबाळी झघा म जार बेठगा। मूसा का नेम-कायदा अर परमेसर की खेबाळा की पोथी मऊँ बाचर अरदास घर का अधिकारी बाऊँ बोल्या, “यहूदि भाईड़ो, मिनखानै देबा ताँई थारै कनै कोई उपदेस ह तो आर ख्यो।” जणा पोलुस खड़्यो होर आपका हात को इसारो मिनखा कानि कर बोल्यो, “परमेसरऊँ डरबाळो गैर-यहूदिओ अर इजरायली मिनखो ध्यानऊँ सुणो। इजरायली मिनखा को परमेसर आपणा बाप-दादानै आप ताँई टाळ लिओ हो। अर जद अ मिसर म परदेसी होर रेह्ता हा जणा बो आनै बठै फळायो अर आपकी ताकतऊँ बानै बठैऊँ छुटा ल्यायो। अर करीब चाळिस बरसा ताँई बो बानै उजाड़ म बरदास करतो रिह्यो। अर कनान देस का सात राजनै नास कर बो बा धरती इजरायली मिनखानै बाकी बापोत होबा ताँई दे दि। आ बाता म करीब साडे च्यार सो बरस लाग्या हा। इकै पाछै परमेसर की खेबाळा सेमुएल क टेम ताँई परमेसर बानै न्याय करबाळा दिआ। इकै पाछै बे परमेसरऊँ एक राजा की माँग करी जणा परमेसर बिन्यामीन का गोत मऊँ एक मिनख किस का छोरा साऊलनै बापै चाळिस बरसा ताँई राजा बणायो। इकै पाछै परमेसर साऊल की झघा दाऊदनै बाको राजा बणायो; जिकै बारां म बो बोल्यो की, ‘यिसै को छोरो दाऊद जखो मेरा हिया जंय्यां को ह मनै मिलगो, जखो मेरी सगळी इंछ्यानै पूरी करसी।’ इ मिनख क कूणबा मऊँई परमेसर आपका वादा गेल इजरायल का मिनखानै छुटाबाळा ईसुनै भेज्यो। बिकै आबाऊँ पेली यहून्ना सगळा इजरायली मिनखा म पापऊँ तौबा कर पाणी को बतिस्मो लेबा को परचार करतो हो। जद यहून्ना आपको काम पूरो करबाळो हो जणा बो मिनखानै बोल्यो, ‘थे जखो मनै समजर्या हो, म बो कोनी हूँ बो तो मेरै पाछै आसी अर म तो बिकाळा जूता का सळू खोलबा जोगोई कोनी हूँ।’ सुणो मेरा यहूदि भाईड़ो, अब्राहम की संतानो अर गैर-यहूदि परमेसर का भगतो! छुटकारा का अ बचन थारै कनैई पुग्या हीं। यरूसलेम का रेह्बाळा अर यहूदि नेता आ कोनी जाण्या क ईसुई छुटाबाळो ह, अर अरामहाळा दिन सीखाया जाबाळा बे बचन जखा परमेसर की खेबाळा क कानिऊँ मांड्या गया हा, बाका भेद बी कोनी जाण्या। पण ईसु प दोस लगार सास्तर का बा बचनानै बे पूरा कर्या। बानै बिमै मारबा जंय्यां को कोई दोस कोनी लाध्यो इकै पाछै बी बे पीळातुसऊँ बिनै मारबा की माँग करी। अर जद बे बिकै बारां म मंडेड़ी सगळी बातानै पूरी करली, जणा बे बिनै सुळीऊँ तळै उतार बिकी लासनै एक कबर क मांयनै धर दिआ। पण परमेसर बिनै मरेड़ा मऊँ ओज्यु जिंदो कर्यो। अर बो बानै जखा बिकै सागै गलिलऊँ यरूसलेम आया हा, बोळा दिना ताँई दिखतो रिह्यो अर इब बेई मिनखा क सामै बिका गुवा हीं। म्हें थानै परमेसर का बि करार का चोखा समचार को परचार करर्या हां जखो आपणा बडका क सागै कर्यो गयो हो। परमेसर ईसुनै ओज्यु जीवार, बा बात आपणा ताँई पूरी करी ह, जखा बिकी संतान हां, जंय्यां की दुसरा भजन म मंडेड़ो ह क, ‘तू मेरो छोरो ह, अर म आजई तेरो बाप बण्यो हूँ।’ अर बिनै अंय्यां मरेड़ा मऊँ ओज्यु जिंदो कर दिओ जिऊँ बो कदैई नइ सिडै़। इ ताँई परमेसर बोल्यो क, ‘म दाऊद क सागै करार करेड़ी सगळी पबितर अर पक्काइऊँ होबाळी बरकत तेरै प करस्युं।’ जणाई बो एक दुसरा भजन म अंय्यां बोल्यो की, ‘तू तेरा पबितर मिनखनै कबर म सिड़बा कोनी देवै।’ अर दाऊद तो परमेसर की इंछ्या गेल आपका टेम म सेवा कर मरगो अर बिनै बठैई गाड्यो गयो जठै बिका बडका गडर्या हा अर बाकी लास सिड़गी। पण परमेसर जिनै मरेड़ा मऊँ जिंदो कर्यो बो कोनी सिड़यो। जणा यहूदि भाईड़ो, थे जाणल्यो क ईसुई ह जिकै जरिए थार प पापऊँ माफी की घोसणा करी ह। थानै नेम-कायदा गेल छुटकारो कोनी मिल सकै, पण जखो बी बिपै बिस्वास करसी बिनै सगळा पापऊँ अजाद कर्यो जासी अर परमेसर क सामै धरमी बणायो जासी। इ ताँई चेता म रेह्‍वो अंय्यां नइ हो क जोक्यु परमेसर की खेबाळा बोल्या हीं बा थारै सागै नइ होवै। क्युं क परमेसर की खेबाळा की पोथी म मंडर्यो ह, ‘हसी करबाळो! अचरज कर मरज्यावो! क्युं क म आ दिना म अंय्यां को काम करबाळो हूँ, जिकै बारां म ज थानै कोई बतातो जणा बी थे बिपै जमाई बिस्वास कोनी करता।’” अर जद बे आपको उपदेस देर बठैऊँ जार्या हा जणा बानै सुणबाळा मिनख बाऊँ बोल्या, “आगला अरामहाळा दिन म्हानै अ बाता ओज्यु सुणाज्यो।” सभा क खतम होबा क पाछै यहूदि अर गैर-यहूदि जखा यहूदि धरम पंथ म रळेड़ा भगत हा बे पोलुस अर बरनाबास क गेल होलिआ। पोलुस अर बरनाबास बाऊँ बात कर बानै समजाया की परमेसर की दया म बण्या रेह्ओ। इकै पाछै आगला अरामहाळा दिन करीब सगळी नगरी परबु को बचन सुणबा ताँई भेळी होई। इ भीड़नै देखर यहूदि बळगा अर पोलुस की बाता क खिलाप बोलता होया बिकी बुराई करी। जणा पोलुस अर बरनाबास हिमत कर बोल्या, “ओ जरूरी हो क परमेसर को बचन सऊँ पेली थानै सुणायो जावै पण थे इनै थारूँ दूर कर्या अर खुदनै अजर-अमर जीवन को भागी कोनी मान्या जणा इब म्हें गैर-यहूदिआ क कनै जावां हां। क्युं क अ आदेस म्हानै परबु दिओ ह। बो बोलै ह, ‘दुसरा देसा ताँई म थानै च्यानणो बणायो हूँ। जिऊँ ओ होवै की थारै जरिए मुक्‍ति को ओ संदेसो धरती का सगळा मिनखा म फेल जावै।’” आ सुणर गैर-यहूदि मिनख बोळा राजी होया अर परबु का बचना की मेमा करबा लागगा। अर जत्ता बी अजर-अमर जीवन ताँई टाळेड़ा हा बे बिस्वास कर्या। अर सगळा परदेस म परबु को बचन फेलगो। पण यहूदि नेता, गैर-यहूदिआ की मानी-थानी यहूदि धरमनै मानबाळी भगत लूगाया अर नगरी का मान्या-थान्या मिनख जखा परमेसरनै मानबाळा हा बाका कान भर पोलुस अर बरनाबास क खिलाप बिदरो कर बानै, बि नगरी क बारनै कढवा दिओ। जणा पोलुस अर बरनाबास बानै चेताबा ताँई आपकै पगा की धूळ झाड़र बठैऊँ इकोनियुम चलेगा। अर बठिनै अंताकीया का बिस्वासी राजी होर्या हा अर बे पबितर आत्माऊँ भरता गया। इकोनियुम म पोलुस अर बरनाबास अरदास करबाळी झघा म गया अर बठै उपदेस दिआ जिऊँ यहूदि अर यूनानी, बोळा मिनख बिस्वास कर्या। पण बे यहूदि जखा बिस्वास कोनी कर्या हा बे गैर-यहूदि मिनखानै बिस्वासी भाया क खिलाप भड़काया अर बाकै मना म झेर भर दिओ। पोलुस अर बरनाबास बोळा दिना ताँई बठैई रिह्या अर बिना कोई डर क परचार करता रिह्या। अर परबु बी बाका हाताऊँ अचरजभर्या काम अर चमत्कार दिखार आपकी दया का संदेसनै साबित कर्यो। अर नगरी म अंय्यां होयो क मिनखा म फूट पड़गी। कोई भेजेड़ा चेला को तो कोई यहूदि पंथ को हिमायत्यो होयो। पण जद यहूदि अर गैर-यहूदि मिनख आपका नेता सेत्युं बाकी बेजती करबा अर भाठा मारबा की सोची। जणा बानै इको पेल्याई बेरो पड़गो अर बे बाकै आबाऊँ पेलीई लिकोनिआ का लुस्तरा अर दिरबे नाम की नगर्या अर कनै का इलाका म भाग छुट्या। अर बठै परमेसर का चोखा समचार को परचार करबा लागगा। लुस्तरा म एक अंय्यां को मिनख हो जिकी टांग्या म जमाई जान कोनी ही बो जलमऊँई लंगड़ो हो। बो पोलुसनै ध्यानऊँ सुणबा लागर्यो हो जणा पोलुस बिकै कानि देख्यो अर बिमै निरोगो होबा को बिस्वास देखर जोरऊँ बोल्यो, “खड़्यो हो।” अर अत्ती खेताई बो खड़्यो होगो अर उछळबा कुदबा लागगो। ओ चमत्कार देखर लुस्तरा का मिनख लिकोनिआ भासा म बोलबा लाग्या क , “मिनख रूप म खुद देवता आपणा कनै आया हीं।” बे बरनाबासनै जयुस अर पोलुसनै हरमेस कह्या क्युं क बो बोलबाळा म मुखियो हो। नगरी क बारला नाकै जयुस को देवरो हो। अर बि देवरा को पुजारी सांड अर माळा लेर नगरी का बारना प आयो क्युं क बो मिनखा क सागै पोलुस अर बरनाबास ताँई बलि देबो चाओ हो। अर जद भेजेड़ा चेला पोलुस अर बरनाबासनै इ बात को बेरो पड़्यो जणा बे आपका गाबा पा'ड़र बि भीड़ म कुदगा अर बाऊँ जोरऊँ खेबा लागगा, “थे काँई करो हो म्हें बी तो थारी जंय्यां का मिनख हां, म्हें तो थानै चोखा समचार सुणाबा आया हां क थे आ बेकाम की चिजानै छोडर बि जीवता परमेसरनै जाणो, जखो ईस्बर नगरी अर धरती, समदर अर जोक्यु बिमै ह बानै बणायो ह। बितेड़ा टेम म बो धरती का सगळा मिनखानै बाकी इंछ्या गेल चालबा दिओ। इकै पाछै बी बो खुदनै साबित करतो होयो, भलाई करी अर आसमानऊँ टेम-टेम प मी बरसार धरती प चोखी फसल उगार आपणानै देवै ह जिऊँ आपणो मन राजी होवै ह।” अ सगळी बाता बोलबा क पाछै बी, बे बोळी मुस्किलऊँ भीड़नै बलि देबाऊँ रोक्या। इकै पाछै अंताकीया अर इकोनियुम नगर्याऊँ क्युंक यहूदि आर भीड़नै भड़कार खुद म मिला लिओ। अर बे पोलुसनै भाठाऊँ मार'र बिनै मरेड़ो समजर बिनै नगरी क बारनै घिसर गेर दिआ। पण जद चेला बिकै च्यारूमेर भेळा होया जणा बो खड़्यो होर नगरी म आयो अर दुसरा दिन बरनाबास क सागै दिरबे चलेगो। बि नगरी म बे परमेसर का समचार सुणार बोळा चेला बणार लुस्तरा अर इकोनियुम होताहोया पिसदिआ का अंताकीया म आगा, अर चेलानै समजाता अर हिमत बंधाता हा क, “बिस्वास म बण्या रेह्ओ अर परमेसर का राज म बड़बा ताँई आपानै बोळा दुख भोगणा पड़सी।” अर बे सगळी बिस्वासी मंडळ्या म मुखिया टाळ्या अर बरत क सागै अरदास कर बानै परबु क हाता म सूप दिआ जिपै बे बिस्वास कर लिआ हा। जणा पाछै बे पिसदिआ क गेला होर पंफुलिया नाम का इलाका म गया। अर पेरगे म बचन सुणार अतालिआ आया। बठैऊँ बे न्याव प सवार होर अंताकीया गया जठै बे बि कामनै हाल पूरोई कर्यो हो जि ताँई बानै परमेसर का हाता म सूप्यो गयो हो। बठै जार बे बिस्वासी मंडळी की सभा बुलार बानै बे सगळी बाता खे सुणाई जखी परमेसर गैर-यहूदिआ क मांयनै बाकै हाता करवायो अर कंय्यां गैर-यहूदि मिनखा ताँई सचा परमेसरनै मानबा को गेलो खुल्यो। बे बोळा दिना ताँई बठैई बिस्वास्या क सागै रिह्या। इकै पाछै यहूदिआ परदेसऊँ आर क्युंक मिनख बिस्वासी मंडळी का भाईड़ानै सीखाया क, “ज मूसा की रीत गेल थारी सुन्नत नइ करी जावै जणा थानै छुटकारो कोनी मिल सकै।” इ बातनै लेर पोलुस अर बरनाबास बाऊँ खूब लड़्या, बोळी खिचा-ताणी होबा क पाछै बिस्वास्या की बिस्वासी मंडळी पोलुसनै, बरनाबास अर क्युंक बिस्वासी मिनखानै टाळ्या क जिऊँ बे अंताकीयाऊँ यरूसलेम म जार भेजेड़ा चेला अर बिस्वासी मंडळी का मुखियाऊँ फेसलो करवावै। जणा बिस्वासी मंडळी बानै थोड़ी घणी दूर छोडर गई अर बे फिनीके अर सामरीया क गेला, गैर-यहूदि कंय्यांसिक मन बदल्यो आ बात बिस्वासी भायानै बताता गया, जिनै सुणर सगळा बोळा राजी होया। बाकै यरूसलेम पुगताई बठै की बिस्वासी मंडळी, भेजेड़ा चेला अर बिस्वासी मंडळी का मुखिया बाऊँ राजी होर मिल्या, अर बे बानै बताया क परमेसर बाकै सागै होर कंय्यां का बडा-बडा काम कर्या ह। पण फरिसीया मऊँ बिस्वास म आया क्युंक मिनख खड़्या होर बोल्या, “गैर-यहूदि मिनखानै सुन्नत करार नेम-कायदानै मानबो चाए।” जणा बिस्वासी मंडळी का मुखिया अर भेजेड़ा चेला इ बात प बिचार करबा ताँई भेळा होया। बोळी देर खिचा-ताणी होबा क पाछै पतरस बामैऊँ खड़्यो होर बोल्यो, “मेरा लाडला बिस्वास्यो, जंय्यां की थे जाणोई हो क थार मऊँ परमेसर मनै टाळ्यो क गैर-यहूदि मेरै मुंडाऊँ परमेसर का चोखा समचारनै सुणर बिपै बिस्वास करै। अर हियानै जाणबाळो परमेसर आपणी जंय्यां बानै बी पबितर आत्मा देर अपणायो। अर बिस्वासऊँ बाका हियानै धोर आपणा म अर बामै कोई भेद-भाव कोनी कर्यो। जणा पाछै इब थे क्याले परमेसरनै बिचासर बिस्वास्या की गरदना प हाळी धरर्या हो, जिनै नइ तो म्हारा बाप-दादा उठा सक्या अर नइ म्हें उठा सकां। म्हें ओ बिस्वास करां हां क परमेसर की दयाऊँ म्हें बी बचा लिआ गया हां जंय्यां क बे बचा लिआ गया हीं।” जणा सभा म बेठ्या सगळा का सगळा चुपचाला पोलुस अर बरनाबास की बाता सुणबा लागगा क, परमेसर कंय्यां बाकै जरिए गैर-यहूदिआ म अचरजभर्या सेलाणी-चमत्कार कर्या। अर जद बोलर बे चुप होया जणा याकूब खड़्यो होर बोल्यो, “मेरा लाडला बिस्वास्यो, मेरी सुणो। जंय्यां की समोन अबार बतायो ह क परमेसर कंय्यांसिक गैर-यहूदिआ की समाळ करी ह जि ताँई बो बा गैर-यहूदिआ मऊँ क्युंक मिनखानै बिका खुदका मिनख होबा ताँई बुलायो ह। अर इऊँ परमेसर की खेबाळा की बाता को बी मेळ मिलै जंय्यां क पबितर सास्तर म मंडेड़ो ह, “‘इकै पाछै म ओज्यु आर दाऊद का राजनै पाछो बसास्युं। इको राज नास होगो हो, म इनै ओज्यु बसार खड़्यो करस्युं। सगळा जगत का मिनख जखा मनै ढुंढीं हीं अर हाँ बे सगळा गैर-यहूदि मिनख बी जखानै म मेरा खुदका मिनख कर बुलायो हूँ बे बचेड़ा सगळा मेर कनै आसी। परबु बोलै ह क, म अ बाता बोळी पेल्याऊँई बता दिनी ही।’” याकूब ओर खयो, जणा इब मेरो फेसलो ओ ह क गैर-यहूदि मिनखा मऊँ जखा परमेसर क कनै आया हीं, बानै आपा दिन नइ घालां। पण बानै आ जरूर मांडर भेज्या क बे मूरत्या प चढाईड़ी चिज नइ खावै अर पराई लूगाया क सागै गळत काम नइ करै अर गळो मोसेड़ो मास नइ खावै अर नइ लोय पिवै। क्युं क पुराणा टेमऊँई अ बात नेम-कायदा मऊँ अरामहाळा दिन अरदास करबाळी झघा म बाची जावै ह अर नगरी-नगरी आको परचार कर्यो जार्यो ह। जणा पाछै भेजेड़ा चेला, बिस्वासी मंडळी का मुखिया अर सगळी बिस्वासी मंडळी क्युंक जणानै टाळर पोलुस अर बरनाबास क सागै अंताकीया भेजबा की ते करी। जणा बे यहूदा जिनै बरसबा बोलता हा अर सीलासनै टाळर, जखा बामै चोखी पेठ राखता हा बानै बाकै सागै भेज्या। बाकै हात बे अंय्यां मांडर भेज्या क, “अंताकीया, सिरीया अर कलिकीया म रेह्बाळा गैर-यहूदि बिस्वासी भायानै भेजेड़ा चेला अर यरूसलेम की बिस्वासी मंडळी का मुखिया को नमस्कार। म्हारा काना म आ बात आई ह क म्हारै मऊँ क्युंक मिनख बठै थारै कनै आर थानै आपकी बाताऊँ घबरा दिआ अर भंगरा दिन्या। पण अंय्यां करबा ताँई म्हें तो बानै ओडायो कोनी जणाई तो म्हें एक चित होर आ सोची की म्हारा लाडला बरनाबास अर पोलुस क सागै टाळेड़ा मिनखनै थारै कनै भेज्या। अ अंय्यां का मिनख ही जखा परबु ईसु मसी का नाम ताँई आपकी पिराणा की परवा कोनी करी। जणाई म्हें थारै कनै यहूदा अर सीलासनै भेजर्या हां जखा आपका मुंडाऊँ अ सगळी बाता थानै खे देसी। पबितर आत्मा अर म्हानै अंय्यां लाग्यो की आ जरूरी बातानै छोडर थार प ओर बेसी बोज नइ गेरां। क थे मूरत्या प चढाईड़ी चिजा, गळो मोसेड़ा मास, लोयऊँ अर पराई लूगाया क सागै गळत कामाऊँ परै रेहज्यो, अर थारो भलो होवै।” इकै पाछै बे अंताकीया गया अर बठै बिस्वासी मंडळी की सभा बुलार बो कागद बानै दे दिओ। अर बे बि आस बंधाबाळा कागदनै बाचर बा बाताऊँ बोळा राजी होया। यहूदा अर सीलास जखा परमेसर की खेबाळा हा, बे आस बंधाबाळी अर बिस्वासनै मजबूत करबाळी बाता बतार बानै मजबूत कर्या। बे बाकै सागै थोड़ा घणा दिन रेह्बा क पाछै बाऊँ राजी-खुसी बिदा लेर पाछा आपका भेजबाळा क कनै जाबा ताँई रवाना होया। (पण सीलासनै बठै रेह्बो चोखो लाग्यो)। पोलुस अर बरनाबास अंताकीया मई रेह्गा अर बोळा मिनखा क सागै परबु का बचननै सीखाता अर चोखा समचार को परचार करता रिह्या। थोड़ा घणा दिन बित्या पाछै पोलुस बरनाबासऊँ बोल्यो, “आओ ल्यो आपा बा नगर्या म चालां जामै आपा परबु को बचन सुणार आया हां बठै चालर बिस्वासी भायानै समाळा क बे कंय्यांसिक हीं।” जणा बरनाबास यहून्नानै जिनै मरकुस बोलीं हीं आपकै सागै लेबा की सोची। पण पंफुलिया म मरकुस बानै एकला छोडर चोखा समचार परचार म बाकै सागै कोनी गयो हो इ बजेऊँ पोलुस बिनै सागै कोनी लेज्याबो चातो हो। बि बातऊँ बाकै बिच अंय्यां की खिचा-ताणी होई क बे एक दुसराऊँ नाकै-नाकै होगा अर बरनाबास मरकुसनै लेर साईपरस चलेगो। पण पोलुस सीलासनै टाळ्यो अर बिस्वासी भाईड़ा बानै परमेसर क हाता म सू'पर अरदास कर दि जणा पाछै बो बठैऊँ चलेगो। अर बो बिस्वासी मंडळ्यानै मजबूत करतो सिरीया अर कलिकीया इलाकाऊँ होतो होयो गयो। इकै पाछै पोलुस दिरबे अर लुस्तरा म गयो बठै बिनै तिमूतियूस नाम को एक चेलो मिल्यो जिकी माँ यहूदि बिस्वासण ही पण बिको बाप यूनानी हो। बो मिनख लुस्तरा अर इकोनियुम का बिस्वासी भाया म पेठहाळो हो। पोलुस क आ मन म ही की बो बिकै सागै चालै, जणा बठै का यहूदि मिनखा क चलतै बो बिकी सुन्नत करी क्युं क बे सगळा जाणता हा क इको बाप यूनानी ह। अर नगरी-नगरी जार बे, बा आदेसानै जानै यरूसलेम का भेजेड़ा चेला अर बिस्वासी मंडळी का मुखिया बणाया हा बानै सीखाता अर मनवाता हा। अंय्यां करता-करता बिस्वासी मंडळ्या बिस्वास म मजबूत होती गई अर गिणती म बढती गई। बे फरूगिया अर गलातिया परदेसा म होर गया, क्युं क पबितर आत्मा बानै एसिया म बचन सुणाबा ताँई मना कर दिओ हो। बे मूसिया क कनै पुगर बितूनिया जाबो चावा हा पण ईसु की पबितर आत्मा बानै बठै बी जाबा कोनी दि। जणा बे मूसियाऊँ होर तरोआस म आया। बठै पोलुस एक दरसाव देख्यो। अर बि दरसाव म बो काँई देखै ह क एक मकीदुनिया को मिनख बिनै हात जो'ड़र खेर्यो ह क, “थे मकीदुनिया आर म्हारी मदद करो।” बिकै ओ दरसाव देखताई म्हें मकीदुनिया जाबो चाया क्युं क परमेसर म्हानै बठै चोखो समचार सुणाबा ताँई बुलायो ह। तरोआस नगरीऊँ रवाना होबा क पाछै म्हें पाणी का झाज म बेठर समोथराके, दुसरा दिन निआपोलिस पुग्या अर बठैऊँ बे जमीन क गेला फलिपी पुग्या। फलिपी मकीदुनिया परदेस की मानेड़ी नगरी अर रोमी मिनखा की बस्ति ही। म्हें क्युंक दिन बठै रिह्या। यहूदिआ क अरामहाळा दिन म्हें आ सोचर नगरी का दरूजा क बारनै नदि किनारै गया की बठै कोई अरदास करबा की झघा होगी। म्हें बठै बेठगा अर बा लूगायाऊँ बतळाबा लागगा जखी बठै भेळी होरी ही। बा लूगाया म थुआतिरा नगरीऊँ लुदिआ नाम की एक लूगाई ही जखी मेंगा भाव का गाबा बेच्या करती ही अर बा परमेसर की भगत ही। परबु बिका मन का पाट खोल दिआ अर बा पोलुस की बाता प गोर करी। अर आपका टाबर-टिकरा सेत्युं बतिस्मो लेबा क पाछै बा म्हारूँ बोली, “ज थे मनै परबु की सची बिस्वासण मानो हो जणा चालर मेरै घरा रेह्ओ ,” अर बा म्हानै मनार लेगी। म्हें जद अरदास करबा हाळी झघा म जार्या हा जणा म्हानै एक दासी मिली जिमै हूँण बताबाळी बलाय ही अर मिनखा की हूँण बतार बा आपका मालिकानै बोळा पिसा कमार देरी ही। जणा बा म्हारै गेल आर कूकबा लागी की, “अ मिनख सचा परमेसर का दास हीं जखा थानै छुटकारा को गेलो दिखावीं हीं।” बा बोळा दिना ताँई अंय्यांई करती री जणा पोलुस दुखी होर बि नुगरी ओपरी बलायऊँ बोल्यो, “म ईसु मसी का नामऊँ तनै आदेस द्‍युँ हूँ क तू इमैऊँ निकळज्या।” अर बा अत्तो खेताई बिमैऊँ निकळगी। बिका मालिक आ देखर क आपणी कमाई को सादन तो जातो रिह्यो जणा बे पोलुस अर सीलासनै खिंचर चोक म परधान क कनै लेग्या। बे बानै न्याय करबाळा क आगै लेग्या अर बाऊँ कह्या क , “अ यहूदि मिनख ही जखा आपणी नगरी म खळबळी मचा राखी ह। अर अ आपणा मिनखानै अंय्यां का रिती-रिवाज सीखार्या हीं जानै मानबो अर बापै चालबो रोम्या का नियमा क खिलाप ह।” बाकै खिलाप भीड़ बी भेळी होर बोलबा लागी। जणा पाछै न्याय करबाळा बाका गाबल्या फड़वार बाकै तड़ा मराबा को हुकम दिआ। बाकै अणमेदा का तड़ा पड़वार बे बानै पाछा कोठड़ी म बंद कर दिआ अर कोठड़ी का दरोगानै सूल पेरो देबा ताँई आदेस दिओ। जणा बो दरोगो आदेस गेल बानै मांयली कोठड़ी म बंद कर बाका पगानै काठ म ठोक दिआ। आदी रातनै पोलुस अर सीलास अरदास अर परमेसर का भजन गाबा लागर्या हा अर बानै सगळा केदि सुणर्या हा। अत्ती बारां मई धरती हालगी अर काळ-कोठड़ी की निम तकात हालगी अर सगळा केद्‍या की साँकळा टूटगी अर कुआड़ बी मतैई खुलगा। दरोगो जाग्यो अर सगळा कुआड़ खुला देखर सोच्यो क सगळा केदि भाग छुट्या जि बजेऊँ बो खुदनै मारबा ताँई आपकी तलवार काडी। जणा पोलुस जोरऊँ बोल्यो, “खुदनै नुकसान मना पुचावै! म्हें सगळा अठैई हां।” जणा बो मसाल मंगार मांयनै गयो अर धुजतो-धुजतो पोलुस अर सीलास क पगा म पड़गो। अर बो बानै बारनै लेज्यार बुज्यो, “म्हराज छुटकारो पाबा ताँई मनै काँई करबो चाए?” जणा बे बिऊँ बोल्या, “परबु ईसु म बिस्वास कर। अंय्यां करबाऊँ तू अर तेरो सगळो कूणबो छुटकारो पासी।” इकै पाछै बे बिनै अर बिका घर म भेळा सगळा मिनखानै परबु को बचन सुणाया। बि रातई बो बानै लेज्यार बाका घाव धोया अर आपका सगळा कूणबा समेत रात्यु-रातई बतिस्मो लिओ। जणा बो बानै आपकै घरा लेज्यार जिमायो अर आपका पूरा कूणबा सेत्युं परमेसर प बिस्वास कर खुसी मनाई। दिन उग्यो जणा न्याय करबाळा सिपाईड़ा क हात खुवा भेज्या की बा मिनखानै छोड द्‍यो। जणा बो दरोगो ह जखो पोलुसनै आर बोल्यो, “न्याय करबाळा थानै दोन्यानै छोडबा ताँई ओडाया ह जणा इब थे बारनै आर राजी-खुसी जाओ।” पण पोलुस अकड़गो अर बा सिपायड़ाऊँ बोल्यो, “म्हें रोमी होतासोता बी, बे म्हारै प लगाया गया दोस की जाच पड़ताळ कर्या बिनाई म्हारै सगळा क सामै तड़ा मरवार म्हानै कोठड़ी म बंद कर दिआ। अर इब चुपचाला म्हानै छोडर्या हीं, अंय्यां कोनी चालै जद ताँई बे खुद आर म्हानै नइ छोडै म्हें कोनी जावां।” आ बात सिपाईड़ा जार बा न्याय करबाळाऊँ बोली जणा बे आ सुणर क बे रोमी हीं डरग्या। जणा बे खुद आर बाकै सामै हाता जोड़ी करी अर बठैऊँ बानै बारनै ल्याया अर हात जो'ड़र कह्या, “थे दया कर इ नगरीऊँ चल्या जाओ।” जणा बे बठैऊँ छुटबा क पाछै सिदा लुदिआ क घरा गया अर बिस्वासी भाईड़ाऊँ मिल-मिलार बानै हिमत बंधार बठैऊँ चलेगा। इकै पाछै बे अम्फिपुलिस अर अपुलोनिया होताहोया थिसलूनिकी म आया, जठै यहूदि मिनखा की एक अरदास करबाळी झघा ही। पोलुस आपकी बाण गेल बाऊँ मिलबा गयो अर बाऊँ यहूदिआ क तीन अरामहाळा दिन सास्तर का बचनानै लेर चरचा करी। अर धरमसास्तर को बखान कर आ साबित कर्यो क दुख भोगबो अर मरेड़ा मऊँ जिंदो होबो मसी ताँई जरूरी हो। सागैई बो आ बी बोल्यो क, “ईसुई छुटकारो देबाळो राजा ह। जिकी बाता म थानै बताऊँ हूँ।” बामैऊँ क्युंक जणा बिस्वास कर्या अर पोलुस अर सीलास म जार मिलगा। अंय्यां का बोळा परमेसर का भगत यूनानी मिनख अर मानी-थानी लूगाया बी अंय्यांई करी। इपै यहूदि जळता-बळता पिसा देर क्युंक बदमास मिनखानै आपकै सागै कर लिओ अर नगरी म बिदरो मचाबा लागगा। बे पोलुस अर सीलासनै भीड़ क सामै ल्याबा क चकर म यासोन क घरा धावो बोल्यो। बठै बानै बे कोनी लाध्या जणा बे यासोन अर क्युंक भायानै नगरी का अधिकारीया क कनै लेग्या अर चिलार कह्या, “बे सगळी दुनिया का मिनखा म उथल-पुथल मचार इब अठै आया हीं।” यासोन बानै आपकै घरा राख्यो अर अ सगळा बोली हीं ईसु नाम को कोई ओर राजा ह, अर अ रोम का राजा कैसर को आदेस कोनी मान्यो। आ सुणर नगरी का मिनख अर नगरी का अधिकारी लाल-ताता होगा। जणा अधिकारी यासोन अर दुसरा बिस्वास्यानै जमानत लेर छोड दिआ। जणा बठै का बिस्वासी भाईड़ा पोलुस अर सीलासनै रात्यु-रातई बठैऊँ बिरीया भेज दिआ अर बे बठै पुगर सिदा यहूदिआ क अरदास करबाळी झघा गया। अठै का यहूदि थिसलूनिकी का यहूदि मिनखाऊँ चोखा हा अर बे पूरा मनऊँ बचननै अपणाया अर बे रोजकी बाकी बोलेड़ी बातानै सास्तर म टोता हा क बे बंय्यांई ह क कोनी। जिऊँ बोळा मिनख बिस्वास कर्या अर बामै यूनानी मिनख अर मानी-थानी लूगाया ही। अर जद थिसलूनिकी का यहूदि मिनखानै ओ बेरो पड़्यो की पोलुस बिरीया म बी परमेसर को बचन सुणार्यो ह जणा बे बठै आर भीड़नै बाकै खिलाप भर दिआ। जणा बठै का मसी भाईड़ा तावळासा पोलुसनै बिदा कर समदर किनारै भेज्या पण सीलास अर तिमूतियूस बिरीया मई रेह्गा। पोलुस का साती बिनै एथेंस नगरी ताँई छोडर बिको ओ आदेस लेर आया क सीलास अर तिमूतियूस मेर कनै बेगाऊँ बेगा आवै। पोलुस जद एथेंस म उडिकर्यो हो। जणा बो बि नगरी म मूरत्या की भरमार देखी अर बानै देखर बिकी अन्तर-आत्मा बोळी दुखी होई। जि बजेऊँ बो अरदास करबाळी झघा म यहूदि अर गैर-यहूदि मिनखा क सागै जखा परमेसर का भगत हा। अर रोजकी चोक म आबाळा जाबाळा क सागै बी चरचा करतो हो। बठै बो क्युंक एपिकूरी अर स्तोइकी ज्ञानी मिनखा क सागै बी चरचा करी। क्युंक मिनख कह्या, “ओ गेलो म्हारूँ काँई खेबो चावै ह?” अर क्युंक खेता हा, “लागै ह क ओ कोई पराया देवता की बात करै ह।” क्युं क बो ईसु अर बिकै मर्या पाछै ओज्यु जीबा का चोखा समचार को परचार करतो हो। जणा बे बिनै अरियुपगस की सभा म लेग्या अर बिऊँ बुज्या, “थे आ कूणसी नई सीख देर्या हो। थे म्हानै अणजाणी सीख बताओ हो, जणाई म्हें आको मतबल जाणबो चावां हां।” सगळा एथेंस का रेह्बाळा अर दुसरा देसाऊँ आर बसेड़ा परदेस्या को करीब-करीब सगळो टेम नई-नई बाता खेबा अर सुणबा मई बिततो हो। अरियुपगस की भरी सभा म पोलुस खड़्यो होर बोल्यो, “एथेंस म रेह्बाळो म आयो जणाऊँ देखबा लागर्यो हूँ क थे सगळी बाता म बोळा धरमी हो। म जद हांडतो-फिरतो थारी पूजबा की चिजा देख्यो हो जणा बठै मनै एक अंय्यां की बेदी दिखी जिपै मंडर्यो हो अणजाण देवता ताँई। थे जि ईस्बरनै बिना जाण्या पूजो हो म थानै बि ईस्बर क बारां मई बताऊँ हूँ। बो परमेसर जखो इ सरस्टि अर इपै जोक्यु बी दिखै ह बिनै बणायो अर बोई ईस्बर नगरी अर धरती को मालिक ह। बो हाताऊँ बणाएड़ा देवरा म कोनी रेह्‍वै। बिनै काँई बात की कमी? जखो बो मिनखा की सेवा लेवै? बो तो सगळा जिवांनै सांस, जीवन अर सक्यु देवै ह। बो एकई मिनख क जरिए इ धरती प च्यारूमेर मिनख फेलाया। अर बाका टेम अर परदेसा की सीमा ते करी। अर बो अंय्यां इ ताँई कर्यो क, मिनख बिनै टोवै अर बिनै पावै, पण बो आपणाऊँ दूर कोनी ह। क्युं क क्युंक बोली हीं, ‘बिमैई आपणा पिराण, बिमैई आपा डोला-फिरां हां अर बिमैई आपणो बजूद ह।’ जंय्यां क थारा कबी बोलगा क, ‘आपा बिका टाबर हां।’ अर आपा परमेसर का टाबर हां, जणा आपानै ओ समजबो चाए क परमेसर आपणै हातऊँ घड़ेड़ी सोना-चाँदी अर भाठा की चिजा जंय्यां को कंय्यां हो सकै ह? परमेसर बि टेम का मिनखा को लेखो कोनी लेबो चायो जद बे बिनै कोनी जाणता हा, पण इब बो हुकम देवै ह क सगळी धरती का सगळा मिनख पापऊँ तौबा करै। क्युं क एक दिन परमेसर पेल्याऊँ ते करेड़ा मिनख क हातऊँ जगत का मिनखा को सचाई क सागै न्याय करसी। इ बात को सबूत देबा ताँई परमेसर बिनै मरेड़ा मऊँ जीवायो।” मरेड़ा मऊँ ओज्यु जीबा की बात सुणर क्युंक मिनख बिपै हसबा लागगा। अर क्युंक बिऊँ बोल्या की, “इ बारां म म्हें ओज्यु कदै सुणस्यां।” जणा पोलुस बठैऊँ चलेगो। इकै पाछै कई मिनख बिस्वास कर्या अर बिकै गेल गया। आ मिनखा म अरियुपगस सभा को एक मिनख जिको नाम दिओनुसीस अर दमरिस नाम की एक लूगाई अर ओर बी बोळा मिनख हा। जणा पाछै पोलुस एथेंसऊँ कुरन्थी म आयो। जठै बो अकविला नाम का एक यहूदि मिनखऊँ टकरायो। जिकी जन्मभौम पिन्तुस ही। अर बो इटलीऊँ आपकी लूगाई क सागै हाल आयोई हो। क्युं क बठै को म्हराज कलोदियुस सगळा यहूदिआनै रोमऊँ निकळ जाबा को हुकम काड्यो। जणाई पोलुस बाऊँ मिलबा गयो । अर बो बाकै सागै रेह्बा अर काम करबा लागगो क्युं क बाको एकसोई धंधो हो। बे तम्मू बणाबाळा हा। पोलुस हर यहूदिआ का अरामहाळा दिन अरदास करबाळी झघा म यहूदि अर यूनानी मिनखा क सागै चरचा करतो अर बानै समजातो हो। अर जद सीलास अर तिमूतियूस मकीदुनियाऊँ आया जणा पोलुस आपको सगळो टेम बचन का परचार मई बितातो हो अर यहूदि मिनखा म आ साबित करतो की ईसुई मसी ह। पण जद बे मिनख पोलुस को बिरोद अर बिकी बुराई करबा लागगा जणा बो आपको पल्लो झाड़ लिओ अर बोल्यो, “थारी करनी थेई पाओ! इमै मेरी कोई जुबाबदारी कोनी अर इबऊँ म गैर-यहूदि मिनखा क कनै जास्युं।” बठैऊँ बो तितूस यूसतुस नाम का एक परमेसर का गैर-यहूदि भगत क घरा आयो; अर बिको घर हो जखो अरदास करबाळी झघा क सारैई हो। जणा अरदास घर को अधिकारी आपका सगळा परवार सेत्युं परबु म बिस्वास कर्यो अर बाकै सागै बोळा कुरन्थी म रेह्बाळा पोलुस की बाता सुणर बिस्वास कर्या अर बतिस्मो लिओ। अर एक रात परबु पोलुसनै दरसाव देर कह्या, “तू डरै मना बोलतोई रेह चुप मना होवै क्युं क म तेरै सागै हूँ, कोई तेरो बाळई बाको कोनी कर सकै। अर इ नगरी का बोळा मिनख मेरा बणसी।” अर पोलुस बठै डेड बरस ताँई रेह्‍र मिनखानै परमेसर का बचना की सीख देतो रिह्यो। जद गलिओ अखाया परदेस को राजपाल हो बि टेम सगळा यहूदि एको कर पोलुसनै पकड़र कचेरी म खड़्यो कर दिओ अर बे बोल्या, “ओ मिनख मिनखानै परमेसर की भगती करबा की अंय्यां की रीत सीखावै जखी मूसा का नेम-कायदा क खिलाप ह।” पोलुस बोलबाळोई हो क अत्ता मई गलिओ बोल्यो, “ओ यहूदि मिनखो! ज आ गळत अर अपराद की बात होती जणा म थारी बात स्यांतीऊँ सुणतो। पण ओ झमेलो तो थारी बाता को, नाम अर थारा खुदका रिती-रिवाजा को ह इ मामलानै थेई जाणो म इ मामला को न्याय कोनी करूं।” आ खेर बो बानै कचेरी क बारनै निकळ्वा दिओ। जिकै पाछै बे अरदास घर का अधिकारी सोस्थिनेस कचेरी क सामै मार पिटाई करी पण गलिओ प आ बाता को कोई फरक कोनी पड़्यो। पोलुस क्युंक दिन कुरन्थी म रेह्बा क पाछै भायाऊँ बिदा होर परसकीला अर अकविला क सागै किंखिरीआस आयो अर बठै आपको सीर मुंडायो क्युं क बो कोई मन्नत माँगी ही। पाछै पाणी का झाज प सवार होर सिरीया ताँई रवानगी करी। अर इफिसुस पुगर परसकीला अर अकविलानै बठैई छोडर खुद अरदास घर जार यहूदि मिनखाऊँ चरचा करबा लाग्यो। अर बे पोलुस का ओर थोड़ा दिन बठै रेह्बा ताँई न्होरा खाया पण बो कोनी मान्यो। अर बो बाऊँ बिदा होर बोल्यो, “परमेसर चायो तो आपा ओज्यु मिलस्यां।” आ खेर बो इफिसुस छोडर पाणी का झाजऊँ कैसरिया गयो अर बठैऊँ यरूसलेम जार बठै की बिस्वासी मंडळीऊँ नमस्कार कर अंताकीया गयो। क्युं क दिन बठै रेह्‍र बो बठैऊँ बिदा होर गलातिया अर फरूगिया ठिकाणा म सगळा चेला-चपाट्यानै समाळतो फिर्यो। अपुलोस नाम को एक यहूदि जिकी जन्मभौम सिकन्दरिआ ही बो बोलबा म बोळो माहिर हो अर सास्तर को चोखो ज्ञ्याता हो बो बा दिना इफिसुस आयो। बिनै परबु का गेला की सीख मिली ही अर बो आपकी सगळी आत्माऊँ ईसु क बारां म सई-सई बाता सुणातो अर सीखातो हो, पण बो खाली पाणी को बतिस्मो देबाळा यहून्ना क बारां मई जाणतो हो। अर बो अरदास घर म बेधड़क बोलबा लाग्यो। परसकीला अर अकविला बिकी बाता सुणबा क पाछै बिनै आपकै घरा ल्याया अर बिनै ओर बी चोखा ढंगऊँ परमेसर का गेला क बारां म समजाया। अर जद अपुलोस अखाया परदेस जाबा की मन म करी जणा बठै का भाईड़ा बिकी मदद करी अर बिकै हात चेलानै एक कागद भेज्यो क बे बिकी आवभगत करै। अर बो बठै जार बा मिनखा की मदद करी जखा परमेसर की दयाऊँ बिस्वास म आया हा। क्युं क बो सास्तरऊँ “ईसुई मसी ह” इ बातनै साबित कर सगळा मिनखा क सामै यहूदि मिनखा को मुंडो बंद कर दिओ। अपुलोस जद कुरन्थी म हो जणा पोलुस एसिया का मांयला परदेसा को दोरो कर इफिसुस पुग्यो। जठै बिनै क्युंक चेला मिल्या जणा बो बाऊँ बुज्यो, “थे जद बिस्वास कर्यो हो बि टेम थानै पबितर आत्मा मिल्यो हो के?” जणा बे बोल्या, “ओ काँई होवै ह म्हें तो पबितर आत्मा क बारां म पेली कदैई कोनी सुण्या।” बो बाऊँ बोल्यो, “जणा पाछै थानै किको बतिस्मो दिओ गयो ह,” बे बोल्या, “पाणी को बतिस्मो देबाळा यहून्ना को।” जणा पोलुस बानै खेबा लाग्यो, “यहून्ना पापऊँ तौबा करबा ताँई पाणी को बतिस्मो दिआ करतो हो। अर मिनखाऊँ बोल्या करतो हो की जखो मेरै पाछै आबाळो ह बिपै बिस्वास करज्यो। बोई ईसु ह।” आ सुणर बे परबु ईसु का नामऊँ बतिस्मो लिओ। अर जद पोलुस बापै हात धर्यो जणा बापै पबितर आत्मा उतर्यो। बे भात-भात की बोली बोलबा लागगा अर परमेसर का चोखा समचार को हेलो पाड़बा लागगा। अर बे कुल मिलार करीब बारा जणा हा। पोलुस यहूदिआ का अरदास घर म तीन म्हेना ताँई बेधड़क बोलतो अर परमेसर का राज क बारां म मिनखानै समजातो रिह्यो। पण बामैऊँ क्युंक ढिट हा अर बे इपै बिस्वास कोनी कर्या अर परमेसर की आ बाता क बारां म बुरो भलो बी बोलता हा। जि बजेऊँ पोलुस बानै बठै छोडर बिस्वास्यानै लेर रोजकी तरनुस का समुदाय भवन म धरम की सीख देबा लागगो। करीब दो बरस ताँई अंय्यांई चालतो रिह्यो अर अंय्यां करता-करता एसिया का सगळा रेह्बाळा चाए बे यहूदि हो चाए यूनानी ईस्बर को बचन सुण्या। अर परमेसर पोलुस क हाताऊँ मिनखानै ताजूब का काम दिखातो हो। अर अठै ताँई जद लोग बिकी काया क अड़ेड़ा रूमाल अर गमछो रोगला प गेरता जणा बे निरोगा होज्याता अर ओपरी बलाय भाग जाया करती ही। पण क्युंक यहूदि मिनख जखा स्याणा भोपा हा। बे परबु ईसु को नाम लेर ओपरी बलायानै भगाबा की कोसिस करता हा अर बे जखा म ओपरी बलाय ही बाऊँ अंय्यां खेता हा क, “ईसु का नामऊँ भागज्या जिको परचार पोलुस करै ह।” यहूदि परधान याजक स्केवा का सात्यु बेटा अंय्यांई करता हा। जणा ओपरी बलाय बाऊँ बोली, “ईसुनै म जाणू हूँ अर पोलुस क बारां म बी जाणू हूँ, पण थे कूण हो?” अर जि मिनख म बा ओपरी बलाय ही बो बापै झपट्यो अर बा सगळानै पछाड़र बाकी अंय्यां की दुरगती करी क बे अदमर्या होर उघाड़ाई बि घरऊँ भाग छुट्या। अर आ बात सगळा इफिसुस म फेलगी अर बठै का सगळा यहूदि अर यूनानीयानै इ बात को बेरो पड़गो, जिऊँ बे सगळा डरग्या अर परबु ईसु का नामनै बोळो आदरमान दिओ। जत्ता ईसु का नाम को बिस्वास कर्या बामैऊँ घणकराक सगळा क सामै आप-आपका बुरा कामानै मान्या। जादू मंतर करबाळा घणकराक आप-आपकी पोथ्यानै भेळी कर बानै सगळा क सामै बाळ गेरी अर जद बाको मोल जोड़्यो गयो जणा बो करीब पचास झार चाँदी हाळा सीक्का क बराबर निकळ्यो। अर अंय्यां परबु को बचन मजबूत होर फेलतो रिह्यो। आ बाता क पाछै पोलुस पबितर आत्माऊँ मकीदुनिया अर अखायाऊँ होर यरूसलेम जाबा की सोची अर बोल्यो क, “बठै जाबा क पाछै मनै रोम बी जाणो ह।” जणा बो आपका दो सात्या तिमूतियूस अर इरास्तुसनै मकीदुनिया भेज्यो, अर आप खुद क्युं क दिन ताँई एसिया म रिह्यो। बि टेम बोळा मिनख परबु म आर्या हा जि बजेऊँ बोळो जोरको बबाळ माच्यो। क्युं क देमेतिरीयुस नाम को एक सुनार चाँदीऊँ अरतिमीस देबी हाळा देवरा का खिलोणा बणवार कारिगरानै बोळो फाईदो दिवाया करतो हो। जणा बो आ कारिगरानै अर इ कामऊँ जुड़ेड़ा दुसरा मिनखानै भेळा कर बोल्यो, “भाईड़ो! थानै बताबा की जुर्त कोनी की इ कामऊँ आपानै कतो फाईदो होवै ह। अर थानै जंय्यां बेरोई ह क पोलुस इफिसुस मई नइ पण सगळा एसिया म मिनखानै भंगरा इ बातनै मनवावै ह क हातऊँ बणाएड़ी मूरती ईस्बर कोनी। जिकी बजेऊँ आपणा धंधा की बदनामी होबा कोई डर कोनी पण म्हान देबी अरतिमीस का देवरा की मेमा बी खतम होबा को डर ह। अर आपणी देबी जिनै सगळा एसिया अर जगत का मिनख पूजै ह बिकी मेमा बी खतम होज्यासी।” आ सुणताई बे झाळा म लाल-ताता होगा अर जोर-जोरऊँ खेबा लागगा क, “इफिसीआ की देबी अरतिमीस की जे हो!” अर अंय्यां पूरी नगरी म हो-हल्लो मचगो अर बे लोग मकीदुनिया का रेह्बाळा गयुस अर अरिस्तखुसनै जखा सफर म पोलुस क सागै हा बानै पकड़ लिआ अर सगळा बानै नगरी का मैदान कानि भगाताई लेग्या। अर जद पोलुस बठै जार मिनखा क सामै बोलबा की मन म करी जणा चेला बिनै जाबा कोनी दिआ। एसिया परदेस का क्युंक अधिकारी पोलुस का भाईला हा बे बी पोलुसनै खुवा भेज्यो क बो मैदान म नइ आवै। बि पंचायत म धांधळी मचरी ही क्युं क कोई क्युं खेवै हो अर कोई क्युं, कयानै तो ओई कोनी बेरो हो क बे क्याले भेळा होया हीं। जणा यहूदि सिकन्दरनै आगै भेज्या अर बो आपका बचाव पक्ष म मिनखानै हात हला-हलार बोलबा लाग्यो। पण जद भीड़नै ओ बेरो पड़्यो क बो यहूदि ह। जणा बे सगळा करीब दो घंटा ताँई जोर-जोरऊँ रोळा मचाता रिह्या क, “इफिसीआ की अरतिमीस की जे हो अरतिमीस की जे हो।” इकै पाछै नगरी को मुनिम मिनखानै चुप करार बोल्यो, “अरै इफिसीओ, कूण कोनी जाणै क इफिसुस नगरी म्हान देबी अरतिमीस अर आसमानऊँ गिरी बिकी मूरती अर बिका देवरा को रूखाळो ह। अर जद आ बातानै कोई झूठी बताई कोनी सकै जणा पाछै थानै चुप होज्याणो चाए अर बिना सोच्या समज्या क्युंई नइ करबो चाए। अर थे जखा आदम्यानै पकड़र अठै ल्याया हो बे नइ तो देवरानै लूट्यो अर नइ आपणी देबी क बारां म बुरो भलो बोल्या। अर देमेतिरीयुस अर बिका साती कारिगरानै कोईऊँ क्युं सिकायत ह, जणा कचेरी खुली ह अर न्याय करबाळा बी बेठ्या ह अर बठैई थे थारो मुकदमो दरज करा सको हो। अर मिनखो ज थारी बी कोई सिकायत ह जणा बिकै बारां म कानूनऊँ मान्यता मिलेड़ी नगरी की पंचायत म बिचार कर्यो जा सकै ह। क्युं क आज का इ बबाळ को दोस कदै आपणा सीर नइ मंढ जावै अर इनै सई बोलबा ताँई आपणै कनै कोई बजै बी कोनी।” आ खेर बे बि पंचायतनै बरखास्त कर दिनी। बबाळ थमबा क पाछै पोलुस बिस्वास्यानै बुलार बानै आस बंधार अर बाऊँ बिदा लेर मकीदुनिया कानि रवाना होयो। अर बा परदेसा को दोरो कर्यो अर बठै का बिस्वास्यानै हिमत बंधार बो यूनान का अखाया परदेस गयो। अर बठै तीन म्हेना रेह्बा क पाछै बो पाणी का झाजऊँ सिरीया जाबो चायो जणा बिनै भणक लागी की यहूदि बिकी ताक म हीं। जणा बो मकीदुनिया होर जाबा की मन म करी। जणा बिरीया को पाईरस को छोरो सूपतरुस अर थिसलूनिकी अरिस्तखुस अर सिकन्दुस, दिरबे को गयुस, एसिया को तुखीकुस अर तरीफिमुस एसिया ताँई बिकै सागै होलिआ बाकै सागै तिमूतियूस बी हो। बे म्हारै अगाऊ जार तरोआस म म्हानै उडिकबा लागगा। अर जंय्यांई बिना खमिर की रोटी को त्युंहार सलट्योक, म्हें पाणी का झाजऊँ पाच दिना पाछै तरोआस पुग्या जठै म्हें सात दिन ताँई रिह्या। सपता का पेला दिन दितबारनै, म्हें एक सागै परबु की याद म रोटी खाबा ताँई भेळा होया। पोलुस जखो दुसरा दिन बठैऊँ जाबाळो हो बो बाऊँ बाता करी अर आदी रात ताँई बो बाऊँ बतळातो रिह्यो। अर जि माळ्या म म्हें भेळा होर्या हा बिमै बोळा सारका दिआ जळबा लागर्या हा। अर युतूखुस नाम को एक मोट्यार जंगला म बेठ्यो हो अर बिनै निंद का लटका आर्या हा। अर जद पोलुस देर ताँई बाता करतो रिह्यो जणा बिकी आँख लागगी अर बो तीसरा माळाऊँ निचै गिरगो अर जद बिनै उठाया, जणा बो बानै मरेड़ो लाध्यो। जणा पोलुस तळै आर बिनै आपकी छातीऊँ लगार मिनखाऊँ बोल्यो, “घबराओ मना क्युं क हाल तो ओ जीवै ह।” अर इकै पाछै बो उपर जार परबु की याद म रोटी तोड़ी अर रोटी खार भागपाट्या ताँई बाऊँ बाता करतो रिह्यो। अर इकै पाछै बो बठैऊँ चलेगो। अर बे बि मोट्यारनै जीवतो घरा ल्याया अर बानै इऊँ बोळो चेन मिल्यो। म्हें पेल्याई पाणी का झाजऊँ असोस ताँई चाल पड़्या। बठै म्हानै पोलुसनै बी बिठाणो हो। ओ इंतजाम बो इ ताँई कर्यो क्युं क बो पैदल जाबाळो हो। अर जद पोलुस असोस म म्हानै मिल्यो जणा म्हें बिनै पाणी का झाज म चढार मितूलेने लिआया। बठैऊँ पाणी का झाजऊँ दुसरा दिन खियुस टापू प पुग्या। अर आगला दिन समदर पार कर सामोस टापू अर बिकै दुसरा दिन मिलेतूस नगरी जा टिक्या। पोलुस इफिसुसऊँ बारै-बारै होर जाबा की मन म कर राखी ही, क्युं क बो एसिया म टेम काटबो कोनी चातो हो, क्युं क बो पेन्तिकूस हाळै दिन ताँई यरूसलेम पुगबा की तावळ्या म हो। पोलुस मिलेतूसऊँ इफिसुस म खुवा भेज्यो अर बिस्वासी मंडळी का मुखियानै आपकै कनै बुलावो भेज्यो। अर जद बे बिकै कनै पुग्या जणा बो बानै बोल्यो, “थे तो जाणोई हो की जद म एसिया म पेली बर आयो हो, बि दिनऊँ लेर हाल ताँई मेरो चाल-चलन किसोक रिह्यो ह। अर थानै आ बताबा की जुर्त तो आथ कोनी क यहूदि मिनख जद एको कर मेरै खिलाप होगा हा। जिऊँ मेर प कत्ती तुमत आई ही पण आकै बावजुद बी म दिन-रात नरमाई अर आसुआ क सागै कंय्यां परबु की सेवा करतो रिह्यो। अर जखी बात थारै ताँई चोखी ही बानै बताबा ताँई म कदैई मन म दबार कोनी राखी पण बा बाता की सीख सगळा क सामै अर घरा-घरा जार देतो रिह्यो। अर म यहूदि अर यूनानी मिनखानै पापऊँ मन फेर'र परमेसर कानि मुड़बा अर परबु ईसु मसी प बिस्वास करबा ताँई खेतो रिह्यो। अर इब म पबितर आत्मा क कह्या गेल यरूसलेम जार्यो हूँ अर मनै कोनी बेरो क बठै मेर म काँई-काँई बितसी। पण म खाली ओई जाणू हूँ क सगळी नगर्या म पबितर आत्मा मनै हुस्यार कर दिओ ह, क तुमत अर केद मनै उडिकै ह। पण मनै मेरी ज्यान की परवा कोनी म तो बस मेरी भाग दोड़नै पूरी करबो चाऊँ हूँ। अर परमेसर की दया का चोखा समचार सुणाबा को काम जखो परबु मनै सूप्यो ह बिनै पूरो करबो चाऊँ हूँ। अर इब म थानै बताबो चाऊँ हूँ क थे सगळा जणा जाकै मांयनै म परमेसर का राज क बारां म सुणायो हूँ मेरो मुंडो ओज्यु कोनी देखस्यो। इ ताँई म आज थानै गुवाई देर बोलुँ हूँ क ज थारै मालो कोईबी नास होसी बिकी मेरी जुबाबदारी कोनी। क्युं क म परमेसर की सगळी इंछ्या थानै बता दिओ हूँ। जणा इब थे बिस्वासी मंडळी का रूखाळा हो आ जिमेदारी थानै पबितर आत्मा सूपी ह। बा लल्ड्या का रेवड़ा का गुवाळ्या बणो, जिनै परमेसर आपका बेटा का लोयऊँ मोल लिओ ह। अर म आ बी जाणू हूँ क मेरै जाबा क पाछै थारै मऊँ अंय्यां का खुखार ल्याळी आज्यासी जखा कोईबी लल्डीनै कोनी छोडसी। अर थारै मऊँ बी अंय्यां का मिनख खड़्या होसी जखा टेडी मेडी बाता बोलर बिस्वास्यानै आपकै गेल कर लेसी। जणा इब थे चेता म रेह्‍वो अर आ कदैई मना भूलज्यो की तीन बरसा ताँई दिन-रात आसुआ क सागै थानै एक-एकनै चेताबो कोनी भूल्यो। अर इब म थानै परमेसर की साळसमाळ अर बिकी दया का बचना म सूपूँ हूँ जखो थानै तगड़ो करसी अर जखी बापोत परमेसर का सगळा मिनखा ताँई ह बा थानै बी देसी। म कोईका सोना-चाँदी अर कपड़ा को लालच कोनी कर्यो। अर थानै आ बताबा की बी जुर्त कोनी क म मेरा आ हाताऊँई मेरी अर मेरा सात्या की जुर्त पूरी करी। म परबु ईसु का बे बचन याद राख'र की ‘लेबाऊँ देबो चोखो ह।’ मेरा हाताऊँ मेनत कर माड़ानै समाळर थानै दिखायो हूँ।” आ खेर बो आपका गोडा क पाण बेठगो अर सगळा क सागै अरदास करबा लागगो। जिकै पाछै बे सगळा जणा बोळा रोया अर पोलुस क बांथ घालर बिकै प्यारऊँ गळै मिलबा लागगा। अर बे घणा दुखी तो इ बात प हा क बो बाऊँ बोल्यो हो क मेरो मुंडो थे ओज्यु कोनी देखस्यो। जणा पाछै बे बिनै पाणी का झाज प बिठाबा आया। बठैऊँ बिदा होर म्हें पाणी क गेला कोस अर रूदुस टापू होताहोया दो दिन पाछै पतरा नगरी म पुग्या। जठै म्हानै फिनीके जातो एक झाज हात आगो जिपै म्हें सवार होर चाल पड़्या। म्हानै साईपरस टापू दिख्यो जणा म्हें बिकै दिखणाद म जार सिरीया जाबाळो गेलो पकड़ लिओ अर सूर नगरी म रूक्या क्युं क बठै झाजऊँ माळ उतारनो हो। अर बठै क्युंक बिस्वास्यानै देखर म्हें बाकै सागै सात दिना ताँई रिह्या अर पबितर आत्मा क बताया गेल बे पोलुसऊँ बोलता हा की यरूसलेम म जाबा को बिचार छोड दे। आठवा दिन म्हें बठैऊँ रवानगी करी अर बे आपका टाबर-टिकरा समेत म्हानै नगरी क बारनै छोडर गया अर समदर क किनारा प पुगर म्हें गोडा टे'कर अरदास करी, जणा बाऊँ बिदा होर म्हें तो पाणी का झाज प चढगा अर बे आप-आप क घरा चलेगा। जणा म्हें पाणी क गेला पतूलिमयिस आया अर बिस्वासी भायानै नमस्कार कर बाकै सागै एक दिन रिह्या। अर दुसरा दिन बठैऊँ चालर म्हें कैसरिया पुग्या अर फलिपूस जखो चोखा समचार को परचार कर्या करतो हो बिकै घरा रूक्या जखो यरूसलेम म टाळेड़ा बा सात जणा मऊँ एक हो। बिकै च्यार कुंआरी छोर्या ही जखी परमेसर की खेबाळी ही। अर जद म्हानै बठै रेह्ता बोळा दिन होगा जणा अगबुस नाम को एक परमेसर की खेबाळो यहूदिआऊँ आयो। बो म्हारै कनै आर पोलुस को कमर बांदबा को पट्टो लेर बिऊँ आपका हात पगानै बांद लिओ अर खेबा लाग्यो, “जिको ओ कमर पट्टो ह बिनै यरूसलेम म यहूदि मिनख अंय्यांई बांदसी अर बिनै परमेसरनै नइ ध्यारबाळा मिनखा क हाता म सूपसी आ बात मनै पबितर आत्मा बतावै ह।” अर आ बात सुणर म्हें अर बठै का मिनख पोलुसऊँ अरदास करबा लागगा की यरूसलेम नइ जावै। पण पोलुस बाऊँ बोल्यो, “थे ओ काँई करो हो? आ ढंगा रो-रोर थे मेरो मन कचो करो हो, म तो परबु ईसु का नामऊँ यरूसलेम म खाली बंदि बणबा ताँई नइ पण मरबा ताँई बी त्यार हूँ।” अर जद बो कोनी मान्यो जणा म्हें अंय्यां खेर क, “परबु की इंछ्या पूरी होवै” चुप होगा। आ दिना क पाछै म्हें त्यार होर यरूसलेम ताँई रवानगी करी। कैसरियाऊँ बी क्युंक बिस्वासी म्हारै सागै होगा अर म्हानै साईपरस का मनासोन नाम का एक मिनख क घरा ल्याया जखो सरूपोत का बिस्वास्या मऊँ एक हो अर म्हें बठैई रूक्या। म्हारै यरूसलेम पुगबा क पाछै बिस्वासी भाईड़ा राजी होर म्हारूँ मिल्या। अर दुसरा दिन पोलुस अर म्हें याकूब क कनै गया जठै सगळा बिस्वासी मंडळी का मुखिया बी हा। जणा बो बानै नमस्कार कर सगळा कामा क बारां म बतायो जखा काम परमेसर बिकी सेवा क जरिए गैर-यहूदिआ क मांयनै कर्यो। आ सुणर बे परमेसर की बडाई करबा लागगा अर इकै पाछै बोल्या, “मेरा लाडला बिस्वासी भाईड़ा, तू देखै ह क यहूदिआऊँ मिनख झारा की तादाद म बिस्वास कर्या हीं अर मूसा का नेम-कायदा प चालबा ताँई कट्टर हीं। अर बानै तेरा बारां म आ पटी पढाई गई ह की तू गैर-यहूदि मिनखा म रेह्बाळा यहूदि मिनखानै आ सीखावै ह की थानै नइ तो नेम-कायदानै मानबा की जुर्त ह अर नइ थानै थारा टाबरा की सुन्नत कराबा की अर नइ पेलड़ा रिती-रिवाजा की लिकटी पिटबा की जुर्त ह। इब काँई कर्यो जाय? क्युं क मिनखानै तो बेरो पड़सी क तू आयड़ो ह। जणा इब तू म्हारो खेणो मान, अठै च्यार मिनख हीं जखा मन्नत माँगी ही। इब तू अंय्यां कर बाकै सागै सुद हो अर बानै सीर मुंडाबा को खरचो दे। अर जद तू अंय्यां करसी जणा कोईनै बी सपाई देबा की जुर्तई कोनी क्युं क बे तनै अंय्यां करता देखसी जणा सगळा मतैई जाणज्यासी क जखी बाता बे तेरा बारां म सुणी ही बे सगळी झूठी ह अर तू खुदई नेम-कायदानै मानबाळो ह। अर जठै ताँई गैर-यहूदिआ का बिस्वास्या को सुवाल ह बा ताँई म्हें कागद मांडर दे दिओ क बे मूरती क आगै चढाईड़ो मास, लोय अर गळो घोटेड़ो ज्यानबर को मास खाबाऊँ अर पराई लूगाया क सागै गळत कामाऊँ परै रेह्‍वै।” जणा पोलुस दुसरा दिन बा मिनखा क सागै सुद होर मनदर म गयो अर आ बतायो की कूणसा दिन सुद होबा का दिन पूरा होसी अर बा सगळा ताँई चढावो चढायो जासी। अर जद बे सात दिन पूरा होबाळा हा जणा एसिया का यहूदि मिनख मनदर म पोलुसनै देखर भीड़ का सगळा मिनखा का कान भर दिआ अर अंय्यां चिलार बिनै पकड़ लिआ। “ओ इजरायल का रेह्बाळो म्हारी मदद करो ओ बोई मिनख ह जखो हर कठै मूसा का नेम-कायदा, आपणै अर इ मनदर क खिलाप सीख देतो फिरै ह। अर ओ यूनानीयानै मनदर म ल्यार इ पबितर झघानै सूगलो कर्यो ह।” क्युं क इऊँ पेली बे बिनै इफिसीआ तरीफिमुस क सागै देख्या हा अर आ समजर्या हा की बो बिनै मनदर म लेर आयो हो। इकै पाछै पूरी नगरी म बबाळ माचगो अर लोग भाग-भागर भेळा होगा अर पोलुसनै पकड़र मनदर मऊँ बारनै घसिटताई ल्याया अर हात्युहात मनदर का कुआड़ बंद कर दिआ। अर जद बे बिनै मारबाळाई हाक जणा रोमी पलटण का सरदारनै खबर लागी क सगळी यरूसलेम नगरी म बबाळ माचर्यो ह। जणा बो सिपाईड़ा अर सुबेदारनै लेर बेगोसो मोका प पुग्यो जणा भीड़ सिपाईड़ा अर सरदारनै देखर पोलुसनै पिटबो बंद कर दिओ। जणा पलटण को सरदार बिकन आर बिनै साँकळऊँ बांदबा ताँई ओडार बुज्यो, “ओ कूण ह अर ओ काँई अपराद कर्यो ह?” पण भीड़ मऊँ कोई क्युं बकबा लागर्यो अर कोई क्युं अर इ रोळा-बेदा क चलतै पलटण का सरदारनै कोनी बेरो पड़्यो क होयो के ह, जणा बो बिनै सेनाहाळा गड म लेज्याबा ताँई ओडायो। अर जद बे सिढ्या प पुग्या जणा झाळा भरेड़ी भीड़ की बजेऊँ सिपाईड़ा पोलुसनै अधर उठार लेज्याणो पड़्यो। क्युं क बे अंय्यां चिलाता बिकै गेल होर्या हा क, “इनै मार गेरो।” अर जद बे बिनै सेनाहाळा गड म लेज्याबाळा हा, जणा पलटण का सरदारनै पोलुस बोल्यो, “थे ओडाओ तो म थारूँ क्युं बोलबो चाऊँ हूँ।” जणा बो बोल्यो, “तनै यूनानी बोलबो आवै ह के? जणा तो तू बो मिसरी मिनख कोनी के? जखो क्युंक दिना पेली बगावत कर च्यार झार बगावत्यानै उजाड़ म लेगो हो।” जणा पोलुस बोल्यो, “अजी म बो कोनी। म तो कलिकीया की मानेड़ी नगरी तरसुस को रेह्बाळो यहूदि मिनख हूँ। म थारूँ हात जो'ड़र खेऊँ हूँ की थे मनै मिनखाऊँ बात करबा को मोको द्‍यो।” अर जद बो बिनै बोलबा ताँई ओडायो जणा बो पेड़ी प खड़्यो होर आपका हातऊँ इसारो कर्यो। अर जद लोग चुप होगा जणा बो इबरानी भासा म बोलबा लागगो। “यहूदि भाईड़ो, अर बडको मेरो पक्ष बी सुणो।” आ सुणर की बो म्हारूँ इबरानी भासा म बोलै ह जणा भीड़ एकदम चुपचाली होगी। जणा बो बोल्यो, “म एक कलिकीया का तरसुस म जलमेड़ो एक यहूदि मिनख हूँ। अर मेरी लिखाई पढाई अठैई इ यरूसलेम नगरी म गमलिएल धरम-गरूजी क कनैई होई ह। अर आपणा बाप-दादा का नेम-कायदा मनै सई ढंगऊँ सीखाया गया हीं। अर जंय्यां थे परमेसरनै मानबा ताँई कट्टर हो बंय्यांई म बी हूँ। इ ईसु का गेला प चालबाळा मिनखानै म मार गेर्यो अर बानै दिन घाल्यो हूँ अर इ गेला प चालबाळा मोट्यार अर लूगायानै बांद-बां'दर जेळ म गेर दिआ। अर मेरी इ बात का गुवा म्हायाजक अर म्हासभा का सगळा यहूदि नेता ह। म बाऊँ अधिकार कागद मंडवार इ गेला प चालबाळा यहूदि भायानै पकड़र यरूसलेम ल्यार बंद करबानै दमिसक नगरी जार्यो हो। “अर जद चालतो-चालतो म दमिसक क सांकड़ै लाग्यो जणा दोपारी क टेम आसमानऊँ मेरै च्यारूमेर एक जोरकी बिजळीसी चमकी। अर जिकी बजेऊँ म धरती प पड़गो अर मनै एक उवाज सुणी जखी अंय्यां ही, ‘ओ साऊल, ओ साऊल तू मनै क्याले दिन घालै ह?’ जणा म बोल्यो, ‘म्हराज थे कूण हो?’ अर बे कह्या, ‘म ईसु नासरी हूँ, जिनै तू दिन घालै ह।’ मेरै सागैहाळा बिजळी को बो च्यानणो सो तो देख्या पण जखो मेरै सागै बात करै हो बिकी उवाज कोनी सुण्या। जणा म बोल्यो, ‘तो परबु म काँई करूं?’ परबु मेरूँ कह्या, ‘खड़्यो होर दमिसक म जा, अर जोक्यु तनै करबो ह बो तनै बठैई बतायो ज्यासी।’ अर बि च्यानणा की बजेऊँ मनै सुजबो बंद होगो, अर मनै मेरै सागैहाळा हात पकड़र दमिसक ल्याया। “बि नगरी म हनन्या नाम को एक मिनख हो जखो नेम-कायदा प चालबाळो अर बठै का यहूदि मिनखा म मान्यो-थान्यो हो। परबु की इंछ्या गेल बो मेर कनै आर खड़्यो होर मेरूँ बोल्यो, ‘मेरा लाडला बिस्वासी भाईड़ा साऊल, ओज्यु देखबा लाग।’ अर बि घड़ीई मेरी आँख्या का पाट खुलगा अर म बिनै देख्यो। जणा बो मेरूँ बोल्यो, ‘आपणा बाप-दादा को परमेसर तनै इ ताँई टाळ्यो ह क तू बिकी इंछ्या जाणै। अर बि धरमीनै देखै अर बिका मुंडाऊँ बाता सुणै। क्युं क तू मिनखा क आगै बा बाता की गुवाई देसी जानै तू सुणी अर देखी। इब देर क्याकी? खड़्यो हो बतिस्मो ले अर बिका नामऊँ अरदास कर जिऊँ परमेसर तेरा पाप धो दे।’ “यरूसलेम आबा क पाछै म जद एक दिन मनदर म अरदास करर्यो हो, जणा मनै चाणचुकई एक दरसाव होयो। अर मनै परबु जी दरसाव देर कह्या, ‘तावळोसो यरूसलेमऊँ चल्योजा क्युं क अठै का मिनख मेरा बारां म तेरी गुवाईनै कोनी मानी।’ जणा म बोल्यो, ‘परबु जी थे तो जाणोई हो की म यहूदि मिनखा क अरदास करबाळी झघा म जार थार प बिस्वास करबाळा क तड़ा मरवाया करतो हो अर जेळ म गेर दिआ करतो हो। अर जद थारा गुवा सतफनुसनै मार्यो जार्यो हो जणा बि टेम म बठैई खड़्यो हो, अर बिकी मोतनै सई बताई अर बिनै मारबाळा का गाबा की रूखाळी करी।’ जणा बो मेरूँ बोल्यो, ‘जणा जा म तनै दूर-दूर ताँई गैर-यहूदि मिनखा क कनै भेजस्युं।’” आ बाता ताँई तो लोग बिकी सुणबो कर्या, अर इकै पाछै बे जोर-जोरऊँ रोळा घालबा लागगा, “अंय्यां को मिनख धरती प जीबा जोगो कोनी इनै मार गेरो।” अर जद बे रोळा घालता अर गाबा बगाता अर आसमान म धुळीया उडाता रिह्या। जणा पलटण को सरदार बिनै सेनाहाळा गड म लेज्यार बिकै तड़ा मारबा अर जाच करबा ताँई ओडायो क, “लोग इकै खिलापत म अंय्यां क्युं रोळा घालीं हीं।” पण जद बे बिनै तड़ा मारबा ताँई बांदर्या हा जणा बो सुबेदारऊँ बोल्यो, “कानून गेल थे एक रोमी मिनख क बिना अपराद साबित होया तड़ा लगवा सको हो के?” आ सुणर सुबेदार पलटण का सरदार क कनै गयो। अर बिनै जार बोल्यो, “तू ओ काँई करै ह? ओ तो रोमी मिनख ह।” जणा पलटण को सरदार बिकन आर बिऊँ बोल्यो, “मनै बता, के तू रोमी ह?” जणा बो बोल्यो, “हाँ।” आ सुणर पलटण को सरदार बोल्यो, “म रोमी नागरिकता मोटी रकम देर लिओ हूँ।” पोलुस बोल्यो, “म तो जलमजातई रोमी हूँ।” जणा बे सगळा मिनख जखा बिकी जाच पड़ताळ करर्या हा बे सगळा नाकै होगा। अर पलटण को सरदार बी आ जा'णर डरगो क म इनै बांद्‍यो हूँ। सऊँ पेली पलटण को सरदार आ जाणबो चायो क यहूदि पोलुस क खिलापत म काँई दोस लगार्या हीं। इ ताँई बो दुजै दिन बिका हात-पग खुलवाया अर परधान याजक अर सगळी म्हासभानै भेळा होबा ताँई ओडायो। जणा पोलुसनै ल्यार बाकै सामै खड़्यो कर दिओ। पोलुस म्हापंचायत क कानि एक टक देखर बोल्यो, “इजरायल का यहूदि भाईड़ो, म हाल ताँई परमेसर क सामै ईमानदारी क सागै साप मनऊँ जियो हूँ।” पण म्हायाजक हनन्या पोलुस क सारै खड़्या मिनखनै ओडायो “इकै होठा प मार।” आ बात सुणर पोलुस बिनै बोल्यो, “ओ कपटी तू तो चुनाऊँ लिपेड़ी भीत ह, परमेसर तनै मारसी। तू मूसा का नेम-कायदा गेल मेरो न्याय करबा अठै बेठ्यो ह, पण तूई नेम-कायदा क खिलाप मनै मारबा ताँई ओडावै ह।” जणा कनै खड़्या मिनख पोलुसऊँ बोल्या, “तेरी अत्ती हिमत क तू परमेसर का म्हायाजकनै बुरो-भलो खेवै।” जणा पोलुस बोल्यो, “यहूदि भाईड़ो, मनै कोनी बेरो हो की ओ म्हायाजक ह; क्युं क पबितर सास्तर म मंडेड़ो ह की तू मिनखा का परधाननै बुरो मना खेजे।” जणा पोलुस आ जा'णर क अठै एक टोळी सदुकीया की अर दुसरी फरिसीया की ह जणा बो पंचायत म जोरऊँ बोल्यो, “ओ यहूदि भाईड़ो, म फरिसी हूँ अर फरिसीया की ओलाद हूँ, अर मरबा क पाछै ओज्यु जी उठबा की मेरी आस की बातनै लेर मेर प मुकदमो चालर्यो ह।” पोलुस क अ बाता खेताई फरिसी अर सदुकीया म खिचा-ताणी होबा लागगी अर पंचायत म फूट पड़गी। क्युं क सदुकी मानी ही की नइ तो मरबा क पाछै कोई जी उठै, नइ कोई ईस्बर नगरी दुत ह, अर नइ आत्मा ह; पण फरिसी आ बाता म बिस्वास करीं हीं। अंय्यां चोखी खिचा-ताणी होगी। अर फरिसीया की टोळी मऊँ क्युंक सास्तरी खड़्या होर जोर-जोरऊँ खेबा लाग्या क, “म्हें इ मिनख म सजा देबा जोगो कोई दोस कोनी देखां, हो सकै क बिऊँ कोई आत्मा नहिस कोई ईस्बर नगरी दुत बोल्यो होसी, जणा इमै काँई बात होगी?” अर जद बाकी राड़ घणी बढगी जणा इ डरऊँ क बे कदै पोलुस का टुकड़ा-टुकड़ा नइ कर दिं, पलटण को सरदार आपकी पलटण का क्युं क सिपाईड़ानै ओडायो क, “जाओ अर जोरामादी बिनै बामैऊँ काड ल्याओ अर सेनाहाळा गड म लेज्याओ।” बि रात परबु बिनै दरसाव देर बोल्यो, “हिमत बांद अर जंय्यां तू मेरै बारां म अठै गुवाई दि ह, ठिक बंय्यांई तनै रोम म बी देणी पड़सी।” सुआरै क्युंक यहूदि पोलुसनै मारबा को जाळ बिछायो अर सोगन खाई क बिनै मार्या पेली म्हें क्युंई कोनी खावां पिवां अर जखा ओ जाळ बिछायो हो बे चाळिसऊँ बी बेसी हा। बे, बा परधान याजका अर यहूदि नेता क कनै जार बोल्या, “म्हें सोगन खाई ह क पोलुसनै मार्या पेली जीब प क्युंई कोनी धरां। जणा इब थे अर म्हापंचायत का सगळा जणा पलटण का सरदार क कनै जार ओ भानो लेल्यो क थे बिका मुकदमा क बारां म ठिक-ठिक जाच करबो चाओ हो, बिनै थारै कनै ल्याबा की बोलो, अर म्हें बिनै थारै कनै पुगबाऊँ पेलीई मार देस्यां।” आ बात पोलुस को भाण्जो सुणली क बे बिनै मारबा क चकरां म ह, जणा बो गड म जार आ बात पोलुसनै बता दि। जणा पोलुस एक सुबेदारनै बुलार बिऊँ बोल्यो, “इ मोट्यारनै पलटण का सरदार क कनै लेज्याओ, ओ बिऊँ क्युं बोलबो चावै।” जणा बो बिनै पलटण का सरदार क कनै लेज्यार बोल्यो, “केदि पोलुस मनै बुलार मेरूँ अंय्यां बोल्यो ह की ओ मोट्यार पलटण का सरदारऊँ क्युं बोलबो चावै ह, तू इनै बिकन लेज्या।” जणा पलटण को सरदार बिको हात पकड़र बिनै कूणा म लेज्यार बिऊँ बुज्यो, “तू मेरूँ काँई खेबो चावै ह?” बो बिऊँ बोल्यो, “यहूदि आ साजिस करी, क थे पोलुसनै इ भानै पंचायत म लेर आओ अर अंय्यां मानो जंय्यां क बे बिकी ओर चोखी ढाळ जाच करबो चावीं हीं। पण थे बाकी मना मानज्यो, क्युं क बामैऊँ चाळिसऊँ बेसी मिनख बिकी घात म बेठ्या हीं, जखा आ सोगन खाराखी ह क, जद ताँई बे पोलुसनै नइ मार गेरीं जणा ताँई क्युंई कोनी खावीं पीवीं। अर बे इब त्यार हीं अर तेरी हामळनै उडिकीं हीं।” जणा पलटण को सरदार ओ आदेस देर मोट्यारनै बिदा कर्यो, “आ कोईनैई मना खिजे क तू मनै अ बाता बताई ह।” जणा पलटण को सरदार दो सुबेदारानै बुलार बोल्यो, “रात क नो बजे कैसरिया जाबा ताँई दो सो सिपाईड़ा, सत्तर घुड़सवार अर दो सो भाला बगाबाळानै त्यार राखो। अर पोलुस ताँई बी घोड़ा त्यार राखो, जिऊँ बिनै राजपाल फेलिक्स क कनै राजी-खुसी पुगा सको।” बो बाकै हात कागद भेज्यो जिमै अंय्यां मंडर्यो हो क, “म्हराज राजपाल फेलिक्सनै कलोदियुस लूसियस को नमस्कार। इ मिनखनै यहूदि पकड़र मारबो चावै हा, पण जद मनै इको बेरो पड़्यो की ओ रोमी ह। जणा सिपाईड़ा लेर इनै छुटा ल्यायो। म आ जाणबो चाओ हो क बे इपै काँई दोस लगावीं हीं, जि बजेऊँ म इनै यहूदि म्हापंचायत लेगो। जणा म समजगो की बे आपका धरम का नेम-कायदा क बारां म इपै दोस लगार्या हीं, पण इमै मार देबा अर इनै केद करबा जोगो इमै कोई दोस कोनी ह। अर जद मनै ओ बेरो पड़्यो की बे इ मिनखनै मारबा क चकरां म हीं, जणा म तावळोसो इनै तेरै कनै भेज दिओ। अर इपै मुकदमो चलाबाळानै बी आदेस दिओ की तेरै सामै जार इपै मुकदमो बाजी करै।” जणा पाछै सिपाईड़ा ओडाया गेल बिनै रात्यु-रात अन्तिपतरिस नगरी म ल्याया। अर दुसरा दिन पैदल चालबाळा सिपाईड़ा पोलुसनै घुड़सवारा क सागै छोडर पाछा सेनाहाळा गड म आग्या। अर जद बे कैसरिया पुग्याक जणा बे पोलुसनै तो बि राजपाल क सामै खड़्यो कर्यो अर पलटण क सरदार क हातऊँ मंडेड़ो कागद बिनै दिओ। बो कागद बाचर बो पोलुसनै बुज्यो, “तू कूणसा इलाका को ह?” अर जद बिनै ओ बेरो पड़गो क कलिकीया को ह जणा बो बिऊँ बोल्यो, “जद तेरै प मुकदमाबाजी करबाळा आसी जणा तेरा मुकदमा की सुणाई होसी।” अर बे बिनै हेरोद का गड म निगरानी म राखबा ताँई ओडायो। पाच दिन क पाछै म्हायाजक हनन्या कई यहूदि नेता अर तिरतूलस नाम का एक बकिलनै लेर आयो। अर फेलिक्स क सामै पोलुस प मुकदमाबाजी करबा ताँई बिपै दावो पेस कर्यो। अर जद पोलुसनै बठै बुलायो गयो जणा तिरतूलस बिपै दोस मंढर खेबा लाग्यो, “म्हराज! थारा राजपाट म म्हें बोळा राजी-खुसीऊँ रेह्‍वां हां अर म्हारा यहूदि मिनखा की भलाई ताँई थे बोळा सुदार कर्या हो। अर आ बातानै म्हें सगळी झघा अर सगळी टेम राजी हियाऊँ माना हां। अर म थानै ओर तंग करबो कोनी चाऊँ पण दया कर थे दो च्यार बात ओर सुणो। ओ मिनख अपरादि ह अर म्हें इनै जगत का सगळा यहूदिआ म बबाळ मचाता देख्या हा, अर ओ नासरी पंथ को खास नेता ह। अर ओ मनदरनै सूगलो करबा की कोसिस करर्यो हो पण म्हें इनै पकड़ लिओ। [म्हें इनै म्हारी रिती-रिवाज गेल सजा देबो चावै हा पण पलटण को सरदार लूसियस इनै जोरामादी म्हारा हाताऊँ खोस लिआ, अर तेरै सामै मुकदमाबाजी करबा को हुकम दिओ।] अर आ सगळी बाता को जाको म्हें इपै दोस लगावां हां, बानै थे खुदई जाच पड़ताळ कर जाण सको हो।” अर यहूदि बी बिकी हाँ म हाँ मिलार बोल्या, “हाँ, अ बाता अंय्यांई ही।” अर जद अधिकारी पोलुसनै बोलबा ताँई इसारो कर्यो, जणा बो बोल्यो, “म आ जा'णर की थे बोळा बरसाऊँ यहूदि मिनखा को न्याय कर्या हो, जणा म राजी होर तेरै सामै मेरो पक्ष धरूँ हूँ। आ बातानै जाणबो थारै ताँई कोई मुसकील की बात कोनी, भगती करबा ताँई मनै यरूसलेम म आया हाल बारा दिनाऊँ बेसी कोनी होया। अर बे मनै नइ तो मनदर म कोईऊँ जिरै करता देख्यो अर नइ अरदास करबाळी झघा म अर नइ नगरी म भीड़नै उकसाता देख्या। अर बे बा बातानै जखी बे मेरै माथा मंढी ह, बानै तेरै सामै सच साबित कोनी कर सकै ह। पण म अ बातानै झूठी कोनी बताऊँ क जिनै बे कुपंथ बोलीं हीं, म बि गेलाई मेरा बाप-दादा का परमेसर की भगती करूं हूँ। अर म बा सगळी बाता प बिस्वास करूं हूँ, जखी बाता मूसा का नेम-कायदा अर परमेसर की खेबाळा की पोथ्या म मंडरी ह। अर जंय्यां अ परमेसर म आस राखै ह बंय्यांई म बी राखूँ हूँ की सगळा धरमी अर अधरमी दोन्या को ओज्यु जी उठबो होसी। जणाई तो म बी आई कोसिस करूं हूँ की परमेसर अर मिनखा क सामै मेरी अन्तर-आत्मा साप रेह्‍वै। कई बरसा ताँई दिसावर म रेह्बा क पाछै म मेरा यहूदि मिनखानै दान का रिपीआ देबा अर चढावो चढाबा आयो हो। अर जद म अ सगळी बाता करर्यो हो जणा अ मनै मनदर म देख्या, बि टेम म सगळा बिधी-बिधाननै पूरो कर सुद होगो हो। अर नइ तो बठै कोई भीड़ ही अर नइ कोई रोळो-बेदो। पण एसियाऊँ आएड़ा कई यहूदि बठै हा अर ज बाकन मेरै खिलापत म क्युं ह, जणा बेई आर तेरै सामै मेर प दोस लगावै। अर नहिस अठै भेळा आ मिनखाऊँ बुजो क जद म यहूदि धरम-पंचायत म खड़्यो हो, जनाड़ै बे मेर म कोई दोस देख्यो हो के? इनै छोडर की म उची उवाज म बोल्यो हो क, ‘म मरबा क पाछै ओज्यु जी उठबा की बात प बिस्वास करूं हूँ’ इ बजेऊँ आज थे मेरो न्याय करो हो।” जणा फेलिक्स जखो परबु का गेला क बारां म चोखी ढाळ जाणतो हो, बो बानै आ खेर टाळ दिओ क, “जद पलटण को सरदार लुसिआस आसी जणाई म तेरा मुकदमा को फेसलो करस्युं” अर फेलिक्स, सुबेदारनै ओडायो क, “पोलुसनै तेरी निगरानी म राख अर बिकाळा भाईलानै बिकी सेवा-पाणी करबा दे।” क्युं क दिन बितबा क पाछै फेलिक्स आपकी घरहाळी दुरसिलानै लेर आयो। अर बिकाळी घरहाळी यहूदि ही। जणा बो पोलुसनै बुलार बिकन मसी ईसु प बिस्वास करबा क बारां म बिऊँ सुण्यो। पण जद पोलुस धारमिक्‍ता, खुद प काबू राखबो अर परमेसर को मिनखा प आबाळा न्याय का दिन क बारां म बोलबा लाग्यो जणा फेलिक्स डरगो अर बोल्यो, “इब तो तू जा कदै ओज्यु मोको पड़सीक जणा तनै बुलास्युं।” बिनै पोलुसऊँ क्युं पुण-पावलो मिलबा की आस ही, जि बजेऊँ बो बिनै बुला-बुलार बतळाया करतो हो। अर जद दो बरस बितगा जणा पुरकीयुस फेतूस फेलिक्स की झघा आयो। अर फेलिक्स यहूदि मिनखानै राजी करबा क चकरां म बिनै केद मई छोडगो। बि परदेस म पुगबा क तीन दिना पाछै, फेतूस कैसरियाऊँ यरूसलेम गयो। जणा बठै परधान याजका अर यहूदिआ का नेता बिकै सामै पोलुस क खिलाप बिका कान भरबा आया। अर बे बिऊँ दरखास्त करी क बो पोलुसनै कैसरियाऊँ यरूसलेम भेजै, क्युं क बे बिनै गेला मई मारबा की साजिस कर राखी ही। जणा फेतूस बाऊँ बोल्यो, “पोलुस कड़ा पेरा क मांयनै कैसरिया म बंद ह। अर म बी तावळो बठैई जार्यो हूँ। अर थारा क्युंक अधिकारी मेरै सागै चालीं अर ज बो क्युं गळत कर्यो ह जणा बिपै दोस लगावै।” फेतूस आठ दस दिन ओर बाकै सागै रिह्यो, जणा पाछै बो कैसरिया आयो। अर आगला दिन न्याय कचेरी म बेठर पोलुसनै बुलवा भेज्यो। अर जद पोलुस बठै आयो जणा यरूसलेमऊँ आएड़ा यहूदि बिकै बारकी फिरगा अर सागेड़ा-सागेड़ा दोस बिकै सीर मंढबो चालू कर्यो, पण बे बानै साबित कोनी कर सक्या। पण पोलुस आपका बचाव म बोल्यो, “म यहूदिआ का कानून, मनदर अर रोमी समराट मऊँ कोई क खिलाप क्युंई गळत कोनी कर्यो।” पण फेतूस यहूदि मिनखानै राजी करबा क चकरां म पोलुसऊँ बुज्यो, “के तू चावै ह की म तेरा मुकदमा को फेसलो यरूसलेम म करूं।” जणा पोलुस बोल्यो, “म रोम हाळा राजा का एक न्याय आसन क सामै खड़्यो हूँ, अर अठैई मेरो न्याय कर्यो जावै। यहूदिआ क खिलाप म क्युंई बुरो कोनी कर्यो इ बातनै तू चोखी ढाळ जाणै ह। ज म कानून तोड़्यो हूँ अर म क्युं अंय्यां को बुरो काम कर्यो हूँ जि बजेऊँ मनै मोत की सजा दि जावै जणा म मरबाऊँ कोनी मुकरूं। पण जखा गळत काम मेरै सीर मंड्या जार्या हीं ज बामैऊँ क्युंई सच कोनी निकळै जणा मनै आकै हाता म कोई कोनी सूप सकै, म रोम का राजा क सामै दरखास्त लगाऊँ हूँ।” जणा फेतूस आपका पंचा क सागै सला-मस्वरो कर बोल्यो, “तू रोम का राजा ताँई दरखास्त करी ह, जणा इब तू रोम का राजा क सामैई जासी।” क्युंक दिना क पाछै राजा अगरीपा अर बरनिके फेतूसऊँ मिलबा कैसरिया आया। बानै बठै रेह्ता क्युंक दिन होया, जणा फेतूस पोलुस का मुकदमा की बात राजानै खे सुणायो अर बोल्यो, “अठै एक अंय्यां को मिनख ह जिनै फेलिक्स बंदि छोडगो हो। अर जद म यरूसलेम गयो जणा यहूदि मिनखा का परधान याजका अर यहूदि नेता बिकै खिलाप सिकायत करी अर बिनै सजा देबा की माँग करी। जणा म बाऊँ बोल्यो, रोम्या म ओ चलन कोनी की कोईनै बी बिकी बात सुण्या पेली अर जद ताँई बिपै दोस मंढबाळानै बिकै आमै-सामै कोनी कर्यो जा, सजा ताँई सूप दे। अर जद बे अठै आया, जणा म बिना टेम खराब कर्या आगला दिनई कचेरी म न्याय सिंघासन प बेठर ओडायो क पोलुसनै अठै पेस कर्यो जावै। अर जद बिपै दोस मंढबाळा खड़्या होया जणा बे बिपै अंय्यां का कोई बुरा काम को दोस कोनी मंढ्यो जंय्यां क म सोचै हो। पण बामै तो बाका धरम अर ईसु नाम का एक मिनख क बारां म जखो मरगो हो, अर इनै पोलुस जिंदो बतावै ह इ बात की राड़ ही। म इ बातनै ते कोनी कर सक्यो की आ बाता की जाणकारी कंय्यां ल्युं, जणा म पोलुसनै बुज्यो तेरा मुकदमा का फेसला ताँई तू यरूसलेम जाबा ताँई त्यार ह के? पण पोलुस दरखास्त लगाई की बिनै हिरासत म राख्यो जावै अर बिका मुकदमा को फेसलो रोम को राजा करै। जणा म ओडायो की जद ताँई म बिनै कैसर क कनै कोनी भेज द्‍युँ बिनै हिरासत मई राख्यो जावै।” जणा अगरीपा फेतूसऊँ बोल्यो, “म खुद, इ मिनख की सुणबो चाऊँ हूँ।” जणा फेतूस बोल्यो, “थे बिनै दिनग्या सुणज्यो।” आगला दिन अगरीपा अर बरनिके गाजा-बाजा क सागै सेनापती अर नगरी का मान्या-थान्या क सागै कचेरी म आया। जणा फेतूस ओडायो, “पोलुसनै ल्यायो जावै।” फेतूस बोल्यो, “म्हराज अगरीपा अर अठै भेळा सगळा मिनखो! थे इ मिनखनै देखर्या हो जिकै बारां म सगळो यहूदि समाज, अठै अर यरूसलेम म चिलार मेरूँ माँग करी की ओ ओर जीबा जोगो कोनी। पण म इमै मार्या जाबा जोगी क्युंई बुराई कोनी देखी। अर जंय्यां की ओ खुदई रोम का राजा की सुणाई ताँई दरखास्त करी, जणा म इनै बाकन भेजबा को फेसलो कर्यो। पण इकै बारां म मेर कनै कोई पुक्‍ता बात कोनी जखी म रोम का राजानै मांडर भेजूँ। जणाई तो म इनै थारै सामै अर खास कर म्हराज अगरीपा! थारै सामै ल्यायो हूँ जिऊँ इ पुछाताछी क पाछै मेर कनै मांडबा ताँई क्युं होवै। क्युं क बिना दोस बताया बंदिनै भेजबो मनै ठिक कोनी लागै।” अगरीपा पोलुसऊँ बोल्यो, “तनै तेरा खुद क बचाव म बोलबा की छुट ह।” जणा पोलुस आपको हात उठायो अर आपका बचाव म बोलबो चालू कर्यो, “म्हराज अगरीपा! ओ मेरो सोभाग ह क यहूदि मेर प जोक्यु दोस लगायो ह आकै बचाव म मनै खुदनै थारै सामै बोलबा को मोको मिल्यो ह। खास कर जदकी थे यहूदि रिती-रिवाजानै अर बाकी जिरैनै चोखी ढाळ जाणो हो। इ ताँई म थारूँ माँग करूं हूँ क थे थ्यावस क सागै मेरी सुणज्यो। “सगळा यहूदि जाणी हीं क टाबरपुणाऊँई म, कंय्यांसिक जीतो आयो हूँ। अर अ जाणी हीं क म मेरी पूरी जिंदगी पेली तो मेरा यहूदि मिनखा क मांयनै अर जणा पाछै यरूसलेम म कंय्यांसिक बिताई। बे मनै सदाऊँ जाणता आया हीं अर बे इ बात की गुवाई दे सकीं हीं क म म्हारा धरम का कट्टर पंथ फरिसी क गेल जीतो आयो हूँ। अर इब बि करार की आस की बजेऊँ जखी परमेसर आपणा बडकाऊँ कर्यो हो म अठै खड़्यो हूँ। आ बाई आस ह जिनै पाबा ताँई आपणा मिनखा का बारां कूणबा दिन-रात परमेसर की भगती करी। अर इ आस की बजेऊँई अ यहूदि मेर प दोस लगावीं हीं, म्हराज! परमेसर मरेड़ानै जीवावै ह आ बात थारै अठै बिस्वास जोगी क्युं कोनी समजी जावै? “म बी सोच्यो हो, जोक्यु मेरूँ हो सकै बो म नासरत का ईसु नाम क खिलाप करूं। अर म यरूसलेम म अंय्यांई कर्यो हो। अर परधान याजकाऊँ अधिकार लेर परमेसर का मिनखानै जेळ म गेर्यो हो अर जद बानै मार गेर्यो जातो हो जणा म बी बाकै खिलाप मेरी हामी देतो हो। अर बोळीबर म अरदास करबाळी झघा म बानै पिट्यो अर बापै ईसु की बुराई करबा ताँई जोर देतो हो। म बापै झाळा भर'र अत्तो बिकराळ होगो हो क म दिसावर नगर्या म बी जार बानै दिन घाल्या करतो हो। “अर इ लोर म जद म परधान याजकाऊँ अधिकार कागद मंडवार दमिसक जार्यो हो। तो म्हराज गेला म मनै धोळै दोपारा घणो जोरको च्यानणो जखो आसमानऊँ आर्यो हो मेरै अर मेरै सागै जाबाळा क च्यारूमेर चमकतो दिख्यो। अर बो अत्तो जोरको हो की सूरज को च्यानणो बिकै आगै क्युंई कोनी हो। अर म्हें सगळा धरती प पड़गा, अर इबरानी भासा म, म अंय्यां की एक उवाज सुणी ‘साऊल ओ साऊल! तू मनै क्युं दिन घालै ह? आरी क मुंडा प लात मार तू क्याले खुदनै दिन घालै ह।’ जणा म बुज्यो ‘परबु थे कूण हो?’ अर परबु बोल्या, ‘म ईसु हूँ जिनै तू दिन घालै ह। पण इब तू उठर खुदका पगा प खड़्यो हो। म तनै मेरो दास बणाबा ताँई दरसाव दिओ हूँ। अर जोक्यु तू आज देख्यो ह अर जखी म तनै आगै दिखास्युं बिनै लोगानै बतातो रेह। म तनै इजरायली अर गैर-यहूदिआ का मिनखाऊँ बचास्युं जाकन म तनै भेजस्युं। जिऊँ तू बाकी आँख्या खोलै अर बानै अँधेराऊँ च्यानणा म अर सेतान की सक्‍तिऊँ परमेसर कानि ल्यावै, अर मेर प बिस्वास करबाऊँ बानै पापऊँ माफी मिलसी अर जखी बापोत मेरा टाळेड़ा मिनखा ताँई ह बिमै बाको बी हिस्सो होसी।’ जणा म्हराज अगरीपा, म बि दरसावनै कोनी टाळ्यो जखो मेर कनै ईस्बर नगरीऊँ आयो हो। जणा म सऊँ पेली दमिसक पाछै यरूसलेम अर पाछै यहूदिआ का सगळा देसा का रेह्बाळा अर परमेसरनै नइ ध्यारबाळा मिनखानै समजातो रिह्यो क पापऊँ तौबा करो, परमेसर कानि आओ अर हियो बदलबा जोगो काम करो। आ बाता की बजेऊँई जद म मनदर म हो जणा यहूदि मनै पकड़र मारबा की कोसिस करी। पण परमेसर की दयाऊँ म आज अठै खड़्यो हूँ अर छोटाऊँ लेर बडा ताँई सगळानै मेरी गुवाई देर्यो हूँ। अर बा बातानै छोडर ओर क्युंई कोनी खेऊँ जानै मूसा अर परमेसर की खेबाळा कह्या हा क अ बाता होबाळी ह। की मसी बोळा दुख भोगसी, मरसी अर बोई सऊँ पेली मरेड़ा म जिंदो होसी जिऊँ यहूदि अर गैर-यहूदि मिनखा म च्यानणा को हेलो पाड़ै।” अंय्यां बोलर जद पोलुस खुदको बचाव करर्यो हो, जणा फेतूस जोरऊँ बोल्यो, “पोलुस! तू बावळो ह, तेरी घणी बिद्‍या तनै बावळो करै ह।” जणा पोलुस जुबाब दिओ, “म्हराज फेतूस! म बावळो कोनी, पण म सची अर समजहाळी बात खेऊँ हूँ। म्हराज अगरीपा अ बाता म थानै बेधड़क खे सकूँ हूँ, क्युं क थे आ सगळी बाता क बारां म जाणो हो। अर अ सगळी बाता थारूँ छानी कोनी क्युं क अ बाता ओला अर कूणा म कोनी घटी। म्हराज अगरीपा, थे परमेसर की खेबाळा म बिस्वास करो हो के? म जाणू हूँ थे करो हो।” अगरीपा पोलुसऊँ बोल्यो, “तू के जाणै ह मनै थोड़ासा टेम म मसी को चेलो बणा लेसी?” पोलुस बोल्यो, “के थोड़ो टेम, के बोळो, पण म तो परमेसरऊँ आई अरदास करूं हूँ क थे अर जत्ता बी मनै आज अठै सुणी हीं बे जि साँकळाऊँ म बंदर्यो हूँ आनै छोडर बाकी बाता म मेरै जंय्यां का होज्यावै।” जणा राजा खड़्यो होगो अर बिकै सागै राजपाल, बरनिके अर जत्ता बी बठै बेठ्या हा सगळा खड़्या होगा। अर बठैऊँ जार आपसरी म बतळाबा लाग्या, “ओ मिनख अंय्यां को तो कोई काम कोनी कर्यो जिऊँ इनै मार्यो अर बंदि राख्यो जावै।” अर अगरीपा फेतूसऊँ बोल्यो, “ओ मिनख ज रोम का राजा कनै सुणाई की दरखास्त नइ करतो जणा ओ छोड्यो जा सकै हो।” जद म्हारो पाणी क गेला इटली जाबो ते होगो हो, जणा बे पोलुस अर दुसरा केद्‍यानै रोम की सेना, “जिनै रोम का राजा की सेना खेता हा।” बिका सुबेदारा मऊँ एक सुबेदार युलियुस क हाता म सूप दिआ। म्हें अदरमुतियुमऊँ आबाळा एक पाणी हाळा झाज प चढर चाल पड़्या, जखो एसिया का समदरी भागाऊँ होतो होयो जाबाळो हो। अर एक थिसलूनिकी को रेह्बाळो एक मकीदुनी, जिको नाम अरिस्तखुस हो बो म्हारै सागै हो। आगला दिन म्हें सैदा पुग्या। युलियुस पोलुस प दया दिखाई अर बिनै बिकै भाईला क कनै जार बाऊँ मिलबा की, अर जोक्यु बे बिनै दिं बा लेबा की छुट दे दि। भाळ सामै की ही, इ बजेऊँ बठैऊँ बे साईपरस का टापू की ओट म चाल पड़्या। म्हें कलिकीया अर पंफुलिया का गेला होताहोया लूसिया परदेस का मुरा कसबा म पुग्या। बठै सुबेदारनै सिकन्दरिआ नगरी को एक झाज लाध्यो जखो इटली जार्यो हो। जणा बो म्हानै बिपै चढा दिआ। म्हें बोळा दिना ताँई सफर कर बोळी मुसकीलाऊँ आखीर क कनिदुस नगरी क सांकड़ै पुग्या। अर भाळ म्हानै आगै कोनी चालबा देरी ही, जणा म्हें सलमोन क सामैऊँ होताहोया करेती का टापू की ओट म चाल्या। अर म्हें किनारै-किनारै चालर बोळी मुसकीलऊँ एक झघा पुग्या जिको नाम “म्हेफुज बंदरगा” हो, अर लसाय नगरी बिकै सारैई पड़ै ही। बठै म्हें बोळा दिन बिता दिआ जि बजेऊँ आगै चालबो खतरनाक होगो हो, अर बरत करबाळो त्युंहार बी बितगो हो। जणा पोलुस बानै राय दिनी, “भला मिनखो, म देखूँ हूँ की अठैऊँ आपणो सफर खतरनाक होसी। अर इमै आपणा झाज अर माळ किई नइ पण पिराणा की हानी होबाळी ह।” पण सुबेदार पोलुस की बाता की परवा कर्या बिना झाज का मालिक अर कपतान की बात मानी। ओ बंदरगा स्याळा ताँई चोखो कोनी हो इ ताँई घणकराक ओई बिचार कर्यो क हो सकै तो कंय्यां जंय्यां फिनिक्स पुगर स्याळा-स्याळा बठैई रेह्‍वां। ओ करेती को अंय्यां को बंदरगा हो जिको मुंडो दिखणाद-पाछुणै अर उतराद-पाछुणै म खुलतो हो। अर जद दिखणादि भाळ होळ्या-होळ्या चालबा लागी। जणा बे सोच्या जंय्यां बे चावा हा बंय्यांई होर्यो ह। जणा बे लंगर उठार करेती का किनारै-किनारै झाजनै आगै बढाबा लाग्या। पण क्युं क बारामई एक जोरकी भाळ आई जिनै उतरादी-अगुणी भाळ बोलै ह अर बा टापू कानिऊँ भेरी ही। अर जद भाळ झाज क टकर मारी जणा बो भाळ की बजेऊँ आगै कोनी सरकर्यो हो। जणा म्हें बिनै बंय्यांई छोडर जठिनै भाळ भेवै ही बठिनैई बिनै जाबा दिओ। अर कलोदा का छोटासाक टापू का दिखणाद हाळा हिस्सानै पार करती टेम म्हानै क्युंक ओट मिली, जिऊँ म्हें बचाव न्यावनै समाळर राख सकां। इकै पाछै बे बिनै झाज क मांयनै लिआया, अर इ डरऊँ क कदै बो सूरतिस का गदळा पाणी की रेत म नइ फस जावै जणा झाज चलाबाळा जंय्यां तंय्यां कर झाजनै जेवड़ाऊँ लपेटर बांद अर झाज का पाळनै निचै कर दिआ अर भेताई चलेगा। अर दुसरा दिन तौफान का जोरका थपेड़ा की बजेऊँ बे झाज को माळ पाणी म बगाबा लाग्या। अर तीसरा दिन बे आपका हाताऊँ झाज का औजारानै बगा दिआ। अर जद बोळा दिना ताँई नइ तो सूरज दिख्यो अर नइ तारा अर उपरऊँ तौफान तगड़ा थपेड़ा मारर्यो हो, जणा म्हें बचबा की सगळी आस छोड दि। बोळा दिना ताँई जद बे निरहार हा, जणा पोलुस बामै खड़्यो होर बोल्यो, “ज थे करेतऊँ नइ चालबा को मेरो खयो मान्यो होतो जणा आज इ बिनास अर इ हाणीऊँ बच ज्याता। पण हाल बी म थारूँ अरदास करूं क, थे हिमत राखो क्युं क झाजनै छोडर कोईनै क्युंई कोनी होवै। क्युं क बिती रात बि परमेसर को ईस्बर नगरी दुत जि परमेसर को म हूँ अर जिकी म भगती करूं हूँ मेर कनै आयो अर बोल्यो, ‘पोलुस डरै मना! तेरो रोम का राजा क सामै खड़्यो होबो ते ह। अर परमेसर जत्ता बी तेरै सागै सफर करीं हीं बा सगळानै बी बचासी क्युं क तेरै प बिकी दया ह।’ जणा इब थे सगळा हिमत राखो क्युं क म परमेसर प बिस्वास करूं हूँ, अर मेरूँ जंय्यां बोल्यो गयो ह ठिक बंय्यांई होसी। पण आ भाळ आपानै कोई टापू प लेज्यासी।” आ गेलड़ा चोदा दिनाऊँ म्हें तौफान की बजेऊँ भूमध्य सागर म भेताई जार्या हा। जणा मज रात क करीब झाज चलाबाळा अनुमान लगाया क म्हें जमीन क सांकड़ै हा। जणा बे बजन बां'दर एक डोरी समदर म गेर'र देख्या क गेराई करीब एक सो बिस फूट ह। अर क्युं क देर पाछै बे ओज्यु अंय्यांई कर बेरो पाड़्यो क इब नबै फूट ह। बे डरग्या क कदै झाज ढाड क नइ भिड़ज्या, जणा बे झाज क गेलड़ै नाकै च्यार लंगर गेर्या, अर दिन उगबा की अरदास करबा लाग्या। जणा झाजनै चलाबाळा झाज पऊँ भागबा ताँई लंगर गेरबा को भानो कर बचाव न्यावनै पाणी म उतार दि। जणा पोलुस सुबेदार अर सिपाईड़ाऊँ बोल्यो, “ज अ झाज पऊँ चलेगाक जणा थे बी कोनी बचस्यो।” जणा सिपाईड़ा बि न्याव का जेवड़ा का'टर बिनै पाणी म भेभा दि। अर जद भागपाट्याई जणा पोलुस बानै आ खेर रोटी खाबा ताँई अरदास कर्यो क, “इ चिंत्या म आज थानै ठिक चोदा दिन होगा बिना रोटी खाया। म थारूँ अरदास करूं हूँ क्युं खाल्यो जिऊँ थे जिंदा रेह्‍वो। क्युं क थारै मऊँ कोईसाको बाळई बाको कोनी होवै।” आ खेर पोलुस रोटी ली अर सगळा क सामै परमेसर को धनेवाद देर बिका टुकड़ा कर खाबा लाग्यो। जिऊँ बा सगळा की बी हिमत बढी अर बे रोटी खाई। झाज म म्हें कुल मिलार दो सो छिंतर मिनख हा। अर जद सगळा खार धापगा जणा बे अनाजनै पाणी म बगार झाजनै हळको कर्यो। अर जद दिन उग्यो जणा बानै किनारो दिख्यो पण बे पिछाण कोनी सक्या क आ कूणसी झघा ह, पण एक खाड़ी देखी जिको रेतिलो किनारो हो, अर बे बिचार कर्या क ज होज्या तो इपई झाजनै टिकावां। जणा बे लंगर की जेवड़ी का'टर समदर म गेर दिआ, अर सागैई हंडल की जेवड़ी खोलर आगलो पाळ ताणर किनारा कानि चाल पड़्या। झाज को आगलो सिरो तो रेत म जार लाग्यो अर बिमै धसगो पण गेलड़ो सिरो झाल का थपेड़ाऊँ टूटबा लागगो। जणा सिपाईड़ा हा जखा सगळा केद्‍यानै आ सोचर मारबा की मन म करी क कदै कोई तिरके भाग नइ छुटै। पण सुबेदार पोलुसनै बचाबा ताँई बानै रोक्यो अर बोल्यो जिनै बी तिरनो आवै बो पाणी म कूदर किनारा प चल्या जावै। अर बाकी का तक्‍ता अर झाज की दुसरी चिजा को सारो लेर चालै। अंय्यां सगळा का सगळा किनारा प पुग्या। अर किनारा प सई सलामत पुग्या पाछै म्हानै बेरो चाल्यो क बि टापू को नाम माल्टा ह। बठै का रेह्बाळा म्हारै सागै चोखो बरताव कर्या, क्युं क मी बरस्बा की बजेऊँ ठंड ही, जणा बे म्हारै ताँई बास्ते बाळी अर म्हारी आवभगत करी। पोलुस लकड़्या की पतूकळी कर आग म गेरबा लाग्यो जणा ताव लागबाऊँ एक साँप बारनै निकळ्यो अर बिकाळा हात प आटी घालर डस लिओ। अर जद बठै का रेह्बाळा बिका हात प बि साँपनै लटक्या देख्या जणा आपसरी म बतळाबा लाग्या, “पक्कोई ओ हत्यारो ह जणाई तो ओ समदरऊँ तो बच निकळ्यो पण न्याय इनै जीबा कोनी देर्यो।” पण पोलुस बिनै आग म झड़का दिओ अर पोलुस क क्युंई कोनी होयो। पण बे मिनख आ बाट देखता रिह्या की ओ सूज ज्यासी नहिस जमीन प पड़र मरज्यासी। पण जद बोळी देर ताँई बिकै क्युंई कोनी होयो जणा बे बिकै बारां म आपकी राय बदली अर कह्या, “ओ तो कोई देवता ह।” बि झघा क कनै बि टापू का मुखिया पुबलीयुस की जमीन ही। बो म्हानै आपकै घरा लेगो अर तीन दिना ताँई बो म्हारी आवभगत करी। पुबलीयुस को बाप बिछावणा म पड़्यो हो। बिकै उन अर आमीदस्त लागर्या हा। जणा पोलुस बिऊँ मिलबा मांयनै गयो अर अरदास करबा क पाछै बो बिपै हात धर्यो जिऊँ बो निरोगो होगो। आ बात होबा क पाछै बि टापू का सगळा रोगी बठै आया अर सगळा निरोगा होया। बे म्हारी बोळी ईज्जत करी अर जद म्हें चालबा लाग्या जणा जोक्यु म्हानै आगै का गेला ताँई चावै हो, बे सगळी चिजा म्हानै दि। तीन म्हेना पाछै म्हें सिकन्दरिआ का एक झाज प चाल पड़्या जखो स्याळा म बि टापू पई हो जिपै दो जोड़ला देवता को चितर हो। म्हें सूरकूसा की नगरी पुगर तीन दिना ताँई बठै रिह्या। अर बठैऊँ चालर म्हें रेगियुस नगरी पुग्या। आगला दिन दिखणादि भाळ चाली जणा पाछै दुसरा दिन म्हें पतियुली नगरी आया। बठै म्हानै क्युं क बिस्वासी भाईड़ा मिल्या अर बे म्हानै सात दिन आपकै सागै रेह्बा ताँई कह्या। अर अंय्यां म्हें रोम आया। अर जद रोम का बिस्वासी भाई म्हारै बारां म सुण्या जणा बे म्हारूँ मिलबा ताँई अपियुस का बजार अर तीन सराया ताँई आया। बानै देखर पोलुस परमेसर को धनेवाद दिओ अर इऊँ बिनै बोळी हिमत मिली। अर जद म्हें रोम पुग्या जणा पोलुसनै एक सिपाईड़ा की निगरानी म खुलो रेह्बा की इजाजत मिलगी। अर तीन दिना क पाछै पोलुस बठै का यहूदि बडका की एक सभा बुलाई। अर जद बे भेळा होया जणा बो बाऊँ बोल्यो, “यहूदि भाईड़ो, म आपणा मिनखा अर बाप-दादा का रिती-रिवाजा क खिलाप क्युंई कोनी कर्यो इकै बावजुद बी यरूसलेम म बंदि बणार रोमी मिनखा क हाता म सूप्यो गयो। अर रोमी मेरी जाच पड़ताळ कर छोडबो चावा हा क्युं क बानै मेर म मोत की सजा देबा जोगो क्युंई कोनी लाध्यो। पण जद यहूदि कोनी मान्या जणा मनै बेबस होर रोम का राजा की दरखास्त लगाणी पड़ी। इकै पाछै बी म मेरा यहूदि मिनखा प दोस कोनी लगाबो चाऊँ। इ ताँई म थारूँ मिलबो अर बातचित करबो चावै हो। क्युं क मसी ताँई इजरायली मिनखा की आस की बजेऊँई म साँकळाऊँ बंदर्यो हूँ।” बे बिऊँ बोल्या, “म्हानै नइ तो तेरै बारां म यहूदिआऊँ कोई कागद आयो अर नइ बठैऊँ आएड़ा यहूदि भाई तेरै बारां म कोई बुरो समचार दिओ अर नइ तेरै बारां म क्युं गळत बात बोली। पण म्हें तेरा बिचार तेरा मुंडाऊँई सुणबो चावै हां, क्युं क जि पंथऊँ तू ह बिकै खिलापत म सगळी झघा लोग बाता करै ह।” जणा बे पोलुस की सुणबा ताँई एक दिन राख्यो। अर बि दिन जठै बो रेहर्यो हो बठै बोळासारा मिनख आर भेळा होया। जणा बो मूसा का नेम-कायदा अर परमेसर की खेबाळा की पोथ्याऊँ ईसु क बारां म समजाबा की कोसिस करतो बानै परमेसर का राज क बारां म समजायो। बो दिनग्याऊँ लेर दिन ढळबा ताँई इमई लाग्यो रिह्यो। जणा क्युंक तो बिकी बातानै मानली पण क्युंक बिस्वास कोनी कर्यो। अर बे आपस म एक मत कोनी होया, जद बे बठैऊँ जाबा लाग्याक जणा पोलुस एक बात बोली, “यसाया परमेसर की खेबाळा का मुंडाऊँ पबितर आत्मा थारा बडकाऊँ कतो सई बोली ही, ‘जार आ मिनखाऊँ खे दे, क थे सुणता तो रेहस्यो, पण समजस्यो कोनी, अर देखता तो रेहस्यो, पण सुजसी कोनी। क्युं क आ मिनखा को हियो मोटो अर कान भार्या होगा, अर बे आपकी आँख्या मीच राखी ह। अंय्यां नइ होतो तो बे आपकी आँख्याऊँ देखता अर कानाऊँ सुणता अर मनऊँ समजता अर मन बदलर मेर कनै आता, अर म बानै निरोगो करतो।’ थानै ओ जाणबो चाए की परमेसर को छुटकारो गैर-यहूदि मिनखा क कनै भेज्यो गयो ह। बे इ छुटकारा का समचारनै सुणसी।” पोलुस क अंय्यां बोलबा क पाछै यहूदि मिनखा म खिचा-ताणी होगी अर बे बठैऊँ चलेगा। बो पूरा दो बरसा ताँई आपका किराया का मकान म रिह्यो, अर जखा बी बिकन आता हा, बो बा सगळा की आवभगत करतो हो। अर बिना रोक-टोक बेधड़क होर परमेसर का राज को परचार करतो अर परबु ईसु मसी की बाता सीखातो हो। म ईसु मसी को दास, भेजेड़ो चेलो पोलुस, जिनै परमेसर बुलायो अर चोखो समचार परचार करबा ताँई टाळ्यो, आ चिठी रोम की बिस्वासी मंडळीनै मांडूँ हूँ। रोम म रेह्बाळा थारै सगळा प जखा परमेसर का लाडला अर पबितर होबा ताँई बुलाया गया हीं। आपणा परम-पिता परमेसर अर परबु ईसु मसी की दया अर स्यांती बणी रेह्‍वै। चोखा समचार को बादो परमेसर की खेबाळा क जरिए पेलीऊँई कर्यो गयो, जंय्यां क पबितर सास्तर म मंडर्यो ह, ओ चोखो समचार परमेसर का बेटा क बारां म ह अर ओ काया रूप म दाऊद क कूणबा म जलम्यो। अर बिनै पबितर आत्माऊँ मरेड़ा मऊँ जीवार सक्‍ति क सागै ओ साबित कर्यो गयो क ओ परमेसर को बेटो ह जखो आपणो परबु ईसु मसी ह। मसी क जरिए परमेसर म्हानै ओ सोभाग अर भेजेड़ा चेला को ओदो दिओ, जिऊँ जगत का सगळा मिनख बिस्वास करीं अर बिकी मानी जिऊँ बिका नाम की मेमा होवै। थारी बी गिणती आमई आवै ह, थानै ईसु मसी का होबा ताँई बुलायो गयो ह। सऊँ पेली म थारै सगळा ताँई ईसु मसी म परमेसर को धनेवाद देऊँ हूँ, क्युं क सगळी दुनिया म थारा बिस्वास क बारां म बतायो जार्यो ह। परमेसर जिकी सेवा म मेरी आत्माऊँ बिका बेटा का चोखा समचार को परचार कर करूं हूँ, बो मेरो गुवा ह क म सदाई थानै मेरी अरदास म याद करूं हूँ। म सदाई अरदास कर माँगर्यो हूँ क परमेसर की इंछ्याऊँ म थारूँ मिलबा ताँई आ सकूँ। मेरी बोळी इंछ्या ह क म थानै देखूँ, क्युं क म आत्मिक आसिरबाद थारै सागै बाटबो चाऊँ हूँ जिऊँ थानै ताकत मिलै। मेरो मतबल ओ ह क, जद म थारै सागै होऊँ जणा थानै मेरा अर मनै थारा बिस्वासऊँ हिमत मिलै। मेरा लाडला बिस्वासी भाईड़ो, म चाऊँ हूँ थे इनै जाणो क म बोळी बार थारै कनै आबा की सोची क थारै म बाकी का दुसरा गैर-यहूदि मिनखा की जंय्यां फळ पा सकूँ पण हर बर क्युंना क्युं अंय्यां होयो क म कोनी आ सक्यो। के यूनानी, के कुजात, के मूरख, के बुदीमान म तो आ सगळानै चोखो समचार सुणाबा ताँई जिमेदार हूँ। जणाई म थारै म जखा रोम म रेहर्या हो, बि चोखा समचार को परचार करबा ताँई उतावळो हूँ। म मसी का चोखा समचारऊँ कोनी सरमाऊँ क्युं क जखो बी बिस्वास करै बिकै छुटकारा ताँई ओ समचार पेली यहूदि मिनखा ताँई अर पाछै यूनानी मिनखा ताँई बी परमेसर की सक्‍ति ह। क्युं क चोखो समचार परमेसर की धारमिक्‍तानै बतावै, आ धारमिक्‍ता सरूआतऊँ लेर आखीर ताँई बिस्वास प टिकरी ह जंय्यां क पबितर सास्तर म मंडर्यो ह, “धरमी मिनख बिस्वासऊँ जिसी।” परमेसर की झाळ ईस्बर नगरीऊँ मिनखा का हरेक पाप अर बुराई क खिलाप परगट होवै ह, जखा बुराईऊँ सचनै दबावै ह। परमेसर बानै सजा देसी, इकी बजे आ ह क बे परमेसर का बारां म जाणी हीं, क्युं क परमेसर खुदनै साप-साप परगट कर्यो ह। जद परमेसर इ सरस्टिनै रच्यो हो, जणाऊँई बिका नइ दिखबाळा गुण जखा बिकी जुग-जुग रेह्बाळी सक्‍ति अर ईस्बरीय सुभाव ह देख्यो गयो। परमेसर जोक्यु बी बणायो बिकै जरिए परमेसरनै साप-साप जाण्यो जावै ह, जिऊँ कोई कनै कोई भानो नइ होवै। परमेसरनै जाणता बुजता बी बे बिको परमेसर की जंय्यां आदरमान कोनी कर्यो अर नइ बिनै धनेवाद दिओ। बाकी सोच बेकार होगी अर बाका बेबुदी मन अँधकारऊँ भरगा। बे बोलीं हीं क बे स्याणा हीं, पण बे तो मूरख हीं। अर बे नइ मिटबाळा परमेसर की मेमानै नास होबाळा मिनख, पंछ्या, जानबर अर पेटपल्याणा चालबाळा जिनावरा की मूरत्या म बदल दिआ। इ ताँई परमेसर बानै बाका हिया की सरमनाक इंछ्या ताँई छोड दिओ, क बे असुद होवीं अर एक दुसरा की काया क सागै ओछोपुणो करै। बे परमेसर का सचनै झूठ म बदल्या, अर जगतनै रचबाळा की झघा बिकी रचेड़ी चिजानै ध्यारीं अर बाकी सेवा करीं हीं, जगतनै रचबाळा की जे सदाई होवै। अंय्यांई होवै। इ बजेऊँ परमेसर बानै सरमनाक इंछ्या क बस म छोड दिओ। बाकी लूगाया बी आपका मोट्यार क सागै कुदरती भेवारनै छोडर अंय्यां-अंय्यां का भेवार राखबा लागगी जखा कुदरत क खिलाप ह। अर अंय्यांई मोट्यार लूगाया क सागै कुदरती भेवारनै छोडर मोट्यार, मोट्यार एक दुसरा क सागै काळो मुंडो करबा ताँई तड़फीं हीं। अंय्यां मोट्यार, मोट्यार क सागै काळो मुंडो कर बेसरमी भर्या कामा को फळ पार्या हीं जिका बे हकदार हीं। अर अठै ताँई बे परमेसरनै जाणबा को मोल कोनी जाण्या जणाई परमेसर बी बानै बाकी फालतु सोच प छोड दिओ, अर बे जखी नइ करनी चाए बे बाता करीं हीं। बे हरतर्या का अधरम, बुराई, लालच, बुरी लत, बळोकड़ापूणा, हत्या, राड़, धोको, बुरी मनस्या अर चुगली-चाळाऊँ भर्या पड़्या हीं। बे आपका मुंडाऊँ एक दुसरा की बुराई करबाळा, परमेसरऊँ नफरत करबाळा, उपरादी, गुमानऊँ भरेड़ा अर फांप मारबाळा हीं। बे बुराई करबा की नई-नई तरकीब घड़ी हीं। बे आपका माँ-बापा का कह्या म कोनी चालीं। बे बेबुदी का अर करारनै तोड़बाळा हीं। बे दुसरा प दया कोनी करै अर बाकै हिया म परेम कोनी। बे परमेसर का नियमानै जाणी हीं क जखो मिनख अंय्यां जीवै ह बो मोतनै पाळै ह जणा पाछै बी बे खुद तो अंय्यां करै जखा करैई ह अंय्यां करबाळा दुसरानै बी सई बतावै। थे जखा दुसरा को न्याय करो हो थारै कनै कोई भानो कोनी क्युं क थे दुसरा की जखी बाता को न्याय करो हो बा बाता म खुदई दोसी हो। जखी बाता को थे न्याय करो हो बे बाता थे खुदई करो हो। पण आपा जाणा हां क परमेसर को सचो न्याय बापै पड़ै ह जखा अंय्यां का करम करीं हीं। पण तू जखो अ सगळा काम करबाळा को न्याय करै ह जदकी तू खुद अ काम करै ह, जणा तू के जाणै ह क तू परमेसर का न्यायऊँ बच ज्यासी? थे बिकी दया अर बिकी सहनसिलता अर बिका थ्यावसनै ख्याई जोगो कोनी समजो के? तू सचमई जाणै ह क परमेसर की दया तनै पापऊँ मन फिराबा कानि लेज्यावै ह। पण थारा जीद्दि सुभाव अर पापऊँ मन नइ फेरबा की बजेऊँ थे थारै ताँई झाळ भेळी करर्या हो अर आ झाळ थार प बि दिन पड़सी जद परमेसर आपको सचो न्याय परगट करसी। क्युं क परमेसर हरेकनै बिका करमा गेल फळ देसी। बे मिनख जखा थ्यावसऊँ भला कामा म लागर मेमा, मान-समान अर अजर-अमर जीवननै टोवीं हीं बानै परमेसर अजर-अमर को जीवन देसी। पण जखा खुदकी परवा करीं हीं अर सचनै कोनी मानी पण बुरो करीं हीं, बापै परमेसर की झाळ अर रीस पड़सी। बुराई का गेला प चालबाळा दुख संकट भोगसी, आ बात पेली यहूदि मिनखा प अर सागै की सागै यूनानी मिनखा प बी लागू होवै ह। बा मिनखानै मेमा, मान-समान अर सुक-स्यांती मिलसी जखा भला काम करीं हीं। आ बात पेली यहूदि मिनखा प अर सागै की सागै यूनानी मिनखा प बी लागू होवै ह। परमेसर भेद-भाव कोनी करै। जखा नेम-कायदानै जाण्या बिना पाप करीं हीं बे बिना नेम-कायदा क नास कर्या ज्यासी। अर जखा नेम-कायदानै जाणर पाप करीं हीं बे नेम-कायदा गेल नास कर्या ज्यासी। क्युं क नेम-कायदानै सुणबाळा परमेसर की नजर्या म धरमी कोनी होवै, पण बिपै चालबाळो धरमी बाजै। जद परमेसरनै नइ ध्यारबाळा जखा नेम-कायदा का नियमानै कोनी जाणै इकै पाछै बी ज बे आपकी समजऊँ नेम-कायदा की बातानै मानै जणा बे बिना नेम-कायदाई खुद ताँई नेम-कायदा ह। बाका काम आ दिखावै ह क नेम-कायदो बाका मना प मंडर्यो ह, बाकी अन्तर-आत्मा गुवाई देवै ह, कदै-कदै बाका बिचार बापै दोस लगावै अर कदै-कदै बानै बचावै ह। अ बाता चोखा समचार गेल जिको म परचार करूं हूँ बि दिन होसी जि दिन परमेसर मसी ईसु क जरिए मिनखा की लुखेड़ी बाता को न्याय करसी। तू खुदनै यहूदि मानै ह अर नेम-कायदा प तनै बिस्वास ह अर परमेसर प तनै गुमान ह, तू परमेसर की इंछ्यानै जाणै अर जखो सई ह बिनै मानै ह क्युं क नेम-कायदाऊँ तनै अ सीखाया गया ह। तू आ मानै ह क तू आँदा की आँख ह अर जखा अँधेरा म भटकर्या हीं बा ताँई च्यानणो ह, मूरखानै गेलो बताबाळो ह अर टाबरानै सीखाबाळो ह क्युं क नेम-कायदाऊँ तनै सगळो ज्ञान अर सच मिल्यो ह। तू जखो दुसरानै सीखावै खुदनै क्युं कोनी सीखावै? तू जखो दुसरानै चोरी नइ करबा को परचार करै, खुद चोरी क्याले करै ह? तू सीखावै ह क, “कुकरम नइ करनो चाए,” जणा खुद क्याले करै ह? तू जखो मूरत्याऊँ नफरत करै, मनदरनै क्याले लूटै ह? तू खुद नेम-कायदा प गुमान करै, जणा नेम-कायदा का नियमानै तोड़र परमेसर को अपमान क्याले करै ह? जंय्यां क पबितर सास्तर म मंडेड़ो ह क, “थारी बजेऊँ परमेसरनै नइ ध्यारबाळा मिनखा म परमेसर की बुराई होवै ह।” क्युं क ज थे नेम-कायदानै मानो जणा तो सुन्नत को मतबल ह, पण ज थे नेम-कायदा का नियमानै तोड़ो जणा सुन्नत करायड़ा बी नइ करायड़ासा हो। ज कोई गैर-यहूदि जखो बिना सुन्नत हाळो ह नेम-कायदा प चालै जणा बिनै सुन्नत हाळो नइ होबा प बी परमेसर सची सुन्नत हाळो गिणसी। तू जिकी सुन्नत होईड़ी ह अर तेरै कनै मंडेड़ो नेम-कायदो बी ह इकै पाछै बी तू नेम-कायदा का नियमानै तोड़ै जणा जिकी कायाऊँ सुन्नत कोनी होईड़ी पण नेम-कायदा प चालै ह, बो तनै दोसी बतासी। जखो मिनख देख-दिखावा को यहूदि ह बो सचो यहूदि कोनी अर काया की सुन्नत, सची सुन्नत कोनी। सचो यहूदि बो ह जखो मांयऊँ यहूदि ह अर सची सुन्नत बा सुन्नत ह जखी आत्मा क जरिए मन की होवै ह मांडेड़ा नेम-कायदाऊँ नइ। अंय्यां का मिनख की बडाई मिनख नइ पण परमेसर खुद करै ह। जणा यहूदि होबा को काँई फाईदो अर सुन्नत को काँई मोल? हरतर्याऊँ बाको घणोई फाईदो ह, सऊँ पेली बात तो परमेसर का बचन बानै दिआ गया हीं। के होयो ज बामैऊँ क्युंक बिस्वास जोगा कोनी रिह्या? जणा के परमेसर बिस्वास जोगो कोनी रेह्सी? नइ, अंय्यां कोनी, ज सगळा मिनख झूठा होवै जणा बी परमेसर सचोई ह। जंय्यां क मंडर्यो ह: “जिऊँ तू तेरी बाता म धरमी होवै, अर जद न्याय करै जणा तेरी जे हो।” पण ज आपणा बुरा करम परमेसर की धारमिक्‍तानै ओरबी साप तरिकाऊँ परगट करै अर बा ताँई बो आपानै सजा देवै जणा के आपा आ बोल सकां हां क परमेसर आपानै सजा देर आपणै सागै अन्याय करर्यो ह? अंय्यां म एक मिनख होबा क नातै बोलर्यो हूँ। नइ, अंय्यां कोनी, ज अंय्यां की बात ह जणा परमेसर जगत का मिनखा को न्याय कंय्यां कर सकै ह? कोई अंय्यां बी बोल सकै ह, ज मेरो झूठ परमेसर का सच अर बिकी मेमानै बढावै, जणा मनै पापी की जंय्यां नइ दंड्यो जाणो चाए। जणा “आओ ल्यो बुराई करां” जिऊँ भलाई होवै। जंय्यां क क्युंक म्हारी बुराई कर म्हारै प दोस लगावीं हीं क म्हें अंय्यां बोलां हां। अंय्यां का मिनख दंड का भागी हीं। जणा काँई बात ह? आपा यहूदि गैर-यहूदि मिनखाऊँ चोखा हां के? नइ, क्याका चोखा हां। जंय्यां क म्हें पेलीई बोल दिआ हा क यहूदि अर यूनानी दोन्युई पाप क बस म हां। जंय्यां की पबितर सास्तर म मंडेड़ो ह, “कोई धरमी कोनी, एकई कोनी!” कोई स्याणो कोनी। “परमेसरनै ढुंढबाळो कोई कोनी!” “सगळा का सगळा रूळगा, बे सगळा बिगड़गा, कोई भलाई करबाळो कोनी, एक जणो बी कोनी!” “बाको गळो खुली कबर ह, बे आपकी जबानऊँ छळ करै।” “बाका होठा प साँप को झेर रेह्‍वै ह।” “बाका मुंडा सराप अर कड़वाटऊँ भर्या पड़्या हीं।” “लोय बहाबा ताँई बे आपका पग तावळाई उठावीं। बाका गेला म नास अर कळेस होवै, बानै स्यांती का गेला को ज्ञान कोनी।” “बाकी आँख्या म परमेसर को डर कोनी।” आपा जाणा हां क नेम-कायदा म मंडेड़ो बि ताँई ह जखो बिकै बस म ह। जिऊँ हरेक मुंडानै बंद कर्यो जा सकै अर सगळा को सगळो जगत परमेसर का दंड को भागी होवै। नेम-कायदा का काम करबाऊँ कोईबी मिनख परमेसर क सामै धरमी कोनी हो सकै। क्युं क नेम-कायदाऊँ तो पाप की पिछाण होवै। पण इब परमेसर बिना नेम-कायदा क मिनखानै कंय्यां धरमी बणावै आ परगट करी गई ह, जिकी गुवाई नेम-कायदा अर परमेसर की खेबाळा दि ह। सगळा बिस्वास्या ताँई ईसु मसी प बिस्वास करबा क जरिए बिना कोई भेद कर्या परमेसर कानिऊँ मिलबाळी धारमिक्‍ता परगट करी गई ह। क्युं क सगळा पाप कर्या अर परमेसर की मेमाऊँ दूर होगा। पण मसी ईसु म जखो छुटकारो ह बिकै जरिए परमेसर की दयाऊँ बे सितमित म धरमी बणाया गया हीं। ईसु की मोत प बिस्वास करबाळा मिनखा का छुटकारा ताँई परमेसर ईसुनै एक कुरबानी जंय्यां भेज्यो। आ बात परमेसर की धारमिक्‍तानै दिखावै ह, क्युंक परमेसर मिनखा का पेलड़ा पापनै ईस्बरीय सेनसिलताऊँ अनदेख्यो कर्यो। बो अंय्यां इ टेम म आपका न्यायनै परगट करबा ताँई कर्यो, जिऊँ बो खुद धरमी अर ईसु म बिस्वास करबाळानै बी धरमी बताबाळो होवै। जणा पाछै गुमान काँई बात को? बि ताँई तो झघाई कोनी। कूणसा नेम-कायदा की बजेऊँ? करमाऊँ? नइ, आऊँ नइ पण बिस्वासऊँ। क्युं क म्हें इ नतिजा प पुग्या हां क मिनख नेम-कायदा का करमाऊँ नइ पण बिस्वास की बजेऊँ धरमी बणै ह। के परमेसर खाली यहूदि मिनखा कोई ह? के गैर-यहूदि मिनखा को परमेसर कोनी? नइ, परमेसर गैर-यहूदि मिनखा को बी ह, क्युं क खाली एकई परमेसर ह जखो यहूदि मिनखा का बिस्वास क जरिए बानै धरमी बणावै ह अर बि बिस्वास क जरिए बो गैर-यहूदि मिनखानै बी धरमी बणावै ह। जणा के म्हें बिस्वास क जरिए नेम-कायदानै मानबो बंद कर दिओ? नइ, अंय्यां कोनी! पण नेम-कायदानै थाम राख्या हां। जणा पाछै म्हें काँई बोलां क आपणा धरती का बडका अब्राहमनै इ धारमिक्‍ताऊँ काँई समज म आयो? क्युं क ज अब्राहमनै बिका कामा की बजेऊँ धरमी गिण्यो जातो, जणा आतो बि ताँई गुमान करबा की बात ही, पण परमेसर क सामै नइ। पबितर सास्तर काँई खेवै ह? “अब्राहम परमेसर प बिस्वास कर्यो, जिकी बजेऊँ बो धरमी खुवायो।” काम करबाळानै मजुरी देबो कोई एसान कोनी ह, बो तो बिको हक ह। पण ज कोई मिनख करम कोनी करै पण खाली बि परमेसर म बिस्वास करै जखो पाप्यानै धरमी बणावै ह, जणा बिको बिस्वासई बिकी धारमिक्‍ता खुवावै ह। जिनै परमेसर बिना करमा क धरमी मानै बिनै दाऊद बी धने खेवै ह, “भागहाळो ह बो जिका अधरम माफ कर्या गया, अर जखा का पापनै ढक्यो गयो! भागहाळो ह बो मिनख जिका पाप परबु कोनी गिणै!” जणा आ धारमिक्‍ता हाळी बात यहूदि मिनखा पई नइ पण गैर-यहूदि मिनखा प बी लागू होवै ह। क्युं क जंय्यां म्हें कह्या हा क, “अब्राहम को बिस्वास बि ताँई धारमिक्‍ता गिण्यो गयो।” बिको बिस्वास धारमिक्‍ता म कद गिण्यो गयो? के बिकी सुन्नत होबा क पाछै? नइ, सुन्नत होबा क पाछै नइ पण पेली! इकै पाछै धारमिक्‍ता की छाप क रूप म एक सेलाण की जंय्यां बो सुन्नत करवाई। ओ बिस्वास बो जद दरसायो हो जि टेम का बिकी सुन्नत कोनी होई ही। जणा बो बा सगळा को बाप ह जखा बिना सुन्नतहाळा हीं पण बिस्वास करीं हीं। जिऊँ गैर-यहूदि बी धरमी गिण्या जावै। जखो बिस्वास अब्राहम आपकी सुन्नत होबाऊँ पेली कर्यो, ज सुन्नतहाळा सुन्नत की सेलाण क सागै बंय्यां को बिस्वास बी करै जणा बो बाको बी बाप ह। अब्राहम अर बिकी ओलादानै ओ करार क बे जगत का वारिस होसी, नेम-कायदाऊँ कोनी मिल्या पण बि धारमिक्‍ताऊँ मिल्या जखी बिस्वास की बजेऊँ आई ही। ज नेम-कायदानै मानबाळा जगत का वारिस होता जणा बिस्वास को काँई मोल रेह्तो अर करार बी बेकार होज्यातो। क्युं क नेम-कायदा का नियमानै तोड़बाऊँ परमेसर की झाळ मिनखा प पड़ै ह अर जठै नेम-कायदा कोनी बठै बिनै तोड़बा की गुंजाईस कोनी। जणा इऊँ आ बात साबित होवै ह क परमेसर को करार बिस्वास को फळ होवै ह जखो बिकी दयाऊँ मिलै ह। आई बजे ह क बिको करार अब्राहम की सगळी पिड्या प लागू होवै ह, खाली नेम-कायदा का नियमानै मानबाळा पई नइ पण बा सगळा प बी जखा अब्राहम की जंय्यां को बिस्वास राखीं हीं। बो आपणा सगळा को बाप ह। जंय्यां क पबितर सास्तर म मंडर्यो ह, “म तनै बोळा कूणबा को बाप बणायो।” बि परमेसर क सामै जिपै बो बिस्वास कर्यो जखो मरेड़ानै ओज्यु जीवावै ह अर जखी बात आथई कोनी बानै परगट करै ह बो अब्राहम आपणो बाप ह। जठै आस करबा की गुंजाईस कोनी बठै आपका मन म आस लेर अब्राहम बिपै बिस्वास कर्यो, आई बजे ही क बो कह्या गेल बोळा कूणबा को बाप बण्यो जंय्यां पबितर सास्तर म मंडर्यो ह, “तेरै बोळी ओलाद होसी जखी गिणी कोनी जासी।” बो चोखी तर्या जाणतो हो क बिकी काया सो बरस की बूडी मरियलसी होगी अर सारा बांझ ह, इकै बावजुद बी बिस्वास म बिना हाल्या परमेसर का करार म बिस्वास जगायो राख्यो। आई नइ पण बिस्वासनै ओर बी मजबूत कर परमेसरनै मेमा दि। बिनै पक्को बिस्वास हो क जखो करार परमेसर बिऊँ कर्यो ह बिनै बो पूरो करबा की ताकत राखै ह। आई बजे ही क बिको ओ बिस्वास बिकी धारमिक्‍ता गिण्यो गयो। पबितर सास्तर को ओ बचन क, “बिस्वास बि ताँई धारमिक्‍ता गिण्यो गयो”, खाली बि ताँई नइ पण आपणा ताँई बी ह। परमेसर आपानै जखा बिपै बिस्वास राखां हां धरमी मानसी। बो आपणा परबु ईसुनै ओज्यु जीवायो। ईसुनै आपणा पाप ताँई मरबानै दिओ गयो अर आपानै धरमी बणाबा ताँई मरेड़ा मऊँ ओज्यु जीवायो गयो। आपा बिस्वास की बजेऊँ धरमी होगा हां, इ ताँई परबु ईसु मसी क जरिए आपणो मेळमिलाप परमेसरऊँ ह। बिस्वास की बजेऊँ बो आपानै परमेसर की दया म ल्यायो जिमै आपा इब जिर्या हां अर परमेसर की मेमा की आस प गुमान करां हां। खाली ओई नइ, म्हें तो म्हारा दुख म बी गुमान करां हां क्युं क म्हें जाणा हां क दुख थ्यावसनै जलम देवै ह। थ्यावसऊँ खराई अर खराईऊँ आस जलम लेवै ह। अर आ आस आपणो निरादर कोनी होबा दे, क्युं क पबितर आत्मा क जरिए जखी आपानै दि गई ह परमेसर को परेम आपणा हिया म उंदकायो गयो ह। क्युं क जद आपा माड़ी दसा म हा ठिक बि टेमई मसी अधरम्या ताँई मर्यो। जदकी कोई धरमी ताँई बी पिराण देबानै त्यार कोनी होवै। पण काँई बेरो कोई धरमी मिनख ताँई मरबा की हिमत कर बी जा। पण परमेसर आपणाऊँ अंय्यां को परेम कर्यो क जद आपा पापीई हा बि टेम का बो मसीनै आपणै ताँई मरबा भेज्यो। इब जद आपा बिका लोयऊँ धरमी होगा हां जणा परमेसर की झाळऊँ क्युं कोनी बचाया ज्यास्यां। क्युं क बि टेम का जद आपा परमेसर का बेरी हा, जणा परमेसर आपका बेटा की मोत क जरिए आपणो मेळमिलाप खुदऊँ कर्यो। अर इब जद आपणो मेळमिलाप होगो जणा मसी क जिबाऊँ पक्काई बचाया ज्यास्यां। ओई नइ, पण इब परबु ईसु मसी क जरिए जिकी बजेऊँ आपणो मेळमिलाप परमेसरऊँ होयो ह, परमेसर म गुमान करां हां। जंय्यां एक मिनख आदम क जरिए धरती प पाप अर पापऊँ मोत आई। बंय्यांई सगळा मिनख पाप कर्या अर सगळा प मोत आई। नेम-कायदा का नियमा क आबाऊँ पेली धरती प पाप हो, पण जठै नेम-कायदा कोनी बठै पाप की गिणती बी कोनी होवै। पण आदमऊँ लेर मूसा का टेमताई मोत सगळा प राज करती री। मोत बापै बी ही जखा आदम की जंय्यां को पाप कोनी कर्या। आदम आबाळा जंय्यां कोई हो। पण दोन्यु इकसार कोनी क्युं क परमेसर को सितमित को बरदान आदम का पाप की जंय्यां को कोनी। आ बात सची ह क एक मिनख आदम का पाप की बजेऊँ बोळा मिनखा प मोत आई। पण परमेसर की दया इऊँ बोळी म्हान ह अर एक मिनख ईसु मसी की दया क जरिए बिको सितमित को बरदान बोळा मिनखा ताँई खूब ह। अर ओ बरदान आदम का पापऊँ आया फळ की जंय्यां को कोनी ह। क्युं क दंड ताँई न्याय को आबो एक पाप क पाछै होयो हो। पण ओ बरदान जखो पाप की माफी कानि लेज्यावै ह, बोळा पाप क पाछै आयो हो। ज बि एक मिनख आदम का पाप की बजेऊँ मोत को राज आयो। जणा परमेसर की दया अर बरदाननै मुकळाईऊँ लेबाळा बि एक मिनख ईसु मसी क जरिए जीवन प ओर बी बेसी राज करसी। जंय्यां एक पाप सगळा मिनखा ताँई दंड ल्याओ, बंय्यांई एक धरम को काम सगळा मिनखानै जीवन देबाळी धारमिक्‍ता म लेज्यावै ह। जंय्यां बि एक मिनख क कह्यो नइ मानबा की बजेऊँ सगळा मिनख पापी होया ठिक बंय्यांई बि एक मिनख क कह्यो मानबा की बजेऊँ बोळा मिनखानै परमेसर सई बतासी। नेम-कायदा इ ताँई आया क पाप बढ सकीं। पण जठै पाप बढ्यो बठै परमेसर की दया इऊँ ओर बी ज्यादा बढी। जिऊँ जंय्यां मोत की बजेऊँ पाप राज कर्यो ठिक बंय्यांई आपणा परबु ईसु मसी क जरिए अजर-अमर जीवन ल्याबा ताँई परमेसर की दया धरमऊँ राज करै। जणा पाछै आपा काँई खेवां? के आपा पाप करता रेह्‍वां जिऊँ परमेसर की दया बढती रेह्‍वै? कदैई नइ, आपा जखा पाप ताँई मरगा हां, पाप म कंय्यां जिस्यां? थे कोनी जाणो के, आपा जखा मसी ईसु म बतिस्मो लिआ हा, बिकी मोत कोई तो बतिस्मो लिआ हा। जणा बिकी मोत को बतिस्मो लेबाऊँ आपा बी बिकै सागैई गाड्या गया हा, अर जंय्यां परम-पिता की मेमा भरी सक्‍ति क जरिए मसीनै मरेड़ा मऊँ जीवायो गयो हो बंय्यांई आपा बी एक नयो जीवन जीवां। ज आपा बिकीसी मोत म बिकै सागै एक होगा हां, जणा बिका ओज्यु जी उठबा म बी बिकै सागै एक होज्यास्यां। क्युं क आपा आ जाणा हां क इ नसबर काया को आपणो पुराणीयो जीवन ईसु क सागै सुळी प चढा दिओ गयो हो, जिऊँ पापऊँ भरी आपणी काया नास होज्यावै। अर आपा आगैऊँ पाप का गुलाम नइ होवां। क्युं क जखो मरगो बो पापऊँ छुटायो गयो। अर जंय्यां आपा मसी क सागै मर्या हा, जणा आपणो बिस्वास ह क आपा बिकैई सागै जिस्यां। आपा जाणा हां क मसी जिनै मरेड़ा मऊँ जीवायो गयो हो बो ओज्यु कोनी मरै। इब बिपै मोत को जोर कदैई कोनी चालै। बो पाप ताँई एकई बर मरमरागो पण जखी जिंदगी बो जीर्यो ह बा जीवता परमेसर की ह। अंय्यांई थे थारै ताँई बी सोचो क थे पाप ताँई मरमरागा पण मसी ईसु म परमेसर ताँई जिर्या हो। इ ताँई थारी नसबर काया प पाप को जोर मना चालबा द्‍यो। जिऊँ थे पाप की इंछ्या प कदैई नइ चाल सको। थारी काया का अंगानै अधरम का सादन होबा ताँई पाप क हाता म मना द्‍यो, पण मरेड़ा मऊँ जी उठबाळा की जंय्यां परमेसर क हाता म द्‍यो। अर थारी काया का अंगानै धरम का सादन होबा ताँई परमेसरनै सूप द्‍यो। थार प पाप को राज कोनी हो सकै क्युं क थे नेम-कायदा क साराऊँ कोनी जीओ पण परमेसर की दया क साराऊँ जीओ हो। आपा नेम-कायदा क साराऊँ कोनी जीवां, पण परमेसर की दया म जीवां हां। जणा आपा काँई करां? के आपा पाप करां? नइ, कदैई नइ। के थे ओ कोनी जाणो क, थे कोई क हाता म खुदनै दास की जंय्यां सूपो हो जणा थे बिको कह्यो मानबा ताँई बिका गुलाम हो। जणा पाछै चाए थे मरबा ताँई पाप का दास बणो नहिस कह्यो करबाळा बणो जखो थानै धारमिक्‍ता कानि लेज्यासी। पण परमेसर को गुण-एसान क, थे पाप का दास होबा क बावजुद बी, बि सीखनै हियाऊँ मान्या जखी थानै सूपी गई ह। थानै पापऊँ छुटकारो मिलगो अर थे धारमिक्‍ता का दास बणगा हो। मिनख सुभाव होबा क नातै थे अ बाता कोनी समज सको इ ताँई म आम बोलचाल म समजार्यो हूँ क्युं क जंय्यां थे थारी काया का अंगानै असुद होबा अर अधरमनै बढाबा ताँई एक दास की जंय्यां काम लेता हा, जणा इब आनै धारमिक्‍ता ताँई जखी पबितरता कानि लेज्यावै दास होबा ताँई सूप द्‍यो। क्युं क जद थे पाप का गुलाम हा जणा धारमिक्‍ता को थारै प कोई बंदण कोनी हो। अर थे खुद जाणो हो क बि टेम थानै कंय्यां को फळ मिल्यो? जिकी बजेऊँ आज थे सरमिंदा हो अर जिको आखरी फळ मोत ह। पण इब थानै पाप का बंदणाऊँ छुटा लिओ गयो ह, अर थे परमेसर का दास बणगा हो, जणा जखी खेती थे काटर्या हो बा थानै पबितरता म लेज्यावै ह जिको आखरी फळ अजर-अमर जीवन ह। क्युं क पाप की मजुरी तो मोत ह पण आपणा परबु मसी ईसु म परमेसर को बरदान अजर-अमर जीवन ह। मेरा लाडला बिस्वास्यो, थे जाणोई हो, म बानै बोलुँ हूँ जखा नेम-कायदानै जाणी हीं, नेम-कायदा कोई मिनख प बिकै जीताजीई राज करै ह। जंय्यां एक ब्याईड़ी लूगाई काण कायदा गेल आपका मोट्यार क सागै बिकै जीताजीई बंधेड़ी ह, ज बिको मोट्यार मरज्यावै जणा बा ब्या का सगळा काण कायदाऊँ अजाद होज्यावै। ज बा आपका मोट्यार क जीताजीई पराया क सागै समंद राखै जणा कुकरम करै ह। पण ज बिको मोट्यार मर जावै जणा ब्या का काण कायदा बिपै लागू कोनी होवै अर ज बा दुसरो मोट्यार करले जणा बा कुकरमी कोनी खुवावै। जणा मेरा लाडला बिस्वास्यो सुणो, मसी की काया क जरिए नेम-कायदा ताँई थे बी मरेड़ा हो। जणा इब थे बी ओराऊँ नातो राख सको हो, बिऊँ जिनै मरेड़ा मऊँ ओज्यु जीवायो गयो जिऊँ आपा परमेसर ताँई फळां-फुलां। क्युं क जद आपा मिनख सुभाव क गेल जिर्या हां जणा आपणी पाप भरी इंछ्या नेम-कायदा क जरिए आपणा म काम करबा लागी जिको फळ मोत हो। पण इब आपानै नेम-कायदाऊँ छुटकारो दे दिओ गयो ह जिकै बंदण म आपा बंदर्या हा अर आपा बि नेम-कायदा ताँई मरलिआ। जिऊँ बि पुराणा मंडेड़ा नेम-कायदाऊँ नइ पण पबितर आत्मा की नएड़ी रीत गेल सेवा करां। जणा आपा काँई बोलां? के नेम-कायदा पाप ह? पक्काई नेम-कायदा पाप कोनी। क्युंबी हो नेम-कायदो नइ होतो जणा म जाणतोई कोनी क पाप काँई होवै ह। ज नेम-कायदो आ कोनी बतातो क लालच मना करो जणा सचमई म जाणतोई कोनी क लालच काँई ह। पण मोको मिलताई पाप, हुकमा को फाईदो उठार मेरै मांयनै हरेक लालच भर दिओ। बिना नेम-कायदा क पाप तो मरेड़ो ह। बो एक टेम हो जद म बिना नेम-कायदा क जिंदो हो। पण जद हुकम आया जणा पाप जीगो अर म मरगो। अर म जाणग्यो क नेम-कायदा को हुकम जखो जीवन देबा ताँई हो मेर ताँई मोत ल्यायो। क्युं क पापनै मोको मिलगो अर बो नेम-कायदा क हुकम क जरिए मनै छळ्यो अर मनै मार गेर्यो। जणाई नेम-कायदो पबितर ह, अर हुकम पबितर, चोखा अर धरमी ह। जणा पाछै इको काँई मतबल होयो क जखो चोखो ह बोई मेरी मोत की बजे बण्यो? नइ, कदैई नइ! पण पाप बि चोखा क जरिए मेरी मोत की बजे इ ताँई बण्यो क पापनै पिछाण्यो जा सकै जिऊँ नेम-कायदा का हुकम क जरिए पाप ओर बी बढगो। क्युं क आपा जाणा हां क नेम-कायदा आत्मिक ह पण म हाड-मास को मिनख हूँ जखो पाप की गुलामी ताँई बिकेड़ो हूँ। मनै कोनी बेरो म काँई करूं हूँ क्युं क म जखो करबो चाऊँ हूँ बो कोनी करूं पण म बो करूं हूँ जिऊँ मनै नफरत ह। अर ज म बोई करूं हूँ जखो म कोनी करबो चाऊँ जणा म मानू हूँ क नेम-कायदो चोखो ह। पण सचमई करबाळो म कोनी पण मेरै मांयनै बसेड़ो बो पापई ह। हाँ म जाणू हूँ क मेरा पापी मिनख सुभाव म कोईबी चोखी चिज को बास कोनी। भलाई करबा की इंछ्या तो मेरै मांयनै ह पण भलाई का काम मेरूँ कोनी होवै। क्युं क जखा चोखा काम म करबो चाऊँ हूँ बे म कोनी करूं पण जखा बुरा काम म कोनी करबो चाऊँ बेई कर्या करूं हूँ। अर ज म बे काम करूं हूँ जखा करबो कोनी चाऊँ जणा सचमई बिनै करबाळो म कोनी हूँ पण पाप ह जखो मेरै मांयनै बास करै ह। जणा म मेरै मांयनै ओ नियम पाऊँ हूँ क, म जद बी चोखो करबो चाऊँ जणा म मेर म बुराई पाऊँ हूँ। मेरी अन्तर-आत्मा क मांयनै तो म परमेसर का नेम-कायदानै राजी पेटा मानू हूँ। पण म मेरी काया म ओरई नेम-कायदानै काम करता देखूँ हूँ जखो मेरी सोच प राज करबाळा नेम-कायदाऊँ लड़ै ह। अर मनै पाप का नेम-कायदा को केदि बणा लेवै ह, अ नेम-कायदा मेरी काया म काम करै ह। म एक अभागो मिनख हूँ। मनै इ नसबर कायाऊँ कूण छुटासी जिमै मोत आवै ह। आपणा परबु ईसु मसी क जरिए म परमेसर को धनेवाद करूं हूँ। क्युं क इ मिनख सुभाव की काया म तो म पाप की सेवा करूं हूँ पण मेरी बुदीऊँ परमेसर का नेम-कायदा की सेवा करूं हूँ। जणा इब मसी ईसु म जिबाळा ताँई कोई दंड कोनी, क्युं क मसी ईसु म जीवन देबाळी पबितर आत्मा को नेम-कायदो मनै पाप अर मोत का बिधानऊँ छुटावै ह। नेम-कायदो आपानै कोनी बचा सक्यो क्युं क पापी मिनख सुभाव की बजेऊँ बो कमजोर होगो। जणा परमेसर बो कर्यो जखो नेम-कायदो कोनी कर सक्यो, बो आपका एकलोता बेटानै आपणा पाप की सजा भोगबा ताँई आपणी पाप्या की काया स्यारकी काया म भेज्यो। अंय्यां परमेसर पापी काया म पापनै दंड दिओ। जिऊँ नेम-कायदा की जुर्त आपणा म पूरी होज्यावै क्युं क आपा मिनख सुभाव की बिधीऊँ नइ पण पबितर आत्मा की बिधी गेल जीवां हां। क्युं क बे जखा आपकी काया का सुभाव गेल जिवीं हीं बाका मन काया की इंछ्या पूरी करबा म लाग्या रेह्‍वै पण जखा पबितर आत्मा गेल जिवीं हीं बाका मन जखो पबितर आत्मा चावै बा बाता म लाग्या रेह्‍वै ह। काया की बाता प मन लगाबो तो मरबो ह, पण पबितर आत्मा प मन लगाबो जीवन अर स्यांती ह। काया प मन लगाबो तो परमेसरऊँ बेर बांदबो ह, क्युं क आ नइ तो परमेसर का नियमा प चालै अर नइ कदै चाल सकै। अर बे जखा काया का सुभाव गेल जिवीं हीं बे परमेसरनै राजी कोनी कर सकै। ज थारै म परमेसर को पबितर आत्मा बास करै ह जणा थे काया का सुभाव गेल कोनी जीओ पण पबितर आत्मा गेल जीओ हो। क्युं क जिमै मसी को पबितर आत्मा बास कोनी करै बो मसी को कोनी। ज थारै म मसी बास करै ह जणा थारी काया पाप की बजेऊँ मरेड़ी होबा क बावजुद बी थारी आत्मा धारमिक्‍ता की बजेऊँ जीवै ह। अर ज बो पबितर आत्मा जखो मसी ईसुनै मरेड़ा मऊँ जीवायो हो, थारै मांयनै बास करै ह जणा बो, जखो मसी ईसुनै मरेड़ा मऊँ ओज्यु जीवायो हो थारी नसबर कायानै आपकी पबितर आत्माऊँ जखी थारै मांयनै बास करै ह ओज्यु जीवासी। जणा पाछै मेरा लाडला बिस्वास्यो, आपणा प इ काया को कोई एसान कोनी जिऊँ आपा इकै गेलई जीवां। क्युं क ज थे इ नसबर काया का सुभाव गेल जीओ जणा मरस्यो। पण ज थे पबितर आत्माऊँ काया का सुभावनै मार द्‍यो जणा जिस्यो। जखा परमेसर की पबितर आत्मा गेल चालीं हीं बे परमेसर की ओलाद हीं। क्युं क जखी आत्मा थानै दि गई ह, बा थानै ओज्यु दास बणाबा नहिस डराबा ताँई कोनी पण आपानै बिकी ओलाद बणाबा ताँई ह जिऊँ आपा “अब्बा, परम-पिता” खेर बुलावां हां। पबितर आत्मा खुद आपणी आत्मा क सागै मिलर गुवाई देवै ह क आपा परमेसर की ओलाद हां। अर ज आपा बिकी ओलाद हां जणा परमेसर का वारिस अर मसी क सागै पाँतीवाळ बी हां, ज आपा बिकै सागै दुख म पाँतीवाळ हां जणा बिकै सागै मेमा म बी पाँतीवाळ हां। म सोचूँ हूँ क, इ टेम जखो दुख आपा भोगर्या हां बो आबाळी मेमा क आगै क्युंई कोनी। क्युं क आ सरस्टि बोळी आसऊँ बि टेमनै उडिकरी ह जद परमेसर आपकी ओलादनै परगट करसी। आ सरस्टि आपकी इंछ्याऊँ नइ पण इनै बणाबाळा की इंछ्याऊँ बेमतबल की होगी, इ आसऊँ क आबी आपका नास होबाऊँ छुटकारो पार परमेसर की ओलादा की मेमाभरी अजादि म पाँतीवाळ होवै। क्युं क आपा जाणा हां क हाल ताँई सगळी सरस्टि जच्चा किसी पिड़ाऊँ तड़पर बार घालरी ह। आ सरस्टिई नइ पण आपा बी जानै पबितर आत्मा को पेलो फळ मिल्यो हो, मांय-मांय घुटता रिह्या हां। क्युं क आपा इ बातनै उडिकर्या हां क बो आपानै आपकी ओलाद की जंय्यां अपणावै अर काया को छुटकारो होज्यावै। क्युं क आपा इ आस मई बचाया गया हां। ज आस पूरी होज्यावै जणा आस कठै री? क्युं क पूरी होईड़ी बाता की आस कोई कोनी करै। पण ज आपा बि बात की आस करां जखी हाल ताँई पूरी कोनी होई जणा आपा बिनै थ्यावस राखर उडिकां हां। अंय्यांई पबितर आत्मा आपणी कमजोरी म आपणी मदद करै ह, क्युं क आपा कोनी जाणा क आपा कूणसी रीतऊँ अरदास करां हां। पण पबितर आत्मा खुद कुराणर जिको बखान कोनी कर सकां आपणा ताँई अरदास करै ह। पण बो हियानै जाणबाळो जाणै ह क पबितर आत्मा की मनस्या काँई ह? क्युं क परमेसर की इंछ्याऊँई पबितर आत्मा परमेसर का मिनखा ताँई बिचोली करै ह। अर आपा जाणा हां क जखा परमेसरऊँ परेम करै ह बा ताँई हर बात मिलर भलाई पैदा करै, बा ताँई, जखा बिका मकसद गेल बुलाया गया हीं। जिनै बो पेल्या टाळ्यो बानै बो बिका बेटा स्यारका बणाबा ताँई ते कर्यो। जिऊँ बोळा भायां म बो पेलीपोत को बणै। जानै बो टाळ्यो बानै बो बुलायो अर जानै बो बुलायो बानै धरमी बी बणायो अर जानै बो धरमी बणायो बानै मेमा बी दिनी। जणा आ बातानै देखर आपा काँई बोलां, ज परमेसर आपणै कानि ह जणा आपणै सामै कूण हो सकै ह? जखो आपका बेटानै बी आपणा सगळा ताँई मरबानै दे दिओ। जणा पाछै बो बिकै सागै आपानै सक्यु क्युं कोनी देसी? परमेसर का टाळेड़ा मिनखा प कूण दोस लगा सकै ह? बो परमेसरई ह जखो बानै निरदोस बणावै ह। कूण ह जखो आपणा प दोस लगासी? क्युं क मसी ईसु आपणा ताँई मर्यो अर आई नइ, बो मरेड़ा मऊँ ओज्यु जियो जखो इब परमेसर क दाया हात कानि बेठ्यो ह अर आपणा ताँई बिचोली करै ह। कूण ह जखो आपानै मसी का परेमऊँ न्यारो करसी? दुख नहिस मुसीबत नहिस दिन घालबो नहिस काळ नहिस कंगाली नहिस जोखम नहिस कटारी? जंय्यां क पबितर सास्तर म मंडेड़ो ह: “क्युं क तेरी बजेऊँ म्हानै हर टेम मोत को मुंडो देखणो पड़ै; म्हें कटबाळी लल्डी समज्या जावां हां।” आ सगळी बाता म बी म्हें म्हानै परेम करबाळा की बजेऊँ जीतबाळाऊँ बी बढर हा। क्युं क म पक्काई जाणू हूँ क नइ तो मोत अर नइ जीवन, नइ ईस्बर नगरी दुत अर नइ उपरी सक्‍तिया प राज करबाळा, नइ इ टेम की कोई चिज अर नइ आबाळा टेम की कोई चिज, नइ कोई सक्‍तिया अर नइ उचाई अर नइ गेराई अर नइ सरस्टि की कोई चिज आपानै परमेसर का बि परेमऊँ न्यारो कर सकै जखो आपणा परबु मसी ईसु म ह। म मसी म सच बोलर्यो हूँ। म झूठ कोनी बोलुँ अर मेरी अन्तर-आत्मा पबितर आत्मा म मेरी गुवाई देवै ह, क मनै बोळो बडो दुख ह, अर मेरा मन म पिड़ा ह। ज मेरा बस म होतो क, म मेरा यहूदि भाई-भाणा अर मेरा देस का मिनखा ताँई सराप खुद प ले लेतो, अर मसीऊँ न्यारो होज्यातो। जखा इजरायल का हीं अर जानै परमेसर की ओलाद होबा को अधिकार ह। जखा परमेसर की मेमा को दरसण कर लिआ हीं। जखा परमेसर का करारा का भागी हीं। जानै नेम-कायदो, सची भगती अर बचन दियड़ा हीं। बडका बाऊँई नातो राखी हीं, अर मिनख क जाया क रूप म मसी बामैऊँई जलम्यो जखो सगळा को परमेसर ह अर सदाई धने ह! आमीन। अंय्यां कोनी क परमेसर आपका बचनानै पूरो कोनी कर्यो क्युं क जखा इजरायल का वंसज ह बे सगळा परमेसर का कोनी। अर नइ अब्राहम की पिडी होबा की बजेऊँ बे अब्राहम की ओलाद हीं। पण जंय्यां परमेसर अब्राहमऊँ बोल्यो हो, “इसाकऊँई तेरो वंस चालसी।” इको मतबल ओ ह क, परमेसर काया रूप म अब्राहम की पिडीऊँ जलमेड़ानै आपकी ओलाद कर कोनी गिणै पण बानैई गिणै जखा बिकै करार गेल जलम लिआ जानै अब्राहम की ओलाद मान्यो जावै ह। करार अंय्यां खेवै ह, “आगलै बरस इ टेम काई म पाछो आस्युं अर सारा छोरो जणसी।” ओई नइ, जद रिबका क बी आपणा बडका इसाकऊँ फळ पड़्यो, अर जोड़ला टाबरा क जलमऊँ पेल्या अर बाकै क्युं बी भलो-बुरो करबाऊँ पेल्या परमेसर रिबकाऊँ बोल्यो, “बडोड़ो छोटक्या की सेवा करसी।” परमेसर अंय्यां इ ताँई बोल्यो जिऊँ परमेसर क टाळबा को मकसद पूरो होवै जखो बा दोन्या क करमा गेल कोनी हो, पण इ बात प हो क परमेसर किनै बुलाबा की ध्यारमाली हीं। जंय्यां की पबितर सास्तर म मंडेड़ो ह क, “म याकूबऊँ परेम कर्यो अर एसावऊँ नफरत कर्यो।” जणा आपा काँई बोलां? के परमेसर अन्यायी ह? नइ, अंय्यां कोनी! क्युं क बो मूसाऊँ बोल्यो हो, “म जिपै दया करबा की मन म करस्युं बिपै दया करस्युं। अर जिपै बी तरस खाबा की मन म करस्युं बिपै तरस खास्युं।” जणा आ बात नइ तो कोईकी इंछ्याऊँ होवै अर नइ कोई क भाग-दोड़ करबाऊँ पण आ तो दयालु परमेसर की बात ह। क्युं क सास्तर म परमेसर फिरोनऊँ बोल्यो हो, “म तनै इ ताँई खड़्यो कर्यो क, म मेरी सक्‍ति तेरै प दिखा सकूँ अर मेरा नाम को हेलो सगळी धरती प पाड़्यो जावै।” खेबा को मतबल ओ ह क परमेसर जिपै दया दिखाबो चावै बिपै दया दिखावै ह अर जिको मन काठो करबो चावै बिका मननै काठो कर देवै ह। जणा थारै मऊँ कोई बोल सकै ह, “ज आई बात ह जणा बो म्हारै प दोस क्युं लगावै ह? अंय्यां को कूण ह जखो बिकी इंछ्यानै टाळज्यावै?” मिनख कूण होवै ह जखो परमेसरनै ओटो जुबाब देवै? के कोई हात की बणाएड़ी चिज बिका बणाबाळानै बुज सकै ह क, “तू मनै अंय्यां क्युं बणायो?” के खुमारनै इ बात की छुट कोनी क बो माटी की एक लुगदीऊँ एक बरतननै खास मकसद ताँई अर दुसरानै छोटा मोटा काम म आबा ताँई बणावै? अंय्यांई परमेसर बी आपकी झाळ अर नफरतनै नास होबाळा प परगट करबो चावै हो। इकै बावजुद बी बो बा झाळ अर नफरत जोगा नास होबाळा ताँई बोळी सबर करी। जिऊँ जानै बो पेल्याऊँई मेमा ताँई त्यार करमाल्यो हो अर बिकी दया क जोगा हा बापै बो आपकी भरपूर मेमा परगट कर सकै। अर सचमई आपा बे मिनख हा जानै परमेसर बुलायो ह अर खाली यहूदिई नइ, पण गैर-यहूदि बी सामिल ह। जंय्यां की होसे की पोथी म मंडर्यो ह: “जखा मिनख मेरा कोनी हा बानै म ‘खुदका मिनख खेस्युं,’ अर जखी परजा मेरी लाडली कोनी हीं, बिनै म ‘लाडली बोलस्युं।’ “अर, जि झघा म खेयड़ो हो, “थे मेरी परजा कोनी हो। बठैई थे जीवता परमेसर की ओलाद खुवास्यो।” अर परमेसर की खेबाळो यसाया, इजरायल क बाबत हेलो पाड़र बोलै ह क: “इजरायल की ओलाद समदर की बाळू का रणा जंय्यां कोनी गिणी जा सकै। इकै बावजुद बी बामैऊँ क्युंकई बचाया ज्यासी। क्युं क परबु धरती प आपका न्यायनै पूरीतर्या बिना देरी क पूरो करसी।” अर जंय्यां यसाया बोल्यो हो, “ज सक्‍तिसाली परबु आपणै ताँई, बंसज नइ छोडतो जणा आपा सदोम अर अमोरा जंय्यांई होज्याता ।” जणा पाछै आपा काँई बोलां? गैर-यहूदि मिनख जखा धारमिक्‍ता की खोज म कोनी हा, बानै धारमिक्‍ता मिलगी। बे बिस्वास की बजेऊँई धरमी बणाया गया। पण इजरायल का मिनख जखा नेम-कायदा प चालबो चावा हा जखी बानै धरमी बणाती, बे बि धारमिक्‍तानै कोनी पा सक्या। अंय्यां क्युं कोनी होयो? क्युं क बे इनै बिस्वास की झघा आपका करमाऊँ पाबा की कोसिस करी, पण बे ठोकर खाबाला भाठा प ठोकर खाई। जंय्यां क पबितर सास्तर म मंडेड़ो ह, “सुणो, म सिओन म एक भाठो धर राख्यो हूँ, जखो ठोकर खुवावै ह अर एक ढाड जखी पाप करवावै ह। पण जखो बिपै बिस्वास करै ह, बो कदैई सरमिंदा कोनी होसी।” मेरा लाडला बिस्वास्यो, मेरा मन की इंछ्या ह, जि ताँई म परमेसरऊँ अरदास करूं हूँ क इजरायली मिनख बचाया जावीं। क्युं क म इ बात की गुवाई दे सकूँ हूँ क बामै परमेसर की धुन ह। पण बा धुन ज्ञान गेल कोनी। क्युं क बे परमेसर की धारमिक्‍ताऊँ अणजाण होर खुदकी धारमिक्‍तानै बणाबा म लाग्या रिह्या अर खुदनै परमेसर की धारमिक्‍ता म कोनी सूप्या। मसी नेम-कायदा को अंत ह जिऊँ जखो बिस्वास करै बो परमेसर की नजर्या म धरमी बणै। मूसा नेम-कायदाऊँ आबाळी धारमिक्‍ता क बारां म मांड्यो ह क, “जखो नेम-कायदा का हुकमा प चालसी बो बाकै सारै जीवै ह।” पण बिस्वासऊँ आबाळी धारमिक्‍ता क बाबत सास्तर बोलै ह, “तू खुदऊँ आ मना बुज क, ईस्बर नगरीऊँ मसीनै धरती प ल्याबा कूण जासी?” अर आबी मना बुज क, “पताळ म कूण जासी? मतबल मसीनै मरेड़ा मऊँ पाछो ल्याबानै।” पण सास्तर बोलै ह क, “बचन तेरै कनै ह, तेरा होठा प ह अर तेरा मन म ह।” इ बिस्वास का बचन को आपा हेलो पाड़ां हां। ज तू तेरा मुंडाऊँ बोलै, “ईसु परबु ह,” अर तू ओ बिस्वास करै क परमेसर बिनै मरेड़ा मऊँ जीवा दिओ ह जणा तू बचायो ज्यासी। क्युं क आपका हिया म बिस्वासऊँ मिनख धरमी बणायो जावै ह अर खुदका मुंडाऊँ मानबाऊँई बिनै बचायो जावै ह। सास्तर बोलै ह, “जखो बी बिपै बिस्वास करै ह बो सरमिंदा कोनी होसी।” आ इ ताँई ह क यहूदि मिनखा अर यूनानी मिनखा म कोई भेद कोनी क्युं क सगळा को परबु एकई ह। अर बिकी अपरम्पार दया बा सगळा ताँई ह जखा बिनै हेलो देवै ह। क्युं क, “जखो बी परबु को नाम लेवै ह, बिनै बचायो ज्यासी।” पण बे जखा बिपै बिस्वास कोनी करीं, बिको नाम कंय्यां लेसी? अर बे जखा बिकै बारां म सुण्याई कोनी बिको बिस्वास कंय्यां करसी? अर जद ताँई बानै बताबाळो कोई कोनी जणा बे कंय्यां सुण सकीं हीं? अर सुणाबाळानै बिना भेज्या बे कंय्यां सुणा सकीं हीं? जंय्यां क पबितर सास्तर म मंडेड़ो ह, “चोखा समचार को हेलो पाड़बाळा का पग कत्ता सोवणा हीं।” पण चोखा समचारनै सगळा कोनी मान्या। यसाया बोलै ह, “ओ परबु, म्हारूँ सुणर कूण बिस्वास कर्यो?” सुणबाऊँ बिस्वास उपजै ह अर सुणबो खाली मसी का बचनऊँई होवै। पण म बुजूँ हूँ, के बे हेलो कोनी सुण्या? हाँ, पक्काई सुण्या। सास्तर बोलै ह: “बाकी उवाज सगळी धरती प फेलगी, अर बाका बचन धरती का इ कूणाऊँ बि कूणा ताँई पुग्या।” पण म बुजूँ हूँ, के इजरायली कोनी जाणता हा? सऊँ पेली मूसा बोल्यो हो: “म थारै मना म बा मिनखा क जरिए बळत लगास्युं। म बिस्वास नइ करबाळा कूणबा क जरिए थानै झाळ दिवास्युं।” पाछै यसाया हिमत क सागै बोलै ह: “म बानै मिल्यो जखा मनै कोनी ढुंढर्या हा। म बा ताँई परगट होयो जानै मेरी खोज खबरई कोनी हीं।” पण परमेसर इजरायलीआ क बारां म बोल्यो ह: “म सगळा दिन मेरी नइ मानबाळा, अर बिरोद्‍या क आगै हात फेलाया राख्यो।” जणा म बुजूँ हूँ, “के परमेसर आपका मिनखानै तज दिओ?” नइ, अंय्यां कोनी। क्युं क म बी अब्राहम का बंस अर बिन्यामीन का गोत को इजरायली हूँ। परमेसर आपका मिनखाऊँ जानै बो पेल्याऊँ जाणतो हो मुंडो कोनी मोड़्यो। के थे कोनी जाणो क एलिआ क बारां म सास्तर काँई बोलै ह, जद एलिआ परमेसरऊँ इजरायल का मिनखा क खिलाप कंय्यां अरदास करी ही? “ओ परबु, बे थारी खेबाळा का पिराण ले लिआ। तेरी बेदीयानै तोड़ गेर्या। अर मनै छोडर तेरी खेबाळा म कोई कोनी बच्यो अर बे मनै बी मारबा की तक म हीं।” पण जणा परमेसर बिनै काँई जुबाब दिओ? “म मेर ताँई सात हझार मिनखानै बचा राख्यो हूँ जखा झूठा देवता बाल क आगै नाक कोनी रगड़ी।” अंय्यांई आज बी क्युंक इजरायली हीं, जखा परमेसर की दयाऊँ टाळेड़ा हीं। ज ओ परमेसर की दया को नतिजो ह, जणा ओ मिनखा का करमा को नतिजो कोनी ह। नहिस तो दया को काँई मतबल। जणा इऊँ काँई? इजरायल का मिनखानै बो कोनी मिल्यो जिनै बे टोवै हा, पण बो टाळेड़ानै मिलगो। जदकी बाक्या का मनानै काठो कर दिओ गयो। जंय्यां क पबितर सास्तर म मंडेड़ो ह, “परमेसर बानै बेचेत मिनखा कोसो मन दिओ।” “अंय्यां की आँख्या दि जानै सुजै कोनी अर अंय्यां का कान दिआ जखा सुण कोनी सकै हा। अर आ दसा आज ताँई बणेड़ी ह।” दाऊद बोलै ह, “बाकी दावत बा ताँई फंदो, जाळ, ठोकर अर सजा की बजे बणज्यावै। बाकी आँख्या धुँधळी होज्या जिऊँ बे देख कोनी सकीं। अर बाकी कड़त्यु सदाई झुकी रेह्‍वै।” जणा म बुजूँ हूँ, के बे इ ताँई ठोकर खाया क बे नास होज्यावीं? नइ, पण बाकै गळती करबाऊँ गैर-यहूदि मिनखानै छुटकारो मिल्यो। जिऊँ यहूदि मिनखा क मना म होड पैदा होवै।  अंय्यां ज बाकै गळती करबा को मतबल जगत भर्योपूरो होवै अर बाकी नाकामीऊँ गैर-यहूदि मिनख भर्यापूरा होवै, इ ताँई ज बे सगळा एक सागै जुड़ज्यावै, जणा कत्ती भरपूरी होसी। आ इब म थारूँ, जखा यहूदि कोनी बोलर्यो हूँ, क्युं क जंय्यां खास तोर प तो म गैर-यहूदि मिनखा ताँई भेजेड़ो चेलो हूँ अर मनै मेरा काम प गुमान ह क्युं क इनै पूरी जीज्यानऊँ करूँ हूँ , बंय्यांई म चाऊँ हूँ क कंय्यां बी कर म मेरा मिनखा म होड पैदा कर सकूँ अर बामैऊँ क्युंकनै बचा सकूँ। क्युं क बानै नकार्यो जाबो जगत का बाकी मिनखा को परमेसरऊँ मेळमिलाप करवावै ह, जणा बानै अपणायो जाबो मरेड़ा मऊँ ओज्यु जीलाबो कोनी होसी के? ज चढावा मऊँ चढायो जाबाळो भोग पबितर ह जणा बाकी को चढावो बी तो पबितर ह। ज दरख्त की जड़ पबितर ह जणा पाछै बिकी डाळ्यां बी पबितर ह। पण ज पाळेड़ा जेतून का दरख्त की क्युंक डाळ्यां तोड़र फेक दि जावै, अर एक जंगली जेतून की डाळीनै बिपै कलम चढा दिओ जावै, जणा थे गैर-यहूदि जखा पाळेड़ा दरख्त प कलम चढाईड़ी डाळ्यां की जंय्यां हो जेतून की जड़्या का पोसण का साती हो। जणा तनै बा डाळ्यां क सामै जखी तोड़र फेकी गई गुमान नइ करबो चाए। अर ज गुमान करै जणा ध्यान राख ओ तू कोनी जखो जड़्यानै पाळर्यो ह, आ तो बा जड़ ह जखी तनै पाळरी ह। इब तू बोलसी, “डाळ्यां इ ताँई तोड़ी गई क मेरी कलम चढै।” आ बात सची ह क बे बाका भेम की बजेऊँ तोड़ी गई पण थे थारा बिस्वास का बूता प टिकर्या हो। जणा इको गुमान मना करो पण डरता रेह्‍वो। ज परमेसर असल डाळ्यांनैई कोनी छोडी जणा थानै बी कोनी छोडै। जणा तू परमेसर की नरमाईनै देख अर बिकी कल्ड प ध्यान दे। आ कल्ड बा ताँई ह जखा पड़ग्या पण ज थे बिकी दया म बण्या रेह्‍वो जणा बिकी दया थारै ताँई ह। नहिस थानै बी का'टर फेक दिओ जासी। अर ज बे आपका भेमनै छोड दे जणा बानै बी दरख्त म जोड़ दिओ जासी। क्युं क परमेसर बानै ओज्यु जोड़बा की सक्‍ति राखै ह। जद तनै जलमजात जंगली जेतून का दरख्तऊँ एक डाळी की जंय्यां का'टर बिधी क खिलाप एक चोखा जेतून का दरख्तऊँ जोड़ दिओ गयो, जणा अ जखी बि दरख्त की खुदकी डाळ्यां हीं खुदका दरख्त म पाछी क्युं कोनी जोड़ी जासी। मेरा लाडला बिस्वास्यो! म थानै इ लुखेड़ा सचऊँ अणजाण कोनी राखबो चाऊँ, क थे खुदनै घणा चतर नइ समजबा लागो। क्युं क इजरायल का मिनखा को ढिटपुणो सदाई कोनी बण्यो रेह्सी। ओ तो जद ताँई ह जद ताँई गैर-यहूदि मिनखा मऊँ जत्ता टाळेड़ा हीं, बे सगळा परमेसर कनै नइ आज्यावै। अर अंय्यां सगळा इजरायली बचाया ज्यासी। जंय्यां की पबितर सास्तर म मंडेड़ो ह, “छुटकारो देबाळो सिओनऊँ आसी; बो याकूब का कूणबाऊँ सगळो अधरम दूर करसी। अर बाकै सागै मेरो ओ नयो करार ह, क म बाका पापनै दूर कर देस्युँ।” जठै ताँई चोखा समचार को सुवाल ह, बे थारा हित म परमेसर का बेरी हीं। पण जठै ताँई परमेसर क हाता टाळ्या जाबा की बात ह, जणा बे बाका बडका की बजेऊँ परमेसर का लाडला हीं। क्युं क परमेसर का बरदान अर बिको बुलाया जाबानै कोनी बदल्यो जा सकै। जंय्यां क थे गैर-यहूदि पेल्या परमेसर का कह्या म कोनी चालता हा। पण इब यहूदि परमेसर का कह्या म नइ चालबा की बजेऊँ परमेसर की दया थार प होई ह। बंय्यांई बे इब कह्या म कोनी चालै जिऊँ जखी दया थार प होई ह बा इब बापै होवै। क्युं क परमेसर सगळा मिनखानै कह्यो नइ मानबा की केद म इ ताँई गेर राख्यो ह क बो बापै दया करै। परमेसर की भरपूरी, बुदी अर ज्ञान कत्तो अपरम्पार ह। बिको न्याय कत्तो उंडो अर बिका गेला कत्ता भेदभर्या हीं। “परबु का मननै कूण जाणै ह? अर बिनै राय देबाळो कूण ह?” “परमेसरनै कूण काँई दिओ? क बो कोईनै पाछो दे।” क्युं क सगळा को रचबाळो बोई ह। बिऊँ सगळा हीं अर बे बी ताँई हीं। बिकी सदाई मेमा हो! अंय्यांई होवै। इ ताँई मेरा लाडला बिस्वास्यो मेरी अरदास ह क, परमेसर जखी दया आपणा प दिखाई ह। बिकी बजेऊँ थारी कायानै पबितर अर जीवती भेंट चढावा क रूप म परमेसरनै चढा द्‍यो जखी बिनै राजी करै। क्युं क बिनै ध्यारबा को ओई सचो अर सई तरिको ह। दुनिया की बाता प मना चालो। पण लगातार परमेसरनै थारा मनानै पूरीतर्या बदलबा द्‍यो। क्युं क अंय्यां होबाऊँ थे परख'र जाणस्यो क परमेसर की काँई इंछ्या ह, काँई चोखो ह, काँई बिनै राजी करै अर काँई सिद ह। इ ताँई जखी दया मनै मिली ह, बिऊँ म थानै बोलुँ हूँ, थे खुदनै जखा थे हो बिऊँ बेत्ती मना समजो। पण थारा बिस्वास गेल जत्ती उजमा परमेसर थानै दिनी ह बत्तोई खुदनै समजो। क्युं क जंय्यां काया म भात-भात का अंग हीं अर बाको काम बी इकसार कोनी। बंय्यांई आपा बोळा हां पण मसी क सागै एक होबा की बजेऊँ एक काया हां। इ ताँई आपणा मऊँ हरेक, एक दुसराऊँ जुड़ेड़ो ह। बिकी दया गेल आपानै भात-भात का बरदान मिल्या हीं। ज कोईसानै परमेसर की खेबाळो होबा को बरदान मिल्यो ह जणा बो आपका बिस्वास गेल परमेसर की बाता बोलै। ज कोईसानै सेवा करबा को बरदान मिल्यो ह जणा बो सेवा करै, ज कोईसानै सीखाबा को बरदान मिल्यो ह जणा बो सीखावै। ज कोईसानै दुसरानै हिमत बंधाबा को बरदान मिल्यो ह जणा बो हिमत बंधावै। ज कोईसानै दान देबा को बरदान मिलेड़ो ह जणा बो खुला मनऊँ देवै। ज कोईसानै मुख्याई करबा को दान मिलेड़ो ह जणा बो मन लगार मुख्याई करै, अर ज कोईसानै दया करबा को बरदान मिलेड़ो ह जणा बो राजी हियाऊँ दया करै। थारो परेम सचो होवै। बुराईऊँ बेर करो अर भलाई करता रेह्ओ। एक दुसराऊँ सचो परेम करो। एक दुसरा को खुदऊँ बेत्ती आदरमान करो। मेनत करो आळसी मना बणो, पबितर आत्मा म जोसऊँ भरज्याओ अर परबु की सेवा करो। आस म राजी रेह्ओ, पिड़ा म थ्यावस राखो, लगातार अरदास करता रेह्ओ। परमेसर का मिनखा की जुर्ता म बाको सागो द्‍यो, मिजमानी घालबा का मोका ढुंढता रेह्ओ। थानै सताबाळानै आसिरबाद द्‍यो। बानै कोसो मना पण आसिरबाद द्‍यो। जखा राजी हीं बाकै सागै राजी होवो अर जखा रोइ हीं बाकै सागै रोओ। आपसर्या म एक चित रेह्ओ घमंड मना करो पण दीन हीन की सोबत करो। अर खुदनै अंय्यां मना जाणो क खाली मई बुदीमान हूँ। कोईकी बुराई क बदलै बुराई मना करो। पण जखो सगळा की नजर्या म सई अर चोखो ह बोई करो। जठै ताँई होवै सगळा मिनखा क सागै स्यांतीऊँ रेह्ओ। मेरा लाडलो, खुद बदलो मना ल्यो पण इनै परमेसर की झाळपै छोड द्‍यो क्युं क पबितर सास्तर म मंडेड़ो ह, “परबु बोल्यो बदलो लेबा को काम मेरो ह, मई बदलो चुकास्युं। पण तू तो, “ज तेरो दुस्मन भूखो ह जणा बिनै रोटी खुवा; ज बो तिसायो ह, जणा बिनै पीबानै दे। ज तू अंय्यां करसी, जणा बो सरमऊँ पाणी-पाणी होज्यासी।” बुराईऊँ मना हारो पण भलाईऊँ बुराईनै जीतल्यो। सगळा मिनखानै अधिकार्या का कायदा कानून मानबो चाए। क्युं क परमेसर की मरजी क बिना कोई राज कोनी कर सकै, अर परमेसरई अधिकारी बणावै ह। जणा जखो बी अधिकारी को बिरोद करै ह, बो परमेसर का हुकमा को बिरोद करै ह। अर जखा परमेसर की व्यवस्था को बिरोद करीं हीं बानै सजा मिलसी। क्युं क अधिकारी चोखा काम करबाळानै डराबा ताँई नइ पण बुरा काम करबाळानै डराबानै ह। अर ज थे परधानऊँ नइ डरबो चाओ जणा चोखा काम करो जिऊँ अधिकार्याऊँ थारी बडाई होसी। क्युं क अधिकारी थारी भलाई ताँई परमेसर को सेवक ह। पण ज तू बुरो करै ह जणा बिऊँ डर क्युं क बो अंय्यांई तलवार कोनी ले मेली। बो परमेसर को सेवक ह जखो बुराई करबाळा प बिका न्यायनै ल्यावै ह। इ बजेऊँ थानै अधिकारी को कह्यो मानबो जरूरी ह। सजा का डरऊँई नइ पण थारी अन्तर-आत्मा की बजेऊँ बी ओ जरूरी ह। जणाई थे लगान बी चुकाओ हो, क्युं क अधिकारी परमेसर का सेवक होवीं हीं जखा आपको काम पूरो करबा म लाग्या रेह्‍वै। कोईकी उधारी ह जणा बिनै चुकतो कर दे, अर जखो कर जिनै देणो ह बिनै दे। अर चुंगी लेबाळानै चुंगी दे। जिऊँ डरबो चाए बिऊँ डर अर जिको मान करबो चाए बिको मान कर। आपसी प्यार-परेम क अलावा कोईको करजो खुद प मना राख। क्युं क एक दुसराऊँ परेम करबाळो नेम-कायदानै पूरो करै ह। जंय्यां क, “तू कुकरम मना करै, हत्या मना करै, चोरी मना करै, दुसरा की चिजा को लालच मना करै,” अ सगळा अर बचेड़ा सगळा हुकम बी इ हुकम क मांयनै ह क, “तू दुसराऊँ बी तेरी जंय्यां परेम कर।”  ज थे कोईऊँ परेम करो हो जणा थे बाको बुरो कोनी चाओ। परेम करबो सगळा नेम-कायदानै पूरो करबो ह। आज का टेमनै देखता अंय्यां कर, थे जाणो हो क निंदऊँ जागबा की घड़ी आगी ह। क्युं क इब आपणो छुटकारो बि टेमऊँ सांकड़ैई ह जद आपा बिस्वास कर्यो हो। रात ढळबाळी ह, अर दिन उगबाळो ह। अँधेरा का काम करबो छोडो अर उजाळा का हतियार उठाल्यो। जणा क्युंना आपा सूल रेह्‍वां जंय्यां मिनख दिन का उजाळा म रेह्‍वै। खा पीर धुत्त रेह्बाळासा नइ, नइ कुकरम अर रांडबाज की जंय्यां, नइ लड़बाळा की जंय्यां अर नइ बळोकड़ा की जंय्यां। पण परबु ईसु मसी का सुभावनै लेर आपणा पापी सुभावनै अर मन की इंछ्यानै मारो। जखा बिस्वास म कमजोर हीं बानै बी सागै राखो, पण बाका मतापै बहस मना करो। क्युंक मिनखा को बिस्वास बानै सक्यु खाबा की इजाजत देवै ह, पण जखो बिस्वास म कमजोर ह बो साग-पातई खावै। जखा सक्यु खावीं हीं बे बाको तिरस्कार नइ करै जखा साग-पात खावीं हीं। अर साग-पात खाबाला बानै गळत नइ बतावै जखा सक्यु खावीं हीं। क्युं क परमेसर बानै अपणायो ह। दुसरा का दासा को न्याय करबाळा थे कूण होवो हो? बे सफल होसी क कोनी इ बात को फेसलो करबाळो बाको खुदको मालिक ह। अर बे सफल होसी, क्युं क परबु बानै सफल बणाबा को बूतो राखै ह। क्युंक मिनख एक खास दिननै बेत्ती मानी हीं, अर कोई सगळा दिनानै एक स्यारकाई मानी हीं। इ ताँई हरेकनै खुदका मन मई हरतर्याऊँ ते करबो चाए। जखो मिनख कोई दिननै खास दिन मानै ह बो अंय्यां परबुनै आदर देबा ताँई करै ह। अर जखो सक्यु खावै ह बो बी परबुनै मान देबा ताँई खावै ह, क्युं क बे रोटी ताँई परमेसरनै धनेवाद देवीं हीं। जखा क्युंक चिजा कोनी खावीं बे बी अंय्यां परबुनै मान देबा ताँई करीं हीं। अर परमेसरनै धनेवाद देवीं हीं। आपणामै कोईसो बी खुद ताँई कोनी जीवै अर नइ खुद ताँई मरै। ज आपा जीवां हां बो परबु ताँई अर ज मरा हां जणा बो बी परबु ताँई। जणा चाए आपा जीवां नहिस मरा, आपा परबु का हां। क्युं क मसी इ ताँई मर्यो अर ओज्यु जिंदो होयो जिऊँ बो मरेड़ा अर जीवता दोन्या को परबु होवै। जणा थे दुसरा को क्युं न्याय करो हो? अर दुसरा बिस्वासी भायानै निचो क्युं जाणो हो? क्युं क आपा सगळा परमेसर का न्याय सिंघासन क सामै खड़्या होस्यां। जंय्यां क पबितर सास्तर म मंडेड़ो ह: “परबु खेवै ह, म जीवतो परमेसर हूँ, सगळा मेरै आगै गोडा टेकसी, अर हरेक जबान खेसी क म परमेसर हूँ।” आपणा मऊँ हरेकनै परमेसर क सामै खुदको हिसाब देणो पड़सी। जणा आपा एक दुसराकी गळती निकाळबो बंद करां। इकी झघा इ बात म पक्का होवां क दुसरा भायानै पाप म गिरबा ताँई नइ उकसावां। परबु ईसु क सागै एका म, म सचमई मानू हूँ क खाबाळी कोई चिज असुद कोनी। बा खाली बि ताँई असुद ह जखो बिनै असुद मानै ह। ज थारा खाबाऊँ कोई बिस्वासी भाई क ठेस लागै ह जणा थे सचमई प्यार-परेम को भेवार कोनी करो। जणा थारा खाबाऊँ बिको नास नइ होवै, क्युं क मसी बि ताँई मर्यो ह। जणा जखो तेरै ताँई चोखो ह बि ताँई तेरा नामनै मना खराब कर। क्युं क परमेसर को राज खाबो-पीबो कोनी पण बो तो धारमिक्‍ता, स्यांती अर पबितर आत्माऊँ मिलबाळो सुक ह। जखो इ तरिकाऊँ मसी की सेवा करै ह, बिऊँ परमेसर राजी रेह्‍वै ह। अर मिनख बिकी ईज्जत करै ह। जणा, बा बाता म लाग्या रेह्ओ जखी स्यांतीनै बढावै ह अर एक दुसरा की आत्मिक बढोतरी म मदद करै ह। खाबा ताँई परमेसर का कामनै मना बिगाड़ो। हर जंय्यां को खाणो सुद ह पण ज क्युं खाबाऊँ कोई मिनख पाप म गिरै जणा बिनै खाबो गळत ह। मास नइ खाबो चोखो ह, दारू नइ पीबो चोखो ह अर क्युं बी अंय्यां को काम जखो तेरा बिस्वासी भाईनै ठोकर खुवावै नइ करबो चोखो ह। इ ताँई आ बाता क बारां म थारो जखो बी बिस्वास ह बिनै तेरै अर परमेसर क बिच राख। भागहाळा हीं बे मिनख जखा जि बातनै चोखी समजीं हीं बामै खुदनै दोसी कोनी मानी। पण जि चिजनै खाबा को मन कोनी माँगै ज बो अंय्यां की चिज खावै ह, जणा बो दोसी होवै ह। क्युं क बिको खाबो बिका बिस्वास गेल कोनी ह अर बो सक्यु जखो बिस्वासऊँ कोनी बो पाप ह। आपा जखा बिस्वास म मजबूत हां, आपानै चाए क जखा बिस्वास म कमजोर हीं बानै सेण करां। आपा खुदनैई राजी नइ करां। आपणा मऊँ हरेक जणो बिस्वासी भाईड़ा की भलाई ताँई बिनै राजी करै जिऊँ बो मजबूत होवै। क्युं क मसी खुदनै राजी कोनी कर्यो हो। पण जंय्यां क, पबितर सास्तर म मंडेड़ो ह, “जखा तेरो अपमान कर्यो हो, बो अपमान मेर प आ पड़्यो ह।” हरेक बात जखी पबितर सास्तर म मांडी गई ह, बा आपानै सीख देबा ताँई हीं, जिऊँ जखी थ्यावस अर हिमत सास्तराऊँ मिलै ह, बिऊँ आपानै आस मिलै। थ्यावस अर हिमत देबाळो परमेसर थानै मसी ईसु की जंय्यां एका को मन देवै, जिऊँ थे एक हिया अर एक मुंडा होर आपणा परबु ईसु मसी का परम-पिता परमेसर की मेमा करो। जणा परमेसर की मेमा करबा ताँई एक दुसरानै अपणाल्यो, जंय्यां क मसी थानै अपणायो हो। म थानै बताऊँ हूँ क बडकाऊँ करेड़ा परमेसर का करार का सचनै, सचो साबित करबा ताँई मसी परमेसर की सचाई गेल यहूदि मिनखा को दास बण्यो। जिऊँ गैर-यहूदि मिनख बी परमेसरनै बिकी दया ताँई मेमा देवै, जंय्यां क पबितर सास्तर म मंडेड़ो ह, “इ ताँई म गैर-यहूदि मिनखा म तेरी बडाई करस्युं, म बाकै बिच तेरा नाम को गुणगान गास्युं।” अर ओ बी बोल्यो गयो, “गैर-यहूदि मिनखो, परमेसर का मिनखा क सागै राजी होवो।” अर ओज्यु बोल्यो गयो, “गैर-यहूदि मिनखो, थे परबु की बडाई करो, सगळा मिनखो बिको गुणगान गाओ!” अर ओज्यु, यसाया बोलै ह, “यिसै को एक बंसज आसी, जखो गैर-यहूदि मिनखा प राज करसी, अर गैर-यहूदि मिनख बिपै आस लगासी।” थारै बिस्वास गेल थानै आस देबाळो परमेसर थानै सुक-स्यांती अर खुसीऊँ भर देवै। जिऊँ पबितर आत्मा की सक्‍तिऊँ थारी आस बढती जावै। मेरा लाडला बिस्वास्यो, मनै पक्को बेरो ह क थे भलो करबाळा हो, सगळा ज्ञानऊँ भर्यापूरा हो अर एक दुसरानै सीखा सको हो। पण इ चिठी म, म थानै याद दिलाबा ताँई क्युंक बाता साप-साप मांड्यो हूँ, अर अंय्यां म, मनै मिलेड़ी परमेसर की दया की बजेऊँ कर्यो। क्युं क गैर-यहूदि मिनखा ताँई मसी ईसु को दास होर म परमेसरऊँ मिलेड़ा चोखा समचार को हेलो पाड़बा ताँई एक याजक की जंय्यां काम करूं हूँ, जिऊँ गैर-यहूदि मिनख पबितर आत्मा क जरिए पूरा का पूरा पबितर होर परमेसर क चढबा जोगो चढावो बण सकै। इ ताँई मसी ईसु की बजेऊँ परमेसर की सेवा करबा म, मनै गुमान ह। क्युं क म खाली बा बातानै करबाकी हिमत करूं हूँ जानै मसी, गैर-यहूदि मिनखानै परमेसर का हुकमानै मानबा ताँई बचन, करम, अचरज, सक्‍तिसाली सेलाणी अर परमेसर की पबितर आत्मा की सक्‍तिऊँ मेरै जरिए पूरी कर्यो। जिऊँ म यरूसलेमऊँ लेर इलेरीकुम क च्यारूमेर मसी का चोखा समचार को हेलो पाड़बा को काम पूरो कर्यो। मेरी सदाई आ मनस्या ह क म बठै चोखा समचार को हेलो पाड़ूँ जठै कोई मसी को नामई कोनी जाणै, इकी आ बजे ह क म कोई दुसरा मिनख की धरेड़ी निम प चिणाई नइ करूं। जंय्यां क पबितर सास्तर म मंडेड़ो ह, “जानै बिकै बारां म कोनी बताएड़ो, बे बिनै देखसी। अर जखा कदै सुण्याई कोनी, बे समजसी।” घणकरी बार मनै थारै कनै आबाऊँ रोक्यो गयो। पण इब आ परदेसा म मेरै काम करबा की कोई झघा कोनी बची, अर बोळा बरसाऊँ म थारूँ मिलबा ताँई बी तरसर्यो हूँ। म आस करूं हूँ क स्पेन जाती टेम म थारूँ मिलूँ। अर थारै सागै क्युंक दिन रूकबा को सुक उठाबा क पाछै म आस करूं हूँ क आगै का सफर ताँई मनै थारूँ मदद मिलै। पण इब तो म परमेसर का मिनखा की सेवा करबा ताँई यरूसलेम जार्यो हूँ। क्युं क मकीदुनिया अर अखाया की बिस्वासी मंडळी का मिनखानै ओ चोखो लाग्यो क यरूसलेम म परमेसर का मिनखा म जखा गरीब हीं बानै दान देवीं। हाँ, बे इ ताँई राजी बी हा अर बाको फरज बी बणै ह क्युं क ज गैर-यहूदि, यहूदि मिनखा का आत्मिक आसिरबाद म पाँती पताई ह जणा गैर-यहूदि मिनखानै बी आपकी सुक सुविदा म पाँती देणी चाए। जणा ओ काम कर मतबल भेळा करेड़ा इ धननै जिमेबारी क सागै समळार, थारी नगरी होतो होयो स्पेन रवाना होज्यास्युं। अर म जाणू हूँ क जद म थारै कनै आस्युं जणा मेरै सागै मसी का खूब आसिरबाद बी ल्यास्युं। मेरा लाडला बिस्वास्यो, आपणा परबु ईसु मसी अर पबितर आत्मा का परेमऊँ म थारूँ अरदास करूं हूँ क, परमेसरऊँ मेर ताँई अरदास करबा क जरिए मेरी आत्मिक राड़ म मेरो सागो द्‍यो। जिऊँ म यहूदिआ दिसावर म अबिस्वास्याऊँ बच्यो रेह्ऊँ अर यरूसलेम का परमेसर का मिनखा ताँई जखो दान म लेर जार्यो हूँ बानै बो भावै। अर म परमेसर की इंछ्या गेल राजी मनऊँ थारै कनै आर थारै सागै राजी हो सकूँ। स्यांती को परमेसर थारै सगळा क सागै रेह्‍वै। अंय्यांई होज्यावै। किंखिरीआ की बिस्वासी मंडळी की सेवा करबाळी आपणी बिस्वासी भाण फिबे की थारूँ सिपारीस करूं हूँ। क थे परबु म बिकी आवभगत अंय्यां करो जंय्यां एक परमेसर का मिनख की करी जाणी चाए। बिनै थारूँ जखी बी मदद चाए बा मदद बिनै दिज्यो, क्युं क बा बोळा मिनखा की मदद करी अर मेरी बी मदद करी। मसी ईसु म मेरा साती परसकीला अर अकविलानै मेरो नमस्कार खिज्यो। मेरी ज्यान बचाबा ताँई बे आपकी ज्याननै बी दाव प लगादि ही, मई नइ पण गैर-यहूदि मिनखा की सगळी बिस्वासी मंडळ्या बी बाको एसान मानै। बिकै घरा भेळी होबाळी बिस्वासी मंडळीनै बी मेरो नमस्कार। मेरा लाडला इपनितुसनै जखो एसिया म मसीनै मानबाळा म पेलो मिनख ह मेरो नमस्कार खिज्यो। मरीयमनै, जखी थारै ताँई बोळी मेनत करी ह, नमस्कार। मेरा देसवासी अंडरोनीकुस अर यूनिया जखा मेरै सागै जेळ म हा, भेजेड़ा चेला म नामी ह अर जखा मेरूँ पेल्याई मसी म आगा हा, बानै मेरो नमस्कार। परबु म मेरा लाडला अम्पलिआतुसनै मेरो नमस्कार। मसी म मेरै सागै काम करबाळा उरबानुस अर मेरा लाडला इस्तुखुसनै मेरो नमस्कार। मसी म सचा अर खरा अपिलेसनै मेरो नमस्कार। अरिस्तोबुलुस का परवारनै नमस्कार। मेरा देसवासी हेरोदिओननै नमस्कार। नरकीसुस का परवार का बा मिनखानै नमस्कार जखा परबु म हीं। तरेफेना अर तरेफोसानै जखी परबु म कड़ी मेनत करबाळी हीं, मेरो नमस्कार। मेरी लाडली परसिसनै जखी परबु म बोळी मेनत करी ह, मेरो नमस्कार। परबु म टाळेड़ा रूफुसनै अर बिकी माँ जखी मेरी बी माँ स्यारकी ह, मेरो नमस्कार। असंकरीतुस, फिलगोन, हरमेस, पतरोबास, हरमास अर बाकी का बिस्वासी भायानै नमस्कार। फिलगुस, जुलिआ, नेरिऊस अर बिकी भाणनै, ओलमपास अर बिका सगळा परमेसर का मिनखानै मेरो नमस्कार। थे हात जोड़र एक दुसरानै नमस्कार कर्या करो। थानै सगळी मसी बिस्वासी मंडळ्या कानिऊँ नमस्कार। मेरा लाडला बिस्वास्यो, म थारूँ खेऊँ हूँ क, थानै जखी सीख मिली, बिकै खिलाप थारै म फूट गेरबाळा अर दुसरा का बिस्वासनै बिगाड़बाळाऊँ दूर रेह्ओ। क्युं क अंय्यां का मिनख आपणा परबु मसी की नइ पण आपकी इंछ्या की सेवा करीं हीं। अर अ आपकी मिठी-मिठी अर चापलुसी की बाताऊँ भोळा-भाळा मिनखा को हियो छळी हीं। हुकमानै मानबा की थारी चरचा, च्यारूमेर होरी ह। इ ताँई म थारूँ खुस हूँ पण म चाऊँ हूँ क थे भलाई ताँई स्याणा बणो अर बुराई ताँई अणभोळ। स्यांती देबाळो परमेसर तावळोई सेताननै थारा पगा तळै चिथवा देसी। आपणा परबु ईसु मसी की दया थार प बणी रेह्‍वै। मेरै सागै काम करबाळो तिमूतियूस, लूकियुस, यासोन अर सोसिपतरुस अर मेरा देसवासी कानिऊँ थानै नमस्कार। म तरतियुस, जिका हातऊँ ओ कागद मंडवायो गयो ह, परबु म थानै नमस्कार बोलुँ हूँ। मेरी अर सगळी बिस्वासी मंडळी की मिजमानी करबाळा गयुस को थानै नमस्कार। इरास्तुस जखो नगरी को भंडारी ह अर आपणा बिस्वासी भाईड़ा कुआरतुस को थानै नमस्कार। बिकी बडाई होवै जखो थानै, ईसु मसी का संदेस, जि चोखा समचार को म हेलो पाड़ूँ हूँ अर परमेसर का परगट होयड़ा बि भेदभर्या सच गेल जखो जुगादऊँ लुखेड़ो हो, मजबूत बणाबा की सक्‍ति राखै ह। जिनै जुग-जुग बण्या रेह्बाळा परमेसर का हुकमाऊँ परमेसर की खेबाळा का लेखा क जरिए सगळा गैर-यहूदि मिनखा प परगट कर बता दिओ गयो ह, जिऊँ बामै बिस्वासऊँ पैदा होबाळी कह्यो मानबा की मनस्या पैदा होवै। ईसु मसी क जरिए खाली बि एकई ज्ञान का सागर परमेसर की कदैई नइ मिटबाळा जुग ताँई मेमा हो। अंय्यांई होज्यावै! परमेसर की इंछ्या गेल मसी ईसु म भेजेड़ो चेलो होबा ताँई टाळ्यो गयो, म पोलुस जखो बिस्वासी भाईड़ा सोस्थिनेस की मददऊँ आ चिठी, कुरन्थी नगरी म परमेसर की बिस्वासी मंडळी का मिनखा अर बा सगळा क नाम मांडूँ हूँ, जखा परमेसर का मिनख होबा ताँई बुलाया गया हीं, जखा मसी ईसु क जरिए परमेसरऊँ जुड़ेड़ा हीं। अर बे सगळा जखा हर कठै रेह्‍र म्हारा अर आपणा सगळा का परबु ईसु मसी, को गुणगान करीं हीं। आपणो परम-पिता परमेसर अर परबु ईसु मसी, थारै सगळा प दया अर सुक-स्यांती बणाई राखै। थार प मसी ईसु क जरिए जखी दया करी गई ह, बि ताँई म मेरा परमेसरनै सदाई धनेवाद देऊँ हूँ। क्युं क मसी म थानै बोलबा, सगळा ज्ञान अर सगळी बाता म सागेड़ो बणायो गयो ह। क्युं क मसी क बारां म थारै मांयनै, म्हारो संदेस पक्को साबित होयो ह। जणाई थे आपणा परबु ईसु मसी क परगट होबानै उडिकर्या हो अर इ ताँई थानै ख्याई आत्मिक बाता की कमी कोनी। परबु ईसु मसी थानै आखीर ताँई मजबूत बणायो राखसी, जिऊँ थे आपणा परबु ईसु मसी क ओज्यु आबा का दिन म न्यायऊँ बच ज्याओ। परमेसर बिस्वास जोगो ह। बो थानै आपका बेटा ईसु मसी क सागै संगती करबानै टाळ्यो ह जखो आपणो परबु ह। जणा इब मेरा लाडला बिस्वास्यो, म आपणा परबु ईसु मसी क नाम म था सगळाऊँ अरदास करूं हूँ। जोक्यु थे बोलो बिपै सगळा एक मत होवो, जिऊँ थारै मांयनै फूट ना होवै। अर थारा बिचार अर इंछ्या एकई होवै। क्युं क, मेरा लाडला बिस्वास्यो, खलोए क कूणबा का क्युंक मिनख मनै बताया हीं क थारै मांयनै राड़ होवै ह। थारै म आ राड़ ह क थारै मऊँ क्युंक बोलै ह, “म्हें तो पोलुस का चेला हां” क्युंक बोलै ह, “म्हें अपुलोस का” क्युंक बोलै ह, “म्हें केफा का” अर क्युंक खुदनै, “मसी का चेला” बतावीं हीं। के मसी बटगो? के थारै ताँई पोलुस सुळी चढयो? के थानै पोलुस का चेला होबा ताँई बतिस्मो दिओ गयो हो? नइ अंय्यां कोनी ह। परमेसर को धनेवाद हो क किरसपुस अर गयुसनै छोडर म थारै माला खिनई बतिस्मो कोनी दिओ। जिऊँ कोईबी आ कोनी खे सकै क थे मेरा चेला होबा ताँई बतिस्मो दिआ गया हो। अर हाँ म स्तिफनस अर बिका घरकानै बी बतिस्मो दिओ हो। पण इकै अलावा मनै तो याद कोनी क म कोई ओरनै बी बतिस्मो दिओ हो। क्युं क मसी मनै बतिस्मो देबा ताँई नइ, पण बिना मिनख बुदी की मिलावट क चोखा समचार सुणाबा ताँई भेज्यो ह। जिऊँ मसी को सुळी भोगबो बेकार नइ जावै। मसी क सुळी भोगबा को समचार नास होबाळा मिनखा ताँई बकवास ह। पण आपणा ताँई जखा बचाया जार्या हां परमेसर की सक्‍ति ह। क्युं क पबितर सास्तर म मंडेड़ो ह क, “म ज्ञान्या का ज्ञाननै नास कर देस्युँ, अर चतरा की चतराईनै बेकार कर देस्युँ।” कठै ह ज्ञानी? अर कठै ह सीखाबाळा? अर कठै हीं इ दुनिया का जिरैबाज? के परमेसर इ दुनिया का ज्ञाननै बेबुदी को कोनी बतायो? इ दुनिया का मिनख बुदीऊँ परमेसरनै कोनी जाण्या। क्युं क आ परमेसर सोच समजर ध्यार राखी ही। इ ताँई परमेसरनै ओ चोखो लाग्यो क इ परचार क जरिए जखो आपा करां हां जिनै इ दुनिया का मिनख बकवास जाणी हीं बिस्वास करबाळानै बचावै। यहूदि मिनख ह जखा सबूत ताँई चमत्कारा की माँग करीं हीं, अर यूनानी मिनख ज्ञान ढुंढीं हीं। पण म्हें तो सुळी प चढाईड़ा ईसु मसी को हेलो पाड़ां हां, जखो यहूदि मिनखा ताँई आखळी अर गैर-यहूदि मिनखा ताँई बकवास ह। पण जानै परमेसर बुलायो ह चाए बे यहूदि हो चाए यूनानी, बा ताँई मसी परमेसर की सक्‍ति अर बिकी बुदी ह। क्युं क परमेसर की बकवास बी मिनखा की बुदीऊँ बेत्ती ह, अर परमेसर की कमजोरी मिनखा की ताकतऊँ बेत्ती ह। मेरा लाडला बिस्वास्यो, याद करो जद परमेसर थानै बुलायो जणा थे के हा। इ दुनिया की नजर्या म थारै मऊँ घणकराक नइ तो ज्ञानवान हा अर नइ ताकतबर हा अर नइ समाज म चोखी पेठहाळा। पण परमेसर इ दुनिया का ज्ञानवानानै सरमा मारबा ताँई दुनिया की नजर्या म बेबुदी समज्या जाबाळा अर ताकतबरानै सरमा मारबा ताँई इ दुनिया म कमजोर समज्या जाबाळानै टाळ्यो। अर इ दुनिया की सोचनै मिटाबा ताँई परमेसर इ दुनिया म छोटा अर निचा देख्या जाबाळानै जानै क्युंई कोनी समज्यो जावै टाळ्यो। जिऊँ कोईबी मिनख परमेसर क सामै गुमान कोनी कर सकै। पण परमेसर थानै मसी ईसु म जोड़्यो अर मसीनै थारी बुदी बणायो। अर बिकै जरिएई आपा परमेसर की नजर्या म धरमी हां अर आपा परमेसर का पबितर मिनख बण्या अर अजाद कर्या गया। जंय्यां की पबितर सास्तर म मंडेड़ो ह: “ज कोई मिनख गुमान करबो चावै बो परबु क बारां म गुमान करै।” मेरा लाडला बिस्वास्यो, जद म थारै कनै परमेसर का भेदा को सच परचार करबा आयो हो जणा म नइ तो बडी-बडी बाता करी अर नइ कोई बडी सीख लगाई। क्युं क जद थारै सागै हो जणा म ध्यारली ही क म ईसु मसी अर सुळी प बिकाळी मोत क सिवाय क्युंई कोनी जाणू। जणाई म थारै कनै डरपतो, धुजतो अर कमजोरी क सागै आयो, मेरो बोलबो, अर हेलो पाड़बो मिनख की बुदी गेल बडा-बडा बोलऊँ कोनी हो पण पबितर आत्मा की सक्‍ति का पुक्‍ता सबूत म हो, जिऊँ थारो बिस्वास मिनखा की समज प नइ होवै पण परमेसर की सक्‍ति प होवै। आपा परमेसर की आत्मा म पक्का मिनखानै इ ज्ञान क बारां म बतावां हां। पण ओ ज्ञान दुनिया अर इ दुनिया प राज करबाळी सक्‍ति को कोनी ह जखी नास होरी ही। पण आपा परमेसर का बि भेदभर्या सच अर लुखेड़ा ज्ञान को हेलो पाड़ां हां, जिनै परमेसर आपणी मेमा करबा ताँई जुगादऊँई ते कर राख्यो ह। इ दुनिया प राज करबाळा इ ज्ञाननै कोनी जाण्या। क्युं क ज बे इ ज्ञाननै जाणता जणा मेमाभर्या परबुनै सुळी प कोनी चढाता। पण पबितर सास्तर म मंडेड़ो ह, “जखी बातानै आँख कोनी देखी, अर कान कोनी सुण्या, अर जखी मिनखा क चित मई कोनी आई, बे बाता परमेसर क हाता बा मिनखा ताँई त्यार करी गई, जखा परमेसरऊँ परेम करीं हीं।” पण परमेसर पबितर आत्मा क जरिए बानै आपणा प परगट करी ह। क्युं क पबितर आत्मा सक्यु ढुंढले ह अठै ताँई क परमेसर की उंडी बातानै बी। मिनख की खुदकी आत्मा क अलावा बिकै मन की बात कोई दुसरो जाण सकै ह के? बंय्यांई परमेसर की बातानै बिकी पबितर आत्मानै छोडर कोई कोनी जाण सकै। आपानै इ दुनिया की आत्मा कोनी मिली पण परमेसर की भेजेड़ी पबितर आत्मा मिली ह, जिऊँ बा बातानै अरामऊँ जाण सकां जखी परमेसर आपानै खुला हियाऊँ दि ह। जणा म्हें मिनखा की बुदीऊँ सीखाया गेल कोनी बोलां पण पबितर आत्मा क सीखाया गेल बोलां हां। जंय्यां की म्हें आत्मिक सचनै जाकै कनै पबितर आत्मा ह बानै बतावां हां। जिकै कनै आत्मा कोनी बिनै बे चिजा कोनी मिलै जखी परमेसर की पबितर आत्माऊँ आवै ह। बि ताँई बे बकवास बाता ह क्युं क बाको मोल आत्मिक रूपऊँ परख्यो जावै ह। अर जखो आत्मिक मिनख ह बो सगळी बातानै परखै ह, पण बिनै कोईबी कोनी परख सकै। जंय्यां की सास्तर म मंडर्यो ह, “परबु का मननै कूण जाणै ह, कूण ह जखो परबुनै राय दे सकै?” पण आपणै कनै मसी को मन ह। मेरा लाडला बिस्वास्यो, म थारै सागै बंय्यां बात कोनी कर्यो जंय्यां आत्मिक मिनखा क सागै करूं हूँ। पण मनै थारै सागै अंय्यां बात करनी पड़ी जंय्यां दुनिया का मिनखा क अर मसी म नया बिस्वास्या क सागै करी जावै ह। म थानै पीबा ताँई दुद दिओ भार्यो खाणो नइ, क्युं क थे बिनै कोनी खा सका हा। अर नइ हाल ताँई खा सको हो। क्युं क थे हाल ताँई इ दुनिया का मिनखा की जंय्यां हो। थे आपसरी म बळोकड़ोपूणो अर कळै राखो हो। जणा थे इ दुनिया का मिनखा की जंय्यां कोनी के? अर इ दुनिया का मिनखा की जंय्यां बरताव कोनी कर्या के? क्युं क थारै मऊँ एक बोलै ह, “म पोलुस को चेलो हूँ” अर दुसरो बोलै ह, “म अपुलोस को हूँ” जणा थे दुनिया का मिनखा की जंय्यां कोनी जिर्या के? जणा थेई बताओ अपुलोस कूण ह अर पोलुस कूण ह? म्हें तो परमेसर का मामुलीसा सेवक हा जाकी बजेऊँ थे बिस्वास म आया। म्हारै मऊँ हरेक जणो बो काम करै ह जखो परमेसर म्हानै करबा ताँई दिओ ह। म बीज बोयो, अपुलोस सिंच्यो, अर परमेसर बिनै बोजो बणायो। जखो बोवै अर सिचै ह बो कोई मायनो कोनी राखै। सऊँ बडो परमेसर ह जखो बिनै बढावै ह। सिचबाळा अर बीज बोबाळा म कोई फरक कोनी। हरेकनै परमेसर बाकी मेनत गेल मजुरी देसी। परमेसर की सेवा म म्हें साती-संगी हां, अर थे परमेसर का खेत अर बिका भवन हो। परमेसर की दयाऊँ म एक चोखा चेजारा की जंय्यां निम धरी ह। अर बिपै ईमारत दुसरो बणार्यो ह। पण सगळानै ओ ध्यान राखबो चाए की बो बिपै कंय्यांको काम करर्यो ह। क्युं क परमेसर ईसु मसीनै एकलोती निम की जंय्यां पेलीई धर दिओ ह, अर बिकी झघा कोई दुसरी निम कोनी धरी जा सकै। ज कोई बि निम प सोना, चाँदी, हिरा-मोती, लकड़ी, घास अर फुसनै काम लेर ईमारत बणावै, जणा हरेक का काम सामै आसी, क्युं क न्यायहाळो दिन आगऊँ आनै चोड़ा म ल्यासी। अर बे कंय्यांको काम कर्या ही इकी परख आगऊँ होसी। जिको काम बि आग म टिक्यो रेह्सीक बिनै फळ मिलसी। अर ज कोईसाको काम बळ ज्यासी जणा बो हानी उठासी। पण बो खुद बच ज्यासी जंय्यां की आगऊँ बचर निकळगो हो। थे जाणो कोनी के थे परमेसर का मनदर हो अर परमेसर की पबितर आत्मा थारै म रेह्‍वै ह? अर ज कोई परमेसर का मनदरनै बरबाद करसी बिनै परमेसर नास करसी। क्युं क परमेसर को मनदर पबितर ह, अर बो थे हो। थे खुदनै धोको मना द्‍यो। अर ज कोई मिनख ओ सोचतो हो की बो इ दुनियादारी म ज्ञानी ह जणा इऊँ चोखो ओ ह क बो बेबुदी को बण्यो रेह्‍वै जिऊँ बो ज्ञानी बण सकै। क्युं क परमेसर की नजर्या म इ दुनिया को ज्ञान बावळोपुणोई ह। अर पबितर सास्तर म मंडेड़ो ह क, “परमेसर ज्ञान्यानै बाकीई चतराई म फसावै ह।” अर “परमेसर ज्ञान्या का बिचारानै बी जाणै ह क बे ख्याई काम का कोनी।” इ ताँई कोई बी मिनख काँई कर सकै ह इपै गुमान नइ करै क्युं क सक्यु थारोई ह। जणा चाए बो पोलुस हो, चाए अपुलोस हो, चाए केफा हो, चाए सरस्टि हो, जीवन हो नहिस मोत हो, चाए आज की बाता हो नहिस आबाळा काल की बाता हो अ सगळी चिजा थारी ह। थे मसी का हो अर मसी परमेसर को ह। म्हारै बारां म मिनखानै अंय्यां सोचबो चाए क म्हें मसी का दास हां, अर परमेसर का भेदा का भंडारी हां। अर अंय्यां का भंडारी ताँई आ एक बात बोळी जरूरी ह क बे आपका मालिक बेई बिस्वास जोगा होवीं। अर मेर ताँई आ बात कोई मांयनै कोनी राखै क थे अर मिनखा की कचेरी को कोई बी न्याय करबाळो मेरो न्याय करै। पण म खुदबी मेरो न्याय कोनी करूं। मेरो हियो साप ह। पण इऊँ ओ साबित कोनी होवै क म सचमई निरदोस हूँ। पण बो एकई परबु ह जखो मेरो न्याय करै ह। जणा सई टेम आबाऊँ पेली कोईबी बात को न्याय मना करो। परबु क आबा का टेमऊँ पेली आखरी न्याय कोनी होवै। बो अँधेरा म लुखेड़ी बातानै च्यानणा म ल्यासी अर चित का बिचारानै परगट करसी बी टेमई हरेक की बडाई परमेसर कानिऊँ होसी। मेरा लाडला बिस्वास्यो, थारै ताँई म अ बाता जखी म थानै सीखायो हूँ बानै अपुलोस अर खुद प लागू करी ह, जिऊँ थे म्हारूँ खेबत का मतबलनै सीख सको अर आ खेबत आ ह, “जोक्यु पबितर सास्तर म मंडेड़ो ह थे बिनै नइ उंडाळ ज्याओ।” अर थानै दुसरा को विरोध करबा ताँई एक की भीड़ लेर गुमानऊँ नइ फुलबो चाए। थानै दुसराऊँ चोखो कूण बणायो? जोक्यु थारै कनै ह के बो थानै परमेसर कोनी दिओ? जणा थे ओ गुमान क्युं करो जंय्यां थे खिकन क्युं लेयड़ाई कोनी? जोक्यु बी थानै चाए बो थारै कनै पेल्याऊँई हो के? के थे पेलीऊँ पिसाळा हो? थे म्हारै बिनाई राजा बणग्या के? म चाऊँ क थे राजा बणज्याता जिऊँ म्हें बी थारै सागै राजा होता। क्युं क अंय्यां लागै ह क परमेसर म्हानै जखा भेजेड़ा चेला हां बानै सऊँ आखरी म झघा दिनी ह, जंय्यां क कोई मिनखनै अखाड़ा म मरबा की सजा दि गई हो। क्युं क म्हें सगळी सरस्टि, ईस्बर नगरी दुता अर सागै की सागै मिनखा ताँई तमासो बणाया गया हां। हां, सई ह भाईड़ो म्हें मसी ताँई बेबुदी का हां, पण थे मसी म बोळा ज्ञानी हो! म्हें तो माड़ा हां पण थे तो तगड़ा हो। म्हें तो बेजत हां पण थे तो मान्या-थान्या हो। अर म्हें इब ताँई भूखा तिसाया अर उघाड़ा हां, म्हारै सागै मारा पिटी करी जावै ह अर म्हें बेघर हां। अर म्हें मेनत मजुरी कर खावां कमावां हां। अर ज म्हानै कोई दूरसिस देवै जणा म्हें बिनै आसिरबाद देवां हां। म्हानै सतायो जावै ह अर म्हें बरदास करां हां। जद म्हारी बुराई करी जावै ह जणा म्हें परेमऊँ जुबाब देवां हां म्हें इ जगत का मिनखा का कूटळाऊँ बेत्ती कोनी समज्या जावां, हाल ताँई म्हें इ दुनिया का मेल हां। म थारी बेजती करबा ताँई अ बाता कोनी मांडर्यो। पण म मेरा लाडला टाबर जा'णर थानै समजाऊँ हूँ। क्युं क ज मसी जीवन म थानै समाळबाळा दस झार होवै, जणा बी थारो बाप तो एकई ह। क्युं क म मसी को चोखो समचार सुणाबा क जरिए मसी म थारो बाप बणगो। इ ताँई म थारूँ अरदास करूं हूँ क थे मेरी सी चाल चालो। इ बजेऊँ म तिमूतियूसनै थारै कनै भेजूँ हूँ जखो परबु म मेरो लाडलो बेटो अर बिस्वास जोगो ह। बो थानै बे बाता याद दिलासी जखी बाता प म मसी म चालू हूँ अर जाकी सीख म सगळी झघा अर सगळी बिस्वासी मंडळ्या म देऊँ हूँ। अर थारै म कई मिनख तो अंय्यां सोचर गुमान म फूलर्या हीं क म इब थारै कनै कदै आस्युंई कोनी। ज परबु चायो तो म पक्कोई थारै कनै आस्युं। जणा म आ गुमान म फुलेड़ा मिनखा की बातानैई कोनी पण आकी ताकतनै बि देखलेस्युँ। क्युं क परमेसर को राज बाता कोई कोनी पण परमेसर की सक्‍तिऊँ ह। थे काँई चाओ हो के म सोटकी लेर थारै कनै आऊँ नहिस परेम क सागै दया की आत्माऊँ भर'र थारै कनै आऊँ। मेरै सुणबा म आयो ह क थारै मांय कुकरम फेलर्यो ह अर अंय्यां का कुकरम तो परमेसरनै नइ ध्यारबाळा मिनख बी कोनी करै। अर कई तो आपकी सोतेली माँ क सागैई काळो मुंडो करै ह। अर थे अंय्यां कर गुमान म फूलर्या हो जदकी थानै दुखी होणो चाए। अर थानै अंय्यां करबो चाए की जखो मिनख अंय्यां को काम करै ह बिनै थारूँ न्यारो कर देणो चाए। म कायाऊँ तो थारै कनै कोनी पण आत्माऊँ तो थारै कनैई रेह्ऊँ हूँ। अर इ बजेऊँ म अठैऊँई मेरो फेसलो बुरा मिनखा ताँई सुणा दिओ। जद थे परबु ईसु की सक्‍ति क सागै बिका नाम म भेळा होस्यो जणा मेरी काया को तो बेरो कोनी पण मेरी आत्मा बठै होसी। जणा बि बुराई करबाळा मिनख की कायानै नास करबा ताँई सेतान क हात सूप दिओ जासी जिऊँ परबु क ओज्यु आबा का दिन बिकी आत्मा को छुटकारो हो सकै। थारो गुमान करबो चोखो कोनी ह। अर थे आ खेबत तो सुण्याई हो क, “चिनोसोक खमिर सगळा गुंदेड़ा आटानै खमिर बणा देवै ह।” इ ताँई थे थारै मांयनैऊँ पुराणा खमिरनै जखी बुरी बाता हीं बारनै बगाद्‍यो अर खुदनै पबितर करो जिऊँ थे चोखो ताजा गुंदेड़ो आटो बण सको। पण थे तो बिना खमिर हाळी फसै की रोटी की जंय्यां हो। अर आपानै पबितर करबा ताँई ईसु मसीनै फसै की जंय्यां बलि कर चढायो गयो हो। इ ताँई आओ आपा फसै को त्युंहार बुरी बाता अर पुराणा पाप हाळी खमिर की रोटी क सागै नइ पण खराई अर सचाईऊँ जखी बिना खमिर की रोटी जंय्यां ह मनावां। अर म थानै मेरा गेलड़ा कागद म मांड्यो हो क थे कुकरमीयाऊँ कोई नातो मना राखज्यो। अर मेरो खेबा को ओ मतबल बि कोनी हो क थे इ दुनिया का कुकरम करबाळाऊँ, लालच्याऊँ, ठगाऊँ, मूरतीपुजबाळाऊँ कोई नातो मना राखज्यो। ज थे अंय्यां करस्योक जणा तो थानै इ जगत का मिनखाऊँ न्यारो रेह्णो पड़सी। पण मेरो अंय्यां मांडबा को ओ मतबल ह क थे अंय्यां का मिनखाऊँ नातो मना राखज्यो जखा देख दिखाई का बिस्वासी भाई बणी हीं पण बे कुकरमी, लालची, मूरतीपुजबाळा, गाळीगळोच करबाळा, पियाचरी करबाळा अर ठग हीं। अंय्यां का मिनखा क सागै उठा-बेठी मना राखज्यो। अर जखा अबिस्वासी हीं बा मिनखा को न्याय म क्युं करूं? बिस्वासी मंडळी का को न्याय थानैई करबो चाए। जखा अबिस्वासी हीं बाको न्याय तो परमेसरई करसी। अर सास्तर म जंय्यां मंडर्यो ह क “थे थारै मांयनैऊँ बुरा मिनखनै निकाळ द्‍यो।” ज थारै मऊँ कोईसाको दुसरा बिस्वासी भाई क सागै मनमुटाव ह। जणा थे बिका सुळजेटा ताँई परमेसर का मिनखा क कनै जाबा की बजाय कचेरी जाबा की हिमत करो हो? के थे ओ कोनी जाणो क परमेसर का मिनख जगत का मिनखा को न्याय करसी? परमेसर का मिनख जद सगळा जगत का मिनखा को न्याय करसी जणा आ छोटी-छोटी बाता को सुळजेटो कोनी कर सको के? अर थे ओ कोनी जाणो के आपा दुता को न्याय करस्यां? जणा इ जीवन की आ छोटी-छोटी बाता को काँई खेबो? ज थारै मांय अंय्यां की बाता होवै जणा थानै अंय्यां का मिनखा क कनै नइ जाणो चाए जाको बिस्वासी मंडळीऊँ कोई लेणदेण कोनी। थानै सरम आणी चाए! के साच्याई थारै मालो कोई ज्ञानी मिनख कोनी? जखो थारी तू-तू मे-मे को सुळजेटो कर सकै। पण थे जखा बिस्वासी भाई होर एक दुसरा क खिलाप मुकदमो करो हो अर थारी बाता को न्याय बिस्वास नइ करबाळा मिनखा कनै करवार्या हो। सचाई तो आ ह क थे आपसरी म एक दुसरा प मुकदमाबाजी करर्या हो जखी थारी हारनै दरसावै ह। इऊँ चोखो तो ओ होवै क थे अन्याय सेल्यो अर थे थारी हानी उठाल्यो। पण थे तो खुद अन्याय करो हो अर एक दुसरानै लूटो हो अर दुसरा मसी भाईड़ानै बी! के थे पक्काई कोनी जाणो क बुराई करबाळा मिनख परमेसर का राज का वारिस कोनी होसी? बावळा मना बणो! गंदा काम करबाळा, मूरतीपुजा करबाळा, कुकरमी, लुच्चा काम करबाळा अर लुच्चा-लफंगा, चोर लूटेरा, लालची, दारूखोर्या, भिड़ाबाळा, अर ठग परमेसर का राज का वारिस कोनी होसी। अर थारै म बी पेल्या क्युंक मिनख अंय्यां का हा, पण इब थानै परबु ईसु मसी अर परमेसर की पबितर आत्मा क जरिए पापऊँ धोर पबितर कर परमेसर क सागै सई होबा ताँई परमेसरनै सूप दिओ गयो ह। कोई खे सकै ह, “मनै सक्यु करबा की छुट ह।” हाँ पण सक्यु थारै ताँई चोखो कोनी। म खे सकूँ हूँ क, “मनै सक्यु करबा की छुट ह” पण म कोई चिज क बस म कोनी। खेबत म आवै ह क, “रोटी पेट ताँई अर पेट रोटी ताँई होवै ह” पण परमेसर आ दोन्यानैई नास कर देसी। अर आपणी काया कुकरम करबा ताँई कोनी पण परबु की सेवा करबा ताँई ह। अर काया ताँई परबु बंदोबस्त करै ह। परमेसर परबु ईसुनैई जिंदो कोनी कर्यो पण बो आपकी सक्‍तिऊँ आपानै बी ओज्यु जिंदो करसी। के थे जाणो हो थारी काया परबु ईसुऊँ जुड़ेड़ी ह? जणा पाछै म आ अंगानै जखा मसी का हीं, आनै रांड का अंग कोनी बणबा द्‍युँ। थे कोनी जाणो के जखो मिनख रांड क सागै रेह्‍वै ह बो बिकै सागै एक तन होज्यावै ह? क्युं क पबितर सास्तर म मंडेड़ो ह क, “बे दोन्यु एक काया हो होज्यासी।” पण जखो परबु म मगन रेह्‍वै ह बो परबु की आत्मा क सागै एक होज्यावै ह। कुकरम मना करो। क्युं क इकै अलावा जत्ता बी पाप मिनख करै ह बो आपकी काया क बारनैऊँ करै। पण जखो मिनख कुकरम करै ह बो आपकी काया क सागै ही पाप करै ह। अर थे ओ कोनी जणो के थारी काया पबितर आत्मा को मनदर ह आ आत्मा थारै मांयनै रेह्‍वै ह जिनै परमेसर थानै दिओ ह। थे खुदका कोनी हो, पण परमेसर का हो। क्युं क परमेसर थारी किमत चुकार थानै मोल लिआ ह। इ ताँई थे थारी कायाऊँ परमेसर की मेमा कर्या करो। थे मनै मांडी ही क, के ओ चोखो ह क मिनख ब्या नइ करै? इ बात क बाबत म खेबो चाऊँ हूँ, कुकरमऊँ बचबा ताँई सगळा मोट्यारा की खुद-खुदकी लूगाई होणी चाए, अर सगळी लूगाया क मोट्यार होणा चाए। मोट्यारनै आपकी लूगाई की इंछ्या स्यांत करनी चाए; अर बंय्यांई लूगाईनै मोट्यार की इंछ्या स्यांत करनी चाए। लूगाईनैई आपकी काया प हक कोनी पण बिका मोट्यार को बी बिकी काया प हक ह; अर बंय्यांई मोट्यारनैई कोनी पण बिकी लूगाई को बी बिकी काया प हक ह। थे मोट्यार लूगाई एक दुसरा की इंछ्या मना मारज्यो। पण आपसरी म बतळार क्युंक देर ताँई इनै टाळ सको हो जिऊँ थारै अरदास करबा म दिकत नइ होवै, अर इकै पाछै थे ओज्यु एक सागै रह्यो; क्युं क कदै अंय्यां नइ हो क खुदनै बस म राखबा की कमी को फाईदो उठार सेतान थानै बिचासै। अर म आ बात मेरै कानिऊँ खेऊँ हूँ पण ओ हुकम कोनी ह। अर म अंय्यां चाऊँ हूँ क सगळा मिनख मेरी जंय्यांई बिना ब्या क रेह्ता। पण एक कनै एक बरदान ह जणा दुसरा कनै दुसरो। अंय्यां सगळा मिनखानै परमेसर कानिऊँ न्यारो-न्यारो बरदान मिलेड़ो ह। अर इब म बानै जाको ब्या कोनी होयो अर जाको मोट्यार लूगाई मरेड़ो ह बानै खेऊँ हूँ क बा ताँई कतो बडिया ह क बे मेरी जंय्यां ब्या नइ करै। पण ज थे खुदनै बस म नइ राख सको जणा इऊँ चोखो तो ओ ह क थे ब्या करल्यो; क्युं क इ भूख म जळबाऊँ ब्या करबो घणो चोखो ह। अर इब म बानै आदेस देऊँ हूँ जखा ब्याईड़ा हीं, अर ओ मेरो आदेस कोनी पण परबु को हुकम ह क लूगाई आपका मोट्यारनै नइ छोडै अर ज बा आपका मोट्यारनै छोड बी देवै जणा बिनै दुसरो ब्या नइ करबो चाए अर हो सकै तो बिनै ओज्यु आपका मोट्यार क सागै मेळमिलाप करलेणो चाए। अर अंय्यांई मोट्यारनै बी आपकी लूगाईनै नइ छोडणो चाए। अर इब आकै अलावा जखा मिनख रेह्गा बानै परबु कोनी पण म खेऊँ हूँ, ज कोई बिस्वासी भाईड़ा क लूगाई होवै अर बा बिस्वास कोनी करै पण बिकै सागै रेह्बा ताँई राजी ह जणा बो मिनख आपकी लूगाईनै नइ छोडै। अर अंय्यांई ज कोई लूगाई को मोट्यार बी बिस्वास कोनी करै पण बो बिकै सागै रेह्बा म राजी रेह्‍वै जणा बा लूगाई बी आपका मोट्यारनै नइ छोडै। क्युं क बो बिस्वास कोनी करबाळो मोट्यार आपकी बिस्वासी लूगाई क सागै रेह्बाऊँ परमेसर की नजर्या म भाबाळो होज्यावै ह अर अंय्यांई अबिस्वासी लूगाई आपका बिस्वासी मोट्यार क सागै रेह्बाऊँ परमेसर की नजर्या म भाबाळी होज्यावै ह। अर ज थे अंय्यां कोनी करो जणा थारा बेटा-बेटी बी असुद होसी पण अंय्यां करबाऊँ बे परमेसर की नजर्या म पबितर होसी। अर इकै पाछै बी कोई बिस्वास नइ करबाळा मोट्यार लूगाई न्यारो होबो चावै जणा बो न्यारो हो सकै ह। क्युं क अंय्यां की बाता प मसी मोट्यार लूगाई अजाद हीं। क्युं क परमेसर आपानै सुक-स्यांतीऊँ रेह्बा ताँई बुलायो ह। ओ लूगायो थे जाणो हो के? थारै अंय्यां करबाऊँ काँई बेरो थे थारा अबिस्वासी मोट्यारानै बचाल्यो? ओ मोट्यारो थे जाणो हो के? थारै अंय्यां करबाऊँ काँई बेरो थे थारी अबिस्वासी लूगायानै बचाल्यो? परबु जिनै जंय्यां को बरदान दिओ ह अर जिनै जि रूप म टाळ्यो ह, बिनै चाए की बो बंय्यांई जीवै। अर म सगळी बिस्वासी मंडळ्यानै अंय्यांई सीखाऊँ हूँ। ज सुन्नत करवायड़ा मिनखनै परबु बुलावै जणा बिनै सुन्नत की सेलाणीनै नइ लुखाणो चाए। अर अंय्यांई बिना सुन्नतहाळा मिनखनै जद परबु बुलावै जणा बिनै सुन्नत कराबा की कोई जुर्त कोनी। क्युं क परमेसर का हुकमानै मानबा क अलावा नइ तो सुन्नत अर नइ सुन्नत नइ कराबो कोई माईनो राखै ह। सगळा मिनखानै बंय्यां रेह्बो चाए जंय्यां बिनै बुलायो गयो ह। तनै जद बुलायो गयो हो बी टेम का के तू दास हो? तू इकी चिंत्या मना करै। पण ज तू अजाद होबो चावै ह तो मोका को फाईदो उठा। क्युं क जि दासनै परबु बुलायो ह बो परबु को अजाद मिनख ह। अर अंय्यांई अजाद मिनखनै परबु बुलायो ह बो परबु ईसु मसी को दास ह। परबु थारो मोल देर थानै मोल लिआ ह। इ ताँई मिनखा का गुलाम मना बणो। ओ मेरा लाडला बिस्वास्यो, परमेसर की सोबत म रेह्‍वो पण थानै थारी बी दसाऊँ भागबा की जुर्त कोनी जिमै रेह्तासोता थानै बुलायो गयो हो। कुंआरी ताँई परबु क कानिऊँ मनै कोई हुकम कोनी मिल्या। इ ताँई म परबु की दयाऊँ अर बिस्वास जोगो होबा की बजेऊँ सला देऊँ हूँ। अर म सोचूँ हूँ क इ दुख की घड़ीनै देखता तो थारो बिना ब्या क रेह्बो चोखो ह। अर ज तेरै लूगाई ह तो बिऊँ न्यारो होबा की कोसिस मना करै, अर ज तेरै लूगाई कोनी तो बिनै ब्याबा की कोसिस मना करै। अर ज तू ब्या बी करै ह तो ओ पाप कोनी; अर ज कोई कुंआरी छोरी ब्याई जावै ह तो बा कोई पाप कोनी करै। पण ब्याईड़ा मिनखानै बोळी परेसानी होवै ह अर म आ परेसान्याऊँ थानै बचाबो चाऊँ हूँ। ओ मेरा लाडला बिस्वास्यो, म तो आई खेऊँ हूँ, क टेम बोळो कम ह। इ ताँई इबऊँ जिकै लूगाई ह बो अंय्यां रेह्‍वै जंय्यां बिकै लूगाई आथई कोनी। अर जखा बिलखै ह बे अंय्यां रेह्‍वै जंय्यां बे कदै दुखीई कोनी होया। अर जखा राजी हीं बे अंय्यां रेह्‍वै क बे कदै राजीई कोनी रिह्या। अर जखा चिज मोल लेवीं हीं बे अंय्यां रेह्‍वै क बाकन क्युंई कोनी। अर जखा इ दुनिया की चिजा का मजा लेर्या हीं, बे अंय्यां रेह्‍वै क बे चिजा बाकै काम की कोनी। क्युं क इ दुनिया का रिती-रिवाज जाता रेह्सी। अर म चाऊँ हूँ क थे चिंत्या मना करज्यो। क्युं क एक कुंआरो मिनख परबु क बारां म सोचतो रेह्‍वै ह क परबुनै कंय्यांसिक राजी करूं। अर एक ब्याईड़ो मिनख दुनिया म ही मगन रेह्‍वै अर आ सोचतो रेह्‍वै ह क खुदकी लूगाईनै कंय्यांसिक राजी राखूँ। अर अंय्यां करबाऊँ बिको जीवन दो हिस्सा म बट जावै ह। अर अंय्यांई कुंआरी छोरी क सागै ह। एक कुंआरी छोरी परबु की चिंत्या म रेह्‍वै ह जिऊँ बा आत्मा म अर काया म पबितर हो सकै। पण एक ब्याईड़ी लूगाई इ दुनिया की बाता म मगन रेह्‍वै ह अर आ चावै ह क म मेरा मोट्यारनै कंय्यांसिक राजी राखूँ। अर म अ बाता थार प पाबंदि लगाबा ताँई कोनी बोलुँ हूँ पण थारी भलाई ताँई बोलुँ हूँ। जिऊँ थे इ दुनिया की चिंत्यानै छोडर परबु क हाता म रेह सको। अर ज कोई ओ सोचै की जिऊँ मेरी सगाई होईड़ी ह बा छोरी तो जुवान होगी ह अर म इऊँ ब्या नइ कर इको हक मार्यो हूँ जणा बो जंय्यां चावै ह बो बिकै सागै करै ओ पाप कोनी, अर बिनै बिकै सागै ब्या कर लेणो चाए । पण जखो आपकै हिया म गांठ बांद राखी हो अर जिपै खुदका मन को दबाव बी कोनी, अर बो आपकी इंछ्यानै बस म राख सकै अर बो आपका हिया म आ ध्यार राखी हो क म मेरी सगाई होईड़ीऊँ ब्या कोनी करूं जणा बो चोखो करै ह। इ ताँई जखो बी आपकी सगाई होईड़ीऊँ ब्या करै ह बो चोखो करै ह। पण जखो ब्या कोनी करै बो ओर बी चोखो करै ह। अर जद ताँई लूगाई को मोट्यार जीवै ह, बा ब्या का बंदण म बंदी रेह्‍वै ह। पण ज बिका मोट्यार की मोत होज्यावै जणा बा चावै बिकै सागै ब्या करबा ताँई अजाद ह पण परबु म। अर ज बा जंय्यां ह बंय्यांई रेह्‍वै जणा राजी रेह्सी। ओ मेरो बिचार ह अर म आ सोच्यो हूँ क मेरै मांयनै बी परमेसर की पबितर आत्मा को बास ह। आपा मूरत्या क आगै चढाईड़ा परसाद क बारां म जाणा हां, “क्युं क आपा सगळा ज्ञानी हा।” अर ज्ञान मिनखानै गुमान म फुलावै ह। पण परेम करबाऊँ सको भलो होवै ह। अर ज कोई खेवै क बो क्युं जाणै अर जिकै बारां म बिनै जाणबो चाए बिकै बारां म कोनी जाणै जणा बो क्युंई कोनी जाण्यो। अर ज कोई परमेसरऊँ परेम करै बिकी परमेसर म पिछाण ह। आपा मूरत्या क चढाईड़ा परसाद क खाबा क बारां म बी जाणा हां, अर ओ बी जाणा हा क इ सरस्टि म परमेसर क अलावा कोई दुसरो परमेसर आथई कोनी। जदकी इ धरती प अर अकास म बोळा ईस्बर अर मालिक खुवावै ह। पण आपणो तो एकई परमेसर ह अर बो आपणो परम-पिता ह बोई सक्यानै रच्यो। अर एकई परबु ह, अर बो परबु ईसु मसी ह जिमै सगळी चिजा ह अर जिमै सक्यानै रच्यो गयो अर जिमै आपा जीवां हां। पण ओ ज्ञान सगळा मिनखानै कोनी। अर कई मिनख तो इब ताँई मूरती धोकी हीं, अर बे आ सोचर अंय्यां की चिजा खावीं क ओ तो परसाद ह। अर बाकै अंय्यां करबाऊँ बाकी अन्तर-आत्मा असुद हो जावै ह क्युं क बाको मांयलो माड़ो ह। अर बो परसाद आपानै परमेसर क कनै लेर कोनी जावै। इ ताँई ज आपा परसाद ना खावां जणा आपणो क्युंई कोनी घटै अर ज खावै जणा क्युंई बढै कोनी। इ ताँई थे चेता म रेह्ओ क थारी छुट बिस्वास म कमजोर मिनख ताँई पाप करबा की बजै नइ बणज्यावै। क्युं क ज कोई अंय्यां को मिनख जखो बिस्वास म कमजोर हो अर तनै, जिनै इ बारां म ज्ञान ह मनदर म परसाद खातो देखै जणा कदै बिनै मूरती क चढाईड़ो परसाद खाबा की हिमत नइ मिलज्यावै। अर तेरै इ ज्ञानऊँ बि बिस्वास म कमजोर भाई को नास होज्यासी जि ताँई परबु ईसु मसी खुदकी जान दि ह। अर अंय्यां कर तू तेरा भाई क खिलाप पाप करै ह। अर बाको बिस्वास कम कर मसी क खिलाप बी पाप करै ह। इ ताँई ज खाबो मेरा बिस्वासी भाईनै पाप करबा ताँई उकसावै ह जणा म कदैई मास कोनी खास्युं जिऊँ म मेरा बिस्वासी भाई क सामै पाप की बजै नइ बणू। के म अजाद कोनी हूँ? अर म भेजेड़ो चेलो कोनी के? के मनै आपणा परबु ईसु को दरसाव कोनी होयो? अर के थे बी परबु म मेरै काम की बजेऊँ कोनी हो? ज दुसरा मिनख मनै भेजेड़ो चेलो कोनी मानी जणा बी म थारै ताँई तो भेजेड़ो चेलो हूँ। क्युं क थे परबु म इ बात को सबूत हो क मेरै कनै भेजेड़ा चेला को ओदो ह। अर जखा मिनख मेरी जाच पड़ताळ करबो चावीं हीं बा ताँई मेरो जुबाब ह। के म्हानै ओ हक कोनी क थे म्हारो पेट भरो? अर ज म्हें ब्याईड़ा होवां जणा के म्हानै ओ हक कोनी? जंय्यां दुसरा भेजेड़ा चेला, अर परबु का सगा भायानै अर पतरसनै ह। की बे आपकी बिस्वासी लूगायानै जानै बे ब्या राखी ह बानै जठै बे जावीं हीं बठै लेज्यावीं हीं। अर के मनै अर बरनाबासनै इ जिंदगीनै जीबा ताँई काम करबो चाए? थे बताओ सेना म अंय्यां को कूण मिनख होवै ह जखो खुदका खरचा प एक सिपाई की जंय्यां काम करै? अर अंय्यां को कूण ह जखो खुदका अँगूरा का बाग म अँगूर की बैल उगार बिका अँगूर कोनी खावै? के अंय्यां को बी कोई मिनख ह जखो रेवड़ की रूखाळी कर बाको दुद कोनी पीतो हो? के म अ बाता मिनखा का अधिकारऊँ बोलुँ हूँ? के आ बाता क बारां म सास्तर कोनी खेवै? अर मूसा का नेम-कायदा म मांडेड़ो ह क, “खेती को काम करती टेम बळद को मुंडो मना बांदो।” के आ बात परमेसर बळदा प बोली ह? के बो अंय्यां आपणा बेई कोनी खेवै? ओ आपणा बेई पबितर सास्तर म मांड्यो गयो हो। क्युं क फसल बोबाळो अर लावणी करबाळो क्युं मिलबा की आस मई आप-आपको काम करीं हीं। अर अंय्यांई म्हें बी थारै म आत्मिक बीज बोया हां जणा ज म्हें थारूँ कोई चिज-बस्त की मदद चावां जणा बा के कोई घणी बडी माँग ह? जद दुसरा मिनखनै आ चिजा म पाँती लेबा की अजादि ह जणा के म्हानै बाऊँ बेत्ती कोनी ह? पण म्हें थार प हक कोनी जताया, जदकी म्हें सक्यु भोग्या जिऊँ मसी का चोखा समचारनै कोई अड़चल नइ आवै। के थे ओ जाणो कोनी जखा मिनख मनदर म काम करै ह बे मनदरऊँई पेट भरै ह। अर जखो मनदर की बेदी प चढावो चढावीं हीं बे बि चढावा म पाँतीवाळ ह? अंय्यांई परबु आपानै बी सास्तर म मांडर दिओ ह क चोखा समचार सुणाबाळा मिनखा को घर बी बिऊँ चालबो चाए। पण म तो अंय्यां कोनी कर्यो। अर ना म अंय्यां की कोई बात मांडी जिऊँ थे मेरै ताँई क्युं करो। जि बात को मनै गुमान ह बिनै कोई खोसले इऊँ पेली म मरबो पसंद करस्युं। इ ताँई ज म चोखो समचार सुणाऊँ हूँ जणा इमै मनै गुमान करबा की जुर्त कोनी क्युं क ओ तो मेरो फरज ह। अर ज म चोखा समचार कोनी सुणाऊँ जणा आ बात मेरै ताँई बोळी बुरी ह। अर ज ओ काम म मेरी इंछ्याऊँ करूं हूँ जणा म इको फळ पाबा जोगो हूँ। पण म ओ काम फरज क रूप म करूं हूँ क्युं क परमेसर मनै ओ काम सूप्यो ह। जणा मनै क्याको फळ मिलसी? इ बात को क, चोखा समचार सुणाबा को काम सितमित करूं। बिना मेरा हक को दावो कर्या चोखा समचारनै सुणाबा को काम एक सोभाग ह। म कोई कई बंदण म कोनी जणा पाछै बी म खुदनै सगळा को दास बणा लिओ। जिऊँ म मसी म बोळा मिनखानै जीत सकूँ। अर म यहूदि मिनखा ताँई यहूदि मिनख की जंय्यां बण्यो जिऊँ बानै मसी म ल्या सकूँ। जदकी म यहूदि नेम-कायदा क तळै कोनी हो इकै बावजुद बी म बिनै मान्यो जिऊँ क म बाका हियानै जीत सकूँ। अर जखा गैर-यहूदि मिनख हा बानै मसी म बचाबा ताँई म गैर-यहूदि मिनख की जंय्यां जियो यहूदि नेम-कायदा क बिपरीत। इको मतबल ओ कोनी क म परमेसर का नेम-कायदानै कोनी मानू। नइ, पण म मसी का नेम-कायदा क तळै जिऊँ हूँ। अर म बिस्वास म कमजोर ताँई कमजोर बण्यो जिऊँ म बानै मसी म ल्या सकूँ अर म मिनखा ताँई क्युंना क्युं बण्यो जोक्यु हो सकै हो बो म कर्यो की म बामैऊँ क्युंकनै बचा सकूँ। अर म ओ सक्यु चोखा समचार ताँई करूं हूँ क म दुसरा मिनखा क सागै इमै बाको साती-संगी बण सकूँ। के थे ओ कोनी जाणो दोड़ म तो सगळाई दोड़ीं हीं, पण इनाम तो एकनैई मिलै ह? अर थे बि अंय्यां दोड़ो की जीत सको। अर थे जाणो हो क खेल-कूद म भाग लेबाळा सगळा खिलाड़ी सगळी बाता प खराईऊँ चाली हीं। अर बे तो नास होबाळा मुकटनै पाबा ताँई अंय्यां करै ह, पण आपा बि मुकट ताँई कर्या हां जखो कदैई नास कोनी होबा को। इ ताँई म बी मिनख की जंय्यां दोड़ूँ हूँ जिकै सामै एक मुकाम होवै ह म अँधेरा म तीर कोनी चलाऊँ। पण म तो मेरी कायानै बस म कर मेरै खया म चलाऊँ हूँ, क्युं क कदै अंय्यां नइ हो क म दुसरानै तो परचार करूं पण खुद निकम्मो खुवाऊँ। मेरा लाडला बिस्वास्यो, म ओ चाऊँ हूँ क थे ओ जाणल्यो की आपणा बडका जखा मूसा की मान्या करता हा बे परबु का बादळ की छाया म लाल समदर क पार राजी-खुसी गया हा। बा सगळानै बादळ क तळै अर समदर क मांयनै मूसा की मानबाळा क रूप म बतिस्मो दिओ गयो हो। अर सगळा जणा एकई जंय्यां को आत्मिक खाणो खाया, अर सगळा एकई जंय्यांको आत्मिक पाणी पीआ, अर बे बि आत्मिक ढाडऊँ पीता हा जखी बाकै सागै चालती ही; अर बा ढाड मसी ह। पण बामैऊँ घणकराऊँ परमेसर राजी कोनी होयो अर बे मिनख उजाड़ मई मर'र ढेर होगा। अर अ बाता आपणा ताँई सीख ह क आपा बुरी बाता की इंछ्या नइ करां, जंय्यांकी बे कर्या हा, अर नइ मूरती धोकबाळा बणो जंय्यांकी बामैऊँ बण्गा हा, अर जंय्यां पबितर सास्तर म मांडेड़ो ह क, “बे मिनख खाबा-पीबा अर मूरती क सामै नाचा-कूदि अर एक दुसरा क सागै मोज-मस्ति करबा लाग्या।” अर नइ आपा कुकरम करां, जंय्यांकी बामैऊँ कई मिनख कर्या हा, अर एकई दिन म तेईस झार मिनख मरगा। अर नइ आपा मसीनै बिचासां, जंय्यांकी बामैऊँ कई कर्या अर बे साप क डसबाऊँ मरगा। अर नइ सिकायत करो, जंय्यांकी बामैऊँ बोळाजणा कर्या करता हा अर बे नास करबाळा क हाता मार्या गया। अर अ बाता बामै इ हिसाबऊँ होई जिऊँ बे दुसरा मिनखा ताँई सीख होई, अर आपानै चिताबा ताँई पबितर सास्तर म मांडी गई। क्युं क आपा अंय्यां का जुग म जिर्या हां जिमै अंत सांकड़ोई ह। इ ताँई जखो अंय्यां सोचै क, “म बिस्वास म मजबूत हूँ,” बो ध्यानऊँ रेह्‍वै क कदै अंय्यां नइ होज्या क बो बिस्वासऊँ गुड़ जावै। अर थे कदै बी अंय्यां कोनी बिचास्या गया। जखो मिनखा क सेह्बाऊँ बारनै हो। अर परमेसर तो बिस्वास जोगो ह बो थानै थारी सक्‍तिऊँ बेत्ती बिचासबा कोनी दे, पण जद थे बिचास्या जाओ हो जणा बो बिचासबा क सागै-सागै थानै बचाव ताँई उपाय बी बतावै ह। ओ लाडलो मूरती पूजा मना करज्यो। अर आ बात म थानै स्याणा जा'णर खेऊँ हूँ। अर जखो म थानै खेर्यो हूँ इनै थेई परख ल्यो। जि प्याला मऊँ आपा परबुभोज क रूप म धनेवाद देर पिवां हां, बो दरसावै ह क आपा मसी का लोय मऊँ पिवां हां। अर बा रोटी जखी आपा परबुभोज म तोड़र खावां हां बा दरसावै ह क आपा मसी की काया मऊँ खावां हां। क्युं क जंय्यां रोटी एक ह बंय्यांई आपा बी बोळा होर एक की काया हां, क्युं क आपा सगळा बि एक रोटी मऊँ खावां हां। थे बा इजरायल का मिनखा क बारां म सोचो जखा बेदी प चढाईड़ी चिजानै खावीं हीं, के बे बेदी का पाँतीवाळ कोनी? अर मेरो इ बातनै खेबा को काँई मतबल ह की मूरती प चढाईड़ो क्युं ह अर मूरती क्युं ह? नइ, पण मेरो खेबा को ओ मतबल ह क परमेसरनै नइ ध्यारबाळा परमेसर की झघा ओपरी बलायानै बलि चढावै ह। अर म कोनी चाऊँ क थे ओपरी बलाया का साती बणो। जणा थे परबु अर ओपरी बलाय मऊँ एक कोई खा अर पी सको हो। के आपा परबुनै चिड़ाबो चावां हां? के आपा परबुऊँ बेत्ती सक्‍तिसाली होगा? आपा सक्यु करबा ताँई अजाद हां। पण सक्यु भलाई ताँई कोनी ह। आपा सक्यु करबा ताँई अजाद तो हां पण सगळी बाताऊँ बिस्वास मजबूत कोनी होवै ह। थारै मऊँ सगळा जणा खुदको मतबलई नइ देखै पण दुसरा को ध्यान बी करै। अर गोस बजार म जोक्यु बिकै बिनै अन्तर-आत्मा क खया गेल खायो अर बिका बारां म कोई सुवाल मना उठायो। क्युं क सास्तर म मांडेड़ो ह, “आ धरती अर इ धरती प जोक्यु बी ह बो सक्यु परबु को ह।” ज कोई बिस्वास नइ करबाळा मिनख थानै रोटी खाबा ताँई बुलावै जणा थारै सामै जखो बी परूस्यो जावै जणा थारी अन्तर-आत्मा की बजेऊँ बिनै कोई सुवाल बुज्या बिना बिनै खाल्यो। पण ज कोई थानै बतावै क, “ओ देवता क चढाईड़ो चढावो ह,” जणा थानै बताबाळा अर अन्तर-आत्मा ताँई मना खाज्यो। अर मेरै खेबा को मतबल थारी अन्तर-आत्माऊँ कोनी ह पण बी दुसरा मिनखऊँ ह। क्युं क मेरी अजादि दुसरा मिनख की अन्तर-आत्माऊँ क्युं परखी जावै? अर ज म परबुनै धनेवाद देर रोटी म पाँती पताऊँ हूँ जणा बि ताँई मेरी बुराई नइ करबो चाए। इ ताँई थे चाए खायो, चाए पीयो, सक्यु परमेसर की मेमा ताँई करो। थे इ हिसाबऊँ जीओ जिऊँ थे नइ यहूदि मिनखा ताँई, नइ यूनानी मिनखा ताँई अर नइ परमेसर की बिस्वासी मंडळी का मिनखा ताँई आखळी बणो। मेरी जंय्यां बिना आ सोच्या की मनै काँई फाईदो होसी म दुसरा को फाईदो देखूँ हूँ अर सगळानै राजी राखूँ हूँ बंय्यांई करो, जिऊँ बे बचा लिआ जावै। म मसी की जंय्यां जीबा की कोसिस करूं हूँ, बंय्यांई थे बी करो। म थारी बडाई करूं हूँ क्युं क म कंय्यांसिक जिऊँ हूँ बिनै थे ध्यान म राखो हो अर मेरी सीख प चालो हो। अर म थानै बताबो चाऊँ हूँ क लूगाई को सीर बिको मोट्यार ह, अर मोट्यार को सीर ईसु मसी ह, अर ईसु मसी को सीर परमेसर ह। इ ताँई जखो बी मिनख सीरनै ढकर अरदास करै ह अर परमेसर की बाता खेवै ह बो मसी को निरादर करै ह। क्युं क मसी बिको सीर ह। अर जखी लूगाई उघाड़ै सीर अरदास करै ह अर मिनखा क सामै परमेसर की बाता बोलै ह बा आपका मोट्यार को निरादर करै ह जखो बिको सीर ह। अर बा लूगाई बि लूगाई की जंय्यां ह जखी आपका बाळानै कटवा दिनी हो। ज कोई लूगाई आपको सीर कोनी ढकै जणा बिनै आपका बाळ कटवा लेणा चाए। अर ज बाळ कटाबो एक लूगाई ताँई निरादर की बात ह जणा बिनै चाए की बा सीर बी ढकै। पण मोट्यारनै सीर नइ ढकणो चाए क्युं क बो परमेसर क रूप म परमेसर की मेमा ताँई बणायो गयो ह। पण एक लूगाई आपका मोट्यार की मेमा करै ह। क्युं क मोट्यार मऊँ लूगाई निकळी लूगाई मऊँ मोट्यार नइ। अर मोट्यार लूगाई ताँई कोनी रच्यो गयो पण लूगाई मोट्यार ताँई रची गई ह। इ ताँई अर ईस्बर नगरी दुता की बजेऊँ एक लूगाईनै आ दिखाबा ताँई की बा आपका मोट्यार क अधिकार म ह आपको सीर ढकणो चाए। इकै पाछै बी परबु म नइ तो नर नारीऊँ न्यारो ह अर नइ नारी नरऊँ। क्युं क जंय्यां सऊँ पेली नारी नरऊँ बणाई गई ही बंय्यांई इब नर बी नारी को फळ ह। अर परमेसरई सगळी चिजानै बणायो। अर थेई इ बात को फेसलो करो। लूगाई को उघाड़ै सीर परमेसरऊँ अरदास करबो चोखो ह के? अर थे खुद इ बातनै कोनी जाणो के क एक मिनख को बडा बाळ राखबो बी ताँई निरादर की बात ह, अर एक लूगाई ताँई बाळ बढाबो स्यान की बात ह? क्युं क बाळ बिनै बिकी ओडणी क रूप म दिआ गया हीं। पण ज कोई मिनख जिदा-जादि करबो चावै जणा बो आ जाणले की इ रीत क अलावा नइ तो म्हारी अर नइ परमेसर की बिस्वासी मंडळी की ओर कोई रीत ह। मेरा आगला आदेसा म थारै ताँई बडाई का बोल कोनी हीं, क्युं क अरदास ताँई थारो एक सागै भेळो होबो भलाई की बजाय नुकसान को कारण होर्यो ह। पेली बात तो म आ सुण्यो हूँ क जद थे बिस्वासी मंडळी म एक सागै भेळा होवो हो जणा थारै म गुटबाजी होवै ह। अर मनै क्युंक हद ताँई आ बात सची बी लागै ह। क्युं क इमै कोई सक कोनी क थारै मांयनै मतभेद कोनी, जिऊँ जखा मिनख खरा हीं बे सामै आ सकै। अर जद थे भेळा होवो हो जणा अंय्यां कोनी लागै क सच म परबुभोज खाबा ताँई भेळा होवो हो। क्युं क थारै मऊँ क्युंक ओराऊँ पेल्याई पेट भरली हीं जणा घणकरा क क्युंई हात कोनी आवै। अर कई तो अंय्यां का हीं जखा पीर मतवाळा होज्यावीं हीं। खाबा-पीबा ताँई के थारै घर कोनी? नहिस थे परमेसर की बिस्वासी मंडळीनै बेकारई जाणो हो, अर जिकै कनै क्युंई कोनी बानै छोटो जाणो हो? म थारूँ काँई खेऊँ? के म थारी बडाई करूं? पण थे जाणो हो की आ कोनी होवै। क्युं क आ बात मनै परबुऊँ मिली ह अर इब म आ थानै मांडर्यो हूँ। जि रात परबु ईसु धोकाऊँ पकड़ायो जार्यो हो, जणा बो रोटी ली, अर परमेसरनै धनेवाद देर तोड़ी अर आपका चेलानै खयो, “आ रोटी मेरी काया ह, जखी थारै ताँई ह। अर थे मनै याद करबा ताँई अंय्यांई कर्या करो।” अर अंय्यांई बो रोटी खाबा क पाछै कचोळो लिओ अर खयो, “ओ कचोळो परमेसर को नयो करार ह: जिपै मेरै लोयऊँ म्होर लगाई गई ह। जद बी थे इनै पीओ, जणा मेरी याद म पीआ करो।” इको मतबल ओ ह क परबु क आबा ताँई जद बी थे इ रोटीनै खाओ अर इ कचोळा मऊँ पीओ जणा थे परबु की मोत को हेलो पाड़ो हो। इ ताँई जखो बी मिनख परबु की रोटी अर बिका कचोळा मऊँ गळत रीतऊँ खावै अर पिवै जणा थे परबु की काया अर बिका लोय को निरादर करो हो। इ ताँई थानै चाए क थे इ रोटीनै खाबाऊँ अर इ कचोळा मऊँ पीबाऊँ पेल्या खुदनै जाचो। क्युं क जखो मिनख इनै खाबा अर पीबाऊँ पेल्या परबु की कायानै कोनी जाणै बो इनै खार खुदकै उपर परमेसर की स्यामत ल्यावै ह। अर इ बजेऊँई थारै माला कई कमजोर अर रोगला हीं, अर क्युंक मर बी गया। अर ज आपा खुदनै परखां जणा आपणा प परमेसर की स्यामत कोनी पड़ै। पण परबु आपानै सजा देर सुदारबो चावै ह क आपा इ दुनिया क सागै सजानै नइ भोगां। इ ताँई ओ मेरा लाडला बिस्वास्यो, जद थे खाबा ताँई भेळा होवो जणा एक दुसरानै उडिको। अर ज थारै मऊँ कोई भूखो होवै तो बो आपकै घरा जार खाले, जिऊँ थारो भेळो होबो थारै ताँई स्यामत की बजै नइ बणै। अर जखी बाता रेह्गी बानै म आर ठिक करस्युं। मेरा लाडला बिस्वास्यो, म ओ कोनी चाऊँ क थे आत्मिक बरदाना क बारां म नइ जाणो। क्युं क थे खुदई जाणो हो क जद थे परमेसरनै नइ ध्यारबाळा हा जणा बिना जीव की मूरत्यानै धोक्या करता हा अर बाकीई लीक पिट्या करता हा। इ ताँई म थानै बताऊँ हूँ जखा मिनख म परमेसर की पबितर आत्मा को बास ह बो कदै बी अंय्यां कोनी खेसी क “ईसु सरापित ह।” अर नइ कोई बिना पबितर आत्मा क अंय्यां खेसी क “ईसुई परबु ह।” बरदान तो भात-भात का हीं। पण हीं बि एक पबितर आत्मा का; अर सेवा बी कई तर्याऊँ करी जावै ह, पण सेवा तो बि एक परबु की करी जावै ह; अर काम करबा की न्यारी-न्यारी चिजा होवै ह पण परमेसर एकई ह जखो सगळानै एक खास काम करबा की काबलीयत देवै ह। एक दुसरा की भलाई ताँई पबितर आत्मा खुद हरेक बिस्वासी क जरिए न्यारा-न्यारा तरिकाऊँ परगट होवै ह। अर पबितर आत्माऊँ एकनै बुदी भर्यो समचार अर दुसरानै ज्ञान की बाता बोलबा ताँई दि जावै ह। अर पबितर आत्माऊँ कोईनै बिस्वास करबा ताँई बरदान अर कोईनै इ पबितर आत्माऊँ निरोगो करबा को बरदान दिओ जावै ह। जणा कोईनै चमत्कार करबा की सक्‍ति, कोईनै परमेसर की बाता खेबा को बरदान अर कोईनै आत्मानै पिछाण्बा को बरदान। अर कोईनै भात-भात की बोली बोलबा को बरदान अर कोईनै बोली को मतबल बताबा को बरदान दिओ जावै ह। पण अ सगळा काम एक पबितर आत्मा करै ह अर बो जिनै चावै बिनै अ बरदान बाट देवै ह। जंय्यां काया म भात-भात का अंग होर बी बे मिलर एक काया बणै बंय्यांई मसी बी ह। क्युं क आपा सगळा चाए यहूदि हो चाए यूनानी, चाए दास हो, चाए अजाद सगळा एकई पबितर आत्माऊँ एक काया होबा ताँई पबितर आत्मा को बतिस्मो लिओ ह अर आपानै एकई पबितर आत्मा को दान दिओ गयो ह। क्युं क काया एक अंगऊँ कोनी बणै पण कई अंगाऊँ मिलर बणै ह। अर ज पग खेवै क, “म हात कोनी इ ताँई मेरो इ कायाऊँ कोई लेणदेण कोनी,” बिकै अंय्यां खेबाऊँ के बो काया को हिस्सो कोनी? अर ज कान खेबा लागै क, “म आँख कोनी” जणा के बिकै अंय्यां खेबाऊँ बो काया को हिस्सो कोनी? अर ज सगळी काया आँखई होती जणा सुणता कंय्यां? अर ज सगळी काया कान होती जणा सूँघता कठैऊँ? पण परमेसर आपकी इंछ्या गेल जंय्यां बो चायो बंय्यांई काया का हरेक हिस्सानै बणायो। अर ज सगळा हिस्सा एकसा होता जणा काया कठै होती? इ ताँई एक काया क सेस अंग होवै। आँख हातऊँ कोनी खे सकै क, “मनै तेरी जुर्त कोनी” अर नइ सीर पगाऊँ खे सकै क, “मनै थारी जुर्त कोनी।” पण काया म अंय्यां का बी अंग ह जखा दुसरा अंगाऊँ कमजोर हीं पण बे ओर बी बेत्ती जरूरी हीं। अर काया का बे अंग जखा बेत्ती आदर जोगा कोनी बाकी आपा देखभाळ करां हां। अर बा अंगानै जखा दिखाबा जोगा कोनी बानै ढकर राखां हां। आपणा दिखबाळा अंगानै ढकबा की जुर्त कोनी पड़ै पण परमेसर आपणी कायानै इ ढंगऊँ रच्यो क आपणी काया का बा अंगानै जानै आदर की कमी ह बानै बेत्ती आदर मिलै। जिऊँ काया म फूट नइ पड़ै पण काया का अंग आपसरी म एक दुसरा की चिंत्या करै। इ ताँई ज काया को एक अंग दुख पावै जणा बिकै सागै सगळा अंग दुख पावै ह अर ज एक अंगनै मान मिलै ह जणा सगळा अंग बिकै सागै राजी होवीं हीं। अंय्यांई थे सगळा मिलर मसी की काया हो, अर हरेक बिकी काया का अंग हो। अर परमेसर बिस्वासी मंडळी म न्यारा-न्यारा मिनखानै न्यारा-न्यारा पद दिओ ह, पेलानै भेजेड़ा चेला को, दुसरानै परमेसर की बात बताबा को, तीसरानै गरूजी को अर कोईनै चमत्कार का काम करबाको, अर कोईनै निरोगा करबाको, अर कोईनै मदद करबाको, अर कोईनै बेबस्ता करबाको तो कोईनै न्यारी-न्यारी बोली बोलबा को काम सोप्यो ह। के सगळा भेजेड़ा चेला हीं? के सगळा परमेसर की खेबाळा हीं? के सगळा गरूजी हीं? के सगळा चमत्कार का काम करबाळा ही? के सगळानै निरोगो करबा को बरदान मिलेड़ो ह? अर के सगळानै न्यारी-न्यारी बोली बोलबा को? अर के सगळानै न्यारी-न्यारी बोल्या को मतबल समजाबा को बरदान मिल्यो ह? जणा थे बडाऊँ बडा बरदानानै पाबा की धुन म रह्यो। जि ताँई म थानै ओर बी चोखो गेलो बताऊँ हूँ। ज म मिनखा अर ईस्बर नगरी दुता की बोली बोलुँ पण मिनखाऊँ परेम कोनी करूं, जणा म ठन-ठन करती पितळ की परात अर टन-टन करता थाळी गिलास हूँ। अर ज म परमेसर की बाता बताऊँ अर म सगळा भेद खोल सकूँ अर सगळो ज्ञान बी जाणल्युं, अर मनै अठै ताँई बिस्वास बी होवै क म डूँगरानै हटा सकूँ हूँ, पण परेम कोनी करूं, जणा म क्युंई कोनी। अर ज म मेरी सगळी धन सम्पति गरीबा म बाट द्‍युँ, अर ज म चोखा समचार ताँई मेरी कायानै जळाबानै बी दे द्‍युँ। इकै बावजुदबी ज म परेम नइ करूं, जणा मनै काँई फाईदो। क्युं क जिमै परेम होवै ह बो थ्यावस राखै ह, अर दया करै ह; अर ओ बळोकड़ो पुणो कोनी राखै; अर खुदकी बडाई कोनी मारै, अर गुमानऊँ फुलै कोनी, अर बो बुरी चाल कोनी चालै, अर खुदकी भलाई बी कोनी चावै, तावळोसो झाळ्या कोनी भरै, अर नइ बुराई को बदलो बुराईऊँ देवै। नइ बुराईऊँ राजी होवै ह पण सचाईऊँ राजी रेह्‍वै ह। परेम सगळी बातानै सेह लेवै ह, सगळी बाता प बिस्वास राखै ह, सगळी बाता की आस राखै ह, अर सगळी बाता ताँई थ्यावस राखै ह। परेम कदैई टळै कोनी; पण एक टेम आसी जद परमेसर की खेबाळा का बोलां की जुर्त कोनी रेह्सी; न्यारी-न्यारी बोली म बोलबा का बरदान की बी जुर्त कोनी रेह्सी; अर ज्ञान बी जातो रेह्सी। क्युं क आपणो ज्ञान अधुरो ह, अर परमेसर की खेबाळा का बोल बी अधुरा हीं; पण जद सगळी बाता पूरी करबाळो आसी जणा ओ अधुरो मिट ज्यासी। क्युं क जद म टाबर हो जणा म टाबरा की जंय्यां बोलतो हो, अर टाबरा को सो मन हो, अर टाबरा की सी समज ही; पण जद म स्याणो होगो जणा म टाबरा की सी बाता छोड दि। हाल तो आपा परमेसर क बारां म सगळी बाता आदी-अधुरी समजा हां जंय्यां धुँधळा सिसा म चिजा दिखै। पण बो टेम आसी जद आपा परमेसरनै आमै-सामै देखस्यां। हाल म जोक्यु जाणू हूँ बो अधुरो ह पण बि टेम म सक्यु सूल जाणस्युं जंय्यां परमेसर मनै जाणै ह। पण इब बिस्वास, आस, अर परेम अ तीन्युई टळै कोनी पण आ सगळा म बडो परेम ह। परेम का गेला प चालो, जणा पाछै आत्मिक बरदान पाबा की इंछ्या राखो, खासकर परमेसरऊँ आबाळा बोलां का समचार को हेलो पाड़बा को बरदान। क्युं क जखो बी मिनख न्यारी-न्यारी बोल्या म बाता करै ह बो मिनखाऊँ बाता कोनी करै पण परमेसरऊँ बाता करै ह; जिऊँ बाकी बोली कोई कोनी समज सकै, क्युं क बे पबितर आत्मा की सक्‍तिऊँ भेदभर्या सच की बाता करीं हीं। पण जखा मिनख परमेसरऊँ आबाळा बोलां का समचार को हेलो पाड़ै ह, बे मिनखानै आत्मा म पक्को करै ह, बानै स्यांती देवै ह अर हिमत बंधावै ह। क्युं क जखो मिनख न्यारी-न्यारी बोली म बाता करै ह बो खुदनै उचो करै ह। पण जखो परमेसरऊँ आबाळा बोलां का समचार को हेलो पाड़ै बो बिस्वासी मंडळीनै आत्मा म पक्को करै ह। अर म आ चाऊँ हूँ क थे न्यारी-न्यारी बोली म बाता करो पण इऊँ बी बेत्ती म आ चाऊँ हूँ क परमेसरऊँ आबाळा बोलां का समचार को हेलो पाड़ो: क्युं क बिस्वासी मंडळीनै पक्को करबा ताँई जद ताँई न्यारी-न्यारी बोल्या को मतबल समजाबाळा नइ समजावै जणा मंडळीनै काँई फाईदो? इ ताँई परमेसरऊँ आबाळा बोलां का समचार को हेलो पाड़बो बिऊँ बेत्ती जरूरी ह। मेरा लाडला बिस्वास्यो, ज म थारै कनै आर दरसाव नहिस समजदारी नहिस परमेसरऊँ आबाळा बोल नहिस सीख देबाळी बाता नइ बताऊँ, पण न्यारी-न्यारी बोली बोलुँ जणा थानै मेरूँ काँई फाईदो? अर अंय्यांई ज बंसरी अर बीणानै सूर क सागै नइ बजायो जावै जणा कंय्यां बेरो पड़सी की आ कूणसी धुन बाजरी ह। अर ज नरसिंगाऊँ साप उवाज नइ निकळै जणा कूण राड़ ताँई त्यार होसी? अंय्यांई ज थे दुसरा की बोली म थारा समचारनै सूल नइ बोलो जणा थारी बात कंय्यां समजी जासी? अंय्यां तो थे रान काटबाळासा होस्यो। इ दुनिया म भात-भात की बोल्या हीं, पण कोईबी बोली बिना मतबल की कोनी। पण ज म कोई बोली को मतबल कोनी जाणू जणा म बि बोली बोलबाळा ताँई परदेसी हूँ अर बे मेरै ताँई परदेसी ह। थार प बी अ बाता लागू होवै ह क्युं क थे आत्मिक बरदान पाबा ताँई उतावळा हो, थे आ कोसिस कर्या करो क थारा आत्मिक बरदानाऊँ बिस्वासी मंडळी पबितर आत्मा म पक्की होवै। इ ताँई जखो मिनख न्यारी बोली बोलै बिनै अरदास बी करबो चाए क जखो बो बोल्यो ह बिको मतबल बी बता सकै। क्युं क जद म न्यारी-न्यारी बोली म अरदास करूं हूँ जणा मेरी आत्मा अरदास करै ह पण मेरी बुदी काम कोनी करै। जणा काँई करबो चाए? म आत्माऊँ तो अरदास करस्युंई पण बिकै सागै बुदीऊँ बी अरदास करस्युं। आत्माऊँ तो भजन गास्युं बिकै सागै बुदीऊँ बी गास्युं। क्युं क ज तू आत्माऊँ धनेवाद देवै जणा बठै खड़्या अबिस्वासी मिनख कंय्यां खेसी क अंय्यांई होवै, क्युं क बे कोनी जाणी की तू काँई खेर्यो ह? तू तो चोखा ढंगऊँ धनेवाद की अरदास करै ह पण इऊँ दुसरा मिनख आत्मा म पक्का कोनी होर्या। म परमेसर को धनेवाद करूं हूँ क म थारूँ बी बेत्ती बार न्यारी-न्यारी बोली बोलुँ हूँ। जणा बिस्वासी मंडळी म न्यारी-न्यारी बोली म दस हझार बोल क बोलबाऊँ समज का पाच बोल बोलबो चोखो जाणू हूँ जिऊँ म दुसरानै सीख दे सकूँ। मेरा लाडला बिस्वास्यो, थे थारी समज म टाबर मना बणो। बुराई ताँई टाबर बण्या रेह्ओ पण समज म स्याणा बणज्याओ। पबितर सास्तर म मंडेड़ो ह क परबु खयो ह, “न्यारी-न्यारी बोली बोलबाळा अर परदेसी मिनखा का मुंडाऊँ, म आ मिनखाऊँ बात करस्युं पण बे मेरी कोनी सुणसी।” इ ताँई न्यारी-न्यारी बोली बोलबा को बरदान बिस्वास्या ताँई सेलाणी कोनी पण बिस्वास नइ करबाळा म परमेसर की आत्मा को सबूत ह; अर परमेसरऊँ आबाळा बोल बिस्वास नइ करबाळा ताँई कोनी पण बिस्वास्या ताँई सेलाणी ह। मानल्यो जद बिस्वासी मंडळी एक झघा भेळी होवै अर सगळा न्यारी-न्यारी बोली बोलबा लागज्या जखी बे कोनी सीखी अर ज बिस्वास नइ करबाळा मिनख जखा परमेसर का इ बरदान क बारां म कोनी जाणै बिस्वासी मंडळी म आज्यावै जणा बे कोनी सोचींगा थे बावळा हो? पण ज परमेसरऊँ आएड़ा बोल को सगळा बिस्वासी बारी-बारीऊँ हेलो पाड़ै ह अर बि टेम कोई बिस्वास नइ करबाळा मिनख जखो परमेसर का बरदान क बारां म कोनी जाणै बिस्वासी मंडळी म आज्यावै जणा सगळी बाता जखी थे खेस्यो बे बि मिनखनै बतासी क बो पापी ह अर परमेसर बिनै सजा देसी ज बो पाप का गेलाऊँ नइ फिरै। जणा बो जाणसी क परमेसर बा सगळी बुरी बातानै जाणै ह जखी म करी ह जानै दुसरा मिनख कोनी जाणै। जणा बो गोडा टे'कर परमेसरनै ध्यारसी अर खेसी, “सच म थारै मांय परमेसर को बास ह।” मेरा लाडला बिस्वास्यो, परमेसर को नाम लेबा ताँई जद बी एक सागै भेळा होवो जणा एक मिनख तो परमेसर को गुणगान गावै दुसरो सीख देवै, एक परमेसरऊँ आएड़ा दरसाव बतावै जदकी दुसरो न्यारी-न्यारी बोली म बोलै अर एक इको मतबल बतावै। अ सगळी बाता बिस्वासी मंडळीनै पक्को करबा ताँई होणी चाए। अर ज थानै न्यारी-न्यारी बोली म बोलबो ह जणा थारै मऊँ दो नहिस ज्यादाऊँ ज्यादा तीन जणानैई बोलबो चाए बानै बी बारी-बारीऊँ बोलबो चाए अर एक जणानै बोलेड़ी बात को मतबल बताबो चाए। अर ज बिस्वासी मंडळी म बिको मतबल बताबाळो नइ होवै जणा न्यारी-न्यारी बोली बोलबाळा मिनखानै बिस्वासी मंडळी म चुपचालो रेह्णो चाए पण बानै मनई मन परमेसरऊँ बाता करनी चाए। बिस्वासी मंडळी म दो नहिस तीन जणानैई बोलबो चाए जानै परमेसरऊँ आएड़ा बोल दिआ गया ह बाकी मिनखानै ध्यान देणो चाए क बे काँई खेवै ह। अर ज बठै बेठ्या मिनख म कोईनै परमेसरऊँ दरसाव मिल्यो ह जणा बोलबाळा मिनखनै चुप होर बि मिनखनै बोलबा को मोको देणो चाए क परमेसर काँई परगट कर्यो ह। क्युं क ज थे परमेसरऊँ आएड़ा बोल बारी-बारीऊँ बोलस्यो जणाई मिनखा क पलै पड़सी अर बे परबु की बातानै सीखर हिमत पासी। परमेसर की खेबाळा की आत्मा खुद क बस म रेह्‍वै ह, जिऊँ बे आपका बोलबा की बारीनै उडिक सकीं। क्युं क परमेसर गिचपिच करबाळो परमेसर कोनी पण स्यांती को परमेसर ह। जंय्यां की परमेसर का मिनखा की बिस्वासी मंडळ्या म देखां हां, क लूगायानै बिस्वासी मंडळी म चुपचाली रेह्णो चाए। क्युं क बानै बोलबा की इजाजत कोनी, जंय्यां की यहूदि रीत बतावै ह क बे आपका मोट्यारा क बस म ह। ज बे क्युं सीखबो चावै जणा आपका घर म आपका मोट्याराऊँ बुजै, क्युं क लूगाई को बिस्वासी मंडळी म बोलबो बेसरमी की बात ह। परमेसर को बचन सऊँ पेली थारै मऊँ तो आयो कोनी अर नइ थे बे एकलोता हो जखा इनै सुण्या हो। ज कोई खुदनै परमेसर की खेबाळो समजै ह अर बिकन आत्मिक बरदान बी होवै जणा बिनै आ जाण लेणो चाए क म थानै जोक्यु बी मांड्यो ह ओ परबु को हुकम ह। अर ज कोई आ बाता की अनदेखी करै ह बिकी बी अनदेखी करी ज्यासी। इ ताँई मेरा लाडला बिस्वास्यो, परमेसरऊँ आएड़ा बोल को हेलो पाड़बा ताँई हर घड़ी त्यार रह्यो अर जखो मिनख न्यारी-न्यारी बोली बोलै ह बिनै बी रोको मना। पण अ सगळी बाता सूल एक सई सलिकाऊँ होणी चाए। मेरा लाडला बिस्वास्यो, इब म थानै बि चोखा समचार की याद दिआऊँ जखो म थानै सुणायो हो। थे बिनै मान्या अर आज ताँई बिनै मानर्या बी हो। ज मेरै जरिए सुणाईड़ा समचार प थे मजबूतीऊँ चालो जणा परमेसर थानै बचासी। ज थे अंय्यां कोनी करस्यो जणा मसी म थारो बिस्वास करबो बेकार ह। सऊँ खास बात जिको मनै बेरो पड़्यो बा म थानै खे सुणाई क सास्तर म मांडेड़ो ह क, मसी आपणा पाप की सजा भोगबा ताँई मर्यो, अर बिनै कबर म धर दिओ गयो पण सास्तर म मांडेड़ो ह क बो तिजै दिन जी उठ्यो। इकै पाछै बो केफा क सामै परगट होयो जणा पाछै बो सगळा बारा भेजेड़ा चेला क सामै। इकै पाछै बो पानसोऊँ बेत्ती भाईड़ानै जद बे एक सागै भेळा हा दिख्यो, अर आमैऊँ घणकराक हाल ताँई जीवै ह, पण कई चलता रिह्या। इकै पाछै बो याकूबनै दिख्यो, जणा पाछै सगळा भेजेड़ा चेलानै दिख्यो, आखीर म मेरै सामै बी परगट होयो। जदकी म तो अजिब तरिकाऊँ भेजेड़ो चेलो बण्यो। म सगळा भेजेड़ा चेलाऊँ छोटो हूँ म तो भेजेड़ो चेलो खुवाबा जोगोई कोनी क्युं क म परमेसर की बिस्वासी मंडळी का मिनखानै सतायो करतो हो। अर आज म जोक्यु बी हूँ परमेसर की दयाऊँ हूँ, अर बिकी दया मेर ताँई बेकार कोनी गई म दुसरा भेजेड़ा चेलाऊँ बढचढ'र मेनत करी ह। पण आ मेरी काबलीयत कोनी आ तो परमेसर की दया ह। जणा चाए म थानै चोखो समचार सुणायो हो नहिस चाए बे, म्हें एकई समचार सुणावां हां जिपै थे बिस्वास कर्या हो। जंय्यां की म्हें सगळा एकई समचार सुणावां हां क मसीनै मरेड़ा मऊँ ओज्यु जीवायो गयो हो, जणा थारै मऊँ कोई कंय्यां खे सकै ह क बिस्वास्यानै मर्या पाछै जीवायो कोनी ज्यासी? अर ज मर्या पाछै जीवायो कोनी जा सकै जणा मसी बी कोनी जीवायो गयो। अर ज मसीनै कोनी जीवायो गयो जणा म्हारो परचार करबो अर थारो बिस्वास करबो दोन्यु बेकार ह। ज आ बात सच ह क मर्या पाछै कोई कोनी जीवायो ज्यासी जणा परमेसर क बारां म थारूँ झूठ बोलबा ताँई म्हें दोसी बणगा हां क्युं क म्हें थारूँ खया हा क परमेसर मसीनै जीवायो हो। पण ज साच्याई मरेड़ा कोनी जीवाया जावीं जणा मसी बी कोनी जीवायो गयो। अर ज मसी कोनी जीवायो गयो जणा थारो बिस्वास करबो बेकार ह क्युं क परमेसर थानै थारा पाप की बजेऊँ सजा देसी। अर जत्ता बी मसी प बिस्वास करता होया मर्या बे तो नास होगा। अर ज आपा इ दुनिया की मो-मायानै पाबा ताँई मसीऊँ आस लगा राखी ह जणा आपा सगळा मिनखाऊँ अभागा मिनख हां। पण सचाई आ ह क मसीनै मरेड़ा मऊँ जीवायो गयो आ इ बात की जामनी ह क मरेड़ानै जीवायो ज्यासी। क्युं क जंय्यां एक मिनखऊँ मोत आई बंय्यांई एक मिनख क जरिए मोतऊँ ओज्यु जी उठबो होयो। आदम का करम को फळ मोत बिकी सगळी ओलादा प बी लागू होई बंय्यांई मसी का करम को फळ मोतऊँ जि उठबो बा सगळा प लागू होवै जखा मसीऊँ जुड़ेड़ा हीं। पण आपणा सगळा को बी सरो आसी। सऊँ पेली परमेसर मसीनै मरेड़ाऊँ जीवायो अर जद ईसु ओज्यु आसी जणा परमेसर बा सगळानै जीवासी जखा मसीऊँ जुड़ेड़ा हीं। इकै पाछै इ दुनिया को अंत आसी, मसी राज करबाळा, उपरी सक्‍तिया प राज करबाळा अर सक्‍तियानै नास करसी। जणा पाछै मसी आपको राज परम-पिता परमेसर क हाता म सूप देसी। पण जद ताँई परमेसर मसी का सगळा बेरीयानै बिकै पगा तळै नइ कर दे मसी को राज करबो ते ह। आखीर म आखरी बेरी मोत को नास कर्यो ज्यासी। क्युं क सास्तर म मंडर्यो ह, “परमेसर सक्यु बिकै अधिकार तळै कर दिओ ह।” पण आ बात साप ह क, सक्यु म परमेसर सामिल कोनी ह क्युं क बो परमेसरई ह जखो सक्यु मसी क अधिकार क तळै कर्यो ह। सक्यु परमेसर का बेटा क अधिकार तळै कर्या जाबा क पाछै, बो खुदनै पूरी-तर्या परमेसर क अधिकार क तळै कर देसी, परमेसर जखो बिनै ओ अधिकार दिओ ह। जणा पाछै परमेसर सगळी चिजा प पूरी-तर्या राज करसी। ज आ बात सच ह क मरेड़ा मऊँ जि उठबो कोनी ह जणा बाको काँई होसी जखानै मरेड़ा ताँई बतिस्मो दिओ जावै ह? ज मरेड़ा मऊँ जि उठबो कोनी जणा बा कूणसी आस ह जि ताँई अंय्यां कर्यो जावै ह। अर ज अंय्यां ह जणा म्हें तो बावळाई हां जखा हर घड़ी चोखा समचारनै सुणाबा ताँई खतरो उठावां हां। मेरा बिस्वासी भाईड़ो, मसी ईसु क सागै थारा रिस्ता की बजेऊँ म थार प गुमान करूं हूँ आ बात जत्ती सच ह बत्तिई आ बी सच ह क म रोजकी मेरी ज्यान को खतरो उठाऊँ हूँ। ज परमेसर बिस्वास्यानै मर्या पाछै ओज्यु कोनी जीवावै जणा बाकै सागै लड़बा को काँई फाईदो जखा इफिसुस नगरी म मेरै सागै जंगली जिनावरा की जंय्यां लड़्या। ज सई मई मरेड़ा मऊँ जिबो कोनी ह, “जणा आओ आपा खाई पी करां क्युं क काल तो आपानै मरनोई ह।” धोको मना खाज्यो क्युं क, “बुरी संगती चोखी बाणनै बिगाड़ देवै ह।” चेता म आओ, अर पाप को गेलो छोड द्‍यो। म थानै थारी सरमिंदगी दिखाऊँ हूँ क्युं क थारै म क्युंक मिनख परमेसरनै कोनी जाणै। पण कोई बुज सकै ह, “मरेड़ा कंय्यां जीवाया जा सकै ह? अर बानै कंय्यां की काया मिलसी?” अरै बावळो! थे जखो बीज धरती म बोवो हो बो जद ताँई सिड़ नइ जावै ओज्यु कोनी उगै। अर जिनै थे बोयो हो बा काया कोनी पण ग्युं को नहिस ओर ख्याको एक बीजई तो ह बिऊँ उगबाळो बोजो बोळो न्यारो ह। परमेसर आपकी इंछ्या गेल बीजऊँ बोजा निकाळै ह। अर हरेक बीज को एक खास बोजो ह। जत्ता बी जीव ह बाकी सगळा की काया एक जिसी कोनी। मिनखा की एक तर्या की काया ह, जिनावरा क दुसरी तर्या की, पंछ्या क न्यारी तो मछ्या की न्यारीई होवै ह। क्युं क कई काया ईस्बर नगरी की होवै ह कई धरती की, पण ईस्बर नगरी की काया को तेज न्यारोई होवै ह अर धरती को न्यारो। जंय्यां क सूरज, चाँद अर तारा की चमक म फरक होवै ह। अर अठै ताँई क एक ताराऊँ दुसरा तारा की चमक म बी फरक ह। इ ताँई जद मरेड़ा ओज्यु जीवाया ज्यासी जणा अंय्यांई होसी। अर जखी कायानै इ धरती प गाड्यो जावै बा नसबर ह पण जखी नई काया आपानै मिलसी बा अमर ह। अर जखी कायानै धरती म गाड्यो जावै ह, बा कमजोर अर बेजत ह। पण जद आ काया ओज्यु जीवाई जासी बा परमेसर की मेमा अर सक्‍तिऊँ भरेड़ी होसी। अर जखी कायानै धरती म गाड्यो गयो ह बा माटी की काया ह पण जद इ कायानै ओज्यु जीवायो ज्यासी आ आत्मिक होसी। अर ज माटी की काया होवै ह जणा आत्मिक काया बी होवै ह। क्युं क पबितर सास्तर म मंडर्यो ह क “पेलो मिनख आदम जिनै एक जिंदा पराणी क रूप रच्यो गयो” पण आखरी मिनख मसी जीवन देबाळी आत्मा ह। पेल्या आत्मिक जीवन कोनी मिलै पण माटी की काया मिलै पाछैई आत्मिक जीवन मिलै ह। पेला मिनखनै धरती की माटीऊँ सरज्यो गयो। पण दुसरो मिनख मसी ईस्बर नगरीऊँ आयो। धरती का सगळा मिनख माटी की काया ले राखी ह जंय्यांकी बि पेला मिनख की ही। अर ईस्बर नगरी म सगळा कनै आत्मिक काया होसी जंय्यांकी मसी की ह जखो ईस्बर नगरीऊँ आयो हो। अर जंय्यां आपा माटीऊँ सरजेड़ा मिनख आदम कोसो रूप धारण करां हां, बंय्यांई आपा ईस्बर नगरीऊँ आएड़ा मसी की जंय्यां रूप बी धारण करस्यां। मेरा लाडला बिस्वास्यो, म थानै बताऊँ हूँ क आपणी आ काया जखी मास अर लोयऊँ बणेड़ी ह परमेसर का राज म कोनी जा सकै। अर ना नसबर काया अमर होसी। थे गोर लगार सुणो, म थानै एक भेद की बात बताऊँ हूँ: आपा सगळा मरा कोनी, पण आपणो रूप बदल्यो ज्यासी। अर जद आखरी नरसिंगो फुक्यो ज्यासी जणा आँख मीचताई आपा बदल्या जास्यां। नरसिंगा की उवाज जद आपणा काना म पड़सी जणा सगळा मरेड़ा बिस्वासी ओज्यु नइ मरबा ताँई जीवाया जासी अर जखा जीवता बिस्वासी हीं बे कदैई नइ मरबा ताँई बदल्या जासी। क्युं क नसबर काया को नास नइ होबाळी काया म बदलबो जरूरी ह। अर मरबाळा जीवन को कदैई नइ मरबाळा जीवन म बदलबो जरूरी ह। जद अंय्यां होसी, मतबल जद नसबर कायानै नास नइ होबाळी काया म बदल्यो ज्यासी जणा पबितर सास्तर म मंडेड़ो आंक पूरो होसी, “मोतनै नास कर बिनै जीत लिओ गयो।” “हे मोत तेरी जीत कठै ह? अर तेरो डंक कठै ह?” आपा मरा हां क्युं क आपा पाप करां हां, अर आपणै कनै नेम-कायदो ह जिकी बजै आपा जाणा हां क पाप करां हां। पण परमेसर को धनेवाद ह क बो आपानै परबु ईसु मसी क जरिए मोत प जीत दिलावै ह। इ ताँई मेरा लाडला बिस्वास्यो, बिस्वास म मजबूत बण्या रेह्ओ अर जमाई संका मना करो। अर परबु का काम म खुदनै लगाया राखो। क्युं क थे जाणो हो क परबु ताँई करेड़ो काम बेकार कोनी जावै। मेरा भाईड़ो थे बुज्या हा क यहूदिआ म रेह्बाळा परमेसर का मिनखानै भेजबा ताँई जखा रिपीआ थे भेळा कर्या हो बाको काँई करनो ह? म थानै एकई बात ओडाऊँ हूँ बोई करो जखो म गलातिया की बिस्वासी मंडळीनै बोल्यो हो। अर जद बी सपता को पेलो दिन दितबार आवै, थे थारी कमाई मऊँ थोड़ो भोत न्यारो टाळता रेहज्यो जिऊँ म जदबी आऊँ थानै दान भेळो करबो नइ पड़ै। अर जद म थारै कनै आस्युं जणा बा मिनखानै जानै थे चास्यो, बिनै अधिकार चिठी देर थारा दाननै बाका हाता यरूसलेम भेज देस्युँ। अर ज मेरो जाबो होयो जणा बे मेरै सागैई चल्या ज्यासी। म मकीदुनिया होतो होयो थारै कनै आस्युं, क्युं क मनै पेली मकीदुनिया जाबो जरूरी ह। अर हो सकै तो म थारै कनैई रूक जास्युं अर स्याळा-स्याळा थारै कनैई रेहस्युं, बिकै पाछै जठैबी मेरो जाबो होसी बठै जाबा ताँई जुर्त की चिजा क सागै बिदा कर दिज्यो। क्युं क म आ कोनी चाऊँ क चालतोसो थारूँ मिलूँ; पण मनै आस ह अर ज परबु चायो तो म क्युंक दिन थारै कनैई रेहस्युं। पण पेन्तिकूस का त्युंहार ताँई तो म इफिसुस मई रेहस्युं, क्युं क बठै परबु को काम करबा ताँई ओ चोखो मोको ह। अर बठै मेरा बिरोद करबाळा बी बोळा हीं। अर ज थारै कनै तिमूतियूस आज्यावै जणा थे बिकी सूल आवभगत करज्यो क्युं क बो बी मेरी जंय्यां परबु को काम करै ह। इ ताँई कोईबी बिनै छोटो नइ जाणै। अर जद बो थारै कनैऊँ बिदाई लेवै जणा सफर म चायती चिजा क सागै राजी-खुसी बिदा करज्यो। अर म दुसरा बिस्वासी भाईड़ा क सागै बिनै उडिकर्यो हूँ। इब म थानै अपुलोस क बारां म बताऊँ हूँ जंय्यां क थे मेरूँ बिकै बारां म बुज्या हो। म बिनै सूल समजायो हो क बो दुसरा बिस्वासी भाईड़ा क सागै थारै कनै पाछो चल्यो जावै। पण बो हाल जाबा ताँई राजी कोनी पण आगै कोई मोका प थारै कनै आज्यासी। चेता म रेहज्यो अर मजबूती क सागै बिस्वास म बण्या रेहज्यो। थे हिमत राखबाळा अर ठाडा बणो। अर थे जोक्युबी करो बो परेमऊँ करो। थे स्तिफनुस अर बिका परवार क बारां म तो जाणोई हो, क बे अखाया म मसी प सऊँ पेली बिस्वास करबाळा मिनख हीं। बे परमेसर का मिनखा की मदद करबा को बीड़ो उठा राख्यो ह। इ ताँई ओ मेरा लाडला बिस्वास्यो, म थारूँ अरदास करूं हूँ, थे खुदनै बानै अर बाकी जंय्यां मेनत क सागै परबु को काम करबाळा मिनखानै सूप द्‍यो। स्तिफनुस, फुरतुनातुस अर अखिकुस क आबाऊँ म बोळो राजी हूँ। जखो थे मेरै ताँई कर कोनी सक्या बो बे कर दिखाया क्युं क थे मेरै सागै कोनी हा। बे मेरी अर थारी आत्मानै राजी करी ह। इ ताँई अंय्यां का मिनख ईज्जत क जोगा हीं। एसिया की बिस्वासी मंडळी क कानिऊँ थानै नमस्कार। अर अकविला अर परसकीला! अर बाकै घर म भेळी होबाळी बिस्वासी मंडळी क कानिऊँ थानै नमस्कार। अर सगळा भाईड़ा कानिऊँ बी थानै नमस्कार, थे हात जोड़र एक दुसरा को सत्कार करो। चिठी को ओ आखरी नमस्कार म पोलुस खुद मेरा हातऊँ थानै मांडूँ हूँ। अर ज कोई परबुऊँ परेम कोनी करै बिपै स्राप पड़ै ह। म्हारा परबु जी तावळा आवै ह! परबु ईसु की दया थार प होवै। अर मसी ईसु म मेरो परेम थारै सागै बण्यो रेह्‍वै। आ चिठी परमेसर की इंछ्याऊँ म, मसी ईसु को भेजेड़ो चेलो पोलुस अर आपणो बिस्वासी भाई तिमूतियूस परमेसर की कुरन्थी नगरी की बिस्वासी मंडळी का मिनखानै अर अखाया का सगळा परमेसर का मिनखानै मांडां हां। आपणा परम-पिता परमेसर अर परबु ईसु मसी की दया अर सुक-स्यांती थारै सगळा प बणी रेह्‍वै। परमेसर जखो आपणा परबु ईसु मसी को परम-पिता ह, दया करबाळो अर अराम देबाळो परमेसर धने ह। अर जद आपणा प कळेस आवै ह जणा बे आपानै हिमत बंधावै ह। जिऊँ आपा बी परमेसर की बि हिमत की बजेऊँ बा मिनखानै जखा कळेस म पड़्या हीं हिमत बंधा सकां। क्युं क जंय्यां मसी जखी पिड़ा भोगी बिनै म्हें बी भोगां हां जिऊँ आपा मसी की बजेऊँ परमेसर की बि म्हान मददनै बी भोगां। ज म्हें सताया जावां हां जणा बो थानै हिमत बंधाबा अर थारा छुटकारा ताँई होवै ह। थे राजी हो जणा म्हें बी राजी हां। अर थारो राजी रेह्बोई थानै हिमत क सागै बा कळेसानै भोगबा की ताकत देवै ह जखा कळेस म्हें भोगां हां। म्हानै थार प पक्की आस ह क्युं क म्हें जाणा हां क जंय्यां थे म्हारा कळेस म म्हारा साती हो बंय्यांई बि अराम म बी साती हो जखो म्हानै मिलै ह। क्युं क मेरा लाडला बिस्वास्यो, म्हें आ चावां हां क जखी पिड़ा म्हें एसिया म भोगी बिकै बारां म थे जाणो। बठै म्हें म्हारी सेवाऊँ बी बेत्ती पिड़ा भोगी। अठै ताँई क मरबा की बी नोबत आगी ही। अर म्हें हिया म आ बी सोचली ही क म्हानै मोत की सजा होगी ह। जिऊँ म्हें खुद प भरोसो नइ कर परमेसर प भरोसो कर सकां जखो मरेड़ानै बी ओज्यु जीवावै ह। अर बोई म्हानै बि दरदनाक मोतऊँ बचायो। अर इ टेम बी बोई म्हानै बचावै ह। क्युं क म्हें बिपैई आस लगा राखी ह इ ताँई आगै बी बोई म्हानै बचासी। थे म्हारै ताँई अरदास कर म्हारी मदद करो हो। ओ बिकोई नतिजो ह क म्हानै खतराऊँ बचायो जावै ह। अर बोळानै परमेसर जखो म्हारै ताँई कर्यो ह बिकै बजेऊँ परमेसरनै धनेवाद देबा को मोको मिलै ह। म्हानै गुमान ह क म्हें साप अन्तर-आत्माऊँ आ खे सकां हां, क म्हें इ दुनिया का मिनखा क सागै अर खासकर थारै सागै परमेसर की खराई अर ईमानदारीऊँ रिह्या हां। अंय्यां म्हें परमेसरऊँ मिलबाळी दयाऊँ कर्या हां, दुनियादारीऊँ मिलबाळी बुदीऊँ नइ। म्हें थानै अंय्यां की कोई बात कोनी मांडर्या जखी नइ बाच सको अर नइ समज सको। म आस करूं हूँ क थे इ चिठी की सगळी बातानै सूल समज ज्यास्यो। जंय्यां क थे म्हानै हाल क्युंक हदताई समजो हो। पण जद परबु ईसु क ओज्यु आबा का दिन थे सगळा म्हारै प गुमान करस्यो जंय्यां म्हें थार प करां हां। अर इ भरोसा की बजेऊँई म थारै कनै दो बर आबा की मन म करी जिऊँ थानै दो बर आसिरबाद पाबा को मोको मिल सकै। अर म सोचूँ हूँ क मकीदुनिया जाती टेम थारूँ मिलर जाऊँ अर मकीदुनियाऊँ ओटो आती टेम थारै कनै होतो आऊँ जिऊँ थे यहूदिआ नगरी का मेरा सफर ताँई मेरै सागै जुर्त की चिजा बांदो। इ ताँई ज म आ बाता की इंछ्या करी ही जणा के म उपला मनऊँ करी ही? क म इ दुनिया का मिनखा की जंय्यां हूँ जखा एक टेम हाँ-हाँ अर नइ-नइ करीं हीं? पण परमेसर बिस्वास जोगो ह, इ ताँई जखा बोल म्हें थानै बोल्या हा बे सचा हीं। क्युं क परमेसर का बेटा ईसु मसी जिको परचार तिमूतियूस, सिलवानुस अर म कर्या हा बो हाँ-हाँ अर नइ-नइ म कोनी हो। पण ईसु मसी म बो हाँ म हो। क्युं क ईसु मसी म परमेसर का सगळा करार, हाँ म हीं अर आपा बी इ बजेऊँ खेवां हां क अंय्यांई होवै अर ओ परमेसर की मेमा ताँई होवै ह। बो परमेसरई ह जखो ईसु मसी की बजेऊँ थानै म्हानै सागै जो'ड़र पक्को कर्यो अर आपणो अभिसेक कर्यो ह। बो आपकी छाप आपणा प लगाई ह, बो आपणा हिया म पबितर आत्मा दिनी ह। आ इ बात की जामनी ह क बो बे सगळा आसिरबाद आपानै देसी जानै देबा ताँई बो करार कर्यो ह। परमेसर मेरो गुवा ह क म ओज्यु कुरन्थी नगरी म इ ताँई कोनी आयो क्युं क म थानै दिन घालबो कोनी चातो हो। अर इको ओ मतबल कोनी क म्हें थारा मालिक हां जखा थानै खेवां क थारो बिस्वास कंय्यां को होवै। पण म्हें तो थारी खुसी ताँई थारै सागै काम करां हां, क्युं क थे बिस्वास म मजबूत हो। इ ताँई म ध्यारमाली ही क म थारै कनै ओज्यु कोनी आऊँ जिऊँ नइ तो म थानै दकालूं अर नइ थे बिऊँ दुखी होवो। क्युं क ज म थानै दुखी करूं जणा मनै कूण राजी करसी? के थे जिनै म दुखी करतो? नइ! जणाई तो म थानै गेलड़ी चिठी म मांड्यो हो क जद म थारै कनै आऊँ जणा थारूँ जखा मनै सुक देवै ह बाऊँ दुखी नइ होऊँ। क्युं क मनै थारै उपर भरोसो ह क मेरी खुसी मई थारी खुसी ह। क्युं क म अ बाता दुखी हियाऊँ अर पिड़ा म आसुआ क सागै थानै मांडी ही। इको मतबल ओ कोनी क म थानै दुखी करबो चावै हो पण इ ताँई मांडी ह क जखो परेम म थारूँ करूं हूँ बिनै थे जाणल्यो। इब म बि मिनख क बारां म मांडबो चाऊँ हूँ जखो आपका करमाऊँ मनैई नइ पण थानै मेरूँ बेत्ती दिन घाल्यो ह। इकै बावजुद बी म इ मामलानै ओर बेत्ती कोनी खिचबो चाऊँ। अंय्यां करबाळा मिनखनै बिस्वासी मंडळी का घणकराक मिनख ओळमो दे दिआ हीं आ सजा बि ताँई बोळी ह। इब थे बिनै ओर सजा देबो बंद करो अर बि मिनखनै माफ कर बिकी हिमत बढाओ जिऊँ अंय्यां नइ होवै क बो दुख मई पड़्यो रेह्‍वै। इ ताँई म थानै बोलुँ हूँ क थे बिऊँ सचो परेम करो। म सगळी बाता इ ताँई थानै मेरी गेलड़ी चिठी म मांडी ही जिऊँ मनै ओ बेरो पड़ सकै क थे मेरी हिदायतानै मानो हो क कोनी। पण ज थे कोईनै बी कोई बात ताँई माफ करो हो जणा म बी बिनै माफ करूं हूँ। अर जोक्यु बी म माफ करूं हूँ बो मसी क सामै थारै ताँई करूं हूँ, जिऊँ क आपा सेतान की भंगर्या म नइ आवां। क्युं क आपा बिकी चालाऊँ अणजाण कोनी हां। जद म मसी का चोखा समचार को परचार करबा तरोआस गयो हो जणा मेरै ताँई परबु गेलो खोल दिओ। पण बठै जद मनै बिस्वासी भाईड़ो तितूस कोनी लाध्यो जणा मेरा जीव म तसली कोनी आई। अर म बठैऊँ बिदा होर मकीदुनिया कानि चाल पड़्यो। परमेसर को धनेवाद हो क बो आपानै मसी की बजेऊँ सदाई जीत का गेला प लेज्यावै ह। अर परमेसर मसी की बाता का ज्ञाननै च्यारूमेर फेलाबा ताँई आपानै चोखी सुगंद की जंय्यां काम म लेवै ह। जखा नास कर्या जावै अर बचाया जावीं हीं बाकै मांयनै आपा बि धूप की सुगंद की जंय्यां हां जखी मसी परमेसर क चढावै ह। क्युं क जखा मोत का गेला प नास होबा ताँई जार्या हीं बा ताँई मोत की बास हां। अर जखा छुटकारा का गेला प जार्या हीं बा ताँई जीवन की सुगंद हां। पण आ बाता क जोगो कूण ह? परमेसर का बचना को परचार को धंधो करबाळा बोळा हीं बे आपको फाईदो चावै ह। पण म्हें अंय्यां का कोनी हां, म्हानै परमेसर सचाई क सागै बोलबा ताँई ईसु मसी का दास क रूप म भेज्यो ह। के म्हें खुद म्हारी बडाई करर्या हां? नहिस म्हें दुसरा मिनखा की जंय्यां चापलुसी की चिठी मांडर थानै देवां नहिस थारूँ ल्यां? म्हारी चिठी तो थे हो, जखी म्हारै हिया की पट्या प मंडरी ह बिनै सगळा मिनख जाणै अर बाचै ह। थे चिठी की जंय्यां हो जिनै खुद मसी मांडी ह अर म्हारै हाता भेजी ह। आ चिठी स्याईऊँ भाठा की पट्या प कोनी मांडी गई पण जीवता परमेसर की पबितर आत्माऊँ मिनखा की हिया की पटी प मांडी गई ह। अर म्हें आ बात इ ताँई खेवां हां क्युं क मसी की बजेऊँ म्हानै परमेसर म पूरो बिस्वास ह। इको ओ मतबल कोनी क म्हें इ कामनै करबा को बूतो राखां हां। पण म्हानै ओ बूतो परमेसरई देवै ह। अर बोई म्हानै नया करार को दास होबा जोगो बणायो ह। अर आ कोई मांडेड़ी बात कोनी ह पण ओ पबितर आत्मा को करार ह क्युं क मांडेड़ो नेम-कायदो तो मारै ह जदकी पबितर आत्मा जीवन देवै ह। मोत ल्याबाळी सेवा जखी मूसा का नेम-कायदा गेल होती ही जखो भाठा की पट्या प मांड्यो गयो अर जद ओ बिधान दिओ गयो जणा परमेसर की मेमा परगट होई। बि टेम का मूसा का मुंडा की चमक होळ्या-होळ्या कम होरी ही इकै बावजुद बी बा अत्ती जोरकी ही क इजरायल का मिनख बिका मुंडा कानि कोनी देख पार्या हा। जणा जीवन ल्याबाळी सेवा जखी पबितर आत्मा गेल होवै ह बिऊँ बेत्ती भळका मारबाळी क्युं कोनी होसी? जद मोत ल्याबाळी सेवा मेमाऊँ भरेड़ी ही जणा जीवन ल्याबाळी सेवा जखी धरमी बणावै ह बा बिऊँ बेत्ती मेमाऊँ भरेड़ी क्युं कोनी होसी? इ नया करार की सेवा की मेमा क आगै मूसा का बिधान की मेमा क्युंई कोनी। ज मूसा को बिधान क्युंक टेम मई मिटबाळी मेमा क सागै दिओ गयो हो जणा इ कदैई नइ मिटबाळा नया करार की मेमा बिऊँ बोळी जोरकी क्युं कोनी होसी? म्हारै कनै आ मेमा भरी आस ह जणाई म्हें बेधड़क बोलर्या हां। अर म्हें बि मूसा की जंय्यां कोनी जखो आपका मुंडानै गाबाऊँ ढक लिओ हो क्युं क कदै अंय्यां नइ होज्या क इजरायल का मिनख आपकी आँख्याऊँ बि मिटबाळा तेजनै देखले। पण हालताई बाकी बुदी काम कोनी करै अर बे बि पुराणीया करारनै बाची हीं इ बजेऊँ बाकै आज बी आँख्या प बोई परदो पड़्यो ह। ओ परदो मसीई हटा सकै ह। आज बी जद कदै मूसा का नेम-कायदा बाच्या जावै ह जणा बो परदो बाकी मती प पड़ज्यावै ह। पण जखो बी परबु म मन लागावै ह बिकी बुदीऊँ बो परदो हटा दिओ जावै ह। परबु अर पबितर आत्मा एकई ह अर जठै परबु की पबितर आत्मा ह बठै छुटकारो ह। इ ताँई आपणा मुंडा ढकेड़ा कोनी। बे परबु की मेमा का तेजनै दरसावीं हीं अर पबितर आत्मा आपानै होळ्या-होळ्या आपणा मेमाभर्या परबु की जंय्यां बणावै ह। म्हारै प परमेसर की दया होई जिऊँ म्हानै आ सेवा मिली ह, जणा म्हें हिमत कोनी हारां। म्हें बेसरमी का काम कोनी करां। नइ तो म्हें कपट राखां हां अर नइ झूठी बातानै परमेसर की कर बतावां हां। पण परमेसर क सामै म्हें सच बोलर्या हां अर जखा सचा हीं बेई इ बातनै जाणी हीं। अर चोखो समचार जिनै म्हें सुणावां हां ज बिपै परदो पड़्यो ह जणा बो बा मिनखा ताँई ह जखा नास होर्या हीं। अर इ दुनिया को ईस्बर जखो सेतान ह बो बा मिनखा की मत मार राखी ह जखा बिस्वास कोनी करीं। जिऊँ बे चोखा समचार का मेमाभर्या उजाळानै कोनी देख सकीं अर मसी जखो परमेसर को रूप ह बिकी मेमा का समचारनै कोनी समजीं। क्युं क म्हें म्हारो नइ पण ईसु मसी को आ खेर क बोई परबु ह परचार करां हां। अर म्हें ईसु की बजेऊँ खेवां हां क म्हें थारा दास हां। क्युं क बो परमेसरई ह जखो बोल्यो क, “अँधेरा म च्यानणो हो” अर बोई म्हारा हिया म होयो, जिऊँ म्हानै ईसु मसी म परमेसर की मेमा की ज्ञान को च्यानणो मिल सकै। आपणा जंय्यां का माटी का भांढा म आत्मिक जागिर धर राखी ह अर आ अनोरी सक्‍ति आपणी कोनी ह पण परमेसर की ह। आपा बार-बार पिड़ा भोगां हां, पण रूंध्या कोनी जावां, कई बार तुमत म पड़ा हां पण आस कोनी खोवां। सताया तो जावां हां, पण तज्या कोनी जावां। म्हें पटक्या जावां हां पण खतम कोनी होवां। क्युं क म्हें सदाई इ बातनै ध्यान म राखां हां क ईसुनै मिनख मार्या। जणा बिका समचार को हेलो पाड़बा ताँई जद म्हें हांडा हां जणा मिनख म्हानै बी मार सकीं हीं इकै पाछै बी म्हें डरां कोनी पण मरबानै त्यार हां। जिऊँ क ईसु को जीवन बी म्हारी काया म खुला रूप म दिखै। ईसु की बजेऊँई म्हें जखा जीवता हां मोत क हाता म सूप्या जावां जिऊँ ईसु को जीवन नास होबाळी काया म खुला रूपऊँ सामै आवै। इ बजेऊँई म्हें मोत की छांया म जीवां हां जिऊँ थे अजर-अमर जीवन म बड़ सको। पबितर सास्तर म मंडेड़ो ह, “म बिस्वास कर्यो जणाई तो म बोल्यो।” बि बिस्वासऊँई म्हें बोलर्या हां क्युं क म्हारै म बिस्वास को आत्मा ह। क्युं क म्हें जाणा हां क जंय्यां बो परमेसर ईसुनै मरेड़ा मऊँ जीवायो ह म्हानै बी ईसु क सागै जीवासी। अर म्हानै बी थारै सागै आपकै सामै खड़्यो करसी। अ सगळी बाता थारै ताँई करी जारी ह जिऊँ परमेसर की दया बेत्तीऊँ बेत्ती मिनखा ताँई पुगै, जिऊँ बे परमेसरनै धनेवाद देसी अर परमेसरनै मोकळी मेमा मिलसी। इ ताँई कदैई हिमत मना हारो, चाए आपणी बारली काया कमजोर होती जारी ह, पण आपणो मांयलो नित नयो होतो जार्यो ह। अर ओ स्यातेक को कळेस आपणा ताँई जुग-जुग की मेमा लेर आसी जिकै सामै ओ स्यातेक को कळेस क्युंई कोनी। अर जोक्यु सुजै ह बिनै म्हारी आँख्या कोनी देखै, पण जखी चिजा सुजै कोनी बानै देखै ह। क्युं क जखी चिजा सुजै ह, बाको नास होसी पण जखी कोनी सुजै बे जुग-जुग बणी रेह्सी। क्युं क आपा जाणा हां आपणी काया जखी धरती का टापरा की जंय्यां ह जखी माटी होज्यासी। पण आपणा ताँई परमेसर जुग-जुग ताँई रेह्बाळो टापरो बणा राख्यो ह जखो ईस्बर नगरी म ह। इ काया म आपा टसकता रेह्‍वां हां, अर नया गाबा की जंय्यां ईस्बर नगरी की कायानै पेरबा ताँई तड़पां हां। जिनै पेरबाऊँ आपा उघाड़ा कोनी रेहस्यां। आपा इ काया म होतासोता बोज क तळै दबर तड़पर्या हां, इकी बजे आ ह क आपा खुदकी कायानै बदलबो कोनी चावां पण इ काया म ईस्बर नगरी को जीवन जिबो चावां हां, जिऊँ मरबाळो जीवन अजर-अमर जीवन होज्यावै। इ ताँई आपानै त्यार करबाळो परमेसरई ह, बोई आपानै जामनी ताँई पबितर आत्मा बी दिनी ह। इ ताँई आपानै सदाई हिमत राखबो चाए क्युं क आपा जाणा हां क जद ताँई इ काया म हां, जणा बि झघाऊँ दूर हा जठै आपा परबु क सागै रेहस्यां। क्युं क आपा बिस्वासऊँ जीवां हां आँख्या देख्याऊँ नइ। जणा आपानै हिमत राखबो चाए क्युं क खुदकी कायानै छोडर परबु क सागै बिका घर म रेह्बो चोखो ह। इ ताँई म्हारा हिया की इंछ्या तो आ ह क चाए धरती प रेह्‍वां चाए ईस्बर नगरी म रेह्‍वां पण परमेसरनै भाता रेह्‍वां। क्युं क आपा इ काया म जीर जखो बी भलो-बुरो काम कर्या हां बिको फळ पाबा ताँई मसी क न्याय सिंघासन क सामै पक्कोई खड़्यो होणो पड़सी। जणाई म्हें परबु को डर मानर ओरानै परमेसर कानि फिरबा ताँई हिमत बंधावां हां। परमेसर म्हानै जाणै ह, अर म आस करूं हूँ, क थे बी म्हारा बारां म सक्यु जाणो हो। जणा बी म्हें थारै सामै खुदकी बडाई कोनी कर्या। पण थानै एक मोको देवां हां क थे म्हारै प गुमान कर सको। अर जखो मिनख आपकी हिया की बातानै छोडर दिखावटी बाता प गुमान करै ह बानै थे जुबाब दे सको। अर ज म्हें बावळा हां जणा परमेसरनै राजी करबा ताँई हां अर ज स्याणा हां जणा थारै फाईदा ताँई हां। क्युं क मसी को परेम म्हानै बसमै राखै ह; अर म्हें समजगा क ज एक मिनख आपणा सगळा ताँई मर्यो जणा आपा सगळा बी मरगा। बो सगळा ताँई मर्यो जिऊँ जखा जीवै ह बे खुदका मतबल ताँई नइ जीवै पण बि ताँई जीवै जखो मरेड़ा मऊँ बा ताँई जीवायो गयो ह। इ ताँई आपा इब आगैऊँ कोईबी मिनख क सागै इ दुनिया को न्याय कोनी करां। एक टेम आपा मसी क सागै इ दुनिया गेल न्याय कर्यो हो। पण इब अंय्यां कोनी। इ ताँई इब जखो बी मसी म ह बो नई सरस्टि ह। गेलड़ी बाता बितगी। अर इब सक्यु नयो ह। अ सगळी बाता परमेसर करी ह। बो मसी की बजेऊँ आपणै सागै रिस्तो सई कर्यो अर आपानै परमेसर क सागै मिनखा को ओज्यु मेळमिलाप करबा की सेवा दिनी ह। इ ताँई म्हारो खेबो ओ ह क परमेसर जगत का मिनखा का पाप को हिसाब कोनी राख्यो अर मसी की बजेऊँ बानै खुद म मिलायो ह अर बोई मिनखानै परमेसरऊँ ओज्यु मेळमिलाप कराबा को समचार म्हानै सूप्यो ह। म्हें मसी ताँई ओ काम करां हां। अर थे आ मानो की परमेसर म्हारै जरिए थानै चेतावै ह। इ ताँई म्हें मसी क कानिऊँ थारूँ हात जो'ड़र खेवां हां क थे परमेसरऊँ मेळमिलाप करल्यो। अर जखो कदैई पाप कोनी कर्यो बिनै परमेसर आपणा ताँई पापबली बणायो जिऊँ आपा परमेसर क सामै धरमी बाजां। परमेसर का संगी होबा क नातै म्हें थानै समजावां हां क परमेसर की दया थार प होई ह बिनै बेकार मना जाबाद्‍यो। क्युं क बो बोल्यो ह, “म सई टेम प तेरी सुणली, अर म छुटकारा हाळै दिन तनै सारो दिओ।” सुणो! सई टेम अर “छुटकारा को दिन” ओई ह। म्हें कोई ताँई आखळी कोनी बणा जिऊँ कोईबी म्हारी सेवा प दोस कोनी लगा सकै। पण म्हें सगळी बाता म कळेस, दुख, मुसीबत भोगर थ्यावस क सागै परमेसर का दासा की जंय्यां होबा की कोसिस करता रेह्‍वां हां। म्हानै मार्यो, रूंद्‍यो अर जेळ म दिओ गयो म्हारूँ हदऊँ बेत्ती काम करवायो गयो अर म्हें नइ तो सो सक्या अर नइ खा सक्या। म्हारी खराई, ज्ञान, थ्यावस, दया, सचो परेम, सच का समचार, पबितर आत्मा, अर परमेसर की सक्‍ति की बजेऊँ म्हें परमेसर का दास हां। हमलो करबा अर बचाव ताँई म्हारी धारमिक्‍ता म्हारो राछ ह। म्हानै मान दिओ जावै ह अर म्हारी बेजती बी करी जावै ह, म्हानै बुरा बी बतावीं अर भला बी बतावीं, म्हारै सागै अंय्यां बरताव कर्यो जावै ह क म्हें ठग हां। इकै बावजुद बी म्हें परमेसर क सामै बिस्वास जोगा हां। म्हानै सूल जाणता बुजता बी मिनख म्हारी अनदेखी करीं हीं। म्हें मोत की छांया म हां पण हाल जीवां हां। म्हानै मार्या तो सई पण ज्यानऊँ कोनी मार्या। म्हारा हिया म पिड़ा ह पण म्हें सदाई राजी रेह्‍वां हां, म्हें कंगला की जंय्यां दिखां हां पण ओरानै पिसाळा बणा देवां हां, म्हें रिता हात दिखां हां पण म्हारै कनै सक्यु ह। ओ कुरन्थी नगरी का म्हारा भाईड़ो म्हें थारूँ साप-साप बोल्या हां। अर म्हारा हिया की बाता थारै सामै खोल दिनी ह। अर जखो परेम म्हें थारूँ राखां हां बो कम कोनी होयो। पण थेई म्हारूँ परेम करबो छोड दिओ। म आ बात थानै मेरा टाबर समजर खेऊँ हूँ, थे थारा हियानै म्हारै ताँई खोलो। परमेसर प बिस्वास नइ करबाळा का संगी मना बणो। क्युं क, बुराई को भलाई क सागै अर अँधेरा को च्यानणा क सागै काँई मेळ? सेतान बलियाल क सागै मसी को काँई लेणदेण? अर बिस्वासी को परमेसर प नइ बिस्वास राखबाळा क सागै काँई मेळ? परमेसर का मनदर को मूरत्याऊँ काँई नातो? क्युं क आपा खुदई जीवता परमेसर का मनदर हां, जंय्यां बो खुदई खयो हो, “म बामै रेह्ऊँ हूँ, बामै चालू फिरूँ हूँ। म बाको परमेसर हूँ, बे मेरा मिनख हीं। इ ताँई थे परमेसर म बिस्वास नइ करबाळा मिनखा मऊँ निकळ्याओ, बाऊँ दूर रेह्ओ। परबु बोलै ह, बा चिजा क हात मना अड़ाज्यो जखी असुद ह। जणाई म थानै अपणास्युं। म थारो बाप होस्युं, अर थे मेरा छोरा-छोरी होस्यो। आ बात सऊँ सक्‍तिसाली परबु खेवै ह।” लाडला भाईड़ो जदकी आपणै कनै परमेसर का करेड़ा अ करार ह। इ ताँई आपानै परमेसर को डर मानर काया अर आत्मानै सूगली चिजाऊँ दूर राख'र पबितर राखबो चाए। थे थारा हिया म म्हानै झघा द्‍यो। म्हें नइ तो कोईकै सागै अन्याय कर्या हां, नइ कोईको क्युं बिगाड़्या हां, अर नइ म्हें कोईको फाईदो उठायो। म अ बाता थानै बुरो बताबा ताँई कोनी खेर्यो। पण जंय्यां पेल्या म थानै बतायो हो क थे म्हारा हिया म बसर्या हो, अर म्हें थारै सागै जीवां-मरां हां। मनै थार प पूरो भरोसो ह। मनै थार प बोळो गुमान ह, थारी बजेऊँ म कदैई हिमत कोनी हारूँ, म्हारा दुख मुसीबत म बी म थारी बजेऊँ राजी हूँ। जद म्हें मकीदुनिया गया हा जद बी म्हानै अराम कोनी मिल्यो, पण म्हानै काया म राड़-दंगा अर हिया म डर की बजेऊँ कई ढाळ दुख भोगणो पड़्यो। पण दुखियारानै स्यांती देबाळो परमेसर तितूसनै म्हारै कनै भेजर म्हारी हिमत बंधाई। अर बिकै अठै आबाऊँ बढर तो म्हें आ सुण्या क थे बिको चोखो आदरमान कर्यो जणा म्हानै ओर बी बेत्ती हिमत मिलगी। बो म्हानै बतायो क थे मेरूँ मिलबा ताँई कत्ता तरसो हो, थे थारा किया प सरमिंदा हो अर म्हारी चिंत्या करो हो अंय्यां सुणर म ओर बी राजी होयो। थे मेरी गेलड़ी चिठीऊँ दुखी होया होगा, पण मनै बि चिठीनै मांडबा को इब जमाई पछताओ कोनी। मनै इ बात को पेली दुख हो पण इब मनै बेरो पड़्यो ह क थे बि चिठीऊँ क्युंक टेम ताँई दुखी होया हा। इब म राजी हूँ। म इ ताँई राजी कोनी हूँ क थानै दुखी कर्यो हो पण म इ बात बेई राजी हूँ क बि दुख की बजेऊँ थे थारा हियानै पापऊँ फिराया। थानै बो दुख परमेसर कानिऊँ होयो जिऊँ क म्हारै जरिए थारो क्युंई नुकसान नइ होवै। क्युं क जखो दुख परमेसर क कानिऊँ होवै ह बो पापऊँ हियानै बदलबा ताँई होवै ह बिको मकसद छुटकारो ह बिऊँ इ बात को पछताओ कोनी होवै क म्हें क्याले पापऊँ हियो बदल्यो। पण जखो दुख जगतऊँ मिलै ह, बिको फळ मोत ह। थेई बताओ जखो दुख परमेसर थानै दिओ बिकी बजेऊँ थे कत्ता राजी हो, थे बात का खरा, गळत की भीड़ नइ लेबाळा, परमेसर क डर म रेह्बाळा, म्हारूँ मिलबा की लगन राखबाळा, हिमत राखबाळा अर पापी को न्याय चुकाबाळा होगा। थे अंय्यां कर सगळी बाता म आ दिखा दिआ हो, क थे पबितर हो। मेरो थानै चिठी मांडबा को मकसद ओ बताबो कोनी हो क कूण गळती करी ही नहिस किकै खिलाप करी। पण ओ हो क परमेसर क सामै खुद देख सको क थे म्हारै बेई कत्ताक बफादार हो। इ बजेऊँ म्हानै हिमत मिली। म्हानै हिमत मिलबा क अलावा तितूस क राजी होबाऊँ ओर बी बेत्ती खुसी होई, क्युं क थारी बजेऊँ बिकी आत्मानै स्यांती मिली। क्युं क म बिकै आगै थारी खूब बडाई करी ही, अर इ ताँई मनै निचो कोनी देखणो पड़्यो। पण जंय्यां म्हें थानै सची-सची बोल्या हां, बंय्यांई थारै बारां म म्हारो गुमान तितूस क सामै सचाई क सागै परगट होयो। बो जदबी आ याद करै ह क थे कंय्यां बिकी बात मान्या अर आदरमान क सागै कंय्यां बिकी मनवार करी ही जणा बिको परेम थारै बेई ओर बी बेत्ती उमड़ै ह। अर म राजी हूँ क सगळी बाता म, म थार प बिस्वास कर सकूँ हूँ। सुणो मेरा लाडला बिस्वास्यो, इब म्हें थानै मकीदुनिया दिसावर की बिस्वासी मंडळ्या प जखी दया परमेसर करी ही बिकै बारां म बतावां हां। मेरा खेबा को मतबल ओ ह क बा मंडळ्या का मिनख कळेस म बी बोळा राजी हा अर बे गरीब होतासोता बी दान देबा का मामला म पिछै कोनी रिह्या। अर म बाकै बारां म खे सकूँ हूँ क, बे आपकी पायना गेलई कोनी दिआ पण बिऊँ बढर दिआ। अर अंय्यां बे आपकी सरदा गेल कर्या। बे म्हारूँ हात जो'ड़र बुज्या हा क म्हें यहूदिआ म रेह्बाळा परमेसर का मिनखा की मदद करबा का सोभाग म संगी होबो चावां हां। अर जंय्यां म्हें आस करी ही बिऊँ बेसी बे कर्या। पेली बे खुदनै परबुनै सूप दिआ बिकै पाछै परमेसर की इंछ्याऊँ खुदनै म्हानै सूप दिआ। इ ताँई म्हें तितूसनै बोल्या हा क जंय्यां बो दान भेळा करबा का कामनै थारै मांय सरू कर्यो हो, बिनै सूल पूरो करबा म थारी मदद करै। थे सगळी बाता म बढर्या हो जंय्यां क, बिस्वास म, बोली म, ज्ञान म, ईमानदारी म, परेम म, जखो थे म्हारूँ राखो हो। बंय्यांई दान देबा म बी बढता जाओ। आ बात म हुकम देर कोनी खेर्यो पण इ ताँई खेर्यो हूँ क दुसरा मिनखा क खुला हियाऊँ दान देबा की बात सुणर थारै हिया म दुसरा मिनखा ताँई जखो परेम ह बि परेम की सचाई को सबूत द्‍यो। क्युं क थे आपणा परबु ईसु मसी की दयानै जाणो हो। बो सक्याको मालिक होर बी थारै ताँई गरीब बण्यो। जिऊँ थे बिकी गरीबी की बजेऊँ हर चिज का धणी बण सको। इ मामला म, म मेरी राय देबा जार्यो हूँ जखी थारै ताँई फाईदा मंद ह। थे गेलड़ा बरस दान देबा की इंछ्या दिखाबा मई नइ पण दान देबा म बी सगळाऊँ आगै हा। इब थे इ कामनै पूरो करो। जखी इंछ्या थे करी ही, बिनै थे जोक्यु थारै कनै ह बि मऊँ दान देर पूरी करो। थे जोक्यु बी थारी हिया की इंछ्याऊँ द्‍यो हो जणा बो अपणायो जावै ह। अर मेरो खेबो तो ओई ह क थारी पायना गेलई दिज्यो बिऊँ बेसी देबा की जुर्त कोनी। क्युं क म्हें कोनी चावां क थानै तुमत होवै अर दुसरा को काम बणज्या पण म्हें तो सगळा को भलो चावां हां। इ टेम थे थारी बढतीऊँ बाकै आडा आओ जखा कमी-घटी म ह, जिऊँ के बेरो आगै चालर थारी कमी-घटी म बे बी थारै आडै आ सकीं। अर अंय्यां सगळी बाता बराबर बी रेह्सी। जंय्यां पबितर सास्तर म मंडेड़ो बी ह, “जखो बोळो भेळो कर्यो बिकन फालतु कोनी बच्यो, अर जखो थोड़ो भेळो कर्यो बिनै कम कोनी पड़्यो ।” परमेसर को धनेवाद हो, क बो तितूस क हिया म थारै बेई बाई चिंत्या दि जखी म राखूँ हूँ। क्युं क बो थारै कनै आबा ताँई म्हारै कनैऊँ रवाना होगो ह। अंय्यां कर बो म्हारी बातनै राखी जखी राखी पण आ बिकी बी इंछ्या ही क बो थारूँ ओज्यु मिलै। अर म्हें बिकै सागै बि बिस्वासी भाईड़ानै बी भेज्या हां, जिको मान चोखा समचारनै परचार करबा की बजेऊँ सगळी बिस्वासी मंडळ्या म कर्यो जावै ह। म्हारै सागै जार दान भेळो करबा ताँई बिस्वासी मंडळ्या इ भाईड़ानै टाळी ह। अर ओ सेवा को काम म्हें ओरा क आडै आबा अर परमेसर की मेमा ताँई करां हां। म्हें एक सागै इ ताँई जावां हां, क्युं क म्हें कोनी चावां क खुला हियाऊँ दियड़ा इ बडा दान क बारां म कोई म्हारै प एक पिसा ताँई बी आँगळी उठावै। क्युं क म्हें परबु की नजर्या मई नइ, पण मिनखा की नजर्या म बी ईमानदार रेह्बो चावां हां। अर बाकै सागै म्हें म्हारा बि बिस्वासी भाईड़ानै भेजर्या हां, जिनै म्हें बोळी बार भलाई करबा ताँई त्यार देख्या हां अर इब बिनै थार प बी बोळो बिस्वास ह, जिऊँ बिमै थारै आडो आबा की इंछ्या बोळी बेत्ती ह। अर ज कोई मनै तितूस क बारां म बुजै, तो बो मेरो साती अर थारै ताँई मेरै सागै काम करबाळो मिनख ह। अर जठै ताँई म्हारा बिस्वासी भाईड़ा को सुवाल ह, बे मसी की मेमा ताँई बिस्वासी मंडळ्याऊँ भेजेड़ा दुत हीं। इ ताँई थे बानै थारो परेम दिखाज्यो अर थारै बारां म म्हें जखी बडाई करां हां, बिनै बिस्वासी मंडळ्या क सामै साबित करज्यो। परमेसर का मिनखा ताँई जोक्यु दान देबा क बारां म थे सोच्या हो बिकै बारां म मनै ओर बेत्ती मांडबा की जुर्त कोनी। क्युं क मनै बेरो ह थे इ कामनै करबा ताँई सदाई त्यार रेह्ओ हो। जणाई म मकीदुनिया का मिनखा क सामै थारै बारां म गुमानऊँ खयो क अखाया का मिनख तो गेलड़ा बरसऊँई त्यार हीं अर थारी उजमानै देखर बोळा अंय्यां करबा ताँई आगै आया हीं। जणा मेरै सागैहाळा बिस्वासी भाईड़ानै थारै कनै भेजर्यो हूँ, जिऊँ थार प जखो गुमान म्हें करां हां बि ताँई म्हानै निचो नइ देखणो पड़ै। इ ताँई जंय्यां म खयो हूँ बंय्यांई थे त्यार रेह्ओ। क्युं क काँई बेरो कदै मेरै सागै मकीदुनिया नगरी का मिनख थारै कनै आज्या अर जखो थारा बारां म बानै बतायो गयो हो, बंय्यां नइ देखै जणा म्हारूँ बेत्ती थानै सरमिंदा होणो पड़सी। इ ताँई म मेरा आबाऊँ पेली मेरै सागैहाळा बिस्वासी भाईड़ानै थारै कनै जाबा ताँई मनायो जिऊँ बे, जखो खुला हियाऊँ बडो दान थे देबा ताँई जबान करी ही बिनै भेळो कर त्यार राखै। अंय्यां करबो इ बातनै दिखासी क थे थारी इंछ्याऊँ दिआ हो नइ क थे देबा ताँई पाबंद हा। पण थे याद राखो जखो थोड़ो बोवै ह बो थोड़ो अर जखो बोळो बोवै ह बो बोळो काटसी। हर कोई बत्तोई दान दे जत्तो बो देबा की मन म करी ह। नइ बेमनऊँ अर नइ कोई क दबाव म आर, क्युं क परमेसर राजी हियाऊँ देबाळाऊँ परेम करै ह। अर परमेसर थारी सगळी जुर्तानै पूरी करसी। जिऊँ भला काम करबा ताँई थारै कनै थारी जुर्तऊँ बेसी होसी। जंय्यां सास्तर म मांडेड़ो ह, “बो खुला हियाऊँ गरीबानै देवै ह, बिकी भलाई सदाई बणी रेह्सी।” परमेसर बोवणियानै बीज, अर खाबा ताँई रोटी देवै ह। बोई थारी जुर्त पूरी करसी अर थारी धारमिक्‍ता की फसलनै बढासी। थानै हर ढाळ भर्योपूरो कर्यो जासी जिऊँ हर मोका प थे खुला हियाऊँ हात बढाबाळा बणो। अर जद म्हें थारा दियड़ा दानऊँ ओरा क आडा आस्यां जणा बे परमेसरनै धनेवाद देसी। क्युं क इ सेवा की बजेऊँ परमेसर का मिनखा की जुर्तई पूरी कोनी होवै पण मिनख परमेसरनै धनेवाद बी देवीं हीं। थारी इ सेवा की बजेऊँ बे परमेसरनै मेमा देसी। क्युं क बा ताँई अर सगळा बिस्वासी ताँई थारो खुला हियाऊँ दान करबो ओ साबित करै ह क थे मसी का चोखा समचार प चालबाळा हो। परमेसर थानै जखो हियो दिओ ह बिकी बजेऊँ बे थारै ताँई मन लगार अरदास करसी अर बे थानै आपकै हिया म बसासी। बि बरदान ताँई परमेसर को धनेवाद जिको बखान कोनी कर्यो जा सकै। मसी की दिनता अर नरमाई क सागै म पोलुस निजी तोरऊँ बोलुँ हूँ। थारै मऊँ क्युं क जणा मेरै बारां म बोलीं हीं क जद म थारै आमै-सामै होऊँ बि टेम थारै सागै नरमाईऊँ रेह्ऊँ हूँ अर जद म थारूँ दूर रेह्ऊँ बि टेम सकताई बरतुँ हूँ। म सोचूँ हूँ क जद म थारै कनै आऊँ जणा बा मिनखा क सागै सकताई बरतबा की जुर्त कोनी जखा सोचीं हीं क म्हें दुनियादारी को जीवन जीवां हां। सई ह, म्हें इ दुनिया म रेह्‍वां तो हां पण इ दुनिया का मिनखा की जंय्यां लड़ा कोनी। क्युं क सेतान का नइ दिखबाळा गडानै ढाबा ताँई म्हारै कनै इ दुनिया का राछ कोनी पण बे राछ हीं जामै परमेसर की सक्‍ति ह। जणाई म्हें गुमान भरी बाता अर मतानै जखा परमेसर का ज्ञान क खिलाप ह नकारा हां, मसी की मानबा ताँई म्हें म्हारी सोचनै बस म राखां हां। अर जद थे सगळी बाता म मसी का गेला प चालस्यो जणा आपा बा मिनखानै जखा बिका गेला प कोनी चालै सजा देस्यां। थे तो बा चिजानैई देखो हो जखी आँख्या क सामै ह। अर ज कोई खेवै क मनै बिस्वास ह क म मसी को हूँ। जणा बिनै आ बी मान लेणो चाए क जंय्यां बो मसी को ह जणा म्हें बी मसी का हां। परबु म्हानै थारै उपर जखो अधिकार दिओ ह बिपै ज म गुमान करूं जणा बिपै मनै सरमिंदा होबा की जुर्त कोनी। क्युं क ओ अधिकार थारै आत्मिक जीवननै बणाबा ताँई ह इनै बिगाड़बा ताँई कोनी। इ चिठीऊँ थानै डराबा को मेरो कोई इरादो कोनी। क्युं क क्युंक मिनख मेरै बारां म बोलै ह क, “बिकी चिठ्या हिया प ठेस लगाबाळी अर दुख देबाळी ह। पण जद बो म्हारै सामै होवै जणा बो खाट काटेड़ोसो लागै अर बिकी बाता म बी दम कोनी होवै ह।” जखा अंय्यां खेवै ह बानै ओ बी जाण लेबो चाए क जंय्यां म्हें चिठी म मांडां हां बंय्यां का म्हारा काम बी हीं। क्युं क म्हें बा मिनखा की जंय्यां कोनी जखा खुदकी बडाई खुदई करीं हीं। बे खुदकी एक दुसराऊँ बराबरी करीं हीं अर अंय्यां कर बे खुदई बावळा खुवावीं हीं। म्हें बढचढ'र बात कोनी करां, पण बि हक ताँई जखो परमेसर म्हानै दिओ ह, गुमान करां हां इमै थे बी आगा हो। म्हानै जत्तो गुमान करबो चाए बिऊँ बढर कोनी करां। क्युं क म्हें मसी को चोखो समचार थारै कनै लेर आबाळा म पेलीपोत का हां। अर म्हें दुसरा का करेड़ा काम की सबासी कोनी लेवां। पण म्हानै आस ह क थारो बिस्वास बढसी जिऊँ थारै मांयनै म्हारो काम बी बढसी। जणा पाछै म्हें थारै अलावा दुसरी झघा जा सकां हां अर बठै चोखो समचार सुणा सकां जठै कोई कोनी सुणार्यो। जणा म्हारै गुमान करबा प कोईको आँगळी उठाबा को सुवालई पैदा कोनी होवै। पण, “ज कोई मिनख गुमान करबो चावै बो परबु क बारां म गुमान करै।” क्युं क जखो खुदकी बडाई करै ह बा नइ पण जिकी परबु बडाई करै ह बा बडी बात ह। म चाऊँ हूँ क जद म बावळापुणा करूं जणा थे बिनै दया कर सेल्यो। क्युं क जंय्यां परमेसर थारी चिंत्या करै ह बंय्यांई म बी थारी चिंत्या करूं हूँ अर थे पबितर कुंआरी छोरी की जंय्यां हो जिकी सगाई म मसी क सागै करबा को करार कर दिओ हूँ। पण मनै डर ह क्युं क कदै अंय्यां नइ होज्या क जंय्यां हवानै जखी धरती की सऊँ पेली नारी ही बिनै साँप चतराईऊँ भंगरा दिओ हो, बंय्यांई थारा हियानै नइ भंगरा दे जिमै मसी ताँई थारी खरी भगती अर ईमानदारी ह। म्हें जि ईसु क बारां म थानै बताया हा अर जखी पबितर आत्मा थानै मिली अर जखो चोखो समचार थे मान्या बिकै अलावा ज थे कोई मिनखनै दुसरा ईसु क बारां म बोलबा द्‍यो जणा इको मतबल ओई ह क थे ओरई ईसुनै, ओरई चोखा समचारनै अर ओरई आत्मानै मानबा अर लेबा ताँई राजी हो। पण म खुदनै बा मिनखाऊँ छोटो कोनी जाणू जखा खुदनै थारा भेजेड़ा चेला बतावीं हीं। म बोलबा म अनाड़ी हो सकूँ हूँ, पण म ज्ञान म कम कोनी। सगळी बाता म म्हें थानै आ साप-साप खेता आर्या हां। के म खुदनै छोटो कर थानै उपर उठाबानै सितमित म परमेसर को चोखो समचार सुणार कोई पाप कर दिओ? के थे खे सको हो, थारी सेवा करबा ताँई दुसरी बिस्वासी मंडळ्याऊँ जखी मदद भेजी गई ही बानै लेर म बानै लूट्यो? अर जद म थारै कनै हो जणा मनै कमी-घटी होई ही पण बि टेम बी म थार प कोई बोज कोनी गेर्यो। क्युं क मकीदुनियाऊँ मेरा बिस्वासी भाईड़ा आर मेरी सगळी जुर्ता पूरी करी। अर म हर बर खुदनै थार प बोज बणबाऊँ रोक्यो, अर आगै बी रोकस्युं। अर ज मसी की सचाई मेरै मांयनै ह जणा अखाया दिसावर म कोईबी इ बात बेई मनै गुमान करबाऊँ कोनी रोक सकै। अर मेरा खेबा को ओ मतबल थोड़ी ह क म थारूँ परेम कोनी करूं? परमेसर इ बातनै जाणै ह क म थारूँ परेम करूं हूँ। इ ताँई जोक्यु म करूं हूँ बिनै करतो रेहस्युं, जिऊँ जखा खुदनै थारा भेजेड़ा खास चेला बतावीं हीं बानै म्हारी जंय्यां बाका काम प गुमान करबा को मोको नइ मिलै जखी बात ताँई बे गुमान करीं हीं। क्युं क अंय्यां का मिनख झूठ मई भेजेड़ा चेला बण्या बेठ्या हीं अर धोकाऊँ काम करीं हीं, अर मसी का भेजेड़ा चेला जंय्यां को भेस बणावीं हीं। आ ताजूब की बात कोनी ह क्युं क सेतान बी चमकबाळा ईस्बर नगरी दुता को रूप धारण कर सकै ह। इ ताँई आ कोई ताजूब की बात कोनी ह क बिका दास धरम का काम करबाळा मिनखा जंय्यां को भेस बणावै ह। पण आखीर म बाको नास बाकै काम गेल होसी। म ओज्यु खेऊँ हूँ, कोई मनै बावळो नइ जाणै। अर ज अंय्यां ह जणा मनै बावळो समजई मनै सेल्यो, जिऊँ म थोड़ो भोत गुमान ओर कर सकूँ। थे अंय्यांई मानल्यो क, म जखो गुमान करूं हूँ बो परबु क कानिऊँ कोनी ह पण बो मेरो बावळोपुणोई ह। क्युं क बोळा हीं जखा काया-माया को गुमान करीं हीं, जणा म बी गुमान करस्युं। थे स्याणा हो इ ताँई राजी-राजी बावळा की बाता सेल्यो। मनै बिस्वास कोनी होर्यो, जद थानै कोई दास बणाले, थारो बुरो चावै, ज कोई थानै धोको दे, अर खुदनै थारूँ बडो बणावै अर कोई थारै मुंडा प थपड़ मारै जणा थे बिनै राजी-राजी सेल्यो हो। के म सरमिंदा होर खेऊँ हूँ म्हें बाकी जंय्यां थारै सागै सलुक करबा म बोळा कमजोर हां? पण ज कोई ख्याताई बी गुमान करबा की हिमत कर सकै ह जणा म बावळापुणाऊँई खेऊँ हूँ क म बी हिमत करस्युं। बे इबरानी हीं, जणा म बी तो इबरानी हूँ। बे इजरायल का हीं, जणा म बी तो इजरायल को हूँ। बाकी जड़ अब्राहम ह, जणा मेरी जड़ बी तो अब्राहमई ह। बे मसी का दास हीं जणा म बावळा की जंय्यां खेऊँ हूँ, म बाऊँ बी बढर मसी को दास हूँ। म बाऊँ बेत्ती मेनत करी ह, बार-बार केद म गयो हूँ, अर बोळीबर कोड़ा खाया, बार-बार मोत को सामनो कर्यो हूँ। पाच बार म यहूदिआ क हाता उणचाळिस-उणचाळिस कोड़ा खाया। तीन बर तो म बेत खाई अर एकर तो मेरै उपर भाठा की बोछाड़ करी गई; अर तीन बर तो जखा झाजा म चढ्यो बे टूटगा; एकर तो म एक रात अर एक दिन समदर क मांयनै रिह्यो। म बोळीबर लामो-लामो सफर कर्यो, कई बर तो म उफणती नद्‍या को तो कदै डाकूआ का खतरा को सामनो कर्यो। खुदका मिनखाऊँ खतरा को सामनो कर्यो अर गैर-यहूदि मिनखाऊँ बी खतरा को सामनो कर्यो। नगर्या म, उजाड़ म, अर समदर म मनै तो खतरोई मिल्यो। अर बा मिनखाऊँ बी जखा खुदनै बिस्वासी बतावीं हीं बाऊँ बी मनै तो खतरोई मिल्यो। पिड़ा अर बोळी मेनत करबा क पाछै बी बार-बार भूखो तिसायो रिह्यो जिऊँ म सोयो बी कोनी। अर बोळी बार तो दावा म बिना गाबा क धुजतो रिह्यो। अर इकै अलावा मेरै उपर सगळी बिस्वासी मंडळ्या की चिंत्या को बोज बी रोजकी रिह्यो। जद कोई कमजोर ह तो म बी खुदनै कमजोर म्हेसुस करूं हूँ, अर ज कोई पाप म पड़्यो ह जणा मनै दुख होवै ह। ज मनै गुमान करबोई ह जणा म मेरी कमजोरी पई करस्युं। परमेसर जखो आपणा परबु ईसु को परम-पिता ह, जिकी सदाई जे होती रेह्‍वै ह, बो जाणै ह क म झूठ कोनी बोलुँ। जद म दमिसक नगरी हो बि टेम का अरितास राजा को राजपाल बि नगरी क दरूजा प मनै पकड़बा ताँई पेरो बिठा राख्यो हो। पण मनै छाबड़ी म बिठार नगरी की भीत का जंगला क मांयनैऊँ बारनै भेज्यो गयो, अंय्यां म बिकै हाताऊँ बच निकळ्यो। जदकी गुमान करबा को कोई फाईदो कोनी बिकै बावजुद बी म गुमान करूं हूँ, इ ताँई म परबुऊँ मिलेड़ा दरसाव अर परकासन की चरचा करस्युं। बरसा पेली एक मिनखनै जखो मसी म ह, बिनै ईस्बर नगरी म तीसरी उची झघा म उठा लिओ गयो हो। म कोनी जाणू बिनै काया म नहिस बिना काया क, आतो परमेसरई जाणै। बिकी काया बठै ही नहिस बिकी आत्मा बठै ही आ म कोनी जाणू पण बस परमेसरई जाणै ह। म जाणू हूँ इ मिनखनै ईस्बर नगरी म उठायो गयो बठै बो अनोरी बाता सुणी जानै कोनी बोल्यो जा सकै बे अंय्यां की बाता ही जानै बोलबो मिनख क बस म कोनी। अंय्यां का मिनख की बजेऊँ म गुमान कर सकूँ हूँ। पण खुदकी कमजोर्यानै छोडर कोईबी बात प खुद प गुमान कोनी करस्युं। अर ज म गुमान करबा की सोची बी ह जणा बी म बावळो कोनी हूँ। क्युं क म सच बोलुँ हूँ क; ज कोई मनै अंय्यां करता देखै नहिस सुणै ह जणा बो मनै बिऊँ बढर नइ मानबो चाए। म बोळी ताजूबभरी बाता देखबा की बजेऊँ गुमान नइ करूं इ ताँई मेरी काया म रोग की एक दरदनाक पिड़ा दिनी गई ह, जखी सेतान का एक दुत की जंय्यां मनै मारबा को काम करै ह। पण आ मनै खुद प गुमान करबाऊँ बचावै ह। म तीन बर परमेसरऊँ अरदास कर बोल्यो क, इ पिड़ानै मेरूँ दूर कर दे, पण बो मनै बोल्यो, “तेरी कमजोरी म मेरी दया जखी तेर प ह बा तनै बोळी, क्युं क कमजोरी मई मेरी सक्‍ति बोळी काम करै।” इ ताँई म मेरी कमजोरी म बोळो राजी होर गुमान करस्युं जिऊँ मसी की सक्‍ति मेर प उतरसी। हाँ म कमजोर होर, बेजत होर, दुख म, सताव म, परेसानी म राजी हूँ, ज बे मसी की बजेऊँ ह। क्युं क जद म कमजोर होऊँ हूँ, जणाई ताकतबर होऊँ हूँ। म बावळा की ढाळ बोल्यो, पण अंय्यां करबा ताँई थेई मनै उकसाया। जदकी म तो क्युंबी कोनी हूँ, पण थानै तो मेरी बडाई करबो चाए, क्युं क म थारा बा भेजेड़ा चेला मऊँ, एक बात म बी कम कोनी हूँ। अर भेजेड़ा चेला क मांयनै जखी बाता होवै ह, बंय्यांई म बोळी थ्यावसऊँ सेलाणी, चमत्कार, अर ताजूब का काम कर दिखायो हूँ। थे कूणसी बात म दुसरी बिस्वासी मंडळ्याऊँ न्यारा हो? खाली इकै क म मेरो बोज थारै उपर कोनी लाद्‍यो। मनै इ काम ताँई थे माफई करो। इब म तीसरकै थारै कनै आबा ताँई त्यार हूँ। पण म थारूँ कोई माँग कोनी करूं। क्युं क मनै थारी धन-दोलत को लालच कोनी, पण थारो लालच ह। अर नइ टाबरानै आपका माँ-बाप ताँई पिसो जोड़बा की जुर्त होवै ह। पण माँ-बाप टाबरा ताँई पिसो जोड़ै ह। अर जठै ताँई मेरी बात ह, मेरै कनै जोक्यु बी ह, बिनै थारै ताँई राजी होर खरच करस्युं, अठै ताँई क म खुदनै बी थारै ताँई दे देस्युँ। अर जद म थारूँ, अत्तो प्यार-परेम करूं हूँ, जणा थे कंय्यां मेरूँ, थोड़ो प्यार-परेम कर सको हो? थे मानो हो क, म थार प बोज कोनी हूँ। पण दुसरै नाकै थारै मऊँ क्युंक खेवै ह क, म चलाक होर थानै मेरी चलाकी म फसा लिओ। थेई बताओ, म जत्ता मिनखानै थारै कनै भेज्यो हो बाऊँ थानै कोई ठग्यो हो के? म तितूसऊँ जाबा ताँई हाता जोड़ी करी अर बिकै सागै बिस्वासी भाईड़ानै भेज्यो हो। जणा के थे खे सको हो क, तितूस थारो फाईदो उठायो? नइ! क्युं क म्हारै कनै एकई आत्मा ह, जखी म्हारै म एक जंय्यांई काम करै ह। हो सकै ह! थे अंय्यां सोचो हो क, म्हें अंय्यां बोलर खुदको बचाव करर्या हां। नइ! म्हें मसी का दास होर बोल्या, अर इ बात को गुवा परमेसर ह। ओ मेरा लाडला भाईड़ो! म्हें जोक्यु बी कर्या बो थानै आत्मिक रूपऊँ मजबूत करबा ताँई कर्या। म डरूँ हूँ क, जद म थारै कनै आऊँ, जणा कदै अंय्यां नइ होवै क, जंय्यां म थानै देखबो चाऊँ हूँ, बिऊँ न्याराई दिखो। अर जंय्यांको थे मनै नइ देखबो चाओ हो, बिऊँ न्यारोई देखो। अर मनै ओ बी डर ह क, कदै थारै मांयनै आपसरी म राड़, एक दुसराऊँ बळबो, झाळ काडबो, मतलबीपुणो, बदनामी अर बेजती करबो, काना-फूसी अर हेकड़ोपूणो अर काम बिगाड़बो नइ देखूँ। अर मनै ओ बी डर ह क, जद म थारूँ मिलबा आऊँ, जणा मनै परमेसर क सामै सरमिंदा नइ होणो पड़ै। अर मनै बा ताँई रोबो नइ पड़ै जखा पेल्या पाप करता हा, बे कुकरम, सूगली बाता, अर रांडबाजी म जीवन जीता हां, इकै पाछै बी, बे आपका पापऊँ तौबा कोनी कर्या। म तीसरकै थारूँ मिलबा आर्यो हूँ। “सगळी बाता को फेसलो क बे सई ह क कोनी, दो-तीन गुवा की मोजूदगी म होणी चाए।” जद म दुसरकै थारै सागै हो, जणाबी अर इब जदकी म थारूँ दूर हूँ, बा मिनखानै जखा पाप कर्या ह बानै, अर सगळा मिनखानै ओज्यु खेऊँ हूँ, ज मेरो ओज्यु आबो होसी, जणा म बानै कोनी बकसूँ। अंय्यां म इ ताँई खेर्यो हूँ, क्युं क थे इ बात को सबूत चाओ हो की मेरै जरिए मसी बोलै ह। बो थारै सागै बरताव करै जणा बो कमजोर कोनी ह, पण थारै मांयनै आपकी सक्‍ति दिखावै ह। बो कमजोरी म हो जणा बो सुळी प मर्यो, पण बो परमेसर की सक्‍तिऊँ जिंदो ह। अर म्हें बी बिमै तो कमजोर हां पण परमेसर की सक्‍ति की बजेऊँ बिकै सागै जीवां हां जिऊँ थानै सुदार सकां। खुदनै बिचासो अर देखो क, थे बिस्वास म खरा हो क कोनी। ज थे हो जणा थानै बेरो पड़सी क मसी थारै म जीवै ह। ज ईसु मसी थारै म कोनी जीवै जणा इको मतबल ह क थे नाकाम होगा। अर म आस करूं हूँ, जद थे ढुंढस्यो जणा पास्यो क म्हें नाकाम कोनी होया। अर म्हें परमेसरऊँ अरदास करां हां क, थे बुराई नइ करो। ओ इ ताँई कोनी ह क, म्हारी कामयाबिनै दिखावां हां। पण इ ताँई क थे बोई कर्यो जखो सई ह, चाए म्हें नाकामई नजर आवां। क्युं क म्हें कदैई सचाई क खिलाप कोनी गया। पण जोक्यु बी कर्या बो सच ताँई कर्या। म्हें राजी हां जद म्हें कमजोर अर थे ताकतबर हो। अर आ अरदास बी करां हां क, थे मजबूतऊँ बी मजबूत बणो। इ ताँई थारूँ दूर होतासोता बी, म आ बातानै थारै ताँई मांडर्यो हूँ। जिऊँ क जद म थारै कनै आऊँ, जणा मनै परबु का दियड़ा हकनै कल्डाई दिखाबा ताँई काम म नइ लेणो पड़ै। ओ हक थानै बणाबा ताँई ह, थानै गेरबा ताँई कोनी। ओ मेरा लाडला बिस्वास्यो, म आखीरक आ बोलां क सागै इ चिठीनै बंद करूं हूँ, राजी रेह्ओ, थारो भेवार बदलो, एक दुसरानै हिमत बंधाओ, स्यांती अर मेळमिलापऊँ रेह्ओ। जणा परमेसर जखो स्यांती अर परेम को दातार ह, बो थारै सागै रेह्सी। एक दुसराको हात जोड़र मान करो। सगळा परमेसर का मिनख थानै नमस्कार मांडी हीं। परबु ईसु मसी की दया अर परमेसर को परेम अर पबितर आत्मा को संगरो थारै सगळा क सागै होतो रेह्‍वै। इ चिठी म, म पोलुस मेरो अर मेरै सागैहाळा सगळा भायां को, गलातिया दिसावर की बिस्वासी मंडळ्यानै नमस्कार मांडूँ हूँ। म बोई पोलुस हूँ जिनै भेजेड़ो चेलो होबा ताँई मिनख कोनी बुलाया पण ईसु मसी अर परम-पिता परमेसर जखो ईसु मसीनै मरेड़ा मऊँ जिंदो कर्यो हो बे टाळ्या हीं। थार प आपणा परम-पिता परमेसर अर परबु ईसु मसी की दया अर सुक-स्यांती बणी रेह्‍वै। परम-पिता परमेसर की इंछ्यानै पूरी करबा ताँई मसी आपणा पाप ताँई खुदनै मरबा ताँई दे दिओ जिऊँ आपा बुरी दुनियाऊँ छुटाया जावां। परमेसर की मेमा जुग-जुग होवै! अंय्यांई होवै। मनै ताजूब होर्यो ह, क परमेसर थानै मसी की दयाऊँ बुलायो हो। अर थे बि परमेसरनै तावळाई छोडर दुसराई समचार प बिस्वास कर्या हो। पण मसी का चोखा समचारनै छोडर दुसरो समचार तो आथई कोनी, पण क्युंक मिनख थानै भंगरार्या हीं अर मसी का चोखा समचार म हेर-फेर करबो चावीं हीं। पण जखा बी थानै म्हारा सुणाईड़ा चोखा समचार क अलावा दुसरो समचार सुणावै ह चाए फेर बे म्हें हो नहिस ईस्बर नगरी दुत हो बे नरक का भागी होसी। जंय्यांकी म्हें थानै पेल्याई कह्या हा, अर इब बी म ओज्यु बोलुँ हूँ क, जि चोखा समचारनै थे मान्या हा बिकै अलावा ज कोई थानै दुसरो चोखो समचार सुणावै ह बो नरक को भागी होसी। के म मिनखाऊँ मंजुरी लेबो चाऊँ? मनै इकी जुर्त कोनी! जिकी मनै जुर्त ह बा परमेसर की मंजुरी ह! म मिनखानै राजी करबो कोनी चाऊँ ज म अंय्यां करबो चाऊँ जणा म मसी को सेवक कोनी। मेरा लाडला बिस्वास्यो, म थानै समजाबो चाऊँ हूँ, क म थानै जखो चोखो समचार सुणायो हो बो मिनख की मंजुरीऊँ कोनी हो। क्युं क ओ मनै कोई मिनखऊँ कोनी मिल्यो अर नइ कोई मनै सीखायो, पण ओ मेर प ईसु मसी क जरिए परगट कर्यो गयो। अर थे जाणो हो क म पेली यहूदि मत म कंय्यांसिक जीआ करतो हो। अर थे ओ बी जाणो हो क म परमेसर की बिस्वासी मंडळी का मिनखानै कंय्यां सताया करतो अर बिनै मिटाबा की कोसिस करतो हो। अर म यहूदि मत को पालन करबा म दुसरा यहूदि मिनखाऊँ कट्टर हो, अर आपणा बडकाऊँ आपानै जखा रिती-रिवाज मिल्या हा बानै म निभातो हो। पण मेरा जलमऊँ पेली परमेसर मनै टाळ लिओ, अर आपकी दयाऊँ मनै आपकी सेवा करबा ताँई बुलायो। अर जद बे आ ध्यारी, क बे आपका बेटानै मेर प परगट करै, जिऊँ म गैर-यहूदि मिनखानै ईसु मसी का चोखा समचार सुणाऊँ, बि टेम म कोईकिई राय कोनी ली, अर नइ म यरूसलेम म बा मिनखा क कनै गयो जखा मेरूँ पेली भेजेड़ा चेला हा। पण म तावळोसो अरब दिसावर चलेगो, अर बिकै पाछै दमिसक नगरी आग्यो। अर तीन बरसा क पाछै म यरूसलेम म केफाऊँ जाणकारी लेबा गयो, अर बिकै सागै पन्दरा दिन रिह्यो। पण म परबु का भाई याकूबनै छोडर बठै कोईसा बी भेजेड़ा चेलाऊँ कोनी मिल्यो। म परमेसरनै मेरै सामै जा'णर थारूँ खेऊँ हूँ! क जखी बाता म थानै मांडर्यो हूँ बे झूठी कोनी। अर म बिकै पाछै सिरीया अर कलिकीया दिसावरा म गयो। पण यहूदिआ दिसावर की मसी बिस्वासी मंडळी मनै कोनी पिछाण्ती ही। पण बे मेरै बारां म मिनखाऊँ अंय्यां खेता सुणता हा क ओ बोई मिनख ह जखो पेल्या आपानै सताया करतो हो। पण इब ओ बी मसी को परचार करै ह जिनै ओ पेल्या नास कर्या करतो हो। अर बे मेरी बजेऊँ परमेसर की बडाई करबा लाग्या। म चोदा बरसा क पाछै बरनाबास क सागै पाछो यरूसलेम गयो, अर म तितूसनै बि मेरै सागै लेगो। म बठै कोनी जाबो चातो हो पण म बठै परमेसर की इंछ्या की बजेऊँ गयो। अर म बि चोखा समचार क बारां म चुपचाप बठै की बिस्वासी मंडळी का मुखियानै बतायो जखो म गैर-यहूदि मिनखानै सुणायो हो, क्युं क म अंय्यां कोनी चातो हो मेरी गेलड़ी मेनत बेकार चली जावै। तितूस जखो मेरै सागै यरूसलेम आयो हो बिकै यूनानी होबा क वावजुद बि बे बिकी सुन्नत करबा की जोर-जबरदस्ती कोनी कर्या। म्हें बठै बा मिनखा की बजेऊँ गया जखा म्हारै बिचमै ओलै-छानै मसी ईसु क गेल चालबाळा बणर आगा हा। अर बे अंय्यां इ बजेऊँ कर्या क मसी ईसुऊँ आबाळी अजादि को चोखो समचार जखो म्हानै मिल्यो ह बिको भेद लेर म्हानै दास बणावै। पण म्हें स्यात घड़ीई बाकै आगै हार कोनी मानी, जिऊँ चोखा समचार की सचाई थारै मांयनै बणी रेह्‍वै। अर जखा मिनख मान्या-थान्या हा, चाए बे कंय्यांका बी हो, मनै कोई फरक कोनी पड़ै, परमेसर कोईको भेद-भाव कोनी करै बानै मेरा सुणाईड़ा चोखा समचार म क्युंई कमी कोनी लाधी। अर बे इ बातनै समजगा क जंय्यां पतरसनै यहूदि मिनखानै चोखो समचार सुणाबा ताँई भेज्यो गयो ह बंय्यांई म बी गैर-यहूदि मिनखानै चोखो समचार सुणाबा ताँई भेज्यो गयो हूँ। क्युं क परमेसर, जखो पतरसनै भेजर यहूदि मिनखा म आपको काम कर्यो, इब बोई परमेसर मनै बी गैर-यहूदि मिनखा म भेजेड़ो चेलो बणार काम लेर्यो ह। अर जद याकूब, केफा अर यहून्ना जखा बिस्वासी मंडळी का खम्बा समज्या जाता हा, बे आ जाणग्या की ओ चोखो समचार परबु की दयाऊँ मिल्यो ह। जणा बे बरनाबास अर मेरै सागै संगती को हात मिला लिआ। अर बे राजी होगा की म्हें गैर-यहूदि मिनखानै चोखो समचार सुणाता रेह्‍वां अर बे खुद यहूदि मिनखानै सुणाता रेह्‍वै। अर बे म्हारूँ कह्या क म्हें जुर्तमंदा को ध्यान राखां, अर म खुद इ कामनै करबानै उतावळो हो। पण जद केफा अन्ताकीया नगरी आयो जणा म बिकै मुंह पई बोल्यो क बो गळत हो। क्युं क बो गैर-यहूदि मिनखा क सागै रोटी खातो हो, पण जद याकूब क कनैऊँ मिनख बिकै बठै गया, जणा बो बा मिनखाऊँ डर जखा गैर-यहूदि मिनखा की सुन्नत करबो चाता हा गैर-यहूदि मिनखाऊँ न्यारो रेह्बा लाग्यो। अर जखा यहूदि मिनख बिकै सागै हा बे बी बिका पाखंड म बिकै सागै होगा, अठै ताँई क बरनाबास बी बंय्यांई करबा लाग्यो। अर म आ देखर क बे चोखा समचार की सचाई प खराईऊँ कोनी चालीं, जणा म सकै सामै केफाऊँ बोल्यो, “तू यहूदि होर बि गैर-यहूदि मिनखा की जंय्यां जीतो आर्यो ह, जणा गैर-यहूदि मिनखानै यहूदि मिनखा की जंय्यां जीबा ताँई क्यु खेवै ह?” आपा तो जलमजात यहूदि हां, पापी गैर-यहूदि मिनखा की जंय्यां कोनी हां। पण आपा जाणा हां, क मिनख नेम-कायदानै मानबाऊँ नहिस करमाऊँ परमेसर क सामै धरमी कोनी बणै, पण ईसु मसी प बिस्वास करबाऊँ धरमी बणै ह। जणा आपा बी ईसु मसी प बिस्वास कर्या अर आई बजे ह क आपा परमेसर क सामै धरमी बण्या, क्युं क बिधी-बिधान का करमाऊँ कोई बी धरमी कोनी बणै। अर ज आपा मसी म धरमी होबो चावां हां, अर बिधी-बिधान आपानै पापी बतावै, जणा के मसी पाप को सेवक कोनी? पक्काई बो कोनी। जा रितीयानै म छोड दिओ, बानै म ओज्यु मानू जणा म खुदई सजा को भागी हूँ। क्युं क म नेम-कायदा की बजेऊँ नेम-कायदा ताँई मरग्यो जिऊँ परमेसर ताँई जिऊँ। म मसी क सागै सुळी प चढायो गयो हूँ, अर इब म खुद जिंदो कोनी हूँ, पण मसी मेरै म जीवै ह। अर ज म काया म जिंदो हूँ तो बस बि बिस्वासऊँ जिंदो हूँ जखो परमेसर का बेटा प ह, जखो मेरूँ परेम कर्यो अर मेरै ताँई खुदनै दे दिओ। म परमेसर की दयानै बेकार कोनी जाबा द्‍युँ, क्युं क ज नेम-कायदा की बजेऊँ धारमिक्‍ता मिलती, जणा मसी को मरबो बेकारई ह। ओ बावळो गलाति मिनखो, थानै कूण भंगरा दिओ? म थानै साप-साप बता दिओ हो, क कंय्यां ईसु मसीनै सुळी प चढायो गयो हो। म तो थारूँ अत्तो जाणबो चाऊँ हूँ, क थानै पबितर आत्मा को बरदान नेम-कायदानै मानबा की बजेऊँ मिल्यो नहिस जखो चोखो समचार थे सुण्या बिपै बिस्वास करबा की बजेऊँ मिल्यो हो? थे अत्ता बावळा कंय्यां हो सको हो? के थे सोचो हो जखो काम पबितर आत्मा थारै मांयनै चालू कर्यो बिनै थे थारूँ पूरो कर सको हो? के थे अत्तो दुख बेकार मई भोग्या? पण ओ पक्काई बेकार कोनी। परमेसर, जखो थानै पबितर आत्मा दिनी ह अर थारै मांयनै ताजूब हाळा काम करै ह, के बो थारै मांयनै अ काम नेम-कायदानै मानबा की बजेऊँ नहिस थारै मसी का चोखा समचार प बिस्वास करबा की बजेऊँ करै ह? जंय्यांकी, “अब्राहम परमेसर प बिस्वास कर्यो अर आ बात बिकै ताँई धारमिक्‍ता गिणी गई।” जणा इऊँ तो आ साबित होवै ह, क जखा बिस्वास करबाळा हीं, बे अब्राहम की ओलाद हीं। नेम-कायदा म पेल्याऊँई बतायो गयो हो क, गैर-यहूदि मिनख बिस्वासऊँ धरमी होसी। जणाई तो परमेसर कानिऊँ अब्राहमनै ओ समचार सुणायो गयो क, “तेरै जरिए धरती का सगळा कूणबानै आसिरबाद मिलसी।” जणा जखा बिस्वास राखै ह, बानै बिस्वासी अब्राहम क सागै आसिरबाद मिलै ह। जखो बी नेम-कायदानै मानबा की बजेऊँ परमेसरनै राजी करबो चावै ह, बो सराप क बस म ह, क्युं क नेम-कायदा म मांडेड़ो ह क, “जखो बी नेम-कायदा म मांडेड़ी सगळी बातानै नित-नित कोनी मानै बो सरापित ह।” इऊँ तो ओ साबित होवै ह, क नेम-कायदा क जरिए परमेसर क सामै कोई धरमी कोनी होवै। क्युं क सास्तर म मंडर्यो ह क, “परमेसर क सामै मिनख बिस्वासऊँ धरमी होसी अर जिसी।” पण नेम-कायदो बिस्वास की निम प कोनी ह। अर “जखो बिनै मानै ह बो बिकैई सारै जीवै ह।” मसी आपणा सरापनै आपकै उपर लेर आपानै नेम-कायदा का सरापऊँ अजाद कर दिओ। क्युं क पबितर सास्तर म मंडेड़ो ह क, “जखो बी सुळी प लटकायो जासी बो सरापित ह।” मसी ईसु आपानै इ ताँई छुटायो ह क अब्राहमनै दियड़ो आसिरबाद गैर-यहूदि मिनखानै मिल सकै, जिऊँ आपानै बिस्वास करबा की बजेऊँ पबितर आत्मा मिल सकै जिको करार करेड़ो ह। ओ मेरा लाडला बिस्वास्यो, म थानै एक खेबत क जरिए बताऊँ हूँ, क जद कोई मिनख कोईऊँ करार करै ह, जणा बो बि करेड़ा करारनामा म बंद जावै ह, अर बिनै बो कोनी टाळ सकै अर नइ बिमै क्यु घटा-बढा सकै ह। अंय्यांई परमेसर अब्राहमऊँ अर बिका वंसऊँ करार कर्यो, परमेसर अंय्यां कोनी बोल्यो क, “म तेरा वंसजाऊँ करार करूं हूँ” वंसजा को मतबल तो बोळा होवै पण बो “वंस” बोल्यो अर आ बात एक मिनखनै दिखावै अर बो मसी ह। मेरै खेबा को मतबल ओ ह, क जखो करार परमेसर पेल्याऊँ कर दिओ बिनै च्यार सो तीस बरस क पाछै आबाळो सास्तर कोनी बदल सकै। अर नइ बिका वादानै नकार्यो जा सकै। क्युं क ज बापोत नेम-कायदाऊँ मिलती जणा करारऊँ कोनी मिलती, पण परमेसर अब्राहम प आपकी दया दिखाई अर बापोती करार की बजेऊँ बिनै दि। जणा नेम-कायदा की कठै जुर्त री? आ तो पाछै दि गई जिऊँ आपानै बेरो चालै क आपा पाप करां हां, बि एक वंसज क आबा ताँई जिकै बारां म करार कर्यो गयो हो। अर नेम-कायदा तो ईस्बर नगरी दुता की बजेऊँ मूसानै दिआ गया हा, अर बो मिनखानै दिओ। अर मूसा अंय्यां एक बिचोलिओ होयो। बिचोलिओ तो दो मिनखा क बिचमै होवै ह, पण परमेसर एकई ह। के जणा नेम-कायदा परमेसर का करेड़ा करार क खिलाप ह? अंय्यां पक्काई कोनी! क्युं क ज नियमानै मानबा की बजेऊँ परमेसरऊँ आपानै जीवन मिलतो, जणा सचमई नेम-कायदाऊँ पाप धुप जाता। पण नेम-कायदा बोलै ह, पाप सगळानै आपकै बस म ले लिआ, जणा परमेसर को बादो बा सगळा ताँई ह जखा ईसु मसी प बिस्वास करीं हीं अर आ बात बस बिस्वास पई टिकरी ह। पण बिस्वास क आबाऊँ पेली, आपा नेम-कायदा क मांयनै बंदि की जंय्यां हां। मतबल ओ हो क, जद ताँई बिस्वास कोनी आयो हो, जणा ताँई आपानै नेम-कायदानै मानबो जरूरी हो। इ ताँई नेम-कायदो मसी ताँई आपणानै पुगाबाळो गरूजी की जंय्यां होयो, जिऊँ आपा बिस्वास की बजेऊँ परमेसर क सामै धरमी होआं। पण इब जद बिस्वास आगो ह जणा इब आपा नेम-कायदा क बस म कोनी। थे सगळा इब मसी ईसु प बिस्वास करबा की बजेऊँ परमेसर का बेटा हो। अर थार मऊँ जत्ता बी मसी म बतिस्मो लिआ हो बे मसीनै गाबा की जंय्यां पेर लिआ हीं। जणा इब नइ तो कोई यहूदि रिह्यो अर नइ यूनानी, नइ गुलाम, नइ अजाद, नइ नर, नइ नारी, क्युं क थे सगळा मसी ईसु म एकई हो। अर जद थे मसी का हो, जणा अब्राहम का वंसज अर करार गेल वारिस बी हो। म बोलुँ हूँ, जद ताँई वारिस टाबर ह अर बो सगळी चिजा को मालिक बी ह, इकै वावजुद बी बिमै अर गुलाम म कोई फरक कोनी। बो आपका बाप का ते करेड़ा टेम ताँई घरका क अर भंडारी की निगरानी म रेह्‍वै ह। अर अंय्यां आपणै सागै बि हो। आपा जद टाबरा हा, जणा आपा जगत की आत्मिक सक्‍तिया का गुलाम हा। पण जद ते टेम आयो, जणा परमेसर आपका बेटानै भेज्यो बो लूगाईऊँ जलम्यो। अर बो नेम-कायदानै मान्यो, जिऊँ बो बा मिनखानै जखा नेम-कायदा क बस म ह बानै किमत चुकार छुटा ले, अर आपानै गोद लेयड़ा बेटा को हक मिलै। जदकी थे तो बिका बेटा हो, अर परमेसर आपका बेटा की पबितर आत्मानै जखी हे अब्बा, हे परम-पिता बोलर हेलो देवै ह, आपणा हिया म भेज्यो ह। जणा इब थे दास कोनी हो, पण बिका बेटा हो। जणा थे बि बापोत का करेड़ा वादा का पाँतीवाळ हो। पेल्या थे परमेसरनै कोनी जाणता हा, थे बाका दास हा जखा सच म परमेसर कोनी हा। पण इब थे परमेसरनै पिछाण लिआ हो अर परमेसर थानै पिछाणै ह। जणा इब थे जगत की बाता कानि जामै दमहाळी बात कोनी अर जखी बेफालतू की ह, ओज्यु बाका गुलाम क्यु होबा जार्या हो? थे खास दिनानै, म्हेनानै, रूतानै अर बरसानै मानो हो! म तो थारै बारां म आ सोचर डरूँ हूँ क, कदै अंय्यां नइ हो क जखी मेनत म थार ताँई करी ही बिपै पाणी फिरज्यावै। ओ मेरा लाडला बिस्वास्यो, म थारूँ अरदास करूं हूँ क थे मेरै जंय्यां बणो, क्युं क म बी थारी जंय्यां बण्यो हो। थे मेरो क्युंई बुरो कोनी कर्या। थानै याद होगो क, जद म पेलीपोत मेरी बिमारी की दसा म थानैई चोखो समचार सुणायो। अर मेरी आ बिमारी थारी बिचासबा की घड़ी होई, जणा बी थे मनै छोटो कोनी जाण्या अर नइ मेरूँ नफरत करी, पण परमेसर का ईस्बर नगरी दुत अर मसी ईसु की जंय्यां जा'णर मेरी आवभगत करी। जणा फेर थारी बा धने भावना इब कठै गई? म इ बात को थारो गुवा हूँ, जि टेम का ज मोको पड़तो तो थे थारी आँख्या का'डर मनै दे देता। जणा के म सच बोलबा की बजेऊँई थारो बेरी होगो? बिधी-बिधान प चलाबाळा मिनख थार म मो तो राखै ह पण बाकी नीत सई कोनी। बे थानै मेरूँ न्यारो करबो चावीं हीं, जिऊँ थे बी बामै मो घालल्यो। अर ओ बी चोखो ह क भली बाता म मो राखबो चाए, आ चोखी बात ह, पण इको ओ मतबल कोनी क जद म थारै सागै हूँ जणाई राखो। ओ मेरा टाबरो, जद ताँई थार म मसी को सुभाव नइ आज्यावै, जद ताँई म जच्चा की सी पिड़ा भोगर्यो हूँ। मेरी तो आ इंछ्या होरी क इब थारै कनै आर ओरई ढंगऊँ बोलुँ, क्युं क थारै बारां म, म कोनी समज पार्यो क काँई कर्यो जावै! नेम-कायदानै मानबाळो, थे मनै बताओ, के थे नेम-कायदा की इ बातनै कोनी सुण्या? पबितर सास्तर म मंडेड़ो ह क, “अब्राहम क दो बेटा हा, एक तो बिकै परनायड़ी लूगाईऊँ जखी दासी कोनी ही अर दुसरो बिकी दासीऊँ। दासीऊँ जलमेड़ो काया को फळ हो, पण बिकी लूगाईऊँ जलमेड़ो परमेसर क करेड़ा करार को फळ हो।” आ बाता का होबा क पिछै निती-कथा ह, अ दोन्यु लूगाया दो करारानै दिखावै ह, एक तो सीनै डूँगर की जिऊँ दासई जलमै ह अर बा ह हाजिरा। हाजिरा मानो अरब देस को सीनै डूँगर ह, अर यरूसलेम की जंय्यां ह क्युं क बो आपका टाबर-टिकरा सेत्युं गुलामी म ह। पण दुसरी लूगाई बिस्वास करबाळा की माँ ह जखी परमेसर की खास नगरीनै दिखावै बो ईस्बर नगरी को यरूसलेम ह जखो गुलामी म कोनी। क्युं क पबितर सास्तर म मंडेड़ो ह क, “हे बांझड़ी तू राजी हो, क्युं क तू टाबर कोनी जणी। अर तनै टाबर जलम्बा की पिड़ा कोनी होई, तू जे-जैकार कर। क्युं क सुहागण लूगायो बेत्ती, टाबर-टिकर छोडेड़ी लूगाई क ह।” ओ मेरा लाडला बिस्वास्यो, आपा बी अब्राहम का बेटा इसाक की जंय्यां करेड़ा करार का टाबर हां। जखो परमेसर क करार गेल जलम्यो हो। पण जंय्यां बि टेम म काया म जलमेड़ो पबितर आत्मा गेल जलमेड़ानै सतातो हो बंय्यांई इब बी होवै ह। पण पबितर सास्तर म मंडर्यो ह, “दासी अर बिका बेटानै काड दे, क्युं क दासी को बेटो ब्याईड़ी लूगाई का बेटा क सागै बापोत को अधिकारी कोनी होवै।” इ ताँई ओ मेरा बिस्वासी भाईड़ो, आपा दासी का कोनी पण परनायड़ी लूगाई का टाबर हां जखी दासी कोनी ही। मसी आपानै अजाद रेह्बा ताँई अजाद कर्यो हो, जणा मसी मई बण्या रेह्‍वो। अर गुलाम बणाबाळी बाता म ओज्यु मना जाओ। सुणो म खुद पोलुस थानै खेऊँ हूँ क, ज थे परमेसर क सामै धरमी होबा ताँई सुन्नत करास्यो, जणा इको मतबल ह क मसी को थारै बेली कोई मोल कोनी। इकै वावजुद बी म हरेक सुन्नत कराबाळानै खेबो चाऊँ हूँ क, बानै नेम-कायदानै नित-नित माननो पड़सी। जखा बी नेम-कायदानै मानबा की बजेऊँ परमेसरनै राजी करबो चावीं, बिको मतबल ह क बे मसीऊँ न्यारा होगा हीं अर परमेसर की दयाऊँ दूर हीं। पण आपा पबितर आत्मा का दियड़ा बिस्वास की बजेऊँ परमेसर क सामै जीबा की आस देखां हां। क्युं क मसी ईसु म नइ तो सुन्नत कराबाळो, अर नइ सुन्नत नइ कराबाळो क्यु मांयनै राखै ह। पण बिस्वास जखो परेम की बजेऊँ काम करै ह बोई मांयनै राखै ह। थे तो बोळी चोखी तर्याऊँ मसी को जीवन जिर्या हो। जणा इब थार म कूणसी बात ह जखी थानै सचाई प चालबाऊँ रोकै ह? अंय्यां की बाता तो थानै बुलाबाळा परमेसर क कानिऊँ होई कोनी सकै। याद राखो, “जरासो खमिर गुंदेड़ा सगळा आटानै फूला देवै ह।” म परबु म थारै उपर पूरो भरोसो करूं हूँ, क थे दुसरा मतनै कोनी मानो पण जखा थानै भंगरावै ह चाए बे कोईबी क्यु नइ हो बे सजा पासी। ओ मेरा लाडला बिस्वास्यो, ज म सुन्नत को परचार करतो जणा म क्यु सतायो जातो? ज म सुन्नत करबा की खेतो जणा मसी क सुळी क बारां म जखो समचार म सुणायो हो बि ताँई मनै कोई परेसानी नइ होणी चाए ही। चोखो तो ओ होतो क थानै भंगराबाळा सुन्नत के करा हा काटई लेता। ओ मेरा लाडला बिस्वास्यो, थे अजाद रेह्बा ताँई बुलाया गया हो, पण अंय्यां नइ हो क आ अजादि काया का कामानै पूरो करबा को सादन बणै। पण परेमऊँ एक दुसरा का दास बणो। क्युं क नेम-कायदा की सगळी बाता इ एक बातनै मानबाऊँ क, “तू तेरा पड़ोसीऊँ खुदकी जंय्यां परेम राख पूरी होज्यावै ह।” पण थे एक दुसरानै पाड़ खाबो चाओ हो, जणा थे चेता म रेह्ओ, कदै अंय्यां नइ होज्या क थे एक दुसरा को नास कर द्‍यो। म थारूँ खेऊँ हूँ, ज थे पबितर आत्मा क कह्या गेल भेवार करस्यो, जणा काया की बुरी इंछ्यानै बस म राखस्यो। क्युं क काया की बुरी इंछ्या पबितर आत्मा क खिलाप मो राखै अर पबितर आत्मा काया की बुरी इंछ्या क खिलाप मो राखै ह। अर अ दोन्युई एक दुसरा क खिलाप म हीं। जणाई तो थे जोक्यु करबो चाओ हो बो कोनी कर सको। अर ज थे पबितर आत्मा क कह्या गेल भेवार करो हो जणा थे नेम-कायदा क बस म कोनी हो। काया का काम तो सामै हीं जंय्यांकी, कुकरम, सूगला काम, उदफेली, मूरती पूजा, जादू-टोणो, बैर भाव, राड़-झगड़ा, बळोकड़ोपूणो, झाळ्या भरबो, फूट गेरबो, भेद-भाव करबो, होड करबो, जळबो, नसो करबो, भोगबिलास करबो अंय्यां का ओर बि बोळा काम हीं। जाकै बारां म पेल्या बी म थानै चेता दिओ हूँ अर ओज्यु चेतार्यो हूँ क, अंय्यां का काम करबाळा मिनख परमेसर का राज म वारिस कोनी होसी। पण पबितर आत्मा का फळ परेम, खुसी, स्यांती, थ्यावस, दया, भलाई, बिस्वास, नरमाई अर खुदनै बस म राखबो, अंय्यां का कामा क खिलाप म कोई नियम कोनी ह। बे मिनख जखा मसी ईसु का हीं बे आपकी काया की बुरी इंछ्या अर बुरी लालसानै सुळी प चढा दिआ हीं। अर ज आपा पबितर आत्मा क कह्या गेल जीवां हां जणा पबितर आत्मा गेल भेवार बि करां। आपानै नइ तो गुमान करबो चाए, अर नइ एक दुसरानै रीस दिवाणो चाए, अर नइ आपसरी म बळोकड़ोपूणो राखबो चाए। ओ मेरा लाडला बिस्वास्यो, थे जखा आत्मिक जीवन जीओ हो, ज थारी नजर्या म थार मऊँ कोई पाप करतो पकड़्यो जावै, जणा बिकै सागै नरमाईऊँ बरताव कर बिकी मदद करो जिऊँ बो पाछो बिस्वास म आज्यावै। अर थे बी हुस्यार रेहज्यो कदै थे पाप म नइ पड़ जाओ। अर थे एक दुसरानै दुख की घड़ी म सारो द्‍यो, अर ज थे अंय्यां करस्यो जणा मसी का नेम-कायदानै मानबाळा होस्यो। ज कोई मिनख सोचै क, म सक्यु हूँ जदकी बो होवै क्युंई कोनी, अंय्यां को मिनख खुदनै धोको देवै ह। पण हरेक मिनखनै खुदका कामा क बारां मई जाच पड़ताळ करनी चाए। क्युं क अंय्यां करबाऊँ बिनै खुदनै गुमान करबा को मोको मिलसी। पण बिनै दुसराऊँ खुदकी बराबरी नइ करबो चाए। क्युं क हरेक मिनखनै खुदको बोज उठाणो चाए। जखा बचन की सीख सीखै ह, बिनै चाए क जखी चोखी चिजा बिकन ह, बो बानै आपका सीखाबाळा क सागै बांटै। धोको मना खाओ, परमेसरनै कोई बावळो कोनी बणा सकै, क्युं क मिनख जखो बोसी बोई काटसी। क्युं क जखो काया की बुरी इंछ्या ताँई बोवै ह बो आपकी काया की बजेऊँ नास होबाळी फसल काटसी। पण जखो पबितर आत्मा ताँई बोवै ह बो पबितर आत्मा की बजेऊँ अजर-अमर जीवन की फसल काटसी। जणा आपानै चाए क जीज्यानऊँ भला काम करबा म लाग्या रेह्‍वां। जिऊँ ठिक टेम आबा प आपानै बिको फळ मिलै। जणा जठै ताँई मोको मिलै, आपा सगळा क सागै भलाई करां, अर खास कर बिस्वासी भाईड़ा क सागै। सुणो, इब म खुद मेरै हातऊँ थानै मोटा-मोटा आंक म मांडर्यो हूँ! जखा मिनख देख-दिखावो चावीं हीं बे थानै सुन्नत करबा ताँई जोर देवीं हीं, अर बे अंय्यां इ ताँई करीं हीं, क बे मसी की सुळी का समचार की बजेऊँ सताया नइ जावीं। जदकी सुन्नत कराईड़ा खुद तो नेम-कायदानै कोनी मानै, पण थारी सुन्नत इ ताँई कराबो चावै ह क बानै थारी काया की बजेऊँ गुमान होवै क बे थारी सुन्नत कराई ह। पण परबु ईसु मसी जखो सुळी प मर्यो, मनै आ बाता क अलावा ओर कोई बात पई गुमान कोनी। अर म जगत ताँई अर जगत मेरै ताँई सुळी प मरग्यो ह। क्युं क नइ तो सुन्नत कराबाळा अर नइ सुन्नत नइ कराबाळा क्यु ह, पण जखी बात माईनो राखै ह बा ह क, सगळा नई सरस्टि ह। अर जत्ताबी इ रीतनै मानसी बापै अर सगळा परमेसर का मिनखा प इजरायल का परमेसर की दया अर स्यांती बणी रेह्सी। इब म आखरी म खेऊँ हूँ क, आगै कोई बी मनै दुखी नइ करै, क्युं क म तो मेरी काया म ईसु मसी का घाव लेर घूमर्यो हूँ। ओ मेरा लाडला बिस्वास्यो, आपणा परबु ईसु मसी की दया थारै सगळा की आत्मा प होती रेह्‍वै। अंय्यांई होवै। म परमेसर की इंछ्या गेल मसी ईसुऊँ भेजेड़ो चेलो पोलुस, इफिसुस म रेह्बाळा ईसु मसी प बिस्वास करबाळा परमेसर का मिनखानै नमस्कार मांडू हूँ। आपणा परम-पिता परमेसर अर परबु ईसु मसी कानिऊँ थानै दया अर स्यांती मिलती रेह। परमेसर अर आपणा परबु ईसु मसी का परम-पिता की जे हो, जखो इ सरस्टिनै रचबा क पेल्याई आपा बिस्वास्यानै मसी म टाळ लिओ। बो आपानै टाळ्यो जिऊँ आपा बिकी नजर्या म पबितर अर निरदोस होवां। जणाई बो ईसु मसी म आपानै ईस्बर नगरी म सगळा भात का आत्मिक आसिरबाद दिआ हीं। अर परमेसर खुदका परेम की बजेऊँ पेल्याऊँई आ ते करलिनी ही क ईसु मसी म आपा बिका गोद लियड़ा टाबर होवां, आई बिकी खुसी अर मकसद हो। परमेसर की मेमाभरी दया ताँई बिकी जे-जैकार होवै, जखी बिका लाडला बेटा म आपानै सितमित म मिली ह! ईसु मसी की खुदकी मरजीऊँ बिका लोयऊँई आपणो छुटकारो होयो ह अर पापऊँ माफी मिली ह। आ परमेसर की बोळी बडी दया ह, जिनै बो बुदी अर सगळी समजदारी क सागै बेत्ती-बेत्ती आपानै दिनी ह! परमेसर बोई कर्यो जखो बिको मकसद हो, अर बो बि भेदनै आपानै बतायो जिनै मसीऊँ पूरो करबा ताँई बो पेल्याऊँई ध्यार राख्यो हो। क सई टेम आबा प परमेसर इ मकसदनै पूरो करै, जिमै सगळी रचना जखी ईस्बर नगरी अर धरती प ह बानै एकसागै मसी म जखो सीर की जंय्यां ह भेळी करै। परमेसर सगळी चिजा बंय्यांई करी जंय्यां बो ध्यार राखी ही; अर परमेसर आपका मकसद गेल आपणानै बी मसी क सागै बिका मिनख होबा ताँई टाळ्यो जिनै बो बोळी पेल्याऊँई ध्यार राख्यो हो। जणाई म्हें मसी प आस लगाबाळा पेला हां, परमेसर की मेमा ताँई जे-जैकार करां हां। अर जद थे बिका सचा बचननै सुण्याक जखो थारा छुटकारा को चोखो समचार ह थे बी परमेसर का मिनख बणग्या, थे मसी प बिस्वास कर्या अर परमेसर थानै पबितर आत्मा जिकै ताँई बो करार कर्यो हो देर थार प मालकाना छाप लगादि। आ पबितर आत्मा इ बात की जामनी ह क परमेसर आपका मिनखा ताँई जखो बादो कर्यो ह बो पूरो होज्यासी, अर आपणानै ओ बिस्वास दिलावै क जखा बी बिका ह बानै परमेसर पूरो-पूरो छुटकारो दिलासी जिऊँ बिकी मेमा की जे-जैकार होवै। इ ताँई, परबु ईसु प थारा बिस्वास अर परमेसर का मिनखा ताँई थारा प्यार-परेम क बारां म जदऊँ म सुण्यो बि टेमऊँ, मेरो, परमेसर पितानै थारै ताँई धनेवाद देबो कोनी रूक्यो। म जद बी परमेसर क सामै जाऊँ जणा म थानै याद करबो कोनी भूलूँ। अर आपणा परबु ईसु मसी का परमेसर जखो मेमाभर्यो परम-पिता ह, बिऊँ माँगु हूँ क बो थानै बुदी देबाळी अर परगट करबाळी आत्मा दे, जिऊँ थे बिनै चोखा ढंगऊँ जाण सको। अर म आ बी माँगु हूँ क बिका च्यानणानै देखबा ताँई थारा मन की आँख्या खुलज्यावै जिऊँ थे जाणल्यो क बा कूणसी आस ह जि ताँई बो थानै बुलायो ह? अर बा आ ह क परमेसर का मिनखा म बिऊँ मिलबाळी मेमाभरी पाँती कत्ती मोकळी ह। अर थे आ जाणो की बिकी सक्‍ति जखी आपा बिस्वास करबाळा म काम करै ह बा कत्ती म्हान ह। आ सक्‍ति आपणा म बंय्यांई पूरी ताकत क सागै काम करै ह, जंय्यां बो इ सक्‍तिनै मसीनै मोतऊँ ओज्यु जीवार बिनै ईस्बर नगरी म आपकै दाणै नाकै बिठाबा ताँई काम म लिनी ही। मसी सगळा राजकरबाळा प, अधिकार्या प, उपरी सक्‍तिया प अर परबुआ प, अर हरेक नाम प राज करै ह, बिको ओदो इ दुनिया प अर आबाळी दुनिया प अधिकार राखबाळा ओदाऊँ उचो ह। परमेसर सक्यु बिका पगा तळै कर दिओ; अर बिस्वास्या की बिस्वासी मंडळी ताँई मंडळी की सगळी चिजा प बिनै सीर बणा दिओ। बिस्वास्या की बिस्वासी मंडळी मसी की काया ह, अर बिकी सक्‍ति की भरपूरी च्यारूमेर ह। पाप अर परमेसर का हुकमानै नइ मानबा की बजेऊँ थे आत्मिक रूपऊँ मरेड़ा हा। अर गेलड़ा दिना म थे इ जगत का कूगेला प चालता हा, अर सगळी सूगली ओपरी बलाया का राजा को कह्यो कर्या करता हा, आ आत्मा बा मिनखा प हक जमावै ह जखा परमेसर का हुकमानै कोनी मानै। साचली तो आ ह क आपा सगळा बी बाकी जंय्यांई पेल्या बुरी इंछ्या गेल दिन काटर्या हा जखी काया अर मन की इंछ्या होती बिनैई करर्या हा। अर आ सगळा की जंय्यांई आपा बी परमेसर का परकोपनै भोगबा जोगा हा। पण परमेसर की दया अपरम्पार, अर आपणा ताँई बिको प्यार-परेम बोळो बडो ह। अर परमेसर का हुकमानै नइ मानबा की बजेऊँ आपा तो आत्मा म मरेड़ा हा। पण मसी क जीबा की बजेऊँ बो आपानै पाप भर्या जीवनऊँ बचार आत्मा म जीवायो। आ परमेसर की दयाई ह जिकी बजेऊँ आपा बचगा। अर मसी क मरेड़ा म जी उठबा की बजेऊँ बो आपानै ईस्बर नगरी म मसी ईसु क सागै राज करबा ताँई जीवायो। ओ उपकार जखो बो मसी ईसु म आपणा प दिखायो ह, बि दया क जरिए बो आबाळा जुग-जुग का मिनखानै बिका उपकार की बोळी मुकळाईनै दिखाबो चावै ह, जिकी कोई होड कोनी कर सकै। क्युं क आ परमेसर की दयाई ह क थे बिपै बिस्वास कर्या जणा थानै बचा लिओ गयो। अर ओ थारा करमा की बजेऊँ कोनी पण परमेसर का दान की बजेऊँ होयो ह। जिऊँ इकै बारां म कोई फांप कोनी मार सकै। आपा परमेसर की बणाएड़ी रचना हां अर मसी ईसुऊँ भला काम करबा ताँई आपानै रच्यो गयो ह, जानै परमेसर पेल्याऊँई आपणा ताँई त्यार कर्यो ह। इ ताँई थे इ बातनै याद करो क थे जलमजात गैर-यहूदि हो, अर काया म मिनखा क हाता सुन्नत करवायड़ा मिनख जानै इ बात प घमंड ह थानै बिना सुन्नतहाळा बोलै ह, अर बा दिना म थे मसी अर इजरायल का मिनखाऊँ न्यारा हा। बा करारा म थारी पाँती कोनी ही जामै परमेसर बाऊँ छुटकारो करबाळा क आबा को बादो कर्यो हो, अंय्यां थे इ जगत म बेआस अर परमेसर क बिनाई जिर्या हा। पण थे जखा पेल्या परमेसरऊँ दूर हा, इब मसी ईसु का लोयऊँ कनै ल्याया गया हो। क्युं क यहूदि अर गैर-यहूदिआ क बिचमै मसी स्यांती लेर आयो अर बानै मिलार एक कर दिओ, अर आपकी काया का बलिदानऊँ बानै न्यारो करबाळी अर बैर बंधाबाळी भीतनै ढाह गेरी। अर नेम-कायदा का हुकमा अर नेम-कायदानै भुजाण दिओ अर यहूदि अर गैर-यहूदिआनै आपसरी म मिलार परमेसर का मिनख बणा दिओ। अर सुळी प ईसु मसी बैर-भावनै नास कर दोन्यानै एक काया बणार परमेसरऊँ मिला दिओ। मसी आर थानै जखा परमेसरऊँ दूर हा अर बानै जखा बिकन हा दोन्यानै स्यांती को चोखो समचार सुणायो। मसी की बजेऊँई आपा सगळा एकई पबितर आत्माऊँ परम-पिता क सामै पुग्या हां। इ ताँई इब थे परमेसर की नजर्या म बारला कोनी हो, पण परमेसर का मिनखा क सागै परमेसर का घरबार का बणग्या हो। जंय्यां एक हेली निम प चिणी जावै ह, बंय्यांई थे परमेसर का भेजेड़ा चेला अर बिकी खेबाळा मिनखा की सीख की निम प सेलाणी हो। जिकै कूणा का सिरा को भाठो खुद मसी ईसुई ह। बो मसी सगळी हेलीनै थाम राख्यो ह। अर मसी मई परमेसर सगळा बिस्वास्यानै मिलार पबितर आत्मा का बास ताँई एक पबितर मनदर बणार्यो ह। अर थेबी ईसु मसी म मनदर होबा ताँई बणाया जार्या हो जिमै परमेसर बिकी पबितर आत्मा क जरिए बास करै ह। इ बजेऊँ म, पोलुस थारै ताँई जखा गैर-यहूदि हो, मसी ईसु को दास हूँ, आई मेरै केदि होबा की बजे ह। परमेसर की दयाऊँ थारै भला ताँई जखा काम परमेसर मनै करबा ताँई दिओ ह बाकै बारां म थे पक्काई सुण्या हो। परमेसर आपका भेदनै मेर प परगट कर्यो ह। पिछै बी म, इ कागद म आ बाता क बारां म थोड़ो-भोत थानै मांड्यो हूँ। अर आनै बाचर थे जाण ज्यास्यो क म मसी का भेदानै कठै ताँई समजूँ हूँ। गेलड़ा दिना म मिनख जातनै ओ भेद कोनी बताएड़ो हो। पण इब परमेसर आनै पबितर आत्मा क हाता परमेसर का भेजेड़ा चेला अर परमेसर की खेबाळा प परगट कर्यो ह। ओ भेद ओ ह क मसी का चोखा समचारनै मानबा की बजेऊँ गैर-यहूदि मिनख यहूदि मिनखा क सागै बापोती का हिस्सेदार होर, परमेसर का आसिरबाद म सामिल होगा; अर एकई काया का अंग अर मसी ईसु म करेड़ा बादा का हिस्सेदार होगा। परमेसर की दया का दानऊँ म चोखा समचार को सेवक बण्यो अर बिकी काम करबाळी सक्‍तिऊँ मनै ओ दान मिलेड़ो ह। म परमेसर का सगळा मिनखा म सऊँ छोटो हूँ इकै पाछै बी परमेसर की आ दया मेर प होई ह जिऊँ म गैर-यहूदि मिनखानै मसी का अनमोल धन का चोखा समचार सुणाऊँ। अर परमेसर का इ भेदनै सगळानै खोलर बताऊँ क ओ भेद कंय्यांसिक काम करै ह जखो आपा सगळानै बणाबाळा परमेसर क मांयनै जुगादऊँई लुखेड़ो हो। जिऊँ परमेसर का भात-भात का ज्ञाननै बिस्वास्या की बिस्वासी मंडळी क हाताऊँ उपरी सक्‍तिया प राज करबाळा अर अधिकार्यानै बतावै। परमेसर इनै आपकी जुग-जुग ताँई रेह्बाळी मनस्याऊँ कर्यो ह जिनै बो आपणा परबु मसी ईसु की बजेऊँ पूरी कर्यो ह। ईसु मसी क सागै संगत अर बिपै आपणा बिस्वास की बजेऊँई आपा बेधड़क अर सगळा भरोसा क सागै परमेसर क सामै जा सकां हां। जणाई म थारूँ हात जो'ड़र खेऊँ हूँ क, थे हिमत मना हारो क्युं क म थारै ताँई जेळ म दुख उठार्यो हूँ, अर अ सगळी बाता थारै भला ताँई ह। भाईड़ो इ ताँई म परमेसर क आगै जखो ईस्बर नगरी अर धरती उपर का सगळा कूणबा को परम-पिता ह थारै ताँई बिऊँ अरदास करूं हूँ क, परमेसर आपकी मेमा का धनऊँ बिकाळी पबितर आत्माऊँ थानै आ सक्‍ति देवै जिऊँ थे थारा खुदका मांयला मिनख म सक्‍ति पार तगड़ा होता जाओ। अर थारा बिस्वास क जरिए मसी थारा हिया म बास करतो रेह्‍वै, थे थारै मांय प्यार-परेम की जड़ पकड़र बिपै निम धरल्यो। जिऊँ थे परमेसर का सगळा मिनखा क सागै इ बातनै समजबा की सक्‍ति पाओ क मसी को प्यार-परेम कत्तो लामो-चोड़ो, कत्तो डूँगो अर कत्तो उचो ह। अर मसी का बि प्यार-परेमनै जाण सको जखो सगळी समजऊँ नाकै ह। अर थे परमेसर का सुभाव म भर्यापूरा होज्याओ। परमेसर सक्‍तिसाली ह अर आपणा म काम करबाळी बिकी सक्‍तिऊँ जखो बी आपा अरदास कर बिऊँ माँगा अर जत्तो सोचां हां बिऊँ बी बेत्ती बो कर सकै ह। बिस्वास्या की बिस्वासी मंडळी म परमेसर की मेमा जुग-जुग होती रेह्‍वै क्युं क आ मेमा परमेसर मसी ईसु क जरिए परगट करी ह। अंय्यांई होज्यावै! इ ताँई म, जखो परबु की सेवा ताँई केदि हूँ थारूँ आ अरदास करूं हूँ क जखा हेलाऊँ थानै बुलायो गयो हो बिकै जोगीई चाल चालो, सगळी बाता म खुदनै छोटो बणार नरमाई समेत, थ्यावस राख'र प्यार-परेमऊँ एक दुसरा की सेण करो; अर मेळमिलाप का बंदणऊँ पबितर आत्मा को एको राखबा ताँई जोक्यु कर सको बो करो। क्युं क एकई पबितर आत्मा ह अर आपा बिस्वासी एकई काया हां अर आपणी एकई आस ह जी ताँई परमेसर थानै बुलायो ह। आपणो परबु मसी एक ह, जिमै आपणो एक सो बिस्वास ह अर आपा एकई बतिस्मो लेवां हां अर अंय्यां आपा सगळा एक हां, सगळा को परमेसर अर परम-पिता एकई ह जखो सगळा क उपर, सगळा क मांयनै ह अर सगळा की बजेऊँ काम करै। पण आपा सगळानै दया मिली ह अर जंय्यां मसी चायो बंय्यांई बो इ बरदाननै बाट्यो ह। इ ताँई धरमसास्तर खेवै ह क, “बो आपका बेरीयानै केदि बणार बोळो उचो चढ्यो अर आपका मिनखानै बरदान दिओ।” बिकै उचो चढबा को मतबल काँई ह? ओई क, बो उचो चढबाऊँ पेली धरती का पताळ म जार आपका बेरीयानै केदि बणायो। अर जखो उतर्यो बो ओई ह क सगळा आसमानऊँ बी उपर चढगो जिऊँ सक्यानै आपकी मोजूदगीऊँ भर्योपूरो करदे। बोई क्युंकनै तो भेजबा ताँई भेजेड़ा चेला बणार, क्युंकनै परमेसर की खेबाळा बणार, क्युंकनै चोखा समचार को हेलो पाड़बा ताँई, क्युंकनै बिस्वास्या की बिस्वासी मंडळी की रूखाळी करबाळा अर परमेसर की सीख देबाळा बणार टाळ लिआ। बो अंय्यां मसी की कायानै मजबूत करबा अर परमेसर का मिनखानै मसी की सेवा ताँई त्यार करबानै कर्यो। जद ताँई आपा सगळा बिस्वास अर परमेसर का बेटा की जाण-पिछाण म एक नइ होज्यावां, अर पक्का मिनख बणर मसी का रूप म पूरा नइ बढ ज्यावां। जिऊँ आपा टाबरपुणो नइ करां। जिऊँ आपा मिनखा का ठगपुणा अर चतराईऊँ अर बाकी भंगराबाळी सीख म आर इनै-बिनै भटकता नइ फिरां। पण इकी बजाय आपानै प्यार-परेमऊँ सचाईनै बतार सगळी बाता म मसी म बढणो चाए। आपा बिस्वास्या को सीर मसी ह, जिमै सगळी काया का न्यारा-न्यारा अंग एक सागै जुड़्या रेह्‍वै। आ सगळी काया जोड़ा की मददऊँ एक सागै जुड़री ह। इ ताँई जद काया का अ न्यारा-न्यारा अंग प्यार-परेमऊँ आपको काम करै जणा सगळी काया मजबूती क सागै बढै ह। इ ताँई परबु का नामऊँ म थानै चेतार्यो हूँ क इब आगैऊँ परमेसरनै नइ ध्यारबाळा मिनखा की जंय्यां मना जीवो क्युं क बाकी सोच बुरी ह, बाकी मती मरेड़ी ह। बे आपकी अज्ञानता अर हिया की कलडाई की बजेऊँ परमेसर का जीवनऊँ न्यारा ह। बाकी सगळी सरम-हया मरी पड़ी ह; बे खुदनै बुरी बाण म गेर राख्या हीं, अर सगळा लुचापुणा का काम बिना रोक-टोक करबा लागर्या हीं। पण मसी क बारां म थानै अंय्यांलकी सीख मिली ह के? थे थारा पुराणा सुभावनै छोडद्‍यो जखो धोको देबाळी इछ्या गेल चालर थारो नास करर्यो हो। क्युं क थे तो पक्काई ईसु क बारां म सुण्या हो अर जखो सच बिमै ह बोई थानै सीखायो गयो, अर मन आत्मा म नया बणता जाओ, अर नएड़ा सुभावनै पेरल्यो जखो सची धारमिक्‍ता अर पबितरता म परमेसर की जंय्यां ओज्यु नयो करेड़ो ह। इ ताँई झूठ बोलबो छोडर हरेक आपका संगी-साती बिस्वासीऊँ सच बोलै, क्युं क मसी म आपा सगळा एकई काया का अंग हां। थे झाळ तो काडो, पण पाप मना करो; सूरज ढळबाऊँ पेली थारी झाळ खतम होणी चाए। अर सेताननै मोको मना द्‍यो, की बो थानै पाप म गेरै। जखा चोरी करीं हीं बानै चोरी करनी छोडर भला कामा म मेनत कर खुद ताँई कमाणो चाए अर गरीबानै दान देणो चाए। कोईबी बुरी बात थारै मुंडाऊँ नइ निकळै पण दुसरा को भलो करबाळी बाता बोलो जिऊँ सुणबाळा की जुर्ता पूरी होवै अर बाको भलो होवै। परमेसर की पबितर आत्मा को निरादर मना करो क्युं क छुडाबाळा दिन ताँई आ पबितर आत्मा थारै ताँई बिकी जामनी ह, की बो थानै छुड़ासी। इ ताँई थे सगळी कड़वाट, परकोप, झाळ, कळै, दुसरा की बुराई करबाऊँ अर दुसरा की हानी करबाऊँ दूर रेह्ओ। एक दुसरा प दया कर्या करो अर जंय्यां परमेसर ईसु मसी म थारा बुरा कामा ताँई थानै माफ कर्यो ह बंय्यांई थे बी एक दुसरानै माफ करो। थे परमेसर का लाडला टाबर हो, इ ताँई परमेसर का सुभाव प चालो। अर प्यार-परेमऊँ जीवन बसर करो, जंय्यां मसी आपणाऊँ प्यार-परेम कर्यो अर परमेसर क सामै आपणै ताँई खुदकी भेंट चढा दि बिको आपणा ताँई ओ परेम चोखी सुगंद हाळी धूप की जंय्यां ह जखी परमेसरनै भावै ह। थे परमेसर का मिनख हो इ ताँई थारै म कुकरमा की, लुचापुणा की अर लोभ-लालच की चरचा बी नइ होणी चाए; अर थारा मुंडाऊँ कोई बेसरमी की, बेतुकी, बेहूदा मजाक अर जखी बाता चोखी कोनी बे नइ निकळनी चाए पण इकी बजाय थारा मुंडाऊँ परमेसर ताँई धनेवाद निकळणो चाए। थानै इ बातनै सूल जाणणोई ह क कुकरमी, सूगला काम करबाळा, अर लोभी मिनखा को जखा मूरतीपुजा करबाळा की जंय्यां हीं, मसी अर परमेसर का राज म आकी कोई पाँती कोनी। कोईबी थानै बेकार की बाताऊँ धोको नइ देदे; क्युं क आ कामा की बजेऊँ परमेसर को परकोप बिका हुकमानै नइ मानबाळा प पड़ै ह। इ ताँई अंय्यां का मिनखा को संगरो मना राखो। क्युं क थे इब अँधकार म नइ पण परबु का उजाळा म हो, उजाळो भलाई, धारमिक्‍ता अर सच जंय्यां का फळ ल्यावै ह। इ ताँई उजाळा का टाबरा की जंय्यां जीओ। परमेसरनै काँई चोखो लागै ह इकै बारां म खोज करो। अर अँधकार का बुरा कामा म सामिल मना होवो जंय्यां मिनख करै ह इकी बजाय बानै बाका बुरा कामा ताँई चेताओ। (क्युं क बाका ओलैछानै करेड़ा कामा क बारां म बात करबो बी सरम की बात ह।) पण जद सगळी चिजा उजाळा म आवै ह जणा बाकी असलियत सामनै आवै ह। क्युं क जखो सक्यानै परगट करै ह बो उजाळोई ह। इ ताँई अंय्यां खेयड़ो ह, “ओ सोबाळा, जागज्या अर मरेड़ा मऊँ जी उठ; अर मसी को उजाळो तेरै प भळकसी” इ ताँई थे ध्यान द्‍यो क कंय्यां को जीवन जीवो हो। अनाड़ी की जंय्यां मना जीओ पण बुदीमाना की जंय्यां जीवो। हरेक मोकानै सई काम म ल्यो, क्युं क दिन बुरा हीं। इ ताँई मूरख मना बणो, पण परमेसर थारूँ काँई चावै ह बिनै ध्यानऊँ समजो। दारू पीर मतवाळा मना बणो, क्युं क इऊँ मत्त मारी ज्यावै, पण इकी बजाय पबितर आत्मा म भर्यापूरा होता जाओ। भजन-किरतन अर आत्मिक गीत का सब्दाऊँ एक दुसराऊँ बतळाता रिह्यो। अर थारा सगळा हियाऊँ परबु का भजन-किरतन करता रिह्या करो। अर आपणा परबु ईसु मसी का नामऊँ परम-पिता परमेसर को सगळी बाता ताँई सदाई धनेवाद देता रह्यो। मसी को डर राख'र एक-दुसरा क बस म रह्यो। ओ लूगायो, थे थारा मोट्यारा क बस म रह्यो जंय्यां परबु क रेह्ओ हो। क्युं क मोट्यार लूगाई को सीर ह जंय्यां मसी बिस्वासी मंडळी को सीर ह अर मसीई बिस्वासी मंडळीनै छुटाबाळो ह। इ ताँई जंय्यां बिस्वासी मंडळी मसी क बस म ह बंय्यांई लूगायानै बी चोखी बाता म आपका मोट्यारा क बस म रेह्णो चाए। ओ मोट्यारो, थे बी थारी लूगायाऊँ प्यार-परेम राखो जंय्यां मसी बिस्वासी मंडळीऊँ प्यार-परेम राख'र खुदकी ज्यान बिस्वासी मंडळी ताँई दे दिनी। जिऊँ बिस्वासी मंडळीनै मसी परमेसर का बचना अर पाणी का बतिस्माऊँ धोर पबितर अर उजळी बणावै, जिऊँ बो बिनै अंय्यां की भळका मारबाळी बिस्वासी मंडळी बणार आप ताँई त्यार करै, जिमै कोईबी दाग कोनी होवै, अर नइ बिकी खाल लटकेड़ी होवै अर नइ बिमै अंय्यां की कोई दुसरी कमी होवै पण पबितर अर बेदाग होवै। मसी मंडळीऊँ परेम राखै ह, इ ताँई आ जरूरी ह क मोट्यार आपकी लूगायाऊँ अंय्यां को परेम राखै जंय्यां बो खुदकी कायाऊँ राखै ह क्युं क मोट्यार अर लूगाई एक काया जंय्यां हीं। अर जखो मोट्यार आपकी लूगाईऊँ प्यार-परेम राखै ह बो खुदऊँ परेम राखै ह। क्युं क कोईबी आपकी कायाऊँ कदैई बैर कोनी राखै पण बिनै पाळै-पोसै ह। आपा मसी की काया का अंग हां इ ताँई मसी बिस्वास्या की बिस्वासी मंडळीनै पाळै-पोसै ह। मोट्यारनै आपकी लूगाईनै पाळबो चाए इ ताँई परमेसर बोलै ह क, “मिनख आपका माँ-बापनै छोडर आपकी लूगाई क सागै रेह्सी अर बे दोन्यु एक जीव होसी।” ओ तो बोळो उंडो भेद ह, जिनै म अठै मसी अर बिस्वास्या की बिस्वासी मंडळी क बारां म बताऊँ हूँ। इ ताँई थारै म हरेक मोट्यार आपकी लूगाईनै खुदकी जंय्यां परेम करै अर लूगाया बी आपका मोट्यारा की ईज्जत करै। ओ टाबरो, परबु म थे थारा माँ-बाप की बातानै मान्या करो क्युं क थारै ताँई ओई सई ह। “बादा क सागै दियड़ा हुकमा म ओ सऊँ पेलो हुकम ह, क थे थारा माँ-बाप को मान करो। जखा आपका माँ-बाप का कह्या म चालीं हीं बा ताँई बो बादो ओ ह की, ‘बाको भलो होसी अर बे धरती प बोळा दिना ताँई जिसी।’” टाबर-टिकरा हाळो, थारा टाबरानै झाळ मना दिवाओ पण बाका चाल-चलननै सई करबा अर बिस्वास म बढबा ताँई परबु की सीख देर बानै पाळो-पोसो। ओ गुलामो, जखा मिनख इ धरती प थारा मालिक हीं बाकी सेवा सचा मनऊँ डर'र धुजता होया करो जंय्यां मानो की थे मसी की सेवा करर्या होवो। अर बडाई पाबा ताँई देख-दिखावा की सेवा मना करो, पण सगळा मनऊँ परमेसर की इंछ्या गेल मसी का गुलाम की जंय्यां बाकी सेवा कर्या करो। इ सेवानै मिनखा की नइ पण परमेसर की सेवा जा'णर राजी मनऊँ कर्या करो। याद राखो जखा चोखा काम करसी परबु मसी बा हरेकनै इनाम देसी चाएसै बो गुलाम हो अर चाएसै अजाद। ओ मालको, थारा गुलामानै धमकाबो छोडर बाकै सागै बंय्यांई बरताव करो जंय्यां बे थारै सागै करी हीं, क्युं क थानै इ बात को बेरो ह क थारो अर बाको मालिक ईस्बर नगरी म ह अर बिकी नजर्या म सगळा इकसार हीं। आखरी बात आ ह क परबु अर बिकाळी सक्‍ति म तगड़ा बणज्याओ। अर परमेसर जखी लड़ाई की पोसाक अर हतियार थानै देवै ह बानै पेरल्यो जिऊँ सेतान की कळाबाजी क सामै खड़्या रेह सको। क्युं क आ राड़ मिनखाऊँ कोनी पण उपरी सक्‍तिया का अधिकारीयाऊँ, अँधकार का हाकीमाऊँ अर बुरी आत्मा की सेनाऊँ ह। इ ताँई परमेसर का सगळा हतियार बांदल्यो जिऊँ जद बुरा दिन आसी जणा दुस्मन का वारा को सामो कर सको, अर आखीर ताँई लड़्या पाछै बी मैदान म डट्या रेह सको। इ ताँई सचऊँ कड़तु कसर, धरम की झिलम पेर, पगा म मेळमिलाप का चोखा समचार की त्यारी का बूट घालर त्यार होज्याओ, अर आ सगळा क सागै बिस्वास की ढाल लेर डट्या रेह्‍वो जिऊँ सेतान की बळती बाणानै बुत्ता सको। छुटकारा को टोप अर पबितर आत्माऊँ देयड़ी तलवार जखी परमेसर को बचन ह लेल्यो। हरेक मोका प अर सगळी बाता म पबितर आत्माऊँ अरदास करता रह्यो अर बंय्यांई सगळा परमेसर का मिनखा ताँई जी ज्यानऊँ अरदास करबा ताँई जागता रेह्ओ। अर सागै की सागै मेर ताँई बी अरदास कर्या करो क बोलबा की घड़ी परमेसर मनै अंय्यां को जोरदार समचार दे जिका भेदनै म बेधड़क होर बता सकूँ। इ चोखा समचार ताँई म राजदुत हूँ अर साँकळा म भंदेड़ो हूँ; अर अरदास करो की म इ चोखा समचार क बारा, म बेधड़क होर बोल सकूँ। म परबु की सेवा म बिस्वास जोगो दास अर आपणा लाडला बिस्वासी भाई तुखीकुसनै थारै कनै भेजर्यो हूँ, जिऊँ बो थानै सगळी बाता बतासी की म कंय्यांसिक हूँ अर काँई कर्यो हूँ जिऊँ थानै हिमत मिल सकै अर थे म्हारा हालचाल जाण सको। परम-पिता परमेसर अर परबु ईसु मसी, मसी भाई-भाणानै बिस्वास क सागै स्यांती अर प्यार-परेम देतो रेह्‍वै। अर जखा आपणा परबु ईसु मसीऊँ नइ मिटबाळो प्यार-परेम राखै ह, बा सगळा प परमेसर की दया होती रेह्‍वै। म्हें मसी ईसु का गुलाम पोलुस अर तिमूतियूस आ चिठी फलिपी नगरी म मसी क सागै मेळ राखबाळा परमेसर का सगळा मिनखा, सागै की सागै बिस्वासी मंडळी का रूखाळा अर काम म हात बटाबाळानै मांडर्या हां। था सगळा प आपणा परम-पिता परमेसर अर परबु ईसु मसी कानिऊँ दया अर स्यांती मिलती रेह। जद बी म थानै याद करूं जणा थारै ताँई परमेसर पिता को धनेवाद करूं हूँ; अर जद बी म था सगळा ताँई परमेसरऊँ अरदास करूं जणा म राजी हियाऊँ थारै ताँई अरदास करूं हूँ, क्युं क जद थे चोखा समचारनै सुण्या बि दिनऊँ लेर इब ताँई चोखा समचारनै फेलाबा म थे मेरा संगी हो। अर मनै पक्को बिस्वास ह की जखो चोखो काम परमेसर थारै म चालू कर्यो हो बो इ कामनै ईसु मसी क ओज्यु आबा का दिन ताँई पूरो कर देसी। थारै बारां म अंय्यां सोचबो मेर ताँई सई ह, क्युं क थे मेरा काळज्या म बसर्या हो। बि सोभाग म थे सगळा पाँतीवाळ हो जखो परमेसर मनै दिओ, चाएस म जद अब जेळ म हूँ अर नहिस जद म अजादिऊँ चोखा समचार क सच को सबूत देर बिनै पुक्‍ता करबा म लागर्यो हो। म मसी ईसु का हिया जंय्यां को लगाव राख'र थारै सगळा ताँई तरसर्यो हूँ, अर इ बात को गुवा खुद परमेसर ह। थारो प्यार-परेम सचा ज्ञान अर सई समज क सागै बोळो-बोळो बढतो जावै इ ताँई म अरदास करूं हूँ। जिऊँ थे घणो चोखो काँई ह इनै टाळर, मसी क ओज्यु आबा का दिन म सगळा बुरा कामाऊँ अर कळंकऊँ पबितर होज्यास्यो। धारमिक्‍ता का चोखा लखणाऊँ थारो जीवन भरज्यावै, जखो परमेसर की मेमा अर जे-जैकार ताँई ईसु मसीऊँ मिलै ह। अब मेरा लाडला बिस्वास्यो, जखी बाता मेरै सागै बिती ह बाऊँ पक्काई चोखो समचार बोळो फळ्यो ह। म चाऊँ हूँ क थे आ बातानै जाणो। इ बजेऊँ सगळा रोमी म्हेला का पेरादारानै अर दुसरा मिनखानै इ बात को बेरो पड़गो की म मसी को सेवक हूँ इ ताँई म केद म हूँ। अर म साकळा म बंदर्यो हूँ। इ बजेऊँई परबु म बिस्वास राखबाळा घणकराक भाईड़ानै घणीसारी हिमत मिली ह, अर बे चोखा समचारनै बेधड़क होर सुणार्या हीं। आ बात बी साची ह क, क्युंक ह जखा जळता-बळता अर राड़ करबा ताँई मसी को हेलो पाड़ीं हीं। बे सचा मनऊँ मसी को हेलो कोनी पाड़ै पण खुदकी गरज काडबा ताँई मसी को परचार कर मेरी केद की टेम मई बे मनै दुख देबो चावीं हीं, पण दुसरा भली मनस्याऊँ मसी को परचार करीं हीं, अ अंय्यां प्यार-परेमऊँ करै ह क्युंक अ जाणै ह क, परमेसर मनै चोखा समचारनै सबूत देर साबित करबा को काम दिओ ह। मेरै इऊँ क्युंई फरक कोनी पड़ै। चाए बुरी मनस्याऊँ अर चाए भली मनस्याऊँ आ सगळी तर्याऊँ मसी कोई परचार होयो ह अर आ बाताऊँ म राजी हूँ अर राजीई रेहस्युं। क्युं क म, इ बातनै आछ्यां जाणू हूँ क, थारी अरदास अर ईसु मसी की पबितर आत्मा कानिऊँ मिलेड़ा साराऊँ म केदऊँ छुट जास्युं। मेरी दिली इंछ्या अर आस ह क, म कदैई मेरा काम म सरमिंदा नइ होऊँ, पण हर टेम अर खासकर इब म हिमतऊँ भरज्याऊँ जिऊँ चाएस म जीऊँ अर मरूँ बस मेरी काया क जरिए मसी की मेमा होवै। मेर ताँई जिबो तो मसी ह, अर मरबो सऊँ चोखो। पण ज म काया म जीतो रिह्यो जणा म बोळा फायदा देबाळा काम कर सकूँ हूँ, आमऊँ कूणसी बातनै टाळबो चाए आ म कोनी जाणू। म आ दो मता म अळजर्यो हूँ। इ कायानै छोडर मसी क सागै रेह्बो तो म बोळो चाऊँ हूँ क्युं क ओ मेर ताँई घणोई चोखो ह; पण काया म मेरो जिबो थारै ताँई जरूरी ह। म पक्कोई आ जाणू हूँ क म जिंदो रेहस्युं। अर थारा बिस्वास अर आनंदनै बढाबा ताँई थारै सागैई रेहस्युं। अर थारै कनै ओज्यु आबा क बाद मेरी बजेऊँ थानै मसी ईसु प घमंड करबा की ओर बी बोळी बजै मिलसी। जणा मोटी बात आ ह क थारा जीवन की उठ बेठ खाली मसी का चोखा समचार जोगी होणी चाए; जिऊँ म थारै बारां म आई सुणू क थे एकई मकसद ताँई खड़्या हो अर एकई मनस्या राख'र चोखा समचारऊँ मिलेड़ा बिस्वास ताँई कड़ी मेनत करतार्यो हो, चाए म थानै आर देखूँ चाए नइ देखूँ, थे थारा बेरीयाऊँ कंय्यांई कोनी डरो ओ बा ताँई इ बात को सबूत ह क बे हार ज्यासी अर थे जीत ज्यास्यो, क्युं क आ जे परमेसर थानै देवै ह। क्युं क मसी प बिस्वास करबा को सोभागई नइ पण बि ताँई दुख उठाबा को बी सोभाग थानै दियड़ो ह; क्युं क थे बी बाई राड़ लड़र्या हो जखी म लड़तो आयो हूँ इनै थे देख्या बी हो अर जंय्यां थे सुणो हो क इब ताँई बी, म इनै लड़र्यो हूँ। मसी म ज थानै हिमत मिली हो, बिका प्यार-परेम म थानै स्यांती मिली हो, पबितर आत्मा क सागै थारो संगरो ह अर थारै म नरमाई अर दया ह, जणा म थारूँ आ चाऊँ क थे एक जंय्यां का बिचार, एक जंय्यां को प्यार-परेम, एक जंय्यां की आत्मा अर मनस्या राख'र मनै ठाडो राजी कर द्‍यो। खुदकी गरज काडबा अर बुरी इंछ्या राख'र फांप मारबा ताँई क्युंई मना करो, पण छोटा बाप का बणर एक-दुसरानै खुदऊँ चोखो मानो। अर हरेक खुदका फायदा किई नइ पण दुसरा की बी चिंत्या राखो। जंय्यां को सुभाव मसी ईसु को हो, बंय्यांकोई थारो सुभाव होणो चाए: बो परमेसर का सुभाव म होर बी परमेसर क बराबर होबा को हक कोनी जतायो। पण सक्यु तज'र गुलाम को सुभाव धर'र मिनख रूप म जलम लिओ। अंय्यां मिनख होर बो खुदनै अत्तो झुका लिओ अर मरबा ताँई ओडाया गेल चालतो रिह्यो अर अठै ताँई सुळी की मोतनै बी गळै लगाली। इ बजेऊँ परमेसर बिनै सबऊँ उची झघा प बिठायो अर सगळा नामा म सबऊँ बडो नाम दिओ। जिऊँ ईसु का नाम को आदरमान करबा ताँई ईस्बर नगरी का, धरती का अर धरती तळै का सगळा गोडा टेकींगा, अर परम-पिता परमेसर की मेमा करबा ताँई हरेक खुदकी जबानऊँ मानिंगा क ईसु मसीई परबु ह। मेरा लाडलो, इ ताँई जंय्यां थे सदाऊँ मेरा हुकमानै मान्या हो जद म थारै सागै हो, ओ ओर बी जरूरी ह क, इब म थारै कनै कोनी हूँ जणा बी थे मेरा हुकमानै मानो। अर परबु का डर म धुजता होया थारा छुटकारानै सूल पूरो करो; क्युं क बो परमेसरई ह जखो थारै म काम करै ह, अर बोई थानै बिका मकसदनै पूरो करबा की इंछ्या अर सक्‍ति देवै ह। सक्यु बिना बड़बडाट क अर बिना जिदा-जादि क कर्या करो, जिऊँ थे इ जगत म रेह्बाळा कुटिचर अर पापी मिनखा म परमेसर का खरा अर बिना बलेम हाळा सायर टाबर बण सको। अर आसमान म तारा जंय्यां चिलकै ह बंय्यां थानै बी जगत का मिनखा म चिलकणो चाए, अर बानै जीवन को चोखो समचार सुणाणो चाए जणा आ सगळी बाता ताँई मनै मसी क ओज्यु आबा का दिन म थार प फकर होसी क चोखा समचारनै फेलाबा ताँई मेरो काम अर भाग-दोड़ अळी कोनी गई। थारो बिस्वास परमेसर क सामै बलि अर याजक की सेवा जंय्यां को ह अर इ बलि प ज मेरो लोय बी चढाणो पड़ै जणा म इ बात ताँई राजी हूँ अर आ खुसी म था सगळा क सागै बाटर्यो हूँ। बंय्यांई थानै बी राजी होणो चाए अर थारी खुसी को बाटो मेरै सागै करबो चाए। ज परबु ईसु चायो तो, तिमूतियूसनै थारै कनै बेगोसो भेजबा की म आस राखूँ हूँ जिऊँ थारा समचार सुणर मेरी खुसी ओर बढ जावै। बोई ह जखो मेरो सो मन राखै ह अर सचा मनऊँ थारै भला की सोचै ह। क्युं क बाकी सगळा ह जखा खुदको मतबल काडबा ताँई लाग्या रेह्‍वै ह, ईसु मसी का कामा की बानै जमाई चिंत्या कोनी। जंय्यां बेटो बाप क सागै मिलर मेनत करै ह बंय्यांई तिमूतियूस मेरै सागै मिलर चोखा समचारनै फेलाबा ताँई मेनत करी ह अर बिकी काबलीयतनै थे खुदई चोखी तर्या जाणो हो। अर जंय्यांई मनै इ बात को बेरो पड़सी क मेरै सागै केद म काँई होबाळी ह बंय्यांई म बेगोसोक बिनै थारै कनै भेजबा की आस राखूँ हूँ। अर परबु प मनै पक्को भरोसो ह क म बी बेगोई थारै कनै आजास्युं। आपणो बिस्वासी भाईड़ो इफरूदितुस जखो मेरै सागै काम करबाळो, मेरी जंय्यां लड़बाळो, अर सेवा म थारै कानिऊँ मेरी मदद करबा ताँई थारो भेजेड़ो डाकीयो अर सेवक ह बिनै थारै कनै भेजबो म जरूरी समजूँ हूँ। बो थानै देखबा की चिंत्या राखै ह। अर बो बोळो उदास ह, क्युं क थे बिकी बिमारी क बारां म सुण्या हो। बो साच्याई बिमार हो अठै ताँई बो मरबाळोसो होगो हो पण परमेसर बिकै सागै-सागै मेर प बी दया करी जिऊँ मनै दुख प दुख नइ होवै। बिनै थारै कनै भेजबा की म बोळी इंछ्या राखूँ हूँ जिऊँ बिनै पाछा देखर थे राजी होज्याओ अर इऊँ मेरो बी दुख कट ज्यासी। परबु म राजी होर भाई-भाई की जंय्यां बिऊँ मिलीयो अर बिकै जंय्यां का मिनखा को मान करिओ। क्युं क मसी का काम ताँई बो आपकी ज्यान प खेलर मोत क सांकड़ै आग्यो हो, जिऊँ जखी सेवा थारै कानिऊँ मेरी कोनी हो सकी बिनै बो पूरी करी। आखीर म, मेरा लाडला बिस्वास्यो, परबु म राजी होता रह्यो। थानै अ बाता ओज्यु मांडबा म मनै तो कोई आट कोनी, अर ज म अंय्यां मांडूँ बी हूँ जणा आऊँ थारो बचावई होसी। बा कमिणा, गंडक्ड़ाऊँ ध्यानऊँ रेह्ओ जखा चोखा समचारऊँ छेड़-छाड़ करीं हीं। बुरा काम करबाळा अर काया की सुन्नत करबा प जोर देवीं हीं बाऊँ ध्यानऊँ रेह्ओ। क्युं क सची सुन्नतहाळा तो आपाई हां बे कोनी, क्युं क आपा परमेसरनै बिकी आत्माऊँ ध्यारां हां अर आपा इ जगत की बाता प नइ पण मसी ईसु प गुमान करां हां। म अंय्यां की बाता प घमंड कर सको हो, ज कोई सोचै ह की बो जगत की बाता प घमंड कर सकै ह जणा मेरै कनै आपै घमंड करबा ताँई बिऊँ बी बडी बजै ह। म जद आठ दिन को हो जणा मेरी सुन्नत होई ही। म जलमजात इजरायली, बिन्यामीन का कूणबा को अर इबरानी माँ-बापऊँ पैदा होयड़ो सागे इबरानी हूँ। अर जठै ताँई नेम-कायदा म लगाव राखबा की बात ह जणा म फरिसी हूँ। ज मेरा जोस क बारां म सुणबो चाओ जणा म बिस्वासी मंडळीनै दिन घालबाळो; अर नेम-कायदा का हुकमानै मानबाळो धरमी अर निरदोस आदमी हो। पण जखी-जखी बाता प मनै गुमान हो, बा बातानै म मसी ताँई ख्याई जोगी कोनी समजूँ। अर म आ बातानैई नइ पण सगळी बातानै मेरा परबु मसी ईसुनै जाणबा की बडी बात क सामै घाटा की समजूँ हूँ। अर मसी ताँई म आनै कुड़ो-करकट जा'णर बगा दिओ जिऊँ म मसीनै पाऊँ अर म सगळो को सगळो बिको होज्याऊँ। म खुदकी धारमिक्‍ता की बजेऊँ धरमी कोनी हूँ जखी नेम-कायदा म मंडेड़ा धरम का काम करबाऊँ आवै ह, पण बि धारमिक्‍ता की बजेऊँ धरमी हूँ जखी मसी म बिस्वास की बजेऊँ परमेसर कानिऊँ आवै ह अर ओ बिस्वास करबाऊँई होवै ह। म आ आस राखूँ हूँ क म बी मर'र मोतऊँ ओज्यु जिंदो हो जास्युं। अर इ आस ताँई म मसीनै जाणबो चाऊँ हूँ अर बिकी बि सक्‍तिनै म्हेसुस करबो चाऊँ जिऊँ बो मर्या पाछै ओज्यु जिंदो होगो हो। अर म बिकीसी पिड़ा उठार बिकासा मरबा म बिको संगी होबो चाऊँ हूँ। म ओ दावो कोनी करूं क म सक्यु पूरो कर करालिओ अर सगळो सिद होगो। पण म बि इनामनै जीतबा ताँई कड़ी मेनत करर्यो हूँ, जिताँई मसी ईसु मनै पेल्याऊँ खुद ताँई जीत लिआ ह। मेरा लाडला बिस्वास्यो, मेरी अंय्यां की भावना कोनी क म जीतगो; पण ओ एक काम करूं हूँ क गेलड़ी बातानै भूलर आगै की बाता ताँई जी जान लगाऊँ हूँ, जिऊँ म निसाना कानि सिदो-सिदो भागर बो इनाम जीतल्युँ जिताँई परमेसर मसी ईसु की बजेऊँ मनै ईस्बर नगरी जीवन ताँई बुलायो ह। आपा सगळानै जखा आत्मा म पक्का हां अंय्यां कोई एकसो बिचार राखबो चाए पण ज थारै मऊँ क्युंक न्यारा बिचार राखै ह जणा बिनै परमेसर थार प परगट कर देसी। जखो बी हो आओ ल्यो आपा एकसा नियमनै मानर आगैऊँ-आगै बढता जावां जिनै इब ताँई मानर आया हां। मेरा लाडला बिस्वास्यो, मेरी जंय्यां की चाल चालो, अर बानै बी ध्यानऊँ देखो जखा अंय्यां किई चाल चालै ह जंय्यां की थे म्हारै म देखो हो। म थानै पेल्या बी कई बार आ बात बता दिनी ही अर इब बी म थानै आसुआ क सागै ओज्यु बताऊँ हूँ, क अंय्यां का बोळा हीं जखा सुळी प मसी की मोत का बेरी बणर जीवै ह। अर बे नरक म नास होबा जार्या हीं। क्युं क बाको पेटई बा ताँई परमेसर ह। जखी बाता प बे घमंड करीं हीं बा बाता प बानै सरम आणी चाए अर बे संसार की चिजा क बारां मई सोचीं हीं। पण आपा तो ईस्बर नगरी का रेह्बाळा हां, अर आपणानै बचाबाळा परबु ईसु मसी की जखो ईस्बर नगरीऊँ आबाळो ह आस लगार बाट उडिकर्या हां। बो सगळी चिजानै आपकै बस म करबाळी खुदकी सक्‍तिऊँ आपणी माड़ी अर नसबर कायानै बदलर खुदकी मेमाभरी काया जंय्यां की कर देसी। मेरा लाडला बिस्वास्यो, अर मेरा काळज्या का टुकड़ो थारै ताँई म तरसू हूँ। थे मनै राजी करो हो अर मनै थार प गुमान ह। मेरा लाडलो, थारो जीवन परबु म अंय्यांई मजबूत बण्यो रेह्णो चाए। म यूओदिआ अर सन्तुखेऊँ अरदास करूं हूँ क दोन्यु जणी परबु म आपसरी म मेळमिलाप कर भाणा की जंय्यां रेह्‍वै। अर मेरा बिस्वासी सिरी सुजुगे, म तेरूँ बी अरदास कर आ चाऊँ हूँ क जखी लूगाया मेरै सागै चोखा समचारनै फेलाबा म क्लेमेंस अर मेरा ओर बी सिर्या क सागै मेनत करी ही बाको सागो दिआ कर क्युं क बाको नाम बी जीवन की पोथी म मंडेड़ो ह। परबु को संगरो राख'र सदाई राजी-खुसीऊँ रेह्ओ, म ओज्यु थानै खेऊँ हूँ, राजी-खुसीऊँ रेह्ओ। सगळा ताँई नरमाई को भेवार राखो। क्युं क परबु बेगोई ओज्यु आर्यो ह। कोईबी बात की चिंत्या मना करो, पण परमेसर को सगळी बात ताँई दिलऊँ धनेवाद करता होया थानै जखो चाए ह बि ताँई बिऊँ अरदास अर बिणती कर माँगता रह्यो। जणा थानै परमेसर कानिऊँ बा स्यांती मिलसी जखी मिनखा की सोचऊँ बोळी परै ह अर आ स्यांती थारा दिल अर हिया की मसी ईसु म रूखाळी करसी। मेरा लाडला बिस्वास्यो, जखी बाता सची, आदरमान करबाळी, धारमिक, पबितर, प्यारी, सदगुण, चोखी, बडाई जोगी ह बा बाताऊँ थे थारी बुदीनै भरल्यो। जोक्यु थे मेरी बाता अर कामाऊँ सीख्यो अर पायो ह बानै लागू कर्या करो जणा स्यांती देबाळो परमेसर थारै सागै रेह्सी। म परबु म बोळो राजी हूँ क अत्ता दिना पाछै थे ओज्यु मेरी चिंत्या करी; म आ कोनी खेऊँ क थे मेरी चिंत्या करबो छोड दिआ क्युं क म जाणू हूँ क थानै इनै दिखाबा को मोको कोनी मिल्यो। अर मनै कोई चिज की जुर्त ह इ ताँई अ बाता कोनी बोलर्यो, क्युं क मेरै कनै झिसो बी ह बिमैई सबर करबो म सीख्यो हूँ। घाटा-मोसी म कंय्यां अर बोळो सारको होबा म कंय्यां जीणो चाए म आ बात सूल जाणू हूँ, कद बी अर कठै बी चाए म धापेड़ो हो अर चाएस म बास्यो हो, चाए मेरै कनै थोड़ो हो चाएस बोळो सारको हो म ओ भेद सीख लिओ क बिमै सबर राखूँ। अर मसी कानिऊँ मिलेड़ी सक्‍तिऊँ म हरेक दसा को सामनो करबा की हिमत राखूँ हूँ। पण ओ बोळो चोखो हो क मेरा दुख म थे मेरो सागो दिओ। फलिपीयो, थे इ बातनै सूल जाणो हो क, चोखा समचार को परचार करबा हाळा सरू का दिना म जद म थारा मकीदुनिया परदेसऊँ रवाना होयो हो जणाऊँ थारीई बिस्वासी मंडळी एक अंय्यां की ही जखी मेरी मदद करी; अर थेई एक अंय्यां का हा जखा मेरा फायदा अर घाटा-मोसी म मेरो सागो दिओ हो। अर जद मनै थिसलूनिकी म बी पिसा-टक्का की जुर्त पड़ी ही जणा बी थे ओज्यु मेर ताँई क्युंना क्युं भेजता हा। इको मतबल ओ कोनी क मनै दान चाए; पण म थारी बही म बढतो होयो फाईदो देखबो चाऊँ हूँ। मेरै कनै थारो देयड़ो सक्यु ह अर जुर्तऊँ बी बेत्ती ह: अर जखी चिजा थे ईफरदितुस क हाता मनै भेजी बे मनै मिलगी अर बे मिठी अर खुसबोई देबाळी भेंट ह जखी लेबा जोगी अर परमेसरनै राजी करबाळा बलिदान जंय्यां की ह। अर बिका सगळा भर्यापूरा धन क सागै मेरो परमेसर मसी ईसु क हाता थारी सगळी जुर्तानै पूरी करसी। आपणा परमेसर अर परम-पिता की मेमा जुग-जुग होती रेह्‍वै। अंय्यांई होज्यावै। सगळा परमेसर का मिनखानै जखा मसी ईसु को संगरो राखै ह बानै मेरो जे मसी की। अर जखा भाईड़ा मेरै सागै अठै ह बा कानिऊँ थानै जे मसी की पुगै। परमेसर का सगळा मिनख जखा खासकर रोमी समराट का महल म काम करबाळा हीं बाकै कानिऊँ बी थानै जे मसी की पुगै। आपणा परबु ईसु मसी की दया थारै सगळा की आत्मा क सागै बणी रेह्‍वै। म परमेसर की इंछ्या गेल मसी ईसुऊँ भेजेड़ो चेलो पोलुस अर आपणो बिस्वासी भाईड़ो तिमूतियूस आ चिठी कलुसीया नगरी म रेह्बाळा मसी प बिस्वास करबाळा बिस्वास जोगा परमेसर का मिनखानै मांडर्या हां। था सगळा प आपणा परम-पिता परमेसर की दया अर स्यांती होती रेह। म्हें जद बी अरदास करां हां, जणा सदाई आपणा परबु ईसु मसी का परम-पिता परमेसरनै थारै ताँई धनेवाद देवां हां, क्युं क थे मसी ईसु प बिस्वास अर सगळा परमेसर का मिनखाऊँ प्यार-परेम राखो हो, आ बाता क बारां म म्हें सुण्या हां। अंय्यां बि आस करेड़ी चिज की बजेऊँ होयो ह जखी थारै ताँई ईस्बर नगरी म धरेड़ी ह। अर जिकै बारां म थे पेल्याऊँई चोखा समचार जखो सचो ह बिमै सुण लिआ हो। चोखो समचार सगळा जगत म फळर्यो-फुलर्यो अर फेलर्यो बी ह। बंय्यांई जद थे परमेसर की दया क बारां म सुण्या अर सचमई बिनै समज्या हा जदऊँ लेर थारै म बी चोखो समचार फळर्यो-फुलर्यो अर फेलर्यो बी ह। आपणो लाडलो भाई इफरास, जखो आपणै ताँई मसी को संगी बिस्वास जोगो दास ह बिऊँ थानै परमेसर की दया की सीख मिली ही। पबितर आत्मा थानै परेम करबाळो हियो दिओ ह बिकै बारां म बो म्हानै बतायो ह। इ बजेऊँ जनाड़ैऊँ म्हें थारै बारां म सुण्यो हो थारै ताँई अरदास करबो कोनी छोड्यो। म्हें अरदास करां हां क परमेसर थानै बिकी इंछ्या का गेरा ज्ञान अर बि सगळी बुदी अर समजऊँ भरै जखी आत्मिक ह। जिऊँ थे परबु जंय्यां चावै ह बंय्यां जी सको अर हर बाता म सदाई परबु मसीनै राजी राख सको। थारै जीवन म भला कामा का फळ लागै अर थे परमेसर का ज्ञान म दिन-दिन बढता रह्यो। बो थानै आपकी मेमाभरी सक्‍तिऊँ मजबूत बणावै ह जिऊँ थे थ्यावस राख'र सक्यु सेह सको। अर राजी-खुसीऊँ परम-पितानै धनेवाद देता रह्यो, बो थानै इ जोगो बणायो ह क उजाळा का राज म जोक्यु परमेसर आपका मिनखा ताँई धर राख्यो ह बिमै थारी पाँती होवै। परमेसर आपणानै अँधकार की सक्‍तिऊँ छुटार आपका लाडला बेटा क राज म बाड़्यो ह। बिका बेटा की बजेऊँ आपणानै छुटकारो मिल्यो ह मतबल आपणा पाप की माफी। दिखबाळो ईसु मसी नइ दिखबाळा परमेसर की जंय्यां ह। बो सगळी चिजा म पेलो अर सगळी सरस्टिऊँ बोळो म्हान ह। बिऊँई परमेसर सगळी चिजा बणायो चाए बे ईस्बर नगरी अर धरती की, दिखबाळी हो अर नइ दिखबाळी उपरी सक्‍तियानै मिलार, चाए राजा हो चाए म्हराजा, चाए राजकरबाळो हो चाए कोई अधिकारी सक्यु बिऊँई रचायो गयो ह अर बि ताँई रचायो गयो ह। सगळाऊँ पेल्या परमेसर क सागै मसी हो अर मसी की सक्‍तिऊँई सगळी चिजा बणी रेह्‍वै ह। इ काया रूपी बिस्वासी मंडळी को सीर अर जीवन की सरूआत बोई ह। अर मरेड़ा मऊँ जी उठबाळा म पेलीपोत को बोई ह, इ बजेऊँ सगळी बाता म पेली झघा बिनैई मिलै। क्युं क परमेसर की खुसी आ ही क बिका सगळा का सगळा गुण बिमै बास करै। अर बिऊँई परमेसर सगळा ब्रह्माण्डऊँ मेळमिलाप करबो चायो, बा सगळाऊँ बी जखा ईस्बर नगरी अर धरती का ह। बिकाळा लोयऊँई परमेसर मेळमिलाप करवायो जिनै मसी सुळी उपर बहायो हो। बो बी एक टेम हो जद थे थारा बुरा बिचार अर बुरा कामा की बजेऊँ परमेसरऊँ आंतरै हा अर बिका बेरी हा। पण इब, हाड-मास की काया म बिकी मोतऊँ परमेसर थारूँ बी मेळमिलाप कर लिओ। जिऊँ थानै पबितर, बिना कळंक अर निरदोस बणार आपकै सामै लेर आवै। ओ जणाई हो सकै ह जद थे बिस्वास म एक झघा अर अटल बण्या रह्यो अर जि चोखा समचारनै थे सुण्या हो बिऊँ मिलेड़ी बि आसनै मना तजो। ओ बोई चोखो समचार ह जिको म पोलुस गुलाम बण्यो हूँ अर इकी इ जगत का सगळा मिनखानै सीख दिनी गई ह। मसी की सेवा करतो होयो म थारै ताँई दुख उठाबानै राजी हूँ, अर म मसी की काया मतबल बिस्वास्या की बिस्वासी मंडळी ताँई मसी का सेवका की पिड़ानै भोगर्यो हूँ। थारै भला ताँई परमेसर मनै जखो हुकम दिओ हो, बि बजेऊँई म बिस्वास्या की बिस्वासी मंडळी को दास बणायो गयो हूँ। जिऊँ म परमेसर का चोखा समचार को भरपुरीऊँ हेलो पाड़ूँ। ओ चोखो समचार भेद भर्यो सच ह जखो जुगादऊँई सगळी पिड्या की आँख्याऊँ ओला म हो। पण इब परमेसर का मिनखा प इनै परमेसर कानिऊँ परगट कर दिओ गयो ह। परमेसर आपका टाळेड़ा मिनखा प बि भेदभर्या सतनै परगट कर्यो जिकी बो मनस्या बणा राखी ही ओ सत बोळो मेमाभर्यो ह, अर ओ सगळा ताँई ह। ओ भेद भर्यो सत ओ ह क, मसी गैर-यहूदि मिनखा म बी रेह्‍वै ह जखो मेमा की आस ह। म्हें मसी को परचार कर हरेक मिनखानै चितावां अर सगळा ज्ञानऊँ बानै सीखावां, जिऊँ हरेक मिनखनै मसी म सिद कर परमेसर क सामनै हाजिर कर सकां। इ ताँई तो म, मेर म दम क सागै काम करबाळी बिकी सक्‍तिऊँ कड़ी मेनत करर्यो हूँ। म चाऊँ क थे इ बातनै जाणो क, म थारै ताँई, लोदिकीया नगरी म रेह्बाळा अर बा सगळा ताँई जाऊँ मेरो आमनो-सामनो कोनी होयो, कत्ती चिंत्या राखूँ हूँ। ओ म इ ताँई करूं हूँ क, बाका हिया म हिमत बंधै अर बे आपसरी का प्यार-परेम म बंद जावै, अर बाकन मोकळी पक्की समज होवै जखी परमेसर पिता का भेदनै सूल जाणबाऊँ आवै ह। ओ भेद मसी ह जिनै परमेसर खोल्यो ह। मसी म सगळा ज्ञान अर बुदी को खजानो लुखेड़ो ह। अंय्यां म इ ताँई बोलुँ हूँ क कोई थानै आपकी मिठी-मिठी बाताऊँ धोको नइ दे सकै। बंय्यां तो म कायाऊँ थारूँ दूर हूँ पण आत्माऊँ थारै कनै हूँ, म राजी हूँ अर सुणर्यो हूँ क थे सई ढंगऊँ हो अर मसी म थारो बिस्वास मजबूत ह। इ ताँई जंय्यां थे मसी ईसुनै परबु मान्यो ह, बंय्यांई बिमै बण्या रह्यो। अर जंय्यां थानै सीखायो गयो ह बंय्यांई थारी जड़ानै बिमै फिलार बढता जाओ। बिपै थारा जीवना की निम गेरो। अर बिस्वास म पक्का होर बिको धनेवाद करता रेह्ओ। सचमई मसी ईसु जखो मिनख बणर आयो बिमै परमेसर को सगळो सुभाव भरपूरी क सागै बास करै ह। इ ताँई थे बेमतबल की जिरै-बाजीऊँ समळर रेह्ओ कदै कोई थानै आको गुलाम नइ बणाले क्युं क अ मसी कानिऊँ नइ पण मिनखा का रिती-रिवाजा अर जगत प राज करबाळी आत्मा कानिऊँ आवै ह। अर बिमैई थे भर्यापूरा हो, जखो सगळी राज करबाळी अर अधिकार राखबाळी सक्‍तियाऊँ बोळो बडो ह। थारा खुदका पापी सुभाव का छुटकारा ताँई थारी सची सुन्नत मिनखा क हाताऊँ नइ पण मसीऊँ करेड़ी ह। अर जद थे बतिस्मो लिआ जणा मसी क सागै गाड्या गया हा अर परमेसर की काम करबाळी सक्‍ति प थारा बिस्वासऊँ ओज्यु मसी क सागै जीवाया गया हा। जि मसीनै परमेसर मरेड़ा मऊँ ओज्यु जीवायो हो। मसी प बिस्वास करबाऊँ पेल्या थे थारा पाप की बजेऊँ आत्मा म मरेड़ा अर बिना सुन्नतहाळा हा। पण इब परमेसर थानै मसी क सागै जीवायो अर सगळा पापऊँ आपणानै माफ कर दिओ; अर बि आदेसनै जखो आपणै नाम अर खिलापत म हो बिनै भुजाण दिओ अर ईसुनै सुळी प किलाऊँ जड़र आपणै सामैऊँ बि लेखनै हटा दिओ, अर राज करबाळा अर उपरी सक्‍तिया का अधिकारी का हतियार खोसर सुळीऊँ बाको चोड़ै-धाड़ै तमासो बणायो अर बानै आपकै गेल कर जीत को जुलस काड्यो। इ ताँई खाबो-पीबो, तिहवार, पुन्यु अर अरामहाळा दिन क बारां म बताबाळा नियम सदाई कोनी बण्या रेह्‍वै अर अ रिती-रिवाज छाया जंय्यां का हीं पण सचाई तो मसी मई ह इ ताँई ज कोई थार प आ बाता की बजेऊँ बलेम लगावै जणा बिऊँ दुखी मना होवो। जखो मिनख देख-दिखावा की नरमाई बरतै अर ईस्बर नगरी दुतानै पूजबा को काम करै ह बिनै थारा इनाम पाबा म रोड़ो मना बणबा द्‍यो। अंय्यांलको मिनख सदाई बा दिव्य दरसावा की फांप मारतो रेह जखा बो देख्या हा अर बो आपका अर मिनखा का बिचार म झूठोई गुमान म फुल्यो रेह्‍वै ह, अर अंय्यांलको मिनख मसी म कोनी बण्यो रेह। मसी बिस्वासी मंडळी को सीर ह। मसी का बसऊँई सगळी काया रूपी बिस्वासी मंडळी पळै अर जोड़ अर नसाऊँ मिलर जंय्यां परमेसर चावै ह बंय्यांई बढती जावै। थे तो मसी क सागै मरेड़ा हो अर थानै जगत प राज करबाळी आत्मा क कनैऊँ छुडायड़ो ह। जणा पाछै थे आ जगत का मिनखा की जंय्यां क्याले जीओ हो? थे जगत का अंय्यांलका नियमानै क्याले मानो हो? जंय्यां, “इनै हातऊँ नइ पकड़णो, इकै कोनी अड़बो, इनै कोनी खाणो” अ सगळी चिजा खतम होबाळी चिजा हीं, अर अ मिनखा का आदेस अर सीख ह। ईस्बर नगरी दुतानै पूजबो, आपकी कायानै दुख देबो, देख-दिखावा की नरमाई अ मिनखा का बणाएड़ा झूठा नियम, ज्ञान की बाता तो लागै पण काया की बासनानै रोकबा ताँई अ क्युंई फाईदो कोनी करै। मसी मरेड़ा मऊँ ओज्यु जीवायो गयो इ बजेऊँ थे आत्मा म जीवाया गया हो। इ ताँई थे ईस्बर नगरी हाळी चिजानै टोल्यो। जठै मसी परमेसर का दायणै हात कानि बिका सिंघासन प बिराजर्यो ह। थे तो आत्मा म मरेड़ा हा पण इब थारो जीवन मसी क सागै परमेसर म लुखेड़ो ह। अर जद बो परगट होसी जणा थानै बी बिकै सागै बिकी मेमा म परगट कर्यो ज्यासी। थारा जीवना की निम मसी ह। इ ताँई थे धरती हाळी चिजा प नइ पण ईस्बर नगरी हाळी चिजा प हियो लागाओ। इ ताँई थारै मांयनै जोक्यु दुनियादारी की इछ्या गेल काम करै ह बानै मार द्‍यो, जंय्यां मुंडा काळा होबाळा नाजायज कुकरम बासना भर्या काम, बुरी इंछ्या अर लोभ-लालच जखो परमेसर की नजर्या म बुरो ह अठै ताँई की मूरती पूजा की जंय्यां ह। जखा आ कामानै करीं हीं बापै परमेसर को परकोप पड़ै ह। अर बो बी एक टेम हो जद थे बी आ बाता क गेल चालता हा अर अंय्यांई बुरी-बुरी बाता म जिर्या हा। पण इब थे आ सगळी चिजा क सागै, लाल-तातो होबो, दांत पिसबो, बैर बांदबो, दुसरा की बुराई करबो अर मुंडाऊँ गाळ्यां बकबानै छोड द्‍यो। आपसरी म झूठ मना बोलो क्युं क थे थारा पुराणा सुभावनै जिमै बुरी बाण ही बिनै छोड दिओ। अर नएड़ा सुभावनै ध्यार लिओ ह। अर थे परमेसर का गुण अर बिका सगळा ज्ञान म दिन-दिन बढता जाओ। अर इब कोई यूनानी अर यहूदि, सुन्नत हाळो अर बिना सुन्नत हाळो, बिना लोतर का, कुजात, गुलाम अर अजाद म कोई अंतर कोनी ह पण मसी सक्यु अर सगळा म ह। थे परमेसर का लाडला, पबितर अर टाळेड़ा मिनख हो। इ ताँई तरस, दया, नरमाई अर थ्यावस का गाबा पेरल्यो अर मन म बडा मना होवो। याद राखो परबु थारा पापनै माफ कर्यो ह, इ ताँई एक दुसरा की सिकायत करबा की बजाय बिनै सेल्यो अर एक दुसरानै माफ करो। अर आ सगळा लखणा म प्यार-परेमनै बी सामिल करल्यो जखो सगळी चिजानै आपसरी म कोनी टूटबाळा पटा म बांदै ह। परमेसर थानै एक सागै एकई काया म स्यांतीऊँ रेह्बा ताँई बुलायो ह, जणा इब थे मसी जखी स्यांती थानै दि ह बिनै थारा हिया म राज करबा द्‍यो। अर परमेसर को धनेवाद करता रह्यो। सगळी बुदी क सागै एक दुसरानै सीखाओ अर चेताओ। अर थारा हियाऊँ परमेसर ताँई सगळा भजन अर आत्मिक गुणगान गाता रह्यो अर धनेवाद देतार्यो। अंय्यां कर मसी का बचनानै थारा हिया म पूरो-पूरो बसबा द्‍यो। मेरो खेबा को मतबल ओ ह क, थे जोक्यु करो अर बोलो बो परबु ईसु मसी क नामऊँ होणो चाए अर बिका नामऊँई परम-पिता परमेसरनै धनेवाद द्‍यो। ओ परबुनै मानबाळी लूगायो, थारै ताँई ओ चोखो ह क, थे थारा मोट्यारा क बस म रह्यो। अर मोट्यारो, थे थारी लूगायाऊँ प्यार-परेम राखो, बाऊँ कल्डो बरताव मना करो। टाबरियो, थे थारा माँ-बाप का कह्या म चालो क्युं क परबु इऊँई राजी होवै ह। टाबर-टिकरा हाळो, थे थारा टाबरानै दुखी मना करो कदै अंय्यां नइ होज्या क बाको मन मर जावै। गुलामो, थे मिनखानै राजी करबाळा की जंय्यां थारा मालिका क सामै काम मना करो। पण सचा मनऊँ परबु को मान करबा ताँई सगळी बाता म बाका हुकमानै मानो। थे जोक्यु करो बिनै मन लगार करो अर अंय्यां जाणो क, “ओ काम म्हें मिनखा ताँई कोनी करर्या पण परबु ताँई करर्या हां।” याद राखो, थारो असली मालिक मसी ह जिकी थे सेवा करो हो अर परबु थारै ताँई जखो इनाम धर राख्यो ह बो थानै देसी। मेरो खेबा को मतबल ओ ह क, परमेसर हरेक को बराबर न्याय करसी बो कोईकिई हिमायती कोनी ले। अर हरेक पापीनै बिका बुरा कामा गेलई फळ मिलसी। मालको, याद राखो थारै उपर बी ईस्बर नगरी म एक मालिक ह, इ ताँई थारा गुलामाऊँ थारो बरताव सळीयो अर बाजीब होणो चाए। ध्यानऊँ अरदास करबा म लाग्या रह्यो अर परमेसरनै धनेवाद देता रेह्ओ। अर सागै की सागै म्हारै ताँई बी अरदास करो क परमेसर म्हानै मसी का भेदा को परचार करबा को मोको देवै। क्युं क परचार करबा क चलतई म जेळ म हूँ, अर अरदास करो क म आनै साप-साप बोल सकूँ जंय्यां मनै बोलबो चाए। अबिस्वास्या क सागै थारो बरताव सलिका को राखो अर हरेक मोका को चोखो फाईदो उठाओ। थारो बोल मिठो अर मननै चोखो लागबाळो होणो चाए जिऊँ थे जाणल्यो की कूणसा आदमीनै कंय्यां को जुबाब देणो चाए। म्हारो लाडलो बिस्वासी भाईड़ो तुखीकुस जखो एक बिस्वास जोगो काम करबाळो अर परबु म म्हारो साती-संगी दास ह, बो थानै मेरा सगळा समचार दे देसी बिनै म थारै कनै भेजूँ हूँ जिऊँ म्हारा हालचाल थानै बेरो पड़ज्या अर बो थारी हिमत बंधासी। लाडलो अर बिस्वास जोगो बिस्वासी भाईड़ो जखो थारमालोई ह बि उनेसिमुसनै बी बिकै सागै भेजर्यो हूँ, बे थानै अठै जखी बाता बितरी ह बाकै बारां म बतासी। मेरै सागै केद खाना म बंद अरिस्तखुस कानिऊँ थानै “जे मसी की” पुगै अर बरनाबास को भाई मरकुस बी थानै “जे मसी की बोल्यो ह” (मरकुस क बारां म थानै पेल्याऊँई आदेस मिलगो हो क जद मरकुस थारै कनै आवै जणा बिकी चोखी आवभगत करज्यो) यसु जिनै यूसतुस बी बोलै ह, बिकी बी थानै “जे मसी की” पुगै। परमेसर का राज ताँई अ तीन सुन्नत होयड़ा यहूदि बिस्वासी ह जखा मेरै सागै काम करै ह अर अ मेरो बोळो साथ दिआ हीं। थारै मालोई एक ओर ह जिको नाम इफरास ह अर मसी ईसु को दास ह बिकी बी थानै “जे मसी की” पुगै। ओ सदाई थारै ताँई जी ज्यानऊँ अरदास करै ह जिऊँ थे परमेसर की सगळी इंछ्या म समजदारी अर पूरा भरोसा क सागै खड़्या रेह सको। थारै ताँई अर लोदिकीया अर हिरापुलिस नगर्या का मिनखा ताँई बो बोळी कड़ी मेनत करै ह इ बात की म खुद गुवाई दे सकूँ हूँ। आपणो लाडलो बेद लूका अर देमास कानिऊँ थानै “जे मसी की” पुगै। लोदिकीया म रेह्बाळा भाई बंदानै, नुमफास अर बिकै घरा भेळी होबाळी बिस्वासी मंडळीनै म्हारी “जे मसी की” पुगै। आ चिठी थारै बाच्या पाछै लोदिकीया की बिस्वासी मंडळी म बी बाची जावै अर जखी चिठी लोदिकीया म रेह्बाळा मसी का बिस्वासी लेर आसी बिनै थे बी बाचज्यो। अर परबु की सेवा ताँई जखा काम दियड़ा हीं बानै ढंगऊँ करबा ताँई अरखिप्पुसनै बोलजे। अर म पोलुस खुदका हाताऊँ थानै “जे मसी की” मांडर्यो हूँ। म साकळा म बंदर्यो हूँ इ बातनै थे याद राखज्यो। परमेसर की दया थारै सागै बणी रेह। “अंय्यांई होज्यावै!” म पोलुस, आ चिठी सीलास अर तिमूतियूस क सागै मिलर थिसलूनिकी नगरी का बा सगळा मिनखानै मांडर्यो हूँ, जखा परम-पिता परमेसर अर परबु ईसु मसीनै मानबा की बजेऊँ बिस्वासी मंडळीऊँ जुड़ेड़ा हीं। परमेसर थार प दया बणाए राखै अर थानै स्यांती देवै। म्हें म्हारी अरदास म थानै सदाई याद करां हां, अर थारै ताँई परमेसर को धनेवाद देवां हां। परम-पिता परमेसर क सामै म्हें जद बी जावां जणा थारा बिस्वास का कामानै, थारा परेम भर्या कामानै अर परबु ईसु मसी क ओज्यु आबा की आस म, थे सक्यु सेह्ता होया बी बिस्वास म पक्का हो, आ बातानै सदाई याद करां हां। मेरा लाडला बिस्वास्यो, परमेसर का लाडला मिनखो म्हें जाणा हां, क परमेसर थानै खुद ताँई टाळ्यो ह। क्युं क ओ चोखो समचार थारै कनै बोली रूप मई कोनी पुग्यो पण सक्‍ति, पबितर आत्मा अर इकै सच की पुक्‍ताई क सागै पुग्यो ह। जंय्यां थे जाणोई हो क, म्हें थारा भला ताँई थारै मांयनै कंय्यां जिया। थे कळेस क बावजुद बी पबितर आत्मा का दियड़ा आनंद क सागै परमेसर का बचननै मानर म्हारी अर परबु की जंय्यां चालबाळा बणग्या। अठै ताँई मकीदुनिया अर अखाया दिसावर का सगळा बिस्वास्या ताँई थे सीख देबाळो पाठ बणग्या हो। क्युं क थारी बजेऊँ परबु को बचन थारूँ लेर मकीदुनिया अर अखाया मई कोनी फेल्यो, पण जठै बी म्हें जावां बठै परमेसर म थारा बिस्वास की चरचा सुणा हां। जि बजेऊँ म्हानै क्युं खेबा की जुर्तई कोनी पड़ै। क्युं क बठै का मिनख खुदई बतावै ह क कंय्यां म्हें थारै कनै आया अर कंय्यां थे मूरत्यानै छोडर जीवता अर सचा परमेसर की सेवा करबा ताँई मुड़्या। अर बिकाळा बेटा ईसु मसीनै ईस्बर नगरी मऊँ ओज्यु आबानै उडिको हो, जिनै बो मरेड़ा मऊँ ओज्यु जीवायो हो, अर बोई आपानै परमेसर का आबाळा परकोपऊँ बचा सकै ह। मेरा लाडला बिस्वास्यो, आ बात थे खुदई जाणो हो क म्हारो थारै कनै आबो अळीयो कोनी गयो। अर आबी जाणो हो क थिसलूनिकी आबाऊँ पेल्या फलिपी म म्हें दुख उठाया अर बेजत कर्या गया। अर जद म्हें थिसलूनिकी म आया जणा अठै बी म्हारो खूब बिरोद होयो पण परमेसरऊँ अंय्यां की हिमत मिली क बिना डर थानै चोखो समचार सुणावां। क्युं क म्हारो उपदेस झूठो, धोको देबाळो अर छळकपट करबाळो कोनी, पण जंय्यां परमेसर म्हानै इ जोगो जा'णर चोखा समचारनै सुणाबा को काम सूप्यो ह, म्हें इनै बंय्यांई बतावां अर अंय्यां कर म्हें मिनखानै कोनी पण परमेसरनै जखो हियानै परखै ह राजी करां हां। थे इ बातनै सूल जाणो हो क म्हें कदैई लालाचोपड़ी की बाता कोनी करी। अर नइ म्हें अंय्यां की कोई बाता बोली जिऊँ थारो धन लूटां , अर आ बाता को परमेसरई गुवा ह। अर म्हें आ कोनी चावां क मिनख म्हारो मान करै अर नइ म्हें थारूँ अर दुसराऊँ आदरमान चायो। जदकी म्हें मसी का भेजेड़ा चेला होबा क नातै थारै प हक जमा सका हा। पण जंय्यां माँ आपका टाबरा की खेचळ करै ह बंय्यांकोई नरमाई को भेवार म्हें थारै सागै राख्यो। नहिस म्हें मसी का भेजेड़ा चेला होबा क चलतै थार प रोब जमार बोज गेर सकां। पण थारै ताँई म्हारा प्यार-परेम क चलतै म्हें थानै चोखो समचारई कोनी सुणाया, पण इकै सागै थारै ताँई ज्यान देबानै बी राजी हां क्युं क थे म्हारा प्यारा बणग्या हा। मेरा लाडला बिस्वास्यो, म्हें जाणा क थे म्हारी मेनतनै जखी म्हें थार ताँई करी अर दुखानै याद राखो हो। अर थानै पक्काई याद होगो क जद म्हें थानै परमेसर को चोखो समचार सुणार्या हा बि टेम का म्हारो पेट भरबा ताँई रात-दिन कंय्यां मेनत करी। क्युं क म्हें थार प म्हारो बोज कोनी लादबो चावा हा। थे खुद अर परमेसर इ बात का गुवा हो क थारै बिस्वास्या म म्हारो भेवार कंय्यां को पबितर, धारमिक अर बेदाग हो। क्युं क थे जाणो हो क, जंय्यां बाप आपका टाबरा क सागै भेवार करै ह बंय्यांई म्हें थारै सागै भेवार राख्यो। थारै मऊँ हरेकनै हिमत बंधाता, तसली देता अर समजाता हा क थारो चाल-चलन परमेसर जोगो होवै जखो थानै आपका राज अर मेमा म बुलावै ह। म्हें इ ताँई बी थारै ताँई परमेसर को धनेवाद करता कोनी रूकां, क जद म्हें थानै परमेसर को चोखो समचार सुणायो हो जणा थे इनै मिनखा कानि को कोनी जाण्या पण परमेसर को जा'णर इनै मान्या अर सच बी ओई ह, इ बजेऊँ परमेसर थारै म जखा बिस्वास करो हो काम करै ह। भाई-भाणो थारै सागै बी बाई होई जखी यहूदिआ दिसावर म परमेसर की बिस्वासी मंडळी क सागै होई ही, क्युं क बे बी थारी जंय्यां मसी ईसुनै मानता हा। अर थानै बी थारा मिनखाऊँ बंय्यांई दुख मिल्यो जंय्यां बानै यहूदि मिनखाऊँ मिल्यो। जखा परबु ईसुनै अर परमेसर की खेबाळानै मार्या अर आपानै दिन घाल्या बाऊँ परमेसर बोळो नराज ह क्युं क बे सगळा क विरोध म हीं। अर बे गैर-यहूदि मिनखानै छुटकारा को चोखो समचार सुणाबा ताँई आपानै रोकै ह। अंय्यां करबाऊँ बाकै पाप को घड़ो भरर्यो ह अर परमेसर को परकोप बापै आग्यो ह। मेरा लाडला बिस्वास्यो, जद म्हें क्युंक दिना ताँई थारूँ कायाऊँ दूर हा पण हियाऊँ तो थारै कनैई हा, जणाबी म्हानै थारी बोळी उसेर आई अर थारूँ ओज्यु मिलबा की म्हें बोळी कोसिस करी। इ ताँई म्हें थारै कनै ओज्यु आबो चायो, जदकी म खुद, पोलुस दो बर थारै कनै आबा की कोसिस करी पण सेतान म्हानै रोक्या राख्यो। थेई बताओ, आपणा परबु ईसु क सामै बिका आबा की टेम म्हारै ताँई म्हारी आस, खुसी अर बडाई को मुकट कूण होसी? बे थेई कोनी होस्यो के? सच म म्हारी बडाई अर खुसी थेई हो। म्हारूँ थारा हालचाल लिआ बिना कोनी डट्यो गयो। जणा म्हें आ ते करी क तिमूतियूस जखो म्हारो बिस्वासी भाई अर मसी का चोखा समचारनै फेलाबा म म्हारो संगी ह बिनै थारै कनै भेजां अर म्हें एथेंस नगरी म एकला रेहज्यावां। जिऊँ बो थानै बिस्वास म पक्का करै अर समजावै, जिऊँ परख्या जाबा की टेम थे हिमत नइ हारो। क्युं क थे खुद, इ बातनै जाणो हो क परमेसर की आई इंछ्या ह क आपा दुख की घड़ी म मजबूत बण्या रेह्‍वां क्युं क जद म्हें थारै कनै हा जणा पेल्याई थानै बतायो हो क आपानै कल्डा टेमऊँ जाणो पड़सी अर बंय्यांई होयो आ थेबी जाणो हो। इ ताँई जद मेरूँ ओर कोनी रिह्यो गयो जणा म थारा बिस्वास का हालचाल लेबा ताँई तिमूतियूसनै भेज्यो। परमेसर करै अंय्यां नइ होवै क बिचास्बाळो सेतान थानै बिचास्यो होवै अर म्हारी करी कराई मेनत अळी गई हो। पण तिमूतियूस थारै कनैऊँ पाछो आयोक जणा म्हानै थारै बिस्वास अर प्यार-परेम का चोखा समचार सुणाया। बो म्हानै बतायो क थे सदाई म्हानै प्यार-परेम क सागै याद करो हो, अर जंय्यां म्हारो जी थानै देखबानै करै ह बंय्यांई थारो बी करै ह। मेरा लाडला बिस्वास्यो, थारा बिस्वास का समचाराऊँ म्हानै म्हारा सताव अर दुखा म हिमत मिली ह। क्युं क ज थे परबु म मजबूत बण्या रह्यो जणा म्हारै जी म जी रेह्‍वै ह। थारी बजेऊँ परमेसर क सामै जखी खुसी म्हानै मिली ह बिको धनेवाद करबा ताँई म्हारै कनै बोल कोनी। म्हें रात-दिन परमेसरऊँ जीज्यानऊँ अरदास करर्या हां क थानै देखां अर थारा बिस्वास की कमी पूरी करां। इब म्हारो परम-पिता परमेसर अर परबु ईसु खुदई अंय्यां को गेलो खोलै क म्हें थारूँ आर मिलां। अर परबु करै थारो प्यार-परेम आपसरी म अर सगळा मिनखा क सागै दिन-दिन बढतो अर ओर बी बेत्ती बढतो जावै जंय्यां म्हारो प्यार-परेम थारै सागै ह। बो थारा हियानै अंय्यां को पक्को करै क जद आपणो परबु ईसु सगळा पबितर दुता क सागै आसी जणा थे परम-पिता परमेसर क सामै पबितर अर निरदोस होवो। मेरा लाडला बिस्वास्यो, म्हें थारूँ ईसु मसी का नामऊँ आ अरदास करां अर थानै समजावां हां क जंय्यां थे म्हारूँ परमेसरनै राजी करबाळो जीवन जिबो सीख्यो, अर बंय्यांई जीओ बी हो। जणा म्हें चावां हां क, थे बिमै ओर बी बेत्ती बढता जाओ। क्युं क थे जाणो हो, जखी सीख म्हें थानै दि ह बा परबु ईसु क हुकमऊँ दिनी ह। परमेसर आई चावै ह क थे पबितर बणो अर कुकरमऊँ बच्या रेह्ओ। थानै हरेकनै थारी खुदकी लूगाई क सागै पबितर अर आदरमान क सागै जीवन जिबो चाए, बस थारी काया की भूख मिटाबा ताँई थे ब्या मना करो जंय्यां परमेसरनै नइ ध्यारबाळा मिनख करीं हीं। कोई मिनख दुसरा की लूगाईनै बुरी नजरऊँ नइ देखै। क्युं क परबु अंय्यां करबाळा मिनखनै बेसी सजा देवै ह जंय्यां आ बाता क बारां म म्हें पेल्याई थानै बता अर चेता दिओ हो। क्युं क परमेसर आपानै सूगलो नइ पण पबितर जीवन जीबा ताँई बुलायो ह। इ ताँई जखो मिनख इ सीखनै माड़ी जाणै, जणा बो कोई मिनखनै माड़ो कोनी जाणै पण पबितर आत्मा देबाळा परमेसरनै माड़ो जाणै ह। भाईचारा अर प्यार-परेम क बारां म म्हानै मांडबा की कोई जुर्तई कोनी, क्युं क इकै बारां म थे खुदई परमेसरऊँ सीख लिआ हो क कंय्यां आपसरी म प्यार-परेम राखबो चाए। सचमई थे सगळा मकीदुनिया का बिस्वासी भाई-बंदा क सागै प्यार-परेम राखो हो। पण म्हें चावां हां क थे प्यार-परेम म ओर बी बढता जाओ। थानै ध्यान रेह्‍वै, थे दुसरा क सागै मेळमिलापऊँ रेह्‍वो। थारो ध्यान थारा काम मई रेह्‍वै, अर खुद कमार खाओ बंय्यांई करो जंय्यां म्हें थानै आदेस दिआ हां, जिऊँ थानै अबिस्वास्याऊँ आदरमान मिलै अर थानै कोई बात की कमी नइ होवै। मेरा लाडला बिस्वास्यो, म्हें चावां हां क थे मरेड़ा क ओज्यु जी उठबा का सचनै जाणो, जिऊँ थे बिस्वास नइ करबाळा मिनखा की जंय्यां थारा बिस्वासी मरेड़ा मिनखा ताँई बेआस होर दुखी नइ होवो। क्युं क आपा ओ बिस्वास करां हां क ईसु मर्यो अर जिंदो होयो। इ ताँई थानै चाए क थे ओ बी बिस्वास करो क, जद ईसु ओज्यु आसी जणा परमेसर बानै बी ईसु क सागै भेजसी जखा ईसु म बिस्वास करता-करता मरग्या। परबु का सीखाया गेल म्हें थानै बतार्या हां क, बे जखा परबु का ओज्यु आबाळा दिन ताँई काया म जीवता रेह्सी बे बि दिन मर्या पाछै जी उठेड़ा मिनखाऊँ आगै कोनी होसी। क्युं क परबु खुदई ईस्बर नगरीऊँ जोरका हेला क सागै आदेस, परधान दुत की ललकार अर परमेसर की तुरई की उवाज क सागै उतरसी, अर मसी म जखा मरग्या बे पेल्या जी उठसी। जणा पाछै आपानै जखा जीवता अर बचेड़ा हां, बाकै सागै बादळा म परबुऊँ हवा म मिलबा ताँई उपर उठा लिओ जासी। अंय्यां आपा सगळा सदाई परबु क सागै रेहस्यां। इ ताँई थे एक दुसरानै आ बाताऊँ हिमत देता रेह्ओ। मेरा लाडला बिस्वास्यो, परबु क ओज्यु आबा की घड़ी अर दिन क बारां म म्हानै मांडबा की जुर्त कोनी। क्युं क थे खुद, इ बातनै सूल जाणो हो क, परबु क ओज्यु आबा को दिन बंय्यां आसी जंय्यां रात म चाणचुक चोर आवै ह। जद मिनख खेसी, “सक्यु चोखो ह, अर क्युंई डर कोनी,” जणा बापै चाणचुक परकोप आ पड़सी जंय्यां चाणचुकै पेटहाळी क दरद चालू होवीं हीं। अर बे कंय्यांई कोनी बचसी। पण भाईड़ो, थे तो अँधकार म कोनी जिर्या, क परबु क ओज्यु आबो को दिन थार प चोर की जंय्यां चाणचुक आवै। क्युं क थे इब दिन का च्यानणा म चालो हो, थे रात का अँधकारऊँ न्यारा होगा हो। इ ताँई दुसरा की जंय्यां आपानै सुत्यो नइ रेह्णो चाए, पण खुदनै बस म राख'र चेता म अर जागतो रेह्णो चाए। क्युं क जखा सोवै ह बे रातनैई सोवै ह, अर पीबाळा रातनैई पीर मतवाळा होवै ह। पण आपा जखा दिन का च्यानणा म चालां हां बानै चाए क बे खुदनै बस म राख'र बिस्वास अर प्यार-परेम की झिलम पेरीं अर छुटकारो पाबा की आसनै टोपला की जंय्यां पेरीं। क्युं क परमेसर आपणा प आपकी झाळ काडबा ताँई नइ पण परबु ईसु मसी क जरिए पापऊँ छुटकारो पाबा ताँई टाळ्या ह। ईसु मसी आपणै ताँई मर्यो। इ ताँई आपा सगळा बिकै सागै सदाई जिस्यां, चाए बिकै आबा की टेम आपा जीवता रेह्‍वां नहिस मरेड़ा होवां। इ ताँई जंय्यां थे करता आर्या हो बंय्यांई एक दुसरानै हिमत अर सारो द्‍यो। मेरा लाडला बिस्वास्यो, म्हें थारूँ आ बिणती करां हां क मंडळी का अगुवा जखा थारै ताँई मेनत करै, परबु म थानै गेलो दिखावै अर सीख देवै ह बाको आदरमान करो। बाका कामा की बजेऊँ प्यार-परेम क सागै बानै बोळा आदरमान क जोगा जाण्या करो अर आपसरी म मेळमिलापऊँ रेह्ओ। मेरा लाडला बिस्वास्यो, म्हें थानै समजावां हां क, जखा कामऊँ जी चुरावै ह बानै समजाओ, डरपोकानै हिमत बंधाओ, माड़ानै समाळो अर सगळा क सागै नरमाई बरतो। कोईबी बुराई क बदलै बुराई नइ करै, पण सगळा मिनखा को अर एक दुसरा को भलो करबा की कोसिस करता रेह्ओ। सदाई राजी-खुसी रेह्ओ। अरदास करबा म लाग्या रेह्ओ। हर हाल म परमेसरनै धनेवाद देता रेह्ओ, क्युं क थारै ताँई मसी ईसु म परमेसर की आई इंछ्या ह। पबितर आत्मा की अणसुणी मना करो। परमेसर की खेबाळा की खयड़ी बातानै माड़ी मना जाणो। सगळी बातानै बिचासो अर जखी चोखी ह बानै पकड़्या रेह्ओ। सगळी बुराईऊँ बच्या रेह्ओ। स्यांती देबाळो परमेसर खुदई थानै सूल पबितर करै। थारी आत्मा, पिराण अर काया आपणा परबु ईसु मसी क ओज्यु आबा का दिन ताँई बेदाग रेह्‍वै। थानै बुलाबाळो परमेसर बिस्वास जोगो ह, अर बो इनै पूरो करसी। मेरा लाडला बिस्वास्यो, म्हारै ताँई बी अरदास कर्या करो। सगळा परमेसर का मिनखाऊँ हात जोड़र जे मसी की कर्या करो। आ चिठी सगळा भायानै बाचर सुणाज्यो इ ताँई म थानै परबु क सामै ओडाऊँ हूँ। आपणा परबु ईसु मसी की दया थार प होती रेह्‍वै। म पोलुस, आ चिठी सीलास अर तिमूतियूस क सागै मिलर थिसलूनिकी नगरी का बा सगळा मिनखानै मांडर्यो हूँ, जखा परम-पिता परमेसर अर परबु ईसु मसीनै मानबा की बजेऊँ बिस्वासी मंडळीऊँ जुड़ेड़ा हीं। परम-पिता परमेसर अर परबु ईसु मसी थार प दया बणाए राखै अर थानै स्यांती देवै। मेरा लाडला बिस्वास्यो, थारै ताँई म्हानै पिता परमेसरनै धनेवाद देतो रेह्णो चाए अर ओ बाजीब बी ह, क्युं क थे बिस्वास म बोळा बढर्या हो। था सगळा म आपसरी म बोळो प्यार-परेम ह। इ ताँई जद कदै म्हें परमेसर की दुसरी बिस्वासी मंडळ्या म जावां हां जणा बाकै सामै थारै बई गुमान करबो कोनी भूलां। क्युं क थे जत्ता बी दुख अर सताव भोगो हो बा सगळा म बानै थारी सेह्बा की सक्‍ति अर बिस्वास क बारां म बेरो चालै ह। अ सगळी बाता परमेसर क सचा न्याय को साप सबूत ह। अ बाता थानै परमेसर का राज का जोगा बणावै, जि परमेसर का राज ताँई थे दुख बी भोगर्या हो। परमेसर बोई करसी जखो सई ह। जखा थानै दिन घालै ह, बानै बो बी दिन घालसी, अर थे जखा कळेस भोगो हो थानै बो म्हारै सागै सुक-स्यांती देसी। आ बात बि दिन होसी जद परबु ईसु मसी आपका ईस्बर नगरी दुता क सागै भबकती आग म ईस्बर नगरीऊँ आसी, अर जखा परमेसरनै कोनी जाणै अर आपणा परबु ईसु का चोखा समचारनै कोनी मान्या बानै सजा देसी। बे परबु क सामैऊँ अर बिकाळी सक्‍ति की मेमाऊँ नाकै कर दिआ जासी अर जुग-जुग ताँई सजा भोगसी। ओ बी दिन होसी जद बो आपका सगळा परमेसर का मिनखाऊँ जखा बिपै बिस्वास करीं हीं बाऊँ मेमा अर आदरमान लेबा आसी। थे बी बा मिनखा म होस्यो, क्युं क म्हें जखो चोखो समचार थानै सुणायो ह बिपै थे बिस्वास कर्यो ह। इ ताँई, म्हें थारै ताँई सदाई अरदास करां हां क, आपणो परमेसर थानै जुग-जुग का जीवन जोगो बणावै, जि ताँई थानै बो बुलायो ह। परमेसर थानै सक्‍तिऊँ भरै जिऊँ थे भलाई की हरेक इंछ्यानै अर बिस्वास का हरेक कामानै पूरा करो। जिऊँ आपणा परमेसर अर परबु ईसु मसी की दयाऊँ आपणा परबु ईसु को नाम थारै म मान पावै अर थे बिमै मान पावो। मेरा लाडला बिस्वास्यो, आपणा परबु ईसु मसी क आबा अर बिकन भेळा होबा क बारां म, म्हें थारूँ बिणती करां हां क, ज थे कोईऊँ अंय्यां सुणो क परबु क ओज्यु आबा को दिन आग्यो ह जणा थे उकचुक मना होज्यो, नइ दरमई घबराज्यो। नइ कोई आत्माऊँ, नइ बोलऊँ नइ कोई लिखावटऊँ जखी म्हारी सी क्युना लागै जणा बी बिको बिस्वास मना करज्यो। क्युंबी हो, बाकी बाताऊँ मना भेक जाज्यो। क्युं क आ बात जद ताँई पूरी कोनी होवै जद ताँई परमेसर को बिरोद करबाळा सगळा मिनख चोड़ा म नइ आज्यावीं, सागै की सागै आबी जरूरी ह क बो एक मिनख परगट होसी जखो परमेसर का सगळा नियम कायदानै तोड़सी जिकी सजा नरक म जुग-जुग ताँई ह। ओ मिनख परमेसर, झूठा देवता अर जानै मिनख धोकीं हीं बा सकै बिरोद म होज्यासी अर बो खुदनै आ सगळाऊँ बडो बतासी। बो परमेसर का मनदर म जार बेठ ज्यासी अर खुदनै परमेसर बतासी। थानै याद कोनी के? जद म थारै कनै रिह्या करतो हो जणा म थानै अ सगळी बाता बोल्या करतो हो। जणा थे तो इ बातनै जाणोई हो क बि परमेसर की खिलापत करबाळानै काँई बात ह, जखी बिनै इब ताँई आबाऊँ रोक राखी ह। क्युं क परमेसर बिकै आबा को टेम ते कर राख्यो ह। पण परमेसर का सगळा नियम कायदानै तोड़बाळो ओला म तो हाल बी काम करर्यो ह, क्युं क अठै क्युं तो पक्काई ह, जखो बिनै इब बी चोड़ा म कोनी आबा देर्यो। जणा पाछै परमेसर का नियम कायदानै तोड़बाळो परगट होसी। बिनै परबु ईसु आर आपकी मोजूदगी का च्यानणाऊँ अर फूंकऊँ नास कर देसी। पण बिकै नास होबाऊँ पेली बो सेलाणी-चमत्कार अर ताजूब का काम दिखासी क्युं क बिमै सेतान की सक्‍ति होसी। बो इ सक्‍तिनै बा मिनखानै भंगराबा ताँई काम म लेसी जखा नास होबाळा हीं। क्युं क बे छुटकारा करबाळा सचा चोखा समचारनै कोनी मानसी अर खुदनै परमेसरनै कोनी सूपसी जिऊँ क परमेसर बानै बाका पाप की सजाऊँ बचावै। इ ताँई परमेसर बा मिनखा की बुदीनै बांद देसी जिऊँ परमेसर का नियम कायदानै तोड़बाळो बानै अरामऊँ भंगरा सकै, जि बजेऊँ बे मिनख बि बात प बिस्वास करसी जखी सच कोनी। अंय्यां बे सगळा जखा सच प बिस्वास कोनी कर्या अर कूगेला चालर मजा मारता हा बे सजा भोगसी। पण परबु का लाडला बिस्वास्यो, थारै ताँई म्हानै सदाई परमेसर को धनेवाद करतो रेह्णो ह, क्युं क परमेसर खुदकी पबितर आत्मा की सक्‍तिऊँ थानै बचार बिका पबितर मिनख होबा अर छुटकारा का पेला फळ होबा ताँई पेल्याऊँ टाळ लिओ ह, क्युं क थे सच प बिस्वास कर्यो ह। परमेसर थानै चोखा समचार की बजेऊँ बुलायो ह, जिऊँ थे बी आपणा परबु ईसु मसी की मेमा म सामिल होवो। ओ बि चोखा समचार क जरिए होयो ह जिकी सीख म्हें थानै दिनी ही। इ ताँई मेरा लाडला बिस्वास्यो, बिस्वास म मजबूत रेह्ओ अर जखी सीख म्हें थानै बोलर नहिस चिठी म मांडर दिनी ह बापै चालता रेह्ओ। आपणो परबु ईसु मसी खुदई अर आपणो परम-पिता परमेसर जखो आपणाऊँ परेम करै ह अर जखो आपानै आपकी दयाऊँ जुग-जुग ताँई हिमत बंधवाई ह अर आस दिनी ह, बो था सगळानै चोखा कामा अर बचना म पक्को करै अर थारा हिया म हिमत बंधवावै। मेरा लाडला बिस्वास्यो, आखीर म, म्हें एकोर बात थारूँ चावां हां क थे करो, म्हारै ताँई बी अरदास कर्या करो, जिऊँ परबु को चोखो समचार जंय्यां थारै बिचमै फेल्यो हो बंय्यांई तावळो ओर मिनखा म बी फेलै अर आदरमान पावै। अरदास कर्या करो क परबु म्हानै बेकार अर बुराई करबाळा मिनखाऊँ बचावै। क्युं क हरेक मिनख परमेसर प बिस्वास कोनी राखै। पण परबु बिस्वास जोगो ह। बोई थानै ताकत देसी अर सेतानऊँ बचासी। परबु म म्हानै थार प पक्को बिस्वास ह क म्हें थानै जंय्यां करबा ताँई आदेस दिन्यो हो थे बंय्यांई करर्या हो अर करता रेहस्यो। परबु थारा हियानै परमेसर का परेमनै समजबा की अर मसी की जंय्यां बरदास करबा की सक्‍ति देवै। मेरा लाडला बिस्वास्यो, म्हें थानै परबु ईसु मसी म ओ आदेस देवां हां क, हरेक अंय्यां का बिस्वासी भाईड़ाऊँ नाकैई रेह्ज्यो जखो कामऊँ जी चुरावै ह। अर जखी सीख म्हें बिनै दिनी ह बिकै गेल कोनी चालै। थे खुद जाणो हो क थे म्हारी मिसाल प कंय्यां चाल सको हो, क्युं क जद म्हें थारै सागै हा जणा कमारई खाता हा, अर कोईकिई फोकट की रोटी कोनी खाई; पण रात-दिन मेनत अर दुख उठार काम-धंधो करता हा, जिऊँ थार प बोज कोनी बण्या। अंय्यां करबा क पिछै आ बात कोनी ही क थारै कनैऊँ म्हानै खाबा को हक कोनी हो; पण म्हें चावां हां क थे म्हानै देखर सीखो अर म्हारी जंय्यां जीओ। क्युं क जद म्हें थारै सागै हा जणा ओ आदेस दिओ हो क, “ज कोई काम कोनी करै बिनै खाबा ताँई बी मना द्‍यो।” म्हें सुण्या हा क थारै मांयनै क्युंक मिनख सई गेलै कोनी चालै अर काम-धंधो कोनी करै। पण दुसरा का कामा म टांग अड़ावै। अंय्यां का मिनखानै परबु ईसु मसी म म्हें आदेस देवां हां अर समजावां हां क, बे हद म रेह्‍वै अर खुद कमार खावीं। ओ मेरा लाडला बिस्वास्यो, थे भला काम करबा ताँई कदैई हिमत मना हारज्यो। ज कोई म्हारी इ चिठी म मांडेड़ी बातानै कोनी मानै बापै निगा राखो अर बाका संगराऊँ दूरई रह्यो जिऊँ बाको सीर निचो होज्यावै। पण बिनै बेरी मना जाणज्यो, पण सागे भाई-भाण जा'णर चेताओ। परबु जखो खुद स्यांती को दातार ह बो हर टेम थारै सागै रेह्‍वै अर थारा हर हाल म थानै स्यांती देवै। चिठी का इ भाग म, म पोलुस, मेरै खुदका हातऊँ थानै जे मसी मांडूँ हूँ। अर अंय्यां चिठी का आखरी भाग म मेरै हात की लिखावटई तो मेरी चिठ्या की पिछाण ह, क आनै भेजबाळो मई हूँ। थारै सगळा प आपणा परबु ईसु मसी की दया होती रेह्‍वै। म पोलुस, आपानै बचाबाळा परमेसर अर आपणी आस की निम मसी ईसु का हुकमऊँ मसी ईसु को भेजेड़ो चेलो बण्यो। म आ चिठी तिमूतियूसनै मांडूँ हूँ, जखो बिस्वास म मेरो सचो बेटो ह। तिमूतियूस, तेर प परम-पिता परमेसर अर आपणा परबु मसी ईसु को आसिरबाद, दया अर स्यांती होती रेह्‍वै। जंय्यां क म मकीदुनिया जाती टेम तनै इफिसुस म रेह्बा ताँई बोल्यो हो, जिऊँ तू क्युंक मिनखानै आदेस दे क, बे झूठी सीख नइ देवै, अर बा क्हाण्या अर पिड्या प गोर नइ करै जखी राड़ करावै ह, अर परमेसर की बि इंछ्यानै पूरी कोनी करीं, जखी खाली बिस्वासऊँई पूरी हो सकै ह। इ आदेस को मकसद ओ ह क, सगळा बिस्वासी परेमऊँ भरज्यावै, जखो पबितर मनऊँ, साप अन्तर-आत्माऊँ अर बिना मिलावट का बिस्वासऊँ पैदा होवै ह। क्युंक मिनख इ गेलानै छोडर बेकार की बाता म उळ्जगा हीं। अर बे नेम-कायदा का सास्तरी होबो चावीं, पण जखी बातानै बे बोलीं हीं अर जखी बाता प बे जोर देवै ह, बानै बे खुदई कोनी समजीं। आपा जाणा हां क, ज कोई नेम-कायदानै सूल काम म लेवै, जणा बो घणोई चोखो ह। आ जा'णर क नेम-कायदा धरम्या ताँई कोनी, पण अधरम्या, खयो नइ मानबाळा, परमेसरनै नइ मानबाळा, पापी, असुद, माँ-बाप को बुरो करबाळा, मिनखानै मारबाळा, कुकरमी, आदमी आदमी क सागै कुकरम करबाळा, मिनखानै बेचबाळा, झूठ बोलबाळा, अर झूठी सोगन खाबाळा, आकै अलावा खरी सीख को बिरोद करबाळा ताँई बताएड़ा ह। आ खरी सीख धने परम-परधान परमेसर की लिला का बि चोखा समचार क गेल ह जखो मनै दिओ गयो ह। म आपणा परबु मसी ईसु जखो मनै ताकत दि ह, बिको गुण-एसान मानू हूँ क, बो मनै बिस्वास जोगो जाणर आपकी सेवा सूपी ह। पेल्या म मेरा मुंडाऊँ परमेसर की बुराई करबाळो, परमेसर का मिनखानै दिन घालबाळो अर एक अँधेर करबाळो मिनख हो। इकै पाछै बी मेर प दया होई। क्युं क म एक परमेसर म बिस्वास नइ करबाळा की जंय्यां अणभोळ म अ सगळा काम कर्यो हो। अर परबु मेर प खूब दया करी, अर सागैई बो परेम अर बिस्वास जखो मसी ईसु म ह बो मनै मिल्यो। आ बात बिस्वास जोगी अर मानबाळी ह क, मसी ईसु इ दुनिया म पाप्यानै बचाबा ताँई आयो हो। जामै सऊँ बडो पापी म हूँ। पण मेर प इ ताँई दया होई ह क, म जखो सऊँ बडो पापी हूँ मेर म ईसु मसी आपको थ्यावस दिखायो ह, अंय्यां करबाऊँ जखा मिनख बिपै अजर-अमर जीवन ताँई बिस्वास करसी बा ताँई म, एक नमूनो बणू। अर इब सदाई राज करबाळो राजा, अनदेख्यो, अमर अर बस बि एकई परमेसर को मान अर गुणगान जुग-जुग होतो रेह्‍वै। अंय्यांई होवै। मेरा बेटा तिमूतियूस, म तनै आदेस द्‍युँ हूँ क, तू चोखी राड़ लड़, ओ बा बाता गेलई ह जखी पेल्याऊँ परमेसर की खेबाळा खे दि ह। बा बातानै भूलै मना जिऊँ तनै बुराई क खिलाप लड़बा की हिमत मिल सकै। बिस्वास अर साप अन्तर-आत्मा राख। क्युंक मिनख खुदकी अन्तर-आत्मा की कोनी सुणी, जिऊँ बे बिस्वासऊँ फिरगा। हमनियस अर सिकन्दर बामैऊँई हीं, जानै म सेतान क हाता म सूप दिओ, जिऊँ बानै परमेसर की बुराई नइ करबा को पाठ सीखायो जा सकै। इब सऊँ पेल्या म थारूँ अंय्यां अरज करूं हूँ क, बिणती, अरदास, बिचबचाव अर धनेवाद परमेसरनै सगळा मिनखा ताँई दिओ जावै। राजा-म्हराजा अर सगळा अधिकार्या ताँई अरदास करी जावै। जिऊँ आपा सुक-स्यांती क सागै भगती अर सरदाऊँ परमेसर ताँई जीवन जी सकां। अंय्यां अरदास करबो चोखो ह, अर ओ आपानै बचाबाळा परमेसरनै भावै बी ह। अर बो चावै क, धरती का सगळा मिनख बचज्यावीं अर बे सचनै जाणी। क्युं क परमेसर एकई ह अर परमेसर अर मिनखा क बिचमै बिचोलिओ बी एकई ह, मतबल मसी ईसु जखो खुद एक मिनख ह। जखो सगळा मिनखानै बचाबा ताँई खुदनै हरजाना क रूप म दे दिओ, जखी सई टेम प इ बात की गुवाई ही क, परमेसर सगळानै बचाबो चावै ह। अर इ गुवाईनै गैर-यहूदि मिनखानै सुणाबा ताँई म एक सचा बिस्वास की सीख देबाळो अर ईसु को भेजेड़ो चेलो बणायो गयो हूँ। जिऊँ म बिस्वास का समचार अर सच को हेलो पाड़ सकूँ। म झूठो कोनी हूँ म सच बोलर्यो हूँ। जणा इब म चाऊँ हूँ क, हर कठै मोट्यार बिना झाळ भर्या अर बिना मनमुटाव कर्या, खुदका पबितर हातानै जो'ड़र अरदास करै। अर ठिक बंय्यांई म भाण-बेट्याऊँ बोलुँ हूँ क, सरम लाज अर थ्यावस क सागै सिदा-सादा पेराणऊँ खुदनै सुवांरीं, चोटी बणार सोना अर मोत्या अर मेंगा गाबाऊँ नइ, अंय्यां की भाण-बेटी जखी खुदनै परमेसर की भगत मानी हीं बा ताँई ओई चोखो ह क, बे खुदनै भला कामाऊँ सुवांरी। लूगाईनै चुपचाली रेह्‍र सूल कह्या म चालर, सीख लेणी चाए। म बोलुँ हूँ, लूगाया नइ तो मोट्यारानै सीख देवीं अर नइ मोट्यारानै हुकम ओडावै, पण चुपचाली रेह्‍वै। क्युं क पेल्या आदम बणायो गयो अर पाछै हवा। आदमनै भंगरायो कोनी गयो, पण लूगाई भंगराया म आर पापण बणी। इकै बावजुद बी लूगाया टाबर जामर बचसी, अर बानै चाए क, बे थ्यावस क सागै बिस्वास, परेम अर पबितरता म मजबूत रेह्‍वै। आ बिस्वास जोगी बात ह, ज कोई बिस्वासी मंडळी का परधान को ओदो चावै जणा बिकी आ इंछ्या सीर-माथै ह। एक बिस्वासी मंडळी का रूखाळा परधान म आँगळी टेकबा की झघा नइ हो, बिकै एकई लूगाई हो, खुदनै बस म राखबाळो, थ्यावस राखबाळो अर मरियादा म रेह्बाळो, बो आपकै घर म अणजाण की बी आवभगत करै, बो सीखाबा म निधान हो। बो दारूड़ो नइ हो, मारपीट करबाळो नइ हो, पण दयाऊँ भरेड़ो अर स्यांतीऊँ रेह्बाळो होवै, बिको मो रिपीआ म नइ होवै। बो आपका परवार की समाळ करबाळो होवै, अर बिका टाबर बिकी पूरी ईज्जत करै अर बिका कह्या म चालै। ज कोई आदमी ओई कोनी जाणै क खुदका परवार की समाळ कंय्यां होवै, जणा बो परमेसर की बिस्वासी मंडळी की समाळ कंय्यां कर सकै ह? बो बिस्वास म पक्को होणो चाए, क्युं क कदै अंय्यां नइ होवै क, बो सेतान की जंय्यां गुमान कर सजा पावै। बो अंय्यां को मिनख होणो चाए जिकी बिस्वासी मंडळी क अलावा बारका मिनखा म बी ईज्जत हो, अंय्यां नइ हो क बो काळो मुंडो करवार सेतान का जाळ म फस जावै। बिस्वासी मंडळी का सेवक बी सचा अर ईज्जत हाळा होणा चाए; बे पिसा का भूखा अर घणी अँगूरी पीबाळा नइ हो; बे बिस्वास का सचनै साप अन्तर-आत्माऊँ दिखाबाळा होणा चाए। अ पेल्या बिचास्या जावीं अर ज आमै कोई एब नइ होवै जणाई आनै बिस्वासी मंडळी का सेवक की जंय्यां काम करबा द्‍यो। अंय्यांई बाकी लूगायाबी ईज्जत हाळी हो अर बे चुगलीचाळा करबाळी नइ हो; बे चोकस अर सगळी बाता म बिस्वास जोगी हो। बिस्वासी मंडळी का सेवक क एकई लूगाई हो, अर बो खुदका टाबरा अर खुदका परवारनै सूल चलाबाळो हो। बे सेवक जखा खुदको काम सूल करीं हीं बे खुद ताँई चोखी झघा अर बी बिस्वास म जखो मसी ईसु प ह, हिमत का धणी होसी। म तावळोई तेरै कनै आर मिलबा की आस राखूँ हूँ, पण हाल म तनै आ चिठी बी मांडूँ हूँ। पण ज मेरै आबा म मोड़ो होवै जणा इ चिठीऊँ जाण ज्याए क, आपणा परमेसर को कूणबो जखो जीवता परमेसर की बिस्वासी मंडळी आ सचाई की निम अर खम्बो ह, बिकै सागै आपानै कंय्यां को बरताव करबो चाए। कोई कोनी नट सकै क, भगती को भेद कंय्यां को म्हान ह, बो जखो मिनख जूण म परगट होयो, पबितर आत्मा जिनै धरमी बतायो, अर ईस्बर नगरी दुत जिनै देख्या, देस-देस म बिको परचार कर्यो गयो, जगत म बिपै बिस्वास कर्यो गयो, अर ईस्बर नगरी म उठा लिओ गयो। पबितर आत्मा साप-साप बोलै ह क, क्युंक टेम क पाछै क्युंक मिनख बिस्वास करबो छोड देसी, बे ओपरी बलाया की सीखनै मानसी अर भंगराबाळी आत्मा क कह्या म चालसी। अर अ सीख झूठा पाखंडी मिनखा की बजेऊँ फेलसी, जाकी अन्तर-आत्मा मरेड़ी ह। अंय्यां का मिनख ब्या करबानै गळत अर खाबा की क्युंक चिजाऊँ परेज करबा की सीख देसी, पण परमेसर बा चिजानै इ ताँई बणायो हो क, बिस्वासी अर सचनै जाणबाळा बानै परमेसर को धनेवाद कर खावै। क्युं क परमेसर को सिरजेड़ो सक्यु चोखो ह क्युं बी बगाबा जोगो कोनी, पण धनेवाद कर सक्यु खायो जा सकै ह, क्युं क परमेसर का बचन अर थारी अरदास बा सगळी चिजानै खाबा ताँई सुद बणावै ह। ज तू भाईड़ानै अ हिदायत देसी जणा तू मसी ईसु को चोखो दास होसी। इऊँ ओ बेरो पड़ै क, आत्मिक रूपऊँ बिस्वास का बचन अर सची सीख तेरै मांयनै ह, जखी तू मानतो आयो ह। पण खुदनै, नइ खेबा जोगी बा क्हाणी-कथाऊँ परै राख, जामै परमेसर कोनी पण खुदनै परमेसर की भगती म लगायो राख। काया की कसरतऊँ तो चिनोसोई फाईदो होवै, पण परमेसर की भगती तो सगळी बाता म फाईदो करै ह। क्युं क आज अर आबाळा जीवन का सगळा आसिरबादा की जामनी भगती प टिकरी ह। आ सची बात ह जखी हर कानिऊँ बिस्वास जोगी अर मानबाळी ह। आपा इ ताँई मेनत अर कोसिस करां हां, क्युं क आपणी आस जीवता परमेसर म ह। जखो सगळानै, खासकर बिस्वास्यानै बचाबाळो ह। इ ताँई बानै बा बाता ताँई आदेस अर अ सीख देतो रेह। तनै कोई क सामैई निचो नइ देखणो पड़ै क्युं क तू जवान ह, पण बोली-चाली, चाल-चलन, प्यार-परेम, बिस्वास अर खराई म तू बिस्वास्या क सामै नमूनो बणज्या। जद ताँई म थार कनै नइ आऊँ तू तेरो टेम अर तेरी मेनत मिनखानै नेम-कायदानै बाचर सुणाबा, बचन को हेलो पाड़बा अर सीखाबा म लगाजे। तेरै मांयनै जखो आत्मिक बरदान ह जखो तनै बि टेम मिल्यो हो जद परमेसर की खेबाळा अर बिस्वासी मंडळी का मुखिया तेरा सीर प तनै आसिरबाद देबा ताँई हात मेहल्या हा, बि बरदान बई लापरवा मना हो। बा बरदानानै काम म लेतो रेह अर बामै ध्यान लगायो राख, जिऊँ तेरी तरक्की सगळा देख सकै। खुद प अर तेरी सीख प ध्यान दे, अर आमै पक्को हो। क्युं क अंय्यां करबाऊँ तू, खुदनै अर तनै सुणबाळानै बचाबा की बजै बणसी। जद तू बूडा-ठेरा मिनखानै चेतावै जणा बानै मना दकालजे, पण बाऊँ ईज्जतऊँ बोलजे जंय्यां क खुदका बापऊँ बोलै ह। अंय्यांई जवान मोट्यारा क सागै खुदका भाई की जंय्यां बरताव कर। अर बूडी-ठेरी लूगायानै माँ जंय्यां अर जवान लूगायानै पूरी खराई क सागै भाण समजर बरताव कर। बा खालीहोइड़ी लूगाया की ईज्जत कर जाकी देखभाळ करबाळो कोई कोनी। पण ज कोई खालीहोइड़ी क टाबर-टिकर, दोइती-दोय्ता नहिस पोती-पोता होवै जणा आ टाबरानै सऊँ पेल्या चाए क, अ आपका परवार क सागै भगती को बरताव करै। अर आपका माँ-बाप दादी-दादा की सेवा कर बाकै उपकार को जस दे, क्युं क अंय्यां करबाऊँ परमेसर राजी होवै ह। बा जखी सचमई खालीहोइड़ी लूगाई ह जिकै कनै बिकी साळसमाळ करबाळो कोई कोनी, अर जखी परमेसर म आस राखै ह अर रात-दिन अरदास करै ह अर परमेसरऊँ मदद माँगै ह। पण जखी खालीहोइड़ी लूगाई मोज-मस्ति म पड़गी बा जीता-जी मरगी। आ सगळानै आ बाता ताँई आदेस दे जिऊँ बापै कोई लालछण नइ लागै। पण ज कोई आपका रिस्तेदारा की, खासकर आपका घरहाळा की साळसमाळ नइ करै जणा बो बिस्वासऊँ मुकरगो ह अर बो एक बिस्वास नइ करबाळाऊँ बी भत्तर होगो ह। बि खालीहोइड़ी लूगाई को नाम इ बिदवा सायता सूची म मांडजै जखी साठ बरसऊँ कम नइ होवै, अर बा एकरई ब्याईड़ी होवै, जिको चोखा काम करबा म नाम होयड़ो हो, अर जखी आपका टाबरानै सूल पाळी हो, जखी पराया अर अणजाण मिनखा की आवभगत करी हो, परमेसर का मिनखा को खुदका घर म आवभगत करी हो, दिन-दुखीया की मदद करी हो, अर जखी खुदनै चोखा काम करबा म लगादि होवै। पण जवान खालीहोइड़ी लूगाया को नाम बिदवा सायता सूची म मना मांडजै। क्युं क मसी बई बाकी भगती प जद बिकी काया की इंछ्या सवार होवै जणा बे ब्या करबो चावीं हीं। जणा बे अंय्यां कर परमेसर क सागै करेड़ा बाका पेल्या का वादाऊँ मुकर पापण बणी हीं। अर बे घर-घर हांडर खुदको टेम बरबाद करबो सीखीं हीं, अर इऊँ बी भत्तर बे फाँप मारबो अर दुसरा का काम म टांग अड़ाबो सीखीं हीं, अर जखी बाता क बारां म बात नइ करनी चाए, बाकै बारां म बतळावीं हीं। जणा म चाऊँ हूँ क, जवान खालीहोइड़ी लूगाई ब्या कर टाबर जलमै, अर आपका घर की देखभाळ करै, जिऊँ बे आपणी बुरी चितबाळानै आपणै खिलाप बुरो खेबा को मोको नइ दिं। क्युं क क्युंक जवान खालीहोइड़ी लूगाया पेल्याऊँई सेतान की भंगराया म आर बिकै गेल होली ह। ज कोई बिस्वासणी क परवार म खालीहोइड़ी लूगाई ह जणा बा बिकी देखभाळ करै अर बिस्वासी मंडळी प बिको बोज नइ गेरै, जिऊँ बिस्वासी मंडळी बा खालीहोइड़ी लूगाया की देखभाळ कर सकै जाको कोई कोनी। एक मुखिया क रूप म, जखाबी बिस्वासी मंडळी का मुखिया, चोखो काम करीं बे दुणा मान क जोगा समज्या जावै, खासकर बे जखा परचार अर सीखाबा म घणी मेनत करीं हीं। क्युं क नेम-कायदा बोलै ह, “थे कोईको पेट मना दुखाज्यो” अर “ध्यानग्यानै ध्यानगी मिल्णी चाए।” कोईबी बिस्वासी मंडळी का मुखिया क खिलाप दो नहिस बिऊँ बेसी गुवा बिना बिपै लगाया गया दोस मना सुणजै। जखा पाप करीं बाकै सगळा क सामै दकाल लगा जिऊँ दुसरा पाप करबाऊँ डरै। म तनै परमेसर, मसी ईसु अर टाळेड़ा ईस्बर नगरी दुता की मोजूदगी म बोलुँ हूँ क, बिना कोईकी भीड़ लिये तू आ आदेसानै मानजै अर ख्यामई कोईकै सागैई भेद-भाव मना करजे। मिनखा क सीर प आसिरबाद देबा ताँई हात म्हेलर बानै परमेसर की सेवा म देबा ताँई तावळ मना करजे। दुसरा क पाप म सामिल मना होए, खुदनै पबितर बणायो राख। पाणीई मना पीआ कर पण पेट अर बारबार होबाळी बिमारी की बजेऊँ चीनिसी अँगूरी बी पी लिआ कर। क्युंक मिनखा का पाप चोड़ा म रेह्‍वै अर बाकै गेल बाको न्याय बी होवै, पण कया का बुरा कामा को पाछै बेरो पड़ै ह। अंय्यांई चोखा काम बी सामै आवीं हीं अर जखो भला काम सामै कोनी आया बे ओला म कोनी रेह्सी। ज तू दास ह, तो तनै तेरा मालिक की ईज्जत अर बिको आदर करबो चाए। जिऊँ कोईबी परमेसर का नाम अर आपणी सीख क बारां म बुरो नइ बोल सकै। जखा दासा का मालिक बिस्वासी हीं, बे इ बजेऊँ क, बाका मालिक बिस्वासी हीं बाको मान-समान करबो कम नइ करै, इकी झघा बे बाकी सूल सेवा करै। क्युं क बाका कामा को फाईदो जानै मिलर्यो ह बे बिस्वासी हीं जानै बे परेम करै ह। अ बाता थे लोगानै करबा ताँई बोलो अर सीखाओ। ज कोई, बि सई अर आपणा परबु ईसु मसी की ईस्बरीय सीखनै, नइ मानै अर क्युं न्यारोई सीखावीं, जणा अंय्यां को मिनख मरोड़ म बांको रेह्‍वै, पण बो क्युंई कोनी जाणै। बिकी मत्ती मारी गई, अर बिनै बाता प जिदबो चोखो लागै ह। बिमैऊँ बळोकड़ोपूणो, दोस लगाबो, सूगली बाता अर बुराई निकळै ह। अर बा मिनखा म राड़ होवै ह जाकी मत्ती मारी गई ह, अर जखा सचऊँ दूर होगा हीं, बे सोचीं हीं क, परमेसर की सेवा धन कमाबा को सादन ह। परमेसर की भगती म राजी रेह्बाळो, इ सच म अमीर ह। क्युं क आपा धरती प नइ तो क्युं लेर आया हा अर नइ क्युं लेर ज्यास्यां। ज आपणै कनै रोटी अर गाबा हीं, जणा पाछै आपानै ओर काँई चाए? पण जानै धन भावै, बे लालच अर उजाड़बाळी बोळी बुरी इंछ्या म पड़ीं, जखी मिनखनै बरबादि अर बिनास क गर्त म गेरै ह। क्युं क पिसा को मो सगळी बुराया की जड़ ह। क्युंक मिनख पिसा का लालच म बिस्वासऊँ मुंडो मोड़र बोळा दुख मोल ले लिआ। पण तू, जखो परमेसरनै मानबाळो ह, आ सगळी बाताऊँ दूर रेह्जे, पण धारमिक्‍ता, भगती, बिस्वास, परेम, थ्यावस अर दिनता म बण्यो रेह। बिस्वास की दोड़ म पूरी ज्यान लगार भाज। अर खुद ताँई अजर-अमर जीवन जीत, जि ताँई तनै परमेसर बुलायो हो, जद तू रोब क सागै तेरा बिस्वासनै बोळा सारका गुवा क सामै दिखायो हो। सगळानै जीवन देबाळा परमेसर क सामै अर मसी ईसु जखो पीळातुस क सामै हिमत क सागै आपका बिस्वासनै दिखायो बिमै, म तनै आदेस देऊँ हूँ, आपणा परबु ईसु मसी क परगट होबाळा दिन ताँई अ आदेस मानबा म बेदाग रेह। बिनै परमेसर सई टेम प परगट करसी, परमेसर धने अर एकई राज करबाळो, राजा-म्हराजा को राजा अर परबुआ को परबु ह। बो एकलोई अजर-अमर ह! बो बि च्यानणा म बास करै ह जिकनै कोई कोनी पुग सकै। नइ कोई बिनै कदै देख्यो ह! अर नइ कोई कदै देख सकै। बिको मान-समान अर राज जुग-जुग होतो रेह्‍वै! अंय्यांई होवै। जखा मिनख इ दुनिया म पिसाळा हीं बानै आदेस दे बे इपै गुमान नइ करै, पण बाकी आस, नास होबाळा धन की बजाय परमेसर म हो, जखो आपानै आपणा सुक ताँई सगळी चिजा देवै ह। चोखा काम करबा ताँई बानै आदेस दे, जिऊँ बे चोखा काम करबाळा, दान देबाळा अर हियाऊँ देबाळा होवीं। अंय्यां कर बे खुद ताँई अंय्यां को धन भेळो करसी जखो आबाळा टेम ताँई एक मजबूत निम म्हेलसी। अर जणा बे बि जीवननै जीतबा जोगा होसी, जखो सचो ह। ओ तिमूतियूस, जखो तनै सोप्यो गयो ह बिनै समाळर राख। दुनियादारी की बात अर बकवास जिरैऊँ खुदनै परै राख जिनै क्युंक मिनख गळतीऊँ “ज्ञान” बोलै ह। क्युंक मिनख इ झूठा ज्ञान प बिस्वास करबा को दावो कर्या, अर जिको नतिजो ओ होयो क, बे सचा बिस्वास का गेलाऊँ भटकगा। थारै सगळा प परमेसर की दया होवै। इ चिठीनै पोलुस मांडी, जखो परमेसर की इंछ्याऊँ मसी ईसु को भेजेड़ो चेलो ह, जिनै परमेसर बि जीवन को हेलो पाड़बा ताँई भेज्यो ह जिकै बारां म परमेसर आपणाऊँ मसी ईसु म देबा को बादो कर्यो ह। परबु म मेरा लाडला बेटा तिमूतियूस, आ चिठी म तनै मांडूँ हूँ। परम-पिता परमेसर अर आपणा परबु मसी ईसु की किरपा, दया अर स्यांती तेर प होती रेह्‍वै। तिमूतियूस म रात-दिन मेरी अरदास म तनै याद करूं हूँ, अर तेरै ताँई परमेसरनै धनेवाद देऊँ हूँ। जिकी सेवा म मेरा बडका की जंय्यां पबितर अन्तर-आत्माऊँ करूं हूँ। मेरै कनैऊँ जाती टेम का तेरा आसुआनै याद कर मेरै हिया म आ इंछ्या होवै क, म तनै देखूँ अर राजी होऊँ। म तेरा सचा बिस्वासनै बी याद करूं हूँ, पेल्या ओ बिस्वास तेरी नानी लोइस अर तेरी माँ उनिके म हो, अर म इ बात ताँई पक्को हूँ क, बोई बिस्वास तेरै म बी ह। जणाई म तनै याद दिआऊँ क, बि बरदाननै थाम्यो राख, जिनै परमेसर तनै बि टेम दिओ हो जद म तेर प हात धर्यो हो। परमेसर आपानै डर की आत्मा कोनी दि पण ताकत, परेम अर खुदनै काबू म राखबा की आत्मा दि ह। जणा तू आपणा परबु अर मेरी गुवाई देबा ताँई, म जखो मसी ताँई केद म हूँ नाड़ निची मना करजे। पण अंय्यां करबा की बजाय परमेसर जखी ताकत तनै दि ह बिनै मेरै सागै चोखा समचार ताँई दुख उठाबा म लगा। बो आपानै परमेसर का मिनख होबा ताँई बचायो अर बुलायो ह, ओ सोभाग आपणा प आपणा करमा गेल कोनी होयो ह पण ओ तो बिकी दया अर बिका मकसद गेल आपणा प होयो ह। जखो मसी ईसु म जगत की सरूआतऊँ पेली आपणा प होगो हो। पण इब आपणा बचाबाळा मसी ईसु क आबा की बजेऊँ आपणा प परगट होयो ह। जखो चोखा समचार की बजेऊँ मोत को नास कर, अजर-अमर का जीवननै परगट कर्यो। परमेसर मनै चोखा समचार को हेलो सुणाबा ताँई एक हलकारा, सीखाबाळा अर ईसु का भेजेड़ा चेला को काम दिओ ह। अर इ बजेऊँई म अ सगळा दुख उठाऊँ हूँ। पण म इ ताँई सरमिंदा कोनी, क्युं क म जाणू हूँ क, मेरो बिस्वास किमै ह, अर म इ बात ताँई पक्को हूँ क, जोक्यु बो मनै सूप्यो ह बिनै मसी क ओज्यु आबाळा दिन ताँई बचाबा को बळबूतो राखै ह । जखा खरा बचन म तनै सीखायो हूँ बानै डटर थाम्यो रेह अर बानै बि बिस्वास अर परेम क सागै, जखा मसी ईसु म ह, खुद ताँई नमूनो बणार राख। पबितर आत्मा की बजेऊँ जखो आपणा म बास करै ह आ चोखी चिजा की रूखाळी कर जखी तनै सूपी गई ही। तू जाणै ह क, एसिया दिसावर का रेह्बाळा सगळा मेरूँ मुंडो फेर लिआ ह, जिमै फूगिलुस अर हरमुगनेस बी सामिल ह। परबु उनेसिफुरूस क कूणबा प दया करै, क्युं क बो बोळीबर मनै सारो दिओ ह अर मेरै केद होबा की बजेऊँ बी सरमिंदा कोनी होयो। अर जद बो रोम नगरी आयो जणा बो मनै जद ताँई टोतो रिह्यो जद ताँई म बिनै कोनी लाध्यो। परमेसर बिपै मसी क ओज्यु आबाळा दिन दया करै! अर तू बी सूल जाणै ह क बो इफिसुस म मेर ताँई काँई-काँई कर्यो। परबु म मेरा बेटा तिमूतियूस, मसी ईसु म परमेसर जखी दया तेर प करी ह, बिकी बजेऊँ मजबूत बण्यो रेह। जखी बाता तू मेरूँ बोळा सारका गुवाई देबाळा की मोजूदगी म सुणी ह बा बातानै बिस्वास जोगा मिनखानै सूप दे, जखा दुसरानै सीखाबा जोगा हीं। मसी ईसु का बफादार सिपाई की जंय्यां दुख म मेरो पाँतीवाळ बण। एक सिपाई जद खुदका काम म लाग्यो रेह्‍वै ह जणा बो खुदऊँ उपला अधिकार्यानै खुदका कामाऊँ राजी राखबो चावै ह अर इ बजेऊँई बो खुदनै दुसरा झंझटामै कोनी गेरै। अर अंय्यांई कुस्ति को पेलवान बिना नेम-कायदा गेल दाव-पेचऊँ लड़ै जणा बो इनाम कोनी जीत सकै। मेनत करबाळा किसाननै सऊँ पेली धरती को फळ मिलणो चाए। जोक्यु म बोलुँ हूँ बिपै गोर धर, क्युं क परबु तनै सगळी बातानै समजबा की बुदी देसी। जंय्यां की चोखा समचार म सीखायो गयो ह, म बंय्यांई परचार करूं हूँ क, दाऊद का कूणबा को ईसु मसी जखो मरेड़ा मऊँ जी उठ्यो बिपै तेरा हियानै लगा। अर इ चोखा समचारनै परचार करबा की बजेऊँई म दुख उठार्यो हूँ अर एक मुलजिम की जंय्यां साकळा म बंदर्यो हूँ, पण परमेसर का बचना प कोई बंदण कोनी। जणाई म टाळेड़ा मिनखा ताँई सक्यु भोगज्याऊँ हूँ जिऊँ बे बि जीवननै जखो मसी ईसु म ह, अर बिकै सागै जुग-जुग की मेमानै लीं। आ बिस्वास जोगी बात ह, “ज आपा बिकै सागै मरेड़ा हां, जणा बिकै सागै जिस्यां। ज आपा थ्यावस क सागै दुख भोगस्यां, जणा आपा बिकै सागै राज बी करस्यां। ज आपा बिऊँ मुंडो फेरां, जणा बो बी आपणाऊँ मुंडो फेरसी। ज आपा बिस्वास जोगा कोनी होवां, जणाबी बो बिस्वास जोगो बण्यो रेह्‍वै ह, क्युं क बो खुदऊँ कोनी मुकर सकै।” मिनखानै अ बाता याद दिवातो रेह। अर बानै परमेसर क सामै चेतार बोल क बे बेकार की बाता प नइ लड़ीं। अंय्यां करबो चोखो कोनी क्युं क बे बाता बानै सुणबाळा ताँई बिनास की जड़ ह। परमेसर की नजर्या म खुदनै काम करबाळो मिनख बणबा ताँई मेनत कर, जिऊँ तनै सरमिन्दो नइ होणो पड़ै, पण परमेसर क सच का बचनानै सई-सई सीखावै। मिनखनै परमेसरऊँ दूर लेज्याबाळी दुनियादारी अर बकवास बाताऊँ खुदनै दूर राख। अंय्यां की बाता खुला घाव की जंय्यां फेलै ह, हमनुस अर फिलेतुस बामैऊँई ह। बे सच को गेलो छोड दिओ अर अंय्यां खेर क, आपानै ओज्यु जिंदगी पेल्याई मिलगी ह क्युंक बिस्वास्या का बिस्वासनै भंगरा दिआ हीं। पण परमेसर की पक्की निम हालै कोनी, जिपै आ छाप लागरी ह, “परबु खुदका मिनखानै जाणै ह,” अर, “जखो कोई परबु को नाम लेवै ह बिनै चाए क बो बुरा करमाऊँ बच्यो रेह्‍वै।” बडा घर म भात-भात का बरतन होवीं हीं, क्युं लकड़ी अर चिकणी माटी का बणेड़ा अर क्युं सोना अर चाँदी का, क्युं खास मोका ताँई अर क्युं घर म रोजकी बरतबा ताँई। ज मिनख खुदनै बुरायाऊँ सुद करले जणा बो खास काम म आबाळो बणसी अर पबितर बणर खुदका मालिक परमेसर क काम आबाळो बणज्यावै ह। जिऊँ बो हर भला काम ताँई त्यार करेड़ो होसी। जुवानी की बुरी इंछ्याऊँ भाज अर जखा पबितर मनऊँ परबु को नाम लेवीं हीं बाकै सागै खुदनै धरम, बिस्वास, परेम अर मेळमिलाप क सागै संगरो राख। बकवास अर बेतुक की बाताऊँ खुदनै दूर राख क्युं क तू खुद जाणै ह अ बाता राड़-झगड़ा करावै ह। परमेसर को दास लड़बाळो नइ पण सगळा प दया दिखाबाळो, थ्यावस राखबाळो अर चोखो सीखाबाळो होणो चाए। अर जखा खिलाप होवीं बानै नरमाईऊँ समजाबाळो होणो चाए; काँई बेरो परमेसर बानै बाकी गळती मानर माफी माँगबा को मन देवै अर बेबी सच जाण जावै। अर चेतो कर सेतान का जाळऊँ बच ज्यावीं, जखो बानै खुदकी इंछ्या मनवाबा ताँई पकड़ राख्यो ह। आ ध्यान राख, धरती का आखरी का दिना म बोळो माड़ो टेम आसी। क्युं क मिनख मतलबी, लालची, फाँप मारबाळो, मरोड़ म बाँका अर बुराई करबाळा, खुदका माँ-बाप को खयो नइ मानबाळा, दया नइ करबाळा, अधरमी होसी। बाकै हिया म नइ तो प्यार-परेम, नइ दया-धरम होसी। बे दुसरा की बुराई करबाळा, राड़ करबाळा, कुटिचर, भलाईऊँ बैर राखबाळा होसी। बे बिस्वासघाती, लापरवा, गुमान म फुलेड़ा, परमेसर की बजाय मोज-मस्तिऊँ प्यार करबाळा होसी। बे धारमिक्‍ता को दिखाओ तो करी हीं, पण परमेसर की सक्‍तिनै कोनी मानी। अंय्यां का मिनखाऊँ खुदनै दूर राख। बामैऊँ क्युंक सीखाबाळा, मिनखा क घरा म जार खुदनै बस म नइ राखबाळी लूगायानै आपकै बस म करली हीं, जखी खुदका बुरा करमा म अर इंछ्या म फसेड़ी रेह्‍वै। अ लूगाया सदाई बा सीखाबाळाऊँ सीखबो तो चावीं, पण सच काँई ह इनै कोनी जाण सकै। अ सीखाबाळा यन्नेस अर यमबरनेस की जंय्यां ह, जखा मूसा को बिरोद कर्यो हो। बंय्यांई अ बी सच को बिरोद करी हीं। अ अंय्यां का सीखाबाळा हीं जाकी मती मरगी ह अर बे बिस्वास म कोनी बण्या रेह सकीं। पण इब बे ओर घणा कोनी पण्प सकीं, क्युं क जंय्यां यन्नेस अर यमबरनेस की बावळी-बुदी सगळा क सामै आई बंय्यांई आकी बी आज्यासी। पण तू मेरी सीख, भेवार, अर जिंदगी ताँई मेरा मकसदनै मानै ह, तू मेरा बिस्वास, मेरा थ्यावस, मेरा प्यार-परेम, मेरी सेह्बा की सक्‍ति, मेर प होया जुलमा, अर मेरा दुखानै देख्यो। अन्ताकीया, इकोनियुम अर लुस्तरा म जोक्यु होयो हो अर कंय्यां-कंय्यां का दुखदाई जुलमानै भोग्यो हो बानै तू जाणै ह। पण परबु मनै बाऊँ बचायो। जखो बी मिनख मसी ईसु की एकता म धरमी जीवन जिबो चावै ह जणा बिनै जुलम सेह्बो पड़सी। अर पापी अर धोकेबाज मिनख धोको देता अर धोको खाता बिगड़ताई जावीं। पण तू बा बाता प जखी तू सीखी ह, अर जाकै बारां म तनै पक्को बिस्वास ह, आ जाणर की तनै बे बाता सीखाबाळा कूण हा बामै बण्यो रेह। अर टाबरपुणाऊँई तू पबितर सास्तरनै जाणै ह जखो मसी ईसु म बिस्वास की बजेऊँ तनै छुटकारा ताँई बुदी दे सकै ह। सगळो पबितर सास्तर परमेसर की आत्मा की सक्‍तिऊँ मांड्यो गयो ह, जखो सच, गळती प फटकार, सुदार अर धारमिक्‍ता की सीख देवै ह। पबितर सास्तरऊँ परमेसर को भगत सगळा भला कामा म माहिर अर त्यार होज्यावै। मसी ईसु जखो राजा क रूप म आसी अर सगळा जीवता अर मरेड़ा को न्याय करसी बिनै अर परमेसरनै गुवा मानर म तनै आदेस देऊँ हूँ, परमेसर का बचना को परचार कर। टेम बेटेम मिनखानै सुदारबा ताँई त्यार रेह। तू मिनखानै सई कर अर बाका पाप प बाकै दकाल लगा। सागैई बानै उदास बी मना होबा दे, बानै हिदायत देती टेम सदाई थ्यावस राखजे। अंय्यां को टेम आर्यो ह जद मिनख चोखी सीखनै कोनी सुणसी, पण इकी झघा बे खुद ताँई अंय्यां का सीखाबाळा ढुंढलेसी। अंय्यां का सीखाबाळा बानै बे बाताई बतासी जखी सुणबो बानै चोखो लागै ह। बे खुदका कानानै सच सुणबाऊँ बंद करलेसी अर बेतुक की क्हाण्या म ध्यान लगा लेसी। तू स्यांतीऊँ टिक्यो रेह अर दुख भोगबा ताँई त्यार रेह। चोखा समचारनै बोलबा ताँई कड़ी मेनत कर अर तेरी जुबाबदारीनै चोखा ढंगऊँ निभा। म मेरी इ जिंदगीनै परबु की सेवा ताँई दे दिओ हूँ, मेर ताँई बा घड़ी आगी ह जद मनै मेरी आ खोळ छोडणी पड़सी। म चोखो लड़लिओ, म मेरी दोड़ पूरी करली अर म बिस्वास जोगो रिह्यो। अर इब ईस्बर नगरी म जीत को इनाम मनै उडिकर्यो ह, जिनै धरमी न्यायी परबु आखरी दिन मनै देसी। मनै एकलानैई नइ पण बा सगळानै बी जखा परेम क सागै बिकै परगट होबानै उडिकीं हीं। तावळोई मेरै कनै आबा की कोसिस कर, क्युं क देमास तो इ दुनियादारी का मो म पड़र मनै छोडर थिसलूनिकी नगरी चलेगो ह, करेसकन्स गलातिया अर तितूस दलमतिया नगरी चलेगो। मेरै सागै खाली लूकाई रिह्यो ह। चोखा समचारनै सुणाबा का काम म मरकुस मेरो बोळो मददगार हो सकै ह, इ ताँई बिनै टोर तेरै सागै लेतो आजे। तुखीकुसनै म इफिसुस भेज्यो हूँ। जद तू आवै जणा तरोआस का रेह्बाळा करपुस क घराऊँ मेरो चोळो, पोथ्या अर चमड़ा को पतर तो खासकर याद कर ल्याजे। धातु को काम करबाळो सिकन्दर मनै बोळो दिन घाल्यो ह। परबु बिकी करनी गेल बिनै फळ दे। तू बी बिऊँ समळर रेह्जे, क्युं क बो आपा जखो चोखो समचार सुणावां हां बिको बोळो बिरोद कर्यो ह। जद पेली बर कचेरी म मनै लेर गया, जणा मेरा बचाव म मेरो सागो कोई कोनी दिओ, पण सगळा का सगळा मनै तज दिआ। ज हो सकै तो परमेसर बाऊँ इको हिसाब नइ लेवै। पण परबु मेरै सागै खड़्यो रिह्यो अर मनै ताकत दिओ, जणाई तो म सगळा गैर-यहूदिआनै सुणाबा ताँई चोखा समचार को खूब हेलो पाड़ सक्यो अर म मोत की सजाऊँ बचायो गयो। अर परबु मनै सगळी बुरी बाताऊँ बचासी अर बचार ईस्बर नगरी राज म लेज्यासी। बिकी मेमा जुग-जुग होती रेह्‍वै। अंय्यांई होवै! परसकीला, अकविला अर उनेसिफुरूस का कूणबानै मेरा राजी-खुसी का समचार बोलजे। इरास्तुस कुरन्थी म रेहग्यो, अर तरोफेमुसनै, म बिमारी की बजेऊँ मिलेतूस नगरी मई छोड्यायो। स्याळाऊँ पेल्या-पेल्या आबा की पूरी-पूरी कोसिस करजे। इबलुस, पुदेंस, लिनुस, कलौदिआ अर सगळा बिस्वासी भाई तनै राजी-खुसी का समचार बोल्या ह। परबु तेरी आत्मा क सागै रेह्‍वै। थारै सगळा प परमेसर की दया होती रेह्‍वै। म ईसु मसीऊँ भेजेड़ो चेलो, परमेसर को दास पोलुस आ चिठी तितूस तनै मांडूँ हूँ। म परमेसर का टाळेड़ा मिनखानै बिस्वास म बढाबा भेज्यो गयो हूँ। जिऊँ बे सचनै जाणर पबितर जीवन जीवै। ओ सच अजर-अमर जीवन की आस बंधावै ह। जिको करार बिस्वास जोगो परमेसर जगत की सरूआतऊँ पेली कर दिओ हो। परमेसर को बचन सई टेम प परचार कर परगट कर्यो गयो। बोई समचार मनै सूप्यो गयो हो, अर आपानै बचाबाळा परमेसर का हुकमऊँ म इको हेलो पाड़ूँ हूँ। तितूस, आपणा एकसा बिस्वास की बजेऊँ, तू सचमई मेरो बेटो ह। परम-पिता परमेसर अर आपानै बचाबाळो मसी ईसु तेरै प दया अर स्यांती राखै। करेत टापू म, म तनै इ ताँई छोडर आयो हो क तू बठै की सगळी बचेड़ी बातानै सुदारै अर मेरी हिदायत गेल हर नगरी म बिस्वासी मंडळी का मुखियानै टाळर जिमेबारी सूपै। एक बडका म अ बाता होणी चाए क, बिमै कोई एब नइ हो, बिकै एकई लूगाई हो, बिका टाबर बिस्वासी, संस्कारी अर आज्ञा मानबाळा हो। परमेसर का कामनै आपका हाता म लेबाळा भंडारी ताँई ओ जरूरी ह क बिमै कोई एब नइ हो। बो घमंड करबाळो नइ होवै, नइ तावळोई ताव खाबाळो होवै, नइ दारूड़ो, नइ मारपीट करबाळो अर नइ पिसा को लालची। पण बो आवभगत करबाळो, भलाई चाबाळो, खुदनै बस म राखबाळो, पबितर, धरमी अर कायदा म रेह्बाळो होवै। बो बिस्वास जोगा परमेसर का समचार म मजबूती क सागै ठिक बंय्यांई बिस्वास करै जंय्यां क बिनै सीखायो गयो ह। जिऊँ क बो ओरानै बी सची सीखऊँ हिमत बंधा सकै। अर जखा सामै होवै बा मिनखा को मुंडो बंद कर बानै मनवा सकै क बे गळत हीं। क्युं क अठै सीर उठाबाळा, बकवास करबाळा अर धोको देबाळा बोळा मिनख हीं, खासकर बे जखा छुटकारा ताँई सुन्नत प जोर देवीं हीं। ओ जरूरी होगो ह क बाको मुंडो बंद कर्यो जाय। क्युं क बे पिसा कमाबा क चकरां म आपकी सीखऊँ घर-घरनै सई सीख प बिस्वास कोनी करबा दे। करेत टापू को रेह्बाळो बाकोई एक बडको खयो ह, “करेत का रेह्बाळा सदाई झूठ बोलै, अ जंगली ज्यानबर, आळसी अर पेटू हीं।” आकै बारां म इ आदमी की गुवाई सची ह, इ ताँई तू बानै दकालर समजा जिऊँ बे बिस्वास म मजबूत होवीं। अर यहूदि मिनखा की मनघड़ी क्हाण्या प अर बा मिनखा का आदेसा प ध्यान मना द्‍यो जखा सचाईनै कोनी मानै। पबितर मिनखा ताँई सक्यु सुद ह, पण असुद अर अबिस्वास्या ताँई क्युंई पबितर कोनी, क्युं क बाका मन अर बाकी अन्तर-आत्मा दोन्युई असुद करी गई ह। बे खेवै ह, क म्हें परमेसरनै जाणा हां, पण बाका करम इ जोगा कोनी। बे सूगला अर बात नइ मानबाळा अर चोखा काम करबा क जोगा कोनी। तितूस तू बोई सीखा जखो सई ह। बूडा-ठेरानै हिदायत दे क बे सिदा-सादा, थ्यावस राखबाळा, खुदनै बस म राखबाळा लोगा म बुजहाळा, प्यार-परेम अर बिस्वास म मजबूत अर बरदास करबाळा हो। अंय्यांई बूडी-ठेरी लूगायानै बी सीखा क बे पबितर मिनखा की जंय्यां बरताव करबाळी हो। बे चुगली-चाळा करबाळी नइ हो अर नइ बामै पीबा की लत हो। पण बे चोखी सीख देबाळी हो। जिऊँ क बे जुवान लूगायानै बाका मोट्यार अर टाबरा-टिकराऊँ प्यार करबा, खुदनै बस म राखबा, खुदनै पबितर राखबा, मोट्यार क खया म चालबाळी अर घर बांदबाळी चोखी लूगाई बणबा की सीख दे। जिऊँ कोईबी परमेसरऊँ आबाळा संदेस क बारां म बुरा नइ बोलै। अंय्यांई तू जुवान छोरानै समजदारीऊँ जीबा ताँई समजा। तू खुद बोई कर जखो चोखो ह, जिऊँ दुसरानै बेरो पड़ै की बानै कंय्यां को बरताव करबो चाए। तू तेरी सीख म ईमानदार अर खरो बण्यो रेह। बोई बोल जिपै कोई आँगळी नइ उठा सकै, जिऊँ तेरा बेरी सरमिंदा होवीं अर बाकन आपानै बुरो बताबा की कोई बजै नइ होवै। दासानै सीखा क बे आपका मालिका की हर बातनै मानर बानै राजी राखै। बे बानै ओटो जुबाब नइ देवै, बे मालिक क घर म चोरी-चकारी नइ करीं, पण पूरी तर्या चोखा अर बिस्वास जोगा बण्या रेह्‍वै जिऊँ आपानै बचाबाळा परमेसर क बारां म जखो सीखायो गयो ह हर कोई बिको मान करै। क्युं क परमेसर सगळा मिनखा का छुटकारा ताँई दया दिखाई ह। आ दया सीखावै ह क आपा बि जीवननै जिमै परमेसर कोनी अर दुनियादारी की बुरी इंछ्यानै छोडर इ जुग म खुद क बस म रेह्बाळो, खराईऊँ भर्यो जीवन जीवां जिमै परमेसर ह, अर आपा जखी भागहाळी आस राखां हां बिकै पूरो होबानै उडिकां हां, जद आपणो म्हान परमेसर अर छुटकारो देबाळो ईसु मसी मेमा म परगट होसी। बो आपणा ताँई खुदकी ज्यान दे दिनी। जिऊँ बो आपानै सगळा पापऊँ बचावै अर आपानै सुद कर खुद ताँई अंय्यां का मिनख बणावै जखा भला काम करबा ताँई उतावळा रेह्‍वै। तू अ सगळी बाता अधिकार क सागै तेरा सुणबाळानै सीखा, जुर्त पड़ै तो बाकै दकाल लगा अर जुर्त पड़ै तो हिमत बंधा। कोईकै सामैई तनै निचो नइ देखणो पड़ै। तू मिनखानै याद दिवा क राज करबाळा अर परधाना को खयो मानी। अर हरतर्या का भला काम करबा ताँई त्यार रेह्‍वै। बाऊँ बोल क बे कोईकी बुराई नइ करै, पण सगळा क सागै चोखो बरताव कर रळमिलर स्यांतीऊँ रेह्‍वै। क्युं क मसीनै मानबाऊँ पेली आपा बी बेबुदी का, खयो नइ मानबाळा, भटकेड़ा अर हरतर्या की मो-माया का गुलाम हा। आपणो जीवन बुराई अर बळोकड़ा पुणाऊँ भरेड़ो हो। अर आपा एक दुसराऊँ नफरत करता हा। पण आपानै बचाबाळा परमेसर की दया अर प्यार मिनख ताँई परगट कर्यो गयो, अंय्यां इ ताँई कोनी होयो क आपा धरम का करम कर्या हा, पण आ बिकी दयाई ह की बो आपानै पबितर आत्मा क जरिए बचायो ह जखी आपानै धोर नयो जलम अर नई जिंदगी देवै ह। परमेसर आपानै छुटाबाळा ईसु मसी क जरिए आपणा प भरपुरीऊँ पबितर आत्मानै उंदकायो ह। दयाऊँई आपा परमेसर क सामै सई हां अर अजर-अमर जीवन का वारिस होवां जिकी आपा आस राखां हां। आ बिस्वास जोगी बात ह। म चाऊँ हूँ क आ मामला म तू खास जोर देर बोलै जिऊँ परमेसर प बिस्वास राखबाळा, भला काम करीं, जखा सकै काम का अर चोखा हीं। बेतुक की जिरै, बडका की पिड्या की गिणती, राड़-झगड़ाऊँ अर नेम-कायदा क बारां म लड़बाऊँ बचो। क्युं क अ बाता बेतुक अर बेमतबल की ह। फूट गेरबाळा मिनखनै चिता अर ज बो एक बर म नइ मानै जणा बिनै दुसरकै चिता जद बो दुसरकै बी नइ मानै जणा बिऊँ किनारो करले। तू ओ जाणले क, अंय्यां को मिनख भरस्ट होगो ह, अर बिका पाप बिनै गळत साबित करीं हीं। जद म अरतिमास नहिस तुखीकुसनै तेरै कनै भेजूँ। अर बाकै पुगताई तू तावळ कर मेरै कनै निकुपुलिस नगरी म आज्याजे। क्युं क स्याळै-स्याळै म बठैई रेह्बा की मनस्या करी। तू बकिल जेनास अर अपुलोस क सागै बाका सफर ताँई जुर्त की चिजा बांद दिजे। बानै कोई बात की कमी-घटी नइ होवै। आपणा मिनखानै ओरा की जुर्त पूरी करबा ताँई चोखा करमा म टेम बिताणो चाए, बानै फालतु को जीवन नइ जीणो चाए। मेरै सागैहाळा कानिऊँ तनै नमस्कार मांडूँ हूँ। बिस्वास म आपणाऊँ परेम राखबाळा सगळा भाईड़ानै म्हारै कानिऊँ नमस्कार खिजे। परमेसर की दया थारै सगळा प बणी रेह्‍वै। म पोलुस, जखो मसी ईसु को समचार सुणाबा की बजेऊँ जेळ म बंदि हूँ। म अर बिस्वासी भाईड़ो तिमूतियूस आ चिठी, म्हारा लाडला संगी फिलेमोन, म्हारी भाण अफिया, म्हारो सिरी अरखिप्पुस जखो सिपाई ह अर थारा घरा भेळी होबाळी मसी बिस्वासी मंडळीनै मांडां हां। आपणा परम-पिता परमेसर अर परबु ईसु मसी की दया अर स्यांती थार प बणी रेह्‍वै। फिलेमोन, म जद बी अरदास करूं हूँ, जणा म मेरी अरदास म तनै याद राखूँ हूँ, अर तेरै ताँई सदाई परमेसर को धनेवाद देऊँ हूँ। क्युं क तू जखो परेम परमेसर का मिनखा ताँई राखै ह, अर जखो बिस्वास तू ईसु मसी म राखै बिकै बारां म, म सुणतो रेह्‍वूं हूँ। म आ अरदास करूं हूँ क, तू मिनखानै तेरै बिस्वास क बारां म बतावै जणा बिकै जरिए बे मसी का सगळा आसिरबादा क बारां म जाणै जखा आपानै दियड़ा ह। क्युं क मेरा बिस्वासी भाईड़ा, म तेरा प्यार-परेमऊँ बोळो राजी हूँ, अर बिऊँ मनै हिमत मिलै ह। तेरी बजेऊँ परमेसर का मिनखा का हिया राजी हीं। मसी म मनै ओ हक क, म जखो सई ह बिनै करबा ताँई ओडाऊँ। अर म उमर म बी बडो हूँ अर अठै ताँई क म मसी ईसु का चोखा समचारनै सुणाबा की बजेऊँ जेळ म बंदि हूँ। पण आ सगळी बाता क वावजुद बी म तेरूँ परेमऊँ अरदास करूं हूँ, म चाऊँ हूँ क तू मसी म मेरा बेटा उनेसिमुस की मदद करै। क्युं क ओ जेळ म मेरै जरिए मसी म आयो। पेल्या ओ तेरै क्युंई काम को कोनी हो, पण इब ओ तेरै अर मेरै दोन्या क काम को ह। जणा इब म मेरा काळज्या का टुकड़ा उनेसिमुसनै तेरै कनै पाछो भेजूँ हूँ। मेरी तो आ इंछ्या ही क बो अठै रेह्‍र तेरै कानिऊँ मेरी सेवा करै, क्युं क म तो चोखा समचारनै सुणाबा की बजेऊँ जेळ म बंदि हूँ। पण फिलेमोन तेरी हामी बिना म क्युंई कोनी करबो चाऊँ, जिऊँ तेरूँ होबाळी भलाई कोई दबाब म नइ होवै पण तेरी इंछ्याऊँ होवै। कूण जाणतो हो क बो तेरूँ इ ताँई न्यारो होयो क बो सदाई तेरै कनै रेह्‍वै। पण बो एक दास की जंय्यां नइ पण एक भाई की जंय्यां मेरो लाडलो ह अर मेरूँ बेत्ती बो परबु क गेल चालबा की बजेऊँ अर एक सागी भाई क रूप म तनै बोळो प्यारो होसी। ज तू मनै तेरो साती समजै जणा तू बिकी बंय्यांई आवभगत करजे जंय्यां मेरी करै ह। अर बिकी बजेऊँ तेरो क्युं बुरो होयो नहिस तेरी बिपै माँगत ह जणा बिनै मेरै नाम मांड लिए। म पोलुस मेरै हातऊँ मांडर्यो हूँ क, म तेरो सक्यु चुका देस्युँ। अर आ बात मनै बताबा की जुर्त कोनी क तेरो जीवन मेरो करजदार ह। मेरा लाडला बिस्वासी भाई, ज तू मेरै ताँई आ बात करदे, जणा परबु ईसु मसी क नामऊँ मेरा काळज्या म ठंड पड़ज्या। तेर प मनै भरोसो ह जणाई म तनै मांडूँ हूँ, क्युं क म जाणू हूँ क, तू जखो म तेरूँ चाऊँ हूँ बिऊँ बढर करसी। मेरै ताँई एक कोठो त्यार राखजे, क्युं क मनै आस ह की थारी अरदास की बजेऊँ थारूँ मिलस्युं। मसी ईसु क पिछै चालबा की बजेऊँ मेरै सागै जेळ म बंद इफरास मेरा साती-संगी मरकुस, अरिस्तखुस, देमास अर लूका थानै नमस्कार बोली ह। आपणा परबु ईसु मसी की दया थारै सगळा की आत्मा क सागै रेह्‍वै। अंय्यांई होवै! पुराणा टेम म परमेसर आपणा बडकाऊँ आपकी खेबाळा क जरिए टेम-टेम प भात-भात का तरिकाऊँ बतळायो। पण आ आखरी दिना म परमेसर आपका बेटा क जरिए आपणाऊँ बातचित करी। बिनै बो सगळी चिजा को वारिस बणायो अर बिकै जरिए बो सगळी सरस्टिनै रच्यो। परमेसर को बेटो परमेसर की मेमा को उजाळो अर बिमै बिकोसोई सुभाव ह। बोई आपका बचना की सक्‍तिऊँ सरस्टि की सगळी चिजानै थाम राखी ह। बो मिनखा का पापनै धोर ईस्बर नगरी म सऊँ सक्‍तिसाली परमेसर क दायणै हात जार बेठगो। जणा बो ईस्बर नगरी दुताऊँ बडो बणगो अर जखो नाम बिनै बापोत म दिओ गयो बो बाका नामऊँ बडो ह। क्युं क परमेसर कदैई कोई बी ईस्बर नगरी दुताऊँ आ कोनी बोल्यो क, “तू मेरो बेटो ह; म आज तेरो बाप बण्यो हूँ!” अर नइ कोई ईस्बर नगरी दुताऊँ अंय्यां बोल्यो, “म बिको बाप होस्युं, अर बो मेरो बेटो होसी!” अर जद परमेसर आपका पेलीपोत का बेटानै जगत म भेज्यो ह, जणा बो बोलै ह क, “सगळा ईस्बर नगरी दुत बिकै आगै धोक खावै।” अर बो ईस्बर नगरी दुता क बारां म अंय्यां खेवै ह क, “बो ईस्बर नगरी दुतानै आत्मा बणायो, अर आपका दासनै आग की लपटा बणायो।” पण बो आपका बेटा क बारां म खेवै ह क, “ओ परमेसर तेरो सिंघासन जुग-जुग ताँई रेह्सी, अर तेरा राज म सदाई न्याय होसी। तू धरमीऊँ प्यार अर नियमानै नइ मानबाळाऊँ नफरत करी, इ बजेऊँ परमेसर, तेरो परमेसर, तेर प आनंद का तेलऊँ अभिसेक कर तनै तेरा सात्याऊँ उचो कर्यो।” अर बो अंय्यां बी खेवै ह क, “ओ परबु, सरूआत मई थे इ सरस्टि की निम धरी, अर आ ईस्बर नगरी बी थारा हाता की कारिगरी ह। आको बी नास होज्यासी, पण थे जुग-जुग ताँई रेहस्यो। ओ सक्यु गाबा की जंय्यां पुराणो होज्यासी। अर थे आनै चादरा की जंय्यां पळेट देस्यो। बे गाबा की जंय्यां बदल ज्यासी। पण थे तो बंय्यां का बंय्यांई रेहस्यो, अर थारो जुग कदैई कोनी मिटै।” परमेसर कदैई कोई ईस्बर नगरी दुतऊँ अंय्यां कोनी बोल्यो क, “तू मेरै दाया हात बेठ, जद ताँई म तेरा बेरीयानै तेरै पगा तळै की चोकी नइ कर द्‍युँ।” इ ताँई सगळा ईस्बर नगरी दुत छुटकारो पाबाळा मिनखा की सेवा करबा ताँई भेजेड़ी आत्मा हीं। आपा जखी बी बाता सुणी ह बापै आपानै हियो लगाणो चाए, जिऊँ आपा नइ भटकां। क्युं क ज ईस्बर नगरी दुता क जरिए दिओ गयो समचार पक्को हो, खयो नइ मानबाळानै अर नियमानै तोड़बाळानै ठिक-ठिक सजा दि गई जणा पाछै आपा इ बडा छुटकारा की अनदेखी कर कंय्यां बच सकां हां? इ छुटकारा को पेलो हेलो परबु कानिऊँ पाड़्यो गयो हो अर जखा बी इ हेलानै सुण्या हा बे आपणा ताँई इनै पुक्‍तो कर्या। अर परमेसर बी आपका बडा-बडा चमत्काराऊँ, सक्‍तिऊँ भरेड़ा भात-भात का कामाऊँ, सेलाणीऊँ अर पबितर आत्मा का बरदानाऊँ जखा बिकी इंछ्याऊँ बाट्या गया हा, इनै साबित कर्यो। जि आबाळा जुग की चरचा आपा करर्या हां बिपै राज करबा ताँई परमेसर ईस्बर नगरी दुतानै कोनी गिण्यो। सास्तर म एक झघा कोई अंय्यां बोल्यो ह, “मिनख काँई ह, जिनै तू याद करै? मिनख को बेटो काँई ह, जखो तू बिको ध्यान राखै? तू मिनखनै ईस्बर नगरी दुताऊँ चिनोसोई कम बणायो ह, तू बिकै माथा प मेमा अर मान को मुकट धर्यो ह अर बिकै पगा तळै सक्यु कर दिओ।” अर सक्यु बिकै बस म कर परमेसर क्युं बी कोनी छोड्यो जखो बिकै बस म नइ होवै। पण आजकाल देखबा म कोनी आवै क सक्यु बिकै बस म ह। पण आपा ईसुनै जखो ईस्बर नगरी दुताऊँ चिनोसोई कम बणायो गयो हो, इब बिनै मेमा अर मान को मुकट पेर्या देखां हां, क्युं क बो मोत की पिड़ा भोगी ह। जिऊँ क बो परमेसर की दयाऊँ सगळा मिनखा ताँई मोत भोगै। सगळी चिजा परमेसर ताँई ह अर सक्यु बिऊँई ह। परमेसरनै भायो क बो आपका घणकराक टाबरानै आपकी मेमा म ल्याबा ताँई ईसुनै दुख क जरिए सिद बणावै। बानै छुटकारो देबाळो ईसुई ह। क्युं क पापऊँ पबितर करबाळो ईसु अर पापऊँ पबितर होबाळा मिनख एकई बाप का हीं; इ ताँई ईसु बानै खुदका भाई खेबाऊँ कोनी सरमावै। अर बो खेवै ह, “म मेरा भाई-भाणा म तेरा नाम को हेलो पाड़स्युं, अर मिनखा की मंडळी क मांयनै म तेरो गुणगान गास्युं।” अर बो अंय्यां बी बोलै ह, “म बिपै बिस्वास करस्युं।” ओज्यु बो बोलै ह, “म अर बा ओलाद जखी परमेसर मनै दिनी ह अठै हां।” क्युं क बा ओलाद मास अर लोय की ही इ ताँई ईसु बी मास अर लोय को बण्यो। जिऊँ बो आपकी मोतऊँ सेताननै नास करै, सेतान जिकनै मारबा की सक्‍ति ही अर जत्ता बी आपकै जीता-जीव मोत का डर की गुलामी म हा बानै छुड़ावै। क्युं क पक्काई बे ईस्बर नगरी दुत कोनी जाकी बो मदद करै पण बे तो अब्राहम का वंस ह जाकी बो मदद करै। इ ताँई बिनै हर बात म मिनखा जंय्यां को बणायो गयो, जिऊँ बो परमेसर की सेवा करबा ताँई दया करबाळो अर बिस्वास जोगो म्हायाजक बणै। अर मिनखा को परमेसरऊँ ओज्यु मेळ कराबा ताँई बलि होवै। क्युं क ईसु खुदबी दुख भोग्यो जद बो बिचास्यो गयो जिऊँ बो बाकी मदद कर सकै ह जखा बिचास्या जावै ह। ईस्बर नगरी का बुलावा म पाँतीवाळ ओ मेरा पबितर बिस्वासी भाईड़ो, थे थारो ध्यान बि परमेसर का भेजेड़ा ईसु प जखो म्हायाजक ह अर जिनै म्हें माना हां बिपै लगाओ। अर जंय्यां मूसा परमेसर को काम करबा म बिस्वास जोगो हो, बंय्यांई ईसु बी आपका टाळबाळा परमेसर क सामै बिस्वास जोगो हो। जंय्यां घरनै बणाबाळानै घरऊँ बेत्ती मान दिओ जावै ह बंय्यांई ईसुनै बी मूसाऊँ बेत्ती मान दिओ गयो। क्युं क हरेक घरनै बणाबाळो कोईनै कोई होवै ह, पण सक्यानै बणाबाळो परमेसरई ह। मूसा तो परमेसर क घर म बिस्वास जोगो दास बणर रिह्यो, जिऊँ बो बा बाता क बारां म गुवाई देवै जखी आबाळा टेम म बोली जाबाळी ही। पण मसी बेटो होबा क नातै परमेसर का घर को मुखियो ह, अर ज आपा हिमत अर बि आसनै जिपै आपा बिस्वास करां हां थाम्या राखां जणा आपा बिका परिवार हां। जणाई पबितर आत्मा खेवै ह, “ज थे आज बिकी उवाज सुणो, जणा थे थारा हियानै थारा बडका की जंय्यां काठो मना करो, जखा बगावती दिना म कर्या हा, जि टेम का बे उजाड़ म बिचास्या जार्या हा। बे चाळिस बरसा ताँई मेरा कामानै देख्या, बिकै वावजुद बी बे मनै बिचास्ता अर अजमाता रिह्या। इ बजेऊँई म बि पिडीऊँ नराज रिह्यो, अर म बाऊँ बोल्यो, ‘थारो हियो सदाई भटकतो रेह्सी, अर थे मेरा गेलानै कोनी पिछाण्यो।’ अर म बानै झाळ्या म आर आ सोगन खार खयो, ‘बे कदैई मेरी अराम हाळी झघा म कोनी बड़सी।’ ” मेरा लाडला बिस्वास्यो, चेता म रेहज्यो! कदै अंय्यां नइ होवै क कोईसाको हियो बुराई अर भेमऊँ भर जावै जखो बिनै जीवता परमेसरऊँ दूर कर देवै ह। जद ताँई आज को दिन खुवावै ह रोजकी एक दुसरा की हिमत बंधाता रेहज्यो। जिऊँ थार मालो कोईसो बी पाप का धोका म आर आपका हियानै काठो नइ करै। क्युं क ज आपा पेलड़ा बिस्वास म आखीर ताँई मजबूत बण्या रेहस्यां जणाई आपा मसी का पाँतीवाळ बणस्यां। जंय्यां क बोल्यो बी गयो ह, “ज थे आज बिकी उवाज सुणो, जणा थे थारा हियानै काठो मना करज्यो, जंय्यां की बगावत की टेम म कर्या हा।” बे सुणबाळा अर बगावती मिनख कूण हा? के अ बे कोनी जानै मूसा मिसरऊँ का'डर ल्यायो हो? अर के अ बेई मिनख कोनी हा जाऊँ परमेसर चाळिस बरसा ताँई नराज रिह्यो? के अ बेई मिनख कोनी हा जखा पाप कर्या अर जाकी लास उजाड़ म पड़ीरी? परमेसर किकै ताँई सोगन खाई ही क थे मेरी अराम हाळी झघा म कोनी बड़स्यो? के अ बे मिनख कोनी जखा बिका हुकमनै कोनी मान्या? अर आपा देख सकां हां क बे मिनख भेम की बजेऊँई बठै कोनी बड़ सक्या। जदकी बिकी अराम हाळी झघा म जाबा को बादो हाल बी ह, जणा आपानै चेता म रेह्बो चाए क्युं क कदै अंय्यां नइ होवै क थारै मऊँ कोईसो बी बठै जाबाऊँ चूक ज्यावै। क्युं क आपानै बी आपणा बडका की जंय्यांई चोखो समचार सुणायो गयो ह पण बानै बि समचारऊँ क्युंई फाईदो कोनी होयो क्युं क बे बि समचारनै तो सुण्यो पण बिपै बिस्वास कोनी कर्यो। पण आपा जखा बिस्वास करां हां बानै बो करार करेड़ो अराम मिलै ह। जंय्यां क बो बोल्यो ह; “म बानै झाळ्या म आर आ सोगन खार खयो, ‘बे कदैई मेरी अराम हाळी झघा म कोनी बड़सी।’ ” जदकी इ सरस्टि की रचना क टेमऊँई बिको काम पूरो होगो हो। क्युं क सातुआ दिन क बारां म बो सास्तर म एक झघा अंय्यां बोल्यो ह, “परमेसर सातवै दिन आपका सगळा कामानै निमेड़र अराम कर्यो।” अर बो बठै ओज्यु खेवै ह, “बे कदैई मेरी अराम हाळी झघा म कोनी बड़सी।” सऊँ पेली जखा मिनखानै चोखो समचार सुणायो गयो हो बे अराम हाळी झघा म कोनी बड़ सक्या क्युं क बे खयो कोनी मान्या। इ ताँई हाल बी क्युंक मिनखा क बड़बा ताँई बा अराम हाळी झघा त्यार ह। इ ताँई परमेसर ओज्यु एक खास दिन ते कर्यो अर बिनै नाम दिओ “आज” अर बो बोळा बरसा क पाछै दाऊद क जरिए बोल्यो, “ज थे आज बिकी उवाज सुणो, जणा थे थारा हियानै काठो मना करो।” अर ज यहोसू बानै बि अराम हाळी झघा म बाड़ देतो जणा पाछै परमेसरनै कोई ओर दिन क बारां म चरचा करबा की जुर्तई कोनी होती। जखोबी हो, बो सातुआ दिनहाळो अराम, हाल बी परमेसर का मिनखानै उडिकर्यो ह। क्युं क जखो बी बि अराम म बड़ै ह जिकै बारां म परमेसर करार कर्यो हो, बठै बानै बाका कामाऊँ बी अराम मिलसी जंय्यांकी परमेसर आपका कामानै निमेड़र अराम कर्यो हो। जणा आओ आपा बि अराम हाळी झघा म बड़बा ताँई पूरी कोसिस करां, क्युं क कदै अंय्यां नइ होवै क आपणा बा बडका की जंय्यां परमेसर का हुकमानै नइ मानबा की बजेऊँ बि अराम हाळी झघा म जाबाऊँ चूक ज्यावां। क्युं क परमेसर को बचन जिंदो अर काम करबाळो ह। बो दोधारी तलवारऊँ बी बेत्ती पेनो ह। परमेसर को बचन आत्मा, पिराण, जोड़ अर गुली म जार बानै न्यारो-न्यारो कर सकै ह। अर ओ हिया का बिचारानै अर मनस्यानै बिचासै ह। परमेसरऊँ क्युंई लुखेड़ो कोनी। बिकी नजर्या म हरेक चिजा खुली अर उघाड़ी पड़ी ह जिकै सामै आपानै लेखो देणो ह। इ ताँई परमेसर को बेटो ईसु मसी अंय्यां को म्हान म्हायाजक ह जखो ईस्बर नगरी गयो। जणा आओ आपा बा बाता म मजबूत रेह्‍वां जानै आपा मानी ह। क्युं क आपणो म्हायाजक अंय्यां को कोनी जखो आपणी कमजोरीनै म्हेसुस कोनी कर सकै; क्युं क बिनै सगळी बाता म आपणी जंय्यां बिचास्यो गयो हो जणा बी बिमै कोई पाप कोनी लाध्यो। जणा आओ, आपा हिमत बां'दर परमेसर की दया का सिंघासन कानि चालां, जिऊँ आपणानै दया अर किरपा मिलै अर जुर्त की टेम प आपणी मदद हो सकै। हरेक म्हायाजक मिनखा मऊँई टाळ्यो जावै ह। अर मिनखा कानिऊँ परमेसरऊँ जुड़ेड़ी बातानै करबा ताँई बिनै म्हायाजक बणायो जावै ह, जंय्यां क पाप का छुटकारा ताँई भेंट अर बलि चढाबो। बो अज्ञानी अर भटकेड़ा मिनखा क सागै नरमाईऊँ बरताव कर सकै ह। क्युं क बो खुद कमजोर्या क बस म ह। इ ताँई बिनै चाए क जंय्यां बो मिनखा का पाप की माफी ताँई चढावो चढावै ह बंय्यांई खुदका पाप की माफी ताँई बी चढावो चढावै। म्हायाजक बणबा को मान कोई बी मिनख खुदकी मरजीऊँ कोनी ले सकै पण ओ तो परमेसर कानिऊँ दिओ जावै ह जंय्यां हारुणनै परमेसर दिओ हो। अंय्यांई मसी बी म्हायाजक बणबा को मान खुदऊँ कोनी लिओ। पण परमेसर बिऊँ बोल्यो, “तू मेरो बेटो ह; आज म तेरो बाप बण्यो हूँ।” अंय्यांई बो एक ओर झघा बोल्यो ह क, “तू मिलिकीसिदक की रीत गेल, सदा-सदाई को याजक ह।” ईसु जद काया म इ धरती प हो बा दिना म बो जोर-जोरऊँ अर रो-रोर बिऊँ अरज अर अरदास करतो रिह्यो जखो बिनै मोतऊँ बचा सको हो। अर बिकी भगती की बजेऊँई बिकी सुणी गई। बो बिको बेटो होबा क बावजुद बी दुख भोग-भोगर हुकमानै मानबो सीख्यो। बो सगळी बाता म निधान होर बा सगळा मिनखा ताँई जखा बिका हुकमानै मानै ह, जुग-जुग ताँई छुटकारा को आधार बणगो। अर बिनै परमेसर, मिलिकीसिदक की रीत गेल म्हायाजक बणायो। आकै बारां म खेबा ताँई म्हारै कनै बोळी बाता हीं, पण थानै समजाबो दोरो ह क्युं क थे सुणबा म कचा हो। टेम देखता तो थानै इब ताँई सीखाबाळा होज्याणा चाए हा। पण थानै अंय्यां का मिनख की जुर्त पड़ै ह जखो थानै सरूआतऊँ ओज्यु परमेसर का बचना का सच की सीख देवै। थानै रोटी नइ पण इब ताँई बी दुद किई जुर्त पड़री ह। क्युं क जखो दुद क पाण जीवै बो तो हाल ताँई टाबरई ह, बिनै धारमिक्‍ता की काँई पिछाण? पण रोटी तो स्याणा ताँई होवै, जखा सीखता सीखता भला-बुरा म भेद करबो जाणज्यावीं। इ ताँई आओ आपा मसी की सरूआती सीखनै छोडर स्याणा बणबा ताँई आगै बढता रेह्‍वां। अर आपानै ओज्यु बाई बाता म नइ पड़्यो रेह्बो चाए जखी बाता आपा सरूआत म सीखी ही जंय्यां क मोत कानि लेज्याबाळा करमाऊँ हियो फेरबो अर परमेसर प बिस्वास करबो, सुद होबा का रिती-रिवाजा की सीख, सीर प हात धरबो, मरेड़ा को ओज्यु जिबो अर आखरी न्याय। ज परमेसर चायो तो आपा अंय्यांई करस्यां। क्युं क जखा मिनखनै एकर परमेसर को ज्ञान मिलगो, जखो ईस्बर नगरी का बरदाना को सुवाद चखलिओ, जखो पबितर आत्मा को संगरो कर लिओ, अर परमेसर का बचना की भलाई अर आबाळा जुग की उपरी सक्‍तियानै जाणग्यो ह। जणा ज अ मिनख भटक जावै जणा आ मिनखा को हियो फेर'र ओज्यु परमेसर का गेला प ल्याबो बोळो ओखो ह, क्युं क बे परमेसर का बेटानै खुद ताँई ओज्यु सुळी चढावीं अर चोड़ै-धाड़ै बिको तमासो बणावीं हीं। क्युंक झाड़्या अर काटा उगाबाळी जमीन बेकार अर परमेसर कानिऊँ सरापित ह अर आखरी म आगऊँ जळाई जावै ह। पण उपळी जमीन प मी को पाणी बार-बार बरसै ह अर जमीन बि पाणीनै पीर किसान ताँई चोखी फसल उगावै ह अर बिनै परमेसर को आसिरबाद मिलै। लाडलो, म्हें अंय्यां बोलर्या तो हां पण म्हानै बिस्वास ह क थारै सागै छुटकारा क बारां म ओर बी चोखो-चोखो होवै। परमेसर अन्याय करबाळो कोनी। क्युं क थारा कामानै अर परमेसर का मिनखा की मदद कर जखो परेम थे बिका नामऊँ दिखाया अर दिखार्या हो बिनै परमेसर कदैई कोनी भूलै। म्हारी तो आई दिली इंछ्या ह क थे हरेक जणा आखीर ताँई इ लगनऊँ काम करता रेह्‍वो, जिऊँ थारी आस पूरी होज्यावै। क्युं क म्हें आ कोनी चावां क थे आळसी बणो, पण म्हें आ चावां हां क थे बा मिनखा किसी चाल चालो जखा बिस्वास अर थ्यावसऊँ बा बाता का वारिस हीं जाको करार परमेसर कर्यो हो। परमेसर जद अब्राहमऊँ करार करर्यो हो, जणा बठै परमेसरऊँ बडो कोई कोनी हो, जिकी सोगन खाई जा सकै ही जणा परमेसर खुदकी सोगन खार बोल्यो, “पक्काई म तनै आसिरबाद देस्युँ अर तनै निरी आस-ओलाद देस्युँ।” जणा अब्राहम थ्यावस क सागै इ करारनै उडिक्यो अर परमेसर को करेड़ो करार पूरो होयो। मिनखा म तो ओ चलन ह क बे आपऊँ बडा की सोगन खावै ह। अर अंय्यां कर सोगन खाबाळो आपकी बातनै सची साबित करै ह अर आ सोगन सगळी बहसनै खतम कर देवै ह। सोगनऊँ परमेसर बिका करार का पाँतीवाळ मिनखानै ओ साप-साप दिखाबो चावै हो क बिको बादो कदैई कोनी टळै। अंय्यां बो सोगनऊँ करारनै पुक्‍तो कर्यो। जणा अठै नइ बदलबाळी दो बाता ह, बिको बादो अर बिकी सोगन जाकै बारां म परमेसर कदैई झूठ कोनी बोल सकै। इ ताँई परमेसर की सरण म आबो आपानै बोळी हिमत बंधावै, जिऊँ आपा आपणै सामै धरेड़ी परमेसर का करेड़ा वादा क पूरो होबा की आसनै, मजबूती क सागै लगाए राखां। आपणी आ आस बि निम का भाठा की जंय्यां ह जखी आपणा हियानै थाम्यो राखै जिऊँ आपणो बिस्वास नइ हालै। अर आपणी आस की बजेऊँई आपा अंय्यां का हां मानो आपा परमेसर की बि झघा म बड़गा जिमै खाली म्हायाजकई बड़ सकै ह जखी परदाऊँ ढकेड़ी ही। जठै आपणा कानिऊँ ईसु मसी आपणाऊँ पेली गयो। अर बो मिलिकीसिदक की रीत गेल सदा-सदाई को म्हायाजक बणगो। ओ मिलिकीसिदक सलेम नगरी को राजा हो अर ओ सऊँ सक्‍तिसाली परमेसर को याजक हो। जद अब्राहम बा च्यार राजानै हरा'र पाछो आर्यो हो जाऊँ बो राड़ करी ही जणा ओई याजक बिऊँ मिल्यो अर आसिरबाद दिओ अर अब्राहम बा सगळी चिजा मऊँ जखी बो राड़ म जीतर ल्यायो हो बाको दसवो हिस्सो बिनै दिओ। मिलिकीसिदक का नाम को पेलो मतबल “धारमिक्‍ता को राजा” होवै ह अर सलेम को राजा होबा की बजेऊँ बिका नाम को मतबल “स्यांती को राजा” बी ह। जिका नइ तो माँ-बाप अर बडका क बारां म कोई लेखो-जोखो ह अर नइ इका जलम अर मोत क बारां म लेखो-जोखो ह। पण बो परमेसर का बेटा की जंय्यां सदा-सदा को याजक ह। इ ताँई थे सोचो तो सई, क बो कतो म्हान हो जिनै कूणबा को खास बडको अब्राहम मेंगी लूट को दसवो हिस्सो दिओ हो। अर इब देखो, नेम-कायदा गेल जखा लेवी की ओलाद हीं बेई याजक बणै अर बानै मिनखाऊँ मतबल आपका यहूदि भायाऊँ दसवो हिस्सो लेबा को हुकम मिलेड़ो ह। जदकी बिका भाईड़ा अब्राहम किई ओलाद हीं। अर मिलिकीसिदक जखो लेवी वंस को कोनी हो, जणा बी बो अब्राहमऊँ दसवो हिस्सो लिओ हो। अर बो अब्राहमनै आसिरबाद दिओ जिकै कनै परमेसर का करेड़ा करार हा। इमै सक की कोई गुंजाईस कोनी क बडा छोटानै आसिरबाद देवै ह। लेवी वंस का याजका का मामला म दसवो हिस्सो लेबाळा याजक मिनखई तो ह जखा मरै ह, पण याजक मिलिकीसिदक क बारां म सास्तर बोलै ह क बो इब ताँई जीवै ह। इ ताँई आपा अंय्यां बी खे सकां हां क जखा लेवी दसवो हिस्सो लेवै ह, बे अब्राहम क जरिए मिलिकीसिदकनै दसवो हिस्सो दे बी दिओ। क्युं क हाल ताँई तो लेवी वंस निकळ्योई कोनी हो जद मिलिकीसिदक अब्राहमऊँ मिल्यो हो। पण जिमैऊँ ओ वंस निकळ्यो बाको बडको अब्राहमई तो ह। परमेसर इजरायल का मिनखानै लेवी याजकपुणा का आधार प नेम-कायदा दिओ। पण लेवी वंस को याजकपुणो परमेसर की नजर्या म मिनखानै धरमी कोनी बणा सक्यो। इ ताँई परमेसरनै दुसरा याजकनै भेजबा की जुर्त पड़ी जिको याजकपुणो लेवी वंस का याजक हारुण का याजकपुणा की जंय्यां कोनी हो। पण बिको याजकपुणो मिलिकीसिदक की रीत गेल हो। ज याजकपुणो बदलै ह जणा जरूरी ह क नेम-कायदो बी बदल्यो जावै। जिकै बारां म अ बाता बोली गई ह बो दुसरा कूणबा को ह अर बि कूणबा को कोईबी मिनख कदैई बेदी प सेवा कोनी करी। आ बात साप-साप ह क आपणो परबु यहूदा का कूणबा म जलम्यो अर मूसा कदैई इ बात को जिकर कोनी कर्यो क इ कूणबा मऊँ कोई याजक निकळसी। अर ओ बदलाव ओर बी साप होगो क्युं क मिलिकीसिदक की जंय्यां को एकोर याजक परगट होगो ह। जखो मिनखा का आदेसा क आधार प नइ पण जीवन देबाळी सक्‍ति क आधार प बण्यो जखी कदैई नास कोनी होवै। क्युं क पेल्याऊँई इ बात की गुवाई दि गई ह क, “तू मिलिकीसिदक की रीत गेल, सदा-सदाई को याजक ह।” पुराणो हुकम इ ताँई हटा दिओ गयो क्युं क बो कमजोर अर बेकार हो। क्युं क नेम-कायदा ख्यानैई निधान कोनी बणायो। पण एक अंय्यां की चोखी आस की पिछाण कराई गई ह जिकै जरिए आपा परमेसर क कनै जा सकां हां। परमेसर बिनै सोगन की बजेऊँ याजक बणायो जदकी दुसरा बिना सोगन कई याजक बण्या। पण ईसु सोगन क सागै बि टेम याजक बण्यो जद परमेसर बिऊँ बोल्यो हो क, “परबु सोगन खाई ह, अर आपका हियानै कदैई कोनी बदलै: ‘तू सदा-सदा को याजक ह।’ ” इ सोगन की बजेऊँ ईसु एक चोखा करार की जामनी बणगो। अंय्यां तो बोळासारा याजक बणता आया हीं पण बानै मोत सदा ताँई कोनी रेह्बा दि। पण ईसु अमर ह, इ ताँई बो सदा-सदाई को म्हायाजक रेह्सी। अर बिकै जरिए जखो बी परमेसर क कनै जावै ह, बाको बो पूरो-पूरो छुटकारो कर सकै ह। क्युं क बो बाकै ताँई अरदास करबा ताँई सदाई जिंदो ह। अर आपानै तो अंय्यां कोई म्हायाजक चाए हो जखो पबितर, निरदोस, पापी मिनखाऊँ न्यारो, सुद अर जिको ईस्बर नगरी म उचो पद हो। अर बिनै इकी जुर्त कोनी ही क बो म्हायाजका की जंय्यां पेल्या खुद ताँई पाप बलि चढावै बिकै पाछैई मिनखा ताँई पाप बलि चढावै। पण बो बाकै पाप ताँई खुदनै सदा-सदा ताँई बलि कर दिओ। मूसा का नेम-कायदा गेल बणाएड़ा म्हायाजका म तो कमीया ही; पण जखी सोगन नियमा पाछै आई बा, बेटानै टाळी जखो सदा-सदा ताँई निधान म्हायाजक बणगो। जोक्यु बी म्हें खेर्या हां बा सगळी बाता मऊँ बडी बात तो आ ह क आपणै कनै अंय्यां को म्हायाजक ह जखो ईस्बर नगरी म सऊँ सक्‍तिसाली क दायणै हात सिंघासन प बिराजमान ह। ओ म्हापबितर झघा म सेवा करै ह, आ झघा सचा परमेसर को पबितर तम्मू ह, जिनै कोई मिनख कोनी, पण परबु बणायो ह। क्युं क जिनै बी म्हायाजक बणायो जावै ह बो भेंट अर बलि चढाबा ताँई बणायो जावै ह। इ ताँई जरूरी हो क इ म्हायाजक क कनै बी चढावा ताँई क्युंनै क्यु होणो चाए हो। अर ज ओ इ धरती प होतो जणा याजक कोनी होतो, क्युं क नेम-कायदा गेल भेंट चढाबाळा तो पेल्याऊँई हां। अ, जखा परमेसर का पबितर तम्मू की सेवा करीं हीं बो, जखी ईस्बर नगरी म ह बिकिई नकल अर रूप म ह। इ ताँई जद मूसा पबितर झघा बणाबाळो हो जणा बिनै चेतायो गयो हो क, “याद राखजे हरेक चिज बंय्यांई होणी चाए जंय्यां तनै डूँगर प दिखायो गयो हो।” पण जखो सेवा को काम मसीनै मिल्यो बो बाकी सेवा का कामाऊँ उचो ह। क्युं क ईसु जि नया करार को बिचोलो ह बो करार पुराणा करारऊँ उचो ह अर बो चोखी चिजा का वादा का बळबूता प ह। क्युं क ज पुराणा करार म कोई खोट नइ होती जणा दुसरा करार की जुर्तई कोनी पड़ती। पण परमेसरनै बा मिनखा म खोट नजर आई जणा बो बोल्यो, “परबु घोसणा करै ह; बो टेम आर्यो ह, जद म इजरायल का कूणबाऊँ अर यहूदा का कूणबाऊँ एक नयो करार करस्युं। अर ओ करार बाका बडकाऊँ करेड़ा करार की जंय्यां कोनी, जद म बाका बडकानै मिसर देस की गुलामीऊँ बाका हातनै पकड़र निकाळ्यो हो। परबु घोसणा करै ह, म बाऊँ मुंडो फेर लिओ, क्युं क बे मेरा करार क बिस्वास जोगा कोनी रिह्या। परबु घोसणा करै ह, जखो करार म बा दिना क पाछै इजरायल का कूणबा क सागै बांदस्युं, बो नयो करार ओ ह क म मेरा नियमानै बाकै हिया म बिठास्युं, अर बानै बाका काळज्या प मांडस्युं, अर म बाको परमेसर होस्युं अर बे मेरा मिनख होसी। अर इकै पाछै कोईबी आपका पाड़ोसी भाईनै सीख कोनी देसी, अर नइ आपका भाईऊँ खेसी क, ‘परबुनै जाण।’ क्युं क छोटाऊँ लेर बडा ताँई सगळा मनै जाण ज्यासी। क्युं क म बाका बुरा कामानै माफ करस्युं अर बाका पापनै आगैऊँ याद कोनी करस्युं।” अर अंय्यां बो इनै “नयो करार” खेर पुराणा करारनै बेकार बणा दिओ; अर जखो पुराणो अर बेकार ह बो तावळोई मिटज्यावै ह। पेलड़ो करार जखो इजरायली मिनखा अर परमेसर क बिचमै हो, बिमै भगती करबा का नियम काईदा बी हा अर भगती करबा ताँई पबितर झघा बी बणाई गई ही। मतबल एक पबितर तम्मू खड़्यो कर्यो गयो हो, जिका दो भाग हा, पेलड़ा भाग म दिपदान, पाटियो अर चढावा म चढाईड़ी रोट्या ही; इ हिस्सानै पबितर झघा बोलता हा। इकै पाछै एक परदो हो, परदा क गेलड़ै नाकै एक भाग हो जिनै म्हापबितर झघा बोलता हा। इ भाग म सोना की धूप जळाबाळी बेदी जिपै सुगंद देबाळी चिजा चढाई जाती ही, सोनाऊँ मंढेड़ो करार को बक्सो अर इ बक्सा क मांयनै सोनाऊँ बणेड़ो बरतन हो जिकै मांयनै मन्ना हो, हारुण की कुपळ फूटेड़ी लाठी अर करार मांडेड़ा भाठा बी हा। अर करारहाळा बक्सा क उपर मेमा का तेजऊँ भर्या करूब ईस्बर नगरी दुता की मूरत्या ही अर अ माफी हाळी झघा प छाया करमाली ही। पण इब आ एकेक क बारां म बखान करबा को टेम कोनी। पबितर तम्मू क मांयनै सक्यु इ हिसाबऊँ जचेड़ो हो अर याजक रोजकी पबितर तम्मू क पेलड़ा भाग म जार आपका सेवा का कामनै करता हा। पण परदा क गेलड़ै नाकै का भाग म खाली म्हायाजकई जा सकतो हो, अर बो बी बरस म खाली एकबर। अर म्हायाजक बी बिना बि लोय क कोनी जा सकतो हो जखो बो खुदका अर मिनखा का अणभोळ म करेड़ा पाप क बदलै चढायो जातो हो। इकै जरिए पबितर आत्मा आ दिखावै ह क, जद ताँई पबितर झघा का पेलड़ा भाग म सेवा को काम होर्यो ह जणा ताँई म्हापबितर हाळा भाग म जाबा को गेलो कोनी खोल्यो गयो। अर ओ पबितर तम्मू आज का जुग ताँई मिसाल ह, जखो आ दिखावै ह क जखी भेंट अर बलिदान चढायो जार्यो ह बो भगती करबाळा मिनखा की अन्तर-आत्मानै समुळी सुद कोनी कर सकै। क्युं क अ नियम तो बारला हीं जखा खाबा-पीबा अर भात-भात का सुद होबा का रिती-रिवाज ह अर अ जद ताँई रेह्सी जद ताँई नयो सिरो लागू नइ होज्यावै। पण इब मसी जखो चोखी बाता को म्हायाजक बणर आयो ह, बो हात का बणाएड़ा तम्मू म कोनी पण इऊँ बी बडा अर सिद तम्मू क मांयनै सेवा करै ह इको मतबल ओ ह क बो पबितर तम्मू इ सरस्टि को भाग कोनी। बो बकरा अर बाछ्या का लोयऊँ नइ पण खुदका लोयऊँ एकबर मई म्हापबितर झघा क मांयनै गयो। अर जुग-जुग को छुटकारो पक्को कर दिओ। क्युं क बकरा अर सांड को लोय अर बछड़ा की भगूती छिड़कर मिनखानै बारनैऊँ रिती-रिवाजा गेल सुद कर्यो जावै ह। ज अ बाता साची ह जणा मसी को लोय कतो सक्‍तिसाली ह। अर अजर-अमर पबितर आत्मा क जरिए बो खुदनै निरदोस चढावा क रूप म परमेसरनै चढा दिओ, अंय्यां करबाऊँ अर लोयऊँ आपानै बो, मोत क गेलै लेज्याबाळा कामाऊँ सुद कर दिओ जिऊँ आपा जीवता परमेसर की सेवा कर सकां। इ बजेऊँ मसी नया करार को बिचोलिओ ह जिऊँ जखा बुलाईड़ा हीं बानै बा बादो करेड़ी जुग-जुग ताँई की बापोत दि जावै। अर बा पापऊँ जखा पेलड़ा करार क तळै आता हा बाकी मर'र किमत चुकाई अर बानै अजाद कर्यो। जठै ताँई बसियतनामा को सुवाल ह, जणा बि ताँई बसियतनामानै मंडाबाळा की मोत को सबूत मिलबो जरूरी ह। क्युं क कोई बी बसियतनामो जदई पक्को होवै ह जद बिनै मंडाबाळा की मोत होज्यावै ह। अर जद ताँई, बिनै मंडाबाळो जीताजी ह, बि वसियतनामा को कोई मतबल कोनी। आई बजे ह क पेलड़ा करारनै बिना लोय क लागू कोनी कर्यो गयो। क्युं क मूसा नेम-कायदा का सगळा हुकमानै मिनखानै सुणाबा क पाछै बकरा अर बछड़ा को लोय पाणी म मिलार लाल ऊन अर जूफा की डाळ्याऊँ बा सगळा मिनखा प अर बि पोथी प छिड़क दिओ। अर बो बोल्यो, “ओ बि करार को लोय ह जिनै मानबा को हुकम परमेसर दिओ ह।” अर अंय्यांई मूसा पबितर तम्मू अर भगती क काम म आबाळी सगळी चिजा प लोय छिड़क्यो। सचमई नेम-कायदा चावै ह क सगळी चिजानै लोयऊँ सुद कर्यो जावै। क्युं क बिना लोय बहाया माफी हई कोनी। इ ताँई आ जरूरी ह क जखी चिजा ईस्बर नगरी की नकल ह, बानै ज्यानबरा का बलिदानऊँ सुद कर्यो जाणो चाए। पण ईस्बर नगरी की चिजा तो आऊँ चोखा बलिदानऊँ पबितर करी जाणी चाए। क्युं क मसी बि पबितर झघा म कोनी गयो जखी हातऊँ बणाएड़ी अर असली परमेसर का पबितर तम्मू की नकल ह पण बो तो ईस्बर नगरी मई गयो, जिऊँ क बो आपणै कानिऊँ परमेसर क सामै बिचोली करै। अर नइ बो आपको बलिदान चढाबा ताँई बार-बार ईस्बर नगरी म गयो जंय्यांकी म्हायाजक लोय क सागै जखो बिको कोनी बिनै लेर म्हापबितर झघा म हर बरस जावै ह। अर ज अंय्यां होतो जणा मसीनै इ सरस्टि की सरूआतऊँ लेर कई बार पिड़ा भोगणी पड़ती; पण इब बो इ जुग क आखरी म सगळा ताँई एकबरई परगट होगो, जिऊँ बो खुदई बलिदान होर पाप को नास कर दे। अर जंय्यां मिनखा ताँई एकर मरबो अर बिकै पाछै बिको न्याय होबो जरूरी ह, बंय्यांई मसी बी बोळा मिनखा का पापनै धोबा ताँई एकर बलिदान होयो; अर मसी बा मिनखा ताँई जखा बिनै उडिकै ह बाका पाप धोबा ताँई नइ पण बाका छुटकारा ताँई दुसरकै परगट होसी। नेम-कायदा तो आबाळी चोखी बाता की छाया ह। पण ओ बाको असली रूप कोनी ह। इ ताँई चढावा की चिजानै चढावा क रूप म हर बरस चढायो जातो हो जखी परमेसर क कनै आबाळा मिनखानै कदैई सिद कोनी कर सकै। अर ज अंय्यां होतो जणा बाको चढावो चढाबो बंद कोनी होज्यातो? अर ज भगती करबाळा एकरई सुद होज्याता, जणा बाकी अन्तर-आत्मा बानै ओज्यु पापी कोनी बताती। पण बाको बलि देबो बरस म एकबरई बाका पापनै याद दिलाबा ताँई हो। क्युं क ओ तो अणहोतो ह क बकरा अर सांड को लोय पापनै धो सकै। इ ताँई जद मसी इ जगत म आयो हो जणा बो बोल्यो हो क, “तू बलिदान अर चढाओ कोनी चायो, पण मेरै ताँई एक काया त्यार करी ह। थे नइ तो होमबलीऊँ, अर नइ पापबलीऊँ राजी होया। जणा म बोल्यो, ‘मेरै बारां म जंय्यां पबितर सास्तर म मंडेड़ो ह क, “म अठै हूँ।”’ ओ मेरा परमेसर म थारी इंछ्या पूरी करबा आयो हूँ।” क्युं क बो पेल्याई बोल्यो हो क, “बलिदान, चढाओ, होमबली अर पापबली नइ तो चावै अर नइ आऊँ राजी होवै।” जदकी नेम-कायदा गेल तो अ सगळी चिजा चढाई जावै ह। जणा बो बोल्यो, “म अठै हूँ, म थारी इंछ्या पूरी करबा आग्यो हूँ।” अर बो मसी का बलिदाननै लागू करबा ताँई पेलड़ा बलिदानानै रद्द करै ह। अर परमेसर की बि इंछ्याऊँ आपा ईसु मसी की कायानै एकर बलिदान करबा की जरिए पबितर कर दिआ गया हां। जदकी हरेक याजक खड़्या होर रोजकी धारमिक सेवा पूरी करै ह अर एकई जंय्यां का बलिदान बार-बार चढावै ह जखा कदैई पाप कोनी धो सकै। पण ईसु मसी तो एक याजक क रूप म एकरई पाप क बदलै सदा ताँई को चढाओ चढार परमेसर क दायणै हात जार बेठगो। अर बि टेमऊँई बो इ बातनै उडिकर्यो ह क बिका बेरी बिका पगा तळै की चोकी बणा दिआ जावै। क्युं क बो एकर का चढावा की बजेऊँ बानै जखा पबितर कर्या जार्या हीं सदा-सदा ताँई सिद कर दे। अर पबितर आत्मा बी इ बात की गुवाई देवै ह, क्युं क बो बोल्यो ह, “परबु बोलै ह क, बा दिना क पाछै, म जखो नयो करार बाऊँ करस्युं, बो ओ ह क म मेरा नियमानै बाका मना प मांडस्युं अर म बाकै दिल म अ बाता बसास्युं।” इकै पाछै बो अंय्यां बी खेवै ह क, “म बाका पापनै अर बाका बुरा कामानै, इबऊँ लेर कदैई याद कोनी करस्युं।” अर इब जद पाप धुपग्या हीं जणा इब पाप ताँई बलिदान चढाबा की जुर्तई काँई ह? मेरा लाडला बिस्वास्यो, इब ईसु मसी क लोय की बजेऊँ आपानै परमेसर का म्हापबितर तम्मू म जाबा को पूरो-पूरो भरोसो ह, बो आपणा ताँई बि परदा क जरिए जखी बिकी काया ह एक नयो अर जीवतो गेलो खोल दिओ। क्युं क आपणै कनै अंय्यां को म्हायाजक ह जखो ईस्बर नगरी म परमेसर का घर को अधिकारी ह। जणा आओ, आपा सचा हिया अर पूरा बिस्वास क सागै मन का बुरा बिचारानै छिड़कावऊँ सुद करवार कायानै पबितर पाणीऊँ धुलवार परमेसर क कनै चालां। अर आपा जखी आस मुंडाऊँ बोलर मान्या हां बिपै मजबूतीऊँ डट्या रेह्‍वां, क्युं क जखो आपणाऊँ बादो कर्यो ह बो बिस्वास जोगो ह। आपानै ओ बी ध्यान राखबो चाए क एक दुसरानै परेम अर भला कामानै करबा ताँई कंय्यां हिमत दे सकां हां। थे भेळो होबो मना छोडो, जंय्यां क कयानै तो बाणई पड़गी ह। पण एक दुसरानै समजाता रेह्ओ अर जंय्यां-जंय्यां बि दिननै कनै आता देखो जणा थानै ओर बी बेत्ती अंय्यां करबो चाए। ज सच को ज्ञान होबा क पाछै बी जाणबूजर आपा पाप करता रेह्‍वां जणा पाप ताँई कोई बलिदान आथई कोनी। पण बिकै पाछै तो भेंकर न्याय अर भबकती आग उडिकबोई बचै ह जखी परमेसर क खिलाप होबाळानै बाळ गेरै ह। अर ज कोई मूसा का नेम-कायदानै कोनी मानै, बिनै बिना दया दिखाया दो नहिस तीन गुवा की गुवाई गेल मार दिओ जावै ह। जणा थे सोचो बो कत्ती सजा भोगसी जखो आपका पगा तळै परमेसर का बेटानै चिथ्यो, अर बि नया करार का लोयनै जखो बिनै पबितर कर्यो हो सूगलो जाण्यो, अर दया करबाळी पबितर आत्मा को अनादर कर्यो। क्युं क आपा बिनै जाणा हां, जखो बोल्यो हो क, “बदलो लेबा को काम मेरो ह, मई बदलो चुकास्युं।” अर ओज्यु बोल्यो, “परबु आपका मिनखा को न्याय करसी।” जीवता परमेसर क हाता म पड़बो भेंकर बात ह। थे बा पेलड़ा दिनानै याद करो, जद थे मसी क बारां म जाण्या हा जणा बोळा सताव अर दुख की घड़ी म बी मजबूत रिह्या हा। कई बर तो मिनखा क सामै थारी बेजती करी गई अर सतायो गयो, अर कई बर थे बाका साती होर बाकै सागै खड़्या होया जाकै सागै अंय्यां को बरताव कर्यो जार्यो हो। थे केद म पड़्या मिनखा का दुख म दुखी होया, अर थे आ जा'णर क थारै कनै अंय्यां की धन-दोलत ह जखी चोखी अर सदाई रेह्बाळी ह, राजी-राजी थारी धन-दोलत जब्त होबा दि। इ ताँई थे हिमत मना हारो क्युं क थानै बिको बडो फळ दिओ ज्यासी। अर थानै चाए क थे मजबूत होवो जिऊँ क जद थे परमेसर की इंछ्यानै पूरी करो जणा जिको बादो बो कर्यो ह बो थे पा सको। क्युं क पबितर सास्तर बतावै ह, “जिनै आणो ह, बो परमेसर तावळोई आसी। अर बो उवांर कोनी करसी। पण मेरो धरमी मिनख बिस्वासऊँ जिसी, अर ज बो बिस्वासऊँ फिरज्या जणा म बिऊँ राजी कोनी रेहस्युं।” पण आपा बिस्वासऊँ फिरबाळा कोनी, जिऊँ क नास होज्यावां पण बिस्वास राखबाळा हां जिऊँ क पिराण बचावां। बिस्वास, आस करेड़ी चिजा मिलबा को पूरो भरोसो, अर नइ दिखबाळी चिजा को पुक्‍तो सबूत ह। अर अंय्यां को बिस्वास करबा की बजेऊँई पुराणा टेम का मिनखा की परमेसर क कानिऊँ बडाई करी गई। बिस्वासऊँई आपा आ जाणा हां क परमेसर का बोल बोलबाऊँ इ सरस्टि की रचना होई। इ ताँई जखो दिखै ह, बो दिखबाळी चिजाऊँ कोनी बण्यो। हाबिल क बिस्वास करबा की बजेऊँई बो कैनऊँ चोखो बलिदान परमेसर क चढायो। बिस्वास करबा की बजेऊँई बिकै धरमी होबा की बडाई करी गई अर परमेसर बिका चढावानै मान्यो अर बिकै मरबा क पाछै बी आपा इब ताँई बिऊँ सीखां हां। बिस्वासऊँ हनोक उपर उठा लिओ गयो जिऊँ बो मोत कोनी भोगी, अर बिको बेरोई कोनी चाल्यो क बो कठै गयो, क्युं क परमेसर बिनै उठा लिओ अर बिकै उठाया जाबाऊँ पेलीई बिकी बडाई करी क बो परमेसरनै राजी कर्यो हो। अर बिस्वास क बिना परमेसरनै राजी करबो अणहोतो ह, क्युं क परमेसर क कनै आबाळानै बिस्वास करबो चाए क बो ह अर परमेसरनै लगनऊँ ढुंढबाळानै बो फळ देवै ह। बिस्वास करबा की बजेऊँई नूह बा बातानै जखी बि टेम का कोनी दिखरी ही। बानै परमेसर का डर क सागै चितावनी मानर आपका परवारनै बचाबा ताँई झाज बणायो हो, अंय्यां कर बो जगतनै दोसी गिण्यो अर बि धारमिक्‍ता को पाँतीवाळ होयो जखी बिस्वास करबाऊँ आवै ह। बिस्वास करबा की बजेऊँई जद अब्राहमनै बुलायो गयो हो, जणा बो हुकम मानर बि झघा कानि चाल पड़्यो जिको बो वारिस बणबाळो हो। जदकी बो कोनी जाणतो हो क बो कठै जार्यो ह। बिस्वास करबा की बजेऊँई जखी जमीन बिनै देबा को करार दिओ गयो हो बिकै उपर बो एक परदेसी की जंय्यां तम्मू बणार रिह्यो। अंय्यांई इसाक अर याकूब बी रिह्या जखा परमेसर का बिई करार का पाँतीवाळ हा। क्युं क बो बि मजबूत निम हाळी नगरीनै उडिकर्यो हो जिको नक्सो बणाबाळो अर चिणबाळो परमेसर ह। बिस्वास करबा की बजेऊँई टाबर पैदा करबा की उमर बित्या पाछै बी सारा माँ बणी। क्युं क बिऊँ करार करबाळा परमेसरनै बा बिस्वास जोगो मानी। अर अंय्यांई एक मिनख अब्राहमऊँ जखो मरियलसो हो, आसमान का तारा अर समदर की बाळू की जंय्यां अणमेदा की ओलाद होई। अ सगळा बिस्वास क सागैई मर्या। अर आ मिनखानै बे चिजा कोनी मिली जाको बादो कर्यो गयो हो पण अ बानै दूरऊँ देखर राजी होया। अर बे मान लिआ क बे इ जगत म अणजाण अर परदेसी ह। अर जखा अंय्यां की बाता करीं हीं बे दिखावीं हीं क बे अंय्यां का देस की आस म ह जखो बाको खुदको ह। ज बे बि देस क बारां म सोचता जठै बे रेह्ता हा, जणा बानै बठै ओटा जाबा को मोको हो। पण बानै तो चोखा देस की चाह ही जखो ईस्बर नगरी ह, इ ताँई परमेसर बाको परमेसर बाजबाऊँ कोनी सरमावै, अर परमेसर बा ताँई एक नगरी त्यार करमाली ह। बिस्वास करबा की बजेऊँई अब्राहम जद बिचास्यो गयो बि टेम का इसाक की बलि चढाबा की पूरी त्यारी करली ही। जदकी परमेसर बिऊँ बोल्यो हो क, “इसाकऊँई तेरो वंस चालसी।” इकै बावजुद बी अब्राहम, जिऊँ करार कर्यो गयो हो आपका एकलोता बेटा की बलि देबानै त्यार होगो। क्युं क अब्राहम सोच्यो क परमेसर मरेड़ानै जिंदो कर सकै अर ज इनै दुसरा तरिकाऊँ बोलां जणा बो इसाकनै मोतऊँ पाछो ले लिओ। इसाक बिस्वासऊँई याकूब अर एसावनै बाकी आबाळी जिंदगी को आसिरबाद दिओ। बिस्वास करबा की बजेऊँई याकूब मरता टेम युसूफ का छोरानै बारी-बारीऊँ आसिरबाद दिओ अर आपकी लाठी को सारो लेर परमेसर क धोक खाई। बिस्वास करबा की बजेऊँई युसूफ जद मरबाळो हो जणा इजरायलीआ की मिसरऊँ निकळबा की बात करी अर बो आपकी गाडेड़ी हाड्या लेज्याबा क बारां म बानै हुकम दिओ। बिस्वास करबा की बजेऊँई मूसा का माँ-बाप बिकै जलम क पाछै बिनै तीन म्हेना ताँई लुखार राख्या, क्युं क बे देख्या क बो बोळो सोवणो टाबर ह अर बे राजा का हुकमऊँ बी कोनी डर्या। बिस्वास करबा की बजेऊँई जद मूसा बडो होगो जणा बो फिरोन की छोरी को बेटो खुवाबाऊँ नट दिओ। क्युं क बिनै थोड़ा दिन रेह्बाळा पाप का सुक भोगबाऊँ परमेसर का मिनखा क सागै दुख भोगबो चोखो लाग्यो। बिनै मिसर का धनऊँ बेत्ती मसी ताँई बेजती कराबो घणो किमती लाग्यो, क्युं क बो आगै मिलबाळा इनामनै बेसबरीऊँ उडिकर्यो हो। बिस्वास करबा की बजेऊँई बो राजा की झाळ को डर कोनी मान्यो अर बो मिसरनै छोड दिओ। बो सक्यु सेण करग्यो क्युं क बो अंय्यां को भिवार कर्यो मानो नइ दिखबाळा परमेसरनै देख लिओ हो। बिस्वास करबा की बजेऊँई बो फसै को त्युंहार मनायो अर लोय छिड़कबा का हुकमनै मान्यो, जिऊँ क पेलीपोत का छोरा को नास करबाळो इजरायल का पेलीपोत का छोरा क क्युंई नइ करै। बिस्वास करबा की बजेऊँई इजरायली मिनख लाल समदर प अंय्यां चालर पार करग्या जंय्यां बे सूकी धरती प चालर्या हो। पण जद मिसरी मिनख अंय्यां कर्या जणा डूबगा। बिस्वास करबा की बजेऊँई जद इजरायली मिनख यरियो नगरी की च्यार दिवारी क सात दिन ताँई चकर दिआ, जणा बा ढह्गी। बिस्वास करबा की बजेऊँई राहाब नाम की रांड हुकम नइ मानबाळा क सागै कोनी मारी गई, क्युं क बा भेध्या की आवभगत करी ही। इब आगै काँई बताऊँ? गिदोन, बारक, सिमसोन, यिपताह, दाऊद, सेमुएल अर बा परमेसर की खेबाळा क बारां म बताबा ताँई मेरै कनै टेम कोनी। बे बिस्वास करबा की बजेऊँई राजपाटानै जीत लिआ, बे धरम का काम कर्या अर जोक्यु बी परमेसर बानै देबा को बादो कर्यो हो बो सक्यु बानै मिल्यो। बे नार का मुंडानै बंद कर दिआ, बळती लायनै बुत्ता दिआ अर तलवार की धारऊँ बच निकळ्या। बे कमजोर होबा क पाछै बी सक्‍तिसाली बणग्या अर युद म सक्‍तिसाली होगा अर दुसरा देसा की सेनानै तीनतेरा कर दिआ। बिस्वासऊँई लूगायानै बाका मरेड़ा जिंदा होर ओटा मिलग्या। बोळा मिनखानै सतायो गयो, पण बे छुटबाऊँ नट दिआ जिऊँ क बे चोखा जीवन म ओज्यु जिंदा हो सकै। कया को तमासो बणायो गयो, कया क बेत मारी गई, कयानै बां'दर जेळ म गेर्यो गयो। कयानै भाठाऊँ मारगेर्यो गयो, कयानै आरीऊँ चिर्या गया, कयानै तलवारऊँ मार्यो गयो। बे कंगाली की दसा म, कळेस म, अर दुख भोगता होया अर बकर्या अर लल्ड्या की खाल ओड्या अठिनै-बठिनै लात घूसा खाता हांडता फिर्या; बे उजाड़ म, डूँगरा म, अर गुफा म, धरती प बणेड़ा खाडा खोळा म लुखता फिर्या क्युं क जगत बाकै जोगो कोनी हो। आकै बिस्वास करबा की बजेऊँई आ सगळा की बडाई करी गई, जणाबी आमैऊँ कोईसानै बी बादो करेड़ी चिज कोनी मिली। क्युं क परमेसर क कनै बिकी इंछ्या गेल आपणा ताँई इऊँ बी चोखी बाता ह जिऊँ बानै बी आपणा सागैई सिद कर्यो जावै। इ ताँई आपणै च्यारूमेर गुवाया की भीड़ ह जणा आओ रोड़ो गेरबाळी हरेक चिजानै, उळजाबाळा पापनै दूर करर बा दोड़ जिमै आपानै दोड़णो ह थ्यावस क सागै दोड़ां। आओ ल्यो आपा आपणी आँख्या ईसु प लगावां। जखो बिस्वास को मालिक अर बिनै निधान करबाळो ह। बो आगला सुक क बारां म सोचतो होयो बेजती होबा की चिंत्या कर्या बिना सुळी प दुख भोग्यो अर परमेसर क सिंघासन क दायणै जार बिराजगो। इ ताँई बिपै ध्यान द्‍यो, क्युं क बो पाप्याऊँ अंय्यां का विरोध सेलिआ जिऊँ क थे नइ थको अर नइ हार मानो। थानै पाप क सागै थारी राड़ म अत्तोबी अड़बो कोनी पड़्यो क थारो लोय बाहणो पड़ै। थे बि हिमत बंधाबाळा बचननै भूल बेठ्या हो, जखो थानै बेटो जाणर दिओ गयो हो: “ओ बेटा, परबु की सीखनै हळकी बात मना जाण, अर बिकी दकालऊँ कदैई निरास मना होजे। क्युं क परबु बानैई सुदारै ह जाऊँ बो परेम करै ह, अर बो बानैई सजा देवै ह जानै बो आपको बेटो करर अपणावै ह।” थे थारी कल्डाईनै सीख जाणर सेल्यो। क्युं क परमेसर थानै बेटो जाणर थारै सागै बरताव करै ह। बो कूणसो बेटो ह जिनै बिको बाप कोनी सुदारै? ज तेरै बंय्यां की दकाल कोनी लागी जंय्यां सगळा क लगाई गई ही जणा तू तेरै बापऊँ पैदा होईड़ी ओलाद कोनी अर नइ तू सची ओलाद ह। जदकी आपणा बाप जखा काया म हीं बे आपणै दकाल लगाया करता हा अर आपा बाकी ईज्जत बी कर्या करता हा। जणा पाछै खुदनै बि परम-पिता क हात म सूप देणो चाए जखो आपणी आत्मा को परम-पिता ह जिऊँ आपा जीवता रेह्‍वां। आपणा बाप तो आपकी समजऊँ क्युंक टेम ताँई जंय्यां बानै सई लागतो हो आपानै दकालता हा, पण परमेसर तो आपणो भलो होबा ताँई आपणै दकाल लगावै ह, जिऊँ आपा बिकी पबितरता का भागी हो सकां। जि टेम का दकाल लगाई जावै ह जणा बा चोखी कोनी लागै पण दुख देबाळी होवै ह। पण क्युंक टेम पाछै बिऊँ जखा पक्का होगा हीं बानै धारमिक्‍ता की स्यांती को फळ देवै ह। इ ताँई थे थारा ढिला हातानै अर कमजोर गोडानै मजबूत करो। अर खुदका पगा ताँई थे सिदो गेलो बणाओ जिऊँ क जखा मिनख लंगड़ा हीं बे आखड़ै नइ पण निरोगा होज्यावीं। सगळा क सागै मेळमिलाप राखबा अर पबितर होबा ताँई हरेक जंय्यां कोसिस करो क्युं क बिना पबितरता क कदैई कोई परबुनै कोनी देख सकै। थे ध्यानऊँ रेहज्यो कदै अंय्यां नइ होज्या क थारै मऊँ कोई परमेसर की दयाऊँ चूक ज्यावै। अर ध्यान राखज्यो क थारै मऊँ कोई खारी जड़ नइ निकळै जखी कयानै असुद अर दुख देबा की बजे बाजै। ध्यान द्‍यो क कोई कुकरमी नइ होवै अर नइ कोई एसाव की जंय्यां बिना परमेसर क होवै, जखो एक टेमकी रोटी खाबा ताँई आपका पेलीपोतको होबा का हकनै बेच दिओ। अर थे जाणो हो क बो इ आसिरबादनै लेबो चायो पण बो इकै जोगो कोनी गिण्यो गयो। अर रो-रोर बि आसिरबादनै ढुंढबा की कोसिस कर्यो पण हियो बदलबा को मोको कोनी पा सक्यो। थे तो बी बळता डूँगर क कनै कोनी गया जिकै हात अड़ायो जा सकै हो। अर नइ थे अँधेरा, घोर अँधकार अर भंबुळिया क कनै गया। बि टेम मिनख नरसिंगा अर सब्दा की उवाजई सुणी, अर जत्ता बी बिनै सुण्या बे अरदास करी क इकै अलावा कोई दुसरा सबद नइ सुणबो पड़ै। क्युं क जखो हुकम बानै दिओ गयो हो बिनै बे झेल कोनी सक्या। क्युं क बानै चेतार ओडायो गयो हो, “ज कोई जिनावर बी बि डूँगर क अड़ ज्यावै जणा बिकै भाठा मार्या जावै।” अर बो नजारो अत्तो डरावनो हो क मूसा बी बोल्यो, “मेरै डर क मारै धुजणी छुटरी ह।” पण थे तो सिओन डूँगर, जीवता परमेसर की नगरी, अर ईस्बर नगरी का यरूसलेम कनै आग्या हो। थे तो हझारो-हझारो ईस्बर नगरी दुता की राजी करबाळी बिस्वासी मंडळी कनै आग्या हो, थे परमेसर का पेलीपोत की बिस्वासी मंडळी कनै आग्या हो जाका ईस्बर नगरी म नाम दरज हीं। थे बि परमेसर क कनै आग्या हो जखो सगळा को न्याय करै ह। अर धरम्या की आत्मा कनै आग्या हो जखा सिद बणग्या हीं, अर नया करार का बिचोलिआ ईसु कनै आग्या हो अर छिड़कबाळा लोय क कनै आग्या हो जखो हाबिल का लोयऊँ बी चोखा बचन बोलै ह। ध्यान राखो, बि बोलबाळानै मना नकारो। ज बे बिनै नकारर कोनी बच पाया, जानै बो धरती पई चेतावनी दि ही, जणा ज आपा बिऊँ मुंडो फेरां, जखो ईस्बर नगरीऊँ चेतावनी देर्यो ह जणा बिऊँ कदैई कोनी बचस्यां। क्युं क बिकी उवाज बि टेम का धरतीनै हला दि ही पण इब बो बादो कर्यो ह क, “म एकर ओज्यु इ ईस्बर नगरी अर धरती दोन्यानै हलास्युं।” आ बात ओज्यु इ बातनै बतावै ह क जखो रच्यो गयो ह मतबल जखी चिजा हालबाळी ह नास होज्यासी। अर बेई चिजा बचसी जखी हालबाळी कोनी। इ ताँई आपानै अंय्यां को राज मिलबाळो ह जिनै हलायो कोनी जा सकै, जणा आओ आपा परमेसर को डर मानर बाको मान करता होया बिनै राजी करबाळी भगती क सागै बिको धनेवाद करां। क्युं क आपणो परमेसर भसम करबाळी आग ह। भाईचारा का प्यार-परेम म बण्या रेह्ओ। अर अणजाण की आवभगत करबो मना भूलज्यो, क्युं क अंय्यां करर कई मिनख अणभोळ म ईस्बर नगरी दुता की आवभगत करीं ह। केदिआनै अंय्यां याद राखो जंय्यां थे बी बिकै सागै केद म रिह्या हो। अर जाकै सागै बुरो बरताव कर्यो गयो ह बाकी आ जाणर सुदी ल्यो क जंय्यां थे खुद पिड़ा म हो। ब्या सगळा ताँई आदर की बात समजी जाणी चाए। अर ब्याईड़ा लूगाई मोट्यार एक दुसरा बेई पबितर रेह्‍वै, क्युं क परमेसर दुसरा लूगाई मोट्यार क सागै नाजायज समंद राखबाळा अर कुकरमीनै सजा देसी। थारो सुभाव धन को लालची नइ होवै, अर जोक्युबी थारै कनै ह, बिमई सबर राखो, क्युं क परमेसर बोल्यो ह, “म तनै कदैई कोनी छोडूँ, अर कदैई कोनी तजूं।” इ ताँई म्हें बेधड़क खेवां हां क, “परबु मेरी मदद करबाळो ह, म कोनी डरूँ; मिनख मेरो काँई बिगाड़ सकै ह?” थे बा मुखियानै याद राखो जखा थानै परमेसर को बचन सुण्या हीं। अर ध्यानऊँ बाका चाल-चलन का फळनै देखर बाकी जंय्यांई बिस्वास करो। ईसु मसी काल अर आज अर सदाई एकसो ह। भात-भात की अणजाणी सीख की भंगर्या म मना आज्यो, क्युं क थारा हिया ताँई ओ चोखो ह क बे खाबा-पीबा का नियमा क बजाय दया की बजेऊँ मजबूत बणै। अर जखा खाबा-पीबा का नियमानै मान्या बाऊँ बाको कदैई भलो कोनी होयो। आपणै कनै अंय्यां की बेदी ह जिकै उपर चढाईड़ा बलिदानानै खाबा की छुट बानै कोनी जखा पबितर तम्मू की सेवा करीं हीं। म्हायाजक पबितर झघा म पापबली चढाबा ताँई जिनावरा को लोय तो लेर जावै ह, पण बा ज्यानबरा की लोथनै डेरा क परै बाळ दिओ जावै ह। इ ताँई, ईसु मिनखानै आपका लोयऊँ पबितर करबा ताँई नगरी क बारनैई दुख भोग्यो। जणा आओ आपाबी बिकी बेजतीनै लेर, डेरा क बारनै बिकन चालां। क्युं क अठै आपणै ताँई सदाई रेह्बाळी नगरी कोनी, पण आपा तो बि आबाळी नगरीनै उडिकर्या हां। इ ताँई आपा ईसु क जरिए परमेसरनै बडाई का बलिदान मतबल होठा का फळ जखा बिको नाम लेवीं हीं हमेसा चढावां। अर भलाई करबो अर खुदकी चिजानै दुसरा क सागै बांटबो मना भूलज्यो। क्युं क परमेसर अंय्यां का बलिदानाऊँई राजी होवै ह। थे थारा आत्मिक मुखिया प भरोसो करो अर बाकै बस म रेह्‍वो, क्युं क बे बाकी जंय्यां जानै लेखो देणो पड़ै ह थारा पिराणा ताँई जागता रेह्‍वै ह। अंय्यांई कर्या करो जिऊँ बाका काम थारै ताँई बोज नइ पण राजी होबा की बजे बणै। क्युं क बोज समज्या तो थारो क्युंई फाईदो कोनी होवै। थे म्हारै ताँई अरदास करता रेह्‍वो। अर म्हानै पक्को बेरो ह क म्हारी अन्तर-आत्मा सुद ह। अर म्हें हरतर्याऊँ चोखी जिंदगी जिबो चावां हां। म ओज्यु थारूँ बोळी अरदास कर खेऊँ हूँ क, थे अरदास कर्या करो, जिऊँ क म थारै कनै तावळोई आ सकूँ। स्यांती देबाळो परमेसर थानै हर भली बात म भर्योपूरो करै। जिऊँ थे बिकी इंछ्या पूरी करो, अर ईसु मसी क जरिए आपणै मांयनै बी काम करै जंय्यां क बिनै चोखो लागै। परमेसर, आपणा परबु ईसुनै नइ मिटबाळा नया करार का लोय क जरिए मोतऊँ ओज्यु जीवायो जखो लल्ड्या को म्हान गुवाळ्यो ह। परमेसर की मेमा जुग-जुग ताँई होती रेह्‍वै। अंय्यांई होवै। ओ मेरा लाडला बिस्वास्यो, म थारूँ अरदास करूं हूँ क थे आ हिमत बंधाबाळा बचना प चालो, क्युं क म थानै थोड़ीई बाता मांडी ह। अर म चाऊँ हूँ क थानै खबर लागै क आपणो बिस्वासी भाई तिमूतियूस छुटगो ह। अर ज बो तावळोई मेरै कनै आसी जणा म बी बिकै सागै थारूँ मिलबा आस्युं। मेरै कानिऊँ थारा सगळा मुखियानै अर परमेसर का मिनखानै नमस्कार बोलज्यो। इटली म रेह्बाळा पबितर मिनख थानै नमस्कार खयां हीं। थारै सगळा प परमेसर की दया होती रेह्‍वै। म परमेसर अर परबु ईसु मसी को दास याकूब, इजरायल का बारा कूणबा का बिस्वास्यानै नमस्कार मांडूँ हूँ, जखा तीनतेरा होगा। ओ मेरा लाडला बिस्वास्यो, जद थे भात-भातऊँ बिचास्या जाओ जणा राजी होज्यो, क्युं क थे जाणो हो क, थारो बिचास्यो जाबो थारा बिस्वासनै पक्को करै ह अर थानै सेण करबा की ताकत मिलै। थ्यावसनै आपको काम पूरो करबा द्‍यो जिऊँ थे पूरा अर सिद होज्यास्यो, अर थार म कोई बात की घटी कोनी रेह्‍वै। पण ज थार मऊँ कोईनै बी बुदी की कमी होवै जणा बो परमेसरऊँ माँगै, जखो बिना धमकाया खुला हियाऊँ देवै ह, अर थानै आ बुदी दि ज्यासी। पण जद थे माँगो जणा बिना भेम कर्या बिस्वासऊँ माँगो, क्युं क जखो भेम करै ह बो समदर की झाल की जंय्यां भेवै अर उछाळा मारै। अंय्यां को मिनख आ आस नइ करै क, बिनै परबुऊँ क्युं मिलसी। बो मिनख दो मन हाळो ह अर बिना पिंदा को ह। दीन हीन बिस्वासी भाईड़ो गुमान करो क्युं क परमेसर थानै उठायो ह। अर अमीर बिस्वासी गुमान करै क्युं क थानै निचो कर्यो गयो ह। अमीर मिनखानै तो घास की जंय्यां एक दिन बळर नास होणो ह। क्युं क सूरज का तावड़ाऊँ घास बळज्यावै अर फूल झड़ज्यावै, जिऊँ बा सोवणी कोनी लागै। अंय्यांई अमीर मिनख बी आपकी भाग-दोड़ म खाली हातई मरज्यावै। बो मिनख भागहाळो ह जखो बिचास्या जाबा की घड़ी म डट्यो रेह्‍वै ह, क्युं क बिनै बिचास्या जाबा क पाछैई खरो मिनख बणार जीवन को मुकट मिलसी, जिनै परबु आपका परेम करबाळानै देबा को बादो कर राख्यो ह। जिनै बिचास्यो जावै ह बिनै अंय्यां नइ खेणो चाए क परमेसर बिनै बिचासर्यो ह। क्युं क बुरी बाताऊँ परमेसर कोनी बिचास्यो ज्यावै अर नइ बो खिनै बिचासै। पण जखो बी बिचास्यो जावै ह बो आपकी बुरी इंछ्या म खिंच्यो ज्यावै अर बिमै फंसर बिचास्यो जावै ह। अर बा बुरी इंछ्या बिकै मांयनै बढर पाप करावै ह अर पाप मोतनै जलम देवै ह। इ ताँई मेरा लाडला बिस्वास्यो, थे धोको मना खाज्यो। क्युं क सगळा दान बरदान अर चोखा इनाम उपरऊँई मिलै ह अर अ उजाळा को परम-पिता देवै ह जखो कदैई कोनी बदलै अर इमै बदलती दसा की बजेऊँ आबाळी काळी छाया बी कोनी। बो आपकी इंछ्याऊँ आपानै सचाई का बचनऊँ पैदा कर्यो ह जिऊँ आपा बिकी बणाएड़ी सगळी सरस्टि म पेलो फळ होवां। मेरा लाडला बिस्वास्यो, ध्यान राखज्यो, थार मऊँ हरेक मिनख सुणबा म तेज अर बोलबा म स्यांत होवै। झाळनै बस म राखो। क्युं क मिनखा की झाळ परमेसर की धारमिक्‍तानै कोनी ल्या सकै। इ ताँई सगळा गंदा कामाऊँ अर च्यारूमेर फेलेड़ी बुराईऊँ न्यारा होर, नरमाईऊँ थारै हिया म बसेड़ा परमेसर का बचननै मानो, जखा थारी आत्मा को छुटकारो कर सकै ह। बचननै सुणबाळाई मना बणो, पण बिपै चालबाळा बी बणो। ज थे सुणबाळाई हो जणा खुदनै धोको द्‍यो हो। क्युं क ज कोई बचननै सुणै तो ह पण बिपै चालै कोनी जणा बो बि मिनख की जंय्यां ह जखो आपको मुंडो सूल सिसा म देखै ह अर देखबा क पाछै बठैऊँ चल्यो जावै ह अर तावळोई भूल जावै ह क बो कंय्यां को दिखै ह। पण जखो मिनख अजादि देबाळा सिद नेम-कायदा प ध्यान लगार चालै ह बिनै बिका कामा म आसिस मिलै क्युं क जखो बो सुणै ह बिनै भूलै कोनी अर जंय्यां बो सुणै ह बंय्यांई बो करै ह। अर ज कोई खुदनै भगत मानै अर आपकी जीबनै बस म नइ राखै जणा बो खुदनै धोको देवै ह अर बिकी भगती ख्याई काम की कोनी। पण परमेसर अर परम-पिता की नजर्या म खरी अर पबितर भगती तो आ ह क अनाथ अर खाली होईड़ीनै बाकै दुख दरद म समाळै अर खुदनै इ दुनियादारीऊँ बेदाग राख। मेमाभर्या परबु ईसु मसी प बिस्वास करबाळा मेरा लाडला बिस्वास्यो, थारै मांय भेद-भाव नइ होणो चाए। थे अंय्यां मना करज्यो क, ज थारी सभा म कोई मिनख सोना की अँगूठी अर मेंगा गाबा पेर'र आवै अर बिकै गेलई कोई गरीब मिनख फाट्या पुराणा गाबा म बठै आवै, जणा ज थे सोना की अँगूठी अर मेंगा गाबा पेर'र आबाळानै तो चोखी झघा बिठाओ अर बि गरीबऊँ बोलो क, “तू मेरै पगा क कनैई तळै बेठज्या,” जणा थे आपसरी म भेद-भाव कोनी कर्या के? अर बुरी मनस्याऊँ भेवार कोनी कर्या के? मेरा लाडला बिस्वास्यो, ध्यानऊँ सुणो, के ईस्बर बानै कोनी टाळ्यो जखा इ जगत का मिनखा की नजर्या म गरीब ह? जिऊँ बे बिस्वास म अमीर होज्यावै अर बि राज का अधिकारी बणै जिनै परमेसर बिऊँ परेम करबाळानै देबा को बादो कर्यो ह। पण जणा बी थे बा गरीबा को अपमान कर्यो हो। के पिसाळा मिनख थार प जोर कोनी जिमावै अर थानै कचेरी म घिसर कोनी लेज्यावै? के बे मसी का बि चोखा नाम की बुराई कोनी करै जखो थानै दिओ गयो ह? पबितर सास्तर म सगळा हुकमा म स्याही हुकम ओ ह क, “थे थारा पड़ोसीऊँ खुदकी जंय्यांई प्यार करज्यो।” अर ज थे इनै मानो हो जणा चोखोई करो हो। पण ज थे भेद-भाव करो हो जणा पाप करो हो अर नेम-कायदा थानै दोसी बतावै ह। क्युं क ज कोई नेम-कायदा का सगळा नियमानै मानै पण ज एक बी बात म चूक ज्यावै जणा बो नेम-कायदा का सगळा नियमानै तोड़बाळो बाजै। क्युं क जखो बोल्यो ह क, “कुकरम मना करज्यो” बोई आबी बोल्यो ह क, “हत्या मना करज्यो।” इ ताँई ज थे कुकरम तो कोनी करो पण हत्या करो हो, जणा अंय्यां कर थे नेम-कायदा का नियमानै तोड़बाळा बणग्या। थे बा मिनखा की जंय्यां बोलो अर भेवार करो जखा को न्याय अजाद करबाळा नेम-कायदा गेल होवै ह। क्युं क जखो दया कोनी करै बिको न्याय बी बिना दया होसी। पण दया न्यायनै जीतै ह। मेरा लाडला बिस्वास्यो, ज कोई खेवै क मनै बिस्वास ह पण बो बिकै गेल करम कोनी करै जणा बिनै काँई फाईदो। अंय्यां को बिस्वास बिको छुटकारो कर सकै ह के? अर मानल्यो कोई बिस्वासी भाई नहिस कोई बिस्वासी भाण भूखो तिसायो अर उघाड़ो होवै, अर थार मऊँ कोई बिनै बोलै क, “राजी-खुसी चल्योजा, धाप्यो-धुस्यो अर गरम रेह।” पण बिकी काया की जुर्त हाळी चिजा नइ दे जणा काँई फाईदो? अंय्यांई बिना करम क बिस्वास मतैई मर्यो समान ह। पण कोई खेवै, “तेरै कनै बिस्वास ह अर मेरै कनै करम।” तू मनै थाकाळो बिस्वास बिना करम क दिखा अर म तनै माखाळो बिस्वास करम क सागै दिखास्युं। तू बिस्वास करै ह क एकई परमेसर ह। चोखी बात ह! पण ओ बिस्वास तो ओपरी बलाय बी करै ह अर धुजै ह। ओ बावळा मिनख, तू ओ जाणबो चावै ह के क, करम बिना बिस्वास बेकार ह ? जद आपणो बाप अब्राहम आपका छोरा इसाकनै बेदी प चढायो हो जणा के बो करम गेलई धरमी कोनी खुवायो? थे जाणो हो क बिको बिस्वास अर बिका करम एक सागै मिलरई काम कर्या , बिका करमऊँई बिको बिस्वास सिद होयो। अर सास्तर म मंडेड़ो बचन पूरो होयो क, “अब्राहम परमेसर प बिस्वास कर्यो अर बिस्वास की बजेऊँ बो धरमी गिण्यो गयो,” अर बो परमेसर को भाईलो खुवायो। जणा थे आ जाणल्यो क, मिनख करमऊँ धरमी बणै ह खाली बिस्वासऊँ मिनख धरमी कोनी खुवावै। अंय्यांई राहाब रंडी बी आपका करमाऊँई धरमी बणी, क्युं क बा इजरायल का भेदियानै खुदका घर म सरण दि अर बानै बचाबा बेई दुसरा गेलाऊँ बिदा करी। अर जंय्यां काया आत्मा क बिना मरेड़ी ह बंय्यांई बिस्वास करम बिना मरेड़ो ह। ओ मेरा लाडला बिस्वास्यो, थार मऊँ घणकराकनै चाए क बे बिस्वासी मंडळी म सीख देबाळा नइ बणै। क्युं क थे जणो हो क म्हें जखा सीख देबाळा हां बाको न्याय ओर बी बेत्ती कल्डाईऊँ होसी। क्युं क आपणाऊँ बोळीबर चूक होवै ह। पण जखो बचन म चूक कोनी करै बो सिद मिनख ह अर बो आपकी सगळी काया प लगाम लगा सकै ह। आपा घोड़ानै बस म करबा ताँई बिका मुंडा प लगाम लगावां हां जिऊँ आपा बिनै जठै चावां बठै लेज्या सकां हां। अर पाणी म चालबाळा जाहाजनैई देखल्यो। बे चाए दिखबा म कत्ताई बडा क्युं नइ हो अर बानै जोरकी भाळऊँ चलायो जावै ह, पण इकै वावजुद बी एक छोटीसी पतवारऊँ बानै चलाबाळा की इंछ्या गेल मोड़्यो अर जठै चाए बठै लेज्यायो जावै ह। अंय्यांई आपणी काया म जीब छोटोसो अंग ह, पण बडी-बडी बाता की फांप मारै ह। ध्यान राखो एक छोटोसो पतंगो जंगल का जंगलनैई बाळ गेरै ह। बंय्यांई जीब बी आग ह जखी आपणा अंगा म एक बुराई को हिस्सो ह। आ सगळी काया प कळंक लगावै, कोईका सगळा जीवन म आग लगा देवै ह अर आ नरक की आगऊँ भबकती रेह्‍वै। अर देखो सगळा ज्यानबर, पंछी, रिंगबाळा जीव-जिनावर, पाणी म रेह्बाळा जीव मिनख क बस म कर्या जा सकै ह अर मिनख बानै बस म करै बी ह, पण जीबनै कोई मिनख बस म कोनी कर सकै। आ अंय्यां की बुराई ह जखी निचली कोनी रेह अर पिराण लेबाळा झेरऊँ भरी पड़ी ह। आपा जीबऊँई परबु अर परम-पिता की जे-जैकार करां हां अर इऊँई परमेसर का रूप म बणाएड़ा मिनखनै सराप देवां हां। आपा एकई मुंडाऊँ परमेसर की जे-जैकार करां हां अर बि मुंडाऊँई मिनखानै सराप बी देवां हां। मेरा लाडला बिस्वास्यो, अंय्यां नइ होणो चाए। थेई बताओ एकई कूंडऊँ मिठो अर खारो पाणी निकळ सकै ह के? मेरा लाडला बिस्वास्यो, अंजीर का दरख्त क जेतून अर अँगूर की बेल क अंजीर लाग सकै ह के? कदैई कोनी लागै अर नइ खारो पाणी निकळबाळा कूंडऊँ मिठो पाणी निकळ सकै ह। थार म स्याणो अर समजदार कूण ह? अर ज कोई अंय्यां को ह जणा बो आनै आपका चोखा जीवनऊँ, नरमाई अर बुदीऊँ भर्या कामाऊँ दिखावै। पण ज थे थारा हिया म बळोकड़ोपूणो, नफरत, मतलबीपुणो राखो हो जणा थे गुमान मना करज्यो क्युं क अंय्यां को मिनख सचनै झूठ बतावै। अंय्यां की बुदी ईस्बर नगरीऊँ कोनी आवै पण आ धरती की, मिनख सुभाव अर सेतान की बुदी होवै। क्युं क जठै बळोकड़ोपूणो अर मतलबीपुणो ह बठै बिरोद अर सगळा बुरा काम होवीं हीं। पण जखी बुदी ईस्बर नगरीऊँ आवै ह बा सऊँ पेली तो पबितर होवै अर बिकै पाछै स्यांतीऊँ भरेड़ी, नरमाईऊँ भरेड़ी, बात मानबाळी, अपरम्पार दयाऊँ भरेड़ी, चोखा कामाऊँ भरेड़ी, दोगलोपुणो नइ करबाळी अर खरी होवै ह। जखा मेळमिलाप करावै ह, बे धारमिक्‍ता को फळ पावै ह। थारै मांयनै राड़ अर कळै कठैऊँ आगी? अंय्यां होबा की बजे थारी बुरी इंछ्या ह जखी थारै मांयनै राड़ अर कळै करावै ह। थे पाबा की इंछ्या तो राखो हो पण थानै मिलै कोनी, इ ताँई थे राड़ अर कळै करो हो, थे खून करो हो अर बळोकड़ोपूणो राखो हो जिऊँ थानै क्युं कोनी मिलै। थानै इ ताँई कोनी मिलै क्युं क थे परमेसरऊँ कोनी माँगो। जद थे माँगो हो, जणा थानै मिलै कोनी क्युं क थे बुरी इंछ्याऊँ माँगो हो, जिऊँ जोक्यु थानै मिलै बिनै थे थारी भोगबिलास म उडाद्‍यो। ओ कुकरमी मिनखो, के थे ओ कोनी जाणो क, इ दुनियादारीऊँ भाईलाचारी करबो परमेसरऊँ बेर राखबो ह ? इ ताँई जखो बी दुनियादारीऊँ भाईलाचारी करै ह बो खुदनै परमेसर को बेरी बणावै ह। थानै अंय्यां नइ सोचबो चाए क, बिधी-बिधान बेफालतुई अंय्यां खेवै ह क, “परमेसर जखी आत्मा आपानै दि ह बि ताँई बोळी जळन राखै ह , क्युं क बो बिऊँ बोळो परेम करै ह।” पण परमेसर आपणा प दया करी ह, इ ताँई बिधी विधान म मंडेड़ो ह क, “परमेसर गुमान करबाळा क खिलाप ह, पण नरमाईऊँ चालबाळा मिनखा प दया करै ह।” इ ताँई खुदनै परमेसरनै सूप द्‍यो। अर सेतान को विरोध करो, जणा बो थारै सामैऊँ भागज्यासी। परमेसर क कनै आओ जणा बो बी थारै कनै आसी। ओ पाप्यो! थे थारा हातानै साप करो, ओ सक करबाळो थे थारा हियानै पबितर करो। सोक मनाओ, रोओ अर दुखी होवो। थारा हसबानै सोक म अर थारी खुसीनै उदासी म बदलल्यो। थे परबु क सामै खुदनै छोटो करो जिऊँ बो थानै उचो उठासी। ओ मेरा लाडला बिस्वास्यो, थे एक दुसरा प कळंक मना लगाओ। अर ज कोई आपका पाड़ोसी भाईड़ा क खिलाप बोलै ह अर न्याय करै, जणा बो नेम-कायदा क खिलाप म बोलै अर न्याय करै ह। अर बे अंय्यां कर नेम-कायदा गेल कोनी चालै पण इको न्याय करबाळा बणज्यावीं हीं। पण नेम-कायदा देबाळो अर न्याय करबाळो तो एकई ह , अर बोई बचाबाळो अर नास करबाळो ह। पण थे कूण हो जखा थारा पड़ोसी को न्याय करो हो ? इब थे सुणो, जखा अंय्यां खेओ ह क, “आपा आज नहिस काल इ नगरी म नहिस बि नगरी म जार बरस दो बरस काम-धंधो कर पिसाळा बण सकां हां।” पण थे तो अत्तोबी कोनी जाणो क काल थारै जीवन क सागै काँई होसी? काँई ह थारो जीवन? थे तो ओस की जंय्यां हो जखी क्युंक देर रेह्‍वै ह अर पाछै गायब होज्यावै ह। पण इकै बदलै थानै तो अंय्यां बोलबो चाए क, “ज परबु चायो तो आपा जिस्यां अर ओ करस्यां नहिस बो करस्यां।” पण थे तो थारा झूठा पाखंडाऊँ खुद प गुमान करो हो। अंय्यां को गुमान करबो बुरो ह। अर जखो बी मिनख भलाई करबो जाणै ह पण कोनी करै जणा बो पाप करै ह। इब थे सुणो, जखा पिसाळा हो, थे रोओ अर जोर-जोरऊँ बार घालो क्युं क थारो कल्डो टेम आबाळो ह। थारो धन सिड़गो ह अर थारा गाबानै किड़ा खागा। थारा सोना-चाँदी क काई लागगी। अर बापै लागेड़ी काई थारै खिलाप गुवाई देसी अर थारी कायानै आग की जंय्यां नास करै ह। थे आखरी दिना म धन जोड़्या हो। सुणो, जखी ध्यानगी थे थारा खेता म निन्याण करबाळा मजुरियानै कोनी दिनी , बा थारै खिलाप जोरऊँ बोलरी ह अर लावणी करबाळा मजुरिया की चिख सऊँ सक्‍तिसाली परबु क काना ताँई पुगगी ह। थे इ धरती प थारी मन की मोज मारी ह। अर थे खुदनै भोगबिलास म डूबा दिआ हो। अर अंय्यां कर थे खुदनै पाळपोसर नास हाळा दिन ताँई त्यार कर लिआ हो। अर थे धरमी मिनखानै जखा थारै खिलाप कोनी होया, बानै दोसी बतार बाकी हत्या कर दिनी। ओ मेरा लाडला बिस्वास्यो, परबु क ओज्यु आबा की घड़ीनै थ्यावसऊँ उडिको जंय्यां एक किसान जमीन की फसलनै जखी बि ताँई बोळो माईनो राखै ह, जोपबाळा दिनऊँ लेर जद ताँई बा पकर त्यार नइ होज्यावै बि दिन ताँई सरू का अर आखीर का मीनै थ्यावसऊँ लगातार उडिकतो रेह्‍वै। बंय्यांई थे बी थ्यावस राखो अर मजबूत होज्याओ क्युं क परबु को आबो सांकड़ै ह। ओ मेरा लाडला बिस्वास्यो, एक दुसरा प मना बलडाओ जिऊँ थारो न्याय नइ होवै। देखो न्याय करबाळो थळी पई खड़्यो ह। ओ मेरा लाडला बिस्वास्यो, थे परमेसर की खेबाळानै मना भूलो जखा परबु क नामऊँ बोलता हा। बे आपणा ताँई दुख, मुसीबत सेण करबा अर थ्यावस राखबा का नमूना हीं। आपा बानै दुख मुसीबत सेह्बा की बजेऊँई भागहाळा बोलां हां। अर थे अयुब क थ्यावस राखबा क बारां म तो सुण्योई हो अर थे आबी सुण्या हो क परबु बिनै बिको काँई फळ दिओ क्युं क परबु तरस अर दया करबाळो ह। ओ मेरा लाडला बिस्वास्यो, सऊँ बडी बात तो आ ह क, थे नइ तो ईस्बर नगरी अर धरती की अर नइ कोई ओर ख्याकी सोगन खाज्यो। थारी बात “हाँ” अर “नइ” मई होणी चाए जिऊँ परमेसर को दंड थार प नइ आवै। अर ज थार मऊँ कोई दुख मुसीबत म होवै जणा बिनै अरदास करबो चाए अर ज कोई राजी रेह्‍वै जणा बिनै परमेसर की जे-जैकार अर भजन गाणा चाए। अर ज कोई थारै मांयनै रोगलो होवै जणा बिनै बिस्वासी मंडळी का मुखियानै बुलाबो चाए जिऊँ बे बिकै परबु क नामऊँ तेलऊँ अभिसेक कर अरदास करै। बिस्वासऊँ करेड़ी अरदासऊँ रोगलो, निरोगो होज्यासी अर परबु बिनै खड़्यो कर देसी। अर ज बो पाप कर्यो हो जणा परबु बिका पाप धो देसी। इ ताँई एक दुसरा क सामै खुदका पापनै मानल्यो अर एक दुसरा ताँई अरदास करो जिऊँ थे भला चंगा होज्याओ। धरमी मिनख की अरदास बोळी सक्‍तिसाली अर असर करबाळी होवै ह। एलिआ बी आपणी जंय्यां एक मिनख हो। अर बो बिस्वास क सागै अरदास कर्यो क मी नइ बरसै जणा साडे तीन बरसा ताँई धरती प मी कोनी बरस्यो। अर बो ओज्यु अरदास कर्यो जणा आसमानऊँ मी बरसबा लाग्यो अर धरती फसल उगाबा लागी। ओ मेरा लाडला बिस्वास्यो, ज कोई थार मऊँ सचाई का गेलाऊँ भटक जावै अर ज कोई बिनै ओज्यु सई गेलो दिखावै ह, जणा बिनै ओ जाण लेणो चाए क, पापी मिनखनै पाप का गेलाऊँ ओज्यु सई गेलो दिखाबाळो, बि पापी मिनख की आत्मानै जुग-जुग की मोतऊँ बचावै ह। अर बो बिका बोळा पाप धोबा की बजे बणज्यावै ह। म ईसु मसी को भेजेड़ो चेलो पतरस, आ चिठी परमेसर का टाळेड़ा मिनखानै मांडूँ हूँ। जखा पिन्तुस, गलातिया, कपुदूकिया, एसिया अर बितूनिया परदेसा म तीनतेरा होगा। परम-पिता परमेसर पेल्याऊँ काँई ध्यार राखी ही बिकै गेलई थानै टाळ्यो ह। अर पबितर आत्मा थानै पबितर बणाई, जिऊँ थे ईसु मसी क खया प चालो अर बिका लोयऊँ सुद होवो। परमेसर की दया अर स्यांती थार प बणी रेह्‍वै। परमेसर अर आपणा परबु ईसु मसी का परम-पिता की जे हो। क्युं क परमेसर आपणा प बडी दया दिखाई जणाई बो मसीनै मरेड़ा मऊँ जीवार आपानै नया जीवन की आस ताँई ओज्यु जीवायो ह। इब थे ईस्बर नगरी म धरेड़ी बि बापोत का वारिस होगा हो, जखी नइ तो कदैई नास होबा की अर नइ सिड़बा की अर नइ गुमबा की ह। थे, जानै परमेसर थारै बिस्वास क जरिए आपकी ताकतऊँ बि छुटकारा ताँई बचावै ह जखो अंत घड़ी म परगट कर्यो ज्यासी। इ बात की बजेऊँ थे राजी रेह्ओ, पण क्युंक टेम ताँई थारो भात-भातऊँ बिचास्या जाबाऊँ दुखी होबो बी जरूरी ह। ओ इ ताँई होयो जिऊँ थारो बो बिस्वास जखो आग म ताईड़ा नास होबाळा सोनाऊँ बी मेंगो ह। जखो ईसु मसी क परगट होबाळा दिन थारै ताँई बडाई, मेमा अर ईज्जत को कारण होसी। थे बिनै बिना देख्याई परेम करो हो, अर अठै ताँई बिनै बिना देख्या बिपै बिस्वास कर अंय्यां राजी होवो हो, जिको बखान कोनी कर्यो जा सकै। अ बाता मेमाभरी ह। थे बिपै बिस्वास करो हो। बिकोई फळ ह क, थे बचाया जाओ हो। अर इनै थे म्हेसुस बी करो हो। थे बचाया जार्या हो, इ बात को हेलो परमेसर की खेबाळा बोळी पेल्या पाड़्या हा। अर बे इ बात की खूब जाच पड़ताळ करी क, परमेसर थानै कंय्यां बचासी। परमेसर की खेबाळा म बाई पबितर आत्मा ही, जखी मसी म ह। आ आत्मा बानै बताई क मसीनै दुख भोगणो पड़सी अर इकै पाछै बिकी मेमा होसी। परमेसर की खेबाळा ओबी जाणबो चाता हा क ओ कद अर कंय्यां होसी। पण बानै ओबी बतायो गयो क, बे खुदकी नइ पण थारी सेवा ताँई अ बाता बोल्या हीं। बे थारै ताँई ईस्बर नगरीऊँ आईड़ी पबितर आत्मा की सक्‍तिऊँ चोखा समचार को हेलो पाड़्या। जदकी आ बातानै जाणबा ताँई ईस्बर नगरी दुत बी तरसीं हीं, पण इकै वावजुद बी अ बाता बस थारै ताँई परचार करी गई। इ ताँई थारी बुदीनै काम म ल्यो, खुदनै बस म राखो अर बि दया की आस राखो जखी थानै ईसु मसी क परगट होबा की टेम मिलसी। खयो मानबाळा टाबरा की जंय्यां जीओ। पेली थारा जीवन प बुरी इंछ्या को जोर चालतो हो, बंय्यां इब थारा जीवन प बुरी इंछ्या को जोर मना चालबा द्‍यो। पण जंय्यां थानै आपका होबा ताँई बुलाबाळो परमेसर पबितर ह, बंय्यांई थे जोक्युबी करो बो पबितर होणो चाए। क्युं क पबितर सास्तर म मंडेड़ो ह, “थे पबितर बणो, क्युं क म पबितर हूँ।” थे बिनै, “परम-पिता” खेर हेलो द्‍यो हो, इकै वावजुद बी बो थारा कामा को दोगलापुणाऊँ न्याय कोनी करै। क्युं क बिकी नजर्या म सगळा मिनख बराबर ह अर बो सगळा को न्याय बाकै करमा गेल करै ह। जणा थे थारा इ जीवन म बिकै खया प चालो क्युं क थे इ धरती प परदेसी की जंय्यां हो। क्युं क थे जाणो हो क, थारो बेकार चाल-चलन जखो थारै बडकाऊँ चालतो आर्यो ह, बिऊँ थारो छुटकारो, सोना-चाँदी जंय्यांकी नास होबाळी चिजाऊँ कोनी होयो। पण थारो छुटकारो परमेसर का पबितर अर बेदाग उन्या मसी का लोयऊँ होयो ह, जिको मोल कोनी लगायो जा सकै। बिनै इ सरस्टि की रचना होबा क पेल्याई टाळ लिओ गयो हो, पण थारा भला ताँई आ आखरी दिना म बिनै परगट कर्यो गयो। जोक्यु मसी कर्यो बिकी बजेऊँ थे परमेसर प बिस्वास करो हो। परमेसर जखो बिनै मरेड़ा मऊँ जीवायो अर मेमा दि, इ बजेऊँई थे परमेसर म आस अर बिस्वास राखो हो। थे सच का गेला प चाल्या जणा थारा पाप सुद कर दिआ गया, जणा इब थानै चाए क एक दुसराऊँ भाईचारो राखो अर एक दुसराऊँ खरा हिया क सागै डूँगो परेम राखो। क्युं क थे नयो जीवन पाया हो। अर थारो ओ नयो जीवन मिनखऊँ कोनी आयो जिको अंत होवै ह। पण थारो ओ जीवन परमेसरऊँ आयो ह, जिको कोई अंत कोनी। क्युं क थे परमेसर का बचन प बिस्वास कर्या, जखो सदा-सदाई बण्यो रेह्‍वै ह। जंय्यां क सास्तर म मांडेड़ो ह, “सगळा मिनख घास की जंय्यां ह, अर बाको सगळो तेज जंगल का फूला की जंय्यां ह। क्युं क घास बळ जावै ह, अर फूल झड़ जावै ह। पण परबु को बचन सदाई बण्यो रेह्सी।” अर ओई बचन चोखो समचार ह जखो थानै सुणायो गयो ह। इ ताँई, थे छळ-कपट, पाखंड, नफरत, बळोकड़ापूणा अर दुसरा प दोस लगाबाऊँ बचर रेह्ओ। जंय्यां माँ को दुद पीता टाबर खरा दुद ताँई रोवीं हीं, बंय्यांई थार म पबितर आत्मिक दुद की भूख होणी चाए जखी परमेसर की बाता ह। जिऊँ थारो छुटकारो पक्को होतो जावै। पबितर सास्तर म मंडर्यो ह, क्युं क इब थानै सूल बेरो पड़ग्यो ह क, परबु थारै बेई कतो दयालु ह। इ ताँई, थे ईसु मसीनै ओर सूल जाणबा ताँई बिमै बण्या रेह्ओ। क्युं क मसी जीवता भाठा की जंय्यां ह। ओ बो भाठो ह जिपै मकान टिक्यो रेह्‍वै ह, इकै वावजुद बी मिनख बिकी कदर कोनी करीं। पण सच तो ओ ह क, बो परमेसर को टाळेड़ो हो, जिको मोलई कोनी लगायो जा सकै। जणा इब थे बी जीवता भाठा की जंय्यां हो, जाऊँ परमेसर आपको आत्मिक घर बणार्यो ह। थे पबितर याजक बी हो, जखा आपका आत्मिक चढावानै ईसु मसी क जरिए परमेसरनै राजी करबा ताँई चढाओ हो। पबितर सास्तर म मांडेड़ो ह, “सुणो! म सिओन नगरी म एक भाठो धरूँ हूँ, जखो टाळेड़ो अर कूणा को भाठो ह, जिको मोल कोनी लगायो जा सकै। अर जखो इपै बिस्वास करसी, बो कदैई सरमिंदा कोनी मरसी।” जणा इब थे जखा बिपै बिस्वास करो हो, बा ताँई बो भाठो अंय्यां को ह, जिको मोलई कोनी लगायो जा सकै। पण बिपै बिस्वास कोनी करबाळा ताँई बो भाठो अंय्यां को ह, “जि भाठानै चेजारा ख्याई जोगो कोनी जाण्या, बोई कूणा को भाठो निकळ्यो।” अर सास्तर म अंय्यां बी मांडेड़ो ह, “ओ बो भाठो ह जखो मिनखानै ठोकर खुवावै, आ बा ढाड ह जखी मिनखानै तळै पटकै ह।” बे ठोकर खावीं हीं, क्युं क बे परमेसर का बचन प कोनी चालीं जि बजेऊँ बे बि मोत को मुंडो देखी हीं, जखी अंय्यां का मिनखा ताँई त्यार करी गई ह। पण थे अंय्यां का मिनख कोनी हो। थे तो परमेसर का टाळेड़ा खास मिनख हो। थे स्याही याजका की टोळी अर पबितर कूणबो हो। एक कूणबो जखो परमेसरऊँ निकळ्यो ह। परमेसर थानै अँधकारऊँ ताजूबभर्या च्यानणा म ल्यायो ह। जणा इब थानै चाए क थे बिकी ताजूबभरी बाता को जखी बो करी ह, हेलो पाड़ो। पबितर सास्तर म मंडेड़ो ह, “एक टेम बो बी हो जद थे क्युंई कोनी हा। पण इब थे परमेसर का मिनख हो। अर एक बो टेम बी हो जद कोई थार प दया कोनी करतो हो। पण इब परमेसर थार प दया दिखाई ह।” ओ लाडलो, म थानै हात जोड़र खेऊँ हूँ क, थे इ दुनिया म खुदनै परदेसी अर सरणारथी जाणर जीवन जीओ। अर पाप करबा की बुरी इंछ्याऊँ खुदनै बचार राखो, जखी थारै आत्मा क खिलाप लड़ै ह। परमेसरनै नइ ध्यारबाळा मिनख थानै बुरा बतावीं हीं। इकै वावजुद बी बाकै मांयनै थारो बरताव अर चाल-चलन चोखो राखो। जिऊँ जखी चोखी बाता बे थारै म देखसी बा बेई बे न्यायहाळा दिन परमेसर की मेमा करसी। इ ताँई परबु चावै ह, मिनखा क अधिकार क तळै रेह्‍वो। चाए पाछै बो राजा हो जखो सगळा क उपर ह नहिस कोई अधिकारी। थानै अधिकार्या की मानबो चाए, क्युं क राजा बानै नगरी का भलो करबाळा मिनखा की बडाई अर गळत करबाळानै सजा देबा को अधिकार देवै ह। जणाई परमेसर थारूँ चावै ह क, थे थारा भला कामाऊँ बेबुदी की बाता करबाळा को मुंडो बंद कर द्‍यो। थे अजाद हो इकै वावजुद बी थे परमेसर का दास हो, इ ताँई थानै पक्कोई चाए क थे थारी अजादिनै बुरा काम करबा ताँई एक भाना की जंय्यां काम म मना ल्यो। सगळा मिनखा की ईज्जत करो, बिस्वासी भायाऊँ भाईचारो अर प्यार-परेम राखो, परमेसर को मान करो अर राजानै ईज्जत द्‍यो। ओ दासो, थारा मालका की मानो। बा मालका किई ईज्जत मना करो जखा चोखा अर दुसरा को ध्यान राखबाळा हीं पण बाकी बी करो जखा कुटिचर हीं। क्युं क परमेसर क बारां म सोचर, ज कोई मिनख बिना गळती कई सक्यु सेह्‍वै ह, बो परमेसरनै राजी करै ह। पण ज थे बुरा काम की बजेऊँ लात घूसा खार क्युंई कोनी बोलो जणा इमै कूणसी बडाई की बात ह? पण ज भला काम करबा की बजेऊँ सक्यु सेर बी क्युंई कोनी बोलो, जणा आ बात परमेसर क सामै बडाई हाळी ह। क्युं क परमेसर थानै भलो करबा ताँई बुलायो ह, चाए पाछै थे भलो करबा ताँई दुखई क्युं नइ उठाओ जंय्यां क मसी थारै ताँई उठाया हा। अंय्यां करबा बेई मसी थारै ताँई नमूनो ह। जणा थानै बी बिकी लीक प चालबो चाए। सास्तर म मंडर्यो ह, “नइ तो बो पाप कर्यो, अर नइ मुंडाऊँ छळ की बात बोली।” बिकी बेजती करी गई इकै वावजुद बी बो क्युंई कोनी बोल्यो। अर जद बिनै दिन घाल्यो गयो हो, जणा बी बो कोई धमकी कोनी दि। पण आकै वावजुद बी बिको भरोसो परमेसर म हो जिको न्याय खरो ह। बो आपणा पापनै खुदकी काया प लेर सुळी प चढगो, जिऊँ आपा पाप करबा बेई मर्या समान होवां अर जखो सई ह बिनै करबा बेई जीवां। थानै निरोगो कर्यो जा सकै, इ ताँई बो आपकी काया प घाव लिआ। क्युं क पेली थे भटकेड़ी लल्ड्या की जंय्यां हा। पण इब थे थारा गुवाळ्या अर थारी आत्मा की रूखाळी करबाळा कनै ओटा आगा हो। जंय्यां दास आपका मालिक क बस म रेह्‍वै ह बंय्यांई ओ लूगायो, थे बी थारा मोट्यारा की मानो। जिऊँ ज कोईसी को मोट्यार परमेसर का बचन प नइ चालबाळो होवै जणा बिऊँ कोईनै क्युं बोलबा की जुर्त कोनी पण बो आपकी लूगाई का बरतावनै देखरई परमेसर का बचन प चालबा लागज्या। क्युं क बो देखसी क थे परमेसर को आदरमान करो हो अर पबितर चाल-चलन राखो हो। थे इ सोच म मना रेहज्यो क, जद थे बाळ गुथस्यो, सोना का गेणा अर मेंगा गाबा पेरस्यो जणाई सोवणी लागस्यो। पण थे स्यांत अर सुदी बणो जिऊँ थे मांयऊँ सोवणी होस्यो। अंय्यां को सोवणोपूणो सदाई बण्यो रेह्‍वै ह अर परमेसर की नजर्या म इको बोळो मोल ह। क्युं क पेलड़ा जुग म पबितर लूगाया जखी परमेसर म आस राखती ही, बे बी खुदनै अंय्यांई सोवणी बणाती ही। अर आप-आपका मोट्यारा की हर बात मान्या करती ही। जंय्यां, सारा अब्राहम की मान्या करती ही अर बा बिनै आपको मालिक बोलती ही। इ ताँई ज थे बी जखो सई ह बो करो अर ख्याऊँई मना डरो जणा थे बिकी बेट्या खुवास्यो। अंय्यांई ओ मोट्यारो, थे बी थारी लूगाया क सागै समजदारीऊँ जीवन जीओ। अर लूगायानै थारूँ कम मजबूत अर जीवन का बरदान म थारी पाँतीवाळ मानर बाकी ईज्जत करो। जिऊँ थारी अरदास म कोई आट नइ आवै। मेरी आखरी हिदायत आ ह क, थे सगळा मेळमिलापऊँ रेह्ओ, भलाई करो, प्यार-परेमऊँ भाईचारो राखो, तरस खाओ अर खुदनै छोटा बणाओ। थे बुराई क बदलै बुराई मना करो, गाळी क बदलै गाळी मना द्‍यो पण आकै बदलै आसिरबादई द्‍यो। क्युं क थानै अंय्यां करबा ताँई बुलायो गयो ह जिऊँ थे आसिरबाद का वारिस होवो। जंय्यां सास्तर म मंडर्यो ह, “जखो जीवन की इंछ्या राखै ह, अर चोखा दिन देखबो चावै ह। बो आपकी जबानऊँ बुरा बोल बोलबाऊँ अर होठानै छळ की बाता करबाऊँ रोकै। बुराई करबो छोडर भलाई करै, अर इ कोसिस म लाग्यो रेह्‍वै क मेळमिलापऊँ कंय्यां रेह्ऊँ। क्युं क धरम्या प परबु की नजर रेह्‍वै ह, अर बाका कान बाकी अरदास सुणबा म लाग्या रेह्‍वै, पण परबु बुराई करबाळा क खिलाप रेह्‍वै ह।” अर ज थे भलाई करबा ताँई भूख राखो हो जणा थारो बुरो कूण करसी? अर ज थे भलाई करबा बेई दुख भोगो हो, जणा थे भागहाळा हो। इ ताँई बाऊँ डरबो छोड द्‍यो अर इकी बी चिंत्या मना करो क मिनख काँई कर सकै ह। पण मसीनै थारा हिया को मालिक मानो अर ज कोई थारूँ थारी आस क बारां म क्युं बुजै, जणा थे बिनै मान अर कदर क सागै जुबाब देबा ताँई सदाई त्यार रेह्‍ओ। अर थारी अन्तर-आत्मानै बी सुद राखो, अंय्यां थे बा मिनखानै सरमा मार देस्यो जखा मसी म थारै भला करमा क बारां म बुरो बोलीं हीं। अर ज परमेसर की इंछ्या ह क थे भलाई करबा की बजेऊँ दुख भोगो, जणा बुराई करबाऊँ तो चोखो दुख भोगबो ह। क्युं क मसी सगळा का पाप ताँई एकर मर्यो जखो धरमी होर बी पाप की बजेऊँ दुख भोग्यो जिऊँ आपानै परमेसरऊँ मिलावै। बो काया म मर्यो पण आत्मा म जीवायो गयो। मर्या पाछै अर मरेड़ा मऊँ जिंदो होबाऊँ पेली बो मरेड़ा मिनखा की आत्मा जखी न्याय होबानै केद म ही बामै चोखा समचार को हेलो पाड़्यो। अ बा मिनखा की आत्मा ही जखी नूह का टेम म जद बो झाज बणार्यो हो बे परमेसर का कह्यानै कोनी मान्या पण परमेसर बा बेई थ्यावस राख्यो। बस आठ मिनख झाज म बड़्या अर पाणी म डूबबाऊँ बचाया गया हा। अर बा पाणी की बाढ बतिस्मा की जंय्यां ही, बतिस्मो जखो थारो छुटकारो करै ह पण इ बतिस्मा को मतबल काया का मेलनै धोबो कोनी पण अन्तर-आत्मानै सुद कर खुदनै परमेसर कानि मोड़बो ह। क्युं क ईसु मसी मरेड़ा मऊँ ओज्यु जीवायो गयो ह। बो ईस्बर नगरी जार परमेसर क दायणै हात बेठगो, अर ईस्बर नगरी दुत, उपरी सक्‍तिया का अधिकारी, सगळी सक्‍तिया बिकै बस म कर दिनी गई। जदकी मसी काया म दुख भोग्यो जणा थे बी बिकी लीक प चालता होया जीवन जीओ, क्युं क जखो काया म दुख भोग्यो बिनै पापऊँ छुटकारो मिलगो। इको ओ मतबल ह क थे थारा बचेड़ा जीवन भर थारी इंछ्यानै नइ पण जखो परमेसर चावै ह बिनै मानस्यो। थे बिस्वास म आबाऊँ पेली परमेसरनै नइ ध्यारबाळा मिनखा की जंय्यां खूब जीवन जीआ हो। थे कुकरमी हा, अर थे थारी बुरी इंछ्या गेल चालता हा। थे दारू म धुत्त, मेफलबाज्या अर उदफेली म लाग्या रेह्ता हा। अठै ताँई क थे सूगली मूरतानै पूजता हा। पण इब जद थे बाका बा बुरा कामा म सामिल कोनी होवो जणा बानै ताजूब होवै ह। अर बे थारी बुराई करै ह। पण बानै, बिनै जखो जीवता अर मरेड़ा को न्याय करसी, लेखो देणो पड़सी। मरेड़ानै तो इ ताँई चोखो समचार सुणायो गयो हो क काया म तो मिनखा क कह्या गेल बाको न्याय हो, पण आत्मा म बे परमेसर क कह्या गेल जिवीं। बा घड़ी सांकड़ैई ह जद सक्यु नास होज्यासी। इ ताँई स्याणा बणो अर खुदनै बस म राखो जिऊँ थानै अरदास करबा म मदद मिलै। अर सऊँ बडी बात आ ह क थे एक दुसराऊँ प्यार-परेम राखो, क्युं क परेम बोळा पापनै ढकै ह। थे बिना बड़बड़ाया एक दुसरा की आवभगत कर्या करो। अर जिनै बी परमेसर कानिऊँ आत्मिक बरदान मिलेड़ो ह। बिनै चाए क बो परमेसर का चोखा भंडारी की जंय्यां बि आत्मिक बरदाननै एक दुसरा की सेवा करबा ताँई सूल काम म लेवै। अर ज कोईनै बोलबा को, परमेसर का बचननै परचार करबा को अर कोईकी मदद करबा को बरदान होवै जणा बो बिनै बि ताकत क सागै काम म लेवै जखी परमेसर बिनै देवै ह। अर अ सगळी बाता अंय्यां होणी चाए जिऊँ परमेसरनै ईसु मसी की बजेऊँ जखो जुग-जुग ताँई मेमा म अर ताकतबर ह मान मिलै। अंय्यांई होवै! ओ मेरा लाडलो, थारो बिचास्यो जाबो लाय प चालबा की जंय्यां ह, पण थे इऊँ ताजूब मना करो क थारै सागै क्युं अनोरो होर्यो ह। पण राजी होवो क थानै मसी की जंय्यां दुख भोगबा को मोको मिल्यो। आ बात थानै बि बडी खुसी ताँई त्यार करसी जखी मसी जि दिन आपकी मेमा क सागै आसी जणा होसी। ज मसी क नाम की बजेऊँ थानै दुख अर बेजती सेणी पड़ै जणा बिनै सोभाग मानो। आ बात इनै दिखावै ह क परमेसर की मेमा भरी आत्मा थारै सागै ह। ज थे दुख उठाओ जणा थारो दुख उठाबो चोरी, हत्या, बुराई अर दुसरा का कामा म आट देबा की बजेऊँ नइ होणो चाए। पण ज थे मसी होबा की बजेऊँ दुख उठाओ हो जणा थानै सरमिंदा होबा की जुर्त कोनी, पण थानै इ बजेऊँ परमेसर की मेमा करबो चाए। क्युं क बा घड़ी आबाळी ह जद पेल्या तो परमेसर का मिनखा को न्याय कर्यो ज्यासी; अर न्याय की सरूआत आपणाऊँई होसी जणा बाको काँई होसी जखा परमेसर का चोखा समचारनै कोनी मानी? अर जंय्यां सास्तर बोलै ह, “ज धरमी मिनखई बडी मुसकीलाऊँ बचसी, जणा पाप्या अर जखा भगतीऊँ न्यारा रेह्‍वै ह बाको काँई होसी?” इ ताँई जखो परमेसर की इंछ्या गेल दुख उठावै ह, बे भला काम करता होया खुदनै बिस्वास जोगा परमेसरनै सूप दे जखो थानै बणायो ह। इब म, थारै माला बिस्वासी मंडळी का मुखियाऊँ अरदास करूं हूँ। म खुद एक बिस्वासी मंडळी को मुखियो हूँ अर मसी जखो दुख भोग्यो हो बिको म गुवा हूँ अर आबाळी मेमा को म पाँतीवाळ हूँ। म थानै समजाऊँ हूँ क परमेसर की बिस्वासी मंडळी की जखी थारी देखरेख म ह बिकी रूखाळी करो। अर ओ काम कोईकै दबाव म आर मना करो पण परमेसर की इंछ्याऊँ राजी होर करो, अर धन का लालच की बजेऊँ ओ काम मना करो पण मन लगार इ कामनै करो। अर जखी बिस्वासी मंडळी थारी देखरेख म ह बिपै जोर मना जमायो। पण बा ताँई सीख बणो। क्युं क जद बो रूखाळो मसी जखो सकै उपर परधान ह परगट होसी, जणा थानै मेमा को मुकट मिलसी अर इ मुकट की रंगत कदैई कोनी जावै। अंय्यांई ओ जवानो थे बिस्वासी मंडळी का मुखिया क खया म चालो, थे छोटा बणर एक दुसरा की सेवा करो, क्युं क, “परमेसर गुमान करबाळा क खिलाप ह, पण जखो मिनख खुदनै छोटो बणावै ह बिकै उपर परबु दया करै ह।” इ ताँई परमेसर का सक्‍तिसाली हाता क तळै छोटा बणर रेह्‍वो जिऊँ बो थानै ठिक टेम प उचो उठावै। अर थे थारी सगळी चिंत्या बिनै देद्‍यो, क्युं क बिनै थारो ध्यान ह। थे चेता म रह्यो अर जागता रह्यो; क्युं क थारो बेरी सेतान धाड़बाळा सेर की जंय्यां इ खोज म रेह्‍वै ह क किनै पाड़ खाऊँ। बिस्वास म मजबूत होर सेतान को सामनो करो , क्युं क थे ओ जाणो हो की थारा भाईड़ा जखा इ दुनिया म च्यारूमेर फेलर्या हीं बे थारोसो दुख भोगर्या हीं। परमेसर जखो दया को दाता ह। बोई थानै मसी म जुग-जुग ताँई आपकी की मेमा ताँई बुलायो ह। अर थारै थोड़ोसोक दुख भोगबा क पाछै बो खुदई थानै मजबूत, ताकतबर अर पक्को बणासी। परमेसर को राज जुग-जुग रेह्‍वै। अंय्यांई होवै। म बिस्वासी भाईड़ा सिवानुसनै बिस्वास जोगो जाणू हूँ, बिकै हात चिठी मंडवार थानै समजायो हूँ, अर आ गुवाई दिनी ह क परमेसर की सची दया आई ह। थे इमई मजबूत रेहज्यो। अर थारी जंय्यां टाळेड़ा बेबिलोन का मिनखा को थानै नमस्कार। बे परमेसर का टाळेड़ा मिनख हीं। मरकुस जखो मेरा छोरा की जंय्यां ह बो बी थानै नमस्कार खेवै ह। परेमऊँ एक दुसरानै हात जोड़र नमस्कार करो। म अरदास करूं हूँ क थानै सगळानै जखा मसी का हो परमेसर राजी-खुसी राखै। म, समोन जिको नाम पतरस बी ह, जखो परबु ईसु मसी को दास अर भेजेड़ो चेलो हूँ। आ चिठी बा मिनखानै मांडूँ हूँ जखा आपणा परमेसर अर छुटकारो देबाळा ईसु मसी की धारमिक्‍ता की बजेऊँ आपणी जंय्यांई बिस्वास करीं हीं। म चाऊँ हूँ क, परमेसर अर आपणा परबु ईसुनै जाणबा क जरिए स्यांती अर दया बेसीऊँ बेसी थार प होती रेह्‍वै। जीवन जीबा ताँई अर परबु की सेवा करबा ताँई जोक्यु बी आपणानै चाए हो, बो सक्यु परबु आपकी अनोरी सक्‍तिऊँ आपणानै दिओ ह। क्युं क आपा बिनै जाणा हां। बोई आपणानै आपकी धारमिक्‍ता अर मेमाऊँ बुलायो ह। इ बजेऊँ बो आपणाऊँ बडा-बडा अर किमती करार कर्या हीं, जिऊँ आपणा म परमेसर को सुभाव आ सकै, जिऊँ आपा आपणी बुरी इंछ्या अर इ दुनिया की बुराईऊँ बच सकां। थे जी तोड़ मेनत कर्या करो जिऊँ थे बिस्वासनै बढा सको, बिस्वासऊँ सदगुणनै, अर सदगुणऊँ समजनै, अर समजऊँ खुद प काबू राखबानै अर खुद प काबू राखबाऊँ थ्यावसनै अर थ्यावसऊँ परमेसर की भगतीनै, अर भगतीऊँ भाईचारानै, अर इ भाईचाराऊँ परेमनै। क्युं क ज थारै म अ सगळी बाता रेह्सी अर थे आ बाता म बढता रेहस्यो जणा परबु ईसु मसी की पिछाण म बो थानै निकम्मो कोनी होबा देसी। क्युं क जखो बी आ बातानै कोनी मानै बो आँदो ह, अर बिनै धुन्दो-धुन्दो सुजै ह, अर बो आबी भूलगो क पेल्याई बिका पापनै धोर बिनै सुद कर्यो गयो ह। ओ मेरा लाडला बिस्वास्यो, थे थारा बुलाया जाबानै, अर टाळ्या जाबानै पक्को करो। क्युं क ज थे अंय्यां करस्यो जणा कदैई आखळी कोनी खास्यो, अर ज थे इ रीत गेल चालस्यो जणा एक दिन पक्काई आपणा परबु अर छुटकारो देबाळा ईसु मसी का अजर-अमर राज म जास्यो। जदकी थे आ बातानै जाणो हो, अर थानै जखी सचाई का बचन मिल्या हीं अर थे आ बचनानै मानो बी हो। जणा बी म थानै अ बाता याद दिवाऊँ हूँ। म सोचूँ हूँ क, ओ चोखो ह क जद ताँई म इ काया म हूँ, थानै अ बाता याद दिवातो रेहस्युं। जंय्यांकी आपणो परबु ईसु मसी मनै साप-साप बता दिनी ही क, म तावळोई इ कायानै छोडबाळो हूँ। इ ताँई म पूरी कोसिस करूं हूँ, क मेरै मरबा क पाछै आ बातानै थे याद राखो। म्हें थानै आपणा परबु ईसु मसी की सक्‍ति क बारां म अर बिकै ओज्यु आबा क बारां म जखो समचार सुणाया हां, बा कोई मन घड़त क्हाणी कोनी ही, पण म्हें खुद बिकी मेमानै म्हारी आँख्याऊँ देख्या हां। क्युं क जद बो पिता परमेसरऊँ मेमा अर आसिरबाद लेर्यो हो जणा सऊँ सक्‍तिसाली परम-पिता परमेसर कानिऊँ ओ हेलो आयो, “ओ मेरो लाडलो बेटो ह, जिऊँ म राजी हूँ।” म्हें खुद ईस्बर नगरीऊँ आबाळा हेलानै सुण्या, क्युं क बि टेम म्हें खुद बिकै सागै पबितर डूँगरी प हा। अर म्हारै कनै परमेसर की खेबाळा का जखा बचन ह बिऊँ आ साबित बी होवै ह। अर थे समजर इपै ध्यान करो हो अंय्यां कर थे चोखोई करो हो। क्युं क बो च्यानणो ह, जखो अँधेरा म जद ताँई च्यानणो देसी जद ताँई दिन नइ निकळै अर थारा हिया म भोर को तारो नइ उग्यावै। पण थानै ओ जाणलेबो चाए क, पबितर सास्तर की कोईबी भबिस्बाणीनै कोईबी खुदऊँ कोनी जाण सकै। क्युं क कोईबी भबिस्वाणी मिनखा की इंछ्याऊँ कदैई कोनी आई, पण भगत मिनख पबितर आत्माऊँ परमेसर कानिऊँ बोलता हा। बि टेम का बी मिनखा म झूठा परमेसर की खेबाळा हा जंय्यां क आज थारै मांयनै झूठी सीख देबाळा हीं। बे नास करबाळा अर ओलैछानै पाखंड करसी, बे बि मालिक बेई नटसी जखो बानै मोल लिओ हो, अंय्यां बे तावळाई खुदको नास कर लेसी। अर बोळा मिनख बाका कूगेला प चालसी अर बाका करमाऊँ सचाई का गेला की बदनामी होसी। अर बे लालची होबा की बजेऊँ थानै दिखावटी बाता बोलर थारूँ धन कमासी। अर बाकी सजा तो पेल्याऊँई परमेसर ते कर राखी ह। अर बाको नास बानै उडिकर्यो ह। क्युं क परमेसर बा दुतानै जखा पाप कर्या हा बानैई कोनी बकस्यो। अर बानै पताळ क मांयनै अँधेरा कूंड म गेर दिओ, जिऊँ क बे न्यायहाळै दिन ताँई बिकै मांयनै केद रेह्‍वै। परमेसर बि पुराणी दुनियानै कोनी बकस्यो, पण बो नूहनै जखो धारमिक्‍ता को परचार करतो हो बिनै अर सात मिनखानै छोडर सगळा पापी मिनखानै बाढऊँ नास कर दिओ। परमेसर सदोम अर अमोरा जंय्यां की नगर्यानै बाळर राख को ढेर बणा दिओ जिऊँ की पापी मिनखानै सबक मिलै क पापी मिनखा क सागै काँई होसी। पण लुत धरमी मिनख हो इ ताँई परमेसर बिनै बचा लिओ। बो पापी मिनखा क पाप करबा की बजेऊँ दुखी होतो हो। क्युं क बो धरमी मिनख बा पापी मिनखा क मांयनै रेह्ता-सेह्ता बाका बुरा कामानै देखर अर बाका बुरा कामा क बारां म सुणर, रोजकी आपका हिया म दुखी होतो हो। अ बाता आ दिखावै ह क परबु, परमेसरनै मानबाळा मिनखानै दुखऊँ बचाबो अर न्यायहाळै दिन ताँई पाप्यानै दुख भोगबा की दसा म राखबो जाणै ह। आ बात खासकर बा मिनखा प लागू होवै ह जखा काया की बुरी इंछ्या गेल चालीं हीं। अर परमेसर का अधिकारनै कोनी मानी। बे ढिट अर बादिला हीं, अर अंय्यां का मिनख ईस्बर नगरी की सक्‍तिया की बुराई करबाऊँ कोनी डरै। जदकी ईस्बर नगरी दुत सक्‍ति अर म्हानता म आ मिनखाऊँ बोळा बडा हीं, बे बी परबु क सामै ईस्बर नगरी की सक्‍तिया की बुराई कोनी करै अर बापै दोस कोनी लगावीं। पण अ मिनख निरबुदी ज्यानबरा की जंय्यां हीं, जखा को जलम पकड़्या जाबा अर नास होबा ताँई होयो ह। अ मिनख जखी बाता क बारां म जाणैई कोनी बाकै बारां म दुसरा की बुराई करीं हीं, अर जंय्यां ज्यानबर मार्या जावीं हीं बंय्यांई अ मिनख बी मार्या ज्यासी। अ बुराई करी ह, जणा अ बुराई को फळ भोगसी। आनै रात-दिन कुकरम करबो चोखो लागै ह। अ मिनखा क नाम प कळंक हीं। अ मिनख जद थारै सागै बार त्युंहार प खाबा-पीबा ताँई भेळा होवीं हीं जणा अ खुद क कानिऊँ खाबो-पीबो कर आपकी इंछ्यानै पूरी करीं हीं। बे सदाई बि कुकरमी लूगाई की तक म रेह्‍वै जिकै सागै अ कुकरम कर सकै। अर बे पाप कर्या बिना कोनी सकै। अ भोळा-भाळा मिनखानै भूळा-फुसळार आपकै सागै कर लेवीं हीं आको हियो लालची ह अ सराप की ओलाद हीं। अ सई गेलानै छोडर भटकगा हीं। अ मिनख बओर का छोरा बिलाम का गेला प चालीं हीं; बिलाम जिनै हराम की कमाई प्यारी ही। पण बिका इ बावळापुणा का काम की बजेऊँ बेजुबान गधेड़ी मिनख की उवाज म बोलर बिनै दकाली अर बि परमेसर का खेबाळानै बावळापुणा को काम करबाऊँ रोकी। अ धोकेबाज मिनख सूकेड़ा कुआ की जंय्यां अर आँधी म उडबाळा बादळ की जंय्यां हीं। परमेसर आ ताँई नरक म अँधेरी झघा त्यार कर राखी ह। क्युं क अ मिनख बा मिनखानै जखा पेल्या भटकेड़ा हा पण इबारई सई गेला प आया हीं, बाऊँ गुमान हाळी बाता कर बाकी बुरी इंछ्यानै जगावीं हीं। अर बानै गेलो भटकावै ह। बे मिनख बाऊँ छुटकारो देबा की तो जबान करीं हीं पण बे खुदई छुटकारो कोनी पायो। क्युं क जखो मिनख जिऊँ हार ज्यावै बो बिको दास बणज्यावै ह। ज अ मिनख परबु अर छुटकारो देबाळा ईसु मसी की बजेऊँ दुनिया की बुराईऊँ बचाया गया हा इकै वावजुद बी ज बे बुराई करीं हीं जणा आकी दसा पेलड़ी दसाऊँ बेसी बुरी होसी। आ मिनखा ताँई तो ओ चोखो होतो क अ इ धारमिक्‍ता का गेलानैई कोनी जाणता, अर जखो हुकम बानै दिओ गयो हो बिऊँ बे मुंडो फेर लेता। बापै आ खेबत सई बेठै ह, “गंडक्ड़ो आपकी उल्टी चाटै ह अर न्हूवायड़ी सूलडी पाछी कादा म जावै ह।” ओ लाडलो, आ मेरी दुसरी चिठी ह जखी म थानै मांडी ह, अर म मेरी आ दोन्यु चिठ्या म थानै याद दिवायो हूँ क थानै पबितर हियो राखबो चाए। जिऊँ थे बा बातानै जानै परमेसर की खेबाळा पेल्याई खे दिआ हा याद राख सको अर परबु, अर आपणानै छुटकारो देबाळा का हुकमनै याद राखो जखो थानै भेजेड़ा चेला की बजेऊँ दिओ हो। सऊँ पेल्या तो थानै ओ जाणलेबो चाए क, अंत का दिना म हसी ठटा करबाळा आसी, जखा आपकी बुरी इंछ्या गेल चालसी। बे बोलसी, “मसी क आबा का करेड़ा करार को काँई होयो? क्युं क आपणा बडका तो मरग्या। अर इब ताँई सक्यु अंय्यांई ह जंय्यांकी इ सरस्टि की सरूआत म हो।” पण अ मिनख जाणबूजर भूल बेठ्या हीं क आसमान परमेसर का बचन क जरिए जुगादऊँ ह अर आ धरती पाणी मऊँ बणेड़ी ह अर पाणी मई मजबूत ह। अर आई बजे ही क बि टेमकी सरस्टि बाढऊँ नास होगी। पण आज का आसमान अर धरती बिका बचनऊँ इ ताँई बणाएड़ा हीं क, बे बाळ्या ज्यावीं। अर अ जद ताँई अंय्यांई रेह्सी जद ताँई पापी मिनखा को न्याय अर बाको नास नइ होज्यावै। पण मेरा लाडलो, थे इ बातनै मना भूलज्यो, क परबु की नजर्या म एक दिन झार बरस जंय्यां अर झार बरस एक दिन की जंय्यां ह। अर परबु आपका करेड़ा करारनै पूरो करबा म देर कोनी करै, जंय्यांकी कई मिनख सोचै ह। पण परबु आपणा ताँई थ्यावस धरै ह क्युं क बो कोईको बी नास करबो कोनी चावै। पण बो चावै ह क सगळा मिनखानै पापऊँ हिया फेरबा को मोको मिलै। परबु क ओज्यु आबा को दिन चोर की जंय्यां चाणचुक आज्यासी। बि दिन आसमान जोरऊँ गरजसी अर बो सुजसी कोनी। अर आसमान म जत्ता बी गरह ह बे तपर पिघळ ज्यासी, अर आ धरती अर इपै जोक्यु बी ह बो सक्यु बळ ज्यासी। जदकी अ सगळी चिजा नास होबाळी ह जणा पाछै थे सोचो थारो परमेसर म चाल-चलन किसोक होणो चाए? थानै पबितर जीवन जिबो चाए। अर थानै परमेसर का न्याय का दिननै उडिकबो चाए। बो दिन तावळो आवै इकी थानै कोसिस करबो चाए। बि दिन आसमान आगऊँ बळ ज्यासी अर बाकी की चिजा पिघळ ज्यासी। पण आपा बिका करेड़ा करार गेल नया आसमान अर धरती क मिलबा की आस देखर्या हां, जठै धारमिक्‍ता बास करै ह। ओ लाडलो, थे आ बाता की आस देखो हो, जणा कोसिस करो क परमेसर की नजर्या म खरा, बेदाग अर स्यांतीऊँ रेह्बाळा बाजो। अर आपणा परबु का थ्यावसनै छुटकारो समजो, जंय्यां की म्हारो लाडलो भाईड़ो पोलुस बि ज्ञान गेल जखो बिनै मिल्यो हो थानै मांड्यो हो। पोलुस आपकी सगळी चिठी म आ बाता किई चरचा करी ह, अर जामै कत्ती बाता तो अंय्यां की ह जानै समजबो ओखो ह। अज्ञानी अर जखा मजबूत कोनी बे मिनख बाको गळत मतबल लगार खुदनै नास करीं हीं। बे दुसरा सास्तर की सीखनै मानी हीं। ओ लाडलो, थे पेल्याऊँई आ बातानै जाणर चेता म रेह्ओ, जिऊँ थे बुराई करबाळा की बाता म आर थारी मजबूतिनै नइ खो द्‍यो। पण आपणा परबु अर छुटकारो देबाळा ईसु मसी की दया अर बिकी पिछाण म बढता जाओ। बिकी मेमा इब अर सदा-सदाई होती रेह्‍वै। अंय्यांई होवै! इ चिठी म म्हें, बि एक की बात करां हां, जिनै बचन बोल्यो गयो ह , जखो क्युबी रच्या जाबाऊँ पेली हो, जखो कदैई नइ खतम होबाळो जीवन देवै ह। म्हें बि अजर-अमर जीवन को हेलो थारै मांयनै पाड़ां हां, जखो परम-पिता क सागै हो अर म्हारै प परगट कर्यो गयो। बो जुगादऊँई हो , पण जद बो मिनख रूप मई धरती प आयो जणा म्हें इनै सुण्या, म्हारी आँख्याऊँ देख्या, अर म्हें खुद बिकै हात अड़ाया। म्हें जोक्यु सुण्या अर देख्या बिको हेलो थारै मांयनै पाड़ां हां, जिऊँ थेबी म्हारै सागै पाँतीवाळ होवो। क्युं क म्हें बी परम-पिता अर बिका बेटा ईसु मसी क सागै पाँतीवाळ हां। अर म्हें थानै अ बाता इ ताँई मांडां हां क आपणो राजी होबो पूरो होज्या। म्हें जखो समचार ईसु मसीऊँ सुण्या हा, बोई थानै सुणावां हां क परमेसर च्यानणो ह अर बिमै चिनोसो बी अँधेरो कोनी ह। अर ज आपा खेवां क आपा बिकै सागै चालां हां, पण हाल बी पाप का अँधकार को जीवन जीवां जणा आपा झूठ बोलां हां अर सचनै कोनी माना। पण ज आपा च्यानणा म चालां जंय्यांकी बो च्यानणा म चालै ह, जणा आपा बिस्वासी होबा क नातै एक दुसराको सागो देस्यां, अर परमेसर का बेटा ईसु को लोय आपानै आपणा सगळा पापऊँ सुद कर देसी। अर ज आपा आ खेवां क म्हें कोई पाप कोनी कर्या, जणा खुदनै धोको देवां हां अर आपा सच कोनी बोलां। पण ज आपा परमेसर क सामै खुदका पापनै मानल्या जणा बो आपणा सगळा पाप माफ कर देसी अर सगळी बुरायाऊँ आपानै सुद कर देसी। क्युं क बो बिस्वास जोगो अर न्याय करबाळो ह। अर ज आपा खेवां क म्हें क्युंई पाप कोनी कर्या जणा आपा परमेसरनै झूठो बतावां हां अर इ बजेऊँ बिको बचन बी आपणा म कोनी। ओ मेरा टाबरो, म थानै अ बाता इ ताँई मांडूँ हूँ क, थे पाप नइ करो। पण ज कोई मिनख पाप करै ह बिका पाप धोबा ताँई धरमी ईसु मसी आपणै अर परम-पिता क बिचमै बकिल ह जखो आपणानै परमेसर क सामै सई बणावै ह। बो आपणो मेळमिलाप परमेसरऊँ कराबा ताँई खुदनै एक बलिदान क रूप म दे दिओ। बो आपणा सगळा पाप धोवै ह , बो आपणाई नइ पण सगळा जगत का मिनखा का पाप धोवै ह। परमेसरनै सचमई जाणबा ताँई एकई गेलो ह क, आपा बिका हुकमानै माना, अर ज आपा अंय्यां करां हां, जणा बिनै सचमई जाण लिआ हां। पण ज कोई मिनख अंय्यां खेवै ह क, “म परमेसरनै जाणू हूँ,” पण बिका हुकमानै कोनी मानै जणा बो मिनख झूठो ह अर बिका हिया म सचाई कोनी। पण जखोबी मिनख परमेसर को खयो करै ह, जणा बिकै मांयनै परमेसर को परेम सचमई बास करै ह। क्युं क ओई एक गेलो ह जिऊँ आपा परमेसर म मजबूत बण्या रेह सकां हां। अर जखोबी मिनख आ खेवै ह क, बो परमेसर म मजबूत ह, जणा बिनै ईसु मसी क जंय्यां जीवन जिबो चाए। ओ लाडलो, म थानै कोई नयो आदेस कोनी देर्यो हूँ, पण जखो म थानै बताऊँ हूँ बो जुगादऊँ थानै सुणायो गयो ह। ओ पुराणो हुकम जखो चोखो समचार ह जिनै थे सुण चुक्या हो। म थानै एक ओर नयो आदेस मांडूँ हूँ। इकी सचाई मसी का जीवन म अर थारा जीवन म परगट होई ह। क्युं क अँधेरो मिटर्यो ह अर सचो च्यानणो चमकबा लागगो ह। अर जखो बी मिनख अंय्यां खेवै क, बो च्यानणा म चालै ह पण आपका बिस्वासी भाण भायाऊँ नफरत करै ह, जणा बो इब बी अँधेरा मई ह। जखो बी मिनख आपका बिस्वासी भाण भायाऊँ परेम करै ह बो च्यानणा म ह , अर बिकै जीवन म अंय्यां की कोईबी बात कोनी घटसी जिऊँ क बो पाप करै। पण जखो बी मिनख आपका बिस्वासी भाण भायाऊँ नफरत करै ह बो इब बी अँधेरा मई हात मारतो भटकै ह अर अँधेरा मई जीवन जीवै ह। अर बो आबी कोनी जाणै क इ अँधेरा क मांयनै कठै जार्यो ह। क्युं क अँधेरो बिनै आँदो कर दिओ ह। ओ मेरा टाबरो, म थानै मांडू हूँ, क्युं क ईसु मसी की बजेऊँ थारा पाप धोया गया हीं। ओ बूडा ठेरो, म थानै मांडूँ हूँ, क्युं क थे बिनै जाणो हो जखो जुगादऊँ ह। ओ मोट्यारो म थानै मांडूँ हूँ, क्युं क थे बुराईनै हराया हो। ओ मेरा टाबरो म थानै मांडूँ हूँ, क्युं क थे पिता परमेसरनै जाण लिआ हो। ओ बूडा ठेरो म थानै मांडू हूँ, क्युं क थे बिनै जाणो हो जखो जुगादऊँ ह। ओ मोट्यारो म थानै मांडू हूँ, क्युं क थे ताकतबर हो, अर परमेसर को बचन थारै म बास करै ह, अर थे बुराईनै हराया हो। थे नइ तो इ दुनियाऊँ अर नइ इ दुनिया की चिजाऊँ परेम करज्यो। क्युं क जखो बी इ दुनियाऊँ परेम करै ह, बिकै हिया म परम-पिता बेई परेम कोनी ह। क्युं क इ दुनिया म बुरी इंछ्या, घमंड, काया की बुरी लालसा ह अ बाता परम-पिता क कानिऊँ कोनी पण इ दुनिया क कानिऊँ आवै ह। आ दुनिया अर इकी बुरी इंछ्या नास होज्यासी, पण जखो बी मिनख परमेसर की इंछ्या प चालै ह बिको कदैई नास कोनी होसी। ओ मेरा टाबरो, जंय्यांकी थे जाणो हो क, आखरी घड़ी आगी ह अर मसी को बेरी बी आबाळो ह, अर आबाळो काँई ह जदकी मसी का बोळा बेरी आग्या हीं। इ बात की बजेऊँई आपा जाण सकां हां क आ आखरी घड़ी ह। मसी का बेरी आपणाऊँ निकळ्या हीं पण बे आपणा कोनी। क्युं क ज बे आपणा होता जणा आपणो संगरो कोनी छोडता, पण बे अंय्यां कर दिखा दिओ क बे आपणा मऊँ कोनी। पण थारो अभिसेक मसीऊँ होयो ह, जखो पबितर ह। इ ताँई थे सचाईनै जाणो हो। के थानै अंय्यां लागै क म आ चिठी इ ताँई मांडूँ हूँ क, थे सचनै कोनी जाणो ? पण थे तो सचनै जाणो हो अर आबी जाणो हो क जठै सच होवै बठै झूठ कोनी खटावै। क्युं क झूठो बो ह जखो अंय्यां खेवै ह क, ईसु, मसी कोनी ह। अंय्यां खेबाळो मिनख मसी को बेरी ह। बो बेटा क सागै परम-पितानै बी नकारै ह। जखो बेटानै नकारै ह बो परम-पितानै बी नकारै ह, पण जखो बेटानै मानै ह बो बिकै सागै परम-पितानै बी मानै ह। जखी बाता थे जुगादऊँ सुण्या हा बानै मानता रेहस्यो जणाई बेटो अर परम-पिता बी थारै म बास करसी, अर मसी खुद आपानै अजर-अमर जीवन देबा को बादो कर्यो ह। म अ बाता बा मिनखा बेई थानै मांडी ह जखा थानै भंगराबा की कोसिस करीं हीं। अर जठै ताँई थारी बात ह थारो अभिसेक बिऊँ होयो ह, थार म बण्यो रेह्‍वै ह। इ ताँई थानै तो आ जुर्तई कोनी क कोई थानै सीखावै। पण थानै जखी आत्मा दिनी गई ह बा सक्यु सीखावै ह। बा आत्मा सची ह, बा झूठी कोनी जंय्यां बा थानै सीखावै बंय्यांई करो अर मसी म बण्या रेह्ओ। ओ टाबरो, इ ताँई थे ईसु मसी म बण्या रेह्ओ, जिऊँ बो परगट होसी जणा आपा बिस्वास म मजबूत रेह्‍वां अर जद बो ओज्यु आसी बि टेम का आपानै बिकै सामै सरमिंदा नइ होणो पड़ै। अर ज थे आ जाणो हो क बो धरमी ह जणा थे आबी जाणल्यो क जखो मिनख धरम का काम करै ह बो बिऊँ जलम्यो ह। सोचो परम-पिता आपणाऊँ कतो बेत्ती परेम कर्यो ह, जिऊँ क आपा बिका टाबर खुवा सकां अर सच म आपा हां बी। आ दुनिया परमेसरनै कोनी जाणी आई बजे ह क बा आपानै बी कोनी जाणै। ओ लाडलो, इब आपा परमेसर का टाबर हां, पण आबाळा टेम म आपा काँई होस्यां इकै बारां म आपानै ज्ञान कोनी करायो गयो ह। पण चाए जखोबी हो आपा आ जाणा हां क जद मसी ओज्यु परगट होसी जणा आपा बिकै जंय्यां का होज्यास्यां, क्युं क जंय्यां बो ह बंय्यांई बिनै आपा देखस्यां। अर जखो बी मिनख बिमै आस करमाली ह, बो खुदनै बंय्यांई पबितर राखै जंय्यांकी मसी पबितर ह। पण जखो बी मिनख पाप करै ह, बो परमेसर का हुकमानै कोनी मानै अर परमेसर का हुकमानै नइ मानबोई पाप ह। क्युं क थे आ तो जाणोई हो क मसी मिनखा का पापनै धोबा ताँई आयो , अर आबी जाणो हो क बिकै मांयनै क्युंई पाप कोनी। अर जखोबी मिनख मसीनै मानै ह बो पाप करतो कोनी रेह्‍वै। अर जखो बी पाप करतो रेह्‍वै ह बिनै नइ तो मसी को दरसाव मिल्यो ह अर नइ बो मसीनै जाण्यो ह। ओ टाबरो, थे कोई कई भंगर्या म मना आज्यो। क्युं क जखो मिनख धरम का काम करै ह बोई मसी की जंय्यां धरमी ह। जखोबी मिनख पाप करतो रेह्‍वै ह बो सेतान को ह, क्युं क सेतान जुगादऊँई पाप करतो आयो ह। जणाई तो परमेसर को बेटो परगट होयो जिऊँ क बो सेतान का कामा को नास करदे। जखोबी परमेसर को बेटो बणगो ह बो पाप करतो कोनी रेह्‍वै। क्युं क बिकै मांयनै मसी बास करै ह अर बो परमेसर को बेटो ह इ ताँई बो पाप करतो कोनी रेह्‍वै। थे कंय्यां जाण सको हो क कूण परमेसर को बेटो ह अर कूण सेतान को बेटो ह? पण बे मिनख जखा धरम का काम कोनी करै अर आपका पाड़ोसी भाईऊँ परेम कोनी करै, बो पिता-परमेसर क कानिऊँ कोनी। थानै एक दुसरा क सागै प्यार-परेमऊँ रेह्णो चाए क्युं क ओ चोखो समचार थानै सरू मई सुणायो गयो हो। आपानै कैन की जंय्यां कोनी बणणो ह जखो सेतान को हो, जखो आपका भाईड़ानै मार गेर्यो ह। अर बो अंय्यां इ ताँई कर्यो क्युं क बिका खुदका काम तो बुरा हा पण बिका भाई का काम धरम का हा। ओ भाईड़ो थे इ बातऊँ ताजूब मना करो क आ दुनिया थारूँ नफरत करै ह। क्युं क आपा मोतऊँ बचर जीवन पाबा ताँई आग्या हां अर इकी बजे आ ह क आपा भाईड़ाऊँ प्यार-परेम करां हां। अर जखो बी मिनख परेम कोनी करै बो इब बी मोत को गुलाम ह। बे सगळा मिनख जखा खुदका बिस्वासी भाईऊँ नफरत करै ह बे हत्यारा हीं अर थे आ तो जाणोई हो क जखो मिनख हत्यारो ह बिकन अजर-अमर जीवन की आस कोनी। मसी आपणा ताँई आपको जीवन तज दिओ इ बात की बजेऊँई आपा जाण सकां हां क परेम काँई ह। इ ताँई आपानै बी खुदका बिस्वासी भाईड़ा ताँई ज्यान देबानै त्यार रेह्णो चाए। ज थारै मऊँ कोई मिनख सादन सम्पन होवै अर बिका बिस्वासी भाईड़ानै ख्या चिज की जुर्त होवै अर ज बो जुर्तमंद पाड़ोसी भाईड़ा प तरस नइ खावै जणा आपा कंय्यां खे सकां हां क बिकै मांयनै पिता-परमेसर को परेम ह? ओ मेरा टाबरो, आपा बोली अर जबानऊँई प्यार-परेम नइ करां पण ओ प्यार-परेम करमाऊँ अर सचो होणो चाए। अर इऊँ बेरो चालै ह क आपा सचा हां, अर जद आपा परमेसर क सामै जावां जणा आपानै सरमिन्दो कोनी होणो पड़ै। पण ज इकै पाछै बी आपणो हियो आपणा बुरा कामाऊँ सरमिन्दो होवै, जणा आपानै याद राखबो चाए क परमेसर हाल बी आपणा हियाऊँ बडो ह अर बो हर बातनै समजै ह। ओ लाडला भाई-भाणो, ज आपणो हियो आपानै मूरती पूजा नइ करबा बेई दोसी कोनी मानै जणा आपानै परमेसर क सामै सरमिन्दो कोनी होणो पड़ै। अर आपा जोक्यु बिऊँ माँगा हां बो आपानै मिलै ह, क्युं क आपा बोई काम करां हां जखो परमेसरनै भावै ह अर आपा बिका हुकमानै बी माना हां। अर परमेसर को हुकम ओ ह क, आपा बिका बेटा ईसु मसी का नाम प बिस्वास करां अर इकै सागैई ईसु मसी क कह्या गेल एक दुसराऊँ प्यार-परेम करां। अर जखोबी मिनख परमेसर का हुकमानै मानै ह, बिकै मांयनै परमेसर को बास रेह्‍वै ह अर बो मिनख परमेसर म बण्यो रेह्‍वै ह। अर पबितर आत्मा की बजेऊँई जखी आपानै दि गई, आ जाण ज्यावां हां क आपणै मांयनै परमेसर को बास ह। लाडलो, हरेक मिनख की बाता को बिस्वास मना करो जखो खेवै ह क, म, आत्माऊँ बोलुँ हूँ। पण सदाई बाकी आत्मानै परखो अर देखो क बामै परमेसर ह क कोनी। म थारूँ अंय्यां इ ताँई खेर्यो हूँ, क्युं क इ दुनिया म बोळा झूठा परमेसर की खेबाळा घुमर्या हीं। थे परमेसर की पबितर आत्मानै अंय्यां जाण सको हो: जिकी बी आत्मा आ खेवै ह क, “ईसु मसी, मिनख काया म इ धरती प आयो।” बिकी आत्मा परमेसर क कानिऊँ ह। अर हरेक बा आत्मा जखी ईसु मसी क बारां म इ बातनै कोनी मानै बा परमेसर क कानिऊँ कोनी। बा मसी का बेरी की आत्मा ह, जिकै बारां म थे पेल्याऊँई सुण चुक्या हो क बो आबाळो ह। बो आबाळो के ह बो तो इब बी इ दुनिया मई ह। ओ टाबरो, थे परमेसर का हो। इ ताँई थे झूठा परमेसर की खेबाळानै जीत लिआ हो। क्युं क थारै मांयनै रेह्बाळो परमेसर, इ दुनिया म रेह्बाळा सेतानऊँ बडो ह। बे झूठा परमेसर की खेबाळा इ दुनिया का हीं, अर इकै बारां मई बात करीं हीं अर आ दुनियाई बाकी बाता सुणै ह। पण आपा परमेसर का हां अर जखो बी परमेसरनै जाणै ह बो आपणी बाता सुणै ह। पण जखो परमेसर को कोनी बो आपणी कोनी सुणै। अर इ बातऊँ आपा आ जाण सकां हां क, कूणसी आत्मा सच की ह अर कूणसी आत्मा भंगराबाळी ह। लाडलो, आपा एक दुसराऊँ प्यार-परेम करां। क्युं क परमेसरई परेम ह अर जखा बी प्यार-परेम करै ह बे परमेसर का बेटा-बेटी बणग्या हीं अर बे परमेसरनै जाणी हीं। जखोबी मिनख परेम कोनी करै बो परमेसरनै कोनी जाण्यो। क्युं क परमेसरई परेम ह। परमेसर आपका एकलोता बेटानै इ दुनिया म भेजर आपको परेम परगट कर्यो जिऊँ आपानै बिका बेटा की बजेऊँ जीवन मिल सकै। सचो परेम इमै कोनी क आपा परमेसरऊँ परेम करां हां पण इमै ह क परमेसर आपणाऊँ परेम कर्यो अर आपका बेटानै आपणा पाप ताँई बलिदान होबानै भेज दिओ। लाडलो, जदकी परमेसर आपणाऊँ अंय्यां को परेम कर्यो ह जणा पाछै आपानै बी एक दुसराऊँ प्यार-परेम करबो चाए। परमेसरनै कोईबी कदैई कोनी देख्यो, पण ज आपा एक दुसराऊँ प्यार-परेम करां जणा परमेसर आपणा म बास करै ह अर बिको परेम आपणै मांयनै पूरी तर्या ह। अर आपानै पूरो बिस्वास बी ह क बो आपणा म बास करै ह अर आपा बी बिकै सागै चालां हां क्युं क बो आपानै खुदकी पबितर आत्मा दिओ ह। परम-पिता आपका बेटानै इ जगत का मिनखा को छुटकारो करबा ताँई भेज्यो। अर म्हें बिनै देख्या अर बिका गुवा बी हां। अर जखो बी इ बातनै मानै ह क, “ईसु परमेसर को बेटो ह,” जणा परमेसर बिकै मांयनै बास करै ह अर बो परमेसर को होज्यावै ह। जंय्यां को परेम परमेसर आपाऊँ करै ह बिनै आपा जाणा हां अर आपा बिपै बिस्वास बी करां हां। परमेसर परेम ह, अर जखो बी मिनख परेम करै ह बो परमेसर म बण्यो रेह्‍वै ह अर परमेसर बिमै बास करै ह। इऊँ आपणा म परेम साबित होयो ह क, जद न्याय होसी जणा बिस्वास म बण्या रेह्‍वां, क्युं क आपा बंय्यांई इ दुनिया म जीवन जीवां हां जंय्यांकी मसी जीवन जियो हो। जखो मिनख परेम करै ह बो डरै कोनी क्युं क परेम डरनै दूर करै ह। डर को सागो सजाऊँ ह, इ ताँई जखोबी मिनख डरै ह बिमै परेम कदैई कोनी हो सकै। म्हें इ ताँई परेम करां हां क्युं क परमेसर पेल्या आपणाऊँ परेम कर्यो ह। अर ज आपा खेवां क, “म्हानै परमेसरऊँ परेम ह।” पण मेरा भाईऊँ नफरत ह जणा आपा झूठा हां, क्युं क जि पाड़ोसी भाईड़ानै आपा देखां हां बिऊँई परेम कोनी करां, जणा बि परमेसरऊँ जिनै कदै देख्याई कोनी कंय्यां परेम कर सकां हां? मसी आपानै ओ हुकम दिओ ह क, ज आपा परमेसरऊँ परेम करां हां जणा आपानै पाड़ोसी भाईड़ाऊँ बी परेम करबो चाए। जखाबी मिनख ओ बिस्वास करीं हीं क, ईसुई मसी ह बे परमेसर का टाबर हीं, अर जखाबी परमेसरऊँ परेम करसी बे बिका टाबराऊँ बी परेम करसी। अर ज आपा परमेसर का टाबराऊँ परेम करां हां, जणा इऊँ आ साबित होवै ह क, आपा परमेसरऊँ परेम करां हां अर बिका हुकमानै बी माना हां। परमेसरऊँ परेम करबा को मतबल ओ ह क, आपा बिका हुकमानै माना अर बिका हुकमानै मानबो दोरो कोनी। अर जखाबी मिनख परमेसर का टाबर बणज्यावीं हीं बे दुनियानै जीत लेवै ह। इकी बजे आपणो बिस्वास ह। जखोबी ओ बिस्वास करै ह क, ईसु मसीई परमेसर को बेटो ह , बो इ दुनिया प जीत हासिल करै ह। ईसु मसी जखो आपणै कनै पाणी अर लोय क सागै आयो। बो बस पाणी को बतिस्मो लेबाई कोनी आयो पण बोतो इकै सागै आपको लोय बहाबा ताँई आयो। इ बात की गुवाई परमेसर की आत्मा देवै ह अर आत्मा की गवाई सची ह। अर गुवाई देबाळा तीन जणा हीं। पबितर आत्मा, पाणी अर लोय आ तीन्या की गुवाई एकई ह , अर अ इमै सेमत बी हीं। अर आपा तो मिनखा की गुवाईनै अत्तो मान देवां हां, जणा परमेसर की गुवाई को तो खेबोई काँई। क्युं क परमेसर की गुवाई तो मिनखा की गुवाईऊँ बडी ह। अर परमेसर आपका बेटा ताँई गुवाई दि ह। अर जखो बी मिनख परमेसर का बेटा प बिस्वास करै ह, बो परमेसर की गुवाईनै मानै ह। अर ज कोई परमेसर की खेईड़ी बाता प बिस्वास कोनी करै, बो परमेसरनै झूठो बोलै ह। क्युं क परमेसर आपका बेटा ताँई गुवाई दिनी ह। परमेसर बिकी गुवाई आ खेर दिनी क बो आपानै अजर-अमर जीवन दिओ ह , अर ओ जीवन बिका बेटाऊँ आवै ह। जिकै कनै परमेसर को बेटो ह, बिकन जुग-जुग को जीवन बी ह। अर जिकै कनै परमेसर को बेटो कोनी बिकन जुग-जुग को जीवन बी कोनी। परमेसर का बेटा प बिस्वास करबाळो, म, अ बाता थानै इ ताँई मांडूँ हूँ, जिऊँ थे ओ जाणल्यो क अजर-अमर जीवन थानै मिल्यो ह। आपा परमेसर प अंय्यां को बिस्वास करां हां क, जद बिऊँ बिकी इंछ्या गेल अरदास करां हां जणा बो आपणी सुणै ह। अर आपा आबी जणा हां क, जदकी बो आपणी सुणै ह अर जद आपा बिऊँ माँगा हां जणा आपा जाणा हां क, जोक्यु आपा माँग्या हां बो आपानै मिलगो ह। अर ज कोई मिनख खुदका बिस्वासी भाईनै अंय्यां को पाप करता देखै जिको फळ जुग-जुग की मोत कोनी ह जणा बो परमेसरऊँ बिकै ताँई अरदास करै जणा परबु बिनै जुग-जुग की मोत की सजा कोनी देसी पण बाकी अरदास सुणर जुग-जुग को जीवन देसी। पण म बा मिनखा ताँई अरदास करबा ताँई कोनी खेऊँ जखा अंय्यां का पाप करै ह जिको फळ जुग-जुग की मोत ह। सगळा बुरा काम पाप ह पण अंय्यां का पाप बी ह जिको फळ जुग-जुग की मोत कोनी। आपा जाणा हां क, जखोबी मिनख परमेसर को ह बो पाप कोनी करतो रेह्‍वै क्युं क परमेसर बिनै बचावै ह अर बिकै सेतान हात कोनी अड़ा सकै। आपा आबी जाणा हां क, सगळा जगत का मिनख सेतान क बस म ह, पण आपा परमेसर का हां। इ बातनै बी आपा जाणा हां क परमेसर को बेटो ईसु मसी आयो अर आपानै समज दिओ जिऊँ आपा सचा परमेसरनै जाण सकां, अर आपा बिकै सागै रेह्‍वां जखो सचो ह, मतबल ईसु मसी क सागै। ओई सचो परमेसर अर अजर-अमर जीवन देबाळो ह। मेरा भाईड़ो, थे खुदनै मूरती धोकबाऊँ बचार राखज्यो। म बिस्वासी मंडळी को मुखियो, आ चिठी बि लूगाईनै अर बिका टाबरानै मांडू हूँ। जिनै परमेसर टाळ्यो हो, अर बिका टाबराऊँ, म बाकै सचाई प चालबा की बजेऊँ परेम करूं हूँ। अर मई थारूँ परेम कोनी करूं पण बे सगळा जखा सचाईनै जाणगा हीं बे बी बाऊँ परेम करीं हीं। ओ बि सच की बजेऊँ होयो ह जखो आपणा म बास करै ह अर जखो सदाई आपणै सागै रेह्सी। परम-पिता परमेसर अर ईसु मसी की दया, किरपा अर स्यांती सचा परेम क सागै आपणा प होती रेह्‍वै। म, इ बातऊँ बोळो राजी हूँ क, थारा क्युंक टाबर सच प चालै ह जंय्यां क परम-पिता आपानै सच प चालबा ताँई हुकम दिओ हो। इ ताँई, ए स्याणी इब, म तनै कोई नयो आदेस कोनी मांडर्यो पण बोई हुकम ओडाऊँ हूँ जखो जुगाद म दिओ गयो हो। म चाऊँ हूँ क आपा सगळा बिस्वासी एक दुसराऊँ परेम राखां। परेम करबा को मतबल ओ ह क, आपा परमेसर का हुकमा प चालां। अर ओ बोई हुकम ह जखो आपानै जुगाद म दिआ गयो हो क आपानै परेम क सागै जीवन जिबो चाए। म आ बात इ ताँई बोलुँ हूँ, क्युं क इ दुनिया म बोळा भटकाबाळा मिनख हीं। अर जखो बी मिनख इ बातनै कोनी मानै क ईसु मसी इ धरती प मिनख काया को रूप लेर आयो, जणा बो छळ करबाळो ह अर मसी को बेरी ह। इ ताँई थे खुद समळर रेहज्यो जिऊँ थे बिनै जिकै ताँई म्हें बोळी मेनत कर्या हा गुमा नइ द्‍यो पण पूरो-पूरो इनाम पाओ। अर जखो मिनख मसी की सीखऊँ न्यारो चल्यो जावै ह बो परमेसर क कनै कोनी जा सकै। पण जखो मिनख बिकी सीखनै मानै ह बिकन परम-पिता अर बिको बेटो दोन्युई रेह्‍वै ह। अर ज कोई थानै मसी की सीख कोनी देवै जणा थे बि मिनखनै थारै घर म मना आबा द्‍यो अर नइ बिकी आवभगत करज्यो। क्युं क जखो मिनख बिकी आवभगत करै ह बो बिका बुरा करमा म सामिल होवै ह। थानै मांडबा ताँई तो मेरै कनै ओर बी बोळो क्युं ह, पण म बानै कागद प स्याईऊँ मांडबो कोनी चाऊँ। इकै बदलै म आ आस करूं हूँ क म थारै कनै आर आमै-सामै बतळाऊँ जिऊँ क आपा राजी होवां। तेरी बिस्वासी भाण का टाबर-टिकर, थानै राजी-खुसी का समचार बोल्या हीं जानै परमेसर टाळ्यो। म, बिस्वासी मंडळी को मुखियो, आ चिठी लाडला गयुसनै मांडू हूँ , जिऊँ म बिकै सचाई प चालबा की बजेऊँ परेम करूं हूँ। मेरा लाडला, म अरदास करूं हूँ क, तेरी काया निरोगी रेह्‍वै अर तेरै सागै भलोई होवै, जंय्यांकी तू आत्मिक बाता म आगै बढर्यो ह। अर जद तेरै बारां म आपणा भाईड़ा मऊँ क्युं क जणा मनै बताया क तू सचाई प चालै ह अर सचनैई मानै ह जणा म आ सुणर बोळो राजी होयो। मनै इऊँ बेत्ती राजी कोई बात कोनी करै क मेरा टाबर सचाई प चालै ह। मेरा लाडला, तू तेरा बिस्वासी भाया का हित म काम करबा ताँई बिस्वास जोगो ह , अठै ताँई क बे तेरूँ अणजाणई क्युं नइ हो। जणाई तो बे बिस्वासी मंडळी क सामै तेरै बारां म आ गुवाई दिनी ह क तू बाऊँ कंय्यां को परेम राख्यो ह। इ ताँई जद तू बानै बिदा करै जणा अंय्यां करजे जिऊँ परमेसरनै मान मिलै। क्युं क बे मसी की सेवा करबा ताँई जार्या हीं अर बे परमेसरनै नइ ध्यारबाळा मिनखाऊँ मदद कोनी लेवीं। इ ताँई आपानै जखा बिस्वासी हीं बाकी खातरदारी करनी चाए , जिऊँ क आपाबी बाकै सागै सचाई फेलाबा म सामिल हो सकां। इकै बारां म, म, बिस्वासी मंडळीनै बी मांड्यो हो, पण दियुतीफेस जखो नेतो बण्यो घूमै ह , बो म्हारी आवभगत कोनी करी। इ ताँई जद म आस्युं जणा बतास्युं क बो काँई-काँई करै ह। बो म्हारै बारां म भड़काबाळी बाता फेलावै ह। बो आई कोनी करै पण बिस्वासी भाया की बी आवभगत कोनी करै। अर जखो कोई बाकी आवभगत करबो बी चावै ह बानै बो करबा कोनी देवै अर बो बानै बिस्वासी मंडळी क बारनै काड देवै ह। मेरा लाडला, तू तो बुराई क गेलै नइ पण भलाई क गेलै चालजे। क्युं क जखो बी मिनख भलाई करै ह, बो परमेसर को ह। अर जखो बुराई करै ह बो परमेसरनै कोनी जाणै। दिमेतीयुसनै जाणबाळा बिस्वासी बिकै बारां म चोखो बोलीं हीं अर ओ सच बी ह। अर म्हें खुदबी बिनै भलो मिनख बतावां हां अर थे तो जाणोई हो क म्हारी गुवाई सची ह। थानै मांडबा ताँई तो मेरै कनै ओर बी बोळो क्युं ह, पण म बानै कागद प स्याईऊँ मांडबो कोनी चाऊँ। म आ आस करूं हूँ क, म थारै कनै आर आमै-सामै बतळाऊँ। तनै सुक-स्यांती मिलती रेह्‍वै। बिस्वासी भाईड़ा क कानिऊँ तनै राजी-खुसी का समचार। म्हारै कानिऊँ तू बठै का हरेक बिस्वासी भाईड़ा क कनै जार राजी-खुसी समचार बोलजे। म, यहूदा जखो ईसु मसी को दास अर याकूब को भाई हूँ। आ चिठी थानै मांडूँ हूँ, जानै परम-पिता परमेसर बुलायो ह अर जिऊँ बो लाड करै ह, अर थानै जखानै ईसु मसी बचा राख्यो ह। थार प सुक-स्यांती, दया अर परेम खूब होवै। लाडलो म तो घणोई चातो हो क, थानै बि छुटकारा क बारां म मांडूँ, जिका आपा बराबर का पाँतीवाळ हां। अर मनै अंय्यां बी लाग्यो क, म थानै अ बाता मांडर बढाओ द्‍युँ जिऊँ थे बिस्वास म बढता रेह्‍ओ, ओ बो बिस्वास ह जखो परमेसर का मिनखानै दिओ गयो ह। पण थारै म अंय्यां का मिनख घुसगा हीं, जिकै बारां म सास्तर म पेल्याऊँई मांडेड़ो ह क, बानै सजा मिलसी। बे परमेसरनै कोनी मानी अर आपणा परमेसर की दयानै कुकरम करबा ताँई हरी झंडी मानी हीं। बे आपणा परबु जखो आपणो मालिक ह बि ईसु मसीनै मानबाऊँ बी मना करीं हीं। थे तो बा बातानै जाणोई हो, पण म थानै ओज्यु याद दिलाबो चाऊँ हूँ, क परबु आपका मिनखानै मिसर देसऊँ निकाळर बचार ल्यायो हो। पण बा मिनखा मऊँ कई बिस्वासऊँ मुकरगा इ ताँई बोई बा मिनखानै नास कर दिओ जखा बिस्वासऊँ मुकरगा हा। म थानै बा दुता क बारां म बी याद दिलाबो चाऊँ हूँ, जखा आपका अधिकार का पदनै समाळर कोनी राख्या पण बि झघानै छोडर भाग्या जिनै परमेसर बानै रेह्बानै दिओ हो। जणा परमेसर बानै सदा ताँई की आग की भटी म न्यायहाळै दिन ताँई बंद कर दिओ, जिऊँ न्याय क दिन बानै सजा दे। परमेसर इजरायल का बा मिनखा अर बा ईस्बर नगरी दुता की जंय्यां, सदोम अर अमोरानै अर बिकै कनै की नगर्या का मिनखानै जखा कुकरम करता हा, अर बुरा कामा क गेल भागता हा, बानै कदैई नइ बुत्तबाळी आग म झोकर सजा दिनी। जिऊँ अ बाता ओरा ताँई सबक होवै। अंय्यांई बे मिनख हीं जखा थारी मंडळ्या म घुसगा हीं। बे बाकी जंय्यांई कुकरम कर आपकी कायानै सूगली करीं हीं, अर खेवीं हीं, “अंय्यां करबा ताँई परमेसर म्हानै दरसाव देर खयो ह।” अंय्यां कर बे आपणा परबु का अधिकारनै कोनी मानी अर ईस्बर नगरी दुता की बुराई करीं। थानै याद होवै तो ईस्बर नगरी को दुत मीकाईल जखो दुता को मुखियो ह। बिकी जद मूसा की लास ताँई सेतानऊँ जिरै होई, क बिकी लासनै लेज्याबा को हक किको ह। जणा बी बो सेतान की बुराई कोनी करी, बस अत्तोई बोल्यो, “तनै परबुई सजा देवै!” क्युं क बिमै बी न्याय करबा का परबु का अधिकारनै हड़पबा की हिमत कोनी ही। पण अ मिनख तो जखी बाता क बारां म जाणैई कोनी बाकै बारां म भावै जंय्यां बोलीं हीं। अ तो बिना समज का ज्यानबरा की जंय्यां हीं, जणाई बिना सोच्या समज्या भाऊँ बंय्यां करीं हीं। आ बुरी बाता की बजेऊँ बाको नास कर दिओ ज्यासी। बापै स्यामत पड़सी! अ मिनख तो कैन की जंय्यांई बुराई का गेला प चालीं हीं, अर अ धन का लालच म बिलाम की जंय्यांई पाप करीं हीं। अ मिनख परमेसर क सामै होगा हीं जंय्यां कोरह होयो हो। जणा आ सगळी बाता बेई आको बी नास कर्यो जासी। बिस्वासी मंडळी म जद कदै दावत होवै जणा बि टेम अ मिनख थारै सागै रेह्‍वै, जणा अ गेला का बा खाडा की जंय्यां हीं जखा पत्ताऊँ ढकेड़ा होवै। बिस्वासी मंडळी म रोटी खाती टेम अ आपका बेसरमी भर्या कामा प नइ तो सरमिंदा होवीं अर नइ आनै डर लागै। अ बा गुवाळ्या की जंय्यां हीं जानै लल्ड्याऊँ क्युंई मतबल कोनी, पण बे खुदको पेट भरबो सूल जाणी हीं। जंय्यां रेगीस्तान म बिना पाणी का बादळ भाळऊँ उनै का उनै होता रेह्‍वै ह पण छांटई कोनी गेरै, बंय्यांई अ मिनख बात तो बोळी लामी-लामी करीं हीं पण देबानै आकै कनै क्युंई कोनी। अ बि दरखत की जंय्यां हीं जखो आपकी रुत म बी कोनी फळै अर जिनै उपाड़ दिओ गयो ह। आऊँ क्युंई भलो कोनी होवै। अ मिनख आपका करमाऊँ गंदगी फेलावीं हीं जंय्यां तौफान म समदर की झाल झाग फेकै ह। थानै आ मिनखा का दिखाया गेला प नइ चालबो चाए क्युं क अ बा तारा की जंय्यां हीं जखा नित नई-नई दिसा म जावीं हीं। आ ताँई नरक म अँधेरीयो खाडो सदाई त्यार ह जिमै आनै पटक्यो जासी। आ मिनखा ताँई हनोक जखो आदम की सातवी पिडी मऊँ हो बो बी खयो हो, “देखो! परबु आपका हझारा-हझारा पबितर ईस्बर नगरी दुता क सागै आर सगळा को न्याय करसी। बो बा सगळा मिनखानै जखा परमेसरनै कोनी मानी बाका बुरा करमा की सजा देसी, जखा बे कर्या हीं। परबु पक्काईऊँ परमेसरनै नइ मानबाळा मिनखानै बाका हरेक बुरा बोल ताँई सजा देसी जखा परबु बेई बे बोल्या ह।” क्युं क अ मिनख बड़बड़ाबाळा, दुसरा मिनखा म दोस ढुंढबाळा, आपकी इंछ्यानै पूरी करबा बेई जिबाळा, बडा-बडा बोल बोलबाळा अर आपका फायदा ताँई दुसरा की चमचागरी करबाळा हीं। लाडलो, थे बा बातानै याद करो, जखी थानै चेताबा ताँई परबु ईसु मसी का भेजेड़ा चेला पेल्याऊँई बता दिनी ह। बे थानै खया हा क, “आखरी दिना म अंय्यां का मिनख बी आसी जखा परबु अर बिका मिनखा को तमासो बणासी, परमेसरनै नइ मानबाळा बे मिनख आपकी बुरी इंछ्या गेल मन मरजी करसी।” अ मिनख बेई हीं, जखा थारै म फूट गेरीं हीं। बे इ धरती का जीवन बेई सोचीं हीं, बामै पबितर आत्मा कोनी। पण लाडलो, थे बिस्वास की पबितर निम प मजबूत होता जाओ अर पबितर आत्मा की मददऊँ अरदास करो। आपणा परबु ईसु मसी की दयानै उडिकता रेह्‍ओ, जखो थानै अजर-अमर जीवन देसी। अंय्यां कर थे खुदनै परमेसर का परेम म बचार राखस्यो। अर जखा मिनख डावांडोळ ह बाकै उपर दया करज्यो। थे आगै बढर बा मिनखानै बचाल्यो जखा बचबो चावीं हीं। बानै बंय्यां बचाल्यो जंय्यां थे कोईनै लायऊँ बचाया हो। बापै परबु को डर मानर दया करो। पण बाका बा गाबाऊँ जापै बाकी बुरा करमा की गंदगी लागरी ह नफरत करो, मतबल बाका पाप भर्या करमाऊँ नफरत करो। परबु ईसु मसी की बजेऊँ आपानै बचाबाळा परमेसर की जे-जैकार हो। परमेसरई थानै बचा सकै ह, अर पापऊँ धो सकै ह। अर बोई ह जखो थानै आपकी मेमाभरी मोजूदगीऊँ राजी कर सकै ह अर खुद क सामै निरदोस खड़्यो कर सकै ह। जुगादऊँ इब ताँई अर आबाळा जुग-जुग ताँई मेमा, मान, ताकत अर अधिकार परमेसर कोई ह। अंय्यांई होवै। इ पोथी म बे बाता मांडी गई जखी ईसु मसी दरसाव क जरिए बताई ह। अ बाता ईसु मसीनै परमेसर बताई ह जिऊँ बो आपका दासानै, दरसावा क जरिए बतावै क आबाळा टेम म काँई होबाळो ह। ईसु मसी आपका ईस्बर नगरी दुतनै यहून्ना क कनै भेजर अ बाता बताई। जणा यहून्नानै जोक्यु दरसाव होया बो बा बाता क बारां म मांड्यो। अर आ बा सचाई ह जखी ईसु मसी बतायो हो। अ परमेसर क कानिऊँ आएड़ा समचार हीं। भागहाळो ह जखो परमेसर क कानिऊँ आएड़ा इ समचारनै बाचै अर भागहाळा हीं बे जखा इ पोथी म मांडेड़ी बातानै सुणै अर मानै क्युं क बो टेम सांकड़ैई ह जद अ बाता पूरी होसी। म यहून्ना, एसिया परदेस की सात्यु बिस्वासी मंडळ्यानै मांडू हूँ , परमेसर जखो ह, हो अर आबाळो ह बिकै कानिऊँ, अर सात्यु आत्मा जखी बिकै सिंघासन क सामै ह बाकै कानिऊँ, अर बिस्वास जोगो गुवा, अर मरेड़ा मऊँ जीबाळो पेलो अर इ धरती का राजा प राज करबाळा ईसु मसी कानिऊँ थार प दया अर सुक-स्यांती होती रेह्‍वै। बो आपणाऊँ परेम करै ह अर आपका लोयऊँ आपानै आपणा पापऊँ सुद करबा ताँई मर्यो , अर आपानै अंय्यां की परजा अर याजक बणाया जखी परमेसर अर परम-पिता की सेवा करै। बिकी मेमा सदाई होवै! अंय्यांई होवै। “देखो, बो बादळा क सागै आर्यो ह,” अर “हरेक आँख बिनै देखसी, अठै ताँई बे बी जखा बिनै मार्या हा।” अर धरती का सगळा कूणबा का मिनख “बि ताँई छाती पिटसी।” अंय्यांई होसी! अंय्यांई होवै। परबु परमेसर, जखो ह, जखो हो अर जखो आबाळो ह, जखो सऊँ सक्‍तिसाली ह बो खेवै ह, “मई अलफा अर ओमेगा हूँ।” म यहून्ना थारो बिस्वासी भाई हूँ, म आपणा ईसु मसी म पिड़ा, थ्यावस अर राज म थारो साती हूँ। मनै परमेसर का बचन अर ईसु मसी की गुवाई देबा की बजेऊँ देस निकाळो देर पत्तमुस नाम का टापू प भेज दिओ गयो हो। अरामहाळा दिन म परबु की जे-जैकार करर्यो हो जणा म पबितर आत्माऊँ भरगो अर म मेरै गेलनै नरसिंगा की उवाज सुणी , अर बि उवाज म अंय्यां हेलो आर्यो हो क, “तू जोक्यु बि देखर्यो ह बिनै एक पोथी म मांडतो जा अर बिकै पाछै आ बातानै इफिसुस, स्मुरना, परगमुम, थुआतिरा, सरदिस, फिलीदिलफिआ अर लोदिकीया की सात्यु बिस्वासी मंडळ्यानै भेज दिजे।” म बिनै देखबा ताँई जखो मेरूँ बोलर्यो हो गेलनै मुड़्यो जणा मनै सात सोना का दिपदान दिख्या। अर बा दिपदाना क बिचमै एक मिनख दिख्यो जखो मिनख का बेटा की जंय्यां हो अर बो पगा ताँई चोळो पेर राख्यो हो। अर बिकै सीना प सुनेरा रंग को कमरबंध बंदर्यो हो। बिका सीर का बाळ दुदऊँ बी धोळा धप हा अर बिकी आँख आग की लपटा की जंय्यां ही। बिका पग ताजाई तपाईड़ा काँसा की जंय्यां चमकर्या हा अर बिकी उवाज झरना का पाणी की जंय्यां ही। अर बो आपका दाया हात म सात तारा ले राख्या हा। बिका मुंडाऊँ दोधारी तलवार बारनै निकळरी ही। अर बिकी सकल दोपारी का भळकता सूरज की जंय्यां ही। जद म बिनै देख्यो जणा बिका पगा म मरेड़ा मिनख की जंय्यां पड़गो। अर बो आपको दाइणो हात मेर प धर मेरूँ बोल्यो, “डरै मना। म पेलो अर आखरी हूँ। म बोई हूँ जिकनै जीवन ह। म पेली मरगो हो पण इब सदा-सदा ताँई जिंदो हूँ, मोत अर पताळ की ताळ्या मेरै कनै ह। “इ ताँई जखी बाता तू देखी ह, जखी बाता होरी ह अर जखी बाता होबाळी ह बा सगळ्यानै मांडले। बा सात तारा, जिनै तू मेरै दाया हात म देख्यो हो अर बा सात सोना का दिपदाना को भेद ओ ह क बे सात तारा बिस्वासी मंडळ्या का सात ईस्बर नगरी दुतानै दिखावै अर बे सात दिपदान सात बिस्वासी मंडळ्यानै दिखावै ह। “इफिसुस की बिस्वासी मंडळी का मुखियानै मांड। अ बात बिकै कानिऊँ ह जखो सात्यु तारा आपका दाया हात म ले राख्या ह, अर सोना का सात्यु दिपदाना क बिचमै फिरै ह। म तेरा कामानै, तेरी मेनतनै अर तेरा थ्यावसनै जाणू हूँ। म ओबी जाणू हूँ क, तू बुरा मिनखानै बरदास कोनी करै अर तू बा मिनखानै जखा खुदनै भेजेड़ा चेला बोलै ह पण बे ह कोनी, तू बानै परख्यो अर बे झूठा निकळ्या। तू थ्यावस राखै ह, अर मेरा नाम की बजेऊँ दुख भोगतो भोगतो बी थक्यो कोनी। पण इब तेर म एक कमी ह अर बा आ ह क, तेर म मेरै बेली पेलो जिस्यो परेम कोनी रिह्यो। इ ताँई चेता म आ अर आ सोच क तू कठैऊँ गिर्यो, तू तौबा कर अर पेल्या की जंय्यां काम कर, अर ज तू अंय्यां कोनी करसी जणा म तेरै कनै आर तेरा दिपदानानै बि झघाऊँ हटा देस्युँ। पण तेर म एक बात ह क तू नीकुलीया का कामाऊँ नफरत करै ह जिऊँ म बी नफरत करूं हूँ। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह। जखो बी बुराईऊँ जीतसी म बिनै जीवन का दरख्त को फळ खाबा को हक देस्युँ जखो परमेसर का बाग म ह। “ स्मुरना की बिस्वासी मंडळी का मुखियानै मांड। अ बात बिकै कानिऊँ ह जखो पेलो अर आखरी ह, जखो मरगो हो पण ओज्यु जिंदो होगो। म थारा दुख अर गरीबी क बारां म जाणू हूँ, इकै वावजुद बी थे भर्यापूरा हो। अर जखा खुदनै यहूदि खेवै ह पण बे ह कोनी, म बा मिनखा की बुरी बातानै बी जाणू हूँ जखी थारै बेई बे करै ह, बे सेतान की बिस्वासी मंडळी ह। जखा दुख तनै भोगणा ह बाऊँ मना डर। क्युं क सेतान थारै मऊँ कयानै बिचासबा ताँई काळ-कोठड़ी म गेरसी अर थानै बठै दस दिना ताँई सताव भोगणो पड़सी। पण तू बिस्वास जोगो रेह्जे चाए तनै मोतई क्युं नइ आज्यावै। जणा म तनै तेरी जीत क रूप म अजर-अमर जीवन को मुकट देस्युँ। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह। जखो बी जीतसी बिनै दुजी मोत कोनी भोगणी पड़सी।” परगमुम की बिस्वासी मंडळी का मुखियानै मांड। अ बात बिकै कानिऊँ ह जिकै कनै पेनी दोधारी तलवार ह। म जाणू हूँ क, तू बठै रेह्‍वै ह जठै सेतान को सिंघासन ह। इकै वावजुद बी तू मेरै नाम प सचो बिस्वास करै ह। तेरी नगरी म सेतान को सिंघासन ह जठै मेरा बिस्वास जोगा दास अन्तिपासनै मार्यो गयो जणाबी तू मेर प बिस्वास करबो कोनी छोड्यो। क्युंबी हो पण इब बी तेर म क्युंक कमीया ह अर बे अ ह क, तेरी बिस्वासी मंडळी म अंय्यां का क्युंक मिनख ह जखा बिलाम की सीख प चालै ह। क्युं क बिलाम, बालाकनै सीखायो हो क बो इजरायली मिनखानै मूरती प चढाईड़ो चढावो खाबा अर कुकरम करबा ताँई उकसावै। अंय्यांई तेरै अठै बी अंय्यां का मिनख ह जखा नीकुलीया की सीख प चालै ह। इ ताँई तौबा करो, नहिस म आर बाकै सागै मुंडा की तलवारऊँ लड़स्युं। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह। जखो जीतै ह, म बिनै ईस्बर नगरी म लुखेड़ो मन्नो देस्युँ। म बिनै एक धोळो भाठो बी देस्युँ जिकै उपर एक नयो नाम मंडेड़ो होसी। बो नाम बि मिनख क सिवाय कोई कोनी जाणसी जिनै बो दिओ ज्यासी। “थुआतिरा की बिस्वासी मंडळी का मुखियानै मांड। अ बाता परमेसर का बेटा कानिऊँ ह, जिकी आँख्या आग की लपटा की जंय्यां ह, अर पग चमकता काँसा की जंय्यां ह। म तेरै करमानै, बिस्वासनै, परेमनै, तेरी सेवानै अर तेरा थ्यावसनै जाणू हूँ। अर म आ बी जाणू हूँ क तू इब आ बातानै ओर बी बेत्ती करै ह। क्युंबी हो पण इब बी तेर म एक कमी ह अर बा आ ह क, तू इजेबैल नाम की बि लूगाईनै तेरै बिचमै राखै ह, जखी खुदनै परमेसर की खेबाळी बतावै। अर आपकी सीखऊँ मेरा दासानै कुकरम करबा अर मूरत्या प चढाईड़ा चढावानै खाबा ताँई उकसावै ह। म बिनै बिका कुकरमाऊँ हियो बदलबा को मोको दिओ हो, पण बा पापऊँ तौबा कोनी करी। इ ताँई म बिनै खाट म घालबाळो हूँ। अर कुकरमी मिनखा प बी पिड़ा भेजस्युं, ज बे पापऊँ तौबा कोनी करसी। म बिका टाबरानै मार गेरस्युं। जणा सगळी बिस्वासी मंडळ्या आ जाण ज्यासी क म हिया अर बुदीनै जाणबाळो हूँ। अर म हरेकनै बाका करमा गेल बदलो देस्युँ। इब म थुआतिरा बिस्वासी मंडळी का बा मिनखानै खेबो चाऊँ हूँ जखा बि लूगाई की सीखनै कोनी मानै अर सेतान की भेद भरी बातानै कोनी जाणै। ‘म थार प ओर बोज कोनी लादूँ, पण मेरी सीख जखी थारै कनै ह बिपै चालता रह्यो।’ जखो जीतै ह अर आखीर ताँई मेरी इंछ्या प चालै ह म बिनै देस-देस का मिनखा प अधिकार देस्युँ। अर बो लौ को डंडो लेर बापै राज करसी। अर बो बानै माटी का बरतना की जंय्यां फोड़ गेरसी। ओ बोई हक ह जखो मनै मेरा परम-पिताऊँ मिल्यो ह अर म बिनै भोर का तारा की जंय्यां चमकास्युं। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह। “सरदिस की बिस्वासी मंडळी का मुखियानै मांड। अ बाता बिकै कानिऊँ ह जिकै कनै परमेसर की सात आत्मा अर सात तारा हीं। म थारा करमानै जाणू हूँ। थे जिंदा तो बाजो हो पण हो मरेड़ा। इ ताँई चेता म आ, अर इऊँ पेली क जोक्यु नास होबाळो अर बचेड़ो ह बिनै पूरी तर्या मजबूत कर। क्युं क म मेरा परमेसर की नजर्या म तेरा कोईबी कामानै पूरो होता कोनी देख्यो। इ ताँई, जि सीखनै थे सुण्या हा बानै याद करो अर तौबा करो अर बि सीख क गेल चालो। अर ज तू अंय्यां कोनी करसी जणा म चोर की जंय्यां चाणचुक तेरै कनै आज्यास्युं अर तनै बेरो कोनी पड़बा देस्युँ। क्युंबी हो सरदिस, तेरै मांयनै क्युंक मिनख ह जखा खुदका गाबानै मेला कोनी होबा दिआ। बे धोळा गाबा पेर'र मेरै सागै-सागै डोला-फिरी करसी क्युं क बे इ जोगा हीं। जखो जीतै ह बो बाकी जंय्यां ह जखा धोळा गाबा पेरै ह। म जीवन की पोथी मऊँ बिको नाम कोनी बुझाणू, पण बिका नामनै परम-पिता अर ईस्बर नगरी दुता क सामै परगट करस्युं क बो मेरो ह। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह। “फिलीदिलफिआ की बिस्वासी मंडळी का मुखियानै मांड। अ बाता बिकै कानिऊँ ह जखो पबितर अर सचो ह अर जिकै कनै दाऊद राजा की नगरी की ताळी ह। अर बो जि दरूजानै खोलै ह बिनै कोईबी कोनी जुड़ सकै अर जिनै बो जुड़ै ह बिनै कोईबी खोल कोनी सकै। म तेरा करमानै जाणू हूँ। म तेरै सामै एक दरूजो खोल्यो हूँ जिनै कोईबी कोनी जुड़ सकै। म जाणू हूँ क तेरै कनै थोड़ीई ताकत ह पण तू मेरा हुकमानै मान्यो ह, अर मेरो नाम लेबो कोनी छोड्यो। सुण, तेरै कनै अंय्यां का मिनख ह जखा सेतान की बिस्वासी मंडळी का हीं बे खुदनै यहूदि बतावै जदकी बे ह कोनी, बे झूठा हीं। म बाकै सागै अंय्यां को बरताव करस्युं जिऊँ बे तेरै कनै आर तेरा पगा म धोक खासी अर आ जाणज्यासी क म तेरूँ परेम करूं हूँ। क्युं क तू मेरा हुकमानै थ्यावस क सागै सक्यु सेण करतो होयो मान्यो ह। इ ताँई जद इ जगत का मिनखानै परखबा ताँई जखो कळेस आबाळो ह बि घड़ी म, म तनै बचास्युं। म तावळोई आबाळो हूँ। इ ताँई जोक्यु बी तेरै कनै ह बिनै थाम्यो राख जिऊँ कोई तेरो अजर-अमर जीवन को मुकट कोनी खोस सकै। जखो जीतै ह बिनै म मेरा परमेसर को पबितर तम्मू को खम्बो बणास्युं। अर बिकै पाछै बे कदैई बारनै कोनी जासी। म बिकै उपर मेरा परमेसर को नाम, नई नगरी यरूसलेम जखी परमेसर की ईस्बर नगरीऊँ उतरबाळी ह बिको नाम अर मेरो नयो नाम मांडस्युं। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह।” “लोदिकीया की बिस्वासी मंडळी का मुखियानै मांड। अ बाता बिकै कानिऊँ ह जखो परमेसर का हरेक वादा की जामनी ह, जखो बिस्वास जोगो, सचो गुवा अर परमेसर की सगळी सरस्टि प राज करबाळो ह। म तेरा कामानै जाणू हूँ, अर ओ बी जाणू हूँ क तू नइ तो सीळो अर नइ गरम । म चाऊँ हूँ क, तू आमैऊँ एक तो होतो। तू नइ तो ठंडो ह अर नइ गरम पण तू न्युनिवायो ह, इ ताँई म तनै मेरा मुंडाऊँ थूकबाळो हूँ। तू बोलै ह, ‘म पिसाळो हूँ, म धन जोड़ लिओ हूँ मनै ख्याकीई कमी कोनी।’ पण तनै कोनी बेरो क तू नीच, बिचारो, कंगलो, आँदो अर नंगो ह। इ ताँई म तनै सला देऊँ हूँ क, तू मेरूँ आगऊँ तपाईड़ो सोनो मोल लेले जिऊँ तू पिसाळो होज्यावै। अर पेरबा ताँई मेरूँ धोळा गाबा बी मोल लेले, जिऊँ तेरो सरमिंदगी भर्यो नंगोपुणो ढक ज्यावै। अर तेरी आँख्या म घालबा ताँई सूरमो लेले जिऊँ तनै सुजबा लागज्या। म जिऊँ बी परेम करूं हूँ बानै दकालूं हूँ अर सूदारूँ हूँ। जणा मजबूत होज्या अर तौबा कर। सुण, म बारना प खड़्यो-खड़्यो खुड़काऊँ हूँ। ज कोई मेरो हेलो सुणर कुआड़ खोलसी, जणा म मांयनै जार बिकै सागै खाणो खास्युं अर बो मेरै सागै। जखो जीतै ह, बिनै म मेरै दाया नाकै मेरा सिंघासन प बिठास्युं। जंय्यां म जित्यो अर मेरा परम-पिता क सागै बिका सिंघासन प बेठ्यो। जिकै कान ह बे बानै खोल ले क, पबितर आत्मा बिस्वासी मंडळ्याऊँ काँई बोलै ह।” इकै पाछै म देख्यो, ईस्बर नगरी म एक दरूजो खुल्यो। अर म ओज्यु नरसिंगा की सी उवाज सुणी जखी म पेली बी सुणी ही। बा उवाज मेरूँ बोली, “उपर आज्या, म तनै बे बाता दिखास्युं जखी आबाळा टेम म होबाळी ह।” अत्ता मई पबितर आत्मा मनै उपर उठा लेगी। अर म ईस्बर नगरी म एक सिंघासन देख्यो जिकै उपर कोई बेठ्यो हो। अर जखो बिपै बेठ्यो हो बिको मुंडो लाल मणी अर लाल हिरा की जंय्यां चमकर्यो हो। अर बिकै च्यारूमेर मेघ धनुस हो जखो हर्या रंग का हिरा पन्ना जंय्यां को लागर्यो हो। बि सिंघासन क च्यारूमेर चोबिस सिंघासन ओर हा, बाकै उपर चोबिस बडका बेठ्या हा। बे धोळा गाबा पेर राख्या हा अर बाका माथा प सोना का ताज हा। अर बि सिंघासन पऊँ बिजळी का पळका, बिकी कड़कड़ाट अर बादळा की गरजबा की उवाज आरी ही। अर सिंघासन क सामै सात मसाल चसरी ही जामै लपटा उठरी ही। अ मसाल परमेसर की सात आत्मा ह। अर बि सिंघासन क सामै सिसा की जंय्यां दिखबाळो समदर हो। अर बि समदर क बिचमै अर सिंघासन क च्यारूमेर च्यार जीवता पराणी हा बाकै आगै-पिछै आँख्याई आँख्या ही। पेलो जीवतो पराणी नार की जंय्यां, दुसरो जीवतो पराणी बळद की जंय्यां, तीसरा जीवता पराणी को मुंडो मिनख की जंय्यां हो, अर चोथो जीवतो पराणी उडता बाज की जंय्यां हो। बा च्यारू जीवता पराण्या क छ: छ: पंख हा बाकै च्यारूमेर आँख्याई आँख्या ही, अठै ताँई बाकै पांखड़ा क तळै बी आँख्या ही अर बे रात-दिन एकई बात बोलता रेह्ता हा, “‘सऊँ सक्‍तिसाली परबु परमेसर पबितर, पबितर, पबितर ह,’ जखो हो, जखो ह, जखो आबाळो ह।” जद जद बे जीवता पराणी, सिंघासन प बेठैड़ा की जखो अमर ह, मेमा अर जे-जैकार कर्या हा जणा, बे चोबिस बडका, जखो सिंघासन प बेठ्यो हो अर जखो अमर ह बिका पगा म धोक खार्या हा। बे सिंघासन क सामै आपका ताज उतार बोलर्या हा, “ओ म्हारा परबु अर म्हारा परमेसर, थेई मेमा, ईज्जत अर ताकत जोगा हो। क्युं क थेई सगळी चिजानै रच्या हो, थारीई इंछ्याऊँ अ सगळी चिजा रची गई ह, अर जीवै ह।” जणा म देख्यो क जखो सिंघासन प बेठ्यो हो बिकै दाया हात म समटेड़ो कागद हो बि कागद क दोन्यु नाकै आंक मंडर्या हा। अर बिकै सात म्होरा की चेपी लागरी ही। इकै पाछै म एक सक्‍तिसाली ईस्बर नगरी दुतनै देख्यो जखो जोरऊँ हेलो पाड़र्यो हो क, “इकी चेपीनै तोड़र इ कागदनै खोलबा जोगो कूण ह?” पण इ कागदनै खोलबा अर इकै मांयनै काँई ह बिनै देखबा जोगो कोई कोनी हो। नइ तो ईस्बर नगरी अर धरती प अर नइ धरती तळै। जणा म खूब रोयो क्युं क कागदनै खोलर बिनै बाचबा जोगो कोई कोनी हो। जणा बा बडका मऊँ एक मेरूँ बोल्यो, “रोवै मना! देख, उरै एक ह जखो ठेराईड़ो नार अर यहूदा का कूणबा मऊँ ह अर बो दाऊद को वंस ह। बो इ कागद अर इकी सात म्होरा की चेपीनै खोलबा ताँई जीत हासिल करली ह।” इकै पाछै म एक उन्यानै देख्यो जखो सिंघासन, च्यारू जीवता पराण्या अर बा बडका क बिचमै खड़्यो हो। बो अंय्यां लागर्यो हो जंय्यां क बिकी बलि चढाई गई हो। बिकै सात सींग अर सात आँख ही अ परमेसर की सात आत्मा ही जानै सगळी धरती प भेज्यो गयो हो। बो सिंघासन क कनै आयो अर जखो बिपै बेठ्यो हो बिकै दाया हातऊँ बो कागद ले लिओ। अर जद बो बि कागदनै ले लिओ जणा बे च्यारू जीवता पराणी अर बे चोबिस बडका बि उन्या क धोक खाई। बा सगळा क कनै विणा ही अर बे सुगंद देबाळी चिजाऊँ भरेड़ा सोना का प्याला ले राख्या हा, अ परमेसर का मिनखा की अरदासनै दिखावै ह। बे एक नयो गीत गार्या हा, “तूई, इ कागदनै अर इपै लगाईड़ी म्होरा की चेपीनै, खोलबा जोगो ह, क्युं क तू बलि होयो, थारा लोयऊँ, सगळा कूणबा का मिनखानै, सगळी बोली बोलबाळानै, देस-देस का मिनखानै परमेसर ताँई मोल लिआ हो। तू बानै एक राज अर परमेसर की सेवा करबा ताँई याजक बणायो ह, अर बे धरती प राज करसी।” जणा म देख्यो क बि सिंघासन, च्यारू जीवता पराणी अर बडका क च्यारूमेर बोळासारा ईस्बर नगरी दुत खड़्या हीं। जाकी गिणती लाखो करोड़ा म ही, म बाकी उवाज सुणी। बे जोर-जोरऊँ हेलो पाड़र्या हा, “जखो उन्यो बलि चढायो गयो हो, बो मेमा, मान, धनेवाद, बळबूतो, सक्‍ति, बुदी अर धन पाबा जोगो ह।” बिकै पाछै म ईस्बर नगरी अर धरती की, धरती तळै की, अर समदर की सगळी रचना अर ब्रह्माण्ड का सगळा पराण्या की उवाज सुणी, बे अंय्यां बोलर्या हा, “जखो सिंघासन प बेठ्यो ह बिकी अर उन्या की, मेमा, ईज्जत, धनेवाद अर बिको राजपाट जुग-जुग रेह्‍वै।” जणा बे च्यारू जीवता पराणी बोल्या, “अंय्यांई होवै, ” अर बे बडका बिकै धोक खाई। म देख्यो क बो उन्यो बा सात म्होरा मऊँ पेली म्होर की चेपी खोली। जणा म बा च्यार जीवता पराण्या मऊँ एकनै बादळा की गरजबा की उवाज म आ बोलता सुण्यो, “आ।” म देख्यो क मेरै सामै एक धोळो घोड़ो ह अर बिपै जखो सुवार हो बो तिरख-बाण ले राखी ही। अर बिनै एक ताज पिरायड़ो हो अर बो जीतबाळा की जंय्यां जीतबानै बारनै चलेग्यो। अर जद बो उन्यो दुसरी म्होर की चेपी खोली जणा म दुसरा जीवता पराणीनै बोलता सुण्यो, “आ।” जणा एक ओर घोड़ो आयो जखो लाल सूरख हो। अर बिका सुवारनै धरती का मिनखानै आपसर्या म एक दुसराऊँ मरवाबा अर बाकी सुक-स्यांती खोसबा की ताकत दि गई ही। बिनै एक बडी तलवार बी दि गई ही। जद बो उन्यो तीसरी म्होर की चेपी खोली जणा म बि तीसरा जीवता पराणीनै बोलतो सुण्यो, “आ।” जणा म एक ओर घोड़ो देख्यो जखो काळो हो। बिका सुवार क हात म एक ताखड़ी ही। अर म बा च्यारू जीवता पराण्या क बिच मऊँ एक हेलो आतो सुण्यो, “आबाळा टेम म धरती प काळ पड़सी बिमै एक मजुरिया की ध्यानगीऊँ एक दिन खाबा जोगोई ग्युं नहिस तीन दिन खाबा जोगोई जौ मोल लिओ जासी। पण जेतून का तेल अर अँगूरी का भाव कोनी बदलै।” बिकै पाछै बो उन्यो चोथी म्होर की चेपी खोली, जणा म चोथा जीवता पराणीनै बोलता सुण्यो, “आ।” अर म एक हळका पिळा रंग को घोड़ो देख्यो। बिका सुवार को नाम मोत हो। बिकै गेल-गेल पताळ हो। धरती को एक चोथाई भाग बाकै बस म दिओ गयो हो क बे तलवारऊँ, काळऊँ, मरीऊँ अर धरती का जंगली जानबराऊँ मिनखानै मरवावै। बिकै पाछै बो उन्यो पाचवी म्होर की चेपी खोली, जणा म बेदी क तळै बा मिनखा की आत्मा देखी जानै परमेसर का चोखा समचार अर गुवाई देबा की बजेऊँ मार दिओ गयो हो। बे जोर-जोरऊँ हेलो पाड़र्या हा, “ओ पबितर अर सचा परबु, थे कद न्याय करस्यो? इ धरती का मिनखा को न्याय अर जखा म्हानै मार्या हा बानै कद सजा देस्यो?” बा सगळानै धोळा चोळा पिराया गया हा अर ओडायो गयो हो क, “क्युंक घड़ी ओर उडिको जद ताँई क थारा साती-संगी अर थारा भाईड़ा की गिणती पूरी नइ होज्यावै जानै बंय्यांई मार्यो जासी जंय्यां थानै मार्यो गयो हो।” बिकै पाछै बो उन्यो छठी म्होर की चेपी खोली, जणा बठै एक जोरको भूचाळ आयो , जिऊँ सूरज तूवा की जंय्यां काळो अर चाँद लोय की जंय्यां लाल होगो। आसमानऊँ धरती प तारा अंय्यां पड़्या जंय्यां आँधी का सुटाऊँ दरख्तऊँ काच्चा फळ पड़ै ह। अर आसमान समटेड़ा कागद की जंय्यां भेळो होगो अर सगळा डूँगर अर टापूआनै बाकी झघाऊँ हटा दिआ गया। जणा धरती का राजा, मुखिया, सरदार, पिसाळा, ताकतबर, मालिक अर दास सगळा का सगळा गुफा म लुखगा। बे डूँगराऊँ अर ढाडऊँ बोलर्या हा, “म्हारै प गिर पड़ो अर जखो सिंघासन प बिराजै ह बिऊँ अर उन्या की झाळऊँ म्हानै लुखाल्यो। क्युं क बिकै झाळ काडबा को भेंकर दिन आगो ह, अंय्यां को कूण ह जखो बानै झेल सकै?” इकै पाछै म च्यार ईस्बर नगरी दुतानै धरती क च्यारू कूणा म खड़्यो देख्यो, बे च्यारू कूणाऊँ आबाळी भाळनै डाट राख्या हा। जिऊँ धरतीऊँ, दरख्ताऊँ अर समदरऊँ भाळ नइ आवै। अर म एक ओर ईस्बर नगरी दुतनै अगुणी दिसाऊँ उपर आतो देख्यो, बो जीवता परमेसर की म्होर ले राखी ही। बो बा च्यारू दुतानै जानै धरती अर समदर को नास करबा को हक दिओ गयो हो बाऊँ जोरऊँ बोल्यो, “थे जद ताँई धरती, समदर अर दरख्तानै नास मना करज्यो जद ताँई म्हें आपणा परमेसर की म्होर बिका दासा का माथा प नइ लगा देवां।” जणा म म्होर लगाईड़ा मिनखा की गिणती सुणी बे इजरायल का हरेक कूणबा मऊँ हा जखा गिणती म एक लाख चोमाळिस झार हा। बा कूणबा मऊँ यहूदा, रूबेन, गाद, आसेर, नपताली, मनसे, समोन, लेवी, इस्साकार, जबलुन, युसूफ अर बिन्यामीन हा। अर बामैऊँ हरेक कूणबा मऊँ बारा-बारा हझार मिनख हा। इकै पाछै म देख्यो क मेरै सामै मिनखा की बोळी बडी भीड़ ही जिनै कोईबी कोनी गिण सकतो हो, बि भीड़ म सगळा कूणबा का मिनख, देस, बोली, अर हर दिसावर का मिनख हा , जखा बि सिंघासन अर उन्या क सामै खड़्या हा। बे धोळा गाबा पेरमाल्या हा अर हाता म खजूर की डाळ्यां ले राख्या हा। अर बे हेलो पाड़र्या हा, “छुटकारा ताँई परमेसर जखो सिंघासन प बिराजै ह, बाकी अर उन्या की, जे-जैकार हो।” सगळा ईस्बर नगरी दुत बि सिंघासन क, बडका क अर च्यारू जीवता पराण्या क च्यारूमेर खड़्या हा। बे सिंघासन प बिराजमान परमेसर क धोक खाई। अर बे बोल्या, “अंय्यांई होवै! म्हारा परमेसर की मेमा, बडाई, धनेवाद, ज्ञान, मान, सक्‍ति अर बळबूतो सदाई होती रेह्‍वै। अंय्यांई होवै!” जणा बा बडका मऊँ एक जणो मेरूँ बुज्यो, “जखा धोळा गाबा पेरमाल्या हीं बे मिनख कूण ह, अर बे कठैऊँ आया हीं?” म बिऊँ बोल्यो, “म्हराज, थे जाणो हो।” जणा बो मेरूँ बोल्यो, “अ बे मिनख ह जखा कळेस भोगर आया हीं अर आपका गाबल्यानै उन्या का लोयऊँ धोर पबितर कर्या हीं। जणाई, “अ परमेसर का सिंघासन क सामै खड़्या हीं, अर बिका मनदर म रात-दिन बाकी भगती करता रेह्‍वै ह, इ ताँई जखो सिंघासन प बिराजमान ह, बो बामै बास कर बानै बचासी। बानै नइ तो ओज्यु भूख लागसी, अर नइ ओज्यु कदै तिस लागसी। बानै सूरज की तावड़ी बी कोनी बाळसी , अर नइ कोई ओर गरमी बाळसी। क्युं क जखो उन्यो सिंघासन क बिचमै ह, बो बाको गुवाळ्यो होसी, अर बो बानै जीवन देबाळा पाणी का झरना कनै लेज्यासी। अर परमेसर बाकी आँख्या का सगळा आसु पुछ देसी।” जद बो उन्यो सातवी म्होर की चेपी खोली, जणा आदा घंटा ताँई ईस्बर नगरी म सुनसट होगी। अर म परमेसर क सामै सात ईस्बर नगरी दुतानै खड़्या देख्यो। बानै सात तूताड़ी दि गई ही। बिकै पाछै एक ओर ईस्बर नगरी दुत सोना को धूपदान लेर आयो अर बेदी कनै खड़्यो होगो। बिनै परमेसर का मिनखा की अरदास क सागै सोना की बेदी प जखो सिंघासन क सामै ही, चढाबा ताँई बोळीसारकी धूप दि गई ही। अर ईस्बर नगरी दुता क हाताऊँ धूप को धुँओ बा परमेसर का मिनखा की अरदास क सागै परमेसर कनै गयो। ईस्बर नगरी दुत धूपदान म बेदीऊँ आग लेर धरती प फेक दि, जणा बादळा की गरजबा की उवाज बिजळी की कड़कड़ाट अर बिको पळको अर भूचाळ आयो। जणा बे ईस्बर नगरी दुत जाकै कनै सात तूताड़ी ही, बे बानै बजाबा ताँई त्यार होगा। पेलो ईस्बर नगरी दुत जंय्यांई तूताड़ी बजाई बंय्यांई ओळा, लोय अर आग एक सागै मिलेड़ी दिखी। अर बानै धरती प फेक दिओ गयो जिऊँ धरती अर दरख्ता को एक तिहाई भाग बळर राख होगो, अर सगळी हरी घास बी बळगी। बिकै पाछै दुसरो ईस्बर नगरी दुत तूताड़ी फूंकी, जणा मानो एक बळता डूँगरनै समदर क मांयनै फेक दिओ गयो हो, जिऊँ समदर को एक तिहाई पाणी लोय बणगो। जिकी बजेऊँ समदर का एक तिहाई जीव मरगा अर एक तिहाई झाज बी नास होगा। जद तीसरो ईस्बर नगरी दुत तूताड़ी फूंकी जणा आसमान मऊँ एक मसाल की जंय्यां बळ-बळतो तारो पड़्यो, ओ तारो एक तिहाई नद्‍या अर झरना का पाणी प पड़्यो। इ तारा को नाम नागदौना हो, जिकै बजेऊँ एक तिहाई पाणी नागदौना म बदलगो , अर खारो होगो , जिनै पीबाऊँ बोळा मिनख मरगा। जद चोथो ईस्बर नगरी दुत जंय्यांई तूताड़ी फूंकी जणा एक तिहाई सूरज, चाँद अर तारा प विपदा आई। अर बाको एक तिहाई भाग काळो होगो जिकी बजेऊँ एक तिहाई दिन अर रात म अँधेरो छागो। जणा म आसमान म एक बाजनै उडता देख्यो अर बो जोरकी उवाज म बोलर्यो हो, “इबी तो तीन ईस्बर नगरी दुता को तूताड़ी फूंकबो बाकी ह इ ताँई धरती प रेह्बाळा मिनखा प हाय! हाय! हाय!” पाचवो ईस्बर नगरी दुत तूताड़ी फूंकी जणा म आसमानऊँ धरती प एक तारो पड़ता देख्यो। बि तारानै पताळ खोलबा ताँई ताळी दिनी गई ही। अर बो पताळनै खोल्यो, बिकै मांयनैऊँ भटा की जंय्यां धुँआ आयो, अर बि धुँआऊँ सूरज अर आसमान काळो पड़गो। बि धुँआ मऊँ टिड्या निकळर धरती प आई। अर बानै बिछुआ स्यारकी सक्‍ति देयड़ी ही। बानै ओडायो गयो क धरती की घास अर हर्या बोजानै अर दरख्तानै नास मना करज्यो। पण बा मिनखा को नास करज्यो जाकै माथा प परमेसर की म्होर कोनी ह। बानै मिनखानै मारबा को तो हक कोनी दिओ गयो पण मिनखानै पाच म्हेना ताँई पिड़ा देबा को हक दिओ गयो हो अर आ पिड़ा बिछू का डंक मारबा जंय्यां की ह। बा पाच म्हेना म मिनख मोत ढुंढसी पण बानै मोत कोनी आसी। बे मरबो चासी पण मोत बाकै अगाऊ भागसी। बे टिड्या लड़ाई ताँई त्यार करेड़ा घोड़ा की जंय्यां दिखरी ही। बे आपका माथा प सोना को ताज स्यारको क्युं पेर राख्यो हो अर बाको मुंडो मिनखा की जंय्यां को हो। बाका बाळ लूगाया का बाळा की जंय्यां हा अर बाका दांत नार का दांत जंय्यां का हा। बे झिलम पेर राखी ही जखी लौ की झिलम सी लागरी ही, अर बाका पांखड़ाऊँ आबाळी उवाज अंय्यां लागरी जंय्यां लड़ाई म भागबाळा घोड़ा अर रथाऊँ आवै। बाकी पूंछ बिछू का डंक स्यारकी ही। अर बाकी पूंछ म पाच म्हेना ताँई मिनखानै पिड़ा देबा की सक्‍ति ही। पताळ को दुत बापै राजा हो, बिको नाम इबरानी भासा म अबदोन अर यूनानी भासा म अपोल्यन ह। आ दोनू नामा को मतबल नास करबो ह। पेली डरावणी विपदा को ओ अंत ह। पण ध्यान रेह्‍वै हाल बी दो डरावणी विपदा आणी बाकी ह। इकै पाछै छठो ईस्बर नगरी दुत आपकी तूताड़ी फूंकी। जणा म परमेसर क सामै सोना की बेदी का च्यारू कूणाऊँ उवाज आती सुणी। बा उवाज बी छठा ईस्बर नगरी दुतनै बोलरी ही जखो तूताड़ी ले राखी ही, “बा फरात म्हानदि क कनै भंदेड़ा च्यारू दुतानै छोडदे।” जणा बे च्यारू दुत छोड दिआ गया, जानै परमेसर बि घड़ी, बि दिन, बि म्हेना अर बि बरस ताँई त्यार करमाल्या जिऊँ बे आपका सिपायानै ताकत देवै अर बे हुकम नइ मानबाळा एक तिहाई मिनखानै मार गेरै। म बाकी गिणती सुणी। बे घुड़सवार सिपाई बिस करोड़ हा। मनै बि दरसाव म बे घोड़ा अर बापै जखा सुवार हा बे दिखबा म आया, बाकी झिलम आग की जंय्यां लाल, तिजाब की जंय्यां पिळी अर गाडी निली ही। अर बाका घोड़ा का सीर नार की जंय्यां हा। अर बाका मुंडाऊँ आग, धुँआ अर तिजाब निकळरी ही। बाकै मुंडाऊँ जखी आग, धुँआ अर तिजाब निकळरी ही बिऊँ हुकम नइ मानबाळा एक तिहाई मिनख मार्या गया। बा घोड़ा का मुंडा अर पूंछ म सक्‍ति ही। क्युं क बाकी पूंछ साँप की जंय्यां ही, अर बाकी पूंछ क सीर बी हा, जिऊँ बे मिनखानै पिड़ा देरी ही। जखा मिनख आग, धुँआ अर तिजाब हाळी म्हामारीऊँ बचगा हा बे तौबा कोनी कर्या हा, बे ओपरी बलायानै सोना, चाँदी, पितळ, भाठा अर काठ की मूरत्या क जखी नइ तो बोल सकै ह नइ देख सकै ह, नइ चाल सकै अर नइ सुण सकै बानै धोकबो कोनी छोड्या। अर बे हत्या, जादू-टोणा, कुकरम अर चोरीऊँ तौबा कोनी कर्या। इकै पाछै, म ईस्बर नगरीऊँ एक ताकतबर ईस्बर नगरी दुतनै तळै उतरता देख्यो। बिकै च्यारूमेर बादळ हा। बिकै सीर क कनै मेघ धनुस हो। बिको मुंडो सूरज की जंय्यां चमकर्यो हो अर बिका पग आग का खम्बा की जंय्यां हा। बो हात म एक खुलेड़ी छोटीसी पोथी ले माली ही। बो आपका दाया पगनै समदर प अर बाया पगनै सूकी धरती प धर्यो, अर बो नार की जंय्यां दहाड़ मारी। जणा सात बर गरजन गुंजी। अर जद सात बर गरजन गुंजी जणा म मांडबा ताँई त्यार होयो, पण म ईस्बर नगरीऊँ हेलो सुण्यो, “जखी बाता बा गरजनऊँ गुंजी ह बानै ओला म राख बानै मना मांड।” जणा जि ईस्बर नगरी दुतनै, म समदर अर सूकी धरती प खड़्यो देख्यो हो, बो आपका दाया हातनै ईस्बर नगरी कानि उठायो। बो बि परमेसर की जखो ईस्बर नगरी अर धरती, समदरनै अर आकै मांयनै जखी चिजा ह बा सगळ्यानै रच्यो ह बिकी सोगन खार बोल्यो, “इब ओर मोड़ो कोनी होसी। पण जद सातुओ ईस्बर नगरी दुत को तूताड़ी फूंकबा को टेम आसी बि दिन परमेसर का बे भेद पूरा होसी जिनै बे आपका दासा अर परमेसर की खेबाळानै बताया हा।” जखो ईस्बर नगरीऊँ हेलो आयो हो, बो एकर ओर आयो, “जा, अर जखो ईस्बर नगरी दुत समदर अर सूकी धरती प खड़्यो ह, बिकै हात मऊँ बा खुलेड़ी पोथी लेले।” जणा म बि ईस्बर नगरी दुत क कनै गयो अर बिऊँ बोलो, “मनै बा छोटी पोथी दे दे।” बो मेरूँ बोल्यो, “ले अर इनै खाज्या। इऊँ तेरो पेट खराब होसी पण तेरो मुंडो सहदऊँ बी मिठो होज्यासी।” म बी ईस्बर नगरी दुत क हातऊँ बा पोथी लेली अर खागो। अर बिऊँ मेरो मुंडो सहदऊँ बी मिठो होगो पण पेट म गळदाई होगी। जणा मेरूँ बोल्यो गयो, “तनै परमेसर को समचार सगळा देसानै, सगळा राजानै, सगळी बोली बोलबाळा मिनखानै सुणाणो ह।” इकै पाछै मनै एक फलडो दिओ गयो। बो नाप लेबाळा डंडा की जंय्यां हो अर ईस्बर नगरी दुत मेरूँ बोल्यो, “खड़्यो होर परमेसर का मनदर अर बेदीनै नापले, अर जखा मिनख मनदर म जे-जैकार करर्या ह बानै गिणले। पण मनदर क बाड़ क बारै की झघानै मना नापजे, क्युं क ओ परमेसरनै नइ ध्यारबाळा मिनखानै ताँई ह। बे बयाळिस म्हेना ताँई पबितर नगरीनै पगाऊँ चिथसी। म दो गुवा त्यार करस्युं, बे एक हझार दो सो साठ दिना ताँई बोरी का गाबल्या पेर'र परमेसर की बाता बतासी।” अ गुवा दो जेतून का दरख्तानै अर दो दिपदान दरसावै ह जखा धरती प राज करबाळा परबु परमेसर क सामै ईस्बर नगरी म खड़्या रेह्‍वै। ज कोई बाको नास करबो चावै जणा बाका मुंडाऊँ आग निकळसी अर बानै बाळ गेरसी। इ ताँई ज कोई बाको बुरो करबा की सोचसी बानै पक्काई मोत भोगणी पड़सी। आसमान बाकै बस म होसी जिऊँ जत्ता दिन बे परमेसर की बाता को हेलो पाड़ै बता दिन बरसात कोनी बरससी। पाणी प बी बाको बस चालसी जिऊँ बे पाणीनै लोय म बदल दे, अर बे जद चावै इ धरती प म्हामारी ल्या सकीं हीं। जद बे परमेसर को हेलो मिनखा म पाड़ देसी जणा बो खुखार ज्यानबर जखो पताळ मऊँ निकळसी बाऊँ लड़र बानै मार गेरसी। बाकी लास बी बडी नगरी का चोराया प म्हेलदि ज्यासी। इ नगरीनै बिकी बुराई क चलतै सदोम अर मिसर का नामऊँबी बुलायो जावै ह। आ बाई नगरी ह जठै बाका परबुनै सुळी प चढायो गयो हो। धरती का सगळा देसा का मिनखा मऊँ, सगळी बोली बोलबाळा मऊँ अर सगळा कूणबा का मिनखा मऊँ क्युंक मिनख बाकी लासनै साडे तीन दिना ताँई देखसी पण बे बाकी लासनै कबर म कोनी धरबा देसी। जद धरती का परमेसर को कह्यो नइ मानबाळा मिनख बाकी मोत प राजी होर त्युंहार मनासी। बे एक दुसरानै भेंट भेजसी, क्युं क बे दोनू परमेसर की खेबाळा धरती का परमेसर का कह्या नइ मानबाळा मिनखानै सताया अर बापै विपदा ल्याया हा। पण साडे तीन दिना क पाछै, परमेसर बामै ओज्यु पिराण गेर देसी, जिऊँ बे उठ खड़्या होज्यासी, अर जखा मिनख बानै देखसी बे बोळा डरज्यासी। बे दोनू ईस्बर नगरीऊँ हेलो सुणसी, “उपर आज्याओ!” जणा बे दोनू आपका दुस्मना क देखता-देखता बादळा म ईस्बर नगरी म चल्या ज्यासी। बि टेम क एक जोरको भूचाळ आसी अर नगरी को दसवो भाग नास होज्यासी। अर बी भूचाळऊँ सात हझार मिनख मरज्यासी, अर बाकी मिनख डरज्यासी अर ईस्बर नगरी का परमेसर की मेमा करसी। दुसरी विपदा बितगी पण तीसरी विपदा बेगिई आबाळी ह। सातुओ ईस्बर नगरी दुत जद तूताड़ी फूंकी जणा ईस्बर नगरीऊँ जोरको हेलो आयो, “इब इ धरती प परबु अर बिका मसी को राज ह, अर बो जुग-जुग ताँई राज करसी।” जणा बे चोबिस बडका जखा आपका सिंघासन प बेठ्या हा खड़्या होर परमेसर क धोक खाई, अर बोलबा लाग्या, “सऊँ सक्‍तिसाली परबु परमेसर को म्हें धनेवाद करां हां, जखो पेलाऊँ हो, अर इब बी ह । क्युं क थे थारी म्हान सक्‍तिनै लेर राज करबो चालू कर्या हो। देस-देस का मिनख झाळ्या म भर्या पड़्या हा। थे झाळ्या भर्या , पण इब थारो न्याय करबा को टेम आगो, जिऊँ मरेड़ा को न्याय कर्यो जावै। अर तेरा मिनखा को, थारी खेबाळा को अर बाको जखा थारा नाम को डर मान्या करता हा बदलो लिओ जावै। बानै फळ दिओ जावै अर जखा धरतीनै खराब कर्या हीं बाको नास कर्यो जावै।” इकै पाछै परमेसर का मनदरनै जखो ईस्बर नगरी म ह बिनै खोल्यो गयो, अर मनै मनदर म करार हाळी पेटी दिखी। बिकै पाछै बिजळी को पळको आयो, बिजळी की कड़कबा की उवाज आई अर बादळ की गरजबा की उवाज होई, भूचाळ आयो अर ओळा बरसबा लाग्या। इकै पाछै आसमान म एक बडी सेलाणी परगट होई। मनै एक लूगाई दिखबा म आई बा सूरजनै धारण कर राखी ही अर चंदरमा बिकै पगा तळै हो। बिकै माथा प बारा तारा को ताज हो। बा पेटऊँ ही अर बा दरदऊँ अंय्यां चिलाटी घालरी ही क इबारई बिकै टाबर होबाळो होवै। ईस्बर नगरीऊँ एक ओर सेलाणी परगट होई, मेरै सामै एक लाल रंग को बडोसारो अजगर खड़्यो हो बिकै सात सीर अर दस सींग हा अर बिकै सात सीरां प सात ताज हा। बो आपकी पूंछऊँ सपाटो मार'र आसमानऊँ एक तिहाई तारानै धरती प फेक दिओ। अर बो बी लूगाई क सामै जखी टाबर जलम्बाळी ह खड़्यो होगो जिऊँ जद बा टाबर जलमै जणा बो बि टाबरनै निगळज्या। बा लूगाई एक छोरानै जलम दिनी बो लौ का राजदंड क सागै सगळा देसा का मिनखा प राज करबाळो हो। अर बि लूगाई का टाबरनै हात्युहात परमेसर अर बिका सिंघासन क सामै लेज्यायो गयो। अर बा लूगाई उजाड़ म भागगी। बा अंय्यां की झघा ही जिनै परमेसर बि ताँई त्यार कर्यो जठै बा एक हझार दो सो साठ दिना ताँई जिंदी राखी जा सकै। इकै पाछै ईस्बर नगरी म राड़ छिड़गी। जिमै मुखियो ईस्बर नगरी दुत मीकाईल अर बिका दुत बि बडासारा अजगरऊँ, अर बो अजगर अर इका दुत बाऊँ लड़्यो। पण बो अजगर बानै हरा कोनी सक्यो, जिऊँ ईस्बर नगरी म बिकी झघा कोनी बची। अर बि बडासारा अजगरनै धरती प फेक दिओ गयो, ओ बोई पुराणो बडो नाग ह जिनै दानव, सेतान बोल्यो गयो ह। ओ सगळा जगत का मिनखानै भंगरावै ह। बो आपका दुता क सागै धरती प फेक दिओ गयो। इकै पाछै मनै ईस्बर नगरीऊँ जोरको हेलो सुण्यो, “इब म्हारा परमेसर को छुटकारो, सक्‍ति, अर बिको राज अर मसी को अधिकार परगट होयो ह। क्युं क म्हारा भाईड़ा प दोस लगाबाळो, जखो रात-दिन म्हारा परमेसर क सामै बापै दोस लगाया करतो हो, बिनै तळै फेक दिओ गयो ह। बे उन्या का लोयऊँ अर खुदकी गुवाईऊँ, बिपै जीत हासिल करी। बे आपका पिराणानै बी प्यारा कोनी जाण्या अर मोतनै बी गळै लगा लिआ। इ ताँई ओ ईस्बर नगरी का रेह्बाळो, खुसी मनाओ। पण हाय धरती अर समदर प, क्युं क बापै सेतान उतरगो ह। बो झाळ्या भर'र आग-बबुलो होर्यो ह, अर बो जाणै ह क बिकन थोड़ोई टेम बच्यो ह।” जद बो अजगर देख्यो क, “मनै धरती प फेक दिओ गयो ह,” जणा बो बि लूगाई कानि लपक्यो जखी छोरो जलमी ही। पण बि लूगाईनै चील की जंय्यां का दो पांख दिआ गया हा जिऊँ बा बि नाग क सामैऊँ उडर बि उजाड़ म चली जावै जिऊँ साडे तीन बरसा ताँई इकी देखभाळ करी जा सकै। जणा बो बडोसारो नाग बि लूगाई क गेल आपका मुंडाऊँ नदि की जंय्यां पाणी गेल कर्यो जिऊँ बो पाणी बिनै भुवा लेज्यावै। पण धरती बि लूगाई की मदद करी, धरती आपको मुंडो खोलर बि नदि का पाणीनै जिनै बो अजगर आपका मुंडाऊँ निकाळ्यो हो बिनै पिगी। जणा बो अजगर बि लूगाई प झाळ्या भर्यो, अर बो बि लूगाई का वंसजा प जखा परमेसर का हुकमानै मान्या करता हा अर ईसु मसी की गुवाई देता हा बाऊँ लड़बा ताँई निकळ्यो। अर बो अजगर जार समदर क किनारै खड़्यो होगो। जणा म समदर क मांयनैऊँ एक खुखार ज्यानबरनै बारनै निकळता देख्यो। बिकै दस तो सींग अर सात सीर हा। अर बिकै सींगा प दस ताज हा। बिका हरेक माथा प परमेसर की बुराई करबाळा नाम मंडर्या हा। म जखा खुखार ज्यानबरनै देख्यो हो बो दिखबा म तो चीता की जंय्यां को हो पण बिका पग रीछ की जंय्यां का अर मुंडो नार की जंय्यां को हो। बो अजगर बिनै आपको सिंघासन आपको सगळो अधिकार, अर सक्‍ति सूप दिनी। बि खुखार ज्यानबर क सीरामऊँ एक सीर म अंय्यां को घाव हो जिऊँ अंय्यां लगार्यो हो बो इबारई मरज्यासी। पण बिको ओ घाव भरगो, जिऊँ सगळी धरती का मिनख ताजूब कर बिकै गेल होलिआ। मिनख बि अजगरनै धोकबा लाग्या क्युं क बो आपको सगळो अधिकार बि खुखार ज्यानबरनै दे दिओ हो। अर बे बि डरावना जानबरनै बी धोकर खेबा लाग्या, “इ जानबर जत्तो सक्‍तिसाली कोई कोनी। अर इऊँ लड़बा की हिमत कोईकी इ कोनी।” बि खुखार ज्यानबरनै बयाळिस म्हेना ताँई परमेसर की बुराई करबानै, गुमानऊँ बोलबा ताँई अर मिनखा प अधिकार राखबा ताँई खुलो छोड्यो गयो हो। जणा बो परमेसर की बुराई करबानै आपको मुंडो खोल्यो अर बो परमेसर का नाम, बाकी रेह्बाळी झघा अर ईस्बर नगरी म रेह्बाळा मिनखा की बेजती करबा लाग्यो। बिनै ओ अधिकार दिओ गयो क बो परमेसर का मिनखाऊँ लड़र जीतै। अर बिनै धरती का सगळा कूणबा प, मिनखा प, सगळी बोली बोलबाळा प, अर सगळा देसा प अधिकार दिओ गयो हो। जखा मिनखा को नाम बि उन्या की जीवन हाळी पोथी म कोनी मांडेड़ो बे सगळा मिनख इ डरावना जानबरनै धोकसी। ओ उन्यो जखो इ सरस्टि की सरूआतऊँई बलि होबा ताँई ते कर्यो गयो हो।  जिकै कान ह, बे बानै खोल ले। “जिनै केद म जाणो ह, बो केद म ज्यासी, जिनै तलवारऊँ मार्यो ज्यासी, बो तलवारऊँ मरसी।” इमई परमेसर का मिनखानै थ्यावस अर बिस्वास राखबा की जुर्त ह। इकै पाछै म धरतीऊँ एक ओर डरावना जानबरनै बारनै निकळता देख्यो। जंय्यां उन्या क सींग होवै ह बंय्यां बिकै दो सींग हा, पण बिकी उवाज अजगर जंय्यां की ही। ओ बि पेलड़ा खुखार ज्यानबर को सगळो अधिकार काम म लेर्यो हो अर धरती प रेह्बाळा सगळा मिनखाऊँ बि जानबरनै जिको घाव भरगो हो बिनै पूजावै हो। अर ओ बडा-बडा सेलाणी-चमत्कार दिखातो हो, अठै ताँई क ओ मिनखा क सामै आसमानऊँ धरती प आग बरसा देतो हो। पेलड़ा डरावना जानबर का अधिकारऊँ बो चमत्कार दिखातो हो। अंय्यां कर बो धरती का परमेसर प बिस्वास नइ करबाळा मिनखानै भंगरा दिओ जिऊँ बानै ओ बिस्वास होज्यावै क बानै पेलड़ा डरावना जानबरनै धोकणो चाए। बो मिनखानै पेलड़ा डरावना जानबर की मूरती बणाबा ताँई बोल्यो जिकै तलवारऊँ घाव होयो अर बो हाल जीवै हो। जिऊँ बिनै मान मिलै। बि दुसरा डरावना जानबरनै बि मूरती म पिराण गेरबा की सक्‍ति दि गई ही। जिऊँ बा बोल सकै। अर जत्ता बी मिनख बि मूरतीनै नइ धोकै बानै मार दिओ ज्यासी। अर बो सगळा मिनखानै चाए बो छोटो हो नहिस बडो हो, पिसाळो हो नहिस गरीब हो, मालिक हो नहिस नोकर हो बो सगळानै माथा अर दाया हात प एक छाप लेबा ताँई मजबुर कर्यो। अर जिकै बी बा छाप कोनी होती बे नइ तो क्युं मोल ले सका हा अर नइ बेच सका हा। आ छाप बि डरावना जानबर को नाम अर बिको आंक ह। जिमै बुदी ह बो बि डरावना जानबर का आंकनै जोड़ले, क्युं क ओ एक मिनख को आंक ह। अर बो आंक छ सो छियासठ (666) ह। जणा म देख्यो क मेरै सामै यरूसलेम नगरी का सिओन डूँगर प उन्यो खड़्यो ह। बिकै सागै एक लाख चोमाळिस हझार मिनख जाकै माथा प बिको अर बिका परम-पिता को नाम मांडेड़ो हो। अर मनै ईस्बर नगरीऊँ एक जोरकी उवाज सुणी। बा उवाज भेता झरना की सी अर बिजळी की गरजबा की सी ही। जखी उवाज म सुणी बा उवाज मानो जंय्यां घणा सारका मिनख बीणा बजावै ह बंय्यांकी ही। अर एक लाख चोमाळिस हझार मिनख सिंघासन क सामै, च्यारू जीवता पराण्या क सामै अर बडका क सामै नयो गीत गार्या हा। अर इ गीतनै आ एक लाख चोमाळिस हझार मिनख जानै धरती की केदऊँ छुडायो गयो हो बाकै अलावा कोईबी कोनी गा सकतो हो। अ बे मिनख हा जखा कदैई लूगाई क सागै सोर खुदनै असुद कोनी कर्या। क्युं क अ मिनख हाल ताँई कुंआरा हा। अर जठैबी उन्यो जातो अ बिकै गेल होलेता। आनै परमेसर क सामै पेला फळ क रूप म चढाबा ताँई दुनिया का मिनखा मऊँ मोल लिओ गयो ह। अ मिनख कदैई झूठ कोनी बोल्या, अर अ बेकसूर मिनख ह। इकै पाछै म एक ओर ईस्बर नगरी दुतनै आसमान क बिचमै उडता देख्यो। बिकन धरती प रेह्बाळा सगळा कूणबा का मिनखा, सगळा देसा, सगळी बोली बोलबाळा अर सगळा कुल का मिनखानै सुणाबा ताँई जुग-जुग ताँई को चोखो समचार हो। बो जोरऊँ बोलर्यो हो, “परमेसरऊँ डरो अर बिकी जे-जैकार करो, क्युं क बिकी न्याय करबा की घड़ी आगी ह। बिकी जेजैकार करो जखो आसमान अर धरती, समदर अर पाणी का कूंडानै बणायो ह।” बिकै गेलकी गेल दुसरो ईस्बर नगरी दुत आर बोल्यो, “‘बडी नगरी बाबुल नास हो! नास हो,’ आ नगरी सगळा मिनखानै आपकी कुकरम की वासना की अँगूरी पिलाई ही।” बा दोनू ईस्बर नगरी दुता क गेलकी गेल तीसरो ईस्बर नगरी दुत आर उची उवाज म बोल्यो, “ज कोई इ डरावना जानबर अर इकी मूरतीनै धोकै अर इकी छापनै आपका माथा नहिस हात प लेवै, जणा बो परमेसर का परकोप की अँगूरी जखी बाकी झाळ हाळा प्याला म घाली गई ह, बिनै पिसी अर पबितर ईस्बर नगरी दुता क सामै अर उन्या क सामै आग अर तिजाब की पिड़ा भोगसी। बे जुग-जुग ताँई बिमै पिड़ा भोगसी। अर जखाबी मिनख बि जानबर अर बिकी मूरतीनै धोकसी अर बिका नाम की छाप लेसी बानै रात-दिन चेन कोनी मिलसी।” जखा मिनख परमेसर का हुकमानै मानै, अर ईसु प बिस्वास करै ह बानै थ्यावस अर बिस्वास राखबा की जुर्त ह। जणा ईस्बर नगरीऊँ म ओ हेलो सुण्यो, “इनै मांडले: जखा इबऊँ परबु म मरी हीं बे भागहाळा हीं।” पबितर आत्मा खेवै ह, “हाँ क्युं क बे आपका कामाऊँ अराम पासी, अर बाका काम बाकै सागै ह।” अर म काँई देख्यो क मेरै सामै एक धोळो बादळ हो अर बिकै उपर एक मिनख बेठ्यो हो बो मिनख का बेटा की जंय्यां दिखर्यो हो, बो आपका सीर प सोना को ताज पेरमाल्यो हो अर बिकै हात म एक पेनो हसियो हो। जदई एक ओर ईस्बर नगरी दुत मनदर क मांयनैऊँ बारनै आयो अर बो बिऊँ जखो बादळ प बेठ्यो हो जोरऊँ हेलो देर बोल्यो, “हसियो चलार लावणी करले क्युं क लावणी की टेम आगी ह। अर धरती की फसल पकगी ह।” जणा जखो बादळ प बेठ्यो हो बो हसियो चलायो अर धरती की फसल काट ली। बिकै पाछै ईस्बर नगरी म जखो बडो मनदर ह बिमऊँ एक ओर ईस्बर नगरी दुत बारनै आयो बिकन बी पेनो हसियो हो। जदई एक ओर ईस्बर नगरी दुत जिनै आग प अधिकार हो, बेदीऊँ निकळ्यो, अर जिकै कनै पेनो हसियो हो, बिनै जोरऊँ हेलो देर बोल्यो, “तेरा पेना हसियाऊँ धरती की बैलऊँ अँगूरा का गुछा काट ले क्युं क इका अँगूर पकगा हीं।” अर बो ईस्बर नगरी दुत हसियाऊँ धरती का अँगूरानै का'टर परमेसर का परकोप हाळा बडासारा कूंड म गेर दिओ। जिऊँ बे अँगूर नगरी क बारनै पगाऊँ चिथ्या गया, अर कूंड क मांयनै अत्तो लोय निकळ्यो क बो घोड़ा की लगाम ताँई पुचगो, अर सो कोस ताँई भेगो। इकै पाछै म ईस्बर नगरी म एक ओर ताजूबभरी निसाणी देखी, इबकै म देख्यो क सात ईस्बर नगरी दुत आखरी सात म्हामार्या क सागै हा। क्युं क आकै होबा क सागैई परमेसर को परकोप बी पूरो होज्यासी। इकै पाछै मनै काच की जंय्यां को समदर दिख्यो बो अंय्यां दिखै हो जंय्यां क बिकै मांयनै आग बळरी हो। जखा मिनख बि डरावना जानबर की मूरती अर बिका नाम का आंकऊँ जीतगा हा बानै बी काच का समदर क सारै खड़्या देख्या। बे परमेसर की देयड़ी बीणा ले राखी ही बे मिनख परमेसर का दास मूसा अर उन्या का गीत गावा हा, “परबु परमेसर थे सऊँ सक्‍तिसाली हो। थारा काम बडा अर ताजूबभर्या हीं। ओ जुग-जुग का राजा। थारो गेलो सचो अर धारमिक ह। ओ परबु, बस थेई पबितर हो! देस-देस का मिनख थारै कनै आसी अर थारी जे-जैकार करसी। सगळा थारूँ डरसी अर थारो मान करसी, क्युं क थारी धारमिक्‍ता परगट होई ह।” इकै पाछै म ईस्बर नगरी म मनदरनै देख्यो जखो बि तम्मूनै दिखावै ह जिमै दस हुकम धरेड़ा हा। इ मनदर का कुआड़ खोल्या गया। बिकै मांयनैऊँ बे सात ईस्बर नगरी दुत बा सात म्हामार्या क सागै बारनै आया। बे साप अर चमकीला धोळा गाबा पेरमाल्या हा अर आपका सीना प सोना का पटा बांद माल्या हा। जणा बा च्यारू जीवता पराण्या मऊँ एक जणो बा सात्यु ईस्बर नगरी दुतानै एकेक सोना को प्यालो दिओ जखो अमर परमेसर का परकोपऊँ भरेड़ा हा। बो मनदर परमेसर की मेमा अर सक्‍ति का धुँआऊँ भरेड़ो हो। अर जद ताँई बे सात ईस्बर नगरी दुत बा सात म्हामार्यानै पूरी होबा ताँई कोनी भेजी बि मनदर म कोई कोनी बड़ सक्यो। जणा म सुण्यो क बा सात्यु ईस्बर नगरी दुतानै मनदर मऊँ कोई जोरको हेलो देर बोल्यो, “जाओ, अर परमेसर का परकोपऊँ भरेड़ा आ सात्यु प्यालानै धरती प उंदकाद्‍यो।” जणा पेलो ईस्बर नगरी दुत गयो अर धरती प आपको प्यालो उंदका दिओ, जिऊँ जखा मिनख बि डरावना जानबरनै अर बिकी मूरतीनै धोक्या हा अर बिको आंक लिआ हा बाकै राद हाळा सूगला गुमड़ा निकळ्याया। बिकै पाछै दुसरो ईस्बर नगरी दुत आपको प्यालो समदर प उंदका दिओ, जिऊँ समदर को पाणी मरेड़ा मिनखा का लोय की जंय्यां होगो अर समदर क मांयनै जत्ता बी जीवता जानबर हा बे सगळा मरगा। तीसरो ईस्बर नगरी दुत आपको प्यालो नद्‍या अर झरना प उंदका दिओ जिऊँ बाको पाणी बी लोय होगो। जणा म पाणी प अधिकार राखबाळा ईस्बर नगरी दुतनै ओ बोलता सुण्यो, “ओ पबितर, थे सई न्याय करो हो। थे हा अर हो, क्युं क अ मिनख थारा मिनखा अर परमेसर की खेबाळा को लोय भुआया हीं। थे बानै पीबानै लोय दिओ ह बे इ जोगाई ह।” बिकै पाछै म बेदीऊँ उवाज सुण्यो, “ओ परबु परमेसर थे सऊँ सक्‍तिसाली हो। थारो न्याय सचो अर सई ह।” चोथो ईस्बर नगरी दुत आपको प्यालो सूरज प उंदका दिओ, अर मिनखानै गरमीऊँ बाळबा ताँई सूरजनै सक्‍ति दे दि। जिऊँ बे मिनख भेंकर गरमीऊँ तपगा अर परमेसर का नाम की बुराई करबा लाग्या जिकै बस म आ म्हामारी ही , पण बे तौबा कोनी कर्या अर नइ परमेसर की मेमा करी। बिकै पाछै पाचवो ईस्बर नगरी दुत आपको प्यालो बी डरावना जानबर का सिंघासन प उंदका दिओ, जिऊँ बिका राजपाट म अँधकार छागो। पिड़ा क मार्या मिनख आपका दांताऊँ आपकी जीब काट ली। बे मिनख दरद अर गुमड़ा की बजेऊँ ईस्बर नगरी का परमेसर की बुराई करर्या हा, पण बे आपका कामाऊँ तौबा कोनी कर्या। छठो ईस्बर नगरी दुत आपको प्यालो बडोड़ी नदि फरात प उंदका दिओ, जिऊँ बिको पाणी सूकग्यो। अर बिको पाणी सूकबाऊँ अगुणी दिसा का देसा का राजा ताँई गेलो बणगो। इकै पाछै म काँई देख्यो क बी बडासारका अजगर क मुंडाऊँ, अर बी डरावना जानबर क मुंडाऊँ अर बाका झूठा परमेसर की खेबाळा का मुंडाऊँ मिंडका सारकी तीन सूगली आत्मा निकळी। अ सेतानी ओपरी बलाय ही आकै मांयनै चमत्कार करबा की सक्‍ति ही। अ सगळा जगत का राजानै भेळा करबा ताँई चाल पड़ी जिऊँ अ सऊँ सक्‍तिसाली परमेसर का न्याय का दिन लड़ाई लड़ै। “चेता म रेह्‍वो, क्युं क म चोर की जंय्यां चाणचुक आऊँ हूँ! भागहाळा हीं बे जखा जागता रेह्‍वै ह, अर आपका गाबानै समाळै ह, जिऊँ बे सरमा नइ मरै।” बे ओपरी बलाय बा सगळा राजानै भेळा कर बि झघा लिआई जिनै इबरानी भासा म हरमगिदोन बोलै ह। इकै पाछै सातुओ ईस्बर नगरी दुत आपको प्यालो भाळ प उंदका दिओ, अर मनदर का सिंघासनऊँ जोरको हेलो सुणाई दिओ, “सक्यु पूरो होगो!” जणा बिजळी कड़कर चमकबा लागी, बादळ गरजबा लाग्या अर जोरको भूचाळ आयो। अंय्यां को भूचाळ इऊँ पेल्या धरती प कदैई कोनी आयो। ओ भूचाळ बोळो भेंकर हो। अर बडी नगरी का तीन टुकड़ा होगा, अर पापी मिनखा की सगळी नगर्या नास होगी। परमेसर बाबुल नगरीनै सजा देबा ताँई याद कर्यो जिऊँ क बो बिनै आपका परकोपऊँ भरेड़ो अँगूरी को प्यालो पिलावै। सगळा टापू लापता होगा। एक डूँगर बी नजर कोनी आर्यो हो। आसमानऊँ मण-मण का ओळा मिनखा प पड़र्या हा। अर इ म्हामारी की बजेऊँ मिनख परमेसर की बुराई करर्या हा। क्युं क आ म्हामारी बोळी भेंकर ही। इकै पाछै सात ईस्बर नगरी दुता मऊँ जाकै कनै सात प्याला हा, एक मेरै कनै आर बोल्यो, “अठै आ, म तनै बि सऊँ बडी बेस्यानै सजा भोगता दिखास्युं जखी बोळी नद्‍या क किनारै बेठी ह। बिकै सागै धरती का राजा कुकरम कर्या, अर धरती प रेह्बाळा बिकी कुकरम की अँगूरीऊँ मतवाळा होगा हा।” जणा बो दुत पबितर आत्मा म मनै उजाड़ म लेगो। बठै म एक लूगाईनै लाल रंग का खुखार ज्यानबर प बेठी देख्यो। बि जानबर क उपर परमेसर की बुराई करबाळा नाम मंडर्या हा। बिकै सात सीर अर दस सींग हा। बा लूगाई लाल रंग का बैंगणी गाबा पेरमाली ही। बा हिरा मोत्याऊँ, सोना, चाँद्‍याऊँ खुदको सिंगार करमाली ही। बिकै हात म सोना को प्यालो हो बो प्यालो सूगली बाताऊँ अर कुकरम की चिजाऊँ भरेड़ो हो। बिकै माथा प नाम मंडर्यो हो जखो एक भेद हो , सऊँ बडी नगरी बाबुल बेस्या अर सूगली चिजा की माँ म बि लूगाईनै परमेसर का मिनखा का लोय अर ईसु मसी की गुवाई देबाळा मिनखा का लोय पीबा की बजेऊँ मतवाळी होता देख्यो। बिनै देखर मनै बोळो ताजूब होयो। जणा बो ईस्बर नगरी दुत मेरूँ बोल्यो, “तू ताजूब क्युं करै ह? म तनै इ लूगाई अर जि सात सीर अर दस सींग हाळा खुखार ज्यानबर प आ बेठी ह बिको भेद बतास्युं। जि खुखार ज्यानबरनै तू देख्यो ह, बो पेली हो इब कोनी पण बो जिंदो होर पताळऊँ ओज्यु आसी अर बिको नास होज्यासी। अर धरती प रेह्बाळा बे मिनख जाका नाम जुगादऊँई जीवन की पोथी म कोनी मांडेड़ा बे इ खुखार ज्यानबरनै देखर ताजूब करसी, क्युं क ओ पेला जिंदो हो पण इब कोनी पण बो आबाळो ह। “अठै समजबाळी अर ज्ञान की बात कह्यी गई ह। अ सात सीर सात डूँगरानै दिखावै ह, जापै बा लूगाई बेठी ह। अ सात सीर सात राजानै बी दिखावै ह, आमैऊँ पाच को तो नास हो चुक्यो, एक इबी राज करै ह, अर एक इब ताँई आयो कोनी। पण जद बो आसी जणा क्युं क टेम ताँई रेह्सी। अर बो खुखार ज्यानबर जखो पेला जिंदो हो, पण इब कोनी, बो खुद आठूओ राजा ह ओ बा सात्यु राजा की जंय्यांई बुरो होसी अर, इको बी नास कर दिओ जासी। “अर जखा दस सींग तू देख्यो हो बे बी दस राजानै दिखावै ह, पण बानै इबी ताँई राजपाट कोनी मिल्यो, पण आनै बि खुखार ज्यानबर क सागै क्युं क टेम ताँई राज करबा को हक दिओ ज्यासी। बे दसु राजा एक मन होसी, अर बे आप-आपकी सक्‍ति अर अधिकार बि खुखार ज्यानबरनै देसी। बे उन्याऊँ लड़सी पण बो उन्यो आपका टाळेड़ा, बुलाईड़ा अर आपकै गेल चालबाळा बिस्वास जोगानै सागै लेर बिनै हरा गेरसी क्युं क बो उन्यो राजाओं को बि राजा अर परबुआ को बी परबु ह।” बो ईस्बर नगरी दुत मेरूँ ओज्यु बोल्यो, “तू जखी नद्‍या देखी ही जाकै किनारै बा सऊँ बडी बेस्या बेठी ही, बे नद्‍या सगळा कूणबा का मिनखानै, सगळी बोली बोलबाळानै, देस-देस का मिनखानै, सगळा देसानै दिखावै ह। बे दस सींग अर जि खुखार ज्यानबरनै तू देख्यो हो बे बि सऊँ बडी बेस्याऊँ नफरत करसी बे बिको सक्यु खोसर बिनै उघाड़ी कर देसी। अर बिको मास खाज्यासी अर बिनै आग म बाळ गेरसी। क्युं क परमेसर आपकी बातनै पूरी करबा ताँई बाकै मन म अंय्यां करसी अर बानै एक मन होर अंय्यां करबा ताँई उकसासी जिऊँ बे आपकी सक्‍ति अर आपको अधिकार बि खुखार ज्यानबरनै दे देसी। जखी लूगाईनै तू देख्यो हो आ बि बडी नगरीनै दिखावै जखी धरती का देस-देस प राज करै ह।” इकै पाछै म एक ओर ईस्बर नगरी दुतनै ईस्बर नगरीऊँ तळै उतरता देख्यो। जिकै कनै बडो अधिकार हो, बिकै मांयनै अंय्यां को मेमा को तेज हो जिऊँ सगळी धरती प च्यानणो होगो हो। बो जोरको हेलो देर बोल्यो, “ ‘नास हो नास हो! बाबुल नगरी को नास हो!’ आ नगरी सगळी ओपरी बलाया को, सूगला पंछ्या अर सूगला जानबरा को अडो बणगी ह। क्युं क सगळा देस, बिका कुकरम की झाळ भरी अँगूरी पी। इ धरती का सगळा राजा बिकै सागै कुकरम कर्या , अर इ धरती का सगळा लेणदेण करबाळा, बिकी भोगबिलास की बजेऊँ पिसाळा होगा।” मनै ईस्बर नगरीऊँ एक ओर हेलो अंय्यां बोलता सुणाई दिओ, “ ‘मेरा मिनखो, इमैऊँ बारनै आज्याओ,’ जिऊँ थे इका पाप म सामिल नइ होवो, अर थे बिपै पड़बाळी बिपदाऊँ बचज्यावो। क्युं क बिको पाप को घड़ो भरगो ह, अर परमेसरनै बिका करेड़ा पाप याद ह। थे बिकै सागै बंय्यांई भिवार करो जंय्यां बा कर्यो ह। जखो बा थारै सागै कर्यो ह बिऊँ दुणो बिकै सागै करो। जखो प्यालो बा थानै दि ह, बिको दुणो भर'र बिनै पाछो द्‍यो। जत्ती बा आपकी मेमा, बडाई अर भोगबिलास करी ह, बत्तोई बिनै दुख अर पिड़ा द्‍यो। क्युं क बा खुद म गुमान कर्या करती ही, ‘म राणी की जंय्यां सिंघासन प बेठी हूँ। म खालीहोइड़ी कोनी, जणा म क्युं सोक मनाऊँ?’ इ बजेऊँ बिपै एक दिन मई बिपदा आ पड़सी। मोत, सोक, काळ बिपै पड़सी। अर आग बिनै बाळ गेरसी, क्युं क सऊँ सक्‍तिसाली परबु परमेसर बिको न्याय करसी। “बिनै आग म बळता अर बिमऊँ धुँओ निकळतो देखर धरती का राजा जखा बिकै सागै कुकरम कर्या हा अर बिकै सागै भोगबिलास म भागी बण्या हा, बे बि ताँई बार घालसी अर छाती पिटसी। बे बिकी आ दुरगती देखर डर का मार्या दूर खड़्या बार घालसी, “ ‘सऊँ बडी नगरी तेरै प हाय, बाबुल सक्‍तिसाली नगरी, देखो! घड़ी भर मई तेर प स्यामत आ पड़ी।’ “इ धरती प लेणदेण करबाळा बि ताँई बार घालसी अर छाती पिटसी क्युं क बाका मालनै इब कोई मोल कोनी लेसी, जंय्यां क सोनो, चाँदी, मलमल, बैंगणी, रेसम अर सिलक, चंदन, हाथी का दांताऊँ बणेड़ी चिजा, किमती लकड़्या, कासो, लौ, अर संगमरमरऊँ बणेड़ी चिजा, दाळ चीणी, गुलमेंदि, धूप, गंधरस, लोबान, अँगूरी, जेतून को तेल, मैदो, ग्युं, गाय, बैल, लल्डी, रथ घोड़ा। मिनखानै गुलाम बणाबा ताँई बी बेची ही। “बे बोलसी, ‘हे बाबुल नगरी! जखी चिजा म तेरो हियो बसर्यो हो बे सगळी तनै छोडर चलेगी। तेरो सगळो भोगबिलास अर तेज नास होगो अर नइ तनै ओज्यु कदै मिलै।’ बे लेणदेण करबाळा जखा आ चिजानै बेचर पिसाळा बणगा हा, बे बिकी आ दुरगती देखर रोता बिलखता अर डर का मार्या दूर खड़्या होर, बार घालसी, “ ‘हाय इ सऊँ बडी नगरी प, जखी पेल्या मलमल, बैंगणी, अर सिलक का गाबा पेर्या करती अर सोना, हिरा अर मोत्याऊँ सज्या करती ही। घड़ी भर मई, इकी सगळी जायजाद जाती री।’ “बे सगळा जखा पाणी का झाज का कपतान अर बानै चलाबाळा अर बापै सवार हा अर बे सगळा मिनख जखा समदरऊँ आपको पेट भरै ह, बे दूर खड़्या होगा। अर जद बे बि नगरीनै बळता अर बिमऊँ धुँआ उठता देख्या जणा बे जोरऊँ बोल पड़्या, ‘के इ सऊँ बडी नगरी की जंय्यां कोई नगरी होई?’ बे आपकै उपर धूळ गेरता अर बार-घोड़ो मचाता बोलबा लाग्या, “ ‘हाय इ सऊँ बडी नगरी प, जिकी जायजादऊँ समदर म झाज चलाबाळा पिसाळा बणग्या। पण देखो! बा घड़ी भर मई नास होगी।’ हे ईस्बर नगरी, हे परमेसर का मिनखो, भेजेड़ा चेला अर परमेसर की खेबाळो राजी होओ, क्युं क परमेसर बिको न्याय कर थारो बदलो लिओ ह।” आ बाता क पाछै एक ताकतबर ईस्बर नगरी दुत चाकी का भाठा की जंय्यां की बडीसारी ढाड उठार बिनै समदर प फेकतो होयो बोल्यो, “आ बाबुल नगरी बी, इ भाठा की जंय्यां फेक दि ज्यासी, अर ओज्यु कदैई कोनी लाधसी। अर नइ तेरै मांय ओज्यु कदै, कोई बीणा, बंसरी, तूताड़ी की धुन सुणबा म आसी। अर नइ तेरै मांय ओज्यु कदै कोई कलाकारी करबाळो कारिगर मिलसी, अर नइ चाकी चालबा की उवाज सुणबा म आसी। तेरै मांयनै दिआ को च्यानणो ओज्यु कदैई कोनी जगमगासी, अर नइ ओज्यु तेरै मांयनै, बिंद बिनणी को हेलो सुणबा म आसी। क्युं क तेरा लेणदेण करबाळा व्यापारी धरती का मुखिया हा। अर तेरा जादू टोणाऊँ, सगळा देसा का मिनखानै भटकायो गयो हो। परमेसर की खेबाळा को, अर बिका मिनखा को अर बा सगळा मिनखा को जानै इ धरती प बलि चढायो गयो हो, बाको लोय इ नगरी क माथै ह।” इकै पाछै मनै ईस्बर नगरी म बोळासारा मिनखा को एकसागै हेलो सुण्यो, बे जोरऊँ बोलर्या हा, “हालेलुया! परमेसर की जे हो, जे हो! क्युं क छुटकारो, सक्‍ति अर मेमा बेई देवै ह। बाको न्याय सदाई सचो ह, क्युं क बे बि बेस्या को न्याय कर्या हीं, जखी धरती का मिनखानै कुकरम करवाती, अर बानै बिगाड़ती ही, अर बो बिऊँ आपका दासा का लोय को बदलो लिओ ह।” बे ओज्यु जोरऊँ बोल्या, “हालेलुया! जुग-जुग ताँई बि बडी नगरीऊँ धुँओ उठतो रेह्सी।” बे चोबिस बडका अर च्यारू जीवता पराणी सिंघासन प बिराजमान परमेसर क धोक लगार गीत गाबा लाग्या, “हालेलुया! अंय्यांई होवै।” जणा ओज्यु सिंघासनऊँ एक हेलो आयो, “ओ मिनखो थे जखा परमेसरऊँ डरो हो, थे चाए छोटा हो चाए बडा हो बिकी जेजैकार करो।” इकै पाछै मनै ओज्यु बोळासारा मिनखा को एकसागै हेलो सुण्यो। ओ हेलो अंय्यां लागर्यो हो जंय्यां की पाणी का झरना की नहिस बादळा की गरजबा की उवाज हो। बे मिनख गार्या हा, “हालेलुया! क्युं क आपणो सऊँ सक्‍तिसाली परमेसर राज करै ह। इ ताँई आओ आपा राजी होर खुसी मनावां, अर बाकी जे-जैकार करां। क्युं क उन्या की ब्या की त्यारी पूरी होगी ह, अर बिकी बिनणी बी सजि-धजी त्यार बेठी ह। बडिया, उजळो अर साप मलमल, बिनै पेरबानै दिओ गयो ह।” ओ मलमल परमेसर का मिनखा का धरम का कामानै दिखावै। जणा बो ईस्बर नगरी दुत मेरूँ बोल्यो, “अंय्यां मांड: बे मिनख भागहाळा हीं जखा उन्या का ब्या की मेळ म नूत्या गया हीं।” बो ओज्यु बोल्यो, “अ बचन परमेसर का सचा बचन हीं।” जणा म बिकी जेजैकार करतो होयो ईस्बर नगरी दुत क आगै धोक खाई। पण बो मेरूँ बोल्यो, “अंय्यां मना करै! क्युं क म तो तेरै अर तेरा साती-संगी भाया क सागै परमेसर को दास हूँ। जखानै ईसु मसी की गुवाई देबा की जिमेबारी दि गई ह। तू परमेसर क धोक खा, क्युं क आ परमेसर की आत्मा ह जखी मिनखानै ईसु मसी क बारा म बोलबा की सक्‍ति देवै ह।” जणा म ईस्बर नगरीनै खुली देख्यो अर म बठै एक धोळो घोड़ो देख्यो, अर बिका सवारनै बिस्वास जोगा अर सच का नामाऊँ बुलायो जार्यो हो। बो सचाई क सागै न्याय अर युद करतो हो। बिकी आँख्या मानो आग की लाय की लपटा की जंय्यां ही, अर बिकै सीरपै बोळासारा मुकट हा। अर बिपै एक नाम मंडर्यो हो जिनै बिकै अलावा कोईबी कोनी जाणतो हो। बो लोय म रंगेड़ो गाबो पेरमाल्यो हो। अर बिको नाम परमेसर को बचन हो। धोळा घोड़ा प सवार होर परमेसर की सेना बिकै गेल-गेल होरी ह, बे बडिया, साप अर धोळा गाबा पेरमाल्या हा। पाप्यानै मारबा ताँई बिकै मुंडाऊँ एक पेनी तलवार बारनै निकळरी ही। “बो लौ का लठ का जोर प बापै राज करसी।” सऊँ सक्‍तिसाली परमेसर, जखो बाका पाप की बजेऊँ बुर्यां झाळ्या भर्यो ह बि ताँई बो बानै अंय्यां पिससी जंय्यां अँगूरानै रसकूंड म पिस्योज्यावै ह। बिकी जांघ अर बिका गाबा प अंय्यां मंडर्यो हो, ओ राजाओं को राजा अर परबुआ का परबु। इकै पाछै म देख्यो क एक ईस्बर नगरी दुत सूरज क उपर खड़्यो ह। बो आसमान म उडबाळा सगळा पंछ्यानै जोरऊँ हेलो देर बोल्यो, “आओ, परमेसर का म्हाभोज ताँई भेळा होज्याओ, जिऊँ थे राजाओं, सेनापत्या, ताकतबर मिनखा, घोड़ा को अर बाका सवारा को मास खा सको। अर सगळा मिनखा को चाए बे छोटा हो चाए बडा हो चाए बे मालिक हो चाए बे गुलाम हो बाको मास खा सको।” इकै पाछै म बि खुखार ज्यानबरनै अर धरती प राज करबाळा राजानै देख्यो। बाकै सागै बाकी सेना ही। बे बि धोळा घोड़ा का सवार अर बिकी सेनाऊँ लड़बा ताँई एकजुट हा। पण बि खुखार ज्यानबरनै अर झूठा परमेसर की खेबाळानै जखो बिकै कानिऊँ सेलाणी-चमत्कार दिखाया करतो हो बानै केद कर लिओ गयो। ओ बोई झूठो खेबाळो ह जखो आपकी सेलाणीऊँ बा मिनखानै भंगरायो हो जखा बि खुखार ज्यानबर का आंक लिआ हा अर बिकी मूरतीनै धोक्या हा। अर बि खुखार ज्यानबर अर झूठा परमेसर की खेबाळानै तिजाब हाळी नरक का भबकता आग का कूंड म जिंदोई गेर दिओ गयो। धोळा घोड़ा का सवार क मुंडाऊँ जखी तलवार निकळरी ही बिऊँ बाकी का सिपाई मार्या गया अर पंछी बाका मासनै खार आपको पेट भर्या। इकै पाछै मनै ईस्बर नगरीऊँ एक ईस्बर नगरी दुत तळै उतरता दिख्यो। बिकै हात म पताळ की चाबी अर एक बडीसारी साँकळ ही। बो बि अजगरनै जखो पुराणो साँप, दुस्ट अर सेतान खुवावै ह बिनै पकड़र एक हझार बरस ताँई साँकळऊँ बांद दिओ। बो बिनै पताळ म गेर'र बिकै ताळो लगा दिओ। अर बिकै उपर म्होर लगादि जिऊँ बो एक हझार बरसा ताँई मिनखानै कोनी भंगरा सकै। पण एक हझार बरसा क पाछै बिनै क्युंक टेम ताँई छोड्यो ज्यासी। जणा म क्युंक सिंघासन देख्या बापै क्युंक मिनख बेठ्या हा। बानै न्याय करबा को अधिकार दिओ गयो हो। अर म बा मिनखा की आत्मानै जाका सीर ईसु मसी की गुवाई देबा की बजेऊँ अर परमेसर को बचन सुणाबा की बजेऊँ काट्या गया ह, अर बा मिनखानै जखा बि खुखार ज्यानबर अर बिकी मूरतीनै कोनी धोक्या अर नइ बिका आंकनै आपकै माथा अर हात प लगाया हा देख्यो। बे ओज्यु जिंदा होगा अर एक हझार बरस ताँई मसी क सागै राज कर्या। बाकी का मिनख जद ताँई एक हझार बरस कोनी बितगा बे जिंदा कोनी होया। ओ पेलो मर्या पाछै ओज्यु जिंदो होबो ह बे मिनख भागहाळा अर पबितर ह जखा पेला मर्या पाछै ओज्यु जिंदा होबा का भागी होसी। आ मिनखा प दुसरी मोत को कोई बस कोनी। पण अ मिनख परमेसर अर मसी का याजक होसी अर बिकै सागै एक हझार बरस ताँई राज करसी। पण जद एक हझार बरस पूरा होज्यासी जणा सेताननै केद मऊँ छोड्यो ज्यासी। अर बो धरती का सगळा देसा का मिनखानै भंगराबा ताँई जासी अ गोग अर मागोग का नामऊँ जाण्या जावै ह। बो बानै युद करबा ताँई भेळा करसी। अर बे समदर की रेत की जंय्यां अणगीणत होसी। सेतान की सेना सगळी धरती प फेल ज्यासी। अर बे परमेसर का मिनखा का डेरा अर बिकी लाडली नगरीनै घेर लेसी पण बापै आग बरससी अर बानै बाळ गेरसी। अर बि सेताननै जखो बानै भंगरातो हो बि तिजाब हाळा नरक का भबकता आग का कूंड म जिकै मांयनै बि खुखार ज्यानबर अर झूठा परमेसर की खेबाळानै गेर्यो गयो हो बिकै मांयनै गेर दिओ ज्यासी। अर बानै सदा-सदाई दिन-रात बिकै मांयनै तड़पायो जासी। इकै पाछै म बडोसारो धोळो सिंघासन अर बिकै उपर जखो बेठ्यो हो बिनै देख्यो। बिकै सामैऊँ आसमान अर धरती भाग छुट्या अर बाको नामो निसानई कोनी रिह्यो। इकै पाछै म छोटाऊँ लेर बडा ताँई का सगळा मरेड़ा मिनखानै देख्यो। बे बि सिंघासन क सामै खड़्या हा , जणा क्युंक पोथ्या खोली गई। आकै पाछै एक ओर पोथी खोली गई, जखी जीवन की पोथी ह। अर बाका करमा गेल जखा इ पोथी म मांड्या गया हा, मरेड़ा को न्याय कर्यो गयो। जखा मिनख समदर म मरगा हा, बानै समदर दे दिओ अर मोत अर पताळ बी मरेड़ा मिनखानै दे दिआ। अर बा हरेक को न्याय बाका करमा गेल कर्यो गयो। इकै पाछै मोतनै अर पताळनै आग का कूंड म गेर दिओ गयो। ओ आग को कूंडई दुसरी मोत ह। अर जिको बी नाम जीवन की पोथी म मांडेड़ो कोनी मिल्यो बिनै बी इ आग का कूंड म गेर दिओ गयो। इकै पाछै म एक नई ईस्बर नगरी अर धरतीनै देख्यो। पेलड़ी ईस्बर नगरी अर पेलड़ी धरती कोनी री, अर समदर बी कोनी रिह्यो। म पबितर नगरी नया यरूसलेमनै ईस्बर नगरीऊँ परमेसर क कनैऊँ तळै उतरता देख्यो। बि नगरीनै बंय्यां सजायो गयो हो जंय्यां मानो कोई बनड़ीनै बिका बनड़ा ताँई सजायो जावै ह। जणा म परमेसर का सिंघासनऊँ एक जोरको हेलो सुण्यो, “देखो! इब परमेसर मिनखा क बिचमै रेह्सी। बाको बास मिनखा क बिचमै होसी। अर बे परमेसर की परजा होसी अर परमेसर खुद बाको परमेसर होसी। ‘बो बाकी आँख्याऊँ सगळा आसु पुछ देसी। इब बठै मोत कोनी होसी’ अर नइ दुख, रोबो अर पिड़ा होसी। क्युं क सगळी पुराणी बाता जाती री।” जणा जखो सिंघासन प बेठ्यो हो बो बोल्यो, “देखो, म सक्यु नयो बणार्यो हूँ।” बो ओज्यु बोल्यो, “इनै मांडले क्युं क अ बचन बिस्वास जोगा अर सचा हीं।” बो ओज्यु बोल्यो, “सक्यु पूरो होगो। मई अलफा हूँ अर मई ओमेगा हूँ, मई जुगाद हूँ अर मई अंत हूँ। जखो बी तिसायो ह बिनै म सितमित म जीवन का कूंडऊँ पाणी प्यास्युं। जखो बी जीतसी बो आ सक्याको मालिक होसी। म बाको परमेसर होस्युं अर बे मेरा टाबर होसी। पण डरपोक, परमेसर म बिस्वास नइ करबाळा, भरस्ट, हत्यारा, कुकरमी, जादू-टोणा करबाळा, मूरती धोकबाळा अर झूठा मिनखानै तिजाब हाळा नरक का भबकती आग का कूंड म गेर्यो जासी। आई दुसरी मोत ह।” इकै पाछै बा सात्यु ईस्बर नगरी दुता मऊँ जाकै कनै सात म्हामारीऊँ भरेड़ा प्याला हा एक जणो आगै आर मेरूँ बोल्यो, “अठै आ, म तनै बा बनड़ी दिखास्युं जखी उन्या की बिनणी ह।” इब ताँई म पबितर आत्मा मई हो जणा बो मनै उचासारा डूँगर प लेगो अर बठैऊँ मनै पबितर नगरी यरूसलेम दिखायो बा परमेसर क कानिऊँ ईस्बर नगरीऊँ तळै उतररी ही। बा परमेसर की मेमाऊँ भरेड़ी ही, बा अंय्यां चमकरी ही जंय्यां की बा सिसा का गेणा पेरमाली हो। नगरी क च्यारूमेर उचीसारी दिवाल ही। बि दिवाल म बारा बारना हा , अर बा बारा बारना प बारा ईस्बर नगरी दुत हा। अर बा बारना प इजरायल का बारा कूणबा का नाम मंडर्या हा। बा बारा बारना मऊँ तीन बारना का मुंडा तो अगुणी दिसा कानि, तीन का उतराद कानि, तीन का पाछुणी कानि अर तीन का दिखणाद कानि हा। नगरी की दिवार बारा निम का भाठाऊँ धरेड़ी ही , अर बापै उन्या का बारा भेजेड़ा चेला का नाम मंडर्या हा। जखो ईस्बर नगरी दुत मेरूँ बतळार्यो हो बिकन नगरीनै, बिका बारनानै, अर दिवारनै नापबा ताँई सोना की डंडी ही। बा नगरी चोकोर ही, अर जत्ती बिकी लमाई ही बत्तिई बिकी चोड़ाई ही। अर जद बो बि नगरीनै नाप्यो जणा बा साडे सात सो कोस की निकळी। अर जत्ती बिकी लमाई ही बत्तिई बिकी चोड़ाई ही। अर बत्तिई बा उची ही। बो ईस्बर नगरी दुत मिनखा क नापऊँ बिकी दिवारनै नाप्यो अर बा दो सो सोळा फूट उची ही। बि नगरी की दिवारनै हिरा मोत्याऊँ अर सिसा की जंय्यां चमकबाळा खरा सोनाऊँ बणायो गयो हो। नगरी की दिवार की निमनै हिरा मोत्याऊँ सजाईड़ो हो। अर निम को पेलो भाठो सूरजमणीऊँ, दुसरो नीलमऊँ, तीसरो सफटिकऊँ। चोथो पन्नाऊँ, पाचवो गोमेदऊँ, छठो माणकऊँ, सातुओ पीत मणिऊँ, आठूओ पेरोजऊँ, नोवो पुखराजऊँ, दसवो लहसनियाऊँ, ग्यारवो धूमरकांतऊँ अर बारवो चंदरकांत मणिऊँ बणेड़ो हो। बारा बारना बारा मोत्याऊँ बणेड़ा हा, एक-एक बारनो एक-एक मोतीऊँ बणेड़ो हो। नगरी की गळ्या आरपार दिखबाळा सिसा की जंय्यां का खरा सोनाऊँ बणेड़ी ही। नगरी म मनै मनदर दिख्योई कोनी क्युं क सऊँ सक्‍तिसाली परबु परमेसर अर उन्योई बिका मनदर हा। नगरीनै सूरज अर चाँद की जुर्त कोनी ही क्युं क बा परमेसर की मेमा का च्यानणाऊँ चमकरी ही अर उन्यो नगरी को दिओ हो। सगळा मिनख इ दिआ का च्यानणा क सारैई आगै चालता ज्यासी। अर इ धरती का राजा आपको ठाट-बाट इ नगरी म लिआसी। बि नगरी का कुआड़ कोईसा दिनई बंद कोनी होसी, क्युं क बठै रात होसीई कोनी। देस-देस का मिनखा को ठाट-बाट अर मान इ नगरी म ल्यायो ज्यासी। कोई असुद चिज तो बिकै मांयनै बड़ई कोनी सकै, अर नइ बे जखा सूगला अर धोकेबाज हीं, पण बि नगरी म तो बेई बड़ सकै ह जखा को नाम उन्या की जीवन हाळी पोथी म मंडर्या ह। इकै पाछै ईस्बर नगरी दुत मनै जीवन देबाळी पाणी की नदि दिखाई , बा नदि सिसा की जंय्यां साप ही , बा नदि परमेसर अर उन्या का सिंघासनऊँ भेह्ती होई, नगरी क गळ्या क बिच मऊँ भेरी ही। इकै दोनू किनारा प जीवन देबाळो दरखत लागर्यो हो। बापै हर म्हेना बारा भात का फळ लागता हा। अर दरखत का पत्ताऊँ सगळा देसा का मिनख निरोगा होता हा। बठै कोईबी सराप कोनी होसी। परमेसर अर उन्या को सिंघासन बि नगरी म होसी, अर बिका दास बिकी भगती करसी। बे परमेसरनै आमै-सामै देखसी अर बिको नाम बाका माथा प मंड्यो रेह्सी। बठै कदैई रात कोनी होसी। अर नइ बठै सूरज अर दिआ का च्यानणा की जुर्त होसी। क्युं क परबु परमेसर आपको च्यानणो बापै राखसी। अर बे बठै सदाई राज करसी। इकै पाछै बो ईस्बर नगरी दुत मनै बोल्यो, “अ बचन बिस्वास जोगा अर सचा हीं। परबु परमेसर, जखो परमेसर की खेबाळानै आत्मा देवै ह, बो आपका दासानै जोक्यु तावळोई होबाळो ह, बिकै बारां म बताबा ताँई आपका दुतनै भेज्यो ह।” ईसु कह्यो, “सुणो! म तावळोई आऊँ हूँ। भागहाळा ह बे जखा इ पोथी म मांडेड़ा बचनानै जखा आबाळा टेम म पूरा होबाळा हीं बानै मानी हीं।” म, यहून्ना, जखो अ बाता देखी अर सुणी हूँ। अर जद म अ बाता देखी अर सुणी जणा म बि ईस्बर नगरी दुत क जखो मनै अ बाता दिखाया करतो हो बिकै पगा पड़र धोक खाई। पण बो मेरूँ बोल्यो, “अंय्यां मना कर क्युं क म तेरै अर परमेसर की खेबाळा तेरा साती-संग्या क अर जत्ताबी इ पोथी का बचनानै मानबाळा हीं बाकै सागै संगी दास हूँ। इ ताँई तू परमेसर कई धोक खा।” बो ईस्बर नगरी दुत मेरूँ ओज्यु बोल्यो, “इ पोथी म जखी बाता होबाळी ह बानै लुखा मना क्युं क आ बाता को पूरो होबा को टेम सांकड़ैई ह। जखा बुरो करै ह बे बुरोई करता रेह्‍वै। जखा भरस्ट हीं बे भरस्टई रेह्‍वै। जखा चोखा काम करै ह बे चोखा काम करताई रेह्‍वै। जखा पबितर हीं बे पबितरई रेह्‍वै।” ईसु सगळा मिनखाऊँ बोलै ह, “सुणो, म तावळोई आऊँ हूँ। अर सागै थारा करमा गेल थारै ताँई फळ ल्याऊँ हूँ। मई अलफा हूँ अर ओमेगा हूँ , म पेलो अर आखरी हूँ, मई जुगाद अर अंत हूँ। “भागहाळा हीं बे जखा हुकमानै मानी हीं जिऊँ बानै जीवन का दरखत का फळ खाबा की छुट होसी। बानै दरवाजा होर नगरी म बड़बा की छुट होसी। पण जादू-टोणा करबाळा, हत्यारा, कुकरमी, मूरती धोकबाळा अर बे हरेक जखा झूठनै चावै ह अर बिपै चालै ह बे हड़कायड़ा गंडक की जंय्यां हीं अर बे नगरी क बारनै रेह्सी। “म, ईसु खुद, थारै अर बिस्वासी मंडळी क कनै आ बाता की गुवाई देबा ताँई मेरा ईस्बर नगरी दुतनै भेज्यो हूँ। म दाऊद का कूणबा मऊँ हूँ। म भोर को चमकतो तारो हूँ।” पबितर आत्मा अर बनड़ी खेवै ह, “आ!” अर जखो इनै सुणै ह बो बी बोलै ह, “आ!” अर जखो तिसायो ह बो अर जखोबी चावै बो इ जीवन का पाणी का फळनै सितमित म लेले। इ पोथी की होबाळी बातानै सुणबाळा हरेक मिनखनै म, यहून्ना चेताऊँ हूँ, ज कोई आ बाता म ओर जोड़ै जणा इ पोथी म जखी बिपदा क बारां म बतायो गयो ह बानै परमेसर बिपै ल्यासी। अर ज कोई परमेसर की खेबाळा की इ पोथी की बाता मऊँ क्युं घटासी जणा परमेसर इ पोथी म मांडेड़ा जीवन का दरखत अर पबितर नगरी मऊँ बिको फळ खोस लेसी। ईसु जखो आ बाता को गुवा ह बो खेवै ह, “हाँ, म तावळोई आऊँ हूँ।” अंय्यांई होवै। ओ परबु ईसु, आ। परबु ईसु की दया परमेसर का मिनखा प होती रेह्‍वै। अंय्यांई होवै।