ارّا ن‑تلاليت ن‑ياسوع لماسيح يوس ن‑داود يوس ن‑يبراهيم. ءيبراهيم يورو ءيسحاق. ءيسحاق يورو ياعقوب. ياعقوب يورو ياهودا د‑ايتماس. ياهودا يورو فاريص د‑زاراح (تگا ءينّاتسن تامار). فاريص يورو حاصرون، حاصرون يورو ارام، ارام يورو عامّيناداب، عامّيناداب يورو ناحشون، ناحشون يورو سالمون. سالمون يورو بوعاز (تگا ءينّاس راحاب). بوعاز يورو عوبيد (تگا ءينّاس راعوت). عوبيد يورو ياسّا، ياسّا يورو داود اگلّيد. داود يورو سوليمان (ءينّاس ن‑سوليمان تكّا‑تّين تگا تامغارت ن‑ورّيّا). سوليمان يورو راحبعام، راحبعام يورو ابيّا، ابيّا يورو اسا، اسا يورو ياهوشافاط، ياهوشافاط يورو يورام، يورام يورو عوزّيّا، عوزّيّا يورو يوتام، يوتام يورو احاز، احاز يورو حازقيّا، حازقيّا يورو ماناسّا، ماناسّا يورو امون، امون يورو يوشيّا، يوشيّا يورو ياكونيّا د‑ايتماس غاكود لّيغ نكرن ايت‑بابيل اوين كولّو ايت‑يودايا س‑تمازيرت ن‑بابيل. تيگيرا ن‑ما‑تن‑يوين س‑بابيل ياكونيّا يورو شالتيل، شالتيل يورو زاروبّابيل، زاروبّابيل يورو ابيهودا، ابيهودا يورو الياقيم، الياقيم يورو عازور، عازور يورو صادوق، صادوق يورو اخيم، اخيم يورو اليود. اليود يورو اليعازر، اليعازر يورو ماتّان، ماتّان يورو ياعقوب. ياعقوب يورو يوسف ارگاز ن‑ماريام لّي‑يگان ءينّاس ن‑ياسوع لّي‑مي‑تّينين لماسيح. كّوژط د‑مراوت ن‑تاسوت ا‑يلّان زغ‑يبراهيم ار داود. كّوژط د‑مراوت ن‑تاسوت ا‑يلّان زغ‑داود ار اكود لّيغ ءيوين ايت‑يودايا س‑بابيل. د‑كّوژط د‑مراوت ن‑تاسوت ا‑يلّان زغ‑لّيغ‑تن‑يوين س‑بابيل ار اكود لّيغ ءيلول لماسيح. غمكاد ا‑تگا‑تلاليت ن‑ياسوع لماسيح. ءينّاس ماريام تّياوضالاب ءي‑يوسف، ءور‑تا‑ستّ‑ييوي. تاف‑ن ءيخف‑نس ءيس‑ا‑تربّو زغ‑تحكيمت ن‑رّوح لقودوس ن‑ربّي. ءيمّا يوسف لّي‑ستّ‑ين‑يضالبن ءيگا واد بدّا ءيران ا‑يرضو ربّي. ءيسوانگم اد‑اس‑يفرو س‑تنتلا، اشكو ءور‑يري ا‑ستّ‑يشّحشّم غ‑لگدّام ن‑مدّن. ار‑سول‑يسوينگيم غ‑مايان س‑اس‑د‑يبان يا‑لّمالاك ن‑سيدي ربّي غ‑توارگيت ييني‑اس: «وا‑يوسف يوس ن‑داود، اد‑ور‑تيكساطّ ا‑تاويت ماريام ا‑تگ تامغارت‑نّك، اشكو نتّات زغ‑تحكيمت ن‑رّوح لقودوس اين‑س‑تفّوغ ار‑تربّو. را‑تارو يان‑وارّاو، تگت‑اس ءيسم ‹ياسوع› اشكو را‑يجّنجم مدّن‑نس زغ‑دّنوب‑نسن.» كولّو ماياد ءيجرا باش ا‑يافو مايلّي ءينّا سيدي ربّي ف‑يلس ن‑نّابي غايد ءيزرين ءينّا: «ها‑يات‑تاعيّالت را‑تفّوغ ار‑تربّو، تارو يان‑وارّاو. راد‑اس‑تّينين ‹عيمّانوّيل›.» تگا لمعنا‑نس ‹ربّي ديدنّغ›. لّيغ‑د‑يفاق يوسف زغ‑يطس ءيسكر غمكلّي‑اس‑ينّا لمالاك ن‑سيدي ربّي. ياوي ماريام ا‑تگ تامغارت‑نس والاينّي ءور‑ديدس‑يگين ايلّيغ تورو ارّاو‑ان. ءيگ‑اس غاكودان ءيسم ‹ياسوع›. ءيلول ياسوع غ‑ووسّان ن‑وگلّيد هيرودوس غ‑تمدينت ن‑بيتلاحم غ‑تمازيرت ن‑يودايا. ءوشكان‑د كرا ن‑يماجوسين زغ‑شّرق غ‑ووسّان‑ان س‑تمدينت ن‑وروشاليم ار‑سقسان: «مانيغ ءيلّا غوالّي‑د‑يلولن ا‑يگ اگلّيد ن‑ايت‑يودايا؟ نژرا ءيتري‑نس غ‑شّرق، ناشك‑يد اد‑اس‑نسجد.» لّيغ ءيسفلد هيرودوس ءي‑مايد نّان، طيّر‑اس باهرا نتّا د‑كولّو ايت‑وروشاليم. ءيسّمون‑د ءينمغورن ن‑تگمّي ن‑ربّي د‑يمسلمدن ن‑شّرع كولّوتن ءيسقسا‑تن: «مانيغ را‑يلال لماسيح ن‑ربّي؟» ءينين‑اس: «غ‑بيتلاحم غ‑تمازيرت ن‑يودايا، اشكو غمكاد ا‑يتياران ف‑وفوس ن‑نّابي ءينّا: ‹وا‑بيتلاحم غ‑تمازيرت ن‑يودايا، ءورد كمّين ا‑يگُّران غ‑تمدينين ن‑يودايا، اشكو زغ‑گيم ا‑زغ‑را‑د‑ياشك‑ونمغور لّي‑را‑يكس مدّن‑ينو ن‑ايت‑ياعقوب.› » يازن هيرودوس غاكودان ماد‑د‑يتاوين ءيماجوسين س‑دارس س‑تنتلا. ءيسقسا‑تن: «ماناگو اد‑اون‑يبان ءيتري؟» يازن‑تن ءيلمّا س‑بيتلاحم ييني‑اسن: «زايدات تسيگّلم س‑وارّاو‑ان غ‑كرايگاتّ ماني. غاكود نّا‑تي‑توفام تاويم‑يّي‑د لخبار باش اد‑دّوغ اد‑اس‑ن‑سجدغ ءولا نكّي.» لّيغ سفلدن نتني ءي‑ماد‑اسن‑ينّا‑وگلّيد، مونّ‑داغ د‑وغاراس‑نسن. ءيبان‑اسن‑د‑داغ ءيتري لّي‑يادلّي‑ژران غ‑شّرق، فرحن باهرا س‑لفرح ءيگّوتن. ءيزوور‑اسن ءيتري ايلّيغ ءيلكم ءيگّي ن‑يلّيغ ءيلّا‑وحشمي، ءيبيدّ. كشمن نتني س‑تگمّي، س‑ژران احشمي د‑ينّاس ماريام. ضرن ف‑يفادّن‑نسن، كنون س‑واكال غ‑لگدّام‑نس. رژمن ءيتلسان‑نسن، فكن‑اس تيوافكيو ن‑وورغ د‑لبخور د‑توجّوت لّمورّ. ءيمل‑اسن ربّي غاكودان غ‑توارگيت ا‑ور‑وورّين س‑دار هيرودوس. امژن ءيلمّا اغاراس ياضني س‑تمازيرت‑نسن. لّيغ دّان نتني ءيبان‑د يا‑لّمالاك ن‑سيدي ربّي ءي‑يوسف غ‑توارگيت ييني‑اس: «نكر تاويت احشمي د‑ينّاس تروولم س‑تمازيرت ن‑ميصر، تقامام‑ن غين ارد‑اك‑ينيغ ا‑دي‑توورّيم، اشكو هيرودوس را‑يسيگّيل س‑وحشمي‑اد ا‑ت‑ينغ.» ءينكر يوسف غ‑يض‑ان ياوي احشمي د‑ينّاس فتون س‑ميصر. قامان غين ايلّيغ ءيمّوت هيرودوس. غمكاد ا‑س‑يووفا مايلّي ءينّا سيدي ربّي ف‑يلس ن‑نّابي غايد ءيزرين: «زغ‑ميصر ا‑زغ‑د‑غريغ ءي‑يوي.» ءيمّا هيرودوس، لّيغ ءيسّن ءيس‑ت‑غضرن ءيماجوسين، نكرن‑د گيس ءيريين. يازن س‑بيتلاحم ءينغ كولّو ءيحشمين غ‑تسگيو‑ان زغ‑سين ءيسگُّاسن د‑ما‑يكّان دّاواتسن، اشكو ءيسّن زغ‑يماجوسين ماناگو اد‑اسن‑يبان ءيتري. غاكودان ا‑يووفا ما‑ينّا نّابي ءيرميّا غايد ءيزرين: «تاغويّيت ا‑مي‑ن‑نسفلد غ‑تمدينت ن‑راما، ار‑سّغويّون ار‑تنوّاحن. ار‑تالّا راحيل ف‑تاروا‑نس، ءور‑تژضار ا‑تصبر اشكو ءور‑سول‑لّين.» لّيغ ءيمّوت هيرودوس ءيبان يا‑لّمالاك ن‑سيدي ربّي غ‑توارگيت ءي‑يوسف غ‑ميصر ييني‑اس: «نكر تاويت احشمي د‑ينّاس توورّيم س‑تمازيرت ن‑ايت‑ربّي. اشكو غويلّي رانين اد‑نغن احشمي، هاتنين مّوتن.» ءينكر ءيلمّا ياوي احشمي د‑ينّاس س‑تمازيرت ن‑ايت‑ربّي. والاينّي لّيغ ءيسفلد يوسف ءيس‑يوورّي ارخيلاوس ءيغلي س‑تگلديت ن‑باباس هيرودوس غ‑تسگيو ن‑يودايا، ييكساض ءور‑يژضار ا‑يدّو س‑غين. ءيمل‑اس ربّي غ‑توارگيت ءيس‑ت‑يد‑يقّان ا‑يزري س‑تسگيو ن‑جاليل، ءيدّو ءيزدغ غ‑تمدينت ن‑ناصيرا. غمكاد ا‑س‑يووفا مايلّي نّان لانبيا: «راد‑اس‑تّينين ءي‑لماسيح ‹گو‑ناصيرا›.» تيغوردين ن‑مايان ا‑د‑يبان يوحانّا امسدّام غ‑لخلا ن‑يودايا ار‑يتبرّاح ار‑يتّيني: «فلات كولّو ما‑تسكارم يُخشن، اشكو تاكمور‑د‑تگلديت ن‑يگنّا.» غواد ا‑ف‑ينّا نّابي ءيشاعيا غايد ءيزرين ييني: «ها‑يان‑واوال ار‑يتبرّاح غ‑لخلا ار‑يتّيني ‹جّوجادات اغاراس ن‑سيديتنّغ، تسّنمّ تيغاراسين‑نس.› » ار‑يلسّا يوحانّا تاضوت ن‑يرعامان ار‑ياگّس س‑وبكّاس ن‑يلم، ار‑يشتّا تامورغي د‑تامّنت لّخلا. فّوغن‑د دارس مدّن گّوتنين زغ‑تمدينت ن‑وروشاليم ءولا تامازيرت ن‑يودايا كولّوتّ ءولا كولّو تيسگيو ن‑واسيف ن‑وردون. ار‑تقرّان س‑دّنوب‑نسن، ار‑تن‑يسّدّام غ‑واسيف ن‑وردون. اشكين‑د دارس مدّن گّوتنين لّمدهب ن‑يفاريسين د‑وين ءيصادّوقين، ءيرين ءولا نتني اد‑دّمن غ‑وامان ف‑وفوس‑نس. ءيمّا نتّا لّيغ‑تن‑يژرا، ءيساول سرسن ييني‑اسن: «وا‑تاروا ن‑يفاغرن، ماد‑اون‑ينّان ءيزد غمكاد ا‑س‑را‑تانفم ءي‑لعقوبيت لّي‑را‑يتّوت ف‑دّونيت؟ سكارات افولكي باش ا‑يبان ءيس‑تفلم ما‑يُخشنّ. ا‑ور‑تّينيم ءي‑نگراتون ‹نكُّني نگا تاروا ن‑يبراهيم،› اشكو راد‑اون‑ينيغ، ربّي ءيژضار ا‑د‑يسّنكر تاروا ءي‑يبراهيم ءولا زغ‑يژران‑اد. هاي‑اگلزيم ءيتّرس ف‑وگّجا ن‑وسغار. كود تاسغارت نّا‑ور‑ياكّان لغلّت ءيميمن، را‑ستّ‑يبّي ءيلوح‑تّ‑ين غ‑لعافيت. نكّي ار‑كُن‑سّدّامغ غ‑وامان باش ا‑تملم ءيس‑تفلم لخُشانت‑نّون، والاينّي يوگُر‑يّي غوالّي را‑د‑ياشك تيگيرا‑نو، ءور‑ستهلّاغ اد‑اسيغ تورژيّين‑نس. را‑كُن‑يسّدّم نتّا س‑رّوح لقودوس د‑لعافيت. ياسي تازّرت ا‑يزوزّر، ءيسّمون‑د ءيردن‑نس غ‑وحانو، ءيجدر اليم س‑لعافيت لّي‑ور‑سار‑يخسين.» غ‑ووسّان‑ان ا‑غ‑د‑يوشكا ياسوع زغ‑تمازيرت ن‑جاليل س‑واسيف ن‑وردون باش ا‑يدّم ف‑وفوس ن‑يوحانّا. ءور‑يري يوحانّا ا‑ت‑يسّدّم. ييني‑اس: «ما‑س‑د‑داري‑توشكيت ا‑ك‑سّدّمغ؟ نكّين ا‑يحتاجّان اد‑دّمغ ف‑وفوس‑نّك.» ءيمّا ياسوع ءينّا‑ياس: «ا‑ييلي غيلاد غمكلّي نّيغ، اشكو غمكاد ا‑س‑را‑نسّافو كولّو ما‑يرضان ربّي.» غاكودان ءيقبل يوحانّا اوال‑نس ءيسّدّم‑ت غ‑واسيف. غير ءينكر‑د ياسوع زغ‑وامان س‑رژمن ءيگنوان، ءيژر رّوح ن‑ربّي ءيگّوز‑د زوند يان‑وتبير ءيتّرس‑د فلّاس. ءيساول‑د يان‑واوال زغ‑يگنوان ييني: «غواد ءيگا ءيوي ءيعزّان. فرحغ سرس باهرا.» ءيدّو ياسوع غاكودان، ياوي‑ت رّوح لقودوس س‑لخلا ا‑ت‑يتارم ءيبليس. كّوژ ءيد‑مراو ن‑واسّ ا‑ياژوم غ‑ييض ءولا ازال، ايلّيغ يوورّي ياغ‑ت لاژ باهرا. ياشك‑يد سرس ءيلمّا ءيبليس، ييني‑اس: «ءيغ‑تگيت يوس ن‑ربّي، ءيني ءي‑يژران‑اد اد‑وورّين گن اغروم.» ءيرار‑اس ياسوع: «هان ءيتيارا غ‑وارّا ن‑ربّي ‹ءورد اغروم كا‑س‑ا‑يتدّر بنادم، والاينّي س‑كرايگاتّ اوال نّا‑د‑يوشكان زغ‑دار ربّي.› » ياوي‑ت ءيلمّا ءيبليس س‑تمدينت ن‑وروشاليم، ءيسّبيدّ‑ت ف‑يگّي ن‑وكفاف ن‑تگمّي ن‑ربّي ييني‑اس: «ءيغ‑تگيت يوس ن‑ربّي لوح‑ن ءيخف‑نّك س‑ييزدار، اشكو ءيتيارا ‹را‑د‑يازن لمالايكا‑نس ا‑ك‑گابلن. را‑ك‑اسين ف‑يفاسّن‑نسن باش ا‑ور‑يلكم‑وضار‑نّك كرا ن‑وژرو.› » ءيرار‑اس ياسوع: «هان ءيتيارا ‹ا‑ور‑تارمت ربّي سيديك.› » ياوي‑ت ءيلمّا ءيبليس ءيسّغلي‑ت س‑يان‑ودرار ياتّوين، ءيمل‑اس كولّو تيگلداي ن‑دّونيت ءولا لمجد‑نسنت، ييني‑اس: «راد‑اك‑فكغ كولّو ماياد ءيغ‑تضرت ف‑يفادّن‑نّك تسجدت‑يّي.» ءيرار‑اس ياسوع: «ءيتّي‑ن زغ‑گيگي ا‑شيطان، اشكو ءيتيارا ‹ربّي سيديك ا‑مي‑تّسجادت، د‑نتّان واحدوت ا‑تّعبادت.› » ءيفل‑ت ءيبليس غاكودان، اشكين‑د دارس لمالايكا ار‑تي‑تعاوانّ. لّيغ ءيسفلد ياسوع ءيس‑يتياماژ يوحانّا امسدّام غ‑لحبس، يوورّي س‑تمازيرت ن‑جاليل. لّيغ‑ن‑يلكم ءور‑يقاما غ‑ناصيرا والاينّي ءيزري ءيزدغ غ‑تمدينت ن‑كافرناحوم، تلّا غ‑تاما ن‑ومدا غ‑تسگا ن‑زابولون ءولا نافتالي. غمكان ا‑س‑يووفا‑واوال ن‑نّابي ءيشاعيا ءينّا: «واي‑اكال ن‑زابولون د‑واكال ن‑نافتالي لّي‑يوالان امدا غ‑تسگا ياضني ن‑وردون. وا‑تامازيرت ن‑جاليل تازدغت ن‑يبرّانيين. هان غوين گاورنين غ‑تيلّاس ا‑يژران تيفاوت ءيگّوتن. غوين زدغنين غ‑تمازيرت ن‑ومالو لّموت، نتني ا‑ف‑تسفاو تيفاوت.» غاكودان ا‑يگرا ياسوع ار‑يتبرّاح ار‑يتّيني: «فلات كولّو ما‑تسكارم يُخشن، اشكو تاكمور‑د‑تگلديت ن‑يگنّا.» ءيفتو ياسوع غ‑تاما ن‑ومدا ن‑جاليل، ءيژر سين ايتماتن، سيمعان لّي‑مي‑تّينين بطرُس د‑گماس اندراوس. ءينگُمارن ن‑يسلمان اد‑گان، گرن‑ين شّبكت غ‑ومدا. ءيساول سرسن ياسوع ييني‑اسن: «اشكاد‑د مونات ديدي، رارغ‑كُن ا‑تگم ءينگُمارن ن‑مدّن.» غاكودان فلن شّبايك‑نسن، مونّ ديدس. ءيزايد ءيفتو يان ءيميكّ س‑ن‑يژرا سين ايتماتن ياضني، ياعقوب يوس ن‑زابدي د‑گماس يوحانّا. لّان غ‑تاناوت نتني د‑باباتسن زابدي ار‑تعدالن شّبايك. ءيغر‑اسن ياسوع، فلن‑ين تاناوت ءولا باباتسن غاكودان، مونّ ديدس. ءيزايد ياسوع ار‑يتكّا تامازيرت ن‑جاليل كولّوتّ، ار‑يسّلماد غ‑تگُمّا ن‑تژالّيت، ار‑يتبرّاح س‑لخبار ءيفولكين ن‑تگلديت ن‑يگنّا، ار‑يجّوجّي مدّن زغ‑كرايگاتّ تاماضونت ءولا كرايگاتّ اطّان نّا‑گيسن‑يلّان. سفلدن فلّاس كولّو مدّن غ‑تمازيرت ن‑سوريّا، اوين‑اس‑د كولّو ما‑يهرشن س‑مكنّا تگا‑تماضونت ءولا اطّان، گن‑ييت ءيكوشامن نغد ءيمجنان نغد غويلّي ءيسّطار‑وسلاي، ءيجّوجّي‑تن كولّوتن. ضفورن‑ت مدّن گّوتنين، ءوشكان‑د زغ‑تسگيو ن‑جاليل د‑تمازيرت ن‑مراوت‑تمدينين د‑وروشاليم د‑تمازيرت ن‑يودايا ءولا زغ‑تسگا ياضني ن‑واسيف ن‑وردون. لّيغ ءيژرا ياسوع مدّن گّوتنين ءوشكان‑د س‑دارس، ءيغلي س‑يان‑وورير ءيسكيوس، مونّ‑د فلّاس ءيمحضارن‑نس. ءيبدو ار‑تن‑يسّلماد ييني: «ءيمباركين اد‑گان غويلّي سّحسّانين ءيس‑ور‑گين يات، اشكو نتني ا‑مي‑تلّا‑تگلديت ن‑يگنّا. ءيمباركين اد‑گان غويلّي الّانين، اشكو نتني ا‑مي‑را‑يسفيض ربّي ءيمطّاون‑نسن. ءيمباركين اد‑گان غويلّي تصبارنين، اشكو نتني ا‑را‑يشّكشم ربّي س‑كولّو تيميخار‑نس. ءيمباركين اد‑گان غويلّي ياغ لاژ ءولا ءيريفي ءي‑ما‑يرضان ربّي، اشكو نتني ا‑را‑يشبع. ءيمباركين اد‑گان غويلّي تحنّونين غ‑وييّاض، اشكو نتني ا‑ف‑را‑د‑يحنّو ربّي. ءيمباركين اد‑گان غويلّي دار ءول ءيغوسن، اشكو نتني ا‑را‑يژر ربّي. ءيمباركين اد‑گان غويلّي سكارنين سّلامت، اشكو نتني ا‑را‑يگ ربّي د‑تاروا‑نس. ءيمباركين اد‑گان غويلّي ترفوفونّين ف‑سّيبت ن‑ما‑يرضان ربّي، اشكو نتني ا‑مي‑تلّا‑تگلديت ن‑يگنّا. ءيمباركين ا‑تگام ءيغ‑كُن‑رگمن مدّن سّرفوفنّ‑كُن ءينين فلّاون كولّو ما‑يُخشنّ س‑تكركاس ف‑سّيبت ن‑ما‑تگام وينو. تهنّايات تفرحم باهرا، اشكو تگّوت لباراكا لّي‑راد‑اون‑ييلي غ‑يگنّا. هان غمكان اد‑سّرفوفنّ ءولا لانبيا لّي‑كُن‑د‑زوارنين. «كونّي تگام تيسنت ن‑دّونيت. والاينّي ءيغ‑تلموس تيسنت ما‑س‑را‑ستّي‑تسّمارغم؟ ءور‑سول‑تگي ءي‑يات. را‑ستّ‑ين‑لوحن مدّن غ‑برّا اكُلن فلّاس. كونّي تگام تيفاوت ن‑دّونيت. تامدينت نّا‑يلّان ف‑يگّي ن‑وورير ءور‑تژضار ا‑تنتل. ءور‑ا‑سّرغان مدّن لقنديل ا‑ت‑ين‑سرسن غ‑دّو لعبرت، والاينّي ف‑يگّي ن‑ماني ياتّوين ا‑ف‑ا‑ت‑ين‑سراسن باش اد‑يسفيون كولّو ايت‑تگمّي. غمكاد ا‑س‑د‑يقّان تيفاوت‑نّون ا‑تيسفيو غ‑لگدّام ن‑مدّن، باش اد‑ژرن افولكي لّي‑تسكارم الغن باباتون لّي‑يلّان غ‑يگنّا. «اد‑ور‑تغالم ءيس‑د‑وشكيغ اد‑سّيتّيغ شّرع ن‑موسا ءولا ارّاتن لّانبيا. ءور‑د‑وشكيغ ا‑تن‑سّيتّيغ. ءوشكيغ‑د ا‑تن‑كمّلغ. لحقّ ا‑راد‑اون‑ينيغ، كولّو ماد‑قامان ءيگنوان د‑واكال ءور‑را‑ييتّي كرا لّحرف نغد كرا ن‑تنقيطّ زغ‑شّرع ارد يافو كولّو ما‑گيس‑يلّان. وانّا ءيسّونفن كرا لّوصيت ءيمژّين زغ‑لوصيّات‑اد ن‑شّرع ءيسّلمد ءي‑مدّن اد‑اس‑انفن، را‑يگ نتّان واد كولّو ءيمژّين غ‑تگلديت ن‑يگنّا. ءيمّا وانّا ءيسكارن س‑لوصيّات‑اد ءيسّلمد مدّن اد‑سرسنت‑سكارن، را‑يگ نتّان واد ءيمقّورن غ‑تگلديت ن‑يگنّا. راد‑اون‑ينيغ، ءيغ‑ور‑ترضيم ربّي ءوگُّار ن‑يمسلمدن ن‑شّرع د‑يفاريسين ءور‑اكُّ‑را‑تيژضارم ا‑تكشمّ س‑تگلديت ن‑يگنّا. «تسفلدم ءيس‑ينّا موسا ءي‑ويلّي زرينين ‹ا‑ور‑تنغت. وانّا ءينغان، را‑فلّاس‑يتّوت لحوكم.› ءيمّا نكّي راد‑اون‑ينيغ، كولّو وانّا ءيكورهان گماس، ءيلّا فلّاس لحوكم. د‑وانّا ءيرگمن گماس ءيقّان‑ت‑يد ا‑يزري زغ‑لمحكاما، د‑وانّا‑ياس‑ينّان ‹كيّي واشّ ا‑تگيت› ءيستهلّا لعافيت ن‑جهنّاما. ءيغ‑تيويت كرا ن‑توافكا س‑تگمّي ن‑ربّي تسوانگمد‑د ءيس‑تسكرت كرا يُخشنّ غ‑گماك، فل‑ن تاوافكا‑نّك غ‑تاما ن‑وژرو ن‑تغرسي، تدّوت تصالحت د‑گماك، توورّيد‑د ءيلمّا تفكت تاوافكا‑نّك ءي‑ربّي. ءيغ‑اك‑يصرض كرا ن‑يان، مشاشكاد‑د ديدس غ‑وغاراس ءور‑تا‑تلكيمّ لمحكاما، ا‑ور‑ك‑ين‑يدحي‑ومصراض‑نّك ءي‑لقاضي، ءيدحي‑ك لقاضي ءي‑ومخزني، ءيلوح‑ك‑ين غ‑لحبس. لحقّ ا‑راد‑اك‑ينيغ، ءور‑را‑دي‑تفّوغت زغ‑غين ارد تفروت تاقاريتّ ءيگُّران. «تسفلدم ءيس‑ينّا موسا ‹ا‑ور‑تزنوت.› ءيمّا نكّي راد‑اون‑ينيغ، وانّا ءيسّماقّلن غ‑كرا ن‑تمغارت ءيشتهو‑تّ، هان ءيزنا سرس غ‑وول‑نس. ءيغ‑ا‑ك‑تسّطار تيط‑نّك تافاسيت، سّوكف‑تّ‑يد تلوحت‑ستّ. يوف ا‑ك‑يخصّا يان‑وگزّوم غ‑دّات‑نّك ءولا ا‑ن‑كولّو‑تّياوگار دّات‑نّك غ‑جهنّاما. ءيغ‑ا‑ك‑يسّطار‑وفوس‑نّك افاسي، بّي‑ت تلوحت‑ت. يوف ا‑ك‑يخصّا يان‑وگزّوم غ‑دّات‑نّك ءولا ا‑كولّو‑تدّو دّات‑نّك س‑جهنّاما. «ءينّا‑داغ موسا ‹وانّا ءيفران ءي‑تمغارت‑نس ءيقّان‑ت‑يد اد‑اس‑يفك تابرات لّفرا.› ءيمّا نكّي راد‑اون‑ينيغ، وانّا ءيفران ءي‑تمغارت‑نس ف‑كرا ياضني بلا زّنا، هاتي ءيرور‑تّ ا‑تزنو. د‑وانّا ءيتاهلن تانّا‑د‑يفران، هان زّنا اين ءيسكر. «تسفلدم ءيس‑ينّا موسا ءي‑ويلّي زرينين ‹ا‑ور‑تفّوغت ف‑مايلّي‑س‑تگّولّيت س‑ربّي. ءيلّا فلّاك ا‑تسّافوت تاگالّيت‑نّك.› ءيمّا نكّي راد‑اون‑ينيغ، ا‑ور‑تّگالّام، لا س‑يگنّا اشكو ءيگا لعرش ن‑ربّي، ءولا س‑دّونيت اشكو تگا اژرو لّي‑ف‑يسرس ءيضارن‑نس، ءولا س‑وروشاليم اشكو تگا تامدينت ن‑وگلّيد ءيمقّورن. ءولا تگّولّيت س‑يخف‑نّك اشكو ءور‑تژضارت ا‑ترارت يان‑ونژاض ا‑يگ ءومليل نغد ءيضيلي. ءيلّا فلّاون ا‑يگ‑واوال‑نّون ‹يياه› نغد ‹ءوهو›. اينّا تزوويدم ءي‑مايان، هان ءيبليس ا‑د‑يكّا. «تسفلدم ءيس‑ينّا موسا ‹تيط س‑تيط، ءولا اخس س‑واخس.› ءيمّا نكّي راد‑اون‑ينيغ، ا‑ور‑تمّاغم د‑يان گيگون ءيسكرن ما‑يُخشنّ. ءيغ‑ك‑يوت يان ف‑ومادل افاسي، گلّب‑اس‑ن اژلماض. ءيغ‑اك‑يصرض يان ييري اد‑اك‑ياوي اقشّاب، فك‑اس ءولا اسلهام. ءيغ‑ك‑يومر كرا ن‑يان اد‑اس‑تاسيت تاغاوسا‑نس يان كيليميتر، دّو ديدس سين. وانّا‑زگيك‑يضالبن، فك‑اس. د‑وانّا‑د‑يوشكان اد‑اس‑ترضلت، ا‑ور‑تي‑ترارت بلا يات. «تسفلدم ءيس‑ينّا موسا ‹ا‑تحنّوت غ‑ومدّاكُّل‑نّك، تكرهوت انوّاش‑نّك.› ءيمّا نكّي راد‑اون‑ينيغ، حنّوات غ‑ينوّاشن‑نّون، تضالبم ربّي ا‑يرحم غويلّي‑كُن‑سّرفوفنّين. غمكاد ا‑س‑را‑تگم زوند باباتون لّي‑يلّان غ‑يگنّا، اشكو نتّا ار‑د‑يسّاقلاي تافوكت‑نس ف‑ويلّي أُخشنّين ءولا ف‑ويلّي فولكينين، ار‑د‑ياكّا انژار ءي‑ويلّي سكارنين س‑واوال‑نس ءولا غويلّي ءور‑سرس‑سكارنين. ءيغ‑ا‑تّحنّوم غير غ‑ويلّي گيگون تحنّونين، ما‑لّباراكا ا‑راد‑اون‑ييلي؟ ءيس‑ورد غمكان اد‑سكارن ايت‑نكّاس ءولا نتني؟ ءيغد غير ءيمدّوكُّال‑نّون ا‑دا‑تّنسالّامّ، مان افولكي تسكرم ءوگُّار ن‑مدّن ياضني؟ ءيس‑ورد غمكان اد‑سكارن ءولا غويلّي ءور‑سّينّين ربّي؟ ءيمّا كونّي، ءيلّا فلّاون ا‑تفولكيم س‑وفولكي ءيكمّلن، غمكلّي كولّو ءيفولكي باباتون ن‑يگنّا. «رارات لعاقل ا‑ور‑تّيريم ا‑تسكارم ءيفولكيتن‑نّون غ‑لگدّام ن‑مدّن باش ا‑كُن‑ژرن. اشكو ءيغ‑ا‑تسكارم غمكان ءور‑راد‑اون‑تيلي كرا لّباراكا دار باباتون لّي‑يلّان غ‑يگنّا. ءيغ‑تفكيت ءي‑كرا ن‑ومژلوض، ا‑ور‑توتّ نّاقوس باش ا‑ك‑ژرن مدّن. هان غمكان اد‑سكارن ايت‑سين‑وودماون غ‑تگُمّا ن‑تژالّيت ءولا غ‑تسواك باش ا‑تن‑الغن وييّاض. لحقّ ا‑راد‑اون‑ينيغ، مايان كا‑راد‑اسن‑ييلي. ءيمّا كيّي غاكود نّا‑را‑تفكت ءي‑يمژلاض، ا‑ور‑ييسّان‑وفوس‑نّك اژلماض ما‑يسكر‑وفاسي. اكّا غ‑تنتلا، تيلي‑اك لباراكا دار باباك لّي‑يتمنادن كولّو ما‑ينتلن. «ءيغ‑را‑تژّالّم ا‑ور‑تگم زوند ايت‑سين‑وودماون لّي‑دار‑يعزّا اد‑تبدّادن ار‑تژالّان غ‑تگُمّا ن‑تژالّيت ءولا غ‑گر‑تسواك باش ا‑تن‑ژرن مدّن. لحقّ ا‑راد‑اون‑ينيغ، مايان كا‑راد‑اسن‑ييلي. ءيمّا كيّي غاكود نّا‑تريت ا‑تژّالّت، كشم س‑تحانوت‑نّك تقّنت تيفلوت تژّالّت ءي‑باباك لّي‑ينتلن، را‑ك‑يبارك باباك لّي‑يژرّان ما‑ينتلن. غاكود نّا‑تّژالّام ا‑ور‑تسّيگاتم ءيواليون خوانين غمكلّي سكارن غويلّي تژالّانين ءي‑يلاهات ياضني، غالن ءيزد س‑توگّت ن‑يواليون ا‑س‑راد‑اسن‑سفلدن. ا‑ور‑تگم زوند نتني، اشكو باباتون ءيسّن ما‑كُن‑يخصّان ءور‑تا‑ياس‑تي‑تضالبم. «ءيمّا كونّي تژالّايات غمكاد: ‹وا‑باباتنّغ لّي‑يلّان غ‑يگنّا، ا‑ييلي لوقر ءي‑يسم‑نّك، تاشك‑يد‑تگلديت‑نّك، ييلي ما‑ك‑يرضان غ‑دّونيت غمكلّي ءيلّا غ‑يگنّا. فك‑اغ‑د غاسّاد اغروم ءي‑واسّ‑اد، تصامحت‑اغ ف‑لخُشانت لّي‑نسكر، غمكلّي نصامح ءي‑ويلّي گينّغ سكرنين ما‑يُخشنّ. سّانف‑اغ ءي‑ما‑راد‑اغ‑يجلّو، تجّنجمت‑اغ زغ‑يبليس.› «ءيغ‑ا‑تّصاماحم ءي‑مدّن ف‑دّنوب لّي‑گيگون‑سكارن، راد‑اون‑يصامح باباتون ن‑يگنّا. والاينّي ءيغ‑ور‑ا‑تّصاماحم ءي‑وييّاض ف‑دّنوب لّي‑گيگون‑سكارن، ءور‑راد‑اون‑يصامح باباتون ف‑دّنوب‑نّون. «ءيغ‑ا‑تّاژومّ ا‑ور‑تسكارم زوند ايت‑سين‑وودماون لّي‑كّرسنين ءيگنزي‑نسن باش اد‑سّبايّنّ ءي‑مدّن ءيس‑اژومن. لحقّ ا‑راد‑اون‑ينيغ، مايان كا‑راد‑اسن‑ييلي. ءيمّا كيّي غاكود نّا‑تّاژومت سيرد ءودم‑نّك تسرفت ازّار‑نّك ا‑ور‑ييسّان يان ءيس‑تاژومت ابلا باباك لّي‑ينتلن. را‑ك‑يبارك باباك لّي‑يتمنادن كولّو ما‑ينتلن. «ا‑ور‑تسّمونوم ايدا غ‑دّونيت‑اد ءيلّيغ را‑تي‑تشّ‑تووكّا تغوي‑ت تانيگت غزن‑ين سرس ءيمخّارن ا‑ت‑اكُرن. والاينّي سّمونوات‑ن ايدا غ‑يگنّا ءيلّيغ ءور‑را‑تي‑تشّ‑تووكّا ءولا تغوي‑ت تانيگت ءولا غزان سرس ءيمخّارن ا‑ت‑اكُرن. اشكو ءينّاغ ءيلّا‑وايدا‑نّك ا‑غ‑را‑ييلي‑وول‑نّك. «تيط ن‑بنادم ا‑يگان لقنديل ن‑دّات‑نس. ءيغ‑تسفاو تيط، را‑تيلي دّات كولّوتّ غ‑تيفاوت. ءيغ‑ور‑تسفاو تيط، را‑تيلي دّات كولّوتّ غ‑تيلّاس. والاينّي ءيغ‑تخسي تيفاوت لّي‑گيك‑يلّان، منشك ا‑س‑راد‑يگاتنت تيلّاس‑نّك. «ءور‑را‑ييژضار يان ا‑يقاسا سين ءيد‑سيديس. ءيمّا را‑يكرهو يان ييري وايّاض، نغد را‑يتوقّار يان ءيحگر وايّاض. ءور‑را‑تيژضارم ا‑تگم ءيسمگان ن‑ربّي د‑وين‑وايدا. «راد‑اون‑ينيغ، ا‑ور‑تاسيم تاغوفت ءي‑تودرت‑نّون ف‑ما‑را‑تشّم ءولا ما‑را‑تسوم، ءولا ءي‑دّات‑نّون ف‑ما‑راد‑اس‑تلسم. ءيس‑ور‑توف تودرت امشّو؟ ءيس‑ور‑توف دّات تيملسيت؟ ژرات ءيگضاض ن‑يگنوان، ءور‑ا‑كّرزن ءولا‑دا‑مگّرن ءولا‑دا‑سّمونون صّابت غ‑يحونا، والاينّي باباتون ن‑يگنّا ار‑اسن‑ياكّا امشّو لّي‑حتاجّان. ءيمّا كونّي ءيس‑ور‑دارس‑تعزّام ءوگُّار ن‑يگضاض؟ ما‑يژضارن ا‑يزايد تاساعت ءي‑تودرت‑نس س‑تاغوفت لّي‑يوسي؟ ماخ ايلّيغ ا‑تّاسيم تاغوفت ف‑مالسّا؟ ژرات ءيجدّيگن ن‑تاگانت مامنك ا‑دي‑تمغاين. ءور‑ا‑كّاتن تامّارا ءولا‑دا‑ژطّان، والاينّي راد‑اون‑ينيغ، سوليمان س‑لهيبت ن‑تگلديت‑نس ءور‑جّو‑يلسي زوند يان زغ‑يجدّيگن‑اد. ار‑يسّلسا ربّي توگا ن‑تاگانت لّي‑يتمغاين غاسّاد تّياوگار‑ن ازكّا غ‑تاكات. ءيس‑ور‑را‑كُن‑يسّلس ءولا كونّي س‑وگُّار؟ ءيس‑ور‑تومينم س‑ربّي؟ ا‑ور‑تاسيم تاغوفت ءولا‑دا‑تّينيم ‹ما‑را‑نشّ؟› ءولا ‹ما‑را‑نسو؟› ءولا ‹ما‑را‑نلس؟› هان غويلّي ءور‑سّينّين ربّي، تيغاوسيوين‑ان ا‑س‑لهان. ءيمّا كونّي، باباتون ن‑يگنّا ءيسّن ءيس‑تنتي‑تحتاجّام كولّوتنت. لهوات زوار س‑تگلديت ن‑ربّي ءولا س‑ما‑ت‑يرضان س‑اون‑يزوويد كولّو تيغاوسيوين‑ان ياضني. ا‑ور‑تّاسيم تاغوفت ءي‑وزكّا، اشكو ازكّا ءيژضار ءي‑تاغوفت‑نس. تقادّا‑تمّارا ن‑غاسّاد بلا‑دي‑تزوويدم تين‑وزكّا. «ا‑ور‑تينيم ف‑يان ءيس‑يُخشن، ا‑ور‑فلّاون‑ييني ربّي ءيس‑تُخشنم. اشكو غايلّي تّينيم ف‑وييّاض ا‑را‑فلّاون‑يتياونّا، ءولا لعبرت لّي‑س‑ا‑تّعبّارم ءي‑وييّاض ا‑س‑راد‑اون‑يتياوعبّار. ماخ ا‑ن‑تّمنادت ارفتوس ءيمژّين لّي‑ن‑يلّان غ‑تيط ن‑گماك، ءور‑تّ‑اكُّ‑تيويت غ‑تگّجديت لّي‑يلّان غ‑تيط‑نّك؟ مامنك ا‑تريت ا‑تينيت ءي‑گماك ‹ادج‑يّي اد‑اك‑د‑سّيتّيغ ارفتوس‑ان ا‑ك‑يلّان غ‑تيط،› ءيمّا كيّي تلّا‑ياك‑تگّجديت غ‑تيط؟ وا‑بو‑سين‑وودماون، سّيتّي زوار تاگّجديت زغ‑تيط‑نّك، باش ا‑تژرت مامنك ا‑دي‑تسّيتّيت ارفتوس زغ‑تيط ن‑گماك. «ا‑ور‑تاكّام ءي‑يضان ما‑يگان وين ربّي، ا‑ور‑نكرن اكُين‑د فلّاون. ا‑ور‑تّلوحم لجوهر‑نّون غ‑لگدّام ن‑والفان، ا‑ور‑ت‑اضّرن س‑يضارن‑نسن. «ضالبات ربّي راد‑اون‑يفك، سيگّلات دارس را‑تافم، سّضوقّرات‑ن سرس راد‑اون‑يرژم. اشكو كولّو وانّا‑ت‑يضالبن راد‑اس‑يفك، د‑وانّا دارس ءيسيگّيلن را‑دارس‑ياف، د‑وانّا‑ن‑يسّضوقّورن راد‑اس‑يرژم. ءيس‑گيگون‑يلّا ما‑مي‑يضالب يوس اغروم ءيفك‑اس اژرو؟ نغد ءيضالب‑اس اسلم ءيفك‑اس الگمّاض؟ ژرات كونّي، واخّا دا‑تسكارم ما‑يُخشنّ تيسّانم ا‑تفكم تيميخار فولكينين ءي‑تاروا‑نّون. ءوگُّار ن‑مايان ا‑را‑ياكّا باباتون ن‑يگنّا ما‑يفولكين ءي‑ويلّي‑تي‑تضالابنين. سكارات د‑كولّو‑مدّن غمكنّا ترام ا‑ت‑ديدون‑سكارن. اوال‑اد ا‑يسّمونّ كولّو ما‑يتياران غ‑شّرع ءولا لانبيا. «كشمات غ‑يمي ءينوكمان. هان يوسعا ءيمي ياضني لّي‑يتاوين س‑لهالاك، ءيرخو‑وغاراس‑نس، ءيگّوت ما‑گيس‑يكشّمن. والاينّي ءينوكما ءيمي لّي‑يتاوين س‑تودرت، ءيشقو‑وغاراس‑نس، ءيدروس ما‑ت‑يتافان. «رارات لعاقل اشكو راد‑د‑دارون‑اشكين كرا ن‑مدّن ار‑تّينين ءيس‑گان لانبيا والاينّي ار‑سّكيركيسن. ءوشّانّ اد‑گان، لسن‑د سرون تيملسيت ن‑وولّي باش ا‑كُن‑غوين. ءيمّا نتني زغ‑لغلّت‑نسن ا‑زغ‑را‑تن‑تّيسّانم، اشكو ءور‑ا‑ياكّا‑وزگُّار اضيل، ءولا‑دا‑تاكّا‑تسكرا ءيكوزارن. تاسغارت ءيفولكين ار‑تسكار لغلّت ءيفولكين. تاسغارت يُخشنّ ار‑تسكار لغلّت يُخشنّ. ءور‑تژضار‑تسغارت ءيفولكين ا‑تفك لغلّت يُخشنّ، ءولا تژضار‑تسغارت يُخشنّ ا‑تفك لغلّت ءيفولكين. والاينّي كرايگاتّ تاسغارت نّا‑ور‑ياكّان لغلّت ءيفولكين، را‑ستّ‑يبّي‑وفلّاح ءيلوح‑تّ‑ين غ‑لعافيت. غمكان ا‑راد‑گن ءولا نتني، زغ‑لغلّت‑نسن ا‑زغ‑را‑تن‑تّيسّانم. «هان ءورد كولّو وانّا‑يّي‑يتّينين ‹وا‑سيدي، وا‑سيدي› ا‑را‑يكشم س‑تگلديت ن‑يگنّا. ءور‑را‑سرس‑يكشم ابلا غويلّي سكارنين ما‑يتّيري بابا لّي‑يلّان غ‑يگنّا. ءيگّوت ما‑راد‑يّي‑ييني غ‑واسّ لّحساب ‹وا‑سيدي وا‑سيدي، ها‑ياغ س‑يسم‑نّك ا‑س‑نساول س‑يواليون ن‑ربّي. س‑يسم‑نّك ا‑س‑نسّوفغ لجنون. س‑يسم‑نّك ا‑س‑نسكر كيگان د‑لمعجيزات.› غاكودان راد‑اسن‑ينيغ ‹ءور‑اكُّ‑كُن‑سّينغ. ءيتّيات‑ن زغ‑گيگي كونّي لّي‑يسكارن لخُشانت.› «كولّو وانّا ءيسفلدن ءي‑يواليون‑اد‑ينو ار‑سرسن‑يسكار، ءيرواس ارگاز ءيطّافن لعاقل، ءيبنا تيگمّي‑نس ف‑يسلي. ار‑يصواض‑واضو ار‑يطّار‑ونژار ءينگي‑د‑واسيف ار‑كّاتن تيگمّي، والاينّي ءور‑تّ‑سّضيرن اشكو ءيزگا لّساس‑نس ف‑يسلي. ءيمّا كولّو وانّا ءيسفلدن ءي‑يواليون‑اد‑ينو ءور‑ا‑سرسن‑يسكار، ءيرواس ارگاز ءينوفلن، ءيبنا تيگمّي‑نس ف‑وملال. ءيصوض‑واضو ءيضر‑ونژار ءينگي‑د‑واسيف ءوتن تيگمّي تضر‑د، تخلو كولّوتّ.» لّيغ ءيكمّل ياسوع ءيواليون‑اد، ار‑باهرا‑تعجّابن مدّن غ‑ولمّود‑نس، اشكو ار‑سرسن‑يساوال غمكلّي دارس لحقّ اد‑اسن‑يتّيني ما‑تن‑د‑يقّانّ ا‑ت‑سكارن. ءور‑يگي نتّا زوند ءيمسلمدن‑نسن ن‑شّرع. لّيغ‑د‑يگّوز ياسوع زغ‑وورير، ضفورن‑ت مدّن گّوتنين. ياشك‑يد دارس يان‑ونجدام ءيضر‑د غ‑لگدّام‑نس ييني‑اس: «وا‑سيدي، تژضارت ا‑يّي‑تسّغوست ءيغ‑تريت.» ءيگّر‑اس ياسوع س‑وفوس‑نس ييني‑اس: «ريغ نكّي. غوس.» ييتّي زغ‑گيس لجدام غاكودان ءيغوس. ءيزايد ياسوع ييني‑اس: «اد‑ور‑تينيت يات ءي‑يان، والاينّي دّو تملت ءيخف‑نّك ءي‑ونمغور ن‑تگمّي ن‑ربّي، تفكت‑اس تيغرسي لّي‑ف‑يوصّا موسا ا‑تگ توگّا ءي‑مدّن.» ءيكشم ياسوع س‑تمدينت ن‑كافرناحوم. ياشك‑يد دارس يا‑لّقبطان ن‑يعسكرين ن‑رّومان، ءيضالب‑ت باهرا ييني‑اس: «وا‑سيدي، ءيكوشم‑وخدّام‑ينو، ءيگن غ‑تگمّي ءيتياومرّات باهرا.» ييني‑اس ياسوع: «را‑ن‑اشكغ جّوجّيغ‑ت.» ءيمّا لقبطان ءيساول‑د ييني‑اس: «وا‑سيدي، ءور‑ستهلّاغ ا‑تكشمت س‑تگمّي‑نو، والاينّي ءيني غير يان‑واوال س‑يجّي‑وخدّام‑ينو. ها‑يّي ءولا نكّي ار‑سكارغ س‑واوال ن‑ما‑يّي‑يوگُرن، ءيلين ءيعسكرين غ‑دّو‑وفوس‑ينو. ءيغ‑نّيغ ءي‑يان ‹دّو› ءيدّو. ءيغ‑نّيغ ءي‑وايّاض ‹اشك‑يد› ياشك‑يد. ءيغ‑نّيغ ءي‑وخدّام‑ينو ‹سكر تاووري‑اد› ءيسكر‑تّ.» لّيغ ءيسفلد ياسوع ءي‑ماياد ءيتعجّب، ييني ءي‑ويلّي ديدس مونّين: «لحقّ ا‑راد‑اون‑ينيغ، ءور‑جّو‑وفيغ كرا ن‑يان يومنّ زوند غواد، ءولا غ‑گر ايت‑ربّي. راد‑اون‑ينيغ، گّوتن ءيبرّانيين لّي‑را‑د‑ياشك زغ‑شّرق ءولا لغرب مونّ‑د د‑يبراهيم د‑يسحاق د‑ياعقوب ف‑يمنسي ءيمقّورن ن‑تگلديت ن‑يگنّا. ءيمّا غويلّي‑ف‑يقصاد ربّي غايد ءيزرين اد‑گن ايت‑تگلديت‑نس، را‑تن‑يلوح غ‑تيلّاس اگّوگنين. غين ا‑غ‑راد‑الّان ار‑تگژاژن ءوخسان‑نسن.» ييني ءيلمّا ياسوع ءي‑لقبطان: «زايد س‑تگمّي. راد‑اك‑ييلي غمكلّي تومنت.» غاكودان ا‑يجّي‑وخدّام‑نس. ءيفتو ياسوع س‑تگمّي ن‑بطرُس، ياف‑ن تاضگُّالت ن‑بطرُس تگن، توضن س‑تاولا. ءيگّر‑اس ءي‑وفوس، تيتّي زگيس تاولا، تنكر ار‑فلّاس‑تّسخّار. لّيغ‑دي‑تروح‑تدگُّات اوين‑د ءي‑ياسوع مدّن گّوتنين لّي‑غ‑لّان لجنون. ار‑زگيسن‑يسّوفوغ لجنون س‑يان‑واوال، ءيجّوجّي كولّو ويلّي ءوضنّين. غمكان ا‑س‑يووفا‑واوال ن‑نّابي ءيشاعيا ءينّا «نتّان ا‑يسّيتّين تيموضان‑نّغ، ياسي اطّان‑نّغ.» ءيژر ياسوع مدّن گّوتنين مونّ‑د فلّاس، ييني ءي‑يمحضارن‑نس ف‑اد‑سكرن اد‑ديدس‑سّودون س‑تسگا ياضني ن‑ومدا، س‑د‑دارس‑يوشكا يان‑ومسلمد ن‑شّرع ييني‑اس: «واي‑امسلمد، راد‑ديدك‑مونغ س‑ينّاس را‑تدّوت.» ءيرار‑اس ياسوع ييني‑اس: «ءيبوغاغ دارسن تانسيوين‑نسن، ءولا ءيگضاض ن‑يگنوان دارسن ءوسودن‑نسن، ءيمّا يوس ن‑بنادم ءور‑دارس مانيغ ا‑يسراس اگايّو‑نس.» ءيساول‑د ءيلمّا يان ياضني زغ‑گر ويلّي ديدس ءيتمونون ييني‑اس: «وا‑سيدي، ادج‑يّي زوار اد‑وورّيغ ارد‑ن‑مضلغ بابا.» ءيمّا ياسوع ءينّا‑ياس: «اشك‑يد مون ديدي. فل غويلّي ءور‑طّافنين تودرت ا‑ن‑مضلن وينّا‑ياسن‑مّوتنين.» ءيكشم ياسوع س‑تاناوت، سّودون ديدس ءيمحضارن‑نس. غاكودان ءينكر‑د‑واضو ءيتجهّدن، اتّوينت تاضانگيوين ار‑كّاتنت تاناوت ايلّيغ ا‑تّعمّار س‑وامان. ءيمّا ياسوع ءيگن. دّون ءيمحضارن سّفاقن‑ت ءينين‑اس: «جّنجم‑اغ ا‑سيدي. ها‑ياغ را‑نهلك.» ييني‑اسن ياسوع: «ماخ ايلّيغ تكسوضم؟ ءيس‑ور‑تومينم؟» ءينكر يامر اضو ءولا تاضانگيوين اد‑زگان، س‑يوورّي‑ومدا ءيهنّا باهرا. ءيضر‑اسن لعجب ار‑تّينين: «ما‑يگا‑ورگاز‑اد ايلّيغ ا‑سرس‑يسفليد‑واضو ءولا امدا؟» لّيغ ءيلكم ياسوع تامازيرت ن‑گادارا غ‑تسگا ياضني ن‑ومدا، فّوغن‑د دارس سين ءيرگازن زغ‑گر ءيسمضال. لّان گيسن لجنون، شقون باهرا. ءور‑يژضار يان ا‑يك اغاراس‑ان. غوّتن س‑جّهد ءينين‑اس‑د: «وا‑يوس ن‑ربّي، ما‑يلّان غ‑گراتنّغ ديدك؟ ءيس‑دي‑توشكيت اد‑اغ‑تسّرفوفنت ءور‑تا‑د‑يلكيم‑وزمز؟» تّياوكسا غين يات‑تووروت ءيگّوتن ن‑والفان، ءور‑ن‑باهرا‑تاگّوگ. ضالبن‑ت لجنون باهرا ءينين‑اس: «ءيغ‑اغ‑تسّوفغت، تازنت‑اغ ا‑نكشم س‑والفان‑ان.» ءيرار‑اسن: «زايدات.» فّوغن زغ‑يرگازن، كشمن س‑والفان. تازّل‑تووروت غاكودان س‑جّهد زغ‑وجاريف س‑ومدا، خسين‑ين كولّو غ‑وامان. روولن ءيمكساون، وورّين س‑تمدينت، اوين لخبار ف‑كولّو مايان ءولا ف‑ما‑يجران ءي‑يمجنان. اشكين‑د كولّو ايت‑تمدينت اد‑ژرن ياسوع. لّيغ‑ت‑ين‑مناگّارن ضالبن‑ت باهرا ا‑يفّوغ تامازيرت‑نسن. ءيكشم ياسوع س‑تاناوت يوورّي‑د س‑تسگا‑ياد ن‑ومدا، ءيروح‑د تامدينت لّي‑غ‑يزدغ. اشكين‑د دارس كرا ن‑مدّن اوين‑اس‑د يان‑ورگاز ءيكوشمن ءيگن ف‑يمجدين‑نس. ياسوع ءيژرا مامنك اد‑باهرا‑سرس‑ومنّ، ءيساول س‑وكوشام ييني‑اس: «تهنّا ا‑يوي، ءيتّين فلّاك دّنوب‑نّك.» ءيلين غين كرا ن‑يمسلمدن ن‑شّرع، ءينين د‑يخف‑نسن: «غواد، اوال لّكوفر ايد ءينّا.» ءيمّا ياسوع ءيسّن ماد‑سوانگمن، ييني‑اسن: «ماخ ايلّيغ تودجام ءيسوينگيمن أُخشنّين اد‑كشمن س‑يخفاون‑نّون؟ ما‑گيسن‑يرخان، اد‑ينيغ ‹ءيتّين فلّاك دّنوب‑نّك› نغد اد‑ينيغ ‹نكر ار‑تّيدوت›؟ ءيمّا غيلاد راد‑اون‑ملغ ءيس‑داري تاژضّارت غ‑دّونيت اد‑سّيتّيغ دّنوب، نكّي لّي‑يگان يوس ن‑بنادم.» ءيساول ءيلمّا س‑وكوشام ييني‑اس: «نكر، تاسيت ءيمجدين‑نّك، تدّوت س‑تگمّي.» ءينكر غاكودان ءيدّو س‑تگمّي‑نس. لّيغ‑ت‑ژران، غووضن مدّن‑ان كولّوتن ار‑تالغن ربّي لّي‑يفكان تاژضّارت‑اد ءيگّوتن ءي‑بنادم. ءيفتو ياسوع زغ‑غين، س‑يژرا يان بو‑نكّاس ءيسم‑نس ماتّا، ءيسكيوس غ‑يلّيغ ا‑تامژن ءيقاريدن ن‑نكّاس. ييني‑اس ياسوع: «اشك‑يد مون ديدي.» ءينكر غاكودان ءيمون ديدس. ءيگاور ياسوع غ‑تگمّي ن‑ماتّا، اشكين‑د ءيد‑بو‑نكّاس گّوتنين د‑وييّاض أُخشنّين، درون د‑ياسوع د‑يمحضارن‑نس. لّيغ‑ت‑ژران ءيفاريسين، سقسان ءيمحضارن‑نس: «ماخ ايلّيغ ا‑يشتّا‑ومسلمد‑نّون د‑ايت‑نكّاس د‑وييّاض أُخشنّين؟» ءيمّا ياسوع، لّيغ ءيسفلد ءي‑ماد‑نّان ءيرار‑اسن: «ءورد غويلّي دوسنين ا‑يحتاجّان اطبيب والاينّي غويلّي ءوضنّين. زايدات تسوانگمّ غ‑وارّا ن‑ربّي لّي‑ينّان ‹ريغ دارون لحنانت، ءورد تيغرسي.› ءيمّا نكّي، ءور‑د‑وشكيغ ا‑ن‑غرغ ءي‑ويلّي غالنين ءيس‑فولكين، والاينّي ءوشكيغ‑د ا‑ن‑غرغ ءي‑ويلّي أُخشنّين.» اشكين‑د ءيمحضارن ن‑يوحانّا امسدّام س‑دار ياسوع ءينين‑اس: «ار‑نتاژوم نكُّني د‑يفاريسين. ماخ ايلّيغ ءور‑ا‑تاژومن ءيمحضارن‑نّك؟» ييني‑اسن: «ءيس‑را‑طيّر ءي‑ايت‑تمغرا د‑وسلي ديدسن؟ والاينّي راد‑د‑اشكين‑ووسّان لّي‑غ‑را‑فلّاسن‑ييتّي‑وسلي. غاكودان ا‑راد‑تاژومن. ءور‑يلّي ما‑يتگّان تادغارت ن‑تّوب لّجديد ءي‑تملسيت تاقديمت، اشكو را‑تكّيس‑تدغارت لّجديد زغ‑تقديمت، تبّي س‑وگُّار. ءور‑يلّي ما‑يتگّان امان ن‑واضيل ءيكتين لّجديد غ‑يلماون ءيقديمن، اشكو راد‑ستغن ءيلماون ءيقديمن، فّين‑وامان خسرن ءيلماون. والاينّي ار‑تگّان امان ن‑واضيل لّجديد غ‑يلماون لّجديد. غمكان ا‑س‑راد‑قامان فولكين س‑سين.» سول ا‑يساوال ياسوع س‑د‑يوشكا يان‑ومغار، ءيضر‑د غ‑دار ءيضارن‑نس ييني‑اس: «تاساعت‑اد تمّوت ءيلّي ءيمژّين. والاينّي اشك‑يد تگت فلّاس افوس‑نّك تدّر.» ءينكر ياسوع ءيمون ديدس نتّا د‑يمحضارن‑نس. تلّا غين يات‑تمغارت توضن، ييلي‑بدّا‑گيس‑وسگُّرد ن‑يدامّن سين د‑مراو ن‑وسگُّاس. تروح‑د تيغوردين ن‑ياسوع تگّر ءي‑تاما ن‑تملسيت‑نس، تيني د‑يخف‑نس: «ءيغ‑ن‑گّرغ غير ءي‑تملسيت‑نس راد‑جّيغ.» ءيگراول ياسوع ءيسّماقّل گيس ييني‑اس: «تهنّا ا‑يلّي، تجّيت غيلاد اشكو تومنت.» غاكودان ا‑تجّي‑تمغارت. لّيغ ءيلكم ياسوع تيگمّي ن‑ومغار ياف‑ن غويلّي كّاتنين تاعوّاتّ د‑مدّن گّوتنين ار‑سّغويّون. ييني‑اسن: «ءيتّيات. هان تافروخت ءور‑تمّوت. غير تگن.» ءيمّا نتني ار‑گيس‑ضصّان. لّيغ سّوفغن مدّن‑ان كولّوتن، ءيكشم ياسوع س‑دار‑تفروخت. يامژ‑اس غ‑وفوس، تنكر‑د. اوين ءيلمّا لخبار‑نس س‑تمازيرت‑ان كولّوتّ. ءيفتو ياسوع زغ‑غين، ضفورن‑ت سين ءيبوكاضن ار‑تغوّاتن ار‑تّينين: «حنّو گينّغ ا‑يوس ن‑داود.» لّيغ ءيكشم ياسوع س‑يات‑تگمّي روحن‑ت‑يد ءيبوكاضن‑لّي. ءيسقسا‑تن: «ءيس‑تومنم ءيس‑ژضارغ اد‑سكرغ ماياد؟» ءينين‑اس: «نومن ا‑سيدي.» ءيگّر ءي‑والّن‑نسن ييني‑اسن: «اد‑اون‑ييلي ما‑س‑تومنم.» وورّين سفاون غاكودان. يوصّا‑تن ءيلمّا س‑لمعقول ييني‑اسن: «رارات لعاقل، ا‑ور‑تينيم ءي‑يان ف‑ماياد.» ءيمّا نتني دّان ار‑ساوالن ف‑ياسوع غ‑تمازيرت‑ان كولّوتّ. غير دّان نتني س‑د‑وشكان كرا ن‑مدّن ياضني، اوين‑اس‑د يان‑ورگاز اژنژوم، ييلي گيس يا‑لّجنّ. لّيغ‑زگيس‑يفّوغ لجنّ يوورّي‑وژنژوم ار‑يساوال. ار‑تعجّابن مدّن كولّوتن ار‑تّينين: «ءور‑جّو‑يلّي زوند ماياد غ‑دار ايت‑ربّي.» ءيمّا ءيفاريسين ار‑تّينين: «نتّان س‑تحكيمت ن‑وگلّيد لّجنون ا‑س‑ا‑يسّوفوغ لجنون.» ار‑يتكّا ياسوع كولّو تيمدينين ءولا ءيدوران، ار‑يسّلماد غ‑تگُمّا ن‑تژالّيت ار‑يتبرّاح س‑لخبار ءيفولكين ن‑تگلديت ن‑يگنّا، ار‑يجّوجّي مدّن زغ‑كرايگاتّ تاماضونت ءولا كرايگاتّ اطّان نّا‑گيسن‑يلّان. لّيغ ءيمناد غ‑مدّن‑ان گّوتنين، قامان گيس باهرا، اشكو ءيژرا تامّارا د‑تاغوفت لّي‑غ‑لّان زوند ءولّي بلا امكسا. ييني ءيلمّا ءي‑يمحضارن‑نس: «تگّوت‑تمگرا والاينّي دروسن ءيخدّامن. ضالبات بو‑تمگرا ا‑يازن ءيخدّامن اد‑سّمونّ تامگرا‑نس.» ءيغر‑د ياسوع ءي‑يمحضارن‑نس س‑سين د‑مراو س‑دارس، ءيفك‑اسن تاژضّارت اد‑سّوفوغن لجنون أُخشنّين ار‑جّوجّين كرايگاتّ تاماضونت ءولا اطّان. غمكاد اد‑گان ءيسماون ن‑يرقّاسن س‑سين د‑مراو: امزوارو سيمعان لّي‑مي‑تّينين بطرُس، نتّا د‑گماس اندراوس، د‑ياعقوب يوس ن‑زابدي، نتّا د‑گماس يوحانّا، د‑فيليبّوس، د‑بارتولاماوس، د‑توما، د‑ماتّا لّي‑ستّين‑يكّان ءيگا بو‑نكّاس، د‑ياعقوب يوس ن‑حالفا، د‑تادّاوس، د‑سيمعان اواطاني، نتني د‑ياهودا ءيسخاريوط لّي‑را‑يزّنز ياسوع تيگيرا. غاكودان ا‑يوزن ياسوع ءيرقّاسن‑نس س‑سين د‑مراو يوصّا‑تن: «ا‑ور‑تدّوم س‑تميزار ياضني ءولا تكشمّ س‑تمدينين ن‑ساميرا. والاينّي دّوات دار‑وولّي ن‑تووروت ءيجلان لّي‑يگان ايت‑ربّي، ار‑تّبرّاحم غ‑وغاراس ار‑تّينيم ‹تاكمور‑د‑تگلديت ن‑يگنّا.› جّوجّيات ءيموضان‑نسن، ار‑تسّنكارم غويلّي مّوتنين، ار‑تسّغوسم ءينجدامن، ار‑تسّوفوغم لجنون. اكّايات بلا‑دا‑تّامژم يات، اشكو تومژم بلا تفكام يات. ا‑ور‑تاويم ءورغ ءولا نّوقرت ءولا اناس غ‑وبكّاس‑نّون. ا‑ور‑تاسيم اقُراب ءي‑وغاراس نغد سين ءيقشبان نغد تورژيّين نغد اعمود، اشكو اخدّام ءيستهلّا امشّو‑نس. تامدينت نّا‑تلكمّ نغد ادوّار، سيگّلات گيس س‑مانوا گيس ءيستهلّان، تگاورم دارس ار اكود نّا‑را‑تمودّوم زغ‑غين. تيگمّي نّا‑س‑تكشمّ ءينيات‑اسن ‹اد‑اون‑تيلي سّلامت.› ءيغ‑تّ‑ستهلّان ايت‑تگمّي‑ان راد‑اسن‑تيلي سّلامت لّي‑س‑تنّام. ءيغ‑ور‑تّ‑ستهلّان ءور‑را‑ن‑غين‑تقاما سّلامت‑نّون. والاينّي ءينّاغ‑كُن‑ور‑رين مدّن ءولا سفلدن س‑واوال‑نّون، فّوغات زغ‑تگمّي‑ان ءولا تامدينت‑ان تسّوسم اگدرور ن‑يضارن‑نّون. لحقّ ا‑راد‑اون‑ينيغ، را‑يشقو غ‑واسّ لّحساب ف‑ايت‑تمدينت‑ان ءوگُّار ن‑ايت‑سادوم ءولا ايت‑عامورا. «ءوزنغ‑كُن غيلاد زوند ءيلقّاغن غ‑گر‑ووشّانّ. رارات لعاقل زوند الگمّاض، تزريم س‑سّلامت زوند اتبير. رارات لعاقل‑نّون زغ‑بنادم، اشكو را‑كُن‑ين‑دحاين س‑لمحكامات، سّغورشن‑كُن غ‑تگُمّا ن‑تژالّيت، جورّن‑كُن س‑لگدّام لّحوكّام د‑يگلدان ف‑سّيبت‑ينو، باش ا‑فلّا‑تاكّام توگّا ءي‑مدّن‑ان ءولا ءي‑ايت‑تميزار ياضني. ءيغ‑كُن‑دحين س‑لمحكاما، اد‑ور‑تاسيم تاغوفت ف‑ما‑را‑تينيم ءولا ما‑ف‑را‑تساولم، اشكو ربّي ا‑راد‑اون‑يمل غ‑تاساعت‑ان ما‑را‑تينيم. ءورد كونّي ا‑را‑يساوال والاينّي را‑د‑زگيگون‑يساوال رّوح ن‑ربّي باباتون. را‑ييلي ما‑را‑ن‑يدحي گماس ءي‑لموت، ييلي ما‑را‑ن‑يدحي يوس، نكرن‑د تاروا ف‑ايت‑دارسن نغن‑تن. را‑كُن‑تكرهون كولّو مدّن ف‑سّيبت ن‑ما‑تگام وينو، والاينّي وانّا ءيبيدّن ءيزگا ار ءيسيگُّرا را‑ينجم. ءيغ‑كُن‑سّرفوفنّ غ‑يات‑تمدينت، روولات س‑تايّاض. لحقّ ا‑راد‑اون‑ينيغ، ءور‑تا‑را‑تكمّلم تابرّاحت غ‑تمدينين ن‑ايت‑ربّي ارد‑د‑وورّيغ نكّي لّي‑يگان يوس ن‑بنادم. «امحضار ءور‑يوگُر امسلمد‑نس. اخدّام ءور‑يوگُر سيديس. را‑يقنعو‑ومحضار ءيغ‑يرواس امسلمد‑نس، ءيقنعو‑وخدّام ءيغ‑يرواس سيديس. والاينّي ءيغ‑ا‑تّينين مدّن ف‑بو‑تگمّي ‹بعل‑زابول› (شيطان)، ءور‑راد‑حشمن ا‑ت‑ينين ف‑ايت‑تگمّي‑نس. «ا‑ور‑زگيسن‑تيكساضم، اشكو كولّو ما‑يرگسن را‑د‑يبان، د‑كولّو ما‑ينتلن را‑يتياوسّان. اينّا‑ياون‑نّيغ غ‑گريّي ديدون، ءينيات‑ت ءي‑كولّو مدّن. اينّا مي تسفلدم غ‑تنتلا، برّحات سرس ف‑يگّي ن‑تگُمّا. ا‑ور‑تيكساضم زغ‑ويلّي نقّانين دّات، اشكو ءور‑ژضارن اد‑هلكن رّوح. والاينّي ءيكساضات زغ‑غوالّي ءيژضارن ا‑يهلك رّوح ءولا دّات غ‑جهنّاما. ءيس‑ور‑ا‑نزّان سين‑واجّاوجن س‑يات‑تقاريتّ؟ والاينّي ءور‑را‑گيسن‑يضر يان س‑واكال ءيغ‑ور‑ت‑يودجي ربّي باباتون. ءيمّا كونّي، زغ‑ينژاضن ن‑يخف‑نّون ءيحاسب‑تن باباتون. ا‑ور‑تيكساضم، اشكو تعزّام دارس ءوگُّار ن‑واجّاوجن گّوتنين. «وانّا ءيتّينين ءيس‑يگا وينو غ‑گر مدّن، ءولا نكّي را‑تّينيغ ءيگا وينو غ‑دار بابا ربّي غ‑يگنّا. ءيمّا وانّا ءيتّينين ءور‑يگي وينو غ‑گر مدّن، را‑تّينيغ ءولا نكّي ءور‑يگي وينو غ‑دار بابا ربّي غ‑يگنّا. «ا‑ور‑تغالم ءيس‑د‑وشكيغ اد‑سكرغ لهنا غ‑دّونيت. ءورد لهنا ا‑راد‑سكرغ والاينّي تيبضيت. ءوشكيغ‑د اد‑بضوغ افروخ د‑باباس، بضوغ تافروخت د‑ينّاس، بضوغ تامغارت د‑تضگُّالت‑نس. هان ايت‑تگمّي‑نّون ا‑را‑يگ ءينوّاشن‑نّون. وانّا ءيتّيرين باباس نغد ءينّاس ءوگُّار‑ينو ءور‑يستهلّا ا‑يگ وينو. وانّا ءيتّيرين ءيويس نغد ءيلّيس ءوگُّار‑ينو ءور‑يستهلّا ا‑يگ وينو. وانّا ءور‑يوسين اگّجدي‑نس ءيمون ديدي، ءور‑يستهلّا ا‑يگ وينو. وانّا ءيغوين غ‑تودرت‑نس را‑ستّ‑يجلو. ءيمّا وانّا ءيجلان تودرت‑نس ف‑سّيبت‑ينو را‑ستّ‑ياف. «وانّا‑كُن‑يقبلن، ءيقبل‑يّي. د‑وانّا‑يّي‑يقبلن، ءيقبل غوالّي‑يّي‑د‑يوزنّ. وانّا ءيسّبرّكن س‑كرا ن‑نّابي ف‑سّيبت ن‑ما‑يگا نّابي، لباراكا ن‑نّابي ا‑راد‑اس‑ييلي. د‑وانّا ءيسّبرّكن س‑يان ءيرضان ربّي ف‑سّيبت ن‑ما‑يرضا ربّي، لباراكا ن‑يان ءيرضان ربّي ا‑راد‑اس‑ييلي. لحقّ ا‑راد‑اون‑ينيغ، وانّا ءيفكان ءي‑يان غ‑يمژّيين‑اد ا‑يسو ف‑سّيبت ن‑ما‑يگا امحضار‑ينو، واخّا‑ياس‑يفكا غير يا‑لّكاس ن‑وامان سمّيضنين، راد‑اس‑تيلي لباراكا‑نس.» لّيغ ءيكمّل ياسوع ءيواليون‑ان لّي‑س‑يوصّا ءيمحضارن‑نس س‑سين د‑مراو، ءيدّو ار‑يتبرّاح ار‑يسّلماد غ‑تمدينين ن‑تمازيرت‑ان. ءيمّا يوحانّا امسدّام ءيلّا غ‑لحبس. لّيغ ءيسفلد ف‑ما‑يسكار لماسيح، يازن كرا ن‑يمحضارن‑نس ا‑ت‑سقسان: «ءيزد كيّين ا‑يگان غوالّي را‑د‑ياشك، نغد ا‑سول‑نتقل س‑يان ياضني؟» ءيساول ياسوع ييني‑اسن: «زايدات تينيم ءي‑يوحانّا ف‑ما‑مي‑تسفلدم ءولا ما‑تژرام. ها‑يبوكاضن ار‑تّيسفيون، ءيكوشامن ار‑فتّون، ءينجدامن ار‑تغوسن، ءيضرضار ار‑سفليدن، غويلّي مّوتنين ار‑د‑نكّرن ءولا ءيمژلاض ار‑تن‑يلكّم لخبار ءيفولكين. امباركي ا‑يگا وانّا ءور‑گيگي‑يوفين ما‑ف‑ا‑ياس‑طيّار.» لّيغ فتان نتني، ءيساول ياسوع ف‑يوحانّا ءي‑مدّن گّوتنين لّي‑د‑فلّاس‑مونّين. ءيسقسا‑تن: «غاكود لّيغ ا‑تّيدوم س‑لخلا ما‑ترام ا‑تژرم؟ ءيزد كرا ن‑تاژّمايت ار‑تّ‑يسّموسّو‑واضو؟ ما‑س‑ا‑تّيدوم؟ ءيزد ا‑تژرم كرا ن‑ورگاز ءيلسان ءيبردان شوانين؟ هان غويلّي دار ءيبردان شوانين، غ‑تگُمّا ن‑يگلدان ا‑غ‑لّان. والاينّي ما‑س‑ا‑تّيدوم؟ ءيس‑ورد يان‑نّابي ا‑تّيريم ا‑تي‑تژرم؟ راد‑اون‑ينيغ، ءيگا يان ءيمقّورن غ‑لانبيا. اشكو يوحانّا ا‑ف‑يتيارا غ‑وارّا ن‑ربّي ‹هاتي راد‑ازنغ ارقّاس‑ينو اد‑اك‑يزوور، ءيجّوجاد‑اك اغاراس‑نّك.› لحقّ ا‑راد‑اون‑ينيغ، ءور‑يلّي غ‑تاروا ن‑تمغارين يان يوگُرن يوحانّا امسدّام. ءيمّا واد كولّو ءيمژّين غ‑تگلديت ن‑يگنّا، يوگُر يوحانّا. «زغ‑ووسّان ن‑يوحانّا امسدّام سول س‑غاسّاد مّاغن مدّن اد‑كشمن س‑تگلديت ن‑يگنّا، ار‑تّيرين ايت‑يميغ ا‑ستّ‑غوين س‑جّهد. كّان‑تّين لانبيا ءولا شّرع ن‑موسا ار‑كولّو‑مالان اوال ن‑ربّي ءي‑مدّن ايلّيغ‑د‑يوشكا يوحانّا. والاينّي ءيغ‑ترام ا‑تامنم اوال‑نسن، تيسّانم ءيزد يوحانّا ا‑يگان ‹نّابي ءيليّا› لّي‑س‑نّان را‑د‑ياشك. وانّا دار ءيمزگان ا‑سرسن‑يسفليد، ءيلّا فلّاس ا‑يسفلد. «والاينّي ما‑س‑راد‑اون‑سّرواسغ تاسوت‑اد؟ ترواس تاروا لّي‑سكيوسنين غ‑سّوق ار‑ن‑اقران ءي‑يمدّوكُّال‑نسن ار‑تّينين ‹نوت‑اون تاعوّاتّ ءور‑ا‑تّحوشم، ناسي‑اون امارگ ءور‑ا‑تالّام.› يوشكا‑د يوحانّا ءور‑ا‑يشتّا ءولا‑دا‑يسّا، ار‑فلّاس‑تّينين ‹ءيلّا گيس يا‑لّجنّ.› اشكغ‑د نكّي لّي‑يگان يوس ن‑بنادم ار‑شتّاغ ار‑سّاغ، ار‑فلّا‑تّينين ‹غواد ءيگا بو‑وديس ءيگ اسكايري، ءيگ امدّاكُّل ن‑ايت‑نكّاس د‑وييّاض أُخشنّين.› والاينّي تاحكيمت ن‑ربّي، كولّو ويلّي سرس سكارنين ار‑تّ‑ين‑تافان تُغژان.» غاكودان ار‑يتژي ياسوع ايت‑تمدينين لّي‑غ‑يسكر كيگان د‑لمعجيزات‑نس، اشكو ءور‑رين اد‑فلن كولّو ماد‑سكارن يُخشن. ييني‑اسن: «تاگوضي ا‑راد‑اون‑ييلي اي‑ايت‑كورازين. تاگوضي ا‑راد‑اون‑ييلي اي‑ايت‑بيتصايدا. هان لمعجيزات لّي‑سكرغ غ‑دارون، مراد ءيس‑تنت‑سكرغ غ‑تمدينين ن‑صور د‑صايدا، ءيكون لسان لخيش غاكودان، گن ءيغد ف‑يخفاون‑نسن، فلن كولّو ماد‑سكارن يُخشن. راد‑اون‑ينيغ، را‑فلّاون‑يشقو‑واسّ لّحساب ءوگُّار ن‑ايت‑صور د‑ايت‑صايدا. ءيمّا كونّي اي‑ايت‑كافرناحوم، ءيس‑ترام ا‑تلكم ءيگنوان؟ هان را‑كُن‑ين‑يلوح ربّي غ‑تدروت ن‑واكال. هان لمعجيزات لّي‑سكرغ غ‑دارون، مراد ءيس‑تنت‑سكرغ غ‑تمدينت ن‑سادوم، ءيكون تقاما سول س‑غاسّاد. راد‑اون‑ينيغ، را‑فلّاون‑يشقو‑واسّ لّحساب ءوگُّار ن‑ايت‑سادوم.» ءيژّالّ ياسوع غ‑تاساعت‑ان ييني: «وا‑بابا، سيديس ن‑يگنّا د‑واكال، ءولغّ‑ك اشكو تسّنتلت تيغاوسيوين‑اد ف‑ايت‑لعاقل د‑لفهمت تسّملت‑تنت ءي‑يبوجاديين. اشكو غمكاد ا‑س‑ترضيت ا‑بابا.» ييني ءيلمّا: «غ‑دّو‑وفوس‑ينو ا‑غ‑يگا بابا كولّو ما‑يلّان. ءور‑يلّي ما‑يسّنّ يوس ن‑ربّي ابلا باباس، ءولا ءيلّا ما‑يسّنّ بابا ابلا نكّي لّي‑يگان يوس د‑ويلّي قصادغ اد‑اسن‑ت‑ملغ. اشكاد‑د سري، ا‑كولّو ويلّي كّاتنين تامّارا اسين تاژايت ءيشقان، سّونفوغ‑اون. گات‑ن فلّاون ءيحلاسن‑ينو ار‑زگيگي‑تّلمادم، اشكو ءيهنّا‑وول‑ينو ءيعمّر س‑صّبر، تافم گيگي اسونفو ءي‑يخف‑نّون. هاتي رخان ءيحلاسن‑ينو ءيفسّوس‑وسيتّي لّي‑راد‑فلّاون‑سرسغ.» يان‑واسّ غ‑ووسّان‑ان، ءيگا اسّ ن‑وسونفو، ءيفتا ياسوع غ‑يگران غ‑گر ءيمندي. ءينغ لاژ ءيمحضارن‑نس، بدون ار‑تكّيسن تيزلفين ار‑شتّان. ژرن‑تن كرا ن‑يفاريسين ءينين‑اس‑د: «ژر ءيمحضارن‑نّك، ار‑سكارن غ‑واسّ ن‑وسونفو غايلّي ءور‑گيس‑يحلّان.» ءيساول ياسوع ييني‑اسن: «ءيس‑ور‑تغريم ف‑داود ما‑يسكر لّيغ‑ت‑باهرا‑ينغا لاژ، نتّا د‑ويلّي ديدس مونّين؟ ءيكشم س‑تگمّي ن‑ربّي ءيشّ اغروم لّي‑يتياوفكان ءي‑ربّي، ءور‑يحلّا ا‑ت‑يشّ نتّا ءولا اسمون‑نس. غير ءينمغورن ن‑تگمّي ن‑ربّي ا‑مي‑يحلّا. ءيس‑ور‑تغريم غ‑شّرع ن‑موسا ف‑مامنك ا‑تخدامن ءينمغورن ن‑تگمّي ن‑ربّي غ‑واسّ ن‑وسونفو؟ والاينّي ءور‑تن‑يژي ربّي ف‑مايان. ءيمّا غيلاد راد‑اون‑ينيغ، ءيلّا غيد ما‑يوگُرن تيگمّي ن‑ربّي. ءيتيارا غ‑وارّا ن‑ربّي ‹ريغ دارون لحنانت، ءورد تيغرسي.› مراد ءيس‑تسّنم لمعنا ن‑واوال‑ان، ءيكون ءور‑تحكامّ ف‑غويد ءور‑سكيرنين كرا يُخشنّ. ءيمّا نكّي لّي‑يگان يوس ن‑بنادم، گيغ سيديس ن‑واسّ ن‑وسونفو.» ءيفتو ياسوع ءيكشم س‑تگمّي ن‑تژالّيت. ءيلّا غين يان‑ورگاز ءيمّوت‑اس‑وفوس. ءيلين ءولا كرا ن‑مدّن ران اد‑افن غ‑ياسوع ما‑س‑ا‑ياس‑صراضن. سقسان‑ت: «ءيس‑يحلّا ا‑تجّوجّيت غ‑واسّ ن‑وسونفو؟» ءيساول ياسوع ييني‑اسن: «ءيس‑گيگون‑يلّا ما‑يطّافن القّاغ ءيضر‑اس‑ن غ‑وگضي غ‑واسّ ن‑وسونفو ءيفل‑ت غين؟ ءيس‑ور‑را‑ت‑يد‑يغوي ياسي‑ت‑يد؟ والاينّي ءيعزّا بنادم دار ربّي ءوگُّار ن‑ولقّاغ. هاتي ءيحلّا ا‑نسكار افولكي غ‑واسّ ن‑وسونفو.» ءيساول ءيلمّا س‑ورگاز‑لّي ييني‑اس: «مدي‑د افوس‑نّك.» ءيمدي‑اس‑ت‑يد س‑يجّي ءيدوس زوند وايّاض. فّوغن ءيفاريسين غاكودان، ار‑تمشاوارن ءي‑نگراتسن ف‑مامنك ا‑راد‑نغن ياسوع. ءيسّن ياسوع ماد‑قصادن، ءيفتو زغ‑غين. ضفورن‑ت مدّن گّوتنين، ءيجّوجّي كولّو ما‑غ‑لّانت‑تموضان، ييني‑اسن ا‑ور‑فلّاس‑ساوالن. غمكاد ا‑س‑يووفا ما‑ينّا ربّي غايد ءيزرين ف‑يمي ن‑نّابي ءيشاعيا ءينّا: «هاي‑اخدّام‑ينو لّي‑ژليغ. نتّان ا‑داري‑يعزّان، فرحغ سرس باهرا. را‑ت‑عمّرغ س‑رّوح‑ينو، ار‑يتبرّاح ءي‑كولّو ايت‑تميزار س‑لحقّ لّي‑راد‑اسن‑ييلي. ءور‑را‑يتجاحاد ءولا‑دا‑يتغوّات. ءور‑را‑يتالّ اوال‑نس غ‑تسواك. تاژّمايت نّا‑يبرين، ءور‑را‑ستّ‑يبّي. ءولا تيفتيلت نّا‑يسكارن اگّو، ءور‑را‑ستّ‑يسّخسي، ارد ءيزّگا لحقّ غ‑كرايگاتّ ماني. غ‑يسم‑نس ا‑غ‑را‑ن‑رجون كولّو ايت‑تميزار.» ءوشكان‑د كرا ن‑مدّن غ‑ووسّان‑ان، اوين‑اس‑د يان‑ورگاز ءيبوكضن، ءيگ اژنژوم ييلي گيس يا‑لّجنّ. ءيجّوجّي‑ت ياسوع، يوورّي‑وژنژوم ار‑يساوال ييسفيو. گّوتن غويلّي‑ت‑ژرانين، ءيضر‑اسن لعجب كولّوتن ار‑سّمقسان ءي‑نگراتسن ار‑تّينين: «ءيزد غواد ا‑يگان يوس ن‑داود لّي‑س‑ا‑نتقل؟» ءيمّا ءيفاريسين، لّيغ سفلدن ف‑ما‑يسكر ار‑تّينين: «غواد، غير س‑تحكيمت ن‑بعل‑زابول اگلّيد لّجنون ا‑س‑ا‑يسّوفوغ لجنون.» ءيمّا ياسوع ءيسّن ءيسوينگيمن‑نسن ييني‑اسن: «تاگلديت نّا‑يتمّاغن د‑يخف‑نس را‑تخلو. تامدينت نغد تيگمّي نّا‑يتمّاغن د‑يخف‑نس ءور‑تژضار ا‑تقاما. ءولا شيطان، ءيغ‑ا‑يسّوفوغ شيطان، هاتي ار‑يتمّاغ د‑يخف‑نس. مامنك ا‑را‑تقاما‑تگلديت‑نس؟ والاينّي ءيغد س‑تحكيمت ن‑بعل‑زابول ا‑س‑ا‑سّوفوغّ لجنون، ءينيات‑يّي ما‑س‑ا‑تن‑سّوفوغن ايت‑دارون؟ نتني ا‑راد‑اون‑يمل ءيس‑تجلام. والاينّي ءيغد س‑رّوح ن‑ربّي ا‑س‑ا‑سّوفوغّ لجنون، ءيسّانات ءيس‑د‑دارون‑توشكا‑تگلديت ن‑ربّي. «ما‑يژضارن ا‑يكشم س‑تگمّي ن‑يان ءيدوسن ا‑د‑ياكُر ايدا‑نس ءيغ‑ور‑زوار‑يكرس غوالّي ءيدوسن؟ ءيغ‑ت‑يكرس، غاكودان ا‑راد‑اس‑د‑ياكُر ايدا‑نس. هان وانّا ءور‑ديدي‑يلّين، ءيگا ضيضّ‑ينو. د‑وانّا ءور‑ديدي‑يسّمونون، ار‑يزّمزار. ف‑ماياد ا‑ف‑راد‑اون‑ينيغ، كولّو دّنوب ن‑بنادم ءولا كولّو تيرگّام نّا‑س‑رگمن ربّي، ءيژضار اد‑اسن‑يصامح فلّاسن، والاينّي يان ءيرگّمن رّوح لقودوس ءور‑سار‑اس‑فلّاس‑يصامح. وانّا ءيساولن غ‑يوس ن‑بنادم، ءيژضار ربّي اد‑اس‑يصامح. والاينّي يان ءيرگّمن رّوح لقودوس، ءور‑راد‑اس‑يصامح، لا غ‑دّونيت ءولا غ‑ليخرت. «ءيغ‑تفولكي لغلّت، تيسّانم ءيس‑تفولكي‑تسغارت. ءيغ‑تُخشن لغلّت، تيسّانم ءيس‑تُخشن‑تسغارت. اشكو زغ‑لغلّت‑نس ا‑زغ‑ا‑تّياوسّان‑تسغارت. وا‑تاروا ن‑يفاغرن، مامنك ا‑را‑تيژضارم ا‑تساوالم س‑وفولكي د‑كونّي تُخشنم؟ هاتي اينّا‑س‑يعمّر‑وول ا‑س‑ا‑د‑يساوال ءيمي. يان ءيفولكين، ار‑د‑يسّوفوغ ما‑يفولكين زغ‑لخزين ن‑وفولكي‑نس. ءيمّا يان يُخشنّ، ار‑د‑يسّوفوغ ما‑يُخشنّ زغ‑لخزين لّخُشانت‑نس. راد‑اون‑ينيغ، راد‑رارن مدّن لحساب غ‑واسّ لّحوكم ف‑كرايگاتّ اوال ءيخوان لّي‑س‑نّان. ف‑يواليون‑نّون ا‑ف‑راد‑اون‑ييلي رّضا. ف‑يواليون‑نّون ا‑ف‑راد‑اون‑ييلي لهالاك.» ساولن‑د ءيلمّا كرا ن‑يمسلمدن ن‑شّرع د‑يفاريسين ءينين‑اس: «واي‑امسلمد، نرا ا‑دارك‑نژر كرا لّمعجيزت اد‑اغ‑تگ تاماتارت ن‑يزد ربّي ا‑ك‑يد‑يوزنّ.» ءيمّا نتّا ءيرور‑اسن: «تاسوت يُخشنّ ءيفسادن اياد، تضالب تاماتارت. ءور‑راد‑اس‑تّياوفكا كرا ن‑تماتارت ابلا تاماتارت ن‑نّابي يونا. غمكلّي‑ن‑يكّا يونا كراض‑ووسّان د‑كراض‑واضان غ‑واحليگ ن‑وسلم ءيمقّورن، غمكان ا‑راد‑يّي‑يجرو ءولا نكّي لّي‑يگان يوس ن‑بنادم. را‑ن‑كغ كراض‑ووسّان د‑كراض‑واضان غ‑تدروت ن‑واكال. والاينّي راد‑نكرن ايت‑نينوا غ‑واسّ لّحساب غ‑گر مدّن ن‑تاسوت‑اد، اشتكّان سرسن، اشكو فلن نتني كولّو ماد‑سكارن يُخشن غاكود لّيغ سفلدن ءي‑تبرّاحت ن‑يونا. ءيمّا غيلاد ءيلّا غيد ما‑يوگُرن يونا. را‑تنكر‑تگلّيتّ لّجانوب غ‑واسّ لّحساب غ‑گر مدّن ن‑تاسوت‑اد، تاشتكّا سرسن، اشكو توشكا‑د نتّات زغ‑تّمي ن‑دّونيت ا‑تسفلد ءي‑تحكيمت ن‑سوليمان. ءيمّا غيلاد ءيلّا غيد ما‑يوگُرن سوليمان. «ءيغ‑يفّوغ لجنّ زغ‑كرا ن‑بنادم، را‑يزراي غ‑لخلا غ‑ور‑لّين‑وامان، ار‑يسيگّيل س‑مانيغ ا‑يزدّغ. ءيغ‑ور‑يوفي مان، را‑ييني د‑يخف‑نس: ‹راد‑وورّيغ س‑تگمّي لّي‑غ‑تّين‑كّيغ.› ياشك‑يد ياف‑د تيگمّي تخوا تّياراس تنگادّا. ءيدّو ءيلمّا ياوي‑د ديدس سّا لّجنون ياضني لّي‑ت‑يوگُرن غ‑لخُشانت، كشمن كولّوتن زدغن غ‑ورگاز‑ان ارد يوورّي ءيسيگُّرا‑نس يُخشن ف‑يسيزوار‑نس. غمكاد ا‑را‑ييلي ءي‑تاسوت‑اد يُخشنّ.» ار‑سول‑يساوال ياسوع س‑دي‑توشكا ءينّاس د‑ايتماس، بيدّن‑د غ‑برّا ضالبن ا‑ديدس‑ساولن. ييني‑اس‑د يان زغ‑گر ويلّي‑اس‑سفليدنين: «ها‑ينّاك د‑ايتماك بيدّن‑ين غ‑برّا، ضالبن ا‑ديدك‑ساولن.» ءيمّا نتّا ءينّا‑ياسن: «ما‑يگان ءينّا ءولا ايتما؟» ءيمدي افوس‑نس س‑دار ءيمحضارن‑نس ييني‑اسن: «ها‑ينّا د‑ايتما. اشكو وانّا ءيسكارن ما‑يرا بابا ربّي ن‑يگنّا، نتّان ا‑يگان گما، ءيگ ءولّتما، ءيگ ءينّا.» غاسّان ءيفّوغ ياسوع زغ‑تگمّي، ءيفتو ءيگاور غ‑تاما ن‑ومدا. مونّ‑د فلّاس مدّن گّوتنين ايلّيغ‑ت‑يد‑يقّان ا‑يكشم س‑يات تاناوت. ءيسكيوس گيس، بيدّن مدّن‑ان كولّوتن غ‑تاما ن‑وامان. ءيبدو ار‑تن‑يسّلماد س‑لمعني ف‑كيگان د‑تغاوسيوين. ييني‑اسن: «هاي‑افلّاح ءيفّوغ ا‑ن‑يلوح امود. لّيغ‑ت‑يلوح ءيضر‑ن كرا غ‑وغاراس اشكين‑د ءيگضاض گرون‑ت. ءيضر‑ن كرا غ‑گر ءيژران غ‑يلّيغ ءيدروس‑واكال، ءيمغي‑د حاينا اشكو ءور‑ت‑باهرا‑يديل‑واكال. والاينّي لّيغ‑دي‑تغلي تافوكت تجدر‑ت، ييقار اشكو ءور دارس ءيژوران. ءيضر‑ن كرا غ‑وزگُّار، ءيغلي د‑وزگُّار ءيشّقاجّي‑ت. ءيضر‑ن كرا غ‑واكال ءيفولكين ءيفك صّابت. ءيفك يان ميّا، ءيفك يان سضيص ءيد‑مراو، ءيفك يان كراض ءيد‑مراو. وانّا دار ءيمزگان ا‑سرسن‑يسفليد، ءيلّا فلّاس ا‑يسفلد.» اشكين‑د دارس ءيمحضارن‑نس سقسان‑ت: «ماخ ايلّيغ ا‑سرسن‑تساوالت س‑لمعني؟» ييني‑اسن ياسوع: «كونّي ءيتياوفكا‑ياون ا‑تيسّانم ف‑تگلديت ن‑ربّي ما‑ينتلن، ءيمّا نتني ءور‑اسن‑يتياوفكا. اشكو وانّا دار ءيلّا، راد‑اس‑يزايد ربّي، ييلي‑اس ءوگُّار. ءيمّا وانّا ءور‑دار‑يلّي، راد‑اس‑يكّيس ءولا مايلّي دارس ءيلّان. ماياد ا‑ف‑ا‑سرسن‑ساوالغ س‑لمعني. اشكو ار‑تمنادن ءور‑ا‑ژرّان يات، ار‑سفليدن ءور‑ا‑تسلّان ءي‑يات ءولا‑دا‑تفهامن يات. ءيلّا گيسن غايلّي‑ف‑ينّا ربّي ف‑يمي ن‑نّابي ءيشاعيا ءينّا: ‹راد‑باهرا‑تسفليدم والاينّي ءور‑را‑تفهمّ ما‑مي‑تسفلدم. راد‑باهرا‑تّمنادم والاينّي ءور‑را‑تيسّانم ما‑تمنادم. وورّين مدّن‑ان ءيقّور ءيخف‑نسن، ژّاين ءيمزگان‑نسن، قّنّت‑والّن‑نسن. ءور‑رين اد‑ژرنت‑والّن‑نسن ءولا سفلدن ءيمزگان‑نسن ءولا فهمن غ‑يخف‑نسن. ءور‑رين اد‑د‑سري‑وورّين ا‑تن‑جّوجّيغ.› ءيمّا كونّي، تيمباركيّين اد‑گانت‑والّن‑نّون اشكو ار‑ژرّانت. ءيمباركين اد‑گان ءيمزگان‑نّون اشكو ار‑سفليدن. لحقّ ا‑راد‑اون‑ينيغ، گّوتن لانبيا د‑مدّن رضانين ربّي ژوژضن اد‑ژرن مايد تژرّام والاينّي ءور‑ت‑ژرين، ژوژضن اد‑سفلدن ءي‑مايد مي تسفليدم والاينّي ءور‑اس‑سفلدن. «غمكاد ا‑تگا لمعنا ن‑وفلّاح. امود لّي‑يضرن غ‑وغاراس، ءيگا نتّا زوند يان ءيسفلدن ءي‑واوال ن‑تگلديت ن‑يگنّا ءور‑ت‑يفهيم. ياشك‑يد ءيبليس ءيكّيس‑اس اوال لّي‑يلّان غ‑يخف‑نس. ءيمّا امود لّي‑يضرن غ‑گر ءيژران، ءيگا نتّا زوند يان ءيسفلدن ءي‑واوال يامژ‑ت حاينا ءيفرح سرس، والاينّي ءور‑يكشيم‑واوال‑ان س‑وول‑نس. ءيقاما غير كرا ن‑ووسّان ارد تيلي تاسّاست نغد تارفوفنت ف‑سّيبت ن‑واوال س‑يكنوكي. ءيمّا امود لّي‑يضرن غ‑وزگُّار، ءيگا نتّا زوند يان ءيسفلدن ءي‑واوال، والاينّي ءيدّا ياسي تيغوفيوين ن‑دّونيت ءيلهو س‑وايدا. غايان ا‑يشّقاجّين اوال ايلّيغ ءور‑د‑ييوي صّابت. والاينّي امود لّي‑يضرن غ‑واكال ءيفولكين، ءيگا نتّا زوند يان ءيسفلدن ءي‑واوال ءيفهم‑ت، ءيفك صّابت. را‑ييلي ما‑يفكان ميّا، ييلي ما‑يفكان سضيص ءيد‑مراو، ييلي ما‑يفكان كراض ءيد‑مراو.» ءيزايد ياسوع يوت‑اسن لمعنا‑ياد ياضني ييني‑اسن: «تاگلديت ن‑يگنّا تگا زوند يان‑ورگاز ءيفتا ءيلوح‑ن امود ءيفولكين غ‑يگر‑نس. لّيغ ءيگن غ‑ييض ياشك‑يد يان‑ونوّاش‑نس، ءيلوح‑ن وازكّون غ‑گر ءيردن، ءيدّو ءيفل‑ت. لّيغ‑د‑مغين ءيردن سّوفغن تيزلفين، ءيمغي ديدسن وازكّون. اشكين‑د ءيخدّامن س‑دار باب ن‑يگر ءينين‑اس: ‹وا‑سيدي، ءيس‑ورد امود ءيفولكين ا‑تگيت غ‑يگر‑نّك؟ ماني‑د‑يكّا وازكّون‑اد؟› ييني‑اسن: ‹كرا ن‑ونوّاش ا‑يسكرن غاياد.› ءينين‑اس ءيخدّامن: ‹ءيس‑تريت ا‑ندّو نسوسّي نسّوكف وازكّون‑ان؟› ءيرار‑اسن: ‹ءوهو، ا‑ور‑تسّوكفم وازكّون ا‑ور‑يميل تسّوكفم ديدس ءيردن. ادجات‑تن اد‑كولّو‑مقّورن ارد تروح‑تمگرا. غاكودان راد‑ينيغ ءي‑يشوّالن: سّمونات‑زوار وازكّون تگم‑ت د‑تاگُّاتين باش ا‑يجدر، تزايدم ءيلمّا تمگرم ءيردن تسّمونم‑تن‑د غ‑وحانو‑نو.› » يوت‑اسن لمعنا‑ياد ياضني ييني‑اسن: «تاگلديت ن‑يگنّا تگا زوند يات تاقّايت لّخردل، ييوي‑تّ يان‑ورگاز ءيژّو‑تّ غ‑واكال‑نس. نتّات تمژّي ف‑كولّو تاقّايين لّي‑لّانين، والاينّي ءيغ‑دي‑تمغي را‑تاگُر ءيشدّران كولّوتن، توورّي تگ تاسغارت. ار‑دي‑تّاشكين ءيگضاض ن‑يگنوان ار‑زدّغن غ‑گر‑تصطّوين‑نس.» يوت‑اسن‑داغ لمعنا‑ياد ياضني ييني‑اسن: «تاگلديت ن‑يگنّا تگا زوند تاخميرت لّي‑دي‑توسي يات‑تمغارت تگ‑تّ‑ين غ‑كراطّ لعبرات مقّورنين ن‑وگّورن، تسّكتي لعجين كولّوت.» كولّو ماياد، س‑لمعني ا‑س‑ت‑ينّا ياسوع ءي‑مدّن گّوتنين لّي‑د‑فلّاس‑مونّين. ءور‑ا‑سرسن‑يساوال ابلا س‑لمعني. غمكاد ا‑س‑يووفا‑واوال ن‑نّابي لّي‑ينّان: «س‑لمعني ا‑س‑راد‑اسن‑ساولغ، ملغ‑اسن ما‑ينتلن زغ‑يسيزوار ن‑دّونيت.» غاكودان ءيفل ياسوع مدّن‑ان ءيكشم س‑تگمّي، اشكين‑د دارس ءيمحضارن‑نس ءينين‑اس: «مل‑اغ ما‑تقصادت س‑لمعنا ن‑وازكّون غ‑يگر.» ءيساول ياسوع ييني‑اسن: «غوالّي ءيلوحن امود ءيفولكين ءيگا‑ت يوس ن‑بنادم، ءيگر تگا‑ت دّونيت. اقّاين ن‑وامود ءيفولكين گان‑تن ايت‑تگلديت ن‑يگنّا، ءيمّا اقّاين ن‑وازكّون گان‑تن ايت‑يبليس. انوّاش لّي‑تن‑ين‑يلوحن ءيگا‑ت ءيبليس. تامگرا تگا ءيسيگُّرا ن‑دّونيت، ءيشوّالن گان لمالايكا. غمكلّي سّمونّ وازكّون ا‑يجدر غ‑لعافيت، غمكان ا‑را‑يجرو غ‑يسيگُّرا ن‑دّونيت. اشكو يوس ن‑بنادم را‑يازن لمالايكا‑نس، سّيتّين زغ‑تگلديت‑نس كولّو ما‑يسّطارن مدّن ءولا كولّو ما‑يسكارن لخُشانت، لوحن‑تن‑ين غ‑وفارنو لّعافيت. غين ا‑غ‑راد‑الّان ار‑تگژاژن ءوخسان‑نسن. ءيمّا غويلّي‑ف‑يرضا ربّي، غاكودان ا‑راد‑يسفيون زوند تافوكت غ‑تگلديت ن‑باباتسن. وانّا دار ءيمزگان ا‑سرسن‑يسفليد، ءيلّا فلّاس ا‑يسفلد. «تاگلديت ن‑يگنّا تگا زوند لكنز ءيتياومضالن غ‑يگر، ياف‑ت‑ين يان‑ورگاز ءيحضو‑ت‑داغ. ءيدّو ءيفرح باهرا، ءيزّنز كولّو ما‑دارس‑يلّان، ءيسغ ءيگر‑ان. «تاگلديت ن‑يگنّا تگا زوند تّاجر ار‑يسيگّيل س‑لجوهر ءيغُلان. لّيغ يوفا يات تالجوهرت ءيگّوت‑باهرا‑واتيگ‑نس، ءيدّو ءيزّنز كولّو ما‑دارس‑يلّان ءيسغ تالجوهرت‑ان. «تاگلديت ن‑يگنّا تگا زوند شّبكت، لوحن‑تّ‑ين ءينگُمارن غ‑ومدا سّمونّ‑د گيس كرايگاتّ رّهض ن‑يسلمان. لّيغ تعمّر شّبكت اوين‑تّ‑يد س‑واكال، گاورن ار‑ژلاين غويلّي شوانين ار‑تن‑تگان غ‑تيسلّا، ءيمّا غويلّي أُخشنّين لوحن‑تن‑ين. غمكان ا‑را‑يجرو غ‑يسيگُّرا ن‑دّونيت. راد‑دّون لمالايكا ژلين مدّن أُخشنّين زغ‑گر ويلّي رضانين ربّي، لوحن‑تن‑ين غ‑وفارنو لّعافيت. غين ا‑غ‑راد‑الّان ار‑تگژاژن ءوخسان‑نسن.» ييني‑اسن ياسوع: «ءيس‑تفهمّ كولّو تيغاوسيوين‑اد غيلا؟» ءينين‑اس: «نفهم‑تنت.» ءيزايد ييني‑اسن: «كرايگاتّ امسلمد لّي‑يلمدن ف‑تگلديت ن‑يگنّا، ءيگا زوند بو‑تگمّي لّي‑د‑يسّوفوغن زغ‑لخزين‑نس ما‑يگان لّجديد ءولا ما‑يگان اقديم.» لّيغ ءيكمّل ياسوع كولّو لمعني‑اد، ءيفتو زغ‑غين، يوورّي‑د س‑تمازيرت‑نس. ار‑يسّلماد غ‑تگمّي ن‑تژالّيت، ار‑گيس‑تعجّابن مدّن ار‑تّينين: «ارگاز‑اد، ماني‑د‑كولّو‑سرس‑تكّا‑تحكيمت‑اد ءولا لمعجيزات‑اد ءيسكار؟ ءيس‑ورد يوس ن‑ونجّار اياد؟ ءيس‑ورد ماريام ا‑يگان ءينّاس؟ ءيس‑ورد ياعقوب د‑يوسف د‑سيمعان د‑ياهودا ا‑يگان ايتماس؟ ءيس‑ورد ءيستماس كولّوتنت ايد‑ديدنّغ‑يلّان غيد؟ ءيمّا كولّو ماياد، ماني‑د‑سرس‑يكّا؟» نتني بزگن فلّاس. ءيمّا ياسوع ءينّا‑ياسن: «نّابي نّا‑يلّان ار‑تي‑توقّارن مدّن، والاينّي ءور‑ا‑تي‑توقّارن ايت‑تمازيرت‑نس د‑ايت‑تگمّي‑نس.» ءور‑غين‑يسكير كرا لّمعجيزات گّوتنين، اشكو ءور‑رين اد‑سرس‑امنّ. غ‑ووسّان‑ان ءيسفلد‑وگلّيد هيرودوس ف‑كولّو ما‑يسكار ياسوع. ييني فلّاس ءي‑يخدّامن‑نس: «يوحانّا امسدّام اياد، ءينكر‑د زغ‑لموت. مايان ا‑ف‑گيس‑لّانت لقوّات‑اد.» اشكو هيرودوس ا‑يوزنّ اد‑امژن يوحانّا كرسن‑ت لوحن‑ت‑ين غ‑لحبس ف‑سّيبت ن‑هيروديّا تامغارت ن‑گماس فيليبّوس. اشكو يوحانّا ءيكّا‑تّين ار‑يتّيني ءي‑هيرودوس: «ءور‑اك‑يحلّا ا‑تاويت تامغارت ن‑گماك.» ييري هيرودوس ا‑ينغ يوحانّا والاينّي ءيكسوض زغ‑مدّن اشكو ار‑كولّو‑تّينين ءيزد يوحانّا يان‑نّابي ا‑يگا. والاينّي لّيغ‑د‑يروح‑واسّ لّي‑غ‑يلول هيرودوس، تكشم‑ن ءيلّيس ن‑هيروديّا ار‑تّحوش غ‑لگدّام ن‑هيرودوس د‑ويلّي ديدس گاورنين، تسّفراح‑ت. ءيساول س‑تفروخت ءيگّالّ‑اس ارد‑اس‑يفك اينّا تضالب. تفّوغ نتّات تسقسا‑ن ءينّاس، توورّي‑د تيني‑اس: «فك‑يّي‑د غ‑يات‑تقصرييت ءيخف ن‑يوحانّا امسدّام.» طيّر‑اس ءي‑وگلّيد باهرا، والاينّي ف‑سّيبت ن‑تگالّيت لّي‑س‑يگّولّا غ‑لگدّام ن‑ينبگيون‑نس يوصّا اد‑اس‑يتياوفكا. يازن اد‑بّين ءيخف ن‑يوحانّا غ‑لحبس. اوين‑د ءيخف‑نس غ‑يات‑تقصرييت، ءيفك‑ت ءي‑تفروخت تاوي‑ت‑تفروخت ءي‑ينّاس. اشكين‑د ءيلمّا ءيمحضارن ن‑يوحانّا، اوين دّات‑نس مضلن‑تّ‑ين. دّون ءينين‑ت ءي‑ياسوع. لّيغ ءيسفلد ياسوع ف‑مايد ءيجران، ءيفتو ءيسّودو غ‑يات تاناوت س‑يان‑ودغار غ‑ور‑يلّي يان. سفلدن مدّن ءيس‑يدّا، فتون ف‑وضار زغ‑يدوران‑ان ضفورن‑ت. لّيغ ءيفّوغ زغ‑تاناوت ءيژر‑ن كيگان د‑مدّن، قامان گيس باهرا، ءيجّوجّي‑اسن ءيموضان‑نسن. لّيغ تاكمور تاكُيا ن‑تافوكت اشكين‑د دارس ءيمحضارن‑نس ءينين‑اس: «ياغ‑وزال، ءور‑يلّي يات غ‑لخلا‑ياد. ازن مدّن اد‑دّون س‑يدوران‑ان اد‑د‑سغن ماد‑شتّان.» ءيساول ياسوع ييني‑اسن: «ءور‑تن‑د‑يقّان اد‑دّون. فكات‑اسن كونّي ماد‑شتّان.» ءينين‑اس: «ءور‑دارنّغ غير سمّوست‑تنگُال د‑سنات‑تسلمين.» ييني‑اسن: «اويات‑تند‑د س‑داري.» يوصّا مدّن‑ان گّوتنين اد‑گاورن غ‑توگا. ياسي سمّوست‑تنگُال‑لّي د‑تسلمين‑لّي س‑سنات، يالّ الّن‑نس س‑يگنوان ءيشكر ربّي. ءيبّي تينگُال ءيفك‑تنت ءي‑يمحضارن‑نس. بضون‑تنت ءيمحضارن ف‑مدّن‑ان گّوتنين. شّن كولّو ايلّيغ شبعان. سّمونّ‑د توفّاژ لّي‑د‑قامانين، عمّرن سنات د‑مراوت ن‑تاسلّيت. غويلّي شّانين راد‑گن ما‑يتگّان سمّوس ءيد‑والف ن‑ورگاز، ءيلينت ءولا تيمغارين د‑تاروا مژّينين. ييني ياسوع ءيلمّا ءي‑يمحضارن‑نس اد‑كشمن س‑تاناوت زوورن‑ت س‑تسگا ياضني ن‑ومدا. ءيمّا نتّا ءيقاما غين ا‑يمسافاض د‑مدّن. تيغوردين ن‑ما‑يمسافاض ياسوع د‑مدّن‑ان، ءيغلي س‑يان‑وورير واحدوت ا‑غين‑يژّالّ. ضرند‑د تيلّاس، سول ءيلّا غين واحدوت. ءيمّا ءيمحضارن‑نس غ‑تاساعت‑ان، تاگّوگ‑ن تاناوت‑نسن ف‑واكال. ار‑تّ‑كّاتنت تاضانگيوين، ار‑تّ‑يترارا‑واضو تيغوردين. غاكودان غ‑طوژّونت ن‑ييض ياشك‑يد دارسن ياسوع ءيفتو ف‑يگّي ن‑وامان. لّيغ‑ت‑ژران ءيمحضارن‑نس ءيفتا ف‑يگّي ن‑وامان ءيكساضن باهرا، گن تاغويّيت ءينين: «كرا ن‑واغُژن اياد.» غاكودان ءيساول‑د ياسوع ييني‑اسن: «اد‑ور‑تيكساضم. تهنّايات، نكّين ايا.» ييني‑اس بطرُس: «وا‑سيدي، ءيغد كيّي ايان، امر‑يّي ا‑ن‑دارك‑فتوغ ف‑يگّي ن‑وامان.» ييني‑اس‑د: «اشك‑يد.» ءيفّوغ بطرُس زغ‑تاناوت ءيفتو ف‑يگّي ن‑وامان س‑دار ياسوع. والاينّي ءيژرا اضو ءيتجهّد ييكساض، س‑ا‑يتدّم غ‑وامان. ءيغر ءي‑ياسوع ييني‑اس: «وا‑سيدي، جّنجم‑يّي.» غاكودان ءيمدي‑اس‑ن ياسوع افوس‑نس، يامژ گيس ييني‑اس: «ءيس‑ور‑تومينت؟ ماخ ايلّيغ تشكّات؟» غلين ءيلمّا س‑تاناوت، ءيبّي‑ن‑واضو. سجدن‑اس غويلّي لّانين غ‑تاناوت ار‑تّينين: «س‑صّاحت كيّي تگيت يوس ن‑ربّي.» لّيغ بّين امدا لكمن تامازيرت ن‑گانيساراط. اكُزن‑ت مدّن ن‑غين، سّوفغن لخبار س‑كولّو تيسگيو ن‑تمازيرت‑ان. ار‑اس‑دي‑تاوين كولّو ما‑غ‑لّانت‑تموضان. ار‑زگيس‑تضالابن باهرا ا‑يادج ءيموضان‑نسن اد‑اس‑گّرن، واخّا غير ءي‑تاما ن‑تملسيت‑نس. كولّو ماد‑اس‑يگّرن ءيجّي. اشكين‑د كرا ن‑يفاريسين د‑يمسلمدن ن‑شّرع زغ‑تمدينت ن‑وروشاليم س‑دار ياسوع. سقسان‑ت: «ماخ ايلّيغ ا‑تفّوغن ءيمحضارن‑نّك زغ‑لعادا ن‑يمزوورا‑نّغ لّي‑زرينين؟ ها‑نتني ار‑شتّان بلا‑دا‑سّغوسن ءيفاسّن‑نسن س‑يسيريد لّي‑تن‑د‑يقّانّ.» ءيساول ياسوع ييني‑اسن: «ءيمّا كونّي، ماخ ايلّيغ ا‑تّفّوغم زغ‑لوصيت ن‑ربّي باش ا‑تسكارم س‑لعادا‑نّون؟ هان ربّي ا‑ينّان ‹اوي‑تّ غ‑باباك د‑ينّاك.› ييني‑داغ ‹وانّا ءيرگمن باباس نغد ءينّاس ءيلّا فلّاس ا‑يمّت.› ءيمّا كونّي، ءيغ‑ينّا كرا ن‑يان ءي‑باباس نغد ءينّاس ‹فكيغ ءي‑ربّي مايلّي ترام اد‑اون‑ت‑فكغ،› ءيغ‑ينّا اوال‑اد ار‑اس‑تّينيم ءور‑سول‑ت‑يخصّا ا‑ستّ‑يتاوي غ‑باباس. غمكاد ا‑س‑تونفم ءي‑واوال ن‑ربّي س‑لعادا‑نّون. وا‑يد‑بو‑سين‑وودماون، س‑لحقّ ا‑س‑فلّاون‑ينّا ربّي ف‑يمي ن‑نّابي ءيشاعيا، ءينّا ‹مدّن‑اد ار‑يّي‑تالغن س‑يلس‑نسن، ءيمّا ءول‑نسن ياگّوگ‑ن فلّا. بلا لفايتّ ا‑يّي‑تعبادن اشكو ءور‑ا‑سّلمادن غ‑ولمّود‑نسن ابلا تينباضين ن‑بنادم.› » ءيغر‑د ياسوع ءي‑مدّن س‑دارس ييني‑اسن: «سفلدات‑يّي ا‑تيسّانم. ءورد مايلّي ءيكشّمن زغ‑يمي ن‑بنادم ا‑ت‑يسّحرامن. والاينّي غايلّي‑د‑يتفّوغن زغ‑يمي‑نس، نتّان ا‑ت‑يسّحرامن.» اشكين‑د دارس ءيلمّا ءيمحضارن‑نس ءينين‑اس: «ءيس‑ور‑تسّينت ءيس‑تّي‑تسّطيّرت ءي‑يفاريسين س‑واوال‑اد؟» ءيساول ياسوع ييني‑اسن: «را‑ياكوف كود اسغار نّا‑ور‑يژّي بابا ربّي ن‑يگنّا. غير تهنّايات زغ‑گيسن. نتني گان ءيبوكاضن ار‑زگّورون ءي‑يبوكاضن. ءيغ‑يزوار‑وبوكاض ءي‑وايّاض را‑ن‑ضرن س‑سين غ‑وگضي.» ييني‑اس بطرُس: «مل‑اغ ما‑تقصادت س‑لمعنا‑ياد.» ءيرار‑اسن ياسوع: «ءيزد ءولا كونّي ءور‑تا‑تفهيمّ؟ ءيس‑ور‑تسّينم ءيزد كولّو ما‑يكشّمن زغ‑يمي ن‑بنادم ار‑يزراي زغ‑واحليگ‑نس س‑لخلا؟ ءيمّا غايلّي‑د‑يتفّوغن زغ‑يمي، ءول‑نس ا‑د‑يتكّا. نتّان ا‑يسّحرامن بنادم. اشكو زغ‑وول‑نس ا‑زغ‑ا‑دي‑تفّوغن ءيسوينگيمن أُخشنّين ءولا تاناغا د‑زّنا د‑لفساد د‑تمخّارت د‑توگّا ن‑تكركاس د‑ترگّام. غويد ا‑يسّحرامن بنادم. ءيمّا يان ءيشّان ءور‑يسيرد ءيفاسّن‑نس، ءور‑را‑ت‑يسّحرم مايان.» ءينكر ياسوع ءيفّوغ زغ‑تمازيرت ن‑ايت‑ربّي ءيفتو س‑تسگا ن‑صور د‑صايدا. تاشك‑يد دارس يات‑تمغارت ءولّت‑تمازيرت‑ان ن‑كانعان، ار‑اس‑دي‑تاقرا ار‑تّيني: «حنّو زغ‑گيگي ا‑يوس ن‑داود. ها‑يلّي ءيلّا گيس يا‑لّجنّ، تمرّت باهرا.» ءيمّا ياسوع ءيفسّا، ءور‑اس‑ينّي يات. مونّ‑د ءيلمّا ءيمحضارن‑نس ءينين‑اس: «سّمسر‑تّ ا‑سيدي، اشكو سول‑اغ‑تضفار ار‑تسّغويّو.» ءيساول سرس ياسوع ييني‑اس: «غير ءولّي ن‑تووروت ءيجلان لّي‑يگان ايت‑ربّي ا‑ف‑دي‑تيازانغ.» ءيمّا نتّات توشكا‑د تضر‑د غ‑لگدّام‑نس تيني‑اس: «وا‑سيدي، عاون‑يّي.» ييني‑اس: «ءور‑يشوي ا‑نامژ اغروم ن‑تاروا، نلوح‑ت‑ين ءي‑ييضان.» تيني‑اس: «وا‑سيدي، ءولا ءيضان ار‑شتّان ءيبروزيين لّي‑طّارنين زغ‑لميدا ن‑سيديتسن.» ءيساول ياسوع ييني‑اس: «وا‑تامغارت، تومنت باهرا. اد‑ام‑ييلي غمكلّي تريت.» تجّي ءيلّيس غاكودان. ءيفتو ياسوع زغ‑غين ءيزري زغ‑تاما ن‑ومدا ن‑جاليل، ءيغلي س‑يان‑وورير ءيگاور گيس. مونّ‑د فلّاس مدّن گّوتنين، اوين‑اس‑د ءيكوشامن د‑يبيضارن د‑يبوكاضن د‑يژنژام د‑وييّاض گّوتنين، سرسن‑تن‑د غ‑دار ءيضارن‑نس ءيجّوجّي‑تن. ار‑كولّو‑تعجّابن مدّن‑ان لّيغ ژران ءيژنژام ار‑ساوالن، د‑يكوشامن ار‑تدوسن، د‑يبيضارن ار‑فتّون، د‑يبوكاضن ار‑تّيسفيون. ار‑كولّو‑تالغن ربّي ن‑ايت‑يودايا. ءيغر‑د ياسوع ءيلمّا ءي‑يمحضارن‑نس س‑دارس، ييني‑اسن: «ها‑مدّن‑اد قامان گيگي باهرا، اشكو كراض‑ووسّان ايد ديدي لّان، ءور‑دارسن ماد‑شتّان. ءور‑ريغ ا‑تن‑ازنغ د‑نتني ءينغا‑تن لاژ ا‑ور‑تغاشان غ‑وغاراس.» ءينين‑اس ءيمحضارن‑نس: «غير لخلا اياد. مانيغ را‑ناف اغروم ما‑س‑ا‑نشّباع كولّو مدّن‑اد گّوتنين؟» ءيسقسا‑تن ياسوع: «منّاوت‑تنگُال اد‑دارون؟» ءينين‑اس: «سّا ن‑تنگُال د‑كرا ن‑تسلمين مژّينين.» يوصّا مدّن اد‑سكيوسن س‑واكال ياسي سّا ن‑تنگُال د‑تسلمين، ءيشكر ربّي ءيبّي‑تنت ءيفك ءي‑يمحضارن‑نس، بضون‑تنت ف‑مدّن. شّن كولّو مدّن‑ان ايلّيغ شبعان. سّمونّ‑د توفّاژ لّي‑د‑قامانين، عمّرن سّا ن‑تريالين. غويلّي شّانين، كّوژ ءيد‑والف ن‑ورگاز اد‑گان، ءيلينت ءولا تيمغارين د‑تاروا مژّينين. ءينكر ياسوع ءيلمّا، ءيمسافاض د‑مدّن. ءيكشم س‑تاناوت ءيسّودو غ‑ومدا س‑تسگيو ن‑ماگادان. اشكين‑د كرا ن‑يفاريسين د‑كرا ن‑مدّن لّمدهب ن‑يصادّوقين، ءيرين اد‑ارمن ياسوع. ضالبن زغ‑گيس ا‑يسكر كرا لّمعجيزت اد‑اسن‑تگ تاماتارت ن‑يزد ربّي ا‑ت‑يد‑يوزنّ. ءيمّا نتّا ءيساول ييني‑اسن: «ها‑كونّي غ‑تدگُّات ار‑تّينيم ‹را‑يصفو لحال ازكّا اشكو ژگُّاغن ءيگنوان.› ءولا زيكّ صباح ار‑تّينيم ‹را‑ييلي‑ونژار غاسّاد اشكو ژگُّاغن ءيمدلا غ‑يگنوان.› كونّي تسّنم لمعني ن‑يگنوان، والاينّي ءور‑اكُّ‑تسّينم لمعنا ن‑كولّو مايد دارون ءيجران غ‑ووسّان‑اد. تاسوت يُخشنّ ءيفسادن اياد، تضالب تاماتارت. ءور‑راد‑اس‑تّياوفكا كرا ن‑تماتارت ابلا تاماتارت ن‑نّابي يونا.» ءيفل‑تن ءيلمّا ءيدّو. لّيغ لكمن تاسگا ياضني ن‑ومدا كتين‑د ءيمحضارن ءور‑ديدسن‑يوين اغروم. ييني‑اسن ياسوع: «اويات‑ستّ غ‑يخف‑نّون، ترارم لعاقل زغ‑تخميرت ن‑يفاريسين د‑يصادّوقين.» ءيمّا نتني ار‑سّمقسان ءي‑نگراتسن ار‑تّينين: «ءور‑د‑نيوي اغروم، مايان ا‑ف‑ينّا اوال‑اد.» ءيسّن ياسوع ما‑تّينين، ييني‑اسن: «ماخ ايلّيغ ا‑تسّمقسام غمكاد ف‑وغروم ءور‑دارون‑يلّي؟ ءيس‑ور‑تومينم؟ ءيس‑ور‑تا‑تفهيمّ؟ ءيس‑ور‑دي‑تسوانگمّ سمّوست‑تنگُال لّي‑بّيغ ءي‑سمّوس ءيد‑والف، ءولا منشك ن‑تاسلّيت ا‑توسيم ن‑توفّاژ؟ نغد سّا ن‑تنگُال لّي‑بّيغ ءي‑كّوژ ءيد‑والف، ءولا منشك ن‑تريالت ا‑توسيم ن‑توفّاژ؟ ماخ ءور‑تسّينم ءيس‑ورد اغروم ا‑ف‑ا‑ساوالغ لّيغ‑اون‑نّيغ ‹رارات لعاقل‑نّون زغ‑تخميرت ن‑يفاريسين د‑يصادّوقين›؟» فهمن ءيمحضارن غاكودان ءيس‑ورد تاخميرت ن‑وغروم ا‑ف‑اسن‑ينّا ا‑زگيس‑تراران لعاقل والاينّي المّود ن‑يفاريسين د‑يصادّوقين. ءيزايد ياسوع ءيدّو س‑تسگيو ن‑قايصريّا فيليبّي. ءيسقسا ءيمحضارن‑نس: «ما‑تّينين مدّن ف‑يوس ن‑بنادم؟ ماد‑گيغ نكّي؟» ساولن ءيمحضارن ءينين‑اس: «كرا ار‑يتّيني تگيت يوحانّا امسدّام. كرا ار‑يتّيني تگيت نّابي ءيليّا. كرا ار‑يتّيني تگيت ءيرميّا نغد كرا ن‑يان زغ‑لانبيا ن‑زمان.» ييني‑اسن ياسوع: «ءيمّا كونّي، ما‑فلّا‑تّينيم؟ ماد‑گيغ نكّي؟» ءيساول سيمعان بطرُس ييني‑اس: «تگيت لماسيح يوس ن‑ربّي لّي‑يدّرن.» ييني‑اس ياسوع: «امباركي ا‑تگيت ا‑سيمعان يوس ن‑يونا، اشكو ءورد بنادم اد‑اك‑يملان ماياد، والاينّي ءيملا‑ياك‑ت بابا ربّي لّي‑يلّان غ‑يگنّا. راد‑اك‑ينيغ، كيّي تگيت ‹بطرُس›، تگت اژرو لّي‑ف‑راد‑بنوغ امناگّار‑ينو، د‑ور‑سار‑ت‑نرينت لقوّات لّموت. راد‑اك‑فكغ تيسورا ن‑تگلديت ن‑يگنّا. اينّا تكرست غ‑دّونيت ءيتياوكراس غ‑يگنّا، د‑اينّا تفسيت غ‑دّونيت ءيتياوفساي غ‑يگنّا.» يوصّا ءيمحضارن‑نس ءيلمّا ييني‑اسن س‑لمعقول: «ا‑ور‑تينيم ءي‑يان ءيزد نكّين ا‑يگان لماسيح لّي‑س‑ا‑تقلن.» زغ‑غاسّان ا‑يبدا ياسوع ار‑يمالا ءي‑يمحضارن‑نس ما‑راد‑اس‑يجرو، ييني‑اسن: «ءيقّان‑يّي‑د اد‑دّوغ س‑تمدينت ن‑وروشاليم، رفوفنغ باهرا ف‑وفوس ن‑يمغارن ن‑تمازيرت د‑ينمغورن ن‑تگمّي ن‑ربّي د‑يمسلمدن ن‑شّرع. را‑يّي‑نغن، والاينّي ويس كراض‑ووسّان را‑د‑نكرغ زغ‑لموت.» ياوي‑ت ءيلمّا بطرُس ا‑ت‑يژي ف‑واوال‑اد ييني‑اس: «اد‑اك‑ييلي لخير ا‑سيدي، ءولا ءيجرا‑ياك غايان.» ءيگراول‑د گيس ياسوع ييني‑اس: «ءيتّي‑ن زغ‑گيگي ا‑شيطان. تابايضّرت اد‑يّي‑تگيت. اشكو ءور‑ا‑تسكارت س‑ما‑يرا ربّي، والاينّي س‑ما‑يرا بنادم كا‑س‑ا‑تسكارت.» ءيزايد ياسوع ءيساول س‑يمحضارن‑نس ييني‑اسن: «وانّا ءيران ا‑ديدي‑ييلي، ءيقّان‑ت‑يد ا‑يتّو ءيخف‑نس، ياسي اگّجدي‑نس، ءيمون ديدي. وانّا ءيران ا‑يجّنجم تودرت‑نس را‑ستّ‑يجلو. ءيمّا وانّا ءيجلان تودرت‑نس ف‑سّيبت‑ينو، را‑ستّ‑ياف. ما‑را‑ييلي ءي‑بنادم ءيغ‑يوورّي ءيطّاف دّونيت كولّوتّ ءيخسر ءيخف‑نس؟ ما‑را‑يفك بنادم باش ا‑يجّنجم ءيخف‑نس؟ ءيمّا نكّي لّي‑يگان يوس ن‑بنادم راد‑د‑اشكغ س‑لمجد ن‑بابا ربّي د‑لمالايكا‑نو، باش اد‑رارغ ءي‑كرايگاتّ يان ف‑ما‑يسكر. لحقّ ا‑راد‑اون‑ينيغ، ءيلّا غ‑غويد بيدّنين غيد ما‑ور‑را‑يمّت ارد ءيژر يوس ن‑بنادم يوشكا‑د غ‑تگلديت‑نس.» زرين سضيص‑ووسّان، ءيدّو ياسوع ياوي ديدس بطرُس د‑ياعقوب د‑گماس يوحانّا، غلين واحدوتن س‑يان‑وورير ياتّوين. تبدّل سّيفت ن‑ياسوع غ‑لگدّام‑نسن، ار‑يسّمرقيقيي‑وودم‑نس زوند تافوكت، وورّينت‑تملسا‑نس ملّولنت باهرا زوند تيفاوت ن‑واسّ. غاكودان ژران نّابي موسا ءولا نّابي ءيليّا ار‑ساوالن د‑ياسوع. ءينكر بطرُس ييني‑اس: «وا‑سيديتنّغ، ءيفولكي ا‑نيلي غيد. ءيس‑تريت اد‑اون‑نسكر كراض ءيحشاش، يان‑نّك د‑يان ن‑موسا د‑يان ن‑يليّا؟» سول ا‑يساوال س‑د‑فلّاسن‑تگّوز يات‑تمدلوت ءيسّمرغان تدل‑تن. ءيساول‑د يان‑واوال زغ‑تمدلوت ييني: «غواد ءيگا ءيوي ءيعزّان. نتّان ا‑س‑باهرا‑فرحغ. سفليدات سرس.» لّيغ سلّان ءيمحضارن ءي‑مايان ضرن س‑واكال ف‑وودماون‑نسن، گُّدن باهرا. ءيمّا ياسوع ءيفتا‑د س‑دارسن ءيسرس فلّاسن افوس‑نس ييني‑اسن: «نكرات. اد‑ور‑تيكساضم.» لّيغ سّماقّلن ءور‑ژرين يان، ابلا ياسوع واحدوت. لّيغ‑د‑فتان غ‑وگسار ن‑وورير، يوصّا‑تن ياسوع: «اد‑ور‑تينيم ءي‑يان ف‑ما‑تژرام ارد‑د‑ينكر يوس ن‑بنادم زغ‑لموت.» سقسان‑ت ءيمحضارن‑نس: «ماخ ايلّيغ ا‑تّينين ءيمسلمدن ن‑شّرع ءيقّان‑د نّابي ءيليّا ا‑د‑ياشك ءيزوور‑د غوالّي ءيگان لماسيح؟» ييني‑اسن: «س‑صّاحت ءيليّا ا‑د‑يزوارن ا‑يجّوجاد كرايگاتّ كرا. والاينّي راد‑اون‑ينيغ، يوشكا‑د‑ياد ءيليّا، ءور‑ت‑وكُزن مدّن. سكرن سرس كولّو غايلّي ران. غمكان ا‑س‑راد‑رفوفنغ ءولا نكّي لّي‑يگان يوس ن‑بنادم ف‑وفوس‑نسن.» سّنّ ءيمحضارن غاكودان ءيزد يوحانّا امسدّام ا‑ف‑ا‑ياسن‑يساوال. لّيغ وورّين س‑دار مدّن ياضني، ياشك‑يد يان‑ورگاز ءيضر‑د غ‑لگدّام ن‑ياسوع ييني‑اس: «وا‑سيدي، حنّو غ‑يوي. هان ءيلّا‑گيس‑وسلاي ار‑باهرا‑يترفوفون. منّاوت‑توال ا‑ن‑يطّار غ‑لعافيت ءولا غ‑وامان. ءيويغ‑ت‑يد ءي‑يمحضارن‑نّك والاينّي ءور‑ژضارن نتني ا‑ت‑جّوجّين.» ءيساول ياسوع ييني‑اسن: «وا‑تاسوت‑اد ءيجلان، ءور‑اكُّ‑تريت ا‑تامنت. منشك ا‑را‑سول‑ديدون‑قاماغ؟ منشك ا‑راد‑ديدون‑صبرغ؟ اويات‑ت‑يد س‑داري.» يامر لجنّ، ءيفّوغ زغ‑گيس س‑يجّي‑وفروخ حاينا. اشكين‑د ءيمحضارن س‑دار ياسوع واحدوتن سقسان‑ت: «ماخ ايلّيغ ءور‑نژضار نكُّني ا‑ت‑نسّوفغ؟» ييني‑اسن: «اشكو ءيدروس ليمان‑نّون. لحقّ ا‑راد‑اون‑ينيغ، ءيغ‑گيگون‑يلّا ليمان ءونشك ن‑تاقّايت ءيمژّين لّخردل، را‑تينيم ءي‑وورير‑اد ‹ءيتّي زغ‑غيد س‑غين› را‑يسكر س‑ماد‑اس‑تنّام. ءور‑را‑ييلي كرا مي ءور‑تژضارم. والاينّي وان لجنّ‑ان، ءور‑را‑يتفّوغ ابلا ءيغ‑تاژومّ ار‑تّضالابم ربّي.» مونّ‑داغ ءيمحضارن د‑ياسوع غ‑تمازيرت ن‑جاليل، ءيساول سرسن ييني‑اسن: «نكّي لّي‑يگان يوس ن‑بنادم را‑يّي‑ن‑دحين س‑گر ءيفاسّن ن‑مدّن نغن‑يّي، نكرغ‑د ءيلمّا غ‑ويس كراض‑ووسّان.» ءيمّا نتني طيّر‑اسن باهرا ف‑ما‑ينّا. دّون ءيلمّا س‑تمدينت ن‑كافرناحوم. اشكين‑د غويلّي تامژنين شّرد ن‑تگمّي ن‑ربّي، لكمن‑د بطرُس ءينين‑اس: «ءيس‑ور‑ا‑ياكّا‑ومسلمد‑نّون شّرد ن‑تگمّي ن‑ربّي؟» ييني‑اسن: «ار‑ت‑ياكّا.» لّيغ‑د‑يروح بطرُس تيگمّي ءيساول سرس ياسوع، ءيزوور‑اس غ‑واوال ءيسقسا‑ت: «مانوي تغالت ا‑سيمعان، ار‑زگيسن‑تامژن ءيگلدان ن‑دّونيت شّرد ءولا ضابييت؟ ءيزد زغ‑تاروا‑نسن نغد زغ‑وييّاض؟» ييني‑اس بطرُس: «زغ‑وييّاض.» ءيزايد ياسوع ييني‑اس: «ءولا غمكان ءور‑يلّي ف‑تاروا ن‑تگلديت. والاينّي ا‑ستّ‑ور‑نسّطيّار ءي‑مدّن‑ان. زايد س‑ومدا، تلوحت‑ن يات توكطّ غ‑وامان. تاسلمت تامزواروت نّا‑دي‑تومژت، ترژمت ءيمي‑نس را‑ن‑تافت يان‑وقاريد. اوي‑ت تفروت سرس ماد‑اغ‑ضفارن نكّي ءولا كيّي.» اشكين‑د ءيمحضارن س‑دار ياسوع غ‑تاساعت‑ان سقسان‑ت: «ما‑را‑يگ انمغور غ‑تگلديت ن‑يگنّا؟» ءيغر‑د ياسوع ءي‑يان‑وارّاو ءيمژّين س‑دارس، ياوي‑ت‑يد س‑وامّاس‑نسن ييني‑اسن: «لحقّ ا‑راد‑اون‑ينيغ، ءيغ‑ور‑تبدّيلم توورّيم تگم زوند تاروا مژّينين، ءور‑سار‑تكشيمّ س‑تگلديت ن‑يگنّا. وانّا ءيژّيمژين ءيخف‑نس زوند ارّاو‑اد، نتّان ا‑يمقّورن غ‑تگلديت ن‑يگنّا. د‑وانّا ءيقبلن يان‑وارّاو ءيمژّين زوند غواد س‑يسم‑ينو، هاتي ءيقبل‑يّي. «والاينّي وانّا ءيسّضرن يان زغ‑يمژّيين‑اد لّي‑سري‑ومنّين، يوف‑اس مراد ءيس‑اس‑يتياگّال‑وژرو ن‑وزرگ ءيمقّورن غ‑ومگّرض‑نس ءيخسي‑ن غ‑تدروت ن‑ومدا. تاگوضي ا‑را‑ييلي ءي‑دّونيت ف‑سّيبت ن‑كولّو ما‑گيس‑يسّطارن بنادم. ءيقّان‑د‑نّيت ا‑ييلي ما‑يسّطارن مدّن، والاينّي تاگوضي ا‑را‑ييلي ءي‑ويلّي‑تن‑سّضرنين. ءيغ‑ا‑ك‑يسّطار‑وفوس‑نّك نغد اضار‑نّك، بّي‑ت تلوحت‑ت‑ين. يوف‑اك ا‑تكشمت س‑تودرت تگيت ابيضار نغد بلا ن‑يان‑وفوس، ءولا ا‑دارك‑يلين سين ءيفاسّن د‑سين ءيضارن تّياوگارت‑ن غ‑لعافيت لّي‑ور‑سار‑يخسين. ءيغ‑ا‑ك‑تسّطار تيط‑نّك سّوكف‑تّ‑يد تلوحت‑ستّ‑ين. يوف‑اك ا‑تكشمت س‑تودرت تگيت ابوكاض، ءولا ا‑دارك‑يلينت سنات‑والّن تّياوگارت‑ن غ‑لعافيت ن‑جهنّاما. اويات‑ستّ غ‑يخف‑نّون ا‑ور‑تحگرم يان غ‑يمژّيين‑اد. اشكو راد‑اون‑ينيغ، لمالايكا‑نسن ار‑ن‑بدّا‑تمونون د‑بابا ربّي لّي‑يلّان غ‑يگنّا. «ءوشكيغ‑د نكّي لّي‑يگان يوس ن‑بنادم باش اد‑جّنجامغ غويلّي جلانين. ما‑را‑تينيم؟ ما‑را‑يسكر يان دار ميّا ن‑يخف ن‑وولّي ءيغ‑اس‑تجلا يات گيسنت؟ ءيس‑ور‑را‑يفل تژا ن‑يد‑مراو د‑تژا (99) فردنت غ‑يورار، ءيدّو ار‑يسيگّيل س‑تالّي ءيجلان؟ راد‑اون‑ينيغ، غاكود نّا‑ستّ‑يوفا را‑سرس‑يفرح ءوگُّار ن‑تژا ن‑يد‑مراو د‑تژا لّي‑ور‑جلينين. غمكاد ا‑يرا باباتون لّي‑يلّان غ‑يگنّا ا‑ور‑يتياوهلاك يان غ‑يمژّيين‑اد. «ءيغ‑گيك‑يسكر گماك كرا يُخشنّ، دّو س‑دارس تينيت‑اس ما‑يسكر غ‑گراك ديدس واحدوكن. ءيغ‑سرك‑يسفلد، هاتي ترورد‑د گماك. والاينّي ءيغ‑ياگُي ا‑سرك‑يسفلد، دّو دارس تيس سنات‑توال، تاويت ديدك يان نغد سين مدّن ياضني غمكلّي ءيتياران باش ‹ا‑تزگا‑تغاوسا نّا‑يلّان س‑توگّا ن‑سين نغد كراض ءيناگان.› ءيغ‑ياگُي ا‑سرسن‑يسفلد ءولا نتني، ءيني‑ت ءي‑ومناگّار ن‑ايتماتن. ءيغ‑ياگُي ا‑يسفلد س‑ومناگّار، ءيگ‑ييت دارك زوند يان ءور‑اكُّ‑يومينّ نغد زوند يان ءيتامژن نكّاس. «لحقّ ا‑راد‑اون‑ينيغ، اينّا تكرسم غ‑دّونيت ءيتياوكراس غ‑يگنّا، د‑اينّا تفسيم غ‑دّونيت ءيتياوفساي غ‑يگنّا. راد‑اون‑ينيغ كرا ياضني، ءيغ‑د‑مشاشكان سين گيگون غ‑دّونيت ف‑كرا ضالبن ءي‑بابا ربّي ن‑يگنّا، راد‑اسن‑ييلي. اشكو ءينّاغ‑د‑مونّ سين نغد كراض س‑يسم‑ينو، راد‑يليغ نكّي غ‑وامّاس‑نسن.» ياشك‑يد بطرُس ءيسقسا‑ت: «وا‑سيدي، ءيغ‑ا‑باهرا‑گيگي‑يسكار گما كرا يُخشنّ، منّاوت‑توال ا‑يّي‑د‑يقّانّ اد‑اس‑صامحغ؟ ءيزد ار سّا ن‑توال؟» ءيساول ياسوع ييني‑اس: «ءورد سّا ن‑توال ا‑س‑راد‑اك‑ينيغ والاينّي سّا ن‑يد‑مراو ف‑سّا ن‑توال. اشكو تاگلديت ن‑يگنّا تگا زوند يان‑وگلّيد ءيرا ا‑ينحاساب د‑يخدّامن‑نس. لّيغ ءيبدا ار‑ديدسن‑يتنحاساب اوين‑اس‑د يان ءيضفار‑اس‑وگلّيد مراو ءيد‑والف ن‑وقاريد ن‑وورغ. لّيغ ءور‑دارس‑يلّي ما‑س‑ا‑ياس‑يترارا غونشكان، يامر‑وگلّيد ا‑ينز نتّا د‑تمغارت‑نس د‑تاروا‑نس ءولا كولّو ماد‑دارس‑يلّان، ا‑زگيس‑يامژ غونشك لّي‑اس‑يضفار. غاكودان ءيضر‑وخدّام‑لّي غ‑لگدّام ن‑وگلّيد ءيضالب‑ت باهرا ييني‑اس ‹وا‑سيدي، صبر ديدي، راد‑اك‑ت‑يد‑رارغ كولّوت.› ءيحنّو‑گيس‑وگلّيد يوت ف‑لحساب‑نس ءيرژم‑اس. ءيمّا اخدّام‑ان، ءيفّوغ ءيمناگّار يان‑وخدّام ياضني، د‑نتّان ءيضفار ءي‑وخدّام‑ان ياضني ميّا ن‑تقاريتّ. يامژ‑ت زغ‑وقرجوض ييني‑اس ‹رار‑يّي‑د ماد‑اك‑ضفارغ.› ءيضر‑د‑وخدّام‑ان ياضني غ‑لگدّام‑نس ءيضالب‑ت باهرا ييني‑اس ‹صبر ديدي، راد‑اك‑ت‑يد‑رارغ.› ءيمّا نتّا ياگُي اد‑اس‑يصامح، ءيدّو ءيلوح‑ت‑ين غ‑لحبس ار‑د‑يفرو كولّو ماد‑اس‑يضفار. ءيمّا ءيخدّامن ياضني، لّيغ ژران ما‑يسكر طيّر‑اسن باهرا، دّون س‑دار‑وگلّيد ءينين‑اس ف‑كولّو ما‑يجران. ءيغر‑د‑وگلّيد ءي‑وخدّام‑لّي س‑دارس ييني‑اس ‹واي‑اخدّام يُخشنّ. ءوتغ ف‑لحساب‑نّك كولّوت اشكو تضالبت‑يّي باهرا. ءيس‑ور‑فلّاك‑يلّي ءولا كيّي ا‑تحنّوت زغ‑گماك غمكلّي زگيك حنّاغ نكّي؟› ءيبزگ‑فلّاس‑وگلّيد ءيدحي‑ت‑ين ا‑يرفوفن غ‑لحبس ار‑د‑يفرو كولّو ماد‑اس‑يضفار. غمكان ا‑را‑يسكر بابا ربّي ن‑يگنّا ءي‑كولّو وانّا گيگون ءور‑يصامحن ءي‑گماس س‑نّيت ن‑وول‑نس.» لّيغ ءيكمّل ياسوع ما‑يتّيني ءي‑مدّن‑ان، ءيفّوغ جاليل ءيدّو س‑تمازيرت ن‑يودايا س‑تسگا ياضني ن‑واسيف ن‑وردون. ضفورن‑ت مدّن گّوتنين ار‑غين‑يجّوجّي ءيموضان. اشكين‑د كرا ن‑يفاريسين ءيرين ا‑ت‑ارمن، ءينين‑اس: «ءيس‑يحلّا ا‑يفرو‑ورگاز ءي‑تمغارت‑نس ف‑سّيبت نّا‑دارس‑يلّان؟» ءيرار‑اسن ياسوع: «ءيس‑ور‑تغريم ف‑ربّي مامنك ا‑يخلق بنادم غ‑يسيزوار؟ ءيسكر اوتم د‑تاوتمت، ييني فلّاسن ‹ماياد ا‑ف‑را‑يفل‑ورگاز باباس د‑ينّاس ءيمون د‑تمغارت‑نس. هاتنين سين راد‑وورّين گن يات دّات.› ءور‑سول‑گين سين والاينّي يات دّات اد‑گان. ف‑مايان ا‑ف‑راد‑اون‑ينيغ، اينّا ءيسّمون ربّي، ا‑ت‑ور‑يبضو بنادم.» سقسان‑ت ءيلمّا ءينين‑اس: «ءيغ‑يگا غمكاد، ماخ ايلّيغ يوصّا موسا ف‑تبرات لّفرا، ا‑ستّ‑يارا‑ورگاز ءيفرو ءي‑تمغارت‑نس؟» ءيرار‑اسن ياسوع: «يودج‑كُن موسا ا‑تفروم ءي‑تمغارت‑نّون اشكو قّورن‑وولاون‑نّون، والاينّي ءور‑يگي غمكان غ‑يسيزوار. راد‑اون‑ينيغ، وانّا ءيفران ءي‑تمغارت‑نس ف‑كرا ياضني بلا زّنا ءيتاهل تايّاض، هاتين ءيزنا.» ءينين‑اس ءيمحضارن: «ءيغ‑يگا غمكاد غ‑گر‑ورگاز د‑تمغارت‑نس، يوف‑اس ا‑ور‑اكُّ‑يتاهل.» ءيرار‑اسن ياسوع: «اوال‑اد، ءور‑را‑ت‑يرين ابلا غويلّي مي ءيفكا ربّي ا‑ت‑يرين. لّان لاسباب لّي‑ور‑را‑يادج مدّن اد‑تاهلن. كرا گيسن ءيلول غمكان. كرا سكرن‑اس مدّن غمكان. كرا ياگُي ا‑يتاهل اشكو ءيرا ا‑يلهو د‑يخف‑نس غير س‑تگلديت ن‑يگنّا. وانّا ءيژضارن ا‑يقبل اوال‑اد، ءيقبل‑ت.» اشكين‑د كرا ن‑مدّن غ‑تاساعت‑ان اوين‑د تاروا مژّينين، ءيرين ياسوع ا‑ن‑فلّاسن‑يسرس ءيفاسّن‑نس ءيبارك‑تن. نكرن ءيمحضارن‑نس رارن‑تن ءينين‑اسن: «ا‑تن‑د‑ور‑تاويم.» ءيمّا ياسوع ءينّا‑ياسن: «ادجات تاروا مژّينين ا‑د‑داري‑اشكين. ا‑تن‑ور‑تحصارم، اشكو زوند غويد ا‑مي‑تلّا‑تگلديت ن‑يگنّا.» ءيسرس فلّاسن ءيفاسّن‑نس. ءيفل‑تن غاكودان ءيدّو س‑ماني ياضني. ياشك‑يد يان‑وعيّال س‑دار ياسوع ييني‑اس: «واي‑امسلمد، مان افولكي ا‑راد‑سكرغ باش اد‑طّافغ تودرت لّيخرت؟» ءيساول ياسوع ييني‑اس: «ماخ ا‑يّي‑تسقسات ف‑وفولكي؟ يان واحدوت ا‑يگان افولكي. ءيغ‑تريت ا‑تكشمت س‑تودرت، سكار س‑لوصيّات‑نس.» ءيسقسا‑ت‑وعيّال: «ما‑لّوصيّات؟» ييني‑اس ياسوع: «‹ا‑ور‑تنغت. ا‑ور‑تزنوت. ا‑ور‑تاكُرت، ا‑ور‑تفكت توگّا ن‑تكركاس.› ‹اوي‑تّ غ‑باباك د‑ينّاك.› ‹تيريت ادجار‑نّك زوند ءيخف‑نّك.› » ءيساول‑وعيّال ييني‑اس: «ماياد ار‑ت‑سكارغ كولّوت. ما‑يّي‑سول‑يخصّان؟» ييني‑اس ياسوع: «ءيغ‑تريت ا‑تگت واد ءيكمّلن، زايد تزّنزت كولّو ماد‑دارك‑يلّان، تفكت‑ت ءي‑يمژلاض ييلي‑اك‑وايدا غ‑يگنّا. تاشكيد‑د ءيلمّا تمونت ديدي.» لّيغ ءيسفلد‑وعيّال ءي‑ماياد، ءيدّو طيّر‑اس اشكو ءيگّوت‑وايدا‑نس. ءيساول ياسوع س‑يمحضارن‑نس ييني‑اسن: «لحقّ ا‑راد‑اون‑ينيغ، راد‑باهرا‑يشقو ءي‑يان دار ءيگّوت‑وايدا ا‑يكشم س‑تگلديت ن‑يگنّا. ءينيغ‑اون، را‑يرخو ف‑ورعام ا‑يكشم زغ‑تيط ن‑تاسمي ءولا ءيكشم يان دار ايدا ءيگّوتن س‑تگلديت ن‑ربّي.» لّيغ سفلدن ءيمحضارن ءي‑ماياد، گُّدن باهرا، ار‑تّينين ءي‑نگراتسن: «ءيغ‑يگا غمكاد ما‑را‑ييژضار ا‑ينجم؟» ءيسّماقّل گيسن ياسوع ييني‑اسن: «غ‑دار بنادم ءور‑يژضار ا‑ييلي. ءيمّا ربّي، ءور‑يلّي كرا مي ءور‑يژضار ا‑ت‑يسكر نتّا.» ءيساول بطرُس ييني‑اس: «ها‑نكُّني نفل‑ن كولّو ما‑دارنّغ‑يلّان، ناشك‑يد نمون ديدك. ما‑راد‑اغ‑ييلي نكُّني؟» ييني‑اسن ياسوع: «لحقّ ا‑راد‑اون‑ينيغ، غاكود لّيغ راد‑گاورغ نكّي لّي‑يگان يوس ن‑بنادم ف‑لعرش لّمجد‑ينو غ‑دّونيت لّجديد، را‑تگاورم ءولا كونّي لّي‑ديدي‑يتمونون ف‑سين د‑مراو لّعرش ار‑تّحكامّ ف‑كولّو ايت‑ربّي. كولّو وانّا‑ن‑يفلن تيگمّي‑نس نغد ايتماس نغد ءيستماس نغد باباس نغد ءينّاس نغد تاروا‑نس نغد ءيگران‑نس ف‑سّيبت‑ينو، راد‑اس‑ييلي ما‑يوگُرن مايان ف‑ميّا ن‑توال، ءيطّاف تودرت ءيدومن. والاينّي كيگان د‑يمزوورا ا‑را‑يگُّرو، د‑كيگان د‑يمگّورا ا‑را‑يزوور.» «تاگلديت ن‑يگنّا تگا زوند يان‑ورگاز باب ن‑يگر، ءيفّوغ زيكّ صباح ا‑د‑يكرو ءيخدّامن ءي‑يگر‑نس ن‑واضيل. ءيمشاشكا‑د د‑يخدّامن اد‑اسن‑يفك يان‑وقاريد ءي‑واسّ، يازن‑تن ءيلمّا س‑يگر‑نس. ءيفّوغ‑داغ غ‑تاساعت تيس تژا، ءيژر وييّاض بيدّن غ‑تاسوقت ءور‑ا‑سكارن يات. ييني‑اسن: ‹اشكاد‑د تخدمّ ءولا كونّي غ‑يگر ن‑واضيل، راد‑اون‑فكغ تيغراد نّا‑ياون‑يگان.› دّون ءولا نتني س‑يگر. ءيفّوغ‑داغ غ‑تاساعت تيس سنات د‑مراوت، ءولا غ‑تيس كراطّ ن‑تدگُّات، ءيسكر‑داغ غمكان. ما‑د‑ياد‑تروح تاساعت تيس سمّوست ن‑تدگُّات ءيدّو‑داغ س‑تاسوقت، ءيژر كرا ن‑مدّن سول بيدّن غين. ييني‑اسن: ‹ماخ ايلّيغ تبيدّم غيد اسّ كولّوت ءور‑ا‑تسكارم يات؟› ءينين‑اس: ‹ءور‑اغ‑ييوي يان.› ييني‑اسن: ‹واخّا، اشكاد‑د ءولا كونّي تخدمّ غ‑يگر‑ينو ن‑واضيل.› لّيغ‑ن‑تضر تافوكت ءيساول باب ن‑يگر س‑ونگابال‑نس ييني‑اس: ‹غر‑د ءي‑يخدّامن تفكت‑اسن تيغراد‑نسن، تبدوت زغ‑ويلّي گُّرانين غ‑تووري ارد تلكمت غويلّي زوارنين.› غاكودان ءوشكان‑د دارس ءيمگّورا لّي‑ور‑كشيمنين ار تيس سمّوست ن‑تدگُّات، ءيفك ءي‑كرايگاتّ يان گيسن يان‑وقاريد. اشكين‑د ءيلمّا غويلّي زوارنين، غالن ءيس‑راد‑اسن‑يفك ءوگُّار، والاينّي ءيفكا‑ياسن يان‑وقاريد ءي‑يان زوند وييّاض. بدون ار‑تنگموگن ف‑باب ن‑يگر ءينين‑اس: ‹غويد گُّرانين ءور‑خديمن غير يات تاساعت، والاينّي تفكيت‑اسن غونشك لّي‑اغ‑تفكيت نكُّني لّي‑يكلان ار‑نكّات تامّارا اسّ كولّوت غ‑تافوكت‑اد ءيحرّان.› ءيرار‑اسن باب ن‑يگر، ييني ءي‑يان گيسن: ‹وا‑گما، ءور‑اك‑وكُيغ ف‑يات. ءيس‑ورد يان‑وقاريد ا‑ف‑د‑ديدي‑تمشاشكات؟ امژ ما‑يگان وينّك تدّوت. اشكو ريغ اد‑فكغ ءي‑غواد ءيگُّران زوند كيّي. ءيس‑ور‑يزري اد‑سكارغ ماد‑ريغ س‑ما‑يگان وينو؟ ءيس‑توسيت تانوّاشت ف‑سّيبت ن‑ماد‑سكرغ افولكي؟› » ييني‑اسن ياسوع: «غمكاد ا‑س‑راد‑زوورن ءيمگّورا، گُّرون ءيمزوورا.» ءيمون ياسوع د‑وغاراس ن‑تمدينت ن‑وروشاليم. ياوي سين د‑مراو ن‑ومحضار‑نس واحدوتن، ءيساول سرسن غ‑وغاراس ييني‑اسن: «سفلدات، را‑ندّو س‑وروشاليم. ءيمّا نكّي لّي‑يگان يوس ن‑بنادم، را‑يّي‑دحين س‑گر ءيفاسّن ن‑ينمغورن ن‑تگمّي ن‑ربّي د‑يمسلمدن ن‑شّرع. راد‑فلّا‑حكامن س‑لموت، فكن‑يّي ءي‑يبرّانيين ا‑گيگي‑تطناژن سّغورشن‑يّي اگُلن‑يّي ف‑وگّجدي ارد مّتغ. والاينّي غ‑ويس كراض‑ووسّان راد‑د‑نكرغ زغ‑لموت.» تاشك‑يد ءينّاس ن‑تاروا ن‑زابدي س‑دار ياسوع، نتّات د‑تاروا‑نس س‑سين. تكنو س‑واكال غ‑لگدّام‑نس تضالب‑ت اد‑اس‑يفك كرا. ءيرار‑اس: «ما‑تريت اد‑ام‑ت‑فكغ؟» تيني‑اس: «فك ءي‑سين تاروا‑ياد‑ينو اد‑سكيوسن يان ف‑وفاسيي‑نّك د‑يان ف‑وژلماض‑نّك غاكود لّيغ را‑تكشمت س‑تگلديت‑نّك.» ءيساول ياسوع ييني‑اسن: «ءور‑تسّينم مايد تضالبم. ءيس‑تژضارم ا‑تسوم لكاس ن‑ورفوفن لّي‑راد‑سوغ نكّي؟» ءينين‑اس: «نژضار‑اس.» ءيرار‑اسن ياسوع: «س‑صّاحت، لكاس لّي‑راد‑سوغ نكّي را‑تي‑تسوم كونّي، والاينّي اسكيوس ف‑وفاسيي‑ينو ءولا ف‑وژلماض‑ينو ءور‑يگي وينو باش ا‑ت‑فكغ ابلا ءي‑ويلّي‑مي‑ت‑يسكر بابا ربّي.» لّيغ سفلدن مراو ياضني ءي‑مايد نّان سين ايتماتن‑ان، بزگن فلّاسن. ءيمّا ياسوع ءيغرا‑ياسن‑د كولّوتن ييني‑اسن: «تسّنم ءيگلدان ن‑دّونيت‑اد ار‑تحكامن ف‑ايت‑تميزار‑نسن، تيسّانم ءينمغورن‑نسن ار‑تامرن مدّن اد‑سكارن س‑يواليون‑نسن. ءيمّا كونّي ا‑ور‑ييلي غمكان غ‑گراتون. وانّا ءيران ا‑گيگون‑ييمغور، ءيلّا فلّاس ا‑يگ اخدّام‑نّون. د‑وانّا گيگون ءيران ا‑يزوور، ءيلّا فلّاس ا‑يگ ءيسمگ ءي‑وييّاض. ءولا نكّي لّي‑يگان يوس ن‑بنادم، ءور‑د‑وشكيغ اد‑فلّا‑تخدامن مدّن. ءوشكيغ‑د اد‑تخدامغ، فكغ تودرت‑ينو اد‑فوكّوغ ما‑يگّوتن.» زرين ءيلمّا زغ‑تمدينت ن‑اريحا، ضفورن‑ت مدّن گّوتن. ءيلين غين سين ءيبوكاضن گاورن غ‑تاما ن‑وغاراس. لّيغ سفلدن ءيزد ياسوع ايد ءيزرين، ار‑تغوّاتن ار‑تّينين: «وا‑يوس ن‑داود، حنّو گينّغ.» اكُين گيسن مدّن ءينين‑اسن اد‑فسّان. ءيمّا نتني زوويدن ار‑تغوّاتن س‑وگُّار ار‑تّينين: «وا‑سيدي، حنّو گينّغ ا‑يوس ن‑داود.» ءيبيدّ ياسوع ءيغر‑اسن‑د س‑دارس ييني‑اسن: «ما‑ترام اد‑اون‑ت‑سكرغ؟» ءينين‑اس: «وا‑سيدي، ا‑نيسفيو.» قامان غ‑ياسوع باهرا. ءيگّر ءي‑والّن‑نسن، ءيسفيون غاكودان. نكرن ضفورن‑ت غ‑وغاراس. اكمورن‑ين س‑تمدينت ن‑وروشاليم. لّيغ لكمن اورير ن‑زّيتون غ‑تسگا ن‑بيتفاجي، يازن ياسوع سين زغ‑يمحضارن‑نس ييني‑اسن: «زايدات س‑ودوّار‑ان لّگدّام‑نّون. را‑ن‑تافم يات‑تغيّولت تقّن نتّات د‑وسنوس‑نس. فسيات‑اسن تاويم‑تن‑د س‑داري. ءيغ‑كُن‑يسقسا كرا ن‑يان، تينيم‑اس ‹ءيرا‑تن سيديتنّغ،› را‑كُن‑يادج ا‑تن‑دي‑تاويم.» ءيجرا كولّو ماياد باش ا‑يافو ما‑ينّا ربّي ف‑يلس ن‑نّابي غايد ءيزرين ءينّا: «ءينيات ءي‑تمدينت ن‑ايت‑ربّي، هاي‑اگلّيد‑نّم يوشكا‑د سرم. يودر ءي‑يخف‑نس، ءيني ف‑وغيّول ءولا ف‑وسنوس ن‑تغيّولت.» دّون ءيمحضارن سكرن غمكلّي‑س‑اسن‑ينّا ياسوع. اوين‑د تاغيّولت د‑وسنوس، گرن‑ين فلّاسن ءيسلهامن‑نسن، ءيني فلّاسن ياسوع. مونّ‑د مدّن گّوتنين، ار‑سّوان ءيسلهامن‑نسن غ‑وغاراس. كرا گيسن ار‑د‑يتبّي تيصطّوين زغ‑يسغارن، ار‑تنت‑سّوان غ‑وغاراس. فرحن باهرا غويلّي زوارنين ءي‑ياسوع غ‑وغاراس ءولا غويلّي‑اس‑گُّرانين، ار‑تالّن اوال‑نسن ار‑تّينين: «هوصانّا ءي‑يوس ن‑داود. امباركي ا‑يگا غواد‑د‑يوشكان س‑يسم ن‑سيدي ربّي. هوصانّا غ‑يگنّا ياتّوين.» لّيغ‑ن‑يلكم ياسوع ءوروشاليم، تقربل‑تمدينت كولّوتّ. ار‑سّمقسان مدّن ءي‑نگراتسن: «ما‑يگا غواد؟» ساولن‑د كولّو ويلّي ديدس مونّين ار‑تّينين: «غواد ءيگا نّابي ياسوع گو‑ناصيرا غ‑جاليل.» ءيكشم ياسوع س‑تگمّي ن‑ربّي، ءينكر ار‑زگيس‑يطّاي غويلّي گيس زّنزانين ار‑گيس‑ساغن. ءيگلّب لميادي ن‑ويلّي تصرّافنين ءيقاريدن، ءيگلّب لكُراسا ن‑ويلّي زّنزانين ءيتبيرن. ييني‑اسن: «هان ءيتيارا غ‑وارّا ن‑ربّي ‹تيگمّي‑نو راد‑اس‑تّينيم تيگمّي ن‑تژالّيت.› ءيمّا كونّي، هاتي ترورم‑تّ تگا ءيفري ن‑يمخّارن.» اشكين‑د دارس ءيبوكاضن د‑يكوشامن غ‑تگمّي ن‑ربّي، ءيجّوجّي‑تن. ءيمّا ءينمغورن ن‑تگمّي ن‑ربّي د‑يمسلمدن ن‑شّرع، طيّر‑اسن باهرا لّيغ ژران لمعجيزات لّي‑يسكر، ژرن تاروا مژّينين ار‑تالّن اوال‑نسن غ‑تگمّي ن‑ربّي ار‑تّينين: «هوصانّا ءي‑يوس ن‑داود.» ساولن ءيلمّا س‑ياسوع ءينين‑اس: «ءيس‑ور‑تسفلدت ءي‑مايد تّينين مدّن‑اد؟» ءيرار‑اسن ياسوع: «سفلدغ‑اسن. ءيمّا كونّي ءيس‑ور‑تغريم ارّا ن‑ربّي لّي‑ينّان ‹تفكيت ءي‑يحشماي د‑وازّانّ ا‑كي‑تالغن س‑نّييت د‑لحقّ›؟» ءيفل‑تن غاكودان ءيفّوغ تامدينت، ءيدّو س‑ودوّار ن‑بيتعانيا ءينس غين. زيكّ صباح يوورّي‑د ياسوع س‑تمدينت، ياغ‑ت لاژ. ءيژر‑ن يات تازارت غ‑تاما ن‑وغاراس، ءيفتو سرس والاينّي ءور‑ن‑گيس‑يوفي غير ءيفراون. ييني‑اس: «زايد ا‑ور‑سار‑گيم‑تيلي لغلّت.» تيقار تازارت غاكودان. لّيغ ژران ءيمحضارن‑نس مايان، ءيضر‑اسن لعجب ءينين: «مامنك ا‑س‑تقّور تازارت‑اد حاينا؟» ءيساول ياسوع ييني‑اسن: «لحقّ ا‑راد‑اون‑ينيغ، ءيغ‑تومنم بلا تشكّام را‑تسكرم زوند ماد‑سكرغ ءي‑تازارت‑اد، راد‑نّيت‑تسكارم ءوگُّار ن‑ماياد. ءيغ‑تنّام ءي‑وورير‑اد ‹ءيتّي زغ‑غيد تضرت‑ن غ‑ومدا› راد‑اس‑ييلي ماد‑اس‑تنّام. غاكود نّا‑تّژالّام راد‑اون‑ييلي كولّو ما‑تضالبم ءيغ‑نّيت‑تومنم.» ءيكشم‑داغ ياسوع س‑تگمّي ن‑ربّي ار‑گيس‑يسّلماد. اشكين‑د ءينمغورن د‑يمغارن ن‑تمازيرت‑ان سقسان‑ت: «ما‑ك‑يد‑يوزنّ ا‑تسكارت كولّو غاياد؟ اوال ن‑مي ايد‑س‑ا‑تي‑تسكارت؟» ءيساول ياسوع ييني‑اسن: «ءولا نكّي را‑كُن‑سقساغ يان‑وسقسي. رارات‑يّي‑د ءينيغ‑اون ما‑يّي‑د‑يوزنّ اد‑سكارغ ماياد. يوحانّا، ما‑ت‑يد‑يوزنّ ا‑يسّدّام مدّن؟ ءيزد ربّي نغد بنادم؟» بدون نتني ار‑سّمقسان ءي‑نگراتسن ار‑تّينين: «ءيغ‑ننّا ‹ربّي ا‑ت‑يد‑يوزنّ› راد‑اغ‑ييني ‹ماخ ايلّيغ ءور‑تومينم ماد‑اون‑ينّا؟› والاينّي ءيغ‑ننّا ‹بنادم ا‑ت‑يد‑يوزنّ› را‑نيكساض زغ‑مدّن‑ان گّوتنين، اشكو ار‑كولّو‑تّينين ءيزد يوحانّا يان‑نّابي ا‑يگا.» ساولن ءيلمّا ءينين‑اس: «ءور‑نسّين ما‑ت‑يد‑يوزنّ.» ءيرار‑اسن ياسوع: «ءولا نكّي ءور‑راد‑اون‑ينيغ ما‑يّي‑د‑يوزنّ اد‑سكارغ كولّو ماياد.» ءيزايد ييني‑اسن: «ما‑را‑تينيم؟ ها‑يان‑ورگاز، دارس سين تاروا. ءيفتو دار‑ومزوارو ييني‑اس: ‹زايد ا‑يوي، تخدمت غاسّاد غ‑يگر ن‑واضيل.› ءيمّا نتّا ءيرور‑اس: ‹ءور‑ريغ.› ءيك ءيميكّ تُگراژ‑ت ف‑واوال‑ان ءيدّو ءيخدم. ءيفتو‑ورگاز ءيلمّا دار ويس سين تاروا‑نس، ييني‑اس غمكلّي ءينّا ءي‑ومزوارو. ءيرار‑اس يوس‑لّي ويس سين: ‹ها‑يّي دّيغ ا‑سيدي،› والاينّي ءور‑يدّي.» ءيسقسا‑تن ياسوع: «مانوا غ‑سين‑اد ا‑يسكرن ما‑يرا باباس؟» ءينين‑اس: «امزوارو.» ءيرار‑اسن ياسوع: «لحقّ ا‑راد‑اون‑ينيغ، ار‑كُن‑زگّورونت‑تمگّانين د‑ايت‑نكّاس س‑تگلديت ن‑ربّي. يوشكا‑د دارون يوحانّا ءيمل‑اون اغاراس ن‑وفولكي، ءور‑تي‑تومينم. ءيمّا ايت‑نكّاس د‑تمگّانين، نتني ءومنّ يوحانّا. تژرم‑تن ار‑تي‑تامنّ، سول ءور‑تريم ا‑تي‑تامنم كونّي توورّيم‑د س‑وغاراس.» ييني‑اسن ياسوع: «سفلدات ءي‑يات لمعنا ياضني. ها‑يان‑ورگاز ءيژّا اضيل غ‑يگر‑نس، ءيسّلولّي‑اس ءيفريگ ءيغزا اگُضي ءي‑لمعصّرت ءيبنو يا‑لّبرج، ءيفل‑ت ءي‑يخمُّاصن ءيفتو ءيمودّو. لّيغ‑د‑يروح‑وزمز لّغلّت، يازن كرا ن‑يخدّامن‑نس س‑دار ءيخمُّاصن اد‑اس‑د‑اوين ما‑ت‑يد‑يوشكان غ‑لغلّت. والاينّي ءيخمُّاصن غوين ءيخدّامن‑ان، سّغورشن يان گيسن، نغن يان، ءوتن يان س‑يژران. يازن‑اسن ءيلمّا كرا ن‑يخدّامن ياضني ءوگُّار ن‑ويلّي زوارنين، سكرن‑اسن ءولا نتني غمكلّي سكرن ءي‑يمزوورا. غ‑يسيگُّرا يازن‑اسن يوس، ييني د‑يخف‑نس ‹راد‑وقّرن ءيوي.› والاينّي ءيخمُّاصن‑ان، لّيغ ژران يوس مشاوارن ءي‑نگراتسن ءينين ‹غواد ا‑را‑يوورت ءيگر. اشكاد‑د ا‑ت‑ننغ ءيگ لوورت وينّغ.› غوين‑ت لوحن‑ت‑ين س‑برّا ن‑يگر نغن‑ت.» ءيسقسا‑تن ياسوع: «ما‑را‑يسكر باب ن‑يگر ءي‑يخمُّاصن‑ان غاكود نّا‑د‑يوورّي.» ءينين‑اس: «را‑يهلك مدّن‑ان أُخشنّين س‑يات لموت يُخشنّ، ءيفك ءيگر ءي‑يخمُّاصن ياضني لّي‑راد‑اس‑ياكّا لغلّت غ‑وزمز‑نس.» ءيرار‑اسن ياسوع: «ءيس‑ور‑تغريم ما‑يتياران غ‑وارّا ن‑ربّي؟ ‹اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو. ماياد، سيدي ربّي ا‑ت‑يسكرن. نژرا‑ت ار‑گيس‑نتعجّاب.› ف‑مايان ا‑ف‑راد‑اون‑ينيغ، را‑كُن‑يسّوفغ ربّي زغ‑تگلديت‑نس، ءيفك‑تّ ءي‑مدّن ياضني لّي‑را‑ياكّا لغلّت‑نس. ءيمّا اژرو‑اد، وانّا فلّاس ءيضرن را‑يرژ، د‑وانّا‑ف‑يضر را‑ت‑يلبج د‑واكال.» لّيغ سفلدن ءينمغورن ن‑تگمّي ن‑ربّي د‑يفاريسين ءي‑لمعني‑اد، ءيسّانّ ءيزد فلّاسن ا‑ف‑يساول ياسوع. ءيرين ا‑ت‑امژن والاينّي كسوضن زغ‑مدّن، اشكو ار‑كولّو‑تّينين ءيزد يان‑نّابي ا‑يگا. ءيساول‑داغ ياسوع س‑لمعني ييني‑اسن: «تاگلديت ن‑يگنّا تگا زوند يان‑وگلّيد ءيسكر تامغرا ءي‑يوس. يازن ءيخدّامن‑نس اد‑د‑غرن ءي‑ويلّي تياوعراضنين، ءيمّا نتني ءور‑رين اد‑د‑اشكين س‑تمغرا. يازن ءيلمّا كرا ن‑يخدّامن ياضني يوصّا‑تن اد‑ينين ءي‑ويلّي تياوعراضنين ‹ها‑تيرمت توجاد، غرسغ ءي‑يموگاين ءولا ءي‑يگايزن ضنينين. يوجاد كولّو، اشكاد‑د س‑تمغرا.› ءيمّا نتني رژمن ءي‑يخف‑نسن ءور‑د‑وشكين، ءيدّو كرا س‑يگران‑نس، ءيدّو كرا س‑تووري‑نس، نكرن وييّاض امژن ءيخدّامن‑ان سّرفوفنّ‑تن نغن‑تن. طيّر‑اس ءي‑وگلّيد باهرا، يازن ءيمخزنيين‑نس هلكن ءيمنغان‑ان، جدرن تامدينت‑نسن. ييني ءيلمّا ءي‑يخدّامن‑نس ‹تامغرا توجاد، والاينّي ءور‑تّ‑ستهلّان غويلّي مي عرضغ. زايدات غيلاد س‑يسواك، تعرضم ءي‑كولّو وانّا‑ن‑توفام، تاويم‑تن‑د س‑تمغرا.› غاكودان فّوغن ءيخدّامن س‑تسواك سّمونّ‑د كولّو ما‑ن‑وفان، گن‑ييت ويد أُخشنّين ءولا ويد شوانين، ايلّيغ تعمّر‑تگمّي ن‑تمغرا س‑ينبگيون. ءيكّا ما‑يكّا، ءيكشم‑وگلّيد ا‑يسّماقّل ايت‑تمغرا، س‑ن‑يژرا يان‑ورگاز غ‑گراتسن ءور‑يلسي تيملسيت ن‑تمغرا. ءيسقسا‑ت‑وگلّيد: ‹وا‑گو‑دارنّغ، مامنك ا‑دي‑تكشمت س‑غيد بلا تيملسيت ن‑تمغرا؟› ءيمّا نتّا غير ءيفسّا. ييني‑وگلّيد ءي‑يخدّامن‑نس ‹كرفات‑ت زغ‑يفاسّن ءولا ءيضارن، تلوحم‑ت‑ين غ‑تيلّاس اگّوگنين. غين ا‑غ‑راد‑الّان ار‑تگژاژن ءوخسان‑نسن.› هان ءيگّوت ما‑مي‑يعرض ربّي، ييدروس ما‑يژلي اد‑گن وينس.» دّون ءيلمّا ءيفاريسين ار‑تمشاوارن ءي‑نگراتسن ف‑مامنك ا‑راد‑سّموتّلن ياسوع ف‑واوال‑نس. ازنّ‑د دارس كرا ن‑مدّن‑نسن د‑كرا ن‑يمدّوكُّال ن‑وگلّيد هيرودوس ءينين‑اس: «واي‑امسلمد، نسّن ءيزد لحقّ ايد تّينيت، ار‑تسّلمادت اغاراس ن‑ربّي غمكلّي ءيگا. ءور‑ا‑تسكارت ف‑ماد‑سوينگيمن مدّن، اشكو ءور‑ا‑تّمنادت ءودماون ن‑مدّن. ءيمّا غيلاد ما‑را‑تينيت؟ ءيس‑يحلّا ا‑ناكّا ضابييت ءي‑قايصر نغد ءوهو؟» ءيمّا ياسوع ءيسّن تانوّاشت لّي‑گيسن‑يلّان، ييني‑اسن: «وا‑يد‑بو‑سين‑وودماون، ماخ ا‑يّي‑تّارمّ؟ ملات‑يّي‑د يان‑وقاريد ن‑ضابييت.» فكن‑اس‑د يان‑وقاريد. ييني‑اسن: «وين‑ميت ا‑يگا‑وودم‑اد د‑يسم‑اد گيس ءيلّان؟» ءينين‑اس: «وين قايصر.» ءيرار‑اسن ياسوع: «فكات ءي‑قايصر ما‑يگان وين قايصر، تفكم ءي‑ربّي ما‑يگان وين ربّي.» لّيغ سفلدن ءي‑ماياد ار‑گيس‑تعجّابن، دّون فلن‑ت. اشكين‑د دارس غاسّان كرا ن‑يصادّوقين. نتني غ‑لمدهب‑نسن ار‑تّينين «ءور‑يلّي ما‑را‑د‑ينكر زغ‑لموت.» سقسان-ت: «واي‑امسلمد، ءينّا موسا ‹ءيغ‑يمّوت كرا ن‑يان ءيفل‑د تامغارت‑نس بلا تاروا، ءيلّا ف‑گماس ن‑ورگاز‑ان ا‑ستّ‑يتاهل ا‑ديدس‑يسكر تاروا ف‑يسم ن‑گماس لّي‑يمّوتن.› لّان دارنّغ سّا ن‑ايتماتن. ييوي‑ومزوارو تامغارت ءيمّت بلا تاروا، ءيفل تامغارت‑نس ءي‑گماس. ءيمّت ويس سين بلا تاروا ءولا نتّا د‑ويس كراض، ايلّيغ‑تّ‑يوين كولّوتن س‑سّا ءور‑د‑فيلن تاروا. غ‑يسيگُّرا تمّت‑تمغارت. ءيني‑اغ غيلاد، غ‑تنكرا لّي‑غ‑راد‑نكرن كولّوتن، تامغارت ن‑مانوا غ‑سّا‑ياد ا‑را‑تگ؟ هاتّي تكّا‑تّين تگا تامغارت‑نسن كولّوتن.» ءيساول ياسوع ييني‑اسن: «غاياد ا‑ف‑تجلام، اشكو ءور‑تسّينم ارّاتن ن‑ربّي ءولا تسّنم تاژضّارت ن‑ربّي. غاكود لّيغ راد‑نكرن ءور‑را‑تاهالن ءولا‑دا‑تاهالنت، والاينّي زوند لمالايكا ن‑يگنّا ا‑راد‑گن. ءيمّا تانكرا ن‑ويلّي مّوتنين، ءيس‑ور‑تغريم ما‑فلّاس‑ينّا ربّي؟ ءينّا ‹نكّي گيغ ربّي ن‑يبراهيم، گغ ربّي ن‑يسحاق، گغ ربّي ن‑ياعقوب.› اوال‑ان ءيملا‑ياغ ءيس‑دّرن نتني غ‑لگدّام ن‑ربّي، واخّا مّوتن.» لّيغ سفلدن مدّن‑ان گّوتنين ءي‑مايد ءينّا ياسوع، تعجّبن غ‑ولمّود‑نس. مونّ‑د فلّاس ءيفاريسين لّيغ سفلدن ف‑مامنك ا‑يسّفسّا ءيصادّوقين. ءينكر يان‑ومسلمد ن‑شّرع زغ‑گيسن، ييري ا‑يارم ياسوع غ‑واوال‑نس. ءيسقسا‑ت: «واي‑امسلمد، ما‑لّوصيت ا‑كولّو‑يهيّان غ‑شّرع ن‑ربّي؟» ءيساول ياسوع ييني‑اس: «‹ا‑تّيريت ربّي سيديك زغ‑تّمي ن‑يخف‑نّك د‑تّمي ن‑وول‑نّك د‑تّمي لّعاقل‑نّك.› ختاد ا‑يگان لوصيت ءيمقّورن ءيهيّان. ترواس‑تّ تيس سنات، ‹ا‑تّيريت ادجار‑نّك زوند ءيخف‑نّك.› سنات لوصيّات‑اد ا‑يگان لّساس ن‑كولّو ما‑يلّان غ‑شّرع د‑وارّاتن لّانبيا.» غاكودان سول دارس قامان ءيفاريسين، ءيسقسا‑تن ياسوع: «ما‑تّينيم كونّي ف‑والّي ءيگان لماسيح؟ تاسوت ن‑مي ا‑زغ‑را‑يگ؟» ءينين‑اس: «زغ‑تاسوت ن‑وگلّيد داود.» ءيرار‑اسن ياسوع: «ءيمّا داود، لّيغ‑ت‑يگوّد رّوح لقودوس ا‑يساول ف‑لماسيح، ءيگ‑ت د‑سيديس ءينّا ‹ها‑سيدي ربّي ءينّا ءي‑سيدي، سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.› ها‑داود س‑يخف‑نس ءيبدر غوالّي ءيگان لماسيح، ءيگ‑ت د‑سيديس. مامنك ا‑را‑يگ غير يان زغ‑تاسوت‑نس؟» ءور‑يژضار يان اد‑اس‑د‑يرار اوال. زغ‑غاسّان ءور‑سول‑يزعم يان ا‑ت‑يسقسا. ءيساول‑داغ ياسوع س‑مدّن‑ان گّوتنين، نتني د‑يمحضارن‑نس ييني‑اسن: «ءيمسلمدن ن‑شّرع د‑يفاريسين، نتني ا‑دار اوال ن‑موسا ار‑ت‑سّلمادن. سفليدات س‑يواليون‑نسن ار‑تسكارم س‑ما‑تّينين، والاينّي ا‑ور‑تسكارم ماد‑سكارن اشكو ءيسكّيرن‑نسن ءور‑ا‑دي‑تمشاشكان د‑يواليون‑نسن. ار‑تاسّن تاگُّاتين ژّاينين ار‑تنت‑ين‑سراسن ف‑تغُراض ن‑مدّن. منشك ا‑باهرا‑ژّاينت، والاينّي ءيمسلمدن‑ان ءور‑رين ا‑ن‑گن ءولا يان‑وضاض اد‑اسن‑عاونّ. كولّو ءيسكّيرن‑نسن ار‑تن‑سكارن باش ا‑تن‑ژرن وييّاض. ار‑سّيمغورن لحروز ن‑يگنزي‑نسن، ار‑سّيغزّيفن تاميو ن‑يسلهامن‑نسن. ءيعزّا دارسن اد‑تگاوارن ف‑لكُراسا مقّورنين غ‑يمنسيون، ءيعزّو دارسن اد‑زگّورون س‑لگدّام غ‑تگُمّا ن‑تژالّيت. ءيعزّو دارسن ا‑فلّاسن‑تسلّامن مدّن غ‑لاسواق ار‑اسن‑تّينين ‹امسلمد›. ءيمّا كونّي، ا‑ور‑تادجم يان اد‑اون‑يتّيني ‹امسلمد›، اشكو يان‑ومسلمد كاد‑دارون‑يلّان، د‑كونّي ايتماتن ا‑تگام. ا‑ور‑تّينيم ءي‑يان غ‑دّونيت‑اد ‹بابا›، اشكو يان باباتون كاد‑دارون‑يلّان، ا‑ت‑يگان د‑باباتون ن‑يگنّا. ا‑ور‑تادجم يان اد‑اون‑يتّيني ‹انمغور›، اشكو يان‑ونمغور كاد‑دارون‑يلّان، ا‑ت‑يگان د‑لماسيح. وانّا گيگون ءيمقّورن، نتّان ا‑را‑يگ اخدّام‑نّون. وانّا ءيسّيمغورن ءيخف‑نس را‑ت‑يژّيمژاي ربّي، ءيمّا وانّا ءيژّيمژاين ءيخف‑نس را‑ت‑يسّيمغور. «تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ايت‑سين‑وودماون ا‑تگام. ار‑تقّنم ءيمي ن‑تگلديت ن‑يگنّا ف‑مدّن، ءور‑ا‑دي‑تكشّمّ كونّي ءولا‑دا‑تّادجم غويلّي رانين اد‑د‑كشمن. وا‑يد‑بو‑سين‑وودماون، تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ار‑تشتّام تيگُمّا ن‑تهجّالين، ار‑تسّيغزّيفم تيژولّا‑نّون باش ا‑تسّبايّنم ءيخفاون‑نّون ءيس‑تفولكيم. ف‑غايان ا‑س‑را‑فلّاون‑يتّوت لحوكم س‑وگُّار. وا‑يد‑بو‑سين‑وودماون، تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ار‑تّبّيم ءيمدوان د‑يكالّن باش ا‑ترارم غير يان س‑وغاراس‑نّون، د‑نتّا ءيغ‑تي‑ترورم تسّوورّيم‑ت ءيگا يوس ن‑جهنّاما ءوگُّار‑نّون س‑سنات‑توال. «تاگوضي ا‑راد‑اون‑ييلي ا‑يگوّادن بوكضنين. ار‑تّينيم ‹يان ءيگّولّان س‑تگمّي ن‑ربّي ءور‑فلّاس‑يلّي يات، والاينّي يان ءيگّولّان س‑وورغ لّي‑يلّان غ‑تگمّي ن‑ربّي ءيقّان‑ت‑يد ا‑يسّافو تاگالّيت‑نس.› واي‑ينافالن، وا‑يبوكاضن، ءينيات‑يّي ما‑يوگُرن، ءيزد ءورغ نغد تيگمّي ن‑ربّي لّي‑يرورن ءورغ‑ان ا‑يگ وين ربّي؟ ار‑تّينيم ‹يان ءيگّولّان س‑وژرو ن‑تغرسي، ءور‑فلّاس‑يلّي يات، والاينّي يان ءيگّولّان س‑توافكا لّي‑يتّرسن ف‑وژرو ءيقّان‑ت‑يد ا‑يسّافو تاگالّيت‑نس.› واي‑يبوكاضن، ما‑يوگُرن، ءيزد تاوافكا نغد اژرو لّي‑يرورن تاوافكا‑يان ا‑تگ تين ربّي؟ وانّا ءيگّولّان س‑وژرو ن‑تغرسي، س‑وژرو ا‑س‑يگّولّا ءولا س‑كولّو ما‑فلّاس‑يلّان. د‑وانّا ءيگّولّان س‑تگمّي ن‑ربّي، س‑تگمّي ا‑س‑يگّولّا ءولا س‑ربّي لّي‑گيس‑يلّان. د‑وانّا ءيگّولّان س‑يگنّا، س‑لعرش ن‑ربّي ا‑س‑يگّولّا ءولا س‑والّي فلّاس ءيگاورن. «تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ايت‑سين‑وودماون ا‑تگام. ار‑تاكّام ءي‑ربّي يات زغ‑كرايگاتّ مراوت لّيقامت د‑لبسباس د‑لكمّون، والاينّي ار‑تتّوم تينباضين تيمزوورا ن‑شّرع زوند لحقّ ءولا لامان ءولا لحنانت. ها‑تيغاوسيوين‑اد ا‑فلّاون‑يلّان ا‑سرسنتي‑تسكارم، بلا تفلم تييّاض. وا‑يگوّادن بوكضنين، ها‑كونّي ار‑تستايم تيزيت زغ‑وامان، ار‑تصراتم ارعام. وا‑يد‑بو‑سين‑وودماون، تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ار‑تسّغوسم لكاس د‑تمكيلت زغ‑برّا، ءيمّا اگُنس ءيعمّر س‑تمخّارت د‑لباضل. واي‑افاريسي ابوكاض، سّغوس زوار لكاس ءولا تيمكيلت زغ‑وگُنس، ءيغوس ءيلمّا ءولا برّا. وا‑يد‑بو‑سين‑وودماون، تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. تگام زوند ءيمضّالن ملّولنين س‑لجير، ار‑تبانّ زغ‑برّا ءيس‑فولكين، ءيمّا اگُنس‑نسن ءيعمّر س‑يخسان ن‑ويلّي مّوتنين د‑كولّو ما‑يجلخن. ها‑كونّي تبانم زغ‑برّا ءيس‑تفولكيم، ءيمّا اگُنس‑نّون ءيعمّر س‑دّنوب د‑لخُشانت لّي‑گيگون‑يرگسن. «تاگوضي ا‑راد‑اون‑ييلي ا‑يمسلمدن ن‑شّرع د‑يفاريسين. ايت‑سين‑وودماون ا‑تگام. ار‑تبنّوم ءيمضّالن شوانين ءي‑لانبيا لّي‑زرينين، ار‑تكلّوم لقوبّات ن‑ويلّي سكرنين افولكي. ار‑تّينيم ‹مراد ءيس‑نلّا نكُّني غ‑ووسّان‑ان ن‑يمزوورا‑نّغ، ءور‑اكُّ‑را‑نسكر غمكلّي سكارن نتني، ار‑نقّان لانبيا.› والاينّي س‑واوال‑اد ا‑س‑ا‑تاكّام توگّا ف‑يخفاون‑نّون ن‑يس‑تگام تاروا ن‑ويلّي نغانين لانبيا. زايدات تكمّلم غايلّي بدان ءيمزوورا‑نّون. وا‑يلگمّاضن، وا‑تاروا ن‑يفاغرن، مامنك ا‑را‑تنجمّ زغ‑لهالاك ن‑جهنّاما؟ راد‑اون‑د‑ازنغ لانبيا د‑ايت‑لفهمت د‑يمسلمدن، تنغم گيسن كرا، تاگُلم كرا ف‑وگّجدي، تسّغورشم كرا غ‑تگُمّا ن‑تژالّيت، ار‑تن‑تطّايم زغ‑تمدينت س‑تمدينت. كونّي ا‑ف‑را‑د‑تتّوت لعقوبيت ف‑سّيبت ن‑كولّو ءيدامّن غوسنين لّي‑فّينين غ‑دّونيت‑اد، زغ‑يدامّن ن‑هابيل لّي‑يرضان ربّي ار ءيدامّن ن‑زاكاريّا يوس ن‑باراخييّا لّي‑تنغام غ‑گر‑تحانوت تامژلايت د‑ودغار ن‑تغرسي. لحقّ ايد‑اون‑نّيغ، تاسوت‑اد ا‑ف‑را‑د‑كولّو‑تتّوت لعقوبيت‑ان. «وا‑وروشاليم، وا‑وروشاليم، وا‑تالّي ءينقّان لانبيا ن‑ربّي ار‑تكّاتّ س‑يژران غويلّي‑د‑سرم‑يوزن. منّاوت‑توال اد‑ريغ اد‑د‑سّمونغ تاروا‑نّم غمكلّي‑دي‑تسّمونو‑تفولّوست ءيكيّاون غ‑دّو ءيفراون‑نس، ءيمّا كونّي ءور‑تريم. هان تيگمّي ن‑ربّي غ‑وامّاس‑نّون راد‑كولّو‑تخلو. راد‑اون‑ينيغ، ءور‑را‑يّي‑تژرم‑داغ ارد تينيم ‹امباركي ا‑يگا غواد‑د‑يوشكان س‑يسم ن‑سيدي ربّي.› » ءيفّوغ ياسوع زغ‑تگمّي ن‑ربّي ءيفتو. مونّ ديدس ءيمحضارن‑نس، ملن‑اس ءيغوربان مقّورنين ن‑تگمّي ن‑ربّي. ءيمّا نتّا ءينّا‑ياسن: «كولّو مايد تّمنادم، لحقّ ا‑راد‑اون‑ينيغ، راد‑كولّو‑يتياوگار س‑واكال. ءور‑را‑گيس‑يقاما‑وژرو ف‑وژرو.» لّيغ ءيسكيوس ياسوع غ‑وورير ن‑زّيتون اشكين‑د دارس ءيمحضارن‑نس واحدوتن سقسان‑ت: «ءيني‑اغ ماناگو ا‑را‑ييلي غايد‑س‑تنّيت؟ ما‑را‑يگ تاماتارت ن‑يس‑د‑ياكمور‑واسّ لّي‑غ‑را‑دي‑توورّيت كيّي ءولا ءيسيگُّرا ن‑دّونيت؟» ءيساول ياسوع ييني‑اسن: «اويات‑ستّ غ‑يخف‑نّون ا‑كُن‑ور‑يجلو يان. اشكو گّوتن غويلّي را‑د‑ياشك اسين‑د ءيسم‑ينو، كود يان ار‑يتّيني ءيزد نتّان ا‑يگان لماسيح. نتني راد‑جلّون مدّن گّوتنين. را‑تسفلدم ف‑يماغن ءولا لخبارات ن‑يماغن. رارات لعاقل ا‑ور‑تغووضم، اشكو ءيقّان‑د ا‑ييلي غايان، والاينّي ءور‑تا‑د‑يروح ءيسيگُّرا. را‑دي‑تنكر‑تقبيلت س‑تقبيلت تنكر‑د‑تگلديت س‑تگلديت، ييلي‑وغني ءيلينت زّنزالات غ‑كرا ن‑تميزار. والاينّي كولّو غايان ءيگا غير ازبّار امزوارو ن‑تلاليت. «غاكودان را‑كُن‑دحاين س‑لمحكامات ار‑كُن‑سّرفوفونّ نغن‑كُن. را‑كُن‑تكرهون غ‑كولّو تيميزار ن‑دّونيت ف‑سّيبت ن‑ما‑تگام وينو. ءيگّوت گيگون ما‑را‑توت‑تبايضّرت ءيضر غ‑ووسّان‑ان. را‑ن‑يدحاي كرا كرا، ار‑يتكرهو كرا كرا. گّوتن ءيد‑بو‑تكركاس لّي‑را‑د‑ياشك ار‑تّينين ءيس‑گان لانبيا، ار‑جلّون كيگان د‑مدّن. راد‑باهرا‑تّيگات لخُشانت ارد ءيدروسن غويلّي دار تقاما لحنانت غ‑وول‑نسن. ءيمّا وانّا ءيبيدّن ءيزگا ار ءيسيگُّرا را‑ينجم. را‑تّبرّاحم غ‑كولّو دّونيت س‑لخبار ءيفولكين ن‑تگلديت ن‑يگنّا ارد لكمنت توگّا‑نّون كرايگاتّ تامازيرت. غاكودان ا‑را‑د‑يروح ءيسيگُّرا. «را‑تژرم تاجلخيت لّي‑يفنّون تنكر غ‑ودغار امژلاي ن‑ربّي، غمكلّي ءينّا نّابي دانيال غايد ءيزرين. وانّا ياقران، ءيلّا فلّاس ا‑ييسّان لمعنا. غاكودان وينّا لّانين غ‑تمازيرت ن‑يودايا، ءيقّان‑تن‑د اد‑روولن س‑يدرارن. وانّا ءيلّان غ‑يگّي ن‑تگمّي، ءيقّان‑ت‑يد ا‑ور‑يكشم ا‑د‑ياسي كرا. وانّا‑ن‑يلّان غ‑يگران، ءيقّان‑ت‑يد ا‑ور‑يوورّي تيغوردين ا‑د‑ياوي تيملسيت‑نس. راد‑باهرا‑شقون‑ووسّان‑ان ف‑تيلّي گيسن ربّونين ءولا تيلّي گيسن سّنگاينين. ضالبات ءي‑ربّي ا‑ور‑اون‑دي‑تاشك‑ترولا‑يان غ‑تگرست ءولا غ‑واسّ ن‑وسونفو. اشكو را‑تيلي‑تنوكموت غ‑ووسّان‑ان، ءور‑جّو‑تلّي زوند نتّات زغ‑يسيزوار ن‑دّونيت سول س‑غيلاد، ءولا راد‑داغ‑تيلي زوند نتّات. مراد ءيس‑ور‑يسّيدروس ربّي ءوسّان‑ان ءور‑را‑ينجم يان. والاينّي ف‑سّيبت ن‑مدّن‑نس لّي‑يژلي، هاتي ءيسّيدروس ءوسّان‑ان ف‑سّيبت‑نسن. «غاكودان ءيغ‑اون‑ينّا كرا ن‑يان ‹ها‑لماسيح ءيلّا غيد› نغد ‹هاتين ءيلّا غين› ا‑ت‑ور‑تامنم. اشكو راد‑د‑نكرن كرا ن‑مدّن، كود يان ار‑يتّيني ف‑يخف‑نس ءيزد لماسيح ا‑يگا نغد كرا ن‑نّابي، والاينّي ار‑سّكيركيسن. راد‑سكارن تيميتار مقّورنين د‑لمعجيزات ءيغ‑وفان اد‑جلّون ءولا غويلّي گانين وين ربّي. هاتي نّيغ‑اون‑ت ءور‑تا‑يجري. غاكودان ءيغ‑اون‑نّان ‹هاتين غ‑لخلا› ا‑ور‑تفّوغم س‑غين. ءيغ‑اون‑نّان ‹هاتي غ‑وگُنس ن‑تگمّي› ا‑تن‑ور‑تامنم. اشكو غمكلّي كّاتن‑ووسمانّ غ‑شّرق ار‑ن‑تّيسفيون ءي‑لغرب، غمكان ا‑راد‑د‑اشكغ نكّي لّي‑يگان يوس ن‑بنادم. ءينّاغ ءيلّا ميضروس، ا‑غ‑ا‑ن‑تمونون ءيگادرن. «غاكودان تيگيرا ن‑تنوكموت ن‑ووسّان‑ان، را‑تلّاس تافوكت، ءور‑را‑يفاو‑وايّور. راد‑ضرن ءيتران زغ‑يگنوان، تياتّاينت تيفاوين ن‑يگنوان. غاكودان ا‑را‑دي‑تبان‑تماتارت ن‑يوس ن‑بنادم غ‑يگنوان، ار‑الّان كولّو ءيمزدغن ن‑دّونيت، ژرن‑يّي فتيغ‑د غ‑گر ءيمدلا ن‑يگنوان س‑لقوّا د‑لمجد ءيگّوتن. را‑يتّوت نّفّار ءيتجهّدن، ازنغ لمالايكا‑نو اد‑سّمونّ غويلّي گانين وينو زغ‑كرايگاتّ تاسگا، زغ‑تّمي ن‑دّونيت ار تّمي ياضني. «هاتي تازارت ا‑زغ‑را‑تيسّانم لمعنا. ءيغ‑لگُّيغنت‑تصطّوين‑نس تسّوفغ‑د تيفراوين‑نس تيسّانم ءيس‑د‑ياكمور صّيف. غمكان ا‑را‑ييلي. ءيغ‑تژرام كولّو تيميتار‑اد س‑اون‑نّيغ، تيسّانم ءيس‑د‑ياكمور، هاتين غ‑يمي. لحقّ ا‑راد‑اون‑ينيغ، ءور‑را‑تزري تاسوت‑اد ارد كولّو ءيجرو ماياد. راد‑يتّين ءيگنوان د‑واكال، والاينّي ءور‑سار‑يتّين ءيواليون‑ينو. والاينّي اسّ‑ان ءولا تاساعت‑ان، ءور‑تن‑يسّين يان، لا لمالايكا ن‑يگنّا ءولا يوس ن‑بنادم. غير بابا لّي‑يلّان غ‑يگنّا، نتّان واحدوت ا‑يسّنّ. «زوند غايلّي ءيلّان غ‑ووسّان ن‑نوح ا‑را‑ييلي غ‑ووسّان‑ان غ‑راد‑د‑اشكغ نكّي لّي‑يگان يوس ن‑بنادم. غ‑ووسّان ن‑نوح، ءور‑تا‑د‑غلين‑وامان ف‑دّونيت، ار‑شتّان ار‑سّان ار‑تّاهالن ار‑تّاهالنت، ار اسّ لّي‑غ‑يكشم نوح س‑واناو. مدّن‑ان ءور‑تّ‑گيس‑يوين ايلّيغ غلين‑وامان تياوهلاكن كولّوتن. غمكان ا‑را‑يجرو غ‑واسّ‑ان غ‑راد‑د‑اشكغ نكّي لّي‑يگان يوس ن‑بنادم. غاكودان راد‑يلين سين ءيرگازن غ‑يگر، را‑ييتّي يان ءيقاما يان. راد‑يلينت سنات‑تمغارين ار‑ژّاضنت س‑وزرگ، را‑تيتّي يات تقاما يات. ضوفات اشكو ءور‑تسّينم مان اسّ ا‑را‑د‑ياشك سيديتون. راد‑اون‑ينيغ، مراد ءيس‑يسّن بو‑تگمّي مان تاساعت غ‑ييض ا‑را‑د‑ياشك‑ومخّار، راد‑باهرا‑يضوف. ءور‑را‑ت‑يادج ا‑ينقب تيگمّي‑نس. ءولا كونّي ءيلّا فلّاون ا‑بدّا‑توجادم، اشكو را‑د‑ياشك يوس ن‑بنادم غ‑كرا ن‑تاساعت لّي‑ور‑تغالم. «مانوا ءيگان اخدّام ءيفولكين باب‑لعاقل؟ نتّان ا‑مي‑را‑يفل سيديس تيگمّي غ‑دّو‑وفوس‑نس، باش ا‑ياكّا ءي‑يخدّامن ياضني اد‑شتّان كرايگاتّ يان غ‑تاساعت‑نس. امباركي ا‑يگا‑وخدّام نّا‑مي‑د‑يوورّي سيديس ياف‑ت‑يد ار‑يسكار مايان. لحقّ ا‑راد‑اون‑ينيغ، راد‑اس‑يفل سيديس ايدا‑نس كولّوت غ‑دّو‑وفوس‑نس. والاينّي ءيغ‑يُخشن‑وخدّام‑ان ييني د‑يخف‑نس ‹ءيماطل‑ن سيدي› ار‑يكّات ءيخدّامن ياضني ار‑يشتّا ار‑يسّا د‑ويلّي سّنوفولنين ءيخفاون‑نسن س‑تيسّي، هان را‑د‑يوورّي سيديس غ‑يان‑واسّ لّي‑ف‑ور‑يسكير ءولا يات تاساعت لّي‑ور‑يغال. غاكودان را‑ت‑يبري سيديس، ءيگ‑ت‑ين د‑ايت‑سين‑وودماون غ‑يلّيغ الّان ار‑تگژاژن ءوخسان‑نسن.» «غ‑ووسّان‑ان را‑تگ‑تگلديت ن‑يگنّا زوند مراوت‑تفرخين، ءوسينت لقنادل فّوغنت ا‑ن‑مناگّارنت اسلي. سمّوست گيسنت گانت ءيست‑لعاقل، سمّوست ءور‑سوانگمنت غ‑ما‑را‑تند‑د‑يقّان. ءيست‑لعاقل، لّيغ ءوسينت لقنادل‑نسنت اوينت ديدسنت تابوقّالت ن‑زّيت. ءيمّا ختيلّي ءور‑سوانگمنين ءور‑ديدسنت‑يوينت زّيت. لّيغ‑ن‑يماطل‑وسلي، ياوي‑تنت ءيطس كولّوتنت گنّت. غ‑طوژّونت ن‑ييض سفلدنت ءي‑كرا ن‑يان يولّ اوال‑نس ءينّا ‹هاي‑اسلي يوشكا‑د، فّوغامد‑د ا‑ت‑ين‑تمناگّارمت.› نكرنت‑تفرخين كولّوتنت، سّنگادّانت تيفتيلين ءي‑لقنادل‑نسنت. ءينينت ءيلمّا ختيلّي ءور‑سوانگمنين ءي‑تييّاض ‹فكامت‑اغ ءيميكّ زغ‑زّيت‑نّونت اشكو راد‑اغ‑خسين لقنادل‑نّغ.› ءيمّا ءيست‑لعاقل نّانت‑اسنت ‹ءيس‑راد‑اغ‑كولّو‑توودو زّيت‑اد نكُّنينتي ءولا كونّينتي؟ زايدامت س‑دار ءيد‑بو‑زّيت تسغمد‑د ما‑كُنت‑يخصّان.› دّونت نتنتي، س‑د‑يروح‑وسلي. نكرنت ختيلّي ءوجادنين مونّت ديدس س‑تمغرا. ءيقّن‑د ءيمي ن‑تگمّي. اشكيند‑د‑تفرخين‑لّي ياضني ار‑اقرانت ار‑تّينينت ‹وا‑سيدي، وا‑سيدي، رژم‑اغ.› ءيمّا نتّا ءيرور‑اسند‑د ‹لحقّ ا‑راد‑اونت‑ينيغ، ءور‑كُنت‑سّينغ.› » ءيزايد ياسوع ييني‑اسن: «ضوفات اشكو ءور‑تسّينم مان اسّ ءولا مان تاساعت ا‑راد‑د‑اشكغ. «را‑تگ‑تگلديت ن‑يگنّا زوند يان‑ورگاز ءيرا ا‑يمودّو، ءيغر‑د ءي‑يخدّامن‑نس س‑دارس، ءيفل كولّو ايدا‑نس غ‑يفاسّن‑نسن. ءيفك ءي‑يان سمّوست لوزنات ن‑نّوقرت، ءيفك ءي‑وايّاض سنات، ءيفك ءي‑وايّاض يات، كرايگاتّ يان د‑غونشك نّا‑مي‑يژضار، ءيفّوغ ءيلمّا ءيمودّو. ءيدّو غوالّي مي ءيفكا سمّوست لوزنات ن‑نّوقرت ار‑سرسنت‑يساغ ار‑يزّنزا ايلّيغ‑د‑سرسنت‑يرور سمّوست لوزنات ياضني. غمكاد ا‑يسكر ءولا غوالّي دار سنات لوزنات، ءيرار‑د سرسنت سنات ياضني. ءيمّا غوالّي دار يات لوزنت ءيدّا ءيغزا غ‑واكال ءيحضو نّوقرت ن‑سيديس. ءيزري ما‑يزرين س‑د‑يوورّي سيديتسن، ءينحاساب د‑يخدّامن‑نس. ياشك‑يد غوالّي مي ءيفكا سمّوست لوزنات، ياسي‑د ديدسنت سمّوست ياضني ييني‑اس ‹وا‑سيدي، ها‑سمّوست لوزنات لّي‑داري‑تفلت، رورغ‑د سرسنت سمّوست ياضني نّيگاتسنت.› ييني‑اس سيديس ‹ءيشوا ماياد، اي‑اخدّام ءيفولكين ءيصلحن. تسكرت ما‑ك‑يد‑يقّانّ س‑مايلّي ءيدروسن. ءيمّا غيلاد راد‑فلغ غ‑وفوس‑نّك ما‑يگّوتن. كشم‑د تفرحت د‑سيديك.› ياشك‑يد ءيلمّا غوالّي دار سنات لوزنات ييني‑اس ‹وا‑سيدي، ها‑سنات لوزنات لّي‑داري‑تفلت، رورغ‑د سرسنت سنات ياضني نّيگاتسنت.› ييني‑اس سيديس ‹ءيشوا ماياد، اي‑اخدّام ءيفولكين ءيصلحن. تسكرت ما‑ك‑يد‑يقّانّ س‑مايلّي ءيدروسن. ءيمّا غيلاد راد‑فلغ غ‑وفوس‑نّك ما‑يگّوتن. كشم‑د تفرحت د‑سيديك.› ياشك‑يد ءيلمّا غوالّي مي ءيفكا يات لوزنت ييني‑اس ‹وا‑سيدي سّنغ ءيزد ارگاز ءيشقان ا‑تگيت، ار‑تمگّرت ما‑ور‑تكرزت، ار‑تسّمونوت ما‑ور‑تلوحت. كسوضغ غاكودان، دّوغ حضوغ لوزنت‑نّك غ‑دّو‑واكال. ها‑لامانت‑نّك ءيويغ‑اك‑تّ‑يد.› ءيرار‑اس سيديس ‹واي‑اخدّام يُخشنّ ءيدّولّان، ءيس‑تسّنت ءيس‑ا‑د‑مگّرغ ما‑ور‑كرزغ، ار‑د‑سّمونوغ ما‑ور‑ن‑لوحغ؟ لّيغ تسّنت ماياد، ءيلّا فلّاك ا‑ن‑تسرست نّوقرت‑ينو غ‑دار ءيصرّارفين، اكود نّا‑د‑وورّيغ امژغ‑د لامانت‑ينو نتّات د‑ما‑دي‑ترور ءيكّا نّيگاس.› ييني ءيلمّا: ‹كّيسّات‑اس لوزنت‑ان، تفكم‑تّ ءي‑والّي دار مراوت لوزنات. اشكو وانّا دار ءيلّا، راد‑اس‑يتياوفكا ءوگُّار، ييلي‑اس ما‑يگّوتن. ءيمّا وانّا ءور‑دار‑يلّي، راد‑اس‑يتياوكّاس ءولا ما‑دارس‑يلّان. ءيمّا اخدّام‑اد ءور‑يسكيرن يات، لوحات‑ت‑ين غ‑توگّوگت ن‑تيلّاس. غين ا‑غ‑راد‑الّان ار‑تگژاژن ءوخسان‑نسن.› » ءيزايد ياسوع ييني‑اسن: «غاكود لّيغ راد‑د‑وورّيغ س‑دّونيت‑اد، مونّ‑د ديدي كولّو لمالايكا س‑لمجد ءيگّوتن، راد‑سكيوسغ نكّي لّي‑يگان يوس ن‑بنادم ف‑لعرش ن‑تگلديت‑ينو، اشكين‑د س‑لگدّام‑ينو كولّو ايت‑تميزار ن‑دّونيت. را‑تن‑اطّوغ ءي‑نگراتسن غمكلّي ياطّو‑ومكسا ءيهراي زغ‑واغاضن. راد‑گغ ءيهراي ف‑وفاسيي‑ينو، گغ اغاضن ف‑وژلماض‑ينو، ساولغ ءيلمّا، نكّي لّي‑يگان اگلّيد، س‑ويلّي لّانين ف‑وفاسي ءينيغ‑اسن ‹اشكاد‑د ا‑يمباركين ن‑بابا ربّي، كشمات س‑تگلديت لّي‑اون‑يجّوجاد زغ‑يسيزوار ن‑دّونيت. اشكو ياغ‑يّي لاژ تفكم‑يّي اد‑شّغ، ياغ‑يّي ءيريفي تفكم‑يّي اد‑سوغ، گيغ اغريب تشّكشمّ‑يّي س‑دارون، ياغ‑يّي‑وسمّيض تفكم‑يّي ماد‑لسّاغ، ءوضنغ تگابلم‑يّي، لّيغ‑ن غ‑لحبس تاشكيم‑ن س‑داري.› غاكودان را‑يّي‑سقسان غويلّي ف‑يرضا ربّي ‹ماناگو ا‑سيدي، ا‑ك‑نژرا ياغ‑ك لاژ نفك‑اك ا‑تشّت، نغد ياغ‑ك ءيريفي نفك‑اك ا‑تسوت؟ ماناگو ا‑ك‑نژرا تگيت اغريب نشّكشم‑ك‑يد س‑دارنّغ، نغد ياغ‑ك‑وسمّيض نفك‑اك ما‑تلسّات؟ ماناگو ا‑ك‑نژرا توضنت نغد تلّيت غ‑لحبس ناشك‑ين دارك؟› راد‑اسن‑رارغ، نكّي لّي‑يگان اگلّيد، ‹لحقّ ا‑راد‑اون‑ينيغ، غاكود نّا‑تي‑تسكرم غ‑يان زغ‑ايتما‑ياد مژّينين، هاتي تسكرم‑ت گيگي نكّي.› ءينيغ ءيلمّا ءي‑ويلّي لّانين ف‑وژلماض ‹ءيتّيات‑ن زغ‑گيگي ا‑ويلّي ءيخزا ربّي، تدّوم س‑لعافيت لّي‑ور‑را‑سار‑يخسي، تّياوسكار ءي‑يبليس د‑لمالايكا‑نس. اشكو ياغ‑يّي لاژ ءور‑يّي‑تفكيم اد‑شّغ، ياغ‑يّي ءيريفي ءور‑يّي‑تفكيم اد‑سوغ، گيغ اغريب ءور‑يّي‑تشّكشيمّ س‑دارون، ياغ‑يّي‑وسمّيض ءور‑يّي‑تفكيم ماد‑لسّاغ، ءوضنغ ءيليغ‑ن غ‑لحبس ءور‑يّي‑تگابلم.› غاكودان را‑يّي‑سقسان ءولا نتني ‹ماناگو ا‑سيدي ا‑ك‑نژرا ياغ‑ك لاژ نغد ءيريفي، نغد تگيت اغريب نغد ياغ‑ك‑وسمّيض نغد توضنت نغد تلّيت غ‑لحبس ءور‑ن‑دارك‑نوشكي ا‑ك‑نعاون؟› راد‑اسن‑رارغ ‹لحقّ ا‑راد‑اون‑ينيغ، لّيغ ءور‑تي‑تسكيرم غ‑يان غ‑يمژّيين‑اد، ءور‑ت‑گيگي‑تسكيرم نكّي.› راد‑دّون نتني س‑لعقوبيت لّيخرت. ءيمّا غويلّي‑ف‑يرضا ربّي راد‑د‑كشمن س‑تودرت ءيدومن.» لّيغ ءيكمّل ياسوع ءيواليون‑اد كولّوتن، ييني ءي‑يمحضارن‑نس: «تسّنم ءيزد سين‑ووسّان ا‑يقامان ءي‑لعيد ن‑وسورف. غاكودان ا‑را‑يّي‑ن‑دحين نكّي لّي‑يگان يوس ن‑بنادم ا‑يّي‑نغن ف‑وگّجدي.» مونّ‑د ءينمغورن ن‑تگمّي ن‑ربّي د‑يمغارن ن‑تمازيرت‑ان غ‑تگمّي ن‑قايافا لّي‑يگان انمغور ءيهيّان ن‑تگمّي ن‑ربّي. مشاوارن ف‑مامنك ا‑س‑راد‑امژن ياسوع س‑لحيلت ا‑ت‑نغن. والاينّي نّان ءي‑نگراتسن: «ءورد غ‑ووسّان لّعيد باش ا‑ور‑دووين مدّن.» ءيلّا ياسوع غ‑ودوّار ن‑بيتعانيا غ‑تگمّي ن‑سيمعان لّي‑ستّين‑يكّان ءيگا انجدام، ءيسكيوس ار‑يشتّا. تكشم‑د دارس يات‑تمغارت توسي‑د يات‑تبوقّالت ن‑وژرو تيلي گيس توجّوت ءيصفان، ءيگّوت‑باهرا‑واتيگ‑نس. تفّي‑تّ‑يد ف‑يخف ن‑ياسوع. لّيغ ژران ءيمحضارن ما‑تسكر، بزگن فلّاس، ءينين ءي‑نگراتسن: «ماخ ا‑ستّي‑تجلا؟ مراد ءيس‑تنزا توجّوت‑اد را‑دي‑تاوي كيگان، نفك‑ت ءي‑يمژلاض.» ءيمّا ياسوع ءيسّن ماد‑سوانگمن ييني‑اسن: «ماخ ايلّيغ تشقام د‑تمغارت‑اد؟ هاتّي تسكر گيگي افولكي. ءيمژلاض راد‑بدّا‑ديدون‑يلين، ءيمّا نكّي ءور‑راد‑بدّا‑ديدون‑يليغ. هاتّي توجّوت‑اد فلّا تفّي، تژغور سرس دّات‑ينو ءي‑ومضّال. لحقّ ا‑راد‑اون‑ينيغ، ءينّاغ ا‑تبرّاحن مدّن س‑لخبار‑اد ءيفولكين غ‑كولّو دّونيت، را‑تّينين ف‑مايد تسكر ختاد، ار‑تّ‑يد‑سرس‑كتّين.» غاكودان ا‑ينكر يان زغ‑گر سين د‑مراو ن‑ومحضار، ءيسم‑نس ياهودا ءيسخاريوط، ءيدّو س‑دار ءينمغورن ن‑تگمّي ن‑ربّي. ييني‑اسن: «منشك ا‑راد‑يّي‑تفكم اد‑اون‑ت‑زّنزغ؟» فكن‑اس كراض ءيد‑مراو ن‑وقاريد ن‑نّوقرت. غاكودان ا‑يوورّي ار‑يسوينگيم مامنك ا‑را‑تن‑يعاون اد‑امژن ياسوع. ءيلكم‑د‑واسّ امزوارو غ‑ووسّان ن‑ورخصيص. اشكين‑د ءيمحضارن س‑دار ياسوع سقسان‑ت: «ماني تريت اد‑اك‑ن‑گيس‑نجّوجاد ءيمنسي لّعيد ن‑وسورف؟» ييني‑اسن: «زايدات س‑دار فلان غ‑تمدينت تينيم‑اس ‹هاتي ءينّا‑ياك‑د‑ومسلمد: تلكم‑د تاساعت‑ينو. راد‑شّغ ءيمنسي ن‑وسورف غ‑تگمّي‑نّك، نكّي د‑يمحضارن‑ينو.› » سكرن ءيمحضارن س‑ما‑ف‑تن‑يوصّا ياسوع، جّوجادن ءيمنسي ن‑وسورف. تروح‑د‑تدگُّات ءيسكيوس ياسوع ا‑يشّ د‑يمحضارن‑نس س‑سين د‑مراو. لّيغ ا‑شتّان ييني‑اسن: «لحقّ ا‑راد‑اون‑ينيغ، را‑يّي‑يزّنز يان غ‑گراتون.» طيّر‑اسن باهرا، بدون ار‑ت‑سقسان كولّوتن، كود يان ار‑يتّيني: «ياك، ءورد نكّي ا‑سيدي؟» ييني‑اسن: «يان زغ‑ويلّي ديدي درانين غ‑وروكو‑اد ا‑را‑يّي‑يزّنز. ها‑يوس ن‑بنادم را‑يمّت غمكلّي فلّاس ءيتياران، والاينّي تاگوضي ا‑را‑ييلي ءي‑ورگاز لّي‑يزّنزان يوس ن‑بنادم. يوف‑اس ءي‑ورگاز‑ان مراد ءيس‑ور‑اكُّ‑يلول.» ءيساول ياهودا لّي‑را‑ت‑يزّنز ييني‑اس: «ءيزد نكّي ا‑سيدي؟» ءيرار‑اس: «كيّي ا‑ت‑ينّان.» لّيغ ا‑شتّان ياسي ياسوع تانگولت، ءيشكر ربّي ءيبّي‑تّ، ءيفك‑تّ ءي‑يمحضارن‑نس ييني‑اسن: «امژات تشّم. ختاد تگا دّات‑ينو.» ياسي لكاس، ءيشكر ربّي ءيفك‑اسن‑ت ييني‑اسن: «سوات زغ‑گيس كولّوكن. غويد گان ءيدامّن‑ينو لّي‑را‑يفّي ف‑سّيبت ن‑مدّن گّوتنين باش اد‑گن لعهد لّجديد غ‑گراتون د‑ربّي ما‑س‑ا‑فلّاون‑يسّيتّي دّنوب‑نّون. راد‑اون‑ينيغ، ءور‑سول‑راد‑سوغ زغ‑لغلّت ن‑واضيل ار اسّ لّي‑غ‑را‑ت‑ديدون‑سوغ زغ‑لجديد غ‑تگلديت ن‑بابا ربّي.» اسين ءيلمّا يان‑ومارگ زغ‑يموريگن ن‑ربّي، فّوغن س‑وورير ن‑زّيتون. ييني‑اسن ياسوع: «ها‑كونّي غ‑يض‑اد را‑يّي‑كولّو‑تفلم، اشكو ءيتيارا ‹راد‑وتغ امكسا، تمزر‑تووروت ن‑وولّي.› والاينّي تيگيرا ن‑ماد‑د‑نكرغ زغ‑لموت را‑كُن‑زوورغ س‑تمازيرت ن‑جاليل.» ءيساول بطرُس ييني‑اس: «واخّا‑ك‑كولّو‑فلن، ءور‑سار‑ك‑فيلغ نكّي.» ءيمّا ياسوع ءيرور‑اس: «لحقّ ا‑راد‑اك‑ينيغ، غ‑يض‑اد ءور‑را‑يغر‑وفولّوس ارد تينيت كراطّ‑توال ءور‑يّي‑تسّينت.» ييني‑اس بطرُس: «واخّا راد‑ديدك‑مّتغ، ءور‑راد‑ينيغ ءور‑ك‑سّينغ.» غمكاد اد‑نّان ءيمحضارن كولّوتن. غاكودان ءيدّا ديدسن ياسوع س‑يان‑ودغار لّي‑مي‑تّينين ‹گاتسيماني›، ييني ءي‑يمحضارن‑نس: «گاورات غيد. راد‑فتوغ يان ءيميكّ اد‑ژّالّغ.» ياوي ديدس بطرُس د‑سين تاروا ن‑زابدي. ءيغووض ياسوع غ‑تاساعت‑ان، مّاغن ءيسوينگيمن باهرا غ‑وول‑نس. ييني‑اسن: «تژّاي فلّا تاغوفت‑اد ار لموت. گاورات غيد تاوزم ديدي.» ءيزايد ءيفتو يان ءيميكّ ءيضر ف‑وودم‑نس س‑واكال ءيژّالّ ييني: «وا‑بابا، سّيتّي فلّا لكاس‑اد ن‑ورفوفن ءيغ‑يژضار ا‑ييتّي. والاينّي ا‑ييلي ما‑تريت، ءورد ماد‑ريغ نكّي.» يوورّي س‑دار ءيمحضارن ياف‑تن‑ين طّاسن. ءيساول س‑بطرُس ييني‑اس: «ءيس‑ور‑تژضارم ا‑ديدي‑تاوزم يات تاساعت؟ اوزات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو. هاتي ءول ن‑بنادم ار‑يتّيري ا‑يسكار افولكي، ءيمّا دّات‑نس تضعف.» ءيدّو تيس سنات‑توال ءيژّالّ ييني: «وا‑بابا، ءيغ‑ور‑يژضار اد‑يّي‑يانف لكاس‑اد بلا‑ت‑سويغ، ا‑ييلي ما‑تريت كيّي.» يوورّي‑داغ ياف‑تن‑ين طّاسن، ءينرا‑تن ءيطس. ءيفل‑تن ءيدّو تيس كراطّ‑توال ءيژّالّ ييني غمكلّي ءينّا تيواليو تيمزوورا. يوورّي ءيلمّا س‑دار ءيمحضارن‑نس ييني‑اسن: «طّاسات غيلا تسونفوم. هاتي تلكم‑د تاساعت. ءينزا يوس ن‑بنادم س‑گر ءيفاسّن ن‑مدّن أُخشنّين. نكرات ا‑ندّو. ها‑والّي‑يّي‑يزّنزان يوشكا‑د.» سول ا‑يساوال س‑د‑يروح ياهودا لّي‑يگان يان زغ‑سين د‑مراو ن‑ومحضار. مونّ‑د ديدس كيگان د‑مدّن اسين‑د لكمامي د‑يعماد. ءوزنّ‑تن‑د ءينمغورن ن‑تگمّي ن‑ربّي د‑يمغارن ن‑تمازيرت‑ان. غوالّي ءيزّنزان ياسوع ءيملا‑ياسن‑ياد تاماتارت‑اد ييني‑اسن «وانّا سّودنغ، غوان ا‑ت‑يگان. امژات‑ت.» ياشك‑يد ياهودا ءيفتو س‑دار ياسوع ييني‑اس: «سّلام اي‑امسلمد،» ءيسّودن‑ت. ءيساول ياسوع ييني‑اس: «واي‑امدّاكُّل‑ينو، ءيزد ماياد ا‑ف‑دي‑توشكيت س‑غيد؟» لكمن‑ت‑ين وييّاض، گرن‑ين ءيفاسّن فلّاس امژن‑ت. ءينكر ءيلمّا يان زغ‑ويلّي لّانين د‑ياسوع ءيلدي‑د لكومّيت‑نس، يوت اخدّام ن‑ونمغور ن‑تگمّي ن‑ربّي ءيبّي‑اس امژّوغ. ءيمّا ياسوع ءينّا‑ياس: «رار لكومّيت‑ان س‑وغلاف‑نس. هان كولّو وانّا يوسين لكومّيت، س‑لكومّيت ا‑س‑را‑يمّت. ءيس‑ور‑تسّينم ءيس‑ژضارغ اد‑ضالبغ بابا ربّي، يازن‑يّي‑د ءوگُّار ن‑سين د‑مراو ن‑وكابار لّمالايكا؟ والاينّي ءيغ‑سكرغ مايان، مامنك ا‑راد‑افون‑وارّاتن ن‑ربّي لّي‑ملانين ءيس‑د‑يقّان ا‑يجرو كولّو ماياد؟» ءيساول ياسوع غاكودان س‑مدّن‑ان گّوتنين ييني‑اسن: «ما‑س‑دي‑تفّوغم س‑لكمامي د‑يعماد ا‑يّي‑تغويم زوند ءيغ‑گيغ امخّار؟ گاورغ‑ن‑بدّا غ‑تگمّي ن‑ربّي كرايگاتّ اسّ ار‑سّلمادغ، ءور‑يّي‑تومژم غ‑ووسّان‑ان. والاينّي ءيجرا كولّو ماياد باش ا‑يافو ما‑يتياران غ‑وارّاتن لّانبيا.» غاكودان روولن كولّو ءيمحضارن‑نس فلن‑ت. غويلّي ءومژنين ياسوع ءيوين‑ت س‑دار قايافا انمغور ن‑تگمّي ن‑ربّي، مونّ‑د ءيمسلمدن ن‑شّرع د‑يمغارن ن‑تمازيرت كولّوتن. ءيضفور‑ت بطرُس زغ‑توگّوگت ار امّاس ن‑تگمّي ن‑ونمغور، ءيكشم ءولا نتّا ءيسكيوس د‑يمخزنيين ا‑يژر ما‑را‑يجرو. ءيمّا ءينمغورن ن‑تگمّي ن‑ربّي د‑يمغارن لّمحكاما كولّوتن ار‑سيگّيلن س‑كرا ن‑توگّا ن‑تكركاس ف‑ياسوع ما‑ف‑ا‑ت‑نقّان. نكرن كيگان د‑مدّن ار‑فلّاس‑سّكيركيسن، والاينّي ءور‑گيسن‑وفين كرا ن‑توگّا ءيزگان. غ‑يسيگُّرا نكرن سين ءيناگان ءينين: «ارگاز‑اد نسفلد‑اس ءينّا ‹نكّي ژضارغ اد‑خلوغ تيگمّي ن‑ربّي بنوغ‑تّ‑داغ غ‑كراض‑ووسّان.› » ءيبيدّ‑ونمغور ن‑تگمّي ن‑ربّي ءيسقسا ياسوع: «ءيس‑ور‑را‑د‑فلّاسن‑ترارت س‑يات؟ مايد‑فلّاك‑تّينين غويد غ‑توگّا‑نسن؟» ءيمّا ياسوع غير ءيفسّا. ءيساول‑داغ‑ونمغور ييني‑اس: «گيغ‑ن سرك ربّي لّي‑يدّرن. ءيني‑اغ، ءيزد كيّي ا‑يگان لماسيح يوس ن‑ربّي؟» ءيرار‑اس ياسوع: «كيّي ا‑ت‑ينّان. والاينّي راد‑اون‑ينيغ، يان ءيميكّ را‑تژرم يوس ن‑بنادم ءيسكيوس ف‑وفاسي ن‑ربّي ءيتجهّدن، ءيفتو‑د غ‑گر ءيمدلا ن‑يگنوان.» لّيغ ءيسفلد‑ونمغور ن‑تگمّي ن‑ربّي ءي‑ماياد، ءيبّي تيملسا‑نس ييني‑اسن: «لكوفر اياد. ما‑سول‑نرا ءيناگان؟ كونّي تسفلدم غيلاد ءي‑واوال‑نس لّكوفر. ما‑فلّاس‑تنّام؟» رارن‑اس: «ءيقّان‑ت‑يد ا‑يمّت.» سّوفسن غ‑وودم‑نس ار‑ت‑كّاتن. كرا يوت‑ت س‑يباريقن ار‑اس‑تّينين: «وا‑كيّي‑اد ءيگان لماسيح، ءيغ‑تگيت نّابي مل‑اغ مانوا‑ك‑يوتن.» ءيمّا بطرُس سول ءيگاور غ‑برّا غ‑وامّاس ن‑تگمّي. تاشك‑يد يات‑تخدّامت تيني‑اس: «ءولا كيّي تلّيت د‑ياسوع گو‑جاليل.» ءيرار‑اس نتّا غ‑لگدّام ن‑ويلّي‑د‑يلّا: «ءور‑سّينغ ما‑س‑تنّيت.» ءيفّوغ س‑وغگُمّي. تژر‑ت يات‑تخدّامت ياضني، تيني ءي‑ويلّي بيدّنين غين: «غواد ءيلّا د‑ياسوع گو‑ناصيرا.» ءيرار‑داغ بطرُس س‑تگالّيت: «ءور‑سّينغ ارگاز‑ان.» يان ءيميكّ س‑اس‑نّان غويلّي بيدّنين غين: «س‑صّاحت تگيت كيّي زغ‑گيسن، اشكو ار‑تساوالت غمكلّي ساوالن ايت‑جاليل.» ءينكر بطرُس ار‑يتگالّا ار‑يتّيني س‑جّهد: «نكّي ءور‑سّينغ ارگاز‑ان ف‑ا‑تساوالم.» ءيغر‑وفولّوس غاكودان. ءيكتي‑د بطرُس مايلّي‑س‑اس‑ينّا ياسوع: «ءور‑را‑يغر‑وفولّوس ارد تينيت كراطّ‑توال ءور‑يّي‑تسّينت.» ءيفّوغ ار‑يالّا باهرا. لّيغ ءيفاو زّمان مونّ‑د ءينمغورن ن‑تگمّي ن‑ربّي د‑يمغارن ن‑تمازيرت‑ان كولّوتن، مشاوارن ف‑مامنك ا‑راد‑نغن ياسوع. كرفن‑ت اوين‑ت دحين‑ت‑ين ءي‑بيلاطوس لحاكم ن‑رّومان. ءيمّا ياهودا لّي‑يزّنزان ياسوع، لّيغ ءيسفلد ءيس‑فلّاس‑حكامن س‑لموت تُگراژ‑ت. ياوي كراض ءيد‑مراو ن‑وقاريد‑لّي ن‑نّوقرت، ءيرار‑تن ءي‑ينمغورن د‑يمغارن ييني‑اسن: «هاتي دّنوب ايد سكرغ. زّنزيغ ءي‑لموت يان ءور‑يسكيرن كرا يُخشنّ.» رارن‑اس: «ماد‑اغ‑گيس‑يلّان نكُّني؟ دبّر ءي‑يخف‑نّك.» ءيدّو ياهودا ءيلوح‑ن ءيقاريدن غ‑تگمّي ن‑ربّي، ءيفّوغ ياگُل ءيخف‑نس س‑يان‑يزيكر ءيمّت. اسين ءينمغورن ءيقاريدن‑ان ءينين: «ءور‑حلّان ا‑تن‑ين‑نگ غ‑صّندوق ن‑تگمّي ن‑ربّي اشكو اتيگ ن‑يدامّن اد‑گان.» مشاوارن‑داغ ءي‑نگراتسن، سغن سرسن ‹ءيگر ن‑وفخّار› ا‑گيس‑تمضالن ءيغريبن. سول س‑غاسّاد ار‑تّينين مدّن ءي‑يگر‑ان ‹اكال ن‑يدامّن›. غمكاد ا‑س‑يووفا‑واوال ن‑نّابي ءيرميّا لّي‑ينّان: «راد‑د‑مشاشكان مدّن‑ان ن‑ايت‑ربّي ا‑د‑فلّاس‑فكن اتيگ ن‑كراض ءيد‑مراو ن‑وقاريد ن‑نّوقرت، اوين‑تن ءيلمّا سغن سرسن ءيگر ن‑وفخّار. غمكاد ا‑يّي‑يوصّا سيدي ربّي.» ءيبيدّ ياسوع غ‑لگدّام لّحاكم بيلاطوس. ءيسقسا‑ت لحاكم ييني‑اس: «ءيس‑تگيت اگلّيد ن‑ايت‑يودايا؟» ءيرار‑اس ياسوع: «كيّي ا‑ت‑ينّان.» نكرن ءينمغورن ن‑تگمّي ن‑ربّي د‑يمغارن ن‑تمازيرت ار‑سرس‑تاشتكّان س‑كيگان د‑تغاوسيوين، ءيمّا نتّا ءور‑اسن‑يرور س‑يات. ييني‑اس بيلاطوس: «ءيس‑ور‑تسفلدت ءي‑منّاوت‑تغاوسيوين ايد‑فلّاك‑تّينين؟» ءيمّا نتّا ءيفسّا ءور‑اسن‑يرور س‑يات ايلّيغ ءيتعجّب بيلاطوس باهرا. ءيكّا‑تّين لحاكم غ‑كرايگاتّ لعيد ن‑وسورف ار‑اسن‑گيس‑يرژّم ءي‑يان‑وحبّاس نّا‑ران. ءيلّا يان غ‑لحبس غ‑ووسّان‑ان ءيسم‑نس بارابّاس، ءيتياوسّان باهرا. لّيغ‑د‑مونّ مدّن گّوتنين، ءيسقسا‑تن بيلاطوس: «مانوا ترام اد‑اون‑اس‑رژمغ، ءيزد بارابّاس نغد ياسوع لّي‑مي‑تّينيم لماسيح؟» اشكو بيلاطوس ءيسّن ءينمغورن‑نسن ءيس‑حسادن ياسوع، غايان كا‑ف‑ت‑يد‑دحين. والاينّي غ‑تاساعت‑ان سول ءيسكيوس بيلاطوس غ‑لكورسي لّحوكم س‑د‑سرس‑توزن‑تمغارت‑نس تيني‑اس‑د: «اد‑ور‑تكشمت سّوق ن‑ورگاز‑ان ءيفولكين، اشكو توشكا‑يّي‑د تاغوفت ءيگّوتن غاسّاد ف‑سّيبت‑نس غ‑يات‑توارگيت.» ءيمّا ءينمغورن ن‑تگمّي ن‑ربّي د‑يمغارن ن‑تمازيرت‑ان زوويدن سّهيّسن مدّن باش ا‑ت‑ضالبن اد‑اسن‑د‑يرژم ءي‑بارابّاس ءيدحي‑ن ياسوع س‑لموت. ءيسقسا‑تن‑داغ لحاكم: «مانوا ترام غ‑سين‑اد اد‑اون‑اس‑رژمغ؟» رارن‑اس: «بارابّاس.» ييني‑اسن بيلاطوس: «ما‑ترام ا‑ت‑سكرغ ءي‑ياسوع لّي‑مي‑تّينيم لماسيح؟» رارن‑اس كولّوتن: «ا‑يتياگّال ف‑وگّجدي.» ييني‑اسن: «ماخ؟ ما‑يسكر يُخشنّ؟» ءيمّا نتني ار‑سّغويّون س‑وگُّار ار‑تّينين: «ا‑يتياگّال ف‑وگّجدي ا‑يمّت.» ءيژر بيلاطوس ءيس‑ور‑يسوگير يات، غير زوويدن مدّن دووين س‑وگُّار. ياسي‑د امان ءيسيرد ءيفاسّن‑نس غ‑لگدّام‑نسن ييني‑اسن: «ها‑نكّي ءور‑فلّا‑لّين ءيدامّن ن‑ورگاز‑اد. ژرات كونّي ما‑را‑تسكرم.» رارن‑اس كولّوتن: «ا‑فلّانّغ‑يلين ءيدامّن‑نس نكُّني د‑تاروا‑نّغ.» ءيرژم‑اسن غاكودان ءي‑بارابّاس. ءيمّا ياسوع، ءيسّغورش‑ت ءيسّوفغ‑ت ا‑يمّت ف‑وگّجدي. نكرن ءيعسكرين لّحاكم اوين ياسوع س‑طوژّونت لّقصر، سّمونّ‑د كولّو لعسكر لّي‑يلّان غين. كّيسن‑اس تيملسيت‑نس سّلسن‑اس يان‑وسلهام ءيژگُّاغن، سكرن يان‑تّاج زغ‑وزگُّار گن‑اس‑ت ف‑يخف، گن‑اس يات‑تغانيمت غ‑وفوس‑نس افاسي. ار‑طّارن ف‑يفادّن‑نسن غ‑لگدّام‑نس ار‑گيس‑ضصّان ار‑تّينين: «سّلام فلّاك اي‑اگلّيد ن‑ايت‑يودايا.» ار‑فلّاس‑سّوفوسن، اسين تاغانيمت‑لّي ار‑ت‑ين‑سرس‑كّاتن ف‑يخف. لّيغ گيس شبعان تاضصا، كّيسن‑اس اسلهام سّلسن‑اس تيملسيت‑نس، اوين‑ت ا‑ت‑نغن ف‑وگّجدي. لّيغ فّوغن نتني، مناگّارن يان‑ورگاز گو‑كوريني ءيسم‑نس سيمعان، امرن‑ت ا‑ياسي اگّجدي ن‑ياسوع. لكمن ادغار لّي‑مي‑تّينين ‹گولگوتا›. تگا لمعنا‑نس ‹ادغار ن‑تُخشاشت ن‑يخف›. ءيرين اد‑فكن ءي‑ياسوع امان ن‑واضيل ءيكتين لّي‑غ‑يلّا‑وسافار ءيسمّومن، ءيمّا نتّا لّيغ‑ت‑يمضي ياگُي ا‑ت‑يسو. قّنّ‑ت ف‑وگّجدي الّن‑ت. بضون تيملسا‑نس ءي‑نگراتسن گرن‑د فلّاسنت اسغار. گاورن غين ضوفن‑ت. گن يات تالّوحت غ‑نّيگ ءيخف‑نس ا‑تمل اصراض لّي‑س‑اس‑صرضن، ءيتيارا گيس: «غواد ءيگا ياسوع اگلّيد ن‑ايت‑يودايا.» اوين‑د سين ءيمخّارن اگُلن‑تن ف‑يگّجدا، يان ف‑وفاسي ن‑ياسوع د‑يان ف‑وژلماض‑نس. ار‑ت‑رگّمن مدّن لّي‑زراينين، ار‑سّموسّون ءيخفاون‑نسن ار‑اس‑تّينين: «وا‑كيّي لّي‑را‑يخلو تيگمّي ن‑ربّي تبنوت‑ستّ غ‑كراض‑ووسّان، جّنجم ءيخف‑نّك. گّوز‑د زغ‑وگّجدي ءيغ‑تگيت يوس ن‑ربّي.» غمكاد‑داغ ا‑س‑ا‑گيس‑تطناژن ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت ار‑تّينين: «هاتي ءيجّنجم وييّاض والاينّي ءور‑يژضار ا‑يجّنجم ءيخف‑نس. ءيزد اگلّيد ن‑ايت‑ربّي ا‑يگا؟ ءينيات‑اس ا‑د‑يگّوز زغ‑وگّجدي غيلاد باش ا‑سرس‑نامن. هاتين ءيسّتامن غ‑ربّي، ءيگ ءيخف‑نس د‑يوس ن‑ربّي. ءينيات‑اس ا‑ت‑يجّنجم ربّي غيلاد ءيغ‑فلّاس‑يرضا.» ءولا ءيمخّارن لّي‑ديدس‑تياگّالنين ف‑يگّجدا ار‑ت‑رگّمن ءولا نتني. لّيغ تلكم تاساعت تيس سنات د‑مراوت، ضرند‑د تيلّاس ف‑تمازيرت‑ان كولّوتّ ار تاساعت تيس كراطّ ن‑تدگُّات. تاساعت تيس كراطّ يوت ياسوع س‑يات‑تغويّيت ءيتجهّدن ييني: «الووي، الووي، لاما شاباقتاني؟» تگا لمعنا‑نس «وا‑ربّي‑نو، وا‑ربّي‑نو، ماخ ا‑يّي‑تفلت؟» كرا زغ‑ويلّي بيدّنين غين، لّيغ‑اس‑سفلدن ءينين: «هاتي ار‑ياقرا ءي‑نّابي ءيليّا.» يازّل يان گيسن ياسي‑د يان‑وشرويض ءيعمّر‑ت س‑وامان لّخلّ ءيگ‑ت غ‑يات‑تغانيمت ءيمدي‑ت‑ين ءي‑ياسوع ا‑يسو. ءينين وييّاض: «زگايات، ا‑نژر ءيس‑را‑د‑ياشك ءيليّا ا‑ت‑يجّنجم.» ءيمّا ياسوع يوت‑داغ س‑يات‑تغويّيت ءيتجهّدن ءيدحي رّوح‑نس. غاكودان يوت‑وشرّيگ لخاميا ن‑تحانوت تامژلايت غ‑تگمّي ن‑ربّي، تبضو ف‑سين زغ‑وفلّا ار ءيزدار. ءيمّاسّ‑واكال ستغن ءيجاريفن، رژمن ءيسمضال نكرن كيگان د‑يمژلاين ن‑ربّي لّي‑مّوتنين. نتني، لّيغ‑د‑ينكر ياسوع زغ‑لموت، فّوغن‑د زغ‑يسمضال كشمن‑د س‑تمدينت ن‑وروشاليم، ژرن‑تن مدّن گّوتنين. ءيمّا لقبطان ن‑يعسكرين د‑ويلّي ديدس ضوفنين ياسوع، لّيغ ژران اكال ار‑يتموسّو ءولا كولّو مايد ءيجران، ءيكساضن باهرا ار‑تّينين: «س‑صّاحت ءيگا غواد يوس ن‑ربّي.» ءيلينت‑غين‑تمغارين گّوتنين، بيدّنت غ‑توگّوگت ار‑تمنادنت كولّو ما‑يجران. مونّد‑د نتنتي د‑ياسوع زغ‑تمازيرت ن‑جاليل ار‑تي‑تعاوانّت. تلّا گيسنت ماريام ءولّت‑ماگدالا، د‑ماريام ءينّاس ن‑ايتماتن ياعقوب د‑يوسف، تيلي ءولا ءينّاس ن‑تاروا ن‑زابدي. لّيغ‑دي‑تروح‑تدگُّات ياشك‑يد يان‑ورگاز ءيسم‑نس يوسف. ءيگا گو‑راما، ءيگّوت دارس لخير، ءيگ ءولا نتّا امحضار ن‑ياسوع. ءيكشم س‑دار بيلاطوس ءيضالب زغ‑گيس دّات ن‑ياسوع، يامر بيلاطوس اد‑اس‑تّ‑فكن. ءيدّو يوسف ياوي دّات ءيسّموتّل‑تّ غ‑لكتّان ءيشوان ءيغوسن، ءيسرس‑تّ‑ين غ‑ومضّال‑نس لّجديد ءيتياوغزا غ‑وجاريف. ءيسّكنوكي‑د يان‑يفير ءيمقّورن ءيقّن سرس ءيمي ن‑ومضّال ءيدّو. تيلي غين ماريام ءولّت‑ماگدالا د‑ماريام‑لّي ياضني، گاورنت غ‑لگدّام ن‑ومضّال. ءيزري‑واسّ‑ان غ‑وجادن ءي‑لعيد. مونّ‑د ءينمغورن ن‑تگمّي ن‑ربّي د‑يفاريسين، دّون س‑دار بيلاطوس ءينين‑اس: «ا‑سيدي، ءور‑نتّو ما‑ينّا بو‑تكركاس‑ان لّيغ سول ءيدّر، ءينّا ‹غ‑ويس كراض‑ووسّان راد‑د‑نكرغ زغ‑لموت.› نضالب‑ك غيلاد ا‑تازنت ءيعسكرين ا‑ن‑ضوفن امضّال‑نس ارد ءيزري ويس كراض‑ووسّان، ا‑ور‑يميل دّون ءيمحضارن‑نس اكُرن دّات ءينين ءيس‑د‑ينكر زغ‑لموت، جلون مدّن ءوگُّار ن‑غمكلّي جلان.» ءيرار‑اسن بيلاطوس: «هاتين دارون ءيمخزنيين. زايدات تضوفم كونّي غمكنّا ترام.» دّون ءيلمّا، غوين تيضاف ف‑ومضّال، علّمن ءيفير باش اد‑يسّانّ ءيس‑يلّا ما‑ت‑يرژّمن، سّبيدّن ءيمخزنيين غ‑لگدّام‑نس. لّيغ ءيزري‑واسّ ن‑وسونفو، زيكّ صباح ن‑واسّ لّحدّ، تنكر ماريام ءولّت‑ماگدالا د‑ماريام‑لّي ياضني دّونت اد‑ژرنت امضّال. س‑يمّوسّا‑واكال غ‑تاساعت‑ان س‑جّهد، ءيگّوز‑د يا‑لّمالاك ن‑سيدي ربّي زغ‑يگنوان، ءيسّكنوكي ءيفير زغ‑يمي ن‑ومضّال، ءيگاور فلّاس. ار‑يسّمرقيقيي لمالاك زوند ءوسمانّ تملّول‑تملسيت‑نس زوند ادفل. گُّدن ءيمخزنيين لّي‑ضوفنين امضّال ار‑ترگيگيين س‑تاودا، ضرن س‑واكال زوند ءيغ‑مّوتن. ءيساول لمالاك س‑تمغارين ييني‑اسنت: «اد‑ور‑تيكساضمت. سّنغ ءيس‑ا‑تسيگّيلمت ياسوع لّي‑يمّوتن ف‑وگّجدي. ءور‑سول‑يلّي غيد اشكو ءينكر‑ن غمكلّي‑س‑ينّا. اشكامد‑د ا‑تژرمت ءيلّيغ‑ت‑يد‑سرسن.» ييني‑اسنت ءيلمّا: «دّوامت غيلاد س‑دار ءيمحضارن‑نس، تينيمت‑اسن ءيس‑د‑ينكر زغ‑لموت. را‑كُن‑يزوور س‑تمازيرت ن‑جاليل. غين ا‑غ‑را‑تي‑تژرم. ها‑يّي نّيغ‑اونت‑ت.» فّوغند‑د‑تمغارين حاينا زغ‑دار‑ومضّال، گُّدنت س‑لفرح ءيگّوتن. دّونت ار‑تازّالنت اد‑اوينت لخبار ءي‑يمحضارن‑نس. سول لّانت غ‑وغاراس س‑اسنت‑يبان ياسوع ييني‑اسنت: «اد‑اونت‑تيلي سّلامت.» روحنت‑ين ضرنت‑اس‑ن ف‑يضارن سجدنت‑اس. ييني‑اسنت ياسوع: «اد‑ور‑تيكساضمت. زايدامت تينيمت ءي‑ايتما اد‑دّون س‑جاليل. غين ا‑غ‑را‑يّي‑ژرن.» لّيغ دّانت‑تمغارين، يوورّي كرا زغ‑يمخزنيين لّي‑ضوفنين امضّال س‑تمدينت، ءينين ءي‑ينمغورن ن‑تگمّي ن‑ربّي ف‑ما‑يجران. مونّ‑د نتني د‑يمغارن ن‑تمازيرت مشاوارن ءي‑نگراتسن، فكن ءي‑يمخزنيين ءيقاريدن ءوصّان‑تن ءينين‑اسن: «ءينيات ءي‑مدّن ‹ءوشكان‑د ءيمحضارن‑نس غ‑ييض، افن‑اغ‑د نگن، اكُرن دّات‑نس.› ا‑ور‑تيكساضم زغ‑لحاكم. ءيغ‑يفّوغ ءيسفلد ءي‑غايان، را‑ت‑نسّفهم ءيس‑ور‑فلّاون‑يلّي يات.» امژن ءيقاريدن، سكرن غمكلّي‑تن‑وصّان. ءيلين ءيواليون‑اد غ‑دار ايت‑يودايا سول س‑غاسّاد. نكرن ءيلمّا ءيمحضارن س‑يان د‑مراو، دّون س‑تمازيرت ن‑جاليل س‑وورير لّي‑س‑اسن‑ينّا ياسوع. ژرن‑ت غين ضرن س‑واكال سجدن‑اس، والاينّي ءيلّا سول گيسن ما‑يشكّان. ءيمّا ياسوع ءيروح‑تن ييني‑اسن: «هاتي غ‑وفوس‑ينو ا‑غ‑يتياوفكا كولّو ما‑يلّان غ‑يگنوان ءولا غ‑واكال. دّوات غيلاد س‑كرايگاتّ تامازيرت، ترارم مدّن اد‑گن ءيمحضارن‑ينو، تسّدّمّ‑تن غ‑وامان س‑يسم ن‑بابا د‑يوس د‑رّوح لقودوس، ار‑تن‑تسّلمادم اد‑سكارن كولّو ما‑ف‑كُن‑وصّاغ. ها‑يّي بدّا ديدون ار ءيسيگُّرا ن‑دّونيت.» لخبار ءيفولكين ن‑ياسوع لماسيح يوس ن‑ربّي. ءيبدا غمكلّي ءيتياران غايد ءيزرين ف‑وفوس ن‑نّابي ءيشاعيا، ءينّا ربّي: «راد‑ازنغ ارقّاس‑ينو اد‑اك‑يزوور ءيجّوجاد‑اك اغاراس‑نّك. ها‑يان‑واوال ار‑يتبرّاح غ‑لخلا ار‑يتّيني ‹جّوجادات اغاراس ن‑سيديتنّغ، تسّنمّ تيغاراسين‑نس.› » غمكان ا‑س‑د‑يبان يوحانّا امسدّام غ‑لخلا ار‑يتبرّاح ار‑يتّيني: «فلات كولّو ما‑تسكارم يُخشن، تدّمّ غ‑وامان، باش اد‑اون‑يصامح ربّي ف‑دّنوب‑نّون.» فّوغن‑د س‑دارس مدّن گّوتنين زغ‑تمازيرت ن‑يودايا د‑يمزدغن ن‑تمدينت ن‑وروشاليم، ار‑تقرّان س‑دّنوب‑نسن، دّمن كولّوتن ف‑وفوس‑نس غ‑واسيف ن‑وردون. يوحانّا ار‑يلسّا تاضوت ن‑يرعامان ار‑ياگّس س‑وبكّاس ن‑يلم، ار‑يشتّا تامورغي د‑تامّنت لّخلا. ار‑يتبرّاح ار‑يتّيني: «را‑د‑ياشك تيگيرا‑نو يان يوگُر‑يّي. ءور‑ستهلّاغ اد‑كنوغ اد‑رژمغ ءيفالان ن‑تورژيّين‑نس. نكّي سّدّمغ‑كُن غ‑وامان، ءيمّا نتّا را‑كُن‑يسّدّم س‑رّوح لقودوس ن‑ربّي.» يان‑واسّ غ‑ووسّان‑ان ءيفّوغ ياسوع تامدينت ن‑ناصيرا لّي‑يلّان غ‑تمازيرت ن‑جاليل، ياشك‑يد ءيدّم غ‑واسيف ن‑وردون ف‑وفوس ن‑يوحانّا. غير ءينكر‑د زغ‑وامان س‑يژرا ءيگنوان رژمن، ءيگّوز‑د فلّاس رّوح لقودوس ن‑ربّي زوند يان‑وتبير، ءيساول‑د يان‑واوال زغ‑يگنوان ييني: «كيّي تگيت ءيوي ءيعزّان. فرحغ سرك باهرا.» ءيدّو ياسوع ءيدحي‑ت رّوح لقودوس غاكودان س‑لخلا. ءيكّا‑ن غ‑دار لوحوش غ‑لخلا كّوژ ءيد‑مراو ن‑واسّ، ار‑ت‑يتارم شيطان، ار‑تي‑تعاوانّ لمالايكا. لّيغ ءيتياماژ يوحانّا غ‑لحبس ياشك‑يد ياسوع س‑تمازيرت ن‑جاليل ار‑يتبرّاح س‑لخبار ءيفولكين ن‑ربّي ار‑يتّيني: «ءيكمّل زّمان، تاكمور‑د‑تگلديت ن‑ربّي. فلات كولّو ما‑تسكارم يُخشن، تغويم غ‑لخبار‑اد ءيفولكين.» ءيفتو غ‑تاما ن‑ومدا ن‑جاليل، ءيژر سيمعان نتّا د‑گماس اندراوس. ءينگُمارن ن‑يسلمان اد‑گان. گرن‑ين شّبكت غ‑ومدا. ءيساول ياسوع ييني‑اسن: «اشكاد‑د مونات ديدي، رارغ‑كُن ا‑تگم ءينگُمارن ن‑مدّن.» فلن شّبايك‑نسن غاكودان، مونّ ديدس. ءيزايد ءيفتو يان ءيميكّ س‑ن‑يژرا ياعقوب يوس ن‑زابدي نتّا د‑گماس يوحانّا. لّان غ‑تاناوت‑نسن ار‑تعدالن شّبايك. ءيغر‑اسن غاكودان، فلن‑ين باباتسن زابدي غ‑تاناوت نتّا د‑يخدّامن‑نس، مونّ د‑ياسوع. روحن تامدينت ن‑كافرناحوم. غ‑واسّ ن‑وسونفو ءيكشم ياسوع س‑تگمّي ن‑تژالّيت ار‑يسّلماد مدّن. ار‑تعجّابن غ‑ولمّود‑نس اشكو ار‑سرسن‑يساوال غمكلّي دارس لحقّ اد‑اسن‑ييني ما‑تن‑د‑يقّانّ ا‑ت‑سكارن. ءور‑يگي نتّا زوند ءيمسلمدن ن‑شّرع. غ‑تاساعت‑ان ءيلّا غ‑تگمّي ن‑تژالّيت يان‑ورگاز لّي‑غ‑يلّا يا‑لّجنّ يُخشنّ باهرا. يوت س‑يات‑تغويّيت ييني: «وا‑ياسوع گو‑ناصيرا، ما‑يلّان غ‑گراتنّغ ديدك؟ ءيس‑دي‑توشكيت اد‑اغ‑تهلكت؟ سّنغ ما‑تگيت كيّي. امژلاي ن‑ربّي ا‑تگيت.» ءيساول ياسوع يامر لجنّ ييني‑اس: «فسّا، تفّوغت زغ‑گيس.» ءيسّمحاكّا‑ت لجنّ باهرا، يوت س‑يات‑تغويّيت ءيتجهّدن ءيفّوغ زغ‑گيس. ار‑تعجّابن مدّن كولّوتن ار‑سّمقسان ءي‑نگراتسن ار‑تّينين: «ما‑يگا ماياد؟ كرا ن‑ولمّود لّجديد اياد. هاتي دارس تاژضّارت ءيگّوتن ايلّيغ ا‑يتامر لجنون أُخشنّين، ار‑سكارن س‑واوال‑نس.» غاكودان ار‑باهرا‑ساوالن مدّن ف‑ياسوع، اوين لخبار‑نس س‑كرايگاتّ ماني غ‑تمازيرت ن‑جاليل كولّوتّ. لّيغ ءيفّوغ زغ‑تگمّي ن‑تژالّيت ياشك‑يد س‑تگمّي ن‑سيمعان د‑اندراوس. كشمن سرس نتني د‑ياعقوب د‑يوحانّا. افن‑ين تاضگُّالت ن‑سيمعان تگن توضن س‑تاولا، ءينين‑اس فلّاس. ياكمور س‑تاما‑نس يامژ‑اس غ‑وفوس ءيسّنكر‑تّ‑يد. تيتّي زگيس تاولا، تنكر ار‑فلّاسن‑تّسخّار. غ‑تدگُّات ن‑غاسّان لّيغ‑ن‑تضر تافوكت اشكين‑د مدّن س‑دار ياسوع، اوين‑اس‑د ءيموضان كولّوتن ءولا غويلّي‑غ‑لّان لجنون. مونّ‑د كولّو ايت‑تمدينت غ‑يمي ن‑تگمّي. ءيجّوجّي ءيموضان گّوتنين زغ‑كولّو تيموضان لّي‑گيسن‑لّانين ءيسّوفغ كيگان د‑لجنون. ءور‑يودجي لجنون ا‑فلّاس‑ساوالن، اشكو سّنّ نتني ما‑يگا. ءينكر‑د ياسوع غ‑تيلّاس ن‑صّباح، ءيفّوغ ءيفتو س‑يان ماني غ‑ور‑يلّي يان، ار‑غين‑يتژالّا. ءيضفور‑ت سيمعان د‑ويلّي ديدس لّانين. لّيغ‑ت‑ين‑وفان ءينين‑اس: «ها‑مدّن كولّوتن ار‑سرك‑سيگّيلن.» ءيمّا ياسوع ءيرور‑اسن: «ا‑ندّو س‑يدوران‑ان ياضني ا‑ن‑تبرّاحغ غين‑داغ، اشكو ماياد ا‑ف‑د‑وشكيغ.» ءيزايد ار‑يتكّا كولّو تامازيرت ن‑جاليل ار‑يتبرّاح غ‑تگُمّا ن‑تژالّيت ار‑يسّوفوغ لجنون. يان‑واسّ يوشكا‑د دارس يان‑ونجدام، ءيضر غ‑لگدّام‑نس ءيضالب‑ت باهرا ييني‑اس: «تژضارت ا‑يّي‑تسّغوست ءيغ‑تريت.» ءيحنّو گيس ياسوع باهرا، ءيگّر‑اس س‑وفوس‑نس، ييني‑اس: «ريغ نكّي. غوس.» غاكودان ييتّي زغ‑گيس لجدام ءيغوس. يازن‑ت ياسوع يوصّا‑ت س‑لمعقول ييني‑اس: «رار لعاقل اد‑ور‑تينيت يات ءي‑يان، والاينّي دّو تملت ءيخف‑نّك ءي‑ونمغور ن‑تگمّي ن‑ربّي تفكت ف‑وسغوس‑نّك تيغرسي لّي‑ف‑يوصّا موسا، ا‑تگ توگّا ءي‑مدّن.» ءيمّا نتّا ءيفّوغ غاكودان ار‑يساوال باهرا ف‑ياسوع، ار‑يتاوي لخبار ن‑ماد‑اس‑يجران ايلّيغ ءور‑سول‑يژضار ياسوع ا‑يكشم ءيبايّن س‑كرا ن‑ودوّار. ءيقاما غ‑لخلا ار‑ن‑دارس‑تّاشكين مدّن زغ‑كرايگاتّ تاسگا. يوورّي‑د ياسوع س‑تمدينت ن‑كافرناحوم. زرين كرا ن‑ووسّان س‑سفلدن مدّن ءيس‑يلّا غ‑تگمّي. مونّ‑د فلّاس مدّن گّوتنين ايلّيغ ءور‑يقاما كرا ن‑وغژو غ‑وگُنس ءولا غ‑يمي ن‑برّا. ار‑تن‑يسّلماد س‑واوال ن‑ربّي. اشكين‑د كّوژ مدّن اسين‑د يان‑ورگاز ءيكوشمن. ءور‑ژضارن ا‑ت‑ين‑سّاكمورن ءي‑ياسوع اسكو تعمّر‑تگمّي س‑مدّن گّوتنين. غلين ءيلمّا س‑وكفاف، سّيتّين يان‑ووزون غ‑يگّي ن‑يلّيغ ءيلّا ياسوع، رژمن انقوبّي، زّوگزن‑ين ءيمجدين لّي‑ف‑يگن‑وكوشام. ياسوع ءيژرا مامنك ا‑باهرا‑سرس‑ومنّ، ءيساول س‑وكوشام ييني‑اس: «واي‑يوي، ءيتّين فلّاك دّنوب‑نّك.» لّان غين كرا ن‑يمسلمدن ن‑شّرع، گاورن ار‑سوينگيمن د‑يخف‑نسن: «ماخ ا‑يساول غواد س‑غمكاد؟ اوال لّكوفر ايد ءينّا. ما‑يژضارن ا‑يسّيتّي دّنوب ابلا ربّي واحدوت؟» ءيمّا ياسوع ءيسّن غ‑رّوح‑نس ما‑غ‑ا‑سوينگيمن، ييني‑اسن: «ماخ ايلّيغ ا‑تسوينگيمّ د‑يخفاون‑نّون غمكاد؟ ما‑گيسن‑يرخان، اد‑ينيغ ءي‑غواد ءيكوشمن ‹ءيتّين فلّاك دّنوب‑نّك› نغد اد‑ينيغ ‹نكر، تاسيت ءيمجدين‑نّك ار‑تّيدوت›؟ والاينّي راد‑اون‑ملغ ءيس‑داري تاژضّارت غ‑دّونيت اد‑سّيتّيغ دّنوب، نكّي لّي‑يگان يوس ن‑بنادم.» ءيگراول غ‑وكوشام ييني‑اس: «نّيغ‑اك، نكر تاسيت ءيمجدين‑نّك، تدّوت س‑تگمّي‑نّك.» ءينكر غاكودان ياسي ءيمجدين‑نس ءيفّوغ غ‑لگدّام ن‑مدّن‑ان. ار‑تعجّابن كولّوتن ار‑تالغن ربّي ار‑تّينين: «ءور‑جّو‑نژري زوند ماياد.» ءيفّوغ‑داغ ياسوع س‑تاما ن‑ومدا، اشكين‑د دارس مدّن گّوتنين ار‑تن‑يسّلماد. ءيفتو يان ءيميكّ ءيژر لاوي يوس ن‑حالفا ءيسكيوس غ‑يلّيغ ا‑تامژن ءيقاريدن ن‑نكّاس. ييني‑اس: «اشك‑يد، مون ديدي.» ءينكر لاوي ءيمون ديدس. ءيگاور ياسوع د‑يمحضارن‑نس غ‑تگمّي ن‑لاوي، ءيدرو د‑يد‑بو‑نكّاس گّوتنين د‑وييّاض أُخشنّين. ءيگّوت گيسن ما‑يتمونون د‑ياسوع. ءيمّا ءيمسلمدن ن‑شّرع لّمدهب ن‑يفاريسين، لّيغ‑ت‑ژران ار‑يشتّا د‑مدّن أُخشنّين د‑ويلّي تامژنين نكّاس، سقسان ءيمحضارن‑نس: «ماخ ايلّيغ ا‑يشتّا د‑يد‑بو‑نكّاس د‑مدّن‑ان أُخشنّين؟» لّيغ ءيسفلد ياسوع ءي‑ماد‑نّان ييني‑اسن: «ءورد غويلّي دوسنين ا‑يحتاجّان اطبيب والاينّي غويلّي ءوضنّين. ءور‑د‑وشكيغ ا‑ن‑غرغ ءي‑ويلّي غالنين ءيس‑فولكين، والاينّي ءوشكيغ‑د ا‑ن‑غرغ ءي‑ويلّي أُخشنّين.» غ‑ووسّان‑ان ار‑تاژومن ءيمحضارن ن‑يوحانّا امسدّام، نتني د‑يفاريسين. اشكين‑د كرا ن‑مدّن سقسان ياسوع: «ماخ ايلّيغ ا‑تاژومن ءيمحضارن ن‑يوحانّا نتني د‑يفاريسين، ءيمّا ءيمحضارن‑نّك كيّي ءور‑ا‑تاژومن؟» ءيساول ياسوع ييني‑اسن: «ءيس‑ژضارن ايت‑تمغرا اد‑اژومن د‑وسلي ديدسن؟ ءيغ‑سول‑ديدسن‑يلّا‑وسلي ءور‑ژضارن اد‑اژومن. والاينّي راد‑د‑اشكين‑ووسّان لّي‑غ‑را‑فلّاسن‑ييتّي‑وسلي. غ‑ووسّان‑ان ا‑غ‑راد‑تاژومن. ءور‑يلّي ما‑يگنّون تادغارت ن‑تّوب لّجديد ف‑تملسيت تاقديمت. ءيغ‑يسكر غمكان را‑تكّيس‑تدغارت لّجديد زغ‑تقديمت تبّي س‑وگُّار. ءور‑يلّي ما‑يتگّان امان ن‑واضيل ءيكتين لّجديد غ‑يلماون ءيقديمن. ءيغ‑يسكر غمكان راد‑ستغن‑وامان لّجديد ءيلماون ءيقديمن فّين‑وامان خسرن ءيلماون. والاينّي ار‑تگّان امان ن‑واضيل لّجديد غ‑يلماون لّجديد.» يان‑واسّ ن‑وسونفو ءيفتا ياسوع د‑يمحضارن‑نس غ‑يگران غ‑گر ءيمندي. لّيغ ا‑تّيدون ار‑تكّيسن ءيمحضارن تيزلفين. ساولن‑د كرا ن‑يفاريسين ءينين‑اس: «ژر، ماخ ايلّيغ ا‑سكارن غ‑واسّ ن‑وسونفو غايلّي ءور‑گيس‑يحلّان؟» ءيرار‑اسن ياسوع: «ءيس‑ور‑تغريم ف‑داود ما‑يسكر غاكود لّيغ‑ت‑باهرا‑ينغا لاژ، نتّا د‑ويلّي ديدس مونّين؟ ءيكشم س‑تگمّي ن‑ربّي غ‑ووسّان ن‑ابياتار انمغور ن‑تگمّي ن‑ربّي، ءيشّ اغروم لّي‑يتياوفكان ءي‑ربّي. ءور‑يحلّا ا‑ت‑يشّ يان ابلا ءينمغورن ن‑تگمّي ن‑ربّي. ءيشّا‑ت داود ءيفك‑ت ءي‑وسمون‑نس.» ءيزايد ياسوع ييني‑اسن: «ربّي ءيسكر اسّ ن‑وسونفو ف‑سّيبت ن‑بنادم، ءورد بنادم ف‑سّيبت ن‑واسّ ن‑وسونفو. ماياد ا‑ف‑گيغ سيديس ءولا ن‑واسّ ن‑وسونفو، نكّي لّي‑يگان يوس ن‑بنادم.» ءيكشم‑داغ ياسوع س‑تگمّي ن‑تژالّيت. ءيلّا غين يان‑ورگاز ءيمّوت‑اس‑وفوس. ءيلين كرا ن‑مدّن ران اد‑افن غ‑ياسوع ما‑س‑ا‑ياس‑صراضن، گابلن‑ت اد‑ژرن ءيس‑را‑ت‑يجّوجّي غ‑واسّ ن‑وسونفو. ءيساول ياسوع س‑والّي مي ءيمّوت‑وفوس ييني‑اس: «اشك‑يد س‑وامّاس.» ءيساول ءيلمّا س‑وييّاض ييني‑اسن: «ما‑يحلّان غ‑واسّ ن‑وسونفو؟ ا‑نسكار ما‑يفولكين نغد ا‑نسكار ما‑يُخشنّ؟ ءيزد ا‑نجّنجم يان نغد ا‑ت‑نهلك؟» ءيمّا نتني فسّان. ءيگراول گيسن طيّر‑اس تُگراژ‑ت اشكو قّورن‑وولاون‑نسن باهرا. ءيساول س‑ورگاز‑لّي ييني‑اس: «مدي‑د افوس‑نّك.» ءيمدي‑اس‑ت‑يد س‑يجّي، ءيدوس‑وفوس‑نس. فّوغن ءيفاريسين غاكودان، دّون ار‑تمشاوارن د‑يمدّوكُّال ن‑وگلّيد هيرودوس ف‑مامنك ا‑راد‑نغن ياسوع. ءيفتو ياسوع د‑يمحضارن‑نس س‑ومدا، ضفورن‑ت مدّن گّوتنين زغ‑تمازيرت‑ان ن‑جاليل. لّيغ سفلدن وييّاض ف‑ما‑يسكر، اشكين‑د زغ‑يودايا د‑تمدينت ن‑وروشاليم ءولا تامازيرت ن‑يدوميّا د‑تسگا ياضني ن‑واسيف ن‑وردون ءولا تيسگيو ن‑صور د‑صايدا. ييني ءيلمّا ياسوع ءي‑يمحضارن‑نس اد‑اس‑د‑اوين يات تاناوت، ا‑تيلي غ‑تاما‑نس باش ا‑سرس‑يكشم ءيغ‑ت‑سّنوكمان مدّن باهرا. اشكو غ‑ووسّان‑ان ار‑يجّوجّي مدّن گّوتنين ايلّيغ ا‑د‑فلّاس‑طّارن كولّو ما‑غ‑لّانت‑تموضان باش اد‑اس‑گّرن. ءولا لجنون غاكود نّا‑ت‑ژران ضرن‑د غ‑دار ءيضارن‑نس ار‑سّغويّون ار‑تّينين: «كيّي تگيت يوس ن‑ربّي.» ءيمّا ياسوع ار‑تن‑يتامر ا‑ور‑ينين ءي‑يان ف‑ما‑يگا. ءيغلي ياسوع س‑يان‑وورير ءيغر‑د ءي‑ويلّي ءيرا، اشكين‑د س‑دارس. ءيستي سين د‑مراو اد‑گن ءيرقّاسن‑نس، باش اد‑ديدس‑تمونون يازن‑تن ءيلمّا ا‑تبرّاحن تيلي‑اسن‑تژضّارت اد‑سّوفوغن لجنون. ءيستي سيمعان، ءيفك‑اس ءيسم لّجديد ‹بطرُس›. ءيستي ياعقوب يوس ن‑زابدي د‑يوحانّا گماس ن‑ياعقوب، ءيفك‑اسن ءيسم لّجديد ‹بو‑انارجيس›، تگا لمعنا‑نس ‹تاروا ن‑يگّيگ›. ءيستي اندراوس د‑فيليبّوس د‑بارتولاماوس د‑ماتّا د‑توما د‑ياعقوب يوس ن‑حالفا د‑تادّاوس د‑سيمعان اواطاني، نتني د‑ياهودا ءيسخاريوط لّي‑را‑يزّنز ياسوع تيگيرا. يوورّي‑د ياسوع غاكودان س‑تگمّي. مونّ‑د‑داغ فلّاس مدّن گّوتنين ايلّيغ ءور‑اكُّ‑ژضارن اد‑شّن اغروم. ءولا ايتماس ن‑ياسوع سفلدن فلّاس. اشكين‑د نتني ا‑ت‑اوين اشكو نّان: «ءيفّوغ ءيخف‑نس.» ءيمّا ءيمسلمدن ن‑شّرع لّي‑د‑وشكانين زغ‑تمدينت ن‑وروشاليم، ار‑تّينين: «ءيلّا گيس ‹بعل‑زابول.› هاتي س‑تحكيمت ن‑وگلّيد لّجنون ا‑س‑ا‑يسّوفوغ لجنون.» ءيمّا ياسوع ءيغرا‑ياسن‑د س‑دارس، ار‑سرسن‑يساوال س‑لمعني ييني‑اسن: «مامنك ا‑را‑ييري شيطان ا‑يسّوفوغ ءيخف‑نس؟ ءيغ‑ا‑تّمّاغ يات‑تگلديت د‑يخف‑نس ءور‑را‑تقاما‑تگلديت‑ان. ءيغ‑ا‑تّمّاغ يات‑تگمّي د‑يخف‑نس ءور‑را‑تقاما‑تگمّي‑ان. ءولا شيطان، ءيغ‑يمّاغ د‑يخف‑نس ءور‑را‑يقاما والاينّي را‑يضر. ءور‑يژضار يان ا‑يكشم س‑تگمّي ن‑يان‑يدوسن ا‑د‑ياكُر ايدا‑نس ءيغ‑ور‑زوار‑يكرس غوالّي ءيدوسن. ءيغ‑ت‑يكرس، غاكودان ا‑راد‑اس‑د‑ياكُر تيگمّي‑نس. «لحقّ ا‑راد‑اون‑ينيغ، كولّو دّنوب ن‑بنادم، ءيژضار ربّي اد‑اسن‑يصامح فلّاسن، ءولا تيرگّام لّي‑س‑ا‑رگّمن ربّي. والاينّي يان ءيرگّمن رّوح لقودوس ءور‑سار‑اس‑فلّاس‑يصامح. نتّا راد‑بدّا‑فلّاس‑ييلي لحوكم ن‑ربّي.» ءيساول غمكاد اشكو ار‑تّينين: «ءيلّا گيس يان‑رّوح يُخشنّ.» تاشك‑يد ءينّاس ن‑ياسوع د‑ايتماس، بيدّن‑د غ‑برّا ن‑تگمّي، ازنّ‑د ماد‑اس‑د‑ياقران. ءيمّا نتّا سوتلن‑اس مدّن، ءيسكيوس غ‑وامّاس‑نسن. ءينين‑اس‑د: «ها‑ينّاك د‑ايتماك غ‑برّا، ار‑سرك‑سيگّيلن.» ءيساول ياسوع ييني‑اسن: «ما‑يگان ءينّا ءولا ايتما؟» ءيسّماقّل غ‑ويلّي ديدس سكيوسنين ييني‑اسن: «ها‑ينّا د‑ايتما. اشكو وانّا ءيسكارن ما‑يرا ربّي، نتّان ا‑يگان گما ءيگ ءولّتما ءيگ ءينّا.» ءيزايد ياسوع ار‑يسّلماد غ‑تاما ن‑ومدا. مونّ‑د فلّاس مدّن گّوتنين ايلّيغ‑ت‑يد‑يقّان ا‑يكشم س‑تاناوت، ءيسكيوس گيس غ‑ومدا، اكمورن‑د مدّن ار تاما ن‑وامان. ار‑تن‑يسّلماد س‑لمعني ف‑تغاوسيوين گّوتنين، ييني‑اسن: «سفلدات، هاي‑افلّاح ءيفّوغ ا‑ن‑يلوح امود. لّيغ‑ت‑يلوح ءيضر‑ن كرا غ‑وغاراس اشكين‑د ءيگضاض گرون‑ت. ءيضر‑ن كرا غ‑گر ءيژران غ‑يلّيغ ءيدروس‑واكال، ءيمغي‑د حاينا اشكو ءور‑ت‑باهرا‑يديل‑واكال. والاينّي لّيغ‑دي‑تغلي تافوكت تجدر‑ت، ييقار اشكو ءور دارس ءيژوران. ءيضر‑ن كرا غ‑وزگُّار، ءيغلي د‑وزگُّار ءيشّقاجّي‑ت ءور‑د‑ييوي صّابت. ءيضر‑ن كرا غ‑واكال ءيفولكين، ءيمغي‑د ييمغور ءيفك صّابت، ءيفك يان كراض ءيد‑مراو، ءيفك وايّاض سضيص ءيد‑مراو، ءيفك وايّاض ميّا.» ييني‑اسن: «وانّا دار ءيمزگان ا‑سرسن‑يسفليد، ءيلّا فلّاس ا‑يسفلد.» لّيغ ءيفّوغ ياسوع زغ‑گر مدّن‑ان گّوتنين اشكين‑د دارس ءيمحضارن‑نس س‑سين د‑مراو، نتني د‑وييّاض زغ‑وسمون‑نس، سقسان‑ت ف‑لمعني‑اد. ييني‑اسن ياسوع: «كونّي ءيتياوفكا‑ياون ا‑تيسّانم ف‑تگلديت ن‑ربّي ما‑ينتلن ف‑مدّن ياضني. ءيمّا غوين ن‑برّا راد‑اسن‑كولّو‑يتياونّا س‑لمعني. غمكلّي ءيتياران ‹راد‑باهرا‑تمنادن والاينّي ءور‑راد‑يسّانّ ماد‑منادن. راد‑باهرا‑سفليدن والاينّي ءور‑راد‑فهمن ما‑مي‑سفلدن. ءور‑رين ا‑د‑سري‑وورّين ا‑فلّاسن‑سّيتّيغ دّنوب‑نسن.› » ءيزايد ييني‑اسن: «ءيس‑ور‑تسّينم ءولا لمعنا‑ياد؟ مامنك ا‑س‑را‑تيسّانم لمعني ياضني كولّوتنت؟ افلّاح ءيگا‑ت واد ءيزراعن اوال ن‑ربّي. كرا ن‑مدّن گان زوند امود لّي‑يضرن غ‑وغاراس. لّيغ سفلدن ءي‑واوال ياشك‑يد شيطان، ءيكّيس‑اسن اوال لّي‑دارسن‑يلّان. كرا ن‑مدّن گان زوند امود لّي‑يضرن غ‑گر ءيژران. سفلدن ءي‑واوال امژن‑ت حاينا، فرحن سرس. والاينّي ءور‑يكشيم‑واوال‑ان س‑وول‑نسن. قامان غير كرا ن‑ووسّان ارد تيلي تاسّاست نغد تارفوفنت ف‑سّيبت ن‑واوال س‑كنوكين. كرا ن‑مدّن گان زوند امود لّي‑يضرن غ‑وزگُّار. سفلدن ءي‑واوال والاينّي دّان اسين تيغوفيوين ن‑دّونيت لهون س‑وايدا ءيرين تيغاوسيوين ياضني. غايان ا‑يشّقاجّين اوال‑ان ايلّيغ ءور‑د‑ييوي صّابت. والاينّي كرا ن‑مدّن گان زوند امود لّي‑يضرن غ‑واكال ءيفولكين. سفلدن ءي‑واوال ن‑ربّي سكرن سرس فكن صّابت. ءيفك يان كراض ءيد‑مراو، ءيفك وايّاض سضيص ءيد‑مراو، ءيفك وايّاض ميّا.» ءيساول‑داغ ياسوع ييني‑اسن: «ءيس‑را‑دي‑تاويم لقنديل ا‑تي‑تسرسم غ‑دّو لعبرت نغد غ‑دّو تيسي؟ ءيس‑ورد ف‑يگّي ن‑ماني ياتّوين ا‑ف‑را‑ت‑ين‑تسرسم؟ هان كولّو ما‑ينتلن را‑ت‑ژرن مدّن تيگيرا، د‑كولّو ما‑يدلن را‑ت‑زّودفن. يان دار ءيمزگان ا‑سرسن‑يسفليد، ءيلّا فلّاس ا‑يسفلد.» ءيزايد ييني‑اسن: «رارات لعاقل س‑مايد مي تسفليدم. هاتي س‑لعبرت لّي‑س‑ا‑تّعبّارم ا‑س‑راد‑اون‑يتياوعبّار ءيتياوفكا‑ياون س‑وگُّار. اشكو وانّا دار ءيلّا، راد‑اس‑يزايد ربّي، ءيمّا وانّا ءور‑دار‑يلّي، راد‑اس‑يكّيس ءولا مايلّي دارس ءيلّان.» ءيزايد ياسوع ييني‑اسن: «غمكاد ا‑تگا‑تگلديت ن‑ربّي. تگا زوند يان‑ورگاز ار‑يتلوح امود غ‑واكال. ار‑يگان ار‑ينكّر غ‑ييض ءولا ازال، ءيمغي‑د‑وامود ار‑يتيمغور، ءيمّا ارگاز‑ان ءور‑يسّين مامنك. هاتي اكال ا‑ت‑يد‑يسّمغاين. غ‑يسيزوار گانت اگُلاس، يان كرا گنت تيزلفين، غ‑يسيگُّرا گنت طومژّين عمّرنين. ءيغ‑نوانت‑طمژّين را‑د‑ياسي اسمّاود اشكو تروح‑تمگرا.» ييني‑اسن ياسوع: «ما‑س‑را‑نسّرواس تاگلديت ن‑ربّي؟ ما‑لّمعنا ا‑س‑را‑فلّاس‑نساول؟ ترواس يات تاقّايت لّخردل. لّيغ‑ن‑تضر غ‑واكال، تمژّي ف‑كولّو تاقّايين ن‑يمادن لّي‑لّانين. والاينّي يان كرا ار‑دي‑تّمغاي ار‑تّيمغور، توورّي تاگُر كولّو ءيمندي. ار‑تسكار تيصطّوين مقّورنين ايلّيغ ا‑سرسنت‑كشّمن ءيگضاض ن‑يگنوان، زدغن غ‑ومالو‑نس.» ار‑سرسن‑يساوال ياسوع س‑لمعني گّوتنين زوند ختيد، ياوي‑اسن‑د اوال ن‑ربّي س‑ونشكنّا مي ژضارن ا‑ت‑فهمن. مدّن‑ان غير س‑لمعني ا‑س‑ا‑سرسن‑يساوال. والاينّي ءيمحضارن‑نس، لّيغ لّان واحدوتن ار‑اسن‑يمالا تيغاوسيوين‑اد كولّوتنت باش ا‑تنت‑يسّانّ غمكلّي گانت. لّيغ تلكم‑تدگُّات ن‑غاسّان ييني‑اسن: «ا‑ندّو س‑تسگا‑يان ياضني ن‑ومدا.» فلن مدّن غين، كشمن ءيمحضارن س‑تاناوت لّي‑غ‑يلّا ياسوع. مونّ ديدسن كرا ن‑مدّن غ‑تاناوين ياضني. غاكودان ءينكر‑د‑واضو ءيتجهّدن، اتّوينت تاضانگيوين ار‑كّاتنت تاناوت ايلّيغ ا‑تّعمّار س‑وامان. ياسوع ءيلّا غ‑تغوردين غ‑تاناوت، ءيسرس ءيخف‑نس ف‑يات لمخدّا، ءيگن. سّفاقن‑ت ءيمحضارن‑نس ءينين‑اس: «ءيس‑ور‑اك‑گينّغ‑يلّي يات را‑نهلك؟» ءينكر ياسوع يامر اضو ا‑يفسّا، ييني ءي‑ومدا: «زگا، تهنّات.» س‑يبّي‑واضو يوورّي‑ومدا ءيهنّا باهرا. ييني ءي‑يمحضارن‑نس: «ماخ ايلّيغ تكسوضم؟ ءيس‑ور‑تومينم؟» ءيمّا نتني گُّدن س‑وگُّار ار‑تّينين ءي‑نگراتسن: «ما‑يگا غواد ايلّيغ ا‑سرس‑يسفليد‑واضو ءولا امدا؟» لكمن تامازيرت ن‑گاراسا غ‑تسگا ياضني ن‑ومدا ن‑جاليل. بحرا‑د‑يفّوغ ياسوع زغ‑تاناوت س‑ت‑يد‑يمناگّار يان‑ورگاز ءيفّوغ‑د زغ‑گر ءيسمضال. ءيلّا گيس يا‑لّجنّ يُخشنّ باهرا، ءيزدغ غ‑گر ءيسمضال، ءور‑يژضار يان ا‑ت‑يقّن نغد ا‑ت‑يكرف س‑سّناسل. منّاوت‑توال ا‑يتياوكرّاف س‑لگيود د‑سّناسل، والاينّي ار‑يتبّي سّناسل ار‑يرژّا لگيود ايلّيغ ءور‑يژضار يان ا‑ت‑يحصار. غ‑ييض ءولا ازال ار‑يتلّي غ‑گر ءيسمضال ءولا غ‑يورار، ار‑يسّغويّو ار‑يسّياگّاس ءيخف‑نس س‑يژران. لّيغ ءيژرا ياسوع سول‑ن‑ياگّوگ يازّل‑د ءيضر ف‑يفادّن غ‑لگدّام‑نس، ءيغوّت س‑جّهد ييني‑اس: «وا‑ياسوع يوس ن‑ربّي اماتّوي، ما‑يلّان غ‑گريّي ديدك؟ گيغ‑ن سرك سيدي ربّي ا‑ور‑يّي‑تسّرفوفنت.» اشكو ياسوع ءينّا‑ياس: «وا‑لجنّ‑ان يُخشنّ، فّوغ زغ‑ورگاز‑اد.» ءيسقسا‑ت ياسوع غاكودان: «ما‑يگا ءيسم‑نّك؟» ييني‑اس: «ءيگا ءيسم‑ينو ‹منّاو› اشكو نكُّني نگّوت.» ءيضالب‑ت باهرا ا‑ور‑يطّاي لجنون زغ‑تمازيرت‑ان. تلّا غين يات‑تووروت ءيگّوتن ن‑والفان، تّياوكسا غ‑وورير‑ان. ضالبن‑ت لجنون باهرا ءينين‑اس: «ازن‑اغ س‑والفان‑ان. ادج‑اغ ا‑سرسن‑نكشم.» ءيرار‑اسن: «زايدات.» فّوغن لجنون غاكودان، كشمن س‑والفان، تازّل‑تووروت س‑جّهد زغ‑وجاريف س‑ومدا. سين ءيد‑والف ن‑يلف اد‑گان، خسين‑ين كولّوتن غ‑ومدا. روولن ءيمكساون اوين لخبار ءي‑مدّن غ‑تمدينت ءولا غ‑يگران. فّوغن‑د كولّو اد‑ژرن ما‑يلّان. اشكين‑د س‑دار ياسوع، افن‑د غوالّي‑غ‑تّين كّان ‹منّاو› لّجنون ءيسكيوس ءيلس تيملسيت‑نس ييلي س‑يخف‑نس. گُّدن باهرا. ءيمّا غويلّي ژرانين ما‑يجران، نّان‑اسن ف‑ومجنون ءولا الفان. نكرن ءيلمّا ضالبن ياسوع باهرا ا‑يفّوغ تامازيرت‑نسن. ءيكشم غاكودان س‑تاناوت. ءيمّا غوالّي‑غ‑تّين‑كّان لجنون ءيضالب‑ت باهرا ا‑ت‑يادج اد‑ديدس‑يمون، والاينّي ياسوع ءور‑ت‑يودجي، ييني‑اس: «دّو س‑تگمّي س‑دار ايت‑دارك تينيت‑اسن ف‑مايد‑اك‑يسكر سيديك ءيفولكي ءولا غمكلّي گيك ءيحنّا.» ءيدّو‑ورگاز ار‑يتلولّي غ‑تمازيرت ن‑مراوت‑تمدينين ار‑يساوال ف‑كولّو ماد‑اس‑يسكر ياسوع، ار‑تعجّابن مدّن كولّوتن. يوورّي‑د ياسوع غ‑تاناوت س‑تسگا‑ياد ن‑ومدا، مونّ‑د دارس مدّن گّوتنين غ‑تاما ن‑ومدا. ياشك‑يد يان زغ‑يمغارن ن‑تگمّي ن‑تژالّيت، ءيگا ءيسم‑نس يايروس. لّيغ ءيژرا ياسوع ءيضر‑د غ‑دار ءيضارن‑نس. ءيضالب‑ت باهرا ييني‑اس: «ءيلّي ءيمژّين توضن باهرا، ار‑تّمتات. اشك‑يد تسرست فلّاس ءيفاسّن‑نّك ا‑تجّي تدّر.» ءيفتو ياسوع ءيمون ديدس، ضفورن‑ت مدّن گّوتنين ار‑ت‑سّنوكمون باهرا. تلّا غ‑گراتسن يات‑تمغارت توضن ييلي‑بدّا‑گيس‑وسگُّرد ن‑يدامّن سين د‑مراو ن‑وسگُّاس. ترفوفن غ‑دار ءيطبيبن گّوتنين، تفك كولّو ما‑دارس‑يلّان، سول‑ور‑تجّي والاينّي ار‑غير‑تّزاياد‑تماضونت‑نس. تسفلد نتّات ف‑ما‑يسكار ياسوع، تزري غ‑گر مدّن‑ان ايلّيغ تروح تيغوردين‑نس، تگّر ءي‑تملسيت‑نس. تيني د‑يخف‑نس: «ءيغ‑ن‑گّرغ غير ءي‑تملسا‑نس راد‑جّيغ.» تگّر‑اس، س‑بّين ءيدامّن، تسّحسّا غ‑دّات‑نس ءيس‑تجّي زغ‑تماضونت‑نس. ءيسّحسّا ياسوع ءيس‑زگيس‑تفّوغ كرا لّباراكا، ءيگراول غ‑مدّن‑ان ييني‑اسن: «ما‑د‑يگّرن ءي‑تملسيت‑ينو؟» رارن‑اس ءيمحضارن‑نس: «ژر مدّن‑اد كولّوتن، ار‑ك‑يد‑سّنوكمون باهرا. ماخ ا‑تنّيت ‹ماد‑يّي‑د‑يگّرن؟› » ءيمّا ياسوع ار‑يسّموقّول غ‑گر غويلّي‑اس‑سوتلنين ا‑يژر ماد‑اس‑يگّرن. تيكساض‑تمغارت‑لّي ار‑تّرگيگيي س‑تاودا، تسّن ماد‑اس‑يجران. تاشك‑يد تضر‑د غ‑دار ءيضارن‑نس تيني‑اس كولّو ماد‑اس‑يجران. ييني‑اس ءيلمّا ياسوع: «وا‑يلّي، ها‑كمّي تجّيت غيلاد اشكو تومنت. زايد س‑سّلامت تدوست زغ‑تماضونت‑نّم.» سول ا‑ديدس‑يساوال س‑د‑وشكان كرا ن‑مدّن زغ‑تگمّي ن‑ومغار يايروس ءينين‑اس: «هان ءيلّيك تمّوت. ا‑ور‑سول‑تسّيحلت امسلمد.» ءيمّا ياسوع ءيسفلد ءي‑ماد‑نّان ءي‑ومغار، ييني‑اس: «اد‑ور‑تيكساطّ. غير امن.» ءور‑يودجي يان ا‑ديدس‑يمون ابلا بطرُس د‑ياعقوب د‑يوحانّا گماس ن‑ياعقوب. لّيغ لكمن تيگمّي ن‑ومغار ياف‑ن مدّن ار‑تّيدون ار‑دي‑تّاشكين ار‑الّان ار‑سّغويّون. ءيكشم‑ن ييني‑اسن: «ماخ ا‑تالّام تسكرم صّضاع؟ هان تافروخت ءور‑تمّوت، غير تگن.» ءيمّا نتني ار‑گيس‑ضصّان. ءيسّوفغ‑تن كولّوتن ياوي‑د باباس ن‑تفروخت د‑ينّاس نتني د‑يمحضارن‑نس س‑كراض، كشمن س‑يلّيغ تگن‑تفروخت. يامژ‑اس غ‑وفوس ييني‑اس: «طاليتا قومي.» تگا لمعنا‑نس «وا‑تافروخت نّيغ‑ام، نكر‑د.» غاكودان تنكر‑تفروخت ار‑تفتّو. نتّات تگا ءيلّيس ن‑سين د‑مراو ن‑وسگُّاس. ار‑باهرا‑تعجّابن مدّن. يوصّا‑تن اد‑ور‑ينين ءي‑يان ف‑ما‑يجران، ييني‑اسن اد‑اس‑فكن ما‑تشتّا. ءيفّوغ ياسوع زغ‑غين يوورّي‑د س‑تمازيرت‑نس، مونّ‑د ديدس ءيمحضارن‑نس. ءينكر غ‑واسّ ن‑وسونفو ار‑يسّلماد غ‑تگمّي ن‑تژالّيت. لّيغ‑اس‑سفلدن مدّن ار‑تعجّابن كولّوتن، ار‑تّينين ءي‑نگراتسن: «ارگاز‑اد، ماني‑د‑سرس‑يكّا كولّو ماياد؟ ما‑تگا تاحكيمت‑اد لّي‑اس‑يتياوفكان ءولا لمعجيزات لّي‑يسكار؟ ءيس‑ورد انجّار اياد، يوس ن‑ماريام، گماس ن‑ياعقوب د‑يوسي د‑ياهودا د‑سيمعان؟ ءيس‑ورد ءيستماس ايد‑ديدنّغ‑يلّان غيد؟» نتني بزگن فلّاس. ءيمّا ياسوع ءينّا‑ياسن: «نّابي نّا‑يلّان، ار‑تي‑توقّارن مدّن، والاينّي ءور‑ا‑تي‑توقّارن ايت‑تمازيرت‑نس د‑ايت‑دارس د‑ايت‑تگمّي‑نس.» ءور‑يوفي ا‑غين‑يسكر كرا لّمعجيزات ابلا ءيسرس ءيفاسّن‑نس ف‑كرا ن‑يموضان دروسنين ءيجّوجّي‑تن. ءيتعجّب ياسوع غ‑مدّن‑ان، اشكو ءور‑رين ا‑سرس‑امنّ. ءيدّو ار‑يتكّا ءيدوران ن‑تمازيرت‑ان ار‑يسّلماد. ءيغر‑د ءي‑يمحضارن‑نس س‑سين د‑مراو س‑دارس، يازن‑تن سين س‑سين ءيفك‑اسن تاژضّارت اد‑سّوفوغن لجنون أُخشنّين. ييني‑اسن: «ا‑ور‑تاسيم يات ءي‑وغاراس، ابلا اعمود. ا‑ور‑تاويم اغروم نغد اقُراب نغد ءيقاريدن غ‑وبكّاس‑نّون. قّنات تورژيّين‑نّون والاينّي اد‑ور‑تلسم سنات‑تملسا.» ييني‑اسن: «تيگمّي نّا‑س‑تكشمّ، گاورات گيس ار اكود نّا‑را‑تمودّوم زغ‑تمدينت‑ان. تامدينت نّا‑كُن‑ور‑يرين تاگُي ا‑سرون‑تسفلد، فّوغات زغ‑گيس تسّوسم اگدرور لّي‑وسين ءيضارن‑نّون، اد‑اسن‑يگ تاماتارت ما‑غ‑ا‑سوينگيمن.» غاكودان اد‑فتان ءيمحضارن ار‑تبرّاحن ار‑تّينين ءي‑مدّن اد‑فلن كولّو ماد‑سكارن يُخشن، ار‑سّوفوغن لجنون گّوتنين ار‑ژغّورن كيگان د‑يموضان س‑زّيت ار‑تن‑جّوجّين. ءيسفلد‑وگلّيد هيرودوس ف‑ماياد اشكو ار‑باهرا‑ساوالن مدّن ف‑ياسوع. كرا ار‑يتّيني: «يوحانّا امسدّام اياد‑د‑ينكرن زغ‑لموت. ماياد ا‑ف‑گيس‑لّانت لقوّات‑اد.» ار‑تّينين وييّاض: «نّابي ءيليّا ا‑يگا.» ار‑تّينين وييّاض: «كرا ن‑نّابي ا‑يگا، زوند لانبيا ن‑زمان.» ءيمّا هيرودوس، لّيغ ءيسفلد ف‑ياسوع ييني: «يوحانّا لّي‑مي‑بّيغ ءيخف اياد، ءينكر‑د.» اشكو هيرودوس ا‑يوزنّ اد‑امژن يوحانّا كرسن‑ت‑ين غ‑لحبس ف‑سّيبت ن‑هيروديّا. نتّات ييوي‑تّ هيرودوس واخّا تگا تامغارت ن‑گماس فيليبّوس. يوحانّا ءيكّا‑تّين ار‑يتّيني ءي‑هيرودوس: «ءور‑اك‑تحلّا‑تمغارت ن‑گماك.» ءيمّا تامغارت‑لّي هيروديّا، ار‑تّ‑يژّاض سّمّ، تيري ا‑تنغ يوحانّا والاينّي ءور‑تژضار. ءيمّا هيرودوس ار‑يتوقّار يوحانّا، ييسّان ءيس‑يگا ارگاز ءيفولكين ءيگ وين ربّي. ار‑فلّاس‑يتحصار غ‑لامان. ار‑يتّيري اد‑اس‑يسفليد والاينّي غاكود نّا‑ياس‑يسفلد ار‑باهرا‑يتغووض. يان‑واسّ ءيروح‑وزمز. ءيسكر هيرودوس ءيمنسي ن‑واسّ لّي‑غ‑يلول. ءيسّمون ءيمغارن ن‑تگلديت‑نس د‑ينمغورن ن‑يمخزنيين د‑يد‑بو‑وايدا زغ‑تمازيرت ن‑جاليل. تكشم‑ن ءيلّيس ن‑هيروديّا ار‑تّحوش غ‑لگدّام‑نسن، تسّفرح هيرودوس د‑ويلّي ديدس گاورنين. ءيساول‑وگلّيد س‑تفروخت ييني‑اس: «ضالب زغ‑گيگي اينّا تريت، فكغ‑ام‑ت.» ءيزايد ءيگّالّ‑اس: «اينّا زغ‑گيگي تضالبت راد‑ام‑ت‑فكغ، واخّا ءيگا مناصّ ن‑تگلديت‑ينو.» تفّوغ نتّات تسقسا‑ن ءينّاس تيني‑اس: «ما‑راد‑ضالبغ؟» تيني‑اس ءينّاس: «ءيخف ن‑يوحانّا امسدّام.» تازّل‑تفروخت تكشم‑داغ س‑دار‑وگلّيد تيني‑اس: «ريغ اد‑يّي‑تفكت غيلاد غ‑يات‑تقصرييت ءيخف ن‑يوحانّا امسدّام.» ءيگُّد‑وگلّيد طيّر‑اس باهرا، والاينّي ف‑سّيبت ن‑تگالّيت لّي‑س‑يگّولّا غ‑لگدّام ن‑ينبگيون‑نس ءور‑يري ا‑ستّ‑يرار. ءينكر غاكودان يازن امخزني ييني‑اس: «اوي‑د ءيخف ن‑يوحانّا.» ءيدّو س‑لحبس ءيبّي ءيخف‑نس ياوي‑ت‑يد غ‑يات‑تقصرييت ءيفك‑ت ءي‑تفروخت تفك‑ت‑تفروخت ءي‑ينّاس. لّيغ سفلدن ءيمحضارن ن‑يوحانّا ف‑ماياد، اشكين‑د اوين دّات‑نس مضلن‑تّ‑ين. وورّين‑د ءيرقّاسن لّي‑يوزن ياسوع، ءينين‑اس ف‑كولّو ماد‑سكرن د‑كولّو ماد‑سّلمادن. ييني‑اسن: «اشكاد‑د كونّي واحدوكن س‑كرا ن‑ماني غ‑ور‑لّين مدّن، ا‑تسونفوم ءيميكّ.» اشكو غ‑ووسّان‑ان گّوتن مدّن ار‑تّيدون ار‑دي‑تّاشكين ايلّيغ ءور‑وفين مامنك اد‑شتّان. سّودون ءيلمّا غ‑تاناوت واحدوتن س‑يان‑ودغار لّي‑غ‑ور‑يلّي يان. والاينّي ژران‑تن مدّن لّيغ دّان، ءيگّوت ما‑تن‑يسّنّ. اشكين‑د زغ‑كولّو ءيدوران‑ان، ازّلن ف‑وضار زوورن‑تن س‑ودغار‑ان. لّيغ ءيفّوغ ياسوع زغ‑تاناوت ءيژر‑ن مدّن‑ان گّوتنين، قامان گيس باهرا اشكو نتني گان زوند ءولّي بلا امكسا. ءيبدو ار‑تن‑يسّلماد ف‑كيگان د‑تغاوسيوين. لّيغ ءيدّا‑واسّ اشكين‑د دارس ءيمحضارن‑نس ءينين‑اس: «ياغ‑وزال، ءور‑يلّي يات غ‑لخلا‑ياد. ازن مدّن اد‑دّون س‑يگران د‑يدوران‑اد اكمورنين باش اد‑سغن ماد‑شتّان.» ءيمّا ياسوع ءينّا‑ياسن: «فكات‑اسن كونّي ماد‑شتّان.» ءينين‑اس: «ءيس‑ا‑ندّو اد‑اسن‑د‑ناوي ماد‑شتّان؟ هان اتيگ‑نس را‑يگ سنات ءيد‑ميّا ن‑نّوقرت.» ييني‑اسن: «منّاوت‑تنگُال اد‑دارون؟ زايدات تژرم.» لّيغ سّنّ ءينين‑اس: «سمّوست‑تنگُال د‑سنات‑تسلمين.» ييني‑اسن: «سّگاورات مدّن غ‑توگا تگم‑تن د‑تغاماتين.» سكيوسن غمكاد س‑تغاماتين ن‑ميّا ءولا تين سمّوس ءيد‑مراو. ياسي سمّوست‑تنگُال‑لّي د‑تسلمين‑لّي س‑سنات، يالّ الّن‑نس س‑يگنوان ءيشكر ربّي. ءيبّي تينگُال ءيفك ءي‑يمحضارن‑نس ا‑ن‑سراسن ءي‑مدّن، ءيبضو سنات‑تسلمين فلّاسن كولّوتن. شّن كولّو مدّن‑ان ايلّيغ شبعان. سّمونّ‑د مايلّي ءيقامان ن‑توفّاژ د‑تسلمين، عمّرن سنات د‑مراوت ن‑تاسلّيت. غويلّي شّانين تينگُال، سمّوس ءيد‑والف ن‑ورگاز اد‑گان. ييني ياسوع غاكودان ءي‑يمحضارن‑نس اد‑كشمن س‑تاناوت ا‑ت‑زوورن س‑تسگا ياضني ن‑ومدا، س‑تمدينت ن‑بيتصايدا. ءيمّا نتّا ءيقاما غين ا‑يمسافاض د‑مدّن. تيغوردين ن‑ما‑ديدسن‑يبضا ءيدّو س‑يان‑وورير ا‑يژّالّ. ضرند‑د تيلّاس، تروح تاناوت امّاس ن‑ومدا. ءيمّا ياسوع ءيقاما‑ن واحدوت غ‑واكال. ءيژر ءيمحضارن‑نس مّاغن باهرا س‑تُگلا ن‑تاناوت اشكو ار‑تن‑يترارا‑واضو تيغوردين. غاكودان غ‑طوژّونت ن‑ييض ياشك‑يد دارسن ءيفتو ف‑يگّي ن‑وامان. ءيسكر زوند ءيغ‑را‑تن‑يزري. لّيغ‑ت‑ژران ءيفتا ف‑يگّي ن‑وامان، غالن ءيزد كرا ن‑واغُژن ا‑يگا، ار‑سّغويّون. ژران‑ت كولّوتن، كسوضن باهرا. غاكودان ءيساول‑د ياسوع ييني‑اسن: «اد‑ور‑تيكساضم. تهنّايات، نكّين ايا.» ءيغلي س‑دارسن غ‑تاناوت ءيبّي‑ن‑واضو. ءيضر‑اسن لعجب باهرا، اشكو ءور‑تا‑سّينّ لمعنا ن‑ما‑يجران ءي‑تنگُال، قّورن ءيخفاون‑نسن. لّيغ بّين امدا لكمن تامازيرت ن‑گانيساراط، قّنّ تاناوت ف‑واكال. غير فّوغن زغ‑تاناوت س‑ت‑يد‑وكُزن مدّن. ار‑دي‑تازّالن زغ‑تمازيرت‑ان كولّوتّ، ار‑دي‑تاوين ءيموضان ف‑يمجدان‑نسن س‑يلّي مي سفلدن ءيلّا گيس ياسوع. ءينّا‑س‑يدّا غ‑يدوران نغد تيمدينين نغد تيميزار، ار‑اس‑د‑سراسن ءيموضان غ‑لاسواق ار‑تي‑تضالابن ا‑تن‑يادج اد‑اس‑گّرن، واخّا غير ءي‑تاما ن‑تملسيت‑نس. كولّو ماد‑اس‑يگّرن ءيجّي. مونّ‑د ءيفاريسين ف‑ياسوع نتني د‑كرا ن‑يمسلمدن ن‑شّرع لّي‑د‑وشكانين زغ‑تمدينت ن‑وروشاليم. ژران كرا زغ‑يمحضارن‑نس ار‑شتّان اغروم س‑يفاسّن‑نسن سول حرمن، اشكو ءور‑تن‑سيردن غمكلّي سيريدن مدّن‑ان. ءيفاريسين د‑ايت‑يودايا كولّوتن، ءيغ‑ور‑باهرا‑سيردن ءيفاسّن‑نسن ءور‑راد‑شّن. نتني ار‑سكارن س‑لعادا ن‑يمغارن لّي‑زرينين. غاكود نّا‑د‑وشكان زغ‑سّوق ءور‑راد‑شّن ارد سيردن. گّوتنت لعادات ياضني لّي‑تامژن، ار‑سيريدن لكيسان د‑تمكيلين د‑يروكوتن ن‑واناس د‑يبردان. سقسان‑ت ءيفاريسين د‑يمسلمدن ن‑شّرع ءينين‑اس: «ماخ ايلّيغ ءور‑ا‑فتّون ءيمحضارن‑نّك ف‑لعادا ن‑يمزوورا‑نّغ لّي‑زرينين؟ ها‑نتني ار‑شتّان اغروم س‑يفاسّن‑نسن سول حرمن.» ءيساول ياسوع ييني‑اسن: «وا‑يد‑بو‑سين‑وودماون، س‑لحقّ ا‑س‑فلّاون‑ينّا ربّي ف‑يمي ن‑نّابي ءيشاعيا، ءينّا ‹مدّن‑اد ار‑يّي‑تالغن س‑يلس‑نسن، ءيمّا ءول‑نسن ياگّوگ‑ن فلّا. بلا لفايتّ ا‑يّي‑تعبادن اشكو ءور‑ا‑سّلمادن غ‑ولمّود‑نسن ابلا تينباضين ن‑بنادم.› ها‑كونّي ار‑تفالم لوصيّات ن‑ربّي، ار‑تامژم لعادات ن‑بنادم.» ءيزايد ييني‑اسن: «غمكاد ا‑س‑ا‑تّانفم ءي‑لوصيّات ن‑ربّي باش ا‑تسكارم س‑لعادات‑نّون. يوصّا‑كُن موسا ءينّا ‹اوي‑تّ غ‑باباك د‑ينّاك.› ييني‑داغ ‹وانّا ءيرگمن باباس نغد ءينّاس ءيلّا فلّاس ا‑يمّت.› ءيمّا كونّي، ءيغ‑ينّا كرا ن‑يان ءي‑باباس نغد ءينّاس ‹فكيغ ءي‑ربّي مايلّي ترام اد‑اون‑ت‑فكغ، وين ربّي ا‑يگا،› ءيغ‑ينّا اوال‑اد ار‑اس‑تّينيم ا‑ور‑سول‑يسكار يات ف‑باباس د‑ينّاس. غمكاد ا‑س‑ا‑تّانفم ءي‑واوال ن‑ربّي س‑لعادا‑نّون. كيگان د‑تغاوسيوين ا‑تسكارم زوند غاياد.» ءيغر‑داغ ياسوع ءي‑مدّن س‑دارس ييني‑اسن: «سفلدات‑يّي كولّوكن ا‑تيسّانم. ءور‑يلّي يات غ‑برّا ن‑بنادم ءيژضارن ا‑ت‑يسّحرم ءيغ‑سرس‑يكشم. والاينّي غايلّي‑د‑يتفّوغن زغ‑بنادم، نتّان ا‑ت‑يسّحرامن. يان دار ءيمزگان ا‑سرسن‑يسفليد، ءيلّا فلّاس ا‑يسفلد.» لّيغ ءيفل مدّن‑ان ءيكشم س‑تگمّي، سقسان‑ت ءيمحضارن‑نس ف‑لمعنا‑ياد. ييني‑اسن: «ءيزد ءولا كونّي ءور‑تفهيمّ؟ ءيس‑ور‑تسّينم ءيزد كولّو ما‑يكشّمن س‑بنادم زغ‑برّا ءور‑يژضار ا‑ت‑يسّحرم؟ اشكو ءورد ءول ا‑س‑ا‑يكشّم والاينّي س‑واحليگ، ار‑يزراي زغ‑دّات س‑لخلا.» ءيملا ياسوع س‑واوال‑اد ءيس‑يحلّا كولّو ماد‑شتّان مدّن. ءيزايد ييني‑اسن: «غايلّي‑د‑يتفّوغن زغ‑بنادم نتّان ا‑ت‑يسّحرامن، اشكو زغ‑وگُنس ن‑وول ن‑بنادم، ا‑زغ‑ا‑دي‑تفّوغن ءيسوينگيمن أُخشنّين د‑لفساد د‑تمخّارت د‑تناغا د‑زّنا د‑طّماع د‑لمونكر د‑لغُشّ د‑شّهوات د‑تنوّاشت د‑تكنداوت د‑لكيبر د‑ونوفل. كولّو لخُشانات‑اد ار‑دي‑تفّوغنت زغ‑وگُنس ن‑بنادم ار‑ت‑سّحرامنت.» ءينكر ياسوع ءيفّوغ زغ‑غين ءيفتو س‑تسگا ن‑صور د‑صايدا. ءيكشم س‑يات‑تگمّي. ءور‑يري ا‑ت‑اكُزن مدّن، والاينّي ءور‑يژضار ا‑يرگس. غاكودان تسفلد فلّاس يات‑تمغارت، دارس ءيلّيس ءيمژّين ءيلّا‑ياس گيس يا‑لّجنّ يُخشنّ باهرا. تاشك‑يد تضر‑د غ‑دار ءيضارن ن‑ياسوع. تگا نتّات تابرّانيت تگ ءولّت‑فينيقيّا زغ‑تمازيرت ن‑شّام. تضالب‑ت باهرا ا‑يسّوفغ لجنّ زغ‑يلّيس، ءيمّا ياسوع ءينّا‑ياس: «ادج تاروا اد‑زوار‑شبعان، اشكو ءور‑يشوي ا‑نامژ اغروم ن‑تاروا نلوح‑ت‑ين ءي‑ييضان.» تساول‑د نتّات تيني‑اس: «وا‑سيدي، ءولا ءيضان غ‑دّو لميدا ار‑شتّان ءيبروزيين لّي‑طّارنين ءي‑تاروا.» ييني‑اس ياسوع غاكودان: «ف‑سّيبت ن‑واوال‑اد س‑يّي‑تنّيت، نّيغ‑ام زايد س‑تگمّي. هان لجنّ ءيفّوغ زغ‑يلّيم.» تفتو س‑تگمّي‑نس تاف‑ن تافروخت تگن ف‑تيسي، ءيفّوغ زغ‑گيس لجنّ. يوورّي‑د ياسوع غاكودان زغ‑تسگا‑يان ن‑صور، ءيزري زغ‑صايدا ءولا تامازيرت ن‑مراوت‑تمدينين، ءيروح‑د س‑ومدا ن‑جاليل. اشكين‑د دارس كرا ن‑مدّن اوين‑اس‑د يان‑ورگاز ءيگا اتيتاو اضرضور. ضالبن‑ت ا‑فلّاس‑يسرس افوس‑نس. ياوي‑ت ياسوع زغ‑گر مدّن واحدوت. ءيگ‑ن ءيضوضان‑نس غ‑يمزگان ن‑ورگاز، ءيسّوفس ف‑يضوضان‑نس ءيگّر‑ن ءي‑يلس ن‑ورگاز. يالّ الّن‑نس س‑يگنوان يوت س‑ونفوس‑نس، ييني‑اس: «ءيفاتا.» تگا لمعنا‑نس ‹رژم›. غاكودان رژمن ءيمزگان‑نس ءيفسي ءيلس‑نس، ءيساول ءينم‑واوال‑نس. يوصّا ياسوع مدّن‑ان اد‑ور‑ينين ءي‑يان ف‑مايد ءيجران، والاينّي كرا‑س‑ا‑تن‑يتوصّا نتني ار‑تاوين لخبار‑نس باهرا. ار‑تعجّابن س‑وگُّار ار‑تّينين: «كولّو ما‑يسكار ءيفولكي. هاتي ار‑يترارا ءيضرضار ار‑سفليدن ءولا ءيژنژام ار‑ساوالن.» يان‑واسّ غ‑ووسّان‑ان، لّيغ‑د‑مونّ‑داغ مدّن گّوتنين ءور‑دارسن‑يلّي ماد‑شتّان. ءيغر‑د ياسوع ءي‑يمحضارن‑نس س‑دارس ييني‑اسن: «ها‑مدّن‑اد قامان گيگي باهرا، اشكو كراض‑ووسّان ايد ديدي لّان، ءور‑دارسن ماد‑شتّان. ءيغ‑تن‑وزنغ س‑تگُمّا‑نسن، د‑نتني ءينغا‑تن لاژ، راد‑تغاشان غ‑وغاراس، اشكو كرا گيسن يوشكا‑د زغ‑توگّاگ.» ءينين‑اس ءيمحضارن‑نس: «مانيغ را‑ناف اغروم غ‑لخلا‑ياد ما‑س‑ا‑نشّباع كولّو مدّن‑اد؟» ءيسقسا‑تن ياسوع: «منّاوت‑تنگُال اد‑دارون؟» ءينين‑اس: «سّا.» يوصّا مدّن اد‑سكيوسن س‑واكال، ياسي سّا ن‑تنگُال‑لّي ءيشكر ربّي ءيبّي‑تنت، ءيفك ءي‑يمحضارن ا‑تنت‑اطّون. بضون‑تنت ف‑مدّن. ءيلينت دارسن كرا ن‑تسلمين دروسنين. ءيشكر ربّي ييني ءي‑يمحضارن ا‑تنت‑بضون ءولا نتنتي. شّن كولّو مدّن‑ان ايلّيغ شبعان. سّمونّ‑د توفّاژ لّي‑د‑قامانين، عمّرن سّا ن‑تريالين. غويلّي شّانين راد‑گن ما‑يتگّان كّوژ ءيد‑والف. غاكودان ءيمسافاض ديدسن ياسوع، ءيكشم س‑تاناوت نتّا د‑يمحضارن‑نس، سّودون غ‑ومدا س‑تسگيو ن‑دالمانوتا. اشكين‑د ءيفاريسين س‑دار ياسوع، ءيرين اد‑ديدس‑تمجاحادن. ضالبن زغ‑گيس كرا لّمعجيزت اد‑اسن‑تگ تاماتارت ن‑يزد ربّي ا‑ت‑يد‑يوزنّ، ءيرين ا‑ت‑ارمن. ءيندر ياسوع غ‑رّوح‑نس ييني: «ماخ ايلّيغ ا‑تّضالاب تاسوت‑اد يات‑تماتارت؟ لحقّ ا‑راد‑اون‑ينيغ، ءور‑را‑تّياوفكا كرا ن‑تماتارت ءي‑تاسوت‑اد.» ءيفل‑تن ءيكشم‑داغ س‑تاناوت ءيسّودو س‑تسگا ياضني ن‑ومدا. تّون ءيمحضارن ءور‑د‑ديدسن‑يوين اغروم. ءور‑دارسن غير يات‑تنگولت غ‑تاناوت. ءيساول سرسن ياسوع ييني‑اسن: «ژرات، رارات لعاقل‑نّون زغ‑تخميرت ن‑يفاريسين ءولا تاخميرت ن‑هيرودوس.» بدون ار‑سّمقسان ءي‑نگراتسن ار‑تّينين: «ءور‑دارنّغ اغروم. مايان ا‑ف‑ينّا اوال‑اد.» ءيسّن ياسوع ماد‑سوانگمن، ييني‑اسن: «ماخ ايلّيغ ا‑تسّمقسام غمكاد ف‑وغروم ءور‑دارون‑يلّي؟ ءيس‑ور‑تا‑تسّينم ءولا تفهمّ؟ ءيس‑قّورن ءيخفاون‑نّون؟ ءيس‑دارون الّن ءور‑ا‑تّمنادم؟ ءيس‑دارون ءيمزگان ءور‑ا‑تسفليدم؟ ءيس‑ور‑ا‑تسوينگيمّ؟ ءينيات‑يّي، لّيغ بّيغ سمّوست‑تنگُال ءي‑سمّوس ءيد‑والف، منّاوت تيسلّا ا‑توسيم عمّرنت س‑توفّاژ؟» ءينين‑اس: «سنات د‑مراوت.» ييني‑اسن: «لّيغ بّيغ سّا ن‑تنگُال ءي‑كّوژ ءيد‑والف، منّاوت‑تريال ا‑توسيم عمّرنت س‑توفّاژ؟» ءينين‑اس: «سّا.» ييني‑اسن: «ءيس‑ور‑تا‑تفهيمّ؟» لكمن بيتصايدا، اشكين‑د كرا ن‑مدّن اوين‑د يان‑وبوكاض ءي‑ياسوع، ضالبن‑ت باهرا اد‑اس‑يگّر. يامژ ياسوع ءي‑وبوكاض غ‑وفوس ياوي‑ت س‑برّا ن‑ودوّار، ءيسّوفس‑اس‑ن غ‑والّن‑نس ءيسرس فلّاس ءيفاسّن‑نس. ءيسقسا‑ت: «ءيس‑تژريت كرا؟» ابوكاض يولّ‑د الّن‑نس ييني‑اس: «ژريغ مدّن زوند ءيسغارن ار‑فتّون.» ءيسرس‑ن‑داغ ياسوع ءيفاسّن ف‑والّن‑نس. ءيسّماقّل‑د‑ورگاز غاكودان ييسفيو، ءيژر كرايگاتّ كرا ءيبايّن‑اس. يازن‑ت ياسوع ييني‑اس: «زري س‑تگمّي‑نّك. اد‑ور‑توورّيت س‑ودوّار.» ءيزايد ياسوع ءيدّو نتّا د‑يمحضارن‑نس س‑يدوران غ‑تسگيو ن‑قايصريّا فيليبّي. ءيساول ديدسن غ‑وغاراس ءيسقسا‑تن: «ما‑فلّا‑تّينين مدّن، ماد‑گيغ نكّي؟» ساولن ءيمحضارن ءينين‑اس: «كرا ار‑يتّيني تگيت يوحانّا امسدّام، كرا ار‑يتّيني تگيت نّابي ءيليّا، كرا ار‑يتّيني تگيت كرا ن‑يان زغ‑لانبيا ن‑زمان.» ييني‑اسن ياسوع: «ءيمّا كونّي، ما‑فلّا‑تّينيم؟ ماد‑گيغ نكّي؟» ءيساول بطرُس ييني‑اس: «تگيت لماسيح ن‑ربّي.» يوصّا‑تن اد‑ور‑ينين ماياد ءي‑يان. ءيبدو ياسوع ار‑يمالا ءي‑يمحضارن‑نس ما‑راد‑اس‑يجرو ييني‑اسن: «ها‑نكّي لّي‑يگان يوس ن‑بنادم، ءيقّان‑يّي‑د اد‑باهرا‑رفوفنغ. را‑يّي‑ن‑لوحن ءيمغارن ن‑تمازيرت د‑ينمغورن ن‑تگمّي ن‑ربّي د‑يمسلمدن ن‑شّرع. را‑يّي‑نغن، والاينّي ويس كراض‑ووسّان را‑د‑نكرغ زغ‑لموت.» غمكاد ا‑س‑اسن‑ينّا، ءور‑فلّاسن‑يسّنتيل يات. ياوي‑ت ءيلمّا بطرُس ا‑ت‑يژي ف‑واوال‑اد. ءيگراول‑د ياسوع، ءيسّماقّل غ‑يمحضارن‑نس. ءيسّفسّا بطرُس ييني‑اس: «ءيتّي‑ن زغ‑گيگي ا‑شيطان، اشكو ءور‑ا‑تسكارت س‑ما‑يرا ربّي، والاينّي س‑ما‑يرا بنادم كا‑س‑ا‑تسكارت.» ءيغر‑د ياسوع ءي‑مدّن س‑دارس نتني د‑يمحضارن‑نس ييني‑اسن: «وانّا ءيران ا‑ديدي‑ييلي، ءيقّان‑ت‑يد ا‑يتّو ءيخف‑نس، ياسي اگّجدي‑نس، ءيمون ديدي. وانّا ءيران ا‑يجّنجم تودرت‑نس را‑ستّ‑يجلو. ءيمّا وانّا ءيجلان تودرت‑نس ف‑سّيبت‑ينو ءولا ف‑سّيبت لّخبار‑اد ءيفولكين، را‑ستّ‑يجّنجم. ما‑را‑ييلي ءي‑بنادم ءيغ‑يوورّي ءيطّاف دّونيت كولّوتّ ءيخسر ءيخف‑نس؟ ما‑را‑يفك بنادم باش ا‑يجّنجم ءيخف‑نس؟ وانّا ءينّان ءور‑يّي‑يسّين ءولا ءيسّن اوال‑ينو غ‑گر مدّن ن‑تاسوت‑اد ءيجلان يُخشنّ، راد‑ينيغ ءور‑ت‑سّينغ ءولا نكّي لّي‑يگان يوس ن‑بنادم غاكود لّيغ راد‑د‑اشكغ د‑لمالايكا ن‑يگنّا س‑لمجد ن‑ربّي بابا.» ءيساول ياسوع ييني‑اسن: «لحقّ ا‑راد‑اون‑ينيغ، ءيلّا غ‑غويد بيدّنين غيد ما‑ور‑را‑يمّت ارد ءيژر تاگلديت ن‑ربّي توشكا‑د س‑لقوّا.» زرين سضيص‑ووسّان، ءيدّو ياسوع ياوي ديدس بطرُس د‑ياعقوب د‑يوحانّا، غلين س‑يان‑وورير ياتّوين واحدوتن. تبدّل سّيفت ن‑ياسوع غ‑لگدّام‑نسن. وورّينت‑تملسا‑نس ملّولنت باهرا ايلّيغ ا‑سّمرقيقيينت. ءور‑يلّي غ‑دّونيت‑اد ما‑يژضارن ا‑تنت‑يسيرد ارد ملّولنت غمكان. غاكودان ژران نّابي ءيليّا ءولا نّابي موسا ار‑ساوالن د‑ياسوع. ءينكر بطرُس ييني‑اس: «وا‑سيدي، ءيفولكي ا‑نيلي غيد. ءيس‑تريت اد‑اون‑نسكر كراض ءيحشاش، يان‑نّك د‑يان ن‑موسا د‑يان ن‑يليّا؟» ءور‑يسّين ما‑يتّيني، اشكو گُّدن باهرا. غاكودان تگّوز‑د فلّاسن يات‑تمدلوت تدل‑تن. ءيساول‑د يان‑واوال زغ‑تمدلوت ييني‑اسن: «غواد ءيگا ءيوي ءيعزّان. سفليدات سرس.» غاكودان گراولن غمك د‑غمك والاينّي ءور‑سول‑ژرين يان ديدسن، ابلا ياسوع واحدوت. لّيغ‑د‑فتان غ‑وگسار ن‑وورير يوصّا‑تن ياسوع: «اد‑ور‑تينيم ءي‑يان ف‑ما‑تژرام ارد‑د‑نكرغ نكّي لّي‑يگان يوس ن‑بنادم زغ‑لموت.» حضون اوال‑اد غ‑يخفاون‑نسن ار‑سّمقسان ءي‑نگراتسن ف‑ما‑تگا لمعنا‑ياد «راد‑نكرغ زغ‑لموت.» سقسان‑ت ءيلمّا: «ماخ ايلّيغ ا‑تّينين ءيمسلمدن ن‑شّرع ءيقّان‑د نّابي ءيليّا ا‑د‑ياشك ءيزوور‑د غوالّي ءيگان لماسيح؟» ييني‑اسن ياسوع: «س‑صّاحت ءيليّا ا‑د‑يزوارن ا‑يجّوجاد كرايگاتّ كرا. ءيمّا يوس ن‑بنادم، ءيس‑ور‑فلّاس‑يتيارا راد‑باهرا‑يرفوفن، لوحن‑ت‑ين مدّن؟ والاينّي راد‑اون‑ينيغ، يوشكا‑د‑ياد ءيليّا، سكرن سرس كولّو غايلّي ران، غمكلّي فلّاس ءيتياران.» لّيغ وورّين س‑دار ءيمحضارن ياضني، ژرن‑ين دارسن مدّن گّوتنين سوتلن‑اسن، ار‑ديدسن‑تمجاحادن كرا ن‑يمسلمدن ن‑شّرع. ءيمّا مدّن‑ان، لّيغ ژران ياسوع تعجّبن كولّوتن، ازّلن‑د س‑دارس ار‑فلّاس‑تسلّامن. ءيمّا نتّا ءيسقسا‑تن: «ما‑ف‑ا‑ديدسن‑تّمجاحادم؟» ءيساول يان زغ‑گر مدّن‑ان ييني‑اس: «واي‑امسلمد، ءيويغ‑اك‑د ءيوي، ءيلّا گيس يا‑لّجنّ اژنژوم. ءينّاغ‑ت‑يغوي ار‑سرس‑يكّات ارد‑اس‑د‑يك‑وكشكوش ءيمي، ار‑يتگژاژ ءوخسان‑نس ءيقار. ضالبغ ءيمحضارن‑نّك ا‑ت‑سّوفغن والاينّي ءور‑ژضارن.» ءيساول ياسوع ييني‑اسن: «وا‑تاسوت‑اد، ءور‑اكُّ‑تريت ا‑تامنت. منشك ا‑را‑سول‑ديدون‑قاماغ؟ منشك ا‑راد‑ديدون‑صبرغ؟ اويات‑ت‑يد س‑داري.» اوين‑اس‑ت‑يد. غير ءيژرا‑ت لجنّ س‑يوت س‑وفروخ، ءيضر س‑واكال ار‑يتكنوكي ءيك‑اس‑د‑وكشكوش ءيمي. ءيساول ياسوع س‑باباس ءيسقسا‑ت: «منشك اياد س‑ا‑يتگّا غمكاد؟» ييني‑اس: «زغ‑مژّيي‑نس. منّاوت‑توال ا‑ت‑ين‑يتلوح غ‑تاكات ءولا غ‑وامان باش ا‑ت‑يهلك. والاينّي ءيغ‑تژضارت ا‑تسكرت كرا، حنّو گينّغ تعاونت‑اغ.» ييني‑اس ياسوع: «ما‑س‑تنّيت ‹ءيغ‑تژضارت›؟ يان يومنّ، ءور‑يلّي كرا مي ءور‑يژضار ا‑ت‑يسكر.» ءيرار‑اس باباس ن‑وفروخ س‑جّهد ييني‑اس: «ها‑يّي ءومنغ. عاون‑يّي اد‑امنغ س‑وگُّار.» ءيمّا ياسوع ءيژرا مدّن ار‑د‑دارسن‑تازّالن، يامر لجنّ ييني‑اس: «وا‑لجنّ اژنژوم اضرضور، نّيغ‑اك فّوغ زغ‑گيس، ا‑سرس‑داغ‑ور‑تكشمت.» يوت لجنّ س‑يات‑تغويّيت ءيسّمحاكّا افروخ ءيفّوغ. يوورّي‑وفروخ زوند ءيغ‑يمّوت ايلّيغ ءيگّوت ما‑ينّان: «هاتي ءيمّوت.» ءيمّا ياسوع يومژ‑اس غ‑وفوس ءيسّنكر‑ت‑يد، ءيبيدّ ف‑يضارن‑نس. غاكودان ءيكشم ياسوع س‑تگمّي، نتّا د‑يمحضارن‑نس واحدوتن. سقسان‑ت: «ماخ ايلّيغ ءور‑نژضار نكُّني ا‑ت‑نسّوفغ؟» ييني‑اسن: «وان لجنّ‑ان ءور‑را‑تي‑تسّوفوغم ابلا ءيغ‑ا‑تّضالابم ربّي.» فّوغن زغ‑غين زرين ف‑تمازيرت ن‑جاليل. ءور‑يري ياسوع ا‑فلّاس‑يسّانّ مدّن، اشكو ار‑يسّلماد ءيمحضارن‑نس، ييني‑اسن: «نكّي لّي‑يگان يوس ن‑بنادم را‑يّي‑ن‑دحين س‑گر ءيفاسّن ن‑مدّن نغن‑يّي. والاينّي غ‑ويس كراض‑ووسّان را‑د‑نكرغ زغ‑لموت.» ءيمّا نتني ءور‑سّينّ ما‑يرا اد‑اسن‑يمل س‑واوال‑اد، ءيكساضن ءور‑ژضارن ا‑ت‑فلّاس‑سقسان. روحن كافرناحوم. ييلي ياسوع د‑يمحضارن‑نس غ‑تگمّي، ءيسقسا‑تن: «ما‑ف‑ا‑دي‑تساوالم ءي‑نگراتون غ‑وغاراس؟» ءيمّا نتني فسّان، اشكو غ‑وغاراس ار‑د‑ساوالن ءي‑نگراتسن ف‑مانوا گيسن ا‑را‑يگ انمغور. ءيسكيوس ياسوع ءيغر‑د ءي‑سين د‑مراو ن‑ومحضار س‑دارس ييني‑اسن: «وانّا ءيران ا‑يزوور، ءيلّا فلّاس ا‑كولّو‑يگُّرو، ءيگ اخدّام ءي‑وييّاض.» يامژ‑د يان‑وارّاو ءيمژّين ياوي‑ت‑يد س‑وامّاس‑نسن، ياسي‑ت غ‑يغيل‑نس ييني‑اسن: «وانّا ءيقبلن يان‑وارّاو ءيمژّين زوند غواد س‑يسم‑ينو، هاتي ءيقبل‑يّي. د‑وانّا‑يّي‑يقبلن، ءورد نكّي كا‑يقبل، هاتين ءيقبل ءولا غوالّي‑يّي‑د‑يوزنّ.» ييني‑اس يوحانّا: «واي‑امسلمد، نژرا يان‑ورگاز ار‑يسّوفوغ لجنون س‑يسم‑نّك. ءور‑ت‑نودجي اشكو ءور‑ا‑ديدنّغ‑يتمونو.» ءيرار‑اس ياسوع: «ادجات‑ت، اشكو يان ءيسكرن كرا لّمعجيزت س‑يسم‑ينو ءور‑را‑ييژضار غاكودان ا‑گيگي‑يرگم. اشكو وانّا‑ياغ‑ور‑يتضاضّان، هاتين ءيگا زغ‑گينّغ. لحقّ ا‑راد‑اون‑ينيغ، وانّا‑ياون‑يفكان لكاس ن‑وامان س‑يسم‑ينو ف‑سّيبت ن‑ما‑تگام وين لماسيح، راد‑اس‑تيلي لباراكا‑نس.» «وانّا ءيسّضرن يان زغ‑يمژّيين‑اد لّي‑سري‑ومنّين، يوف‑اس مراد ءيس‑اس‑يتياگّال‑وژرو ن‑وزرگ ءيمقّورن غ‑ومگّرض‑نس ءيتياوگار‑ن غ‑ومدا. ءيغ‑ا‑ك‑يسّطار‑وفوس‑نّك، بّي‑ت. يوف‑اك ا‑تكشمت س‑تودرت بلا افوس ءولا ا‑تدّوت س‑جهنّاما س‑سين ءيفاسّن، س‑لعافيت لّي‑ور‑را‑يخسي. ءيغ‑ا‑ك‑يسّطار‑وضار‑نّك، بّي‑ت. يوف‑اك ا‑تكشمت س‑تودرت تگيت ابيضار ءولا ا‑دارك‑يلين سين ءيضارن تّياوگارت‑ن غ‑جهنّاما. ءيغ‑ا‑ك‑تسّطار تيط‑نّك سّوكف‑تّ‑يد. يوف‑اك ا‑تكشمت س‑تگلديت ن‑ربّي تگيت ابوكاض ءولا ا‑دارك‑يلينت سنات‑والّن تّياوگارت‑ن غ‑لعافيت ن‑جهنّاما غ‑يلّيغ ءور‑ا‑تّمتات‑تووكّا‑نسن ءولا‑دا‑گيس‑تخسّي لعافيت، را‑يمارغ كرايگاتّ يان س‑لعافيت. تفولكي تيسنت، والاينّي ءيغ‑تلموس تيسنت ما‑س‑را‑ستّي‑تسّمارغم؟ طّافات تيسنت غ‑يخفاون‑نّون، تگم س‑سّلامت ءي‑نگراتون.» ءيفّوغ ياسوع زغ‑غين ءيك تيسگيو ن‑يودايا ءيلكم تاسگا ياضني ن‑واسيف ن‑وردون. مونّ‑د فلّاس مدّن گّوتنين ار‑تن‑يسّلماد غمكلّي‑بدّا‑يسّلماد غ‑ينّا ءيكّا. اشكين‑د كرا ن‑يفاريسين ءيرين ا‑ت‑ارمن ءينين‑اس: «ءيس‑يحلّا ءي‑ورگاز ا‑يفرو ءي‑تمغارت‑نس؟» ييني‑اسن: «ما‑س‑كُن‑يوصّا موسا؟» ءينين‑اس: «موسا يودجا ارگاز ا‑يارا تابرات لّفرا ءيفرو‑اس.» ءيرار‑اسن ياسوع: «يورا‑ياون اوال‑ان اشكو قّورن‑وولاون‑نّون، والاينّي ءور‑يگي غمكاد غ‑يسيزوار ن‑دّونيت. غمكلّي ءيتياران ‹ربّي ءيسكر اوتم د‑تاوتمت.› ءيتيارا‑داغ ‹مايان ا‑ف‑را‑يفل‑ورگاز باباس د‑ينّاس ءيمون د‑تمغارت‑نس. هاتنين سين راد‑وورّين گن يات دّات.› ءور‑سول‑گين سين والاينّي يات دّات اد‑گان. ف‑مايان ا‑ف‑راد‑اون‑ينيغ، اينّا ءيسّمون ربّي، ا‑ت‑ور‑يبضو بنادم.» لّيغ وورّين س‑تگمّي سقسان‑ت ءيمحضارن‑نس ف‑تغاوسا‑ياد. ءيساول ياسوع ييني‑اسن: «وانّا ءيفران ءي‑تمغارت‑نس ءيتاهل يات ياضني، هاتين ءيزنا فلّاس. ءيغ‑تفرا‑تمغارت ءي‑ورگاز‑نس ءيتاهل‑تّ يان ياضني، هاتين زّنا ايان تسكر ءولا نتّات.» ار‑دي‑تّاشكين مدّن ار‑دي‑تاوين تاروا مژّينين، ءيرين ياسوع ا‑ن‑فلّاسن‑يسرس ءيفاسّن‑نس ءيبارك‑تن. نكرن ءيمحضارن رارن‑تن ءينين‑اسن: «ا‑تن‑د‑ور‑تاويم.» ءيمّا ياسوع، لّيغ ءيژرا مايان طيّر‑اس ييني‑اسن: «ادجات تاروا مژّينين ا‑د‑داري‑اشكين. ا‑تن‑ور‑تحصارم، اشكو زوند غويد ا‑مي‑تلّا‑تگلديت ن‑ربّي. لحقّ ا‑راد‑اون‑ينيغ، وانّا ءور‑يرين ا‑يكشم س‑تگلديت ن‑ربّي زوند ارّاو ءيمژّين ءور‑را‑سرس‑يكشم.» ياسي‑تن ءيلمّا ف‑يفادّن‑نس ءيسرس فلّاسن ءيفاسّن‑نس ءيبارك‑تن. ءينكر ياسوع، را‑د‑يفّوغ س‑وغاراس س‑د‑يوزّل يان‑ورگاز ءيضر ف‑يفادّن غ‑لگدّام‑نس ءيسقسا‑ت: «واي‑امسلمد ءيفولكين، ما‑راد‑سكرغ باش اد‑طّافغ تودرت لّيخرت؟» ءيساول ياسوع ييني‑اس: «ماخ ايلّيغ‑يّي‑تگيت د‑واد ءيفولكين؟ ءور‑يلّي يان ءيفولكين ابلا ربّي واحدوت. كيّي تسّنت لوصيّات، ‹ا‑ور‑تنغت، ا‑ور‑تزنوت، ا‑ور‑تاكُرت، ا‑ور‑تفكت توگّا ن‑تكركاس، ا‑ور‑تغُشّوت. اوي‑تّ غ‑باباك د‑ينّاك.› » ءيساول‑ورگاز ييني‑اس: «واي‑امسلمد، ماياد كولّوت ار‑ت‑سكارغ زغ‑لّيغ مژّيغ سول س‑غيلاد.» ءيسّماقّل گيس ياسوع ءيحوبّو‑ت، ييني‑اس: «يات‑تغاوسا اد‑اك‑يقامان. زايد تزّنزت كولّو ماد‑دارك‑يلّان، تفكت‑ت ءي‑يمژلاض ييلي‑اك‑وايدا غ‑يگنّا. تاشكيد‑د ءيلمّا تمونت ديدي.» ءيمّا نتّا تُگراژ‑ت ف‑واوال‑اد، ءيدّو طيّر‑اس اشكو ءيگّوت‑وايدا‑نس باهرا. ءيگراول‑د ياسوع ءيسّماقّل غ‑يمحضارن‑نس ييني‑اسن: «منشك ا‑س‑يشقا ف‑ويلّي دار ءيگّوت‑وايدا اد‑كشمن س‑تگلديت ن‑ربّي.» گُّدن ءيمحضارن ف‑واوال‑اد. ءيزايد ياسوع ييني‑اسن: «وا‑تاروا، منشك ا‑س‑يشقا اد‑كشمن س‑تگلديت ن‑ربّي. را‑يرخو ف‑ورعام ا‑يكشم زغ‑تيط ن‑تاسمي ءولا ءيكشم يان دار ايدا ءيگّوتن س‑تگلديت ن‑ربّي.» گُّدن س‑وگُّار ار‑تّينين ءي‑نگراتسن: «ءيغ‑يگا غمكاد ما‑را‑ييژضار ا‑ينجم؟» ءيسّماقّل گيسن ياسوع ييني‑اسن: «غ‑دار بنادم ءور‑يژضار ا‑ييلي والاينّي غ‑دار ربّي. اشكو ءور‑يلّي كرا مي ءور‑يژضار ربّي ا‑ت‑يسكر.» ءينكر بطرُس ييني‑اس: «ها‑نكُّني نفل‑ن كولّو ما‑دارنّغ‑يلّان، ناشك‑يد نمون ديدك.» ييني‑اسن ياسوع: «لحقّ ا‑راد‑اون‑ينيغ، وانّا‑ن‑يفلن تيگمّي‑نس نغد ايتماس نغد ءيستماس نغد باباس نغد ءينّاس نغد تاروا‑نس نغد ءيگران‑نس ف‑سّيبت‑ينو ءولا ف‑سّيبت لّخبار‑اد ءيفولكين راد‑اس‑ييلي ما‑يوگُرن مايان ف‑ميّا ن‑توال غيلاد غ‑دّونيت‑اد، تيگُمّا د‑ايتماتن د‑تايتماتين د‑ينّاتين د‑تاروا د‑يگران نتني د‑ترفوفنت، تيلي‑اس غ‑ليخرت تودرت ءيدومن. والاينّي كيگان د‑يمزوورا ا‑را‑يگُّرو، د‑كيگان د‑يمگّورا ا‑را‑يزوور.» مونّ د‑وغاراس اكمورن‑ين س‑تمدينت ن‑وروشاليم، ءيزوور‑اسن ياسوع. غووضن ءيمحضارن‑نس، ءيمّا مدّن لّي‑اسن‑گُّرانين كسوضن. ياوي‑داغ ءيمحضارن‑نس س‑سين د‑مراو، ءيساول سرسن ف‑غايلّي راد‑اس‑يجرو، ييني‑اسن: «سفلدات، را‑ندّو س‑وروشاليم. ءيمّا نكّي لّي‑يگان يوس ن‑بنادم، را‑يّي‑ن‑دحين س‑گر ءيفاسّن ن‑ينمغورن ن‑تگمّي ن‑ربّي د‑يمسلمدن ن‑شّرع. راد‑فلّا‑حكامن س‑لموت فكن‑يّي ءي‑يبرّانيين. را‑گيگي‑تطناژن سّوفسن فلّا سّغورشن‑يّي نغن‑يّي. والاينّي غ‑ويس كراض‑ووسّان راد‑د‑نكرغ زغ‑لموت.» ياشك‑يد ياعقوب د‑يوحانّا تاروا ن‑زابدي س‑دار ياسوع ءينين‑اس: «واي‑امسلمد، نرا اد‑اغ‑تسكرت كرا.» ييني‑اسن: «ما‑ترام اد‑اون‑ت‑سكرغ؟» ءينين‑اس: «فك‑اغ ا‑نسكيوس يان ف‑وفاسيي‑نّك د‑يان ف‑وژلماض‑نّك غاكود لّيغ را‑تكشمت س‑لمجد ن‑تگلديت‑نّك.» ءيساول ياسوع ييني‑اسن: «ءور‑تسّينم مايد تضالبم. ءيس‑تژضارم ا‑تسوم لكاس ن‑ورفوفن لّي‑راد‑سوغ نكّي، تدّمّ س‑ودوم لّي‑س‑راد‑دّمغ؟» ءينين‑اس: «نژضار‑اس.» ءيرار‑اسن ياسوع: «س‑صّاحت، لكاس لّي‑راد‑سوغ نكّي را‑تي‑تسوم كونّي، ءولا ءودوم لّي‑س‑راد‑دّمغ را‑سرس‑تدّمّ، والاينّي اسكيوس ف‑وفاسيي‑ينو ءولا ف‑وژلماض‑ينو ءور‑يگي وينو باش ا‑ت‑فكغ ابلا ءي‑ويلّي‑مي‑ت‑يسكر ربّي.» سفلدن مراو ياضني ءي‑مايد ءينّا ياعقوب د‑يوحانّا، بزگن فلّاسن. ءيمّا ياسوع ءيغرا‑ياسن‑د كولّوتن ييني‑اسن: «تسّنم غويلّي گانين ءيگلدان ن‑دّونيت‑اد ار‑تحكامن ف‑ايت‑تميزار‑نسن، تيسّانم ءينمغورن‑نسن ار‑تامرن مدّن اد‑سكارن س‑يواليون‑نسن. ءيمّا كونّي ا‑ور‑ييلي غمكان غ‑گراتون. وانّا ءيران ا‑گيگون‑ييمغور، ءيلّا فلّاس ا‑يگ اخدّام‑نّون. د‑وانّا گيگون ءيران ا‑يزوور، ءيلّا فلّاس ا‑يگ ءيسمگ ءي‑كولّو وييّاض. ءولا نكّي لّي‑يگان يوس ن‑بنادم، ءور‑د‑وشكيغ اد‑فلّا‑تخدامن مدّن. ءوشكيغ‑د اد‑تخدامغ، فكغ تودرت‑ينو اد‑فوكّوغ ما‑يگّوتن.» لكمن تامدينت ن‑اريحا. لّيغ ءيفّوغ ياسوع زغ‑اريحا نتّا د‑يمحضارن‑نس د‑مدّن گّوتنين، ييلي غين يان‑وبوكاض ءيسم‑نس بارتيماوس يوس ن‑تيماوس، ءيگاور غ‑تاما ن‑وغاراس ار‑يتضالاب. لّيغ ءيسفلد ءيزد ياسوع گو‑ناصيرا ايد ءيزرين ار‑يتغوّات ار‑يتّيني: «وا‑ياسوع يوس ن‑داود، حنّو گيگي.» اكُين گيس مدّن ءينين‑اس ا‑يفسّا. ءيمّا نتّا ءيزوويد ار‑يتغوّات س‑وگُّار ار‑يتّيني: «وا‑ياسوع يوس ن‑داود، حنّو گيگي.» ءيبيدّ ياسوع ييني ءي‑مدّن‑ان: «غرات‑اس‑د.» غرن‑د ءي‑وبوكاض ءينين‑اس: «غير تهنّا. تنكرت، هاتي ءيغرا‑ياك‑د س‑دارس.» ياكُي‑وبوكاض ءيلوح اسلهام‑نس، ياشك‑يد س‑دار ياسوع. ءيسقسا‑ت ياسوع: «ما‑تريت اد‑اك‑ت‑سكرغ؟» ييني‑اس‑وبوكاض: «وا‑سيدي، اد‑يسفيوغ.» ءيساول ياسوع ييني‑اس: «زايد غيلاد، ها‑كيّي تجّيت اشكو تومنت.» ييسفيو غاكودان، ءيضفور ياسوع غ‑وغاراس. اكمورن‑ين س‑تمدينت ن‑وروشاليم. لّيغ لكمن اورير ن‑زّيتون غ‑تسگا ن‑بيتفاجي د‑بيتعانيا، يازن ياسوع سين زغ‑يمحضارن‑نس ييني‑اسن: «زايدات س‑ودوّار‑ان لّگدّام‑نّون. كشمات سرس، را‑ن‑تافم يان‑وسنوس ءيقّنّ، ءور‑جّو‑فلّاس‑يني يان. فسيات‑اس تاويم‑ت‑يد. ءيغ‑اون‑ينّا كرا ن‑يان ‹مايد تناولم؟› تينيم‑اس ‹ءيرا‑ت سيديتنّغ، يان ءيميكّ را‑ت‑يد‑يرار.› » دّون افن‑ين اسنوس ءيقّن غ‑وغاراس غ‑تاما ن‑يمي ن‑يات‑تگمّي. فسين‑اس‑د. ساولن سرسن غويلّي بيدّنين غين ءينين‑اسن: «مايد تناولم؟ ماخ ا‑تفسيم ءي‑وسنوس‑اد؟» رارن‑اسن س‑غمكلّي‑س‑اسن‑ينّا ياسوع، ادجن‑تن. اوين‑د اسنوس ءي‑ياسوع گرن‑ين فلّاس ءيسلهامن‑نسن، ءيني فلّاس. مونّ‑د مدّن گّوتنين، ار‑سّوان ءيسلهامن‑نسن غ‑وغاراس. كرا گيسن ار‑د‑يتبّي تيصطّوين زغ‑يسغارن ن‑يگران ار‑تنت‑سّوان غ‑وغاراس. فرحن باهرا غويلّي زوارنين ءي‑ياسوع غ‑وغاراس ءولا غويلّي‑اس‑گُّرانين، ار‑تالّن اوال‑نسن ار‑تّينين: «هوصانّا، امباركي ا‑يگا غواد‑د‑يوشكان س‑يسم ن‑سيدي ربّي. تامباركيت ا‑تگا‑تگلديت ن‑باباتنّغ داود لّي‑د‑يوشكان. هوصانّا غ‑يگنّا ياتّوين.» ءيلكم ياسوع تامدينت ن‑وروشاليم، ءيكشم س‑تگمّي ن‑ربّي ار‑يتمناد غ‑كولّو ما‑گيس‑يلّان. ءيفّوغ ءيلمّا نتّا د‑يمحضارن‑نس س‑سين د‑مراو، ءيدّو س‑بيتعانيا اشكو ياغ‑وزال. نديد ازكّا لّيغ فّوغن زغ‑بيتعانيا ءينغ‑ت لاژ. ءيژر‑ن يات تازارت ءيزگزاون غ‑توگّوگت. ءيفتو سرس ا‑ور‑يميل ياف‑ن‑گيس كرا. لّيغ‑تّ‑يروح ءور‑ن‑گيس‑يوفي غير ءيفراون اشكو ءورد ازمز ن‑يكوزارن ايان. ييني‑اس: «زايد ا‑ور‑سار‑زگيم‑يشّ يان لغلّت.» سفلدن ءيمحضارن‑نس ءي‑ما‑ينّا. لكمن‑د‑داغ تامدينت ن‑وروشاليم، ءيكشم ياسوع س‑تگمّي ن‑ربّي. ءينكر ار‑زگيس‑يطّاي غويلّي گيس زّنزانين ءولا غويلّي گيس ساغنين. ءيگلّب لميادي ن‑ويلّي تصرّافنين ءيقاريدن، ءيگلّب لكُراسا ن‑ويلّي زّنزانين ءيتبيرن. ءور‑يودجي يان ا‑ياسي ما‑ينزّان غ‑تگمّي ن‑ربّي. ءيبدو ار‑تن‑يسّلماد ييني‑اسن: «ءيس‑ور‑يتيارا غ‑وارّا ن‑ربّي ‹تيگمّي‑نو راد‑اس‑تّينيم تيگمّي ن‑تژالّيت ءي‑مدّن ن‑كولّو تيميزار؟› ءيمّا كونّي، هاتي ترورم‑تّ تگا ءيفري ن‑يمخّارن.» سفلدن‑اس ءينمغورن ن‑تگمّي ن‑ربّي د‑يمسلمدن ن‑شّرع، بدون ار‑سيگّيلن س‑مامنك ا‑س‑را‑ت‑هلكن. كسوضن زغ‑گيس اشكو ار‑تعجّابن مدّن كولّوتن غ‑ولمّود‑نس. لّيغ‑دي‑تلكم‑تدگُّات ءيفّوغ ياسوع د‑يمحضارن‑نس زغ‑تمدينت ن‑وروشاليم. زيكّ صباح ن‑نديد ازكّا لّيغ زرين غ‑وغاراس ژرن تازارت‑لّي، تقّور زغ‑يژوران‑نس. ءيكتي‑د بطرُس ييني ءي‑ياسوع: «واي‑امسلمد، سّماقّل. تازارت لّي‑مي‑تدعيت، هاتّي تقّور.» ءيساول ياسوع ييني‑اسن: «امنات س‑ربّي. لحقّ ا‑راد‑اون‑ينيغ، وانّا ءينّان ءي‑وورير‑اد ‹ءيتّي زغ‑غيد تضرت‑ن غ‑ومدا،› ءيغ‑يومن ءيس‑را‑ييلي مايلّي‑س‑ينّا بلا ءيشكّا غ‑وول‑نس، هاتي راد‑اس‑ييلي. ف‑ماياد ا‑ف‑راد‑اون‑ينيغ، كولّو ما‑تضالبم ءيغ‑ا‑تّژالّام ءي‑ربّي، امنات ءيس‑راد‑اون‑يتياوفكا، هاتي راد‑اون‑ييلي. غاكود نّا‑تبيدّم ار‑تّژالّام، صامحات ءي‑وانّا گيگون ءيسكرن كرا يُخشنّ، باش اد‑اون‑يصامح باباتون لّي‑يلّان غ‑يگنّا ءولا كونّي ف‑دّنوب‑نّون.» اشكين‑د‑داغ س‑تمدينت ن‑وروشاليم. لّيغ ا‑يفتّو ياسوع غ‑تگمّي ن‑ربّي مناگّارن‑ت‑يد ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت. ءينين‑اس: «ما‑ك‑يد‑يوزنّ ا‑تسكارت كولّو غاياد؟ اوال ن‑مي ايد‑س‑ا‑تي‑تسكارت؟» ءيساول ياسوع ييني‑اسن: «ءولا نكّي را‑كُن‑سقساغ يان‑وسقسي. رارات‑يّي‑د ءينيغ‑اون ما‑يّي‑د‑يوزنّ اد‑سكارغ ماياد. يوحانّا، ما‑ت‑يد‑يوزنّ ا‑يسّدّام مدّن؟ ءيزد ربّي نغد بنادم؟ رارات‑يّي‑د.» بدون ار‑سّمقسان ءي‑نگراتسن ار‑تّينين: «ءيغ‑ننّا ‹ربّي ا‑ت‑يد‑يوزنّ› راد‑اغ‑ييني ‹ماخ ايلّيغ ءور‑تومينم ماد‑اون‑ينّا؟› والاينّي ءيزد‑نّيت‑ا‑نيني ‹بنادم ا‑ت‑يد‑يوزنّ›؟» نتني كسوضن زغ‑مدّن، اشكو ار‑كولّو‑تّينين ءيزد يوحانّا يان‑نّابي ا‑يگا. ساولن ءيلمّا ءينين‑اس: «ءور‑نسّين ما‑ت‑يد‑يوزنّ.» ءيرار‑اسن ياسوع: «ءولا نكّي ءور‑راد‑اون‑ينيغ ما‑يّي‑د‑يوزنّ اد‑سكارغ كولّو ماياد.» ءيبدو ياسوع ار‑سرسن‑يساوال س‑لمعني ييني‑اسن: «ها‑يان‑ورگاز ءيژّا اضيل غ‑يگر‑نس، ءيسّلولّي‑اس ءيفريگ ءيغزا اگُضي ءي‑لمعصّرت، ءيبنو يا‑لّبرج ءيفل‑ت ءي‑يخمُّاصن ءيفتو ءيمودّو. لّيغ‑د‑يروح‑وزمز يازن يان‑وخدّام‑نس س‑دار ءيخمُّاصن اد‑اس‑د‑ياوي ما‑ت‑يد‑يوشكان غ‑لغلّت ن‑يگر‑نس. ءيمّا نتني غوين‑ت سّغورشن‑ت رارن‑ت ءور‑د‑ييوي يات. يازن‑اسن اخدّام ياضني، رژن‑اس ءيخف‑نس سّرفوفنّ‑ت. يازن وايّاض، نغن‑ت. يازن وييّاض گّوتنين، كرا گيسن ءوتن‑ت، كرا گيسن نغان‑ت. ءيقاما‑ياس يان ءيگا يوس، ءيعزّا دارس باهرا. يازن‑اسن‑ت غ‑يسيگُّرا، ييني د‑يخف‑نس: ‹راد‑وقّرن ءيوي.› والاينّي ءيخمُّاصن‑ان مشاوارن ءي‑نگراتسن ءينين: ‹غواد ا‑را‑يوورت ءيگر. اشكاد‑د ا‑ت‑ننغ ءيگ لوورت وينّغ.› غوين‑ت نغن‑ت لوحن‑ت‑ين س‑برّا ن‑يگر.» ءيسقسا‑تن ياسوع: «ما‑را‑يسكر باب ن‑يگر ف‑غايان؟ را‑د‑ياشك ءيهلك ءيخمُّاصن‑ان، ءيفك ءيگر ءي‑وييّاض. ءيس‑ور‑تغريم ما‑يتياران غ‑وارّا ن‑ربّي؟ ‹اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو. ماياد، سيدي ربّي ا‑ت‑يسكرن. نژرا‑ت ار‑گيس‑نتعجّاب.› » نكرن ءينمغورن غاكودان، ءيرين اد‑امژن ياسوع اشكو سّنّ ءيزد نتني ا‑ف‑يوت لمعنا‑ياد، والاينّي كسوضن زغ‑مدّن، فلن‑ت دّون. ازنّ‑د دارس كرا ن‑يفاريسين د‑يمدّوكُّال ن‑وگلّيد هيرودوس. ءيرين اد‑اس‑مدين گمّرن‑ت ف‑واوال‑نس. اشكين‑د ءينين‑اس: «واي‑امسلمد، نسّن ءيزد لحقّ ايد تّينيت، ءور‑ا‑تسكارت ف‑ماد‑سوينگيمن مدّن. اشكو ءور‑ا‑تّمنادت ءودماون ن‑مدّن والاينّي ار‑تسّلمادت اغاراس ن‑ربّي غمكلّي ءيگا. ءيني‑اغ ءيس‑يحلّا ا‑ناكّا ضابييت ءي‑قايصر نغد ءوهو؟ ا‑ستّ‑ناكّا نغد ءوهو؟» ءيمّا ياسوع ءيسّن ماد‑ران غ‑لحيلت‑نسن، ييني‑اسن: «ماخ ا‑يّي‑تّارمّ؟ ارايات‑يّي‑د يان‑وقاريد ا‑ت‑ژرغ.» فكن‑اس‑د يان‑وقاريد. ييني‑اسن: «وين‑ميت ا‑يگا‑وودم‑اد د‑يسم‑اد گيس ءيلّان؟» ءينين‑اس: «وين قايصر.» ءيرار‑اسن ياسوع: «فكات ءي‑قايصر ما‑يگان وين قايصر، تفكم ءي‑ربّي ما‑يگان وين ربّي.» نتني ار‑گيس‑تعجّابن. اشكين‑د دارس كرا ن‑يصادّوقين. نتني غ‑لمدهب‑نسن ار‑تّينين «ءور‑يلّي ما‑را‑د‑ينكر زغ‑لموت.» سقسان‑ت: «واي‑امسلمد، يورا‑ياغ موسا ءينّا ‹ءيغ‑يمّوت كرا ن‑يان ءيفل‑د تامغارت‑نس بلا تاروا، ءيلّا ف‑گماس ن‑ورگاز‑ان ا‑يتاهل تامغارت‑ان ا‑ديدس‑يسكر تاروا ف‑يسم ن‑گماس لّي‑يمّوتن.› ها‑سّا ن‑ايتماتن، ييوي‑ومزوارو تامغارت ءيمّت ءور‑د‑يفيل تاروا، ياوي‑تّ ويس سين ءيمّت ءور‑د‑يفيل تاروا. غمكاد ا‑يگا ويس كراض ءولا نتّا، ايلّيغ‑تّ‑يوين كولّوتن س‑سّا ءور‑د‑فيلن تاروا. غ‑يسيگُّرا تمّت‑تمغارت ءولا نتّات. ءيني‑اغ، غ‑تنكرا لّي‑غ‑راد‑نكرن كولّوتن، تامغارت ن‑مانوا گيسن ا‑را‑تگ؟ هاتّي تكّا‑تّين تگا تامغارت‑نسن س‑سّا.» ءيساول ياسوع ييني‑اسن: «ءيس‑ورد غاياد ا‑ف‑تجلام؟ اشكو ءور‑تسّينم ارّاتن ن‑ربّي ءولا تسّنم تاژضّارت ن‑ربّي. غاكود لّيغ راد‑نكرن غويلّي مّوتنين ءور‑را‑تاهالن ءولا‑دا‑تاهالنت، والاينّي زوند لمالايكا ن‑يگنّا ا‑راد‑گن. ءيمّا تانكرا ن‑ويلّي مّوتنين، ءيس‑ور‑فلّاس‑تغريم غ‑وارّا ن‑موسا، لّيغ ءيلّا غ‑تاما ن‑تزگُّارت؟ ربّي ءيساول سرس ييني‑اس ‹نكّي گيغ ربّي ن‑يبراهيم گغ ربّي ن‑يسحاق گغ ربّي ن‑ياعقوب.› اوال‑ان ءيملا‑ياغ ءيس‑دّرن نتني غ‑لگدّام ن‑ربّي، واخّا مّوتن. هان كونّي تجلام باهرا.» ياشك‑يد يان‑ومسلمد ن‑شّرع ءيسفلد‑اسن ار‑تمجاحادن. لّيغ ءيژرا مامنك ا‑تن‑يرور ياسوع س‑لمعقول، ءيسقسا‑ت: «ما‑لّوصيت ا‑كولّو‑يهيّان غ‑لوصيّات ن‑ربّي؟» ءيساول ياسوع ييني‑اس: «لوصيت ءيهيّان ا‑ستّ‑يگان ‹سفلدات، اي‑ايت‑ربّي. ربّي سيديتنّغ، نتّان واحدوت ا‑يگان ربّي. ا‑تّيريت ربّي سيديك زغ‑تّمي ن‑يخف‑نّك د‑تّمي ن‑وول‑نّك د‑تّمي لّعاقل‑نّك د‑تّمي ن‑تژضّارت‑نّك.› تيس سنات ا‑ستّ‑يگان ‹ا‑تّيريت ادجار‑نّك زوند ءيخف‑نّك.› ءور‑تلّي كرا لّوصيت يوگُرن سنات‑اد.» ييني‑اس‑ومسلمد ن‑شّرع: «ءيفولكي اي‑امسلمد. س‑لحقّ ا‑س‑تنّيت ربّي ءيگا واحدوت، ءور‑يلّي ابلا نتّا. ءيغ‑ت‑يرا يان زغ‑تّمي ن‑يخف‑نس د‑تّمي لّفهمت‑نس د‑تّمي ن‑تژضّارت‑نس، ييري ادجار‑نس زوند ءيخف‑نس، ماياد يوف كولّو تيغرسيو لّي‑جدّرن مدّن ءولا تيوافكيو لّي‑اكّان ءي‑ربّي.» لّيغ ءيژرا ياسوع ءيزد س‑لمعقول ا‑س‑د‑يساول ييني‑اس: «ءور‑ن‑تاگّوگت كيّي ف‑تگلديت ن‑ربّي.» غاكودان ءور‑سول‑يزعم يان ا‑ت‑يسقسا. ار‑يسّلماد ياسوع غ‑تگمّي ن‑ربّي، ءيسقسا مدّن: «ماخ ايلّيغ ا‑تّينين ءيمسلمدن ن‑شّرع ‹را‑يگ لماسيح يان زغ‑تاسوت ن‑وگلّيد داود›؟ ءيمّا داود، لّيغ‑ت‑يگوّد رّوح لقودوس ا‑يساول ف‑لماسيح ءينّا ‹ها‑سيدي ربّي ءينّا ءي‑سيدي، سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.› ها‑داود س‑يخف‑نس ءيبدر غوالّي ءيگان لماسيح، ءيگ‑ت د‑سيديس. مامنك ا‑را‑يگ غير يان زغ‑تاسوت‑نس؟» ار‑اس‑سفليدن مدّن گّوتنين، فرحن س‑كولّو ماد‑اسن‑ينّا. ار‑تن‑يسّلماد ييني‑اسن: «رارات لعاقل‑نّون زغ‑يمسلمدن ن‑شّرع، اشكو ءيعزّا دارسن اد‑فتّون س‑تملسا غزّيفنين شوانين، ءيعزّو دارسن ا‑فلّاسن‑تسلّامن مدّن غ‑لاسواق، ءيعزّو دارسن اد‑زگّورون س‑لگدّام غ‑تگُمّا ن‑تژالّيت ءولا غ‑وسكيوس ن‑يمنسيون. ار‑شتّان تيگُمّا ن‑تهجّالين، ار‑سّيغزّيفن تيژولّا‑نسن باش اد‑سّبايّنّ ءيخفاون‑نسن ءيس‑فولكين. نتني را‑فلّاسن‑يتّوت لحوكم ن‑ربّي س‑وگُّار.» ءيگاور ياسوع غ‑ومنيد ن‑صّندوق غ‑تگمّي ن‑ربّي، ار‑يتمناد غ‑مدّن ار‑ن‑سراسن ءيقاريدن غ‑صّندوق. كيگان د‑يد‑بو‑وايدا ار‑ن‑سراسن ما‑يگّوتن. تاشك‑يد يات‑تهجّالت تگا تامژلوطّ، تسرس‑ن سنات‑تقاريدين ءيدروس‑واتيگ‑نسنت. ءيغر ياسوع ءي‑يمحضارن‑نس س‑دارس ييني‑اسن: «لحقّ ا‑راد‑اون‑ينيغ، تاهجّالت‑اد تامژلوطّ، هاتّي تسرس‑ن غ‑صّندوق ءوگُّار ن‑غويد كولّوتن، اشكو نتني فكان زغ‑مايلّي دارسن ءيگّوتن، ءيمّا نتّات، واخّا تحتاجّا، تسرس‑ن كولّو ما‑دارس‑يلّان، تفك لمعيشت‑نس كولّوتّ.» لّيغ‑د‑يفّوغ ياسوع زغ‑تگمّي ن‑ربّي، ييني‑اس يان زغ‑يمحضارن‑نس: «ژر اي‑امسلمد، ماتّا غمكاد مقّورن ءيژران‑اد. ماتّا غمكاد دوسن فولكين ءيغوربان‑اد.» ءيمّا ياسوع ءينّا‑ياس: «ءيس‑ا‑تّمنادت غ‑يغوربان‑اد مقّورنين؟ راد‑كولّو‑تياوگارن س‑واكال. ءور‑را‑گيسن‑يقاما‑وژرو ف‑وژرو.» لّيغ ءيسكيوس ياسوع غ‑وورير ن‑زّيتون غ‑ومنيد ن‑تگمّي ن‑ربّي، ءيسقسا‑ت بطرُس د‑ياعقوب د‑يوحانّا د‑اندراوس نتني واحدوتن، ءينين‑اس: «ماناگو ا‑را‑ييلي غايد‑س‑تنّيت؟ ما‑را‑يگ تاماتارت ن‑يس‑د‑ياكمور ا‑يجرو كولّو غاياد؟» ءيساول ياسوع ييني‑اسن: «اويات‑ستّ غ‑يخف‑نّون ا‑كُن‑ور‑يجلو يان. اشكو گّوتن غويلّي را‑د‑ياشك اسين‑د ءيسم‑ينو، كود يان ار‑يتّيني ءيزد نتّان ا‑يگان لماسيح. نتني راد‑جلّون مدّن گّوتنين. ءيغ‑تسفلدم ف‑يماغن ءولا لخبارات ن‑يماغن اد‑ور‑تغووضم، اشكو ءيقّان‑د ا‑ييلي غايان، والاينّي ءور‑تا‑د‑يروح ءيسيگُّرا. را‑دي‑تنكر‑تقبيلت س‑تقبيلت تنكر‑د‑تگلديت س‑تگلديت، ءيلينت زّنزالات غ‑كرا ن‑تميزار ييلي‑وغني. والاينّي غاياد ءيگا غير ازبّار امزوارو ن‑تلاليت. «اويات‑ستّ غ‑يخف‑نّون. را‑كُن‑دحاين س‑لمحكامات، سّغورشن‑كُن غ‑تگُمّا ن‑تژالّيت. را‑تبدّادم ف‑سّيبت‑ينو غ‑لگدّام لّحوكّام د‑يگلدان اد‑اسن‑تاكّام توگّا فلّا. ءيقّان‑د ا‑تروح‑تبرّاحت لّخبار ءيفولكين كولّو تيميزار ن‑دّونيت ءور‑تا‑د‑يلكيم ءيسيگُّرا. ءيغ‑كُن‑ومژن دحين‑كُن‑ين، اد‑ور‑تاسيم تاغوفت ف‑ما‑را‑تينيم. ءينيات اوال نّا‑ياون‑يملا ربّي غ‑تاساعت‑ان، اشكو ءورد كونّي ا‑يساوالن والاينّي رّوح لقودوس ن‑ربّي. را‑ييلي ما‑را‑ن‑يدحي گماس ءي‑لموت، ييلي ما‑را‑ن‑يدحي يوس، نكرن‑د تاروا ف‑ايت‑دارسن نغن‑تن. را‑كُن‑تكرهون كولّو مدّن ف‑سّيبت ن‑ما‑تگام وينو. ءيمّا وانّا ءيبيدّن ءيزگا ار ءيسيگُّرا را‑ينجم. «را‑تژرم تاجلخيت لّي‑يفنّون تنكر غ‑يلّيغ ءور‑دارس لحقّ ا‑گيس‑تيلي. وانّا ياقران، ءيلّا فلّاس ا‑ييسّان لمعنا. غاكودان وينّا لّانين غ‑تمازيرت ن‑يودايا ءيقّان‑تن‑د اد‑روولن س‑يدرارن. وانّا ءيلّان ف‑يگّي ن‑تگمّي ءيقّان‑ت‑يد اد‑ور‑يكشم ا‑د‑ياسي كرا. وانّا‑ن‑يلّان غ‑يگران ءيقّان‑ت‑يد ا‑ور‑يوورّي تيغوردين ا‑د‑ياوي تيملسيت‑نس. راد‑باهرا‑شقون‑ووسّان‑ان ف‑تيلّي گيسن ربّونين ءولا تيلّي گيسن سّنگاينين. ضالبات ءي‑ربّي اد‑ور‑يجرو غايان غ‑تگرست اشكو غ‑ووسّان‑ان را‑تيلي‑تنوكموت، ءور‑جّو‑تلّي زوند نتّات زغ‑يسيزوار غ‑يخلق ربّي دّونيت سول س‑غيلاد، ءولا راد‑داغ‑تيلي زوند نتّات. مراد ءيس‑ور‑يسّيدروس سيديتون ءوسّان‑ان ءور‑را‑ينجم يان. والاينّي ف‑سّيبت ن‑ويلّي ءيژلي اد‑گن وينس، هاتي ءيسّيدروس ءوسّان‑ان ف‑سّيبت‑نسن. «غاكودان ءيغ‑اون‑ينّا كرا ن‑يان ‹ها‑لماسيح ءيلّا غيد› نغد ‹هاتين ءيلّا غين› ا‑ت‑ور‑تامنم. اشكو راد‑د‑نكرن كرا ن‑مدّن، كود يان ار‑يتّيني ف‑يخف‑نس ءيزد لماسيح ا‑يگا نغد كرا ن‑نّابي، والاينّي ار‑سّكيركيسن. راد‑سكارن تيميتار د‑لمعجيزات ءيغ‑وفان اد‑جلّون ءولا غويلّي گانين وين ربّي. ءيمّا كونّي، اويات‑ستّ غ‑يخف‑نّون. نّيغ‑اون كولّو غاياد ءور‑تا‑يجري. «غ‑ووسّان‑ان غ‑تغوردين ن‑تنوكموت‑ان، را‑تلّاس تافوكت، ءور‑را‑يفاو‑وايّور. راد‑طّارن ءيتران زغ‑يگنوان، ار‑تياتّاينت تيفاوين ن‑يگنوان. غاكودان ا‑را‑يّي‑ژرن، نكّي لّي‑يگان يوس ن‑بنادم، فتيغ‑د غ‑يمدلا س‑لقوّا د‑لمجد ءيگّوتن. غاكودان راد‑ازنغ لمالايكا اد‑سّمونّ غويلّي گانين وينو زغ‑كرايگاتّ تاسگا، زغ‑تّمي ن‑واكال ار تّمي ن‑يگنوان. «هاتي تازارت ا‑زغ‑را‑تيسّانم لمعنا. ءيغ‑لگُّيغنت‑تصطّوين‑نس تسّوفغ‑د تيفراوين‑نس تيسّانم ءيس‑د‑ياكمور صّيف. غمكان ا‑را‑ييلي. ءيغ‑تژرام تيميتار‑اد س‑اون‑نّيغ ار‑جرّونت، تيسّانم ءيس‑د‑ياكمور، هاتين غ‑يمي. لحقّ ا‑راد‑اون‑ينيغ، ءور‑را‑تزري‑تاسوت‑اد ارد كولّو ءيجرو ماياد. راد‑يتّين ءيگنوان د‑واكال والاينّي ءور‑سار‑يتّين ءيواليون‑ينو. «والاينّي اسّ‑ان ءولا تاساعت‑ان ءور‑تن‑يسّين يان، لا لمالايكا ن‑يگنّا ءولا يوس ن‑بنادم. غير بابا لّي‑يلّان غ‑يگنّا، نتّان واحدوت ا‑يسّنّ. رارات لعاقل‑نّون تضوفم اشكو ءور‑تسّينم ماناگو ا‑را‑د‑يروح‑وزمز‑ان. زوند يان‑ورگاز ءيمودّا ءيفل تيگمّي ءي‑يخدّامن‑نس ا‑ستّ‑گابلن، ءيفك ءي‑كرايگاتّ يان تاووري‑نس. يوصّا انگابال ن‑يمي ا‑يضوف. ضوفات ءولا كونّي، اشكو ءور‑تسّينم ماناگو ا‑را‑د‑ياشك بو‑تگمّي، ءيزد غ‑تدگُّات نغد امّاس ن‑ييض نغد اودّان امزوارو ن‑وفولّوس نغد تاواغلا ن‑تافوكت. ضوفات ا‑ور‑د‑ياشك غ‑كرا ن‑تاساعت لّي‑ور‑تغالم ياف‑كُن‑د تگنم. مايد‑اون‑نّيغ، را‑ت‑ينيغ ءي‑كولّو مدّن: ضوفات.» سين‑ووسّان ا‑يقامان ءي‑لعيد ن‑وسورف د‑ووسّان ن‑ورخصيص. ار‑سيگّيلن ءينمغورن ن‑تگمّي ن‑ربّي د‑يمسلمدن ن‑شّرع مامنك ا‑راد‑امژن ياسوع س‑لحيلت ا‑ت‑نغن. والاينّي نّان ءي‑نگراتسن: «ءورد غ‑ووسّان لّعيد باش ا‑ور‑دووين مدّن.» ءيلّا ياسوع غ‑ودوّار ن‑بيتعانيا، ءيسكيوس ار‑يشتّا غ‑تگمّي ن‑سيمعان لّي‑ستّين‑يكّان ءيگا انجدام. تكشم‑د دارس يات‑تمغارت توسي‑د يات‑تبوقّالت ن‑وژرو تيلي‑گيس‑توجّوت ن‑ناردين ءيصفان، ءيگّوت‑باهرا‑واتيگ‑نس. ترژ ءيمي ن‑تبوقّالت تفّي‑تّ‑يد ف‑يخف ن‑ياسوع. ءيمّا غويلّي لّانين غين، كرا گيسن ءيبزگ فلّاس ءينين ءي‑نگراتسن: «ماخ ا‑تجلا توجّوت‑اد؟ مراد ءيس‑تنزا را‑دي‑تاوي ءوگُّار ن‑كراض ءيد‑ميّا ن‑نّوقرت، نفك‑تن ءي‑يمژلاض.» بدون ار‑فلّاس‑سّنگموگن. ءيمّا ياسوع ءينّا‑ياسن: «ادجات‑ستّ. ماخ ايلّيغ ديدس تشقام؟ هاتّي تسكر گيگي افولكي. ءيمژلاض راد‑بدّا‑ديدون‑يلين. غاكود نّا‑ترام را‑تافم ما‑س‑ا‑گيسن‑تسكارم لخير. ءيمّا نكّي ءور‑راد‑بدّا‑ديدون‑يليغ. هاتّي تسكر مايلّي مي توفا. نتّات تزوار تژغور دّات‑ينو ءي‑ومضّال. لحقّ ا‑راد‑اون‑ينيغ، ءينّاغ ا‑تبرّاحن مدّن س‑لخبار‑اد ءيفولكين غ‑كولّو دّونيت، را‑تّينين ف‑مايد تسكر ختاد، ار‑تّ‑يد‑سرس‑كتّين.» غاكودان ءينكر ياهودا ءيسخاريوط لّي‑يگان يان زغ‑سين د‑مراو ن‑ومحضار، ءيدّو س‑دار ءينمغورن ن‑تگمّي ن‑ربّي باش اد‑اسن‑يزّنز ياسوع. لّيغ سفلدن ءي‑ماد‑اسن‑ينّا، فرحن ءينين‑اس اد‑اس‑فكن ءيقاريدن. يوورّي ار‑يسوينگيم مامنك ا‑را‑تن‑يعاون اد‑امژن ياسوع. ءيلكم‑د‑واسّ امزوارو ن‑ووسّان ن‑ورخصيص لّي‑غ‑ا‑قّرسن مدّن ءي‑يلقّاغن. سقسان‑ت ءيمحضارن‑نس: «ماني تريت ا‑سرس‑ندّو اد‑اك‑ن‑گيس‑نجّوجاد ءيمنسي لّعيد ن‑وسورف؟» يازن سين زغ‑يمحضارن‑نس غاكودان، ييني‑اسن: «زايدات س‑تمدينت. را‑تمناگّارم يان‑ورگاز يوسي‑د اگدور ن‑وامان. ضفورات‑ت س‑تگمّي نّا‑س‑يكشم، تينيم ءي‑بو‑تگمّي‑ان ‹هاتي ءينّا‑ياك‑د‑ومسلمد، مانيغ ءيلّا‑وحانو لّي‑غ‑راد‑شّغ ءيمنسي ن‑وسورف نكّي د‑يمحضارن‑ينو؟› راد‑اون‑يمل يان‑وحانو ن‑وفلّا ءيمقّورن ءيسوان ءينگادّان. غين ا‑غ‑راد‑اغ‑تجّوجادم.» فّوغن ءيمحضارن، دّون س‑تمدينت افن‑ين غمكلّي‑اسن‑ينّا. جّوجادن ءيمنسي ن‑وسورف. تروح‑د‑تدگُّات، ءيلكم ياسوع تيگمّي نتّا د‑يمحضارن‑نس س‑سين د‑مراو. لّيغ سكيوسن ار‑شتّان ييني‑اسن: «لحقّ ا‑راد‑اون‑ينيغ، را‑يّي‑يزّنز يان غ‑گراتون، كونّي لّي‑ديدي‑شتّانين.» طيّر‑اسن باهرا، بدون ار‑ت‑سقسان كولّوتن، كود يان ار‑يتّيني: «ياك، ءورد نكّي؟» ييني‑اسن: «ءيگا يان زغ‑سين د‑مراو لّي‑ديدي‑درانين غ‑وروكو‑اد. ها‑يوس ن‑بنادم را‑يمّت غمكلّي فلّاس ءيتياران، والاينّي تاگوضي ا‑را‑ييلي ءي‑ورگاز لّي‑يزّنزان يوس ن‑بنادم. يوف‑اس ءي‑ورگاز‑ان مراد ءيس‑ور‑اكُّ‑يلول.» لّيغ ا‑شتّان ياسي ياسوع تانگولت، ءيشكر ربّي ءيبّي‑تّ، ءيفك‑اسن‑تّ ييني‑اسن: «امژات. ختاد تگا دّات‑ينو.» ياسي لكاس، ءيشكر ربّي ءيفك‑اسن‑ت. سون زغ‑گيس كولّوتن. ييني‑اسن: «غويد گان ءيدامّن‑ينو لّي‑را‑يفّي ف‑سّيبت ن‑مدّن گّوتنين باش اد‑گن لعهد لّجديد غ‑گراتون د‑ربّي. لحقّ ا‑راد‑اون‑ينيغ، ءور‑سول‑راد‑سوغ زغ‑لغلّت ن‑واضيل ار اسّ لّي‑غ‑را‑ت‑سوغ زغ‑لجديد غ‑تگلديت ن‑ربّي.» اسين ءيلمّا يان‑ومارگ زغ‑يموريگن ن‑ربّي، فّوغن س‑وورير ن‑زّيتون. ييني‑اسن ياسوع: «ها‑كونّي را‑يّي‑كولّو‑تفلم، اشكو ءيتيارا ‹راد‑وتغ امكسا، مزرنت‑وولّي.› والاينّي تيگيرا ن‑ما‑د‑نكرغ زغ‑لموت را‑كُن‑زوورغ س‑تمازيرت ن‑جاليل.» ءيساول بطرُس ييني‑اس: «واخّا‑ك‑كولّو‑فلن ءور‑سار‑ك‑فيلغ نكّي.» ءيمّا ياسوع ءيرور‑اس: «لحقّ ا‑راد‑اك‑ينيغ، غ‑يض‑اد ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.» ءيمّا نتّا ءينّا‑ياس س‑جّهد: «واخّا راد‑ديدك‑مّتغ ءور‑راد‑ينيغ ءور‑ك‑سّينغ.» غمكاد اد‑نّان كولّوتن. اشكين‑د س‑يان‑ودغار لّي‑مي‑تّينين ‹گاتسيماني›. ييني ياسوع ءي‑يمحضارن‑نس: «گاورات غيد، راد‑ژّالّغ.» ياوي ديدس بطرُس د‑ياعقوب د‑يوحانّا. ءيغووض ياسوع غ‑تاساعت‑ان، مّاغن ءيسوينگيمن باهرا غ‑وول‑نس. ييني‑اسن: «تژّاي فلّا تاغوفت‑اد ار لموت. گاورات غيد تاوزم.» ءيزايد ءيفتو يان ءيميكّ ءيضر س‑واكال ءيژّالّ ييني: «سّيتّي فلّا تاساعت‑اد ن‑ورفوفن ءيغ‑تژضار ا‑تيتّي.» ءيژّالّ‑داغ ييني: «ابّا وا‑بابا، ءور‑يلّي كرا مي ءور‑تژضارت ا‑تي‑تسكرت. كّيس فلّا لكاس‑اد ن‑ورفوفن، والاينّي ا‑ييلي ما‑تريت، ءورد ماد‑ريغ نكّي.» يوورّي ياسوع ياف‑تن‑ين طّاسن. ءيساول س‑بطرُس ييني‑اس: «وا‑سيمعان، ءيس‑تطّاست؟ ءيس‑ور‑تژضارت ا‑تاوزت يات تاساعت؟ اوزات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو. هاتي ءول ن‑بنادم ار‑يتّيري ا‑يسكار افولكي، ءيمّا دّات‑نس تضعف.» ءيدّو‑داغ ا‑يژّالّ ييني غمكلّي ءينّا تاوالا تامزواروت. يوورّي ياف‑تن‑ين طّاسن، ءينرا‑تن ءيطس. ءور‑سّينّ ما‑راد‑اس‑ينين. يوورّي تيس كراطّ‑توال ييني‑اسن: «طّاسات غيلا تسونفوم. يوودا غونشكاد، تلكم‑د تاساعت. ءينزا يوس ن‑بنادم س‑گر ءيفاسّن ن‑مدّن أُخشنّين. نكرات ا‑ندّو. ها‑والّي‑يّي‑يزّنزان يوشكا‑د.» سول ا‑يساوال س‑د‑يروح ياهودا لّي‑يگان يان زغ‑سين د‑مراو ن‑ومحضار. مونّ‑د ديدس كيگان د‑مدّن اسين‑د لكمامي د‑يعماد. ءوزنّ‑تن‑د ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت‑ان. غوالّي ءيزّنزان ياسوع ءيملا‑ياسن‑ياد تاماتارت‑اد، ييني‑اسن: «وانّا سّودنغ، غوان ا‑ت‑يگان. امژات‑ت تاويم‑ت تضوفم‑ت.» ياشك‑يد ياهودا ءيفتو س‑دار ياسوع ييني‑اس: «واي‑امسلمد»، ءيسّودن‑ت. گرن‑ين فلّاس ءيفاسّن امژن‑ت. ءينكر ءيلمّا يان زغ‑ويلّي لّانين د‑ياسوع ءيلدي‑د لكومّيت، يوت اخدّام ن‑ونمغور ن‑تگمّي ن‑ربّي ءيبّي‑اس امژّوغ. ءيساول ياسوع ييني‑اسن: «ما‑س‑دي‑تفّوغم س‑لكمامي د‑يعماد ا‑يّي‑تغويم زوند ءيغ‑گيغ امخّار؟ لّيغ‑ن‑بدّا ديدون كرايگاتّ اسّ ار‑سّلمادغ غ‑تگمّي ن‑ربّي، ءور‑يّي‑تومژم غ‑ووسّان‑ان. والاينّي ءيجرا غمكاد باش ا‑يافو ما‑يتياران غ‑وارّاتن ن‑ربّي.» غاكودان روولن كولّو ءيمحضارن، فلن ياسوع. ءيضفور‑ت‑سول يان‑وعيّال ءور‑يلسي غير احايك. غوين‑ت مدّن‑ان، ءيمّا نتّا ءيفل احايك ءيروول ءور‑يلسي يات. اوين ياسوع س‑دار‑ونمغور ن‑تگمّي ن‑ربّي، مونّ‑د ءينمغورن كولّوتن د‑يمغارن ن‑تمازيرت د‑يمسلمدن ن‑شّرع. ءيمّا بطرُس ءيضفار‑ت زغ‑توگّوگت، ءيكشم س‑وامّاس ن‑تگمّي ن‑ونمغور، ءيسكيوس د‑يمخزنيين غ‑دار لعافيت ار‑ديدسن‑يرقّا. ءيمّا ءينمغورن ن‑تگمّي ن‑ربّي د‑يمغارن لّمحكاما كولّوتن ار‑سيگّيلن س‑توگّا ف‑ياسوع باش ا‑ت‑نغن، والاينّي ءور‑وفين يات. كيگان د‑مدّن ار‑فلّاس‑اكّان توگّا ن‑تكركاس، والاينّي ءور‑نگادّانت توگّا‑نسن. ءينكر كرا گيسن ار‑سّكيركيسن ءينين: «نكُّني نسفلد‑اس ءينّا ‹نكّي راد‑خلوغ تيگمّي‑اد ن‑ربّي ءيتياوسكارن س‑يفاسّن ن‑بنادم، بنوغ غ‑كراض‑ووسّان يات ياضني ءور‑يتياوسكارن س‑يفاسّن ن‑بنادم.› » ءولا غمكاد‑داغ، ءور‑نگادّانت توگّا‑نسن. ءيبيدّ‑ونمغور ن‑تگمّي ن‑ربّي غ‑وامّاس‑نسن، ءيسقسا ياسوع: «ءيس‑ور‑را‑د‑فلّاسن‑ترارت س‑يات؟ مايد‑فلّاك‑تّينين غويد غ‑توگّا‑نسن؟» ءيمّا ياسوع غير ءيفسّا، ءور‑ينّي يات. ءيسقسا‑ت‑داغ‑ونمغور: «ءيزد كيّي ا‑يگان لماسيح يوس ن‑ومباركي؟» ييني‑اس ياسوع: «نكّي ا‑ت‑يگان. را‑تژرم يوس ن‑بنادم ءيسكيوس ف‑وفاسي ن‑ربّي ءيتجهّدن، ءيفتو‑د غ‑يمدلا ن‑يگنوان.» لّيغ‑اس‑يسفلد‑ونمغور ن‑تگمّي ن‑ربّي، ءيبّي تيملسا‑نس ييني‑اسن: «ما‑سول‑نرا ءيناگان‑اد؟ كونّي تسفلدم ءي‑واوال‑نس لّكوفر. ما‑فلّاس‑تنّام؟» حكامن فلّاس كولّوتن ءينين: «ءيقّان‑ت‑يد ا‑يمّت.» ءينكر كرا گيسن ار‑فلّاس‑سّوفوسن ار‑اس‑دالن ءودم ار‑ت‑كّاتن س‑يباريقن ار‑اس‑تّينين: «وا‑نّابي، مل‑اغ مانوا‑ك‑يوتن.» امژن‑ت ءيمخزنيين ار‑ت‑كّاتن. ءيمّا بطرُس ءيلّا‑سول غ‑ييزدار غ‑وامّاس ن‑تگمّي. تاشك‑يد يات‑تخدّامت ن‑ونمغور ن‑تگمّي ن‑ربّي تژر بطرُس ار‑يرقّا، تسّماقّل گيس تيني‑اس: «ءولا كيّي تلّيت د‑ياسوع گو‑ناصيرا.» ءيرار‑اس نتّان: «ءور‑سّينغ، ءور‑فهيمغ ما‑س‑تنّيت.» ءيفّوغ س‑وغگُمّي. ءيغر‑وفولّوس غاكودان. تژر‑ت‑داغ‑تخدّامت‑لّي، تيني فلّاس ءي‑ويلّي بيدّنين غين: «غواد ءيگا يان زغ‑گيسن.» ءيرار‑داغ بطرُس: «ءوهو.» يان ءيميكّ س‑اس‑نّان غويلّي بيدّنين غين: «س‑صّاحت تگيت كيّي زغ‑گيسن اشكو گو‑جاليل ا‑تگيت.» ءينكر بطرُس ار‑يتگالّا ار‑يتّيني س‑جّهد: «نكّي ءور‑سّينغ ارگاز‑اد ف‑ا‑تساوالم.» ءيغر‑وفولّوس غاكودان تيس سنات‑توال. ءيكتي‑د بطرُس مايلّي‑س‑اس‑ينّا ياسوع «ءور‑را‑يغر‑وفولّوس سنات‑توال ارد تينيت كراطّ‑توال ءور‑يّي‑تسّينت.» ءيسوانگم‑د اوال‑ان ار‑يالّا. لّيغ ءيفاو زّمان مونّ‑د ءينمغورن ن‑تگمّي ن‑ربّي د‑يمغارن ن‑تمازيرت د‑يمسلمدن ن‑شّرع، نتني د‑يمغارن لّمحكاما كولّوتن، مشاوارن ف‑ما‑راد‑سكرن. كرفن ياسوع اوين‑ت دحين‑ت‑ين ءي‑بيلاطوس لحاكم ن‑رّومان. ءيسقسا‑ت بيلاطوس: «ءيس‑تگيت اگلّيد ن‑ايت‑يودايا؟» ءيرار‑اس ياسوع: «كيّي ا‑ت‑ينّان.» نكرن ءينمغورن ن‑تگمّي ن‑ربّي ار‑سرس‑تاشتكّان س‑كيگان د‑تغاوسيوين. ييني‑اس بيلاطوس: «ءيس‑ور‑را‑دي‑ترارت س‑يات؟ ژر منّاوت‑تغاوسيوين ايد‑فلّاك‑تّينين.» ءيمّا ياسوع ءور‑ينّي يات ايلّيغ ءيتعجّب بيلاطوس. ءيكّا‑تّين لحاكم غ‑كرايگاتّ لعيد ن‑وسورف ار‑اسن‑گيس‑يرژّم ءي‑يان‑وحبّاس نّا‑ران. ءيلّا يان غ‑لحبس غ‑ووسّان‑ان، ءيسم‑نس بارابّاس. ءيتياماژ نتّا د‑وييّاض لّيغ سّنكرن ءودووي ف‑سّولطا ن‑رّومان، نغن كرا ن‑مدّن. مونّ‑د مدّن گّوتنين ار‑تضالابن بيلاطوس اد‑اسن‑يسكر غمكلّي‑بدّا‑يسكار غ‑لعيد. ءيسقسا‑تن بيلاطوس: «ءيس‑ترام اد‑اون‑رژمغ ءي‑وگلّيد ن‑ايت‑يودايا؟» اشكو بيلاطوس ءيسّن ءينمغورن ن‑تگمّي ن‑ربّي ءيس‑حسادن ياسوع، غايان كا‑ف‑ت‑يد‑دحين. والاينّي ءينمغورن سّهيّسن مدّن غ‑تاساعت‑ان باش ا‑ت‑ضالبن اد‑اسن‑د‑يرژم ءي‑بارابّاس. ييني‑اسن بيلاطوس: «ما‑ترام ا‑ت‑سكرغ ءي‑غواد مي تّينيم اگلّيد ن‑ايت‑يودايا؟» رارن‑اس ار‑سّغويّون: «اگُل‑ت ف‑وگّجدي.» ءيسقسا‑تن بيلاطوس: «ماخ؟ ما‑يسكر يُخشنّ؟» ءيمّا نتني ار‑سّغويّون س‑وگُّار ار‑تّينين: «اگُل‑ت ف‑وگّجدي ا‑يمّت.» بيلاطوس ءيرا ا‑يرضو مدّن، ءيرژم‑اسن ءي‑بارابّاس، ءيمّا ياسوع، ءيسّغورش‑ت ءيسّوفغ‑ت ا‑يمّت ف‑وگّجدي. اوين‑ت ءيعسكرين س‑طوژّونت ن‑تگمّي ءيمقّورن لّي‑مي‑تّينين لقصر، سّمونّ‑د كولّو لعسكر لّي‑يلّان غين. سّلسن‑اس يان‑وسلهام ءيژگُّاغن، سكرن يان‑تّاج زغ‑وزگُّار گن‑اس‑ت ف‑يخف. ار‑فلّاس‑تسلّامن ار‑تّينين: «سّلام فلّاك اي‑اگلّيد ن‑ايت‑يودايا.» ار‑ت‑كّاتن ف‑يخف س‑يات‑تغانيمت ار‑فلّاس‑سّوفوسن ار‑طّارن ف‑يفادّن‑نسن غ‑لگدّام‑نس. لّيغ گيس شبعان تاضصا، كّيسن‑اس اسلهام اژگُّاغ سّلسن‑اس تيملسيت‑نس، سّوفغن‑ت ا‑ت‑نغن ف‑وگّجدي. امژن يان‑ورگاز ءيمون‑د د‑وغاراس، بحرا‑د‑يوشكا زغ‑برّا، ءينين‑اس ا‑ياسي اگّجدي ن‑ياسوع. ءيگا ءيسم‑نس سيمعان گو‑كوريني، ءيگ باباس ن‑الاكساندروس د‑روفوس. اوين‑د ياسوع س‑ودغار لّي‑مي‑تّينين ‹گولگوتا›. تگا لمعنا‑نس ‹ادغار ن‑تُخشاشت ن‑يخف.› ءيرين اد‑اس‑فكن امان ن‑واضيل ءيكتين لّي‑غ‑يلّا‑وسافار لّمورّ، ءيمّا نتّا ءور‑ت‑يسوي. قّنّ‑ت غ‑وگّجدي الّن‑ت. بضون تيملسا‑نس ءي‑نگراتسن گرن‑د فلّاسنت اسغار، كرايگاتّ يان د‑ما‑را‑ياوي. تگا تاساعت تيس تژا ن‑صّباح لّيغ‑ت‑وگُلن ف‑وگّجدي. سكرن يات تالّوحت ا‑تمل اصراض لّي‑س‑اس‑صرضن، ءيتيارا گيس «اگلّيد ن‑ايت‑يودايا.» اوين‑د سين ءيمخّارن اگُلن‑تن ف‑يگّجدا يان ف‑وفاسي ن‑ياسوع د‑يان ف‑وژلماض‑نس. غمكان ا‑يووفا ما‑يتياران غ‑وارّا ن‑ربّي لّي‑ينّان «را‑ت‑گن د‑يان زغ‑ويلّي فّوغنين زغ‑واوال ن‑ربّي.» ار‑ت‑رگّمن مدّن لّي‑زراينين ار‑سّموسّون ءيخفاون‑نسن ار‑اس‑تّينين: «وا‑كيّي لّي‑را‑يخلو تيگمّي ن‑ربّي تبنوت‑ستّ غ‑كراض‑ووسّان، جّنجم ءيخف‑نّك تگّوزد‑د زغ‑وگّجدي.» غمكاد‑داغ ا‑س‑ا‑گيس‑تطناژن ءينمغورن ن‑تگمّي ن‑ربّي ءي‑نگراتسن نتني د‑يمسلمدن ن‑شّرع ار‑تّينين: «هاتي ءيجّنجم وييّاض والاينّي ءور‑يژضار ا‑يجّنجم ءيخف‑نس. ءينيات‑اس ا‑د‑يگّوز لماسيح‑اد اگلّيد ن‑ايت‑ربّي زغ‑وگّجدي باش ا‑ت‑نژر نامن سرس.» ءولا غويلّي ديدس تياگّالنين ف‑يگّجدا ار‑ت‑رگّمن ءولا نتني. لّيغ تلكم تاساعت تيس سنات د‑مراوت ضرند‑د تيلّاس ف‑تمازيرت‑ان كولّوتّ ار تاساعت تيس كراطّ ن‑تدگُّات. تاساعت تيس كراطّ يوت ياسوع س‑يات‑تغويّيت ءيتجهّدن ييني: «الووي، الووي، لاما شاباقتاني؟» تگا لمعنا‑نس «وا‑ربّي‑نو، وا‑ربّي‑نو، ماخ ا‑يّي‑تفلت؟» كرا زغ‑ويلّي بيدّنين غين، لّيغ‑اس‑سفلدن ءينين: «هاتي ار‑ياقرا ءي‑نّابي ءيليّا.» يازّل يان ءيعمّر‑د يان‑وشرويض س‑وامان لّخلّ ءيگ‑ت غ‑يات‑تغانيمت ءيمدي‑ت‑ين ءي‑ياسوع ا‑يسو، ييني‑اسن: «زگايات، ا‑نژر ءيس‑را‑د‑ياشك ءيليّا ا‑ت‑يد‑يزّوگز.» ءيمّا ياسوع يوت س‑يات‑تغويّيت ءيتجهّدن ءيسّوفغ رّوح‑نس. غاكودان يوت‑وشرّيگ لخاميا ن‑تحانوت تامژلايت غ‑تگمّي ن‑ربّي، تبضو ف‑سين زغ‑وفلّا ار ءيزدار. ءيمّا لقبطان ن‑يعسكرين لّي‑يبيدّن غ‑تاما ن‑ياسوع، لّيغ ءيژرا مامنك ا‑يوت س‑تغويّيت ءيسّوفغ رّوح‑نس، ييني: «س‑صّاحت ءيگا‑ورگاز‑اد يوس ن‑ربّي.» لّانت غين كرا ن‑تمغارين بيدّنت غ‑توگّوگت ار‑تمنادنت كولّو ما‑يجران. تلّا گيسنت ماريام ءولّت‑ماگدالا، د‑ماريام ءينّاس ن‑ايتماتن ياعقوب ءيمژّين د‑يوسف، نتنتي د‑سالوما. كّانت‑ستّين ار‑تمونونت د‑ياسوع ار‑تي‑تعاوانّت لّيغ ءيلّا غ‑جاليل. ءيلينت غين تييّاض گّوتنين لّي‑د‑ديدس‑وشكانين س‑وروشاليم. غاسّان ار‑توجادن مدّن ءي‑لعيد، ءيگ اسّ لّي‑يقامان ءي‑واسّ ن‑وسونفو. لّيغ‑دي‑تروح‑تدگُّات ياشك‑يد يوسف گو‑راما. ءيگا نتّا يان زغ‑يمغارن لّمحكاما، ار‑تي‑توقّارن مدّن. ءولا نتّا ار‑يترجو تاگلديت ن‑ربّي ا‑دي‑تاشك. ءيزعم ءيكشم س‑دار بيلاطوس ءيضالب زغ‑گيس دّات ن‑ياسوع. ءيتعجّب بيلاطوس لّيغ ءيسفلد ءيس‑ياد‑يمّوت. ءيغر ءي‑لقبطان ن‑يعسكرين ءيسقسا‑ت: «منشك ايد‑س‑يمّوت؟» لّيغ‑اس‑ت‑ينّا لقبطان ءيفك ءيلمّا دّات ءي‑يوسف. ءيسغ‑د يوسف لكتّان ءيشوان، ءيزّوگز‑د دّات ن‑ياسوع زغ‑وگّجدي ءيسّموتّل‑تّ، ءيسرس‑تّ‑ين غ‑يان‑ومضّال، ءيگا ءيفري ءيتياوغزا غ‑وجاريف. ءيسّكنوكي‑د يان‑يفير ءيقّن سرس ءيمي ن‑ومضّال. ار‑ن‑گيس‑تّمناد ماريام ءولّت‑ماگدالا د‑ماريام ءينّاس ن‑يوسف، ژرنت ءيلّيغ‑ن‑تتّرس دّات ن‑ياسوع. لّيغ ءيزري‑واسّ ن‑وسونفو، تنكر ماريام ءولّت‑ماگدالا د‑ماريام ءينّاس ن‑ياعقوب نتنتي د‑سالوما، سغنت ءيسافارن ن‑توجّوت باش اد‑دّونت اد‑ژغورنت دّات ن‑ياسوع. زيكّ صباح ن‑واسّ لّحدّ، بحرا‑دي‑تغلي تافوكت، فتونت س‑ومضّال. ار‑تّينينت ءي‑نگراتسنت: «ما‑راد‑اغ‑يسّكنوكي ءيفير زغ‑يمي ن‑يفري؟» اشكو ءيمقّور باهرا. الّنت الّن‑نسنت س‑ن‑ژرانت ءيفير ييتّي زغ‑يمي. كشمنت س‑ومضّال افنت‑ن يان‑وعيّال ءيسكيوس ف‑وفاسي، ءيلسا اسلهام ءيملّولن. لّيغ‑ت‑ژرانت گُّدنت باهرا. ءيمّا نتّا ءيساول ييني‑اسنت: «اد‑ور‑تيكساضمت. ار‑تسيگّيلمت ياسوع گو‑ناصيرا لّي‑يمّوتن ف‑وگّجدي. ءور‑سول‑يلّي غيد، هاتي ءينكر‑ن. ژرامت، ها‑يلّيغ‑ت‑يد‑سرسن. ءيمّا غيلاد، دّوامت تسّلكمّت اوال‑اد ءي‑يمحضارن‑نس نتني د‑بطرُس، تينيمت‑اسن: ‹ياسوع را‑كُن‑يزوور س‑تمازيرت ن‑جاليل. غين ا‑غ‑را‑تي‑تژرم غمكلّي‑س‑اون‑ينّا.› » فّوغند‑د‑تمغارين زغ‑ومضّال ار‑سرسنتي‑تكّات تاودا ار‑ترگيگيينت. روولنت ءور‑نّينت يات ءي‑يان اشكو كسوضنت باهرا. لّيغ‑د‑ينكر ياسوع زيكّ صباح ن‑واسّ لّحدّ، ءيبان‑د زوار ءي‑ماريام ءولّت‑ماگدالا لّي‑زغ‑يسّوفغ سّا لّجنون، تدّو تيني‑ت ءي‑يمحضارن‑نس. نتني تاغ‑تن‑تگوضي باهرا ار‑الّان. تيني‑اسن: «يوورّي ءيدّر، ژريغ‑ت نكّي.» ءيمّا نتني ءور‑تّ‑ومينّ. تيغوردين ن‑مايان ءيبان‑د ياسوع س‑مامنك ياضني ءي‑سين زغ‑گيسن لّيغ فتان غ‑وغاراس س‑يدوران غ‑برّا ن‑تمدينت. وورّين‑د ءينين‑ت ءي‑وييّاض، والاينّي ءور‑تن‑ومينّ ءولا نتني. غ‑يسيگُّرا ءيبان‑د ياسوع ءي‑يان د‑مراو ن‑ومحضار لّيغ سكيوسن ار‑شتّان. ءيژي‑تن اشكو قّورن ءيخفاون‑نسن ءور‑ومينّ، ءولا سفلدن س‑ويلّي‑ت‑ژرانين لّيغ‑د‑ينكر زغ‑لموت. ييني‑اسن غاكودان: «فّوغات ار‑تّيدوم س‑دّونيت كولّوتّ، ار‑تّبرّاحم س‑لخبار‑اد ءيفولكين ءي‑كولّو مدّن. وانّا يومنّ ءيدّم غ‑وامان، هاتي را‑ينجم. وانّا ءور‑يومينّ، را‑فلّاس‑ييلي لحوكم ن‑ربّي. را‑يفك ربّي تيميتار‑اد ءي‑ويلّي ءومنّين، راد‑سّوفوغن لجنون س‑يسم‑ينو، راد‑ساوالن س‑يواليون لّجديد. ءيغ‑وسين ءيلگمّاضن ءولا ءيغ‑سوان كرا ءينقّان ءور‑را‑تن‑يضرّو. راد‑سراسن ءيفاسّن‑نسن ف‑يموضان جّين.» سيديتنّغ ياسوع، تيغوردين ن‑ما‑سرسن‑يساول، ءيتيالال س‑يگنّا ءيسكيوس ف‑وفاسي ن‑ربّي. ءيمّا نتني فّوغن ار‑تبرّاحن غ‑كرايگاتّ ماني، ار‑تن‑يتعاوان سيديتنّغ ار‑يزّگا ءيواليون‑نسن س‑تميتار لّي‑يسكار ف‑وفوس‑نسن. گّوتن غويلّي گرانين ا‑تاران ف‑تغاوسيوين لّي‑دارنّغ‑جرانين غمكلّي‑اغ‑نّان غويلّي‑تنت‑ژرانين زغ‑يسيزوار، گن فلّاسنت ءيناگان اوين‑اغ‑د لخبار‑نسنت. مايان ا‑ف‑نّيغ را‑يفولكي اد‑اك‑سّنگادّاغ يان‑وارّا ءيزگان، ا‑سيدي ءيعزّان تاوفيلوس، اشكو سيگّلغ باهرا غ‑تغاوسيوين‑اد غمكلّي گانت زغ‑يسيزوار، باش ا‑تيسّانت لحقّ كولّوت ف‑مايلّي مي تسفلدت. غ‑ووسّان ن‑هيرودوس اگلّيد ن‑تمازيرت ن‑يودايا، ءيلّا يان‑ونمغور زغ‑ينمغورن ن‑تگمّي ن‑ربّي، ءيسم‑نس زاكاريّا. ءيگا نتّا زغ‑رّبعت ن‑ابيّا، ءيطّاف تامغارت زغ‑تاسوت ن‑هارون، ءيسم‑نس اليصاباط. نتني فولكين س‑سين ءيرضو فلّاسن سيدي ربّي. ار‑بدّا‑سكارن س‑يواليون ن‑ربّي ءولا لوصيّات‑نس، ءور‑ا‑زگيسنتي‑تفّوغن س‑يات. والاينّي ءور‑جّو‑دارسن كرا ن‑وارّاو، اشكو ءور‑تژضار اليصاباط ا‑تربّو، د‑نتني س‑سين ووسّرن. يان‑واسّ ءيسكر زاكاريّا تاووري‑نس ن‑ينمغورن ن‑تگمّي ن‑ربّي اشكو تلكم‑د‑توالا ن‑رّبعت‑نس. گرن‑د ءينمغورن اسغار غمكلّي بدّا سكارن، باش اد‑بضون تاووري ءي‑نگراتسن. ياشك‑يد‑وسغار غ‑زاكاريّا ا‑يكشم س‑تحانوت تامژلايت ا‑ن‑گيس‑يبخّر غ‑لگدّام ن‑ربّي. ءيكشم سرس غ‑تاساعت لّبخور، مونّ‑د مدّن گّوتنين غ‑برّا ار‑تژالّان. ءيبان‑اس غاكودان يا‑لّمالاك ن‑سيدي ربّي، ءيبيدّ غ‑تسگا تافاسيت لّميدا لّي‑ف‑ا‑تبخّارن. لّيغ‑ت‑يژرا زاكاريّا ءيغووض ييكساض. ءيساول لمالاك ييني‑اس: «وا‑زاكاريّا، اد‑ور‑تيكساطّ. ءيسفلد ربّي ءي‑مايلّي‑اس‑تّضالابت. راد‑اك‑تارو‑تمغارت‑نّك اليصاباط يان‑وازّان، تگت‑اس ءيسم ‹يوحانّا›. راد‑اك‑ييلي لفرح ءولا تاضصا، فرحن مدّن گّوتنين س‑تلاليت‑نس. اشكو را‑يگ واد ءيهيّان غ‑يژري ن‑سيدي ربّي. ءور‑را‑يسّا ما‑يكتين ءولا ما‑يسّملّيلين. را‑يعمّر س‑رّوح لقودوس غ‑واحليگ ن‑ينّاس، ءيرار‑د كيگان د‑مدّن ن‑ايت‑ربّي اد‑د‑وورّين س‑وغاراس ن‑ربّي‑نسن. را‑يزوور سيديتنّغ س‑تحكيمت ءيتجهّدن زوند نّابي ءيليّا، ءيرار‑د ءولاون ن‑مدّن ا‑تحنّون غ‑تاروا‑نسن، ءيرار‑د غويلّي فّوغنين زغ‑واوال ن‑ربّي اد‑د‑وورّين س‑وغاراس ن‑ويلّي‑ف‑يرضا، ءيجّوجاد ءي‑سيديتنّغ يات تاسوت ا‑تگ تينس.» ييني زاكاريّا ءي‑لمالاك: «مامنك ا‑س‑راد‑يسّانغ ءيس‑را‑ييلي ماياد؟ هاتي افقّير ايد‑گيغ، ءولا تامغارت‑ينو تووسّر.» ييني‑اس لمالاك: «نكّي گيغ جيبرايّيل، ار‑تبدّادغ غ‑لگدّام ن‑ربّي. يوزن‑يّي‑د ا‑سرك‑ساولغ اويغ‑اك‑د لخبار‑اد ءيفولكين. والاينّي را‑تگت اژنژوم، ءور‑را‑تساولت ار اسّ نّا‑غ‑يجرا مايد‑اك‑نّيغ، اشكو ءور‑تومينت اوال‑ينو لّي‑را‑يافو غ‑وزمز‑نس.» ار‑تقلن مدّن س‑زاكاريّا ار‑سّمقسان ءي‑نگراتسن: «ماخ ايلّيغ‑ن‑يماطل غ‑تحانوت تامژلايت؟» لّيغ‑د‑يفّوغ ءور‑يژضار ا‑سرسن‑يساول، ءيسّانّ ءيس‑يژرا كرا ءيسّبايّن‑اس‑ت‑يد ربّي غ‑تحانوت تامژلايت. ءيمل‑اسن زاكاريّا س‑يفاسّن‑نس ف‑ماد‑اس‑يجران، اشكو ءور‑يژضار ا‑يساول. ءيزايد ءيلمّا ءيكمّل ءوسّان ن‑تووري‑نس، يوورّي س‑تگمّي‑نس. زرين كرا ن‑ووسّان س‑ا‑تربّو‑تمغارت‑نس اليصاباط. تقاما غ‑تگمّي‑نس سمّوس‑ييرن. ار‑تّيني: «هاتي غيلاد ءيبارك گيگي سيدي ربّي، ءيسفيض لعار‑ينو غ‑گر مدّن.» زرين ءيلمّا سضيص‑ييرن، يازن ربّي لمالاك جيبرايّيل س‑يات‑تمدينت غ‑تمازيرت ن‑جاليل ءيسم‑نس ناصيرا، س‑يات‑تعيّالت ءيضالب‑تّ‑ين يان‑ورگاز ءيسم‑نس يوسف زغ‑تاسوت ن‑وگلّيد داود. ءيگ ءيسم ن‑تعيّالت ماريام. ءيبيدّ سرس لمالاك ييني‑اس: «سّلام فلّام ا‑تامباركيت. سيدي ربّي ءيلّا ديدم.» تغووض ماريام ف‑واوال‑نس، تسقسا ءيخف‑نس ماخ ايلّيغ سرس ءيساول غمكان. ءيمّا لمالاك ءيساول‑داغ ييني‑اس: «وا‑ماريام، اد‑ور‑تيكساطّ، اشكو ربّي ءيرضا فلّام. هاتي را‑تربّوت، تاروت يان‑وازّان، تگت‑اس ءيسم ‹ياسوع›. را‑يگ واد باهرا ءيهيّان. راد‑اس‑تّينين ‹يوس ن‑وماتّوي›. راد‑اس‑يفك سيدي ربّي لعرش ن‑جدّيس داود، ءيگ اگلّيد ف‑تاروا ن‑ياعقوب كولّو مايد‑د‑يفتان. تاگلديت‑نس ءور‑را‑سار‑تّمّو.» تيني‑اس ماريام ءي‑لمالاك: «مامنك ا‑را‑ييلي ماياد؟ ءور‑جّو‑سّينغ كرا ن‑ورگاز.» ييني‑اس لمالاك: «را‑د‑فلّام‑يگّوز رّوح لقودوس، تدل‑كم‑تحكيمت ن‑ربّي اماتّوي. مايان ا‑ف‑را‑تّينين ءي‑وازّان امژلاي لّي‑را‑تاروت ‹يوس ن‑ربّي›. هان اليصاباط لّي‑يگان زغ‑ايت‑دارم، ءولا نتّات ار‑تربّو س‑يان‑وازّان غ‑تووسّرت‑نس. هان ختالّي‑ف‑ا‑تّينين مدّن ءور‑تژضار ا‑تربّو، ويس سضيص‑ييرن ايد دارس ءيلّان. اشكو ءور‑يلّي كرا مي ءور‑يژضار ربّي ا‑ت‑يسكر.» تساول ماريام تيني: «ها‑يّي گيغ تاخدّامت ن‑سيدي ربّي. اد‑يّي‑ييلي مايد‑يّي‑تنّيت.» ءيفل‑تّ لمالاك غاكودان. ءور‑تماطيل ماريام، تنكر غ‑ووسّان‑ان تدّو س‑يات‑تمدينت غ‑يورار ن‑يودايا، تلكم‑ن تيگمّي ن‑زاكاريّا تغر س‑اليصاباط. لّيغ تسفلد اليصاباط ءي‑واوال ن‑ماريام ءيمّاسّ‑وازّان غ‑واحليگ‑نس، تعمّر س‑رّوح لقودوس، تالّ اوال‑نس تيني: «تامباركيت ا‑تگيت غ‑تمغارين. امباركي ا‑يگا‑وارّاو ن‑واحليگ‑نّم. ماد‑گيغ نكّي ايلّيغ‑د‑داري‑توشكا ءينّاس ن‑سيدي؟ غير سفلدغ ءي‑واوال‑نّم س‑يمّوسّا‑وازّان س‑لفرح غ‑واحليگ‑ينو. تامباركيت ا‑تگيت اشكو تومنت ءيس‑راد‑ام‑يسّافو سيدي ربّي اوال لّي‑س‑ام‑ينّا.» تساول ماريام تيني: «يولغ‑وول‑ينو سيدي ربّي، تفرح رّوح‑ينو س‑ربّي انجّام‑ينو، اشكو ءيژرا‑د لحالت ن‑تخدّامت‑نس ءيمژّين. هاتي زغ‑غيلاد كرايگاتّ تاسوت راد‑يّي‑تّيني ‹تامباركيت›، اشكو ربّي ءيتجهّدن ءيسكر گيگي تيغاوسيوين مقّورنين. ءيلّا لوقر ءي‑يسم‑نس، تيلي رّحمت‑نس ف‑كولّو ويلّي‑ت‑وقّرنين زغ‑كرايگاتّ تاسوت ن‑تاسوتين. هاتي ءيمدي‑د افوس‑نس ءيتجهّدن، ءيزّمزر ءودماون مقّورنين ف‑يسوينگيمن لّعاقل‑نسن. ءيلوح‑ن ءيگلدان زغ‑لعرش‑نسن، يالّ‑د ايت‑ييزدار س‑وفلّا. ءيشّباع س‑تميخار غويلّي ءينغا لاژ، ءيرار ايت‑وايدا بلا يات. ءيرحم‑اغ س‑رّحمت‑نس ءيدومن، ءيبيدّ د‑ايت‑ياعقوب لّي‑يگان ءيخدّامن‑نس. ءيسّافو اوال لّي‑س‑ينّا ءي‑يمزوورا‑نّغ، ءور‑جّو‑يتّو ءيبراهيم ءولا تاروا‑نس.» تگاور ماريام غ‑دار اليصاباط ما‑يتگّان كراض‑ييرن، توورّي س‑تگمّي‑نس. ءيمّا اليصاباط، غاكود لّيغ‑تّ‑يلكم‑وزمز تارو يان‑وازّان. فرحن‑ديدس‑وادجارن‑نس ءولا ايت‑دارس لّيغ سفلدن ف‑مامنك اد‑باهرا‑گيس‑يبارك ربّي. اشكين‑د ءيلمّا غ‑ويس تام‑ووسّان اد‑ژّالّن ءي‑وازّان. ءيرين اد‑اس‑گن ءيسم ‹زاكاريّا› اشكو ءيگا ءيسم ن‑باباس. تساول‑د ءينّاس تيني: «ءوهو، راد‑اس‑نگ ءيسم ‹يوحانّا›.» ءينين‑اس: «والاينّي ءور‑يلّي يان غ‑ايت‑دارم ءيطّافن ءيسم‑اد.» سيلّفن ءي‑باباس ا‑ت‑سقسان مان ءيسم ءيرا اد‑اس‑يگ. ءيسيلّف‑اسن زاكاريّا باش اد‑اس‑د‑اوين يات تالّوحت، يارا گيس: «ءيسم‑نس يوحانّا.» تعجّبن كولّوتن. س‑يفسي ءيلس ن‑زاكاريّا غاكودان ار‑يساوال ار‑يتالغ ربّي. گُّدن غويلّي زدغنين غين، اوين لخبار ف‑كولّو مايد ءيجران غ‑تمازيرت‑ان ن‑يورار ن‑يودايا كولّوتّ. غويلّي فلّاس سفلدنين ار‑باهرا‑سوينگيمن ار‑تّينين ءي‑نگراتسن: «ما‑را‑يگ‑وازّان‑اد؟» اشكو ءيلّا‑ديدس‑وفوس ن‑ربّي. ءيعمّر زاكاريّا باباس س‑رّوح لقودوس، ءيساول س‑ماد‑اس‑يملا ربّي ييني: «اد‑باهرا‑نالغ سيدي ربّي ن‑ايت‑دارنّغ، اشكو ياكمور‑د س‑مدّن‑نس اد‑اغ‑يفوكّو. ءيسّمغي‑د غ‑گر تاسوتين ن‑وخدّام‑نس داود يان ءيگان انجّام ءيتجهّدن، غمكلّي ءينّا ف‑يمي لّانبيا‑نس ءيمژلاين غايد ءيزرين، باش اد‑اغ‑يجّنجم زغ‑ينوّاشن‑نّغ ءولا كولّو ويلّي‑اغ‑كورهانين. هاتي ءيرحم‑اغ غمكلّي ءينّا ءي‑يمزوورا‑نّغ، ءيسّافو لعهد‑نس ءيهيّان، غمكلّي ءينّا ءي‑باباتنّغ ءيبراهيم س‑واوال ءيزگان. راد‑اغ‑يفوكّو زغ‑گر ءيفاسّن ن‑ينوّاشن‑نّغ، باش ا‑نتعباد بلا نكسوض يات، ار‑نسكار ما‑يفولكين ءولا ما‑ت‑يرضان كولّو ءوسّان ن‑تودرت‑نّغ. ءيمّا كيّي ا‑يوي، راد‑اك‑تّينين ‹نّابي ن‑ربّي اماتّوي›. را‑تزوورت سيديتنّغ اد‑اس‑تجّوجادت اغاراس. را‑تمالات ءي‑مدّن‑نس مامنك ا‑س‑را‑تن‑يجّنجم، ءيصامح‑اسن ف‑كولّو ماد‑سكرن يُخشن. اشكو ءيرحم‑اغ ربّي‑نّغ، ءيحنّو گينّغ. هاتي زوند تافوكت ا‑را‑ت‑يد‑فلّانّغ‑يسّغلي، ييسفيو ف‑ويلّي زدغنين غ‑تيلّاس د‑ومالو لّموت، ءيسّلكم ءيضارن‑نّغ س‑وغاراس ن‑سّلامت.» ءيزايد‑وحشمي يوحانّا ار‑يتيمغور ار‑يتدوس غ‑رّوح‑نس. ءيقاما غ‑لخلا ار اسّ لّي‑غ‑يگرا غ‑تووري‑نس غ‑وامّاس ن‑ايت‑ربّي. غ‑ووسّان‑ان ا‑غ‑د‑يفّوغ يا‑لّقانون زغ‑دار‑وگلّيد ءيمقّورن قايصر ءوغوسطوس، يامر كولّو مدّن غ‑كرايگاتّ ماني اد‑حاسبن ءيسم‑نسن. تاوالا تامزواروت ايان غ‑حاسبن مدّن، ءيجرا غ‑ووسّان لّي‑غ‑يحكام كيرينيوس تامازيرت ن‑سوريّا. ار‑تمودّون مدّن كرايگاتّ يان س‑تمازيرت‑نس ا‑ن‑گيس‑يحاسب ءيسم‑نس. ءينكر يوسف ءيفّوغ تامدينت ن‑ناصيرا غ‑جاليل ءيمودّو س‑تمدينت ن-داود لّي-مي-تّينين بيتلاحم غ‑تمازيرت ن‑يودايا، اشكو ءيگا نتّا زغ‑تاسوت ن‑داود ءولا تاروا‑نس. ءيدّو ا‑ن‑يحاسب ءيخف‑نس نتّا د‑ماريام لّي‑ن‑يضالب ا‑تگ تامغارت‑نس، د‑نتّات ار‑تربّو. غ‑ووسّان لّي‑غ‑لّان غين تلكم‑د لوقت ن‑تلاليت. تارو ارّاو‑نس امزوارو، تسّموتّل‑ت غ‑وحزّام تسرس‑ت‑ين غ‑يان‑وسدس، اشكو ءور‑وفين كرا ن‑تحانوت ءيخوان غ‑لفِندق. ءيلين كرا ن‑يمكساون غ‑تمازيرت‑ان گابلن ءولّي‑نسن غ‑لخلا غ‑ييض. ءيبان‑اسن‑د يا‑لّمالاك ن‑سيدي ربّي، ييسفيو فلّاسن لمجد ن‑سيدي ربّي، ءيكساضن باهرا. ءيساول لمالاك ييني‑اسن: «اد‑ور‑تيكساضم. هاتي ءيويغ‑اون‑د لخبار ءيفولكين ف‑لفرح ءيگّوتن لّي‑را‑ييلي ءي‑كولّو‑مدّن. اشكو غاسّاد غ‑تمدينت ن‑داود ءيلول‑اون‑د‑ونجّام لّي‑يگان لماسيح سيديتنّغ. غمكاد ا‑راد‑اون‑يگ تاماتارت: را‑ن‑تافم يان‑وازّان ءيموتّل غ‑وحزّام ءيتّرس‑ن غ‑وسدس.» بانّ‑د ءيلمّا ءيكابارن لّمالايكا گّوتنين د‑لمالاك، ار‑تالغن ربّي ار‑تّينين: «ا‑ييلي لمجد ءي‑ربّي غ‑تاتّويت، تيلي سّلامت ءي‑ويلّي‑ف‑يرضا غ‑دّونيت.» لّيغ وورّين لمالايكا س‑يگنوان ءينين ءيمكساون ءي‑نگراتسن: «نكرات ا‑ندّو س‑بيتلاحم ا‑نژر مايد‑ف‑اغ‑ينّا سيدي ربّي.» دّون غاكودان س‑تيزّلا، افن‑ين ماريام د‑يوسف، ژرن ازّان غ‑وسدس. لّيغ‑ت‑ژران ساولن‑اسن ءيمكساون ف‑مايلّي‑اسن‑ينّا لمالاك ف‑وازّان‑ان. ار‑تعجّابن كولّو ويلّي سفلدنين ءي‑يواليون‑نسن. ءيمّا ماريام ار‑تّحضو تيغاوسيوين‑ان غ‑وول‑نس ار‑گيسنتي‑تسوينگيم. وورّين ءيلمّا ءيمكساون، ار‑تشكارن ربّي ار‑تي‑تالغن ف‑كولّو ما‑مي‑سفلدن ءولا ماد‑ژران. ءيلّا كولّو مايان غمكلّي‑س‑اسن‑ينّا لمالاك. زرين سّا‑ووسّان س‑د‑يروح‑واسّ لّي‑غ‑راد‑ژّالّن ءي‑وازّان. گن‑اس غاكودان ءيسم ‹ياسوع›، ءيگا ءيسم لّي‑س‑ينّا لمالاك ءور‑تا‑دا‑تربّو ماريام. لّيغ كمّلن ءوسّان ن‑وسغوس‑نسن سكرن غمكلّي ءيلّان غ‑شّرع ن‑موسا، اوين ازّان س‑تمدينت ن‑وروشاليم ا‑ت‑ين‑سرسن غ‑لگدّام ن‑ربّي. اشكو ءيتيارا غ‑شّرع ن‑ربّي: «ا‑تژليم كرايگاتّ اوتم ءيخفدّي ا‑يگ وين سيدي ربّي.» فكن ءيلمّا تيغرسي ءي‑ربّي غمكلّي‑س‑ينّا شّرع: «سين ءيمالّيون نغد سين ءيتبيرن مژّينين.» ييلي يان‑ورگاز غ‑وروشاليم ءيسم‑نس سيمعان، ءيفولكي باهرا ءيعزّو‑دارس‑وغاراس ن‑ربّي، ييلي فلّاس رّوح لقودوس. ار‑بدّا‑يترجو اسّ لّي‑غ‑را‑يجّنجم ربّي مدّن‑نس. ءيملا‑ياس رّوح لقودوس ءيس‑ور‑را‑يمّت ارد ءيژر لماسيح ن‑سيدي ربّي. سيمعان، ييوي‑ت رّوح لقودوس ءيكشم س‑تگمّي ن‑ربّي. اشكين‑د ايت‑دارس ن‑ياسوع غ‑تاساعت‑ان، اوين‑د ازّان اد‑كمّلن ف‑سّيبت‑نس ما‑يلّان غ‑شّرع. ياسي‑ت سيمعان غ‑گر ءيفاسّن‑نس، يالغ ربّي ييني: «غمكاد ا‑سيدي ربّي تسّووفيت‑يّي‑د اوال. ادج اخدّام‑نّك ا‑ن‑فّوغّ دّونيت غيلاد س‑سّلامت، اشكو ژرانت‑والّن‑ينو انجّام لّي‑دي‑توزنت ف‑كولّو مدّن. را‑يگ تيفاوت ءي‑ايت‑تميزار اگّوگنين، ياوي‑د لمجد‑نّك ءي‑ايت‑ربّي.» ءيتعجّب يوسف د‑ينّاس ن‑وازّان ف‑مايد‑فلّاس‑ينّا سيمعان. ءيزايد سيمعان ءيضالب ربّي ا‑تن‑يبارك، ءيساول ءيلمّا س‑ماريام ءينّاس ن‑وازّان، ييني‑اس: «ازّان‑اد، ءيگا‑ت ربّي د‑واد‑س‑راد‑ضرن كيگان د‑مدّن ن‑ايت‑ربّي، نكرن كيگان ف‑سّيبت‑نس. ءيگ‑ت د‑يات‑تماتارت لّي‑راد‑اگُين مدّن گّوتنين، د‑غمكان ا‑س‑راد‑سّبايّنّ تينباضين ن‑وولاون‑نسن. ءولا كمّي، راد‑ام‑تبّي تاغوفت ءول‑نّم زوند تاژّيت.» تيلي غين يات‑تهجّالت ار‑تساوال س‑ماد‑اس‑د‑يمالا ربّي. ءيگا ءيسم‑نس حانّا ءيلّيس ن‑فانويل زغ‑تقبيلت ن‑اشير. تمقّور باهرا، تزّري د‑ورگاز‑نس سّا ن‑يسگُّاسن زغ‑لّيغ‑تّ‑يلا، تيلي دارس تام ءيد‑مراو د‑كّوژ (84) ن‑وسگُّاس. ءور‑ا‑تّفّوغ تيگمّي ن‑ربّي، ار‑گيس‑تّعباد ربّي ار‑تّاژوم ار‑تي‑تّضالاب غ‑ييض ءولا ازال. تاشك‑يد غ‑تاساعت‑ان تالغ ربّي، تساول ف‑وازّان‑ان ءي‑كولّو ويلّي ترجونين اسّ لّي‑غ‑را‑يفوكّو ربّي ايت‑وروشاليم. لّيغ ءيكمّل يوسف د‑ماريام مايلّي فلّاسن ءيلّان غ‑شّرع ن‑سيدي ربّي، وورّين س‑تمدينت‑نسن ن‑ناصيرا غ‑تمازيرت ن‑جاليل. ار‑يتيمغور‑وازّان ار‑يتدوس. تيگات‑گيس‑تحكيمت، تيلي فلّاس لباراكا ن‑ربّي. اسگُّاس ار اسگُّاس ار‑تّيدون ايت‑دارس ن‑ياسوع س‑تمدينت ن‑وروشاليم غ‑لعيد ن‑وسورف. لّيغ ءيرگل سين د‑مراو ن‑وسگُّاس دّون غمكلّي بدّا. غاكود لّيغ كمّلن‑ووسّان لّعيد امژن اغاراس س‑تمازيرت‑نسن. ءور‑سّينّ ايت‑دارس ءيس‑ن‑يقاما‑وحشمي ياسوع غ‑وروشاليم، غالن ءيس‑ديدسن‑يمون غ‑وكابار. زّرين اسّ كولّوت غ‑وغاراس، بدون ءيلمّا ار‑سرس‑سيگّيلن غ‑گر ايت‑دارسن د‑يمدّوكُّال‑نسن. لّيغ‑ت‑ور‑وفين وورّين س‑وروشاليم ا‑سرس‑سيگّيلن. ار ويس كراض‑ووسّان ا‑ت‑ين‑وفان غ‑گر ءيمسلمدن ن‑شّرع غ‑تگمّي ن‑ربّي، ار‑اسن‑يسفليد ار‑تن‑يسقسا. غويلّي‑اس‑سفليدنين ار‑كولّو‑تعجّابن غ‑لفهمت‑نس ءولا تاحكيمت لّي‑س‑ا‑يترارا اوال. لّيغ‑ت‑ژران ايت‑دارس ءيضر‑اسن لعجب، تيني‑اس ءينّاس: «ماخ ا‑يوي ايلّيغ‑اغ‑تسكرت غمكاد؟ ها‑نكّي د‑باباك نوسي فلّاك تاغوفت باهرا، ار‑سرك‑نسيگّيل.» ءيمّا نتّا ءينّا‑ياسن: «ماخ ايلّيغ ا‑سري‑تسيگّيلم؟ ءيس‑ور‑تسّينم ءيس‑د‑يقّان اد‑يليغ غ‑تگمّي ن‑بابا؟» ءيمّا نتني ءور‑فهيمن اوال لّي‑س‑اسن‑ينّا. ءيمون ديدسن غاكودان، وورّين س‑ناصيرا، ار‑يسكار س‑يواليون‑نسن. ءيمّا ءينّاس تحضا كولّو تيغاوسيوين‑ان غ‑وول‑نس. ار‑يتزاياد ياسوع غ‑تيدّي ءولا تاحكيمت، ءيرضو سرس ربّي ءولا مدّن. غ‑وسگُّاس ويس سمّوس د‑مراو ن‑وگلّيد ءيمقّورن قايصر طيباريوس، ءيگا بيلاطوس گو‑بونطوس لحاكم ف‑يودايا، ءيگ هيرودوس اگلّيد ن‑جاليل، ءيگ گماس فيليبّوس اگلّيد ن‑يطورايا د‑تراخونيتيس، ءيگ ليسانياس اگلّيد ن‑ابيليني. غ‑ووسّان‑ان لّيغ يگا حانّان د‑قايافا ءينمغورن هيّانين ن‑تگمّي ن‑ربّي، ياشك‑يد‑واوال ن‑ربّي س‑يوحانّا يوس ن‑زاكاريّا غ‑لخلا. ار‑يتكّا تيسگيو ن‑واسيف ن‑وردون ار‑يتبرّاح ار‑يتّيني: «فلات كولّو ما‑تسكارم يُخشن، تدّمّ غ‑وامان، باش اد‑اون‑يصامح ربّي ف‑دّنوب‑نّون.» غمكان ا‑س‑يووفا ما‑يتياران غ‑وارّا ن‑نّابي ءيشاعيا ءينّا: «ها‑يان‑واوال ار‑يتبرّاح غ‑لخلا ار‑يتّيني ‹جّوجادات اغاراس ن‑سيديتنّغ، تسّنمّ تيغاراسين‑نس. را‑تنگادّا كرايگاتّ تالات، استوان ءيدرارن ءولا يورار. را‑ينم‑وغاراس نّا‑يلولّين، ترخو‑تغاراست نّا‑يشقان. راد‑ژرن كولّو مدّن انجّام لّي‑را‑د‑يازن ربّي.› » اشكين‑د مدّن گّوتنين س‑دار يوحانّا، ءيرين ا‑تن‑يسّدّم غ‑وامان. ءيمّا نتّا ءينّا‑ياسن: «وا‑تاروا ن‑يفاغرن، ماد‑اون‑ينّان ءيزد غمكاد ا‑س‑را‑تانفم ءي‑لعقوبيت لّي‑را‑يتّوت ف‑دّونيت؟ سكارات افولكي باش ا‑يبان ءيس‑تفلم ما‑يُخشنّ. ا‑ور‑تّينيم ءي‑نگراتون ‹نكُّني نگا تاروا ن‑يبراهيم،› اشكو راد‑اون‑ينيغ، ربّي ءيژضار ا‑د‑يسّنكر تاروا ءي‑يبراهيم ءولا زغ‑يژران‑اد. هاي‑اگلزيم ءيتّرس ف‑وگّجا ن‑وسغار. كود تاسغارت نّا‑ور‑ياكّان لغلّت ءيميمن، را‑ستّ‑يبّي ءيلوح‑تّ‑ين غ‑لعافيت.» سقسان‑ت مدّن: «ءيني‑اغ ماد‑اغ‑د‑يقّانّ ا‑ت‑نسكر؟» ءيرار‑اسن: «وانّا ءيطّافن سين ءيقشبان، ءيفك يان ءي‑وانّا ءور‑دار‑يلّي. وانّا دار ما‑يشتّا، ءيبضو‑ت د‑وييّاض.» اشكين‑د دارس ءيلمّا كرا زغ‑ويلّي تامژنين ءيقاريدن ن‑نكّاس، ءيرين ا‑تن‑يسّدّم، سقسان‑ت: «واي‑امسلمد، ماد‑اغ‑د‑يقّانّ ا‑ت‑نسكر نكُّني؟» ءيرار‑اسن: «ا‑ور‑تّامژم زغ‑دار مدّن ءوگُّار ن‑ما‑كُن‑د‑يوشكان.» اشكين‑د ءيلمّا كرا ن‑يعسكرين سقسان‑ت: «ءيمّا نكُّني، ماد‑اغ‑د‑يقّانّ ا‑ت‑نسكار؟» ءيرار‑اسن: «ا‑ور‑تّعدّام ف‑يان ءولا تسّضرم لباضل ف‑يان. زايدات تقنعوم س‑تغراد‑نّون.» ار‑باهرا‑سوينگيمن مدّن غ‑يوحانّا، ار‑سّمقسان ءي‑نگراتسن: «ءيزد غواد ا‑يگان لماسيح لّي‑را‑د‑يازن ربّي؟» ءيساول يوحانّا ييني‑اسن: «ها‑يّي ار‑كُن‑سّدّامغ غ‑وامان والاينّي را‑د‑ياشك يان يوگُر‑يّي، ءور‑ستهلّاغ اد‑رژمغ ءيفالان ن‑تورژيّين‑نس. را‑كُن‑يسّدّم نتّان س‑رّوح لقودوس د‑لعافيت، ياسي تازّرت ا‑يزوزّر، ءيسّمون‑د ءيردن‑نس غ‑وحانو، ءيجدر اليم س‑لعافيت ءور‑سار‑يخسين.» ءيزايد يوحانّا س‑يواليون گّوتنين ار‑يتبرّاح ءي‑مدّن ف‑لخبار ءيفولكين ار‑اسن‑يتّيني اد‑د‑وورّين س‑وغاراس ن‑ربّي. ءيژي يوحانّا د‑وگلّيد هيرودوس ف‑سّيبت ن‑هيروديّا لّي‑ييوي هيرودوس واخّا تگا تامغارت ن‑گماس. ءيساول سرس يوحانّا ف‑منّاوت لخُشانات ياضني ار‑تنت‑يسكار. ءيمّا هيرودوس ءيزوويد ءي‑كولّو غايان، ءيلوح‑ن يوحانّا غ‑لحبس. تيغوردين ن‑ما‑يسّدّم يوحانّا كولّو مدّن‑ان، ءيسّدّم ياسوع ءولا نتّا. ءيبيدّ ياسوع ار‑يتژالّا، س‑رژمن ءيگنوان ءيگّوز‑د فلّاس رّوح لقودوس غ‑سّيفت ن‑يان‑وتبير، ءيساول‑د يان‑واوال زغ‑يگنوان ييني: «كيّي تگيت ءيوي ءيعزّان. فرحغ سرك باهرا.» لّيغ ءيگرا ياسوع غ‑تووري‑نس ييلي دارس ما‑يتگّان كراض ءيد‑مراو ن‑وسگُّاس. ار‑اس‑تّينين يوس ن‑يوسف يوس ن‑عالي يوس ن‑ماتّات يوس ن‑لاوي يوس ن‑مالكي يوس ن‑يانّاي يوس ن‑يوسف يوس ن‑ماتّيتيا يوس ن‑عاموس يوس ن‑ناحوم يوس ن‑حاسلي يوس ن‑ناگّاي يوس ن‑ماحات يوس ن‑ماتّيتيا يوس ن‑شيمعي يوس ن‑يوسيخ يوس ن‑يودا يوس ن‑يوحانّا يوس ن‑ريسا يوس ن‑زروبّابل يوس ن‑شالتيال يوس ن‑نير يوس ن‑مالكي يوس ن‑ادّي يوس ن‑قوصم يوس ن‑المّودام يوس ن‑عير يوس ن‑ياشوع يوس ن‑اليعازر يوس ن‑يوريم يوس ن‑ماتّات يوس ن‑لاوي يوس ن‑شيمعون يوس ن‑ياهودا يوس ن‑يوسف يوس ن‑يونام يوس ن‑الياقيم يوس ن‑ماليا يوس ن‑مانّا يوس ن‑ماتّاتا يوس ن‑ناتان يوس ن‑داود يوس ن‑يشاي يوس ن‑عوبيد يوس ن‑بوعاز يوس ن‑شالاح يوس ن‑ناحشون يوس ن‑عميناداب يوس ن‑ادمين يوس ن‑ارني يوس ن‑حاصرون يوس ن‑فاريص يوس ن‑ياهودا يوس ن‑ياعقوب يوس ن‑يسحاق يوس ن‑يبراهيم يوس ن‑تاراح يوس ن‑ناحور يوس ن‑ساروگ يوس ن‑راعو يوس ن‑فالاگ يوس ن‑عابر يوس ن‑شالاح يوس ن‑قينان يوس ن‑ارفاكشاد يوس ن‑شام يوس ن‑نوح يوس ن‑لاماك يوس ن‑ماتوشالاح يوس ن‑اخنوخ يوس ن‑ياراد يوس ن‑ماهالاليل يوس ن‑قينان يوس ن‑انوس يوس ن‑شيت يوس ن‑ادام يوس ن‑ربّي. ءيفّوغ ياسوع زغ‑تسگيو ن‑وردون، ءيعمّر س‑رّوح لقودوس. ار‑ت‑يتگوّاد رّوح كّوژ ءيد‑مراو ن‑واسّ غ‑لخلا، ار‑ت‑يتارم ءيبليس. ءور‑ا‑يشتّا يات غ‑ووسّان‑ان ايلّيغ يوورّي ياغ‑ت لاژ باهرا. ءيساول سرس ءيبليس غاكودان، ييني‑اس: «ءيغ‑تگيت يوس ن‑ربّي، ءيني ءي‑وژرو‑اد ا‑يوورّي ءيگ اغروم.» ءيرار‑اس ياسوع: «هان ءيتيارا غ‑وارّا ن‑ربّي ‹ءورد اغروم كا‑س‑ا‑يتدّر بنادم.› » ياوي‑ت ءيلمّا ءيبليس ءيسّغلي‑ت س‑ماني ياتّوين، ءيمل‑اس غ‑يان‑وسماقّل كولّو تيگلداي ن‑دّونيت، ييني‑اس: «راد‑اك‑فكغ ا‑تحكامت كولّو ماياد، ييلي‑اك لمجد‑نس كولّوت، اشكو نكّي ا‑مي‑يتياوفكا ا‑ت‑فكغ ءي‑وانّا ريغ. ءيغ‑يّي‑تسجدت، كولّو ماياد را‑يگ وينّك.» ءيرار‑اس ياسوع: «هان ءيتيارا ‹ربّي سيديك ا‑مي‑تّسجادت، د‑نتّان واحدوت ا‑تّعبادت.› » ياوي‑ت ءيلمّا ءيبليس س‑تمدينت ن‑وروشاليم، ءيسّبيدّ‑ت ف‑يگّي ن‑وكفاف ن‑تگمّي ن‑ربّي، ييني‑اس: «ءيغ‑تگيت يوس ن‑ربّي، لوح‑ن ءيخف‑نّك زغ‑غيد س‑ييزدار، اشكو ءيتيارا ‹را‑د‑يازن لمالايكا‑نس ا‑ك‑گابلن.› ءيتيارا‑داغ ‹را‑ك‑اسين ف‑يفاسّن‑نسن باش ا‑ور‑يلكم‑وضار‑نّك كرا ن‑وژرو.› » ءيرار‑اس ياسوع: «هان ءيتيارا ‹ا‑ور‑تارمت ربّي سيديك.› » لّيغ‑ت‑يورم ءيبليس س‑كولّو غايان، ءيفل‑ت ار ازمز ياضني. يوورّي ياسوع س‑تمازيرت ن‑جاليل، ءيعمّر س‑تحكيمت ءيتجهّدن ن‑رّوح لقودوس. ار‑فلّاس‑ساوالن مدّن غ‑كولّو‑تسگيو ن‑تمازيرت‑ان. ار‑تن‑يسّلماد غ‑تگُمّا ن‑تژالّيت، ار‑تي‑تالغن كولّو مدّن. ياشك‑يد ياسوع س‑تمدينت ن‑ناصيرا، غ‑يلّيغ‑تّين‑يكّا غ‑مژّيي‑نس. ءيكشم س‑تگمّي ن‑تژالّيت غ‑واسّ ن‑وسونفو غمكلّي بدّا ءيسكار. ءينكر ا‑يغر ف‑مدّن، فكن‑اس ارّا ن‑نّابي ءيشاعيا. ءيرژم ارّا ياف‑ن گيس اگزّوم لّي‑غ‑يتيارا: «ءيلّا فلّا رّوح ن‑سيدي ربّي. ءيژلي‑يّي اد‑د‑اويغ لخبار ءيفولكين ءي‑يمژلاض، ءينيغ ءي‑ويلّي تياماژنين ‹ربّي راد‑اون‑يفسي،› ءينيغ ءي‑يبوكاضن ‹ربّي را‑كُن‑يرار ا‑تيسفيوم.› يازن‑يّي‑د اد‑فوكّوغ غويلّي‑ف‑يضر لباضل، ملغ‑اون ءيس‑د‑يلكم‑وزمز لّي‑غ‑را‑يجّنجم سيدي ربّي غويلّي گانين وينس.» ءيسّمون ارّا، ءيرار‑ت‑يد ءي‑ومعاون ءيسكيوس. ار‑گيس‑تمنادن كولّو ويلّي لّانين غ‑تگمّي ن‑تژالّيت. ييني‑اسن: «ارّا‑ياد ن‑ربّي، غاسّاد اد‑دارون‑يووفا.» ار‑تعجّابن مدّن كولّوتن غ‑يواليون شوانين لّي‑س‑ا‑يساوال، ار‑تّينين ءي‑نگراتسن: «ءيفولكي‑ورگاز‑اد.» ار‑سّمقسان ءي‑نگراتسن: «ءيس‑ورد يوس ن‑يوسف اياد؟» ءيزايد ياسوع ييني‑اسن: «ءيس‑ور‑راد‑يّي‑تينيم لمعنا‑ياد ‹واي‑اطبيب، جّوجّي ءيخف‑نّك›؟ ءيس‑ور‑راد‑يّي‑تينيم ‹مايلّي‑ف‑نسفلد تسكرت‑ت غ‑كافرناحوم، سكر‑ت ءولا غيد غ‑تمازيرت‑نّك›؟ لحقّ ا‑راد‑اون‑ينيغ، ءور‑يلّي كرا ن‑نّابي قبلن ايت‑تمازيرت‑نس. لحقّ ا‑راد‑اون‑ينيغ، گّوتنت‑تهجّالين غ‑دار ايت‑ربّي غ‑ووسّان ن‑نّابي ءيليّا لّيغ ءور‑يضر‑ونژار كراض ءيسگُّاسن د‑سضيص‑ييرن، ييلي‑وغني ءيشقان غ‑تمازيرت كولّوتّ. ءيمّا ءيليّا، ءور‑ت‑يد‑يوزن ربّي س‑يات گيسنت، والاينّي يوزن‑ت س‑دار يات‑تهجّالت تلّا‑ن غ‑صارفا غ‑تمازيرت ن‑صايدا. گّوتن ءينجدامن غ‑دار ايت‑ربّي غ‑ووسّان ن‑نّابي اليشاع، والاينّي ءور‑يجّوجّي كرا ن‑يان گيسن. غير نوعمان گو‑سوريّا ا‑يجّين.» لّيغ سفلدن مدّن غ‑تگمّي ن‑تژالّيت ءي‑يواليون‑اد بزگن ف‑ياسوع باهرا. نكرن سّوفغن‑ت س‑برّا ن‑تمدينت‑نسن، سّغلين‑ت س‑يگّي ن‑وورير لّي‑ف‑تلّا‑تمدينت، ءيرين ا‑ت‑ين‑لوحن زغ‑وجاريف. والاينّي ءيزري ياسوع زغ‑گراتسن ءيفتو. ياشك‑يد ياسوع س‑كافرناحوم، تگا يات‑تمدينت غ‑جاليل. ار‑يكشّم س‑تگمّي ن‑تژالّيت غ‑ووسّان ن‑وسونفو ار‑يسّلماد. ار‑تعجّابن مدّن كولّوتن غ‑ولمّود‑نس اشكو ار‑سرسن‑يساوال غمكلّي دارس لحقّ اد‑اسن‑يتّيني ما‑تن‑د‑يقّانّ. ءيلّا غ‑تگمّي‑ان ن‑تژالّيت يان‑ورگاز لّي‑غ‑يلّا يا‑لّجنّ يُخشنّ باهرا. يوت س‑يات‑تغويّيت ييني‑اس: «وا‑ياسوع گو‑ناصيرا، ما‑يلّان غ‑گراتنّغ ديدك؟ ءيس‑دي‑توشكيت اد‑اغ‑تهلكت؟ سّنغ ما‑تگيت كيّي. امژلاي ن‑ربّي ا‑تگيت.» ءيساول ياسوع يامر لجنّ ييني‑اس: «فسّا، تفّوغت زغ‑گيس.» ءيلوح‑ت لجنّ س‑واكال غ‑وامّاس‑نسن ءيفّوغ زغ‑گيس، ءور‑ت‑يسّرفوفن س‑يات. مدّن‑ان ءيضر‑اسن لعجب ار‑تّينين ءي‑نگراتسن: «ماتّا اوال‑اد؟ هاتي س‑تحكيمت د‑تژضّارت ءيگّوتن ا‑س‑ا‑يتامر لجنون أُخشنّين ار‑تفّوغن.» ار‑باهرا‑ساوالن مدّن ف‑ياسوع، اوين لخبار‑نس س‑كرايگاتّ ماني غ‑تمازيرت‑ان كولّوتّ. ءيفّوغ ياسوع زغ‑تگمّي ن‑تژالّيت ءيزايد ءيكشم س‑تگمّي ن‑سيمعان. ياف‑ن غين تاضگُّالت ن‑سيمعان توضن س‑تاولا ءيشقان، ضالبن‑ت فلّاس. ياكمور‑د س‑تاما‑نس يامر تاولا ا‑تيتّي. تيتّي‑زگيس‑تاولا، تنكر غاكودان ار‑فلّاسن‑تّسخّار. لّيغ‑ن‑تضر تافوكت اشكين‑د مدّن گّوتنين س‑دار ياسوع، ار‑دي‑تاوين غويلّي ءوضنّين س‑تموضان گّوتنين. ار‑ن‑يسراس ءيفاسّن‑نس ف‑كرايگاتّ يان گيسن ار‑تن‑يجّوجّي. ار‑تفّوغن لجنون زغ‑مدّن گّوتنين ار‑سّغويّون ار‑تّينين: «كيّي تگيت يوس ن‑ربّي.» ءيمّا نتّا يومر لجنون اد‑فسّان. ءور‑تن‑يودجي ا‑فلّاس‑ساوالن، اشكو سّنّ ءيزد لماسيح ن‑ربّي ا‑يگا. لّيغ‑دي‑تغلي تافوكت ءيفّوغ ياسوع زغ‑تمدينت، ءيدّو س‑يان‑ماني غ‑ور‑يلّي يان. والاينّي ار‑سرس‑سيگّيلن مدّن، ضفورن‑ت ءور‑اكُّ‑رين ا‑تن‑يفل. ءيمّا نتّا ءينّا‑ياسن: «ءيقّان‑يّي‑د اد‑دّوغ ار‑تاويغ لخبار ءيفولكين ف‑تگلديت ن‑ربّي ءي‑تمدينين ياضني، اشكو ماياد ا‑ف‑يّي‑د‑يوزن ربّي.» ءيزايد ار‑يتبرّاح غ‑تگُمّا ن‑تژالّيت غ‑تمازيرت ن‑ايت‑يودايا كولّوتّ. يان‑واسّ ءيبيدّ ياسوع غ‑تاما ن‑ومدا ن‑گانيساراط، ار‑ت‑سّنوكمون مدّن گّوتنين ار‑تّيرين اد‑دارس‑سفلدن ءي‑واوال ن‑ربّي. ءيژر سنات‑تاناوين تّرسنت ف‑واكال غ‑تاما ن‑ومدا، فلن‑تنت ءينگُمارن ن‑يسلمان، ار‑سيريدن شّبايك‑نسن. ءيكشم ياسوع س‑يات غ‑تاناوين، تگ تين سيمعان، ءيضالب‑ت ا‑ستّ‑ين‑يشّكشم ءيميكّ س‑وامان. ءيگاور غ‑تاناوت ار‑يسّلماد مدّن. لّيغ ءيكمّل اوال‑نس ييني ءي‑سيمعان: «زايد‑ن س‑وگُنس ار تادروت تگرم‑ن شّبايك‑نّون ا‑دي‑تگمّرم ءيسلمان.» ءيساول سيمعان ييني‑اس: «ءيض كولّوت ار‑نكّات تامّارا ا‑سيدي، ءور‑نومژ يات. والاينّي لّيغ‑تي‑تنّيت كيّي را‑ن‑گرغ شّبايك.» گرن‑تنت‑ين غاكودان، س‑تنت‑ين‑وفان عمّرنت س‑يسلمان گّوتنين ايلّيغ راد‑بّينت. سيلّفن‑ين ءي‑يمدّوكُّال‑نسن غ‑تاناوت ياضني اد‑د‑اشكين اد‑اسن‑عاونّ. لّيغ‑تن‑د‑روحن ار‑ديدسن‑سّمونون ءيسلمان ايلّيغ عمّرنت سنات تاناوين‑لّي، فتونت اد‑دّمنت. ءيمّا سيمعان بطرُس، لّيغ ءيژرا مايد ءيجران ءيضر‑ن ف‑يفادّن ن‑ياسوع ييني‑اس: «وا‑سيدي، نگارا ديدي. ارگاز يُخشنّ اد‑گيغ.» اشكو ءيضر‑اس لعجب غ‑توگّت ن‑يسلمان لّي‑د‑ومژن. ار‑تعجّابن ءيمدّوكُّال‑نس ياعقوب د‑يوحانّا تاروا ن‑زابدي ءولا نتني. ءيمّا ياسوع ءيساول س‑سيمعان ييني‑اس: «اد‑ور‑تيكساطّ. غيلاد س‑وفلّا مدّن ا‑را‑تّگمّارت.» سّوفغن تاناوين‑نسن س‑واكال، فلن كولّو ما‑دارسن‑يلّان، مونّ د‑ياسوع. يان‑واسّ ءيلّا ياسوع غ‑يات‑تمدينت، ياشك‑يد دارس يان‑ونجدام يوضن باهرا. لّيغ ءيژرا ياسوع ءيضر غ‑دار ءيضارن‑نس ءيضالب‑ت باهرا ييني: «وا‑سيدي، تژضارت ا‑يّي‑تسّغوست ءيغ‑تريت.» ءيگّر‑اس ياسوع س‑وفوس‑نس ييني‑اس: «ريغ نكّي. غوس.» غاكودان ييتّي زغ‑گيس لجدام ءيغوس. يوصّا‑ت ياسوع ييني‑اس: «ا‑ور‑تينيت ءي‑يان ف‑ماياد، والاينّي دّو تملت ءيخف‑نّك ءي‑ونمغور ن‑تگمّي ن‑ربّي، تفكت‑اس ف‑وسغوس‑نّك تيغرسي لّي‑ف‑يوصّا موسا، ا‑تگ توگّا ءي‑مدّن.» والاينّي ار‑فلّاس‑ساوالن مدّن س‑وگُّار، اوين لخبار س‑كرايگاتّ ماني. ار‑دي‑تّاشكين س‑كيگان باش اد‑سفلدن ءي‑يواليون‑نس جّين دارس زغ‑تموضان‑نسن. ءيمّا نتّا ار‑تن‑يفال ءيدّو س‑ماني ءيخوان ا‑ن‑گيس‑يژّالّ. يان‑واسّ ياسوع ار‑يسّلماد مدّن. گاورن غ‑گراتسن كرا ن‑مدّن لّمدهب ن‑يفاريسين د‑كرا ن‑يمسلمدن ن‑شّرع، ءوشكان‑د زغ‑كولّو تيمدينين ن‑جاليل ءولا زغ‑يودايا د‑تمدينت ن‑وروشاليم. ياسوع تلّا‑گيس‑تحكيمت ءيتجهّدن ن‑ربّي ا‑يجّوجّي ءيموضان. اشكين‑د كرا ن‑مدّن اسين‑د يان‑ورگاز ءيكوشمن ءيگن ف‑يمجدين‑نس. ءيرين ا‑ت‑ين‑سرسن غ‑لگدّام ن‑ياسوع، والاينّي ءور‑وفين مامنك ا‑ت‑شّكشامن اشكو تعمّر‑تگمّي س‑مدّن گّوتنين. سّغلين‑ت ءيلمّا س‑وكفاف ف‑يگّي ن‑تگمّي، زّوگزن ءيمجدين لّي‑ف‑يگن زغ‑گر لياجور س‑وامّاس ن‑مدّن غ‑لگدّام ن‑ياسوع. ءيژر ياسوع مامنك ا‑باهرا‑سرس‑ومنّ، ءيساول س‑وكوشام ييني‑اس: «واي‑ارگاز، ءيتّين فلّاك دّنوب‑نّك.» بدون ءيمسلمدن‑لّي ن‑شّرع د‑يفاريسين ار‑سوينگيمن د‑يخفاون‑نسن: «ما‑يگا غواد ار‑يساوال س‑لكوفر؟ ما‑يژضارن ا‑يسّيتّي دّنوب ابلا ربّي واحدوت؟» ءيمّا ياسوع ءيسّن ما‑غ‑ا‑سوينگيمن، ييني‑اسن: «ماخ ايلّيغ ا‑تسوينگيمّ د‑يخفاون‑نّون غمكاد؟ ما‑گيسن‑يرخان، اد‑ينيغ ‹ءيتّين فلّاك دّنوب‑نّك› نغد اد‑ينيغ ‹نكر ار‑تّيدوت›؟ ءيمّا غيلاد راد‑اون‑ملغ ءيس‑داري تاژضّارت غ‑دّونيت اد‑سّيتّيغ دّنوب، نكّي لّي‑يگان يوس ن‑بنادم.» ءيساول ءيلمّا س‑وكوشام ييني‑اس: «نّيغ‑اك، نكر، تاسيت ءيمجدين‑نّك، تدّوت س‑تگمّي‑نّك.» ءينكر غاكودان غ‑لگدّام‑نسن ياسي مايلّي‑ف‑يگن ءيدّو س‑تگمّي‑نس ار‑يتالغ ربّي. غووضن مدّن‑ان كولّوتن ءيضر‑اسن لعجب، ار‑تالغن ربّي ار‑تّينين: «تيغاوسيوين هيّانين ا‑نژرا غاسّاد.» تيغوردين ن‑مايان ءيفّوغ ياسوع ءيژر يان بو‑نكّاس ءيسم‑نس لاوي، ءيگاور غ‑تگمّي لّي‑غ‑ا‑تامژن ءيقاريدن ن‑نكّاس. ييني‑اس ياسوع: «اشك‑يد، مون ديدي.» ءينكر لاوي ءيفل كولّو ما‑دارس‑يلّان ءيمون ديدس. ءيسكر‑اس لاوي يان‑يمنسي ءيمقّورن غ‑تگمّي‑نس. گاورن ديدسن ءيد‑بو‑نكّاس گّوتنين د‑ينبگيون ياضني. ءيمّا ءيفاريسين د‑يمسلمدن ن‑شّرع زغ‑لمدهب‑نسن ار‑سّنگموگن ف‑يمحضارن ن‑ياسوع ءينين‑اسن: «ماخ ايلّيغ ا‑تشتّام ار‑تسّام د‑ويلّي تامژنين نكّاس ءولا مدّن‑ان أُخشنّين؟» ءيساول ياسوع ييني‑اسن: «ءورد غويلّي دوسنين ا‑يحتاجّان اطبيب والاينّي غويلّي ءوضنّين. ءور‑د‑وشكيغ ا‑ن‑غرغ ءي‑ويلّي غالنين ءيس‑فولكين، والاينّي ءوشكيغ‑د ا‑ن‑غرغ ءي‑ويلّي أُخشنّين، اد‑فلن لخُشانت‑نسن.» سقسان‑ت: «ماخ ايلّيغ ا‑باهرا‑تاژومن ار‑تژالّان ءيمحضارن ن‑يوحانّا ءولا ءيمحضارن ن‑يفاريسين، ءيمّا ءيمحضارن‑نّك كيّي ار‑شتّان ار‑سّان؟» ءيرار‑اسن ياسوع: «ءيس‑تژضارم ا‑تينيم ءي‑ايت‑تمغرا اد‑اژومن د‑وسلي ديدسن؟ والاينّي راد‑د‑اشكين‑ووسّان لّي‑غ‑را‑فلّاسن‑ييتّي‑وسلي. غ‑ووسّان‑ان ا‑غ‑راد‑تاژومن.» ءيزايد ياسوع يوت‑اسن لمعنا‑ياد ييني‑اسن: «ءور‑يلّي ما‑يتبّين تادغارت زغ‑تملسيت لّجديد ءيگ‑تّ ءي‑تملسيت تاقديمت. ءيغ‑يسكر غمكان را‑يهلك تيملسيت لّجديد، ءور‑را‑دي‑تمشاشكا‑تدغارت لّجديد د‑تملسيت تاقديمت. ءور‑يلّي ما‑يتگّان امان ن‑واضيل ءيكتين لّجديد غ‑يلماون ءيقديمن. ءيغ‑يسكر غمكان راد‑ستغن‑وامان لّجديد ءيلماون ءيقديمن فّين‑وامان غ‑واكال خسرن ءيلماون. والاينّي ءيقّان‑د ا‑بدّا‑تگّان امان لّجديد غ‑يلماون لّجديد. وانّا ءيسوان امان ن‑واضيل ءيقديمن ءور‑را‑ييري وين لجديد، اشكو ار‑يتّيني ‹اقديم ا‑يفولكين.› » يان‑واسّ ن‑وسونفو ءيفتا ياسوع غ‑يگران غ‑گر ءيمندي. ار‑تكّيسن ءيمحضارن‑نس تيزلفين ار‑تنت‑جّمجورون غ‑گر ءيفاسّن‑نسن ار‑تنت‑شتّان. ساولن سرسن كرا ن‑يفاريسين ءينين‑اسن: «ماخ ايلّيغ ا‑تسكارم غ‑واسّ ن‑وسونفو غايلّي ءور‑گيس‑يحلّان؟» ءيرار‑اسن ياسوع: «ءيس‑ور‑تغريم ف‑داود ما‑يسكر غاكود لّيغ‑ت‑ينغا لاژ باهرا، نتّا د‑ويلّي ديدس مونّين؟ ءيكشم س‑تگمّي ن‑ربّي، ياسي اغروم لّي‑يتياوفكان ءي‑ربّي. ءور‑يحلّا ءي‑ومشّو ابلا ءي‑ينمغورن ن‑تگمّي ن‑ربّي. ءيشّ‑ت داود ءيفك‑ت ءي‑وسمون‑نس.» ءيزايد ياسوع ييني‑اسن: «ءيمّا نكّي لّي‑يگان يوس ن‑بنادم، گيغ سيديس ن‑واسّ ن‑وسونفو.» يان‑واسّ ن‑وسونفو ياضني ءيكشم ياسوع س‑تگمّي ن‑تژالّيت ار‑يسّلماد. ءيلّا غين يان‑ورگاز ءيمّوت‑اس‑وفوس افاسي. ءيلين كرا ن‑يمسلمدن ن‑شّرع د‑يفاريسين ران اد‑افن غ‑ياسوع ما‑س‑ا‑ياس‑صراضن. گابلن‑ت اد‑ژرن ءيس‑را‑ت‑يجّوجّي غ‑واسّ ن‑وسونفو. ءيمّا ياسوع ءيسّن ءيسوينگيمن‑نسن، ءيساول س‑ورگاز لّي‑مي‑يمّوت‑وفوس ييني‑اس: «اشك‑يد س‑وامّاس.» ءينكر‑د ءيبيدّ غ‑وامّاس‑نسن. ءيزايد ياسوع ءيسقسا مدّن‑ان: «ينيات‑يّي، ما‑يحلّان غ‑واسّ ن‑وسونفو؟ ا‑نسكار ما‑يفولكين نغد ا‑نسكار ما‑يُخشنّ؟ ءيزد ا‑نجّنجم يان نغد ا‑ت‑نهلك؟» ءيگراول گيسن كولّوتن، ءيساول ءيلمّا س‑ورگاز‑لّي ييني‑اس: «مدي‑د افوس‑نّك.» ءيمدي‑اس‑ت‑يد س‑يجّي ءيدوس‑وفوس‑نس. ءيمّا نتني نكرن‑د گيسن ءيريين، بدون ار‑تمشاوارن ءي‑نگراتسن ف‑ما‑راد‑سكرن ءي‑ياسوع. يان‑واسّ غ‑ووسّان‑ان ءيغلي ياسوع س‑يان‑وورير ا‑يژّالّ. ءيزّري ءيض كولّوت ار‑يتژالّا ار‑يتضالاب ربّي. لّيغ‑د‑يغلي‑واسّ ءيغر‑د ءي‑يمحضارن‑نس س‑دارس. ءيستي زغ‑گيسن سين د‑مراو، ءيگ‑تن د‑يرقّاسن‑نس. ءيستي سيمعان ءيفك‑اس ءيسم لّجديد ‹بطرُس›، ءيستي اندراوس گماس ن‑سيمعان. ءيستي ياعقوب د‑يوحانّا د‑فيليبّوس د‑بارتولاماوس د‑ماتّا د‑توما د‑ياعقوب يوس ن‑حالفا د‑سيمعان لّي‑مي‑تّينين ‹اواطاني› د‑ياهودا يوس ن‑ياعقوب، نتني د‑ياهودا ءيسخاريوط لّي‑را‑يزّنز ياسوع تيگيرا. لّيغ‑د‑يگّوز ياسوع د‑يرقّاسن‑نس، ءيبيدّ غ‑يان‑ودغار ياستوان. مونّ‑د فلّاس كيگان د‑يمحضارن‑نس د‑مدّن ياضني گّوتنين. ءوشكان‑د زغ‑تسگيو ن‑يودايا ءولا ءوروشاليم ءولا زغ‑تمدينين ن‑صور د‑صايدا لّي‑لّانين غ‑تاما ن‑ومدا ءيمقّورن. ءيرين اد‑سفليدن ءي‑يواليون‑نس جّين زغ‑تموضان‑نسن. غاكودان ار‑يجّوجّي ءولا غويلّي سّرفوفونّ لجنون أُخشنّين. ار‑دي‑تاكمورن مدّن كولّوتن اد‑اس‑گّرن، اشكو ار‑زگيس‑تّفّوغ لباراكا. ار‑تن‑يجّوجّي كولّوتن. ءيسّماقّل ياسوع غ‑يمحضارن‑نس ييني‑اسن: «ءيمباركين ا‑تگام ا‑ويلّي حتاجّانين، اشكو كونّي ا‑مي‑تلّا‑تگلديت ن‑ربّي. ءيمباركين ا‑تگام ا‑ويلّي ياغ لاژ غيلاد، اشكو كونّي ا‑را‑يشبع. ءيمباركين ا‑تگام ا‑ويلّي الّانين غيلاد، اشكو كونّي ا‑را‑يضصّا. ءيمباركين ا‑تگام ءيغ‑كُن‑كورهان مدّن سّوفغن‑كُن رگمن‑كُن ار‑فلّاون‑تّينين ‹كونّي تُخشنم› ف‑سّيبت ن‑ما‑تگام وين يوس ن‑بنادم. تهنّايات ءيغ‑ا‑سكارن غمكان، تفرحم باهرا، اشكو تگّوت لباراكا لّي‑راد‑اون‑ييلي غ‑يگنّا. هان غمكان اد‑سكرن ءيمزوورا‑نسن ءي‑لانبيا لّي‑زرينين. «والاينّي تاگوضي ا‑راد‑اون‑ييلي، ا‑ويلّي دار ءيگّوت‑وايدا، اشكو تكمّل تاغامت لّخير‑نّون. تاگوضي ا‑راد‑اون‑ييلي، ا‑ويلّي شبعانين غيلاد، اشكو را‑كُن‑ياغ لاژ. تاگوضي ا‑راد‑اون‑ييلي، ا‑ويلّي ضصّانين غيلاد، اشكو را‑كُن‑تيگُراژ ار‑تالّام. تاگوضي ا‑راد‑اون‑ييلي ءيغ‑ا‑كُن‑تالغن كولّو مدّن. هان غمكان اد‑سكرن ءيمزوورا‑نسن ءي‑ايت‑تكركاس لّي‑يتّينين ءيزد لانبيا اد‑گان. «وا‑كونّي‑اد سري ءيسفليدن، راد‑اون‑ينيغ، حنّوات غ‑ينوّاشن‑نّون. سكرات افولكي غ‑ويلّي‑كُن‑كورهانين. ضالبات ربّي ا‑يبارك غويلّي‑كُن‑رگمنين، تضالبم‑ت ا‑يرحم غويلّي‑كُن‑سّرفوفنّين. ءيغ‑ك‑يوت يان ف‑ومادل، مدي‑اس‑ن وايّاض. ءيغ‑اك‑ييوي يان اسلهام‑نّك، ادج‑ت ا‑ياوي ءولا اقشّاب. كولّو وانّا زگيك ءيضالبن، فك‑اس. د‑وانّا ييوين ما‑يگان وينّك، ا‑ت‑ور‑تضالبت ا‑ت‑يد‑يرار. سكارات د‑مدّن غمكلّي ترام ا‑ت‑ديدون‑سكارن. ءيغ‑ا‑تّحنّوم غ‑ويلّي گيگون تحنّونين، مان افولكي تسكرم؟ اشكو غويلّي أُخشنّين ار‑تحنّون ءولا نتني غ‑ويلّي گيسن تحنّونين. ءيغ‑ا‑تسكارم لخير غ‑ويلّي گيگون سكارنين لخير، مان افولكي تسكرم؟ اشكو غويلّي أُخشنّين ءولا نتني ار‑سكارن غمكان. «ءيغ‑ا‑ترطّلم ءي‑ويلّي‑س‑تسّنم ءيس‑راد‑اون‑تن‑د‑رارن تيگيرا، مان افولكي تسكرم؟ اشكو غويلّي أُخشنّين ار‑رطّلن ءولا نتني ءي‑وييّاض أُخشنّين ا‑د‑دارسن‑تامژن غونشك لّي‑اسن‑رضلن. والاينّي حنّوات غ‑ينوّاشن‑نّون، ار‑اسن‑تسكارم لخير. رطّلات بلا‑دا‑تسوينگيمّ ا‑تامژم ارطّال‑نّون تيگيرا. غمكاد ا‑س‑را‑تگم تاروا ن‑ربّي اماتّوي، تيلي‑اون لباراكا ءيگّوتن. اشكو نتّا ار‑يتفولكي د‑ويلّي‑ت‑ور‑تشكارنين د‑ويلّي سكارنين ما‑يُخشنّ. تحنّوات غ‑وييّاض غمكلّي ءيتحنّو ربّي باباتون. ا‑ور‑تينيم ف‑يان ءيس‑يُخشن، ا‑ور‑فلّاون‑ييني ربّي ءيس‑تُخشنم. ا‑ور‑تحكامّ ف‑يان، ا‑ور‑فلّاون‑يحكام ربّي. صامحات ءي‑وييّاض ف‑اد‑اون‑يصامح ربّي. اكّايات ءي‑وييّاض ف‑ا‑ياون‑ياكّا ربّي س‑لعبرت ءيمقّورن ءيعمّرن ءيمّوسّان تّيادار، را‑ن‑تفّي غ‑وشلّيق‑نّون. اشكو س‑لعبرت لّي‑س‑ا‑تّعبّارم ا‑س‑راد‑اون‑يتياوعبّار.» ءيزايد ياسوع يوت‑اسن لمعنا‑ياد ءيسقسا‑تن: «ءيس‑يژضار‑وبوكاض ا‑يزوور ءي‑وبوكاض؟ ءيس‑ور‑را‑ن‑ضرن س‑سين غ‑وگضي؟ امحضار ءور‑يوگُر امسلمد‑نس، والاينّي كرايگاتّ امحضار ءيغ‑يكمّل المّود‑نس را‑يگ زوند امسلمد‑نس. ماخ ا‑ن‑تّمنادت ارفتوس ءيمژّين غ‑تيط ن‑گماك ءور‑تّ‑اكُّ‑تيويت غ‑تگّجديت لّي‑يلّان غ‑تيط‑نّك؟ مامنك ا‑تريت ا‑تينيت ءي‑گماك ‹ادج‑يّي ا‑گما، اد‑اك‑د‑سّيتّيغ ارفتوس‑ان ا‑ك‑يلّان غ‑تيط،› ءيمّا كيّي ءور‑اكُّ‑تژريت تاگّجديت لّي‑يلّان غ‑تيط‑نّك؟ وا‑بو‑سين‑وودماون، سّيتّي‑زوار تاگّجديت زغ‑تيط‑نّك باش ا‑تژرت مامنك ا‑تسّيتّيت ارفتوس زغ‑تيط ن‑گماك. «تاسغارت ءيفولكين ءور‑ا‑تاكّا لغلّت يُخشنّ. تاسغارت يُخشنّ ءور‑ا‑تاكّا لغلّت ءيفولكين. كرايگاتّ تاسغارت، زغ‑لغلّت‑نس ا‑زغ‑ا‑تّياوسّان. ءور‑ا‑نتكّيس ءيكوزارن زغ‑وزگُّار، ءولا‑دا‑نتكّيس اضيل زغ‑وشدّير. يان ءيفولكين، ار‑د‑يسّوفوغ ما‑يفولكين زغ‑لخزين ن‑وفولكي لّي‑يسّمون غ‑وول‑نس. يان يُخشنّ، ار‑د‑يسّوفوغ ما‑يُخشنّ زغ‑لخزين لّخُشانت لّي‑يسّمون غ‑وول‑نس. اشكو اينّا‑س‑يعمّر‑وول ا‑س‑ا‑يساوال ءيمي. «ماخ ايلّيغ ا‑يّي‑تّينيم ‹وا‑سيدي وا‑سيدي› والاينّي ءور‑ا‑تسكارم س‑واوال‑ينو؟ كولّو وانّا‑د‑داري‑يوشكان ءيسفلد ءي‑يواليون‑اد‑ينو ار‑سرسن‑يسكار، راد‑اون‑ملغ ما‑يرواس. ءيرواس ارگاز لّي‑يبنان تيگمّي، ءيغزا باهرا ءيزّوگز لّساس ف‑يسلي. لّيغ‑د‑ينگي‑واسيف يوت تيگمّي ءور‑تّ‑يسّموسّي اشكو ءيدوس لّساس‑نس. ءيمّا وانّا ءيسفلدن ءي‑يواليون‑اد‑ينو ءور‑ا‑سرسن‑يسكار، ءيرواس ارگاز لّي‑يبنان تيگمّي‑نس ف‑واكال ءور‑يغزا لّساس. لّيغ‑د‑ينگي‑واسيف يوت تيگمّي تضر‑د، تخلو كولّوتّ.» لّيغ ءيكمّل ياسوع كولّو ما‑يرا ا‑ييني ءي‑مدّن‑ان، ءيدّو س‑تمدينت ن‑كافرناحوم. ءيلّا غين يا‑لّقبطان ن‑يعسكرين ن‑رّومان، ييلي دارس يان‑وخدّام‑نس يوضن باهرا ءيفتو ا‑يمّت. اخدّام‑ان ءيعزّا دارس باهرا. لّيغ ءيسفلد لقبطان ف‑ياسوع يازن‑د كرا ن‑يمغارن ن‑ايت‑يودايا س‑دارس ا‑زگيس‑ضالبن ا‑ن‑دارس‑ياشك ا‑يجّوجّي اخدّام‑نس. نتني روحن‑د ياسوع ضالبن‑ت باهرا ءينين‑اس: «ءيستهلّا اد‑اس‑تسكرت لخير‑اد، اشكو ار‑يتحوبّو ايت‑تمازيرت‑نّغ ءيبنو‑اغ تيگمّي ن‑تژالّيت.» ءيمون ديدسن ياسوع. لّيغ‑ن‑اكمورن س‑تگمّي يازن‑د لقبطان كرا ن‑يمدّوكُّال‑نس س‑ياسوع ييني‑اس: «وا‑سيدي، اد‑ور‑تسّيحلت ءيخف‑نّك. ءور‑ستهلّاغ ا‑دي‑تكشمت س‑تگمّي‑نو. مايان ا‑ف‑ور‑ن‑دارك‑وشكيغ اشكو حشمغ، والاينّي غير ءيني يان‑واوال س‑يجّي‑وخدّام‑ينو. ها‑يّي ءولا نكّي ار‑سكارغ س‑واوال ن‑ما‑يّي‑يوگُرن، ءيلين ءيعسكرين غ‑دّو‑وفوس‑ينو. ءيغ‑نّيغ ءي‑يان: ‹دّو› ءيدّو، ءيغ‑نّيغ ءي‑وايّاض ‹اشك‑يد› ياشك‑يد، ءيغ‑نّيغ ءي‑وخدّام‑ينو ‹سكر تاووري‑اد› ءيسكر‑تّ.» لّيغ ءيسفلد ياسوع ءي‑ماياد ءيتعجّب. ءيگراول غ‑مدّن‑ان گّوتنين لّي‑د‑ديدس‑مونّين ييني‑اسن: «راد‑اون‑ينيغ، ءور‑جّو‑وفيغ كرا ن‑يان يومنّ زوند غواد، ءولا غ‑گر ايت‑ربّي.» دّون غويلّي‑د‑يوزن لقبطان وورّين س‑تگمّي‑نس، افن‑ين اخدّام‑نس ءيجّي. تيغوردين ن‑مايان ءيدّو ياسوع س‑يات‑تمدينت لّي‑مي‑تّينين ناين، مونّ ديدس ءيمحضارن‑نس د‑وييّاض گّوتنين. لّيغ‑ن‑يلكم ءيمي ن‑تمدينت، ها‑كرا ن‑مدّن ءوسين‑د يان‑وعيّال ءيمّوت. ءيگا يوس ن‑يات‑تهجّالت، د‑نتّات ءور‑دارس ابلا نتّان. ءيلين ديدس كيگان د‑ايت‑تمدينت‑ان. لّيغ‑تّ‑يژرا سيديتنّغ تقاما گيس باهرا، ييني‑اس: «اد‑ور‑تالّات.» ءيروح‑ن نّعاش ءيگّر‑اس، س‑بيدّن غويلّي‑ت‑وسينين، ييني: «واي‑اعيّال، نّيغ‑اك، نكر.» ءينكر‑د غوالّي ءيمّوتن، ءيبدو ار‑يساوال. ياوي‑ت ياسوع ءيفك‑ت ءي‑ينّاس. غووضن مدّن‑ان كولّوتن ار‑تالغن ربّي ار‑تّينين: «يوشكا‑ياغ‑د يان‑نّابي ءيمقّورن. ياكمور‑د ربّي ا‑يعاون مدّن‑نس.» ار‑باهرا‑ساوالن ف‑ياسوع اوين لخبار‑نس س‑تمازيرت ن‑يودايا كولّوتّ ءولا س‑تميزار لّي‑اس‑لولّينين. دّون ءيمحضارن ن‑يوحانّا امسدّام ءينين ءي‑يوحانّا ف‑كولّو تيغاوسيوين‑اد. ءيغر ءيلمّا ءي‑سين زغ‑گيسن س‑دارس، يازن‑تن س‑دار سيديتنّغ، يوصّا‑تن ا‑ت‑سقسان «ءيزد كيّي ا‑يگان غوالّي را‑د‑ياشك، نغد ا‑سول‑نتقل س‑يان ياضني؟» اشكين‑د س‑دار ياسوع ءينين‑اس: «يوزن‑اغ‑د يوحانّا امسدّام ءينّا‑ياك ‹ءيزد كيّي ا‑يگان غوالّي را‑د‑ياشك، نغد ا‑سول‑نتقل س‑يان ياضني؟› » غ‑تاساعت‑ان ار‑يجّوجّي ياسوع كيگان د‑مدّن غ‑لّانت‑تموضان د‑واطّان د‑لجنون أُخشنّين، ار‑يترارا ءيبوكاضن گّوتنين اد‑يسفيون. ءيساول ياسوع ييني‑اسن: «زايدات تينيم ءي‑يوحانّا ف‑ما‑تژرام ءولا ما‑مي‑تسفلدم. ها‑يبوكاضن ار‑تّيسفيون، ءيكوشامن ار‑فتّون، ءينجدامن ار‑تغوسن، ءيضرضار ار‑سفليدن، غويلّي مّوتنين ار‑د‑نكّرن، ءيمژلاض ار‑تن‑يلكّم لخبار ءيفولكين. امباركي ا‑يگا وانّا ءور‑گيگي‑يوفين ما‑ف‑ا‑ياس‑طيّار.» لّيغ دّان غويلّي‑د‑يوزن يوحانّا، ءيساول ياسوع ف‑يوحانّا ءي‑مدّن گّوتنين لّي‑د‑فلّاس‑مونّين، ءيسقسا‑تن: «غاكود لّيغ ا‑تّيدوم س‑لخلا ما‑ترام ا‑تژرم؟ ءيزد كرا ن‑تاژّمايت ار‑تّ‑يسّموسّو‑واضو؟ والاينّي ما‑س‑ا‑تّيدوم ا‑تي‑تژرم؟ ءيزد كرا ن‑ورگاز ءيلسان ءيبردان شوانين؟ هان غويلّي دار ءيبردان شوانين د‑تغاوسيوين غُلانين، غ‑تگُمّا ن‑يگلدان ا‑غ‑لّان. ءينيات‑يّي، ما‑س‑ا‑تّيدوم ا‑تي‑تژرم؟ ءيس‑ورد يان‑نّابي؟ راد‑اون‑ينيغ، ءيگا يان ءيمقّورن غ‑لانبيا. اشكو يوحانّا ا‑ف‑يتيارا غ‑وارّا ن‑ربّي ‹راد‑ازنغ ارقّاس‑ينو اد‑اك‑يزوور ءيجّوجاد‑اك اغاراس‑نّك.› راد‑اون‑ينيغ، ءور‑يلّي غ‑تاروا ن‑تمغارين يان يوگُرن يوحانّا. ءيمّا واد كولّو ءيمژّين غ‑تگلديت ن‑ربّي، يوگُر يوحانّا.» لّيغ سفلدن مدّن‑ان گّوتنين د‑يد‑بو‑نكّاس ءي‑ماياد، ءينين ءي‑نگراتسن: «ربّي ار‑بدّا‑يسكار افولكي.» اشكو ف‑وفوس ن‑يوحانّا ا‑ف‑دّمن غ‑وامان. والاينّي ءيفاريسين د‑يمسلمدن ن‑شّرع فّوغن زغ‑ما‑گيسن‑يقصاد ربّي، اگُين اد‑دّمن ف‑وفوس‑نس. ييني‑اسن ءيلمّا ياسوع: «ما‑س‑راد‑اون‑سّرواسغ مدّن ن‑تاسوت‑اد؟ ماد‑رواسن؟ رواسن تاروا لّي‑سكيوسنين غ‑سّوق، ار‑ن‑ياقرا كرا س‑كرا ار‑تّينين ‹نوت‑اون تاعوّاتّ ءور‑ا‑تّحوشم. ناسي‑اون امارگ ءور‑ا‑تالّام.› يوشكا‑د يوحانّا امسدّام ءور‑ا‑يشتّا اغروم ءولا‑دا‑يسّا امان ن‑واضيل ءيكتين، ار‑فلّاس‑تّينيم: ‹ءيلّا گيس يا‑لّجنّ.› اشكغ‑د نكّي لّي‑يگان يوس ن‑بنادم ار‑شتّاغ ار‑سّاغ، ار‑فلّا‑تّينيم: ‹غواد ءيگا بو‑وديس ءيگ اسكايري، ءيگ امدّاكُّل ن‑ايت‑نكّاس د‑وييّاض أُخشنّين.› والاينّي تاحكيمت ن‑ربّي، كولّو ويلّي سرس سكارنين ار‑تّ‑ين‑تافان تُغژان.» يان‑وفاريسي ءيضالب ياسوع ا‑ديدس‑يشّ ءيمكلي. ءيكشم س‑تگمّي ن‑وفاريسي ءيگاور ا‑يشّ. تاشك‑يد غاكودان يات‑تمغارت ءولّت‑تمدينت‑ان، تگا تاد ءيسكارن ما‑يُخشنّ. تسفلد ف‑ياسوع ءيس‑يلّا غ‑تگمّي ن‑وفاريسي، تاسي‑د يات‑تبوقّالت ن‑وژرو لّي‑غ‑تلّا توجّوت ءيشوان. تبيدّ غ‑تغوردين ن‑ياسوع غ‑دار ءيضارن‑نس ار‑تالّا. ار‑د‑طّارن ءيمطّاون‑نس ف‑يوورزان ن‑ياسوع، ار‑اس‑تسفاض ءيوورزان س‑وازّار‑نس ار‑تن‑تسودون ار‑تن‑تژغّور س‑توجّوت. ءيمّا افاريسي، لّيغ ءيژرا ماياد ييني د‑يخف‑نس: «مراد ءيس‑يگا‑ورگاز‑اد نّابي، را‑ييسّان ما‑تگا ختاد‑اس‑يتگّرن، ييسّان ءيسكّيرن‑نس، اشكو هاتّي گار تامغارت ا‑تگا.» ءيساول ياسوع س‑وفاريسي ييني‑اس: «وا‑سيمعان، راد‑اك‑ينيغ كرا.» ءيرار‑اس: «ءيني‑يّي اي‑امسلمد.» ييني‑اس ياسوع: «ها‑يان ءيضفار ءي‑سين مدّن، يان ءيضفار‑اس سمّوس ءيد‑ميّا ن‑نّوقرت، وايّاض ءيضفار‑اس غير سمّوس ءيد‑مراو. نتني لّيغ ءور‑دارسن ما‑س‑ا‑ياس‑تراران، ءيصامح‑اسن س‑سين. مانوا‑س‑تنّيت را‑دارس‑يعزّو‑ورگاز‑ان باهرا؟» ييني‑اس سيمعان: «ءيرواس‑يّي ءيزد غوان مي ءيصامح غ‑وگُّار.» ييني‑اس ياسوع: «تُغژانت.» ءيگراول ءيلمّا غ‑تمغارت‑لّي، ييني ءي‑سيمعان: «ءيس‑تژريت تامغارت‑اد؟ ها‑يّي ءوشكيغ‑د س‑تگمّي‑نّك، ءور‑يّي‑تفكيت امان ما‑س‑ا‑سيريدغ ءيوورزان‑ينو، ءيمّا نتّات هاتّي تسيرد ءيوورزان‑ينو س‑يمطّاون‑نس، تسفيض‑تن س‑وازّار‑نس. كيّي ءور‑ديدي‑تنسالّامت س‑يان‑وسودن، ءيمّا نتّات زغ‑ما‑د‑كشمغ اد‑وكان‑تسودون ءيوورزان‑ينو. كيّي ءور‑يّي‑تژغورت ءيخف‑ينو س‑زّيت. ءيمّا نتّات، هاتّي ار‑تژغّور ءيوورزان‑ينو س‑توجّوت ءيشوان. راد‑اك‑ينيغ، س‑كيگان اد‑دارس‑يعزّا ما‑يگان وين ربّي، اشكو گّوتن دّنوب‑نس لّي‑ف‑اس‑يصامح. ءيمّا يان مي ءيصامح ف‑ما‑يدروسن، غير ءيميكّ ا‑س‑راد‑دارس‑يعزّو.» ييني ءيلمّا ءي‑تمغارت: «ءيتّين فلّام دّنوب‑نّم.» لّيغ‑اس‑سفلدن غويلّي ديدس درانين، بدون ار‑تّينين ءي‑نگراتسن: «ما‑يگا غواد ايلّيغ ا‑يسّيتّي دّنوب؟» ءيمّا ياسوع ءينّا ءي‑تمغارت: «ها‑كمّي تنجمت اشكو تومنت. زايد س‑سّلامت.» تيغوردين ن‑مايان ءيدّو ياسوع ار‑يتكّا تيمدينين ءولا ءيدوران ار‑يتبرّاح س‑لخبار ءيفولكين ف‑تگلديت ن‑ربّي. ار‑ديدس‑تمونون ءيمحضارن‑نس س‑سين د‑مراو، نتني د‑كرا ن‑تمغارين لّي‑يجّوجّي ياسوع زغ‑تموضان‑نسنت ءيسّوفغ زغ‑گيسنت لجنون أُخشنّين. تلّا ماريام لّي‑مي‑تّينين ءولّت‑ماگدالا، ءيسّوفغ زغ‑گيس سّا لجنون. تيلي يووانّا تامغارت ن‑خوزي لّي‑يگان امغار غ‑تگمّي ن‑وگلّيد هيرودوس. تيلي سوسانّا د‑تييّاض گّوتنين، ار‑تعاوانّت ياسوع د‑يمحضارن‑نس زغ‑ما‑يگان وينسنت. اشكين‑د مدّن س‑دار ياسوع زغ‑تمدينين كولّوتنت ن‑تمازيرت‑ان. لّيغ‑د‑فلّاس‑مونّ س‑كيگان يوت‑اسن لمعنا‑ياد ييني‑اسن: «هاي‑افلّاح ءيفّوغ ا‑ن‑يلوح امود. لّيغ‑ت‑يلوح ءيضر‑ن كرا غ‑وغاراس، اكُلن فلّاس مدّن، گرون‑ت ءيگضاض. ءيضر‑ن كرا ف‑يسلي. لّيغ‑د‑يمغي ييقار اشكو ءور‑دارس امان. ءيضر‑ن كرا غ‑وزگُّار، ءيغلي د‑وزگُّار ءيشّقاجّي‑ت. ءيضر‑ن كرا غ‑واكال ءيفولكين ءيمغي‑د ءيفك صّابت، ءيفك ف‑ميّا ن‑توال.» ءيزايد ياسوع يالّ اوال‑نس ييني‑اسن: «وانّا دار ءيمزگان ا‑سرسن‑يسفليد، ءيلّا فلّاس ا‑يسفلد.» سقسان‑ت ءيمحضارن‑نس ف‑لمعنا‑ياد. ييني‑اسن ياسوع: «كونّي ءيتياوفكا‑ياون ا‑تيسّانم ف‑تگلديت ن‑ربّي ما‑ينتلن ف‑وييّاض. ءيمّا نتني، غير س‑لمعني ا‑س‑راد‑اسن‑يتياونّا. غمكلّي ءيتياران، ‹راد‑تمنادن والاينّي ءور‑راد‑ژرن يات. راد‑سفليدن والاينّي ءور‑راد‑فهمن يات.› «غمكاد ا‑تگا لمعنا‑ياد. امود ءيگا اوال ن‑ربّي. غوالّي ءيضرن غ‑وغاراس ءيگا زوند مدّن لّي‑سفلدنين ءي‑واوال ياشك‑يد ءيبليس ءيكّيس اوال زغ‑يخف‑نسن باش ا‑ور‑امنّ نجمن. ءيمّا غوالّي ءيضرن غ‑يسلي ءيگا زوند مدّن لّي‑سفلدنين ءي‑واوال فرحن سرس والاينّي ءور‑يكشيم‑واوال‑ان س‑وول‑نسن. امنّ غير كرا ن‑ووسّان ارد تيلي تاسّاست س‑كنوكين. ءيمّا غوالّي ءيضرن غ‑وزگُّار ءيگا زوند مدّن لّي‑سفلدنين ءي‑واوال، دّون ءيلمّا اسين تيغوفيوين ن‑دّونيت‑اد لهون س‑وايدا رشقن س‑تغاوسيوين ياضني. غايان ا‑يشّقاجّين اوال ايلّيغ ءور‑د‑ييوي صّابت. والاينّي غوالّي ءيضرن غ‑واكال ءيفولكين ءيگا زوند مدّن لّي‑سفلدنين ءي‑واوال ن‑ربّي امژن‑ت س‑نّييت ن‑وول‑نسن ءيغوسن، ار‑سرس‑سكارن بلا‑دا‑ترماين، فكن صّابت‑نسن. «ءور‑يلّي ما‑يسّرغان لقنديل ءيدل‑ت س‑تكينت نغد ا‑ت‑ين‑يگ غ‑دّو تيسي. والاينّي ف‑يگّي ن‑ماني ياتّوين ا‑ف‑را‑ت‑ين‑يسرس، باش ا‑تبان تيفاوت ءي‑كولّو وانّا‑د‑يكشمن. كولّو ما‑ينتلن، را‑ت‑ژرن مدّن تيگيرا. كولّو ما‑يدلن، را‑ت‑زّودفن سّبايّنّ‑ت‑يد. اويات‑ستّ غ‑مايد مي تسفليدم، اشكو وانّا دار ءيلّا، راد‑اس‑يزايد ربّي. ءيمّا وانّا ءور‑دار‑يلّي، راد‑اس‑يكّيس ءولا مايلّي‑س‑يغال ءيس‑دارس‑يلّا.» تاشك‑يد ءينّاس ن‑ياسوع د‑ايتماس، ءور‑وفين مانيغ ا‑ت‑ين‑لكّمن اشكو گّوتن مدّن لّي‑فلّاس‑مونّين. ييني‑اس‑د يان: «ها‑ينّاك د‑ايتماك بيدّن‑ين غ‑برّا. ران ا‑ك‑ژرن.» ءيمّا نتّا ءينّا‑ياسن: «ءينّا د‑ايتما گان‑تن غويد سفليدنين ءي‑واوال ن‑ربّي ار‑سرس‑سكارن.» يان‑واسّ ءيكشم ياسوع س‑يات‑تاناوت نتّا د‑يمحضارن‑نس، ييني‑اسن: «ا‑ندّو س‑تسگا‑يان ياضني ن‑ومدا.» فّوغن فتون ف‑وامان. لّيغ ا‑تّيدون ءيگن ياسوع. ءينكر‑د‑واضو غ‑تاساعت‑ان ءيدووي‑ومدا ايلّيغ ا‑تّعمّار تاناوت س‑وامان، تفتو ا‑تدّم. دّون ءيمحضارن سّفاقن‑ت ءينين‑اس: «وا‑سيدي، وا‑سيدي، ها‑ياغ را‑نهلك.» ءينكر ياسوع يامر اضو ءولا تاضانگيوين، س‑زگان كولّو، يوورّي‑ومدا ءيهنّا باهرا. ييني ءيلمّا ءي‑يمحضارن‑نس: «ءيس‑ور‑تومينم؟» ءيمّا نتني غووضن ار‑باهرا‑تعجّابن ار‑تّينين ءي‑نگراتسن: «ما‑يگا غواد ايلّيغ ا‑يتامر اضو د‑ومدا، ار‑سكارن س‑واوال‑نس؟» لكمن تامازيرت ن‑گاراسا، تاگّوگ ف‑تمازيرت ن‑جاليل غ‑تسگا ياضني ن‑ومدا. ءيفّوغ ياسوع زغ‑تاناوت س‑ت‑يد‑يمناگّار يان‑ورگاز گو‑تمدينت‑ان، لّان گيس لجنون. كيگان ا‑ور‑يلسّا يات. ءور‑ا‑يتّيري تيگمّي، ار‑يزدّغ غير غ‑گر ءيسمضال. لّيغ ءيژرا ياسوع يوت س‑يات‑تغويّيت ءيضر غ‑دار ءيضارن‑نس ءيغوّت ييني‑اس: «وا‑ياسوع يوس ن‑ربّي اماتّوي، ما‑يلّان غ‑گريّي ديدك؟ ضالبغ‑اك، ضالبغ‑اك ا‑ور‑يّي‑تسّرفوفنت.» اشكو ياسوع يومر لجنّ ا‑زگيس‑يفّوغ. ارگاز‑ان، منّاوت‑توال ا‑ت‑يومژ لجنّ. ار‑تي‑تگابالن مدّن ار‑ت‑كّرفن زغ‑يفاسّن ءولا ءيضارن س‑سّناسل ءولا لگيود، والاينّي ار‑يتبّي سّناسل، ار‑ت‑يدحاي لجنّ س‑لخلا. ءيسقسا‑ت ياسوع غاكودان: «ما‑يگا ءيسم‑نّك؟» ييني‑اس: «ءيگا ءيسم‑ينو ‹منّاو›.» اشكو گّوتن لجنون لّي‑گيس‑لّانين. ضالبن‑ت لجنون باهرا ا‑تن‑ور‑يطّاي س‑تدروت ن‑واكال. تّياوكسا غ‑وورير‑ان يات‑تووروت ءيگّوتن ن‑والفان. ضالبن‑ت لجنون باهرا ا‑تن‑يادج اد‑كشمن س‑والفان، يادج‑تن. فّوغن زغ‑ورگاز كشمن س‑والفان، تازّل‑تووروت س‑جّهد زغ‑وجاريف س‑ومدا، خسين‑ين كولّوتن. لّيغ ژران ءيمكساون ما‑يجران روولن اوين لخبار ءي‑مدّن غ‑تمدينت ءولا ءيگران. فّوغن‑د مدّن اد‑ژرن ما‑يلّان، اشكين‑د س‑دار ياسوع افن‑د ارگاز لّي‑زغ‑فّوغن لجنون ءيسكيوس غ‑دار ءيضارن ن‑ياسوع ءيلس تيملسيت‑نس ييلي س‑يخف‑نس. د‑نتني كسوضن. ءيمّا غويلّي ژرانين ما‑يجران نّان‑اسن ف‑مامنك ا‑يجّي‑ومجنون. نكرن مدّن‑ان ن‑ايت‑گاراسا غاكودان، ضالبن زغ‑ياسوع ا‑يفّوغ تامازيرت‑نسن اشكو كسوضن باهرا. ءيكشم ياسوع س‑تاناوت ا‑يوورّي. ءيمّا غوالّي‑زغ‑فّوغن لجنون ءيضالب ياسوع باهرا ا‑ت‑يادج ا‑ديدس‑يمون. ءيمّا ياسوع يوزن‑ت ييني‑اس: «وورّي س‑تگمّي تينيت‑اسن ف‑ماد‑اك‑يسكر ربّي.» ءيدّو‑ورگاز‑ان ار‑يتلولّي غ‑تمدينت كولّوتّ ار‑يساوال ف‑ماد‑اس‑يسكر ياسوع. يوورّي‑د ياسوع س‑تسگا‑ياد ن‑ومدا. فرحن مدّن لّيغ‑ت‑ژران اشكو ار‑كولّو‑سرس‑تقلن. ياشك‑يد يان‑ورگاز ءيسم‑نس يايروس، ءيگا يان زغ‑يمغارن ن‑تگمّي ن‑تژالّيت. ءيضر‑د غ‑دار ءيضارن ن‑ياسوع ءيضالب‑ت باهرا ا‑ديدس‑يمون س‑تگمّي‑نس اشكو ار‑اس‑تّمتات ءيلّيس، ءور‑دارس ابلا نتّات. تگ ءيلّيس ن‑سين د‑مراو ن‑وسگُّاس. ءيفتو ياسوع ءيمون ديدس، والاينّي ار‑ت‑باهرا‑سّنوكمون مدّن زغ‑كرايگاتّ تاسگا. تيلي غ‑گراتسن يات‑تمغارت توضن، ءيلّا‑بدّا‑گيس‑وسگُّرد ن‑يدامّن سين د‑مراو ن‑وسگُّاس. تفكا كولّو ما‑دارس‑يلّان ءي‑يطبيبن، والاينّي ءور‑يژضار يان ا‑ستّ‑يجّوجّي. تزري زغ‑گر مدّن ايلّيغ تروح تيغوردين ن‑ياسوع. تگّر ءي‑تاما ن‑تملسيت‑نس، س‑بّين ءيدامّن تجّي. ييني‑اسن ياسوع: «ماد‑يّي‑د‑يگّرن؟» ار‑كولّو‑تّينين: «ءورد نكّي، ءورد نكّي.» ييني‑اس بطرُس: «هاتي ا‑سيدي، گّوتن مدّن‑اد ار‑ك‑يد‑سّنوكمون ار‑ك‑دحاين باهرا.» ءيمّا ياسوع ءينّا: «ءيگّر‑يّي‑د كرا ن‑يان، اشكو سّحسّاغ ءيس‑زگيگي‑تفّوغ كرا لّباراكا.» لّيغ تسّن‑تمغارت‑لّي ءيس‑ور‑تژضار ا‑تسّنتال مايد‑اس‑يجران، تاشك‑يد تضر غ‑دار ءيضارن ن‑ياسوع ار‑تّرگيگيي س‑تاودا. تيني‑اس غ‑لگدّام ن‑مدّن‑ان كولّوتن ما‑ف‑اس‑تگّر ءولا مامنك ا‑س‑تجّي حاينا. ييني‑اس ياسوع: «واي‑يلّي، تجّيت غيلاد اشكو تومنت. زايد س‑سّلامت.» سول ا‑ديدس‑يساوال ياسوع س‑د‑يوشكا يان زغ‑تگمّي ن‑ومغار يايروس، ييني‑اس: «هان ءيلّيك تمّوت. ا‑ور‑سول‑تسّيحلت امسلمد.» ءيسفلد ياسوع ءي‑ما‑ينّا، ءيساول س‑يايروس ييني‑اس: «اد‑ور‑تيكساطّ. غير امن، را‑تجّي.» لّيغ ءيلكم ياسوع تيگمّي ن‑يايروس ءور‑يودجي يان ا‑ديدس‑يكشم ابلا بطرُس د‑يوحانّا د‑ياعقوب نتني د‑باباس ن‑تفروخت د‑ينّاس. كولّو ويلّي لّانين غين ار‑الّان ار‑سّغويّون. ءيمّا ياسوع ءينّا‑ياسن: «اد‑ور‑تالّام. هان ءور‑تمّوت. غير تگن.» ار‑گيس‑ضصّان اشكو سّنّ ءيس‑تمّوت. ءيمّا ياسوع يومژ‑اس غ‑وفوس ءيغر‑اس ييني: «وا‑تافروخت، نكر‑د.» توورّي‑تّ‑يد رّوح‑نس تبيدّ ف‑يضارن‑نس. ييني‑اسن: «فكات‑اس ما‑تشتّا.» تعجّبن ايت‑دارس باهرا، ءيمّا ياسوع يوصّا‑تن اد‑ور‑ينين ءي‑يان ف‑ما‑يجران. ءيغر‑د ياسوع ءي‑يمحضارن‑نس س‑سين د‑مراو س‑دارس، ءيفك‑اسن تاحكيمت د‑تژضّارت اد‑سّوفوغن كولّو لجنون ار‑جّوجّين تيموضان. يازن‑تن ا‑تّيدون ار‑تبرّاحن ف‑تگلديت ن‑ربّي ار‑جّوجّين مدّن. ييني‑اسن: «ا‑ور‑تاسيم يات ءي‑وغاراس. ا‑ور‑تاويم اعمود نغد اقُراب نغد اغروم نغد ءيقاريدن نغد سين ءيقشبان. تيگمّي نّا‑س‑تكشمّ، گاورات گيس ار اكود نّا‑را‑تمودّوم زغ‑تمدينت‑ان. تامدينت نّا‑كُن‑ور‑يرين، فّوغات زغ‑گيس تسّوسم اگدرور ن‑يضارن‑نّون، اد‑اسن‑يگ تاماتارت ما‑غ‑ا‑سوينگيمن.» غاكودان اد‑فتان ءيمحضارن ار‑تكّان ءيدوران ار‑تبرّاحن س‑لخبار ءيفولكين ار‑جّوجّين مدّن غ‑كرايگاتّ ماني. ءيسفلد‑وگلّيد هيرودوس ف‑كولّو ما‑يسكار ياسوع، ءيدوهدو اشكو ار‑تّينين كرا ن‑مدّن: «يوحانّا امسدّام اياد، ءينكر‑د زغ‑لموت.» ار‑تّينين وييّاض: «ءيبان‑د‑داغ نّابي ءيليّا.» ار‑تّينين وييّاض: «يوورّي‑د كرا ن‑يان زغ‑لانبيا ن‑زمان.» ءيمّا هيرودوس ءينّا: «يوحانّا بّيغ‑اس ءيخف، والاينّي ما‑يگا غواد ف‑سفلدغ ءي‑تغاوسيوين‑اد؟» ييري باهرا ا‑يژر ياسوع. لّيغ‑د‑وورّين ءيرقّاسن س‑دار ياسوع ءينين‑اس ف‑كولّو ماد‑سكرن. ياوي‑تن واحدوتن دّون س‑تسگا ن‑يات‑تمدينت لّي‑مي‑تّينين بيتصايدا. سفلدن مدّن گّوتنين ف‑مانيس ءيدّا ضفورن‑ت. ءيفرح سرسن ياسوع ار‑اسن‑يساوال ف‑تگلديت ن‑ربّي، ءيجّوجّي غويلّي ءوضنّين. لّيغ ءيدّا‑واسّ اشكين‑د دارس ءيمحضارن‑نس س‑سين د‑مراو ءينين‑اس: «ازن مدّن اد‑دّون س‑يدوران د‑يگران‑اد اكمورنين اد‑افن ماد‑شتّان ءولا مانيغ ا‑نسّان، اشكو ءور‑يلّي يات غ‑لخلا‑ياد.» ءيمّا ياسوع ءيرور‑اسن: «فكات‑اسن كونّي ماد‑شتّان.» ءينين‑اس: «ءور‑دارنّغ غير سمّوست‑تنگُال د‑سنات‑تسلمين. ءيس‑زگينّغ‑تريت ا‑ندّو ا‑د‑نسغ امشّو ءي‑مدّن‑اد كولّوتن؟» اشكو ءيلّا غين ما‑يتگّان سمّوس ءيد‑والف ن‑ورگاز. ءيساول‑داغ ياسوع ييني ءي‑يمحضارن‑نس: «سّگاورات مدّن، تگم‑تن د‑تغاماتين. اد‑يلين سمّوس ءيد‑مراو غ‑كرايگاتّ تاغامت.» سكرن ما‑س‑اسن‑ينّا سّگاورن‑تن كولّوتن. ياسي ياسوع سمّوست‑تنگُال‑لّي د‑تسلمين‑لّي س‑سنات، يالّ الّن‑نس س‑يگنوان ءيشكر ربّي ءيبّي‑تنت، ءيفك ءي‑يمحضارن‑نس ا‑ن‑سراسن ءي‑مدّن. شّن كولّوتن ايلّيغ شبعان. سّمونّ‑د توفّاژ لّي‑د‑قامانين، عمّرن سنات د‑مراوت ن‑تاسلّيت. يان‑واسّ ار‑يتژالّا ياسوع واحدوت، اشكين‑د دارس ءيمحضارن‑نس. ءيسقسا‑تن: «ما‑فلّا‑تّينين مدّن، ماد‑گيغ نكّي؟» ءينين‑اس: «كرا گيسن ار‑يتّيني تگيت يوحانّا امسدّام. كرا ار‑يتّيني تگيت نّابي ءيليّا. كرا ار‑يتّيني تگيت كرا ن‑يان زغ‑لانبيا ن‑زمان ءينكر‑د يوورّي‑د.» ييني‑اسن ياسوع: «ءيمّا كونّي، ما‑فلّا‑تّينيم؟ ماد‑گيغ نكّي؟» ءيساول‑د بطرُس ييني‑اس: «تگيت لماسيح ن‑ربّي.» يوصّا‑تن س‑لمعقول اد‑ور‑ينين ماياد ءي‑يان. ييني‑اسن: «ها‑نكّي لّي‑يگان يوس ن‑بنادم ءيقّان‑يّي‑د اد‑باهرا‑رفوفنغ. را‑يّي‑ن‑لوحن ءيمغارن ن‑تمازيرت د‑ينمغورن ن‑تگمّي ن‑ربّي د‑يمسلمدن ن‑شّرع. را‑يّي‑نغن، والاينّي ويس كراض‑ووسّان را‑د‑نكرغ زغ‑لموت.» ييني‑اسن كولّوتن: «وانّا ءيران اد‑ديدي‑ييلي، ءيقّان‑ت‑يد ا‑يتّو ءيخف‑نس ار‑يتاسي اگّجدي‑نس كرايگاتّ اسّ ار‑ديدي‑يتمونو. اشكو وانّا ءيران ا‑يجّنجم تودرت‑نس را‑ستّ‑يجلو، ءيمّا وانّا ءيجلان تودرت‑نس ف‑سّيبت‑ينو را‑ستّ‑يجّنجم. ما‑را‑ييلي ءي‑بنادم ءيغ‑يوورّي ءيطّاف دّونيت كولّوتّ ءيجلو ءيخف‑نس ءيخسر‑ت؟ وانّا ءيتّينين غ‑گر مدّن ءور‑يّي‑يسّين ءولا ءيسّن اوال‑ينو، راد‑ينيغ ءور‑ت‑سّينغ ءولا نكّي لّي‑يگان يوس ن‑بنادم، غاكود لّيغ راد‑د‑اشكغ س‑لمجد‑ينو ءولا لمجد ن‑بابا ربّي ءولا وين لمالايكا‑نس ن‑يگنّا. لحقّ ا‑راد‑اون‑ينيغ، ءيلّا غ‑غويد بيدّنين غيد ما‑ور‑را‑يمّت ارد ءيژر تاگلديت ن‑ربّي توشكا‑د.» ءيزري ما‑يتگّان تام‑ووسّان تيگيرا ن‑مايان، ءيفتو ياسوع ءيغلي س‑يان‑وورير ا‑يژّالّ، ياوي ديدس بطرُس د‑يوحانّا د‑ياعقوب. لّيغ ا‑يتژالّا تبدّل سّيفت ن‑وودم‑نس، وورّينت‑تملسا‑نس ملّولنت باهرا ايلّيغ ا‑سّمرقيقيينت. بيدّن‑د ديدس سين ءيرگازن ار‑ديدس‑ساوالن، گان نّابي موسا ءولا نّابي ءيليّا. بانّ‑د س‑تيفاوت لّمجد، ار‑ساوالن د‑ياسوع ف‑مامنك ا‑را‑يفّوغ دّونيت ءيكمّل ما‑گيس‑يقصاد ربّي غ‑وروشاليم. ءيمّا بطرُس د‑ويلّي ديدس لّانين، ييوي‑تن‑ييطس. لّيغ‑د‑فاقن ژرن لمجد ن‑ياسوع نتّا د‑سين ءيرگازن لّي‑ديدس‑بيدّنين. ءيفتو موسا د‑يليّا اد‑فلن ياسوع س‑يساول بطرُس ييني‑اس: «وا‑سيدي، ءيفولكي ا‑نيلي غيد. اد‑اون‑نسكر كراض ءيحشاش، يان‑نّك د‑يان ن‑موسا د‑يان ن‑يليّا؟» نتّا ءور‑يسّين ما‑يتّيني. سول ا‑يساوال س‑د‑فلّاسن‑تگّوز يات‑تمدلوت تدل‑تن. ءيكساضن ءيمحضارن لّيغ‑د‑فلّاسن‑يضر‑ومالو. غاكودان ءيساول‑د يان‑واوال زغ‑تمدلوت ييني‑اسن: «غواد ءيگا ءيوي امژلاي. سفليدات سرس.» غير ءيفسّا‑واوال‑ان س‑ژران ياسوع ءيقاما واحدوت. غ‑ووسّان‑ان ءور‑ساولن ءيمحضارن ف‑ماد‑ژران ءولا نّان‑ت ءي‑يان. نديد ازكّا گّوزن‑د زغ‑وورير، مناگّارن‑ت‑ين مدّن گّوتنين. ءينكر يان‑ورگاز غ‑گراتسن ءيغر‑د ءي‑ياسوع ييني‑اس: «واي‑امسلمد، اشك‑يد اد‑يّي‑تژرت ءيوي. ءور‑داري ابلا نتّان، ييلي گيس يا‑لّجنّ. اكود نّا‑ت‑يغوي لجنّ ار‑باهرا‑يسّغويّو، ار‑سرس‑يكّات ار‑ت‑يبرّي ارد‑اس‑د‑يك‑وكشكوش ءيمي، ءور‑سول‑ا‑يتّيري اد‑اس‑يرژم. ضالبغ باهرا زغ‑يمحضارن‑نّك ا‑ت‑زگيس‑سّوفغن، والاينّي ءور‑ژضارن.» ءيساول ياسوع ييني‑اسن كولّوتن: «وا‑تاسوت‑اد ءيجلان، ءور‑اكُّ‑تريت ا‑تامنت. منشك ا‑را‑سول‑ديدون‑قاماغ؟ منشك ا‑راد‑ديدون‑صبرغ؟ اوي‑د يوك س‑داري.» ءيفتو‑د‑وفروخ س‑دار ياسوع س‑سرس‑يوت لجنّ اكال ءيسّمحاكّا‑ت. ءيساول‑داغ ياسوع يامر لجنّ ا‑زگيس‑يفّوغ، ءيجّوجّي‑ت ءيرار‑ت ءي‑باباس. تعجّبن مدّن‑ان كولّوتن ار‑تّينين: «منشك ايد‑س‑تگّوت‑تژضّارت ن‑ربّي.» سول ا‑تعجّابن مدّن غ‑كولّو مايد ءيسكر ياسوع، س‑يساول س‑يمحضارن‑نس ييني‑اسن: «سفلدات ءي‑ما‑راد‑اون‑ينيغ. ها‑نكّي لّي‑يگان يوس ن‑بنادم، را‑يّي‑ن‑دحين س‑گر ءيفاسّن ن‑مدّن.» والاينّي ءيمحضارن ءور‑سّينّ ما‑يرا اد‑اسن‑يمل س‑واوال‑اد. تنتل فلّاسن لمعنا‑نس ايلّيغ ءور‑ت‑فهيمن، ءيكساضن ءور‑ژضارن ا‑ت‑فلّاس‑سقسان. بدون ءيمحضارن ار‑تمجاحادن ءي‑نگراتسن ف‑مانوا گيسن ا‑را‑يگ انمغور. ياسوع ءيسّن مامنك اد‑سوينگيمن، ياوي‑د يان‑وارّاو ءيمژّين ءيسّبيدّ‑ت غ‑تاما‑نس ييني‑اسن: «وانّا ءيقبلن ارّاو‑اد ءيمژّين س‑يسم‑ينو، هاتي ءيقبل‑يّي. د‑وانّا‑يّي‑يقبلن، ءيقبل غوالّي‑يّي‑د‑يوزنّ. اشكو وانّا كولّو گيگون ءيمژّين، نتّان ا‑يگان واد ءيمقّورن.» ييني‑اس يوحانّا: «وا‑سيدي، نژرا يان‑ورگاز ار‑يسّوفوغ لجنون س‑يسم‑نّك. ءور‑ت‑نودجي اشكو ءور‑ا‑ديدنّغ‑يتمونو.» ءيرار‑اس ياسوع: «ا‑ت‑ور‑تحصارم، اشكو وانّا‑كُن‑ور‑يتضاضّان، هاتين ءيگا زغ‑گيگون.» لّيغ‑د‑ياكمور‑وزمز لّي‑غ‑را‑يتياتّاي ياسوع س‑يگنّا، ءيغوي غ‑يخف‑نس ءيسكر ف‑وروشاليم. يازن كرا ن‑يرقّاسن ا‑ت‑زوورن س‑تمازيرت ن‑ساميرا، باش اد‑كشمن س‑يان‑ودوّار اد‑اس‑گيس‑جّوجادن مانيغ ا‑ينسّا. والاينّي ايت‑تمازيرت‑ان ءور‑ت‑رين اشكو سّنّ ءيزد ءوروشاليم ا‑ف‑يسكر. ءيمّا ءيمحضارن‑نس ياعقوب د‑يوحانّا، لّيغ ژران غايان ءينين‑اس: «وا‑سيدي، ءيس‑تريت ا‑نغر س‑يگنوان ا‑د‑فلّاسن‑تگّوز لعافيت تهلك‑تن؟» ءيگراول گيسن ياسوع ءيسّفسّا‑تن. فتون ءيلمّا س‑يان‑ودوّار ياضني. لّيغ ا‑تّيدون غ‑وغاراس ييني‑اس يان‑ورگاز: «راد‑ديدك‑مونغ س‑ينّاس را‑تدّوت.» ءيرار‑اس ياسوع: «ءيبوغاغ دارسن تانسيوين‑نسن، ءولا ءيگضاض ن‑يگنوان دارسن ءوسودن‑نسن، ءيمّا يوس ن‑بنادم ءور‑دارس مانيغ ا‑يسراس اگايّو‑نس.» ييني ياسوع ءي‑يان ياضني: «اشك‑يد، مون ديدي.» ءيمّا نتّا ءينّا‑ياس: «ا‑سيدي، ادج‑يّي زوار اد‑وورّيغ ارد‑ن‑مضلغ بابا.» ءيرار‑اس ياسوع: «فل غويلّي ءور‑طّافنين تودرت ا‑ن‑مضلن وينّا‑ياسن‑مّوتنين. زايد كيّي، ار‑تّاويت لخبار ءي‑مدّن ف‑تگلديت ن‑ربّي.» ياشك‑يد يان ياضني ييني‑اس: «راد‑ديدك‑مونغ ا‑سيدي، والاينّي ادج‑يّي زوار ا‑ن‑مسافاضغ د‑ايت‑تگمّي.» ءيرار‑اس ياسوع: «وانّا يومژن غ‑ووالّو ءيسّماقّل‑ن تيغوردين ءور‑اكُّ‑يگي ءي‑تگلديت ن‑ربّي.» تيغوردين ن‑مايان ءيستي سيديتنّغ سّا ن‑يد‑مراو د‑سين (72) ن‑ومحضار ياضني، يازن‑تن سين س‑سين ا‑ت‑زوورن س‑كرايگاتّ تامدينت ءولا كرايگاتّ ماني لّي‑زغ‑را‑يزري نتّا. ييني‑اسن: «تگّوت‑تمگرا والاينّي دروسن ءيخدّامن. ضالبات بو‑تمگرا ا‑يازن ءيخدّامن اد‑سّمونّ تامگرا‑نس. زايدات، ءوزنغ‑كُن غيلاد زوند ءيلقّاغن غ‑گر‑ووشّانّ. ا‑ور‑تاسيم اومّيس ءولا اقُراب ءولا تورژيّين. ا‑ور‑تبيدّم ار‑تنسالّامّ د‑يان غ‑وغاراس. تيگمّي نّا‑س‑تكشمّ، تينيم‑اسن: ‹اد‑اون‑تيلي سّلامت.› ءيغ‑گيس‑يلّا يان ءيتّيرين سّلامت راد‑اس‑تيلي سّلامت لّي‑س‑تنّام. ءيغ‑ور‑يلّي، ءور‑را‑گيس‑تقاما سّلامت‑نّون. قامايات غ‑تگمّي نّا‑س‑تكشمّ ار‑تشتّام ار‑تسّام اينّا‑ياون‑د‑فكان، اشكو اخدّام ءيستهلّا تيغراد‑نس. ا‑ور‑تّيدوم زغ‑تگمّي س‑تگمّي. تامدينت نّا‑كُن‑يران ءيغ‑ن‑سرس‑تكشمّ، شتّايات اينّا‑ياون‑د‑سرسن ءيمزدغن‑نس ار‑تجّوجّيم ءيموضان‑نسن ار‑اسن‑تّينيم: ‹ها‑تاگلديت ن‑ربّي تاكمور‑اون‑د.› والاينّي تامدينت نّا‑ور‑كُن‑يرين ءيغ‑ن‑سرس‑تكشمّ، زريات غ‑تسواك‑نس ار‑تّينيم: ‹ءولا اگدرور ن‑تمدينت‑نّون لّي‑وسين ءيضارن‑نّغ، ار‑ت‑نسّوسوس. والاينّي سوانگمات تيسّانم ءيس‑دي‑تاكمور‑تگلديت ن‑ربّي.› راد‑اون‑ينيغ، را‑يشقو‑واسّ لّحساب ف‑ايت‑تمدينت‑ان ءوگُّار ن‑ايت‑سادوم. «تاگوضي ا‑راد‑اون‑ييلي اي‑ايت‑كورازين. تاگوضي ا‑راد‑اون‑ييلي اي‑ايت‑بيتصايدا. هان لمعجيزات لّي‑سكرغ غ‑دارون، مراد ءيس‑تنت‑سكرغ غ‑تمدينين ن‑صور د‑صايدا ءيكون كنان ءيمزدغن‑نسنت س‑واكال غاكودان، لسن لخيش گن ءيغد ف‑يخفاون‑نسن، فلن كولّو ماد‑سكارن يُخشن. را‑فلّاون‑يشقو‑واسّ لّحساب ءوگُّار ن‑ايت‑صور د‑ايت‑صايدا. ءيمّا كونّي اي‑ايت‑كافرناحوم، ءيس‑ترام ا‑تلكمّ ءيگنوان؟ هان را‑كُن‑ين‑يلوح ربّي غ‑تدروت ن‑واكال.» ييني ءيلمّا ياسوع ءي‑يمحضارن‑نس: «وانّا ءيسفليدن س‑واوال‑نّون، ءيسفلد سري. وانّا‑كُن‑ور‑يرين، ءور‑يّي‑يري ءولا نكّي. د‑وانّا‑يّي‑ور‑يرين، ءور‑يري غوالّي‑يّي‑د‑يوزنّ.» وورّين‑د سّا ن‑يد‑مراو د‑سين ن‑ومحضار، فرحن باهرا ار‑تّينين: «وا‑سيدي، ءولا لجنون ار‑تن‑نتامر س‑يسم‑نّك ار‑سكارن س‑واوال‑نّغ.» ييني‑اسن ياسوع: «ژريغ شيطان ءيضر‑د زغ‑يگنوان زوند ءوسمانّ. هاتي فكيغ‑اون تاژضّارت ا‑تاكُلم ف‑يلگمّاضن د‑يغردميون، تنروم كولّو تاحكيمت ن‑ونوّاش، ءور‑را‑كُن‑يسّهرش يات. والاينّي راد‑اون‑ينيغ، ا‑ور‑تفرحم ف‑سّيبت لّجنون ار‑سكارن س‑واوال‑نّون، والاينّي فرحات ف‑سّيبت ن‑ما‑تياران ءيسماون‑نّون غ‑يگنّا.» ءيفرح ياسوع باهرا غ‑تاساعت‑ان س‑لفرح ن‑رّوح لقودوس، ءيژّالّ ييني: «وا‑بابا، سيديس ن‑يگنّا د‑واكال، ءولغّ‑ك اشكو تسّنتلت تيغاوسيوين‑اد ف‑ايت‑لعاقل د‑لفهمت، تسّملت‑تنت ءي‑يبوجاديين. اشكو غمكاد ا‑س‑ترضيت ا‑بابا.» ييني ءيلمّا ءي‑مدّن‑ان: «غ‑دّو‑وفوس‑ينو ا‑غ‑يگا بابا كولّو ما‑يلّان. ءور‑يلّي ما‑يسّنّ يوس ن‑ربّي ابلا باباس، ءولا ءيلّا ما‑يسّنّ بابا ابلا نكّي لّي‑يگان يوس د‑ويلّي قصادغ اد‑اسن‑ت‑ملغ.» ءيگراول‑د ياسوع س‑دار ءيمحضارن‑نس ييني‑اسن واحدوتن: «تيمباركيّين اد‑گانت‑والّن‑اد ژرانين مايد تژرام كونّي. راد‑اون‑ينيغ، گّوتن لانبيا د‑يگلدان ژوژضن اد‑ژرن مايد تژرّام والاينّي ءور‑ت‑ژرين، ژوژضن اد‑سفلدن ءي‑مايد مي تسفليدم والاينّي ءور‑اس‑سفلدن.» ياشك‑يد يان‑ومسلمد ن‑شّرع ييري ا‑يارم ياسوع غ‑واوال‑نس، ييني‑اس: «واي‑امسلمد، ما‑راد‑سكرغ باش اد‑طّافغ تودرت لّيخرت؟» ءيرار‑اس ياسوع: «ما‑يتياران غ‑شّرع؟ ما‑گيس‑تغريت؟» ييني‑اس: «‹ا‑تّيريت ربّي سيديك زغ‑تّمي ن‑يخف‑نّك د‑تّمي ن‑وول‑نّك د‑تّمي ن‑تژضّارت‑نّك د‑تّمي لّعاقل‑نّك،› ‹تيريت ادجار‑نّك زوند ءيخف‑نّك.› » ءيساول ياسوع ييني‑اس: «تُغژانت. سكار ماياد تدّرت.» والاينّي امسلمد‑لّي ن‑شّرع ءيرا ا‑يسّبايّن ءيخف‑نس، ءيسقسا‑ت: «ما‑يگان ادجار‑ينو؟» ءيساول ياسوع ييني‑اس: «ها‑يان‑ورگاز ءيمودّا ار‑يتّيدو غ‑وغاراس زغ‑وروشاليم س‑تمدينت ن‑اريحا. امژن‑ت ءيمخّارن كّيسن‑اس كولّو ما‑دارس‑يلّان، سّياگّاسن‑ت فلن‑ت‑ين غ‑گر لموت د‑تودرت. ها‑يان زغ‑ينمغورن ن‑تگمّي ن‑ربّي ءيكّا‑د اغاراس‑ان. لّيغ‑ت‑ين‑يژرا يانف‑اس ءيمون د‑تسگا ياضني. ها‑يان ياضني زغ‑يخدّامن ن‑تگمّي ن‑ربّي، ءيمون‑د د‑وغاراس، ءيدّو ايلّيغ‑ن‑سرس‑يوگُّا، ءيزري ءولا نتّا زغ‑تسگا ياضني. والاينّي ها‑يان‑وبرّاني گو‑ساميرا ءيمودّا ءولا نتّا، ءيروح‑د ارگاز‑ان. لّيغ‑ت‑يژرا ءيقاما گيس باهرا. ءيدّو س‑دارس ءيگ زّيت د‑وامان ن‑واضيل ءيكتين ءي‑تيگّاس‑نس ياسّ‑اس‑تنت. ءيسّني‑ت ف‑لبهيمت ءيسّلكم‑ت س‑يا‑لّفِندق ءيگابل‑ت گيس. نديد ازكّا ءيلدي‑د سين ءيقاريدن ن‑نّوقرت ءيفك‑تن ءي‑بو‑لفِندق ييني‑اس: ‹تهالّا گيس. ءيغ‑فلّاس‑تسّخسرت ءوگُّار ن‑مايد‑اك‑فكيغ، راد‑اك‑ت‑زايدغ غاكود نّا‑د‑وورّيغ غ‑وغاراس‑اد.› » ءيسقسا‑ت ياسوع: «مانوا تنّيت غ‑كراض‑اد ا‑يوورّين ءيگا ادجار ءي‑والّي ءيضرن غ‑يفاسّن ن‑يمخّارن؟» ييني‑اس: «غوالّي گيس ءيحنّان.» ييني‑اس ياسوع: «زايد ءولا كيّي ار‑تسكارت زوند مايان.» مونّ‑داغ د‑وغاراس ايلّيغ لكمن يان‑ودوّار لّي‑غ‑تزدغ يات‑تمغارت ءيسم‑نس مارتا. تشّكشم ياسوع س‑تگمّي‑نس. تيلي‑دارس‑وولّتماس ءيسم‑نس ماريام، تسكيوس نتّات غ‑دار ءيضارن ن‑سيديتنّغ ار‑تسفليد ءي‑ما‑يتّيني. ءيمّا مارتا تلها باهرا س‑اسي‑سرس، تاشك‑يد س‑ياسوع تيني‑اس: «وا‑سيدي، ءيس‑ور‑تنّيت يات ءي‑وولّتما‑ياد ف‑تووري‑اد غ‑يّي‑ن‑تفل واحدويّي؟ ءيني‑اس ا‑تنكر ا‑يّي‑تعاون.» ءيساول سرس سيديتنّغ ييني‑اس: «مارتا، مارتا، ها‑كمّي توحلت باهرا، تهوّلت ءيخف‑نّم س‑كيگان د‑تغاوسيوين. غير يات‑تغاوسا ا‑د‑يقّانّ. هاتّي ماريام تختار تاغامت لّي‑يفولكين. ءور‑يلّي ما‑راد‑اس‑تّ‑يكّيس.» يان‑واسّ ءيلّا ياسوع غ‑يان ماني ار‑يتژالّا. لّيغ ءيكمّل، ءيضالب‑ت يان زغ‑يمحضارن‑نس ييني‑اس: «وا‑سيديتنّغ، سّلمد‑اغ مامنك ا‑نتژالّا، غمكلّي ءيسّلمد يوحانّا امسدّام ءيمحضارن‑نس.» ءيساول ياسوع ييني‑اسن: «ءيغ‑را‑تژّالّم تينيم ‹وا‑باباتنّغ، ا‑ييلي لوقر ءي‑يسم‑نّك، تاشك‑يد‑تگلديت‑نّك. اكّا‑ياغ‑د كرايگاتّ اسّ اغروم ن‑واسّ، تصامحت‑اغ ف‑دّنوب لّي‑نسكر، غمكلّي نتصاماح ءي‑كولّو وانّا گينّغ ءيسكرن لخُشانت. تسّانفت‑اغ ءي‑ما‑راد‑اغ‑يجلّو.› » ءيزايد ييني‑اسن: «ما‑را‑يجرو ءيغ‑يدّا يان گيگون س‑تگمّي ن‑ومدّاكُّل‑نس غ‑طوژّونت ن‑ييض ييني‑اس ‹وا‑گما، رضل‑يّي كراطّ‑تنگُال اشكو يوشكا‑د داري يان‑ونبگي ءيمودّا‑د. ءور‑داري ماد‑اس‑د‑سراسغ ا‑ت‑يشّ.›؟ راد‑اك‑د‑يرار‑ومدّاكُّل‑نّك زغ‑وگُنس ن‑تگمّي ييني‑اك‑د: ‹ا‑يّي‑ور‑تنفوت. قّنغ‑ن تيفلوت، گنغ د‑تاروا‑نو غ‑تيسي، ءور‑ژضارغ ا‑ن‑نكرغ اد‑اك‑فكغ كرا.› والاينّي راد‑اون‑ينيغ، واخّا ءور‑ينكير اد‑اك‑د‑يفك ف‑سّيبت ن‑ما‑تگيت امدّاكُّل‑نس، را‑د‑ينكر ءيفك‑اك‑د اينّا‑ف‑تلكمت ف‑سّيبت ن‑ما‑تزوويدت ار‑تّضالابت بلا‑دا‑تّحشامت. راد‑اون‑ينيغ، ضالبات ربّي راد‑اون‑يفك، سيگّلات دارس را‑تافم، سّضوقّرات‑ن سرس راد‑اون‑يرژم. اشكو كولّو وانّا‑ت‑يضالبن راد‑اس‑يفك، د‑وانّا دارس ءيسيگّيلن را‑دارس‑ياف، د‑وانّا‑ن‑يسّضوقّورن راد‑اس‑يرژم. ءيس‑يلّا يان غ‑ويلّي گيگون طّافنين تاروا مژّينين، ءيضالب‑اس يوس اسلم ءيفك‑اس الگمّاض؟ نغد ءيضالب‑اس تاگلايت ءيفك‑اس ءيغردم؟ ژرات كونّي، واخّا دا‑تسكارم ما‑يُخشنّ، تيسّانم ا‑تفكم تيميخار فولكينين ءي‑تاروا‑نّون. ءوگُّار ن‑مايان ا‑را‑ياكّا باباتون ن‑يگنّا رّوح لقودوس ءي‑ويلّي‑تي‑تضالابنين.» يان‑واسّ ياضني ءيسّوفغ ياسوع لجنّ زغ‑يان‑ورگاز اژنژوم. لّيغ‑ت‑يفّوغ يوورّي‑وژنژوم ار‑يساوال. ار‑كولّو‑تعجّابن مدّن، والاينّي كرا گيسن ار‑يتّيني: «نتّان س‑تحكيمت ن‑بعل‑زابول اگلّيد لّجنون ا‑س‑ا‑يسّوفوغ لجنون.» ءيرين وييّاض اد‑ارمن ياسوع، ضالبن‑ت اد‑اسن‑يمل كرا لّمعجيزت اد‑اسن‑تگ تاماتارت ن‑يزد ربّي ا‑ت‑يد‑يوزنّ. ءيمّا ياسوع ءيسّن ءيسوينگيمن‑نسن ييني‑اسن: «تاگلديت نّا‑يتمّاغن د‑يخف‑نس را‑تخلو، د‑تگمّي نّا‑يتمّاغن د‑يخف‑نس را‑تضر. ءولا شيطان ءيغ‑يمّاغ د‑يخف‑نس مامنك ا‑را‑تقاما‑تگلديت‑نس؟ ها‑كونّي ار‑تّينيم ءيزد س‑تحكيمت ن‑بعل‑زابول ا‑س‑ا‑سّوفوغّ لجنون. والاينّي ءيغد س‑بعل‑زابول ا‑س‑ا‑تن‑سّوفوغّ، ءينيات‑يّي ما‑س‑ا‑تن‑سّوفوغن ايت‑دارون؟ نتني ا‑راد‑اون‑يمل ءيس‑تجلام. والاينّي ءيغد س‑تحكيمت ن‑ربّي ا‑س‑ا‑سّوفوغّ لجنون، ءيسّانات ءيس‑د‑دارون‑توشكا‑تگلديت ن‑ربّي. «ءيغ‑يلّا يان ءيدوسن ءيضوف تيگمّي‑نس ياسي ءيمقلاد‑نس، ءور‑را‑ييژضار يان ا‑يروح ايدا‑نس. والاينّي ءيغ‑ت‑يد‑يوشكا ما‑فلّاس‑يدوسن را‑ت‑ينرو ءيكّيس‑اس ءيمقلاد‑نس لّي‑ف‑يسكر ءيبضو تيغاوسيوين‑نس. هان وانّا ءور‑ديدي‑يلّين، ءيگا ضيضّ‑ينو. د‑وانّا ءور‑ديدي‑يسّمونون، ار‑يزّمزار. «ءيغ‑يفّوغ لجنّ زغ‑كرا ن‑بنادم، را‑يزراي غ‑لخلا غ‑ور‑لّين‑وامان، ار‑يسيگّيل س‑مانيغ ا‑يزدّغ. ءيغ‑ور‑يوفي مان، را‑ييني د‑يخف‑نس: ‹راد‑وورّيغ س‑تگمّي لّي‑غ‑تّين‑كّيغ.› ياشك‑يد ياف‑د تيگمّي تّياراس تنگادّا. ءيدّو ءيلمّا ياوي‑د سّا لّجنون ياضني لّي‑ت‑يوگُرن غ‑لخُشانت، كشمن كولّوتن زدغن غ‑ورگاز‑ان ارد يوورّي ءيسيگُّرا‑نس يُخشن ف‑يسيزوار‑نس.» ار‑سول‑يساوال ياسوع س‑اس‑دي‑تغرا يات‑تمغارت زغ‑گر مدّن‑ان تيني‑اس: «امباركي ا‑يگا‑واحليگ لّي‑ك‑يورون ءولا تيبّاتين لّي‑ك‑سّنگينين.» ءيساول ياسوع ييني‑اسن: «ءوگُّار ن‑يمباركين اد‑گان غويلّي سفليدنين ءي‑واوال ن‑ربّي ار‑سرس‑سكارن.» مونّ‑د مدّن گّوتنين ف‑ياسوع، ءيساول‑داغ ييني‑اسن: «ها‑تاسوت‑اد، تاسوت يُخشنّ ا‑تگا. ار‑تّضالاب يات‑تماتارت، والاينّي ءور‑راد‑اس‑تّياوفكا كرا ن‑تماتارت ابلا تاماتارت ن‑نّابي يونا. غمكلّي ءيگا يونا يات‑تماتارت ءي‑ايت‑نينوا، غمكان ا‑س‑راد‑گغ يات‑تماتارت ءي‑تاسوت‑اد، نكّي لّي‑يگان يوس ن‑بنادم. هاتي را‑دي‑تنكر‑تگلّيتّ لّجانوب غ‑واسّ لّحساب غ‑گر مدّن ن‑تاسوت‑اد، تاشتكّا سرسن، اشكو توشكا‑د نتّات زغ‑تّمي ن‑دّونيت ا‑تسفلد ءي‑تحكيمت ن‑سوليمان. ءيمّا غيلاد ءيلّا غيد ما‑يوگُرن سوليمان. راد‑نكرن ايت‑نينوا ءولا نتني غ‑واسّ لّحساب غ‑گر مدّن ن‑تاسوت‑اد، اشتكّان سرسن، اشكو فلن نتني دّنوب‑نسن غاكود لّيغ سفلدن ءي‑تبرّاحت ن‑يونا. ءيمّا غيلاد ءيلّا غيد ما‑يوگُرن يونا. «ءور‑يلّي ما‑يسّرغان لقنديل ءيسرس‑ت‑ين غ‑وگضي نغد غ‑دّو لعبرت. والاينّي ف‑يگّي ن‑ماني ياتّوين ا‑ف‑را‑ت‑يسرس، باش ا‑تبان تيفاوت ءي‑كولّو وانّا‑د‑يكشمن. تيط‑نّك ا‑يگان لقنديل ن‑دّات‑نّك. ءيغ‑تسفاو تيط، را‑تيلي دّات كولّوتّ غ‑تيفاوت. ءيغ‑ور‑تسفاو تيط، را‑تيلي دّات كولّوتّ غ‑تيلّاس. اوي‑تّ غ‑يخف‑نّك اد‑ور‑تخسي تيفاوت لّي‑گيك‑يلّان. ءيغ‑كولّو‑تفاو دّات‑نّك بلا‑گيس‑يلّا كرا ن‑ماني ءيلّاسن، راد‑كولّو‑تفاوت زوند ءيغ‑گيك‑يرغا يا‑لّقنديل.» لّيغ ءيكمّل ياسوع ءيواليون‑اد، ءيضالب‑ت يان‑وفاريسي ا‑ديدس‑يشّ ءيمكلي. ءيكشم ياسوع س‑دارس ءيسكيوس ا‑يشّ. ءيمّا افاريسي‑ان ءيتعجّب اشكو ءور‑زوار‑يسيرد باش ا‑يشّ غمكلّي سيريدن ايت‑يودايا. ءيساول سرس سيديتنّغ ييني‑اس: «وا‑كونّي ن‑يفاريسين ار‑تسّغوسم لكاس د‑تمكيلت زغ‑برّا، ءيمّا اگُنس ءيعمّر س‑تمخّارت د‑لخُشانت. وا‑ينافالن، ربّي لّي‑يسكرن برّا، ءيس‑ورد نتّان ا‑يسكرن اگُنس؟ والاينّي فكات ءي‑يمژلاض ما‑يلّان غ‑يروكوتن‑نّون، س‑اون‑يغوس كرايگاتّ كرا. «وا‑يفاريسين، تاگوضي ا‑راد‑اون‑ييلي. ار‑تاكّام ءي‑ربّي يات زغ‑كرايگاتّ مراوت لّيقامت د‑وزوكُّني د‑كولّو ءيسافارن ياضني، والاينّي ار‑تتّوم لحقّ ءولا لحنانت ن‑ربّي. ها‑تيغاوسيوين‑اد ا‑فلّاون‑يلّان ا‑سرسنتي‑تسكارم بلا تفلم تييّاض. وا‑يفاريسين، تاگوضي ا‑راد‑اون‑ييلي، اشكو ءيعزّا دارون ا‑تزگّوروم س‑لگدّام غ‑تگُمّا ن‑تژالّيت. ءيعزّو دارون ا‑فلّاون‑تسلّامن مدّن غ‑لاسواق. تاگوضي ا‑راد‑اون‑ييلي باهرا، اشكو تگام زوند ءيمضّالن لّي‑مي‑ور‑يبيدّ ءيفير. ار‑فلّاسن‑تّيدون مدّن، اشكو ءور‑سّينّ ماد‑گان. ءيساول يان زغ‑يمسلمدن ن‑شّرع ييني‑اس: «واي‑امسلمد، ترگمت‑اغ ءولا نكُّني س‑واوال‑اد.» ءيرار‑اس ياسوع: «تاگوضي ا‑راد‑اون‑ييلي ءولا كونّي ا‑يمسلمدن ن‑شّرع. ار‑ن‑تسراسم ف‑مدّن تاژايت لّي‑مي‑ور‑ژضارن، والاينّي ءور‑تريم ا‑ن‑تگم ءولا يان‑وضاض اد‑اسن‑تعاونم. تاگوضي ا‑راد‑اون‑ييلي، اشكو ار‑تبنّوم ءيمضّالن شوانين ءي‑لانبيا لّي‑مّوتنين ف‑وفوس ن‑يمزوورا‑نّون. غمكاد ا‑س‑ا‑تزّگام ءيسكّيرن ن‑يمزوورا‑نّون، ار‑تاكّام توگّا ف‑ماد‑سكرن. نتني نغان لانبيا د‑كونّي ار‑تبنّوم ءيمضّالن‑نسن. د‑غايان ا‑ف‑تنّا‑تحكيمت ن‑ربّي: ‹راد‑اسن‑ازنغ لانبيا د‑يرقّاسن، نغن گيسن كرا سّرفوفنّ كرا.› ءيمّا تاسوت‑اد را‑د‑فلّاس‑تتّوت لعقوبيت ف‑سّيبت ن‑يدامّن لّانبيا كولّوتن لّي‑فّينين زغ‑يسيزوار ن‑دّونيت سول س‑غيلاد، زغ‑يدامّن ن‑هابيل ار ءيدامّن ن‑زاكاريّا لّي‑نغان غ‑گر‑ودغار ن‑تغرسي د‑تحانوت تامژلايت ن‑ربّي. راد‑اون‑ينيغ، ف‑تاسوت‑اد ا‑ف‑را‑د‑كولّو‑تتّوت لعقوبيت‑ان. تاگوضي ا‑راد‑اون‑ييلي ا‑يمسلمدن ن‑شّرع، اشكو تكّيسم ءي‑مدّن تاساروت ن‑تواسّنا. ءور‑دي‑تكشيمّ كونّي، ءولا تودجام غويلّي رانين اد‑د‑كشمن.» لّيغ ءيفّوغ ياسوع زغ‑تگمّي‑ان ار‑ت‑باهرا‑تژين ءيمسلمدن ن‑شّرع د‑يفاريسين. ار‑ت‑سقسان ف‑منّاوت‑تغاوسيوين، گابلن‑ت مدين‑اس ا‑ت‑غوين ف‑واوال‑نس. مونّ‑د كيگان د‑يد‑والف ن‑مدّن غ‑تاساعت‑ان، ايلّيغ ا‑تاكُلن ف‑ينگراتسن. ءيگر ياسوع ار‑يساوال س‑يمحضارن‑نس ييني‑اسن: «رارات لعاقل‑نّون زغ‑تخميرت ن‑يفاريسين، اشكو نتني سين‑وودماون اد‑سكارن. كولّو ما‑يرگسن را‑د‑يبايّن، د‑كولّو ما‑ينتلن را‑يتياوسّان. اينّا تنّام غ‑گراتون راد‑اس‑سفلدن كولّو مدّن. اينّا‑ف‑تساولم غ‑تنتلا غ‑وگُنس ن‑تحانوت راد‑سرس‑تبرّاحن ف‑يگّي ن‑تگُمّا. وا‑يمدّوكُّال‑ينو راد‑اون‑ينيغ، ا‑ور‑تيكساضم غويلّي نقّانين دّات والاينّي تيغوردين ن‑مايان ءور‑سول‑ژضارن اد‑سكرن يات. راد‑اون‑ملغ مانوا تيكساضم. ءيكساضات غوالّي ءيژضارن ا‑ينغ ءيلوح‑ن سول غ‑جهنّاما. راد‑اون‑ينيغ، نتّان ا‑تيكساضم. ءيس‑ور‑ا‑نزّان سمّوس‑واجّاوجن س‑سنات‑تقاريدين؟ والاينّي ربّي ءور‑ا‑گيسن‑يتتّو يان. ءيمّا كونّي زغ‑ينژاضن ن‑يخف‑نّون ءيحاسب‑تن ربّي. ا‑ور‑تيكساضم، اشكو تعزّام دارس ءوگُّار ن‑واجّاوجن گّوتنين. «راد‑اون‑ينيغ، وانّا ءيتّينين ءيس‑يگا وينو غ‑گر مدّن، ءولا نكّي لّي‑يگان يوس ن‑بنادم را‑تّينيغ ءيگا وينو غ‑دار لمالايكا ن‑ربّي. ءيمّا وانّا ءيتّينين ءور‑يگي وينو غ‑گر مدّن، را‑تّينيغ ءولا نكّي ءور‑يگي وينو غ‑دار لمالايكا ن‑ربّي. وانّا ءيساولن غ‑يوس ن‑بنادم، ءيژضار ربّي اد‑اس‑يصامح. والاينّي يان ءيرگّمن رّوح لقودوس، ءور‑راد‑اس‑فلّاس‑يصامح ربّي. ءيغ‑كُن‑ين‑سّبيدّن غ‑تگُمّا ن‑تژالّيت ا‑فلّاون‑حكامن، نغد غ‑لگدّام ن‑ينمغورن ءولا لحوكّام، اد‑ور‑تاسيم تاغوفت ف‑ما‑را‑تينيم ءولا ف‑ما‑س‑راد‑اسن‑ترارم، اشكو رّوح لقودوس ا‑راد‑اون‑يمل غ‑تاساعت‑ان مايلّي‑كُن‑د‑يقّانّ اد‑اسن‑تي‑تينيم.» ءيساول‑د يان‑ورگاز زغ‑گر مدّن‑ان ييني‑اس: «واي‑امسلمد، ساول س‑گما تينيت‑اس ا‑ديدي‑يبضو لوورت.» ءيرار‑اس ياسوع: «واي‑ارگاز، ما‑يّي‑يگان د‑لقاضي فلّاون باش اد‑اون‑اطّوغ ايدا‑نّون؟» ءيزايد ييني‑اسن: «رارات لعاقل ا‑ور‑تّيريم كرا ءيگّوتن ءي‑يخف‑نّون، اشكو تودرت ن‑بنادم ءور‑تلّي س‑توگّت ن‑وايدا.» يوت‑اسن لمعنا‑ياد ييني‑اسن: «ها‑يان‑ورگاز ءيگّوت‑دارس‑وايدا، ياسي صّابت ءيگّوتن زغ‑واكال‑نس. ءيسوانگم د‑يخف‑نس ار‑يتّيني: ‹ما‑راد‑سكرغ؟ ءور‑داري مانيغ ا‑سّمونوغ كولّو صّابت‑اد.› ييني: ‹غمكاد ا‑راد‑سكرغ، راد‑خلوغ ءيحونا ن‑يمندي، بنوغ ما‑تن‑يوگُرن، سّمونغ‑ن گيسن ءيمندي د‑لخير‑ينو كولّوت، ءينيغ ءيلمّا د‑يخف‑ينو: ءيگّوت لخير ما‑س‑ا‑زرايغ كيگان د‑يسگُّاسن. راد‑سونفوغ ار‑شتّاغ ار‑سّاغ ار‑تفراحغ.› والاينّي ارگاز‑ان، ءينّا‑ياس ربّي: ‹واي‑انافال، غ‑يض‑اد ا‑را‑ك‑كّيسغ زغ‑تودرت. وين مي ا‑را‑يگ كولّو ماياد‑دي‑تسّمونت؟› » ءيزايد ياسوع ييني‑اسن: «غمكان ا‑يگا كولّو وانّا ءيسّمونون ءي‑يخف‑نس بلا‑ياس‑يلّا يات غ‑دار ربّي.» ءيساول ياسوع س‑يمحضارن‑نس ييني‑اسن: «ماياد ا‑ف‑راد‑اون‑ينيغ، ا‑ور‑تاسيم تاغوفت ءي‑تودرت‑نّون ف‑ما‑را‑تشّم، ءولا ءي‑دّات‑نّون ف‑ما‑راد‑اس‑تلسم. اشكو تودرت توف امشّو، ءولا دّات توف تيملسيت. ژرات ءيهاقّاين، ءور‑ا‑كّرزن ءولا‑دا‑مگّرن، ءور‑دارسن ءيحونا نغد لبروج ما‑غ‑ا‑سّمونون، والاينّي ار‑اسن‑ياكّا ربّي امشّو لّي‑حتاجّان. ءيمّا كونّي، ءوگُّار ن‑يگضاض ا‑تعزّام دار ربّي. ما‑يژضارن ا‑يزايد يات تاساعت ءي‑تودرت‑نس س‑تاغوفت لّي‑يوسي؟ ءيغ‑ور‑تژضارم ا‑تسكرم مايد ءيدروسن ما‑ف‑ا‑تّاسيم تاغوفت ف‑تغاوسيوين‑ان ياضني؟ ژرات ءيجدّيگن ن‑تاگانت، مامنك ا‑دي‑تمغاين. ءور‑ا‑تلّمن ءولا‑دا‑ژطّان والاينّي راد‑اون‑ينيغ، سوليمان س‑لهيبت ن‑تگلديت‑نس ءور‑جّو‑يلسي زوند يان زغ‑يجدّيگن‑اد. ءيغ‑ا‑يسّلسا ربّي توگا لّي‑يتمغاين غاسّاد غ‑تاگانت تّياوگار‑ن ازكّا غ‑تاكات، ءيس‑ور‑را‑كُن‑يسّلس ءولا كونّي س‑وگُّار؟ ءيس‑ور‑تومينم س‑ربّي؟ ا‑ور‑تلهوم س‑ما‑تشتّام ءولا ما‑تسّام، ءولا‑دا‑تسّيحيلم ءيخف‑نّون س‑يات. ژرات ايت‑دّونيت‑اد كولّوتن، تيغاوسيوين‑اد ا‑س‑ا‑تلهون. ءولا كونّي، باباتون ءيسّن ءيس‑تنتي‑تحتاجّام. والاينّي لهوات زوار س‑تگلديت ن‑ربّي س‑اون‑يزوويد كولّو تيغاوسيوين‑ان ياضني. «ا‑ور‑تيكساطّ ا‑تاوروت ءيمژّين. ءيفرح ربّي باباتون اد‑اون‑يفك تاگلديت‑نس. زّنزات ما‑تطّافم تبضوم‑ت ءي‑يمژلاض. سكارات ءي‑يخف‑نّون ءيقربان لّي‑ور‑را‑يمدو، ييلي‑اون‑وايدا غ‑يگنّا ءيلّيغ ءور‑را‑زگيس‑يتياتّاي يات، ءولا ءيروح‑ت‑ومخّار، ءولا تشّا‑ت‑تووكّا. اشكو ءينّاغ ءيلّا‑وايدا‑نّون ا‑غ‑را‑ييلي‑وول‑نّون. «بكيسات تسّرغم تيفاوين‑نّون ا‑بدّا‑توجادم، زوند ءيخدّامن لّي‑تقلنين س‑سيديتسن ارد‑د‑يوورّي زغ‑دار‑تمغرا، ءيرين اد‑اس‑رژمن ءيمي غاكود نّا‑د‑يسّضوقّر. منشك ا‑س‑را‑يفولكي ءي‑يخدّامن‑ان ءيغ‑د‑يوشكا سيديتسن ياف‑تن‑د ضوفن. راد‑اون‑ينيغ، را‑يبكيس نتّا ييني‑اسن اد‑سكيوسن ياوي‑اسن‑د ماد‑شتّان. منشك ا‑س‑را‑يفولكي ءيغ‑تن‑د‑يوفا ءوجادن، واخّا‑د‑يوشكا غ‑طوژّونت ن‑ييض نغد زيكّ زيكّ صباح. والاينّي راد‑اون‑ينيغ، مراد ءيس‑يسّن بو‑تگمّي ماناگو ا‑را‑د‑ياشك‑ومخّار، ءور‑را‑ت‑يادج ا‑ينقب تيگمّي‑نس. ءولا كونّي ءيلّا فلّاون ا‑بدّا‑توجادم، اشكو راد‑د‑اشكغ نكّي لّي‑يگان يوس ن‑بنادم غ‑كرا ن‑تاساعت لّي‑ور‑تغالم.» ءيسقسا‑ت بطرُس ييني‑اس: «وا‑سيدي، ءيزد فلّانّغ ا‑ف‑توتّ لمعنا‑ياد نغد كولّو مدّن؟» ءيساول سيديتنّغ ييني: «مانوا ءيگان اخدّام ءيفولكين باب لّعاقل؟ نتّان ا‑مي‑را‑يفل سيديس تيگمّي‑نس باش ا‑ياطّو ف‑يخدّامن ياضني اد‑شتّان، كرايگاتّ يان غ‑تاساعت‑نس. امباركي ا‑يگا‑وخدّام نّا‑مي‑د‑يوورّي سيديس ياف‑ت‑يد ار‑يسكار مايان. لحقّ ا‑راد‑اون‑ينيغ، راد‑اس‑يفل سيديس ايدا‑نس كولّوت غ‑دّو‑وفوس‑نس. والاينّي ءيغ‑يدّا‑وخدّام‑ان ييني د‑يخف‑نس: ‹ءيماطل‑ن سيدي› ار‑يكّات ءيخدّامن د‑تخدّامين ار‑يشتّا ار‑يسّا ار‑يسّنوفول ءيخف‑نس س‑تيسّي، هان را‑د‑يوورّي سيديس غ‑يان‑واسّ لّي‑ف‑ور‑يسكير ءولا يات تاساعت لّي‑ور‑يغال. غاكودان را‑ت‑يبري سيديس ءيگ‑ت‑ين د‑ينوّاشن ن‑ربّي. اخدّام نّا‑يسّنّ ما‑زگيس‑يرا سيديس والاينّي ءور‑ت‑يناول ءولا ءيسكر‑ت، را‑ت‑يسّغورش سيديس باهرا. ءيمّا اخدّام نّا‑يسكرن ما‑ف‑ت‑يد‑يقّان‑وكوراي بلا ءيسّن ما‑زگيس‑يرا سيديس، را‑ت‑يسّغورش غير ءيميكّ. اشكو وانّا مي ءيفكا سيديس ما‑يگّوتن، را‑زگيس‑يضالب ما‑يگّوتن، د‑وانّا مي ءيفكا ءوگُّار را‑زگيس‑يضالب ءوگُّار. «ءوشكيغ‑د نكّي اد‑لوحغ لعافيت غ‑دّونيت. امار يوفان ا‑تزند غيلاد. راد‑سول‑دّمغ س‑يان‑ودوم ءيشقان. منشك ا‑س‑فلّا‑يژّاي ارد ءيكمّل. ءيس‑تغالم ءيس‑د‑وشكيغ اد‑سكرغ لهنا غ‑دّونيت؟ ءوهو، راد‑اون‑ينيغ ءورد لهنا والاينّي تيبضيت. غيلاد س‑وفلّا ءيغ‑لّان سمّوس غ‑يات‑تگمّي راد‑بضون كراض د‑سين ءولا سين د‑كراض. را‑يبضو‑ورگاز د‑يوس، ءيبضو‑وفروخ د‑باباس. را‑تبضو‑تمغارت د‑يلّيس، تبضو‑تفروخت د‑ينّاس. را‑تبضو‑تضگُّالت د‑تمغارت ن‑يوس، تبضو‑تسليت د‑ينّاس ن‑ورگاز‑نس.» غاكودان ءيساول‑داغ ياسوع س‑مدّن‑ان گّوتنين ييني‑اسن: «غاكود نّا‑تژرام امدلو ءيغلي‑د زغ‑لغرب ار‑تّينيم: ‹را‑ييلي‑ونژار،› س‑نّيت‑يلّا. غاكود نّا‑تژرام اضو ءيكّا‑د لجانوب ار‑تّينيم: ‹را‑يرغ لحال،› س‑نّيت‑يرغا. وا‑يد‑بو‑سين‑وودماون، كونّي تسّنم لمعني ن‑يكالّن د‑يگنوان. ماخ ءور‑تژضارم ا‑تيسّانم لمعنا ن‑كولّو ماياد دارون ءيجرّون غ‑ووسّان‑اد؟ ماخ ايلّيغ ءور‑ا‑تسوينگيمّ د‑يخف‑نّون غ‑ما‑كُن‑د‑يقّانّ ا‑تسكارم؟ ءيغ‑اك‑يصرض كرا ن‑يان س‑لمحكاما، گ‑ن تيقّي‑نّك ا‑د‑ديدس‑تمشاشكات غ‑وغاراس، ا‑ك‑ور‑يزوكر س‑دار لقاضي، ءيدحي‑ك لقاضي ءي‑ومخزني، ءيلوح‑ك‑ين‑ومخزني غ‑لحبس. راد‑اك‑ينيغ، ءور‑را‑تفّوغت زغ‑غين ارد تفروت تاقاريتّ ءيگُّران.» ساولن كرا ن‑مدّن س‑ياسوع غاكودان ءينين‑اس ف‑كرا ن‑ايت‑جاليل، ءينغا‑تن لحاكم بيلاطوس ف‑يگّي ن‑تغرسيو لّي‑ن‑سّاكمورن ءي‑ربّي. ءيساول ياسوع ييني‑اسن: «ما‑تغالم ف‑مدّن‑ان ن‑ايت‑جاليل؟ ءيزد نتني ا‑يسكرن دّنوب ءوگُّار ن‑وييّاض غ‑جاليل ايلّيغ رفوفنّ غمكان؟ ءوهو، والاينّي راد‑اون‑ينيغ، ءيغ‑ور‑تفيلم ما‑تسكارم يُخشن راد‑كولّو‑تهلكم زوند نتني. ما‑تغالم ف‑مدّن لّي‑ف‑يضر لبرج غ‑سيلوام، ءينغ‑تن كولّو س‑تام د‑مراو؟ ءيزد نتني ا‑يُخشنّ ءوگُّار ن‑كولّو وييّاض غ‑وروشاليم؟ ءوهو، والاينّي راد‑اون‑ينيغ، ءيغ‑ور‑تفيلم ما‑تسكارم يُخشنّ، راد‑كولّو‑تهلكم زوند نتني.» يوت‑اسن لمعنا‑ياد ييني‑اسن: «ها‑يان‑ورگاز، تلّا دارس يات تازارت تّياوژّا غ‑يگر ن‑واضيل. ار‑يتّيدو ار‑گيس‑يسيگّيل ءيكوزارن، ءور‑ا‑ن‑گيس‑يتافا يات. ييني ءي‑وخدّام‑نس: ‹ژر، كراض ءيسگُّاسن اياد سيگّيلغ ءيكوزارن غ‑تازارت‑اد، ءور‑جّو‑گيس‑وفيغ يات. زايد غيلاد بّي‑تّ ا‑ور‑غير‑تامژ اكال.› ءيساول‑وخدّام ييني‑اس: ‹ادج‑تّ ا‑سيدي غير غاسگُّاساد، ا‑ستّ‑نقشغ گغ‑اس امازير. ءيغ‑تورو غاسگُّاساد‑د‑يوشكان، ءيشوا. ءيغ‑ور‑تورو، تبّيت‑ستّ ءيلمّا.› » ءيلّا ياسوع غ‑يات‑تگمّي ن‑تژالّيت غ‑واسّ ن‑وسونفو ار‑يسّلماد. تيلي غين يات‑تمغارت، ءيكرف‑تّ يا‑لّجنّ تام د‑مراو ن‑وسگُّاس. تگا توكنيت، ءور‑تژضار ا‑تسّنم تيدّي‑نس. لّيغ‑تّ‑يژرا ياسوع ءيغر‑اس ييني‑اس: «وا‑تامغارت، ها‑كمّي تفسيت زغ‑وسكرف‑نّم.» ءيسرس‑ن فلّاس ءيفاسّن‑نس س‑تنم غ‑تيدّي‑نس حاينا، ار‑تّالغ ربّي. والاينّي انمغور ن‑تگمّي ن‑تژالّيت طيّر‑اس باهرا ف‑ياسوع اشكو ءيجّوجّي غ‑واسّ ن‑وسونفو، ءينكر ييني ءي‑مدّن‑ان: «سضيص‑ووسّان ا‑يلّان ا‑گيسن‑تّخدامّ. اشكاد‑د غ‑ووسّان‑ان ءيغ‑ترام ا‑تجّيم، والاينّي ءورد غ‑واسّ ن‑وسونفو.» ءيمّا سيديتنّغ ءيرور‑اس: «وا‑يد‑بو‑سين‑وودماون، مانوا گيگون ءور‑يفسّين ءي‑تموگايت‑نس نغد اغيّول‑نس كرايگاتّ اسّ ن‑وسونفو ار‑ت‑يتاوي زغ‑رّوا س‑مانيغ ا‑يسّا؟ ها‑تامغارت‑اد تگا ءيلّيس ن‑يبراهيم، ءيكرف‑تّ شيطان تام د‑مراو ن‑وسگُّاس اياد. ءيس‑ور‑تريم اد‑اس‑فسيغ غ‑واسّ ن‑وسونفو؟» لّيغ‑اس‑سفلدن غويلّي‑ت‑ژينين، حشمن باهرا زغ‑واوال‑نس، فرحن مدّن كولّوتن س‑كولّو لعجايب لّي‑يسكار. ييني‑اسن ياسوع: «مامنك ا‑تگا‑تگلديت ن‑ربّي؟ ما‑س‑راد‑اون‑تّ‑سّرواسغ؟ ترواس يات تاقّايت ءيمژّين لّخردل، ييوي‑تّ يان‑ورگاز ءيژّو‑تّ غ‑يگر‑نس. تمغي‑د تيمغور توورّي تگا تاسغارت ايلّيغ ا‑دي‑تّاشكين ءيگضاض ن‑يگنوان ار‑زدّغن غ‑گر ءيفراون‑نس.» ءيزايد ييني‑اسن: «ما‑س‑راد‑اون‑سّرواسغ تاگلديت ن‑ربّي؟ ترواس تاخميرت لّي‑دي‑توسي يات‑تمغارت تگ‑تّ‑ين غ‑كراطّ لعبرات مقّورنين ن‑وگّورن، تسّكتي لعجين كولّوت.» ءيمون ياسوع د‑وغاراس ن‑وروشاليم، ار‑يتكّا تيمدينين ءولا ءيدوران ار‑گيسن‑يسّلماد مدّن. ءيسقسا‑ت يان ييني‑اس: «ءيزد ا‑سيدي غير كرا ءيدروسن ا‑را‑ينجم؟» ءيساول ياسوع ييني‑اسن: «گات‑ن تيقّي‑نّون ا‑تكشمّ غ‑يمي ءينوكمان. اشكو راد‑اون‑ينيغ، ءيگّوت ما‑را‑يسيگّيل ا‑ن‑كشمن والاينّي ءور‑راد‑يژضارن. اشكو غاكود نّا‑غ‑ينكر بو‑تگمّي ءيقّن ءيمي، را‑تبيدّم غ‑برّا ار‑ن‑سرس‑تسّضوقّورم ار‑تّينيم: ‹رژم‑اغ ا‑سيدي.› ءيمّا نتّا راد‑اون‑ييني: ‹ءور‑سّينغ ماني‑دي‑تكّام كونّي.› راد‑اس‑تّينيم: ‹ها‑نكُّني نشّا ديك نسو ديك، تسّلمدت غ‑تمدينت‑نّغ.› ءيمّا نتّا راد‑اون‑ييني: ‹ءور‑سّينغ ماني‑دي‑تكّام. ءيتّيات‑ن زغ‑گيگي كونّي لّي‑يسكارن لخُشانت.› منشك ا‑س‑را‑تالّام ار‑تّگژاژم ءوخسان‑نّون غاكود نّا‑تژرام ءيبراهيم د‑يسحاق د‑ياعقوب د‑لانبيا كولّوتن غ‑تگلديت ن‑ربّي، ءيمّا كونّي ءيلوح‑كُن‑ين س‑برّا. راد‑د‑اشكين ءيبرّانيين زغ‑شّرق ءولا لغرب ءولا شّامال ءولا لجانوب، مونّ‑د ف‑يمنسي ءيمقّورن غ‑تگلديت ن‑ربّي. س‑صّاحت لّان كرا ن‑يمگّورا لّي‑را‑يزوور، ءولا كرا ن‑يمزوورا لّي‑را‑يگُّرو.» اشكين‑د كرا ن‑يفاريسين غ‑تاساعت‑ان، ءينين‑اس: «هان اگلّيد هيرودوس ءيرا ا‑ك‑ينغ. يوف ا‑ن‑تيتّيت زغ‑غيد تفتوت س‑كرا ن‑ماني ياضني.» ءيمّا ياسوع ءيرور‑اسن: «زايدات تينيم ءي‑ووشّن‑ان: ‹ها‑يّي ار‑سّوفوغّ لجنون ار‑جّوجّيغ مدّن غاسّاد د‑وزكّا ار ويس كراض‑ووسّان راد‑كمّلغ. والاينّي ءيقّان‑يّي‑د اد‑مونغ د‑وغاراس‑ينو غاسّاد د‑وزكّا د‑ناف‑وزكّا، اشكو ءور‑يژضار يان ءيگان نّابي ا‑يمّت ابلا غ‑وروشاليم.› وا‑وروشاليم، وا‑وروشاليم، وا‑تالّي ءينقّان لانبيا ن‑ربّي ار‑تكّاتّ س‑يژران غويلّي‑د‑سرم‑يوزن. منّاوت‑توال اد‑ريغ اد‑د‑سّمونغ تاروا‑نّم غمكلّي‑دي‑تسّمونو‑تفولّوست ءيكيّاون غ‑دّو ءيفراون‑نس، ءيمّا كونّي ءور‑تريم. هان تيگمّي ن‑ربّي غ‑وامّاس‑نّون را‑تخلو. راد‑اون‑ينيغ، ءور‑را‑يّي‑تژرم‑داغ ارد تينيم: ‹امباركي ا‑يگا غواد‑د‑يوشكان س‑يسم ن‑سيدي ربّي.› » يان‑واسّ ن‑وسونفو ءيدّا ياسوع ا‑يشّ غ‑تگمّي ن‑يان زغ‑ينمغورن ن‑يفاريسين. گابلن‑ت اد‑ژرن ما‑را‑يسكر. ياشك‑يد دارس يان‑ورگاز يوضن بزگن‑اس ءيضارن د‑يفاسّن. ءيساول ياسوع ءي‑يمسلمدن ن‑شّرع د‑يفاريسين ءيسقسا‑تن: «ما‑يتّيني شّرع ن‑موسا؟ ءيس‑يحلّا ا‑نجّوجّي غ‑واسّ ن‑وسونفو نغد ءوهو؟» ءيمّا نتني فسّان. ءينكر ياسوع ياوي‑د ارگاز‑لّي ءيجّوجّي‑ت يادج‑ت ا‑يدّو. ييني‑اسن: «ما‑را‑تسكرم ءيغ‑اون‑ين‑يضر ءيويتون نغد تاموگايت‑نّون غ‑وانو غ‑واسّ ن‑وسونفو؟ ءيس‑ور‑را‑تازّلم ا‑تي‑دي‑تلديم؟» ءور‑ژضارن اد‑اس‑د‑رارن س‑يات ف‑واوال‑اد. ءيژر ياسوع ءينبگيون‑ان ار‑زّگّورون ءيخف‑نسن س‑وسكيوس لّگدّام. يوت‑اسن لمعنا‑ياد ييني‑اسن: «ءيغ‑اك‑يعرض كرا ن‑يان س‑تمغرا ا‑ور‑تامژت اسكيوس لّگدّام، ا‑ور‑ن‑يكشم كرا ن‑يان‑ك‑يوگُرن ياشك‑يد غوالّي‑اون‑يعرضن ييني‑اك: ‹نكر ا‑يسكيوس‑ورگاز‑اد.› غاكودان را‑تحشمت د‑يخف‑نّك توورّيت س‑تغوردين ن‑كولّو مدّن‑ان. والاينّي غاكود نّا‑ياك‑يعرض كرا ن‑يان، سكيوس غ‑تغوردين. ءيغ‑د‑يوشكا بو‑تگمّي ييني‑اك ‹اشك‑يد ا‑گما س‑لگدّام،› را‑ك‑كولّو‑وقّرن ءينبگيون. اشكو وانّا ءيسّيمغورن ءيخف‑نس را‑ت‑يژّيمژاي ربّي، ءيمّا وانّا ءيژّيمژاين ءيخف‑نس را‑ت‑يسّيمغور.» ييني ياسوع ءيلمّا ءي‑والّي‑اس‑يعرضن: «ءيغ‑تريت ا‑تسكرت كرا ن‑يمكلي نغد كرا ن‑يمنسي اد‑ور‑تعرضت ءي‑يمدّوكُّال‑نّك نغد ايتماك نغد ايت‑دارك نغد ادجارن‑نّك لّي‑دار لخير. اشكو ءولا نتني راد‑اك‑عرضن تيگيرا، تامژت زغ‑دارسن ماد‑اسن‑تفكيت. والاينّي ءيغ‑تريت ا‑تسكرت كرا ن‑يمنسي ءيمقّورن، عرض ءي‑يمژلاض د‑يكوشامن د‑يبيضارن د‑يبوكاضن. را‑ك‑يبارك ربّي اشكو نتني ءور‑دارسن ما‑س‑ا‑ياك‑تراران لخير. ربّي ا‑راد‑اك‑ت‑يرار غ‑واسّ لّي‑غ‑را‑د‑نكرن غويلّي‑ف‑يرضا.» ءيساول‑د يان زغ‑ينبگيون‑لّي لّيغ ءيسفلد ءي‑مايد ءينّا ياسوع، ييني‑اس: «امباركي ا‑يگا وانّا را‑يشّ ءيمنسي غ‑تگلديت ن‑ربّي.» ءيساول ياسوع ييني‑اس: «ها‑يان‑ورگاز ءيسكر ءيمنسي ءيمقّورن، ءيعرض ءي‑كيگان د‑مدّن. لّيغ‑دي‑تلكم تاساعت ن‑يمنسي، يازن اخدّام‑نس ا‑ن‑ييني ءي‑ويلّي تياوعراضنين: ‹اشكاد‑د، ها‑كولّو يوجاد.› والاينّي ار‑سّعدارن نتني كولّوتن. ييني‑اس‑ومزوارو: ‹ا‑ودّي، سغيغ يان‑يگر، ءيقّان‑يّي‑د اد‑دّوغ ا‑ت‑ژرغ. ضالبغ‑اك اد‑يّي‑تصامحت.› ييني وايّاض: ‹ا‑ودّي، سغيغ سمّوست‑تييگيو ن‑يزگارن. راد‑دّوغ غيلاد ا‑تنت‑ين‑ارمغ. ضالبغ‑اك اد‑يّي‑تصامحت.› ييني وايّاض ياضني: ‹ا‑ودّي، بحرا‑د‑يويغ تامغارت، ءور‑ژضارغ ا‑ن‑اشكغ.› يوورّي‑د‑وخدّام ييني ءيواليون‑اد ءي‑سيديس. طيّر‑اس ءي‑بو‑تگمّي باهرا، ييني غاكودان ءي‑وخدّام‑نس: ‹فّوغ تازّلت غ‑يسواك ءولا تيسواك ن‑تمدينت، تاويد‑د ءيمژلاض د‑يكوشامن د‑يبوكاضن د‑يبيضارن.› يان ءيميكّ يوورّي‑د‑وخدّام ييني‑اس: ‹سكرغ ما‑تنّيت ا‑سيدي، والاينّي سول ءيقاما ماني ءيخوان غ‑وحانو ن‑يمنسي.› ييني بو‑تگمّي ءي‑وخدّام‑نس: ‹فّوغ‑داغ س‑يغاراسن د‑تغاراسين، تامرت مدّن اد‑د‑كشمن ارد تعمّر‑تگمّي‑نو. اشكو راد‑اون‑ينيغ، غويلّي مي عرضغ غ‑يسيزوار، ءور‑يلّي يان زغ-گيسن را‑يمضي ءيمنسي‑نو.› » مونّ‑د مدّن گّوتنين ف‑ياسوع غ‑وغاراس، ءيگراول گيسن ييني‑اسن: «وانّا‑د‑سري‑يوشكان، ءور‑يژضار ا‑يگ امحضار‑ينو ءيغ‑ور‑ا‑يّي‑يتّيري ءوگُّار ن‑باباس د‑ينّاس د‑تمغارت‑نس د‑تاروا‑نس د‑ايتماس د‑يستماس، د‑يخف‑نس ءولا نتّا. وانّا ءور‑يوسين اگّجدي‑نس ءيمون ديدي، ءور‑يژضار ا‑يگ امحضار‑ينو. ما‑را‑يسكر وانّا گيگون ءيران ا‑يبنو يا‑لّبرج؟ ءيس‑ور‑را‑يسكيوس ءيسكر لحساب‑نس ا‑يژر ءيس‑دارس ءيقاريدن ما‑س‑ا‑ت‑يتكمّال؟ ا‑ور‑يزّوگز لّساس ياف‑ن ءيس‑ور‑يژضار ا‑ت‑يكمّل. غاكودان را‑گيس‑ضصّان كولّو وينّا‑ت‑ژرانين ار‑تّينين: ‹غواد ءيگرا ا‑يبنو والاينّي ءور‑يژضار ا‑يكمّل.› ما‑را‑يسكر‑وگلّيد نّا‑يران ا‑يفّوغ ا‑يمّاغ د‑وگلّيد ياضني؟ ءيس‑ور‑را‑يسكيوس ا‑يمشاوار د‑يمدّوكُّال‑نس ا‑يژر ءيس‑يژضار ا‑ينرو س‑مراو ءيد‑والف غوالّي‑ت‑يد‑يمناگّارن س‑سين ءيد‑مراو‑والف؟ ءيغ‑اس‑ور‑يژضار، راد‑اس‑يازن ارقّاس سول‑ن‑ياگّوگ باش ا‑د‑ديدس‑يمشاشكا تيلي سّلامت ءي‑نگراتسن. غمكاد ا‑س‑اون‑نّيغ، وانّا گيگون ءور‑يفيلن كولّو ما‑دارس‑يلّان، ءور‑را‑ييژضار ا‑يگ امحضار‑ينو. «تفولكي تيسنت والاينّي ءيغ‑تلموس تيسنت ما‑س‑را‑ستّي‑تسّمارغم؟ ءور‑سول‑تگي ءي‑واكال ءولا تگا ءي‑وگودي ن‑ومازير. را‑ستّ‑اوين مدّن لوحن‑تّ‑ين س‑برّا. وانّا دار ءيمزگان ا‑سرسن‑يسفليد، ءيلّا فلّاس ا‑يسفلد.» يان‑واسّ مونّ‑د كيگان د‑يد‑بو‑نكّاس د‑مدّن أُخشنّين، ءيرين اد‑سفليدن ءي‑ياسوع. ار‑تنگموگن ءيفاريسين د‑يمسلمدن ن‑شّرع ار‑تّينين: «هان ارگاز‑ان ار‑يشتّا د‑ويلّي أُخشنّين ار‑سرسن‑يتفراح.» ءيساول ياسوع يوت‑اسن لمعنا‑ياد ءيسقسا‑تن: «ما‑را‑يسكر يان گيگون ءيطّافن ميّا ن‑يخف ن‑وولّي ءيغ‑اس‑تجلا يات گيسنت؟ را‑يفل تژا ن‑يد‑مراو د‑تژا (99) فردنت غ‑لخلا، ءيدّو ار‑يسيگّيل س‑تالّي ءيجلان ارد‑ستّ‑ياف. غاكود نّا‑ستّ‑يوفا را‑ستّ‑يد‑ياسي ف‑تغُراض‑نس ءيفرح باهرا، ءيروح‑د تيگمّي ءيغر‑د ءي‑يمدّوكُّال‑نس د‑وادجارن‑نس ييني‑اسن: ‹اشكاد‑د تفرحم ديدي، ها‑يّي ءوفيغ تاهرويت لّي‑يّي‑يجلان.› غمكاد ا‑س‑راد‑اون‑ينيغ، راد‑فرحن ايت‑يگنوان س‑يان‑ن‑يفلن كولّو ما‑يسكار يُخشن يوورّي‑د س‑وغاراس ن‑ربّي ءوگُّار ن‑تژا ن‑يد‑مراو د‑تژا لّي‑غالنين ءيس‑شوان ءور‑تن‑يخصّا اد‑فلن دّنوب‑نسن. «ما‑را‑تسكر‑تمغارت نّا‑يطّافن مراو ن‑وقاريد ن‑نّوقرت ءيغ‑اس‑يجلا يان گيسن؟ را‑تسّرغ لقنديل تارس كولّو تيگمّي ار‑سرس‑تسيگّيل ارد‑تي‑تاف. غاكود نّا‑تي‑توفا را‑دي‑تغر ءي‑تمدّوكُّالين‑نس د‑تادجارين‑نس تيني‑اسنت: ‹اشكامد‑د تفرحمت ديدي، ها‑يّي ءوفيغ اقاريد لّي‑يّي‑يجلان.› غمكاد ا‑س‑راد‑اون‑ينيغ، ار‑تفراحن لمالايكا ن‑ربّي س‑يان‑ن‑يفلن كولّو ما‑يسكار يُخشن يوورّي‑د س‑وغاراس ن‑ربّي.» ءيزايد ياسوع ييني‑اسن: «ها‑يان‑ورگاز دارس سين تاروا. ياشك‑يد غوالّي ءيمژّين ءيضالب‑ت ييني‑اس: ‹وا‑بابا، اد‑يّي‑تفكت غيلاد ما‑يّي‑د‑يوشكان غ‑لوورت.› ءينكر باباس ءيبضو‑اسن ايدا‑نس. زرين كرا ن‑ووسّان، ءيسّمون يوس‑لّي ءيمژّين كولّو ما‑يطّاف، ءيمودّو س‑يات‑تمازيرت ياگّوگن. ار‑يسكار غين س‑شّهوات‑نس ايلّيغ ءيشّا كولّو مايلّي دارس ءيلّان، ءور‑سول‑دارس‑يقاما يات. يوورّي ييلي‑وغني ءيشقان غ‑تمازيرت‑ان، ءيلكم باهرا ف‑ما‑يشتّا. ءيدّو ا‑يخدم غ‑دار يان غ‑يمزدغن ن‑تمازيرت‑ان، يازن‑ت س‑يگران ا‑يكسّا الفان. يوورّي ءيژوژض ا‑يعمّر احليگ‑نس س‑تكيضا لّي‑شتّان‑والفان، والاينّي ءور‑اس‑فكين يات. غ‑يسيگُّرا ءيسوانگم د‑يخف‑نس ييني: ‹ءيخدّامن ن‑بابا كولّوتن ار‑اسن‑د‑بدّا‑يتشاض‑وغروم، ءيمّا نكّي ها‑يّي ار‑تمتاتغ س‑لاژ. راد‑دّوغ غيلاد وورّيغ س‑دار بابا ءينيغ‑اس: وا‑بابا، فّوغّ باهرا زغ‑مايلّي ءيرا ربّي ءولا ما‑تريت كيّي. ءور‑سول‑ستهلّاغ اد‑گغ يوك. سكر گيگي زوند يان زغ‑يخدّامن‑نّك.› ءينكر غاكودان ءيفتو س‑دار باباس. سول‑ن‑ياگّوگ س‑ت‑ين‑يوكُز باباس، ءيحنّو گيس يازّل س‑دارس يامژ‑ت‑يد غ‑گر ءيفاسّن‑نس ار‑ت‑يسّودون. ءيمّا يوس ءينّا‑ياس: ‹وا‑بابا، ها‑نكّي فّوغّ باهرا زغ‑مايلّي ءيرا ربّي ءولا ما‑تريت كيّي. ءور‑سول‑ستهلّاغ اد‑گغ يوك.› والاينّي باباس ءيغرا‑د ءي‑يخدّامن‑نس ييني‑اسن: ‹ازّلات تاويم‑د اسلهام لّي‑يهيّان تسّلسم‑اس‑ت، تگم‑اس تالخاتمت غ‑وضاض‑نس د‑يدوكان غ‑يضارن‑نس، تاويم‑د ءيگيز ءيضنين تغرسم‑اس ا‑نشّ نفرح. اشكو ءيوي لّي‑يمّوتن هاتي ءيدّر، غوالّي ءيجلان هاتي نوفا‑ت.› زايدن فرحن باهرا ءي‑نگراتسن. ءيمّا يوس لّي‑يمقّورن ءيلّا‑ن غ‑يگران غ‑تاساعت‑ان. لّيغ‑د‑يوشكا ياكمور‑د س‑تگمّي ءيسفلد ءي‑وحواش د‑تغوريت، ءيغر‑د ءي‑يان‑وخدّام ءيسقسا‑ت: ‹مايد ءيلّان؟› ييني‑اس: ‹يوشكا‑د گماك. ءيغرس باباك ءي‑يگيز ءيضنين اشكو يوورّي‑د دارس يوس ءور‑ت‑ياغ يات.› غاكودان ءيبزگ طيّر‑اس باهرا ءور‑اكُّ‑يري ا‑يكشم س‑تگمّي. ءيفّوغ‑د باباس ءيضالب‑ت باهرا، ءيمّا نتّا ءيرور‑اس: ‹هاتي منّاو ءيسگُّاسن ايد دارك كّاتغ تامّارا، ار‑بدّا‑سكارغ س‑واوال‑نّك، والاينّي ءور‑جّو‑يّي‑تفكيت واخّا غير تيكروت ا‑سرس‑فرحغ نكّي د‑يمدّوكُّال‑ينو. ءيمّا غيلاد ها‑يوك لّي‑ن‑يشّان كولّو لخير‑نّك د‑تمگّانين، تغرست‑اس ءي‑يگيز ءيضنين.› ءيساول باباس ييني‑اس: ‹وا‑يوي، كيّي تلّيت‑بدّا ديدي. كولّو ماد‑داري‑يلّان ءيگا وينّك. ءيفولكي ا‑نفرح ار‑نشتّا اشكو گماك لّي‑يمّوتن هاتي ءيدّر، غوالّي ءيجلان هاتي نوفا‑ت.› » ءيساول‑داغ ياسوع س‑يمحضارن‑نس ييني‑اسن: «ها‑يان‑ورگاز ءيطّافن ايدا ءيگّوتن، ءيفل‑ت غ‑وفوس ن‑وخدّام‑نس ا‑ت‑يگابل. ءيسفلد بو‑وايدا ف‑وخدّام‑ان ءيس‑ا‑ياس‑يزّمزار ايدا‑نس. ءيغر‑اس س‑دارس ييني‑اس: ‹ما‑يگا غايد مي فلّاك سفليدغ؟ اشك‑يد غيلاد، نحاساب ديدي س‑ما‑تسكرت س‑وايدا‑نو، اشكو ءور‑سول‑ريغ ا‑داري‑تخدمت.› ءيسوانگم‑وخدّام، ييني د‑يخف‑نس: ‹ما‑راد‑سكرغ؟ را‑يّي‑يسّوفغ سيدي. ءور‑دوسغ باش اد‑قّازغ اكال، د‑ور‑رضيغ ا‑تضالابغ مدّن. سّنغ ما‑راد‑سكرغ باش ا‑يّي‑ن‑شّكشامن مدّن س‑دارسن ءيغ‑يّي‑يسّوفغ زغ‑تووري.› يازن ءيلمّا س‑كولّو ويلّي مي ءيضفار سيديس كرا، ءيساول سرسن يان س‑يان. ءيسقسا امزوارو: ‹منشك اد‑اك‑يضفار سيدي؟› ييني‑اس: ‹ميّا ن‑واطّارو ن‑زّيت.› ييني‑اس: ‹ها‑لحساب‑نّك، سكيوس غيل غيل تارات گيس سمّوس ءيد‑مراو ن‑واطّارو.› ءيسقسا وايّاض: ‹منشك اد‑اك‑يضفار؟› ييني‑اس: ‹ميّا ن‑وتلّيس ن‑يردن.› ييني‑اس: ‹ها‑لحساب‑نّك، ارا گيس تام ءيد‑مراو ن‑وتلّيس.› غاكودان يولغ بو‑وايدا اخدّام‑نس‑لّي يُخشنّ، اشكو ءيسوانگم باهرا غ‑مايد ءيسكر. اشكو ار‑سوينگيمن ايت‑دّونيت‑اد غ‑تغاوسيوين‑نسن ءوگُّار ن‑ايت‑تيفاوت. راد‑اون‑ينيغ، سكارات‑اون ءيمدّوكُّال س‑وايدا ن‑دّونيت‑اد، ا‑كُن‑ين‑شّكشمن س‑تگُمّا لّيخرت غاكود نّا‑يتمّا‑وايدا. «يان ءيسكارن لحقّ س‑تغاوسيوين مژّينين را‑ت‑يسكر ءولا س‑تغاوسيوين مقّورنين. يان ءيتفّوغن زغ‑لحقّ س‑تغاوسيوين مژّينين را‑زگيس‑يفّوغ ءولا س‑تغاوسيوين مقّورنين. ءيغ‑ور‑تسكيرم س‑نّييت س‑وايدا ن‑دّونيت‑اد ما‑را‑يفل غ‑وفوس‑نّون مايلّي ءيهيّان س‑وگُّار؟ ءيغ‑ور‑تسكيرم س‑نّييت س‑ما‑يگان وين وييّاض ما‑راد‑اون‑يفك ما‑يگان وينّون؟ «ءور‑را‑ييژضار يان ا‑يقاسا سين ءيد‑سيديس. ءيمّا را‑يكرهو يان ييري وايّاض، نغد را‑يتوقّار يان ءيحگر وايّاض. ءور‑را‑تيژضارم ا‑تگم ءيسمگان ن‑ربّي د‑وين‑وايدا.» لّيغ سفلدن ءيفاريسين ءي‑كولّو مايد ءينّا ياسوع ار‑گيس‑تطناژن، اشكو نتني عزّان دارسن ءيقاريدن. ءيمّا نتّا ءيرور‑اسن: «ها‑كونّي ار‑تمالام ءيخفاون‑نّون غ‑لگدّام ن‑مدّن باش ا‑فلّاون‑تّينين تفولكيم، والاينّي ربّي ءيسّن ما‑يلّان غ‑وولاون‑نّون. اشكو غايلّي ءيعزّان دار مدّن، تاجلخيت ا‑يگا دار ربّي. «ءيكّا‑تّين شّرع ن‑موسا ءولا لانبيا ار‑مالان ءي‑مدّن ما‑يرا ربّي ايلّيغ‑د‑يوشكا يوحانّا امسدّام. ءيمّا غيلاد غ‑ا‑تبرّاحغ س‑لخبار ءيفولكين ن‑تگلديت ن‑ربّي، مّاغن كولّو مدّن ا‑سرس‑كشمن. والاينّي را‑يرخو اد‑يتّين ءيگنوان د‑واكال ءولا تيتّي يات‑تنقيطّ زغ‑شّرع. وانّا ءيفران ءي‑تمغارت‑نس ءيتاهل يات ياضني، هاتي ءيزنا. د‑وانّا ءيتاهلن تانّا ءيفران، ءولا نتّان زّنا ايان ءيسكر. «ها‑يان‑ورگاز ءيطّافن ايدا ءيگّوتن، ار‑يلسّا اسلهام اژگُّاغ د‑تملسا شوانين، ار‑يشتّا ار‑يسّا ءيفرح د‑يخف‑نس كرايگاتّ اسّ. ييلي‑داغ يان‑ومژلوض ءيسم‑نس ليعازر، ار‑د‑يتّروس غ‑يمي ن‑تگمّي ن‑ورگاز‑ان. يوضن س‑يحبّا گّوتنين، ءيژوژض ا‑يشّ اينّا‑د‑يطّارن زغ‑لميدا ن‑بو‑وايدا. ءولا ءيضان ار‑سرس‑تّيدون ار‑تلّحن ءيحبّا‑نس. ءيمّت‑يلمّا‑ومژلوض‑لّي، اسين‑ت لمالايكا س‑تاما ن‑يبراهيم. ءيمّت بو‑وايدا ءيتياومضال، ءيرفوفن باهرا غ‑ودغار ن‑ويلّي مّوتنين. يالّ الّن‑نس ءيژر‑ن ءيبراهيم غ‑توگّوگت ءيژر‑ن ليعازر غ‑تاما‑نس، ءيغر‑اس: ‹وا‑بابا ءيبراهيم، حنّو گيگي. ها‑يّي غ‑لعافيت‑اد ار‑باهرا‑ترفوفونغ. ازن ليعازر ا‑د‑يسّايك اضاض‑نس امان، ءيسّيلويغ ءيلس‑ينو.› ءيرار‑اس ءيبراهيم: ‹كتي‑د ا‑يوي ءيس‑تومژت تيميخار‑نّك غ‑دّونيت، يامژ ليعازر تارفوفنت. ءيمّا غيلاد ءيفرح ليعازر غيد، ترفوفنت كيّي. راد‑اك‑ينيغ، تلّا يات تالات ءيدران غ‑گراتنّغ ديدون. تّياوسكار ءي‑غمكاد، ا‑ن‑ور‑بّين غويد رانين ا‑ن‑بّين زغ‑دارنّغ س‑دارون، ءولا ءيژضار يان ا‑د‑يبّي زغ‑دارون س‑دارنّغ.› ييني‑اس بو‑وايدا: ‹وا‑بابا ءيبراهيم، والاينّي ضالبغ زغ‑گيك ا‑تازنت ليعازر س‑تگمّي ن‑بابا، اشكو لّان سول غين سمّوس ايتما، اد‑اسن‑ييني ا‑ور‑سكارن زوند نكّي، ا‑ور‑د‑كشمن ءولا نتني س‑ودغار‑اد ن‑ورفوفن ءيگّوتن.› ءيرار‑اس ءيبراهيم: ‹ايتماك، لّان‑دارسن‑وارّاتن ن‑موسا ءولا وين لانبيا. ءيلّا فلّاسن اد‑سفليدن ءي‑ما‑تّينين نتني.› ييني‑اس بو‑وايدا: ‹ءوهو ا‑بابا ءيبراهيم، والاينّي ءيغ‑ن‑دارسن‑يوشكا كرا ن‑يان زغ‑گر غويلّي مّوتنين راد‑فلن دّنوب‑نسن وورّين س‑وغاراس ن‑ربّي.› ءيرار‑اس ءيبراهيم: ‹ءيغ‑ور‑ا‑سفليدن ءي‑موسا ءولا لانبيا ءور‑راد‑وورّين، واخّا‑د‑اكُّ‑ينكر كرا ن‑يان زغ‑لموت.› » ءيساول ياسوع س‑يمحضارن‑نس ييني‑اسن: «ءيقّان‑د اد‑يلينت تابايضّرين ما‑يسّطارن مدّن، والاينّي تاگوضي ا‑را‑ييلي ءي‑وانّا‑تنت‑ين‑يسراسن. يوف‑اس ءيغ‑اس‑يتياگّال‑وژرو ن‑وزرگ غ‑ومگّرض‑نس ءيتياوگار‑ن غ‑ومدا، ءولا ءيسّضر يان زغ‑يمژّيين‑اد. اويات‑ستّ غ‑يخف‑نّون. ءيغ‑يسكر گماك كرا يُخشنّ، ساول سرس باش ا‑ور‑ت‑سول‑يسكر. ءيغ‑تُگراژ گماك ءيفل لخُشانت‑ان، صامح‑اس. ءيغ‑ا‑ياك‑يسكار لخُشانت سّا ن‑توال غ‑يان‑واسّ ار‑د‑يتّاشكي سّا ن‑توال ار‑اك‑يتّيني: ‹تُگراژ‑يّي ف‑ماد‑سكرغ، ءور‑سول‑را‑ت‑سكرغ،› ءيلّا فلّاك اد‑اس‑تّصاماحت.» ءينين‑اس ءيرقّاسن‑نس: «عاون‑اغ ا‑نزايد نامن س‑وگُّار.» ءيرار‑اسن سيديتنّغ: «مراد ءيس‑گيگون‑يلّا ليمان ءونشك ن‑تاقّايت ءيمژّين لّخردل، را‑تينيم ءي‑تسغارت‑اد ن‑يمرشيق ‹اكوف تّياوژّات‑ن غ‑ومدا› را‑تسكر س‑ماد‑اس‑تنّام. «ما‑را‑تسكرت ءيغ‑دارك‑يلّا يان‑وخدّام ار‑يكّرز نغد ار‑يكسّا ءولّي؟ ءيغ‑د‑يوورّي زغ‑يگران ءيس‑راد‑اس‑تينيت: ‹ها‑يمنسي‑نّك، گاور تسونفوت ار‑تشتّات›؟ ءوهو، راد‑اس‑تينيت: ‹سكر‑يّي ءيمنسي‑نو، تبكيست ار‑فلّا‑تّسخّارت، ارد شّغ سوغ نكّي غاكودان ا‑را‑تشّت ءولا كيّي تسوت.› ءور‑را‑تالغم اخدّام‑ان ف‑مايد ءيسكر، اشكو ءور‑يسكير ابلا تاووري لّي‑ف‑ت‑يوصّا سيديس. ءولا كونّي، غاكود لّيغ تسكرم كولّو ما‑ف‑كُن‑يوصّا سيديتون ءيقّان‑كُن‑د ا‑تينيم: ‹ءيخدّامن كا‑نگا زوند وييّاض. ءور‑نسكير ابلا مايلّي فلّانّغ ءيلّان.› » ءيزايد ياسوع غ‑وغاراس ن‑وروشاليم، ءيزري غ‑گر‑تميزار ن‑ساميرا د‑جاليل، ءيلكم يان‑ودوّار. مناگّارن‑ت‑يد مراو ءينجدامن. بيدّن‑ين غ‑توگّوگت، الّن اوال‑نسن ار‑تّينين: «وا‑ياسوع، وا‑سيدي، حنّو گينّغ.» لّيغ‑تن‑يژرا ياسوع ييني‑اسن: «دّوات تملم ءيخفاون‑نّون ءي‑ينمغورن ن‑تگمّي ن‑ربّي.» غاكودان، لّيغ فتان غوسن. يان گيسن، لّيغ ءيژرا ءيخف‑نس ءيجّي، يوورّي‑د يالّ اوال‑نس ار‑يتالغ ربّي، ءيضر ف‑وودم‑نس غ‑دار ءيضارن ن‑ياسوع ار‑ت‑يتشكار. ءيگا نتّا گو‑ساميرا. ءيساول ياسوع ييني: «ءيس‑ورد مراو ا‑يغوسن؟ مانزا تژا ياضني؟ ءيس‑ور‑يلّي ما‑د‑يوورّين ا‑يشكر ربّي ابلا ابرّاني‑اد؟» ييني‑اس ءيلمّا: «نكر، مون د‑وغاراس‑نّك. ها‑كيّي تومنت، مايان ا‑ف‑تغوست.» اشكين‑د كرا ن‑يفاريسين سقسان ياسوع: «ماناگو ا‑را‑دي‑تاشك‑تگلديت ن‑ربّي؟» ييني‑اسن: «تاگلديت ن‑ربّي، ءور‑را‑دي‑تبان ءي‑يژري ن‑مدّن ا‑ستّ‑سّماقّلن. ءور‑را‑ييژضار يان ا‑ييني ‹هاتّي› نغد ‹هاتّين› اشكو تاگلديت ن‑ربّي، امّاس‑نّون ا‑غ‑تلّا.» ييني ءيلمّا ءي‑يمحضارن‑نس: «را‑د‑ياشك‑وزمز لّي‑غ‑را‑تژوژضم باهرا ا‑تژرم يان‑واسّ غ‑ووسّان ن‑يوس ن‑بنادم، ءور‑را‑تي‑تژرم. راد‑نكرن مدّن ءينين‑اون ‹هاتين› نغد ‹هاتي›. والاينّي راد‑اون‑ينيغ، ا‑ور‑دارسن‑تدّوم ءولا تضفورم‑تن. اشكو غمكلّي كّاتن‑ووسمانّ زغ‑يات‑تسگا ن‑يگنوان ءيسفيون‑ين ءي‑تسگا ياضني، غمكان ا‑راد‑د‑اشكغ نكّي لّي‑يگان يوس ن‑بنادم غ‑واسّ‑ينو. والاينّي ءيقّان‑يّي‑د زوار ا‑باهرا‑رفوفنغ، لوحن‑يّي‑ن مدّن ن‑تاسوت‑اد. زوند غايلّي ءيلّان غ‑ووسّان ن‑نوح ا‑را‑ييلي غ‑ووسّان‑ان غ‑را‑د‑ياشك يوس ن‑بنادم. ار‑شتّان مدّن ار‑سّان ار‑تّاهالن ار‑تّاهالنت ار اسّ لّي‑غ‑يكشم نوح س‑واناو غلين‑د‑سرسن‑وامان گّوتنين تياوهلاكن كولّوتن. راد‑داغ‑ييلي غمكلّي ءيلّان غ‑ووسّان ن‑لوط. ار‑شتّان ار‑سّان ار‑ساغن ار‑زّنزان ار‑تژّون ار‑بنّون، والاينّي غ‑واسّ لّي‑غ‑يفّوغ لوط تامدينت ن‑سادوم تضر‑د لعافيت د‑لكبريت زغ‑يگنوان تياوهلاكن كولّوتن. غمكان ا‑را‑د‑داغ‑ييلي غ‑واسّ لّي‑غ‑را‑د‑يبان يوس ن‑بنادم. «ءيمّا غاسّان، راد‑اون‑فلّاس‑ينيغ: وانّا ءيلّان غ‑يگّي ن‑تگمّي، ءيقّان‑ت‑يد ا‑ور‑يگّوز ا‑د‑ياسي تيغاوسيوين‑نس زغ‑تگمّي. ءولا وانّا‑ن‑يلّان غ‑يگران، ا‑ور‑يوورّي ا‑د‑ياوي كرا. سوانگماد‑د ما‑يجران ءي‑تمغارت ن‑لوط. وانّا ءيسيگّيلن ا‑يجّنجم تودرت‑نس را‑ستّ‑يجلو. د‑وانّا ءيجلان تودرت‑نس را‑ستّ‑يجّنجم. راد‑اون‑ينيغ، غ‑يض‑ان راد‑يلين سين مدّن غ‑تيسي، را‑ييتّي يان ءيقاما يان. راد‑يلينت سنات‑تمغارين ار‑ژّاضنت، را‑تيتّي يات تقاما يات.» سقسان‑ت ءيمحضارن‑نس: «وا‑سيدي، مانيغ ا‑را‑ييلي ماياد؟» ييني‑اسن: «ءينّاغ ءيلّا ميضروس ا‑غ‑ا‑ن‑تمونون ءيگادرن.» ءيساول ياسوع س‑يمحضارن‑نس، ييري اد‑اسن‑يمل ءيس‑تن‑د‑يقّان ا‑بدّا‑تژالّان بلا‑دا‑ترماين. يوت‑اسن لمعنا‑ياد، ييني‑اسن: «ها‑يا‑لّقاضي غ‑يات‑تمدينت، ءور‑يكسوض ربّي ءولا‑دا‑ستّ‑يتاوي غ‑مدّن. تيلي يات‑تهجّالت غ‑تمدينت‑ان ار‑بدّا‑تسّمومُّي غ‑دار لقاضي ار‑اس‑تّيني: ‹فوكّو‑يّي زغ‑ونوّاش‑ينو.› منّاو‑ووسّان ءور‑يري لقاضي اد‑اس‑يسفلد، ءيميل ييني د‑يخف‑نس: ‹تاهجّالت‑اد ار‑بدّا‑يّي‑تسّيحيل. واخّا ءور‑كسوضغ ربّي ءولا‑دا‑ستّي‑تاويغ غ‑مدّن را‑ستّ‑فوكّوغ، ا‑ور‑سول‑دي‑تّاشكي اد‑يّي‑ترژ ءيخف.› » ييني‑اسن سيديتنّغ: «غمكاد ا‑س‑ينّا لقاضي‑ان يُخشنّ، ءيمّا ربّي ءيس‑ور‑را‑يفوكّو مدّن‑نس لّي‑اس‑اقرانين غ‑ييض ءولا ازال؟ ءيس‑را‑يماطل اد‑اسن‑يفك مايلّي زغ‑گيس ضالبن؟ راد‑اون‑ينيغ، را‑تن‑يفوكّو حاينا. والاينّي غاسّان غ‑راد‑د‑وورّيغ س‑دّونيت‑اد نكّي لّي‑يگان يوس ن‑بنادم، ءيس‑راد‑د‑افغ ما‑سول‑يومنّ؟» ءيزايد ياسوع ءيساول س‑كرا ن‑مدّن لّي‑يعجب ءيخف‑نسن، غالن ءيس‑فولكين ار‑تحگارن وييّاض. يوت‑اسن لمعنا‑ياد ييني‑اسن: «ها‑سين مدّن كشمن س‑تگمّي ن‑ربّي اد‑ژّالّن. يان ءيگا افاريسي، ءيگ وايّاض بو‑نكّاس. ءيبيدّ‑وفاريسي واحدوت، ءيژّالّ د‑يخف‑نس ييني: ‹وا‑ربّي، ار‑ك‑تشكارغ اشكو ءور‑گيغ زوند مدّن ياضني. نتني ار‑تاكُرن ار‑تغُشّان ار‑تفسادن. ار‑ك‑تشكارغ اشكو ءور‑اكُّ‑گيغ زوند بو‑نكّاس‑اد. ها‑يّي ار‑تاژومغ كرايگاتّ كراض‑ووسّان، ار‑اكّاغ تيس مراوت ن‑كولّو ما‑داري‑يلّان.› ءيمّا بو‑نكّاس، ءيبيدّ‑ن غ‑تغوردين. ءور‑يژضار ا‑يالّ الّن‑نس س‑يگّي. ار‑يكّات ف‑يدمارن‑نس ار‑يتّيني: ‹وا‑ربّي صامح‑يّي، ءيگّوت ماد‑سكرغ يُخشن.› راد‑اون‑ينيغ، لّيغ وورّين س‑تگُمّا‑نسن، بو‑نكّاس‑ان ا‑ف‑يرضا ربّي، ءورد افاريسي. اشكو وانّا ءيسّيمغورن ءيخف‑نس را‑ت‑يژّيمژاي ربّي، ءيمّا وانّا ءيژّيمژاين ءيخف‑نس را‑ت‑يسّيمغور.» ار‑دي‑تّاشكين مدّن ار‑دي‑تاوين تاروا مژّينين ءي‑ياسوع، ءيرين ا‑ن‑فلّاسن‑يسرس ءيفاسّن‑نس ءيبارك‑تن. لّيغ ژران ءيمحضارن‑نس مايد سكارن، رارن‑تن ءينين‑اسن: «ا‑تن‑د‑ور‑تاويم.» ءيمّا ياسوع ءيغرا‑د ءي‑تاروا س‑دارس ييني: «ادجات تاروا مژّينين ا‑د‑داري‑اشكين. ا‑تن‑ور‑تحصارم، اشكو زوند غويد ا‑مي‑تلّا‑تگلديت ن‑ربّي. لحقّ ا‑راد‑اون‑ينيغ، وانّا ءور‑يرين ا‑يكشم س‑تگلديت ن‑ربّي زوند ارّاو ءيمژّين ءور‑را‑سرس‑يكشم.» ياشك‑يد يان‑ونمغور ن‑تمازيرت‑ان، ءيسقسا ياسوع ييني‑اس: «واي‑امسلمد ءيفولكين، ما‑راد‑سكرغ باش اد‑طّافغ تودرت لّيخرت؟» ءيساول ياسوع ييني‑اس: «ماخ ايلّيغ‑يّي‑تگيت د‑واد ءيفولكين؟ ءور‑يلّي يان ءيفولكين ابلا ربّي واحدوت. كيّي تسّنت لوصيّات، ‹ا‑ور‑تزنوت، ا‑ور‑تنغت، ا‑ور‑تاكُرت، ا‑ور‑تفكت توگّا ن‑تكركاس. اوي‑تّ غ‑باباك د‑ينّاك.› » ييني‑اس‑ونمغور: «ماياد كولّوت ار‑ت‑سكارغ زغ‑لّيغ مژّيغ سول س‑غيلاد.» لّيغ ءيسفلد ياسوع ءي‑ماياد ييني‑اس: «يات‑تغاوسا اد‑اك‑يقامان. زايد تزّنزت كولّو ماد‑دارك‑يلّان تفكت‑ت ءي‑يمژلاض، ييلي‑اك‑وايدا غ‑يگنّا. تاشكيد‑د ءيلمّا تمونت ديدي.» ءيمّا نتّا لّيغ ءيسفلد ءي‑واوال‑اد تُگراژ‑ت باهرا اشكو ءيگّوت‑دارس‑وايدا. ياسوع ءيژرا ءيس‑تي‑تُگراژ، ييني‑اسن: «منشك ا‑س‑يشقا ف‑ويلّي دار ءيگّوت‑وايدا اد‑كشمن س‑تگلديت ن‑ربّي. را‑يرخو ف‑ورعام ا‑يكشم زغ‑تيط ن‑تاسمي ءولا ءيكشم يان دار ايدا ءيگّوتن س‑تگلديت ن‑ربّي.» ءينين‑اس غويلّي‑اس‑سفلدنين: «ءيغ‑يگا غمكاد، ما‑را‑ييژضار ا‑ينجم؟» ييني‑اسن ياسوع: «اينّا مي ءور‑يژضار بنادم، ءيژضار‑اس ربّي.» ءيساول بطرُس ييني‑اس: «ها‑نكُّني نفل‑ن تيگُمّا‑نّغ ناشك‑يد نمون ديدك.» ييني‑اسن ياسوع: «لحقّ ا‑راد‑اون‑ينيغ، وانّا‑ن‑يفلن تيگمّي‑نس نغد تامغارت‑نس نغد ايتماس نغد باباس نغد ءينّاس نغد تاروا‑نس ف‑سّيبت ن‑تگلديت ن‑ربّي، راد‑اس‑ييلي ماد‑باهرا‑يوگُرن ماياد غ‑دّونيت‑اد، تيلي‑اس غ‑ليخرت تودرت ءيدومن.» ياوي ياسوع سين د‑مراو ن‑ومحضار‑نس واحدوتن، ييني‑اسن: «ژرات، را‑ندّو س‑وروشاليم، ءيجرو غين كولّو ماد‑وران لانبيا ف‑يوس ن‑بنادم. را‑يّي‑دحين س‑گر ءيفاسّن ن‑يبرّانيين، طنژن گيگي رگمن‑يّي سّوفسن فلّا. را‑يّي‑سّغورشن نغن‑يّي، نكرغ‑د ءيلمّا زغ‑لموت غ‑ويس كراض‑ووسّان.» ءيمّا ءيمحضارن‑نس ءور‑فهيمن تيغاوسيوين‑اد. ءور‑سّينّ ما‑يرا اد‑اسن‑ييني، تنتل فلّاسن لمعنا. ياكمور‑د ياسوع س‑تمدينت ن‑اريحا. ءيلّا غين يان‑وبوكاض ءيگاور غ‑تاما ن‑وغاراس ار‑يتضالاب. ءيسفلد ءي‑مدّن گّوتنين ار‑زراين غ‑وغاراس ءيسقسا‑تن ف‑ما‑يلّان. ءينين‑اس: «ياسوع گو‑ناصيرا ايد ءيزرين.» يالّ اوال‑نس غاكودان ءيغر‑اس ييني: «وا‑ياسوع يوس ن‑داود، حنّو گيگي.» گراولن مدّن لّي‑بيدّنين غ‑لگدّام‑نس، اكُين گيس ءينين‑اس ا‑يفسّا. ءيمّا نتّا ءيزوويد ار‑يتغوّات ار‑يتّيني: «وا‑يوس ن‑داود، حنّو گيگي.» ءيبيدّ ياسوع ييني ءي‑مدّن‑ان ا‑ت‑يد‑اوين س‑دارس. لّيغ‑ت‑يد‑يروح‑وبوكاض ءيسقسا‑ت ياسوع: «ما‑تريت اد‑اك‑ت‑سكرغ؟» ييني‑اس: «ا‑سيدي، اد‑يسفيوغ.» ييني‑اس ياسوع: «ءيسفيو غيلاد، ها‑كيّي تجّيت اشكو تومنت.» ييسفيو غاكودان ءيضفور ياسوع غ‑وغاراس ار‑يتالغ ربّي. مدّن‑ان كولّوتن، لّيغ‑ت‑ژران الغن ربّي باهرا. ءيزايد ياسوع ءيكشم س‑تمدينت ن‑اريحا، ءيفتو غ‑وامّاس‑نس. ييلي غين يان‑ونمغور ن‑ويلّي تامژنين ءيقاريدن ن‑نكّاس، ءيگ ءيسم‑نس زاكّا، ءيگّوت‑دارس‑وايدا. ءيرا باهرا ا‑يژر ياسوع والاينّي گّوتن مدّن غين، ءور‑يژضار ا‑ت‑ين‑يژر اشكو ءيگزّول. ار‑يتازّال ءيزوور مدّن، ءيغلي س‑يات‑تسغارت ن‑يمرشيق ا‑يژر ياسوع، اشكو غين ا‑زغ‑را‑يزري. لّيغ‑ت‑ين‑يلكم ياسوع يالّ الّن‑نس ييني‑اس: «وا‑زاكّا، گّوز‑د غيل غيل، اشكو غ‑تگمّي‑نّك ا‑غ‑راد‑گاورغ غاسّاد.» ءيگّوز‑د زاكّا حاينا، ءيفرح باهرا ءيشّكشم ياسوع س‑دارس. لّيغ‑ت‑ژران مدّن‑ان گّوتنين، ار‑كولّو‑تنگموگن ءي‑نگراتسن ار‑تّينين: «هاتي ءيكشم ا‑يگ انبگي غ‑دار بو‑دّنوب‑اد.» ءيمّا زاكّا ءينكر ءيبيدّ ف‑يضارن‑نس ييني ءي‑سيديتنّغ: «غيلاد ا‑سيدي، راد‑فكغ مناصّ ن‑وايدا‑نو ءي‑يمژلاض. ءيغ‑شّيغ كرا ن‑يان س‑لغُشّ راد‑اس‑ت‑رارغ ف‑كّوژط‑توال.» ءيساول ياسوع ييني‑اس: «غاسّاد ءيلكم‑د‑وجنجم ن‑ربّي تيگمّي‑اد، اشكو يومن غواد ءولا نتّا غمكلّي يومن باباتنّغ ءيبراهيم. ءوشكيغ‑د نكّي لّي‑يگان يوس ن‑بنادم اد‑سيگّلغ س‑ويلّي جلانين جّنجمغ‑تن.» ءيزايد ياسوع ءيساول س‑مدّن لّي‑اس‑سفليدنين، يوت‑اسن لمعنا‑ياد اشكو ياكمور س‑تمدينت ن‑وروشاليم. غالن نتني ءيزد غ‑ووسّان‑ان ا‑غ‑را‑دي‑تبان‑تگلديت ن‑ربّي. ييني‑اسن: «ها‑يان‑ورگاز ءيگا يوس ن‑تگمّي ءيمقّورن، ءيسكر ف‑ا‑يمودّو س‑يات‑تمازيرت ياگّوگن، باش اد‑اس‑فكن لحقّ ا‑يحكام تامازيرت‑نس يوورّي‑د ءيگ فلّاس اگلّيد. لّيغ ءور‑تا‑يدّي ءيغرا‑د ءي‑مراو ءيخدّامن‑نس س‑دارس، ءيفك ءي‑كرايگاتّ يان گيسن يان‑وقاريد ن‑وورغ، ييني‑اسن: ‹زايدات ار‑تساغم ار‑تزّنزام ارد‑د‑وورّيغ.› ءيمّا ارگاز‑ان، ار‑تي‑تكرهون ايت‑تمازيرت‑نس، ازنّ ءيرقّاسن س‑تمازيرت‑لّي ياگّوگن ار‑تّينين: ‹ءور‑نري ارگاز‑اد ا‑فلّانّغ‑يحكام.› ءيزري ما‑يزرين س‑اس‑يتياوفكا ا‑يگ اگلّيد، يوورّي ءيلمّا س‑تمازيرت‑نس. ءيغر‑د ءي‑يخدّامن لّي‑مي‑يفكا ءيقاريدن ا‑دارس‑كشمن اد‑اس‑ينين منشك اد‑د‑سرسن‑رورن. ءيكشم‑ومزوارو ييني‑اس: ‹اقاريد‑نّك ا‑سيدي، رورغ‑د سرس مراو ءيقاريدن ياضني نّيگاس.› ييني‑اس‑وگلّيد: ‹ءيشوا. اخدّام ءيفولكين ا‑تگيت. تسكرت س‑لمعقول س‑مايد ءيدروسن. را‑ك‑گغ غيلاد د‑لحاكم ف‑مراوت‑تمدينين.› ءيكشم ويس سين ييني‑اس: ‹اقاريد‑نّك ا‑سيدي، رورغ‑د سرس سمّوس ءيقاريدن ياضني نّيگاس.› ييني‑اس‑وگلّيد: ‹را‑ك‑گغ د‑لحاكم ف‑سمّوست‑تمدينين.› ءيكشم وايّاض ييني‑اس: ‹هاي‑اقاريد‑نّك ا‑سيدي. حضيغ‑ت غ‑يات‑تومُّيست. كسوضغ زغ‑گيك اشكو سّنغ ءيزد ارگاز ءيشقان ا‑تگيت، ار‑دي‑تّاسيت ما‑ور‑ن‑تسرست ار‑دي‑تمگّرت ما‑ور‑تكرزت.› ييني‑اس سيديس: ‹واي‑اخدّام يُخشنّ، س‑واوال‑اد تنّيت ا‑س‑راد‑فلّاك‑حكامغ. تسّنت ءيزد ارگاز ءيشقان اد‑گيغ، ار‑دي‑تاسيغ ما‑ور‑ن‑سرسغ ار‑د‑مگّرغ ما‑ور‑كرزغ. ماخ ايلّيغ ءور‑ن‑تگيت اقاريد‑ينو غ‑لبانك، اكود نّا‑د‑وورّيغ امژغ‑ت‑يد نتّا د‑ما‑د‑يرور ءيكّا نّيگاس؟› ييني‑وگلّيد ءي‑ويلّي ن‑تاما‑نس: ‹كّيسات‑اس اقاريد‑ان تفكم‑ت ءي‑والّي دار مراو ءيقاريدن.› ءينين‑اس: ‹ها‑نتّا مراو اد‑دارس‑يلّان، ا‑سيدي.› ءيرار‑اسن: ‹راد‑اون‑ينيغ، وانّا دار ءيلّا، راد‑اس‑يتياوفكا ءوگُّار. ءيمّا وانّا ءور‑دار‑يلّي، راد‑اس‑يتياوكّاس ءولا ما‑دارس‑يلّان. ءيمّا ءينوّاشن‑ان‑ينو لّي‑ور‑رينين اد‑گغ اگلّيد‑نسن، اويات‑تن‑د تنغم‑تن غ‑لگدّام‑ينو.› » لّيغ ءيكمّل ياسوع ءيواليون‑اد، ءيزايد غ‑وغاراس ن‑وروشاليم ءيزوور‑اسن. لّيغ ءيلكم اورير ن‑زّيتون غ‑تسگا ن‑بيتفاجي د‑بيتعانيا، يازن سين زغ‑يمحضارن‑نس ييني‑اسن: «زايدات س‑ودوّار‑ان لّگدّام‑نّون. كشمات سرس، را‑ن‑تافم يان‑وسنوس ءيقّنّ ءور‑جّو‑فلّاس‑يني يان. فسيات‑اس تاويم‑ت‑يد س‑غيد. ءيغ‑كُن‑يسقسا كرا ن‑يان ماخ اد‑اس‑تفسّيم، تينيم‑اس: ‹ءيرا‑ت سيديتنّغ.› » دّون ءيرقّاسن‑لّي افن‑ين كولّو مايلّي‑س‑اسن‑ينّا ياسوع. لّيغ فسّين ءي‑وسنوس، ءينين‑اسن ءيد‑باب‑نس: «ماخ ا‑تفسّيم ءي‑وسنوس‑اد؟» ءينين‑اسن: «ءيرا‑ت سيديتنّغ.» اوين‑د اسنوس ءي‑ياسوع. گرن‑ين فلّاس ءيسلهامن‑نسن، سّنين ياسوع. ءيسّودو غ‑وغاراس، اشكين‑د مدّن ار‑سّوان ءيسلهامن‑نسن غ‑واكال غ‑لگدّام‑نس. لّيغ ءيلكم اگسار ن‑وورير ن‑زّيتون، ياكمور‑ن س‑تمدينت، فرحن كولّو ءيمحضارن‑ان گّوتنين، ار‑تالّن اوال‑نسن ار‑تالغن ربّي ف‑كولّو تيغاوسيوين لّي‑ژران مقّورنت ار‑تّينين: «امباركي ا‑يگا‑وگلّيد‑اد‑د‑يوشكان س‑يسم ن‑سيدي ربّي. سّلامت غ‑يگنّا د‑لمجد غ‑تاتّويت.» ساولن سرس كرا ن‑يفاريسين زغ‑گر مدّن‑ان ءينين‑اس: «واي‑امسلمد، ءيني ءي‑يمحضارن‑نّك اد‑فسّان.» ءيرار‑اسن ياسوع: «راد‑اون‑ينيغ، ءيغ‑فسّان غويد، راد‑وتن ءيژران‑اد تاغوريت.» لّيغ‑ن‑ياكمور ياسوع س‑تاما ن‑وروشاليم ءيسّماقّل‑ن گيس ار‑يالّا، ييني‑اس: «مراد ءيس‑تسّنت اغاراس ن‑سّلامت غاسّاد، والاينّي ءينتل فلّام. راد‑د‑اشكين‑ووسّان غ‑را‑كم‑د‑لكمن ءينوّاشن‑نّم، سوتلن‑ام اشبار رگلن فلّام، حصارن‑كم زغ‑كرايگاتّ تاسگا. را‑كم‑خلون د‑تاروا‑نّم گيم، ءور‑را‑گيم‑فلن اژرو ف‑وايّاض، اشكو ءور‑تريت ا‑تيسّانت ءيزد غ‑وزمز‑اد ا‑غ‑يسكر ربّي ف‑ا‑كم‑يجّنجم.» ءيكشم ياسوع س‑تگمّي ن‑ربّي، ءينكر ار‑زگيس‑يطّاي غويلّي گيس زّنزانين، ييني‑اسن: «هان ءيتيارا غ‑وارّا ن‑ربّي ‹تيگمّي‑نو را‑تگ تيگمّي ن‑تژالّيت› ءيمّا كونّي، هاتي ترورم‑تّ تگا ءيفري ن‑يمخّارن.» كرايگاتّ اسّ ار‑يسّلماد غ‑تگمّي ن‑ربّي. ءيمّا ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن ن‑تمازيرت‑ان ار‑سيگّيلن مامنك ا‑س‑را‑ت‑هلكن. والاينّي ءور‑وفين مامنك، اشكو مدّن كولّوتن ار‑باهرا‑تّيرين اد‑سفليدن ءي‑يواليون‑نس. يان‑واسّ ءيلّا ياسوع غ‑تگمّي ن‑ربّي ار‑يسّلماد مدّن ار‑اسن‑يتبرّاح س‑لخبار ءيفولكين. اشكين‑د ءينمغورن ن‑تگمّي ن‑ربّي د‑يمسلمدن ن‑شّرع د‑يمغارن. لكمن‑د ياسوع سقسان‑ت: «ءيني‑اغ، ما‑ك‑يد‑يوزنّ ا‑تسكارت كولّو غاياد؟ اوال ن‑مي ايد‑س‑ا‑تي‑تسكارت؟» ءيساول ياسوع ييني‑اسن: «ءولا نكّي را‑كُن‑سقساغ يان‑وسقسي. ءينيات‑يّي، يوحانّا امسدّام، ما‑ت‑يد‑يوزنّ ا‑يسّدّام مدّن؟ ءيزد ربّي نغد بنادم؟» بدون ار‑سّمقسان ءي‑نگراتسن ار‑تّينين: «ما‑راد‑اس‑نيني؟ اشكو ءيغ‑ننّا ‹ربّي ا‑ت‑يد‑يوزنّ› راد‑اغ‑ييني ‹ماخ ايلّيغ ءور‑تومينم ماد‑اون‑ينّا؟› والاينّي ءيغ‑ننّا ‹بنادم ا‑ت‑يد‑يوزنّ› راد‑اغ‑كّاتن كولّو مدّن‑اد س‑يژران، اشكو ار‑تّينين نتني ءيزد س‑صّاحت يوحانّا يان‑نّابي ا‑يگا.» ساولن ءيلمّا ءينين‑اس: «ءور‑نسّين ما‑ت‑يد‑يوزنّ.» ءيرار‑اسن ياسوع: «ءولا نكّي ءور‑راد‑اون‑ينيغ ما‑يّي‑د‑يوزنّ اد‑سكارغ كولّو ماياد.» ءيساول ياسوع س‑مدّن، يوت‑اسن لمعنا‑ياد ييني‑اسن: «ها‑يان‑ورگاز ءيژّا اضيل غ‑يگر‑نس. ءيفل‑ت ءي‑يخمُّاصن، ءيفتو ءيمودّو س‑تمازيرت ياضني ءيگاور‑ن غين. لّيغ‑د‑يروح‑وزمز يازن يان‑وخدّام‑نس س‑دار ءيخمُّاصن، اد‑اس‑د‑فكن ما‑ت‑يد‑يوشكان غ‑لغلّت ن‑يگر‑نس. والاينّي ءيخمُّاصن غوين اخدّام‑ان، سّغورشن‑ت رارن‑ت بلا يات. يازن اخدّام ياضني. ءولا نتّا، سّغورشن‑ت ءيخمُّاصن سّرفوفنّ‑ت رارن‑ت بلا يات. يازن ويس كراض. ءولا نتّا، سّياگّاسن‑ت لوحن‑ت‑ين س‑برّا. ءيسوانگم باب ن‑يگر د‑يخف‑نس ييني: ‹ما‑راد‑سكرغ غيلاد؟ راد‑ازنغ ءيوي ءيعزّان. نتّا، را‑ت‑وقّرن.› ءيمّا ءيخمُّاصن‑لّي، لّيغ‑ت‑ژران مشاوارن ءي‑نگراتسن ءينين: ‹غواد ا‑را‑يوورت ءيگر. اشكاد‑د ا‑ت‑ننغ ءيگ لوورت وينّغ.› نكرن لوحن‑ت‑ين س‑برّا ن‑يگر نغن‑ت.» ءيسقسا‑تن ياسوع: «ما‑راد‑اسن‑يسكر باب ن‑يگر‑ان ن‑واضيل؟ را‑د‑ياشك ءيهلك ءيخمُّاصن‑ان ءيفك ءيگر ءي‑وييّاض.» لّيغ سفلدن مدّن ءي‑غايان ءينين: «اد‑اغ‑ينجّا ربّي.» ءيسّماقّل گيسن ياسوع ييني‑اسن: «ما‑يگا مايد ءيتياران غ‑وارّاتن ن‑ربّي؟ ‹اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو.› ءيمّا اژرو‑اد، كولّو وانّا فلّاس ءيضرن را‑يرژ، د‑وانّا‑ف‑يضر را‑ت‑يلبج د‑واكال.» ءيرين ءيمسلمدن ن‑شّرع د‑ينمغورن ن‑تگمّي ن‑ربّي اد‑امژن ياسوع، اشكو سّنّ ءيزد نتني ا‑ف‑يوت لمعنا‑ياد، والاينّي كسوضن زغ‑مدّن. سول‑ت‑گابلن، ازنّ‑د كرا ن‑يرگازن اد‑سكارن زوند ءيغ‑ا‑تّيرين اغاراس ن‑ربّي، والاينّي ران غير اد‑امژن ياسوع ف‑واوال‑نس باش ا‑ت‑ين‑دحين ءي‑لحاكم ن‑رّومان ا‑فلّاس‑يحكام. اشكين‑د ءينين‑اس: «واي‑امسلمد، نسّن ءيزد لحقّ ايد تّينيت ار‑تي‑تسّلمادت. ءور‑ا‑تّمنادت ءودماون ن‑مدّن والاينّي ار‑تسّلمادت اغاراس ن‑ربّي غمكلّي ءيگا. ءيني‑اغ، ءيس‑يحلّا ا‑ناكّا ضابييت ءي‑قايصر نغد ءوهو؟» ءيمّا ياسوع ءيسّن ماد‑نوّان غ‑لحيلت‑نسن، ييني‑اسن: «ملات‑يّي‑د يان‑وقاريد. ءينيات‑يّي، وين‑ميت ا‑يگا‑وودم‑اد د‑يسم‑اد گيس ءيلّان؟» ءينين‑اس: «وين قايصر.» ءيرار‑اسن: «فكات ءي‑قايصر ما‑يگان وين قايصر، تفكم ءي‑ربّي ما‑يگان وين ربّي.» ءيضر‑اسن لعجب ف‑مايد‑س‑اسن‑يرور. فسّان كولّو، ءور‑ژضارن ا‑ت‑امژن ف‑واوال‑نس غ‑لگدّام ن‑كولّو مدّن‑ان. اشكين‑د دارس كرا ن‑يصادّوقين. نتني غ‑لمدهب‑نسن ار‑تّينين «ءور‑يلّي ما‑را‑د‑ينكر زغ‑لموت.» سقسان‑ت: «واي‑امسلمد، يورا‑ياغ موسا ءينّا ‹ءيغ‑يمّوت كرا ن‑يان ءيفل‑د تامغارت‑نس بلا تاروا، ءيلّا ف‑گماس ن‑ورگاز‑ان ا‑يتاهل تامغارت‑ان ا‑ديدس‑يسكر تاروا ف‑يسم ن‑گماس لّي‑يمّوتن.› ها‑سّا ن‑ايتماتن. ييوي‑ومزوارو تامغارت، ءيمّت ءور‑د‑يفيل تاروا. ياوي‑تّ ويس سين، نتّا ءولا ويس كراض، ايلّيغ‑تّ‑يوين س‑سّا، مّتن كولّوتن ءور‑د‑فيلن تاروا. غ‑يسيگُّرا تمّت‑تمغارت ءولا نتّات. ءيني‑اغ، غ‑تنكرا لّي‑غ‑راد‑نكرن كولّوتن، تامغارت ن‑مانوا گيسن ا‑را‑تگ؟ هاتّي تكّا‑تّين تگا تامغارت‑نسن س‑سّا.» ءيساول ياسوع ييني‑اسن: «ايت‑دّونيت‑اد ار‑تاهالن ار‑تاهالنت، ءيمّا غويلّي ف‑يرضا ربّي اد‑نكرن زغ‑لموت دّرن غ‑ليخرت، نتني ءور‑را‑تاهالن ءولا‑دا‑تاهالنت. هاتني زوند لمالايكا ا‑راد‑گن اشكو ءور‑سول‑راد‑مّتن. گن تاروا ن‑ربّي اشكو لولن س‑تودرت لّيخرت. ءيمّا تانكرا ن‑ويلّي مّوتنين، يورا فلّاس ءولا موسا غ‑وارّا ن‑تزگُّارت لّي‑يجدّرن، ييني ف‑سيدي ربّي ءيس‑يگا ربّي ن‑يبراهيم ءيگ ربّي ن‑يسحاق ءيگ ربّي ن‑ياعقوب. اوال‑ان ءيملا‑ياغ ءيس‑دّرن نتني واخّا مّوتن، اشكو سول دّرن كولّوتن غ‑لگدّام ن‑ربّي.» ءينين‑اس كرا ن‑يمسلمدن ن‑شّرع: «يُغژان مايد تنّيت اي‑امسلمد.» اشكو ءور‑سول‑زعمن ا‑ت‑سقسان. ءيزايد ياسوع ييني‑اسن: «ماخ ايلّيغ ا‑تّينين مدّن ‹را‑يگ لماسيح يان زغ‑تاسوت ن‑وگلّيد داود›؟ هاتي داود ءولا نتّا ءيساول ف‑لماسيح غ‑وارّا ن‑يموريگن ءينّا: ‹ها‑سيدي ربّي ءينّا ءي‑سيدي، سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.› ها‑داود س‑يخف‑نس ءيبدر غوالّي ءيگان لماسيح ءيگ‑ت د‑سيديس. مامنك ا‑را‑يگ غير يان زغ‑تاسوت‑نس؟» ءيساول ياسوع س‑يمحضارن‑نس غ‑لگدّام ن‑مدّن‑ان كولّوتن ييني‑اسن: «رارات لعاقل‑نّون زغ‑يمسلمدن ن‑شّرع، اشكو ءيعزّا دارسن اد‑فتّون س‑تملسا غزّيفنين شوانين، ءيعزّو دارسن اد‑فلّاسن‑تسلّامن مدّن غ‑لاسواق، ءيعزّو دارسن اد‑زگّورون س‑لگدّام غ‑تگُمّا ن‑تژالّيت ءولا غ‑وسكيوس ن‑يمنسيون. ار‑شتّان تيگُمّا ن‑تهجّالين، ار‑سّيغزّيفن تيژولّا‑نسن باش اد‑سّبايّنّ ءيخفاون‑نسن ءيس‑فولكين. نتني را‑فلّاسن‑يتّوت لحوكم ن‑ربّي س‑وگُّار.» ار‑يتمناد ياسوع غ‑يد‑بو‑وايدا ار‑ن‑سراسن تيوافكيو‑نسن غ‑صّندوق غ‑تگمّي ن‑ربّي. ءيژر‑ن يات‑تهجّالت تگا تامژلوطّ، تاشك‑يد تسرس‑ن سنات‑تقاريدين غ‑صّندوق ءيدروس‑واتيگ‑نسنت. ييني ءي‑يمحضارن‑نس: «لحقّ ا‑راد‑اون‑ينيغ، تاهجّالت‑اد تامژلوطّ، هاتّي تفكا ءوگُّار ن‑غويد كولّوتن، اشكو نتني فكان زغ‑مايلّي دارسن ءيگّوتن، ءيمّا نتّات، واخّا تحتاجّا، تفكا لمعيشت‑نس كولّوتّ.» ساولن ءيمحضارن ءي‑نگراتسن ف‑تگمّي ن‑ربّي، ار‑تعجّابن غ‑وفولكي ن‑يژران لّي‑س‑تغلي ءولا تيوافكيو لّي‑گيس‑اكّان مدّن ءي‑ربّي. ءيمّا ياسوع ءينّا‑ياسن: «كولّو مايد تّمنادم، راد‑د‑اشكين‑ووسّان غ‑راد‑كولّو‑يتياوگار س‑واكال. ءور‑را‑گيس‑يقاما‑وژرو ف‑وژرو.» سقسان‑ت: «واي‑امسلمد، ماناگو ا‑را‑ييلي غايان؟ ما‑را‑يگ تاماتارت ن‑يس‑د‑ياكمور ا‑يجرو؟» ييني‑اسن ياسوع: «اويات‑ستّ غ‑يخف‑نّون ا‑كُن‑ور‑يجلو يان، اشكو گّوتن غويلّي را‑د‑ياشك اسين ءيسم‑ينو، كود يان ار‑يتّيني ءيزد نتّان ا‑يگان لماسيح ار‑يتّيني: ‹هاتي تروح‑د تاساعت.› والاينّي ا‑تن‑ور‑تضفورم. ءيغ‑تسفلدم ف‑يماغن ءولا ءودووين اد‑ور‑تغووضم، اشكو ءيقّان‑د ا‑ييلي غايان، والاينّي ءور‑تا‑د‑يروح ءيسيگُّرا.» ءيزايد ييني‑اسن: «را‑تنكر‑تقبيلت س‑تقبيلت، تنكر‑تگلديت س‑تگلديت، ءيلينت زّنزالات شقانين، ييلي‑وغني د‑واطّان غ‑كيگان د‑تميزار. راد‑د‑بانّت‑تميتار تجهّدنين غ‑يگنوان ارد باهرا غووضن مدّن. ءيمّا كونّي، ءور‑تا‑يجري غايان ا‑را‑كُن‑تامژن ار‑كُن‑سّرفوفونّ ار‑كُن‑ين‑دحاين س‑تگُمّا ن‑تژالّيت ءولا لحبس. را‑كُن‑ين‑سّبيدّادن غ‑لگدّام ن‑يگلدان د‑لحوكّام ف‑سّيبت ن‑ما‑تگام وينو. تاساعت‑ان ا‑يهيّانّ اد‑اسن‑گيس‑تفكم توگّا‑نّون فلّا. والاينّي نبضات غ‑يخف‑نّون ءور‑تا‑د‑يروح‑وزمز‑ان ا‑ور‑تسوينگيمّ غ‑مامنك ا‑س‑راد‑اسن‑ترارم اوال. اشكو راد‑اون‑د‑فكغ ءيواليون د‑تحكيمت باش ا‑ور‑ييژضار يان زغ‑ينوّاشن‑نّون ا‑كُن‑يسّفسّا ءولا ا‑كُن‑ينرو غ‑ما‑تّينيم. ءيمّا كونّي را‑كُن‑ين‑دحاين ايت‑دارون د‑ايتماتون د‑ايت‑تقبيلت‑نّون ءولا ءيمدّوكُّال‑نّون. راد‑نغن كرا گيگون. را‑كُن‑تكرهون كولّو مدّن ف‑سّيبت ن‑ما‑تگام وينو. والاينّي ءور‑را‑يتياوهلاك كرا ن‑ونژاض زغ‑يخف‑نّون. بيدّات تزگام، غمكاد ا‑س‑را‑تنجمّ. «ءيغ‑تژرام تامدينت ن‑وروشاليم سوتلنت‑اس لحركات ن‑يعسكرين، تيسّانم ءيس‑د‑ياكمور‑واسّ غ‑را‑تخلو. ءيمّا غاسّان، وينّا لّانين غ‑تمازيرت ن‑يودايا، ءيقّان‑تن‑د اد‑روولن س‑يدرارن. د‑وينّا لّانين غ‑تمدينت، ءيقّان‑تن‑د ا‑ستّ‑فّوغن. د‑وينّا لّانين غ‑لخلا، ءيقّان‑تن‑د ا‑ن‑ور‑كشمن س‑تمدينت. اشكو راد‑گن‑ووسّان‑ان ءوسّان لّعقوبيت، ا‑گيسن‑يجرو كولّو ما‑فلّاسن‑يتياران غ‑وارّاتن ن‑ربّي. منشك ا‑س‑راد‑شقون‑ووسّان‑ان ف‑تيلّي گيسن ربّونين ءولا تيلّي گيسن سّنگاينين. اشكو را‑تيگات تاسّاست غ‑تمازيرت‑اد، ييلي لغاضاب ن‑ربّي ف‑مدّن‑اد. را‑يمّت كرا غ‑يميغ، كرفن وييّاض اوين‑تن س‑تميزار اگّوگنين. راد‑اكُلن ءيبرّانيين ف‑وروشاليم ارد ءيكمّل‑وزمز‑نسن. «راد‑يلينت‑تميتار غ‑تافوكت د‑وايّور د‑يتران، تيلي تاغوفت ءيگّوتن غ‑كيگان د‑تميزار ن‑دّونيت، غووضن مدّن غ‑يجّيج ن‑ومدا ءولا تاضانگيوين‑نس. راد‑يكساضن باهرا تغاشان س‑تاغوفت ن‑ما‑را‑يزري ف‑دّونيت، اشكو را‑تياتّاينت تيفاوين ن‑يگنوان. غاكودان ا‑را‑يّي‑ژرن، نكّي لّي‑يگان يوس ن‑بنادم، فتيغ‑د غ‑يات‑تمدلوت س‑لقوّا د‑لمجد ءيگّوتن. غاكود نّا‑تژرام تيغاوسيوين‑اد ار‑جرّونت، نكرات تالّم ءيخفاون‑نّون، اشكو تاكمور‑د تاساعت لّي‑غ‑را‑تنجمّ.» ءيزايد ياسوع يوت‑اسن لمعنا‑ياد ييني‑اسن: «ژرات تازارت ءولا ءيسغارن كولّوتن. ءيغ‑ا‑د‑سّوفوغن ءيفراون‑نسن، تيسّانم ءيس‑د‑ياكمور صّيف. غمكان ا‑را‑ييلي. ءيغ‑تژرام تيميتار‑اد‑س‑اون‑نّيغ ار‑جرّونت، تيسّانم ءيس‑دي‑تاكمور‑تگلديت ن‑ربّي. لحقّ ا‑راد‑اون‑ينيغ، ءور‑را‑تزري تاسوت‑اد ارد كولّو ءيجرو ماياد. راد‑يتّين ءيگنوان د‑واكال والاينّي ءور‑سار‑يتّين ءيواليون‑ينو. «اويات‑ستّ غ‑يخف‑نّون ا‑ور‑تلهوم س‑ومشّو ءولا تيسّي ءولا تيغوفيوين ن‑تودرت‑اد، ا‑ور‑يميل ءيروح‑كُن‑د‑واسّ‑ان ءيغوي‑كُن زوند اگضيض لّي‑تغوي‑تژقّورت. اشكو را‑يزري‑واسّ‑ان ف‑كولّو ءيمزدغن ن‑دّونيت. رارات لعاقل تضوفم‑بدّا ار‑تّضالابم ربّي ا‑كُن‑يسّدوس ا‑تنجمّ زغ‑كولّو غايلّي را‑يجرو، تبيدّم غ‑لگدّام ن‑يوس ن‑بنادم تزگام.» اسّ ف‑واسّ ار‑يسّلماد ياسوع غ‑تگمّي ن‑ربّي، ار‑يتفّوغ غ‑ييض ا‑ينسّا غ‑وورير ن‑زّيتون. زيكّ صباح ن‑كرايگاتّ اسّ ار‑دي‑تّاشكين مدّن گّوتنين س‑تگمّي ن‑ربّي، ار‑د‑دارس‑تمونون اد‑اس‑سفلدن. ياكمور‑د لعيد ن‑ورخصيص لّي‑مي‑تّينين‑داغ لعيد ن‑وسورف. ءينمغورن ن‑تگمّي ن‑ربّي د‑يمسلمدن ن‑شّرع ار‑سيگّيلن س‑مامنك ا‑راد‑نغن ياسوع، والاينّي كسوضن زغ‑مدّن. غاكودان ا‑يكشم شيطان س‑ياهودا لّي‑مي‑تّينين ءيسخاريوط، ءيگا يان زغ‑سين د‑مراو ن‑ومحضار. ءيدّو ياهودا س‑دار ءينمغورن ن‑تگمّي ن‑ربّي د‑وين ءيمخزنيين، ءيمشاوار ديدسن ف‑مامنك ا‑راد‑اسن‑يزّنز ياسوع. فرحن نتني ءينين‑اس راد‑اس‑فكن ءيقاريدن. ءيمشاشكا‑د ديدسن، يوورّي ار‑يسوينگيم مامنك ا‑را‑تن‑يعاون اد‑امژن ياسوع غ‑كرا ن‑تاساعت غ‑ور‑لّين مدّن. ءيلكم‑د‑واسّ ن‑ورخصيص لّي‑غ ا‑قّرسن مدّن ءي‑يلقّاغن لّعيد ن‑وسورف. ءينكر ياسوع يازن بطرُس د‑يوحانّا ييني‑اسن: «زايدات تجّوجادم‑اغ ءيمنسي لّعيد ن‑وسورف ا‑ت‑نشّ ءي‑نگراتنّغ.» ءينين‑اس: «ماني تريت ا‑ت‑ين‑گيس‑نجّوجاد؟» ييني‑اسن: «ژرات، را‑ن‑تكشمّ س‑تمدينت، تمناگّارم يان‑ورگاز يوسي‑د اگدور ن‑وامان. ضفورات‑ت س‑تگمّي نّا‑س‑يكشم، تينيم ءي‑بو‑تگمّي‑ان ‹هاتي ءينّا‑ياك‑د‑ومسلمد، مانيغ ءيلّا‑وحانو لّي‑غ‑راد‑شّغ ءيمنسي ن‑وسورف نكّي د‑يمحضارن‑ينو؟› راد‑اون‑يمل بو‑تگمّي‑ان يان‑وحانو ن‑وفلّا ءيمقّورن ءيسوان. غين ا‑غ‑را‑تجّوجادم.» دّون نتني افن‑ين غمكلّي‑اسن‑ينّا، جّوجادن ءيمنسي ن‑وسورف. لّيغ‑دي‑تلكم تاساعت ن‑يمنسي، ءيسكيوس ياسوع ا‑يشّ د‑يرقّاسن‑نس، ييني‑اسن: «منشك ا‑س‑ريغ اد‑ديدون‑شّغ ءيمنسي‑اد ن‑وسورف ءور‑تا‑مّوتغ. اشكو راد‑اون‑ينيغ، ءور‑سول‑را‑ت‑شّغ ارد يافو غ‑تگلديت ن‑ربّي.» ياسي لكاس ءيشكر ربّي، ييني ءي‑يمحضارن‑نس: «امژات لكاس‑اد، تسوم زغ‑گيس كولّوكن. راد‑اون‑ينيغ، ءور‑سول‑راد‑سّوغ زغ‑لغلّت ن‑واضيل ارد‑دي‑تاشك‑تگلديت ن‑ربّي.» ياسي تانگولت، ءيشكر ربّي ءيبّي‑تّ ءيفك‑اسن‑تّ ييني‑اسن: «ختاد تگا دّات‑ينو، تّياوفكا ف‑سّيبت‑نّون. سكارات ماياد ا‑يّي‑د‑سرس‑تسوينگيمّ.» ياسي ءولا لكاس غمكاد غ‑يسيگُّرا ن‑يمنسي، ييني‑اسن: «لكاس‑اد ءيگا لعهد لّجديد غ‑گراتون د‑ربّي س‑يدامّن‑ينو لّي‑را‑يفّي ف‑سّيبت‑نّون. والاينّي هاي‑افوس ن‑والّي‑يّي‑ن‑يزّنزان ءيتّرس ديدي غ‑لميدا‑ياد. را‑يمّت يوس ن‑بنادم غمكلّي ءيقصاد ربّي، والاينّي تاگوضي ا‑را‑ييلي ءي‑ورگاز لّي‑ت‑يزّنزان.» بدون نتني ار‑سّمقسان ءي‑نگراتسن ف‑مانوا گيسن ا‑را‑يسكر غايان. ار‑تژين ءيمحضارن ءي‑نگراتسن ف‑مانوا گيسن ا‑را‑يگ انمغور. ءيساول سرسن ياسوع ييني‑اسن: «ها‑يگلدان ن‑دّونيت ار‑تحكامن ف‑ايت‑تميزار‑نسن، ءولا ءينمغورن‑نسن ار‑تّيرين مدّن اد‑فلّاسن‑تّينين ‹ءيد‑بو‑لجوديت›. ءيمّا كونّي، ا‑ور‑ييلي غمكان غ‑گراتون، اشكو غوالّي گيگون ءيمقّورن ءيلّا فلّاس ا‑يگ زوند غوالّي ءيمژّين، ءيگ‑ومزوارو زوند اخدّام. ما‑يمقّورن؟ ءيزد غوالّي ءيگاورن ار‑يشتّا نغد غوالّي‑اس‑د‑يسراسن امشّو؟ ءيس‑ورد غوالّي ءيگاورن ار‑يشتّا؟ والاينّي لّيغ نكّي غ‑گراتون زوند اخدّام. «كونّي ا‑ديدي‑يبيدّن كولّو ءوسّان‑اد ن‑ترفوفنت‑ينو. غمكلّي‑يّي‑يفكا بابا ربّي تاگلديت، راد‑اون‑فكغ ءولا كونّي ا‑تشتّام ار‑تسّام غ‑دار لميدا‑نو غ‑تگلديت‑ينو، تگاورم ف‑لعروش ار‑تّحكامّ ف‑كولّو ايت‑ربّي.» ءيساول ياسوع س‑بطرُس ييني‑اس: «سيمعان، سيمعان، هان شيطان ءيضالب ا‑كُن‑يزوزّر غمكلّي ءيزوزّور‑وفلّاح ءيبضو اليم د‑يردن. والاينّي ضالبغ ربّي فلّاك ا‑ور‑يمّت ليمان‑نّك. غاكود لّيغ توورّيت، سّدوس ايتماك.» ييني‑اس بطرُس: «وا‑سيدي، ها‑يّي ءوجادغ اد‑ديدك‑دّوغ س‑لحبس مّتغ ديدك.» ءيمّا ياسوع ءيرور‑اس: «وا‑بطرُس، راد‑اك‑ينيغ، غ‑يض‑اد ءور‑را‑يغر‑وفولّوس ارد تينيت كراطّ‑توال ءور‑يّي‑تسّينت.» ءيسقسا ياسوع ءيمحضارن‑نس ييني‑اسن: «غ‑ووسّان لّي‑غ‑كُن‑وزنغ بلا اقُراب ءولا اومّيس ءولا تورژيّين ءيس‑تلكمّ ف‑كرا غ‑ووسّان‑ان؟» ءينين‑اس: «ءوهو، ءور‑نلكيم ف‑يات.» ييني‑اسن: «ءيمّا غيلاد، وانّا دار اقُراب ءولا اومّيس ءيلّا فلّاس ا‑تن‑ديدس‑ياوي. وانّا ءور‑دار لكومّيت ءيلّا فلّاس ا‑يزّنز اسلهام‑نس ءيسغ‑تّ‑يد. اشكو راد‑اون‑ينيغ، ءيقّان‑د ا‑يجرو مايلّي فلّا ءيتياونّان غايد ءيزرين ءيتيارا: ‹گان‑ت د‑يان زغ‑ويلّي فّوغنين زغ‑شّرع ن‑ربّي.› هاتي را‑يافو كولّو ما‑فلّا‑يتياران.» ءينين‑اس ءيمحضارن‑نس: «ژر ا‑سيدي، ها‑سنات لكمامي.» ءيمّا نتّا ءيرور‑اسن: «يوودا.» ءيفّوغ ياسوع زغ‑تمدينت ءيدّو س‑وورير ن‑زّيتون غمكلّي‑بدّا‑يتّيدو س‑غين. مونّ ديدس ءيمحضارن‑نس. لّيغ لكمن ادغار‑ان ييني‑اسن: «ژّالّات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو.» ءيفل‑تن ءيفتو ياگّوگ‑ن فلّاسن ما‑يتگّان كّوژ ءيد‑مراو ن‑وژمّوژل، ءيضر ف‑يفادّن‑نس ار‑يتژالّا، ييني: «وا‑بابا ضالبغ‑اك ءيغ‑تريت، كّيس فلّا لكاس‑اد ن‑ورفوفن. والاينّي ا‑ييلي ما‑تريت، ءورد ماد‑ريغ نكّي.» غاكودان ءيگّوز‑د دارس يا‑لّمالاك زغ‑يگنّا ءيسّدوس‑ت. ءيغووض ياسوع باهرا، ار‑يتژالّا س‑وگُّار ايلّيغ ا‑زگيس‑يتادّوم لعرگ ف‑واكال زوند تيمقّا ن‑يدامّن. لّيغ ءيكمّل تاژالّيت ءينكر يوورّي س‑دار ءيمحضارن‑نس، ياف‑تن‑ين طّاسن. نهاتافن س‑تاغوفت لّي‑وسين. ييني‑اسن: «ماخ ا‑تطّاسم؟ نكرات تضالبم ربّي ا‑كُن‑يسّانف ءي‑كولّو ما‑را‑كُن‑يجلّو.» سول ا‑يساوال س‑د‑روحن مدّن گّوتنين، ءيزوور‑اسن‑د ياهودا لّي‑يگان يان زغ‑سين د‑مراو ن‑ومحضار. ءيفتو س‑دار ياسوع ا‑ت‑يسّودن، ءيمّا ياسوع ءينّا‑ياس: «وا‑ياهودا، ءيزد س‑وسودن ا‑س‑تريت ا‑تزّنزت يوس ن‑بنادم؟» لّيغ ژران ءيمحضارن‑نس ما‑را‑يجرو ءينين‑اس: «وا‑سيدي، ءيس‑تريت ا‑تن‑نطّاي س‑لكمامي‑اد؟» ءينكر يان زغ‑يمحضارن يوت اخدّام ن‑ونمغور ن‑تگمّي ن‑ربّي ءيبّي‑اس امژّوغ افاسي. ءيمّا ياسوع ءينّا‑ياسن: «زگايات.» ءيگّر‑ن ءي‑ومژّوغ ن‑وخدّام ءيجّوجّي‑ت. ءيساول ياسوع س‑ينمغورن ن‑تگمّي ن‑ربّي د‑وين ءيمخزنيين د‑يمغارن ن‑تمازيرت لّي‑د‑وشكانين ا‑ت‑امژن، ييني‑اسن: «ما‑س‑دي‑تفّوغم س‑لكمامي د‑يعماد زوند ءيغ‑گيغ امخّار؟ لّيغ‑ن‑بدّا ديدون كرايگاتّ اسّ غ‑تگمّي ن‑ربّي، ءور‑يّي‑تومژم غ‑ووسّان‑ان، والاينّي تاساعت‑نّون اياد ا‑گيس‑تحكام لقوّا ن‑تيلّاس.» غوين ياسوع اوين‑ت س‑تگمّي ن‑ونمغور ن‑تگمّي ن‑ربّي، ءيضفور‑ت بطرُس زغ‑توگّوگت. سّرغان مدّن لعافيت غ‑وامّاس ن‑تگمّي، گاورن غ‑تاما‑نس. ءيدّو بطرُس ءيسكيوس غ‑گراتسن. تژر‑ت يات‑تخدّامت غ‑تيفاوت لّعافيت، تسّماقّل گيس تيني ءي‑مدّن‑ان: «ءولا غواد ءيلّا د‑ياسوع.» ءيرار‑اس بطرُس: «وا‑تامغارت، ءور‑ت‑سّينغ نكّي.» يان ءيميكّ س‑ت‑يژرا يان ياضني ييني‑اس: «ءولا كيّي تگيت يان زغ‑گيسن.» ءيرار‑اس‑داغ بطرُس: «واي‑ارگاز، ءورد نكّي.» تزري يات تاساعت س‑يساول يان ياضني س‑جّهد ييني‑اسن: «س‑صّاحت، غواد ءيلّا ديدس ءولا نتّا، اشكو گو‑جاليل ا‑يگا.» ءيرار‑د‑داغ بطرُس: «واي‑ارگاز، هان ءور‑سّينغ مايد تّينيت.» غاكودان سول ا‑يساوال س‑يغرا‑وفولّوس. ءيگراول سيديتنّغ ءيسّماقّل غ‑بطرُس. ءيسوانگم‑د بطرُس اوال لّي‑س‑اس‑ينّا سيديتنّغ: «غ‑يض‑اد ءور‑را‑يغر‑وفولّوس ارد تينيت كراطّ‑توال ءور‑يّي‑تسّينت.» ءيفّوغ بطرُس ار‑يالّا باهرا. نكرن ءيمخزنيين لّي‑ضوفنين ياسوع، ار‑گيس‑ضصّان ار‑ت‑كّاتن. دلن‑اس الّن‑نس س‑يان‑وشدّاد ار‑اس‑تّينين: «وا‑نّابي، مل‑اغ مانوا‑ك‑يوتن.» ار‑ت‑رگّمن س‑كيگان د‑يواليون أُخشنّين. لّيغ‑د‑يغلي‑واسّ مونّ‑د ءيمغارن لّمحكاما، گان ءينمغورن ن‑تگمّي ن‑ربّي د‑يمسلمدن ن‑شّرع. اوين ياسوع س‑لگدّام‑نسن سقسان‑ت: «ءيني‑اغ، ءيزد كيّين ا‑يگان لماسيح ن‑ربّي؟» ءيساول ياسوع ييني‑اسن: «ءيغ‑اون‑ت‑نّيغ، ءور‑را‑يّي‑تامنم. ءيغ‑كُن‑فلّاس‑سقساغ ءور‑را‑دي‑ترارم اوال. والاينّي يان ءيميكّ را‑ن‑يسكيوس يوس ن‑بنادم ف‑وفاسي ن‑ربّي ءيتجهّدن.» سقسان‑ت كولّوتن: «ءيس‑تنّيت كيّي يوس ن‑ربّي ا‑تگيت؟» ءيرار‑اسن: «غمكلّي‑س‑تنّام اد‑گيغ.» نكرن غاكودان ار‑تّينين: «ما‑س‑سول‑نرا توگّا ن‑وييّاض؟ نسفلد كولّو ءي‑غايد ءينّا.» نكرن ءيمغارن لّمحكاما كولّوتن، اوين ياسوع س‑دار بيلاطوس لحاكم ن‑رّومان. ار‑سرس‑تاشتكّان ار‑تّينين: «نوفا‑ن ارگاز‑اد ار‑يجلّو ايت‑تمازيرت‑نّغ، ار‑اسن‑يتّيني ا‑ور‑اكّان ضابييت ءي‑قايصر، ار‑يتّيني ءيس‑يگا لماسيح ن‑ربّي ءيگ اگلّيد.» ءيسقسا‑ت بيلاطوس: «ءيس‑تگيت اگلّيد ن‑ايت‑يودايا؟» ءيرار‑اس ياسوع: «كيّي ا‑ت‑ينّان.» ءيساول بيلاطوس س‑ينمغورن ن‑تگمّي ن‑ربّي د‑مدّن‑ان كولّوتن ييني‑اسن: «ءور‑وفيغ كرا لّعيب غ‑ورگاز‑اد.» رارن‑اس نتني س‑جّهد: «ار‑يتكّا كولّو تامازيرت ن‑يودايا، زغ‑جاليل ار غيد، ار‑يسّدووي مدّن س‑ولمّود‑نس.» لّيغ ءيسفلد بيلاطوس ءي‑ماياد ييني‑اسن: «ءيزد گو‑جاليل ا‑يگا‑ورگاز‑اد؟» ءينين‑اس «زغ‑غين ا‑زغ‑د‑يوشكا.» يازن‑ت ءيلمّا بيلاطوس س‑دار هيرودوس لّي‑يحكامن تاسگا‑يان، اشكو ءيلّا ءولا نتّا غ‑وروشاليم غ‑ووسّان‑ان لّعيد. ءيفرح هيرودوس باهرا لّيغ ءيژرا ياسوع، اشكو كيگان ا‑يتقل ييري ا‑ت‑يژر. ءيسفلد فلّاس باهرا، ييري ا‑يژر كرا لّمعجيزت ف‑وفوس‑نس. ءيسقسا‑ت هيرودوس ف‑ما‑يگّوتن، ءيمّا ياسوع ءور‑اس‑ينّي يات. بيدّن غين ءينمغورن ن‑تگمّي ن‑ربّي د‑يمسلمدن ن‑شّرع، ار‑باهرا‑تاشتكّان س‑ياسوع. ءينكر ءيلمّا هيرودوس نتّا د‑يعسكرين‑نس ار‑گيس‑تطناژن ار‑گيس‑ضصّان. سّلسن‑اس يان‑وسلهام ءيغُلان رارن‑ت‑داغ س‑دار بيلاطوس. غاسّان ا‑د‑يمشاشكا هيرودوس د‑بيلاطوس واخّا‑ستّين‑تكّا تاژيت ءي‑نگراتسن. ءيغر بيلاطوس ءي‑ينمغورن ن‑تگمّي ن‑ربّي س‑دارس، نتني د‑يمغارن د‑مدّن ياضني كولّوتن. ييني‑اسن: «ارگاز‑اد، تيويم‑ت‑يد س‑داري، تينيم فلّاس ‹ار‑يجلّو مدّن كولّوتن.› ها‑يّي غيلاد سقساغ‑ت باهرا غ‑لگدّام‑نّون ف‑ما‑يسكر، والاينّي ءور‑وفيغ غ‑ورگاز‑اد كرا لّعيب زغ‑غايلّي س‑ا‑سرس‑تّاشتكّام. ءولا هيرودوس ءيرور‑ت‑يد س‑داري اشكو ءور‑ن‑گيس‑يوفي يات. ءور‑يسكير كرا ما‑ف‑ا‑يتمتات. را‑ت‑سّغورشغ غيلاد رژمغ‑اس.» كرايگاتّ اسگُّاس ءيقّان‑د لحاكم اد‑اسن‑يرژم ءي‑يان‑وحبّاس نّا‑ران غ‑لعيد ن‑وسورف. نكرن مدّن غاكودان ار‑كولّو‑سّغويّون ار‑تّينين: «سّيتّي‑ن فلّانّغ ارگاز‑اد، ترژمت‑اغ‑د ءي‑بارابّاس.» ءيلّا بارابّاس غ‑لحبس، ءيتياماژ اشكو ءيسّدووي تامدينت‑ان ءينغ كرا ن‑مدّن. ءيساول‑داغ بيلاطوس س‑مدّن‑ان اشكو ءيرا ا‑يرژم ءي‑ياسوع، ءيمّا نتني رورن‑اس ار‑سّغويّون: «اگُل‑ت ف‑وگّجدي. اگُل‑ت ف‑وگّجدي ا‑يمّت.» ءيزايد بيلاطوس تيس كراطّ‑توال ييني‑اسن: «ما‑لّعيب ءيسكر؟ ءور‑گيس‑وفيغ كرا لّعيب ف‑ت‑يد‑يقّان ا‑يمّت. را‑ت‑سّغورشغ ءوكان، رژمغ‑اس.» ءيمّا نتني ار‑باهرا‑سّغويّون س‑جّهد ار‑تضالابن بيلاطوس ا‑يسّوفغ ياسوع ا‑يمّت ف‑وگّجدي. ار ءيسيگُّرا نران‑ت س‑يواليون‑نسن. ءينكر بيلاطوس يوت لحوكم ف‑ياسوع غمكلّي تضالابن. ءيرژم ءي‑والّي ران مدّن، ا‑ت‑يگان د‑والّي ءيتياماژن غ‑لحبس ف‑سّيبت ن‑ودووي د‑تناغا. ءيسّوفغ‑اسن ياسوع ا‑سرس‑سكرن غمكلّي ران. نكرن ءيعسكرين اوين ياسوع. مناگّارن يان‑ورگاز گو‑كوريني ءيسم‑نس سيمعان، بحرا‑د‑يوشكا زغ‑برّا. امژن‑ت، سرسن فلّاس اگّجدي ا‑ت‑ياسي غ‑تغوردين ن‑ياسوع. ضفورن‑ت كيگان د‑مدّن، ءيلينت گيسن كرا ن‑تمغارين ار‑الّانت ار‑سّغويّونت. ءيگراول‑د گيسنت ياسوع ييني‑اسنت: «وا‑يست‑وروشاليم، اد‑ور‑فلّا‑تالّامت. الّامت ف‑يخفاون‑نّونت د‑تاروا‑نّونت. اشكو راد‑د‑اشكين‑ووسّان غ‑راد‑ينين مدّن ‹تيمباركيّين اد‑گانت ختينّا ءور‑تارونين. ءيمباركين اد‑گان ءيحلگان نّا‑ور‑وسينين. تيمباركيّين اد‑گانت تيبّاتين نّا‑ور‑سّنگاينين.› غاكودان ا‑راد‑ينين مدّن ءي‑يدرارن ‹ضراد‑د فلّانّغ،› ءينين ءي‑يورار ‹حضوات‑اغ.› ءيغ‑ا‑سكارن غونشكاد د‑وكشّوض ءيزگزاو، ما‑را‑ييلي غاكود نّا‑غ‑يقّور؟» اوين ءيعسكرين سين ءيرگازن ياضني گان ءيمخّارن، ا‑تن‑نغن د‑ياسوع. لّيغ لكمن ادغار لّي‑مي‑تّينين ‹تاخُشاشت ن‑يخف› قّنّ ياسوع غ‑وگّجدي الّن‑ت. قّنّ ءيمخّارن غ‑يگّجدا ياضني، يان ف‑وفاسيي‑نس د‑يان ف‑وژلماض‑نس. ءيژّالّ ياسوع ييني: «وا‑بابا ربّي، صامح‑اسن. ءور‑اكُّ‑سّينّ مايد سكارن.» گرن‑د ءيعسكرين اسغار ف‑تملسا‑نس ا‑تنت‑بضون. بيدّن مدّن ار‑تمنادن كولّو ما‑يجران، ءيمّا ءيمغارن ن‑تمازيرت ار‑گيس‑تطناژن ار‑تّينين: «هاتي ءيجّنجم وييّاض، ءينيات‑اس ا‑يجّنجم ءولا ءيخف‑نس ءيغ‑يگا نتّا لماسيح امژلاي ن‑ربّي.» روحن‑ت‑ين ءيعسكرين ءولا نتني ار‑گيس‑ضصّان، مدين‑اس‑ن امان لّخلّ ا‑تن‑يسو، ار‑اس‑تّينين: «جّنجم ءيخف‑نّك ءيغ‑تگيت اگلّيد ن‑ايت‑يودايا.» تلّا غين يات تالّوحت غ‑نّيگ ءيخف‑نس، ءيتيارا گيس «غواد ءيگا اگلّيد ن‑ايت‑يودايا.» ار‑ت‑يرگّم ءولا يان زغ‑يمخّارن لّي‑ديدس‑تياگّالنين ييني‑اس: «ءيس‑ورد لماسيح ن‑ربّي ا‑تگيت؟ جّنجم ءيخف‑نّك تجّنجمت‑اغ ديدك.» ءيسّفسّا‑ت‑ومخّار ياضني ييني‑اس: «ءيس‑ور‑تكسوطّ ربّي؟ ءيتّوت فلّاك لحوكم‑اد زوند نتّان، د‑نكُّني نستهلّا غاياد ف‑سّيبت ن‑ما‑نسكر. ءيمّا نتّان، ءور‑يسكير كرا يُخشنّ.» ءيزايد ييني: «وا‑ياسوع، سوانگم‑يّي‑د غاكود نّا‑تكشمت س‑تگلديت‑نّك.» ييني‑اس ياسوع: «لحقّ ا‑راد‑اك‑ينيغ، را‑ديدي‑تيليت غاسّاد غ‑تالعرصت لّمجد.» لّيغ تلكم تاساعت تيس سنات د‑مراوت ضرند‑د تيلّاس ف‑تمازيرت‑ان كولّوتّ، ءور‑سول‑تسفاو تافوكت ار تاساعت تيس كراطّ ن‑تدگُّات. يوت‑وشرّيگ لخاميا ن‑تحانوت تامژلايت غ‑تگمّي ن‑ربّي، تبضو ف‑سين. يالّ ياسوع اوال‑نس ييني: «وا‑بابا، غ‑گر ءيفاسّن‑نّك ا‑غ‑فكيغ رّوح‑ينو.» غير ءينّا اوال‑اد س‑يسّوفغ رّوح‑نس. لقبطان ن‑يعسكرين، لّيغ ءيژرا مايد ءيجران ءيتعجّب غ‑لمجد ن‑ربّي ييني: «س‑صّاحت، ارگاز ءيفولكين اياد.» كولّو ويلّي مونّين غين ا‑گيس‑سّموقّولن، لّيغ ژران ماياد وورّين س‑تگُمّا‑نسن طيّر‑اسن باهرا، ار‑كّاتن غ‑يدمارن‑نسن. بيدّن ءيمدّوكُّال ن‑ياسوع غ‑توگّوگت، نتني د‑تمغارين لّي‑د‑ديدس‑مونّين زغ‑تمازيرت ن‑جاليل، ار‑تمنادن كولّو ما‑يجران. ييلي غين يان‑ورگاز ءيسم‑نس يوسف، ءيگا گو‑راما غ‑تمازيرت ن‑يودايا. ءيگ ارگاز ءيفولكين، ار‑باهرا‑يتّيري ا‑يرضو ربّي، ار‑يترجو تاگلديت ن‑ربّي ا‑دي‑تاشك. ءيگ نتّا يان زغ‑يمغارن لّمحكاما، والاينّي ءور‑يرضي س‑غايلّي نّان ف‑ياسوع ءولا غايلّي سرس سكرن. ءيكشم س‑دار بيلاطوس ءيضالب زغ‑گيس دّات ن‑ياسوع. ءيزّوگز‑د دّات زغ‑وگّجدي ءيسّموتّل‑تّ غ‑لكتّان ءيشوان، ءيسرس‑تّ‑ين غ‑يان‑ومضّال ءيگان ءيفري ءيتياوغزا غ‑وجاريف، ءور‑جّو‑ن‑گيس‑يتّرس يان. غاسّان ار‑توجادن مدّن ءي‑لعيد، ءيگ اسّ لّي‑يقامان ءي‑واسّ ن‑وسونفو. نكرنت‑تمغارين لّي‑د‑مونّين د‑ياسوع زغ‑جاليل ضفورنت يوسف، ژرنت امضّال ءولا مامنك ا‑ن‑گيس‑تتّرس دّات ن‑ياسوع. وورّيند‑د ءيلمّا جّوجادنت توجّوتين د‑يسافارن. سونفونت اسّ ن‑سّبت غمكلّي ءيتّيني شّرع ن‑ربّي. زيكّ صباح ن‑واسّ لّحدّ دّونت‑تمغارين س‑ومضّال، اوينت ديدسنت توجّوتين لّي‑جّوجادنت. والاينّي لّيغ‑ن‑اكمورنت س‑ومضّال ژرنت ءيفير ءيكنوكي‑د زغ‑يمي ن‑يفري. كشمنت سرس، والاينّي ءور‑ن‑گيس‑وفينت دّات ن‑سيديتنّغ ياسوع. دوهدونت باهرا بيدّنت غين، س‑اسند‑د‑بانّ سين ءيرگازن ار‑سّمرقيقيينت‑تملسا‑نسن. ءيكساضنت‑تمغارين باهرا كنونت ار اكال. ساولن سرسنت ءيرگازن ءينين‑اسنت: «ماخ ا‑تسيگّيلمت غوالّي ءيدّرن غ‑گر‑ويلّي مّوتنين؟ ءور‑سول‑يلّي غيد. هاتي ءينكر‑ن زغ‑لموت. سوانگمامد‑د اوال لّي‑س‑اون‑ينّا لّيغ سول ءيلّا غ‑جاليل، ءينّا‑ياون: ‹ءيقّان‑يّي‑د، نكّي لّي‑يگان يوس ن‑بنادم، ا‑ن‑تياودحايغ س‑گر ءيفاسّن ن‑مدّن أُخشنّين، نغن‑يّي ف‑وگّجدي، نكرغ‑د ءيلمّا زغ‑لموت غ‑ويس كراض‑ووسّان.› » كتيند‑د‑تمغارين اوال‑ان. وورّيند‑د زغ‑ومضّال، ءينينت كولّو ماياد ءي‑يرقّاسن س‑يان د‑مراو د‑وييّاض كولّوتن. تلّا ماريام ءولّت‑ماگدالا د‑يووانّا د‑ماريام ءينّاس ن‑ياعقوب، نتنتي د‑تمغارين ياضني، ءينينت ءي‑يرقّاسن ف‑مايد ءيجران. ءيمّا نتني غالن ءيزد كرا ن‑توارگيت ءيفسّوسن ايد‑ف‑اسن‑نّانت، ءور‑تنت‑ومينّ. ءيمّا بطرُس ءينكر غاكودان يازّل س‑ومضّال. ءيكنو‑ن ار‑ن‑سرس‑يتاگُّا، ءور‑ن‑يژري ابلا ءيشدّادن لّكتّان. يوورّي‑د س‑تگمّي ار‑باهرا‑يسوينگيم غ‑مايد ءيجران. غاسّان‑نّيت اد‑فتان سين زغ‑گيسن غ‑وغاراس لّي‑يتاوين س‑ودوّار ن‑عيمواس، ياگّوگ ف‑وروشاليم س‑ما‑يتگّان يان د‑مراو كيليميتر. ار‑ساوالن ءي‑نگراتسن ف‑كولّو مايد ءيجران. سول ا‑ساوالن ار‑سّمقسان س‑د‑يوشكا ياسوع ءيمون ديدسن. واخّا‑ت‑ژران ءور‑ت‑وكُزن. ييني‑اسن: «مايد ف‑ا‑تساوالم ءي‑نگراتون غ‑وغاراس؟» بيدّن نتني، سّخوزّين. ءيرار‑اس يان گيسن ءيسم‑نس كليوباس ييني‑اس: «ءيزد غير كيّي واحدوك غ‑گر ويلّي عمّرنين ءوروشاليم ا‑ور‑يسفلدن ف‑مايد گيس ءيجران ءوسّان‑اد؟» ييني‑اس: «ما‑يجران؟» ءينين‑اس: «غايلّي ءيجران ءي‑ياسوع گو‑ناصيرا. ءيگا يان‑نّابي ءيمقّورن س‑يسكّيرن‑نس ءولا س‑يواليون‑نس. ءيفرح سرس ربّي ءولا مدّن كولّوتن. والاينّي ءينمغورن‑نّغ ن‑تگمّي ن‑ربّي د‑يمغارن لّمحكاما، دحين‑ت‑ين ا‑يتياوحكام س‑لموت. هاتي نغان‑ت غيلاد ف‑وگّجدي. ءيمّا نكُّني نكّا‑تّين نرجا‑ن گيس باهرا، اشكو نغال ءيزد نتّان ا‑را‑يجّنجم ايت‑ربّي. هاتي كراض‑ووسّان ايد‑س‑يجرا غاياد. والاينّي كرا ن‑يستماتنّغ ءيويند‑د كرا لّخبار، ار‑گيس‑نتعجّاب باهرا. دّانت زيكّ صباح س‑ومضّال‑نس والاينّي ءور‑ن‑وفينت دّات‑نس. وورّيند‑د ءينينت‑اغ ءيس‑ژرانت كرا لّمالايكا بانّ‑اسند‑د ءينين‑اسنت ءيس‑يوورّي ءيدّر. دّون ءيلمّا كرا ن‑يمدّوكُّال‑نّغ س‑ومضّال، افن‑ين غمكلّي نّانت‑تمغارين، والاينّي ءور‑ژرين ياسوع.» ءيساول ياسوع ييني‑اسن: «وا‑كونّي، ءيس‑ور‑تفهيمّ؟ ءيس‑قّورن ءيخفاون‑نّون ايلّيغ ءور‑تومينم كولّو ماد‑نّان لانبيا؟ ءيس‑ور‑د‑يقّان لماسيح ا‑يرفوفن غمكان ءيكشم س‑لمجد‑نس؟» ءيساول‑اسن ءيلمّا ف‑يواليون ن‑موسا ءولا وين لانبيا كولّوتن، ءيمل‑اسن ما‑فلّاس‑يتياران غ‑كولّو ارّاتن ن‑ربّي. لّيغ‑ن‑اكمورن س‑ودوّار لّي‑ران نتني، ءيسكر ياسوع زوند ءيغ‑يرا ا‑يزايد ف‑وغاراس‑نس. ءيمّا نتني ضالبن‑ت باهرا ءينين‑اس: «قاما ديدنّغ اشكو ءيدّا‑واسّ، تينوشّي ايا.» ءيكشم ديدسن س‑تگمّي ا‑دارسن‑ينس. لّيغ ديدسن ءيسكيوس غ‑يمنسي يامژ اغروم، ءيشكر ربّي فلّاس، ءيبّي‑ت ءيفك‑اسن‑ت. غاكودان اد‑سّنّ ءيزد ياسوع ا‑يگا، س‑اسن‑ت‑لاح ءور‑سول‑ا‑تي‑تمنادن. ءينين نتني ءي‑نگراتسن: «منشك ا‑س‑رغان‑وولاون‑نّغ لّيغ سرنّغ ءيساول غ‑وغاراس ءيسّفهم‑اغ ما‑يلّان غ‑وارّاتن ن‑ربّي.» نكرن غاكودان وورّين س‑وروشاليم. افن‑ين ءيرقّاسن س‑يان د‑مراو مونّ د‑ايتماتن ياضني ار‑كولّو‑تّينين: «س‑لحقّ ءينكر‑د سيديتنّغ زغ‑لموت. ءيبان‑د ءي‑سيمعان.» ساولن ءولا نتني غاكودان ءينين‑اسن ف‑ماد‑اسن‑يجران غ‑وغاراس ءولا مامنك اد‑سّنّ ياسوع لّيغ‑اسن‑يبّي اغروم. سول ا‑ساوالن س‑د‑يبيدّ ياسوع غ‑گراتسن، ييني‑اسن: «اد‑اون‑تيلي سّلامت.» گُّدن ءيكساضن، غالن ءيزد كرا ن‑رّوح ايد‑اسن‑د‑يبانّ. ييني‑اسن: «ماخ ايلّيغ تغووضم، ءيكشم شّكّ غ‑وولاون‑نّون؟ ژرات ءيفاسّن‑ينو د‑يضارن‑ينو، تيسّانم ءيزد نتّان اد‑گيغ. گّرات‑يّي‑د تژرم، اشكو ءور‑يژضار كرا ن‑رّوح ا‑يطّاف تيفيّي د‑يخسان غمكلّي تمنادم طّافغ‑تن نكّي.» لّيغ ءينّا ماياد ءيمدي‑اسن‑د ءيفاسّن‑نس د‑يضارن‑نس. ءيمّا نتني ءور‑اكُّ‑زعمن ا‑ت‑امنّ اشكو ءيضر‑اسن لعجب س‑لفرح ءيگّوتن. ييني‑اسن ياسوع: «ءيس‑دارون كرا ن‑ومشّو؟» فكن‑اس يان‑وگزّوم ن‑وسلم ءينوان، ياسي‑ت ءيشّ‑ت غ‑لگدّام‑نسن. ءيساول‑داغ ياسوع ييني‑اسن: «غمكاد ا‑س‑يووفا مايلّي‑اون‑نّيغ غ‑ووسّان‑ان غ‑سول‑ديدون‑لّيغ. نّيغ‑اون، ءيقّان‑د ا‑يجرو كولّو ما‑فلّا‑يتياران غ‑شّرع ن‑موسا ءولا ارّاتن لّانبيا ءولا ءيموريگن ن‑ربّي.» ءيزايد ءيرژم لعاقل‑نسن اد‑فهمن ارّاتن ن‑ربّي، ييني‑اسن: «غمكاد ا‑يتياران، ءيقّان‑د لماسيح ن‑ربّي ا‑يرفوفن ءينكر‑د زغ‑لموت غ‑ويس كراض‑ووسّان، تفّوغ‑تبرّاحت س‑يسم‑نس زغ‑وروشاليم ارد تلكم كولّو تيميزار ن‑دّونيت، سفلدن كولّو مدّن ف‑مامنك ا‑س‑ژضارن اد‑فلن دّنوب‑نسن ءيصامح‑اسن ربّي. كونّي تگام ءيناگان ف‑تغاوسيوين‑اد. ءيمّا غيلاد راد‑اون‑د‑ازنغ مايلّي‑ف‑ينّا بابا ربّي راد‑اون‑ت‑يفك. قامايات غ‑تمدينت ارد فلّاون تگّوز‑تحكيمت ءيتجهّدن زغ‑تاتّويت.» ءيزوار‑اسن غاكودان، فتون ايلّيغ لكمن تاما ن‑بيتعانيا، يالّ ءيفاسّن‑نس ءيبارك‑تن. سول ا‑تن‑يتباراك س‑فلّاسن‑يتيالال س‑يگنوان. ضرن س‑واكال سجدن‑اس. وورّين‑د ءيلمّا س‑وروشاليم س‑لفرح ءيگّوتن. ار‑تقامان غ‑تگمّي ن‑ربّي ار‑تالغن ربّي. ءيلّا‑واوال غ‑يسيزوار ن‑كولّو ما‑يلّان. ربّي ا‑دار‑يلّا‑واوال‑ان، ءيگ‑واوال‑ان ربّي. ءيلّا دار ربّي غ‑يسيزوار، سرس ا‑س‑يخلق كولّو ما‑يلّان. ءور‑يلّي كرا ءيخلق‑ت ربّي ابلا ءيتياوخلاق سرس. اوال‑ان ا‑غ‑تلّا تودرت، تگ‑تودرت‑ان تيفاوت ءي‑مدّن. ار‑تّيسفيو تيفاوت غ‑تيلّاس، ءيمّا تيلّاس ءور‑اس‑سوگيرنت يات. ءيكّا‑تّين يان‑ورگاز، يوزن‑ت‑يد ربّي، ءيگا ءيسم‑نس يوحانّا. يوشكا‑د ا‑يگ ءينيگي، ءيفك توگّا ف‑تيفاوت باش اد‑امنّ كولّو مدّن ف‑يمي‑نس. ءورد نتّان ا‑يگان تيفاوت، والاينّي يوشكا‑د ا‑ياكّا توگّا ف‑تيفاوت. اشكو س‑دّونيت ا‑س‑را‑د‑ياشك غوالّي ءيگان تيفاوت لّحقّ لّي‑يتّيسفيون ف‑كولّو مدّن. يوشكا‑د س‑دّونيت، د‑سرس ا‑س‑تّياوخلاق دّونيت، والاينّي ءور‑ت‑وكُزن ايت‑دّونيت. يوشكا‑د دار وينس، والاينّي ءور‑ت‑رين مدّن‑نس. ءيمّا كولّو وينّا‑ت‑رانين امنّ سرس، ءيفكا‑ياسن لحقّ اد‑گن تاروا ن‑ربّي. نتني، ءورد س‑تلاليت ن‑واحليگ ا‑س‑لولن نغد س‑تايري ن‑دّات نغد س‑تايري ن‑ورگاز، والاينّي ربّي ا‑تن‑يگان د‑تاروا‑نس. اوال‑ان يوورّي ءيگا بنادم، ءيزدغ غ‑گراتنّغ، نژر لمجد‑نس. ءيگا لمجد ن‑والّي ءيگان يان دار باباس، تيگات گيس لباراكا د‑لحقّ. يوحانّا ءيفكا فلّاس توگّا، يالّ اوال‑نس ييني: «غواد ا‑يگان غوالّي‑س‑اون‑نّيغ ‹را‑د‑ياشك تيگيرا‑نو يان يوگُر‑يّي اشكو ءيلّا ءور‑تا‑لّيغ.› » نكُّني كولّواغ، لّانت‑اغ لباراكات گّوتنين زغ‑توگّت لّباراكا لّي‑گيس‑يلّان. ف‑وفوس ن‑موسا ا‑ف‑د‑يتياوفكا شّرع، ءيمّا ف‑وفوس ن‑ياسوع لماسيح ا‑ف‑دي‑توشكا لباراكا د‑لحقّ. ربّي، ءور‑جّو‑ت‑يژري يان، والاينّي غوالّي ءيگان يوس ييلي‑بدّا د‑باباس، نتّان اد‑اغ‑يملان مامنك ا‑يگا. غمكاد اد‑گانت توگّا ن‑يوحانّا غاكود لّيغ‑د‑سرس‑وزنّ ايت‑يودايا كرا ن‑ينمغورن د‑يخدّامن ن‑تگمّي ن‑ربّي زغ‑وروشاليم. سقسان يوحانّا ءينين‑اس‑د: «ما‑تگيت كيّي؟» ءيساول ءيمل‑اسن لحقّ، ءور‑اس‑يونف س‑يات. ييني‑اسن: «ءورد نكّي ا‑يگان لماسيح ن‑ربّي.» سقسان‑ت‑داغ: «ءيزد نّابي ءيليّا ا‑تگيت؟» ييني‑اسن: «ءورد ءيليّا اد‑گيغ.» سقسان‑ت: «ءيس‑تگيت نّابي ءيمقّورن لّي‑را‑د‑ياشك؟» ييني‑اسن: «ءوهو.» ضالبن‑اس ءيلمّا: «ءيني‑اغ ما‑تگيت. مل‑اغ ما‑را‑نيني ءي‑ويلّي‑اغ‑د‑وزنّين. ما‑تّينيت ف‑يخف‑نّك؟» ءيساول يوحانّا ييني‑اسن: «گيغ غوالّي ءيتبرّاحن غ‑لخلا ار‑يتّيني ‹سّنمات اغاراس ن‑سيديتنّغ›،» غمكلّي‑س‑ينّا نّابي ءيشاعيا. لّان كرا ن‑مدّن زغ‑لمدهب ن‑يفاريسين غ‑گر‑ويلّي‑د‑وزنّ ايت‑يودايا. سقسان يوحانّا: «ماخ ايلّيغ ا‑تسّدّامت مدّن غ‑وامان لّيغ ءور‑تگيت لماسيح نغد ءيليّا نغد نّابي لّي‑يمقّورن؟» ءيساول‑د يوحانّا ييني‑اسن: «نكّي ار‑كُن‑سّدّامغ غ‑وامان والاينّي ءيلّا يان غ‑گراتون ءور‑تي‑توكُزم، ءيگ غوالّي را‑د‑ياشك تيگيرا‑نو. ءور‑ستهلّاغ نكّي اد‑رژمغ ءيفالان ن‑تورژيّين‑نس.» ءيجرا كولّو ماياد غ‑بيتعانيا غ‑تسگا ياضني ن‑واسيف ن‑وردون. غين ا‑غ‑ا‑يسّدّام يوحانّا مدّن غ‑وامان. نديد ازكّا ءيژر‑ن يوحانّا ياسوع ءيفتا‑د س‑دارس، ييني فلّاس: «هان القّاغ ن‑ربّي لّي‑را‑يسّيتّي دّنوب ن‑دّونيت. غواد ا‑يگان غوالّي‑ف‑اون‑نّيغ ‹راد‑ياشك تيگيرا‑نو يان يوگُر‑يّي اشكو ءيلّا ءور‑تا‑لّيغ.› ءولا نكّي كّيغ‑تّين ءور‑ت‑وكُزغ، والاينّي ف‑سّيبت‑نس ا‑ف‑ا‑سّدّامغ مدّن غ‑وامان باش ا‑يتياوسّان دار ايت‑ربّي.» ءيزايد يوحانّا ءيفك توگّا‑نس ييني: «ژريغ رّوح ن‑ربّي ءيگّوز‑د زغ‑يگنوان زوند يان‑وتبير ءيتّرس‑د فلّاس. ار غاكودان ءور‑ت‑وكُزغ، والاينّي ربّي لّي‑يّي‑د‑يوزنّ اد‑سّدّامغ مدّن غ‑وامان، نتّان اد‑يّي‑ينّان ‹را‑تژرت رّوح ءيگّوز‑د ءيتّرس‑د ف‑يان‑ورگاز. نتّان ا‑را‑يسّدّام مدّن س‑رّوح لقودوس.› ها‑يّي ژريغ‑ت غيلاد، فكغ‑اون توگّا‑نو، غواد ا‑يگان يوس ن‑ربّي.» نديد ازكّا ءيلّا غين يوحانّا ءيبيدّ د‑سين زغ‑يمحضارن‑نس. ءيژر‑ن ياسوع ءيفتا‑د. ءيساول يوحانّا ييني: «هان القّاغ ن‑ربّي.» لّيغ سفلدن سين ءيمحضارن‑لّي ءي‑ما‑ينّا، دّون ضفورن ياسوع. ءيگراول‑د ياسوع ءيژر‑تن ضفارن‑ت ييني‑اسن‑د: «ما‑تسيگّيلم؟» ءينين‑اس: «مانيغ تزدغت، ا‑رابّي؟» (اوال‑اد، تگا لمعنا‑نس ‹اي‑امسلمد›.) ييني‑اسن‑د: «اشكاد‑د ا‑تژرم.» مونّ ديدس ژرن ءيلّيغ ءيزدغ، گاورن ديدس غاسّان اشكو تلكم‑د تاساعت تيس كّوژط ن‑تدگُّات. اندراوس گماس ن‑سيمعان بطرُس، نتّان ا‑يگان يان غ‑سين ءيمحضارن لّي‑سفلدنين ءي‑واوال ن‑يوحانّا ضفورن ياسوع. ءيدّو غاكودان ياف‑ن گماس سيمعان ييني‑اس: «ها‑ياغ نمناگّار غوالّي ءيگان لماسيح ن‑ربّي.» (اوال‑اد ‹لماسيح›، تگا لمعنا‑نس ‹امژلاي›.) ياوي‑ت‑يد ءيلمّا س‑دار ياسوع. ءيسّماقّل گيس ياسوع، ييني‑اس: «كيّي تگيت سيمعان يوس ن‑يونا، والاينّي راد‑اك‑نتّيني كافا.» ءيسم‑اد، تگا لمعنا‑نس ‹اژرو› زوند لمعنا ن‑بطرُس. نديد ازكّا ءيسكر ياسوع ف‑ا‑يدّو س‑تمازيرت ن‑جاليل. ءيمناگّار فيليبّوس ييني‑اس: «اشك‑يد، مون ديدي.» ءيگا فيليبّوس گو‑بيتصايدا لّي‑يگان تامدينت ن‑اندراوس د‑بطرُس. ءيدّو فيليبّوس ياف‑ن ناتانايل ييني‑اس: «ها‑ياغ نمناگّار غوالّي‑ف‑يورا موسا غ‑شّرع ءولا لانبيا غ‑وارّاتن‑نسن. ءيگا ياسوع گو‑ناصيرا يوس ن‑يوسف.» ءيرار‑اس‑د ناتانايل: «ءيس‑يژضار ا‑د‑ياشك كرا ءيفولكين زغ‑ناصيرا؟» ييني‑اس فيليبّوس: «اشك‑يد ا‑تژرت.» ياسوع ءيژرا‑ن ناتانايل ءيفتا‑د س‑دارس، ييني فلّاس: «غواد ا‑يگان س‑صّاحت زغ‑ايت‑ربّي، ءيصفو‑وول‑نس.» ييني‑اس‑د ناتانايل: «ما‑س‑يّي‑تسّنت؟» ءيرار‑اس ياسوع: «لّيغ ءور‑تا‑ياك‑يغري فيليبّوس، ژريغ‑ك‑ين غ‑دّو تازارت.» ءيساول‑د ناتانايل ييني‑اس: «واي‑امسلمد، كيّي ا‑يگان يوس ن‑ربّي، تگت اگلّيد ن‑ايت‑ربّي.» ءيرار‑اس ياسوع: «ءيس‑سري‑تومنت لّيغ‑اك‑نّيغ ‹ژريغ‑ك‑ين غ‑دّو تازارت›؟ را‑سول‑تژرت ءوگُّار ن‑ماياد.» ءيزايد ياسوع ييني‑اس: «لحقّ اياد، لحقّ ا‑راد‑اون‑ينيغ. را‑تژرم ءيگنوان رژمن، تژرم لمالايكا ن‑ربّي ار‑اقلاين ار‑دي‑تگّوزن ف‑يوس ن‑بنادم.» زرين سين‑ووسّان س‑تلّا يات‑تمغرا غ‑تمدينت ن‑قانا غ‑تمازيرت ن‑جاليل، تيلي غين ءينّاس ن‑ياسوع. ءيتياوعراض ءولا ياسوع د‑يمحضارن‑نس س‑تمغرا. لّيغ‑اسن‑تمّان‑وامان ن‑واضيل ءيكتين، تيني‑اس ءينّاس ءي‑ياسوع: «ءور‑سول دارسن امان ن‑واضيل.» ييني‑اس ياسوع: «ماد‑داري‑تريت، ا‑تامغارت؟ هان ءور‑تا‑دي‑تلكيم تاساعت‑ينو.» ءيمّا ءينّاس تزوويد تيني ءي‑يخدّامن: «سكرات اينّا‑س‑اون‑ينّا.» لّانت غين سضيصط‑تخاباتين مقّورنين ن‑وژرو، ار‑گيسنتي‑تگّان امان لّي‑س‑ا‑تغوسن ايت‑يودايا س‑يسيرد‑نسن. كرايگاتّ يات را‑تّاسي ما‑يتگّان ميّا ن‑ليترو. ءيساول ياسوع س‑يخدّامن ييني‑اسن: «عمّرات تيخاباتين س‑وامان.» عمّرن‑تنت ار ءيمي. ءيزايد ييني‑اسن: «اسيات غيلاد، تاويم ءي‑بو‑تمغرا.» دّون اوين‑اس امان. لّيغ ءيمضي بو‑تمغرا امان لّي‑يوورّين گن امان ن‑واضيل، ءور‑يسّين ماني‑د‑كّان. غير ءيخدّامن لّي‑تن‑د‑وگُمنين ا‑يسّنّ. ءيغر ءي‑وسلي ييني‑اس: «ار‑بدّا‑دي‑تاوين مدّن امان ن‑واضيل ءيحلان غ‑يسيزوار ن‑تمغرا، ارد سون ءينبگيون يان كرا فكن‑اسن‑د وييّاض ياضني. ءيمّا كيّي تسّوگُّريت‑ن امان ن‑واضيل ءيحلان ار غيلاد.» ختاد ا‑يگان لمعجيزت تامزواروت، ءيسكر‑تّ ياسوع غ‑قانا ن‑جاليل، ءيسّبايّن‑د لمجد‑نس، امنّ سرس ءيمحضارن‑نس. ءيفتو ياسوع غاكودان س‑تمدينت ن‑كافرناحوم، نتّا د‑ينّاس د‑ايتماس د‑يمحضارن‑نس. گاورن غين كرا ن‑ووسّان. ياكمور‑د لعيد ن‑وسورف غ‑دار ايت‑يودايا، ءيفتو ياسوع س‑تمدينت ن‑وروشاليم. ءيكشم س‑تگمّي ن‑ربّي ياف‑ن مدّن ار‑گيس‑زّنزان ءيزگارن د‑وولّي د‑يتبيرن، ءيژر وييّاض سكيوسن غ‑دار لميادي‑نسن ار‑تصرّافن ءيقاريدن. ياسي ءيزاكارن ءيفتل‑تن، ءيطّاي سرسن مدّن‑ان كولّوتن زغ‑تگمّي ن‑ربّي، نتني د‑وولّي د‑يزگارن، ءيگلّب لميادي ن‑يصرّارفين فّين ءيقاريدن‑نسن ف‑واكال. ييني ءي‑ويلّي زّنزانين ءيتبيرن: «سّوفغات غاياد زغ‑غيد. ا‑ور‑ترارم تيگمّي ن‑بابا ا‑تگ سّوق.» كتين‑د ءيمحضارن‑نس ما‑يتياران غ‑وارّا ن‑ربّي، «تايري ف‑تگمّي‑نّك ا‑يجدّرن ءول‑ينو.» نكرن ءيمغارن ن‑ايت‑يودايا ءينين‑اس: «مل‑اغ كرا لّمعجيزت اد‑اغ‑تگ تاماتارت ن‑يس‑دارك لحقّ ا‑تسكارت غاياد.» ءيرار‑اسن ياسوع ييني: «خلوات تيگمّي‑اد ن‑ربّي، بنوغ‑تّ غ‑كراض‑ووسّان.» ءينين‑اس‑د: «كّوژ ءيد‑مراو د‑سضيص (46) ن‑وسگُّاس ايد بنّون تيگمّي‑اد. مامنك ا‑تريت كيّي ا‑ستّي‑تبنوت غ‑كراض‑ووسّان؟» ءيمّا ياسوع، هاتي ءيساول ف‑دّات‑نس ا‑يگان تيگمّي ن‑ربّي. لّيغ‑د‑ينكر زغ‑لموت كتين‑د ءيمحضارن‑نس مايلّي‑س‑اسن‑ينّا، امنّ ارّا ن‑ربّي د‑واوال‑اد س‑ينّا ياسوع. لّيغ ءيلّا ياسوع غ‑وروشاليم غ‑ووسّان لّعيد ن‑وسورف، امنّ سرس مدّن گّوتنين لّيغ ژران لمعجيزات لّي‑يسكر. ءيمّا ياسوع ءور‑گيسن‑يومين نتني، اشكو ءيسّن كولّو مدّن مامنك اد‑گان. ءور‑يحتاجّا ماد‑اس‑ياكّان توگّا ف‑بنادم، اشكو ءيسّن ما‑يلّان غ‑بنادم. ءيلّا يان‑ورگاز زغ‑لمدهب ن‑يفاريسين، ءيگا ءيسم‑نس نيقوديموس، ءيگ يان زغ‑يمغارن ن‑ايت‑يودايا. يوشكا‑د س‑دار ياسوع غ‑ييض ييني‑اس‑د: «واي‑امسلمد، نسّن ءيزد ربّي ا‑ك‑يد‑يوزنّ ا‑تسّلمادت، اشكو ءور‑يژضار يان ا‑يسكار لمعجيزات لّي‑تسكارت ءيغ‑ور‑ديدس‑يلّي ربّي.» ءيساول ياسوع ييني‑اس: «لحقّ اياد، لحقّ ا‑راد‑اك‑ينيغ. يان ءور‑يلولن زغ‑لجديد ءور‑را‑ييژضار ا‑يژر تاگلديت ن‑ربّي.» ييني‑اس‑د نيقوديموس: «مامنك ا‑را‑ييژضار يان ا‑د‑يلال د‑نتّان ءيمقّور؟ ءيس‑را‑يوورّي س‑واحليگ ن‑ينّاس ا‑د‑يلال تيس سنات‑توال؟» ءيساول ياسوع ييني‑اس: «لحقّ ايد‑اك‑تّينيغ، يان ءور‑يلولن س‑وامان د‑رّوح ءور‑يژضار ا‑يكشم س‑تگلديت ن‑ربّي. اينّا ءيلولن زغ‑دّات، وين دّات ا‑يگا. اينّا ءيلولن زغ‑رّوح، وين رّوح ا‑يگا. «اد‑ور‑تعجّبت غ‑واوال‑اد‑اك‑نّيغ ‹ءيقّان‑كُن‑د ا‑تلالم زغ‑لجديد.› ار‑يصواض‑واضو س‑ينّا ءيرا، ار‑تسفليدت ءي‑تيجّيجت‑نس، والاينّي ءور‑تسّينت ماني‑د‑يكّا ءولا مانيس ءيفتا. غمكاد ا‑يگا رّوح لقودوس دار كولّو وانّا زغ‑گيس ءيلولن.» ييني‑اس‑د نيقوديموس: «مامنك ا‑يژضار ا‑ييلي ماياد؟» ييني‑اس ياسوع: «كيّي تگيت امسلمد ن‑ايت‑ربّي، سول ءور‑تسّينت تيغاوسيوين‑اد؟ لحقّ ايد‑اك‑تّينيغ، ار‑نساوال ف‑ما‑نسّن ار‑ناكّا توگّا ف‑ما‑نژرا، ءيمّا كونّي ءور‑تريم ا‑تامنم توگّا‑نّغ. ار‑اون‑تّينيغ ف‑تغاوسيوين ن‑دّونيت‑اد، ءور‑يّي‑تومينم. مامنك ا‑را‑يّي‑تامنم ءيغ‑اون‑نّيغ ف‑تغاوسيوين ن‑يگنّا؟ «ءور‑يغلي يان س‑يگنّا ابلا يوس ن‑بنادم لّي‑د‑يگّوزن زغ‑يگنّا. غمكلّي يولّ موسا الگمّاض ن‑واناس ف‑يگّي ن‑وگّجدي غ‑لخلا، غمكان ا‑يّي‑د‑يقّان اد‑تيالالغ ءولا نكّي لّي‑يگان يوس ن‑بنادم، باش ا‑تيلي تودرت ءيدومن ءي‑كولّو وانّا سري يومنّ.» اشكو غونشكاد ا‑س‑يحنّا ربّي ف‑دّونيت ايلّيغ‑د‑يفكا غوالّي ءيگان يوس، ا‑د‑يكّيس ءي‑لهالاك كولّو وانّا سرس يومنّ، ءيشّكشم‑تن س‑تودرت ءيدومن. اشكو ربّي ءور‑د‑يوزن يوس س‑دّونيت باش ا‑يحكام ف‑دّونيت، والاينّي يوزن‑ت‑يد باش ا‑تنجم دّونيت ف‑وفوس‑نس. وانّا سري يومنّ، ءور‑را‑فلّاس‑يتّوت لحوكم. ءيمّا وانّا ءور‑يرين ا‑يامن، لحوكم ا‑فلّاس‑يلّان اشكو ءور‑يومين س‑واد ءيگان يوس ن‑ربّي. غاياد ا‑ف‑يتّوت لحوكم، اشكو تكشم‑د تيفاوت س‑دّونيت ءيرين مدّن تيلّاس ءوگُّار ن‑تيفاوت، ميارن اد‑سكارن لخُشانت. كولّو وانّا ءيسكارن ما‑يُخشنّ، ار‑يتكرهو تيفاوت. ءور‑ا‑يتّيري ا‑د‑يفّوغ س‑تيفاوت ا‑ور‑د‑بايّنّ ءيسكّيرن‑نس. ءيمّا وانّا ءيسكارن س‑لحقّ، ار‑د‑يتفّوغ س‑تيفاوت باش اد‑د‑بايّنّ ءيسكّيرن‑نس ءيزد س‑واوال ن‑ربّي ا‑س‑ا‑يسكار. تيغوردين ن‑مايان ءيدّو ياسوع د‑يمحضارن‑نس س‑تمازيرت ن‑يودايا، ءيقاما غين ار‑يسّدّام مدّن غ‑وامان. ءولا يوحانّا غ‑ووسّان‑ان ار‑يسّدّام مدّن، ييلي غ‑تسگا ن‑عينّون اشكو غين ا‑غ‑گّوتن‑وامان، ءور‑باهرا‑ياگّوگ زغ‑ساليم. ار‑دي‑تّاشكين مدّن س‑دار يوحانّا، دّمن غ‑وامان ف‑وفوس‑نس. غاكودان ءور‑تا‑يتياماژ يوحانّا غ‑لحبس. يان‑واسّ ار‑ساوالن ءيمحضارن ن‑يوحانّا د‑يان‑ورگاز ءيگا گو‑يودايا، ار‑تمجاحادن ف‑وسغوس ن‑ايت‑يودايا. اشكين‑د س‑يوحانّا ءينين‑اس: «واي‑امسلمد، غوالّي‑ك‑يمناگّارن غ‑تسگا ياضني ن‑وردون تفكت فلّاس توگّا‑نّك، هاتي ار‑يسّدّام ءولا نتّا، ار‑دارس‑تّيدون مدّن كولّوتن.» ءيساول يوحانّا ييني‑اسن: «ءور‑يژضار يان ا‑يطّاف كرا ءيغ‑ور‑اس‑ت‑يفكي ربّي. كونّي تسفلدم‑يّي لّيغ نّيغ ‹ءورد نكّين ا‑يگان لماسيح والاينّي يوزن‑يّي‑د ربّي اد‑زوورغ ءي‑لماسيح.› تاسليت تين‑وسلي ا‑تگا، ءيمّا امدّاكُّل ن‑وسلي ءيبيدّ غ‑تاما ن‑وسلي ار‑يسفليد ءي‑واوال‑نس ءيفرح سرس. يووفا گيگي لفرح‑اد غيلا. ءيقّان‑د ا‑ياقلاي نتّا، ار‑تگّوزغ نكّي.» غوالّي‑د‑يوشكان زغ‑وفلّا، نتّان ا‑يوگُرن كولّو ما‑يلّان. وانّا ءيگان زغ‑دّونيت، گو‑دّونيت ا‑يگا، ار‑يساوال غير ف‑تغاوسيوين ن‑دّونيت. ءيمّا غوالّي ءيگان زغ‑يگنّا، يوگُر كولّو ما‑يلّان. ار‑ياكّا توگّا ف‑ما‑يژرا ءولا ما‑مي‑يسفلد، والاينّي ءور‑يلّي ما‑يومنّ توگّا‑نس. ءيمّا وانّا يومنّ توگّا‑نس، هاتي ءيملا ءيزد ربّي ا‑دار لحقّ. غوالّي‑د‑يوزن ربّي، ار‑بدّا‑يساوال س‑يواليون ن‑ربّي، اشكو ءيعمّر‑ت كولّو س‑تحكيمت ن‑رّوح‑نس. ربّي، ءيعزّا دارس يوس، ءيگ كولّو ما‑يلّان غ‑دّو‑وفوس‑نس. وانّا يومنّ س‑يوس ن‑ربّي، را‑يدّر تودرت ءيدومن. ءيمّا وانّا ءور‑يسفليدن س‑يوس ءور‑را‑يطّاف تودرت والاينّي را‑فلّاس‑يقاما لغاضاب ن‑ربّي. سفلدن ءيفاريسين ءيس‑ا‑يسكار ياسوع ءيمحضارن ءوگُّار ن‑يوحانّا، ار‑تن‑يسّدّام غ‑وامان. ءورد ف‑وفوس ن‑ياسوع ا‑ف‑ا‑تدّامن والاينّي ف‑وفوس ن‑يمحضارن‑نس، والاينّي لّيغ ءيسفلد ياسوع ف‑مايد تّينين ءيفّوغ تامازيرت ن‑يودايا يامژ اغاراس ن‑جاليل. ءيقّان‑ت‑يد ا‑يزري زغ‑تمازيرت ن‑ساميرا. ءيلكم‑د يات‑تمدينت غ‑ساميرا ار‑اس‑تّينين سوخار. تلّا غ‑تسگا ن‑يگر لّي‑يفكا ياعقوب ءي‑يوس يوسف. ءيلّا‑غين‑وانو ن‑ياعقوب. ءيگاور ياسوع غ‑تاما ن‑وانو اشكو ءيرمي غ‑وغاراس، ءيگ لحال طوژّونت ن‑واسّ. تاشك‑يد يات‑تمغارت ءولّت‑ساميرا ا‑ن‑تاگُم. ءيساول سرس ياسوع ييني‑اس: «فك‑يّي اد‑سوغ.» ءور‑ديدس‑لّين ءيمحضارن‑نس غ‑تاساعت‑ان، اشكو دّان س‑تمدينت اد‑د‑سغن ماد‑شتّان. تيني‑اس‑د‑تمغارت: «ماخ ا‑يّي‑تضالبت ا‑تسوت؟ كيّي تگيت گو‑يودايا، نكّي گيغ ءولّت‑ساميرا.» اشكو ايت‑يودايا ءور‑ا‑سّان زغ‑يروكوتن ن‑ايت‑ساميرا. ءيساول ياسوع ييني‑اس: «مراد ءيس‑تسّنت تاوافكا ن‑ربّي ءولا ما‑يگا غواد‑ام‑ينّان ‹فك‑يّي اد‑سوغ،› ءيكون تضالبت‑يّي فكغ‑ام امان ن‑تودرت.» ترار‑اس‑د‑تمغارت: «وا‑سيدي، هان انو ءيدرا، ءور‑دارك دّلو. مانيغ را‑تافت امان‑لّي ن‑تودرت؟ ءيس‑توگُرت باباتنّغ ياعقوب لّي‑اغ‑يفكان انو‑اد، ءيسو زغ‑گيس نتّا د‑تاروا‑نس د‑لكسيبت‑نس؟» ءيساول ياسوع ييني‑اس: «كولّو وانّا ءيسوان زغ‑وامان‑اد راد‑داغ‑يروفو، ءيمّا وانّا ءيسوان زغ‑وامان لّي‑راد‑اس‑فكغ نكّي، ءور‑سار‑يروفي. اشكو امان لّي‑راد‑اس‑فكغ را‑زگيس‑نگين زوند يات تالعينت ن‑تودرت ءيدومن.» تيني‑اس‑د‑تمغارت غاكودان: «وا‑سيدي، فك‑يّي امان‑اد، ا‑يّي‑ور‑سول‑ياغ ءيريفي ءولا‑دا‑د‑سول‑تّاشكيغ ا‑ن‑اگُمغ.» ييني‑اس ياسوع: «زايد غر‑د ءي‑ورگاز‑نّم توورّيد‑د.» ءيمّا نتّات ترور‑اس‑د: «ءور‑داري ارگاز.» ييني‑اس ياسوع: «تُغژانت لّيغ تنّيت ءور‑دارم ارگاز، اشكو تكّيت‑ستّين تّاهالت سمّوس ءيرگازن. ءيمّا غوالّي‑دا‑تلّيت غ‑ووسّان‑اد ءور‑كم‑يتاهيل. لحقّ ايد‑س‑تنّيت.» تيني‑اس‑د‑تمغارت: «وا‑سيدي، سّنغ غيلاد ءيزد كرا ن‑نّابي ا‑تگيت. ها‑يمزوورا‑نّغ نكُّني ار‑تعبادن ربّي غ‑يگّي ن‑ودرار‑اد، ءيمّا كونّي ار‑تّينيم ‹ءوروشاليم ا‑غ‑د‑يقّان مدّن اد‑تعبادن.› » ءيساول ياسوع ييني‑اس: «امن‑يّي ا‑تامغارت. راد‑د‑اشكين‑ووسّان غ‑را‑تّعبادم ربّي باباتنّغ ءورد غير غ‑ودرار‑اد نغد غ‑وروشاليم. كونّي ار‑تّعبادم غوالّي ءور‑تسّينم. نكُّني نسّن ما‑نتعباد، اشكو دار ايت‑يودايا ا‑د‑يكّا‑وجنجم ن‑ربّي. والاينّي راد‑د‑اشكين كرا ن‑ووسّان، هاتني‑نّيت لكمن‑د، لّي‑غ‑راد‑يلين كرا ن‑مدّن ار‑تعبادن ربّي باباتنّغ غمكلّي ءيرا، س‑تحكيمت ن‑رّوح لقودوس ءولا لحقّ. زوند غويد ا‑يرا باباتنّغ ا‑تي‑تعبادن. ربّي ءيگا رّوح. وينّا رانين ا‑تي‑تعبادن ءيقّان‑تن‑د ا‑تي‑تعبادن س‑تحكيمت ن‑رّوح ءولا لحقّ.» تيني‑اس‑د‑تمغارت: «سّنغ ءيس‑را‑د‑ياشك لماسيح (ا‑ت‑يگان د‑ومژلاي ن‑ربّي). غاكود نّا‑د‑يوشكا راد‑اغ‑د‑يمل كولّو تيغاوسيوين‑اد.» ييني‑اس ياسوع: «نكّي‑اد ديدم ءيساوالن ا‑ت‑يگان.» غاكودان اد‑د‑وورّين ءيمحضارن ن‑ياسوع. تعجّبن لّيغ‑ت‑ين‑وفان ار‑يساوال د‑يات‑تمغارت، والاينّي ءور‑اس‑نّين «ما‑دارس‑تريت؟» ءولا «ماخ ايلّيغ ا‑ديدس‑تساوالت؟» تنكر‑تمغارت تفل اگدور‑نس تفتو س‑تمدينت، ار‑تّيني ءي‑مدّن ن‑غين: «اشكاد‑د ا‑تژرم يان‑ورگاز ءيساول‑يّي ف‑كولّو ماد‑سكرغ. حاقّان ءيزد غواد ا‑يگان لماسيح ن‑ربّي.» فّوغن‑د مدّن زغ‑تمدينت فتون‑د س‑دار ياسوع. ءور‑تا‑د‑روحن مدّن‑ان، ساولن‑د ءيمحضارن س‑ياسوع ءينين‑اس: «هاك ا‑تشّت اي‑امسلمد.» ءيمّا نتّا ءينّا‑ياسن: «ءيلّا داري ما‑يّي‑يشّباعن، ءور‑تي‑تسّينم كونّي.» سقسان ءيمحضارن ءي‑نگراتسن: «ءيس‑يلّا ماد‑اس‑د‑ييوين ما‑يشتّا؟» ءيمّا ياسوع ءينّا‑ياسن: «ها‑يّي ار‑تشباعغ ءيغ‑ا‑سكارغ ما‑يرا غوالّي‑يّي‑د‑يوزنّ، سّافوغ تاووري‑نس. ءيس‑ور‑ا‑تّينيم ‹كّوژ‑ييرن ا‑سول‑يقامان ءي‑تمگرا›؟ والاينّي راد‑اون‑ينيغ، الّات الّن‑نّون ا‑تژرم ءيگران ملّولن، لكمن ف‑تمگرا. غيلاد غوالّي ءيمگرن ار‑يتامژ تيغراد‑نس، ار‑يسّمونو صّابت ن‑تودرت ءيدومن، باش ا‑يفرح غوالّي ءيكرزن ءولا غوالّي ءيمگرن ءي‑نگراتسن. يُغژان‑واوال لّي‑س‑ا‑تّينين مدّن ‹ءيكرز‑ت يان، ءيمگر‑ت وايّاض.› ها‑يّي ءوزنغ‑كُن ا‑تمگّرم غايلّي‑ف‑ور‑توتم تامّارا. وييّاض ءوتن تامّارا، ءيمّا كونّي ار‑دي‑تّاويم غايلّي‑ف‑تّ‑وتن.» ءيگّوت ما‑يومنّ س‑ياسوع غ‑تمدينت‑ان ن‑ساميرا لّيغ سفلدن ءي‑توگّا لّي‑فلّاس‑تفكا‑تمغارت‑لّي، تيني‑اسن «ءيساول‑يّي ف‑كولّو ماد‑سكرغ.» لّيغ‑ت‑يد‑روحن ضالبن‑ت اد‑دارسن‑يگاور. ءيقاما غين دار ايت‑ساميرا سين‑ووسّان. ار‑تّيگاتن س‑وگُّار غويلّي سرس ءومنّين لّيغ‑اس‑سفلدن ار‑يساوال. ءينين ءي‑تمغارت‑ان: «ءورد غير ف‑سّيبت ن‑واوال‑نّم ا‑ف‑نومن غيلاد والاينّي نسفلد‑اس ءولا نكُّني، نيسّان ءيزد س‑صّاحت غواد ا‑يگان انجّام ن‑دّونيت.» لّيغ زرين سين‑ووسّان ءيفتو ياسوع، يامژ اغاراس س‑تمازيرت ن‑جاليل. نتّا س‑يخف‑نس ا‑يفكان توگّا‑ياد ءينّا: «ءور‑يلّي كرا ن‑نّابي، ءوقّرن‑ت ايت‑تمازيرت‑نس.» لّيغ ءيلكم جاليل فرحن سرس ايت‑جاليل، اشكو دّان ءولا نتني س‑وروشاليم ا‑ن‑زّرين لعيد، ژرن كولّو مايلّي ءيسكر غين غ‑ووسّان‑ان. يوورّي ياسوع س‑تمدينت ن‑قانا غ‑جاليل غ‑يلّيغ ءيرور امان اد‑گن امان ن‑واضيل ءيكتين. ءيلّا غين يان‑ونمغور ن‑تمازيرت، يوضن‑اس يوس غ‑تمدينت ن‑كافرناحوم. لّيغ ءيسفلد ءيس‑د‑يوشكا ياسوع زغ‑يودايا س‑جاليل، ءيدّو س‑دارس ءيضالب‑ت ا‑د‑ياشك ا‑يجّوجّي يوس اشكو ار‑يتمتات. ءيساول ياسوع غاكودان ييني: «ءيغ‑ور‑تژريم لمعجيزات د‑لقوّات ءور‑اكُّ‑ا‑تّيريم ا‑تامنم.» ييني‑اس‑د‑ونمغور: «اشك‑يد ا‑سيدي ءور‑تا‑يمّوت ءيوي.» ءيرار‑اس ياسوع: «زايد، را‑يدّر يوك.» ءيفتو‑ورگاز يامن ماد‑اس‑ينّا ياسوع. نتّان سول ءيفتا غ‑وغاراس مناگّارن‑ت‑يد ءيخدّامن‑نس ءينين‑اس: «ها‑يوك ءيدّر.» ءيسقسا‑تن: «مان تاساعت ا‑يجّي؟» ءينين‑اس: «تيتّي زغ‑گيس تاولا ءيضگام غ‑تاساعت ءيزوارن غ‑طوژّونت ن‑واسّ.» ءيسّن ءيزد تاساعت‑ان ا‑غ‑اس‑ينّا ياسوع «را‑يدّر يوك،» يامن سرس نتّا ءولا كولّو ايت‑تگمّي‑نس. ختاد ا‑يگان تيس سنات لمعجيزات ءيسكر‑تّ ياسوع لّيغ‑د‑يوشكا زغ‑يودايا س‑جاليل. تيغوردين ن‑مايان ييلي يا‑لّعيد دار ايت‑يودايا، ءيدّو ياسوع س‑تمدينت ن‑وروشاليم. ءيلّا يان‑يفرض غ‑وروشاليم غ‑تاما ن‑يمي ن‑وولّي، ار‑اس‑تّينين ‹ءيفرض ن‑بيتزاتا› س‑واوال ن‑ايت‑يودايا. سوتلن‑اس سمّوس ءيلحنين. ار‑گيسن‑گانّ ءيموضان گّوتنين، ءيبوكاضن د‑يبيضارن د‑يكوشامن. ءيلّا غين يان‑ورگاز يوضن كراض ءيد‑مراو د‑تام (38) ن‑وسگُّاس. لّيغ‑ت‑يژرا ياسوع ييسّان ءيزد كيگان د‑يسگُّاسن ا‑غين‑يگن، ييني‑اس: «ءيس‑تريت ا‑تجّيت؟» ءيساول‑د‑وماضون ييني‑اس: «وا‑سيدي، ءور‑داري ما‑يّي‑يشّكشامن س‑يفرض اكود نّا‑گيس‑مّوسّان‑وامان. غاكود نّا‑ن‑اكمورغ س‑يّي‑يزوار كرا ن‑يان ياضني ءيگّوز س‑وامان.» ءيزايد ياسوع ييني‑اس: «نكر، اسي ءيمجدين‑نّك تدّوت.» ءيجّي‑ورگاز‑لّي غاكودان، ياسي ءيمجدين‑نس ار‑يفتّو. د‑غاسّان ءيگا اسّ ن‑وسونفو. ساولن ءيمغارن ن‑ايت‑يودايا س‑ورگاز لّي‑يجّين ءينين‑اس: «اسّ ن‑وسونفو اياد. ءيحرم ا‑تاسيت ءيمجدين.» ءيرار‑اسن: «غوالّي‑يّي‑يجّوجّين ءينّا‑يّي ‹اسي ءيمجدين‑نّك تدّوت.› » سقسان‑ت: «ما‑يگا‑ورگاز لّي‑اك‑ينّان ‹اسي ءيمجدين‑نّك تدّوت›؟» ءيمّا نتّا ءور‑يسّين ما‑يگا، اشكو ياسوع ءيماتّي‑ن زغ‑گر مدّن گّوتنين لّي‑لّانين غين. غير ءيميكّ س‑ن‑ديدس‑يمناگّار ياسوع غ‑تگمّي ن‑ربّي ييني‑اس: «ها‑كيّي تجّيت. ا‑ور‑سول‑تسكارت دّنوب ا‑ور‑يميل ييلي‑اك كرا يوگُرن غايان.» ءيدّو‑ورگاز لّي‑يجّين س‑دار ءيمغارن ن‑ايت‑يودايا ييني‑اسن: «ياسوع ا‑يّي‑يجّوجّين.» غاكودان اد‑وسين تانوّاشت ف‑ياسوع، اشكو ءيسكر مايان غ‑واسّ ن‑وسونفو. ءيمّا ياسوع ءيرور‑اسن ءينّا: «ها‑ربّي بابا ءيخدم‑بدّا، ءيقّان‑يّي‑د اد‑تخدامغ ءولا نكّي.» لّيغ سفلدن ءي‑واوال‑اد ءيرين س‑وگُّار ا‑ت‑نغن، ءورد غير ف‑سّيبت ن‑يس‑يفّوغ زغ‑لعادا ن‑واسّ ن‑وسونفو والاينّي ف‑سّيبت ن‑ما‑يگا ربّي د‑باباس، ءيسّنگادّا ءيخف‑نس د‑ربّي. ءيزايد ياسوع غاكودان ييني‑اسن: «لحقّ اياد، لحقّ ا‑راد‑اون‑ينيغ. نكّي لّي‑يگان يوس ن‑ربّي ءور‑ژضارغ اد‑سكرغ يات زغ‑يخف‑ينو ابلا مايلّي‑س‑ژريغ بابا ار‑ت‑يسكار. اشكو اينّا ءيسكار نتّا، اد‑سكارغ ءولا نكّي. اشكو ربّي بابا، عزّاغ دارس، ار‑يّي‑يمالا كولّو ما‑يسكار. راد‑يّي‑سول‑يمالا كرا ن‑يسكّيرن ءوگُرن غويد، راد‑باهرا‑گيسن‑تّعجّابم كونّي. غمكلّي‑د‑يسّنكار بابا غويلّي مّوتنين ار‑تن‑يسّدّر، غمكان ا‑س‑راد‑سّدّرغ وانّا ريغ ءولا نكّي. ءور‑ا‑يتحكام بابا ف‑يان والاينّي ءيفكا‑يّي اد‑تحكامغ ف‑كولّو مدّن، باش ا‑يّي‑كولّو‑توقّارن غمكلّي توقّارن بابا. يان ءور‑يّي‑يوقّرن، ءور‑يوقّر بابا لّي‑يّي‑د‑يوزنّ. «لحقّ اياد، لحقّ ا‑راد‑اون‑ينيغ. وانّا ءيسفلدن س‑واوال‑ينو يامن غوالّي‑يّي‑د‑يوزنّ، را‑يدّر تودرت ءيدومن. ءور‑را‑فلّاس‑يتّوت لحوكم، اشكو ءيزري زغ‑لموت س‑تودرت. لحقّ ايد‑اون‑تّينيغ، راد‑د‑اشكين كرا ن‑ووسّان، هاتني‑نّيت لكمن‑د، لّي‑غ‑راد‑سفلدن غويلّي مّوتنين ءي‑واوال ن‑يوس ن‑ربّي. د‑كولّو وانّا ءيسفلدن ءي‑واوال‑ان را‑يدّر. اشكو غمكلّي تلّا‑تژضّارت ن‑تودرت دار بابا، غمكان اد‑يّي‑يفكا تاژضّارت اد‑اكّاغ تودرت ءولا نكّي لّي‑يگان يوس. ءيفك‑يّي‑داغ اد‑كّاتغ لحوكم ف‑بنادم اشكو گيغ يوس ن‑بنادم. اد‑ور‑تّعجّابم غ‑ماياد، اشكو را‑دي‑تاشك تاساعت لّي‑غ‑راد‑سفلدن كولّو ويلّي لّانين غ‑يسمضال ءي‑واوال‑ينو. غاكودان ا‑راد‑د‑فّوغن، نكرن‑د وينّا سكارنين افولكي اد‑كشمن س‑تودرت لّجديد، نكرن‑د وينّا سكارنين لخُشانت ا‑فلّاسن‑يتّوت لحوكم. «ءور‑ژضارغ اد‑سكرغ يات زغ‑يخف‑ينو، والاينّي ار‑تحكامغ س‑ماد‑يّي‑يمالا بابا. س‑لحقّ ا‑س‑ا‑تحكامغ اشكو ءور‑ا‑سكارغ س‑ما‑تّيريغ نكّي والاينّي س‑ما‑يتّيري غوالّي‑يّي‑د‑يوزنّ. مراد ءيس‑فكيغ توگّا ف‑يخف‑ينو ءور‑راد‑زگانت توگّا‑نو. والاينّي ءيلّا وايّاض فلّا ياكّان توگّا، سّنغ ءيزد لحقّ اد‑گانت توگّا لّي‑فلّا‑ياكّا. يوحانّا لّي‑س‑توزنم، نتّان ا‑ياكّان توگّا ف‑لحقّ. ءورد نكّي ا‑يحتاجّان توگّا ن‑بنادم، والاينّي نّيغ‑اون ماياد باش ا‑تنجمّ زغ‑لهالاك. يوحانّا ءيكّا‑تّين ءيگا زوند يا‑لّقنديل ءيرغان ءيفاو، ترضوم ا‑سرس‑تيسفيوم يات تاساعت. ءيمّا نكّي، توگّا لّي‑داري‑يلّان ءوگُرنت تين يوحانّا، اشكو ءيسكّيرن لّي‑يّي‑يفكا بابا ا‑تن‑سكرغ، نتني ا‑فلّا‑ياكّان توگّا. ءيسكّيرن لّي‑سكارغ، نتني ا‑يمالان ءيزد بابا ا‑يّي‑د‑يوزنّ. ها‑بابا لّي‑يّي‑د‑يوزنّ، نتّان ا‑فلّا‑يفكان توگّا. ءور‑جّو‑تسفلدم ءي‑صّوت‑نس، ءولا تژرام صّورت‑نس. ءور‑اكُّ‑يزگا‑واوال‑نس غ‑وول‑نّون، اشكو ءور‑يّي‑تومنم نكّي لّي‑د‑يوزن. كونّي ار‑تسيگّيلم غ‑وارّاتن ن‑ربّي اشكو تغالم ءيزد گيسن ا‑غ‑را‑تافم اغاراس ن‑تودرت ءيدومن. نتني ا‑فلّا‑ياكّان توگّا، والاينّي ءور‑تريم ا‑د‑سري‑تاشكيم اد‑اون‑تيلي تودرت‑ان. «ءور‑ا‑سكارغ ف‑ا‑يّي‑تالغن مدّن، والاينّي سّنغ مامنك ا‑تگام، ءور‑گيگون‑تلّي تايري ن‑ربّي. ءوشكيغ‑د س‑يسم ن‑بابا، ءيمّا كونّي ءور‑ا‑سري‑تسفليدم. مراد ءيس‑د‑يوشكا كرا ن‑يان ياضني ار‑يساوال غير زغ‑يخف‑نس، را‑سرس‑تسفليدم. مامنك ا‑را‑تامنم لّيغ ا‑تّيريم ا‑تّالغم ءي‑نگراتون بلا‑دا‑تسكارم ف‑ا‑كُن‑يالغ ربّي لّي‑يگان واحدوت؟ ا‑ور‑تغالم ءيزد نكّي ا‑را‑سرون‑ياشتكّا غ‑دار بابا. ءيلّا وايّاض سرون ياشتكّان، ا‑ت‑يگان د‑موسا لّي‑غ‑ن‑ترجام. مراد ءيس‑تومنم موسا ءيكون تومنم‑يّي، اشكو يورا فلّا. والاينّي ءيغ‑ور‑تومينم ارّاتن ن‑موسا، مامنك ا‑را‑تامنم ءيواليون‑ينو؟» تيغوردين ن‑مايان ءيدّو ياسوع ءيبّي س‑تسگا ياضني ن‑ومدا ن‑جاليل، ار‑اس‑تّينين امدا ن‑طاباريّا. ضفورن‑ت مدّن گّوتنين اشكو ژران لمعجيزات لّي‑يسكار ار‑يجّوجّي ءيموضان. ءيغلي ياسوع س‑يان‑وورير، ءيگاور غين نتّا د‑يمحضارن‑نس. ياكمور‑د لعيد ن‑ايت‑يودايا لّي‑مي‑تّينين لعيد ن‑وسورف. ار‑ن‑يسّموقّول ياسوع س‑ن‑يژرا مدّن گّوتنين فتان‑د س‑دارس، ييني ءي‑فيليبّوس: «مانيزغ را‑د‑نسغ اغروم ماد‑شتّان مدّن‑اد؟» ءيسّن ما‑را‑يسكر والاينّي ءيسقسا فيليبّوس غمكاد باش ا‑ت‑يارم. ءيرار‑اس‑د فيليبّوس: «ءوگُّار ن‑سنات ءيد‑ميّا ن‑نّوقرت ن‑وغروم ا‑را‑يغ‑يخصّا، سول ءور‑را‑تن‑د‑ياشك غير ءيميكّ ءي‑يان.» ءيساول‑د يان زغ‑يمحضارن‑نس ءيسم‑نس اندراوس گماس ن‑سيمعان بطرُس ييني‑اس: «ءيلّا غيد يان‑وفروخ، دارس سمّوست‑تنگُال ن‑طمژّين د‑سنات‑تسلمين. والاينّي ما‑را‑يگ مايان ءي‑غونشكاد ن‑مدّن؟» ءيمّا ياسوع ءينّا‑ياسن: «سّگاورات مدّن.» ادغار‑ان، تگّوت گيس توگا. گاورن مدّن‑ان كولّوتن، راد‑گن ما‑يتگّان سمّوس ءيد‑والف ن‑ورگاز. ياسي ياسوع سمّوست‑تنگُال‑لّي ءيشكر ربّي، ءيفك‑تنت ءي‑مدّن، ءيفك‑اسن ءولا تيسلمين، كود يان د‑غونشك لّي‑يرا. لّيغ شبعان، ييني ءي‑يمحضارن‑نس: «سّمونات توفّاژ لّي‑قامانين ا‑ور‑يخسر يات.» سّمونّ‑د ما‑د‑يقامان ءي‑مدّن‑لّي زغ‑سمّوست‑تنگُال ن‑طمژّين، عمّرن سنات د‑مراوت تاسلّيت س‑توفّاژ. لّيغ ژران لمعجيزت‑اد لّي‑يسكر ياسوع ار‑تّينين: «س‑صّاحت غواد ا‑يگان نّابي لّي‑ف‑نسفلد را‑د‑ياشك س‑دّونيت.» ءيمّا ياسوع ءيسّن مامنك اد‑ران ا‑ت‑امژن سكرن زغ‑گيس اگلّيد‑نسن، ءيفل‑تن ءيفتو واحدوت س‑يورار. لّيغ‑دي‑تروح‑تدگُّات، گّوزن ءيمحضارن س‑تاما ن‑ومدا. ضرنت تيلّاس، ءور‑تا‑تن‑د‑يلكيم ياسوع. كشمن س‑تاناوت فتون غ‑ومدا، ءيرين اد‑بّين س‑تسگا ياضني س‑تمدينت ن‑كافرناحوم. ءينكر‑د‑واضو ءيتجهّدن ءيدووي‑ومدا. ار‑كّاتن ءيمحضارن س‑تُگلا، سّودون ما‑يتگّان سمّوس نغد سضيص كيليميتر س‑ا‑ن‑تمنادن ياسوع ءيفتا‑د ف‑يگّي ن‑وامان ياكمور‑د س‑تاناوت، غووضن باهرا. ييني‑اسن ياسوع: «اد‑ور‑تيكساضم. نكّين ايا.» فرحن غاكودان، سّغلين‑ت س‑تاناوت، س‑لكمن تامازيرت لّي‑ران. نديد ازكّا كتين‑د مدّن لّي‑ن‑قامانين ءيزد يات تاناوت كا‑يلّان غين ءيضگام، ءيسّانّ ءيس‑ور‑يني ياسوع د‑يمحضارن‑نس والاينّي سّودان نتني واحدوتن. غاكودان س‑ن‑وشكانت كرا ن‑تاناوين ياضني زغ‑تمدينت ن‑طاباريّا، لكمنت تاما ن‑ودغار لّي‑غ‑شّان اغروم لّي‑اسن‑يفكا سيديتنّغ ءيشكر ربّي فلّاس. لّيغ ژران مدّن‑ان ءور‑سول‑يقاما ياسوع غين ءولا ءيمحضارن‑نس، كشمن س‑تاناوين سّودون س‑تسگا ن‑كافرناحوم ا‑سرس‑سيگّلن. لّيغ‑د‑وفان ياسوع غ‑تسگا‑ياد ن‑ومدا ءينين‑اس: «واي‑امسلمد، ماناگو ا‑دي‑توشكيت س‑غيد؟» ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ. ءور‑ا‑سري‑تسيگّيلم ف‑سّيبت ن‑ما‑تسّنم لمعنا لّمعجيزات لّي‑تژرام والاينّي ف‑سّيبت ن‑ما‑تشّام اغروم تشبعام. ا‑ور‑تّخدامّ ف‑ومشّو لّي‑يتخسارن، والاينّي تخدامات ف‑ومشّو لّي‑راد‑بدّا‑يقاما ءي‑تودرت ءيدومن. نتّان ا‑راد‑اون‑فكغ نكّي لّي‑يگان يوس ن‑بنادم، اشكو ءيملا ربّي بابا ءيس‑يّي‑يژلي ءي‑ماياد.» ءيمّا نتني سقسان‑ت: «ماد‑اغ‑د‑يقّانّ ا‑ت‑نسكار باش ا‑نتخدام ءي‑ربّي؟» ييني‑اسن ياسوع: «ها لخدمت لّي‑زگيگون‑يرا ربّي، ا‑تامنم س‑غواد‑د‑يوزن.» رارن‑اس‑د: «ما‑لّمعجيزت ا‑را‑تسكرت باش ا‑ستّ‑نژر نامن سرك؟ مامنك ا‑را‑تخدمت كيّي؟ كّان‑تّين ءيمزوورا‑نّغ غ‑لخلا ار‑شتّان اغروم لّي‑مي‑تّينين ‹مانّا›. غمكلّي ءيتياران ‹ءيفكا‑ياسن‑د اغروم زغ‑يگنّا ا‑ت‑شتّان.› » ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ. ءورد موسا اد‑اون‑د‑يفكان اغروم زغ‑يگنّا والاينّي ربّي بابا. نتّان اد‑اون‑د‑ياكّان غيلاد اغروم ءيصحان زغ‑يگنّا. اشكو اغروم ن‑ربّي ءيگا‑ت غواد‑د‑يگّوزن زغ‑يگنّا، ار‑ياكّا تودرت ءي‑دّونيت.» ءينين‑اس‑د: «وا‑سيدي، اكّا‑ياغ‑بدّا اغروم‑اد.» ءيساول ياسوع ييني‑اسن: «نكّي ا‑يگان اغروم ن‑تودرت. وانّا‑د‑سري‑يوشكان، ءور‑سار‑ت‑ياغ لاژ. وانّا سري يومنّ، ءور‑سار‑ت‑ياغ ءيريفي. ءيمّا كونّي نّيغ‑اون يادلّي ‹تژرام‑يّي، ءور‑سري‑تومينم.› والاينّي را‑د‑سري‑تّاشكين كولّو وينّا‑يّي‑ياكّا بابا. د‑وانّا‑د‑سري‑يوشكان، ءور‑سار‑ت‑رورغ. اشكو گّوزغ‑د زغ‑يگنّا باش اد‑سكارغ ما‑يرا غوالّي‑يّي‑د‑يوزنّ، ءورد ماد‑ريغ نكّي. غمكاد ا‑يرا غوالّي‑يّي‑د‑يوزنّ، ءيرا ا‑ور‑يتياوهلاك يان زغ‑ويلّي‑يّي‑يفكا، ييري ا‑تن‑د‑سّنكرغ غ‑واسّ ءيگُّران ن‑دّونيت. غمكاد‑نّيت ا‑يرا بابا، ءيرا ا‑يفك تودرت ءيدومن ءي‑كولّو وانّا‑يّي‑يژران يامن سري. را‑ت‑يد‑سّنكرغ غ‑واسّ ءيگُّران.» بدون ار‑فلّاس‑تنگموگن مدّن‑ان ن‑ايت‑يودايا اشكو ءينّا «نكّي ا‑يگان اغروم لّي‑د‑يگّوزن زغ‑يگنّا.» ار‑تّينين: «ءيس‑ور‑يگي غواد ياسوع يوس ن‑يوسف؟ نسّن باباس د‑ينّاس. مامنك ا‑را‑ييري ا‑يتّيني ‹گّوزغ‑د زغ‑يگنّا›؟» ءيرار‑اسن ياسوع: «اد‑ور‑تنگموگم ءي‑نگراتون. ءور‑يژضار يان ا‑د‑سري‑ياشك ابلا‑ت‑يد‑يلدي بابا لّي‑يّي‑د‑يوزنّ. ءيمّا وانّا‑د‑سري‑يوشكان، را‑ت‑يد‑سّنكرغ غ‑واسّ ءيگُّران ن‑دّونيت. ءيتيارا غ‑وارّا لّانبيا، ‹ربّي ا‑را‑يسّلمد كولّو مدّن.› كولّو وانّا ءيسفلدن ءي‑بابا ءيلمد زغ‑گيس، را‑د‑سري‑ياشك. ءور‑يلّي يان ءيژران بابا، ابلا نكّي لّي‑يگان زغ‑ربّي ا‑ت‑يژران. لحقّ اياد، لحقّ ا‑راد‑اون‑ينيغ. وانّا سري يومنّ، را‑يدّر تودرت ءيدومن. نكّي ا‑يگان اغروم ن‑تودرت. مّوتن ءيمزوورا‑نّون غ‑لخلا واخّا دا‑شتّان اغروم لّي‑مي‑تّينين ‹مانّا›. ءيمّا غيلاد ءيگّوز‑د‑وغروم‑اد زغ‑يگنّا باش ا‑ور‑يمّت وانّا زگيس ءيشّان. نكّي گيغ اغروم ءيدّرن لّي‑د‑يگّوزن زغ‑يگنّا. وانّا ءيشّان زغ‑وغروم‑اد، راد‑بدّا‑يدّر. اغروم لّي‑راد‑فكغ ءيگا دّات‑ينو، را‑ستّ‑فكغ ا‑سرس‑تدّر دّونيت.» بدون مدّن‑ان ار‑تمجاحادن ءي‑نگراتسن ار‑تّينين: «مامنك ا‑يژضار غواد اد‑اغ‑يفك دّات‑نس ا‑زگيس‑نشّ؟» ءيمّا ياسوع ءينّا‑ياسن: «لحقّ ايد‑اون‑تّينيغ، ءيغ‑ور‑تشّيم زغ‑دّات ن‑يوس ن‑بنادم، ءيغ‑ور‑تسويم زغ‑يدامّن‑نس، ءور‑را‑گيگون‑تيلي تودرت. وانّا ءيشّان زغ‑دّات‑ينو ءيسو زغ‑يدامّن‑ينو، را‑يدّر تودرت ءيدومن، را‑ت‑يد‑سّنكرغ غ‑واسّ ءيگُّران ن‑دّونيت. اشكو دّات‑ينو تگا امشّو لّحقّ، گن ءيدامّن‑ينو تيسّي لّحقّ. وانّا ءيشّان زغ‑دّات‑ينو ءيسو زغ‑يدامّن‑ينو، هاتي ءيزگا گيگي زگاغ گيس. يوزن‑يّي‑د بابا لّي‑دار تاحكيمت ن‑تودرت، دّرغ نكّي ف‑سّيبت‑نس. را‑يدّر وانّا زغ‑گيگي ءيشّان ءولا نتّا ف‑سّيبت‑ينو. غواد ا‑يگان اغروم لّي‑د‑يگّوزن زغ‑يگنّا، ءورد زوند اغروم لّي‑شّان ءيمزوورا‑نّون، مّتن سول غ‑يسيگُّرا. وانّا ءيشّان زغ‑وغروم‑اد راد‑بدّا‑يدّر.» غمكاد ا‑س‑اسن‑يساول ياسوع لّيغ ءيسّلمد مدّن غ‑تگمّي ن‑تژالّيت غ‑كافرناحوم. لّيغ‑اس‑سفلدن ءيمحضارن‑نس، ءيگّوت گيسن ما‑ينّان: «ءيشقا‑ولمّود‑اد. ما‑را‑ييژضار اد‑اس‑يسفليد؟» ءيمّا ياسوع، بلا‑ياس‑نّان ءيسّن ما‑ف‑ا‑تنگموگن، ييني‑اسن: «ءيس‑اون‑تّ‑يسّطيّر ماياد؟ ما‑را‑تينيم ءيغ‑يّي‑تژرام تيالالغ، نكّي لّي‑يگان يوس ن‑بنادم، س‑يلّيغ تّين‑كّيغ لّيغ؟ هاتي رّوح ن‑ربّي ا‑ياكّان تودرت، ءيمّا دّات ءور‑تگي يات. راد‑اون‑ييلي رّوح ءولا تودرت س‑يواليون‑اد‑اون‑تّينيغ، والاينّي ءيلّا غ‑گراتون ما‑ور‑يومينّ.» اشكو ياسوع ءيسّن زغ‑يسيزوار مانوي ءور‑سرس‑ومنّين، ييسّان مانوا را‑ت‑يزّنز. ءيزايد ءيلمّا ييني‑اسن: «ماياد ا‑ف‑اون‑نّيغ ‹ءور‑يژضار يان ا‑د‑سري‑ياشك ءيغ‑ور‑اس‑د‑يتياوفكا زغ‑بابا.› » غاكودان ما‑يگّوتن زغ‑يمحضارن‑نس فلن‑ت، ءور‑ا‑سول‑ديدس‑تمونون. ءيساول‑د ياسوع ءيلمّا س‑سين د‑مراو ن‑ومحضار ييني‑اسن: «ءيزد ءولا كونّي ترام ا‑توورّيم؟» ييني‑اس سيمعان بطرُس: «وا‑سيدي، دار ميت ا‑س‑را‑ندّو؟ كيّي ا‑دار ءيواليون ن‑تودرت ءيدومن. ها‑ياغ نومن نيسّان ءيزد كيّي ا‑يگان امژلاي ن‑ربّي.» ييني‑اسن‑د ياسوع: «كونّي س‑سين د‑مراو، ءيس‑ورد نكّي ا‑كُن‑يستين؟ والاينّي يان گيگون ءيگا وين ءيبليس.» غمكاد ا‑س‑يبدر ياهودا يوس ن‑سيمعان ءيسخاريوط لّي‑را‑يزّنز ياسوع واخّا ءيگا يان زغ‑سين د‑مراو ن‑ومحضار‑نس. تيغوردين ن‑مايان ار‑يتلولّي ياسوع غ‑تمازيرت ن‑جاليل. ءور‑يري ا‑يفّوغ س‑تمازيرت ن‑يودايا اشكو ار‑تّيرين ءيمغارن ن‑ايت‑يودايا ا‑ت‑نغن. غ‑ووسّان‑ان ياكمور‑د لعيد ن‑ايت‑يودايا لّي‑مي‑تّينين لعيد ن‑يحشاش. ساولن‑د ايتماس ن‑ياسوع ءينين‑اس: «دّو زغ‑غيد س‑يودايا اد‑ژرن ءيمحضارن‑نّك ما‑تسكارت. اشكو يان ءيران ا‑يتياوسّان ءور‑ا‑يتحضو ءيسكّيرن‑نس. ءيغ‑ا‑تسكارت تيغاوسيوين‑اد، ءيخصّا‑ك ا‑دي‑تسّبايّنت ءيخف‑نّك ءي‑دّونيت.» اشكو ءور‑سرس‑ومينّ ايتماس. ييني‑اسن ياسوع: «ازمز‑نّون ءيلّا‑بدّا، والاينّي ءور‑تا‑د‑يلكيم‑وزمز‑ينو. كونّي، ءور‑گيگون‑يلّي ما‑ف‑ا‑كُن‑تكرهون ايت‑دّونيت‑اد، ءيمّا نكّي ار‑يّي‑تكرهون ف‑توگّا لّي‑اكّاغ ف‑لخُشانات لّي‑سكارن. زايدات كونّي ا‑تزّريم لعيد غين. ءور‑تا‑راد‑دّوغ نكّي اشكو ءور‑تا‑د‑يلكيم‑وزمز‑ينو.» ءينّا‑ياسن غمكاد، ءيگاور سول غ‑تمازيرت ن‑جاليل. والاينّي لّيغ فتان ايتماس اد‑زّرين لعيد غ‑وروشاليم، ءيفتو ءولا نتّا س‑تنتلا باش ا‑ت‑ور‑اكُزن مدّن. ار‑سرس‑سيگّيلن ءيمغارن ن‑ايت‑يودايا غ‑ووسّان لّعيد ار‑تّينين: «مانزا غوالّي؟» ءيگّوت ما‑فلّاس‑يتنشموشن. كرا گيسن ار‑يتّيني: «ارگاز ءيفولكين ا‑يگا.» كرا ار‑يتّيني: «ءوهو، ار‑يجلّو مدّن.» والاينّي ءور‑يژضار يان ا‑يالّ اوال‑نس، اشكو كسوضن زغ‑يمغارن ن‑ايت‑يودايا. لّيغ ءيروح مناصّ غ‑ووسّان لّعيد، ءيكشم ياسوع س‑تگمّي ن‑ربّي ار‑يسّلماد. ار‑گيس‑تعجّابن ءيمغارن ن‑ايت‑يودايا ار‑تّينين: «ارگاز‑اد ءور‑د‑يكّي لمدرست. مامنك ا‑س‑يسّن غونشكاد ن‑ولمّود؟» ءيمّا ياسوع ءيرور‑اسن ءينّا: «المّود‑اد ءور‑يگي وينو. ءيگا وين غوالّي‑يّي‑د‑يوزنّ. وانّا ءيران ا‑يسكار ما‑يرا ربّي، نتّان ا‑را‑ييسّان المّود‑اد ءيزد دار ربّي ا‑زغ‑د‑يوشكا نغد ار‑د‑ساوالغ زغ‑يخف‑ينو. يان‑د‑يساوالن زغ‑يخف‑نس، ار‑يتّيري ا‑ت‑الغن مدّن. والاينّي يان ءيتّيرين ا‑ت‑يالغ غوالّي‑ت‑يد‑يوزنّ، نتّان ار‑يتّيني لحقّ ءور‑ا‑يسّكيركيس. موسا ءيفكا‑ياون شّرع ن‑ربّي، والاينّي ءور‑گيگون‑يلّي يان ءيسكارن س‑شّرع. ماخ ايلّيغ ا‑تّيريم ا‑يّي‑تنغم؟» رارن‑اس‑د مدّن‑ان: «كيّي، كرا لّجنّ ا‑ك‑يكشمن. ما‑يران ا‑ك‑ينغ؟» ييني‑اسن ياسوع: «يان‑وسكّير كاد‑سكرغ، ار‑كولّو‑گيس‑تّعجّابم. يوصّا‑كُن موسا ا‑تژّالّم ءي‑تاروا‑نّون، واخّا ءورد موسا كا‑يزوارن غ‑تژالّيت‑ان والاينّي ءيمزوورا‑نّون ا‑زوار‑يژّولّان. تميارم غيلاد ا‑تژّالّم ءي‑بنادم ءولا غ‑واسّ ن‑وسونفو. والاينّي ءيغ‑تژّولّام ءي‑بنادم غ‑واسّ ن‑وسونفو باش ا‑تسكارم س‑شّرع ن‑موسا، ما‑ف‑اون‑فلّا‑طيّر لّيغ جّوجّيغ بنادم كولّوت غ‑واسّ ن‑وسونفو؟ ا‑ور‑تّنباضم س‑ما‑د‑يبانّ ءي‑مدّن والاينّي تنباضات س‑لحقّ.» بدون كرا ن‑ايت‑وروشاليم ار‑سقسان ءي‑نگراتسن ار‑تّينين: «ءيس‑ورد غواد اد‑ران ءيمغارن ا‑ت‑نغن؟ هاتي ار‑يساوال غ‑وامّاس ن‑مدّن، ءور‑اس‑نّين يات. حاقّان سّنّ ءيزد س‑صّاحت نتّان ا‑يگان لماسيح ن‑ربّي؟ والاينّي ارگاز‑اد، نسّن مانيزغ‑د‑يوشكا. ءيغ‑د‑يوشكا لماسيح، ءور‑را‑ييسّان يان مانيزغ‑د‑يوشكا.» ار‑يسّلماد ياسوع غ‑تگمّي ن‑ربّي، يالّ اوال‑نس ييني: «ءيس‑يّي‑تسّنم؟ ءيس‑تسّنم مانيزغ‑د‑وشكيغ؟ ءور‑د‑وزنغ ءيخف‑ينو. لحقّ ا‑يگا غوالّي‑يّي‑د‑يوزنّ، والاينّي ءور‑تي‑تسّينم كونّي. سّنغ‑ت نكّي اشكو گيغ زغ‑گيس، د‑نتّان ا‑يّي‑د‑يوزنّ.» نكرن مدّن غاكودان ا‑ت‑غوين، والاينّي ءور‑يژضار يان ا‑ن‑سرس‑يگ افوس اشكو ءور‑تا‑دي‑تلكيم تاساعت‑نس. والاينّي ءيگّوت غ‑مدّن‑ان ما‑سرس‑يومنّ، ار‑تّينين: «ءيغ‑د‑يوشكا لماسيح ن‑ربّي ءيس‑را‑يسكر لمعجيزات ءوگُّار ن‑مايلّي ءيسكر‑ورگاز‑اد؟» سفلدن ءيفاريسين ءي‑ما‑تّينين مدّن ءي‑نگراتسن ف‑ياسوع. نكرن نتني د‑ينمغورن ن‑تگمّي ن‑ربّي، ازنّ‑د ءيمخزنيين ا‑ت‑امژن. ءيساول ياسوع س‑مدّن ييني‑اسن: «غير كرا ءيدروسن ا‑را‑سول‑ديدون‑يليغ، وورّيغ ءيلمّا س‑والّي‑يّي‑د‑يوزنّ. را‑سري‑تسيگّيلم والاينّي ءور‑را‑يّي‑تافم، اشكو ءيلّيس راد‑دّوغ ءور‑تژضارم ا‑سرس‑تدّوم.» سّمقسان ءيلمّا مدّن‑ان ن‑ايت‑يودايا ءي‑نگراتسن ءينين: «مانيس را‑يدّو ايلّيغ ءور‑را‑ت‑ناف نكُّني؟ ءيس‑يرا ا‑يدّو س‑دار ايت‑دارنّغ لّي‑زدغنين غ‑تميزار ياضني ا‑غين‑يسّلماد ايت‑تميزار‑ان؟ ها‑نتّا ءينّا را‑سرس‑نسيگّيل ءور‑را‑ت‑ناف، ييني ءيس‑ور‑نژضار ا‑ندّو س‑يلّيس را‑يدّو. ما‑تگا لمعنا ن‑واوال‑اد؟» غ‑واسّ ءيگُّران لّعيد، ءيگا اسّ كولّو ءيهيّان، ءيبيدّ ياسوع يالّ اوال‑نس ييني: «وانّا ياغ ءيريفي، ا‑د‑سري‑ياشك ءيسو. وانّا سري يومنّ، ‹ءيسافّن ن‑وامان ن‑تودرت ا‑را‑يفتو زغ‑وول‑نس› غمكلّي ءيتياران.» اوال‑اد، ءينّا‑ت ياسوع ف‑رّوح ن‑ربّي لّي‑را‑د‑يگّوز ف‑ويلّي سرس ءومنّين. غ‑ووسّان‑ان ءور‑تا‑ياسن‑د‑يتياوفكا رّوح، اشكو ءور‑تا‑يتيالال ياسوع س‑لمجد. لّيغ سفلدن مدّن ءي‑واوال‑ان، كرا گيسن ءينّا: «س‑صّاحت، غواد ا‑يگان نّابي لّي‑س‑ا‑نتقل.» ءينين وييّاض: «غواد ا‑يگان لماسيح ن‑ربّي.» ءيمّا وييّاض نّان: «ءيزد تامازيرت ن‑جاليل ا‑زغ‑را‑د‑ياشك لماسيح؟ ءيس‑ور‑يتيارا غ‑وارّا ن‑ربّي، لماسيح را‑يگ زغ‑تاسوت ن‑وگلّيد داود، ءيلال غ‑بيتلاحم ادوّار لّي‑غ‑تّين ءيكّا ءيزدغ داود؟» بضون مدّن‑ان ءي‑نگراتسن ف‑سّيبت‑نس. كرا گيسن ءيرا ا‑ت‑يغوي، والاينّي ءور‑ن‑سرس‑يگي يان افوس‑نس. وورّين ءيمخزنيين س‑دار ءينمغورن ن‑تگمّي ن‑ربّي د‑يفاريسين. سقسان‑تن نتني: «ماخ ايلّيغ ءور‑ت‑يد‑تيويم؟» ءينين‑اسن ءيمخزنيين: «ءور‑جّو‑يلّي يان ءيساوالن زوند ارگاز‑ان.» ءينين‑اسن ءيفاريسين: «ءيزد ءولا كونّي تجلام؟ ءيس‑يلّا زغ‑يمغارن نغد ءيفاريسين ما‑سرس‑يومنّ؟ ءيمّا مدّن‑ان ياضني لّي‑ور‑سّينّين شّرع، تاگات ا‑تن‑يوتن.» ءيلّا يان غ‑گر ءيفاريسين‑ان ءيسم‑نس نيقوديموس، ءيكّا‑تّين يوشكا‑د دار ياسوع. ءيساول غاكودان ييني‑اسن: «ءيس‑را‑يحكام شّرع‑نّغ ف‑يان ءور‑تا‑نسفلد ءي‑ما‑يتّيني ف‑يخف‑نس ءولا نسّن ما‑يسكار؟» ءيمّا نتني رورن‑اس: «ءيزد ءولا كيّي گو‑جاليل ا‑تگيت؟ سيگّيل غ‑وارّاتن تيسّانت ءيس‑ور‑را‑د‑ياشك كرا ن‑نّابي زغ‑جاليل.» نكرن ءيفتو كود يان س‑تگمّي‑نس. ءيمّا ياسوع ءيدّا س‑وورير ن‑زّيتون. زيكّ صباح ءيكشم‑داغ س‑تگمّي ن‑ربّي، مونّ‑د فلّاس مدّن گّوتنين. ءيگاور غين ار‑تن‑يسّلماد. اشكين‑د سرس كرا ن‑يمسلمدن ن‑شّرع د‑يفاريسين، اوين‑اس‑د يات‑تمغارت لّي‑د‑ومژن ف‑زّنا. سّبيدّن‑تّ‑يد غ‑وامّاس ن‑مدّن، ءينين ءي‑ياسوع: «واي‑امسلمد، ها‑تامغارت‑اد نومژ‑تّ‑يد ف‑زّنا. يوصّا‑ياغ موسا غ‑شّرع ا‑نكّات زوند ختاد س‑يژران ارد تمّت. ءيمّا كيّي ما‑را‑فلّاس‑تينيت؟» ساولن ديدس غمكاد باش ا‑فلّاس‑امژن كرا ن‑واوال ما‑س‑ا‑ياس‑صراضن. ءيمّا ياسوع ءيكُنا ار‑يتارا س‑وضاض‑نس غ‑واكال. زايدن ار‑ت‑سقسان ايلّيغ‑د‑ينم ييني‑اسن: «وانّا گيگون ءور‑جّو‑يسكيرن دّنوب ا‑يزوور ا‑ن‑فلّاس‑يلوح اژرو.» ءيكنو‑داغ ار‑يتارا غ‑واكال. ءيمّا نتني، لّيغ سفلدن ءي‑غونشكان بدون ار‑تّيدون يان س‑يان، زغ‑يمقّورن ار ءيمژّيين، ايلّيغ ءور‑يقاما غير ياسوع، د‑تمغارت‑ان ا‑سول‑يبيدّن غ‑لگدّام‑نس. ءينم‑د ياسوع ييني‑اس: «مانزا‑تن ا‑تامغارت؟ ءيس‑ور‑فلّام‑يحكام يان؟» تيني‑اس‑د: «ءور‑يلّي يان ا‑سيدي.» ييني‑اس ياسوع: «ءولا نكّي ءور‑را‑فلّام‑حكامغ. زايد غيلاد، ا‑ور‑سول‑تسكارت دّنوب.» ءيساول‑داغ ياسوع س‑مدّن ييني‑اسن: «نكّي ا‑يگان تيفاوت ن‑دّونيت. وانّا ديدي ءيتمونون راد‑اس‑تيلي تيفاوت ن‑تودرت، ءور‑را‑سار‑يفتّو غ‑تيلّاس.» ءينين‑اس‑د ءيفاريسين: «ها‑كيّي ار‑تاكّات توگّا ف‑يخف‑نّك. ءور‑زگانت توگّا‑ياد.» ءيرار‑اسن ياسوع: «ءيغ‑اكُّ‑فكيغ توگّا‑ياد ف‑يخف‑ينو هاتي لحقّ اد‑گانت توگّا‑نو، اشكو سّنغ مانيزغ‑د‑وشكيغ ءولا مانيس راد‑دّوغ. ءور‑تسّينم كونّي مانيزغ‑د‑وشكيغ ءولا تسّنم مانيس راد‑دّوغ. كونّي ار‑تّحكامّ س‑تنباضين ن‑دّونيت‑اد، ءيمّا نكّي ءور‑ا‑تحكامغ ف‑يان. مراد ءيس‑حكامغ را‑يُغژان لحوكم‑ينو، اشكو ءورد واحدويّي ا‑راد‑حكامغ. ءيلّا‑بدّا ديدي بابا لّي‑يّي‑د‑يوزنّ. ءيتيارا غ‑شّرع‑نّون ‹ءيغ‑د‑مشاشكانت توگّا ن‑سين ءيناگان تيسّانم ءيس‑يُغژان‑واوال‑نسن.› ها‑يّي گيغ ءينيگي ن‑يخف‑ينو، ءينيگي ياضني ءيگا‑ت بابا لّي‑يّي‑د‑يوزنّ.» ءينين‑اس‑د: «مانزا باباك؟» ءيرار‑اسن ياسوع: «ءور‑يّي‑تسّينم ءولا تسّنم بابا. مراد ءيس‑يّي‑تسّنم را‑تيسّانم بابا ءولا نتّا.» كولّو ماياد، ءينّا‑ت ياسوع لّيغ ا‑يسّلماد غ‑تگمّي ن‑ربّي غ‑ودغار لّي‑غ‑يلّا صّندوق. ءور‑ينكير يان ا‑ت‑يامژ، اشكو ءور‑تا‑دي‑تروح تاساعت‑نس. ءيساول‑داغ ياسوع ييني‑اسن: «راد‑دّوغ نكّي، تسيگّلم سري، تمّتم سول غ‑دّنوب‑نّون. ءور‑تژضارم ا‑تدّوم س‑يلّيس راد‑دّوغ.» سقسان مدّن‑ان ن‑ايت‑يودايا ءي‑نگراتسن ءينين: «ماخ ايلّيغ ءينّا ‹ءور‑تژضارم ا‑تدّوم س‑يلّيس راد‑دّوغ›؟ ءيس‑را‑ينغ ءيخف‑نس؟» ءيزايد ياسوع ييني‑اسن: «كونّي تگام زغ‑واكال، ءيمّا نكّي گيغ زغ‑يگنّا. كونّي تگام وين دّونيت‑اد، ءيمّا نكّي ءور‑گيغ وين دّونيت‑اد. ماياد ا‑ف‑اون‑نّيغ را‑تمّتم غ‑دّنوب‑نّون. ءيغ‑ور‑تومينم ءيس‑گيغ غوالّي بدّا ءيلّان، راد‑نّيت‑تمّتم غ‑دّنوب‑نّون.» ءينين‑اس‑د: «ما‑تگيت كيّي؟» ءيرار‑اسن ياسوع: «نّيغ‑اون‑ت غ‑يسيزوار. ءيگّوت داري ما‑گيگون‑تّينيغ، ييگات داري ما‑ف‑ا‑فلّاون‑تحكامغ. ءيمّا غوالّي‑يّي‑د‑يوزنّ، لحقّ ا‑يگا، د‑مايلّي مي دارس سفلدغ ايد تّينيغ ءي‑دّونيت.» ءيمّا نتني ءور‑سّينّ ءيزد ربّي باباس ايد‑ف‑ا‑يساوال. ءيزايد ياسوع ييني‑اسن: «ار تالّم يوس ن‑بنادم ف‑وگّجدي، غاكودان ا‑را‑تيسّانم ءيس‑گيغ غوالّي بدّا ءيلّان، تيسّانم ءيس‑ا‑ساوالغ س‑ماد‑يّي‑يملا بابا، ءور‑ا‑سكارغ يات زغ‑يخف‑ينو. غوالّي‑يّي‑د‑يوزنّ ءيلّا‑بدّا ديدي. ءور‑يّي‑يفل واحدويّي، اشكو ار‑بدّا‑سكارغ ما‑ت‑يرضان.» لّيغ سفلدن مدّن ءي‑غونشكان، ءيگّوت ما‑سرس‑يومنّ. ءيساول‑داغ ياسوع س‑ويلّي سرس ءومنّين غ‑گر مدّن‑ان ن‑ايت‑يودايا ييني‑اسن: «ءيغ‑تزگام غ‑واوال‑ينو، س‑صّاحت ءيمحضارن‑ينو ا‑را‑تگم. را‑تيسّانم لحقّ، د‑لحقّ ا‑راد‑اون‑يفسي زغ‑يسكراف.» رارن‑اس‑د: «نكُّني نگا تاروا ن‑يبراهيم، ءور‑جّو‑يلّي ماد‑اغ‑يكرسن. ماخ ا‑تّينيت ‹راد‑اون‑يفسي›؟» ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ. كولّو وانّا ءيسكارن دّنوب ءيگا ءيسمگ ءي‑دّنوب. يان ءيگان ءيسمگ ءور‑راد‑بدّا‑يقاما غ‑تگمّي ن‑سيديس، والاينّي يوس ن‑تگمّي راد‑بدّا‑يگ گو‑تگمّي. ءيغ‑اون‑د‑يفسي يوس، س‑لحقّ ءور‑سول‑را‑تيليم غ‑يسكراف. سّنغ ءيزد تاروا ن‑يبراهيم ا‑تگام، ءيمّا كونّي ار‑تّيريم ا‑يّي‑تنغم اشكو اوال‑ينو ءور‑ن‑گيگون‑يوفي مانيغ ا‑يتّيلي. ار‑ساوالغ ف‑ماد‑ژريغ غ‑دار بابا، ءيمّا كونّي ار‑تسكارم ما‑مي‑تسفلدم زغ‑باباتون.» ءينين‑اس‑د: «ءيبراهيم ا‑يگان باباتنّغ.» ءيرار‑اسن ياسوع: «مراد ءيس‑تگام تاروا ن‑يبراهيم را‑تسكارم غمكلّي ءيسكار ءيبراهيم. والاينّي ها‑كونّي غيلاد ار‑تّيريم ا‑يّي‑تنغم، نكّي لّي‑اون‑ينّان لحقّ لّي‑مي‑سفلدغ غ‑دار ربّي. ءورد غمكان ا‑يسكر ءيبراهيم. ءيمّا كونّي ار‑تسكارم زوند باباتون.» رارن‑اس‑د: «ءورد تاروا لّفساد ا‑نگا. يان باباتنّغ كا‑دارنّغ‑يلّان، ا‑ت‑يگان د‑ربّي.» ييني‑اسن ياسوع: «مراد ءيس‑يگا ربّي باباتون را‑يّي‑تيريم نكّي، اشكو ءوشكيغ‑د زغ‑ربّي كغ‑د دارس. ءور‑د‑وزنغ ءيخف‑ينو والاينّي نتّان ا‑يّي‑د‑يوزنّ. ماخ ايلّيغ ءور‑ا‑تّفهامّ مايد‑اون‑تّينيغ؟ ءور‑ا‑تّفهامّ اشكو ءور‑ا‑تّيريم ا‑تسفليدم س‑واوال‑ينو. وين باباتون ءيبليس ا‑تگام، ار‑تّيريم ا‑تسكارم ما‑يرضان باباتون. ءيگا واد ءينقّان زغ‑يسيزوار، ءور‑جّو‑يسكير س‑لحقّ اشكو لحقّ ءور‑دارس‑يلّي. غاكود نّا‑يسّكاركس ار‑يسكار س‑ما‑گيس‑يلّان، اشكو بو‑تكركاس ا‑يگا، ءيگ باباس ن‑كولّو ما‑يسّكيركيسن. ءيمّا نكّي ار‑اون‑تّينيغ لحقّ، ماياد ا‑ف‑ور‑يّي‑تومينم. مانوا گيگون ا‑فلّا‑يزّگان كرا ن‑دّنب؟ والاينّي لّيغ ا‑ياون‑تّينيغ لحقّ ماخ ايلّيغ ءور‑يّي‑تومينم؟ وانّا ءيگان وين ربّي، را‑يسفليد س‑يواليون ن‑ربّي. كونّي ءور‑تگيم وين ربّي، ماياد ا‑ف‑ور‑ا‑تسفليدم.» ساولن‑د مدّن‑ان ن‑ايت‑يودايا ءينين‑اس: «ءيس‑ور‑نُغژان ءيغ‑ا‑فلّاك‑نتّيني تگيت گو‑ساميرا ءيكشم‑ك يا‑لّجنّ؟» ييني‑اسن ياسوع: «ءور‑يّي‑يكشيم كرا لّجنّ. نكّي ار‑توقّارغ بابا، ءيمّا كونّي ءور‑ا‑يّي‑تّوقّارم. ءور‑ا‑سكارغ ف‑ا‑يّي‑توقّارن مدّن، والاينّي ءيلّا يان ءيتحكامن، ييري مدّن ا‑يّي‑توقّارن. لحقّ اياد، لحقّ ا‑راد‑اون‑ينيغ. وانّا ءيزگان غ‑واوال‑ينو، ءور‑سار‑يمّوت.» رارن‑اس‑د مدّن‑ان: «ءيبان گيك غيلاد ءيس‑ك‑يكشم كرا لّجنّ. ءيمّوت ءيبراهيم ءولا لانبيا، ءيمّا كيّي ار‑تّينيت ‹وانّا ءيزگان غ‑واوال‑ينو، ءور‑سار‑يمّوت.› ءيس‑توگُرت باباتنّغ ءيبراهيم ءولا لانبيا لّي‑مّوتنين؟ ماد‑اكُّ‑تغالت ءيس‑تي‑تگيت كيّي؟» ءيساول ياسوع ييني‑اسن: «مراد ءيس‑ا‑تالغّ ءيخف‑ينو ءور‑يّي‑يگي يات، والاينّي بابا لّي‑مي‑تّينيم ربّي‑نّون، نتّان ا‑يّي‑يتالغن. ءور‑تي‑تسّينم كونّي، والاينّي سّنغ‑ت نكّي. مراد ءيس‑نّيغ ‹ءور‑ت‑سّينغ› ءيكون سّكاركسغ زوند كونّي، والاينّي سّنغ‑ت زگاغ غ‑واوال‑نس. ءيفرح باباتون ءيبراهيم لّيغ ءيسّن ءيس‑را‑يژر ءوسّان‑ينو، ءيژرا‑تن ءيفرح باهرا.» رارن‑اس‑د‑داغ مدّن‑ان ن‑ايت‑يودايا ءينين‑اس: «كيّي ءور‑تا‑تكّيت سمّوس ءيد‑مراو‑وسگُّاس. ءيس‑تژريت ءيبراهيم؟» ءيساول ياسوع ييني‑اسن: «لحقّ اياد، لحقّ ا‑راد‑اون‑ينيغ، لّيغ نكّي ءور‑تا‑يلّي ءيبراهيم.» لّيغ سفلدن ءي‑مايان، اسين ءيژران ما‑س‑ا‑ت‑كّاتن، والاينّي ءينتل فلّاسن ياسوع ءيفّوغ زغ‑تگمّي ن‑ربّي. لّيغ ءيفتا ياسوع د‑وغاراس ءيژر يان‑ورگاز ءيگا ابوكاض زغ‑لّيغ ءيلول. سقسان‑ت ءيمحضارن‑نس: «واي‑امسلمد، ماخ ايلّيغ ءيلول غواد ءيبوكض؟ ءيزد ف‑سّيبت ن‑دّنوب‑نس نغد ف‑سّيبت ن‑كرا ن‑دّنوب سكرن‑تن ايت‑دارس؟» ءيساول‑د ياسوع ييني‑اسن: «ءورد ف‑سّيبت ن‑دّنوب‑نس نغد دّنوب ن‑ايت‑دارس، والاينّي ءيلول غمكاد باش ا‑گيس‑يبايّن ما‑را‑يسكر ربّي. ءيلّا فلّانّغ، ماحدّ ءيلّا‑وزال، ا‑نسكار ءيسكّيرن ن‑والّي‑يّي‑د‑يوزنّ. را‑د‑ياشك‑ييض، ءور‑را‑ييژضار يان ا‑گيس‑يسكر يات. كرا كّيغ غ‑دّونيت گيغ تيفاوت ن‑دّونيت.» لّيغ ءينّا ماياد ءيسّوفس ف‑واكال ياضر تالّاغت س‑يلوفسان‑نس، ءيغم‑تّ ءي‑والّن ن‑وبوكاض. ييني‑اس: «زايد، تسيردت غ‑يفرض ن‑سيلوام.» تگا لمعنا ن‑سيلوام ‹امازان›. ءيدّو‑وبوكاض ءيلمّا ءيسيرد، يوورّي‑د ءيسفاو. ار‑سّمقسان‑وادجارن‑نس نتني د‑ويلّي‑ت‑ژرانين ار‑يتضالاب، ار‑تّينين ءي‑نگراتسن: «ءيس‑ورد غوالّي ءيتگاوارن ار‑يتضالاب اياد؟» كرا ءينّا: «نتّان ايا.» كرا ءينّا: «ءوهو، غير ءيرواس‑ت.» ءيمّا نتّا ءيرور‑اسن: «نتّان‑نّيت اد‑گيغ.» سقسان‑ت ءيلمّا: «مامنك ا‑س‑توورّيت تسفاوت؟» ييني‑اسن: «غوالّي مي تّينين ياسوع يوضر تالّاغت ءيغم‑تّ ءي‑والّن‑ينو ييني‑يّي ‹زايد س‑سيلوام تسيردت.› دّوغ سيردغ ءيسفيوغ.» ءينين‑اس: «ءيمّا نتّا، ماني ءيكّا غيلا؟» ييني‑اسن: «ءور‑سّينغ.» اوين ارگاز لّي‑ستّين ءيكّان ءيبوكض س‑دار ءيفاريسين. اسّ ن‑وسونفو ا‑يگا غاسّان غ‑يوضر ياسوع تالّاغت ءيرژم الّن‑نس. سقسان‑ت ءيفاريسين ف‑مامنك ا‑س‑يوورّي ءيسفاو. ييني‑اسن: «ءيغما تالّاغت ءي‑والّن‑ينو، سيردغ ءيسفيوغ.» كرا غ‑يفاريسين ار‑يتّيني: «غوان، ءيبان ءيس‑ورد ربّي ا‑ت‑يد‑يوزنّ اشكو ار‑يسكار غ‑واسّ ن‑وسونفو ما‑گيس‑ور‑يحلّان.» ءيمّا وييّاض ار‑تّينين: «يان ءيفّوغن اغاراس ن‑ربّي، ءيس‑يژضار ا‑يسكار زوند لمعجيزات‑اد؟» بضون نتني ءي‑نگراتسن. ساولن‑داغ س‑والّي‑ستّين ءيكّان ءيبوكض ءينين‑اس: «ءيمّا كيّي لّي‑مي‑يرژم الّن‑نّك، ما‑را‑فلّاس‑تينيت؟» ييني‑اسن: «نّابي ا‑يگا.» والاينّي ءيمغارن ن‑ايت‑يودايا ءور‑ومينّ ءيس‑تّين ءيكّا ءيبوكض يوورّي ءيسفاو. ازنّ ءيلمّا ما‑د‑يتاوين ايت‑دارس، سقسان‑تن: «ءيزد ءيويتون اياد؟ ءيزد غواد ا‑ف‑ا‑تّينيم ءيلول ءيبوكض؟ مامنك ا‑س‑يوورّي ءيسفاو؟» ساولن ايت‑دارس ءينين‑اسن: «نسّن ءيزد ءيويتنّغ ا‑يگا، ءيبوكض زغ‑تلاليت‑نس. والاينّي ءور‑نسّين مامنك ا‑س‑يوورّي ءيسفاو ءولا نسّن ما‑يرژمن الّن‑نس. سقسات‑ت. هاتي ارگاز ا‑يگا، ءيژضار ا‑يساول ف‑يخف‑نس.» غمكاد ا‑س‑نّان ايت‑دارس اشكو كسوضن زغ‑يمغارن ن‑ايت‑يودايا. مشاشكان‑د ءيمغارن يادلّي اد‑سّوفغن زغ‑تگمّي ن‑تژالّيت وانّا ءينّان ءيزد ياسوع ا‑يگان لماسيح ن‑ربّي لّي‑س‑ا‑تقلن. مايان ا‑ف‑نّان ايت‑دارس «سقسات‑ت. ارگاز ا‑يگا.» ازنّ‑داغ ءيمغارن س‑والّي‑ستّين ءيكّان ءيبوكض، ءينين‑اس: «نگا‑ن سرك ربّي ا‑ور‑تسّكاركست. نسّن غوان ءيس‑يفّوغ اغاراس ن‑ربّي.» ءيساول نتّا ييني‑اسن: «ءور‑سّينغ ءيس‑يفّوغ اغاراس نغد ءوهو. تاغاوسا‑ياد اد‑سّنغ. كّيغ‑تّين بوكضغ، ءيمّا غيلاد ها‑يّي سفاوغ.» ءينين‑اس: «ماد‑اك‑يسكر؟ مامنك ا‑يرژم الّن‑نّك؟» ءيرار‑اسن: «نّيغ‑اون‑ت‑ياد، ءور‑سري‑تسفلدم. ماخ ايلّيغ ترام ا‑تسفلدم تيس سنات‑توال؟ ءيزد ءولا كونّي ترام ا‑تگم ءيمحضارن‑نس؟» رگمن‑ت غاكودان ءينين‑اس: «كيّي ا‑يگان امحضار‑نس، ءيمّا نكُّني ءيمحضارن ن‑موسا ا‑نگا. نسّن ءيزد ربّي ا‑يساوالن س‑موسا، ءيمّا غوان ءور‑اكُّ‑نسّين مانيزغ‑د‑يوشكا.» ءيساول‑ورگاز‑لّي ييني‑اسن: «لعجب ايا. ءور‑تسّينم مانيزغ‑د‑يوشكا، د‑نتّا ءيرژم الّن‑ينو. نسّن ءيس‑ور‑را‑يسفليد ربّي ءي‑يان ءيفّوغن اغاراس‑نس، والاينّي يان‑ت‑يتوقّارن ار‑يسكار ما‑ت‑يرضان، نتّان ا‑مي‑يسفليد ربّي. زغ‑يسيزوار ن‑دّونيت ءور‑جّو‑نسفلد ف‑كرا ن‑يان ءيرژمن الّن ءي‑يان‑د‑يلولن ءيبوكض. مراد ءيس‑ور‑د‑يوشكي‑ورگاز‑ان زغ‑ربّي، ءور‑را‑ييژضار ا‑يسكر يات.» رارن‑اس: «كيّي تعمّرت س‑دّنوب زغ‑تلاليت‑نّك، تيريت اد‑اغ‑تسّلمادت نكُّني؟» سّوفغن‑ت ءيلمّا زغ‑تگمّي ن‑تژالّيت. ءيسفلد ياسوع ءيس‑ت‑سّوفغن، ياف‑ت‑ين ءيسقسا‑ت: «ءيس‑تومنت س‑يوس ن‑بنادم؟» ءيرار‑اس‑د: «ءيني‑يّي ا‑سيدي مانوا‑ت‑يگان، باش ا‑سرس‑امنغ.» ييني‑اس ياسوع: «تژريت‑ت‑ياد، ءيگا‑ت غواد سرك ءيساوالن.» ءيرار‑اس‑د: «ها‑يّي ءومنغ ا‑سيدي.» ءيضر ف‑يفادّن‑نس غ‑لگدّام‑نس. ءيزايد ياسوع ييني‑اسن: «ءوشكيغ‑د س‑دّونيت اد‑بضوغ افولكي د‑لخُشانت، اد‑يسفيون ءيبوكاضن، بوكضن غويلّي سفاونين.» سفلدن‑اس كرا ن‑يفاريسين لّي‑لّانين غين، ءينين‑اس‑د: «ءيزد ءولا نكُّني نبوكض؟» ءيرار‑اسن ياسوع: «مراد ءيس‑تبوكضم س‑صّاحت، ءيكون ءور‑را‑فلّاون‑ييلي لحوكم. والاينّي ار‑تّينيم ‹نسفاو›، ف‑غايان ا‑ف‑فلّاون‑يلّا لحوكم.» ييني‑اسن ياسوع: «لحقّ اياد، لحقّ ا‑راد‑اون‑ينيغ. يان ءيفلن ءيمي ن‑زّريبت ءيغلي س‑وولّي زغ‑ماني ياضني، ءيميكر ا‑يگا، ءيگ امخّار. ءيمّا غوالّي ءيكشمن زغ‑يمي ن‑زّريبت، ءيگا امكسا ن‑وولّي. نتّان ا‑مي‑يرژّم‑وبوّاب، د‑واوال‑نس ا‑س‑ا‑سفليدنت‑وولّي. ار‑ن‑ياقرا س‑تيلّي گانين تينس، كرايگاتّ يات س‑يسم‑نس، ار‑تند‑د‑يسّوفوغ س‑برّا. ءيغ‑تند‑د‑يسّوفغ را‑يفتو ءيزوور‑اسنت، ضفورنت‑ت‑وولّي‑نس اشكو ءوكُزنت اوال‑نس. راد‑روولنت زغ‑يان ءيگان اغريب، ءور‑را‑ت‑ضفورنت اشكو ءور‑ا‑تيسّانّت اوال ن‑يغريبن.» ياسوع يوت‑اسن لمعنا‑ياد، ءيمّا نتني ءور‑سّينّ ما‑يرا اد‑اسن‑سرس‑يمل. ءيزايد ياسوع ييني‑اسن: «لحقّ ايد‑اون‑تّينيغ. نكّي ا‑يگان ءيمي لّي‑زغ‑ا‑كشّمنت‑وولّي. كولّو ويلّي‑د‑وشكانين غايد ءيزرين، ءيماكارن د‑يمخّارن اد‑گان، ءور‑سرسن‑سفلدنت‑وولّي. ءيمّا نكّي گيغ ءيمي. يان زغ‑گيگي ءيكشمن را‑ينجم، ار‑يتفّوغ ار‑يكشّم ار‑يتافا ما‑غ‑ا‑يفّرد. غاكود نّا‑د‑يوشكا‑ومخّار ءور‑ا‑يتّيري ابلا ا‑ياكُر ءينغ ءيهلك. ءيمّا نكّي ءوشكيغ‑د اد‑اون‑تيلي تودرت، تيلي‑اون تودرت ءيكمّلن. نكّي ا‑يگان امكسا ءيفولكين. امكسا ءيفولكين ا‑يتمتاتن ف‑وولّي. هان ءيمكيري ءور‑يگي زوند امكسا، اشكو ءورد تينس اد‑گانت‑وولّي. ءيغ‑ن‑يژرا ءوشّن ءيفتا‑د، را‑يفل ءولّي ءيروول، يامژ‑تنت‑ووشّن ءيفتس‑تنت. را‑يروول اشكو ءيمكيري كا‑يگا، ءور‑اس‑يلّي يات غ‑وولّي. ءيمّا نكّي گيغ امكسا ءيفولكين. سّنغ تينو ءولا تينو سّنّت‑يّي، غمكلّي‑يّي‑يسّن ربّي بابا ءيسّانغ‑ت نكّي. راد‑فكغ ءيخف‑ينو ءي‑لموت ف‑سّيبت ن‑وولّي. داري ءولّي ياضني، ءور‑ا‑دي‑تمونونت غ‑زّريبت‑اد، ءيقّان‑يّي‑د ا‑تند‑د‑سّمونغ ءولا نتنتي. راد‑سفلدنت س‑واوال‑ينو، تيلي يات‑تووروت ييلي يان‑ومكسا. ها‑يّي عزّاغ دار بابا، اشكو راد‑فكغ ءيخف‑ينو ءي‑لموت باش اد‑د‑نكرغ س‑تودرت لّجديد. ءور‑يلّي ما‑راد‑يّي‑يكّيس تودرت‑ينو والاينّي را‑ستّ‑فكغ نكّي. ژضارغ ا‑ستّ‑فكغ، ءيژضارغ ا‑ستّ‑امژغ‑داغ. غمكاد ا‑س‑يّي‑يوصّا بابا.» لّيغ سفلدن مدّن‑ان ن‑ايت‑يودايا ءي‑مايد ءينّا بضون‑داغ ءي‑نگراتسن. ءيگّوت گيسن ما‑يتّينين: «كرا لّجنّ ا‑ت‑يكشمن، ءيفّوغ ءيخف‑نس. ماخ ايلّيغ ا‑ياس‑سول‑تسفليدم؟» ءيمّا وييّاض ار‑تّينين: «ءوهو، يان غ‑يلّا لجنّ ءور‑را‑يساوال غمكاد. لجنون ءور‑راد‑يژضارن اد‑رژمن الّن ن‑يبوكاضن.» غ‑ووسّان‑ان فرحن ايت‑وروشاليم س‑لعيد لّي‑غ‑د‑رورن تيگمّي ن‑ربّي سّغوسن‑تّ، ءيگ‑وزمز‑ان تاگرست. ار‑يفتّو ياسوع غ‑تگمّي ن‑ربّي غ‑ودغار لّي‑مي‑تّينين ‹الحني ن‑سوليمان›. مونّ‑د فلّاس كرا ن‑مدّن ن‑ايت‑يودايا ءينين‑اس‑د: «ار ماناگو ا‑راد‑اغ‑تادجت غمكاد، كود يان د‑ما‑يسوينگيم؟ ءيغ‑تگيت لماسيح ن‑ربّي، ءيني‑اغ‑ت ا‑نيسّان.» ءيساول ياسوع ييني‑اسن: «نّيغ‑اون‑ت‑ياد والاينّي ءور‑يّي‑تومينم. كولّو مايد سكارغ س‑يسم ن‑ربّي بابا ار‑يسّبايّان ماد‑گيغ. ءور‑تومينم كونّي اشكو ءور‑تگيم زغ‑وولّي‑نو. ار‑سفليدنت‑وولّي‑نو س‑واوال‑ينو، سّنغ‑تنت ار‑يّي‑تضفورنت، ار‑اسنت‑اكّاغ تودرت ءيدومن. ءور‑را‑سار‑تّهلكنت، ءور‑راد‑يّي‑تنت‑يكّيس يان زغ‑وفوس‑ينو. بابا لّي‑يّي‑تنت‑يفكان، يوگُر كولّو ما‑يلّان. ءور‑يژضار يان ا‑تنت‑يكّيس زغ‑وفوس ن‑بابا. نكّي د‑بابا، يان ا‑نگا.» نكرن مدّن‑ان غاكودان، اسين‑داغ ءيژران ما‑س‑ا‑ت‑كّاتن. ءيمّا ياسوع ءينّا‑ياسن: «ها‑يّي سكرغ غ‑گراتون كيگان د‑يفولكيتن لّي‑يّي‑يفكا بابا ا‑تن‑سكرغ. ف‑مانوا گيسن ا‑ف‑ترام ا‑يّي‑توتم س‑يژران؟» رارن‑اس‑د: «ءورد ف‑كرا ن‑وفولكي ا‑ف‑را‑ك‑نوت والاينّي ف‑يواليون‑اد لّكوفر. بنادم كا‑تگيت والاينّي ار‑تّگّات ءيخف‑نّك د‑ربّي.» ءيساول ياسوع ييني‑اسن: «ءيس‑ور‑يتيارا غ‑شّرع‑نّون ءينّا ربّي ءي‑كرا ن‑مدّن ‹كونّي تگام ءيد‑ربّي›؟ نسّن ءيس‑يُغژان كولّو ما‑يتياران غ‑وارّاتن ن‑ربّي. والاينّي لّيغ ءينّا ‹تگام ءيد‑ربّي› ءي‑ويلّي سفلدنين ءي‑واوال‑نس، ماخ ايلّيغ تنّام ‹لكوفر اياد› لّيغ نّيغ ءيس‑گيغ يوس ن‑ربّي، نكّي لّي‑يژلي بابا يازن‑يّي‑د س‑دّونيت؟ مراد ءيس‑ور‑ا‑سكارغ ءيسكّيرن ن‑بابا، ءور‑را‑كُن‑د‑يقّان ا‑سري‑تامنم. والاينّي لّيغ ا‑تن‑سكارغ، واخّا ءور‑تومينم اوال‑ينو ءيقّان‑كُن‑د ا‑تامنم ءيسكّيرن‑ينو، تيسّانم س‑صّاحت ءيزد نكّي د‑بابا يان ا‑نگا، ءيلّا گيگي ءيليغ گيس.» نكرن‑داغ ا‑ت‑امژن، والاينّي ءينجم‑اسن. ءيدّو‑داغ ياسوع س‑تسگا ياضني ن‑واسيف ن‑وردون، س‑يلّيغ‑تّين ءيكّا يوحانّا ار‑يسّدّام. ءيقاما غين، ار‑ن‑دارس‑تّاشكين مدّن گّوتنين ار‑تّينين: «يوحانّا ءور‑جّو‑يسكير كرا لّمعجيزت، والاينّي كولّو ما‑ينّا يوحانّا ف‑ورگاز‑اد يُغژان.» ءيگّوت غين ما‑يومنّ س‑ياسوع. غ‑ووسّان‑ان يوضن باهرا يان‑ورگاز ءيسم‑نس ليعازر، ءيزدغ غ‑بيتعانيا لّي‑يگان ادوّار ن‑ماريام د‑وولّتماس مارتا. ماريام‑اد مي يوضن گماس ليعازر تگا ختالّي ءيفّين اسافار ف‑يضارن ن‑ياسوع تسفيض‑تن س‑وازّار‑نس. ازنّد‑د تايتماتين‑لّي س‑ياسوع ءينينت‑اس: «وا‑سيديتنّغ، ها‑والّي دارك ءيعزّان يوضن باهرا.» لّيغ ءيسفلد ياسوع ءي‑ماياد ييني: «تاماضونت‑اد ءور‑را‑تگُّرو س‑لموت، والاينّي را‑سرس‑يبان لمجد ن‑ربّي، ءيتمجّد يوس ن‑ربّي ف‑سّيبت‑نس.» مارتا د‑وولّتماس د‑ليعازر، نتني عزّان دار ياسوع. والاينّي لّيغ ءيسفلد ءيس‑يوضن ليعازر ءيقاما غ‑يلّيغ ءيلّا سين‑ووسّان، ييني ءيلمّا ءي‑يمحضارن‑نس: «ا‑نوورّي س‑تمازيرت ن‑يودايا.» ءيمّا نتني نّان‑اس: «واي‑امسلمد، هان ايت‑يودايا غير كرا ءيدروسن ايد‑س‑ران ا‑ك‑وتن س‑يژران. ماخ ايلّيغ تريت ا‑سول‑توورّيت س‑غين؟» ءيرار‑اسن ياسوع: «ءيس‑ورد سنات د‑مراوت تاساعت ا‑يلّان غ‑وزال؟ يان ءيفتّون غ‑وزال ءور‑را‑تي‑توت‑تبايضّرت اشكو ار‑يتّيسفيو س‑تيفاوت لّي‑يلّان غ‑دّونيت‑اد. ءيمّا يان ءيفتّون غ‑ييض را‑تي‑توت‑تبايضّرت، اشكو ءور‑يسفاو.» غمكاد ا‑س‑اسن‑ينّا ياسوع، ءيزايد ءيلمّا ييني‑اسن: «هان امدّاكُّل‑نّغ ليعازر ءيطّاس. راد‑دّوغ ا‑ت‑يد‑سّفاقغ.» ءينين‑اس ءيمحضارن: «ءيغ‑يطّاس ا‑سيدي، را‑يجّي.» والاينّي ياسوع، ف‑لموت ا‑ف‑ينّا مايان، ءيمّا نتني غالن ءيزد غير ءيطس ا‑ف‑يساول. ييني‑اسن ياسوع ءيلمّا س‑واوال ءينمن: «ءيمّوت ليعازر. ءيشوا غمكاد ف‑سّيبت‑نّون لّيغ ءور‑ديدس‑لّيغ نكّي، اشكو غمكاد ا‑س‑را‑توورّيم تامنم س‑وگُّار. ءيمّا غيلاد، ا‑ندّو س‑دارس.» ءينكر توما لّي‑مي‑تّينين ‹اكنيو›، ييني ءي‑يمحضارن: «رواحات ءولا نكُّني، ا‑نمون د‑ومسلمد ا‑ن‑ديدس‑نمّت.» لّيغ‑ن‑يلكم ياسوع، ياف‑ن ليعازر كّوژ‑ووسّان ا‑ن‑يكّا غ‑ومضّال. ادوّار‑ان ن‑بيتعانيا ياگّوگ زغ‑وروشاليم س‑ما‑يتگّان كراض كيليميتر. ءوشكان‑د مدّن گّوتنين ن‑ايت‑يودايا س‑دار مارتا د‑ماريام ا‑تنت‑صبّرن ف‑گماتسنت. لّيغ تسفلد مارتا ءيس‑د‑يوشكا ياسوع تفتو تمناگّار‑ت‑ين، ءيمّا ماريام تقاما غ‑تگمّي. تيني‑اس‑د مارتا ءي‑ياسوع: «وا‑سيدي، مراد ءيس‑تلّيت غيد، ءيكون ءور‑اكُّ‑را‑يمّت گما. والاينّي سّنغ ءولا غيلاد راد‑اك‑يفك ربّي اينّا زغ‑گيس تضالبت.» ييني‑اس ياسوع: «را‑د‑ينكر گمام زغ‑لموت.» تيني‑اس‑د مارتا: «سّنغ ءيس‑را‑د‑ينكر غ‑تنكرا غ‑واسّ ءيگُّران ن‑دّونيت.» ءيساول ياسوع ييني‑اس: «نكّي ا‑يگان تانكرا ءولا تودرت. وانّا سري يومنّ، واخّا ءيمّوت سول ءيدّر. ءيمّا وانّا ءيدّرن يامن سري، ءور‑را‑سار‑يمّت. ءيس‑تومنت ماياد؟» تيني‑اس‑د: «ءومنغ‑ت ا‑سيدي، امنغ ءيس‑تگيت لماسيح يوس ن‑ربّي لّي‑ف‑نسفلد را‑د‑ياشك س‑دّونيت.» مارتا تنّا‑ياس غمكاد توورّي س‑تگمّي. تغر‑د ءي‑وولّتماس ماريام، تيني‑اس غ‑گراس ديدس: «هاي‑امسلمد يوشكا‑د، ار‑گيم‑يسقسا.» لّيغ تسفلد ماريام ءي‑ماياد، تنكر تازّل‑د س‑دارس. ياسوع ءور‑تا‑ن‑يروح ادوّار، ءيلّا سول غ‑يلّيغ‑تي‑دي‑تمناگّار مارتا. ءيمّا مدّن لّي‑ن‑مونّين غ‑تگمّي ن‑ماريام ا‑ستّ‑صبّرن، لّيغ‑تّ‑ژران تنكر تازّل س‑برّا، ضفورن‑تّ غالن ءيس‑تدّا س‑ومضّال ا‑ن‑غين‑تالّا. ءيمّا ماريام، لّيغ‑دي‑تلكم دار ياسوع، غير تژرا‑ت تضر غ‑دار ءيضارن‑نس تيني‑اس‑د: «وا‑سيدي، مراد ءيس‑تلّيت غيد، ءيكون ءور‑اكُّ‑را‑يمّت گما.» لّيغ‑تّ‑يژرا ياسوع ار‑تالّا، ءيژر ءولا غويلّي‑ستّ‑ين‑ضفارنين ار‑الّان، بّين غ‑تاسا‑نس طيّر‑اس باهرا. ييني‑اسن: «مانيغ‑ت‑ين‑تمضلم؟» ءينين‑اس: «اشك‑يد ا‑تژرت ا‑سيدي.» ار‑يالّا ياسوع. ءينين مدّن ءي‑نگراتسن: «ژرات منشك ا‑دارس‑يعزّا.» والاينّي كرا گيسن ءينّا: «غواد لّي‑يرژمن الّن ن‑وبوكاض، ءيس‑ور‑تّين‑يكّي ءيژضار ا‑يسّانف لموت ءي‑ورگاز‑اد؟» لّيغ‑ن‑يلكم ياسوع امضّال، ءيبّي‑داغ غ‑تاسا‑نس. امضّال‑ان ءيگا ءيفري، ييلي ف‑يمي‑نس يان‑يفير ءيمقّورن. ييني‑اسن ياسوع: «سّيتّيات ءيفير.» تساول‑د مارتا ءولّتماس ن‑والّي ءيمّوتن تيني‑اس: «وا‑سيدي، را‑يجّو اشكو كّوژ‑ووسّان ايد‑س‑ت‑ين‑نمضل.» ءيرار‑اس ياسوع: «ءيس‑ام‑ور‑نّيغ ‹ءيغ‑تومنت را‑تژرت لمجد ن‑ربّي›؟» سّيتّين ءيفير ءيلمّا، يالّ ياسوع الّن‑نس س‑يگنوان ييني: «وا‑بابا، شكرغ‑ك اشكو تسفلدت‑يّي. سّنغ ءيس‑ا‑يّي‑بدّا‑تسفليدت، والاينّي نّيغ ماياد ف‑سّيبت ن‑مدّن‑اد بيدّنين غيد، باش اد‑امنّ ءيزد كيّي ا‑يّي‑د‑يوزنّ.» لّيغ ءينّا ماياد، يالّ اوال‑نس س‑جّهد ييني: «وا‑ليعازر، فّوغ‑د.» ءيفّوغ‑د غوالّي ءيمّوتن. ءيتياساس زغ‑يفاسّن‑نس ءولا ءيضارن‑نس س‑يشدّادن لّكفن، ءيدل‑وودم‑نس س‑يان‑وشرويض. ءيزايد ياسوع ييني‑اسن: «فسيات‑اس ترژمّ‑اس.» مدّن‑ان ن‑ايت‑يودايا لّي‑د‑مونّين د‑ماريام، لّيغ ژران ما‑يسكر ياسوع ييگات گيسن ما‑سرس‑يومنّ. والاينّي كرا زغ‑گيسن ءيدّا س‑دار ءيفاريسين، ءينين‑اسن ف‑ما‑يسكر. غاكودان اد‑نكرن ءينمغورن ن‑تگمّي ن‑ربّي، نتني د‑يفاريسين، سّمونّ ءيمغارن لّمحكاما ار‑تّينين: «ما‑را‑نسكر؟ هان ارگاز‑ان، گّوتنت لمعجيزات لّي‑يسكار. ءيغ‑ت‑نودجا غمكاد، را‑سرس‑امنّ كولّو مدّن، ءينكر سرنّغ لعسكر ن‑رّومان ءيهلك تيگمّي ن‑ربّي ءولا تامازيرت‑نّغ.» ءيساول ءيلمّا يان گيسن ءيسم‑نس قايافا، ءيگا انمغور ن‑تگمّي ن‑ربّي غ‑وسگُّاس‑ان، ييني‑اسن: «ءيزد كونّي ءور‑ا‑تّفهامّ يات؟ ءيس‑ور‑تسّينم ءيس‑اون‑يوف ءيغ‑يمّوت يان‑ورگاز ف‑سّيبت ن‑مدّن‑نّغ ءولا تياوهلاكن ايت‑تمازيرت‑نّغ كولّوتن؟» قايافا، ءورد زغ‑يخف‑نس ا‑زغ‑د‑ينّا اوال‑اد، اشكو ءيگا انمغور ن‑تگمّي ن‑ربّي غ‑وسگُّاس‑ان، ءيساول س‑ماد‑اس‑يملا ربّي، ييني ءيس‑را‑يمّت ياسوع ف‑سّيبت ن‑ايت‑تمازيرت‑نس. ءيمّا ياسوع، ءورد غير ايت‑تمازيرت‑ان ا‑ف‑را‑يمّت، والاينّي را‑د‑يسّمون تاروا ن‑ربّي لّي‑اكوتنين غ‑كولّو دّونيت باش اد‑كولّو‑گن يان. غاسّان اد‑بدان ءيمغارن ار‑تمشاوارن ف‑مامنك ا‑س‑راد‑نغن ياسوع. غاكودان ءور‑سول‑ا‑يتلولّي ياسوع غ‑گر ايت‑يودايا، ءيفّوغ زغ‑غين ءيدّو س‑يات‑تمازيرت غ‑تاما لّخلا س‑يات‑تمدينت لّي‑مي‑تّينين افرايم. ءيقاما غين نتّا د‑يمحضارن‑نس. ياكمور‑د لعيد ن‑وسورف ن‑ايت‑يودايا. غ‑ووسّان‑ان ار‑دي‑تّاشكين مدّن گّوتنين زغ‑يدوران س‑تمدينت ن‑وروشاليم، باش اد‑سّغوسن ءيخفاون‑نسن ءور‑تا‑د‑يروح لعيد. ار‑سيگّيلن س‑ياسوع ار‑تبدّادن غ‑تگمّي ن‑ربّي ار‑تّينين ءي‑نگراتسن: «ما‑تسوانگمّ؟ ءيس‑را‑د‑ياشك س‑لعيد نغد ءوهو؟» ءيمّا ءينمغورن ن‑تگمّي ن‑ربّي نتني د‑يفاريسين ءوصّان مدّن، وانّا ءيسّنّ مانيغ ءيلّا، اد‑اسن‑ت‑ييني باش ا‑ت‑امژن. لّيغ سول قامان سضيص‑ووسّان ءي‑لعيد ن‑وسورف، ياشك‑يد ياسوع س‑ودوّار ن‑بيتعانيا، س‑دار ليعازر لّي‑د‑يسّنكر زغ‑لموت. سكرن ءي‑ياسوع ءيمنسي، ار‑فلّاسن‑تّسخّار مارتا، ءيگ ليعازر يان زغ‑غويلّي گاورنين ار‑شتّان د‑ياسوع. تنكر ماريام تاوي‑د يات‑تبوقّالت ن‑توجّوت ن‑ناردين ءيصفان، ءيگّوت‑واتيگ‑نس باهرا. تژغور سرس ءيوورزان ن‑ياسوع، ار‑اس‑تسفاض ءيوورزان س‑وازّار‑نس. تعمّر‑تگمّي س‑واضو ن‑توجّوت‑ان. ءيميل ءيساول‑د يان زغ‑يمحضارن‑نس، ا‑ت‑يگان د‑ياهودا ءيسخاريوط لّي‑را‑ت‑يزّنز، ييني‑اسن: «ماخ ا‑ور‑تنز توجّوت‑اد؟ مراد ءيس‑تنزا را‑دي‑تاوي كراض ءيد‑ميّا ن‑نّوقرت، نفك‑تن ءي‑يمژلاض.» ءورد لهمّ ن‑يمژلاض ا‑ت‑ين‑يگان ايلّيغ ءينّا غمكاد. ءينّا‑ت اشكو امخّار ا‑يگا. نتّان ا‑دار‑يلّا صّندوق‑نسن، كرا‑ن‑گيس‑گان ار‑زگيس‑يتاكُر. ءيساول ياسوع ييني‑اسن: «ادجات‑ستّ اد‑اس‑ييلي ماياد ار اسّ ن‑تمضلت‑ينو. راد‑بدّا‑ديدون‑يلين ءيمژلاض، ءيمّا نكّي ءور‑راد‑بدّا‑ديدون‑يليغ.» ءيگّوت ما‑يسفلدن ءيس‑يلّا ياسوع غ‑بيتعانيا، فّوغن‑د اشكين‑د س‑دارس. ءورد غير ياسوع كاد‑ران والاينّي ران اد‑ژرن ءولا ليعازر لّي‑د‑يسّنكر زغ‑لموت. مشاوارن ءينمغورن ن‑تگمّي ن‑ربّي اد‑نغن ليعازر ءولا نتّا، اشكو ف‑سّيبت‑نس ايد‑س‑وورّين مدّن گّوتنين ن‑ايت‑يودايا ار‑تامنّ س‑ياسوع. نديد ازكّا سفلدن مدّن ءيس‑يومژ ياسوع اغاراس ياكمور‑ن س‑وروشاليم. ءيگّوت غ‑وروشاليم ما‑د‑يوشكان اد‑زّرين لعيد غين. فّوغن‑د غاكودان ا‑ت‑يد‑مناگّارن، اسين تالضايين ن‑تاينيوين، ار‑تالّن اوال‑نسن ار‑تّينين: «هوصانّا، امباركي ا‑يگا غواد‑د‑يوشكان س‑يسم ن‑سيدي ربّي. امباركي ا‑يگا‑وگلّيد ن‑ايت‑ربّي.» ياسوع يوفا يان‑وسنوس ءيني فلّاس غمكلّي ءيتياران غ‑وارّا ن‑ربّي: «اد‑ور‑تيكساضم اي‑ايت‑وروشاليم. هاي‑اگلّيد‑نّون ءيفتا‑د ف‑وسنوس.» ماياد ءور‑ت‑فهيمن ءيمحضارن‑نس غ‑ووسّان‑ان، والاينّي تيغوردين ن‑ما‑يتيالال ياسوع س‑لمجد فهمن ءيزد فلّاس ا‑ف‑تياران ءيواليون‑اد، كتين‑د ماد‑اس‑سكرن مدّن. ار‑فلّاس‑اكّان توگّا كولّو ويلّي ژرانين مامنك ا‑ن‑يغرا ءي‑ليعازر غ‑ومضّال ءيسّنكر‑ت‑يد زغ‑لموت. ءيگّوت ما‑يسفلدن ف‑لمعجيزت لّي‑يسكر، مايان ا‑ف‑د‑مونّ س‑كيگان ا‑ت‑يد‑مناگّارن. ار‑تّينين ءيفاريسين ءي‑نگراتسن: «هاتي ءور‑نژضار ءي‑يات. ار‑دارس‑تّازّال كولّو دّونيت.» لّان غين كرا ن‑مدّن ن‑ايت‑تميزار ياضني غ‑گر ويلّي‑د‑وشكانين اد‑تعبادن غ‑وروشاليم غ‑ووسّان لّعيد. اشكين‑د دار فيليبّوس لّي‑يگان گو‑بيتصايدا غ‑تمازيرت ن‑جاليل، ءينين‑اس: «ا‑سيدي، نرا ا‑نژر ياسوع.» ءيدّو فيليبّوس ييني‑ت ءي‑اندراوس. ءيمون ديدس اندراوس ءينين‑ت ءي‑ياسوع. ءيساول ياسوع ييني‑اسن: «تلكم‑د تاساعت لّي‑غ‑را‑يتمجّد يوس ن‑بنادم. لحقّ اياد، لحقّ ا‑راد‑اون‑ينيغ. ءيغ‑ور‑يضر‑واقّا ن‑يردن غ‑واكال ءيمّت، واحدوت ا‑را‑يقاما. والاينّي ءيغ‑يمّوت را‑د‑ياوي صّابت ءيگّوتن. وانّا دار تعزّا تودرت‑نس را‑ستّ‑يجلو، ءيمّا وانّا ءيصامحن غ‑تودرت‑نس غ‑دّونيت‑اد را‑يكشم س‑تودرت لّي‑يدومن. وانّا ءيران ا‑يگ زغ‑يخدّامن‑ينو، ءيلّا فلّاس اد‑ديدي‑يتمونو، ييلي‑وخدّام‑ينو غ‑ينّاغ لّيغ نكّي. د‑وانّا ءيگان اخدّام‑ينو، ربّي بابا ا‑را‑ت‑يوقّر. «هاتي ءيغوفا‑وول‑ينو. ءيزد اد‑ينيغ ‹وا‑بابا، سّانف‑يّي تاساعت‑اد›؟ ءوهو، اشكو ماياد ا‑ف‑د‑وشكيغ، اد‑زريغ غ‑تاساعت‑اد. والاينّي ضالبغ‑اك ا‑بابا، ا‑د‑يبان لمجد ن‑يسم‑نّك.» غاكودان ا‑د‑يساول يان‑واوال زغ‑يگنوان ييني: «سّبايّنغ لمجد‑نس، د‑را‑ت‑ين‑سول‑سّبايّنغ.» كولّو مدّن لّي‑بيدّنين د‑ياسوع سفلدن‑اس. كرا گيسن ءينّا: «ءيگّيگ ايد ءيمّوسّان.» كرا ءينّا: «كرا لّمالاك ايد‑سرس‑يساولن.» ءيمّا نتّا ءينّا‑ياسن: «ءورد ف‑سّيبت‑ينو ا‑ف‑د‑يساول‑واوال‑اد والاينّي ف‑سّيبت‑نّون. اشكو غيلاد ا‑را‑يتّوت لحوكم ف‑دّونيت. غيلاد ا‑را‑ن‑يتياوگار‑وگلّيد ن‑دّونيت‑اد. ءيمّا نكّي راد‑تيالالغ ف‑يگّي ن‑واكال، لديغ‑د كولّو مدّن س‑داري.» س‑واوال‑اد ا‑س‑يملا ياسوع مامنك ا‑را‑تگ لموت لّي‑س‑را‑يمّت. ساولن‑د مدّن‑ان ءينين‑اس: «نسفلد ءي‑ما‑يتياران غ‑شّرع ف‑لماسيح ن‑ربّي، ار‑يتّيني ءيس‑راد‑بدّا‑يقاما. ءيمّا كيّي ما‑ف‑ا‑تّينيت ‹ءيقّان‑د يوس ن‑بنادم ا‑يتيالال›؟ ما‑يگا غواد مي تّينيت ‹يوس ن‑بنادم›؟» ييني‑اسن ياسوع: «كرا ءيدروسن ا‑راد‑سول‑ديدون‑تقاما تيفاوت. فتوات ماحدّ ديدون تيفاوت، ا‑كُن‑ور‑امژنت تيلّاس. اشكو يان ءيفتان غ‑تيلّاس ءور‑يسّين ماني را‑يك. امنات س‑تيفاوت ماحدّ سول ديدون تلّا تيفاوت، ا‑توورّيم تگم ايت‑تيفاوت.» لّيغ‑اسن‑ينّا ياسوع ماياد، ءيفتو ياگّوگ‑ن زغ‑گيسن. گّوتنت لمعجيزات لّي‑يسكر ياسوع غ‑دار مدّن‑ان، والاينّي ءور‑رين ا‑سرس‑امنّ. غمكاد ا‑س‑يووفا‑واوال ن‑نّابي ءيشاعيا ءينّا: «وا‑سيدي ربّي، ما‑يومنّ لخبار‑اد‑د‑نيوي؟ ما‑مي‑تبان‑تژضّارت ن‑ربّي سيديتنّغ؟» ماياد ا‑ف‑ور‑ژضارن اد‑امنّ، اشكو ءينّا‑داغ ءيشاعيا: «ربّي ءيسّبوكض الّن‑نسن ءيسّيقار ءيخف‑نسن، ا‑ور‑ژرنت‑والّن‑نسن ءولا ءيفهم ءيخف‑نسن ءولا وورّين‑د سري ا‑تن‑جّوجّيغ.» غمكاد ا‑س‑ينّا ءيشاعيا اشكو ءيژرا لمجد ن‑سيديتنّغ ءيساول فلّاس. غمكان اد‑گان مدّن‑اد، والاينّي ءيگّوت ما‑يومنّ س‑ياسوع ءولا زغ‑يمغارن ن‑ايت‑يودايا. والاينّي ءور‑ژضارن ا‑ت‑ينين اشكو كسوضن زغ‑يفاريسين ا‑تن‑سّوفغن زغ‑تگمّي ن‑تژالّيت. نتني يوف دارسن ا‑تن‑تالغن مدّن ءولا يولغ‑تن ربّي. يالّ ياسوع اوال‑نس ييني: «وانّا سري يومنّ، ءورد نكّي كا‑س‑يومن والاينّي يومن ءولا س‑والّي‑يّي‑د‑يوزنّ. د‑وانّا‑يّي‑يژران، ءيژرا غوالّي‑يّي‑د‑يوزنّ. ءوشكيغ‑د اد‑گغ تيفاوت ءي‑دّونيت، ا‑ور‑قامان غ‑تيلّاس وينّا سري ءومنّين. وانّا ءيسفليدن ءي‑يواليون‑ينو ءور‑ا‑سرسن‑يسكار، ءورد نكّي ا‑را‑فلّاس‑يحكام. اشكو ءوشكيغ‑د س‑دّونيت اد‑جّنجمغ دّونيت، ءورد ا‑فلّاس‑حكامغ. ءيمّا وانّا‑يّي‑يحگرن ياگُي ا‑يسفلد س‑واوال‑ينو، راد‑اس‑سول‑ييلي ما‑فلّاس‑يتحكامن. اشكو اوال لّي‑س‑نّيغ، نتّان ا‑را‑فلّاس‑يحكام غ‑واسّ ءيگُّران ن‑دّونيت. اشكو ءور‑ا‑ساوالغ غير زغ‑يخف‑ينو. ربّي بابا لّي‑يّي‑د‑يوزنّ، نتّان ا‑يّي‑يوصّان ف‑ما‑راد‑ينيغ ءولا ما‑س‑ا‑ساوالغ. سّنغ ءيزد لوصيت‑نس ا‑يتاوين س‑تودرت ءيدومن. كولّو مايد‑س‑ا‑تّينيغ، غمكلّي‑يّي‑ت‑يد‑يملا بابا، ا‑تي‑تّينيغ.» ءيقاما يان‑واسّ ءي‑لعيد ن‑وسورف، ييسّان ياسوع ءيس‑دي‑تروح تاساعت لّي‑غ‑را‑يفّوغ دّونيت ءيدّو س‑باباس. غمكلّي‑بدّا‑يحنّا غ‑وينس لّي‑لّانين غ‑دّونيت، ءيسّافو فلّاسن لحنانت‑نس ار تّمي. ءيگاور د‑يمحضارن‑نس ار‑ديدسن‑يشتّا ءيمنسي. ييلي ديدسن ياهودا يوس ن‑سيمعان ءيسخاريوط لّي‑مي‑يسّموسّا ءيبليس ءول‑نس ار‑يسوينگيم ا‑يزّنز ياسوع. ءيمّا ياسوع ءيسّن ءيس‑يگا ربّي باباس كولّو ما‑يلّان غ‑دّو‑وفوس‑نس، ييسّان ءيس‑د‑يوشكا زغ‑ربّي، د‑ربّي ا‑س‑را‑يوورّي. ءينكر ءيلمّا زغ‑يمنسي ءيكّيس اسلهام‑نس ءيبكيس س‑يات لفوطا. ءيفّي امان غ‑واطّاص ءيبدو ار‑يسيريد ءيضارن ءي‑يمحضارن‑نس، ار‑تن‑يسفاض س‑لفوطا لّي‑س‑يبكيس. لّيغ‑ن‑يلكم سيمعان بطرُس، ءيساول‑د بطرُس ييني‑اس: «ءيزد ا‑سيدي، تريت ا‑تسيردت ءيضارن‑ينو؟» ييني‑اس ياسوع: «ءور‑تسّينت مايد سكارغ غيلاد، والاينّي را‑تيسّانت تيگيرا.» ءيرار‑اس‑د بطرُس: «ءوهو ا‑سيدي. ءور‑سار‑تسيردت ءيضارن‑ينو.» ءيمّا ياسوع ءينّا‑ياس: «ءيغ‑ور‑ك‑سيردغ ءور‑دارك گيگي يات.» ييني‑اس‑د ءيلمّا سيمعان بطرُس: «ءيغ‑يگا غمكاد ا‑سيدي، ا‑ور‑يّي‑تسيردت غير ءيضارن. سيرد‑يّي ءولا ءيفاسّن د‑وگايّو.» ءيساول ياسوع ييني‑اس: «يان يارودن ءور‑ت‑يخصّا ا‑يسيرد ابلا ءيضارن‑نس، اشكو تغوس كولّو دّات‑نس. تغوسم كونّي، والاينّي ءورد كولّوكن.» ءيسّن ياسوع مانوا را‑ت‑يزّنز. مايان ا‑ف‑ينّا «ءورد كولّوكن تغوسم.» لّيغ ءيسيرد ءيضارن‑نسن، ءيلس اسلهام‑نس ءيسكيوس ييني‑اسن: «ءيس‑تسّنم ماد‑اون‑سكرغ؟ كونّي ار‑يّي‑تّينيم ‹امسلمد› ءولا ‹سيدي›. ءيشوا غمكاد تّينيم، اشكو غمكاد اد‑گيغ. والاينّي ءيغ‑سيردغ ءيضارن‑نّون، نكّي لّي‑يگان سيديتون د‑ومسلمد‑نّون، ييلي فلّاون ءولا كونّي ا‑تسيريدم ءيضارن ن‑ينگراتون. مليغ‑اون لمعنا‑ياد باش ا‑تسكارم غمكلّي‑اون‑سكرغ. لحقّ اياد، لحقّ ا‑راد‑اون‑ينيغ. اخدّام ءور‑يوگُر سيديس. ارقّاس ءور‑يوگُر غوالّي‑ت‑يوزنّ. ءيمّا غيلاد ءيغ‑تسّنم تيغاوسيوين‑اد، ءيمباركين ا‑را‑تگم ءيغ‑ا‑سرسنتي‑تسكارم. «ءورد كولّوكن ا‑ف‑ا‑ساوالغ، اشكو سّنغ غويد ستيغ. والاينّي ءيقّان‑د ا‑يجرو غمكلّي ءيتياران غ‑وارّا ن‑ربّي ءينّا، ‹غوالّي ديدي ءيشتّان اغروم، نتّان ا‑را‑يّي‑يغضر.› نّيغ‑اون‑ت ءور‑تا‑يجري، باش ا‑تي‑دي‑تسوانگمّ غاكود نّا‑يجرا، تامنم ءيس‑گيغ غوالّي بدّا ءيلّان. لحقّ اياد، لحقّ ا‑راد‑اون‑ينيغ. وانّا ءيقبلن يان ءوزنغ، هاتي ءيقبل‑يّي. د‑وانّا‑يّي‑يقبلن، ءيقبل غوالّي‑يّي‑د‑يوزنّ.» لّيغ ءينّا ياسوع ماياد تاشك‑ت‑يد تاغوفت، ييني‑اسن: «لحقّ ايد‑اون‑تّينيغ. را‑يّي‑يزّنز يان گيگون.» لّيغ سفلدن ءيمحضارن ءي‑غونشكان ار‑يتمناد كرا غ‑كرا، دوهدون ءور‑سّينّ مانوا گيسن ا‑ف‑يساول. ييلي گيسن يان‑ومحضار ءيعزّا دار ياسوع ءيسكيوس غ‑تاما‑نس. ءينعت‑اس‑د سيمعان بطرُس ا‑يسقسا ياسوع مانوا‑ف‑يساول. ءيسنّد‑ن‑ومحضار‑لّي ف‑يدمارن ن‑ياسوع ءيسقسا‑ت: «مانوا ا‑سيدي؟» ءيساول‑د ياسوع ييني‑اس: «ا‑ت‑يگان د‑غوان مي راد‑سّايكغ توفّاژط‑اد غ‑وروكو فكغ‑اس‑تّ.» ءيسّايك ءيلمّا توفّاژط ن‑وغروم غ‑وروكو ءيفك‑تّ ءي‑ياهودا يوس ن‑سيمعان ءيسخاريوط. غير يومژ ياهودا توفّاژط س‑ت‑يكشم شيطان غاكودان. ييني‑اس ياسوع: «غاياد را‑تسكرت، زايد سكر‑ت غيل غيل.» ءيمّا وييّاض لّي‑ديدس‑گاورنين ءور‑سّينّ ما‑ف‑اس‑ينّا اوال‑اد. كرا گيسن ءيغال ءيس‑اس‑ت‑ينّا اشكو ياهودا ا‑دار‑يلّا صّندوق ن‑يقاريدن‑نسن. غالن ءيس‑ت‑يوصّا ياسوع ا‑يدّو ا‑د‑يسغ غايلّي‑تن‑يخصّان ءي‑لعيد، نغد ا‑ن‑يفك كرا ءي‑يمژلاض. لّيغ يومژ ياهودا توفّاژط، ءيفّوغ حاينا. ءيگا لحال ءيض. لّيغ ءيفّوغ ياهودا ييني‑اسن ياسوع: «غيلاد ا‑را‑يتمجّد يوس ن‑بنادم، ءيبان‑د لمجد ن‑ربّي گيگي. ءيغ‑د‑گيگي‑يبان لمجد ن‑ربّي، را‑يّي‑يمجّد ءولا نكّي، غيلاد ا‑را‑يّي‑يمجّد. وا‑تاروا‑نو، غير كرا ءيدروسن ا‑را‑سول‑ديدون‑قاماغ. را‑سري‑تسيگّيلم، والاينّي غمكلّي‑س‑نّيغ ءي‑يمغارن ن‑ايت‑يودايا، غمكان ا‑س‑راد‑اون‑ينيغ ءولا كونّي، ‹ءور‑تژضارم ا‑تدّوم س‑يلّيس راد‑دّوغ.› ءيمّا غيلاد راد‑اون‑فكغ يات لوصيت لّجديد. تحنّوات ءي‑نگراتون. غمكلّي گيگون تحنّوغ، غمكان ا‑فلّاون‑يلّان ءولا كونّي ا‑تّحنّوم ءي‑نگراتون. غمكاد ا‑س‑راد‑يسّانّ كولّو مدّن ءيزد ءيمحضارن‑ينو ا‑تگام، ءيغ‑ا‑تّحنّوم ءي‑نگراتون.» ءيساول‑د سيمعان بطرُس ءيسقسا‑ت: «مانيس را‑تدّوت ا‑سيدي؟» ييني‑اس ياسوع: «ءور‑تژضارت غيلاد ا‑يّي‑تضفورت س‑يلّيس راد‑دّوغ، والاينّي را‑يّي‑ن‑تضفورت تيگيرا.» ءيمّا بطرُس ءيزوويد ييني‑اس‑د: «وا‑سيدي، ماخ ايلّيغ ءور‑ژضارغ ا‑ك‑ضفورغ غيلاد؟ ها‑يّي ءوجادغ اد‑فكغ ءيخف‑ينو ارد مّتغ ف‑سّيبت‑نّك.» ءيساول ياسوع ييني‑اس: «ءيس‑توجادت ا‑تفكت ءيخف‑نّك تمّتّ ف‑سّيبت‑ينو؟ لحقّ اياد، لحقّ ا‑راد‑اك‑ينيغ. ءور‑را‑يغر‑وفولّوس ارد تينيت كراطّ‑توال ءور‑يّي‑تسّينت.» ييني‑اسن ياسوع: «اد‑ور‑تادجم تاغوفت ا‑تكشم س‑وولاون‑نّون. امنات س‑ربّي، تامنم ءولا سري. گّوتنت‑تحونا غ‑تگمّي ن‑بابا. مراد ءيس‑ور‑يگي غمكاد ءور‑راد‑اون‑ت‑ينيغ، اشكو راد‑دّوغ اد‑اون‑ين‑جّوجادغ ادغار. ءيغ‑دّيغ جّوجادغ‑اون ادغار راد‑د‑وورّيغ اويغ‑كُن ديدي، تيليم ءولا كونّي غ‑يلّيغ راد‑يليغ نكّي. هاتي تسّنم اغاراس لّي‑يتاوين س‑يلّيس راد‑دّوغ.» ءيساول‑د توما ييني‑اس: «ءور‑نسّين مانيس را‑تدّوت، ا‑سيدي. مامنك ا‑س‑را‑نيسّان اغاراس؟» ءيساول ياسوع ييني‑اس: «نكّي ا‑يگان اغاراس ءولا لحقّ ءولا تودرت. ءور‑را‑ن‑يروح يان دار ربّي بابا، ابلا ءيغ‑ت‑سّروحغ نكّي. مراد ءيس‑يّي‑تسّنم، ءيكون تسّنم ءولا بابا. زغ‑غيلاد تسّنم‑ت تژرم‑ت.» ييني‑اس‑د فيليبّوس: «وا‑سيدي، مل‑اغ ربّي باباك س‑نقنعا.» ءيساول ياسوع ييني‑اس: «منشك ايد ديدون كّيغ ا‑فيليبّوس، ءور‑تا‑جّو‑يّي‑تسّينت؟ وانّا‑يّي‑يژران، ءيژرا بابا. ما‑ف‑يّي‑تنّيت ‹مل‑اغ ربّي باباك›؟ ءيس‑ور‑تومينت نكّي د‑بابا يان ا‑نگا، ءيلّا گيگي ءيليغ گيس؟ ءور‑ا‑ياون‑د‑تّينيغ ءيواليون‑اد زغ‑يخف‑ينو، والاينّي بابا لّي‑گيگي‑يلّان، نتّان ا‑گيگي‑يسكارن ما‑يرا. امنات‑يّي ءيغ‑اون‑نّيغ ‹نكّي د‑بابا يان ا‑نگا، ءيلّا گيگي ءيليغ گيس.› نغد امنات‑يّي ف‑سّيبت ن‑ماد‑سكارغ. لحقّ اياد، لحقّ ا‑راد‑اون‑ينيغ. وانّا سري يومنّ، را‑يسكار زوند ءيسكّيرن لّي‑سكارغ. را‑يسكار ما‑تن‑يوگُرن، اشكو راد‑دّوغ نكّي س‑بابا. اينّا تضالبم س‑يسم‑ينو، را‑ت‑سكرغ. غمكاد ا‑را‑د‑يبان لمجد ن‑بابا غ‑يوس. ءيغ‑تضالبم كرا س‑يسم‑ينو، را‑ت‑سكرغ. «ءيغ‑ا‑يّي‑تّيريم، را‑تسكارم س‑لوصيّات‑ينو. راد‑ضالبغ زغ‑بابا، ءيفك‑اون‑د اعوين ياضني لّي‑راد‑بدّا‑ديدون‑يقاما، ا‑ت‑يگان د‑رّوح لّحقّ. ءور‑ژضارن ايت‑دّونيت‑اد ا‑ت‑قبلن اشكو ءور‑جّو‑ت‑ژرين ءولا سّنّ‑ت. ءيمّا كونّي تسّنم‑ت اشكو ءيلّا غ‑گراتون، را‑سول‑يكشم س‑وگُنس‑نّون. ءور‑را‑كُن‑فلغ ا‑تگم ءيگيگيلن، هاتي را‑د‑دارون‑وورّيغ. غير يان ءيميكّ ءور‑سول‑را‑يّي‑ژرن ايت‑دّونيت‑اد، ءيمّا كونّي را‑يّي‑تژرم. اشكو لّيغ دّرغ نكّي را‑تدّرم ءولا كونّي. غاسّان ا‑را‑تيسّانم ءيس‑لّيغ غ‑بابا تيليم گيگي ءيليغ گيگون. وانّا ءيسفليدن س‑لوصيّات‑ينو ار‑سرسنت‑يسكار، نتّان ا‑يّي‑يتّيرين. د‑وانّا‑يّي‑يتّيرين، را‑ت‑ييري بابا. را‑ت‑يريغ ءولا نكّي، سّبايّنغ‑اس ءيخف‑ينو.» ءيسقسا‑ت ياهودا ياضني ءورد ءيسخاريوط، ييني‑اس: «مامنك ا‑سيدي ا‑راد‑اغ‑دي‑تسّبايّنت ءيخف‑نّك، ءور‑را‑تي‑تسّبايّنت ءي‑دّونيت؟» ييني‑اس ياسوع: «وانّا‑يّي‑يتّيرين، را‑يسكار س‑واوال‑ينو. را‑ت‑ييري بابا، ناشك‑يد دارس نيلي‑بدّا ديدس. ءيمّا وانّا ءور‑يّي‑يتّيرين، ءور‑را‑يسكار س‑واوال‑ينو. هاتي ءيواليون‑اد مي تسفليدم ءور‑گين غير وينو، گان وين بابا لّي‑يّي‑د‑يوزنّ. «نّيغ‑اون كولّو ماياد غيلاد غ‑سول ديدون لّيغ. ءيمّا اعوين ا‑ت‑يگان د‑رّوح لقودوس لّي‑راد‑اون‑د‑يازن بابا س‑يسم‑ينو، نتّان ا‑را‑كُن‑يسّلماد ف‑كرايگاتّ كرا ءيسّكتي‑اون‑د كولّو ماد‑اون‑نّيغ. ءيمّا غيلاد فلغ‑اون سّلامت. سّلامت‑ينو ايد‑اون‑فكيغ. ءور‑را‑تيژضار دّونيت اد‑اون‑تّي‑تفك غمكلّي‑اون‑تّ‑فكيغ نكّي. ا‑ور‑تيكساضم ءولا تودجم تاغوفت ا‑تكشم س‑وولاون‑نّون. تسفلدم‑يّي نّيغ‑اون ‹راد‑دّوغ، وورّيغ‑د ءيلمّا س‑دارون.› مراد ءيس‑ا‑يّي‑تّيريم ءيكون تفرحم لّيغ‑اون‑نّيغ ‹راد‑دّوغ س‑بابا› اشكو بابا يوگُر‑يّي. نّيغ‑اون كولّو ماياد ءور‑تا‑يجري، باش ا‑يّي‑تامنم غاكود نّا‑يجرا. ءور‑را‑سول‑ديدون‑ساولغ باهرا. را‑د‑ياشك غوالّي ءيتحكامن غ‑دّونيت‑اد، ءيمّا نتّا ءور‑دارس‑فلّا يات. والاينّي ءيقّان‑د ايت‑دّونيت اد‑يسّانّ ءيس‑ا‑تّيريغ بابا ار‑بدّا‑سكارغ س‑لوصيّات‑نس. نكرات غيلاد، ا‑نفّوغ زغ‑غيد.» ييني‑اسن ياسوع: «نكّي ا‑يگان دّاليت ءيصحان، ءيگ بابا بو‑يگر. ار‑زگيگي‑يتكّيس تيصطّوين نّا‑ور‑يسكارن لغلّت. ار‑يفرّن كرايگاتّ تاصطّا نّا‑ياكّان لغلّت باش ا‑تيگات لغلّت‑نس س‑وگُّار. ها‑كونّي غيلاد تّياوفرانم س‑يواليون لّي‑س‑اون‑نّيغ. زگايات گيگي، زگاغ گيگون. ءور‑را‑تيژضار‑تصطّا ا‑تفك لغلّت ءيغ‑ور‑تزگا غ‑دّاليت. ءولا كونّي ءور‑را‑تيژضارم ا‑تسكرم لغلّت ءيغ‑ور‑گيگي‑تزگام. «نكّي گيغ دّاليت، تگم كونّي تيصطّوين. وانّا گيگي ءيزگان زگاغ گيس، نتّان ا‑را‑يسكار لغلّت ءيگّوتن. ءيغ‑گيگي‑ور‑تزگام ءور‑را‑تيژضارم ءي‑يات. وانّا ءور‑گيگي‑يزگان، را‑ن‑يتياوگار س‑برّا زوند تاصطّا، ءيقار. وان تيصطّوين‑ان، ار‑تنت‑سّمونون لوحن‑تنت‑ين غ‑لعافيت اد‑جدرنت. ءيغ‑گيگي‑تزگام زگان گيگون ءيواليون‑ينو، را‑تضالبم اينّا ترام ءيتياوفكا‑ياون. غمكاد ا‑س‑را‑يتمجّد بابا، اشكو را‑تسكارم لغلّت ءيگّوتن، ءيبان گيگون ءيس‑تگام ءيمحضارن‑ينو. ها‑يّي ار‑كُن‑تّيريغ غمكلّي‑يّي‑يتّيري بابا. زگايات‑بدّا غ‑تايري‑نو. ءيغ‑ا‑تسكارم س‑لوصيّات‑ينو را‑تزگام غ‑تايري‑نو، غمكلّي سكارغ س‑لوصيّات ن‑بابا زگاغ غ‑تايري‑نس. «كولّو ماياد، نّيغ‑اون‑ت باش اد‑اون‑ييلي لفرح‑اد داري ءيلّان، تعمّرم س‑لفرح ءيگّوتن. غمكاد ا‑ف‑را‑كُن‑وصّاغ. تحنّوات ءي‑نگراتون غمكلّي گيگون تحنّوغ. ءور‑تلّي لحنانت يوگُرن تين يان ءيفكان ءيخف‑نس ءيمّت ف‑سّيبت ن‑يمدّوكُّال‑نس. كونّي تگام ءيمدّوكُّال‑ينو، ءيغ‑ا‑تسكارم ما‑ف‑كُن‑وصّاغ. ءور‑سول‑كُن‑گيغ د‑يخدّامن‑ينو، اشكو اخدّام ءور‑يسّين ما‑يتناوال سيديس. گيغ‑كُن د‑يمدّوكُّال‑ينو، اشكو مليغ‑اون كولّو ما‑مي‑سفلدغ زغ‑بابا. ءور‑يّي‑تستيم كونّي والاينّي نكّي ا‑كُن‑يستين، ژليغ‑كُن ا‑تّيدوم ار‑تسكارم لغلّت ءيگّوتن لّي‑راد‑بدّا‑يدوم. غمكاد ا‑س‑راد‑اون‑يفك بابا اينّا زغ‑گيس تضالبم س‑يسم‑ينو. ءيمّا غيلاد ار‑كُن‑توصّاغ ا‑تّحنّوم ءي‑نگراتون. «ءيغ‑كُن‑كورهان مدّن ن‑دّونيت‑اد، سوانگماد‑د ءيس‑يّي‑كورهان نكّي امزوارو. مراد ءيس‑تگام وين دّونيت، را‑كُن‑تّيرين ايت‑دّونيت زوند مدّن‑نسن. والاينّي ژليغ‑كُن زغ‑دّونيت. ءور‑اكُّ‑تگيم وين دّونيت. مايان ا‑ف‑ا‑كُن‑تكرهون ايت‑دّونيت. سوانگماد‑د مايلّي‑اون‑نّيغ، ‹اخدّام ءور‑يوگُر سيديس.› ءيغ‑يّي‑سّرفوفنّ، را‑كُن‑سّرفوفنّ ءولا كونّي. ءيغ‑سفلدن س‑واوال‑ينو، راد‑سفلدن ءولا س‑واوال‑نّون. كولّو ماياد راد‑اون‑ت‑سكرن ف‑سّيبت ن‑ما‑تگام وينو، اشكو ءور‑سّينّ غوالّي‑يّي‑د‑يوزنّ. مراد ءيس‑ور‑د‑وشكيغ ساولغ سرسن، ءور‑را‑فلّاسن‑يلين دّنوب‑نسن. ءيمّا غيلاد غ‑د‑وشكيغ ءور‑ژضارن اد‑ينين ‹ءور‑نسّين مايد نسكر ءيس‑يُخشن.› وانّا‑يّي‑يكورهان، هاتي ءيكورها بابا. مراد ءيس‑ور‑سكيرغ غ‑گراتسن مايلّي ءور‑جّو‑يسكير كرا ن‑يان ياضني، ءور‑را‑فلّاسن‑يلين دّنوب‑نسن. والاينّي غيلا ژران ءيسكّيرن‑ينو، كرهون‑يّي سول نكّي ءولا بابا. ءيجرا غمكاد باش ا‑يافو ما‑يتياران غ‑شّرع‑نسن ار‑يتّيني ‹كورهان‑يّي، واخّا ءور‑يلّي ف‑مي.› «والاينّي راد‑د‑سرون‑ياشك رّوح لّحقّ لّي‑د‑يفّوغن زغ‑بابا، ا‑ت‑يگان د‑واعوين لّي‑راد‑اون‑د‑ازنغ زغ‑بابا. نتّان ا‑را‑فلّا‑ياكّا توگّا. ءولا كونّي را‑فلّا‑تاكّام توگّا، اشكو تلّام ديدي زغ‑يسيزوار.» «نّيغ‑اون كولّو ماياد باش ا‑ور‑تدوهدوم تضرم. را‑كُن‑سّوفغن زغ‑تگُمّا ن‑تژالّيت. راد‑د‑سول‑اشكين كرا ن‑ووسّان غ‑را‑يسوانگم وانّا‑كُن‑ينغان ءيس‑يسكر ما‑يرضان ربّي. راد‑اون‑سكرن غمكان اشكو ءور‑سّينّ بابا ءولا سّنّ‑يّي نكّي. نّيغ‑اون ماياد ءور‑تا‑يجري، باش ا‑دي‑تسوانگمّ ماد‑اون‑نّيغ غاكود نّا‑د‑يلكم‑وزمز‑ان. غ‑ووسّان زوارنين ءور‑اون‑نّيغ تيغاوسيوين‑اد اشكو سول ديدون لّيغ. ءيمّا غيلاد غ‑راد‑دّوغ س‑والّي‑يّي‑د‑يوزنّ، ءور‑يّي‑يسقسا يان گيگون مانيس راد‑دّوغ. تاغ‑كُن‑تگوضي لّيغ‑اون‑ساولغ ف‑تغاوسيوين‑اد، والاينّي لحقّ ا‑راد‑اون‑ينيغ، يوف‑اون اد‑دّوغ. اشكو ءيغ‑ور‑دّيغ ءور‑را‑د‑سرون‑ياشك‑واعوين، والاينّي ءيغ‑دّيغ راد‑اون‑ت‑يد‑ازنغ. را‑د‑ياشك نتّا، ار‑يسّبايّان لحقّ ءي‑مدّن ف‑دّنوب لّي‑سكارن، ءولا افولكي لّي‑س‑يرضا ربّي، ءولا لحوكم لّي‑را‑يتّوت ف‑دّونيت. راد‑اسن‑يسّبايّان ما‑يگان دّنوب اشكو ءور‑سري‑ومينّ. راد‑اسن‑يسّبايّان ما‑يگان افولكي اشكو راد‑دّوغ س‑بابا ءور‑را‑يّي‑سول‑تژرم. راد‑اسن‑يسّبايّان ما‑يگان لحوكم اشكو ءيتّوت‑ياد لحوكم ن‑ربّي ف‑والّي ءيتحكامن غ‑دّونيت‑اد. «ءيگّوت داري ماد‑اون‑سول‑تّينيغ والاينّي ءور‑اس‑تژضارم غيلاد. ءيمّا غاكود نّا‑د‑يوشكا رّوح لّحقّ، راد‑اون‑يمل لحقّ كولّوت. ءور‑را‑يساوال زغ‑يخف‑نس، والاينّي راد‑اون‑يساوال ف‑مايلّي مي ءيسفليد ءيمل‑اون ما‑را‑ييلي غ‑مايد‑د‑يفتان. را‑يّي‑يتمجّاد نكّي، اشكو را‑يامژ اوال‑ينو ءيمل‑اون‑ت‑يد. كولّو ما‑يطّاف بابا، ءيگا وينو. ماياد ا‑ف‑اون‑نّيغ ‹را‑يامژ اوال‑ينو ءيمل‑اون‑ت‑يد.› غير يان ءيميكّ ءور‑سول‑را‑يّي‑تژرم، ءيميكّ تيغوردين ن‑مايان را‑يّي‑داغ‑تژرم.» كرا غ‑يمحضارن‑نس ار‑سقسان ءي‑نگراتسن: «مايد‑اغ‑يتّيني غيلا ‹غير يان ءيميكّ ءور‑سول‑را‑يّي‑تژرم، ءيميكّ تيغوردين ن‑مايان را‑يّي‑داغ‑تژرم›؟ ماخ ايلّيغ ءينّا ‹راد‑دّوغ س‑بابا›؟ ما‑يقصاد س‑واوال‑اد ‹غير ءيميكّ›؟ ءور‑نسّين ما‑ف‑ا‑يساوال.» ءيمّا ياسوع ءيسّن ءيس‑ران ا‑ت‑سقسان، ييني‑اسن: «ءيزد اوال‑اد ا‑كُن‑يسّيحلن لّيغ‑اون‑نّيغ ‹غير يان ءيميكّ ءور‑سول‑را‑يّي‑تژرم، ءيميكّ تيغوردين ن‑مايان را‑يّي‑داغ‑تژرم›؟ لحقّ اياد، لحقّ ا‑راد‑اون‑ينيغ. راد‑فرحن مدّن ن‑دّونيت‑اد، طيّر‑اون كونّي ار‑تالّام، تاغ‑كُن‑تگوضي. والاينّي را‑تگُّرو‑تگوضي‑نّون س‑لفرح. ءولا تامغارت ءيغ‑تاكمور ا‑تارو، ار‑تّي‑تّاغ‑تگوضي، اشكو تلكم‑د تاساعت‑نس. والاينّي ءيغ‑تورو ارّاو‑نس ار‑تتّو تاكرّايت لّي‑تزّري، اشكو تفرح س‑بنادم لّي‑د‑يفّوغن س‑دّونيت. ءولا كونّي، تاغ‑كُن‑تگوضي غيلاد، والاينّي را‑كُن‑داغ‑ژرغ، تفرحم س‑وگُّار. ءور‑يلّي ما‑راد‑اون‑يكّيس لفرح‑نّون. غ‑ووسّان‑ان ءور‑سول‑را‑زگيگي‑تضالبم يات. لحقّ اياد، لحقّ ا‑راد‑اون‑ينيغ. ءيغ‑تضالبم كرا ءي‑بابا س‑يسم‑ينو، راد‑اون‑ت‑يفك. ءور‑جّو‑تضالبم يات س‑يسم‑ينو ار غيلاد. ضالبات ييلي‑اون، تعمّرم س‑لفرح ءيگّوتن. «كولّو ماياد نّيغ‑اون‑ت س‑لمعني، والاينّي راد‑د‑اشكين‑ووسّان غ‑ور‑سول‑راد‑اون‑ساولغ س‑لمعني. راد‑اون‑ينيغ ف‑بابا س‑واوال ءينمن. غ‑ووسّان‑ان ءورد نكّي ا‑را‑يتضالاب بابا ف‑سّيبت‑نّون والاينّي را‑تي‑تّضالابم كونّي س‑يسم‑ينو. اشكو ار‑كُن‑يتّيري بابا ف‑سّيبت ن‑ما‑يّي‑تّيريم، تامنم ءيس‑د‑وشكيغ زغ‑ربّي. ءوشكيغ‑د‑نّيت زغ‑بابا، كشمغ‑د س‑دّونيت‑اد. راد‑داغ‑فّوغّ دّونيت وورّيغ س‑بابا.» ءينين‑اس ءيمحضارن‑نس: «اوال ءينمن ايد‑س‑ا‑تساوالت غيلاد، ءورد لمعني. نژرا غيلاد ءيس‑تسّنت كولّو ما‑يلّان، تيسّانت ءولا ءيسوينگيمن ن‑مدّن ءور‑تا‑ك‑فلّاسن‑سقسان. ف‑مايان ا‑ف‑نومن ءيس‑دي‑توشكيت زغ‑ربّي.» ءيساول‑د ياسوع ييني‑اسن: «ءيس‑تومنم غيلاد؟ را‑دي‑تاشك يات تاساعت، هاتي‑نّيت تلكم‑د، لّي‑غ‑را‑تاكوتم، ءيروح كود يان تيگمّي‑نس تفلم‑يّي واحدويّي. والاينّي ءورد واحدويّي ا‑راد‑قاماغ، اشكو ءيلّا‑بدّا ديدي بابا. كولّو ماياد نّيغ‑اون‑ت باش ا‑تيلي سّلامت‑ينو غ‑وولاون‑نّون. تاكرّايت ا‑راد‑اون‑ييلي غ‑دّونيت. والاينّي زعمات، ها‑يّي نريغ دّونيت.» لّيغ ءيكمّل ياسوع ءيواليون‑اد، يالّ الّن‑نس س‑يگنوان ييني: «وا‑بابا ربّي، تلكم‑د تاساعت. مجّد يوك غيلاد، ا‑د‑گيگي‑يبان لمجد‑نّك. سّنغ ءيس‑تگيت كولّو بنادم غ‑دّو‑وفوس‑ينو، اد‑فكغ تودرت ءيدومن ءي‑كولّو ويلّي‑يّي‑تفكيت. غمكاد ا‑تگا تودرت ءيدومن، ا‑ك‑يسّانّ كيّي لّي‑يگان ربّي لّحقّ، ءيسّانّ ياسوع لماسيح لّي‑دي‑توزنت. سّبايّنغ‑د لمجد‑نّك غ‑دّونيت‑اد، كمّلغ تاووري لّي‑يّي‑تفكيت. ءيمّا غيلاد ا‑بابا، مجّد‑يّي غ‑دارك س‑لمجد لّي‑يّي‑يلّان غ‑دارك لّيغ ءور‑تا‑تلّي دّونيت. «ها‑يّي سّبايّنغ‑د مامنك ا‑تگيت ءي‑ويلّي‑يّي‑تفكيت زغ‑دّونيت‑اد. وينّك اد‑گان، د‑نكّي ا‑مي‑تن‑تفكيت. زگان سول غ‑واوال‑نّك، ءيسّانّ ءيزد دارك ا‑د‑يكّا كولّو مايد‑يّي‑تفكيت اشكو نّيغ‑اسن ءيواليون لّي‑يّي‑تمليت. امژن ءيواليون‑ان ءيسّانّ ءيزد س‑صّاحت زغ‑گيك ا‑زغ‑د‑وشكيغ، امنّ ءيزد كيّي ا‑يّي‑د‑يوزنّ. ف‑سّيبت‑نسن ا‑ف‑ا‑ك‑تضالابغ غيلاد. ءور‑ا‑تضالابغ ف‑دّونيت والاينّي ف‑ويلّي‑يّي‑تفكيت، اشكو وينّك اد‑گان. كولّو ماد‑داري‑يلّان، ءيگا وينّك. ءولا كولّو ماد‑دارك‑يلّان، ءيگا وينو. ءيمّا نتني ار‑گيسن‑يتبان لمجد‑ينو. ها‑يّي غيلاد را‑ن‑دارك‑وورّيغ، ءور‑را‑سول‑قاماغ غ‑دّونيت. ءيمّا نتني دّونيت ا‑غ‑لّان. وا‑بابا ربّي امژلاي، حضو‑تن‑بدّا س‑تحكيمت ن‑يسم‑نّك لّي‑يّي‑تفكيت، اد‑كولّو‑گن يان غمكلّي نگا يان نكّي ديك. غ‑ووسّان لّي‑غ‑سول‑ديدسن‑لّيغ غ‑دّونيت ار‑تن‑تحضوغ ار‑تن‑تگابالغ س‑تحكيمت ن‑يسم‑نّك لّي‑يّي‑تفكيت. ءور‑گيسن‑يتياوهلاك يان، ابلا غوالّي‑د‑يقّانّ ا‑يتياوهلاك باش ا‑يافو مايلّي ءيتياران غايد ءيزرين. «يان ءيميكّ را‑ن‑دارك‑اشكغ، ءيمّا غيلاد غ‑سول‑لّيغ غ‑دّونيت ار‑اسن‑ادّرغ تيغاوسيوين‑اد باش اد‑اسن‑ييلي كولّو لفرح‑اد داري ءيلّان. مليغ‑اسن اوال‑نّك، كرهون‑تن مدّن ن‑دّونيت‑اد اشكو ءور‑گين وين دّونيت، غمكلّي ءور‑گيغ نكّي وين دّونيت. ءور‑ا‑ك‑تضالابغ ا‑تن‑تسّيتّيت زغ‑دّونيت والاينّي ا‑تن‑تسّنتالت زغ‑يبليس. نتني ءور‑گين وين دّونيت، غمكلّي ءور‑گيغ نكّي وين دّونيت. ضالبغ‑ك ا‑تن‑تژّليت ءي‑يخف‑نّك س‑وژلاي لّحقّ. اوال‑نّك ا‑يگان لحقّ. غمكلّي‑يّي‑توزنت س‑دّونيت، غمكان ا‑تن‑وزنغ ءولا نتني غ‑دّونيت. ف‑سّيبت‑نسن ا‑ف‑ژّليغ ءيخف‑ينو ءي‑وغاراس‑نّك باش اد‑ژّلين ءولا نتني ءيخفاون‑نسن ءي‑وغاراس‑نّك س‑لحقّ. «ءورد غويد كا‑ف‑ا‑كي‑تضالابغ والاينّي ضالبغ‑ك ءولا ف‑وينّا را‑سري‑يامن ف‑سّيبت ن‑واوال ن‑غويد. ضالبغ‑ك ا‑بابا، اد‑گن كولّو يان، غمكلّي نگا نكّي ديك يان. ضالبغ اد‑گن ءولا نتني يان ديدنّغ، باش اد‑وورّين امنّ ايت‑دّونيت‑اد، ءيسّانّ ءيزد كيّي ا‑يّي‑د‑يوزنّ. لمجد لّي‑يّي‑تفكيت، فكيغ‑اسن‑ت، باش اد‑گن كولّوتن يان غمكلّي نگا يان، نكّي ديدسن ءولا كيّي ديدي. ريغ اد‑مونّ كولّو س‑تامونت ءيكمّلن، باش اد‑يسّانّ ايت‑دّونيت‑اد ءيزد كيّي ا‑يّي‑د‑يوزنّ، ءيسّانّ ءيس‑ا‑تن‑تّيريت غمكلّي‑يّي‑تّيريت نكّي. «وا‑بابا، غويد‑يّي‑تفكيت، ريغ اد‑يلين نتني غ‑يلّيغ راد‑يليغ نكّي، اد‑ژرن لمجد لّي‑يّي‑تفكيت، اشكو عزّاغ دارك ءور‑تا‑تلّي دّونيت. وا‑بابا ربّي ءيفولكين، ءور‑ك‑سّينّ مدّن ن‑دّونيت‑اد، والاينّي سّنغ‑ك نكّي. ءولا غويد، سّنّ نتني ءيزد كيّي ا‑يّي‑د‑يوزنّ. مليغ‑اسن مامنك ا‑تگيت. راد‑اسن‑سول‑مالاغ مامنك ا‑تگيت، باش ا‑گيسن‑تيلي تايري لّي‑س‑ا‑يّي‑تّيريت، ءيليغ گيسن نكّي.» ءيژّولّا ياسوع غمكان، ءيفّوغ ءيلمّا نتّا د‑يمحضارن‑نس، بّين تالات ن‑قيدرون س‑يلّيغ ءيلّا يان‑وورتي، كشمن سرس. ياهودا لّي‑يسكرن ف‑ا‑يزّنز ياسوع ءيسّن ءورتي‑ان، اشكو ار‑گيس‑يتمونو ياسوع د‑يمحضارن‑نس منّاوت‑توال. ءيفتو ياهودا س‑غين، ياوي ديدس ءيعسكرين ن‑رّومان ءولا كرا ن‑يمخزنيين ءوزنّ‑تن ءينمغورن ن‑تگمّي ن‑ربّي د‑يفاريسين. اسين ديدسن لفنارات د‑يسوفا د‑يمقلاد. ياسوع ءيسّن كولّو ما‑راد‑اس‑يجرو، ءيفّوغ سرسن ييني‑اسن: «ما‑س‑ا‑تسيگّيلم؟» ءينين‑اس: «ياسوع گو‑ناصيرا.» ييني‑اسن: «نكّي ا‑ت‑يگان.» ياهودا لّي‑يسكرن ف‑ا‑ت‑يزّنز ءيبيدّ ديدسن. ءيمّا نتني لّيغ‑اس‑سفلدن ءينّا «نكّي ا‑ت‑يگان،» وورّين تيغوردين ضرن س‑واكال. ءيسقسا‑تن‑داغ ياسوع: «مانوا‑س‑ا‑تسيگّيلم؟» ءينين‑اس: «ياسوع گو‑ناصيرا.» ييني‑اسن ياسوع: «نكّي ا‑ت‑يگان غمكلّي‑س‑اون‑نّيغ. ءيغد نكّي ا‑س‑ا‑تسيگّيلم، ادجات غويد ياضني اد‑دّون.» غمكاد ا‑س‑يووفا‑واوال لّي‑س‑يادلّي‑ينّا «ءور‑يتياوهلاك يان زغ‑ويلّي‑يّي‑تفكيت.» ءيمّا سيمعان بطرُس، تلّا دارس يات لكومّيت، ءيلدي‑تّ‑يد يوت سرس اخدّام ن‑ونمغور ن‑تگمّي ن‑ربّي، ءيبّي‑اس امژّوغ افاسي. ءيگا ءيسم ن‑وخدّام‑ان مالخوس. ءيمّا ياسوع ءينّا‑ياس ءي‑بطرُس: «رار لكومّيت‑ان س‑وغلاف‑نس. ءيس‑تغالت ءيس‑ور‑راد‑سوغ لكاس‑اد ن‑ورفوفن لّي‑يّي‑يفكا ربّي بابا؟» امژن ياسوع غاكودان، سوتلن‑اس ءيعسكرين د‑ومغار‑نسن د‑يمخزنيين ن‑ايت‑يودايا، كرسن‑ت س‑يزيكر. اوين‑ت س‑دار حانّان، ءيگا اضگُّال ن‑قايافا لّي‑يگان انمغور ن‑تگمّي ن‑ربّي غ‑وسگُّاس‑ان. قايافا، نتّان ا‑ينّان يادلّي ءي‑يمغارن ن‑ايت‑يودايا «يوف ءيغ‑يمّوت يان‑ورگاز ف‑سّيبت ن‑مدّن‑نّغ كولّوتن.» ءيمّا سيمعان بطرُس نتّا د‑يان‑ومحضار ياضني ضفارن ياسوع. امحضار‑ان، ءيسّن‑ت‑ونمغور ن‑تگمّي ن‑ربّي. ءيكشم ءولا نتّا س‑وامّاس ن‑تگمّي ن‑ونمغور س‑يلّيغ ءيلّا ياسوع. ءيقاما بطرُس غ‑برّا غ‑دار ءيمي. ءيفّوغ‑يلمّا‑ومحضار‑ان س‑دار‑تخدّامت لّي‑يتگابالن ءيمي، ءيساول سرس ءيشّكشم بطرُس. ءيمّا تاخدّامت‑لّي تنّا‑ياس ءي‑بطرُس: «ءيس‑ور‑تگيت ءولا كيّي زغ‑يمحضارن ن‑ورگاز‑ان؟» ءيرار‑اس: «ءوهو، ءور‑زگيسن‑گيغ نكّي.» سكرن ءيخدّامن د‑يمخزنيين يات لعافيت ن‑ترگين اشكو ءيلّا‑وسمّيض، بيدّن غ‑تاما‑نس ار‑رقّان. ءيدّو دارسن بطرُس ءيبيدّ ار‑ديدسن‑يرقّا. ءينكر‑ونمغور ن‑تگمّي ن‑ربّي ءيسقسا ياسوع ف‑يمحضارن‑نس ءولا المّود‑نس. ءيساول ياسوع ييني‑اس: «ها‑يّي سّبايّنغ المّود‑ينو غ‑لگدّام ن‑مدّن. ار‑سّلمادغ غ‑تگُمّا ن‑تژالّيت ءولا تيگمّي ن‑ربّي غ‑يلّيغ ا‑كولّو‑تمونون ايت‑يودايا. ءور‑جّو‑سّنتيلغ اوال‑ينو. ماخ ا‑يّي‑تسقسات نكّي؟ سقسا غويلّي‑يّي‑سفليدنين، اشكو سّنّ ما‑تّينيغ.» لّيغ ءينّا ياسوع ماياد يوت‑ت يان زغ‑يمخزنيين س‑وباريق ييني‑اس: «ماتّا غمكاد تساوالت س‑ونمغور ن‑تگمّي ن‑ربّي؟» ييني‑اس ياسوع: «ءيغ‑يلّا كرا يُخشنّ غ‑ماد‑نّيغ، مل‑يّي‑ت. والاينّي ءيغ‑نّيغ صّاحت ماخ ايلّيغ‑يّي‑توتّ؟» يازن‑ت ءيلمّا حانّان غمكلّي ءيتياوكرّاف س‑دار قايافا انمغور ن‑تگمّي ن‑ربّي. ءيمّا سيمعان بطرُس سول ءيبيدّ ار‑يرقّا، سقسان‑ت كرا ن‑مدّن: «ءيس‑ور‑تگيت ءولا كيّي زغ‑يمحضارن‑نس؟» ءيرار‑اسن: «ءوهو، ءور‑زگيسن‑گيغ نكّي.» ءيساول‑د يان‑وخدّام ن‑ونمغور ن‑تگمّي ن‑ربّي، ءيگا زغ‑ايت‑دار والّي مي ءيبّي بطرُس امژّوغ، ييني‑اس: «ماخ، ءور‑ك‑ديدس‑ژريغ غ‑وورتي‑ان؟» ءيرار‑داغ بطرُس: «ءوهو، ءورد نكّي.» ءيغر‑وفولّوس غاكودان. نكرن ءيلمّا اوين ياسوع زغ‑دار قايافا س‑لقصر لّحاكم ن‑رّومان، ييلي مايان زيكّ صباح. ءور‑كشيمن س‑لقصر، اشكو ءيحرم ف‑وانّا ءيران ا‑يشّ ءيمنسي لّعيد ن‑وسورف. ءور‑رين ءيمغارن‑ان ن‑ايت‑يودايا اد‑سّحرمن ءيخفاون‑نسن. لحاكم بيلاطوس ءيسّن ماياد، ءيفّوغ‑د س‑دارسن ييني‑اسن: «ما‑ف‑تصرضم ءي‑ورگاز‑اد؟» رارن‑اس: «مراد ءيس‑ور‑يسكير لخُشانت ءور‑راد‑اك‑ت‑يد‑ناوي.» ييني‑اسن بيلاطوس: «اويات‑ت كونّي تحكامّ فلّاس س‑غايلّي ءيلّان غ‑شّرع‑نّون.» ءينين‑اس: «ءور‑دارنّغ لحقّ ا‑نحكام ف‑كرا ن‑يان س‑لموت.» غمكاد ءيجرا باش ا‑يافو‑واوال لّي‑س‑ينّا ياسوع ف‑مامنك ا‑را‑تگ لموت لّي‑س‑را‑يمّت. ءيكشم‑داغ بيلاطوس لحاكم س‑لقصر، يوصّا ءيعسكرين اد‑شّكشمن ياسوع س‑دارس. ءيسقسا‑ت: «ءيس‑تگيت اگلّيد ن‑ايت‑يودايا؟» ءيرار‑اس ياسوع: «ءيزد اسقسي‑اد ءيگا وينّك، نغد غير مدّن ياضني اد‑اك‑ت‑ينّان؟» ييني‑اس بيلاطوس: «ماخ گيغ زغ‑ايت‑يودايا؟ هان مدّن‑نّك د‑ينمغورن‑نّك ا‑ك‑يد‑ييوين س‑داري. ما‑تسكرت؟» ءيرار‑اس ياسوع: «تاگلديت‑ينو ءور‑تگي تين دّونيت‑اد. مراد ءيس‑تگا‑تگلديت‑ينو تين دّونيت‑اد، راد‑مّاغن ءيخدّامن‑ينو ا‑يّي‑سّنتالن زغ‑يفاسّن ن‑ايت‑يودايا. ءيمّا نكّي، تاگلديت‑ينو ءور‑تگي زغ‑غيد.» ييني‑اس بيلاطوس: «ءيزد‑نّيت اگلّيد ا‑تگيت؟» ءيرار‑اس ياسوع: «كيّي ايد ءينّان ءيس‑گيغ اگلّيد. ماياد ا‑ف‑د‑لولغ ءي‑دّونيت، اشكغ‑د اد‑اكّاغ توگّا ف‑لحقّ. كولّو وانّا ءيران لحقّ را‑يسفليد ءي‑واوال‑ينو.» ييني‑اس ءيلمّا بيلاطوس: «ما‑يگا لحقّ؟» غاكودان ءينكر بيلاطوس ءيفّوغ‑د س‑دار مدّن‑ان ن‑ايت‑يودايا ييني‑اسن: «ءور‑گيس‑وفيغ كرا لّعيب. والاينّي كرايگاتّ لعيد ن‑وسورف ار‑اون‑گيس‑رژّمغ ءي‑يان‑وحبّاس س‑مكلّي تگا لعادا‑نّون. ءيس‑ترام غيلاد اد‑اون‑ين‑رژمغ ءي‑وگلّيد ن‑ايت‑يودايا؟» غوّتن نتني ار‑تّينين: «ءور‑نري غواد. رژم‑اغ‑د ءي‑بارابّاس.» ءيمّا بارابّاس ءيگا اقطّاع. غاكودان يوصّا بيلاطوس ءيعسكرين اد‑اوين ياسوع سّغورشن‑ت. سكرن نتني يان‑تّاج زغ‑وزگُّار گن‑اس‑ت ف‑يخف، سّلسن‑اس يان‑وسلهام ءيژگُّاغن، ار‑ن‑تبدّادن غ‑لگدّام‑نس ار‑اس‑تّينين: «سّلام فلّاك اي‑اگلّيد ن‑ايت‑يودايا.» ار‑ت‑كّاتن س‑يباريقن. ءيفّوغ‑د‑داغ بيلاطوس ءيساول س‑مدّن ييني‑اسن: «هاتي راد‑اون‑ت‑يد‑سّوفغّ، تيسّانم ءيس‑ور‑گيس‑وفيغ كرا لّعيب.» ءيفّوغ‑د ياسوع ءيلمّا، ءيلس تّاج ن‑وزگُّار د‑وسلهام ءيژگُّاغن. ييني‑اسن بيلاطوس: «هاي‑ارگاز.» لّيغ‑ت‑ژران ءينمغورن د‑يمخزنيين ن‑تگمّي ن‑ربّي ار‑سّغويّون ار‑تّينين: «اگُل‑ت ف‑وگّجدي. اگُل‑ت ف‑وگّجدي ا‑يمّت.» ييني‑اسن بيلاطوس: «اويات‑ت كونّي تاگُلم‑ت ف‑وگّجدي. ها‑يّي ءور‑گيس‑وفيغ كرا لّعيب.» ءيمّا مدّن‑ان ن‑ايت‑يودايا نّان‑اس: «نكُّني س‑شّرع‑نّغ ا‑س‑ا‑نسكار. س‑ما‑يلّان غ‑شّرع ءيقّان‑ت‑يد ا‑يمّت اشكو ءيگا ءيخف‑نس د‑يوس ن‑ربّي.» بيلاطوس لّيغ ءيسفلد ءي‑مايد نّان تزايد گيس تاودا، ءيكشم‑داغ س‑لقصر ءيسقسا ياسوع: «گو‑ماني ا‑تگيت؟» ءيمّا ياسوع ءور‑اس‑يرور س‑يات. ييني‑اس بيلاطوس: «ماخ ايلّيغ ءور‑را‑دي‑تساولت؟ ءيس‑ور‑تسّينت ءيس‑ژضارغ اد‑اك‑رژمغ ءيژضارغ ا‑ك‑نغّ ف‑وگّجدي؟» ءيساول ياسوع ييني‑اس: «ربّي اد‑اك‑فلّا‑يفكان تاژضّارت. مراد ءيس‑اك‑تّ‑ور‑يفكي، ءور‑را‑تيژضارت اد‑يّي‑تسكرت يات. والاينّي ءوگُّار‑نّك ا‑يجلا غوالّي‑يّي‑د‑يدحين غ‑گر ءيفاسّن‑نّك.» غاكودان ار‑يسوينگيم بيلاطوس مامنك ا‑را‑يرژم ءي‑ياسوع، والاينّي سول ا‑سّغويّون مدّن‑ان ن‑ايت‑يودايا ار‑تّينين: «ءيغ‑ترژمت ءي‑ورگاز‑اد ءور‑تگيت امدّاكُّل ن‑قايصر، اشكو وانّا ءيگان ءيخف‑نس د‑وگلّيد، ءيگا انوّاش ن‑قايصر.» لّيغ ءيسفلد بيلاطوس ءي‑مايد تّينين ياوي‑د ياسوع س‑برّا. ءيسكيوس غ‑لكورسي لّحوكم غ‑وسايس لّي‑مي‑تّينين ‹اسايس ن‑يفاريون›، ار‑اس‑داغ‑تّينين ‹گابّاتا› س‑واوال ن‑ايت‑يودايا. ييلي مايان غ‑واسّ لّي‑غ‑ا‑توجادن مدّن ءي‑لعيد ن‑وسورف، تلكم‑د طوژّونت ن‑واسّ. ءيساول‑داغ بيلاطوس س‑مدّن‑ان ن‑ايت‑يودايا ييني‑اسن: «هاي‑اگلّيد‑نّون.» رارن‑اس ار‑سّغويّون: «سّيتّي‑ت، سّيتّي‑ت. اگُل‑ت ف‑وگّجدي.» ييني‑اسن بيلاطوس: «ءيس‑ترام اد‑اگُلغ اگلّيد‑نّون ف‑وگّجدي؟» رارن‑اس ءينمغورن ن‑تگمّي ن‑ربّي: «ءور‑دارنّغ كرا ن‑وگلّيد ابلا قايصر.» غاكودان بيلاطوس ءيدحي‑اسن‑د ياسوع غ‑گر ءيفاسّن‑نسن ا‑ت‑اگُلن ف‑وگّجدي ا‑يمّت. اوين ياسوع، ءيفّوغ ياسي اگّجدي‑نس س‑ودغار لّي‑مي‑تّينين ‹تاخُشاشت ن‑يخف›، ار‑اس‑داغ‑تّينين ‹گولگوتا› س‑واوال ن‑ايت‑يودايا. قّنّ ياسوع غين ف‑وگّجدي الّن‑ت. اگُلن ديدس سين ياضني ف‑يگّجدا ف‑وفاسيي‑نس ءولا ف‑وژلماض‑نس، ييلي ياسوع غ‑وامّاس. يورا بيلاطوس يات تالّوحت گن‑تّ‑ين ف‑يگّي ن‑وگّجدي. ءيتيارا گيس «ياسوع گو‑ناصيرا، اگلّيد ن‑ايت‑يودايا» س‑يواليون ن‑ايت‑يودايا د‑وين ايت‑روما د‑وين ايت‑يونان. غرن‑ت مدّن گّوتنين ن‑يودايا، اشكو تامدينت ءور‑تاگّوگ زغ‑ودغار لّي‑غ‑وگُلن ياسوع. ءينين ءينمغورن ن‑تگمّي ن‑ربّي ءي‑بيلاطوس: «اد‑ور‑تارات ‹اگلّيد ن‑ايت‑يودايا›. ارا ‹غواد ءيگا ءيخف‑نس د‑وگلّيد ن‑ايت‑يودايا.› » ءيرار‑اسن بيلاطوس: «ماد‑وريغ، ءوريغ‑ت.» ءيمّا ءيعسكرين، لّيغ ءوگُلن ياسوع ف‑وگّجدي، اسين تيملسا‑نس بضون‑تنت ف‑كّوژط، كرايگاتّ اعسكري د‑ما‑ييوي. اسين ءولا اقشّاب ن‑ياسوع، ءيمّا اقشّاب‑ان ءور‑يتّگُني، ءيتياوژضا زغ‑وفلّا ار ءيزدار. ءينين ءي‑نگراتسن: «ا‑ت‑ور‑نبّي. ا‑د‑فلّاس‑نگر اسغار، نژر مانوا را‑ت‑ياوي.» غمكاد ا‑س‑يووفا ما‑يتياران غ‑وارّا ن‑ربّي ءينّا «بضان تيملسا‑نو ءي‑نگراتسن، گرن‑د اسغار ف‑وقشّاب‑ينو.» غمكان اد‑سكرن ءيعسكرين. تبيدّ ءينّاس ن‑ياسوع غ‑تاما ن‑وگّجدي، نتّات د‑خالتيس ن‑ياسوع د‑ماريام تامغارت ن‑كلوبا د‑ماريام ءولّت‑ماگدالا. ياسوع ءيژرا ءينّاس د‑ومحضار لّي‑دارس‑يعزّان ءيبيدّ غ‑تاما‑نس. ييني‑د ءي‑ينّاس: «وا‑تامغارت، هان يوم غ‑تاما‑نّم.» ييني‑د ءي‑ومحضار: «هان ءينّاك غ‑تاما‑نّك.» تاساعت‑ان ا‑ستّ‑ييوي‑ومحضار اد‑دارس‑تزدغ. غاكودان ءيسّن ياسوع ءيس‑يكمّل كولّو ما‑فلّاس‑يلّان، ءيسّافو ءيلمّا ما‑يتياران غ‑وارّا ن‑ربّي ءيساول‑د ييني: «هاتي روفيغ.» تلّا غين يات‑تبوقّالت ن‑وامان لّخلّ، فّين‑تّ مدّن ف‑يان‑وشرويض، گن‑ت ف‑يات‑تصطّا ن‑وزوكُّني، مدين‑اس‑ت‑ين س‑يمي‑نس. لّيغ ءيسوا ياسوع لخلّ ييني: «يووفا.» ءيسّكنو ءيخف‑نس ءيدحي رّوح‑نس. غاسّان ا‑يقامان ءي‑واسّ ن‑وسونفو، ار‑گيس‑توجادن مدّن ءي‑لعيد. ءور‑رين ءيمغارن ن‑ايت‑يودايا ا‑ن‑تقاما دّات ن‑ويلّي مّوتنين ف‑وگّجدي غ‑واسّ لّعيد. ضالبن زغ‑بيلاطوس ا‑تن‑يادج اد‑اسن‑رژن ءيضارن كّيسن‑تن‑د ءيلمّا. دّون ءيعسكرين رژن ءيضارن ءي‑يان زغ‑ويلّي تياگّالنين د‑ياسوع، رژن ءيلمّا ءيضارن ءي‑وايّاض. ءيمّا ياسوع، لّيغ‑ت‑لكمن افن‑ت‑ين ءيمّوت، ءور‑رژين ءيضارن‑نس. غاكودان ءيروح‑ن يان زغ‑يعسكرين ءيسّياگّاس‑ت غ‑تسگا‑نس س‑وحريش، س‑د‑فّين ءيدامّن د‑وامان. غوالّي ءيژران كولّو ماياد ءيفكا توگّا‑نس فلّاس باش ا‑تامنم ءولا كونّي. ءينّا لحقّ، ييسّان ءيزد لحقّ ايد ءينّا. ءيجرا غمكاد باش ا‑يافو ما‑يتياران غ‑وارّا ن‑ربّي ءينّا: «ءور‑را‑يرژ كرا ن‑يخس غ‑يخسان‑نس.» ءيتيارا‑داغ غ‑وارّا ياضني: «راد‑تمنادن غ‑غوالّي سّياگّاسن.» تيغوردين ن‑مايان ياشك‑يد يوسف گو‑راما. ءيكّا‑تّين ءولا نتّا ءيگا زغ‑يمحضارن ن‑ياسوع، والاينّي س‑تنتلا اشكو ءيكسوض زغ‑يمغارن ن‑ايت‑يودايا. ءيضالب زغ‑بيلاطوس ا‑ت‑يادج ا‑ياوي دّات ن‑ياسوع. يادج‑ت بيلاطوس، ياشك‑يد ءيلمّا ءيسّيتّي دّات‑نس. ءيمون‑د ديدس نيقوديموس لّي‑ستّين ءيكّان ءيدّا غ‑ييض س‑دار ياسوع. ياوي‑د نيقوديموس ما‑يتگّان كراض ءيد‑مراو كيلو ن‑يسافارن ن‑تمضلت، ييلي گيسن لمورّ د‑صّابرا. اسين دّات ن‑ياسوع گن‑اس ءيسافارن، كفنّ‑تّ س‑يشدّادن لّكتّان غمكلّي سكارن ايت‑يودايا. ءيلّا يان‑وورتي غ‑ودغار لّي‑غ‑يمّوت ياسوع، ييلي گيس يان‑ومضّال لّجديد ءور‑جّو‑ن‑گيس‑يتياومضال يان. سرسن‑ين دّات ن‑ياسوع غ‑ومضّال‑لّي اشكو ياكمور‑د، د‑وزكّا را‑دارسن‑يگ لعيد. زيكّ صباح ن‑واسّ لّحدّ، سول لّانت تيلّاس، تدّو ماريام ءولّت‑ماگدالا س‑ومضّال. لّيغ‑ن‑تلكم امضّال تژر‑ن ءيفير لّي‑س‑يقّن ءيتياتّاي زغ‑يمي‑نس. توورّي‑د ار‑دي‑تّازّال س‑دار سيمعان بطرُس د‑ومحضار ياضني لّي‑يعزّان دار ياسوع تيني‑اسن: «سّيتّين سيديتنّغ زغ‑ومضّال. ءور‑نسّين مانيغ‑ت‑ين‑سرسن.» ءينكر بطرُس نتّا د‑ومحضار ياضني، فتون ار‑تازّالن س‑ومضّال. امحضار ياضني ءيزوار بطرُس س‑دار‑ومضّال، ءيكنو ءيژر‑ن ءيشدّادن لّكتّان سول گيس تّرسن، والاينّي ءور‑سرس‑يكشيم. ءيلكم‑د سيمعان بطرُس تيغوردين‑نس ءيكشم س‑ومضّال، ءيژر ءيشدّادن تّرسن گيس. ءيژر اشرويض لّي‑س‑سّلولّين ءي‑وگايّو ن‑ياسوع، ءيموتّل واحدوت ءور‑ن‑يتّرس ف‑يگّي ن‑يشدّادن. ءيزايد‑يلمّا‑ومحضار لّي‑د‑يزوارن س‑دار‑ومضّال، ءيكشم سرس ءولا نتّا، ءيژر ما‑يلّان يامن. ءور‑تا‑فهيمن لمعنا ن‑وارّاتن ن‑ربّي لّي‑غ‑يتيارا ءيقّان‑د ا‑د‑ينكر لماسيح زغ‑لموت. وورّين‑د ءيلمّا ءيمحضارن‑ان س‑تگمّي. ءيمّا ماريام تبيدّ غ‑برّا ن‑ومضّال ار‑تالّا. سول ا‑تالّا تكنو تاگُّ‑ن س‑ومضّال، تژر‑ن سين لمالايكا لسان تيملسا ملّولنين. گاورن غ‑يلّيغ‑ن‑سرسن دّات ن‑ياسوع، يان غ‑دار ءيخف‑نس د‑يان غ‑دار ءيضارن‑نس. ساولن‑د لمالايكا‑يان ءينين‑اس: «وا‑تامغارت، ماخ ايلّيغ ا‑تالّات؟» تيني‑اسن: «سّيتّين سيدي، ءور‑سّينغ مانيغ‑ت‑ين‑سرسن.» لّيغ تنّا ماياد، تگراول تيغوردين‑نس س‑تژرا ياسوع ءيبيدّ. نتّات ءور‑تسّين ءيزد ياسوع ا‑يگا. ءيساول‑د ييني‑اس: «وا‑تامغارت، ماخ ايلّيغ ا‑تالّات؟ ما‑س‑ا‑تسيگّيلت؟» ءيمّا نتّات تغال ءيس‑يگا انگابال ن‑وورتي، تيني‑اس: «ا‑سيدي، ءيغد كيّي ا‑ت‑يوسين، ءيني‑يّي مانيغ‑ت‑ين‑تسرست، اد‑دّوغ ا‑ت‑اويغ.» ءيمّا ياسوع ءينّا‑ياس‑د: «ماريام.» تگراول گيس تيني س‑واوال ن‑ايت‑يودايا: «رابّوني.» تگا لمعنا‑نس ‹امسلمد›. ييني‑اس‑د ياسوع: «اد‑ور‑گيگي‑تامژت، اشكو ءور‑تا‑تيالالغ س‑بابا. والاينّي دّو س‑دار ايتما تينيت‑اسن را‑تيالالغ س‑والّي ءيگان بابا ءيگ باباتون، ءيگا ربّي‑نو ءيگ ربّي‑نّون.» تنكر ماريام ءولّت‑ماگدالا تفتو س‑دار ءيمحضارن تيني‑اسن: «ها‑يّي ژريغ سيديتنّغ.» تساول‑اسن ف‑ماد‑اس‑ينّا ياسوع. تادگُّات ن‑واسّ‑ان لّحدّ، مونّ ءيمحضارن غ‑تگمّي، قّنّ‑د ءيماون اشكو كسوضن زغ‑يمغارن ن‑ايت‑يودايا. غاكودان ءيبان‑اسن‑د ياسوع ءيبيدّ غ‑گراتسن ييني‑اسن: «اد‑اون‑تيلي سّلامت.» ءيساول‑اسن غمكاد ءيمل‑اسن ءيفاسّن‑نس د‑تسگا‑نس. فرحن ءيمحضارن باهرا لّيغ ژران سيديتسن. ييني‑اسن‑داغ: «اد‑اون‑تيلي سّلامت. غمكلّي‑يّي‑د‑يوزن بابا، غمكاد ا‑س‑را‑كُن‑ازنغ غيلاد.» ءيصوض گيسن ييني‑اسن: «امژات رّوح لقودوس. وانّا مي تصامحم ف‑دّنوب‑نس، هاتي تياتّاين فلّاس. د‑وانّا مي ءور‑تصامحم، سول فلّاس قامان دّنوب‑نس.» ءيمّا يان زغ‑سين د‑مراو ن‑ومحضار ءيسم‑نس توما، ار‑اس‑داغ‑تّينين ‹اكنيو›، ءور‑ديدسن‑يلّي غاكود لّيغ‑د‑دارسن‑يوشكا ياسوع. نّان‑اس: «ها‑ياغ نژرا سيديتنّغ.» ءيمّا نتّا ءيرور‑اسن‑د: «ءور‑راد‑امنغ نكّي ارد ژرغ تيگّاس غ‑يفاسّن‑نس، گّرغ‑ن ءي‑لاترت ن‑يمسمارن، گغ افوس‑ينو غ‑تسگا‑نس.» زرين تام‑ووسّان، مونّ‑داغ ءيمحضارن غ‑تگمّي قّنّ‑ين ءيماون، ييلي ديدسن ءولا توما، س‑اسن‑د‑يبان ياسوع ءيبيدّ غ‑گراتسن ييني‑اسن: «اد‑اون‑تيلي سّلامت.» ييني ءيلمّا ءي‑توما: «ژر ءيفاسّن‑ينو، تگّرت‑اسن. مدي‑د افوس‑نّك، تگت‑ت‑ين ف‑تسگا‑نو. اد‑ور‑تّشكّات، غير امن.» ءيساول توما ييني: «وا‑سيدي، وا‑ربّي‑نو.» ءيمّا ياسوع ءينّا‑ياس: «ءيس‑تومنت غيلاد غ‑يّي‑تژريت؟ ءيمباركين اد‑گان وينّا سري ءومنّين بلا‑يّي‑ژران.» كيگان د‑تميتار ياضني ا‑يسكار ياسوع غ‑دار ءيمحضارن‑نس، ءور‑تيارانت غ‑وارّا‑ياد. والاينّي تيارانت ختيد باش ا‑تامنم ءيس‑يگا ياسوع يوس ن‑ربّي ءيگ لماسيح‑نس، تيلي‑اون تودرت س‑يسم‑نس ءيغ‑سرس‑تومنم. تيغوردين ن‑مايان ءيبان‑د‑داغ ياسوع ءي‑يمحضارن‑نس غ‑تاما ن‑ومدا ن‑طاباريّا. غمكاد ا‑س‑د‑يبان. ءيلّا غين سيمعان بطرُس د‑توما لّي‑مي‑تّينين ‹اكنيو› د‑ناتانايل گو‑قانا غ‑تمازيرت ن‑جاليل، نتني د‑تاروا ن‑زابدي د‑سين ءيمحضارن ياضني. ءينّا‑ياسن سيمعان بطرُس: «راد‑دّوغ اد‑گمرغ ءيسلمان.» ءينين‑اس: «را‑ديك‑نمون.» فّوغن ءيلمّا غ‑يات تاناوت، زّرين ءيض كولّوت، ءور‑ومژن يات. لّيغ‑دي‑تغلي تافوكت ءيبيدّ ياسوع غ‑تاما ن‑وامان، والاينّي ءور‑سّينّ ءيزد ياسوع ا‑يگا. ءيساول‑د سرسن ييني: «وا‑يفرخان، ءيس‑تومژم كرا ن‑يسلمان؟» ءينين‑اس: «ءور‑نومژ يات.» ييني‑اسن‑د: «لوحات‑ن شّبكت غ‑تسگا تافاسيت ن‑تاناوت، س‑ن‑توفام كرا.» لوحن‑ين شّبكت، س‑تعمّر غاكودان س‑يسلمان گّوتنين ايلّيغ ءور‑ژضارن ا‑ستّ‑سّغلين س‑تاناوت. ءيساول‑د‑ومحضار لّي‑يعزّان دار ياسوع ييني ءي‑بطرُس: «هاتي سيديتنّغ ايان.» لّيغ ءيسفلد سيمعان بطرُس ءيزد سيديتسن ايان، ءيبكيس اشكو ءيلسا غير ما‑يفسّوسن، ياكُي‑ن غ‑وامان. ءور‑باهرا‑تاگّوگ تاناوت زغ‑واكال، را‑ييلي غ‑گراتسن ما‑يتگّان ميّا ن‑ميترو. ار‑لدّين ءيمحضارن ياضني شّبكت لّي‑يعمّرن س‑يسلمان ايلّيغ تروح تاناوت اكال. لّيغ فّوغن س‑واكال افن‑ين يات لعافيت ن‑ترگين، تّرسن فلّاس كرا ن‑يسلمان، ييلي‑وغروم. ءيساول‑د ياسوع ييني‑اسن: «اوياد‑د كرا زغ‑يسلمان‑ان تومژم.» يوورّي سيمعان بطرُس ءيكشم س‑تاناوت، ءيلدي شّبكت س‑واكال تعمّر س‑يسلمان مقّورنين. ءيلّا گيس ميّا د‑سمّوس ءيد‑مراو د‑كراض (153) ن‑وسلم. واخّا تعمّر س‑غونشكان، ءور‑تبّي شّبكت. ييني‑اسن‑د ياسوع: «اشكاد‑د ا‑تشّم.» ءور‑يزعم يان غ‑يمحضارن ا‑ت‑يسقسا ما‑يگا، اشكو سّنّ ءيزد سيديتسن ا‑يگا. ءينكر ياسوع ياسي اغروم ءيفك‑اسن‑ت، ءيفك‑اسن ءولا ءيسلمان. ختاد ا‑يگان تيس كراطّ‑توال ن‑يس‑د‑يبان ياسوع ءي‑يمحضارن‑نس تيغوردين ن‑ما‑د‑ينكر زغ‑لموت. لّيغ شّان، ءيساول‑د ياسوع س‑سيمعان بطرُس ييني‑اس: «وا‑سيمعان يوس ن‑يونا، ءيس‑ا‑يّي‑تّيريت ءوگُّار ن‑ما‑يّي‑تّيرين غويد؟» ءيرار‑اس بطرُس: «يياه ا‑سيدي، تسّنت ءيس‑داري‑تعزّات.» ييني‑اس‑د ياسوع: «كس ءيلقّاغن‑ينو.» ءيسقسا‑ت ياسوع تيس سنات‑توال: «وا‑سيمعان يوس ن‑يونا، ءيس‑ا‑يّي‑تّيريت؟» ءيرار‑اس بطرُس: «يياه ا‑سيدي، تسّنت ءيس‑داري‑تعزّات.» ييني‑اس‑د ياسوع: «گابل ءولّي‑نو.» ءيسقسا‑ت ياسوع تيس كراطّ‑توال: «وا‑سيمعان يوس ن‑يونا، ءيس‑دارك‑عزّاغ؟» طيّر ءيلمّا ءي‑بطرُس اشكو ءينّا‑ياس تيس كراطّ‑توال «ءيس‑دارك‑عزّاغ؟» ءيساول ييني‑اس: «ا‑سيدي، تسّنت كولّو ما‑يلّان. تسّنت ءيس‑داري‑تعزّات.» ييني‑اس‑د ياسوع: «كس ءولّي‑نو. لحقّ اياد، لحقّ ا‑راد‑اك‑ينيغ. غ‑تمژّيت‑نّك ار‑تّاگّست ءي‑يخف‑نّك تفتوت س‑ينّا تريت، والاينّي غ‑تووسّرت‑نّك را‑ن‑تمديت ءيفاسّن ءيبكيس‑اك يان ياضني ياسي‑ك س‑يلّي ءور‑تريت.» غمكاد ا‑س‑يملا ياسوع مامنك ا‑را‑تگ لموت ن‑بطرُس لّي‑س‑را‑يتمجّد ربّي. ءيزايد ياسوع ييني‑اس: «اشك‑يد كيّي، مون ديدي.» ءيگراول بطرُس تيغوردين‑نس ءيژر امحضار لّي‑يعزّان دار ياسوع، ءيگ غوالّي‑ن‑يسنّدن ف‑يدمارن ن‑ياسوع غ‑واسّ ن‑يمنسي ءيسقسا‑ت ف‑مانوا را‑ت‑يزّنز. لّيغ ءيژرا بطرُس امحضار‑ان يوشكا‑د ا‑د‑ديدسن‑يمون، ءيسقسا ياسوع فلّاس ييني: «ءيمّا غوان ا‑سيدي، ما‑راد‑اس‑يجرو؟» ييني‑اس ياسوع: «ءيغ‑ريغ ا‑سول‑يدّر ارد‑د‑وورّيغ ما‑گيس‑تريت كيّي؟ اشك‑يد مون ديدي.» زغ‑غاكودان ا‑يفّوغ لخبار غ‑دار ايتماتن، ار‑تّينين ءيس‑ور‑را‑يمّت‑ومحضار‑لّي. والاينّي ياسوع ءور‑ينّي «ءور‑را‑يمّت.» ءينّا «ءيغ‑ريغ ا‑سول‑يدّر ارد‑د‑وورّيغ ما‑گيس‑تريت كيّي؟» امحضار‑ان ا‑يفكان توگّا‑نس ف‑تغاوسيوين‑اد، يارا‑تنت غ‑وارّا‑ياد. نسّن ءيس‑أُغژانّت توگّا‑نس. كيگان د‑تغاوسيوين ياضني ءيسكر‑تنت ياسوع. ءيرواس‑يّي ءيغ‑تنت‑كولّو‑نورا يات س‑يات، ءور‑را‑تامو دّونيت كولّو ارّاتن‑ان. وا‑تاوفيلوس، ءوريغ‑اك‑ن غ‑وارّا‑نو امزوارو ف‑كولّو ما‑يسكر ياسوع ءولا ما‑يسّلماد زغ‑يسيزوار ار اسّ لّي‑غ‑يتيالال س‑يگنّا. والاينّي لّيغ ءور‑تا‑يتيالال ءيساول س‑ويلّي ءيستي اد‑گن ءيرقّاسن‑نس، يوصّا‑تن س‑تحكيمت ن‑رّوح لقودوس ف‑ما‑راد‑سكارن. يوشكا‑د دارسن تيغوردين لّموت‑نس، ار‑اسن‑يمالا س‑تميتار گّوتنين ءيس‑د‑ينكر ءيدّر. ار‑اسن‑يسّبايّان ءيخف‑نس كّوژ ءيد‑مراو ن‑واسّ، ار‑اسن‑يساوال ف‑تگلديت ن‑ربّي. لّيغ ديدسن ءيگاور ياسوع غ‑ووسّان‑ان ييني‑اسن: «اد‑ور‑تفّوغم تامدينت ن‑وروشاليم، والاينّي قلات س‑لباراكا لّي‑ف‑ينّا بابا ربّي راد‑اون‑تّ‑يفك، ساولغ‑اون فلّاس. ءيكّا‑تّين يوحانّا ار‑يسّدّام مدّن غ‑وامان، ءيمّا كونّي تيگيرا ن‑كرا ن‑ووسّان دروسنين، را‑تدّمّ س‑رّوح لقودوس.» غاكودان لّيغ ديدس مونّ سقسان‑ت: «وا‑سيديتنّغ، ءيس‑را‑دي‑ترارت تاگلديت ءي‑ايت‑ربّي غ‑ووسّان‑اد؟» ييني‑اسن: «بابا ربّي ا‑دار اوال ا‑يسكار ءوسّان د‑يزماز. ءور‑را‑تيسّانم كونّي ماناگو ا‑راد‑يلين، والاينّي را‑تعمّرم س‑تحكيمت ءيتجهّدن غاكود نّا‑د‑فلّاون‑يگّوز رّوح لقودوس. را‑فلّا‑تاكّام توگّا غ‑وروشاليم ءولا كولّو تامازيرت ن‑يودايا ءولا ساميرا ار تيميزار اگّوگنين ن‑دّونيت.» غير ءينّا‑ياسن ماياد س‑ا‑تي‑تمنادن ءيتيالال غ‑لگدّام‑نسن ايلّيغ‑تي‑تسّنتل يات‑تمدلوت. سول ا‑ن‑سّموقّولن غ‑يگنوان س‑يلّيس ءيفتا، س‑د‑فلّاسن‑بيدّن سين ءيرگازن س‑تملسا ملّولنين ءينين‑اسن: «وا‑يرگازن ايت‑جاليل، ماخ ايلّيغ تبيدّم غيد ار‑ن‑تسّموقّولم غ‑يگنوان؟ هاتي ياسوع لّي‑فلّاون‑يتيالالن س‑يگنّا، را‑د‑يوورّي غمكاد تي‑تژرام ءيفتا س‑يگنّا.» گّوزن ءيلمّا ءيرقّاسن زغ‑وورير لّي‑مي‑تّينين اورير ن‑زّيتون، وورّين س‑وروشاليم. ءور‑تاگّوگ غير س‑يان كيليميتر. لّيغ لكمن تامدينت غلين س‑وحانو ن‑وفلّا لّي‑غ‑ا‑تگاوارن. ءيلّا بطرُس د‑يوحانّا د‑ياعقوب د‑اندراوس د‑فيليبّوس د‑توما د‑بارتولاماوس د‑ماتّا د‑ياعقوب يوس ن‑حالفا د‑سيمعان اواطاني د‑ياهودا يوس ن‑ياعقوب. ار‑كولّو‑تمونون س‑يان‑وول اد‑تژالّان ار‑تضالابن ربّي، نتني د‑تمغارين‑نسن د‑ايتماس ن‑ياسوع د‑ينّاس ماريام. يان‑واسّ غ‑ووسّان‑ان ءينكر بطرُس غ‑وامّاس ن‑ايتماتن. ءيلّا غين ما‑يتگّان ميّا د‑سين ءيد‑مراو (120) ن‑يان. ييني‑اسن: «واي‑ايتما، ءيقّان‑د ا‑يافو مايلّي ءينّا رّوح لقودوس غ‑وارّاتن ن‑ربّي ف‑يمي ن‑وگلّيد داود، ءيساول ف‑ياهودا لّي‑يزوارن ءي‑ويلّي ءومژنين ياسوع. اشكو ياهودا ءيكّا‑تّين ءيگا زغ‑گينّغ، ياسي تاغامت‑نس غ‑تووري‑نّغ.» ءيسغا ياهودا يان‑يگر س‑تغراد لّي‑يومژ ف‑لباضل، ءيضر‑ن غ‑يگر‑نس ءيمّت، ءيفرسي‑واحليگ‑نس فّين‑د‑وادان‑نس غ‑واكال. سفلدن فلّاس كولّو ايت‑وروشاليم، ار‑تّينين ءي‑يگر‑ان س‑واوال‑نسن ‹حاكال‑داما›. تگا لمعنا‑نس ‹ءيگر ن‑يدامّن›. ءيزايد بطرُس ييني‑اسن: «ءيتيارا غ‑وارّا ن‑يموريگن ‹ا‑تخلو‑تگمّي‑نس. ا‑ور‑گيس‑يزدغ يان.› ءيتيارا‑داغ ‹ا‑يامژ يان ياضني تاغامت‑نس غ‑تووري.› ف‑مايان ا‑ف‑د‑يقّان ا‑نستي يان ياضني ا‑ديدنّغ‑ياكّا توگّا ف‑تنكرا ن‑سيديتنّغ ياسوع زغ‑لموت. ءيقّان‑د ا‑يگ يان زغ‑ويلّي ديدنّغ لّانين كولّو ءوسّان لّي‑غ‑ا‑نتمونو د‑سيديتنّغ ياسوع، زغ‑غاكود لّيغ ءيدّم غ‑وامان ف‑وفوس ن‑يوحانّا ار اسّ لّي‑غ‑فلّانّغ‑يتيالال.» اوين‑د سين ءيرگازن. يان ءيگا يوسف لّي‑مي‑تّينين بارسابا (تگا لكنيت‑نس يوسطوس)، د‑وايّاض ءيگا ماتّياس. ژّالّن ءيلمّا ءينين: «وا‑سيديتنّغ، تسّنت ءولاون ن‑كولّو مدّن. مل‑اغ غيلاد مانوا غ‑سين‑اد ا‑يگان غوالّي تستيت ا‑يامژ تاغامت غ‑تووري‑اد ءولا تارقّاست‑اد لّي‑زغ‑يضر ياهودا ا‑يدّو س‑يلّي‑اس‑يگان.» گرن‑د فلّاسن اسغار، ياشك‑يد‑وسغار غ‑ماتّياس. اوين‑ت ءيلمّا ا‑يگ ارقّاس غ‑گر يان د‑مراو. زرين‑ووسّان ايلّيغ‑د‑يروح لعيد ن‑وين سمّوس ءيد‑مراو. مونّ كولّوتن غ‑يات‑تگمّي. سفلدن ءيلمّا ءي‑يات تيجّيجت توشكا‑د زغ‑يگنوان تعمّر تيگمّي لّي‑غ‑گاورن زوند اضو ءيتجهّدن. ژرن كرا ءيرواس تيمزليوين لّعافيت، بضونت تتّرس يات ف‑كرايگاتّ يان گيسن. عمّرن كولّو س‑رّوح لقودوس، بدون ار‑ساوالن س‑يواليون ءيغريبن غمكلّي‑اسن‑تن‑يفكا رّوح لقودوس. غ‑ووسّان‑ان لّان ايت‑يودايا غ‑وروشاليم، ءوشكان‑د زغ‑كولّو تيميزار ن‑دّونيت، ار‑باهرا‑تّيرين اد‑ترضون ربّي. لّيغ سفلدن ءي‑تاقّورت، مونّ ف‑تگمّي ايلّيغ ءيگّوت ما‑يبيدّن غين. ءيضر‑اسن لعجب اشكو كرايگاتّ يان ار‑يسفليد ءي‑واوال ن‑دارس. ار‑باهرا‑تعجّابن ار‑سّمقسان ءي‑نگراتسن: «غويد كولّو ساوالنين، ءيس‑ورد ايت‑جاليل اد‑گان؟ مامنك ا‑دارسن‑نسفليد كود يان ءي‑واوال ن‑تمازيرت لّي‑غ‑يلول؟ هاتي كرا گينّغ يوشكا‑د زغ‑فارتيّا د‑كرا زغ‑ماديّا ءولا ءيلاميّا، اشكين‑د وييّاض زغ‑ماسوبوطاميا ءولا يودايا ءولا كابادوكيّا ءولا بونتوس ءولا اسيّا. اشكين‑د وييّاض ياضني زغ‑فريجيّا ءولا بامفيليّا ءولا ميصر ءولا تيسگيو ن‑ليبيّا غ‑تاما ن‑كوريني. كرا گينّغ يوشكا‑د زغ‑تمدينت ن‑روما، گن ايت‑يودايا ءولا ءيبرّانيين لّي‑ومژنين اغاراس ن‑ايت‑ربّي. ياشك‑يد كرا زغ‑يگزير ن‑كريت ءولا زغ‑تمازيرت ن‑واعرابن. والاينّي ار‑كولّو‑نسفليد ءي‑واوال ن‑دارنّغ، ار‑اغ‑ساوالن ف‑يسكّيرن مقّورنين ن‑ربّي.» ار‑تعجّابن مدّن‑ان كولّوتن، گامّين اد‑فهمن مايد ءيلّان، ار‑سّمقسان ءي‑نگراتسن: «ما‑تگا لمعنا ن‑ماياد؟» والاينّي كرا گيسن ار‑تطناژن غ‑يرقّاسن ار‑تّينين: «هان امان ن‑واضيل ءيكتين ايد سوان مدّن‑اد.» ءينكر بطرُس ءيبيدّ غ‑لگدّام‑نسن نتّا د‑وييّاض س‑يان د‑مراو، يالّ اوال‑نس ييني‑اسن: «وا‑يرگازن ايت‑يودايا ءولا كولّو ءيمزدغن ن‑وروشاليم، سفلدات‑يّي اد‑اون‑ينيغ ما‑يگا ماياد. مدّن‑اد ءور‑سوين امان ن‑واضيل ءيكتين غمكلّي تغالم. هاتي بحرا‑دي‑تلكم تاساعت تيس تژا ن‑صّباح. والاينّي مايد ءيجران غ‑دارنّغ ءيگا مايلّي‑ف‑يساول ربّي ف‑يمي ن‑نّابي يووّيل ءينّا: ‹غ‑ووسّان گُّرانين را‑ن‑زّوگزغ رّوح‑ينو ف‑كولّو مدّن. راد‑ساوالن تاروا‑نّون د‑يستيتون س‑يواليون لّي‑راد‑اسن‑اكّاغ. راد‑تيسفيون ءيعيّالن‑نّون ماد‑اسن‑مالاغ. راد‑توارگان ءيفقّيرن‑نّون س‑ماد‑اسن‑سّبايّانغ. هاتي غ‑ووسّان‑ان را‑ن‑زّوگزغ رّوح‑ينو ف‑يخدّامن‑ينو د‑تخدّامين‑ينو، راد‑ساوالن س‑يواليون لّي‑راد‑اسن‑مالاغ. راد‑سكارغ تيميتار غ‑تاتّويت ن‑يگنوان ءولا لمعجيزات ف‑يگّي ن‑واكال. راد‑يلين ءيدامّن د‑لعافيت د‑يمدلا ن‑واگّو ءيگّوتن. را‑تلّاس تافوكت ءيژگُّاغ‑وايّور زوند ءيدامّن، ءيروح‑د‑يلمّا‑واسّ ءيهيّان لّي‑غ‑را‑د‑ياشك سيديس ن‑بنادم س‑لمجد ءيگّوتن. د‑كولّو وانّا ءيزاوگن غ‑يسم‑نس، را‑ينجم.› «وا‑يرگازن ايت‑ربّي، سفلدات ءي‑ما‑راد‑اون‑ينيغ. ياسوع گو‑ناصيرا، تلّا گيس لباراكا ن‑ربّي، ءيسكر غ‑دارون لقوّات د‑لمعجيزات د‑تميتار تجهّدنين. كولّو ماياد، ءيملا‑ياون‑ت ربّي. ءيمّا كونّي تنغام‑ت لّيغ‑تي‑تدحيم س‑گر ءيفاسّن ن‑مدّن أُخشنّين ا‑ت‑اگُلن ف‑وگّجدي. ءيمّا ربّي، ءيسّن ماياد ءيقصاد‑ت ءور‑تا‑يجري، ءيسّنكر‑ت‑يد ءيلمّا ءيرژم‑اس زغ‑وژبّار لّموت، اشكو ءور‑تژضار لموت ا‑تي‑تامژ. غمكلّي فلّاس ءينّا داود: ‹ار‑بدّا‑تمنادغ سيدي غ‑لگدّام‑ينو، ييلي‑بدّا ديدي، ءور‑سار‑اسوسغ. ءيفرح‑وول‑ينو، ار‑ت‑يتالغ ءيلس‑ينو. واخّا تضعف دّات‑ينو، گيغ‑ن رّجا‑نو غ‑ربّي. ءور‑را‑يّي‑تفلت غ‑ودغار ن‑ويلّي مّوتنين، ءولا را‑تادجت امژلاي‑نّك ا‑يركم غ‑ومضّال. تمليت‑يّي‑د اغاراس ن‑تودرت. غ‑دارك ا‑غ‑را‑يّي‑تعمّرت س‑لفرح.› «واي‑ايتما، ژضارغ اد‑اون‑ساولغ س‑زّعامت ف‑باباتنّغ داود اشكو تسّنم ءيس‑يمّوت ءيتياومضال، ييلي‑ومضّال‑نس غ‑دارنّغ سول س‑غاسّاد. ءيمّا نتّان، نّابي ا‑يگا. ييسّان ءيس‑اس‑ينّا ربّي س‑واوال ءيزگان: ‹يان زغ‑تاروا ن‑تاروا‑نّك ا‑راد‑گغ د‑وگلّيد زوند كيّي.› ءيسّن داود ما‑را‑ييلي، ءيساول ف‑تنكرا لّماسيح ييني ءيس‑ور‑را‑ت‑يفل ربّي غ‑ودغار ن‑ويلّي مّوتنين، ءولا را‑تركم دّات‑نس غ‑ومضّال. «هاتي ياسوع ا‑د‑يسّنكر ربّي زغ‑گر ويلّي مّوتنين. نگا نكُّني كولّواغ ءيناگان ف‑مايان، نژرا‑ت. ءيتيالال ءيلمّا س‑وفاسي ن‑ربّي باباتنّغ، يامژ زغ‑دارس رّوح لقودوس لّي‑ف‑ينّا راد‑اغ‑ت‑يفك. ءيزّوگز‑ت‑يد فلّانّغ غيلاد غمكاد تژرام ار‑اس‑تسفليدم. اشكو داود، ءورد نتّان ا‑يتيالالن س‑يگنّا، والاينّي ءيساول ف‑وايّاض ءينّا: ‹ها‑سيدي ربّي ءينّا ءي‑سيدي، سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.› واي‑ايت‑ربّي كولّوكن، ءيقّان‑كُن‑د ا‑تيسّانم ماياد. ياسوع لّي‑تنغام ف‑وگّجدي، ءيگا‑ت ربّي د‑سيديس ن‑بنادم ءيگ‑ت د‑لماسيح‑نّغ.» لّيغ سفلدن مدّن ءي‑ماياد، ءيبّي غ‑تاسا‑نسن. ءينين ءي‑بطرُس د‑يرقّاسن ياضني: «واي‑ايتما، ما‑را‑نسكر؟» ءيساول بطرُس ييني‑اسن: «فلات كولّو ما‑تسكارم يُخشن، ءيدّم كود يان گيگون غ‑وامان س‑يسم ن‑ياسوع لماسيح، اد‑اون‑يصامح ربّي ف‑دّنوب‑نّون ءيفك‑اون لباراكا ن‑رّوح لقودوس. اشكو مايلّي ءينّا ربّي ف‑ما‑را‑يسكر ءيفولكي، ءينّا‑ياون‑ت كونّي ءولا تاروا‑نّون ءولا كولّو وييّاض اگّوگنين، ييني‑ت ءي‑كولّو ما‑مي‑د‑يغرا ربّي سيديتنّغ س‑دارس.» ءيزايد بطرُس ءيفك توگّا‑نس ءيزّعام‑تن س‑يواليون گّوتنين ييني‑اسن: «سكرات كولّو ف‑ا‑تنجمّ زغ‑لعقوبيت لّي‑را‑د‑يضر ف‑تاسوت‑اد يُخشنّ.» سّدّمن ءيلمّا كولّو ويلّي ءومنّين ءيواليون‑نس. غاسّان اد‑اسن‑يزوويد ربّي ما‑يتگّان كراض ءيد‑والف (3000) ن‑يان. ار‑كولّو‑تلهون س‑ولمّود ن‑يرقّاسن ءولا تامونت ن‑ينگراتسن ار‑تبّين اغروم ار‑تژالّان ءي‑ربّي. ار‑تغووضن مدّن كولّوتن، اشكو گّوتنت لمعجيزات د‑تميتار تجهّدنين لّي‑يسكار ربّي ف‑يفاسّن ن‑يرقّاسن. ءيمّا غويلّي ءومنّين س‑ياسوع ار‑كولّو‑تمونون ار‑اكّان ءي‑نگراتسن. ار‑زّنزان ايدا‑نسن د‑تغاوسيوين لّي‑طّافن، ار‑ت‑اطّون ف‑ويلّي گيسن حتاجّانين، كود يان د‑ونشك لّي‑ف‑يلكم. اسّ ف‑واسّ ار‑تمونون كولّوتن غ‑تگمّي ن‑ربّي، ار‑تبّين اغروم غ‑تگُمّا‑نسن ار‑شتّان ءي‑نگراتسن س‑نّييت د‑لفرح ءيگّوتن، ار‑تالغن ربّي. ءيمّا ايت‑تمدينت ار‑كولّو‑فلّاسن‑تّينين ءيس‑باهرا‑فولكين. كرايگاتّ اسّ ار‑اسن‑يتزاياد سيديتنّغ غويلّي نجمنين. يان‑واسّ غ‑ووسّان‑ان ءيدّا بطرُس د‑يوحانّا س‑تگمّي ن‑ربّي غ‑تاساعت ن‑تژالّيت، تگا تاساعت تيس كراطّ ن‑تدگُّات. ءيلّا غين يان‑ورگاز كوشمن‑اس ءيضارن زغ‑لّيغ ءيلول، ءيگاور غ‑تاما ن‑يمي ن‑تگمّي ن‑ربّي لّي‑مي‑تّينين ‹ءيمي ءيفولكين›. ار‑تي‑دي‑تاسين مدّن اسّ ف‑واسّ باش ا‑يتضالاب ءي‑ويلّي كشمنين س‑تگمّي ن‑ربّي. نتّا، لّيغ ءيژرا بطرُس د‑يوحانّا راد‑كشمن، ءيضالب‑تن اد‑اس‑فكن كرا. سّماقّلن گيس، ييني‑اس بطرُس: «مناد گينّغ.» ار‑گيسن‑يتمناد‑وكوشام، ءيغال ءيس‑راد‑اس‑فكن كرا. ييني‑اس بطرُس: «ءور‑داري نّوقرت ءولا ءورغ، والاينّي مايد داري ءيلّان، راد‑اك‑ت‑فكغ. س‑يسم ن‑ياسوع لماسيح گو‑ناصيرا، نكر تفتوت.» يامژ‑اس بطرُس غ‑وفوس افاسي ءيسّنكر‑ت‑يد. غاكودان وورّين دوسن ءيضارن‑نس د‑يغشفان‑نس، ياكُي ءيبيدّ ف‑يضارن‑نس ءيفتو. ءيكشم ديدسن س‑تگمّي ن‑ربّي ار‑يفتّو ار‑يتاكُي ار‑يتالغ ربّي. ژرن‑ت مدّن لّي‑لّانين غين ار‑يفتّو ار‑يتالغ ربّي. اكُزن‑ت ءيسّانّ ءيس‑يگا انضالاب لّي‑يتگاوارن غ‑دار ءيمي ءيفولكين. ءيضر‑اسن لعجب كولّوتن، گامّين اد‑فهمن ماد‑اس‑يجران. ژرن‑ت سول يومژ غ‑بطرُس د‑يوحانّا، ازّلن كولّو س‑يلّيغ لّان غ‑ولحني لّي‑مي‑تّينين ‹الحني ن‑سوليمان› ار‑باهرا‑تعجّابن. لّيغ‑تن‑يژرا بطرُس ييني‑اسن: «وا‑يرگازن ايت‑ربّي، ماخ ايلّيغ ا‑تّعجّابم غ‑ماياد؟ ماخ ا‑گينّغ‑تسّموقّولم؟ ءيس‑تغالم ءيزد س‑تحكيمت‑نّغ ءولا س‑وفولكي‑نّغ ا‑س‑نجّوجّي ارگاز‑اد ايلّيغ ا‑يفتّو ف‑يضارن‑نس؟ راد‑اون‑ينيغ، ربّي ن‑يبراهيم د‑يسحاق د‑ياعقوب، ربّي ن‑يمزوورا‑نّغ ءيسّبايّن‑د لمجد ن‑وخدّام‑نس ياسوع غاسّاد. تدحيم‑ت‑ين كونّي ءي‑لموت، ترگمّ‑ت غ‑لگدّام ن‑بيلاطوس واخّا ءيرا نتّان اد‑اس‑يرژم. تلوحم‑ن س‑ومژلاي ن‑ربّي لّي‑يعمّرن س‑وفولكي‑نس، تضالبم اد‑اون‑د‑يرژم ءي‑يان ءينقّان. تنغام غوالّي ياكّان تودرت، ءيمّا ربّي ءيسّنكر‑ت‑يد زغ‑لموت. نگا نكُّني ءيناگان ف‑مايان، نژرا‑ت. هاتي س‑يسم ن‑ياسوع ا‑س‑يوورّي ءيجّي غواد تژرام تيسّانم‑ت. اشكو ف‑سّيبت ن‑ما‑نومن س‑ياسوع ا‑ف‑يدوس غ‑لگدّام‑نّون كولّوكن. «ءيمّا غيلاد اي‑ايتما، سّنغ غايلّي تسكرم كونّي د‑ينمغورن‑نّون، تسكرم‑ت اشكو ءور‑تسّينم ما‑يگا. والاينّي غمكان ا‑س‑يسّووفا ربّي مايلّي ءينّا ف‑يمي لّانبيا كولّوتن، ءيملا‑ياسن مامنك ا‑د‑يقّان لماسيح ا‑يرفوفن. ماياد ا‑ف‑راد‑اون‑ينيغ، فلات كولّو ما‑تسكارم يُخشن، توورّيم‑د س‑ربّي ا‑فلّاون‑يسّيتّي دّنوب‑نّون، ءيفك‑اون ءوسّان لّباراكا زغ‑دارس، يازن‑اون‑د‑داغ ياسوع لّي‑يژلي ا‑يگ لماسيح‑نّون. اشكو ءيقّان‑ت‑يد ا‑يقاما غ‑يگنّا ارد‑د‑يروح‑وزمز لّي‑غ‑را‑يسكر ربّي كرايگاتّ كرا زغ‑لجديد، غمكلّي ءينّا ف‑يمي ن‑يمژلاين‑نس لانبيا ن‑زمان. اشكو ءينّا موسا: ‹ربّي سيديتون راد‑اون‑د‑يفك يان زغ‑ايتماتون ا‑يگ نّابي زوند نكّي. سفليدات س‑كولّو ماد‑اون‑يتّيني. وانّا ءور‑يسفلدن س‑واوال ن‑نّابي‑ان، سّيتّيات‑ت‑ين زغ‑ايت‑ربّي ا‑يتّهلك.› «هاتي ءوسّان‑اد ا‑ف‑ساولن كولّو لانبيا لّي‑دار اوال ن‑ربّي زغ‑صامويل ءولا كولّو ويلّي‑اس‑گُّرانين. اشكو كونّي ا‑را‑يطّاف مايلّي‑ف‑نّان لانبيا، توورتم لعهد لّي‑يسكر ربّي د‑يمزوورا‑نّغ. غمكلّي ءينّا ءي‑يبراهيم: ‹س‑تاروا‑نّك ا‑س‑راد‑باركغ كولّو مدّن ن‑دّونيت.› غمكاد ا‑س‑يژلي ربّي اخدّام‑نس ياسوع، يازن‑ت‑يد س‑دارون باش ا‑تزوورم كونّي ءيبارك‑كُن، ءيسّوورّي‑د كود يان گيگون زغ‑يغاراسن أُخشنّين لّي‑غ‑ا‑تّيدوم.» سول ا‑يساوال بطرُس د‑يوحانّا ءي‑مدّن‑ان، س‑د‑وشكان ءينمغورن ن‑تگمّي ن‑ربّي، ءيمون‑د ديدسن لقبطان ن‑يمخزنيين ن‑تگمّي ن‑ربّي ءولا كرا ن‑يصادّوقين. طيّر‑اسن باهرا ف‑يرقّاسن، اشكو ار‑تبرّاحن ءي‑مدّن ار‑اسن‑تّينين ءيس‑ژضارن اد‑د‑نكرن زغ‑لموت ف‑سّيبت ن‑ما‑د‑ينكر ياسوع. اشكين‑د امژن‑تن گن‑تن‑ين غ‑لحبس ا‑ن‑غين‑قامان ار صّباح اشكو ياغ‑وزال. ءيمّا غويلّي سفليدنين ءي‑واوال ن‑ربّي، ءيگّوت گيسن ما‑يومنّ غ‑تاساعت‑ان. ار‑تّيگاتن ءيمومنّ ايلّيغ ءيلّا ما‑يتگّان سمّوس ءيد‑والف (5000) ن‑يان. نديد ازكّا مونّ‑د ءيمغارن لّمحكاما غ‑وروشاليم، نتني د‑يمغارن ن‑تمازيرت د‑يمسلمدن ن‑شّرع. ييلي‑ديدسن‑ونمغور ءيهيّان ن‑تگمّي ن‑ربّي ءيسم‑نس حانّان، ييلي قايافا د‑يوحانّا د‑يسكاندر د‑وييّاض ن‑ايت‑ونمغور ن‑تگمّي ن‑ربّي. اوين‑د ءيرقّاسن سّبيدّن‑تن غ‑لگدّام‑نسن سقسان‑تن: «مان تاحكيمت ا‑س‑تسكرم غاياد؟ س‑يسم ن‑مي ا‑س‑تي‑تسكرم؟» ءيعمّر بطرُس س‑رّوح لقودوس ييني‑اسن: «وا‑يمغارن لّمحكاما د‑يمغارن ن‑تمازيرت، ءيغ‑اغ‑تسقسام غاسّاد ف‑وفولكي لّي‑يتياوسكارن ءي‑يان‑وكوشام ءولا ف‑مامنك ا‑س‑يجّي، ءيقّان‑كُن‑د ا‑تيسّانم ماياد كونّي ءولا كولّو ايت‑ربّي. ءيبيدّ‑ورگاز‑اد غ‑لگدّام‑نّون ءيجّي ءيدوس س‑تحكيمت لّي‑يلّان س‑يسم ن‑ياسوع لماسيح گو‑ناصيرا، ا‑ت‑يگان د‑والّي تنغام كونّي ف‑وگّجدي، ءيسّنكر‑ت‑يد ربّي زغ‑لموت. نتّان ا‑ف‑يتيارا غ‑وارّا ن‑ربّي: ‹اژرو لّي‑ن‑تلوحم كونّي ا‑يبنّاين، نتّان ا‑يوورّين ءيگا ءيخف ن‑وغژو.› ءور‑يژضار يان ا‑ينجم زغ‑لهالاك ابلا سرس نتّان، اشكو ءور‑يلّي غ‑دّو ءيگنوان كرا ن‑يسم ياضني ءيفكا‑ت ربّي ما‑س‑ا‑يتنجام بنادم.» لّيغ ژران مامنك ا‑يزعم بطرُس د‑يوحانّا ءيضر‑اسن لعجب، اشكو سّنّ ءيس‑گان غير زوند مدّن ياضني ءور‑باهرا‑غرين. فهمن غاكودان ءيس‑تّين‑كّان ار‑تمونون د‑ياسوع. والاينّي ءور‑دارسن ما‑تّينين اشكو ژران ارگاز لّي‑يجّين، ءيبيدّ ديدسن. سّوفغن‑تن ءيلمّا زغ‑وحانو لّمحكاما، سّمقسان ءي‑نگراتسن: «ما‑را‑نسكر ءي‑مدّن‑اد؟ هاتي كولّو ءيمزدغن ن‑وروشاليم سّنّ ءيس‑تّياوسكار يات لمعجيزت ءيمقّورن ف‑وفوس‑نسن. ءور‑نژضار ا‑نيني ءور‑تلّي. والاينّي ءيخصّا ا‑ور‑يزايد غاياد غ‑دار مدّن س‑وگُّار. را‑تن‑نسّيوود باش ا‑ور‑سول‑ساوالن ءي‑يان س‑يسم ن‑ياسوع.» غرن‑اسن ءيلمّا س‑دارسن ءينين‑اسن: «ا‑ور‑سول‑تساوالم ءولا‑دا‑تسّلمادم س‑يسم ن‑ياسوع.» ءيرار‑اسن بطرُس د‑يوحانّا: «ءينيات كونّي ما‑يفولكين غ‑دار ربّي، ءيزد ا‑نسكار س‑واوال‑نّون نغد س‑واوال ن‑ربّي؟ اشكو ءور‑نژضار ا‑نفسّا ف‑ما‑نژرا ءولا ما‑مي‑نسفلد.» زايدن ءيمغارن ار‑تن‑تهدّيدن، رژمن‑اسن ءيلمّا اشكو ءور‑وفين ما‑س‑ا‑فلّاسن‑تحكامن، د‑مدّن كولّوتن ار‑تالغن ربّي ف‑ما‑يجران. ارگاز لّي‑يجّين س‑لمعجيزت‑اد، ءيلّا دارس ءوگُّار ن‑كّوژ ءيد‑مراو ن‑وسگُّاس. لّيغ‑اسن‑رژمن يوورّي بطرُس د‑يوحانّا س‑دار مدّن‑نسن، ساولن‑اسن ف‑كولّو ماد‑اسن‑نّان ءينمغورن ن‑تگمّي ن‑ربّي د‑يمغارن ن‑تمازيرت. لّيغ‑اسن‑سفلدن ءيمومنّ، مشاشكان‑د كولّوتن الّن اوال‑نسن س‑ربّي ءينين: «وا‑سيدي ربّي ءيتجهّدن، تسكرت ءيگنوان د‑واكال د‑يمدوان ءولا كولّو ما‑گيسن‑يلّان. تساولت ف‑يمي ن‑وخدّام‑نّك باباتنّغ داود س‑تحكيمت ن‑رّوح لقودوس لّيغ ءينّا: ‹ماخ ايلّيغ هاجنت‑تميزار ن‑دّونيت؟ ماخ ايلّيغ‑د‑مشاشكان مدّن اد‑سكارن ف‑ما‑مي‑ور‑ژضارن؟ ءوشكان‑د ءيگلدان، مونّ‑د د‑ينمغورن ن‑دّونيت، باش اد‑مّاغن د‑سيدي ربّي ءولا لماسيح‑نس.› غمكان ا‑س‑د‑يمون هيرودوس د‑بيلاطوس گو‑بونطوس، نتني د‑يبرّانيين د‑ايت‑ربّي غ‑تمدينت‑اد، باش اد‑د‑مشاشكان ف‑وخدّام‑نّك امژلاي ياسوع لّي‑تگيت د‑لماسيح. سكرن كولّو ما‑تقصادت زغ‑يسيزوار س‑تحكيمت‑نّك ءيتجهّدن. ءيمّا غيلاد ا‑سيديتنّغ، ژر مامنك ا‑تّيرين اد‑اغ‑سّيويدن، تعاونت‑اغ نكُّني ن‑يخدّامن‑نّك ا‑نساوال س‑واوال‑نّك س‑زّعامت. مدي‑د افوس‑نّك ا‑تجّوجّيت، ار‑تسكارت لمعجيزات د‑تميتار تجهّدنين س‑يسم ن‑وخدّام‑نّك امژلاي ياسوع.» لّيغ كمّلن تاژالّيت‑اد، تمّاسّ‑تگمّي لّي‑غ‑لّان، عمّرن كولّوتن س‑رّوح لقودوس ار‑ساوالن س‑زّعامت س‑واوال ن‑ربّي. كولّو ءيمومنّ، يان اد‑گان غ‑ماد‑سوينگيمن ءولا ما‑س‑ا‑سّحسّون. ءور‑يلّي ما‑يتّينين تيغاوسيوين‑نس غير تينس اد‑گانت، والاينّي كود يان ار‑ياطّو اينّا دارس ءيلّان د‑وييّاض. س‑تحكيمت ءيگّوتن ا‑س‑اكّان ءيرقّاسن توگّا‑نسن ف‑تنكرا ن‑سيديتنّغ ياسوع، عمّرن كولّوتن س‑لباراكا ن‑ربّي. ءور‑يلّي يان غ‑ومناگّار ن‑يمومنّ ءيحتاجّا. اشكو غويلّي طّافنين ءيگران نغد تيگُمّا ار‑تن‑زّنزان، ار‑دي‑تاوين ما‑گيسن‑تامژن ار‑ت‑سراسن غ‑لگدّام ن‑يرقّاسن. ار‑ت‑اطّون نتني ف‑ويلّي گيسن حتاجّانين، كود يان د‑ونشك لّي‑ف‑يلكم. غمكان ا‑يسكر يوسف لّي‑مي‑تّينين بارنابا. لكنيت‑اد، فكان‑اس‑تّ ءيرقّاسن، تگا لمعنا‑نس ‹واد ءيزّعامن›. ءيگا نتّا زغ‑تقبيلت ن‑لاوي، ءيگ گو‑قوبروس. ءيزّنزا يان‑يگر‑نس، ياوي‑د ءيقاريدن لّي‑گيس‑يومژ ءيسرس‑تن غ‑لگدّام ن‑يرقّاسن. ءيلّا يان‑ورگاز ءيسم‑نس حانانيّا، نتّا د‑تمغارت‑نس سافّيرا. ءيزّنزا يان‑يگر، ءيحضو ءي‑يخف‑نس كرا زغ‑مايلّي گيس يومژ، ءيسرس ما‑يقامان غ‑لگدّام ن‑يرقّاسن. د‑تمغارت‑نس، ءيلّا كولّو مايان غ‑وگايّو‑نس. ءينكر بطرُس ييني‑اس: «وا‑حانانيّا، ماخ ايلّيغ تودجيت شيطان ا‑يكشم س‑وول‑نّك باش ا‑تسّكاركست ف‑رّوح لقودوس تحضوت كرا زغ‑مايلّي تومژت غ‑يگر‑نّك؟ لّيغ ءور‑تا‑ينزي وينّك ا‑يگا، ءيمّا لّيغ ءينزا هاتي مايلّي گيس تومژت ءيلّا سول غ‑وفوس‑نّك ا‑سرس‑تسكرت اينّا تريت. ماخ ايلّيغ تقصادت غاياد غ‑وول‑نّك؟ هاتي ءورد بنادم ا‑ف‑تسّكاركست، والاينّي تسّكاركست ف‑ربّي.» غير ءيسفلد حانانيّا ءي‑ماياد س‑يضر س‑واكال ءيمّت. غووضن كولّو ويلّي سفلدنين ءي‑ما‑يجران. نكرن ءيلمّا ءيعيّالن، لسن‑اس لكفن اسين‑ت مضلن‑ت‑ين. زرينت كراطّ تاساعين س‑دي‑تكشم‑تمغارت‑نس، ءور‑تسّين ما‑يجران. ءيسقسا‑تّ بطرُس: «ءيني‑يّي، ءيزد غونشكاد ا‑تومژم غ‑يگر‑نّون؟» تيني‑اس: «غونشكان ا‑يلّان.» ءيزايد بطرُس ييني‑اس: «ماخ ايلّيغ تسوانگمّ ا‑ستّي‑تزّريم ف‑رّوح ن‑ربّي؟ هاتنين غ‑يمي، غويلّي‑ن‑مضلنين ارگاز‑نّم. را‑كم‑اسين ءولا كمّي.» غاكودان ا‑تضر س‑واكال غ‑لگدّام‑نس تمّت. كشمن‑د ءيعيّالن افن‑تّ‑يد تمّوت، اسين‑تّ مضلن‑تّ‑ين غ‑تاما ن‑ورگاز‑نس. غووضن كولّو ايت‑ومناگّار باهرا، نتني ءولا كولّو وييّاض لّي‑سفلدنين ف‑ما‑يجران. ءيسكر ربّي لمعجيزات د‑تميتار گّوتنين ف‑يفاسّن ن‑يرقّاسن غ‑دار ايت‑تمدينت‑ان. ار‑ن‑تمونون ءيمومنّ كولّوتن غ‑ودغار لّي‑مي‑تّينين ‹الحني ن‑سوليمان›. واخّا دا‑تن‑تالغن كولّو مدّن، ءور‑يزعم يان ءور‑يگين امومن ا‑ديدسن‑يمون. والاينّي ار‑تّيگاتن ايت‑ومناگّار، ءيرگازن ءولا تيمغارين لّي‑ومنّين س‑سيديتنّغ. لّيغ ژران ايت‑تمدينت كولّو ماياد، ار‑د‑سّوفوغن ءيموضان‑نسن س‑تسواك، ار‑تن‑سراسن ف‑يبردان‑نسن ءولا ءيمجدان‑نسن، ار‑ترجون ا‑يزري بطرُس ءيضر‑د‑ومالو‑نس ف‑كرا گيسن. ءيگّوت ما‑د‑يتّاشكين زغ‑يدوران ن‑تسگيو ن‑وروشاليم، ار‑دي‑تاوين ءيموضان د‑يمجنان، ار‑كولّو‑تجّين. ءيمّا انمغور ن‑تگمّي ن‑ربّي د‑يمدّوكُّال‑نس كولّوتن لّمدهب ن‑يصادّوقين، طيّر‑اسن باهرا اشكو فرحن مدّن س‑يرقّاسن ءوگُّار‑نسن نتني. امژن‑تن غاكودان گن‑تن‑ين غ‑لحبس غ‑گر ويلّي فّوغنين لقانون. والاينّي غ‑يض‑ان يوشكا‑د يا‑لّمالاك ن‑سيدي ربّي، ءيرژم تيفلوين لّحبس ءيسّوفغ‑د ءيرقّاسن ييني‑اسن: «زايدات تبيدّم غ‑تگمّي ن‑ربّي، تساولم ءي‑مدّن ف‑كولّو ما‑يگان وين‑وغاراس ن‑تودرت‑اد لّجديد.» لّيغ‑د‑يغلي‑واسّ، سكرن ءيرقّاسن س‑واوال‑نس، كشمن س‑تگمّي ن‑ربّي ار‑سّلمادن مدّن. لّيغ ءينكر‑ونمغور ن‑تگمّي ن‑ربّي د‑يمدّوكُّال‑نس، سّمونّ‑د ءيمغارن لّمحكاما ن‑ايت‑ربّي كولّوتن، ازنّ س‑لحبس اد‑د‑اوين ءيرقّاسن س‑دارسن. والاينّي لّيغ كشمن ءيمخزنيين س‑لحبس ءور‑تن‑ين‑وفين، وورّين س‑لمحكاما ءينين‑اسن: «نوفا‑ن لحبس ءيقّن، رگلنت‑تفلوين‑نس، بيدّن ءينگابالن كولّوتن غ‑تاما ن‑يماون، والاينّي لّيغ‑تن‑نرژم ءور‑ن‑نوفي يان غ‑وگُنس.» لّيغ سفلدن ءينمغورن د‑لقبطان ن‑يمخزنيين ن‑تگمّي ن‑ربّي ءي‑ماد‑نّان، گامّين اد‑فهمن ما‑يجران. ار‑تّينين ءي‑نگراتسن: «ما‑را‑د‑يگُّرو ءي‑غاياد؟» غاكودان ءيكشم دارسن يان‑ورگاز ييني‑اسن: «هان غويلّي‑ن‑تگام غ‑لحبس، بيدّن غ‑تگمّي ن‑ربّي ار‑سّلمادن مدّن.» ءيفّوغ لقبطان د‑يمخزنيين‑نس غاكودان، اوين‑د ءيرقّاسن س‑دارسن، والاينّي ءور‑تن‑سّرفوفنّ اشكو كسوضن زغ‑ايت‑تمدينت ا‑گيسن‑برّمن س‑يژران. شّكشمن‑تن سّبيدّن‑تن‑ين غ‑لگدّام ن‑ايت‑لمحكاما. ءينكر‑ونمغور ن‑تگمّي ن‑ربّي غاكودان ييني‑اسن: «ءيس‑ور‑كُن‑نومر ا‑ور‑تسّلمادم س‑يسم‑ان؟ ءيمّا كونّي مايد تسكرم غيلاد؟ هاتي تعمّرم ءوروشاليم س‑ولمّود‑نّون، تيريم اد‑اغ‑تقلّدم س‑يدامّن ن‑ورگاز‑ان.» ءيساول بطرُس ءولا ءيرقّاسن ءينين: «ءيقّان‑اغ‑د ا‑نسكار س‑واوال ن‑ربّي ءوگُّار ن‑واوال ن‑بنادم. اشكو ربّي ن‑يمزوورا‑نّغ ءيسّنكر‑د ياسوع لّي‑تنغام ف‑وگّجدي. ءيسّاتّوي‑ت س‑وفاسيي‑نس باش ا‑يگ اگلّيد د‑ونجّام ءي‑ايت‑ربّي، ءيسكر‑اسن اغاراس ما‑س‑ا‑دي‑توورّين زغ‑كولّو ما‑يُخشنّ، ءيسّيتّي فلّاسن دّنوب‑نسن. كولّو ماياد، ار‑فلّاس‑ناكّا توگّا‑نّغ نكُّني ءولا رّوح لقودوس لّي‑د‑يوزن ربّي ءي‑ويلّي سكارنين س‑واوال‑نس.» لّيغ سفلدن ايت‑لمحكاما ءي‑ماياد، نكرن‑د گيسن ءيريين باهرا، ءيرين اد‑نغن ءيرقّاسن. والاينّي ءينكر يان گيسن غ‑وامّاس لّمحكاما، ءيسم‑نس گاماليال. ءيگا زغ‑لمدهب ن‑يفاريسين، ءيگ امسلمد ن‑شّرع، ار‑تي‑توقّارن مدّن كولّوتن. ييني‑اسن اد‑سّوفغن ءيرقّاسن يان ءيميكّ. ءيساول ءيلمّا د‑ايت‑لمحكاما ييني‑اسن: «وا‑يرگازن ايت‑ربّي، سوانگمات باهرا ءور‑تا‑تسكيرم كرا ءي‑مدّن‑اد. ا‑ور‑تتّوم توداس لّي‑د‑يوشكان ءيسگُّاسن‑اد زرينين، ءينّا ءيس‑يگا كرا ءيهيّان. ءيمون ديدس ما‑يتگّان كّوژ ءيد‑ميّا (400) ن‑ورگاز. والاينّي ءيتياونغا، اكوتن كولّو ويلّي ديدس لّانين، ءور‑يقاما يات غ‑ما‑يناول. تيگيرا‑نس يوشكا‑د ياهودا گو‑جاليل غ‑وزمز لّي‑غ‑حاسبن كولّو ايت‑تمازيرت، ياوي ديدس مدّن گّوتنين. ءولا نتّان ءيتياونغا، اكوتن غويلّي ديدس مونّين. ف‑مايان ا‑ف‑راد‑اون‑ينيغ، اد‑ور‑تژيم د‑مدّن‑اد. ادجات‑تن اد‑دّون. اشكو مايد ناولن ءولا مايد سكارن، ءيغ‑يگا وين بنادم را‑يضر. والاينّي ءيغ‑يگا وين ربّي، ءور‑را‑تيژضارم ا‑تن‑تنروم. هان ا‑ور‑ن‑تافم ءيخفاون‑نّون غ‑يسيگُّرا ءيس‑ا‑تّژيم د‑ربّي.» سكرن ءيلمّا س‑ماد‑اسن‑ينّا گاماليال، غرن‑د ءي‑يرقّاسن سّغورشن‑تن، امرن‑تن ا‑ور‑داغ‑ساوالن س‑يسم ن‑ياسوع، رژمن‑اسن. فّوغن ءيرقّاسن زغ‑لمحكاما، فرحن باهرا اشكو ءيگا‑تن ربّي د‑ويد‑ف‑يرضا ايلّيغ رفوفنّ ف‑يسم ن‑ياسوع. زايدن ءيلمّا اسّ ف‑واسّ ار‑سّلمادن غ‑تگمّي ن‑ربّي ءولا غ‑تگُمّا ن‑مدّن، ار‑تبرّاحن س‑لخبار ءيفولكين ن‑ياسوع، ار‑تّينين ءيزد نتّان ا‑يگان لماسيح ن‑ربّي. ار‑تّيگاتن ءيمحضارن غ‑ووسّان‑ان. ءيمّا غويلّي ساوالنين س‑واوال ن‑يبرّانيين ار‑تنگموگن ف‑ويلّي ساوالنين س‑واوال ن‑ايت‑يودايا ار‑تّينين: «ءور‑ا‑تامژنت‑تهجّالين‑نّغ تاغامت لّي‑تند‑د‑يوشكان غ‑لمعاونت ن‑كرايگاتّ اسّ.» نكرن ءيرقّاسن س‑سين د‑مراو، غرن‑د ءي‑يمحضارن كولّوتن س‑دارسن ءينين‑اسن: «ءور‑را‑يفولكي ا‑نفل تاووري ن‑واوال ن‑ربّي باش ا‑ناطّو ف‑لميادي. غير زايدات اي‑ايتما، تستيم زغ‑گيگون سّا ن‑مدّن نّا‑س‑تسّنم ءيس‑عمّرن س‑رّوح لقودوس ءولا تاحكيمت. را‑نفل تاووري‑اد غ‑وفوس‑نسن، نلهو نكُّني س‑تژالّيت د‑ولمّود ن‑واوال ن‑ربّي.» ءيعجب‑تن كولّوتن مايد نّان ءيرقّاسن. ستين ءيلمّا ستيفانوس (ءيگا نتّان ارگاز ءيعمّرن س‑ليمان ءولا رّوح لقودوس). ستين ءولا فيليبّوس د‑بروخوروس د‑نيكانور د‑تيمون د‑بارميناس د‑نيقولاوس (ءيگا نتّان ابرّاني گو‑انطاكيّا يومژ اغاراس ن‑ايت‑ربّي). اوين‑تن‑د س‑دار ءيرقّاسن. ژّالّن نتني ضالبن ربّي، سرسن فلّاسن ءيفاسّن‑نسن ا‑تن‑ژلين ءي‑تووري‑ان. ءيگّوت ما‑يسفليدن س‑واوال ن‑ربّي غ‑ووسّان‑ان، ار‑باهرا‑تّيگاتن ءيمحضارن غ‑وروشاليم. كيگان د‑ينمغورن ن‑تگمّي ن‑ربّي ا‑يومژن اغاراس لّماسيح ءولا نتني. ءيعمّر ستيفانوس س‑لباراكا ن‑ربّي د‑تحكيمت ءيتجهّدن، ار‑يسكار لمعجيزات د‑تميتار مقّورنين غ‑دار ايت‑تمدينت. والاينّي نكرن سرس كرا ن‑مدّن زغ‑تگمّي ن‑تژالّيت لّي‑مي‑تّينين ‹تيگمّي ن‑يسمگان لّي‑تياورژامنين›، گن ايت‑يودايا زغ‑تمدينين ن‑كوريني د‑يسكانداريّا د‑وييّاض زغ‑تميزار ن‑كيليكيّا د‑اسيّا، ار‑تمجاحادن د‑ستيفانوس. ءيمّا نتّان ار‑ديدسن‑يساوال س‑تحكيمت ءيگّوتن غمكلّي‑اس‑يمالا رّوح لقودوس، ايلّيغ ءور‑ژضارن ا‑ت‑نرون س‑يواليون. غاكودان سكرن د‑كرا ن‑يرگازن غ‑تنتلا اد‑د‑اشكين ءينين «نسفلد‑اس ار‑يرگّم غ‑شّرع ن‑موسا ءولا ربّي.» سّهيّسن ايت‑تمدينت د‑يمغارن ن‑تمازيرت د‑يمسلمدن ن‑شّرع، ايلّيغ ءومژن ستيفانوس اوين‑ت س‑لمحكاما. شّكشمن كرا ن‑مدّن ا‑فلّاس‑اكّان توگّا ن‑تكركاس ار‑تّينين: «غواد ار‑بدّا‑يرگّم غ‑تگمّي تامژلايت ن‑ربّي ءولا شّرع ن‑موسا. نسفلد‑اس ءيبدر غوالّي مي تّينين ياسوع گو‑ناصيرا، ييني فلّاس را‑يخلو تيگمّي ن‑ربّي ءيسّنگارا‑ياغ د‑يغاراسن لّي‑اغ‑د‑يفل موسا.» ءيمّا ستيفانوس، ار‑گيس‑سّموقّولن كولّو ويلّي گاورنين غ‑وحانو لّمحكاما، ژرن ءودم‑نس ءيرواس ءودم لّمالاك. ءيساول‑ونمغور ن‑تگمّي ن‑ربّي س‑ستيفانوس ءيسقسا‑ت: «ءيس‑يُغژان غايد فلّاك تّينين مدّن‑اد؟» ءيساول ستيفانوس ييني‑اسن كولّوتن: «واي‑ايتما د‑يد‑خالي، سفلدات‑يّي. ءيبان‑د ربّي لّمجد ءي‑باباتنّغ ءيبراهيم غ‑تمازيرت ن‑ماسوبوطاميا، ءور‑تا‑يدّي ا‑يزدغ غ‑تمدينت ن‑حاران. ييني‑اس: ‹فل ايت‑دارك د‑تمازيرت‑نّك، تدّوت س‑تمازيرت لّي‑راد‑اك‑ملغ.› ءيفّوغ ءيلمّا تامازيرت‑نس ن‑ايت‑كالدان ءيدّو ءيزدغ غ‑حاران. لّيغ ءيمّوت باباس، ياوي‑ت‑يد ربّي س‑تمازيرت‑اد لّي‑غ‑تزدغم غيلاد. والاينّي ءور‑اس‑گيس‑يفكي كرا ن‑ودغار ا‑يگ وينس غ‑ووسّان‑ان. كرا ن‑ووزون ءيمژّين ءور‑اس‑ت‑يفكي. والاينّي ءينّا‑ياس ربّي: ‹راد‑اك‑تّ‑فكغ غ‑مايد‑د‑يفتان، ا‑تگ تينّك كيّي د‑تاروا‑نّك.› غمكان اد‑اس‑ينّا واخّا ءور‑تا‑دارس‑يلول كرا ن‑وارّاو. ءيساول‑داغ ربّي ييني‑اس: ‹تاروا‑نّك راد‑گن ءيغريبن غ‑يات‑تمازيرت ياگّوگن. كّوژ ءيد‑ميّا ن‑وسگُّاس ا‑راد‑گن ءيسمگان ار‑ترفوفونّ غين. والاينّي راد‑وتغ لحوكم ف‑تمازيرت لّي‑تن‑يرورن اد‑گن ءيسمگان. تيگيرا ن‑ووسّان‑ان راد‑فّوغن زغ‑غين، اشكين‑د ار‑يّي‑تعبادن غ‑تمازيرت‑اد.› ءيفك ءيلمّا ربّي ءي‑يبراهيم تاماتارت لّعهد لّي‑يسكر غ‑گراس ديدس، تگا تاژالّيت ن‑يحشماي‑نس. غاكودان ءيژّولّا ءيبراهيم ءي‑يوس ءيسحاق غ‑ويس تام‑ووسّان. ءيژّالّ ءيسحاق ءي‑يوس ياعقوب، ءيژّالّ ياعقوب ءي‑تاروا‑نس س‑سين د‑مراو، ا‑تن‑يگان د‑يد‑باباتنّغ نكُّني ن‑ايت‑ربّي. «والاينّي ءيد‑باباتنّغ ءوسين تانوّاشت ف‑گماتسن يوسف، زّنزن‑ت ا‑يگ ءيسمگ غ‑تمازيرت ن‑ميصر. ءيمّا نتّان، ءيلّا ديدس ربّي ءيفوكّو‑ت زغ‑كولّو تاسّاسين‑نس. لّيغ ءيبيدّ يوسف غ‑لگدّام ن‑فيرعاون اگلّيد ن‑ميصر، ءيفك‑اس ربّي تاحكيمت ءيگّوتن، ايلّيغ فلّاس ءيرضا‑وگلّيد، ءيفل غ‑دّو‑وفوس‑نس تامازيرت ن‑ميصر ءولا كولّو تيگمّي‑نس. والاينّي غ‑ووسّان‑ان ءيلّا‑وغني غ‑ميصر كولّوتّ ءولا غ‑تمازيرت‑اد ن‑كانعان، ار‑باهرا‑تاضنّ مدّن. ءور‑ژضارن ءيد‑باباتنّغ اد‑افن ماد‑شتّان. ءيسفلد ياعقوب ءيس‑يلّا ءيمندي غ‑ميصر، يازن ءيد‑باباتنّغ اد‑دّون س‑غين تاوالا تامزواروت. دّون ءيلمّا تيس سنات‑توال س‑اسن‑يملا يوسف ءيزد گماتسن ا‑يگا، يوورّي فيرعاون ءيسّن ايت‑دارس ن‑يوسف. يازن يوسف س‑باباس ياعقوب د‑مدّن‑نس كولّوتن، ءيضالب‑تن ا‑د‑دارس‑اشكين. سّا ن‑يد‑مراو د‑سمّوس (75) ن‑يان اد‑گان. ءيدّو ياعقوب س‑ميصر، ءيمّت غين نتّان د‑يد‑باباتنّغ. اوين‑تن‑د ءيلمّا س‑تمدينت ن‑شاكيم، مضلن‑تن غ‑ومضّال لّي‑ستّين ءيكّا ءيبراهيم ءيسغا‑ت س‑نّوقرت دار ايت‑حامور. «زرين ءيسگُّاسن، ار‑تّيگاتن مدّن‑نّغ غ‑ميصر باهرا. ياكمور‑د‑وزمز لّي‑غ‑را‑يسّافو ربّي اوال لّي‑س‑ينّا ءي‑يبراهيم. ءينكر يان‑وگلّيد ياضني ءيحكام ميصر، ءور‑يسّين يوسف. ار‑تّ‑يزّراي ف‑يمزوورا‑نّغ ار‑ديدسن‑يتشقو. يامر‑تن اد‑سّوفوغن تاروا نّا‑ياسن‑لولنين، فلن‑تن‑ين اد‑مّتن غ‑لخلا. غ‑ووسّان‑ان ا‑يلول موسا، ءيگا احشمي باهرا ءيشوان. ربّان‑ت ايت‑دارس كراض‑ييرن غ‑تگمّي، سّوفغن‑ت ءيلمّا فلن‑ت‑ين. والاينّي توفا‑ت ءيلّيس ن‑فيرعاون، تاسي‑ت تگ‑ت د‑يوس تربّا‑ت. ار‑ياقرا موسا كولّو تاواسّنا ن‑ايت‑ميصر، يوورّي ءيگ ارگاز ءيتجهّدن غ‑يواليون‑نس د‑يسكّيرن‑نس. «لّيغ ءيرگل كّوژ ءيد‑مراو ن‑وسگُّاس، ءيضر‑د غ‑يخف‑نس ا‑يدّو ءيژر ايتماس، ا‑تن‑يگان د‑ايت‑ربّي. ءيژر يان گيسن، ار‑ت‑يسّرفوفون يان گو‑ميصر. ءيفتو موسا ا‑ت‑يعاون ءيرار ءي‑گو‑ميصر ف‑ما‑يسكر. يوت‑ت غاكودان ءينغ‑ت. ييني موسا د‑يخف‑نس: ‹راد‑يسّانّ ايتما‑ياد ءيس‑يرا ربّي ا‑تن‑يفوكّو ف‑وفوس‑ينو،› والاينّي ءور‑ا‑سوينگيمن نتني غمكان. نديد ازكّا س‑يژرا موسا سين ءيرگازن ن‑ايت‑ربّي مّاغن ءي‑نگراتسن، ءيفتو دارسن ييري ا‑تن‑يسّنگادّا. ييني‑اسن: ‹وا‑يرگازن ژرات، هاتي ايتماتن ا‑تگام. ماخ ايلّيغ تمّاغم ءي‑نگراتون؟› والاينّي غوالّي ءيسّرفوفنّ وايّاض ءينفر موسا ييني‑اس: ‹ما‑ك‑يگان د‑ومغار ءولا لحاكم فلّانّغ؟ ءيس‑تريت ا‑يّي‑تنغت غمكلّي تنغيت گو‑ميصر ءيضگام؟› لّيغ ءيسفلد موسا ءي‑ماياد ءيروول، ءيفّوغ ميصر ءيدّو ءيگاور غ‑تمازيرت ن‑ماديان. لالن‑ين دارس سين تاروا غين. «زرين كّوژ ءيد‑مراو ن‑وسگُّاس، ءيبان‑اس‑د ءيلمّا يا‑لّمالاك س‑تمزيولت لّعافيت غ‑يات‑تزگُّارت تلّا غ‑لخلا غ‑تسگا ن‑ودرار ن‑سينا. موسا، ءيضر‑اس لعجب غ‑ما‑يتمناد، ياكمور‑ن سرس ا‑ستّ‑يسّماقّل. غاكودان ا‑يسفلد ءي‑واوال ن‑سيدي ربّي ييني‑اس‑د: ‹نكّي ا‑يگان ربّي ن‑يمزوورا‑نّك، ربّي ن‑يبراهيم د‑يسحاق د‑ياعقوب.› ييكساض موسا ار‑يترگيگيي باهرا، ءور‑يژضار ا‑يالّ الّن‑نس. ءيساول‑داغ سيدي ربّي ييني‑اس: ‹كّيس تورژيّين‑نّك. هان غين غ‑تبيدّت ءيگا اكال ءيتياوژلاين ءي‑ربّي‑نّك. هاتي ژريغ منشك اد‑ترفوفونّ مدّن‑ينو غ‑ميصر، سفلدغ ءي‑يسمومُّين‑نسن، گّوزغ‑د ا‑تن‑فوكّوغ. ءيمّا غيلاد نكر، را‑ك‑ازنغ س‑ميصر.› «موسا، نتّان ا‑ن‑لوحن ايت‑ربّي ءينين‑اس: ‹ما‑ك‑يگان د‑ومغار ءولا لحاكم فلّانّغ؟› ءيمّا ربّي يوزن‑ت‑يد اد‑اسن‑يگ امغار د‑ونجّام لّيغ‑اس‑د‑يبان لمالاك غ‑تزگُّارت. غاكودان ءيسّوفغ‑تن‑د زغ‑غين، ءيسكر لمعجيزات د‑تميتار تجهّدنين غ‑ميصر ءولا غ‑دار‑ومدا اژگُّاغ ءولا كّوژ ءيد‑مراو ن‑وسگُّاس غ‑لخلا. موسا، نتّان ا‑ينّان ءي‑ايت‑ربّي: ‹راد‑اون‑يفك ربّي يان زغ‑ايتماتون ا‑يگ نّابي زوند نكّي.› «ءيلّا موسا غ‑ومناگّار ن‑ايت‑ربّي غ‑لخلا، ييلي د‑يمزوورا‑نّغ، ييلي د‑لمالاك لّي‑سرس‑يساولن غ‑ودرار ن‑سينا. نتّان ا‑مي‑د‑يملا ربّي ءيواليون دّرنين اد‑اغ‑تن‑د‑يسّلكم نكُّني. والاينّي اگُين ءيمزوورا‑نّغ اد‑سرس‑سفلدن. نفرن‑ت ءيرين اد‑وورّين س‑ميصر. ءينين ءي‑هارون: ‹سكر‑اغ كرا ن‑يلاهات ما‑ياغ‑يزگّورون، اشكو موسا لّي‑اغ‑د‑يسّوفغن زغ‑ميصر، ءور‑نسّين ماد‑اس‑يجران.› سكرن يا‑لاصنام زوند ءيگيز غ‑ووسّان‑ان، ار‑ن‑سراسن تيغرسيو غ‑لگدّام‑نس، سكرن لفيشتا فرحن س‑غايلّي سّنگادّان س‑يفاسّن‑نسن. يوورّي فلّاسن ربّي غاكودان، ءيفل‑تن اد‑تعبادن ءيتران ن‑يگنوان، غمكلّي ءينّا غ‑وارّا لّانبيا ءيسقسا‑تن: ‹واي‑ايت‑ربّي، ءيزد نكّي ا‑مي‑ن‑تسّاكمورم تيغرسيو د‑توافكيو كّوژ ءيد‑مراو ن‑وسگُّاس غ‑لخلا؟ هان اخيّام ن‑مولوخ ا‑توسيم، د‑يتري ن‑يلاه رافان. ار‑تّعبادم لاصنام لّي‑تسكرم. ف‑غايان ا‑ف‑را‑كُن‑سّيتّيغ س‑توگّوگت ن‑بابيل.› «غ‑ووسّان لّي‑غ‑لّان ءيمزوورا‑نّغ غ‑لخلا ار‑ديدسن‑تاوين اخيّام لّي‑غ‑لّانت‑تميتار ن‑يس‑ديدسن‑يلّا ربّي. ءيتياوسكار‑وخيّام‑ان غمكلّي‑س‑ينّا ربّي ءي‑موسا زوند مايلّي‑اس‑يملا. فلن‑د ءيلمّا اخيّام‑ان دار ويلّي‑اسن‑گُّرانين، اسين‑ت‑يد نتني لّيغ‑د‑كشمن د‑ياشوع س‑تميزار ن‑مدّن لّي‑يسّوفغ ربّي غ‑لگدّام‑نسن. ءيقاما دارنّغ ار ءوسّان ن‑وگلّيد داود. نتّان، ءيرضا فلّاس ربّي. ءيضالب‑ت داود ا‑ت‑يادج ا‑يسكر يات‑تگمّي ا‑گيس‑يزدغ ربّي لّي‑د‑يسّبايّنّ ءيخف‑نس ءي‑باباتنّغ ياعقوب. والاينّي سوليمان اد‑اس‑سول‑يبنان تيگمّي‑ان. ءيمّا ربّي اماتّوي ءور‑ا‑يزدّغ غ‑تگُمّا تياوسكارنين س‑يفاسّن ن‑بنادم. غمكلّي‑س‑ينّا ف‑يمي ن‑نّابي: ‹ءيگنّا ءيگا لعرش‑ينو، ءيگ‑واكال اژرو لّي‑ف‑ا‑ن‑سراسغ ءيضارن‑ينو. غمكاد ا‑ينّا سيدي ربّي: مان تيگمّي ا‑راد‑يّي‑تبنوم؟ مان تاحانوت ا‑غ‑راد‑سونفوغ؟ ءيس‑ورد نكّي ا‑يسكرن كولّو مايد ءيلّان؟› » ءيزايد ستيفانوس ييني‑اسن: «ماتّا غمكاد قّورن ءيخفاون‑نّون، زوند ءيغ‑ور‑تسّينم ربّي ءولا تسفلدم ءي‑واوال‑نس. تاگُيم‑بدّا ما‑يرا رّوح لقودوس زوند ءيمزوورا‑نّون. ءيس‑يلّا كرا ن‑نّابي ءور‑يرفوفنّ ف‑يفاسّن ن‑يمزوورا‑نّون؟ نتني نغان ءولا غويلّي‑د‑يوينين لخبار ن‑يس‑را‑د‑ياشك يان ءيعمّرن س‑وفولكي ن‑ربّي. ءيمّا غيلاد غ‑د‑يوشكا، تزّنزام‑ت تنغم‑ت كونّي لّي‑مي‑يفكا ربّي شّرع ف‑وفوس لّمالايكا، والاينّي ءور‑جّو‑سرس‑تسكيرم.» لّيغ سفلدن ايت‑لمحكاما ءي‑ماياد، نكرن‑د گيسن ءيريين باهرا، ار‑تگژاژن ءوخسان‑نسن. ءيمّا ستيفانوس ءيعمّر س‑رّوح لقودوس، ار‑ن‑يسّموقّول غ‑يگنوان ءيژر‑ن لمجد ن‑ربّي، ءيژر‑ن ياسوع ءيبيدّ ف‑وفاسي ن‑ربّي. ييني: «هاتي ژريغ‑ن ءيگنوان رژمن، ژرغ يوس ن‑بنادم ءيبيدّ ف‑وفاسي ن‑ربّي.» قّنّ ءيمزگان‑نسن ار‑تغوّاتن س‑جّهد، ازّلن سرس كولّوتن. دحين‑ت س‑برّا ن‑تمدينت ار‑ت‑كّاتن س‑يژران. كّيسن ءيناگان ءيسلهامن‑نسن، سرسن‑تن‑ين غ‑دار ءيضارن ن‑يان‑وعيّال ءيسم‑نس شاول. زايدن ار‑سول‑كّاتن غ‑ستيفانوس س‑يژران. ءيمّا ستيفانوس ءيغرا ءي‑سيديتنّغ ييني: «وا‑سيدي ياسوع، قبل رّوح‑ينو.» ءيضر ف‑يفادّن‑نس س‑واكال، يوت س‑يات‑تغويّيت ييني: «وا‑سيدي، ا‑ور‑فلّاسن‑تحاسبت لخُشانت‑اد.» غير ءينّا اوال‑اد ءيمّت. ءيمّا شاول ءيفرح لّيغ نغان ستيفانوس. زغ‑واسّ‑ان ا‑تزراي‑ترفوفنت ءيشقان ف‑ومناگّار ن‑ايتماتن غ‑وروشاليم، اكوتن كولّو غ‑تسگيو ن‑يودايا ءولا ساميرا. غير ءيرقّاسن ا‑يقامان. ءيمّا ستيفانوس، مضلن‑ت كرا ن‑مدّن لّي‑توقّارنين ربّي، تاغ‑تن‑تگوضي‑نس باهرا. ءيمّا شاول ءيگا‑ن تيقّي‑نس ا‑يهلك امناگّار كولّوت. ار‑يكشّم س‑تگُمّا يات س‑يات، ار‑د‑يزوكور ءيرگازن ءولا تيمغارين ار‑تن‑ين‑يتلوح غ‑لحبس. ءيمّا غويلّي اكوتنين، ار‑تكّان كرايگاتّ ماني ار‑تبرّاحن س‑واوال ن‑ربّي. ءيدّو فيليبّوس س‑يات‑تمدينت غ‑ساميرا، ار‑يتبرّاح ف‑لماسيح. گّوتن مدّن ن‑غين، لّيغ سفلدن ءي‑ما‑يتّيني فيليبّوس ژرن تيميتار تجهّدنين لّي‑يسكار، اوين‑تّ كولّو غ‑واوال‑نس. مدّن گّوتنين، فّوغن زگيسن لجنون أُخشنّين س‑تغويّا تجهّدنين، جّين كيگان د‑يكوشامن د‑يبيضارن. فرحن ايت‑تمدينت‑ان باهرا. ييلي يان‑ورگاز غ‑تمدينت‑ان ءيسم‑نس سيمعون، ار‑يسكار سّيحر ار‑گيس‑تعجّابن ايت‑ساميرا. ار‑اسن‑يتّيني ءيزد واد ءيمقّورن ا‑يگا. ار‑تّ‑گيس‑تاوين مدّن كولّوتن، ءودماون مقّورنين ءولا وييّاض، ار‑تّينين: «ارگاز‑اد تلّا‑گيس‑تحكيمت ن‑ربّي لّي‑مي ءيسم‑نس ‹امقّور›.» ار‑سرس‑سفليدن اشكو كيگان اد‑زّرين ار‑تعجّابن غ‑سّيحر لّي‑يسكار. والاينّي لّيغ سفلدن ءي‑ما‑ينّا فيليبّوس ف‑لخبار ءيفولكين ن‑تگلديت ن‑ربّي ءولا ف‑يسم ن‑ياسوع لماسيح، امنّ اوال‑نس. ءيسّدّم‑تن غ‑وامان، ءيرگازن ءولا تيمغارين. يامن سيمعون ءولا نتّان، ءيسّدّم‑ت فيليبّوس غ‑وامان. ءيزايد ار‑يتمونو د‑فيليبّوس، ار‑يتعجّاب غ‑لقوّات د‑تميتار مقّورنين لّي‑دارس‑يژرّا. سفلدن ءيرقّاسن غ‑وروشاليم ف‑ايت‑ساميرا ءيس‑قبلن اوال ن‑ربّي، ازنّ بطرُس د‑يوحانّا س‑دارسن. لّيغ‑ن‑لكمن، ژّالّن ضالبن زغ‑ربّي ا‑د‑يفك رّوح لقودوس ءي‑ويلّي ءومنّين. اشكو غاكودان ءور‑تا‑د‑فلّاسن‑يگّوز رّوح لقودوس. غير دّمن نتني غ‑وامان س‑يسم ن‑سيديتنّغ ياسوع. سرسن فلّاسن ءيرقّاسن ءيفاسّن‑نسن س‑تن‑يكشم رّوح لقودوس. غير ءيژرا سيمعون ءيس‑د‑يوشكا رّوح لقودوس لّيغ فلّاسن سرسن ءيرقّاسن ءيفاسّن‑نسن، ياوي‑د ءيقاريدن ييني‑اسن: «فكات‑يّي ءولا نكّي تاژضّارت‑اد، باش ا‑يكشم رّوح لقودوس س‑وانّا‑ف‑سرسغ ءيفاسّن‑ينو.» ءيرار‑اس بطرُس: «ا‑تّهلكت كيّي ءولا نّوقرت‑نّك، اشكو تغالت ءيزد س‑يقاريدن ا‑س‑تلّا‑توافكا ن‑ربّي. ءور‑دارك تاغامت غ‑تووري‑اد ءولا را‑گيس‑تكشمت، اشكو ءور‑يغوس‑وول‑نّك غ‑يژري ن‑ربّي. فل لخُشانت‑ان تناولت، تضالبت ربّي اد‑اك‑يصامح ف‑غاين تنوّات غ‑وول‑نّك. اشكو ژريغ ءيس‑تعمّرت س‑واسمّوم، تياسّاست س‑يسكراف ن‑دّنوب.» ييني‑اسن سيمعون: «ضالبات ربّي ف‑سّيبت‑ينو، ا‑ور‑يّي‑ييلي كرا غ‑غايد فلّا تنّام.» ءيزايد بطرُس د‑يوحانّا فكن توگّا‑نسن ساولن ءي‑مدّن‑ان س‑واوال ن‑سيديتنّغ. وورّين ءيلمّا س‑وروشاليم. لّيغ فتان غ‑وغاراس ار‑تبرّاحن س‑لخبار ءيفولكين غ‑يدوران گّوتنين ن‑ساميرا. ءيمّا فيليبّوس، ءينّا‑ياس‑د يا‑لّمالاك ن‑سيدي ربّي: «نكر تدّوت س‑تسگا لّجانوب س‑وغاراس لّي‑يتاوين زغ‑وروشاليم س‑تمدينت ن‑غازّا.» اغاراس‑ان ءيلّا غ‑لخلا. ءينكر فيليبّوس ءيدّو. ءيمناگّار يان‑ورگاز، ءيگا گو‑حاباش ءيگ لوازير ن‑صّندوق غ‑دار كانداكا تاگلّيتّ ن‑حاباش. يوشكا‑د غ‑ووسّان‑ان س‑وروشاليم ا‑گيس‑يتعباد ربّي، يامژ اغاراس‑ان ءيلمّا باش ا‑يوورّي س‑تمازيرت‑نس. غاسّان ءيسّودا غ‑لكورّيصا‑نس ار‑ياقرا غ‑وارّا ن‑نّابي ءيشاعيا. غاكودان فيليبّوس، ءينّا‑ياس رّوح لقودوس: «فتو‑ن دار بو‑لكورّيصا‑يان، تمونت ديدس.» يازّل فيليبّوس س‑دارس، ءيسفلد‑اس ار‑ياقرا غ‑وارّا ن‑نّابي ءيشاعيا. ءيسقسا‑ت فيليبّوس: «ءيس‑تسّنت لمعنا ن‑مايد تاقرات؟» ييني‑اس لوازير: «مامنك ا‑س‑راد‑يسّانغ لمعنا‑نس ءيغ‑ور‑داري ماد‑يّي‑ستّ‑يمالان؟» ءيضالب‑ت ءيلمّا ا‑يغلي ءيسّودو ديدس غ‑لكورّيصا. اگزّوم لّي‑ياقرا غ‑وارّا ن‑ربّي ءيگا غمكاد: «زوند ءيزيمّر لّي‑لدين اد‑اس‑غرسن، نغد زوند القّاغ لّي‑يفسّان غ‑گر ءيفاسّن ن‑ويلّي را‑ت‑يلاسّ، ءور‑يرژيم ءيمي‑نس. رگمن‑ت سّضرن فلّاس لباضل. ما‑را‑يادّر تاروا‑نس؟ اشكو بّين‑ت زغ‑تودرت ن‑دّونيت‑اد.» ءيساول‑داغ لوازير ءيسقسا فيليبّوس: «ءيني‑يّي، ما‑ف‑يساول نّابي لّيغ ءينّا ماياد؟ ءيزد ف‑يخف‑نس نغد كرا ن‑يان ياضني؟» ءيبدو فيليبّوس غاكودان زغ‑وارّا‑يان، ار‑اس‑يمالا لخبار ءيفولكين ف‑ياسوع. زايدن سّودون غ‑وغاراس ايلّيغ لكمن يان‑ودغار گيس امان، ييني لوازير ءي‑فيليبّوس: «هاي‑امان. ءيس‑يلّا ما‑راد‑يّي‑يكّيس ا‑يّي‑تسّدّمت؟» ييني‑اس فيليبّوس: «ءور‑يلّي ما‑راد‑اك‑ت‑يكّيس ءيغ‑تومنت س‑نّييت ن‑وول‑نّك.» ييني‑اس: «ها‑يّي ءومنغ ءيس‑يگا ياسوع لماسيح يوس ن‑ربّي.» ييني لوازير ءي‑وخدّام‑نس ا‑يسّبيدّ لكورّيصا، ءيگّوز س‑وامان نتّا د‑فيليبّوس، ءيسّدّم‑ت. ءيمّا فيليبّوس، غير غلين‑د زغ‑وامان س‑ت‑يسّيتّي رّوح ن‑سيديتنّغ، ءور‑سول‑ت‑يژري لوازير. ءيزايد نتّا ف‑وغاراس‑نس س‑لفرح ءيگّوتن. ءيمّا فيليبّوس يوفا‑ن ءيخف‑نس غ‑تمدينت ن‑اشدود، ءيزايد ار‑يتكّا كولّو تيمدينين ار‑گيسنت‑يتبرّاح س‑لخبار ءيفولكين ايلّيغ ءيروح قايصريّا. ءيمّا شاول ار‑سول‑يسكار ما‑س‑ا‑يسّيويد ءيمحضارن ن‑سيديتنّغ ار‑تن‑يتنوّا س‑لموت. ءيدّو س‑دار‑ونمغور ءيهيّان ن‑تگمّي ن‑ربّي، ءيضالب زغ‑گيس تيبراتين ءي‑يمغارن ن‑تگُمّا ن‑تژالّيت غ‑تمدينت ن‑ديماشق، باش ا‑يغوي وانّا‑ن‑يوفا زغ‑ايت‑وغاراس لّماسيح گن‑ييت ءيرگازن نغد تيمغارين، ياوي‑تن س‑وروشاليم. ءيسّودو شاول ايلّيغ‑ن‑ياكمور س‑ديماشق، س‑د‑فلّاس‑تسفاو يات تيفاوت ءيتجهّدن زغ‑يگنوان. ءيضر س‑واكال ءيسفلد ءي‑يان‑واوال ءينّا‑ياس: «شاول، شاول، ماخ ا‑يّي‑تسّرفوفونت؟» ييني: «وا‑سيدي، ما‑تگيت كيّي؟» ييني‑اس: «نكّين ا‑يگان ياسوع لّي‑تسّرفوفونت. ءيمّا غيلاد نكر تكشمت س‑تمدينت. راد‑اك‑يتياونّا ما‑ك‑يد‑يقّانّ ا‑تي‑تسكارت.» دوهدون غويلّي ديدس سّودانين، بيدّن غين فسّان. سلّان نتني ءي‑واوال‑ان والاينّي ءور‑ژرين يان. ءينكر شاول زغ‑واكال والاينّي لّيغ ءيرژم الّن‑نس ءور‑يسفاو يات. امژن‑اس افوس اوين‑ت س‑ديماشق. ءيكّا كراض‑ووسّان ءور‑يسفاو، ءور‑ا‑يشتّا ءولا‑دا‑يسّا. ءيلّا يان‑ومحضار لّماسيح غ‑ديماشق ءيسم‑نس حانانيّا، ءيبان‑اس‑د سيديتنّغ غ‑توارگيت ييني‑اس: «وا‑حانانيّا.» ييني: «ها‑نكّي ا‑سيدي.» ييني‑اس سيديتنّغ: «نكر تدّوت س‑تگمّي ن‑ياهودا غ‑تسوكت لّي‑مي‑تّينين ‹تاسوكت ءينمن›، تسقسات غ‑يان‑ورگاز گو‑طارسوس ءيسم‑نس شاول. اشكو ار‑يتژالّا، ءيژر غ‑توارگيت يان‑ورگاز ءيسم‑نس حانانيّا يوشكا‑د دارس، ءيسرس فلّاس ءيفاسّن‑نس باش ا‑ييسفيو.» ءيساول حانانيّا ييني: «وا‑سيدي، سفلدغ ءي‑كولّو ما‑تّينين مدّن ف‑ورگاز‑ان ءولا كولّو ما‑يسكار يُخشن ءي‑يمژلاين‑نّك غ‑وروشاليم. هاتي غيلاد يوشكا‑د س‑غيد، ياوي‑د ديدس تيبراتين زغ‑ينمغورن ن‑تگمّي ن‑ربّي باش ا‑يامژ كولّو غويد اقرانين س‑يسم‑نّك.» ييني‑اس سيديتنّغ: «دّو س‑دارس، اشكو ارگاز‑ان ستيغ‑ت ا‑يگ اروكو لّي‑را‑ياسي ءيسم‑ينو دار ايت‑تميزار اگّوگنين د‑يگلدان ءولا دار ايت‑ربّي. راد‑اس‑ملغ منشك ن‑ترفوفنت ا‑ت‑يد‑يقّانّ ا‑سرس‑يرفوفن ف‑يسم‑ينو.» ءيدّو حانانيّا ءيكشم س‑تگمّي لّي‑غ‑يلّا شاول، ءيسرس فلّاس ءيفاسّن‑نس ييني‑اس: «وا‑گما شاول، يوزن‑يّي‑د سيديتنّغ، ا‑ت‑يگان د‑ياسوع لّي‑اك‑د‑يبانّ غ‑وغاراس غاكود لّيغ‑دي‑تسّوديت. يازن‑يّي‑د س‑دارك باش ا‑تيسفيوت تعمّرت س‑رّوح لقودوس.» غير ءينّا ماياد س‑د‑يضر كرا زغ‑والّن ن‑شاول ءيرواس ءي‑يكرضن ن‑يسلمان، يوورّي ءيسفاو. ءينكر غاكودان، ءيسّدّم‑ت حانانيّا غ‑وامان. ءيشّ ءيلمّا س‑يوورّي ءيدوس. ءيگاور شاول د‑يمحضارن لّماسيح غ‑ديماشق كرا ن‑ووسّان. ءيبدو ار‑يتبرّاح غ‑تگُمّا ن‑تژالّيت ار‑يتّيني: «ياسوع ءيگا يوس ن‑ربّي.» ار‑تعجّابن كولّو ويلّي‑اس‑سفليدنين ار‑تّينين ءي‑نگراتسن: «ءيس‑ورد غواد ا‑يتهلاكن غويلّي اقرانين س‑يسم‑اد غ‑وروشاليم؟ ءيس‑ور‑د‑يوشكي س‑غيد باش ا‑تن‑يامژ ياوي‑تن س‑دار ءينمغورن ن‑تگمّي ن‑ربّي؟» ءيمّا شاول ار‑يتزاياد ار‑يساوال س‑تحكيمت ءيتجهّدن ار‑يمالا ءيس‑يگا ياسوع غوالّي‑د‑يوزن ربّي ا‑يگ لماسيح، ايلّيغ ءور‑وفين ايت‑يودايا لّي‑زدغنين غ‑ديماشق مامنك ا‑فلّاس‑تراران اوال. زرين‑ووسّان گّوتنين س‑فلّاس‑مشاوارن كرا ن‑ايت‑يودايا، ءيرين ا‑ت‑نغن. گابلن ءيماون ن‑تمدينت غ‑ييض ءولا ازال باش ا‑ت‑هلكن. ءيمّا شاول ءيسفلد ءي‑غايلّي فلّاس نوّان. اوين‑ت ءيمحضارن‑نس غ‑ييض س‑يان‑وارّياح ءيلّا غ‑وغُراب، زّوگزن‑ت غ‑يان‑وريال س‑برّا ن‑تمدينت. ءيدّو شاول س‑وروشاليم، ييري ا‑يژر ءيمحضارن ن‑سيديتنّغ. ءيمّا نتني كسوضن زغ‑گيس كولّوتن، اشكو ءور‑ت‑ومينّ ءيس‑يوورّي ءيگا امحضار لّماسيح. ياشك‑يد بارنابا ياوي شاول س‑دار ءيرقّاسن، ييني‑اسن ف‑مامنك اد‑اس‑د‑يبان سيديتنّغ غ‑وغاراس ءيساول سرس، ءولا مامنك ا‑يزعم شاول ار‑يساوال س‑يسم ن‑ياسوع غ‑ديماشق. ءيقاما ديدسن شاول، ار‑يتكّا كولّو تامدينت ن‑وروشاليم ار‑يساوال س‑يسم ن‑سيديتنّغ س‑زّعامت. ار‑يسّمقسا ار‑يتمجاحاد د‑ايت‑يودايا لّي‑د‑كّانين تيميزار ياضني، ءيمّا نتني سكرن ف‑ا‑ت‑نغن. لّيغ سفلدن ايتماتن ف‑مايلّي نوّان، اوين‑ت س‑لمرسا ن‑قايصريّا، ازن‑ت ءيلمّا س‑تمدينت‑نس ن‑طارسوس. غ‑ووسّان‑ان ءيهنّا لحال دار كولّو ايت‑ومناگّار غ‑تميزار ن‑يودايا ءولا جاليل ءولا ساميرا. ار‑تّيگاتن ار‑تدوسن، ار‑تن‑يزّعام رّوح لقودوس. ار‑سكارن كولّو ف‑اد‑رضون سيديتنّغ. غ‑ووسّان‑ان ار‑يتكّا بطرُس كرايگاتّ ماني، ياشك‑يد س‑دار ءيمژلاين ن‑ربّي غ‑ودوّار ن‑لودّا. ياف‑ن غين يان‑ورگاز ءيكوشمن، ءيسم‑نس عينياس. تام ءيسگُّاسن ءور‑يژضار ا‑ينكر زغ‑تيسي‑نس. ييني‑اس بطرُس: «وا‑عينياس، هاتي ءيجّوجّي‑ك ياسوع لماسيح. نكر تسّمونت اسدّول‑نّك.» ءينكر غاكودان، ءيبيدّ ف‑يضارن‑نس. ژرن‑ت كولّو ايت‑لودّا ءولا غويلّي زدغنين غ‑وزاغار ن‑سارون، وورّين امنّ ءولا نتني س‑سيديتنّغ. تلّا يات‑تمحضارت لّماسيح غ‑تمدينت ن‑يافّا، ءيسم‑نس طابيتا. تگا لمعنا ن‑يسم‑نس ‹تاژنكطّ›. نتّات ار‑بدّا‑تسكار افولكي غ‑مدّن ار‑تّعاوان ءيمژلاض. توضن غ‑ووسّان‑ان تمّت. سيردنت‑ستّ سرسنت‑ستّ‑ين غ‑يان‑وحانو ن‑وفلّا. تامدينت ن‑يافّا ءور‑باهرا‑تاگّوگ ف‑ودوّار ن‑لودّا. لّيغ سفلدن ءيمحضارن ءيس‑يلّا بطرُس غ‑لودّا، ازنّ سين ءيرگازن س‑دارس ضالبن‑ت: «اشك‑يد غيل غيل.» ءينكر بطرُس ءيمون ديدسن. لّيغ ءيروح تيگمّي سّغلين‑ت س‑وحانو. اشكيند‑د‑تهجّالين كولّوتنت لولّينت ءي‑بطرُس ار‑الّانت ار‑اس‑مالانت ءيقشبان د‑يسلهامن لّي‑تسكر طابيتا لّيغ سول ديدسنتي تلّا. ءيمّا بطرُس ءيسّوفغ‑تنت كولّوتنت زغ‑وحانو، يوتش ف‑يفادّن‑نس ءيژّالّ ءيضالب ربّي. ءيگراول ءيلمّا غ‑تالّي ءيمّوتن ييني‑اس: «وا‑طابيتا، نكر،» س‑دي‑ترژم الّن‑نس تژر بطرُس، تنكر غ‑تيسي‑نس. ءيمدي‑اس‑ن بطرُس افوس‑نس ءيسّبيدّ‑ستّ ف‑يضارن‑نس. ءيغر س‑يمژلاين ن‑ربّي د‑تهجّالين، ءيفك‑اسن‑تّ‑يد تدّر. ار‑سفليدن كولّو ايت‑يافّا ف‑ما‑يجران، ايلّيغ ءيگّوت ما‑يوورّين يومن س‑سيديتنّغ. ءيگاور بطرُس غ‑يافّا يان‑منّاو‑ووسّان غ‑دار يان‑ودبّاغ ءيسم‑نس سيمعان. ءيلّا يان‑ورگاز غ‑تمدينت ن‑قايصريّا ءيسم‑نس كورنيليوس، ءيگا لقبطان زغ‑رّبعت ن‑يعسكرين ن‑رّومان لّي‑مي‑تّينين ‹رّبعت ن‑يطاليا›. ار‑يتعباد ربّي ييري بدّا ا‑ت‑يرضو، نتّان ءولا كولّو ايت‑تگمّي‑نس. ار‑ياكّا ما‑يگّوتن ءي‑يمژلاض ن‑ايت‑يودايا، ار‑بدّا‑يتژالّا ار‑يتضالاب ربّي. يان‑واسّ غ‑تاساعت تيس كراطّ ن‑تدگُّات ءيبان‑اس‑د يا‑لّمالاك ن‑ربّي، يوشكا‑د دارس ييني‑اس: «وا‑كورنيليوس.» ءيسّماقّل گيس كورنيليوس ييكساض باهرا ييني: «ماد‑داري‑تريت ا‑سيدي؟» ءيزايد لمالاك ييني‑اس: «هاتي ءيقبل ربّي تيژولّا‑نّك ءولا مايلّي تاكّات ءي‑يمژلاض، ءيرضو فلّاك. نكر غيلاد تازنت كرا ن‑يرگازن س‑تمدينت ن‑يافّا اد‑د‑اوين يان‑ورگاز لّي‑مي ءيسم‑نس سيمعان بطرُس. هاتين ءيگّوز غ‑تگمّي ن‑يان‑ودبّاغ ءيسم‑نس سيمعان غ‑تاما ن‑ومدا.» لّيغ‑ت‑يفل لمالاك ءيغر كورنيليوس ءي‑سين ءيمقاسان ن‑تگمّي‑نس ءولا يان‑وعسكري‑نس لّي‑يتعبادن ربّي. ييني‑اسن ف‑كولّو ما‑يجران يازن‑تن ءيلمّا س‑يافّا. نديد ازكّا سول لّان غ‑وغاراس اكمورن‑ين س‑يافّا، ءيغلي بطرُس س‑وكفاف ن‑تگمّي ا‑يژّالّ. تگا تاساعت تيس سنات د‑مراوت غ‑طوژّونت ن‑واسّ س‑ت‑ياغ لاژ ييري ما‑يشتّا. سول خدمن غ‑تيرمت س‑ا‑س‑د‑يسّبايّن ربّي كرا زوند تاوارگيت. ءيژر ءيگنوان رژمن، ءيگّوز‑د فلّاس كرا ءيرواس ءي‑ليزار ءيمقّورن ءيتياماژ زغ‑كّوژط‑تغمرين، ءيتّرس‑د س‑واكال. ءيلين گيس كيگان د‑لوحوش د‑يبنكالن د‑يگضاض ن‑تاگانت. ءيساول‑د يان‑واوال ييني: «نكر ا‑بطرُس، تغرست تشّت.» ءيرار‑اس بطرُس: «حاشا ا‑سيدي. ءور‑جّو‑شّيغ ما‑ف‑ينّا شّرع ن‑موسا ءيحرم نغد ءيركا.» ءيساول‑د‑داغ‑واوال‑ان ييني‑اس: «ا‑ور‑تگت ما‑يسّحلّا ربّي د‑ما‑يحرمن.» ءيجرو غمكان كراطّ‑توال، ءيتيالال ءيلمّا ليزار س‑يگنوان. سول ا‑يسوينگيم بطرُس غ‑ما‑تگا لمعنا ن‑توارگيت‑ان س‑د‑روحن ءيرگازن لّي‑د‑يوزن كورنيليوس. ار‑سقسان غ‑تگمّي ن‑سيمعان ايلّيغ‑ن‑بيدّن غ‑يمي‑نس. غرن ءي‑ايت‑تگمّي سقسان‑تن: «ءيس‑دارون يان‑ورگاز ءيسم‑نس سيمعان بطرُس؟» نتّان سول ا‑يسوينگيم غ‑لمعنا ن‑توارگيت س‑اس‑ينّا رّوح لقودوس: «ها‑كراض ءيرگازن ار‑سرك‑سيگّيلن. نكر غيلاد تگّوزت، تمونت ديدسن بلا تشكّات، اشكو نكّي ا‑تن‑د‑يوزنّ.» ءيگّوز بطرُس غاكودان ييني‑اسن: «هاتي نكّي ا‑س‑ا‑تسيگّيلم. ماد‑داري‑ترام؟» ءينين‑اس: «يوزن‑اغ‑د لقبطان كورنيليوس. ءيگا ارگاز ءيفولكين، ار‑يتعباد ربّي ار‑تي‑توقّارن كولّو ايت‑يودايا. ءيبان‑اس‑د يا‑لّمالاك ن‑ربّي، ييني‑اس اد‑اك‑د‑يغر س‑تگمّي‑نس باش ا‑يسفلد ءي‑ما‑راد‑اس‑تينيت.» ءيشّكشم‑تن بطرُس غاكودان س‑تگمّي، ءيگ‑تن د‑ينبگيون‑نس. نديد ازكّا ءيمون ديدسن، نتّان ءولا كرا ن‑ايتماتن ياضني زغ‑تمدينت ن‑يافّا. نديد ازكّا ءيروح تامدينت ن‑قايصريّا. ار‑سرس‑يتقل كورنيليوس، نتّان د‑ايت‑دارس د‑يمدّوكُّال‑نس، اشكو ءيسّمون‑تن‑د كولّوتن غ‑تگمّي‑نس. ءيلكم بطرُس تيگمّي س‑ت‑يد‑يمناگّار كورنيليوس ءيكنو س‑واكال غ‑دار ءيضارن‑نس. ءيسّنكر‑ت‑يد بطرُس ييني‑اس: «نكر، نكّي بنادم كاد‑گيغ.» ءيزايد ار‑ديدس‑يساوال، ءيكشم ءيلمّا س‑تگمّي ياف‑ن مدّن گّوتنين ا‑غين‑يمونّ. ييني‑اسن بطرُس: «تسّنم شّرع ن‑موسا ءيس‑ور‑يودجي يان ءيگان زغ‑ايت‑يودايا ا‑يكشم س‑دار ءيبرّانيين ءولا ءيمون ديدسن. والاينّي ءيملا‑يّي ربّي ا‑ور‑گغ يان د‑ما‑يحرمن ءولا ما‑يركان. ف‑مايان ا‑ف‑د‑وشكيغ لّيغ‑ن‑سري‑توزنم، ءور‑سول‑مشاوارغ د‑يخف‑ينو. ءيمّا غيلاد ريغ اد‑يّي‑تملم ما‑ف‑يّي‑دي‑تغرام.» ءيساول كورنيليوس ييني‑اس: «كراض‑ووسّان اياد، زوند تاساعت‑اد ءيگان تيس كراطّ ن‑تدگُّات، ار‑تژالّاغ ار‑تضالابغ ربّي غ‑تگمّي‑نو، س‑ژريغ يان‑ورگاز ءيبيدّ غ‑لگدّام‑ينو س‑تملسا سّمرغانين. ييني‑يّي: ‹وا‑كورنيليوس، ءيسفلد ربّي ءي‑تژولّا‑نّك، ءور‑يتّو مايلّي تاكّات ءي‑يمژلاض. ازن غيلاد س‑يافّا تسقسات غ‑يان‑ورگاز لّي‑مي ءيسم‑نس سيمعان، ار‑اس‑تّينين بطرُس. ءيگّوز غ‑تگمّي ن‑يان‑ودبّاغ ءيسم‑نس سيمعان غ‑تاما ن‑ومدا.› ازنغ‑ن سرك غاكودان. هاتي تسكرت گيگي ما‑يفولكين لّيغ‑د‑توشكيت. ءيمّا غيلاد ها‑نكُّني كولّواغ غ‑لگدّام ن‑ربّي، نرا ا‑نسفلد ءي‑كولّو ما‑ف‑ك‑يوصّا سيديتنّغ اد‑اغ‑تي‑تملت.» ءيساول بطرُس ييني: «سّنغ غيلاد ءيزد س‑صّاحت ءور‑ا‑يسكار ربّي س‑وودماون. اشكو ار‑يتقبال كولّو وانّا‑ت‑يتوقّارن ار‑يسكار ما‑ت‑يرضان، كرا تگا‑تمازيرت‑نس. غمكاد ا‑يگا‑واوال لّي‑د‑يوزن ربّي ءي‑مدّن‑نس ن‑ايت‑ياعقوب، ءيمل‑اسن‑د لخبار ءيفولكين ن‑سّلامت غ‑گراس ديدسن ف‑وودم ن‑ياسوع لماسيح لّي‑يگان سيديس ن‑كولّو ما‑يلّان. تسفلدم ف‑ما‑يجران غ‑كولّو تامازيرت ن‑يودايا، ءيبدو زغ‑جاليل تيگيرا ن‑ما‑يتبرّاح يوحانّا ار‑يسّدّام مدّن غ‑وامان. تيسّانم ف‑ياسوع گو‑ناصيرا ءيس‑ت‑يعمّر ربّي س‑رّوح لقودوس د‑تحكيمت ءيتجهّدن، ار‑يتكّا كرايگاتّ ماني ار‑يسكار افولكي ار‑يجّوجّي كولّو ويلّي تياوكرّافنين س‑يسكراف ن‑يبليس، اشكو ءيلّا ديدس ربّي. نكُّني نگا فلّاس ءيناگان، نژرا كولّو ما‑يسكار غ‑تمازيرت ن‑يودايا ءولا غ‑وروشاليم. نغن‑ت ءيلمّا ف‑وگّجدي، والاينّي غ‑ويس كراض‑ووسّان ءيسّنكر‑ت‑يد ربّي زغ‑لموت ءيسّبايّن‑ت‑يد. ءور‑د‑يبان ءي‑كولّو مدّن والاينّي غير ءي‑ويلّي ءيستي ربّي اد‑گن ءيناگان، ا‑تن‑يگان د‑نكُّني لّي‑ديدس‑يشّان نسو ديدس تيگيرا ن‑ما‑د‑ينكر زغ‑لموت. يوصّا‑ياغ ا‑نتبرّاح ار‑ناكّا توگّا‑نّغ ن‑يزد نتّان ا‑يژلي ربّي ا‑يوت لحوكم ف‑ويلّي دّرنين ءولا غويلّي مّوتنين. نتّان ا‑ف‑ساولن لانبيا كولّوتن ار‑اكّان توگّا‑نسن ار‑تّينين: س‑يسم‑نس ا‑س‑را‑يسّيتّي ربّي دّنوب ف‑كولّو وانّا سرس يومنّ.» سول ا‑يساوال بطرُس س‑د‑يگّوز رّوح لقودوس ف‑كولّو ويلّي‑اس‑سفليدنين. ار‑تعجّابن ءيمومنّ ن‑ايت‑يودايا لّي‑د‑مونّين د‑بطرُس لّيغ ژران مامنك ا‑يفكا ربّي لباراكا ن‑رّوح لقودوس ءي‑يبرّانيين ءولا نتني. اشكو سفلدن‑اسن ار‑ساوالن س‑يواليون ءيغريبن ار‑تالغن ربّي. ييني ءيلمّا بطرُس: «ءيس‑يلّا ما‑راد‑اغ‑يكّيس ا‑نسّدّم مدّن‑اد غ‑وامان؟ اشكو ءولا نتني، ءيفكا‑ياسن ربّي رّوح لقودوس غمكلّي‑اغ‑ت‑يفكا نكُّني.» يوصّا‑تن اد‑دّمن غ‑وامان س‑يسم ن‑ياسوع لماسيح. ضالبن‑ت ءيلمّا ا‑ديدسن‑يگاور كرا ن‑ووسّان. سفلدن ءيرقّاسن د‑ايتماتن غ‑كولّو تامازيرت ن‑يودايا ف‑يبرّانيين ءيس‑ومژن ءولا نتني اوال ن‑ربّي. لّيغ يوورّي بطرُس س‑وروشاليم، نكرن سرس غويلّي تّيرينين اد‑ژّالّن مدّن ءي‑دّات‑نسن ءينين‑اس: «ماخ ايلّيغ تگّوزت غ‑دار غويلّي ءور‑ژّولّينين، ار‑ديدسن‑تشتّات؟» ءيساول بطرُس ءيمل‑اسن كولّو ما‑يجران زغ‑يسيزوار ييني‑اسن: «لّيغ نكّي غ‑تمدينت ن‑يافّا ار‑تژالّاغ ار‑تضالابغ ربّي، س‑يّي‑د‑يسّبايّن كرا زوند تاوارگيت. ژرغ كرا ءيگّوز‑د فلّا، ءيرواس ءي‑ليزار ءيمقّورن ءيتياماژ زغ‑كّوژط‑تغمرين. ءيگّوز‑د زغ‑يگنوان ءيتّرس‑د غ‑لگدّام‑ينو. سّماقّلغ گيس لمخلوقات، گان لوحوش د‑يبنكالن د‑يگضاض ن‑تاگانت، س‑سفلدغ ءي‑يان‑واوال ءينّا‑يّي: ‹نكر ا‑بطرُس، تغرست تشّت.› رارغ‑اس: ‹حاشا ا‑سيدي. ءور‑جّو‑مضيغ كرا‑ف‑ينّا شّرع ن‑موسا ءيحرم نغد ءيركا.› ءيساول‑د‑داغ‑واوال‑ان زغ‑يگنوان ييني‑يّي: ‹ا‑ور‑تگت ما‑يسّحلّا ربّي د‑ما‑يحرمن.› ءيجرو ماياد كراطّ‑توال، ءيتيالال ءيلمّا ليزار س‑يگنوان. تاساعت‑ان ا‑غ‑ن‑روحن كراض ءيرگازن تيگمّي لّي‑غ‑گّوزغ، تيازانّ‑ين سري زغ‑قايصريّا. ييني‑يّي رّوح لقودوس اد‑ديدسن‑مونغ بلا شكّاغ. مونّ ءيلمّا ديدنّغ سضيص ايتماتن‑اد. نكشم س‑تگمّي ن‑كورنيليوس. ييني‑اغ نتّان ف‑مامنك ا‑يژرا يا‑لّمالاك ءيبيدّ غ‑تگمّي‑نس ييني‑اس: ‹ازن س‑يافّا، تسقسات غ‑يان‑ورگاز لّي‑مي ءيسم‑نس سيمعان، ار‑اس‑تّينين بطرُس. راد‑اك‑د‑ياوي اوال ما‑س‑ا‑تّنجامت كيّي ءولا كولّو ايت‑تگمّي‑نّك.› «بدوغ ار‑اسن‑ساوالغ، س‑د‑فلّاسن‑يگّوز رّوح لقودوس غمكلّي‑د‑فلّانّغ‑يگّوز نكُّني غ‑يسيزوار. كتيغ‑د اوال ن‑سيديتنّغ لّي‑س‑اغ‑ينّا: ‹ءيكّا‑تّين يوحانّا ار‑يسّدّام مدّن غ‑وامان، ءيمّا كونّي را‑تدّمّ س‑رّوح لقودوس.› ءيبايّن ءيس‑اسن‑د‑يفكا ربّي مايلّي‑اغ‑د‑يفكا نكُّني لّيغ نومن س‑سيديتنّغ ياسوع لماسيح. ماد‑گيغ نكّي ايلّيغ راد‑ضاضّغ ربّي؟» لّيغ سفلدن مدّن‑ان ءي‑ما‑ينّا بطرُس ءور‑سول‑دارسن ما‑تّينين. الغن ربّي ءينين: «هاتي ءيفكا ربّي ءي‑يبرّانيين ءولا نتني اد‑د‑وورّين زغ‑كولّو ما‑يُخشنّ، كشمن‑د س‑تودرت‑اد ءيدومن.» ار‑تمودّون غويلّي اكوتنين ف‑سّيبت ن‑ترفوفنت تيگيرا لّموت ن‑ستيفانوس، ار‑تّيدون غ‑ووسّان‑ان ار تامازيرت ن‑فينيقيّا د‑يگزير ن‑قوبروس د‑تمدينت ن‑انطاكيّا، ار‑سّلكامن اوال ن‑ربّي غير ءي‑ويلّي گانين ايت‑يودايا. والاينّي كرا گيسن، گان ن‑ايت‑قوبروس د‑ايت‑كوريني، لّيغ روحن انطاكيّا بدون ار‑ساوالن س‑يبرّانيين ءولا نتني، ار‑اسن‑تّينين ف‑لخبار ءيفولكين ن‑سيديتنّغ ياسوع. ءيعاون‑تن سيديتنّغ ايلّيغ ءومنّ مدّن گّوتنين امژن اغاراس ن‑سيديتنّغ. سفلدن ايتماتن ن‑ومناگّار غ‑وروشاليم ف‑ماياد، ازنّ ءيلمّا بارنابا س‑انطاكيّا. لّيغ‑ن‑يلكم، ءيژر مامنك ا‑تن‑يبارك ربّي، ءيفرح ءيزّعام‑تن كولّوتن اد‑امژن غ‑سيديتنّغ س‑وول ءيزگان. ءيگا بارنابا ارگاز ءيفولكين، ءيعمّر س‑رّوح لقودوس ءولا ليمان. ءيگاتن غويلّي ءومژنين اغاراس ن‑سيديتنّغ غ‑ووسّان‑ان. ءيدّو بارنابا غاكودان س‑تمدينت ن‑طارسوس ا‑يسيگّل س‑شاول. لّيغ‑ت‑يوفا، ياوي‑ت ديدس س‑انطاكيّا. قامان غين اسگُّاس ار‑تمونون د‑ومناگّار ن‑ايتماتن ار‑سّلمادن مدّن گّوتنين. غ‑تمدينت ن‑انطاكيّا ا‑غ‑بدان مدّن ار‑تّينين ءي‑يمحضارن ‹ءيماسيحين›. غ‑ووسّان‑ان ا‑غ‑د‑وشكان كرا ن‑مدّن زغ‑وروشاليم س‑انطاكيّا، ار‑تّينين ءيواليون نّا‑ياسن‑يمالا ربّي. ءينكر يان گيسن ءيسم‑نس اگابوس، ءيگوّد‑ت رّوح لقودوس ييني‑اسن: «يان كرا را‑ييلي‑وغني ءيشقان غ‑دّونيت كولّوتّ.» (ءيجرا‑نّيت غمكان غ‑ووسّان ن‑وگلّيد كلوديوس.) مشاشكان‑د ءيمحضارن ف‑اد‑ازنّ كرا لّمعاونت ءي‑ايتماتن غ‑تمازيرت ن‑يودايا، ءيفك كود يان گيسن غونشك لّي‑مي‑يژضار. سكرن غمكان، ازن‑تّ ءي‑يمغارن غ‑وروشاليم ف‑وفوس ن‑بارنابا د‑شاول. غ‑ووسّان‑ان ا‑يومژ‑وگلّيد هيرودوس كرا زغ‑ايتماتن ن‑ومناگّار، ييري ا‑تن‑يسّرفوفن. يامژ ياعقوب گماس ن‑يوحانّا ءينغ‑ت س‑تاژّيت. لّيغ ءيژرا مامنك اد‑فرحن ايت‑يودايا س‑غايان، ءيزايد يامژ بطرُس ءولا نتّان غ‑ووسّان لّعيد ن‑ورخصيص. ءيگ‑ت‑ين غ‑لحبس، ار‑تي‑تگابالن كّوژط رّبايع ن‑يعسكرين، ءيلين كّوژ غ‑كرايگاتّ رّبعت. ييري هيرودوس ا‑فلّاس‑يوت لحوكم غ‑لگدّام ن‑كولّو مدّن تيگيرا لّعيد ن‑وسورف. ءيقاما بطرُس غ‑لحبس، ءيمّا ايت‑ومناگّار ار‑تژالّان ار‑باهرا‑فلّاس‑تضالابن ربّي. ءيض لّي‑يزوارن اسّ لّي‑غ‑را‑ت‑ين‑يسّحاضر هيرودوس غ‑لگدّام ن‑مدّن، ءيطّاس بطرُس غ‑گر سين ءيعسكرين، ءيقّن س‑سنات سّناسل. ءيلين ءينگابالن ياضني غوين تيضاف غ‑يمي لّحبس، س‑يبيدّ يا‑لّمالاك ن‑سيدي ربّي غ‑تحانوت لّي‑غ‑يلّا بطرُس. تسّمرغا س‑تيفاوت ءيتجهّدن. ءيسّماسّ‑ت لمالاك زغ‑تغروطّ‑نس ءيسّفاق‑ت‑يد ييني‑اس: «نكر غيل غيل،» س‑ضرنت سّناسل زغ‑يفاسّن‑نس. ييني‑اس لمالاك: «بكيس تقّنت تورژيّين‑نّك.» ءينكر بطرُس ءيسكر مايان. ييني‑اس لمالاك: «سّمون اسلهام‑نّك تضفورت‑يّي.» ءيضفور‑ت بطرُس ءيفّوغ زغ‑تحانوت. ءور‑يسّين كولّو ماين ءيسكار لمالاك ءيزد صّاحت ا‑يگا. ءيغال ءيزد غير كرا ن‑توارگيت ايان. زرين ف‑ينگابالن زوارنين، زرين ف‑ويس سين، لكمن تيفلوت ن‑ووزّال لّي‑يقامان اد‑فّوغن س‑تمدينت. ترژم‑تفلوت ءي‑يخف‑نس، فّوغن. زرين‑ين تاسوكت‑ان، س‑فلّاس‑ييتّي لمالاك ءيفل‑ت غين. غاكودان ا‑يفهم بطرُس ماد‑اس‑يجران ييني: «سّنغ غيلاد ءيزد س‑صّاحت يوزن‑د سيدي ربّي لمالاك‑نس ا‑يّي‑د‑يفوكّو زغ‑وفوس ن‑هيرودوس ءولا زغ‑كولّو ماد‑ران مدّن‑ان ن‑ايت‑يودايا ا‑ت‑فلّا‑زّرين.» لّيغ ءيفاق بطرُس ءي‑ماد‑اس‑يجران، ءيفتو س‑تگمّي ن‑ماريام ءينّاس ن‑يوحانّا لّي‑مي‑تّينين مارقُس. لّان غين مدّن گّوتنين مونّ‑د كولّو ار‑تژالّان ار‑تضالابن ربّي. ءيسّضوقّر بطرُس غ‑يمي ن‑برّا. تاشك‑يد يات‑تخدّامت ءيسم‑نس رودا، باش ا‑تژر ما‑يسّضوقّرن. غير توكُز اوال ن‑بطرُس تفرح باهرا ايلّيغ تتّو ءيمي ءيس‑يقّن، توورّي س‑تيزّلا س‑وگُنس تيني‑اسن: «هاتي بطرُس ايد ءيبيدّن غ‑يمي.» رارن‑اس‑د: «ءيس‑تفّوغت ءيخف‑نّم؟» تيني‑اسن‑داغ: «بطرُس ا‑يگا.» رارن‑اس: «ءوهو، حاقّان لمالاك‑نس كايان.» سول ءيقاما بطرُس غ‑يمي ار‑يسّضوقّور. رژمن‑اس افن‑ت‑ين بطرُس ا‑يگا، ءيضر‑اسن لعجب. يالّ افوس‑نس ا‑تن‑يسّفسّا، ييني‑اسن ءيلمّا ف‑مامنك ا‑ت‑يد‑يسّوفغ سيديتنّغ زغ‑لحبس. يوصّا‑تن: «ءينيات كولّو ماياد ءي‑ياعقوب د‑ايتماتن.» ءيفل‑تن غاكودان، ءيدّو س‑ماني ياضني. لّيغ ءيفاو لحال، دوهدون ءينگابالن لّحبس باهرا، ار‑سّمقسان ءي‑نگراتسن: «ما‑يگا غاياد؟ ماني ءيكّا بطرُس؟» يازن هيرودوس ما‑سرس‑يسيگّيلن، والاينّي ءور‑ت‑وفين. ءيسقسا ءينگابالن باهرا، ءيسّوفغ‑تن ءيلمّا ا‑تن‑نغن. ءيفّوغ هيرودوس تامازيرت ن‑يودايا ءيدّو س‑قايصريّا ءيگاور غين. غ‑ووسّان‑ان ءيژي هيرودوس د‑يمزدغن ن‑صور د‑صايدا. اشكين‑د ايت‑تمدينين‑ان س‑يان‑واوال، ءيرين اد‑ديدس‑ساولن، اشكو ءيقّان‑تن‑د اد‑اوين ماد‑شتّان زغ‑تمازيرت ن‑وگلّيد. مشاشكان‑د زوار د‑لوازير ءيسم‑نس بلاستوس، باش اد‑ضالبن زغ‑هيرودوس سّلامت. لّيغ ءيلكم‑واسّ لّي‑غ‑را‑تن‑يژر، ءيلسا هيرودوس اسلهام ن‑تگلديت‑نس، ءيسكيوس غ‑لكورسي لّحوكم ءيساول ءي‑مدّن‑ان. الّن نتني اوال‑نسن ءينين: «اوال ن‑يان‑يلاه اياد، ءورد اوال ن‑بنادم.» غاكودان ا‑ت‑يد‑يوت يا‑لّمالاك ن‑سيدي ربّي س‑تووكّا ار‑ت‑تشتّا غ‑وگُنس‑نس ايلّيغ ءيمّوت، اشكو يومژ لمجد لّي‑يگان وين ربّي. ار‑باهرا‑يتزاياد‑واوال ن‑ربّي غ‑ووسّان‑ان، ءيگّوت ما‑سرس‑يسفليدن. ءيمّا بارنابا د‑شاول، لّيغ سّلكمن لامانت‑نسن س‑وروشاليم، وورّين س‑انطاكيّا. اوين ديدسن يوحانّا لّي‑مي‑تّينين مارقُس. لّان كرا ن‑مدّن غ‑ومناگّار ن‑ايتماتن غ‑انطاكيّا، ار‑تّينين ءيواليون نّا‑ياسن‑يمالا ربّي ار‑سّلمادن. ءيلّا بارنابا د‑سيمعان لّي‑مي‑تّينين ‹اسگّان›، ييلي لوكيوس گو‑كوريني د‑ماناين لّي‑يمقّورن د‑وگلّيد هيرودوس غ‑يات‑تگمّي، ييلي شاول. يان‑واسّ اژومن ار‑تعبادن سيديتنّغ، س‑اسن‑ينّا رّوح لقودوس: «فكات‑يّي‑د بارنابا د‑شاول اد‑قاسان كرا ن‑تووري، غريغ‑اسن سرس.» زايدن ءيلمّا غ‑وژوم د‑تژالّيت، سرسن فلّاسن ءيفاسّن‑نسن سافضن‑تن. دّون نتني غمكلّي‑اسن‑يملا رّوح لقودوس س‑لمرسا ن‑سالوكيّا، سّودون غ‑ومدا س‑يگزير ن‑قوبروس. كشمن س‑تمدينت ن‑سالاميس ار‑تبرّاحن س‑واوال ن‑ربّي غ‑تگُمّا ن‑تژالّيت ن‑ايت‑يودايا. ءيوين ديدسن يوحانّا لّي‑مي‑تّينين مارقُس، ار‑تن‑يتعاوان غ‑تووري. ار‑تكّان ءيگزير كولّوت ايلّيغ لكمن تامدينت ن‑بافوس، افن‑ين گيس يان‑وسحّار گو‑يودايا ءيسم‑نس بارياشوع، ار‑يتّيني ءيس‑يگا نّابي والاينّي ار‑يسّكيركيس. نتّان ار‑يتگاوار دار لحاكم ن‑يگزير ءيسم‑نس سارجيوس‑بولُس. ءيگا لحاكم‑ان باب لّعاقل. يازن س‑بارنابا د‑شاول ءيضالب‑تن اد‑د‑اشكين س‑دارس، اشكو ءيرا ا‑زگيسن‑يسفلد ءي‑واوال ن‑ربّي. ءيمّا اسحّار‑ان، ءيسم‑نس اليماس س‑واوال ن‑ايت‑يونان، ءينكر سرسن ييري ا‑يحصار لحاكم ا‑ور‑يامژ اغاراس لّماسيح. غاكودان شاول لّي‑مي‑نتّيني بولُس ءيعمّر س‑رّوح لقودوس، ءيمناد غ‑وسحّار ييني‑اس: «وا‑يوس ن‑يبليس، تگيت امضاضّ ءي‑كولّو ما‑يرا ربّي. تعمّرت س‑تكركاس د‑تيلّاي أُخشنّين. ار‑بدّا‑تسّلولّيت ءيغاراسن أُغژانّين ن‑سيديتنّغ. هاتي ءيلّا‑فلّاك‑وفوس ن‑سيديتنّغ. را‑تبوكضت ءور‑را‑تيسفيوت ار ازمز ياضني.» غاكودان ا‑فلّاس‑يضر‑ومدلو د‑تيلّاس، ار‑يتلّي س‑ماد‑اس‑يتامژن افوس. ءيمّا لحاكم، لّيغ ءيژرا مايد ءيجران، ءيتعجّب باهرا. يامن س‑ماد‑اس‑سّلمدن ف‑سيديتنّغ. ءيفّوغ بولُس د‑وسمون‑نس زغ‑بافوس، سّودون غ‑ومدا س‑تمدينت ن‑بارگا غ‑تمازيرت ن‑بامفيليّا. ءيبضو ديدسن يوحانّا لّي‑مي‑تّينين مارقُس، يوورّي س‑وروشاليم. زايدن نتني زغ‑بارگا س‑تمدينت ن‑انطاكيّا ن‑بيسيديّا. كشمن س‑تگمّي ن‑تژالّيت غ‑واسّ ن‑وسونفو، سكيوسن گيس. ءيمغارن ن‑تگمّي ن‑تژالّيت، تيگيرا ن‑ماد‑غران زغ‑شّرع ن‑موسا د‑وارّاتن لّانبيا، غرن‑اسن: «واي‑ايتماتنّغ، نكراد‑د تساولم ءيغ‑دارون كرا ن‑يواليون ما‑س‑ا‑تسّدوسم مدّن‑نّغ.» ءينكر بولُس يالّ افوس‑نس ييني‑اسن: «واي‑ايت‑ربّي د‑يبرّانيين لّي‑تعبادنين ربّي، سفلدات‑يّي. ربّي ن‑ايت‑دارنّغ ءيژلي ءيمزوورا‑نّغ، ءيسّيگات‑تن باهرا غ‑يسگُّاسن لّي‑غ‑لّان غ‑تمازيرت ن‑ميصر. ءيسّوفغ‑تن‑د ءيلمّا زغ‑غين س‑وفوس‑نس ءيتجهّدن. ءيبيدّ ديدسن كّوژ ءيد‑مراو ن‑وسگُّاس غ‑لخلا. ءيهلك سّا ن‑تگلداي غ‑تمازيرت ن‑كانعان، ءيفك‑اسن تامازيرت‑ان ا‑ستّ‑وورتن. غمكان ا‑س‑يزري ما‑يتگّان كّوژ ءيد‑ميّا د‑سمّوس ءيد‑مراو (450) ن‑وسگُّاس. ءيفك‑اسن ءيلمّا ءيمغارن تجهّدنين ا‑فلّاسن‑تحكامن ار ءوسّان ن‑نّابي صامويل. ضالبن‑ت غاكودان ا‑زگيسن‑يژلي يان اد‑اسن‑يگ اگلّيد، ءيمل‑اسن ربّي شاول يوس ن‑قيش زغ‑تقبيلت ن‑بنيامين. ءيزايد نتّان ار‑فلّاسن‑يتحكام كّوژ ءيد‑مراو ن‑وسگُّاس. ءيسّيتّي‑ت ءيلمّا ربّي، ءيگ داود د‑وگلّيد‑نسن. نتّان ا‑ف‑يفكا ربّي توگّا‑نس ءينّا: ‹ءوفيغ‑ن غ‑داود يوس ن‑ياسّا ما‑ن‑ياكمورن س‑وول‑ينو. را‑يسكار كولّو ماد‑ريغ.› ءيمّا غيلاد، زغ‑تاسوت ن‑داود ا‑زغ‑د‑يفكا ربّي يان ياضني ا‑يگ انجّام ءي‑ايت‑ربّي غمكلّي‑س‑ينّا غايد ءيزرين، ا‑ت‑يگان د‑ياسوع. لّيغ ءور‑تا‑يگري ياسوع غ‑تووري‑نس، ءيكّا‑تّين يوحانّا امسدّام ار‑يتبرّاح ار‑يتّيني ءي‑كولّو ايت‑ربّي اد‑فلن ماد‑سكارن يُخشن ار‑تن‑يسّدّام غ‑وامان. لّيغ‑د‑ياكمور‑وزمز ا‑يكمّل يوحانّا تاووري‑نس، ءيسقسا مدّن‑ان: ‹ما‑تّينيم گيغ‑ت نكّي؟ هاتي ءورد نكّين ا‑يگان غوالّي‑س‑ا‑تّقلم، والاينّي را‑د‑ياشك تيگيرا‑نو. ءور‑ستهلّاغ نكّي اد‑رژمغ ءيفالان ن‑تورژيّين‑نس.› «واي‑ايتما زغ‑تاسوت ن‑يبراهيم د‑يبرّانيين لّي‑تعبادنين ربّي، نكُّني كولّواغ ا‑مي‑د‑يوزن ربّي اوال ف‑مامنك ا‑راد‑اغ‑يجّنجم. ءيمّا ءيمزدغن ن‑وروشاليم د‑ينمغورن‑نسن ءور‑سّينّ ءيزد ياسوع ا‑يگان انجّام لّي‑س‑ا‑تقلن. ءور‑فهيمن ءيواليون لّانبيا لّي‑اقران كرايگاتّ اسّ ن‑وسونفو، والاينّي سّووفان ءيواليون‑ان لّيغ فلّاس حكامن. واخّا ءور‑گيس‑وفين ما‑ف‑ا‑ت‑نقّان، ضالبن زغ‑بيلاطوس ا‑ت‑ينغ. غاكود لّيغ سكرن نتني كولّو مايلّي فلّاس ءيتياران زغ‑يسيزوار، زّوگزن‑ت زغ‑وگّجدي، سرسن‑ت‑ين غ‑ومضّال. «ءيمّا ربّي هاتي ءيسّنكر‑ت‑يد زغ‑لموت، ار‑د‑يتبان كيگان د‑ووسّان ءي‑ويلّي ديدس مونّين زغ‑جاليل س‑وروشاليم. گن نتني ءيناگان، ار‑اكّان توگّا ءي‑ايت‑ربّي ف‑ماد‑ژران. ءولا نكُّني نوشكا‑د ناوي‑اون‑د لخبار‑اد ءيفولكين، اشكو مايلّي ءينّا ربّي ءي‑يمزوورا‑نّغ ف‑ما‑را‑يسكر، هاتي ءيسكر‑ت غيلاد غ‑دارنّغ نكُّني لّي‑يگان تاروا‑نسن. اشكو ءيسّنكر‑د ياسوع زغ‑لموت غمكلّي ءيتياران غ‑ويس سين ءيموريگن، ءينّا ربّي: ‹كيّي تگيت ءيوي. باباك اد‑گيغ غاسّاد.› ءيتيارا ءولا ف‑مامنك ا‑را‑ت‑يد‑يسّنكر زغ‑لموت ا‑ور‑سار‑تركم دّات‑نس، ييني: ‹هاتي را‑كُن‑باركغ س‑لباراكات صفانين زگانين لّي‑ف‑نّيغ ءي‑داود.› ييني‑داغ غ‑وارّا ياضني: ‹ءور‑را‑تادجت امژلاي‑نّك ا‑يركم غ‑ومضّال.› نسّن داود غ‑ووسّان‑نس ءيس‑يسكر ما‑يرا ربّي، ءيمّت ءيلمّا ءيتياومضال غ‑گر ءيمزوورا‑نس، تركم دّات‑نس. ءيمّا غواد‑د‑يسّنكر ربّي، ءور‑ت‑يودجي ا‑يركم. «واي‑ايتما، نرا ا‑تيسّانم لخبار‑اد ءيفولكين. اشكو ف‑سّيبت ن‑غواد‑د‑ينكرن ا‑س‑يوجاد ربّي ا‑فلّاون‑يسّيتّي دّنوب‑نّون. كولّو وانّا سرس يومنّ، را‑ت‑يسّغوس زغ‑كولّو غايلّي مي ءور‑يژضار شّرع ن‑موسا ا‑ت‑زگيس‑يسّغوس. ءيمّا غيلاد، رارات لعاقل‑نّون اد‑اون‑ور‑يجرو غمكلّي نّان لانبيا: ‹ژرات ا‑يطنّاژن، ار‑تّعجّابم تّهلكم. اشكو راد‑سكرغ كرا ءيهيّان غ‑ووسّان‑نّون. ءيغ‑يلّا ماد‑اون‑فلّاس‑ينّان، ءور‑را‑تي‑تامنم.› » ءيفّوغ ءيلمّا بولُس د‑بارنابا زغ‑تگمّي ن‑تژالّيت. ضالبن‑تن مدّن ا‑ن‑وورّين ءيمال اسّ‑ان ن‑وسونفو اد‑اسن‑ساولن س‑وگُّار ف‑تغاوسيوين‑اد. لّيغ كولّو فّوغن، ءيگّوت گيسن ما‑يمونّ د‑بولُس د‑بارنابا زغ‑ايت‑يودايا د‑يبرّانيين لّي‑ومژنين اغاراس ن‑ايت‑ربّي. ءيساول سرسن بولُس د‑بارنابا، زّعامن‑تن اد‑زگان غ‑لباراكا ن‑ربّي. ءيمال اسّ‑ان ن‑وسونفو مونّ‑د ايت‑تمدينت كولّوتن، ءيرين اد‑سفلدن ءي‑واوال ن‑ربّي. ءيمّا ايت‑يودايا لّي‑زدغنين غين، لّيغ ژران مدّن‑ان گّوتنين، اسين تانوّاشت ف‑يرقّاسن، ژين د‑بولُس ف‑واوال‑نس رگمن‑ت. ءيرار‑اسن ءيلمّا بولُس د‑بارنابا س‑زّعامت ءينين‑اسن: «نيوي‑اون‑د اوال ن‑ربّي غمكلّي‑اغ‑د‑يقّانّ باش ا‑تزوورم كونّي. ءيمّا غيلاد ءور‑تي‑تريم، تگم ءيخفاون‑نّون د‑ويلّي ءور‑يستهلّان اد‑كشمن س‑تودرت ءيدومن. را‑كُن‑نفل غيلاد ناوي‑تّ غ‑يبرّانيين، اشكو غمكاد ا‑س‑اغ‑يوصّا سيدي ربّي. ءينّا: ‹گيغ‑ك د‑تيفاوت ءي‑ايت‑تميزار اگّوگنين، ا‑تجّنجمت مدّن ار تّمي ن‑واكال.› » لّيغ سفلدن ءيبرّانيين ءي‑ماياد، فرحن باهرا الغن اوال ن‑سيدي ربّي. وورّين امنّ س‑ياسوع كولّو ويلّي ءيژلي ربّي اد‑كشمن س‑تودرت ءيدومن. سفلدن مدّن ءي‑لخبار ن‑سيديتنّغ غ‑كولّو تامازيرت‑ان. ءيمّا ايت‑يودايا سّهيّسن تيمغارين تيبرّانيّين ءيست‑تگُمّا مقّورنين لّي‑تعبادنين ربّي د‑وودماون مقّورنين ن‑تمدينت‑ان، ايلّيغ نكرن مدّن گّوتنين ار‑سّرفوفونّ بولُس د‑بارنابا سّمسرن‑تن زغ‑تمازيرت‑ان. ءيسّوس فلّاسن بولُس د‑بارنابا اگدرور ن‑يضارن‑نسن اد‑اسن‑يگ تاماتارت، فتون س‑تمدينت ن‑يقونيّا. ءيمّا ءيمحضارن لّي‑فلن غ‑انطاكيّا، عمّرن نتني س‑لفرح ءولا س‑رّوح لقودوس. ءيكشم بولُس د‑بارنابا س‑تگمّي ن‑تژالّيت ن‑ايت‑يودايا غ‑يقونيّا غمكلّي سكارن غ‑تمدينين ياضني، ساولن ءي‑مدّن ايلّيغ يوورّي ءيگّوت ما‑يومنّ س‑ياسوع، گان زغ‑ايت‑يودايا ءولا ءيبرّانيين. ءيمّا ايت‑يودايا لّي‑ور‑رينين اد‑امنّ، نكرن ار‑سّهيّاسن ءيبرّانيين باش اد‑اسين تانوّاشت ف‑ايتماتن. ءيقاما غين بولُس د‑بارنابا كيگان د‑ووسّان، ار‑ساوالن ف‑سيديتنّغ س‑زّعامت. ءيفك‑اسن سيديتنّغ تاحكيمت اد‑سكارن لمعجيزات د‑تميتار تجهّدنين غ‑لگدّام ن‑مدّن‑ان، باش اد‑يسّانّ ءيزد لحقّ ا‑يگا‑واوال لّباراكا لّي‑س‑ا‑تبرّاحن. ايت‑تمدينت‑ان بضان ف‑سين. كرا ءيبيدّ د‑ايت‑يودايا، كرا ءيبيدّ د‑يرقّاسن. مشاوارن ءيلمّا كرا ن‑مدّن زغ‑يبرّانيين د‑ايت‑يودايا د‑يمغارن‑نسن، سكرن ف‑اد‑سّرفوفنّ بولُس د‑بارنابا، ءيرين ا‑تن‑كّاتن س‑يژران نغن‑تن. ءيمّا نتني سفلدن ف‑غايلّي فلّاسن نوّان، روولن س‑تمدينين ن‑ليسترا د‑داربا غ‑تمازيرت ن‑ليكونيّا ءولا س‑تسگيو ياضني ن‑تمازيرت‑ان، ار‑غين‑تبرّاحن س‑لخبار ءيفولكين. ءيلّا يان‑ورگاز غ‑ليسترا، كوشمن‑اس ءيضارن زغ‑لّيغ ءيلول، ءور‑جّو‑يفتي. ءيسكيوس ار‑يسفليد ءي‑مايلّي ءيتّيني بولُس ءي‑مدّن. ءيسّماقّل گيس بولُس، ءيژر‑ت يومن ايلّيغ ءيژضار ا‑يجّي. ييني‑اس س‑واوال ءيتجهّدن: «نكر‑د، تبيدّت ف‑يضارن‑نّك،» س‑يوكُي ءيبيدّ ف‑يضارن‑نس ءيفتو. لّيغ ژران مدّن ما‑يسكر بولُس، الّن اوال‑نسن ءينين س‑واوال ن‑ايت‑ليكونيّا: «هاتي گّوزن‑د ءيلاهات‑نّغ س‑دارنّغ، وورّين س‑سّيفت ن‑بنادم.» غالن ءيس‑يگا بارنابا ‹زافس›، ءيگ بولُس ‹هارماس› اشكو نتّان ا‑يساوالن س‑وگُّار. تلّا‑تگمّي ن‑‹زافس› غ‑برّا ن‑تمدينت. ياشك‑يد‑ونمغور ن‑ويلّي تعبادنين ءيلاه‑ان، ياوي‑د ءيزگارن س‑يمي ن‑تمدينت، اگُلن‑اسن تاگُّاتين ن‑يجدّيگن. ييري نتّان ءولا كولّو وييّاض ا‑ن‑سرسن تيغرسيو غ‑لگدّام ن‑بارنابا د‑بولُس ار‑تن‑تعبادن. لّيغ سفلدن ءيرقّاسن ءي‑مايان، بّين تيملسا‑نسن ازّلن س‑وامّاس‑نسن ءينين‑اسن س‑جّهد: «مايد را‑تناولم؟ هاتي بنادم كا‑نگا زوند كونّي. نوشكا‑د ناوي‑اون‑د لخبار ءيفولكين باش ا‑تفلم تيغاوسيوين‑اد خوانين لّي‑تسكارم، توورّيم تيسّانم ربّي لّي‑يدّرن. نتّان ا‑يسكرن ءيگنوان د‑واكال د‑يمدوان ءولا كولّو ما‑گيسن‑يلّان. كولّو مايد ءيزرين يودجا مدّن غ‑كرايگاتّ تامازيرت اد‑زايدن غ‑وغاراس نّا‑ران. والاينّي ءور‑كُن‑يفيل بلا تاماتارت ن‑يس‑يلّا نتّان، اشكو ءيملا‑ياون‑د منشك ا‑باهرا‑يفولكي. ار‑اون‑د‑ياكّا انژار زغ‑يگنوان ءولا تامگرا غ‑وزمز‑نس. ار‑يشّباع اديس‑نّون س‑ومشّو ءيعمّر ءول‑نّون س‑لفرح.» غمكاد ا‑ينّا بارنابا د‑بولُس، والاينّي بحرا ءور‑حصارن مدّن‑ان كولّوتن اد‑ور‑غرسن غ‑لگدّام‑نسن. اشكين‑د ءيلمّا كرا ن‑ايت‑يودايا زغ‑انطاكيّا ن‑بيسيديّا د‑يقونيّا. سّهيّسن مدّن‑ان گّوتنين، ايلّيغ نكرن ار‑كّاتن بولُس س‑يژران. زوكرن‑ت س‑برّا ن‑تمدينت، غالن ءيس‑يمّوت. مونّ‑د ءيلمّا ءيمحضارن لولّين‑اس، س‑ينكر بولُس يوورّي س‑تمدينت. نديد ازكّا ءيفّوغ نتّان د‑بارنابا دّون س‑تمدينت ن‑داربا. ار‑يتبرّاح بولُس د‑بارنابا س‑لخبار ءيفولكين غ‑داربا، ايلّيغ ءيگّوت ما‑يوورّين گان ءيمحضارن ءي‑لماسيح. وورّين ءيلمّا نتني س‑تمدينين ن‑ليسترا د‑يقونيّا د‑انطاكيّا ن‑بيسيديّا، ار‑سّدوسن ءولاون ن‑يمحضارن ار‑تن‑زّعامن اد‑زگان غ‑وغاراس لّماسيح، ار‑اسن‑تّينين: «س‑ترفوفنت ءيگّوتن ا‑س‑د‑يقّان ا‑نكشم س‑تگلديت ن‑ربّي.» ءيستي بولُس د‑بارنابا غ‑كرايگاتّ امناگّار ماد‑اسن‑يتگّان ءيمغارن. ار‑تژالّان ار‑تاژومن ار‑تن‑فالن غ‑وفوس ن‑سيديتنّغ لّي‑س‑ومنّ. زرين زغ‑تمازيرت ن‑بيسيديّا س‑تمازيرت ن‑بامفيليّا. ار‑تبرّاحن س‑واوال ن‑ربّي غ‑تمدينت ن‑بارگا، زايدن ءيلمّا س‑لمرسا ن‑اتّاليّا. امژن اناو سّودون غ‑ومدا ايلّيغ روحن انطاكيّا. تامدينت‑ان ا‑زغ‑تن‑سافضن ايتماتن غ‑يسيزوار لّيغ‑تن‑فكان غ‑وفوس ن‑ربّي ا‑يبارك غ‑تووري‑نسن. غمكان ا‑س‑كمّلن تاووري‑ان. لّيغ كشمن س‑انطاكيّا، سّمونّ‑د ايت‑ومناگّار. ءينين‑اسن ف‑كولّو ما‑سرسن‑يسكر ربّي، ءولا مامنك ا‑يرژم ءيمي ءي‑ايت‑تميزار ياضني اد‑امژن اغاراس لّماسيح. قامان د‑يمحضارن ن‑غين كرا ن‑ييرن. اشكين‑د كرا ن‑مدّن زغ‑تمازيرت ن‑يودايا س‑انطاكيّا، بدون ار‑سّلمادن ايتماتن ار‑تّينين: «ءيغ‑ور‑تژّولّيم ءي‑دّات‑نّون غمكلّي ءيتّيني شّرع ن‑موسا، ءور‑را‑تيژضارم ا‑تنجمّ.» ءيژي ديدسن بولُس د‑بارنابا ف‑واوال‑اد ار‑ديدسن‑تمجاحادن، ايلّيغ سكرن ايتماتن ن‑ومناگّار ف‑اد‑ازنّ بولُس د‑بارنابا د‑كرا غ‑وييّاض س‑وروشاليم، باش اد‑سقسان ءيرقّاسن د‑يمغارن ف‑تغاوسا‑ياد. سافضن‑تن غاكودان، زرين غ‑تميزار ن‑فينيقيّا د‑ساميرا، اوين لخبار ءي‑ايت‑تميزار‑ان ف‑مامنك اد‑ومژن ءيبرّانيين اغاراس لّماسيح. فرحن ايتماتن كولّوتن لّيغ سفلدن ءي‑لخبار‑اد. لّيغ روحن ءوروشاليم سّمرحبان سرسن ايت‑ومناگّار د‑يرقّاسن د‑يمغارن. ييني‑اسن بولُس د‑بارنابا ف‑كولّو ما‑سرسن‑يسكر ربّي. والاينّي نكرن كرا ن‑يمومنّ لّمدهب ن‑يفاريسين ءينين‑اسن: «ءيقّان‑كُن‑د ا‑توصّام ءيبرّانيين اد‑ژّالّن ءي‑دّات‑نسن ار‑سكارن س‑شّرع ن‑موسا.» مناگّارن ءيلمّا ءيرقّاسن د‑يمغارن باش اد‑مشاوارن ف‑تغاوسا‑ياد. ييگات‑واوال ايلّيغ ءينكر بطرُس ييني‑اسن: «واي‑ايتما، تسّنم غ‑ووسّان زوارنين ءيستي‑يّي ربّي زغ‑گيگون باش اد‑سفلدن ءيبرّانيين ف‑يمي‑نو ءي‑لخبار ءيفولكين امنّ سرس. ربّي ءيسّنّ ما‑يلّان غ‑وول ن‑كولّو مدّن، ءيمل‑اغ غاكودان ءيس‑يرضا ف‑يبرّانيين، اشكو ءولا نتني ءيفكا‑ياسن رّوح لقودوس غمكلّي‑اغ‑ت‑يفكا نكُّني. ءور‑تن‑يبضي ديدنّغ، اشكو ءيسّغوس ءولاون‑نسن ءولا نتني لّيغ ءومنّ س‑ياسوع. ءيمّا غيلاد، ماخ ايلّيغ ترام ا‑تژيم د‑ربّي، تگم تاژايت ف‑يمحضارن‑ان لّي‑مي‑ور‑نژضار ا‑ستّ‑ناسي نكُّني ءولا ءيمزوورا‑نّغ؟ ءوهو، نومن ءيزد لحنانت ن‑سيديتنّغ ياسوع ا‑س‑ننجم، د‑غمكاد ا‑س‑راد‑نجمن ءولا نتني.» فسّان ايتماتن‑ان كولّوتن، سفلدن ءيلمّا ءي‑ماد‑اسن‑يتّيني بارنابا د‑بولُس ف‑لمعجيزات د‑تميتار تجهّدنين لّي‑يسكر ربّي ف‑وفوس‑نسن غ‑گر ايت‑تميزار ياضني. لّيغ كمّلن اوال‑نسن، ءينكر ياعقوب ييني‑اسن: «واي‑ايتما سفلدات‑يّي. ءينّا‑ياغ سيمعان ف‑مامنك اد‑اغ‑يملا ربّي غ‑يسيزوار ءيس‑يرا ا‑يژلي زغ‑گر ءيبرّانيين كرا ن‑مدّن اد‑گن وينس. غمكاد اد‑نّان ءولا لانبيا غ‑وارّاتن ن‑ربّي ءينّا: ‹تيگيرا ن‑مايان راد‑د‑وورّيغ، بنوغ تيگمّي ءيخُلان ن‑داود، بنوغ ءيغوربان‑نس لّي‑ضرنين. را‑ستّ‑يد‑سّنكرغ باش اد‑وورّين كولّو ايت‑تميزار ياضني ار‑سيگّيلن س‑سيدي ربّي، ءولا كولّو ءيبرّانيين لّي‑مي‑غريغ اد‑گن وينو. غمكاد ا‑س‑ينّا سيدي ربّي لّي‑يسكارن كولّو ماياد، ءيتياوسّان دارس زغ‑يسيزوار.› » ءيزايد ياعقوب ييني‑اسن: «ف‑ماياد ا‑ف‑راد‑ينيغ نكّي: را‑ياف ا‑ور‑نتشقو د‑ايت‑تميزار ياضني لّي‑ومژنين اغاراس ن‑ربّي، والاينّي اد‑اسن‑نازن يات‑تبرات نيني‑اسن اد‑تانفن ءي‑يركان لّاصنام ءولا لفساد، ءولا‑دا‑شتّان تيفيّي ن‑ما‑يقاجّين ءولا ءيدامّن. اشكو ميارن مدّن غ‑كرايگاتّ تامدينت ا‑فلّاسن‑اقران شّرع ن‑موسا غ‑تگُمّا ن‑تژالّيت، ار‑تن‑توصّان ا‑سرس‑سكارن، كرايگاتّ اسّ ن‑وسونفو زغ‑تاسوت ن‑تاسوتين سول س‑غيلاد.» مشاشكان‑د ءيلمّا ءيرقّاسن د‑يمغارن د‑ايت‑ومناگّار كولّوتن، سكرن ف‑اد‑ستين كرا ن‑مدّن‑نسن اد‑مونّ د‑بولُس د‑بارنابا س‑انطاكيّا. ستين ياهودا لّي‑مي‑تّينين بارسابا، نتّان د‑سيلا. نتني، ار‑تن‑توقّارن ايتماتن كولّوتن. ازنّ ديدسن يات‑تبرات، تياران گيس ءيواليون‑اد: «زغ‑ايتماتون ءيرقّاسن ءولا ءيمغارن، ءي‑ايتماتنّغ ن‑تميزار ياضني غ‑انطاكيّا د‑سوريّا د‑كيليكيّا. اد‑اون‑تيلي سّلامت. نسفلد ف‑كرا ن‑مدّن ءوشكان‑ين زغ‑دارنّغ ءينين‑اون كرا‑س‑اون‑ت‑سّطيّرن ايلّيغ توسيم تاغوفت ف‑يواليون‑نسن. والاينّي ءورد نكُّني ا‑تن‑ين‑يوزنّ. مايان ا‑ف‑د‑نمناگّار غيلاد، نمشاشكا‑د كولّواغ ا‑نستي كرا ن‑مدّن نازن‑تن‑ين س‑دارون، ا‑ن‑مونّ د‑ايتماتنّغ عزّانين بارنابا د‑بولُس لّي‑فكانين ءيخفاون‑نسن ف‑يسم ن‑سيديتنّغ ياسوع لماسيح. غمكاد ا‑ف‑ن‑نوزن ياهودا د‑سيلا اد‑اون‑ينين ف‑كولّو مايد‑اون‑ين‑نورا. اشكو ءيملا‑ياغ‑د رّوح لقودوس ءولا ءيخف‑نّغ، ا‑ور‑فلّاون‑نگ كرا ن‑تاژايت ابلا تيغاوسيوين‑اد هيّانين: ا‑ور‑تشتّام ما‑يتياوغراسن ءي‑لاصنام ءولا ءيدامّن ءولا تيفيّي ن‑ما‑يقاجّين، تاگّوگم زغ‑لفساد. افولكي ا‑راد‑اون‑ييلي، ءيغ‑ا‑تّانفم ءي‑تغاوسيوين‑اد. ا‑كُن‑يعاون ربّي.» سافضن‑تن ءيلمّا س‑انطاكيّا. لّيغ‑ن‑لكمن تامدينت‑ان، سّمونّ‑د ايت‑ومناگّار كولّوتن فكن‑اسن تابرات. لّيغ‑تّ‑غران نتني، فرحن س‑يواليون ن‑يرقّاسن لّي‑س‑تن‑زّعامن. ءيساول ءيلمّا ياهودا د‑سيلا س‑ايتماتن‑ان، ار‑تن‑زّعامن ار‑تن‑سّدوسن، اشكو گان ءولا نتني زغ‑ويلّي ءيتّينين ءيواليون نّا‑ياسن‑يمالا ربّي. تيگيرا ن‑ما‑دارسن‑گاورن كرا ن‑ووسّان، سافضن‑تن ايتماتن س‑سّلامت، وورّين س‑دار غويلّي‑تن‑وزنّين. ءيمّا بولُس د‑بارنابا قامان غ‑انطاكيّا، ار‑سّلمادن ار‑تبرّاحن س‑واوال ن‑سيديتنّغ نتني د‑وييّاض گّوتنين. يان‑واسّ ءيساول بولُس س‑بارنابا ييني‑اس: «ا‑نوورّي س‑دار ايتماتن غ‑تمدينين كولّوتنت لّي‑غ‑نبرّح س‑واوال ن‑سيديتنّغ، ا‑نژر مامنك اد‑گان.» ءيرا بارنابا اد‑ديدسن‑اوين يوحانّا لّي‑مي‑تّينين مارقُس. ءيمّا بولُس ءينّا‑ياس: «ءور‑يشوي ا‑ديدنّغ‑ناوي غوالّي‑اغ‑ن‑يفلن تاوالا‑لّي غ‑تمازيرت ن‑بامفيليّا، ءور‑ديدنّغ‑يكمّيل تاووري.» ءور‑ژضارن اد‑د‑مشاشكان ف‑تغاوسا‑ياد، بضون ءيفل يان يان. بارنابا ييوي ديدس مارقُس، ءيسّودو غ‑ومدا س‑يگزير ن‑قوبروس. ءيمّا بولُس ءيستي سيلا ا‑يگ اسمون‑نس. فكن‑تن ءيلمّا ايتماتن غ‑وفوس ن‑سيديتنّغ ا‑گيسن‑يبارك، فّوغن زغ‑غين. ار‑تكّان تامازيرت ن‑سوريّا ءولا كيليكيّا ار‑سّدوسن ءيمناگّارن ن‑ايتماتن. ار‑يتمودّو بولُس ايلّيغ ءيزري زغ‑تمدينت ن‑داربا ءيروح تامدينت ن‑ليسترا. ييلي غين يان‑ومحضار لّماسيح ءيسم‑نس تيموتاوس، ءيگ يوس ن‑يات‑تمومنت ءولّت‑يودايا ءيمّا باباس ءيگا گو‑يونان. ايتماتن غ‑ليسترا ءولا غ‑يقونيّا ار‑كولّو‑تّينين ف‑تيموتاوس ءيس‑يگا امومن ءيفولكين. ييري بولُس ا‑ت‑ديدس‑ياوي. ءيژّالّ‑اس غاكودان ءي‑دّات‑نس، اشكو ايت‑يودايا غ‑تمدينت‑ان سّنّ ءيس‑يگا باباس ابرّاني. دّون ءيلمّا ار‑تكّان تيمدينين، ار‑تاوين لخبار ءي‑ايتماتن ف‑مايلّي‑ف‑د‑مشاشكان ءيرقّاسن د‑يمغارن غ‑وروشاليم، ار‑تن‑توصّان اد‑سكارن س‑يواليون‑ان. غمكاد ا‑س‑ا‑تدوسن ءيمناگّارن ن‑ايتماتن غ‑وغاراس لّماسيح، ار‑تّيگاتن اسّ ف‑واسّ. ءور‑تن‑يودجي رّوح لقودوس اد‑تبرّاحن س‑واوال ن‑ربّي غ‑تمازيرت ن‑اسيّا. زايدن غاكودان ار‑تكّان تامازيرت ن‑فريجيّا ءولا گالاطيّا. لّيغ لكمن تاما ن‑ميسيّا ءيرين اد‑كشمن س‑تمازيرت ن‑بيتينيّا، والاينّي ءور‑تن‑يودجي رّوح ن‑ياسوع. زرين غاكودان ف‑ميسيّا، دّون س‑لمرسا ن‑تروّاس. غ‑يض‑ان ا‑يوارگا بولُس يان‑ورگاز گو‑ماكيدونيّا ءيبيدّ ءيضالب‑ت باهرا ييني‑اس: «اشك‑يد س‑ماكيدونيّا تعاونت‑اغ.» لّيغ ءيژرا بولُس تاوارگيت‑ان، نسكر ف‑ا‑ندّو غاكودان س‑تمازيرت ن‑ماكيدونيّا، اشكو نسّن ءيس‑اغ‑ن‑يغرا ربّي غمكان اد‑اسن‑ناوي لخبار ءيفولكين. نامژ اناو نبّي زغ‑تروّاس س‑يگزير ن‑ساموتراكي. نديد ازكّا نلكم لمرسا ن‑نيابوليس. نامژ غين اغاراس س‑فيليبّي. تگا نتّات تامدينت ءيمقّورن غ‑تسگا‑يان ن‑ماكيدونيّا، بنان‑تّ رّومان. نگاور غين كرا ن‑ووسّان. غ‑واسّ ن‑وسونفو نفّوغ س‑برّا ن‑تمدينت ندّو س‑تاما ن‑واسيف، اشكو ننّا د‑يخف‑نّغ را‑ييلي غين كرا ن‑ماني غ‑ا‑تمونون ايت‑يودايا ار‑گيس‑تژالّان. نسكيوس ار‑نساوال د‑تمغارين لّي‑ن‑مونّين غين. تيلي گيسنت يات‑تمغارت ءيسم‑نس ليديّا، تگا ءولّت‑تاياتيرا ار‑تزّنزا تّوب اژگُّاغ. تگا زغ‑تيلّي تعبادنين ربّي. ءيخدم سيديتنّغ غ‑وول‑نس غ‑تاساعت‑ان ايلّيغ تومن س‑كولّو مايلّي ءينّا بولُس. نسّدّم‑تّ ءيلمّا غ‑وامان نتّات د‑ايت‑تگمّي‑نس. تضالب زغ‑گينّغ: «ءيغ‑يّي‑تگام د‑تاد يومنّ س‑سيديتنّغ، اشكاد‑د تگّوزم غ‑تگمّي‑نو.» تامژ گينّغ. يان‑واسّ نفّوغ نيري ادغار ن‑تژالّيت، س‑نمناگّار يات‑تفروخت تگا تيسمگت. ءيلّا گيس يا‑لّجنّ لّي‑دار تاحكيمت اد‑اس‑يمالا ما‑را‑يجرو. ءيد‑باب‑نس ار‑فلّاس‑تامژن ءيقاريدن گّوتنين زغ‑مدّن لّي‑رانين اد‑يسّانّ ما‑راد‑اسن‑ييلي. ءيمّا نتّات، تضفار بولُس د‑وسمون‑نس ار‑تّغوّات ار‑فلّانّغ‑تّيني: «مدّن‑اد گان ءيخدّامن ن‑ربّي اماتّوي. ار‑اون‑تبرّاحن ف‑مامنك ا‑را‑تيژضارم ا‑تنجمّ.» ار‑بدّا‑تسكار غمكان كيگان د‑ووسّان. ار يان‑واسّ طيّر‑اس ءي‑بولُس باهرا، ءيگراول گيس يامر لجنّ: «س‑يسم ن‑ياسوع لماسيح، فّوغ زغ‑گيس.» ءيفّوغ لجنّ غاكودان. لّيغ ژران ءيد‑باب ن‑تسمگت ءيس‑ور‑سول‑را‑فلّاس‑تامژن يات، غوين بولُس د‑سيلا زوكرن‑تن س‑سّوق س‑دار غويلّي تحكامنين. دحين‑تن‑ين س‑لگدّام ن‑يمغارن لّمحكاما ن‑رّومان ءينين: «غويد گان ايت‑يودايا، سّمروين تامدينت‑نّغ باهرا. ار‑تبرّاحن ف‑كرا ن‑تنباضين، ءور‑فلّانّغ‑يحلّا ا‑تنت‑نقبل ءولا‑دا‑سرسنت‑نسكار نكُّني ن‑ايت‑روما.» بزگن فلّاسن غويلّي‑اسن‑سوتلنين. نكرن ءيمغارن لّمحكاما ءوصّان ءيمخزنيين اد‑فلّاسن‑بّين تيملسا سّغورشن‑تن. لّيغ‑تن‑وتن باهرا، گرن‑تن‑ين غ‑لحبس، ءوصّان انگابال لّحبس ا‑يسّدوس ءي‑يمي. لّيغ ءيسفلد‑ونگابال ءي‑لوصيت‑اد، ءيگ‑تن‑ين غ‑تحانوت ن‑والّاغ، ءيقّن ءيضارن‑نسن غ‑گر‑تفرسا ژّاينين. غ‑طوژّونت ن‑يض‑ان ار‑يتژالّا بولُس د‑سيلا ار‑تّيريرن ار‑تالغن ربّي. ار‑اسن‑سفليدن ءيحبّاسن ياضني. س‑يمّوسّا‑واكال س‑جّهد، ندودين ءيغوربان زغ‑لّساس، رژمن ءيماون لّحبس كولّوتن، فسينت سّناسل ف‑كرايگاتّ يان. ءيتّفاق‑د‑ونگابال، ءيژر ءيماون لّحبس رژمن، ءيغال ءيس‑روولن ءيحبّاسن. ءيلدي‑د تاژّيت ا‑ينغ ءيخف‑نس. ءيغر‑اس بولُس س‑جّهد ييني‑اس: «اد‑ور‑تهلكت ءيخف‑نّك. هاتي نلّا كولّواغ.» ءيغر‑ونگابال ءي‑ماد‑اس‑د‑يتاوين تيفاوت، يازّل س‑دارسن ءيضر‑ن ف‑يفادّن‑نس غ‑لگدّام ن‑بولُس د‑سيلا، ار‑سرس‑تكّات تاودا. ياوي‑تن ءيلمّا س‑برّا لّحبس ييني‑اسن: «وا‑يد‑سيدي، ما‑يّي‑د‑يقّانّ ا‑ت‑سكرغ باش اد‑نجمغ؟» ءينين‑اس: «امن س‑سيديتنّغ ياسوع تنجمت كيّي د‑ايت‑تگمّي‑نّك.» ساولن سرس س‑واوال ن‑سيديتنّغ نتّان د‑ايت‑تگمّي‑نس كولّوتن. ياوي‑تن غ‑تاساعت‑ان غ‑ييض، ءيسيرد‑اسن تيگّاس‑نسن. سّدّمن‑ت ءيلمّا غ‑وامان، نتّا د‑ايت‑تگمّي‑نس كولّوتن. ءيشّكشم‑تن س‑تگمّي ءيسرس‑اسن‑ين ماد‑شتّان، ءيفرح باهرا نتّا د‑كولّو ايت‑تگمّي‑نس اشكو وورّين ءومنّ س‑ربّي. زيكّ صباح نكرن ءيمغارن لّمحكاما ن‑رّومان، ازنّ كرا ن‑يمخزنيين س‑لحبس ءينين: «رژمات ءي‑يرگازن‑ان.» ياشك‑يد‑ونگابال س‑دار بولُس ييني‑اس: «ها‑يمغارن ءوزنّ‑د اوال اد‑اون‑رژمن. فّوغات غيلاد، تدّوم س‑سّلامت.» ءيمّا بولُس ءيساول س‑يمخزنيين ييني‑اسن: «ها‑نتني سّغورشن‑اغ غ‑لگدّام ن‑كولّو مدّن واخّا ءور‑گينّغ‑وفين كرا ءيفّوغن لقانون. دحين‑اغ‑د س‑لحبس، د‑نكُّني نگا زغ‑ويلّي طّافنين تاغامت غ‑ايت‑روما. ءيس‑ران اد‑اغ‑سّوفغن غيلاد س‑تنتلا؟ نكُّني ءور‑را‑نفّوغ. ءيخصّا ءيمغارن‑ان اد‑د‑اشكين سّوفغن‑اغ‑ن.» دّون ءيمخزنيين ءينين ءي‑يمغارن ف‑ماد‑نّان. ءيكساضن نتني لّيغ سفلدن ف‑بولُس د‑سيلا ءيس‑دارسن لحقّ ن‑ايت‑روما. اشكين‑د ضالبن زغ‑گيسن اد‑اسن‑صامحن، اوين‑تن ءيلمّا س‑برّا ضالبن‑تن اد‑فّوغن تامدينت. غمكان ا‑س‑فّوغن زغ‑لحبس، دّون ءيلمّا س‑تگمّي ن‑ليديّا. مناگّارن گيس د‑ايتماتن ار‑تن‑زّعامن، امژن ءيلمّا اغاراس. زرين زغ‑تمدينت ن‑امفيبوليس ءولا ابولونيّا، لكمن تامدينت ن‑تاسالونيكي. تيلي غين يات‑تگمّي ن‑تژالّيت ن‑ايت‑يودايا. ءيكشم سرس بولُس غمكلّي ءيسكار غ‑تمدينين ياضني. كراض‑ووسّان ن‑وسونفو ار‑غين‑يساوال د‑مدّن، ار‑اسن‑يمالا ما‑يتياران غ‑وارّاتن ن‑ربّي ار‑اسن‑يتّيني: «ءيقّان‑د غوالّي ءيگان لماسيح ا‑يرفوفن باهرا، ءينكر‑د ءيلمّا زغ‑لموت.» ار‑اسن‑يتّيني: «ياسوع لّي‑ف‑ا‑ياون‑تبرّاحغ، نتّان ا‑يگان لماسيح لّي‑س‑ا‑تّقلم.» امنّ كرا ن‑ايت‑يودايا س‑مايلّي‑اسن‑يتّيني، نتني ءولا يان‑منّاو زغ‑يبرّانيين لّي‑تعبادنين ربّي، د‑كرا ن‑تمغارين ءيست‑تگُمّا مقّورنين غ‑تمدينت‑ان، وورّين كولّو بيدّن د‑بولُس د‑سيلا. ءيمّا وييّاض غ‑ايت‑يودايا ءوسين فلّاسن تانوّاشت. اوين‑د كرا ن‑يرگازن أُخشنّين زغ‑سّوق، غرن ءي‑مدّن گّوتنين اد‑ديدسن‑مونّ، سّدووين‑د تامدينت كولّوتّ. ازّلن س‑تگمّي ن‑ياسون، ار‑سيگّيلن س‑بولُس د‑سيلا باش ا‑تن‑سّوفغن س‑وامّاس ن‑مدّن. لّيغ ءور‑تن‑وفين، زوكرن ياسون د‑كرا ن‑ايتماتن ياضني س‑دار ءيمغارن ن‑تمدينت، ار‑تغوّاتن ار‑تّينين: «غويلّي سّگراولنين دّونيت كولّوتّ، هاتني ءوشكان‑د ءولا س‑غيد، ءيشّكشم‑تن ياسون س‑تگمّي‑نس. فّوغن نتني زغ‑لقانون ن‑قايصر، ار‑تّينين ءيلّا يان‑وگلّيد ياضني ءيسم‑نس ياسوع.» لّيغ سفلدن مدّن د‑يمغارن‑نسن ءي‑ماياد، مروين باهرا. ضالبن ءيلمّا فلّاسن ضّمانت زغ‑ياسون د‑ايتماتن ياضني، رژمن‑اسن. لّيغ‑د‑ضرنت تيلّاس، نكرن ايتماتن سافضن بولُس د‑سيلا س‑بيريّا. لّيغ لكمن تامدينت‑ان، كشمن س‑تگمّي ن‑تژالّيت ن‑ايت‑يودايا. مدّن‑ان ن‑بيريّا، ءور‑قّورن ءيخفاون‑نسن زوند ايت‑تاسالونيكي. ار‑تّيرين اد‑سفليدن ءي‑واوال ن‑سيديتنّغ ار‑تّ‑گيس‑تاوين باهرا، ار‑سيگّيلن غ‑وارّاتن ن‑ربّي اسّ ف‑واسّ، باش اد‑ژرن ءيس‑يُغژان مايلّي‑اسن‑يتّيني بولُس. ييگات ما‑يوورّين يومن زغ‑ايت‑يودايا ءولا كرا ن‑تمغارين تيبرّانيّين ءيست‑تگُمّا مقّورنين د‑يرگازن ءيبرّانيين گّوتنين. ءيمّا ايت‑يودايا غ‑تاسالونيكي سفلدن ف‑مامنك ا‑يتبرّاح بولُس س‑واوال ن‑ربّي غ‑بيريّا. دّون سّهيّسن مدّن سّدووين ءولا تامدينت‑ان. نكرن ايتماتن غاكودان، سافضن بولُس س‑تاما ن‑ومدا. ءيمّا سيلا د‑تيموتاوس قامان غ‑بيريّا. ءيدّو بولُس، اوين‑ت ءيمدّوكُّال‑نس ار تامدينت ن‑اتينا، فلن‑ت‑ين غين وورّين س‑بيريّا. يوصّا‑تن بولُس اد‑ينين ءي‑سيلا د‑تيموتاوس ا‑ن‑دارس‑اشكين اد‑ور‑ماطلن. لّيغ ا‑سرسن‑يتقل بولُس غ‑اتينا، ءيژر تامدينت‑ان تعمّر س‑لاصنام ار‑تن‑تعبادن مدّن. طيّر‑اس باهرا. ءيكشم س‑تگمّي ن‑تژالّيت ار‑يساوال د‑ايت‑يودايا د‑يبرّانيين لّي‑تعبادنين ربّي. ار‑يساوال ءولا غ‑سّوق اسّ ف‑واسّ د‑وينّا گيس لّانين. ءيمناگّار كرا ن‑يمسلمدن لّفالسافا، گان ‹ءيبيكوريين› ءولا ‹رواقيين›. كرا گيسن ءينّا فلّاس: «غواد ءيجروبّوجن، ما‑يرا ا‑ييني؟» ءينين وييّاض: «ءيرواس ءيس‑ا‑يساوال ف‑كرا ن‑يلاهات ار‑تن‑تعبادن مدّن غ‑تميزار ياضني.» غالن نتني ءيس‑ا‑يساوال ف‑سين ءيلاهات اشكو ار‑يادّر ‹ياسوع› ءولا ‹تانكرا›. اوين‑ت ءيلمّا س‑وسگاور ن‑يمغارن ن‑تمدينت‑ان، ءيگا اسگاور لّي‑مي‑تّينين ‹اريوس‑باگوس›. ءينين ءي‑بولُس: «ءيس‑تريت اد‑اغ‑تملت ما‑يعنا‑ولمّود‑اد لّجديد لّي‑س‑ا‑تّبرّاحت؟ اشكو ار‑تساوالت ف‑كرا ن‑تغاوسيوين ءور‑جّو‑نسفلد ءي‑زوند نتنتي. نرا ا‑نيسّان ما‑تگا لمعنا‑نسنت.» غمكاد اد‑گان ايت‑اتينا ءولا كولّو ويلّي زدغنين غ‑تمدينت‑ان، ءور‑ا‑سّلهاون ءيخف‑نسن ابلا اد‑سفليدن ار‑ساوالن ف‑اينّا ءيگان تاغاوسا لّجديد. ءيبيدّ بولُس غ‑وامّاس ن‑وسگاور ييني‑اسن: «واي‑ايت‑اتينا، ژريغ‑كُن ار‑باهرا‑تّوقّارم ءيلاهات مكنّا گان. لّيغ ا‑تفجّيجغ غ‑تمدينت‑نّون ار‑تمنادغ ءيدغارن لّي‑غ‑ا‑تّعبادم. افغ‑ن يان غ‑يژران لّي‑دار تّژالّام، تياران گيس ءيواليون‑اد ‹ءيلاه ءور‑يتياوسّانّ›. هان غوالّي تّعبادم بلا‑تي‑تسّنم، نتّان ا‑ف‑راد‑اون‑ساولغ. اشكو ربّي لّي‑يسكرن دّونيت ءولا كولّو ما‑گيس‑يلّان، نتّان ا‑يگان سيديس ن‑يگنّا ءولا وين‑واكال. ءور‑ا‑يزدّغ غ‑تگُمّا تياوسكارنين س‑يفاسّن ن‑بنادم. ءور‑ت‑يخصّا كرا نسكر نكُّني، اشكو ءور‑يحتاجّا يات. نتّان ا‑ياكّان ءي‑كولّو مدّن تودرت د‑ونفوس ءولا كرايگاتّ كرا. ءيسكر زغ‑تاروا ن‑يان‑ورگاز كولّو تاسوتين ن‑بنادم اد‑زدغن غ‑تميزار ن‑دّونيت كولّوتّ. ءيحودّا‑ياسن ءيسگُّاسن ن‑تودرت، ءيگلي‑اسن يووتّا ن‑يمزدغن‑نسن. ءيسكر‑اسن غمكان باش اد‑سيگّيلن س‑ربّي ا‑ور‑يميل مناگّارن ديدس ءيسّانّ‑ت. والاينّي راد‑اون‑ينيغ، هان نتّا ءور‑ن‑ياگّوگ ف‑يان گينّغ اشكو ‹نتّان ا‑غ‑ندّر نفتو نيلي.› غمكلّي نّان كرا ن‑ايت‑ومارگ‑نّون: ‹ءولا نكُّني نگا تاروا‑نس.› «لّيغ نگا نكُّني تاروا ن‑ربّي، ءيلّا فلّانّغ ا‑ور‑نغال ءيس‑يگا نتّان زوند كرا ءيتياوسكارن زغ‑وورغ نغد نّوقرت نغد اژرو س‑يفاسّن ءولا لعاقل ن‑بنادم. غايد ءيزرين ءيصبر ربّي د‑ويلّي ءور‑سّينّين مايان. ءيمّا غيلاد يومر كولّو مدّن غ‑كرايگاتّ ماني اد‑فلن كولّو ماد‑سكارن يُخشن. اشكو ءيقصاد يان‑واسّ لّي‑غ‑را‑يوت لحوكم س‑لحقّ ف‑كولّو دّونيت ف‑وفوس ن‑يان‑ورگاز لّي‑يژلي، ءيمل سرس تاماتارت ءي‑كولّو مدّن لّيغ‑ت‑يد‑يسّنكر زغ‑لموت.» لّيغ سفلدن ءي‑مايد ءينّا بولُس ف‑يان‑د‑ينكرن زغ‑لموت، كرا گيسن ار‑يضصّا. ءيمّا وييّاض نّان: «ار تاوالا ياضني تساولت‑اغ ف‑تغاوسا‑ياد.» ءيفّوغ ءيلمّا بولُس زغ‑دارسن. كرا گيسن يومن س‑ما‑س‑اسن‑ينّا، مونّ ديدس. ءيلّا گيسن يان زغ‑يمغارن ن‑وسگاور‑ان ءيسم‑نس ديونيسيوس. تيلي يات‑تمغارت ءيسم‑نس داماريس، ءيلين كرا ن‑مدّن ياضني. تيگيرا ن‑مايان ءيفّوغ بولُس زغ‑اتينا ءيدّو س‑تمدينت ن‑كورينتوس. ءيمناگّار غين يان‑ورگاز گو‑يودايا ءيسم‑نس اكيلا، ءيگ لاصل‑نس زغ‑تمازيرت ن‑بونتوس. ءيكّا‑د تامازيرت ن‑يطاليا غ‑ووسّان‑ان، نتّا د‑تمغارت‑نس بريسكيلّا، اشكو قايصر كلوديوس يومر كولّو ايت‑يودايا اد‑فّوغن تامدينت ن‑روما. ءيدّو دارسن بولُس س‑تگمّي، ءيگاور دارسن ار‑ديدسن‑يتخدام، اشكو يات ا‑تگا‑تووري‑نسن نتني د‑بولُس، ار‑گنّون ءيخيّامن. كرايگاتّ اسّ ن‑وسونفو ار‑يتّيدو بولُس س‑تگمّي ن‑تژالّيت، ار‑يساوال د‑ايت‑يودايا د‑يبرّانيين، ءيگ‑ن تيقّي‑نس ا‑تن‑يرار اد‑امنّ زوند نتّا. لّيغ‑د‑يلكم سيلا د‑تيموتاوس زغ‑تمازيرت ن‑ماكيدونيّا، افن‑ين بولُس ءيلها س‑تبرّاحت ن‑واوال ن‑ربّي، ار‑يساوال س‑ايت‑يودايا س‑لمعقول ييني‑اسن: «ياسوع ا‑يگان لماسيح لّي‑س‑ا‑تّقلم.» والاينّي ژين ديدس ايت‑يودايا رگمن‑ت ايلّيغ فلّاسن ءيسّوس تيملسا‑نس ييني‑اسن: «دّنوب‑نّون ف‑يخف‑نّون. نكّي برّاغ گيگون. هاتي زغ‑غيلاد راد‑دّوغ س‑يبرّانيين.» ءيفّوغ زغ‑دارسن، ءيكشم س‑تگمّي ن‑يان‑وبرّاني ءيسم‑نس تيتيوس‑يوسطوس. ءيگا يان زغ‑ويلّي تعبادنين ربّي، تيلي‑تگمّي‑نس غ‑تاما ن‑تگمّي ن‑تژالّيت. ءيمّا كريسبوس امغار ن‑تگمّي ن‑تژالّيت، نتّا د‑ايت‑تگمّي‑نس كولّوتن، وورّين ءومنّ س‑سيديتنّغ. گّوتن وييّاض غ‑تمدينت‑ان ن‑كورينتوس وورّين ءومنّ لّيغ سفلدن ءي‑ماد‑اسن‑يتّيني بولُس. سّدّمن‑تن ءيلمّا ايتماتن غ‑وامان. يان‑ييض ءيساول‑د سيديتنّغ س‑بولُس غ‑توارگيت ييني‑اس: «اد‑ور‑تيكساطّ. زايد ار‑تساوالت د‑مدّن ا‑ور‑تفسّات. هاتي لّيغ ديدك، ءور‑يلّي ما‑را‑ك‑يلكم س‑گار، اشكو گّوتن مدّن‑ينو غ‑تمدينت‑اد.» ءيقاما بولُس غين اسگُّاس د‑مناصّ، ار‑اسن‑يسّلماد اوال ن‑ربّي. والاينّي غ‑ووسّان لّي‑غ‑يگا گاليون لحاكم غ‑تمازيرت‑ان ن‑اخايا، نكرن ايت‑يودايا كولّوتن غوين بولُس اوين‑ت س‑لمحكاما ءينين فلّاس: «ارگاز‑اد ار‑يترارا مدّن اد‑فّوغن زغ‑شّرع ن‑موسا ار‑تعبادن ربّي س‑مامنك ياضني.» ييري بولُس ا‑فلّاسن‑يرار اوال، س‑ينكر گاليون غاكودان ييني ءي‑ايت‑يودايا: «مراد ءيس‑تگا‑تغاوسا‑ياد تين كرا ءيفّوغن لقانون نغد كرا لّباضل يُخشنّ، راد‑اون‑سفلدغ. والاينّي ءور‑تگي ختاد غير تاغاوسا ن‑يواليون د‑يسماون ءولا شّرع‑نّون. زايدات تسّنفاصالم‑ت كونّي ءي‑نگراتون. ءور‑راد‑تحكامغ نكّي ف‑وان تيغاوسيوين‑اد.» ءيسّمسر‑تن زغ‑لمحكاما. فّوغن كولّو، غوين سوستانيس امغار ن‑تگمّي ن‑تژالّيت، ار‑ت‑كّاتن غ‑تاما لّمحكاما. ءيمّا لحاكم گاليون ءور‑تّ‑اكُّ‑گيسن‑ييوي. ءيقاما بولُس غ‑دار ايتماتن غ‑كورينتوس يان منّاو‑ووسّان. لّيغ‑ديدسن‑يمسافاض، ءيدّو س‑لمرسا ن‑كانخاريّا. غين ا‑غ‑يسّماكّرد اگايّو‑نس، ءيگ مايان تاماتارت ن‑كرا‑س‑يقاول ءي‑ربّي. يامژ ءيلمّا اناو ءيسّودو غ‑ومدا س‑تمازيرت ن‑سوريّا، ياوي ديدس اكيلا د‑بريسكيلّا. روحن تامدينت ن‑افسوس، ءيفل‑تن. ءيكشم نتّان س‑تگمّي ن‑تژالّيت ار‑يساوال د‑ايت‑يودايا. ضالبن زغ‑گيس ا‑ديدسن‑يقاما، والاينّي ءور‑يري ا‑يماطل غين. ءيمسافاض ديدسن ييني‑اسن: «ءيغ‑يرا ربّي راد‑د‑وورّيغ س‑دارون.» ءيفّوغ افسوس ءيسّودو غ‑ومدا، ايلّيغ ءيلكم لمرسا ن‑قايصريّا. يامژ اغاراس س‑وروشاليم، ءينسالّام د‑ايتماتن ن‑ومناگّار ن‑غين، ءيكمّل ءيلمّا س‑انطاكيّا. ءيقاما گيس كرا ن‑ووسّان، ءيمودّو ءيلمّا ار‑يتكّا تامازيرت ن‑گالاطيّا ءلا فريجيّا ار‑يسّدوس ءيمحضارن كولّوتن. غ‑ووسّان‑ان ا‑غ‑د‑يوشكا يان گو‑يودايا ءيسم‑نس ابولُس س‑افسوس. ءيگا لاصل‑نس زغ‑تمدينت ن‑يسكانداريّا. ءيگ واد باهرا ءيسّنّ مامنك ا‑يساوال، ييسّان ارّاتن ن‑ربّي باهرا. ءيسفلد ف‑ولمّود ن‑وغاراس ن‑سيديتنّغ، ار‑يساوال س‑مدّن س‑زّعامت ءيگّوتن. ار‑تن‑يسّلماد ف‑يسكّيرن ن‑ياسوع د‑يواليون‑نس غمكلّي گان، والاينّي ءور‑يسّين ف‑ودوم ابلا غوالّي‑س‑ا‑يسّدّام يوحانّا. يان‑واسّ ار‑يساوال س‑زّعامت غ‑تگمّي ن‑تژالّيت، تسفلد‑اس بريسكيلّا د‑اكيلا. اوين‑ت س‑تگمّي، ملن‑اس ءوگُّار ف‑وغاراس ن‑ربّي باش ا‑ت‑ييسّان غمكلّي ءيگا. ييري ءيلمّا ا‑يبّي امدا س‑تمازيرت ن‑اخايا. زّعامن‑ت ايتماتن ا‑يسكر غمكان، اران يات‑تبرات ءي‑يمحضارن غ‑اخايا، ضالبن‑تن ا‑ت‑ين‑شّكشمن س‑گراتسن. لّيغ ءيروح نتّان اخايا، ار‑باهرا‑يتعاوان غويلّي ءيبارك ربّي ءومنّ س‑لماسيح. اشكو ار‑يساوال س‑ايت‑يودايا غ‑لگدّام ن‑كولّو مدّن، ايلّيغ ءور‑ژضارن نتني ا‑فلّاس‑رارن اوال. ار‑اسن‑يمالا زغ‑وارّاتن ن‑ربّي ءيزد ياسوع ا‑يگان لماسيح لّي‑س‑ا‑تقلن. غاكود لّيغ ءيلّا ابولُس غ‑كورينتوس، ءيزري بولُس زغ‑طوژّونت ن‑تمازيرت‑ان، ءيلكم تامدينت ن‑افسوس. ياف‑ن غين كرا ن‑يمحضارن، ءيسقسا‑تن: «ءيس‑اون‑د‑يتياوفكا رّوح لقودوس لّيغ تومنم؟» ءينين‑اس: «ءور‑جّو‑نسفلد ءيس‑يلّا كرا ن‑رّوح لقودوس.» ءيسقسا‑تن ءيلمّا: «ما‑يگا‑ودوم لّي‑س‑تدّمّ؟» ءينين‑اس: «ءودوم لّي‑س‑ا‑يسّدّام يوحانّا.» ييني‑اسن بولُس: «ءيكّا‑تّين يوحانّا ار‑يسّدّام غويلّي رانين اد‑فلن دّنوب‑نسن وورّين س‑ربّي، والاينّي ءيساول‑اسن ف‑والّي را‑د‑ياشك تيگيرا‑نس، ا‑ت‑يگان د‑ياسوع. يوصّا‑تن اد‑سرس‑امنّ.» لّيغ سفلدن ءيمحضارن‑ان ءي‑مايد‑اسن‑ينّا بولُس، ءيسّدّم‑تن غ‑وامان س‑يسم ن‑سيديتنّغ ياسوع. ءيسرس فلّاسن ءيفاسّن‑نس، س‑د‑فلّاسن‑يگّوز رّوح لقودوس، ار‑ساوالن س‑يواليون ءيغريبن ار‑تبرّاحن س‑ماد‑اسن‑يمالا ربّي. ما‑يتگّان سين د‑مراو ن‑ورگاز اد‑گان. كراض‑ييرن ا‑يكشّم بولُس س‑تگمّي ن‑تژالّيت ار‑يساوال د‑مدّن س‑زّعامت، ءيگ‑ن تيقّي‑نس اد‑اسن‑يمل ءيس‑يُغژان مايلّي‑اسن‑يتّيني ف‑تگلديت ن‑ربّي. والاينّي كرا گيسن وورّين سّيقارن ءيخف‑نسن، ءور‑رين اد‑امنّ. ار‑رگّمن غ‑وغاراس لّماسيح غ‑لگدّام ن‑كولّو وييّاض. غاكودان ا‑يفّوغ بولُس زغ‑دارسن، ياوي ديدس ءيمحضارن، يوورّي س‑لمدرست ن‑تيرانّوس ار‑غين‑يساوال د‑مدّن اسّ ف‑واسّ. غمكان ا‑يزّري سين ءيسگُّاسن، ايلّيغ سفلدن كولّو ءيمزدغن ن‑اسيّا ءي‑واوال ن‑سيديتنّغ، ايت‑يودايا ءولا ءيبرّانيين. ار‑يسكار ربّي لمعجيزات ف‑وفوس ن‑بولُس، ءور‑جّو‑ژرين مدّن زوند نتنتي. ار‑تّاوين ءيشرويضن ءولا تيبانّكيو زغ‑وفوس‑نس ءي‑يموضان‑نسن، ار‑تجّين ار‑زگيسن‑تفّوغن لجنون أُخشنّين. ءيلين غين كرا ن‑ايت‑يودايا ار‑تلولّين ار‑سّوفوغن لجنون. غالن ءيس‑ژضارن اد‑سّوفوغن لجنون س‑يسم ن‑سيديتنّغ ياسوع، ار‑تن‑تامرن: «فّوغات س‑يسم ن‑ياسوع لّي‑س‑ا‑يتبرّاح بولُس.» غمكان اد‑سكارن سّا ن‑ايتماتن، تاروا ن‑يان‑ونمغور ن‑تگمّي ن‑ربّي ءيسم‑نس سكاوا. والاينّي ءيرور‑اسن لجنّ‑ان: «ياسوع سّنغ‑ت، ءولا بولُس سّنغ ما‑يگا، والاينّي ما‑تگام كونّي؟» ياكُي‑ن‑فلّاسن‑ومجنون ار‑گيسن‑يكّات ءينرو‑تن كولّوتن. روولن زغ‑تگمّي، تياگّاسن بّينت‑تملسا‑نسن. سفلدن كولّو ءيمزدغن ن‑افسوس ف‑ما‑يجران، ايت‑يودايا ءولا ءيبرّانيين. وورّين ءيكساضن كولّوتن، ءوقّرن ءيسم ن‑سيديتنّغ ياسوع باهرا. ءيمّا غويلّي ءومنّين، ءيگّوت گيسن ما‑د‑يوشكان ار‑تقرّان س‑يسكّيرن أُخشنّين لّي‑ستّين‑كّان ار‑تن‑سكارن. كيگان د‑يسحّارن ا‑د‑يسّمونّ ارّاتن‑نسن جدرن‑تن غ‑لگدّام ن‑مدّن. لّيغ حاسبن اتيگ ن‑وارّاتن‑ان، افن‑ين سمّوس ءيد‑مراو ن‑يد‑والف (000‏.50) ن‑وقاريد ن‑نّوقرت. غمكان ا‑س‑ا‑يتزاياد‑واوال ن‑سيديتنّغ س‑جّهد، يوورّي ءيتياوسّان غ‑كرايگاتّ ماني. تيگيرا ن‑مايان ءيسوانگم بولُس، ءيمل‑اس رّوح لقودوس ءيس‑ت‑يد‑يقّان ا‑يزري زغ‑ماكيدونيّا د‑اخايا س‑وروشاليم. ءينّا: «تيگيرا ن‑ماد‑كّيغ غين، ءيقّان‑يّي‑د اد‑ژرغ ءولا تامدينت ن‑روما.» يازن ءيلمّا سين ءيمعاوانّ‑نس تيموتاوس د‑اراستوس ا‑ت‑زوورن س‑ماكيدونيّا، ءيمّا نتّا سول‑ن‑يقاما يان كرا غ‑اسيّا. والاينّي غ‑ووسّان‑ان تنكر لفرتونت ءيگّوتن ف‑سّيبت ن‑وغاراس لّماسيح. ءيلّا غين يان‑وسيّاخ ءيسم‑نس ديميتريوس ار‑يتعدال تيگُمّا مژّينين زغ‑نّوقرت زوند تيگمّي لّي‑غ‑ا‑تعبادن ءيلاها ‹ارطاميس›. ار‑تامژن ءيسيّاخن ما‑يگّوتن ف‑تووري‑ان. ءيسّمون‑تن‑د كولّو ديميتريوس ييني‑اسن: «وا‑يرگازن، تسّنم ءيس‑ا‑نتامژ لخير ف‑تووري‑اد‑نّغ. والاينّي تسفلدم ءي‑غوان مي تّينين بولُس تژرم غايلّي ءيسكار، ار‑يتّيني ءيلاهات لّي‑سكرن ءيفاسّن ن‑بنادم ءورد ءيلاهات اد‑گان. هاتي ءيرور مدّن گّوتنين ءيجلو‑تن غيد غ‑افسوس ءولا غ‑كولّو تامازيرت ن‑اسيّا. ءورد غير تاووري‑نّغ ا‑را‑يخسر، والاينّي راد‑وورّين مدّن ار‑رگّمن ءولا غ‑تگمّي ن‑يلاها ءيمقّورن ارطاميس، ءينين ءيس‑ور‑تگي يات ختالّي كولّو تعبادن مدّن غ‑اسيّا ءولا دّونيت كولّوتّ.» لّيغ سفلدن ءي‑يواليون‑اد نكرن‑د گيسن ءيريين ار‑سّغويّون ار‑تّينين: «تامقّورت ا‑تگا ارطاميس ن‑ايت‑افسوس.» دووين باهرا، ايلّيغ تقربل‑تمدينت كولّوتّ. نكرن مدّن گّوتنين غوين سين ايت‑ماكيدونيّا زغ‑وسمون ن‑بولُس، ءيسماون‑نسن گايوس د‑اريستارخوس، زوكرن‑تن س‑وسايس لّي‑غ‑ا‑تمونون ايت‑تمدينت‑ان. بولُس ءيرا ا‑يفتو س‑وامّاس ن‑مدّن‑ان ا‑سرسن‑يساول، والاينّي ءور‑ت‑ودجين ايتماتن. كرا ن‑يمدّوكُّال ن‑بولُس، گان ءودماون مقّورنين ن‑تمازيرت‑ان، ازنّ‑اس ماد‑اس‑يتّينين: «ا‑ور‑تسّبايّنت ءيخف‑نّك غ‑وسايس ن‑تمدينت.» مروين مدّن ار‑سّغويّون، كود يان د‑ما‑يتّيني. ءيگّوت گيسن ما‑ور‑يسّينّ ما‑ف‑ن‑مونّ. ءينكر كرا گيسن غاكودان ءينين ءيزد يان‑ورگاز ءيسكاندر اد‑دار اوال، دحين‑ت‑ين ايت‑يودايا س‑لگدّام ن‑مدّن ا‑سرسن‑يساول. يالّ افوس‑نس ا‑تن‑يسّفسّا ييري اد‑اسن‑يمل ءيس‑ورد ايت‑يودايا ا‑يسّنكرن ءودووي. والاينّي لّيغ ژران ءيزد گو‑يودايا ا‑يگا، نكرن‑داغ ار‑سّغويّون ار‑تّينين: «تامقّورت ا‑تگا ارطاميس ن‑ايت‑افسوس.» زايدن سنات تاساعين اد‑سّغويّون س‑واوال‑ان. قامان غمكان ايلّيغ ءينكر‑وكتاتبي لّمحكاما. ءيسّفسّا‑تن ييني‑اسن: «واي‑ايت‑افسوس. ءيس‑يلّا ما‑ور‑يسّينّ تامدينت ن‑افسوس ا‑يگابلن تيگمّي ن‑ارطاميس تامقّورت د‑وژرو ن‑صّورت‑نس لّي‑د‑يضرن زغ‑يگنّا؟ كولّو دّونيت تسّن تيغاوسيوين‑اد. ءور‑يژضار يان اد‑اسنت‑يانف. ءيمّا غيلاد ءيلّا فلّاون ا‑تفسّام، ا‑ور‑تسكرم كرا ف‑ا‑كُن‑تّيگُراژ. ها‑كونّي تيويم‑د ءيرگازن‑اد س‑غيد واخّا ءور‑وكيرن تيگُمّا لّي‑غ‑ا‑نتعباد ءولا‑دا‑رگّمن غ‑يلاها‑نّغ. ءيغ‑يرا ديميتريوس ءولا ءيمدّوكُّال‑نس اد‑صرضن ءي‑كرا ن‑يان، ءيلّا فلّاسن اد‑دّون س‑لمحكاما. اشكو سكرن ءيمغارن لّمحكاما ءوسّان ا‑گيسن‑سفليدن ءي‑مدّن. را‑تيژضارم ا‑ن‑دارسن‑تمصاراضم، نغد ءيغ‑ترام كرا ياضني، ءيخصّا‑كُن ا‑تي‑تسّنفاصالم ءي‑نگراتون غ‑دار ءيمغارن ن‑تمدينت. والاينّي غايد دارنّغ ءيجران غاسّاد، ءيلّا گيس ما‑ف‑ا‑نتيكساض، ا‑ور‑سرنّغ‑اشتكّان لحوكّام ن‑رّومان، ءينين ءيزد نتني ا‑ف‑ينكر‑ودووي‑اد. ءور‑دارنّغ ما‑نتّيني ف‑يمرواين‑اد، اشكو ءور‑نژضار ا‑نيني ما‑ف‑د‑مونّ مدّن‑اد گّوتنين.» لّيغ ءينّا ماياد، ءيسّمسر‑تن س‑تگُمّا‑نسن. لّيغ تهنّا‑تمدينت، يازن بولُس ما‑د‑يسّمونون ءيمحضارن، ءيساول سرسن ءيزّعام‑تن. ءيمسافاض ديدسن، يامژ اغاراس س‑تمازيرت ن‑ماكيدونيّا. ار‑يتكّا تيسگيو‑ان ار‑يساوال س‑مدّن ار‑تن‑يزّعام، ايلّيغ ءيلكم تامازيرت ن‑يونان. ءيقاما غين كراض‑ييرن. والاينّي لّيغ ءيسكر ف‑ا‑يبّي امدا ا‑يوورّي س‑تمازيرت ن‑سوريّا، ءيسفلد ف‑كرا ن‑ايت‑يودايا ءيس‑د‑فلّاس‑مشاشكان ا‑ت‑هلكن. ييني ءيلمّا د‑يخف‑نس: «يوف اد‑وورّيغ د‑وغاراس‑ينو زريغ زغ‑ماكيدونيّا.» مونّ ديدس كرا ن‑ايتماتن. ءيلّا سوباتروس يوس ن‑بيروس زغ‑بيريّا، ييلي اريستارخوس د‑ساكوندوس زغ‑تاسالونيكي، ييلي گايوس زغ‑داربا نتّا د‑تيموتاوس، ييلي تيخيكوس د‑تروفيموس زغ‑اسيّا. دّون نتني زوورن‑اغ س‑تمدينت ن‑تروّاس ار‑سرنّغ‑تقلن. ءيمّا نكُّني، لّيغ ءيزري لعيد ن‑ورخصيص نامژ اناو زغ‑فيليبّي، نسّودو سمّوس‑ووسّان ايلّيغ‑ن‑ديدسن‑نمناگّار غ‑تروّاس. نقاما غين سّا ن‑ووسّان. غ‑واسّ لّحدّ نمناگّار‑د كولّواغ ا‑نبّي اغروم. ءيساول‑اغ بولُس، ييري ا‑يامژ اغاراس نديد ازكّا. ءيزايد ار‑يساوال ار طوژّونت ن‑ييض. ءيگاتنت تيفاوين غ‑وحانو ن‑وفلّا لّي‑غ‑نمناگّار. ييلي غين يان‑وعيّال ءيسم‑نس افتيخوس، ءيسكيوس غ‑يان‑وارّياح ار‑يتنودّوم. ءيزايد بولُس ف‑واوال‑نس ايلّيغ ءيسّايك ءيطس ف‑وعيّال‑ان، ءيضر زغ‑سنات‑تدوليو س‑واكال. اسين‑ت افن‑ت‑ين ءيمّوت. ءيمّا بولُس ءيگّوز ءيكنو‑ن فلّاس يامژ گيس، ييني‑اسن: «اد‑ور‑تاسيم تاغوفت، هاتي ءيدّر.» يوورّي‑د ءيلمّا بولُس س‑وفلّا، ءيبّي اغروم ءيشّ ديدنّغ. ءيزايد ار‑يساوال ايلّيغ‑دي‑تغلي تافوكت. غاكودان ا‑يفّوغ ءيمون د‑وغاراس. ءيمّا اعيّال ءيدّر، اوين‑ت س‑تگمّي‑نس وورّين فجّيجن باهرا. نفل بولُس نامژ اناو نسّودو س‑لمرسا ن‑اسّوس، اشكو ءيسكر ديدنّغ ا‑ن‑ديدس‑نمناگّار غين، ييري نتّان ا‑ن‑ياشك ف‑وضار‑نس. لّيغ‑اغ‑ن‑يلكم غ‑اسّوس ناوي‑ت ديدنّغ غ‑واناو، نسّودو غ‑ومدا س‑لمرسا ن‑ميتيليني. نديد ازكّا نزايد نسّودو س‑تاما ن‑يگزير ن‑خيّوس. نديد ازكّا نبّي س‑يگزير ن‑ساموس. نديد ازكّا نلكم لمرسا ن‑ميليتوس. ييري بولُس ا‑يانف ءي‑افسوس ا‑ور‑ن‑يماطل غ‑تمازيرت ن‑اسيّا، اشكو ءيرا باهرا ا‑ييلي غ‑وروشاليم غ‑لعيد ن‑وين سمّوس ءيد‑مراو ءيغ‑يژضار ا‑ن‑گيس‑ييلي. لّيغ ءيلّا بولُس غ‑ميليتوس يازن س‑يمغارن ن‑ومناگّار غ‑افسوس، ءيضالب‑اسن ادّ‑دارس‑اشكين. لّيغ‑د‑وشكان ييني‑اسن: «تسّنم كولّو ماد‑سكارغ زغ‑واسّ امزوارو لّي‑غ‑د‑دارون‑كشمغ س‑تمازيرت ن‑اسيّا. ار‑تخدامغ ءي‑سيديتنّغ س‑صّبر ءيگّوتن د‑يمطّاون ءولا غ‑ترفوفنت لّي‑يّي‑مدّين ايت‑يودايا. تسّنم ءيس‑ا‑ياون‑مالاغ كولّو ما‑را‑كُن‑ينفعا، ءور‑حصارغ ءيخف‑ينو. ار‑اون‑ت‑سّلمادغ غ‑لگدّام ن‑مدّن ءولا غ‑تگُمّا‑نّون. ار‑بدّا‑تّينيغ س‑لمعقول ءي‑ايت‑يودايا ءولا ءيبرّانيين اد‑فلن كولّو ماد‑سكارن يُخشن، وورّين س‑ربّي امنّ س‑سيديتنّغ ياسوع. «ءيمّا غيلاد ءيدحي‑يّي رّوح لقودوس اد‑دّوغ س‑وروشاليم. ءور‑سّينغ ما‑راد‑يّي‑يجرو غين. يات‑تغاوسا كاد‑سّنغ: غ‑كرايگاتّ تامدينت ار‑يّي‑يتّيني رّوح لقودوس س‑لمعقول ءيزد غين ا‑غ‑ا‑سري‑تقلن ءيسكراف ءولا تارفوفنت. ءيمّا نكّي ءور‑ا‑تحاسابغ تودرت‑ينو ءيس‑تگا كرا. ءور‑ريغ ابلا ا‑تازّالغ ارد روحغ تّمي ن‑وغاراس‑ينو، كمّلغ تاووري لّي‑يّي‑يفكا سيديتنّغ ياسوع، سّلكمغ لخبار ءيفولكين ف‑لباراكا ن‑ربّي. «ءيمّا كونّي كولّوكن لّي‑دار‑تلولّيغ ار‑اون‑تبرّاحغ ف‑تگلديت ن‑ربّي، سّنغ ءيس‑ور‑سار‑را‑تژرم ءودم‑ينو. والاينّي راد‑اون‑ينيغ غاسّاد: ءيغ‑يلّا ما‑گيگون‑يتّهلكن، ءورد نكّي ا‑ف‑لّان ءيدامّن‑نس. اشكو ءور‑حصارغ ءيخف‑ينو والاينّي مليغ‑اون ف‑كولّو ما‑گيگون‑يرا ربّي. اويات‑ستّ غيلاد غ‑يخف‑نّون، تاويم‑تّ ءولا غ‑تووروت كولّوتّ لّي‑ف‑كُن‑يرور رّوح لقودوس اد‑اس‑تگم ءينگابالن، تكسم امناگّار ن‑ربّي لّي‑يسغا س‑يدامّن‑نس. سّنغ ءوسّان لّي‑غ‑را‑كُن‑فلغ نكّي، را‑ن‑كشمن‑ووشّانّ شقانين س‑گراتون، راد‑سّياگّاسن تاوروت. راد‑نكرن ءولا كرا ن‑مدّن غ‑گراتون، ار‑سّگريويلن لحقّ باش ا‑ن‑لدّين ءيمحضارن ا‑تن‑تابعان. ف‑مايان ا‑ف‑راد‑اون‑ينيغ، رارات لعاقل‑نّون ار‑دي‑تسوينگيمّ مامنك ا‑ديدون‑سكارغ كراض ءيسگُّاسن غ‑ييض ءولا ازال ار‑بدّا‑تنصاحغ كرايگاتّ يان گيگون ار ءيمطّاون. «ءيمّا غيلاد را‑كُن‑فلغ غ‑وفوس ن‑ربّي، فلغ دارون اوال لّباراكا‑نس لّي‑يژضارن ا‑كُن‑يسّدوس ءيشّكشم‑كُن س‑تميخار گّوتنين لّي‑را‑ييلي ءي‑كولّو ويلّي ءيژلي اد‑گن وينس. ءور‑جّود نكّي ا‑ن‑يضمعن نّوقرت نغد ءورغ نغد تيملسا ن‑كرا ن‑يان گيگون. تسّنم ءيزد س‑يفاسّن‑ينو ا‑س‑ا‑دي‑تراراغ ماد‑حتاجّاغ نكّي ءولا اسمون‑ينو. كولّو ماد‑سكارغ، ار‑اون‑سرس‑مالاغ ءيس‑فلّانّغ‑يلّا ا‑نتنهاتاف غمكاد باش ا‑نعاون وينّا ضعفنين، ار‑نسوينگيم غ‑واوال ن‑سيديتنّغ ياسوع لّيغ ءينّا ‹امباركي ا‑يگا غوالّي ياكّان، ءوگُّار ن‑والّي ءيتامژن.› » غير ءيكمّل بولُس اوال‑اد، ءيضر نتّا ديدسن ف‑يفادّن‑نسن، ءيژّالّ ءيضالب ربّي. حبّلن‑ت‑يد ار‑گيس‑سّودونّ ار‑الّان كولّوتن. طيّر‑اسن باهرا اشكو ءينّا‑ياسن ءور‑سول‑را‑ت‑ژرن. مونّ ديدس ءيلمّا ار اناو. غمكان ا‑تن‑نفل، نسّودو زغ‑غين نبّي امدا س‑يگزير ن‑كوس. نديد ازكّا نلكم ءيگزير ن‑رودوس، نزايد س‑يگزير ن‑باتارا. ناف‑ن غين يان‑واناو ءيرا ا‑يبّي س‑تمازيرت ن‑فينيقيّا، نغلي سرس نسّودو گيس. ار‑نتمناد ءيگزير ن‑قوبروس ف‑وژلماض‑نّغ، نزايد ايلّيغ نلكم تامازيرت ن‑سوريّا. نگّوز غ‑تمدينت ن‑صور، اشكو غين اد‑ران ءيد‑باب ن‑واناو اد‑سرسن سّلاعت‑نسن. ناف‑ن غين كرا ن‑يمحضارن، نگّوز غ‑دارسن سّا ن‑ووسّان. ءينين ءي‑بولُس مايلّي‑اسن‑يملا رّوح لقودوس ا‑ور‑يدّو س‑وروشاليم. والاينّي لّيغ كمّلن‑ووسّان‑ان، نفّوغ زغ‑دارسن ا‑نزايد ف‑ومودّو‑نّغ. مونّ‑د ديدنّغ نتني كولّوتن ءولا تيمغارين‑نسن د‑تاروا‑نسن س‑برّا ن‑تمدينت. نوتش ف‑يفادّن‑نّغ غ‑تاما ن‑ومدا نژّالّ نضالب ربّي. نمسافاض ديدسن، نغلي‑داغ س‑واناو، وورّين نتني س‑تگُمّا‑نسن. نسّودو غ‑ومدا زغ‑صور س‑تمدينت ن‑بوتوليمايس. ننسالّام ءولا غين د‑ايتماتن، نزّري ديدسن غاسّان. نديد ازكّا نزايد ايلّيغ نلكم تامدينت ن‑قايصريّا. نگّوز غين غ‑تگمّي ن‑فيليبّوس ابرّاح لّخبار ءيفولكين. ءيگ نتّان يان زغ‑سّا ن‑يرگازن لّي‑ستين ايتماتن غ‑وروشاليم. ءيلينت دارس كّوژط ءيستيس ءور‑تاهيلنت، ار‑تّينينت ءيواليون نّا‑ياسنت‑يمالا ربّي. نگاور دارس كرا ن‑ووسّان. غاكودان ا‑د‑يوشكا يان‑ورگاز زغ‑تمازيرت ن‑يودايا ءيسم‑نس اگابوس، ءيگ واد ءيتّينين ءيواليون نّا‑ياس‑يمالا ربّي. ءيروح‑اغ‑د، ياسي تاگُست ن‑بولُس، ءيكرس سرس ءيخف‑نس غ‑يضارن ءولا ءيفاسّن ييني‑اغ: «سفلدات ءي‑مايد ءينّا رّوح لقودوس، ‹غمكاد ا‑راد‑كرسن ايت‑يودايا بو‑تاگُست‑اد غ‑وروشاليم، فكن‑ت غ‑يفاسّن ن‑يبرّانيين.› » لّيغ نسفلد ءي‑ما‑ينّا، ننكر نكُّني د‑ايتماتن ن‑غين نضالب زغ‑بولُس باهرا ا‑ور‑يدّو س‑وروشاليم. ءيرار‑اغ‑د نتّان ييني: «ما‑ف‑ا‑تالّام ار‑تسّياگّاسم ءول‑ينو؟ ها‑نكّي ءوجادغ ءورد غير اد‑تياوكرّافغ والاينّي ارد مّتغ غ‑وروشاليم ف‑يسم ن‑سيديتنّغ ياسوع.» بولُس ءور‑سول‑يري ا‑سرنّغ‑يسفلد، نفسّا غاكودان نيني: «ا‑ييلي ما‑يرا سيديتنّغ.» نقاما غين كرا ن‑ووسّان، نسّمون ءيلمّا تيغاوسيوين‑نّغ نمون‑داغ د‑وغاراس س‑وروشاليم. مونّ‑د ديدنّغ كرا ن‑يمحضارن ن‑ايت‑قايصريّا، اوين‑اغ‑د س‑تگمّي ن‑والّي را‑دار‑نگّوز، ءيسم‑نس مناسون. ءيگا نتّا گو‑قوبروس ءيگ يان زغ‑يمزوورا لّي‑ومژنين اغاراس ن‑سيديتنّغ. لّيغ نلكم ءوروشاليم، فرحن سرنّغ ايتماتن شّكشمن‑اغ س‑دارسن. نديد ازكّا نمون د‑بولُس ا‑نژر ياعقوب، ءيلين غين ءيمغارن كولّوتن. ءينسالّام بولُس ديدسن، ار‑اسن‑يمالا كولّو ما‑يسكر ربّي ف‑وفوس‑نس غ‑دار ايت‑تميزار ياضني. لّيغ سفلدن ءي‑ما‑ينّا ار‑كولّو‑تالغن ربّي. ءينين ءيلمّا ءي‑بولُس: «وا‑گماتنّغ، تژريت كيگان د‑وافضان ن‑ايت‑يودايا ا‑د‑يوورّين امنّ س‑سيديتنّغ، ار‑كولّو‑تّيرين شّرع ن‑موسا باهرا. نتني سفلدن فلّاك ءيس‑ا‑تسّلمادت ايت‑يودايا لّي‑زدغنين غ‑تميزار ياضني ا‑ور‑سول‑سكارن س‑شّرع ءولا‑دا‑تژالّان ءي‑يحشماي‑نسن ءولا‑دا‑تامژن سول غ‑لعادات ن‑يمزوورا‑نّغ. ما‑را‑نسكر غيلاد؟ اشكو راد‑يسّانّ ءيس‑دي‑توشكيت س‑غيد. سكر مايد راد‑اك‑نيني. لّان دارنّغ كّوژ ءيرگازن قاولن ءي‑ربّي س‑واوال ءيزگان. اوي‑تن تسّغوست ءيخف‑نّك ديدسن، تفكت فلّاسن ما‑تن‑يخصّان ءي‑وسماكّرد ن‑يگويّا‑نسن. غمكاد ا‑س‑راد‑ژرن مدّن كولّوتن ءور‑يگي يات غايلّي مي فلّاك سفلدن. راد‑يسّانّ ءيس‑ا‑تسكارت س‑شّرع ن‑موسا. ءيمّا ءيبرّانيين لّي‑ومنّين س‑لماسيح، نوزن‑اسن يات‑تبرات، نيني‑اسن ف‑مايلّي‑ف‑د‑نمشاشكا. نوصّا‑تن ا‑ور‑شتّان ما‑يتياوغراسن ءي‑لاصنام ءولا ءيدامّن ءولا تيفيّي ن‑ما‑يقاجّين، اگّوگن زغ‑لفساد.» نديد ازكّا ياوي بولُس ءيرگازن‑لّي، ءيكمّل ديدسن اسغوس غمكلّي ءيگا دار ايت‑يودايا. ءيكشم ءيلمّا س‑تگمّي ن‑ربّي ييني ءي‑ينمغورن ف‑مان اسّ ا‑راد‑كمّلن ءوسّان ن‑وسغوس‑نسن باش ا‑ن‑سّاكمورن تيغرسيو ءي‑ربّي ف‑كرايگاتّ يان گيسن. ءور‑يقاما والو اد‑كمّلن سّا ن‑ووسّان، س‑يلّا بولُس غ‑تگمّي ن‑ربّي، ژرن‑ت كرا ن‑ايت‑يودايا لّي‑د‑كّانين تامازيرت ن‑اسيّا. سّهيّسن مدّن كولّوتن، غوين غ‑بولُس ار‑تغوّاتن ار‑تّينين: «واي‑ايت‑ربّي، اشكاد‑د تبيدّم ديدنّغ. ارگاز‑اد ءيگا واد ءيتكّان كرايگاتّ ماني، ار‑يسّلماد كولّو مدّن اد‑رگّمن غ‑ايت‑دارنّغ ءولا شّرع‑نّغ ءولا تيگمّي‑اد ن‑ربّي. هاتي غيلاد ءيشّكشم‑د كرا ن‑يبرّانيين س‑تگمّي ن‑ربّي، ءيسّحرم ادغار امژلاي.» نّان نتني غمكان اشكو ژران تروفيموس گو‑افسوس ءيمون د‑بولُس غ‑تمدينت، غالن ءيس‑ت‑يد‑ديدس‑ييوي س‑تگمّي ن‑ربّي. تزايد تقربل‑تمدينت كولّوتّ. ازّلن‑د مدّن گّوتنين، امژن بولُس زوكرن‑ت‑يد زغ‑تگمّي ن‑ربّي، قّنّ‑د فلّاس ءيفلوان ءيرين ا‑ت‑نغن. غاكودان ا‑يسفلد‑ونمغور ن‑يعسكرين ن‑رّومان ءي‑لخبار ن‑يس‑كولّو‑تدووي ءوروشاليم. ياوي‑د كرا ن‑يعسكرين د‑لقبطانات‑نسن ازّلن‑د س‑دارسن. لّيغ ژران مدّن انمغور‑ان د‑يعسكرين‑نس رژمن زغ‑بولُس ءور‑سول‑ا‑ت‑كّاتن. ءيروح‑تن‑ين‑ونمغور، يامژ غ‑بولُس، يامر ءيعسكرين ا‑ت‑كرسن س‑سنات سّناسل. ءيسقسا مدّن ءيلمّا: «ما‑يگا‑ورگاز‑اد؟ ما‑يسكر؟» بدون‑داغ ار‑تغوّاتن كود كرا د‑ما‑يتّيني، ايلّيغ ءور‑يژضار ا‑ييسّان ما‑ف‑ينكر ءودووي‑ان. يامر ءيلمّا اد‑اوين بولُس س‑لقصر. سّروحن‑ت ءيعسكرين س‑تاما ن‑يسكفال، والاينّي ار‑تن‑باهرا‑سّنوكمون مدّن ايلّيغ‑تن‑د‑يقّان اد‑اسين بولُس. ژّون گيس مدّن كولّوتن ار‑سّغويّون ار‑تّينين: «نغات‑ت، نغات‑ت.» لّيغ‑ن‑لكمن ءيمي لّقصر ءيساول بولُس س‑ونمغور ن‑يعسكرين ييني‑اس: «ءيس‑راد‑يّي‑تصامحت اد‑اك‑ينيغ كرا؟» ءيرار‑اس‑ونمغور: «ماخ، تسّنت ا‑تساولت س‑واوال ن‑ايت‑يونان؟ ءيس‑ورد گو‑ميصر ا‑تگيت لّي‑يسّدووين مدّن ف‑سّولطا ن‑رّومان، ياوي ديدس كّوژ ءيد‑والف ن‑يان س‑لخلا، د‑كولّوتن ءوسين ديدسن ءوزّال؟» ييني‑اس بولُس: «گو‑يودايا اد‑گيغ زغ‑طارسوس غ‑تمازيرت ن‑كيليكيّا. طّافغ تاغامت ن‑ايت‑تمدينت‑ان، د‑نتّات ءورد تامدينت ءيمژّين ا‑تگا. ادج‑يّي اد‑ساولغ د‑مدّن‑اد.» يادج‑ت‑يلمّا‑ونمغور. ءيبيدّ بولُس غ‑يگّي ن‑يسكفال يالّ افوس‑نس ا‑تن‑يسّفسّا. لّيغ فسّان كولّوتن، ءيساول سرسن س‑واوال ن‑ايت‑يودايا. ييني‑اسن: «واي‑ايتما د‑يد‑خالي، سفلدات‑يّي. راد‑اون‑ملغ ماد‑گيغ ءولا ماد‑سكرغ ءيس‑ور‑يُخشين.» فسّان س‑وگُّار لّيغ‑اس‑سفلدن ار‑يساوال س‑واوال‑نسن ن‑ايت‑يودايا. ءيزايد ييني‑اسن: «گيغ نكّي گو‑يودايا، لولغ غ‑طارسوس غ‑تمازيرت ن‑كيليكيّا، مقّورغ غ‑تمدينت‑اد ن‑وروشاليم. كّيغ‑تّين ار‑اقراغ غ‑دّو‑وفوس ن‑گاماليال، ار‑تلمادغ كولّو ما‑يلّان غ‑شّرع ن‑يمزوورا‑نّغ. ءيريغ باهرا اد‑رضوغ ربّي زوند كونّي كولّوكن لّي‑لّانين غيد غاسّاد، ايلّيغ وورّيغ ار‑سّرفوفونغ ايت‑وغاراس‑اد ار لموت، ار‑تامژغ ءيرگازن ءولا تيمغارين ار‑تن‑ين‑دحايغ غ‑لحبس. سقسات انمغور ن‑تگمّي ن‑ربّي د‑يمغارن ن‑تمازيرت، راد‑اون‑ينين ءيزد صّاحت اياد. اشكو ءومژغ غ‑دارسن تيبراتين ءي‑يمدّوكُّال‑نسن غ‑ديماشق، باش اد‑امژغ وانّا غين ءيلّان زغ‑ايت‑وغاراس‑اد، كرسغ‑تن س‑سّناسل اويغ‑تن‑د س‑وروشاليم ا‑فلّاسن‑نوت لحوكم. «ها‑يان‑واسّ سّوديغ اكمورغ‑ن س‑ديماشق. غ‑طوژّونت ن‑واسّ تسفاو‑د فلّا يات تيفاوت ءيتجهّدن زغ‑يگنوان. ضرغ س‑واكال س‑سفلدغ ءي‑واوال ءينّا‑يّي‑د: ‹شاول، شاول، ماخ ا‑يّي‑تسّرفوفونت؟› ءينيغ: ‹وا‑سيدي، ما‑تگيت كيّي؟› ءيرار‑يّي‑د: ‹نكّي ا‑يگان ياسوع گو‑ناصيرا لّي‑تسّرفوفونت.› غويلّي ديدي لّانين ژران تيفاوت والاينّي ءور‑فهيمن اوال لّي‑د‑سري‑يساولن. ءينيغ ءيلمّا: ‹وا‑سيدي، ما‑راد‑سكرغ؟› ييني‑يّي‑د سيديتنّغ: ‹نكر تدّوت س‑ديماشق. غين ا‑غ‑راد‑اك‑يتياونّا كولّو مايلّي‑گيك‑يقصاد ربّي ا‑تي‑تسكرت.› سول بوكضغ نكّي ف‑سّيبت ن‑تيفاوت‑ان ءيتجهّدن، امژن‑يّي افوس غويلّي ديدي لّانين، اوين‑يّي س‑ديماشق. «ياشك‑ين داري يان‑ورگاز ءيسم‑نس حانانيّا، ءيگ يان باهرا ءيتّيرين ا‑يرضو ربّي، ار‑يسكار س‑كولّو ما‑يلّان غ‑شّرع، ار‑تي‑توقّارن كولّو ايت‑يودايا لّي‑زدغنين غين. ءيبيدّ غ‑تاما‑نو ييني‑يّي: ‹وا‑گما شاول ءيسفيو،› س‑سفاوغ غاكودان ار‑تي‑تمنادغ. ييني‑يّي: ‹ءيستي‑ك ربّي ن‑يمزوورا‑نّغ ا‑تيسّانت ما‑يقصاد، تژرت غوالّي ءيعمّرن س‑وفولكي لّي‑س‑يرضا، تسفلدت ءي‑واوال زغ‑يمي‑نس. را‑تگت ءينيگي‑نس غ‑دار كولّو مدّن، تساولت‑اسن ف‑ما‑تژريت ءولا ما‑مي‑تسفلدت. ءيمّا غيلاد ماخ ايلّيغ سول تگاورت؟ نكر ا‑ك‑سّدّمغ غ‑وامان، تغرت س‑يسم ن‑سيديتنّغ ا‑ك‑يسّغوس زغ‑دّنوب‑نّك.› «لّيغ‑د‑وورّيغ س‑وروشاليم، ار‑تژالّاغ يان‑واسّ غ‑تگمّي ن‑ربّي س‑يّي‑د‑يبان سيديتنّغ غ‑توارگيت ييني‑يّي: ‹زايد غيل غيل تفّوغت زغ‑وروشاليم، اشكو ءور‑راد‑سفلدن س‑توگّا‑نّك فلّا.› ءينيغ: ‹وا‑سيدي، سّنّ نتني مامنك ا‑ستّين‑كّيغ ار‑كشّمغ كولّو تيگُمّا ن‑تژالّيت ار‑تامژغ غويلّي سرك ءومنّين ار‑تن‑كّاتغ. ءولا غاسّان غ‑نغان ءينيگي‑نّك ستيفانوس بيدّغ نكّي غين، فرحغ س‑لموت‑نس گابلغ تيملسا ءي‑ويلّي‑ت‑نغانين.› ءيساول‑داغ ييني‑يّي: ‹زايد تدّوت، اشكو را‑ك‑ازنغ س‑تميزار اگّوگنين.› » ار‑كولّو‑سفليدن مدّن‑ان ءي‑بولُس، ايلّيغ ءينّا اوال‑اد نكرن‑داغ ار‑سّغويّون س‑جّهد ار‑تّينين: «وان غواد كّيسات‑ت زغ‑دّونيت. ءور‑اس‑يگي ا‑سول‑يقاما.» ار‑سّغويّون باهرا ار‑سّوسوسن ءيسلهامن‑نسن ار‑تالّن اگدرور س‑نّيگاتسن. يامر‑يلمّا‑ونمغور ءيعسكرين اد‑شّكشمن بولُس س‑لقصر، يوصّا‑تن ا‑ت‑سّغورشن ارد‑اسن‑يمل ماخ ايلّيغ ا‑فلّاس‑سّغويّون مدّن غمكان س‑جّهد. والاينّي لّيغ‑ت‑كرسن ا‑ت‑سّغورشن، ءيساول بولُس س‑لقبطان لّي‑يبيدّن غين ييني‑اس: «ءيس‑يلّا غاياد غ‑لقانون ا‑تسّغورشم يان ءيطّافن تاغامت غ‑ايت‑روما د‑نتّان ءور‑تا‑فلّاس‑وتن لحوكم ف‑كرا ءيسكر‑ت؟» لّيغ ءيسفلد لقبطان ءي‑ماياد، يوورّي س‑دار‑ونمغور ن‑يعسكرين ييني‑اس: «مايد را‑تسكرت؟ ارگاز‑اد ءيگا يان دار لحقّ ن‑ايت‑روما.» ياشك‑يد‑ونمغور س‑دار بولُس ءيسقسا‑ت: «ءيزد دارك تاغامت غ‑ايت‑روما؟» ييني‑اس بولُس: «تلّا داري.» ءيزايد‑ونمغور ييني‑اس: «نكّي س‑يقاريدن گّوتنين ا‑س‑ومژغ تاغامت غ‑ايت‑روما.» ءيرار‑اس بولُس: «ءيمّا نكّي، لولغ س‑تاغامت‑ينو، اشكو ايت‑داري طّافن تاغامت يادلّي.» لّيغ سفلدن ءيعسكرين ءي‑ماياد ءيتّين زغ‑گيس، ييكساض‑ونمغور لّيغ ءيسّن ف‑بولُس ءيس‑دارس لحقّ ن‑ايت‑روما د‑نتّان ءيكرس‑ت س‑سّناسل. نديد ازكّا ءيرا‑ونمغور ن‑يعسكرين ا‑ييسّان لحقّ ن‑ما‑س‑ا‑تاشتكّان ايت‑يودايا س‑بولُس. ءيسّمون‑د ءينمغورن ن‑تگمّي ن‑ربّي د‑يمغارن لّمحكاما كولّوتن. ءيرژم‑د ءيلمّا ءي‑بولُس ياوي‑ت‑يد ءيسّبيدّ‑ت غ‑لگدّام‑نسن. ءيسّماقّل بولُس غ‑ايت‑لمحكاما ييني‑اسن: «واي‑ايتما، ها‑يّي كولّو ماد‑كّيغ سول س‑غاسّاد ار‑سكارغ ف‑اد‑ترضوغ ربّي س‑وول ءيغوسن.» ءينكر غاكودان حانانيّا لّي‑يگان انمغور ءيهيّان ن‑تگمّي ن‑ربّي، يامر غويلّي بيدّنين غ‑تاما ن‑بولُس ا‑ت‑وتن ف‑يمي‑نس. ءيرار‑اس بولُس: «را‑ك‑يد‑يوت ربّي، اي‑اغُراب ءيجيّرن. هاتي تسكيوست غيد ا‑فلّا‑تحكامت س‑شّرع، والاينّي تفّوغت زغ‑شّرع لّيغ‑تن‑تومرت ا‑يّي‑وتن.» ءينين‑اس غويلّي بيدّنين غ‑تاما‑نس: «ءيزد ترگمت انمغور ءيهيّان ن‑ربّي؟» ءيرار‑اسن بولُس: «واي‑ايتما، ءور‑سّينغ غواد ءيزد انمغور ءيهيّان ا‑يگا. اشكو ءيتيارا غ‑واوال ن‑ربّي: ‹ا‑ور‑ترگمت يان ءيگان انمغور ن‑ايت‑تمازيرت‑نّك.› » ءيسّن بولُس ءيزد كرا گيسن ءيگا زغ‑لمدهب ن‑يصادّوقين د‑كرا ءيگا زغ‑لمدهب ن‑يفاريسين. يالّ اوال‑نس غ‑لمحكاما ييني‑اسن: «واي‑ايتما، نكّي افاريسي اد‑گيغ، گغ يوس ن‑يفاريسين. بيدّغ غ‑دّو لحوكم غاسّاد ف‑سّيبت ن‑رّجا لّي‑غ‑ن‑رجيغ، اشكو ءومنغ ءيس‑راد‑نكرن غويلّي مّوتنين.» غير ءينّا اوال‑اد س‑نكرن ءيفاريسين د‑يصادّوقين ار‑تژين ءي‑نگراتسن، بضون ايت‑لمحكاما ف‑سين. اشكو ءيصادّوقين ار‑تّينين ءور‑راد‑نكرن مدّن زغ‑لموت، ار‑تّينين ءور‑لّين كرا لّمالايكا نغد كرا لّارواح. ءيمّا ءيفاريسين ار‑تّينين كولّو غويد لّان. زايدن كولّو ار‑تغوّاتن ايلّيغ نكرن كرا ن‑يمسلمدن ن‑شّرع لّمدهب ن‑يفاريسين، بزگن باهرا ف‑وييّاض ءينين‑اسن: «ءور‑اكُّ‑نوفي كرا يُخشنّ غ‑ورگاز‑اد. ءور‑يشقي ا‑سرس‑يساول كرا ن‑رّوح نغد كرا لّمالاك.» زايدن غمكان ايلّيغ گيس روحن تيميغت. ار‑كولّو‑لدّين غ‑بولُس، ايلّيغ ءيكسوض‑ونمغور ن‑يعسكرين ا‑ت‑گن د‑يگزمان. يامر ءيعسكرين اد‑گّوزن اد‑اسن‑ت‑يد‑كّيسن س‑يفادّن اوين‑ت س‑لقصر. غ‑يض‑ان ا‑يبيدّ سيديتنّغ ف‑بولُس ييني‑اس: «زعم د‑يخف‑نّك. غمكلّي فلّا تفكيت توگّا‑نّك غ‑وروشاليم، غمكان ا‑ك‑يد‑يقّانّ ا‑تنت‑فلّا‑تفكت ءولا غ‑روما.» نديد ازكّا غ‑صّباح مشاوارن كرا ن‑ايت‑يودايا ءي‑نگراتسن، گّالّن ءور‑شتّان ءولا سوان ارد نغن بولُس. ءوگُّار ن‑كّوژ ءيد‑مراو ا‑يگّولّان ف‑غايان. اشكين‑د س‑دار ءينمغورن ن‑تگمّي ن‑ربّي د‑يمغارن ن‑تمازيرت ءينين‑اسن: «ها‑نكُّني نمشاشكا‑د نگّالّ تاگالّيت ءيمقّورن ءيس‑ور‑را‑نشّ ارد ننغ بولُس. نرا گيگون كونّي ءولا ايت‑لمحكاما ا‑تازنم غيلاد س‑ونمغور ن‑يعسكرين، تضالبم‑ت ا‑د‑ياوي بولُس س‑لگدّام‑نّون، تينيم‑اس ءيس‑ترام ا‑تي‑تسقسام ءوگُّار ف‑ما‑يسكر. ها‑نكُّني نوجاد ا‑ت‑ننغ ءور‑تا‑د‑يلكيم.» والاينّي غايلّي‑ف‑د‑مشاشكان، ءيسفلد فلّاس يوس ن‑وولّتماس ن‑بولُس. ءيدّو س‑لقصر ءيكشم س‑دار بولُس ييني‑اس‑ت. ءيغر بولُس غاكودان ءي‑يان زغ‑لقبطانات ن‑يعسكرين ييني‑اس: «اوي اعيّال‑اد ءي‑ونمغور‑نّون، اشكو ءيرا اد‑اس‑ييني كرا.» ياوي‑ت لقبطان ءيشّكشم‑ت س‑دار‑ونمغور ييني‑اس: «ءيغرا‑يّي‑وحبّاس بولُس ءيضالب‑يّي اد‑اك‑د‑اويغ اعيّال‑اد، اشكو ءيرا اد‑اك‑ييني كرا.» يامژ‑ونمغور غ‑وفوس ن‑وعيّال، ياوي‑ت واحدوت ءيسقسا‑ت: «ما‑راد‑يّي‑تينيت؟» ييني‑اس: «مشاشكان‑د ءينمغورن ن‑ايت‑يودايا ا‑زگيك‑ضالبن اد‑اسن‑ين‑تاويت بولُس ازكّا س‑لمحكاما. راد‑اك‑ينين ران ا‑ت‑سقسان ءوگُّار ف‑ما‑يسكر. والاينّي ا‑تن‑ور‑تامنت اشكو لّان ءوگُّار ن‑كّوژ ءيد‑مراو ن‑ورگاز، رگسن ار‑سرس‑تقلن. گّالّن ءور‑شتّان ءولا سوان ارد‑ت‑نغن. ءوجادن غيلاد، ار‑غير‑تقلن س‑واوال‑نّك.» ييني‑اس‑ونمغور ءي‑وعيّال: «اد‑ور‑تينيت ءي‑يان ءيس‑يّي‑دي‑تيويت لخبار‑اد.» يادج‑ت ءيلمّا ءيدّو. ءيغر‑ونمغور ن‑يعسكرين ءي‑سين زغ‑لقبطانات‑نس يوصّا‑تن ييني‑اسن: «سّموناد‑د سين ءيد‑ميّا (200) ن‑وعسكري د‑سّا ن‑يد‑مراو (70) ن‑ومنّاي د‑سين ءيد‑ميّا (200) ن‑ويلّي طّافنين احريش، اد‑وجادن اد‑دّون س‑قايصريّا غ‑يض‑اد غ‑تاساعت تيس تژا. تزايدم كرا ن‑واگمارن ما‑غ‑ا‑يسّودو بولُس، باش ا‑تي‑تسّلكمّ غ‑لامان ءي‑لحاكم فيليكس.» يارا ءيلمّا يات‑تبرات ييني: «زغ‑كلوديوس‑ليسياس، ءي‑سيدي لحاكم ءيعزّان فيليكس، اد‑اك‑تيلي سّلامت. ارگاز‑اد، غوين‑ت ايت‑يودايا، ءيرين نتني ا‑ت‑نغن. افغ‑ت‑ين ءيس‑يگا يان ءيطّافن تاغامت غ‑ايت‑روما، نلكم‑ن نكّي د‑يعسكرين‑ينو نكّيس‑اسن‑ت‑يد. سّحاضرغ‑اسن‑ت‑ين غ‑لمحكاما‑نسن باش اد‑يسّانغ ما‑س‑ا‑سرس‑تاشتكّان. افغ‑ت‑ين ءيس‑ور‑يسكير ما‑ف‑ا‑يتمتات نغد ما‑ف‑ا‑يتّيلي غ‑لحبس. ءور‑ا‑سرس‑تاشتكّان ابلا س‑كرا ءيگان وين شّرع‑نسن. والاينّي لّيغ‑يّي‑د‑يلكم لخبار ن‑يزد كرا گيسن مشاوارن فلّاس ا‑ت‑نغن، ازنغ‑اك‑ت‑ين. ءينيغ ءي‑ويلّي سرس تاشتكّانين اد‑اس‑صرضن س‑لگدّام‑نّك.» سكرن ءيلمّا ءيعسكرين غمكلّي‑تن‑يوصّا‑ونمغور‑نسن، اوين بولُس غ‑ييض ايلّيغ لكمن تامدينت ن‑انتيباتريس. نديد ازكّا وورّين نتني س‑لقصر، فلن ءيمنّاين ا‑ت‑اوين زغ‑غين. لّيغ روحن قايصريّا، فكن تابرات ءي‑لحاكم، شّكشمن بولُس س‑دارس. لّيغ ءيغرا لحاكم تابرات، ءيسقسا بولُس گو‑مان تامازيرت ا‑يگا. لّيغ ءيسّن ءيس‑يگا گو‑كيليكيّا ييني‑اس: «راد‑اك‑سفلدغ غاكود نّا‑د‑وشكان غويلّي‑اك‑صرضنين.» يوصّا‑تن ءيلمّا ا‑ت‑گابلن غ‑لقصر ن‑هيرودوس. زرين سمّوس‑ووسّان، س‑د‑يوشكا حانانيّا لّي‑يگان انمغور ءيهيّان ن‑تگمّي ن‑ربّي س‑قايصريّا، نتّا د‑كرا ن‑يمغارن ن‑تمازيرت. اوين‑د ديدسن يا‑لّموحامي ءيسم‑نس تارتولّوس. كشمن س‑دار فيليكس ءينين‑اس ف‑غايلّي‑ف‑صرضن ءي‑بولُس. ءيشّكشم‑ن بولُس غاكودان س‑دارسن، ءيبدو تارتولّوس ار‑سرس‑يتاشتكّا ييني: «وا‑لحاكم ءيعزّان سيدي فيليكس، منّاو ءيسگُّاسن اياد تهنّا‑تمازيرت‑نّغ ف‑وفوس‑نّك. تگريت غ‑كولّو ما‑يخصّان باش اد‑اغ‑ييگات لخير. نفرح س‑كولّو ماد‑اغ‑تسكارت، ار‑ك‑نتشكار غ‑كرايگاتّ ماني د‑كرايگاتّ لوقت. ءيمّا غيلاد ءور‑ريغ ا‑ك‑سّماطلغ. را‑ك‑نضالب اد‑اغ‑تسكرت افولكي‑اد، تسفلدت ءي‑كرا ن‑يواليون دروسنين ف‑مايلّي دارنّغ ءيجران. اشكو نوفا‑ن ارگاز‑اد ءيگا بو‑يروّاين، ار‑يسّنكار ءودووي غ‑گر ايت‑يودايا غ‑دّونيت كولّوتّ. ءيگا زغ‑ينمغورن ن‑ويلّي مي تّينين ‹ايت‑ناصيرا›. غمكان ا‑يسكار ايلّيغ ءيرا ا‑يسّحرم تيگمّي ن‑ربّي، نامژ‑ت نكُّني غاكودان. ءيغ‑تي‑تسقسات را‑تيسّانت كولّو غايلّي‑س‑ا‑سرس‑نتاشتكّا.» نكرن ءيلمّا وييّاض زغ‑ايت‑يودايا ءينين: «س‑صّاحت غمكان ا‑يلّان.» ءينعت‑ن لحاكم ءي‑بولُس س‑وفوس باش ا‑يساول. ييني: «وا‑سيدي، سّنغ ءيزد ءيسگُّاسن گّوتنين ايد تحكامت غ‑تمازيرت‑اد. ماياد ا‑ف‑فرحغ س‑وگُّار اد‑رارغ اوال ف‑مدّن‑اد غ‑لگدّام‑نّك. ءيغ‑تن‑تسقسات را‑تيسّانت ءيزد غير سين د‑مراو ن‑واسّ ايد‑ن‑كشمغ س‑وروشاليم ا‑گيس‑تعبادغ ربّي. ءيمّا نتني، هاتني ءور‑يّي‑ن‑وفين ار‑تمجاحادغ د‑كرا ن‑يان غ‑تگمّي ن‑ربّي، ءولا ءوفان‑يّي‑ن ار‑سّهيّاسغ مدّن لا غ‑تگُمّا ن‑تژالّيت ءولا غ‑تمدينت. غايلّي‑س‑ا‑سري‑تاشتكّان، ءور‑ژضارن ا‑ت‑زّگان. والاينّي يات‑تغاوسا راد‑اك‑تّ‑ينيغ: اغاراس لّي‑س‑ا‑تّينين غويد ءيجلا، نتّان ا‑غ‑ا‑تعبادغ ربّي ن‑يمزوورا‑نّغ. ها‑يّي ءومنغ س‑كولّو ما‑يتياران غ‑شّرع ن‑موسا ءولا ارّاتن لّانبيا. گيغ رّجا‑نو غ‑ربّي غمكلّي‑ن‑گيس‑رجان نتني، امنغ ءيس‑راد‑نكرن كولّو مدّن زغ‑لموت، ما‑يفولكين ءولا ما‑يُخشنّ. مايان ا‑ف‑ا‑ن‑تگّاغ تيقّي‑نو باش ا‑بدّا‑يغوس‑وول‑ينو زغ‑كولّو ما‑يگان لعيب غ‑يژري ن‑ربّي ءولا وين بنادم. «زرين يان‑منّاو ن‑يسگُّاسن ءور‑دّيغ س‑وروشاليم، ايلّيغ‑ن‑يويغ كرا لّمعاونت ءي‑يمژلاض ن‑ايت‑تمازيرت‑ينو سّاكمورغ‑ن تيوافكيو ءي‑ربّي. غمكان اد‑سكرغ س‑يّي‑ن‑وفان غ‑تگمّي ن‑ربّي، د‑نكّي غوسغ س‑يسيرد ن‑ايت‑يودايا. ءور‑ا‑ساوالغ س‑مدّن ءولا‑دا‑تژيغ د‑يان. والاينّي لّان غين كرا ن‑ايت‑يودايا زغ‑تمازيرت ن‑اسيّا. نتني ءيغ‑دارسن كرا فلّا، ءيلّا فلّاسن ءولا نتني اد‑د‑اشكين صرضن‑يّي غ‑لگدّام‑نّك. نغد ادج غويد اد‑فلّا‑ينين ءيس‑گيگي‑وفان كرا لّعيب غاكود لّيغ بيدّغ غ‑لمحكاما‑نسن. ءور‑سكيرغ يات، ابلا اوال‑اد اد‑نّيغ س‑جّهد لّيغ بيدّغ غ‑لگدّام‑نسن، نّيغ‑اسن: ‹ها‑يّي بيدّغ غ‑دّو لحوكم‑نّون غاسّاد ف‑سّيبت ن‑ماد‑ومنغ س‑تنكرا ن‑ويلّي مّوتنين.› » ءيمّا لحاكم فيليكس ءيسّن ما‑يگّوتن ف‑وغاراس لّماسيح، ييني‑اسن: «غاسّاد يوودا غونشكاد، ارد‑د‑ياشك‑ونمغور ليسياس راد‑داغ‑غرغ س‑تغاوسا‑ياد‑نّون.» ءيزايد يوصّا لقبطان ا‑يگابل بولُس، ييني‑اس ا‑ت‑ور‑يكرس، يادج ءيمدّوكُّال‑نس اد‑اس‑دي‑تاوين اينّا‑ت‑يخصّان. زرين كرا ن‑ووسّان، س‑د‑يوشكا فيليكس د‑دروسيلا تامغارت‑نس. تگا نتّات ءولّت‑يودايا. يازن غاكودان اد‑د‑اوين بولُس. ءيسفلد‑اس ار‑يساوال ف‑ما‑را‑ييلي ءي‑يان يومنّ س‑لماسيح ياسوع. والاينّي لّيغ ءيزوويد بولُس ار‑يساوال ف‑وفولكي لّي‑س‑يرضا ربّي، ءولا مامنك ا‑را‑ييژضار يان ا‑يحكام غ‑يخف‑نس، ءولا لعقوبيت لّي‑را‑يتّوت ف‑دّونيت، ييكساض فيليكس ييني‑اس: «دّو غيلاد، را‑ن‑سرك‑ازنغ اكود نّا‑يّي‑تطلق لوقت.» ءيغال ءيس‑راد‑اس‑يفك بولُس ءيقاريدن. كيگان د‑توال ار‑سرس‑يتازن ار‑ديدس‑يساوال. غمكان ايلّيغ زرين سين ءيسگُّاسن، ءيدّو فيليكس تيگيرا. ياشك‑يد يا‑لّحاكم ياضني، ءيگ ءيسم‑نس بوركيوس‑فاستوس. ءيمّا فيليكس ءيرا ا‑يرضو ايت‑يودايا، ءيفل بولُس غ‑لحبس. ءيقاما فاستوس كراض‑ووسّان غ‑قايصريّا س‑يفّوغ ءيدّو س‑وروشاليم. دّون دارس ءينمغورن ن‑تگمّي ن‑ربّي د‑يمغارن ن‑ايت‑يودايا، اشتكّان‑داغ س‑بولُس. ضالبن فاستوس ا‑گيسن‑يسكر لخير‑اد ياوي‑اسن‑د بولُس س‑وروشاليم، اشكو نتني سكرن ف‑اد‑اس‑مدين غ‑وغاراس نغن‑ت ءور‑تا‑يلكيم. ءيمّا فاستوس ءيرور‑اسن: «هان بولُس ءيلّا غ‑لحبس غ‑قايصريّا. يان ءيميكّ راد‑وورّيغ نكّي س‑غين. ازنات ديدي كرا ن‑يمغارن‑نّون اد‑اس‑ن‑صرضن غين ءيغ‑يسكر كرا يُخشنّ.» ءيقاما فاستوس غ‑وروشاليم ما‑يتگّان تژا ن‑ووسّان، ءيدّو ءيلمّا س‑قايصريّا. نديد ازكّا ءيسكيوس غ‑لمحكاما يامر ءيعسكرين اد‑د‑اوين بولُس. ءيكشم‑د بولُس سوتلن‑اس ايت‑يودايا لّي‑د‑وشكانين زغ‑وروشاليم، ار‑سرس‑تاشتكّان س‑تغاوسيوين مقّورنين والاينّي ءور‑ژضارن ا‑تنت‑زّگان. ءيساول بولُس ف‑يخف‑نس ييني‑اسن: «ءور‑سكيرغ كرا لّعيب لا غ‑شّرع ن‑ايت‑يودايا ءولا غ‑تگمّي ن‑ربّي ءولا غ‑قايصر.» والاينّي فاستوس ءيرا ا‑يرضو ايت‑يودايا، ءيسقسا بولُس: «ءيس‑تريت ا‑تدّوت س‑وروشاليم ا‑تبيدّت غ‑لگدّام‑ينو غين ترارت اوال ف‑يصراض‑نسن؟» ءيساول بولُس ييني‑اس: «ها‑يّي بيدّغ غيد غ‑لمحكاما ن‑قايصر غ‑يلّيغ‑يّي‑د‑يقّان اد‑بيدّغ. ءيمّا ايت‑يودايا، ءور‑گيسن‑سكيرغ كرا لّعيب. كيّي تسّنت ماياد باهرا. مراد ءيس‑فّوغّ لقانون سكرغ كرا‑ف‑ا‑تمتاتغ، ءور‑راد‑يريغ اد‑انفغ ءي‑لموت. والاينّي ءيغ‑ور‑يلّي غ‑يصراض‑نسن ابلا تيكركاس، ءور‑يژضار يان ا‑يّي‑يدحي ءي‑مدّن‑ان. ها‑يّي غيلاد ءوسيغ اصراض‑ينو س‑گر ءيفاسّن ن‑قايصر.» ءيشاور فاستوس د‑يمعاوانّ‑نس، ييني ءيلمّا ءي‑بولُس: «تسّغليت اصراض‑نّك س‑دار قايصر. هاتي س‑دار قايصر ا‑س‑را‑تدّوت.» زرين كرا ن‑ووسّان س‑د‑يوشكا‑وگلّيد اگريبّاس د‑وولّتماس بارنيكي س‑قايصريّا. ءيرين اد‑سّمرحبان س‑فاستوس غ‑تمازيرت‑نسن. گاورن دارس كرا ن‑ووسّان ايلّيغ ءيساول فاستوس د‑وگلّيد ف‑تغاوسا ن‑بولُس ييني‑اس: «ءيلّا غيد يان‑ورگاز، ءيفل‑ت‑يد فيليكس غ‑لحبس. لّيغ دّيغ س‑وروشاليم، صرضن‑اس ءينمغورن ن‑تگمّي ن‑ربّي د‑يمغارن ن‑ايت‑يودايا، ضالبن‑يّي ا‑فلّاس‑وتغ لحوكم، والاينّي رورغ‑اسن: ‹نكُّني ن‑ايت‑روما ءور‑ا‑نسكار غمكان. ءور‑ا‑نتحكام ف‑يان س‑لموت ءيغ‑ور‑زوار‑يبيدّ غ‑لگدّام ن‑ويلّي‑اس‑صرضنين، ءيساول ف‑يخف‑نس ف‑غايلّي س‑ا‑سرس‑تاشتكّان.› والاينّي لّيغ‑د‑ديدي‑مونّ س‑غيد ءور‑سّماطلغ تاغاوسا‑يان. سكيوسغ نديد ازكّا غ‑لمحكاما، امرغ اد‑د‑سّحاضرن ارگاز‑ان. والاينّي لّيغ‑د‑نكرن ءيمصراضن‑نس، ءور‑سرس‑اشتكّان س‑كرا ن‑يسكّيرن أُخشنّين غمكلّي غالغ نكّي. ءور‑يلّي يات غ‑گراتسن ابلا كرا ن‑يمجاحادن ف‑مامنك اد‑تعبادن ءيلاه‑نسن، ءولا ف‑يان ءيمّوت ءيسم‑نس ياسوع ار‑فلّاس‑يتّيني بولُس ءيس‑يدّر. ءور‑سّينغ غاكودان مامنك اد‑سّنفاصالغ تيغاوسيوين‑اد. سقساغ بولُس ءيس‑يرا ا‑يدّو س‑وروشاليم ا‑ن‑فلّاس‑حكامغ غين، والاينّي ءينّا‑يّي ءيرا ا‑يقاما غيد ارد ءيحكام قايصر ف‑تغاوسا‑نس. امرغ غاكودان ا‑يقاما غ‑لحبس ارد‑ت‑ازنغ س‑دار قايصر.» ءيساول ءيلمّا اگريبّاس ييني‑اس ءي‑فاستوس: «ءولا نكّي ريغ اد‑سفلدغ ءي‑ورگاز‑اد.» ييني‑اس فاستوس: «ار صّباح راد‑اس‑تسفلدت.» نديد ازكّا ياشك‑يد اگريبّاس د‑بارنيكي س‑لهيبت ءيگّوتن، كشمن س‑وحانو ءيمقّورن لّمحكاما، نتني د‑ينمغورن ن‑يعسكرين د‑يمغارن ن‑تمدينت. ءينكر فاستوس يامر اد‑د‑شّكشمن بولُس. ييني ءيلمّا فاستوس: «واي‑اگلّيد اگريبّاس ءولا كولّو ويلّي ديدنّغ لّانين غاسّاد، غواد ا‑يگان ارگاز لّي‑مي‑د‑صرضن كولّو ايت‑يودايا س‑داري غ‑وروشاليم ءولا غيد، ار‑سرس‑تغوّاتن ار‑تّينين ءيقّان‑ت‑يد ا‑يمّت. ءور‑گيس‑وفيغ نكّي كرا‑ف‑يستهلّا لموت، والاينّي لّيغ ءيسّغلي تاغاوسا‑نس س‑گر ءيفاسّن ن‑قايصر سكرغ ف‑ا‑ت‑ازنغ س‑دارس. ءيمّا نكّي ءور‑داري كرا ءيزگان ما‑س‑ا‑فلّاس‑تاراغ ءي‑قايصر. هاتي سّحاضرغ‑اون‑ت‑يد غيلاد، سّبيدّغ‑ت‑يد غ‑لگدّام‑نّك اي‑اگلّيد اگريبّاس، باش ا‑گيس‑نسيگّل ناف ما‑س‑ا‑فلّاس‑تاراغ. اشكو ءيرواس‑يّي ءيس‑ور‑يشوي ا‑نازن يان‑وحبّاس ءي‑قايصر ءيغ‑ور‑فلّاس‑نملي مايلّي‑ف‑ا‑ياس‑صراضن مدّن.» ءيساول اگريبّاس س‑بولُس ييني‑اس: «را‑ك‑ادجغ ا‑تساولت غيلاد ف‑يخف‑نّك.» يالّ بولُس افوس‑نس ا‑يرار اوال ييني: «واي‑اگلّيد اگريبّاس، نّيغ نكّي اساعدي اد‑گيغ غاسّاد، اشكو غ‑لگدّام‑نّك ا‑غ‑بيدّغ باش اد‑رارغ اوال ف‑كولّو ما‑س‑ا‑سري‑تاشتكّان مدّن‑اد ن‑ايت‑يودايا. اشكو كيّي تسّنت لعادات ن‑ايت‑يودايا ءولا ءيسوينگيمن لّي‑ف‑ا‑تمجاحادن ءي‑نگراتسن. ف‑مايان ا‑ف‑را‑ك‑ضالبغ ا‑ديدي‑تصبرت، تسفلدت ءي‑ما‑راد‑اك‑ينيغ. اشكو كولّو ايت‑يودايا سّنّ مامنك اد‑گيغ زغ‑لّيغ مژّيغ غ‑تمازيرت‑ينو ءولا تيگيرا ن‑مايان غ‑وروشاليم. كيگان د‑يسگُّاسن ايد‑يّي‑سّنّ. ژضارن اد‑اك‑فلّا‑فكن توگّا ءيغ‑ران نتني، ءينين‑اك ءيس‑گيغ واد ءيسكارن س‑تنباضين ن‑يفاريسين لّي‑يگان لمدهب كولّو ءينوكمان غ‑دّين‑نّغ. ءيمّا غيلاد بيدّغ غيد ا‑فلّا‑تحكامت ف‑سّيبت ن‑رّجا لّي‑داري‑يلّان، اشكو ءومنغ اوال لّي‑ينّا ربّي ءي‑يمزوورا‑نّغ. اوال‑ان ا‑غ‑ا‑ن‑كولّو‑ترجونت‑تقبيلين‑نّغ س‑سنات د‑مراوت، لّيغ ا‑تعبادن ربّي غيلاد س‑نّييت‑نسن غ‑ييض ءولا ازال. واي‑اگلّيد ءيعزّان، هاتي ف‑رّجا‑ياد ا‑س‑ا‑سري‑تاشتكّان ايت‑يودايا. ءيمّا كونّي، ماخ ايلّيغ ءور‑تريم ا‑تامنم ءيس‑يژضار ربّي ا‑د‑يسّنكر غويلّي مّوتنين؟ «كّيغ‑تّين ءولا نكّي ار‑تّينيغ ءيلّا فلّا ا‑ن‑گغ تيقّي‑نو اد‑تضاضّاغ كولّو ما‑يگان وين ءيسم ن‑ياسوع گو‑ناصيرا. غمكان اد‑سكارغ غ‑وروشاليم. ضالبغ زغ‑ينمغورن ن‑تگمّي ن‑ربّي اد‑يّي‑فكن اوال ا‑ن‑تقّنغ ءي‑ما‑يگّوتن غ‑يمژلاين ن‑ربّي غ‑لحبس. غاكود نّا‑فلّاسن‑حكامن س‑لموت، ار‑تّينيغ نتّات اد‑اسن‑يگان. كيگان د‑توال اد‑كشّمغ س‑تگُمّا ن‑تژالّيت ار‑تن‑سّرفوفونغ باش ا‑تن‑رارغ اد‑رگّمن غ‑وغاراس‑اد. ار‑يّي‑سرسن‑تاسين ءيريين باهرا ايلّيغ ا‑سرسن‑تمودّوغ ءولا س‑تمدينين اگّوگنين باش ا‑تن‑سّرفوفنغ. «غايان ا‑ف‑ومژغ اغاراس س‑ديماشق س‑واوال ن‑ينمغورن ن‑تگمّي ن‑ربّي ءولا لوصيت‑نسن. واي‑اگلّيد ءيعزّان، سّوديغ غ‑وغاراس‑ان غ‑طوژّونت ن‑واسّ س‑يّي‑دي‑تبان يات تيفاوت زغ‑يگنوان تجهّد ءوگُّار ن‑تافوكت، تسفاو فلّا نكّي ءولا غويلّي‑د‑مونغ. نضر كولّواغ س‑واكال، س‑سفلدغ ءي‑يان ءينّا‑يّي‑د س‑واوال ن‑ايت‑يودايا: ‹شاول شاول، ماخ ا‑يّي‑تسّرفوفونت؟ هان ار‑تسّياگّاست ءيخف‑نّك لّيغ ا‑تسّفوقوست ف‑وكوراي.› ءينيغ: ‹وا‑سيدي، ما‑تگيت كيّي؟› ءيساول‑د سيديتنّغ ييني‑يّي: ‹نكّي ا‑يگان ياسوع لّي‑تسّرفوفونت. نكر تبيدّت ف‑يضارن‑نّك، اشكو ماياد ا‑ف‑اك‑د‑بانغ، باش ا‑ك‑گغ د‑وخدّام‑ينو ار‑تاكّات توگّا ف‑مامنك ا‑يّي‑تژريت غاسّاد ءولا ف‑ما‑راد‑اك‑ملغ تيگيرا. را‑كي‑تفوكّوغ زغ‑يفاسّن ن‑ايت‑يودايا ءولا ايت‑تميزار اگّوگنين. را‑ك‑ازنغ ا‑ترژمت الّن‑نسن، ترارت‑تن‑د زغ‑تيلّاس س‑تيفاوت، ءولا زغ‑لقوّا ن‑شيطان س‑ربّي، باش ا‑فلّاسن‑يتّين دّنوب‑نسن، وورّين طّافن تاغامت غ‑گر غويلّي ژليغ اد‑گن وينو ف‑سّيبت ن‑ماد‑سري‑ومنّ.› «غاكودان اي‑اگلّيد اگريبّاس، ءور‑ونفغ ءي‑مايلّي‑يّي‑د‑يسّبايّن ربّي. فّوغّ ار‑تبرّاحغ غ‑ديماشق، دّوغ ءيلمّا ار‑تبرّاحغ غ‑وروشاليم ءولا غ‑كولّو تامازيرت ن‑يودايا ءولا تيميزار ن‑يبرّانيين. ار‑اسن‑تّينيغ ءيس‑تن‑يخصّا اد‑فلن كولّو ما‑يُخشنّ وورّين س‑ربّي، ار‑سكارن افولكي باش ا‑يبان ءيس‑فلن ما‑يُخشنّ. ف‑سّيبت ن‑تبرّاحت‑اد ا‑ف‑يّي‑ومژن كرا ن‑ايت‑يودايا غ‑تگمّي ن‑ربّي، ءيرين ا‑يّي‑نغن. والاينّي ار‑بدّا‑يّي‑يتعاوان ربّي سول س‑غاسّاد. مايان ا‑ف‑بيدّغ غيد ار‑اكّاغ توگّا‑نو ءي‑كولّو مدّن، ءي‑ما‑يمقّورن ءولا ءي‑ما‑يمژّين. ءور‑ا‑ساوالغ ابلا ف‑مايلّي‑ف‑نّان لانبيا را‑ييلي، نتني ءولا موسا. نّان ءيس‑راد‑باهرا‑يرفوفن لماسيح، ءيگ امزوارو ءي‑ويلّي را‑د‑ينكر زغ‑لموت، باش ا‑يسّبايّن تيفاوت ءي‑ايت‑يودايا ءولا ايت‑تميزار اگّوگنين.» سول ا‑يساوال بولُس ف‑يخف‑نس س‑اس‑ينّا فاستوس س‑جّهد: «وا‑بولُس، هاتين تفّوغت ءيخف‑نّك. هان تيغري ءيگّوتن ا‑ك‑يسّنوفلن.» ءيرار‑اس بولُس: «ءور‑نوفلغ، ا‑سيدي فاستوس. كولّو مايد‑اون‑تّينيغ، لحقّ د‑لمعقول ا‑يگا. تيغاوسيوين‑اد، ءيسّن‑تنت‑وگلّيد اگريبّاس، ژضارغ اد‑اس‑فلّاسنت‑ساولغ س‑زّعامت. سّنغ ءيس‑ور‑فلّاس‑ينتيل ماياد، اشكو ءورد غ‑كرا ن‑توغژوت ءيلّاسن ا‑غ‑يجرا. واي‑اگلّيد اگريبّاس، ءيس‑تومنت ءيواليون لّانبيا؟ سّنغ ءيس‑تن‑تومنت.» ءيساول ءيلمّا اگريبّاس س‑بولُس ييني‑اس: «ءيس‑تريت ا‑يّي‑ترارت اد‑گغ اماسيحي غ‑يات تاساعت ءيگزّولن؟» ييني‑اس بولُس: «زوند ءيغ‑تگزّول زوند ءيغ‑تغزّيف، ضالبغ ءي‑ربّي ا‑تگت زوند ماد‑گيغ، كيّي ءولا كولّو غويد سري سفليدنين غاسّاد، والاينّي بلا سّناسل‑اد.» ءينكر‑وگلّيد غاكودان، نتّان د‑لحاكم ءولا بارنيكي ءولا وييّاض لّي‑ديدس‑سكيوسنين، فّوغن زغ‑لمحكاما ار‑تّينين ءي‑نگراتسن: «ارگاز‑اد ءور‑يسكير كرا‑ف‑ا‑يتمتات ءولا كرا‑ف‑ا‑يتّيلي غ‑لحبس.» ءيساول اگريبّاس س‑فاستوس ييني‑اس: «ارگاز‑اد، تژضارم اد‑اس‑ترژمّ مراد ءيس‑ور‑يسّغلي تاغاوسا‑نس س‑گر ءيفاسّن ن‑قايصر.» سكرن غاكودان ف‑اد‑اغ‑ازنّ غ‑ومدا س‑تمازيرت ن‑يطاليا. فكن بولُس د‑كرا ن‑يحبّاسن ياضني غ‑وفوس ن‑يا‑لّقبطان ن‑يعسكرين ءيسم‑نس يوليوس، ءيگا زغ‑‹رّبعت ن‑قايصر›. نغلي س‑يان‑واناو ءيكّا‑د تامدينت ن‑ادراميتا، ييري لمرسات لّي‑لّانين غ‑تسگيو ن‑اسيّا. ءيمون ديدنّغ اريستارخوس، ءيگا گو‑ماكيدونيّا زغ‑تمدينت ن‑تاسالونيكي. نفّوغ نسّودو غ‑ومدا. نديد ازكّا نلكم لمرسا ن‑صايدا. يوليوس ءيسكر لخير غ‑بولُس، يادج‑ت ا‑يدّو س‑دار ءيمدّوكُّال‑نس غ‑تمدينت‑ان باش اد‑اس‑فكن ما‑ت‑يخصّان. نزايد ءيلمّا نفّوغ غ‑ومدا، نزري زغ‑تسگا ءينتلن ن‑يگزير ن‑قوبروس اشكو ءيضاضّ‑اغ‑واضو. نبّي امدا غ‑تاما ن‑كيليكيّا د‑بامفيليّا ايلّيغ نلكم لمرسا ن‑ميرا غ‑تمازيرت ن‑ليكيّا. ياف غين لقبطان يان‑واناو ياضني، ءيكّا‑د ءيسكانداريّا ييري تامازيرت ن‑يطاليا، ءيسّغلي‑اغ سرس. كيگان د‑ووسّان ءور‑ا‑نتزاياد غير س‑يميكّ، ايلّيغ بحرا ءور‑نلكيم تاما لّمرسا ن‑كنيدوس. ءور‑اغ‑يودجي‑واضو ا‑نكمّل س‑تسگا‑يان. نك ءيلمّا تاسگا ءينتلن ن‑يگزير ن‑كريت، نزري زغ‑تاما ن‑وجاريف ن‑سالموني. نزايد س‑تكرّايت، نحادا اكال ايلّيغ نلكم يان‑ماني لّي‑مي‑تّينين ‹ءيد‑ونتال شوانين›، ياكمور س‑تمدينت ن‑لاسايّا. نسّن غ‑وزمز‑ان ءيس‑را‑يشقو لحال ءيغ‑نزوويد غ‑ومودّو‑نّغ، اشكو نماطل باهرا، ءيزري فلّانّغ لعيد ن‑وژوم. غاكودان ا‑ينكر بولُس ءيساول س‑مدّن س‑لمعقول ييني‑اسن: «وا‑يرگازن، ءيبان ءيس‑را‑يشقو‑ومودّو‑نّغ باهرا غيلاد. ءيگّوت گينّغ ما‑را‑يتّهلك، ءورد غير سّلاعت ءولا اناو والاينّي ءولا تودرت‑نّغ نكُّني.» ءيمّا لقبطان ن‑يعسكرين ءور‑سرس‑يسفلد. ءيسكر س‑ما‑ينّا رّايس ن‑واناو د‑باب‑نس. تمژّي لمرسا لّي‑غ‑نلّا، ءور‑تشوي ا‑گيس‑نقاما غ‑وزمز ن‑تگرست. ءيمشاشكا‑د ما‑يگّوتن غ‑ايت‑واناو ا‑نسّودو زغ‑غين، نارم ءيس‑نژضار ا‑نروح فينيكس ا‑ن‑گيس‑نزّري تاگرست. تگا فينيكس يات لمرسا غ‑يگزير ن‑كريت، ءيحكام‑تّ‑وغربي زغ‑وفاسي ءولا اژلماض. ءيصوض‑د ءيميكّ ن‑وزوزوو زغ‑لجانوب، ءيرواس‑اسن ءيس‑يوورّي لحال ءيگا غمكلّي ران. سّوكفن ءيلمّا اگّوس ا‑نسّودو. نزايد نحادا اكال ن‑كريت، ءور‑ديدس‑نمگالّاي يات. ءيميل ءينكر‑د‑واضو لّي‑مي‑تّينين ‹اژلماض ءي‑وسغلاي› ار‑د‑يصواض س‑جّهد زغ‑تسگا ن‑يگزير. ار‑يكّات اناو ايلّيغ ءور‑سول‑نژضار ا‑نزايد س‑تسگا‑يان، نادج اناو ا‑ت‑يدحاي‑واضو. لّيغ نزري غ‑ونتال ن‑تگزيرت ن‑كودا، مّاغن ءيباحريين اد‑قّنّ تاناوت لّي‑يزوكور‑واناو. الّن‑تّ‑يد س‑يگّي ن‑واناو، سّلولّين ءيلمّا ءيزاكارن ءي‑والّاغ ن‑واناو باش ا‑ت‑سّدوسن. كسوضن ا‑يوت يورار ن‑وملال لّي‑لّانين غ‑دّو‑وامان غ‑تاما ن‑سيرتيس. ادرن ءي‑لقلوع، ادجن اناو ا‑ت‑يدحاي‑واضو. والاينّي ءيزوويد‑واضو د‑ومدا س‑وگُّار ايلّيغ نكرن ءيباحريين غ‑ويس سين‑ووسّان ار‑ن‑تلوحن سّلاعت غ‑ومدا. ويس كراض‑ووسّان اسين ءولا ءيماسّن ن‑واناو لوحن‑تن‑ين غ‑ومدا. منّاو‑ووسّان ءور‑ا‑ياغ‑تّبان تافوكت ءولا ءيتران، ار‑سول‑يصواض‑واضو س‑جّهد ايلّيغ ننّا ءور‑نژضار ا‑ننجم. نتني ءور‑سول‑ا‑شتّان يات غ‑ووسّان‑ان، ءينكر بولُس ءيبيدّ غ‑وامّاس‑نسن ييني: «وا‑يرگازن، مراد ءيس‑سري‑تسفلدم، ءيكون ءور‑د‑نفّوغ كريت ءولا ترفوفنم غمكاد ءولا تسّخسرم كولّو ماياد. ءيمّا غيلاد راد‑اون‑ينيغ، تهنّايات. هاتي ءور‑را‑يمّت يان گيگون. غير اناو ا‑را‑يتّهلك. اشكو غ‑يض‑اد ءيبيدّ‑د سري يا‑لّمالاك ن‑ربّي لّي‑مي‑گيغ وينس ار‑تي‑تعبادغ، ييني‑يّي: ‹وا‑بولُس، اد‑ور‑تيكساطّ. هاتي ءيقّان‑ك‑يد ا‑تبيدّت غ‑لگدّام ن‑قايصر. ءيفكا‑ياك ربّي ا‑ور‑يمّت يان زغ‑غويلّي ديدك مودّانين.› تهنّايات غيلاد ا‑يرگازن، اشكو ءومنغ ربّي ءيس‑را‑ييلي غمكلّي‑س‑يّي‑د‑ينّا. والاينّي ءيقّان‑د ا‑ن‑نضر غ‑كرا ن‑يگزير.» ويس كّوژ د‑مراو ن‑واسّ، سول ءوكان ا‑ياغ‑يدحاي‑واضو غ‑وامّاس ن‑ومدا ن‑ادريّا. غ‑طوژّونت ن‑يض‑ان ءيرواس ءي‑يباحريين ءيس‑ناكمور س‑كرا ن‑واكال. ءيرين اد‑يسّانّ تادروت ن‑ومدا غين. گرن‑ين ءيزيكر، ييلي غ‑يخف‑نس كرا ن‑ووزّال، افن‑ين گيس كّوژ ءيد‑مراو ن‑ميترو. ءيميكّ گرن‑ت‑ين‑داغ، افن‑ين گيس كراض ءيد‑مراو ن‑ميترو. كسوضن ا‑يوت‑واناو كرا ن‑وجاريف، لوحن‑ين كّوژ ءيگّوسن زغ‑تغوردين‑نس، ار‑ن‑ترجون ا‑دي‑تاكمور‑تواغلا ن‑تافوكت. سكرن ءيلمّا ءيباحريين ف‑اد‑روولن زغ‑واناو. زّوگزن تاناوت س‑وامان زوند ءيغ‑ران ا‑ن‑لوحن كرا ن‑يگّوسن زغ‑لگدّام ن‑واناو. والاينّي ءيساول بولُس س‑لقبطان د‑يعسكرين ييني‑اسن: «ءيغ‑ور‑ديدون‑قامان ءيباحريين غ‑واناو ءور‑را‑تيژضارم ا‑تنجمّ.» نكرن ءيعسكرين غاكودان، بّين ءيزاكارن ن‑تاناوت، ادجن‑تّ‑ين غ‑ومدا. لّيغ‑د‑ياكمور ا‑يفاو‑واسّ ءيساول سرسن بولُس كولّوتن ءيضالب‑تن اد‑شّن ييني‑اسن: «هاتي كّوژ د‑مراو ن‑واسّ اياد توسيم تاغوفت باهرا ءور‑تشّيم يات. ضالبغ‑كُن غيلاد ا‑تامژم ءيميكّ ن‑ومشّو. ءيخصّا‑كُن ا‑تسّدوسم ءيخفاون‑نّون، اشكو ءور‑اكُّ‑را‑يتّهلك يان‑ونژاض ن‑يگويّا‑نّون.» لّيغ‑اسن‑ينّا ماياد، ياسي اغروم، ءيشكر ربّي غ‑لگدّام‑نسن ءيبّي‑ت ار‑يشتّا. زعمن ءولا نتني غاكودان، بدون ار‑شتّان. نگا نكُّني سين ءيد‑ميّا د‑سّا ن‑يد‑مراو د‑سضيص (276) غ‑واناو. لّيغ شبعان كولّوتن، لوحن‑ين ءيردن لّي‑قامانين باش اد‑سّيفسوسن ف‑واناو. لّيغ‑د‑يغلي‑واسّ ءور‑سّينّ ءيباحريين مان اكال اد‑لكمن، والاينّي ژران يات‑تدغارت ياستوان ن‑وملال غ‑گر ءيجاريفن. سوانگمن ا‑سرس‑اوين اناو ءيغ‑ژضارن. بّين ءيزاكارن ن‑يگّوسن فلن‑تن غ‑ومدا، رژمن ءي‑يزاكارن ن‑تفلوين لّي‑س‑ا‑تگوّادن اناو. الّن لقلع ءيمژّين غ‑لگدّام ن‑واناو باش ا‑ت‑يدحي‑واضو س‑لگدّام. ناكمور س‑واكال، والاينّي ءيزري‑واناو ف‑يان‑ماني غ‑ور‑درين‑وامان. يوت املال ءيتغز زغ‑لگدّام‑نس، ءور‑يژضار ا‑سول‑يمّاسّ. ار‑تّ‑كّاتنت تاضانگيوين ايلّيغ ا‑يفسّي زغ‑تغوردين‑نس. مشاوارن ءيعسكرين ءي‑نگراتسن، ءيرين اد‑نغن ءيحبّاسن ا‑ور‑گيسن‑يعوم كرا ن‑يان ارد ءيلكم اكال ءيروول. ءيمّا لقبطان ءيرا ا‑يحصار ف‑بولُس غ‑لامان، ءور‑تن‑يودجي اد‑سكرن غمكان. يامر‑تن وانّا ءيسّنّ ا‑يعوم ا‑ن‑يضر غ‑وامان ءيزوور س‑واكال. ييني ءي‑وييّاض كود يان ا‑يغوي غ‑كرا ن‑يفرش ن‑واناو نغد كرا ن‑وكشّوض. غمكان ا‑س‑كولّو‑نروح اكال س‑لامان. لّيغ ننجم زغ‑ومدا، ناف‑ن ءيگزير‑ان ءيگا غوالّي مي تّينين ماليطا. اشكين‑د ءيمزدغن‑نس سكرن گينّغ افولكي، سّرغن لعافيت سّمرحبان سرنّغ كولّواغ اشكو ءيلّا‑ونژار د‑وسمّيض. بولُس ءيسّمون‑د يات تاگُّات ن‑يكشّوضن، ييري ا‑تن‑ين‑يسرس ف‑يگّي لّعافيت. ءيفّوغ‑د زگيسن يان‑ولگمّاض ف‑سّيبت ن‑ترغي، ءيلبي غ‑وفوس ن‑بولُس. ايت‑يگزير، لّيغ ژران الگمّاض يوگُل غ‑وفوس ن‑بولُس ءينين ءي‑نگراتسن: «ارگاز‑اد، ءيرواس ءيس‑ينغا كرا ن‑روح. هاتي، واخّا ءينجم زغ‑ومدا ءور‑ت‑يفيل لحقّ ا‑يسول.» والاينّي بولُس ءيسّوس‑ن الگمّاض غ‑لعافيت، ءور‑ت‑ياغ يات. ار‑تقلن مدّن‑ان اد‑ژرن ءيس‑را‑يوفّ بولُس نغد ا‑يضر س‑واكال ءيمّت. والاينّي لّيغ قلن يان كرا ژرن ءور‑اس‑يجري يات، وورّين ار‑تّينين: «كرا ن‑يلاه اياد.» ءيلين كرا ن‑يگران غ‑تسگا لّي‑غ‑نلّا، گان وين لحاكم ن‑يگزير‑ان ءيسم‑نس بوبليوس. ءيشّكشم‑اغ س‑تگمّي‑نس ءيگ‑اغ د‑ينبگيون‑نس كراض‑ووسّان. ييلي دارس باباس تسّگن‑ت تاولا، ءيضر‑گيس‑وديس باهرا. ءيكشم بولُس س‑تحانوت لّي‑غ‑يلّا، ءيژّالّ ءيضالب ربّي ءيسرس‑ن فلّاس ءيفاسّن‑نس، ءيجّوجّي‑ت. لّيغ سفلدن مدّن ءي‑ماياد ار‑د‑دارس‑تّاشكين كولّو وينّا ءوضنّين غ‑يگزير‑ان، جّين. ار‑اغ‑توقّارن مدّن‑ان س‑توافكيو گّوتنين، ار اسّ لّي‑غ‑را‑نفّوغ زغ‑دارسن، اوين‑اغ‑د كولّو ما‑راد‑اغ‑يخصّا ءي‑ومودّو‑نّغ. غمكان ا‑دارسن‑نگاور كراض‑ييرن، نكشم ءيلمّا س‑يان‑واناو، ءيتياوسّان دارسن س‑يات لعلاما ن‑‹سين ءيلاهات ءيكنيون›. ءيكّا‑د ءيسكانداريّا، ءيقاما ءولا نتّا غ‑يگزير غ‑وزمز‑ان ن‑تگرست. نسّودو گيس ايلّيغ نلكم تامدينت ن‑سيراكوسا، نقاما غين كراض‑ووسّان. نزايد ءيلمّا زغ‑غين س‑لمرسا ن‑ريگيون. نديد ازكّا ءيصوض‑د‑واضو ءيشوان زغ‑لجانوب. نديد ازكّا نلكم لمرسا ن‑بوطيولي. ناف‑ن غين كرا ن‑ايتماتن، ضالبن‑اغ اد‑دارسن‑نگّوز سّا ن‑ووسّان. غمكان ا‑س‑ناكمور س‑روما. لّيغ سفلدن ايتماتن غ‑روما ءيس‑ن‑نوشكا، فّوغن‑د ار ‹سّوق ن‑ابّيوس› ءولا ادوّار ن‑‹كراض لفنادق› باش اد‑اغ‑د‑مناگّارن. لّيغ‑تن‑يژرا بولُس، ءيشكر ربّي ءيزعم. لّيغ‑ن‑نكشم س‑تمدينت ن‑روما، لقبطان يودجا بولُس ا‑يزدغ واحدوت، ءيگ فلّاس يان‑وعسكري ءيگابل‑ت. زرين كراض‑ووسّان يازن بولُس س‑يمغارن ن‑ايت‑يودايا، ءيضالب زغ‑گيسن ادّ‑دارس‑اشكين. لّيغ‑د‑مونّ نتني ييني‑اسن: «واي‑ايتما، ءور‑جّود نكّين ا‑يرگمن غ‑ايت‑تمازيرت‑نّغ ءولا لعادات ن‑يمزوورا‑نّغ، والاينّي ءومژن‑يّي كرا ن‑ايت‑يودايا غ‑وروشاليم دحين‑يّي س‑گر ءيفاسّن لّحوكّام ن‑رّومان. لّيغ‑يّي‑سقسان رّومان ف‑ماد‑سكرغ، ءور‑گيگي‑وفين كرا‑س‑ا‑فلّا‑تحكامن س‑لموت، ءيرين اد‑يّي‑رژمن. والاينّي مدّن‑ان ن‑ايت‑يودايا ءور‑قبيلن مايان، ايلّيغ‑يّي‑يخصّا اد‑سّغليغ تاغاوسا‑نو س‑دار قايصر واخّا ءور‑داري كرا‑س‑ا‑تاشتكّاغ س‑ايت‑تمازيرت‑ينو. مايان ا‑ف‑ضالبغ ا‑كُن‑ژرغ ساولغ ديدون. اشكو تياوكرّافغ غيلاد س‑سّناسل ف‑سّيبت ن‑رّجا لّي‑غ‑ن‑رجان ايت‑ربّي.» ءينين‑اس غاكودان: «ءور‑اغ‑د‑فلّاك‑لكيمنت كرا ن‑تبراتين زغ‑يودايا، ءولا نّان فلّاك ايتماتن لّي‑د‑وشكانين زغ‑غين كرا لّخبار نغد اوال يُخشنّ. والاينّي نرا اد‑اغ‑تملت ءيسوينگيمن‑نّك، اشكو نسفلد ءيس‑ا‑تّينين مدّن غ‑كرايگاتّ ماني ءور‑يشوي‑وغاراس‑ان.» ءيزّگا ديدسن اسّ ياضني باش ادّ‑دارس‑داغ‑مونّ. لّيغ ءيلكم‑واسّ‑ان، ءيگّوت ما‑د‑يوشكان س‑يلّيغ ءيزدغ بولُس. ار‑اسن‑يساوال س‑لمعقول زغ‑زيكّ صباح ار ءيض ف‑مامنك ا‑تگا‑تگلديت ن‑ربّي. ار‑فلّاسن‑ياقرا زغ‑شّرع ن‑موسا د‑وارّاتن لّانبيا باش اد‑اسن‑يمل ءيس‑يُغژان ما‑يتّيني ف‑ياسوع. يوورّي كرا گيسن يومن اوال‑نس، ءيمّا وييّاض اگُين اد‑امنّ. ءور‑د‑مشاشكان ءي‑نگراتسن، فّوغن ءيلمّا زغ‑دارس لّيغ‑اسن‑ينّا اوال‑اد: «س‑لحقّ ا‑س‑يساول رّوح لقودوس لّيغ ءينّا ءي‑يمزوورا‑نّون ف‑يمي ن‑نّابي ءيشاعيا: ‹دّو س‑مدّن‑ان تينيت‑اسن، راد‑باهرا‑تسفليدم والاينّي ءور‑را‑تفهمّ ما‑مي‑تسفلدم. راد‑باهرا‑تّمنادم والاينّي ءور‑را‑تيسّانم ما‑تمنادم. وورّين مدّن‑ان ءيقّور ءيخف‑نسن، ژّاين ءيمزگان‑نسن، قّنّت‑والّن‑نسن. ءور‑رينت اد‑ژرنت‑والّن‑نسن ءولا سفلدن ءيمزگان‑نسن ءولا فهمن غ‑يگويّا‑نسن. ءور‑رين اد‑د‑سري‑وورّين ا‑تن‑جّوجّيغ.› ف‑مايان ا‑ف‑راد‑اون‑ينيغ، اجنجم‑اد ءيفكا‑ت ربّي غيلاد ءي‑ايت‑تميزار ياضني. نتني ا‑را‑سرس‑يسفلد.» ءيقاما بولُس غين سين ءيسگُّاسن، ءيزدغ غ‑تگمّي لّي‑يكُرا، ار‑يسّمرحبا س‑كولّو وانّا‑ن‑دارس‑يوشكان. ار‑اسن‑يساوال س‑زّعامت ف‑تگلديت ن‑ربّي، ار‑تن‑يسّلماد ف‑سيديتنّغ ياسوع لماسيح، ءور‑ت‑يحصار يان. زغ‑بولُس اخدّام لّماسيح ياسوع. ءيغرا‑يّي‑د ءيژلي‑يّي اد‑گغ ارقّاس‑نس ار‑تبرّاحغ س‑لخبار ءيفولكين ن‑ربّي. لخبار‑اد ءيگا غوالّي‑ف‑وران لانبيا غايد ءيزرين غ‑وارّاتن ن‑ربّي، ءيملا‑ياسن مامنك ا‑را‑ييلي. ءيگا لخبار ف‑يوس سيديتنّغ ياسوع لماسيح. نتّان زغ‑تسگا ن‑دّات ءيگا زغ‑تاسوت ن‑داود. ءيمّا زغ‑تسگا ن‑رّوح ءيبان گيس ءيس‑يگا يوس ن‑ربّي امژلاي س‑تحكيمت ءيتجهّدن لّيغ‑د‑ينكر زغ‑لموت. ف‑وودم‑نس ا‑ف‑اغ‑يبارك ربّي ءيفك‑اغ تارقّاست‑اد س‑يسم‑نس، باش اد‑امنّ مدّن غ‑كرايگاتّ تامازيرت سكرن س‑واوال‑نس. ءولا كونّي تگام زغ‑ويلّي مي ءيغرا ربّي اد‑گن وين ياسوع لماسيح. ءي‑كولّو ويلّي‑غ‑يحنّا ربّي غ‑تمدينت ن‑روما لّي‑مي‑يغرا اد‑گن ءيمژلاين‑نس. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. اوال ءيزوارن ءيگا‑ت: ار‑تشكارغ ربّي‑نو فلّاون كولّوكن ف‑وودم ن‑ياسوع لماسيح، اشكو ار‑سفليدن مدّن غ‑كولّو دّونيت ف‑مامنك ا‑سرس‑تومنم. ربّي لّي‑مي‑تخدامغ س‑نّييت ن‑وول‑ينو س‑تبرّاحت لّخبار ءيفولكين ن‑يوس، نتّان ا‑يسّنّ مامنك ا‑بدّا‑گيگون‑سوينگيمغ غاكود نّا‑تژالّاغ، ار‑تي‑تضالابغ اد‑يّي‑يسّنم اغاراس ءيغ‑يرا، باش ا‑ن‑دارون‑اشكغ غ‑مايد‑د‑ياكمورن. اشكو ريغ باهرا ا‑كُن‑ژرغ اد‑اون‑ين‑اويغ كرا لّباراكا ن‑رّوح لقودوس ما‑كُن‑يسّدوسن غ‑ليمان. ريغ‑نّيت ا‑نزّعام ءي‑نگراتنّغ نكّي ديدون غ‑وغاراس لّماسيح. ريغ ا‑تيسّانم اي‑ايتما، منّاوت‑توال اد‑سكرغ ف‑ا‑ن‑دارون‑اشكغ والاينّي ار‑يّي‑يتحصار كرا. ريغ اد‑يّي‑تيلي لغلّت غ‑دارون غمكلّي‑يّي‑تلّا غ‑تميزار ن‑تسگيو ياضني. اشكو ءيلّا فلّا اد‑تعاوانغ كولّو مدّن، ايت‑تمدينت ءولا ايت‑ودرار، غويلّي غرانين ءولا غويلّي ءور‑غرينين. ماياد ا‑ف‑ريغ باهرا اد‑تبرّاحغ س‑لخبار ءيفولكين غ‑دارون ءولا كونّي لّي‑زدغنين غ‑روما. ءور‑ا‑تحشامغ س‑لخبار‑اد ءيفولكين، اشكو ءيگا تاحكيمت ءيتجهّدن ن‑ربّي لّي‑س‑ا‑يجّنجام كولّو وانّا يومنّ، ايت‑يودايا ءيمزوورا ءولا ايت‑تميزار ياضني. ار‑اغ‑يمالا لخبار‑اد مامنك ا‑س‑ا‑يسكار ربّي سّلامت غ‑گراس د‑ويلّي ءومنّين، ار‑تّ‑يسكار ف‑سّيبت لّيمان‑نسن غمكلّي ءيتياران، ءينّا ربّي: «وانّا يومنّ، نتّان ا‑ف‑راد‑رضوغ فكغ‑اس تودرت.» اشكو ءيبان‑د غيلاد لغاضاب ن‑ربّي. ءيگّوز‑د زغ‑يگنّا ف‑مدّن أُخشنّين لّي‑سرس‑رورنين تيغوردين‑نسن، ار‑سّرگاسن لحقّ س‑لخُشانت‑نسن. لغاضاب‑نس ا‑فلّاسن‑يلّان اشكو سّنّ ف‑ربّي ما‑فلّاس‑سّنّ كولّو مدّن، ربّي‑نّيت اد‑اسن‑ت‑يملان. اشكو زغ‑لّيغ ءيخلق دّونيت، ءيبان مامنك ا‑يگا غوالّي ءور‑يژري يان، ءيبان ءيس‑دارس تاحكيمت ءيتجهّدن ن‑والّي بدّا ءيلّان، ءيبان ءيس‑يگا ربّي ءيتجهّدن. سّنّ نتني مامنك ا‑يگا اشكو ژران ما‑يسكر، ءور‑دارسن ما‑تّينين. والاينّي واخّا سّنّ مدّن مامنك ا‑يگا ربّي، ءور‑ت‑وقّيرن غمكلّي‑تن‑د‑يقّانّ ءولا‑دا‑تي‑تشكارن. جلان نتني س‑يسوينگيمن‑نسن خوانين، يوورّي ءيلّاس لعاقل‑نسن ايلّيغ ءور‑فهيمن يات. ار‑تّينين: «نكُّني ا‑يطّافن لعاقل،» والاينّي ءينافالن اد‑گان. ءونفن ءي‑ربّي لّمجد لّي‑بدّا‑يلّان، ار‑تعبادن تيغاوسيوين لّي‑سكارن س‑يفاسّن‑نسن ار‑تنت‑سّرواسن س‑بنادم لّي‑يتمتاتن د‑يگضاض د‑لوحوش د‑يبنكالن. ف‑غايان ا‑ف‑تن‑يفل ربّي، يادج‑تن زايدن غ‑شّهوات‑نسن، ار‑تفسادن ار‑سكارن ءي‑نگراتسن ما‑يشّحشّامن، اگُين لحقّ ن‑ربّي امژن غ‑تكركاس. ار‑تعبادن ار‑سّمقاسان لمخلوقات، ءورد غوالّي‑تنت‑يخلقن. نتّان ا‑يستهلّان ا‑ت‑نتالغ غيلاد ءولا كولّو مايد‑د‑يفتان، امين. غايان ا‑ف‑تن‑يفل ربّي، يادج‑تن اد‑سكارن س‑شّهوات‑نسن لّي‑باهرا‑شّحشّامنين. ءولا تيمغارين‑نسن وورّينت ار‑طّارنت ءي‑نگراتسنت، ءور‑سول‑ا‑تّيرينت ءيرگازن. غمكان اد‑گان ءولا ءيرگازن، ار‑طّارن د‑يرگازن، ءور‑سول‑ا‑تّيرين تيمغارين. ار‑جدّرن س‑شّهوات ءي‑نگراتسن، ار‑تفسادن ءيرگازن د‑يرگازن ايلّيغ ءومژن ءي‑يخف‑نسن لعقوبيت لّي‑اسن‑يگان ف‑دّنوب‑نسن. اگُين مدّن‑ان ا‑ستّ‑اوين غ‑ربّي. غايان ا‑ف‑تن‑يفل اد‑زايدن س‑يسوينگيمن‑نسن ركانين د‑يسكّيرن‑نسن هرشنين. عمّرن س‑كولّو ما‑يگان لخُشانت د‑تشيطانت د‑طّماع د‑لعار. ار‑تنوّاشن غ‑كولّو ما‑تن‑يوفن، ءوجادن‑بدّا اد‑نقّان. ار‑تمّاغن ار‑تكنادن ار‑تژين. ار‑باهرا‑ساوالن غ‑وييّاض، ار‑رگّمن مدّن ار‑تكرهون ربّي. ءور‑ا‑توقّارن يان، ار‑سّفورّوگن ار‑سّيمغورن ءيخف‑نسن ار‑بدّا‑سيگّيلن تيلّاي لّجديد. اگُين اد‑سفليدن س‑ايت‑دارسن. ءيقّور‑وول‑نسن باهرا، ءور‑ا‑تقامان غ‑واوال‑نسن. ار‑تشقون د‑كولّو مدّن، ءور‑ا‑تحنّون غ‑يان. نتني سّنّ اوال ن‑ربّي لّي‑س‑ينّا لموت ا‑د‑يقّانّ وانّا ءيسكارن تيغاوسيوين‑اد، والاينّي ار‑تنت‑سول‑سكارن ار‑نّيت‑تفراحن س‑وييّاض نّا‑تنت‑سكارنين. ءيمّا كيّي ا‑بنادم، ءور‑دارك ما‑تّينيت. اشكو ءيغ‑ا‑تحكامت ف‑مدّن ياضني، هاتين تحكامت ءولا ف‑يخف‑نّك، اشكو كيّي لّي‑يتحكامن، ار‑تسكارت زوند نتني. نسّن ءيزد س‑لحقّ ا‑س‑ا‑يكّات ربّي لحوكم ف‑ويلّي سكارنين تيغاوسيوين‑ان. ءيمّا كيّي ا‑بنادم، ءيس‑تغالت ءيس‑را‑تنجمت زغ‑لحوكم ن‑ربّي؟ ار‑تحكامت ف‑ويلّي سكارنين غمكان، والاينّي ار‑تسكارت غمكان ءولا كيّي. ءيس‑ا‑تّينيت د‑يخف‑نّك «ربّي ءور‑را‑فلّا‑يحكام اشكو تگّوت دارس لحنانت د‑ومهال د‑صّبر»؟ والاينّي ءيس‑ور‑تسّينت ربّي ار‑سول‑گيك‑يتحنّو اشكو ءيرا گيك ا‑تفلت كولّو ما‑يُخشنّ توورّيت س‑وغاراس‑نس؟ ءيمّا كيّي ءيقّور‑وول‑نّك ءور‑تريت ا‑دي‑توورّيت. هاتي ار‑تسّيگاتّ ف‑يخف‑نّك لعقوبيت لّي‑را‑فلّاك‑يضر غ‑واسّ لّي‑غ‑را‑يوت ربّي لحوكم س‑لحقّ ءيمل منشك ا‑باهرا‑يكورها لخُشانت. اشكو ربّي را‑يرار ءي‑كرايگاتّ يان ف‑ما‑يسكر. لّان كرا ن‑مدّن ار‑بدّا‑سكارن افولكي ار‑ن‑ترجون غ‑دار ربّي ا‑تن‑يسّاتّوي ار‑تن‑يسّيمغور ءيفك‑اسن تودرت ءيدومن. نتني راد‑اسن‑يفك ربّي تودرت لّيخرت. ءيمّا وييّاض ار‑تمّاغن غير ف‑يخف‑نسن، ار‑سكارن س‑كولّو ما‑يُخشنّ، اگُين اد‑سكارن س‑لحقّ. نتني را‑فلّاسن‑يوت ربّي لعقوبيت س‑لغاضاب ءيتجهّدن. كولّو بنادم نّا‑يسكارن ما‑يُخشنّ، راد‑اس‑تيلي‑تمّارا د‑تگوضي. را‑تيلي زوار ءي‑ايت‑يودايا تيلي ءولا ءي‑ايت‑تميزار ياضني. ءيمّا كولّو وانّا ءيسكارن افولكي، را‑ت‑يسّاتّوي ربّي ءيسّيمغور‑ت ءيفك‑اس سّلامت. را‑ستّ‑يفك زوار ءي‑ايت‑يودايا ءيفك‑تّ ءولا ءي‑ايت‑تميزار ياضني. اشكو ربّي ءور‑ا‑يسكار س‑وودماون. وينّا سكارنين دّنوب والاينّي ءور‑سّينّ شّرع ن‑ربّي، راد‑كولّو‑تياوهلاكن بلا شّرع. ءيمّا وينّا سّنّين شّرع ار‑سول‑سكارن دّنوب، شّرع ا‑را‑فلّاسن‑يحكام. اشكو ربّي ءور‑ا‑يترضو ف‑ويلّي غير سفليدنين ءي‑شّرع، والاينّي ف‑ويلّي سكارنين س‑شّرع. هان مدّن ن‑تميزار ياضني ءور‑سّينّ شّرع، والاينّي غاكود نّا‑ياسن‑ينّا‑وگايّو‑نسن اد‑سكارن غمكلّي ءيتّيني شّرع، ار‑مالان ءيس‑سّنّ ما‑تن‑د‑يقّانّ ا‑ت‑سكارن، واخّا ءور‑سّينّ شّرع. ار‑مالان ءيس‑تّيارا لمعنا ن‑شّرع غ‑وولاون‑نسن، ار‑سّحسّون س‑توگّا لّي‑لّانين غ‑يگويّا‑نسن. ار‑گيسن‑تمّاغن ءيسوينگيمن‑نسن ارد ءيسّانّ مايد سكارن ءيزد لخُشانت نغد افولكي. را‑گيسن‑يبان كولّو ماياد غ‑واسّ لّي‑غ‑را‑يحكام ربّي س‑يسم لّماسيح ياسوع ف‑كولّو ما‑ينتلن غ‑وول ن‑بنادم. غمكاد ا‑يتّيني لخبار ءيفولكين لّي‑س‑ا‑تبرّاحغ. ءيمّا كيّي ما‑را‑تسكرت، كيّي لّي‑يتّينين ف‑يخف‑نّك گو‑يودايا ا‑تگيت؟ ار‑تبنّوت ف‑شّرع، ار‑تّينيت تگيت وين ربّي. ار‑تّينيت تسّنت ما‑يرا ربّي، تيسّانت ما‑را‑يفولكي اشكو ءيملا‑ياك‑ت شّرع. كيّي تگيت ءيخف‑نّك د‑ومزوار ءي‑يبوكاضن ءولا تيفاوت ءي‑ويلّي لّانين غ‑تيلّاس. ءيعزّو دارك ا‑تملت اغاراس ءي‑يمجلان ار‑تسّلمادت ءيبوجاديين. تغالت ءيس‑تطّافت كولّو تاواسّنا د‑لحقّ ف‑سّيبت ن‑ما‑تسّنت شّرع. ءيمّا كيّي لّي‑يسّلمادن وييّاض، ءيس‑ور‑را‑تسّلمادت ءيخف‑نّك؟ تميارت اد‑اسن‑تّينيت «ا‑ور‑تاكُرم» والاينّي ءيس‑ورد كيّي ايد ءيتاكُرن؟ تميارت ا‑تّينيت «ا‑ور‑تزنوم» والاينّي ءيس‑ورد كيّي ايد ءيتزنون؟ ار‑باهرا‑تّژيت ف‑لاصنام، والاينّي ءيس‑ورد كيّي ا‑يتاوين ما‑يتّيلين غ‑تگُمّا لّاصنام؟ ار‑تّينيت ف‑يخف‑نّك ءيس‑توفت مدّن ياضني اشكو تسّنت شّرع ن‑ربّي، والاينّي ءيس‑ورد كيّي ا‑يتكنادن ربّي تفّوغت زغ‑شّرع‑نس؟ غمكلّي ءيتياران غ‑وارّا ن‑ربّي: «ايت‑تميزار ياضني ار‑رگّمن غ‑يسم ن‑ربّي ف‑سّيبت‑نّون كونّي.» راد‑اك‑يشوو ءيغ‑تگيت زغ‑ويلّي تژالّانين ءي‑دّات‑نسن، ءيغ‑ا‑تسكارت س‑شّرع. والاينّي ءيغ‑ور‑ا‑تسكارت س‑شّرع، هان تاژالّيت ن‑دّات‑نّك ءور‑تگي يات. ءيمّا وانّا ءور‑يژّولّين ءي‑دّات، ءيغ‑ا‑يسكار س‑شّرع را‑فلّاس‑يرضو ربّي ءولا نتّا زوند ءيغ‑يژّولّا ءي‑دّات. غمكاد ا‑س‑كُن‑وفن ايت‑تميزار ياضني اشكو نتني ار‑سكارن س‑شّرع واخّا ءور‑دارسن تاژالّيت ن‑دّات، ءيمّا كونّي ن‑ايت‑يودايا تفّوغم زغ‑شّرع واخّا تژّولّام ءي‑دّات ءيلين‑وارّاتن ن‑شّرع غ‑گر ءيفاسّن‑نّون. ما‑يگان گو‑يودايا باب ن‑تژالّيت س‑لحقّ؟ ءور‑ت‑يگي غوالّي ءيسّغوسن دّات‑نس س‑تژالّيت لّي‑يتبانّ ءي‑مدّن. ا‑يگان گو‑يودايا س‑لحقّ د‑والّي ءيسّغوسن ءول‑نس. ءيسّغوس‑ت س‑تحكيمت ن‑رّوح لقودوس ءورد س‑وارّاتن ن‑شّرع، ءيبدّل زغ‑وگُنس‑نس ءورد برّا‑نس. وانّا ءيسكارن غمكاد، ءورد بنادم ا‑را‑ت‑يالغ والاينّي ربّي ا‑را‑ت‑يالغ. ءيمّا غيلاد، ما‑را‑نيني ف‑ايت‑يودايا؟ ءيس‑ور‑دارسن تيميخار ن‑ربّي ءوگُّار ن‑مدّن ياضني؟ ءيمّا تاژالّيت ن‑دّات، ءيس‑ور‑گيس‑تلّي كرا لّفايتّ؟ راد‑اون‑ينيغ، نتني اد‑دار تيميخار س‑كيگان. تاماخيرت تامزواروت: نتني ا‑مي‑يفكا ربّي ءيواليون‑نس. والاينّي لّيغ ءور‑زگان كرا ن‑ايت‑يودايا غ‑يواليون ن‑ربّي، ءيس‑يفّوغ نتّان زغ‑يواليون‑ان؟ ءوهو، ءور‑ا‑يتفّوغ ربّي زغ‑واوال‑نس. ار‑بدّا‑يسكار س‑لحقّ واخّا دا‑كولّو‑سكارن مدّن س‑تكركاس. غمكلّي ءيتياران: «را‑يبان ءيس‑يُغژان‑واوال‑نّك، ژرن ءيمصراضن‑نّك ءيزد كيّي ا‑دار لحقّ.» والاينّي ءيغ‑ا‑يتبان لحقّ ن‑ربّي س‑وگُّار ف‑سّيبت لّخُشانت لّي‑نسكار نكُّني، ءيزد را‑نيني «ربّي ءور‑يغوي لحقّ لّيغ فلّانّغ ءيغضب.» ها‑يّي ساولغ زوند مدّن ن‑دّونيت‑اد، والاينّي ءور‑را‑نيني غمكان. اشكو ربّي، مراد ءيس‑ور‑دارس لحقّ ءور‑را‑ييژضار ا‑يحكام ف‑دّونيت. ءيغ‑نفّوغ زغ‑لحقّ، نمل ءيزد ربّي ا‑دار لحقّ. والاينّي ءيغ‑نسّبايّن تيموغرا ن‑ربّي س‑غمكان، ماخ ايلّيغ سول ءيرا ا‑فلّانّغ‑يحكام ءيگ‑اغ د‑ويلّي أُخشنّين؟ ءيغ‑يگا غمكان ءيس‑ور‑را‑ياف ا‑نيني: «نكرات ا‑نسكار لخُشانت باش ا‑يبان‑وفولكي ن‑ربّي س‑وگُّار»؟ لّان‑نّيت كرا ن‑مدّن ار‑گينّغ‑رگّمن، غالن ءيزد غمكان ا‑س‑ا‑نتّيني. ءيمّا نتني را‑فلّاسن‑يتّوت لحوكم لّي‑اسن‑يگان. ءيمّا نكُّني ن‑ايت‑يودايا، ءيس‑نوف مدّن ياضني؟ ءوهو ءور‑تن‑نوف، اشكو ءيلّا لحوكم ن‑ربّي ف‑كولّو مدّن غمكلّي‑ياد نّيغ، ييلي ف‑ايت‑يودايا ييلي‑داغ ف‑ايت‑تميزار ياضني، اشكو ار‑كولّو‑سكارن دّنوب. غمكلّي ءيتياران غ‑وارّا ن‑ربّي: «ءور‑يلّي يان ءيفولكين، ءور‑يلّي يان ءيفهمن، ءور‑يلّي يان ءيسيگّيلن ربّي. فّوغن اغاراس كولّوتن، جلان. ءور‑يلّي يان ءيسكارن افولكي، ءور‑اكُّ‑يلّي يان. ار‑رژّمن اقرجوض‑نسن زوند امضّال ءيخوان. تيكركاس كا‑تاسين س‑يلس. سّمّ زوند ءيلگمّاضن ا‑يتكّان ءينفورن‑نسن. ءيمي‑نسن ار‑د‑يسّوفوغ نّعلات د‑ترگّام. ار‑بدّا‑توجادن اد‑سّياگّاسن وييّاض. ار‑تاوين تامّارا د‑تگوضي كولّو ماني تكّان. اغاراس ن‑سّلامت ءور‑جّو‑ت‑سّينّ. ءور‑اكُّ‑ا‑توقّارن ربّي.» كولّو ما‑يتياران غ‑شّرع، نسّن ءيس‑يتيارا ف‑سّيبت ن‑ويلّي دار شّرع، باش ا‑يقّن ءيمي ءي‑كرايگاتّ يان، تيلي دّونيت كولّوتّ غ‑دّو لحوكم ن‑ربّي. اشكو ءور‑يژضار يان ا‑يسكر سّلامت غ‑گراس د‑ربّي س‑يسكّيرن ن‑شّرع. والاينّي شّرع اد‑اغ‑يمالان ما‑يگان دّنوب. ءيمّا غيلاد ءيملا‑ياغ ربّي اغاراس لّي‑س‑يسكر سّلامت غ‑گراس د‑مدّن. ءورد شّرع ا‑س‑تّ‑يسكر، والاينّي ار‑نّيت‑يمالا شّرع ءولا لانبيا ءيزد لحقّ ا‑يگا. اشكو ربّي ار‑يسكار سّلامت غ‑گراس د‑ويلّي ءومنّين س‑ياسوع لماسيح. ار‑تّ‑ياكّا ءي‑كولّو وانّا يومنّ، اشكو بنادم يان ا‑يگا. كولّو مدّن سكرن دّنوب، اگّوگن ف‑لمجد ن‑ربّي. والاينّي س‑رّحمت‑نس ا‑س‑اسن‑يفكا لباراكا‑ياد، ءيسكر سّلامت غ‑گراس ديدسن ف‑سّيبت لّماسيح ياسوع. يوزن‑د لماسيح ا‑يمّت ءيفرو مدّن س‑يدامّن‑نس باش ا‑يصامح ءي‑وينّا سرس ءومنّين. غمكاد ا‑س‑يملا ربّي ءيزد س‑لحقّ ا‑س‑ا‑بدّا‑يسكار. غايد ءيزرين ءيصبر باهرا، ءور‑ا‑يتحكام ف‑دّنوب ن‑مدّن. ءيمّا غيلاد ءيملا مامنك ا‑يزّگا لحقّ، ءيفك سّلامت ءي‑وانّا يومنّ س‑ياسوع. ءيس‑سول‑نژضار ا‑نتشكار ءيخف‑نّغ؟ ءوهو، ءور‑اكُّ‑نژضار ا‑نشكر ءيخف‑نّغ، اشكو ءور‑ا‑فلّانّغ‑يترضو ربّي ف‑سّيبت ن‑كرا نسكار والاينّي ف‑سّيبت ن‑ما‑نومن. نلمد ءيس‑يسكر ربّي سّلامت غ‑گراس د‑مدّن ف‑سّيبت لّيمان‑نسن، ءورد ف‑سّيبت ن‑يسكّيرن ن‑شّرع. را‑كُن‑سقساغ غيلاد: ءيزد ربّي وين ايت‑يودايا كا‑يگا؟ ءيس‑ور‑يگي وين ايت‑تميزار ياضني ءولا نتني؟ س‑صّاحت، ءيگا ربّي ن‑ايت‑تميزار ياضني، اشكو ءور‑يلّي ابلا نتّان. را‑يسكر سّلامت غ‑گراس د‑ايت‑يودايا ف‑سّيبت ن‑ماد‑ومنّ، ءيسكر سّلامت غ‑گراس د‑ايت‑تميزار ياضني ف‑سّيبت ن‑ماد‑ومنّ ءولا نتني. والاينّي ءيغ‑ا‑نتامن غمكاد ءيس‑را‑نيري ا‑ن‑نلوح شّرع؟ ءوهو، ءور‑اكُّ‑را‑ن‑نلوح شّرع، والاينّي ار‑ت‑سول‑نزّگا. ما‑را‑نيني ف‑يبراهيم لّي‑يگان باباتنّغ زغ‑تسگا ن‑دّات؟ ماد‑اس‑يلّان؟ مراد ءيزد ف‑سّيبت ن‑كرا ءيسكار ءيبراهيم ا‑ف‑فلّاس‑يرضا ربّي، را‑دارس‑ييلي ما‑س‑ا‑يتشكار ءيخف‑نس. والاينّي ءور‑يژضار يان ا‑يشكر ءيخف‑نس غ‑لگدّام ن‑ربّي. ءيتيارا غ‑وارّا ن‑ربّي: «ءيبراهيم يومن ربّي، مايان ا‑ف‑ت‑يگا ربّي د‑واد‑ف‑يرضا.» وانّا ءيتخدامن ار‑يتامژ تيغراد‑نس، ءورد تيكّي اد‑گانت، والاينّي ف‑تووري لّي‑يسكر ا‑ف‑ا‑تنت‑يتامژ. ءيمّا وانّا يومنّ س‑والّي ياكّان سّلامت ءي‑مدّن أُخشنّين، را‑ت‑يگ ربّي د‑واد‑ف‑يرضا ف‑سّيبت ن‑ما‑يومن، ءورد ف‑سّيبت ن‑كرا ءيسكار. ءولا داود ءيملا ءيزد امباركي ا‑يگا وانّا‑ف‑يرضا ربّي بلا ءيسكر يات، ييني: «ءيمباركين اد‑گان وينّا مي ءيصامح ربّي ف‑دّنوب‑نسن، ءيسّيتّي فلّاسن غايلّي‑تن‑يشّحشّامن. امباركي ا‑يگا وانّا مي ءور‑يحاسب ربّي لمعصيات‑نس.» ما‑را‑نيني ف‑لباراكا‑ياد ف‑يساول داود؟ ءيس‑تلّا غير ءي‑ويلّي ژّولّانين ءي‑دّات‑نسن؟ ءوهو، تلّا ءولا ءي‑ويلّي ءور‑ژّولّينين ءي‑دّات. اشكو نغرا ما‑يتياران ف‑يبراهيم، نغر ءيزد ف‑سّيبت ن‑ما‑يومن ا‑ف‑ت‑يگا ربّي د‑واد‑ف‑يرضا. ءيمّا رّضا‑ياد، ماناگو اد‑اس‑ت‑يفكا ربّي؟ ءيزد غاكود لّيغ ءور‑تا‑يژّولّي ءيبراهيم ءي‑دّات‑نس، نغد غ‑تغوردين ن‑ماد‑اس‑يژّولّا؟ ءيفكا‑ياس‑ت ربّي لّيغ ءور‑تا‑يژّولّي. تگا‑ياس‑تژالّيت‑ان تاماتارت ما‑س‑ا‑د‑يكتّي رّضا لّي‑اس‑يفكا ربّي ف‑سّيبت ن‑ما‑يومن لّيغ ءور‑تا‑يژّولّي ءي‑دّات‑نس. غمكاد ا‑س‑يوورّي ءيگا ءيبراهيم باباتسن ن‑كولّو ويلّي ءومنّين ربّي، ا‑تن‑يگان د‑ويلّي‑ف‑يرضا ربّي واخّا ءور‑ژّولّين ءي‑دّات. ءيمّا ءيبراهيم ءيگا باباتسن ءولا ن‑ويلّي ژّولّانين ءي‑دّات، ءورد غير ف‑سّيبت ن‑تژالّيت والاينّي ف‑سّيبت ن‑ماد‑ومنّ ربّي ءولا نتني غمكلّي يومن ءيبراهيم لّيغ ءور‑تا‑يژّولّي ءي‑دّات‑نس. اوال ءيزگان ا‑س‑ينّا ربّي ءي‑يبراهيم ءولا تاروا‑نس، ييني‑اس: «را‑توورتم كولّو دّونيت.» ءورد ف‑سّيبت ن‑شّرع ا‑ف‑اس‑ينّا اوال‑ان، والاينّي ف‑سّيبت ن‑ما‑يومن ءيبراهيم ءيرضو فلّاس ربّي. مراد ءيزد ايت‑شّرع ا‑را‑يوورت دّونيت ءور‑را‑ييلي يات ءي‑ويلّي ءومنّين ءولا‑را‑يزگا‑واوال‑ان ن‑ربّي. ءيمّا شّرع را‑د‑ياوي لعقوبيت ن‑ربّي ف‑ويلّي سّنّين شّرع. والاينّي غويلّي‑ت‑ور‑سّينّين، نتني ءور‑زگيس‑فّوغن. ءيمّا غويلّي ءومنّين، نتني ا‑را‑يامژ كولّو ماياد. نتني ا‑مي‑را‑يسّافو ربّي اوال‑نس، باش ا‑ياكّا لباراكا‑نس ءي‑كولّو وينّا گانين تاروا ن‑يبراهيم، ءورد غير ءي‑ويلّي سكارنين س‑شّرع، والاينّي را‑ستّ‑ياكّا ءي‑ويلّي ءومنّين غمكلّي يومن ءيبراهيم. اشكو ءيبراهيم يوورّي ءيگا باباتنّغ كولّواغ، غمكلّي ءيتياران: «گيغ‑ك د‑باباتسن ن‑ايت‑تميزار گّوتنين.» غمكاد ا‑س‑يگا ءيبراهيم باباتنّغ دار ربّي لّي‑س‑يومن، ا‑ت‑يگان د‑والّي ءيسّدّرن غويلّي مّوتنين، ار‑يتامر ما‑ور‑يلّين ا‑ييلي س‑يلّا. ءيمّا ءيبراهيم، واخّا ءور‑تا‑ياس‑يلّي يات غ‑مايلّي ءيترجو، ءيزوويد ار‑سول‑يترجو س‑ليمان ءيگّوتن ايلّيغ‑نّيت يوورّي ءيگا «باباتسن ن‑ايت‑تميزار گّوتنين.» ءينّا‑ياس ربّي: «غونشكاد ا‑راد‑گن تاروا‑نّك.» نتّا ءور‑يشكّا غ‑ماد‑اس‑ينّا ربّي، واخّا ءيسّن ءيس‑دارس‑يلّا ما‑يتگّان ميّا ن‑وسگُّاس، تووسّر دّات‑نس باهرا ءولا تژضار‑تمغارت‑نس سارا ا‑تربّو. يومن ربّي بلا‑اكُّ ءيشكّا غ‑واوال لّي‑س‑اس‑ينّا. ءيزايد ءيدوس غ‑ليمان‑نس ار‑يتالغ ربّي، ييسّان باهرا ءيس‑يژضار ربّي ا‑يكمّل مايلّي‑س‑اس‑ينّا س‑واوال ءيزگان. ماياد ا‑ف‑ت‑يگا ربّي د‑واد‑ف‑يرضا، اشكو يومن. والاينّي لّيغ ءيتيارا «ءيگا‑ت د‑واد‑ف‑يرضا،» ءورد غير ف‑سّيبت ن‑يبراهيم ا‑ف‑يتيارا‑واوال‑ان. ءيتيارا ف‑سّيبت‑نّغ ءولا نكُّني. اشكو ربّي راد‑اغ‑يگ د‑ويد ف‑يرضا ءولا نكُّني، ف‑سّيبت ن‑ما‑نومن سرس نتّان لّي‑د‑يسّنكرن سيديتنّغ ياسوع زغ‑لموت. ءيدحي‑ت ا‑يمّت ف‑سّيبت ن‑دّنوب‑نّغ، ءيسّنكر‑ت‑يد ا‑يسكر سّلامت غ‑گراتنّغ ديدس. ءيمّا غيلاد تلّا‑ياغ سّلامت غ‑گراتنّغ د‑ربّي ف‑وودم ن‑سيديتنّغ ياسوع لماسيح، اشكو ءيگا‑ياغ د‑ويد‑ف‑يرضا ف‑سّيبت ن‑ما‑سرس‑نومن. ف‑وودم لّماسيح ا‑ف‑اغ‑تلّا لباراكا‑ياد لّيغ سرس نومن. ار‑باهرا‑نتفراح س‑رّجا‑ياد‑اغ‑يفكا، اشكو نسّن ءيس‑راد‑اغ‑يشّكشم س‑لمجد ن‑ربّي. والاينّي ءورد غير مايان ا‑س‑ا‑نتفراح. ار‑نتفراح ءولا س‑ترفوفنت نّا‑دارنّغ‑يلّان، اشكو نسّن ءيزد س‑ترفوفنت ا‑س‑را‑گينّغ‑يتزاياد صّبر. ءولا س‑صّبر ا‑س‑را‑نتنرو تاسّاست نّا‑يلّان. ءولا س‑تنري ا‑س‑را‑دارنّغ‑ييلي رّجا. ءولا رّجا ءور‑راد‑اغ‑يژّيگُراژ، اشكو ربّي ءيعمّر ءولاون‑نّغ س‑لحنانت‑نس س‑تحكيمت ن‑رّوح لقودوس لّي‑اغ‑يفكا. غاكود لّي‑يقصاد ربّي، لّيغ سول نضعف، ءيمّوت لماسيح اد‑اغ‑يجّنجم نكُّني لّي‑ن‑يرورن تيغوردين‑نّغ س‑ربّي. ءيس‑ور‑را‑يشقو ا‑يمّت كرا ن‑يان ف‑يان ءيسكارن لحقّ؟ ءيژضار ا‑ييلي ما‑را‑يزعم ارد ءيمّت ف‑يان ءيفولكين، والاينّي ربّي ءيملا‑ياغ منشك ا‑س‑گينّغ‑يحنّا، اشكو ءيمّوت فلّانّغ لماسيح لّيغ سول ا‑نتسالا دّنوب. ءيمّا غيلاد غ‑يسكر سّلامت غ‑گراتنّغ د‑ربّي س‑لموت‑نس، نسّن باهرا ءيس‑راد‑اغ‑يجّنجم لماسيح زغ‑لغاضاب ن‑ربّي. اشكو لّيغ سول نگا ويد تژينين د‑ربّي، ءيسكر سّلامت غ‑گراتنّغ ديدس س‑لموت ن‑يوس. ءيمّا غيلاد غ‑تلّا سّلامت غ‑گراتنّغ ديدس، نسّن س‑وگُّار ءيس‑راد‑اغ‑يجّنجم س‑تودرت‑نس. والاينّي ءورد غير مايان ا‑دارنّغ‑يلّان. نكُّني س‑لفرح ءيگّوتن ا‑س‑ا‑نتفراح س‑ربّي، اشكو ءيفكا‑ياغ سّلامت غيلاد غ‑گراتنّغ ديدس ف‑سّيبت ن‑سيديتنّغ ياسوع لماسيح. ف‑سّيبت ن‑باباتنّغ ادام ا‑س‑د‑كشمن دّنوب س‑دّونيت، اوين‑د لموت. مايان ا‑ف‑ا‑تمتاتن كولّو مدّن، اشكو كولّو سكرن دّنوب. كّان‑تّين دّنوب غ‑دّونيت ءور‑تا‑يتياوفكا شّرع. ءور‑ا‑يتحاساب ربّي دّنوب‑ان لّيغ ءور‑يلّي شّرع، والاينّي ار‑كولّو‑تمتاتن مدّن‑ان. ار‑تن‑تّنرو لموت زغ‑ووسّان ن‑ادام د‑سول غ‑ووسّان ن‑موسا، ار‑تّنرو ءولا غويلّي ءور‑فّوغنين زغ‑كرا ن‑واوال ن‑ربّي غمكلّي ءيفّوغ ادام س‑لمعصيت لّي‑يسكر نتّان. ءيرواس ادام ءي‑ياسوع لّي‑د‑يوشكان تيگيرا‑نس. والاينّي ءورد يان اد‑گان، اشكو تاوافكا ن‑ربّي ءور‑تگي زوند لمعصيت ن‑ادام. گّوتن غويلّي مّوتنين ف‑سّيبت لّمعصيت ن‑ورگاز‑ان، والاينّي ءوگُّار ا‑تگا لباراكا ن‑ربّي ءولا تاوافكا لّي‑س‑يبارك مدّن گّوتنين ف‑وودم ن‑ورگاز ياضني ا‑ت‑يگان د‑ياسوع لماسيح. تاوافكا‑ياد ءور‑تگي زوند لمعصيت‑ان. اشكو لّيغ ءيعاصا ادام يات‑توال، يوت ربّي فلّاس لحوكم س‑لعقوبيت ءيشقان. ءيمّا غيلاد غ‑باهرا‑عاصان مدّن گّوتنين، ءيفكا‑ياغ تاوافكا‑ياد ن‑سّلامت غ‑گراتنّغ ديدس. تكّا‑تّين لموت ار‑تّنرو ف‑سّيبت لّمعصيت ن‑ادام، والاينّي ءوگُّار ن‑مايان ا‑را‑ننرو س‑تودرت لّي‑اغ‑يلّان ف‑سّيبت ن‑ياسوع لماسيح، نكُّني لّي‑مي‑يفكا ربّي لباراكا ءيگّوتن د‑توافكا ن‑سّلامت غ‑گراتنّغ ديدس. غاكود لّيغ ءيعاصا ادام، ا‑تلّا لعقوبيت ءي‑كولّو مدّن. غاكود لّيغ ءيسكر ياسوع ما‑يرضان ربّي، ا‑تلّا سّلامت د‑تودرت ءي‑كولّو مدّن. غاكود لّيغ ءيفّوغ ادام زغ‑واوال ن‑ربّي، ا‑يرور مدّن گّوتنين فّوغن زغ‑واوال‑نس. غاكود لّيغ ءيسكر ياسوع س‑واوال ن‑ربّي، ا‑يرور مدّن گّوتنين ءيرضو فلّاسن ربّي. ءيفك ءيلمّا ربّي شّرع باش اد‑يگاتن لمعصيات. والاينّي غونشك لّي‑تّيگاتن دّنوب ءوگُّار‑ان ا‑تگا لحنانت ن‑ربّي. هاتي لقوّا ن‑دّنوب ار‑دي‑تّاوي لموت، ءيمّا لقوّا لّحنانت ن‑ربّي ار‑دي‑تّاوي سّلامت د‑تودرت ءيدومن ف‑وودم ن‑ياسوع لماسيح سيديتنّغ. ما‑را‑نيني ف‑ماياد؟ ءيس‑ا‑نزايد غ‑دّنوب باش ا‑تّيگات لحنانت ن‑ربّي؟ ءوهو، ءورد غمكان ا‑را‑نسكار. اشكو نكُّني نمّوت ءي‑دّنوب. مامنك ا‑را‑نيري ا‑سول‑گيسن‑نزايد؟ ءيس‑ور‑تسّينم؟ لّيغ ندّم غ‑وامان باش ا‑نگ وين لماسيح ياسوع، نكشم س‑لموت لّماسيح س‑ودوم‑ان. نتياومضال ديدس س‑ودوم لّي‑يرواسن ءي‑لموت باش ا‑ندّر س‑تودرت لّجديد، غمكلّي‑د‑ينكر نتّان زغ‑لموت س‑تحكيمت ن‑ربّي باباس. اشكو لّيغ نوورّي نگا زوند لماسيح غ‑لموت‑نس، را‑نگ زوند نتّان ءولا غ‑تودرت‑نس لّجديد. نسّن مايد‑اغ‑يجران. ءيمّوت زغ‑گينّغ بنادم اقديم لّي‑ستّين‑نكّا نگا‑ت. ءيمّوت د‑لماسيح ف‑وگّجدي باش ا‑تيتّي لقوّا ن‑دّنوب زغ‑وول‑نّغ ا‑ور‑سول‑نگ ءيسمگان ءي‑دّنوب. اشكو وانّا ءيمّوتن، هاتي ءيتياوفساي زغ‑يسكراف ن‑دّنوب. لّيغ نمّوت د‑لماسيح، نامن ءيس‑را‑ديدس‑ندّر، اشكو نسّن ءيس‑ور‑را‑يمّت لماسيح تيس سنات‑توال غيلاد غ‑د‑ينكر زغ‑لموت. ءور‑سار‑تژضار لموت ا‑تي‑تنرو. غاكود لّيغ ءيمّوت لماسيح ءيمّت يات‑توال ءي‑كولّو ما‑يگان دّنوب. ءيمّا غيلاد غ‑يدّر، هاتي ءيدّر ءي‑ربّي. غمكاد ا‑كُن‑د‑يقّان ءولا كونّي ا‑تگم ءيخف‑نّون د‑ويلّي مّوتنين ءي‑دّنوب تدّرم ءي‑ربّي ف‑سّيبت ن‑ما‑تگام وين لماسيح ياسوع. ا‑ور‑تادجم دّنوب اد‑تحكامن غ‑دّات‑نّون لّي‑را‑يمّت، ءولا‑دا‑كُن‑تراران ا‑تسكارم س‑لخُشانت لّي‑يتّيري‑وول ن‑بنادم. ا‑ور‑تاكّام ءيگزمان ن‑دّات‑نّون زوند ءيروكوتن لّخُشانت اد‑سكارن دّنوب. والاينّي فكات ءيخفاون‑نّون ءي‑ربّي زوند غويلّي نكرنين زغ‑لموت س‑تودرت لّجديد، تفكم ءيگزمان‑نّون ءي‑ربّي زوند ءيروكوتن ن‑وفولكي. ءور‑را‑كُن‑نرون دّنوب اشكو ءور‑تگيم غويلّي‑ف‑يلّا شّرع، والاينّي تگام غويلّي‑ف‑تلّا لحنانت ن‑ربّي. ما‑را‑نيني ف‑ماياد؟ ءيس‑را‑نزايد ار‑نسكار دّنوب ف‑سّيبت ن‑ما‑نگا غويلّي‑ف‑تلّا لحنانت ن‑ربّي ءورد شّرع؟ ءوهو، ءورد غمكان ا‑را‑نسكار، اشكو تسّنم ماياد: ءيغ‑تفكام ءيخف‑نّون ءي‑كرا ن‑يان ا‑تسكارم ما‑يرا، توورّيم تگام ءيسمگان ءي‑والّي مي تسكارم س‑واوال‑نس. ءيغ‑ا‑تسكارم دّنوب راد‑اون‑تيلي لموت، والاينّي ءيغ‑ا‑تسكارم ما‑يرا ربّي راد‑اون‑ييلي‑وفولكي لّي‑س‑يرضا. ءيمّا غيلاد ءيلّا فلّانّغ ا‑باهرا‑نتالغ ربّي، اشكو كونّي لّي‑ستّين‑يكّان تگام ءيسمگان ن‑دّنوب، هاتي توورّيم ار‑تسكارم س‑نّييت ن‑وول‑نّون س‑تنباضين ن‑ولمّود لّي‑مي‑تسفلدم. ءيفسي‑اون ربّي زغ‑يسكراف ن‑دّنوب ايلّيغ توورّيم تگام ءيسمگان ن‑ربّي ار‑تسكارم س‑ما‑ت‑يرضان. هاتي ار‑ديدون‑ساوالغ غيلاد س‑يواليون رخانين اشكو تضعفم، ءيشقا فلّاون ا‑تفهمّ. تكّام‑تّين تفكام ءيخفاون‑نّون ءيسمگان ءي‑لعيب د‑لخُشانت باش ا‑تّزايادم ار‑تسكارم كولّو ما‑يُخشنّ. ءيمّا غيلاد ءيقّان‑كُن‑د ا‑تفكم ءيخفاون‑نّون ا‑تسكارم افولكي لّي‑س‑يرضا ربّي تّياوژلايم ا‑تگم وينس. لّيغ تّين تكّام تگام ءيسمگان ءي‑دّنوب، ار‑سول‑تسكارم غمكلّي تّيريم بلا‑دا‑تّلهوم س‑ما‑يرضان ربّي. والاينّي غايان تسكارم لّي‑ف‑كُن‑تُگراژ غيلاد، ما‑لّفايتّ زگيس تومژم؟ ءيسكّيرن‑ان ءور‑ا‑دي‑تاوين ابلا لموت. والاينّي ربّي ءيفسي‑اون زغ‑يسكراف ن‑دّنوب. توورّيم تگم ءيسمگان ن‑ربّي، تّياوژلايم ا‑تگم وينس تيلي‑اون لفايتّ ن‑تودرت ءيدومن. اشكو تيغراد ن‑دّنوب لموت ا‑ستّ‑يگان، والاينّي تيكّي ن‑ربّي تگا تودرت ءيدومن ف‑وودم لّماسيح ياسوع سيديتنّغ. واي‑ايتما، راد‑باهرا‑تفهمّ ما‑راد‑اون‑ينيغ اشكو كونّي تسّنم شّرع. تيسّانم ءيس‑ور‑ا‑يتحكام شّرع ابلا ف‑ويلّي دّرنين. غمكاد ا‑را‑ييلي‑ورگاز تامغارت‑نس كولّو ما‑يكّا ءيدّر، والاينّي ءيغ‑يمّوت‑ورگاز تفسي‑تمغارت زغ‑يسكراف لّعقد لّي‑ستّ‑ديدس‑يكرفن. ءيغ‑تدّا نتّات تزدغ د‑كرا ن‑ورگاز ياضني سول ءيدّر‑ورگاز‑نس، راد‑اس‑تّينين ‹تامگّانت›. والاينّي ءيغ‑يمّوت‑ورگاز‑نس، تفسي‑تمغارت زغ‑لعقد‑لّي ن‑شّرع. ءور‑را‑تگ تامگّانت ءيغ‑تّ‑يتاهل يان ياضني. غمكاد ا‑تگام ءولا كونّي اي‑ايتما. تمّوتم س‑لموت لّماسيح ءي‑ما‑يگان وين شّرع، ءيطّاف‑كُن يان ياضني، ا‑ت‑يگان د‑والّي‑د‑ينكرن زغ‑لموت باش ا‑نسكار لغلّت ءيفولكين ءي‑ربّي. غايد ءيزرين نكّا‑تّين ار‑نتلهو س‑ما‑يتّيري بنادم ءي‑يخف‑نس، ار‑اغ‑يترارا شّرع ا‑نسوينگيم س‑وگُّار غ‑لخُشانت لّي‑يتّيري‑وول‑نّغ، ايلّيغ ا‑نسكار لغلّت يُخشنّ لّي‑د‑يتاوين لموت. ءيمّا غيلاد نتياوفساي زغ‑شّرع نمّت ءي‑غايلّي‑اغ‑يكرفن، باش ا‑نگ ءيخدّامن ن‑ربّي ءورد س‑تنباضين تيقديمين ن‑شّرع لّي‑يتياران والاينّي س‑تنباضين لّجديد ن‑رّوح لقودوس. ءيمّا شّرع، ما‑را‑فلّاس‑نيني؟ ءيس‑يُخشن؟ ءوهو، ءورد غمكان ا‑را‑نيني، اشكو شّرع ا‑يّي‑يملان دّنوب. مراد ءيس‑ورد شّرع ا‑ينّان «ا‑ور‑تّيريت ما‑يگان وين وييّاض» ءيكون ءور‑راد‑يسّانغ ءيس‑باهرا‑يُخشن اد‑يريغ ما‑يگان وين وييّاض. والاينّي لّيغ سفلدغ ءي‑لوصيت‑ان مغين‑د گيگي دّنوب، رارن‑يّي ا‑تّيريغ كولّو كرا ءيگان وين وييّاض. والاينّي ءينّاغ ءور‑يلّي شّرع ءور‑ژضارن دّنوب اد‑د‑مغين. ءولا نكّي كّيغ‑تّين دّرغ لّيغ ءور‑تا‑سّينغ شّرع، والاينّي غاكود لّيغ سفلدغ ءي‑لوصيت بدون دّنوب ار‑گيگي‑تمغاين ايلّيغ‑يّي‑سّروحن ءي‑لموت. لوصيت لّي‑يملان ءي‑مدّن اغاراس ن‑تودرت، نتّات ا‑يّي‑د‑ييوين لموت. اشكو لّيغ سفلدغ ءي‑لوصيت‑ان مغين‑د گيگي دّنوب، جلون‑يّي نغن‑يّي. ماياد ا‑ف‑اون‑تّينيغ: شّرع ءيگا وين ربّي، ءولا لوصيت تگا تين ربّي. لحقّ اد‑گان فولكين باهرا. والاينّي ءيزد مايلّي ءيفولكين ا‑يّي‑د‑ييوين لموت؟ ءوهو ءورد غمكان ا‑يگا، اشكو دّنوب ا‑يّي‑د‑ييوين لموت. كشمن دّنوب غ‑مايلّي ءيفولكين باش اد‑يسّانغ دّنوب مامنك اد‑گان. ماياد ا‑ف‑يفكا ربّي لوصيت‑نس: باش ا‑نژر منشك ا‑باهرا‑أُخشنّ دّنوب. نسّن شّرع ءيس‑يگا وين ربّي، ءيمّا نكّي گيغ بنادم ءيضعفن، گغ ءيسمگ ءي‑دّنوب. ءور‑ا‑تفهامغ ماد‑سكارغ. ءور‑ا‑سكارغ افولكي لّي‑ريغ، والاينّي لخُشانت لّي‑كورهيغ كاد‑سكارغ. اكود نّا‑سكارغ ما‑ور‑ريغ ار‑مالاغ ءيس‑سّنغ شّرع ءيفولكي. ار‑مالاغ‑داغ ءيس‑ورد نكّي ا‑يسكارن غايان والاينّي لقوّا ن‑دّنوب لّي‑گيگي‑يلّان، نتّات ا‑ت‑يسكارن. سّنغ ءيس‑ور‑يلّي كرا ءيفولكين غ‑دّات‑اد‑ينو. واخّا دا‑تّيريغ اد‑سكارغ افولكي ءور‑ا‑تيژضارغ. ءور‑ا‑سكارغ افولكي لّي‑ريغ، والاينّي لخُشانت لّي‑ور‑ريغ، نتّات اد‑سكارغ. ءيغ‑ا‑سكارغ غايلّي ءور‑ريغ، ءورد نكّي ا‑ت‑يسكارن والاينّي لقوّا ن‑دّنوب لّي‑گيگي‑يلّان، نتّات ا‑ت‑يسكارن. هاتي غمكاد ا‑بدّا‑گيغ: اكود نّا‑ريغ اد‑سكرغ افولكي ار‑ن‑تافاغ ءيخف‑ينو ءور‑ژضارغ غير ءي‑لخُشانت. غ‑وول‑ينو ار‑تفراحغ س‑تنباضين ن‑ربّي، والاينّي غ‑وگُنس‑ينو ار‑ن‑تافاغ كرا ن‑تنباضين ياضني ار‑تمّاغنت د‑تنباضين لّعاقل‑ينو. ار‑يّي‑كّرفنت‑تنباضين ن‑دّنوب لّي‑لّانين غ‑وگُنس‑ينو. تاگوضي اد‑يّي‑يلّان. ما‑را‑يّي‑يجّنجم زغ‑دّات‑اد لّي‑يّي‑يتاوين س‑لموت؟ والاينّي راد‑باهرا‑تالغّ ربّي، اشكو ف‑وودم ن‑ياسوع لماسيح سيديتنّغ ا‑ف‑راد‑نجمغ. والاينّي غمكاد اد‑سول‑گيغ نكّي: ار‑تّيريغ تينباضين ن‑ربّي س‑لعاقل‑ينو، والاينّي دّات‑ينو ار‑سول‑تسكار س‑تنباضين ن‑دّنوب. ءيمّا غيلاد ءور‑سول‑تلّي لعقوبيت ءي‑وانّا ءيگان وين لماسيح ياسوع. اشكو تينباضين ن‑رّوح لّي‑د‑ييوين تودرت ءي‑ويلّي گانين وين لماسيح ياسوع، نتنتي ا‑يّي‑يفسين زغ‑تنباضين ن‑دّنوب د‑لموت. ءور‑يژضار شّرع ا‑يفسي ءي‑بنادم، اشكو بنادم ءيضعف ءور‑يژضار ا‑يسكار س‑شّرع. والاينّي ربّي اد‑اغ‑يفسين، يازن‑د يوس ا‑يطّاف دّات ن‑بنادم زوند تين ويلّي سكارنين دّنوب. يوت ءيلمّا ربّي لحوكم ف‑دّات ن‑يوس باش ا‑يسّيتّي دّنوب ف‑بنادم. ءيسكر ربّي مايان باش ا‑يسّافو لحقّ ن‑شّرع لّي‑فلّانّغ‑يلّان نكُّني لّي‑يسكارن غيلاد س‑ما‑يرا رّوح لقودوس ءورد ما‑ترا دّات ن‑بنادم. غويلّي‑ستّ‑يتاوين غ‑دّات ار‑تلهون ءيخف‑نسن س‑ما‑ترا دّات. ءيمّا غويلّي‑ستّ‑يتاوين غ‑رّوح لقودوس ار‑تلهون س‑ما‑يرا رّوح لقودوس. وانّا ءيتلهون ءيخف‑نس س‑ما‑ترا دّات راد‑اس‑تيلي لموت. وانّا ءيتلهون س‑ما‑يرا رّوح لقودوس راد‑اس‑تيلي تودرت د‑سّلامت. يان ءيتلهون س‑دّات، هاتي ار‑يتمّاغ د‑ربّي، اشكو ءور‑ا‑يسكار س‑تنباضين ن‑ربّي، ءور‑اكُّ‑يژضار ا‑سرسنت‑يسكار. غويلّي سكارنين س‑ما‑ترا دّات ن‑بنادم ءور‑ژضارن اد‑رضون ربّي. ءيمّا كونّي، ءيغ‑گيگون ءيلّا رّوح ن‑ربّي، ءور‑را‑تسكارم س‑ما‑ترا دّات، والاينّي را‑تسكارم س‑ما‑يرا رّوح. وانّا‑غ‑ور‑يلّي رّوح لّماسيح، ءور‑اكُّ‑يگي وين لماسيح. ءيمّا كونّي، لّيغ گيگون ءيلّا لماسيح، هاتي تدّرم س‑تودرت ن‑رّوح. اشكو تلّا سّلامت غ‑گراتون د‑ربّي واخّا را‑تمّت دّات‑نّون ف‑سّيبت ن‑دّنوب. لّيغ گيگون ءيلّا رّوح ن‑والّي‑د‑يسّنكرن ياسوع زغ‑لموت، را‑يسّدّر دّات‑نّون لّي‑ف‑تلّا لموت. اشكو غوالّي‑د‑يسّنكرن لماسيح زغ‑لموت را‑كُن‑يسّدّر ءولا كونّي س‑تحكيمت ن‑رّوح‑نس لّي‑گيگون‑يلّان. غمكاد اي‑ايتما، ءيلّا فلّانّغ ا‑نسكار س‑ما‑يرا رّوح ن‑ربّي ءورد ما‑ترا دّات‑نّغ. ءيغ‑ا‑تسكارم س‑ما‑ترا دّات، راد‑اون‑تيلي لموت. والاينّي ءيغ‑ا‑تنقّام ءيسكّيرن ن‑دّات س‑تحكيمت ن‑رّوح، راد‑اون‑تيلي تودرت. كولّو وينّا سفليدنين س‑رّوح ن‑ربّي، گان تاروا ن‑ربّي. اشكو رّوح لّي‑اون‑يفكا ربّي ءور‑كُن‑يرور ا‑تگم ءيسمگان توورّيم‑داغ تيكساضم، والاينّي ءيرور‑كُن ا‑تگم تاروا ن‑ربّي ايلّيغ ا‑سرس‑ناقرا: «ابّا، وا‑بابا.» هاتي ءيمشاشكا‑د رّوح ن‑ربّي د‑رّوح‑نّغ ار‑اغ‑مالان ءيزد تاروا ن‑ربّي ا‑نگا. لّيغ نگا تاروا‑نس، نيسّان ءيس‑را‑نطّاف لوورت لّي‑را‑ييلي ءي‑مدّن ن‑ربّي، را‑نكشم غ‑لوورت لّماسيح. ءيغ‑ديدس‑نمون غ‑ورفوفن، را‑ديدس‑نيلي غ‑لمجد. سّنغ نكّي تارفوفنت ن‑ووسّان‑اد ءور‑تسوي يات غ‑لگدّام لّمجد لّي‑راد‑اغ‑يفك ربّي غ‑مايد‑د‑يوشكان. اشكو كولّو ما‑يخلق ربّي غ‑دّونيت‑اد ار‑يتقل ييري باهرا اسّ‑ان غ‑راد‑د‑بانّ تاروا ن‑ربّي. اشكو ربّي ءيرور دّونيت ا‑تّژوژض ما‑مي‑ور‑تژضار. ءورد دّونيت ا‑يران ا‑تگ غمكان والاينّي ربّي اد‑اس‑ت‑يسكرن. والاينّي ءيفكا‑ياس سول رّجا، راد‑اس‑يفسي زغ‑يسكراف لّهالاك باش ا‑ن‑تكشم ءولا نتّات غ‑لمجد ن‑تاروا ن‑ربّي. نسّن ءيزد كولّو ما‑يلّان غ‑دّونيت ار‑يندّر س‑ونگاژ زوند تامغارت لّي‑را‑يارو. والاينّي ءورد غير دّونيت ا‑يندّرن. ءولا نكُّني لّي‑دار لغلّات تيمنزا ن‑رّوح لقودوس، ار‑نندّر غ‑وگُنس‑نّغ غيلاد غ‑ا‑نتقل س‑واسّ لّي‑غ‑راد‑اغ‑يگ ربّي د‑تاروا‑نس ءيفوكّو دّات‑نّغ زغ‑لهالاك. اشكو نكُّني س‑رّجا‑ياد ا‑س‑ننجم. مراد ءيس‑نژرا مايلّي‑ن‑نترجو ءور‑را‑دارنّغ‑ييلي رّجا والاينّي ءيژري، اشكو ءور‑يژضار يان ا‑ن‑يترجو غ‑ما‑يژرّا ييلي دارس. والاينّي لّيغ ا‑نترجو غ‑مايلّي ءور‑تا‑نژري، هاتي ار‑سرس‑نتقل نزگا غ‑رّجا ارد‑اغ‑ييلي. غمكاد‑نّيت اد‑اغ‑يتعاوان رّوح لقودوس غيلاد غ‑سول‑نضعف. ءور‑نسّين ما‑س‑را‑نتژالّا ءي‑ربّي غمكلّي‑اغ‑د‑يقّانّ، والاينّي رّوح لقودوس ار‑ت‑فلّانّغ‑يتضالاب س‑ونفوسن تجهّدنين لّي‑وگُرنين ءيواليون. ءيمّا ربّي لّي‑يژرّان ما‑يلّان غ‑وولاون‑نّغ، ءيسّن ما‑يقصاد رّوح. اشكو رّوح ار‑يتضالاب ف‑يمژلاين ن‑ربّي غمكلّي ءيتّيري ربّي. ءيمّا غويلّي ءيتّيرين ربّي ءيغرا‑ياسن‑د غمكلّي ءيقصاد، نسّن ءيس‑ا‑ياسن‑يسكار افولكي غ‑كولّو ماد‑اسن‑يجرّون. اشكو غويلّي ءيسّن ربّي زغ‑يسيزوار، ءيژلي‑تن اد‑گن زوند يوس. غمكاد ا‑س‑يوورّي يوس ءيگا نتّان امزوارو غ‑ايتماتن گّوتنين. ءيمّا غويلّي ءيژلي، ءيغرا‑ياسن‑د. د‑ويلّي مي‑د‑يغرا، ءيفكا‑ياسن سّلامت غ‑گراس ديدسن. د‑ويلّي مي ءيفكا سّلامت، ءيشّكشم‑تن س‑لمجد‑نس. ءيمّا غيلاد ما‑را‑نيني ف‑كولّو ماياد؟ لّيغ ديدنّغ ءيبيدّ ربّي ما‑راد‑اغ‑ينرو؟ ءيمّا ربّي، لّيغ ءور‑ن‑يحضي يوس غ‑دارس والاينّي ءيدحي‑ت‑يد ف‑سّيبت‑نّغ كولّواغ، ءيس‑ور‑را‑ييري اد‑اغ‑ديدس‑يفك كرايگاتّ كرا؟ ما‑يژضارن ا‑ياشتكّا س‑يمژلاين ن‑ربّي؟ هان ربّي ا‑فلّانّغ‑يرضان. ما‑يژضارن ا‑ييني نُخشن؟ هان لماسيح ياسوع ا‑فلّانّغ‑يمّوتن، ءينكر‑د‑نّيت زغ‑لموت ييلي ف‑وفاسي ن‑ربّي، ار‑ت‑فلّانّغ‑يتضالاب. ما‑راد‑اغ‑يسّنگارا د‑لحنانت لّماسيح؟ ءيزد تامّارا نغد تانوكموت نغد تارفوفنت نغد لاژ نغد لهيف نغد شّرّ نغد تاژّيت؟ غمكلّي ءيتياران: «اسّ كولّوت ار‑تّيرين اد‑اغ‑نغن ف‑سّيبت‑نّك. گان‑اغ د‑وولّي غ‑توكُي‑تغرسي.» والاينّي كولّو غايان، ننرا‑ت باهرا س‑يسم ن‑والّي گينّغ ءيحنّان. اشكو سّنغ ماياد باهرا: ءور‑يلّي كرا ءيژضارن اد‑اغ‑يسّنگارا د‑لحنانت‑نس، ءورد لموت نغد تودرت نغد لمالايكا نغد لارواح، ءورد ما‑يلّان نغد ما‑را‑ييلي، ءورد سّولطات نغد لقوّات ن‑تاتّويت نغد تين‑تدروت. كولّو ما‑يخلق ربّي، ءور‑گيس‑يلّي كرا ءيژضارن اد‑اغ‑يسّنگارا د‑لحنانت ن‑ربّي لّي‑س‑گينّغ‑يحنّا ف‑وودم لّماسيح ياسوع سيديتنّغ. لحقّ ايد‑اون‑تّينيغ س‑يسم لّماسيح، ءور‑ا‑سّكيركيسغ. سّنغ ماياد غ‑وول‑ينو لّي‑غ‑ا‑يتحكام رّوح لقودوس: طيّر‑يّي باهرا ار‑يّي‑بدّا‑تتاغ‑تگوضي ف‑ايت‑تمازيرت‑ينو لّي‑گانين ايتما زغ‑تسگا ن‑دّات. مراد ءيس‑ژضارغ ا‑تن‑جّنجمغ نكّي، راد‑دحيغ ءيخف‑ينو ار لهالاك نگاراغ ءولا د‑لماسيح باش ا‑تن‑جّنجمغ. نتني ا‑يگان ايت‑ربّي، ءيگ‑تن د‑تاروا‑نس، ءيفك‑اسن لمجد‑نس د‑يد‑لعهد‑نس د‑شّرع‑نس. ءيمل‑اسن اغاراس ما‑س‑ا‑تي‑تعبادن، ييني‑اسن ف‑كولّو ما‑راد‑اسن‑يسكر ءيفولكي. زغ‑گيسن ا‑زغ‑گان ءيد‑باباتنّغ ءيمزوورا ءولا لماسيح زغ‑تسگا ن‑دّات. نتّان ا‑ياتّوين ف‑كولّو ما‑يلّان، ءيگ ربّي لّي‑يستهلّان ا‑ت‑نتالغ غيلاد ءولا كولّو مايد‑د‑يفتان. امين. والاينّي ءور‑راد‑ينيغ ءيس‑ضرن بلا لفايتّ ءيواليون‑ان لّي‑يفكا ربّي ءي‑ايت‑دارس غايد ءيزرين. اشكو مدّن‑ان ن‑ايت‑ربّي ءور‑گين كولّوتن وين ربّي. ءولا تاروا ن‑يبراهيم، ءور‑گين كولّوتن ايت‑يبراهيم. اشكو ءينّا ربّي: «زغ‑تاروا ن‑يوك ءيسحاق ا‑زغ‑را‑تيلي تاسوت‑نّك.» غمكاد ا‑س‑يملا مانوي گيسن ا‑را‑يگ تاروا ن‑ربّي: ءورد غويلّي لولنين غمكلّي تلالن كولّو مدّن، والاينّي غويلّي لولنين س‑واوال ن‑ربّي. اشكو ربّي ءيفكا اوال‑اد ءيزگان ءي‑يبراهيم ءينّا‑ياس: «راد‑د‑وورّيغ ءيمال غ‑وزمز‑اد، ييلي ءي‑سارا يان‑وارّاو.» والاينّي ءيلّا كرا ياضني. تفّوغ ءينّاتنّغ ريفقا ار‑تربّو س‑يكنيون زغ‑ورگاز‑نس ءيسحاق باباتنّغ. لّيغ ءور‑تا‑د‑لولن‑وارّاضن‑ان ءيساول ربّي س‑ريفقا، ءور‑تا‑سكيرن كرا يُخشنّ ءولا كرا ءيشوان. ييني‑اس فلّاسن: «امزوارو را‑يگ اخدّام ءي‑ويس سين.» غمكاد ا‑تن‑يبضا ربّي اشكو ءيقصاد مايان، ءورد ف‑سّيبت ن‑كرا سكرن نتني. غمكلّي ءيتياران ءينّا ربّي: «ريغ ياعقوب، ءيمّا عيسو ءور‑ت‑ريغ.» ما‑را‑نيني ف‑ماياد؟ ءيس‑ا‑يسكار ربّي س‑وودماون؟ ءورد غمكان ا‑را‑نيني. اشكو ءينّا ربّي ءي‑موسا: «راد‑رحمغ وانّا ريغ ا‑ت‑رحمغ، حنّوغ ف‑وانّا ريغ ا‑فلّاس‑حنّوغ.» ماياد ءور‑ن‑يقاما غ‑ما‑يرا بنادم نغد ما‑يسكار بنادم والاينّي ءيقاما‑ن غ‑رّحمت ن‑ربّي. ءيتيارا‑داغ ءينّا ربّي ءي‑فيرعاون: «ماياد ا‑ف‑ك‑گيغ د‑وگلّيد، باش ا‑گيك‑سّبايّنغ تاحكيمت‑ينو ءيتجهّدن، اد‑سفلدن مدّن غ‑كولّو دّونيت ف‑يسم‑ينو.» غمكان ا‑س‑نسّن ءيس‑ا‑يترحام ربّي وانّا ءيرا ا‑ت‑يرحم، ار‑يسّيقار ءيخف ءي‑وانّا مي ءيرا ا‑ت‑يسّيقار. والاينّي را‑د‑يساول كرا ن‑يان ييني‑يّي‑د: «لّيغ ءيگا ربّي غمكاد، ماخ ايلّيغ ا‑ياغ‑سول‑يتلامّا؟ ءور‑يژضار يان ا‑يسكر ابلا غايلّي فلّاس ءيقصاد ربّي.» ءيمّا كيّي ا‑بنادم، ما‑تگيت ايلّيغ تريت ا‑ترارت اوال ءي‑ربّي؟ ءيس‑را‑تيني‑تمكيلت ءي‑وفخّار «ماخ ايلّيغ‑يّي‑تسكرت غمكاد؟» افخّار، ءيلّا دارس لحقّ ا‑يسكر س‑يدقّي مكنّا ءيرا. ءيژضار ا‑يسكر سنات‑تمكيلين زغ‑يان‑وطّيب، تيلي يات ءي‑تمغريوين تيلي تايّاض ءي‑كرايگاتّ اسّ. غمكاد ا‑يسكر ربّي. ءيرا ا‑يسّبايّن ءي‑مدّن لغاضاب‑نس ءولا تاحكيمت‑نس ءيتجهّدن، والاينّي ءيرا سول ا‑يصبر د‑تمكيلين لّي‑ف‑يلّا لغاضاب واخّا ءور‑گينت غير ءي‑لهالاك. ءيصبر اشكو ءيرا ا‑يسّبايّن تيميخار لّمجد‑نس ءي‑ويلّي ءيرحم لّي‑ف‑يسكر اد‑كشمن غ‑لمجد. ا‑تن‑يگان د‑نكُّني لّي‑مي‑يغرا زغ‑گر ايت‑يودايا ءولا‑داغ زغ‑گر ايت‑تميزار ياضني. غمكلّي ءينّا ربّي غ‑وارّا ن‑نّابي هوشاع: «غويلّي ءور‑گينين مدّن‑ينو، راد‑اسن‑ينيغ ‹مدّن‑ينو›. غويلّي گانين ءيغريبن، راد‑اسن‑ينيغ ‹ايت‑داري›. غ‑يلّيغ نّيغ ‹ءور‑تگيم مدّن‑ينو،› غين ا‑غ‑راد‑ينيغ ‹تگام تاروا ن‑ربّي لّي‑يلّان.› » ءولا ءيشاعيا ءيكّا‑تّين يولّ اوال‑نس ييني ف‑مدّن ن‑ايت‑ربّي: «واخّا گّوتن ايت‑ربّي زوند املال ن‑تاما ن‑ومدا، ءيدروس ما‑را‑گيسن‑ينجم. اشكو ربّي ءور‑را‑يماطل. س‑جّهد ا‑س‑را‑يوت لحوكم ف‑كولّو دّونيت.» ييني‑داغ ءيشاعيا: «سيدي ربّي ءيتجهّدن، مراد ءيس‑ور‑اغ‑يفل كرا غ‑تاروا‑نّغ، ءيكون نخوا زوند تامدينت ن‑سادوم ءولا تامدينت ن‑عامورا.» ما‑را‑نيني ف‑ماياد؟ ربّي ءيرضا ف‑ايت‑تميزار ياضني. واخّا ءور‑ا‑تناوالن ما‑ت‑يرضان، ءيرضا فلّاسن ف‑سّيبت ن‑ماد‑ومنّ. ءيمّا ايت‑ربّي لّي‑تناوالنين اد‑ترضون ربّي س‑يسكّيرن ن‑شّرع، ءور‑فلّاسن‑يرضي. ماخ؟ اشكو س‑يسكّيرن‑نسن ا‑س‑ا‑تّيرين اد‑ترضون ربّي، ءورد س‑ليمان. غمكاد ا‑س‑وتن اژرو ن‑تبايضّرت. غمكلّي ءيتياران: «هاتي را‑ن‑زّوگزغ غ‑گر مدّن‑ينو يان‑وژرو ءيمقّورن. راد‑اسن‑يگ تابايضّرت، ءيگ ءيفير لّي‑را‑تن‑يسّكنوكي. ءيمّا وانّا فلّاس ءيتّكلن ءور‑سار‑تي‑تُگراژ.» واي‑ايتما، منشك ا‑باهرا‑تّيريغ اد‑نجمن ايت‑تمازيرت‑ينو. ار‑باهرا‑تضالابغ ربّي فلّاسن. ژضارغ ا‑فلّاسن‑فكغ توگّا ن‑يس‑ا‑باهرا‑تّيرين ربّي، والاينّي ءور‑سّينّ ربّي غمكلّي ءيگا. ءور‑فهيمن اغاراس لّي‑س‑ا‑يترضو ربّي ف‑مدّن، والاينّي ار‑تّيرين اد‑رضون ربّي س‑مامنك ياضني، ايلّيغ ءور‑اكُّ‑ومژن اغاراس لّي‑يرا نتّا. اشكو لماسيح ءيكمّل شّرع، باش ا‑يسكر سّلامت غ‑گر ربّي د‑كولّو وانّا سرس يومنّ. يورا موسا ف‑ويلّي رانين اد‑ترضون ربّي س‑شّرع ءينّا: «وانّا ءيسكارن ما‑يلّان غ‑شّرع را‑يدّر ف‑سّيبت ن‑شّرع.» والاينّي ءينّا ءي‑وانّا‑ف‑يرضا ربّي ف‑سّيبت ن‑ما‑يومن: «اد‑ور‑تّينيت د‑يخف‑نّك ‹ما‑را‑يغلي س‑يگنّا ا‑يضالب لماسيح ا‑د‑يگّوز؟› ءولا‑دا‑تّينيت ‹ما‑را‑يگّوز س‑تدروت ن‑واكال ا‑يضالب لماسيح ا‑د‑يغلي زغ‑گر ويلّي مّوتنين؟› » اشكو ءينّا‑داغ: «هاي‑اوال ن‑ربّي ءيلكم‑ك‑يد، ييلي غ‑يمي‑نّك ييلي غ‑وول‑نّك.» اوال‑ان ا‑ت‑يگان د‑غواد‑س‑ا‑نتبرّاح ف‑مامنك ا‑يترضو ربّي ف‑وينّا ءومنّين. اشكو ءيغ‑تنّيت غ‑لگدّام ن‑مدّن «ياسوع ا‑يگان سيدي» تامنت ءيس‑ت‑يد‑يسّنكر ربّي زغ‑لموت، هاتي را‑تنجمت. اشكو س‑وول ا‑س‑ا‑نتامن نطّاف سّلامت د‑ربّي. س‑ينفورن ا‑س‑ا‑ت‑نتّيني غ‑لگدّام ن‑مدّن ننجم. ءيتيارا غ‑وارّا ن‑ربّي: «وانّا فلّاس ءيتّكلن ءور‑سار‑تي‑تُگراژ.» ربّي ءور‑ا‑يژّمژلاي ايت‑يودايا زغ‑ايت‑تميزار ياضني، والاينّي ءيگا سيديتسن كولّوتن. ار‑ياكّا تيميخار‑نس ءي‑كولّو وينّا گيس زاوگنين، اشكو ءيتيارا: «وانّا ءيزاوگن غ‑يسم ن‑سيديتنّغ، را‑ينجم.» والاينّي مامنك ا‑راد‑زاوگن غ‑يسم‑نس ءيغ‑ور‑سرس‑ومينّ؟ مامنك ا‑راد‑امنّ ءيغ‑ور‑فلّاس‑سفلدن؟ مامنك ا‑راد‑سفلدن ءيغ‑ور‑يلّي ماد‑اسن‑ين‑ييوين لخبار؟ مامنك ا‑را‑ن‑اوين لخبار ءيغ‑ور‑يلّي ما‑تن‑يوزنّ؟ غمكلّي ءيتياران: «منشك ا‑س‑يفولكي ا‑نژر غويد‑د‑يوينين لخبار ءيشوان.» والاينّي ءور‑ا‑تّيرين كولّوتن اد‑سفليدن س‑لخبار ءيفولكين. ءينّا‑داغ ءيشاعيا: «وا‑سيدي ربّي، ما‑يران ا‑يامن اوال لّي‑اسن‑د‑نيوي؟» والاينّي غويلّي سفليدنين، نتني ا‑را‑يامن. غويلّي مي‑ن‑نتاوي لخبار لّماسيح، نتني ا‑را‑يسفلد. ءيمّا ايت‑ربّي ءيس‑ور‑سفلدن ف‑لخبار‑اد غايد ءيزرين؟ نسّن ءيس‑فلّاس‑سفلدن، اشكو ءيتيارا: «تيميتار‑نسن كّانت كرايگاتّ ماني، تروح‑تواغرا‑نسن تّمي ن‑واكال.» والاينّي مدّن‑ان ن‑ايت‑ربّي، ءيس‑ور‑ژضارن اد‑فهمن مايلّي مي سفلدن؟ موسا اد‑اغ‑يملان ءيس‑ت‑فهمن، اشكو ف‑يمي‑نس ا‑ف‑ينّا ربّي: «را‑كُن‑رارغ ا‑تّيريم ما‑يلّان غ‑دار ءيغريبن. راد‑اون‑تّ‑سّطيّرغ س‑ويلّي مي تّينيم ‹ءور‑سّينّ يات.› » ءولا ءيشاعيا ءيزعم ءينّا: «ءوفان‑يّي غويلّي ءور‑سري‑سيگّيلنين، سّبايّنغ ءيخف‑ينو ءي‑ويلّي ءور‑گيگي‑سقسانين.» والاينّي ءيزوويد ربّي ءينّا ف‑ايت‑دارس: «ها‑يّي اسّ كولّو مديغ‑ن ءيفاسّن‑ينو ءي‑مدّن لّي‑سري‑رورنين تيغوردين‑نسن، اگُين اد‑سفليدن س‑واوال‑ينو.» ءيمّا غيلاد، ما‑راد‑ينيغ؟ ءيس‑ن‑يلوح ربّي مدّن‑نس؟ ءوهو، ءور‑تن‑ين‑يلوح. ءولا نكّي گيغ غ‑ايت‑ربّي، گغ زغ‑تاسوت ن‑يبراهيم زغ‑تقبيلت ن‑بنيامين. ربّي ءور‑ن‑يلوح مدّن‑نس لّي‑يسّن زغ‑يسيزوار. ءيس‑ور‑تسّينم ما‑يتياران ف‑نّابي ءيليّا غ‑وارّا ن‑ربّي؟ ار‑يسّمومُّي ءيليّا ف‑ربّي ف‑لخُشانت لّي‑سكارن ايت‑ربّي ييني‑اس: «وا‑سيدي ربّي، هاتنين نغان لانبيا‑نّك، خلون ءيكركار لّي‑ف‑ا‑ياك‑ن‑نسراس تيغرسيو. غير نكّي ا‑يقامان، ءيرين ا‑يّي‑نغن.» ءيمّا نتّا، ما‑س‑اس‑ينّا ربّي غاكودان؟ ءينّا‑ياس: «سول حضيغ ءي‑يخف‑ينو سّا ن‑يد‑والف ن‑ورگاز لّي‑ور‑يكنين غ‑لگدّام ن‑بعل.» غمكان اد‑دارنّغ‑يلّان ءولا نكُّني غ‑ووسّان‑اد. ءيقاما سول ما‑يدروسن، ءيژلي‑تن ربّي س‑رّحمت‑نس. ف‑سّيبت ن‑رّحمت‑نس ا‑ف‑تن‑يژلي، ءورد ف‑سّيبت ن‑يسكّيرن‑نسن. مراد ءيس‑تن‑يژلي ف‑سّيبت ن‑كرا سكرن ءور‑را‑ييلي ماياد س‑رّحمت. غاكودان ءور‑يفكي ءي‑ايت‑ربّي مايلّي تّيرين، والاينّي ءيفكا‑ت ءي‑ويلّي زغ‑گيسن ءيژلي. وورّين وييّاض ءيقّور ءيخف‑نسن غمكلّي فلّاسن ءيتياران: «سول س‑غاسّاد ار‑يسّهروصّي ربّي ءول‑نسن، ءيرار الّن‑نسن ءور‑سول‑ا‑تّيسفيونت، ءيرار ءيمزگان‑نسن ءور‑سول‑ا‑سفليدن.» ءولا اگلّيد داود ءيضالب ربّي فلّاسن ييني: «اد‑اسن‑تگ تامونت ن‑يمنسيون‑نسن تاژقّورت ءولا تاسرافت ما‑غ‑ا‑ن‑طّارن. اد‑كنوكين، تضر فلّاسن لعقوبيت لّي‑اسن‑يگان. اد‑لّاسنت‑والّن‑نسن ا‑ور‑يسفيون، ار‑بدّا‑كنّون غ‑دّو تاژايت ن‑تمّاريو.» والاينّي ءيس‑راد‑ينيغ: ضرن ءور‑سول‑ژضارن اد‑نكرن؟ ءور‑راد‑ينيغ غمكان. اشكو لّيغ ضرن ايت‑يودايا وورّين نجمن ايت‑تميزار ياضني، باش اد‑وورّين ايت‑يودايا ار‑تّيرين ما‑يلّان دار ايت‑تميزار ياضني. هاتي تاضوري ن‑ايت‑يودايا ا‑د‑ييوين تيميخار ن‑ربّي ءي‑دّونيت كولّوتّ. ءولا ف‑سّيبت ن‑وفّوغ‑نسن زغ‑تميخار ن‑ربّي ا‑را‑سرسنت‑كشمن ايت‑تميزار ياضني. والاينّي منشك ا‑س‑را‑تيگات‑تماخيرت ن‑ربّي س‑وگُّار ءيغ‑وورّين كشمن‑داغ كولّو مدّن ن‑ايت‑يودايا. راد‑اون‑ينيغ غيلاد ءي‑كونّي ن‑ايت‑تميزار ياضني: ار‑بدّا‑مالاغ ءي‑ايت‑داري ءيس‑باهرا‑تهيّا‑ترقّاست‑اد داري ءيلّان غ‑گر ايت‑تميزار ياضني، ا‑ور‑يميل رارغ‑د كرا غ‑ايت‑يودايا اد‑يرين اد‑امژن ماد‑دارون‑يلّان، باش اد‑نجمن ءولا نتني. لّيغ‑تن‑يسّوفغ ربّي ءيشّكشم‑د مدّن زغ‑كولّو دّونيت، والاينّي ما‑را‑ييلي ءيغ‑تن‑د‑يشّكشم‑داغ ءولا نتني تيگيرا؟ را‑تيلي تودرت لّجديد ءي‑ويلّي مّوتنين. ءيغ‑تّياوفكا تومّيت لّعجين تامزواروت ءي‑ربّي، را‑يگ لعجين كولّوت وين ربّي. ءيغ‑يگا‑وگّجا وين ربّي، راد‑گنت‑تصطّوين تين ربّي. ءيمّا غيلاد ءيبّي ربّي كرا ن‑تصطّوين زغ‑تازيتونت، ءيلقّم‑اس گيس يات‑تصطّا ن‑تزمّورت. غمكاد ا‑س‑تكشمت ءولا كيّي لّي‑يگان زغ‑تزمّورت غ‑تودرت ءيصحان ن‑تازيتونت. والاينّي ا‑ور‑تحگرت تيصطّوين لّي‑بّينين. ءيغ‑تنتي‑تحگرت ءيلّا فلّاك ا‑دي‑تكتيت ماياد: ءورد كيّي ا‑يوسين اگّجا، والاينّي اگّجا ا‑ك‑يوسين. ءيمّا كيّي را‑تينيت «ربّي ءيبّي تيصطّوين زغ‑تازيتونت باش ا‑يّي‑ن‑گيس‑يلقّم.» تُغژانت، ءيبّي‑تنت اشكو ءور‑رينت اد‑امنّت، تيليت گيس اشكو تومنت، والاينّي اد‑ور‑تشكرت ءيخف‑نّك ف‑ماياد. ءيلّا فلّاك ا‑ترارت لعاقل. اشكو لّيغ ءور‑يصامح ربّي ءي‑ايت‑يودايا لّي‑گانين تيصطّوين‑نس، ءيس‑راد‑اك‑يصامح كيّي ءيغ‑ور‑تزگات غ‑ليمان؟ ژر مامنك ا‑باهرا‑يتحنّو ربّي ءولا مامنك ا‑باهرا‑يتشقو. ءيشقا د‑ويلّي ضرنين، را‑گيك‑يتحنّو ءيغ‑تزگات غ‑لحنانت‑نس. والاينّي ءيغ‑ور‑ا‑تّزگات را‑ك‑يبّي ءولا كيّي. ءيمّا وييّاض، ءولا نتني ءيغ‑د‑وورّين امنّ را‑تن‑يلقّم ءي‑تازيتونت، اشكو ربّي ا‑يژضارن اد‑اس‑تن‑ين‑داغ‑يلقّم. ءيسكر ربّي ما‑ور‑سكارن مدّن لّيغ‑ك‑يد‑يبّي زغ‑تزمّورت ءيلقّم‑ك‑يد ءي‑تازيتونت. والاينّي را‑يرخو س‑وگُّار ا‑د‑گيس‑يلقّم تيصطّوين لّي‑زگيس‑بّينين، اشكو تين تازيتونت اد‑گانت. واي‑ايتما، ريغ اد‑اون‑ملغ يات‑تغاوسا ءينتلن باش ا‑ور‑تغالم ءيزد كونّي ا‑يسّنّ كولّو ما‑يلّان. ءيقّور ءيخف ن‑كرا غ‑ايت‑ربّي ارد‑د‑يكمّل ما‑را‑د‑يكشم زغ‑ايت‑تميزار ياضني. غمكاد ا‑س‑راد‑نجمن كولّو ويلّي گانين ايت‑ربّي. غمكلّي ءيتياران، ءينّا ربّي: «را‑د‑ياشك‑ونجّام زغ‑وروشاليم، ءيكّيس لخُشانت ءي‑تاروا ن‑ياعقوب. راد‑اسن‑فكغ لعهد‑اد غاكود نّا‑فلّاسن‑سّيتّيغ دّنوب‑نسن.» ءيمّا نتني ءيگا‑تن ربّي د‑ينوّاشن‑نس ف‑سّيبت‑نّون اشكو اگُين اد‑سفليدن س‑لخبار ءيفولكين. والاينّي ءيگا‑تن سول د‑يمدّوكُّال‑نس ف‑سّيبت ن‑يمزوورا‑نسن لّي‑يژلي غايد ءيزرين. اشكو ربّي ءور‑را‑يكّيس مايلّي ءيفكا ءولا را‑ن‑يلوح غويلّي‑ياد ءيژلي. ءيمّا كونّي اي‑ايت‑تميزار ياضني، تكّام‑تّين تفّوغم زغ‑واوال ن‑ربّي، والاينّي تلّا‑ياون رّحمت‑نس غيلاد اشكو فّوغن نتني زغ‑واوال‑نس. ف‑سّيبت ن‑وفّوغ‑نسن ا‑ف‑اون‑تلّا رّحمت ن‑ربّي، تيلي‑اسن ءولا نتني رّحمت‑نس ديدون. اشكو ربّي يودجا كولّو مدّن ا‑ن‑تياوكرّافن س‑وفّوغ زغ‑واوال‑نس، باش اد‑اسن‑كولّو‑يفك رّحمت‑نس تيگيرا. ماتّا غونشكاد س‑گّوتنت‑تميخار ن‑ربّي، تيگات‑تحكيمت‑نس ءولا تاواسّنا‑نس. ما‑يژضارن ا‑ييسّان ما‑يقصاد ربّي، ءولا ما‑يژضارن ا‑يفهم ما‑يناول؟ «ما‑يسّنّ ءيسوينگيمن ن‑سيدي ربّي؟ ما‑را‑ت‑ينصح؟ ماد‑اس‑يفكان ايلّيغ‑ت‑يد‑يقّان ا‑د‑يرار تاوافكا؟» اشكو كولّو ما‑يلّان يوشكا‑د زغ‑ربّي، ييلي غ‑وفوس‑نس، ءيگ وينس. نتّان ا‑باهرا‑نتالغ غيلاد ءولا كولّو مايد ءيفتان، امين. ماياد ا‑ف‑را‑كُن‑ضالبغ اي‑ايتما، ف‑سّيبت ن‑رّحمت ن‑ربّي لّي‑يگّوتن، اد‑اس‑تفكم ءيخف‑نّون زوند تيغرسي ءيدّرن ءيژلين لّي‑س‑را‑يرضو، اشكو غمكان ا‑س‑كُن‑د‑يقّان ا‑تي‑تّعبادم. ا‑ور‑تسكارم زوند مدّن ن‑دّونيت‑اد، والاينّي ادجات ربّي ا‑كُن‑يرار ا‑تگم لجديد، ءيبدّل كولّو تينباضين لّعاقل‑نّون. غمكان ا‑س‑را‑تيسّانم ما‑گيگون‑يتّيري ربّي ءيفولكي ءيرضو سرس يوف كولّو كرا ءيلّان. ربّي اد‑يّي‑يفكان لباراكا‑ياد ايلّيغ ژضارغ اد‑ينيغ ءي‑كرايگاتّ يان گيگون: ا‑ور‑تغالت د‑يخف‑نّك ءيس‑تگيت ءوگُّار ن‑ما‑تگيت والاينّي سوينگيم س‑لمعقول، كرايگاتّ يان د‑ونشك نّا‑ياس‑يفكا ربّي ليمان. اشكو دّات ن‑بنادم، گّوتن گيس ءيگزمان، كرايگاتّ اگزّوم ار‑يسكار ما‑ت‑يد‑يقّانّ. ءولا نكُّني نگّوت. زوند دّات ا‑نگا، اشكو كولّواغ نگا وين لماسيح، نگ زوند ءيگزمان ن‑دّات‑نس. ءيبارك‑اغ ربّي ءيبضو‑اغ منّاوت‑توافكيو. ءيمّا نكُّني، ءيلّا فلّانّغ ا‑نسكار س‑ماد‑اغ‑يفكا. يان مي ءيفكا ربّي ا‑يساوال س‑يواليون لّي‑اس‑يمالا، ءيلّا فلّاس ا‑يساوال س‑ونشك لّي‑گيس‑يلّا ليمان. يان مي ءيفكا ا‑يتخدام ءي‑وييّاض، ءيلّا فلّاس ا‑يتخدام. يان مي ءيفكا ا‑يسّلماد، ءيلّا فلّاس ا‑يسّلماد. يان مي ءيفكا ا‑يتنصاح، ءيلّا فلّاس ا‑يتنصاح. يان مي ءيفكا ا‑ياكّا، ءيلّا فلّاس ا‑ياكّا س‑لخاطر. يان مي ءيفكا ا‑يمالا اغاراس ءي‑وييّاض، ءيلّا فلّاس ا‑ت‑يمالا س‑لمعقول. يان مي ءيفكا ا‑يتعاوان، ءيلّا فلّاس ا‑يتعاوان س‑لفرح. تحنّوات غ‑ينگراتون س‑نّييت ءيصفان، ار‑تّكرهوم اينّا يُخشنّ، ار‑تّامژم غ‑اينّا ءيفولكين. تحوبّوات ءي‑نگراتون غمكلّي تمحوبّون ايتماتن، ار‑يتّيري كرايگاتّ يان ا‑يوقّر وايّاض ءوگُّار ن‑يخف‑نس. خدمات ءي‑سيديتنّغ س‑زّعامت ن‑رّوح ءيتجهّدن بلا‑دا‑تّرمايم. فرحات غ‑رّجا، تصبرم غ‑ترفوفنت، تزايدم غ‑تژولّا. اكّايات ءي‑يمژلاين نّا‑يحتاجّان ار‑تسّمرحبام س‑ويلّي تمودّونين. ضالبات ربّي ا‑يبارك وينّا‑كُن‑سّرفوفنّين. ا‑ور‑تي‑تّضالابم ا‑تن‑يخزو والاينّي ا‑تن‑يبارك. فرحات د‑وانّا ءيفرحن، ار‑تالّام د‑وانّا يالّان. تمشاشكاد‑د‑بدّا ءي‑نگراتون. ا‑ور‑تسوينگيمّ غ‑ما‑يكّان نّيگاتون والاينّي تمونوات د‑ما‑يكّان دّاواتون. ا‑ور‑تگم ءيخف‑نّون د‑ويد سّنّين كولّو ما‑يلّان. ءيغ‑يلّا ماد‑اون‑يسكرن ما‑يُخشنّ اد‑اس‑ت‑ور‑ترارم س‑لخُشانت، والاينّي تاويات‑ستّ غ‑يخف‑نّون ا‑تسكارم ما‑ف‑راد‑اكّان كولّو مدّن توگّا ن‑يس‑يفولكي. گات‑ن تيقّي‑نّون ا‑تسكارم كولّو ما‑مي‑تژضارم ا‑بدّا‑تيلي سّلامت غ‑گراتون د‑كولّو مدّن. واي‑ايتما عزّانين، ا‑ور‑ترارم ءي‑يان ف‑ما‑يسكر يُخشنّ، والاينّي ادجات ربّي ا‑فلّاس‑يحكام. اشكو ءيتيارا: «غمكاد ا‑س‑ينّا سيدي ربّي، نكّي ا‑را‑يرار ءي‑مدّن ف‑ماد‑سكرن، فكغ‑اسن ماد‑اسن‑يگان.» ءيمّا كيّي، سكر غمكلّي ءيتياران: «ءيغ‑تژريت انوّاش‑نّك ءينغا‑ت لاژ، تفكت‑اس ا‑يشّ، نغ‑ت‑ينغا ءيريفي، تفكت‑اس ا‑يسو. غمكاد ا‑س‑راد‑اس‑تسّگوديت تيرگيشين ف‑يخف‑نس.» ا‑ور‑تادجم لخُشانت ا‑كُن‑تنرو، والاينّي تنروات لخُشانت س‑وفولكي. ءيلّا ف‑كرايگاتّ يان ا‑يسكار س‑واوال ن‑ويلّي تحكامنين تامازيرت. اشكو ءور‑يلّي يان ءيتحكامن بلا‑ت‑يژلي ربّي ءي‑تووري‑ان. ءولا غويلّي حكامنين غيلاد، ربّي ا‑تن‑يژلين. يان ءيضاضّن لحوكّام، هاتي ءيضاضّ مايلّي ءيرا ربّي، د‑وانّا ءيضاضّن را‑فلّاس‑يتّوت لحوكم. اشكو لحوكّام ءور‑ا‑سّيكساضن غويلّي سكارنين افولكي والاينّي غويلّي سكارنين لخُشانت. ءيس‑تريت ا‑ور‑تيكساطّ زغ‑والّي ءيتحكامن؟ راد‑اك‑ينيغ، سكار افولكي س‑فلّاك‑يرضا، اشكو ءيگا اخدّام ن‑ربّي ف‑ا‑گيك‑يسكار لخير. والاينّي ءيغ‑ا‑تسكارت ما‑يُخشنّ، ءيلّا دارك ما‑ف‑ا‑تّيكساطّ، اشكو لحاكم دارس لحقّ ا‑يوت لحوكم، ءيگ اخدّام ن‑ربّي ف‑ا‑يسّضر لعقوبيت ف‑ويلّي سكارنين ما‑يُخشنّ. مايان ا‑ف‑فلّاون‑يلّا ا‑تسكارم س‑واوال لّحوكّام، ءورد غير باش ا‑تانفم ءي‑لغاضاب ن‑ربّي، والاينّي ف‑سّيبت ن‑ما‑تّيريم غ‑وول‑نّون ا‑بدّا‑تسكارم ما‑يُغژانّ. ف‑ماياد ا‑ف‑ا‑تاكّام ضّاريبا ءي‑لحوكّام، اشكو گان ءيخدّامن ن‑ربّي ار‑تّي‑تاوين غ‑مايان. اكّايات‑اسن ماد‑اون‑ضفارن، ضابييت ءي‑ايت‑ضابييت، نكّاس ءي‑ايت‑نكّاس. اكّايات‑داغ لوقر ءي‑ويلّي مي ءيلّا لوقر، ءولا شّوكر ءي‑ويلّي مي ءيلّا شّوكر. اد‑ور‑تاسيم تامرواست ءي‑يان. غير يات‑تمرواست ا‑كُن‑د‑يقّانّ: ا‑تّحنّوم ءي‑نگراتون. وانّا ءيحنّان غ‑وييّاض، هان ءيكمّل كولّو ما‑يتياران غ‑شّرع. اشكو لوصيّات «ا‑ور‑تزنوت» «ا‑ور‑تنغت» «ا‑ور‑تاكُرت» «ا‑ور‑تيريت ما‑يگان وين وييّاض،» نژضار ا‑تنت‑نسّمون نتنتي د‑تييّاض نّا‑لّانين س‑يان‑واوال، ا‑ت‑يگان: «ا-تّيريت ادجار‑نّك زوند ءيخف‑نّك.» وانّا ءيتّيرين ادجار‑نس، ءور‑را‑ييژضار اد‑اس‑يسكر ما‑يُخشنّ. ماياد ا‑ف‑اون‑نّيغ، وانّا ءيحنّان غ‑وييّاض، ءيكمّل كولّو ما‑يتياران غ‑شّرع. اويات‑ستّ غ‑ماياد اشكو تسّنم ماتّا ازمز‑اد غ‑نلّا، تلكم‑د تاساعت ا‑تنكرم زغ‑ييطس. اشكو ياكمور‑د‑واسّ ن‑وجنجم‑نّغ غيلاد، ءوگُّار ن‑ما‑د‑ياكمور غاكود لّيغ نگرا غ‑وغاراس لّماسيح. ءيفتا‑ييض، علاين ا‑د‑يغلي‑واسّ. ءيلّا فلّانّغ ا‑ن‑نلوح ءيسكّيرن ن‑تيلّاس نلس ءيمقلاد ن‑تيفاوت. ييلي فلّانّغ ا‑نسكار غمكلّي‑د‑يقّانّ ايت‑وزال. ا‑ور‑تّمونوم ف‑تيلّاي أُخشنّين ءولا‑دا‑تسّنوفولم ءيخفاون‑نّون س‑تيسّي. ا‑ور‑تّشتهوم ءولا‑دا‑تّفسادم. ا‑ور‑تّمّاغم ءولا‑دا‑تّنوّاشم. لسات افولكي ن‑سيديتنّغ ياسوع لماسيح بلا‑دا‑تّلهوم س‑دّات ءولا ما‑يتّيري بنادم ءي‑يخف‑نس. قبلات غ‑ينگراتون وانّا ءور‑يدوسن غ‑ليمان، والاينّي ا‑ور‑ديدس‑تّمجاحادم ف‑يسوينگيمن‑نس. را‑ييلي كرا ن‑يان يومن ءيس‑يحلّا ا‑يشتّا كرايگاتّ كرا، ييلي يان ياضني ءور‑يدوس غ‑ليمان ءور‑يري ا‑يشتّا ابلا لخضرت. ءيمّا غوالّي ءيشتّان كرايگاتّ كرا، ءيلّا فلّاس ا‑ور‑يحگر غوالّي ءيتكّيسن كرا زغ‑ومشّو، ييلي ف‑والّي ءيتكّيسن ا‑ور‑يحكام ف‑والّي ءيشتّان كرايگاتّ كرا، اشكو ربّي ا‑ت‑يقبلن. ما‑تگيت كيّي ايلّيغ تريت ا‑تحكامت ف‑وخدّام ن‑وايّاض؟ سيديس ا‑را‑فلّاس‑يرضو نغد نتّان ا‑را‑ت‑يرگم. س‑صّاحت را‑فلّاس‑يرضو، اشكو سيديس ءيژضار ا‑ت‑يگ د‑واد‑ف‑يرضا. را‑ييني كرا ن‑يان: «غاسّاد يوف ءوسّان ياضني،» ييني وايّاض: «ءوسّان كولّوتن يان اد‑گان.» والاينّي ءيقّان‑د كرايگاتّ يان ا‑ييسّان مامنك ا‑يتنباض غ‑يخف‑نس. وانّا ءيژلاين اسّ، ار‑ت‑يژلاي باش ا‑يتوقّار سيديتنّغ. وانّا ءيشتّان ار‑يشتّا باش ا‑يتوقّار سيديتنّغ، ار‑يتشكار ربّي ف‑ما‑يشتّا. وانّا ءيتكّيسن كرا زغ‑ومشّو ار‑ت‑يتكّيس باش ا‑يتوقّار سيديتنّغ، ار‑يتشكار ربّي ءولا نتّا. كولّواغ، ءيغ‑ندّر ءولا ءيغ‑نمّوت، ءورد ءيخف‑نّغ ا‑نترضو. ءيغ‑ندّر را‑نرضو سيديتنّغ، ءيغ‑نمّوت را‑نرضو سيديتنّغ. اشكو ءيغ‑ندّر ءولا ءيغ‑نمّوت، وين سيديتنّغ ا‑نگا. ماياد ا‑ف‑يمّوت لماسيح ءينكر‑د زغ‑لموت، باش ا‑يگ سيديتسن ن‑ويلّي مّوتنين ءولا سيديتسن ن‑ويلّي دّرنين. ءيمّا كيّي، ماخ ايلّيغ ا‑تّحكامت ف‑گماك؟ ماخ ايلّيغ ا‑تّحگارت گماك؟ غ‑لگدّام ن‑ربّي ا‑غ‑را‑نبيدّ كولّواغ. نتّان ا‑را‑فلّانّغ‑يحكام، غمكلّي ءيتياران: «ءينّا سيدي ربّي ‹ءيزگا‑واوال‑اد زوند تودرت‑ينو. غ‑لگدّام‑ينو ا‑غ‑را‑د‑يكنو كرايگاتّ افود، ءيقرّا كرايگاتّ ءيلس ءي‑ربّي.› » كرايگاتّ يان گينّغ را‑يرار لحساب ف‑يخف‑نس ءي‑ربّي. ماياد ا‑ف‑د‑يقّان ا‑ور‑سول‑نتحكام ف‑ينگراتنّغ، والاينّي ا‑نتنباض غ‑يخف‑نّغ ا‑ور‑سار‑نسرس كرا ن‑تبايضّرت غ‑لگدّام ن‑گماتنّغ ءولا كرا را‑ت‑يسّضر. سّنغ ماياد باهرا اشكو ءيملا‑ياغ‑ت سيديتنّغ ياسوع: ءور‑يلّي كرا ن‑ومشّو ءيحرمن. والاينّي يان ءيغالن ءيس‑يحرم، راد‑اس‑يتياوحرام. ءيغ‑تسّنت ءيس‑را‑يتياگّاس گماك س‑ما‑تشتّات كيّي، ءورد لحنانت اين‑س‑ا‑ديدس‑تسكارت. ا‑ور‑تادجت امشّو‑نّك ا‑يهلك غوالّي ف‑يمّوت لماسيح. ا‑ور‑تادجم مدّن اد‑رگّمن غ‑مايلّي دارون ءيفولكين. اشكو تاگلديت ن‑ربّي ءور‑تگي امشّو نغد تيسّي، والاينّي افولكي د‑سّلامت د‑لفرح ا‑تگا، س‑تحكيمت ن‑رّوح لقودوس. وانّا ءيتخدامن ءي‑لماسيح غمكاد، را‑فلّاس‑يرضو ربّي ار‑تي‑تالغن مدّن. ءيمّا غيلاد ءيلّا فلّانّغ ا‑بدّا‑نتّيري ما‑د‑يتاوين سّلامت ءولا ماد‑اغ‑يسّدوسن ءي‑نگراتنّغ. ا‑ور‑تهلكت تاووري ن‑ربّي ف‑سّيبت ن‑ومشّو. ءيحلّا‑كولّو‑ومشّو، والاينّي يان ءيشّان كرا ءيسّطارن وايّاض، هان لخُشانت اين ءيسكر. را‑ياف ا‑ور‑تشّت تيفيّي نغد ا‑تسوت تيسّي ءيكتين نغد ا‑تسكرت كرا ياضني ءيغ‑يژضار گماك ا‑يضر ف‑سّيبت ن‑ما‑تسكارت. تينباضين نّا‑دارك‑لّانين، حضو‑تنت غ‑وول‑نّك غ‑گراك د‑ربّي. امباركي ا‑يگا وانّا ءور‑دار ما‑س‑ا‑يتشكّو غ‑يخف‑نس غاكود نّا‑يسكار ما‑يرا. ءيمّا وانّا ءيشكّان غ‑ما‑يشتّا، ءيلّا فلّاس لحوكم اشكو ءور‑ا‑يسكار س‑تنباضين لّيمان‑نس. وانّا ءور‑يسكارن س‑ليمان، دّنوب اد‑اس‑يگا. نكُّني لّي‑يدوسن غ‑ليمان، ءيلّا فلّانّغ ا‑نتعاوان غويلّي ضعفنين غ‑اينّا فلّاسن ءيژّاين. ا‑ور‑نتّيري غير ا‑نرضو ءيخف‑نّغ. هاتي ءيلّا ف‑كرايگاتّ يان ا‑يترضو گماس ار‑گيس‑يسكار لخير ار‑ت‑يسّدوس غ‑وغاراس لّماسيح. اشكو لماسيح ءولا نتّا ءور‑تّين‑يكّي ار‑يترضو ءيخف‑نس. ءيجرا‑ياس غمكلّي ءيتياران: «فلّا ا‑ف‑ا‑د‑طّارنت‑ترگّام ن‑ويلّي گيك رگّمنين.» كولّو ما‑يتياران غ‑ووسّان لّي‑زرينين، ءيتيارا باش ا‑نلمد نكُّني، نصبر نزعم نزگا غ‑رّجا ف‑سّيبت ن‑مايلّي ناقرا غ‑وارّاتن‑ان. ضالبغ ربّي لّي‑ياكّان صّبر د‑زّعامت، اد‑اون‑يفك ا‑بدّا‑دي‑تّمشاشكام ءي‑نگراتون غ‑تامونت لّماسيح ياسوع، باش ا‑كولّو‑تّمونوم س‑يان‑واوال ا‑تّالغم ربّي باباس ن‑سيديتنّغ ياسوع لماسيح. ماياد ا‑ف‑اون‑نّيغ ا‑تّقبالم ءي‑نگراتون غمكلّي‑كُن‑يقبل لماسيح، باش ا‑گيگون‑يبايّن لمجد ن‑ربّي. اشكو لماسيح يوورّي ءيگا اخدّام ءي‑ايت‑يودايا باش ا‑يمل ءيس‑يقاما ربّي غ‑لحقّ، ءيسّافو ءيواليون زگانين لّي‑س‑ينّا ءي‑لاجدود‑نسن. ءيسكر غمكاد باش اد‑ژرن ايت‑تميزار ياضني رّحمت ن‑ربّي الغن‑ت ءولا نتني. غمكلّي ءيتياران: «ماياد ا‑ف‑را‑كي‑تشكارغ غ‑گر ايت‑تميزار اگّوگنين، الغّ ءيسم‑نّك س‑يموريگن لّفرح.» ءيتيارا‑داغ: «واي‑ايت‑تميزار اگّوگنين، فرحات د‑مدّن ن‑ربّي.» ءيتيارا‑داغ: «سبّحات ءي‑ربّي ا‑بنادم كولّوكن، تالغم‑ت ا‑كولّو ءيمزدغن ن‑دّونيت.» ءينّا‑داغ ءيشاعيا: «را‑د‑ياشك يان زغ‑تاسوت ن‑ياسّا. را‑ت‑يسّاتّوي ربّي ا‑يحكام غ‑ايت‑تميزار اگّوگنين. نتّان ا‑غ‑را‑ن‑كولّو‑ترجون.» ضالبغ ربّي لّي‑ياكّان رّجا، ا‑كُن‑يعمّر س‑لفرح د‑سّلامت ءيگّوتن غيلاد غ‑سرس‑تومنم، باش ا‑باهرا‑گيگون‑يتّيگات رّجا‑ياد س‑تحكيمت ن‑رّوح لقودوس. واي‑ايتما، سّنغ نكّي ءيس‑تعمّرم س‑وفولكي ءولا تاواسّنا، تيژضارم ا‑تّنصاحم ءي‑نگراتون. والاينّي س‑زّعامت ايد‑س‑اون‑ين‑وريغ ف‑تغاوسيوين‑اد. زعمغ اد‑اون‑تنت‑يد‑سّكتيغ اشكو ربّي اد‑يّي‑يفكان لباراكا‑ياد، ءيگ‑يّي د‑وخدّام لّماسيح ياسوع غ‑گر ايت‑تميزار اگّوگنين. ار‑تخدامغ زوند يان‑ونمغور ن‑تگمّي ن‑ربّي، ار‑سّاكمورغ مدّن ن‑ايت‑تميزار ءي‑ربّي س‑تبرّاحت لّخبار ءيفولكين، باش ا‑فلّاسن‑يرضو ربّي ءيژلي‑تن ءي‑يخف‑نس س‑وسغوس ن‑رّوح لقودوس. ءيلّا داري ما‑س‑ا‑تفراحغ س‑يسم لّماسيح ياسوع غ‑تووري‑اد لّي‑س‑ا‑تخدامغ ءي‑ربّي، اشكو ءور‑راد‑زعمغ اد‑ساولغ ف‑يات ابلا ما‑يسكر لماسيح ف‑وفوس‑ينو. اشكو س‑يواليون د‑يسكّيرن د‑لقوّات د‑تميتار تجهّدنين ءولا س‑تحكيمت ن‑رّوح لقودوس ا‑س‑يرور ايت‑تميزار اد‑امژن اغاراس ن‑ربّي. غمكاد ا‑س‑سّلكمغ لخبار‑نس ءي‑كولّو تيميزار زغ‑تسگا ن‑وروشاليم ار تاسگا ن‑يلّيريكون. هاتي يات‑تغاوسا كاد‑ريغ: اد‑تبرّاحغ س‑لخبار ءيفولكين غ‑ينّاغ ءور‑جّو‑سفلدن ف‑لماسيح، اشكو ءور‑ريغ اد‑بنّوغ ف‑لّساس ن‑كرا ن‑يان ياضني. غمكلّي ءيتياران: «غويلّي ءور‑يروح لخبار‑نس ا‑را‑ت‑يژر. غويلّي ءور‑فلّاس‑سفلدنين ا‑را‑ت‑ييسّان.» مايان ا‑يّي‑يتكّيسن ايلّيغ ءور‑ا‑ن‑تّاشكيغ س‑دارون. كيگان د‑يسگُّاسن ايد تّيريغ ا‑ن‑دارون‑اشكغ. والاينّي غيلاد غ‑كمّلغ تاووري‑نو غ‑تسگيو‑اد ار‑باهرا‑ترجوغ ا‑كُن‑ين‑سليغ غاكود نّا‑غ‑راد‑مودّوغ س‑صبانيا، باش اد‑فرحغ غ‑گراتون، تعاونم‑يّي ءيلمّا اد‑كمّلغ ف‑ومودّو‑نو. ءيمّا غيلاد راد‑دّوغ زوار س‑وروشاليم اد‑عاونغ ءيمژلاين ن‑ربّي غين. اشكو ايتماتن غ‑ماكيدونيّا د‑اخايا، ءيبايّن‑اسن ءيس‑يفولكي اد‑ازنّ كرا لّمعاونت ءي‑ويلّي ژلضنين غ‑يمژلاين ن‑ربّي غ‑وروشاليم. ءيبايّن‑اسن ءيس‑يفولكي اد‑سكرن ماياد، اشكو ءيلّا فلّاسن نتني ن‑ايت‑تميزار ياضني اد‑رارن لخير ءي‑ايت‑يودايا. ءيقّان‑تن‑د ا‑تن‑تعاوانّ س‑لباراكات ن‑دّات، اشكو ءومژن زغ‑دارسن لباراكات ن‑رّوح. ءيغ‑اسن‑ين‑سّلكمغ لامانت‑اد كمّلغ تاووري‑اد، را‑كُن‑سليغ زريغ س‑صبانيا. سّنغ غاكود نّا‑ن‑دارون‑وشكيغ را‑ن‑ديدي‑اويغ كولّو لباراكا لّماسيح. را‑كُن‑ضالبغ اي‑ايتما، س‑يسم ن‑سيديتنّغ ياسوع لماسيح ءولا س‑لحنانت ن‑رّوح لقودوس، ا‑تبكيسم تمعاوانم ديدي س‑تژالّيت ءي‑ربّي ف‑سّيبت‑ينو. ضالبات ربّي ا‑يّي‑يجّنجم زغ‑ويلّي ءور‑ومنّين غ‑تمازيرت ن‑يودايا. تضالبم‑ت ءولا ف‑يمژلاين‑نس غ‑وروشاليم اد‑رضون س‑مايلّي‑س‑ريغ ا‑تن‑سرس‑عاونغ، باش ا‑ن‑دارون‑اشكغ س‑لفرح ءيگّوتن غمكلّي ءيرا ربّي، سونفوغ غ‑گراتون. ضالبغ ربّي لّي‑بدّا‑ياكّان سّلامت ا‑ديدون‑ييلي كولّوكن. امين ريغ ا‑كُن‑وصّاغ ف‑وولّتماتنّغ ءيعزّان فيبي لّي‑يگان تامعاونت ءي‑ومناگّار غ‑كانخاريّا. سّمرحبات سرس س‑يسم ن‑سيديتنّغ غمكلّي‑س‑د‑يقّان ءيمژلاين ن‑ربّي. عاونات‑ستّ س‑اينّا‑ن‑دارون‑تحتاجّا، اشكو نتّات تعاون مدّن گّوتنين تعاون‑يّي ءولا نكّي. ار‑ن‑تسلّامغ ف‑بريسكيلّا د‑اكيلا لّي‑ديدي‑خدمنين غ‑تووري لّماسيح ياسوع. نتني كّان‑تّين ءوجادن اد‑فكن ءيخف‑نسن ار لموت ف‑سّيبت‑ينو. ار‑تن‑تشكارغ باهرا، ءورد غير نكّي والاينّي ار‑تن‑تشكارن كولّو ءيمناگّارن ن‑ايت‑تميزار اگّوگنين. ار‑ن‑داغ‑تسلّامغ ف‑ومناگّار لّي‑دارسن‑يتمونون غ‑تگمّي‑نسن. ار‑ن‑تسلّامغ ءولا ف‑ومدّاكُّل‑ينو ءيعزّان ابينيتوس. ءيگا نتّان امزوارو لّي‑يومنّ س‑لماسيح غ‑تمازيرت ن‑اسيّا. ار‑ن‑تسلّامغ ف‑ماريام لّي‑باهرا‑يتخدامن غ‑گراتون. ار‑ن‑تسلّامغ ءولا ف‑اندرونيكوس د‑يونياس لّي‑گانين زغ‑ايت‑داري. كّان‑تّين ديدي غ‑لحبس. تياوسّانّ نتني غ‑يرقّاسن، ءومژن اغاراس لّماسيح ءور‑تا‑ت‑ومژغ نكّي. ار‑ن‑تسلّامغ ف‑امبلياتوس لّي‑يگان امدّاكُّل‑ينو ءيعزّان غ‑سيديتنّغ. ار‑ن‑تسلّامغ ءولا ف‑وربانوس لّي‑ديدنّغ‑يتخدامن غ‑تووري لّماسيح، نتّا د‑ومدّاكُّل‑ينو ءيعزّان ستاخيس. ار‑ن‑تسلّامغ ف‑ابالّيس لّي‑يتيارامن ءيزگا غ‑لماسيح. ار‑ن‑تسلّامغ ءولا ف‑ايت‑تگمّي ن‑اريستوبولُس. ار‑ن‑تسلّامغ ف‑هيروديون لّي‑يگان زغ‑ايت‑داري. ار‑ن‑تسلّامغ ءولا ف‑ويلّي گانين وين سيديتنّغ زغ‑ايت‑تگمّي ن‑ناركيسّوس. ار‑ن‑تسلّامغ ف‑تخدّامين ن‑سيديتنّغ تريفينا د‑تريفوسا. ار‑ن‑تسلّامغ ءولا ف‑وولّتماتنّغ ءيعزّان بارسيس لّي‑باهرا‑يتخدامن ءي‑سيديتنّغ. ار‑ن‑تسلّامغ ف‑روفوس لّي‑يتياوژلاين ءي‑تووري ن‑سيديتنّغ. ار‑ن‑تسلّامغ ءولا ف‑ينّاس لّي‑زگيگي‑يسكارن زوند يوس. ار‑ن‑تسلّامغ ف‑اسينكريتوس د‑فليگون د‑هارميس د‑باتروباس د‑هارماس نتني د‑ايتماتن لّي‑ديدسن‑لّانين. ار‑ن‑تسلّامغ ف‑فيلولوگوس د‑يوليا د‑نيريوس د‑وولّتماس، نتني د‑ولومباس د‑كولّو ءيمژلاين ن‑ربّي لّي‑ديدسن‑لّانين. نسالّامات ءي‑نگراتون س‑ونسالّام ن‑تاگُمات. ار‑ن‑فلّاون‑تسلّامن كولّو ءيمناگّارن لّماسيح. ضالبغ‑كُن اي‑ايتما، ا‑ستّي‑تّاويم غ‑ويلّي اطّونين ايتماتن ار‑اسن‑تگّان ءيفيكش ما‑تن‑يسّطارن، ار‑تفّوغن زغ‑ولمّود لّي‑تلمدم غايد ءيزرين. ءينيغ‑اون، انفات‑اسن اشكو غويلّي سكارنين غمكاد ءورد سيديتنّغ ا‑مي‑تخدامن والاينّي اديس‑نسن. س‑يواليون شوانين ميمنين ا‑س‑ا‑جلّون لعاقل ن‑وانّا ءيگان لغشيم. ءيمّا كونّي، فرحغ ف‑سّيبت‑نّون اشكو سفلدن كولّو مدّن ف‑مامنك ا‑تومژم غ‑لماسيح. والاينّي ريغ ا‑توورّيم تيسّانم كولّو ما‑يفولكين، تانفم ءي‑كولّو ما‑يُخشنّ. ءيمّا ربّي لّي‑بدّا‑ياكّان سّلامت، يان ءيميكّ را‑يرار شيطان ا‑يگ البّيج غ‑دّو ءيضارن‑نّون. اد‑اون‑تيلي لباراكا ن‑سيديتنّغ ياسوع. ار‑ن‑فلّاون‑يتسلّام تيموتاوس لّي‑ديدي‑يتخدامن، نتّا د‑لوكيوس د‑ياسون د‑سوسيباتروس لّي‑گانين زغ‑ايت‑داري. ءولا نكّي تارتيوس لّي‑يوران تابرات‑اد س‑وفوس‑ينو، ار‑ن‑فلّاون‑تسلّامغ س‑يسم ن‑سيديتنّغ. ار‑ن‑فلّاون‑يتسلّام گايوس لّي‑دار گّوزغ ءوسّان‑اد. تيگمّي‑نس ا‑غ‑ا‑تمونون كولّو ايتماتن ن‑ومناگّار. ار‑ن‑فلّاون‑يتسلّام اراستوس لّي‑يگان بو‑صندوق ن‑تمدينت‑اد، نتّا ءولا گماتنّغ كوارتوس. ءيمّا غيلاد، ا‑نالغ ربّي لّي‑يژضارن ا‑كُن‑يزّگا غ‑ليمان‑نّون غمكلّي‑اون‑نّيغ س‑لخبار ءيفولكين لّي‑س‑ا‑تبرّاحغ ف‑لماسيح ياسوع. اشكو مايلّي ءينتلن كولّو غايد ءيزرين، ءيسّبايّن‑ت‑يد ربّي غيلاد، ءيمل‑اغ‑ت غ‑وارّاتن لّانبيا، باش اد‑وورّين امنّ مدّن غ‑كولّو تيميزار ن‑دّونيت ار‑سكارن س‑واوال‑نس، غمكلّي يوصّا ربّي لّي‑بدّا‑يلّان. ربّي لّي‑دار كولّو تاحكيمت، نتّان ا‑باهرا‑نتالغ ف‑ياسوع لماسيح غيلاد ءولا كولّو مايد‑د‑يفتان. امين. زغ‑بولُس ارقّاس لّماسيح ياسوع غمكلّي ءيرا ربّي لّي‑يّي‑يژلين ءي‑تووري‑اد، د‑زغ‑گماتنّغ سوستانيس. ءي‑ايت‑ومناگّار ن‑ربّي غ‑تمدينت ن‑كورينتوس، ا‑تن‑يگان د‑ويلّي ءيژلي ربّي ف‑وودم لّماسيح ياسوع اد‑گن ءيمژلاين‑نس، زوند كولّو وييّاض غ‑كرايگاتّ ماني لّي‑زاوگنين غ‑يسم ن‑سيديتنّغ ياسوع لماسيح، ءيگ سيديتسن ءيگ سيديتنّغ ءولا نكُّني. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. ار‑بدّا‑فلّاون‑تشكارغ ربّي‑نو ف‑سّيبت لّباراكا لّي‑س‑كُن‑يبارك ف‑وودم لّماسيح ياسوع، اشكو ءيفكا‑ياون كولّو تيميخار لّماسيح ايلّيغ دارون تگّوت‑تواسّنا د‑يواليون شوانين. ربّي ءيزّگا گيگون توگّا لّي‑اون‑ين‑نيوي ف‑لماسيح. ءور‑اون‑لاح يات غ‑توافكيو ن‑رّوح غيلاد غ‑ا‑تّقلم س‑سيديتنّغ ياسوع لماسيح ارد‑د‑يوورّي ءيبايّن. نتّان ا‑را‑كُن‑يسّدوس ار ءيسيگُّرا ف‑ا‑ور‑گيگون‑ييلي كرا لّعيب غ‑واسّ لّي‑غ‑را‑د‑يوورّي سيديتنّغ ياسوع لماسيح. ربّي ءيقاما‑بدّا غ‑واوال‑نس. نتّان اد‑اون‑د‑يغران ا‑تكشمّ غ‑تامونت ن‑ياسوع لماسيح سيديتنّغ. واي‑ايتما، را‑كُن‑ضالبغ غيلاد س‑يسم ن‑سيديتنّغ ياسوع لماسيح، ا‑د‑كولّو‑تمشاشكام بلا‑دا‑تاطّوم ءي‑نگراتون. ءيلّا فلّاون ا‑تگم يان غ‑يسوينگيمن‑نّون د‑تنباضين‑نّون. والاينّي اي‑ايتما، ءينّا‑يّي كرا زغ‑ايت‑تگمّي ن‑خلوّي ءيس‑ا‑تّژيم ءي‑نگراتون. تسّنم ما‑ف‑ا‑ساوالغ. كرا گيگون ار‑يتّيني: «گيغ وين بولُس.» كرا گيگون ار‑يتّيني: «گيغ وين ابولُس.» كرا گيگون ار‑يتّيني: «گيغ وين بطرُس.» كرا گيگون ار‑يتّيني: «گيغ وين لماسيح.» والاينّي را‑كُن‑سقساغ، ءيس‑يبضا لماسيح؟ ءيزد بولُس ا‑فلّاون‑يمّوتن ف‑وگّجدي؟ ءيزد س‑يسم ن‑بولُس ا‑س‑تدّمّ غ‑وامان؟ ها‑يّي شكرغ ءي‑ربّي اشكو ءور‑سّدّيمغ يان گيگون ابلا كريسبوس د‑گايوس، ف‑ا‑ور‑ييني كرا ن‑يان ءيزد س‑يسم ن‑بولُس ا‑س‑يدّم. سّنغ ءيس‑سّدّمغ ايت‑تگمّي ن‑ستيفاناس ءولا نتني، ءيمّا وييّاض ءور‑سّينغ ءيس‑سّدّمغ كرا ياضني. اشكو لماسيح ءور‑يّي‑يوزن اد‑سّدّمغ مدّن، هاتي يوزن‑يّي اد‑اسن‑تبرّاحغ س‑لخبار ءيفولكين. ءورد ءيواليون لّعاقل ا‑س‑ا‑تبرّاحغ، ف‑ا‑ور‑رارغ لموت لّماسيح ف‑وگّجدي بلا لفايتّ. اشكو لخبار ن‑وگّجدي ءيگا زوند انوفل دار ويلّي تياوهلاكنين، والاينّي تاحكيمت ءيتجهّدن ن‑ربّي ا‑دارنّغ‑يگا نكُّني لّي‑ينجمن. ءيتيارا غ‑وارّا ن‑ربّي: «راد‑خلوغ لعاقل ن‑ايت‑لعاقل، سّضرغ لفهمت ن‑ايت‑لفهمت.» ما‑يگا باب لّعاقل؟ ما‑يگا باب ن‑تغري؟ ما‑يگا باب ن‑يواليون ن‑دّونيت‑اد؟ ها‑ربّي ءيرور لعاقل ن‑دّونيت‑اد ءيگا انوفل. اشكو ربّي س‑تحكيمت‑نس ا‑س‑يقصاد غ‑مدّن ن‑دّونيت‑اد ا‑ور‑يژضارن اد‑وورّين ءيسّانّ ربّي س‑لعاقل‑نسن، والاينّي ءيرضا ا‑يجّنجم وينّا ءومنّين س‑تبرّاحت‑نّغ لّي‑ف‑ا‑تّينين «تگا انوفل.» ايت‑يودايا ار‑زگينّغ‑تضالابن لمعجيزات. ايت‑تميزار ياضني ار‑زگينّغ‑تّيرين ءيواليون لّعاقل. ءيمّا نكُّني ار‑اسن‑نتبرّاح ف‑لماسيح لّي‑يمّوتن ف‑وگّجدي. اوال‑اد ءيگا تابايضّرت ءي‑ايت‑يودايا، ءيگ انوفل دار ايت‑تميزار ياضني. والاينّي لخبار‑اد ف‑لماسيح ءيگا تاژضّارت ن‑ربّي ءولا تاحكيمت ن‑ربّي غ‑دار‑ويلّي مي ءيغرا، گن‑ييت ايت‑يودايا نغد ايت‑تميزار ياضني. اشكو مايد مي تّينين ‹انوفل› ن‑ربّي، يوگُر لعاقل ن‑بنادم، ءولا مايد مي تّينين ‹ضّعف› ن‑ربّي، يوگُر تادواست ن‑بنادم. واي‑ايتما، سوانگماد‑د ما‑ستّين‑تكّام تگام‑ت لّيغ‑اون‑د‑يغرا ربّي. ءيدروس گيگون ما‑يطّافن تاحكيمت غمكلّي غالن مدّن ن‑دّونيت‑اد. ءيدروس گيگون ما‑ن‑يلّان س‑واوال. ءيدروس گيگون ما‑يگان يوس ن‑تگمّي ءيمقّورن. والاينّي ربّي ءيستي مايلّي ءيگان انوفل دار ايت‑دّونيت‑اد، باش ا‑يشّحشّم غويلّي ءيتّينين ءيس‑دارسن لعاقل. ءيستي ما‑يضعفن دار ايت‑دّونيت‑اد باش ا‑يشّحشّم غويلّي دوسنين. ربّي ءيستي مايلّي حگرن لوحن‑ت‑ين ايت‑دّونيت‑اد، ءيستي مايلّي دارسن ءور‑يگين يات، باش ا‑يسّضر ماد‑دارسن‑يگان كرا ءيهيّان. غمكاد ا‑يقصاد ربّي باش ا‑ور‑ياف بنادم ما‑ف‑ا‑يتالغ ءيخف‑نس غ‑لگدّام ن‑ربّي. نتّان اد‑اون‑يفكان ا‑تگم وين لماسيح. ءيفك‑اغ تاحكيمت لّماسيح، ءيفك‑اغ افولكي لّماسيح، ءيژلي‑اغ س‑وژلاي لّماسيح، ءيفوكّو‑اغ ف‑وودم لّماسيح. ماياد ا‑ف‑يتيارا: «وانّا ءيران ا‑يالغ، يالغ سيديتنّغ.» غاكود لّيغ‑ن‑دارون‑وشكيغ اي‑ايتما، ءورد س‑يواليون غزّيفنين ءولا س‑لعاقل ن‑بنادم ا‑س‑ا‑ياون‑تبرّاحغ ف‑لحقّ لّي‑اغ‑د‑يسّبايّن ربّي. والاينّي سكرغ‑د ف‑ا‑ور‑اون‑ساوالغ ف‑كرا ابلا ف‑ياسوع لماسيح د‑لموت‑نس ف‑وگّجدي. غاكود لّيغ‑ن‑دارون‑وشكيغ، ضعفغ ار‑ترگيگييغ طيّر‑يّي باهرا. ءورد س‑يواليون شوانين ءولا س‑لعاقل ن‑بنادم ا‑س‑ا‑ياون‑ساوالغ ار‑اون‑تبرّاحغ، والاينّي س‑تميتار ن‑رّوح لقودوس ءولا تاحكيمت ءيتجهّدن. غمكان اد‑سكارغ باش ا‑ور‑تامنم س‑لماسيح ف‑سّيبت لّعاقل ن‑بنادم والاينّي ف‑سّيبت ن‑تحكيمت ءيتجهّدن ن‑ربّي. س‑صّاحت، س‑لعاقل ا‑س‑ا‑نساوال ءي‑ويد مقّورنين غ‑وغاراس ن‑ربّي، والاينّي ءور‑يگي لعاقل ن‑دّونيت‑اد نغد وين ءينمغورن ن‑دّونيت‑اد لّي‑راد‑لاح. والاينّي ار‑نساوال س‑تحكيمت ن‑ربّي لّي‑ينتلن غايد ءيزرين ءيسّبايّن‑ت‑يد غيلاد. اشكو ربّي، ءور‑تا‑يخلق دّونيت، ءيقصاد اد‑اغ‑يشّكشم س‑لمجد‑نس. ءور‑يلّي يان غ‑ينمغورن ن‑دّونيت ءيسّن ماياد. مراد ءيس‑سّنّ ماياد، ءيكون ءور‑اكُّ‑راد‑نغن باب لّمجد ف‑وگّجدي. والاينّي ءيتيارا: «ءور‑جّو‑يژري يان ءولا ءيسفلد يان ءولا ءيسوانگم لعاقل ن‑بنادم ف‑ما‑يجّوجاد ربّي ءي‑ويلّي‑تي‑تّيرينين.» ءيمّا غيلاد ءيسّبايّن‑اغ‑ت‑يد ربّي س‑تحكيمت ن‑رّوح‑نس. اشكو رّوح لقودوس ار‑يسيگّيل كولّو ما‑يلّان، ييسّان ءولا تيغاوسيوين ن‑ربّي لّي‑نتلنين. ما‑يسّنّ ءيسوينگيمن لّي‑رگسنين غ‑وول ن‑بنادم؟ ءور‑تن‑يسّين ابلا رّوح ن‑بنادم لّي‑گيس‑يلّان. غمكاد ا‑يگا ءولا دار ربّي. ءور‑يلّي ما‑يسّنّ ءيسوينگيمن ن‑ربّي ابلا رّوح ن‑ربّي. ءيمّا نكُّني ءور‑گينّغ‑تلّي رّوح ن‑دّونيت‑اد، والاينّي ءيلّا گينّغ رّوح لّي‑اغ‑د‑يوزن ربّي باش ا‑نيسّان كولّو ماد‑اغ‑ياكّا ربّي. ار‑نساوال ف‑ماياد س‑مكلّي‑اغ‑يمالا رّوح لقودوس، ءورد س‑يواليون لّعاقل ن‑بنادم. ار‑نسّلماد غويلّي‑غ‑يلّا رّوح لقودوس ف‑تغاوسيوين ن‑رّوح لقودوس. يان دار ءور‑يلّي رّوح ن‑ربّي، ءور‑را‑يقبل تيوافكيو ن‑رّوح‑نس. ءور‑يژضار ا‑تنت‑يفهم، را‑يغال ءيزد انوفل اد‑گانت، اشكو س‑رّوح ا‑س‑ا‑تنت‑نتفهام. وانّا‑غ‑يلّا رّوح ن‑ربّي ار‑يتفهام كولّو ما‑يلّان، ءيمّا نتّا ءور‑را‑ت‑فهمن مدّن ياضني. ءيتيارا: «ما‑يسّنّ ءيسوينگيمن ن‑سيديتنّغ باش اد‑اس‑يمالا ما‑ت‑يد‑يقّانّ؟» ءيمّا نكُّني، لّان گينّغ ءيسوينگيمن لّماسيح. ءيمّا كونّي اي‑ايتما، غ‑ووسّان‑ان ءور‑ژضارغ اد‑ديدون‑ساولغ غمكلّي ساوالغ د‑ويلّي دار رّوح لقودوس، اشكو سول تمژّيم غ‑لماسيح، عزّونت‑دارون‑تغاوسيوين ن‑دّونيت‑اد. غير اكُّفاي اد‑اون‑فكيغ، اشكو ءور‑تا‑تژضارم ءي‑ومشّو. سول س‑غيلاد ءور‑اس‑تژضارم، اشكو ار‑سول‑تسكارم زوند مدّن ن‑دّونيت‑اد. اشكو ءيغ‑ا‑يتّيري كرا ا‑ياگُر كرا ار‑تّژيم ءي‑نگراتون، ءيبان گيگون ءيزد وين دّونيت ا‑تگام ار‑تسكارم زوند غمكلّي كولّو سكارن مدّن ن‑دّونيت. اشكو كرا گيگون ار‑يتّيني: «گيغ وين بولُس.» كرا گيگون ار‑يتّيني: «گيغ وين ابولُس.» ءيغ‑ا‑تسكارم غمكان، زوند مدّن ن‑دّونيت ا‑تگام. ما‑يگا ابولُس ءولا بولُس؟ ءيخدّامن كا‑نگا، تامنم ف‑يمي‑نّغ س‑مكلّي ءيفكا سيديتنّغ ءي‑كود يان گينّغ. نكّي ژّيغ تاسغارت، ابولُس ءيسّوا‑تّ، والاينّي ربّي ا‑ستّ‑يسّمقّورن. غوالّي ءيژّان ءولا غوالّي ءيسّوان ءور‑يگي يات. والاينّي ربّي، نتّان ا‑يسّمقّورن. غوالّي ءيژّان د‑والّي ءيسّوان، يان اد‑گان. كود يان، راد‑اس‑يفك ربّي تيغراد‑نس ف‑تووري لّي‑يسكر. نكُّني نگا ويد تخدامنين د‑ربّي. ءيمّا كونّي تگام ءيگر ن‑ربّي، تگم تيگمّي لّي‑اس‑نبنّو. ربّي ءيبارك گيگي ءيفك‑يّي ا‑ن‑دارون‑سرسغ لّساس زوند ءيغ‑گيغ لمعلّم ابنّاي. غيلاد ار‑فلّاس‑بنّون مدّن ياضني، والاينّي ءيلّا ف‑كود يان ا‑ستّ‑يتاوي غ‑مامنك ا‑يبنّو. اشكو ءور‑يژضار يان ا‑يسرس كرا لّساس ياضني ابلا لّساس لّي‑يتّرسن، ا‑ت‑يگان د‑ياسوع لماسيح. ءيغ‑ا‑يبنّو يان ف‑لّساس‑ان س‑وورغ نغد نّوقرت نغد ءيژران غُلانين نغد اكشّوض نغد اساغور نغد اليم، را‑دي‑تبان‑تووري ن‑تبنّايت‑نس. اشكو تابنّايت ن‑كود يان را‑تّيارام س‑لعافيت غ‑واسّ لّي‑غ‑را‑د‑ياشك لماسيح. را‑تبان ءيس‑تدوس نغد ءوهو. وانّا مي ءور‑يجدير مايلّي ءيبنا ف‑لّساس‑ان، راد‑اس‑يفك ربّي تيغراد‑نس. ءيمّا وانّا مي ءيجدر مايلّي ءيبنا راد‑اس‑لاح. ءور‑راد‑اس‑ييلي يات، والاينّي را‑ينجم نتّا زوند ءيغ‑نّيت‑ينجم ءي‑لعافيت. ءيس‑ور‑تسّينم ءيزد تيگمّي تامژلايت ن‑ربّي ا‑تگام، ءيزدغ گيگون رّوح ن‑ربّي؟ والاينّي تيگمّي ن‑ربّي، ءيغ‑تّ‑يهلك كرا ن‑يان را‑ت‑يهلك ربّي. اشكو تّياوژلاي‑تگمّي ن‑ربّي ا‑تگ تين ربّي، د‑كونّي تيگمّي‑نس ا‑تگام. ا‑ور‑اكُّ‑يجلّو يان ءيخف‑نس. وانّا ءيغالن ءيس‑يطّاف لعاقل ن‑دّونيت‑اد، ءيخصّا‑ت ا‑يوورّي زوند ءيغ‑ور‑يسّين يات باش ا‑يطّاف لعاقل ءيصحان. اشكو تاحكيمت ن‑دّونيت‑اد، تگا زوند انوفل دار ربّي. غمكلّي ءيتياران: «ربّي ار‑يقُّاي ايت‑لعاقل غ‑تيلّاي‑نسن.» ءيتيارا‑داغ: «ءيسّن سيديتنّغ ءيس‑خوان ءيسوينگيمن ن‑ايت‑لعاقل.» ءيخصّا‑كُن ا‑ور‑تسّفورّوگم ف‑ما‑يسكر غواد ءولا غوان. اشكو كولّو ما‑يلّان، كونّي ا‑مي‑يلّا، ءيگ‑ييت بولُس نغد ابولُس نغد بطرُس، ءيگ‑ييت دّونيت نغد تودرت نغد لموت، ءيگ‑ييت ما‑يلّان غيلاد نغد ما‑را‑ييلي. كونّي ا‑مي‑يلّا، تيليم ءي‑لماسيح، ييلي لماسيح ءي‑ربّي. غمكاد ا‑س‑يخصّا اد‑اغ‑تّمنادم ءيس‑نگا غير ءيخدّامن لّماسيح، نگ ويد دار ءيفل ربّي لامانت ن‑ولمّود‑نس ءينتلن. ءيمّا اخدّام، ءيلّا فلّاس ا‑يكمّل تاووري لّي‑اس‑يفل سيديس. نكّي ءور‑يّي‑يهمّا ءيغ‑فلّا‑تحكامّ كونّي نغد كرا لّمحكاما ن‑دّونيت‑اد. ءور‑نّيغ يات ف‑يخف‑ينو، ءيس‑شويغ ءولا ءيس‑أُخشنغ. سوانگمغ ءيس‑ور‑گيگي‑يلّي كرا لّعيب، والاينّي ءور‑راد‑ينيغ ءيس‑فولكيغ، اشكو ءور‑يلّي ما‑يژضارن ا‑فلّا‑يحكام ابلا سيديتنّغ واحدوت. ماياد ا‑ف‑كُن‑يخصّا ا‑ور‑تّينيم ف‑يان ءيس‑يُخشن، اشكو ءور‑تا‑د‑يلكيم‑وزمز لّحوكم. والاينّي غاكود نّا‑د‑يوشكا سيديتنّغ را‑يفاو كولّو ما‑يرگسن غ‑تيلّاس، ءيسّبايّن‑د ءولا ءيسوينگيمن لّي‑نتلنين غ‑وولاون ن‑مدّن. غاكودان ا‑را‑يفك ربّي رّضا‑نس ءي‑كود يان د‑ما‑ت‑يد‑يوشكان. واي‑ايتما، ساولغ غمكاد ف‑يخف‑ينو ءولا ف‑ابولُس باش ا‑تيسّانم مامنك ا‑كُن‑يخصّا ا‑تّمنادم غ‑مدّن. ريغ ا‑زگينّغ‑تلمدم «ا‑ور‑تّفّوغم زغ‑ما‑يتياران،» ءولا ءيلّا گيگون ما‑يسّفورّوگن ءولا ما‑يتحگارن. اشكو ما‑ك‑يبضان د‑وييّاض؟ ما‑دارك‑يلّان بلا‑ياك‑ت‑يفكا ربّي؟ والاينّي لّيغد ربّي اد‑اك‑ت‑يفكان، ماخ ايلّيغ ا‑تسّفورّوگت زوند ءيغد ءيخف‑نّك ا‑د‑يكّا؟ ها‑كونّي غيلاد تشبعام، ءيگّوت دارون لخير. ها‑كونّي بلا‑نّغ توورّيم تگام زوند ءيگلدان. امار يوفان ا‑تگم ءيگلدان ن‑صّاحت باش ا‑ديدون‑نتحكام غ‑تگلديت‑نّون. اشكو ءيرواس‑يّي ءيس‑اغ‑ن‑يسّبيدّ ربّي نكُّني‑اد ن‑يرقّاسن غ‑تغوردين ن‑كولّو مدّن زوند ءيغ‑فلّانّغ‑يتّوت لحوكم لّموت، باش ا‑كولّو‑گينّغ‑سّموقّولن لمالايكا ن‑يگنوان ءولا مدّن ن‑دّونيت. نكُّني نگا ‹ءينافالن› ف‑يسم لّماسيح، ءيمّا كونّي تگام ‹ايت‑لعاقل› غ‑لماسيح. نكُّني نضعف، ءيمّا كونّي تدوسم. نكُّني ار‑اغ‑تحگارن مدّن، ءيمّا كونّي ار‑كُن‑توقّارن. سول س‑غيلاد ار‑نتقاما س‑لاژ ءولا ءيريفي. ءيدربالن ا‑نلسّا، د‑يباريقن ا‑نشتّا، ءولا دارنّغ مانيغ ا‑نتگاوار. ار‑نتنهاتاف ار‑نتخدام س‑يفاسّن‑نّغ. غاكود نّا‑ياغ‑رگّمن مدّن ار‑نتضالاب ربّي ا‑تن‑يبارك. غاكود نّا‑ياغ‑سّرفوفونّ ار‑نتصبار. غاكود نّا‑فلّانّغ‑سّكيركيسن ار‑نترارا اوال ءيفولكين. سول س‑غيلا نگا دارسن زوند ارّاس لّي‑ن‑لوحن مدّن غ‑ومدّوز، نگ دارسن زوند امازير ن‑دّونيت‑اد. ءوريغ‑اون‑ين ماياد، ءورد ا‑كُن‑سرس‑شّحشّامغ، والاينّي ءوصّاغ‑كُن زوند تاروا عزّانين. ءيگّوت دارون ماد‑اون‑يسّلمادن اغاراس لّماسيح، والاينّي ءور‑گّوتن ءيد‑باباتون. اشكو نكّي ا‑يوورّين گيغ باباتون غ‑لماسيح ياسوع زغ‑غاكود لّيغ‑اون‑ين‑يويغ لخبار ءيفولكين. ضالبغ‑كُن غيلاد ا‑يّي‑تضفورم غ‑ماد‑سكارغ. ماياد ا‑ف‑راد‑اون‑ين‑ازنغ تيموتاوس. ءيگا ءيوي ءيعزّان غ‑سيديتنّغ، ار‑بدّا‑يسكار كولّو ما‑فلّاس‑يلّان. راد‑اون‑د‑يسّكتاي تينباضين‑ينو لّي‑س‑ا‑تّيدوغ غ‑وغاراس لّماسيح ياسوع، ار‑سرسنت‑سّلمادغ غ‑كولّو ءيمناگّارن ن‑ايتماتن غ‑كرايگاتّ ماني. والاينّي سّنغ ءيس‑يلّا غ‑گراتون ما‑يسّفورّوگن، غالن ءيس‑ور‑را‑ن‑دارون‑اشكغ. والاينّي را‑ن‑اشكغ غ‑مايد‑د‑ياكمورن ءيغ‑يرا سيديتنّغ. غاكودان ا‑راد‑ژرغ ءيد‑بو‑يسفورّوگن‑ان ءيسّانغ ءيزد تاحكيمت ءيتجهّدن ا‑دارسن‑يلّان نغد غير ءيواليون. اشكو تاگلديت ن‑ربّي ءور‑تلّي س‑يواليون، والاينّي تاحكيمت ءيتجهّدن ا‑س‑تلّا. مامنك ا‑ترام اد‑اون‑ين‑سرس‑اشكغ، ءيزد س‑وكوراي نغد س‑تايري ن‑وول‑ينو ءيهنّان؟ اشكو سفلدغ ءيس‑دارون لفساد يُخشنّ باهرا، ءوگُّار ن‑ماد‑سكارن غويلّي ءور‑سّينّين اغاراس ن‑ربّي. هان ءيلّا غ‑گراتون يان‑ورگاز ار‑يگان د‑تمغارت ن‑باباس. ءيلّا فلّاون ا‑تالّام، والاينّي كونّي ار‑تسّفورّوگم. ءيلّا فلّاون ا‑تسّوفغم غوالّي ءيسكارن غايان، ا‑ور‑سول‑ديدون‑يتمونو. واخّا‑د‑فلّاون‑ياگّوگ‑وودم‑ينو ءيلّا‑ن‑ديدون‑وول‑ينو. ها‑نكّي زوند ءيغ‑ديدون‑لّيغ، ءوتغ لحوكم س‑يسم ن‑سيديتنّغ ياسوع ف‑ورگاز لّي‑يسكارن غايلّي باهرا يُخشنّ. ءيغ‑تمونم كولّوكن غيلاد، ءيلّا‑ديدون‑وول‑ينو تيلي ديدون ءولا تاحكيمت ءيتجهّدن ن‑سيديتنّغ ياسوع، ءيقّان‑كُن‑د ا‑ن‑تدحيم ارگاز‑ان غ‑وفوس ن‑شيطان، باش ا‑تياوهلاكنت شّهوات ن‑دّات‑نس تنجم رّوح‑نس غ‑واسّ لّي‑غ‑را‑د‑ياشك سيديتنّغ ياسوع. هان ءور‑شوين ءيسفورّوگن‑نّون. ءيس‑ور‑تسّينم ءيزد «تاخميرت ءيدروسن ا‑يسّكتاين لعجين ءيگّوتن.»؟ سّيتّيات زغ‑گيگون تاخميرت‑ان تاقديمت، باش ا‑بدّا‑تگم ارخصيص لّجديد غ‑ور‑تلّي‑تخميرت. اشكو ءيلكم‑د لعيد ن‑وسورف‑نّغ، ءيتياوغراس‑ولقّاغ‑نّغ لّي‑يگان لماسيح. ييلي فلّانّغ ا‑نمون ف‑لعيد س‑ورخصيص ن‑وفولكي د‑لحقّ، ءورد اغروم ءيكتين س‑تخميرت تاقديمت ن‑تنوّاشت د‑لخُشانت. ءوريغ‑اون‑ين‑ياد يات‑تبرات، ءينيغ‑اون گيس ا‑تّانفم ءي‑ويلّي تفسادنين. والاينّي ءور‑ريغ ا‑تانفم ءي‑مدّن ن‑دّونيت‑اد لّي‑تفسادنين نغد مدّن ن‑دّونيت‑اد لّي‑دار‑يعزّا اد‑تامژن ما‑يگّوتن ءي‑يخف‑نسن، نغد غويلّي گيسن تاكُرنين نغد غويلّي گيسن تعبادنين ءيلاهات ياضني. اشكو ءور‑يژضار يان ا‑يانف ءي‑كولّو مدّن‑ان ابلا‑اكُّ‑يفّوغ دّونيت. والاينّي ءوريغ‑اون تابرات‑ان اد‑اون‑ينيغ ا‑تّانفم ءي‑وانّا ءيگان ءيخف‑نس د‑گماتون امومن والاينّي ار‑يتفساد نغد ار‑يتامژ ما‑يگّوتن ءي‑يخف‑نس نغد ار‑يتعباد ءيلاهات ياضني نغد ار‑يرگّم غ‑وييّاض نغد ار‑يسّنوفول ءيخف‑نس س‑تيسّي ءيكتين نغد ار‑يتاكُر. وان غواد، انفات‑اس. ءولا تيرمت، ا‑ور‑تّ‑ديدس‑تدروم. ايت‑برّا، ءور‑را‑فلّاسن‑حكامغ نكّي، والاينّي ايت‑ومناگّار لّماسيح، ءيس‑ور‑فلّاون‑يلّي ا‑فلّاسن‑تّحكامّ؟ ربّي ا‑را‑يحكام ف‑ويلّي لّانين غ‑برّا، ءيمّا كونّي «سّوفغات وانّا يُخشنّ زغ‑گراتون.» ءيغ‑يلّا يان گيگون دارس كرا‑ف‑ا‑يصراض ءي‑گماس امومن، ءيس‑را‑يزعم ا‑ت‑ياوي س‑دار كرا لّقاضي لّي‑ور‑يسّينّ ربّي، ءور‑ت‑ييوي س‑دار ءيمژلاين لّماسيح؟ ءيس‑ور‑تسّينم ءيزد ءيمژلاين لّماسيح ا‑را‑يحكام ف‑دّونيت كولّوتّ؟ لّيغد كونّي ا‑را‑يحكام ف‑دّونيت، ءيس‑ور‑تژضارم ا‑تّحكامّ ف‑يصراض‑اد مژّينين؟ ءيس‑ور‑تسّينم ءيزد نكُّني ا‑را‑يحكام ف‑لمالايكا؟ ءيمّا غيلاد ءيس‑ور‑نژضار ا‑نتحكام ف‑تغاوسيوين ن‑تودرت‑اد؟ ءيغ‑دارون‑يلّا كرا ن‑وصراض، ماخ ا‑تّيريم ا‑تي‑تسّلكمّ ءي‑ويلّي ءور‑گينين يات دار‑ومناگّار ن‑ايتماتن؟ ءيس‑كُن‑ور‑يشّحشّيم غايد تسكارم؟ ءيس‑ور‑گيگون‑يلّي يان ءيطّافن لعاقل ييژضار ا‑يسّنفاصال ايتماتن ن‑ومناگّار؟ ءيمّا كونّي، هان سول‑نّيت دارون ايتماتن ار‑صراضن ءي‑نگراتسن. هان دار‑ويلّي ءور‑سّينّين ربّي ا‑س‑ا‑ياسن‑صراضن. ءيغ‑ا‑تصراضم غمكان ءي‑نگراتون ءيبان گيگون ءيس‑تفّوغم اغاراس باهرا. ءيس‑ور‑را‑ياف ا‑تصبارم د‑وانّا‑فلّاون‑يتعدّان؟ ءيس‑ور‑را‑ياف ا‑تادجم وانّا‑ياون‑يوكُرن؟ ءيمّا كونّي ار‑تّاكُرم ار‑تّعدّام ف‑ينگراتون، واخّا‑نّيت تگام ايتماتن. ءيس‑ور‑تسّينم ماياد؟ ءور‑راد‑كشمن مدّن أُخشنّين س‑تگلديت ن‑ربّي. اد‑ور‑تجلوم ءيخف‑نّون. ءور‑را‑سرس‑يكشم يان ءيتفسادن نغد يان ءيتعبادن ءيلاهات ن‑دّونيت‑اد نغد يان ءيتزنون نغد يان ءيتفسادن د‑يوتمان زوند نتّا نغد يان ءيشتّان وييّاض نغد يان دار ءيعزّا ا‑يتامژ ما‑يگّوتن ءي‑يخف‑نس نغد يان ءيتنوفولن س‑تيسّي نغد يان ءيرگّمن نغد يان ءيتاكُرن. ءولا كونّي، كرا گيگون ءيكّا‑تّين ار‑يسكار غمكان، والاينّي ءيسيرد‑كُن سيديتنّغ ياسوع لماسيح س‑رّوح ن‑ربّي‑نّغ، ءيژلي‑كُن ءيسكر سّلامت غ‑گراتون د‑ربّي. كرا ن‑مدّن ار‑تّينين: «ءيحلّا داري كرايگاتّ كرا.» والاينّي ءور‑را‑ك‑ينفعا كرايگاتّ كرا. «ءيحلّا داري كرايگاتّ كرا،» والاينّي ءور‑راد‑ادجغ يات ا‑يّي‑يكرس زوند ءيسمگ‑نس. ار‑تّينين مدّن: «ءيگا‑ومشّو وين‑وديس، ءيگ‑وديس وين‑ومشّو،» والاينّي ربّي را‑يهلك اديس ءولا امشّو. غمكاد ا‑س‑يبان ءيس‑ور‑تگي دّات‑نّغ تين لفساد، والاينّي تگا تين سيديتنّغ، ءيگ نتّا سيديس ن‑دّات‑نّغ. ربّي ءيسّنكر‑د دّات ن‑سيديتنّغ زغ‑لموت، راد‑اغ‑د‑يسّنكر ءولا نكُّني س‑تحكيمت‑نس ءيتجهّدن. ءيس‑ور‑تسّينم ماياد؟ كود يان گيگون، تگا دّات‑نس اگزّوم زغ‑يگزمان لّماسيح. ءيس‑ترام ا‑تاويم يان‑وگزّوم لّماسيح تزديم‑ت د‑دّات ن‑تمگّانت؟ حاشا. ءيس‑ور‑تسّينم، يان ءيزدين د‑تمگّانت يوورّي ءيگا ديدس يات‑دّات؟ غمكلّي ءيتياران: «راد‑گن سين يان.» والاينّي يان ءيزدين د‑سيديتنّغ يوورّي ءيگا نتّا ديدس يان‑رّوح. روولات زغ‑كولّو ما‑يگان لفساد. دّنوب ياضني ءور‑ا‑سّيُخشانّ دّات ن‑بنادم، والاينّي يان ءيتفسادن، هاتي ار‑يسّيُخشان ءولا دّات‑نس. ءيس‑ور‑تسّينم دّات‑نّون ءيس‑تگا تيگمّي تامژلايت، ءيزدغ گيس رّوح لقودوس لّي‑اون‑يفكا ربّي. ءور‑تگيم وين ءيخف‑نّون، اشكو نتّان ا‑كُن‑يسغان، ءيفك فلّاون اتيگ‑نّون. ءيلّا فلّاون غيلاد ا‑تمجّدم ربّي س‑دّات‑نّون. ءيمّا تيغاوسيوين لّي‑ف‑دي‑تورام، راد‑اون‑فلّاسنت‑ينيغ: ءيشوا ءي‑ورگاز ا‑ور‑ياوي تامغارت. والاينّي را‑ياف ءيغ‑يلّا كرايگاتّ ارگاز س‑تمغارت‑نس، تيلي كرايگاتّ تامغارت س‑ورگاز‑نس، ف‑سّيبت ن‑ا‑ور‑ييلي لفساد. ءيلّا ف‑ورگاز ا‑يفك ءي‑تمغارت‑نس لحقّ ن‑تمغارت، ييلي ف‑تمغارت ا‑تفك ءي‑ورگاز‑نس لحقّ ن‑ورگاز. اشكو ءور‑سول‑تگي دّات ن‑تمغارت تين‑تمغارت، والاينّي تگا تين‑ورگاز‑نس. ءور‑سول‑تگي دّات ن‑ورگاز تين‑ورگاز والاينّي تگا تين‑تمغارت‑نس. ءيلّا فلّاون ا‑ور‑تحصارم ءي‑نگراتون، ابلا ءيغ‑دي‑تمشاشكام ا‑تژليم كرا ن‑ووسّان تلهوم گيسن س‑تژالّيت. والاينّي ءيغ‑زرين‑ووسّان‑ان ءيلّا فلّاون ا‑توورّيم س‑ينگراتون، ا‑ور‑كُن‑يغرّو شيطان ءيغ‑ور‑سول‑تژضارم ا‑تصبرم. مايد‑اون‑نّيغ ءور‑كُن‑سرس‑وميرغ، والاينّي ءودجيغ‑كُن ا‑تسكارم س‑غمكاد ءيغ‑ترام. ريغ كولّو مدّن اد‑گن زوند نكّي، والاينّي كرايگاتّ يان د‑ماد‑اس‑يفكا ربّي. يان ءيتياوفكا‑ياس ا‑يگ غمكاد، د‑يان ءيتياوفكا‑ياس ا‑يگ غمكان. ءيمّا غويلّي ءور‑تاهلنين ءولا ختيلّي گانين تيهجّالين، راد‑اسن‑ينيغ: را‑يشوو ءيغ‑قامان واحدوتن زوند نكّي. والاينّي ءيغ‑ور‑ژضارن اد‑نبضن غ‑يخف‑نسن ءيلّا فلّاسن اد‑تاهلن. را‑ياف ءيغ‑تاهلن ءولا‑دا‑تن‑تجدّر شّهاوا. ءيمّا غويلّي تاهلنين، راد‑اسن‑فكغ لوصيت‑اد. ءورد نكّي ا‑تن‑يوصّان والاينّي سيديتنّغ. ءيلّا ف‑تمغارت ا‑ور‑تفل ارگاز‑نس، والاينّي ءيغ‑تي‑تفل ءيلّا فلّاس ا‑تقاما واحدوتّ نغد ا‑دي‑توورّي س‑دار‑ورگاز‑نس. ييلي ف‑ورگاز ا‑ور‑يفرو ءي‑تمغارت‑نس. ءيمّا وييّاض راد‑اسن‑ينيغ ماياد. نكّي ا‑ت‑ينّان ءورد سيديتنّغ. وانّا گيگون ءيطّافن تامغارت ءور‑يگين تامومنت، ءيلّا فلّاس اد‑اس‑ور‑يفرو ءيغ‑ترا ا‑ديدس‑تقاما. تانّا گيگونت ءيطّافن ارگاز ءور‑يگين امومن، ءيلّا فلّاس اد‑اس‑ور‑تفرو ءيغ‑يرا ا‑ديدس‑يقاما. اشكو ف‑سّيبت ن‑تمغارت تامومنت ا‑ف‑يرضا ربّي ف‑ورگاز‑نس. ءولا ف‑سّيبت ن‑ورگاز امومن ا‑ف‑يرضا ربّي ف‑تمغارت‑نس. مراد ءيس‑ور‑يگي غمكاد راد‑گن تاروا‑نسن زوند تاروا ن‑ويلّي ءور‑سّينّين ربّي، والاينّي نسّن ءيزد س‑صّاحت ءيرضا ربّي ف‑تاروا‑نسن. ءيمّا ارگاز لّي‑ور‑يومينّ، ءيغ‑يرا ا‑يفرو ءي‑تمومنت، ءيسكر‑ييت غمكلّي ءيرا. ءولا تامغارت لّي‑ور‑يومينّ، ءيغ‑ترا ا‑تفرو ءي‑ومومن تسكر‑ييت غمكلّي ترا. ءيغ‑يلّا غمكاد ءور‑سول‑تياوكرّافن ءيمومنّ، اشكو ربّي ءيقصاد گيگون اد‑اون‑تيلي سّلامت. والاينّي سوانگم ا‑تامغارت تامومنت، ءيس‑تسّنت ءيس‑ور‑را‑تجّنجمت ارگاز‑نّم؟ سوانگم اي‑ارگاز امومن، ءيس‑تسّنت ءيس‑ور‑را‑تجّنجمت تامغارت‑نّك؟ والاينّي ءيلّا ف‑كود يان ا‑يقاما غمكلّي‑ف‑ت‑يد‑يوفا سيديتنّغ غاكود لّيغ‑اس‑د‑يغرا، ءيقاما غ‑تاغامت لّي‑اس‑يفكا ربّي. غمكاد ا‑س‑ا‑توصّاغ غ‑يمناگّارن كولّوتن. وانّا ءيطّافن تاژالّيت ن‑دّات‑نس غاكود لّيغ‑اس‑د‑يغرا سيديتنّغ، ا‑ور‑ييري ا‑يگ زوند غويلّي ءور‑تّي‑طّافنين. ءيمّا وانّا ءور‑يطّافن تاژالّيت‑ان غاكود لّيغ‑اس‑د‑يغرا، ا‑ور‑ييري ا‑يژّالّ ي‑دّات‑نس. اشكو تاژالّيت ن‑دّات ءور‑تگي يات، زوند ءيغ‑اس‑يژّولّا زوند ءيغ‑اس‑ور‑يژّولّي. ءيمّا تاغاوسا ءيهيّان ا‑ستّ‑يگان ا‑نسكار س‑لوصيّات ن‑ربّي. ءيلّا ف‑كرايگاتّ يان ا‑يقاما غمكلّي‑ت‑يد‑يوفا سيديتنّغ غاكود لّيغ‑اس‑د‑يغرا. ءيغ‑تگيت ءيسمگ غاكود لّيغ‑اك‑د‑يغرا، اد‑اك‑ور‑طيّر ف‑مايان. والاينّي ءيغ‑توفيت مامنك ا‑س‑توورّيت ا‑تگت وين ءيخف‑نّك، سكر ما‑مي‑توفيت. اشكو وانّا ءيگان ءيسمگ غاكود لّيغ‑اس‑د‑يغرا سيديتنّغ، هاتي يوورّي ءيگا وين ءيخف‑نس غ‑لگدّام ن‑سيديتنّغ. ءيمّا وانّا ءيگان وين ءيخف‑نس غاكود لّيغ‑اس‑د‑يغرا، يوورّي ءيگا نتّا ءيسمگ لّماسيح. ءيسغا‑كُن لماسيح ءيفك فلّاون اتيگ‑نّون. ءيمّا غيلاد ا‑ور‑تفكم ءيخفاون‑نّون ا‑تگم ءيسمگان ءي‑بنادم. واي‑ايتما، ءيلّا ف‑كود يان ا‑يقاما د‑ربّي غمكلّي‑ت‑يد‑يوفا غاكود لّيغ‑اس‑د‑يغرا. ءيمّا غويلّي ءور‑تا‑تاهلنين، ءور‑داري فلّاسن كرا لّوصيت زغ‑سيديتنّغ. والاينّي راد‑اون‑ينيغ ماد‑سوانگمغ نكّي لّي‑ف‑يرحم ربّي ءيگ‑يّي د‑واد ءيزگان غ‑وغاراس‑نس. هاتي ف‑سّيبت ن‑تنوكموت لّي‑يلّان غ‑ووسّان‑اد، نّيغ نكّي را‑ياف اد‑قامان مدّن غمكلّي گان. ءيغ‑تطّافت تامغارت ا‑ور‑تّي‑تفلت. ءيغ‑ور‑تطّافت تامغارت ا‑ور‑تيريت ا‑تّاهلت. ءيغ‑تّاهلت تامغارت ءورد دّنوب ايان. ءيغ‑تّاهل‑تفروخت ءورد دّنوب ايان. والاينّي غويلّي تاهلنين، ءيشابوكن ن‑دّونيت ا‑غ‑راد‑يلين. هاتي ريغ ا‑كُن‑كّيسغ ءي‑غايان. واي‑ايتما راد‑اون‑ينيغ، ءور‑سول‑تقاما لوقت ءيگّوتن. غيلاد س‑وفلّا ءيلّا ف‑ويلّي طّافنين تامغارت اد‑سكارن زوند ءيغ‑تّ‑ور‑طّافن. ءيلّا ف‑ويلّي الّانين اد‑سكارن زوند ءيغ‑ور‑الّان. ءيلّا ف‑ويلّي ضصّانين اد‑سكارن زوند ءيغ‑ور‑ا‑ضصّان. ءيلّا ف‑ويلّي ساغنين اد‑سكارن زوند ءيغ‑ور‑يگي يات وينسن. ءيلّا ف‑ويلّي سالانين تيغاوسيوين ن‑دّونيت ا‑ور‑لهون ءيخف‑نسن س‑دّونيت، اشكو دّونيت‑اد تاكمور ا‑تتمّو. ريغ ا‑ور‑دارون‑تيلي تاغوفت. ارگاز نّا‑ور‑يتاهيلن، ار‑يتلهو س‑تغاوسيوين ن‑سيديتنّغ، اشكو ار‑يتّيري ا‑يرضو سيديتنّغ. ءيمّا وانّا ءيتاهلن، ار‑ت‑سّلهاونت‑تغاوسيوين ن‑دّونيت اشكو ار‑يتّيري ا‑يرضو تامغارت‑نس. ار‑ن‑يتافا ءيخف‑نس غ‑گر سنات‑تنباضين. تافروخت نغد تامغارت نّا‑ور‑يتاهيلن، ار‑تّلهو س‑تغاوسيوين ن‑سيديتنّغ، اشكو ار‑تّيري ا‑تگ تينس تّياوژلاي كولّو ءي‑سيديتنّغ. ءيمّا تامغارت نّا‑يتاهلن ار‑تّ‑سّلهاونت‑تغاوسيوين ن‑دّونيت اشكو ار‑تّيري ا‑تّرضو ارگاز‑نس. نّيغ‑اون ماياد باش اد‑اون‑تيلي سّلامت. ءور‑ريغ ا‑ن‑فلّاون‑ژّيژايغ، والاينّي ريغ ا‑تسكارم ما‑يفولكين ار‑بدّا‑تّلهوم س‑ما‑يرضان سيديتنّغ. ءيمّا وانّا ءيغالن ءيس‑ا‑يسكار ما‑ور‑يفولكين د‑تالّي‑ن‑يضالب ار‑فلّاس‑تسّايك شّهاوا‑نس ييري ا‑ستّ‑ياوي، ادجات‑تن اد‑تاهلن. ءور‑را‑يگ مايان دّنوب. ءيمّا وانّا ءيدوسن ءيزگا غ‑وول‑نس ءينبض غ‑ما‑يرا ءيسكر د‑يخف‑نس ا‑ستّ‑ور‑يتاهل، ءيفولكي‑نّيت مايان. غوالّي ءيتاهلن، افولكي ايد ءيسكر. ءيمّا غوالّي ءور‑يتاهيلن ءيسكر افولكي س‑وگُّار. تياوكرّاف‑تمغارت س‑ورگاز‑نس ماحدّ سول ءيلّا غ‑دّونيت. ءيغ‑يمّوت‑ورگاز را‑تّياوفساي‑تمغارت. غاكودان را‑تيژضار ا‑تّاهل وانّا ترا، ءيغ‑يگا وين سيديتنّغ. والاينّي ءيرواس‑يّي ءيس‑را‑تفرح‑تمغارت ءيغ‑تقاما واحدوتّ. ماياد اد‑نّيغ نكّي، والاينّي ءيرواس‑يّي ءيس‑يّي‑ت‑يد‑يملا رّوح ن‑ربّي. ءيمّا تيفيّي ن‑تغرسيو لّاصنام، نسّن ما‑فلّاس‑تّينين مدّن: «نطّاف كولّواغ ‹تاواسّنا›.» هاتي تاواسّنا ار‑تسّوفّ بنادم، ءيمّا تايري ار‑تي‑تسّدوس. يان ءيغالن ءيس‑يسّن كرا، ءور‑تا‑يسّين غمكلّي‑ت‑يخصّا ا‑ييسّان. والاينّي يان ءيتّيرين ربّي، هاتين ءيتياوسّان دار ربّي. ءيمّا غويلّي شتّانين تيفيّي ن‑تغرسيو لّاصنام، نسّن فلّاسن ءيزد «كولّو لاصنام ن‑دّونيت‑اد ءور‑ا‑سكارن يات.» نيسّان ءيزد «يان‑ربّي كا‑يلّان.» ءور‑نتّو لارواح ن‑يگنوان ءولا وين‑واكال لّي‑زغ‑ا‑سكارن مدّن ‹ءيد‑ربّي›، اشكو نتني گّوتن دارسن ءيد‑ربّي‑نسن د‑يد‑سيديتسن. ءيمّا نكُّني، يان‑ربّي اد‑دارنّغ‑يلّان لّي‑مي‑نگا وينس، ا‑ت‑يگان د‑باباتنّغ لّي‑يخلقن كولّو ما‑يلّان. د‑يان‑سيديتنّغ اد‑دارنّغ‑يلّان لّي‑س‑نلّا، ا‑ت‑يگان د‑ياسوع لماسيح لّي‑س‑يتياوخلاق كولّو ما‑يلّان. والاينّي تاواسّنا‑ياد ءور‑تّ‑سّينّ كولّو مدّن. اشكو كرا گيسن ءيميار لاصنام باهرا. ءيغ‑دّان غيلاد ار‑شتّان تيفيّي‑ان راد‑سوانگمن ءيزد تيفيّي لّاصنام ا‑تگا. راد‑اسن‑طيّر ار‑سّحسّون ءيس‑را‑تن‑تسّركو، اشكو ءور‑تا‑سّينّ مامنك اد‑ژّمژلاين ما‑يفولكين زغ‑ما‑يُخشنّ. ءيمّا ربّي، ءورد امشّو ا‑س‑را‑ت‑نرضو. ءور‑دارس‑نُخشين ءيغ‑ت‑نشّا، ءولا نشوا دارس ءيغ‑ور‑ت‑نشّي. والاينّي ءيلّا فلّاون ا‑ترارم لعاقل ءيغ‑ترام ا‑تسكارم س‑لحقّ‑نّون، ا‑ور‑تّگّام تابايضّرت ءي‑ويلّي مي ءيضعف ليمان‑نسن. اشكو يان ءور‑باهرا‑يسّينّ ما‑يفولكين زغ‑ما‑يُخشنّ، ءيغ‑ك‑يژرا كيّي لّي‑دار ‹تاواسّنا› ار‑تشتّات غ‑تگمّي لّاصنام، ءيس‑ور‑را‑ت‑يزّعام مايان ا‑يشّ ءولا نتّا تيفيّي لّاصنام؟ هاتي س‑تواسّنا‑نّك ا‑س‑را‑تهلكت غوالّي ءيضعفن، ءيگان گماك لّي‑ف‑يمّوت لماسيح. وانّا ءيسكرن كرا ن‑دّنب ءي‑ايتماس، ءيسّياگّاس غويلّي ءور‑تا‑سّينّين مامنك اطّون افولكي زغ‑لخُشانت، هاتين لماسيح ا‑مي‑يسكر دّنب. ماياد ا‑ف‑راد‑اون‑ينيغ، ءيغ‑را‑يضر گما ف‑سّيبت ن‑ماد‑شتّاغ، ءور‑سار‑راد‑شّغ تيفيّي، باش ا‑ور‑سّضرغ گما. ءيس‑ور‑ژضارغ اد‑سكارغ غمكنّا ريغ؟ ءيس‑ور‑گيغ ارقّاس؟ ءيس‑ور‑ژريغ سيديتنّغ ياسوع؟ ءيس‑ور‑تگيم كونّي صّابت لّي‑ف‑خدمغ س‑يسم ن‑سيديتنّغ؟ واخّا ءيلّا ما‑يّي‑ور‑يگين د‑ورقّاس، تسّنم كونّي ءيس‑ت‑گيغ، اشكو ءيبان گيگون ما‑يسكر سيديتنّغ ف‑وفوس‑ينو س‑ترقّاست لّي‑يّي‑يفكا. غمكاد ا‑س‑ا‑تراراغ اوال ءي‑ويلّي سري تاشتكّانين. ءيس‑ور‑داري لحقّ اد‑شتّاغ ار‑سّاغ ءولا نكّي؟ ءيغ‑ا‑تمودّوغ ءيس‑ور‑داري لحقّ ا‑ديدي‑تاويغ تامغارت تامومنت زوند ءيرقّاسن ياضني د‑ايتماس ن‑سيديتنّغ د‑بطرُس؟ ءيزد غير نكّي د‑بارنابا كا‑يخصّا ا‑نتخدام غ‑تووري ياضني باش ا‑نتامژ ما‑نشتّا؟ مان اعسكري ءيكشمن س‑يميغ ار‑سول‑يتصيّار ف‑يخف‑نس؟ ما‑يژّان اضيل ءور‑ا‑يشتّا زغ‑لغلّت‑نس؟ ما‑يكسان تاوروت ءور‑ا‑يسّا زغ‑وكُّفاي‑نس؟ والاينّي ءورد غير لمعني ن‑بنادم ا‑س‑نسّن تيغاوسيوين‑اد. ار‑فلّاسنت‑يتّيني شّرع ءولا نتّا. اشكو غ‑شّرع ن‑موسا ا‑غ‑يتيارا: «ا‑ور‑تگت اغامو ءي‑وزگر لّي‑يسرواتن.» ءيزد غير ءيزگارن ا‑يقصاد ربّي غ‑واوال‑اد؟ ءيس‑ورد نكُّني ا‑يعنا غ‑ما‑ينّا؟ هاتي ف‑سّيبت‑نّغ ا‑ف‑يتيارا‑واوال‑اد، اشكو غوالّي ءيكّرزن ءولا غوالّي ءيمگّرن ءيقّان‑تن‑د ا‑ن‑ترجون غ‑تاغامت ن‑صّابت. نكُّني نلوح‑ن دارون امود ن‑رّوح. ءيس‑ور‑دارنّغ لحقّ ا‑دارون‑نمگر كرا لّخير لّي‑تحتاجّا دّات؟ لّان وييّاض ار‑دارون‑تامژن تاغامت لّخير، ءيمّا نكُّني ءيس‑ور‑راد‑اغ‑تيلي تاغامت يوگُرن تينسن؟ والاينّي ءور‑جّو‑نضالب لحقّ‑نّغ. نصامح غ‑مايان كولّوت، باش ا‑ور‑نتحصار تابرّاحت لّخبار ءيفولكين لّماسيح. ءيس‑ور‑تسّينم، غويلّي تخدامنين غ‑تگمّي ن‑ربّي ءيزد ما‑يتياوفكان ءي‑تگمّي ن‑ربّي ا‑زغ‑ا‑شتّان؟ ءيس‑ور‑تسّينم، غويلّي سكارنين تاووري ن‑وژرو ن‑تغرسي ءيزد تيغرسيو‑ان ا‑زغ‑ا‑شتّان؟ غمكان ا‑يوصّا سيديتنّغ ءولا ف‑ويلّي تبرّاحنين غيلاد س‑لخبار ءيفولكين، باش اد‑تامژن ماد‑حتاجّان ف‑سّيبت ن‑تووري ن‑تبرّاحت لّي‑سكارن. ءيمّا نكّي ءور‑جّو‑ضالبغ لحقّ‑ينو. تابرات‑اد، ءور‑اون‑تّ‑ين‑وريغ باش اد‑امژغ كرا ءي‑يخف‑ينو. اشكو يوف داري اد‑مّتغ ءولا ءيكّيس فلّا كرا ن‑يان لفرح‑اد داري ءيلّان س‑مايد سكارغ. والاينّي ءيغ‑ا‑تبرّاحغ س‑لخبار ءيفولكين، ءور‑ژضارغ اد‑الغّ ءيخف‑ينو ف‑مايد سكرغ، اشكو ءيقّان‑يّي‑د اد‑سكارغ غمكاد. تاگوضي ا‑راد‑يّي‑ييلي ءيغ‑ور‑ا‑تبرّاحغ س‑لخبار ءيفولكين. مراد ءيزد نكّي ا‑يقصادن تاووري‑اد، راد‑يريغ ا‑فلّاس‑تامژغ تيغراد‑ينو. والاينّي تقّان‑يّي‑د‑تووري‑اد، اشكو ربّي ا‑زگيگي‑يران ا‑ستّ‑سكارغ. ءيمّا غيلاد ما‑يگان تيغراد‑ينو؟ ا‑تنت‑يگان د‑ماياد. ژضارغ اد‑سّلكامغ لخبار ءيفولكين ءي‑مدّن بلا زگيسن حتاجّاغ يات، ءولا‑دا‑زگيسن‑تضالابغ ماد‑ستهلّاغ ف‑تووري‑اد ن‑تبرّاحت. نكّي گيغ وين ءيخف‑ينو، ژضارغ اد‑سكارغ مكنّا ريغ. والاينّي گيغ ءيخف‑ينو د‑يسمگ ءي‑كولّو مدّن، باش ا‑زگيسن‑رارغ ويد گّوتنين ءي‑ربّي. گيغ ءيخف‑ينو د‑گو‑يودايا غ‑دار ايت‑يودايا، باش اد‑رارغ ايت‑يودايا ءي‑ربّي. گغ ءيخف‑ينو د‑بو‑شّرع غ‑دار ايت‑شّرع، واخّا ءور‑يّي‑د‑يقّان شّرع، باش اد‑رارغ ءولا ايت‑شّرع ءي‑ربّي. گغ ءيخف‑ينو د‑واد ءور‑يسّينّ شّرع غ‑دار ويلّي ءور‑سّينّين شّرع، باش اد‑رارغ ءولا غويلّي ءور‑سّينّين شّرع ءي‑ربّي. والاينّي ءور‑جّود نكّين ا‑يفّوغن زغ‑شّرع ن‑ربّي اشكو ار‑بدّا‑سكارغ س‑ولمّود لّماسيح. گغ ءيخف‑ينو د‑واد ءيضعفن غ‑دار ويلّي ضعفنين، باش اد‑رارغ ءولا غويلّي ضعفنين ءي‑ربّي. غ‑دار كولّو مدّن ار‑توورّيغ گغ زغ‑گيسن باش اد‑افغ مامنك اد‑زگيسن‑جّنجامغ كرا. كولّو ماياد، ار‑ت‑سكارغ باش اد‑سّلكمغ لخبار ءيفولكين ءي‑مدّن، كشمغ ديدسن غ‑تامونت‑نس. تسّنم ءيس‑يگّوت ما‑يسكارن شالا ن‑تيزّلا والاينّي غير يان ا‑را‑گيسن‑يامژ لكاس. تازّالات غيلاد باش ا‑تامژم لكاس. كولّو وانّا ءيتازّالن ار‑يسّدوس ءيخف‑نس. ار‑ت‑يسّدوس باش ا‑يامژ كرا لّكاس لّي‑ور‑را‑يدوم. ءيمّا نكُّني ار‑نسّدوس ءيخفاون‑نّغ باش ا‑نامژ لكاس لّي‑راد‑بدّا‑يدوم. ءور‑ا‑تازّالغ نكّي بلا لفايتّ ءولا‑دا‑سكارغ توكُّيمت زوند يان ءيكّاتن غير اضو. والاينّي ار‑سّدوسغ دّات‑ينو ار‑گيس‑تنباضغ، باش ا‑ور‑يّي‑يسّوفغ ربّي غ‑يسيگُّرا نكّي لّي‑ياد‑يتبرّاحن ءي‑وييّاض. واي‑ايتما، ريغ ا‑ور‑تتّوم ما‑يجران ءي‑يمزوورا‑نّغ غايد ءيزرين. نتني كولّوتن ءيسّنتال‑تن‑ومدلو، زرين كولّو غ‑وامّاس ن‑ومدا، دّمن كولّو س‑يسم ن‑موسا غ‑ومدلو د‑ومدا. ار‑كولّو‑شتّان تيرمت زغ‑يگنّا، ار‑كولّو‑سّان تيسّي زغ‑يگنّا، اشكو ار‑سّان زغ‑وژرو ن‑يگنّا لّي‑بدّا‑ديدسن‑يتمونون. لماسيح ا‑يگان اژرو‑ان. والاينّي ما‑گيسن‑يگّوتن، ءور‑فلّاسن‑يرضي ربّي، مّتن جلون ءيمضّالن‑نسن غ‑لخلا. غايلّي‑س‑اسن‑تگُّرا ار‑اغ‑يمالا ا‑ور‑نتّيري ما‑يُخشنّ غمكلّي تّيرين نتني، ءولا‑دا‑نتعباد ءيلاهات ياضني زوند كرا گيسن غمكلّي ءيتياران: «سكيوسن مدّن ار‑شتّان ار‑سّان، نكرن ار‑تحوشن.» ا‑ور‑نتفساد زوند كرا گيسن، ءيتياوهلاك گيسن سين ءيد‑مراو د‑كراض ن‑يد‑والف (000‏.23) غ‑يان‑واسّ. ءيلّا فلّانّغ ا‑ور‑نتارم ربّي زوند كرا گيسن، نغن‑تن ءيلگمّاضن. ا‑ور‑نتنگموگ زوند كرا گيسن، ءيهلك‑تن لمالاك لّموت. غايلّي‑س‑اسن‑تگُّرا، ءيجرا غمكان باش اد‑اغ‑يمل ا‑ور‑نسكار زوند نتني، ءيتيارا كولّو ف‑سّيبت‑نّغ باش ا‑نرار لعاقل نكُّني لّي‑يزّراين ءيسيگُّرا ن‑دّونيت. وانّا ءيتّينين ءيس‑يزگا، ءيرار لعاقل ا‑ور‑يضر. ءور‑فلّاون‑تزري كرا ن‑تاسّاست ابلا ختالّي كولّو ءيزراين ف‑مدّن. ءيمّا ربّي ءيزگا‑بدّا غ‑واوال‑نس، ءور‑را‑كُن‑يادج ا‑تّيارامّ ءوگُّار ن‑ما‑مي‑تژضارم. هاتي غاكود نّا‑تزرايم غ‑تاسّاست راد‑اون‑يمل مامنك ا‑ستّي‑تنروم تنجمّ زغ‑گيس. واي‑ايتما عزّانين، ماياد ا‑ف‑ا‑ياون‑تّينيغ، تانفات ءي‑يلاهات ن‑دّونيت‑اد. ار‑سرون‑ساوالغ زوند ايت‑لعاقل. سوانگمات د‑يخف‑نّون غ‑ما‑راد‑اون‑ينيغ. هاتي لكاس امباركي لّي‑ف‑ا‑نتشكار ربّي، غاكود نّا‑زگيس‑نسّا ار‑نكشّم غ‑تامونت ن‑يدامّن لّماسيح. ءولا تانگولت ن‑وغروم لّي‑نتبّي، غاكود نّا‑زگيس‑نشتّا ار‑نكشّم غ‑تامونت ن‑دّات لّماسيح. يات‑تنگولت ا‑يلّان اشكو يان ا‑نگا نكُّني لّي‑يگّوتن، ار‑كولّو‑نطّاف تاغامت غ‑تنگولت‑ان. سوانگمات غ‑ماد‑سكارن ايت‑يودايا. غويلّي شتّانين تيغرسيو ار‑كشّمن غ‑تامونت ن‑وژرو ن‑تغرسي. والاينّي ماد‑قصادغ غ‑واوال‑اد؟ ءيس‑تگا كرا، تيفيّي ن‑تغرسيو لّاصنام؟ نغد ءيس‑گان كرا، لاصنام؟ ءوهو، والاينّي تيغرسيو لّي‑مي‑قّرسن ايت‑لاصنام ار‑تنت‑اكّان ءي‑لجنون ءورد ءي‑ربّي. ءور‑ريغ ا‑تكشّمّ كونّي غ‑ما‑يگان وين لجنون. ءور‑را‑تيژضارم ا‑تسّام زغ‑لكاس ن‑سيديتنّغ د‑لكاس لّجنون. ءور‑را‑تيژضارم ا‑تشتّام زغ‑لميدا ن‑سيديتنّغ د‑لميدا لّجنون. ءيس‑ترام ا‑ستّي‑تسّطيّارم ءي‑سيديتنّغ؟ ءيس‑فلّاس‑تجهّدم كونّي؟ ار‑تّينين مدّن: «ءيحلّا كرايگاتّ كرا.» والاينّي ءور‑را‑ينفعا كرايگاتّ كرا. «ءيحلّا كرايگاتّ كرا،» والاينّي ءور‑راد‑اغ‑يسّدوس كرايگاتّ كرا. ا‑ور‑يسيگّيل يان غير ما‑يفولكين ءي‑يخف‑نس، والاينّي ا‑ت‑يسيگّيل ءي‑وييّاض. ءيحلّا‑ياون ا‑تشتّام تيفيّي نّا‑ينزّان غ‑سّوق بلا‑دا‑فلّاس‑تسقسام ءولا تشكّام غ‑وول‑نّون، اشكو «اكال وين ربّي ا‑يگا، ءولا كولّو ما‑گيس‑يلّان.» ءيغ‑اون‑يعرض كرا ن‑يان ءور‑يسّينّ ربّي، ءيغ‑ترام ا‑ديدس‑تمونم، شتّايات اينّا‑ياون‑ين‑يسرس بلا تسقسام ءولا تشكّام غ‑وول‑نّون. والاينّي ءيغ‑اون‑ينّا كرا ن‑يان «تيفيّي‑اد تگا تين لاصنام،» ءيلّا فلّاون ا‑ستّ‑ور‑تشّم. اشكو ءيغ‑تّي‑تشّام، ءورد افولكي اين تسكرم ءي‑والّي‑اون‑ت‑ينّان، اشكو را‑ييلي شّكّ. شّكّ‑اد را‑ييلي غ‑وول‑نس نتّا ءورد ءول‑نّون. والاينّي ماخ ايلّيغ راد‑كّيسغ ءي‑يخف‑ينو ماد‑يّي‑يحلّان ف‑سّيبت ن‑يان ءيشكّان؟ ءيغ‑ا‑تشكارغ ربّي ف‑ماد‑شتّاغ، ماخ ايلّيغ را‑يّي‑تژين مدّن ف‑مايلّي‑ف‑ا‑تشكارغ ربّي؟ والاينّي كولّو ما‑تشتّام ءولا كولّو ما‑تسّام ءولا كولّو ما‑تسكارم، ءيلّا فلّاون ا‑سرس‑تمالام لمجد ن‑ربّي. ا‑ور‑تّي‑تسّطيّارم ءي‑ايت‑يودايا ءولا ايت‑تميزار ياضني ءولا ايت‑ومناگّار ن‑ربّي. سكارات زوند نكّي، ار‑ن‑تگّاغ تيقّي‑نو ا‑بدّا‑ترضوغ كولّو مدّن. ءور‑ا‑سيگّيلغ غير ما‑يفولكين ءي‑يخف‑ينو والاينّي ار‑سيگّيلغ ما‑يفولكين ءي‑وييّاض، باش اد‑وورّين نجمن. ضفورات‑يّي غ‑ماد‑سكارغ غمكلّي تضفورغ لماسيح غ‑ما‑يسكار. هاتي فرحغ سرون اشكو ار‑تسكارم س‑كولّو ماد‑اون‑نّيغ ار‑تزّگام المّود لّي‑اون‑ين‑سّلكمغ. والاينّي ريغ ا‑تيسّانم ماياد: ءيگا لماسيح ءيخف ن‑كرايگاتّ ارگاز، ءيگ‑ورگاز ءيخف ن‑تمغارت‑نس، ءيگ ربّي ءيخف لّماسيح. ارگاز نّا‑يدالن اگايّو‑نس ءيغ‑ا‑يتژالّا نغد ءيغ‑ا‑يتّيني س‑ماد‑اس‑يمالا ربّي، هاتي ار‑يشّحشّام غوالّي ءيگان ءيخف‑نس. ءيمّا تامغارت نّا‑ور‑يدالن اگايّو‑نس ءيغ‑ا‑تّژالّا نغد ءيغ‑ا‑تّيني س‑ماد‑اس‑يمالا ربّي، نتّات ار‑تشّحشّام غوالّي ءيگان ءيخف‑نس. را‑يگ غايان زوند ءيغ‑تسّماكّرد اگايّو‑نس. تامغارت نّا‑ور‑يدالن اگايّو‑نس، را‑ياف ا‑تلاسّ ازّار‑نس. ءيمّا غايان، لفضحت ا‑را‑يگ ءي‑يات ءيلاسّن ازّار‑نس نغد تسّماكّرد اگايّو‑نس. غمكان ا‑س‑يبان ءيس‑فلّاس‑يلّا ا‑تي‑تدل. ارگاز، ءيلّا فلّاس ا‑ور‑يدال اگايّو‑نس اشكو ربّي ءيخلق ارگاز ف‑صّورت‑نس، ءيبان گيس لمجد ن‑ربّي. ءيمّا تامغارت، ءيبان گيس لمجد ن‑ورگاز. غ‑يسيزوار ءور‑يتياوسكار‑ورگاز زغ‑تمغارت، والاينّي تّياوسكار‑تمغارت زغ‑ورگاز. ءور‑يتياوسكار‑ورگاز ف‑سّيبت ن‑تمغارت، والاينّي تامغارت ا‑يتياوسكارن ف‑سّيبت ن‑ورگاز. ماياد ا‑ف‑يلّا ف‑تمغارت ا‑تّاسي تاماتارت‑اد ف‑يخف‑نس، باش ا‑تمالا ءيس‑تگا تين‑ورگاز‑نس. ءيقّان‑تّ‑يد ماياد ف‑سّيبت لّمالايكا. والاينّي نسّن ءيس‑ور‑نگارانت‑تمغارين د‑يرگازن غ‑تامونت ن‑سيديتنّغ، ءولا نگاران ءيرگازن د‑تمغارين. اشكو تّياوسكار‑تمغارت زغ‑ورگاز، ار‑يتلول‑ورگاز زغ‑تمغارت. كولّو مايان، ربّي ا‑ت‑يقصادن. ما‑تنّام كونّي؟ ءيس‑را‑يفولكي ءيغ‑تژّولّا‑تمغارت ءي‑ربّي د‑وگايّو‑نس ءور‑يديل؟ ءيس‑ور‑تسّينم، ارگاز نّا‑دار‑يغزّيف‑وازّار، ءور‑را‑تي‑توقّارن مدّن. والاينّي تفولكي‑تمغارت نّا‑دار ازّار ءيغزّيفن، اشكو ءيفكا‑ياس ربّي ازّار‑نس زوند يات‑تملسيت. ءيغ‑يلّا ما‑يران ا‑ديدنّغ‑يتژي ف‑ماياد، ءور‑راد‑اس‑ينيغ ابلا: غمكاد ا‑نسكار نكُّني ءولا كولّو ءيمناگّارن ن‑ربّي. ءيمّا غيلاد را‑كُن‑وصّاغ ف‑كرا ن‑تغاوسيوين ياضني، ءور‑ژضارغ ا‑كُن‑فلّاسنت‑الغّ. اشكو غاكود نّا‑تمناگّارم ءور‑ا‑تسكارم لخير والاينّي لخُشانت ا‑تسكارم. تاغاوسا تامزواروت ا‑ستّ‑يگان: سفلدغ ءيس‑ا‑تاطّوم غاكود نّا‑ن‑تمناگّارم. ءيرواس‑يّي ءيس‑ورد تيكركاس ايان، اشكو ءيقّان‑د ا‑ياطّو كرا ف‑كرا باش ا‑گيگون‑يبان مانوي‑ف‑يرضا ربّي. والاينّي لّيغ ا‑ن‑تمناگّارم ءورد ءيمنسي ن‑سيديتنّغ ا‑تشتّام. اشكو كرايگاتّ يان ار‑يتزاياد ار‑يشتّا بلا‑دا‑يتقل س‑وييّاض، ار‑گيگون‑يتّيلي كرا ياغ لاژ، ار‑يتّيلي كرا ءينوفل س‑تيسّي. ماخ، ءور‑دارون تيگُمّا‑نّون ا‑گيسنتي‑تشتّام ار‑گيسنتي‑تسّام؟ ءيس‑تحگرم امناگّار ن‑ربّي تيريم ا‑تشّحشّامّ غويلّي ءور‑دار يات؟ ما‑راد‑اون‑ينيغ؟ ءيس‑ترام ا‑كُن‑الغّ ف‑وان غايان؟ ءوهو، ءور‑را‑كُن‑فلّاس‑الغّ. مايلّي‑يّي‑د‑يملا سيديتنّغ، ها‑يّي مليغ‑اون‑ت. سيديتنّغ ياسوع، غ‑يض‑ان غ‑را‑ينز، ياسي تانگولت ءيشكر ربّي ءيبّي‑تّ ييني: «ختاد تگا دّات‑ينو، تّياوفكا ف‑سّيبت‑نّون. سكارات ماياد ا‑يّي‑د‑سرس‑تسوينگيمّ.» ياسي ءولا لكاس غمكاد غ‑يسيگُّرا ن‑يمنسي ييني: «لكاس‑اد ءيگا لعهد لّجديد غ‑گراتون د‑ربّي س‑يدامّن‑ينو. سكارات ماياد غاكود نّا‑زگيس‑تسّام، ا‑يّي‑د‑سرس‑تسوينگيمّ.» ءيمّا غيلاد غاكود نّا‑غ‑ا‑تشتّام زغ‑تنگولت‑اد ار‑تسّام زغ‑لكاس‑اد، ار‑تاكّام توگّا ف‑لموت ن‑سيديتنّغ ارد‑د‑يوورّي. والاينّي يان ءيشّان زغ‑تنگولت ن‑سيديتنّغ نغد ءيسوا زغ‑لكاس‑نس بلا‑دا‑ت‑يتوقّار، لحوكم ن‑ربّي ا‑را‑فلّاس‑ييلي اشكو ءيسكر زغ‑دّات ن‑سيديتنّغ د‑يدامّن‑نس زوند ءيغ‑ور‑گين يات. ءيلّا ف‑كرايگاتّ يان ا‑زوار‑يارم ءيخف‑نس، ءيشّ ءيلمّا زغ‑تنگولت ءيسو زغ‑لكاس. اشكو وانّا ءيشّان ءيسو بلا ءيسوانگم لمعنا ن‑دّات ن‑سيديتنّغ، هاتي لحوكم ن‑ربّي ا‑را‑يزّوگز ف‑يخف‑نس ءيغ‑يشّا ءيسو. ماياد ا‑ف‑گيگون‑يگّوت ما‑يضعفن ءيهرش، ييلي ما‑يمّوتن. ءيغ‑ا‑نسيگّيل غ‑وولاون‑نّغ، ءور‑را‑فلّانّغ‑يتّوت لحوكم. والاينّي ءيغ‑ا‑فلّانّغ‑يتحكام سيديتنّغ، ار‑اغ‑يتربّا باش ا‑ور‑نتياوهلاك س‑لهالاك ن‑دّونيت‑اد. ءيمّا كونّي اي‑ايتما، غاكود نّا‑تمناگّارم ا‑تشّم، ءيلّا ف‑كود يان ا‑يقل س‑وايّاض. ءيغ‑يلّا ماد‑باهرا‑ياغ لاژ ءيخصّا‑ت ا‑يشّ غ‑تگمّي‑نس، ا‑ور‑فلّاون‑يتّوت لحوكم ن‑ربّي لّيغ ا‑تمناگّارم. ءيمّا تيغاوسيوين ياضني، را‑كُن‑فلّاسنت‑وصّاغ غاكود نّا‑ن‑دارون‑وشكيغ. ءيمّا تيغاوسيوين ن‑رّوح لقودوس اي‑ايتما، ريغ ا‑تيسّانم لحقّ فلّاسنت. سوانگماد‑د مامنك ا‑تجلام غ‑ووسّان لّي‑غ‑ور‑تا‑تسّينم ربّي، ييلي گيگون ما‑كُن‑يتاوين ا‑تّعبادم لاصنام ءيژنژام. غايان ا‑ف‑ريغ ا‑تيسّانم ماياد: يان ءيساوالن س‑تحكيمت ن‑رّوح ن‑ربّي ءور‑را‑ييني «تلّا نّعلت ف‑ياسوع،» ءولا ءيژضار كرا ن‑يان ا‑يتّيني «ياسوع ءيگا سيدي» ابلا س‑تحكيمت ن‑رّوح لقودوس. گّوتنت‑توافكيو، والاينّي يان‑رّوح ا‑يلّان. گّوتنت‑تووريو، والاينّي يان سيديتنّغ ا‑يلّان. گّوتن ءيسكّيرن، والاينّي يان‑ربّي ا‑تن‑يسكارن غ‑كرايگاتّ يان. ار‑ياكّا ءي‑كود يان تاحكيمت ن‑رّوح لقودوس ا‑سرس‑يتعاوان وييّاض. يان، ار‑اس‑ياكّا اوال لّفهمت س‑رّوح لقودوس. يان ياضني، ار‑اس‑ياكّا اوال ن‑تواسّنا س‑رّوح لقودوس. يان ياضني، ار‑اس‑ياكّا س‑رّوح‑اد ا‑باهرا‑يامن. يان ياضني، ار‑اس‑ياكّا س‑رّوح‑اد ا‑يجّوجّي ءيموضان. ار‑ياكّا ءي‑يان ا‑يسكار لمعجيزات، ار‑ياكّا ءي‑يان ا‑يتّيني س‑ماد‑اس‑يمالا ربّي، ار‑ياكّا ءي‑يان ا‑يتاكُز ما‑يگان وين رّوح لقودوس زغ‑وين لارواح ياضني. ار‑ياكّا ءي‑يان ا‑يساوال س‑يواليون ءيغريبن، ار‑ياكّا ءي‑يان ا‑ييسّان لمعنا ن‑يواليون ءيغريبن. والاينّي كولّو ماياد، ار‑ت‑يسكار رّوح لقودوس لّي‑يگان يان، ار‑ياكّا ءي‑كود يان غمكلّي ءيتّيري نتّا. كرايگاتّ دّات تطّاف ءيگزمان گّوتنين. غمكاد ا‑يگا لماسيح ءولا نتّا. واخّا يات‑دّات اد‑دارس‑يلّان، گّوتن ءيگزمان‑نس. اشكو ندّم كولّواغ س‑ودوم ن‑يان‑رّوح باش ا‑نوورّي نگ يات‑دّات، نگ‑ييت ايت‑يودايا نغد ايت‑تميزار ياضني، نگ‑ييت ءيسمگان نغد وين ءيخف‑نّغ. كولّواغ زغ‑يان‑رّوح ا‑زغ‑اغ‑يسّوا. اشكو دّات تطّاف ءيگزمان گّوتنين. ءورد غير يان‑وگزّوم ا‑تگا. ءيغ‑ينّا‑وضار «ءور‑گيغ زغ‑دّات اشكو ءور‑گيغ افوس،» ءيزد س‑صّاحت ءورد دّات ا‑زغ‑يگا؟ ءيغ‑ينّا‑ومژّوغ «ءور‑گيغ زغ‑دّات اشكو ءور‑گيغ تيط،» ءيزد س‑صّاحت ءورد دّات ا‑زغ‑يگا؟ مراد ءيس‑تگا دّات كولّو تيط، ما‑س‑را‑تسفليد؟ مراد ءيس‑تگا دّات كولّو امژّوغ، ما‑س‑را‑تكضّو؟ والاينّي ءيسكر ربّي ءيگزمان ن‑دّات، كرايگاتّ اگزّوم غمكلّي‑ت‑يرا نتّا. مراد ءيس‑كولّو‑نگا يان‑وگزّوم، ءور‑را‑تيلي دّات. والاينّي نسّن ءيس‑گّوتن ءيگزمان، مونّ كولّوتن غ‑يات‑دّات. ءور‑را‑تيژضار تيط ا‑تيني ءي‑وفوس «ءور‑ك‑حتاجّاغ،» ءولا‑را‑ييژضار‑وگايّو ا‑ييني ءي‑يضارن «ءور‑كُن‑حتاجّاغ.» ءور‑ا‑تّينين غمكان اشكو ءيگزمان لّي‑ف‑نغال ءيس‑ضعفن، نحتاجّا‑تن باهرا. ءولا ءيگزمان لّي‑نتحگار، ار‑تّ‑گيسن‑نتاوي س‑وگُّار. ءولا ءيگزمان لّي‑اغ‑شّحشّامنين، ار‑اسن‑نسّلسا ءيبردان لّي‑ور‑د‑يقّانّ ا‑تن‑نسّلس ءي‑يگزمان ياضني. غمكاد ا‑ف‑يسّنگادّا ربّي دّات، ءيفك لوقر س‑وگُّار ءي‑يگزمان لّي‑ف‑نغال ءور‑گين يات. ءيسكر غمكاد باش اد‑كولّو‑تمعاوانّ ءيگزمان ن‑دّات، ا‑ور‑سار‑بضون ءي‑نگراتسن. ءيغ‑يلّا يان‑وگزّوم يوضن، راد‑اضنّ ءيگزمان كولّوتن. ءيغ‑يتياووقّار يان‑وگزّوم، راد‑فرحن ءيگزمان كولّوتن. كونّي تگام دّات لّماسيح، د‑كرايگاتّ يان گيگون ءيگا اگزّوم غ‑دّات‑نس. غمكاد ا‑يسكر ربّي غ‑يگزمان ن‑ومناگّار: ءيمزوورا گان ءيرقّاسن. ويس سين گان غويلّي ءيتّينين س‑ماد‑اسن‑يمالا ربّي. ويس كراض گان ءيمسلمدن. ءيلين‑داغ غويلّي سكارنين لمعجيزات، د‑ويلّي دار تاوافكا اد‑جّوجّين ءيموضان، د‑ويلّي تعاوانّين د‑ويلّي تگوّادنين د‑ويلّي ساوالنين س‑يواليون ءيغريبن. والاينّي ءيزد ءيرقّاسن اد‑گان كولّوتن؟ ءيس‑گان كولّوتن ويد ءيتّينين كرا‑ياسن‑يمالا ربّي؟ ءيس‑گان كولّوتن ءيمسلمدن؟ ءيس‑گان كولّوتن ويد سكارنين لمعجيزات؟ ءيس‑گان كولّوتن ويد جّوجّينين ءيموضان؟ ءيس‑گان كولّوتن ويد ساوالنين س‑يواليون ءيغريبن؟ ءيس‑گان كولّوتن ويد سّبايّانّين لمعني ن‑يواليون ءيغريبن؟ ءوهو، والاينّي ءيريات باهرا اد‑اون‑يلينت‑توافكيو تيمزوورا. ءيمّا غيلاد راد‑اون‑ملغ يان‑وغاراس لّي‑يوفن كولّو مايان. ءيغ‑ا‑ساوالغ س‑يواليون ن‑بنادم ءولا وين لمالايكا د‑نكّي ءور‑ا‑تحنّوغ، ءور‑گيغ ابلا زوند نّاقوس د‑تقرقاوين س‑تصتنّانايت د‑وقّريان. ءيغ‑ژضارغ ا‑تّينيغ س‑ماد‑يّي‑يمالا ربّي، ءيغ‑سّنغ لمعنا ن‑كولّو ما‑ينتلن ءولا كولّو ما‑يلّان، ءيغ‑ومنغ ايلّيغ سّيتّيغ يورار بلا‑دا‑تحنّوغ، ءور‑گيغ يات. ءيغ‑فكيغ كولّو ما‑داري‑يلّان فكغ ءولا دّات‑ينو ار اجدّار بلا‑دا‑تحنّوغ، ءور‑راد‑يّي‑ييلي يات. ءيمّا يان غ‑تلّا لحنانت، ار‑يتصبار ار‑يتفولكي د‑وييّاض. ءور‑ا‑يتحساد ءولا‑دا‑يسّيمغور اگايّو‑نس ءولا‑دا‑يتفشّيش. ءور‑يباسّل ءولا‑دا‑يترضو ءيخف‑نس ءولا‑دا‑يتقلاقال د‑وييّاض ءولا‑دا‑د‑يسوينگيم لعيب لّي‑گيس‑سكرن. ءور‑ا‑يتفراح س‑ما‑يُخشنّ، والاينّي ار‑يتفراح س‑لحقّ. ار‑كولّو‑يتاسي ار‑كولّو‑يتامن ار‑كولّو‑يترجو ار‑كولّو‑يتصبار. لحنانت ءور‑دارس تّمي. را‑د‑ياشك يان‑وزمز غ‑ور‑را‑ييلي ما‑يتّينين س‑ماد‑اس‑يمالا ربّي، ءولا ءيلّا ما‑يساوالن س‑يواليون ءيغريبن، ءولا ءيلّا ما‑يطّافن تاواسّنا. اشكو تحودّا‑تواسّنا لّي‑دارنّغ‑يلّان، ءيحودّا ماد‑اغ‑يمالا ربّي. والاينّي ءيغ‑د‑يوشكا ما‑ور‑دار تّمي، را‑يسّيتّي ما‑يحودّان. غاكود لّيغ گيغ احشمي ار‑ساوالغ زوند احشمي ار‑سّحسّوغ زوند احشمي ار‑سوينگيمغ زوند احشمي، والاينّي لّيغ وورّيغ گيغ ارگاز فلغ‑ن تيغاوسيوين ن‑يحشماي. اشكو كولّو مايد نژرّا غيلاد، ءيگا زوند ءيغ‑ا‑نتمناد غ‑لمري ءيلّاسن، ءيمّا غ‑وزمز‑ان را‑نژر ءودم س‑وودم. سّنغ غيلاد ءيميكّ، ءيمّا غ‑وزمز‑ان راد‑يسّانغ كولّو غمكلّي‑يّي‑يسّن ربّي. ءيمّا غيلاد، ءيقاما‑سول ليمان د‑رّجا د‑لحنانت، نتني س‑كراض، والاينّي تامزواروت گيسن ا‑ستّ‑يگان د‑لحنانت. سكارات كولّو س‑لحنانت، تيريم باهرا اد‑اون‑يلينت‑توافكيو ن‑رّوح لقودوس، س‑وگُّار ا‑تّينيم س‑ماد‑اون‑يمالا ربّي. يان ءيساوالن س‑يواليون ءيغريبن، ربّي اين‑د‑ا‑يساوال ءورد مدّن، اشكو ءور‑سّينّ مدّن لمعنا ن‑يواليون‑نس. نتّا س‑تحكيمت ن‑رّوح لقودوس ا‑س‑ا‑يساوال ف‑ما‑ينتلن. ءيمّا يان ءيتّينين س‑ماد‑اس‑يمالا ربّي ار‑يساوال ءي‑مدّن باش ا‑تن‑يتعاوان نتني، ار‑تن‑يزّعام ار‑يسّفجّيج ءولاون‑نسن. يان ءيساوالن س‑يواليون ءيغريبن، ار‑يسّدوس غير ءيخف‑نس، ءيمّا يان ءيتّينين س‑ماد‑اس‑يمالا ربّي ار‑يسّدوس ايتماتن ن‑ومناگّار كولّوتن. ريغ ا‑كولّو‑تساوالم س‑يواليون ءيغريبن، والاينّي ريغ ءوگُّار ا‑تّينيم س‑ماد‑اون‑يمالا ربّي. يان ءيتّينين س‑ماد‑اس‑يمالا ربّي يوگُر يان ءيساوالن س‑يواليون ءيغريبن ءيغ‑ور‑يلّي ما‑يژضارن ا‑يسّبايّن لمعنا ن‑يواليون‑ان باش ا‑يسّدوس ايتماتن ن‑ومناگّار. واي‑ايتما، ما‑لّفايتّ ا‑را‑ييلي ءيغ‑ن‑دارون‑وشكيغ ار‑ساوالغ غير س‑يواليون ءيغريبن؟ لفايتّ ءور‑را‑تيلي ابلا ءيغ‑اون‑ين‑سّلكمغ كرا ن‑واوال زغ‑ربّي نغد كرا ن‑تواسّنا نغد كرا‑يّي‑يملا ربّي نغد كرا ن‑ولمّود. ژرات تاعوّاتّ ءولا رّيباب، ءورد بنادم اد‑گان، والاينّي ءيغ‑ور‑نگادّان ما‑را‑ييسّان ما‑يقصاد‑وعوّاد ءولا بو‑رّيباب؟ ءولا نّفّار، ءيغ‑ور‑ينم‑واوال‑نس ما‑را‑ينكر ءيسكر ف‑يميغ؟ ءولا كونّي، ما‑را‑يفهم ما‑تّينيم ءيغ‑ا‑تساوالم س‑يواليون ءيغريبن؟ ءيغ‑ور‑ا‑تّبان لمعنا ن‑ما‑تّينيم، ار‑تساوالم غير غ‑لهاوا. نسّن ءيس‑گّوتن ءيواليون لّي‑س‑ا‑ساوالن مدّن غ‑تميزار ن‑دّونيت كولّوتنت. كرايگاتّ اوال ءيطّاف كرا لّمعنا، والاينّي يان سري ءيساوالن، راد‑دارس‑گغ ابرّاني ءيغ‑ور‑سّينغ لمعنا ن‑ما‑يتّيني، ءيگ داري ابرّاني ءولا نتّا. ءيمّا كونّي، سّنغ ءيس‑ا‑باهرا‑تّيريم تيغاوسيوين ن‑رّوح لقودوس، والاينّي ءيريات س‑وگُّار ا‑تسكارم ف‑ما‑را‑يسّدوس امناگّار ن‑ايتماتن. ماياد ا‑ف‑يلّا ف‑كود يان ءيساوالن س‑يواليون ءيغريبن ا‑يضالب ربّي اد‑اس‑يسّبايّن لمعنا‑نسن. ءيغ‑ا‑تژالّاغ س‑يواليون ءيغريبن، هاتي ءول‑ينو ا‑يتژالّان ءيمّا لعاقل‑ينو ءور‑اس‑يلّي يات. ما‑راد‑سكارغ؟ راد‑تژالّاغ زغ‑وول‑ينو، ژّالّغ ءولا س‑لعاقل‑ينو. راد‑تاسيغ امارگ زغ‑وول‑ينو، اسيغ امارگ ءولا س‑لعاقل‑ينو. والاينّي ءيغ‑ا‑تّشكارت ربّي غير زغ‑وول‑نّك ءيسفلد‑اك يان ءور‑يسّينّ ما‑يلّان، مامنك را‑ييژضار ا‑ييني «امين» ءيغ‑ور‑يسّين ما‑ف‑ا‑تّشكارت ربّي؟ واخّا تفولكي‑تژالّيت‑نّك ءور‑سرس‑تعاونت غوالّي ياضني. ءيمّا نكّي شكرغ‑ت ءي‑ربّي، ار‑ساوالغ س‑يواليون ءيغريبن ءوگُّار‑نّون كولّوكن. والاينّي يوف داري اد‑ينيغ سمّوس ءيواليون س‑لعاقل‑ينو غ‑ومناگّار باش اد‑سّلمادغ وييّاض، ءوگُّار ن‑مراو ءيد‑والف ن‑يواليون ءيغريبن. واي‑ايتما، ا‑ور‑تسوينگيمّ زوند تاروا مژّينين. ءيلّا فلّاون ا‑تمژّيم غ‑ما‑يُخشنّ، والاينّي ءيمغورات غ‑لعاقل‑نّون. ءيتيارا غ‑وارّا ن‑ربّي: «ف‑يمي ن‑ايت‑يواليون ءيغريبن ءولا ف‑ينفورن ن‑يبرّانيين ا‑ف‑راد‑ساولغ س‑مدّن‑ينو، والاينّي ءور‑را‑سري‑سفلدن. غمكاد ا‑س‑ينّا سيدي ربّي.» ماياد ا‑ف‑نسّن ءيواليون ءيغريبن ءور‑گين تاماتارت ءي‑ويلّي ءومنّين، والاينّي گان تاماتارت ءي‑ويلّي دار ءيدروس ليمان. ءيمّا اينّا ءيملا ربّي ا‑ت‑يتّيني يان ءي‑وييّاض، را‑يگ تاماتارت ءي‑ويلّي ءومنّين، ءورد ويلّي دار ءيدروس ليمان. والاينّي ءيغ‑مونّ ايت‑ومناگّار كولّوتن ار‑كولّو‑ساوالن س‑يواليون ءيغريبن، ما‑را‑يجرو؟ ءيغ‑ن‑كشمن كرا ن‑مدّن ءور‑سّينّ ما‑يلّان نغد كرا ن‑مدّن دار ءيدروس ليمان، راد‑ينين «كرا ن‑رّوح ا‑گيگون‑يلّان.» والاينّي ءيغ‑ا‑كولّو‑تّينيم س‑ماد‑اون‑ين‑يمالا ربّي، ءيغ‑ن‑يكشم كرا ن‑يان دار ءيدروس ليمان نغد كرا ن‑يان ءور‑يسّينّ ما‑يلّان، را‑يسّحسّو س‑دّنوب‑نس ييسّان ءيس‑فلّاس‑يلّا لحوكم، ءيبان كولّو ما‑ينتلن غ‑وول‑نس. را‑يضر س‑واكال يالغ ربّي ييني «س‑صّاحت ءيلّا ربّي غ‑وامّاس‑نّون.» ما‑را‑نسكار اي‑ايتما؟ غاكود نّا‑تمونم ءي‑نگراتون كود يان را‑دارس‑تيلي كرا ن‑تالغات نغد كرا ن‑ولمّود نغد كرا‑ياس‑يسّبايّن ربّي نغد كرا ن‑يواليون ءيغريبن نغد لمعنا ن‑يواليون ءيغريبن. كولّو ما‑تسكارم، ءيلّا فلّاون ا‑سرس‑تسّدوسم ايت‑ومناگّار. ءيغ‑يلّا ما‑يران ا‑يساول س‑يواليون ءيغريبن، ءيخصّا ا‑ور‑ساوالن ءوگُّار ن‑سين مدّن نغد كراض، كود يان س‑توالا‑نس. ءيخصّا يان ا‑يسّبايّان لمعنا ن‑يواليون‑نسن. والاينّي ءيغ‑ور‑يلّي ما‑يژضارن ا‑يسّبايّن لمعنا، ءيلّا فلّاسن اد‑فسّان غ‑وامّاس ن‑ومناگّار ءيساول كود يان س‑يخف‑نس ءولا س‑ربّي. ادجات سين مدّن نغد كراض ا‑تّينين س‑ماد‑اسن‑يمالا ربّي، ار‑توزّانّ وييّاض اوال‑نسن. والاينّي ءيغ‑يسّبايّن ربّي كرا ياضني ءي‑يان ءيگاورن غين، ءيلّا ف‑والّي ءيساوالن ا‑يفسّا. اشكو تژضارم ا‑كولّو‑تّينيم ماد‑اون‑يمالا ربّي يان س‑يان باش اد‑كولّو‑تلمدم تزعمّ. ءيمّا وانّا ءيتّينين س‑ماد‑اس‑يمالا ربّي، ءيلّا فلّاس ا‑يتنباض غ‑رّوح‑نس. اشكو ربّي ءور‑يگي بو‑يروّاين. بو‑سّلامت ا‑يگا. ءيلّا ف‑تمغارين اد‑تفسّانت غ‑دارون غمكلّي تفسّانت غ‑كولّو ءيمناگّارن ن‑يمژلاين. ءور‑اسنت‑يتياوفكا اد‑ساوالنت. غمكلّي ءيتّيني شّرع ن‑موسا، ءور‑يزري ا‑تّحكامنت ف‑وييّاض. ءيغ‑رانت اد‑يسّانّت كرا، ءيلّا فلّاسنت اد‑سقسانت ءيرگازن‑نسنت غ‑تگمّي. ءيغ‑تساول‑تمغارت غ‑وامّاس ن‑ومناگّار، هان لعيب اين تسكر. ما‑تنّام؟ ءيزد دارون ا‑زغ‑د‑يوشكا‑واوال ن‑ربّي؟ ءيزد كونّي واحدوكن كا‑ت‑يسّنّ؟ وانّا گيگون ءيتّينين ءيس‑ا‑ياس‑يمالا ربّي اوال نغد تلّا‑دارس‑تحكيمت ن‑رّوح لقودوس، ءيقّان‑ت‑يد ا‑ييني ءيزد لوصيت ن‑سيديتنّغ ايد‑اون‑ين‑وريغ. ءيغ‑ور‑يقبيل ماياد، ءور‑يتياوقبال نتّا. ءيمّا غيلاد اي‑ايتما، ءيريات باهرا ا‑تّينيم س‑ماد‑اون‑يمالا ربّي. ا‑ور‑تحصارم يان ءيساوالن س‑يواليون ءيغريبن، والاينّي سكارات كولّو غمكلّي‑د‑يقّانّ س‑تنباطّ ءيزگان. واي‑ايتما، ريغ اد‑اون‑د‑سّكتيغ لخبار ءيفولكين لّي‑س‑اون‑ين‑تبرّاحغ. تسفلدم سرس تزگام گيس تنجمّ ف‑سّيبت‑نس ءيغ‑سول‑تغويم غ‑واوال ن‑تبرّاحت‑ينو. هان ءيغ‑ور‑يگي غمكان، هان ليمان‑نّون بلا لفايتّ. اشكو اوال ءيهيّان لّي‑يّي‑د‑يلكمن، سّلكمغ‑اون‑ت‑ين ءولا كونّي، ءينيغ‑اون ءيس‑يمّوت لماسيح ا‑ياسي دّنوب‑نّغ غمكلّي ءيتياران غ‑وارّاتن ن‑ربّي. ءيتياومضال، ءيتيالال غ‑ويس كراض‑ووسّان غمكلّي ءيتياران. ءيبان‑د غاكودان ءي‑بطرُس ءيبان‑د ءيلمّا ءي‑يرقّاسن س‑سين د‑مراو. ءيبان‑د ءيلمّا ءي‑وگُّار ن‑سمّوس ءيد‑ميّا زغ‑ايتماتن غ‑يات‑توال. ءيگّوت گيسن ماد‑سول‑يسولن والاينّي كرا ءيمّوت. ءيبان‑د ءيلمّا ءي‑ياعقوب، ءيبان‑د ءيلمّا ءي‑يرقّاسن كولّوتن. غ‑يسيگُّرا ءيبان‑يّي‑د ءولا نكّي زوند ءيغ‑گيغ يان ءيلولن بلا ازمز‑نس. نكّي مژّيغ غ‑يرقّاسن. ءور‑اكُّ‑ستهلّاغ اد‑يّي‑تّينين ارقّاس، اشكو كّيغ‑تّين ار‑سّرفوفونغ امناگّار ن‑ربّي. والاينّي ربّي ءيسكر‑يّي افولكي ءيفك‑يّي اد‑گغ ماد‑گيغ غيلاد. ءورد بلا لفايتّ اد‑يّي‑يسكر افولكي، اشكو وورّيغ ار‑تخدامغ ءوگُّار ن‑كولّو وييّاض، واخّا ءورد نكّي ا‑ت‑يسكارن والاينّي لباراكا ن‑ربّي لّي‑داري‑يلّان. زوند نكّي زوند نتني، غمكاد ا‑س‑ا‑نتبرّاح، غمكاد ا‑س‑تومنم. «ءينكر‑د لماسيح زغ‑لموت.» غمكاد ا‑يگا‑واوال ن‑تبرّاحت‑نّغ. ءيمّا كونّي، مامنك ا‑را‑ييري كرا گيگون ا‑يتّيني «غويلّي مّوتنين ءور‑ژضارن اد‑د‑نكرن»؟ ءيغ‑ور‑يژضار بنادم اد‑د‑ينكر زغ‑لموت، ءور‑د‑اكُّ‑ينكير لماسيح. والاينّي ءيغ‑ور‑د‑ينكير لماسيح، ءور‑يلّي ما‑ف‑ا‑نتبرّاح ءولا ءيلّا ما‑س‑ا‑تّامنم. ءيغ‑ور‑ا‑نكّرن غويلّي مّوتنين، ءور‑اكُّ‑يسّنكير ربّي لماسيح. ءيغ‑ور‑ا‑نكّرن غويلّي مّوتنين، ها‑ياغ ار‑نسّكيركيس ف‑ربّي، اشكو ار‑نتّيني ءيسّنكر‑ت‑يد. ءيغ‑ور‑يژضار بنادم ا‑د‑ينكر زغ‑لموت، ءور‑د‑ينكير لماسيح. والاينّي ءيغ‑ور‑د‑ينكير لماسيح، هاتين تومنم بلا لفايتّ، تيليم سول غ‑دّو لحوكم ن‑دّنوب‑نّون. ءيغ‑ور‑د‑ينكير لماسيح، تّهلكن كولّو ويلّي سرس ءومنّين مّتن. مراد ءيس‑يحودّا رّجا‑نّغ غ‑لماسيح غير ءي‑تودرت‑اد، نكُّني ا‑را‑د‑قّانّ ءيمطّاون ءوگُّار ن‑كولّو مدّن. والاينّي س‑لحقّ ءينكر‑د لماسيح زغ‑لموت ءيگ امنزو غ‑ويلّي طّاسنين. ف‑سّيبت ن‑يان‑ورگاز ا‑س‑تلّا لموت. ءيمّا غيلاد ف‑سّيبت ن‑يان‑ورگاز ياضني ا‑س‑تلّا‑تنكرا زغ‑لموت. راد‑كولّو‑نمّت ف‑سّيبت ن‑ما‑يسكر ادام، راد‑كولّو‑ننكر ف‑سّيبت ن‑ما‑يسكر لماسيح. را‑د‑ينكر كرايگاتّ يان س‑توالا‑نس. لماسيح ا‑يزوارن ءيگ امنزو. تيگيرا‑نس راد‑نكرن غويلّي گانين وينس غاكود نّا‑د‑يوورّي س‑دّونيت‑اد، ءيروح‑د ءيلمّا ءيسيگُّرا، ءيهلك لماسيح كولّو لارواح ءولا سّولطات ءولا لقوّات ن‑يگنوان ءيرار‑د تاگلديت ءي‑ربّي باباس. را‑يحكام لماسيح ارد ءيگ ربّي كولّو ءينوّاشن‑نس غ‑دّو ءيضارن‑نس. انوّاش امگُّارو لّي‑را‑يهلك ا‑ت‑يگان د‑لموت. اشكو ءيتيارا: «ءيرور‑د كولّو ما‑يلّان غ‑دّو ءيضارن‑نس.» نسّن ءيس‑ور‑را‑ييلي ربّي غ‑دّو ءيضارن‑نس، والاينّي ربّي ا‑را‑يرار كولّو ما‑يلّان غ‑دّو ءيضارن لّماسيح. غاكود لّيغ را‑ييلي كولّو غ‑دّو لّحوكم ن‑يوس ن‑ربّي، را‑يفك ءيخف‑نس غ‑دّو لحوكم ن‑والّي‑د‑يرورن كولّو ما‑يلّان غ‑دّو لحوكم‑نس. غمكاد ا‑س‑را‑يحكام ربّي ف‑كولّو ما‑يلّان. والاينّي ءيغ‑ور‑راد‑د‑نكرن غويلّي مّوتنين، ماخ ايلّيغ ا‑تّيرين كرا ن‑مدّن اد‑دّمن س‑ودوم ن‑وامان ءي‑ويلّي‑اسن‑مّوتنين؟ ما‑لّفايتّ ا‑راد‑اسن‑ييلي غ‑ودوم‑ان ءيغ‑ور‑راد‑د‑نكرن زغ‑لموت؟ ءولا نكُّني، ماخ ايلّيغ ا‑نتّيري ا‑بدّا‑نسكار ف‑لموت؟ واي‑ايتما، ار‑ن‑تمناگّارغ د‑لموت كرايگاتّ اسّ. نّيغ‑اون‑ت اشكو تعزّام داري باهرا غ‑تامونت لّماسيح ياسوع سيديتنّغ. والاينّي ما‑راد‑يّي‑ييلي ءيغ‑مّاغّ د‑لوحوش غ‑تمدينت ن‑افسوس غير باش اد‑رضوغ ءيخف‑ينو؟ ءيغ‑ور‑راد‑نكرن غويلّي مّوتنين را‑ياف ا‑نسكار غمكلّي تّينين مدّن: «ا‑نشّ نسو غاسّاد اشكو ازكّا تلّا لموت.» اد‑ور‑تجلوم ءيخف‑نّون. «گار تامونت ا‑يژّريژن ءول ءيزدّيگن.» وورّياد‑د س‑وغاراس ءينمن، تانفم ءي‑كولّو ما‑يگان دّنوب. هان ءيلّا گيگون ما‑ور‑اكُّ‑يسّينّ ربّي. ءيس‑كُن‑ور‑باهرا‑يشّحشّيم غايان؟ والاينّي را‑يّي‑يسقسا كرا ن‑يان: «مامنك ا‑راد‑نكرن غويلّي مّوتنين؟ مامنك ا‑را‑تگ دّات لّي‑س‑راد‑نكرن؟» والاينّي ءيس‑ور‑تطّافت لعاقل؟ امود نّا‑تلوحت ءور‑را‑د‑ينكر ءيغ‑ور‑ياد‑يمّوت. ءورد اگُلاس ا‑ن‑تلوحت غ‑واكال، والاينّي غير يان‑واقّا ءيمژّين ن‑يردن نغد وين كرا ن‑يمندي ياضني. والاينّي راد‑اس‑يفك ربّي دّات لّي‑يقصاد نتّا، ءيفك ءي‑كرايگاتّ امود دّات لّي‑اس‑يگان. اشكو تيفيّي ءورد‑يات ا‑تگا. تلّا‑تفيّي ن‑بنادم تيلي تين لبهايم تيلي تين ءيگضاض تيلي ءولا تين ءيسلمان. ءيلّا ما‑يزدغن غ‑يگنوان، ييلي ما‑يزدغن ف‑واكال. ءيلّا‑وفولكي ن‑ما‑يزدغن غ‑يگنوان، ييلي‑وفولكي ن‑ما‑يزدغن ف‑واكال. ييلي‑وفولكي ن‑تافوكت ييلي‑وفولكي ن‑وايّور ييلي‑وفولكي ن‑يتران، ءيژلي‑ولا‑وفولكي ن‑يتري ف‑يتري. غمكاد ا‑را‑تگ‑تنكرا ن‑ويلّي مّوتنين. تمّوت دّات لّي‑يضرن غ‑واكال، والاينّي ءور‑را‑سار‑تمّت دّات لّي‑را‑د‑ينكر. تّياومضال تخسر، تنكر‑د تفولكي. تّياومضال تضعف، تنكر‑د س‑لقوّا. تّياومضال دّات ن‑دّونيت‑اد، تنكر‑د تگ دّات ن‑يگنّا. نسّن ءيس‑تلّا دّات ن‑دّونيت‑اد تيلي ءولا تين‑يگنّا. غمكاد ا‑يتياران غ‑وارّا ن‑ربّي: «ارگاز امزوارو ادام يوورّي ءيگا يا‑لّخلق ءيدّرن.» ءيمّا ادام امگُّارو ءيگا يان‑رّوح ءيسّدّرن. ءورد باب ن‑رّوح ا‑د‑يزوارن والاينّي باب ن‑دّات ن‑دّونيت‑اد، ءيگُّرو‑اس‑د ءيلمّا باب ن‑رّوح. ارگاز امزوارو ءيتياوسكار زغ‑يدقّي، ءيگ وين‑واكال. ءيمّا ارگاز ويس سين ءيگا زغ‑يگنّا. زوند وين‑واكال اد‑گان ايت‑واكال، والاينّي زوند وين‑يگنّا اد‑گان ايت‑يگنّا. غيلاد نگا زوند وين‑واكال، تيگيرا را‑نگ زوند وين‑يگنّا. ريغ اد‑اون‑ينيغ اي‑ايتما، ءور‑تژضار دّات ن‑تفيّي د‑يدامّن ا‑توورت تاگلديت ن‑ربّي، ءولا ءيژضار ما‑يگان وين لموت ا‑يوورت ما‑راد‑بدّا‑يدّر. راد‑اون‑ينيغ كرا ءينتلن. ءور‑راد‑كولّو‑نمّت، والاينّي راد‑اغ‑كولّو‑يبدّل ربّي، حاينا غ‑نّفّار ءيگُّران، ءور‑تا‑تمّوسّي تيط. اشكو را‑يتّوت نّفّار نكرن‑د غويلّي مّوتنين ف‑اد‑دّرن س‑تودرت ءيدومن. غاكودان راد‑اغ‑يبدّل. اشكو ءيقّان‑د دّات‑اد ءيتركامن ا‑تّياوبدّال س‑ما‑راد‑بدّا‑يدوم، ءيقّان‑د دّات‑اد ءيتمتاتن ا‑تّياوبدّال س‑ما‑راد‑بدّا‑يدّر. غاكودان غ‑يوورّي ءيدوم ما‑يتركامن ءيدّر ما‑يتمتاتن، را‑ييلي ما‑يتياران غ‑وارّا ن‑ربّي: «ننرا لموت، ءور‑سول‑فلّانّغ‑تلّي.» «وا‑لموت، ما‑تنريت؟ وا‑لموت، ما‑سول‑يسّيويد‑وساقس‑نّم؟» اساقس لّموت ا‑ت‑يگان د‑دّنوب. ءيمّا تاودا ن‑دّنوب ا‑ستّ‑يسكرن د‑شّرع. والاينّي ار‑باهرا‑نتالغ ربّي اشكو ءيفكا‑ياغ ا‑ننرو كولّو مايان ف‑وودم ن‑سيديتنّغ ياسوع لماسيح. واي‑ايتما عزّانين، ماياد ا‑ف‑راد‑اون‑ينيغ: دوسات تزگام ار‑بدّا‑تّلهوم س‑تووري ن‑سيديتنّغ، تيسّانم ءيس‑ورد بلا لفايتّ ا‑س‑ا‑تّنهاتافم س‑يسم ن‑سيديتنّغ. ءيمّا لمعاونت لّي‑را‑تازنم ءي‑يمژلاين ن‑ربّي غ‑وروشاليم، ءيلّا فلّاون ا‑تسكارم غمكلّي ءوصّاغ ءيمناگّارن غ‑تمازيرت ن‑گالاطيّا. كرايگاتّ اسّ لّحدّ ءيلّا ف‑كود يان گيگون ا‑يسّيتّي كرا غ‑ما‑يومژ غ‑تغراد‑نس، ءونشك نّا‑مي‑يژضار، ءيحضو‑ت، باش ا‑ور‑يخصّا ا‑تسّمونم ءيقاريدن غاكود نّا‑ن‑دارون‑وشكيغ. لّيغ‑ن‑روحغ راد‑فكغ تيبراتين ن‑تواسّنا ءي‑ويلّي تستيم، ازنغ‑تن ا‑ن‑اوين تاوافكا‑نّون س‑وروشاليم. ءيغ‑يّي‑د‑يقّان ءولا نكّي، را‑ن‑ديدسن‑مونغ. را‑ن‑دارون‑اشكغ لّيغ كّيغ تامازيرت ن‑ماكيدونيّا، اشكو ماكيدونيّا ا‑راد‑كغ زوار. ريغ ا‑ن‑دارون‑گاورغ، حاقّان را‑ن‑دارون‑زّريغ تاگرست، تعاونم‑يّي ءيلمّا اد‑كمّلغ ف‑ومودّو‑نو س‑ينّاس راد‑فتوغ تيگيرا. ءور‑ريغ ا‑ن‑دارون‑زّريغ غير كرا ن‑ووسّان دروسنين غيلاد، والاينّي ريغ ا‑ن‑دارون‑گاورغ كيگان ءيغ‑يرا ربّي. مايان ا‑ف‑راد‑قاماغ غ‑افسوس ارد ءيزري لعيد ن‑وين سمّوس ءيد‑مراو، اشكو ربّي ءيرژم غ‑لگدّام‑ينو يان‑يمي يوسعان اد‑سكارغ تاووري ءيهيّان واخّا‑نّيت گّوتن غويلّي‑اغ‑تضاضّانين. ءيغ‑ن‑يوشكا تيموتاوس، اويات‑ستّ گيس ف‑ا‑ور‑يحشم غ‑دارون، اشكو تاووري ن‑سيديتنّغ ا‑يسكار ءولا نتّا زوند نكّي. ا‑ت‑ور‑يحگر يان، والاينّي عاونات‑ت ا‑يكمّل ف‑ومودّو‑نس س‑سّلامت باش ا‑د‑يوورّي س‑داري. اشكو ها‑يّي ار‑سرس‑تقلغ نتّا د‑ايتماتن ياضني. ءيمّا گماتنّغ ابولُس، ساولغ‑اس س‑لمعقول نّيغ‑اس را‑يفولكي ا‑ن‑يمون د‑ايتماتن ياضني س‑دارون، والاينّي ءور‑اكُّ‑يري ا‑ن‑ياشك غيلاد. را‑ن‑دارون‑ياشك غاكود نّا‑يوفا. ضوفات تزگام غ‑وغاراس لّماسيح، تزعمّ تدوسم. كولّو ما‑تسكارم، سكارات‑ت س‑لحنانت. واي‑ايتما، تسّنم ءيزد ستيفاناس د‑ايت‑تگمّي‑نس ا‑يزوارن ءيس‑ومژن اغاراس لّماسيح غ‑تمازيرت ن‑اخايا، فكن ءيخفاون‑نسن اد‑تخدامن ءي‑يمژلاين لّماسيح. ضالبغ‑كُن غيلاد ا‑تسفليدم س‑مدّن زوند غويد ءولا كولّو وانّا ءيتخدامن ار‑يتنهاتاف ديدنّغ ف‑تووري‑اد. فرحغ غيلاد غ‑د‑يوشكا ستيفاناس د‑فورتوناتوس د‑اخايكوس اشكو عمّرن ادغار‑نّون لّي‑داري‑يخوان، سّفجّيجن ءول‑ينو ءولا نكّي غمكلّي سّفجّيجن وينّون. توقّارات مدّن زوند غويد. ار‑ن‑فلّاون‑تسلّامن ءيمناگّارن ن‑ايتماتن غ‑تمازيرت ن‑اسيّا. ار‑ن‑باهرا‑فلّاون‑يتسلّام اكيلا د‑بريسكيلّا س‑يسم ن‑سيديتنّغ، نتني د‑ومناگّار لّي‑يتمونون غ‑تگمّي‑نسن. ار‑ن‑فلّاون‑تسلّامن ايتماتن كولّوتن. نسالّامات ءي‑نگراتون س‑ونسالّام ن‑تاگُمات. نكّي بولُس، س‑وفوس‑ينو ا‑س‑اون‑ين‑وريغ سّلام‑اد. ا‑يتّوت لحوكم ن‑ربّي ف‑وانّا ءور‑يتّيرين سيديتنّغ. ‹ماراناتا›. (اشك‑يد ا‑سيديتنّغ.) اد‑اون‑تيلي لباراكا ن‑سيديتنّغ ياسوع لماسيح. ار‑كُن‑باهرا‑تّيريغ كولّوكن غ‑تامونت لّماسيح ياسوع. زغ‑بولُس ارقّاس لّماسيح ياسوع غمكلّي ءيرا ربّي، د‑زغ‑گماتنّغ تيموتاوس. ءي‑ومناگّار ن‑ربّي غ‑تمدينت ن‑كورينتوس ءولا كولّو ءيمژلاين ن‑ربّي غ‑تمازيرت ن‑اخايا. اد‑اون‑تيلي لباراكا د‑سّلامت زغ‑ربّي باباتنّغ ءولا سيديتنّغ ياسوع لماسيح. ار‑باهرا‑نتالغ ربّي باباس ن‑سيديتنّغ ياسوع لماسيح، ءيگا باباتنّغ ءيحنّان لّي‑بدّا‑يسّفجّيجن ءول‑نّغ. ار‑اغ‑يتعاوان غ‑كولّو تانوكموت لّي‑فلّانّغ‑يزراين، باش ا‑نيژضار ا‑نتعاوان وييّاض غ‑تنوكموت نّا‑غ‑لّان، س‑لمعاونت لّي‑س‑اغ‑يتعاوان ربّي. ءونشك لّي‑باهرا‑نكّات تامّارا ف‑يسم لّماسيح، ا‑ياغ‑باهرا‑يسّفجّيج ربّي غ‑تامونت لّماسيح. ف‑سّيبت‑نّون ا‑ف‑ا‑نزراي غ‑تنوكموت‑اد باش ا‑تّفجّيجم تنجمّ، د‑سّيبت‑نّون ا‑ف‑ا‑نتفجّيج باش اد‑داغ‑تّفجّيجم تدوسم ا‑تصبرم ءي‑تمّارا زوند تامّارا‑ياد غ‑نلّا نكُّني. نسّن ءيس‑را‑تدوسم تصبرم، اشكو ءيغ‑ا‑تكّاتم تامّارا زوند نكُّني را‑كُن‑يسّفجّيج ربّي زوند نكُّني. واي‑ايتما، نرا ا‑تيسّانم ف‑تنوكموت لّي‑فلّانّغ‑يزرين غ‑تمازيرت ن‑اسيّا. تشقا باهرا، تژّاي فلّانّغ ايلّيغ نغال ءيس‑ور‑اكُّ‑نژضار ا‑سول‑ندّر، نيني لموت ايد‑اغ‑د‑يقّانّ. والاينّي يودجا‑ياغ ربّي ا‑نزّري تانوكموت‑ان باش ا‑ور‑ييلي رّجا‑نّغ غ‑يخف‑نّغ والاينّي غ‑ربّي لّي‑يسّنكارن غويلّي مّوتنين. ءيكّيس‑اغ‑د غاكودان ءي‑لموت ءيشقان. هاتي راد‑اغ‑د‑سول‑زگيس‑يتكّيس. نتّان ا‑غ‑ن‑نگا رّجا‑نّغ باش اد‑اغ‑د‑سول‑زگيس‑يتكّيس. ءيلّا فلّاون ءولا كونّي ا‑تّضالابم ربّي ف‑سّيبت‑نّغ. غمكاد ا‑س‑راد‑اغ‑تّعاوانم، ءيگاتن غويلّي تشكارنين ربّي ف‑لباراكات لّي‑اغ‑د‑ياكّا ف‑سّيبت ن‑تژولّا گّوتنين. نفرح غيلاد اشكو ءيملا‑ياغ‑وول‑نّغ ءيزد س‑وفولكي ن‑ربّي ا‑س‑ا‑نسكار د‑كولّو مدّن س‑نّييت ءيصفان. ءولا كونّي، غمكان ا‑ديدون‑نسكر، ءورد غير س‑لعاقل ن‑بنادم والاينّي س‑لباراكا ن‑ربّي. كولّو ماد‑اون‑ين‑نتارا، را‑تيژضارم ا‑تي‑تغرم تفهمّ‑ت. ءيلّا گيس ما‑ور‑تا‑تفهيمّ، والاينّي نرا ا‑كولّو‑تفهمّ باش ا‑سرنّغ‑تفرحم نفرح سرون غ‑واسّ لّي‑غ‑را‑د‑ياشك سيديتنّغ ياسوع. نّيغ د‑يخف‑ينو را‑تفهمّ. ف‑مايان ا‑ف‑سكرغ ف‑ا‑د‑دارون‑كغ‑زوار باش ا‑ديدي‑تفرحم سنات‑توال. سكرغ ف‑ا‑كُن‑سليغ زريغ س‑تمازيرت ن‑ماكيدونيّا، وورّيغ‑د ءيلمّا س‑دارون زغ‑ماكيدونيّا، تازنم‑يّي س‑تمازيرت ن‑يودايا. ءيزد س‑واوال ءيخوان ا‑س‑اون‑نّيغ مايان؟ ءيس‑ا‑ساوالغ زوند يان ءيران ا‑يرضو ءيخف‑نس، ار‑يتّيني س‑يات تونفوست «يياه يياه، ءوهو ءوهو»؟ والاينّي غمكلّي ءيزگا ربّي غ‑كولّو ما‑يتّيني، غمكان ا‑ديدون‑نسكر ءولا نكُّني. ءور‑اكُّ‑نرور «يياه» ا‑يگ «ءوهو». اشكو ياسوع لماسيح يوس ن‑ربّي لّي‑ف‑ا‑دارون‑نتبرّاح نكّي د‑سيلوانوس د‑تيموتاوس، ءور‑گيس‑يلّي «يياه ءوهو» والاينّي «يياه» ا‑بدّا‑يگا. اشكو غونشك لّي‑گان ءيواليون لّي‑س‑ينّا ربّي ف‑ما‑را‑يسكر ءيفولكي، لماسيح ا‑تن‑كولّو‑يسّووفان. مايان ا‑ف‑ا‑نتّيني «امين» س‑يسم لّماسيح غاكود نّا‑نتالغ ربّي. هاتي ربّي اد‑اغ‑يزّگان نكُّني ديدون غ‑تامونت لّماسيح، ءيژلي‑اغ كولّو، ءيمل‑اغ ءيس‑نگا وينس، ءيگ رّوح‑نس غ‑وول‑نّغ باش ا‑يگ تاماتارت ن‑يس‑را‑يسّافو كولّو مايلّي‑س‑اغ‑ينّا. ربّي ءيسّن ءول‑ينو. ءيسّن ماخ ايلّيغ ءور‑ن‑دارون‑وشكيغ س‑كورينتوس غ‑ووسّان‑ان، اشكو ءور‑ريغ اد‑اون‑تّ‑سّطيّرغ. ءور‑نري نكُّني ا‑نحكام غ‑ليمان‑نّون، والاينّي نرا ا‑ديدون‑نتمعاوان باش ا‑تّفراحم، اشكو نسّن ءيس‑تزگام غ‑وغاراس لّماسيح. نّيغ د‑يخف‑ينو غ‑ووسّان‑ان ءور‑را‑ن‑دارون‑اشكغ سّطيّرغ‑اون‑تّ‑داغ. اشكو ءيغ‑ن‑وشكيغ سّطيّرغ‑اون‑تّ، ما‑را‑ن‑افغ غ‑دارون ا‑يّي‑يسّفرح ابلا كونّي لّي‑مي‑ستّ‑سّطيّرغ؟ مايان ا‑ف‑ن‑وريغ تابرات‑ان، ءور‑ن‑دارون‑وشكيغ، اشكو ءور‑ريغ اد‑يّي‑دارون‑طيّر كونّي لّي‑ف‑يلّا ا‑يّي‑تسّفرحم. اشكو سّنغ ءيغ‑فرحغ نكّي را‑ديدي‑كولّو‑تفرحم. والاينّي س‑يمطّاون گّوتنين ا‑س‑اون‑ين‑وريغ تابرات‑ان، اشكو تقامام گيگي، اسيغ فلّاون تاغوفت باهرا. ءور‑اون‑ين‑وريغ باش اد‑اون‑تّ‑سّطيّرغ س‑وگُّار، والاينّي ءوريغ‑اون‑ين باش ا‑تيسّانم منشك اد‑داري‑تعزّام. والاينّي ءيغ‑يلّا ما‑ستّ‑يسّطيّرن ءي‑وايّاض، كونّي ا‑مي‑ستّ‑يسّطيّر ءوگُّار ن‑ماد‑يّي‑تّ‑يسّطيّر نكّي. ءيسّطيّر‑اون‑تّ كولّوكن س‑يميكّ نغد س‑كيگان. غمكان ا‑س‑راد‑ينيغ اشكو ءور‑ريغ اد‑ينيغ ف‑ورگاز‑ان ءوگُّار ن‑ماد‑اس‑يگان. والاينّي توودا‑ت لعقوبيت لّي‑فلّاس‑يوت ما‑يگّوتن گيگون. ييلي فلّاون غيلاد اد‑اس‑تصامحم تسّفجّيجم‑ت، ا‑ور‑تي‑تنرو‑تگوضي باهرا. را‑كُن‑ضالبغ اد‑اس‑تملم ءيس‑ا‑ت‑سول‑تّيريم. مايان ا‑ف‑اون‑ين‑وريغ تابرات‑ان، باش ا‑كُن‑ارمغ، ءيسّانغ ءيس‑راد‑بدّا‑تسكارم س‑واوال‑ينو. وانّا مي تصامحم ف‑كرا ءيسكر، هاتي صامحغ‑اس ءولا نكّي. د‑اينّا‑ف‑صامحغ نكّي، ءيغ‑نّيت‑صامحغ ف‑كرا، سّيبت‑نّون ا‑ف‑فلّاس‑صامحغ س‑يسم لّماسيح، باش ا‑ور‑تّ‑فلّانّغ‑يزّري شيطان، اشكو نسّن تيلّاي‑نس. غاكود لّيغ لكمغ تامدينت ن‑تروّاس، ءيرژم سيديتنّغ غ‑لگدّام‑ينو يان‑يمي ف‑تووري لّخبار ءيفولكين لّماسيح. والاينّي ءور‑يهنّا‑وول‑ينو، اشكو ءور‑ن‑وفيغ گماتنّغ تيطوس. فلغ ءيلمّا مدّن ن‑غين، مودّوغ س‑ماكيدونيّا. ار‑باهرا‑نتالغ ربّي لّي‑اغ‑بدّا‑يزگّورون غ‑وكابار لّماسيح لّي‑يتنرون كولّو ما‑يلّان، ار‑سرنّغ‑يسّلكام اضو ن‑تواسّنا‑نس س‑كرايگاتّ ماني. اشكو نگا غ‑دار ربّي زوند توجّوت لّماسيح غ‑گر كولّو مدّن، غويلّي نجمنين ءولا غويلّي تياوهلاكنين. تگ توجّوت‑ان اضو لّموت ءي‑ويلّي تياوهلاكنين، تگ اضو ن‑تودرت ءي‑ويلّي نجمنين. والاينّي ءيس‑يلّا ما‑يژضارن ءي‑تووري‑اد ءيهيّان؟ ءور‑نگي نكُّني زوند ما‑يگّوتن ار‑تبرّاحن س‑واوال ن‑ربّي غير باش اد‑سرس‑قُّاين ءيقاريدن. اشكو نكُّني س‑نّييت ن‑وول‑نّغ ا‑س‑ا‑نساوال س‑يسم لّماسيح، نيسّان ءيزد ربّي اد‑اغ‑يوزنّ ار‑اغ‑بدّا‑يتمناد. لّيغ ننّا مايان ءيس‑نرا‑داغ ا‑نالغ ءيخف‑نّغ باش ا‑ديدنّغ‑تبيدّم؟ ءيس‑نحتاجّا تيبراتين ن‑تواسّنا زغ‑وييّاض باش اد‑اغ‑تقبلم كونّي، نغد تيبراتين زغ‑گيگون باش اد‑اغ‑قبلن وييّاض، غمكلّي حتاجّان كرا ن‑مدّن؟ والاينّي كونّي ا‑يگان تابرات‑نّغ، تّيارا غ‑وولاون‑نّون باش ا‑ستّ‑اقران كولّو مدّن ءيسّانّ مامنك ا‑نگا. هاتي ءيبان گيگون ءيزد تابرات لّماسيح ا‑تگام، يورا‑تّ نتّا س‑وفوس‑نّغ، ءورد س‑صّمح والاينّي س‑رّوح ن‑ربّي لّي‑يدّرن، ءورد ف‑تيلواح ن‑وژرو والاينّي ف‑تيلواح ن‑وولاون ن‑بنادم. ننّا مايان اشكو نسّن ءيس‑اغ‑يقبل ربّي ف‑سّيبت لّماسيح. ءور‑ا‑نتّيني ءيزد نكُّني ا‑يژضارن ا‑نسكر كرا، والاينّي ربّي ءيژضار ا‑ت‑يسكر ف‑وفوس‑نّغ. نتّان اد‑اغ‑يفكان تاژضّارت ما‑س‑ا‑نسّلكام ءي‑مدّن لعهد لّجديد لّي‑د‑يوشكان س‑تحكيمت ن‑رّوح لقودوس ءورد س‑لوصيّات تيارانين. اشكو لوصيّات تيارانين ار‑دي‑تاوينت لموت، ءيمّا رّوح لقودوس ار‑د‑يتاوي تودرت. ءيمّا لعهد‑ان ن‑شّرع لّي‑د‑يتاوين لموت، غاكود لّيغ ءيتياونقاش ف‑تيلواح ن‑وژرو ءيبان‑د لمجد ن‑ربّي س‑تيفاوت ءيتجهّدن، ايلّيغ ءور‑ژضارن ايت‑ربّي ا‑ن‑تمنادن غ‑وودم ن‑موسا، واخّا ءور‑تقاما تيفاوت‑ان غير يان ءيميكّ ءيدروسن. ءيمّا لعهد‑اد ن‑رّوح لقودوس، ءيس‑ور‑راد‑اس‑ييلي لمجد ءوگُّار ن‑مايان؟ ءيغ‑يگّوت لمجد ءي‑لعهد لّي‑س‑ا‑تهلاكن مدّن، را‑ت‑باهرا‑ياگُر لمجد ءي‑لعهد لّي‑س‑ا‑تنجامن. اشكو مايلّي‑د‑يبانّ غ‑ووسّان‑ان س‑لمجد ءيگّوتن، ءور‑سول‑اس‑يلّي لمجد، اشكو تيگيرا‑نس ا‑د‑يبان ما‑ت‑يوگُرن غ‑لمجد. س‑لمجد ا‑س‑د‑يوشكا مايلّي ءور‑يقامان، والاينّي ءوگُّار لّمجد‑ان ا‑را‑ييلي لمجد ءي‑مايد راد‑بدّا‑يدوم. هاتي ار‑نتزعام باهرا غيلاد، اشكو ءيلّا‑ياغ رّجا‑ياد ءيصحان. ءور‑نگي زوند موسا لّي‑يدلن ءودم‑نس باش ا‑ت‑ور‑ژرن ايت‑ربّي لّيغ ا‑گيس‑تلاح تيفاوت لّمجد. نتني قّورن ءيخفاون‑نسن. سول س‑غاسّا تدل فلّاسن لمعنا لّعهد اقديم غاكود نّا‑ت‑اقران، اشكو غير لماسيح ا‑يژضارن ا‑يسّيتّي اسدّول. واخّا دا‑اقران شّرع ن‑موسا، سول ءيقاما‑وسدّول‑ان ف‑لعاقل‑نسن، والاينّي يان يومنّ س‑سيديتنّغ ءيتياتّاي‑فلّاس‑وسدّول. هاتي سيديتنّغ ءيگا رّوح. د‑وانّا دار رّوح ن‑سيديتنّغ، ءيتياوفساي زغ‑يسكراف. نكُّني كولّواغ ار‑نتمناد لمجد ن‑سيديتنّغ غيلاد، اشكو ءيتياتّاي‑فلّانّغ‑وسدّول. د‑سيديتنّغ لّي‑يگان رّوح ار‑اغ‑يتبدّال باش ا‑نگ زوند نتّا، ار‑اغ‑يتزاياد لمجد ف‑لمجد. لّيغ‑اغ‑يفكا ربّي تاووري‑اد ءيهيّان س‑رّحمت‑نس، ار‑گيس‑نتزاياد بلا‑دا‑نترماي. ناگّوگ زغ‑كولّو ما‑يگان لعيب ءينتلن ءيشّحشّامن. ءور‑ا‑نزّراي كرا ف‑يان س‑تكركاس ءولا‑دا‑نتبدّال اوال ن‑ربّي س‑لغُشّ، والاينّي ار‑بدّا‑نتّيني لحقّ ءي‑كولّو مدّن غ‑لگدّام ن‑ربّي، باش اد‑يسّانّ غ‑وول‑نسن ءيزد افولكي ا‑نسكار. ءيغ‑سول‑يدل لخبار‑اد ءيفولكين، ءيدل غير ف‑ويلّي سول تياوهلاكنين. نتني ءور‑ومينّ اشكو ءيبليس لّي‑يحكامن دّونيت‑اد ءيسّبوكض لعاقل‑نسن ا‑ور‑ژرن تيفاوت لّخبار لّمجد لّماسيح لّي‑يگان صّورت ن‑ربّي. اشكو ءورد ف‑يخف‑نّغ ا‑ف‑ا‑نتبرّاح، والاينّي ار‑نتبرّاح ف‑ياسوع لماسيح، ار‑نمالا ءيس‑يگا نتّا سيديتنّغ، نگ نكُّني ءيخدّامن‑نّون س‑يسم لّماسيح. اشكو ربّي لّي‑ينّان «را‑دي‑تيسفيو تيفاوت زغ‑وامّاس ن‑تيلّاس،» نتّان ا‑يفاون غ‑وولاون‑نّغ غيلاد س‑تيفاوت ن‑تواسّنا لّمجد‑نس لّي‑د‑يبانّ غ‑وودم لّماسيح. ءيمّا لكنز‑اد، نوسي‑ت غ‑تمكيلين ن‑واكال، باش ا‑يتبان ءيزد ربّي ا‑مي‑تلّا‑تحكيمت‑اد ءيتجهّدن ءورد نكُّني. ار‑اغ‑دي‑تّكّا‑تنوكموت كرايگاتّ تاسگا والاينّي ءور‑ا‑ياغ‑تّامژ. ار‑باهرا‑نتدوهدو والاينّي ءور‑ا‑ياغ‑تلاح رّجا. ءيگّوت ماد‑اغ‑يتكرهون والاينّي ءيلّا‑بدّا ماد‑اغ‑يتّيرين. ار‑باهرا‑نترفوفون والاينّي ءور‑ا‑نلكّم لهالاك. نوسي‑بدّا لموت ن‑ياسوع ف‑دّات‑نّغ باش ا‑تّبان ءولا تودرت ن‑ياسوع غ‑دّات‑نّغ. اشكو كولّو ماحدّ نسول ار‑اغ‑ن‑دحاين مدّن ءي‑لموت ف‑سّيبت ن‑ياسوع، باش ا‑تّبايّان تودرت ن‑ياسوع غ‑دّات‑نّغ لّي‑يتمتاتن. غمكاد ا‑س‑ا‑نتمّاغ د‑لموت باش ا‑تطّافم كونّي تودرت. غمكلّي ءيتياران: «ها‑يّي ءومنغ. مايان ا‑ف‑ساولغ.» ءولا نكُّني ءيلّا دارنّغ ليمان‑اد غ‑وولاون‑نّغ، ار‑نساوال اشكو نومن. نسّن ماياد باهرا: ربّي لّي‑د‑يسّنكرن سيديتنّغ ياسوع راد‑اغ‑يسّنكر ءولا نكُّني د‑ياسوع، ياوي‑اغ ديدون س‑دارس. كولّو مايد ءيجرّون غيلاد، ار‑يجرّو ف‑سّيبت‑نّون باش ا‑تزايد لباراكا ن‑ربّي ار‑تّروح كيگان د‑مدّن، ءيگاتن باهرا غويلّي‑تي‑تشكارنين ءيبايّن لمجد ن‑ربّي س‑وگُّار. مايان ا‑ف‑ور‑اكُّ‑ا‑نترماي. واخّا دا‑تّضعاف دّات‑نّغ، ار‑يتدوس‑وول‑نّغ اسّ ف‑واسّ. اشكو تانوكموت‑اد ءيفسّوسن غ‑ا‑نزراي ءوسّان‑اد دروسنين، راد‑اغ‑تگُّرو س‑لمجد ءيدومن لّي‑باهرا‑يوگُرن كولّو غاياد. هاتي ءور‑ا‑ستّ‑نتاوي غ‑مايلّي نژرّا، والاينّي ار‑تّ‑نتاوي غ‑مايلّي ءور‑ا‑يژرّا يان. اشكو مايلّي نژرّا ءور‑را‑يقاما، ءيمّا مايلّي ءور‑ا‑نژرّا راد‑بدّا‑ييلي. نسّن ماياد، ءيغ‑تّياوهلاك‑تخيّامت لّي‑يگان دّات‑نّغ ن‑دّونيت‑اد، راد‑اغ‑يفك ربّي يات‑تزدغت غ‑يگنّا. راد‑اغ‑يفك يات‑تگمّي لّي‑ور‑يتياوسكارن س‑يفاسّن ن‑بنادم، راد‑بدّا‑تدوم. ءيمّا غيلاد غ‑سول‑نقاما غ‑دّونيت‑اد ار‑نندّر، نژوژض ا‑نلس دّات‑نّغ ن‑يگنّا. ار‑نتّيري ا‑ستّ‑نلس ا‑ور‑نقاما بلا تازدغت. اشكو ماحدّ نقاما غ‑تخيّامت‑اد ار‑نندّر س‑تاغوفت. ءور‑نّيغ ءيس‑نرا ا‑نكّيس تاخيّامت‑اد، والاينّي نرا ا‑نلس تازدغت ياضني، باش ا‑نبدّل ما‑يتمتاتن س‑ما‑راد‑بدّا‑يدّر. ربّي ا‑فلّانّغ‑يقصادن ماياد، ءيفك‑اغ رّوح‑نس باش ا‑نيسّان ءيس‑راد‑اغ‑يسّافو كولّو مايلّي‑س‑اغ‑ينّا. غمكاد ا‑س‑ا‑بدّا‑نزّعام ءولاون‑نّغ، اشكو نسّن ءيس‑د‑ناگّوگ زغ‑سيديتنّغ غيلاد غ‑سول‑نزدغ غ‑دّات‑اد. ءيمّا نكُّني ار‑تّ‑نتاوي غ‑مايلّي‑س‑نومن، ءورد غ‑مايلّي نژرّا. مايان اد‑اغ‑يزّعامن باهرا. نيري ا‑نفل دّات‑اد، نروح دار سيديتنّغ. والاينّي ءيغ‑نقاما غ‑دّات‑اد نغد ءيغ‑تّ‑نفل، راد‑بدّا‑نسكار ف‑ا‑نرضو سيديتنّغ. اشكو ءيقّان‑اغ‑د ا‑نبيدّ كولّواغ غ‑لگدّام لّماسيح ا‑فلّانّغ‑يحكام، ءيرار ءي‑كرايگاتّ يان ف‑ما‑يسكر غ‑دّونيت‑اد، ءيگ‑ييت ما‑يفولكين نغد ما‑يُخشنّ. نسّن تيكساض ن‑سيدي ربّي. مايان ا‑ف‑ا‑ن‑نتگّا تيقّي‑نّغ ا‑نسّفهام وييّاض باش اد‑امنّ ءولا نتني. ربّي ءيسّن كولّو ما‑گينّغ‑يلّان. سوانگمغ ءيس‑اغ‑تسّنم ءولا كونّي غ‑وولاون‑نّون. ءور‑ا‑نتالغ ءيخف‑نّغ باش ا‑ديدنّغ‑تبيدّم، والاينّي نملا‑ياون كرا ما‑س‑ا‑سرنّغ‑تّفراحم غ‑دار مدّن، ترارم اوال ءي‑ويلّي تفراحنين س‑وودماون ءورد س‑ما‑يلّان غ‑وولاون. ءيغ‑تغالم ءيس‑نفّوغ ءيخف‑نّغ، ف‑ربّي ا‑ف‑ت‑نفّوغ. والاينّي ءيغ‑نساول س‑لمعقول، ف‑سّيبت‑نّون ا‑ف‑نساول. ءيمّا نكُّني ار‑اغ‑تدحاي لحنانت لّماسيح، اشكو نومن ءيس‑يمّوت يان ف‑سّيبت ن‑كولّو مدّن. مايان ا‑ف‑نسّن ءيس‑كولّو‑ديدس‑مّوتن. ءيمّوت نتّا ف‑سّيبت ن‑كولّو مدّن باش اد‑وورّين غويلّي دّرنين ا‑ور‑سول‑سكارن ف‑اد‑رضون ءيخف‑نسن والاينّي اد‑رضون غوالّي ءيمّوتن ءينكر‑د زغ‑لموت ف‑سّيبت‑نسن. ءور‑سول‑ا‑نتمناد غ‑يان غمكلّي گيس تمنادن مدّن ن‑دّونيت‑اد. نكّا‑تّين ار‑نتمناد غ‑لماسيح غمكلّي گيس تمنادن نتني، والاينّي ءور‑سول‑ا‑گيس‑نتمناد غمكان. اشكو وانّا ءيگان وين لماسيح، ءيسكر‑ت ربّي زغ‑لجديد. لاح زغ‑گيس اقديم، يوورّي ءيگ وين لجديد. ربّي ا‑يقصادن مايان لّيغ ءيسكر سّلامت غ‑گراتنّغ ديدس ف‑سّيبت لّماسيح. ءيژلي‑اغ نكُّني ا‑نمالا ءي‑مدّن مامنك ا‑يرا ا‑يسكر سّلامت غ‑گراس ديدسن. اشكو ربّي ءيسكر سّلامت غ‑گراس د‑دّونيت ف‑وودم لّماسيح، ءور‑سول‑ا‑يتحاساب ف‑مدّن دّنوب‑نسن. يازن‑اغ اد‑اسن‑نسّلكام لخبار ف‑سّلامت‑اد. نكُّني‑اد نگا ءيمازانّ لّماسيح. ف‑يمي‑نّغ ا‑ف‑ا‑سرون‑يساوال ربّي. ار‑كُن‑نتضالاب غيلاد س‑يسم لّماسيح ا‑توورّيم س‑ربّي باش اد‑اون‑تيلي سّلامت غ‑گراتون ديدس. لماسيح لّي‑ور‑جّو‑يسكيرن كرا ن‑دّنب، ءيرور‑ت ربّي زوند ءيغ‑يعمّر س‑دّنوب ف‑سّيبت‑نّغ، باش ا‑نعمّر نكُّني س‑وفولكي ن‑ربّي ف‑سّيبت‑نس. س‑يسم ن‑ربّي لّي‑د‑نخدم، نضالب‑كُن ا‑ور‑تادجم رّحمت‑نس لّي‑س‑تومنم ا‑تضر بلا لفايتّ غ‑دارون. اشكو ربّي ءينّا: «لّيغ‑د‑يروح‑وزمز ن‑رّضا سفلدغ‑اون. لّيغ‑د‑يلكم‑واسّ ن‑وجنجم عاونغ‑كُن.» هاتي غيلاد ا‑د‑يروح‑وزمز ا‑فلّاون‑يرضو. غاسّاد ا‑د‑يلكم‑واسّ ا‑تنجمّ. ار‑نسكار كولّو باش ا‑ور‑ييلي كرا لّعيب غ‑تووري‑نّغ ءولا كرا ن‑تبايضّرت ما‑يسّطارن يان. ار‑نسكار كولّو باش ا‑نمالا ءيزد ءيخدّامن ن‑ربّي ا‑نگا، ندوس ا‑كولّو‑نصبر. ار‑باهرا‑نترفوفون ار‑نكّات تامّارا ار‑نزراي غ‑تنوكموت. ار‑اغ‑سّغوروشن ار‑اغ‑ن‑تلوحن غ‑لحبس ار‑فلّانّغ‑سّهيّاسن مدّن. ار‑نتنهاتاف باهرا. كرا ن‑توال ار‑نتقاما بلا ءيطس، كرا ن‑توال ار‑نتقاما س‑لاژ. والاينّي ءيبان گينّغ ءيس‑يغوس‑وول‑نّغ نيسّان ما‑يُغژانّ نصبر باهرا، ار‑نتعاوان وييّاض، نعمّر س‑رّوح لقودوس، ار‑نتحنّو غ‑مدّن س‑نّييت ءيصفان، ار‑نساوال س‑لحقّ، ار‑نسكار كولّو س‑تحكيمت ءيتجهّدن ن‑ربّي، ناسي ءيمقلاد ن‑وفولكي ن‑ربّي غ‑وفاسيي‑نّغ ءولا غ‑وژلماض‑نّغ. غمكان ا‑نسكار ءيغ‑ا‑ياغ‑تحگارن مدّن ءولا ءيغ‑ا‑ياغ‑تالغن، ءيغ‑ا‑فلّانّغ‑تّينين نُخشن ءولا ءيغ‑ا‑تّينين نشوا. هاتي ار‑اغ‑تگّان د‑ايت‑تكركاس، والاينّي ار‑نساوال س‑لحقّ. ار‑تّينين ءور‑اغ‑يسّين يان، والاينّي ءيگّوت ماد‑اغ‑يسّنّ. ار‑تّينين ار‑نتمتات، والاينّي ها‑ياغ سول ندّر. ار‑تّينين تلّا‑د فلّانّغ لعقوبيت، والاينّي ءور‑يلّي ماد‑اغ‑ينغان. واخّا دا‑گينّغ‑يتقاما لحال، ار‑بدّا‑نتفراح. واخّا نگا ءيمژلاض، ءيگّوت ما‑زگينّغ‑يتامژن لخير. واخّا ءور‑دارنّغ يات، نطّاف كرايگاتّ كرا. واي‑ايتما ن‑كورينتوس، س‑نّييت ن‑وول‑نّغ ايد‑س‑اون‑ين‑نساول، اشكو تعزّام دارنّغ باهرا. ءورد نكُّني ا‑ن‑سرون‑يرورن تيغوردين، والاينّي كونّي ا‑د‑سرنّغ‑يرورن تيغوردين. راد‑اون‑ينيغ غمكلّي ءيتّيني يان ءي‑تاروا‑نس عزّانين، سكرات زوند نكُّني، تملم‑اغ ءيس‑اغ‑تحوبّام غمكلّي‑كُن‑نحوبّا. ا‑ور‑توورّيم تيليم غ‑وزاگلو د‑ويلّي ءور‑ومنّين س‑لماسيح. ءيس‑تلّا تامونت غ‑گر ما‑يرضان ربّي د‑ما‑ت‑ور‑يرضين؟ ءيس‑تلّا تامونت غ‑گر تيفاوت د‑تيلّاس؟ ءيس‑را‑د‑يمشاشكا لماسيح د‑يبليس؟ ءيس‑را‑يمرضا يان يومنّ د‑يان ءور‑يومينّ؟ ءيس‑را‑تّمعاوان‑تگمّي ن‑ربّي د‑تين ءيلاهات ن‑دّونيت‑اد؟ اشكو نگا نكُّني ايت‑تيگمّي ن‑ربّي لّي‑يدّرن. غمكلّي ءينّا ربّي: «راد‑گاورغ د‑مدّن‑ينو، زدغّ غ‑وامّاس‑نسن. راد‑گغ ربّي‑نسن، گن نتني مدّن‑ينو.» ف‑مايان ا‑ف‑ينّا سيدي ربّي: «فّوغاد‑د زغ‑دارسن، تنگارام ديدسن، تانفم ءي‑كولّو ما‑يركان. ءيغ‑تسكرم غمكان را‑فلّاون‑رضوغ. راد‑گغ باباتون، تگم تاروا‑نو د‑يستي. ماياد ءينّا‑ت سيدي ربّي لّي‑يحكامن كولّو ما‑يلّان.» واي‑ايتما عزّانين، لّيغ‑اغ‑ينّا ربّي راد‑اغ‑يسكر كولّو ماياد ءيفولكين، ييلي فلّانّغ ا‑نغوس ناگّوگ زغ‑كولّو ما‑را‑يسّركو ءول‑نّغ ءولا دّات‑نّغ. ييلي فلّانّغ ا‑نتياوژلاي ءي‑ربّي س‑وفولكي ءيكمّلن، ار‑باهرا‑نتّيري ا‑ت‑نرضو. ملات‑اغ غيلاد ءيس‑اغ‑تحوبّام، اشكو ءور‑جّو‑نتعدّا ف‑يان ءولا نسّخسر يان ءولا نشّا يان. ءور‑نّيغ ءيس‑تُخشنم، اشكو مليغ‑اون يادلّي ءيس‑دارنّغ‑تعزّام باهرا. يان ا‑نگا نكُّني ديدون، ءيغ‑ندّر ءولا ءيغ‑نمّوت، اشكو تيقغ گيگون، فرحغ سرون، زعمغ باهرا. واخّا دا‑نزراي غ‑تنوكموت ءيشقان، فرحغ س‑لفرح ءيگّوتن. لّيغ‑د‑نروح تامازيرت‑اد ن‑ماكيدونيّا ءور‑نژضار ا‑نسونفو غ‑ووسّان‑ان، اشكو تكّا‑ياغ‑د‑تنوكموت كرايگاتّ تاسگا. سوتلن‑اغ ءيشابوكن زغ‑برّا، تيلي‑اغ تاغوفت غ‑وگُنس. والاينّي ربّي لّي‑يسّفجّيجن ءول ن‑ويلّي ضعفنين، ءيسّفجّيج‑اغ ءولا نكُّني، اشكو ييوي‑د تيطوس س‑دارنّغ. هاتي نتهنّا غيلاد، ءورد غير ف‑سّيبت ن‑ما‑د‑يوشكا والاينّي نتهنّا ءولا ف‑مكلّي تسّفجّيجم ءول‑نس. ءيمل‑اغ ف‑مامنك ا‑يّي‑تّيريم باهرا، تيگُراژ‑كُن ف‑مايلّي ءيجران، توجادم ا‑ديدي‑تبيدّم. ها‑يّي فرحغ باهرا س‑لخبار‑اد. ءور‑يّي‑تُگراژ غيلاد ف‑تبرات لّي‑اون‑ين‑وزنغ، واخّا‑يّي‑فلّاس‑تُگراژ غ‑ووسّان‑ان اشكو ءيقاما گيگون لحال يان كرا. هاتي غيلاد فرحغ، ءورد ف‑سّيبت ن‑ماد‑اون‑طيّر والاينّي ف‑سّيبت ن‑ما‑گيگون‑يقاما لحال ايلّيغ تسكرم ما‑گيگون‑يرا ربّي. اشكو لّيغ‑اون‑طيّر، توورّيم تسوانگمّ باهرا غ‑ما‑يرا ربّي. ءور‑اون‑يجلي يات ف‑سّيبت‑نّغ. اشكو يان مي طيّر ءيسوانگم غ‑ربّي، هاتي را‑يفل ءيسكّيرن‑نس أُخشنّين ءينجم. ءور‑را‑تي‑تيگُراژ ف‑مايان. ءيمّا يان مي طيّر ءيسوانگم غ‑دّونيت، ءور‑راد‑اس‑د‑ياوي مايان ابلا لموت. ژرات مايلّي تسكرم غاكود لّيغ‑اون‑طيّر تسوانگمّ غ‑ما‑يرا ربّي. توورّيم ترورم لعاقل باهرا، تيريم ا‑تملم ءيس‑ور‑گيگون‑يلّي كرا لّعيب. ءولا كونّي تبزگم ف‑والّي ءيفّوغن اغاراس، تاغ‑كُن‑تگوضي فلّاس. تيريم اد‑اغ‑ترضوم، توجادم ا‑فلّاس‑تحكامّ. هاتي ءيبان فلّاون ءيس‑تسكرم كولّو ما‑فلّاون‑يلّان غ‑مايلّي دارون ءيجران. واخّا‑ياون‑ين‑وريغ تابرات‑ان، ءور‑اون‑تّ‑ين‑وريغ ف‑سّيبت ن‑والّي ءيسكرن ما‑يُخشنّ نغد غوالّي‑مي‑ت‑يسكر، والاينّي ءوريغ‑اون‑تّ‑ين باش اد‑اون‑يمل ربّي منشك ا‑را‑تيريم اد‑اغ‑ترضوم. ءيمّا غيلاد نتهنّا ف‑كولّو مايان. نتهنّا نكُّني والاينّي نفرح س‑وگُّار لّيغ نژرا منشك ا‑كولّو‑تسّفرحم تيطوس ايلّيغ ءور‑سول‑فلّاون‑يوسي تاغوفت. غايد ءيزرين ءولغّ‑كُن ءي‑تيطوس، ءيمّا غيلاد ءيبان ءيس‑ور‑يّي‑تشّحشّيمّ ف‑واوال‑ينو. نملا‑ياون‑ين لحقّ غ‑كولّو ماد‑اون‑ننّا غايد ءيزرين، ءيمّا غيلاد ءيبان ءيزد لحقّ ا‑فلّاون‑ننّا ءولا ءي‑تيطوس. ءيمّا نتّا ءيحوبّا‑كُن غيلاد س‑وگُّار، اشكو ار‑د‑يسوينگيم مامنك ا‑تي‑تقبلم، تادرم ءي‑يخف‑نّون تسفلدم سرس كولّوكن، توقّرم‑ت باهرا. ءولا نكّي فرحغ س‑كيگان اشكو ءوفيغ ا‑باهرا‑گيگون‑گغ لامان. واي‑ايتما، نرا ا‑تيسّانم منشك ا‑يبارك ربّي غ‑يمناگّارن غ‑تمازيرت ن‑ماكيدونيّا. واخّا زرين غ‑تنوكموت ءيشقان، فرحن باهرا. رضون اد‑فكن كيگان، واخّا ءيدروس ماد‑دارسن‑يلّان باهرا. نكّي گيغ ءينيگي ن‑يس‑فكان ءونشك لّي‑مي‑ژضارن، فكن‑نّيت ءوگُّار ن‑ما‑مي‑ژضارن، رضون س‑غمكان. ضالبن‑اغ باهرا ا‑تن‑نادج اد‑فكن كرا غ‑لمعاونت لّي‑را‑ناوي ءي‑يمژلاين ن‑ربّي غ‑وروشاليم، ءيرين نتني اد‑اسن‑تيلي لباراكا ن‑تامونت‑اد. ءور‑نغال غ‑ووسّان‑ان ءيس‑راد‑سكرن غونشكان، ءيمّا نتني فكان ءيخف‑نسن زوار ءي‑سيديتنّغ، فكن‑اغ ءيلمّا ءيخف‑نسن ءولا نكُّني غمكلّي ءيرا ربّي. ءولا كونّي، ءيبدا تيطوس ار‑اون‑يمالا ا‑تسكارم غمكان. نضالب‑ت غيلاد ا‑كُن‑يعاون ا‑تكمّلم لباراكا ن‑توافكا‑ياد. ژرات منشك ا‑تجهّدم كونّي. ءيدوس ليمان‑نّون، تيسّانم ا‑تساوالم، تفهمّ ما‑يُغژانّ، ار‑تسكارم س‑نّييت، ار‑اغ‑تّحوبّوم. ءيمّا غيلاد نرا گيگون ا‑تجهّدم ءولا غ‑لباراكا ن‑توافكا‑ياد. ءورد لوصيت ايد‑اون‑نّيغ، والاينّي مليغ‑اون ماد‑سكرن وييّاض س‑نّييت‑نسن، باش اد‑اغ‑تملم ءيزد س‑صّاحت تحوبّام مدّن ءولا كونّي. تسّنم لحنانت ن‑سيديتنّغ ياسوع لماسيح. واخّا ءيطّاف ما‑يگّوتن، يوورّي بلا يات ف‑سّيبت‑نّون. ءيفل كولّو ما‑دارس‑يلّان، باش ا‑توورّيم تطّافم ما‑يگّوتن. سوانگمغ نكّي ءيس‑راد‑اون‑ياف ا‑تكمّلم مايلّي تبدام اسگُّاس لّي‑يزرين، اشكو كونّي ا‑يزوارن وييّاض غ‑مايلّي تناولم، تبدوم ار‑تي‑تسكارم س‑نّييت‑نّون. كمّلات‑ت غيلاد ءونشك نّا‑مي‑تژضارم، تيريم ا‑تي‑تكمّلم غمكلّي‑تي‑تناولم غ‑يسيزوار. ءيغ‑ترام ا‑تفكم س‑نّييت‑نّون، را‑يرضو ربّي س‑ونشك لّي‑مي‑تژضارم ا‑تفكم. ءور‑را‑ييري ءوگُّار ن‑ما‑مي‑تژضارم. ءور‑نّيغ مايان باش ا‑فلّاون‑ژّوژّايغ سّرخوغ ءي‑وييّاض، والاينّي ريغ ا‑كولّو‑ننگادّا ءي‑نگراتنّغ. هاتي غيلاد غ‑دارون‑يگّوت لخير، ءيلّا فلّاون ا‑تعاونم غويلّي ءور‑دار يات. اشكو ءيغ‑يدّا ارد توورّيم بلا يات وورّين نتني س‑لخير، را‑كُن‑عاونّ نتني غاكودان. غمكلّي ءيتياران: «غوالّي ءيسّمونّ كيگان، ءور‑اس‑يشاض يات. ءيمّا غوالّي ءيسّمونّ ءيميكّ، ءور‑ت‑يخصّا يات.» ار‑نتالغ ربّي لّي‑يسكرن غ‑وول ن‑تيطوس ا‑باهرا‑گيگون‑يسوينگيم غمكلّي گيگون نسوينگيم نكُّني. لّيغ‑ت‑نضالب ا‑ن‑دارون‑ياشك، ءيفرح نتّا باهرا، ءيسكر ف‑ا‑ن‑دارون‑ياشك س‑لخاطر‑نس. نازن‑ن ديدس گماتنّغ لّي‑تالغن ايتماتن غ‑يمناگّارن كولّوتن ف‑سّيبت ن‑تبرّاحت‑نس لّخبار ءيفولكين. ژلين‑ت ايتماتن ن‑يمناگّارن اد‑ديدنّغ‑يمودّو ار‑اغ‑يتعاوان غ‑لباراكا ن‑توافكا‑ياد لّي‑س‑را‑يبان لمجد ن‑سيديتنّغ ءولا تايري‑نّغ ءيصفان. نرا ا‑نسّلكم لامانت‑اد ءيگّوتن بلا گينّغ ءيشكّا يان ف‑مامنك ا‑را‑تلكم. نرار‑بدّا لعاقل باش ا‑نسكار افولكي غ‑يژري ن‑سيديتنّغ ءولا وين مدّن. نازن‑ن ديدسن يان گماتنّغ ياضني، نژرا منّاوت‑توال منشك ا‑باهرا‑يتّيري ا‑يعاون وييّاض. د‑نتّان، لّيغ ءيسفلد ف‑ما‑تناولم ءيفولكي، ييري س‑وگُّار اد‑اون‑گيس‑يعاون. ءيمّا تيطوس، ءيگا اسمون‑ينو ار‑ديدي‑يتخدام ف‑سّيبت‑نّون. ءيمّا ايتماتنّغ ياضني، نتني گان ءيمازانّ ن‑يمناگّارن ار‑يتبان لمجد لّماسيح غ‑تووري لّي‑سكارن. ملات‑اسن منشك ا‑تن‑تّيريم، باش اد‑يسّانّ كولّو ءيمناگّارن ن‑ايتماتن ءيس‑تستهلّام غمكلّي‑كُن‑نتالغ غ‑دارسن. ءور‑يّي‑يخصّا اد‑زايدغ اراغ‑اون‑ين ف‑لمعاونت لّي‑را‑ناوي ءي‑يمژلاين غ‑وروشاليم، اشكو سّنغ ءيس‑ترام باهرا ا‑تفكم كرا. هاتي ءولغّ‑كُن غ‑دار ايت‑ماكيدونيّا ءينيغ‑اسن: «اسگُّاس اياد س‑وجادن ايت‑اخايا اد‑عاونّ» ايلّيغ ءيگّوت غ‑ايت‑ماكيدونيّا ما‑يوورّين ءيرا ا‑يفك كرا لّيغ سفلدن ف‑ما‑تناولم كونّي س‑نّييت‑نّون. ءيمّا غيلاد ءوزنغ‑اون‑ين ايتماتن‑اد باش ا‑توجادم غمكلّي‑اسن‑نّيغ، ءيبان گيگون ءيس‑تستهلّام مايلّي فلّاون نّيغ. والاينّي ءيغ‑ن‑دارون‑وشكيغ نكّي، مونّ‑ين ديدي كرا ن‑ايت‑ماكيدونيّا افن‑كُن‑ين ءور‑توجادم، راد‑باهرا‑حشمغ ف‑واوال‑ينو، را‑تحشمّ ءولا كونّي ءيغ‑تگُّرا‑تغاوسا‑ياد س‑غمكان. مايان ا‑ف‑سوانگمغ ءيس‑را‑ياف ءيغ‑ضالبغ ايتماتن‑اد ا‑يّي‑ن‑زوورن س‑دارون، باش اد‑جّوجادن تاوافكا لّي‑س‑تنّام را‑ستّي‑تازنم. غمكان ا‑س‑را‑ستّ‑ين‑افغ نكّي توجاد س‑لخاطر‑نّون ءورد س‑بزّز. اشكو وانّا‑ن‑يلوحن امود ءيدروسن، ءيدروس ما‑را‑يمگر. ءيمّا وانّا‑ن‑يلوحن امود ءيگّوتن، ءيگّوت ما‑را‑يمگر. ءيلّا ف‑كود يان ا‑يسكر مايلّي ءيقصاد غ‑يخف‑نس. ا‑ور‑يفك س‑بزّز نغد ف‑وودم ن‑وييّاض. اشكو ءيعزّا دار ربّي وانّا ياكّان س‑لفرح. ربّي ءيژضار ا‑كُن‑يبارك س‑تميخار‑نس گّوتنين باش اد‑اون‑ييلي كولّو ما‑تحتاجّام، ييلي‑اون‑داغ ما‑س‑ا‑تّعاوانم غ‑كولّو ما‑يگان افولكي. غمكلّي ءيتياران: «ار‑يسّوكوت لباراكات‑نس ف‑يمژلاض. ءور‑را‑سار‑تتمّو لحنانت‑نس.» ربّي لّي‑ياكّان امود ءي‑والّي ءيكّرزن ار‑اس‑يتزاياد اغروم ما‑يشتّا، نتّان ا‑راد‑اون‑يفك امود ءيزايد‑اون ما‑يگّوتن، ءيسكر‑اون تامگرا ءيفولكين زغ‑لحنانت‑نّون. راد‑اون‑يسّيگات لخير باش ا‑بدّا‑دارون‑ييلي ما‑تاكّام ءي‑وييّاض. غمكان ا‑ف‑را‑تي‑تشكارن مدّن گّوتنين ف‑ماد‑اسن‑تّازنم ف‑وفوس‑نّغ. اشكو لمعاونت‑اد را‑تعمّر ءيمژلاين ن‑ربّي س‑لخير ما‑س‑ا‑باهرا‑تفراحن ار‑كولّو‑تشكارن ربّي. ءيگّوت ما‑را‑ت‑يشكر ف‑لمعاونت‑نّون، اشكو را‑سرس‑تملم ءيس‑ا‑تسكارم س‑لخبار ءيفولكين لّماسيح ار‑تّيريم ا‑تّعاوانم ءيمژلاين‑ان ءولا كولّو مدّن. را‑كُن‑باهرا‑تحوبّون نتني ار‑فلّاون‑تضالابن ربّي، اشكو ءيبارك گيگون ربّي س‑لباراكا ءيگّوتن. ءيمّا غيلاد، ا‑باهرا‑نشكر ربّي لّي‑اغ‑د‑يفكان ما‑يوگُرن كولّو ءيسوينگيمن ن‑بنادم. ءيمّا غيلاد را‑كُن‑ضالبغ نكّي بولُس س‑يسم لّماسيح لّي‑بدّا‑يحنّان ءيصبر د‑كود يان، اشكو ار‑فلّا‑تّينين كرا ن‑مدّن ءيس‑ضعفغ غاكود نّا‑دارون‑لّيغ، شقوغ ديدون غاكود نّا‑فلّاون‑اگّوگغ. والاينّي را‑كُن‑ضالبغ ا‑تسكرم ما‑كُن‑د‑يقّانّ، باش ا‑ور‑يّي‑يخصّا اد‑ديدون‑شقوغ غاكود نّا‑ن‑وشكيغ، غمكلّي‑يّي‑يخصّا اد‑شقوغ د‑كرا ن‑مدّن لّي‑غالنين ءيس‑ا‑نسكار س‑ما‑يتّيري ءيخف‑نّغ. واخّا نزدغ غ‑دّونيت‑اد، ءور‑ا‑نتمّاغ س‑غايلّي‑س‑ا‑تمّاغن مدّن ن‑دّونيت‑اد. ءيمقلاد لّي‑س‑ا‑نتمّاغ نكُّني ءور‑گين وين دّونيت‑اد، والاينّي تلّا‑گيسن‑تحكيمت ءيتجهّدن ن‑ربّي ا‑سرسن‑نسّضار لبروج دوسنين. ار‑نسّگريويل ءيسوينگيمن ن‑بنادم، ار‑نخلّو ءيواليون ن‑كولّو ما‑يتالّن ءيخف‑نس ا‑يضاضّ تاواسّنا ن‑ربّي، ار‑نكّرس كولّو تينباضين ن‑مدّن باش اد‑وورّين س‑تنباضين لّماسيح. ءيمّا كونّي، ءيغ‑ترام ا‑تسكارم كولّو س‑تنباضين لّماسيح، نوجاد نكُّني ا‑نحكام ف‑وانّا ءور‑سرسنت‑يسكارن. والاينّي كونّي ار‑تژرّام غير ما‑يلّان غ‑برّا. ءيس‑دارون‑يلّا ما‑يتّينين ءيگا اخدّام لّماسيح؟ ءيلّا فلّاس ا‑ور‑يتّو ماياد: ءولا نكُّني نگا ءيخدّامن لّماسيح. ءور‑اكُّ‑راد‑حشمغ، واخّا دا‑ساوالغ باهرا ف‑مامنك اد‑اغ‑يژلي سيديتنّغ اد‑اون‑نمالا ما‑كُن‑د‑يقّانّ ا‑تي‑تسكارم. اشكو ءيژلي‑اغ ءورد ف‑ا‑كُن‑نهلك والاينّي ف‑ا‑كُن‑نعاون. ا‑ور‑تغالم ءيس‑ريغ ا‑كُن‑ين‑سّيويدغ س‑تبراتين‑ينو. ءيلّا ما‑يتّينين «غاكود نّا‑ياغ‑د‑يورا بولُس ءيتجهّد ءيشقو ديدنّغ، والاينّي غاكود نّا‑د‑دارنّغ‑يوشكا ءيضعف ءور‑يسّين مامنك ا‑يساوال.» ءيمّا وان مدّن‑ان، ءيلّا فلّاسن اد‑يسّانّ ماياد: غاكود نّا‑ن‑دارون‑نوشكا ار‑بدّا‑نسكار كولّو س‑مكلّي‑اون‑ين‑ننّا لّيغ‑د‑ناگّوگ. ءور‑نزعم ا‑نسّنگادّا ءيخفاون‑نّغ د‑كرا ن‑مدّن لّي‑تالغنين ءيخف‑نسن، ءولا را‑نيني ءيس‑تن‑نوف. اشكو لّيغ ا‑تّينين ءي‑نگراتسن «كرا يوف كرا» نغد «كرا يوگُر كرا» ءيبان فلّاسن ءيس‑ور‑فهيمن يات. ءيمّا نكُّني ءور‑را‑ن‑نتياگّال س‑ما‑ن‑فلّانّغ‑ياگّوگن، والاينّي را‑نگ غمكلّي نگا غ‑تووري‑اد‑اغ‑يفكا ربّي لّي‑س‑اغ‑ن‑ييوي ءولا س‑دارون. ءور‑نري ا‑نسّورف يووتّا س‑يلّي ءور‑اغ‑يفكي ربّي. والاينّي ءيفكا‑ياغ كرا غ‑دارون، اشكو نكُّني ا‑يزوارن ءيس‑ن‑نمودّا نسّلكم‑اون‑ين لخبار ءيفولكين لّماسيح. ءور‑اكُّ‑ا‑نتالغ ءيخف‑نّغ ف‑كرا‑ور‑نسكير ءولا ف‑ماد‑سكرن وييّاض، والاينّي ار‑ن‑نترجو غ‑يگر ن‑دارون ا‑گيس‑تيگات‑تمگرا لّيغ ا‑تّزايادم غ‑ليمان. غمكان ا‑س‑را‑ندّو تيگيرا، ار‑نتبرّاح س‑لخبار ءيفولكين غ‑تميزار ياضني اگّوگن‑ين فلّاون، بلا‑دا‑نتالغ ءيخف‑نّغ ف‑ما‑يتياوسكارن غ‑يگران ن‑مدّن ياضني. غمكلّي ءيتياران: «وانّا ءيران ا‑يالغ، يالغ سيديتنّغ.» اشكو ءورد يان ءيرضان ءيخف‑نس ا‑را‑يتياوقبال، والاينّي يان ف‑يرضا سيديس. صبرات ديدي ءيغ‑يّي‑تژرام ار‑ساوالغ ءيميكّ زوند يان ءيفّوغن ءيخف‑نس. تصبرم ديدي اشكو ار‑كُن‑تّيريغ س‑تايري ن‑ربّي، فكغ‑كُن ءي‑لماسيح زوند يات‑تسليت لّي‑غ‑ور‑يلّي كرا لّعيب، باش ا‑ور‑تيليم ءي‑كرا ن‑يان ياضني. كسوضغ ا‑كُن‑يجلّو كرا ن‑يان ف‑يسوينگيمن‑نّون غمكلّي‑ستّ‑يزّري‑ولگمّاض س‑تكركاس‑نس ف‑يمّاتنّغ حوّا. ءيكساضغ ا‑توورّيم زغ‑تايري ءيصفان لّي‑س‑تّين تكّام ار‑تّيريم لماسيح س‑نّييت‑نّون. اشكو ار‑تسفليدم س‑وانّا‑ن‑دارون‑يوشكان ار‑يتبرّاح س‑كرا ن‑ياسوع ءور‑يگي ياسوع لّي‑س‑اون‑نبرّح نكُّني. هاتي ار‑تّقبالم وانّا‑ياون‑ياكّان كرا ن‑رّوح ءور‑يگي رّوح لّي‑تقبلم يادلّي. ار‑تّامنم وانّا‑ياون‑ين‑يتاوين كرا لّخبار ءيفولكين ءور‑يگي لخبار ءيفولكين لّي‑س‑تومنم ف‑يمي‑نّغ. والاينّي ءيرواس‑يّي ءيس‑ور‑يّي‑اكُّ‑وفن مدّن‑ان لّي‑تگام د‑يرقّاسن هيّانين. واخّا دا‑تّينين كرا ن‑مدّن ءور‑سّينغ اد‑ساولغ، ها‑يّي سّنغ باهرا ما‑يُغژانّ. ءولا كونّي كولّوكن تژرام مايان غ‑كولّو ما‑نسكر غ‑گراتون. غاكود لّيغ‑اون‑ين‑يويغ لخبار ءيفولكين ن‑ربّي ءور‑جّو‑زگيگون‑ضالبغ ءيقاريدن. ءودرغ ءي‑يخف‑ينو باش‑ا‑تالّم كونّي ءيخفاون‑نّون. ءيس‑يعيب ماين سكرغ؟ غ‑ووسّان‑ان ار‑تامژغ ماد‑حتاجّاغ زغ‑يمناگّارن ياضني، ار‑شتّاغ زغ‑لخير‑نسن باش اد‑اون‑خدمغ. ءيمّا غاكود لّيغ لكمغ ف‑كرا غ‑دارون ءور‑ضالبغ يان ف‑يات، اشكو ايتماتن لّي‑ن‑وشكانين زغ‑ماكيدونيّا ءيوين‑يّي‑ن كولّو ماد‑حتاجّاغ. غمكلّي سكرغ غ‑ووسّان‑ان ا‑راد‑بدّا‑سكارغ. ءور‑سار‑را‑زگيگون‑ضالبغ يات ءي‑يخف‑ينو. س‑لحقّ لّماسيح لّي‑گيگي‑يلّان، ءور‑را‑ييژضار يان غ‑تمازيرت ن‑اخايا كولّوتّ ا‑يّي‑يسّفسّا ف‑واوال‑اد. ماخ ايلّيغ‑اون‑ساولغ غمكاد؟ ءيس‑ور‑داري‑تعزّام؟ ربّي ا‑يسّنّ مامنك ا‑داري‑تعزّام باهرا. غمكان ا‑راد‑بدّا‑سكارغ، باش ا‑ور‑يژضارن كرا ن‑مدّن اد‑تالغن ءيخف‑نسن ار‑تّينين ءيزد زوند نكُّني اد‑سكارن. اشكو وان مدّن‑ان ءورد ءيرقّاسن ن‑صّاحت اد‑گان، والاينّي گان ءيخدّامن ءيمغضارن ار‑تبدّالن سّيفت‑نسن باش اد‑رواسن ءيرقّاسن لّماسيح. ءور‑يگي غاياد لعجب، اشكو شيطان ءولا نتّان ار‑يتبدّال سّيفت‑نس باش ا‑يرواس يا‑لّمالاك ءيفاون. ا‑ور‑نتعجّاب ءيغ‑نژرا ءيخدّامن‑نس ار‑تبدّالن سّيفت‑نسن باش اد‑رواسن ءيخدّامن ن‑وفولكي. ءيمّا نتني راد‑اسن‑ييلي ماد‑اسن‑يگان. راد‑اون‑داغ‑ينيغ ا‑ور‑تغالم ءيس‑فّوغّ ءيخف‑ينو. والاينّي ءيغ‑سول‑گيگون‑يلّا ما‑يغالن غمكان، راد‑اس‑ينيغ ا‑يّي‑يقبل زوند يان ءينوفلن، باش اد‑الغّ ءيخف‑ينو ءولا نكّي يان ءيميكّ. ءورد اوال ن‑سيديتنّغ ايد‑اون‑تّينيغ غيلاد، هاتي راد‑الغّ ءيخف‑ينو زوند يان ءينوفلن. گّوتن مدّن ار‑تالغن ءيخفاون‑نسن ف‑ماد‑اسن‑يلّان غ‑دّونيت‑اد. هاتي راد‑ساولغ ءولا نكّي غمكان، اشكو ار‑كُن‑يتعجاب ا‑تّصبارم د‑ينافالن كونّي لّي‑يگان ءيخف‑نّون د‑ايت‑لعاقل. هاتي ار‑تّصبارم د‑كولّو وانّا ءيران ا‑كُن‑يگ د‑يسمگان ييري ا‑كُن‑يژيگ ءيشّ‑كُن ءيحگر‑كُن يوت‑كُن ف‑وودم. ءيمّا نكُّني، ءور‑جّو‑نزعم اد‑اون‑نسكر غمكان، ها‑يّي حشمغ اد‑اون‑ت‑ينيغ. والاينّي ءيغ‑يلّا ما‑يزعمن ا‑يالغ ءيخف‑نس ف‑كرا، ءولا نكّي راد‑زعمغ اد‑الغّ ءيخف‑ينو ف‑مايان. ها‑يّي ساولغ غيلاد زوند يان ءينوفلن. ءيزد س‑يواليون ن‑ايت‑يودايا ا‑س‑ا‑ساوالن مدّن‑ان؟ ءولا نكّي ار‑ساوالغ س‑يواليون ن‑ايت‑يودايا. ءيزد زغ‑ايت‑ربّي ا‑زغ‑گان؟ ءولا نكّي گيغ زغ‑ايت‑ربّي. ءيزد زغ‑تاسوت ن‑يبراهيم ا‑زغ‑گان؟ ءولا نكّي گيغ زغ‑تاسوت ن‑يبراهيم. ءيس‑گان ءيخدّامن لّماسيح؟ گيغ ءولا نكّي اخدّام لّماسيح ءوگُّار‑نسن. ها‑يّي غيلاد ار‑ساوالغ زوند يان ءينوفلن. ار‑تخدامغ ءوگُّار ن‑مدّن‑ان، ار‑تّيليغ غ‑لحبس ءوگُّار‑نسن. شّيغ اكوراي ءوگُّار‑نسن. منّاوت‑توال ا‑ن‑تمناگّارغ د‑لموت. سمّوست‑توال ا‑يّي‑سّغورشن ايت‑يودايا ار‑يّي‑شّوشان كراطّ ءيد‑مراوت د‑تژا (39) ن‑ضّربت. كراطّ‑توال ا‑يّي‑تنت‑شّوشان ايت‑رّومان س‑وكوراي. يات‑توال رجمن‑يّي مدّن س‑يژران. كراطّ‑توال اد‑يّي‑ترژا تاناوت غ‑ومدا، كغ ءيض د‑واسّ غ‑وامان. ار‑باهرا‑تمودّوغ. زريغ غ‑لخاطار ن‑يسافّن د‑يقطّاعن. زريغ غ‑لخاطار غ‑گر مدّن‑ينو ن‑ايت‑يودايا ءولا غ‑گر ايت‑تميزار ياضني. زريغ زغ‑گيس غ‑تمدينين ءولا لخلا ءولا امدا. زريغ زغ‑گيس غ‑گر ايت‑تكركاس لّي‑يتّينين ءيس‑گان ايت‑لماسيح. ار‑كّاتغ تاكرّايت ار‑كّاتغ تامّارا. منّاوت‑توال اد‑سّيكّيغ ءيطس، ءور‑شّيغ ءولا سويغ. ءور‑داري ماد‑شتّاغ ءولا ماد‑لسّاغ ءولا مانيغ ا‑تنتالغ ءي‑وسمّيض. گّوتنت تاسّاسين ياضني، والاينّي زوويدغ‑اسنت كولّوتنت تاژايت ن‑تاغوفت لّي‑بدّا‑تاسيغ كرايگاتّ اسّ ف‑كولّو ءيمناگّارن ن‑ايتماتن. غاكود نّا‑يلّا ما‑يضعفن، ها‑يّي سّحسّاغ س‑ضّعف‑نس. غاكود نّا‑يلّا ما‑يضرن، ار‑يتبّي غ‑تاسا‑نو. ءيغ‑يّي‑د‑يقّان اد‑ساوالغ ف‑ماد‑سكرغ، راد‑ساولغ ف‑ضّعف‑ينو. ربّي باباس ن‑سيديتنّغ ياسوع ا‑يسّنّ ءيس‑ور‑ا‑سّكيركيسغ. نتّان ا‑يستهلّان ا‑ت‑نتالغ غيلاد ءولا كولّو مايد‑د‑يفتان. لّيغ تّين كّيغ غ‑تمدينت ن‑ديماشق، ءينكر لحاكم لّي‑يلّان غ‑دّو‑وگلّيد حاريت، يوصّا ءيعسكرين اد‑ضوفن ءيماون ن‑تمدينت باش ا‑يّي‑امژن. والاينّي گان‑يّي كرا ن‑مدّن غ‑يان‑وريال، زّوگزن‑يّي زغ‑يان‑وارّياح ءيلّا غ‑وغُراب ن‑تمدينت، نجمغ زغ‑وفوس‑نس. ءيقّان‑يّي‑د اد‑ساولغ ف‑ماد‑سكرغ، واخّا ءور‑گيس‑تلّي كرا لّفايتّ. راد‑اون‑ينيغ ف‑توارگيوين لّي‑يّي‑يملا سيديتنّغ ءولا تيغاوسيوين ياضني لّي‑يّي‑يسّبايّن. سّنغ يان‑ورگاز ءيگا وين لماسيح، ءيتيالال س‑ويس كراض ءيگنوان كّوژ د‑مراو ن‑وسگُّاس اياد. ءور‑سّينغ ءيزد س‑دّات ا‑س‑يتيالال نغد بلا دّات. ربّي ا‑يسّنّ. سّنغ ءيس‑يتيالال‑ورگاز‑ان س‑تالعرصت لّمجد، ءور‑سّينغ ءيزد س‑دّات نغد بلا دّات. ربّي ا‑يسّنّ. ءيمّا نتّا ءيسفلد ءي‑كرا ن‑تغاوسيوين، ءور‑يوفي ءيواليون ما‑س‑ا‑تنت‑يادّر ءولا زرينت ءي‑بنادم ا‑سرسنت‑يساول. وان ارگاز‑ان ا‑ف‑راد‑ساولغ، والاينّي ءور‑راد‑ساولغ ف‑يخف‑ينو ابلا ف‑ضّعف لّي‑گيگي‑يلّان. مراد ءيس‑ريغ اد‑ساولغ ف‑يخف‑ينو ءورد انافال ا‑راد‑گغ، اشكو لحقّ ا‑را‑تّينيغ. والاينّي ءور‑راد‑ساوالغ ف‑يخف‑ينو ا‑ور‑فلّا‑يغال كرا ن‑يان ءوگُّار ن‑ما‑گيگي‑يژرّا ءولا ما‑مي‑داري‑يسفليد. والاينّي ءيتياوفكا‑يّي يان‑وسنّان غ‑دّات‑نو، باش ا‑ور‑الّغ ءيخف‑ينو ف‑سّيبت ن‑تغاوسيوين گّوتنين لّي‑يّي‑يسّبايّن ربّي. اسنّان‑ان ءيگا امازان ن‑شيطان، ار‑يّي‑يسّرفوفون باش ا‑ور‑وورّيغ ار‑تالّغ ءيخف‑ينو. كراطّ‑توال اد‑ضالبغ سيديتنّغ ا‑ت‑فلّا‑يسّيتّي والاينّي ءينّا‑يّي: «ءور‑ك‑يخصّا ابلا لحنانت‑ينو. اشكو يان ءيضعفن ا‑غ‑را‑تيلي‑تحكيمت‑ينو ءيتجهّدن س‑وگُّار.» فرحغ غيلاد اد‑ساوالغ ف‑كولّو ما‑گيگي‑يضعفن، باش اد‑عمّرغ س‑تحكيمت ءيتجهّدن لّماسيح. ار‑تقناعغ نكّي غاكود نّا‑ضعفغ، ءولا غاكود نّا‑يّي‑رگمن مدّن ءولا غاكود نّا‑كّاتغ تامّارا ار‑ترفوفونغ ار‑زرايغ غ‑تنوكموت ف‑سّيبت لّماسيح. اشكو غاكود نّا‑ضعفغ، هاتي تجهّدغ. نّيغ مايان زوند يان ءيفّوغن ءيخف‑نس، والاينّي كونّي ا‑يّي‑يرورن اد‑ساولغ غمكان، اشكو ءور‑تريم ا‑يّي‑تالغم غمكلّي فلّاون ءيلّان. واخّا ءور‑گيغ يات نكّي، ءور‑اكُّ‑يّي‑وفن مدّن‑ان لّي‑تگام د‑يرقّاسن هيّانين. كونّي تژرام گيگي تيميتار ن‑يان ءيگان ارقّاس ن‑صّاحت، اشكو سكرغ دارون لمعجيزات د‑لعجايب د‑لقوّات س‑صّبر ءيگّوتن. ءيس‑يلّا كرا سكرغ‑ت ءي‑يمناگّارن ياضني ءور‑اون‑ت‑سكيرغ كونّي؟ غير تاغاوسا‑ياد ا‑يلّان: ءور‑زگيگون‑ومژغ ءيقاريدن. ءيس‑يُخشن مايد گيگون سكرغ باش ا‑كُن‑ضالبغ اد‑يّي‑تصامحم؟ ها‑يّي ءوجادغ غيلاد ا‑ن‑دارون‑اشكغ تيس كراطّ‑توال. ءور‑را‑زگيگون‑ضالبغ يات، اشكو كونّي اد‑ريغ ءورد ما‑يگان وينّون. ءور‑يلّي ف‑تاروا اد‑سّمونون ما‑س‑ا‑تعاوانّ ايت‑دارسن، والاينّي ءيلّا ف‑ايت‑دارسن اد‑تعاوانّ تاروا‑نسن. راد‑فرحغ نكّي اد‑فكغ كولّو ماد‑داري‑يلّان، فكغ ءولا ءيخف‑ينو ف‑سّيبت‑نّون. ءيس‑ور‑را‑دارون‑عزّاغ ءيميكّ لّيغ داري تعزّام كونّي غونشكان؟ تسّنم ءيس‑ور‑فلّاون‑ژّايغ غ‑ووسّان‑ان. والاينّي ءيس‑سول‑گيگون‑يلّا ما‑يتّينين «بولُس ءيگا بو‑لحيلت، ءيزّري‑تّ فلّاون س‑تكركاس»؟ مامنك؟ ءيس‑جّو‑كُن‑شّيغ ف‑وفوس ن‑ويلّي‑اون‑ين‑وزنغ؟ نكّي ا‑يضالبن تيطوس ا‑ن‑ياشك س‑دارون، ازنغ‑ن ديدس گماتنّغ ياضني. والاينّي ءينيات‑يّي، ءيس‑جّو‑كُن‑يشّا تيطوس؟ ءيمّا نكّي د‑تيطوس، ار‑بدّا‑نسكار زوند زوند، ار‑نتنباض زوند زوند. ءيس‑تغالم ءيس‑ننّا كولّو ماياد باش ا‑فلّانّغ‑تحكامّ كونّي، تينيم ءور‑گينّغ كرا لّعيب؟ والاينّي غ‑لگدّام ن‑ربّي ا‑غ‑ا‑نساوال س‑يسم لّماسيح. د‑كولّو ما‑نسكار، اي‑ايتما عزّانين، ار‑ت‑نسكار باش ا‑كُن‑نسّدوس. والاينّي كسوضغ ا‑كُن‑ين‑افغ ءور‑تگيم غمكلّي ريغ غاكود نّا‑ن‑دارون‑وشكيغ، تافم‑يّي‑ن ءولا نكّي ءور‑گيغ غمكلّي ترام. ءور‑ريغ ا‑كُن‑ين‑افغ ار‑تژيم ءي‑نگراتون ءولا‑دا‑تّيريم ما‑يگان وين وييّاض ءولا‑دا‑تّقلاقالم ءولا‑دا‑يكّات كود يان غير ف‑يخف‑نس ءولا‑دا‑ترگّمّ ءولا‑دا‑تساوالم غ‑وييّاض ءولا‑دا‑تسّيمغورم ءيخفاون‑نّون ءولا‑دا‑تسّروايم ماد‑دارون‑يلّان. كسوضغ ا‑يّي‑يادج ربّي ارد‑يّي‑تيگُراژ غ‑گراتون غاكود نّا‑ن‑دارون‑وشكيغ، ار‑الّاغ ف‑ما‑گيگون‑يگّوتن ءور‑رين اد‑فلن لخُشانت لّي‑ميارن غايد ءيزرين، ار‑سول‑تفسادن ار‑تزنون ار‑تشتهون ءي‑نگراتسن. ختاد ا‑را‑يگ تيس كراطّ‑توال ءيس‑ن‑دارون‑وشكيغ. والاينّي غمكلّي ءيتياران: «تاغاوسا نّا‑يجران، ف‑يمي ن‑سين ءيناگان نغد كراض ا‑س‑را‑تزگا.» ءيمّا غيلاد غ‑د‑فلّاون‑اگّوگغ، راد‑اون‑ينيغ مايلّي‑س‑اون‑نّيغ س‑لحقّ غاكود لّيغ‑ن‑دارون‑وشكيغ تيس سنات‑توال. نّيغ‑ت غاكودان ءي‑ويلّي سكارنين ما‑يُخشنّ ءينيغ‑اون‑ت كولّوكن. راد‑اون‑ت‑داغ‑ينيغ: ءيغ‑ن‑دارون‑وورّيغ تاوالا ياضني، ءور‑اكُّ‑راد‑رخوغ د‑يان ءيسكارن ما‑يُخشنّ. غمكاد ا‑س‑راد‑اون‑ملغ تاماتارت لّي‑زگيگي‑تضالبم، باش ا‑تيسّانم ءيزد لماسيح ا‑يساوالن ف‑يمي‑نو. اشكو ءيتجهّد نتّا غ‑گراتون. ءور‑يضعف لّيغ ا‑ديدون‑يسكار. س‑ضّعف ا‑س‑يمّوت ف‑وگّجدي، ءيمّا غيلاد ءيدّر س‑تحكيمت ءيتجهّدن ن‑ربّي. نضعف ءولا نكُّني زوند نتّان، والاينّي س‑تحكيمت ءيتجهّدن ن‑ربّي ا‑س‑ا‑ديدون‑نسكار، اشكو نمون ديدس غ‑تودرت‑نس. سيگّلات غ‑يخف‑نّون ا‑تژرم ءيس‑تزگام غ‑وغاراس لّماسيح. ژرات مامنك ا‑تگام. ءيس‑ور‑تسّينم ماياد؟ ءيلّا ياسوع لماسيح غ‑وگُنس‑نّون، ءيغ‑نّيت‑ور‑تجليم زغ‑وغاراس. رجوغ‑ن گيگون ا‑ور‑تسوينگيمّ ءيزد نكُّني ا‑يجلان. ءيمّا غيلاد ار‑نتضالاب ربّي فلّاون ا‑ور‑تسكارم كرا يُخشنّ. ءور‑ا‑ت‑نتضالاب ف‑يخف‑نّغ ا‑گينّغ‑يبان ءيس‑نسكر كرا، واخّا ءيغ‑غالن كرا ن‑مدّن ءور‑نسكير يات. والاينّي ار‑ت‑نتضالاب فلّاون باش ا‑يبان ءيس‑تسكرم افولكي. اشكو ءور‑نسّوگير يات ءي‑لحقّ. ءور‑نژضار ابلا ا‑سرس‑نسكار. ءيمّا نكُّني ار‑نتفراح غاكود نّا‑نضعف تجهّدم كونّي، والاينّي ار‑نتضالاب ربّي ا‑توورّيم تفولكيم س‑وفولكي ءيكمّلن. مايان ا‑ف‑اون‑ين‑وريغ تابرات‑اد، غيلاد غ‑د‑فلّاون‑اگّوگغ. ءيژلي‑يّي سيديتنّغ اد‑اون‑مالاغ ما‑كُن‑د‑يقّانّ ا‑تي‑تسكارم، ءورد ف‑ا‑كُن‑هلكغ والاينّي ف‑ا‑كُن‑عاونغ. والاينّي غاكود لّيغ را‑ن‑دارون‑اشكغ ءور‑ريغ ا‑ن‑افغ ءيس‑يّي‑يخصّا اد‑ديدون‑شقوغ. واي‑ايتما، اوال‑ينو ءيگُّران ءيگا‑ت: فرحات، ار‑تسكارم ف‑وفولكي، ار‑تزّعامّ ءي‑نگراتون، تگم يان غ‑يسوينگيمن‑نّون، ار‑تزرايم غ‑سّلامت. غمكاد ا‑س‑راد‑بدّا‑ديدون‑ييلي ربّي لّحنانت د‑سّلامت. تنسالّامات ءي‑نگراتون س‑ونسالّام ن‑تاگُمات. ار‑ن‑فلّاون‑تسلّامن كولّو ءيمژلاين ن‑ربّي. اد‑اون‑تيلي لباراكا ن‑سيديتنّغ ياسوع لماسيح ءولا لحنانت ن‑ربّي ءولا تامونت ن‑رّوح لقودوس كولّوكن. زغ‑بولُس ءيگان ارقّاس س‑ترقّاست لّي‑ور‑يگين تين بنادم ءولا ژلين‑يّي سرس مدّن، والاينّي ءيژلي‑يّي سرس ياسوع لماسيح د‑ربّي باباتنّغ لّي‑ت‑يد‑يسّنكرن زغ‑لموت. زغ‑گيگي نكّي د‑ايتماتن لّي‑ديدي‑يلّان، ءي‑يمناگّارن غ‑تمازيرت ن‑گالاطيّا. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. نتّان ا‑يفكان ءيخف‑نس، ءيمّت باش اد‑اغ‑يجّنجم زغ‑دّنوب‑نّغ. ءيفوكّو‑اغ زغ‑دّونيت‑اد يُخشنّ غمكلّي ءيرا ربّي باباتنّغ. ار‑ت‑باهرا‑نتالغ، غيلاد ءولا كولّو مايد‑د‑يفتان، امين. ءيمّا كونّي، ءيضر‑يّي لعجب گيگون. اشكو غير يات لوقت ءيدروسن ايد تزّريم س‑تفلم ربّي لّي‑اون‑يغران س‑لباراكا لّماسيح. توورّيم س‑يان‑وغاراس ياضني، ار‑اس‑تّينين كرا ن‑مدّن ‹لخبار ءيفولكين› والاينّي ءورد لخبار ءيفولكين ايان. سّنغ ءيس‑لّان كرا ن‑مدّن غ‑دارون ار‑اون‑تّ‑سّطيّارن، ءيرين ا‑تبدّالن لخبار ءيفولكين لّماسيح س‑تكركاس. والاينّي ءيغ‑ن‑يوشكا كرا ن‑يان ار‑اون‑يمالا كرا مي ءيتّيني ‹لخبار ءيفولكين› ءور‑يگين لخبار لّي‑اون‑ين‑نيوي غ‑يسيزوار، را‑فلّاس‑ينيغ «ا‑ت‑يهلك ربّي» واخّا نكّي نغد كرا لّمالاك زغ‑يگنوان. ننّا‑ياون غايد ءيزرين، ءينيغ‑اون‑داغ غيلاد: ءيغ‑ن‑يوشكا كرا ن‑يان ار‑اون‑يمالا كرا مي ءيتّيني ‹لخبار ءيفولكين› ءور‑يگين لخبار ءيفولكين لّي‑تومژم زغ‑يسيزوار، هاتي نّيغ فلّاس «ا‑ت‑يهلك ربّي.» ما‑تغالم كونّي؟ ءيزد مدّن اد‑ريغ اد‑فلّا‑رضون، نغد ربّي؟ ءيزد مدّن اد‑ريغ ا‑يّي‑تالغن؟ ءوهو، مراد ءيس‑ريغ ا‑يّي‑تالغن مدّن ءور‑راد‑گغ اخدّام لّماسيح. واي‑ايتما، ريغ ا‑تيسّانم ماياد. ءورد زغ‑بنادم ا‑زغ‑د‑يوشكا لخبار ءيفولكين لّي‑س‑ا‑تبرّاحغ. اشكو ءور‑ت‑ومژغ دار مدّن ءولا سّلمدن‑يّي‑ت مدّن، والاينّي ءيسّبايّن‑يّي‑ت‑يد ياسوع لماسيح. تسفلدم كونّي ف‑مامنك ا‑ستّين‑كّيغ ار‑باهرا‑سكارغ س‑تنباضين ن‑ايت‑يودايا، ار‑سّرفوفونغ ايتماتن ن‑ومناگّار ن‑ربّي س‑ترفوفنت ءيشقان، ار‑ن‑تگّاغ تيقّي‑نو اد‑هلكغ امناگّار ا‑ور‑سول‑يقاما. غ‑ووسّان‑ان زوارغ ما‑يگّوتن غ‑ينگّان‑ينو ن‑ايت‑يودايا، اشكو عزّانت داري باهرا لعادات ن‑يمزوورا‑نّغ لّي‑زرينين. والاينّي ربّي لّي‑يّي‑يژلين لّيغ ءور‑تا‑لولغ، ءيحنّا گيگي ءيرضو اد‑يّي‑يغر ءيسّبايّن‑يّي يوس، باش اد‑دّوغ ار‑فلّاس‑تبرّاحغ غ‑دار ايت‑تميزار اگّوگنين. ءور‑سقساغ كرا ن‑بنادم ءولا دّيغ س‑وروشاليم اد‑ساولغ د‑يرقّاسن لّي‑يّي‑زوارنين، والاينّي فّوغّ مودّوغ س‑تمازيرت ن‑واعرابن. يان كرا وورّيغ س‑تمدينت ن‑ديماشق. زرين كراض ءيسگُّاسن س‑دّيغ س‑وروشاليم ا‑غين‑ساولغ د‑بطرُس. گاورغ ديدس سمّوس د‑مراو ن‑واسّ. والاينّي ءور‑ژريغ ءيرقّاسن ياضني ابلا ياعقوب گماس ن‑سيديتنّغ. مايد‑اون‑ين‑وريغ، ربّي ءيسّن ءيس‑ور‑گيس‑سّكاركسغ. فّوغّ ءيلمّا ار‑تمودّوغ غ‑تميزار ن‑سوريّا د‑كيليكيّا. غ‑ووسّان‑ان ءور‑تا‑يّي‑سّينّ ايت‑يمناگّارن غ‑تمازيرت ن‑يودايا. غير سفلدن فلّا، ار‑تّينين «غوالّي‑ستّين ءيكّان ار‑اغ‑يسّرفوفون، هاتي ار‑يتبرّاح غيلاد ف‑وغاراس لّي‑ف‑يقصاد ا‑ت‑يهلك.» ار‑باهرا‑تالغن ربّي ف‑سّيبت‑ينو. زرين كّوژ د‑مراو ن‑وسگُّاس س‑وورّيغ س‑وروشاليم نكّي د‑بارنابا، اويغ ديدي تيطوس. ءيملا‑يّي ربّي ءيس‑يّي‑د‑يقّان اد‑دّوغ س‑غين. مناگّارغ غاكودان د‑ويلّي مي تّينين ءينمغورن. نّيغ‑اسن غ‑گريّي ديدسن ف‑مامنك ا‑يگا‑واوال لّخبار ءيفولكين لّي‑س‑ا‑تبرّاحغ غ‑دار ايت‑تميزار اگّوگنين، اشكو كسوضغ ا‑ور‑را‑تيلي لفايتّ غ‑ماد‑سكرغ ءولا غ‑مايد سول سكارغ. ءيمّا نتني ءور‑اغ‑وصّان ا‑نژّالّ ءي‑دّات ن‑وسمون‑ينو تيطوس واخّا ءيگا گو‑يونان. والاينّي لّان غين كرا ن‑مدّن سكرن زوند ءيغ‑گان ايتماتنّغ، كشمن دارنّغ س‑تنتلا، ءيرين اد‑ژرن مامنك ا‑نسكار غيلاد غ‑اغ‑يرژم لماسيح زغ‑يسكراف ن‑شّرع. ار‑تّيرين اد‑اغ‑كرسن‑داغ زوند ءيسمگان. ءيمّا نكُّني ءور‑اكُّ‑نقبيل يات غ‑مايلّي‑اغ‑تّينين، باش ا‑ور‑فلّاون‑كّيسن لحقّ لّخبار ءيفولكين. ءيمّا غويلّي‑ف‑ا‑تّينين مدّن زوند ءيغ‑گان كرا (واخّا ءور‑يّي‑يهمّا ماد‑گان اشكو ربّي ءور‑ا‑يسكار س‑وودماون)، نتني ءور‑يّي‑نّين كرا ن‑وسوينگيم ياضني. والاينّي ژران ءيس‑يّي‑يفكا ربّي اد‑سّلكمغ لخبار ءيفولكين ءي‑ايت‑تميزار ياضني، غمكلّي ءيفكا ءي‑بطرُس ا‑ت‑يسّلكم ءي‑ايت‑يودايا. اشكو ربّي لّي‑يتخدامن غ‑بطرُس باش ا‑يگ ارقّاس ءي‑ايت‑يودايا، ار‑گيگي‑يتخدام ءولا نكّي باش اد‑گغ ارقّاس ءي‑ايت‑تميزار ياضني. ءيمّا ياعقوب د‑بطرُس د‑يوحانّا لّي‑مي‑تّينين مدّن ءينمغورن، لّيغ ژران ماياد، مدين‑اغ‑د افوس‑نسن افاسي نكّي د‑بارنابا. مشاشكان‑د ديدنّغ ا‑نتمعاوان ءي‑نگراتنّغ، ار‑نتخدام نكُّني غ‑تميزار ياضني ار‑تخدامن نتني غ‑دار ايت‑يودايا. ءور‑گينّغ‑رين ابلا يات‑تغاوسا. ران گينّغ ا‑ستّ‑نتاوي غ‑يمژلاض لّي‑دارسن‑يلّان. ءيمّا نكّي سوانگمغ يادلّي ف‑مايان، ءيريغ باهرا ا‑ت‑سكرغ. والاينّي غاكود لّيغ‑د‑يوشكا بطرُس س‑تمدينت ن‑انطاكيّا، نكرغ سرس غ‑لگدّام ن‑ايتماتن، اشكو ءور‑ا‑يسكار س‑لحقّ. نتّا غ‑يسيزوار ار‑يشتّا د‑ايتماتن ن‑تميزار ياضني، والاينّي غاكود لّيغ‑د‑وشكان كرا ن‑يمدّوكُّال ن‑ياعقوب، يوورّي بطرُس ءور‑ا‑سول‑يشتّا د‑مدّن‑ان ءولا‑دا‑ديدسن‑يتمونو، اشكو ءيكسوض زغ‑ويلّي ءور‑يتقبالن وينّا ءور‑ژّولّينين ءي‑دّات‑نسن. غاكودان نكرن وييّاض ن‑ايت‑يودايا سكرن سين‑وودماون غمكلّي ءيسكر بطرُس، ايلّيغ‑تن‑يتابعا ءولا بارنابا. ءيمّا نكّي، لّيغ ژريغ ءور‑ا‑تامژن غ‑لحقّ لّخبار ءيفولكين، ساولغ س‑بطرُس غ‑لگدّام‑نسن كولّوتن نّيغ‑اس: «كيّي گو‑يودايا ا‑تگيت، والاينّي تميارت ا‑تسكارت زوند ايت‑تميزار ياضني ءورد ايت‑يودايا. مامنك غيلاد ا‑تريت ا‑تّينيت ءيقّان‑د ايت‑تميزار ياضني اد‑سكارن س‑شّرع ن‑ايت‑يودايا؟» ها‑نكُّني لاصل‑نّغ ءيگا زغ‑ايت‑يودايا، ءورد زغ‑ايت‑تميزار ياضني لّي‑مي‑تّينين ‹ايت‑دّنوب›. والاينّي نسّن تاغاوسا‑ياد باهرا. را‑يرضو ربّي ف‑وينّا ءومنّين س‑ياسوع لماسيح، ءورد ف‑ويلّي سكارنين س‑ما‑يتياران غ‑شّرع ن‑موسا. ماياد ا‑س‑اغ‑د‑يقّان ءولا نكُّني ن‑ايت‑يودايا ا‑نامن س‑ياسوع لماسيح. ف‑سّيبت لّماسيح ا‑ف‑فلّانّغ‑يرضا ربّي، ءورد ف‑سّيبت ن‑كرا نسكار ءيگان وين شّرع. اشكو ءور‑يژضار يان ا‑يرضو ربّي س‑يسكّيرن ن‑شّرع. والاينّي غيلاد غ‑ا‑نترجو ا‑فلّانّغ‑يرضو ربّي ف‑سّيبت لّماسيح، ما‑را‑نيني ءيغ‑ا‑سول‑نتافا دّنوب غ‑يخف‑نّغ زوند ايت‑تميزار‑ان ياضني؟ ءيس‑ا‑ياغ‑يفال لماسيح ا‑نتزاياد غ‑دّنوب؟ ءوهو، ءورد غمكان ا‑نگا. اشكو مراد ءيس‑ا‑بنّوغ ف‑غايلّي خُليغ، را‑گيگي‑يبان ءيزد دّنوب اد‑سكارغ. والاينّي گيغ غيلاد زوند ءيغ‑يّي‑ينغا شّرع مّتغ‑اس، باش اد‑د‑نكرغ دّرغ ءي‑ربّي. ها‑يّي مّوتغ د‑لماسيح ف‑وگّجدي‑نس. ءورد سول نكّي ا‑يدّرن والاينّي لماسيح ا‑گيگي‑يدّرن. كولّو ماد‑سكارغ غيلاد، ار‑ت‑سكارغ ف‑سّيبت ن‑ماد‑ومنغ س‑يوس ن‑ربّي لّي‑گيگي‑يحنّان ءيفك تودرت‑نس فلّا. ءور‑رورغ لحنانت‑اد ن‑ربّي زوند ءيغ‑ور‑تگي يات. اشكو مراد ءيس‑نژضار ا‑نرضو ربّي س‑يسكّيرن ن‑شّرع، بلا لفايتّ ا‑را‑تگ لموت لّماسيح. وا‑كونّي ن‑ايت‑گالاطيّا، ءيزد تفّوغم ءيخف‑نّون؟ ءيس‑كُن‑يسّنوفل كرا ن‑يان؟ نملا‑ياون يادلّي مامنك ا‑يمّوت ياسوع لماسيح ف‑وگّجدي، تيسّانم‑ت باهرا. ءيمّا غيلاد را‑كُن‑سقساغ، ءيزد ف‑سّيبت ن‑ما‑تسكارم س‑شّرع ن‑موسا ا‑ف‑اون‑ين‑يوشكا رّوح لقودوس، نغد ف‑سّيبت ن‑ما‑تسفلدم ءي‑لخبار‑نّغ ءيفولكين تامنم سرس؟ ءيس‑نّيت‑تفّوغم ءيخف‑نّون؟ تگرام غ‑تودرت‑اد لّجديد س‑تحكيمت ن‑رّوح لقودوس، ءيمّا غيلاد ءيس‑ترام ا‑گيس‑تزايدم س‑يسكّيرن ن‑بنادم؟ ءيس‑ور‑يگي يات، كولّو مايلّي دارون ءيجران غايد زرينين؟ ءيزد ف‑سّيبت ن‑ما‑تسكارم س‑شّرع ا‑ف‑اون‑ياكّا ربّي رّوح لقودوس ار‑دارون‑يسكار لمعجيزات، نغد ف‑سّيبت ن‑ما‑تسفلدم ءي‑لخبار ءيفولكين تامنم سرس؟ ءولا ءيبراهيم، ءيتيارا فلّاس: «يومن ربّي، مايان ا‑ف‑ت‑يگا ربّي د‑واد ف‑يرضا.» ريغ ا‑تيسّانم ماياد. ايت‑يبراهيم، ا‑تن‑يگان د‑ويلّي ءومنّين. اشكو ءيتيارا غ‑وارّا ن‑ربّي ف‑مامنك ا‑را‑يرضو ربّي ءولا ف‑ايت‑تميزار اگّوگنين ف‑سّيبت ماد‑ومنّ. ءيساول ربّي س‑يبراهيم ءيمل‑اس لخبار ءيفولكين لّي‑را‑ييلي ييني‑اس: «س‑يسم‑نّك ا‑س‑راد‑باركغ كولّو تيميزار ن‑دّونيت.» غمكاد ا‑س‑نسّن ءيس‑را‑يبارك ربّي كولّو وانّا يومنّ غمكلّي ءيبارك ءيبراهيم لّي‑يومنّ. كولّو ويلّي ءيتّيرين اد‑رضون ربّي س‑يسكّيرن ن‑شّرع، هاتي غ‑دّو لحوكم ا‑غ‑سول‑قامان. اشكو ءيتيارا: «ربّي را‑يوت لحوكم س‑جهنّاما ف‑كرايگاتّ يان ءور‑يسكارن س‑كولّو ما‑يتياران غ‑وارّاتن ن‑شّرع.» ءيملا‑ياغ‑واوال‑اد ءيس‑ور‑يژضار يان ا‑يرضو ربّي س‑يسكّيرن ن‑شّرع، والاينّي ءيتيارا‑داغ ءينّا ربّي: «وانّا يومنّ، نتّان ا‑ف‑راد‑رضوغ فكغ‑اس تودرت.» وانّا ءيبنّون ف‑شّرع، ءور‑ا‑يتاوي رّجا س‑ما‑يومن، اشكو غمكلّي ءيتياران: «يان ءيسكارن كولّو س‑يسكّيرن‑اد، راد‑اس‑يفك ربّي تودرت ف‑سّيبت‑نسن.» ءيمّا لماسيح ءيفوكّا‑ياغ زغ‑لعقوبيت لّي‑را‑يضر ف‑ويلّي ءيبنّون ف‑شّرع. يوورّي ءيگا نتّا واد‑ف‑تضر لعقوبيت، باش ا‑ور‑فلّانّغ‑تضر نكُّني. اشكو ءيتيارا: «كولّو وانّا ءيتياگّالن ف‑وگّجدي، لعقوبيت ن‑ربّي ا‑فلّاس‑يلّان.» ءيمّوت لماسيح ياسوع باش اد‑كشمن ءولا ايت‑تميزار اگّوگنين س‑لباراكا لّي‑ف‑ينّا ربّي ءي‑يبراهيم، نامژ كولّواغ رّوح لقودوس لّي‑ف‑ينّا ربّي راد‑اغ‑ت‑يفك. كولّو ماياد راد‑اغ‑ييلي ف‑سّيبت ن‑ما‑نومن. واي‑ايتما، نسّن ماد‑سكارن مدّن ءيغ‑د‑مشاشكان ف‑كرا ن‑تغاوسا. ار‑اكّان لعهد ءي‑نگراتسن. ءيغ‑سكرن لعهد، ءور‑يژضار يان ا‑يانف ءي‑لعهد‑ان ءولا‑ياس‑يزايد كرا. غايد ءيزرين ار‑يساوال ربّي س‑يبراهيم ار‑اس‑يتّيني ف‑ما‑راد‑اس‑يفك ءي‑يبراهيم، نتّا د‑وامود‑نس. ءور‑اس‑ينّي «را‑ت‑فكغ ءي‑يمادن‑نّك» زوند ءيغ‑گان مدّن گّوتنين، والاينّي ءينّا‑ياس «را‑ت‑فكغ ءي‑وامود‑نّك» ءيگان يان ءيگ لماسيح. لمعنا‑ياد، ريغ اد‑اون‑سرس‑ملغ ماياد. ربّي ءيفكا يا‑لّعهد ءي‑يبراهيم، ييني‑اس راد‑اس‑ت‑يزّگا. زرين كّوژ ءيد‑ميّا د‑كراض ءيد‑مراو (430) ن‑وسگُّاس، ءيفك ءيلمّا ربّي شّرع ءي‑مدّن‑نس. والاينّي ءور‑يژضار شّرع ن‑موسا ا‑يسّانف ءي‑لعهد لّي‑ت‑يد‑يزوارن، ءولا ءيژضار ا‑يكّيس اوال لّي‑س‑ياد‑ينّا ربّي ءي‑يبراهيم. اشكو ربّي، مراد ءيس‑يفكا لوورت‑نس غير ءي‑ويلّي سكارنين س‑شّرع، ءيكون ءور‑اكُّ‑يقاما غ‑واوال لّي‑س‑ياد‑ينّا ءي‑يبراهيم. والاينّي ءورد غمكان ا‑يسكر ربّي، اشكو س‑واوال‑نس ءيزگان ا‑س‑يفكا لوورت ءي‑يبراهيم. ءيمّا غيلاد ما‑را‑نيني ف‑شّرع؟ ماخ ايلّيغ‑ت‑يد‑يزوويد ربّي ءي‑مدّن‑نس؟ ءيزوويد‑اسن‑ت باش اد‑اسن‑يمالا دّنوب لّي‑سكارن. ءيقاما شّرع غير ار اكود لّيغ‑د‑يوشكا‑وامود ن‑يبراهيم لّي‑ف‑ياد‑ينّا ربّي. ف‑وفوس لّمالايكا ا‑ف‑اسن‑يفكا شّرع، د‑نتني سّبايّنّ‑ت‑يد ءي‑موسا، د‑نتّا ءيسّبايّن‑ت‑يد ءي‑وييّاض. والاينّي اوال لّي‑يفكا ربّي ءي‑يبراهيم، ءيفكا‑ياس‑ت غ‑گراس ديدس، ءور‑ت‑يخصّا يان ياضني. ءيمّا غيلاد ما‑را‑نيني؟ ءيس‑يسّونف شّرع ءيواليون ن‑ربّي لّي‑س‑ياد‑ينّا ءي‑يبراهيم؟ ءوهو، ءور‑ت‑يسّونف. اشكو بنادم، مراد ءيس‑اس‑يتياوفكا كرا ن‑شّرع ما‑س‑ا‑يتطّاف تودرت، را‑يرضو ربّي ف‑كرايگاتّ يان ءيسكارن س‑شّرع. والاينّي ارّاتن ن‑ربّي ار‑مالان مامنك ا‑تّياماژ دّونيت كولّوتّ غ‑دّو لحوكم ن‑دّنوب. ءيمّا لوورت لّي‑ف‑ينّا ربّي ءي‑يبراهيم، ار‑ت‑ياكّا ءي‑ويلّي ءومنّين س‑ياسوع لماسيح، ار‑اسن‑ت‑ياكّا غيلاد ف‑سّيبت لّيمان‑نسن. غ‑وزمز لّي‑غ‑ور‑تا‑د‑يوشكي لماسيح ءور‑تا‑سرس‑نومين، نتياوكرّاف سول س‑يسكراف ن‑شّرع. ار‑اغ‑تحصارن‑وارّاتن ن‑شّرع ار كيغ‑د‑يلكم‑وزمز‑اد غ‑نومن س‑لماسيح. ءيكّا‑تّين ءيگا شّرع انگابال فلّانّغ، ار‑اغ‑يتربّا ايلّيغ‑د‑يوشكا لماسيح ءيسكر سّلامت غ‑گر ربّي د‑ويلّي سرس ءومنّين. ءيمّا غيلاد غ‑د‑يلكم‑وزمز لّيمان، ءور‑سول‑يگي شّرع انگابال‑نّغ. ها‑كونّي كولّوكن، تاروا ن‑ربّي ا‑تگام ف‑سّيبت ن‑ما‑تومنم س‑لماسيح ياسوع. اشكو كولّو وانّا گيگون ءيدّمن س‑ودوم ن‑وامان باش ا‑يمل ءيس‑يگا وين لماسيح، هاتي يوورّي ءيدّر س‑تودرت لّماسيح. ماياد ا‑ف‑ور‑ا‑سول‑نژّمژلاي گو‑يودايا زغ‑گو‑يونان، ءولا‑دا‑نژّمژلاي اوتم زغ‑تاوتمت ءولا ءيسمگ زغ‑واد‑يگان وين ءيخف‑نس، اشكو تگام كولّو يان غ‑لماسيح ياسوع. والاينّي لّيغ تگام وين لماسيح، هاتي ايت‑يبراهيم ا‑تگام. را‑تامژم لوورت لّي‑ف‑اس‑ينّا ربّي را‑ت‑يفك ءي‑تاروا‑نس. والاينّي غمكاد ا‑يگا كولّو وانّا يوورتن. لّيغ سول ءيمژّي، ءيگ زوند ءيسمگ غ‑تگمّي ن‑باباس، واخّا را‑يطّاف كولّو ايدا ن‑باباس تيگيرا. اشكو ءيلّا سول غ‑دّو‑وفوس ن‑ويلّي‑ت‑يگابلن د‑ويلّي دار ءيفل باباس لامانت لّوورت‑نس، ارد ءيروح‑وزمز لّي‑ف‑يقصاد باباس ا‑ت‑گيس‑يامژ. ءولا نكُّني نكّا‑تّين نگا غمكان. غاكود لّيغ سول نمژّي، نگا زوند ءيسمگان غ‑دّو‑سّولطا لّارواح ن‑دّونيت‑اد. والاينّي غاكود لّيغ‑د‑يروح‑وزمز، ربّي يوزن‑د يوس س‑دّونيت. ءيلول‑د زغ‑واحليگ ن‑يات‑تمغارت، يوورّي ييلي ءولا نتّا غ‑دّو شّرع، باش ا‑يفوكّو وينّا لّانين غ‑دّو شّرع ءيرار‑اغ ا‑نگ تاروا ن‑ربّي. غمكاد اد‑اغ‑يملان ءيس‑نگا تاروا ن‑ربّي، اشكو يوزن‑د رّوح ن‑يوس ءيزدغ غ‑وولاون‑نّغ، ءيرار‑اغ ا‑سرس‑ناقرا: «ابّا، وا‑بابا.» هاتي ءور‑سول‑تگيم ءيسمگان، والاينّي توورّيم تگام تاروا ن‑ربّي. د‑وانّا ءيگان زغ‑تاروا ن‑ربّي، را‑يوورت لباراكات ن‑ربّي. غايد ءيزرين ءور‑تسّينم ربّي. تكّام‑تّين تگام ءيسمگان ءي‑كرا لّقوّات لّي‑ور‑گينين ربّي. ءيمّا غيلاد غ‑تسّنم ربّي (نغد يوف اد‑ينيغ، غيلاد غ‑كُن‑يسّن ربّي)، ماخ ايلّيغ ترام ا‑توورّيم‑داغ تگم ءيسمگان ءي‑لارواح‑ان لّي‑ور‑گينين يات ءولا ژضارن اد‑سكرن يات؟ هان توورّيم غيلاد ار‑تسكارم ف‑ووسّان لّعيد‑نسن د‑ييرن‑نسن د‑يزماز‑نسن د‑يسگُّاسن‑نسن. ها‑يّي ءوسيغ فلّاون تاغوفت. ءيزد بلا لفايتّ اد‑خدمغ نهاتافغ غ‑گراتون؟ واي‑ايتما، ضالبغ زغ‑گيگون ا‑ديدي‑تبيدّم غمكلّي‑بدّا‑ديدون‑تبدّادغ. غايد ءيزرين ءور‑جّو‑گيگي‑تسكيرم كرا يُخشنّ. تسّنم ءيزد ف‑سّيبت ن‑ماد‑وضنغ ا‑ف‑ن‑دارون‑وشكيغ غ‑يسيزوار، اويغ‑اون‑ين لخبار ءيفولكين. واخّا فلّاون تشقا‑تماضونت‑ينو، ءور‑يّي‑تحگيرم ءولا ترورم‑يّي، والاينّي تشّكشمّ‑يّي‑ن س‑دارون تفرحم سري زوند ءيغ‑گيغ يا‑لّمالاك زغ‑دار ربّي، زوند‑نّيت ءيغ‑گيغ لماسيح ياسوع. ما‑س‑يگُّرا لفرح‑نّون لّي‑س‑سري‑تفرحم؟ سّنغ غ‑ووسّان‑ان مراد ءيس‑تژضارم ا‑تسّوكفم الّن‑نّون ءيكون تفكام‑يّي‑تنت. ءيمّا غيلاد ءيس‑يّي‑تگام د‑ونوّاش‑نّون ف‑سّيبت ن‑ماد‑اون‑نّيغ لحقّ؟ مدّن‑ان ار‑تّ‑گيگون‑تاوين باهرا، والاينّي ءورد ف‑كرا ءيفولكين. ءور‑رين ابلا ا‑كُن‑ديدي‑سّنگاران، باش ا‑ستّ‑گيسن‑تّاويم غير نتني. ءيشوا ا‑ستّي‑تاويم غ‑كرا، ءيغ‑يگا كرا ءيفولكين. ءيشوا‑بدّا، زوند ءيغ‑ن‑ديدون‑لّيغ زوند ءيغ‑فلّاون‑اگّوگغ. وا‑تاروا‑نو عزّانين، ها‑يّي غيلاد گيغ زوند تامغارت لّي‑را‑يارو، ءيزري‑فلّا‑ونگاژ ن‑تلاليت‑نّون ارد گيگون تيمغور‑تحكيمت لّماسيح. امار يوفان ا‑ن‑ديدون‑يليغ غيلاد، ساولغ‑اون ف‑واوال ياضني. هاتي ءوسيغ فلّاون تاغوفت باهرا. وا‑كونّي لّي‑يران ا‑تسكارم كولّو س‑شّرع، را‑كُن‑سقساغ ف‑شّرع: ءيس‑ور‑تسّينم ما‑گيس‑يتياران؟ ءيملا‑ياغ ف‑يبراهيم ءيس‑دارس سين تاروا، يان تورو‑ت‑تسمگت‑نس د‑يان تورو‑ت‑تمغارت‑نس. يوس ن‑تسمگت، تورو‑ت غمكلّي تارونت‑توتمين، ءيمّا يوس ن‑تمغارت‑نس، تورو‑ت ف‑سّيبت ن‑يان‑واوال لّي‑ينّا ربّي ءي‑يبراهيم. مايد ءيجران، تلّا‑ياس يات لمعنا ءينتلن. اشكو سنات‑تمغارين‑ان رواسنت ءي‑سين ءيد‑لعهد. ختالّي يورون ءيسمگان، تگا لمعنا‑نس زوند لعهد ن‑شّرع لّي‑يتياوسكارن غ‑ودرار ن‑سينا. نتّات تگا تيسمگت هاجار. تگا لمعنا ن‑هاجار زوند ادرار ن‑سينا لّي‑يلّان غ‑تمازيرت ن‑واعرابن، تگ زوند تامدينت ن‑وروشاليم د‑يمزدغن‑نس لّي‑گانين ءيسمگان. ءيمّا تايّاض تگا زوند ءوروشاليم ياضني لّي‑يگان تين ءيگنّا. نتّات تگا ءينّاتنّغ سارا، ءور‑اكُّ‑تگي تيسمگت. اشكو ءيتيارا: «وا‑تامغارت لّي‑ور‑جّو‑يورون، وا‑كمّي لّي‑ف‑ور‑جّو‑يزري‑ونگاژ، نكر غيلاد تفرحت ار‑تسّغروتّ. اشكو كمّي لّي‑ن‑يفل‑ورگاز را‑تاروت ءوگُّار ن‑تالّي ءيطّافن ارگاز.» كونّي اي‑ايتما، تگام زوند ءيسحاق، تلولم ف‑سّيبت ن‑واوال ن‑ربّي. والاينّي غمكلّي ءينكر غوالّي ءيلولن زوند كولّو مدّن ار‑يسّرفوفون غوالّي ءيلولن س‑رّوح ن‑ربّي، غمكان اد‑سكارن مدّن ءولا غيلاد. ما‑يتّيني‑وارّا ن‑ربّي؟ ار‑يتّيني: «سّمسر تيسمگت نتّات د‑يوس، اشكو يوس ن‑تسمگت ءور‑را‑يطّاف تاغامت غ‑لوورت ن‑باباس. را‑يگ لوورت كولّوت وين يوس ن‑تالّي ءيگان تامغارت بلا ءيسكراف.» ءيمّا غيلاد اي‑ايتما، ما‑را‑نيني؟ ءورد تاروا ن‑تسمگت ا‑نگا، والاينّي نگا تاروا ن‑تمغارت لّي‑ور‑جّو‑دار ءيسكراف. ءيرژم‑اغ لماسيح باش ا‑ور‑سول‑نگ ءيسمگان ءي‑يات. بيدّات غيلاد تزگام ا‑ور‑توورّيم‑داغ س‑يسكراف ن‑تسموگيت. سفلدات‑يّي نكّي بولُس، راد‑اون‑ينيغ: ءيغ‑ترام ا‑تّغوسم س‑تژالّيت ن‑دّات ءور‑راد‑اون‑ييلي يات غ‑لماسيح. را‑ت‑ينيغ‑داغ س‑لمعقول ءي‑كولّو وانّا ءيران ا‑يژّالّ ءي‑دّات‑نس، ءيغ‑تسكرت غمكان ءيقّان‑ك‑يد ا‑بدّا‑تسكارت س‑كولّو ما‑يتياران غ‑شّرع. وا‑كونّي لّي‑يتّيرين ا‑ترضوم ربّي س‑شّرع، هاتي تسّنگارام ءيخف‑نّون د‑لماسيح، توورّيم تضرم زغ‑لباراكا‑نس. ءيمّا نكُّني نسّن ءيس‑را‑فلّانّغ‑يرضو ربّي ف‑سّيبت ن‑ما‑نومن س‑لماسيح. غمكاد ا‑يگا رّجا ءيصحان لّي‑اغ‑يفكا رّوح لقودوس. اشكو يان ءيگان وين لماسيح، هان تاژالّيت ن‑دّات ءور‑دارس‑تگي يات، زوند ءيغ‑اس‑يژّولّا زوند ءيغ‑اس‑ور‑يژّولّي. اشكو ءيلّا دارس ماد‑باهرا‑يوفن مايان. هاتي يومن س‑لماسيح، ءيعمّر س‑لحنانت‑نس. تكّام‑تّين ار‑تّزايادم غ‑وغاراس لّماسيح. ءيمّا غيلاد ما‑كُن‑يحصارن ا‑ور‑سول‑تسكارم س‑لحقّ؟ ءيسوينگيمن‑ان ءور‑د‑كّين ربّي لّي‑اون‑يغران، والاينّي تاخميرت ءيدروسن ا‑يسّكتاين لعجين ءيگّوتن. ءيمّا نكّي ءومنغ گيگون ءيس‑ور‑را‑تسفليدم س‑كرا ن‑وسوينگيم ياضني، اشكو وين سيديتنّغ ا‑تگام. را‑يحكام نتّا ف‑والّي‑اون‑تّ‑يسّطيّرن، وانّا را‑يگ‑ييت. واي‑ايتما، ءورد نكّين ا‑يتّينين ءي‑مدّن «ءيقّان‑كُن‑د ا‑تژّالّم ءي‑دّات‑نّون». ماياد ا‑ف‑ا‑يّي‑سول‑سّرفوفونّ. اشكو مراد ءيس‑ا‑ياسن‑تّينيغ غمكان، ءور‑را‑يّي‑يتژي يان غاكود نّا‑تبرّاحغ ف‑وگّجدي لّماسيح. ءيمّا مدّن‑ان لّي‑كُن‑يسّندوديين، امار يوفان اد‑بّين ءيگيوّال‑نسن كولّوت. واي‑ايتما، ءيغرا‑ياون ربّي ا‑ترژمّ زغ‑يسكراف. والاينّي ا‑ور‑تّينيم «نتياورژام غيلاد، نژضار ا‑نسكار اينّا ءيرا ءيخف‑نّغ.» اشكو ءيلّا فلّاون ا‑تّحنّوم ار‑تّقاسام ءي‑نگراتون. هاتي تمون‑د لمعنا ن‑شّرع كولّوتّ غ‑يان‑واوال ار‑يتّيني: «ا-تّيريت ادجار‑نّك زوند ءيخف‑نّك.» والاينّي ءيغ‑ا‑تّلبايم ءي‑نگراتون ار‑تشتّام تيفيّي ن‑ينگراتون، هان را‑تهلكم ءي‑نگراتون. والاينّي راد‑اون‑ينيغ، سكارات‑بدّا س‑ماد‑اون‑يمالا رّوح لقودوس بلا‑دا‑تسوينگيمّ غ‑ما‑يتّيري ءيخف‑نّون. اشكو ءول ن‑بنادم ار‑يتّيري ما‑ور‑يتّيري رّوح لقودوس، ءولا رّوح لقودوس ار‑يتّيري ما‑ور‑يتّيري‑وول ن‑بنادم. هاتني ار‑گيگون‑تمّاغن ايلّيغ ءور‑ا‑تسكارم ما‑تّيريم. والاينّي ءيغ‑ا‑تسكارم ماد‑اون‑يمالا رّوح لقودوس، ءور‑را‑سول‑تقامام غ‑يسكراف ن‑شّرع. هان ءيسكّيرن ن‑بنادم، نسّن مامنك اد‑گان. ار‑تزنون ار‑تفسادن ار‑تشتهون ءي‑نگراتسن، ار‑تعبادن ءيلاهات ن‑دّونيت‑اد ار‑سكارن سّيحر، ار‑تكرهون ار‑تژين ار‑تنوّاشن ار‑تبزاگن ف‑ينگراتسن، ار‑تّيرين اد‑اگُرن وييّاض، ار‑تمّاغن د‑وانّا ءور‑زگيسن‑يگين، ار‑رگّمن وانّا ءور‑ديدسن‑يبيدّن، ار‑تّيرين اد‑امژن ما‑ور‑يگين وينسن، ار‑تنوفولن س‑تيسّي ار‑تمونون ف‑تيلّاي‑نسن أُخشنّين، كولّو ءيسكّيرن‑اد د‑ما‑تن‑يرواسن. راد‑اون‑ينيغ س‑لمعقول غمكلّي‑اون‑نّيغ غايد ءيزرين، غويلّي سكارنين غمكان ءور‑راد‑كشمن س‑تگلديت ن‑ربّي. ءيمّا لغلّت ن‑رّوح تگا لحنانت د‑لفرح د‑لهنا د‑صّبر، ار‑نتعاوان وييّاض ار‑ديدسن‑نتفولكي ار‑ديدسن‑نتبدّاد ار‑ديدسن‑نترخو ار‑بدّا‑نقُّاي غ‑يخف‑نّغ. هاتي وان تيغاوسيوين‑اد، ءور‑يلّي كرا ن‑شّرع تنت‑ياگُين. اشكو كولّو وانّا ءيگان وين لماسيح ياسوع، ءيگا ءيخف‑نس د‑واد ءيمّوتن ف‑وگّجدي باش ا‑گيس‑يمّت كولّو ما‑يتّيري بنادم ءي‑يخف‑نس ءولا كولّو ما‑يُخشنّ. ءيمّا غيلاد غ‑ندّر س‑تحكيمت ن‑رّوح لقودوس، ءيلّا فلّانّغ ا‑نسكار س‑ماد‑اغ‑يمالا رّوح لقودوس. ا‑ور‑نسّيمغور ءيخف‑نّغ ءولا‑دا‑نتژي د‑يان ءولا‑دا‑نتّيري ما‑يگان وين وييّاض. واي‑ايتما، ءيغ‑ن‑توفام كرا ن‑يان ءيضر غ‑ما‑يُخشنّ، ءيلّا فلّاون كونّي لّي‑غ‑تلّا لغلّت ن‑رّوح لقودوس ا‑ديدس‑تساولم س‑لحنانت ترارم‑ت س‑وغاراس. والاينّي اويات‑ستّ غ‑يخف‑نّون، ا‑ور‑تضرم ءولا كونّي. تمعاوانات ءي‑نگراتون غ‑اينّا فلّاون ءيژّاين. غمكاد ا‑س‑را‑تسّافاوم لوصيت لّماسيح. والاينّي ءيغ‑يلّا ما‑يغالن ءيس‑يگا كرا، هاتي ءيسّكاركس ف‑يخف‑نس، اشكو ءور‑يگي يات. ءيلّا ف‑كود يان ا‑يسوينگيم غ‑ما‑يسكار باش ا‑يژر ءيس‑يفولكي نغد ءوهو. ءيغ‑يفولكي راد‑اس‑ييلي ما‑س‑ا‑يتفراح د‑يخف‑نس بلا‑دا‑يتمناد غ‑ماد‑سكارن وييّاض. اشكو كود يان را‑ياسي ما‑ت‑يد‑يوشكان. كولّو وانّا ءيتلمادن اوال ن‑ربّي، ءيلّا فلّاس ا‑ياطّو لخير نّا‑دارس‑يلّان د‑ومسلمد‑نس. اد‑ور‑تجلوم ءيخف‑نّون. ءور‑يژضار يان ا‑ستّ‑يزّري ف‑ربّي. امود نّا‑ن‑تلوحم، نتّان ا‑را‑تمگرم. يان ءيسكارن س‑ما‑يتّيري‑وول ن‑بنادم، زغ‑وول‑نس ا‑زغ‑را‑يمگر لموت. ءيمّا يان ءيسكارن س‑ما‑يتّيري رّوح لقودوس، زغ‑رّوح ا‑زغ‑را‑يمگر تودرت ءيدومن. ا‑ور‑نترماي غ‑وفولكي‑اد نسكار، اشكو را‑نمگر صّابت غ‑وزمز‑نس ءيغ‑ور‑نهروصّي. ءيلّا فلّانّغ ا‑نسكار افولكي غ‑كولّو مدّن غاكود نّا‑نوفا، س‑وگُّار غ‑ايتماتنّغ لّي‑ومنّين س‑لماسيح. ژرات منشك ايد‑س‑مقّورنت تيرّا‑ياد‑اون‑ين‑وريغ نكّي س‑وفوس‑ينو. ءيمّا غويلّي‑اون‑يتّينين ا‑تژّالّم ءي‑دّات، ران نتني اد‑رضون مدّن س‑ما‑يگان وين دّات، باش ا‑ور‑رفوفنّ ف‑سّيبت ن‑وگّجدي لّماسيح. ءيمّا ايت‑تژالّيت‑ان، ءولا نتني ءور‑ا‑سكارن كولّو ما‑يتياران غ‑شّرع، والاينّي ار‑گيگون‑تّيرين ا‑تژّالّم ءي‑دّات باش اد‑الغن ءيخف‑نسن ف‑ما‑يتياوسكارن ءي‑دّات‑نّون. ءيمّا نكّي ءور‑راد‑الغّ ابلا اگّجدي ن‑سيديتنّغ ياسوع لماسيح. اشكو س‑وگّجدي لّماسيح ا‑س‑مّوتغ ءي‑دّونيت، ءيمّت‑يّي ما‑يگان وين دّونيت. ءيمّا تاژالّيت ن‑دّات ءور‑تگي يات، زوند ءيغ‑اس‑تژّولّام زوند ءيغ‑اس‑ور‑تژّولّيم. والاينّي تاغاوسا ءيهيّان ا‑ستّ‑يگان تودرت لّجديد لّي‑دارون‑يلّان. اد‑اون‑تيلي سّلامت ن‑ربّي د‑رّحمت‑نس ءي‑كولّو وينّا سكارنين س‑تنباطّ‑اد، ا‑تن‑يگان د‑ايت‑ربّي ن‑صّاحت. ءيمّا غيلاد، ضالبغ‑اون ا‑ور‑سول‑يزايد يان ءي‑تكرّايين‑ينو. اشكو ءيبرّاين‑اد ءوسيغ غ‑دّات‑ينو، نتني تيميتار ن‑ياسوع اد‑گان. ا‑گيگون‑تيلي لباراكا ن‑سيديتنّغ ياسوع لماسيح، اي‑ايتما. امين. زغ‑بولُس ارقّاس لّماسيح ياسوع غمكلّي ءيرا ربّي. ءي‑يمژلاين ن‑ربّي غ‑تمدينت ن‑افسوس لّي‑زگانين غ‑وغاراس لّماسيح ياسوع. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. ار‑باهرا‑نتالغ ربّي باباس ن‑سيديتنّغ ياسوع لماسيح، اشكو ءيبارك‑اغ ف‑وودم لّماسيح س‑كولّو لباراكات ن‑رّوح لّي‑لّانين غ‑تگلديت ن‑يگنّا. لّيغ ءور‑تا‑يخلق دّونيت، ءيژلي‑اغ د‑لماسيح باش ا‑نگ وينس، نغوس غ‑يژري‑نس زغ‑كولّو ما‑يگان لعيب. ءيحنّو گينّغ ءيقصاد اد‑اغ‑يگ د‑تاروا‑نس ف‑وودم ن‑ياسوع لماسيح. غمكان ا‑يرا، ءيرضو سرس. ار‑ت‑باهرا‑نتالغ ف‑لحنانت‑اد ءيگّوتن لّي‑س‑اغ‑يبارك ف‑وودم ن‑يوس ءيعزّان لّي‑اغ‑يفران زغ‑لهالاك س‑يدامّن‑نس، ءيسّيتّي فلّانّغ دّنوب‑نّغ. ماتّا غونشكاد س‑تگّوت لحنانت ن‑ربّي لّي‑س‑اغ‑يبارك، ءولا تاواسّنا‑ياد د‑تحكيمت‑اد لّي‑اغ‑د‑يسّبايّن. اشكو ءيسّبايّن‑اغ‑د تاغاوسا‑ياد ءينتلن، ءيمل‑اغ‑د ما‑يرا ا‑يسكر ءيرضو سرس ءيقصاد‑ت ف‑وفوس لّماسيح، ييري ا‑ت‑يسّافو غ‑يسيگُّرا ن‑دّونيت. هاتي را‑يسّمون كولّو ما‑يلّان غ‑يگنّا ءولا غ‑دّونيت، ءيگ‑ت كولّو غ‑دّو‑وفوس لّماسيح. ربّي ءيژلي‑اغ د‑لماسيح ءولا نكُّني باش ا‑نگ مدّن‑نس، غمكلّي ءيقصاد نتّان لّي‑بدّا‑يسكارن ما‑يرا غ‑كولّو ما‑يجرّون. ءيژلي‑اغ باش ا‑د‑گينّغ‑يبان لمجد‑نس، نكُّني لّي‑يزوارن ءيس‑ن‑نگا رّجا‑نّغ غ‑لماسيح. ءولا كونّي، توورّيم تگام وينس لّيغ‑كُن‑ين‑يلكم‑واوال لّحقّ، ا‑ت‑يگان د‑لخبار ءيفولكين لّي‑س‑تنجمّ. لّيغ تومنم س‑لماسيح ءيتياوفكا‑ياون رّوح لقودوس لّي‑ف‑ينّا ربّي را‑ت‑يفك ءي‑مدّن‑نس، باش ا‑تيسّانم ءيزد وينس ا‑تگام. ءيگا تاماتارت ن‑يس‑را‑يسّافو ربّي كولّو تيميخار لّي‑ف‑ينّا را‑تنت‑يفك ءي‑مدّن‑نس. ماتّا غونشكاد س‑يگّوت لمجد ن‑ربّي، ار‑ت‑نتالغ باهرا. ف‑ماياد ا‑ف‑ا‑بدّا‑فلّاون‑تشكارغ ربّي، اشكو سفلدغ ف‑مامنك ا‑تومنم س‑سيديتنّغ ياسوع، عزّان دارون ءيمژلاين ن‑ربّي كولّوتن. غاكود نّا‑تژالّاغ ار‑كُن‑د‑سوينگيمغ، ار‑تضالابغ باباتنّغ ءيمقّورن لّي‑يگان ربّي ن‑سيديتنّغ ياسوع لماسيح اد‑اون‑ياكّا رّوح ن‑تحكيمت د‑تواسّنا باش ا‑تي‑تيسّانم غمكلّي ءيگا. ار‑تي‑تضالابغ ا‑يرژم الّن لّعاقل‑نّون، باش ا‑تيسّانم ما‑يگا رّجا‑ياد ءيصحان لّي‑مي‑كُن‑يژلي، ءولا لباراكات گّوتنين لّي‑را‑يفك ءي‑يمژلاين‑نس، ءولا تاحكيمت‑نس لّي‑باهرا‑گينّغ‑يتجهّدن نكُّني لّي‑سرس‑يومنّ. اشكو تاحكيمت لّي‑گينّغ‑يلّان، تگا‑ت‑تحكيمت ءيتجهّدن لّي‑س‑د‑يسّنكر لماسيح زغ‑لموت، ءيسّگاور‑ت ف‑وفاسيي‑نس غ‑تاتّويت ن‑تگلديت ن‑يگنّا ف‑وفلّا ن‑كولّو لمالايكا ءولا لارواح ءولا سّولطات ءولا لقوّات، ءيگ ءيسم‑نس ف‑وفلّا ن‑كرايگاتّ ءيسم غ‑دّونيت ءولا ليخرت. ءيگ‑ت د‑وگايّو ف‑كولّو ما‑يلّان، ءيسرس كولّو ما‑يلّان غ‑دّو ءيضارن‑نس س‑لخير ن‑ومناگّار ن‑ويلّي گانين وينس. امناگّار ءيگا دّات لّماسيح، د‑نتّان ا‑غ‑ا‑يتكمّال لماسيح لّي‑يتكمّالن كولّو ما‑يلّان غ‑كرايگاتّ ماني. ءيمّا كونّي غايد ءيزرين تگام زوند ءيغ‑تمّوتم ءي‑ما‑يگان وين ربّي، ف‑سّيبت ن‑دّنوب‑نّون ءولا كولّو ما‑تسكارم يُخشن. تكّام‑تّين ار‑تّيدوم غ‑وغاراس ن‑دّونيت‑اد، ار‑تّضفارم لقوّا يُخشنّ لّي‑يتجهّدن غ‑يگنوان. تگا رّوح لّي‑يتحكامن غيلاد غ‑غويلّي ءور‑سفليدنين س‑ربّي. نكّا‑تّين كولّواغ ار‑ديدسن‑نتّيدو غ‑وغاراس‑ان ار‑نسكار س‑كولّو ما‑يرا بنادم ءي‑يخف‑نس ار‑تّ‑نتاوي غير غ‑يسوينگيمن‑نّغ ءولا شّهوات‑نّغ. ءولا نكُّني غ‑ووسّان‑ان، ءيلّا فلّانّغ لغاضاب ن‑ربّي زوند كولّو مدّن. ءيمّا ربّي، تگّوت دارس رّحمت، ءيحنّو گينّغ س‑لحنانت‑نس ءيگّوتن، ءيسّدّر‑اغ د‑لماسيح غاكود لّيغ سول نمّوت غ‑دّنوب‑نّغ. هاتي س‑لحنانت ن‑ربّي ا‑س‑تنجمّ. ءيسّنكر‑اغ‑د يالّ‑اغ د‑لماسيح ياسوع، ءيسّگاور‑اغ ديدس غ‑تگلديت ن‑يگنّا، باش ا‑يمل، غيلاد ءولا كولّو مايد‑د‑يفتان، منشك ا‑س‑باهرا‑تگّوت لحنانت‑نس لّي‑س‑اغ‑يبارك ف‑سّيبت لّماسيح ياسوع. هاتي ف‑لحنانت‑نس ا‑ف‑تنجمّ لّيغ سرس تومنم. ءورد ف‑سّيبت ن‑كرا تسكارم كونّي، والاينّي تگا تاوافكا ءيفكا‑ياون‑تّ ربّي. ءورد ف‑سّيبت ن‑يفولكيتن‑نّون، باش ا‑ور‑يالغ يان ءيخف‑نس. اشكو ربّي اد‑اغ‑يسكرن غمكان، ءيگ‑اغ د‑وين لماسيح ياسوع باش ا‑نتناوال ءيفولكيتن لّي‑اغ‑زوار‑يجّوجاد ا‑تن‑نسكار. سوينگيماد‑د ما‑تگام غايد ءيزرين، كونّي لّي‑ور‑يگين زغ‑ايت‑ربّي. ار‑اون‑تّينين ‹غويلّي ءور‑ژّولّينين› اشكو ءور‑ا‑تّژالّام ءي‑دّات‑نّون زوند نتني. ءور‑تا‑تسّينم لماسيح غ‑ووسّان‑ان، تيليم غ‑برّا ن‑ايت‑ربّي لّي‑يژلي اد‑گن مدّن‑نس. ءور‑دارون تاغامت غ‑يد‑لعهد لّي‑س‑ا‑ياسن‑يمالا ما‑راد‑اسن‑يسكر. ءور‑دارون رّجا، ءولا تسّنم ربّي غ‑دّونيت. ءيمّا غيلاد ءيسّاكمور‑كُن‑د س‑دارس ف‑سّيبت لّموت لّماسيح ياسوع، كونّي لّي‑ستّين ءيكّان تاگّوگم‑ن. اشكو ءيسكر لماسيح سّلامت غ‑گر ايت‑ربّي د‑ايت‑تميزار ياضني، ءيرار سين اد‑گن يان، ءيسّضر اغُراب ن‑تاژيت لّي‑تن‑يسّنگاران. ءيسّيتّي شّرع س‑لوصيّات‑نس ءولا لفرايض‑نس، باش ا‑يسّمون سين‑اد س‑سّلامت، ءيسكر زغ‑گيسن يات تاسوت لّجديد لّي‑را‑يگ تينس. غمكان ا‑س‑يسكر سّلامت غ‑گراتنّغ كولّواغ د‑ربّي س‑لموت‑نس ف‑وگّجدي، ا‑ور‑سول‑تيلي تاژيت ءي‑نگراتنّغ. لّيغ‑د‑يوشكا لماسيح ياوي‑د لخبار ن‑سّلامت ءي‑كونّي لّي‑ن‑اگّوگنين، والا ءي‑نكُّني لّي‑سرس‑اكمورنين. ف‑سّيبت لّماسيح ا‑ف‑نژضار غيلاد ا‑كولّو‑نكشم س‑دار ربّي باباتنّغ س‑يان‑رّوح لّي‑گينّغ‑يلّان كولّواغ. ءور‑سول‑تگيم ءيبرّانيين ءولا ءيغريبن، اشكو تطّافم ءولا كونّي غيلاد تاغامت غ‑گر ءيمژلاين ن‑ربّي، تگم زغ‑ايت‑تگمّي ن‑ربّي لّي‑يبنّو ف‑لّساس ن‑يرقّاسن د‑لانبيا، ءيگ لماسيح ياسوع اژرو ءيمقّورن ن‑وغژو. نتّان ا‑د‑يسّمونّ ءيژران، ار‑سرسن‑يبنّو يات‑تگمّي ن‑تژالّيت تّياوژلاي ءي‑سيديتنّغ. ءولا كونّي ار‑سرون‑يبنّو باش ا‑كولّو‑نگ يات‑تگمّي، ءيزدغ گيس رّوح ن‑ربّي. مايان ا‑ف‑ا‑فلّاون‑تضالابغ ربّي، نكّي بولُس لّي‑يگان احبّاس ف‑يسم لّماسيح ياسوع ف‑سّيبت ن‑تووري لّي‑سكارغ غ‑گراتون كونّي ن‑تميزار ياضني. ءيس‑ور‑تسفلدم ف‑مامنك اد‑يّي‑يفك ربّي لباراكا‑ياد باش اد‑اون‑تّ‑ين‑سّلكمغ س‑دارون كونّي؟ ءيملا‑يّي‑د تاغاوسا‑ياد لّي‑ينتلن كولّو غايد ءيزرين، ءوريغ‑اون‑ين فلّاس كرا غ‑تبرات‑اد. ءيغ‑تغرام مايلّي ءوريغ را‑تيسّانم تاغاوسا‑ياد لّماسيح غمكلّي‑ستّ‑فهمغ نكّي. ترگس ف‑كولّو تاسوتين لّي‑زرينين، ءيمّا غيلاد ءيسّبايّن‑اغ‑تّ‑يد ربّي س‑تحكيمت ن‑رّوح لقودوس ءي‑غويد ءيژلي اد‑گن ءيرقّاسن‑نس ءولا لانبيا‑نس. ءيمل‑اغ‑د لخبار ءيفولكين ن‑يس‑راد‑كشمن ايت‑تميزار ياضني غ‑لباراكات ن‑ايت‑ربّي ءولا غ‑ومناگّار ن‑ويلّي گانين وينس، امژن ءولا نتني كولّو ما‑ينّا ربّي راد‑اغ‑ت‑يفك ف‑وودم لّماسيح ياسوع. ءيبارك‑يّي ربّي ءيفك‑يّي اد‑سكارغ تاووري‑اد لّخبار ءيفولكين س‑تحكيمت‑نس ءيتجهّدن لّي‑گيگي‑يلّان. واخّا مژّيغ باهرا غ‑گر كولّو ءيمژلاين ن‑ربّي، ءيفكا‑يّي لباراكا‑ياد اد‑تبرّاحغ ءي‑ايت‑تميزار ن‑دّونيت ف‑تميخار لّماسيح لّي‑وگُرنين كولّو ءيسوينگيمن ن‑بنادم. ءيفك‑يّي اد‑مالاغ ءي‑كولّو مدّن تاغاوسا‑ياد ءيهيّان لّي‑فلّاسن‑ينتلن كولّو غايد ءيزرين، ءيقصاد‑ستّ ربّي لّي‑يخلقن كولّو ما‑يلّان. اشكو غيلاد ف‑وفوس ن‑ومناگّار ن‑يمژلاين‑نس ا‑ف‑يرا ربّي ا‑يسّبايّن ءي‑سّولطات ءولا لقوّات ن‑يگنوان منشك ا‑باهرا‑تگّوت‑تحكيمت‑نس لّي‑س‑يكمّل ف‑وفوس لّماسيح ياسوع سيديتنّغ مايلّي ءيقصاد زغ‑يسيزوار. ف‑سّيبت ن‑ما‑يسكر لماسيح ءولا ف‑سّيبت ن‑ما‑سرس‑نومن ا‑ف‑نژضار ا‑ن‑ناكمور س‑ربّي غيلاد بلا‑دا‑نتحشام ءولا‑دا‑نتيكساض. ف‑مايان ا‑ف‑راد‑اون‑ينيغ، ا‑كُن‑ور‑تيگُراژ ف‑ورفوفن‑اد غ‑ا‑زرايغ ف‑سّيبت‑نّون، اشكو ار‑ت‑زّرايغ باش اد‑اون‑يگ لخير كونّي. مايان ا‑ف‑ضرغ ف‑يفادّن‑ينو غ‑لگدّام ن‑ربّي باباتنّغ. نتّان ا‑يفكان ءيسم‑اد‑نس ‹باباتنّغ› ءي‑كولّو‑وينّا دار تاروا غ‑يگنّا ءولا غ‑دّونيت. ضالبغ‑ت اد‑اون‑ياكّا زغ‑تميخار لّمجد‑نس، ءيسّدوس‑كُن غ‑وگُنس‑نّون س‑تحكيمت ءيتجهّدن ن‑رّوح‑نس، باش ا‑يزدغ لماسيح غ‑وول‑نّون غمكلّي سرس تومنم. ضالبغ‑ت ا‑كُن‑يژّو غ‑لحنانت ءيزّگا‑كُن گيس، باش ا‑تيژضارم ا‑تفهمّ، كونّي ءولا كولّو ءيمژلاين ن‑ربّي، منشك ا‑س‑توسعا تيغزّيف تاتّوي تدرو لحنانت لّماسيح، تسّحسّوم غ‑وول‑نّون س‑لحنانت‑نس لّي‑باهرا‑يوگُرن تاواسّنا ن‑بنادم، ارد توورّيم تعمّرم كولّو س‑وفولكي ن‑ربّي. ءيمّا غيلاد ا‑نالغ ربّي لّي‑يژضارن ا‑يسكر ءوگُّار ن‑كولّو ما‑نضالب ءولا كولّو ما‑نسوينگيم س‑تحكيمت‑نس ءيتجهّدن لّي‑گينّغ‑يلّان. اد‑اس‑ييلي لمجد غ‑ومناگّار ءولا غ‑لماسيح ياسوع غ‑كود تاسوت ن‑تاسوتين، غيلاد ءولا كولّو مايد‑د‑يفتان، امين. ءيمّا غيلاد را‑كُن‑ضالبغ باهرا، نكّي‑اد ءيگان احبّاس ف‑يسم ن‑سيديتنّغ. ضالبغ‑كُن ا‑تسكارم غمكلّي ءيلّا ف‑ويلّي ءيژلي ربّي اد‑گن وينس. ژّيمژايات ءيخف‑نّون ار‑تّرخوم ار‑تّصبارم ار‑تّحنّوم ءي‑نگراتون. سكارات كولّو باش ا‑بدّا‑تگم يان غ‑تامونت ن‑سّلامت لّي‑س‑كُن‑د‑يسّمون رّوح لقودوس. يات‑دّات ا‑تگام، ييلي گيگون يان رّوح، غمكلّي دارون يان رّجا لّي‑مي‑كُن‑يژلي ربّي. ييلي يان سيديتون ءولا يان‑وغاراس لّي‑س‑تومنم ءولا يان‑ودوم لّي‑س‑تدّمّ غ‑وامان. ييلي يان ربّي باباس ن‑كرايگاتّ يان، ار‑كُن‑يتگابال، ار‑سرون‑يسكار افولكي، ار‑گيگون‑يتباراك كولّوكن. كرايگاتّ يان گينّغ، تّياوفكا‑ياس كرا لّباراكا س‑ونشك لّي‑تلّا‑توافكا لّماسيح. غمكلّي ءيتياران: «غاكود لّيغ ياتّوي س‑تاتّويت، ياوي ديدس غويلّي ءينرا، ءيفك لباراكات ءي‑مدّن.» والاينّي ماد‑اغ‑يملا‑واوال‑اد ‹ياتّوي›؟ ءيملا‑ياغ ف‑لماسيح ءيس‑يگّوز زوار س‑تدروت ن‑واكال. اشكو غوالّي‑د‑يگّوزن ا‑يگان غوالّي ياتّوين تيگيرا س‑يگّي ن‑يگنوان باش ا‑يكمّل كولّو ما‑يلّان غ‑كرايگاتّ ماني. نتّان ا‑يفكان ءي‑كرا گينّغ اد‑گن ءيرقّاسن‑نس، ءيفك ءي‑وييّاض اد‑ساوالن س‑ماد‑اسن‑يمالا ربّي، ءيفك ءي‑وييّاض اد‑تبرّاحن س‑لخبار ءيفولكين، ءيفك ءي‑وييّاض اد‑تگابالن ار‑سّلمادن مدّن‑نس باش اد‑يژضارن كولّو ءيمژلاين ن‑ربّي اد‑قاسان تاووري ن‑ربّي ار‑سّدوسن دّات لّماسيح. غمكاد ا‑س‑راد‑كولّو‑نتزاياد غ‑وغاراس لّماسيح ارد نوورّي نگ يان، نيسّان يوس ن‑ربّي غمكلّي ءيگا، نوورّي نيمغور زوند لماسيح س‑تموغرا‑نس ءيكمّلن. ءور‑سول‑را‑نگ زوند تاروا مژّينين، ار‑تن‑يتاوي‑واضو ن‑كرايگاتّ المّود لّجديد، ار‑جلّون س‑لحيلات ن‑يمغضارن لّي‑ستّ‑زّراينين ف‑مدّن س‑تكركاس. ءيلّا فلّانّغ ا‑نتّيني لحقّ س‑لحنانت، ار‑نتيمغور غ‑تامونت لّماسيح لّي‑يگان ءيخف‑نّغ. نتّان ا‑يحكامن غ‑دّات ار‑يزدّي ءيگزمان‑نس ار‑تن‑يسّميالّا، كرايگاتّ اگزّوم غ‑يلّيغ ءيرا. غمكاد ا‑س‑را‑تّيمغور دّات ار‑تّدوس س‑لحنانت ءيغ‑ا‑يسكار كرايگاتّ اگزّوم غمكلّي‑ت‑يد‑يقّانّ. ءيمّا غيلاد را‑كُن‑وصّاغ س‑يسم ن‑سيديتنّغ، ءينيغ‑اون ا‑ور‑سول‑تسكارم زوند غويلّي ءور‑سّينّين ربّي. نتني جلان‑تن ءيسوينگيمن‑نسن باهرا، ءيلّاس لعاقل‑نسن. اگّوگن‑ين ف‑تودرت ن‑ربّي، اشكو ءيقّور ءيخف‑نسن ءيقار‑وول‑نسن. وورّين ءور‑سول‑ا‑تحشامن غ‑يات. ار‑سكارن كولّو ماد‑رانت شّهوات‑نسن، ار‑زّراين ءوسّان‑نسن غ‑ما‑يعيبن، ار‑تّيرين ا‑تزايادن غير غ‑يسكّيرن‑نسن أُخشنّين. ءيمّا كونّي، ءورد غمكان ا‑تلمدم ف‑لماسيح. اشكو سّنغ ءيس‑تسفلدم باهرا ف‑ياسوع، تلمدم لحقّ غمكلّي‑ت‑يد‑يسّبايّن نتّا. تلمدم ءيس‑كُن‑يخصّا ا‑تبدّلم زغ‑وگُنس‑نّون، ا‑ور‑سول‑تگم غمكلّي تگام غايد ءيزرين لّيغ تّين‑تكّام ار‑تسكارم ما‑يرا ءيخف‑نّون، تغالم ءيس‑يشوا، ءور‑تسّينم ءيس‑ا‑كُن‑يتاوي س‑لهالاك. تلمدم ءيس‑كُن‑يخصّا ا‑تادجم ربّي ا‑كُن‑يسكر زغ‑لجديد غ‑كولّو ما‑تّيريم ءولا ما‑تسوينگيمّ، باش ا‑توورّيم تگم مدّن لّجديد. اشكو ءيسكر‑كُن ربّي زغ‑لجديد باش ا‑تفولكيم غمكلّي ءيفولكي نتّا، ار‑تسكارم كولّو ما‑ت‑يترضون. مايان ا‑ف‑راد‑اون‑ينيغ، كّيسات فلّاون كولّو تيكركاس. ءيلّا ف‑كود يان ا‑يساوال د‑گماس س‑لحقّ، اشكو نگا كولّواغ يان غ‑دّات لّماسيح. ءيغ‑تقلاقلم ا‑ور‑تادجم غايان ا‑كُن‑يدحي ارد تسكرم كرا يُخشنّ. سّيتّيات اقلاقال‑ان ءور‑تا‑ن‑تضر تافوكت، باش ا‑ور‑تادجم ءي‑يبليس مانيزغ ا‑ن‑سرون‑يكشم. ءيمّا وانّا ءيگان امخّار، ءيخصّا‑ت ا‑ور‑سول‑يتاكُر. ييلي فلّاس ا‑يگر غ‑كرا ن‑تووري، ءيخدم س‑يفاسّن‑نس غ‑كرا ءيشوان، باش ا‑دارس‑ييلي ما‑ياكّا ءي‑ويلّي ءور‑دار يات. ا‑ور‑تادجم كرا ن‑يواليون أُخشنّين ا‑تكّان ءينفورن‑نّون. ساوالات س‑يواليون شوانين لّي‑را‑يعاون غويلّي سفليدنين غ‑مايلّي حتاجّان، اوين‑اسن‑د لباراكا. ا‑ور‑تّي‑تسّطيّارم ءي‑رّوح لقودوس ن‑ربّي لّي‑اون‑يفكا باش ا‑يگ تاماتارت ن‑يس‑تگام وينس ار‑د‑يروح‑واسّ لّي‑غ‑را‑كُن‑يفوكّو زغ‑دّونيت‑اد. ا‑ور‑تّژيم ءولا‑دا‑تّمّاغم ءولا‑دا‑تّكرهوم يان. ا‑ور‑ترگّمّ ءولا‑دا‑تّغوّاتم ءولا‑دا‑تّنوّاشم غ‑يان. ءيلّا فلّاون ا‑تّحنّوم ار‑تّفولكيم ار‑تّصاماحم ءي‑نگراتون غمكلّي‑اون‑يصامح ربّي ف‑سّيبت لّماسيح. ف‑مايان ا‑ف‑راد‑اون‑ينيغ، ضفورات ربّي غ‑ما‑يسكار، غمكلّي ءيلّان ف‑تاروا‑نس عزّانين. تحنّوات غ‑كولّو مدّن غمكلّي گينّغ ءيحنّا لماسيح، ءيسرس ءيخف‑نس غ‑لگدّام ن‑ربّي ف‑سّيبت‑نّغ زوند يات‑تغرسي ءيجدّرن س‑توجّوت ءيميمن. والاينّي ا‑ور‑دارون‑ييلي ما‑يادّرن لفساد ءولا شّهوات أُخشنّين ءولا ءيلّا ما‑يساوالن ف‑ما‑يرا ا‑يسّمون ءي‑يخف‑نس. ءور‑يوكُي ءي‑يمژلاين ن‑ربّي اد‑ساوالن س‑غمكان. انفات ءي‑يجرمان ءولا تاجمّاعت ءيخوان ءولا تاضصا ف‑ما‑يعيبن. ءور‑تشوي‑تجمّاعت ف‑وان غايان، والاينّي را‑يشوو ءيغ‑ا‑بدّا‑تّشكارم ربّي. اشكو ءيقّان‑كُن‑د ا‑تيسّانم ءيس‑ور‑را‑تيلي تاغامت غ‑تگلديت لّماسيح د‑ربّي ءي‑يان ءيتفسادن نغد يان ءيسكارن س‑شّهوات لّي‑أُخشنّين نغد يان ءيتّيرين ا‑يسّمون ما‑يگّوتن ءي‑يخف‑نس. اشكو يان ءيتّيرين ايدا ءيگّوتن، ءيگا زوند ءيغ‑ا‑يتعباد ءيلاهات ن‑دّونيت‑اد. ا‑ور‑تادجم يان ا‑كُن‑يجلو س‑يواليون خوانين، اشكو ف‑سّيبت لّخُشانات‑ان ا‑ف‑را‑يضر لغاضاب ن‑ربّي ف‑ويلّي سرس رورنين تيغوردين‑نسن. انفات‑بدّا ءي‑مدّن زوند غوين. ءولا كونّي تكّام‑تّين تلّام غ‑تيلّاس، ءيمّا غيلاد توورّيم تكشمّ س‑تيفاوت ن‑سيديتنّغ. سكارات غمكلّي‑د‑يقّانّ ايت‑تيفاوت، اشكو غ‑تيفاوت ا‑غ‑تلّا‑تمگرا ن‑وفولكي د‑لحقّ د‑كولّو ما‑يرضان ربّي. سيگّيلات ا‑تيسّانم ما‑يترضون سيديتنّغ. ا‑ور‑تكشمّ غ‑يسكّيرن خوانين ن‑ايت‑تيلّاس‑ان والاينّي شّحشّامات‑تن، اشكو غايلّي سكارن غ‑تنتلا، ءور‑اكُّ‑نري ا‑ت‑نبدر. ءيمّا كولّو ما‑د‑يفّوغن زغ‑تيلّاس س‑تيفاوت را‑د‑يبان غمكلّي ءيگا، ءولا كرايگاتّ كرا‑غ‑تسفاو تيفاوت را‑يفاو ءولا نتّا. ماياد ا‑ف‑ا‑نتّيني: «فاق، ا‑غوان ءيطّاسن، تنكرد‑د زغ‑لموت اد‑اك‑ييسفيو لماسيح.» تاويات‑ستّ غ‑يخف‑نّون ا‑بدّا‑تسكارم غمكلّي‑د‑يقّانّ غويلّي سّنّين ما‑يلّان، ءورد زوند غويلّي ءور‑سّينّين يات. سكارات افولكي نّا‑مي‑توفام كرايگاتّ تاساعت، اشكو ءيگّوت ما‑يُخشنّ غ‑ووسّان‑اد. ا‑ور‑تجلوم د‑يخف‑نّون والاينّي ژرات ما‑گيگون‑يتّيري ربّي. ا‑ور‑تسّنوفولم ءيخف‑نّون س‑تيسّي لّي‑يتهلاكن مدّن، والاينّي تعمّارات س‑رّوح لقودوس ار‑تساوالم ءي‑نگراتون س‑يواليون ن‑يموريگن ن‑ربّي ءولا تاهليلات ءولا تالغاتين نّا‑ياون‑يمالا رّوح لقودوس، ار‑تّيريرم ار‑تّاسيم امارگ ءي‑سيديتنّغ زغ‑وولاون‑نّون، ار‑بدّا‑تّشكارم ربّي باباتنّغ ف‑كرايگاتّ كرا س‑يسم ن‑سيديتنّغ ياسوع لماسيح. ءيلّا ف‑كود يان ا‑يسفليد س‑وايّاض. غمكاد ا‑س‑را‑تّوقّارم لماسيح. وا‑تيمغارين، سفليدامت س‑يرگازن‑نّونت غمكلّي تسفليدمت س‑سيديتنّغ. اشكو ارگاز ءيگا ءيخف ن‑تمغارت، غمكلّي ءيگا لماسيح ءيخف ن‑ومناگّار ن‑ويلّي گانين وينس. ءيگ‑ومناگّار دّات لّماسيح، ءيگ نتّا انجّام‑نس. هاتي ءيلّا ف‑تمغارت ا‑بدّا‑تسفليد س‑ورگاز‑نس غمكلّي ءيسفليد‑ومناگّار س‑لماسيح. ءيمّا كونّي ا‑يرگازن، تحنّوات غ‑تمغارين‑نّون، غمكلّي ءيحنّا لماسيح غ‑ومناگّار ءيفك تودرت‑نس فلّاس باش ا‑ت‑يژلي س‑واوال‑نس، ءيسّغوس‑ت س‑وسيرد ن‑وامان. غمكان ا‑يسكر باش ا‑ت‑ياوي زوند يات‑تسليت ءيفولكين غ‑ور‑تلّي كرا ن‑تركّوت ءولا كرا ن‑ينيضي ءولا كرا ءيگان زوند غايان، باش ا‑زگيس‑يسكر امناگّار امژلاي س‑لمجد ءيگّوتن بلا گيس ءيلّا كرا يُخشنّ. غمكاد ا‑س‑يلّا ف‑ورگاز ا‑يتحنّو غ‑تمغارت‑نس زوند دّات‑نس. اشكو يان ءيتحنّون غ‑تمغارت‑نس، هاتي ءيخف‑نس ا‑غ‑ا‑يتحنّو. ءور‑يلّي ما‑يتكرهون دّات‑نس، والاينّي ار‑تّ‑يشّوشا ار‑تّ‑گيس‑يتاوي. غمكاد ا‑س‑ا‑ستّ‑يتاوي لماسيح غ‑ومناگّار ن‑ويلّي گانين وينس. ءيمّا نكُّني نگا ءيگزمان ن‑دّات‑نس، غمكلّي ءيتياران: «مايان ا‑ف‑را‑يفل‑ورگاز باباس د‑ينّاس ءيمون د‑تمغارت‑نس. هاتنين سين راد‑وورّين گن يان.» اوال‑اد تلّا گيس يات لمعنا ءينتلن، اشكو ءيملا‑ياغ ف‑تامونت لّماسيح د‑ومناگّار‑نس. والاينّي ءيملا‑ياغ‑داغ ءيس‑يلّا ف‑كرايگاتّ يان گيگون ا‑بدّا‑يتحنّو غ‑تمغارت‑نس زوند ءيخف‑نس، ييلي ف‑تمغارت ا‑بدّا‑تسفليد س‑ورگاز‑نس. ءيمّا كونّي ا‑تاروا مژّينين راد‑اون‑ينيغ، سكارات س‑واوال ن‑ايت‑دارون غمكلّي ءيرا سيديتنّغ، اشكو ماياد ءيگا لحقّ گيگون. ءيتيارا: «اوي‑تّ غ‑باباك د‑ينّاك.» لوصيت‑اد تگا تامزواروت لّي‑ف‑ينّا ربّي را‑يبارك غويلّي سرس سكارنين، اشكو ءيزوويد ءينّا: «باش اد‑اك‑ييلي لخير، تغزّيف تودرت‑نّك ف‑واكال.» ءيمّا كونّي ا‑يد‑باباتسن راد‑اون‑ينيغ، ا‑ور‑تسّقلاقالم تاروا‑نّون، والاينّي ربّات‑تن س‑ولمّود ن‑سيديتنّغ ار‑اسن‑تمالام مامنك ا‑س‑سرس‑سكارن. ءيمّا كونّي ا‑يخدّامن راد‑اون‑ينيغ، سكارات س‑واوال ن‑يد‑سيديتون ن‑دّونيت‑اد، ار‑تن‑تّوقّارم ار‑تّادرم ءي‑يخف‑نّون غ‑لگدّام‑نسن. سكارات س‑يواليون‑نسن س‑نّييت ن‑وول‑نّون زوند س‑يواليون لّماسيح. ا‑ور‑تسكارم غير باش ا‑كُن‑ژرن مدّن شكرن‑كُن، والاينّي خدمات غمكلّي‑د‑يقّانّ ءيخدّامن لّماسيح، ار‑بدّا‑تسكارم ما‑يرا ربّي س‑نّييت‑نّون. خدمات س‑لفرح زوند ءيغد سيديتنّغ ا‑مي‑تّخدامّ ءورد بنادم، تيسّانم ءيس‑را‑يرار سيديتنّغ ءي‑كرايگاتّ يان ف‑ما‑يسكار ءيفولكي، ءيگ‑ييت ءيسمگ نغد وين ءيخف‑نس. ءيمّا كونّي ا‑يد‑سيديتسن راد‑اون‑ينيغ، سكارات افولكي ءي‑يخدّامن‑نّون بلا‑دا‑تن‑تسّيويدم. اشكو تسّنم ءيس‑يلّا يان غ‑يگنّا، ءيگا سيديتسن ءيگ سيديتون ءولا كونّي، ءور‑ا‑يسكار س‑وودماون. اوال‑ينو ءيگُّران ءيگا‑ت: دوسات غ‑سيديتنّغ س‑تدواست‑نس ءيتجهّدن. اسيات كولّو ءيمقلاد ن‑ربّي باش ا‑تيژضارم ا‑تّضاضّام لحيلات ن‑يبليس. اشكو ءورد بنادم ا‑د‑نتمّاغ، والاينّي لارواح أُخشنّين ءولا لجنون تجهّدنين ءولا سّولطات ن‑يگنوان ءولا لقوّات ن‑تيلّاس ن‑دّونيت‑اد. مايان ا‑ف‑راد‑اون‑ينيغ، اسيات كولّو ءيمقلاد ن‑ربّي، باش ا‑تيژضارم ا‑تبيدّم تزگام غ‑واسّ يُخشنّ، تمّاغم ار ءيسيگُّرا سول تبيدّم. بيدّات غيلاد تزگام. بكيسات س‑تاگُست ‹لّحقّ›، تگم ءي‑يدمارن‑نّون ابانّك ن‑‹رّضا ن‑ربّي›، تقّنم ءي‑يضارن‑نّون تورژيّين ن‑‹زّعامت س‑تبرّاحت لّخبار ن‑سّلامت›، تاسيم تامسنتلت ن‑‹تّيقا غ‑ربّي› لّي‑يژضارن ا‑ن‑فلّاون‑تحصار كولّو ءيژضكان جدّرنين لّي‑س‑ا‑كُن‑يكّات ءيبليس. گات ف‑يخف‑نّون اسدّول ن‑‹وجنجم›، تامژم غ‑وفوس‑نّون تاژّيت ن‑‹واوال ن‑ربّي› لّي‑اون‑يفكا رّوح لقودوس، ار‑تّژالّام غ‑كرايگاتّ لوقت غمكلّي‑اون‑يمالا رّوح لقودوس، ار‑تّضالابم ربّي ف‑كرايگاتّ كرا، ترارم لعاقل بلا‑دا‑تّرمايم، ار‑بدّا‑تي‑تّضالبم ا‑يتعاوان كولّو ويلّي ءيژلي اد‑گن وينس. ضالبات ربّي فلّا ءولا نكّي، اد‑يّي‑يمل ما‑راد‑ينيغ غاكود نّا‑ساوالغ س‑مدّن، باش ا‑تبرّاحغ س‑زّعامت ف‑لخبار ءيفولكين ءي‑ويلّي ءور‑جّو‑فلّاس‑سفلدنين. هاتي غيلاد ‹امازان غ‑يسكراف› اد‑گيغ ف‑سّيبت لّخبار‑اد. ضالبات ربّي ا‑يّي‑يعاون اد‑ساولغ س‑زّعامت غمكلّي‑يّي‑د‑يقّانّ. ءيمّا غيلاد، ءوزنغ‑اون‑ين تيخيكوس. ءيگا گماتنّغ ءيعزّان، ءيگ اخدّام ءيفولكين ن‑سيديتنّغ. راد‑اون‑ييني كولّو ف‑مامنك اد‑گيغ ءولا ماد‑سكارغ. ماياد ا‑ف‑اون‑ت‑ين‑وزنغ، باش ا‑تيسّانم مامنك ا‑نگا، ءيزّعام ءولاون‑نّون. اد‑اون‑تيلي سّلامت اي‑ايتما كولّوكن. ضالبغ ربّي باباتنّغ د‑سيديتنّغ ياسوع لماسيح اد‑اون‑يفك ا‑تّحنّوم ءي‑نگراتون ار‑تّامنم باهرا. ا‑تيلي لباراكا ءي‑كولّو ويلّي ءيتّيرين سيديتنّغ ياسوع لماسيح س‑تايري ءيدومن. زغ‑بولُس د‑تيموتاوس، ءيخدّامن لّماسيح ياسوع، ءي‑كولّو ءيمژلاين لّماسيح ياسوع غ‑تمدينت ن‑فيليبّي ءولا ءينگابالن د‑يمعاوانّ‑نّون. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. ار‑تشكارغ ربّي‑نو غاكود نّا‑فلّاون‑سوينگيمغ. ار‑تفراحغ غاكود نّا‑تي‑تضالابغ ف‑سّيبت‑نّون كولّوكن، اشكو ار‑ديدي‑تّمعاوانم غ‑تووري لّخبار ءيفولكين زغ‑واسّ امزوارو سول س‑غاسّاد. هاتي سّنغ ماياد باهرا: ربّي لّي‑گيگون‑يگران افولكي را‑ت‑يسّافاو ارد ءيكمّل غ‑واسّ لّي‑غ‑را‑د‑يوورّي لماسيح ياسوع. ءيقّان‑يّي‑د ا‑گيگون‑سوينگيمغ كولّوكن غمكان، اشكو ءوسيغ‑كُن‑بدّا غ‑وول‑ينو. لّيغ ا‑تحاماغ ف‑لخبار ءيفولكين ار‑ت‑زّگاغ غ‑وولاون ن‑مدّن، ءولا غيلاد غ‑تياماژغ ءيليغ غ‑يسكراف، تكشمّ ديدي كولّوكن غ‑لباراكا ن‑تووري‑اد. ربّي ا‑فلّا‑يگان ءينيگي، ييسّان مامنك ا‑يّي‑ينقّا‑ومارگ‑نّون، ار‑كُن‑تّيريغ س‑تايري لّماسيح ياسوع. ءيمّا غيلاد ار‑تضالابغ ربّي اد‑اون‑يسّيگات باهرا لحنانت ن‑ينگراتون، ءيفك‑اون ا‑تيسّانم كولّو ما‑يگان وين لحقّ ار‑تاطّوم ما‑يشوان زغ‑ما‑يُخشنّ. غمكاد ا‑س‑را‑تيژضارم ا‑بدّا‑تّناوالم افولكي، تغوسم زغ‑كولّو ما‑يگان لعيب ءولا كولّو ما‑يشّحشّامن مدّن ار اسّ لّي‑غ‑را‑د‑ياشك لماسيح. راد‑اون‑تيگات صّابت ن‑وفولكي لّي‑گيگون‑يسكار ياسوع لماسيح، ءيبان گيگون لمجد ن‑ربّي، الغن‑ت مدّن ف‑سّيبت‑نّون. واي‑ايتما، ريغ ا‑تيسّانم غاياد‑يّي‑يجران ءيزوويد غ‑تواسّنا لّخبار ءيفولكين، ايلّيغ سّنّ كولّو ءيمخزنيين لّقصر د‑وييّاض گّوتنين ءيزد ف‑سّيبت لّماسيح ا‑ف‑تياماژغ. ءولا ايتماتنّغ، ءيگّوت گيسن ما‑يوورّين ءيدوس غ‑سيديتنّغ ف‑سّيبت ن‑يسكراف‑ينو. زعمن باهرا ار‑تبرّاحن س‑وگُّار س‑واوال ن‑ربّي، ءور‑ا‑تيكساضن يات. سّنغ كرا گيسن ار‑تّيرين اد‑زّوورن سّيمغورن ءيخف‑نسن، غايان كا‑ف‑ا‑تبرّاحن ف‑لماسيح. والاينّي ءيلّا سول ماد‑دار‑تلّا نّييت ءيصفان، ار‑تبرّاحن ف‑سّيبت لّحنانت لّي‑گيسن‑يلّان، اشكو سّنّ ءيس‑يّي‑د‑ييوي ربّي س‑غيد باش اد‑تحاماغ ف‑لخبار ءيفولكين. ءيمّا وييّاض ياضني ءورد س‑وول ءيصفان ا‑س‑ا‑تبرّاحن ف‑لماسيح، اشكو ران اد‑امژن غير كرا ءي‑يخف‑نسن، ءيرين اد‑يّي‑سّيگاتن تانوكموت غ‑لحبس. ءيمّا نكّي، ما‑راد‑ينيغ؟ ابلا‑اد‑فرحغ ءيغ‑ا‑سفليدن مدّن ءي‑تبرّاحت ف‑لماسيح، ءيگ‑ييت ف‑يمي ن‑ايت‑سين‑وودماون نغد ويد دار ءول ءيصفان. هاتي راد‑سول‑فرحغ، اشكو مايد‑يّي‑يجران، سّنغ ءيس‑را‑زگيس‑نجمغ تيگيرا ف‑سّيبت ن‑ما‑فلّا‑تّضالابم ربّي ار‑يّي‑يتعاوان رّوح ن‑ياسوع لماسيح. ءيگّوت گيگي رّجا، ءيريغ باهرا اد‑سكارغ كولّو ما‑يّي‑د‑يقّانّ س‑زّعامت ءيگّوتن، باش ا‑گيگي‑تبان‑تموغرا لّماسيح غيلاد زوند كرايگاتّ لوقت، ءيغ‑سولغ ءولا ءيغ‑مّوتغ. اشكو داري نكّي: ءيغ‑دّرغ، لماسيح ا‑يگان تودرت‑ينو. ءيغ‑مّوتغ، راد‑يّي‑ييلي ما‑يوفن تودرت‑اد. ءور‑سّينغ مانوا را‑گيسن‑يريغ، اشكو ءيغ‑سولغ غ‑دّات راد‑يژضارغ اد‑زايدغ غ‑تووري‑اد ءيفولكين. ريغ ماياد ءولا مايان س‑سين. ريغ باهرا اد‑فّوغّ دّونيت‑اد ءيليغ د‑لماسيح، اشكو ءيفولكي مايان س‑وگُّار. والاينّي ف‑سّيبت‑نّون را‑ياف اد‑قاماغ غ‑دّات. سّنغ باهرا ءيس‑يوف غمكاد. راد‑سولغ قاماغ ديدون كولّوكن باش ا‑تّزايادم ار‑تّفراحم غ‑وغاراس ن‑سيديتنّغ. غمكاد ا‑س‑راد‑باهرا‑تّفراحم س‑لماسيح ياسوع ف‑سّيبت‑ينو غاكود لّيغ را‑ن‑داغ‑دارون‑اشكغ. والاينّي ءيلّا فلّاون ا‑تسكارم س‑ما‑د‑يمشاشكان د‑لخبار ءيفولكين لّماسيح. اشكو ريغ ا‑بدّا‑فلّاون‑سفليدغ ءيس‑كولّو‑تزگام غ‑يان‑وغاراس، ءيغ‑د‑فلّاون‑اگّوگغ نغد ءيغ‑ن‑دارون‑وشكيغ، ار‑كولّو‑تّخدامّ س‑يات‑تنباطّ باش ا‑تسّلمادم لحقّ لّخبار ءيفولكين غمكلّي ءيگا بلا‑دا‑تّيكساضم زغ‑ويلّي‑كُن‑سّرفوفونّين. غمكاد ا‑س‑راد‑ژرن ءيس‑لّان نتني غ‑وغاراس لّهالاك تيليم كونّي غ‑وغاراس ن‑وجنجم، اشكو ربّي ا‑را‑كُن‑يجّنجم. اشكو لّيغ‑اون‑يفكا ا‑تامنم س‑لماسيح، ءيفكا‑ياون ءولا تارفوفنت ف‑سّيبت‑نس. تكشمّ ءولا كونّي س‑يميغ لّي‑تژرام مّاغّ سرس نكّي، تسفلدم ءولا غيلاد ءيس‑ا‑سول‑سرس‑تمّاغّ. ءيس‑ور‑تدوسم تزعمّ ف‑سّيبت ن‑ما‑تگام وين لماسيح؟ ءيس‑ور‑ا‑كُن‑تسّفجّيج تايري‑نس؟ ءيس‑ور‑ا‑تسّحسّام س‑تامونت ن‑رّوح‑نس؟ ءيس‑ور‑دارون لحنانت ءولا لمحبّت ءيگّوتن ن‑ينگراتون؟ لّيغ دارون ءيلّا كولّو مايان، را‑كُن‑ضالبغ اد‑يّي‑تكمّلم لفرح‑ينو، تگم كولّو يان غ‑يسوينگيمن‑نّون ءولا تايري‑نّون، تمونم غ‑يان‑وغاراس، تمشاشكام‑د غ‑يات‑تنباطّ. ا‑ور‑تسكارم كرا ف‑ا‑تزّوورم ءيخف‑نّون ءولا‑دا‑تّيريم ا‑تملم ءيس‑تگام كرا، والاينّي ژّيمژايات ءيخف‑نّون ار‑بدّا‑تّگّام وييّاض د‑ما‑كُن‑يوفن. ءيلّا ف‑كود يان گيگون ا‑ور‑يسوينگيم غير غ‑ما‑يرا ءي‑يخف‑نس، والاينّي ا‑يسوينگيم ءولا غ‑ما‑راد‑يرين وييّاض. ءيلّا فلّاون ا‑تسوينگيمّ غمكلّي ءيسوينگيم لماسيح ياسوع. ءيگا نتّا غمكلّي ءيگا ربّي، والاينّي ءور‑يغوي غ‑مايان ا‑ن‑سول‑يقاما غمكلّي ءيگا ربّي. هاتي ءيفل‑ن كولّو ماد‑دارس‑يلّان، يوورّي ءيگ زوند ءيسمگ، ءيلول غ‑صّورت ن‑بنادم. لّيغ ءيگا س‑سّيفت ن‑بنادم، يادر‑د ءي‑يخف‑نس، ءيسكر كولّو ما‑گيس‑يرا ربّي ايلّيغ ءيمّوت س‑لموت ءيشقان ف‑وگّجدي. ف‑مايان ا‑ف‑ت‑يولّ ربّي س‑تاتّويت ن‑يگنّا، ءيفك‑اس ءيسم لّي‑يوگُرن كرايگاتّ ءيسم، باش ا‑د‑يكنو كرايگاتّ افود س‑يسم ن‑ياسوع، غ‑يگنّا ءولا غ‑واكال ءولا غ‑دّو‑واكال، ييني كرايگاتّ ءيلس: «ياسوع لماسيح ا‑يگان سيديس ن‑كولّو ما‑يلّان.» غمكاد ا‑س‑راد‑كولّو‑وقّرن لمجد ن‑ربّي باباتنّغ. ف‑مايان ا‑ف‑را‑كُن‑وصّاغ اي‑ايتما عزّانين، اشكو سّنغ ءيس‑ترام ا‑تسكارم ما‑فلّاون‑يلّان، غيلاد غ‑د‑فلّاون‑اگّوگغ غمكلّي‑تي‑تسكارم غاكود لّيغ‑ن‑ديدون‑لّيغ. ف‑مايان ا‑ف‑راد‑اون‑ينيغ: سكارات كولّو باش ا‑تسّافوم اجنجم لّي‑س‑تنجمّ، ار‑باهرا‑تّوقّارم ربّي ار‑بدّا‑ستّي‑تّاويم غ‑ما‑يرا نتّا. اشكو ربّي ا‑بدّا‑گيگون‑يحكامن باش ا‑تّيريم ما‑ت‑يرضان ار‑سرس‑تسكارم. زايدات غ‑كولّو ماياد بلا‑دا‑تّنگموگم ءولا‑دا‑تّژيم، باش ا‑تغوسم بلا گيگون ءيلّا كرا لّعيب، تگم تاروا شوانين ن‑ربّي غ‑وامّاس ن‑تاسوت‑اد يُخشنّ ءيجلان. ها‑كونّي زوند ءيتران غ‑يگنوان ا‑س‑ا‑تفاوم غ‑وامّاس‑نسن، ار‑اسن‑تمالام اوال ن‑تودرت. مايان ا‑س‑راد‑سرون‑فرحغ باهرا غ‑واسّ لّي‑غ‑را‑د‑ياشك لماسيح، ژرغ ءيس‑ورد بلا لفايتّ ا‑س‑ا‑تازّالغ ار‑تنهاتافغ غ‑دارون. واخّا ءيغ‑راد‑فّين ءيدامّن‑ينو ف‑يگّي ن‑توافكا لّيمان‑نّون زوند امان ن‑واضيل لّي‑تفّين مدّن ف‑توافكيو‑نسن غ‑لگدّام ن‑ربّي، ها‑يّي رضيغ س‑مايان، فرحغ سرون كولّوكن. ءولا كونّي ءيلّا فلّاون ا‑سرس‑ترضوم، تفرحم ديدي. ار‑ترجوغ غ‑سيديتنّغ ياسوع اد‑اون‑ين‑ازنغ تيموتاوس غ‑مايد‑د‑ياكمورن باش ا‑يّي‑د‑يسّفرح ءولا نكّي س‑كرا لّخبار زغ‑دارون. ءور‑داري يان ءيسوينگيمن زوند نتّان، ار‑تّ‑يتاوي باهرا غ‑مامنك ا‑تگام. اشكو كود يان ار‑يسوينگيم غ‑ما‑يگان وينس، ءورد ما‑يگان وين ياسوع لماسيح. ءيمّا كونّي تسّنم ف‑تيموتاوس ءيس‑يفولكي باهرا، تيسّانم مامنك ا‑ديدي‑يتخدام زوند ارّاو د‑باباس غ‑تووري لّخبار ءيفولكين. ار‑ترجوغ ا‑ت‑ين‑ازنغ غيلاد، والاينّي ار‑تقلغ ارد ژرغ ما‑س‑راد‑يّي‑تگُّرو غيد. ها‑يّي تيقّنغ غ‑سيديتنّغ را‑ن‑اشكغ ءولا نكّي س‑دارون غ‑مايد‑د‑ياكمورن. سوانگمغ ءيس‑را‑ياف اد‑اون‑ين‑رارغ ءولا گماتنّغ ابافروديتوس لّي‑ديدي‑يتخدامن ار‑يتبدّاد غ‑تاما‑نو. ءيگا امازان‑نّون، توزنم‑ت‑يد ا‑يّي‑يعاون غ‑ما‑يّي‑يخصّان. اشكو ار‑ت‑ينقّا‑ومارگ‑نّون كولّوكن، طيّر‑اس لّيغ ءيسّن ءيس‑تسفلدم ف‑تماضونت‑نس. س‑صّاحت يوضن باهرا ايلّيغ ءيلّا ف‑لموت، ءيمّا ربّي ءيحنّا گيس. ءيحنّو فلّا ءولا نكّي لّيغ‑ت‑يجّوجّي، ءيكّيس فلّا تاغوفت‑ان زغ‑تغوفيوين ياضني. ماياد ا‑ف‑ريغ اد‑اون‑ت‑ين‑ازنغ غيلاد باش ا‑تي‑تژرم تفرحم ديدس، والا ا‑سول‑اسيغ تاغوفت‑نس نكّي. شّكشمات‑ت س‑دارون، تفرحم سرس باهرا س‑يسم ن‑سيديتنّغ. تالغات مدّن زوند غواد، اشكو خدا ءور‑يمّوت ف‑سّيبت ن‑تووري لّماسيح. ءور‑يغوي غ‑تودرت‑نس اشكو ءيرا ا‑يّي‑يتعاوان غ‑مايلّي مي ءور‑تژضارم كونّي. واي‑ايتما، اوال‑ينو ءيگُّران ءيگا‑ت: «فرحات غ‑سيديتنّغ.» ءور‑فلّا‑يژّاي اد‑اون‑داغ‑اراغ ماياد، والاينّي را‑كُن‑يعاون ا‑ور‑تجلوم. رارات لعاقل زغ‑ايت‑يسكّيرن‑ان أُخشنّين، اشكو زوند ءيضان اد‑گان، ار‑تبّين دّات ن‑مدّن. ءيمّا ايت‑تژالّيت ءيصحان، ا‑تن‑يگان د‑نكُّني ءورد نتني. ار‑نتعباد ربّي س‑تحكيمت ن‑رّوح‑نس، ار‑نتزعام ف‑سّيبت لّماسيح ياسوع. ءور‑ا‑نبنّو ف‑ما‑يگان وين دّات ن‑بنادم. مراد ءيس‑ريغ نكّي، ءيلّا داري غ‑دّات‑ينو ما‑ف‑ا‑بنّوغ. اشكو ءيغ‑يلّا كرا ن‑يان ءيغالن ءيس‑دارس كرا‑ف‑ا‑يبنّو ف‑يسكّيرن ن‑دّات، ءيلّا داري مايان س‑وگُّار. ژّولّان‑يّي غ‑ويس تام‑ووسّان، گغ زغ‑ايت‑ربّي، زغ‑تقبيلت ن‑بنيامين، ار‑ساوالغ س‑يواليون ن‑ايت‑يودايا زغ‑مژّيي‑ينو. كّيغ‑تّين گيغ افاريسي، ار‑سكارغ س‑شّرع كولّوت. ءيعزّو‑داري‑وغاراس‑ان باهرا، ايلّيغ ا‑سّرفوفونغ ايت‑ومناگّار لّماسيح. ار‑سكارغ كولّو ما‑فلّا‑يلّان باش اد‑ترضوغ ربّي س‑وفولكي لّي‑يگان وين شّرع. والاينّي كولّو كرا حاسبغ ءيگا‑يّي افولكي غ‑ووسّان‑ان، حاسبغ‑ت غيلاد ءور‑يگي يات ف‑سّيبت لّماسيح. حاسبغ كولّو تيغاوسيوين‑ان زوند ءور‑گينت يات، اشكو تلّا داري غيلاد ما‑تنت‑يوفن باهرا، ا‑ستّ‑يگان د‑تواسّنا لّماسيح ياسوع لّي‑يوورّين ءيگا سيدي. ف‑سّيبت‑نس ا‑ف‑گيغ تيغاوسيوين‑ان د‑يركان، فلغ كولّو ما‑داري‑يلّان باش اد‑يّي‑ييلي لماسيح، گغ ءولا نكّي وينس. ءور‑سول‑ا‑سكارغ ف‑اد‑ترضوغ ربّي س‑يسكّيرن ن‑شّرع، والاينّي ءيرضا فلّا ف‑سّيبت ن‑ماد‑ومنغ س‑لماسيح. اشكو غمكاد ا‑س‑ا‑يترضو ربّي ف‑كولّو‑ويلّي سرس ءومنّين. ءيمّا غيلاد ريغ اد‑يسّانغ لماسيح ءولا تاحكيمت ءيتجهّدن لّي‑ت‑يد‑يسّنكرن زغ‑لموت، ءيسّانغ ءولا تامونت ن‑تمّاريو‑نس، ءيريغ اد‑گغ زوند نتّان غ‑لموت‑نس ارد نكرغ ءولا نكّي زغ‑گر ويلّي مّوتنين. ءور‑نّيغ ءيزد نكّين ا‑يروحن كولّو ماياد ءولا كمّلغ گيس، والاينّي ار‑تزايادغ س‑لگدّام باش اد‑امژغ مايلّي‑ف‑يّي‑يومژ لماسيح ياسوع. واي‑ايتما، ءور‑نّيغ ءيس‑ت‑ومژغ غيلاد، والاينّي يات‑تغاوسا كاد‑سكارغ: ار‑ن‑فالغ ما‑يلّان غ‑تغوردين، ار‑تّيدوغ س‑ما‑يلّان غ‑لگدّام. ار‑تازّالغ اد‑روحغ تّمي، باش اد‑امژغ لكاس لّي‑يگان تودرت ن‑وفلّا لّي‑س‑يّي‑د‑يغرا ربّي ف‑وودم لّماسيح ياسوع. ءيخصّا‑ياغ ا‑نسوينگيم غمكان، كولّو وانّا گينّغ ءيمقّورن غ‑وغاراس ن‑ربّي. والاينّي ءيغ‑دارون كرا ن‑يسوينگيمن ياضني، راد‑اون‑يمل ربّي تيغاوسيوين‑ان غمكلّي گانت. ءيمّا غيلاد ءيلّا فلّانّغ ا‑بدّا‑نسكار س‑تنباضين لّي‑نلمد. واي‑ايتما، سكارات كولّوكن زوند نكّي، تضفورم غويلّي مونّين د‑وغاراس لّي‑اون‑نملا. اشكو نّيغ‑اون‑ت كيگان د‑تواليو، ءينيغ‑اون‑ت‑داغ غيلاد س‑يمطّاون: ءيگّوت ما‑يسكارن زوند ءيغ‑ور‑يگي‑وگّجدي لّماسيح يات. راد‑گُّرون نتني س‑لهالاك، اشكو ار‑تعبادن اديس‑نسن. غايلّي‑س‑ا‑تفراحن ا‑را‑تن‑يشّحشّم، اشكو ار‑تسالان غير ما‑يگان وين دّونيت‑اد. ءيمّا نكُّني نگا ايت‑يگنّا. نگا‑ن رّجا‑نّغ غ‑ونجّام لّي‑را‑د‑ياشك زغ‑يگنّا ار‑سرس‑نتقل، ا‑ت‑يگان د‑سيديتنّغ ياسوع لماسيح. نتّان ا‑را‑يرار دّات‑نّغ ن‑واكال ا‑تگ زوند دّات‑نس لّمجد س‑تحكيمت لّي‑س‑يژضار ا‑يگ كولّو ما‑يلّان غ‑دّو‑وفوس‑نس. واي‑ايتما، تعزّام داري باهرا، ار‑يّي‑ينقّا‑ومارگ‑نّون. كونّي ا‑س‑ا‑تفراحغ، تگم تّاج ن‑يخف‑ينو. واي‑ايتما عزّانين، ءيلّا فلّاون ا‑تزگام غمكان غ‑سيديتنّغ. راد‑ضالبغ زغ‑افوديّا، ضالبغ ءولا زغ‑سينتيخا، ا‑د‑مشاشكانت ءي‑نگراتسنت غ‑تامونت ن‑سيديتنّغ. ضالبغ‑ك ءولا كيّي اي‑امعاون‑ينو ءيفولكين، ا‑تعاونت تيمغارين‑ان. خدمنت نتنتي غ‑تووري لّخبار ءيفولكين غ‑تاما‑نو نكّي د‑كليمانتوس د‑يمعاوانّ‑ينو ياضني لّي‑مي‑تياران ءيسماون‑نسن غ‑وارّا ن‑ويلّي طّافنين تودرت ءيدومن. فرحات‑بدّا غ‑سيديتنّغ. را‑ت‑داغ‑ينيغ، فرحات. ملات ءي‑كولّو مدّن منشك ا‑يلّا صّبر‑نّون. هاتي ياكمور‑د سيديتنّغ. ا‑ور‑تاسيم تاغوفت ف‑كرا، والاينّي تژّالّات ار‑تّضالابم ربّي ف‑كرايگاتّ كرا، ار‑تي‑تّشكارم ار‑اس‑تّينيم ف‑اينّا‑كُن‑يخصّان. غمكاد ا‑س‑راد‑اون‑تيلي سّلامت ن‑ربّي لّي‑يوگُرن ءيسوينگيمن ن‑بنادم، را‑تگابل ءول‑نّون ءولا لعاقل‑نّون غ‑تامونت لّماسيح ياسوع. واي‑ايتما، اوال‑ينو ءيگُّران ا‑ت‑يگان: ا‑تسوينگيمّ غ‑ما‑يگان لحقّ ءولا ما‑غ‑يلّا ما‑تّوقّارم ءولا ما‑يُغژانّ ءولا ما‑يغوسن ءولا ما‑يميمن ءولا ما‑يشوان. ءيغ‑يلّا كرا ءيفولكين ءولا كرا‑غ‑يلّا ما‑تّالغم، سوينگيمات غ‑تغاوسيوين‑اد. كولّو ما‑زگيگي‑تلمدم تامژم‑ت تسفلدم‑اس تژرم‑ت گيگي، سكارات سرس. غمكاد ا‑س‑راد‑بدّا‑ديدون‑ييلي ربّي ن‑سّلامت. ءيمّا غيلاد فرحغ باهرا غ‑سيديتنّغ اشكو توورّيم ار‑گيگي‑تسوينگيمّ. سّنغ ءيس‑ا‑بدّا‑گيگي‑تسوينگيمّ، والاينّي ءور‑تژضارم ا‑تسكرم كرا ار غيلاد. ءورد ف‑سّيبت ن‑حتاجّاغ كرا ا‑ف‑نّيغ مايان، اشكو لمدغ اد‑قنعوغ س‑اينّا‑داري‑يلّان. ءيغ‑داري‑يدروس ءولا ءيغ‑داري‑يگّوت، سّنغ ما‑راد‑سكرغ. اشكو لمدغ كرا ءيعزّان، ءيسّانغ مامنك اد‑تقناعغ س‑كولّو كرا‑يّي‑يجران. زوند ءيغ‑شبعاغ تيرمت زوند ءيغ‑قاماغ س‑لاژ، زوند ءيغ‑داري ما‑يگّوتن زوند ءيغ‑داري ما‑يدروسن. ژضارغ ءي‑كرايگاتّ كرا س‑تدواست لّماسيح لّي‑يّي‑يسّدوسن. ءيمّا كونّي، افولكي ايد‑گيگي‑تسكرم غيلاد غ‑ديدي‑تبيدّم غ‑تنوكموت‑ينو. تسّنم كونّي ن‑فيليبّي، غاكود لّيغ فّوغّ تامازيرت ن‑ماكيدونيّا غ‑ووسّان زوارنين لّخبار ءيفولكين، ءور‑ديدي‑يبيدّ كرا ن‑ومناگّار غ‑‹فك‑امژ› ابلا كونّي واحدوكن. ءيمّا كونّي، لّيغ‑ن‑قاماغ غ‑تمدينت ن‑تاسالونيكي تازنم‑يّي‑ن لمعاونت ءورد غير يات‑توال ءولا سنات غاكود لّيغ حتاجّاغ. ءورد نكّين ا‑يران كرا ءي‑يخف‑ينو، والاينّي ريغ اد‑دارون‑تيگات صّابت غ‑لحساب‑نّون. ءيمّا غيلاد ها‑يّي شبعاغ، ييلي داري ما‑يوفان زغ‑لخير، اشكو ءيسّروح‑يّي‑د ابافروديتوس مايلّي‑يّي‑دي‑توزنم. ءيگا زوند توجّوت ءيميمن ءولا زوند يات‑توافكا ءيتّرسن غ‑لگدّام ن‑ربّي لّي‑س‑يفرح ءيرضو سرس. ربّي لّي‑مي‑گيغ وينس راد‑اون‑ياكّا كولّو ما‑تحتاجّام زغ‑تميخار لّمجد‑نس ف‑وودم لّماسيح ياسوع. ربّي باباتنّغ ا‑بدّا‑نتالغ غيلاد ءولا كولّو مايد‑د‑يفتان، امين. ار‑ن‑تسلّامغ ف‑كولّو ءيمژلاين لّماسيح ياسوع. ار‑ن‑فلّاون‑تسلّامن ايتماتن لّي‑ديدي‑لّانين. ار‑ن‑كولّو‑فلّاون‑تسلّامن ءيمژلاين ن‑غيد، باهرا غويد گانين زغ‑تگمّي ن‑قايصر. ا‑گيگون‑تيلي لباراكا ن‑سيديتنّغ ياسوع لماسيح. زغ‑بولُس ارقّاس لّماسيح ياسوع غمكلّي ءيرا ربّي، د‑زغ‑گماتنّغ تيموتاوس. ءي‑ايتماتنّغ غ‑تمدينت ن‑كولوسّي، ا‑تن‑يگان د‑يمژلاين ن‑ربّي لّي‑زگانين غ‑وغاراس لّماسيح. اد‑اون‑تيلي لباراكا د‑سّلامت زغ‑ربّي باباتنّغ. ار‑بدّا‑نتشكار ربّي باباس ن‑سيديتنّغ ياسوع لماسيح غاكود نّا‑ياس‑نتژالّا ف‑سّيبت‑نّون. اشكو نسفلد ف‑مامنك ا‑تومنم س‑لماسيح ياسوع، عزّان دارون كولّو ءيمژلاين ن‑ربّي، اشكو ءيلّا دارون رّجا ءيصحان ف‑مايلّي‑اون‑ين‑يحضا ربّي غ‑يگنّا. مايد‑غ‑ا‑تّرجوم، تسفلدم فلّاس غاكود لّيغ‑كُن‑ين‑يلكم‑واوال لّحقّ لّي‑يگان لخبار ءيفولكين. لخبار‑اد ار‑يتكّا دّونيت كولّوتّ، ار‑ياكّا صّابت غ‑كرايگاتّ ماني، غمكلّي ءيسكار صّابت غ‑دارون زغ‑واسّ امزوارو لّي‑غ‑تسفلدم ف‑لباراكا ن‑ربّي تيسّانم لحقّ غمكلّي ءيگا، سول س‑غيلاد. ءيلكم‑كُن‑ين ف‑يمي ن‑ابافراس لّي‑ديدنّغ‑يتمعاوانّ، ءيگ اخدّام ءيعزّان ءيفولكين لّماسيح ف‑سّيبت‑نّون. ءينّا‑ياغ‑د ءيس‑كُن‑يعمّر رّوح لقودوس س‑تايري ن‑ايتماتن. ف‑مايان ا‑ف‑ا‑بدّا‑نتژالّا ار‑نتضالاب ربّي ف‑سّيبت‑نّون، زغ‑واسّ لّي‑غ‑فلّاون‑نسفلد سول س‑غاسّاد. ار‑ت‑نتضالاب اد‑اون‑يسّبايّن كولّو ما‑گيگون‑يتّيري س‑تواسّنا ءولا تاحكيمت لّي‑راد‑اون‑يمالا رّوح لقودوس. غمكان ا‑س‑راد‑كولّو‑تگم غمكلّي‑د‑يقّانّ غويلّي گانين وين سيديتنّغ، ار‑تسكارم س‑ما‑ت‑يرضان، تيلي گيگون صّابت ن‑كولّو ما‑يگان افولكي، تزايدم تيسّانم ربّي غمكلّي ءيگا. ار‑نتضالاب ربّي ا‑كُن‑يسّدوس س‑تحكيمت‑نس ءيتجهّدن باش ا‑تّصبارم بلا‑دا‑تّرمايم، ار‑تّفراحم ار‑تّشكارم ربّي باباتنّغ لّي‑اون‑يفكان تاغامت غ‑لوورت لّي‑را‑ييلي ءي‑يمژلاين‑نس غ‑تگلديت ن‑تيفاوت. ءيجّنجم‑اغ‑د كولّو زغ‑تگلديت ن‑تيلّاس، ءيشّكشم‑اغ‑د س‑تگلديت ن‑يوس ءيعزّان لّي‑اغ‑يفوكّان ءيسّيتّي فلّانّغ دّنوب‑نّغ. ءيگا لماسيح صّورت ن‑ربّي، ءيمل‑اغ مامنك ا‑يگا غوالّي ءور‑جّو‑يژري يان. ءيگ ءيخفدّي ءيزوور كولّو ما‑يخلق ربّي. اشكو سرس ا‑س‑يتياوخلاق كرايگاتّ كرا غ‑يگنوان ءولا غ‑واكال، مايلّي ءيبانّ ءي‑والّن ن‑بنادم ءولا مايلّي ءور‑اسنت‑يبانّ، لمالايكا ءولا لارواح ءولا سّولطات ءولا لقوّات ن‑يگنوان. س‑لماسيح ا‑س‑يتياوخلاق كولّو ما‑يلّان، ءيگ كولّو وينس. ءيلّا نتّا ءور‑تا‑يلّي كرا ياضني، د‑نتّان ا‑يزّگان كرايگاتّ كرا غ‑يلّيغ‑ت‑يد‑يقّان ا‑ييلي. ءيگا لماسيح ءيخف ن‑دّات لّي‑يگان امناگّار ن‑مدّن‑نس. نتّان ا‑يگان امزوارو، ءيگ ءيخفدّي ن‑ويلّي‑د‑نكرنين زغ‑لموت، باش ا‑يگ نتّان انمغور ن‑كولّو ما‑يلّان. اشكو ءيقصاد ربّي ا‑گيس‑ييلي‑وفولكي‑نس ءيكمّلن. ف‑وودم‑نس ا‑ف‑يقصاد ربّي ا‑يرار ءي‑يخف‑نس كولّو ما‑يلّان غ‑واكال ءولا غ‑يگنوان، ءيسكر سّلامت غ‑گراس د‑مدّن ف‑سّيبت ن‑يدامّن لّماسيح لّي‑فّينين لّيغ ءيمّوت ف‑وگّجدي. ءيمّا كونّي تكّام‑تّين تاگّوگم‑ن زغ‑ربّي، تگم ءينوّاشن‑نس ف‑سّيبت ن‑يسوينگيمن‑نّون د‑يسكّيرن‑نّون لّي‑أُخشنّين. ءيمّا غيلاد ءيسكر سّلامت غ‑گراتون ديدس ف‑سّيبت لّموت لّماسيح غاكود لّيغ ءيطّاف دّات ن‑بنادم. را‑كُن‑يشّكشم س‑لگدّام‑نس تغوسم تفولكيم بلا‑گيگون‑يلّا كرا لّعيب. غمكاد ا‑را‑يسكر ءيغ‑تزوويدم تزگام غ‑لماسيح تامژم‑بدّا گيس بلا تفلم رّجا ءيصحان لّي‑ف‑تسفلدم غ‑واوال لّخبار ءيفولكين. لخبار‑اد ا‑مي‑تّكّا‑تبرّاحت‑نس كولّو دّونيت، وورّيغ گغ اخدّام‑نس ءولا نكّي بولُس. فرحغ غيلاد س‑ترفوفنت‑اد غ‑ا‑زرايغ ف‑سّيبت‑نّون. اشكو ار‑تكمّالغ س‑دّات‑ينو ما‑يقامان غ‑ترفوفنت لّماسيح ف‑سّيبت ن‑دّات‑نس لّي‑يگان امناگّار ن‑مدّن‑نس. وورّيغ گيغ اخدّام ءي‑ومناگّار‑اد لّيغ‑يّي‑يژلي ربّي اد‑سكارغ تاووري‑اد، سّلكمغ‑اون‑ين كولّو ءيواليون‑نس. اشكو مايلّي ءينتلن كولّو غايد ءيزرين، ءور‑ت‑سّينّ مدّن ن‑تاسوتين لّي‑زرينين، هاتي ءيسّبايّن‑ت‑يد ربّي غيلاد ءي‑يمژلاين‑نس. ءيقصاد اد‑اغ‑د‑يمل تاغاوسا‑ياد باهرا ءيفولكين ءيهيّان لّي‑س‑را‑يبارك كولّو تيميزار ن‑دّونيت. غمكاد ا‑تگا: ءيلّا لماسيح غ‑وول‑نّون اد‑اون‑يفك رّجا ءيصحان ن‑يس‑را‑ن‑تكشمّ س‑لمجد‑نس. هاتي لماسيح ا‑ف‑ا‑نتبرّاح ءي‑كولّو مدّن، ار‑نتنصاح كود يان، ار‑نسّلماد كود يان س‑كولّو ما‑يگان تاحكيمت، باش ا‑ن‑نشّكشم كود يان س‑لگدّام ن‑ربّي ءيمقّور غ‑لماسيح. ف‑غمكان ا‑ف‑ا‑تنهاتافغ ار‑كّاتغ تاكرّايت س‑كولّو جّهد لّماسيح لّي‑يّي‑يسّدوسن س‑تحكيمت‑نس ءيگّوتن. ريغ ا‑تيسّانم منشكا ن‑تكرّايت اد‑كّاتغ ف‑سّيبت‑نّون ءولا ف‑سّيبت ن‑ايتماتن ن‑لاوديكيّا ءولا ف‑كولّو وييّاض ءور‑جّو‑ژرينين ءودم‑ينو. والاينّي ار‑سكارغ كولّو ماياد باش اد‑زعمن‑وولاون‑نسن، گن كولّو يان س‑تايري ن‑ينگراتسن، تيلي‑اسن لباراكا ن‑تواسّنا ءيكمّلن ف‑مايلّي ءينتلن غايد ءيزرين. اشكو ربّي ءيسّبايّن‑اغ‑د لماسيح، د‑نتّان ا‑غ‑تلّا‑كولّو‑تحكيمت ن‑ربّي ءولا تاواسّنا‑نس ءيهيّان. نّيغ‑اون ماياد باش ا‑كُن‑ور‑يجلو يان س‑تكركاس. واخّا‑د‑فلّاون‑ياگّوگ‑وودم‑ينو، ءيلّا‑ن‑ديدون‑وول‑ينو. هاتي فرحغ غيلاد غ‑فلّاون‑سفلدغ ءيس‑تزگام غ‑تامونت ن‑ينگراتون تامژم كولّو غ‑لماسيح. سّنغ ءيس‑تگام لماسيح ياسوع د‑سيديتون. د‑مايان ا‑ف‑راد‑اون‑ينيغ، سكارات‑بدّا ما‑يرا. زّوگزات تادروت ن‑لّساس‑نّون غ‑لماسيح ار‑فلّاس‑تبنّوم، تامژم گيس ار‑تّدوسم غمكلّي تلمدم، ار‑بدّا‑تّشكارم ربّي. اويات‑ستّ غ‑يخف‑نّون ا‑كُن‑ور‑يغوي يان س‑يسوينگيمن ن‑بنادم ءولا س‑تكركاس خوانين لّي‑مي‑تسفلدم زغ‑تاسوتين لّي‑زرينين. هان تينباضين ن‑دّونيت اد‑گانت، ءورد تين لماسيح. ءيمّا لماسيح، نتّان ا‑غ‑يلّا‑كولّو‑وفولكي ن‑ربّي ءيكمّلن غ‑دّات‑نس. ءولا كونّي، تلّا‑ياون تودرت ءيكمّلن ف‑سّيبت ن‑ما‑تگام وين لماسيح لّي‑يحكامن غ‑كولّو سّولطات ءولا لقوّات ن‑يگنوان. نتّان ا‑كُن‑يسّغوسن، ءورد س‑تژالّيت لّي‑تبّين مدّن غ‑دّات‑نسن، والاينّي ءيسّغوس‑كُن زغ‑ما‑يسّركان ءول ن‑بنادم. اشكو غاكود لّيغ تدّمّ س‑ودوم ن‑وامان، تّياومضالم د‑لماسيح تنكرم‑د ديدس، اشكو تومنم س‑تحكيمت ءيتجهّدن ن‑ربّي لّي‑ت‑يد‑يسّنكرن زغ‑لموت. غايد ءيزرين تگام زوند ءيغ‑تمّوتم ءي‑ما‑يگان وين ربّي ف‑سّيبت ن‑دّنوب‑نّون ءولا ف‑سّيبت ما‑ور‑جّو‑تسكيرم س‑شّرع. ءيمّا غيلاد ءيسّدّر‑كُن ربّي د‑لماسيح. ءيصامح‑اغ ف‑كولّو دّنوب لّي‑نسكر، ءيسفيض تالّوحت لّحساب لّي‑فلّانّغ‑يحكامن س‑لوصيّات لّي‑س‑ور‑نسكير. ءيكّيس‑ت‑ين فلّانّغ، يوت‑اس تيگوسين ف‑وگّجدي. ف‑وگّجدي ا‑ف‑ينرا لماسيح سّولطات د‑لقوّات ن‑يگنوان، ءيكّيس‑اسنت ءيمقلاد‑نسنت، ءيمل ءي‑كولّو مدّن ءيس‑تنت‑ينرا. ف‑مايان ا‑ف‑راد‑اون‑ينيغ، ا‑ور‑تادجم يان اد‑اون‑ين‑يشّكشم لوصيّات ف‑ما‑را‑تشتّام ءولا ما‑را‑تسّام، ءولا ف‑كرا لّعيد ءولا تالاليت ن‑وايّور ءولا كرا ن‑ووسّان ن‑وسونفو. اشكو تيغاوسيوين‑ان گانت غير امالو ن‑ما‑را‑ييلي. ءيمّا لماسيح، نتّان ا‑يصحان. ا‑ور‑تادجم مدّن‑ان ا‑فلّاون‑تحكامن. راد‑اون‑تّينين ا‑باهرا‑تّادرم ءي‑يخف‑نّون ار‑تّعبادم لمالايكا. ار‑بنّون نتني ف‑ماد‑ژرّان غ‑توارگيوين‑نسن، ار‑سّفورّوگن س‑يسوينگيمن لّعاقل‑نسن، والاينّي ءور‑ومژن غ‑لماسيح لّي‑يگان ءيخف ن‑ومناگّار، ار‑يسّدوس دّات كولّوتّ، ار‑يسّميالّا ءيگزمان‑نس د‑يخسان‑نس باش ا‑تّيمغور دّات غمكلّي ءيرا ربّي. س‑لموت لّماسيح ا‑س‑تمّوتم كونّي ءي‑تنباضين ن‑دّونيت‑اد. مايان ا‑ف‑را‑كُن‑سقساغ، ماخ ايلّيغ ا‑سول‑تسكارم زوند ءيغ‑تگام وين دّونيت؟ ماخ ايلّيغ ا‑تسكارم س‑لوصيّات ن‑مدّن؟ ار‑تّينين: «ا‑ور‑تّاسيم غوان، ا‑ور‑تمضايم غواد، ا‑ن‑ور‑تّگّرم ءي‑غوان.» والاينّي كولّو تيغاوسيوين‑ان ار‑زراينت. ءيغ‑تنت‑نشّا ءور‑سول‑قامانت. هان لوصيّات‑ان، غير ءيواليون ن‑بنادم د‑ولمّود ن‑بنادم اد‑گانت. كرا ن‑مدّن غالن ءيس‑گانت لمعقول اشكو ار‑ترارانت مدّن اد‑باهرا‑تعبادن ار‑تادرن ءي‑يخف‑نسن ار‑سّرفوفونّ دّات‑نسن، والاينّي ءور‑ژضارنت لوصيّات‑ان اد‑كّيسنت شّهوات أُخشنّين زغ‑بنادم. س‑تنكرا لّماسيح ا‑س‑كُن‑د‑يسّنكر ربّي زغ‑لموت. مايان ا‑ف‑كُن‑د‑يقّان ا‑بدّا‑ترارم لعاقل س‑ما‑يگان وين ءيگنّا، اشكو غين ا‑غ‑يلّا لماسيح، ءيسكيوس ف‑وفاسي ن‑ربّي. سوينگيمات‑بدّا غ‑تغاوسيوين ن‑يگنّا ءورد تيغاوسيوين ن‑دّونيت‑اد. اشكو تمّوتم ف‑تودرت لّي‑يزرين، ترگس تودرت‑نّون لّجديد غ‑دار ربّي غ‑يلّيغ ءيرگس لماسيح. لماسيح ا‑يگان تودرت‑نّون. غاكود لّيغ را‑د‑يوورّي را‑كُن‑ياوي ا‑ديدس‑تيليم ءولا كونّي غ‑لمجد‑نس. ف‑مايان ا‑ف‑راد‑اون‑ينيغ، سكارات باش ا‑گيگون‑يمّت اينّا ءيگان وين دّونيت‑اد: لفساد ءولا شّهاوا ءولا اسماقّل س‑تيط يُخشنّ. ا‑ور‑سول‑تسوينگيمّ غ‑ما‑يعيبن ءولا‑دا‑تّيريم ما‑ور‑يگين وينّون، اشكو يان ءيتّيرين وين وييّاض ءيگا زوند يان ءيتعبادن ءيلاهات ن‑دّونيت‑اد. ف‑سّيبت ن‑كولّو غايان ا‑ف‑را‑يضر لغاضاب ن‑ربّي ف‑ويلّي سرس رورنين تيغوردين‑نسن. ءولا كونّي غايد ءيزرين تكّام‑تّين ار‑تسكارم غمكان، ار‑تّسالام تيغاوسيوين‑ان. ءيمّا غيلاد، ءيلّا فلّاون ا‑تكّيسم كولّو غايان. ا‑ور‑تّژيم ءولا‑دا‑تّوفّم ف‑يان. ا‑ور‑تّنوّاشم ءولا‑دا‑ترگّمّ غ‑يان. ا‑ور‑تادجم كرا ن‑يواليون أُخشنّين ا‑تكّان ءينفورن‑نّون، ءولا‑دا‑تسّكيركيسم ف‑ينگراتون. اشكو ءور‑سول‑تگيم غمكلّي تگام غايد ءيزرين، س‑يسكّيرن لّي‑تميارم ار‑تن‑تسكارم. هاتي توورّيم تگام مدّن لّجديد. ربّي لّي‑كُن‑يخلقن ار‑كُن‑يتبدّال باش ا‑توورّيم تگم زوند نتّان، تيسّانم‑ت غمكلّي ءيگا. مايان ا‑ف‑ور‑ا‑نژّمژلاي گو‑يونان زغ‑گو‑يودايا، ءولا غوالّي دار تاژالّيت ن‑دّات زغ‑والّي ءور‑دار‑تلّي، ءولا گو‑تمازيرت‑اد زغ‑گو‑تمازيرت‑ان، ءولا ءيسمگ زغ‑واد‑يگان وين ءيخف‑نس. اشكو نگا كولّو وين لماسيح، ييلي لماسيح گينّغ كولّواغ. كونّي، ءيمژلاين ن‑ربّي ا‑تگام. ءيرا‑كُن ءيژلي‑كُن ا‑تگم وينس. ف‑مايان ا‑ف‑كُن‑د‑يقّان ا‑تعمّرم س‑لحنانت، ار‑تّمعاوانم ار‑تژّيمژايم ءيخف‑نّون، ار‑تّرخوم ار‑تّصبارم ءي‑نگراتون بلا‑دا‑ياون‑تطيّار ف‑ينگراتون. ءيغ‑يلّا يان دار ما‑س‑ا‑يتاشتكّا س‑وايّاض، ءيلّا فلّاس اد‑اس‑يصامح. صامحات ءي‑نگراتون غمكلّي‑اون‑يصامح سيديتون. زايدات ءي‑كولّو ماياد ا‑باهرا‑تّيريم ءي‑نگراتون، اشكو تايري ا‑يژضارن ا‑تسّمون كولّو ما‑يلّان س‑تامونت ءيكمّلن. ادجات سّلامت لّماسيح ا‑تمالا ءي‑وولاون‑نّون كولّو ما‑گيگون‑يرا. اشكو ءيغرا‑ياون‑د ربّي ا‑كولّو‑تگم يان غ‑تامونت ن‑سّلامت‑اد. ييلي فلّاون ا‑بدّا‑تّشكارم ربّي. ادجات اوال لّماسيح ا‑يعمّر ءولاون‑نّون، ار‑تسّلمادم ار‑تّنصاحم ءي‑نگراتون س‑كولّو ما‑يگان تاحكيمت، ار‑تّيريرم ءي‑ربّي ار‑تّاسيم ءيموريگن د‑تاهليلات د‑تالغاتين نّا‑ياون‑يمالا رّوح لقودوس، ار‑تي‑تّشكارم زغ‑وولاون‑نّون. كولّو ما‑تّينيم ءولا كولّو ما‑تسكارم، سكارات‑ت س‑يسم ن‑سيديتنّغ ياسوع، ار‑تّشكارم ربّي فلّاس. وا‑تيمغارين، ءيلّا ف‑كرايگاتّ يات ا‑تسفليد س‑ورگاز‑نس غمكلّي ءيرا سيديتنّغ. ءيمّا كونّي ا‑يرگازن، ءيلّا ف‑كرايگاتّ يان ا‑يتحنّو غ‑تمغارت‑نس بلا‑دا‑ديدس‑يتشقو. وا‑تاروا مژّينين، سكارات‑بدّا س‑واوال ن‑ايت‑دارون، اشكو ءيرضا ربّي س‑ماياد. ءيمّا كونّي ا‑يد‑باباتسن، ا‑ور‑بدّا‑تّژيم تاروا‑نّون، باش ا‑ور‑غووضن غالن ءيس‑ور‑گين يات. وا‑يخدّامن، سكارات‑بدّا س‑واوال ن‑يد‑سيديتون ن‑دّونيت‑اد. ا‑ور‑تّيريم غير ا‑تن‑ترضوم غاكود نّا‑گيگون‑تمنادن، والاينّي خدمات س‑نّييت ن‑وول‑نّون س‑مكلّي تّيريم ا‑ترضوم سيديتنّغ. اينّا‑غ‑ا‑تّخدامّ، خدمات گيس س‑تيقّي‑نّون زوند ءيغد سيديتنّغ ا‑مي‑تّخدامّ ءورد بنادم. اشكو تسّنم ءيزد سيديتنّغ ا‑راد‑اون‑يفك تيغراد‑نّون، ءيشّكشم‑كُن س‑لوورت‑نّون غ‑يگنّا. اشكو سيديتنّغ لماسيح، نتّان ا‑مي‑تّخدامّ. ءيمّا وانّا ءيسكارن ما‑يُخشنّ، راد‑اس‑يرار ربّي ف‑لخُشانت لّي‑يسكر. هان ربّي ءور‑ا‑يسكار س‑وودماون. ءيمّا كونّي ا‑يد‑سيديتسن، سكارات د‑يخدّامن‑نّون س‑لحقّ، ار‑اسن‑تاكّام ما‑تن‑د‑يوشكان. ا‑ور‑تتّوم ءيزد ءولا كونّي ءيلّا‑ياون يان ءيگان سيديتون غ‑يگنّا. زايدات ار‑بدّا‑تّژالّام ار‑تضالابم ربّي، ترارم لعاقل س‑ماد‑اس‑تّينيم ار‑تي‑تّشكارم باهرا. ضالبات‑ت ءولا ف‑سّيبت‑نّغ نكُّني، باش ا‑يرژم غ‑لگدّام‑نّغ يان‑يمي ا‑نتبرّاح ءي‑مدّن س‑واوال‑نس، نمل‑اسن مايلّي مي ءور‑جّو‑سفلدن ف‑لماسيح. ف‑سّيبت ن‑واوال‑اد ا‑ف‑لّيغ نكّي غ‑لحبس، والاينّي ضالبات ربّي ا‑يّي‑يعاون اد‑تافاغ ءيواليون ما‑س‑ا‑سّفهامغ مدّن غمكلّي‑يّي‑د‑يقّان. سكارات س‑تحكيمت د‑كولّو ويلّي ءور‑گينين وين ربّي، ار‑تسكارم افولكي نّا‑مي‑توفام كرايگاتّ تاساعت. ساوالات س‑يواليون شوانين ميمنين، تيسّانم مامنك ا‑تّرارام ءي‑كرايگاتّ يان اوال نّا‑ت‑يخصّان. راد‑اون‑ييني تيخيكوس ف‑كولّو ما‑يگان لخبار‑ينو. ءيگا گماتنّغ ءيعزّان، ءيگ اخدّام ءيفولكين، ار‑ديدنّغ‑يتمعاوان غ‑تووري ن‑سيديتنّغ. ماياد ا‑ف‑اون‑ت‑ين‑وزنغ، باش ا‑تيسّانم مامنك ا‑نگا ءيزّعام ءولاون‑نّون. ازنغ‑ن ديدس گماتنّغ ءيفولكين ءيعزّان ءونيسيموس لّي‑يگان يان زغ‑گيگون. نتني ا‑راد‑اون‑ييني ف‑كولّو ما‑دارنّغ‑يجران غيد. ار‑ن‑فلّاون‑يتسلّام اريستارخوس، ءيلّا ديدي غ‑لحبس. ار‑ن‑فلّاون‑يتسلّام مارقُس يوس ن‑وولّتماس ن‑بارنابا. نّيغ‑اون‑ياد فلّاس ا‑ت‑ين‑تشّكشمّ س‑دارون، تگم‑ت د‑ونبگي‑نّون ءيغ‑ن‑دارون‑يوشكا. ار‑ن‑فلّاون‑يتسلّام ءولا ياشوع لّي‑مي‑تّينين يوسطوس. غير كراض‑اد ا‑يگان ايت‑يودايا غ‑غويلّي ديدي ءيتمعاوانّ غ‑تووري ن‑تگلديت ن‑ربّي، ار‑يّي‑سّفجّيجن ءول‑ينو باهرا. ار‑ن‑فلّاون‑يتسلّام ابافراس. ءيگا زغ‑گيگون ءولا نتّا، ءيگ اخدّام لّماسيح ياسوع. س‑نّييت‑نس ا‑س‑ا‑يتژالّا باهرا ف‑سّيبت‑نّون، باش ا‑تدوسم تزگام غ‑وغاراس ن‑ربّي ار‑تسكارم كولّو ما‑گيگون‑يرا ربّي. هاتي گيغ فلّاس ءينيگي ن‑منشك ا‑يتخدام باهرا ف‑سّيبت‑نّون ءولا ف‑سّيبت ن‑ايت‑لاوديكيّا ءولا ايت‑هيرابوليس. ار‑ن‑فلّاون‑يتسلّام‑وطبيب ءيعزّان لوقا، نتّان ءولا ضيماص. ار‑ن‑تسلّامغ ف‑ايتماتن ن‑لاوديكيّا ءولا ف‑نيمفا د‑ومناگّار لّي‑يتمونون غ‑تگمّي‑نس. تيغوردين ن‑ما‑تغرام تابرات‑اد غ‑دارون، ريغ ا‑ستّي‑تازنم ءي‑ومناگّار غ‑لاوديكيّا باش ا‑ستّ‑غرن ءولا نتني. ءيريغ ا‑تغرم ءولا كونّي تابرات لّي‑دارسن‑يلّان غ‑لاوديكيّا. ءينيات ءي‑ارخيبّوس ا‑يتلهو س‑تووري لّي‑ف‑ت‑يوصّا سيديتنّغ، باش ا‑ستّ‑يكمّل. س‑وفوس‑ينو ا‑س‑اون‑ين‑وريغ اوال‑اد: نكّي بولُس ار‑ن‑فلّاون‑تسلّامغ. ا‑ور‑تتّوم ءيسكراف‑اد غ‑لّيغ. اد‑اون‑تيلي لباراكا ن‑ربّي. زغ‑بولُس د‑سيلا د‑تيموتاوس، ءي‑ومناگّار ن‑ويلّي گانين وين ربّي باباتنّغ د‑سيديتنّغ ياسوع لماسيح غ‑تمدينت ن‑تاسالونيكي. اد‑اون‑تيلي لباراكا د‑سّلامت. ار‑بدّا‑نتشكار ربّي فلّاون كولّوكن. غاكود نّا‑نتژالّا ار‑كُن‑د‑نادّر، ار‑د‑نسوينگيم غ‑لگدّام ن‑ربّي باباتنّغ مامنك ا‑كولّو‑تسكارم س‑ليمان‑نّون، ار‑تّخدامّ س‑لحنانت، تزگام غ‑رّجا ن‑سيديتنّغ ياسوع لماسيح. واي‑ايتماتنّغ لّي‑ف‑يحنّا ربّي، نسّن ءيس‑كُن‑يژلي ا‑تگم وينس، اشكو ءيلكم‑اون‑ين لخبار‑نّغ ءيفولكين، ءورد غير س‑يواليون والاينّي س‑لقوّا ءولا س‑تحكيمت ن‑رّوح لقودوس ايلّيغ‑اون‑يبان ءيس‑يگا لحقّ. تسّنم كونّي مامنك ا‑نگا غ‑ووسّان لّي‑نزّري غ‑گراتون، نسكر كولّو ف‑ا‑كُن‑نتعاوان. توورّيم تسكرم ءولا كونّي غمكلّي نسكار نكُّني ءولا سيديتنّغ. واخّا ترفوفنم باهرا، تومژم غ‑واوال‑نس س‑لفرح ن‑رّوح لقودوس. غمكان ا‑س‑تملام ءي‑كولّو ءيمومنّ غ‑تميزار ن‑ماكيدونيّا د‑اخايا مامنك ا‑تن‑د‑يقّان اد‑سكارن ءولا نتني. والاينّي ءورد غير ماكيدونيّا د‑اخايا ا‑ن‑يلكم‑واوال ن‑سيديتنّغ ف‑سّيبت‑نّون، اشكو سفلدن مدّن غ‑كرايگاتّ ماني ف‑مامنك ا‑تومژم اغاراس ن‑ربّي، ايلّيغ ءور‑اغ‑يخصّا ا‑نيني يات ف‑مايد ءيجران. اشكو ار‑كولّو‑تّينين مدّن ف‑مامنك اد‑اغ‑تقبلم لّيغ‑ن‑دارون‑نوشكا، تفلم ءيلاهات ن‑دّونيت‑اد، توورّيم س‑ربّي باش ا‑تّخدامّ ءي‑ربّي لّحقّ لّي‑يدّرن. ار‑تّينين ف‑مامنك ا‑تّقلم غيلاد س‑يوس لّي‑د‑يسّنكر زغ‑لموت ار‑د‑يوورّي زغ‑يگنّا، ا‑ت‑يگان د‑ياسوع لّي‑اغ‑يجّنجمن زغ‑لغاضاب لّي‑را‑يتّوت ف‑دّونيت. واي‑ايتماتنّغ، تسّنم كونّي ءيس‑ورد بلا لفايتّ ا‑نزّري ءوسّان‑ان غ‑گراتون. تسفلدم ف‑ماد‑اغ‑يجران لّيغ ءور‑تا‑ن‑نروح س‑دارون، سّرفوفنّ‑اغ مدّن غ‑تمدينت ن‑فيليبّي رگمن‑اغ باهرا، والاينّي ءيزّعام‑اغ ربّي‑نّغ باش اد‑اون‑نساول ف‑لخبار ءيفولكين لّي‑اغ‑يملا واخّا ءيلّا ما‑ياغ‑يتژين باهرا. اشكو ءور‑ا‑نسّكيركيس ف‑مدّن لّيغ ا‑تن‑نتضالاب اد‑اغ‑سفليدن، ءولا‑دا‑نتّيري ما‑يگان وينسن ءولا‑دا‑نتّيري ا‑ستّ‑فلّاسن‑نزّري. والاينّي ار‑نساوال س‑مكلّي گينّغ ءيرا ربّي لّي‑اغ‑يورمن ءيفك‑اغ اد‑اسن‑نسّلكام لخبار‑اد ءيفولكين. ءور‑ا‑نسكار ف‑ا‑نترضو بنادم والاينّي ار‑نسكار ف‑ا‑نرضو ربّي لّي‑يتارمن ءول‑نّغ. تسّنم ءيس‑ور‑ا‑كُن‑نتالغ غ‑ووسّان‑ان س‑يواليون خوانين ءولا‑دا‑نسكار سين‑وودماون باش ا‑نتامژ كرا ف‑واوال‑نّغ. ربّي ا‑فلّانّغ‑يگان ءينيگي. ءور‑جّو‑نسكير ف‑اد‑اغ‑تالغم كونّي ءولا وييّاض. واخّا نژضار ا‑زگيگون‑نضالب ما‑يگّوتن ف‑سّيبت ن‑ما‑نگا ءيرقّاسن لّماسيح، نرخا‑بدّا ديدون زوند تامغارت لّي‑ستّ‑يتاوين غ‑تاروا‑نس مژّينين. تعزّام دارنّغ س‑كيگان ايلّيغ نوجاد اد‑اون‑ين‑نفك ءورد غير لخبار ءيفولكين والاينّي نفرح ا‑فلّاون‑نفك ءولا ءيخف‑نّغ. غونشكاد ا‑دارنّغ‑تعزّام. واي‑ايتماتنّغ، ءيس‑ور‑دي‑تسوانگمّ منشك ا‑نتخدام ار‑نتنهاتاف غ‑گراتون؟ نكّا‑تّين ار‑نتخدام غ‑ييض ءولا ازال باش ا‑فلّاون‑ور‑نژّاي لّيغ ا‑ياون‑نتبرّاح س‑لخبار ءيفولكين ن‑ربّي. كونّي تگام ءيناگان فلّانّغ، ءولا ربّي ءيگا فلّانّغ ءينيگي ن‑يس‑يشوا ءيفولكي كولّو ما‑نسكر غ‑گراتون كونّي لّي‑يومنّ، ءور‑جّو‑گينّغ‑يلّي كرا لّعيب غ‑دارون. تيسّانم ءيس‑ا‑نسكار د‑كرايگاتّ يان گيگون غمكلّي ءيسكار‑ورگاز د‑تاروا‑نس عزّانين. ار‑كُن‑نزّعام ار‑فلّاون‑نسّفجّيج، ار‑كُن‑نتنصاح نيني‑اون ا‑تسكارم غمكلّي‑د‑يقّانّ غويلّي گانين وين ربّي لّي‑اون‑د‑يغران ا‑تكشمّ س‑تگلديت‑نس ءولا لمجد‑نس. ماياد‑داغ ا‑ف‑ا‑بدّا‑نتشكار ربّي، اشكو غاكود لّيغ تسفلدم ءي‑واوال ن‑ربّي لّي‑اون‑ين‑نيوي، تامژم گيس تامنم ءيزد اوال ن‑ربّي ا‑يگا، ءورد اوال ن‑بنادم. س‑صّاحت اوال ن‑ربّي ا‑يگا، ءيخدم غيلاد غ‑وولاون‑نّون كونّي لّي‑سرس‑يومنّ. اشكو ءيجرا غ‑دارون اي‑ايتما، غمكلّي ءيجران غ‑دار ءيمناگّارن ن‑ربّي لّي‑ومنّين س‑لماسيح ياسوع غ‑تمازيرت ن‑يودايا. ترفوفنم ف‑وفوس ن‑ايت‑تمازيرت‑نّون غمكلّي رفوفنّ نتني ف‑وفوس ن‑ايت‑يودايا. اشكو ايت‑يودايا ا‑ينغان سيديتنّغ ياسوع ءولا لانبيا، سّمسرن‑اغ ءولا نكُّني. ار‑تّ‑سّطيّارن ءي‑ربّي ار‑سكارن گار غ‑كولّو مدّن، اشكو ار‑ن‑تگّان تيقّي‑نسن ف‑اد‑اغ‑سّفسّان ا‑ور‑نتبرّاح ءي‑ايت‑تميزار ياضني س‑واوال لّي‑س‑راد‑نجمن. غمكاد ا‑س‑ا‑تعمّارن لعبرت ن‑دّنوب‑نسن. ءيمّا غيلاد غ‑تگيرا ءيگّوز‑د فلّاسن لغاضاب ن‑ربّي. ءيشقا فلّانّغ ا‑ديدون‑ننگارا اي‑ايتماتنّغ. واخّا‑د‑فلّاون‑ياگّوگ‑وودم‑نّغ، ءيقاما‑ن‑بدّا‑ديدون‑وول‑نّغ. منشك ا‑باهرا‑نتّيري ا‑كُن‑نژر. نسكر كولّو ف‑ا‑كُن‑نژر. منّاوت‑توال ژوژضغ نكّي بولُس ا‑ن‑دارون‑وورّيغ، والاينّي ار‑اغ‑يتحصار شيطان. اشكو غاكود لّيغ را‑د‑ياشك سيديتنّغ ياسوع، ما‑را‑يگ تّاج ن‑رّجا‑نّغ ذ‑لفرح‑نّغ لّي‑س‑را‑نزعم غ‑لگدّام‑نس، ابلا كونّي؟ يياه، كونّي ا‑يگان لمجد‑نّغ د‑لفرح‑نّغ. لّيغ ءور‑نژضار ا‑سول‑نصبر، نيني ءي‑يخف‑نّغ را‑ياف ا‑نقاما واحدوياغ غ‑تمدينت ن‑اتينا. غاكودان نوزن‑ن س‑دارون گماتنّغ تيموتاوس لّي‑يگان اخدّام ن‑ربّي ديدنّغ غ‑تووري لّخبار ءيفولكين لّماسيح. نازن‑ت‑ين ا‑كُن‑يزّعام ءيسّدوس‑كُن غ‑وغاراس ن‑ربّي، باش ا‑ور‑يضر يان گيگون ف‑سّيبت ن‑ترفوفنت لّي‑غ‑ا‑تزرايم. تسّنم كونّي ءيس‑يقصاد ربّي ا‑نزري غ‑ماياد، اشكو غ‑ووسّان لّي‑غ‑ديدون‑نلّا ننّا‑ياون باهرا ءيس‑را‑نترفوفون. تژرم غيلاد ءيس‑يجرا غمكلّي ننّا. ماياد ا‑ف‑ت‑ين‑وزنغ س‑دارون، اشكو ءور‑ژضارغ اد‑سول‑صبرغ. ءيخصّا‑يّي اد‑يسّانغ ءيس‑سول‑تزگام غ‑وغاراس ن‑ربّي نغد ءوهو، اشكو كسوضغ ا‑كُن‑ور‑يسّضر ءيبليس، تضر ءولا تاووري‑نّغ غ‑گراتون بلا لفايتّ. ءيمّا غيلاد غ‑د‑يوورّي تيموتاوس زغ‑دارون، ياوي‑اغ‑د لخبار ن‑يس‑تزگام غ‑ليمان‑نّون ءولا لحنانت ن‑ينگراتون. ييني‑اغ ءيس‑ا‑تّفراحم ف‑سّيبت‑نّغ غاكود نّا‑گينّغ‑تسوينگيمّ، تيريم باهرا اد‑اغ‑تژرم زوند ما‑نرا باهرا ا‑كُن‑نژر. واي‑ايتماتنّغ، واخّا نزري ءولا نكُّني غ‑تنوكموت د‑ترفوفنت ءيگّوتن، ها‑ياغ نتهنّا غيلاد ف‑سّيبت‑نّون، اشكو نسفلد ءيس‑تزگام غ‑وغاراس ن‑ربّي. نوورّي س‑تودرت‑نّغ اشكو تبيدّم تدوسم غ‑سيديتنّغ. منشك ا‑باهرا‑نتشكار ربّي فلّاون. منشك ا‑باهرا‑نتفراح ف‑سّيبت‑نّون غ‑لگدّام ن‑ربّي‑نّغ. ها‑ياغ غ‑ييض ءولا ازال ار‑نتضالاب ربّي اد‑اغ‑يفك ا‑كُن‑نژر ا‑نكمّل ما‑كُن‑سول‑يخصّان باش ا‑تزايدم غ‑وغاراس لّماسيح. ار‑نتضالاب ربّي باباتنّغ د‑سيديتنّغ ياسوع اد‑اغ‑يجّوجاد اغاراس باش ا‑ن‑نوورّي س‑دارون. ار‑نتضالاب سيديتنّغ اد‑اون‑باهرا‑يسّيگات تايري ن‑ينگراتون ءولا تايري ن‑كولّو مدّن، غمكلّي‑كُن‑باهرا‑نتّيري نكُّني. ار‑ت‑نتضالاب ا‑كُن‑يسّدوس باش ا‑تبيدّم غ‑لگدّام ن‑ربّي باباتنّغ س‑وولاون‑نّون غوسنين بلا گيگون ءيلّا كرا لّعيب غاكود لّيغ را‑د‑ياشك سيديتنّغ ياسوع د‑يمژلاين‑نس كولّوتن. ءيمّا غيلاد اي‑ايتماتنّغ را‑كُن‑نضالب، ننصح‑كُن س‑يسم ن‑سيديتنّغ ياسوع، ا‑تّيدوم غ‑وغاراس لّي‑زگينّغ‑تلمدم، ار‑بدّا‑تّناوالم ما‑يرضان ربّي. زايدات ف‑مايد تسكارم، ار‑تي‑تسكارم س‑وگُّار. تسّنم مايلّي‑ف‑كُن‑نوصّا س‑يسم ن‑سيديتنّغ ياسوع غايد ءيزرين، اشكو ءيرا ربّي ا‑يسّغوس ءولاون‑نّون، ييري گيگون ا‑تانفم ءي‑لفساد. ءيلّا ف‑كود يان ا‑ييسّان مامنك ا‑را‑يوقّر تامغارت‑نس ييلي‑تّ س‑وول ءيغوسن. ا‑ور‑تگم زوند ايت‑تميزار لّي‑ور‑سّينّين ربّي، ار‑تن‑تنرونت شّهوات‑نسن. ءيلّا ف‑كود يان ا‑ور‑يفّوغ زغ‑مايان ءولا ءيتعدّا ف‑گماس. اشكو ننّا‑ياون يادلّي س‑لمعقول، را‑يوت سيديتنّغ لعقوبيت ف‑كولّو وينّا سكارنين وان تيغاوسيوين‑ان. اشكو ءيغرا‑ياغ‑د ربّي ا‑نغوس، ءور‑اكُّ‑يري ا‑نركو. وانّا ياگُين ا‑يسفلد س‑واوال‑اد، ءورد بنادم ا‑ياگُي والاينّي ياگُي ربّي لّي‑اون‑يفكان ءولا كونّي رّوح‑نس لقودوس. والاينّي ءور‑تحتاجّام ماد‑اون‑ين‑يتاران مامنك ا‑تّحوبّوم ايتماتون، اشكو ربّي اد‑اون‑يسّلمدن مامنك ا‑تّحنّوم ءي‑نگراتون. س‑صّاحت ار‑تّحوبّوم كولّو ايتماتن غ‑تمازيرت ن‑ماكيدونيّا كولّوتّ، والاينّي را‑كُن‑سول‑نضالب اي‑ايتماتنّغ، ا‑تزايدم ار‑تن‑تّحوبّوم س‑وگُّار. ءيريات ا‑بدّا‑طّرّحم ار‑تّلهوم س‑تووري ن‑يخف‑نّون ار‑تّخدامّ س‑يفاسّن‑نّون، غمكلّي‑اون‑ننّا غايد ءيزرين. غمكاد ا‑ف‑را‑كُن‑توقّارن مدّن لّي‑ور‑گينين وين لماسيح، ءور‑را‑تحتاجّام يان. واي‑ايتماتنّغ، نرا ا‑تيسّانم ما‑را‑يجرو ءي‑ويلّي مّوتنين، باش ا‑كُن‑ور‑تاغ‑تگوضي زوند مدّن ياضني لّي‑ور‑دار رّجا. اشكو نومن ءيس‑يمّوت ياسوع، ءينكر‑د زغ‑لموت. نامن ءيس‑را‑ديدس‑ياوي ربّي كولّو ويلّي مّوتنين ءومنّين س‑ياسوع. مايلّي‑س‑اغ‑يملا سيديتنّغ ا‑راد‑اون‑نيني: نكُّني لّي‑را‑يقاما نسول ار اسّ لّي‑غ‑را‑د‑ياشك سيديتنّغ، ءور‑را‑نزوور غويلّي مّوتنين. اشكو س‑لامر ءيتجهّدن، س‑واوال لّمالاك ءيمقّورن، س‑تيجّيجت ن‑نّفّار ن‑ربّي ا‑س‑را‑د‑يگّوز سيديتنّغ زغ‑يگنّا، نكرن‑د مدّن لّماسيح لّي‑مّوتنين، نتني ا‑را‑يزوور. غاكودان را‑نتيالال ءولا نكُّني لّي‑يسولن، راد‑كولّو‑ديدسن‑نمون غ‑يمدلا، نمناگّار د‑سيديتنّغ غ‑يگنوان. غمكاد ا‑س‑راد‑بدّا‑نيلي د‑سيديتنّغ. زّعامات ءي‑نگراتون س‑يواليون‑اد. واي‑ايتماتنّغ، ءور‑اغ‑يخصّا اد‑اون‑ين‑نارا كرا ف‑ووسّان ءولا ءيزماز لّي‑غ‑راد‑جرونت‑تغاوسيوين‑اد، اشكو تسّنم ءيزد زوند امخّار ن‑ييض ا‑س‑را‑د‑يلكم‑واسّ ن‑سيديتنّغ. را‑تّينين مدّن «لاباس تهنّا لوقت،» ءيميل ءيگّوز‑د فلّاسن لهالاك. حاينا را‑تن‑يغوي غمكلّي ءيقُّاي‑ونگاژ تامغارت لّي‑را‑يارو، ءور‑اكُّ‑راد‑نجمن. ءيمّا كونّي اي‑ايتماتنّغ، ءور‑تلّيم غ‑تيلّاس. ءور‑را‑كُن‑يامژ‑واسّ‑ان زوند امخّار. اشكو كونّي كولّوكن تگام ايت‑تيفاوت، تگم ايت‑وزال. هاتي ءورد وين‑ييض ا‑نگا نغد وين تيلّاس. ماياد ا‑ف‑اغ‑د‑يقّان ا‑ور‑نطّاس زوند مدّن ياضني. ءيلّا فلّانّغ ا‑بدّا‑نرار لعاقل ار‑نتنباض غ‑يخف‑نّغ. هاتي غ‑ييض ا‑غ‑ا‑طّاسن مدّن ار‑سّنوفولن ءيخف‑نسن س‑تيسّي. ءيمّا نكُّني نگا وين‑وزال، ييلي فلّانّغ ا‑نتنباض غ‑يخف‑نّغ، نگ ءي‑يدمارن‑نّغ ابانّك ن‑‹تّيقا غ‑ربّي› ءولا ‹لحنانت›، نگ ءي‑يخف‑نّغ اسدّول ن‑‹رّجا ن‑وجنجم›. اشكو ءور‑يقصاد ربّي ا‑فلّانّغ‑يوت لعقوبيت، والاينّي ءيقصاد اد‑اغ‑يجّنجم ف‑وودم ن‑سيديتنّغ ياسوع لماسيح. ءيمّوت نتّان ف‑سّيبت‑نّغ باش ا‑ديدس‑ندّر، ءيغ‑نمّوت نغد ءيغ‑نّيت‑نسول ارد‑د‑ياشك. زايدات ار‑تزّعامّ ار‑تّمعاوانم ءي‑نگراتون غمكلّي تميارم ا‑تسكارم. ءيمّا غيلاد اي‑ايتماتنّغ، را‑كُن‑نضالب ا‑تّوقّارم غويلّي سكارنين تاووري ن‑ربّي غ‑گراتون، ار‑كُن‑تگابالن س‑يسم ن‑سيديتنّغ ار‑كُن‑تنصاحن. ملات‑اسن منشك ا‑س‑دارون‑عزّان ف‑سّيبت ن‑تووري‑نسن. گات س‑سّلامت ءي‑نگراتون. را‑كُن‑نضالب اي‑ايتماتنّغ، ا‑تّنصاحم وانّا ءور‑يتّيرين ا‑يخدم، ار‑تزّعامّ وانّا ءيتيكساضن، ار‑تّعاوانم وانّا ءيضعفن، ار‑تّصبارم د‑كرايگاتّ يان. رارات لعاقل ءيغ‑يلّا ماد‑اون‑يسكرن كرا يُخشنّ، اد‑اس‑ت‑ور‑ترارم س‑لخُشانت. گات‑ن تيقّي‑نّون ا‑بدّا‑تّيريم ا‑تسكارم افولكي غ‑گراتون ءولا د‑كولّو مدّن. فرحات‑بدّا، ار‑تّژالّام غ‑كرايگاتّ لوقت، ار‑تّشكارم ربّي غمكنّا ءيگا لحال، اشكو غمكاد ا‑گيگون‑يرا غ‑تامونت لّماسيح ياسوع. ا‑ور‑تسّخسيم رّوح لقودوس، ءولا‑دا‑تّحگارم ءيواليون ن‑يان ءيتّينين س‑ماد‑اس‑يمالا ربّي. سّماقّلات كرايگاتّ كرا، تامژم غ‑ما‑يفولكين، تانفم ءي‑كولّو ما‑يُخشنّ. ءيمّا غيلاد ضالبغ زغ‑ربّي لّي‑بدّا‑ياكّان سّلامت ا‑كُن‑يسّغوس زغ‑كولّو ما‑گيگون‑يُخشنّ، ءيجّنجم ءول‑نّون ءولا رّوح‑نّون ءولا دّات‑نّون زغ‑كولّو كرا ءيگان لعيب ارد‑د‑ياشك سيديتنّغ ياسوع لماسيح. غمكان ا‑را‑يسكر ربّي لّي‑اون‑د‑يغران، اشكو ءيقاما‑بدّا غ‑واوال‑نس. واي‑ايتماتنّغ، ژّالّات تضالبم ربّي ف‑سّيبت‑نّغ ءولا نكُّني. نسالّامات د‑ايتماتن كولّوتن س‑ونسالّام ن‑تاگُمات. را‑كُن‑وصّاغ س‑يسم ن‑سيديتنّغ ا‑تغرم تابرات‑اد ف‑ايتماتن كولّوتن. اد‑اون‑تيلي لباراكا ن‑سيديتنّغ ياسوع لماسيح. زغ‑بولُس د‑سيلا د‑تيموتاوس، ءي‑ومناگّار ن‑ويلّي گانين وين ربّي باباتنّغ د‑سيديتنّغ ياسوع لماسيح غ‑تمدينت ن‑تاسالونيكي. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. واي‑ايتماتنّغ، ءيقّان‑اغ‑د ا‑بدّا‑نتشكار ربّي فلّاون، ءيگ لحقّ گينّغ ا‑ت‑نتشكار، اشكو ار‑تّزايادم ار‑تّيمغورم باهرا غ‑ليمان‑نّون، يوورّي كود يان گيگون ار‑باهرا‑يتحنّو غ‑وييّاض. هاتي ار‑كُن‑نتالغ غ‑دار ءيمناگّارن ن‑ربّي، اشكو تومژم غ‑ربّي سول تزگام، واخّا دا‑تزرايم غ‑ترفوفنت د‑تنوكموت ءيگّوتن. مايد‑اون‑يجرّون ار‑يمالا ءيس‑ا‑يتحكام ربّي س‑لحقّ، اشكو ءيگا‑كُن د‑ويد ستهلّانين اد‑كشمن س‑تگلديت‑نس لّي‑ف‑ا‑تّرفوفونم. اشكو س‑لحقّ ا‑س‑را‑يرار ربّي تارفوفنت ءي‑ويلّي‑كُن‑سّرفوفنّين، ءيفك‑اون اسونفو ديدنّغ ءي‑كونّي لّي‑يرفوفنّ. غمكاد ا‑را‑يسكر غاكود نّا‑د‑يوورّي سيديتنّغ ياسوع لماسيح زغ‑يگنّا ءيبايّن د‑لمالايكا‑نس تجهّدنين س‑لعافيت ءيفنّون. غاكودان ا‑را‑يوت ربّي لعقوبيت ف‑ويلّي سرس رورنين تيغوردين‑نسن، اگُين اد‑سفليدن س‑لخبار ءيفولكين ن‑سيديتنّغ ياسوع. را‑فلّاسن‑يوت لحوكم س‑لهالاك لّيخرت، ءيسّنگارا‑تن د‑سيديتنّغ. را‑تن‑ين‑يسّاگّوگ ف‑لمجد‑نس ءيتجهّدن غ‑واسّ لّي‑غ‑را‑د‑ياشك سيديتنّغ ا‑ت‑الغن ءيمژلاين‑نس، تعجّبن گيس كولّو غويلّي سرس ءومنّين. ءولا كونّي را‑زگيسن‑تگم، اشكو تومنم توگّا لّي‑اون‑ين‑نيوي. ماياد ا‑ف‑ا‑بدّا‑نتژالّا ف‑سّيبت‑نّون، ار‑نتضالاب ربّي‑نّغ ا‑كُن‑يگ د‑ويد ستهلّانين تودرت لّي‑س‑اون‑د‑يغرا. ار‑ت‑نتضالاب ا‑يسّافو س‑تحكيمت‑نس ءيتجهّدن كولّو ما‑تّناوالم ءيفولكي ءولا كولّو ما‑تسكارم ف‑سّيبت لّيمان‑نّون. غمكاد ا‑س‑را‑گيگون‑يبان لمجد ن‑يسم ن‑سيديتنّغ ياسوع، ييلي‑اون لمجد ءولا كونّي ديدس س‑لباراكا ن‑ربّي‑نّغ د‑سيديتنّغ ياسوع لماسيح. واي‑ايتماتنّغ، نرا غيلاد اد‑اون‑نيني ف‑مامنك ا‑را‑د‑ياشك سيديتنّغ ياسوع لماسيح، نمون كولّواغ باش ا‑ديدس‑نمناگّار. والاينّي اد‑ور‑تاسيم تاغوفت ءولا تغووضم ءيغ‑تسفلدم ءي‑كرا ن‑يان ار‑يتّيني «ءيزري‑واسّ لّي‑غ‑د‑يوشكا سيديتنّغ.» ا‑ور‑تي‑تامنم واخّا ءيغ‑اون‑ينّا ءيملا‑ياس‑ت رّوح لقودوس نغد ءيسفلد ءي‑لخبار‑نس نغد ءيغرا‑ت غ‑كرا ن‑تبرات زغ‑دارنّغ. اد‑ور‑تادجم يان ا‑كُن‑يجلو، اشكو ءور‑را‑د‑يلكم‑واسّ‑ان ارد مونّ مدّن گّوتنين اد‑مّاغن د‑ربّي، ءيبان‑د‑ونوّاش ن‑ربّي لّي‑را‑يگُّرو س‑لهالاك. را‑يسّيمغور ءيخف‑نس ار‑يتژي ف‑كولّو ماد‑تعبادن مدّن ءولا كولّو ما‑مي‑تژالّان. را‑يكشم ءولا س‑تگمّي ن‑ربّي ءيگاور گيس ييني ءيزد نتّان ا‑يگان ربّي. ءيس‑ور‑دي‑تسوانگمّ؟ نّيغ‑اون باهرا ف‑تغاوسيوين‑اد غ‑ووسّان لّي‑غ‑ديدون‑لّيغ. تيسّانم ما‑ت‑يحصارن غيلاد باش ا‑ور‑د‑يبان ارد‑د‑يلكم‑وزمز‑نس. اشكو تانوّاشت ءينتلن تبدا غيلاد ار‑تّزاياد، والاينّي غايلّي را‑يجرو ءور‑را‑يجرو ارد ءيتياتّاي ما‑ت‑يحصارن. غاكودان ا‑را‑د‑يبان‑ونوّاش ن‑ربّي، ياشك‑يد ءيلمّا سيديتنّغ ياسوع س‑لمجد ءيگّوتن، ءينغ‑ت س‑يات تونفوست زغ‑يمي‑نس ءيهلك‑ت. ءيمّا انوّاش‑ان، را‑دارس‑تيگات‑تحكيمت ن‑شيطان، را‑يزّگا تيكركاس‑نس س‑لمعجيزات د‑لقوّات د‑تميتار تجهّدنين. س‑كولّو كرا ءيگان لخُشانت ا‑س‑را‑يجلّو غويلّي لّانين غ‑وغاراس لّهالاك اگُين اد‑يرين لحقّ نجمن. ف‑مايان ا‑ف‑ا‑ياسن‑يتزاياد ربّي ايلّيغ جلان س‑وگُّار امنّ تيكركاس‑ان. غمكاد ا‑س‑را‑تضر لعقوبيت ف‑كولّو ويلّي ءور‑ومنّين س‑لحقّ فرحن س‑ما‑يُخشنّ. والاينّي ءيقّان‑اغ‑د ا‑بدّا‑نتشكار ربّي فلّاون اي‑ايتماتنّغ لّي‑ف‑يحنّا سيديتنّغ، اشكو ءيژلي‑كُن زغ‑يسيزوار ا‑تنجمّ، ءيسّغوس‑كُن س‑رّوح لقودوس باش ا‑تگم وينس ف‑سّيبت ن‑ما‑تومنم لحقّ. كولّو ماياد، ءيغرا‑ياون‑د سرس ربّي س‑لخبار ءيفولكين لّي‑اون‑ين‑نيوي، باش اد‑اون‑تيلي تاغامت غ‑لمجد ن‑سيديتنّغ ياسوع لماسيح. ءيمّا غيلاد اي‑ايتماتنّغ، زگايات تامژم‑بدّا غ‑ولمّود لّي‑س‑كُن‑نسّلمد، زوند ماد‑اون‑ننّا س‑يمي، زوند ماد‑اون‑ين‑نورا س‑وفوس. ار‑نتالغ سيديتنّغ ياسوع لماسيح د‑ربّي باباتنّغ لّي‑فلّانّغ‑يحنّان ءيبارك‑اغ ءيفك‑اغ زّعامت ءيدومن ءولا رّجا ءيصحان. ار‑ت‑نتضالاب ا‑باهرا‑يزّعام ءيسّدوس ءولاون‑نّون باش ا‑تسكارم ار‑تساوالم س‑كولّو ما‑يفولكين. ءيمّا غيلاد اي‑ايتماتنّغ، ژّالّات فلّانّغ تضالبم ربّي اد‑اغ‑يعاون ا‑نسّلكم لخبار ن‑سيديتنّغ غ‑ووسّان‑اد س‑كولّو‑تمازيرت‑اد باش ا‑سرس‑سفليدن مدّن گّوتنين غمكلّي سفلدن غ‑دارون. ضالبات‑ت اد‑اغ‑يسّانف ءي‑مدّن شقانين أُخشنّين، اشكو ءور‑ا‑كولّو‑تّيرين اد‑امنّ. ءيمّا سيديتنّغ ءيقاما‑بدّا غ‑واوال‑نس، را‑كُن‑يسّدوس ءيسّنتال‑كُن زغ‑والّي يُخشنّ. هاتي ءيسّهنّا‑ياغ سيديتنّغ ف‑سّيبت‑نّون، نيسّان ءيس‑ا‑تسكارم كولّو ماد‑اون‑ننّا راد‑بدّا‑تي‑تسكارم. ءيمّا غيلاد، نضالب سيديتنّغ ا‑كُن‑يهدو باش ا‑تّحنّوم غمكلّي ءيتحنّو ربّي، ار‑تّصبارم غمكلّي ءيتصبار لماسيح. واي‑ايتماتنّغ، س‑يسم ن‑سيديتنّغ ياسوع لماسيح ا‑س‑را‑كُن‑نوصّا غيلاد، نيني‑اون ا‑تّانفم ءي‑ايتماتن نّا‑ياگُين اد‑تخدامن ءولا‑دا‑سكارن س‑ولمّود لّي‑اون‑نسّلمد. اشكو تسّنم ءيس‑كُن‑يخصّا ا‑تسكارم غمكلّي نسكار نكُّني، ءور‑نگاور غ‑دارون بلا‑دا‑نتخدام. ءور‑جّو‑نشّي اغروم ن‑يان بلا‑ياس‑نفكا اتيگ‑نس. نكّا‑تّين ار‑نتخدام غ‑ييض ءولا ازال، ار‑نكّات تاكرّايت باش ا‑ور‑نژّاي ف‑يان گيگون. واخّا دارنّغ لحقّ ا‑زگيگون‑نضالب ما‑نحتاجّا، ءور‑جّو‑ت‑نضالب. نسكر غمكان باش اد‑اون‑نمل مامنك ا‑كُن‑د‑يقّان ا‑تسكارم ءولا كونّي. غاكود لّيغ ديدون نلّا ننّا‑ياون «وانّا ءور‑يرين ا‑يخدم، ءيخصّا‑ت ا‑ور‑يشّ.» ءيمّا غيلاد نسفلد ءيس‑لّان كرا ن‑مدّن غ‑گراتون ءور‑ا‑سكارن يات، اگُين تاووري، ار‑كشّمن غير سّوق ن‑وييّاض. زوند غوين، را‑تن‑نوصّا غيلاد س‑يسم ن‑سيديتنّغ ياسوع لماسيح، ننصح‑تن اد‑تخدامن اسّ ف‑واسّ باش اد‑امژن ماد‑شتّان ف‑تووري لّي‑سكارن. واي‑ايتماتنّغ، سكارات افولكي بلا‑دا‑تّرمايم. ژرات وانّا ياگُين ا‑يسفليد س‑مايد‑اون‑نورا غ‑تبرات‑اد، تانفم‑اس باش ا‑تي‑تيگُراژ. ا‑ور‑تي‑تگم د‑ونوّاش‑نّون، والاينّي نصحات‑ت زوند يان ءيگان زغ‑ايتماتون. ار‑نتضالاب سيديتنّغ لّي‑يگان باب ن‑سّلامت اد‑اون‑ياكّا سّلامت غ‑كرايگاتّ تاسگا د‑كرايگاتّ تاساعت. ا‑ديدون‑ييلي سيديتنّغ كولّوكن. نكّي بولُس، س‑وفوس‑ينو ا‑س‑وريغ اوال‑اد ن‑سّلام، ءيگ تاماتارت‑ينو غ‑كرايگاتّ تابرات‑ينو. غمكاد ا‑س‑ا‑تاراغ. اد‑اون‑تيلي لباراكا ن‑سيديتنّغ ياسوع لماسيح كولّوكن. زغ‑بولُس ارقّاس لّماسيح ياسوع، غمكلّي يومر ربّي انجّام‑نّغ د‑لماسيح ياسوع لّي‑غ‑ن‑نرجا. ءي‑تيموتاوس ءيوي ءيعزّان غ‑تاگُمات لّماسيح. اد‑اك‑تيلي لباراكا د‑رّحمت د‑سّلامت زغ‑ربّي باباتنّغ د‑لماسيح ياسوع سيديتنّغ. ضالبغ زغ‑گيك غيلاد ا‑ن‑تقامات غ‑تمدينت ن‑افسوس غمكلّي‑اك‑نّيغ غاكود لّيغ‑ن‑زريغ س‑تمازيرت ن‑ماكيدونيّا. اشكو لّان غين كرا ن‑مدّن ار‑سّلمادن ما‑ور‑يگين لحقّ. ريغ ا‑تن‑تامرت اد‑فسّان، تينيت‑اسن ا‑ور‑تلهون ءيخف‑نسن س‑تحاجيّين خوانين ءولا س‑يسماون گّوتنين ن‑كولّو تاسوتين لّي‑زرينين. هان تيغاوسيوين‑ان، ار‑ترارانت مدّن اد‑تمجاحادن ءي‑نگراتسن. ءور‑ا‑تن‑تعاوانّت اد‑امنّ ار‑سكارن ما‑گيسن‑يتّيري ربّي. غمكان ا‑س‑ك‑وصّاغ اشكو ريغ ا‑نزايد ار‑نتعمّار س‑لحنانت ن‑ويلّي دار ءول ءيغوسن ءيسّانّ ءيس‑ور‑گيسن لعيب امنّ س‑لماسيح س‑نّييت ءيكمّلن. والاينّي كرا ن‑مدّن فّوغن اغاراس‑اد، ار‑جلّون ءيخفاون‑نسن س‑يمجاحادن خوانين. ار‑تّيرين اد‑گن ءيمسلمدن ن‑شّرع، والاينّي ءور‑فهيمن ما‑تّينين ءولا سّنّ تيغاوسيوين لّي‑س‑ا‑سّلمادن س‑زّعامت. نسّن نكُّني ءيس‑يفولكي شّرع غ‑دار وانّا سرس ءيسكارن ما‑يرا ربّي. والاينّي ءيقّان‑د ا‑نيسّان ءيزد ف‑سّيبت ن‑ويلّي أُخشنّين ا‑ف‑د‑يفكا ربّي شّرع، ءورد ف‑سّيبت ن‑ويلّي فولكينين. ءيفك‑ت‑يد ف‑ويلّي ءور‑رينين شّرع فّوغن زغ‑گيس. ءيفك‑ت‑يد ف‑ويلّي رورنين تيغوردين‑نسن س‑ربّي ار‑تسالان دّنوب، ءور‑ا‑توقّارن ربّي ءولا‑دا‑تّيرين اغاراس‑نس. ءيفك‑ت‑يد ف‑ويلّي نقّانين باباتسن نغد ءينّاتسن ءولا غويلّي نقّانين وييّاض. ءيفك‑ت‑يد ف‑ويلّي تفسادنين ءولا غويلّي تشتهونين يوتمان زوند نتني. ءيفك‑ت‑يد ف‑ويلّي تاكُرنين ءيحشماي ءولا غويلّي سّكيركيسنين ءولا غويلّي اكّانين توگّا ن‑تكركاس. ءيفك‑ت‑يد ف‑كولّو ويلّي سكارنين اينّا ءيفّوغن زغ‑ولمّود يُغژانّ. المّود‑اد ءيگا لخبار ءيفولكين لّمجد ءيگّوتن لّي‑يّي‑د‑يملا ربّي امباركي اد‑سرس‑تبرّاحغ. ار‑تشكارغ لماسيح ياسوع سيديتنّغ اشكو ءيگا‑يّي د‑واد ءيزگان غ‑وفولكي. ءيژلي‑يّي ءيسّدوس‑يّي باش اد‑قاساغ تاووري‑نس. كّيغ‑تّين ار‑رگّمغ لماسيح ار‑ت‑سّرفوفونغ ار‑ديدس‑تمّاغّ، والاينّي ءيرحم‑يّي‑د اشكو ءور‑سّينغ ماد‑سكارغ غ‑ووسّان‑ان، ءور‑تا‑سرس‑ومينغ. غاكودان ءيبارك گيگي سيديتنّغ س‑لحنانت‑نس ءيگّوتن، ءيعمّر‑يّي س‑ليمان د‑تايري ن‑ويلّي گانين وين لماسيح ياسوع. اوال ءيزگان اياد، ءيقّان‑د كود يان ا‑ت‑يامن: يوشكا‑د لماسيح ياسوع س‑دّونيت باش ا‑يجّنجم مدّن أُخشنّين، د‑نكّي ا‑كولّو‑گيسن‑يُخشنّ. والاينّي ف‑مايان ا‑ف‑يّي‑د‑يرحم نكّي لّي‑گيسن‑يُخشنّ، باش ا‑يمل ءيس‑يژضار لماسيح ياسوع ا‑يصبر د‑وانّا كا‑يلّان، باش ا‑سرس‑امنّ وييّاض كشمن ءولا نتني س‑تودرت ءيدومن. ءيمّا غيلاد راد‑باهرا‑نتالغ اگلّيد لّي‑يدومن. ءور‑را‑يمّت ءولا ءيژرا‑ت يان. نتّان واحدوت ا‑يگان ربّي، ييلي‑اس لمجد د‑لوقر، غيلاد ءولا كولّو مايد‑د‑يفتان، امين. وا‑يوي تيموتاوس، فكيغ‑اك لوصيت‑اد غمكلّي فلّاك نّان ايتماتن غايد ءيزرين س‑يواليون لّي‑اسن‑يملا ربّي. امژ غ‑يواليون‑نسن باش ا‑تبكيست ار‑تكّاتّ تاكرّايت ف‑وفولكي. زّگا ءيخف‑نّك غ‑وغاراس لّماسيح، د‑ا‑ور‑تادجت كرا يُخشنّ ا‑يكشم س‑وول‑نّك. هان كرا ن‑مدّن ءور‑ا‑ستّي‑تاوين غ‑ماد‑اسن‑يمالا‑وول‑نسن. د‑غايان ا‑ف‑ا‑ترژّا تاناوت لّيمان‑نسن، زگيسن هيمينايوس د‑يسكاندر. دحيغ‑تن‑ين نتني ءي‑شيطان باش اد‑لمدن ا‑ور‑رگّمن ربّي. ف‑مايان ا‑ف‑راد‑ضالبغ زغ‑ايتماتن اد‑تژالّان ف‑كولّو مدّن، ار‑تضالابن ربّي ا‑تن‑يرحم ءيبارك‑تن، ار‑تي‑تشكارن ف‑ما‑يسكار ءي‑كرايگاتّ يان. ءيلّا فلّاسن اد‑تژالّان ف‑يگلدان ءولا كولّو ويلّي تحكامنين، باش ا‑ندّر س‑لهنا د‑سّلامت نسكر افولكي ءولا كولّو ما‑يرا ربّي. ءيشوا ماياد، ءيرضو سرس ربّي انجّام‑نّغ لّي‑يران كولّو مدّن اد‑نجمن وورّين ءيسّانّ لحقّ. اشكو ءيلّا يان ربّي، ييلي يان لّي‑يبيدّن غ‑گر ربّي د‑بنادم، ا‑ت‑يگان د‑لماسيح ياسوع لّي‑يگان بنادم. ءيفكا ءيخف‑نس ا‑يفرو كولّو مدّن غ‑وزمز لّي‑يقصاد ربّي ا‑گيس‑يسّبايّن توگُّا-نس. د‑غمكاد ا‑س‑يّي‑يگا د‑وبرّاح د‑ورقّاس غ‑گر ايت‑تميزار اگّوگنين، باش اد‑اسن‑سّلمادغ اغاراس لّيمان ءولا لحقّ. لحقّ اياد نّيغ، ءور‑اكُّ‑سّكاركسغ. ريغ ءيرگازن غ‑كرايگاتّ امناگّار اد‑تژالّان ار‑تضالابن ربّي، ار‑ن‑تگّان ءيفاسّن‑نسن لّي‑س‑ا‑سكارن افولكي بلا‑دا‑تقلاقالن ءولا‑دا‑تژين. ريغ اد‑حشمنت‑تمغارين لسنت مالسّا ءينگادّان لّي‑تنت‑يد‑يقّانّ، ءورد س‑تالّامين ن‑وازّار نغد ءورغ نغد لجوهر نغد تيملسا غُلانين، والاينّي س‑يفولكيتن لّي‑سكارنت غمكلّي‑د‑يقّان تيمغارين لّي‑توقّارنين ربّي. ءيلّا ف‑تمغارين اد‑لمدنت ار‑تحشامنت بلا‑دا‑ساوالنت. ءور‑ودجيغ كرا ن‑تمغارت ا‑تسّلماد ءولا‑دا‑تّحكام غ‑يرگازن. ءيقّان‑تند‑د اد‑فسّانت. اشكو ربّي ءيسكر ادام غ‑يسيزوار، ءيسكر ءيلمّا حوّا. ءورد ادام ا‑ف‑تّ‑يزّري ءيبليس غ‑يسيزوار والاينّي تامغارت ا‑ف‑تّ‑يزّري، تفّوغ زغ‑واوال ن‑ربّي. والاينّي را‑تنجم‑تمغارت س‑تلاليت ن‑تاروا ءيغ‑ا‑تّقاما غ‑ليمان ار‑تّحنّو غ‑وييّاض ار‑تّزگا غ‑يخف‑نس س‑وول ءيغوسن. ءيزگا‑واوال‑اد: وانّا ءيران ا‑يگ انگابال ن‑ومناگّار، هاتي تاووري ءيهيّان ايد ءيرا. ءيقّان‑د انگابال ا‑يگ واد غ‑ور‑يلّي لعيب، ءيطّاف غير يات‑تمغارت، ءيزگا‑بدّا غ‑لعاقل‑نس ار‑يتنباض غ‑كولّو ما‑يسكار، ار‑يتفولكي د‑مدّن ار‑يسّمرحبا س‑ويلّي تمودّونين، ييسّان مامنك ا‑يسّلماد وييّاض. ا‑ور‑يگ واد باهرا ءيسّانّ تيسّي ءيكتين، نغد واد ءيتمّاغن د‑مدّن. ءيقّان‑د ا‑يگ واد ءيتصبارن، ءورد واد ءيتژين نغد واد دار عزّان ءيقاريدن. ءيقّان‑ت‑يد ا‑يگ واد ءيتنباضن غ‑ايت‑تگمّي‑نس س‑سّلامت، ار‑سرس‑سفليدن تاروا‑نس ار‑تي‑توقّارن س‑نّييت‑نسن. اشكو ءيغ‑ور‑يسّين مامنك ا‑يتنباض غ‑ايت‑تگمّي‑نس، مامنك ا‑را‑ييسّان ا‑يگابل امناگّار ن‑ربّي؟ ا‑ور‑يگ واد بحرا يومژن اغاراس لّماسيح، اد‑اس‑ور‑يمل ءيخف‑نس ءيس‑يگا كرا، ءيضر غ‑لهالاك ن‑يبليس. ءيقّان‑د ا‑يگ واد‑ف‑اكّان ايت‑برّا توگّا شوانين، باش ا‑ور‑يضر تيگيرا غ‑ترگّام ن‑مدّن، تامژت‑ت‑يلمّا‑تژقّورت ن‑يبليس. ءولا ءيمعاوانّ ن‑ومناگّار، ءيقّان‑تن‑د اد‑گن ويد زگانين غ‑وفولكي. ا‑ور‑گن ويد سّكيركيسنين نغد ويد تّبلانين س‑تيسّي ءيكتين نغد ويد تّيرينين اد‑سّمونّ ما‑يگّوتن ءي‑يخف‑نسن. ءيقّان‑تن‑د اد‑غوين س‑وول ءيغوسن غ‑ولمّود لّي‑اغ‑د‑يملا ربّي. ءولا نتني ءيخصّا‑تن اد‑زوار‑تيارامن. ءيغ‑ور‑گيسن‑يتيافا كرا لّعيب، راد‑يژضارن اد‑قاسان تاووري‑اد ن‑يمعاوانّ. ءولا تيمغارين، ءيقّان‑تند‑د اد‑گنت تيد زگانين غ‑وفولكي، ار‑تنباضنت غ‑يخف‑نسنت، ار‑سكارنت س‑لحقّ. ا‑ور‑گنت تيد ساوالنين غ‑مدّن. ءيقّان‑د امعاون ا‑يطّاف غير يات‑تمغارت، ار‑يتنباض غ‑تاروا‑نس د‑ايت‑تگمّي‑نس س‑سّلامت. وينّا سكارنين تاووري‑اد ن‑يمعاوانّ س‑نّييت‑نسن، راد‑عزّان دار مدّن، زعمن باهرا غ‑وغاراس لّماسيح ياسوع. ار‑ترجوغ ا‑ن‑دارك‑اشكغ غ‑مايد‑د‑ياكمورن، والاينّي ءوريغ‑اك‑ن تيغاوسيوين‑اد باش ا‑تنتي‑تيسّانت ءيغ‑د‑ماطلغ، تژرت ما‑د‑يقّانّ ا‑تي‑تسكار تاگُمات ن‑ربّي، ا‑ستّ‑يگان د‑ومناگّار ن‑ويلّي گانين وين ربّي لّي‑يدّرن، تگ لّساس ءولا تانّالت لّحقّ. مايلّي‑اغ‑د‑يملا ربّي، ار‑كولّو‑گيس‑نتعجّاب: ءيبان‑د غ‑سّيفت ن‑بنادم، ءينرو س‑تحكيمت ن‑رّوح، ژرن‑ت لمالايكا. ءيلكم لخبار‑نس تيميزار اگّوگنين، امنّ سرس غ‑كولّو دّونيت، ءيتيالال س‑لمجد. ءيساول رّوح لقودوس غيلاد س‑واوال ءيزگان ييني: غ‑ووسّان گُّرانين راد‑فلن كرا ن‑مدّن اغاراس لّماسيح، ار‑سفليدن س‑تكركاس لّارواح أُخشنّين ءولا س‑ولمّود لّجنون دار ءيمسلمدن سّكيركيسنين ايت‑سين‑وودماون لّي‑مي‑قّورن‑وولاون‑نسن باهرا. ءيمسلمدن‑ان ار‑سّحرامن ليتّيهال ءولا كرا ءيخلق ربّي ءي‑ومشّو، ءيفك‑ت ءي‑ويلّي سرس ومنّين ءيسّانّ لحقّ، باش ا‑ت‑شتّان ار‑ت‑فلّاس‑تشكارن. اشكو ءيفولكي كولّو ما‑يخلق ربّي. ءيخصّا‑ياغ ا‑ور‑نسّحرام يات، والاينّي ا‑ت‑نشكر ف‑كولّو ما‑نشتّا. اشكو ار‑ت‑يسّحلّا ربّي س‑واوال‑نس ءولا س‑تژالّيت لّي‑س‑ا‑ت‑فلّاس‑نتشكار. ءيغ‑ا‑تمالات تيغاوسيوين‑اد ءي‑ايتماتن را‑تگت اخدّام ءيشوان لّماسيح ياسوع، تدوست س‑تنباضين لّيمان ءولا س‑ولمّود ءيفولكين لّي‑تومژت. والاينّي انف ءي‑تحاجيّين خوانين ءولا لخرايف ن‑دّونيت‑اد، ار‑تسّدوست ءيخف‑نّك ا‑تّازّالت غ‑وغاراس ن‑ربّي. اشكو يان ءيسّدوسن دّات‑نس، افولكي اين ءيسكر، والاينّي يان ءيسّدوسن رّوح‑نس س‑ما‑يرضان ربّي، راد‑اس‑يفولكي س‑وگُّار ءي‑تودرت‑نس ن‑دّونيت‑اد ءولا تين ليخرت. ءيزگا مايد‑اك‑نّيغ، ءيقّان‑د كود يان ا‑ت‑يامن. ف‑مايان ا‑ف‑ا‑نتخدام ار‑فلّاس‑نكّات تاكرّايت، اشكو نگا رّجا‑نّغ غ‑ربّي لّي‑يدّرن. نتّان ا‑يجّنجامن كولّو مدّن، س‑وگُّار غويلّي ءومنّين. سّلماد‑اسن تيغاوسيوين‑اد ار‑تن‑تّوصّات ا‑سرسنت‑سكارن. اد‑ور‑تادجت يان ا‑ك‑يحگر ف‑سّيبت ن‑ما‑سول‑تمژّيت، والاينّي سكار‑بدّا ف‑وفولكي س‑يواليون‑نّك د‑يسكّيرن‑نّك، ار‑تّحنّوت غ‑وييّاض ار‑تّامنت اوال ن‑ربّي س‑وول ءيغوسن، باش اد‑ژرن ءيمومنّ مامنك ا‑تسكارت ءيرين اد‑سكارن ءولا نتني غمكان. لهو ءيخف‑نّك ار‑تاقرات ارّاتن ن‑ربّي ف‑ايتماتن ار‑تن‑تزّعامت ار‑تن‑تسّلمادت ارد‑ن‑اشكغ. ا‑ور‑تتّوت تاوافكا ن‑رّوح لّي‑گيك‑يلّان، ءيفكا‑ياك‑ت ربّي س‑واوال لّي‑د‑يملا غاكود لّيغ‑ن‑مونّ ءيمغارن، سرسن فلّاك ءيفاسّن‑نسن. فك ءيخف‑نّك ءي‑تووري‑اد ار‑سرس‑تّلهوت، باش اد‑ژرن كولّو مدّن مامنك ا‑گيس‑تّزايادت. اوي‑تّ‑بدّا غ‑يخف‑نّك د‑ولمّود‑نّك، تزگات غ‑كولّو تيغاوسيوين‑اد، اشكو غمكاد ا‑س‑را‑تجّنجمت ءيخف‑نّك تجّنجمت ءولا ءيمسفليدن‑نّك. ا‑ور‑تشّحشّمت كرا ن‑وفقّير ءيغ‑يسكر كرا يُخشنّ، والاينّي سّفهم‑اس ما‑ت‑يخصّان زوند ءيغ‑يگا باباك. سكار د‑يعيّالن زوند ايتماك، ار‑تسكارت د‑تفقّيرين زوند ءينّاك، ار‑تسكارت د‑تفرخين زوند ءيستماك س‑وول ءيغوسن. بيدّ د‑تهجّالين لّي‑ور دار يان. والاينّي تاهجّالت نّا‑دار تاروا‑نس نغد تاروا ن‑تاروا‑نس، ءيقّان‑تن‑د اد‑يسّانّ ءيس‑گيسن‑يرا ربّي اد‑تهالّان غ‑تيلّي گانين تينسن. ءيلّا فلّاسن اد‑تراران لخير ءي‑ايت‑دارسن، اشكو ربّي ءيرضا س‑ماياد. ءيمّا تاهجّالت نّا‑يقامان واحدوتّ بلا يان، تگا رّجا‑نس غ‑ربّي ار‑اس‑تّژالّا ار‑زگيس‑تّضالاب غ‑ييض ءولا ازال. ءيمّا تاهجّالت نّا‑يسالان ما‑يرا ءيخف‑نس، هان تمّوت غ‑رّوح واخّا تسول غ‑دّات. ءوصّا‑تن كولّو ف‑ماياد باش ا‑ور‑ييلي كرا غ‑يلّا لعيب. اشكو وانّا ءور‑يتعاوانّ تاگُمات‑نس، هان ءيفّوغ اغاراس لّماسيح، يُخشن ءوگُّار ن‑ويلّي ءور‑اكُّ‑سّينّين اغاراس، د‑باهرا ءيغ‑ور‑ا‑يتعاوان ايت‑دارس. شّكشم غ‑وارّا ن‑تهجّالين تانّا ءيرگلن سضيص ءيد‑مراو ن‑وسگُّاس، ءيغ‑تّين دارس ءيكّا غير يان‑ورگاز، ار‑تّي‑تالغن مدّن ف‑لخير لّي‑تسكار، تربّو تاروا‑نس ف‑ما‑يفولكين، ار‑تسّمرحبا س‑ويلّي تمودّونين ار‑تّقاسا ءيمژلاين ن‑ربّي، ار‑تّعاوان وينّا لّانين غ‑تنوكموت، ار‑ن‑بدّا‑تّگّا تيقّي‑نس ا‑تسكار افولكي د‑كولّو مدّن. والاينّي ا‑ور‑تشّكشمت تيمژّيّين غ‑وارّا ن‑تهجّالين، اشكو را‑تّيرينت اد‑تاهلنت تيس سنات‑توال. را‑تّيدونت ارد تّونت لماسيح فّوغنت زغ‑واوال لّي‑س‑اس‑نّانت اويند‑د ف‑يخف‑نسنت لحوكم ن‑ربّي. وان نتنتي ار‑تميارنت ءينيفسيسن ار‑تلولّينت زغ‑تگمّي س‑تايّاض. ءورد غايان كاد‑سكارنت والاينّي ار‑ساوالنت ف‑مدّن ار‑كشّمنت ما‑ور‑يگين وينسنت، ار‑تّينينت ما‑ور‑تند‑د‑يقّانّ ا‑تي‑تّينينت. مايان ا‑ف‑ريغ تيهجّالين لّي‑مژّينين اد‑تاهلنت، ارونت تاروا اوينت‑ستّ غ‑تگمّي‑نسنت، باش ا‑ور‑ييلي دار ءينوّاشن‑نّغ ما‑س‑ا‑ياغ‑رگّمن. اشكو كرا گيسنت ءيجلا، امژنت اغاراس ن‑شيطان. والاينّي تامغارت تامومنت نّا‑دار تيهجّالين ءيست‑دارس، ءيلّا فلّاس ا‑تنتي‑تّعاوان باش ا‑ور‑يژّاينت ف‑ومناگّار ن‑يمومنّ. غمكاد ا‑س‑را‑ييژضار‑ومناگّار ا‑يتعاوان تيهجّالين نّا‑ور‑دار يان. ءيمّا ءيمغارن لّي‑تنباضنين غ‑ومناگّار س‑نّييت د‑وفولكي، ءيقّان‑د ايتماتن ا‑تن‑توقّارن باهرا، س‑كيگان غويلّي تخدامنين ف‑تبرّاحت د‑ولمّود. اشكو ءيتيارا غ‑وارّا ن‑ربّي: «ا‑ور‑تگت اغامو ءي‑وزگر لّي‑يسرواتن.» ءيتيارا‑داغ: «اخدّام ءيستهلّا تيغراد‑نس.» ا‑ور‑تسفلدت س‑يان ءيتاشتكّان س‑ومغار ءيغ‑ور‑د‑ييوي سين نغد كراض ءيناگان. ءيمّا يان ءيسكارن دّنوب، ءيني‑اس ف‑ما‑يسكر غ‑لگدّام‑نسن كولّوتن باش اد‑يكساضن وييّاض. ها‑يّي غ‑لگدّام ن‑ربّي د‑لماسيح ياسوع د‑لمالايكا ن‑يگنّا ا‑ك‑وصّاغ ا‑تزّگات تيغاوسيوين‑اد بلا‑دا‑تسكارت س‑وودماون ءولا‑دا‑تّيريت ا‑تّرضوت ءيخف‑نّك. ا‑ور‑تزربت ا‑تسرست ءيفاسّن‑نّك ف‑يان ا‑تي‑تژليت ءي‑تووري ن‑ربّي، ا‑ور‑يميل‑تكشمت غ‑دّنوب ن‑وييّاض. گابل ءول‑نّك ا‑بدّا‑يغوس. ا‑ور‑سول‑تسّات غير امان، والاينّي زايد‑اسن ءيميكّ ن‑وين‑واضيل ءيكتين باش ا‑يجّي‑وديس‑نّك، اشكو منّاوت‑توال ايد تّاضنت. كرا ن‑مدّن، ار‑گيسن‑تبانّ دّنوب‑نسن، ار‑مالان ءيس‑را‑فلّاسن‑يتّوت لحوكم. ءيمّا وييّاض راد‑بانّ دّنوب‑نسن تيگيرا. غمكان ا‑دي‑تبانّ ءولا ءيفولكيتن لّي‑سكارن مدّن. ءولا افولكي لّي‑يرگسن را‑د‑يبان تيگيرا. ءيمّا غويلّي لّانين غ‑وزاگلو ن‑تووري ءيشقان، ءيلّا فلّاسن اد‑توقّارن ءيد‑سيديتسن، باش ا‑ور‑د‑يرار يان تيرگّام ءي‑يسم ن‑ربّي ءولا المّود‑نّغ. وانّا مي ءيگا سيديس امومن، ءيخصّا‑ت ا‑ور‑يحگر سيديس ف‑سّيبت ن‑ما‑يگا گماس. ءيلّا فلّاس ا‑يتخدام س‑وگُّار د‑نّييت، اشكو غوالّي ءيتامژن لخير غ‑تووري‑نس ءيگا امومن ءيگ زغ‑ايتماس عزّانين. سّلماد تيغاوسيوين‑اد ءي‑ايتماتن ار‑اسن‑تّينيت اد‑سكارن غمكاد. هان كرا ن‑مدّن ار‑سّلمادن تينباضين ياضني ءور‑د‑مشاشكانت د‑يواليون صحانين ن‑سيديتنّغ ياسوع لماسيح ءولا المّود لّي‑س‑يرضا ربّي. نتني ار‑باهرا‑سّيمغورن ءيخف‑نسن والاينّي ءور‑سّينّ يات. ءيعجب‑تن اد‑تمحاكّان ار‑تمجاحادن ف‑يواليون، ايلّيغ ا‑توورّين ار‑تحسادن ار‑تژين ار‑رگّمن ار‑تّوهامن. ءور‑ا‑تيژضارن مدّن‑ان اد‑د‑مشاشكان، ءيجلو‑اسن لعاقل فّوغن زغ‑لحقّ. غالن ءيس‑راد‑امژن ءيقاريدن ءي‑يخف‑نسن غ‑وغاراس ن‑ربّي. ءيلّا‑نّيت لخير ءي‑يان ءيمونّ د‑وغاراس ن‑ربّي ءيقنعو س‑ماد‑دارس‑يلّان. لّيغ‑د‑نكشم دّونيت‑اد ءور‑د‑نيوي يات. ءيغ‑را‑ستّ‑نفّوغ ءور‑را‑ناوي يات. والاينّي ءيغ‑دارنّغ ما‑نشتّا د‑ما‑نلسّا نقنعو س‑مايان. ءيمّا غويلّي رانين اد‑سّمونون ايدا ءيگّوتن، هاتي ار‑شّكشامن ءيخف‑نسن س‑تژقّورت ءولا تاسّاست. ار‑تن‑يتنرو كولّو ما‑يگان طّماع، ار‑تن‑يسّنوفول ار‑تن‑يسّياگّاس ار‑تن‑يتاوي س‑لهالاك. اشكو تايري ن‑يقاريدن ار‑دي‑تّاوي كولّو ما‑يُخشنّ. لّان كرا ن‑مدّن ار‑باهرا‑تّيرين ءيقاريدن ايلّيغ فّوغن اغاراس لّماسيح، سّياگّاسن ءولاون‑نسن س‑تگوضي ءيگّوتن. ءيمّا كيّي اي‑اخدّام ن‑ربّي، اگّوگ زغ‑كولّو غايان. تگت‑ن تيقّي‑نّك ا‑بدّا‑تسكارت افولكي ءولا كولّو ما‑يرضان ربّي. امن اوال‑نس ار‑تّحنّوت غ‑وييّاض ار‑تّصبارت ار‑تّرخوت د‑كولّو مدّن. بكيس ار‑تكّاتّ تاكرّايت لّيمان، تامژت غ‑تودرت ءيدومن لّي‑س‑اك‑يغرا ربّي لّيغ تنّيت ءي‑يناگان گّوتنين ف‑مامنك ا‑تومنت س‑لماسيح. ءيمّا غيلاد ءوصّاغ‑ك غ‑لگدّام ن‑ربّي لّي‑ياكّان تودرت ءي‑كرايگاتّ كرا، ءولا لماسيح ياسوع لّي‑يفكان توگّا لّحقّ غ‑دار بيلاطوس گو‑بونطوس، ءينيغ‑اك ا‑بدّا‑تسكارت س‑تنباضين‑اد باش ا‑ور‑گيك‑ييلي كرا لّعيب ءولا كرا ف‑ا‑يرگّم يان، ار اسّ لّي‑غ‑را‑د‑ياشك سيديتنّغ ياسوع لماسيح ءيبايّن. را‑د‑ياشك غ‑وزمز لّي‑يرا ربّي امباركي لّي‑يحكامن كولّو ما‑يلّان، ءيگ اگلّيد ن‑يگلدان ءيگ انمغور ن‑ينمغورن. نتّان واحدوت ا‑بدّا‑يدّرن، ءيزدغ غ‑تيفاوت لّي‑س‑ور‑يژضار يان ا‑ن‑سرس‑ياكمور. ءور‑جّو‑ت‑يژري يان ءولا ءيژضار يان ا‑ت‑يژر. نتّان ا‑مي‑يلّا لمجد د‑لقوّا، غيلاد ءولا كولّو مايد‑د‑يفتان، امين. ءيني ءي‑ويلّي دار ءيگّوت‑وايدا ن‑دّونيت‑اد، ا‑ور‑سّيمغورن ءيخف‑نسن ءولا‑دا‑تاوين رّجا س‑مايلّي ءور‑سّينّ ءيس‑راد‑دارسن‑يقاما. تينيت‑اسن اد‑گن رّجا غ‑ربّي لّي‑يرضان اد‑اغ‑ياكّا كولّو ما‑يگان لخير ا‑سرس‑نتفراح. ءيني‑اسن اد‑سكارن افولكي، ءيگاتن دارسن ءيسكّيرن شوانين، ار‑تعاوانّ ار‑اكّان ءي‑وييّاض. غمكان ا‑س‑راد‑سّمونّ ءي‑يخف‑نسن لخير لّيخرت، باش ا‑يگ لّساس ءيزگان ما‑ف‑ا‑بنّون تودرت لّي‑يگان تودرت ءيصحان. وا‑تيموتاوس، گابل لامانت لّي‑اك‑يفكا ربّي. انف ءي‑تجمّاعت ءيخوان د‑يمجاحادن ن‑ويلّي ءور‑سّينّين ربّي. ار‑تّينين ءيس‑دارسن لفهمت والاينّي ءور‑فهيمن يات. اشكو لفهمت‑ان ا‑يجلان كرا گيسن زغ‑وغاراس لّماسيح. اد‑اون‑تيلي لباراكا ن‑ربّي. زغ‑بولُس ارقّاس لّماسيح ياسوع غمكلّي ءيرا ربّي، س‑ترقّاست ن‑تودرت لّجديد لّي‑ف‑ينّا را‑ستّ‑يفك ءي‑ويلّي گانين وين لماسيح ياسوع. ءي‑يوي ءيعزّان تيموتاوس. اد‑اك‑تيلي لباراكا د‑رّحمت د‑سّلامت زغ‑ربّي باباتنّغ د‑لماسيح ياسوع سيديتنّغ. ار‑تشكارغ ربّي لّي‑مي‑تخدامغ س‑وول ءيغوسن زوند ءيمزوورا‑نو لّي‑زرينين. ار‑ك‑يد‑سوينگيمغ غاكود نّا‑تژالّاغ غ‑ييض ءولا ازال. سوانگمغ‑د ءيمطّاون‑نّك، ءيريغ باهرا ا‑ك‑ژرغ اد‑يّي‑ييلي لفرح ءيگّوتن. ءور‑تّوغ مامنك ا‑تومنت س‑لماسيح س‑نّييت‑نّك، غمكلّي تومن جدّاك لووّيس غ‑يسيزوار، نتّات د‑ينّاك افنيكي. سّنغ ءيس‑تومنت ءولا كيّي غيلاد زوند نتنتي. مايان ا‑ف‑را‑ك‑ضالبغ ا‑تصوطّ ءي‑ترگيت لّباراكا لّي‑گيك‑يگا ربّي لّيغ فلّاك سرسغ ءيفاسّن‑ينو. اشكو رّوح لّي‑اغ‑يفكا ربّي ءور‑ا‑ياغ‑يترارا ا‑نتيكساض، والاينّي ار‑اغ‑يتعمّار س‑تحكيمت ءيتجهّدن د‑لحنانت د‑تنباطّ ن‑يخف‑نّغ. ف‑مايان ا‑ف‑راد‑اك‑ينيغ، ا‑ور‑تّحشامت ا‑تساوالت د‑مدّن ف‑سيديتنّغ، ءولا‑دا‑فلّا‑تّحشامت نكّي لّي‑يلّان غ‑لحبس ف‑يسم‑نس. والاينّي بكيس س‑تحكيمت ءيتجهّدن ن‑ربّي ا‑ديدي‑تّرفوفونت ف‑لخبار ءيفولكين. ءيجّنجم‑اغ ربّي زغ‑دّنوب‑نّغ ءيغر‑اغ ا‑نگ ءيمژلاين‑نس، ءورد ف‑سّيبت ن‑كرا نسكار نكُّني والاينّي ف‑سّيبت ن‑ما‑يقصاد نتّان اد‑اغ‑يبارك ف‑وودم لّماسيح ياسوع ءور‑تا‑يخلق دّونيت. غمكان ا‑س‑اغ‑يبارك غيلاد غ‑د‑يوشكا‑ونجّام‑نّغ لماسيح ياسوع، ءينرو لقوّا لّموت ءيسّبايّن‑اغ‑د لخبار ءيفولكين ن‑تودرت ءيدومن. ف‑لخبار‑اد ا‑ف‑يّي‑يژلي ربّي اد‑گغ ابرّاح‑نس د‑ورقّاس‑نس د‑ومسلمد فلّاس. مايان ا‑ف‑ا‑ترفوفونغ غمكاد. والاينّي ءور‑اكُّ‑حشيمغ، اشكو سّنغ غوالّي‑س‑ومنغ. وورّيغ ءيسّانغ ءيس‑يژضار ا‑يگابل لامانت‑ينو ار اسّ ءيگُّران. امژ‑بدّا غ‑ولمّود يُغژانّ لّي‑مي‑داري‑تسفلدت، تعمّرت س‑ليمان د‑لحنانت لّي‑اغ‑يلّان غ‑تامونت لّماسيح ياسوع. گابل لامانت ءيفولكين لّي‑اك‑يفكا ربّي، تگابلت‑ستّ س‑تحكيمت ن‑رّوح لقودوس لّي‑گينّغ‑يلّان. تسفلدت ف‑ايتماتن غ‑تمازيرت ن‑اسيّا مامنك اد‑دّان كولّو فلن‑يّي. زغ‑گيسن فيجاليس د‑هارموجانيس، والاينّي ضالبغ سيديتنّغ ا‑يرحم ف‑ايت‑تگمّي ن‑ونيسيفوروس، اشكو منّاوت‑توال ا‑يسّفجّيج ف‑وول‑ينو، ءور‑ت‑شّحشّيمنت سّناسل‑اد‑ينو. نتّان غير ءيلكم‑د تامدينت ن‑روما س‑ا‑سري‑يسيگّيل س‑لمعقول ايلّيغ‑يّي‑يوفا. ضالبغ سيديتنّغ اد‑اس‑يسّيگت رّحمت غ‑واسّ لّحساب. تسّنت مامنك ا‑يّي‑يعاون باهرا ءولا غ‑تمدينت ن‑افسوس. زايد ا‑يوي، ار‑تّدوست س‑لباراكا لّماسيح ياسوع. مايلّي مي زگيگي تسفليدت غ‑گر ءيناگان گّوتنين، اكّا‑ت غ‑گر ءيفاسّن ن‑مدّن زگانين ژضارن اد‑سّلمادن وييّاض. بكيس ار‑ديدنّغ‑تّرفوفونت زوند اعسكري ءيفولكين لّماسيح ياسوع. يان ءيگان اعسكري غ‑يميغ ءور‑را‑يلهو ءيخف‑نس س‑تغاوسيوين ياضني ن‑دّونيت‑اد، اشكو را‑ييري ا‑يترضو انمغور‑نس. ءولا يان ءيسكرن شالا ن‑تيزّلا، ءور‑راد‑اس‑ييلي تّاج ن‑ومزوارو ابلا ءيغ‑يسكر س‑ليمور ن‑تيزّلا. افلّاح لّي‑يتخدامن س‑نّييت، نتّان ا‑يستهلّان ا‑ياسي تاغامت تامزواروت غ‑تمگرا. سوانگم غ‑مايد‑اك‑نّيغ، را‑ك‑يسّفهم سيديتنّغ كولّو ماياد. سوانگم‑د ياسوع لماسيح. ءيگا زغ‑تاسوت ن‑وگلّيد داود، ءينكر‑د زغ‑لموت، غمكلّي ءيتّيني لخبار ءيفولكين لّي‑س‑ا‑تبرّاحغ. هاتي ف‑سّيبت لّخبار‑اد ا‑ف‑ا‑ترفوفونغ، قّنغ س‑سّناسل زوند يان ءيفّوغن لقانون. والاينّي ءور‑اكُّ‑يقّين‑واوال ن‑ربّي س‑سّناسل. ماياد ا‑ف‑ا‑كولّو‑تصبارغ، باش اد‑تنجامن ءيمژلاين ن‑ربّي ف‑وودم لّماسيح ياسوع، كشمن س‑لمجد ءيدومن. ءيزگا‑واوال‑اد: «ءيغ‑ديدس‑نمّوت را‑ديدس‑ندّر. ءيغ‑ا‑نتصبار را‑ديدس‑نتحكام. ءيغ‑ننّا ءور‑ت‑نسّين را‑ييني ءور‑اغ‑يسّين. ءيغ‑ندّا ار ءيغ‑ور‑سول‑ا‑گيس‑نتامژ، راد‑بدّا‑گينّغ‑يامژ، اشكو ءور‑يژضار ا‑يسّكاركس ف‑يخف‑نس.» سّكتاي‑اسن‑د كولّو ماياد، تامرت‑تن غ‑لگدّام ن‑ربّي اد‑ور‑تمجاحادن ف‑يواليون، اشكو ءيمجاحادن ءور‑ا‑تنفاعن ءي‑يات. ار‑غير‑تهلاكن غويلّي‑اسن‑سفليدنين. گ‑ن تيقّي‑نّك اد‑اون‑يفك ربّي رّضا‑نس، زوند اخدّام ءيشوان ءور‑تي‑تشّحشّيم‑تووري لّي‑يسكر، ار‑تسّلمادت اوال لّحقّ غمكلّي ءيگا. انف ءي‑تجمّاعت ءيخوان ن‑ويلّي ءور‑سّينّين ربّي، اشكو ار‑غير‑تسّاگّوگ مدّن زغ‑ربّي س‑وگُّار. هان المّود‑نسن ءيگا زوند اطّان لّي‑يشتّان دّات ن‑بنادم. زغ‑گيسن هيمينايوس د‑فيليتوس، جلان نتني زغ‑وغاراس لّحقّ، ار‑تراران ءولا وييّاض ا‑ور‑سول‑امنّ. ار‑تّينين ءور‑راد‑نكرن مدّن غ‑ليخرت والاينّي غير غ‑دّونيت‑اد ا‑غ‑د‑نكرن. والاينّي ءيدوس لّساس لّي‑يزّوگز ربّي ءور‑ا‑يتموسّو، ءيتيارا گيس: «سيدي ربّي ءيسّن مانوي گانين وينس.» ءيتيارا‑داغ: «وانّا ءينّان وين سيدي ربّي ا‑يگا، ءيقّان‑ت‑يد ا‑ياگّوگ ف‑كولّو ما‑يُخشنّ.» گّوتن ءيروكوتن غ‑تگمّي ءيمقّورن. ءيلّا گيسن ما‑يگان وين‑وورغ ءولا نّوقرت، ييلي گيسن ما‑يگان وين‑وكشّوض ءولا اكال. ييلي گيسن ما‑يگان ءي‑ومشّو ءولا ما‑يگان ءي‑وارّاس. ءيغ‑يسيرد يان ءول‑نس زغ‑يركان، را‑يگ اروكو ءيصلحن ءيغوس غ‑وفوس ن‑سيديس، يوجاد ءي‑تووري نّا‑يفولكين. اگّوگ زغ‑شّهوات ن‑يعيّالن، تيريت ا‑تعمّرت س‑وفولكي لّي‑س‑يرضا ربّي ار‑تّامنت اوال‑نس ار‑تّحنّوت غ‑وييّاض ار‑تزرايت س‑سّلامت، كيّي ءولا كولّو وينّا اقرانين ءي‑سيديتنّغ س‑وول ءيغوسن. ا‑ور‑تكشمت غ‑يمجاحادن خوانين ن‑ويلّي ءور‑فهيمنين ما‑ف‑ا‑ساوالن، اشكو تسّنت ءيس‑ور‑ا‑دي‑تاوين غير تاژيت. ءيقّان‑د اخدّام ن‑سيديتنّغ ا‑ور‑يتژي. ءيلّا فلّاس ا‑يتفولكي د‑كولّو مدّن، ييسّان مامنك ا‑تن‑يسّلماد ار‑يتصبار ءي‑كولّو ما‑يشقان. س‑لحنانت ا‑س‑را‑يمالا لحقّ ءي‑وينّا‑ت‑ضاضّنين، ءيرجو‑ن غ‑ربّي اد‑اسن‑يرار اد‑فلن كولّو ما‑يُخشنّ وورّين ءيسّانّ لحقّ، نجمن س‑لمعقول زغ‑تژقّورت ن‑يبليس لّي‑تن‑يغوين باش اد‑سكارن ما‑يرا. سوانگم‑د ماياد: غ‑ووسّان گُّرانين راد‑يلين ءيزماز شقانين. اشكو راد‑تسالان مدّن غير ءيخفاون‑نسن ار‑تسالان ءيقاريدن، ار‑تالغن ار‑سّيمغورن اگايّو‑نسن ار‑رگّمن وييّاض. ءور‑راد‑سفليدن س‑ايت‑دارسن ءولا‑دا‑تشكارن يان ءولا‑دا‑تّيرين ربّي. ءور‑راد‑تحوبّون ءولا‑دا‑تصاماحن ءي‑يان، والاينّي راد‑باهرا‑رگّمن غ‑وييّاض ار‑تژين ار‑تمّاغن ار‑تكرهون كولّو ما‑يفولكين. ءور‑راد‑زگان غ‑واوال‑نسن ءولا‑دا‑تنباضن غ‑يخف‑نسن، والاينّي راد‑تحگارن وييّاض. راد‑تلهون س‑كولّو ما‑تن‑يعجبن، ءور‑را‑تلهون س‑ما‑يرا ربّي. راد‑ينين ءيزد ءيمومنّ اد‑گان، والاينّي ءور‑گيسن‑تلّي‑تحكيمت ءيتجهّدن ن‑ويلّي ءومنّين س‑ربّي. تانف ءي‑مدّن‑ان. وان غويد ا‑يكشّمن س‑تگُمّا زوند ءينگُمارن، ار‑تّ‑زّراين ف‑تمغارين لّي‑ور دار لعاقل، ژّاين فلّاسنت دّنوب‑نسنت، ار‑تنت‑يتاوي كولّو كرا تّيرينت. وان نتنتي ار‑بدّا‑تلمادنت والاينّي ءور‑جّو‑ژضارنت اد‑يسّانّت لحقّ. هان مدّن‑ان ءيهرش لعاقل‑نسن، فّوغن اغاراس ن‑ربّي، ار‑تضاضّان لحقّ غمكلّي ستّين ءيكّا يانّيس د‑يامبريس ار‑تضاضّان موسا. والاينّي ءور‑راد‑باهرا‑تزايادن غ‑غايان، اشكو را‑يبان ءي‑كولّو مدّن ءيس‑فّوغن ءيخف‑نسن غمكلّي ءيبان غ‑سين ءيرگازن‑ان. ءيمّا كيّي، تسّنت ماد‑سّلمادغ ءولا مامنك اد‑سكارغ ءولا ماد‑قصادغ. تيسّانت مامنك اد‑تامنغ اوال ن‑ربّي ار‑تصبارغ ار‑تحنّوغ ار‑تزايادغ بلا‑دا‑ترمايغ. تيسّانت منشك اد‑ترفوفونغ ار‑باهرا‑كّاتغ تامّارا. تسفلدت ف‑ماد‑يّي‑يجران غ‑تمدينين ن‑انطاكيّا د‑يقونيّا د‑ليسترا. تسفلدت ف‑ترفوفنت ءيگّوتن لّي‑فلّا‑يزرين. والاينّي كولّو غايان، ءيفوكّا‑يّي سيديتنّغ زغ‑گيس. اشكو كولّو وانّا ءيران ا‑يسكار ما‑يرضان ربّي س‑يسم لّماسيح ياسوع، تارفوفنت ا‑غ‑را‑يزري. ءيمّا مدّن أُخشنّين د‑ايت‑تكركاس راد‑غير‑تزايادن غ‑لخُشانت‑نسن س‑وگُّار، جلان نتني ار‑جلّون وييّاض. ءيمّا كيّي، ءيقّان‑ك‑يد ا‑تّزايادت غ‑مايلّي تلمدت تامنت سرس، اشكو تسّنت مانوي‑ت دار تلمدت. كيّي زغ‑مژّيي‑نّك ا‑زغ‑تسّنت ارّاتن ن‑ربّي لّي‑ژضارنين ا‑ك‑سّفهمن مامنك ا‑تامنت س‑لماسيح ياسوع تنجمت. هاتي كولّو ما‑يلّان غ‑وارّاتن‑اد، ربّي ا‑ت‑يد‑يسّبايّنّ. ءيشوا كولّو ا‑سرس‑نسّلماد لحقّ، نشّحشّم وانّا ءيسكرن ما‑يُخشنّ، نرار‑د وانّا ءيجلان، نمل مامنك ا‑نسكار افولكي لّي‑س‑يرضا ربّي. غمكاد ا‑س‑را‑يوجاد‑وخدّام ن‑ربّي ءي‑تووري‑نس، ييژضار ا‑يسكار كولّو ما‑يفولكين. را‑ك‑وصّاغ غيلاد غ‑لگدّام ن‑ربّي د‑لماسيح ياسوع لّي‑را‑د‑ياشك ا‑يكشم س‑تگلديت‑نس يوت لحوكم ف‑ويلّي دّرنين ءولا غويلّي مّوتنين. ءينيغ‑اك: تبرّاح س‑واوال ن‑ربّي، تبرّحت سرس غ‑وزمز ءيشقان ءولا واد ءيرخان. رار‑د وينّا فّوغنين اغاراس، تشّحشّمت‑تن ف‑دّنوب نّا‑سكارن، تزّعامت‑تن ف‑وفولكي، ار‑تسّلمادت بلا‑دا‑تّرمايت. هان راد‑د‑اشكين كرا ن‑ووسّان غ‑ور‑راد‑سفليدن مدّن س‑ولمّود يُغژانّ. راد‑ترضون ءيگويّا‑نسن ار‑سّيگاتن ءي‑يخف‑نسن ءيمسلمدن لّي‑راد‑اسن‑يتّيني ما‑تن‑يعجبن. ءور‑راد‑يرين اد‑سفلدن س‑لحقّ، والاينّي را‑ستّي‑تاوين غير غ‑تحاجيّين خوانين. ءيمّا كيّي ءيخصّا‑ك ا‑بدّا‑تغويت غ‑يخف‑نّك، تصبرت ءي‑ترفوفنت، ار‑تّخدامت س‑تبرّاحت لّخبار ءيفولكين. سكار كولّو ما‑د‑يقّانّ واد ءيگان اخدّام ن‑ربّي. ءيمّا نكّي، تلكم‑د تاساعت لّي‑غ‑را‑ن‑سرسغ تودرت‑ينو غ‑لگدّام ن‑ربّي، فّوغّ دّونيت‑اد. ها‑يّي نريغ تيكرّايين لّي‑كّاتغ، كمّلغ اغاراس لّي‑غ‑ا‑تازّالغ، سول زگاغ غ‑ليمان. راد‑يّي‑ييلي تّاج غيلاد ن‑يان ءيرضان ربّي. ءيحضا‑يّي‑ت سيديتنّغ لّي‑بدّا‑يحكامن س‑لحقّ، باش اد‑يّي‑ت‑يفك غ‑واسّ لّي‑غ‑را‑د‑ياشك. ءورد غير نكّي ا‑مي‑را‑ييلي، والاينّي را‑ت‑يفك ءي‑كولّو ويلّي‑ن‑گيس‑رجانين ار‑سرس‑تقلن. گ‑ن تيقّي‑نّك ا‑د‑داري‑تاشكت غ‑مايد‑د‑ياكمورن. اشكو ءيفل‑يّي ضيماص ءيدّو س‑تمدينت ن‑تاسالونيكي، يوورّي ار‑يتّيري تيغاوسيوين ن‑دّونيت‑اد. ءيدّو ءولا كريسكينس س‑تمازيرت ن‑گالاطيّا، ءيدّو تيطوس س‑تمازيرت ن‑دالماطيّا. غير لوقا ا‑ديدي‑يقامان. ريغ ا‑تزريت دار مارقُس تاويت‑ت‑يد ديدك، اشكو ءيژضار ا‑يّي‑يعاون غ‑تووري. ءيمّا تيخيكوس ءوزنغ‑ت س‑افسوس. ءيغ‑دي‑توشكيت تاويت‑يّي‑د اسلهام لّي‑ن‑فلغ غ‑دار كاربوس غ‑تمدينت ن‑تروّاس. تاويد‑د ءولا ارّاتن، ريغ باهرا غويلّي گانين وين ءيلم. كيگان د‑لخُشانت اد‑يّي‑يسكر ءيسكاندر لمعلّم ن‑واناس. راد‑اس‑يرار سيديتنّغ ف‑غايان. ءيخصّا‑ك ا‑زگيس‑ترارت لعاقل ءولا كيّي، اشكو ءيضاضّ المّود‑نّغ باهرا. تاوالا تامزواروت غ‑رورغ اوال ف‑وصراض‑نسن، ءور‑ديدي‑يبيدّ يان. فلن‑يّي كولّوتن. ا‑ور‑تن‑يحاسب ربّي ف‑مايان. والاينّي ءيبيدّ ديدي سيديتنّغ، ءيسّدوس‑يّي اد‑اسن‑تبرّاحغ س‑لخبار ءيفولكين غمكلّي ءيگا. سفلدن‑اس ءيبرّانيين كولّوتن، نجمغ نكّي زغ‑يمي ن‑ييزم. را‑يّي‑يجّنجم سيديتنّغ زغ‑كولّو ما‑يُخشنّ، ءيسّروح‑يّي‑ن غ‑لامان س‑تگلديت‑نس ن‑يگنّا. نتّان ا‑باهرا‑نتالغ غيلاد ءولا كولّو مايد‑د‑يفتان. امين. ار‑ن‑تسلّامغ ف‑بريسكيلّا د‑اكيلا، نتني د‑ايت‑تگمّي ن‑ونيسيفوروس. ءيقاما اراستوس غ‑تمدينت ن‑كورينتوس، ءيمّا تروفيموس، فلغ‑ت‑ين يوضن غ‑ميليتوس. گ‑ن تيقّي‑نّك ا‑دي‑تاشكت ءور‑تا‑دي‑تلكيم‑تگرست. ار‑ن‑فلّاك‑يتسلّام يوبولُس د‑بودينس د‑لينوس د‑كلوديا د‑ايتماتن ياضني كولّوتن. ا‑ن‑ديدك‑ييلي سيديتنّغ، تيلي‑اون لباراكا‑نس. زغ‑بولُس اخدّام ن‑ربّي د‑ورقّاس ن‑ياسوع لماسيح لّي‑يّي‑يژلين اد‑مالاغ ءي‑يمژلاين ن‑ربّي مامنك اد‑تامنّ س‑واوال‑نس، ءيسّانّ كولّو ما‑يگان لحقّ ن‑وغاراس‑نس لّي‑يتاوين س‑رّجا ءيصحان ن‑تودرت ءيدومن. ربّي ءور‑ا‑يسّكيركيس. غاكود لّيغ ءور‑تا‑يخلق يات ا‑ينّا راد‑اغ‑تيلي تودرت‑اد. ءيسّبايّن‑تّ‑يد غ‑وزمز‑اد لّي‑يقصاد س‑لخبار لّي‑س‑يّي‑يوصّا ربّي انجّام‑نّغ ا‑سرس‑تبرّاحغ. ءي‑تيطوس ءيوي ءيعزّان غ‑تاگُمات لّيمان‑نّغ. اد‑اك‑تيلي لباراكا د‑سّلامت زغ‑ربّي باباتنّغ د‑لماسيح ياسوع انجّام‑نّغ. ماياد ا‑ف‑ك‑ين‑فلغ غ‑يگزير ن‑كريت، باش ا‑تكمّلت ما‑يقامان غ‑تووري، تژليت كرا ن‑مدّن غ‑كرايگاتّ تامدينت اد‑گن ءيمغارن ن‑ومناگّار غمكلّي‑ف‑ك‑وصّاغ. ءيقّان‑د امغار ا‑يگ واد غ‑ور‑يلّي لعيب، ءيطّاف غير يات‑تمغارت. ءيقّان‑د تاروا‑نس اد‑گن ءيمومنّ بلا‑دا‑سرسن‑تاشتكّان مدّن ءيس‑ا‑سكارن ما‑يُخشنّ ءولا‑دا‑تفّوغن زغ‑واوال ن‑ايت‑دارسن. ءيقّان‑د انگابال ا‑يگ واد غ‑ور‑اكُّ‑يلّي كرا لّعيب اشكو تاووري ن‑ربّي ا‑را‑يگابل. ا‑ور‑يگ واد ءيتحگارن وييّاض نغد واد ءيتقلاقالن نغد واد باهرا ءيسّان تيسّي ءيكتين نغد واد ءيتمّاغن نغد واد ءيتّيرين ا‑يسّمون ما‑يگّوتن ءي‑يخف‑نس. ءيقّان‑د ا‑يگ واد ءيسّمرحبان س‑ويلّي تمودّونين، ءيگ واد دار ءيعزّا كولّو ما‑يفولكين، ار‑يتنباض غ‑وگايّو‑نس ار‑بدّا‑يسكار س‑لحقّ، ءيغوس‑وول‑نس ءيغوي غ‑يخف‑نس. ءيقّان‑ت‑يد ا‑يامژ غ‑يواليون زگانين لّي‑س‑ا‑نسّلماد. غمكاد ا‑س‑را‑ييژضار ا‑يزّعام وييّاض س‑ولمّود يُغژانّ، ءيرار اوال ءي‑وانّا‑ت‑يضاضّن. اشكو گّوتن مدّن ءور‑رين اد‑سفليدن س‑واوال‑نّغ، باهرا غويلّي تّيرينين اد‑ژّالّن ءي‑دّات، ار‑جلّون وييّاض س‑تجمّاعت ءيخوان. ءيقّان‑ك‑يد ا‑تن‑تسّفسّات، اشكو ار‑سّگراوالن كرا ن‑ايت‑تگُمّا كولّوتن. ار‑سّلمادن ما‑ور‑يگين لحقّ باش اد‑تامژن كرا ءي‑يخف‑نسن. ءيلّا يان گو‑كريت لّي‑مي‑تّينين ‹نّابي›، ءولا نتّا ءيساول فلّاسن ءينّا: «ايت‑كريت ار‑بدّا‑سّكيركيسن. زوند لوحوش أُخشنّين اد‑گان. غير ءيطس د‑ومشّو ا‑ف‑ا‑سكارن.» أُغژانّت توگّا‑ياد. غايان ا‑ف‑ك‑يخصّا ا‑تن‑تشّحشّمت س‑لمعقول، باش اد‑زگان غ‑وغاراس لّماسيح، ا‑ور‑سول‑تّي‑تاوين غ‑تحاجيّين ن‑ايت‑يودايا ءولا لوصيّات ن‑مدّن لّي‑فّوغنين زغ‑لحقّ. هاتي كولّو ما‑يلّان ءيغوس ءي‑ويلّي دار ءول ءيغوسن، والاينّي ءور‑يغوس يات دار ويلّي مي ركان‑وولاون‑نسن ءور‑رين اد‑امنّ. نتني ءيركا لعاقل‑نسن ءولا ول‑نسن. ار‑تّينين ءيس‑سّنّ ربّي، والاينّي ءيسكّيرن‑نسن ا‑يمالان ءيس‑ور‑ت‑سّينّ. هان ءيحاشا‑تن ربّي، ءور‑ا‑سكارن س‑واوال‑نس ءولا ژضارن ءي‑ما‑يفولكين. ءيمّا كيّي، ءيلّا فلّاك ا‑تسّلمادت مدّن اد‑سكارن كولّو س‑ما‑د‑يمشاشكان د‑ولمّود يُغژانّ. ءيني ءي‑يرگازن مقّورنين اد‑زگان غ‑يخف‑نسن، ار‑بدّا‑تفولكين د‑مدّن، ار‑تنباضن غ‑كولّو ماد‑سكارن. تينيت‑اسن اد‑دوسن غ‑وغاراس لّماسيح ار‑تحنّون غ‑وييّاض ار‑تزايادن غمكاد بلا‑دا‑ترماين. ءيني ءولا ءي‑تمغارين مقّورنين اد‑سكارنت غمكلّي‑د‑يقّانّ ختيلّي توقّارنين ربّي. تينيت‑اسنت ا‑ور‑ساوالنت غ‑مدّن ءولا‑دا‑تّبلونت س‑تيسّي ءيكتين. ءيلّا فلّاسنت اد‑سّلمادنت تيمغارين مژّينين ف‑ما‑يفولكين ار‑اسنت‑مالانت مامنك ا‑تگا تايري لّي‑س‑راد‑تعاوانّت ءيرگازن‑نسنت ءولا تاروا‑نسنت. ار‑اسنت‑مالانت مامنك ا‑راد‑يژضارنت اد‑تنباضنت غ‑كولّو ماد‑سكارنت س‑وول ءيغوسن، ار‑تخدامنت غ‑تگمّي ار‑تفولكينت د‑مدّن ار‑سفليدنت س‑يرگازن‑نسنت باش ا‑ور‑د‑يرار يان تيرگّام ءي‑واوال ن‑ربّي. ءيني ءي‑يعيّالن اد‑تنباضن غ‑يخف‑نسن. ءولا كيّي ءيلّا فلّاك ا‑بدّا‑تسكارت افولكي د‑مدّن باش اد‑اسن‑تمالات مامنك ا‑تن‑د‑يقّان اد‑سكارن ءولا نتني. سّلماد‑تن س‑لحقّ د‑لمعقول س‑يواليون أُغژانّين لّي‑ف‑ور‑يژضار يان ا‑فلّاسن‑يژي. ءيغ‑ا‑تسكارت غمكان را‑يتحشام وانّا ءيران ا‑ك‑يضاضّ، اشكو ءور‑را‑ياف ما‑فلّانّغ‑يتّيني يُخشن. ءيني ءي‑يخدّامن اد‑سفليدن س‑يد‑سيديتسن ار‑تن‑ترضون غ‑كولّو ماد‑سكارن. ا‑ور‑فلّاسن‑سّيقارن ءيخفاون‑نسن ءولا‑دا‑تن‑تاكُرن. ءيلّا فلّاسن ا‑بدّا‑سكارن س‑نّييت‑نسن، باش اد‑ژرن مدّن منشك ا‑س‑يفولكي‑ولمّود‑نّغ ف‑ربّي لّي‑اغ‑يجّنجمن. ءيسّبايّن‑د ربّي لحنانت‑نس غيلاد ا‑سرس‑يجّنجم كولّو مدّن. ار‑اغ‑يسّلماد ا‑نتانف ءي‑كولّو ما‑ت‑ور‑يرضين ءولا شّهوات ن‑دّونيت‑اد. ار‑اغ‑يسّلماد ا‑نتنباض غ‑يخف‑نّغ ار‑نسكار س‑لحقّ ءولا كولّو ما‑ت‑يرضان غيلاد غ‑سول‑نقاما غ‑دّونيت. ار‑نتقل ار‑نترجو اسّ‑ان امباركي لّي‑غ‑را‑د‑يبان لمجد ن‑ربّي‑نّغ ءيمقّورن ياسوع لماسيح لّي‑اغ‑يجّنجمن. ءيفكا ءيخف‑نس اد‑اغ‑يفرو زغ‑كولّو ما‑يُخشنّ، ءيسّغوس‑اغ باش ا‑نگ مدّن‑نس لّي‑باهرا‑يتّيرين اد‑سكارن ما‑يفولكين. سّلماد تيغاوسيوين‑اد ءي‑ايتماتن، ار‑اسن‑تّينيت اد‑سكارن غمكاد، ار‑تشّحشّامت وانّا ءيسكارن ما‑يُخشن س‑لامر لّي‑اك‑يتياوفكان. ا‑ور‑تادجت يان ا‑ك‑يحگر. سّكتي‑اسن‑د ءيس‑فلّاسن‑يلّا اد‑سفليدن س‑لحوكّام ءولا كولّو وييّاض تحكامنين تامازيرت، ار‑سكارن س‑واوال‑نسن، ءوجادن ءي‑كرا ءيگان تاووري ءيصلحن. تينيت‑اسن ا‑ور‑رگمن غ‑يان ءولا ژين د‑يان. ءيلّا فلّاسن اد‑تصبارن ار‑ترخون د‑كولّو مدّن. ءولا نكُّني نكّا‑تّين نگا ءينافالن ءيمعصان ءيمجلان، نتياوكرّاف غ‑شّهوات ءولا كولّو ما‑س‑ا‑تّبلون مدّن. نكّا‑تّين ار‑نزّراي ءوسّان‑نّغ س‑تنوّاشت د‑يسكّيرن أُخشنّين، ار‑اغ‑تكرهون مدّن ار‑تن‑نتكرهو ءولا نكُّني. والاينّي ربّي انجّام‑نّغ ءيسّبايّن‑د منشك ا‑يفولكي ءيحوبّو بنادم. س‑رّحمت‑نس ءيگّوتن ا‑س‑اغ‑يجّنجم، ءورد ف‑سّيبت ن‑يفولكيتن لّي‑نسكار. ءيجّنجم‑اغ ءيسيرد‑اغ ءيفك‑اغ تالاليت ن‑تودرت لّجديد س‑تحكيمت ن‑رّوح لقودوس لّي‑س‑اغ‑يعمّر ف‑وفوس ن‑ونجّام‑نّغ ياسوع لماسيح. غمكاد ا‑س‑گينّغ‑يحنّا ربّي ءيسكر سّلامت غ‑گراتنّغ ديدس ءيفك‑اغ لوورت ن‑تودرت ءيدومن لّي‑ن‑نرجا غيلاد. اوال ءيزگان اياد. ريغ زغ‑گيك ا‑تزّگات تيغاوسيوين‑اد غ‑دار ويلّي ءومنّين اوال ن‑ربّي، باش اد‑تلهون ءيخف‑نسن س‑يسكّيرن شوانين. ءيفولكي ماياد، را‑ينفعا كولّو مدّن. والاينّي انف ءي‑تجمّاعت ءيخوان ن‑ويلّي تمجاحادنين ف‑يسماون ن‑تاسوتين لّي‑زرينين، ار‑تژين ار‑تمّاغن ف‑شّرع ن‑موسا. غايان ءور‑اكُّ‑ا‑يتنفاع س‑يات. ءيمّا وانّا ياطّون ايتماتن، ءيني‑اس ا‑يفسّا، تينيت‑اس‑ت تيس سنات‑توال. ءيغ‑ور‑يفسّا، انف‑اس ا‑ور‑سول‑ديدون‑يمون. اشكو ءيسّبايّن وان غواد ءيس‑يفّوغ اغاراس ن‑ربّي س‑دّنوب‑نس، ءيزّوگز لحوكم ف‑يخف‑نس. غاكود نّا‑ياك‑ن‑وزنغ ارتيماس نغد تيخيكوس، اشك‑ين س‑داري س‑نيكوبوليس، ا‑ور‑تماطلت. اشكو ريغ ا‑ن‑زّريغ تاگرست غين. گ‑ن تيقّي‑نّك ا‑تعاونت لموحامي زيناس نتّان د‑ابولُس، باش اد‑كمّلن ف‑وغاراس‑نسن، تفكت‑اسن اينّا‑تن‑يخصّان. ءيلّا ف‑مدّن‑نّغ اد‑ميورن اد‑تلهون س‑تووري ءيصلحن باش اد‑بيدّن د‑وانّا ءيلكمن ف‑كرا، ا‑ور‑زّرين تودرت‑نسن بلا لفايتّ. ار‑ن‑فلّاك‑تسلّامن كولّو ويلّي ديدي لّانين. ار‑ن‑نتسلّام ف‑ايتماتنّغ عزّانين لّي‑ومنّين س‑لماسيح. اد‑اون‑تيلي لباراكا ن‑ربّي كولّوكن. زغ‑بولُس احبّاس ف‑يسم لّماسيح ياسوع، د‑زغ‑گماتنّغ تيموتاوس. ءي‑ومدّاكُّل‑نّغ ءيعزّان فيليمون لّي‑ديدنّغ‑يتمعاوان غ‑تووري‑اد، د‑ولّتماتنّغ ابفيّا د‑ارخيبّوس لّي‑ياگّسن س‑تووري ن‑ربّي زوند نكُّني، د‑ومناگّار ن‑ايتماتن غ‑تگمّي‑نّك. اد‑اون‑تيلي لباراكا د‑سّلامت زغ‑ربّي باباتنّغ د‑سيديتنّغ ياسوع لماسيح. ار‑بدّا‑تشكارغ ربّي‑نو فلّاك، ار‑ك‑يد‑سوينگيمغ غاكود نّا‑تژالّاغ. اشكو ار‑سفليدغ ف‑مامنك ا‑باهرا‑تومنت س‑سيديتنّغ ياسوع، ءولا ف‑مامنك اد‑دارك‑عزّان كولّو ءيمژلاين ن‑ربّي. ار‑تضالابغ ربّي اد‑اك‑يمالا كولّو لباراكات لّي‑اغ‑لّانين ف‑وودم لّماسيح غيلاد غ‑ديدنّغ‑تمونت غ‑وغاراس لّيمان. وا‑گما ها‑يّي تهنّاغ، فرحغ باهرا اشكو عزّان دارك ايتماتن، تسّفجّيجت ف‑وولاون ن‑يمژلاين كولّوتن. راد‑يژضارغ زعمغ ا‑ك‑امرغ س‑يسم لّماسيح ف‑ما‑ك‑يد‑يقّانّ ا‑تي‑تسكرت، والاينّي سّنغ ءيس‑دارك‑نعزّا. مايان ا‑ف‑ريغ ا‑ت‑زگيك‑ضالبغ، نكّي‑اد ءيگان افقّير گغ غيلاد احبّاس ف‑يسم لّماسيح ياسوع. ريغ ا‑ك‑ضالبغ ف‑يوي ءونيسيموس، اشكو وورّيغ گيغ باباس غ‑تاگُمات لّماسيح غ‑ووسّان‑اد غ‑تياوكرّافغ س‑سّناسل. غايد ءيزرين ءور‑ا‑ك‑يتنفاع س‑يات، ءيمّا غيلاد ءينفعا‑يّي نكّي ءولا كيّي. واخّا ءيگا نتّان زوند تاسا‑نو، ءوزنغ‑ت‑ين غيلاد ا‑ن‑يوورّي س‑دارك. ريغ نكّي ا‑د‑ديدي‑يقاما، اشكو ءيژضار ا‑يّي‑يعاون غيلاد غ‑تياوكرّافغ س‑سّناسل ف‑سّيبت لّخبار ءيفولكين، غمكلّي تّيريت كيّي ا‑يّي‑تعاونت مراد ءيس‑ديدي‑تلّيت. والاينّي ءور‑ريغ ماياد ابلا س‑واوال‑نّك، باش ا‑تسكرت افولكي س‑لخاطر ءورد س‑بزّز. ءيس‑ورد ماياد ا‑ف‑ديدك‑ينگارا ار غيلاد؟ باش ا‑ن‑يوورّي ءيقاما ديدك بدّا، ا‑ور‑يگ غير ءيسمگ‑نّك والاينّي ءوگُّار ن‑يسمگ، اشكو يوورّي غيلاد ءيگا گماك ءيعزّان. ءيعزّا داري نكّي، والاينّي را‑دارك‑يعزّا س‑وگُّار، اشكو كيّي ا‑مي‑يگا وينّك غ‑دّات ءولا غ‑سيديتنّغ. ءيمّا غيلاد، ءيغ‑يّي‑تگيت د‑ومدّاكُّل‑نّك غ‑تامونت لّماسيح، ضالبغ‑ك ا‑سرس‑تسّمرحبات غمكلّي تريت ا‑سري‑تسّمرحبات نكّي. اينّا‑ياك‑يسكر يُخشن نغد اينّا‑ياس‑تضفارت، حاسب‑ت فلّا. نكّي بولُس، س‑وفوس‑ينو ا‑س‑راد‑اك‑ن‑اراغ: «راد‑اك‑ت‑فكغ.» ءيمّا كيّي تسّنت ءيزد زغ‑نكّي ا‑س‑اك‑تلّا تودرت‑نّك. ضالبغ‑ك ا‑گما، ا‑گيگي‑تسكرت افولكي‑اد ف‑وودم ن‑سيديتنّغ، تسّفرحت ءول‑ينو س‑يسم لّماسيح. سّنغ ءيس‑را‑تسكرت ماياد‑اك‑ن‑وريغ، را‑تسكرت ءوگُّار ن‑ماد‑ضالبغ. ءيمّا غيلاد ريغ اد‑يّي‑تجّوجادت احانو ن‑ونبگي غ‑دارك، اشكو رجيغ‑ن غ‑ربّي اد‑اون‑يفك مايلّي زگيس تّضالابم، يادج‑يّي ا‑ن‑وورّيغ س‑دارون. ار‑ن‑فلّاك‑يتسلّام ابافراس، ءيگا احبّاس ديدي ف‑يسم لّماسيح ياسوع. ار‑ن‑فلّاك‑تسلّامن ايتماتن مارقُس د‑اريستارخوس د‑ضيماص د‑لوقا لّي‑ديدي‑تمعاوانّين غ‑تووري ن‑ربّي. ا‑گيگون‑تيلي لباراكا ن‑سيديتنّغ ياسوع لماسيح. ف‑يمي لّانبيا گّوتنين ا‑ف‑يساول ربّي س‑يمزوورا‑نّغ غايد ءيزرين، كرايگاتّ ازمز د‑ماد‑اسن‑يملا. ءيمّا غ‑ووسّان‑اد گُّرانين ءيساول‑د سرنّغ ف‑يمي ن‑يان ءيگان يوس. نتّان ا‑س‑يخلق كولّو ما‑يلّان، ءيژلي‑ت ا‑يوورت كرايگاتّ كرا. ءيبان گيس لمجد ن‑ربّي، ءيگ صّورت ن‑رّوح‑نس، ءيحكام غ‑كولّو ما‑يلّان س‑تحكيمت ن‑واوال‑نس. غاكود لّيغ ءيسّيتّي دّنوب ف‑بنادم ءيسكيوس ف‑وفاسي ن‑ربّي لّمجد غ‑تاتّويت ن‑يگنوان. ءيگا‑ت ربّي د‑واد يوگُرن لمالايكا، ءيفك‑اس ءيسم لّي‑يوگُرن ءيسماون‑نسن. اشكو ءورد كرا ن‑يان غ‑لمالايكا ا‑مي‑ينّا ربّي غ‑وارّا‑نس: «كيّي تگيت ءيوي. باباك اد‑گيغ غاسّاد.» ءورد كرا لّمالاك ا‑ف‑ينّا: «راد‑گغ باباس، ءيگ نتّا ءيوي.» والاينّي ربّي، غاكود لّيغ را‑د‑يازن يوس ءيخفدّي س‑دّونيت ءينّا: «كولّو لمالايكا ن‑ربّي، ءيقّان‑تن‑د ا‑تي‑تعبادن.» هاتي لمالايكا ا‑ف‑ينّا: «ربّي ءيسكر لمالايكا‑نس زوند اضو، ءيسكر ءيخدّامن‑نس زوند تيمزليوين لّعافيت.» والاينّي لّيغ ءيساول ف‑يوس ءينّا: «لعرش‑نّك ا‑ربّي ا‑راد‑بدّا‑يدوم، ءور‑را‑سار‑يتمّو. ءيگا‑وعمود ن‑تگلديت‑نّك اعمود لّحقّ. ار‑تّرضوت س‑وفولكي، ار‑تّكرهوت لخُشانت. مايان ا‑ف‑ك‑يژلي ربّي لّي‑يگان ربّي‑نّك س‑وژغور لّفرح ءيسّايك‑ك نّيگ ءينگّان‑نّك.» ييني‑داغ فلّاس: «كيّي ا‑سيدي ربّي ا‑يزّوگزن لّساس ن‑دّونيت غ‑يسيزوار. ف‑وفوس‑نّك ا‑ف‑تياوسكارن ءيگنوان. نتني را‑تن‑كولّو‑لاح، ءيمّا كيّي راد‑بدّا‑تيليت. نتني راد‑كولّو‑مدون زوند تيملسيت، ءيمّا كيّي راد‑بدّا‑تقامات. را‑تن‑تسّموتّلت زوند اسلهام تكّيست‑تن، ءيمّا كيّي غمكلّي تگيت ا‑راد‑بدّا‑تگت. ءيسگُّاسن‑نّك ءور‑را‑سار‑تمّون.» ءور‑جّو‑ينّي ربّي ءي‑كرا لّمالاك: «سكيوس ف‑وفاسيي‑ينو ارد گغ ءينوّاشن‑نّك غ‑دّو ءيضارن‑نّك.» اشكو لمالايكا ءور‑گين غير لارواح لّي‑تخدامنين ءي‑ربّي، ار‑تن‑د‑يتازن اد‑قاسان غويلّي را‑ينجم. مايان ا‑س‑فلّانّغ‑يلّا ا‑ستّ‑نتاوي س‑وگُّار غ‑ما‑مي‑نسفلد، ا‑ور‑نجلو زغ‑وغاراس. اشكو شّرع لّي‑د‑يوشكان ءي‑يمزوورا‑نّغ ف‑يمي لّمالايكا، ءور‑يژضار يان گيسن اد‑اس‑يانف، والاينّي تضر لعقوبيت س‑لحقّ ف‑كولّو وانّا زگيس ءيفّوغن ءولا كولّو وانّا ءور‑سرس‑يسكارن. ءيمّا غيلاد، مامنك ا‑را‑ننجم ءيغ‑ور‑تّ‑نيوي غ‑وجنجم‑اد ءيهيّان؟ سيديتنّغ ياسوع ا‑يزوارن ءينّا‑ياغ فلّاس، ساولن فلّاس ءولا غويلّي سفلدنين ءي‑سيديتنّغ ملن‑اغ ءيس‑يگا لحقّ. ءيزّگا‑ت ربّي س‑لمعجيزات د‑لعجايب د‑لقوّات گّوتنين ءولا س‑توافكيو ن‑رّوح لقودوس لّي‑يفكا ءي‑مدّن غمكلّي ءيرا. ءورد لمالايكا ا‑مي‑يفكا ربّي اد‑تحكامن غ‑دّونيت لّي‑را‑ييلي، ا‑ستّ‑يگان د‑دّونيت لّجديد لّي‑ف‑ا‑نساوال غيلاد. والاينّي غمكلّي ءينّا يان غ‑وارّا ن‑ربّي: «ما‑يگا بنادم ايلّيغ ا‑گيس‑تسوينگيمت، ءولا يوس ن‑بنادم ايلّيغ‑تّ‑گيس‑تيويت؟ ءيمّا كيّي تگيت‑ت‑يد غ‑دّو لّمالايكا يان ءيميكّ، تفكت‑اس تّاج لّمجد د‑لهيبت، ترارت كولّو ما‑يلّان غ‑دّو ءيضارن‑نس.» غمكاد ا‑س‑يملا ربّي ءيس‑يرور كولّو ما‑يلّان غ‑دّو ءيضارن ن‑بنادم باش ا‑ت‑يحكام. ءيمّا غيلاد ءيبان ءيس‑ور‑تا‑يلّي كولّو غ‑دّو ءيضارن ن‑بنادم. والاينّي نژرا ياسوع لّي‑يوورّين ءيلّا‑د غ‑دّو لّمالايكا يان ءيميكّ، نژر‑ت ياتّوي س‑لمجد د‑لهيبت ف‑سّيبت لّموت لّي‑س‑يمّوت ا‑سرس‑يسّروح رّحمت ن‑ربّي ءي‑كولّو مدّن. ربّي ا‑يخلقن كولّو ما‑يلّان، ءيگ كولّو وينس. ءيسكر ما‑يفولكين لّيغ ءيقصاد ا‑يمجّد انجّام‑نّغ س‑ورفوفن، ءيرار مدّن گّوتنين اد‑گن تاروا‑نس كشمن ديدس س‑لمجد‑نس. ءور‑يحشيم ياسوع اد‑اغ‑يگ د‑ايتماس، اشكو غوالّي ءيسّغوسن ءولا غويلّي ءيسّغوس، باباتسن ءيگا يان. ءينّا نتّان ءي‑باباس: «راد‑ينيغ ءي‑ايتما ف‑كولّو ما‑تسكرت، الغّ‑ك غ‑وامّاس ن‑ومناگّار.» ييني‑داغ: «را‑ن‑رجوغ ءولا نكّي غ‑ربّي.» ييني‑داغ: «ها‑نكّي د‑تاروا‑ياد ن‑ربّي لّي‑يّي‑يفكا.» نكُّني‑اد ءيگان تاروا، نطّاف دّات ن‑تفيّي د‑يدامّن. مايان ا‑ف‑يوورّي ءولا نتّا ءيطّاف دّات زوند نكُّني، باش ا‑يمّت ءيهلك ءيبليس لّي‑دار لقوّا لّموت. ءيفسي ءي‑كولّو ويلّي زّراينين ءوسّان‑نسن غ‑يسكراف ن‑تكساض لّموت. ءيبان ءيس‑ورد لمالايكا ا‑ف‑يسكر مايان والاينّي «ءيسكر‑ت ف‑مدّن ن‑تاسوت ن‑يبراهيم.» ماياد ا‑ف‑د‑يقّان ياسوع ا‑يرواس ءي‑ايتماس زغ‑كرايگاتّ تاسگا، باش اد‑اسن‑يگ انمغور ءيهيّان ءيحنّو گيسن ءيسكر كولّو مايلّي حتاجّان، ءيبيدّ غ‑گراتسن د‑ربّي ا‑ن‑يسرس تيغرسي لّي‑را‑يسّيتّي دّنوب ف‑بنادم. ءيمّا غيلاد ءيژضار ا‑يعاون كولّو وانّا تارمنت لخُشانات، اشكو ءيرفوفن ءولا نتّا ءيتيارام ف‑ا‑يسكر ما‑يُخشنّ. واي‑ايتما ءيمژلاين لّي‑مي‑د‑يغرا ربّي اد‑كشمن س‑تامونت‑اد، سوينگيماد‑د ياسوع لّي‑د‑يتيازانّ ا‑يگ انمغور ءيهيّان لّيمان لّي‑غ‑نومژ. ءيسكر كولّو ما‑گيس‑يرا ربّي لّي‑ت‑يژلين ءي‑تووري‑اد، غمكلّي ءيسكر موسا كولّو ما‑گيس‑يرا غ‑وامّاس ن‑ايت‑تگمّي ن‑ربّي. والاينّي نسّن ءيس‑يستهلّا ياسوع لوقر ءوگُّار ن‑موسا. اشكو ابنّاي، ار‑تي‑توقّارن مدّن ءوگُّار ن‑تگمّي لّي‑يبنا. كرايگاتّ تيگمّي تّياوبنا ف‑وفوس ن‑كرا ن‑يان، ءيمّا ربّي ءيگا ابنّاي ن‑كولّو ما‑يلّان. موسا ءيسّووفا كولّو ما‑گيس‑يرا ربّي، ءيگ اخدّام غ‑وامّاس ن‑ايت‑تگمّي ن‑ربّي، ءيمل‑اسن ما‑را‑ييني ربّي غ‑مايلّي‑د‑يفتان. ءولا لماسيح ءيسّووفا كولّو ما‑گيس‑يرا ربّي، ءيمّا نتّا ءيگا يوس ن‑تگمّي، تيلي‑تگمّي كولّوتّ غ‑دّو‑وفوس‑نس. ءيمّا ايت‑تگمّي‑نس، نكُّني ا‑تن‑يگان ءيغ‑نزگا نزعم، نامژ‑بدّا غ‑رّجا‑ياد دارنّغ ءيلّان. غمكلّي‑س‑ينّا رّوح لقودوس: «غاسّاد ءيغ‑تسفلدم ءي‑واوال‑نس، اد‑ور‑تسّيقارم ءيخف‑نّون زوند ءيمزوورا‑نّون لّي‑گيگي‑رگّمنين غ‑ووسّان لّي‑غ‑ا‑يّي‑تارمن غ‑لخلا. كّوژ ءيد‑مراو ن‑وسگُّاس ا‑يّي‑تارمن، ار‑تمنادن كولّو ماد‑سكارغ. مايان ا‑ف‑حاشاغ مدّن‑ان ءينيغ فلّاسن ‹ار‑بدّا‑جلّون ءيخفاون‑نسن. ءور‑جّو‑سّينّ اغاراس‑ينو.› س‑لغاضاب ا‑س‑نّيغ اوال‑اد ءيزگان، ‹نتني ءور‑سار‑راد‑كشمن س‑وسونفو‑نو.› » واي‑ايتما، رارات لعاقل ا‑ور‑گيگون‑ييلي ما‑مي‑يُخشن‑وول‑نس ياگُي ا‑يامن ءيرار تيغوردين‑نس س‑ربّي لّي‑يدّرن. والاينّي زّعامات ءي‑نگراتون كرايگاتّ اسّ، ماحدّ لّان‑ووسّان، ا‑ور‑گيگون‑ييلي ما‑ن‑لدّين دّنوب ارد ءيقار ءيخف‑نس ءيجلو. اشكو راد‑بدّا‑نقاما غ‑تامونت لّماسيح ءيغ‑نزگا غمكلّي نومن زغ‑يسيزوار ار ءيسيگُّرا. غمكلّي ءينّا: «غاسّاد ءيغ‑تسفلدم ءي‑واوال‑نس، اد‑ور‑تسّيقارم ءيخف‑نّون زوند ءيمزوورا‑نّون لّي‑گيگي‑رگّمنين.» والاينّي مانوي سفلدنين ءي‑واوال ن‑ربّي رگمن گيس؟ ا‑تن‑يگان د‑ويلّي‑د‑يسّوفغ موسا زغ‑تمازيرت ن‑ميصر. مانوي ءيحاشا ربّي كّوژ ءيد‑مراو ن‑وسگُّاس؟ ا‑تن‑يگان د‑ويلّي سكرنين دّنوب مّتن ءيلمّا غ‑لخلا. مانوي مي ءينّا ربّي س‑واوال ءيزگان ءور‑سار‑راد‑كشمن س‑وسونفو‑نس؟ ا‑تن‑يگان د‑ويلّي فّوغنين زغ‑واوال‑نس. غايان اد‑اغ‑يملان ءيزد ف‑سّيبت ن‑ماد‑اگُين اد‑امنّ ا‑ف‑ور‑ژضارن اد‑د‑كشمن س‑وسونفو ن‑ربّي. ءيساول ربّي س‑واوال ءيزگان، ييني ءيس‑را‑يفك اسونفو ءي‑مدّن‑نس. ءيمّا غيلاد، ءيلّا فلّانّغ ا‑نرار لعاقل ا‑ور‑گينّغ‑ييلي ما‑ور‑را‑ييژضار ا‑سرس‑يكشم. اشكو لخبار ن‑وسونفو‑اد لّي‑مي‑نسفلد، سفلدن‑اس‑ياد ءيمزوورا‑نّغ والاينّي ءور‑ومينّ اوال لّي‑مي‑سفلدن. مايان ا‑ف‑ور‑زگيس‑ومژن كرا لّفايتّ. ءيمّا نكُّني لّي‑ت‑يومنّ، نكشم غيلاد س‑وسونفو لّي‑ف‑اسن‑ينّا: «س‑لغاضاب ا‑س‑نّيغ اوال‑اد ءيزگان ‹نتني ءور‑سار‑راد‑كشمن س‑وسونفو‑نو.› » ءيقصاد ربّي اسونفو‑اد زغ‑لّيغ ءيخلق دّونيت. ءيتيارا غ‑يان‑وگزّوم غ‑وارّا‑نس: «ويس سّا‑ووسّان ا‑يسونفا ربّي زغ‑كولّو ما‑يسكر.» والاينّي ءيتيارا‑داغ: «نتني ءور‑سار‑راد‑كشمن س‑وسونفو‑نو.» هاتي ءور‑كشيمن غويلّي ءيروح لخبار غ‑ووسّان‑ان اشكو ءور‑سرس‑سكيرن. والاينّي سول لّان وييّاض راد‑كشمن. ماياد ا‑ف‑يسكر ربّي اسّ ياضني لّي‑مي‑ينّا ‹غاسّاد›، اشكو تيغوردين ن‑يسگُّاسن گّوتنين ءيساول‑داغ ف‑يمي ن‑داود ييني ءيواليون‑لّي: «غاسّاد ءيغ‑تسفلدم ءي‑واوال‑نس، اد‑ور‑تسّيقارم ءيخف‑نّون.» مراد ءيس‑تن‑يشّكشم ياشوع س‑وسونفو، ءور‑را‑يساول ربّي تيگيرا ف‑يان‑واسّ ياضني. ءيمّا غيلاد را‑سول‑يفك ربّي اسونفو ءيكمّلن ءي‑مدّن‑نس، غمكلّي ءيسونفا نتّا غ‑ويس سّا‑ووسّان. اشكو وانّا ءيكشمن س‑وسونفو ن‑ربّي، نتّان ا‑يسونفان زغ‑كولّو ما‑يسكر غمكلّي ءيسونفا ربّي. ءيمّا غيلاد ءيلّا فلّانّغ ا‑باهرا‑نتّيري ا‑نكشم س‑وسونفو‑اد، ا‑ور‑يضر يان گينّغ غمكلّي ضرن نتني، فّوغن زغ‑واوال ن‑ربّي. هاي‑اوال ن‑ربّي ءيدّر ءيتجهّد، ءيمساد ءوگُّار ن‑تاژّيت لّي‑يمسادن زغ‑سنات‑تسگيو، ار‑يتبّي غ‑وگُنس ن‑بنادم ارد ءيبضو نّفست زغ‑رّوح، ءيبضو اديف زغ‑تّمي ن‑يخسان، ار‑يسّبايّان نّييت ن‑وول ءولا ما‑يقصاد. ءور‑يرگس يات ف‑ربّي غ‑كولّو ما‑يخلق. هاتي ءيبايّن كولّو غ‑يژري ن‑والّي مي‑د‑يقّان ا‑نرار لحساب. ءيلّا فلّانّغ ا‑نزگا غ‑ليمان‑اد غ‑نومژ، اشكو ءيلّا‑ياغ يان‑ونمغور ءيهيّان لّي‑يكشمن س‑يگنّا، ا‑ت‑يگان د‑ياسوع يوس ن‑ربّي. ءيلّا‑ياغ يان‑ونمغور ءيهيّان لّي‑يژضارن ا‑يحنّو ف‑ضّعف‑نّغ، اشكو ءيتيارام ءولا نتّا زغ‑كرايگاتّ تاسگا زوند نكُّني، والاينّي ءور‑جّو‑يسكير كرا ن‑دّنب. ف‑ماياد ا‑ف‑راد‑ينيغ: ا‑نزعم غيلاد ا‑ن‑ناكمور س‑لعرش ن‑ربّي ءيحنّان، اد‑اغ‑يرحم ءيحنّو فلّانّغ ءيعاون‑اغ غ‑تاساعت لّي‑غ‑نحتاجّا. كولّو وانّا ءيگان انمغور ءيهيّان، ءيتياوستاي زغ‑گر مدّن ياضني، ءيتياوژلاي ا‑يبيدّ غ‑گراتسن د‑ربّي ار‑ن‑يسّاكمور تيغرسيو د‑توافكيو ءي‑ربّي ما‑س‑ا‑ن‑فلّاسن‑يسّيتّي دّنوب‑نسن. ءيژضار‑ونمغور ا‑يترخو د‑ويلّي ءور‑سّينّين اغاراس د‑ويلّي زگيس جلانين، اشكو ءيگا بنادم ءولا نتّان ءيضعف. مايان ا‑ف‑ت‑يد‑يقّان ا‑ن‑يسّاكمور ءي‑ربّي تيغرسيو ف‑دّنوب‑نس نتّا، غمكلّي‑تنت‑ين‑يسّاكمور ف‑دّنوب ن‑وييّاض. ءور‑يلّي ما‑يژلين ءيخف‑نس ءي‑تووري‑ان ءيهيّان، والاينّي ربّي ا‑يژلاين وانّا ءيرا، غمكلّي ءيژلي انمغور هارون. ءولا لماسيح ءور‑يسّمقّور ءيخف‑نس ا‑يناول تاووري ن‑ونمغور ءيهيّان، والاينّي ربّي ا‑ت‑سرس‑يژلين ييني‑اس: «كيّي تگيت ءيوي. باباك اد‑گيغ غاسّاد.» ييني‑اس‑داغ غ‑وگزّوم ياضني: «را‑تگت انمغور ءيدومن زوند مالكيصادق.» غ‑ووسّان لّي‑غ‑يطّاف ياسوع دّات ن‑بنادم، ار‑يتژالّا ار‑يتضالاب س‑تغويّا د‑يمطّاون ءي‑والّي ءيژضارن ا‑ت‑يسّانف ءي‑لموت. ءيسفلد‑اس ربّي اشكو ءيفكا ءيخف‑نس ا‑يسكر ما‑ت‑يرضان. ءيمّا نتّا، واخّا ءيگا يوس ن‑ربّي، س‑تمّارا ا‑س‑ا‑يتلماد ا‑يسكار س‑واوال ن‑ربّي. والاينّي لّيغ ءيكمّل كولّو ما‑فلّاس‑يلّان، ءيجّنجم غويلّي سكارنين س‑واوال‑نس س‑وجنجم ءيدومن، ءيگ‑ت ربّي د‑ونمغور ءيهيّان زوند مالكيصادق. ءيگّوت داري ماد‑اون‑تّينيغ ف‑ماياد، والاينّي را‑يشقو ا‑تي‑تفهمّ، اشكو وورّين ژّاين ءيمزگان‑نّون. هان ءيلّا ف‑كولّو وينّا زّرينين ءونشك‑اد لّوقت لّي‑تزّريم كونّي، اد‑يژضارن اد‑سّلمادن وييّاض. ءيمّا كونّي، هاتي سول تحتاجّام ماد‑اون‑يسّلمادن تينباضين تيمزوورا ن‑وغاراس ن‑ربّي. ها‑كونّي سول‑كُن‑يخصّا‑وكُّفاي، ءور‑تا‑تژضارم ءي‑ومشّو. اشكو وانّا ءور‑يسّان غير اكُّفاي ءور‑تا‑يسّين مامنك ا‑س‑را‑يرضو ربّي، اشكو سول ءيمژّي. ءيمّا امشّو ءيگا وين ءيمقّورن لّي‑ميارنين اد‑سوينگيمن ار‑اطّون ما‑يشوان زغ‑ما‑يُخشنّ. ءيمّا غيلاد، ا‑نزري زغ‑تغاوسيوين‑ان تيمزوورا ن‑ولمّود ف‑لماسيح، نزايد س‑ما‑يگان وين ءيمقّورن. ا‑ور‑داغ‑نتّيري ا‑نزّوگز لّساس لّي‑ياد‑نزّوگز غايد ءيزرين ف‑مامنك ا‑س‑را‑د‑نوورّي زغ‑يسكّيرن خوانين ن‑بنادم نامن س‑ما‑يسكر ربّي. ا‑ور‑داغ‑نساوال غير ف‑يسيريدن نغد اسروس ن‑يفاسّن نغد تانكرا ن‑ويلّي مّوتنين نغد لحوكم لّيخرت. را‑نزري زغ‑تغاوسيوين‑ان، نزايد س‑كرا ياضني ءيغ‑يرا ربّي. ءيمّا غويلّي ژرانين تيفاوت، مضين لباراكا ن‑يگنّا، كشمن س‑تامونت ن‑رّوح لقودوس، فرحن س‑واوال ن‑ربّي ءولا لقوّات ن‑وزمز لّي‑را‑د‑ياشك، ءيغ‑رورن نتني تيغوردين‑نسن س‑ربّي تيگيرا ن‑كولّو مايان، ءور‑سار‑راد‑يژضارن ا‑د‑داغ‑وورّين س‑وغاراس. اشكو ملان ءي‑كولّو مدّن ءيس‑حگرن يوس ن‑ربّي، اگُلن‑ت ف‑وگّجدي تيس سنات‑توال. اشكو اكال نّا‑يسّان انژار لّي‑د‑فلّاس‑يطّارن، ار‑ياكّا صّابت ءيشوان ءي‑ويلّي‑ت‑كرزنين، را‑گيس‑تيلي لباراكا ن‑ربّي. ءيمّا اكال نّا‑ور‑يسّمغاين ابلا ازگُّار د‑تسكرا، ءور‑ينفعا س‑يات. تاكمور‑د سرس نّعلت، د‑وجدّار ا‑س‑راد‑اس‑تگُّرو. واي‑ايتما عزّانين، واخّا سرون نساول غمكاد، نسّن ءيس‑گيگون‑يلّا ما‑يوفن غايان، اشكو تگام ويد ءيجّنجم ربّي. نتّان، س‑لحقّ ا‑س‑ا‑يتحكام. ءور‑را‑يتّو تاووري لّي‑تسكرم ءولا ءيتّو مامنك ا‑توسيم ءيسم‑نس س‑لفرح تعاوانم ءيمژلاين‑نس، ار‑تن‑سول‑تّعاوانم. ءيمّا غيلاد نرا كود يان گيگون ا‑يتزاياد غمكان س‑زّعامت ار ءيسيگُّرا، باش ا‑تكشمّ كولّوكن س‑لباراكا لّي‑ن‑نترجو. ا‑ور‑تّرمايم تفلم ما‑كُن‑د‑يقّانّ، والاينّي سكارات زوند كولّو ويلّي ءومنّين صبرن ايلّيغ كشمن س‑تميخار لّي‑ف‑اسن‑ينّا ربّي. لّيغ ءيساول ربّي س‑يبراهيم ف‑ما‑راد‑اس‑يفك، ييني‑اس‑ت س‑يسم‑نس، اشكو ءور‑يلّي كرا ن‑يسم يوگُرن ءيسم ن‑ربّي. ييني‑اس: «را‑ك‑باركغ فكغ‑اك تاروا گّوتنين.» ءيقل ءيبراهيم ءيصبر ايلّيغ‑اس‑يتياوفكا مايلّي‑س‑اس‑ينّا ربّي. هاتي س‑يسم ن‑ما‑تن‑يوگُرن ا‑س‑اقران مدّن، باش اد‑زّگان ءيواليون‑نسن، ا‑ور‑سول‑گيسن‑تشكّون وييّاض. غمكان ا‑يسكر ربّي، ييري ا‑يسّمل ءي‑ويلّي را‑يوورت تيميخار‑نس ءيس‑ور‑را‑يوورّي غ‑واوال لّي‑س‑اسن‑ينّا. مايان ا‑ف‑يزوويد ءيسم‑نس ءي‑واوال‑نس. اشكو سين‑اد، ءور‑يلّي ما‑يژضارن ا‑تن‑يگلّب ءولا ءيژضار ربّي ا‑فلّاسن‑يسّكاركس. غمكان ا‑يسكر ف‑سّيبت‑نّغ نكُّني لّي‑گيس‑يزاوگن، باش ا‑باهرا‑نزعم نامژ س‑وگُّار غ‑رّجا لّي‑اغ‑يفكا. رّجا ءيصحان ءيزگان اياد، سّرصان گيس‑وولاون‑نّغ ارد‑اغ‑يشّكشم زغ‑لخاميا س‑تحانوت ءيتياوقداسن، س‑يلّيس ءيكشم ياسوع لّي‑اغ‑يزوارن ا‑بدّا‑يگ انمغور ءيهيّان ف‑سّيبت‑نّغ غ‑لگدّام ن‑ربّي غمكلّي ءيگا مالكيصادق. مالكيصادق ءيكّا‑تّين ءيگا اگلّيد ن‑تمدينت ن‑ساليم، ءيگ انمغور ءيبيدّن غ‑گر مدّن د‑ربّي اماتّوي. نتّان ا‑ن‑يمناگّارن ءيبراهيم ءيبارك‑ت لّيغ‑د‑يوورّي ءيبراهيم زغ‑يميغ لّي‑غ‑ينرا ءيگلدان ياضني. ءيفك‑اس ءيبراهيم تيس مراوت زغ‑كولّو ما‑د‑يكّيس ءي‑يگلدان‑لّي. مالكيصادق، تگا لمعنا ن‑يسم‑نس ‹اگلّيد لّي‑يرضان ربّي›. ءيگ نتّا اگلّيد ن‑ساليم، تگا لمعنا‑نس ‹اگلّيد ن‑سّلامت›. ءور‑يتيارا يات ف‑باباس نغد ءينّاس نغد ءيمزوورا‑نس، ءولا ءيتيارا يات ف‑تلاليت‑نس نغد لموت‑نس، والاينّي ءيرواس ءي‑يوس ن‑ربّي اشكو ءيگا‑بدّا انمغور ءيبيدّن غ‑گر مدّن د‑ربّي. ژرات منشك ا‑س‑يمقّور مالكيصادق، اشكو نتّان ا‑مي‑يفكا باباتنّغ ءيبراهيم تيس مراوت زغ‑كولّو ما‑د‑يكّيس ءي‑يگلدان. نسّن ءيزد ايت‑لاوي ا‑يتياوژلاين غ‑شّرع ن‑موسا ف‑اد‑سكارن تاووري ن‑تگمّي ن‑ربّي، ار‑اسن‑اكّان مدّن تيس مراوت زغ‑كولّو ما‑دارسن‑يلّان، واخّا گان نتني ايتماتسن زغ‑تاسوت ن‑يبراهيم. ءيمّا مالكيصادق، واخّا ءور‑يگي زغ‑ايت‑لاوي، يومژ زغ‑يبراهيم تيس مراوت، ءيفك ءيلمّا لباراكا‑نس ءي‑يبراهيم لّي‑يستي ربّي ا‑يوورت كولّو ما‑ف‑اس‑ينّا. ءيبان ءيس‑يوگُر مالكيصادق ءيبراهيم، اشكو غوالّي ءيمقّورن ا‑ياكّان لباراكا ءي‑والّي ءيكّان دّاواس. ءيمّا ايت‑لاوي لّي‑تامژنين تيس مراوت غيلاد، نتني بنادم كاد‑گان ار‑تمتاتن. والاينّي غوالّي مي ءيفكا ءيبراهيم تيس مراوت، ءيتيارا فلّاس ءيس‑يدّر. ايت‑لاوي لّي‑تامژنين تيس مراوت، نژضار ا‑فلّاسن‑نيني ءيزد نتني ا‑يفكان تيس مراوت ءي‑مالكيصادق ف‑وفوس ن‑باباتسن ءيبراهيم. اشكو سول‑ن‑يلّا لاوي غ‑وگُنس ن‑دّات ن‑يبراهيم، ءور‑تا‑جّو‑د‑يلول، ا‑يمناگّار د‑مالكيصادق. ربّي ءيسكر ءينمغورن زغ‑ايت‑لاوي باش اد‑زّگان شّرع. گان نتني زغ‑تاسوت ن‑ونمغور هارون. والاينّي مراد ءيس‑ژضارن اد‑شّكشمن مدّن س‑كولّو‑ما‑يقصاد ربّي، ءور‑راد‑حتاجّان مدّن اد‑اسن‑د‑ياشك يان‑ونمغور ياضني ءيگان زوند مالكيصادق. والاينّي لّيغ ءيبدّل ربّي ءينمغورن‑ان س‑ونمغور‑اد ياضني، ءيقّان‑د ا‑يتياوبدّال شّرع ءولا نتّا. ءور‑يگي‑ونمغور‑اد زغ‑تقبيلت ن‑لاوي، والاينّي ءيگا زغ‑يات‑تقبيلت ياضني لّي‑زغ‑ور‑جّو‑يخديم كرا ن‑يان غ‑تووري ن‑وژرو ن‑تغرسي. ءيمّا سيديتنّغ، نسّن ءيس‑يگا زغ‑تقبيلت ن‑ياهودا. ءور‑جّو‑يسكير موسا كرا ن‑ينمغورن زغ‑تقبيلت‑ان. ءيملا‑ياغ مايان ءيس‑يگا سيديتنّغ يان‑ونمغور زوند مالكيصادق، ءورد زوند ايت‑لاوي. يوورّي ءيگا انمغور س‑تحكيمت ن‑تودرت ءيدومن، ءورد س‑لوورت ن‑تاسوتين ن‑بنادم. غمكلّي ءيتياران: «را‑تگت انمغور ءيدومن زوند مالكيصادق.» ءور‑سول‑ا‑يتگّا ربّي ايت‑لاوي د‑ينمغورن‑نس، اشكو ءور‑ژضارن اد‑بيدّن غ‑گراس د‑مدّن غمكلّي ءيرا. هان شّرع ن‑موسا ءور‑يكمّيل يات، والاينّي ربّي ءيفكا‑ياغ غيلاد يان‑رّجا ءيصحان لّي‑يوفن مايان، ار‑ن‑سرس‑نتاكمور ءي‑ربّي. لّيغ ءيساول ربّي ف‑رّجا‑ياد، ءيزّگا اوال‑نس س‑يسم‑نس. ءينمغورن ياضني، ءور‑يزّگا ربّي اژلاي‑نسن س‑يسم‑نس، والاينّي س‑يسم‑نس ا‑س‑يزّگا اژلاي ن‑ياسوع. غمكلّي ءيتياران: «س‑يسم‑نس ا‑س‑د‑يساول سيدي ربّي، ءور‑را‑يوورّي غ‑واوال‑نس، ييني‑اس ‹را‑تگت انمغور ءيدومن.› » غمكان ا‑س‑يوورّي ياسوع ءيگا ضّامن ن‑يا‑لّعهد لّي‑باهرا‑يوفن لعهد‑ان ياضني. وورّين گّوتن ءينمغورن ن‑شّرع باهرا، اشكو ار‑تمتاتن ار‑د‑فالن تاووري‑نسن ءي‑ماد‑اسن‑يگُّران. ءيمّا ياسوع ءيگا واد ءور‑سار‑يتمّين، ءيگ انمغور ءيدومن. ماياد ا‑ف‑يژضار ا‑يجّنجم كولّو وينّا‑ن‑يسّروح ءي‑ربّي غيلاد ءولا كولّو مايد‑د‑يفتان، اشكو ءيدّر‑بدّا ا‑يتضالاب ربّي فلّاسن. وان انمغور‑اد ا‑نحتاجّا، ءيعمّر س‑وفولكي ن‑ربّي، ءيغوس‑وول‑نس، ءور‑گيس‑يلّي كرا لّعيب، ءيتياوژلاي زغ‑كولّو ما‑يسكارن دّنوب، ءيتيالال س‑يگّي ن‑يگنوان. ءور‑يگي زوند ءينمغورن ن‑شّرع، اشكو ءور‑ت‑يخصّا ا‑ن‑يسّاكمور تيغرسيو ءي‑ربّي اسّ ف‑واسّ ف‑دّنوب‑نس نتّا ءولا ف‑دّنوب ن‑مدّن ياضني. اشكو ياسوع، يات‑تغرسي ا‑ن‑يسّاكمور يات‑توال ف‑دّنوب‑نّغ كولّواغ لّيغ ءيفكا ءيخف‑نس ءيمّت. ضعفن ءينمغورن ن‑شّرع اشكو بنادم كاد‑گان. ءيمّا يوس ن‑ربّي، ءيتياوژلاي س‑يسم‑نس تيگيرا ن‑شّرع، ءيكمّل سرس ربّي كولّو ما‑سرس‑يقصاد. كولّو ماياد ءيملا‑ياغ ءيس‑دارنّغ انمغور ءيهيّان لّي‑نحتاجّا، ءيسكيوس ف‑وفاسي لّعرش ن‑ربّي لّمجد غ‑يگنّا. ار‑يسكار تاووري ن‑تحانوت تامژلايت غ‑وخيّام ءيصحان لّي‑يبنا سيدي ربّي، ءورد غ‑غوالّي ءيتّبنان س‑يفاسّن ن‑بنادم. انمغور نّا‑يلّان، هاتي ءيتياوژلاي ف‑ا‑ن‑يسّاكمور تيوافكيو د‑تغرسيو ءي‑ربّي. مايان ا‑ف‑د‑يقّان ياسوع ءولا نتّا ا‑ن‑يسّاكمور كرا. مراد ءيس‑را‑يقاما ياسوع غ‑دّونيت‑اد ءور‑را‑يسكار تاووري ن‑تگمّي ن‑ربّي غ‑دّونيت‑اد، اشكو لّان گيس غويلّي‑ن‑سّاكمورنين تيوافكيو س‑مكلّي‑ف‑يوصّا شّرع. تاحانوت تامژلايت لّي‑غ‑ا‑سكارن تاووري‑نسن ءور‑تگي ابلا زوند يات‑تماتارت ءولا يان‑ومالو ن‑ما‑يلّان غ‑يگنّا. مايان ا‑ف‑يوصّا ربّي موسا لّيغ ءيسكر ف‑ا‑يبنو اخيّام، ييني‑اس: «رار لعاقل ا‑تسكرت كولّو زوند مايلّي‑اك‑مليغ ف‑يگّي ن‑ودرار.» ءيمّا تاووري ن‑ياسوع توگُر تين ءينمغورن‑ان ياضني، غمكلّي يوگُر لعهد لّي‑د‑ييوي ياسوع لعهد‑نسن، اشكو لباراكات لّي‑د‑سرس‑يفكا ربّي ءوگُرنت تين لعهد‑ان اقديم. لعهد اقديم، مراد ءيس‑يكمّل كولّو ما‑يقصاد ربّي، ءيكون ءور‑را‑يسكر يا‑لّعهد لّجديد. والاينّي سيدي ربّي ءيژرا مدّن‑نس ءور‑سّووفين كولّو ما‑گيسن‑يرا. ييني ءيلمّا: «راد‑د‑اشكين‑ووسّان لّي‑غ‑راد‑سكرغ يا‑لّعهد لّجديد د‑مدّن‑ينو ن‑ايت‑ياعقوب د‑ايت‑يودايا. ءور‑را‑يگ زوند لعهد لّي‑سكرغ د‑يمزوورا‑نسن لّيغ‑اسن‑ومژغ افوس سّوفغّ‑تن‑د زغ‑ميصر. اشكو نتني ءور‑سول‑قامان ف‑لعهد‑ان. ف‑مايان ا‑ف‑وورّيغ فلغ‑تن. والاينّي غمكاد ا‑را‑يگ لعهد لّي‑راد‑سكرغ د‑مدّن‑ينو غ‑ووسّان‑ان. را‑ن‑گغ تينباضين‑ينو غ‑يخفاون‑نسن، اراغ‑تنت ف‑وولاون‑نسن. راد‑گغ ربّي‑نسن، گن نتني مدّن‑ينو. ءور‑را‑ييني يان ءي‑گو‑تمازيرت‑نس ءولا ءي‑گو‑تگمّي‑نس ‹ءيخصّا‑ك ا‑تيسّانت سيدي ربّي،› اشكو را‑يّي‑يسّانّ كولّوتن، زغ‑يمژّيين ار ءيمقّورن. را‑فلّاسن‑سّيتّيغ دّنوب‑نسن، ءور‑سار‑راد‑د‑سوانگمغ لخُشانات لّي‑سكرن.» ءيمّا لعهد‑اد، لّيغ‑ت‑يگا ربّي د‑لجديد، ءيبان‑ومزوارو ءيس‑يگا اقديم. اينّا ءيگان اقديم، هاتي ءيمدا. غير ءيميكّ را‑ت‑لاح. لعهد امزوارو، لّانت گيس لوصيّات ف‑مامنك ا‑س‑را‑تعبادن مدّن، ءولا مامنك ا‑س‑راد‑سكرن يان‑ودغار ءيتياوژلاين ءي‑ربّي غ‑دّونيت‑اد. سّغلين غمكان يان‑وخيّام، تيلي گيس يات‑تحانوت، ار‑اس‑تّينين ‹تاحانوت تامژلايت›، لّي‑غ‑تلّا لحسكا ءولا طّبلا لّي‑ف‑ا‑سراسن اغروم غ‑لگدّام ن‑ربّي. غ‑وگَنس ن‑تحانوت‑ان، غ‑تغوردين ن‑تيس سنات لخوامي، ا‑غ‑ن‑تلّا يات‑تحانوت ياضني، ار‑اس‑تّينين ‹تاحانوت ءيتياوقداسن›. تلّا گيس طّبلا ن‑وورغ لّي‑ف‑ا‑تبخّارن، ءولا صّندوق لّعهد لّي‑يدلن س‑وورغ زغ‑كرايگاتّ تاسگا. غ‑صّندوق‑ان ا‑غ‑تلّا يات تاطّاست ن‑وورغ توسي اغروم ن‑‹مانّا›، ءولا اعمود ن‑هارون لّي‑يمغين، ءولا تيلواح ن‑وژرو لّي‑ف‑تيارانت لوصيّات لّعهد. لّان سين ‹كاروبيم› ف‑وفلّا ن‑صّندوق، ار‑سّبايّانّ لمجد ن‑ربّي. دلن نتني س‑يفراون‑نسن ءيلّي‑زغ‑ا‑تيتّين دّنوب ن‑مدّن. ءيمّا تيغاوسيوين‑ان، ءور‑راد‑باهرا‑نساول غيلاد ف‑مامنك اد‑گانت. والاينّي لّيغ كولّو نگادّانت‑تغاوسيوين‑ان، ار‑كشّمن ءينمغورن س‑تحانوت تامزواروت اد‑سكارن تاووري‑نسن. ءيمّا تاحانوت تيس سنات، ءور‑ا‑سرس‑يكشّم يان. غير انمغور ءيهيّان ا‑سرس‑يكشّمن يات‑توال غ‑كرايگاتّ اسگُّاس، ار‑ديدس‑يتاوي ءيدامّن، ار‑تن‑ين‑يسّاكمور ءي‑ربّي ف‑سّيبت ن‑دّنوب‑نس ءولا دّنوب لّي‑سكرن مدّن‑نس بلا سّنّ ءيس‑تن‑سكرن. غمكاد ا‑س‑اغ‑يملا رّوح لقودوس ءيس‑ور‑تا‑يوجاد‑وغاراس لّي‑يتاوين س‑تحانوت ءيتياوقداسن، ماحدّ سول تقاما‑تحانوت تامزواروت ن‑وخيّام. لمعنا‑ياد تملا‑ياغ مامنك اد‑گان ايت‑يودايا سول س‑غاسّاد. ار‑ن‑سّاكمورن تيوافكيو د‑تغرسيو لّي‑ور‑ژضارنين اد‑سّغوسنت ءولاون ن‑ويلّي‑سرسنتي‑تعبادنين. اشكو ءور‑گينت غير تين‑ومشّو د‑تيسّي د‑يسيريدن. تيغاوسيوين‑ان، غير تين دّات اد‑گانت. ءور‑راد‑قامانت غير ار اكود نّا‑يبدّل ربّي كولّو مايان س‑كرا ءيگان لجديد. ءيمّا لماسيح يوشكا‑د ا‑يگ انمغور ءيهيّان لّباراكات لّي‑اغ‑يلّان غيلاد. اخيّام لّي‑غ‑يسكر تاووري‑نس يوف غوالّي‑ستّين‑يكّان، ياگُر‑ت باهرا. ءورد غ‑دّونيت‑اد ا‑غ‑يلّا، ءولا ءيتياوسكار س‑يفاسّن ن‑بنادم. غير يات‑توال ا‑سرس‑يكشم نتّا، ءورد س‑يدامّن ن‑واغاضن ءولا وين ءيموگاين والاينّي س‑يدامّن ن‑دّات‑نس. غمكاد ا‑س‑اغ‑يفرا زغ‑دّنوب‑نّغ س‑وجنجم ءيدومن. نسّن وانّا ءيسكرن كرا ءيحرمن، ار‑تي‑تروشّن ءينمغورن ن‑ايت‑يودايا س‑يدامّن ن‑واغاضن نغد وين ءيموگاين نغد س‑يغد ن‑تگيزت ءيتياوجدارن، باش ا‑تغوس دّات‑نسن زغ‑لحرام. والاينّي ءوگُّار ن‑غمكان ا‑راد‑اغ‑يسّغوس لماسيح س‑يدامّن‑نس. اشكو ءيسرس‑ن ءيخف‑نس لّي‑كولّو‑يصفان غ‑لگدّام ن‑ربّي س‑تحكيمت ن‑رّوح لّي‑يدومن. ءيسّغوس ءولاون‑نّغ زغ‑يسكّيرن مّوتنين باش ا‑نوورّي نگ ءيخدّامن ن‑ربّي لّي‑يدّرن. غمكان ا‑يسكر لماسيح يا‑لّعهد لّجديد غ‑گر ربّي د‑بنادم، ءيشّكشم سرس غويلّي مي‑د‑يغرا ربّي س‑لوورت ءيدومن لّي‑ف‑اسن‑ينّا راد‑اسن‑ييلي. ءيمّوت لماسيح باش ا‑يفرو مدّن زغ‑دّنوب لّي‑سكرن لّيغ سول لّان غ‑لعهد امزوارو. نسّن لوصيت نّا‑يلّان ف‑لوورت ءيس‑ور‑ژضارن اد‑سرس‑سكرن مدّن ارد ءيسّانّ ءيس‑يمّوت غوالّي يوصّان ف‑لوورت. اشكو لوصيت ءور‑تگي يات ماحدّ سول ءيدّر باب لّوصيت. ءور‑را‑سرس‑سكرن مدّن ارد ءيمّت. مايان ا‑ف‑د‑يقّان ءولا لعهد ن‑ربّي امزوارو ا‑يزگا س‑يدامّن لّموت. لّيغ ءيكمّل موسا ءيواليون‑نس لّي‑س‑يوصّا كولّو مدّن‑نس ف‑لوصيّات ن‑شّرع، ياوي ءيدامّن ن‑يموگاين ءولا وين‑واغاضن ءيزايد‑اسن امان، ياسي تيصطّوين ن‑وزوكُّني ياسّ‑تنت س‑تاضوت ءيژگُّاغن، ءيروشّ سرسن ارّا ن‑شّرع ءولا مدّن كولّوتن ييني‑اسن: «ءيدامّن‑اد ا‑يزّگان لعهد لّي‑ف‑كُن‑يوصّا ربّي ا‑سرس‑تسكارم.» ءيزايد ار‑يتروشّ اخيّام س‑يدامّن ءولا كولّو ءيروكوتن لّي‑س‑ا‑گيس‑تعبادن مدّن. غمكان ا‑يگا شّرع، ءيقّان‑د كرايگاتّ كرا‑يلّان ا‑يتغوس س‑وروشّ ن‑يدامّن. ءيدروس ما‑ور‑يتغوسن غمكان. ءيغ‑ور‑فّين ءيدامّن، ءور‑را‑تيتّين دّنوب. غمكان ا‑س‑د‑يقّان ا‑تغوسنت‑تغاوسيوين‑ان، واخّا ءور‑گينت غير امالو ءيرواسن ما‑يلّان غ‑يگنّا. والاينّي ءيقّان‑د تيغاوسيوين ن‑يگنّا اد‑غوسنت س‑كرا ن‑تغرسي يوفن ختين. اشكو لماسيح ءور‑يكشيم س‑تحانوت تامژلايت لّي‑يتياوسكارن س‑يفاسّن ن‑بنادم، تگ غير امالو ن‑تالّي ءيلّان غ‑يگنّا. والاينّي س‑يگنّا ا‑س‑يكشم نتّا، ييلي گيس غيلاد، ءيبيدّ ف‑سّيبت‑نّغ غ‑لگدّام ن‑ربّي. نسّن ءيس‑ا‑يكشّم‑ونمغور ءيهيّان ن‑ايت‑يودايا كرايگاتّ اسگُّاس س‑تحانوت ءيتياوقداسن، ار‑ديدس‑يتاوي ءيدامّن لّي‑ور‑گينين وينس. ءيمّا لماسيح، ءورد كيگان د‑تواليو ا‑يكشم س‑يگنّا ا‑ن‑يسرس ءيخف‑نس. اشكو ءور‑ت‑يد‑يقّان ا‑يمّت كيگان د‑تواليو زغ‑لّيغ تّياوخلاق دّونيت. والاينّي يات‑توال ا‑د‑يوشكا غ‑يسيگُّرا ن‑دّونيت، باش ا‑يمّت ءيسّيتّي دّنوب ف‑بنادم. ءيقّان‑د كولّو مدّن اد‑مّتن يات‑توال، لكمن ءيلمّا لحوكم. غمكان ا‑س‑يفكا لماسيح ءولا نتّا ءيخف‑نس يات‑توال باش ا‑ياسي دّنوب ن‑مدّن گّوتنين. را‑د‑يوورّي تيس سنات‑توال، ءورد باش ا‑ياسي دّنوب والاينّي باش ا‑يجّنجم كولّو وينّا سرس تقلنين رجون‑ين گيس. ءيمّا شّرع ن‑ايت‑يودايا ءيگا غير زوند امالو لّباراكات لّي‑را‑ييلي. ءور‑يژضار ا‑د‑يسّبايّن لباراكات‑ان غمكلّي گانت. اشكو شّرع ءور‑يژضار ا‑يسّغوس س‑وسغوس ءيكمّلن غويلّي‑ن‑بدّا‑سّاكمورنين تيغرسيو ءي‑ربّي اسگُّاس ار اسگُّاس. مراد ءيس‑وورّين غوسن غويلّي تعبادنين غمكان، ءيكون ءور‑سول‑ا‑سّحسّان ءيس‑ا‑گيسن‑تقامان دّنوب ءولا‑دا‑تّيرين ا‑تزايادن ار‑ن‑سّاكمورن تيغرسيو ياضني. والاينّي تيغرسيو‑ان، نتنتي ا‑تن‑د‑يتراران اد‑سوينگيمن غ‑دّنوب‑نسن اسگُّاس ار اسگُّاس، اشكو ءور‑ژضارن ءيدامّن ن‑يموگاين د‑واغاضن اد‑سّيتّين دّنوب. مايان ا‑ف‑ينّا لماسيح غاكود لّيغ را‑د‑ياشك س‑دّونيت: «تيغرسيو د‑توافكيو، ءور‑ا‑تنتي‑تّيريت والاينّي تقصادت گيگي يات‑دّات. لبهايم تياوجدارنين ءولا اتيگ ن‑دّنوب، ءور‑ا‑سرسن‑تّرضوت، والاينّي نّيغ‑اك ‹ها‑يّي ءوشكيغ‑د اد‑سكرغ ما‑تريت ا‑ربّي، غمكلّي فلّا ءيتياران غ‑وارّا‑نّك.› » غمكان ا‑س‑يملا ربّي ءيس‑ور‑ا‑يتّيري تيغرسيو ءولا تيوافكيو ءولا لبهايم تياوجدارنين ءولا اتيگ لّي‑اكّان مدّن ف‑دّنوب‑نسن. ءور‑ا‑سرسن‑يترضو، واخّا دا‑ياس‑تن‑ين‑سّاكمورن مدّن غمكلّي ءيتّيني شّرع. ءيزايد ءيلمّا لماسيح ييني «ها‑يّي ءوشكيغ‑د اد‑سكرغ ما‑تريت.» غمكان ا‑س‑يسّونف كولّو تيغرسيو تيمزوورا باش ا‑يزّگا تيغرسي ياضني. لّيغ ءيسكر ياسوع لماسيح مايلّي گيس ءيرا ربّي، ءيسرس‑ن يات‑توال غ‑لگدّام‑نس تيغرسي لّي‑يگان دّات‑نس. غمكاد ا‑س‑اغ‑يسّغوس نكُّني زغ‑دّنوب‑نّغ. اسّ ف‑واسّ ار‑تبدّادن ءينمغورن ن‑ايت‑يودايا ار‑سكارن تاووري‑نسن، ار‑ن‑سّاكمورن كيگان د‑تغرسيو لّي‑ور‑ژضارنين اد‑سّيتّينت دّنوب. ءيمّا لماسيح، يات‑توال ا‑ن‑يسرس يات‑تغرسي ف‑دّنوب ن‑كولّو تاسوتين، ءيسكيوس ءيلمّا ف‑وفاسي ن‑ربّي ار‑يتقل ارد ءيگ ربّي كولّو ءينوّاشن‑نس غ‑دّو ءيضارن‑نس. اشكو س‑يات‑تغرسي ا‑س‑يسّغوس ءيمژلاين ن‑ربّي س‑وسغوس ءيكمّلن لّي‑ور‑سار‑يتمّين. ءولا رّوح لقودوس ءيفكا‑ياغ توگّا ف‑ماياد ءينّا: «سيدي ربّي ا‑ينّان ‹غمكاد ا‑يگا لعهد لّي‑راد‑ديدسن‑سكرغ غ‑ووسّان‑ان. را‑ن‑اراغ تينباضين‑ينو ف‑وولاون‑نسن، گغ‑تنت غ‑يخفاون‑نسن.› » ءيزايد ءيلمّا ييني: «ءور‑سول‑راد‑د‑كتيغ دّنوب‑نسن ءولا لخُشانات لّي‑سكرن.» غمكاد ا‑س‑يملا ءيس‑فلّانّغ‑يسّيتّي لماسيح كولّو دّنوب لّي‑نسكر. ءور‑اغ‑سول‑يخصّا ا‑ن‑نسّاكمور كرا ن‑تغرسيو ياضني. ف‑مايان ا‑ف‑راد‑اون‑ينيغ اي‑ايتما، نژضار ا‑نكشم غيلاد س‑زّعامت س‑‹تحانوت ءيتياوقداسن› ف‑سّيبت ن‑يدامّن ن‑ياسوع. اشكو س‑لموت‑نس ا‑س‑اغ‑يجّوجاد يان‑وغاراس لّجديد لّي‑يتاوين س‑تودرت، ا‑سرس‑نزري زغ‑لخاميا س‑وگُنس. لّيغ‑اغ‑يلّا يان‑ونمغور ءيهيّان لّي‑يتگابالن مدّن ن‑ربّي، ءيلّا فلّانّغ ا‑ن‑ناكمور س‑ربّي س‑نّييت ءيكمّلن، نامن راد‑اغ‑يقبل، نغوس زغ‑كولّو دّنوب لّي‑س‑ا‑يسّحسّا‑وول ن‑بنادم، تارود ءولا دّات‑نّغ س‑وامان غوسنين. ءيلّا فلّانّغ ا‑نامژ غ‑رّجا لّي‑س‑نومن بلا‑ياس‑نرژم، اشكو ربّي لّي‑يفكان اوال‑نس راد‑بدّا‑گيس‑يزگا. ءيلّا فلّانّغ ا‑ستّ‑نتاوي غ‑ينگراتنّغ باش ا‑نتمعاوان ا‑نيسّان مامنك ا‑نتحنّو ار‑نسكار كولّو ما‑يفولكين. ا‑ور‑نسّيكّي ف‑ومناگّار ن‑ينگراتنّغ غمكلّي سكارن كرا ن‑مدّن، والاينّي ا‑نزّعام ءي‑نگراتنّغ، غيلاد س‑وگُّار اشكو ار‑تّمنادم ءيس‑ا‑د‑يتاكمور‑واسّ لّي‑غ‑را‑د‑ياشك سيديتنّغ. والاينّي ءيغ‑ننكر ار‑نسكار دّنوب تيگيرا ن‑ما‑نسّن لحقّ، ءور‑را‑سول‑دارنّغ‑تيلي كرا ن‑تغرسي ما‑فلّانّغ‑يسّيتّين دّنوب. هان س‑تكساض گّوتنين ا‑س‑راد‑اغ‑د‑يقّان ا‑نتقل س‑لحوكم ن‑ربّي ءولا لعافيت ءيتجهّدن لّي‑س‑را‑يهلك كولّو ويلّي فّوغنين زغ‑واوال‑نس. نسّن ءيس‑ور‑يرحيم ربّي يان ءيرورن تيغوردين‑نس س‑شّرع ن‑موسا، اشكو ءيقّان‑ت‑يد ا‑يمّت ف‑توگّا ن‑سين نغد كراض ءيناگان. والاينّي ءوگُّار لّعقوبيت‑ان ا‑را‑ييلي ءي‑وانّا يوضّرن يوس ن‑ربّي س‑يضارن‑نس، ءيحگر ءيدامّن لّعهد لّي‑ت‑يسّغوسن، ءيرگم رّوح ن‑رّحمت. اشكو نسّن ءيزد ربّي ا‑ينّان: «نكّي ا‑راد‑اسن‑يرار ف‑ماد‑سكرن، فكغ‑اسن ماد‑اسن‑يگان.» ييني‑داغ: «ربّي سيديتون را‑يوت لحوكم ف‑مدّن‑نس.» هان تيكساض ءيگّوتن ا‑را‑ييلي ءي‑وانّا ءيضرن غ‑وفوس ن‑ربّي لّي‑يدّرن. سوانگماد‑د ءوسّان ءيمزوورا لّي‑غ‑توورّيم تسفاوم س‑تيفاوت لّماسيح، تصبرم تزگام غاكود لّيغ ا‑تكّاتم تامّارا ءيشقان. كرا ن‑يزماز ار‑فلّاون‑زراينت‑ترگّام د‑ترفوفنت غ‑لگدّام ن‑مدّن. ءيزماز ياضني ار‑تبدّادم د‑ويلّي‑ف‑ا‑زراينت. ار‑تّعاوانم ايتماتون لّي‑ن‑لّانين غ‑لحبس، تصبرم د‑ويلّي‑اون‑كّيسنين ايدا‑نّون، تفرحم اشكو تسّنم ءيس‑تطّافم كرا يوفن مايان، ا‑ت‑يگان د‑وايدا ءيدومن. ءيمّا غيلاد، ا‑ور‑دي‑توورّيم ف‑زّعامت‑ان گيگون ءيلّان، اشكو راد‑اون‑گيس‑تيلي لباراكا ءيگّوتن. ءيخصّا‑كُن ا‑تصبرم ارد تكمّلم كولّو ما‑گيگون‑يرا ربّي، تكشمّ تيگيرا س‑مايلّي‑س‑اون‑ينّا راد‑اون‑ييلي. اشكو ءينّا: «يان ءيميكّ را‑د‑يروح غوالّي را‑د‑ياشك، ءور‑را‑ن‑يماطل. وانّا يومنّ، نتّان ا‑ف‑راد‑رضوغ فكغ‑اس تودرت. والاينّي ءيغ‑يوورّي تيغوردين ءور‑راد‑اس‑ييلي رّضا‑نو.» ءيمّا نكُّني ءور‑نگي زغ‑ويلّي وورّينين تيغوردين تياوهلاكن، هاتي نگا زغ‑ويلّي ءومنّين نجمن. يان يومنّ اوال ن‑ربّي، هاتي ءيسّن راد‑اس‑ييلي مايلّي‑ن‑يترجو. ءور‑ا‑يتشكّو غ‑مايلّي ءور‑يژري. مايان ا‑س‑يرضا ربّي ف‑يمزوورا‑نّغ لّي‑زرينين. ءولا نكُّني، ف‑سّيبت ن‑ما‑نومن اوال ن‑ربّي ا‑ف‑نسّن ءيزد نتّان ا‑يخلقن كولّو ما‑يلّان س‑واوال‑نس، ءيسكر كولّو ما‑نتمناد زغ‑ما‑ور‑يتياوژرّان. ءولا هابيل، ف‑سّيبت ن‑ما‑يومن اوال ن‑ربّي ا‑ف‑ن‑يسرس غ‑لگدّام ن‑ربّي يات‑توافكا لّي‑يوفن تين گماس قاين. ءيمل‑اس ربّي ءيس‑فلّاس‑يرضا ف‑سّيبت لّيمان‑نس، ءيقبل مايلّي‑اس‑يفكا. ار‑يساوال هابيل سول س‑غيلاد واخّا ءيمّوت، اشكو يومن ربّي. ءولا اخنوخ، ف‑سّيبت ن‑ما‑يومن اوال ن‑ربّي ا‑ف‑يتيالال س‑يگنّا ءور‑يمّوت. ءور‑ژضارن مدّن ا‑ت‑افن اشكو ربّي ءيسّيتّي‑ت زغ‑دّونيت. لّيغ ءور‑تا‑يتيالال، ءيملا‑ياس ربّي ءيس‑فلّاس‑يرضا. والاينّي يان ءور‑يومينّ ربّي، ءور‑را‑ييژضار ا‑يامژ رّضا‑نس. اشكو وانّا ءيران ا‑ن‑ياكمور س‑ربّي، ءيقّان‑ت‑يد ا‑يامن ءيس‑يلّا ربّي، يوجاد ا‑يبارك وانّا‑ت‑يسيگّيلن. ءولا نوح، ف‑سّيبت ن‑ما‑يومن اوال ن‑ربّي ا‑ف‑تّ‑ييوي باهرا غ‑مايلّي‑اس‑ينّا ربّي ف‑كرا ن‑تغاوسيوين لّي‑ور‑تا‑يژري. ءينكر ءيبنو يان‑واناو، ءينجم گيس نتّا د‑ايت‑تگمّي‑نس. ءيفل دّونيت ا‑تّياوهلاك، ءيمّا نتّا ءيگا‑ت ربّي د‑واد ف‑يرضا ف‑سّيبت ن‑ما‑ت‑يومن. ءولا ءيبراهيم، ف‑سّيبت ن‑ما‑يومن اوال ن‑ربّي ا‑ف‑يسكر س‑مايلّي‑اس‑ينّا لّيغ‑اس‑يغرا ا‑يفّوغ س‑تمازيرت لّي‑را‑يگ تينس. ءينكر ءيفّوغ واخّا ءور‑يسّين مانيس ا‑يتّيدو. ف‑سّيبت ن‑ما‑يومن ربّي ا‑ف‑يسكر تاكات غ‑تمازيرت لّي‑راد‑اس‑يفك ربّي، ءيگ اغريب غ‑وامّاس ن‑ايت‑تمازيرت‑ان. ءيزدغ غ‑يخيّامن، نتّان ءولا ءيسحاق ءولا ياعقوب لّي‑راد‑كولّو‑ديدس‑يطّاف مايلّي‑س‑اس‑ينّا ربّي راد‑اس‑ت‑يفك. اشكو ار‑ن‑يترجو غ‑تمدينت ياضني، ا‑ستّ‑يگان د‑تالّي ءيسكر ربّي ءيبنو‑تّ ف‑لّساس ءيدومن. ف‑سّيبت ن‑ما‑يومن ربّي ا‑ف‑يورو غ‑تيزي لّي‑غ‑ور‑ا‑يتارو يان، ءولا تژضار‑تمغارت‑نس سارا ا‑تربّو. يوورّي ءيگا باباس ن‑يان‑وارّاو، اشكو يومن ءيس‑يزگا ربّي غ‑واوال‑نس. غمكاد ا‑س‑توورّي تاسوت ن‑يان‑ورگاز لّي‑يسّورفن تيزي ن‑تودرت، تگّوت زوند ءيتران ن‑يگنوان نغد املال ن‑تاما ن‑ومدا. كولّو مدّن‑ان ءومنّ اوال ن‑ربّي ايلّيغ مّوتن، ءور‑تا‑ومژن مايلّي‑س‑اسن‑ينّا راد‑اسن‑ت‑يفك. والاينّي ژران‑ت‑ين غ‑توگّوگت فرحن سرس، ءور‑ا‑تحشامن ا‑تّينين ءيزد ءيبرّانيين د‑يغريبن اد‑گان غ‑دّونيت. كولّو وينّا ءيتّينين غمكان، ءيبان گيسن ءيس‑ا‑تّيرين يات‑تمازيرت ياضني ا‑تگ تينسن. اشكو مراد ءيس‑ا‑سوينگيمن غ‑تمازيرت ن‑دّونيت‑اد لّي‑زغ‑د‑وشكان، ءيكون ژضارن ا‑سرس‑وورّين. والاينّي ار‑تّيرين يات‑تمازيرت لّي‑يوفن ختاد، ا‑ستّ‑يگان د‑تين‑يگنّا. ءور‑تُگراژ ربّي لّيغ ا‑تّينين ءيس‑يگا ربّي‑نسن، اشكو ءيجّوجاد‑اسن يات‑تمدينت. ءيبراهيم، ف‑سّيبت ن‑ما‑يومن اوال ن‑ربّي ا‑ف‑ن‑يسرس ءيسحاق ف‑يگّي ن‑وكركور لّيغ‑ت‑يورم ربّي. يوجاد ا‑يغرس ءي‑يوس لّي‑دارس‑يگان يان واخّا‑ياس‑ينّا ربّي س‑واوال‑نس ءيزگان: «زغ‑تاروا ن‑يوك ءيسحاق ا‑زغ‑را‑تيلي تاسوت‑نّك.» والاينّي يومن ءيبراهيم ءيس‑يژضار ربّي ا‑د‑يسّنكر ءولا يان ءيمّوتن. ءيسكر‑نّيت ربّي زوند مايان، ءيرار‑اس‑د ءيسحاق زغ‑لموت. ءولا ءيسحاق ف‑سّيبت ن‑ما‑يومن اوال ن‑ربّي ا‑ف‑ينّا ءي‑ياعقوب د‑عيسو ف‑لباراكات لّي‑راد‑اسن‑ييلي. ءولا ياعقوب لّيغ علاين ا‑يمّت، ف‑سّيبت ن‑ما‑يومن اوال ن‑ربّي ا‑ف‑ينّا ءي‑سين تاروا ن‑يوسف ف‑لباراكات لّي‑راد‑اسن‑ييلي، ءيكنو ف‑يخف ن‑وعكّاز‑نس يالغ ربّي. ءولا يوسف لّيغ ا‑د‑يتاكمور ا‑يمّت، ف‑سّيبت ن‑ما‑يومن اوال ن‑ربّي ا‑ف‑يساول ف‑وفّوغ لّي‑س‑راد‑فّوغن ايت‑ربّي زغ‑ميصر، يوصّا‑تن ءيلمّا ف‑يخسان‑نس. ءولا باباس ن‑موسا د‑ينّاس، ف‑سّيبت ن‑ماد‑ومنّ اوال ن‑ربّي ا‑ف‑ت‑حضان كراض‑ييرن تيغوردين ن‑تلاليت‑نس، اشكو ژران ءيس‑يگا ارّاو ءيفولكين، د‑نتني ءور‑كسوضن لامر ن‑وگلّيد. ءولا موسا لّيغ‑د‑يمقّور، ف‑سّيبت ن‑ما‑يومن اوال ن‑ربّي ا‑ف‑ور‑يري اد‑اس‑تّينين مدّن «يوس ن‑يلّيس ن‑فيرعاون.» يوف دارس ا‑يتمونو د‑ايت‑ربّي غ‑ترفوفنت، ءولا‑دا‑يتفجّيج غ‑دّنوب يات تاساعت ءيدروسن. ءيحاسب نتّا تادالّيت لّي‑غ‑يلّا ف‑سّيبت لّماسيح ءيس‑تعزّا ءوگُّار ن‑تميخار ن‑ميصر، اشكو ار‑ن‑يترجو غ‑لباراكا لّي‑را‑ييلي تيگيرا. ف‑سّيبت ن‑ما‑يومن اوال ن‑ربّي ا‑ف‑يفّوغ زغ‑ميصر، ءور‑يكسوض لغاضاب ن‑وگلّيد. ءيزگا نتّا غ‑مايلّي ءيقصاد زوند ءيغ‑ا‑يژرّا ربّي لّي‑ور‑جّو‑يژري يان. ف‑سّيبت ن‑ما‑يومن ربّي ا‑ف‑يوصّا ايت‑ربّي ف‑واسّ ن‑وسورف، ييني‑اسن اد‑تروشّن تيگُمّا‑نسن س‑يدامّن، باش ا‑ور‑ينغ لمالاك لّموت ءيويتسن ءيخفدّي زوند ءيخفدّيتن ن‑ايت‑ميصر. ءولا مدّن‑ان، ف‑سّيبت ن‑ماد‑ومنّ اوال ن‑ربّي ا‑ف‑زرين زغ‑وامّاس ن‑ومدا ءيژگُّاغن زوند ءيغ‑زرين ف‑واكال. لّيغ ران ايت‑ميصر اد‑سكرن زوند نتني، سّخسين‑تن‑كولّو‑وامان. ف‑سّيبت ن‑ماد‑ومنّ مدّن اوال ن‑ربّي ا‑ف‑اسن‑د‑ضرن ءيغوربان ن‑تمدينت ن‑اريحا تيگيرا ن‑ماد‑اس‑تلولّين سّا‑ووسّان. ءولا تامگّانت راحاب، ف‑سّيبت ن‑ما‑تومن ا‑ف‑تعاون ءيمازانّ، ءور‑تمّوت تيگيرا د‑ويلّي ءور‑رينين ربّي. ما‑راد‑اون‑سول‑ينيغ؟ ءور‑تومي لوقت ما‑غ‑ا‑ياون‑ين‑سول‑ادّرغ ما‑يسكر جيدعون ءولا باراق ءولا شامشون ءولا ءيفتاح ءولا داود ءولا صامويل ءولا لانبيا. نتني، ف‑سّيبت ن‑ماد‑ومنّ اوال ن‑ربّي ا‑ف‑نران تيگلداي، زّگان لحقّ، امژن ما‑ف‑اسن‑ينّا ربّي، قّنّ ءيماون ن‑يزماون، سّخسين لعافيت ءيسّديدّين، نجمن زغ‑تاژّيت ءينقّان، وورّين دوسن غ‑ضّعف‑نسن، تجهّدن غ‑يميغ، نرون ءيعسكرين ن‑يبرّانيين. ءولا كرا ن‑تمغارين، نكرن‑اسند‑د غويلّي‑اسنت‑مّوتنين. ءيمّا وييّاض اگُين انورژم، صبرن د‑ويلّي‑تن‑كّاتنين ار لموت، باش اد‑د‑نكرن س‑تودرت لّي‑يوفن تودرت ن‑دّونيت‑اد. كرا گيسن، رگمن‑ت. كرا گيسن، سّغورشن‑ت. كرا گيسن، كرفن‑ت س‑سّناسل لوحن‑ت‑ين غ‑لحبس. ءوتن‑تن س‑يژران، بّين‑تن س‑لمناشر، غرسن‑اسن س‑تاژّيت. ار‑تلولّين ار‑لسّان ءيلماون ن‑وولّي د‑واغاضن. ژلضن، زايدن‑د تارفوفنت ءي‑تمّارا. وان غويد، ءور‑تن‑تستهلّا دّونيت. ار‑تكّان لخلا د‑يدرارن، ار‑نسّان غ‑يفران د‑يگُضيان غ‑دّو‑واكال. كولّو مدّن‑ان، ءيرضا فلّاسن ربّي ف‑سّيبت ن‑ماد‑ومنّ اوال‑نس، والاينّي ءور‑ومژن مايلّي‑س‑اسن‑ينّا راد‑اسن‑ت‑يفك. اشكو ءيقصاد ربّي كرا يوفن مايان. ييري اد‑ديدنّغ‑كشمن س‑لباراكا لّي‑راد‑اغ‑ييلي، ءيسّافو‑اسن غمكان كولّو مايلّي‑س‑اسن‑ينّا. ءيمّا غيلاد غ‑اغ‑تلولّي‑تمدلوت‑اد ن‑يناگان، ءيلّا فلّانّغ ا‑نلوح كولّو ماد‑اغ‑يژّوژّاين، نفل دّنوب لّي‑بدّا‑تّيرينين اد‑اغ‑سّموكروسن، باش ا‑نتازّال بلا‑دا‑نترماي غ‑وغاراس لّي‑يرژمن غ‑لگدّام‑نّغ. ءيلّا فلّانّغ ا‑ن‑نتمناد غ‑ياسوع لّي‑اغ‑يسكرن اغاراس‑اد س‑نومن، راد‑اغ‑گيس‑ياوي ار تّمي. ءيصبر نتّان ءي‑لموت ف‑وگّجدي، ءور‑تّ‑ييوي غ‑تدالّيت، اشكو ءيژرا‑ن لفرح لّي‑راد‑اس‑ييلي تيگيرا. ءيسكيوس ءيلمّا ف‑وفاسي لّعرش ن‑ربّي. سوانگماد‑د ياسوع لّي‑يصبرن ءي‑تنوّاشت ءيگّوتن ف‑يفاسّن ن‑مدّن أُخشنّين، باش ا‑ور‑يرمي‑وول‑نّون ءيهروصّي. اشكو غ‑يميغ‑اد غ‑ا‑تّمّاغم د‑لخُشانت، ءور‑تا‑گيس‑تلكيمّ تيزي لّموت. ءيس‑تتّوم اوال لّي‑س‑كُن‑يزّعام ربّي لّيغ‑كُن‑يگا د‑تاروا‑نس؟ ييني: «وا‑يوي، ءيغ‑ك‑يصلح سيدي ربّي، اد‑ور‑تينيت د‑يخف‑نّك ‹غاياد ءور‑يگي يات.› نغد ءيغ‑ك‑يژي، اد‑ور‑تينيت ‹نكّي ءور‑گيغ يات.› اشكو سيدي ربّي ار‑يتربّا وانّا دارس ءيعزّان، ار‑يسّروات وانّا ءيگا د‑يوس.» ءيلّا فلّاون ا‑تصبرم ءيغ‑ا‑كُن‑يتربّا، اشكو ار‑ديدون‑يسكار غمكلّي ءيسكار‑ورگاز د‑تاروا‑نس. ءيس‑يلّا ما‑ور‑يتّربّان ف‑وفوس ن‑باباس؟ مراد ءيس‑ا‑كُن‑ور‑يتربّا ربّي غمكلّي تّربّان كولّو مدّن، ءور‑را‑تگم تاروا‑نس، والاينّي زوند تاروا ن‑تسوكت ا‑را‑تگم. نكُّني كولّواغ دارنّغ ءيد‑باباتنّغ ن‑دّونيت‑اد، ار‑اغ‑تربّان ار‑تن‑نتوقّار، والاينّي ءيس‑ور‑يوف ا‑نسفليد ءولا س‑باباتنّغ ن‑يگنّا باش ا‑ندّر؟ يات لوقت ءيدروسن اد‑اغ‑تربّان نتني س‑مكلّي‑اسن‑يبان ءيشوا، ءيمّا ربّي ار‑اغ‑يتربّا س‑مكلّي راد‑اغ‑يصلح باش ا‑نفولكي غمكلّي ءيفولكي نتّا. ءور‑يلّي ما‑يتفراحن غاكود لّيغ ا‑ت‑يتربّا باباس. ار‑اس‑تطيّار غ‑تاساعت‑ان، والاينّي راد‑اس‑تيلي لغلّت ن‑وفولكي د‑لهنا تيگيرا ءي‑وانّا ءيتّربّان غمكاد. ف‑مايان ا‑ف‑راد‑اون‑ينيغ، الّات ءيفاسّن‑نّون الوانين، تزّگام ءيفادّن‑نّون تغاشانين. سّنگادّات تيغاراسين ءي‑يضارن‑نّون، ا‑ور‑يضر يان ءيسّبيضيرن والاينّي ا‑يجّي. گات‑ن تيقّي‑نّون ا‑تگم سّلامت ءي‑كولّو مدّن، تعمّرم س‑وفولكي اشكو يان غ‑ور‑يلّي ءور‑سار‑را‑يژر سيديتنّغ. اويات‑ستّ غ‑يخفاون‑نّون ا‑ور‑يجلو يان گيگون زغ‑لباراكا ن‑ربّي، ءولا ءيمغي‑د‑وامود ن‑واسمّوم غ‑گراتون، ارد ءيسّدووي مدّن ءيسّهرش ما‑يگّوتن. ا‑ور‑ييلي يان گيگون ءيتفسادن، ءولا يان ءيتراران تيغوردين‑نس س‑ربّي زوند عيسو لّي‑يگان ءيخفدّي ءيزّنز لحقّ‑نس ف‑يات تيرمت. تسّنم ءيس‑يوورّي تيگيرا ءيرا باهرا ا‑يوورت لباراكا ن‑باباس، والاينّي باباس ءور‑اس‑تّ‑يفكي. واخّا‑ياس‑تّ‑يضالب باهرا س‑يمطّاون، ءور‑اس‑يسوگير يات. ءور‑ن‑تاكمورم كونّي س‑كرا ن‑ودرار ن‑دّونيت‑اد غمكلّي‑ن‑اكمورن ءيمزوورا‑نّون، ار‑ن‑گيس‑سّموقّولن تيمزليوين لّعافيت د‑تيلّاس د‑ومالو د‑يگّيگ. ءولا تسفلدم كونّي ءي‑تيجّيجت ن‑نّفّار ءولا اوال لّي‑يتبرّاحن. نتني، لّيغ سفلدن ءي‑واوال‑ان، ضالبن‑ت باهرا اد‑اسن‑ور‑سول‑يساول، اشكو گُّدن ف‑لوصيت ن‑ربّي لّي‑س‑اسن‑ينّا: «وانّا‑د‑يروحن ادرار‑اد، ءيگ‑ييت لبهيمت نغد بنادم، ءيقّان‑د ا‑تي‑تكّاتم س‑يژران ارد ءيمّت.» ءولا موسا ءيكسوض باهرا زغ‑كولّو مايلّي‑ن‑يژرا ييني: «ار‑سري‑تكّات تاودا.» والاينّي تاكمورم‑د كونّي س‑ودرار ياضني، ا‑ت‑يگان د‑وروشاليم ن‑يگنّا، ءيگ تامدينت ن‑ربّي لّي‑يدّرن. تاكمورم‑د س‑كيگان د‑وافضان لّمالايكا مونّ‑د كولّو س‑لفرح ءيگّوتن، ءولا س‑ومناگّار ن‑ويلّي ءيگا ربّي د‑تاروا‑نس ءيخفدّيتن لّي‑مي‑تياران ءيسماون‑نسن غ‑يگنّا. تاكمورم‑د س‑ربّي لّي‑يتحكامن ف‑كولّو مدّن، ءولا س‑لارواح ن‑مدّن لّي‑ف‑يرضا ءيسّافو‑اسن كولّو ماد‑اسن‑ينّا. تاكمورم‑د س‑ياسوع لّي‑يسكرن لعهد لّجديد غ‑گر ربّي د‑بنادم، ءولا س‑وروشّ ن‑يدامّن‑نس لّي‑يفكان رّجا ءوگُّار ن‑يدامّن ن‑هابيل. اويات‑ستّ باهرا غ‑غوالّي سرون ءيساوالن. اشكو لهالاك ا‑يضرن ف‑ويلّي اگُينين اد‑سفليدن س‑موسا لّي‑تن‑يومرن غ‑دّونيت‑اد، والاينّي ءوگُّار ن‑غايان ا‑راد‑اغ‑ييلي نكُّني ءيغ‑نرور تيغوردين‑نّغ س‑والّي‑اغ‑د‑يومرن زغ‑يگنّا. لّيغ ءيساول ربّي غ‑ووسّان‑ان، ءيمّوسّا‑واكال س‑واوال‑نس. ءيمّا غيلاد ءينّا‑ياغ ف‑ما‑را‑يسكر: «راد‑داغ‑سّماسّغ اكال، سّماسّغ ءولا ءيگنوان.» س‑واوال‑ان ا‑س‑اغ‑يملا ءيس‑را‑يمّاسّ كولّو ما‑يتياوخلاقن، ءيتياتّاي باش ا‑ور‑يقاما غير ما‑يطّافن لّساس ءيزگان. ءيمّا غيلاد غ‑اغ‑يفكا ربّي يات‑تگلديت لّي‑ور‑سار‑را‑يمّاسّ، ءيلّا فلّانّغ ا‑ت‑نتشكار ار‑ت‑نتعباد غمكلّي‑زگينّغ‑يرا، ار‑ت‑نتوقّار ار‑تّ‑نتاوي باهرا غ‑ما‑س‑ا‑ت‑نترضو. اشكو ربّي‑نّغ ءيرواس ءي‑لعافيت ءيفنّون. زايدات ار‑بدّا‑تّحوبّوم ءي‑نگراتون غمكلّي تمحوبّون ايتماتن. ا‑ور‑تتّوم ا‑تسّمرحبام س‑يغريبن، اشكو غايد ءيزرين سّمرحبان كرا ن‑مدّن س‑لمالايكا، ءور‑سّينّ ءيزد لمالايكا اد‑گان. سوينگيمات غ‑ايتماتون لّي‑ن‑لّانين غ‑لحبس زوند ءيغ‑ن‑ديدسن‑تلّام، ار‑تسوينگيمّ غ‑غويلّي ترفوفونّين زوند ءيغ‑ا‑ديدسن‑تّرفوفونم. ءيلّا ف‑كود يان ا‑يگ ليتّيهال د‑تغاوسا ءيفولكين ءيهيّان، ءولا‑دا‑يشّكشام يان ما‑يهرشن س‑تيسي‑نسن. اشكو ربّي را‑يوت لحوكم ف‑وانّا ءيفسادن ءولا وانّا ءيزنان. زريات تودرت‑نّون بلا‑دا‑تّحوبّوم ءيقاريدن، تقنعوم س‑ونشك نّا‑دارون‑يلّان. اشكو ءينّا ربّي: «ءور‑سار‑ك‑ين‑فلغ ءولا وورّيغ‑د فلّاك.» مايان اد‑اغ‑يزّعامن ا‑نتّيني: «سيدي ربّي ا‑يگان اعوين‑ينو. ءور‑كسوضغ يات. ما‑راد‑يّي‑يسكر بنادم؟» سوينگيماد‑د ءيمغارن لّي‑اون‑ين‑سّلكمنين اوال ن‑ربّي، ار‑دي‑تسوينگيمّ لفايتّ ن‑تودرت‑نسن، تامنم اوال ن‑ربّي غمكلّي ءومنّ نتني. ءيمّا ياسوع لماسيح، غمكلّي ءيگا ا‑راد‑بدّا‑يگ، زوند ءيضگام زوند غاسّ زوند كولّو ما‑د‑يفتان. ا‑ور‑تادجم كرا ن‑يلمّودن ءيغريبن ا‑كُن‑جلّون زغ‑وغاراس لّحقّ. را‑يشوو ا‑تسّدوسم ءولاون‑نّون س‑لباراكا ن‑ربّي، ءورد س‑تنباضين ن‑ومشّو لّي‑غ‑ور‑تلّي كرا لّفايتّ ءي‑ويلّي سرسنت سكارنين. ءور‑ژضارن غويلّي سكارنين تاووري ن‑وخيّام ن‑ربّي اد‑شّن زغ‑تغرسي لّي‑دارنّغ‑يلّان. انمغور‑نسن ءيهيّان ار‑يتاوي ءيدامّن لّبهايم س‑تحانوت تامژلايت باش ا‑غين‑يسّيتّي دّنوب ف‑مدّن‑نس. ءيمّا تيفيّي د‑يخسان ن‑تغرسيو‑ان ار‑تن‑جدّرن مدّن غ‑برّا ن‑ودغار لّي‑غ‑بنان ءيخيّامن‑نسن. مايان ا‑ف‑يمّوت ءولا ياسوع غ‑برّا ن‑تمدينت باش ا‑يسّغوس مدّن س‑يدامّن‑نس. ءيمّا غيلاد ءيلّا فلّانّغ ا‑دارس‑نفّوغ س‑برّا ن‑يخيّامن ا‑ن‑ديدس‑نيلي غ‑ترگّام لّي‑س‑ت‑رگمن. اشكو ءور‑دارنّغ كرا ن‑تمدينت ءيدومن غ‑دّونيت‑اد، والاينّي ار‑ن‑نترجو تامدينت لّي‑راد‑اغ‑ييلي غ‑مايد‑د‑يفتان. ءيمّا غيلاد ءيلّا فلّانّغ ا‑ن‑بدّا‑نسّاكمور ءي‑ربّي تاوافكا ن‑شّوكر ف‑وودم ن‑ياسوع، ا‑ستّ‑يگان د‑لغلّت ن‑ينفورن‑نّغ لّي‑س‑ا‑نتوقّار ءيسم‑نس. ا‑ور‑تتّوم ا‑تسكارم افولكي ار‑تمعاوانم ءي‑نگراتون، اشكو وان تيوافكيو‑ان ا‑س‑ا‑يترضو ربّي. سفليدات س‑يمغارن‑نّون ار‑تسكارم س‑واوال‑نسن، اشكو ار‑بدّا‑سرون‑تراران لعاقل. ءيقّان‑تن‑د اد‑فلّاون‑فكن لحساب ءي‑ربّي. سكارات س‑واوال‑نسن باش اد‑فرحن س‑تووري‑نسن، ءورد ا‑تن‑فلّاس‑تيگُراژ. اشكو ءيغ‑تن‑تژّيگُراژم ءور‑راد‑اون‑تيلي لفايتّ. ژّالّات ار‑تّضالابم ربّي ف‑سّيبت‑نّغ نكُّني. نسّن ءيس‑يغوس‑وول‑نّغ، نيري ا‑نسكار افولكي غ‑كولّو ما‑نتناوال. غمكاد ا‑س‑كُن‑وصّاغ س‑لمعقول ا‑تضالبم ربّي فلّا باش ا‑يّي‑ن‑يسّوورّي س‑دارون غ‑مايد‑د‑ياكمورن. ءيمّا غيلاد، ضالبغ ءي‑ربّي ن‑سّلامت لّي‑د‑يسّنكرن زغ‑لموت امكسا ءيمقّورن سيديتنّغ ياسوع لّي‑يتگابالن ءولّي‑نس، ءيسكر لعهد‑اد ءيدومن غ‑گراتنّغ د‑ربّي س‑يدامّن‑نس. ضالبغ‑اس اد‑اون‑ياكّا كولّو ما‑يگان افولكي، باش ا‑تسكارم ما‑يتّيري. ضالبغ‑اس ا‑گينّغ‑يسكر كولّو ما‑ت‑يترضون س‑يسم ن‑ياسوع لماسيح. نتّان ا‑باهرا‑نتالغ غيلاد ءولا كولّو مايد‑د‑يفتان. امين. واي‑ايتما، ريغ اد‑اون‑ضالبغ ا‑تقبلم ءيواليون‑اد لّي‑س‑كُن‑وصّاغ، اشكو ءور‑باهرا‑تغزّيف‑تبرات‑اد. ءيمّا غيلاد ريغ ا‑تيسّانم ءيس‑د‑يفّوغ گماتنّغ تيموتاوس زغ‑لحبس. ءيغ‑د‑داري‑يوشكا غ‑مايد‑د‑ياكمورن، را‑ن‑ديدي‑يمون س‑دارون ا‑كُن‑نژر. سلّمات‑ن ف‑يمغارن‑نّون كولّوتن ءولا ف‑كولّو ءيمژلاين ن‑ربّي. ار‑ن‑فلّاون‑تسلّامن ايتماتن ن‑يطاليا. اد‑اون‑تيلي لباراكا ن‑ربّي كولّوكن. زغ‑ياعقوب اخدّام ن‑ربّي د‑سيديتنّغ ياسوع لماسيح، ءي‑ايت‑ربّي لّي‑اكوتنين غ‑دّونيت كولّوتّ. اد‑اون‑تيلي سّلامت. فرحات باهرا اي‑ايتما غاكود نّا‑تّيارامّ س‑تنوكموت نّا‑يلّان، اشكو تسّنم ءيغ‑تزريم غ‑تنوكموت سول‑تزگام غ‑وغاراس لّماسيح، را‑كُن‑يسّدوس مايان باش ا‑تيژضارم ا‑تّصبارم س‑وگُّار. ءيمّا غيلاد، زايدات تصبرم ارد تلكمّ تّمي باش ا‑تيمغورم تكمّلم بلا‑كُن‑يخصّا يات. والاينّي ءيغ‑يلّا كرا گيگون ءور‑يطّاف تاحكيمت، ءيلّا فلّاس ا‑يضالب ربّي لّي‑ياكّان ما‑يگّوتن ءي‑كولّو مدّن بلا‑دا‑تي‑تيگُراژ، راد‑اس‑تّ‑يفك. والاينّي ءيغ‑يضالب، ءيقّان‑ت‑يد ا‑يامن بلا ءيشكّا. اشكو يان ءيشكّان ءيگا زوند تاضانگت ن‑ومدا، ار‑تّ‑يسّموسّو‑واضو ار‑تّ‑يتاوي س‑تسگا‑يا د‑ختا. وانّا ءيگان غمكان، ا‑ور‑يغال ءيس‑را‑يامژ كرا زغ‑سيديتنّغ، اشكو ار‑ن‑يتافا ءيخف‑نس غ‑گر سنات‑تنباضين، ءور‑ا‑يتزگا غ‑كولّو ما‑را‑يسكر. واي‑ايتما، وانّا گيگون دار ءيدروس لخير، ءيلّا فلّاس ا‑يفرح ءيغ‑ت‑يولّ ربّي. ءيمّا وانّا گيگون دار ءيگّوت، ءيلّا فلّاس ا‑يفرح ءيغ‑ت‑يزّوگز ربّي. اشكو را‑يزري بو‑وايدا زوند اجدّيگ ن‑توگا، ار‑دي‑تاقلاي تافوكت س‑ترغي‑نس ءيحرّان، تجدر توگا ءيضر‑وجدّيگ‑نس لاح افولكي‑نس. غمكان ا‑س‑راد‑لاح بو‑وايدا لّيغ ا‑سول‑يتسالا تاووري‑نس. امباركي ا‑يگا وانّا ءيصبرن ءيزگان غ‑تاساعت ن‑تنوكموت. اشكو لّيغ ءيتيارام سول‑يزگا، راد‑اس‑ييلي تّاج ن‑تودرت ءيدومن لّي‑ف‑ينّا ربّي را‑ت‑يفك ءي‑ويلّي رانين ربّي. والاينّي ءيغ‑يتيارام كرا ن‑يان، اد‑ور‑ييني «ربّي ايد‑يّي‑يتارمن،» اشكو ربّي ءور‑ا‑يسكار ما‑يُخشنّ ءولا‑دا‑يلدّي يان ا‑يسكر لخُشانت. والاينّي ءيغ‑يتيارام كرا ن‑يان، هان شّهوات‑نس ا‑ت‑ين‑يلدين ارد‑تي‑تغوي‑تژقّورت. غاكودان ءيغ‑گيس‑قامانت شّهوات راد‑ارونت دّنوب. ءولا دّنوب، ءيغ‑گيس‑زوويدن راد‑د‑اوين لموت. واي‑ايتما عزّانين، ا‑ور‑تجلوم ءيخف‑نّون. كولّو ما‑يگان تاوافكا ءيشوان ءولا كولّو ما‑يگان لباراكا ءيفولكين، زغ‑وفلّا ا‑زغ‑د‑يوشكا، زغ‑ربّي لّي‑يسكرن تيفاوين ن‑يگنوان. ءيمّا نتّان ءور‑ا‑يتموتّي ءولا‑دا‑يتبدّال ءولا‑دا‑يتلّاس. ءيسكر ما‑يقصاد، ءيفك‑اغ تودرت لّجديد س‑واوال لّحقّ، باش ا‑نوورّي نگ لغلّت تامنزوت ن‑كولّو ما‑يخلق. واي‑ايتما عزّانين، سوانگمات غ‑ماياد: ءيلّا ف‑كود يان ا‑ييفسوس ا‑يسفلد، ييژّاي ا‑يساول، ييژّاي ا‑ور‑يقلاقل. اشكو يان ءيتقلاقالن ءور‑را‑ييژضار ا‑يسكار افولكي لّي‑يترضون ربّي. كّيسات زغ‑گيگون ءيسكّيرن ركانين ءولا لخُشانت لّي‑يگّوتن غ‑مدّن. تادرات ءي‑يخف‑نّون ار‑تّقبالم اوال لّي‑گيگون‑يتژّو ربّي، اشكو ءيژضار‑واوال‑ان ا‑كُن‑يجّنجم. ءيلّا فلّاون ا‑تگم ويد سكارنين س‑واوال ن‑ربّي، ءورد ويد سفليدنين ءوكان. ا‑ور‑تجلّوم ءيخف‑نّون، اشكو يان ءيسفليدن ءي‑واوال ن‑ربّي بلا‑دا‑سرس‑يسكار، ءيگا زوند يان‑ن‑يوگُّان س‑لمري ا‑يژر ءودم‑نس. غير يوگُّا‑ن ءيژر ءيخف‑نس ييتّي، س‑يتّو مان ءودم ا‑يسكر. ءيمّا وانّا ءيتمنادن غ‑ولمّود ءيفولكين لّي‑يرژمن ءي‑مدّن زغ‑يسكراف، ار‑تّ‑گيس‑يتاوي ار‑سرس‑يسكار بلا‑دا‑يتتّو مايلّي مي ءيسفلد، نتّان ا‑را‑يبارك ربّي غ‑كولّو ما‑يسكار. ءيغ‑يلّا كرا ن‑يان ءيغالن ءيزد امومن ا‑يگا والاينّي ءور‑ا‑يتنباض غ‑يلس‑نس، هاتين ءيجلا د‑يخف‑نس. ليمان‑نس ءور‑يگي يات. ءيمّا يان دار ليمان ءيفولكين ءيصحان غ‑يژري ن‑ربّي باباتنّغ، غمكاد ا‑را‑يگ: ار‑يتعاوان ءيگيگيلن د‑تهجّالين غ‑تنوكموت‑نسن، ار‑يتانف ءي‑يركان ن‑دّونيت. واي‑ايتما، ا‑ور‑تسكارم س‑وودماون غيلاد غ‑تومژم اغاراس ن‑سيديتنّغ ياسوع لماسيح باب لّمجد. را‑كُن‑سقساغ، ما‑را‑تسكرم غ‑ومناگّار‑نّون ءيغ‑ن‑يكشم يان دار تالخاتمت ن‑وورغ د‑تملسيت يُغلان، ءيكشم‑ن ءولا يان‑ومژلوض س‑يبردان‑نس بّينين؟ ءيس‑را‑تنسالّامّ د‑بو‑تملسيت ءيشوان تينيم‑اس «زايد ا‑سيدي ا‑تسكيوست غ‑لگدّام،» تينيم ءي‑ومژلوض «بيدّ غ‑تغوردين» نغد «گاور‑ن غين»؟ والاينّي ءيغ‑ا‑تسكارم غمكان ءيس‑ورد ءودماون‑نّيت اين تسكارم، ار‑تّحكامّ ف‑ينگراتون س‑تنباضين أُخشنّين؟ سفلدات اي‑ايتما عزّانين. ءيس‑ور‑تسّينم ماياد؟ ربّي ءيستي غويلّي دار ما‑يدروسن غ‑دّونيت اد‑دارسن‑ييگات ليمان، كشمن س‑لوورت ن‑تگلديت لّي‑ف‑ينّا را‑ت‑يفك ءي‑ويلّي رانين ربّي. ءيمّا كونّي ار‑تّحگارم ءيمژلاض. را‑كُن‑سقساغ، مانوي‑كُن‑سّرفوفونّين ار‑كُن‑زوكورن س‑لمحكامات؟ ءيس‑ورد غويلّي دار ءيگّوت‑وايدا؟ ءيس‑ورد نتني ا‑يرگّمن ءيسم ءيفولكين ن‑والّي مي تگام وينس؟ هاتي افولكي ايد تسكارم ءيغ‑ا‑تسكارم س‑لوصيت ءيهيّان ن‑تگلديت ن‑ربّي غمكلّي ءيتياران «ا-تّيريت ادجار‑نّك زوند ءيخف‑نّك.» والاينّي ءيغ‑ا‑تسكارم س‑وودماون هان دّنوب ايان، ءيحكام فلّاون شّرع ن‑ربّي اشكو تفّوغم زغ‑گيس. اشكو يان ءيسكارن كولّو س‑شّرع ن‑ربّي، ءيغ‑زگيس‑يفّوغ غير س‑يات‑تغاوسا، هاتي يوورّي ءيگا زوند يان‑زگيس‑يفّوغن كولّوت. اشكو ربّي لّي‑ينّان «ا‑ور‑تزنوت» ءينّا‑داغ «ا‑ور‑تنغت.» ءيغ‑تونفت ءي‑زّنا والاينّي تنغيت، هاتي توورّيت تگيت واد ءيفّوغن زغ‑شّرع. ساوالات ار‑تسكارم س‑مكلّي‑د‑يقّانّ مدّن لّي‑ف‑را‑يحكام ربّي س‑لوصيت لّي‑اغ‑يرژمن زغ‑يسكراف‑ان. اشكو وانّا ءور‑يتصاماحن، را‑فلّاس‑يحكام ربّي بلا‑ياس‑يصامح. ءيمّا وانّا ءيتصاماحن، ءور‑را‑ت‑يلكم لحوكم. واي‑ايتما، ما‑لّفايتّ ا‑را‑ييلي ءيغ‑ينّا كرا ن‑يان «ها‑يّي ءومنغ» والاينّي ءور‑ا‑يسكار ءيفولكيتن؟ ءيس‑را‑ت‑يجّنجم وان ليمان‑ان؟ ما‑لّفايتّ گيگون ءيلّان ءيغ دارون گماتون نغد ءولّتماتون ءيلكم ف‑ما‑يلسّا نغد ما‑يشتّا تينيم‑اس: «زايد س‑سّلامت، اد‑اك‑د‑ياوي ربّي ما‑تلسّات ءولا ما‑تشتّات،» بلا‑ياس‑تفكام كونّي مايلّي‑ف‑تلكم دّات‑نس؟ والاينّي غمكان ا‑يگا وانّا يومنّ ءور‑ا‑يسكار افولكي. هاتي ءيمّوت ليمان‑نس. والاينّي ما‑راد‑ينيغ ءيغ‑يلّا كرا ن‑يان ءينّا‑يّي «ليمان ا‑دارك‑يلّان، ءيمّا نكّي لّان داري ءيفولكيتن»؟ راد‑اس‑رارغ «مل‑يّي ليمان‑نّك بلا ءيفولكيتن، ملغ‑اك ليمان‑ينو س‑يفولكيتن لّي‑سكارغ. كيّي تومنت ءيزد ربّي يان ا‑يگا. تُغژانت. ءولا لجنون أُخشنّين ءومنّ س‑مايان، ار‑ترگيگيين س‑تكساض.» واي‑ارگاز ءيفسّوسن، ءيس‑تريت اد‑زايدغ ملغ‑اك ءيزد ليمان بلا ءيفولكيتن ءور‑يگي يات؟ ما‑س‑يرضا ربّي س‑باباتنّغ ءيبراهيم؟ ءيرضا سرس ف‑سّيبت ن‑ما‑يسكر. ييوي يوس ءيسحاق اد‑اس‑يغرس ف‑وكركور ءيفك‑ت ءي‑ربّي. ءيس‑ور‑تفهيمت مايان؟ يومن ءيبراهيم ءيسكر، ءيكمّل ليمان‑نس س‑يسكّيرن‑نس. ءيجرا غمكلّي ءيتياران غ‑وارّا ن‑ربّي لّي‑ينّان: «ءيبراهيم يومن ربّي. مايان ا‑ف‑ت‑يگا ربّي د‑واد‑ف‑يرضا.» ييني‑داغ ف‑يبراهيم ءيس‑يگا امدّاكُّل ن‑ربّي. ءيس‑ور‑تژريم غيلاد؟ ربّي ار‑سرنّغ‑يترضو ف‑سّيبت ن‑ما‑نسكار ءورد ف‑سّيبت ن‑ما‑نومن ءوكان. غمكان ا‑تگا ءولا تامگّانت راحاب، ءيرضا سرس ربّي ف‑سّيبت ن‑كرا تسكر. اشكو تسّرگس ءيمازانّ، تعاون‑تن اد‑دّون ف‑يان‑وغاراس ياضني. هان ءيمّوت ليمان غ‑ور‑لّين ءيفولكيتن، غمكلّي تّمتات دّات نّا‑غ‑ور‑تلّي رّوح ن‑تودرت. واي‑ايتما، ا‑ور‑تيريم ا‑كولّو‑تگم ءيمسلمدن، اشكو تسّنمم نكُّني‑اد ءيسّلمادن، ءيتابعا‑ياغ لحساب ءوگُّار ن‑وييّاض. س‑كيگان ا‑س‑ا‑نتمزاگال كولّواغ. ءيغ‑يلّا ما‑ور‑يتمزاگالن غ‑ما‑يتّيني، را‑يگ نتّان واد ءيكمّلن ييژضار ا‑يتنباض غ‑دّات‑نس كولّوتّ. ءولا اگمار، ار‑اس‑نتگّا اغامو غ‑يمي ما‑س‑ا‑نتحكام غ‑دّات‑نس كولّوتّ باش ا‑فلّاس‑نتّيدو س‑ينّا نرا. ءولا اناو غ‑ومدا، واخّا ءيمقّور باهرا ءيتجهّد‑واضو لّي‑ت‑يدحاين، ار‑ت‑يسّلولّي باب‑نس س‑يات‑تفلوت ءيمژّين باش ا‑يتّيدو س‑ينّا ءيرا. غمكان ا‑يگا ءيلس ن‑بنادم. واخّا ءيمژّي، ار‑يسّفورّوگ ف‑تغاوسيوين مقّورنين. منشك ا‑تلّا تاگانت ار‑تّي‑تجدّر‑تسافوت ءيمژّين. زوند غمكان ا‑يجدّر ءيلس، اشكو ءيعمّر س‑لخُشانت غ‑وگُنس ن‑دّات‑نّغ، ار‑يسّيُخشان بنادم كولّوت. ار‑يتزناد ءي‑دّونيت س‑لعافيت لّي‑د‑يفّوغن زغ‑جهنّاما. ژرات لوحوش، ءيژضار بنادم ا‑تن‑يامژ. لوحوش ن‑تاگانت د‑يگضاض د‑يفاغرن د‑يسلمان، ار‑تن‑نتامژ كولّوتن. والاينّي ءور‑يلّي يان ءيژضارن ا‑يامژ ءيلس‑نس. ار‑بدّا‑يلدّي س‑ما‑يُخشنّ، ياگُي ا‑يزگا، ءيعمّر س‑سّمّ لّي‑ينقّان. س‑يلس ا‑س‑ا‑نتالغ سيدي ربّي باباتنّغ. س‑يلس‑داغ ا‑س‑ا‑نرگّم بنادم لّي‑يتياوسكارن ف‑صّورت ن‑ربّي. هان يان‑يمي ا‑د‑يتكّا لا شّوكر ءولا تارگّيمت. واي‑ايتما، ءور‑اكُّ‑يشوي ا‑گيگون‑ييلي زوند غايان. ءيس‑تلّا تالعينت دي‑تكّان‑وامان ميمنين ءولا ويد سمّومنين؟ ءيزد اي‑ايتما، تلّا تازارت ءيسكارن زّيت، نغد دّاليت ءيسكارن ءيكوزارن؟ ءور‑سار‑راد‑فتون‑وامان ميمنين زغ‑تالعينت ءيسمّومن. مانوا گيگون اد‑دار تاحكيمت ييسّان ما‑يلّان؟ ءيلّا فلّاس ا‑يمل تاحكيمت‑نس س‑ما‑يسكار، ار‑يتفولكي د‑مدّن ار‑يژّيمژاي ءيخف‑نس س‑تحكيمت لّي‑يصحان. والاينّي ءيغ‑تلّا‑تنوّاشت غ‑وول‑نّون نغد ار‑تّيريم ا‑تاگُرم تزوورم وييّاض، ا‑ور‑تالغم ءيخف‑نّون ءولا تسّكاركسم ف‑لحقّ. اشكو وان تاحكيمت‑ان، ءورد ءيگنّا ا‑دي‑تكّا، والاينّي توشكا‑د زغ‑دّونيت. ءورد تين رّوح لقودوس ا‑تگا، والاينّي تگا تين ءيبليس. ءيغ‑ا‑تّيرين مدّن اد‑اگُرن زوورن وييّاض، را‑تيگات تاژيت ءولا كولّو ما‑يُخشنّ. والاينّي يان دار تاحكيمت لّي‑د‑يكّان ءيگنّا، غمكاد ا‑را‑يگ. امزوارو ءيغوس‑وول‑نس، ييري سّلامت، ار‑يترخو د‑مدّن، ار‑سرسن‑يسفليد، ار‑گيسن‑يتحنّو، ار‑د‑يتاوي صّابت ن‑وفولكي. ءور‑ا‑يسكار س‑وودماون ءولا‑دا‑يسكار زوند ءيغ‑يگا كرا ءور‑يگي. هاتي تامگرا ن‑وفولكي، ار‑تّ‑مگّرن غويلّي‑د‑يوينين امود ن‑سّلامت ار‑ت‑ين‑تلوحن س‑سّلامت. ماخ ايلّيغ ا‑تّمّاغم ار‑تّژيم ءي‑نگراتون؟ ءيس‑ورد ف‑سّيبت ن‑ما‑گيگون‑تمّاغن ءيسوينگيمن ن‑ما‑يتّيري ءيخف‑نّون؟ ار‑تّيريم كرا ءور‑تلكيمّ، غاكودان ار‑تنكّرم ا‑تنقّام. ار‑تّژوژضم ما‑مي‑ور‑تژضارم، غاكودان ار‑تمّاغم ار‑فلّاس‑تكّاتم. هان ءور‑ا‑تطّافم ما‑تّيريم اشكو ءور‑ا‑تي‑تّضالابم زغ‑ربّي. والاينّي ءيغ‑ا‑تّضالابم كرا زغ‑ربّي ءور‑ا‑ياون‑ت‑ياكّا، اشكو ءورد ف‑وفولكي ا‑ف‑ا‑تي‑تّضالابم والاينّي غير ما‑س‑ا‑تسّفراحم ءيخف‑نّون. هان تفّوغم اغاراس باهرا. ءيس‑ور‑تسّينم ماياد؟ وانّا دار تعزّا دّونيت، ءيرور تيغوردين‑نس س‑ربّي. يان دار ءيعزّا ما‑يگان وين دّونيت، ءيگا ءيخف‑نس د‑واد ءيژين د‑ربّي. ءيس‑تغالم ءيس‑ور‑يُغژان مايلّي ءيتياران غ‑وارّا ن‑ربّي ءينّا: «ءول لّي‑گينّغ‑يگا ربّي ار‑يتّيري كيگان»؟ والاينّي ءوگُّار ا‑تگا لباراكا لّي‑اغ‑ياكّا، غمكلّي ءيتياران: «ربّي ار‑يتضاضّا وانّا ءيسّيمغورن ءيخف‑نس، والاينّي ار‑يتباراك وانّا ءيژّيمژاين ءيخف‑نس.» مايان ا‑ف‑راد‑اون‑ينيغ، فكات ءيخف‑نّون غ‑دّو‑وفوس ن‑ربّي. ضاضّات ءيبليس س‑يروول زغ‑گيگون. اكمورات‑ن س‑ربّي، ياكمور‑د سرون. وا‑كونّي لّي‑يسكارن دّنوب، سيردات ءيفاسّن‑نّون. وا‑كونّي لّي‑يكّاتن ف‑سين ءيغاراسن، سّغوسات ءولاون‑نّون تيگُراژ‑كُن طيّر‑اون ار‑تالّام. كّيسات تاضصا، تسكرم ف‑يمطّاون. سّيتّيات لفرح، تسكرم ف‑تگوضي. كنوات غ‑لگدّام ن‑سيديتون يالّ‑كُن. واي‑ايتما، ا‑ور‑ترگّمّ ءي‑نگراتون. اشكو وانّا ءيرگمن غ‑گماس، نغد ءينّا فلّاس ءيس‑يُخشن، هاتي ءيگا ءيخف‑نس د‑واد يوگُرن لوصيّات ن‑ربّي، ءيرار‑تنت زوند ءيغ‑ور‑گينت يات. ءيغ‑تگيت ءيخف‑نّك ف‑يگّي ن‑شّرع ن‑ربّي، ءور‑سول‑تگيت واد سرس ءيسكارن والاينّي واد فلّاس ءيتحكامن. هان ربّي واحدوت ا‑يژضارن ا‑ياكّا لوصيّات، د‑نتّان واحدوت ا‑يژضارن ا‑يكّات لحوكم ار‑يجّنجام ار‑يتهلاك. والاينّي ما‑تگيت كيّي ايلّيغ تريت ا‑تينيت ف‑وايّاض ءيس‑يُخشن؟ سفلدات، ا‑كونّي لّي‑يتّينين «را‑ندّو غاسّاد نغد ازكّا س‑تمدينت ياضني، نگاور‑ن گيس يان‑وسگُّاس ار‑نساغ ار‑نزّنزا ار‑نتامژ ءيقاريدن.» والاينّي ءور‑تسّينم ما‑را‑ييلي ازكّا. ماد‑اكُّ‑تگا تودرت‑نّون؟ هاتي تودرت‑نّون تگا زوند تامدلوت ءيمژّين لّي‑د‑يبانّ يان كرا س‑تّ‑لاح. والاينّي ءيلّا فلّاون ا‑تّينيم «ءيغ‑يرا سيديتنّغ، را‑ندّر نسكر غمكا ءولا غمكا.» ءيمّا كونّي ار‑تّالغم ءيخف‑نّون ار‑تسّفورّوگم ف‑ما‑را‑تسكرم. هان أُخشنّ ءيسفورّوگن‑ان. ءيمّا يان ءيسّنّ ا‑يسكر افولكي ءور‑ت‑يسكير، دّنوب اد‑اس‑يگا غايان. سفلدات اي‑يد‑بو‑وايدا. الّات غيلاد ار‑تسّغويّوم ف‑تگوضي لّي‑راد‑اون‑ييلي. هان ايدا‑نّون ءيمدا، د‑يبردان‑نّون تشّا‑تن‑تووكّا. هان ءورغ‑نّون ءولا نّوقرت‑نّون تغويت‑تن تانيگت. غمكان ا‑را‑تشّ تانيگت‑ان تيفيّي‑نّون زوند لعافيت، تفك فلّاون توگّا غ‑واسّ لّحساب. اشكو كونّي تسّمونم كيگان ءي‑يخف‑نّون غ‑ووسّان گُّرانين. هان تيغراد لّي‑ور‑تفكيم ءي‑ويلّي مگّرنين غ‑يگران‑نّون. ار‑سّمومُّين ءيشوّالن، لكمنت تغويّا‑نسن ءيمزگان ن‑سيدي ربّي ءيتجهّدن. تزّريم ءوسّان‑نّون غ‑دّونيت س‑كولّو ما‑تّيريم، ار‑تشتّام ار‑تّفراحم ار‑تّعالافم دّات‑نّون ءي‑واسّ ن‑تغرسي. تسّضرم لباضل ف‑ايت‑وفولكي تنغم‑تن، ءور‑ن‑رورن ف‑يخف‑نسن س‑يات. ءيمّا كونّي اي‑ايتما، صبرات ارد‑د‑ياشك سيديتنّغ، زوند افلّاح لّي‑يتقلن ارد‑اس‑دي‑تغلي صّابت ءيعزّان غ‑يگر‑نس، ار‑يتصبار ارد ءيضر‑ونژار امنزو ءولا اماژّوژ. ءولا كونّي، ءيلّا فلّاون ا‑تّصبارم ار‑تزّعامّ ءولاون‑نّون، اشكو ياكمور‑د‑واسّ لّي‑غ‑را‑د‑ياشك سيديتنّغ. واي‑ايتما، ا‑ور‑تّنگموگم ءي‑نگراتون ا‑ور‑فلّاون‑يتّوت لحوكم. ها‑لقاضي ءيمقّورن ءيبيدّ‑د غ‑يمي. سوانگمات اي‑ايتما غ‑لانبيا لّي‑ساوالنين س‑يسم ن‑سيديتنّغ غايد ءيزرين، اشكو صبرن نتني غ‑كولّو‑تمّاريو‑نسن. نگا‑تن د‑يمباركين اشكو صبرن سول زگان. تسفلدم كونّي ف‑ايّوب غمكلّي ءيصبر ءيزگا، تيسّانم مامنك ا‑ت‑يبارك سيدي ربّي تيگيرا. اشكو سيديتنّغ ار‑باهرا‑يتحنّا ار‑بدّا‑يسكار افولكي. ءيمّا تاغاوسا ءيهيّان اي‑ايتما، تگا غمكا: ا‑ور‑تّگالّام، لا س‑يگنّا ءولا س‑واكال ءولا س‑كرا ن‑تگالّيت ياضني. والاينّي ءيغ‑يگا‑واوال‑نّون «يياه» تينيم «يياه.» ءيغ‑يگا «ءوهو» تينيم «ءوهو» باش ا‑فلّاون‑ور‑يتّوت لحوكم. ءيغ‑يلّا كرا ن‑يان گيگون يوتن تامّارا، ءيلّا فلّاس ا‑يضالب ءي‑ربّي ف‑غايان. ءيغ‑يلّا كرا ن‑يان گيگون ءيفرحن، ءيلّا فلّاس ا‑يالغ ربّي س‑ومارگ لّفرح. ءيغ‑يلّا كرا ن‑يان گيگون يوضنّ، ءيلّا فلّاس ا‑يازن س‑يمغارن ن‑ومناگّار باش ا‑ن‑دارس‑اشكين ضالبن ربّي فلّاس ژغورن‑ت س‑زّيت س‑يسم ن‑سيديتنّغ. را‑يسكر سيديتنّغ ما‑زگيس‑ضالبن غويلّي ءومنّين، ءيجّوجّي اماضون ءيسّدوس‑ت. ءيغ‑يسكر كرا ن‑دّنوب را‑تن‑فلّاس‑يسّيتّي. ف‑ماياد ا‑ف‑راد‑اون‑ينيغ، قرّات س‑دّنوب‑نّون ءي‑نگراتون، ار‑تّضالابم ربّي ف‑ينگراتون باش ا‑تجّيم. هاتي تاژالّيت ن‑يان ءيرضان ربّي ار‑دي‑تّاوي كيگان. ءولا نّابي ءيليّا ءيگا بنادم زوند نكُّني، ءيمّا نتّا ءيضالب باهرا ءي‑ربّي ا‑ور‑ييلي‑ونژار، س‑ور‑د‑يضر‑ونژار ف‑واكال كراض ءيسگُّاسن د‑مناصّ. ءيضالب‑ت‑داغ س‑د‑فكان ءيگنوان انژار، اوين‑د ءيكالّن صّابت‑نسن. واي‑ايتما، ءيغ‑گيگون‑يلّا كرا ن‑يان ءيفّوغن زغ‑لحقّ ءيرار‑ت‑يد وايّاض س‑وغاراس، سوانگمات ماياد: وانّا‑د‑يرورن يان ءيجلان زغ‑ما‑يُخشنّ، را‑ت‑يسّانف ءي‑لموت لّيخرت، ءيسّاگّوگ‑ت زغ‑كيگان د‑دّنوب. زغ‑بطرُس ارقّاس ن‑ياسوع لماسيح، ءي‑يمژلاين ن‑ربّي لّي‑اكوتنين، گن ءيغريبن غ‑تميزار ن‑بونتوس ءولا گالاطيّا ءولا كابادوكيّا ءولا اسيّا ءولا بيتينيّا. ءيژلي‑كُن ربّي باباتنّغ س‑تحكيمت ن‑رّوح لقودوس غمكلّي ءيقصاد زغ‑يسيزوار، باش ا‑تسكارم س‑يواليون ن‑ياسوع لماسيح تغوسم س‑يدامّن‑نس. اد‑اون‑تيگات لباراكا د‑سّلامت. ار‑باهرا‑نتالغ ربّي باباس ن‑سيديتنّغ ياسوع لماسيح، اشكو س‑رّحمت‑نس ءيگّوتن ا‑س‑اغ‑يفكا ا‑نلال تالاليت ن‑تودرت لّجديد. ءيعمّر‑اغ س‑رّجا ءيدّرن لّيغ‑د‑يسّنكر ياسوع لماسيح زغ‑لموت. ءيفك‑اغ يا‑لّوورت لّي‑ور‑را‑يفنو ءولا را‑يخسر ءولا را‑يمدو، ءيحضا‑ياون‑ت غ‑يگنّا. س‑تحكيمت‑نس ءيتجهّدن ا‑س‑ا‑كُن‑يسّنتال كونّي لّي‑سرس‑ومنّين، ارد تنجمّ س‑وجنجم ءيكمّلن لّي‑راد‑اون‑ييلي غ‑يسيگُّرا ن‑دّونيت. فرحات س‑كولّو ماياد، واخّا ءيغ‑د‑يقّان اد‑اون‑طيّر يات‑تاساعت ف‑سّيبت ن‑تنوكموت ءولا تاسّاست لّي‑كُن‑يتارمن. ءيزري فلّاون مايان باش ا‑تيسّانم ءيس‑يصحا ليمان‑نّون. اشكو ءيعزّا ليمان‑نّون باهرا، ءوگُّار ن‑وورغ لّي‑يفنّون واخّا‑دا‑يتصفو س‑لعافيت. اشكو غمكان ا‑س‑را‑كُن‑يالغ ربّي ءيسّاتّوي‑كُن ءيسّيمغور‑كُن غاكود لّيغ را‑د‑ياشك ياسوع لماسيح ءيبايّن. نتّان، واخّا ءور‑جّو‑تي‑تژريم، ءيعزّا دارون باهرا. واخّا ءور‑ا‑تي‑تّمنادم غيلاد، تومنم سرس. ار‑سرس‑تّفراحم س‑لفرح ءيگّوتن ايلّيغ ءور‑اكُّ‑توفيم ءيواليون ماد‑اس‑تّينيم. اشكو ربّي ءيفكا‑ياون غيلاد مايلّي ترام غ‑ليمان‑نّون، ءيفك‑اون اجنجم ن‑يخف‑نّون. هاتي لانبيا لّي‑ساولنين غايد ءيزرين ف‑لباراكا لّي‑راد‑اون‑ييلي، ار‑سوينگيمن ار‑سقسان ف‑وجنجم‑اد. ار‑سقسان مان ازمز ا‑غ‑را‑ييلي ءولا مامنك ا‑را‑يگ‑وزمز لّي‑ف‑ا‑يتّيني رّوح لّماسيح لّي‑گيسن‑يلّان لّيغ ا‑ياسن‑يمالا ارفوفن لّي‑غ‑را‑يزري لماسيح ءولا لمجد لّي‑راد‑اس‑ييلي تيگيرا. والاينّي ءيسّبايّن‑اسن‑د ربّي ءيس‑ورد ف‑سّيبت ن‑يخف‑نسن ا‑ف‑ا‑ساوالن ف‑تغاوسيوين‑اد والاينّي ف‑سّيبت‑نّون. ءيمّا غيلاد تسفلدم ف‑كولّو ماياد ف‑يمي ن‑ويلّي‑اون‑ين‑يوينين لخبار ءيفولكين، ار‑دارون‑تبرّاحن س‑تحكيمت ن‑رّوح لقودوس لّي‑د‑يتيازانّ زغ‑يگنّا. ءيمّا تيغاوسيوين‑اد، ءولا لمالايكا ار‑باهرا‑تّيرين اد‑يسّانّ مامنك اد‑گانت. ف‑مايان ا‑ف‑راد‑اون‑ينيغ، بكيسات ءيخف‑نّون ترارم لعاقل، تزگام باهرا غ‑رّجا لّي‑س‑ا‑تّرجوم ف‑لباراكا لّي‑راد‑اون‑ييلي غاكود لّيغ را‑د‑ياشك ياسوع لماسيح ءيبايّن. سكارات س‑واوال ن‑ربّي، غمكلّي سكارن تاروا س‑واوال ن‑ايت‑دارسن. ا‑ور‑سول‑تّلهوم س‑غايلّي ستّين تكّام ار‑تّيريم ءي‑يخف‑نّون لّيغ ءور‑تا‑تسّينم لحقّ. والاينّي سكارات كولّو س‑وول ءيغوسن، غمكلّي ءيغوس ربّي لّي‑اون‑د‑يغران. اشكو ءيتيارا ءينّا ربّي: «ءيلّا فلّاون ا‑تغوسم، اشكو گيغ نكّي واد ءيغوسن.» تميارم كونّي ا‑تّينيم: «وا‑ربّي باباتنّغ،» والاينّي ا‑ور‑تتّوم ءيزد نتّان ا‑يتراران ءي‑كرايگاتّ يان ف‑ما‑يسكار، ءور‑ا‑يتمناد ءودماون. اويات‑ستّ گيس باهرا كولّو ءوسّان‑اد تزّرايم زوند ءيغريبن غ‑دّونيت. اشكو تسّنم ءيس‑كُن‑د‑يفرا زغ‑تنباضين خوانين لّي‑اون‑د‑فلن ءيمزوورا‑نّون. اشكو ءورد س‑ما‑يفنّون زوند نّوقرت نغد ءورغ ا‑س‑كُن‑د‑يفرا، والاينّي س‑يدامّن عزّانين لّماسيح زوند ءيدامّن ن‑يان‑ولقّاغ ءيغوسن بلا لعيب. ماياد، ءيقصاد‑ت سرس ربّي لّيغ ءور‑تا‑يخلق يات، يازن‑ت‑يد ءيلمّا ءيبايّن‑د ف‑سّيبت‑نّون غ‑ووسّان‑اد گُّرانين. هاتي ف‑سّيبت لّماسيح ا‑س‑تومنم س‑ربّي لّي‑ت‑يد‑يسّنكرن زغ‑لموت ءيسّاتّوي‑ت س‑لمجد. د‑غمكاد ا‑س‑يزگا ليمان‑نّون د‑رّجا‑نّون غ‑ربّي. هاتي تسّغوسم ءولاون‑نّون لّيغ تومژم اغاراس لّحقّ، ار‑تّحوبّوم ايتماتون س‑نّييت ءيصفان. ءيمّا غيلاد، تحنّوات ءي‑نگراتون زغ‑تّمي ن‑وول‑نّون. اشكو تلولم تالاليت ن‑تودرت لّجديد، ءورد س‑وامود لّي‑يفنّون والاينّي س‑وامود لّي‑ور‑را‑يفنو، ا‑ت‑يگان د‑واوال ن‑ربّي، ءيگ اوال ءيدّرن ءيقاما‑بدّا. اشكو ءيتيارا: «بنادم ءيگا زوند توگا، تگ لهيبت‑نس زوند اجدّيگ ن‑توگا. تسلّاو توگا ياسوس‑وجدّيگ، ءيمّا اوال ن‑سيديتنّغ ءيزگا‑بدّا.» اوال‑اد ءيگا لخبار ءيفولكين لّي‑مي‑تسفلدم. ف‑ماياد ا‑ف‑راد‑اون‑ينيغ، لوحات‑ن س‑كولّو ما‑يگان تانوّاشت ءولا تيكركاس. ا‑ور‑تسكارم غ‑لگدّام ن‑مدّن ما‑ور‑تگيم. اد‑اون‑ور‑طيّر ف‑وييّاض طّافنين كرا ترام ءي‑يخف‑نّون، ءولا‑دا‑ترگّمّ غ‑يان. والاينّي گات زوند تاروا بحرا لولنين، تيريم ا‑تسوم اكُّفاي ن‑واوال ءيغوسن، باش ا‑سرس‑تيمغورم تنجمّ اجنجم ءيكمّلن. اشكو «تمضيم افولكي ن‑سيديتنّغ.» اكموراد‑د غيلاد س‑والّي ءيگان اژرو ءيدّرن. لوحن‑ت‑ين مدّن، والاينّي ءيژلي‑ت ربّي، ءيعزّو دارس. فكات ءيخف‑نّون ءي‑لماسيح زوند ءيژران دّرنين، باش ا‑سرون‑يبنّو يات‑تگمّي ن‑رّوح، ا‑ن‑گيس‑تسراسم غ‑لگدّام ن‑ربّي تيوافكيو ن‑رّوح لّي‑س‑را‑يترضو اشكو ار‑اس‑تنتي‑تاكّام س‑يسم ن‑ياسوع لماسيح. غمكلّي ءيتياران، ءينّا ربّي: «هاتي را‑ن‑زّوگزغ غ‑گر مدّن‑ينو يان‑وژرو ءيمقّورن ءيگان وين‑وغژو. ژليغ‑ت ءيعزّو داري. وانّا سرس يومنّ ءور‑سار‑تي‑تُگراژ.» مايان ا‑ف‑دارون‑يعزّا كونّي لّي‑سرس‑يومنّ. والاينّي ءيتيارا‑داغ ف‑ويلّي ءور‑رينين اد‑امنّ، ءينّا ربّي فلّاسن: «اژرو لّي‑ن‑لوحن ءيبنّاين، نتّان ا‑يوورّين ءيگا ءيخف ن‑وغژو.» ءيتيارا‑داغ: «اژرو‑اد را‑يگ تابايضّرت ءي‑مدّن، ءيگ ءيفير لّي‑را‑تن‑يسّكنوكي.» نتني ار‑طّارن غيلاد اشكو اگُين اد‑سكارن س‑واوال ن‑ربّي. غمكان ا‑تن‑د‑يقّانّ. ءيمّا كونّي، تگام مدّن تياوژلاينين، تگم ايت‑تگلديت ن‑ربّي، ار‑ن‑تسراسم غ‑لگدّام‑نس تيوافكيو لّي‑س‑ا‑يترضو. تگم ايت‑ربّي، ءيژلي‑كُن ا‑تگم وينس، باش ا‑تّاويم لخبار ءي‑مدّن ف‑كولّو ما‑يسكر غوالّي‑اون‑د‑يغران زغ‑تيلّاس س‑تيفاوت لّمجد‑نس. غايد ءيزرين ءور‑تگيم يات، ءيمّا غيلاد ايت‑ربّي ا‑تگام. غايد ءيزرين ءور‑تسّينم رّحمت ن‑ربّي، ءيمّا غيلاد رّحمت‑نس ا‑فلّاون‑يلّان. واي‑ايتما عزّانين، ضالبغ‑كُن غيلاد ا‑تگم ءيخف‑نّون د‑يغريبن د‑يبرّانيين غ‑دّونيت‑اد، تلوحم س‑ما‑تّيري دّات ن‑بنادم، اشكو تيغاوسيوين ن‑دّات ار‑تمّاغنت د‑وول ءيصفان. سكارات افولكي غ‑گر‑ويلّي ءور‑سّينّين ربّي. واخّا ءيغ‑ا‑گيگون‑رگّمن راد‑ژرن ءيس‑يفولكي كولّو ما‑تسكارم، ءينين ءيلمّا ءيزد ربّي اد‑دار لحقّ غ‑واسّ لّي‑غ‑را‑د‑ياشك ا‑يوت لحوكم. سفليدات ف‑سّيبت ن‑سيديتنّغ س‑كرايگاتّ سّولطا ءيتحكامن غ‑دار مدّن. سفليدات س‑ومزوارو لّي‑يگان اگلّيد، ءولا س‑ويلّي‑د‑يتازن اد‑وتن لعقوبيت ف‑ويلّي سكارنين ما‑يُخشنّ، الغن غويلّي سكارنين افولكي. اشكو ربّي ءيرا گيگون ا‑بدّا‑تسكارم ما‑يفولكين، باش ا‑ور‑افن مدّن فسّوسنين سّيبت ما‑س‑ا‑گيگون‑ساوالن س‑تنوّاشت‑نسن ءيخوان. زّريات ءوسّان‑نّون مكنّا ترام، والاينّي ا‑ور‑تّينيم د‑يخف‑نّون: «ها‑ياغ نژضار ا‑نسكر مكنّا نرا. نكرات ا‑نسكر ما‑يُخشنّ.» زّريات ءوسّان‑نّون غمكلّي‑د‑يقّانّ ءيخدّامن ن‑ربّي. ءوقّرات كولّو مدّن، ار‑تّيريم ايتماتون غ‑لماسيح. تاويات‑ستّ باهرا غ‑ربّي، ار‑تّوقّارم اگلّيد. وا‑يخدّامن، سفليدات س‑يد‑سيديتون ار‑تن‑بدّا‑تّوقّارم. ءورد غير غويلّي رخانين شوانين والاينّي سفليدات ءولا س‑ويلّي شقانين. اشكو ربّي را‑يبارك يان ءيرفوفنّ ءيصبر ءي‑لباضل ف‑سّيبت ن‑ما‑س‑يرا ا‑يرضو ربّي. والاينّي ما‑لّفايتّ دارون ءيلّان ءيغ‑تسكرم ما‑يُخشنّ تصبرم ءي‑وكوراي لّي‑تشّام ف‑سّيبت لّخُشانت‑نّون؟ والاينّي ءيغ‑تسكرم افولكي ترفوفنم تصبرم، را‑كُن‑يبارك ربّي. ربّي ءيغرا‑ياون‑د ا‑تزّرايم ماياد، اشكو لماسيح ءيرفوفن ءولا نتّا ف‑سّيبت‑نّون، ءيمل‑اون ما‑يفولكين باش ا‑تضفورم لاترت‑نس. ءيتيارا فلّاس: «ءور‑اكُّ‑يسكير كرا ن‑دّنب. ءور‑جّو‑كّينت‑تكركاس ءيمي‑نس.» لّيغ‑ت‑رگمن، ءور‑اسن‑د‑يرور س‑ترگّام. لّيغ‑ت‑سّرفوفنّ ءور‑تن‑يهدّيد، والاينّي ءيتعنّا س‑ربّي لّي‑يتحكامن س‑لحقّ. نتّان ا‑يوسين دّنوب‑نّغ غ‑دّات‑نس ف‑وگّجدي، باش ا‑نمّت ءي‑دّنوب ندّر ءي‑ما‑يرضان ربّي. س‑تيگّاس‑نس ا‑س‑تجّيم. غايد ءيزرين تجلام زوند ءولّي، ءيمّا غيلاد توورّيم‑د س‑دار‑ومكسا لّي‑يتگابالن ءولاون‑نّون. غمكان ءولا كونّينتي ا‑تيمغارين، ءيلّا فلّاونت ا‑تسفليدمت س‑يرگازن‑نّونت. اشكو ءيغ‑ور‑يري‑ورگاز اوال ن‑ربّي، را‑سرس‑يوورّي بلا‑ياس‑تنّيت يات لّيغ ا‑يتمناد مامنك ا‑تسكارت، اشكو را‑يژر مامنك ا‑يغوس‑وول‑نّم س‑لوقر ءيگّوتن. والاينّي ا‑ور‑يگ‑وفولكي‑نّونت افولكي ن‑يژري غ‑دار مدّن، زوند تالّامين ن‑وازّار نغد ءيكُلان ن‑وورغ نغد تيملسا غُلانين. والاينّي ءيخصّا ا‑يگ‑وفولكي‑نّونت افولكي ءينتلن ن‑وول ءيهنّان ءيعمّرن س‑لحنانت. ءور‑سار‑يضر‑وفولكي‑اد، ءيعزّو باهرا دار ربّي. اشكو غمكان ا‑ستّين كّانت‑تمغارين تيمومنين لّي‑ترجونين غ‑ربّي غايد ءيزرين. غمكان ا‑س‑ا‑سّفولكينت ءيخفاون‑نسنت ار‑سفليدنت س‑يرگازن‑نسنت. غمكان‑نّيت ا‑تگا سارا، ار‑تسفليد س‑يبراهيم ار‑اس‑تّيني «سيدي.» ءولا كونّينتي غيلاد، ءيستيس ن‑سارا ا‑تگامت، ءيغ‑ا‑تسكارمت افولكي بلا‑دا‑تّيكساضمت يات. غمكان ءولا كونّي ا‑يرگازن، ءيلّا فلّاون ا‑تسوينگيمّ غ‑تمغارين‑نّون، تزدغم ديدسنت بلا‑دا‑تتّوم ءيس‑ور‑باهرا‑دوسنت زوند كونّي، ار‑تنتي‑تّوقّارم اشكو وورتنت ءولا نتنتي ديدون لباراكا ن‑تودرت ءيدومن. سكارات غمكان باش ا‑ور‑دارون‑ييلي ما‑يتحصارن تيژولّا‑نّون ءي‑ربّي. ءيمّا غيلاد راد‑اون‑ينيغ، ا‑كولّو‑تگم يان غ‑ما‑تسوينگيمّ ءولا ما‑س‑ا‑تسّحسّوم، ار‑تّحوبّوم ءي‑نگراتون س‑تايري ن‑ايتماتن، ار‑دي‑تّادرم ءي‑يخف‑نّون ار‑تّحنّوم ءي‑نگراتون. ءيغ‑يلّا ماد‑اون‑يسكرن كرا يُخشنّ، اد‑اس‑ور‑ترارم س‑لخُشانت. ءيغ‑يلّا ما‑كُن‑يرگمن، اد‑اس‑ور‑ترارم س‑ترگّام، والاينّي ءينيات‑اس: «ا‑ك‑يبارك ربّي.» اشكو ءيغرا‑ياون‑د ربّي اد‑اون‑تيلي لباراكا. ءيتيارا: «وانّا ءيران ا‑يزّري تودرت‑نس س‑لفرح ءيژر ءوسّان لّخير، ءيلّا فلّاس ا‑يكّيس ما‑يُخشنّ زغ‑يلس‑نس، ءيكّيس تيكركاس زغ‑يمي‑نس. ءيلّا فلّاس ا‑يفل كولّو كرا ءيگان لخُشانت ار‑يسكار افولكي، ار‑يسيگّيل س‑سّلامت ار‑گيس‑يتازّال. اشكو سيديتنّغ ار‑يتگابال غويلّي‑ف‑يرضا، ار‑يسفليد ءي‑ماد‑اس‑تّينين. ءيمّا غويلّي سكارنين ما‑يُخشنّ، ار‑تن‑يتضاضّا.» مانوا را‑كُن‑يسّرفوفن ءيغ‑ترام ا‑تسكارم افولكي؟ والاينّي ءيغ‑يدّا ارد ترفوفنم ف‑سّيبت لّحقّ، هاتي ءيمباركين ا‑تگام. ا‑ور‑تّيكساضم يان ءولا‑دا‑تّاسيم تاغوفت، والاينّي گات لماسيح د‑سيديس ن‑وول‑نّون، توجادم غ‑كرايگاتّ تاساعت ا‑دي‑ترارم اوال ءي‑كولّو وانّا‑كُن‑يسقسان ف‑رّجا لّي‑گيگون‑يلّان. والاينّي ساولات ديدس س‑صّبر د‑لوقر ءولا س‑وول ءيغوسن زغ‑كولّو كرا ءيگان لعيب، باش اد‑تحشامن ءينوّاشن‑نّون ءيغ‑ا‑گيگون‑رگّمن ف‑وفولكي لّي‑تسكارم س‑يسم لّماسيح. اشكو يوف‑اون ا‑ترفوفنم ءيغ‑يرا ربّي ف‑سّيبت ن‑وفولكي لّي‑تسكارم، ءولا ترفوفنم ف‑سّيبت ن‑كرا تسكرم يُخشن. اشكو لماسيح، يات‑توال ا‑يمّوت ف‑سّيبت ن‑دّنوب، ءيمّت غوالّي ءيفولكين ف‑سّيبت ن‑ويلّي أُخشنّين، باش اد‑اغ‑د‑يرار ءي‑ربّي. نغان‑ت مدّن غ‑دّات‑نس، ءيسّدّر‑ت ربّي غ‑رّوح‑نس. ءيدّو ءيلمّا ياوي لخبار ءي‑لارواح تياوكرّافنين، ا‑تن‑يگان د‑ويلّي رورنين تيغوردين‑نسن س‑ربّي غ‑ووسّان لّي‑غ‑ديدسن‑يصبر باهرا. غ‑ووسّان‑ان ا‑غ‑يسكر نوح اناو، نجمن گيس كرا ن‑مدّن دروسنين زغ‑وامان، تام مدّن اد‑گان. مايلّي ءيجران غ‑ووسّان‑ان ءيرواس ءي‑ودوم غ‑وامان لّي‑س‑تنجمّ كونّي، ءورد س‑يريد ن‑يركان ن‑دّات‑نّون والاينّي ءيگا تاماتارت ن‑يس‑يوورّي ءيغوس‑وول‑نّون، تفكم ءيخف‑نّون ءي‑ربّي، تنجمّ ف‑سّيبت ن‑ما‑د‑ينكر ياسوع لماسيح زغ‑لموت. نتّان ا‑يكشمن ءيلمّا س‑يگنّا، ءيسكيوس غيلاد ف‑وفاسي ن‑ربّي، ءيلين كولّو لمالايكا د‑سّولطات د‑لقوّات ن‑يگنوان غ‑دّو‑وفوس‑نس. مايان ا‑ف‑راد‑اون‑ينيغ، لّيغ ءيرفوفن لماسيح غ‑دّات‑نس، ءيلّا فلّاون ا‑تبكيسم ا‑ترفوفنم ءولا كونّي. اشكو وانّا ءيرفوفنّ غ‑دّات‑نس ءور‑سول‑ا‑يتلهو س‑دّنوب. ءور‑سول‑ا‑يزّراي ءوسّان‑نس غ‑ما‑يتّيري بنادم ءي‑يخف‑نس، والاينّي ار‑يزّراي ماد‑اس‑يقامان غ‑دّونيت‑اد غ‑ما‑يرضان ربّي. غايد ءيزرين تكّام‑تّين ار‑تسكارم ما‑يعزّان دار غويلّي ءور‑سّينّين ربّي، ءيمّا غيلاد يوودا‑كُن غ‑ما‑يُخشنّ. هان نتني ار‑تفسادن ار‑تشتهون، ار‑سّنوفولن ءيخف‑نسن س‑تيسّي، ار‑تمونون ف‑لخُشانت، ار‑سكارن لعيب ءي‑نگراتسن، ار‑تعبادن ءيلاهات ن‑دّونيت‑اد س‑تجلخيت‑نسن. ار‑گيگون‑تعجّابن ار‑كُن‑رگّمن، اشكو ءور‑ا‑تّيريم ا‑ديدسن‑تّمونوم ف‑تيلّاي‑نسن. والاينّي ءيقّان‑تن‑د لحساب غ‑دار غوالّي يوجادن ا‑يوت لحوكم ف‑ويلّي دّرنين ءولا غويلّي مّوتنين. مايان ا‑ف‑يدّا لماسيح ا‑ياوي لخبار ءيفولكين ءي‑ويلّي مّوتنين ءولا نتني لّي‑ف‑يضر لحوكم لّموت ن‑دّات غمكلّي ءيطّار ف‑كولّو مدّن، باش اد‑وورّين دّرن س‑تودرت ن‑رّوح غمكلّي ءيدّر ربّي. هاتي ياكمور‑د ءيسيگُّرا ن‑كولّو ما‑يلّان. رارات لعاقل تغويم غ‑يخف‑نّون باش ا‑تّژالّام ار‑تضالابم ربّي. والاينّي تاغاوسا ءيهيّان ا‑ستّ‑يگان، ا‑تّحنّوم ءي‑نگراتون، اشكو لحنانت ار‑تسّنتال كيگان د‑دّنوب. سّمرحبات س‑ينگراتون غ‑تگُمّا‑نّون بلا‑دا‑تّنگموگم. ءيلّا ف‑كرايگاتّ يان ا‑يسكار س‑توافكا ن‑رّوح نّا‑ياس‑يفكا ربّي، ار‑سرس‑يتعاوان وييّاض س‑نّييت ن‑وول‑نس، باش ا‑كولّو‑تّمعاوانم ءي‑نگراتون س‑لباراكات ن‑ربّي لّي‑گّوتنين. وانّا ءيساوالن، ءيلّا فلّاس ا‑يساوال س‑ماد‑اس‑يمالا ربّي. وانّا ءيتعاوانّ، ءيلّا فلّاس ا‑يتعاوان وييّاض س‑تژضّارت لّي‑اس‑ياكّا ربّي. غمكاد ا‑س‑راد‑كولّو‑الغن مدّن ربّي ف‑ما‑تسكارم س‑يسم ن‑ياسوع لماسيح. نتّان ا‑مي‑يلّا لمجد د‑لقوّا غيلاد ءولا كولّو مايد‑د‑يفتان، امين. واي‑ايتما عزّانين، ا‑ور‑تّعجّابم غ‑لعافيت ن‑ترفوفنت لّي‑كُن‑يتارمن، زوند ءيغ‑اون‑يجرا كرا ءيگان لجديد. والاينّي فرحات لّيغ تكشمّ د‑لماسيح غ‑ترفوفنت، باش ا‑تفرحم س‑وگُّار غاكود لّيغ را‑د‑يبان لمجد‑نس ءي‑كولّو مدّن. ءيمباركين ا‑تگام ءيغ‑ا‑كُن‑رگّمن ف‑سّيبت ن‑ما‑تگام وين لماسيح، اشكو ءيگّوز‑د فلّاون رّوح لّمجد لّي‑يگان رّوح ن‑ربّي. والاينّي ءيخصّا ا‑ور‑يرفوفن يان گيگون ف‑سّيبت ن‑ما‑ينغا نغد يوكُر نغد ءيفّوغ زغ‑لقانون نغد ءيكشم ما‑يگان وين وييّاض. والاينّي ءيغ‑يرفوفن ف‑سّيبت ن‑ما‑يگا اماسيحي، ءيلّا فلّاس ا‑ور‑يحشم، والاينّي ا‑يالغ ربّي اشكو مدّن ار‑اس‑تگّان ءيسم لّي‑يگان وين لماسيح. هاتي غيلاد ءيلكم‑د‑وزمز لّي‑غ‑را‑يوت ربّي لحوكم، را‑ت‑يوت زوار ف‑ايت‑تگمّي‑نس. والاينّي ءيغ‑سرنّغ‑يبدا نكُّني، ما‑س‑را‑تگُّرو ءي‑ويلّي اگُينين لخبار ءيفولكين ن‑ربّي؟ غمكلّي ءيتياران: «ءيغ‑يشقا ا‑ينجم يان ءيفولكين ما‑را‑يجرو ءي‑يان ءيرورن تيغوردين‑نس س‑ربّي ءولا يان ءيسالان دّنوب؟» ماياد ا‑ف‑راد‑ينيغ ءي‑كولّو وينّا رفوفنّين ف‑ما‑يرا ربّي: فكات ءيخفاون‑نّون غ‑وفوس ن‑والّي‑كُن‑يخلقن لّي‑بدّا‑يزگان غ‑واوال‑نس، تزايدم ار‑تسكارم افولكي. راد‑ضالبغ ءيمغارن غ‑گراتون، نكّي‑اد ءيگان امغار زوند كونّي، گغ ءينيگي ف‑ورفوفن لّماسيح، طّافغ تاغامت غ‑لمجد لّي‑را‑د‑يبان. ضالبغ‑كُن ا‑تكسم تاوروت ن‑ربّي لّي‑يفل غ‑گر ءيفاسّن‑نّون. تگابلم‑تّ ءورد س‑بزّز والاينّي س‑لفرح غمكلّي ءيرا ربّي، ءورد باش ا‑تامژم كرا ءي‑يخف‑نّون والاينّي س‑نّييت ءيصفان. ا‑ور‑تسّيمغورم ءيخف‑نّون ف‑ويلّي‑اون‑يفكا ربّي، والاينّي مالات ءي‑تووروت افولكي لّي‑س‑ا‑تسكارم باش اد‑سكارن ءولا نتني غمكان. غاكود لّيغ را‑د‑ياشك‑ومكسا ءيمقّورن راد‑اون‑يفك تّاج لّمجد لّي‑ور‑را‑سار‑يمدو. غمكان ءولا كونّي ا‑يعيّالن، ءيلّا فلّاون ا‑تسفليدم س‑يمغارن‑نّون. بكيسات كولّوكن س‑تبانّكا ن‑صّبر باش ا‑تّخدامّ ءي‑نگراتون. اشكو ءيتيارا: «ربّي ار‑يتضاضّا وانّا ءيسّيمغورن ءيخف‑نس، ار‑يتباراك وانّا ءيژّيمژاين ءيخف‑نس.» كنوات غ‑دّو‑وفوس ءيتجهّدن ن‑ربّي باش ا‑كُن‑يالّ غ‑وزمز نّا‑يرا. لوحات‑ن كولّو تيغوفيوين‑نّون ف‑ربّي اشكو ار‑گيگون‑يتهلّا. امژات غ‑يخف‑نّون ترارم لعاقل، اشكو ار‑يتلّي‑ونوّاش‑نّون ءيبليس زوند ءيزم، ار‑يندّر ار‑يسيگّيل س‑ما‑يقُّاي. ضاضّات ءيبليس تزگام غ‑ليمان‑نّون، تيسّانم ءيزد ايتماتون غ‑دّونيت كولّوتّ ار‑زراين غ‑ترفوفنت زوند كونّي. والاينّي ربّي لّي‑بدّا‑يران اد‑اغ‑يبارك، ءيغرا‑ياون‑د ا‑تكشمّ س‑لمجد‑نس ءيدومن غ‑تامونت لّماسيح. تيگيرا ن‑ما‑ترفوفنم يان ءيميكّ، را‑كُن‑ياوي س‑سّلامت ءيكمّلن ءيسّدوس‑كُن ءيزّگا‑كُن ءيسّبيدّ‑كُن ف‑لّساس ءيصحان. نتّان ا‑مي‑تلّا لقوّا غيلاد ءولا كولّو مايد‑د‑يفتان، امين. تابرات‑اد ءيگزّولن ءوريغ‑اون‑تّ‑ين ف‑وفوس ن‑سيلوانوس لّي‑داري‑يگان گما ءيفولكين ءيزگان. اراغ‑تّ‑ين باش ا‑كُن‑زّعامغ، ملغ‑اون ءيزد غمكاد ا‑تگا لباراكا ن‑ربّي س‑لحقّ. زگايات غ‑لباراكا‑ياد. ار‑ن‑فلّاون‑تسلّامن ايتماتون غ‑تمدينت ن‑بابيل، ءيژلي‑تن ربّي غمكلّي‑كُن‑يژلي كونّي. ار‑ن‑فلّاون‑يتسلّام ءيوي مارقُس ءولا نتّا. نسالّامات ءي‑نگراتون س‑ونسالّام ن‑تاگُمات. اد‑اون‑تيلي سّلامت كولّوكن كونّي لّي‑يگان وين لماسيح. زغ‑سيمعان بطرُس اخدّام د‑ورقّاس ن‑ياسوع لماسيح. ءي‑ويلّي مي ءيتياوفكا ليمان ءيعزّان لّي‑اغ‑د‑يتياوفكان ءولا نكُّني س‑وفولكي ن‑ربّي‑نّغ د‑ونجّام‑نّغ ياسوع لماسيح. ا‑فلّاون‑تيگات لباراكا د‑سّلامت غيلاد غ‑تسّنم ربّي ءولا سيديتنّغ ياسوع. س‑تحكيمت‑نس ءيتجهّدن ا‑س‑اغ‑د‑يفكا ربّي كولّو ما‑نحتاجّا باش ا‑ندّر غ‑دّونيت ار‑ت‑نترضو. اشكو نوورّي نسّن غوالّي‑اغ‑د‑يغران ا‑نكشم س‑لمجد‑نس د‑وفولكي‑نس. د‑غمكاد ا‑س‑اغ‑لّانت لباراكات هيّانين عزّانين لّي‑ف‑ينّا راد‑اغ‑تنت‑يفك، باش ا‑توورّيم تگم غمكلّي ءيگا ربّي، تنجمّ زغ‑كولّو ما‑يتاوين غ‑دّونيت س‑لهالاك ف‑سّيبت ن‑مايلّي ءيتّيري بنادم ءي‑يخف‑نس. ف‑مايان ا‑ف‑كُن‑د‑يقّان ا‑ن‑تگم تيقّي ا‑تزايدم ف‑ليمان‑نّون ا‑باهرا‑تفولكيم، تزايدم ف‑وفولكي ا‑باهرا‑تيسّانم ربّي، تزايدم ف‑تواسّنا ن‑ربّي ا‑بدّا‑تغويم غ‑يخف‑نّون، تزايدم ف‑مايان ا‑باهرا‑تزگام غ‑لحقّ، تزايدم ف‑مايان ا‑بدّا‑ترضوم ربّي، تزايدم ف‑مايان ا‑باهرا‑تّحوبّوم مدّن، تزايدم ف‑مايان ا‑بدّا‑تحنّوم غ‑وييّاض. ءيغ‑ا‑گيگون‑تّيگاتنت كولّو‑تغاوسيوين‑اد، را‑تيژضارم ءي‑كيگان ار‑دي‑تّاويم لغلّت ءيگّوتن غيلاد غ‑تسّنم سيديتنّغ ياسوع لماسيح. ءيمّا وانّا ءور‑دار تيغاوسيوين‑اد، هاتي ءيبوكض ءور‑ا‑يتّيسفيو يات، ءيتّو ءيس‑ت‑يسّغوس لماسيح زغ‑دّنوب لّي‑يسكر غايد ءيزرين. واي‑ايتما، ف‑مايان ا‑ف‑راد‑اون‑ينيغ، گات‑ن تيقّي‑نّون س‑وگُّار ا‑باهرا‑تزگام غ‑وغاراس لّي‑س‑اون‑د‑يغرا ربّي ءيژلي‑كُن‑د سرس. اشكو ءيغ‑ا‑تسكارم س‑غمكان ءور‑را‑سار‑تجلوم، هاتي را‑تكشمّ س‑لفرح ءيگّوتن س‑تگلديت ءيدومن ن‑ونجّام سيديتنّغ ياسوع لماسيح. ريغ‑بدّا ا‑ياون‑د‑سّكتايغ تيغاوسيوين‑اد، واخّا‑تنتي‑تسّنم تزگام غ‑لحقّ لّي‑مي‑تسفلدم. اشكو سوانگمغ ءيس‑يشوا ا‑بدّا‑سّرغاغ ما‑يلّان غ‑يخف‑نّون كولّو ماد‑سولغ غ‑وخيّام‑اد لّي‑يگان دّات‑ينو. اشكو سّنغ يان ءيميكّ راد‑خووغ اخيّام‑اد. ماياد، ءيملا‑يّي‑ت‑يد سيديتنّغ ياسوع لماسيح، والاينّي را‑ن‑تگّاغ تيقّي‑نو باش ا‑تيژضارم ا‑بدّا‑تسوينگيمّ غ‑تغاوسيوين‑اد غاكود لّيغ ءور‑را‑سول‑ديدون‑يليغ. ءور‑ا‑نبنّو ف‑كرا ن‑تحاجيّين تياوسكارنين س‑لعاقل ن‑بنادم غاكود لّيغ‑اون‑نساول ف‑مامنك ا‑د‑يوشكا سيديتنّغ ياسوع لماسيح س‑تحكيمت ءيتجهّدن. اشكو نكُّني نژرا تيموغرا‑نس، نيلي ديدس ف‑وورير امژلاي، نسفلد ءي‑واوال زغ‑يگنوان لّيغ‑د‑يسّبايّن ربّي باباتنّغ لمجد لّماسيح د‑لهيبت‑نس. ءيساول‑د‑واوال زغ‑لمجد ن‑تاتّويت ءينّا: «غواد ءيگا ءيوي ءيعزّان. فرحغ سرس باهرا.» مايان ا‑دارنّغ‑يزّگان ءيواليون لّانبيا س‑وگُّار. افولكي ا‑را‑تسكارم ءيغ‑ا‑ستّي‑تّاويم غ‑ماد‑نّان نتني، اشكو ءيگا‑واوال‑نسن زوند تيفاوت لّقنديل، ار‑يتّيسفيو غ‑تيلّاس ارد ءيفاو‑واسّ ءيغلي‑د ءيتري ن‑صّباح غ‑وولاون‑نّون. والاينّي تاغاوسا ءيهيّان ا‑ستّ‑يگان، ا‑تيسّانم ءيس‑ور‑يژضار يان س‑يخف‑نس ا‑يفهم لمعنا ن‑ماد‑نّان لانبيا غ‑وارّاتن ن‑ربّي. اشكو ءور‑د‑يوشكي كرا ن‑واوال ن‑ربّي زغ‑لعاقل ن‑بنادم، والاينّي ار‑ساوالن مدّن‑ان س‑يواليون لّي‑اسن‑د‑يمالا ربّي غمكلّي‑تن‑يتگوّاد رّوح لقودوس. غايد ءيزرين كّان‑تّين كرا ن‑مدّن غ‑گر ايت‑ربّي ار‑تّينين ءيزد لانبيا اد‑گان والاينّي ار‑سّكيركيسن. غمكان ا‑س‑راد‑داغ‑يلين ءيمسلمدن ايت‑تكركاس غ‑دارون. س‑تنتلا ا‑س‑را‑ن‑شّكشامن ءيسوينگيمن ءور‑أُغژانّين ار‑تّاوين س‑لهالاك. راد‑تراران تيغوردين‑نسن س‑سيديتسن ءيتجهّدن لّي‑تن‑يفران اد‑گن وينس. راد‑زّوگزن لهالاك ف‑يخف‑نسن غ‑يات‑تاساعت. ءيگّوت ما‑را‑يتامژ اغاراس‑نسن لّفساد. ف‑سّيبت‑نسن ا‑ف‑راد‑رگّمن مدّن غ‑وغاراس لّحقّ. را‑كُن‑شتّان س‑يواليون خوانين، اشكو ار‑بدّا‑تّيرين ما‑يگان وين وييّاض. والاينّي زغ‑يسيزوار ا‑گيسن‑يتمناد غوالّي را‑فلّاسن‑يوت لحوكم. ءور‑ا‑يگان غوالّي را‑تن‑يهلك. اشكو ءور‑يصامح ربّي ءي‑لمالايكا لّي‑فّوغنين زغ‑واوال‑نس، والاينّي ءيلوح‑تن‑ين غ‑تدروت، ءيدحي‑تن‑ين س‑توگّوگت ن‑تيلّاس ا‑غين‑تياماژن ار اسّ لّحساب. ءور‑يصامح ربّي ءي‑يسيزوار ن‑دّونيت، والاينّي يولّ‑د امان ايلّيغ دلن كولّو دّونيت ن‑ويلّي سرس رورنين تيغوردين‑نسن. ءور‑زگيسن‑يجّنجم ابلا نوح لّي‑يتبرّاحن س‑مايلّي ءيرضان ربّي، نتّا د‑سّا ن‑مدّن ياضني. يوت ءيلمّا ربّي لحوكم ف‑تمدينين ن‑سادوم د‑عامورا، ءيهلك‑تنت س‑لعافيت، باش اد‑ژرن كولّو ويلّي سرس رورنين تيغوردين ما‑يجران ءي‑تمدينين‑ان، ءيسّانّ ما‑راد‑اسن‑يجرو ءولا نتني. والاينّي ءيجّنجم لوط لّي‑يگان ارگاز ءيفولكين، اشكو طيّر‑اس ءي‑لوط باهرا ف‑مامنك اد‑فسادن مدّن‑ان أُخشنّين. ءيزدغ‑ورگاز‑ان ءيفولكين غ‑گراتسن. اسّ ف‑واسّ ار‑تي‑تّاغ‑تگوضي غ‑وول‑نس ءيفولكين غاكود لّيغ ا‑يتمناد ار‑يسفليد ءي‑يسكّيرن‑نسن أُخشنّين. كولّو مايان ءيملا‑ياغ ءيس‑يسّن سيديتنّغ مامنك ا‑يجّنجام غويلّي توقّارنين ربّي زغ‑تنوكموت نّا‑تن‑يتارمن، ييسّان مامنك ا‑يتحضو غويلّي أُخشنّين ار اسّ لّحساب لّي‑غ‑را‑فلّاسن‑يوت لعقوبيت لّي‑اسن‑يگان. را‑ستّ‑يوت س‑وگُّار ف‑ويلّي سكارنين س‑شّهوات لّي‑باهرا‑ركانين حگرن غوالّي فلّاسن ءيحكامن. ءيمّا ءيمسلمدن‑ان شقان باهرا. ار‑زّعامن ءيخفاون‑نسن، ار‑رگّمن ءولا غ‑ينمغورن ن‑يگنوان بلا‑دا‑تيكساضن. واخّا‑تن‑وگُرن لمالايكا تجهّدن فلّاسن باهرا، ءور‑ا‑رگّمن نتني غ‑مدّن‑ان غ‑دار ربّي. والاينّي ءيمسلمدن‑ان ار‑رگّمن غ‑ما‑ور‑فهيمن، گن زوند لوحوش شقانين لّي‑سكارنين والاينّي ءور‑سّينّ ماخ ايلّيغ ا‑سكارن، ار‑تلالن غير باش ا‑تياماژن تياوهلاكن. ءولا مدّن‑ان را‑تياوهلاكن زوند لوحوش. راد‑اسن‑د‑يرار ربّي ارفوفن ف‑ورفوفن لّي‑سكارن ءي‑وييّاض. نتني ءيعجب‑تن اد‑سكارن ما‑يتّيري ءيخف‑نسن ءولا غ‑وزال غ‑لگدّام ن‑مدّن. ءيركان د‑لعار اد‑گان غ‑دارون، ار‑تفراحن س‑تيلّاي‑نسن لّيغ ا‑ديدون‑تمونون ف‑يمنسيون‑نّون. ار‑بدّا‑تّيرين اد‑ژرن لفساد، ءور‑ا‑تشباعن زغ‑دّنوب، ار‑ن‑لدّين غويلّي ءور‑زگانين، ميورن اد‑سّمونون ماد‑ران ءي‑يخف‑نسن. تاروا ن‑خزيت اد‑گان. فّوغن اغاراس لّي‑ينمن، مونّ د‑وغاراس ن‑بالعام يوس ن‑باعور لّي‑دار ءيعزّا ا‑يامژ ءيقاريدن س‑ما‑يُخشنّ. نتّا، ءيژي ديدس ءولا ءوغيّول‑نس ف‑دّنوب لّي‑يسكر. واخّا ءور‑ا‑ساوالنت لبهايم، تساول سرس لبهيمت‑ان س‑واوال ن‑بنادم، باش ا‑تحصار نّابي‑ان غ‑ونوفل‑نس. ءيمّا مدّن‑ان، زوند لعيون قّورنين اد‑گان، ءولا زوند ءيمدلا ءيدحي‑تن‑واضو ءيتجهّدن. ءيسكر‑اسن ربّي ادغار غ‑تيلّاس اگّوگنين. اشكو ار‑سّفورّوگن س‑يواليون خوانين. س‑شّهوات أُخشنّين ا‑س‑ا‑ن‑لدّين مدّن لّي‑بحرا‑د‑وورّينين زغ‑گر ويلّي جلانين. ار‑تّينين راد‑اسن‑فسّين زغ‑يسكراف، ءيمّا نتني سول گان ءيسمگان ءي‑لفساد. اشكو كولّو وانّا ءينرا كرا، ءيگا ءيسمگ ءي‑غايلّي‑ت‑ينران. ءيغ‑د‑نجمن مدّن زغ‑يركان ن‑دّونيت س‑تواسّنا ن‑ونجّام سيديتنّغ ياسوع لماسيح والاينّي وورّين تيگيرا تياسّاسن‑داغ س‑يركان‑ان ايلّيغ‑تن‑نران، هاتي يوورّي ءيسيگُّرا ن‑مدّن‑ان يُخشن ءوگُّار ن‑يسيزوار‑نسن. يوف‑اسن مراد ءيس‑ور‑اكُّ‑سّينّ اغاراس ن‑وفولكي، ءولا ارد‑ت‑يسّانّ رارن ءيلمّا تيغوردين س‑واوال لّي‑ف‑تن‑يوصّا ربّي. سكرن نتني زوند لمعنا‑ياد ءيلّان: يوضا‑ويدي س‑يراران‑نس، توورّي تيلفت لّي‑يارودن ا‑ترورض غ‑تالّاغت. واي‑ايتما عزّانين، تابرات‑اد تگا تيس سنات‑تبراتين لّي‑اون‑ين‑وريغ. سّكتيغ‑اون‑د سرسنت تيغاوسيوين‑اد باش ا‑تسوينگيمّ غ‑ما‑يُغژانّ. ريغ ا‑دي‑تكتيم ءيواليون لّي‑س‑نّان لانبيا ن‑ربّي غايد ءيزرين، تكتيم‑د المّود لّي‑ف‑كُن‑يوصّا‑ونجّام سيديتنّغ ف‑يمي ن‑يرقّاسن‑نّون. والاينّي تاغاوسا ءيهيّان ا‑ستّ‑يگان، ا‑تيسّانم ءيس‑راد‑د‑اشكين كرا ن‑يطنّاژن غ‑ووسّان‑اد گُّرانين ار‑باهرا‑تطناژن ار‑سكارن ف‑كولّو ما‑تّيرين ءي‑يخف‑نسن ار‑تّينين: «مانزا سيديتون؟ ءيس‑ور‑ينّي را‑د‑ياشك؟ ژرات، منشك اياد س‑زرين ءيمزوورا‑نّغ، والاينّي سول ءيقاما كولّو غمكلّي ءيگا زغ‑يسيزوار، غايكلّي تّياوخلاق دّونيت سول س‑غيلاد.» ءيمّا نتني ار‑تّيرين اد‑تّون ءيزد س‑واوال‑نس ا‑س‑يخلق ربّي ءيگنوان غ‑يسيزوار، ءيسكر ءيكالّن غ‑گر‑وامان ءيسكر‑تن س‑وامان. تدل ءيلمّا دّونيت ن‑ووسّان‑ان س‑وامان، تّياوهلاك كولّوتّ. ءيمّا غيلاد س‑واوال‑نس ا‑س‑يحضا ربّي ءيگنوان د‑واكال، باش ا‑تياوهلاكن س‑لعافيت غ‑واسّ لّحساب لّي‑غ‑را‑يهلك غويلّي سرس رورنين تيغوردين. واي‑ايتما عزّانين، ا‑ور‑تتّوم تاغاوسا‑ياد: ءيگا يان‑واسّ دار سيديتنّغ زوند الف ن‑وسگُّاس، ءيگ الف ن‑وسگُّاس زوند يان‑واسّ. ءور‑يماطل سيديتنّغ ا‑يسكر مايلّي‑س‑ينّا، واخّا دا‑تّينين كرا ن‑مدّن ءيماطل. اشكو ار‑ديدون‑يتصبار. ءور‑يري نتّا ا‑يتياوهلاك يان، والاينّي ءيرا كولّو مدّن اد‑وورّين فلن ءيسكّيرن‑نسن أُخشنّين. والاينّي اسّ ن‑سيديتنّغ را‑د‑ياشك زوند امخّار. راد‑يتّين ءيگنوان س‑يجّيج ءيتجهّدن، ءيفنو كولّو ما‑گيسن‑يلّان س‑لعافيت، تجدر اكال ءولا كولّو ما‑گيس‑سكرن مدّن. را‑يتياوهلاك كولّو ما‑يلّان. ف‑مايان ا‑ف‑را‑كُن‑سقساغ: مان مدّن زغ‑را‑تگم؟ ءيس‑ور‑را‑تّيريم ا‑تسكارم افولكي ار‑تّرضوم ربّي غيلاد غ‑ا‑تّقلم س‑واسّ ن‑ربّي، ار‑ت‑يد‑تسّاكمورم؟ غاسّان ا‑را‑تياوهلاكن ءيگنوان س‑لعافيت، ءيفسي كولّو ما‑يلّان س‑ترغي ءيگّوتن. ءيمّا نكُّني ار‑نتقل س‑مايلّي‑س‑اغ‑ينّا ربّي، ار‑ن‑نترجو ءيگنّا لّجديد د‑واكال لّجديد، عمّرن س‑كولّو ما‑يرضان ربّي. ءيمّا غيلاد غ‑ا‑تّقلم س‑ماياد، اي‑ايتما عزّانين، گات‑ن تيقّي‑نّون ا‑بدّا‑تيلي سّلامت غ‑گراتون د‑ربّي، بلا گيگون ءيلّا كرا لّعيب ءولا كرا يُخشنّ غ‑وولاون‑نّون. سوينگيمات ف‑مامنك ا‑ديدون‑يصبر سيديتنّغ باش ا‑توورّيم تنجمّ، غمكلّي‑اون‑ين‑يورا ءولا گماتنّغ ءيعزّان بولُس س‑تحكيمت لّي‑اس‑يفكا ربّي. غمكاد ا‑يتّيني ف‑تغاوسيوين‑اد غ‑كولّو تيبراتين‑نس. كرا غ‑ما‑يتارا، ءور‑يرخي ا‑ت‑نفهم، ءيمّا كرا ن‑يبوجاديين د‑مدّن فسّوسنين ار‑سّلولّين ءيواليون‑نس زوند ماد‑سّلولّين ءيگزمان ياضني غ‑وارّاتن ن‑ربّي. ار‑دي‑تراران لهالاك ف‑يخفاون‑نسن. ءيمّا كونّي اي‑ايتما عزّانين، لّيغ تسّنم كولّو ماياد ءور‑تا‑يجري، رارات لعاقل ا‑كُن‑ور‑يلدي كرا ءيجلان ءيفّوغن زغ‑واوال ن‑ربّي ءولا تضرم زغ‑لامان‑اد غ‑تلّام. زايدات ار‑تّيمغورم غ‑لباراكا د‑تواسّنا ن‑ونجّام سيديتنّغ ياسوع لماسيح. نتّان ا‑بدّا‑نتالغ غيلاد ءولا كولّو مايد‑د‑يفتان. امين. غوالّي ءيلّان زغ‑يسيزوار، نسفلد‑اس نژر‑ت نسّماقّل گيس نگّر‑اس. ءيگا نتّان اوال ن‑تودرت. تبان‑د تودرت‑ان ءي‑مدّن، نژر‑تّ نكُّني، نگ فلّاس ءيناگان. ناوي‑اون‑ين لخبار ف‑والّي ءيگان تودرت ءيدومن، ءيكّا‑تّين ءيلّا غ‑دار ربّي باباتنّغ ءيبان‑اغ‑د ءيلمّا. ناوي‑اون‑ين لخبار ف‑ما‑نژرا ءولا ما‑مي‑نسفلد، باش ا‑تكشمّ ءولا كونّي غ‑تامونت‑اد دارنّغ ءيلّان. اشكو تلّا‑ياغ غيلاد تامونت د‑ربّي باباتنّغ د‑يوس ياسوع لماسيح. كولّو ماياد، نورا‑ياون‑ت‑ين باش ا‑كولّو‑نفرح س‑لفرح ءيگّوتن. غمكاد ا‑يگا لخبار لّي‑مي‑دارس‑نسفلد ناوي‑اون‑ت‑ين: ربّي ءيگا تيفاوت، ءور‑اكّ‑گيس‑لّينت تيلّاس. ءيغ‑ننّا «تلّا دارنّغ تامونت د‑ربّي» والاينّي ار‑سول‑نتّيدو غ‑تيلّاس، هاتي نسّكاركس ءور‑ا‑نسكار س‑لحقّ. والاينّي ءيغ‑ا‑نتّيدو غ‑تيفاوت غمكلّي ءيلّا نتّا غ‑تيفاوت، تلّا دارنّغ تامونت ءي‑نگراتنّغ، ار‑اغ‑سّغوسن ءيدامّن ن‑ياسوع يوس ن‑ربّي زغ‑كولّو دّنوب نّا‑گينّغ‑يلّان. ءيغ‑ننّا «ءور‑ا‑نسكار دّنوب،» هاتي نسّكاركس ف‑يخف‑نّغ، ءور‑گينّغ لحقّ. والاينّي ءيغ‑ا‑نتقرّا س‑دّنوب‑نّغ، را‑يسّافو اوال‑نس ءيزّگا لحقّ ءيسّيتّي فلّانّغ دّنوب‑نّغ ءيسّغوس‑اغ زغ‑كولّو ما‑گينّغ‑يُخشنّ. والاينّي ءيغ‑ننّا «ءور‑نسكير دّنوب،» هاتي نگا ربّي د‑بو‑تكركاس، ءور‑گينّغ‑يزگا‑واوال‑نس. وا‑تاروا‑نو عزّانين، ءوريغ‑اون‑ين ماياد باش ا‑ور‑تسكرم دّنوب. والاينّي ءيغ‑يدّا كرا ن‑يان گيگون ارد ءيسكر دّنوب، ءيلّا‑ياغ سول يان‑ديدنّغ‑يبيدّن غ‑دار ربّي باباتنّغ، ا‑ت‑يگان د‑ياسوع لماسيح لّي‑غ‑يلّا‑وفولكي ءيكمّلن غ‑يژري ن‑ربّي. ءيمّوت نتّان باش اد‑اغ‑يفرو زغ‑دّنوب‑نّغ، ءورد غير دّنوب‑نّغ نكُّني والاينّي دّنوب ن‑دّونيت كولّوتّ. غمكاد ا‑س‑را‑نيسّان ءيس‑دارنّغ تاواسّنا ن‑ربّي: اشكو ءيبان گينّغ ءيس‑ا‑نسكار س‑مايلّي‑ف‑اغ‑يوصّا. يان ءينّان «سّنغ ربّي» بلا‑دا‑يسكار س‑لوصيّات‑نس، هاتي ار‑يسّكيركيس ءور‑گيس لحقّ. ءيمّا كولّو وانّا ءيسكارن س‑واوال ن‑ربّي، هاتي تووفا گيس لحنانت ن‑ربّي. غمكاد ا‑س‑را‑نيسّان ءيس‑نگا وينس: اشكو وانّا ءيتّينين ءيس‑يگا وين لماسيح، ءيقّان‑ت‑يد ا‑يسكار غمكلّي ءيسكار لماسيح. واي‑ايتما عزّانين، ءورد كرا لّوصيت لّجديد اياد‑اون‑ين‑وريغ والاينّي لوصيت تاقديمت. تگ ختالّي‑ف‑كُن‑يوصّا ربّي غايد ءيزرين، تيلي دارون زغ‑يسيزوار. والاينّي لوصيت‑اد‑اون‑ين‑وريغ تگا تين لجديد، ءيبان ءيس‑تگا لحقّ غ‑لماسيح ءولا گيگون كونّي. اشكو ار‑زراينت تيلّاس ار‑دي‑تّيسفيو تيفاوت لّحقّ. وانّا ءينّان ءيلّا غ‑تيفاوت والاينّي سول ا‑يتكرهو گماس، هاتين سول ءيلّا غ‑تيلّاس. ءيمّا وانّا ءيتحنّون غ‑گماس، ءيلّا غ‑تيفاوت، ءور‑گيس كرا لّعيب. والاينّي يان ءيكورهان گماس، سول ءيلّا غ‑تيلّاس ار‑يتّيدو غ‑تيلّاس. ءور‑يسّين مانيس ا‑يتّيدو اشكو سّبوكضنت‑ت تيلّاس. ءوريغ‑اون‑ين ا‑تاروا عزّانين، اشكو ربّي ءيسّيتّي فلّاون دّنوب‑نّون ف‑يسم لّماسيح. اراغ‑اون‑ين ا‑يد‑باباتسن، اشكو تسّنم غوالّي ءيلّان زغ‑يسيزوار. اراغ‑اون‑ين ا‑يعيّالن، اشكو تنرام ءيبليس. اراغ‑اون‑ين ا‑تاروا، اشكو تسّنم باباتنّغ. اراغ‑اون‑ين ا‑يد‑باباتسن، اشكو تسّنم غوالّي ءيلّان زغ‑يسيزوار. اراغ‑اون‑ين ا‑يعيّالن، اشكو تدوسم ءيزگا‑گيگون‑واوال ن‑ربّي تنروم ءيبليس. ا‑ور‑تّيريم دّونيت ءولا كرا ءيلّان غ‑دّونيت. ءيغ‑ا‑يتّيري يان دّونيت، ءور‑گيس‑تلّي تايري ن‑ربّي باباتنّغ. اشكو كولّو ما‑يلّان غ‑دّونيت (ءيگا غايلّي تّيري دّات، ءولا غايلّي تّيري تيط، ءولا غايلّي‑س‑ا‑يسّيمغور بنادم ءيخف‑نس)، ءورد باباتنّغ ا‑د‑يكّا والاينّي ءيكّا‑د دّونيت. ار‑تزراي دّونيت ءولا كولّو ما‑گيس‑تّيرين مدّن، ءيمّا يان ءيسكارن س‑ما‑يرا ربّي، را‑يدّر تودرت ءيدومن. وا‑تاروا عزّانين، تاساعت ءيگُّران اياد. تسفلدم كونّي ف‑ونوّاش لّماسيح لّي‑را‑د‑ياشك. هاتي غيلاد ءوشكان‑د كيگان د‑ينوّاشن لّماسيح. غايان ا‑ف‑نسّن ءيزد تاساعت ءيگُّران ايد ءيلكمن. فّوغن نتني زغ‑دارنّغ والاينّي ءورد زغ‑گينّغ ا‑زغ‑گان. مراد ءيس‑زگينّغ‑گان ءيكون ديدنّغ قامان، والاينّي نسّن كولّوتن ءور‑گين زغ‑گينّغ، اشكو فّوغن زغ‑دارنّغ. كونّي تسّنم لحقّ كولّوكن، اشكو ءيلّا گيگون رّوح لّي‑اون‑يفكا غوالّي ءيگان امژلاي ن‑ربّي. ماياد ا‑ف‑اون‑ين‑وريغ، اشكو تسّنم لحقّ، ءورد زوند ءيغ‑ور‑تي‑تسّينم، اشكو ءور‑جّو‑د‑وشكينت كرا ن‑تكركاس زغ‑لحقّ. مانوا ءيگان بو‑تكركاس؟ ءيگا‑ت وانّا ءينّان «ياسوع ءور‑يگي لماسيح ن‑ربّي.» يان ءينّان غمكان، ءيگا انوّاش لّماسيح، ءيرار تيغوردين‑نس س‑ربّي باباتنّغ ءولا س‑يوس. اشكو يان ءيرورن تيغوردين‑نس س‑يوس ن‑ربّي، ءيرور‑تّ ءولا س‑ربّي باباتنّغ. ءيمّا يان ءيتّيرين يوس ن‑ربّي، ار‑يتّيري ءولا ربّي باباتنّغ. زگايات‑بدّا غ‑مايلّي مي تسفلدم غ‑يسيزوار. غمكان ا‑س‑راد‑بدّا‑تزگام غ‑ربّي باباتنّغ ءولا غ‑يوس. اشكو س‑واوال ءيزگان ا‑س‑اغ‑يملا ماياد، ييني‑اغ ءيس‑راد‑اغ‑يفك تودرت ءيدومن. ءوريغ‑اون‑ين تيغاوسيوين‑اد ف‑ويلّي رانين ا‑كُن‑جلّون. ءيمّا كونّي، ءيلّا‑بدّا گيگون رّوح لّي‑اون‑يفكا لماسيح. ءور‑تحتاجّام ما‑كُن‑يسّلمادن، اشكو رّوح‑نس ار‑كُن‑يسّلماد ف‑كرايگاتّ كرا، ار‑اون‑يمالا لحقّ بلا تيكركاس. والاينّي ءيلّا فلّاون ا‑گيس‑تزگام غمكلّي‑اون‑يسّلماد. ءيمّا غيلاد ا‑تاروا عزّانين، زايدات تزگام غ‑لماسيح، باش ا‑يزعم‑وول‑نّغ غاكود نّا‑د‑يوورّي ءيبايّن‑د، ءور‑را‑نيري ا‑زگيس‑نرگس. تسّنم ءيس‑يسكر لماسيح كولّو ما‑يرضان ربّي، تيسّانم ءيس‑يوورّي ءيلول كرايگاتّ يان ءيسكارن ما‑ت‑يرضان س‑تلاليت لّجديد زغ‑دار ربّي. ژرات ماتّا غونشكا‑س‑اغ‑يرا ربّي باباتنّغ ايلّيغ‑اغ‑يگا د‑تاروا‑نس. اشكو غمكان ا‑نگا نكُّني. ماياد ا‑ف‑ور‑تسّين دّونيت ما‑نگا، اشكو ءور‑تسّين ربّي. واي‑ايتما عزّانين، نگا تاروا ن‑ربّي غيلاد. ءور‑تا‑ياغ‑يسّبايّن ما‑را‑نگ غ‑مايد‑د‑يفتان، والاينّي نسّن ماياد: غاكود لّيغ را‑د‑ياشك لماسيح را‑نگ زوند نتّان، اشكو را‑ت‑نژر غمكلّي ءيگا. كولّو وانّا دار رّجا‑ياد غ‑لماسيح ار‑يسّغوس ءول‑نس غمكلّي ءيغوس نتّا. كرايگاتّ يان ءيسكارن دّنوب، هاتي ءيفّوغ زغ‑شّرع ن‑ربّي، اشكو دّنوب ا‑يگان ءوفّوغ ن‑شّرع. تسّنم كونّي ءيس‑د‑يوشكا لماسيح باش ا‑فلّانّغ‑يسّيتّي دّنوب‑نّغ، تيسّانم ءيس‑ور‑جّو‑يسكير كرا ن‑دّنوب نتّا. وانّا ءيزگان غ‑لماسيح ءور‑ا‑يسكار دّنوب. ءيمّا وانّا ءيتزايادن غ‑دّنوب ءور‑تا‑يفهيم ءولا ءيسّن مامنك ا‑يگا لماسيح. وا‑تاروا عزّانين، ا‑ور‑تادجم يان ا‑كُن‑يجلّو. وانّا ءيسكارن س‑لحقّ، را‑سرس‑يفرح ربّي غمكلّي ءيفرح س‑لماسيح. ءيمّا وانّا ءيسكارن دّنوب، وين ءيبليس ا‑يگا، اشكو ءيبليس ار‑يسكار دّنوب زغ‑يسيزوار. ماياد ا‑ف‑د‑يوشكا يوس ن‑ربّي: يوشكا‑د ا‑يهلك ءيسكّيرن ن‑يبليس. ءيمّا وانّا‑د‑يلولن تالاليت لّجديد زغ‑دار ربّي، ءور‑ا‑يسكار دّنوب، اشكو ربّي ءيژّا گيس امود‑نس. ءور‑يژضار ا‑يزايد غ‑دّنوب، اشكو يوورّي ءيگا زغ‑تاروا ن‑ربّي. غمكاد ا‑س‑ا‑نتيسّان تاروا ن‑ربّي زغ‑تاروا ن‑يبليس: وانّا ءور‑يسكارن س‑لحقّ ءور‑يگي وين ربّي، د‑وانّا ءور‑يتحنّون غ‑گماس ءور‑يگي وين ربّي. غمكاد ا‑يگا‑واوال لّي‑مي‑تسفلدم زغ‑يسيزوار: ءيلّا فلّانّغ ا‑نتّيري ءي‑نگراتنّغ. ا‑ور‑نگ زوند قاين لّي‑يگان وين ءيبليس ءينغ گماس. ماخ ايلّيغ‑ت‑ينغا؟ اشكو قاين ار‑يسكار ما‑يُخشنّ، ءيمّا گماس ار‑يسكار ما‑يفولكين. واي‑ايتما، ا‑ور‑تّعجّابم ءيغ‑كُن‑كورهان ايت‑دّونيت. والاينّي نسّن ءيس‑نزري نكُّني زغ‑لموت س‑تودرت، اشكو تلّا گينّغ تايري ن‑ايتماتنّغ. والاينّي يان ءور‑يتّيرين ايتماس، هاتي سول ءيقاما غ‑لموت. يان ءيكورهان گماس، ءيگا زوند ءيغ‑ت‑ينغا. د‑وانّا ءينغان، ءور‑اكُّ‑راد‑اس‑تيلي تودرت ءيدومن. غمكاد ا‑س‑نسّن مامنك ا‑تگا لحنانت: لماسيح ءيفكا ءيخف‑نس ف‑سّيبت‑نّغ. ءيمّا نكُّني، ءيلّا فلّانّغ ا‑ناكّا ءيخف‑نّغ ف‑سّيبت ن‑ايتماتنّغ. ءيغ‑يلّا يان ءيطّافن لخير ءيژر گماس ءيحتاجّا والاينّي ءيسّيقار فلّاس ءول‑نس، مامنك ا‑را‑ييني تلّا گيس لحنانت ن‑ربّي؟ وا‑تاروا عزّانين، ا‑ور‑نمالا لحنانت غير س‑يواليون ءولا س‑يلس والاينّي س‑يسكّيرن د‑لحقّ. غمكاد ا‑س‑را‑نيسّان ءيس‑نگا وين لحقّ نسّهنّو ءول‑نّغ غ‑لگدّام ن‑ربّي ءيغ‑ا‑يتغووض‑وول‑نّغ ف‑سّيبت ن‑ما‑ور‑نفولكي. اشكو ربّي ءيمقّور ف‑وول‑نّغ، ييسّان كولّو ما‑گينّغ‑يلّان. واي‑ايتما عزّانين، ءيغ‑ور‑يغووض‑وول‑نّغ، نژضار ا‑نزعم غاكود نّا‑نتاكمور س‑ربّي نامژ دارس اينّا زگيس نضالب، اشكو ار‑نسكار س‑ما‑ف‑اغ‑يوصّا ءولا س‑ما‑ت‑يرضان. غمكاد ا‑تگا لوصيت‑نس، ييني‑اغ ا‑نامن س‑يسم ن‑يوس ياسوع لماسيح، ار‑نتحنّو ءي‑نگراتنّغ غمكلّي‑س‑اغ‑يوصّا لماسيح. وانّا ءيسكارن س‑لوصيّات‑نس، نتّان ا‑يزگان غ‑ربّي ءيزگا ربّي گيس. غمكاد ا‑س‑نسّن ءيس‑گينّغ‑يزگا، اشكو ءيفكا‑ياغ رّوح‑نس. واي‑ايتما عزّانين، ا‑ور‑تامنم كولّو وانّا ءينّان «ءيلّا‑گيگي رّوح لقودوس،» والاينّي ارمات رّوح‑ان ا‑تژرم ءيس‑يگا وين ربّي نغد ءوهو. اشكو گّوتن مدّن لّي‑تكّانين دّونيت، ار‑تّينين ءيس‑ا‑ساوالن س‑ماد‑اسن‑يمالا ربّي والاينّي ار‑سّكيركيسن. غمكاد ا‑س‑را‑تيسّانم ءيزد رّوح ن‑ربّي ا‑گيسن‑يساوالن نغد ءوهو: ءيغ‑ا‑يتّيني رّوح‑ان «ياسوع لماسيح يوشكا‑د زغ‑ربّي، يوورّي س‑دّات ن‑بنادم» را‑تيسّانم رّوح‑ان، ءيزد وين ربّي ا‑يگا. ءيمّا رّوح نّا‑ور‑يتّينين لحقّ ف‑ياسوع، ءورد وين ربّي ا‑يگا والاينّي ءيگا رّوح ن‑ونوّاش لّماسيح لّي‑ف‑تسفلدم را‑د‑ياشك، ءيلّا‑نّيت غيلاد غ‑دّونيت. ءيمّا كونّي ا‑تاروا عزّانين، وين ربّي ا‑تگام، تنروم‑تن اشكو رّوح لّي‑گيگون‑يلّان يوگُر رّوح لّي‑يلّان غ‑دّونيت. نتني گان وين دّونيت، ار‑ساوالن س‑ما‑يگان وين دّونيت، ار‑سرسن‑سفليدن ايت‑دّونيت. ءيمّا نكُّني نگا وين ربّي، ار‑سرنّغ‑سفليدن غويلّي سّنّين ربّي. ءيمّا وينّا ءور‑سّينّين ربّي ءور‑رين اد‑سرنّغ‑سفليدن. غمكان ا‑س‑را‑نتيسّان رّوح لّحقّ زغ‑رّوح ن‑تكركاس. واي‑ايتما عزّانين، ءيلّا فلّانّغ ا‑نتحنّو ءي‑نگراتنّغ، اشكو لحنانت تگا تين ربّي. يان ءيتحنّون، هاتي ءيلول‑د زغ‑دار ربّي ييسّان ربّي. ءيمّا يان ءور‑يتحنّون، ءور‑يسّين ربّي. اشكو ربّي ءيگا لحنانت. غمكاد ا‑س‑اغ‑د‑يسّبايّن ربّي لحنانت‑نس: يوزن‑د غوالّي ءيگان يوس س‑دّونيت، باش اد‑اغ‑تيلي تودرت ف‑سّيبت‑نس. غمكاد ا‑تگا تايري: ءورد تايري لّي‑س‑نرا ربّي والاينّي تايري لّي‑س‑اغ‑يرا نتّان، ايلّيغ‑د‑يوزن يوس ا‑يمّت باش اد‑اغ‑يفرو زغ‑دّنوب‑نّغ. واي‑ايتما عزّانين، لّيغ‑اغ‑يرا ربّي غونشكان، ءيلّا فلّانّغ ا‑نتّيري ءي‑نگراتنّغ. ءور‑جّو‑يلّي ما‑يژران ربّي، والاينّي ءيغ‑ا‑نتّيري ءي‑نگراتنّغ، ءيزگا گينّغ ربّي، تووفا گينّغ لحنانت‑نس. غمكاد ا‑نسّن ءيس‑نزگا غ‑ربّي ءيزگا گينّغ: اشكو ءيفكا‑ياغ رّوح‑نس. ربّي باباتنّغ يوزن‑د يوس باش ا‑يگ انجّام ن‑دّونيت. نژرا‑ت نكُّني، نگ فلّاس ءيناگان. وانّا ءيتّينين س‑نّييت ن‑وول‑نس «ياسوع ءيگا يوس ن‑ربّي،» هاتي ءيزگا گيس ربّي، ءيزگا ءولا نتّا غ‑ربّي. نكُّني نسّن لحنانت لّي‑س‑گينّغ‑يحنّا ربّي، نامن سرس. ربّي ءيگا لحنانت. يان ءيزگان غ‑لحنانت، ءيزگا غ‑ربّي، ءيزگا ربّي گيس. هاتي ءيسّووفا ربّي گينّغ لحنانت‑نس، باش ا‑نسّهنّو ءول‑نّغ غ‑واسّ لّحساب، اشكو نوورّي نگا زوند ما‑يگا نتّان غ‑دّونيت‑اد. لحنانت ءور‑گيس تيكساض، والاينّي لحنانت ءيكمّلن ار‑ن‑تّلوح تيكساض س‑برّا. ءيمّا يان ءيكسوضن، ءور‑تا‑گيس‑تووفي لحنانت ءيكمّلن، اشكو وانّا ءيكسوضن ار‑سول‑يسوينگيم غ‑لعقوبيت. ار‑نتحنّو نكُّني اشكو ربّي ا‑يزوارن ءيس‑فلّانّغ‑يحنّا. ءيغ‑ا‑يتّيني كرا ن‑يان «ار‑تّيريغ ربّي» والاينّي سول ا‑يتكرهو گماس، هاتي ار‑يسّكيركيس. اشكو ءيغ‑ور‑ا‑يتّيري گماس لّي‑يتمناد، مامنك ا‑را‑ييري ربّي لّي‑ور‑ا‑يتمناد؟ غمكاد ا‑تگا لوصيت‑نس: وانّا ءيتّيرين ربّي، ءيقّان‑ت‑يد ا‑يتّيري ءولا گماس. كولّو وانّا يومنّ ءيزد ياسوع ا‑يگان لماسيح ن‑ربّي، هاتي ءيلول‑د تالاليت لّجديد زغ‑دار ربّي. كولّو وانّا ءيتّيرين ربّي باباتنّغ، ار‑يتّيري يوس. غمكاد ا‑س‑را‑نيسّان ءيس‑ا‑نتّيري تاروا ن‑ربّي: اشكو ءيبان گينّغ ءيس‑ا‑نتّيري ربّي، ار‑نسكار س‑ما‑ف‑اغ‑يوصّا. غمكاد ا‑س‑ا‑نمالا ءيس‑ا‑نتّيري ربّي: ار‑نسكار س‑لوصيّات‑نس. ءور‑فلّانّغ‑يژّاي مايلّي‑ف‑اغ‑يوصّا، اشكو كولّو وانّا‑د‑يلولن زغ‑دار ربّي ار‑يتنرو دّونيت. ماياد ا‑س‑ا‑نتنرو دّونيت، اشكو نومن اوال ن‑ربّي. مانوا را‑ينرو دّونيت؟ وانّا يومنّ س‑ياسوع ن‑يس‑يگا يوس ن‑ربّي. ياسوع لماسيح، نتّان ا‑د‑يوشكان س‑وامان د‑يدامّن. ءورد غير س‑وامان ا‑س‑د‑يوشكا والاينّي س‑وامان د‑يدامّن. رّوح لقودوس ا‑ياكّان توگّا ف‑ماياد، اشكو رّوح لقودوس ءيگا لحقّ. لّان كراض ءيناگان: رّوح د‑وامان د‑يدامّن. مشاشكاند‑د توگّا‑نسن. نميار ا‑نسفليد س‑توگّا ن‑بنادم، والاينّي توگّا ن‑ربّي ءوگُرنت تين بنادم. ربّي ا‑يگان ءينيگي، ءيفك توگّا ف‑يوس. ءيمّا وانّا يومنّ س‑يوس ن‑ربّي، لّانت توگّا ن‑ربّي غ‑وول‑نس. والاينّي يان ءور‑يسفليدن س‑ما‑يتّيني ربّي، ءيگا ربّي د‑بو‑تكركاس اشكو ءور‑يومين توگّا لّي‑يفكا ف‑يوس. غمكاد اد‑گانت توگّا: ءيفكا‑ياغ ربّي تودرت ءيدومن، تيلي‑اغ تودرت‑اد ف‑سّيبت ن‑يوس. وانّا ءيمونّ د‑يوس ن‑ربّي، تلّا‑ياس تودرت. ءيمّا وانّا ءور‑يمونّ د‑يوس ن‑ربّي، ءور‑راد‑اس‑تيلي تودرت. ءوريغ‑اون‑ين تيغاوسيوين‑اد ءي‑كونّي لّي‑ومنّين س‑يسم ن‑يوس ن‑ربّي، باش ا‑تيسّانم ءيس‑تطّافم تودرت ءيدومن. ماياد ا‑ياغ‑يزّعامن غاكود نّا‑ن‑نتاكمور س‑ربّي، اشكو نسّن ءيس‑ا‑ياغ‑يسفليد ءيغ‑زگيس‑نضالب ما‑ت‑يرضان. لّيغ نسّن ءيس‑ا‑ياغ‑يسفليد غاكود نّا‑زگيس‑نضالب، نيسّان ءيس‑راد‑اغ‑ييلي مايلّي زگيس نضالب. ءيغ‑يلّا ما‑يژران گماس ءيسكر كرا يُخشنّ لّي‑ور‑يگين زغ‑دّنوب لّي‑يتاوين س‑لهالاك، ءيلّا فلّاس ا‑يضالب ربّي ف‑گماس. راد‑اس‑د‑يرار ربّي س‑تودرت. نّيغ‑اون ماياد غير ف‑ويلّي سكرنين دّنوب لّي‑ور‑يتاوين س‑لهالاك. اشكو لّان كرا ن‑دّنوب لّي‑را‑ياوي س‑لهالاك، ءور‑اون‑نّيغ ا‑تّضالابم ف‑دّنوب‑ان. كولّو ءيسكّيرن أُخشنّين گان دّنوب، والاينّي ءور‑ا‑كولّو‑تاوين دّنوب‑ان س‑لهالاك. نسّن غويلّي مي ءيفكا ربّي تالاليت لّجديد ءيس‑ور‑ا‑سكارن دّنوب. ار‑تن‑يسّنتال يوس ن‑ربّي، ءور‑يژضار ءيبليس ا‑تن‑يلكم. نسّن ءيس‑نگا تاروا ن‑ربّي، تيلي دّونيت كولّوتّ غ‑دّو‑وفوس ن‑يبليس. نسّن ءيس‑د‑يوشكا يوس ن‑ربّي اد‑اغ‑يفك لفهمت باش ا‑نيسّان غوالّي ءيگان لحقّ. ءيمّا غيلاد نگا وين غوالّي ءيگان لحقّ د‑وين يوس ياسوع لماسيح. نتّان ا‑يگان ربّي لّحقّ، ءيگ تودرت ءيدومن. وا‑تاروا عزّانين، تانفات ءي‑يلاهات ن‑دّونيت‑اد. زغ‑ومغار ءي‑تمغارت تامژلايت د‑تاروا‑نس. تعزّام داري س‑لحقّ، نكّي ءولا كولّو ويلّي سّنّين لحقّ. اشكو لحقّ ا‑گينّغ‑يزگان كولّواغ، راد‑بدّا‑ديدنّغ‑ييلي. راد‑اغ‑تيلي لباراكا د‑رّحمت د‑سّلامت زغ‑ربّي باباتنّغ د‑ياسوع لماسيح يوس ن‑باباتنّغ س‑لحقّ د‑لحنانت. فرحغ باهرا لّيغ‑ن‑وفيغ كرا ن‑تاروا‑نّم ار‑تّيدون غ‑وغاراس لّحقّ غمكلّي‑اغ‑يوصّا ربّي باباتنّغ. ءيمّا غيلاد ا‑تامغارت ءيعزّان، ءور‑راد‑ام‑ن‑اراغ ف‑كرا لّوصيت لّجديد والاينّي ف‑لوصيت لّي‑دارنّغ‑يلّان زغ‑يسيزوار. اشكو را‑زگيم‑ضالبغ ا‑كولّو‑نتحنّو ءي‑نگراتنّغ. غمكاد ا‑س‑را‑نمالا لحنانت لّي‑گينّغ‑يلّان: را‑نسكار س‑لوصيّات ن‑ربّي. د‑غمكاد ا‑تگا لوصيت‑نس لّي‑مي‑تسفلدم زغ‑يسيزوار: ا‑بدّا‑تّحنّوم ءي‑نگراتون. هان كيگان د‑ايت‑تكركاس ار‑تكّان دّونيت، اگُين اد‑ينين: «يوشكا‑د ياسوع لماسيح زغ‑ربّي، يوورّي س‑دّات ن‑بنادم.» وان مدّن‑ان، ايت‑تكركاس اد‑گان، گن ءينوّاشن لّماسيح. هان دا‑تجلوم لباراكا لّي‑ف‑ا‑تّخدامّ. رارات لعاقل ا‑تكشمّ غ‑كولّو ما‑كُن‑د‑يوشكان. اشكو وانّا ءيسّورفن المّود لّماسيح ءيفّوغ زغ‑گيس، هاتي ءيسّنگارا ءيخف‑نس د‑ربّي. ءيمّا وانّا ءيزگان غ‑ولمّود لّماسيح، را‑يقاما نتّا غ‑تامونت ن‑ربّي باباتنّغ د‑وين يوس. ءيغ‑ن‑دارون‑يوشكا كرا ن‑يان ءور‑ن‑ييوي المّود‑اد، ا‑ت‑ور‑تشّكشمّ س‑تگمّي ءولا تسّمرحبام سرس. اشكو وانّا سرس ءيسّمرحبان، هاتي ءيعاون‑ت غ‑يسكّيرن‑نس أُخشنّين. ءيگّوت ما‑داري اد‑اون‑ت‑ين‑اراغ، والاينّي يوف ءيغ‑ورد غ‑تيوريقين س‑صّمح. والاينّي ار‑ترجوغ ا‑ن‑دارون‑اشكغ ساولغ ديدون ءودم س‑وودم، باش ا‑كولّو‑نفرح س‑لفرح ءيگّوتن. ار‑ن‑فلّام‑تسلّامن تاروا ن‑وولّتمام‑اد تامژلايت. زغ‑ومغار ءي‑گما ءيعزّان گايوس. تعزّات داري س‑لحقّ. وا‑گما ءيعزّان، ضالبغ ربّي فلّاك ا‑تيليت س‑لخير، تدوست غ‑دّات‑نّك غمكلّي تدوست غ‑رّوح‑نّك. فرحغ باهرا لّيغ‑د‑وشكان كرا ن‑ايتماتن ساولن‑يّي ف‑مامنك ا‑تزگات غ‑لحقّ، ار‑تّيدوت غ‑وغاراس لّحقّ. ءور‑يلّي ما‑يّي‑يسّفراحن زوند ءيغ‑سفلدغ ف‑تاروا‑نو ءيس‑سول‑ا‑تّيدون غ‑وغاراس لّحقّ. وا‑گما ءيعزّان، افولكي ايان تسكارت لّيغ ا‑تّعاوانت ايتماتنّغ، باهرا غويلّي دارك گانين ءيغريبن. ساولن‑اغ‑د غ‑لگدّام ن‑ايت‑ومناگّار كولّوتن ف‑مامنك ا‑گيسن‑تّحنّوت. افولكي ا‑را‑تسكرت‑داغ ءيغ‑تزوويدت تعاونت‑تن اد‑كمّلن ف‑ومودّو‑نسن غيلاد غمكلّي ءيرا ربّي. اشكو فّوغن نتني ار‑تمودّون ف‑يسم لّماسيح بلا‑دا‑تامژن يات زغ‑ويلّي ءور‑سّينّين ربّي. هاتي ءيلّا فلّانّغ ا‑نتبدّاد د‑مدّن زوند نتني، باش ا‑ديدسن‑نتمعاوان غ‑تووري لّحقّ. ءوريغ‑ن كرا ءي‑ايت‑ومناگّار ن‑دارون، والاينّي دييّوتريفيس لّي‑دار‑يعزّا ا‑گيگون‑يگ انمغور، ءور‑ا‑يسفليد س‑ما‑نتّيني نكُّني. ءيغ‑ن‑وشكيغ س‑دارون راد‑اك‑ملغ ما‑يسكار. ار‑گينّغ‑يساوال س‑تكركاس، والاينّي ءور‑ت‑يوودي غير غايان. هان ءيزوويد‑اس ءور‑ا‑ن‑يتقبال ايتماتن لّي‑ن‑وشكانين س‑دارون، ار‑يتژي د‑وينّا رانين ا‑تن‑قبلن ار‑تن‑يسّوفوغ ءولا نتني زغ‑ومناگّار. وا‑گما ءيعزّان، ا‑ور‑تسكارت زوند مدّن أُخشنّين والاينّي زوند غويلّي شوانين. وانّا ءيسكارن افولكي، وين ربّي ا‑يگا. ءيمّا وانّا ءيسكارن ما‑يُخشنّ، ءور‑يسّين ربّي. والاينّي ديميتريوس، ار‑فلّاس‑تّينين كولّو مدّن ءيس‑يفولكي. توگّا‑ياد، ءيزّگا‑تنت لحقّ. ءولا نكُّني ار‑فلّاس‑ناكّا توگّا ن‑يس‑يفولكي. تسّنت ءيزد لحقّ اد‑گانت توگّا‑نّغ. ءيگّوت ما‑داري اد‑اك‑ت‑ين‑اراغ، والاينّي ءور‑ريغ اد‑اك‑ت‑اراغ س‑لقلم ءولا صّمح. والاينّي ار‑ترجوغ ا‑ك‑ژرغ غ‑مايد‑د‑ياكمورن، نساول نكّي ديك ءودم س‑وودم. اد‑اك‑تيلي سّلامت. ار‑ن‑فلّاك‑تسلّامن ءيمدّوكُّال‑نّك كولّوتن. سلّم ف‑يمدّوكُّال‑نّغ كرايگاتّ يان س‑يسم‑نس. زغ‑وخدّام ن‑ياسوع لماسيح، ياهودا گماس ن‑ياعقوب. ءي‑ويلّي‑ف‑يحنّا ربّي باباتنّغ ءيغر‑اسن‑د، ار‑تن‑يسّنتال ياسوع لماسيح. اد‑اون‑تيگات رّحمت د‑سّلامت د‑لحنانت. واي‑ايتما عزّانين، سكرغ ف‑اد‑اون‑ين‑اراغ س‑لفرح ف‑وجنجم لّي‑س‑كولّو‑ننجم نكُّني ديدون، والاينّي ءوفيغ‑ن ءيس‑يّي‑يخصّا اد‑اون‑ين‑اراغ ف‑ا‑كُن‑زّعامغ ا‑تّجاحادم ف‑ولمّود لّيمان ءيزگان لّي‑د‑يسّبايّن ربّي ءي‑يمژلاين‑نس. اشكو كشمن‑ين كرا ن‑مدّن س‑گراتون س‑تنتلا. ءيتيارا فلّاسن زغ‑يسيزوار ف‑لحوكم لّي‑را‑فلّاسن‑يضر. نتني ءور‑ا‑توقّارن ربّي. ار‑تفسادن ار‑تّينين ءيزد غمكان ا‑تگا لباراكا ن‑ربّي. رارن تيغوردين‑نسن س‑ياسوع لماسيح، د‑نتّان واحدوت ا‑يگان باب‑نّغ ءيگ سيديتنّغ. ريغ اد‑اون‑د‑سّكتيغ مايلّي مي تسفلدم غايد ءيزرين. تسّنم ءيس‑يجّنجم ربّي مدّن‑نس ءيسّوفغ‑تن‑د زغ‑تمازيرت ن‑ميصر، والاينّي تيگيرا ن‑مايان ءيهلك غويلّي ءور‑ومنّين اوال‑نس. تسفلدم ف‑لمالايكا لّي‑فّوغنين زغ‑تزدغت‑نسن، ءور قامان غ‑يلّيغ‑تن‑يگا ربّي. تيسّانم ءيس‑تن‑ين‑يحضا ربّي غ‑تيلّاس اگّوگنين ا‑ن‑غين‑تياوكرّافن ار اسّ ءيمقّورن لّحساب لّي‑غ‑را‑فلّاسن‑يوت لحوكم. تيسّانم ءيس‑يهلك ربّي تيمدينين ن‑سادوم د‑عامورا د‑تييّاض لّي‑ن‑تاما‑نسنت ف‑سّيبت ن‑شّهوات أُخشنّين لّي‑سكارن، ار‑تفسادن يوتمان ءي‑نگراتسن. ءيقّان‑د مدّن اد‑سوينگيمن ماد‑اسن‑يجران باش ا‑ور‑تياوهلاكن ءولا نتني س‑لعافيت لّي‑ور‑يخسين. ءيمّا غيلاد ار‑سكارن ايت‑توارگيوين‑ان غمكان غ‑دارون. ار‑سّيُخشانّ دّات‑نسن، ءور‑ا‑توقّارن غوالّي ءيتحكامن، ار‑رگّمن ايت‑يگنوان. ءورد غمكان ا‑يسكر لمالاك ءيمقّورن ميخايل لّيغ ءيمّاغ د‑يبليس ف‑مانوا گيسن ا‑را‑يامژ دّات ن‑موسا. ءور‑يزعم نتّا ا‑يرگم ءيبليس. ءور‑اس‑ينّي ابلا: «ا‑ك‑يسّفسّا ربّي.» مدّن‑ان ار‑رگّمن غ‑ما‑ور‑سّينّ. ءيمّا غايلّي سّنّ زغ‑يخف‑نسن زوند لوحوش بلا لعاقل، غايان ا‑تن‑يتاوين س‑لهالاك. تاگوضي ا‑راد‑اسن‑ييلي، اشكو ءومژن اغاراس ن‑قاين، زّنزن ءيخف‑نسن اد‑سّكيركيسن زوند بالعام، ار‑تژين د‑ينمغورن ن‑ربّي زوند قوراح. هان غمكلّي ءيتياوهلاك قوراح ا‑راد‑تياوهلاكن ءولا نتني. ءيركان اد‑گان غ‑دارون لّيغ ا‑ديدون‑تمونون ف‑يمنسيون‑نّون، ار‑شتّان ار‑ضصّان ءي‑نگراتسن بلا‑دا‑تحشامن، ار‑تسالان غير ءيخفاون‑نسن. گان زوند تيمدلا لّي‑غ‑ور‑لّين‑وامان، ار‑تنت‑يدحاي‑واضو. گن زوند ءيسغارن بلا لغلّت غ‑وزمز‑نس، مّوتن ف‑سنات‑توال، اكوفن زغ‑يژوران. گن زوند تاضانگيوين ن‑ومدا ءيدووين س‑وكشكوش ن‑تيلّاي‑نسن أُخشنّين. گن زوند ءيتران جلانين غ‑يگنوان، ءيسكر ربّي فلّاسن تيلّاس اگّوگنين ا‑ن‑گيسنت‑بدّا‑قامان. مدّن‑ان ا‑ف‑يساول اخنوخ لّي‑يگان زغ‑تيس سضيصط تاسوتين غ‑تغوردين ن‑ادام. ءيملا‑ياس ربّي اوال ءينّا: «ژرات سيديتنّغ را‑د‑ياشك، مونّ‑د ديدس كيگان د‑وافضان ن‑يمژلاين‑نس، باش ا‑يحكام ف‑كولّو مدّن. را‑يهلك كولّو ويلّي سرس رورنين تيغوردين ف‑سّيبت ن‑يسكّيرن‑نسن أُخشنّين لّي‑سكارن س‑لخُشانت لّي‑گيسن‑يلّان، ءولا ف‑كولّو تيرگّام لّي‑س‑ت‑رگمن.» هان نتني ار‑تنگموگن ار‑تژين ار‑سكارن كولّو ما‑يتّيري ءيخف‑نسن، ار‑سّفورّوگن ار‑تالغن مدّن باش ا‑تن‑شتّان. واي‑ايتما عزّانين، سوانگماد‑د ءيواليون ن‑يرقّاسن ن‑سيديتنّغ ياسوع لماسيح لّي‑س‑اون‑نّان ف‑ما‑را‑يجرو. نّان‑اون: «غ‑ووسّان گُّرانين ا‑راد‑د‑اشكين كرا ن‑يطنّاژن. راد‑سكارن س‑لخُشانت لّي‑يتّيري ءيخف‑نسن.» ءيمّا غيلاد تژرام ءيزد نتني ا‑ياطّون ايتماتن، ار‑سكارن س‑ما‑يتّيري‑وول ن‑بنادم، ءور‑دارسن رّوح لقودوس. ءيمّا كونّي اي‑ايتما عزّانين، سّدوسات ءيخفاون‑نّون غ‑ليمان ءيعزّان لّي‑اون‑يفكا ربّي، ار‑تّژالّام غمكلّي‑اون‑يمالا رّوح لقودوس. تحضوم ءيخفاون‑نّون غ‑لحنانت ن‑ربّي غيلاد غ‑ا‑تّقلم س‑تودرت لّيخرت لّي‑س‑را‑كُن‑ين‑يشّكشم سيديتنّغ ياسوع لماسيح س‑رّحمت‑نس. حنّوات غ‑وانّا ءيشكّان، تكّيسم‑د كرا ءي‑لعافيت ار‑تن‑تّفوكّوم. تحنّوم غ‑وييّاض تيكساضم زغ‑ماد‑سكارن، ار‑تّكرهوم ءولا تيملسيت نّا‑يمسلن س‑يركان ن‑دّات. ءيمّا غوالّي ءيژضارن ا‑كُن‑ينجّا باش ا‑ور‑تضرم، ءيسّلكم‑كُن‑ين س‑لگدّام لّمجد‑نس س‑لفرح ءيگّوتن بلا گيگون ءيلّا كرا لّعيب، نتّان ا‑مي‑يلّا لمجد د‑تموغرا د‑تژضّارت د‑لقوّا غيلاد ءولا كولّو غايد ءيزرين ءولا كولّو مايد‑د‑يفتان. د‑غمكاد ا‑ف‑راد‑بدّا‑نتالغ غوالّي ءيگان ربّي انجّام‑نّغ س‑يسم ن‑سيديتنّغ ياسوع لماسيح، امين. ارّا‑ياد، ءيتيارا گيس مايلّي‑د‑يسّبايّن ياسوع لماسيح، ءيفك‑اس‑ت ربّي باش ا‑د‑يمل ءي‑يخدّامن‑نس ما‑د‑يقّانّ ا‑يجرو غ‑مايد‑د‑ياكمورن. يازن‑د يا‑لّمالاك ا‑ت‑يد‑يسّبايّن ءي‑وخدّام‑نس يوحانّا. ار‑يادّر يوحانّا كولّو ما‑يژرا، ءيفك توگّا‑نس ف‑واوال‑اد ن‑ربّي ءولا لخبار‑اد ن‑ياسوع لماسيح. امباركي ا‑يگا وانّا ياقران ءيواليون‑اد ن‑ربّي. ءيمباركين اد‑گان وينّا‑ياسن‑سفليدنين ار‑سكارن س‑مايد ءيتياران، اشكو ياكمور‑د‑وزمز لّي‑غ‑راد‑كولّو‑جرونت‑تغاوسيوين‑اد. ف‑وفوس ن‑يوحانّا ءي‑سّا ن‑يمناگّارن ن‑ايتماتن غ‑تمازيرت ن‑اسيّا. اد‑اون‑تيلي لباراكا د‑سّلامت زغ‑والّي ءيلّان ءيكّا‑تّين ءيلّا راد‑بدّا‑ييلي، ءولا زغ‑سّا لّارواح لّي‑يوالان لعرش‑نس، ءولا زغ‑ياسوع لماسيح لّي‑يگان ءينيگي ءيصحان، ءيگ امزوارو لّي‑د‑ينكرن زغ‑لموت، ءيگ واد ءيحكامن غ‑يگلدان ن‑دّونيت. نتّان ا‑گينّغ‑يحنّان ءيفسي‑اغ س‑يدامّن‑نس زغ‑يسكراف ن‑دّنوب‑نّغ، ءيرار‑اغ ا‑نگ ايت‑تگلديت ن‑ربّي باباس ف‑ا‑ن‑نسراس غ‑لگدّام‑نس تيوافكيو ما‑س‑ا‑يترضو. نتّان ا‑مي‑يلّا لمجد د‑لقوّا، غيلاد ءولا كولّو مايد‑د‑يفتان، امين. هاتي را‑د‑يفتو غيلاد غ‑گر ءيمدلا، ژرن‑ت كولّو مدّن، ژرن‑ت ءولا غويلّي‑ت‑سّياگّاسنين. راد‑الّانت‑كولّو‑تميزار ن‑دّونيت ف‑سّيبت‑نس. غمكاد ا‑را‑ييلي، امين. «نكّي گيغ واد ءيزوارن، گغ واد ءيگُّران.» غمكاد ا‑س‑ينّا سيدي ربّي لّي‑يحكامن كولّو ما‑يلّان. ءيكّا‑تّين ءيلّا، ييلي، راد‑بدّا‑ييلي. ءيمّا نكّي يوحانّا گماتون د‑وسمون‑نّون غ‑تنوكموت ءولا تاگلديت ءولا صّبر لّي‑اغ‑يلّان س‑يسم ن‑ياسوع، لّيغ غ‑يگزير ن‑باطموس تياماژغ ف‑سّيبت ن‑تبرّاحت ن‑واوال ن‑ربّي ءولا ف‑توگّا ن‑ياسوع. هاتي غ‑واسّ ن‑سيديتنّغ ييوي‑يّي رّوح لقودوس، س‑سفلدغ ءي‑واوال ءيتجهّدن زوند نّفّار ءيساول‑د غ‑تغوردين‑ينو ييني‑يّي: «ارا مايد را‑تژرت غ‑يان‑وارّا، تازنت‑ت س‑سّا ن‑يمناگّارن، ءي‑افسوس ءولا سميرنا ءولا بارگاموس ءولا تياتيرا ءولا سارديس ءولا فيلادالفيا ءولا لاوديكيّا.» گراولغ اد‑ژرغ ما‑د‑سري‑يساولن، س‑ژريغ سّا لّحساكي ن‑وورغ، ژرغ غ‑گر لحساكي يان ءيرواس ءي‑بنادم. ءيلسا تشامير ءيغزّيفن، ءيبكيس زغ‑وامّاس‑نس س‑يان‑وبكّاس ن‑وورغ. ءيملّول‑باهرا‑وازّار‑نس زوند تاضوت ءيصفان نغد ادفل، ار‑د‑سّوفونت‑والّن‑نس زوند ءيسوفا لّعافيت. ار‑سّمرقيقيين ءيضارن‑نس زوند اناس ءيصفان ءيتياومزاين س‑سّقل. ءيتجهّد‑واوال‑نس زوند ءيجّيج ن‑يسافّن ن‑وامان گّوتنين. ياسي سّا ن‑يتران غ‑وفوس‑نس افاسي، ءيفّوغ‑د زغ‑يمي‑نس زوند يات تاژّيت ءيمسادن زغ‑سنات‑تسگيو. ءيفاو‑وودم‑نس زوند تافوكت ن‑طوژّونت ن‑واسّ. غير ژريغ‑ت ضرغ‑ن غ‑دار ءيضارن‑نس زوند ءيغ‑مّوتغ. ءيسرس‑د فلّا افوس‑نس افاسي ييني‑يّي: «اد‑ور‑تيكساطّ. نكّي ا‑يگان امزوارو ءولا امگُّارو، گغ باب ن‑تودرت. كّيغ‑تّين مّوتغ، والاينّي ها‑يّي دّرغ غيلاد ءولا كولّو مايد‑د‑يفتان. طّافغ تيسورا لّموت ءولا ادغار ن‑ويلّي مّوتنين. ءيمّا كيّي، ارا مايد تژريت، ما‑يلّان غيلاد ءولا ما‑را‑ييلي تيگيرا. غمكاد ا‑تگا لمعنا ن‑سّا ن‑يتران لّي‑تژريت غ‑وفوس‑ينو افاسي ءولا سّا لّحساكي ن‑وورغ. سّا ن‑يتران‑ان، گان لمالايكا ن‑سّا ن‑يمناگّارن، ءيمّا سّا لّحساكي گانت ءيمناگّارن س‑سّا. «ارا اوال‑اد ءي‑لمالاك ن‑ومناگّار غ‑تمدينت ن‑افسوس: ها‑ما‑ينّا واد يوسين سّا ن‑يتران غ‑وفوس‑نس افاسي ار‑يتّيدو غ‑گر سّا لّحساكي ن‑وورغ. سّنغ كولّو ما‑تسكارت ءولا مامنك ا‑تّنهاتافت تصبرت. سّنغ مامنك ا‑تنگارات د‑مدّن أُخشنّين، تارمت ءولا غويلّي ءيتّينين ءيزد ءيرقّاسن اد‑گان، تافت‑تن‑ين ءيس‑ا‑سّكيركيسن ءور‑گين ءيرقّاسن. سّنغ ءيس‑تزگات تصبرت ءي‑تنوكموت ف‑سّيبت ن‑يسم‑ينو بلا‑دا‑تّرمايت. «والاينّي ءيلّا سول داري كرا فلّاك: ءور‑سول‑ا‑يّي‑تّيريت غونشك لّي‑س‑ا‑يّي‑تّيريت غ‑يسيزوار. سوانگم‑د مانيزغ‑ن‑تضرت. وورّي‑د زغ‑دّنوب‑نّك ار‑تسكارت غمكلّي تسكارت غ‑يسيزوار. ءيغ‑ور‑دي‑توورّيت زغ‑دّنوب‑نّك، را‑ن‑سرك‑اشكغ سّيتّيغ‑اك لحسكا‑نّك زغ‑ودغار‑نس. والاينّي سول گيك ءيقاما ما‑يفولكين، اشكو ار‑تّكرهوت ءيسكّيرن ن‑مدّن‑ان ن‑نيكولاوين غمكلّي‑تن‑تكرهوغ نكّي. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، راد‑اس‑فكغ ا‑يشّ زغ‑لغلّت ن‑وسغار ن‑تودرت لّي‑يلّان غ‑تالعرصت لّمجد ن‑ربّي. «ارا اوال‑اد ءي‑لمالاك ن‑ومناگّار غ‑تمدينت ن‑سميرنا: ها‑ما‑ينّا غوالّي ءيگان امزوارو ءيگ امگُّارو، ءيمّت يوورّي ءيدّر. سّنغ مامنك ا‑تزريت غ‑تاسّاست ار‑تّژلاطّ، والاينّي س‑صّاحت لخير ءيگّوتن اد‑اك‑يلّان. سّنغ ءيس‑ا‑گيك‑رگّمن غويلّي ءيتّينين ءيس‑گان ايت‑يودايا والاينّي ءور‑گين ايت‑يودايا. هاتي ايت‑تگمّي ن‑تژالّيت ن‑شيطان اد‑گان. ءيمّا غيلاد، اد‑ور‑تيكساطّ تانوكموت لّي‑را‑فلّاك‑يزري. هاتي را‑ك‑يارم ءيبليس ءيلوح‑ن كرا گيگون غ‑لحبس. را‑ترفوفنت مراو‑ووسّان. زگا غ‑وغاراس‑ينو ار لموت، فكغ‑اك تّاج ن‑تودرت. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، ءور‑اكُّ‑را‑تي‑تلكم لموت تيس سنات. «ارا اوال‑اد ءي‑لمالاك ن‑ومناگّار غ‑تمدينت ن‑بارگاموس: ها‑ما‑ينّا غوالّي دار تاژّيت ءيمسادن زغ‑سنات‑تسگيو. سّنغ مانيغ تزدغت ءيزد ءيلّيغ ءيلّا لعرش ن‑شيطان. تغويت‑بدّا غ‑يسم‑ينو، ءور‑اكُّ‑توورّيت زغ‑وغاراس‑ينو. تامژت گيگي ءولا غ‑ووسّان لّي‑غ‑نغان ءينيگي‑نو ءيزگان انتيباس غين غ‑يزدغ شيطان. «والاينّي لّانت سول داري كرا ن‑تغاوسيوين فلّاك. لّان غ‑گراتون كرا ن‑مدّن ءومژن المّود ن‑بالعام لّي‑يملان ءي‑وگلّيد بالاق مامنك ا‑يجلّو ايت‑ربّي، ايلّيغ ا‑شتّان ما‑يتياوغراسن ءي‑لاصنام ار‑تفسادن. ءيلين‑داغ غ‑گراتون كرا ن‑مدّن ءومژن المّود ن‑نيكولاوين. ف‑مايان ا‑ف‑راد‑اك‑ينيغ: وورّي‑د زغ‑دّنوب‑نّك. ءيغ‑ور‑دي‑توورّيت را‑ن‑سرك‑اشكغ غ‑مايد‑د‑ياكمورن، مّاغّ د‑مدّن‑ان س‑تاژّيت ن‑يمي‑نو. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. كولّو وانّا ءينران، راد‑اس‑فكغ زغ‑وغروم ءينتلن لّي‑مي‑تّينين ‹مانّا›. فكغ‑اس ءولا يان‑وژرو ءومليل، ءيتيارا گيس يان‑يسم لّجديد ءور‑ت‑يسّين يان ابلا غوالّي مي ءيتياوفكا. «ارا اوال‑اد ءي‑لمالاك ن‑ومناگّار غ‑تمدينت ن‑تياتيرا: ها‑ما‑ينّا يوس ن‑ربّي لّي‑مي‑سّوفونت‑والّن زوند ءيسوفا لّعافيت، ار‑سّمرقيقيين ءيضارن‑نس زوند اناس ءيتياومزاين س‑سّقل. سّنغ كولّو ما‑تسكارت ءولا مامنك ا‑يّي‑تّيريت، تزگات غ‑وغاراس‑ينو ار‑تسكارت تاووري‑نو باهرا، ار‑تّصبارت غ‑تنوكموت نّا‑فلّاك‑يزرين. سّنغ ءيس‑ا‑تسكارت غيلاد ءوگُّار ن‑مايلّي تسكارت غ‑يسيزوار. «والاينّي ءيلّا سول داري كرا فلّاك. ءور‑ا‑تسّفسّات تامغارت‑ان ‹ءيزابيل› لّي‑يتّينين ءيس‑ا‑تساوال س‑يواليون ن‑ربّي. نتّات ار‑باهرا‑تجلّو ءيخدّامن‑ينو س‑ولمّود‑نس ار‑تن‑تّرارا اد‑فسادن ار‑شتّان ما‑يتياوغراسن ءي‑لاصنام. فكيغ‑اس امهال ا‑تفل دّنوب‑نس، والاينّي ءور‑تري ا‑دي‑توورّي زغ‑لفساد لّي‑تسكار. هان را‑ستّ‑ين‑لوحغ ف‑تيسي ن‑واطّان ا‑گيس‑تاضن نتّات د‑ويلّي ديدس تفسادنين. غمكاد ا‑راد‑اسن‑سكرغ ءيغ‑ور‑د‑وورّين زغ‑يسكّيرن‑نس. راد‑وتغ تاروا‑نس س‑لموت. غاكودان ا‑راد‑ژرن ايت‑يمناگّارن كولّوتن ءيس‑گيغ واد ءيسّنّ كولّو ماد‑سوينگيمن مدّن ءولا ما‑تّيرين غ‑وول‑نسن. راد‑رارغ ءي‑كرايگاتّ يان گيگون ف‑ما‑يسكر. «ءيمّا وييّاض غ‑تياتيرا لّي‑ور‑ومژنين المّود‑ان ءولا لمدن ما‑مي‑تّينين ‹تيغاوسيوين نتلنين ن‑شيطان›، ءور‑را‑ن‑فلّاون‑زايدغ كرا ن‑تاژايت ياضني. غير امژات غ‑ما‑دارون‑يلّان ارد‑ن‑اشكغ. كولّو وانّا ءينران ار‑يسكار ماد‑ريغ ار ءيسيگُّرا، راد‑اس‑فكغ تاژضّارت ف‑تميزار ن‑دّونيت غمكلّي‑يّي‑يفكا بابا ربّي. را‑تنت‑يحكام س‑وعمود ن‑ووزّال، ءيرژ‑تنت زوند ءيروكوتن ن‑يدقّي. راد‑اس‑فكغ ءيتري لّي‑يفاون زيكّ صباح. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. «ارا اوال‑اد ءي‑لمالاك ن‑ومناگّار غ‑تمدينت ن‑سارديس: ها‑ما‑ينّا غوالّي دار سّا لّارواح ن‑ربّي ءولا سّا ن‑يتران. سّنغ كولّو ما‑تسكارت. ار‑تّينين مدّن ءيس‑تدّرت والاينّي تمّوتّ. رار لعاقل تسّدوست ما‑گيك‑يقامان ءور‑تا‑يمّوت. ءوفيغ‑ن مايلّي تسكارت ءور‑تا‑يكمّيل غ‑يژري ن‑ربّي‑نو. سوانگم‑د ما‑تلمدت ءولا مايلّي مي تسفلدت غايد ءيزرين. سكار سرس، توورّيد‑د زغ‑دّنوب‑نّك. ءيغ‑ور‑ترورت لعاقل، هاتي را‑ن‑سرك‑اشكغ زوند امخّار، ءور‑را‑تيسّانت مان تاساعت غ‑را‑ك‑ين‑لكمغ. والاينّي لّان سول دارك غ‑سارديس كرا ن‑مدّن دروسنين لّي‑ور‑سّركينين تيملسا‑نسن. نتني ا‑را‑ديدي‑يمون س‑تملسا تومليلين، اشكو نتني ا‑يستهلّان. كولّو وانّا ءينران، را‑يلس ءولا نتّا تيملسيت تومليلت. راد‑ادّرغ ءيسم‑نس غ‑دار بابا ربّي ءولا لمالايكا‑نس، ءينيغ فلّاس ءيزد وينو ا‑يگا. ءور‑سار‑كّيسغ ءيسم‑نس زغ‑وارّا ن‑تودرت. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. «ارا اوال‑اد ءي‑لمالاك ن‑ومناگّار غ‑تمدينت ن‑فيلادالفيا: ها‑ما‑ينّا غوالّي ءيگان امژلاي ءيگ لحقّ، ءيطّاف تاساروت ن‑وگلّيد داود. اينّا رژمغ نكّي، ءور‑يژضار يان ا‑ت‑يقّن. د‑اينّا قّنغ، ءور‑يژضار يان ا‑ت‑يرژم. سّنغ كولّو ما‑تسكارت. هاتي رژمغ يان‑يمي غ‑لگدّام‑نّك، ءور‑را‑ييژضار يان ا‑ت‑يقّن. سّنغ ءيس‑ور‑تژضارت ءي‑ما‑يگّوتن والاينّي تومژت غ‑واوال‑ينو، ءور‑تنّيت ءور‑يّي‑تسّينت. ءيمّا مدّن‑ان ن‑ايت‑تگمّي ن‑تژالّيت ن‑شيطان، ار‑سّكيركيسن ار‑تّينين ءيزد ايت‑يودايا اد‑گان والاينّي ءور‑اكُّ‑گين ايت‑يودايا. را‑تن‑د‑اويغ اد‑كنون س‑واكال غ‑دار ءيضارن‑نّك، باش اد‑يسّانّ ءيزد كيّي ا‑داري‑يعزّان. هاتي تصبرت تزگات غمكلّي‑ك‑وصّاغ. ف‑مايان ا‑ف‑را‑ك‑سّنتالغ غ‑تاساعت ن‑تنوكموت لّي‑را‑يزري ف‑دّونيت ا‑تارم كولّو ويلّي گيس زدغنين. غير ءيميكّ را‑ن‑اشكغ. امژ غ‑ما‑دارك‑يلّان، ا‑ور‑تادجت يان اد‑اك‑ياكُر تّاج‑نّك. كولّو وانّا ءينران، را‑ت‑گغ د‑تانّالت غ‑تگمّي ن‑ربّي‑نو، ءور‑سار‑تّ‑يفّوغ. را‑فلّاس‑اراغ ءيسم ن‑ربّي‑نو د‑يسم ن‑تمدينت ن‑ربّي‑نو، ا‑ستّ‑يگان د‑وروشاليم لّجديد لّي‑را‑د‑يگّوز زغ‑يگنّا زغ‑دار ربّي‑نو، اراغ فلّاس ءولا ءيسم‑ينو لّجديد. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن. «ارا اوال‑اد ءي‑لمالاك ن‑ومناگّار غ‑تمدينت ن‑لاوديكيّا: ها‑ما‑ينّا غوالّي ءيگان ‹امين› ءيگ ءينيگي ءيصحان ءيزگان، ءيزوور كولّو ما‑يخلق ربّي. سّنغ كولّو ما‑تسكارت. سّنغ ءيس‑ور‑تسمّيطّ ءولا ترغيت. امار يوفان غير ا‑تسمّيطّ نغد ا‑ترغت. والاينّي تولبيت، ءور‑تسمّيطّ ءولا ترغيت. غايان ا‑ف‑را‑ك‑سّوفسغ زغ‑يمي‑نو. ها‑كيّي ار‑تّينيت «لاباس گيگي. ءيگّوت داري لخير. ءور‑حتاجّاغ يات.» والاينّي ءور‑اكُّ‑تسّينت مامنك ا‑تضعفت تهرشت تژلضت تبوكضت تقامات بلا تيملسيت. راد‑اك‑ينيغ يوف‑اك ا‑زغ‑داري‑تسغت ءورغ لّي‑يصفان س‑لعافيت ف‑ا‑دارك‑نّيت‑ييلي لخير. تسغت زغ‑داري ءولا تيملسا تومليلين ف‑ا‑تلست تدلت لعيب ن‑دّات‑نّك. تسغت زغ‑داري ءولا اسافار ءي‑والّن‑نّك ف‑ا‑تيسفيوت. وينّا داري عزّانين ار‑تن‑تژيغ ار‑تن‑تربّاغ. اوي‑تّ غ‑يخف‑نّك غيلاد، توورّيد‑د زغ‑دّنوب‑نّك. ها‑يّي بيدّغ غ‑يمي ار‑سّضوقّورغ. ءيغ‑يلّا ما‑يسفلدن ءي‑واوال‑ينو ءيرژم‑يّي، را‑دارس‑كشمغ شّغ ديدس ءيشّ ديدي. كولّو وانّا ءينران، راد‑اس‑فكغ ا‑ديدي‑يسكيوس ف‑لعرش‑ينو غمكلّي نريغ نكّي سكيوسغ د‑بابا ربّي ف‑لعرش‑نس. وانّا دار ءيمزگان، ءيقّان‑ت‑يد ا‑يسفلد ءي‑مايد ءيتّيني رّوح لقودوس ءي‑يمناگّارن.» ژرغ ءيلمّا كرا ياضني، يان‑يمي ءيرژم غ‑يگنّا. سفلدغ ءي‑واوال لّي‑ستّين‑يكّان ءيساول‑د سري، ءيگا زوند نّفّار، ييني‑يّي: «غلي‑د س‑غيد اد‑اك‑ملغ ما‑د‑يقّانّ ا‑يجرو تيگيرا.» ياوي‑يّي رّوح لقودوس غاكودان، س‑ژريغ يا‑لّعرش غ‑يگنّا، ژرغ ءولا غوالّي فلّاس ءيسكيوسن. غوالّي ءيسكيوسن ف‑لعرش، ار‑زگيس‑كّاتن لالوان ن‑وژگُّاغ د‑وقرفي تيلي‑تسليت ن‑ونژار تسوتل ءي‑لعرش، ار‑تّيسفيو س‑تيفاوت تازگزاوت. ژرغ سين ءيد‑مراو د‑كّوژ (24) لّعرش لولّين ءي‑لعرش‑ان، سكيوسن فلّاسن سين ءيد‑مراو د‑كّوژ (24) ن‑ومغار، لسن تيملسا تومليلين. كود يان، ءيلّا ف‑يخف‑نس يان‑تّاج ن‑وورغ. ار‑د‑كّاتن‑ووسمانّ زغ‑دار لعرش، ييگات‑وقّريان ن‑يگّيگ. ار‑سّوفون سّا ن‑يسوفا غ‑لگدّام لّعرش، ا‑تن‑يگان د‑سّا لّارواح ن‑ربّي. ييلي ءولا غ‑لگدّام لّعرش كرا ءيرواس يات‑تمدا ن‑جّاج ءيصفان زوند ادفل. ژرغ كّوژط لمخلوقات دّرنين، لولّينت ءي‑لعرش، كرايگاتّ يات غ‑تسگا. گّوتنت‑گيسنت‑والّن، لان‑تنت زغ‑لگدّام ءولا تيغوردين. تامزواروت ترواس ءيزم. تيس سنات ترواس ازگر. تيس كراطّ، ءيرواس‑وودم‑نس ءودم ن‑ورگاز. تيس كّوژط ترواس ءيگيدر يوويلن. كرايگاتّ يات غ‑لمخلوقات‑ان تطّاف سضيص ءيفراون، ءيگاتنت‑گيسنت‑والّن زغ‑كرايگاتّ ماني. ار‑تّيريرنت غ‑ييض ءولا ازال بلا‑دا‑تفسّانت ار‑تّينينت: «امژلاي، امژلاي، امژلاي ا‑يگا سيدي ربّي لّي‑يحكامن كولّو ما‑يلّان. ءيكّا‑تّين ءيلّا، ييلي، راد‑بدّا‑ييلي.» كولّو ماد‑كّانت ار‑تالغنت ار‑تمجّادنت ار‑تحمادنت غوالّي ءيسكيوسن ف‑لعرش، ءيگ غوالّي بدّا ءيلّان راد‑بدّا‑ييلي. ار‑ن‑طّارن سين ءيد‑مراو د‑كّوژ ن‑ومغار غ‑لگدّام ن‑والّي ءيسكيوسن ف‑لعرش، سجدن ءي‑والّي بدّا ءيلّان راد‑بدّا‑ييلي، ار‑ن‑تلوحن تّاج‑نسن غ‑لگدّام لّعرش ار‑تّينين: «وا‑ربّي سيديتنّغ، كيّي ا‑يستهلّان لمجد د‑تّوقير د‑لحوكم، اشكو كيّي ا‑يخلقن كولّو ما‑يلّان. هاتي ءيتياوخلاق ييلي، اشكو كيّي ا‑ت‑يران.» ژرغ ءيلمّا يان‑وارّا ءيموتّلن غ‑وفوس افاسي ن‑والّي ءيسكيوسن ف‑لعرش، ءيتيارا زغ‑سنات‑تسگيو، ءيقّن س‑سّا ن‑طّوابع. ژرغ‑ن يا‑لّمالاك ءيتجهّدن يولّ اوال‑نس ييني: «ما‑يستهلّان ا‑يرژم ارّا‑ياد، ءيفسي طّوابع لّي‑فلّاس‑يلّان؟» والاينّي ءور‑يلّي يان غ‑يگنّا ءولا غ‑واكال ءولا غ‑دّو‑واكال ءيژضارن ا‑يرژم ارّا‑يان ءولا ءيسّماقّل گيس. ار‑الّاغ باهرا اشكو ءور‑يتيافا يان ءيستهلّان ا‑يرژم ارّا‑يان ءولا ا‑گيس‑يسّماقّل. غاكودان ءيساول‑د سري يان زغ‑يمغارن ييني‑يّي‑د: «اد‑ور‑تالّات. هاي‑يزم ن‑تقبيلت ن‑ياهودا، هاي‑اژور ن‑وگلّيد داود، نتّان ا‑ينران، ييژضار ا‑يفسي سّا ن‑طّوابع‑اد، ءيرژم ارّا.» ژرغ ءيلمّا يان‑ولقّاغ، ءيبيدّ غ‑دار لعرش غ‑گر كّوژط لمخلوقات، لولّين‑اس ءيمغارن. ءيرواس ءيس‑يتياوغراس، ءيطّاف سّا ن‑تاسكيوين د‑سّا ن‑والّن، ا‑تن‑يگان د‑سّا لّارواح ن‑ربّي لّي‑يوزن اد‑كن كولّو دّونيت. ياسي‑د‑ولقّاغ ارّا‑يان زغ‑وفوس افاسي ن‑والّي ءيسكيوسن ف‑لعرش. لّيغ‑د‑يوسي ارّا، ضرنت‑ن كّوژط لمخلوقات ءولا سين ءيد‑مراو د‑كّوژ (24) ن‑ومغار غ‑لگدّام ن‑ولقّاغ. كرايگاتّ يان يوسي لوتار، اسين ءولا تاطّاسين ن‑وورغ عمّرنين س‑لبخور لّي‑يگان تيژولّا ن‑يمژلاين ن‑ربّي. ار‑تّيريرن يان‑ومارگ لّجديد ار‑تّينين: «كيّي ا‑يستهلّان ا‑تاسيت ارّا‑ياد تفسيت طّوابع‑نس، اشكو تّياوغراست تفروت مدّن س‑يدامّن‑نّك زغ‑كرايگاتّ تاقبيلت ءولا كرايگاتّ لّوغا ءولا كرايگاتّ تاسوت ءولا كرايگاتّ تامازيرت، ترارت‑تن اد‑گن كولّو وين ربّي. تسكرت زغ‑گيسن ايت‑تگلديت ن‑ربّي‑نّغ ف‑ا‑ن‑سراسن غ‑لگدّام‑نس تيوافكيو ما‑س‑ا‑يترضو. د‑نتني ا‑را‑يحكام غ‑دّونيت.» سّماقّلغ‑ن‑داغ س‑سفلدغ ءي‑واقّور ن‑وافضان ن‑وافضان د‑يد‑والف ن‑يد‑والف لّمالايكا، سوتلن ءي‑لعرش د‑لمخلوقات د‑يمغارن. ار‑تّينين س‑واوال ءيتجهّدن: «ءيستهلّا‑ولقّاغ لّي‑يتياوغراسن ا‑يامژ لحوكم د‑لخير د‑تحكيمت د‑تژضّارت د‑تّوقير د‑لمجد د‑لحمد.» سفلدغ غاكودان ءي‑كولّو ما‑يخلق ربّي غ‑يگنّا ءولا غ‑واكال ءولا غ‑دّو‑واكال ءولا غ‑ومدا، سفلدغ ءي‑كولّو ما‑يدّرن غ‑كرايگاتّ ماني ار‑تّينين: «ا‑ييلي لحمد د‑تّوقير د‑لمجد د‑لقوّا ءي‑والّي ءيسكيوسن ف‑لعرش ءولا ءي‑ولقّاغ، غيلاد ءولا كولّو مايد‑د‑يفتان.» ءينينت كّوژط لمخلوقات: «امين.» ضرن‑ين ءيمغارن سجدن‑اس. ژرغ‑ن القّاغ ءيفسي يان زغ‑سّا ن‑طّوابع، س‑سفلدغ ءي‑يات زغ‑كّوژط لمخلوقات تساول س‑واوال ءيتجهّدن زوند ءيگّيگ تيني: «فّوغ‑د.» سّماقّلغ‑ن س‑ن‑ژريغ يان‑وايّيس ءومليل، يوسي‑ومنّاي‑نس يا‑لّقوس ن‑يميغ. ءيتّفك‑اس يان‑تّاج، ءيفّوغ‑د ا‑ينرو، ءيگ واد بدّا ءيتنرون. ءيفسي‑ولقّاغ ويس سين طّوابع، س‑سفلدغ ءي‑تيس سنات لمخلوقات تنّا: «فّوغ‑د.» ءيفّوغ‑د‑وايّيس ياضني ءيگا اژگُّاغ. ءيتّفك ءي‑ومنّاي‑نس ا‑يكّيس سّلامت ف‑دّونيت ف‑اد‑نقّان مدّن ءي‑نگراتسن، تّفك‑اس يات تاژّيت ءيمقّورن. ءيفسي‑ولقّاغ ويس كراض طّوابع، س‑سفلدغ ءي‑تيس كراطّ لمخلوقات تنّا: «فّوغ‑د.» سّماقّلغ س‑ژريغ ايّيس ءيضيلي، يوسي‑ومنّاي‑نس يا‑لّميزان غ‑وفوس‑نس. سفلدغ ءي‑كرا ءيرواس اوال زغ‑گر كّوژط لمخلوقات ييني: «غير كيلو ن‑يردن س‑وقاريد ن‑نّوقرت. غير كراض ءيد‑كيلو ن‑طمژّين س‑وقاريد ن‑نّوقرت. والاينّي ا‑ور‑تسّوكفم زّيت ءولا اضيل.» ءيفسي‑ولقّاغ ويس كّوژ طّوابع، س‑سفلدغ ءي‑تيس كّوژط لمخلوقات تنّا: «فّوغ‑د.» سّماقّلغ س‑ژريغ ايّيس اوراغ، ءيگ ءيسم ن‑ومنّاي‑نس ‹لموت›، ءيضفور‑ت‑‹ومضّال›. ءيتّفك‑اسن اد‑حكامن ف‑يان‑وگزّوم زغ‑كّوژ ءيگزمان ن‑دّونيت، اد‑نغن غويلّي گيس زدغنين س‑تاژّيت د‑وغني د‑واطّان د‑لوحوش ن‑دّونيت. ءيفسي‑ولقّاغ ويس سمّوس طّوابع، س‑ژريغ لارواح ن‑ويلّي مّوتنين ف‑سّيبت ن‑تبرّاحت‑نسن س‑واوال ن‑ربّي ءولا توگّا‑نسن لّي‑فلّاس‑فكان. غ‑دّو‑وژرو ن‑تغرسي ا‑غ‑لّان، الّن اوال‑نسن ءينين: «وا‑سيدي ربّي ءيتجهّدن، تگيت امژلاي تگت لحقّ. ار ماناگو ا‑را‑ن‑تسّماطلت لعقوبيت لّي‑يلّان ف‑مدّن ن‑دّونيت، ترارت‑اسن ف‑يدامّن‑نّغ؟» غاكودان ا‑يتياوفكا ءي‑كرايگاتّ يان گيسن تيملسيت تومليلت، ييني‑اسن ربّي اد‑قلن سول ءيميكّ ارد ءيكمّل غونشك لّي‑د‑يقّانّ زغ‑ايتماتسن د‑يمعاوانّ‑نسن لّي‑راد‑نغن مدّن غمكلّي‑تن‑نغان نتني. ءيفسي‑ولقّاغ ويس سضيص طّوابع. سّماقّلغ‑ن ژرغ اكال ءيمّوسّا س‑جّهد، توورّي تلّاس تافوكت زوند اخنيف ءيضلان، يوورّي ءيژگُّاغ‑وايّور كولّوت زوند ءيدامّن. ضرن‑د ءيتران زغ‑يگنوان س‑واكال غمكلّي‑د‑يتلوح‑واضو ءيقوراين زغ‑وازار. ءيتّين ءيگنوان، موتّلن زوند كرا ن‑وارّا ءيموتّلن ف‑يعماد‑نس، ءيتياتّاي كولّو ما‑يگان ادرار د‑يگزير زغ‑يلّيغ ءيلّا. روولن ءيگلدان ن‑دّونيت د‑ينمغورن ن‑تميزار د‑ينمغورن لّعسكر، روولن ايت‑وايدا د‑ايت‑سّولطا، نتني ءولا كولّو مدّن ءيسمگان ءولا غويلّي گانين وين ءيخف‑نسن، رگسن غ‑يفران ءولا غ‑گر ءيجاريفن ن‑يدرارن. ار‑اقران ءي‑يدرارن د‑يجاريفن ار‑اسن‑تّينين: «ضراد‑د فلّانّغ تسّنتالم‑اغ زغ‑وودم ن‑والّي ءيسكيوسن ف‑لعرش ءولا زغ‑لغاضاب ن‑ولقّاغ. اشكو ءيلكم‑د‑واسّ لّي‑باهرا‑يشقان ءيگ اسّ لّغاضاب‑نسن. ما‑را‑ييژضار ا‑گيس‑يبيدّ؟» لّيغ ءيزري مايان، ژرغ كّوژ لمالايكا بيدّن غ‑كّوژط‑تسگيو ن‑دّونيت، حصارن‑ين اضو ا‑ور‑يوت اكال ءولا امدا ءولا كرا ن‑وسغار. ژرغ‑ن ءيلمّا يا‑لّمالاك ياضني ءيغلي‑د زغ‑يلّيغ ا‑دي‑تاقلاي تافوكت، ياسي‑د طّابع ن‑ربّي باب ن‑تودرت. ءيغر لمالاك‑ان س‑واوال ءيتجهّدن ءي‑كّوژ لمالايكا لّي‑يوصّا ربّي اد‑هلكن اكال د‑ومدا، ييني‑اسن: «اد‑ور‑تهلكم اكال ءولا امدا ءولا ءيسغارن ارد نگ طّابع ف‑يگنزي ن‑كولّو ءيخدّامن ن‑ربّي‑نّغ.» سفلدغ ءيلمّا ءي‑كرا ءيملا‑يّي منّاو اد‑گان غويلّي‑مي‑گان طّابع. گان ميّا د‑كّوژ ءيد‑مراو د‑كّوژ ن‑والف (000‏.44‏1). گان نتني زغ‑كولّو تيقبيلين ن‑ايت‑ربّي، ييلي سين د‑مراو‑والف (000‏.12) زغ‑كرايگاتّ تاقبيلت: زغ‑ياهودا د‑راوبين د‑گاد د‑اشير د‑نافتالي د‑ماناسّي د‑شيمعون د‑لاوي د‑ياسّاكار د‑زابولون د‑يوسف د‑بنيامين. لّيغ ءيزري مايان سّماقّلغ‑ن ژرغ مدّن گّوتنين باهرا، ءور‑را‑ييژضار يان ا‑تن‑يحاسب. گان نتني زغ‑كولّو تيميزار د‑تقبيلين د‑تاسوتين د‑لّوغات ن‑دّونيت. بيدّن غ‑لگدّام لّعرش ءولا القّاغ س‑تملسا تومليلين، اسين تالضايين غ‑وفوس‑نسن. الّن اوال‑نسن ار‑تّينين: «ربّي‑نّغ لّي‑يسكيوسن ف‑لعرش، نتّان د‑ولقّاغ اد‑اغ‑يجّنجمن.» بيدّن غين كولّو لمالايكا، لولّين ءي‑لعرش ءولا ءيمغارن ءولا كّوژط لمخلوقات، ضرن‑ين ف‑وودم‑نسن غ‑لگدّام لّعرش سجدن ءي‑ربّي ءينين: «امين. ا‑ييلي لحمد د‑لمجد د‑تحكيمت د‑شّوكر د‑تّوقير د‑لحوكم د‑لقوّا ءي‑ربّي‑نّغ غيلاد ءولا كولّو مايد‑د‑يفتان، امين.» ءيسقسا‑يّي يان زغ‑يمغارن: «ءيس‑تسّنت ماد‑گان غويد لسانين تيملسا تومليلين؟ مانيزغ‑د‑وشكان؟» ءينيغ‑اس: «كيّي ا‑يسّنّ ا‑سيدي.» ييني‑يّي: «نتني گان غويلّي‑د‑فّوغنين زغ‑ونوكمو لّي‑باهرا‑يشقان، سيردن تيملسا‑نسن س‑يدامّن ن‑ولقّاغ ايلّيغ ملّولنت باهرا. ف‑مايان ا‑ف‑بيدّن غ‑لگدّام لّعرش ن‑ربّي ار‑تي‑تعبادن غ‑ونتال‑نس غ‑ييض ءولا ازال. غوالّي ءيسكيوسن ف‑لعرش راد‑بدّا‑تن‑يسّنتال غ‑دارس. ءور‑سار‑تن‑ينغي لاژ ءولا ءيريفي. ءور‑سار‑تن‑توت تافوكت ءولا ءيجاوان. اشكو القّاغ لّي‑يلّان غ‑لعرش، نتّان ا‑را‑تن‑يكس ءيزوور‑اسن س‑تالعينين ن‑وامان ن‑تودرت. راد‑اسن‑يسفيض ربّي كولّو ءيمطّاون‑نسن.» ءيفسي‑ولقّاغ ءيلمّا ويس سّا ن‑طّوابع، س‑يفسّا كولّو ما‑يلّان غ‑يگنّا ايلّيغ ءيزري ما‑يتگّان مناصّ ن‑تاساعت. ژرغ ءيلمّا سّا لّمالايكا لّي‑بيدّنين غ‑لگدّام ن‑ربّي، تّفكن‑اسن سّا ن‑نّفّارات. ءيدّو يا‑لّمالاك ياضني ءيبيدّ غ‑تاما ن‑وژرو ن‑تغرسي، ياسي تاطّاست ن‑وورغ. ءيتّفك‑اس لبخور ءيگّوتن ا‑ديدس‑يسّمون تيژولّا ن‑كولّو‑يمژلاين ن‑ربّي، باش ا‑تنت‑ين‑يسّاكمور ءي‑ربّي ف‑طّبلا ن‑وورغ لّي‑يلّان غ‑لگدّام لّعرش. ار‑ياقلاي‑واگّو لّبخور د‑تژولّا ن‑يمژلاين زغ‑وفوس لّمالاك س‑لگدّام ن‑ربّي. ءيدّو لمالاك ءيلمّا، ءيعمّر تاطّاست س‑تيرگين لّعافيت زغ‑دار طّبلا، ءيلوح‑تّ‑ين ف‑دّونيت. ءيمّاسّ ءيگّيگ س‑وقّريان ءيتجهّدن، ءوتن‑ووسمانّ ءيمّاسّ‑واكال. نكرن ءيلمّا سّا لمالايكا لّي‑دار سّا نّفّارات، سكرن ف‑ا‑تن‑وتن. يوت لمالاك امزوارو نّفّار‑نس، س‑يضر ءيبروري د‑لعافيت ف‑دّونيت خلضن د‑يدامّن. ءيجدر تولوت غ‑دّونيت ءولا تولوت غ‑يسغارن، تجدر ءولا توگا ءيزگزاون كولّوتّ. يوت ويس سين لّمالايكا نّفّار‑نس، س‑يتياتّاي كرا ءيرواسن يان‑ودرار ءيمقّورن ءيجدّرن س‑لعافيت، ءيتّلوح‑ن غ‑ومدا. يوورّي ءيژگُّاغ تولوت غ‑ومدا زوند ءيدامّن، ءيمّت تولوت غ‑لمخلوقات لّي‑لّانين غ‑ومدا، ءيتّهلك ءولا تولوت غ‑واناون لّي‑تكّانين امدا. يوت ويس كراض لّمالايكا نّفّار‑نس، س‑يضر يان‑يتري ءيمقّورن زغ‑يگنوان ار‑يجدّر زوند اسافو، ءيضر ف‑تولوت ن‑يسافّن د‑تالعينين ن‑وامان. ءيگا ءيسم ن‑يتري ‹اسمّوم›، يوورّي ءيسمّوم تولوت غ‑وامان، ءيمّت ما‑يگّوتن غ‑مدّن لّي‑سوانين امان‑ان، اشكو وورّين سمّومن باهرا. يوت ويس كّوژ لّمالايكا نّفّار‑نس، س‑تتّوت تافوكت ءيلّاس تولوت‑نس، ءيتّوت‑وايّور ءولا نتّا ءيلّاس تولوت‑نس، تّوتن ءيتران ءولا نتني ءيلّاس تولوت‑نسن. ار‑تلاح تيفاوت غ‑تولوت ن‑وزال ءولا تولوت ن‑ييض. سّماقّلغ‑ن‑داغ س‑ژريغ يان‑يگيدر يوويل غ‑وامّاس ن‑يگنوان، سفلدغ‑اس ءينّا س‑واوال ءيتجهّدن: «تاگوضي تاگوضي تاگوضي ا‑را‑ييلي ءي‑يمزدغن ن‑دّونيت ف‑سّيبت ن‑نّفّارات لّي‑راد‑وتن كراض لمالايكا ياضني.» يوت ويس سمّوس لّمالايكا نّفّار‑نس، س‑ژريغ يان‑يتري ءيضر زغ‑يگنوان س‑واكال. تّفك‑اس يات‑تساروت ءي‑يتري‑ان، ءيگان تين‑تدروت ن‑واكال. ءيدّو ءيرژم ءيمي ن‑تدروت، ءيغلي‑د زغ‑گيس كرا ن‑واگّو ءيگّوتن زوند اگّو ن‑وفارنو ءيمقّورن، ايلّيغ تلّاس تافوكت ءيلّاس لحال كولّو س‑واگّو لّي‑د‑يغلين زغ‑تدروت ن‑واكال. تفّوغ‑د‑يلمّا‑تمورغي زغ‑واگّو، تتّرس ف‑واكال، تّفك‑اس‑تژضّارت ا‑تقّس زوند ءيغردم. ءيتياونّا‑ياس ا‑ور‑تهلك توگا ن‑واكال والا ءيسغارن والا تيفراوين ن‑يسافارن، والاينّي ا‑تهلك غير مدّن لّي‑ور‑دار طّابع ن‑ربّي ف‑يگنزي‑نسن. ءور‑تژضار ا‑تن‑تنغ، والاينّي ءيتياوفكا‑ياس ا‑تن‑تسّمحاكّا سمّوس‑ييرن، ار‑تن‑تژّاض زوند غمكلّي ءيژّاض سّمّ ن‑يغردم ءيغ‑يقّس بنادم. غ‑ووسّان‑ان راد‑باهرا‑يرين مدّن اد‑مّتن، والاينّي ءور‑راد‑يژضارن اد‑مّتن. راد‑باهرا‑ژوژضن لموت، والاينّي ءور‑را‑ستّ‑افن. ترواس‑تمورغي‑ان ءي‑ييسّان ءوجادنين ءي‑يميغ. كود يات، ءيلّا ف‑يخف‑نس كرا ءيرواسن تّاج ن‑وورغ. گن‑وودماون‑نسنت زوند ءودم ن‑بنادم، ءيگ‑وازّار‑نسنت زوند ازّار ن‑تمغارت، گن‑ووخسان‑نسنت زوند ءوخسان ن‑يزم. لسنت ف‑يدمارن‑نسنت كرا ءيرواسن ابانّك ن‑ووزّال. ءيگ ءيجّيج ن‑يفراون‑نسنت زوند ءيجّيج لّكرارص د‑ييسّان گّوتنين ار‑كولّو‑تازّالن س‑يميغ. كود يات تطّاف تيمغيلت د‑وساقس زوند ءيغردم. غ‑تمغيلت‑نسنت ا‑غ‑تلّا‑تژضّارت لّي‑س‑راد‑سّمحاكّانت مدّن سمّوس‑ييرن. تامورغي‑ان، اگلّيد لّي‑گيس‑يحكامن ءيگا لمالاك ن‑تدروت ن‑واكال. ءيگ ءيسم‑نس ‹ابادّون› س‑واوال ن‑ايت‑يودايا، ءيگ ‹ابولّيون› (غوالّي ءيفنّون) س‑واوال ن‑ايت‑يونان. غمكاد ا‑تزري‑تگوضي تامزواروت. راد‑سول‑يلينت سنات‑تگوضيوين ياضني. يوت ويس سضيص لّمالايكا نّفّار‑نس، س‑سفلدغ ءي‑يان‑واوال ءيساول‑د زغ‑دار كّوژ‑واسكاون ن‑تغمرين ن‑طّبلا ن‑وورغ لّي‑يلّان غ‑لگدّام ن‑ربّي. ءيغر ءي‑لمالاك‑ان ويس سضيص لّي‑يوسين نّفّار ييني‑اس: «رژم‑د ءي‑كّوژ لمالايكا لّي‑تياماژنين غ‑دار‑واسيف ن‑فورات ءيمقّورن.» ءيرژم ءيلمّا ءي‑كّوژ لمالايكا لّي‑وجادنين ءي‑تاساعت‑ان ن‑واسّ‑ان ن‑وايّور‑ان ن‑وسگُّاس‑ان باش اد‑نغن تولوت ن‑بنادم. سفلدغ ءي‑كرا ءيملا‑يّي منّاو اد‑گان ءيمنّاين ن‑ييسّان ن‑يميغ. گان سين ءيد‑ميّا ن‑يد‑ميليون (000‏.000‏.200). غمكاد ا‑س‑يّي‑د‑بانّ‑ييسّان غ‑توارگيت لّي‑ژريغ. كرايگاتّ امنّاي ءيلسا ابانّك ءيلّا گيس‑وژگُّاغ د‑وژرقي د‑ووراغ، گن ءيگويّا ن‑ييسّان زوند اگايّو ن‑يزم، ار‑دي‑تّفّوغ لعافيت د‑واگّو د‑لكبريت زغ‑يمي‑نسن. غاكودان ا‑يمّوت تولوت ن‑بنادم س‑كراطّ‑تگوضيوين‑ان، س‑لعافيت د‑واگّو د‑لكبريت لّي‑د‑يتفّوغن زغ‑يماون‑نسن. اشكو غ‑يمي‑نسن د‑تمغيلت‑نسن ا‑غ‑تلّا‑تژضّارت ن‑ييسّان‑ان. كود يان، تيمغيلت‑نس تطّاف ءيخف زوند الگمّاض ما‑س‑ا‑يسّياگّاس مدّن. ءيمّا كولّو ويلّي ءور‑مّوتنين س‑تگوضيوين‑ان، سول ءور‑تا‑رين اد‑فلن غايلّي سكارن س‑يفاسّن‑نسن. زوويدن نتني ار‑تعبادن لجنون ءولا لاصنام ن‑وورغ د‑نّوقرت د‑واناس د‑وژرو د‑وكشّوض لّي‑ور‑تمنادنين ءولا‑دا‑سفليدن ءولا‑دا‑فتّون. نتني ءور‑تن‑اكُّ‑تُگراژ ف‑يسكّيرن‑نسن، ار‑نقّان ار‑سكارن سّيحر ار‑تفسادن ار‑تاكُرن. ژرغ ءيلمّا يا‑لّمالاك ياضني، ءيتجهّد باهرا ءيگّوز‑د زغ‑يگنّا. ءيسوتل‑اس‑ومدلو زوند تيملسيت، تلولّي‑تسليت ن‑ونژار ءي‑يخف‑نس، ييسفيو‑وودم‑نس زوند تافوكت، گن ءيضارن‑نس زوند تانّالين لّعافيت. ياسي غ‑وفوس‑نس يان‑وارّا ءيمژّين ءيرژمن. ءيسرس‑ن اضار‑نس افاسي ف‑ومدا، ءيسرس‑د اضار‑نس اژلماض ف‑واكال. ءيساول س‑يان‑واوال ءيتجهّدن زوند تاندرا ن‑يزم. لّيغ ءيساول ءوتن سّا ن‑يگّيگن. لّيغ ءوتن سّا ن‑يگّيگن گغ‑ن اد‑اراغ، والاينّي سفلدغ ءي‑يان‑واوال زغ‑يگنّا ءينّا‑يّي: «حضو مايد نّان سّا ن‑يگّيگن، ا‑ت‑ور‑تارات.» ءيمّا لمالاك لّي‑ژريغ ءيبيدّ ف‑ومدا د‑واكال، يولّ افوس‑نس افاسي س‑يگنّا، ءيگّالّ س‑ربّي لّي‑بدّا‑يلّان راد‑بدّا‑ييلي، ءيگ غوالّي ءيسكرن ءيگنّا د‑واكال د‑ومدا ءولا كولّو ما‑گيسن‑يلّان. ييني: «هاتي ءور‑را‑سول‑يماطل. اشكو غاكود لّيغ را‑يوت ويس سّا لّمالايكا نّفّار‑نس، را‑يسّافو ربّي مايلّي ءيقصاد، ا‑ت‑يگان د‑لباراكا ءينتلن لّي‑ف‑يساول ءي‑يخدّامن‑نس لانبيا.» غاكودان ءيساول‑د‑داغ‑سري‑واوال لّي‑مي‑سفلدغ زغ‑يگنّا ييني‑يّي‑د: «دّو، تامژت ارّا لّي‑يرژمن غ‑وفوس لّمالاك لّي‑يبيدّن ف‑ومدا ءولا اكال.» فتوغ س‑دار لمالاك ضالبغ‑ت اد‑يّي‑يفك ارّا‑لّي ءيمژّين، ييني‑يّي: «امژ‑ت تشّت‑ت. را‑يسمّوم غ‑وديس‑نّك والاينّي را‑يميم زوند تامّنت غ‑يمي‑نّك.» امژغ ارّا‑لّي ءيمژّين زغ‑وفوس لّمالاك شّغ‑ت. ءيميم زوند تامّنت غ‑يمي‑نو، والاينّي لّيغ‑ت‑شّيغ يوورّي ءيسمّوم غ‑وديس‑ينو. ييني‑يّي غاكودان: «ءيقّان‑ك‑يد ا‑تزايدت ار‑تّبرّاحت س‑ما‑راد‑اك‑يمل ربّي ف‑مدّن ن‑كيگان د‑تميزار د‑تاسوتين د‑لّوغات د‑يگلدان.» تّفك‑يّي ءيلمّا يات‑تغانيمت ما‑س‑ا‑سّغالغ، ييني‑يّي ربّي: «نكر تسّغلت تيگمّي ن‑ربّي‑نّك د‑وژرو ن‑تغرسي، تحاسبت كولّو ويلّي گيس تعبادنين. والاينّي اد‑ور‑تسّغلت تارگّيت‑ان ءيلّان غ‑برّا ن‑تگمّي، اشكو فلغ‑تّ ءي‑ويلّي ءور‑گينين مدّن‑ينو. راد‑اكُلن نتني ف‑تمدينت تامژلايت كّوژ ءيد‑مراو د‑سين (42) ن‑وايّور. والاينّي راد‑ازنغ سين ءيناگان‑ينو اد‑تبرّاحن الف د‑سين‑يد‑ميّا د‑سضيص ءيد‑مراو (1260) ن‑واسّ س‑يواليون لّي‑راد‑اسن‑مالاغ. لخيش ن‑تگوضي ا‑راد‑لسن.» راد‑گن نتني زوند سنات‑تيزوتنا ءولا سين لقنادل، بيدّن غ‑لگدّام ن‑ربّي لّي‑يحكامن كولّو دّونيت. ءيغ‑يناول كرا ن‑يان ا‑تن‑يهلك، را‑دي‑تفّوغ لعافيت زغ‑يمي‑نسن تسو‑ن غويلّي‑تن‑كورهانين. ءيقّان‑د ا‑يمّت وانّا ءيران ا‑تن‑يهلك. راد‑اسن‑تيلي‑تژضّارت اد‑قّنّ ءيگنوان ا‑ور‑يضر‑ونژار غ‑ووسّان لّي‑غ‑ا‑تبرّاحن س‑يواليون لّي‑اسن‑يمالا ربّي. راد‑اسن‑تيلي‑تژضّارت اد‑رارن امان ن‑تالعينين اد‑ژگُّاغن زوند ءيدامّن. راد‑اسن‑تيلي‑تژضّارت ف‑دّونيت ا‑ستّ‑وتن س‑كولّو كرا ءيگان تاگوضي غاكود نّا‑ران. غاكود لّيغ راد‑كمّلن تابرّاحت س‑توگّا‑نسن، راد‑سرسن‑ينكر‑واغُژن لّي‑د‑يغلين زغ‑تدروت ن‑واكال، ءينرو‑تن ءينغ‑تن. تقاما دّات‑نسن غ‑وسوك ن‑تمدينت ءيمقّورن لّي‑غ‑وگُلن سيديتسن ف‑وگّجدي، ار‑سرس‑كّاتن مدّن لمعنا ن‑‹سادوم› ءولا ‹ميصر›. كراض‑ووسّان د‑مناصّ ا‑را‑ن‑تمونون مدّن زغ‑كولّو تاسوتين د‑تقبيلين د‑لّوغات د‑تميزار اد‑سّموقّولن غ‑دّات‑نسن، اگُين ا‑تن‑مضلن. راد‑فرحن ءيمزدغن ن‑دّونيت س‑لموت‑نسن. راد‑باهرا‑ضصّان ءي‑نگراتسن ار‑اكّان تارّاگين ءي‑نگراتسن، اشكو ءور‑سول‑دّرن سين ءيناگان لّي‑زّوگوزنين تامّارا ءيگّوتن ف‑بنادم. والاينّي تيغوردين ن‑كراض‑ووسّان د‑مناصّ، ءيرار‑د گيسن ربّي رّوح ن‑تودرت، بيدّن ف‑يضارن‑نسن. ضرنت‑تكساض گّوتنين غ‑كولّو ويلّي‑تن‑ژرانين. غاكودان سفلدن ءيناگان‑لّي ءي‑يان‑واوال ءيتجهّدن زغ‑يگنّا ييني‑اسن: «غلياد‑د س‑غيد.» تيالالن ءيلمّا س‑يگنّا غ‑يات‑تمدلوت غ‑لگدّام ن‑ويلّي‑تن‑كورهانين. ءيمّاسّ‑واكال باهرا غ‑تاساعت‑ان، ءيضر يان‑وگزّوم زغ‑مراو ءيگزمان ن‑تمدينت، مّتن سّا ن‑يد‑والف (7000) ن‑مدّن لّيغ ءيمّوسّا‑واكال. كسوضن باهرا غويلّي سولنين ار‑تّينين: «منشك ا‑باهرا‑يتجهّد ربّي ن‑يگنّا.» غمكاد ا‑تزري تيس سنات‑تگوضيوين. ءيمّا تيس كراطّ‑تگوضيوين، هاتي تاكمور‑د. يوت ءيلمّا ويس سّا لّمالايكا نّفّار‑نس، س‑سفلدغ ءي‑واقّور س‑يواليون تجهّدنين غ‑يگنّا ار‑تّينين: «هاتي تاگلديت ن‑دّونيت توورّي تگا تاگلديت ن‑سيديتنّغ ءولا تين لماسيح‑نس. نتّان ا‑ستّ‑يحكامن غيلاد ءولا كولّو مايد‑د‑يفتان.» ءيمّا سين ءيد‑مراو د‑كّوژ (24) ن‑ومغار لّي‑سكيوسنين ف‑لعروش‑نسن غ‑لگدّام ن‑ربّي، ضرن‑ين ف‑وودماون‑نسن سجدن‑اس ءينين: «نشكر‑ك ا‑سيدي ربّي لّي‑يحكامن كولّو ما‑يلّان، ءيگ غوالّي ءيلّان ييلي بدّا، اشكو تنكرت س‑تحكيمت‑نّك ءيتجهّدن تگرت غ‑لحوكم. هاجنت‑تميزار ن‑دّونيت والاينّي ءيلكم‑د‑وزمز لّغاضاب‑نّك. ءيگ ازمز لّي‑غ‑را‑توت لحوكم ف‑ويلّي مّوتنين، ترارت لخير ءي‑يخدّامن‑نّك لانبيا ءولا ءيمژلاين‑نّك ءولا كولّو ويلّي ءوقّرنين ءيسم‑نّك، ما‑يمژّين ءولا ما‑يمقّورن. ءيگ ازمز لّي‑غ‑را‑تهلكت غويلّي تهلاكنين دّونيت.» غاكودان ا‑تّياورژام‑تگمّي ن‑ربّي غ‑يگنّا، ژرغ‑ن صّندوق لّعهد ن‑ربّي غ‑وگُنس ن‑تگمّي. ءوتن‑ووسمانّ، ءيمّاسّ ءيگّيگ س‑وقّريان ءيتجهّدن. ءيمّاسّ‑واكال ءولا نتّا، ءيضر ءيبروري ءيشقان. تبان ءيلمّا يات‑تماتارت ءيمقّورن غ‑يگنوان. تگا زوند يات‑تمغارت ءيلسان تافوكت، ييلي‑وايّور غ‑دّو ءيضارن‑نس، ييلي ف‑يخف‑نس يان‑تّاج ن‑سين د‑مراو ن‑يتري. ار‑تربّو تاكمور ا‑تارو، ار‑تسّغويّو س‑ونگاژ ن‑تلاليت. تبان‑يلمّا‑تماتارت ياضني غ‑يگنوان. تگا زوند يان‑ولگمّاض اژگُّاغ، ءيمقّور باهرا. ءيطّاف سّا ن‑يخفاون د‑مراو‑واسكاون، ءيلين سّا ن‑تّيجان مژّينين ف‑يخفاون‑نس. ءيسّماسّ ءيمغيل‑نس ءيجورّ سرس تولوت ن‑يتران زغ‑يگنوان، ءيلوح‑تن س‑واكال. ءيبيدّ غ‑لگدّام ن‑تمغارت لّي‑را‑يارو، ييري ا‑يشّ ارّاو‑نس غاكود نّا‑تي‑تورو. تارو يان‑وارّاو، ءيگ يوس لّي‑را‑يحكام كولّو تيميزار ن‑دّونيت س‑وعمود ن‑ووزّال. ءيتياتّاي‑وارّاو‑نس غاكودان س‑لعرش ن‑ربّي. تروول‑تمغارت س‑لخلا، س‑يلّي‑اس‑يجّوجاد ربّي. غين ا‑غ‑را‑د‑اس‑يفك كولّو ما‑تحتاجّا الف د‑سين ءيد‑ميّا د‑سضيص ءيد‑مراو (1260) ن‑واسّ. غاكودان ءينكر ءيميغ غ‑يگنّا. ءينكر لمالاك ءيمقّورن ميخايل د‑لمالايكا لّي‑لّانين غ‑دّو‑وفوس‑نس مّاغن د‑ولگمّاض. ءيرار‑فلّاسن‑ولگمّاض د‑لمالايكا‑نس، مّاغن ديدسن والاينّي ءور‑تن‑نرين، ءور‑ژضارن اد‑قامان غ‑يگنّا. ءيتياوگار‑ن‑ولگمّاض‑ان ءيمقّورن س‑ييزدار. نتّان ا‑مي‑تّينين ‹ءيبليس› ءولا ‹شيطان›، ءيگ ابنكال اقديم لّي‑يجلّون كولّو ءيمزدغن ن‑دّونيت. ءيتياوگار‑ن س‑واكال نتّا د‑لمالايكا‑نس. سفلدغ ءيلمّا ءي‑يان‑واوال ءيتجهّدن ءيساول غ‑يگنّا ييني: «غيلاد اد‑اغ‑يجّنجم ربّي‑نّغ، تبان‑د‑تحكيمت‑نس ءيتجهّدن، تاشك‑يد‑تگلديت‑نس، يامژ لماسيح‑نس لحوكم. اشكو غوالّي ءيتاشتكّان س‑ايتماتنّغ غ‑لگدّام ن‑ربّي‑نّغ غ‑ييض ءولا ازال، هاتي ءيتياولواح س‑ييزدار. نران‑ت نتني س‑يدامّن ن‑ولقّاغ ءولا س‑واوال ن‑توگّا‑نسن، اشكو ءوجادن اد‑فكن ءيخف‑نسن ار لموت. فرحات اي‑يگنوان ءولا كولّو ما‑گيسن‑يلّان. ءيمّا كونّي اي‑اكال د‑ومدا، تاگوضي ا‑راد‑اون‑ييلي اشكو ءيگّوز سرون ءيبليس، نكرن‑د گيس ءيريين باهرا اشكو ءيسّن ءيس‑ور‑اس‑تقاما غير لوقت ءيدروسن.» ءيمّا الگمّاض، لّيغ ءيژرا ءيخف‑نس ءيس‑ن‑يتياولواح س‑واكال، ءيدّو ار‑يطّاي تامغارت لّي‑يورون ارّاو. ءيمّا نتّات تياوفكان‑اس سين ءيفراون زوند ءيفراون ن‑يگيدر ءيمقّورن باش ا‑تايّل زغ‑دار‑وبنكال س‑لخلا س‑يلّيغ راد‑اس‑يتياوفكا كولّو ما‑تحتاجّا كراض ءيسگُّاسن د‑مناصّ. والاينّي ءينگي‑د ءيمي ن‑وبنكال س‑وامان زوند اسيف ءيتجهّدن باش ا‑ياوي‑ونگّاي‑نس تامغارت. اكال ا‑يسكرن افولكي ءي‑تمغارت غيلان، اشكو ءيرژم ءيمي‑نس ءيسو انگّاي لّي‑د‑يفّوغن زغ‑يمي ن‑ولگمّاض. ءيمّا الگمّاض، نكرن‑د گيس ءيريين گّوتنين، طيّر‑اس باهرا ف‑تمغارت. ءيدّو ا‑يتمّاغ د‑تاروا ياضني ن‑تمغارت، ا‑تن‑يگان د‑كولّو ويلّي سكارنين س‑لوصيّات ن‑ربّي ار‑تامژن غ‑توگّا ن‑ياسوع. ءيبيدّ ف‑وملال غ‑تاما ن‑ومدا. ژرغ ءيلمّا يان‑واغُژن ءيغلي‑د زغ‑ومدا. ءيطّاف مراو‑واسكاون د‑سّا ن‑يخفاون، ييلي ف‑كرايگاتّ ءيسك يان‑تّاج ءيمژّين، ءيتيارا ف‑كرايگاتّ ءيخف يان‑يسم ءيگان تارگّيمت ءي‑يسم ن‑ربّي. ءيگ‑واغُژن‑ان زوند اگرزام، صحون ءيضارن‑نس ءيلين‑گيسن‑واخبّاشن مقّورنين، ءيگ ءيمي‑نس زوند ءيمي ن‑يزم. ءيفك‑اس‑ولگمّاض لحوكم‑نس ءولا تاژضّارت ءيتجهّدن ن‑تگلديت‑نس. ءيرواس ءيس‑يتياگّاس يان زغ‑يخفاون‑نس را‑يمّت، والاينّي ءيجّي‑واگّاس‑لّي ءيشقان ءور‑يمّوت. ار‑تعجّابن كولّو ءيمزدغن ن‑دّونيت غ‑واغُژن‑ان، وورّين ضفورن‑ت. ار‑تعبادن الگمّاض اشكو ءيفكا تاژضّارت‑نس ءي‑واغُژن، ار‑تعبادن اغُژن ءولا نتّا ار‑تّينين: «ما‑يتجهّدن زوند اغُژن؟ ما‑يژضارن ا‑ت‑ينرو؟» ءيتياوفكا ءي‑واغُژن ا‑يساوال ار‑يسّفورّوگ ار‑يرگّم ربّي، ءيتّفك‑اس ا‑يحكام كّوژ ءيد‑مراو د‑سين (42) ن‑وايّور. ءيرژم ءيمي‑نس س‑ترگّام، ار‑يرگّم غ‑يسم ن‑ربّي ءولا تازدغت‑نس ءولا كولّو ايت‑يگنّا. ءيتّفك‑اس ا‑يتمّاغ د‑يمژلاين ن‑ربّي ءينرو‑تن، ءيتّفك‑اس ا‑يحكام غ‑مدّن ن‑كرايگاتّ تاقبيلت د‑تاسوت د‑لّوغا د‑تمازيرت. را‑تي‑تعبادن كولّو ءيمزدغن ن‑دّونيت، ابلا غويلّي مي ءيتيارا ءيسم‑نسن زغ‑يسيزوار ن‑دّونيت غ‑وارّا ن‑تودرت ن‑ولقّاغ لّي‑يتياوغراسن. وانّا دار ءيمزگان، ءيقّان‑ت‑يد ا‑يسفلد. «وانّا‑د‑يقّانّ ا‑يتياماژ را‑يتياماژ. وانّا‑د‑يقّانّ ا‑يمّت س‑تاژّيت را‑يمّت س‑تاژّيت. مايان ا‑ف‑يلّا ف‑يمژلاين ن‑ربّي ا‑گيس‑امژن، زگان غ‑وغاراس‑نس.» ژرغ ءيلمّا اغُژن ياضني ءيفّوغ‑د زغ‑واكال. ءيطّاف سين‑واسكاون زوند اسكاون ن‑ولقّاغ، ار‑يساوال زوند الگمّاض. ار‑يتحكام س‑يسم ن‑واغُژن امزوارو، ءيطّاف كولّو تاژضّارت‑نس. ار‑يتامر دّونيت د‑يمزدغن‑نس اد‑تعبادن اغُژن امزوارو لّي‑مي‑يجّي‑واگّاس‑نس ءيشقان. ءيزايد ار‑يسكار تيميتار مقّورنين، ار‑د‑يزّوگوز لعافيت زغ‑يگنّا ار اكال ا‑ستّ‑ژرن كولّو مدّن. ءيتياوفكا‑ياس ا‑يسكار لمعجيزات غ‑تاما ن‑واغُژن امزوارو، ار‑سرسنت‑يجلّو كولّو ءيمزدغن ن‑دّونيت. يوصّا‑تن اد‑سكرن يات‑صّورت ءيمقّورن ن‑واغُژن امزوارو لّي‑يتياگّاسن س‑تاژّيت يوورّي‑داغ ءيدّر. ءيتّفك‑اس ا‑يزرع كرا ن‑رّوح غ‑صّورت‑لّي ن‑واغُژن امزوارو، ايلّيغ توورّي ار‑تساوال صّورت ار‑تّامر مدّن اد‑نغن وانّا ياگُين ا‑ستّ‑يتعباد. ءيزايد‑واغُژن‑لّي ار‑يتامر كولّو مدّن، ما‑يمژّين ءولا ما‑يمقّورن، ايت‑وايدا ءولا ءيمژلاض، ءيسمگان ءولا غويلّي گانين وين ءيخف‑نس، ييني‑اسن اد‑قبلن طّابع ف‑وفوس‑نسن افاسي نغد ف‑يگنزي‑نسن. غمكان ا‑س‑ا‑يتامر باش ا‑ور‑ييژضار يان ا‑يسغ ءولا ءيزّنزا بلا دارس ءيلّا طّابع ن‑يسم ن‑واغُژن امزوارو نغد نّمرا لّي‑يمالان ءيسم‑نس. ما‑را‑يفهم لمعنا‑ياد؟ وانّا دار لعاقل، ءيلّا فلّاس ا‑يحاسب نّمرا ن‑واغُژن، اشكو تگا نتّات نّمرا ن‑يسم ن‑بنادم، تگ سضيص ءيد‑ميّا د‑سضيص ءيد‑مراو د‑سضيص (666). سّماقّلغ‑ن غاكودان س‑ژريغ القّاغ ءيبيدّ ف‑يگّي ن‑وورير ن‑تگمّي ن‑ربّي. بيدّن ديدس ميّا د‑كّوژ ءيد‑مراو د‑كّوژ‑والف (000‏.144) ن‑مدّن لّي‑مي‑يتيارا ف‑يگنزي‑نسن ءيسم ن‑ولقّاغ ءولا ءيسم ن‑باباس. سفلدغ ءيلمّا ءي‑يان‑واوال ءيساول غ‑يگنّا زوند ءيجّيج ن‑يسافّن ن‑وامان گّوتنين ءولا زوند اقّريان ن‑يگّيگ ءيتجهّدن. ءيرواس لحسّ لّوتارات ار‑تن‑كّاتن ءيد‑باب‑نسن. ار‑كولّو‑تاسين يان‑ومارگ لّجديد غ‑لگدّام لّعرش غ‑دار كّوژط لمخلوقات د‑يمغارن. ءور‑يژضار يان ا‑ييسّان امارگ‑ان، ابلا ميّا د‑كّوژ ءيد‑مراو د‑كّوژ‑والف (000‏.144) ن‑مدّن لّي‑يفرا ربّي زغ‑دّونيت. نتني گان غويلّي غوسنين، ءور‑سّركين ءيخف‑نسن د‑تمغارين. گن غويلّي‑بدّا‑يتمونون د‑ولقّاغ س‑ينّاس ا‑يتّيدو. گن ءيمنزا ن‑بنادم لّي‑يفرا اد‑گن وين ربّي د‑ولقّاغ. كرا ن‑تكركيست ءور‑تكّي ءيمي‑نسن. كرا يُخشنّ ءور‑گيسن‑يلّي. ژرغ ءيلمّا يا‑لّمالاك ياضني يوويل غ‑وامّاس ن‑يگنوان، ياوي‑د لخبار ءيفولكين لّي‑راد‑بدّا‑ييلي، ا‑سرس‑يتبرّاح ءي‑كولّو ءيمزدغن ن‑دّونيت ن‑كرايگاتّ تاسوت د‑تقبيلت د‑لّوغا د‑تمازيرت. يالّ اوال‑نس ييني: «ضرات ا‑تّعبادم ربّي ار‑تي‑تّالغم، اشكو تلكم‑د تاساعت ا‑يوت لحوكم ف‑بنادم. سجدات ءي‑والّي ءيسكرن ءيگنوان د‑واكال، ءيسكر امدا ءولا تالعينين ن‑وامان.» ءيگُّرو‑اس‑د لمالاك ويس سين ييني: «تّهلك، تّهلك‑تمدينت ن‑بابيل ءيتجهّدن. تّهلك ختالّي ءيسّوان كولّو تيميزار ن‑دّونيت س‑تيسّي ءيكتين لّفساد‑نس ءيسّنوفولن.» ءيگُّرو‑اسن‑د لمالاك ويس كراض، يالّ اوال‑نس ييني: «وينّا تعبادنين اغُژن ءولا صّورت‑نس، د‑وينّا قبلنين طّابع‑نس ف‑يگنزي‑نسن ءولا ف‑وفوس‑نسن، نتني راد‑سون زغ‑تيسّي ءيحرّان ن‑سّخط ن‑ربّي لّي‑س‑يعمّر لكاس لّغاضاب‑نس. راد‑رفوفنّ س‑لعافيت د‑لكبريت غ‑لگدّام لّمالايكا ن‑ربّي ءولا غ‑لگدّام ن‑ولقّاغ. راد‑بدّا‑ياقلاي‑واگّو ن‑ورفوفن‑نسن، ءور‑سار‑يتمّي. ءور‑سار‑راد‑اسن‑تيلي رّاحت، لا غ‑ييض ءولا ازال، ءي‑ويلّي تعبادنين اغُژن ءولا صّورت‑نس، ءولا غويلّي قبلنين طّابع ن‑يسم‑نس.» مايان ا‑ف‑يلّا ف‑يمژلاين ن‑ربّي اد‑صبرن زگان، ا‑تن‑يگان د‑ويلّي سكارنين س‑لوصيّات ن‑ربّي غوين‑بدّا غ‑ياسوع. سفلدغ ءيلمّا ءي‑يان‑واوال ءيساول غ‑يگنّا ييني‑يّي: «ارا مايا، ‹ءيمباركين اد‑گان وينّا مّوتنين ف‑يسم ن‑سيديتنّغ زغ‑غيلاد س‑وفلّا.› » ءيساول‑د رّوح ن‑ربّي ييني: «س‑صّاحت، راد‑سونفون نتني زغ‑ونهاتاف‑نسن، اوين ديدسن لحساب ن‑كولّو ماد‑سكارن ءيفولكي.» سّماقّلغ‑ن ءيلمّا س‑ژريغ يات‑تمدلوت تومليلت، ءيسكيوس فلّاس يان ءيرواس بنادم. ييلي تّاج ن‑وورغ ف‑يخف‑نس، ييلي‑وسمّاود ءيمسادن غ‑وفوس‑نس. ءيفّوغ‑د يا‑لّمالاك زغ‑تگمّي ن‑ربّي، يالّ اوال‑نس ييني ءي‑والّي ءيسكيوسن ف‑تمدلوت: «لوح‑ن اسمّاود‑نّك ا‑يمگر، اشكو ءيلكم‑وزمز ن‑تمگرا، تنو صّابت ن‑دّونيت.» ءينكر غوالّي ءيسكيوسن ف‑تمدلوت ءيلوح‑ن اسمّاود‑نس ف‑دّونيت ءيمگر صّابت‑نس. غاكودان ءيفّوغ‑د يا‑لّمالاك ياضني زغ‑تگمّي ن‑ربّي غ‑يگنّا، ءولا نتّا يوسي اسمّاود ءيمسادن. ءيفّوغ‑د ءيلمّا يا‑لّمالاك ياضني زغ‑دار طّبلا لّبخور، ءيگ غوالّي ءيگابلن لعافيت. ءيساول س‑والّي يوسين اسمّاود ءيمسادن ييني‑اس س‑واوال ءيتجهّدن: «لوح‑ن اسمّاود‑نّك، تسّمونت تيزرمين زغ‑دّاليت ن‑دّونيت، اشكو ءينوا‑واضيل.» ءيدّو لمالاك ءيلوح‑ن اسمّاود‑نس ف‑دّونيت ءيسّمون اضيل. ءيلوح‑ن اضيل ن‑دّونيت غ‑لمعصّرت ءيمقّورن ن‑سّخط ن‑ربّي. تلّا لمعصّرت غ‑برّا ن‑تمدينت، ار‑گيس‑تاضّرن اضيل. فّوغن زغ‑گيس ءيدامّن، نگين زوند اسيف، ايلّيغ ءيدرا س‑ما‑يتگّان تيدّي ن‑واگمار. ءيلكم‑ونگّاي‑نس ما‑يتگّان كراض ءيد‑ميّا ن‑كيليميتر. ژرغ ءيلمّا تاماتارت ياضني غ‑يگنّا، تمقّور باهرا، تعجّبغ گيس س‑كيگان. تگا سّا لّمالايكا اسين سّا ن‑تگوضيوين. تيمگّورا غ‑تگوضيوين اد‑گانت، اشكو ربّي ءيحودّا سرسنت سّخط‑نس. ژرغ كرا ءيرواس‑يّي تامدا ن‑جّاج ءيخلضن س‑لعافيت. ژرغ غويلّي نرانين اغُژن ءولا صّورت‑نس ءولا نّمرا ن‑يسم‑نس، بيدّن غ‑تاما ن‑تمدا ن‑جّاج اسين لوتارات ن‑ربّي. ار‑تّيريرن اسين امارگ ن‑موسا اخدّام ن‑ربّي د‑ومارگ ن‑ولقّاغ ار‑تّينين: «وا‑سيدي ربّي لّي‑يحكامن كولّو ما‑يلّان، ءيمقّور كولّو ما‑تسكارت، لعجب ا‑يگا. واي‑اگلّيد ن‑تاسوتين، يُغژان كولّو ما‑تّنباطّ. لحقّ ا‑يگا. وا‑سيدي ربّي، ما‑ور‑را‑يضر غ‑لگدّام‑نّك؟ ما‑ور‑را‑يوقّر لمجد ن‑يسم‑نّك؟ اشكو كيّي واحدوك ا‑يصفان. راد‑د‑اشكين مدّن اد‑اك‑سجدن زغ‑كولّو تيميزار ن‑دّونيت. اشكو ءيبايّن‑اسن‑د لحقّ ن‑تنباضين‑نّك.» لّيغ ءيزري مايان سّماقّلغ‑ن س‑ژريغ تاحانوت تامژلايت ترژم غ‑وخيّام ن‑تميتار ن‑ربّي غ‑يگنّا. ژرغ سّا لّمالايكا لّي‑را‑ياسي سّا ن‑تگوضيوين، فّوغن‑د زغ‑تحانوت تامژلايت. لسن تيملسا لّكتّان ءيصفان ار‑سّمرقيقيينت. بكيسن زغ‑وامّاس‑نسن س‑يبكّاسن ن‑وورغ. تدّو يات زغ‑كّوژط لمخلوقات تفك ءي‑سّا لّمالايكا سّا ن‑تاطّاسين ن‑وورغ، عمّرنت س‑سّخط ن‑ربّي لّي‑بدّا‑يلّان راد‑بدّا‑ييلي. توورّي تعمّر‑تحانوت تامژلايت س‑واگّو لّمجد ن‑ربّي د‑تحكيمت‑نس ءيتجهّدن. ءور‑را‑ييژضار يان ا‑يكشم س‑تحانوت‑ان تامژلايت ارد كمّلنت سّا ن‑تگوضيوين لّي‑وسين سّا لّمالايكا. سفلدغ ءي‑يان‑واوال ءيتجهّدن ءيساول‑د زغ‑تحانوت تامژلايت، ييني ءي‑سّا لّمالايكا: «دّوات تفّيم‑ن ف‑دّونيت سّا ن‑تاطّاسين ن‑سّخط ن‑ربّي.» ءيدّو لمالاك امزوارو ءيفّي‑ن تاطّاست‑نس ف‑دّونيت، س‑وورّين ءيحبّا شقانين أُخشنّين غ‑مدّن لّي‑دار طّابع ن‑واغُژن ار‑تعبادن صّورت‑نس. ءيدّو لمالاك ويس سين ءيفّي‑ن تاطّاست‑نس ف‑ومدا، س‑يوورّي ءيگ‑ومدا زوند ءيدامّن ن‑ينيغي، ءيمّت كولّو ما‑يدّرن غ‑ومدا. ءيدّو لمالاك ويس كراض ءيفّي‑ن تاطّاست‑نس ف‑يسافّن د‑تالعينين ن‑وامان، س‑وورّين كولّو ژگُّاغن زوند ءيدامّن. سفلدغ ءي‑لمالاك لّي‑يگابلن امان ءينّا: «وا‑ربّي امژلاي لّي‑يلّان ءيكّا‑تّين بدّا ءيلّا، س‑لحقّ ا‑س‑توتّ لحوكم‑اد ف‑بنادم، اشكو فّين نتني ءيدامّن ن‑يمژلاين‑نّك د‑لانبيا. هاتني غيلا ءيدامّن اد‑اسن‑تسّوات. غمكان اد‑اسن‑يگان.» سفلدغ ءي‑كرا ءيساول‑د زغ‑طّبلا لّبخور ءينّا: «س‑صّاحت ا‑سيدي ربّي لّي‑يحكامن كولّو ما‑يلّان، يُغژان لحوكم‑نّك. س‑لحقّ ا‑س‑ا‑تّحكامت.» ءيدّو لمالاك ويس كّوژ ءيفّي‑ن تاطّاست‑نس ف‑تافوكت، س‑اس‑يتياوفكا ا‑تقد بنادم س‑لعافيت‑نس. تجدر مدّن س‑ترغي‑نس ءيحرّان، ايلّيغ رگمن ءيسم ن‑ربّي لّي‑دار تاژضّارت ا‑تن‑يوت س‑تگوضيوين‑ان، والاينّي ءور‑رين اد‑فلن دّنوب‑نسن ءوقّرن لمجد‑نس. ءيدّو لمالاك ويس سمّوس ءيفّي‑ن تاطّاست‑نس ف‑لعرش ن‑واغُژن، تلّاس‑تگلديت‑نس س‑وورّين مدّن ار‑گلّين ءيلس‑نسن س‑واطّان لّي‑تن‑يبرّين. ار‑رگّمن ربّي ن‑يگنّا ف‑سّيبت ن‑واطّان د‑يحبّا لّي‑گيسن‑يلّان، والاينّي ءور‑تا‑جّو‑رين اد‑فلن ءيسكّيرن‑نسن أُخشنّين. ءيدّو لمالاك ويس سضيص ءيفّي‑ن تاطّاست‑نس ف‑واسيف ن‑فورات ءيمقّورن، س‑يوورّي ءيقّور زغ‑وامان، باش ا‑يگ اغاراس يوجاد ءي‑يگلدان لّي‑را‑د‑ياشك زغ‑وسغلاي ن‑تافوكت. ژرغ ءيلمّا كراض لجنون أُخشنّين زوند كراض ءيگُرا، فّوغن‑د زغ‑يمي ن‑ولگمّاض د‑وين‑واغُژن د‑وين نّابي بو‑تكركاس. نتني لارواح لّجنون اد‑گان، ار‑سكارن لمعجيزات ار‑تكّان دار كولّو ءيگلدان ن‑دّونيت ا‑تن‑سّمونونّ ءي‑يميغ لّي‑س‑راد‑مّاغن غ‑واسّ لّحساب ن‑ربّي لّي‑يحكامن كولّو ما‑يلّان. ءينّا سيديتنّغ: «هاتي را‑ن‑اشكغ زوند امخّار. امباركي ا‑را‑يگ وانّا ءيضوفن ياوي ديدس تيملسا‑نس ا‑ور‑يفّوغ بلا يات ءيحشم غ‑لگدّام ن‑مدّن.» راد‑سّمونّ ءيگلدان‑لّي غ‑ودغار لّي‑مي‑تّينين ‹هارماگادّون› س‑واوال ن‑ايت‑يودايا. ءيدّو لمالاك ويس سّا ءيفّي‑ن تاطّاست‑نس ف‑يگنوان، س‑د‑يساول يان‑واوال ءيتجهّدن زغ‑دار لعرش غ‑تحانوت تامژلايت ييني: «هاتي ءيكمّل.» ار‑كّاتن‑ووسمانّ، ءيمّاسّ ءيگّيگ س‑وقّريان ءيتجهّدن، ءيمّاسّ‑واكال ءولا نتّا باهرا. ءور‑جّو‑يمّوسّي‑واكال غمكان زغ‑لّيغ ءيتياوخلاق بنادم غ‑دّونيت. تبضو‑تمدينت ءيمقّورن ف‑كراطّ‑توال، تّهلكنت كولّو تيمدينين ن‑تميزار ن‑دّونيت. ءور‑يتّو ربّي تامدينت ن‑بابيل ءيمقّورن، ءيسّوا‑ياس كولّو لكاس ن‑سّخط لّغاضاب‑نس. غاكودان لاح ءيگزيرن، استوان كولّو ءيدرارن. ار‑ن‑يطّار ءيبروري زغ‑يگنوان زوند ءيژران، ءيضني باهرا ياكمور‑ن س‑كّوژ ءيد‑مراو ن‑كيلو. ار‑ن‑يطّار ف‑مدّن ايلّيغ رگمن ربّي ف‑تگوضي‑ان ن‑يبروري، اشكو ءيشقا باهرا. ياشك‑يد داري يان زغ‑سّا لّمالايكا لّي‑وسينين سّا ن‑تاطّاسين ييني‑يّي: «اشك‑يد اد‑اك‑ملغ لعقوبيت لّي‑را‑يضر ف‑تمگّانت ءيمقّورن لّي‑يسكيوسن غ‑گر ءيسافّن ن‑وامان. فسادن ديدس ءيگلدان ن‑دّونيت، تسّنوفل ءيمزدغن ن‑دّونيت س‑تيسّي ءيكتين لّفساد‑نس.» ياسي‑يّي غاكودان س‑تحكيمت ن‑رّوح، ياوي‑يّي س‑يان ماني ءيخوان. ژرغ غين يات‑تمغارت تني ف‑يان‑واغُژن اژگُّاغ. ءيطّاف سّا ن‑يخفاون د‑مراو‑واسكاون، تياران فلّاس كيگان د‑يسماون، گان كولّو تيرگّام ءي‑ربّي. تلس‑تمغارت‑ان ما‑يضلان د‑ما‑يژگُّاغن، تگ‑ن ءيكُلان ن‑وورغ د‑لجوهر د‑تژراتين غُلانين. تاسي غ‑وفوس‑نس يا‑لّكاس ن‑وورغ ءيعمّرن س‑تجلخيت د‑يركان لّفساد‑نس. ءيتيارا ف‑يگنزي‑نس يان ءيسم س‑لمعنا ءينتلن، ءيگا «بابيل ءيمقّورن، ءينّاس ن‑تمگّانين ءولا كولّو ما‑يگان تاجلخيت ن‑دّونيت.» ژرغ تامغارت‑ان تنوفل س‑تيسّي ن‑يدامّن ن‑يمژلاين ن‑ربّي د‑وين ءيناگان ن‑ياسوع. لّيغ‑تّ‑ژريغ، تعجّبغ گيس باهرا. ييني‑يّي لمالاك: «ماخ ايلّيغ گيس تّعجّبت؟ راد‑اك‑ملغ لمعنا‑ياد فلّاك ءينتلن ن‑تمغارت ءولا اغُژن لّي‑ف‑تني لّي‑يطّافن سّا ن‑يخفاون د‑مراو‑واسكاون. اغُژن‑ان ءيكّا‑تّين ءيلّا، ءور‑سول‑ا‑يتبان، را‑د‑يغلي زغ‑تدروت ن‑واكال ءيفتو س‑لهالاك. را‑گيس‑تعجّابن ءيمزدغن ن‑دّونيت لّي‑مي‑ور‑يتيارا ءيسم‑نسن غ‑وارّا ن‑تودرت زغ‑يسيزوار ن‑دّونيت. اشكو راد‑ژرن اغُژن لّي‑ستّين‑يكّان ءيلّا، ءور‑سول‑ا‑يتبان، را‑د‑داغ‑يبان. «ما‑يطّافن لعاقل باش ا‑يفهم لمعنا‑ياد؟ اشكو سّا ن‑يخفاون‑لّي، گان سّا ن‑يورار لّي‑ف‑تسكيوس‑تمغارت. گن ءولا سّا ن‑يگلدان، ضرن زغ‑گيسن سمّوس، ءيسول يان، را‑د‑سول‑ياشك وايّاض. غاكود نّا‑د‑يوشكا راد‑اس‑يتياوفكا ا‑يحكام يات لوقت ءيدروسن. ءيمّا اغُژن لّي‑ستّين ءيكّان ءيلّا ءور‑ا‑سول‑يتبان، نتّان ا‑را‑يگ ويس تام ءيگلدان. ءيكّا‑تّين ءيگا يان زغ‑سّا ن‑يگلدان لّي‑زرينين. را‑د‑يوورّي، ءيفتو ءيلمّا س‑لهالاك. «ءيمّا مراو‑واسكاون لّي‑تژريت، نتني گان مراو ءيگلدان لّي‑ور‑تا‑حكامنين. راد‑اسن‑تّياوفكا‑تژضّارت اد‑حكامن نتني د‑واغُژن يات تاساعت ءيدروسن. يات‑تنباطّ كا‑دارسن‑يلّان، راد‑فلن تاژضّارت ءولا تيگلداي‑نسن غ‑وفوس ن‑واغُژن. راد‑مّاغن د‑ولقّاغ، والاينّي را‑تن‑ينرو‑ولقّاغ نتّا د‑مدّن‑نس لّي‑مي‑يغرا، ءيژلي‑تن اد‑گن وينس، غوين‑بدّا گيس. اشكو ءيگا نتّا انمغور ن‑ينمغورن، ءيگ اگلّيد ن‑يگلدان.» ءيزايد لمالاك ييني‑يّي: «ءيسافّن ن‑وامان لّي‑تژريت تسكيوس‑تمگّانت غ‑گراتسن، نتني گان مدّن ن‑تاسوتين د‑تقبيلين د‑تميزار د‑لّوغات ن‑دّونيت. والاينّي مراو‑واسكاون د‑واغُژن لّي‑تژريت، نتني راد‑كرهون تامگّانت، كّيسن‑اس كولّو ما‑دارس‑يلّان، فلن‑تّ بلا يات. راد‑شّن تيفيّي‑نس جدرن‑تّ كولّو س‑لعافيت. اشكو ءيسكر ربّي غ‑وولاون‑نسن اد‑سكارن ما‑گيسن‑يقصاد نتّا، مشاشكان‑د اد‑فلن تاژضّارت ءولا تيگلداي‑نسن غ‑وفوس ن‑واغُژن ارد كولّو ءيجرو مايلّي‑ياد‑ينّا ربّي را‑يجرو. ءيمّا تامغارت لّي‑تژريت، نتّات ا‑يگان تامدينت ءيمقّورن لّي‑يحكامن غ‑كولّو ءيگلدان دّونيت.» لّيغ ءيزري مايان ژرغ يا‑لّمالاك ياضني ءيتجهّد باهرا، ءيگّوز‑د زغ‑يگنّا، ءيسفاو كولّو دّونيت س‑نّور لّي‑گيس‑يلّان. يالّ اوال‑نس ييني: «تّهلك، تّهلك بابيل ءيمقّورن. ءور‑تگي غيلاد ابلا تازدغت لّجنون، تعمّر س‑كولّو كرا ءيگان رّوح يُخشنّ ءولا كولّو كرا ءيگان اگضيض ءور‑يحلّان لّي‑يسّمسار بنادم. اشكو تسّوا كولّو تيميزار ن‑دّونيت س‑تيسّي ءيكتين لّفساد‑نس، فسادن ديدس ءيگلدان ن‑دّونيت. تسّربح ءيسبّابن ن‑دّونيت زغ‑توگّت ن‑شّهوات‑نس.» سفلدغ ءيلمّا ءي‑واوال ياضني زغ‑يگنّا ءينّا: «وا‑مدّن‑ينو، فّوغاد‑د زغ‑دارس، ا‑ور‑ديدس‑تمونم غ‑دّنوب‑نس باش ا‑ور‑ديدس‑تكشمّ غ‑تگوضيوين‑نس. هان دّنوب‑نس گودين ار ءيگنّا. ءور‑يتّو ربّي‑نّون كولّو ما‑تسكر يُخشن. ءيمّا غيلاد سكرات‑اس غمكلّي‑اون‑تسكر، ترارم‑اس ف‑سنات‑توال ف‑يسكّيرن‑نس، تعمّرم‑اس لكاس س‑تيسّي ءيحرّان ف‑سنات‑توال ف‑تيسّي لّي‑اون‑تسّوا نتّات، تعبّرم‑اس تارفوفنت د‑تگوضي س‑لعبرت لّي‑س‑تعبّر ءي‑يخف‑نس لمجد د‑لخير. اشكو ار‑تّيني نتّات غ‑وول‑نس: ‹ها‑يّي تاگلّيتّ اد‑گيغ ف‑لعرش‑ينو. ءور‑گيغ تاهجّالت، ءور‑سار‑كّين ءيمطّاون الّن‑ينو.› ف‑غايان ا‑ف‑را‑ستّ‑وتنت‑كولّو‑تگوضيوين‑نس غ‑يان‑واسّ. را‑فلّاس‑يضر‑واطّان د‑تاغوفت د‑وغني، ار‑تّي‑تجدّر لعافيت. اشكو ربّي سيديتون لّي‑را‑فلّاس‑يزّوگز لعقوبيت، هاتي ءيتجهّد باهرا. «ءيمّا ءيگلدان ن‑دّونيت لّي‑ديدس‑فسادنين شّن ديدس لخير، راد‑سّغويّون ار‑فلّاس‑الّان غاكود نّا‑ژران اگّو لّعافيت ار‑تّي‑تجدّر. را‑ن‑بيدّن غ‑توگّوگت، ءيكساضن ا‑ور‑ديدس‑رفوفنّ ءولا نتني، ار‑تّينين: ‹تاگوضي، تاگوضي ايد‑فلّام‑يضرن ا‑تامدينت ءيمقّورن. وا‑تامدينت ن‑بابيل ءيتجهّدن، تاساعت ءيدروسن ا‑غ‑فلّام‑تگّوز لعقوبيت‑نّم.› «راد‑سّغويّون ءيسبّابن ن‑دّونيت ار‑فلّاس‑الّان، اشكو ءور‑سول‑يلّي ما‑يساغن سّلاعت‑نسن ن‑وورغ د‑نّوقرت د‑تژراتين غُلانين د‑لجوهر د‑لكتّان ءيشوان د‑لحرير د‑تّوب ءيضيلي د‑تّوب اژگُّاغ د‑يكشّوضن لقماري د‑سّلاعت لّعاج د‑وكشّوض يُغلان د‑سّلاعت ن‑واناس د‑ووزّال د‑رّخام د‑لقرفا د‑لحنوض د‑توجّوت ءيميمن د‑وسافار لمورّ د‑لبخور د‑وامان ن‑واضيل ءيكتين د‑زّيت د‑وگّورن د‑يردن د‑يموگاين د‑وولّي د‑ييسّان د‑لكرارص د‑يسمگان د‑مدّن تياماژنين غ‑يميغ. «راد‑اس‑ينين: ‹لاح‑ام كولّو تيميخار لّي‑تّيريت. ءيتياتّاي فلّام كولّو ما‑س‑ترضيت، تسّفولكيت سرس ءيخف‑نّم. ءور‑سار‑تي‑تژريت‑داغ.› ءولا ءيسبّابن لّي‑ربحنين س‑سّلاعت لّي‑گيس‑زّنزان، راد‑بيدّن غ‑توگّوگت، ءيكساضن ا‑ور‑فلّاسن‑تضر لعقوبيت ءولا نتني ديدس. ار‑سّغويّون ار‑الّان ار‑تّينين: ‹تاگوضي، تاگوضي ايد ءيضرن ف‑تمدينت ءيمقّورن لّي‑يلسان لكتّان ءيشوان د‑تّوب ءيضيلي د‑تّوب اژگُّاغ د‑يكُلان ن‑وورغ د‑لجوهر د‑تژراتين غُلانين. هاتي غير تاساعت ءيدروسن ا‑غ‑كولّو‑لاح تيميخار‑ان.› «بيدّن‑ين غ‑توگّوگت كولّو ويلّي تكّانين امدا، رّوايس ن‑واناون د‑ويلّي گيسن سّودونين د‑ويلّي گيسن تخدامنين. لّيغ ا‑تمنادن اگّو لّعافيت لّي‑س‑ا‑تجدّر ار‑سّغويّون ار‑تّينين: ‹ءيس‑جّو‑تلّا كرا ن‑تمدينت زوند تامدينت‑اد ءيمقّورن؟› ار‑الّان ار‑تلوحن اگدرور ف‑يگّي ن‑يگويّا‑نسن ار‑سّغويّون ار‑تّينين: ‹تاگوضي، تاگوضي ايد ءيضرن ف‑تمدينت ءيمقّورن لّي‑يسّرباحن س‑تميخار‑نس كولّو ويلّي دار اناون ف‑ومدا. هاتي غير تاساعت ءيدروسن ا‑غ‑لاح كولّو ما‑گيس‑يلّان.› فرحات اي‑ايت‑يگنّا س‑لهالاك‑نس، تفرحم اي‑يمژلاين ن‑ربّي د‑يرقّاسن‑نس د‑لانبيا، اشكو ءيزّوگز‑د فلّاس ربّي‑نّون لعقوبيت ف‑غايلّي‑اون‑تسكر.» غاكودان ا‑ينكر يا‑لّمالاك ءيتجهّدن، ياسي يان‑وژرو ءيمقّورن زوند اژرو ن‑وزرگ، ءيلوح‑ت‑ين غ‑ومدا ييني: «غمكاد ا‑س‑را‑ن‑تّياولواح‑تمدينت ن‑بابيل ءيمقّورن س‑جّهد. ءور‑سار‑كم‑يژري يان. ءور‑سول‑را‑گيم‑سفلدن ءي‑لحسّ ن‑ايت‑لوتار نغد ايت‑ومارگ نغد ايت‑تعوّاتّ نغد ايت‑نّفّار. ءور‑سول‑را‑گيم‑يلين ايت‑تووري، والا را‑گيم‑سلّان ءي‑تاقّورت ن‑وزرگ، والا را‑گيم‑تفاو تيفاوت لّقنادل، والا را‑گيم‑سفلدن ءي‑واوال ن‑وسلي د‑تسليت. اشكو ءيسبّابن‑نّم، ءينمغورن ن‑دّونيت اد‑گان. س‑سّيحر‑نّم ا‑س‑ا‑تجلّوت كولّو تيميزار. لعقوبيت ا‑يضرن ف‑بابيل اشكو يوفا‑ن گيس ربّي‑نّون ءيدامّن لّانبيا د‑يمژلاين‑نس د‑وين كولّو مدّن لّي‑تياونغانين غ‑دّونيت.» لّيغ ءيزري مايان سفلدغ ءي‑كرا ءيتجهّدن ءيرواس‑يّي تاقّورت ن‑مدّن گّوتنين غ‑يگنّا، ءولّن اوال‑نسن ار‑تّينين: «هالّيلويا، ربّي‑نّغ ا‑يجّنجامن، ءيگ باب لّمجد د‑لقوّا. يُغژان لحوكم‑نس، س‑لحقّ ا‑س‑ا‑يتحكام. يوت لعقوبيت ف‑تمگّانت ءيمقّورن لّي‑يسّركان كولّو دّونيت س‑لفساد‑نس. ءيرار‑اس ربّي ف‑يدامّن ن‑يخدّامن‑نس.» الّن‑داغ اوال‑نسن ار‑تّينين: «هالّيلويا، ار‑بدّا‑ياقلاي‑واگّو‑نس، ءور‑سار‑يتمّي.» ضرن‑ين ءيلمّا سين ءيد‑مراو د‑كّوژ (24) ن‑ومغار د‑كّوژط لمخلوقات غ‑لگدّام ن‑ربّي لّي‑يسكيوسن ف‑لعرش، سجدن‑اس ار‑تّينين: «امين، هالّيلويا.» ءيساول‑د ءيلمّا يان‑واوال زغ‑دار لعرش ييني: «الغات ربّي‑نّغ ا‑يخدّامن‑نس كولّوكن لّي‑ت‑وقّرنين، غويلّي مقّورنين ءولا غويلّي مژّينين.» سفلدغ ءيلمّا ءي‑كرا ءيرواس‑يّي ءيواليون ن‑مدّن گّوتنين باهرا، زوند ءيجّيجن ن‑يسافّن ن‑وامان گّوتنين ءولا زوند اقّريان ن‑يگّيگ ءيتجهّدن، ار‑تّينين: «هالّيلويا. ربّي سيديتنّغ ءيتجهّدن، نتّان ا‑يحكامن كولّو ما‑يلّان. ا‑نفرح غيلاد، نالّ اوال‑نّغ س‑لفرح، نيني منشك ا‑باهرا‑يگّوت لمجد‑نس. اشكو تروح‑د‑تمغرا ن‑ولقّاغ. ها‑تاسليت‑نس تجّوجاد ءيخف‑نس، ءيفك‑اس ربّي تيملسيت لّكتّان ءيشوان ءيغوسن ءيسّمرقيقيين.» لمعنا لّكتّان تگا «ءيفولكيتن لّي‑سكرن ءيمژلاين ن‑ربّي.» ييني‑يّي ءيلمّا لمالاك: «ارا اوال‑اد، ‹ءيمباركين اد‑گان غويلّي مي ءيغرا ربّي اد‑د‑اشكين س‑يمنسي ن‑تمغرا ن‑ولقّاغ.› » ءيزايد ييني‑يّي: «غويد گان ءيواليون ن‑ربّي. لحقّ اد‑گان.» ءيمّا نكّي ضرغ‑ن غ‑دار ءيضارن‑نس ءيريغ اد‑اس‑سجدغ، س‑يّي‑ينّا: «ا‑ور‑تسكرت غمكان. اشكو اخدّام كاد‑گيغ، زوند كيّي د‑ايتماك لّي‑ومژنين غ‑توگّا ن‑ياسوع. ربّي واحدوت ا‑تّعبادت.» اشكو توگّا ن‑ياسوع ا‑يدحاين غويلّي ساوالنين س‑ماد‑اسن‑يمالا ربّي. ژرغ ءيلمّا ءيگنّا رژمن، س‑يّي‑د‑يبان يان‑وايّيس ءومليل. امنّاي‑نس، ار‑اس‑تّينين ‹لحقّ› ءولا ‹غوالّي ءيزگان غ‑واوال‑نس›. س‑لحقّ ا‑س‑ا‑يكّات لحوكم ار‑سرس‑يتمّاغ. ار‑د‑سّوفونت‑والّن‑نس زوند ءيسوفا لّعافيت، ءيلين ف‑يخف‑نس تّيجان گّوتنين. ءيتيارا فلّاس يان‑يسم لّي‑ور‑يسّين يان ابلا نتّان. ءيمّغ‑وقشّاب‑نس س‑يدامّن، ءيگ ءيسم‑نس ‹اوال ن‑ربّي›. ضفورن‑ت لجيوش ن‑يگنّا، لسن لكتّان ءيشوان ءيغوسن ءيملّولن، نين ف‑ييسّان ءومليلن. ءيفّوغ‑د زغ‑يمي‑نس زوند يات تاژّيت ءيمسادن. را‑سرس‑يوت تيميزار ن‑دّونيت. را‑تنت‑يحكام س‑وعمود ن‑ووزّال، ياضّر اضيل غ‑لمعصّرت ن‑سّخط لّغاضاب ن‑ربّي لّي‑يحكامن كولّو ما‑يلّان. ءيتيارا يان ءيسم غ‑وقشّاب‑نس ف‑وفلّا ن‑ومصاض‑نس، ءيگا ‹اگلّيد ن‑يگلدان د‑ونمغور ن‑ينمغورن›. ژرغ ءيلمّا يا‑لّمالاك ءيبيدّ ف‑تافوكت، يالّ اوال‑نس ءيغر س‑يگضاض كولّوتن لّي‑تايّلالنين غ‑يگنوان ييني‑اسن: «اشكاد‑د تمونم ف‑يمنسي ءيمقّورن لّي‑اون‑يجّوجاد ربّي، ا‑تشتّام تيفيّي ن‑يگلدان د‑يعسكرين د‑ينمغورن لّعسكر، د‑ييسّان ءولا ءيمنّاين‑نسن، ار‑تشتّام تيفيّي ن‑كولّو مدّن، ءيسمگان ءولا غويلّي گانين وين ءيخف‑نسن، ما‑يمژّين ءولا ما‑يمقّورن.» ژرغ ءيلمّا اغُژن، نتّان د‑يگلدان ن‑دّونيت د‑لجيوش‑نسن. مونّ‑د كولّوتن اد‑مّاغن د‑والّي ءينين ف‑وايّيس د‑لجيش‑نس. ءيمّا نتّا يومژ اغُژن، يامژ ءولا نّابي بو‑تكركاس لّي‑يسكرن لمعجيزات س‑يسم ن‑واغُژن ءيجلو سرسنت غويلّي دار طّابع ن‑واغُژن د‑ويلّي تعبادنين صّورت‑نس. غاكودان سول دّرن ا‑تن‑ين‑يلوح س‑سين غ‑تمدا لّعافيت لّي‑يجدّرن س‑لكبريت. ءيزايد ءيلمّا غوالّي ءينين ف‑وايّيس ءينغ ما‑يقامان زغ‑لجيوش‑نسن س‑تاژّيت لّي‑د‑يفّوغن زغ‑يمي‑نس. مونّ‑د فلّاسن ءيگضاض كولّوتن ار‑شتّان تيفيّي‑نسن ايلّيغ شبعان. ژرغ ءيلمّا يا‑لّمالاك ءيگّوز‑د زغ‑يگنّا، يوسي تاساروت ن‑تدروت ن‑واكال، تيلي غ‑وفوس‑نس يات‑سّنسلت ءيمقّورن. يامژ الگمّاض لّي‑مي‑تّينين ‹ابنكال اقديم› ءولا ‹ءيبليس› ءولا ‹شيطان›، ءيكرس‑ت باش ا‑يقاما غ‑يسكراف الف ن‑وسگُّاس. ءيلوح‑ت‑ين غ‑تدروت ن‑واكال، ءيقّن‑ن فلّاس ءيمي ن‑تدروت، ءيسكر‑اس طّابع باش ا‑ور‑سول‑يجلّو تيميزار ن‑دّونيت ارد ءيزري‑والف ن‑وسگُّاس. تيگيرا ن‑مايان را‑د‑يقّان ا‑ينورژم زغ‑يسكراف يات لوقت ءيدروسن. ژرغ ءيلمّا كرا لّعروش غ‑يگنّا. ءيتياوفكا ءي‑ويلّي فلّاسن سكيوسنين لحقّ اد‑تحكامن. ژرغ لارواح ن‑ويلّي مي ءيتياوبّاي ءيخف‑نسن ف‑سّيبت ن‑توگّا‑نسن ف‑ياسوع ءولا ف‑واوال ن‑ربّي. ءور‑ا‑تعبادن اغُژن ءولا صّورت‑نس، ءولا قبلن طّابع‑نس ف‑يگنزي‑نسن ءولا ف‑وفوس‑نسن. نكرن نتني زغ‑لموت ار‑تحكامن د‑لماسيح الف ن‑وسگُّاس. غمكاد ا‑تگا‑تنكرا تامزواروت. ءيمّا وييّاض سول قامان غ‑لموت، ءور‑راد‑نكرن ارد ءيزري‑والف ن‑وسگُّاس. ءيمباركين د‑يمژلاين اد‑گان غويلّي‑د‑نكرنين غ‑تنكرا تامزواروت. ءور‑را‑تيژضار لموت تيس سنات ا‑تن‑تلكم. راد‑گن ءينمغورن ن‑ربّي د‑لماسيح، را‑ديدس‑حكامن الف ن‑وسگُّاس. غاكود نّا‑يكمّل‑والف ن‑وسگُّاس را‑يتياوفساي شيطان زغ‑يسكراف‑نس، ءيفّوغ‑د ا‑يجلو كولّو تيميزار ن‑دّونيت، ءيسّمون ءيمزدغن‑نسنت ءي‑يميغ. نتني ‹گوگ› ءولا ‹ماگوگ› اد‑گان، ءيگاتن زوند املال ن‑تاما ن‑ومدا، ار‑زّيگّيزن ارد كن دّونيت كولّوتّ، سوتلن ءي‑ونتال ن‑يمژلاين ن‑ربّي ا‑ت‑يگان د‑تمدينت لّي‑دارس‑يعزّان. ءيميل تضر‑د فلّاسن لعافيت زغ‑يگنّا تهلك‑تن. ءيتّلوح‑ن ءيبليس لّي‑تن‑يجلان غ‑تمدا لّعافيت د‑لكبريت لّي‑غ‑يلّا‑واغُژن د‑نّابي بو‑تكركاس. راد‑كولّو‑غين‑ترفوفونّ غ‑ييض ءولا ازال س‑ورفوفن ءور‑سار‑يتمّين. ژرغ ءيلمّا يا‑لّعرش ءيمقّورن ءيملّولن، ژرغ ءولا غوالّي فلّاس ءيسكيوسن. لّيغ‑د‑يبان نتّا، روولن زغ‑گيس ءيگنوان د‑واكال، لاح‑تن كولّو. س‑ژريغ غويلّي مّوتنين، ما‑يمقّورن ءولا ما‑يمژّين، بيدّن كولّو غ‑لگدّام لّعرش. تياورژامن كرا ن‑وارّاتن غاكودان، س‑يتياورژام يان‑وارّا ياضني ءيگان ارّا ن‑تودرت. يوت ربّي لحوكم غاكودان ف‑ويلّي مّوتنين، ءيرار‑اسن ف‑غايلّي سكرن غمكلّي ءيتياران غ‑وارّاتن. ءيدحي‑د‑ومدا كولّو ويلّي گيس مّوتنين، تدحي‑د لموت د‑ودغار لّموت كولّو ويلّي گيس لّانين، ءيحكام ربّي فلّاسن كولّوتن ف‑غايلّي سكرن. تتّلوح‑ن ءيلمّا لموت د‑ودغار لّموت غ‑تمدا لّعافيت. لموت تيس سنات ا‑تگا‑تمدا لّعافيت. وانّا مي ءور‑يتيارا ءيسم‑نس غ‑وارّا ن‑تودرت، ءيتّلوح‑ن غ‑تمدا لّعافيت. ژرغ ءيلمّا ءيگنّا لّجديد د‑واكال لّجديد. ءور‑سول‑قامان ءيگنوان ءيقديمن ءولا ءيكالّن ءيقديمن، لاح ءولا امدا. ژرغ تامدينت تامژلايت، ا‑ستّ‑يگان د‑وروشاليم لّجديد، تگّوز‑د زغ‑يگنّا زغ‑دار ربّي. تفولكي باهرا زوند يات‑تسليت ءيلسان تيملسيت ن‑تمغرا، توجاد ا‑تمناگّار اسلي‑نس. سفلدغ ءي‑يان‑واوال ءيتجهّدن ءيساول‑د زغ‑دار لعرش ييني: «هاتي غ‑گر بنادم ا‑غ‑را‑تيلي‑تزدغت ن‑ربّي، ءيزدغ غيلاد غ‑وامّاس‑نسن، گن ايت‑دارس. ربّي راد‑ديدسن‑ييلي، ءيگ ربّي‑نسن. را‑يسفيض كولّو ءيمطّاون‑نسن. ءور‑سول‑را‑تيلي لموت ءولا تاگوضي ءولا تيغويّا ءولا اطّان، اشكو دّونيت تاقديمت ءور‑سول‑تقاما.» ءيساول‑د غوالّي ءيسكيوسن ف‑لعرش ييني: «سكرغ كولّو غيلاد زغ‑لجديد.» ييني‑يّي‑داغ: «ارا ماياد. اشكو أُغژانّ ءيواليون‑اد، لحقّ اد‑گان.» ءيزايد ييني‑يّي: «هاتي ءيكمّل. نكّي گيغ امزوارو گغ امگُّارو. گغ ءيسيزوار گغ ءيسيگُّرا. وانّا ياغ ءيريفي، را‑ت‑سّوغ زغ‑تالعينت ن‑وامان ن‑تودرت بلا گيس ءيفكا يات. ءيمّا وانّا ءينران، راد‑اس‑فكغ لوورت‑اد: راد‑گغ ربّي‑نس، ءيگ نتّا ءيوي. ءيمّا غويلّي روولنين زغ‑لحقّ وورّين زغ‑وغاراس‑ينو سّركان ءيخفاون‑نسن ار‑نقّان ار‑تفسادن ار‑سكارن سّيحر ار‑تعبادن ءيلاهات ن‑دّونيت، راد‑فتون نتني د‑كولّو ايت‑تكركاس س‑ودغار‑نسن غ‑تمدا لّي‑يجدّرن س‑لعافيت د‑لكبريت. غمكاد ا‑را‑تگ لموت تيس سنات.» ياشك‑يد ءيلمّا يان زغ‑سّا لّمالايكا لّي‑وسينين سّا ن‑تاطّاسين لّي‑عمّرنين س‑سّا ن‑تگوضيوين گُّرانين. ءيساول‑د سري ييني‑يّي: «اشك‑يد ملغ‑اك تاسليت لّي‑يگان تامغارت ن‑ولقّاغ.» ياوي‑يّي س‑تحكيمت ن‑رّوح ار ءيگّي ن‑يان‑ودرار ءيمقّورن ياتّوين، ءيمل‑يّي‑د تامدينت تامژلايت ن‑‹وروشاليم› تگّوز‑د زغ‑يگنّا زغ‑دار ربّي. ار‑تسّمرقيقيي س‑لمجد ن‑ربّي زوند يات‑تژروت تاقرفيت ءيُغلان باهرا، ءولا زوند ادفل ءيصفان. ءيلولّي‑اس يان‑وغُراب ءيمقّورن ياتّوين، ءيلا سين د‑مراو ن‑يمي. بيدّن غين سين د‑مراو لّمالاك غ‑لگدّام ن‑يماون. كرايگاتّ ءيمي ءيتيارا گيس ءيسم ن‑تقبيلت زغ‑سنات د‑مراوت ن‑تقبيلت ن‑ايت‑ربّي. لّان كراض ءيماون غ‑تسگا لّي‑زغ‑ا‑تاقلاي تافوكت، ءيلين كراض ءيماون غ‑تسگا تاژلماطّ، ءيلين كراض ءيماون غ‑تسگا تافاسيت، ءيلين كراض ءيماون غ‑تسگا لّي‑غ‑ا‑ن‑تطّار تافوكت. لّان سين د‑مراو ن‑وژرو غ‑لّساس ن‑وغُراب ن‑تمدينت، تياران گيسن ءيسماون ن‑سين د‑مراو ن‑ورقّاس ن‑ولقّاغ. لمالاك لّي‑د‑سري‑يساولن، ءيلّا دارس يان‑وعمود ن‑وورغ ما‑س‑ا‑يسّغال، ييري ا‑سرس‑يسّغل تامدينت د‑يماون‑نس د‑وغُراب‑نس. تنگادّا‑تغزي ن‑تمدينت زغ‑كّوژط‑تسگيو. ءيدّو لمالاك ءيسّغل تامدينت س‑وعمود‑نس. سين ءيد‑والف د‑سين ءيد‑ميّا (2200) ن‑كيليميتر ا‑يلّان غ‑كرايگاتّ تاسگا ءولا غ‑تيدّي‑نس. ءيسّغل ءولا اغُراب لّي‑اس‑يسوتلن. سّا ن‑يد‑مراو د‑سين (72) ميترو ا‑غ‑ن‑تلّا تيدّي‑نس س‑مكلّي‑س‑ا‑سّغالن مدّن. ءيتياوبنا‑وغُراب‑نس س‑يژران ءيقرفين غُلانين. تّياوسكار‑تمدينت زغ‑وورغ باهرا ءيصفان، تفاو زوند جّاج. ءيتياوسكار لّساس ن‑وغُراب ن‑تمدينت زغ‑كيگان د‑يژران غُلانين. امزوارو ءيگا اقرفي، ويس سين ءيگا اژرقي، ويس كراض ءيگا اقهاوي، ويس كّوژ ءيگا ازگزاو، ويس سمّوس ءيگا ابرار، ويس سضيص ءيگا اژگُّاغ، ويس سّا ءيگا اشيبي، ويس تام ءيگا ءومليل، ويس تژا ءيگا اوراغ، ويس مراو ءيگا اخرشوفي، ويس يان د‑مراو ءيگا امشماشي، ويس سين د‑مراو ءيگا ءيضيلي. ءيمّا ءيماون‑ان س‑سين د‑مراو گان سين د‑مراو لّجوهر، كرايگاتّ ءيمي ءيگا تالجوهرت. ءيمّا اسوك ن‑تمدينت ءيگا وين‑وورغ ءيصفان، ءيفاو زوند جّاج. ءور‑ژريغ كرا ن‑تگمّي غ‑ا‑تعبادن مدّن غ‑تمدينت، اشكو ار‑گيس‑تعبادن سيدي ربّي لّي‑يحكامن كولّو ما‑يلّان، نتّان د‑ولقّاغ، غ‑يلّيغ لّان نتني. ءور‑تحتاجّا‑تمدينت اد‑اس‑تّيسفيو تافوكت ءولا ايّور، اشكو لمجد ن‑ربّي ءيگا تيفاوت‑نس، ءيگ‑ولقّاغ لقنديل‑نس. س‑تيفاوت ن‑تمدينت ا‑س‑را‑تّيدون ايت‑تميزار كولّوتن، راد‑اس‑د‑اوين ءيگلدان ن‑دّونيت تيرزّيفين لّمجد‑نسن. ءور‑سار‑قّينّ ءيماون ن‑تمدينت غ‑وزال، ءولا سار ءيلّا ءيض. تيرزّيفين ءولا تيميخار ا‑راد‑اس‑د‑اوين زغ‑كولّو تيميزار ن‑دّونيت. والاينّي ءور‑را‑سرس‑يكشم ما‑يجلخن ءولا ما‑يسّركاون ءولا ما‑يسّكيركيسن. ءور‑را‑سرس‑يكشم ابلا غويلّي مي تياران ءيسماون‑نسن غ‑وارّا ن‑تودرت ن‑ولقّاغ. ءيمل‑يّي ءيلمّا لمالاك اسيف ن‑وامان ن‑تودرت. ار‑يسّمرقيقيي زوند ادفل ءيصفان، ءيفّي‑د زغ‑دار لعرش ن‑ربّي د‑ولقّاغ، ءيفتو غ‑وامّاس ن‑وسوك ن‑تمدينت. ييلي‑وسغار ن‑تودرت غ‑سنات‑تسگيو ن‑واسيف. ار‑ياكّا لغلّت‑نس كرايگاتّ ايّور، سنات د‑مراوت‑توال غ‑وسگُّاس. گن ءيفراون‑نس اسافار ما‑س‑ا‑تجّين مدّن زغ‑كولّو تيميزار ن‑دّونيت، ءور‑سار‑را‑تيلي تاگات. غين ا‑غ‑را‑ييلي لعرش ن‑ربّي د‑ولقّاغ. را‑تي‑تعبادن ءيخدّامن‑نس، ار‑تمنادن ءودم‑نس، ءيتيارا ءيسم‑نس ف‑يگنزي‑نسن. ءور‑سول‑را‑ييلي ءيض، والا را‑سول‑حتاجّان تيفاوت لّقنادل ءولا تين تافوكت. اشكو سيدي ربّي ا‑يگان تيفاوت‑نسن، د‑نتني ا‑را‑يحكام. ءور‑را‑سار‑يتمّو لحوكم‑نسن. ييني‑يّي ءيلمّا لمالاك: «أُغژانّ ءيواليون‑اد، لحقّ اد‑گان. سيدي ربّي لّي‑يدحاين س‑رّوح‑نس غويلّي ساوالنين س‑ماد‑اسن‑يمالا، يوزن‑د لمالاك‑نس غيلاد ا‑د‑يمل ءي‑يخدّامن‑نس ما‑د‑يقّانّ ا‑يجرو غ‑مايد‑د‑ياكمورن.» ءينّا ياسوع: «هاتي غير يان ءيميكّ را‑ن‑اشكغ.» امباركي ا‑يگا وانّا ءيسكارن س‑يواليون لّي‑د‑يسّبايّن ربّي غ‑وارّا‑ياد. نكّي يوحانّا سفلدغ ءي‑تغاوسيوين‑اد ژرغ‑تنت. لّيغ ءيزري كولّو مايد مي سفلدغ ژرغ‑ت، ضرغ‑ن اد‑سجدغ غ‑دار ءيضارن لّمالاك لّي‑يّي‑تنت‑يملان، س‑يّي‑ينّا: «ا‑ور‑تسكرت غمكان، اشكو اخدّام كاد‑گيغ، زوند كيّي د‑ايتماك لانبيا ءولا كولّو ويلّي سكارنين س‑يواليون ن‑وارّا‑ياد. ربّي واحدوت ا‑تّعبادت.» ءيزايد ييني‑يّي: «ءيواليون ن‑وارّا‑ياد لّي‑اك‑يسّبايّن ربّي، ا‑تن‑ور‑تقّنت س‑طّابع تحضوت‑تن. اشكو ياكمور‑د‑وزمز لّي‑غ‑راد‑كولّو‑يجرو مايد ءيتياران. وانّا ءيسكارن ما‑يُخشنّ، را‑يقاما غ‑ما‑يُخشنّ. وانّا ءيسكارن ما‑يسّركاون، را‑يقاما غ‑ما‑يسّركاون. وانّا ءيسكارن افولكي، را‑يقاما غ‑وفولكي. وانّا ءيرضان ربّي، را‑يقاما غ‑ما‑يرضان ربّي.» ءينّا ياسوع: «هاتي غير يان ءيميكّ را‑ن‑اشكغ، فكغ ءي‑كولّو مدّن ماد‑ستهلّان، رارغ ءي‑كرايگاتّ يان ف‑ما‑يسكر. گيغ امزوارو گغ امگُّارو. گغ غوالّي ءيزوارن گغ غوالّي ءيگُّران. گغ ءيسيزوار گغ ءيسيگُّرا.» ءيمباركين اد‑گان غويلّي سيردنين تيملسا‑نسن اد‑اسن‑ييلي لحقّ اد‑كشمن زغ‑يماون ن‑تمدينت شّن زغ‑وسغار ن‑تودرت. ءيمّا غويلّي ركانين را‑ن‑قامان غ‑برّا. گان‑تن غويلّي سكارنين سّيحر د‑ويلّي تفسادنين د‑ويلّي نقّانين د‑ويلّي تعبادنين ءيلاهات ن‑دّونيت، نتني ءولا كولّو ويلّي سّكيركيسنين ار‑تفراحن س‑تكركاس. «نكّي ياسوع ءوزنغ‑اون‑ين لمالاك‑ينو ا‑يمل تيغاوسيوين‑اد ءي‑يمناگّارن ن‑ايتماتن. گيغ اژور ن‑داود گغ اگُلاس‑نس. گغ ءيتري لّي‑يسفاون زيكّ صّباح.» ءيساول‑د رّوح ن‑ربّي ءولا تاسليت ءينين‑اس: «اشك‑يد.» وانّا ءيسفلدن، ءيلّا فلّاس ا‑ييني: «اشك‑يد.» د‑وانّا ياغ ءيريفي، ءيژضار ا‑د‑ياشك، ءيسو زغ‑وامان ن‑تودرت، كولّو وانّا ءيران بلا ءيفكا يات. اويات‑ستّ غ‑ما‑راد‑ينيغ ءي‑كولّو وانّا ءيسفلدن ءي‑يواليون لّي‑د‑يسّبايّن ربّي غ‑وارّا‑ياد: ءيغ‑يدّا يان ارد‑اسن‑يزايد كرا، راد‑اس‑يزايد ربّي كولّو تيگوضيوين لّي‑يبدر غ‑وارّا‑ياد. ءيغ‑يدّا يان ارد ءيكّيس كرا زغ‑يواليون لّي‑د‑يسّبايّن ربّي غ‑وارّا‑ياد، راد‑اس‑يكّيس تاغامت ن‑وسغار ن‑تودرت ءولا غ‑تمدينت تامژلايت لّي‑يبدر غ‑وارّا‑ياد. ءيساول غوالّي‑د‑يسّبايّنّ تيغاوسيوين‑اد ييني: «لحقّ اياد. غير ءيميكّ را‑ن‑اشكغ.» امين. اشك‑يد ا‑سيديتنّغ ياسوع. ا‑تيلي لباراكا ن‑سيديتنّغ ياسوع ءي‑يمژلاين ن‑ربّي كولّوتن. امين.