﻿<?xml version="1.0" encoding="UTF-8"?>
<bible translation="Tulu (ಪೊಸ ಒಡಂಬಡಿಕೆ)" link="https://www.bible.com/bible/3112/MAT.1.%25E0%25B2%25A4%25E0%25B3%2581%25E0%25B2%25B3%25E0%25B3%2581" status="New Life Literature">
	<testament name="New">
		<book number="40">
			<chapter number="1">
				<verse number="1">ಉಂದು ಯೇಸು ಕ್ರಿಸ್ತನ ಸಂತಾನದ ಪಟ್ಟಿ. ಆಯೆ ದಾವೀದನ ಸಂತಾನದಾಯೆ, ದಾವೀದೆ ಅಬ್ರಹಾಮುನ ಸಂತಾನದಾಯೆ.</verse>
				<verse number="2">ಅಬ್ರಹಾಮು ಇಸಾಕ್‌ನ ಅಮ್ಮೆ. ಇಸಾಕೆ ಯಾಕೋಬುನ ಅಮ್ಮೆ. ಯಾಕೋಬು ಯೂದ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ.</verse>
				<verse number="3">ಯೂದೆ ಪೆರೆಸ್ ಬೊಕ್ಕ ಜೆರಹನ ಅಮ್ಮೆ, ಅಕ್ಲೆನ ಅಪ್ಪೆ ತಾಮರ. ಪೆರೆಸ್ ಹೆಚ್ರೋನುನ ಅಮ್ಮೆ. ಹೆಚ್ರೋನು ಅರಾಮನ ಅಮ್ಮೆ.</verse>
				<verse number="4">ಅರಾಮು ಅಮ್ಮೀನಾದಾಬುನ ಅಮ್ಮೆ. ಅಮ್ಮೀನಾದಾಬು ನಹಸ್ಸೋನುನ ಅಮ್ಮೆ. ನಹಸ್ಸೋನ್ ಸಲ್ಮೋನನ ಅಮ್ಮೆ.</verse>
				<verse number="5">ಸಲ್ಮೋನು ಬೋವಜ್‌ನ ಅಮ್ಮೆ. ಬೋವಜ್‌ನ ಅಪ್ಪೆ ರಾಹಾಬ್. ಬೋವಜೆ ಓಬೆದ್‌ನ ಅಮ್ಮೆ. ಓಬೆದ್‌ನ ಅಪ್ಪೆ ರೂತು. ಓಬೆದೆ ಇಸ್ಸಾಯನ ಅಮ್ಮೆ.</verse>
				<verse number="6">ಇಸ್ಸಾಯೆ ಅರಸು ಆದುಪ್ಪು ದಾವೀದನ ಅಮ್ಮೆ. ದಾವೀದೆ ಸೊಲೊಮೋನುನ ಅಮ್ಮೆ. ಸೊಲೊಮೋನುನ ಅಪ್ಪೆ ಉರೀಯನ ಬೊಡೆದಿ ಆದಿತ್ತಿನಾಲ್.</verse>
				<verse number="7">ಸೊಲೊಮೋನು ರೆಹಬ್ಬಾಮುನ ಅಮ್ಮೆ. ರೆಹಬ್ಬಾಮು ಅಬೀಯನ ಅಮ್ಮೆ. ಅಬೀಯೆ ಆಸನ ಅಮ್ಮೆ.</verse>
				<verse number="8">ಆಸೆ ಯೆಹೋಷಾಫಾಟನ ಅಮ್ಮೆ. ಯೆಹೋಷಾಫಾಟ್ ಯೆಹೋರಾಮುನ ಅಮ್ಮೆ. ಯೆಹೋರಾಮು ಉಜ್ಜೀಯನ ಅಮ್ಮೆ.</verse>
				<verse number="9">ಉಜ್ಜೀಯೆ ಯೋತಾಮುನ ಅಮ್ಮೆ. ಯೋತಾಮು ಆಹಾಜನ ಅಮ್ಮೆ. ಆಹಾಜೆ ಹಿಜ್ಕೀಯನ ಅಮ್ಮೆ.</verse>
				<verse number="10">ಹಿಜ್ಕೀಯೆ ಮನಸ್ಸೆನ ಅಮ್ಮೆ. ಮನಸ್ಸೆ ಅಮೋನುನ ಅಮ್ಮೆ. ಅಮೋನು ಯೋಷೀಯನ ಅಮ್ಮೆ.</verse>
				<verse number="11">ಯೋಷೀಯೆ ಯೆಕೊನ್ಯನ ಬೊಕ್ಕ ಆಯನ ಮೆಗ್ಯೆ ಪಲಯಾಡ್ಲೆನ ಅಮ್ಮೆ. ಈ ಸಮಯೊಡು ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಮಲ್ತ್‌ದ್ ಕೊನೊ ಪೋಯಿನವು.</verse>
				<verse number="12">ಯೆಹೂದ್ಯೆರೆನ್ ಬಾಬೆಲ್‌ಗ್ ಕೈದ್ ಆದ್ ಪೋಯಿ ಬೊಕ್ಕದ ಸಂತಾನದ ಪಟ್ಟಿ. ಯೆಕೊನ್ಯೆ ಶೆಯಲ್ತಿಯೇಲನ ಅಮ್ಮೆ. ಶೆಯಲ್ತಿಯೇಲೆ ಜೆರುಬಾಬೆಲನ ಅಮ್ಮೆ.</verse>
				<verse number="13">ಜೆರುಬಾಬೆಲೆ ಅಬಿಹೂದನ ಅಮ್ಮೆ. ಅಬಿಹೂದೆ ಎಲ್ಯಕೀಮುನ ಅಮ್ಮೆ. ಎಲ್ಯಕೀಮು ಅಜೋರುನ ಅಮ್ಮೆ.</verse>
				<verse number="14">ಅಜೋರು ಸದೋಕುನ ಅಮ್ಮೆ. ಸದೋಕು ಅಖೀಮುನ ಅಮ್ಮೆ. ಅಖೀಮು ಎಲಿಹೂದನ ಅಮ್ಮೆ.</verse>
				<verse number="15">ಎಲಿಹೂದೆ ಎಲಿಯಾಜರನ ಅಮ್ಮೆ. ಎಲಿಯಾಜರೆ ಮತ್ತಾನನ ಅಮ್ಮೆ. ಮತ್ತಾನು ಯಾಕೋಬುನ ಅಮ್ಮೆ.</verse>
				<verse number="16">ಯಾಕೋಬು ಮರಿಯನ ಕಂಡನಿ ಆದುಪ್ಪು ಯೋಸೇಫುನ ಅಮ್ಮೆ. ಆ ಮರಿಯಡ್ದ್ ಕ್ರಿಸ್ತೆ ಪನ್ಪಿ ಯೇಸು ಪುಟ್ಟಿಯೆ.</verse>
				<verse number="17">ಇಂಚಾದ್ ಒಟ್ಟುಗು ಅಬ್ರಹಾಮುಡ್ದು ದಾವೀದ ಮುಟ್ಟ ಪದ್ನಾಲ್ ತರೆ, ದಾವೀದಡ್ದ್ ಬಾಬೆಲ್‌ಗ್ ಸೆರೆ ಕೊನೊಪಿ ಮುಟ್ಟ ಪದ್ನಾಲ್ ತರೆ, ಐಡ್ದ್ ಬೊಕ್ಕ ಬಾಬೆಲ್‌ದ ಬಂಧನೊಡ್ದು ಕ್ರಿಸ್ತ ಮುಟ್ಟ ಪದ್ನಾಲ್ ತರೆ.</verse>
				<verse number="18">ಯೇಸು ಕ್ರಿಸ್ತನ ಪುಟ್ಟು ಈ ರೀತಿಡ್ ಆಂಡ್. ಆಯನ ಅಪ್ಪೆ ಆದುಪ್ಪು ಮರಿಯನ್, ಯೋಸೇಫುಗು ನಿಚ್ಚಯ ಮಲ್ತ್‌ದುಪ್ಪುನೆಡ್ದ್ ಅಕುಲು ಮದ್ಮೆ ಆವೊಡ್ದು ದುಂಬೇ ಆಲ್ ಪರಿಶುದ್ಧಾತ್ಮೊಡ್ದು ಬಂಜಿನಾಲ್ ಆಯಿನವು ತೆರಿದ್ ಬತ್ತ್ಂಡ್.</verse>
				<verse number="19">ಆಂಡ ಆಲೆನ ಕಂಡನಿ ಆಯಿ ಯೋಸೇಫೆ ಸಜ್ಜನೆ ಆದಿತ್ತಿನೆಡ್ದ್ ಈ ಸಂಗತಿನ್ ಬೈಲ್‌ಗ್ ಕನವೆರೆ ಮನಸಿಜ್ಜಂದೆ ಆಲೆನ್ ಗುಟ್ಟುಡು ಬುಡ್ದು ಬುಡೊಡು ಪಂಡ್ದಿತ್ತೆ.</verse>
				<verse number="20">ಆಯೆ ಇಂಚ ಆಲೋಚನೆ ಮಲ್ತೊಂದುಪ್ಪುನಗ ಕರ್ತವ ದೂತೆ ಕನೊಟು ಬತ್ತ್‌ದ್, “ಯೋಸೇಫೋ ದಾವೀದ ಸಂತಾನದಾಯಾ, ನಿನ ಬೊಡೆದಿ ಮರಿಯನ್ ಸೇರಾವೊನ್ರೆ ಪೋಡ್ಯಡ ಆಲೆನ ಗರ್ಭ ಪರಿಶುದ್ಧಾತ್ಮೊಡ್ದೇ ಆಯಿನವು.</verse>
				<verse number="21">ಆಲ್ ಆಣ್ ಬಾಲೆನ್ ಪೆದ್ದುವಲ್. ಈ ಆ ಬಾಲೆಗ್ ಯೇಸು ಪಂಡ್ದ್ ಪುದರ್ ದೀವೊಡು, ದಾಯೆಗಂದ್ಂಡ ಆಯೆನೇ ತನ ಜನೊಕುಲೆನ್ ಅಕ್ಲೆನ ಪಾಪೊಲೆಡ್ದ್ ಬುಡ್ಪಾದ್ ಕಾಪುವೆ,” ಅಂದ್‌ದ್ ಪಂಡೆ.</verse>
				<verse number="22">ಕರ್ತವೆ ಪ್ರವಾದಿಡ್ದ್ ಪಂಡಿನ ಪಾತೆರ ನಡಪುಲೆಕ್ಕ ಉಂದು ಮಾತ ನಡತ್ಂಡ್. ಆ ಪಾತೆರ ದಾನೆಂದ್ಂಡ,</verse>
				<verse number="23">“ಇಂದಾ, ಒಂಜಿ ಕನ್ಯಪೊಣ್ಣು ಬಂಜಿನಾಲಾದ್ ಒಂಜಿ ಬಾಲೆನ್ ಪೆದ್ದುವಲ್. ಆಯಗ್ ಇಮ್ಮಾನುವೇಲ್ ಪಂಡ್ದ್ ಪುದರ್ ದೀಪೆರ್. ನೆತ್ತ ಅರ್ಥ, ‘ದೇವೆರ್ ನಮಡೊಪ್ಪ ಉಲ್ಲೆ,’ ಪಂಡ್ದ್.”</verse>
				<verse number="24">ಅಪಗ ಯೋಸೇಫೆ ನಿದ್ರೆಡ್ದ್ ಲಕ್ಕ್‌ದ್ ಕರ್ತವ ದೂತೆ ಅಪ್ಪಣೆ ಕೊರಿಲೆಕ್ಕನೆ ತನ ಬೊಡೆದಿನ್ ಸೇರಾವೊಂಡೆ.</verse>
				<verse number="25">ಅತ್ತಂದೆ ಮರಿಯ ಪೆದ್ದುನೆಟ್ಟ ಆಲೆಡ್ದ್ ದೂರ ಇತ್ತೆ. ಶರೀರ ಸಮ್ಮಂಧೊನು ಮಲ್ತ್‌ಜೆ. ಬೊಕ್ಕ ಯೋಸೇಫೆ ಆ ಬಾಲೆಗ್ ಯೇಸು ಇನ್ಪಿ ಪುದರ್ ದೀಯೆ.</verse>
			</chapter>
			<chapter number="2">
				<verse number="1">ಅರಸು ಆಯಿ ಹೆರೋದನ ದಿನೊಕುಲೆಡ್, ಯೂದಾಯದ ಬೇತ್ಲೆಹೇಮು ಪನ್ಪಿ ಊರುಡು ಯೇಸು ಪುಟ್ಟಿನಪಗ ಮೂಡಾಯಿ ದೇಶದ ಜೊಯಿಸೆರ್ ಯೆರೂಸಲೇಮುಗು ಬತ್ತ್‌ದ್,</verse>
				<verse number="2">“ಯೆಹೂದ್ಯೆರೆಗ್ ಅರಸು ಆದ್ ಪುಟ್ಟಿನಾಯೆ ಓಲುಲ್ಲೆ? ಆಯನ್ ತೋಜಾವುನ ಬೊಳ್ಳಿನ್ ಮೂಡಾಯಿ ದೇಶೊಡು ತೂದು, ಎಂಕುಲು ಆಯಗ್ ಅಡ್ಡಬೂರ್ಯೆರೆ ಬೈದ,” ಪಂಡೆರ್.</verse>
				<verse number="3">ಉಂದೆನ್ ಕೇಂಡ್ದ್ ಅರಸು ಆಯಿ ಹೆರೋದೆಲಾ ಆಯ ಒಟ್ಟುಗು ಇಡೀ ಯೆರೂಸಲೇಮುದಾಕುಲು ಮಾತೆರ್ ಗಡಿಬಿಡಿ ಆಯೆರ್.</verse>
				<verse number="4">ಅಪಗ ಅರಸು ಯೆಹೂದ್ಯೆರೆ ಮಾತ ಪ್ರಧಾನಯಾಜಕೆರೆನ್ಲಾ ಪ್ರಜೆತ ಶಾಸ್ತ್ರಿಲೆನ್ಲಾ ಸೇರಾದ್, “ಕ್ರಿಸ್ತೆ ಪುಟ್ಟೊಡಾಯಿನವು ಓಲು?” ಅಂದ್‌ದ್ ಅಕ್ಲೆಡ ಕೇಂಡೆ.</verse>
				<verse number="5">ಅಕುಲು ಆಯಡ, “ಯೂದಾಯದ ಬೇತ್ಲೆಹೇಮುಡೇ ಅಂದ್‌ದ್ ಪ್ರವಾದಿಲೆನ ಗ್ರಂಥೊಡು ಬರೆತ್ಂಡ್.</verse>
				<verse number="6">‘ಯೆಹೂದ ಸೀಮೆದ ಬೇತ್ಲೆಹೇಮೋ, ಯೆಹೂದದ ಮುಖ್ಯ ಪಟ್ಟಣಲೆಡ್, ಈ ಏತ್ ಮಾತ್ರೊಗ್ಲಾ ಎಲ್ಯವು ಅತ್ತ್. ಒರಿ ಅಧಿಪತಿ ನಿನ ಉಲಯಿಡ್ದ್ ಪಿದಾಡುವೆ. ಆಯೆ ಎನ ಪ್ರಜೆಕುಲಾಯಿ ಇಸ್ರಾಯೇಲ್ಯೆರೆನ್ ಆಳುವೆ,’” ಪಂಡೆರ್.</verse>
				<verse number="7">ಅಪಗ ಹೆರೋದೆ ಏರೆಗ್ಲಾ ತೆರಿಯಂದಿಲೆಕ್ಕ ಜೋಯಿಸೆರೆನ್ ಲೆಪ್ಡಾದ್ ಆ ಬೊಳ್ಳಿ ತೋಜಿದ್ ಬತ್ತಿ ಕಾಲೊನು ಅಕ್ಲೆಡ ಸರಿಯಾದ್ ತೆರಿಯೊಂದು,</verse>
				<verse number="8">“ನಿಕುಲು ಪೋದು ಆ ಬಾಲೆದ ಸಂಗತಿಡ್ ಸರಿಯಾದ್ ವಿಚಾರ ಮಲ್ಪುಲೆ. ಅವು ತಿಕ್ಕಿಬೊಕ್ಕ ಎಂಕ್ ತೆರಿಪಾಲೆ, ಯಾನ್ಲಾ ಬತ್ತ್‌ದ್ ಆ ಬಾಲೆಗ್ ಅಡ್ಡಬೂರ್ವೆ,” ಅಂದ್‌ದ್ ಜೋಯಿಸೆರೆನ್ ಬೇತ್ಲೆಹೇಮುಗು ಕಡಪುಡಿಯೆ.</verse>
				<verse number="9">ಅಕುಲು ಅರಸುನ ಪಾತೆರೊನು ಕೇಂಡ್ದ್ ಪಿದಾಡ್ನಗ ಮೂಡಾಯಿ ದೇಶೊಡು ತೂಯಿ ಬೊಳ್ಳಿ ಕುಡ ತೋಜಿದ್ ಬತ್ತ್‌ದ್ ಅಕ್ಲೆನ ದುಂಬು ದುಂಬು ಪೋದು ಬಾಲೆ ಇತ್ತಿ ಜಾಗ್‌ದ ಮಿತ್ತ್ ಬತ್ತ್‌ದ್ ಉಂತುಂಡು.</verse>
				<verse number="10">ಅಕುಲು ಆ ಬೊಳ್ಳಿನ್ ತೂದು ಮಸ್ತ್ ಸಂತೋಷ ಮಲ್ತೆರ್.</verse>
				<verse number="11">ಬೊಕ್ಕ ಆ ಇಲ್ಲದುಲಯಿ ಪೋದು ಆ ಬಾಲೆನ್ಲಾ ಐತ ಅಪ್ಪೆ ಮರಿಯನ್ಲಾ ತೂದು, ಐಕ್ ಅಡ್ಡಬೂರ್ದು ಆರಾಧನೆ ಮಲ್ತ್‌ದ್ ತನ್ಕುಲೆ ಗಂಟ್‌ನ್ ಗಿರ್ತ್‌ದ್ ಐಕ್ ಬಂಗಾರ, ಲೋಭಾನ, ರಕ್ತಬೋಳಲೆನ್ ಉಡಿಗೆರೆ ಆದ್ ಕೊರಿಯೆರ್.</verse>
				<verse number="12">ಐಡ್ದ್ ಬೊಕ್ಕ ದೇವೆರ್ ಕನೊಟು ಅಕ್ಲೆಗ್ ತೋಜಿದ್ ಬತ್ತ್‌ದ್, “ನಿಕುಲು ಹೆರೋದ ಕೈತಲ್‌ ಪಿರ ಪೋವೆರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿನೆಡ್ದ್ ಅಕುಲು ಬೊಕ್ಕೊಂಜಿ ಸಾದಿಡ್ದ್ ತನ್ಕುಲೆ ದೇಶೊಗು ಪಿದಾಡ್ದ್ ಪೋಯೆರ್.</verse>
				<verse number="13">ಅಕುಲು ಪೋಯಿ ಬೊಕ್ಕ ಕರ್ತವ ದೂತೆ ಯೋಸೇಫುಗು ಕನೊಟು ತೋಜಿದ್ ಬತ್ತ್‌ದ್, “ಈ ಲಕ್ಕ್‌ದ್ ಈ ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಐಗುಪ್ತ ದೇಶೊಗು ಪಾರ್‌ಪೋದು ಯಾನ್ ನಿಕ್ಕ್ ಪನ್ಪಿ ಮುಟ್ಟ ಅವುಲೇ ಉಪ್ಪುಲ. ಹೆರೋದೆ ಈ ಬಾಲೆನ್ ಕೆರೊಡು ಅಂದ್‌ದ್ ಅವೆನ್ ನಾಡೊಂದುಲ್ಲೆ,” ಪಂಡೆ.</verse>
				<verse number="14">ಅಪಗನೆ ಆಯೆ ಲಕ್ಕ್‌ದ್ ಆ ಬಾಲೆನ್ಲಾ ಐತ ಅಪ್ಪೆನ್ಲಾ ರಾತ್ರೆಡೇ ಲೆತ್ತೊಂದು ಐಗುಪ್ತೊಗು ಪೋಯೆ.</verse>
				<verse number="15">ಹೆರೋದೆ ಸೈಪಿನೆಟ್ಟ ಐಗುಪ್ತೊಡೆ ಇತ್ತೆ. ಉಂದೆಡ್ದ್, “ಎನ ಮಗನ್ ಐಗುಪ್ತ ದೇಶದುಲಯಿಡ್ದ್ ಲೆತ್ತೆ,” ಅಂದ್‌ದ್ ಕರ್ತವೆ ಪ್ರವಾದಿಲೆಡ್ದ್ ಪಂಡಿ ಪಾತೆರ ನಡತ್ಂಡ್.</verse>
				<verse number="16">ಅಪಗ ಹೆರೋದೆ ತನ್ಕ್ ಜೋಯಿಸೆರ್ ಮೋಸ ಮಲ್ತೆರ್ ಅಂದ್‌ದ್ ತೆರಿದ್ ಕೋಪೊಡು ಜನ ಕಡಪುಡ್ದು ತಾನ್ ಜೋಯಿಸೆರೆಡ್ದ್ ತೆರಿಯೊಂಡಿ ಕಾಲೊಗು ಸರಿಯಾದ್ ಬೇತ್ಲೆಹೇಮುಡ್ಲಾ ಐತ ಕೈತಲ್‌ದ ಹಳ್ಳಿಲೆಡ್ಲಾ ರಡ್ಡ್ ವರ್ಸದುಲಯಿದ ಆಣ್ ಬಾಲೆಲೆನ್ ಕೆರ್ಪಾಯೆ.</verse>
				<verse number="17">ಯೆರೆಮೀಯ ಪನ್ಪಿ ಪ್ರವಾದಿ ಪಂಡಿ ಪಾತೆರೊಲು ಆ ಕಾಲೊಡು ನಡತ್ಂಡ್. ಅವು ದಾನೆಂದ್ಂಡ,</verse>
				<verse number="18">ರಾಮೊಡು ಬೊಬ್ಬೆ ಕೇಂಡ್. ಮಸ್ತ್ ಬುಲಿಪಾಟಲಾ ಅರಬಾಯಿಲಾ ಉಂಡಾಂಡ್. ರಾಹೆಲ್ ತನ ಜೋಕುಲೆಗಾದ್ ಬುಲ್ತು ಬುಲ್ತುದು ಅಕುಲು ಇಜ್ಜಾಂದೆ ಪೋಯಿನೆಕ್ಕಾದ್ ಸಮಾಧಾನ ಆವಂದೆ ಇತ್ತಲ್ ಪನ್ಪಿನವೇ.</verse>
				<verse number="19">ಹೆರೋದೆ ಸೈತಿ ಬೊಕ್ಕ ಐಗುಪ್ತ ದೇಶೊಡು ಕರ್ತವ ದೂತೆ ಯೋಸೇಫುಗು ಕನೊಟು ತೋಜಿದ್ ಬತ್ತ್‌ದ್ ಪಂಡೆ,</verse>
				<verse number="20">“ಈ ಲಕ್ಕ್‌ದ್ ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಇಸ್ರಾಯೇಲ್ ದೇಶೊಗು ಪೋಲ. ಬಾಲೆದ ಪ್ರಾಣೊನು ದೆಪ್ಪೊಡುಂದು ಇತ್ತಿನಾಕುಲು ಸೈತ್ ಪೋಯೆರ್,”</verse>
				<verse number="21">ಅಪಗ ಯೋಸೇಫು ಬಾಲೆನ್ಲಾ ಐತ ಅಪ್ಪೆನ್ಲಾ ಲೆತ್ತೊಂದು ಇಸ್ರಾಯೇಲ್ ದೇಶೊಗು ಬತ್ತೆ.</verse>
				<verse number="22">ಆಂಡ ಅರ್ಕೆಲಾಯೆ ತನ ಅಮ್ಮೆ ಆಯಿ ಹೆರೋದನ ಪಗತೆಗ್ ಯೂದಾಯೊನು ಆಳುವೆ ಅಂದ್‌ದ್ ತೆರಿದ್ ಅಡೆಗ್ ಪೋಯೆರೆ ಪೋಡಿಯೆ. ಅಪಗ ಆಯೆ ಕನೊಟು ದೇವೆರೆ ಅಪ್ಪಣೆನ್ ಪಡೆದ್ ಗಲಿಲಾಯದ ಸೀಮೆಗ್ ಪೋಯೆ.</verse>
				<verse number="23">ಬೊಕ್ಕ ನಜರೇತ್ ಪನ್ಪಿ ಊರುಗು ಬತ್ತ್‌ದ್ ಅಲ್ಪ ಇಲ್ಲ್ ಮಲ್ತ್‌ದ್ ಕುಲ್ಲಿಯೆ. ನೆಡ್ದ್, “ನಜರಾಯೆ ಪನ್ಪಿ ಪುದರ್ ಬರ್ಪುಂಡು,” ಪಂಡ್ದ್ ಪ್ರವಾದಿಲೆಡ್ದ್ ಪನ್ಪಾಯಿನ ಪಾತೆರ ನಡತ್ಂಡ್.</verse>
			</chapter>
			<chapter number="3">
				<verse number="1">ಆ ದಿನೊಕುಲೆಡ್ ಸ್ನಾನಿಕೆ ಯೋಹಾನೆ ಬತ್ತ್‌ದ್ ಯೂದಾಯದ ಕಾಡ್‌ಡ್ ಸಾರಿಯೊಂದು, “ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗ್‌ಲೆ, ದಾಯೆಗಂದ್ಂಡ ಪರಲೋಕ ರಾಜ್ಯ ಕೈತಲ್ ಬೈದ್‌ಂಡ್,” ಪಂಡ್ದ್ ಪಂಡೆ.</verse>
				<verse number="2"></verse>
				<verse number="3">“ಕರ್ತವ ಮಾರ್ಗೊನು ತಯಾರ್ ಮಲ್ಪುಲೆ, ಆಯ ಸಾದಿನ್ ಸರ್ತ ಮಲ್ಪುಲೆ, ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯನ ಸ್ವರ ಉಂಡು,” ಪಂಡ್ದ್ ಪ್ರವಾದಿ ಯೆಶಾಯಡ್ದ್ ಪಂಡಿನಾಯೆ ಇಂಬೆನೇ.</verse>
				<verse number="4">ಈ ಯೋಹಾನನ ಕುಂಟು ಒಂಟೆ ಕುಜಲ್‌ದ ಪೊದೆಪುಲಾ ಸೊಂಟೊಡು ಚರ್ಮದ ಸೊಂಟಪಟ್ಟಿಲಾ ಕಟ್ಟ್‌ದಿತ್ತೆ. ಮೊಂಟೆಲಾ ಕಾಡ್‌ದ ತಿಗತನೆಯಿಲಾ ಆಯನ ತಿನಸ್ ಆದಿತ್ತ್ಂಡ್.</verse>
				<verse number="5">ಅಪಗ ಯೆರೂಸಲೇಮು, ಇಡೀ ಯೂದಾಯ, ಯೊರ್ದಾನ್ ತುದೆತ ಸುತ್ತೊಡುಪ್ಪು ಮಾತ ಸೀಮೆದ ಜನೊಕುಲುಲಾ ಆಯನ ಕೈತಲ್‌ ಪೋದು,</verse>
				<verse number="6">ಅಕುಲು ತನ್ಕುಲೆ ಪಾಪೊಲೆನ್ ಪಂಡೊಂದು ಯೊರ್ದಾನ್ ತುದೆಟ್ ಆಯಡ್ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆರ್.</verse>
				<verse number="7">ಆಂಡ ಯೋಹಾನೆ ಪರಿಸಾಯೆರೆಡ್ದ್‌ಲಾ ಸದ್ದುಕಾಯೆರೆಡ್ದ್‌ಲಾ ಮಸ್ತ್ ಜನ ತನಡ್ದ್ ದೀಕ್ಷಾಸ್ನಾನ ಮಲ್ಪಾವೊನ್ರೆ ಬರ್ಪಿನೆನ್ ತೂದು ಅಕ್ಲೆಗ್, “ಓ ಸರ್ಪ ಜಾತಿದಾಕುಲೇ, ದುಂಬಗ್ ತೋಜಿದ್ ಬರ್ಪಿ ದೈವಕೋಪೊಡ್ದು ತಪ್ಪಾವೊನ್ರೆ ನಿಕ್ಲೆಗ್ ಎಚ್ಚರಿಕೆ ಏರ್ ಕೊರಿಯೆರ್?</verse>
				<verse number="8">ಅಂಚಾಂಡ ನಿಕಲ್ನ ಮನಸ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ಂಡ್ ಪನ್ಪಿನೆಕ್ಕ್ ತಕ್ಕ ಫಲೊನು ತೋಜಾಲೆ.</verse>
				<verse number="9">ಅಬ್ರಹಾಮು ಎಂಕ್ಲೆನ ಪೂರ್ವಜೆ ಪನ್ಪಿನ ಆಲೋಚನೆನ್ ಬುಡ್ಲೆ. ದೇವೆರ್ ಅಬ್ರಹಾಮುಗು ಈ ಕಲ್ಲ್‌ಲೆಡ್ದ್‌ಲಾ ಜೋಕುಲೆನ್ ಪುಟ್ಟಾವೆರೆ ಸಾದ್ಯ ಉಂಡು, ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="10">ಇತ್ತೆನೇ ಮರತ ಬೇರ್‌ಗ್ ಕುಡರಿ ಪಾಡ್ದ್ಂಡ್. ಎಡ್ಡೆ ಫಲೊನು ಕೊರಂದಿ ಪ್ರತಿಯೊಂಜಿ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್.</verse>
				<verse number="11">ಯಾನಾಂಡಲಾ ನಿಕುಲು ಪಶ್ಚಾತಾಪ ಪಡೆಯೊಡು ಅಂದ್‌ದ್ ನಿಕ್ಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ. ಆಂಡ ಎನಡ್ದ್ ಬಲ ಇತ್ತಿನಾಯೆ ಎನ ಬೆರಿಯೆ ಬರ್ಪೆ. ಆಯ ಕಾರ್‌ದ ಜೋಡುನು ತುಂಬೆರೆಗ್ಲಾ ಯಾನ್ ಯೋಗ್ಯದಾಯೆ ಅತ್ತ್. ಆಯೆ ನಿಕ್ಲೆಗ್ ಪರಿಶುದ್ಧಾತ್ಮೊಡು ಬೊಕ್ಕ ತೂಟು ದೀಕ್ಷಾಸ್ನಾನ ಮಲ್ಪಾವೆ.</verse>
				<verse number="12">ಆಯನ ಕೈಟ್ ತಡ್ಪೆ ಉಂಡು, ತನ್ನ ಜಾಲ್‌ನ್ ಕೊಡೀಕಡೆ ಅಡ್ತ್‌ದ್, ಬುಲೆತ ರಾಶಿನ್ ರಾಪಾದ್ ಪುಡೆತ್‌ದ್ ತನ್ನ ಗೋದಿನ್ ತುಪ್ಪೆಡ್ ದಿಂಜಾದ್ ದೀಪೆ; ಆಂಡ ದಡ್ಡ್‌ನ್ ತೆಕ್ಕಂದಿ ತೂಟು ಪೊತ್ತಾದ್ ಬುಡ್ಪೆ,” ಪಂಡೆ.</verse>
				<verse number="13">ಆ ಸಮಯೊಡು ಯೇಸು ಯೋಹಾನಡ್ದ್ ದೀಕ್ಷಾಸ್ನಾನ ಮಲ್ತೊನೊಡು ಪಂಡ್ದ್ ಗಲಿಲಾಯೊಡ್ದು ಯೊರ್ದಾನ್ ತುದೆಕ್ ಬತ್ತೆ.</verse>
				<verse number="14">ಅಪಗ ಯೋಹಾನೆ ಯೇಸುನು ತಡೆತ್‌ದ್, “ಯಾನೇ ನಿನಡ್ದ್ ದೀಕ್ಷಾಸ್ನಾನ ದೆತ್ತೊನೊಡಿತ್ತ್‌ಂಡ್. ಆಂಡ ಈ ಎನ ಕೈತಡೆಗ್ ದಾಯೆಗ್ ಬರ್ಪ?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="15">ಅಪಗ ಯೇಸು ಆಯಗ್, “ಸದ್ಯೊಗು ಬುಡು, ಇಂಚ ನಮ ಮಾತ ಧರ್ಮೊಲೆನ್ ನಡಪಾವೊಡಾಪುಂಡು,” ಅಂದ್‌ದ್ ಪನ್ನಗ ಯೋಹಾನೆ ಒಪ್ಪಿಯೊಂಡೆ.</verse>
				<verse number="16">ಯೇಸು ದೀಕ್ಷಾಸ್ನಾನ ದೆತ್ತೊಂಡಿ ಬೊಕ್ಕ ನೀರ್‌ಡ್ದ್ ಮಿತ್ತ್ ಬತ್ತಿ ಕೂಡ್ಲೆ, ಇಂದಾ, ಆಯಗ್ ಪರಲೋಕ ಜತ್ತ್ಂಡ್, ಬೊಕ್ಕ ದೇವೆರೆ ಆತ್ಮ ಪಾರಿವಾಳದ ರೂಪೊಡು ಆಯನ ಮಿತ್ತ್ ಜಪ್ಪುನೆನ್ ಯೋಹಾನೆ ತೂಯೆ.</verse>
				<verse number="17">ಅಪಗ ಪರಲೋಕೊಡ್ದು ಒಂಜಿ ಸ್ವರ ಆಂಡ್, “ಇಂಬೆ ಎನ ಪ್ರೀತಿದ ಮಗೆ, ಇಂಬ್ಯನ್ ಯಾನ್ ಮೆಚ್ಚಿದೆ.”</verse>
			</chapter>
			<chapter number="4">
				<verse number="1">ಬೊಕ್ಕ ಯೇಸು ಸೈತಾನಡ್ದ್ ಶೋಧನೆ ಆವೊಡು ಅಂದ್‌ದ್ ಆತ್ಮೆ ಆಯನ್ ಕಾಡ್‌ಗ್ ಲೆತ್ತೊಂದು ಪೋಯೆ.</verse>
				<verse number="2">ಯೇಸು ನಲ್ಪ ದಿನ ರಾತ್ರೆ ಪಗೆಲ್ ಉಪವಾಸ ಮಲ್ತಿ ಬೊಕ್ಕ ಆಯಗ್ ಬಾರಿ ಬಡವು ಆಂಡ್.</verse>
				<verse number="3">ಅಪಗ ಆ ಶೋಧಕೆ ಯೇಸು ಕೈತಲ್‌ ಬತ್ತ್‌ದ್, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್‌ಲೆನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಅಂದ್‌ದ್ ಪನ್ನಗ,</verse>
				<verse number="4">ಯೇಸು, “‘ನರಮಾನಿ ರೊಟ್ಟಿ ತಿಂದ್‌ಂಡ ಮಾತ್ರ ಬದುಕುಜೆ. ದೇವೆರೆ ಬಾಯಿಡ್ದ್ ಬರ್ಪಿ ಪ್ರತಿಯೊಂಜಿ ಪಾತೆರೊಡ್ದು ಬದುಕುವೆ,’ ಅಂದ್‌ದ್ ಬರೆತ್ಂಡ್,” ಪಂಡೆ.</verse>
				<verse number="5">ಅಪಗ ಸೈತಾನೆ ಯೇಸುನು ಪರಿಶುದ್ಧ ಪಟ್ಟಣೊಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್</verse>
				<verse number="6">ಆಯಡ, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ. ‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ; ನಿನ ಕಾರ್ ಕಲ್ಲ್‌ಗ್ ತಾಂಟಂದಿಲೆಕ್ಕ ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್‌ವೆರ್,’ ಅಂದ್‌ದ್ ಬರೆತ್ಂಡ್,” ಅಂದ್‌ದ್ ಪಂಡೆ.</verse>
				<verse number="7">ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ ಬರೆತ್ಂಡ್,” ಅಂದ್‌ದ್ ಪಂಡೆ.</verse>
				<verse number="8">ಐಡ್ದ್ ಬೊಕ್ಕ ಸೈತಾನೆ ಆಯನ್ ಬಾರಿ ಎತ್ತರದ ಪರ್ವತೊಗು ಲೆತ್ತೊಂದು ಪೋದು ಲೋಕದ ಮಾತ ರಾಜ್ಯೊಲೆನ್ಲಾ ಐತ ಮೈಮೆನ್ಲಾ ಆಯಗ್ ತೋಜಾಯೆ.</verse>
				<verse number="9">ಬೊಕ್ಕ ಸೈತಾನೆ, “ಈ ಎಂಕ್ ಅಡ್ಡಬೂರ್ದು ಆರಾಧನೆ ಮಲ್ತ್ಂಡ ಉಂದೆನ್ ಮಾತ ನಿಕ್ಕ್ ಕೊರ್ಪೆ,” ಪಂಡೆ.</verse>
				<verse number="10">ಅಪಗ ಯೇಸು ಆಯಡ ಪಂಡಿನಿ, “ಸೈತಾನಾ, ಈ ಮುಲ್ತುಡ್ದು ಪೋಲ, ‘ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್‌ದ್ ಬರೆತ್ಂಡ್.’”</verse>
				<verse number="11">ಅಪಗ ಸೈತಾನೆ ಆಯನ್ ಬುಡ್ದು ಪೋಯೆ. ಬೊಕ್ಕ ದೂತೆರ್ ಬತ್ತ್‌ದ್ ಆಯಗ್ ಉಪಚಾರ ಮಲ್ತೆರ್.</verse>
				<verse number="12">ಯೋಹಾನೆ ಸೆರೆಮನೆಟ್ ಬೂರಿಯೆ ಪನ್ಪಿ ಸುದ್ಧಿನ್ ಯೇಸು ಕೇಂಡ್ದ್ ಆ ಜಾಗ್‌ನ್ ಬುಡ್ದು ಗಲಿಲಾಯ ಸೀಮೆಗ್ ಪಿರ ಪೋಯೆ.</verse>
				<verse number="13">ಐಡ್ದ್ ಬೊಕ್ಕ ನಜರೇತ್ ಪನ್ಪಿ ಊರುನು ಬುಡ್ದು ಜೆಬುಲೋನ್ ನೆಫ್ತಲೀಮ್ ಪನ್ಪಿ ನಾಡ್‌ಗ್ ಬತ್ತ್‌ದ್ ಕಡಲ್ದ ಕೈತಲಿತ್ತಿ ಕಪೆರ್ನೌಮು ಪನ್ಪಿ ಊರುಗು ಪೋದು ಉಂತಿಯೆ.</verse>
				<verse number="14">ಉಂದೆಡ್ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪಂಡ್ದುಪ್ಪು ಪಾತೆರ ನಡತ್ಂಡ್. ಆ ಪಾತೆರ ದಾನೆಂದ್ಂಡ,</verse>
				<verse number="15">“ಜೆಬುಲೋನ್ ಸೀಮೆಲಾ ನೆಫ್ತಲೀಮ್ ಸೀಮೆಲಾ ಯೊರ್ದಾನ್ ತುದೆತ್ತ ಅಂಚಿ ಕಡಲ್ದ ಕೈತಲುಪ್ಪು ಸೀಮೆಲಾ ಪಿದಯಿದ ಜನೊಕುಲು ಉಪ್ಪು ಗಲಿಲಾಯ ಸೀಮೆಲಾ</verse>
				<verse number="16">ಕತ್ತಲೆಡ್ ಬದ್‌ಕಿನ ಈ ಸೀಮೆದ ಜನೊಕುಲೆಗ್ ಮಲ್ಲ ಬೊಲ್ಪು ತೋಜ್ಂಡ್. ಗರ್ಗಂಡ ಕತ್ತಲೆದ ದೇಶೊಡುಪ್ಪುನಾಕುಲೆಗ್ ಸೂರ್ಯೆ ಮೂಡ್ದು ಬತ್ತ್ಂಡ್.”</verse>
				<verse number="17">ಆನಿಡ್ದ್ ಯೇಸು, “ಪಶ್ಚಾತಾಪ ಪಡೆಲೆ ದಾಯೆಗಂದ್ಂಡ ಪರಲೋಕ ರಾಜ್ಯ ಕೈತಲ್ ಬೈದ್‌ಂಡ್,” ಅಂದ್‌ದ್ ಸಾರಿಯೆರೆ ಸುರು ಮಲ್ತೆ.</verse>
				<verse number="18">ಯೇಸು ಗಲಿಲಾಯ ಕಡಲ್ದ ಬರಿಟ್ಟ್ ನಡಪುನಗ, ಪೇತ್ರೆ ಪನ್ಪಿ ಸೀಮೋನೆ ಬೊಕ್ಕ ಆಯನ ಮೆಗ್ಯೆ ಅಂದ್ರೆಯೆ, ಮೆಗ್ಯೆಪಲಯಾಡ್ಲು ಬಲೆ ಬೀಪುನೆನ್ ತೂಯೆ. ಅಕುಲು ಮೀನ್ ಪತ್ತುನಾಕುಲು.</verse>
				<verse number="19">ಆಯೆ ಅಕ್ಲೆಗ್, “ಎನ ಬೆರಿಯೆ ಬಲೆ; ಯಾನ್ ನಿಕ್ಲೆನ್ ನರಮಾನಿಲೆನ್ ಪತ್ತುನ ಬೆಸ್ತೆರಾದ್ ಮಲ್ಪುವೆ,” ಅಂದ್‌ದ್ ಪಂಡಿ ಕೂಡ್ಲೆ,</verse>
				<verse number="20">ಅಕುಲು ತನ್ಕುಲೆ ಬಲೆನ್ ಬುಡ್ದು ಆಯ ಬೆರಿಯೆ ಪೋಯೆರ್.</verse>
				<verse number="21">ಯೇಸು ಅಲ್ಪಡ್ದ್ ದುಂಬು ಪೋನಗ ಬೇತೆ ಇರ್ವೆರ್ ಮೆಗ್ಯಪಲಯಾಡ್ಲು ಜೆಬೆದಾಯನ ಮಗೆ ಯಾಕೋಬುನ್ಲಾ ಆಯನ ಮೆಗ್ಯೆ ಯೋಹಾನನ್ಲಾ ತೂಯೆ. ಮೊಕುಲು ತನ್ಕುಲೆ ಅಮ್ಮೆ ಆಯಿ ಜೆಬೆದಾಯಡೊಪ್ಪ ಓಡೊಡು ತನ್ಕುಲೆ ಬಲೆನ್ ಸರಿ ಮಲ್ತೊಂದಿತ್ತೆರ್. ಯೇಸು ಮೊಕ್ಲೆನ್ಲಾ ಲೆತ್ತೆ.</verse>
				<verse number="22">ಕೂಡ್ಲೇ ಅಕುಲು ಓಡೊನ್ಲಾ ತನ್ಕುಲೆ ಅಮ್ಮೆರೆನ್ಲಾ ಬುಡ್ದು ಯೇಸುನ ಬೆರಿಯೆ ಪೋಯೆರ್.</verse>
				<verse number="23">ಇಂಚ ಯೇಸು ಗಲಿಲಾಯ ಇಡೀ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಜನೊಕುಲೆನ ಮಾತ ತರತ ಸೀಕ್‌ಲೆನ್, ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ.</verse>
				<verse number="24">ಆಯನ ಸುದ್ಧಿ ಸುರಿಯ ದೇಶೊಡಿಡೀ ಪರಡಿನೆಡ್ದ್ ಮೆಯಿಟ್ ಸೌಖ್ಯದಾಂತಿನಾಕುಲು, ಪಂಡ ತರತರತ ಸೀಕ್‌ಲೆಡ್ದ್ ಭಂಗ ಬರ್ಪಿನಾಕುಲೆನ್ಲಾ, ದೆವ್ವ ಪತ್ತ್‌ದಿನಾಕುಲೆನ್ಲಾ, ಮೂರ್ಚಂಡೆ ರೋಗದಾಕುಲೆನ್ಲಾ, ಪಕ್ಷವಾತದಾಕುಲೆನ್ಲಾ, ಆಯನ ಕೈತಲ್‌ ಕನವೊಂದಿತ್ತೆರ್. ಆಯೆ ಅಕ್ಲೆನ್ ಗುಣ ಮಲ್ತೆ.</verse>
				<verse number="25">ಬೊಕ್ಕ ಗಲಿಲಾಯ, ದೆಕಪೊಲಿ, ಯೆರೂಸಲೇಮ್, ಯೂದಾಯ, ಯೊರ್ದಾನ್ ತುದೆತ ಆಪೆ ಮರ್ಗಿಲ್‌ಡ್ದ್‌ಲಾ ಮಸ್ತ್ ಜನೊಕುಲು ಗುಂಪುಗುಂಪಾದ್ ಆಯನ ಬೆರಿಯೆ ಬತ್ತೆರ್.</verse>
			</chapter>
			<chapter number="5">
				<verse number="1">ಆಯೆ ಆ ಜನೊಕುಲೆ ಗುಂಪುಲೆನ್ ತೂದು ಪರ್ವತ ಮಿತ್ತಾರ್ದ್ ಕುಲ್ಲಿ ಬೊಕ್ಕ ಆಯನ ಶಿಷ್ಯೆರ್ ಆಯ ಕೈತಲ್‌ ಬತ್ತೆರ್.</verse>
				<verse number="2">ಆಯೆ ಅಕ್ಲೆಗ್ ಬೋಧನೆ ಮಲ್ಪೆರೆ ಸುರು ಮಲ್ತೆ.</verse>
				<verse number="3">“ಆತ್ಮೊಡು ಬಡವೆರ್ ಆದಿತ್ತಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.</verse>
				<verse number="4">ದುಃಖ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆಗ್ ದೇವೆರೆಡ್ದ್ ಸಮಾಧಾನ ತಿಕ್ಕುಂಡು</verse>
				<verse number="5">ತಗ್ಗಾವೊಂಡಿನಾಕುಲು ಭಾಗ್ಯವಂತೆರ್, ಅಕ್ಲೆಗ್ ಭೂಮಿ ಬಾಧ್ಯಸ್ತಿಗೆ ಆದ್ ತಿಕ್ಕುಂಡು.</verse>
				<verse number="6">ನೀತಿಗ್ ಬಡವು ಬಾಜೆಲ್ ಇತ್ತಿನಾಕುಲು ಭಾಗ್ಯವಂತೆರ್; ಅಕ್ಲೆಗ್ ತೃಪ್ತಿ ಆಪುಂಡು.</verse>
				<verse number="7">ಕನಿಕರ ಇತ್ತಿನಾಕುಲು ಭಾಗ್ಯವಂತೆರ್, ಅಕುಲು ಕನಿಕರ ಪಡೆವೊನ್ವೆರ್.</verse>
				<verse number="8">ಶುದ್ಧ ಉಡಲ್‌ದಾಕುಲು ಭಾಗ್ಯವಂತೆರ್, ಅಕುಲು ದೇವೆರೆನ್ ತೂವೆರ್.</verse>
				<verse number="9">ಸಮಾಧಾನ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆನ್ ದೇವೆರೆ ಜೋಕುಲು ಅಂದ್‌ದ್ ಲೆಪ್ಪಾವೊನ್ವೆರ್.</verse>
				<verse number="10">ನೀತಿಗಾದ್ ಭಂಗೊನು ತಾಳೊಂಡಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.</verse>
				<verse number="11">ಎನಡ್ದ್ ಜನೊಕುಲು ನಿಕ್ಲೆನ್ ನಿಂದೆ ಮಲ್ತ್‌ದ್ ಭಂಗ ಕೊರ್ದು ನಿಕ್ಲೆ ಮಿತ್ತ್ ಬೊಡ್ಚಾಂದಿ ಸುಳ್ಳು ಪಾತೆರ ಪಂಡೆರ್ಡ ನಿಕುಲು ಭಾಗ್ಯವಂತೆರ್; ದಾಯೆಗಂದ್ಂಡ ನಿಕುಲು ಎನ ಶಿಷ್ಯೆರಾದುಲ್ಲರ್.</verse>
				<verse number="12">“ಸಂತೋಷೊಡುಪ್ಪುಲೆ, ಉಲ್ಲಾಸೊಡುಪ್ಪುಲೆ, ಪರಲೋಕೊಡು ನಿಕ್ಲೆಗ್ ದಿಂಜ ಫಲ ಉಂಡು. ನಿಕ್ಲೆಡ್ದ್ ದುಂಬು ಇತ್ತಿ ಪ್ರವಾದಿಲೆಗ್ಲಾ ಅಕುಲು ಇಂಚೆನೆ ಭಂಗ ಕೊರ್ತೆರತ್ತಾ.</verse>
				<verse number="13">“ನಿಕುಲು ಭೂಮಿಗ್ ಉಪ್ಪು ಆದುಲ್ಲರ್. ಆಂಡ ಉಪ್ಪು ಚಪ್ಪೆ ಆದ್ ಪೋಂಡ, ಐಕ್ ಒಯಿಡ್ದ್ ರುಚಿ ಬರು? ಜನೊಕುಲು ಅವೆನ್ ಪಿದಾಯಿ ಪಾಡ್ದ್ ದೊಂಕಿಯೆರೆ ಯೋಗ್ಯದವು ಅತ್ತಂದೆ ಬೊಕ್ಕ ಒಯಿಕ್‌ಲಾ ಆವಂದ್.</verse>
				<verse number="14">“ನಿಕುಲು ಲೋಕೊಗು ಬೊಲ್ಪಾದುಲ್ಲರ್. ಪರ್ವತದ ಮಿತ್ತ್ ಕಟ್ಟ್‌ದುಪ್ಪುನ ಊರು ಏಪೊಗ್ಲಾ ಮದೆ ಆದುಪ್ಪಂದ್.</verse>
				<verse number="15">“ಬೊಕ್ಕ ತುಡರ್‌ನ್ ಪೊತ್ತಾದ್ ಕಲಸೆದುಲಯಿ ದೀಪುಜೆರ್, ದೀಪಕಂಬದ ಮಿತ್ತ್ ದೀಪೆರತ್ತಾ. ಅಪಗ ಅವು ಇಲ್ಲಡಿತ್ತಿನಾಕುಲೆಗ್ ಮಾತೆರೆಗ್ ಬೊಲ್ಪು ಕೊರ್ಪುಂಡು.</verse>
				<verse number="16">ಐತ ಲೆಕ್ಕನೆ ನಿಕ್ಲೆನ ಬೊಲ್ಪು ಜನೊಕುಲೆ ಎದುರುಡು ಅರ್ಲಡ್, ಇಂಚಾಂಡ ಅಕುಲು ನಿಕ್ಲೆನ ಎಡ್ಡೆ ಕ್ರಿಯೊಲೆನ್ ತೂದು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆನ್ ಪುಗರುವೆರ್.</verse>
				<verse number="17">“ಮೋಶೆನ ನ್ಯಾಯಕಟ್ಟ್ ಆವಡ್ ಪ್ರವಾದಿಲೆ ಪಾತೆರೊಲೆನ್ ಆವಡ್ ದೆತ್ತ್ ಪಾಡಿಯೆರೆ ಯಾನ್ ಬತ್ತೆ ಅಂದ್‌ದ್ ಎನ್ನೊಡ್ಚಿ. ದೆತ್ತ್ ಪಾಡಿಯೆರೆ ಬೈದಿಜಿ, ಪೂರ್ತಿ ಮಲ್ಪೆರೆ ಬೈದೆ.</verse>
				<verse number="18">ನಿಕ್ಲೆಗ್ ನಿಜಾದ್ ಪನ್ಪೆ, ಬಾನಲಾ ಭೂಮಿಲಾ ಆಳಿದ್ ಪೋಪಿನೆಟ್ಟ ನ್ಯಾಯಕಟ್ಟ್‌ಡುಪ್ಪು ಮಾತ ನಡಪುಡಂದೆ ಐತ ಉಲಯಿಡ್ದ್ ಒಂಜಿ ಸೊನ್ನೆಲಾ, ಒಂಜಿ ಶಬ್ಧಲಾ ಆಳಿದ್ ಪೋವಂದ್.</verse>
				<verse number="19">ಅಂಚಾಯಿನೆಡ್ದ್ ಈ ಎಲ್ಯೆಲ್ಯ ಅಪ್ಪಣೆಲೆಡ್ ಒಂಜೆನ್ ಮೀರ್‌ದ್ ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಬಜೀ ಎಲ್ಯಾಯೆ ಆದುಪ್ಪುವೆ; ಆಂಡ ತಾನೇ ಆ ಅಪ್ಪಣೆದಲೆಕ್ಕ ನಡತೊಂದು ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಮಲ್ಲಾಯೆ ಆದುಲ್ಲೆ.</verse>
				<verse number="20">ನಿಕ್ಲೆ ನೀತಿ, ಶಾಸ್ತ್ರಿಲೆ ಬೊಕ್ಕ ಪರಿಸಾಯೆರೆ ನೀತಿಡ್ದ್‌ಲಾ ಹೆಚ್ಚಿನವು ಆದಿತ್ತಿಜಿಡ ಪರಲೋಕ ರಾಜ್ಯೊಡು ಸೇರಯರ್ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ.</verse>
				<verse number="21">“ಮಾನ್ಯ ಕೆರಿಯೆರೆ ಬಲ್ಲಿ, ಮಾನ್ಯ ಕೆರ್ಪಿನಾಯೆ ನ್ಯಾಯವಿಚಾರಣೆಗ್‌ ಒಳಗಾಪೆ ಅಂದ್‌ದ್ ಹಿರಿಯೆರೆಗ್ ಪನ್ತಿನೆನ್ ನಿಕುಲು ಕೇಂಡ್ದರ್.</verse>
				<verse number="22">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ತನ ಸಹೋದ್ರನ ಮಿತ್ತ್ ಕೋಪ ಮಲ್ಪುನ ಪ್ರತಿಯೊರಿಲಾ ನ್ಯಾಯವಿಚಾರಣೆಗ್‌ ಒಳಗಾಪೆ. ತನ ಸಹೋದ್ರನ್ ತೂದು, ಛೀ ನೀಚೆ ಅಂದ್‌ದ್ ಪನ್ಪಿನಾಯೆ ನ್ಯಾಯಸಭೆತ ವಿಚಾರಣೆಗ್ ಒಳಗಾಪೆ. ಮೂರ್ಕೆ ಪನ್ಪಿನಾಯೆ ತೂತ ನರಕೊಗು ಒಳಗಾಪೆ.</verse>
				<verse number="23">ಅಂಚಾಯಿನೆಡ್ದ್ ಈ ನಿನ ಕಾಣಿಕೆನ್ ಬಲಿಪೀಠದ ಕೈತಲ್‌ ಕನತಿನಪಗ ನಿನ ಸಹೋದ್ರನ ಉಡಲ್‌ಡ್ ನಿನ ಮಿತ್ತ್ ಎಂಚಿನಾಂಡಲಾ ವಿರೋಧ ಉಂಡು ಅಂದ್‌ದ್ ನಿನ ನೆನೆಪುಗು ಬತ್ತ್ಂಡ,</verse>
				<verse number="24">ನಿನ ಕಾಣಿಕೆನ್ ಬಲಿಪೀಠದ ಎದುರುಡೇ ಬುಡ್ದು ಪೋದು ದುಂಬತ್ತ ನಿನ ಸಹೋದ್ರನ ಒಟ್ಟುಗು ಒಂಜಾಲ ಐಡ್ದ್ ಬೊಕ್ಕ ಬತ್ತ್‌ದ್ ಕಾಣಿಕೆನ್ ಕೊರ್ಲ.</verse>
				<verse number="25">“ನಿನನ್ ವಾದ ಮಲ್ಪುನಾಯೆ ನಿನಡೊಪ್ಪ ಇತ್ತೆಡ ಸಾದಿಡೇ ಆಯಡೊಪ್ಪ ಅಪಗನೆ ಸಂದಾನ ಮಲ್ತೊನ್ಲ, ಇಜ್ಜಾಂಡ ಆ ವಾದ ಮಲ್ಪುನಾಯೆ ನಿನನ್ ನ್ಯಾಯಾಧಿಪತಿಗ್ ಒಚ್ಚಿದ್ ಕೊರಿಯೆರೆ ಯಾವು. ನ್ಯಾಯಾಧಿಪತಿ ನಿನನ್ ಸೆರೆಮನೆತ ಅಧಿಕಾರಿನ ಕೈಕ್ ಒಚ್ಚಿದ್ ಕೊರುವೆ. ಅಪಗ ಈ ಸೆರೆಮನೆಟ್ ಬೂರ್ವ.</verse>
				<verse number="26">ನಿಕ್ಕ್ ನಿಜಾದ್ ಪನ್ಪೆ, ಈ ಕಡೇ ಕಾಸ್‌ನ್ ಸಂದಾವು ಮುಟ್ಟ ಅಲ್ಪಡ್ದ್ ಪಿದಯಿ ಬರ್ಪಿನೇ ಇಜ್ಜಿ.</verse>
				<verse number="27">“ವ್ಯಭಿಚಾರ ಮಲ್ಪೆರೆ ಬಲ್ಲಿ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್.</verse>
				<verse number="28">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಒಂಜಿ ಪೊಂಜೊವುನ ಮಿತ್ತ್ ಮನಸಾದ್ ಕಣ್ಣ್ ದೀಪಿನಾಯೆ ಪ್ರತಿಯೊರಿಲಾ ಅಪಗನೆ ತನ ಉಡಲ್‌ಡ್ ಆಲೆಡೊಪ್ಪ ವ್ಯಭಿಚಾರ ಮಲ್ತಿನಾಯೆ ಆಯೆ.</verse>
				<verse number="29">ನಿನ ಬಲತ್ತ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ದ್ ಒಂಜಿ ಹಾಳಾಪಿನವು ಏತೋ ಎಡ್ಡೆ.</verse>
				<verse number="30">ನಿನ ಬಲತ್ತ ಕೈ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ ಒಂಜಿ ಹಾಳಾಪಿನವು ಐಡ್ದ್ ಏತೋ ಎಡ್ಡೆ.</verse>
				<verse number="31">“ಉಂದತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ ಆಲೆಗ್ ತ್ಯಾಗಪತ್ರ ಕೊರೊಡು. ಅಂದ್‌ದ್ ಪನ್ತ್ಂಡ್ ಅತ್ತಾ.</verse>
				<verse number="32">ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ, ಆಲೆನ್ ವ್ಯಭಿಚಾರ ಮಲ್ಪಾವೆರೆ ಕಾರಣ ಆಪೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.</verse>
				<verse number="33">“ಬೊಕ್ಕ ಸುಳ್ಳು ಪ್ರಮಾಣ ಪಾಡಿಯೆರೆ ಬಲ್ಲಿ. ಈ ದೀವೊಂಡಿ ಪ್ರಮಾಣೊನು ಕರ್ತವಗ್ ಸಂದಾವೊಡು ಅಂದ್‌ದ್ ಹಿರಿಯಾಕುಲೆಗ್ ಪನ್ತಿನೆನ್ ಕೇಂಡ್ದರತ್ತಾ?</verse>
				<verse number="34">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಆಜ ಪಾಡಡೆ, ಪರಲೋಕದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆ ಗದ್ದಿಗೆ ಆದುಂಡು.</verse>
				<verse number="35">ಭೂಮಿದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆನ ಪಾದಪೀಠ ಆದುಂಡು. ಯೆರೂಸಲೇಮುದ ಮಿತ್ತ್ ಆಜ ಪಾಡೊಡ್ಚಿ, ಅವು ಮಲ್ಲ ಅರಸುನ ಪಟ್ಟಣ ಆದುಂಡು.</verse>
				<verse number="36">ನಿನ ತರೆತ ಮಿತ್ತ್ ಆಜ ಪಾಡೊಡ್ಚಿ, ಈ ಒಂಜಿ ಕುಜಲ್‌ನಾಂಡಲಾ ಬೊಲ್ದು ಇಜ್ಜಿಂಡ ಕಪ್ಪು ಮಲ್ಪಯ.</verse>
				<verse number="37">ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಉಂದೆಡ್ದ್ ಹೆಚ್ಚ್‌ದವು ಸೈತಾನಡ್ದ್ ಬೈದಿನವು.</verse>
				<verse number="38">“ಕಣ್ಣ್‌ದ ಬದಲ್‌ಗ್ ಕಣ್ಣ್, ಕೂಲಿದ ಬದಲ್‌ಗ್ ಕೂಲಿ ದೆಪ್ಪಾವು ಅಂದ್‌ದ್ ಪನ್ತಿನೆನ್ ಕೇಂಡ್ದರತ್ತ.</verse>
				<verse number="39">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಕೇಡ್ ಮಲ್ಪುನಾಯಗ್ ಎದುರು ಉಂತಡೆ. ಒರಿ ನಿನ ಬಲತ್ತ ಕೆಪ್ಪೆಗ್ ಹಾಕಿಯೆಡ ಆಯಗ್ ಬೊಕ್ಕೊಂಜಿ ಕೆಪ್ಪೆನ್ಲಾ ತೋಜಾಲ.</verse>
				<verse number="40">ನಿನನ್ ಕಚೇರಿಗ್ ಲೆತ್ತೊಂದು ಪೋದು ವ್ಯಾಜ್ಯ ಮಲ್ತ್‌ದ್ ನಿನ ಉಲಯಿದ ಅಂಗಿನ್ ದೆತ್ತೊನೊಡು ಪಂಡ್ದಿತ್ತಿನಾಯಗ್ ನಿನ ಮೇಲಂಗಿನ್ ಬುಡ್ಲ.</verse>
				<verse number="41">ಒರಿ ಒಂಜಿ ಮೈಲ್ ದೂರ ಬಲ ಪಂಡ್ದ್ ನಡಪೆರೆ ಒತ್ತಾಯ ಮಲ್ಪುವೆಡ, ಆಯನೊಟ್ಟುಗು ರಡ್ಡ್ ಮೈಲ್ ಪೋಲ.</verse>
				<verse number="42">ನಿನಡ ನಟ್ಟೊಂಡಿನಾಯಗ್ ಕೊರ್ಲ, ಸಾಲ ದೆತ್ತೊನೆರೆ ಬತ್ತಿನಾಯಗ್ ಮೋನೆ ತಿರ್ಗಾವಡ.</verse>
				<verse number="43">“ನಿನ ನಿರೆತಾಯನ್ ಪ್ರೀತಿ ಮಲ್ತ್‌ದ್ ನಿನ ಪಗೆನಾಯನ್ ಪಗೆ ಮಲ್ಪೊಡು ಅಂದ್‌ದ್ ಪನ್ತ್ಂಡ್ ಪನ್ಪಿನೆನ್ ಕೇಂಡ್ದರತ್ತ?</verse>
				<verse number="44">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ನಿಕ್ಲೆನ ಪಗೆನಾಕುಲೆನ್ ಪ್ರೀತಿ ಮಲ್ಪುಲೆ. ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಪ್ರಾರ್ಥನೆ ಮಲ್ಪುಲೆ.</verse>
				<verse number="45">ಇಂಚ ಮಲ್ತರ್ಡ ನಿಕುಲು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆಗ್ ಜೋಕುಲಾಪರ್. ಆಯೆ ಪಡ್ಕೆಂತಿನಾಕ್ಲೆ ಮಿತ್ತ್‌ಲಾ ಎಡ್ಡೆಂತಿನಾಕ್ಲೆ ಮಿತ್ತ್‌ಲಾ ತನ ಸೂರ್ಯೆ ಮೂಡುಲೆಕ್ಕ ಮಲ್ಪುವೆ. ನೀತಿದಾಕುಲೆ ಮಿತ್ತ್‌ಲಾ ನೀತಿಕೆಟ್ಟಿನಾಕುಲೆ ಮಿತ್ತ್‌ಲಾ ಬರ್ಸೊನು ಬರ್ಪಾವೆ.</verse>
				<verse number="46">ನಿಕ್ಲೆಗ್ ಪ್ರೀತಿ ತೋಜಾವುನಾಕುಲೆನೇ ನಿಕುಲು ಪ್ರೀತಿ ಮಲ್ತರ್ಡ ಐಟ್ಟ್ ದಾನೆ ಪ್ರಯೋಜನ ಉಂಡು? ಸುಂಕದಾಕುಲುಲಾ ಅಂಚೆನೇ ಮಲ್ಪುವೆರತ್ತಾ?</verse>
				<verse number="47">ನಿಕ್ಲೆನ ಸಹೋದ್ರೆರೆಗ್ ಮಾತ್ರ ಮರ್ಯಾದಿ ಕೊರಿಯರ್ಡ ದಾದಾಂಡಲಾ ವಿಶೇಷ ಮಲ್ತಿಲೆಕ್ಕ ಆಂಡ? ಪಿದಯಿದ ಜನೊಕುಲುಲಾ ಅಂಚೆನೇ ಮಲ್ಪುವೆರತ್ತಾ?</verse>
				<verse number="48">ಅಂಚಾಯಿನೆಡ್ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ದೋಷದಾಂತಿನಾಯೆ ಆದುಪ್ಪುಲೆಕ್ಕ ನಿಕುಲುಲಾ ದೋಷದಾಂತಿನಾಕುಲು ಆದುಪ್ಪುಲೆ.</verse>
			</chapter>
			<chapter number="6">
				<verse number="1">“ಜನೊಕುಲು ತೂವೊಡು ಅಂದ್‌ದ್ ನಿಕ್ಲೆನ ಧರ್ಮಕಾರ್ಯೊನು ಅಕ್ಲೆನ ಎದುರುಡು ಮಲ್ಪೆರೆ ಬಲ್ಲಿ. ಅಂಚ ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಡ್ದ್ ನಿಕ್ಲೆಗ್ ಫಲ ತಿಕ್ಕಂದ್.</verse>
				<verse number="2">“ಅಂಚಾದ್ ಈ ದಾನ ಮಲ್ಪುನಗ ನಿನ ಎದುರುಡು ಕೊಂಬು ಉರ್ಪಾವಡ. ಜನೊಕುಲೆಡ್ದ್ ಪುಗರಿಕೆ ಪಡೆಯೊಡು ಅಂದ್‌ದ್ ಕಪಟಿಲು ಸಭೆತ ಮಂದಿರೊಲೆಡ್ಲಾ ಸಾದಿದ ಮೂಲೆಡ್ಲಾ ಅಂಚ ಮಲ್ಪುವೆರ್. ಅಕುಲು ತನ್ಕುಲೆಗ್ ಬರೊಡಾಯಿ ಫಲ ತಿಕ್ಕ್‌ದಾಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="3">ಈ ದಾನ ಕೊರ್ನಗ ಗುಟ್ಟುಡು ಉಪ್ಪಡ್. ನಿನ ಬಲತ್ತ ಕೈ ಮಲ್ತಿನವು ದತ್ತ ಕೈಕ್‌ಲಾ ತೆರಿಯಂದೆ ಉಪ್ಪಡ್.</verse>
				<verse number="4">ಗುಟ್ಟುಡು ಕೊರ್ಪಿ ದಾನೊನು ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.</verse>
				<verse number="5">“ನಿಕುಲು ಪ್ರಾರ್ಥನೆ ಮಲ್ಪುನಗ ಕಪಟಿಲೆ ಲೆಕ್ಕ ಮಲ್ಪಡೆ. ಜನೊಕುಲು ತೂವೊಡು ಅಂದ್‌ದ್ ಅಕುಲು ಸಭೆತ ಮಂದಿರೊಲೆಡ್ಲಾ ಕೂಡು ಮಾರ್ಗೊಲೆಡ್ಲಾ ಉಂತೊಂದು ಪ್ರಾರ್ಥನೆ ಮಲ್ಪೆರೆ ಬಯಕುವೆರ್. ಅಕ್ಲೆಗ್ ಪ್ರತಿಫಲ ಅಪಗನೇ ಪಡೆದಾತ್ತ್ಂಡ್ ಪನ್ಪಿನೆನ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="6">ಆಂಡ ಈ ಪ್ರಾರ್ಥನೆ ಮಲ್ಪೊಡಾಂಡ ನಿನ ಕೋಣೆದುಲಯಿ ಪೋದು ಬಾಕಿಲ್‌ನ್ ಮುಚ್ಚೊಂದು ನಿನ ಉಡಲ್‌ಡ್ ಉಪ್ಪು ನಿನ ಅಮ್ಮೆರೆಗ್ ಪ್ರಾರ್ಥನೆ ಮಲ್ಪುಲ. ಉಡಲ್‌ಡುಪ್ಪು ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರುವೆ.</verse>
				<verse number="7">“ಆಂಡ ಪ್ರಾರ್ಥನೆ ಮಲ್ಪುನಗ ಪಿದಯಿದ ಜನೊಕುಲೆ ಲೆಕ್ಕ ಪಂಡಿನೆನೇ ಪನಡ; ಅಕುಲು ಮಸ್ತ್ ಪಾತೆರ್‌ಂಡ ತನ್ಕುಲೆ ಪ್ರಾರ್ಥನೆನ್ ದೇವೆರ್ ಕೇನ್ವೆರ್ ಅಂದ್‌ದ್ ಎನ್ನುವೆರ್.</verse>
				<verse number="8">ಅಂಚಾಯಿನೆಡ್ದ್‌ ನಿಕುಲು ಅಕ್ಲೆನ ಲೆಕ್ಕ ಆವಡೆ. ನಿಕುಲು ನಿಕ್ಲೆನ ಅಮ್ಮೆರೆಡ ನಟ್ಟೊನುನೆಡ್ದ್ ದುಂಬೇ ನಿಕ್ಲೆಗ್ ಎಂಚೆಂಚಿನ ಅಗತ್ಯದವು ಪನ್ಪಿನವು ಆಯಗ್ ತೆರಿದುಂಡು.</verse>
				<verse number="9">ಅವೆಡ್ದಾವರ ನಿಕುಲು ಇಂಚ ಪ್ರಾರ್ಥನೆ ಮಲ್ಪೊಡು. ‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್.</verse>
				<verse number="10">ನಿನ ರಾಜ್ಯ ಬರಡ್, ನಿನ ಚಿತ್ತ ಪರಲೋಕೊಡು ಆಪಿಲೆಕ್ಕನೇ ಭೂಲೋಕೊಡ್ಲಾ ಆವಡ್.</verse>
				<verse number="11">ಎಂಕುಲೆ ದಿನದಿನತ ಪಡಿನ್ ಎಂಕ್ಲೆಗ್ ಇನಿ ಕೊರ್ಲ.</verse>
				<verse number="12">ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಎಂಕುಲು ಮಾಪು ಮಲ್ಪುಲೆಕ್ಕ, ಎಂಕ್ಲೆನ ತಪ್ಪುಲೆನ್ಲಾ ಮಾಪು ಮಲ್ಪುಲ.</verse>
				<verse number="13">ಎಂಕ್ಲೆನ್ ಶೋಧನೆದ ಉಲಯಿ ಸೇರಾವಂದೆ, ಕೇಡ್‌ಡ್ದ್ ಎಂಕ್ಲೆನ್ ತಪ್ಪಾಲ.’</verse>
				<verse number="14">“ನಿಕುಲು ಜನೊಕುಲೆ ತಪ್ಪುಲೆನ್ ಮಾಪು ಮಲ್ತರ್ಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುವೆ.</verse>
				<verse number="15">ಆಂಡ, ನಿಕುಲು ಜನೊಕುಲೆ ತಪ್ಪುನು ಮಾಪು ಮಲ್ಪಂದೆ ಪೋಂಡ ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುಜೆ.</verse>
				<verse number="16">“ಉಪವಾಸ ಮಲ್ಪುನಗ ಕಪಟಿಲೆ ಲೆಕ್ಕ ಮೋನೆನ್ ಬಾಡಾವೊಡ್ಚಿ, ತನ್ಕುಲು ಉಪವಾಸೊಡುಲ್ಲ ಅಂದ್‌ದ್ ಜನೊಕುಲೆಗ್ ತೋಜಾವೆರೆಗಾದ್ ತನ್ಕುಲೆ ಮೋನೆನ್ ವಿಕಾರ ಮಲ್ತೊನ್ವೆರ್. ಅಕ್ಲೆಗ್ ತನ್ಕುಲೆ ಫಲ ಅಪಗನೇ ತಿಕ್ಕ್ಂಡ್ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ.</verse>
				<verse number="17">ಆಂಡ ಈ ಉಪವಾಸ ಮಲ್ಪುನಗ ತರೆಕ್ ಎಣ್ಣೆ ಪಾಡೊಂದು ಮೋನೆನ್ ದೆಕ್ಕೊನ್ಲ.</verse>
				<verse number="18">ಇಂಚ ಮಲ್ತ್ಂಡ ಈ ಉಪವಾಸೊಡುಲ್ಲ ಪಂಡ್ದ್ ಜನೊಕುಲೆಗ್ ತೋಜಂದೆ ಇತ್ತ್ಂಡಲಾ ಉಡಲ್‌ಡ್ ಇತ್ತಿ ನಿನ ಅಮ್ಮೆರೆಗ್ ಈ ಉಪವಾಸೊಡುಲ್ಲ ಪಂಡ್ದ್ ತೋಜಿದ್ ಬರುವ. ಉಡಲ್‌ದ ಉಲಯಿ ನಡಪುನೆನ್ ತೂಪಿನ ನಿನ ಅಮ್ಮೆ ನಿಕ್ಕ್ ಪ್ರತಿಫಲ ಕೊರ್ಪೆ.</verse>
				<verse number="19">“ಭೂಲೋಕೊಡು ಗಂಟ್ ಮಲ್ತ್ ದೀವೊನಡೆ; ಮುಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಂಡು; ಮೂಲು ಕಲ್ವೆರ್ ಮಾಟೆ ಕುರೆದ್ ಕಂಡೊನುವೆರ್.</verse>
				<verse number="20">ಆಂಡ ಪರಲೋಕೊಡು ಗಂಟ್ ಮಲ್ತ್ ದೀವೊನ್ಲೆ; ಅಲ್ಪ ಪುರಿ ಪತ್ತ್‌ದ್ ಕಲೆಂಗಿಡ್ದ್‌ ಹಾಳಾದ್ ಪೋಪುಜಿ; ಅಲ್ಪ ಕಲ್ವೆರ್ ಮಾಟೆ ಮಲ್ತ್‌ದ್ ಕಂಡೊನುನಲಾ ಇಜ್ಜಿ.</verse>
				<verse number="21">ನಿನ ಗಂಟ್ ಇತ್ತಿನಲ್ಪನೇ ನಿನ ಮನಸ್ ಉಪ್ಪುಂಡತ್ತಾ?</verse>
				<verse number="22">“ಕಣ್ಣ್ ಶರೀರೊಗು ತುಡರ್ ಆದುಂಡು. ಇಂಚ ಉಪ್ಪುನಗ ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು.</verse>
				<verse number="23">ಆಂಡ ನಿನ ಕಣ್ಣ್ ಪಡಿಕೆ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪು. ಅಂಚಾನಗ ನಿನಡುಪ್ಪು ಬೊಲ್ಪೇ ಕತ್ತಲೆ ಆದಿತ್ತ್ಂಡ ಆ ಕತ್ತಲೆ ಏತ್ ಪಂಡ್ದ್ ಪನೊಲಿ.</verse>
				<verse number="24">“ಏರ್ಲಾ ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.</verse>
				<verse number="25">“ಈ ಕಾರಣೊಗಾದ್ ನಿಕ್ಲೆ ಪ್ರಾಣೊಗು ಒವೆನ್ ತಿನೊಡು, ಒವೆನ್ ಪರೊಡು, ನಮ ಶರೀರದ ರಕ್ಷಣೆಗ್ ಒವೆನ್ ಪೊದೆತೊನೊಡು ಅಂದ್‌ದ್ ಚಿಂತೆ ಮಲ್ಪಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ವಣಸ್‌ಡ್ದ್ ಪ್ರಾಣ ಮಿತ್ತ್‌ದವು, ಅಂಗಿ ಕುಂಟುಡ್ದು ಶರೀರ ಮಿತ್ತ್‌ದವು ಆದುಂಡತ್ತಾ?”</verse>
				<verse number="26">ಬಾನೊಡು ರಾಪಿನ ಪಕ್ಕಿಲೆನ್ ತೂಲೆ, ಐಕುಲು ಬಿತ್ತುಜ, ಕೊಯ್ಪುಜ, ತುಪ್ಪೆಲೆಡ್ ದಿಂಜಾವೊನುಜ. ಆಂಡಲಾ ಪರಲೋಕೊಡುಪ್ಪು ನಿಕ್ಲೆ ಅಮ್ಮೆ ಐಕ್ಲೆನ್ ತಾಂಕ್‌ದ್ ಕಾಪುವೆ. ಐಕ್ಲೆಡ್ದ್ ನಿಕುಲು ಏತೋ ಹೆಚ್ಚ್‌ದಾಕುಲತ್ತಾ?</verse>
				<verse number="27">ಚಿಂತೆ ಮಲ್ತ್ ಮಲ್ತ್‌ದ್ ನಿಕ್ಲೆ ಶರೀರೊಡು ಒಂಜಿ ಮೊರಂಗೆ ಉದ್ಧ ಆವೆರೆ ಏರೆಡ್ದಾವು?</verse>
				<verse number="28">“ಉಂದತ್ತಂದೆ ನಿಕುಲು ಅಂಗಿ ಕುಂಟುದ ಬಗೆಟ್ ಚಿಂತೆ ಮಲ್ಪುನು ದಾಯೆ? ಕಾಡ್‌ದ ಪೂ ಬುಲೆಪಿನ ರೀತಿನ್ ತೂದು ತೆರಿಲೆ.</verse>
				<verse number="29">ಐಕುಲು ಬೆನ್ಪುಜ, ನೂಲು ನೆಯ್ಪುಜ, ಆಂಡಲಾ ಆ ಪೂಕುಲೆಡ್ ಒಂಜೆಕ್ಕ್ ಉಪ್ಪು ಅಲಂಕಾರ ಅರಸು ಆದುಪ್ಪು ಸೊಲೊಮೋನುಗು ತನ ಮಾತ ಮೈಮೆಡ್ ಉಪ್ಪುನಗಲಾ ಇತ್ತ್‌ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="30">ಓ ಒಂತೆ ನಂಬುನಾಕುಲೇ, ಇನಿ ಇತ್ತ್‌ದ್ ಎಲ್ಲೆ ದಿಕ್ಕೆಲ್‌ದ ಪಾಲಾಪಿ ಕಾಡ್‌ದ ಪಜಿರ್‌ಗ್ ದೇವೆರ್ ಇಂಚ ಪೊದೆಪಾವೆಡ ಅವೆಡ್ದ್ ಏತೋ ಹೆಚ್ಚಾದ್ ನಿಕ್ಲೆಗ್ ತುತ್ತಾದ್ ಪೊದೆಪಾವೆ ಅತ್ತಾ?</verse>
				<verse number="31">“ಇಂಚ ಉಪ್ಪುನಗ ಒವೆನ್ ತಿನೊಡು? ಒವೆನ್ ಪರೊಡು? ಒವೆನ್ ಪೊದೆತೊನೊಡು? ಅಂದ್‌ದ್ ಚಿಂತೆ ಮಲ್ಪಡೆ.</verse>
				<verse number="32">ನೆಕ್ಕ್ ಮಾತೆಕ್ ಪಿದಯಿದ ಜನೊಕುಲು ತುಲ್ಲುವೆರ್. ಉಂದು ಮಾತ ನಿಕ್ಲೆಗ್ ಬೋಡಂದ್‌ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆರೆಗ್ ತೆರಿದುಂಡು.</verse>
				<verse number="33">ಅಂಚಾದ್ ನಿಕುಲು ದುಂಬತ್ತ ದೇವೆರೆ ರಾಜ್ಯೊನು ಬೊಕ್ಕ ಆಯ ನೀತಿನ್ ಬಯಕ್ಲೆ. ಉಂದೆತ್ತ ಒಟ್ಟುಗು ಮಾತಲಾ ನಿಕ್ಲೆಗ್ ತಿಕ್ಕುಂಡು.</verse>
				<verse number="34">ಅಂಚಾದ್ ನಿಕುಲು ಏಲ್ಲೆದ ಚಿಂತೆ ಮಲ್ಪೊಡ್ಚಿ. ಏಲ್ಲೆಗ್ ಎಂಚಿನ ಬೋಡು ಅವು ಏಲ್ಲೆನೇ ಚಿಂತೆ ಮಲ್ಪುಂಡು. ಆ ಪೊರ್ತುದ ಕಾಟ ಆ ಪೊರ್ತುಗೆ ಯಾವು.</verse>
			</chapter>
			<chapter number="7">
				<verse number="1">“ತೀರ್ಪು ಮಲ್ಪಡೆ, ಅಪಗ ನಿಕ್ಲೆಗ್ಲಾ ತೀರ್ಪು ಆಪುಜಿ.</verse>
				<verse number="2">ನಿಕುಲು ಮಲ್ಪುನ ತೀರ್ಪುಗು ಸರಿಯಾದ್ ನಿಕ್ಲೆಗ್ಲಾ ತೀರ್ಪು ಆಪುಂಡು, ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್.</verse>
				<verse number="3">ಈ ನಿನ ಕಣ್ಣ್‌ಡುಪ್ಪು ಕಜವುನ್ ತೂವಂದೆ ನಿನ ಸಹೋದ್ರನ ಕಣ್ಣ್‌ಡುಪ್ಪು ಧೂಳುನು ದಾಯೆಗ್ ತೂಪ?</verse>
				<verse number="4">ಈ ನಿನ ಸಹೋದ್ರಗ್, ‘ನಿನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪುವೆ ಬಲ,’ ಅಂದ್‌ದ್ ಎಂಚ ಪನ್ಪ? ನಿನ ಕಣ್ಣ್‌ಡೇ ಕಜವು ಉಂಡತ್ತಾ.</verse>
				<verse number="5">ಕಪಟಿಯೇ, ದುಂಬತ್ತ ನಿನ ಕಣ್ಣ್‌ದುಲಯಿದ ಕಜವುನ್ ದೆತ್ತ್ ಪಾಡ್ಲ. ಐಡ್ದ್ ಬೊಕ್ಕ ನಿನ ಸಹೋದ್ರನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪೆರೆ ಸರಿಟ್ಟ್ ತೋಜುಂಡು.</verse>
				<verse number="6">“ಪರಿಶುದ್ಧದೆನ್ ನಾಯಿಗ್ ಪಾಡಡೆ; ನಿಕಲ್ನ ಮುತ್ತುಲೆನ್ ಪಂಜಿಲೆ ಎದುರುಡು ಬಿರ್ಕಡೆ, ಬಿರ್ಕಿಯರ್ಡ ಐಕುಲು ಅವೆನ್ ಕಾರ್‌ಡ್ ದೊಂಕುದು ಪಿರ ಬತ್ತ್‌ದ್ ನಿಕ್ಲೆನ್ ತಿಗ್ತ್ ಪಾಡು.</verse>
				<verse number="7">“ಕೇನೊನ್ಲೆ, ಅಪಗ ನಿಕ್ಲೆಗ್ ಕೊರುವು. ನಾಡ್‌ಲೆ ಅಪಗ ನಿಕ್ಲೆಗ್ ತಿಕ್ಕು. ಬೊಟ್ಟುಲೆ ಅಪಗ ನಿಕ್ಲೆಗ್ ಜಪ್ಪು.</verse>
				<verse number="8">ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು.</verse>
				<verse number="9">ನಿಕ್ಲೆಡ್ ಏರಾಂಡಲಾ ರೊಟ್ಟಿ ಕೇನುನ ಮಗಕ್ಕ್ ಕಲ್ಲ್‌ನ್ ಕೊರುವೆನಾ?</verse>
				<verse number="10">ಮೀನ್ ಕೇಂಡ ಉಚ್ಚುನು ಕೊರುವೆನಾ.</verse>
				<verse number="11">ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ; ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಎಡ್ಡೆ ವಸ್ತುಲೆನ್ ಕೊರುವೆತ್ತಾ?</verse>
				<verse number="12">“ಆಂಡಲಾ ಜನೊಕುಲು ನಿಕ್ಲೆಗ್ ಎಂಚೆಂಚಿನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುವೆರಾ, ಅವೆನೇ ನಿಕುಲು ಅಕ್ಲೆಗ್ ಮಲ್ಪುಲೆ. ಉಂದೇ ನ್ಯಾಯಕಟ್ಟ್‌ದ ಬೊಕ್ಕ ಪ್ರವಾದಿಲೆನ ಬೋಧನೆದ ಸಾರಾಂಶ.</verse>
				<verse number="13">“ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋಲೆ. ದಾಯೆಗಂದ್ಂಡ ನಾಶಾನೊಗು ಪೋಪಿ ಬಾಕಿಲ್ ಮಲ್ಲ, ಸಾದಿ ಅಗೆಲ, ಐಟ್ಟ್ ಪೋಪಿನಾಕುಲು ಮಸ್ತ್ ಜನ.</verse>
				<verse number="14">ನಿತ್ಯಜೀವೊಗು ಪೋಪಿ ಬಾಕಿಲ್ ಇಕ್ಕಟ್ಟ್‌ದವು. ಸಾದಿಲಾ ಭಂಗದವು; ಅವೆನ್ ನಾಡ್ ಪತ್ತುನಾಕುಲು ಒಂತೆ ಜನ.</verse>
				<verse number="15">“ಸುಳ್ಳು ಪ್ರವಾದಿಲೆ ಸಂಗತಿಡ್ ಜಾಗ್ರತೆ. ಅಕುಲು ಕುರಿತ ವೇಶೊಡು ನಿಕ್ಲೆ ಕೈತಲ್‌ ಬರ್ಪೆರ್ ಆಂಡ ಉಲಯಿ ತೂಂಡ ತಿಂದ್ ಪಾಡುನ ಚೆನ್ನನಾಯಿಲೆ!</verse>
				<verse number="16">ಅಕ್ಲೆನ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್. ಮುಳ್ಳು ಗಿಡೊಕ್ಲೆಡ್ದ್ ದ್ರಾಕ್ಷೆದ ಪರ್ಂದ್ ಅತ್ತ್‌ಡ ಕಲ್ಲಿಲೆಡ್ದ್ ಅಂಜೂರದ ಪರ್‌ಂದ್ ಕೊಯ್ಪಿನವು ಉಂಡಾ?</verse>
				<verse number="17">ಅಂಚೆನೇ ಎಡ್ಡೆಂತಿನ ಮರ ಎಡ್ಡೆ ಫಲ ಕೊರ್ಪುಂಡು, ಹಾಳ್ ಮರ ಹಾಳ್ ಫಲ ಕೊರ್ಪುಂಡು.</verse>
				<verse number="18">ಎಡ್ಡೆ ಮರ ಹಾಳ್ ಫಲೊನು ಕೊರಂದ್, ಅಂಚೆನೇ ಹಾಳ್ ಮರ ಎಡ್ಡೆ ಫಲೊನು ಕೊರಂದ್.</verse>
				<verse number="19">ಎಡ್ಡೆ ಫಲ ಕೊರಂದಿ ಮಾತ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್.</verse>
				<verse number="20">ಇಂಚ ಉಪ್ಪುನಪಗ ಅಕ್ಲೆ ಕಾರ್ಯೊಲೆಡ್ದ್ ಅಕ್ಲೆನ್ ತೆರಿಯೊನ್ವರ್.</verse>
				<verse number="21">“ಎನನ್ ಕರ್ತವಾ, ಕರ್ತವಾ! ಪನ್ಪಿನಾಕುಲು ಮಾತೆರ್ ಪರಲೋಕ ರಾಜ್ಯೊಡು ಸೇರುವರಂದ್ ಎನ್ನಡೆ; ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತೊನು ಮಲ್ಪುನಾಯೆನೇ ಪರಲೋಕ ರಾಜ್ಯದ ಉಲಯಿ ಸೇರುವೆ.</verse>
				<verse number="22">ಕರ್ತವಾ, ಕರ್ತವಾ ನಿನ ಪುದರ್‌ದ ಮಿತ್ತ್ ಎಂಕುಲು ಪ್ರವಾದನೆ ಮಲ್ತ್‌ಜನಾ? ನಿನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾದ್‌ದಿಜನಾ? ನಿನ ಪುದರ್‌ಡ್ ದಿಂಜ ಬಲತ್ತ ಕಾರ್ಯೊಲೆನ್ ಮಲ್ತ್‌ಜನಾ ಅಂದ್‌ದ್ ಆ ತೀರ್ಪುದ ದಿನೊಕ್ಲೆಡ್ ಏತೋ ಜನೊಕುಲು ಎಂಕ್ ಪನ್ವೆರ್.</verse>
				<verse number="23">ಅಪಗ ಯಾನ್ ಅಕ್ಲೆಗ್, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯಗಾರೆರೇ, ಎನನ್ ಬುಡ್ದು ಪೋಲೆ ಅಂದ್‌ದ್ ಮಾತೆರೆ ಎದುರುಡು ಪಂಡ್ದ್ ಬುಡ್ಪೆ.’</verse>
				<verse number="24">“ಅವೆಡ್ದಾವರ, ಈ ಎನ ಪಾತೆರೊಲೆನ್ ಕೇಂಡ್ದ್ ಐತ ಲೆಕ್ಕನೆ ನಡಪುನಾಯೆ ತನ ಇಲ್ಲ್‌ನ್ ಪಾದೆದ ಮಿತ್ತ್ ಕಟ್ಟ್‌ದಿ ಬುದ್ಧಿ ಇತ್ತಿ ನರಮಾನಿಗ್ ಸಮ ಆದುಲ್ಲೆ.</verse>
				<verse number="25">ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಬತ್ತ್ಂಡ್; ನಾಲ್ ಕಡೆಡ್ದ್ ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್, ಆಂಡಲಾ ಐತ ಪಂಚಾಂಗ ಪಾದೆದ ಮಿತ್ತ್ ಇತ್ತಿನೆಡ್ದ್ ಅವು ಮಗ್‌ರ್ದ್‌ಜಿ.</verse>
				<verse number="26">“ಆಂಡ ಎನ ಪಾತೆರೊಲೆನ್ ಕೇಂಡ್ದ್‌ಲಾ ಐತ ಲೆಕ್ಕನೆ ನಡಪಂದಿನಾಯೆ ಪೊಯ್ಯೆದ ಮಿತ್ತ್ ಇಲ್ಲನ್ ಕಟ್ಟ್‌ದಿ ಬುದ್ಧಿದಾಂತಿ ನರಮಾನಿಗ್ ಸಮ ಆದುಲ್ಲೆ.</verse>
				<verse number="27">ಕಟ್ಟಿ ಬೊಕ್ಕ ಬರ್ಸ ದೊರಿಂಡ್, ಬೊಲ್ಲ ಏರ್‌ಂಡ್, ಗಾಳಿ ಬೀಜ್‌ದ್ ಆ ಇಲ್ಲಗ್ ಹಾಕ್‌ಂಡ್. ಅಪಗ ಆ ಇಲ್ಲ್ ಜರಿದ್ ಬೂರ್ದು ನೆಲ ಸಮ ಆಂಡ್.”</verse>
				<verse number="28">ಯೇಸು ಈ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಆ ಜನೊಕುಲೆ ಗುಂಪು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್.</verse>
				<verse number="29">ದಾಯೆಗಂದ್ಂಡ ಆಯೆ ಅಕ್ಲೆ ಶಾಸ್ತ್ರಿಲೆ ಲೆಕ್ಕ ಬೋಧನೆ ಕೊರಂದೆ, ಅಧಿಕಾರ ಇತ್ತಿನಾಯಲೆಕ್ಕ ಅಕ್ಲೆಗ್ ಬೋಧನೆ ಕೊರಿಯೆ.</verse>
			</chapter>
			<chapter number="8">
				<verse number="1">ಯೇಸು ಪರ್ವತೊಡ್ದು ತಿರ್ತ್ ಬನ್ನಗ ಮಸ್ತ್ ಜನ ಆಯ ಬೆರಿಯೆ ಬತ್ತೆರ್.</verse>
				<verse number="2">ಒರಿ ಕೊಷ್ಟದಾಯೆ ಯೇಸು ಕೈತಲ್‌ ಬತ್ತ್‌ದ್ ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಅಂದ್‌ದ್ ಪಂಡೆ.</verse>
				<verse number="3">ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು, ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಪೋದು ಶುದ್ಧ ಆಯೆ.</verse>
				<verse number="4">ಅಪಗ ಯೇಸು ಆಯಡ, “ತೂಲ ಉಂದೆನ್ ಏರೆಗ್ಲಾ ಪನೊಡ್ಚಿ, ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಕಾಣಿಕೆನ್ ಅರ್ಪಣೆ ಮಲ್ಪುಲ; ಅವು ಜನೊಕುಲೆಗ್ ಸಾಕ್ಷಿ ಆವಡ್,” ಅಂದ್‌ದ್ ಪಂಡೆ.</verse>
				<verse number="5">ಯೇಸು ಕಪೆರ್ನೌಮುಗು ಬತ್ತಿನಪಗ ಒರಿ ಶತಾಧಿಪತಿ ಆಯ ಕೈತಲ್‌ ಬತ್ತ್‌ದ್, “ಕರ್ತವಾ, ಎನ ಬೇಲೆದಾಯೆ ಪಕ್ಷವಾತ ಆದ್ ಬೇನೆಡ್ ನರಳೊಂದು ಇಲ್ಲಡ್ ಬೂರೊಂದೆ,” ಅಂದ್‌ದ್ ಪಂಡೆ.</verse>
				<verse number="6"></verse>
				<verse number="7">ಐಕ್ ಯೇಸು ಆಯಡ, “ಯಾನ್ ಬತ್ತ್‌ದ್ ಆಯನ್ ಗುಣ ಮಲ್ಪುವೆ,” ಅಂದ್‌ದ್ ಪಂಡಿನೆಕ್ಕ್</verse>
				<verse number="8">ಶತಾಧಿಪತಿ ಉತ್ತರ ಕೊರ್ದು, “ಕರ್ತವಾ! ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ; ಈ ಒಂಜಿ ಪಾತೆರ ಪಂಡ್ಂಡ ಯಾವು, ಎನ ಬೇಲೆದಾಯಗ್ ಗುಣ ಆವು.</verse>
				<verse number="9">ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್. ಯಾನ್ ಅಕ್ಲೆಡ್ ಒರಿಯಗ್ ‘ಪೋ’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು ಪಂಡ್ಂಡ ಮಲ್ಪುವೆ,” ಅಂದ್‌ದ್ ಪಂಡೆ.</verse>
				<verse number="10">ಯೇಸು ಉಂದೆನ್ ಕೇಂಡ್ದ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ.</verse>
				<verse number="11">ಉಂದತ್ತಂದೆ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಮೂಡಾಯಿ ಪಡ್ಡಯಿ ದಿಕ್ಕ್‌ಲೆಡ್ದ್ ಮಸ್ತ್ ಜನೊಕುಲು ಬತ್ತ್‌ದ್ ಪರಲೋಕ ರಾಜ್ಯೊಡು ಅಬ್ರಹಾಮು ಇಸಾಕ್ ಯಾಕೋಬು ಮೊಕ್ಲೆ ಒಟ್ಟುಗು ವಣಸ್‌ಗ್ ಕುಲ್ಲುವೆರ್.</verse>
				<verse number="12">ಆಂಡ ಆ ರಾಜ್ಯದ ಬಾಧ್ಯಸ್ಥೆರ್ ಇಸ್ರಾಯೇಲ್ಯೆರೆಡ್ ಪರಲೋಕ ರಾಜ್ಯೊಡು ಉಪ್ಪುನಂಚ ಯೋಗ್ಯತೆ ಇಜ್ಜಂದಿನಾಕುಲೆನ್ ಪಿದಾಯಿ ಗರ್ಗಂಡ ಕತ್ತಲೆಗ್ ಪಾಡ್ವೆರ್. ಅಲ್ಪ ಅರ್ಪಿನವುಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="13">ಐಡ್ದ್ ಬೊಕ್ಕ ಯೇಸು ಆ ಶತಾಧಿಪತಿಗ್, “ಈ ನಂಬಿ ಲೆಕ್ಕನೇ ನಿಕ್ಕ್ ಆವಡ್. ಪೋಲ” ಅಂದ್‌ದ್ ಪಂಡೆ. ಅವ್ವೇ ಗಳಿಗೆಡ್ ಆಯ ಬೇಲೆದಾಯಗ್ ಗುಣ ಆಂಡ್.</verse>
				<verse number="14">ಐಡ್ದ್ ಬೊಕ್ಕ ಯೇಸು ಪೇತ್ರ ಇಲ್ಲಗ್ ಬತ್ತ್‌ದ್, ಅಲ್ಪ ಆಯನ ಮಾಮಿ ಜ್ವರೊಟು ಜೆತ್ತ್‌ದಿನೆನ್ ತೂದು ಆಲೆನ ಕೈ ಮುಟ್ಟಿಯೆ.</verse>
				<verse number="15">ಮುಟ್ಟಿನಪಗನೇ ಆಲೆನ ಜ್ವರ ಬುಡ್ದು ಪೋಂಡು, ಆಲ್ ಲಕ್ಕ್‌ದ್ ಆಯನ ಉಪಚಾರ ಮಲ್ತಲ್.</verse>
				<verse number="16">ಬೈಯಗ್‌ ದೆವ್ವ ಪತ್ತ್‌ದಿನಾಕುಲೆನ್ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್. ಆಯೆ ಬಜೀ ಪಾತೆರೊಡೇ ದೆವ್ವೊಲೆನ್ ಬುಡ್ಪಾಯಿನತ್ತಂದೆ ಮೆಯಿಟ್ ಸಮಕಟ್ಟ್ ಇಜ್ಜಂದಿನಾಕುಲೆನ್ಲಾ ಗುಣ ಮಲ್ತೆ.</verse>
				<verse number="17">ಉಂದೆಡ್ದ್, “ಎಂಕ್ಲೆನ ಬೇನೆಲೆನ್ ತಾನೆ ದೆತ್ತೊಂದು ಎಂಕ್ಲೆನ ಸೀಕ್‌ಲೆನ್ ತುಂಬೊಂಡೆ,” ಅಂದ್‌ದ್ ಯೆಶಾಯೆ ಪನ್ಪಿ ಪ್ರವಾದಿಡ್ದ್ ಪನ್ಪಾಯಿನ ಪಾತೆರ ನಡತ್ಂಡ್.</verse>
				<verse number="18">ಯೇಸು ತನ ಸುತ್ತ ಇತ್ತಿ ಜನೊಕುಲೆ ಮಲ್ಲ ಗುಂಪುಲೆನ್ ತೂದು ಆಪೆದ ಬರಿಕ್ಕ್ ಪೋಯಿ ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="19">ಅಪಗ ಒರಿ ಶಾಸ್ತ್ರಿ ಕೈತಲ್‌ ಬತ್ತ್‌ದ್ ಯೇಸುಡ, “ಗುರೂ, ಈ ಒಡೆಗ್ ಪೋಂಡಲಾ ಯಾನ್ ನಿನ ಬೆರಿಯೆ ಬರ್ಪೆ,” ಅಂದ್‌ದ್ ಪನ್ನಗ,</verse>
				<verse number="20">ಯೇಸು ಆಯಗ್, “ಕುದ್‌ಕೆರ್‌ಲೆಗ್ ಮಾಟೆಲು ಉಂಡು, ಬಾನೊಡು ರಾಪಿನ ಪಕ್ಕಿಲೆಗ್ ಗೂಡುಲು ಉಂಡು, ಆಂಡ ನರಮಾನಿ ಮಗಕ್ಕ್ ತರೆ ದೀಪಿನಾತ್ ಜಾಗ್‌ಲಾ ಇಜ್ಜಿ,” ಅಂದ್‌ದ್ ಪಂಡೆ.</verse>
				<verse number="21">ಶಿಷ್ಯೆರೆಡ್ ಬೇತೆ ಒರಿ, “ಕರ್ತವಾ, ಯಾನ್ ದುಂಬತ್ತ ಪೋದು ಎನ ಅಮ್ಮೆರೆನ್ ಕೌಂತ್‌ದ್ ಬರಿಯೆರೆ ಎಂಕ್ ಅಪ್ಪಣೆ ಆವೊಡು,” ಅಂದ್‌ದ್ ಪಂಡೆ.</verse>
				<verse number="22">ಐಕ್ ಯೇಸು ಆಯಗ್, “ಎನ ಬೆರಿಯೆ ಬಲ, ಸೈತಿನಾಕುಲು ತನ್ಕುಲೆಡ್ ಸೈತ್ ಪೋತಿನಾಕುಲೆನ್ ಕೌಂಪಡ್,” ಅಂದ್‌ದ್ ಪಂಡೆ.</verse>
				<verse number="23">ಯೇಸು ಓಡೊಗು ಮಿತ್ತಾರ್ನಗ ಆಯನ ಶಿಷ್ಯೆರ್ ಆಯನ ಬೆರಿಯೆ ಪೋಯೆರ್.</verse>
				<verse number="24">ಆಂಡ ಅಕುಲು ಪೋವೊಂದುಪ್ಪುನಗ ಕಡಲ್ಡ್ ಮಲ್ಲ ಮಲಕ ಲಕ್ಕ್‌ದ್ ಓಡ ಸೆರೆಕ್ಕುಲೆಡ್ದ್ ಮುಚ್ಚಿದ್ ಪೋಂಡು, ಆಂಡ ಯೇಸು ನಿದ್ರೆ ಬತ್ತ್‌ದ್ ಜೆತ್ತ್‌ದಿತ್ತೆ.</verse>
				<verse number="25">ಅಕುಲು ಕೈತಲ್‌ ಬತ್ತ್‌ದ್ ಆಯನ್ ಲಕ್ಕಾದ್, “ಕರ್ತವಾ! ಎಂಕ್ಲೆನ್ ಕಾಪುಲಾ, ಎಂಕುಲು ಸೈಯೊಂದುಲ್ಲ,” ಅಂದ್‌ದ್ ಪನ್ನಗ,</verse>
				<verse number="26">ಆಯೆ ಅಕ್ಲೆಗ್, “ಒಂತೆ ನಂಬುನಾಕುಲೇ ನಿಕುಲು ದಾಯೆಗ್ ಪೋಡಿವರ್,” ಪಂಡ್ದ್ ಲಕ್ಕ್‌ದ್ ಗಾಳಿನ್ಲಾ ಕಡಲ್‌ನ್ಲಾ ದಟ್ಟಿಯೆ; ಅಪಗ ಮಾತಲಾ ಶಾಂತ ಆಂಡ್.</verse>
				<verse number="27">ಅಪಗ ಅಕುಲು ಪೋಡಿದ್, “ಉಂಬೆ ಎಂಚಿತ್ತಿನಾಯೆ ಆದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಪಂಡೆರ್.</verse>
				<verse number="28">ಐಡ್ದ್ ಬೊಕ್ಕ ಯೇಸು, ಆಪೆದ ಬರಿಕ್ಕ್ ಗದರೇನೆರೆ ಸೀಮೆಗ್ ಮುಟ್ಟಿನಪಗ, ದೆವ್ವ ಪತ್ತ್‌ದಿನಾಕುಲು ಇರ್ವೆರ್ ಸಮಾಧಿದ ಮಾಟೆದುಲಯಿಡ್ದ್ ಪಿದಾಡ್ದ್ ಆಯ ಎದುರು ಬತ್ತೆರ್. ಅಕುಲು ಬಾರಿ ಕಠಿಣದಾಕುಲು ಆದಿತ್ತಿನೆಡ್ದ್ ಆ ಸಾದಿಡ್ ಏರ್ಲಾ ಪೋವೊಂದಿಜ್ಜಾಂಡ್.</verse>
				<verse number="29">ಅಕುಲು “ದೇವೆರೆ ಮಗಾ, ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆಗ್? ಕಾಲ ಬರೊಡ್ದುಂಬು ಎಂಕ್ಲೆಗ್ ಉಪದ್ರ ಕೊರಿಯೆರೆ ಇಡೆಗ್ ಬತ್ತನಾ,” ಅಂದ್‌ದ್ ಅರಬಾಯಿ ದೀಯೆರ್.</verse>
				<verse number="30">ಆ ಜಾಗ್‌ದ ಒಂತೆ ದೂರೊಡು, ಮಲ್ಲ ಪಂಜಿದ ಒಂಜಿ ಪುಂಡು ಮೇಯೊಂದಿತ್ತ್‌ಂಡ್.</verse>
				<verse number="31">ಅಪಗ ಆ ದೆವ್ವೊಲು ಆಯಡ ನಟ್ಟೊಂಡ, “ಈ ಎಂಕ್ಲೆನ್ ಮೊಕ್ಲೆಡ್ದ್ ಪಿದಯಿ ಪಾಡ್ವಡ, ಆ ಪಂಜಿಲೆ ಗುಂಪುದುಲಯಿ ಕಡಪುಡ್ದು ಕೊರ್ಲ.”</verse>
				<verse number="32">ಆಯೆ ಐಕ್ಲೆಗ್, “ಪೋಲೆ” ಪನ್ನಗ ಐಕುಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ, ಆ ಕ್ಷಣೊಟೇ ಆ ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ನೀರ್‌ಡ್ ಮುರ್ಕುದು ಸೈತ್ ಪೋಯ.</verse>
				<verse number="33">ಪಂಜಿಲೆನ್ ಮೇಪಾವುನಾಕುಲು ಊರುದ ಉಲಯಿ ಪಾರ್‌ಪೋದು ಮಾತ ನಡತಿನೆನ್ಲಾ ದೆವ್ವ ಪತ್ತ್‌ದಿನಾಕುಲೆ ಸಂಗತಿನ್ಲಾ ತೆರಿಪಾನಗ</verse>
				<verse number="34">ಆ ಊರುದಾಕುಲು ಮಾತೆರ್ ಯೇಸುನು ತೂವೆರೆ ಪಿದಾಡ್ದ್ ಬತ್ತ್‌ದ್ ಆಯನ್ ತೂಯಿ ಬೊಕ್ಕ ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.</verse>
			</chapter>
			<chapter number="9">
				<verse number="1">ಯೇಸು ಓಡೊಗು ಮಿತ್ತಾದ್ ಕಡಲ್ ದಾಂಟ್‌ದ್ ತನ ಊರುಗು ಬತ್ತೆ.</verse>
				<verse number="2">ಅಲ್ಪ ಬನ್ನಗ ಪಜೆಟ್ಟ್‌ ಬೂರ್ದಿತ್ತಿ ಒರಿ ಪಕ್ಷವಾತದಾಯನ್ ಕೆಲೆವೆರ್ ಆಯನ ಕೈತಲ್‌ ತುಂಬೊಂದು ಬತ್ತೆರ್. ಯೇಸು ಅಕ್ಲೆ ನಂಬಿಕೆನ್ ತೂದು ಪಕ್ಷವಾತದಾಯಗ್ “ಮಗಾ ಧೈರ್ಯೊಡು ಉಪ್ಪುಲ, ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.</verse>
				<verse number="3">ಆಂಡ ಅಲ್ಪ ಇತ್ತಿನ ಶಾಸ್ತ್ರಿಲೆಡ್ ಕೆಲೆವೆರ್, “ಇಂಬೆ ದೇವದೂಷಣೆ ಮಲ್ತೊಂದುಲ್ಲೆ,” ಪಂಡ್ದ್ ತನ್ಕುಲೆ ಉಲಯಿ ಪಾತೆರೊಂದಿತ್ತೆರ್.</verse>
				<verse number="4">ಯೇಸು ಅಕ್ಲೆ ಆಲೋಚನೆ ತೆರಿದ್, “ದಾಯೆ ನಿಕುಲು ನಿಕ್ಲೆ ಉಡಲ್‌ಡ್ ಬೊಡ್ಚಾಂದಿ ಆಲೋಚನೆನ್ ಮಲ್ತೊಂದುಲ್ಲರ್?</verse>
				<verse number="5">ಒವ್ವು ಸುಲಭ? ‘ನಿನ ಪಾಪೊಲು ಮಾಪು ಆತ್ಂಡ್ ಪನ್ಪಿನವಾ,’ ಇಜ್ಜಿಂಡ, ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’</verse>
				<verse number="6">ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋ!” ಪಂಡೆ.</verse>
				<verse number="7">ಆಯೆ ಲಕ್ಕ್‌ದ್ ಇಲ್ಲಗ್ ಪೋಯೆ.</verse>
				<verse number="8">ಜನೊಕುಲು ಉಂದೆನ್ ತೂದು ಪೋಡಿದ್ ನರಮಾನಿಗ್ ಇಂಚಿತ್ತಿ ಅಧಿಕಾರೊನು ಕೊರಿನೆಕ್ಕ್ ದೇವೆರೆನ್ ಪುಗರಿಯೆರ್.</verse>
				<verse number="9">ಯೇಸು ಅಲ್ತ್‌ಡ್ದ್ ಪೋವೊಂದುಪ್ಪುನಗ ಸುಂಕ ವಸೂಲಿ ಮಲ್ತೊಂದಿತ್ತಿ ಮತ್ತಾಯೆ ಪನ್ಪಿನಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ ಆಯೆ ಲಕ್ಕ್‌ದ್ ಆಯನ ಬೆರಿಯೆ ಪೋಯೆ.</verse>
				<verse number="10">ಐಡ್ದ್ ಬೊಕ್ಕ ಆಯೆ ಆಯನ ಇಲ್ಲಡ್ ವಣಸ್‌ಗ್ ಕುಲ್ಲೊಂದುಪ್ಪುನಗ ಮಸ್ತ್ ಜನ ಸುಂಕದಾಕುಲುಲಾ ಪಾಪಿಷ್ಟೆರ್‌ಲಾ ಬತ್ತ್‌ದ್ ಯೇಸುನ ಬೊಕ್ಕ ಆಯ ಶಿಷ್ಯೆರೆ ಪಂತೆಡೇ ಕುಲ್ಲೊಂಡೆರ್.</verse>
				<verse number="11">ಪರಿಸಾಯೆರ್ ಅವೆನ್ ತೂದು ಯೇಸುನ ಶಿಷ್ಯೆರೆಡ, “ನಿಕ್ಲೆ ಗುರು, ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ದಾಯೆಗ್ ವಣಸ್ ಮಲ್ಪುವೆ?” ಅಂದ್‌ದ್ ಕೇಂಡೆರ್.</verse>
				<verse number="12">ಯೇಸು ಉಂದೆನ್ ಕೇಂಡ್ದ್, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು.”</verse>
				<verse number="13">ಬೊಕ್ಕ ಅಕ್ಲೆಗ್, “ನಿಕುಲು ಪೋದು, ‘ಎಂಕ್ ಬಲಿ ಬೊಡ್ಚಿ ಕನಿಕರನೇ ಬೋಡು,’ ಪನ್ಪಿ ಪಾತೆರದ ಅರ್ಥೊನು ಕಲ್ತೊನ್ಲೆ ಯಾನ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್ ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಪಂಡೆ.</verse>
				<verse number="14">ಯೋಹಾನನ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್, “ಎಂಕುಲುಲಾ ಪರಿಸಾಯೆರ್‌ಲಾ ದಿಂಜ ಉಪವಾಸ ಮಲ್ಪುವ, ಆಂಡ ನಿನ ಶಿಷ್ಯೆರ್ ದಾಯೆಗ್ ಉಪವಾಸ ಮಲ್ಪುಜೆರ್?” ಅಂದ್‌ದ್ ಕೇಂಡೆರ್.</verse>
				<verse number="15">ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪ ಮುಟ್ಟ ದುಃಖ ಮಲ್ಪುವೆರಾ? ಆಂಡ ಮದ್ಮಯನ್ ಅಕ್ಲೆ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು, ಅಪಗ ಅಕುಲು ಉಪವಾಸ ಮಲ್ಪುವೆರ್.</verse>
				<verse number="16">ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಪಾಡ್ದಿ ಪತ್ಯೆ ಕುಂಟುನು ಒಯ್ತ್‌ದ್ ಪರ್ತೆಲ್ ಹೆಚ್ಚಾವು.</verse>
				<verse number="17">ಉಂದತ್ತಂದೆ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್. ದಿಂಜಾಂಡ ಚೀರವು ಪುಡಾದ್ ದ್ರಾಕ್ಷಾರಸ ಗುತ್ತುದು ಪೋಪುಂಡು, ಚೀರವು ಹಾಳಾಪುಂಡು. ಆಂಡ ಪೊಸ ದ್ರಾಕ್ಷಾರಸೊನು ಪೊಸ ಚರ್ಮದ ಚೀರವುಡು ಪಾಡ್ದ್ ದೀಪೆರ್. ಅಪಗ ರಡ್ಡ್‌ಲಾ ಒರಿಯುಂಡು.” ಅಂದ್‌ದ್ ಪಂಡೆ.</verse>
				<verse number="18">ಇಂಚ ಆಯೆ ಅಕ್ಲೆಡ ಪಾತೆರೊಂದುಪ್ಪುನಗ ಒರಿ ಅಧಿಕಾರಿ ಬತ್ತ್‌ದ್ ಆಯನ ಕಾರ್‌ಗ್ ಅಡ್ಡಬೂರ್ದು, “ಎನ ಮಗಲ್ ಇತ್ತೆ ಸೈತ್ ಪೋಯಲ್; ಆಂಡಲಾ ಈ ಬತ್ತ್‌ದ್ ಆಲೆನ ಮಿತ್ತ್ ನಿನ ಕೈ ದೀಯಡ ಆಲ್ ಬದುಕುವಲ್.” ಅಂದ್‌ದ್ ನಟ್ಟೊನ್ನಗ</verse>
				<verse number="19">ಯೇಸು ಲಕ್ಕ್‌ದ್ ಆ ಅಧಿಕಾರಿನ ಬೆರಿಯೆ ಪೋನಗ ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್.</verse>
				<verse number="20">ಅಪಗ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು, “ಯಾನ್ ಆಯ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಅಂದ್‌ದ್ ಮನಸ್‌ಡ್ ಎನ್ನೊಂದು ಪಿರವುಡು ಬತ್ತ್‌ದ್ ಯೇಸುನ ಕುಂಟುದ ಗೊಂಡೆನ್ ಮುಟ್ಟಿಯಲ್.</verse>
				<verse number="21"></verse>
				<verse number="22">ಯೇಸು ಪಿಜಿರ್‌ದ್ ಆಲೆನ್ ತೂದು, “ಮಗಲೇ! ಧೈರ್ಯಾದುಪ್ಪುಲ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ. ಆ ಕ್ಷಣೊಟೇ ಆ ಪೊಂಜೊವು ಗುಣ ಆಯಲ್.</verse>
				<verse number="23">ಐಡ್ದ್ ಬೊಕ್ಕ ಯೇಸು ಆ ಅಧಿಕಾರಿನ ಇಲ್ಲಗ್ ಬತ್ತ್‌ದ್ ವಾದ್ಯದಾಕುಲೆನ್ಲಾ ಬೊಬ್ಬೆ ಪಾಡೊಂದಿತ್ತಿನ ಜನೊಕುಲೆ ಗುಂಪುಲೆನ್ಲಾ ತೂದು</verse>
				<verse number="24">ಅಕ್ಲೆಗ್, “ನಿಕುಲು ಪಿದಯಿ ಪೋಲೆ. ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್.” ಇಂಚ ಪನ್ನಗ ಅಕುಲು ಆಯಗ್ ಗೇಲಿ ಮಲ್ತೆರ್.</verse>
				<verse number="25">ಜನೊಕುಲೆನ್ ಪಿದಾಯಿ ಕಡಪುಡಿ ಬೊಕ್ಕ ಯೇಸು ಉಲಯಿ ಪೋದು ಆಲೆನ ಕೈ ಪತ್ತಿನಪಗ ಆಲ್ ಲಕ್ಕಿಯಲ್.</verse>
				<verse number="26">ಈ ಸುದ್ಧಿ ಊರು ಇಡೀ ಪರಡ್ಂಡ್.</verse>
				<verse number="27">ಯೇಸು ಅಲ್ತ್‌ಡ್ದ್ ಪೋನಗ ಇರ್ವೆರ್ ಕುರುಡೆರ್, “ದಾವೀದ್ ಮಗಾ ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬುಲ್ತೊಂದು ಆಯ ಬೆರಿಯೆ ಪೋಯೆರ್.</verse>
				<verse number="28">ಆಯೆ ಇಲ್ಲಡೆ ಬನ್ನಗ ಆ ಕುರುಡೆರ್ ಆಯನ ಒಟ್ಟುಗು ಇಲ್ಲದುಲಯಿ ಪೋಯೆರ್. ಯೇಸು ಅಕ್ಲೆಡ, “ಯಾನ್ ಉಂದೆನ್ ಮಲ್ಪೊಲಿಯಾ ಪಂಡ್ದ್ ನಂಬುವರಾ?” ಪಂಡಿನೆಕ್ಕ್, “ಅಂದ್ ಕರ್ತವಾ, ಎಂಕುಲು ನಂಬುವ,” ಪಂಡೆರ್.</verse>
				<verse number="29">ಅಪಗ ಆಯೆ ಅಕ್ಲೆ ಕಣ್ಣ್‌ಲೆನ್ ಮುಟ್ಟುದು, “ನಿಕುಲು ನಂಬಿ ಲೆಕ್ಕನೇ, ನಿಕ್ಲೆಗ್ ಆವಡ್,” ಅಂದ್‌ದ್ ಪಂಡೆ.</verse>
				<verse number="30">ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಬೊಕ್ಕ ಯೇಸು ಅಕ್ಲೆಡ, “ಉಂದು ಏರೆಗ್ಲಾ ತೆರಿಯೆರೆಗೇ ಬಲ್ಲಿ ಅಂದ್‌ದ್ ಕಂಡಿತಾದ್ ಪಂಡೆ.”</verse>
				<verse number="31">ಆಂಡ ಅಕುಲು ಅಲ್ಪಡ್ದ್ ಪಿದಾಡ್ದ್ ಪೋದು ಆ ಸೀಮೆಡ್ ಇಡೀ ಆಯನ ಸುದ್ಧಿನ್ ಪಂಡೆರ್.</verse>
				<verse number="32">ಅಕುಲು ಪಿದಾಡ್ನಗ, ಒರಿ ದೆವ್ವ ಪತ್ತ್‌ದಿ ಪೊಟ್ಟನ್ ಯೇಸು ಕೈತಲ್‌ ಕನತೆರ್.</verse>
				<verse number="33">ಆಯೆ ದೆವ್ವೊನು ಪಿದಯಿ ಪಾಡಿ ಬೊಕ್ಕ ಪೊಟ್ಟೆ ಪಾತೆರಿಯೆ. ಐಕ್ ಜನೊಕುಲು, “ಇಂಚಿತ್ತಿನೆನ್ ಎಂಕುಲು ಇಡೀ ಇಸ್ರಾಯೇಲ್ ಜನೊಕುಲೆಡ್ ತೂತಿನೆ ಇಜ್ಜಿ,” ಅಂದ್‌ದ್ ಅಚ್ಚಿರ ಆಯೆರ್.</verse>
				<verse number="34">ಆಂಡ ಪರಿಸಾಯೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥನ ಸಹಾಯೊಡ್ದು ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್.</verse>
				<verse number="35">ಯೇಸು ಮಾತ ಪಟ್ಟಣಲೆನ್ಲಾ, ಹಳ್ಳಿಲೆನ್ಲಾ ತಿರ್ಗ್‌ದ್ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಪರಲೋಕ ರಾಜ್ಯದ ಸುವಾರ್ತೆನ್ ಸಾರಿದ್ ಮಾತ ತರತ ಸೀಕ್‌ಲೆನ್ ಮಾತ ತರತ ಬೇನೆಲೆನ್ ಗುಣ ಮಲ್ತೊಂದು ಬತ್ತೆ.</verse>
				<verse number="36">ಆಂಡ ಜನೊಕುಲೆ ಗುಂಪುಲೆನ್ ತೂದು ಅಕುಲು ಕುರುಬೆದಾಂತಿ ಕುರಿಕುಲೆ ಲೆಕ್ಕ ಬೆಂಗ್‌ದ್ ಬಚ್ಚಿದ್ ಪೋತೆರತ್ತಾ ಅಂದ್‌ದ್ ಅಕ್ಲೆ ಮಿತ್ತ್ ಕನಿಕರ ಪಡೆಯೆ.</verse>
				<verse number="37">ತನ ಶಿಷ್ಯೆರೆಡ, “ಬುಲೆ ಮಸ್ತ್ ಉಂಡು, ಆಂಡ ಬೇಲೆದಾಕುಲು ಕಮ್ಮಿ.</verse>
				<verse number="38">ಅವೆಡ್ದಾವರ ಬುಲೆತ ಯಜಮಾನಡ, ಆಯೆ ತನ ಬುಲೆಕ್ ಬೇಲೆದಾಕುಲೆನ್ ಕಡಪುಡೊಡು ಅಂದ್‌ದ್ ನಟ್ಟೊನ್ಲೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="10">
				<verse number="1">ಬೊಕ್ಕ ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಕೈತಲ್ ಲೆತ್ತ್‌ದ್ ದೆವ್ವೊಲೆನ್ ಬುಡ್ಪಾಯೆರೆಲಾ ಮಾತ ತರತ ಸೀಕ್‌ಲೆನ್ಲಾ ಮಾತ ತರತ ಬೇನೆಲೆನ್ಲಾ ಗುಣ ಮಲ್ಪೆರೆ ಅಕ್ಲೆಗ್ ಅಧಿಕಾರ ಕೊರಿಯೆ.</verse>
				<verse number="2">ಆಯೆ ಕಡಪುಡ್ದು ಕೊರಿನ ಪದ್ರಾಡ್ ಅಪೊಸ್ತಲರೆನ ಪುದರ್ ಉಂದೇ, ಸುರುತ್ತಾಯೆ ಪೇತ್ರೆ ಪನ್ಪಿ ಸೀಮೋನೆ, ಆಯನ ಮೆಗ್ಯೆ ಅಂದ್ರೆಯೆ, ಜೆಬೆದಾಯನ ಮಗೆ ಯಾಕೋಬೆ, ಆಯನ ಮೆಗ್ಯೆ ಯೋಹಾನೆ,</verse>
				<verse number="3">ಫಿಲಿಪ್ಪು, ಬಾರ್ತೊಲೊಮಾಯೆ, ತೋಮೆ, ಸುಂಕದ ಮತ್ತಾಯೆ, ಅಲ್ಫಾಯನ ಮಗೆ ಯಾಕೋಬೆ, ತದ್ದಾಯೆ,</verse>
				<verse number="4">ಮತಾಭಿಮಾನಿ ಅಂದ್‌ದ್ ಲೆಪ್ಪವೊಂಡಿ ಸೀಮೋನೆ, ಯೇಸುನು ಒಚ್ಚಿದ್ ಕೊರಿ ಇಸ್ಕಾರಿಯೋತ ಯೂದೆ ಮೊಕುಲೇ.</verse>
				<verse number="5">ಈ ಪದ್ರಾಡ್ ಶಿಷ್ಯೆರೆನ್ ಅಧಿಕಾರ ಕೊರ್ದು ಯೇಸು ಕಡಪುಡಿಯೆ. ಕಡಪುಡುನಪಗ ಅಕ್ಲೆಗ್ ಅಪ್ಪಣೆ ಕೊರಿನಿ ದಾನೆಂದ್ಂಡ, “ಪಿದಯಿದ ಜನೊಕುಲೆ ಕಡೆಕ್ಕ್ ಪೋವಡೆ, ಸಮಾರ್ಯೆರೆ ಊರುದ ಉಲಯಿ ಕಾರ್ ದೀವಡೆ.</verse>
				<verse number="6">ಮೊಕ್ಲೆನ್ ಬುಡ್ದು, ನಿಕುಲು ತತ್ತ್ ಪೋಯಿ ಕುರಿಕುಲೆ ಲೆಕ್ಕ ಉಪ್ಪುನ ಇಸ್ರಾಯೇಲ್ಯೆರೆ ಜನಾಂಗದ ಕೈತಲ್‌ಗ್ ಮಾತ್ರ ಪೋಲೆ.</verse>
				<verse number="7">‘ಪರಲೋಕ ರಾಜ್ಯ ಕೈತಲಾತ್ತ್ಂಡ್,’ ಅಂದ್‌ದ್ ಸಾರಿಯೊಂದು ಪೋಲೆ.</verse>
				<verse number="8">ಸೀಕ್‌ದಾಕುಲೆನ್ ಗುಣ ಮಲ್ಪುಲೆ, ಸೈತಿನಕುಲೆನ್ ಬದ್‌ಕಾಲೆ, ಕೊಷ್ಟ ಪತ್ತ್‌ದಿನಕುಲೆನ್ ಶುದ್ಧ ಮಲ್ಪುಲೆ. ದೆವ್ವೊಲೆನ್ ಬುಡ್ಪಾಲೆ, ನಿಕ್ಲೆಗ್ ಧರ್ಮೊಗು ತಿಕ್ಕ್‌ದ್ಂಡ್, ಧರ್ಮೊಗೇ ಕೊರ್ಲೆ.</verse>
				<verse number="9">ನಿಕ್ಲೆ ಜೋಳಿಗೆಡ್ ಬಂಗಾರ್, ಬೊಳ್ಳಿ, ಕಾಸ್, ರಡ್ಡ್ ಅಂಗಿ, ಜೋಡು, ಕೋಲು ಇಂಚಿತ್ತಿನೆನ್ ದೆತ್ತೊನೊಡ್ಚಿ. ಬೇಲೆದಾಯೆ ತನ ವಣಸ್‌ಗ್ ತಕ್ಕದಾಯೆ.</verse>
				<verse number="10"></verse>
				<verse number="11">“ನಿಕುಲು ವಾ ಊರುಗು ಇಜ್ಜಾಂಡ ಹಳ್ಳಿಗ್ ಪೋಯಿನಪಗ ಅಲ್ಪ ಯೋಗ್ಯದಾಯನ್ ನಾಡ್ ಪತ್ತ್‌ಲೆ. ಅಲ್ಪ ಯೋಗ್ಯದಾಯೆ ಏರ್ಂದ್ ತೆರಿಯೊಂದು ಆ ಊರು ಬುಡ್ಪಿನೆಟ್ಟ ಅವುಲೇ ಉಪ್ಪುಲೆ.</verse>
				<verse number="12">ಆ ಇಲ್ಲದ ಉಲಯಿ ಪೋನಗ ಸಮಾಧಾನ ಆವಡ್ ಪನ್ಲೆ.</verse>
				<verse number="13">ಆ ಇಲ್ಲದಾಕುಲು ಯೋಗ್ಯೆರ್ ಆದಿತ್ತ್ಂಡ ನಿಕ್ಲೆನ ಸಮಾಧಾನ ಅಕ್ಲೆಗ್ ಆವಡ್; ಅಯೋಗ್ಯೆರ್ ಆದಿತ್ತ್ಂಡ ನಿಕ್ಲೆ ಸಮಾಧಾನ ನಿಕ್ಲೆಗ್ ಪಿರ ಬರಡ್.</verse>
				<verse number="14">ಏರಾಂಡಲಾ ನಿಕ್ಲೆನ್ ಸೇರಾವಂದೆ, ನಿಕ್ಲೆ ಪಾತೆರೊಲೆನ್ ಕೇನಂದೆ ಉಲ್ಲೆರ್ಡ ಆ ಇಲ್ಲಡ್ದಾವಡ್, ಊರುಡ್ದಾವಡ್ ಪಿದಾಡ್ದ್ ನಿಕುಲು ಪೋನಗ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ.</verse>
				<verse number="15">ನ್ಯಾಯತೀರ್ಪುದ ದಿನೊಟು ಅಂಚಿತ್ತಿ ಊರುದ ಗತಿ ಸೋದೋಮು ಗೊಮೋರ ಸೀಮೆದ ಗತಿಡ್ದ್‌ಲಾ ಕಠಿಣ ಆದುಪ್ಪುಂಡು ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="16">“ತೂಲೆ, ಚೆನ್ನನಾಯಿಲೆ ನಡುಟು ಕುರಿಕುಲೆನ್ ಪೊಗ್ಗಾಯಿಲೆಕ್ಕ ಯಾನ್ ನಿಕ್ಲೆನ್ ಕಡಪುಡ್ದು ಕೊರ್ಪೆ. ಅಂಚಾಯಿನೆಡ್ದ್ ಸರ್ಪೊಲೆ ಲೆಕ್ಕ ಬುದ್ಧಿವಂತೆರ್ಲಾ ಪಾರಿವಾಳದ ಲೆಕ್ಕ ಕಪಟದಾಂತಿನಾಕುಲುಲಾ ಆದುಪ್ಪುಲೆ.</verse>
				<verse number="17">ಉಂದತ್ತಂದೆ ಜನೊಕುಲೆ ಸಂಗತಿಡ್, ಎಚ್ಚರಿಕೆ ಆದುಪ್ಪುಲೆ, ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್, ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಚಾಟಿಡ್ ಹಾಕೆರ್.</verse>
				<verse number="18">ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ಲಾ ಪಿದಯಿದ ಜನೊಕುಲೆಗ್ಲಾ ಸಾಕ್ಷಿ ಆವರ್.</verse>
				<verse number="19">ಆಂಡ ಅಕುಲು ನಿಕ್ಲೆನ್ ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್‌ದ್ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ದೇವೆರ್ ಕಲ್ಪಾದ್ ಕೊರುವೆ.</verse>
				<verse number="20">ಅಪಗ ಪಾತೆರುನಾಕುಲು ನಿಕುಲತ್ತ್, ನಿಕ್ಲೆ ಅಮ್ಮೆರೆನ ಆತ್ಮನೇ ನಿಕ್ಲೆಡ್ ಪಾತೆರುಂಡು.</verse>
				<verse number="21">“ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್.</verse>
				<verse number="22">ಬೊಕ್ಕ ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.</verse>
				<verse number="23">ಒಂಜಿ ಊರುಡು ನಿಕ್ಲೆನ್ ಭಂಗ ಕೊರಿಯೆರ್ಡ ಬೊಕ್ಕೊಂಜಿ ಊರುಗು ಪಾರ್‌ಪೋಲೆ. ನರಮಾನಿ ಮಗೆ ಬರ್ಪಿನೆಟ್ಟ ನಿಕುಲು ಇಸ್ರಾಯೇಲ್ ಜನೊಕುಲೆ ಊರುಲೆ ಪ್ರಯಾಣೊನು ಮಲ್ತ್‌ದ್ ಮುಗಿತ್‌ದುಪ್ಪುಜರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="24">“ಗುರುಡ್ದು ಶಿಷ್ಯೆ ಮಲ್ಲಾಯೆ ಅತ್ತ್, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್.</verse>
				<verse number="25">ಶಿಷ್ಯೆ ಗುರುಲೆಕ್ಕ, ಚಾಕ್ರಿದಾಯೆ ಧನಿಲೆಕ್ಕ ಉಪ್ಪುನವು ಯಾವು. ಅಕುಲು ಇಲ್ಲದ ಯಜಮಾನಗ್ ಬೆಲ್ಜೆಬೂಲ ಅಂದ್‌ದ್ ಪುದರ್ ದೀಯಿಬೊಕ್ಕ ಆಯನ ಇಲ್ಲದಾಕುಲೆನ್ ಎಂಚಿನ ಪನುವೆರ್?”</verse>
				<verse number="26">ಆಂಡಲಾ ಅಕ್ಲೆಗ್ ಪೋಡ್ಯಡೆ. ಮದೆ ಆದುಪ್ಪು ಒವುಲಾ ತೋಜಿದ್ ಬರಂದೆ ಕುಲ್ಲಂದ್. ಪಿದಯಿ ಬರಂದೆ ಉಪ್ಪುನ ಒಂಜಿ ಗುಟ್ಟುಲಾ ಇಜ್ಜಿ.</verse>
				<verse number="27">ಯಾನ್ ಕತ್ತಲೆಡ್ ನಿಕ್ಲೆಗ್ ಪನ್ಪಿನೆನ್ ನಿಕುಲು ಬೊಲ್ಪುಡು ಪನ್ಲೆ, ಬೊಕ್ಕ ಕೆಬಿಟ್ ಕೇಂಡಿನೆನ್ ಮಾಳಿಗೆದ ಮಿತ್ತ್ ಉಂತುದು ಸಾರಿಲೆ.</verse>
				<verse number="28">ಉಂದತ್ತಂದೆ ಶರೀರೊನು ಕೆರ್ದ್ ಆತ್ಮೊನು ಕೆರಿಯೆರೆ ಆವಂದಿನಾಕುಲೆಗ್ ಪೋಡ್ಯಡೆ, ಆತ್ಮ ಶರೀರ ರಡ್ಡೆನ್ಲಾ ನರಕೊಡು ಪಾಡ್ದ್ ನಾಶ ಮಲ್ಪುನ ದೇವೆರೆಗ್ ಪೋಡಿಲೆ.</verse>
				<verse number="29">ದುಡ್ಡುಗು ರಡ್ಡ್ ಗುರ್ಬ್ಬಿಲೆನ್ ಮಾರುನವು ಉಂಡತ್ತಾ? ಆಂಡಲಾ ನಿಕ್ಲೆ ಅಮ್ಮೆರೆ ಚಿತ್ತದಾಂತೆ ಒಂಜಾಂಡಲಾ ನೆಲಕ್ ಬೂರಂದ್.</verse>
				<verse number="30">ನಿಕ್ಲೆ ತರೆಕುಜಲ್ ಮಾತಲಾ ಗೆನ್ತ್‌ದುಂಡು.</verse>
				<verse number="31">ಅಂಚಾಯಿನೆಡ್ದ್ ಪೋಡ್ಯಡೆ; ಮಸ್ತ್ ಗುರ್ಬ್ಬಿಲೆಡ್ದ್‌ಲಾ ನಿಕುಲು ಹೆಚ್ಚ್‌ದಾಕುಲು.</verse>
				<verse number="32">“ಅಂಚಾಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅಂದ್‌ದ್ ಒಪ್ಪಿಯೊನ್ವೆನಾ, ಯಾನ್ಲಾ ಆಯನ್ ಎನ್ನಾಯೆ ಅಂದ್‌ದ್ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಒಪ್ಪಿಯೊನ್ವೆ.</verse>
				<verse number="33">ಆಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅತ್ತ್ ಅಂದ್‌ದ್ ಪನ್ಪೆನಾ ಆಯನ್ ಯಾನ್ಲಾ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಎನ್ನಾಯೆ ಅತ್ತ್ ಅಂದ್‌ದ್ ಪನ್ಪೆ.</verse>
				<verse number="34">“ಭೂಲೋಕೊಡು ಸಮಾಧಾನ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ಎನ್ನಡೆ. ಸಮಾಧಾನೊನು ಪುಟ್ಟಾವೆರೆ ಯಾನ್ ಬೈದಿಜಿ, ಕತ್ತಿನ್ ಪಾಡಿಯೆರೆ ಬೈದೆ.</verse>
				<verse number="35">ಎಂಚಂದ್ಂಡ ಮಗಕ್ಲಾ ಅಮ್ಮೆರೆಗ್ಲಾ, ಮಗಲೆಗ್ಲಾ ಅಪ್ಪೆಗ್ಲಾ, ಮರ್ಮಲೆಗ್ಲಾ ಮಾಮಿಗ್ಲಾ, ಭೇದ ಪುಟ್ಟಾಯೆರೆ ಬೈದೆ.</verse>
				<verse number="36">ಇಂಚ ಒರಿ ನರಮಾನಿಗ್ ಆಯ ಇಲ್ಲದಾಕುಲೆ ಪಗೆನಾಕುಲು ಆಪೆರ್.</verse>
				<verse number="37">“ಅಪ್ಪೆನಾವಡ್, ಅಮ್ಮೆರೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್. ಮಗನಾವಡ್ ಮಗಲೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್.</verse>
				<verse number="38">ಬೊಕ್ಕ ಏರಾಂಡಲಾ ತನ ಕ್ರುಸ್ಸುನು ಪತ್ತೊಂದು ಎನ ಬೆರಿಯೆ ಬರಂದಿನಾಯೆ ಆಯೆ ಎನ ಶಿಷ್ಯೆ ಆವೆರೆ ಯೋಗ್ಯದಾಯೆ ಅತ್ತ್.</verse>
				<verse number="39">ತನ ಪ್ರಾಣೊನು ಕಾತೊನುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ.</verse>
				<verse number="40">“ನಿಕ್ಲೆನ್ ಸೇರಾವೊನುನಾಯೆ ಎನನ್ ಸೇರಾವೊನುನಾಯೆ ಆದುಲ್ಲೆ; ಎನನ್ ಸೇರಾವೊನುನಾಯೆ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊನುನಾಯೆ ಆದುಲ್ಲೆ.</verse>
				<verse number="41">ಪ್ರವಾದಿನ್ ಪ್ರವಾದಿ ಅಂದ್‌ದ್ ಸೇರಾವೊನುನಾಯೆ ಪ್ರವಾದಿಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ; ನೀತಿವಂತೆರೆನ್ ನೀತಿವಂತೆ ಅಂದ್‌ದ್ ಸೇರಾವೊನುನಾಯೆ ನೀತಿವಂತಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ.</verse>
				<verse number="42">ಆಂಡ ಈ ಎಲ್ಯಾಕುಲೆಡ್ ಒರಿಯಗ್ ಯೇಸುನ ಶಿಷ್ಯೆ ಪಂಡ್ದ್ ಏರಾಂಡಲಾ ಒಂಜಿ ಚೊಂಬು ಚೌಲಿ ನೀರಾಂಡಲಾ ಪರಿಯೆರೆ ಕೊರಿಯೆಡ ಬರೊಡಾಯಿ ಪ್ರತಿಫಲ ಆಯಗ್ ತಪ್ಪುನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="11">
				<verse number="1">ಯೇಸು ತನ ಪದ್ರಾಡ್ ಮಂದೆ ಶಿಷ್ಯೆರೆಗ್ ಅಪ್ಪಣೆ ಕೊರ್ದು ಮುಗಿ ಬೊಕ್ಕ ಅಲ್ಪದ ಊರುಲೆಗ್ ಬೋಧನೆ ಮಲ್ಪೆರೆಲಾ ಸುವಾರ್ತೆನ್ ಸಾರಿಯೆರೆಲಾ ಅಲ್ತ್‌ಡ್ದ್ ಪಿದಾಡಿಯೆ.</verse>
				<verse number="2">ಅಪಗ ಯೋಹಾನೆ ಸೆರೆಮನೆಟ್ ಕ್ರಿಸ್ತನ ಕ್ರಿಯೊಲೆ ಸುದ್ಧಿನ್ ಕೇಂಡ್ದ್ ಆಯ ಕೈತಲ್‌ ಶಿಷ್ಯೆರೆನ್ ಕಡಪುಡ್ದು,</verse>
				<verse number="3">“ಬರ್ಪಿನಾಯೆ ಈಯೆನಾ, ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ ಅಂದ್‌ದ್ ಕೇನ್ಪಾಯೆ.”</verse>
				<verse number="4">ಐಕ್ ಯೇಸು ಅಕ್ಲೆಡ, “ನಿಕುಲು ತೂದು ಕೇಂಡಿನೆನ್ ಯೋಹಾನಗ್ ಪೋದು ಪನ್ಲೆ,</verse>
				<verse number="5">ಕುರುಡೆರೆಗ್ ಕಣ್ಣ್ ತೋಜುಂಡು, ಚೊಂಟೆರೆಗ್ ಕಾರ್ ಬರ್ಪುಂಡು, ಕೊಷ್ಟದಾಕುಲು ಶುದ್ಧ ಆಪೆರ್, ಕೆಪ್ಪೆರೆಗ್ ಕೆಬಿ ಕೇನುಂಡು. ಸೈತಿನಾಕುಲು ಲಕ್ಕುವೆರ್, ಬಡವೆರೆಗ್ ಸುವಾರ್ತೆ ಸಾರುಂಡು.</verse>
				<verse number="6">ಎನ ಸಂಗತಿಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ,” ಅಂದ್‌ದ್ ಯೇಸು ಉತ್ತರ ಕೊರಿಯೆ.</verse>
				<verse number="7">ಅಕುಲು ಪಿದಾಡ್ದ್ ಪೋಯಿ ಬೊಕ್ಕ ಯೇಸು ಜನೊಕುಲೆ ಗುಂಪುಲೆಗ್ ಯೋಹಾನನ ಸಂಗತಿನ್ ಪನಿಯೆರೆ ಸುರು ಮಲ್ತೆ, “ಎಂಚಿನೆನ್ ತೂವೊಡು ಅಂದ್‌ದ್ ಕಾಡ್‌ಗ್ ಪೋದಿತ್ತರ್? ಗಾಳಿಗ್ ಪಂದುನ ದಂಟ್‌ನಾ?</verse>
				<verse number="8">ಇಜ್ಜಾಂಡ ಎಂಚಿನ ತೂವೊಡು ಅಂದ್‌ದ್ ಪೋದಿತ್ತರ್? ನಯತ್ತ ಕುಂಟುನು ಪಾಡ್ದಿನ ನರಮಾನಿನಾ? ನಯತ್ತ ಕುಂಟುನು ಪಾಡುನಾಕುಲು ಅರಸುನ ಇಲ್ಲ್‌ಲೆಡ್ ಉಪ್ಪುವೆರತ್ತಾ?</verse>
				<verse number="9">ಅಪಗಾಂಡ ದಾಯೆಗ್ ಪೋದಿತ್ತರ್? ಪ್ರವಾದಿನ್ ತೂಯೆರೆಗಾ? ಅಂದ್, ಪ್ರವಾದಿಡ್ದ್‌ಲಾ ಹೆಚ್ಚ್‌ದಾಯನ್ ತೂಯರ್, ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="10">‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸರಿ ಮಲ್ಪುವೆ,’ ಅಂದ್‌ದ್ ಏರೆ ಸಂಗತಿಡ್‌ ಗ್ರಂಥೊಡು ಬರೆತ್ಂಡಾ ಆ ನರಮಾನಿ ಉಂಬೆನೇ.</verse>
				<verse number="11">ಪೊಂಜೊವುಲೆಡ್ದ್ ಪುಟ್ಟುದಿನಾಕುಲೆಡ್ ಸ್ನಾನಿಕೆ ಯೋಹಾನಡ್ದ್ ಮಲ್ಲಾಯೆ ಲಕ್ಕ್‌ದಿಜೆ. ಆಂಡಲಾ ಪರಲೋಕ ರಾಜ್ಯೊಡುಪ್ಪು ಎಲ್ಯಾಯೆ ಆಯಡ್ದ್‌ಲಾ ಮಲ್ಲಾಯೆ ಆದುಲ್ಲೆ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="12">ಉಂದತ್ತಂದೆ ಸ್ನಾನಿಕೆ ಯೋಹಾನನ ಕಾಲೊಡ್ದು ಇನಿ ಮುಟ್ಟಲಾ ಪರಲೋಕ ರಾಜ್ಯ ಬಲಾತ್ಕಾರೊಗು ಒಳಗಾತ್ಂಡ್; ಬಲಾತ್ಕಾರಿಲು ಪೊಗ್ಗುದು ಅವೆನ್ ಸ್ವಾದೀನ ಮಲ್ತೊನ್ವೆರ್.</verse>
				<verse number="13">ಪ್ರವಾದಿಲು ಮಾತೆರ್ಲಾ, ನ್ಯಾಯಕಟ್ಟ್‌ಲಾ ಪ್ರವಾದನೆ ಮಲ್ಪುನವುಲಾ ಯೋಹಾನ ಮುಟ್ಟ ಇತ್ತ್ಂಡ್.</verse>
				<verse number="14">ನಿಕ್ಲೆಗ್ ತೆರಿಯೊನಿಯರೆ ಮನಸಿತ್ತ್‌ಂಡ ಬರೊಡಾಯಿ ಎಲೀಯೆ ಇಂಬೆನೇ ಅಂದ್‌ದ್ ತೆರಿಯೊನ್ಲೆ.</verse>
				<verse number="15">ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್.</verse>
				<verse number="16">“ಆಂಡ ಈ ಸಂತಾನೊನು ಏರೆಗ್ ಸಮ ಮಲ್ಪೊಲಿ? ಪೇಂಟೆಡ್ ಕುಲ್ಲೊಂದು ತನ್ಕುಲೆ ಸ್ನೇಹಿತೆರೆಗ್,</verse>
				<verse number="17">‘ಎಂಕುಲು ನಿಕ್ಲೆಗಾದ್ ಕೊಳಲ್ ಉರ್ತ ನಿಕುಲು ನಲ್ತ್‌ಜರ್, ನಿಕ್ಲೆಗ್ ಮುರೆಡಿಯ, ನಿಕುಲು ತಿಗಲೆ ಬೊಟೊನುಜರ್,’ ಅಂದ್‌ದ್ ಅರಬಾಯಿ ದೀದ್ ಪನ್ಪಿನ ಆಣ್ ಜೋಕುಲೆಗ್ ಸಮ ಆದುಂಡು.</verse>
				<verse number="18">ಎಂಚಂದ್ಂಡ, ಯೋಹಾನೆ ಬತ್ತೆ. ಆಯೆ ನುಪ್ಪು ನೀರ್ ದೆತ್ತೊನಂದಿನಾಯೆ ಆದಿತ್ತೆ. ಅಕುಲು ಆಯಗ್ ದೆವ್ವ ಪತ್ತ್‌ದ್ಂಡ್ ಪನ್ಪೆರ್.</verse>
				<verse number="19">ನರಮಾನಿ ಮಗೆ ಬತ್ತೆ, ಆಯೆ ನುಪ್ಪು ನೀರ್‌ನ್ ದೆತ್ತೊನುನಾಯೆ ಆದುಲ್ಲೆ; ಅಕುಲು, ‘ಇಂದಾ, ಇಂಬೆ ಬಂಜೆಲೆ, ಪರ್ಪೆಲೆ, ಸುಂಕದಾಕುಲೆ ಬೊಕ್ಕ ಪಾಪಿಲೆ ದೋಸ್ತಿಯಾಡ್ಲು ಅಂದ್‌ದ್ ಪನ್ಪೆರ್.’ ಆಂಡ ಗೇನ ತನ ಕೆಲಸೊಲೆಡ್ದೇ ಗೇನ ಪಂಡ್ದ್ ಗೊತ್ತಾಪುಂಡು,” ಪಂಡೆ.</verse>
				<verse number="20">ಅಪಗ ಆಯೆ ತನ ಕಾರ್ನಿಕೊಲು ಹೆಚ್ಚಾದ್ ನಡತಿ ಊರುಲು ದೇವೆರೆ ಕಡೆಕ್ಕ್ ತಿರ್ಗುಜೆರ್ ಪಂಡ್ದ್ ಐಕುಲೆನ್‌ ದಡ್ಡಿಯೆರೆ ಸುರು ಮಲ್ತೆ.</verse>
				<verse number="21">ಎಂಚ ಪಂಡ, “ಅಯ್ಯೋ, ಕೊರಜಿನೋ, ಅಯ್ಯೋ ಬೆತ್ಸಾಯಿದಾ, ನಿಕ್ಲೆನಲ್ಪ ನಡತಿ ಮಲ್ಲಕಾರ್ನಿಕೊಲು ತೂರ್ ಬೊಕ್ಕ ಸೀದೋನ್ ಪೇಂಟೆಲೆಡ್ ನಡತುದುಂಡ ಅಲ್ಪದಾಕುಲು ಅಪಗನೆ ಗೋಣಿ ಪೊದೆತೊಂದು ಬೊನ್ಯೊಡು ಕುಲ್ಲೊಂದು ಪಶ್ಚಾತಾಪ ಪಡೆದಿತ್ತ್‌ದ್ವೆರ್.</verse>
				<verse number="22">ನ್ಯಾಯತೀರ್ಪುದ ದಿನೊಟು ನಿಕಲ್ನ ಗತಿಡ್ದ್‌ಲಾ ತೂರ್ ಸೀದೋನ್‌ದ ಪಟ್ಟಣಲೆ ಗತಿ ಮೇಲಾದುಪ್ಪುಂಡು ಪಂಡ್ದ್ ನಿಕ್ಲೆಗ್ ಪನ್ಪೆ.</verse>
				<verse number="23">ಕಪೆರ್ನೌಮೋ, ನಿನನ್ ಪರಲೋಕೊಗು ಏರಾವೊನುವನಾ? ಪಾತಾಳೊಗು ಜಪ್ಪುವ. ನಿನ್ನಲ್ಪ ನಡೆತಿ ಮಲ್ಲಕಾರ್ಯೊಲು ಸೋದೋಮುಡು ನಡತ್‌ದುಂಡ ಅವು ಇನಿ ಮುಟ್ಟಲಾ ಒರಿದು.</verse>
				<verse number="24">ಆಂಡ ನ್ಯಾಯತೀರ್ಪುದ ದಿನೊಟು ನಿನ ಗತಿಡ್ದ್‌ಲಾ ಸೋದೋಮು ಸೀಮೆದ ಗತಿ ಮೇಲಾದುಪ್ಪುಂಡು ಪಂಡ್ದ್ ನಿಕ್ಲೆಗ್ ಪನ್ಪೆ.”</verse>
				<verse number="25">ಆ ಪೊರ್ತುಡು ಯೇಸು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಪರಲೋಕ ಭೂಲೋಕದ ಕರ್ತವಾ, ಈ ಗೇನದಾಕುಲೆಗ್ಲಾ ಬುದ್ಧಿವಂತೆರೆಗ್ಲಾ ಈ ಪಾತೆರೊಲೆನ್ ಮದೆ ಮಲ್ತ್‌ದ್ ಜೋಕುಲೆಗ್ ತೆರಿಪಾಯ ಅಂದ್‌ದ್ ನಿನನ್ ಪುಗರುವೆ.</verse>
				<verse number="26">ಅಂದ್ ಅಮ್ಮೆರೇ, ಇಂಚ ಮಲ್ಪುನವೇ ಎಡ್ಡೆಂದ್‌ದ್ ನಿನ ದೃಷ್ಟಿಗ್ ತೋಜಿನೆಡ್ದ್ ನಿನನ್ ಪುಗರುವೆ.</verse>
				<verse number="27">“ಎನ ಅಮ್ಮೆ ಮಾತೆನ್ ಎಂಕ್ ಒಚ್ಚಿದ್ ಕೊರ್ತೆ. ಅಮ್ಮೆ ಅತ್ತಂದೆ ಬೇತೆ ಏರ್ಲಾ ಮಗನ್ ತೆರಿಯಯೆ; ಬೊಕ್ಕ ಮಗೆ ಅತ್ತಂದೆ ಬೇತೆ ಏರ್ಲಾ ಅಮ್ಮೆರೆನ್ ತೆರಿಯಯೆ. ಬೊಕ್ಕ ಮಗೆ ಅಮ್ಮೆರೆನ್ ಏರೆಗ್ ತೋಜಾದ್ ಕೊರಿಯೆರೆ ಮನಸ್ ಮಲ್ತ್‌ದೆನಾ ಆಯೆಲಾ ಅಮ್ಮೆರೆನ್ ತೆರಿದಿನಾಯೆ ಆದುಲ್ಲೆ.”</verse>
				<verse number="28">“ಕಷ್ಟೊಡುಪ್ಪುನಾಕುಲೇ, ಪುದೆ ತುಂಬೊಂದಿನಾಕುಲೇ, ನಿಕುಲು ಮಾತೆರ್ಲಾ ಎನ ಕೈತಲ್‌ ಬಲ್ಲೆ; ಯಾನ್ ನಿಕ್ಲೆಗ್ ಸುಖ ಕೊರ್ಪೆ.</verse>
				<verse number="29">ಯಾನ್ ಸಜ್ಜನೆಲಾ, ತಗ್ಗ್‌ದಿ ಮನಸ್‌ದಾಯೆಲಾ ಆದುಪ್ಪುನೆಡ್ದ್ ಎನ ನುಗೊನು ನಿಕ್ಲೆ ಮಿತ್ತ್ ದೆತ್ತೊಂದು ಎನಡ್ದ್ ಕಲ್ತೊನ್ಲೆ, ಅಪಗ ನಿಕ್ಲೆ ಆತ್ಮೊಗು ಸುಖ ತಿಕ್ಕು.</verse>
				<verse number="30">ದಾಯೆಗಂದ್ಂಡ ಎನ ನುಗ ನಯ, ಎನ ಪುದೆ ಹಗುರ ಆದುಂಡು.”</verse>
			</chapter>
			<chapter number="12">
				<verse number="1">ಆ ಸಮಯೊಡು ಯೇಸು ಸಬ್ಬತ್‌ದಿನೊಟು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಬಡವುಡು ಕುರಲ್‌ನ್‌ ರುಂಬುದು ತಿನೊಂದಿತ್ತೆರ್.</verse>
				<verse number="2">ಪರಿಸಾಯೆರ್ ಉಂದೆನ್ ತೂದು, “ತೂಲ, ನಿನ ಶಿಷ್ಯೆರ್ ಸಬ್ಬತ್‌ದಿನೊಟು ಮಲ್ಪಂದಿ ಬೇಲೆನ್ ಮಲ್ಪುವೆರ್?” ಅಂದ್‌ದ್ ಆಯಗ್ ಪಂಡೆರ್.</verse>
				<verse number="3">ಆಯೆ ಅಕ್ಲೆಡ, “ದಾವೀದೆ ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ.</verse>
				<verse number="4">ಆಯೆ ದೇವೆರೆ ಆಲಯದ ಉಲಯಿ ಪೋದು ಯಾಜಕೆರ್ ಮಾತ್ರ ಅತ್ತಂದೆ ತಾನಾವಡ್, ತನಡೊಪ್ಪ ಇತ್ತಿನಾಕುಲಾವಡ್ ತಿನಿಯೆರೆ ಬಲ್ಲಿ ಅಂದ್‌ದ್ ಇತ್ತಿನ ನೈವೇದ್ಯದ ರೊಟ್ಟಿನ್ ತಿಂದೆ ಅತ್ತಾ?</verse>
				<verse number="5">ಉಂದತ್ತಂದೆ ಸಬ್ಬತ್‌ದಿನೊಟು ಯಾಜಕೆರ್ ದೇವಾಲಯೊಡು ಸಬ್ಬತ್‌ದ ನಿಯಮೊನು ಮಿರಿಯೆರ್ಡಲಾ, ಅಕುಲು ತಪ್ಪುಗಾರೆರ್ ಆಪುಜೆರ್, ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತಿನೆನ್ ಓದುದಿಜರಾ?</verse>
				<verse number="6">ಯಾನ್ ನಿಕ್ಲೆಗ್ ಪನ್ಪೆ, ಆ ದೇವಾಲಯೊಡ್ದುಲಾ ಮಲ್ಲಾಯೆ ಮೂಲು ಉಲ್ಲೆ.</verse>
				<verse number="7">ಎಂಕ್ ಬಲಿ ಬೊಡ್ಚಿ, ಕನಿಕರನೇ ಬೋಡು ಪನ್ಪಿನೆತ್ತ ಅರ್ಥೊನು ನಿಕುಲು ತೆರಿದಿತ್ತ್‌ಂಡ ನಿರಪರಾಧಿಲೆನ್ ಅಪರಾಧಿಲು ಅಂದ್‌ದ್ ತೀರ್ಪು ಮಲ್ತ್‌ದ್ವಯರ್.</verse>
				<verse number="8">ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="9">ಆಯೆ ಅಲ್ತ್‌ಡ್ದ್ ಪಿದಾಡ್ದ್ ಸಭಾಮಂದಿರೊಗು ಪೋಯಿನಪಗ ಅವುಲು ಕೈ ನುಂಗುಪೋತಿನಾಯೆ ಒರಿ ಇತ್ತೆ.</verse>
				<verse number="10">ಅಪಗ ಅಕುಲು ಆಯನ ಮಿತ್ತ್ ತಪ್ಪು ನಾಡೊಡು ಅಂದ್‌ದ್ ಯೇಸುಡ, “ಸಬ್ಬತ್‌ದಿನೊಟು ಗುಣ ಮಲ್ಪುನವು ಸರಿಯಾ?” ಅಂದ್‌ದ್ ಕೇಂಡೆರ್.</verse>
				<verse number="11">ಐಕ್ ಆಯೆ, “ನಿಕ್ಲೆಡ್ ಏರೆಗಾಂಡಲಾ ಒಂಜೇ ಒಂಜಿ ಕುರಿ ಇತ್ತ್‌ದ್ ಅವು ಸಬ್ಬತ್‌ದಿನೊಟು ಕಣಿತ್ತುಲಯಿ ಬೂರುಂಡ ಆಯೆ ಅವೆನ್ ಪತ್ತ್‌ದ್ ಮಿತ್ತ್ ದೆಪ್ಪಂದೆ ಉಪ್ಪೆನಾ?</verse>
				<verse number="12">ಆ ಕುರಿಡ್ದ್ ನರಮಾನಿ ಏತೋ ಬಿಲೆತ್ತಾಯೆ. ಅಂಚಾಯಿನೆಡ್ದ್ ಸಬ್ಬತ್‌ದಿನೊಟು ಎಡ್ಡೆ ಬೇಲೆ ಮಲ್ಪುನವು ಸರಿಯಾಯಿನವೆ,” ಪಂಡ್ದ್ ಉತ್ತರ ಕೊರಿಯೆ.</verse>
				<verse number="13">ಬೊಕ್ಕ ಯೇಸು ಆ ನರಮಾನಿಗ್, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ. ಆಯೆ ನೀಡಿಯೆ; ಅವು ಪೂರ್ತಿ ಗುಣ ಆದ್ ಬೊಕ್ಕೊಂಜೆತ್ತ ಲೆಕ್ಕ ಆಂಡ್.</verse>
				<verse number="14">ಆಂಡ ಪರಿಸಾಯೆರ್ ಪಿದಯಿ ಪೋದು ಇಂಬ್ಯನ್ ವಾ ಉಪಾಯೊಡು ಕೆರ್ಪಿನಿ ಪಂಡ್ದ್ ಆಯಗ್ ವಿರೋಧಾದ್ ಆಲೋಚನೆ ಮಲ್ತೊಂಡೆರ್.</verse>
				<verse number="15">ಯೇಸು ಅವೆನ್ ತೆರಿದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ. ಮಸ್ತ್ ಜನ ಆಯನ ಬೆರಿಯೆ ಪೋಯೆರ್. ಆಯೆ ಅಕ್ಲೆನ್ ಮಾತೆರೆನ್ ಗುಣ ಮಲ್ತ್‌ದ್</verse>
				<verse number="16">ತಾನ್ ಇಂಚಿತ್ತಿನಾಯೆ ಅಂದ್‌ದ್ ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಕಂಡಿತಾದ್ ಪಂಡೆ.</verse>
				<verse number="17">ಇಂಚ ಯೆಶಾಯೆ ಇನ್ಪಿ ಪ್ರವಾದಿಡ್ದ್ ಪನ್ಪಾಯಿ ಪಾತೆರ ನಡತ್ಂಡ್; ಅವು ದಾನೆಂದ್ಂಡ,</verse>
				<verse number="18">“ಇಂದಾ, ಎನ ಸೇವಕೆ; ಇಂಬ್ಯನ್ ಯಾನ್ ಅಜತೊಂದೆ. ಇಂಬೆ ಎಂಕ್ ಇಷ್ಟೆ, ಇಂಬ್ಯನ್ ಯಾನ್ ಮೆಚ್ಚಿದೆ. ಇಂಬ್ಯಡ್ ಎನ ಆತ್ಮೊನು ದೀಪೆ ಇಂಬೆ ಪಿದಯಿದ ಜನೊಕುಲೆಗ್ ನ್ಯಾಯೊನು ಸಾರಿಯುವೆ.</verse>
				<verse number="19">ಇಂಬೆ ಲಡಯಿ ಮಲ್ಪುಜೆ, ಬೊಬ್ಬೆ ದೀಪುಜೆ, ಸಾದಿಲೆಡ್ ಇಂಬೆನ ಸ್ವರ ಏರೆಗ್ಲಾ ಕೇನಂದ್.</verse>
				<verse number="20">ಗುದ್ದುದಿ ದಂಟ್‌ನ್ ಪೊಲ್ತು ಪಾಡಂದೆಲಾ, ತೆಕ್ಕ್‌ದ್ ಪೋಪಿನ ತುಡರ್‌ನ್ ತೆಕ್ಕಾವಂದೆಲಾ ಉಪ್ಪುವೆ. ನ್ಯಾಯೊನು ಜಯೊಕು ನಡಪುಡುವೆ.</verse>
				<verse number="21">ಪಿದಯಿದ ಜನೊಕುಲು ಇಂಬೆನ ಪುದರ್‌ನ್ ಕೇಂಡ್ದ್ ಕಾತೊಂದುಪ್ಪುವೆರ್.”</verse>
				<verse number="22">ದೆವ್ವ ಪತ್ತ್‌ದಿ ಕುರುಡೆಲಾ ಪೊಟ್ಟೆಲಾ ಆದಿತ್ತಿ ಒರಿಯನ್ ಯೇಸು ಕೈತಲ್‌ ಕನತೆರ್, ಯೇಸು ಆಯನ್ ಗುಣ ಮಲ್ತಿನಪಗ ಆ ಪೊಟ್ಟಗ್ ಬಾಯಿಲಾ, ಕಣ್ಣ್‌ಲಾ ರಡ್ಡ್‌ಲಾ ಬತ್ತ್ಂಡ್.</verse>
				<verse number="23">ಐಕ್ ಜನೊಕುಲು ಮಾತ ಅಚ್ಚಿರ ಆದ್, “ಇಂಬೆ ದಾವೀದನ ಮಗೆ ಆದುಪ್ಪೆನಾ,” ಅಂದ್‌ದ್ ಪಾತೆರೊಂದಿತ್ತೆರ್.</verse>
				<verse number="24">ಆಂಡ ಪರಿಸಾಯೆರ್ ಉಂದೆನ್ ಕೇಂಡ್ದ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡುಪಾವೆ ಅತ್ತಂದೆ ಬೇತೆ ರೀತಿಡ್ದ್ ಬುಡ್ಪಾವುಜೆ,” ಪಂಡೆರ್.</verse>
				<verse number="25">ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ವಾ ರಾಜ್ಯ ಆಂಡಲಾ ತನಡ್ ಭೇದ ಪುಟ್ಟಾಂಡ ನಾಶ ಆಪುಂಡು, ತನಡ್ ಭೇದ ಪುಟ್ಟಿನ ವಾ ಪಟ್ಟಣ ಆವಡ್ ಇಲ್ಲಾವಡ್ ಒರಿಯಂದ್.</verse>
				<verse number="26">ಅಂಚೆನೇ ಸೈತಾನೆ ಸೈತಾನನ್ ಪಿದಾಡ್ಪಾಯೆಡಾ ತನಡನೇ ಭೇದ ಪುಟ್ಟಾಯಿಲೆಕ್ಕ ಆಂಡ್. ಅಂಚಾಂಡ ಆಯನ ರಾಜ್ಯ ಎಂಚ ಒರಿಯು?</verse>
				<verse number="27">ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್.</verse>
				<verse number="28">ಯಾನ್ ದೇವೆರೆ ಆತ್ಮನ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ.</verse>
				<verse number="29">“ಉಂದತ್ತಂದೆ ಒರಿ ಸುರುಟ್ಟು ಬಲವಂತನ್ ಕಟ್ಟ್‌ದ್ ಪಾಡಂದೆ ಆ ಬಲವಂತನ ಇಲ್ಲನ್ ಪೊಗ್ಗುದು ಸೊತ್ತುಲೆನ್ ಲೂಟಿ ಎಂಚ ಮಲ್ಪೊಲಿ? ಕಟ್ಟಿ ಬೊಕ್ಕನೇ ಆಯನ ಇಲ್ಲನ್ ಲೂಟಿ ಮಲ್ಪೊಲಿ.</verse>
				<verse number="30">“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.”</verse>
				<verse number="31">ಅಂಚಾಯಿನೆಡ್ದ್ ನಿಕ್ಲೆಗ್ ಪನ್ಪೆ, ನರಮಾನಿ ಮಲ್ಪುನ ಪ್ರತಿ ಒಂಜಿ ಪಾಪೊಗ್ಲಾ ದೂಷಣೆಗ್ಲಾ ಮಾಪು ಉಂಡು; ಆಂಡ ಪವಿತ್ರಾತ್ಮ ದೂಷಣೆಗ್ ಮಾಪು ಇಜ್ಜಿ.</verse>
				<verse number="32">ಏರಾಂಡಲಾ ನರಮಾನಿ ಮಗಕ್ಕ್ ವಿರೋಧಾದ್ ಪಾತೆರಿಯೆಡ ಅವು ಆಯಗ್ ಮಾಪು ಮಲ್ಪುಂಡು; ಪರಿಶುದ್ಧಾತ್ಮೊಗು ವಿರೋಧಾದ್ ಪಾತೆರಿಯೆಡ ಆಯಗ್ ಈ ಲೋಕೊಡಾವಡ್, ಬರ್ಪಿ ಪರಲೋಕೊಡಾವಡ್ ಮಾಪು ಆವಂದ್.</verse>
				<verse number="33">“ಎಡ್ಡೆ ಮರತ ಫಲ ಎಡ್ಡೆ ಉಪ್ಪುಂಡು; ಹಾಳ್ ಮರತ ಫಲ ಹಾಳೇ ಆದುಪ್ಪುಂಡು, ಫಲೊಡ್ದು ಮರತ ಗುಣ ಗೊತ್ತಾಪುಂಡು.</verse>
				<verse number="34">ಸರ್ಪ ಜಾತಿದಾಕುಲೇ, ನಿಕುಲು ಪಡಿಕೆಂತಿನಾಕುಲು ಆಯಿನೆಡ್ದ್ ಎಡ್ಡೆ ಪಾತೆರೊಲೆನ್ ಪಾತೆರಿಯೆರೆ ನಿಕ್ಲೆಡ್ದ್ ಎಂಚ ಆವು? ಉಡಲ್‌ಡ್ ದಿಂಜಿದಿತ್ತಿನವೇ ಬಾಯಿಡ್ದ್ ಪಿದಾಡುಂಡು.</verse>
				<verse number="35">ಎಡ್ಡೆಂತಿನಾಯೆ ತನ ಎಡ್ಡೆಂತಿ ಕಜನೆದುಲಯಿಡ್ದ್ ಎಡ್ಡೆ ವಸ್ತುಲೆನ್ ದೆಪ್ಪುವೆ; ಪಡಿಕೆಂತಿನಾಯೆ ಪಡಿಕೆಂತಿ ಕಜನೆದುಲಯಿಡ್ದ್ ಹಾಳ್ ವಸ್ತುಲೆನ್ ದೆಪ್ಪುವೆ.</verse>
				<verse number="36">“ಉಂದತ್ತಂದೆ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ನರಮಾನಿ ಪೊಕ್ಕಡೆ ಪಾತೆರುನ ಪ್ರತಿ ಒಂಜಿ ಪಾತೆರದ ಸಂಗತಿಡ್ ನ್ಯಾಯತೀರ್ಪುದ ದಿನೊಟು ಲೆಖ್ಖ ಕೊರೊಡು.</verse>
				<verse number="37">ನಿನ ಪಾತೆರೊಲೆಡ್ದೇ ನೀತಿವಂತೆ ಅಂದ್‌ದ್ ನಿಕ್ಕ್ ತೀರ್ಪು ಆವು. ನಿನ ಪಾತೆರೊಲೆಡ್ದೇ ಈ ಅಪರಾಧಿ ಪಂಡ್ದ್‌ಲಾ ನಿಕ್ಕ್ ತೀರ್ಪು ಆವು.”</verse>
				<verse number="38">ಅಪಗ ಶಾಸ್ತ್ರಿಲೆಡ್ಲಾ ಪರಿಸಾಯೆರೆಡ್ಲಾ ಕೆಲೆವೆರ್, “ಬೋಧಕಾ, ನಿನಡ್ದ್ ಆಪಿನ ಒಂಜಿ ಮಹತ್ಕಾರ್ಯೊನು ತೂವೊಡು,” ಅಂದ್‌ದ್ ಯೇಸುಡ ಕೇನ್ನಗ</verse>
				<verse number="39">ಆಯೆ ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ ದಾನೆಂದ್ಂಡ, “ಹಾದ್ರದಂಚಿತ್ತಿ ಹಾಳ್ ಸಂತಾನ ಮಹತ್ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನೆ ಪನ್ಪಿ ಪ್ರವಾದಿಡ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,”</verse>
				<verse number="40">ಪಂಡ ಯೋನೆ ಎಂಚ ಮೂಜಿ ದಿನ ರಾತ್ರೆ ಪಗೆಲ್ ಮಲ್ಲ ಮೀನ್‌ದ ಬಂಜಿದುಲಯಿ ಇತ್ತೆನಾ ಅಂಚೆನೇ ನರಮಾನಿ ಮಗೆಲಾ ಮೂಜಿ ದಿನ ರಾತ್ರೆ ಪಗೆಲ್ ಭೂಗರ್ಭದುಲಯಿ ಉಪ್ಪುವೆ.</verse>
				<verse number="41">ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನಡೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್; ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್; ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.</verse>
				<verse number="42">ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನ್ರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.</verse>
				<verse number="43">“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ.</verse>
				<verse number="44">ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ.’ ಆ ಇಲ್ಲ್ ಒಕ್ಕೆಲ್‌ದಾಂತಿನವುಲಾ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು,</verse>
				<verse number="45">ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ತನೊಡೊಪ್ಪ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಕಡೆ ಆದುಪ್ಪುಂಡು, ಐತ ಲೆಕ್ಕನೇ ಈ ಹಾಳ್ ಸಂತಾನೊಗು ಆಪುಂಡು,” ಪಂಡೆ.</verse>
				<verse number="46">ಆಯೆ ಜನೊಕುಲೆ ಗುಂಪುದೊಟ್ಟಿಗೆ ನನಲಾ ಪಾತೆರೊಂದುಪ್ಪುನಗ ಆಯನ ಅಪ್ಪೆಲಾ ಮೆಗ್ಯಾಡ್ಲುಲಾ ಆಯನ್ ಪಾತೆರ್ಪಾವೊಡು ಅಂದ್‌ದ್ ಪಿದಯಿ ಉಂತುದಿತ್ತೆರ್.</verse>
				<verse number="47">ಅಪಗ ಒರಿ, “ಇಂದಾ, ನಿನ ಅಪ್ಪೆಲಾ, ನಿನ ಮೆಗ್ಯಾಡ್ಲುಲಾ ನಿನಡ ಪಾತೆರೊಡುಂದು ಪಿದಯಿ ಉಂತುದೆರ್,” ಪಂಡೆ.</verse>
				<verse number="48">ಐಕ್ ಆಯೆ ಆ ಪಾತೆರ ಪಂಡಿನಾಯಡ, “ಎನ ಅಪ್ಪೆ ಏರ್? ಎನ ಮೆಗ್ಯೆ ಏರ್?” ಪಂಡ್ದ್</verse>
				<verse number="49">ಬೊಕ್ಕ ತನ ಶಿಷ್ಯೆರೆನಂಚಿ ಕೈ ತೋಜಾದ್, “ಇಂದಾ, ಮೊಕುಲೇ ಎನ ಅಪ್ಪೆಲಾ ಎನ ಮೆಗ್ಯಾಡ್ಲುಲಾ.</verse>
				<verse number="50">ಪರಲೋಕೊಡುಪ್ಪು ಎನ ಅಮ್ಮೆರೆ ಚಿತ್ತದ ಲೆಕ್ಕ ನಡಪುನಾಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್.”</verse>
			</chapter>
			<chapter number="13">
				<verse number="1">ಆ ದಿನೊಟು ಯೇಸು ಇಲ್ಲಡ್ದ್ ಪಿದಾಡ್ದ್ ಕಡಲ್ದ ಕರೆಟ್ ಕುಲ್ಲೊಂಡೆ.</verse>
				<verse number="2">ಒಂಜಿ ಮಲ್ಲ ಜನೊಕುಲೆ ಗುಂಪು ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಓಡ ಮಿತ್ತಾರ್ದ್ ಕುಲ್ಲಿಯೆ. ಆ ಜನೊಕುಲು ಕರೆಟ್ ಉಂತುದಿತ್ತೆರ್.</verse>
				<verse number="3">ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಮಸ್ತ್ ಸಂಗತಿಲೆನ್ ಪಂಡೆ. “ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ.</verse>
				<verse number="4">ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ.</verse>
				<verse number="5">ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್.</verse>
				<verse number="6">ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಬಾಡ್ದ್ ನುಂಗುದು ಪೋಂಡು.</verse>
				<verse number="7">ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಲ್‌ಡ್ ಬೂರ್‌ಂಡ್; ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಂಡ್.</verse>
				<verse number="8">ನನ ಕೆಲವು ಬಿತ್ತ್ ಎಡ್ಡೆ ನೆಲತ ಮಿತ್ತ್ ಬೂರ್ದು ಕೆಲವು ನೂದೆದಾತ್, ಕೆಲವು ಅಜ್ಪದಾತ್, ಕೆಲವು ಮುಪ್ಪದಾತ್ ಫಲ ಕೊರಿಯ.”</verse>
				<verse number="9">“ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ.</verse>
				<verse number="10">ಐಡ್ದ್ ಬೊಕ್ಕ ಶಿಷ್ಯೆರ್ ಬತ್ತ್‌ದ್ ಆಯಡ, ದಾಯೆಗ್ ಉಪಕತೆತ್ತ ರೂಪೊಡು ಅಕ್ಲೆಡ ಪಾತೆರುವ ಅಂದ್‌ದ್ ಕೇಂಡೆರ್.</verse>
				<verse number="11">ಐಕ್ ಆಯೆ ಅಕ್ಲೆಡ, “ಪರಲೋಕ ರಾಜ್ಯದ ಗುಟ್ಟುಲೆನ್ ತೆರಿಯೊನ್ನ ವರ ನಿಕ್ಲೆಗ್ ಕೊರ್ತುಂಡು; ಅಕ್ಲೆಗ್ ಕೊರ್ತ್‌ಜಿ.</verse>
				<verse number="12">ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಆಯಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು.</verse>
				<verse number="13">ಯಾನ್ ಅಕ್ಲೆಡ ಉಪಕತೆತ್ತ ರೂಪೊಡು ಪಾತೆರಿಯೆರೆ ಕಾರಣ ದಾನೆಂದ್ಂಡ ಅಕ್ಲೆಗ್ ಕಣ್ಣ್ ಇತ್ತ್ಂಡಲಾ ತೂಪುಜೆರ್, ಕೆಬಿ ಇತ್ತ್ಂಡಲಾ ಕೇನುಜೆರ್ ಬೊಕ್ಕ ತೆರಿಯೊನುಜೆರ್.</verse>
				<verse number="14">ಯೆಶಾಯೆ ಪಂಡಿನ ಪ್ರವಾದನೆ ಅಕ್ಲೆಡ್ದ್ ಪೂರ್ತಿ ಆಂಡ್; ಅವು ದಾನೆಂದ್ಂಡ, ನಿಕುಲು ಕೆಬಿ ಇತ್ತ್‌ದ್ ಕೇಂಡಲಾ ತೆರಿಯೊನುಜರ್, ಕಣ್ಣ್ ಇತ್ತ್‌ದ್ ತೂಯರ್ಡಲಾ ತೋಜುನೇ ಇಜ್ಜಿ.</verse>
				<verse number="15">ದಾಯೆಗಂದ್ಂಡ ಈ ಜನೊಕುಲೆ ಉಡಲ್ ಕಲ್ಲಾತ್ತ್‌ಂಡ್, ಮೊಕ್ಲೆ ಕೆಬಿ ಮಂದ ಆತ್ಂಡ್, ಮೊಕುಲು ಕಣ್ಣ್ ಮುಚ್ಚೊಂದೆರ್. ತನ್ಕುಲು ಕಣ್ಣ್‌ಡ್ ತೂದು, ಕೆಬಿಟ್ ಕೇಂಡ್ದ್ ಉಡಲ್‌ಡ್ ತೆರಿದ್, ಅಕುಲು ಎನ ಕಡೆಕ್ಕ್ ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ ಮಲ್ತೊಂದೆರ್ ಪನ್ಪಿನವೇ.</verse>
				<verse number="16">“ಆಂಡ ನಿಕ್ಲೆ ಕಣ್ಣ್ ತೋಜುಂಡು, ನಿಕ್ಲೆ ಕೆಬಿ ಕೇನುಂಡು; ಅಂಚಾಯಿನೆಡ್ದ್ ನಿಕುಲು ಭಾಗ್ಯವಂತೆರ್.</verse>
				<verse number="17">ನಿಕ್ಲೆಗ್ ನಿಜಾದ್ ಪನ್ಪೆ. ನಿಕುಲು ತೂವೊಂದುಪ್ಪುನ ಕಾರ್ಯೊಲೆನ್ ಮಸ್ತ್ ಮಂದಿ ಪ್ರವಾದಿಲುಲಾ, ನೀತಿವಂತೆರ್‌ಲಾ ತೂವೊಡಂದ್ ಆಸೆ ಮಲ್ತ್ಂಡಲಾ ತೂಯಿಜೆರ್; ನಿಕುಲು ಕೇನೊಂದುಪ್ಪುನ ಸಂಗತಿನ್ ಅಕುಲು ಕೇನೊಡುಂದು ಆಸೆ ಮಲ್ತೆರ್ಡಲಾ ಕೇನಿಯೆರೆ ತಿಕ್ಕ್‌ದಿಜಿ.</verse>
				<verse number="18">“ಬಿತ್ತುನಾಯನ ಉಪಕತೆತ್ತ ಅರ್ಥೊನು ಕೇನ್ಲೆ</verse>
				<verse number="19">ಏರಾಂಡಲಾ ಪರಲೋಕ ರಾಜ್ಯದ ಪಾತೆರೊನು ಕೇಂಡ್ದ್ ತೆರಿಯೊನಂದೆ ಇತ್ತಿನಪಗ ಸೈತಾನೆ ಬತ್ತ್‌ದ್ ಆ ನರಮಾನಿನ ಉಡಲ್‌ಡ್ ಬಿತ್ತ್‌ದಿನೆನ್ ದೆತ್ತ್ ಪಾಡುವೆ; ಆ ನರಮಾನಿಯೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ.</verse>
				<verse number="20">ಪಾದೆ ನೆಲತ್ತ ಮಿತ್ತ್ ಬೂರ್ದಿನ ಬಿತ್ತ್ ಪನ್ನಗ, ಒರಿ ಪಾತೆರೊನು ಕೇಂಡ್ದ್ ಅಪಗನೇ ಅವೆನ್ ಸಂತೋಷೊಡು ಸ್ವೀಕಾರ ಮಲ್ಪುವೆ;</verse>
				<verse number="21">ತನ್ಕ್ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ಇಂಬೆ ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು ಆಯಗ್ ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ ಬೇಗ ದಂಟ್‌ದ್ ಬೂರುವೆ. ಇಂಬೆನೇ ಪಾದೆ ನೆಲಟ್ಟ್ ಬೂರ್ದಿತ್ತಿ ಬಿತ್ತ್ ಆದುಪ್ಪುವೆ.</verse>
				<verse number="22">ಒರಿ ಪಾತೆರೊನು ಕೇಂಡಲಾ ಲೋಕದ ಚಿಂತೆ ಐಶ್ವರ್ಯೊಡ್ದು ಆಪಿನ ಮೋಸಲಾ ಈ ಪಾತೆರೊನು ದೆಂಗಾದ್ ಬುಡ್ಪಿನೆಡ್ದ್ ಫಲ ಕೊರಂದೆ ಉಪ್ಪುವೆ; ಇಂಬೆನೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆ.</verse>
				<verse number="23">ಒರಿ ಪಾತೆರೊನು ಕೇಂಡ್ದ್ ತೆರಿಯೊಂದು ಫಲವಂತೆ ಆದ್ ನೂದೆದಾತ್ ಆವಡ್, ಅಜ್ಪದಾತ್ ಆವಡ್, ಮುಪ್ಪದಾತ್ ಆವಡ್ ಫಲ ಕೊರ್ಪೆ; ಇಂಬೆನೇ ಎಡ್ಡೆ ನೆಲ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="24">ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ, “ಪರಲೋಕ ರಾಜ್ಯ ಪಂಡ, ತನ ಕಂಡೊಡು ಎಡ್ಡೆ ಬಿತ್ತ್‌ನ್ ಬಿತ್ತ್‌ದಿನ ಒರಿ ನರಮಾನಿಗ್ ಸಮ ಆದುಂಡು.</verse>
				<verse number="25">ಆಂಡ ಜನೊಕುಲು ನಿದ್ರೆ ಮಲ್ಪು ಸಮಯೊಡು ಆಯನ ಪಗೆನಾಯೆ ಬತ್ತ್‌ದ್ ಗೋದಿದ ನಡುಟು ದಡ್ಡ್ ಬಿತ್ತ್ ಬಿತ್ತ್‌ದ್ ಪೋಪೆ.</verse>
				<verse number="26">ಆ ಗೋದಿ ಬುಲೆದ್ ಕೊರಲ್ ಬುಡ್ನಗ ಐತೊಟ್ಟಿಗೆ ದಡ್ಡ್‌ಲಾ ಬುಲೆಂಡ್.</verse>
				<verse number="27">ಅಪಗ ಬೇಲೆದಾಕುಲು ಯಜಮಾನನ ಕೈತಲ್‌ ಬತ್ತ್‌ದ್, ‘ಅಯ್ಯಾ, ಈ ನಿನ ಕಂಡೊಡು ಎಡ್ಡೆ ಬಿತ್ತ್ ಬಿತ್ತಿಯ ಅತ್ತಾ? ಐತ ನಡುಟು ದಡ್ಡ್ ಎಂಚ ಬತ್ತ್ಂಡ್?’ ಅಂದ್‌ದ್ ಕೇಂಡಿನಪಗ</verse>
				<verse number="28">‘ಉಂದು ಪಗೆನಾಯೆ ಮಲ್ತಿನ ಬೇಲೆ,’ ಅಂದ್‌ದ್ ಪಂಡೆ. ಐಕ್ ಬೇಲೆದಾಕುಲು ಆಯಡ, ‘ಎಂಕುಲು ಆ ದಡ್ಡ್‌ನ್ ಅಜತ್‌ದ್ ದೆಪ್ಪೊಡಾ?’ ಅಂದ್‌ದ್ ಕೇಂಡಿನೆಕ್ಕ್</verse>
				<verse number="29">‘ಬೊಡ್ಚಿ ದಡ್ಡ್‌ನ್ ಅಜತ್‌ದ್ ದೆಪ್ಪುನಗ ಐತ ಒಟ್ಟುಡು ಗೋದಿನ್ಲಾ ದೆಪ್ಪರ್.</verse>
				<verse number="30">ಸುಗ್ಗಿ ಕಾಲ ಮುಟ್ಟ ರಡ್ಡ್‌ಲಾ ಬುಲೆವೆರೆ ಬುಡ್ಲೆ; ಸುಗ್ಗಿಕಾಲೊಡು ಯಾನ್ ಕೊಯ್ಪಿನಾಕುಲೆಗ್ ದುಂಬತ್ತ ದಡ್ಡ್‌ಲೆನ್ ಅಜತ್ ದೆತ್ತ್‌ದ್ ಅವೆನ್ ಪೊತ್ತಾಯೆರೆ ಕಟ್ಟ ಕಟ್ಟ್‌ಲೆ ಬೊಕ್ಕ ಗೋದಿನ್ ಎನ ತುಪ್ಪೆಗ್ ದಿಂಜಾದ್ ದೀಲೆ,’ ಪಂಡ್ದ್ ಪನ್ಪೆ,” ಅಂದ್‌ದ್ ಪಂಡೆ.</verse>
				<verse number="31">ಆಯೆ ಬೊಕ್ಕೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ದಾಸೆಮಿ ಬಿತ್ತ್‌ಗ್ ಸಮ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ಕಂಡೊಡು ಬಿತ್ತಿಯೆ.</verse>
				<verse number="32">ಅವು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದಿತ್ತ್‌ಂಡಲಾ ಬುಲೆಯಿ ಬೊಕ್ಕ ಕಾಯಿಕಜಿಪುಲೆಡ್ದ್ ಮಲ್ಲೆ ಆದ್ ಮರ ಆಪುಂಡು. ಬಾನೊಡು ರಾಪಿ ಪಕ್ಕಿಲು ಬತ್ತ್‌ದ್ ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”</verse>
				<verse number="33">ಆಯೆ ಕುಡೊಂಜಿ ಉಪಕತೆನ್ ಅಕ್ಲೆಗ್ ಪಂಡೆ; ಅವು ದಾನೆಂದ್ಂಡ, “ಪರಲೋಕ ರಾಜ್ಯ ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಹಿಟ್ಟ್‌ನ್ ಕಲತ್ ದೀಯಿನಪಗ ಆ ಹಿಟ್ಟ್ ಮಾತಲಾ ಪುಳಿ ಆಂಡ್.”</verse>
				<verse number="34">ಯೇಸು ಈ ಪಾತೆರೊಲೆನ್ ಮಾತ ಜನೊಕುಲೆ ಗುಂಪುಗು ಉಪಕತೆತ್ತ ರೂಪೊಡು ಪಂಡೆ; ನಿಜಾದ್‌ಲಾ ಉಪಕತೆದಾಂತೆ ಒಂಜೆನ್ಲಾ ಪಂಡಿಜೆ.</verse>
				<verse number="35">ಇಂಚ, “ಯಾನ್ ಬಾಯಿ ಜತ್ತ್‌ದ್ ಉಪಕತೆತ್ತ ರೂಪೊಡು ಬೋಧನೆ ಮಲ್ಪುವೆ; ಲೋಕಾದಿಡ್ದ್ ಮದೆ ಆದಿತ್ತಿನೆನ್ ಪಿದಾಯಿ ಪಾಡುವೆ,” ಅಂದ್ಂಡ ಒರಿ ಪ್ರವಾದಿಡ್ದ್ ಪಂಡಿ ಪಾತೆರ ನಡತ್ಂಡ್.</verse>
				<verse number="36">ಅಪಗ ಯೇಸು ಜನೊಕುಲೆನ್ ಬುಡ್ದು ಇಲ್ಲಗ್ ಪೋಯಿ ಬೊಕ್ಕ ಆಯನ ಶಿಷ್ಯೆರ್ ಬತ್ತ್‌ದ್, “ಕಂಡದ ದಡ್ಡ್‌ದ ಉಪಕತೆತ್ತ ಅರ್ಥೊನು ಎಂಕ್ಲೆಗ್ ಪನ್ಲ,” ಪಂಡೆರ್.</verse>
				<verse number="37">ಐಕ್ ಆಯೆ, “ಎಡ್ಡೆ ಬಿತ್ತ್‌ನ್ ಬಿತ್ತುನಾಯೆ ಪಂಡ ನರಮಾನಿ ಮಗೆ.</verse>
				<verse number="38">ಕಂಡ ಪಂಡ ಈ ಲೋಕ; ಎಡ್ಡೆ ಬಿತ್ತ್ ಪಂಡ ಪರಲೋಕ ರಾಜ್ಯದ ಬಾಲೆಲು; ದಡ್ಡ್ ಪಂಡ ಸೈತಾನನ ಬಾಲೆಲು;</verse>
				<verse number="39">ಅವೆನ್ ಬಿತ್ತುನ ಪಗೆನಾಯೆ ಪಂಡ ಸೈತಾನೆ; ಸುಗ್ಗಿ ಕಾಲ ಪಂಡ ಯುಗತ ಅಂತ್ಯ; ಕೊಯ್ಪಿನಾಕುಲು ಪಂಡ ದೂತೆರ್.</verse>
				<verse number="40">ಇಂಚ ಉಪ್ಪುನಗ ಎಂಚ ದಡ್ಡ್‌ನ್ ಅಜತ್ ದೆತ್ತ್‌ದ್ ಪೊತ್ತಾದ್ ಬುಡ್ಪೆರಾ, ಅಂಚೆನೇ ಯುಗತ ಅಂತ್ಯೊಡ್ಲಾ ನಡಪುಂಡು.</verse>
				<verse number="41">ನರಮಾನಿ ಮಗೆ ತನ ದೂತೆರೆನ್ ಕಡಪುಡ್ವೆ, ಅಕುಲು ಆಯನ ರಾಜ್ಯದ ಉಲಯಿಡ್ದ್ ಮಾತ ಪಾಪೊಗು ಕಾರಣ ಆದಿತ್ತಿನಾಕುಲೆನ್ಲಾ ಅನ್ಯಾಯ ಮಲ್ಪುನಾಕುಲೆನ್ಲಾ ಒಟ್ಟು ಸೇರಾದ್</verse>
				<verse number="42">ತೂತ ಗುಂಡಿಗ್ ಪಾಡ್ವೆರ್. ಅಲ್ಪ ಅಕುಲು ಅರಬಾಯಿಲಾ, ಕಟಕಟ ಕೂಲಿ ಕಡೆಯೊಂದುಲಾ ಉಪ್ಪುವೆರ್.</verse>
				<verse number="43">ಅಪಗ ನೀತಿವಂತೆರ್ ತನ್ಕುಲೆ ಅಮ್ಮೆರೆ ರಾಜ್ಯೊಡು ಸೂರ್ಯದಲೆಕ್ಕ ಮಿಂಚುವೆರ್. ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್ ಪಂಡೆ.</verse>
				<verse number="44">“ಪರಲೋಕ ರಾಜ್ಯ ಕಂಡೊಡು ಕೌಂತು ದೀತಿ ದ್ರವ್ಯೊಲೆಗ್ ಸಮ ಆದುಂಡು. ಒರಿ ಅವೆನ್ ನಾಡ್ ಪತ್ತ್‌ದ್ ಮುಚ್ಚಿ ದೀದ್ ಸಂತೋಷೊಡು ತನ ಬದ್‌ಕ್‌ನ್ ಮಾತ ಮಾರ್ದ್ ಆ ಕಂಡೊನು ದೆತ್ತೊಂಡೆ.</verse>
				<verse number="45">“ಬೊಕ್ಕ ಪರಲೋಕ ರಾಜ್ಯ ಎಡ್ಡೆಂತಿನ ಮುತ್ತುಲೆನ್ ನಾಡುನ ಒರಿ ವ್ಯಾಪಾರಿಗ್ ಸಮ ಆದುಂಡು.</verse>
				<verse number="46">ಆಯೆ ಬಾರಿ ಬಿಲೆತ ಒಂಜಿ ಮುತ್ತುನು ತೂದು ತನ ಬದ್‌ಕ್‌ನ್ ಮಾತ ಮಾರ್ದ್ ಬತ್ತ್‌ದ್ ಅವೆನ್ ದೆತ್ತೊಂಡೆ.</verse>
				<verse number="47">“ಬೊಕ್ಕ ಪರಲೋಕ ರಾಜ್ಯ ಒಂಜಿ ಬಲೆಕ್ ಸಮ ಆದುಂಡು. ಅವೆನ್ ಕಡಲ್ಡ್ ಪಾಡ್ದ್ ಮಾತ ಜಾತಿದ ಮೀನ್‌ಲೆನ್ ಪತ್ತಿಯೆರ್.</verse>
				<verse number="48">ಬಲೆ ದಿಂಜಿದ್ ಪೋನಗ ಮೀನ್ ಪತ್ತುನಾಕುಲು ಆ ದಿಂಜಿದಿನ ಬಲೆನ್ ಮಿತ್ತ್ ಒಯಿತ್‌ದ್, ಐಟ್ಟ್ ಬೂರ್ದಿತ್ತಿನ ಎಡ್ಡೆ ಮೀನ್‌ಲೆನ್ ಪುಡಾಯಿಗ್ ಪಾಡ್ವೆರ್, ಹಾಳ್ ಇತ್ತಿನೆನ್ ದಕ್ಕ್‌ದ್ ಬುಡ್ಪೆರ್.</verse>
				<verse number="49">ಅಂಚೆನೇ ಯುಗತ ಅಂತ್ಯೊಡ್ಲಾ ಆಪುಂಡು. ದೂತೆರ್ ಬತ್ತ್‌ದ್ ನೀತಿವಂತೆರೆಡ್ದ್ ಪಡಿಕೆಂತಿನಾಕುಲೆನ್ ಬೇತೆ ಮಲ್ತ್‌ದ್</verse>
				<verse number="50">ಅಕ್ಲೆನ್ ತೂತ ಗುಂಡಿಡ್ ಪಾಡ್ವೆರ್ ಅಲ್ಪ ಅರಬಾಯಿಲಾ ಕಟಕಟ ಕೂಲಿ ಕಡೆಯುನವುಲಾ ಉಪ್ಪುಂಡು.</verse>
				<verse number="51">“ಈ ಮಾತ ಪಾತೆರೊಲೆ ಅರ್ಥ ನಿಕ್ಲೆಗ್ ತೆರಿಂಡಾ?” ಅಂದ್‌ದ್ ಕೇನ್ನಗ ಅಕುಲು, “ತೆರಿಂಡ್,” ಪಂಡೆರ್.</verse>
				<verse number="52">ಅಪಗ ಆಯೆ ಅಕ್ಲೆಡ, “ಇಂಚ ಉಪ್ಪುನಗ ಪರಲೋಕ ರಾಜ್ಯದ ಸಂಗತಿಡ್ ಉಪದೇಶ ಪಡೆಯೊಂದಿನ ಪ್ರತಿಯೊರಿ ಶಾಸ್ತ್ರಿಲಾ ಇಲ್ಲದ ಯಜಮಾನಗ್ ಸಮ ಆದುಲ್ಲೆ. ಆಯೆ ತನ ಗೋದಾಮುಡ್ದು ಪೊಸ ದ್ರವ್ಯೊಲೆನ್ಲಾ ಐತ ಒಟ್ಟುಗು ಪರತ್ತ್‌ದೆನ್ಲಾ ಪಿದಯಿ ಕನವೊಂದುಪ್ಪುವೆ,” ಅಂದ್‌ದ್ ಪಂಡೆ.</verse>
				<verse number="53">ಯೇಸು ಈ ಉಪಕತೆಲೆನ್ ಪಂಡ್ದ್ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ.</verse>
				<verse number="54">ಐಡ್ದ್ ಬೊಕ್ಕ ಆಯೆ ತನ ಊರುಗು ಬತ್ತ್‌ದ್ ಅಲ್ಪ ಉಪ್ಪುನ ಸಭಾಮಂದಿರೊಡು ಜನೊಕುಲೆಗ್ ಬೋಧನೆ ಮಲ್ತೊಂದಿತ್ತೆ. ಅಕುಲು ಕೇಂಡ್ದ್ ಅಚ್ಚಿರ ಆದ್, “ಇಂಬ್ಯಗ್ ಈ ಬುದ್ಧಿಲಾ ಈ ಮಲ್ಲಕಾರ್ಯೊಲೆನ್ಲಾ ಮಲ್ಪೆರೆ ಒಲ್ತುಡ್ದು ಬುದ್ಧಿ ಬತ್ತ್‌ದುಪ್ಪು?</verse>
				<verse number="55">ಇಂಬೆ ಆ ಮರತ ಬೇಲೆದಾಯನ ಮಗೆ ಅತ್ತಾ? ಇಂಬೆನ ಅಪ್ಪೆ ಮರಿಯ ಅತ್ತಾ? ಯಾಕೋಬು, ಯೋಸೇಫು, ಸೀಮೋನೆ, ಯೂದೆ ಇಂಬೆನ ಮೆಗ್ಯಾಡ್ಲು ಅತ್ತಾ.</verse>
				<verse number="56">ಇಂಬೆನ ಮೆಗ್ದಿಯಾಡ್ಲು ಮಾತ ನಮೊಟ್ಟುಗು ಉಲ್ಲೆರತ್ತಾ. ಅಂಚಾಂಡ ಇಂಚಿನ ಬುದ್ಧಿ ಇಂಬ್ಯಗ್ ಒಲ್ತುಡ್ದು ಬತ್ತ್‌ದುಪ್ಪು?” ಅಂದ್‌ದ್ ಪಾತೆರೊಂದು ಆಯನ ಸಂಗತಿಡ್ ಬೇಜಾರ್ ಆಯೆರ್.</verse>
				<verse number="57">ಆಂಡ ಯೇಸು ಅಕ್ಲೆಡ, “ಪ್ರವಾದಿಗ್ ಮಾತ ಕಡೆಟ್ಲಾ ಮರ್ಯಾದಿ ಉಂಡು; ಆಂಡ ಸ್ವಂತ ಊರುಡ್ಲಾ, ಸ್ವಂತ ಇಲ್ಲಡ್ಲಾ ಮರ್ಯಾದಿ ಇಜ್ಜಿ,” ಪಂಡೆ.</verse>
				<verse number="58">ಅಕ್ಲೆನ ಅಪನಂಬಿಕೆಡ್ದ್ ಆಯೆ ಅಲ್ಪ ಮಸ್ತ್ ಕಾರ್ನಿಕೊಲೆನ್ ಮಲ್ತ್‌ಜೆ.</verse>
			</chapter>
			<chapter number="14">
				<verse number="1">ಆ ಸಮಯೊಡು ಉಪರಾಜೆ ಹೆರೋದೆ ಯೇಸುನ ಸುದ್ಧಿನ್ ಕೇಂಡ್ದ್</verse>
				<verse number="2">ತನ ಸೇವಕೆರೆಡ, “ಇಂಬೆ ಸ್ನಾನಿಕೆ ಯೋಹಾನೆ ಕುಡ ಬದ್‌ಕ್‌ದ್ ಬೈದೆ. ಐಡ್ದಾವರ ಕಾರ್ನಿಕೊಲೆನ್ ನಡಪಾವು ಶಕ್ತಿ ಆಯಡ ಉಂಡು,” ಅಂದ್‌ದ್ ಪಂಡೆ.</verse>
				<verse number="3">ಹೆರೋದೆ ಹೆರೋದ್ಯೆಲೆಗಾದ್ ಯೋಹಾನನ್ ಪತ್ತ್‌ದ್ ಸೆರೆಮನೆಟ್ ಪಾಡ್ದಿತ್ತೆ. ಆ ಹೆರೋದ್ಯೆಲ್ ಹೆರೋದನ ಪಲಯೆ ಆಯಿ ಫಿಲಿಪ್ಪನ ಬೊಡೆದಿ.</verse>
				<verse number="4">ಯೋಹಾನೆ ಹೆರೋದಗ್, “ಈ ಮೊಲೆನ್ ದೀಪಾವೊಂದಿನವು ನ್ಯಾಯ ಅತ್ತ್ ಅಂದ್‌ದ್ ಪನೊಂದಿತ್ತೆ.”</verse>
				<verse number="5">ಹೆರೋದೆ ಆಯನ್ ಕೆರೊಡು ಅಂದ್‌ದ್ ಇತ್ತೆಡಲಾ, ಜನೊಕುಲು ಯೋಹಾನನ್ ಪ್ರವಾದಿ ಪಂಡ್ದ್ ಎನ್ನೊಂದಿತ್ತಿನೆಡ್ದ್ ಅಕ್ಲೆಗ್ ಪೋಡಿದ್ ಆಯನ್ ಕೆರ್ಪಾಯಿಜೆ.</verse>
				<verse number="6">ಆಂಡ ಹೆರೋದನ ಪುಟ್ಟಿ ದಿನತ ಪರ್ಬ ನಡತೊಂದುಪ್ಪುನಗ ಹೆರೋದ್ಯೆಲೆನ ಮಗಲ್ ಬತ್ತಿ ಬಿನ್ನೆರೆ ಎದುರು ನಲ್ತ್‌ದ್ ಹೆರೋದನ್ ಮೆಚ್ಚಾಯಲ್.</verse>
				<verse number="7">ಆಯೆ ಆಲೆಡ, “ಈ ಎಂಚಿನ ಕೇಂಡಲಾ ಕೊರ್ಪೆ,” ಅಂದ್‌ದ್ ಆಜ ದೀದ್ ಪಾತೆರ ಕೊರಿಯೆ.</verse>
				<verse number="8">ಅಪಗ ಆಲ್ ತನ ಅಪ್ಪೆನ ಪಾತೆರೊನು ಕೇಂಡ್ದ್, “ಮುಲ್ಪನೇ ಸ್ನಾನಿಕೆ ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಎಂಕ್ ತರ್ಪಾದ್ ಕೊರ್ಲ ಪಂಡಲ್.”</verse>
				<verse number="9">ಆ ಪಾತೆರೊಗು ಅರಸು ದುಃಖ ಮಲ್ತೆಡಲಾ ತಾನ್ ದೀವೊಂದಿನ ಆಜಡ್ದಾವರ ತನಡೊಪ್ಪ ಪಂತೆಡ್ ಕುಲ್ಲೊಂದಿತ್ತಿನಾಕುಲೆಗಾದ್‌ಲಾ ಅವೆನ್ ಕನತ್ ಕೊರಿಯೆರೆ ಅಪ್ಪಣೆ ಕೊರಿಯೆ.</verse>
				<verse number="10">ಬೊಕ್ಕ ಬೇಲೆದಾಕುಲೆನ್ ಕಡಪುಡ್ದು ಸೆರೆಮನೆಡ್ ಇತ್ತಿ ಯೋಹಾನನ ತರೆನ್ ಕಡ್ಪಾಯೆ.</verse>
				<verse number="11">ಅಕುಲು ಆಯನ ತರೆನ್ ಹರಿವಾಣೊಡು ಕನತ್‌ದ್ ಆ ಪೊಣ್ಣಗ್ ಕೊರಿಯೆರ್; ಆಲ್ ಅವೆನ್ ತನ ಅಪ್ಪೆನ ಕೈತಲ್‌ ದೆತ್ತೊಂದು ಪೋಯಲ್.</verse>
				<verse number="12">ಯೋಹಾನನ ಶಿಷ್ಯೆರ್ ಬತ್ತ್‌ದ್ ಆಯನ ಪುಣೊನು ಕೊನೊದು ಪೋದು ಕೌಂತುದು ಯೇಸುನ ಕೈತಲ್‌ ಬತ್ತ್‌ದ್ ತೆರಿಪಾಯೆರ್.</verse>
				<verse number="13">ಯೇಸು ಈ ಸುದ್ಧಿ ಕೇಂಡ್ದ್ ಒಂಜಿ ಓಡೊನು ಪತ್ತ್‌ದ್ ಏರ್ಲಾದಾಂತಿನ ಜಾಗ್‌ಗ್ ಪ್ರತ್ಯೇಕಾದ್ ಒರಿಯೇ ಪೋಯೆ. ಆಂಡ ಈ ಸಂಗತಿ ಜನೊಕುಲೆಗ್ ಗೊತ್ತಾಯಿನೆಡ್ದ್ ಗುಂಪುಗುಂಪಾದ್ ತನ್ಕುಲೆನ ಊರುಡ್ದು ನಡತೊಂದು ಆಯನ ಬೆರಿಯೆ ಪೋಯೆರ್.</verse>
				<verse number="14">ಯೇಸು ಓಡೊಡ್ದು ಜಪ್ಪುನಗ ಮಸ್ತ್ ಜನೊಕುಲೆ ಗುಂಪುನು ತೂದು ಕನಿಕರ ಪಡೆದ್ ಅಕ್ಲೆಡ್ ಸೀಕ್‌ಡಿತ್ತಿನಾಕುಲೆನ್ ಗುಣ ಮಲ್ತೆ.</verse>
				<verse number="15">ಬೈಯಡ್ ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಉಂದು ಕಾಡ್, ಪೊರ್ತು ಕಂತ್ಂಡ್. ಮೊಕುಲು ಕೈತಲುಪ್ಪು ಹಳ್ಳಿಲೆಗ್ ಪೋದು ತನ್ಕುಲೆ ವಣಸ್‌ಗಾದ್ ದಾಲಾಂಡಲಾ ದೆತ್ತೊನೆರೆ ಕಡಪುಡುಲ,” ಅಂದ್‌ದ್ ಪಂಡೆರ್.</verse>
				<verse number="16">ಆಂಡ ಯೇಸು, “ಅಕುಲು ಪೋಪಿನವು ಅಗತ್ಯ ಇಜ್ಜಿ; ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ,” ಪಂಡೆ.</verse>
				<verse number="17">ಐಕ್ ಅಕುಲು, “ಎಂಕ್ಲೆಡ ಮುಲ್ಪ ಐನ್ ರೊಟ್ಟಿ ರಡ್ಡ್ ಮೀನ್ ಬುಡ್ದು ಬೇತೆ ದಾಲ ಇಜ್ಜಿ,” ಪಂಡೆರ್.</verse>
				<verse number="18">ಆಂಡ ಯೇಸು, “ಅವೆನ್ ಎಂಕ್ ಕನತ್ ಕೊರ್ಲೆ,” ಪಂಡೆ.</verse>
				<verse number="19">ಬೊಕ್ಕ ಜನೊಕುಲೆನ್ ಪಜಿರ್‌ದ ಮಿತ್ತ್ ಕುಲ್ಲಿಯೆರೆ ಅಪ್ಪಣೆ ಕೊರ್ದು, ಆ ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ; ಶಿಷ್ಯೆರ್ ಜನೊಕುಲೆಗ್ ಪಟ್ಟಿಯೆರ್.</verse>
				<verse number="20">ಅಕುಲು ಮಾತೆರ್ ಉಂಡುದು ತೃಪ್ತಿ ಆಯೆರ್. ಒರಿದಿನ ರೊಟ್ಟಿ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.</verse>
				<verse number="21">ವಣಸ್ ಮಲ್ತಿನಾಕುಲೆಡ್ ಪೊಂಜೊವುಲು ಬೊಕ್ಕ ಜೋಕುಲೆನ್ ಬುಡ್ದು ಹೆಚ್ಚಿಕಡಿಮೆ ಐನ್ ಸಾರ ಅಂಜೊವುಲು ಇತ್ತೆರ್.</verse>
				<verse number="22">ಉಂದು ಆಯಿ ಕೂಡ್ಲೆ ಯೇಸು ತನ ಶಿಷ್ಯೆರೆಡ, “ಯಾನ್ ಈ ಜನೊಕುಲೆ ಗುಂಪುಲೆನ್ ಕಡಪುಡ್ದು ಕೊರ್ಪಿನೆಟ್ಟ ನಿಕುಲು ಓಡ ಮಿತ್ತಾರ್ದ್ ಎನಡ್ದ್ ದುಂಬು ಆಯೆರೆಗ್ ಪೋಲೆ,” ಅಂದ್‌ದ್ ಒತ್ತಾಯ ಮಲ್ತೆ.</verse>
				<verse number="23">ಆಯೆ ಜನೊಕುಲೆ ಗುಂಪುನು ಕಡಪುಡ್ದು ಕೊರಿ ಬೊಕ್ಕ ಪ್ರಾರ್ಥನೆ ಮಲ್ಪೆರೆಗಾದ್ ಒರಿಯೇ ಗುಡ್ಡೆಗ್ ಪೋಯೆ. ಪೊರ್ತು ಕಂತಿ ಬೊಕ್ಕಲಾ ಅವುಲು ಇತ್ತೆ.</verse>
				<verse number="24">ಆತ್‌ನೆಟ್ಟ ಓಡ ಕಡಲ್ದ ಕರೆಡ್ದ್ ಮಸ್ತ್ ದೂರ ಪೋದಿತ್ತ್‌ಂಡ್. ಬೊಕ್ಕ ಗಾಳಿ ಎದುರಾದ್ ಬೀಜೊಂದಿತ್ತಿನೆಡ್ದ್ ಸೆರೆಕ್ಕ್ ತಿಕ್ಕ್‌ದ್ ಅಡಿಮೇಲ್ ಆವೊಂದಿತ್ತ್ಂಡ್.</verse>
				<verse number="25">ಅಪಗ ಹೆಚ್ಚಿಕಡಿಮೆ ರಾತ್ರೆದ ನಾಲನೇ ಜಾಮೊಡು ಯೇಸು ಕಡಲ್ದ ಮಿತ್ತ್ ನಡತೊಂದು, ಅಕ್ಲೆ ಕೈತಲ್‌ ಬತ್ತೆ.</verse>
				<verse number="26">ಆಂಡ ಶಿಷ್ಯೆರ್ ಕಡಲ್ದ ಮೇಲ್‌ಡ್ ಆಯೆ ನಡಪುನೆನ್ ತೂದು, “ಅವು ಭೂತ,” ಅಂದ್‌ದ್ ತಳಮಳ ಆದ್ ಪೋಡಿದ್ ಕಲ್ಕಿಯೆರ್.</verse>
				<verse number="27">ಅಪಗನೇ ಯೇಸು ಅಕ್ಲೆಡ ಪಾತೆರ್‌ದ್, “ಧೈರ್ಯ ಮಲ್ತೊನ್ಲೆ, ಯಾನೇ ಪೋಡ್ಯಡೆ,” ಅಂದ್‌ದ್ ಪಂಡೆ.</verse>
				<verse number="28">ಐಕ್ ಪೇತ್ರೆ, “ಕರ್ತವಾ, ಈಯೇ ಆಂಡ,” ಯಾನ್ಲಾ ನೀರ್‌ದ ಮೇಲ್‌ಡ್ ನಡತ್‌ದ್ ನಿನ ಕೈತಲ್‌ ಬರಿಯೆರೆ ಅಪ್ಪಣೆ ಕೊರ್ಲ ಪಂಡೆ. ಐಕ್ ಆಯೆ, “ಬಲ,” ಪಂಡೆ.</verse>
				<verse number="29">ಅಪಗ ಪೇತ್ರೆ ಯೇಸುನ ಕೈತಲ್‌ ಪೋವೆರೆ ಓಡೊಡ್ದು ಜತ್ತ್‌ದ್ ನೀರ್‌ದ ಮೇಲ್‌ಡ್ ನಡತೆ.</verse>
				<verse number="30">ಆಂಡ ಗಾಳಿನ್ ತೂದು ಪೋಡಿದ್ ಮುರ್ಕೊಂದು, “ಕರ್ತವಾ, ಎನನ್ ಕಾಪುಲ,” ಪಂಡ್ದ್ ಬೊಬ್ಬೆ ಪಾಡಿಯೆ.</verse>
				<verse number="31">ಆ ಕ್ಷಣೊಟೇ ಯೇಸು ಕೈ ನೀಡ್ದ್ ಆಯನ್ ಪತ್ತ್‌ದ್, “ನಂಬಿಕೆದಾಂತಿನಾಯಾ, ದಾಯೆ ಸಂಶಯ ಮಲ್ತ?” ಅಂದ್‌ದ್ ಪಂಡೆ.</verse>
				<verse number="32">ಐಡ್ದ್ ಬೊಕ್ಕ ಅಕುಲು ಓಡದ ಉಲಯಿ ಬತ್ತಿ ಬೊಕ್ಕ ಬಿರುಗಾಳಿ ಉಂತುದು ಪೋಂಡು.</verse>
				<verse number="33">ಅಪಗ ಓಡೊಡಿತ್ತಿನಾಕುಲು ಆಯಗ್ ಅಡ್ಡಬೂರ್ದು, “ಈ ನಿಜಾದ್‌ಲಾ, ದೇವೆರೆ ಮಗೆ,” ಅಂದ್‌ದ್ ಆಯಗ್ ವಂದನೆ ಮಲ್ತೆರ್.</verse>
				<verse number="34">ಅಕುಲು ಕಡಲ್‌ನ್ ದಾಂಟ್‌ದ್ ಗೆನೇಜರೇತುದ ಕರೆಕ್ ಬತ್ತೆರ್.</verse>
				<verse number="35">ಆ ಜಾಗ್‌ದಾಕುಲು ಯೇಸುನ ಗುರ್ತ ಪತ್ತಿಯೆರ್. ಸುತ್ತ ಇತ್ತಿ ಸೀಮೆಲೆಗ್ ಜನೊಕುಲೆನ್ ಕಡಪುಡ್ದು ಸೀಕ್‌ಡಿತ್ತಿನಾಕುಲೆನ್ ಮಾತೆರೆನ್ಲಾ ಆಯ ಕೈತಲ್‌ ಕನತೆರ್.</verse>
				<verse number="36">ನಿನ ಕುಂಟುದ ಗೊಂಡೆನಾಂಡಲಾ ಮುಟ್ಟಿಯೆರೆ ಬುಡೊಡು ಅಂದ್‌ದ್ ಆಯಡ ನಟ್ಟೊಂಡೆರ್. ಆಯನ್ ಮುಟ್ಟಿನಾಕುಲು ಮಾತ ಗುಣ ಆಯೆರ್.</verse>
			</chapter>
			<chapter number="15">
				<verse number="1">ಅಪಗ ಯೆರೂಸಲೇಮುಡ್ದು ಪರಿಸಾಯೆರ್‌ಲಾ, ಶಾಸ್ತ್ರಿಲುಲಾ ಯೇಸು ಕೈತಲ್‌ ಬತ್ತ್‌ದ್</verse>
				<verse number="2">“ನಿನ ಶಿಷ್ಯೆರ್ ಹಿರಿಯೆರೆಡ್ದ್ ಬೈದಿನ ಕಟ್ಟ್‌ಲೆದ ಸಂಪ್ರದಾಯೊನು ದಾಯೆಗ್ ಮೀರುವೆರ್? ಅಕುಲು ಕೈ ದೆಕ್ಕಂದೆ ತಿನಸ್ ದೆತ್ತೊನುವೆರ್ ಅತ್ತಾ.”</verse>
				<verse number="3">ಯೇಸು ಉತ್ತರ ಕೊರ್ದು ಅಕ್ಲೆಡ, “ನಿಕುಲುಲಾ ಸಂಪ್ರದಾಯೊಗಾದ್ ದೇವೆರೆನ ಅಪ್ಪಣೆನ್ ದಾಯೆಗ್ ಮೀರುವರ್? ಎಂಚಂದ್ಂಡ, ‘ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುಲೆ, ಅಮ್ಮೆರೆನಾವಡ್ ಅಪ್ಪೆನಾವಡ್‌ ದೂಷಿಯುನಾಯಗ್ ಮರಣ ದಂಡನೆ ಆವೊಡು,’ ಪಂಡ್ದ್ ದೇವೆರ್ ಪನ್ತೆ.</verse>
				<verse number="4"></verse>
				<verse number="5">ಆಂಡ ನಿಕುಲು ಏರಾಂಡಲಾ ಅಮ್ಮೆರೆನಾವಡ್ ಅಪ್ಪೆನಾವಡ್‌ ತೂದು, ‘ಯಾನ್ ನಿಕ್ಲೆನ್ ತಾಂಕೆರೆಗಾದ್ ಕೊರೊಡಾಯಿನೆನ್ ದೇವೆರೆಗ್ ಕಾಣಿಕೆ ಪಂಡ್ದ್ ದೀತೆ,’ ಅಂದ್‌ದ್ ಪಂಡೆಡ</verse>
				<verse number="6">‘ಆಯೆ ತನ ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುನ ಅಗತ್ಯ ಇಜ್ಜಿ,’ ಅಂದ್‌ದ್ ಪನ್ಪರ್. ಇಂಚ ನಿಕ್ಲೆನ ಸಂಪ್ರದಾಯೊಲೆಡ್ದ್ ದೇವೆರೆ ಅಪ್ಪಣೆನ್ ಅರ್ಥದಾಂತಿಲೆಕ್ಕ ಮಲ್ತ್‌ದರ್.</verse>
				<verse number="7">ಕಪಟಿಲೇ, ನಿಕ್ಲೆ ಸಂಗತಿಡ್ ಯೆಶಾಯೆ ಸರಿಯಾದೇ ಪ್ರವಾದನೆ ಮಲ್ತ್‌ದೆ. ಆಯೆ ಬರೆತಿನಿ ದಾನೆಂದ್ಂಡ,</verse>
				<verse number="8">‘ಈ ಜನೊಕುಲು ಪಾತೆರೊಡು ಎನನ್ ಸನ್ಮಾನ ಮಲ್ಪುವೆರ್, ಆಂಡ ಅಕ್ಲೆನ ಮನಸ್ ಎನಡ್ದ್ ದೂರ ಆದುಂಡು.</verse>
				<verse number="9">ಅಕುಲು ನರಮಾನಿಲು ಮಲ್ತಿ ಸಂಪ್ರದಾಯೊನು ದೇವೆರೆನ ಅಪ್ಪಣೆ ಅಂದ್‌ದ್ ಕಲ್ಪಾವುನೆಡ್ದ್, ಎಂಕ್ ಭಕ್ತಿ ತೋಜಾವುನವು ಪೊಕ್ಕಡೆ.’”</verse>
				<verse number="10">ಐಡ್ದ್ ಬೊಕ್ಕ ಯೇಸು ಜನೊಕುಲೆ ಗುಂಪುನು ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಕೆಬಿ ಕೊರ್ದು ಕೇನ್ಲೆ, ಅರ್ಥ ಮಲ್ತೊನ್ಲೆ.</verse>
				<verse number="11">ಬಾಯಿದ ಉಲಯಿ ಪೋಪಿನವು ನರಮಾನಿನ್ ಅಶುದ್ಧ ಮಲ್ಪುಜಿ; ಬಾಯಿದ ಉಲಯಿಡ್ದ್ ಪಿದಯಿ ಬರ್ಪಿನವೇ ನರಮಾನಿನ್ ಅಶುದ್ಧ ಮಲ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="12">ಅಪಗ ಶಿಷ್ಯೆರ್ ಬತ್ತ್‌ದ್ ಆಯಡ, “ಪರಿಸಾಯೆರ್ ಈ ಪಾತೆರೊನು ಕೇಂಡ್ದ್ ಬೇಜಾರ್ ಆತೆರ್ ಅಂದ್‌ದ್ ನಿಕ್ಕ್ ಗೊತ್ತಾಂಡ,” ಅಂದ್‌ದ್ ಕೇಂಡೆರ್.</verse>
				<verse number="13">ಐಕ್ ಯೇಸು, “ಪರಲೋಕೊಡುಪ್ಪು ಎನ ಅಮ್ಮೆರ್‌ ನಡಂದೆ ಉಪ್ಪುನ ದೈಕ್ಲೆನ್ ಬೂರುಡ್ದೇ ಪೊರ್ತುದು ದಕ್ಕುವೆ.</verse>
				<verse number="14">ಅಕ್ಲೆ ಪಾತೆರೊನು ಬುಡ್ಲೆ; ತನ್ಕುಲೇ ಕುರುಡೆರ್, ಬೊಕ್ಕೊರಿಯಗ್ ಸಾದಿ ತೂಪಾಯೆರೆ ಪೋಪೆರ್. ಕುರುಡೆ ಕುರುಡಗ್ ಸಾದಿ ತೂಪಾಯೆಡ ಅಕುಲು ಇರ್ವೆರ್‌ಲಾ ತೋಡುಡು ಬೂರುವೆರ್,” ಪಂಡೆ.</verse>
				<verse number="15">ಅಪಗ ಪೇತ್ರೆ, “ಈ ಉಪಕತೆತ್ತ ಅರ್ಥೊನು ಎಂಕ್ಲೆಗ್ ಪನ್ಲ,” ಅಂದ್‌ದ್ ಕೇಂಡೆ.</verse>
				<verse number="16">ಐಕ್ ಯೇಸು, “ನಿಕ್ಲೆಗ್ ನನಲಾ ಬುದ್ಧಿ ಇಜ್ಜಾ?</verse>
				<verse number="17">ಬಾಯಿದ ಉಲಯಿ ಪೋಯಿನವು ಬಂಜಿದ ಉಲಯಿ ಸೇರ್ದ್ ಪಿದಯಿ ಪೋಪುಂಡು ಅಂದ್‌ದ್ ನಿಕ್ಲೆಗ್ ತೆರಿಯಂದಾ?</verse>
				<verse number="18">ಆಂಡ ಬಾಯಿಡ್ದ್ ಪಿದಾಡುನವು ಉಡಲ್‌ಡ್ದ್ ಬರ್ಪುಂಡು; ಅವ್ವೇ ನರಮಾನಿನ್ ಅಶುದ್ಧ ಮಲ್ಪುಂಡು.</verse>
				<verse number="19">ದಾಯೆಗಂದ್ಂಡ ಉಡಲ್‌ದ ಉಲಯಿಡ್ದ್ ಬೊಡ್ಚಾಂದಿ ಆಲೋಚನೆ, ಮಾನ್ಯ ಕೆರ್ಪಿನವು, ವ್ಯಭಿಚಾರ, ಸೂಳೆಗಾರಿಕೆ, ಕಂಡೊನುನವು, ಸುಳ್ಳು ಸಾಕ್ಷಿ, ದೂಷಣೆ ಪಿದಾಡ್ದ್ ಬರ್ಪುಂಡು.</verse>
				<verse number="20">ನರಮಾನಿನ್ ಅಶುದ್ಧ ಮಲ್ಪುನವು ಉಂದೇ. ಆಂಡ ಕೈ ದೆಕ್ಕೊನಂದೆ ವಣಸ್ ಮಲ್ಪುನವು ನರಮಾನಿನ್ ಅಶುದ್ಧ ಮಲ್ಪುಜಿ,” ಪಂಡೆ.</verse>
				<verse number="21">ಬೊಕ್ಕ ಯೇಸು ಅಲ್ತ್‌ಡ್ದ್ ಪಿದಾಡ್ದ್ ತೂರ್ ಸೀದೋನ್ ಪಟ್ಟಣದ ಪ್ರಾಂತೊಲೆಗ್ ಪೋಯೆ.</verse>
				<verse number="22">ಆ ಸೀಮೆಡ್ದ್ ಕನಾನ್ಯೆರೆಡ್ ಒರ್ತಿ ಪಿದಾಡ್ದ್ ಬತ್ತ್‌ದ್, “ಕರ್ತವಾ, ದಾವೀದ್ ಮಗಾ, ಎಂಕ್ ಕನಿಕರ ತೋಜಾಲ. ಎನ ಮಗಲೆಗ್ ದೆವ್ವದ ಉಪದ್ರ ಉಂಡು,” ಅಂದ್‌ದ್ ಬುಲ್ತಲ್.</verse>
				<verse number="23">ಆಂಡ ಆಯೆ ಆಲೆಗ್ ದಾಲಾ ಉತ್ತರ ಕೊರ್ಜೆ. ಅಪಗ ಆಯನ ಶಿಷ್ಯೆರ್ ಬತ್ತ್‌ದ್, “ಆಲ್ ಎಂಕುಲೆ ಪಿರವುಡು ಬುಲ್ತೊಂದು ಬರೊಂದುಲ್ಲಲ್; ಆಲೆನ್ ಕಡಪುಡ್ದು ಬುಡ್ಲ,” ಅಂದ್‌ದ್ ಆಯಡ ನಟ್ಟೊಂಡೆರ್.</verse>
				<verse number="24">ಐಕ್ ಆಯೆ, “ತಪ್ಪಾವೊಂದಿ ಕುರಿಕುಲೆ ಲೆಕ್ಕ ಉಪ್ಪುನ ಇಸ್ರಾಯೇಲ್ ಸಂತಾನದಾಕುಲೆನ ಕೈತಲ್‌ ಅತ್ತಂದೆ ಬೇತೆ ಏರೆ ಕೈತಲ್‌ಲಾ ಯಾನ್ ಕಡಪುಡ್ದಿನಾಯೆ ಅತ್ತ್,” ಪಂಡೆ.</verse>
				<verse number="25">ಅಪಗ ಆಲ್ ಬತ್ತ್‌ದ್ ಆಯಗ್ ಅಡ್ಡಬೂರ್ದು, “ಕರ್ತವಾ, ಎಂಕ್ ಸಹಾಯ ಮಲ್ಪೊಡು,” ಪಂಡಲ್.</verse>
				<verse number="26">ಐಕ್ ಆಯೆ, “ಜೋಕುಲು ತಿನ್ಪಿನ ರೊಟ್ಟಿನ್ ದೆತ್ತೊಂದು ನಾಯಿಲೆಗ್ ಪಾಡುನವು ಸರಿ ಅತ್ತ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="27">ಐಕ್ ಆಲ್, “ಅಂದ್ ಕರ್ತವಾ, ಈ ಪಾತೆರ ನಿಜನೆ; ಆಂಡ ನಾಯಿಲು ತನ್ಕುಲೆ ಯಜಮಾನನ ಮೇಜಿಡ್ದ್ ಬೂರ್ದಿನ ರೊಟ್ಟಿದ ತುಂಡುಲೆನ್ ತಿನ್ಪತ್ತಾ,” ಪಂಡಲ್.</verse>
				<verse number="28">ಅಪಗ ಯೇಸು ಆಲೆಡ, “ಅಮ್ಮ, ನಿನ ನಂಬಿಕೆ ಮಲ್ಲವು ಆದುಂಡು ನಿನ ಮನಸ್‌ಡ್ ಇತ್ತಿಲೆಕ್ಕನೆ ಆವಡ್,” ಪಂಡ್ದ್ ಉತ್ತರ ಕೊರಿಯೆ. ಅವ್ವೇ ಗಳಿಗೆಡ್ ಆಲೆನ ಮಗಲ್ ಗುಣ ಆಯಲ್.</verse>
				<verse number="29">ಯೇಸು ಅಲ್ತ್‌ಡ್ದ್ ಪಿದಾಡ್ದ್ ಗಲಿಲಾಯ ಕಡಲ್ದ ಕೈತಲ್‌ ಬತ್ತ್‌ದ್ ಗುಡ್ಡೆದ ಮಿತ್ತ್ ಮಿತ್ತಾರ್ದ್ ಅಲ್ಪ ಕುಲ್ಲಿಯೆ.</verse>
				<verse number="30">ಅಪಗ ಜನೊಕುಲು ಗುಂಪುಗುಂಪಾದ್ ತನ್ಕುಲು ಲೆತ್ತೊಂದು ಬತ್ತಿತ್ತಿ ಕುಂಟೆರೆನ್, ಕುರುಡೆರೆನ್, ಪೊಟ್ಟೆರೆನ್, ಚೊಂಟ್ಟೆರೆನ್ ಇಂಚಿನ ಮಸ್ತ್ ಜನೊಕುಲೆನ್ ಲೆತ್ತೊಂದು ಬತ್ತ್‌ದ್ ಅಕ್ಲೆನ್ ಆಯ ಕಾರ ಮುದೆಲ್‌ಡ್ ಬುಡಿಯೆರ್; ಆಯೆ ಅಕ್ಲೆನ್ ಗುಣ ಮಲ್ತೆ.</verse>
				<verse number="31">ಪೊಟ್ಟೆರ್ ಪಾತೆರಿಯೆರ್, ಚೊಂಟ್ಟೆರ್ ಸರ್ತ ಆಯೆರ್, ಕುಂಟೆರ್ ನಡತೆರ್, ಕುರುಡೆರೆಗ್ ಕಣ್ಣ್ ತೋಜ್ಂಡ್, ಜನೊಕುಲು ತೂದು ಅಚ್ಚಿರ ಪಡೆದ್, ಇಸ್ರಾಯೇಲ್ಯೆರೆ ದೇವೆರೆನ್ ಪುಗರಿಯೆರ್.</verse>
				<verse number="32">ಅಪಗ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಈ ಜನೊಕುಲೆನ್ ತೂದು ಕನಿಕರ ಆಪುಂಡು. ಅಕುಲು ಎನ ಕೈತಲ್‌ ಬತ್ತ್‌ದ್ ಇತ್ತೆ ಮೂಜಿ ದಿನ ಆಪುಂಡು. ಅಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಿ. ಅಕ್ಲೆನ್ ಉಪವಾಸೊಡು ಕಡಪುಡ್ದು ಬುಡಿಯೆರೆ ಎಂಕ್ ಮನಸಿಜ್ಜಿ, ಸಾದಿಡ್ ಬರೆಲ್ದ್ ಪೋವೆರ್,” ಅಂದ್‌ದ್ ಪನ್ನಗ</verse>
				<verse number="33">ಶಿಷ್ಯೆರ್, “ಈತ್ ಜನೊಕುಲೆಗ್ ಪಟ್ಟಿಯೆರೆ ಬೋಡಾಯಿನಾತ್ ರೊಟ್ಟಿಲೆನ್ ಈ ಕಾಡ್‌ಡ್ ಎಂಕ್ಲೆಗ್ ಒಲ್ತುಡ್ದು ಬರು?” ಪಂಡೆರ್.</verse>
				<verse number="34">ಯೇಸು ಅಕ್ಲೆಡ, “ನಿಕ್ಲೆಡ ಏತ್ ರೊಟ್ಟಿಲು ಉಂಡು,” ಪಂಡ್ದ್ ಕೇಂಡಿನೆಕ್ಕ್ ಅಕುಲು, “ಏಳ್ ರೊಟ್ಟಿ ಬೊಕ್ಕ ಕೆಲವು ಎಲ್ಯ ಮೀನ್ ಉಂಡು,” ಪಂಡೆರ್.</verse>
				<verse number="35">ಅಪಗ ಯೇಸು ಜನೊಕುಲೆ ಗುಂಪುಗು ನೆಲತ್ತ ಮಿತ್ತ್ ಕುಲ್ಲೆರೆ ಅಪ್ಪಣೆ ಕೊರಿಯೆ.</verse>
				<verse number="36">ಆ ಏಳ್ ರೊಟ್ಟಿನ್ಲಾ ಮೀನ್‌ಲೆನ್ಲಾ ದೆತ್ತೊಂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು ಶಿಷ್ಯೆರೆ ಕೈಕ್ ಕೊರಿಯೆ. ಶಿಷ್ಯೆರ್ ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್.</verse>
				<verse number="37">ಮಾತೆರ್ಲಾ ವಣಸ್ ಮಲ್ತ್‌ದ್ ಬಂಜಾರ ಆಯೆರ್. ಒರಿದಿನ ತುಂಡುಲೆನ್ ಒಟ್ಟು ಮಲ್ಪುನಗ ಏಳ್ ಪುಡಯಿ ದಿಂಜಿಂಡ್.</verse>
				<verse number="38">ವಣಸ್ ಮಲ್ತಿನಾಕುಲು ಪೊಂಜೊವುಲು ಜೋಕುಲು ಅತ್ತಂದೆ ನಾಲ್ ಸಾರ ಅಂಜೊವುಲು ಇತ್ತೆರ್.</verse>
				<verse number="39">ಬೊಕ್ಕ ಆಯೆ ಆ ಜನೊಕುಲೆನ್ ಕಡಪುಡ್ದು ಕೊರ್ದು ಓಡೊನು ಮಿತ್ತಾರ್ದ್ ಮಗದಾನ ಸೀಮೆಗ್ ಬತ್ತೆ.</verse>
			</chapter>
			<chapter number="16">
				<verse number="1">ಅಪಗ ಪರಿಸಾಯೆರ್‌ಲಾ ಸದ್ದುಕಾಯೆರ್‌ಲಾ ಬತ್ತ್‌ದ್ ಯೇಸುನು ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇಂಡೆರ್.</verse>
				<verse number="2">ಐಕ್ ಆಯೆ ಉತ್ತರ ಕೊರ್ದು ಅಕ್ಲೆಡ ಪಂಡಿನಿ, “ಬೈಯದಗ ಬೊಲ್ಕಿರ್ ಆವು, ಬಾನ ಕೆಂಪಾದುಂಡು, ಪನ್ಪರ್,</verse>
				<verse number="3">ಕಾಂಡೆ, ಬಾನ ಮುಗಲ್ ಮುಚ್ಚೊಂದು ಕೆಂಪಾತ್ತ್ಂಡ್, ಇನಿ ಗಾಳಿ ಬರ್ಸ ಪನ್ಪರ್, ಬಾನದ ಸ್ಥಿತಿನ್ ತೂದು ಹೆಚ್ಚಿಕಡಿಮೆ ಪನಿಯೆರೆ ತೆರಿಯೊನ್ವರ್ ಆಂಡ ನಿಕ್ಲೆಗ್ ಈ ಕಾಲದ ಗುರ್ತೊಲೆನ್‌ ತೆರಿಯೊನಿಯೆರೆ ಆಪುಜಿ?</verse>
				<verse number="4">ಹಾದ್ರದಂಚಿತ್ತಿ ಹಾಳ್ ಸಂತಾನ ಗುರ್ತ ಮಲ್ಪುನಂಚಿ ಕಾರ್ಯೊನು ತೂವೊಡು ಅಂದ್‌ದ್ ಬಯಕುಂಡು. ಆಂಡ ಯೋನಗ್ ಆಯಿನ ಗುರ್ತ ಮಲ್ಪುನಂಚಿ ಕಾರ್ಯೊನೇ ಅತ್ತಂದೆ ಬೇತೆ ಒವುಲಾ ನೆಕ್ಕ್ ತಿಕ್ಕಂದ್,” ಪಂಡ್ದ್ ಉತ್ತರ ಕೊರ್ದು ಅಕ್ಲೆನ್ ಬುಡ್ದು ಪೋಯೆ.</verse>
				<verse number="5">ಶಿಷ್ಯೆರ್ ಆಪೆದ ಕರೆಕ್ ಪೋನಗ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್.</verse>
				<verse number="6">ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪನ್ನಗ.</verse>
				<verse number="7">ಅಕುಲು, “ಎಂಕುಲು ರೊಟ್ಟಿದ ಬುತ್ತಿ ದೆತ್ತೊನಂದೆ ಬತ್ತತ್ತಾ?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="8">ಯೇಸು ಅವೆನ್ ತೆರಿದ್, “ಒಂತೆ ನಂಬುನಾಕುಲೇ! ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್?</verse>
				<verse number="9">ನಿಕ್ಲೆಗ್ ನನಲಾ ತೆರಿಯುಜಾ? ನಿಕ್ಲೆಗ್ ನೆನೆಪು ಇಜ್ಜಾ? ಆ ಐನ್ ರೊಟ್ಟಿ ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್?</verse>
				<verse number="10">ಅವು ಅತ್ತಂದೆ, ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ ಏತ್ ಪುಡಯಿ ದಿಂಜಾಯರ್?</verse>
				<verse number="11">ಅಂಚ ಉಪ್ಪುನಗ ಅವು ನಿಕುಲೆಗ್ ದಾಯೆಗ್ ಅರ್ಥ ಆಪುಜಿ? ರೊಟ್ಟಿದ ಸಂಗತಿಡ್ ಪಾತೆರಿದಿನಿ ಅತ್ತ್ ಆಂಡ ನಿಕ್ಲೆಗ್ ಕುಡ ಪನ್ಪಿನಿ, ಪರಿಸಾಯೆರೆ ಬೊಕ್ಕ ಸದ್ದುಕಾಯೆರೆ ಪುಳಿಬಂದದ ಸಂಗತಿಡ್ ಜಾಗ್ರತೆಡ್ ಉಪ್ಪುಲೆ.”</verse>
				<verse number="12">ಅಪಗ ಶಿಷ್ಯರೆಗ್ ರೊಟ್ಟಿಗ್ ಪಾಡುನ ಪುಳಿತ ಬಂದದ ಸಂಗತಿಡ್ ಅತ್ತ್, ಪರಿಸಾಯೆರ್ ಬೊಕ್ಕ ಸದ್ದುಕಾಯೆರೆ ಬೋಧನೆದ ಸಂಗತಿಡ್ ಎಚ್ಚರಿಕೆ ಆದುಪ್ಪೊಡಂದ್‌ದ್ ಪಂಡೆ ಅಂದ್‌ದ್ ತೆರಿಯೊಂಡೆರ್.</verse>
				<verse number="13">ಯೇಸು ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣದ ಪ್ರಾಂತೊಗು ಬತ್ತಿನಪಗ ಆಯೆ ತನ ಶಿಷ್ಯೆರೆಡ, “ಜನೊಕುಲು, ನರಮಾನಿ ಮಗೆ ಆದುಪ್ಪು ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="14">ಅಕುಲು ಪಂಡಿನಿ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ ಪನ್ಪೆರ್, ಕೆಲೆವೆರ್ ಎಲೀಯೆ ಪನ್ಪೆರ್, ಬೇತೆ ಕೆಲೆವೆರ್ ಯೆರೆಮೀಯೆ, ಇಜ್ಜಾಂಡ ಪ್ರವಾದಿಲೆಡ್ ಒರಿ,” ಪಂಡ್ದ್ ಪನ್ಪೆರ್.</verse>
				<verse number="15">ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="16">ಸೀಮೋನ್ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ, ಜೀವಸ್ವರೂಪಿ ಆದುಪ್ಪು ದೇವೆರೆ ಮಗೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="17">ಐಕ್ ಯೇಸು, “ಯೋನನ ಮಗೆ ಆದುಪ್ಪು ಸೀಮೋನ, ಈ ಭಾಗ್ಯವಂತೆ; ಈ ಗುಟ್ಟುನು ನಿಕ್ಕ್ ತೆರಿಪಾಯಿನಾಯೆ ಮಾಸ ನೆತ್ತೆರ್‌ದ ನರಮಾನಿ ಅತ್ತ್, ಪರಲೋಕೊಡುಪ್ಪು ಎನ ಅಮ್ಮೆನೇ ತೆರಿಪಾಯಿನಿ.</verse>
				<verse number="18">ಬೊಕ್ಕ ಯಾನ್ಲಾ ನಿಕ್ಕ್ ಒಂಜಿ ಪಾತೆರ ಪನ್ಪೆ. ಅವು ದಾನೆಂದ್ಂಡ, ಈ ಪೇತ್ರೆ, ಈ ಪಾದೆದ ಮಿತ್ತ್ ಎನ್ನ ಸಭೆನ್ ಕಟ್ಟುವ; ಪಾತಾಳದ ಬಲ ಅವೆನ್ ಸೋಪಾವಂದ್.</verse>
				<verse number="19">ಪರಲೋಕ ರಾಜ್ಯದ ಬೀಗದ ಕೈನ್ ನಿಕ್ಕ್ ಕೊರ್ಪೆ. ಭೂಲೋಕೊಡು ಈ ಒವೆನ್ ಕಟ್ಟುವನಾ, ಅವು ಪರಲೋಕೊಡ್ಲಾ ಕಟ್ಟ್‌ದುಪ್ಪು. ಬೊಕ್ಕ ಭೂಲೋಕೊಡು ಈ ಒವೆನ್ ಗಿರ್ಪುವನಾ ಅವು ಪರಲೋಕೊಡ್ಲಾ ಗಿರ್ಪುಂಡು,” ಪಂಡೆ.</verse>
				<verse number="20">ಅಪಗ ಆಯೆ, ತಾನ್ ಕ್ರಿಸ್ತೆ ಅಂದ್‌ದ್ ಏರೆಗ್ಲಾ ಪನಡೆ ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.</verse>
				<verse number="21">ಆನಿಡ್ದ್ ಯೇಸು, “ಯಾನ್ ಯೆರೂಸಲೇಮುಗು ಪೋವೊಡು. ಅವುಲು ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಕೆರ್ವೆರ್. ಮೂಜನೇ ದಿನೊಟು ಜೀವಾದ್ ಲಕ್ಕುವೆ,” ಅಂದ್‌ದ್ ತನ ಶಿಷ್ಯೆರೆಗ್ ತೆರಿಪಾಯೆರೆ ಸುರು ಮಲ್ತೆ.</verse>
				<verse number="22">ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್, “ಕರ್ತವಾ, ದೇವೆರ್ ಉಂದೆನ್ ಉಂತಾವಡ್, ನಿಕ್ಕ್ ಇಂಚ ಏಪೊಗ್ಲಾ ಆವೆರೆ ಬಲ್ಲಿ.” ದಟ್ಟಿಯೆರೆ ಸುರು ಮಲ್ತೆ.</verse>
				<verse number="23">ಐಕ್ ಆಯೆ ತಿರ್ಗ್‌ದ್ ಪೇತ್ರಡ, “ಸೈತಾನ, ಎನ ದುಂಬು ಉಂತಡ, ಎಂಕ್ ಈ ಅಡ್ಡಿ ಆದುಲ್ಲ; ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ ದೇವೆರೆನವು ಅತ್ತ್,” ಅಂದ್‌ದ್ ಪಂಡೆ.</verse>
				<verse number="24">ಬೊಕ್ಕ ಯೇಸು ತನ ಶಿಷ್ಯೆರೆಗ್ ಪಂಡಿನಿ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.</verse>
				<verse number="25">ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ.</verse>
				<verse number="26">ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು? ಇಜ್ಜಿಡ ಒರಿ ತನ ಪ್ರಾಣದ ಪಗತೆಗ್ ಎಂಚಿನ ಕೊರಿಯೆರೆಗಾವು?</verse>
				<verse number="27">ನರಮಾನಿ ಮಗೆ ಅಮ್ಮೆ ಮೈಮೆಡ್ ತನ ದೂತೆರೆಡೊಪ್ಪ ಬರ್ಪೆ; ಅಪಗ ಆಯೆ ಒರಿ ಒರಿಯಗ್ ಆಯಾಯ ಕೆಲಸೊಗು ತಕ್ಕ ಪ್ರತಿಫಲ ಕೊರುವೆ.</verse>
				<verse number="28">ನಿಕ್ಲೆಗ್ ನಿಜಾದ್ ಪನ್ಪೆ. ಮುಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ನರಮಾನಿ ಮಗೆ ತನ ರಾಜ್ಯೊಡು ಬರ್ಪಿನೆನ್ ತೂವ ಮುಟ್ಟ, ಸೈಪುಜರ್,” ಪಂಡೆ.</verse>
			</chapter>
			<chapter number="17">
				<verse number="1">ಆಜಿ ದಿನೊಡ್ದು ಬೊಕ್ಕ ಯೇಸು ಪೇತ್ರನ್, ಯಾಕೋಬು ಬೊಕ್ಕ ಆಯನ ಮೆಗ್ಯೆ ಯೋಹಾನನ್ ಪ್ರತ್ಯೇಕಾದ್ ಒಂಜಿ ಎತ್ತರ ಗುಡ್ಡೆಗ್ ಲೆತ್ತೊಂದು ಪೋಯೆ.</verse>
				<verse number="2">ಅಲ್ಪ ಅಕ್ಲೆನ ಕಣ್ಣೆದುರುಡು ಆಯನ ರೂಪ ಬೇತೆ ಆಂಡ್; ಆಯ ಮೋನೆ ಸೂರ್ಯದಲೆಕ್ಕ ಮಿಂಚಿಂಡ್; ಆಯೆ ಪಾಡ್ದಿನ ಕುಂಟುಲು ಬೊಲ್ಪುದ ಲೆಕ್ಕನೇ ಬೊಲ್ದಾಂಡ್.</verse>
				<verse number="3">ಉಂದತ್ತಂದೆ ಮೋಶೆಲಾ ಎಲೀಯೆಲಾ ಆಯಡೊಪ್ಪ ಪಾತೆರೊಂದು ಅಕ್ಲೆಗ್ ತೋಜಿಯೆರ್.</verse>
				<verse number="4">ಅಪಗ ಪೇತ್ರೆ ಯೇಸುಡ, “ಕರ್ತವ, ನಮ ಮೂಲೇ ಉಪ್ಪುನವು ಎಡ್ಡೆ. ಈ ಒಪ್ಪಿಯಡ ಮುಲ್ಪ ಮೂಜಿ ಗುಡಾರ ಕಟ್ಟ್‌ಗ; ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ.</verse>
				<verse number="5">ಇಂಚ ಪಾತೆರೊಂದು ಉಪ್ಪುನಪಗನೇ ಬೊಲ್ಪುದ ಮುಗಲ್ ಅಕ್ಲೆನ ಮಿತ್ತ್ ನಿರೆಲಾಂಡ್. ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಆಯನ ಪಾತೆರೊನು ಕೇನ್ಲೆ.” ಅಂದ್‌ದ್ ಒಂಜಿ ಮಲ್ಲ ಸ್ವರ ಆಂಡ್.</verse>
				<verse number="6">ಶಿಷ್ಯೆರ್ ಉಂದೆನ್ ಕೇಂಡ್ದ್ ಪೋಡಿದ್ ನೆಲಕ್ ಕಬ್ಬೆ ಬೂರಿಯೆರ್.</verse>
				<verse number="7">ಆಂಡ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆನ್ ಮುಟ್ಟುದು, “ಲಕ್ಕ್‌ಲೆ, ಪೋಡ್ಯಡೆ,” ಪಂಡೆ.</verse>
				<verse number="8">ಅಕುಲು ಕಣ್ಣ್ ದೆರ್ತ್ತ್ ತೂನಗ ಯೇಸುವೇ ಮಾತ್ರ ಅತ್ತಂದೆ ಬೇತೆ ಏರೆನ್ಲಾ ತೂಯಿಜೆರ್.</verse>
				<verse number="9">ಅಕುಲು ಆ ಗುಡ್ಡೆಡ್ದ್ ಜತ್ತ್‌ದ್ ಬರೊಂದುಪ್ಪುನಗ ಯೇಸು ಅಕ್ಲೆಡ, “ನಿಕುಲು ಇತ್ತೆ ತೂಯಿನ ದರ್ಶನೊನು ನರಮಾನಿ ಮಗೆ ಸೈತ್‌ದ್ ಜೀವಾದ್ ಲಕ್ಕ ಮುಟ್ಟ ಏರೆಗ್ಲಾ ಪನಿಯೆರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="10">ಅಪಗ ಆಯನ ಶಿಷ್ಯೆರ್, “ಎಲೀಯೆ ಸುರುಟ್ಟು ಬರ್ಪಿನವು ಅಗತ್ಯ ಅಂದ್‌ದ್ ಶಾಸ್ತ್ರಿಲು ದಾಯೆಗ್ ಪನ್ಪೆರ್?” ಆಯಡ ಕೇಂಡೆರ್.</verse>
				<verse number="11">ಐಕ್ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ಎಲೀಯೆ ಸುರುಟ್ಟು ಬತ್ತ್‌ದ್ ಮಾತೆನ್ ಸರಿ ಮಲ್ಪುನವು ನಿಜ.</verse>
				<verse number="12">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಎಲೀಯೆ ಬತ್ತ್‌ದ್ ಪೋಯೆ, ಜನೊಕುಲು ಆಯನ್ ತೆರಿಯಂದೆ ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ಆಯಗ್ ಮಲ್ತೆರ್. ಆಯಗ್ ಆದುಪ್ಪುಲೆಕ್ಕನೇ ನರಮಾನಿ ಮಗಕ್ಲಾ ಅಕ್ಲೆ ಕಡೆಡ್ದ್ ಭಂಗ ಆಪುಂಡು.” ಪಂಡ್ದ್ ಉತ್ತರ ಕೊರಿಯೆ.</verse>
				<verse number="13">ಅಪಗ ಸ್ನಾನಿಕೆ ಯೋಹಾನನ ಬಗೆಟ್ ತನ್ಕುಲೆಗ್ ಈ ಪಾತೆರೊನು ಪಂಡೆ ಅಂದ್‌ದ್ ಶಿಷ್ಯೆರ್ ತೆರಿಯೊಂಡೆರ್.</verse>
				<verse number="14">ಅಕುಲು ಜನೊಕುಲೆ ಗುಂಪುದಡೆ ಬತ್ತಿನಪಗ, ಒರಿ ಆಯ ಕೈತಲ್‌ ಬತ್ತ್‌ದ್ ಆಯ ದುಂಬು ಮೊರಂಪೂರ್ದು,</verse>
				<verse number="15">“ಕರ್ತವಾ, ಎನ ಮಗಕ್ಕ್ ಕನಿಕರ ತೋಜಾಲ, ಮೂರ್ಚಂಡೆ ಸೀಕ್‌ಡ್ ಬಾರಿ ಕಷ್ಟ ಪಡೆಪೆ. ಅಪಗಪಗ ತೂಟುಲಾ ನೀರ್‌ಡ್ಲಾ ಬೂರೊಂದುಪ್ಪುವೆ.</verse>
				<verse number="16">ಆಯನ್ ನಿನ ಶಿಷ್ಯೆರೆ ಕೈತಲ್‌ ಕನತ್‌ದ್ ತೋಜಾಯೆ, ಆಂಡ ಆಯನ್ ಗುಣ ಮಲ್ಪೆರೆ ಅಕ್ಲೆಡ್ದ್ ಆವಂದೆ ಪೋಂಡು,” ಪಂಡೆ.</verse>
				<verse number="17">ಐಕ್ ಯೇಸು, “ಓ! ನಂಬಿಕೆದಾಂತಿ ಮೂರ್ಖ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ಆಯನ್ ಇಂಚಿ ಎನ ಕೈತಲ್‌ ಲೆತ್ತೊಂದು ಬಲೆ,” ಪಂಡೆ.</verse>
				<verse number="18">ಯೇಸು ಅವೆನ್ ದಟ್ಟಿನಗ, ದೆವ್ವ ಆಯನ್ ಬುಡ್ದು ಪೋಂಡು; ಆ ಕ್ಷಣೊಟೇ ಆ ಆಣ್ ಗುಣ ಆಯೆ.</verse>
				<verse number="19">ಐಡ್ದ್ ಬೊಕ್ಕ ಶಿಷ್ಯೆರ್ ಪ್ರತ್ಯೇಕಾದ್ ಯೇಸು ಕೈತಲ್‌ ಬತ್ತ್‌ದ್, “ಅವೆನ್ ಬುಡ್ಪಾಯೆರೆ ಎಂಕ್ಲೆಡ್ದ್ ದಾಯೆಗ್ ಆಯಿಜಿ,” ಅಂದ್‌ದ್ ಕೇಂಡೆರ್.</verse>
				<verse number="20">ಐಕ್ ಆಯೆ ಅಕ್ಲೆಡ, “ನಿಕ್ಲೆ ನಂಬಿಕೆ ಕಡಿಮೆ ಆಯಿನೆಡ್ದ್ ಆಯಿಜಿ. ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ ದಾಸೆಮಿದಾತ್ ನಂಬಿಕೆ ಇತ್ತ್ಂಡ, ನಿಕುಲು ಈ ಗುಡ್ಡೆಗ್,</verse>
				<verse number="21">‘ಮುಲ್ತುಡ್ದು ಅಡೆಗ್ ಪೋಲ,’ ಅಂದ್‌ದ್ ಪಂಡ್ಂಡ ಅವುಲಾ ಪೋವು. ನಿಕ್ಲೆ ಕೈಟ್ ಆವಂದಿನ ಕೆಲಸೊಲು ಒಂಜಿಲಾ ಇಜ್ಜಿ. ಆಂಡ ಇಂಚಿತ್ತಿ ದೆವ್ವೊಲು ಪ್ರಾರ್ಥನೆಡ್ದ್ ಉಪವಾಸೊಡ್ದು ಅತ್ತಂದೆ ಪಿದಾಡುಜಿ.”</verse>
				<verse number="22">ಗಲಿಲಾಯೊಡು ಅಕುಲು ಒಟ್ಟು ಸೇರೊಂದುಪ್ಪುನಗ ಯೇಸು ಅಕ್ಲೆಡ, “ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್.</verse>
				<verse number="23">ಅಕುಲು ಆಯನ್ ಕೆರ್ವೆರ್; ಸೈತ್‌ದ್ ಮೂಜನೇ ದಿನೊಟು ಆಯೆ ಜೀವಾದ್ ಲಕ್ಕ್‌ದ್ ಬರುವೆ,” ಅಂದ್‌ದ್ ಪಂಡೆ. ಅವೆನ್ ಕೇಂಡ್ದ್ ಅಕುಲು ಬಾರೀ ದುಃಖ ಮಲ್ತೆರ್.</verse>
				<verse number="24">ಅಕುಲು ಕಪೆರ್ನೌಮುಗು ಬತ್ತಿನಪಗ ದೇವಾಲಯೊಗಾದ್ ತೆರಿಗೆ ದೆತ್ತೊನುನಾಕುಲು ಪೇತ್ರ ಕೈತಲ್‌ ಬತ್ತ್‌ದ್, “ನಿಕ್ಲೆ ಬೋಧಕೆ ದೇವಾಲಯದ ತೆರಿಗೆ ಕೊರ್ಪುಜೆನಾ?” ಅಂದ್‌ದ್ ಕೇಂಡಿನಪಗ, “ಅಂದ್ ಸಂದಾವೆ,” ಪಂಡೆ.</verse>
				<verse number="25">ಪೇತ್ರೆ ಇಲ್ಲದುಲಯಿ ಬತ್ತಿನಪಗ ಯೇಸು ಆಯಡ್ದ್ ದುಂಬೇ, “ಸೀಮೋನಾ ನಿಕ್ಕ್ ಎಂಚ ತೋಜುಂಡು? ಈ ಪ್ರಪಂಚದ ಅರಸೆರ್ ಏರೆಡ್ದ್ ತೆರಿಗೆ ಇಜ್ಜಿಡ ಸುಂಕ ದೆತ್ತೊನುವೆರ್? ತನ್ಕುಲೆ ಜೋಕುಲೆಡ್ದಾ ಇಜ್ಜಿಂಡ ಬೇತೆಕ್ಲೆಡ್ದಾ?” ಅಂದ್‌ದ್ ಕೇಂಡೆ.</verse>
				<verse number="26">ಬೇತೆಕ್ಲೆಡ್ದ್ ಪಂಡ್ದ್ ಉತ್ತರ ಕೊರಿನಪಗ ಯೇಸು ಆಯಡ, “ಅಂಚಾಂಡ ಜೋಕುಲು ಐಕ್ ಸೇರ್ದಿನಾಕುಲು ಅತ್ತತ್ತಾ.</verse>
				<verse number="27">ಆಂಡಲಾ ಎಂಕುಲೆ ಸಂಗತಿಡ್ ಅಕುಲು ಬೇಜಾರ್ ಮಲ್ತೊನೆರೆ ಬಲ್ಲಿ. ಈ ಕಡಲ್‌ಗ್ ಪೋದು ಗಾಳ ಪಾಡ್ದ್ ದುಂಬತ್ತ ತಿಕ್ಕುನ ಮೀನ್ ದೆರ್ಪುಲ. ಐತ ಬಾಯಿ ಬಿಚ್ಚಾನಗ ಒಂಜಿ ಬೊಳ್ಳಿದ ಪಾವೊಲಿ ತಿಕ್ಕು. ಅವೆನ್ ದೆತ್ತೊಂದು ಪೋದು ಎಂಕ್ಲೆನ ಇರ್ವೆರೆನ ತೆರಿಗೆ ಅಂದ್‌ದ್ ಅಕ್ಲೆಗ್ ಕೊರು,” ಅಂದ್‌ದ್ ಪಂಡೆ.</verse>
			</chapter>
			<chapter number="18">
				<verse number="1">ಆ ಸಮಯೊಡು ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಪರಲೋಕ ರಾಜ್ಯೊಡು ಏರ್ ಮಲ್ಲಾಯೆ?” ಅಂದ್‌ದ್ ಕೇನ್ನಗ</verse>
				<verse number="2">ಆಯೆ ಎಲ್ಯ ಬಾಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆನ ನಡುಟು ಉಂತಾದ್</verse>
				<verse number="3">ಅಕ್ಲೆಡ, “ನಿಕುಲು ಪಶ್ಚಾತಾಪ ಪಡೆದ್ ಕುಡೊರ ಎಲ್ಯ ಜೋಕುಲೆ ಲೆಕ್ಕ ಆವಂದೆ ಪೋಯಿಜರ್ಡ ಪರಲೋಕ ರಾಜ್ಯೊಗು ಪೋಪಿನೆ ಇಜ್ಜಿ, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="4">ಇಂಚ ಉಪ್ಪುನೆಡ್ದ್ ಏರ್ ಈ ಎಲ್ಯ ಬಾಲೆದಲೆಕ್ಕ ತನನ್ ತಗ್ಗಾವೊನ್ವೆನಾ, ಆಯೆನೇ ಪರಲೋಕ ರಾಜ್ಯೊಡು ಮಲ್ಲಾಯೆ.</verse>
				<verse number="5">ಉಂದತ್ತಂದೆ ಏರಾಂಡಲಾ ಎನ ಪುದರ್‌ಡ್ ಇಂಚಿನ ಒಂಜಿ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್.</verse>
				<verse number="6">“ಎನ ಮಿತ್ತ್ ನಂಬಿಕೆ ದೀಪಿನ ಈ ಎಲ್ಯಾಕುಲೆಡ್ ಒರಿಯಗ್ ಏರಾಂಡಲಾ ಅಡ್ಡಿ ಮಲ್ತೆಡ ಅಂಚಿನಾಯನ ಕಂಟೆಲ್‌ಗ್ ಮಲ್ಲ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್ದ ಗುಂಡಿಗ್ ಮುರ್ಕಾವುನವು ಎಡ್ಡೆ ಅವು.</verse>
				<verse number="7">ಅಡ್ಡಿಲು ಬರ್ಪಿನೆಡ್ದ್ ಲೋಕೊಗು ಏತೋ ಕೇಡ್. ಅಡ್ಡಿಲು ಎಂಚಾಂಡಲಾ ಬರು. ಆಂಡಲಾ ವಾ ನರಮಾನಿಡ್ದ್ ಅಡ್ಡಿ ಆಪುಂಡಾ ಆಯನ ಗತಿನ್ ದಾನೆಂದ್ ಪನೊಲಿ?</verse>
				<verse number="8">“ಅಂಚಾಂಡ ನಿನ ಕೈಯಾವಡ್ ಕಾರಾವಡ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ದ್ ಬುಡ್ಲ, ಕೈಕಾರ್ ರಡ್ಡ್‌ಲಾ ಇತ್ತ್‌ದ್ ತೆಕ್ಕಂದಿ ತೂಟು ಪಾಡ್ದಿನಾಯೆ ಆಪಿನೆಡ್ದ್ ಕೈಕಾರ್ ಕಳೆವೊಂದಿನಾಯೆ ಆದ್ ಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.</verse>
				<verse number="9">ನಿನ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ಲ, ರಡ್ಡ್ ಕಣ್ಣ್ ಇತ್ತಿನಾಯೆ ಆದಿತ್ತ್‌ದ್ ತೂತ ನರಕೊಗು ಬೂರುನೆಡ್ದ್ ಒಂಜೇ ಕಣ್ಣ್ ಇತ್ತಿನಾಯೆ ಆದ್ ಜೀವೊಗು ಸೇರುನವು ನಿಕ್ಕ್ ಏತೋ ಎಡ್ಡೆ.</verse>
				<verse number="10">“ಈ ಎಲ್ಯಾಕುಲೆಡ್ ಒರಿಯನಾಂಡಲಾ ಸಸಾರ ಮಲ್ಪಂದಿಲೆಕ್ಕ ತೂವೊನ್ಲೆ; ಅಕ್ಲೆ ದೂತೆರ್ ಪರಲೋಕೊಡು ಏಪಲಾ ಎನ ಅಮ್ಮೆರೆನ ಮೋನೆ ತೂವೊಂದುಲ್ಲೆರ್,” ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="11">ನರಮಾನಿ ಮಗೆ ತತ್ತ್‌ದ್ ಪೋಯಿನೆನ್ ರಕ್ಷಣೆ ಮಲ್ಪೆರೆ ಬತ್ತೆ.</verse>
				<verse number="12">“ನಿಕ್ಲೆಗ್ ಎಂಚ ತೋಜುಂಡು? ಒರಿ ನರಮಾನಿಗ್ ನೂದು ಕುರಿಕುಲು ಉಪ್ಪುನಗ ಐಟ್ಟ್ ಒಂಜಿ ಕುರಿ ತತ್ತ್‌ದ್ ಪೋಂಡ ಆಯೆ ಸೊನ್ಪತ್ತೊರ್ಂಬ ಕುರಿಕುಲೆನ್ ಗುಡ್ಡೆಡ್ ಬುಡ್ದು, ತಪ್ಪಾವೊಂದು ಪೋತಿನ ಒಂಜಿ ಕುರಿನ್ ನಾಡೊಂದು ಪೋಪೆ ಅತ್ತಾ.</verse>
				<verse number="13">ಅವು ತಿಕ್ಕ್ಂಡ, ತತ್ತ್‌ದ್ ಪೋವಂದಿ ಸೊನ್ಪತ್ತೊರ್ಂಬ ಕುರಿಕುಲೆಡ್ದ್ ಆ ಒಂಜಿ ಕುರಿಕ್ಕಾದ್ ಮಸ್ತ್ ಸಂತೋಷ ಮಲ್ಪುವೆ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="14">ಅಂಚೆನೇ ಈ ಎಲ್ಯಾಕುಲೆಡ್ ಒರಿಯಾಂಡಲಾ ನಾಶಾದ್ ಪೋಪಿನವು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆ ಚಿತ್ತ ಅತ್ತ್.</verse>
				<verse number="15">“ಉಂದತ್ತಂದೆ ನಿನ ಸಹೋದರೆ ನಿಕ್ಕ್ ತಪ್ಪು ಮಲ್ತೆಡ ಈ ಪೋದು ಇರ್ವೆರೆ ಉಪ್ಪುನಪಗ ಆಯನ ತಪ್ಪುನು ಆಯಗ್ ತೆರಿಪಾಲ. ಆಯೆ ನಿನ ಪಾತೆರೊನು ಕೇಂಡೆಡ ನಿನ ಸಹೋದ್ರನ್ ಗೆಂದಿಯ.</verse>
				<verse number="16">ಆಯೆ ಕೇನಂದೆ ಪೋಂಡ ರಡ್ಡ್ ಮೂಜಿ ಜನ ಸಾಕ್ಷಿದಾಕುಲೆ ಬಾಯಿಡ್ದ್ ಪ್ರತಿಯೊಂಜಿ ಪಾತೆರಲಾ ನಿಗಂಟ್ ಆಪಿಲೆಕ್ಕ ನನಲಾ ಒರಿ ಇರ್ವೆರೆನ್ ನಿನಡೊಪ್ಪ ಲೆತ್ತೊಂದು ಪೋಲ.</verse>
				<verse number="17">ಆಯೆ ಅಕ್ಲೆ ಪಾತೆರೊನ್ಲಾ ಕೇಂಡಿಜೆಡ ಸಭೆಕ್ ಪನ್ಲ; ಆಂಡ ಸಭೆತಲಾ ಪಾತೆರೊನು ಕೇನಂದೆ ಪೋಯೆಡ ಆಯೆ ನಿಕ್ಕ್ ಪಿದಯಿದ ಜನೊಕುಲೆ ಲೆಕ್ಕಲಾ, ಸುಂಕದಾಯಲೆಕ್ಕಲಾ ಉಪ್ಪಡ್.</verse>
				<verse number="18">“ಭೂಲೋಕೊಡು ನಿಕುಲು ಒವೆನ್ ಕಟ್ಟುವರಾ, ಅವು ಪರಲೋಕೊಡ್ಲಾ ಕಟ್ಟ್‌ದುಪ್ಪು. ಬೊಕ್ಕ ಭೂಲೋಕೊಡು ನಿಕುಲು ಒವೆನ್ ಗಿರ್ಪುವರಾ ಅವು ಪರಲೋಕೊಡ್ಲಾ ಗಿರ್ಪುಂಡು, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="19">ಉಂದತ್ತಂದೆ ನಿಕ್ಲೆಡ್ ಇರ್ವೆರ್ ಒಟ್ಟಾದ್ ನಟ್ಟೊನುನ ಒವ್ವಾಂಡಲಾ ಒಂಜಿ ಕಾರ್ಯದ ಸಂಗತಿಲಾವಡ್ ಭೂಲೋಕೊಡು ಒಂಜೇ ಮನಸಾದಿತ್ತ್ಂಡ ಅವು ಪರಲೋಕೊಡುಪ್ಪು ಎನ ಅಮ್ಮೆರೆಡ್ದ್ ಅಕ್ಲೆಗ್ ಒದಗ್‌ದ್ ಬರು, ಅಂದ್‌ದ್ ಕುಡ ನಿಕ್ಲೆಗ್ ಪನ್ಪೆ.</verse>
				<verse number="20">ದಾಯೆ ಪಂಡ ಇರ್ವೆರಾವಡ್, ಮೂವೆರಾವಡ್ ಎನ ಪುದರ್‌ಡ್ ಓಲ್ ಒಟ್ಟು ಸೇರ್ದ್ ಬರ್ಪೆರಾ ಅವುಲು ಅಕ್ಲೆ ನಡುಟು ಯಾನ್ ಉಲ್ಲೆ,” ಪಂಡೆ.</verse>
				<verse number="21">ಅಪಗ ಪೇತ್ರೆ ಆಯ ಕೈತಲ್‌ ಬತ್ತ್‌ದ್, “ಕರ್ತವಾ, ಎನ ಸಹೋದರೆ ಎಂಕ್ ತಪ್ಪು ಮಲ್ತ್ಂಡ ಏತ್ ಸರ್ತಿ ಮಾಪು ಮಲ್ಪೊಡು? ಏಳ್ ಸರ್ತಿಯ,” ಅಂದ್‌ದ್ ಕೇಂಡೆ.</verse>
				<verse number="22">ಐಕ್ ಯೇಸು ಆಯಡ, “ಏಳ್ ಸರ್ತಿ ಪಂಡ್ದ್ ಅತ್ತ್, ಏಳ್ಪತ್ತ ಏಳ್ ಸರ್ತಿಅಂದ್‌ದ್ ನಿಕ್ಕ್ ಪನ್ಪೆ.</verse>
				<verse number="23">“ಉಂದೆಕ್ಕಾದ್ ಪರಲೋಕ ರಾಜ್ಯ ತನ ಸೇವಕೆರೆಡ್ದ್ ಲೆಖ್ಖ ದೆತ್ತೊನಿಯೆರೆ ಮನಸ್ ಇತ್ತಿ ಒರಿ ಅರಸುಗು ಸಮ ಆದುಂಡು.</verse>
				<verse number="24">ಆಯೆ ಲೆಖ್ಖ ದೆತ್ತೊನಿಯೆರೆ ಸುರು ಮಲ್ತಿನಪಗ ಕೋಟ್ಯಾಂತರ ದುಡ್ಡು ಸಾಲ ಮಲ್ತಿನಾಯನ್ ಒರಿಯನ್ ಆಯ ಕೈತಲ್‌ ಪತ್ತ್‌ದ್ ಕನತೆರ್.</verse>
				<verse number="25">ಆ ಸಾಲ ಸಂದಾಯೆರೆ ಆಯಡ ದಾಲಾ ಇಜ್ಜಂದಿನೆಡ್ದ್ ಆಯನ ಧನಿ ಆಯನ್ಲಾ, ಆಯನ ಬೊಡೆದಿ ಜೋಕುಲೆನ್ಲಾ, ಆಯನ ಮಾತ ಬದ್‌ಕ್‌ನ್ಲಾ ಮಾರ್ದ್ ಸಂದಾಯ ಮಲ್ಪೆರೆ ಅಪ್ಪಣೆ ಕೊರಿಯೆ.</verse>
				<verse number="26">ಆ ಚಾಕ್ರಿದಾಯೆ ಆಯ ಕಾರ್‌ಗ್ ಅಡ್ಡಬೂರ್ದು ಆಯಡ, ‘ಧನಿ ಒಂತೆ ತಡೆತೊನು, ನಿಕ್ಕ್ ಕೊರ್ಪಿನೆನ್ ಯಾನ್ ಕೊರ್ದು ಸಂದಾವೆ,’ ಅಂದ್‌ದ್ ಅಡ್ಡಬೂರ್ಯೆ.</verse>
				<verse number="27">ಆ ಚಾಕ್ರಿದಾಯನ ಧನಿ ಕನಿಕರೊಡು ಆಯನ್ ಬುಡ್ಪಾದ್ ಆ ಸಾಲೊನು ಬುಡ್ದು ಬುಡಿಯೆ.</verse>
				<verse number="28">“ಐಡ್ದ್ ಬೊಕ್ಕ ಆ ಚಾಕ್ರಿದಾಯೆ ಪಿದಯಿ ಬತ್ತ್‌ದ್ ತನ್ಕ್ ನೂದು ಪಣವು ಕೊರೊಡಿತ್ತಿ ಒರಿ ಜತೆ ಚಾಕ್ರಿದಾಯನ್ ತೂದು ಆಯನ್ ಪತ್ತ್‌ದ್, ‘ಎನ ಸಾಲ ಸಂದಾಲ,’ ಅಂದ್‌ದ್ ಆಯನ ಕೆಕ್ಕಿಲ್ ಪೊಜೆಂಕಿಯೆ.</verse>
				<verse number="29">ಅಪಗ ಆಯನ ಜತೆ ಚಾಕ್ರಿದಾಯೆ ಆಯ ಕಾರ್‌ಗ್ ಬೂರ್ದು, ‘ಒಂತೆ ತಡೆತೊನು, ಬೂಟಾವೆ,’ ಅಂದ್‌ದ್ ನಟ್ಟೊಂಡೆ.</verse>
				<verse number="30">ಆಂಡ ಆಯೆ ಒಪ್ಪಿಯಂದೆ ಲಕ್ಕ್‌ದ್ ಪೋದು, ಕೊರೊಡಾಪಿನ ಮಾತ ಸಾಲೊನ್ಲಾ ಸಂದಾವುನೆಟ್ಟ ಆಯನ್ ಸೆರೆಮನೆಟ್ ಪಾಡಿಯೆ.</verse>
				<verse number="31">ಆಯ ಜತೆ ಚಾಕ್ರಿದಾಕುಲು ನಡೆತಿ ಸಂಗತಿನ್ ತೂದು ಬಾರೀ ಬೇಜಾರ್ ಮಲ್ತ್‌ದ್ ಧನಿ ಕೈತಲ್‌ ಬತ್ತ್‌ದ್ ಸಂಗತಿಲೆನ್ ತೆರಿಪಾಯೆರ್.</verse>
				<verse number="32">ಅಪಗ ಯಜಮಾನೆ ಆಯನ್ ಲೆಪ್ಡಾದ್, ‘ಓ ನೀಚ ಚಾಕ್ರಿದಾಯಾ,’ ಈ ಎನನ್ ನಟ್ಟೊಂಡಿನೆಕ್ಕ್ ನಿನ ಸಾಲೊನು ಪೂರ ಮಾಪು ಮಲ್ತೆ.</verse>
				<verse number="33">‘ಯಾನ್ ನಿಕ್ಕ್ ಕನಿಕರ ತೋಜಾಯಿಲೆಕ್ಕ ಈ ನಿನ ಜತೆ ಚಾಕ್ರಿದಾಯಗ್ ಕನಿಕರ ತೋಜಾಯೆರೆ ಬಲ್ಲಿತ್ತ್‌ಂಡಾ,’ ಪಂಡೆ.</verse>
				<verse number="34">ಕೋಪೊಡು ಆಯನ ಧನಿ ತನ್ಕ್ ಕೊರೊಡಾಯಿನ ಸಾಲ ಸಂದುನೆಟ್ಟ ಆಯನ್ ಕಷ್ಟ ಕೊರ್ಪಿನಾಕುಲೆ ಕೈಕ್ ಒಚ್ಚಿದ್ ಕೊರಿಯೆ.</verse>
				<verse number="35">ನಿಕ್ಲೆಡ್ ಪ್ರತಿಯೊರಿಲಾ ತನ ಸಹೋದ್ರನ ಪಾಪೊನು ಪೂರ್ತಿ ಮನಸ್‌ಡ್ದ್ ಮಾಪು ಮಲ್ಪಂದೆ ಪೋಯರ್ಡ, ಪರಲೋಕೊಡುಪ್ಪು ಎನ ಅಮ್ಮೆ ನಿಕ್ಲೆಗ್ ಅಂಚೆನೇ ಮಲ್ಪುವೆ,” ಪಂಡೆ.</verse>
			</chapter>
			<chapter number="19">
				<verse number="1">ಯೇಸು ಈ ಪಾತೆರೊಲೆನ್ ಮುಗಿತಿ ಬೊಕ್ಕ ಗಲಿಲಾಯೊನು ಬುಡ್ದು ಯೊರ್ದಾನ್ ತುದೆತ ಆಯೆರೆಗ್ ಪೋದು ಯೂದಾಯ ಪ್ರಾಂತೊಗು ಬತ್ತೆ.</verse>
				<verse number="2">ಮಸ್ತ್ ಜನೊಕುಲು ಆಯ ಬೆರಿಯೆ ಗುಂಪುಗುಂಪಾದ್ ಪೋಯೆರ್. ಆಯೆ ಅಕ್ಲೆನ್ ಅವುಲೇ ಗುಣ ಮಲ್ತೆ.</verse>
				<verse number="3">ಅಪಗ ಪರಿಸಾಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯನ್ ಪರೀಕ್ಷೆ ಮಲ್ಪೊಡು ಪನ್ಪಿ ಯೋಚನೆಡ್, “ಒರಿ ಒವುಲಾ ಒಂಜಿ ಕಾರಣೊಡ್ದು ತನ ಬೊಡೆದಿನ್ ಬುಡ್ದು ಬುಡ್ಪಿನವು ನ್ಯಾಯನಾ,” ಅಂದ್‌ದ್ ಕೇಂಡೆರ್.</verse>
				<verse number="4">ಐಕ್ ಯೇಸು, “ನರಮಾನಿನ್ ಉಂಡು ಮಲ್ತಿನಾಯೆ ಆದಿಡೇ ಅಕ್ಲೆನ್ ಆಣ್ ಪೊಣ್ಣಾದ್ ಉಂಡು ಮಲ್ತ್‌ದೆ.</verse>
				<verse number="5">ಅಕ್ಲೆ ಸಂಗತಿಡ್, ‘ಈ ಕಾರಣೊಡ್ದು ಆಣ್ ಮಗೆ ಅಪ್ಪೆನ್ಲಾ ಅಮ್ಮೆರೆನ್ಲಾ ಬುಡ್ದು ತನ ಬೊಡೆದಿನ್ ಸೇರುವೆ. ಅಕುಲು ಇರ್ವೆರ್ ಒಂಜೇ ಶರೀರ ಆದುಪ್ಪುವೆರ್,’ ಅಂದ್‌ದ್ ಪನ್ತಿನೆನ್ ನಿಕುಲು ಓದುದಿಜರಾ?</verse>
				<verse number="6">ಇಂಚ ಉಪ್ಪುನಗ ಅಕುಲು ನನ ಇರ್ವೆರತ್ತ್, ಒಂಜೇ ಶರೀರ ಆದುಪ್ಪುವೆರ್. ಅಂಚಾಯಿನೆಡ್ದ್ ದೇವೆರ್ ಕೂಡಾಯಿನೆನ್ ನರಮಾನಿಲು ಬೇತೆ ಮಲ್ಪೆರೆ ಬಲ್ಲಿ,” ಪಂಡೆ.</verse>
				<verse number="7">ಅಕುಲು ಆಯನ್, “ಅಂಚಾಂಡ ತ್ಯಾಗಪತ್ರ ಕೊರ್ದು ಆಲೆನ್ ಬುಡ್ದು ಬುಡೊಲಿ ಅಂದ್‌ದ್ ಮೋಶೆ ದಾಯೆ ಅಪ್ಪಣೆ ಕೊರಿಯೆ,” ಅಂದ್‌ದ್ ಕೇಂಡೆರ್.</verse>
				<verse number="8">ಐಕ್ ಯೇಸು ಅಕ್ಲೆಡ, “ಮೋಶೆ ನಿಕ್ಲೆನ ಹಟೊನು ತೂದು ನಿಕ್ಲೆನ ಬೊಡೆದಿಯಾಡ್ಲೆನ್ ಬುಡ್ದು ಬುಡಿಯೆರೆ ಅಪ್ಪಣೆ ಕೊರಿಯೆ, ಆಂಡ ಆದಿಡ್ದೇ ಅಂಚ ಇಜ್ಜಾಂಡ್.</verse>
				<verse number="9">ಬೊಕ್ಕ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಪ್ಪುವೆ.” ಪಂಡೆ.</verse>
				<verse number="10">ಐಕ್ ಶಿಷ್ಯೆರ್ ಬೊಡೆದಿನ ಸಂಗತಿಡ್ ಕಂಡನಿನ ಧರ್ಮ ಇಂಚ ಇತ್ತ್ಂಡ ಮದ್ಮೆ ಆವಂದೆ ಉಪ್ಪುನವು ಎಡ್ಡೆ ಅತ್ತಾ ಪಂಡೆರ್.</verse>
				<verse number="11">ಯೇಸು ಅಕ್ಲೆಡ, “ಉಂದು ಮಾತೆರೆಗ್ಲಾ ಒಪ್ಪಿಯೆರೆ ಆವಂದ್,” ಆಂಡ “ದೇವೆರ್ ಏರೆಗ್ ವರ ಕೊರ್ತೆನಾ ಅಕ್ಲೆಗ್ ಮಾತ್ರ.</verse>
				<verse number="12">ಅಪ್ಪೆನ ಗರ್ಭೊಡ್ದು ಶಿಕಂಡಿಲಾದ್ ಪುಟ್ಟಿನಾಕುಲು ಕೆಲೆವೆರ್ ಉಲ್ಲೆರ್. ನರಮಾನಿಡ್ದ್ ಶಿಕಂಡಿಲಾಯಿನಾಕುಲು ಕೆಲೆವೆರ್ ಉಲ್ಲೆರ್. ಬೊಕ್ಕ ಪರಲೋಕ ರಾಜ್ಯೊಗಾದ್ ತನ್ಕುಲೆನ್ ತನ್ಕುಲೇ ಶಿಕಂಡಿಲಾದ್ ಮಲ್ತೊಂಡಿನಾಕುಲು ಕೆಲೆವೆರ್ ಉಲ್ಲೆರ್. ಅಂಗೀಕಾರ ಮಲ್ಪುನಾಯೆ ಅಂಗೀಕಾರ ಮಲ್ಪಡ್,” ಅಂದ್‌ದ್ ಪಂಡೆ.</verse>
				<verse number="13">ಅಪಗ ಕೆಲೆವೆರ್ ತನ್ಕುಲೆ ಎಲ್ಯ ಜೋಕುಲೆನ್ ಯೇಸುನ ಕೈತಲ್‌ ಕನತ್‌ದ್ ಆಯೆ ಅಕ್ಲೆ ಮಿತ್ತ್ ಕೈ ದೀದ್ ಪ್ರಾರ್ಥನೆ ಮಲ್ಪೊಡಂದ್ ಕೇಂಡಿನಪಗ ಶಿಷ್ಯೆರ್ ಅಕ್ಲೆನ್ ದಟ್ಟಿಯೆರ್.</verse>
				<verse number="14">ಯೇಸು ಅಕ್ಲೆಡ, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ. ಅಕ್ಲೆಗ್ ಅಡ್ಡಿ ಮಲ್ಪಡೆ. ಪರಲೋಕ ರಾಜ್ಯ ಇಂಚಿತ್ತಿನಾಕುಲೆನವೇ,”</verse>
				<verse number="15">ಬೊಕ್ಕ ಜೋಕುಲೆನ ಮಿತ್ತ್ ಕೈ ದೀದ್ ಆಶೀರ್ವಾದ ಮಲ್ತೆ. ಐಡ್ದ್ ಬೊಕ್ಕ ಅಲ್ತ್‌ಡ್ದ್ ಪಿದಾಡ್ದ್ ಪೋಯೆ.</verse>
				<verse number="16">ಅಪಗ ಒರಿ ಬತ್ತ್‌ದ್ ಆಯಡ, “ಬೋಧಕಾ, ಯಾನ್ ನಿತ್ಯಜೀವೊನು ಪಡೆಯೊಡಾಂಡ ಎಂಚಿನ ಎಡ್ಡೆ ಕಾರ್ಯ ಮಲ್ಪೊಡು,” ಅಂದ್‌ದ್ ಕೇನ್ನಗ</verse>
				<verse number="17">ಐಕ್ ಯೇಸು ಆಯಡ, “ಎಡ್ಡೆಂತಿನೆತ್ತ ಬಗೆಟ್ ಎನಡ ದಾಯೆಗ್ ಕೇನ್ವ? ಎಡ್ಡೆಂತಿನಾಯೆ ಒರಿಯೇ, ಆಂಡ ಆ ನಿತ್ಯಜೀವೊಡು ಸೇರೊಡಾಂಡ ದೇವೆರೆ ಅಪ್ಪಣೆಲೆಗ್ ತಕ್ಕ ನಡತೊನ್ಲ,” ಅಂದ್‌ದ್ ಪಂಡೆ.</verse>
				<verse number="18">ಆಯೆ, “ಅವು ಎಂಚಿನವು,” ಅಂದ್‌ದ್ ಕೇನ್ನಗ ಯೇಸು, “ಮಾನ್ಯ ಕೆರಿಯೆರೆ ಬಲ್ಲಿ, ವ್ಯಭಿಚಾರ ಮಲ್ಪೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ನಿನ ಅಪ್ಪೆಗ್ಲಾ ಅಮ್ಮೆರೆಗ್ಲಾ ಸನ್ಮಾನ ಮಲ್ಪೊಡು.</verse>
				<verse number="19">ಬೊಕ್ಕ ನಿನಲೆಕ್ಕನೇ ನಿನ ನಿರೆತಾಯನ್ ಪ್ರೀತಿ ಮಲ್ಪೊಡು ಪನ್ಪಿನವೇ.”</verse>
				<verse number="20">ಆ ಜವನ್ಯೆ ಆಯಡ, “ಉಂದೆಕ್ಕ್ ಮಾತ ಸರಿಯಾದ್ ನಡತೊಂದೆ; ನನ ಎಂಚಿನ ಕಡಿಮೆ ಆದುಪ್ಪು?” ಅಂದ್‌ದ್ ಕೇನ್ನಗ</verse>
				<verse number="21">ಯೇಸು ಆಯಡ, “ಮಾತಲಾ ಸರಿ ಆವೊಡ್ಡ ಪೋದು ನಿನ ಆಸ್ತಿನ್ ಮಾರ್ದ್ ಬಡವೆರೆಗ್ ಕೊರ್ಲ; ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.</verse>
				<verse number="22">ಆ ಜವನ್ಯಗ್ ಮಸ್ತ್ ಆಸ್ತಿ ಇತ್ತಿನೆಡ್ದ್ ಈ ಪಾತೆರೊನು ಕೇಂಡ್ದ್ ದುಃಖೊಡು ಪಿರ ಪೋಯೆ.</verse>
				<verse number="23">ಅಪಗ ಯೇಸು ತನ ಶಿಷ್ಯೆರೆನ್ ತೂದು, “ನಿಕ್ಲೆಗ್ ನಿಜಾದ್ ಪನ್ಪೆ, ಐಶ್ವರ್ಯವಂತೆ ಪರಲೋಕ ರಾಜ್ಯೊಡು ಸೇರುನವು ಕಷ್ಟ.</verse>
				<verse number="24">ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್ ಒಂಜಿ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ ಅಂದ್‌ದ್ ನಿಕ್ಲೆಗ್ ಕುಡ ಪನ್ಪೆ,” ಪಂಡೆ</verse>
				<verse number="25">ಶಿಷ್ಯೆರ್ ಉಂದೆನ್ ಕೇಂಡ್ದ್ ಅಚ್ಚಿರ ಆದ್, “ಇಂಚಾಂಡ, ಏರೆಗ್ ರಕ್ಷಣೆ ಆವು?” ಅಂದ್‌ದ್ ಕೇನ್ನಗ</verse>
				<verse number="26">ಯೇಸು ಅಕ್ಲೆನ್ ತೂದು, “ಉಂದು ನರಮಾನಿಲೆಗ್ ಅಸಾದ್ಯದವು; ಆಂಡ ದೇವೆರೆಗ್ ಮಾತಲಾ ಸಾದ್ಯನೇ,” ಪಂಡೆ.</verse>
				<verse number="27">ಅಪಗ ಪೇತ್ರೆ ಉತ್ತರ ಕೊರ್ದು ಆಯಡ, “ಇಂದಾ, ಎಂಕುಲು ಮಾತ ಬುಡ್ದು ನಿನ ಬೆರಿಯೆ ಬೈದ; ಎಂಕ್ಲೆಗ್ ಎಂಚಿನ ತಿಕ್ಕುಂಡು?” ಅಂದ್‌ದ್ ಕೇಂಡೆ.</verse>
				<verse number="28">ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ. ಪೊಸ ಸೃಷ್ಟಿಡ್ ನರಮಾನಿ ಮಗೆ ತನ ಮೈಮೆದ ಗದ್ದಿಗೆದ ಮಿತ್ತ್ ಕುಲ್ಲುನಗ ಎನ ಬೆರಿಯೆ ಬರ್ಪಿ ನಿಕುಲುಲಾ ಪದ್ರಾಡ್ ಗದ್ದಿಗೆಡ್ ಕುಲ್ಲೊಂದು ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ನ್ಯಾಯತೀರ್ಪು ಮಲ್ಪುವರ್.</verse>
				<verse number="29">ಬೊಕ್ಕ ಎನ ಪುದರ್‌ಗಾದ್ ಇಲ್ಲ್‌ನಾವಡ್, ಮೆಗ್ಯೆಪಲಯನಾವಡ್, ಮೆಗ್ದಿಪಲಿನಾವಡ್, ಅಪ್ಪೆನಾವಡ್, ಅಮ್ಮೆರೆನಾವಡ್, ಜೋಕುಲೆನಾವಡ್, ಆಸ್ತಿನಾವಡ್ ಬುಡ್ದುಬುಡ್ತಿನಾಕುಲೆಗ್ ನೂದು ತಲಾಂತ್ ಹೆಚ್ಚ್ ತಿಕ್ಕುಂಡು. ಬೊಕ್ಕ ಅಕುಲು ನಿತ್ಯಜೀವೊಗು ಬಾಧ್ಯಸ್ತೆರಾಪೆರ್.</verse>
				<verse number="30">ಆಂಡ ಮಸ್ತ್ ಜನ ಸುರುತ್ತಾಕುಲು ಕಡೆತ್ತಾಕುಲು ಆಪೆರ್; ಕಡೆತ್ತಾಕುಲು ಸುರುತ್ತಾಕುಲು ಆಪೆರ್.”</verse>
			</chapter>
			<chapter number="20">
				<verse number="1">ಅವು ಎಂಚಂದ್ಂಡ, “ಪರಲೋಕ ರಾಜ್ಯ ಒಂಜಿ ಇಲ್ಲದ ಯಜಮಾನಗ್ ಸಮಾದುಂಡು. ಆಯೆ ತನ ದ್ರಾಕ್ಷೆತೋಟೊಗು ಕೂಲಿದಾಕುಲೆನ್ ನಾಡಿಯೆರೆ ಪುಲ್ಯಕಾಂಡೆ ಪಿದಾಡುವೆ.</verse>
				<verse number="2">ಕೂಲಿದಾಕುಲೆಗ್ ದಿನೊಕು ಒಂಜಿ ಬೊಳ್ಳಿದ ಪಾವೊಲಿಗ್ ಕೂಲಿ ನಿಗಂಟ್ ಮಲ್ತ್‌ದ್ ಅಕ್ಲೆನ್ ದ್ರಾಕ್ಷೆತೋಟೊಗು ಕಡಪುಡಿಯೆ.</verse>
				<verse number="3">ಐಡ್ದ್ ಬೊಕ್ಕ ಹೆಚ್ಚಿಕಡಿಮೆ ಒಂರ್ಬ ಗಂಟೆಗ್ ಪೋದು ಪೇಂಟೆಡ್ ಪೊಕ್ಕಡೆ ಉಂತುದಿತ್ತಿ ನನ ಕೆಲೆವೆರೆನ್ ತೂದು,</verse>
				<verse number="4">‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ; ನಿಕ್ಲೆಗ್ ಸರಿಯಾಯಿನ ಕೂಲಿ ಕೊರ್ಪೆ,’ ಪಂಡಿನಪಗ</verse>
				<verse number="5">ಅಕುಲು ತೋಟೊಗು ಪೋಯೆರ್. ಆಯೆ ಕುಡ ಹೆಚ್ಚಿಕಡಿಮೆ ಪದ್ರಾಡ್ ಗಂಟೆಗ್ ಬೊಕ್ಕ ಮೂಜಿ ಗಂಟೆಗ್ ಪೋದು ಅವ್ವೇ ರೀತಿ ಮಲ್ತೆ.</verse>
				<verse number="6">ಕುಡ ಹೆಚ್ಚಿಕಡಿಮೆ ಬೈಯಡ್ ಐನ್ ಗಂಟೆಗ್ ಪೋದು ಬೇತೆ ಕೆಲೆವೆರ್ ಉಂತುದುಪ್ಪುನೆನ್ ತೂದು ಅಕ್ಲೆಡ, ‘ದಿನ ಇಡೀ ಮುಲ್ಪ ಪೊಕ್ಕಡೆ ದಾಯೆ ಉಂತುದರ್?’ ಅಂದ್‌ದ್ ಕೇಂಡಿನಪಗ</verse>
				<verse number="7">ಅಕುಲು, ‘ಏರ್ಲಾ ಎಂಕ್ಲೆನ್ ಕೂಲಿಗ್ ಲೆತ್ತ್‌ಜೆರ್,’ ಪಂಡಿನಪಗ ಆಯೆ, ‘ನಿಕುಲುಲಾ ಎನ ದ್ರಾಕ್ಷೆತೋಟೊಗು ಪೋಲೆ,’ ಪಂಡೆ.</verse>
				<verse number="8">“ಬೈಯದ ಪೊರ್ತುಡು ದ್ರಾಕ್ಷೆತೋಟದ ಯಜಮಾನೆ ತನ ಪಾರುಪತ್ತೆದಾಯಗ್, ‘ಆ ಕೂಲಿದಾಕುಲೆನ್ ಲೆತ್ತ್‌ದ್ ಕಡೆಕ್ಕ್ ಬೈದಿನಾಕುಲೆನ್ ಪತ್ತ್‌ದ್ ದುಂಬು ಕೆಲಸೊಗು ಬೈದಿನಾಕುಲೆ ಮುಟ್ಟ ಕೂಲಿ ಕೊರ್ಲ,’ ಅಂದ್‌ದ್ ಪಂಡೆ.</verse>
				<verse number="9">ಅಪಗ ಬೈಯಡ್ ಐನ್ ಗಂಟೆಗ್ ಬತ್ತಿನಾಕುಲೆಗ್ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್.</verse>
				<verse number="10">ಬೊಕ್ಕ ದುಂಬತ್ತ ಬೈದಿನಾಕುಲು ತನ್ಕುಲೆಗ್ ಹೆಚ್ಚ್ ತಿಕ್ಕು ಅಂದ್‌ದ್ ಎನ್ನಿಯೆರ್, ಆಂಡ ಮೊಕ್ಲೆಗ್ಲಾ ಒಂಜೊಂಜಿ ಬೊಳ್ಳಿದ ಪಾವೊಲಿ ತಿಕ್ಕ್ಂಡ್.</verse>
				<verse number="11">ಅವೆನ್ ದೆತ್ತೊಂದು ಇಲ್ಲದ ಯಜಮಾನನ ಮಿತ್ತ್ ಗುಣುಗುಟ್ಟುದು,</verse>
				<verse number="12">‘ಕಡೆಕ್ಕ್ ಬೈದಿ ಮೊಕುಲು ಒಂಜಿ ತಾಸ್ ಮಾತ್ರ ಬೇಲೆ ಮಲ್ತ್‌ದೆರ್. ಎಂಕುಲು ಇಡೀ ದಿನ ಕಷ್ಟ ಬತ್ತ್‌ದ್ ಆ ದೊಂಬುದ ಪೆಟ್ಟ್ ತಿಂದ್‌ದ್ ಬೇಲೆ ಮಲ್ತ್‌ದ ಎಂಕ್ಲೆನ್ ಅಕ್ಲೆಗ್ ಸಮ ಮಲ್ತ್‌ದನಾ?’ ಪಂಡ್ದ್ ಪಂಡೆರ್.</verse>
				<verse number="13">ಐಕ್ ಆಯೆ ಅಕ್ಲೆಡ್ ಒರಿಯಗ್, ‘ದಾನೆಪ್ಪಾ, ಯಾನ್ ನಿಕ್ಕ್ ಅನ್ಯಾಯ ಮಲ್ತ್‌ಜಿ. ಈ ಎನಡೊಪ್ಪ ಒಂಜಿ ಬೊಳ್ಳಿದ ಪಾವೊಲಿಗ್ ನಿಗಂಟ್ ಮಲ್ತೊಂಡತ್ತಾ?</verse>
				<verse number="14">ನಿನ ಕೂಲಿ ದೆತ್ತೊಂದು ಪೋಲ. ನಿಕ್ಕ್ ಕೊರಿ ಲೆಕ್ಕ ಕಡೆಕ್ಕ್ ಬೈದಿನ ಇಂಬ್ಯಗ್ಲಾ ಕೊರಿಯೆರೆ ಎಂಕ್ ಮನಸುಂಡು.</verse>
				<verse number="15">ಎನ ಬದ್‌ಕ್‌ನ್ ಎಂಕ್ ಬೋಡಾಯಿನಂಚ ಮಲ್ಪೆರೆ ಎಂಕ್ ಹಕ್ಕ್ ಉಂಡತ್ತಾ? ಯಾನ್ ಉದಾರ ಮನಸ್ ಮಲ್ತಿನೆಕ್ಕ್ ನಿಕ್ಕ್ ನಂಜಿ ಆಪುಂಡಾ?’ ಅಂದ್‌ದ್ ಪಂಡೆ.</verse>
				<verse number="16">ಈ ಪ್ರಕಾರೊಡು ಕಡೆತ್ತಾಕುಲು ಸುರುತ್ತಾಕುಲು ಆಪೆರ್, ಸುರುತ್ತಾಕುಲು ಕಡೆತ್ತಾಕುಲು ಆಪೆರ್,” ಅಂದ್‌ದ್ ಪಂಡೆ.</verse>
				<verse number="17">ಯೇಸು ಯೆರೂಸಲೇಮುಗು ಪೋವೊಂದುಪ್ಪುನಗ ಪದ್ರಾಡ್ ಶಿಷ್ಯೆರೆನ್ ಒಟ್ಟುಗು ಲೆತ್ತೊಂದು ಸಾದಿಡ್ ಅಕ್ಲೆಡ</verse>
				<verse number="18">ತೂಲೆ, “ನಮ ಯೆರೂಸಲೇಮುಗು ಪೋವೊಂದುಲ್ಲ. ನರಮಾನಿ ಮಗನ್ ಪ್ರಧಾನಯಾಜಕೆರೆ ಬೊಕ್ಕ ಶಾಸ್ತ್ರಿಲೆನ ಕೈಕ್ ಪತ್ತ್‌ದ್ ಕೊರುವೆರ್. ಆಯಗ್‌ ಮರಣ ದಂಡನೆ ಆವು.</verse>
				<verse number="19">ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಆಯಗ್ ಗೇಲಿ ಮಲ್ತ್‌ದ್ ಚಾಟಿಡ್ ಹಾಕ್‌ದ್ ಕ್ರುಸ್ಸುಗು ಪಾಡ್ವೆರ್, ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.” ಅಂದ್‌ದ್ ಪಂಡೆ.</verse>
				<verse number="20">ಅಪಗ ಜೆಬೆದಾಯನ ಜೋಕುಲೆನ ಅಪ್ಪೆ ಆಯಡ್ದ್ ದಾದನ ಕೇನೊಡಂದ್ ತನ ಜೋಕುಲೆನ್ ಲೆತ್ತೊಂದು ಬತ್ತ್‌ದ್ ಆಯಗ್ ಅಡ್ಡಬೂರ್ಯಲ್.</verse>
				<verse number="21">ಆಯೆ ಆಲೆಡ, “ನಿಕ್ಕ್ ದಾದ ಬೋಡಮ್ಮಾ,” ಅಂದ್‌ದ್ ಕೇನ್ನಗ ಆಲ್, “ನಿನ ರಾಜ್ಯೊಡು ಈ ಎನ ರಡ್ಡ್ ಜೋಕುಲೆಡ್ ಒರಿ ನಿನ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿ ನಿನ ದತ್ತ ಮರ್ಗಿಲ್‌ಡ್ ಕುಲ್ಲುಲೆಕ್ಕ ಅಪ್ಪಣೆ ಕೊರೊಡು,” ಪಂಡಲ್.</verse>
				<verse number="22">ಐಕ್ ಯೇಸು, “ನಿಕುಲು ನಟ್ಟೊಂಡಿನವು ದಾನೆಂದ್ ನಿಕ್ಲೆಗ್ ತೆರಿಯಂದ್. ಎನ ಕಷ್ಟೊಡು ಪಾಲ್‌ದಾರೆರಾವೆರೆ ನಿಕ್ಲೆಗ್ ಸಾದ್ಯನಾ?” ಅಂದ್‌ದ್ ಕೇನ್ನಗ ಅಕುಲು, “ಎಂಕ್ಲೆಡ್ದ್ ಆವು,” ಪಂಡೆರ್.</verse>
				<verse number="23">ಅಪಗ ಆಯೆ ಅಕ್ಲೆಡ, “ಎನ ಕಷ್ಟೊಡು ನಿಕುಲು ಪಾಲ್‌ದಾರೆರ್ ಆವರ್ ಸರಿ. ಆಂಡ ಎನ ಬಲತ್ತ ಮರ್ಗಿಲ್ಡಾವಡ್ ದತ್ತ ಮರ್ಗಿಲ್ಡಾವಡ್ ಕುಲ್ಲಾವುನ ಎನ ಬೇಲೆ ಅತ್ತ್. ಎನ ಅಮ್ಮೆರೆಡ್ದ್ ಅವು ಏರೆಗ್ ತಯಾರ್ ಮಲ್ತ್‌ದುಂಡಾ ಅಕ್ಲೆಗ್ ತಿಕ್ಕುಂಡು,” ಅಂದ್‌ದ್ ಪಂಡೆ.</verse>
				<verse number="24">ಒರಿದಿ ಪತ್ತ್ ಶಿಷ್ಯೆರ್ ಉಂದೆನ್ ಕೇಂಡ್ದ್ ಆ ಇರ್ವೆರ್ ಮೆಗ್ಯೆಪಲಯಾಡ್ಲೆ ಮಿತ್ತ್ ಕೋಪ ಮಲ್ತೆರ್.</verse>
				<verse number="25">ಆಂಡ ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, “ಪಿದಯಿದ ಜನೊಕುಲೆನ್ ಆಳುನಾಕುಲು ಅಕ್ಲೆನ ಮಿತ್ತ್ ಅಹಂಕಾರೊಡು ಅಧಿಕಾರ ನಡಪಾವೆರ್ ಬೊಕ್ಕ ಮಲ್ಲಾಕುಲು ಬಲತ್ಕಾರೊಡ್ದು ಅಧಿಕಾರ ನಡಪಾವೆರ್ ಅಂದ್‌ದ್ ನಿಕುಲು ತೆರಿದರತ್ತಾ?</verse>
				<verse number="26">ಆಂಡ ನಿಕ್ಲೆಡ್ ಅಂಚ ಉಪ್ಪೆರೆ ಬಲ್ಲಿ. ನಿಕ್ಲೆಡ್ ಮಲ್ಲಾಯೆ ಆವೊಡುಂದು ಉಪ್ಪುನಾಯೆ ಚಾಕ್ರಿದಾಯೆ ಆದುಪ್ಪೊಡು.</verse>
				<verse number="27">ಆಂಡ ನಿಕ್ಲೆಡ್ ಸುರುತ್ತಾಯೆ ಆವೊಡು ಇನ್ಪಿನಾಯೆ ನಿಕ್ಲೆ ಅಡಿಯಾಳ್ ಆದುಪ್ಪೊಡು.</verse>
				<verse number="28">ಅಂಚೆನೆ ನರಮಾನಿ ಮಗೆಲಾ ಚಾಕ್ರಿ ಮಲ್ಪಾವೊನ್ರೆ ಅತ್ತ್, ಚಾಕ್ರಿ ಮಲ್ಪೆರೆಲಾ ತನ ಪ್ರಾಣೊನು ಮಸ್ತ್ ಜನೊಕುಲೆನ ಬುಡುಗಡೆಗಾದ್ ಕೊರಿಯೆರೆ ಬತ್ತೆ.” ಅಂದ್‌ದ್ ಪಂಡೆ.</verse>
				<verse number="29">ಅಕುಲು ಯೆರಿಕೊಗು ಪಿದಾಡ್ದ್ ಪೋವೊಂದುಪ್ಪುನಪಗ ಜನೊಕುಲೆ ಮಲ್ಲ ಗುಂಪು ಆಯನ ಬೆರಿಯೆ ಪೋಂಡು.</verse>
				<verse number="30">ಅಪಗ ಸಾದಿದ ಬರಿಟ್ಟ್ ಕುಲ್ಲೊಂದಿತ್ತಿ ಇರ್ವೆರ್ ಕುರುಡೆರ್, ಯೇಸು ಆ ಸಾದಿಡ್ ಪೋವೊಂದುಲ್ಲೆ ಅಂದ್‌ದ್ ತೆರಿದ್, “ಕರ್ತವಾ, ದಾವೀದ್ ಮಗಾ! ಎಂಕ್ಲೆನ್ ಕರುಣೆ ಮಲ್ಪುಲ!” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="31">ಆ ಗುಂಪುದಾಕುಲು, “ಮನಿಪಂದೆ ಉಪ್ಪುಲೆ!” ಅಂದ್‌ದ್ ಅಕ್ಲೆನ್ ದಟ್ಟಿನಗ ಅಕುಲು, “ದಾವೀದ ಮಗಾ, ಎಂಕ್ಲೆಗ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆರ್.</verse>
				<verse number="32">ಅಪಗ ಯೇಸು ಉಂತುದು ಅಕ್ಲೆನ್ ಲೆತ್ತ್‌ದ್, “ಯಾನ್ ನಿಕ್ಲೆಗ್ ದಾದ ಮಲ್ಪೊಡಂದ್‌ದ್ ಬಯಕುವರ್,” ಅಂದ್‌ದ್ ಕೇನ್ನಗ</verse>
				<verse number="33">ಅಕುಲು, “ಕರ್ತವಾ, ಎಂಕುಲೆ ಕಣ್ಣ್ ಜಪ್ಪುಲೆಕ್ಕ ಮಲ್ಪುಲ,” ಪಂಡೆರ್.</verse>
				<verse number="34">ಯೇಸು ಕನಿಕರ ಪಡೆದ್ ಅಕ್ಲೆನ ಕಣ್ಣ್‌ಲೆನ್ ಮುಟ್ಟಿಯೆ. ಅಪಗನೆ ಅಕ್ಲೆಗ್ ಕಣ್ಣ್ ತೋಜ್ಂಡ್. ಅಕುಲು ಆಯ ಬೆರಿಯೆ ಪೋಯೆರ್.</verse>
			</chapter>
			<chapter number="21">
				<verse number="1">ಅಕುಲು ಯೆರೂಸಲೇಮುಗು ಕೈತಲಾನಗ ಇಪ್ಪೆಗುಡ್ಡೆದ ಕೈತಲಿತ್ತಿ ಬೇತ್ಫಗೆಗ್ ಬತ್ತೆರ್. ಅಪಗ ಯೇಸು ತನ ರಡ್ಡ್ ಶಿಷ್ಯೆರೆನ್ ಲೆತ್ತ್‌ದ್,</verse>
				<verse number="2">“ನಿಕ್ಲೆ ಎದುರುಡುಪ್ಪು ಹಳ್ಳಿಗ್ ಪೋಲೆ. ಐತ ಉಲಯಿ ಪೋಯಿ ಕೂಡ್ಲೆ, ಅಲ್ಪ ಕಟ್ಟ್‌ದುಪ್ಪು ಕತ್ತೆನ್ಲಾ ಐತ ಒಟ್ಟುಡುಪ್ಪು ಕಿನ್ನಿನ್ಲಾ ತೂಪರ್, ಅವೆನ್ ಗಿರ್ತ್‌ದ್ ಎನ ಕೈತಲ್‌ ಕನಲೆ.</verse>
				<verse number="3">ಏರಾಂಡಲಾ ನಿಕ್ಲೆಗ್ ಎಂಚಿನಾಂಡಲಾ ಪಂಡೆರ್ಡ, ‘ಉಂದು ಸ್ವಾಮಿಗ್ ಬೋಡಾತ್ಂಡ್,’ ಅಪಗನೇ ಅವೆನ್ ಬುಡ್ದು ಕೊರುವೆ,” ಪಂಡ್ದ್ ಕಡಪುಡಿಯೆ.</verse>
				<verse number="4">ಒರಿ ಪ್ರವಾದಿಡ್ದ್ ಪನ್ಪಾಯಿ ಪಾತೆರ ನಡಪುಲೆಕ್ಕ ಉಂದು ಆಂಡ್. ಅವು ದಾನೆಂದ್ಂಡ,</verse>
				<verse number="5">“‘ಚೀಯೋನು ಮಗಲೇ, ತೂಲ, ನಿನ ಅರಸು ನಿನ ಕೈತಲ್‌ ಬರ್ಪೆ, ಆಯೆ ಶಾಂತ ಗುಣತಾಯೆ ಆದ್, ಕತ್ತೆನ್ ಅಂದ್, ಪ್ರಾಯದ ಕತ್ತೆದ ಕಿನ್ನಿದ ಮಿತ್ತ್ ಕುಲ್ಲೊಂದು ಬರ್ಪೆ,’ ಅಂದ್‌ದ್ ಪನ್ಲೆ,” ಪನ್ಪಿನವು.</verse>
				<verse number="6">ಅಪಗ ಶಿಷ್ಯೆರ್ ಪೋದು ಯೇಸು ಅಪ್ಪಣೆ ಕೊರಿಲೆಕ್ಕನೇ</verse>
				<verse number="7">ಕತ್ತೆನ್ಲಾ ಐತ ಕಿನ್ನಿನ್ಲಾ ಕನತ್‌ದ್ ತನ್ಕುಲೆ ಕುಂಟುಲೆನ್ ಐತ ಮಿತ್ತ್ ಪಾಡಿ ಬೊಕ್ಕ ಯೇಸು ಐತ ಮಿತ್ತ್ ಕುಲ್ಲಿಯೆ.</verse>
				<verse number="8">ಅಪಗ ಜನೊಕುಲೆ ಗುಂಪುಡು ಮಸ್ತ್ ಜನ ತನ್ಕುಲೆ ಕುಂಟುಲೆನ್ ಸಾದಿಡ್ ಬುಡ್ಪಾಯೆರ್. ಬೇತೆ ಕೆಲೆವೆರ್ ಮರತ ಕೊಡಿಕ್ಕ್‌ಲೆನ್ ಪೊಲ್ತುದು ಸಾದಿಡ್ ಪಾಡೊಂದಿತ್ತೆರ್.</verse>
				<verse number="9">ಆಯನ ಪಿರವುಡ್ಲಾ ದುಂಬುಡ್ಲಾ ಗುಂಪಾದ್ ಪೋವೊಂದಿತ್ತಿ ಜನೊಕುಲು, “ದಾವೀದನ ಮಗಕ್ಕ್ ಹೊಸನ್ನಾ! ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ, ಮಿತ್ತ್‌ದ ಲೋಕೊಡು ಹೊಸನ್ನಾ!” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="10">ಆಯೆ ಯೆರೂಸಲೇಮುಗು ಸೇರಿನಪಗ ಇಡೀ ಪಟ್ಟಣದಾಕುಲು ಬಾರಿ ಗದ್ದಲೊಡು “ಉಂಬೆ ಏರ್?” ಅಂದ್‌ದ್ ಕೇಂಡೆರ್.</verse>
				<verse number="11">ಐಕ್ ಆ ಜನೊಕುಲೆ ಗುಂಪುದಾಕುಲು, “ಉಂಬೆ ಪ್ರವಾದಿ, ಗಲಿಲಾಯದ ನಜರೇತ್‌ದ ಯೇಸು,” ಪಂಡೆರ್.</verse>
				<verse number="12">ಐಡ್ದ್ ಬೊಕ್ಕ ಯೇಸು ದೇವಾಲಯೊಗು ಪೋದು, ಅಲ್ಪ ಮಾರುನ, ದೆತ್ತೊನುನ ಮಾತೆರೆನ್ಲಾ ಗಿಡ್ತ್‌ದ್, ಕಾಸ್ ಬದಲಿ ಮಲ್ಪುನಾಕುಲೆನ ಮೇಜಿಲೆನ್ಲಾ, ಪುದ ಮಾರುನಾಕುಲೆನ ಮಣೆಕ್ಲೆನ್ಲಾ ಮರತ್ ಪಾಡಿಯೆ.</verse>
				<verse number="13">ಅಕ್ಲೆಗ್, “‘ಎನ ಇಲ್ಲ್ ಪ್ರಾರ್ಥನೆದ ಇಲ್ಲ್ ಆದುಂಡು,’ ಅಂದ್‌ದ್ ಬರೆತ್ಂಡ್. ಆಂಡ ನಿಕುಲು ಅವೆನ್ ಕಲ್ವೆರೆ ಮಾಟೆ ಮಲ್ತ್‌ದರ್,” ಅಂದ್‌ದ್ ಪಂಡೆ.</verse>
				<verse number="14">ಅಪಗ ಕುರುಡೆರ್ಲಾ, ಕುಂಟೆರ್‌ಲಾ ದೇವಾಲಯೊಡು ಆಯನ ಕೈತಲ್‌ ಬತ್ತಿನಪಗ ಅಕ್ಲೆನ್ ಗುಣ ಮಲ್ತೆ.</verse>
				<verse number="15">ಆಂಡ ಪ್ರಧಾನಯಾಜಕೆರ್‌ಲಾ, ಶಾಸ್ತ್ರಿಲುಲಾ ಆಯೆ ಮಲ್ತಿನ ಕಾರ್ನಿಕೊಲೆನ್ಲಾ ದಾವೀದನ ಮಗಕ್ಕ್ ಹೊಸನ್ನಾ ಪಂಡ್ದ್ ದೇವಾಲಯೊಡು ಬೊಬ್ಬೆ ದೀವೊಂದುಪ್ಪುನ ಜೋಕುಲೆನ್ಲಾ ತೂದು ಕೋಪ ಮಲ್ತೆರ್.</verse>
				<verse number="16">ಐಕ್ ಆಯಡ, “ಮೊಕುಲು ಪನ್ಪಿನೆನ್ ಕೇನೊಂದುಲ್ಲನಾ?” ಅಂದ್‌ದ್ ಪನ್ನಗ ಯೇಸು, “ಅಂದ್ ಕೇನೊಂದುಲ್ಲೆ, ‘ಎಲ್ಯ ಜೋಕುಲೆ ಬಾಯಿಡ್ದ್‌ಲಾ, ಮಿರೆತಿನ್ಪಿ ಬಾಲೆಲೆ ಬಾಯಿಡ್ದ್‌ಲಾ ಪುಗರಿಕೆ ಮಲ್ತೊಂಡ,’ ಇನ್ಪಿನೆನ್ ಶಾಸ್ತ್ರೊಡು ನಿಕುಲು ಏಪಾಂಡಲಾ ಓದುದುಜರಾ?” ಪಂಡೆ.</verse>
				<verse number="17">ಐಡ್ದ್ ಬೊಕ್ಕ ಅಕ್ಲೆನ್ ಬುಡ್ದು ಪಟ್ಟಣಡ್ದ್ ಪಿದಾಡ್ದ್ ಬೇಥಾನ್ಯೊಗು ಬತ್ತ್‌ದ್ ರಾತ್ರೆ ಅಲ್ಪ ಇತ್ತೆ.</verse>
				<verse number="18">ಮನದಾನಿ ಆಯೆ ಬೆಥ್ಯಾನ ಬುಡ್ದು ಬನ್ನಗ ಆಯಗ್ ಬಡವು ಆಂಡ್.</verse>
				<verse number="19">ಸಾದಿಡ್ ಒಂಜಿ ಅಂಜೂರದ ಮರೊನು ತೂದು ಐತ ಕೈತಲ್‌ ಪೋದು ತನ್ಕ್ ತಿನಿಯೆರೆ ಅಂಜೂರದ ಪರ್ಂದ್ ತಿಕ್ಕು ಪಂಡ್ದ್ ಮರತ ಕೈತಲ್‌ ಬತ್ತ್‌ದ್ ತೂನಗ ಐಟ್ಟ್ ಬಜೀ ಇರೆ ಅತ್ತಂದೆ ದಾಲಾ ತೋಜಿಜಿ. ಅಪಗ ಐಕ್, “ನನ ಮಿತ್ತ್ ಏಪೊಗ್ಲಾ ನಿನಡ್ ಫಲ ಆವಂದೆನೇ ಪೋವಡ್!” ಅಂದ್‌ದ್ ಪಂಡಿ ಕೂಡ್ಲೆ ಆ ಮರ ನುಂಗುದು ಪೋಂಡು.</verse>
				<verse number="20">ಶಿಷ್ಯೆರ್ ಅವೆನ್ ತೂದು ಅಚ್ಚಿರ ಆದ್‌, “ಈ ಅಂಜೂರದ ಮರ ಎಂಚ ಪಕ್ಕನೆ ನುಂಗುದು ಪೋಂಡು?” ಪಂಡೆರ್.</verse>
				<verse number="21">ಐಕ್ ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಸಂಶಯ ಮಲ್ಪಂದೆ ನಂಬಿಯರ್ಡ ಯಾನ್ ಅಂಜೂರದ ಮರೊಕು ಮಲ್ತಿನೆನ್ ನಿಕುಲುಲಾ ಮಲ್ಪುವರ್. ಉಂದು ಮಾತ್ರ ಅತ್ತಂದೆ ಈ ಗುಡ್ಡೆಡ, ‘ಈ ಲಕ್ಕ್‌ದ್ ಪೋದು ಕಡಲ್ಡ್ ಬೂರು,’ ಅಂದ್‌ದ್ ಪಂಡರ್ಡ ಅವುಲಾ ಆಪುಂಡು.</verse>
				<verse number="22">ನಿಕುಲು ನಂಬೊಂದು ಪ್ರಾರ್ಥನೆಡ್ ಎಂಚೆಂಚಿನೆನ್ ನಟ್ಟೊನುವರಾ ಅವು ಮಾತಲಾ ನಿಕ್ಲೆಗ್ ತಿಕ್ಕುಂಡು.”</verse>
				<verse number="23">ಬೊಕ್ಕ ಆಯೆ ದೇವಾಲಯೊಗು ಬತ್ತ್‌ದ್ ಬೋಧನೆ ಮಲ್ತೊಂದುಪ್ಪುನಗ ಪ್ರಧಾನಯಾಜಕೆರ್‌ಲಾ, ಪ್ರಜೆಕುಲೆ ಹಿರಿಯೆರ್‌ಲಾ ಆಯ ಕೈತಲ್‌ ಬತ್ತ್‌ದ್, “ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="24">ಯೇಸು ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಯಾನ್ಲಾ ನಿಕ್ಲೆಡ ಒಂಜಿ ಪಾತೆರ ಕೇನ್ವೆ. ಅವೆನ್ ನಿಕುಲು ಎಂಕ್ ಪಂಡರ್ಡ ಯಾನ್ಲಾ ವಾ ಅಧಿಕಾರೊಡು ಉಂದೆನ್ ಮಲ್ಪುವೆ ಪನ್ಪಿನೆನ್ ನಿಕ್ಲೆಗ್ ಪನ್ಪೆ.</verse>
				<verse number="25">ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಒಲ್ತುಡ್ದು ಬತ್ತ್ಂಡ್? ಪರಲೋಕೊಡ್ದಾ, ನರಮಾನಿಲೆಡ್ದಾ?” ಅಂದ್‌ದ್ ಅಕ್ಲೆಡ ಕೇಂಡೆ. ಅಪಗ ಅಕುಲು, “‘ಪರಲೋಕೊಡ್ದು,’ ಅಂದ್‌ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್?’ ಅಂದ್‌ದ್ ನಮಡ ಕೇನೆ.</verse>
				<verse number="26">‘ನರಮಾನಿಲೆಡ್ದ್ ಬೈದ್‌ಂಡ್ ಅಂದ್‌ದ್’ ಪಂಡ್ಂಡ, ಎಂಕ್ಲೆಗ್ ಜನೊಕುಲೆ ಪೋಡಿಗೆ ಉಂಡು. ಯೋಹಾನನ್ ಪ್ರವಾದಿ ಅಂದ್‌ದ್ ಮಾತೆರ್ಲಾ ಎನ್ನುವೆರತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="27">ಕಡೆಕ್ಕ್ ಅಕುಲು, “ಎಂಕ್ಲೆಗ್ ಗೊತ್ತಿಜ್ಜಿ,” ಅಂದ್‌ದ್ ಯೇಸುಗು ಉತ್ತರ ಕೊರಿಯೆರ್. ಅಪಗ ಆಯೆ ಅಕ್ಲೆಗ್, “ವಾ ಅಧಿಕಾರೊಡು ಉಂದೆನ್ ಮಾತೆನ್ಲಾ ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ.”</verse>
				<verse number="28">“ಆಂಡ ನಿಕ್ಲೆಗ್ ಎಂಚ ತೋಜುಂಡು? ಒರಿ ನರಮಾನಿಗ್ ರಡ್ಡ್ ಜೋಕುಲಿತ್ತೆರ್. ಆಯೆ ಸುರುತ್ತಾಯನ ಕೈತಲ್‌ ಬತ್ತ್‌ದ್, ‘ಮಗಾ, ಪೋದು ಇನಿ ದ್ರಾಕ್ಷೆತೋಟೊಡು ಬೇಲೆ ಮಲ್ಪು,’ ಪಂಡಿನಪಗ</verse>
				<verse number="29">ಆಯೆ, ‘ಯಾನ್ ಪೋಪುಜಿ,’ ಅಂದ್‌ದ್ ಪಂಡೆಡಲಾ ಬೊಕ್ಕ ಪಶ್ಚಾತಾಪ ಪಡೆದ್ ತೋಟೊಗು ಪೋಯೆ.</verse>
				<verse number="30">ಬೊಕ್ಕ ರಡ್ಡನೆದಾಯನ ಕೈತಲ್‌ ಬತ್ತ್‌ದ್ ಅವ್ವೇ ಪಾತೆರೊನು ಪಂಡಿನಪಗ ಆಯೆ, ‘ಯಾನ್ ಪೋಪೆ ಅಪ್ಪಾ,’ ಪಂಡೆಡಲಾ ಪೋಯಿನೇ ಇಜ್ಜಿ.</verse>
				<verse number="31">ಅಕ್ಲೆಡ್ ಇರ್ವೆರೆಡ್ ಅಮ್ಮೆರೆ ಚಿತ್ತದ ಲೆಕ್ಕ ನಡತಿನಾಯೆ ಏರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಸುರುತ್ತಾಯೆನೇ,” ಪಂಡೆರ್. ಅಪಗ ಯೇಸು ಅಕ್ಲೆಡ, “ಸುಂಕದಾಕುಲುಲಾ, ಸೂಳೆಲುಲಾ ನಿಕ್ಲೆಡ್ದ್ ದುಂಬು ದೇವೆರೆ ರಾಜ್ಯೊನು ಸೇರುವೆರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="32">ಯೋಹಾನೆ ನಿಕ್ಲೆಗ್ ನೀತಿದ ಮಾರ್ಗ ತೋಜಪಾಯೆರೆ ನಿಕ್ಲೆ ಕೈತಲ್‌ ಬತ್ತೆ. ನಿಕುಲು ಆಯನ್ ನಂಬಿಜರ್. ಆಂಡ ಸುಂಕದಾಕುಲುಲಾ, ಸೂಳೆಲುಲಾ ಆಯನ್ ನಂಬಿಯೆರ್. ನಿಕುಲು ಉಂದೆನ್ ತೂಯರ್ಡಲಾ ಪಶ್ಚಾತಾಪ ಪಡೆಯಿಜರ್, ಆಯನ್ ನಂಬಿಜರ್.”</verse>
				<verse number="33">“ಕುಡೊಂಜಿ ಉಪಕತೆನ್ ಕೇನ್ಲೆ. ಒರಿ ಇಲ್ಲದ ಯಜಮಾನೆ ಇತ್ತೆ. ಆಯೆ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಐತ ಸುತ್ತಲಾ ಬೇಲಿ ಪಾಡ್ಪಾದ್ ನಡುಟು ಗಾಣಲಾ ಮಲ್ಪಾದ್ ಕಾಪುನ ಗೋಪುರ ಒಕ್ಕೆಲ್‌ದಾಕುಲೆಗ್ ಬಾಡಿಗೆಗ್ ಕೊರ್ದು ಬೊಕ್ಕೊಂಜಿ ದೇಶೊಗು ಪೋಯೆ.</verse>
				<verse number="34">ಫಲತ್ತ ಕಾಲ ಕೈತಲ್‌ ಬತ್ತಿನಪಗ ತನ್ಕ್ ಬರೊಡಾಯಿ ದ್ರಾಕ್ಷೆ ಪರ್ಂದ್‌ಲೆನ್ ದೆತ್ತೊಂದು ಬರಿಯೆರೆ ಆ ಒಕ್ಕೆಲ್‌ದಾಕುಲೆ ಕೈತಲ್‌ ತನ ಬೇಲೆದಾಕುಲೆನ್ ಕಡಪುಡಿಯೆ.</verse>
				<verse number="35">ಒಕ್ಕೆಲ್‌ದಾಕುಲು ಬೇಲೆದಾಕುಲೆನ್ ಪತ್ತ್‌ದ್ ಒರಿಯಗ್ ಹಾಕ್‌ದ್. ಒರಿಯನ್ ಕೆರ್ದ್, ಒರಿಯಗ್ ಕಲ್ಲ್ ದಕ್ಕಿಯೆರ್.</verse>
				<verse number="36">ಕುಡ ಸುರುಡ್ದು ಹೆಚ್ಚ್ ಜನ ಬೇಲೆದಾಕುಲೆನ್ ಕಡಪುಡಿಯೆ. ಅಕ್ಲೆಗ್ಲಾ ಅಂಚೆನೇ ಮಲ್ತೆರ್.</verse>
				<verse number="37">ಐಡ್ದ್ ಬೊಕ್ಕ ‘ಎನ ಮಗಕ್ಕಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ತನ ಮಗನ್ ಅಕಲ್ನ ಕೈತಲ್‌ ಕಡಪುಡಿಯೆ.</verse>
				<verse number="38">ಆಂಡ ಆ ಒಕ್ಕೆಲ್‌ದಾಕುಲು ಆಯನ ಮಗನ್ ತೂದು, ‘ಇಂಬೆನೇ ಹಕ್ಕ್‌ದಾಯೆ ಬಲೆ, ಇಂಬ್ಯನ್ ಕೆರ್ದ್ ಪಾಡ್‌ಗ, ಇಂಬ್ಯನ ಸೊತ್ತುನು ನಮನೇ ಒಯಿಸೊನುಗ,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="39">ಬೊಕ್ಕ ಅಕುಲು ಆಯನ್ ಪತ್ತ್‌ದ್ ದ್ರಾಕ್ಷೆತೋಟೊಡ್ದು ಪಿದಯಿ ಪಾಡ್ದ್ ಕೆರಿಯೆರ್.</verse>
				<verse number="40">“ಅಂಚಾಂಡ ಆ ದ್ರಾಕ್ಷೆತೋಟದ ಯಜಮಾನೆ ಬತ್ತಿನಪಗ ಆ ಒಕ್ಕೆಲ್‌ದಾಕುಲೆಗ್ ದಾದ ಮಲ್ಪೆ?” ಪಂಡೆ.</verse>
				<verse number="41">ಅಕುಲು ಆಯಡ, “ಆ ಪಡಿಕೆಂತಿನಾಕುಲೆನ್ ಕಠಿಣ ತರೊಟು ಕೆರ್ದ್ ಪಾಡುವೆ. ಕಾಲೊಗು ಸರಿಯಾದ್ ಫಲೊನು ಕೊರ್ಪಿ ಬೇತೆ ಒಕ್ಕೆಲ್‌ದಾಕುಲೆಗ್ ತನ ತೋಟೊನು ಕೊರುವೆ,” ಅಂದ್‌ದ್ ಪಂಡೆರ್.</verse>
				<verse number="42">ಯೇಸು ಅಕ್ಲೆಡ, “‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲ್‌ ಆಂಡ್. ಉಂದು ಕರ್ತವಡ್ದೇ ಆಂಡ್. ನಂಕ್ ಅಚ್ಚಿರ ಆದ್ ತೋಜುಂಡು, ಪನ್ಪಿ ಪಾತೆರೊನು ನಿಕುಲು ಶಾಸ್ತ್ರೊಡು ಏಪಾಂಡಲಾ ಓದುದಿಜರಾ?’</verse>
				<verse number="43">“ಅಂಚಾಯಿನೆಡ್ದ್ ದೇವೆರೆ ರಾಜ್ಯ ನಿಕ್ಲೆಡ್ದ್ ದೆತ್ತ್ ಪಾಡ್ದ್ ಐತ ಫಲೊಕ್ಲೆನ್ ಕೊರ್ಪಿ ಜನೊಕುಲೆಗ್ ಕೊರ್ಪುಂಡು.</verse>
				<verse number="44">ಈ ಕಲ್ಲ್‌ದ ಮಿತ್ತ್ ಬೂರುನಾಯೆ ತುಂಡು ತುಂಡಾದ್ ಪೋಪೆ. ಉಂದು ಏರೆನ ಮಿತ್ತ್ ಬೂರುಂಡಾ ಆಯನ್ ಪೊಡಿ ಪೊಡಿ ಮಲ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="45">ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ಎಂಕುಲೆಗೇ ಈ ಉಪಕತೆನ್ ಪಂಡೆ ಅಂದ್‌ದ್ ತೆರಿಯೊಂದು,</verse>
				<verse number="46">ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್. ಆಂಡ ಜನೊಕುಲು ಆಯನ್ ಪ್ರವಾದಿ ಅಂದ್‌ದ್ ಎನ್ನೊಂದಿತ್ತಿನೆಡ್ದ್ ಅಕ್ಲೆಗ್ ಪೋಡಿಯೆರ್.</verse>
			</chapter>
			<chapter number="22">
				<verse number="1">ಯೇಸು ಬೋಧನೆ ಮಲ್ತೊಂದು ನನಲಾ ಉಪಕತೆತ್ತ ರೂಪೊಡು ಅಕ್ಲೆಗ್ ಪಂಡಿನಿ ದಾನೆ ಪಂಡ,</verse>
				<verse number="2">“ಪರಲೋಕ ರಾಜ್ಯ ಒಂಜಿ ಮಗಕ್ಕ್ ಮದ್ಮೆದ ಲೇಸ್ ತಯಾರ್ ಮಲ್ತಿ ಅರಸುಗು ಸಮ ಆದುಂಡು.</verse>
				<verse number="3">ಆಯೆ ಮದ್ಮೆದ ಲೇಸ್‌ದ ಲೆಪ್ಪೋಲೆ ಇತ್ತಿನಾಕುಲೆನ್ ಲೆಪ್ಪೆರೆ ತನ ಬೇಲೆದಾಕುಲೆನ್ ಕಡಪುಡಿನಪಗ ಬರಿಯೆರೆ ಅಕ್ಲೆಗ್ ಮನಸಿಜ್ಜಾಂಡ್.</verse>
				<verse number="4">ಕುಡ ಬೇತೆ ಬೇಲೆದಾಕುಲೆನ್ ಲೆತ್ತ್‌ದ್, ‘ನಿಕುಲು ಲೇಸ್‌ಗ್ ಲೆಪ್ಪೋಲೆ ಉಪ್ಪುನಾಕುಲೆ ಕೈತಲ್‌ ಪೋದು ಇಂದಾ, ಅಟಿಲ್ ತಯಾರಾತ್ತ್‌ಂಡ್; ಏಡ್‌ಲೆನ್ಲಾ ಚರ್ಬಿದ ಪ್ರಾಣಿಲೆನ್ಲಾ ಕಡ್ತ್‌ದ್ ಮಾತ ತಯಾರ್ ಆದುಂಡು, ನಿಕುಲು ಮದ್ಮೆದ ಲೇಸ್‌ಗ್ ಬರೊಡು ಪಂಡ್ದ್ ಅಕ್ಲೆಗ್ ಪನ್ಲೆ,’ ಅಂದ್‌ದ್ ಕಡಪುಡಿಯೆ.</verse>
				<verse number="5">ಆಂಡ ಅಕುಲು ಅಲಕ್ಷ ಮಲ್ತ್‌ದ್ ಒರಿ ತನ ಕಂಡೊಗು, ಒರಿ ಆಯನ ಬ್ಯಾರ ತೂಯೆರೆ ಪೋಯೆ.</verse>
				<verse number="6">ಒರಿದಿನಾಕುಲು ಆಯನ ಬೇಲೆದಾಕುಲೆನ್ ಪತ್ತ್‌ದ್ ನೆರ್ದ್ ಕೆರ್ದ್ ಪಾಡ್ಯೆರ್.</verse>
				<verse number="7">ಅರಸು ಕೋಪೊಡು ತನ ಸೈನಿಕೆರೆನ್ ಕಡಪುಡ್ದು ಆ ಮಾನ್ಯ ಕೆರ್ತಿನಾಕುಲೆನ್ ನಾಶ ಮಲ್ತ್‌ದ್ ಅಕ್ಲೆನ ಪೇಂಟೆನ್ ಪೊತ್ತಾದ್ ಪಾಡಿಯೆ.</verse>
				<verse number="8">ಅಪಗ ತನ ಬೇಲೆದಾಕುಲೆಗ್, ‘ಮದ್ಮೆದ ಲೇಸ್ ತಯಾರಾತ್ತ್‌ಂಡ್ ಸರಿ, ಆಂಡ ಲೆಪ್ಪೋಲೆ ಇತ್ತಿನಾಕುಲು ಯೋಗ್ಯದಾಕುಲು ಆದಿತ್ತಿಜೆರ್.</verse>
				<verse number="9">ನಿಕುಲು ಇತ್ತೆ ನಾಲ್ ಸಾದಿ ಕೂಡುನ ಜಾಗ್‌ಗ್ ಪೋದು ತಿಕ್ಕಿನಾಕುಲೆನ್ ಮಾತ ಮದ್ಮೆದ ಲೇಸ್‌ಗ್ ಲೆಪ್ಪುಲೆ,’ ಅಂದ್‌ದ್ ಪಂಡೆ.</verse>
				<verse number="10">ಆ ಬೇಲೆದಾಕುಲು ಸಾದಿಲೆಗ್ ಪೋದು ಪಡಿಕೆಂತಿನಾಕುಲೆನ್ಲಾ, ಎಡ್ಡೆಂತಿನಾಕುಲೆನ್ಲಾ ತಿಕ್ಕಿನಾಕುಲೆನ್ ಒಟ್ಟು ಕೂಡಾದ್ ಲೆತ್ತೊಂದು ಬತ್ತೆರ್. ಇಂಚ ಅಕುಲು ಕೂಡುನಗ ಆ ಮದ್ಮೆದ ಇಲ್ಲ್ ದಿಂಜಿಂಡ್.</verse>
				<verse number="11">ಬೊಕ್ಕ ಅರಸು ಕುಲ್ಲುದಿನಾಕುಲೆನ್ ತೂಯೆರೆ ಉಲಯಿ ಬತ್ತಿನಪಗ ಮದ್ಮೆದ ಅಂಗಿನ್ ಪಾಡಂದಿ ಒರಿಯನ್ ತೂದು,</verse>
				<verse number="12">ಆಯಡ, ‘ದಾನೆಪ್ಪಾ, ಈ ಮದ್ಮೆದ ಅಂಗಿನ್ ಪಾಡಂದೆ ಎಂಚ ಉಲಯಿ ಬತ್ತ?’ ಕೇನ್ನಗ ಮನಿಪಂದೆ ಇತ್ತೆ.</verse>
				<verse number="13">ಅಪಗ ಅರಸು ಬೇಲೆದಾಕುಲೆಡ, ‘ಆಯನ ಕೈಕಾರ್ ಕಟ್ಟ್‌ದ್ ಪಿದಾಯಿ ಕತ್ತಲೆಗ್ ನೂಕುಲೆ, ಅಲ್ಪ ಬೊಬ್ಬೆಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು.’</verse>
				<verse number="14">ಇಂಚ ಲೆಪ್ಪು ಇತ್ತಿನಾಕುಲು ಮಸ್ತ್ ಜನ, ಅಜತ್‌ದಿನಾಕುಲು ಒಂತೆ ಜನ.” ಪಂಡೆ.</verse>
				<verse number="15">ಅಪಗ ಪರಿಸಾಯೆರ್ ಪಿದಾಡ್ದ್ ಆಯನ ಪಾತೆರೊಡು ಆಯನ್ ಎಂಚ ತಿಕ್ಕಾದ್ ಪಾಡುನು ಅಂದ್‌ದ್ ಕೂಡ್ದು ಆಲೋಚನೆ ಮಲ್ತೆರ್.</verse>
				<verse number="16">ಬೊಕ್ಕ ಪರಿಸಾಯೆರ್ ತನ್ಕುಲೆ ಶಿಷ್ಯೆರೆನ್ ಹೆರೋದ್ಯನ ಜನೊಕುಲೆಡೊಪ್ಪ ಯೇಸು ಕೈತಲ್‌ ಕಡಪುಡ್ದು ಮೊಕುಲು ಬತ್ತ್‌ದ್, “ಗುರೂ ಈ ಸತ್ಯವಂತೆ, ದೇವೆರೆ ಮಾರ್ಗೊಲೆನ್ ಸತ್ಯವಾದ್ ಬೋಧನೆ ಮಲ್ಪುನಾಯೆ, ಏರೆಗ್ಲಾ ಪೋಡ್ಯಂದಿನಾಯೆ; ಜನೊಕುಲೆ ಮೋನೆದಾಕ್ಷಿಣ್ಯೊಗು ತಕ್ಕ ಪಾತೆರುನಾಯೆ ಅತ್ತ್ ಅಂದ್‌ದ್ ತೆರಿದ.</verse>
				<verse number="17">ಇಂಚ ಉಪ್ಪುನಗ ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ? ನಿಕ್ಕ್ ಎಂಚ ತೋಜುಂಡು? ಎಂಕ್ಲೆಗ್ ಪನ್ಲ,” ಪಂಡೆರ್.</verse>
				<verse number="18">ಆಂಡ ಯೇಸು ಅಕ್ಲೆನ ಮನಸ್‌ಡಿತ್ತಿನ ಬೊಡ್ಚಾಂದಿ ಆಲೋಚನೆನ್ ತೆರಿಯೊಂದು, “ಕಪಟಿಲೇ, ಎನನ್ ದಾಯೆಗ್ ಪರೀಕ್ಷೆ ಮಲ್ಪುವರ್?”</verse>
				<verse number="19">ತೆರಿಗೆ ಕೊರ್ಪಿನ ಪಾವೊಲಿನ್ ಎಂಕ್ ತೋಜಾಲೆ ಅಂದ್‌ದ್ ಪಂಡೆ. ಅಕುಲು ಆಯಗ್ ಒಂಜಿ ಪಾವೊಲಿನ್ ಕನತ್ ಕೊರಿಯೆರ್.</verse>
				<verse number="20">“ಐಟಿತ್ತಿ ತರೆಲಾ ಮುದ್ರೆಲಾ ಏರೆನವು?” ಅಂದ್‌ದ್ ಕೇಂಡಿನೆಕ್ಕ್,</verse>
				<verse number="21">ಅಕುಲು, “ಕೈಸರನವು,” ಅಂದ್‌ದ್ ಪಂಡೆರ್. “ಅಂಚಾಂಡ ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ.</verse>
				<verse number="22">ಅಕುಲು ಈ ಪಾತೆರೊಲೆನ್ ಕೇಂಡ್ದ್ ಅಚ್ಚಿರ ಆದ್ ಆಯನ್ ಬುಡ್ದು ಪೋಯೆರ್.</verse>
				<verse number="23">ಆನಿಯೆ ಸದ್ದುಕಾಯೆರ್‌ಲಾ ಆಯೆ ಇತ್ತಿನಡೆ ಬತ್ತೆರ್. ಮೊಕುಲು ಸೈತಿನಾಕುಲು ಕುಡೊರ ಲಕ್ಕುನವು ಇಜ್ಜಿ ಪಂಡ್ದ್ ಪನ್ಪಿನಾಕುಲು.</verse>
				<verse number="24">ಮೊಕುಲು ಆಯಡ ಒಂಜಿ ಪ್ರಶ್ನೆ ಮಲ್ತಿನಿ ದಾನೆಂದ್ಂಡ, “ಗುರೂ, ಒರಿ ನರಮಾನಿ ಜೋಕುಲ್‌ದಾಂತೆ ಸೈತ್ ಪೋಯೆಡ, ಆಯನ ಬೊಡೆದಿನ್ ಆಯನ ಮೆಗ್ಯೆ ಮದ್ಮೆ ಮಲ್ತೊಂದು ತನ ಪಲಯಗ್ ಸಂತಾನೊನು ಪಡೆಯೊಡು, ಅಂದ್‌ದ್ ಮೋಶೆ ಪನ್ತೆ.</verse>
				<verse number="25">ಆಂಡ ಇತ್ತೆ ಎಂಕ್ಲೆಡ್ ಏಳ್ವೆರ್ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಮದ್ಮೆ ಆದ್ ಸೈತ್ ಪೋಯೆ, ಆಯಗ್ ಸಂತಾನ ಇಜ್ಜಂದಿನೆಡ್ದಾವರ ಆಯನ ಬೊಡೆದಿನ್ ಆಯನ ಮೆಗ್ಯೆ ಮದ್ಮೆ ಆಯೆ.</verse>
				<verse number="26">ಅಂಚೆನೇ ರಡ್ಡನೆದಾಯೆ, ಮೂಜನೆದಾಯೆ, ಏಳನೆದಾಯೆ ಮುಟ್ಟಲಾ ಆಂಡ್,</verse>
				<verse number="27">ಅಕುಲು ಮಾತ ಸೈತಿ ಬೊಕ್ಕ ಕಡೆಕ್ಕ್ ಆ ಪೊಂಜೊವುಲಾ ಸೈತಲ್.</verse>
				<verse number="28">ಅಂಚಾಂಡ ಪುನರುತ್ಥಾನೊಡು ಆಲ್ ಏಳ್ವೆರೆಡ್ ಏರೆನ ಬೊಡೆದಿಯಾದುಪ್ಪುವಲ್? ಅಕುಲು ಮಾತೆರ್ಲಾ ಆಲೆನ್ ಮದ್ಮೆ ಆದಿತ್ತೆರ್ ಅತ್ತಾ?”</verse>
				<verse number="29">ಐಕ್ ಯೇಸು ಉತ್ತರ ಕೊರ್ದು ಅಕ್ಲೆಡ ಪಂಡಿನಿ, “ಶಾಸ್ತ್ರ ಆವಡ್, ದೇವೆರೆ ಬಲ ಆವಡ್ ನಿಕ್ಲೆಗ್ ತೆರಿಯಂದೆ ತಪ್ಪು ಮಲ್ಪುವರ್.</verse>
				<verse number="30">ಎಂಚಂದ್ಂಡ, ಪುನರುತ್ಥಾನೊಡ್ದು ಬೊಕ್ಕ ಮದ್ಮೆ ಮಲ್ತೊನುಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್, ಪರಲೋಕೊಡಿತ್ತಿನ ದೂತೆರೆ ಲೆಕ್ಕ ಉಪ್ಪುವೆರ್.</verse>
				<verse number="31">ಆಂಡ ಸೈತಿನಾಕುಲೆ ಪುನರುತ್ಥಾನದ ವಿಷಯೊಡು ಎಂಚಿನ ಆಪುಂಡು ಅಂದ್‌ದ್ ನಿಕ್ಲೆಗ್ ದೇವೆರ್ ಪಂತಿನೆನ್ ಓದುದಿಜರಾ?</verse>
				<verse number="32">ಯಾನ್ ಅಬ್ರಹಾಮುನ ದೇವೆರ್, ಇಸಾಕನ ದೇವೆರ್ ಬೊಕ್ಕ ಯಾಕೋಬುನ ದೇವೆರ್ ಆದುಲ್ಲೆ. ಆಯೆ ಬದುಕುನಾಕುಲೆಗ್ ದೇವೆರಾದುಲ್ಲೆ, ಸೈತಿದಿನಾಕುಲೆಗ್ ಅತ್ತ್,” ಅಂದ್‌ದ್ ಪಂಡೆ.</verse>
				<verse number="33">ಕೂಡ್ದಿನ ಗುಂಪು ಈ ಬೋಧನೆನ್ ಕೇಂಡ್ದ್ ಬಾರಿ ಸೋದ್ಯ ಬುಡಿಯೆರ್.</verse>
				<verse number="34">ಆಂಡ ಆಯೆ ಸದ್ದುಕಾಯೆರೆ ಬಾಯಿ ಮುಚ್ಚಿಯೆ ಅಂದ್‌ದ್ ಪರಿಸಾಯೆರ್ ಕೇಂಡ್ದ್ ಒಟ್ಟಾಯೆರ್.</verse>
				<verse number="35">ಒರಿ ನ್ಯಾಯಶಾಸ್ತ್ರಿ ಬೋಧಕೆ ಯೇಸುನು ಪರೀಕ್ಷೆ ಮಲ್ಪೆರೆ ಒಂಜಿ ಪ್ರಶ್ನೆ ಪಾಡುವೆ.</verse>
				<verse number="36">“ಗುರುವೇ, ನ್ಯಾಯಕಟ್ಟ್‌ಡ್ ಮಲ್ಲ ಅಪ್ಪಣೆ ಒವು?” ಅಂದ್‌ದ್ ಆಯಡ ಕೇಂಡಿನೆಕ್ಕ್</verse>
				<verse number="37">ಐಕ್ ಯೇಸು, “‘ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’</verse>
				<verse number="38">ಉಂದು ಸುರುತ್ತ ಬೊಕ್ಕ ಮಾತೆರೆಡ್ದ್ ಮಲ್ಲ ಅಪ್ಪಣೆ ಆದುಂಡು.</verse>
				<verse number="39">ನೆಕ್ಕ್ ಸರಿಯಾಯಿನ ರಡ್ಡನೆ ಅಪ್ಪಣೆ ಇಂಚಾದುಂಡು, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ.’</verse>
				<verse number="40">ಈ ರಡ್ಡ್ ಅಪ್ಪಣೆದ ಮಿತ್ತ್ ಮಾತ ನ್ಯಾಯಕಟ್ಟ್‌ಗ್ಲಾ ಪ್ರವಾದನೆದ ಗ್ರಂಥೊಗ್ಲಾ ಆಧಾರ ಆದುಂಡು.”</verse>
				<verse number="41">ಪರಿಸಾಯೆರ್ ಒಟ್ಟು ಕೂಡ್ದುಪ್ಪುನಗ, ಯೇಸು ಅಕ್ಲೆಡ,</verse>
				<verse number="42">“ಬರೊಡಾಯಿ ಕ್ರಿಸ್ತನ ಸಂಗತಿಡ್ ನಿಕ್ಲೆಗ್ ಎಂಚ ತೋಜುಂಡು? ಆಯೆ ಏರೆನ ಮಗೆ?” ಅಂದ್‌ದ್ ಪ್ರಶ್ನೆ ಮಲ್ತಿನಪಗ ಅಕುಲು ಆಯಡ, “ದಾವೀದನ ಮಗೆ,” ಪಂಡ್ದ್ ಪನ್ನಗ ಆಯೆ ಅಂಚಾಂಡ, “ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ತ್‌ದ್ ಪಾಡುನೆಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ ಅಂದ್‌ದ್ ಕರ್ತವೆ ಎನ ಧನಿಕ್ ಪಂಡೆ ಪನ್ಪಿ ಪಾತೆರೊಡು ದಾವೀದೆ ಆತ್ಮೊಡು ದಿಂಜಿದ್ ಆಯನ್ ಧನಿ ಪಂಡ್ದ್ ಪನ್ಪಿನಿ ಎಂಚಾ?</verse>
				<verse number="43"></verse>
				<verse number="44"></verse>
				<verse number="45">“ಅಂಚಾಯಿನೆಡ್ದ್ ದಾವೀದೆ ಆಯನ್ ‘ಕರ್ತವೆ’ ಅಂದ್‌ದ್ ಪಂಡಿ ಬೊಕ್ಕ ಆಯೆ ಆಯಗ್ ಮಗೆ ಆಪಿನವು ಎಂಚ?” ಪಂಡೆ.</verse>
				<verse number="46">ಏರೆಗ್ಲಾ ಆಯನ ಒಂಜೇ ಒಂಜಿ ಪಾತೆರೊಗು ಉತ್ತರ ಕೊರಿಯೆರೆ ಆಯಿಜಿ. ಉಂದತ್ತಂದೆ ಆನಿಡ್ದಿಂಚಿ ಆಯನ್ ಪ್ರಶ್ನೆ ಮಲ್ಪೆರೆ ಏರೆಗ್ಲಾ ಧೈರ್ಯ ಬತ್ತ್‌ಜಿ.</verse>
			</chapter>
			<chapter number="23">
				<verse number="1">ಬೊಕ್ಕ ಯೇಸು ಜನೊಕುಲೆ ಗುಂಪುಗ್ಲಾ, ತನ ಶಿಷ್ಯೆರೆಗ್ಲಾ ಪಂಡಿನಿ ದಾನೆ ಪಂಡ,</verse>
				<verse number="2">“ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ಮೋಶೆನ ಗದ್ದಿಗೆಡ್ ಕುಲ್ಲೊಂದುಲ್ಲೆರ್.</verse>
				<verse number="3">ಅಂಚಾಯಿನೆಡ್ದ್ ಅಕುಲು ನಿಕ್ಲೆಗ್ ಎಂಚೆಂಚಿನ ಪನ್ಪೆರಾ ಅವೆನ್ ಮಾತ ಮಲ್ಪುಲೆ, ತಾಳೊನ್ಲೆ. ಆಂಡ ಅಕ್ಲೆನ ನಡತೆದ ಲೆಕ್ಕ ನಡಪಡೆ. ಅಕುಲು ಪನ್ಪಿನೆ ಅತ್ತಂದೆ ಅಂಚ ನಡಪುಜೆರ್.</verse>
				<verse number="4">ಅಕುಲು ಜನೊಕುಲೆ ಮಿತ್ತ್ ತುಂಬೆರೆ ತೀರಂದಿ ಪುದೆಕ್ಲೆನ್ ತುಂಬಾವೆರ್; ಆಂಡ ತನ್ಕುಲು ಆ ಪುದೆಕ್ಲೆನ್ ಒಂಜಿ ಬಿರೆಲ್‌ಡ್ದ್‌ಲಾ ಮುಟ್ಟುಜೆರ್.</verse>
				<verse number="5">ಅಕುಲು ತನ್ಕುಲೆ ಬೇಲೆ ಮಾತ ಜನೊಕುಲೆಗ್ ತೋಜೊಡು ಅಂದ್‌ದ್ ಮಲ್ಪುವೆರ್. ತನ್ಕುಲು ಶಾಸ್ತ್ರದ ಪಟ್ಟಿಲೆನ್ ಅಗೆಲ ದೀದ್ ಮುಂಡೊಡು ಕಟ್ಟ್‌ದ್ ಕುಂಟುದ ಗೊಂಡೆಲೆನ್ ಉದ್ಧ ಮಲ್ಪುವೆರ್.</verse>
				<verse number="6">ಉಂದತ್ತಂದೆ ಲೇಸ್‌ಲೆಡ್ ಸುರುತ್ತ ಪಂತೆ, ಸಭಾಮಂದಿರೊಡು ಮಲ್ಲಸ್ಥಾನೊಲು,</verse>
				<verse number="7">ಅಂಗಡಿ ಸಾದಿಲೆಡ್ ವಂದನೆಲು, ಜನೊಕುಲೆಡ್ದ್ ಬೋಧಕೆರಂದ್‌ದ್ ಪನ್ಪಾವೊನ್ನವು ಅಕ್ಲೆಗ್ ಇಷ್ಟ.</verse>
				<verse number="8">ಆಂಡ ನಿಕುಲು ಬೋಧಕೆರಂದ್‌ದ್ ಪನ್ಪಾವೊನಡೆ; ದಾಯೆಗ್ ಪಂಡ ಕ್ರಿಸ್ತೆ ಒರಿಯೇ ನಿಕ್ಲೆಗ್ ಬೋಧಕೆ, ನಿಕುಲು ಮಾತ ಸಹೋದ್ರೆರ್.</verse>
				<verse number="9">ಉಂದತ್ತಂದೆ ಭೂಲೋಕೊಡು ಏರೆನ್ಲಾ ಎಂಕುಲೆ ಅಮ್ಮೆ ಅಂದ್‌ದ್ ಲೆಪ್ಪಡೆ, ಪರಲೋಕೊಡುಪ್ಪು ಒರಿಯೇ ನಿಕ್ಲೆಗ್ ಅಮ್ಮೆ.</verse>
				<verse number="10">ಬೊಕ್ಕ ಗುರುಕುಲು ಅಂದ್‌ದ್ ಲೆಪ್ಪಾವೊನಡೆ; ಕ್ರಿಸ್ತೆ ಒರಿಯೇ ನಿಕ್ಲೆಗ್ ಗುರು.</verse>
				<verse number="11">ನಿಕ್ಲೆಡ್ ಮಿತ್ತ್‌ದ ಸ್ಥಾನೊಡು ಉಪ್ಪುನಾಯೆ ನಿಕ್ಲೆನ ಸೇವಕೆ ಆದುಪ್ಪೊಡು.</verse>
				<verse number="12">ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.</verse>
				<verse number="13">“ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ಪರಲೋಕ ರಾಜ್ಯದ ಬಾಕಿಲ್‌ನ್ ನರಮಾನಿಲೆ ಎದುರು ಮುಚ್ಚಿದ್ ಬುಡ್ಪರ್, ನಿಕುಲಾಂಡಲಾ ಉಲಯಿ ಪೋಪುಜರ್, ಉಲಯಿ ಪೋವೊಡಂದ್ ಉಪ್ಪುನಾಕುಲೆನ್ಲಾ ಪೋಯೆರೆ ಬುಡ್ಪುಜರ್.</verse>
				<verse number="14">ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ತೂಪೆರ್ ಪಂಡ್ದ್ ಉದ್ಧದ ಪ್ರಾರ್ಥನೆನ್ ಮಲ್ಪುವರ್, ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್. ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್.</verse>
				<verse number="15">ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಒರಿಯನ್ ನಿಕ್ಲೆನ ಜಾತಿಗ್ ಸೇರಾಯೆರೆ ಬೋಡಾದ್ ಭೂಮಿನ್ಲಾ ಕಡಲ್‌ನ್ಲಾ ಸುತ್ತುದು ಬರ್ಪರ್. ಆಯೆ ಸೇರಿ ಬೊಕ್ಕ ಆಯನ್ ನಿಕ್ಲೆಡ್ದ್ ರಡ್ದ್ ಪಾಲ್ ನರಕದಾಯಾದ್ ಮಲ್ಪುವರ್.</verse>
				<verse number="16">“ಅಯ್ಯೋ, ಸಾದಿ ತೂಪಾವುನ ಕುರುಡೆರೇ, ‘ಒರಿ ದೇವಾಲಯದ ಮಿತ್ತ್ ಆಜ ದೀಯೆಡ ಅವು ದಾಲ ಆಜ ಅತ್ತ್,’ ಆಂಡ ‘ಒರಿ ದೇವಾಲಯದ ಬಂಗಾರ್‌ದ ಮಿತ್ತ್ ಆಜ ದೀವೊಂಡೆಡ ಅವೆನ್ ನಡಪಾವೊಡೇ,’ ಅಂದ್‌ದ್ ಪನ್ಪರ್.</verse>
				<verse number="17">ಮರ್ಲೆರೇ, ಕುರುಡೆರೇ, ಒವು ಹೆಚ್ಚ್‌ದವು? ಬಂಗಾರನಾ, ಬಂಗಾರ್‌ನ್ ಪರಿಶುದ್ಧ ಮಲ್ಪುನ ದೇವಾಲಯನಾ?</verse>
				<verse number="18">‘ಒರಿ ಬಲಿಪೀಠದ ಮಿತ್ತ್ ಆಜ ದೀವೊಂಡೆಡ ಅವು ದಾಲ ಆಜ ಅತ್ತ್,’ ಆಂಡ ‘ಐಟ್ಟುಪ್ಪು ಕಾಣಿಕೆದ ಮಿತ್ತ್ ಆಜ ದೀಯೆಡ ಅವೆನ್ ನಡಪಾವೊಡೇ,’ ಅಂದ್‌ದ್ ಪನ್ಪರ್.</verse>
				<verse number="19">ಕುರುಡೆರೇ ಒವು ಹೆಚ್ಚ್‌ದವು? ಕಾಣಿಕೆನಾ, ಆ ಕಾಣಿಕೆನ್ ಪರಿಶುದ್ಧ ಮಲ್ಪುನ ಬಲಿಪೀಠನಾ?</verse>
				<verse number="20">ಇಂಚಾಯಿನೆಡ್ದ್ ಬಲಿಪೀಠದ ಮಿತ್ತ್ ಆಜ ಪಾಡ್‌ಂಡ ಐತ ಮಿತ್ತ್‌ಲಾ ಐತ ಮಿತ್ತುಪ್ಪು ಮಾತೆತ್ತ ಮಿತ್ತ್‌ಲಾ ಆಜ ಪಾಡಿಲೆಕ್ಕ ಆಂಡ್.</verse>
				<verse number="21">ದೇವಾಲಯದ ಮಿತ್ತ್ ಆಜ ದೀಂಡ ಐತ ಮಿತ್ತ್‌ಲಾ ಐಟ್ಟ್ ಉಪ್ಪುನಾಯನ ಮಿತ್ತ್‌ಲಾ ಆಜ ದೀಯಿಲೆಕ್ಕ ಆಂಡ್. ಅಂಚೆನೇ ದೇವಾಲಯದ ಆಜ ಪಾಡುನಾಯೆ ಆಯೆ ದೇವಾಲಯದ ಮಿತ್ತ್‌ಲಾ ಬೊಕ್ಕ ಐಟ್ಟ್ ಉಪ್ಪುನ ದೇವೆರೆನ ಮಿತ್ತ್‌ಲಾ ಆಜ ಪಾಡುಲೆಕ್ಕ ಆಂಡ್.</verse>
				<verse number="22">ಪರಲೋಕದ ಮಿತ್ತ್ ಆಜ ಪಾಡುನಾಯೆ ದೇವೆರೆ ಗದ್ದಿಗೆದ ಮಿತ್ತ್‌ಲಾ ಐಟ್ಟ್ ಕುಲ್ಲುದಿನಾಯನ ಮಿತ್ತ್‌ಲಾ ಆಜ ಪಾಡುಲೆಕ್ಕ ಆಂಡ್.</verse>
				<verse number="23">“ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಪುದಿನ, ಮೆತ್ತೆ, ಸಬ್ಬಸಿಗೆ ಸೊಪ್ಪು, ಜೀರ್ದರಿಲೆಡ್ ಪತ್ತೆಟ್ಟ್ ಒಂಜಿ ಪಾಲ್ ಕೊರ್ಪರ್ ಸರಿ, ಆಂಡ ನ್ಯಾಯಕಟ್ಟ್‌ಡ್ ಮಾರ್ಯಾದಿಡುಪ್ಪುನ ನ್ಯಾಯೊನ್ಲಾ, ಕರುಣೆನ್ಲಾ, ನಂಬಿಕೆನ್ಲಾ ಬುಡ್ದು ಬುಡಿಯರ್. ಉಂದೆನ್ ಮಲ್ಪೊಡಾದಿತ್ತ್‌ಂಡ್; ಅವೆನ್ಲಾ ಬುಡಿಯೆರೆ ಬಲ್ಲಿ.</verse>
				<verse number="24">ಸಾದಿ ತೋಜಾವುನ ಕುರುಡೆರೆ, ನಿಕುಲು ಉಮಿಲ್ ಗಾಳ್ಯುನಾಕುಲುಲಾ ಒಂಟೆ ದಿಂಗುನಾಕುಲುಲಾ</verse>
				<verse number="25">ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಚೊಂಬು, ಬಟ್ಟಲ್‌ನ್ ಪಿದಾಯಿಡ್ದ್ ಸೂಕ್ಷ್ಮೊಡು ದೆಕ್ಕುವರ್, ಆಂಡ ಉಲಯಿಡ್ದ್ ಕಲೆಂಗ್ ಪತ್ತಿದಿನವು ದುರಾಸೆಡ್ದ್‌ಲಾ ಸುಲಿಗೆಲೆಡ್ದ್‌ಲಾ ದಿಂಜಿದಿನವು ಆದುಪ್ಪುಂಡು.</verse>
				<verse number="26">ಕುರುಡೆ ಆದುಪ್ಪು ಪರಿಸಾಯಾ, ದುಂಬತ್ತ ಚೊಂಬು, ಬಟ್ಟಲ್ದ ಉಲಯಿದೆನ್ ದೆಕ್ಕ್‌ಲ ಅಪಗ ಪಿದಯಿದವುಲಾ ಮಿಂಚ್ಚುಂಡು.</verse>
				<verse number="27">“ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಸುಣ್ಣ ಕೊರ್ತಿ ಸಮಾಧಿದ ಲೆಕ್ಕ ಉಲ್ಲರ್. ಆ ಸಮಾಧಿ ಪಿದಯಿಡ್ದ್ ಬಾರಿ ಪೊರ್ಲು ತೋಜುಂಡು, ಆಂಡ ಉಲಯಿ ತೂಂಡ ಸೈತಿನಾಕುಲೆನ ಎಲುಡ್ದುಲಾ, ಮಾತ ಗಲೀಜಿಡ್ದ್‌ಲಾ ದಿಂಜಿದಿಪ್ಪುಂಡು.</verse>
				<verse number="28">ಅಂಚೆನೇ ನಿಕುಲುಲಾ ಪಿದಯಿ ಜನೊಕುಲೆಗ್ ನೀತಿವಂತೆರ್ ಲೆಕ್ಕ ತೋಜಾವೊನ್ವರ್ ಸರಿ, ಉಲಯಿ ಕಪಟೊಡ್ದುಲಾ ಅನ್ಯಾಯೊಡ್ದುಲಾ ದಿಂಜಿದಿನಕುಲಾದುಲ್ಲರ್.</verse>
				<verse number="29">“ಅಯ್ಯೋ, ಕಪಟಿಲಾಯಿ ಶಾಸ್ತ್ರಿಲೇ, ಪರಿಸಾಯೆರೇ, ನಿಕುಲು ಪ್ರವಾದಿಲೆ ಸಮಾಧಿಲೆನ್ ಕಟ್ಟ್‌ದ್ ನೀತಿವಂತೆರೆ ಗೋರಿಲೆನ್ ಸಿಂಗಾರ ಮಲ್ತ್‌ದ್</verse>
				<verse number="30">ಎಂಕುಲು ಎಂಕಲ್ನ ಹಿರಿಯೆರೆ ಕಾಲೊಡು ಇತ್ತುದ್ವಡ ಪ್ರವಾದಿಲೆ ನೆತ್ತೆರ್‌ಡ್ ಪಾಲ್‌ದಾರೆರ್ ಆತ್ವಯ ಪನ್ಪರ್.</verse>
				<verse number="31">ಅಂಚಾಂಡ ನಿಕುಲು ಪ್ರವಾದಿಲೆನ್ ಕೆರಿನಕುಲೆ ಜೋಕುಲೇ ಅಂದ್‌ದ್ ನಿಕ್ಲೆಗ್ ನಿಕುಲೇ ಸಾಕ್ಷಿ ಆದುಲ್ಲರ್.</verse>
				<verse number="32">ಎಡ್ಡೆ, ನಿಕುಲು ನಿಕ್ಲೆ ಹಿರಿಯೆರೆ ಪಾಪದ ಆಳತೆನ್ ಪೂರ್ತಿ ಮಲ್ಪುಲೆ.</verse>
				<verse number="33">ಕಂದೊಡಿಲೇ! ಸರ್ಪ ಜಾತಿಲೇ ನರಕದ ದಂಡನೆಗ್ ಎಂಚ ತಪ್ಪವೊನ್ವರ್?</verse>
				<verse number="34">ಅಂಚಾಯಿನೆಡ್ದ್ ತೂಲೇ, ಯಾನ್ ನಿಕ್ಲೆ ಕೈತಲ್‌ ಪ್ರವಾದಿಲೆನ್ಲಾ, ಬುದ್ಧಿವಂತೆರೆನ್ಲಾ ಶಾಸ್ತ್ರಿಲೆನ್ಲಾ ಕಡಪುಡ್ವೆ; ಅಕ್ಲೆಡ್ ಕೆಲೆವೆರೆನ್ ಕೆರುವರ್‌, ಕ್ರುಸ್ಸುಗು ಪಾಡ್ವರ್; ಕೆಲೆವೆರೆನ್ ನಿಕ್ಲೆ ಸಭಾಮಂದಿರೊಲೆಡ್ ಸೋಂಟೆಡ್ ಹಾಕ್‌ದ್ ಊರುಡ್ದು ಊರುಗು ಗಿಡ್ತೊಂದು ಪೋವರ್.</verse>
				<verse number="35">ಇಂಚ ನೀತಿವಂತೆ ಆದಿತ್ತಿ ಹೇಬೇಲ್‌ನ ನೆತ್ತೆರೆಡ್ದ್ ಸುರುವಾದ್ ದೇವಾಲಯೊಗ್ಲಾ, ಬಲಿಪೀಠದ ನಡುಟು ನಿಕುಲು ಕೆರ್ದ್ ಪಾಡಿನ ಬರಕೀಯನ ಮಗೆ ಆದುಪ್ಪು ಜಕರೀಯನ ನೆತ್ತೆರ್ ಮುಟ್ಟ ಭೂಮಿದ ಮಿತ್ತ್ ಜಪುಡಾಯಿನ ನೀತಿವಂತೆರೆ ನೆತ್ತೆರೆಡ್ದ್ ಆಯಿನ ಅಪರಾಧ ನಿಕ್ಲೆ ತರೆತ ಮಿತ್ತ್ ಬರು.</verse>
				<verse number="36">ಅವು ಮಾತ ಈ ಸಂತಾನದ ಮಿತ್ತ್ ಬರು ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="37">“ಯೆರೂಸಲೇಮೋ, ಯೆರೂಸಲೇಮೋ ಪ್ರವಾದಿಲೆ ಪ್ರಾಣ ದೆಪ್ಪುನಾಲೇ, ದೇವೆರ್ ನಿನ ಕೈತಲ್‌ ಕಡಪುಡ್ದು ಕೊರ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರ್ಪಿನಾಲೇ, ಕೋರಿ ತನ ಕಿನ್ನಿಲೆನ್ ರೆಂಕೆದ ಅಡಿಟ್ಟ್ ಕುಲ್ಲಾವುಲೆಕ್ಕ ನಿನ ಜೋಕುಲೆನ್ ಕುಲ್ಲಾಯೆರೆ ಎಂಕ್ ಏತೋ ಸರ್ತಿ ಮನಸಿತ್ತ್‌ಂಡ್. ಆಂಡ ನಿಕ್ಲೆಗ್ ಮನಸ್‌ದಾಂತೆ ಪೋಂಡು.</verse>
				<verse number="38">ತೂಲೇ, ನಿಕ್ಲೆನ ಆಲಯ ಕಾಲಿ ಆದ್ ಬೂರ್ದುಂಡು.</verse>
				<verse number="39">ಇತ್ತೆಡ್ದ್, ‘ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ,’ ಪಂಡ್ದ್ ಪನ್ಪಿನ ಮುಟ್ಟ ನಿಕುಲು ಎನನ್ ತೂಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.”</verse>
			</chapter>
			<chapter number="24">
				<verse number="1">ಐಡ್ದ್ ಬೊಕ್ಕ ಯೇಸು ದೇವಾಲಯೊಡ್ದು ಪಿದಾಡ್ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯಗ್ ದೇವಾಲಯದ ಕಟ್ಟಣೊನು ತೋಜಾಯೆರ್.</verse>
				<verse number="2">ಅಪಗ ಆಯೆ, “ಉಂದೆನ್ ಮಾತ ತೂಪರತ್ತಾ, ನೆತ್ತ ಒಂಜಿ ಕಲ್ಲ್‌ಲಾ ಒಂಜೆತ್ತ ಮಿತ್ತ್ ಒಂಜಿ ಉಪ್ಪಂದ್. ಮಾತಲಾ ಮಗ್‌ರ್ದ್ ತಿರ್ತ್ ಬೂರ್ದು ಪೋವು,” ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="3">ಐಡ್ದ್ ಬೊಕ್ಕ ಆಯೆ ಇಪ್ಪೆಗುಡ್ಡೆದ ಮಿತ್ತ್ ಕುಲ್ಲುದಿತ್ತಿನಪಗ ಶಿಷ್ಯೆರ್ ಆಯ ಕೈತಲ್‌ ಬೇತೆ ಬೇತೆ ಆದ್ ಬತ್ತ್‌ದ್, “ಉಂದು ಏಪ ಆವು. ಈ ಕುಡ ಬರ್ಪಿನೆಕ್ಕ್‌ಲಾ ಯುಗತ ಅಂತ್ಯ ಆಪಿನೆಕ್ಕ್‌ಲಾ ಗುರ್ತ ಎಂಚಿನವು ಎಂಕ್ಲೆಗ್ ಪನ್ಲ,” ಪಂಡೆರ್.</verse>
				<verse number="4">ಅಪಗ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ಏರಾಂಡಲಾ ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ತೂವೊನ್ಲೆ.</verse>
				<verse number="5">ದಾಯೆ ಪಂಡ ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಅಂದ್‌ದ್ ಏತೋ ಜನೊಕುಲೆನ್ ಮೋಸೊಡು ಪಾಡೆರ್.</verse>
				<verse number="6">ಉಂದತ್ತಂದೆ ಯುದ್ದೊಲು ಆಪಿನೆನ್ಲಾ, ಯುದ್ದೊಲು ಆಪಿಲೆಕ್ಕ ಉಂಡು ಪನ್ಪಿ ಸುದ್ಧಿಲೆನ್ಲಾ ನಿಕುಲು ಕೇನೊಡಾಪುಂಡು. ಗಲಿಬಿಲಿ ಆವಂದಿಲೆಕ್ಕ ತೂವೊನ್ಲೆ. ಇಂಚಿನ ಪರಿಸ್ಥಿತಿ ಆಪಿನವು ಅಗತ್ಯ. ಆಂಡಲಾ ಉಂದು ಅಂತ್ಯಕಾಲ ಅತ್ತ್.</verse>
				<verse number="7">ಜನಾಂಗದ ವಿರೋಧಾದ್ ಜನಾಂಗೊಲುಲಾ, ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. ಬರಗಾಲ ಬರ್ಪಿನವುಲಾ ಭೂಕಂಪೊಲು ಆಪಿನವುಲಾ</verse>
				<verse number="8">ಉಂದು ಮಾತ (ಪೊಸ ಯುಗ ಪುಟ್ಟುನ) ಪೆದ್ದುನ ಬೇನೆದ ಸುರುತ್ತ ಬೇನೆಲು.</verse>
				<verse number="9">ಅಪಗ ನಿಕ್ಲೆನ್ ಭಂಗೊಗು ಒಚ್ಚಿದ್ ಕೊರ್ದು ಕೆರ್ವೆರ್. ಎನ ಪುದರ್‌ಗಾದ್ ನಿಕ್ಲೆನ್ ಮಾತ ಜನಾಂಗದಾಕುಲು ಪಗೆ ಮಲ್ಪುವೆರ್.</verse>
				<verse number="10">ಅಪಗ ಮಸ್ತ್ ಜನ ಪಿರಜಾರ್ದ್ ಒರಿಯನ್ ಒರಿ ಪತ್ತ್‌ದ್ ಕೊರುವೆರ್. ಒರಿಯ ಮಿತ್ತ್ ಒರಿ ಪಗೆ ಮಲ್ಪುವೆರ್.</verse>
				<verse number="11">ಮಸ್ತ್ ಜನ ಸುಳ್ಳು ಪ್ರವಾದಿಲುಲಾ ಲಕ್ಕ್‌ದ್ ಮಸ್ತ್ ಜನೊಕುಲೆನ್ ಮೋಸೊಗು ಪಾಡೆರ್.</verse>
				<verse number="12">ಉಂದತ್ತಂದೆ ಅನ್ಯಾಯ ಹೆಚ್ಚಾಪಿನೆಡ್ದ್ ಮಸ್ತ್ ಜನೊಕುಲೆ ಪ್ರೀತಿ ಚೌಲಿ ಆದ್ ಪೋಪುಂಡು.</verse>
				<verse number="13">ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.</verse>
				<verse number="14">ಉಂದತ್ತಂದೆ ಪರಲೋಕ ರಾಜ್ಯದ ಈ ಸುವಾರ್ತೆನ್ ಇಡೀ ಲೋಕೊಡು ಮಾತ ಜನಾಂಗೊಲೆಗ್ ಸಾಕ್ಷಿಗಾದ್ ಸಾರಿಯುಂಡು. ಅಪಗ ಅಂತ್ಯ ಬರ್ಪುಂಡು.</verse>
				<verse number="15">“ಅಂಚಾಯಿನೆಡ್ದ್ ಪ್ರವಾದಿ ದಾನಿಯೇಲೆ ಪಂಡಿನಂಚಿನ, ‘ಹಾಳ್ ಮಲ್ಪುನ ಅಸಹ್ಯ ವಸ್ತುಲು ಪರಿಶುದ್ಧಸ್ಥಾನೊಡು ಉಂತುದುಪ್ಪುನೆನ್,’ ನಿಕುಲು ತೂನಗ, (ಉಂದೆನ್ ಓದುನಾಯೆ ತೆರಿಯೊನುಡು).</verse>
				<verse number="16">ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್.</verse>
				<verse number="17">ಮಾಳಿಗೆಡ್ ಉಪ್ಪುನಾಯೆ ತಿರ್ತ್ ಜತ್ತ್‌ದ್ ಇಲ್ಲದುಲಯಿ ಪೋವಂದೆ ತನ ಇಲ್ಲದುಲಯಿಡ್ದ್ ದಾದಾಂಡಲಾ ದೆತ್ತೊನಂದೆ ಉಪ್ಪಡ್.</verse>
				<verse number="18">“ಕಂಡೊಡು ಉಪ್ಪುನಾಯೆ ತನ ಪೊದೆಪುನು ದೆತ್ತೊನಿಯೆರೆ ಪಿರ ಪೋವಂದೆ ಉಪ್ಪಡ್.</verse>
				<verse number="19">ಆಂಡ ಆ ದಿನೊಟು ಬಂಜಿನಾಕುಲೆಗ್ಲಾ ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್.</verse>
				<verse number="20">ನಿಕುಲು ಪಾರ್ ಪೋಪಿನವು ಚಳಿಕಾಲೊಡಾವಡ್ ಸಬ್ಬತ್ ದಿನೊಟಾವಡ್ ಆವೆರೆ ಬಲ್ಲಿ ಅಂದ್‌ದ್ ಪ್ರಾರ್ಥನೆ ಮಲ್ಪುಲೆ.</verse>
				<verse number="21">ಅಂಚಿನ ಸಂಕಟ ಲೋಕದ ಆರಂಭದ ದಿನೊಡ್ದು ಇನಿ ಮುಟ್ಟಲಾ ಆತ್‌ಜಿ. ನನ ಮಿತ್ತ್‌ಗ್ಲಾ ಆವಂದ್.</verse>
				<verse number="22">ಕರ್ತವೆ ಆ ದಿನೊಕುಲೆನ್ ಕಡಿಮೆ ಮಲ್ತ್‌ಜೆಡ ಒಂಜಿ ನರಪ್ರಾಣಿಲಾ ಬದ್‌ಕಂದ್. ಆಂಡ ತಾನ್ ಅಜತ್ ದೆತ್ತೊಂಡಿನಾಕುಲೆಗಾದ್ ಆ ದಿನೊಕುಲೆನ್ ಕಡಿಮೆ ಮಲ್ಪುವೆ.</verse>
				<verse number="23">ಅಪಗ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಮೂಲು ಉಲ್ಲೆ,’ ಇಂದಾ, ‘ಅಲ್ಪ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ</verse>
				<verse number="24">ಸುಳ್ಳು ಕ್ರಿಸ್ತೆರ್ಲಾ ಸುಳ್ಳು ಪ್ರವಾದಿಲುಲಾ ತೋಜಿದ್ ಬರ್ವೆರ್. ಸಾದ್ಯ ಇತ್ತ್ಂಡ ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ಲಾ ಮೋಸೊಡು ಪಾಡಿಯೆರೆಗಾದ್ ಮಲ್ಲ ಮಲ್ಲ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಮಲ್ತ್‌ದ್ ತೋಜಪಾವೆರ್.</verse>
				<verse number="25">ಇಂದಾ, ನಿಕ್ಲೆಗ್ ಸುರುಟ್ಟೆ ಪನ್ತೆ.</verse>
				<verse number="26">ಅಂಚಾಯಿನೆಡ್ದ್ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಕಾಡ್‌ಡ್ ಉಲ್ಲೆ,’ ಪಂಡೆರ್ಡ ಪಿದಾಡ್ದ್ ಪೋವಡೆ. ‘ಇಂದಾ, ಕೋಣೆದ ಉಲಯಿ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ.</verse>
				<verse number="27">ಎಂಚ ಮಿಂಚಿ ಮೂಡಯಿಡ್ ಪುಟ್ಟುದು ಪಡ್ಡಯಿ ಮುಟ್ಟ ಮಿಂಚುಂಡಾ, ಅಂಚೆನೇ ನರಮಾನಿ ಮಗನ ಅವತಾರ ಉಪ್ಪುಂಡು.</verse>
				<verse number="28">ಪುಣೊಕುಲು ಓಲುಂಡಾ ಅಲ್ಪನೇ ಗಿಡಿಕುಲು ಸೇರ್ದ್ ಬರ್ಪುಂಡು.</verse>
				<verse number="29">“ಆ ದಿನೊಕುಲೆ ಸಂಕಟ ಮುಗಿನಪಗ ಸೂರ್ಯೆ ಕತ್ತಲೆ ಆದ್ ಪೋವು, ಚಂದ್ರೆ ಬೊಲ್ಪು ಕೊರಂದ್, ನಕ್ಷತ್ರೊಲು ಬಾನೊಡ್ದು ತಾಲ್ದ್ ಬೂರು ಬಾನದ ಶಕ್ತಿ ಪಂದ್‌ದ್ ಪೋವು.</verse>
				<verse number="30">ಅಪಗ ನರಮಾನಿ ಮಗನ್ ತೋಜಾವುನ ಗುರ್ತ ಬಾನೊಡು ತೋಜಿದ್ ಬರ್ಪುಂಡು. ಅಪಗ ಭೂಲೋಕೊಡುಪ್ಪು ಮಾತ ಗೋತ್ರೊಲು ತಿಗಲೆ ದರ್ತೊನ್ವೆರ್, ಬೊಕ್ಕ ನರಮಾನಿ ಮಗೆ ಬಲೊಟ್ಲಾ ಬಾರಿ ಮೈಮೆಡ್ಲಾ ಬಾನದ ಮುಗಲ್‌ದ ಮಿತ್ತ್ ಬರ್ಪಿನೆನ್ ತೂವೆರ್</verse>
				<verse number="31">ಬೊಕ್ಕ ಆಯೆ ತುತೂರಿದ ಮಲ್ಲ ಶಬ್ಧೊಡು ತನ ದೂತೆರೆನ್ ಕಡಪುಡ್ವೆ. ಅಕುಲು ಆಯೆ ಅಜತ್ ದೆತ್ತೊಂಡಿನಾಕುಲೆನ್ ಬಾನದ ಒಂಜಿ ಕಡೆಡ್ದ್ ಬೊಕ್ಕೊಂಜಿ ಕಡೆ ಮುಟ್ಟ ನಾಲ್ ದಿಕ್ಕ್‌ಲೆಡ್ದ್ ಒಟ್ಟು ಕೂಡಾವೆರ್.</verse>
				<verse number="32">“ಅಂಜೂರದ ಮರತ ಉಪಕತೆಡ್ದ್ ಬುದ್ಧಿ ಕಲ್ತೊನ್ಲೆ. ಐತ ಗೆಲ್ಲ್ ನನಲಾ ಲತ್ತ್ ಇತ್ತ್‌ದ್ ಇರೆ ಬುಡ್ನಗ ಅರೆಗಾಲ ಕೈತಲಾಂಡ್ ಅಂದ್‌ದ್ ತೆರಿಯೊನ್ವರ್.”</verse>
				<verse number="33">ಅಂಚೆನೇ ನಿಕುಲುಲಾ ಉಂದೆನ್ ಮಾತ ತೂನಗ ಆ ದಿನ ಕೈತಲಾಂಡ್, ಬಾಕಿಲ್‌ದಲ್ಪನೇ ಉಂಡು ಅಂದ್‌ದ್ ತೆರಿಯೊನ್ಲೆ.</verse>
				<verse number="34">ಉಂದು ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="35">ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.</verse>
				<verse number="36">“ಉಂದತ್ತಂದೆ ಆ ದಿನತ ಬಗೆಟ್ಲಾ ಆ ಗಳಿಗೆದ ಬಗೆಟ್ಲಾ ಎನ ಅಮ್ಮೆರೆಗ್ ಒರಿಯಗೇ ತೆರಿಯು ಅತ್ತಂದೆ ಬೊಕ್ಕ ಏರೆಗ್ಲಾ ತೆರಿಯಂದ್. ಪರಲೋಕೊಡುಪ್ಪು ದೂತೆರೆಗ್ಲಾ ತೆರಿಯಂದ್, ಮಗಕ್ಲಾ ತೆರಿಯಂದ್.</verse>
				<verse number="37">ನೋಹನ ದಿನೊಕುಲೆಡ್ ಎಂಚ ಇತ್ತನಾ ಅಂಚೆನೇ ನರಮಾನಿ ಮಗೆ ಬರ್ಪಿನವುಲಾ ಉಪ್ಪು.</verse>
				<verse number="38">ಎಂಚಂದ್ಂಡ ಜಲಪ್ರಳಯದ ದುಂಬದ ದಿನೊಕುಲೆಡ್ ನೋಹೆ ಕಪ್ಪಲ್‌ಡ್ ಸೇರಿನ ದಿನ ಮುಟ್ಟ ಜನೊಕುಲು ಉನೊಂದು, ಪರೊಂದು, ಮದ್ಮೆ ಮಲ್ತೊಂದು, ಮಲ್ಪಾವೊಂದು ಇತ್ತೆರ್.</verse>
				<verse number="39">ಜಲಪ್ರಳಯದ ನೀರ್ ಬತ್ತ್‌ದ್ ಮಾತೆರೆನ್ ಒಯ್ತೊಂದು ಪೋನೆಟ್ಟ ದಾಲಾ ತೆರಿಯಂದೆ ಇತ್ತೆರತ್ತಾ, ಐತ ಲೆಕ್ಕನೆ ನರಮಾನಿ ಮಗೆ ಕುಡ ಬರ್ಪಿ ಕಾಲೊಡ್ಲಾ ಉಪ್ಪು.</verse>
				<verse number="40">ಅಪಗ ಇರ್ವೆರ್ ಕಂಡೊಡು ಉಪ್ಪುವೆರ್. ಒರಿಯನ್ ದೆತ್ತೊನುವೆರ್, ಒರಿಯನ್ ಬುಡ್ಪೆರ್.</verse>
				<verse number="41">ರಡ್ಡ್ ಪೊಂಜೊವುಲು ಬೀಸುನ ಕಲ್ಲ್‌ದ ದುಂಬು ಕುಲ್ಲುದು ಬೀಸೊಂದುಪ್ಪುವೆರ್. ಒರ್ತಿನ್ ದೆತ್ತೊನ್ವೆರ್, ಒರ್ತಿನ್ ಬುಡ್ಪೆರ್.</verse>
				<verse number="42">ಇಂಚ ಉಪ್ಪುನಗ ನಿಕ್ಲೆ ಕರ್ತವೆ ಬರ್ಪಿನ ದಿನ ನಿಕ್ಲೆಗ್ ಗೊತ್ತುದಾಂತೆ ಉಪ್ಪುನೆಡ್ದ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="43">ಕಲ್ವೆ ಬರ್ಪಿನ ಗಳಿಗೆ ಇಲ್ಲದ ಯಜಮಾನಗ್ ತೆರಿದಿತ್ತ್‌ಂಡ ಆಯೆ ಎಚ್ಚರಿಕೆಡ್ ಇತ್ತ್‌ದ್ ತನ ಇಲ್ಲಗ್ ಮಾಟೆ ದೆಪ್ಪೆರೆ ಬುಡ್ತುವಯೆ ಅಂದ್‌ದ್ ತೆರಿಯೊನ್ಲೆ.</verse>
				<verse number="44">ಅಂಚಾಯಿನೆಡ್ದ್ ನಿಕುಲುಲಾ ತಯಾರಾದುಪ್ಪುಲೆ; ನಿಕುಲು ಎನ್ನಂದಿ ಗಳಿಗೆಡ್ ನರಮಾನಿ ಮಗೆ ಬರ್ಪೆ.</verse>
				<verse number="45">“ಅಂಚಾಂಡ ಯಜಮಾನೆ ತನ ಇಲ್ಲದಾಕುಲೆಗ್ ಪೊರ್ತು ಪೊರ್ತುಗು ವಣಸ್ ತಿನಸ್ ಕೊರಿಯೆರೆ ಅಕ್ಲೆ ಮಿತ್ತ್ ದೀತಿನ ನಂಬಿಗೆದಾಯೆಲಾ ಬುದ್ಧಿವಂತೆಲಾ ಅಂಚಿತ್ತಿ ಬೇಲೆದಾಯೆ ಏರ್?</verse>
				<verse number="46">ಯಜಮಾನೆ ಪಿದಾಯಿ ಪೋದು ಬನ್ನಮುಟ್ಟ ಜವಾಬ್ದಾರಿಡ್ ಬೇಲೆ ಮಲ್ಪುನಾಯೆನೇ ಭಾಗ್ಯವಂತೆ.</verse>
				<verse number="47">ಅಂಚಿತ್ತಿನಾಯನ್ ಆಯೆ ತನ ಮಾತ ಆಸ್ತಿದ ಮಿತ್ತ್ ನೇಮಕ ಮಲ್ಪುವೆ, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="48">ಆಂಡ ಆ ಹಾಳ್ ಬೇಲೆದಾಯೆ, ‘ತನ ಯಜಮಾನೆ ಬರಿಯೆರೆ ತಡ ಮಲ್ಪುವೆ,’ ಅಂದ್‌ದ್ ತನ ಉಡಲ್‌ಡ್ ಎನ್ನೊಂದು</verse>
				<verse number="49">ತನ ಜತೆ ಬೇಲೆದಾಕುಲೆಗ್ ಹಾಕ್ಯೆರೆ ಸುರು ಮಲ್ತ್‌ದ್ ಪರ್ಪೆಲೆರೆ ಜತೆಟ್ ತಿನೊಂದು ಪರೊಂದು ಉಪ್ಪುವೆ.</verse>
				<verse number="50">ಆಂಡ ಆಯೆ ಎನ್ನಂದಿ ದಿನೊಟ್ಲಾ ತೆರಿಯಂದಿ ಗಳಿಗೆಡ್ಲಾ ಆ ಬೇಲೆದಾಯನ ಯಜಮಾನೆ ಬತ್ತ್‌ದ್ ಆಯಗ್ ಭಯಂಕರ ಪೆಟ್ಟ್ ಕೊರ್ಪಾದ್</verse>
				<verse number="51">ಕಪಟಿಲೆಗ್ ಆವೊಡಾಯಿ ಗತಿನ್ ಆಯಗ್ ನೇಮಕ ಮಲ್ಪುವೆ. ಅವುಲು ಅರಬಾಯಿಲಾ ಕಟಕಟ ಕೂಲಿ ಕಡೆಪಿನವುಲಾ ಉಪ್ಪುಂಡು.”</verse>
			</chapter>
			<chapter number="25">
				<verse number="1">“ಆ ಸಮಯೊಡು ಪರಲೋಕ ರಾಜ್ಯ ತನ್ಕುಲೆ ತುಡರ್‌ಲೆನ್ ದೆತ್ತೊಂದು ಮದ್ಮಯನ್ ಎದುಕೊನಿಯೆರೆ ಪಿದಾಡ್ದಿ ಪತ್ತ್ ಮಂದಿ ಕನ್ಯಪೊಣ್ಣುಲೆಗ್ ಸಮ ಆದುಪ್ಪುಂಡು.</verse>
				<verse number="2">ಐಟ್ಟ್ ಐನ್ ಮಂದಿ ಹೆಡ್ಡೆರ್, ಐನ್ ಮಂದಿ ಬುದ್ಧಿವಂತೆರ್.</verse>
				<verse number="3">ಹೆಡ್ಡೆರ್ ತನ್ಕುಲೆ ತುಡರ್‌ಲೆನ್ ದೆತ್ತೊಂಡೆರ್, ಆಂಡ ಎಣ್ಣೆ ದೆತ್ತೊಂಜೆರ್.</verse>
				<verse number="4">ಬುದ್ಧಿವಂತೆರ್ ತನ್ಕುಲೆ ತುಡರ್‌ದೊಟ್ಟುಗು ಕುಪ್ಪಿಡ್ ಎಣ್ಣೆಲಾ ದೆತ್ತೊಂಡೆರ್.</verse>
				<verse number="5">ಮದ್ಮಯೆ ಬರಿಯೆರೆ ತಡ ಆನಗ ಅಕುಲು ಮಾತ ಕಣ್ಣ್ ಕೂರ್ದು ನಿದ್ರೆ ಮಲ್ತೆರ್.</verse>
				<verse number="6">ಆಂಡ ನಡು ರಾತ್ರೆಡ್, ‘ಇಂದಾ, ಮದ್ಮಯೆ! ಆಯನ್ ಎದುಕೊನಿಯೆರೆ ಬಲೆ,’ ಅಂದ್‌ದ್ ಲೆಪ್ಪು ಆಂಡ್.</verse>
				<verse number="7">ಅಪಗ ಕನ್ಯಪೊಣ್ಣುಲು ಮಾತ ಲಕ್ಕ್‌ದ್ ತನ್ಕುಲೆ ತುಡರ್‌ಲೆನ್ ಸಮ ಮಲ್ತೆರ್.</verse>
				<verse number="8">ಆಂಡ ಹೆಡ್ಡೆರೆ ತುಡರ್‌ಡ್ ಎಣ್ಣೆ ಇಜ್ಜಾಂದೆ ತೆಕೊಂದಿತ್ತ್‌ಂಡ್, ಅಪಗ ಹೆಡ್ಡೆರ್ ಬುದ್ಧಿವಂತೆರ್‌ಡ, ‘ಎಂಕ್ಲೆಗ್ ಒಂತೆ ಎಣ್ಣೆ ಕೊರ್ಲೆ,</verse>
				<verse number="9">ಎಂಕುಲೆ ತುಡರ್ ತೆಕ್ಕೊಂದುಂಡು,’ ಅಂದ್‌ದ್ ಪಂಡೆರ್. ಐಕ್ ಆ ಬುದ್ಧಿವಂತೆರ್, ‘ನಿಕ್ಲೆಗ್ ಕೊರ್‌ಂಡ ಎಂಕುಲೆಗ್ಲಾ ನಿಕ್ಲೆಗ್ಲಾ ಯಾವಂದ್; ನಿಕುಲು ಮಾರುನಾಕುಲೆ ಕೈತಲ್‌ ಪೋದು ದೆತ್ತೊನುನವು ಎಡ್ಡೆ,’ ಪಂಡೆರ್.</verse>
				<verse number="10">ಅಕುಲು ದೆತ್ತೊನಿಯೆರೆ ಪೋಯಿನಪಗ ಮದ್ಮಯೆ ಬತ್ತೆ. ತಯಾರಾದಿತ್ತಿನಾಕುಲು ಆಯ ಒಟ್ಟುಗು ಮದ್ಮೆದ ಇಲ್ಲದ ಉಲಯಿ ಪೋಯೆರ್. ಬಾಕಿಲ್ ಮುಚ್ಚಿಂಡ್.</verse>
				<verse number="11">ಐಡ್ದ್ ಬೊಕ್ಕ ಒರಿದಿ ಕನ್ಯಪೊಣ್ಣುಲು ಬತ್ತ್‌ದ್ ‘ಕರ್ತವಾ, ಕರ್ತವಾ, ಎಂಕ್ಲೆಗ್ ಬಾಕಿಲ್ ಜಪ್ಪುಲೆ,’ ಪಂಡ್ದ್ ಬೊಟ್ಟುನಗ</verse>
				<verse number="12">ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಏರ್ಂದ್ ಎಂಕ್ ಗೊತ್ತಿಜ್ಜಿ,’</verse>
				<verse number="13">ದಾಯೆಗಂದ್ಂಡ ನರಮಾನಿ ಮಗೆ ಬರ್ಪಿ ದಿನ ಆವಡ್, ಗಳಿಗೆ ಆವಡ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆಡುಪ್ಪುಲೆ.</verse>
				<verse number="14">“ಪರಲೋಕ ರಾಜ್ಯ ಇಂಚಾದುಂಡು. ಪರದೇಶೊಗು ಪೋಪಿನ ಒರಿ ಯಜಮಾನೆ, ತನ ಬೇಲೆದಾಕುಲೆನ್ ಲೆತ್ತ್‌ದ್ ಅಕ್ಲೆಗ್ ತನ ಆಸ್ತಿನ್ ಅಕ್ಲೆ ಜವಾಬ್ದಾರಿಡ್ ಬುಡ್ತಿಲೆಕ್ಕ ಉಂಡು.</verse>
				<verse number="15">ಆಯೆ ಒರಿಯಗ್ ಐನ್ ತಲಾಂತ್, ಒರಿಯಗ್ ರಡ್ಡ್ ತಲಾಂತ್, ಒರಿಯಗ್ ಒಂಜಿ ತಲಾಂತ್, ಇಂಚ ಅಕ್ಲೆನ ಸಾಮರ್ಥ್ಯದ ಪ್ರಕಾರ ಕೊರ್ದು ಬೇತೆ ಒಂಜಿ ದೇಶೊಗು ಪೋಯೆ.</verse>
				<verse number="16">ಐನ್ ತಲಾಂತ್ ತಿಕ್ಕಿನಾಯೆ ಅವೆನ್ ಪೋದು ವ್ಯಾಪಾರೊಗು ಪಾಡ್ದ್ ನನಲಾ ಐನ್ ತಲಾಂತ್ ಲಾಭ ಮಲ್ತೆ;</verse>
				<verse number="17">ಅಂಚೆನೇ ರಡ್ಡ್ ತಲಾಂತ್ ತಿಕ್ಕಿನಾಯೆ ನನಲಾ ರಡ್ಡ್ ತಲಾಂತ್ ಸಂಪಾದನೆ ಮಲ್ತೆ,</verse>
				<verse number="18">ಆಂಡ ಒಂಜಿ ತಲಾಂತ್ ತಿಕ್ಕಿನಾಯೆ ಪೋದು ನೆಲ ಗರ್ತ್‌ದ್ ತನ ಯಜಮಾನನ ಕಾಸ್‌ನ್ ದೆಂಗಾದ್ ದೀಯೆ.</verse>
				<verse number="19">ಮಸ್ತ್ ಸಮಯೊಡ್ದು ಬೊಕ್ಕ ಆ ಬೇಲೆದಾಕುಲೆ ಯಜಮಾನೆ ಬತ್ತ್‌ದ್ ಅಕ್ಲೆಡ್ದ್ ಲೆಖ್ಖ ದೆತ್ತೊಂಡೆ.</verse>
				<verse number="20">ಐನ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್ ನನಲಾ ಐನ್ ತಲಾಂತ್ ಹೆಚ್ಚ್ ಕನತ್‌ದ್, ‘ಯಜಮಾನ, ಈ ಎಂಕ್ ಐನ್ ತಲಾಂತ್ ಕೊರ್ತ ಅತ್ತಾ, ಇಂದಾ, ನನಲಾ ಐನ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.</verse>
				<verse number="21">ಐಕ್ ಆಯ ಯಜಮಾನೆ, ‘ಬಲ, ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಪಂಡೆ.</verse>
				<verse number="22">ಅಪಗ ರಡ್ಡ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್, ‘ಯಜಮಾನ, ರಡ್ಡ್ ತಲಾಂತ್ ಎಂಕ್ ಒಪ್ಪಿಸಾದ ಅತ್ತಾ; ಐಡ್ದ್ ನನಲಾ ರಡ್ಡ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.</verse>
				<verse number="23">ಆಯ ಯಜಮಾನೆ ಆಯಡ, ‘ಬಲ ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಅಂದ್‌ದ್ ಪಂಡೆ.</verse>
				<verse number="24">ಐಡ್ದ್ ಬೊಕ್ಕ ಒಂಜಿ ತಲಾಂತ್ ತಿಕ್ಕಿನಾಯೆಲಾ ದುಂಬು ಬತ್ತ್‌ದ್, ‘ಯಜಮಾನ, ಈ ಕಠಿಣ ನರಮಾನಿ, ಈ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಈ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ತೆರಿದ್</verse>
				<verse number="25">ಪೋಡಿದ್ ಪೋದು ಈ ನಿನ ತಲಾಂತ್‌ನ್ ಭೂಮಿಡ್ ದೆಂಗಾದ್ ದೀದಿತ್ತೆ; ಇಂದಾ, ನಿನ್ನವು ನಿಕ್ಕ್ ಉಪ್ಪಡ್,’ ಪಂಡೆ.</verse>
				<verse number="26">ಅಪಗ ಆಯನ ಯಜಮಾನೆ ಆಯಗ್, ‘ಮೆಯಿ ಬಗ್ಗಂದಿನಾಯಾ ಪ್ರಯೋಜನದಾಂತಿ ಬೇಲೆದಾಯಾ, ಈ ಯಾನ್ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಬೊಕ್ಕ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ನಿಕ್ಕ್ ಗೊತ್ತಿತ್ತ್ಂಡತ್ತಾ?</verse>
				<verse number="27">ಅಂಚಾಂಡ ಈ ಎನ ಕಾಸ್‌ನ್ ಸಾಹುಕಾರನ ಕೈತಲ್‌ ಬಡ್ಡಿಗ್ ಪಾಡೊಡಿತ್ತ್‌ಂಡ್. ಯಾನ್ ಬತ್ತ್‌ದ್ ಎನ್ನೆನ್ ಬಡ್ಡಿಸಮೇತ ದೆತ್ತೊಂದ್ವೆ ಅತ್ತಾ,’ ಅಂದ್‌ದ್ ಪಂಡೆ.</verse>
				<verse number="28">ತನ ಸೇವಕೆರೆಗ್, ‘ಆಯಡ್ದ್ ಆ ತಲಾಂತ್ ದೆತ್ತೊಂದು ಪತ್ತ್ ತಲಾಂತ್ ಇತ್ತಿನಾಯಗ್ ಕೊರ್ಲೆ.</verse>
				<verse number="29">ದಾಯೆ ಪಂಡ ಇತ್ತಿನಾಕುಲೆಗ್ ದೇವೆರ್ ಹೆಚ್ಚಾದ್ ಕೊರುವೆ, ಅಕ್ಲೆಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು.</verse>
				<verse number="30">ಬೊಕ್ಕ ಪ್ರಯೋಜನದಾಂತಿ ಬೇಲೆದಾಯನ್ ಪಿದಯಿ ಕತ್ತಲೆಗ್ ಪಾಡ್ದ್ ಬುಡ್ಲೆ ಅಂದ್‌ದ್ ಪಂಡೆ. ಅಲ್ಪ ಅರ್ಪಟಲಾ, ಕಟಕಟ ಕೂಲಿ ಕಡೆಪಿನವುಲಾ ಉಪ್ಪುಂಡು.’</verse>
				<verse number="31">“ಉಂದತ್ತಂದೆ ನರಮಾನಿ ಮಗೆ ತನ ಮೈಮೆಡ್ ಮಾತ ಪರಿಶುದ್ಧ ದೂತೆರೆಲಾ ಆಯಡೊಪ್ಪ ಬನ್ನಗ ತನ ಮೈಮೆದ ಗದ್ದಿಗೆಡ್ ಕುಲ್ಲುವೆ;</verse>
				<verse number="32">ಬೊಕ್ಕ ಮಾತ ದೇಶೊಲೆ ಜನೊಕುಲು ಆಯ ದುಂಬು ಸೇರ್ದ್ ಬರ್ಪೆರ್. ಕುರುಬೆ ಏಡ್‌ಲೆನ್ಲಾ, ಕುರಿಕುಲೆನ್ಲಾ ಬೇತೆ ಬೇತೆ ಮಲ್ಪುಲೆಕ್ಕನೇ ಆಯೆ ಅಕ್ಲೆನ್ ಬೇತೆ ಬೇತೆ ಮಲ್ಪುವೆ</verse>
				<verse number="33">ಕುರಿಕುಲೆನ್ ತನ ಬಲತ್ತ ಮರ್ಗಿಲ್‌ಡ್, ಏಡ್‌ಲೆನ್ ತನ ದತ್ತ ಮರ್ಗಿಲ್‌ಡ್ ಉಂತಾವೆ.</verse>
				<verse number="34">ಅಪಗ ಅರಸು ತನ ಬಲತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಎನ ಅಮ್ಮೆರೆನ ಆಶೀರ್ವಾದ ಪಡೆಯಿನಾಕುಲೆ ಬಲೆ, ಲೋಕಾದಿಡ್ದ್ ನಿಕ್ಲೆಗಾದ್ ತಯಾರಾದುಪ್ಪು ರಾಜ್ಯೊನು ಬೊಕ್ಕ ಬಾಧ್ಯಸ್ತಿಗೆದ ಹಕ್ಕ್‌ನ್ ದೆತ್ತೊನ್ಲೆ.</verse>
				<verse number="35">ಯಾನ್ ಬಡವುಡಿತ್ತೆ, ಎಂಕ್ ವಣಸ್ ಕೊರಿಯರ್; ಯಾನ್ ಬಾಜೆಲ್‌ಡಿತ್ತೆ, ಎಂಕ್ ಪರಿಯೆರೆ ಕೊರಿಯರ್; ಪರದೇಶಿ ಆದಿತ್ತೆ, ಎನನ್ ಸೇರಾವೊಂಡರ್;</verse>
				<verse number="36">ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ತುತ್ಯೆರೆ ಕೊರಿಯರ್; ಸೀಕ್‌ಡ್ ಬೂರ್ದಿತ್ತೆ, ಎನನ್ ಆರೈಕೆ ಮಲ್ಪೆರೆ ಬತ್ತರ್; ಸೆರೆಮನೆಟ್ ಇತ್ತೆ, ಎನನ್ ತೂಯೆರೆ ಬತ್ತರ್,’ ಅಂದ್‌ದ್ ಪನ್ಪೆ.</verse>
				<verse number="37">ಐಕ್ ನೀತಿವಂತೆರ್, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ ತೂದು ನಿಕ್ಕ್ ವಣಸ್ ಕೊರಿಯ? ಇಜ್ಜಿಡ ನಿಕ್ಕ್ ಬಾಜೆಲ್ ಆತಿನೆನ್ ತೂದು ಪರಿಯೆರೆ ಕೊರಿಯ?</verse>
				<verse number="38">ಏಪ ಈ ಪರದೇಶಿ ಆದುಪ್ಪುನೆನ್ ತೂದು ಸೇರಾವೊಂಡ? ಇಜ್ಜಿಡ ನಿಕ್ಕ್ ಕುಂಟುದಾಂತೆ ಉಪ್ಪುನೆನ್ ತೂದು ತುತ್ಯೆರೆ ಕೊರಿಯ?</verse>
				<verse number="39">ಎಂಕುಲು ಏಪ ಈ ಸೀಕ್‌ಡ್ ಬೂರ್ದಿನೆನ್ ತೂದು ಆರೈಕೆ ಮಲ್ತ್‌ದಿನಿ? ಅತ್ತ್‌ಡ ಸೆರೆಮನೆಟ್ ಇತ್ತಿನೆನ್ ತೂದು ನಿನನ್ ತೂಯೆರೆ ಬತ್ತ,’ ಅಂದ್‌ದ್ ಕೇನ್ವೆರ್.</verse>
				<verse number="40">ಐಕ್ ಅರಸು, ‘ಎನ ಸಹೋದ್ರೆರೆಡ್ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ತರಾ ಅವು ಎಂಕ್ ಮಲ್ತಿಲೆಕ್ಕ ಆಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,’ ಅಂದ್‌ದ್ ಪಂಡೆ.</verse>
				<verse number="41">ಐಡ್ದ್ ಬೊಕ್ಕ ಆಯೆ ದತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಶಾಪಗ್ರಸ್ತೆರೇ, ಎನನ್ ಬುಡ್ದು ಪಿಶಾಚಗ್ಲಾ, ಆಯ ದೂತೆರೆಗ್ಲಾ ತಯಾರಾದುಪ್ಪು ನಿತ್ಯ ತೂತ ಉಲಯಿ ಪೋಲೆ.</verse>
				<verse number="42">ಯಾನ್ ಬಡವುಡಿತ್ತೆ, ನಿಕುಲು ಎಂಕ್ ವಣಸ್ ಕೊರ್ಜರ್; ಯಾನ್ ಬಾಜೆಲ್‌ಡಿತ್ತೆ, ನಿಕುಲು ಎಂಕ್ ಪರಿಯೆರೆ ಕೊರ್ಜರ್;</verse>
				<verse number="43">ಪರದೇಶಿ ಆದಿತ್ತೆ, ನಿಕುಲು ಎನನ್ ಸೇರಾವೊಂಡಿಜರ್; ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ಎಂಕ್ ತುತ್ಯೆರೆ ಕೊರ್ಜರ್; ಸೀಕ್‌ಡ್ ಬೂರ್ದಿತ್ತೆ, ಸೆರೆಮನೆಟ್ ಇತ್ತೆ, ನಿಕುಲು ಎನನ್ ಆರೈಕೆ ಮಲ್ಪೆರೆ ಬತ್ತಿಜರ್,’ ಅಂದ್‌ದ್ ಪಂಡೆ.</verse>
				<verse number="44">ಐಕ್ ಅಕುಲುಲಾ, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ಲಾ, ಬಾಜೆಲ್‌ಡ್ ಇತ್ತಿನೆನ್ಲಾ, ಈ ಪರದೇಶಿಯಾದ್ ಇತ್ತಿನೆನ್ಲಾ, ಈ ಕುಂಟುದಾಂತಿನಾಯೆ ಆದಿತ್ತಿನೆನ್ಲಾ, ಈ ಸೀಕ್‌ಡ್ ಬೂರ್ದಿತ್ತಿನೆನ್‌ಲಾ, ಈ ಸೆರೆಮನೆಟ್ ಇತ್ತಿನೆನ್ಲಾ ತೂದು ನಿಕ್ಕ್ ಚಾಕ್ರಿ ಮಲ್ಪಂದೆ ಪೋಯ?’ ಪನ್ವೆರ್.</verse>
				<verse number="45">ಅಪಗ ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಈ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ಪಂದೆ ಉಲ್ಲರಾ ಅವೆನ್ ಎಂಕ್‌ಲಾ ಮಲ್ಪಂದಿಲೆಕ್ಕ ಆಂಡ್,’ ಅಂದ್‌ದ್ ಪಂಡೆ.</verse>
				<verse number="46">ಬೊಕ್ಕ ಮೊಕುಲು ನಿತ್ಯ ಶಿಕ್ಷೆಗ್ಲಾ, ನೀತಿವಂತೆರ್ ನಿತ್ಯಜೀವೊಗ್ಲಾ ಪೋಪೆರ್,” ಅಂದ್‌ದ್ ಪಂಡೆ.</verse>
			</chapter>
			<chapter number="26">
				<verse number="1">ಯೇಸು ಈ ಪಾತೆರೊಲೆನ್ ಮಾತ ಪಂಡ್ದ್ ಮುಗಿತಿ ಬೊಕ್ಕ ತನ ಶಿಷ್ಯೆರೆಡ,</verse>
				<verse number="2">“ರಡ್ಡ್ ದಿನೊಡ್ದು ಬೊಕ್ಕ ಪಸ್ಕ ಪರ್ಬ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತುಂಡು. ಅಪಗ ನರಮಾನಿ ಮಗನ್ ಕ್ರುಸ್ಸುಗು ಪತ್ತಾವೆರೆ ಒಚ್ಚಿದ್ ಕೊರುವೆರ್,” ಅಂದ್‌ದ್ ಪಂಡೆ.</verse>
				<verse number="3">ಆ ಸಮಯೊಡು ಪ್ರಧಾನಯಾಜಕೆರ್‌ಲಾ, ಪ್ರಜೆತ ಹಿರಿಯೆರ್‌ಲಾ ಕಾಯಫೆ ಪನ್ಪಿ ಪ್ರಧಾನಯಾಜಕನ ಮಠೊಕು ಸೇರ್ದ್ ಬತ್ತ್‌ದ್,</verse>
				<verse number="4">ಯೇಸುನು ಉಪಾಯೊಡು ಪತ್ತ್‌ದ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂಡೆರ್.</verse>
				<verse number="5">“ಆಂಡಲಾ ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗಲಾಟೆ ಆವು,” ಅಂದ್‌ದ್ ಪಾತೆರೊಂಡೆರ್.</verse>
				<verse number="6">ಯೇಸು ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತಿನಪಗ ಒರ್ತಿ ಪೊಂಜೊವು</verse>
				<verse number="7">ಮಸ್ತ್ ಬಿಲೆತ ಕಮ್ಮೆನದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್ ಆಯೆ ವಣಸ್‌ಗ್ ಕುಲ್ಲೊಂದಿತ್ತಿನಪಗ ಆ ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್.</verse>
				<verse number="8">ಶಿಷ್ಯೆರ್ ಉಂದೆನ್ ತೂದು ಕೋಪೊಡು, “ಈ ನಷ್ಟ ದಾಯೆಗ್?</verse>
				<verse number="9">ಈ ಎಣ್ಣೆನ್ ಮಸ್ತ್ ದುಡ್ಡುಗು ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಪಂಡೆರ್.</verse>
				<verse number="10">ಯೇಸು ಉಂದೆನ್ ತೆರಿದ್ ಅಕ್ಲೆಡ, “ಈ ಪೊಂಜೊವುಗು ದಾಯೆಗ್ ತೊಂದರೆ ಕೊರೊಂದುಲ್ಲರ್? ಮೋಲು ಎಂಕ್ ಎಡ್ಡೆ ಬೇಲೆ ಮಲ್ತಲ್.</verse>
				<verse number="11">ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ.</verse>
				<verse number="12">ಮೋಲು ಈ ಎಣ್ಣೆನ್ ಎನ ಮೆಯಿಕ್ ಮೈತಿನವು ಎನ ಮರಣಡ್ದುಂಬು ಆಪಿ ಕ್ರಿಯೊಲೆಗ್ ಬೋಡಾದ್ ಮಲ್ತಲ್.</verse>
				<verse number="13">ಈ ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ ಅಲ್ಪಲ್ಪ ಮೋಲು ಮಲ್ತಿನೆನ್ ಆಲೆನ ನೆನೆಪುಗಾದ್ ಪನ್ವೆರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್‌ದ್ ಪಂಡೆ.</verse>
				<verse number="14">ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ ಪನ್ಪಿನಾಯೆ ಪ್ರಧಾನಯಾಜಕೆರೆ ಕೈತಲ್‌ ಪೋದು,</verse>
				<verse number="15">“ಯಾನ್ ಯೇಸುನು ನಿಕ್ಲೆಗ್ ಪತ್ತ್‌ದ್ ಕೊರಿಯೆಡ ಎಂಕ್ ದಾದ ಕೊರ್ಪರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು ಆಯಗ್ ಮುಪ್ಪ ಬೊಳ್ಳಿದ ನಾಣ್ಯೊನು ಗೆನ್ತ್‌ದ್ ಕೊರಿಯೆರ್.</verse>
				<verse number="16">ಆನಿಡ್ದಿಂಚಿ ಆಯೆ ಯೇಸುನು ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.</verse>
				<verse number="17">ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನತಾನಿ ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಪಸ್ಕದ ವಣಸ್ ಮಲ್ಪೆರೆ ಎಂಕುಲು ನಿಕ್ಕ್ ಓಲು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”</verse>
				<verse number="18">ಆಯೆ, “ನಿಕುಲು ಪೇಂಟೆದ ಉಲಯಿ ಇಂಚಿತ್ತಿನಾಯನ ಕೈತಲ್‌ ಪೋದು ಆಯಡ, ‘ಎನ ಕಾಲ ಕೈತಲಾಂಡ್. ನಿನ ಇಲ್ಲಡ್ ಎನ ಶಿಷ್ಯೆರೆಡೊಪ್ಪ ಪಸ್ಕ ಪರ್ಬ ಮಲ್ಪುವೆ ಅಂದ್‌ದ್ ಬೋಧಕೆ ಪನ್ಪೆ ಅಂದ್‌ದ್ ಪನ್ಲೆ.’”</verse>
				<verse number="19">ಯೇಸು ಅಕ್ಲೆಗ್ ಅಪ್ಪಣೆ ಕೊರಿಲೆಕ್ಕನೆ ಶಿಷ್ಯೆರ್ ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.</verse>
				<verse number="20">ಬೈಯಗ್‌ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ವಣಸ್‌ಗ್ ಕುಲ್ಲಿಯೆ.</verse>
				<verse number="21">ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಪಂಡೆ.</verse>
				<verse number="22">ಅಪಗ ಅಕುಲು ಬಾರೀ ದುಃಖೊಡು, “ಕರ್ತವಾ, ಯಾನತ್ತತ್ತಾ?” ಅಂದ್‌ದ್ ಪ್ರತಿ ಒರಿಲಾ ಕೇನಿಯೆರೆ ಸುರು ಮಲ್ತೆರ್.</verse>
				<verse number="23">ಐಕ್ ಆಯೆ, “ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ ಎನನ್ ಪತ್ತ್‌ದ್ ಕೊರ್ಪೆ.</verse>
				<verse number="24">ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ, ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ, ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್.”</verse>
				<verse number="25">ಅಪಗ ಆಯನ್ ಪತ್ತ್‌ದ್ ಕೊರಿಯೆರೆ ಇತ್ತಿನ ಯೂದೆ, “ಗುರೂ, ಯಾನಾ?” ಪಂಡಿನೆಕ್ಕ್ ಯೇಸು ಆಯಗ್, “ಈಯೇ ಪಂಡ,” ಅಂದ್‌ದ್ ಪಂಡೆ.</verse>
				<verse number="26">ಅಕುಲು ವಣಸ್ ಮಲ್ತೊಂದುಪ್ಪುನಗ ಯೇಸು ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಶಿಷ್ಯೆರೆಗ್ ಕೊರ್ದು, “ದೆತ್ತೊನ್ಲೆ, ತಿನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.</verse>
				<verse number="27">ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, “ಉಂದೆಟ್ಟ್ ಇತ್ತಿನೆನ್ ಮಾತೆರ್ಲಾ ಪರ್ಲೆ,</verse>
				<verse number="28">ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆ ಪಾಪೊಲೆ ಪರಿಹಾರೊಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್.</verse>
				<verse number="29">ಯಾನ್ ಎನ ಅಮ್ಮೆರೆ ರಾಜ್ಯೊಡು ನಿಕ್ಲೆಡೊಪ್ಪ ಪೊಸತ್ತಾದ್ ಪರ್ಪಿನ ಆ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ, ಅಂದ್‌ದ್ ನಿಕ್ಲೆಗ್ ಪನ್ಪೆ”</verse>
				<verse number="30">ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್ ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.</verse>
				<verse number="31">ಅಪಗ ಯೇಸು ಅಕ್ಲೆಡ, ನಿಕುಲು ಮಾತೆರ್ಲಾ ಈ ರಾತ್ರೆಡ್ ಎನ ಸಂಗತಿಡ್ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, “ಯಾನ್, ‘ಕುರುಬಗ್ ಹಾಕುವೆ, ಪುಂಡುದ ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ.</verse>
				<verse number="32">ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.</verse>
				<verse number="33">ಆಂಡ ಪೇತ್ರೆ ಆಯಡ, “ಮಾತೆರ್ಲಾ ನಿನ ಬಗೆಟ್ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಏಪೊಗ್ಲಾ ಪಿರಜಾರಯೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="34">ಯೇಸು, “ನಿಕ್ಕ್ ನಿಜಾದ್ ಪನ್ಪೆ. ಉಂದೇ ರಾತ್ರೆ ಕೋರಿ ಕಿಲೆಪುನೆಕ್ಕ್ ದುಂಬು ಈ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.</verse>
				<verse number="35">ಪೇತ್ರೆ ಆಯಡ, “ಯಾನ್ ನಿನಡೊಪ್ಪ ಸೈಯೊಡಾಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ,” ಅಂಚೆನೇ ಮಾತ ಶಿಷ್ಯೆರ್‌ಲಾ ಪಂಡೆರ್.</verse>
				<verse number="36">ಯೇಸು ತನ ಶಿಷ್ಯೆರೆಡೊಪ್ಪ ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಅಕ್ಲೆಡ, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ.” ಅಂದ್‌ದ್ ಪಂಡೆ.</verse>
				<verse number="37">ಪೇತ್ರನ್ಲಾ ಜೆಬೆದಾಯನ ಇರ್ವೆರ್ ಜೋಕುಲೆನ್ಲಾ ಲೆತ್ತೊಂದು ಪೋದು ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ.</verse>
				<verse number="38">ಬೊಕ್ಕ ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎನಡೊಪ್ಪ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="39">ಒಂತೆ ದುಂಬು ಪೋದು ಅಡ್ಡಬೂರ್ದು, “ಎನ ಅಮ್ಮೆರೇ, ಸಾದ್ಯ ಇತ್ತ್ಂಡ ಈ ಕಷ್ಟ ಅನುಭವಿಪುನ ದುನ್ನ ಎನನ್ ಬುಡ್ದು ಪೋವಡ್; ಎಂಚಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್ ದೇವೆರೆಡ ಪ್ರಾರ್ಥನೆ ಮಲ್ತೆ.”</verse>
				<verse number="40">ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಇಂಚನ, ಒಂಜಿ ಗಳಿಗೆ ಆಂಡಲಾ ಎನಡೊಪ್ಪ ಎಚ್ಚರಿಕೆ ಆದುಪ್ಪಯರಾ?</verse>
				<verse number="41">ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ. ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.</verse>
				<verse number="42">ಕುಡ ರಡ್ಡನೆ ಸರ್ತಿ ಪೋದು, “ಎನ ಅಮ್ಮೆರೆ, ಯಾನ್ ಪರಂದೆ ಈ ಕಷ್ಟ ಅನುಭವಿಪುನ ದುನ್ನ ಎನಡ್ದ್ ಬುಡ್ದು ಪೋಯೆರೆ ಬಲ್ಲಿಂದ್ ಇತ್ತ್ಂಡ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್,” ಪ್ರಾರ್ಥನೆ ಮಲ್ತೆ.</verse>
				<verse number="43">ಆಯೆ ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್.</verse>
				<verse number="44">ಐಡ್ದ್ ಬೊಕ್ಕ ಅಕ್ಲೆನ್ ಬುಡ್ದು ಪೋದು ಕುಡ ಅವ್ವೇ ಪಾತೆರೊನು ಪಂಡ್ದ್ ಮೂಜನೇ ಸರ್ತಿ ಪ್ರಾರ್ಥನೆ ಮಲ್ತೆ.</verse>
				<verse number="45">ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕ್ಲೆಡ, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಇಂದಾ, ಗಳಿಗೆ ಕೈತಲ್ ಬತ್ತ್ಂಡ್, ಇತ್ತೆ ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್.</verse>
				<verse number="46">ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.</verse>
				<verse number="47">ಆಯೆ ನನಲಾ ಪಾತೆರೊಂದುಪ್ಪುನಗನೇ, ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಪ್ರಜೆತ ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಮಲ್ಲ ಜನೊಕುಲೆ ಗುಂಪು ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್.</verse>
				<verse number="48">ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ, ಆಯನ್ ಪತ್ತ್‌ಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರಿಯೆ.</verse>
				<verse number="49">ಅಪಗನೆ ಆಯೆ ಯೇಸುನ ಕೈತಲ್‌ ಪೋದು, “ಗುರೂ, ವಂದನೆ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.</verse>
				<verse number="50">ಯೇಸು ಆಯಡ, “ಸ್ನೇಹಿತಾ, ಈ ಮಲ್ಪೆರೆ ಬೈದಿನ ಬೇಲೆ ಉಂದೆನಾ?” ಅಂದ್‌ದ್ ಪಂಡಿನಪಗ ಅಕುಲು ಕೈತಲ್‌ ಬತ್ತ್‌ದ್ ಯೇಸುನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.</verse>
				<verse number="51">ಪತ್ತಿಲೆಕ್ಕನೇ ಯೇಸುಡೊಪ್ಪ ಇತ್ತಿನಾಕುಲೆಡ್ ಒರಿ ಕೈ ದುಂಬು ಮಲ್ತ್‌ದ್ ತನ ಕತ್ತಿನ್ ದೆತ್ತ್‌ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ.</verse>
				<verse number="52">ಅಪಗ ಯೇಸು ಆಯಗ್, “ನಿನ ಕತ್ತಿನ್ ಪಿರ ಐತ ಜಾಗ್‌ಡ್ ದೀಲ. ಕತ್ತಿ ಪತ್ತಿನಾಕುಲು ಕತ್ತಿಡ್ದೇ ಸೈಪೆರ್.</verse>
				<verse number="53">ಯಾನ್ ಎನ ಅಮ್ಮೆರೆಡ ನಟ್ಟೊಂಡ ಎಂಕ್ ಇತ್ತೆನೇ ಪದ್ರಾಡ್ ದಂಡ್‌ಲೆಡ್ದ್ ಹೆಚ್ಚ್ ದೂತೆರೆ ಸೈನೊನು ಕಡಪುಡ್ದು ಕೊರಿಯೆರೆ ಸಾದ್ಯ ಇಜ್ಜಿ ಅಂದ್‌ದ್ ಎನ್ನುವನಾ?</verse>
				<verse number="54">ಕಡಪುಡ್ದು ಕೊರಿಯೆಡ ಎಂಕ್ ಇಂಚಿಂಚಿನವು ಆವೊಡು ಪನ್ಪಿನ ಶಾಸ್ತ್ರದ ಪಾತೆರೊಲು ನಡಪುನು ಎಂಚಾ,” ಅಂದ್‌ದ್ ಪಂಡೆ.</verse>
				<verse number="55">ಅವ್ವೇ ಗಳಿಗೆಡ್ ಯೇಸು ಗುಂಪುಗುಂಪಾದ್ ಸೇರ್ದಿತ್ತಿ ಜನೊಕುಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ? ಯಾನ್ ದಿನಾಲ ದೇವಾಲಯೊಡು ಕುಲ್ಲೊಂದು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್.</verse>
				<verse number="56">ಆಂಡ ಉಂದು ಪ್ರವಾದಿಲು ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಪಂಡೆ. ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.</verse>
				<verse number="57">ಬೊಕ್ಕ ಯೇಸುನು ಪತ್ತಿನಾಕುಲು ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್‌ ಲೆತ್ತೊಂದು ಪೋಯೆರ್. ಅಲ್ಪ ಶಾಸ್ತ್ರಿಲುಲಾ, ಹಿರಿಯೆರ್‌ಲಾ ಕೂಡ್ದು ಬತ್ತ್‌ತ್ತೆರ್.</verse>
				<verse number="58">ಪೇತ್ರೆಲಾ ದೂರೊಡ್ದು ಆಯನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್ ಮುಟ್ಟ ಬತ್ತ್‌ದ್ ಉಲಯಿ ಪೋದು ಆಯನ ಗತಿ ದಾನೆ ಆಪುಂಡು ತೂವೊಡು ಅಂದ್‌ದ್ ಪಾರದಾಕುಲೆಡೊಪ್ಪ ಕುಲ್ಲಿಯೆ.</verse>
				<verse number="59">ಅಪಗ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್;</verse>
				<verse number="60">ಆಂಡ ಮಸ್ತ್ ಜನ ಸುಳ್ಳು ಸಾಕ್ಷಿ ಕೊರಿಯೆರ್ಡಲಾ, ಆಯಡ ದಾಲಾ ತಪ್ಪು ತಿಕ್ಕಿಜಿ. ಕಡೆಕ್ಕ್ ಇರ್ವೆರ್ ದುಂಬು ಬತ್ತ್‌ದ್,</verse>
				<verse number="61">“ಈ ನರಮಾನಿ ಪನೊಂದಿತ್ತೆ, ‘ಯಾನ್ ದೇವೆರೆ ಆಲಯೊನು ದರ್ತ್‌ದ್ ಮೂಜಿ ದಿನತ ಉಲಯಿ ಕಟ್ಟುವೆ ಅಂದ್‌ದ್ ಇಂಬೆ ಪನ್ತೆ,’” ಪಂಡ್ದ್ ಪನ್ನಗ,</verse>
				<verse number="62">ಪ್ರಧಾನಯಾಜಕೆ ಲಕ್ಕ್‌ದ್ ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು ಅಂದ್‌ದ್,” ಆಯನ್ ಕೇನ್ನಗ ಯೇಸು ಮನಿಪಂದೆ ಇತ್ತೆ.</verse>
				<verse number="63">ಅಪಗ ಪ್ರಧಾನಯಾಜಕೆ, “ನಿಕ್ಕ್ ಜೀವ ಇತ್ತಿ ದೇವೆರೆನ ಆಜ ದೀಪೆ. ಈ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಅಂದಾ, ಅತ್ತಾ? ಅಂದ್‌ದ್ ಎಂಕ್ಲೆಗ್ ಈ ಪನೊಡು,” ಪಂಡ್ದ್ ಪನ್ನಗ</verse>
				<verse number="64">ಯೇಸು ಆಯಗ್, “ಈಯೇ ಪಂಡ! ಉಂದತ್ತಂದೆ ನನ ಮಿತ್ತ್ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ, ಬಾನದ ಮುಗಲ್‌ದ ಮಿತ್ತ್ ಕುಲ್ಲೊಂದು ಬರ್ಪಿನೆನ್ಲಾ ತೂವರ್, ಅಂದ್‌ದ್ ನಿಕ್ಲೆಗ್ ಪನ್ಪೆ,” ಅಂದ್‌ದ್ ಪಂಡೆ.</verse>
				<verse number="65">ಅಪಗ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ಉಂದು ದೂಷಣೆದ ಪಾತೆರ, ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು? ಆಯೆ ಇತ್ತೆ ಪಂಡಿನ ದೂಷಣೆದ ಪಾತೆರೊನು ಕೇಂಡರತ್ತಾ?</verse>
				<verse number="66">ನಿಕ್ಲೆಗ್ ಎಂಚ ತೋಜುಂಡು?” ಪನ್ನಗ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="67">ಅಪಗ ಆಯನ ಮೋನೆದ ಮಿತ್ತ್ ಉಬ್ಬಿದ್ ಆಯನ್ ಗುದ್ದಿಯೆರ್. ಕೆಲೆವೆರ್ ಆಯನ ಕೆಪ್ಪೆಗ್ ಹಾಕ್‌ದ್</verse>
				<verse number="68">“ಕ್ರಿಸ್ತ, ನಿಕ್ಕ್ ಹಾಕಿನಾಯೆ ಏರ್? ಎಂಕ್ಲೆಗ್ ಪ್ರವಾದನೆ ಪನ್ಲ,” ಪಂಡೆರ್.</verse>
				<verse number="69">ಇಂಚಿಡ್ದ್ ಪೇತ್ರೆ ಪಿದಯಿ ಜಾಲ್‌ಡ್ ಕುಲ್ದಿತ್ತೆ. ಅಲ್ಪ ಒರ್ತಿ ಚಾಕ್ರಿದಾಲ್ ಆಯ ಕೈತಲ್‌ ಬತ್ತ್‌ದ್, “ಈಲಾ ಗಲಿಲಾಯದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಿನಪಗ</verse>
				<verse number="70">ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್,” ಅಂದ್‌ದ್ ಮಾತೆರೆ ಎದುರು ಆರೆಂಜಿಯೆ.</verse>
				<verse number="71">ಆಯೆ ಅಲ್ತ್‌ಡ್ದ್ ಬಾಕಿಲ್‌ದ ಕೈತಲ್‌ ಪೋಯಿನಪಗ ಬೊಕ್ಕೊರ್ತಿ ಚಾಕ್ರಿದಾಲ್ ಆಯನ್ ತೂದು ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಲ್.</verse>
				<verse number="72">ಆಯೆ ಕುಡ, “ಆರೆಂಜಿಯೆ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಆಜ ದೀವೊಂದು ಪಂಡೆ.</verse>
				<verse number="73">ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ದುಂಬು ಬತ್ತ್‌ದ್ ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ನಿನ ಬಾಷೆನೇ ಈ ಗಲಿಲಾಯದಾಯೆ ಅಂದ್‌ದ್ ತೋಜಾವುಂಡು,” ಅಂದ್‌ದ್ ಪನ್ನಗ</verse>
				<verse number="74">ಆಯೆ, “ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡಿಯೆರೆಗ್ಲಾ ಸುರು ಮಲ್ತೆ. ಅಪಗನೇ ಕೋರಿ ಕಿಲೆತ್ತ್ಂಡ್.</verse>
				<verse number="75">ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.</verse>
			</chapter>
			<chapter number="27">
				<verse number="1">ಬೊಲ್ಪಾನಗ ಮಾತ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಲೋಚನೆ ಮಲ್ತೆರ್.</verse>
				<verse number="2">ಆಯನ್ ಕೈಕಟ್ಟ್‌ದ್ ಲೆತ್ತೊಂದು ಪೋದು ದೇಶಾಧಿಪತಿ ಆದುಪ್ಪು ಪಿಲಾತಗ್ ಒಚ್ಚಿದ್ ಕೊರಿಯೆರ್.</verse>
				<verse number="3">ಅಪಗ ಆಯನ್ ಪತ್ತ್‌ದ್ ಕೊರಿನ ಯೂದೆ, ಯೇಸುಗು ಮರಣ ದಂಡನೆದ ತೀರ್ಪಾಂಡ್ ಪಂಡ್ದ್ ಗೊತ್ತಾಯಿನಪಗ, ಪಶ್ಚಾತಾಪ ಪಡೆದ್ ಆ ಮುಪ್ಪ ಬೊಳ್ಳಿದ ನಾಣ್ಯೊನು ಪ್ರಧಾನಯಾಜಕೆರೆಗ್ಲಾ ಸಭೆತ ಹಿರಿಯೆರೆಗ್ಲಾ ಪಿರ ಕೊರಿಯೆರೆ ಕನತೆ.</verse>
				<verse number="4">“ತಪ್ಪುದಾಂತಿ ನೆತ್ತೆರ್‌ನ್ ಮರಣೊಗು ಒಚ್ಚಿದ್ ಕೊರ್ದು ಪಾಪ ಮಲ್ತೆ,” ಪಂಡೆ. ಐಕ್ ಅಕುಲು, “ಐಟ್ಟ್ ಎಂಕ್ಲೆಗ್ ದಾನೆ, ಅವೆನ್ ಈಯೇ ತೂವೊನ್ಲ,” ಪಂಡೆರ್.</verse>
				<verse number="5">ಅಪಗ ಯೂದೆ ಆ ದುಡ್ಡುನು ದೇವಾಲಯದ ಉಲಯಿ ದಕ್ಕ್‌ದ್ ಪೋದು ಕಂಟೆಲ್‌ಗ್ ಉರ್ಲು ಪಾಡೊಂದು ಸೈತೆ.</verse>
				<verse number="6">ಪ್ರಧಾನಯಾಜಕೆರ್ ಆ ದುಡ್ಡುನು ದೆತ್ತೊಂದು, “ಅವು ನೆತ್ತೆರ್‌ದ ಕಾಸ್ ಆದಿತ್ತಿನೆಡ್ದ್ ಅವೆನ್ ಕಾಣಿಕೆದ ಡಬ್ಬಿಡ್ ಪಾಡಿಯೆರೆ ಬಲ್ಲಿ.” ಪಂಡೆರ್.</verse>
				<verse number="7">ಬೊಕ್ಕ ಆಲೋಚನೆ ಮಲ್ತ್‌ದ್, ಪರದೇಸಿಲೆನ್ ಕೌಂಪೆರೆ ಬೋಡಾದ್ ಐಡ್ದ್ ಓಡಾರಿನ ಕಂಡ ಪನ್ಪಿ ಭೂಮಿನ್ ದೆತ್ತೊಂಡೆರ್.</verse>
				<verse number="8">ಈ ಕಾರಣೊಡ್ದು ಇದ ಮುಟ್ಟಲಾ ಆ ಕಂಡೊಗು ನೆತ್ತೆರ್‌ದ ಕಂಡ ಅಂದ್‌ದ್ ಪುದರ್ ಉಂಡು.</verse>
				<verse number="9">ಇಂಚ ಪ್ರವಾದಿ ಆದುಪ್ಪು ಯೆರೆಮೀಯೆ ಪಂತಿನ ಪಾತೆರ ನಡತ್ಂಡ್. ಅವು ದಾನೆಂದ್ಂಡ, “ಅಕುಲು ಮುಪ್ಪ ರುಪಾಯಿ ದೆತ್ತೊಂದು ಕರ್ತವ ಅಪ್ಪಣೆ ಆಯಿ ಲೆಕ್ಕ ಅವೆನ್ ಕುಂಬಾರನ ಕಂಡೊಗು ಕೊರಿಯೆರ್.” ಉಂದೇ ಅಕುಲು ಕ್ರಯ ಕಟ್ಟಿನ ಬಿಲೆ. ಉಂದೇ ಇಸ್ರಾಯೇಲ್ಯೆರೆಡ್ ಕ್ರಯ ಕಟ್ಟ್‌ದಿನಾಯನ ಬಿಲೆ ಪನ್ಪಿನವೇ.</verse>
				<verse number="10"></verse>
				<verse number="11">ಯೇಸು ದೇಶಾಧಿಪತಿ ದುಂಬು ಉಂತುದುಪ್ಪುನಪಗ ದೇಶಾಧಿಪತಿ, “ಈ ಯೆಹೂದ್ಯೆರೆನ ಅರಸು ಅಂದಾ?” ಅಂದ್‌ದ್ ಕೇಂಡೆ. ಯೇಸು ಆಯಡ, “ಅಂದ್, ಈ ಪಂಡಿನಂಚೆನೇ.”</verse>
				<verse number="12">ಬೊಕ್ಕ ಪ್ರಧಾನಯಾಜಕೆರ್‌ಲಾ, ಹಿರಿಯೆರ್‌ಲಾ ಆಯನ ಮಿತ್ತ್ ದೂರು ಪನೊಂದುಪ್ಪುನಪಗ ಆಯೆ ದಾಲಾ ಉತ್ತರ ಕೊರ್ಜೆ.</verse>
				<verse number="13">ಅಪಗ ಪಿಲಾತೆ ಆಯಡ, “ಮೊಕುಲು ನಿನ ಮಿತ್ತ್ ಈತ್ ದೂರು ಪನ್ನಗ ನಿಕ್ಕ್ ಕೇನುಜಾ?” ಅಂದ್‌ದ್ ಕೇಂಡೆ.</verse>
				<verse number="14">ಯೇಸು ಆಯಗ್ ಒಂಜಿ ಪಾತೆರೊಗ್ಲಾ ಉತ್ತರ ಕೊರ್ಜೆ ಅವೆನ್ ತೂದು ದೇಶಾಧಿಪತಿಗ್ ಮಸ್ತ್ ಅಚ್ಚಿರ ಆಂಡ್.</verse>
				<verse number="15">ಆಂಡ ಆ ಪರ್ಬೊಡು ಜನೊಕುಲು ಬಯಕಿನ ಒರಿ ಸೆರೆಟ್ಟಿತ್ತಿನಾಯನ್ ಅಕ್ಲೆಗ್ ಬುಡ್ದು ಕೊರ್ಪಿನವು ದೇಶಾಧಿಪತಿನ ಕ್ರಮ ಇತ್ತ್ಂಡ್.</verse>
				<verse number="16">ಆ ಸಮಯೊಡು ಬರಬ್ಬೆ ಪನ್ಪಿ ಪುದರ್ ಪೋಯಿ ಒರಿ ಸೆರೆಟ್ಟಿತ್ತೆ. ಇಂಚ ಅಕುಲು ಸೇರ್ದ್ ಬತ್ತ್‌ತ್ತಿ ಸಮಯೊಡು ಪಿಲಾತೆ ಕಿಚ್ಚಿಮಚ್ಚರೊಡು ಆಯನ್ ಒಚ್ಚಿದ್ ಕೊರ್ತೆರ್ ಅಂದ್‌ದ್ ತೆರಿದ್, “ನಿಕ್ಲೆಗ್ ಏರೆನ್ ಬುಡ್ದು ಕೊರೊಡು? ಬರಬ್ಬನಾ? ಕ್ರಿಸ್ತೆ ಪನ್ಪಿ ಯೇಸುನಾ?” ಅಂದ್‌ದ್ ಅಕ್ಲೆಡ ಕೇಂಡೆ.</verse>
				<verse number="17"></verse>
				<verse number="18"></verse>
				<verse number="19">ಪಿಲಾತೆ ನ್ಯಾಯಾಸನೊಡು ಕುಲ್ಲೊಂದುಪ್ಪುನಗ ಆಯನ ಬೊಡೆದಿ ಈ, “ಆ ನೀತಿವಂತನ ತಂಟೆಗ್ ಪೋವಡ. ಆಯಾಡ್ದಾದ್ ಇನಿ ಯಾನ್ ಕನೊಟು ದಿಂಜ ಕಷ್ಟ ಪಡೆಯೆ,” ಪಂಡ್ದ್ ಆಯಗ್ ಪಂಡ್ದ್ ಕಡಪುಡಿಯಲ್,</verse>
				<verse number="20">ಅಂಚಿಡ್ದ್ ಪ್ರಧಾನಯಾಜಕೆರ್‌ಲಾ ಹಿರಿಯೆರ್‌ಲಾ ಕೂಡ್ದಿನ ಜನೊಕುಲೆನ್ ಪಿಲಾತಡ ಬರಬ್ಬನ್ ಬುಡ್ದು ಕೊರಿಯೆರೆ ಬೊಕ್ಕ ಯೇಸುಗು ಮರಣ ದಂಡನೆ ಕೊರೊಡು ಪಂಡ್ದ್ ಜನೊಕುಲೆನ್ ಪುಸ್‌ಲಾಯಿಸೆರ್.</verse>
				<verse number="21">ಐಕ್ ದೇಶಾಧಿಪತಿ ಜನೊಕುಲೆಡ, “ಇರ್ವೆರೆಡ್ ನಿಕ್ಲೆಗ್ ಏರೆನ್ ಬುಡ್ದು ಕೊರೊಡು ಅಂದ್‌ದ್,” ಕೇಂಡಿನೆಕ್ಕ್, ಅಕುಲು “ಬರಬ್ಬನೇ” ಪಂಡೆರ್.</verse>
				<verse number="22">ಐಕ್ ಪಿಲಾತೆ, “ಅಂಚಾಂಡ ಕ್ರಿಸ್ತೆ ಪನ್ಪಿನಾಯೆ ಯೇಸುನು ಯಾನ್ ದಾನೆ ಮಲ್ಪೊಡು?” ಅಂದ್‌ದ್ ಕೇನ್ನಗ ಮಾತೆರ್ಲಾ, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡೆರ್.</verse>
				<verse number="23">ಐಕ್ ಆಯೆ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ?” ಪಂಡೆ. ಆಂಡ ಅಕುಲು, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡ್ದ್ ಬೊಕ್ಕಲಾತ್ ಬೊಬ್ಬೆ ಪಾಡಿಯೆರ್.</verse>
				<verse number="24">ಅಪಗ ಪಿಲಾತೆ ತನ ಪ್ರಯತ್ನ ನಡಪುಜಿ, ಗಲಾಟೆ ಮಾತ್ರ ಹೆಚ್ಚಾಪುಂಡು ಅಂದ್‌ದ್ ತೆರಿದ್ ನೀರ್ ದೆತ್ತೊಂದು ಜನೊಕುಲೆ ಎದುರು ಕೈ ದೆಕ್ಕೊಂದು, “ಈ ನೀತಿವಂತನ ನೆತ್ತೆರ್‌ಡ್ ಯಾನ್ ಸೇರ್ದಿನಾಯೆ ಅತ್ತ್, ನಿಕುಲೇ ತೂವೊನ್ಲೆ,” ಪಂಡ್ದ್ ಪನ್ನಗ</verse>
				<verse number="25">ಜನೊಕುಲು ಮಾತೆರ್ಲಾ, “ಆಯನ ನೆತ್ತೆರ್ ಎಂಕ್ಲೆ ಮಿತ್ತ್‌ಲಾ ಎಂಕ್ಲೆ ಜೋಕುಲೆ ಮಿತ್ತ್‌ಲಾ ಉಪ್ಪಡ್,” ಪಂಡೆರ್.</verse>
				<verse number="26">ಅಪಗ ಬರಬ್ಬನ್ ಅಕ್ಲೆಗ್ ಬುಡ್ದು ಕೊರ್ದು ಯೇಸುನು ಚಾಟಿಡ್ ಹಾಕಾದ್ ಕ್ರುಸ್ಸುಗು ಪಾಡಿಯೆರೆ ಒಚ್ಚಿದ್ ಕೊರಿಯೆ.</verse>
				<verse number="27">ಐಡ್ದ್ ಬೊಕ್ಕ ದೇಶಾಧಿಪತಿನ ಸಿಪಾಯಿಲು ಯೇಸುನು ಅರಮನೆತ್ತ ಉಲಯಿ ಲೆತ್ತೊಂದು ಪೋದು ಇಡೀ ಸಿಪಾಯಿಲೆನ್ ಲೆತ್ತ್‌ದ್ ಆಯನ ಸುತ್ತ ಸೇರಾವೊಂಡೆರ್.</verse>
				<verse number="28">ಅಕುಲು ಆಯನ ಕುಂಟುಲೆನ್ ದೆತ್ತ್‌ದ್ ಕೆಂಪು ಒಲ್ಲಿನ್ ಪೊದಿಪಾದ್,</verse>
				<verse number="29">ಮುಳ್ಳುಬಳ್ಳಿಡ್ದ್ ಕಿರೀಟೊನು ಮುಡೆದ್ ಆಯನ ತರೆತ ಮಿತ್ತ್ ದೀದ್ ಬಲತ್ತ ಕೈಟ್ ಬೆತ್ತ ಕೊರ್ದು, ಆಯ ದುಂಬು ಮೊರಂಪೂರ್ದು, “ಯೆಹೂದ್ಯೆರೆ ಅರಸೋ!” ನಿಕ್ಕ್ ವಂದನೆ ಅಂದ್‌ದ್ ಆಯಗ್ ಗೇಲಿ ಮಲ್ತೆರ್.</verse>
				<verse number="30">ಆಯನ ಮಿತ್ತ್ ಉಬ್ಬಿದ್ ಆ ಬೆತ್ತೊನು ಒಯಿತ್‌ದ್ ಆಯನ ಮಂಡೆದ ಮಿತ್ತ್ ಹಾಕ್ಯೆರ್.</verse>
				<verse number="31">ಇಂಚ ಆಯನ್ ಗೇಲಿ ಮಲ್ತಿ ಬೊಕ್ಕ ಆ ಒಲ್ಲಿನ್ ದೆತ್ತ್‌ದ್ ಆಯನ ಕುಂಟುನು ಪಾಡ್ದ್ ಆಯನ್ ಕ್ರುಸ್ಸುಗು ಪಾಡಿಯೆರೆ ಲೆತ್ತೊಂದು ಪೋಯೆರ್.</verse>
				<verse number="32">ಪಿದಯಿ ಪೋವೊಂದುಪ್ಪುನಗ ಕುರೇನೆ ಪಟ್ಟಣದ ಸೀಮೋನು ಪನ್ಪಿನಾಯನ್ ತೂದು, ಯೇಸುನ ಕ್ರುಸ್ಸುನು ತುಂಬೊಂದು ಕೊನೆಯೆರೆ ಒತ್ತಾಯ ಮಲ್ತೆರ್.</verse>
				<verse number="33">ಬೊಕ್ಕ ಗೊಲ್ಗೊಥಾ ಪಂಡ ಕಪಾಲ ಪನ್ಪಿ ಜಾಗ್‌ಗ್ ಬತ್ತಿನಪಗ</verse>
				<verse number="34">ಆಯಗ್ ಕೈಪೆ ಬೆರಕೆ ಮಲ್ತಿ ದ್ರಾಕ್ಷಾರಸೊನು ಪರಿಯೆರೆ ಕೊರಿಯೆರ್. ಆಯೆ ಅವೆನ್ ರುಚಿ ತೂದು ಪರಂದೆ ಇತ್ತೆ.</verse>
				<verse number="35">ಐಡ್ದ್ ಬೊಕ್ಕ ಅಕುಲು ಆಯನ್ ಕ್ರುಸ್ಸುಗು ಪಾಡ್ದ್ ಆಯನ ಕುಂಟುನು ಚೀಟಿ ಪಾಡ್ದ್ ಪಾಲ್ ಮಲ್ತೊಂಡೆರ್.</verse>
				<verse number="36">ಬೊಕ್ಕ ಅಲ್ಪ ಕುಲ್ಲೊಂದು ಆಯನ್ ಕಾತೊಂದಿತ್ತೆರ್.</verse>
				<verse number="37">ಉಂದತ್ತಂದೆ ಆಯನ ಮಿತ್ತ್ ಪಾಡ್ದಿನ ಅಪರಾಧೊಲೆನ್ ಬರೆದ್ ಆಯನ ತರೆತ ಮಿತ್ತ್ ಪತ್ತಾಯೆರ್; ಅವು ದಾನೆ ಪಂಡ, “ಇಂಬೆ ಯೇಸು, ಯೆಹೂದ್ಯೆರೆ ಅರಸು,” ಪನ್ಪಿನವೇ.</verse>
				<verse number="38">ಅಪಗ ಇರ್ವೆರ್ ಕಲ್ವೆರೆನ್ ಕನತ್‌ದ್ ಒರಿಯನ್ ಬಲತ್ತ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಆಯಡೊಪ್ಪ ಕ್ರುಸ್ಸುಗು ಪಾಡಿಯೆರ್.</verse>
				<verse number="39">ಅಲ್ಪ ದಾಂಟ್‌ದ್ ಪೋಪಿನಾಕುಲು ತರೆ ಆಡಾದ್, “ದೇವಾಲಯೊನು ಬೂರ್ಪಾದ್ ಮೂಜಿ ದಿನೊಟು ಕುಡ ಕಟ್ಟುನಾಯಾ, ನಿನನ್ ಬಚವು ಮಲ್ತೊನ್ಲ. ದೇವೆರೆ ಮಗೆ ಆದಿತ್ತಡ ಕ್ರುಸ್ಸುಡ್ದು ಜತ್ತ್‌ದ್ ಬಲ!” ಅಂದ್‌ದ್ ಆಯನ್ ಗೇಲಿ ಮಲ್ತೊಂದಿತ್ತೆರ್.</verse>
				<verse number="40"></verse>
				<verse number="41">ಐತ ಲೆಕ್ಕನೆ ಪ್ರಧಾನಯಾಜಕೆರ್‌ಲಾ, ಶಾಸ್ತ್ರಿಲುಲಾ, ಹಿರಿಯೆರ್‌ಲಾ, ಯೇಸುಗು ಗೇಲಿ ಮಲ್ತೆರ್,</verse>
				<verse number="42">“ಬೇತೆಕ್ಲೆನ್ ಬಚವು ಮಲ್ತೆ, ತನನ್ ಬಚವು ಮಲ್ತೊನೆರೆ ಆಯಿಜಿ? ಆಯೆ ಇಸ್ರಾಯೇಲ್ಯೆರೆ ಅರಸು ಅತ್ತಾ, ಇತ್ತೆ ಕ್ರುಸ್ಸುಡ್ದು ಜತ್ತ್‌ದ್ ಬರಡ್, ಜತ್ತ್‌ದ್ ಬತ್ತ್ಂಡ ಆಯ ಮಿತ್ತ್ ನಂಬಿಕೆ ದೀವ.</verse>
				<verse number="43">ದೇವೆರೆಡ ಭರವಸ ದೀತೆ, ದೇವೆರ್ ಆಯಡ ಇಷ್ಟ ಪಡೆಂಡ ಇತ್ತೆ ಆಯನ್ ಬುಡ್ಪಾವಡ್. ತಾನ್ ದೇವೆರೆ ಮಗೆ ಅಂದ್‌ದ್ ಪನ್ಪೆ ಅತ್ತಾ,” ಅಂದ್‌ದ್ ಕೋಂಗಿ ಕಟ್ಟೊಂದು ಪಾತೆರೊಂದಿತ್ತೆರ್.</verse>
				<verse number="44">ಆಯಡೊಪ್ಪ ಕ್ರುಸ್ಸುಗು ಪಾಡ್ದಿತ್ತಿ ಕಲ್ವೆರ್‌ಲಾ ಅಂಚೆನೇ ಆಯನ್ ನಿಂದನೆ ಮಲ್ತೊಂದಿತ್ತೆರ್.</verse>
				<verse number="45">ಮಧ್ಯಾಹ್ನ ಪದ್ರಾಡ್ ಗಂಟೆಡ್ದ್ ಮೂಜಿ ಗಂಟೆ ಮುಟ್ಟ ಆ ದೇಶದ ಮಿತ್ತ್ ಕತ್ತಲೆ ಆಂಡ್.</verse>
				<verse number="46">ಸುಮಾರ್ ಮೂಜಿ ಗಂಟೆಗ್ ಯೇಸು, “ಎಲೀ, ಎಲೀ, ಲಮಾ ಸಬಕ್ತಾನಿ?” ಪಂಡ, “ಎನ ದೇವೆರೇ, ಎನ ದೇವೆರೇ, ದಾಯೆಗ್ ಎನ ಕೈ ಬುಡ್ತ?” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ.</verse>
				<verse number="47">ಅಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ಅವೆನ್ ಕೇಂಡ್ದ್, “ಇಂಬೆ ಎಲೀಯನ್ ಲೆಪ್ಪುವೆ,” ಪಂಡೆರ್.</verse>
				<verse number="48">ಕೂಡ್ಲೆ ಅಕ್ಲೆಡ್ ಒರಿ ಪಾರ್‌ಪೋದು ಸ್ಪಂಜಿನ್ ಕನತ್‌ದ್ ಪುಳಿರಸೊಟು ಮುರ್ಕಾದ್ ಕೋಲುಗು ತಿಕ್ಕಾದ್ ಆಯಗ್ ಪರಿಯೆರೆ ಕೊರಿಯೆ. ಬಾಕಿದಾಕುಲು ಬುಡ್ಲೆ, “ಎಲೀಯೆ ಆಯನ್ ಬುಡ್ಪಾವೆರೆ, ಬರ್ಪೆನಾ ತೂಕ,” ಪಂಡೆರ್.</verse>
				<verse number="49"></verse>
				<verse number="50">ಯೇಸು ಕುಡ ಮಲ್ಲ ಸ್ವರೊಟ್ಟು ಬುಲ್ತುದು ಪ್ರಾಣ ಬುಡಿಯೆ.</verse>
				<verse number="51">ಅಪಗ ದೇವಾಲಯದ ಪರದೆ ಮಿತ್ತ್‌ಡ್ದ್ ತಿರ್ತ್ ಮುಟ್ಟ ಪರಿದ್ ರಡ್ಡ್ ಪಾಲ್ ಆಂಡ್. ಭೂಮಿ ಅದ್‌ರ್ಂಡ್,</verse>
				<verse number="52">ಪಾದೆ ಭಾಗ ಆಂಡ್, ಸಮಾಧಿಲು ಜತ್ತ್ಂಡ್. ಸೈತ್ ಪೋತಿ ಮಸ್ತ್ ದೇವಜನೊಕುಲೆ ಶರೀರೊಲು ಲಕ್ಕಿಯ.</verse>
				<verse number="53">ಯೇಸುನ ಪುನರುತ್ಥಾನದ ಬೊಕ್ಕ ಅಕುಲು ಸಮಾಧಿಡ್ದ್ ಲಕ್ಕ್‌ದ್ ಪರಿಶುದ್ಧ ಪಟ್ಟಣದುಲಯಿ ಪೋದು ಮಸ್ತ್ ಜನೊಕುಲೆಗ್ ತೂವೆರೆ ತಿಕ್ಕಿಯೆರ್.</verse>
				<verse number="54">ಅಪಗ ಶತಾಧಿಪತಿ ಬೊಕ್ಕ ಆಯಡೊಪ್ಪ ಯೇಸುನು ಕಾತೊಂದಿತ್ತಿ ಸಿಪಾಯಿಲು ಭೂಕಂಪಲಾ ನಡೆತಿನ ಸಂಗತಿಲೆನ್ಲಾ ತೂದು ಮಸ್ತ್ ಪೋಡಿದ್ ಪೋಯೆರ್, “ನಿಜಾದ್‌ಲಾ ಉಂಬೆ ದೇವೆರೆ ಮಗೆ ಆದಿತ್ತೆ,” ಪಂಡೆರ್.</verse>
				<verse number="55">ಉಂದತ್ತಂದೆ ಮಸ್ತ್ ಪೊಂಜೊವುಲು ಅಲ್ಪ ಇತ್ತ್‌ದ್ ದೂರೊಡ್ದು ತೂವೊಂದಿತ್ತೆರ್. ಮೊಕುಲು ಯೇಸುನ ಸೇವೆ ಮಲ್ತೊಂದು ಗಲಿಲಾಯೊಡ್ದು ಆಯನ ಪಿರವುಡು ಬೈದಿತ್ತೆರ್.</verse>
				<verse number="56">ಉಂದೆಟ್ಟ್ ಮಗ್ದಲದ ಮರಿಯಲಾ, ಯಾಕೋಬು ಯೋಸೆನ ಅಪ್ಪೆ ಆಯಿ ಮರಿಯಲಾ, ಜೆಬೆದಾಯನ ಜೋಕುಲೆ ಅಪ್ಪೆಲಾ ಇತ್ತೆರ್.</verse>
				<verse number="57">ಪೂರ್ತು ಕಂತ್‌ನಗ ಅರಿಮಥಾಯದ ಯೋಸೇಫೆ ಪನ್ಪಿ ಐಶ್ವರ್ಯವಂತೆ ಅಡೆಗ್ ಬತ್ತೆ. ಆಯೆ ಯೇಸುನ ಶಿಷ್ಯೆ ಆದಿತ್ತೆ.</verse>
				<verse number="58">ಆಯೆ ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ. ಅಪಗ ಪಿಲಾತೆ ಅವೆನ್ ಕೊರಿಯೆರೆ ಅಪ್ಪಣೆ ಕೊರಿಯೆ.</verse>
				<verse number="59">ಯೋಸೇಫು ಯೇಸುನ ಶರೀರೊನು ದೆತ್ತೊಂದು ಅವೆನ್ ಶುದ್ಧ ನಾರ್‌ಮಡಿತ ಕುಂಟುಡು ಸುತ್ತುದು,</verse>
				<verse number="60">ಪಾದೆಡ್ ತನ್ಕ್ ತೋಡಾದಿ ಪೊಸ ಸಮಾಧಿಡ್ ದೀದ್ ಸಮಾಧಿದ ಬಾಕಿಲ್‌ಗ್ ಒಂಜಿ ಮಲ್ಲ ಕಲ್ಲ್‌ನ್ ಪೊರೆಲ್ಪಾದ್ ಪೋಯೆ.</verse>
				<verse number="61">ಮಗ್ದಲದ ಮರಿಯಲಾ ಆ ಬೊಕ್ಕೊಂಜಿ ಮರಿಯಲಾ ಅವುಲು ಸಮಾಧಿದ ಎದುರು ಕುಲ್ಲೊಂದಿತ್ತೆರ್.</verse>
				<verse number="62">ಮನದಾನಿ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಪಿಲಾತ ಕೈತಲ್‌ ಕೂಡ್ದು ಬತ್ತ್‌ದ್,</verse>
				<verse number="63">“ದೊರೇ, ಆ ಮೋಸದಾಯೆ ಜೀವೊಡು ಉಪ್ಪುನಗ ಪನೊಂದಿತ್ತೆ, ‘ಮೂಜಿ ದಿನೊಡ್ದು ಬೊಕ್ಕ ಲಕ್ಕುವೆ,’ ಪಂಡಿನ ಎಂಕ್ಲೆ ನೆನೆಪುಗು ಬತ್ತ್ಂಡ್.</verse>
				<verse number="64">ಅಂಚಾಯಿನೆಡ್ದ್ ಮೂಜನೇ ದಿನ ಮುಟ್ಟ ಸಮಾಧಿನ್ ಭದ್ರ ಮಲ್ತ್‌ದ್ ಕಾಪೆರೆ ಅಪ್ಪಣೆ ಕೊರೊಡು. ಇಜ್ಜಾಂಡ ಆಯನ ಶಿಷ್ಯೆರ್ ಬತ್ತ್‌ದ್ ಆಯನ್ ಕಂಡೊಂದು ಪೋದು ಸೈತಿನಾಯೆ ಲಕ್ಕ್‌ದ್ ಬೈದೆ ಅಂದ್‌ದ್ ಪನಿಯೆರೆ ಯಾವು; ಅಪಗ ಸುರುತ್ತ ಮೋಸೊಡ್ದು ಕಡೆತ ಮೋಸ ಭಯಂಕರ ಆವು,” ಅಂದ್‌ದ್ ಪಂಡೆರ್.</verse>
				<verse number="65">ಅಪಗ ಪಿಲಾತೆ, “ಕಾವಲ್ದಾಕುಲೆನ್ ಲೆತ್ತೊಂದು ಪೋದು ನಿಕ್ಲೆಗ್ ತೆರಿಲೆಕ್ಕ ಭದ್ರ ಮಲ್ತ್‌ದ್ ಕಾಪುಲೆ,” ಅಂದ್‌ದ್ ಪಂಡೆ.</verse>
				<verse number="66">ಅಕುಲು ಪೋದು ಕಾವಲ್ದಾಕುಲೆನ ಒಟ್ಟುಗು ಆ ಕಲ್ಲ್‌ಗ್ ಮುದ್ರೆ ಪಾಡ್ದ್ ಆ ಸಮಾಧಿನ್ ಭದ್ರ ಮಲ್ತೆರ್.</verse>
			</chapter>
			<chapter number="28">
				<verse number="1">ಸಬ್ಬತ್‌ದಿನ ಆಯಿ ಬೊಕ್ಕ ವಾರದ ಸುರುತ್ತ ದಿನ ಬೊಲ್ಪಾನಗ ಮಗ್ದಲದ ಮರಿಯಲಾ, ಕುಡೊರ್ತಿ ಮರಿಯಲಾ ಸಮಾಧಿನ್ ತೂಯೆರೆ ಬತ್ತೆರ್.</verse>
				<verse number="2">ಅಪಗ ಮಲ್ಲ ಭೂಕಂಪ ಆಂಡ್. ಕರ್ತವ ದೂತೆ ಪರಲೋಕೊಡ್ದು ತಿರ್ತ್ ಬತ್ತ್‌ದ್ ಆ ಕಲ್ಲ್‌ನ್ ಬಾಕಿಲ್‌ಡ್ದ್ ಪೊರೆಲ್ಪಾದ್ ಐತ ಮಿತ್ತ್ ಕುಲ್ಲೊಂಡೆ.</verse>
				<verse number="3">ಆಯ ಮೋನೆದ ರೂಪ ಮಿಂಚಿದಲೆಕ್ಕಲಾ ಆಯ ಕುಂಟು ಹಿಮತಾತ್ ಬೊಲ್ದು ಆದಿತ್ತ್ಂಡ್.</verse>
				<verse number="4">ಆ ಸಮಾಧಿದ ಕಾವಲ್ದಾಕುಲು ಆಯಗ್ ಪೋಡಿದ್ ನಡ್‌ಗ್‌ದ್ ಸೈತಿ ಲೆಕ್ಕ ಆಯೆರ್.</verse>
				<verse number="5">ಅಪಗ ದೂತೆ ಆ ಪೊಂಜೊವುಲೆಡ, “ನಿಕುಲು ಪೋಡ್ಯಡೆ. ಕ್ರುಸ್ಸುಗು ಪಾಡ್ದಿತ್ತಿನ ಯೇಸುನು ನಾಡುವರ್ ಅಂದ್‌ದ್ ತೆರಿದೆ. ಆಯೆ ಮುಲ್ಪ ಇಜ್ಜೆ.</verse>
				<verse number="6">ಆಯೆ ಪಂಡಿಲೆಕ್ಕನೇ ಆಯೆ ಜೀವಾದ್ ಲಕ್ಕ್‌ದೆ. ಬಲೆ, ಆಯನ್ ದೀತಿನ ಜಾಗ್‌ನ್ ತೂಲೆ.</verse>
				<verse number="7">ಬೊಕ್ಕ ಬೇಗ ಪೋದು ಶಿಷ್ಯೆರೆಗ್ ಪನ್ಲೆ, ‘ಸೈತಿನಾಯೆ ಬದ್‌ಕ್‌ದೆ. ಆಯೆ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ. ನಿಕುಲು ಆಯನ್ ಅವುಲು ತೂವರ್,’ ಯಾನ್ ಪಂತಿನೆನ್ ನಿಕುಲು ನೆನೆಪು ಮಲ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="8">ಅಕುಲು ಪೋಡಿದ್‌ಲಾ, ಮಸ್ತ್ ಸಂತೋಷೊಡ್ಲಾ ಸಮಾಧಿಡ್ದ್ ಪಿದಾಡ್ದ್ ಶಿಷ್ಯೆರೆ ಕೈತಲ್‌ ಪನಿಯೆರೆ ಪಾರ್ದ್ ಪೋಯೆರ್.</verse>
				<verse number="9">ಅಕುಲು ಸಾದಿಡುಪ್ಪುನಗ ಯೇಸು ಅಕಲ್ನ ಎದುರು ಬತ್ತ್‌ದ್, “ನಿಕ್ಲೆಗ್ ಸಮಾಧಾನ ಆವಡ್,” ಪಂಡೆ. ಅಕುಲು ಮುಟ್ಟ ಬತ್ತ್‌ದ್ ಆಯ ಕಾರಕೈತಲ್ ಅಡ್ಡಬೂರ್ದು ಆಯಗ್ ವಂದನೆ ಮಲ್ತೆರ್.</verse>
				<verse number="10">ಯೇಸು ಅಕ್ಲೆಡ, “ಪೋಡ್ಯಡೆ, ಎನ ಸಹೋದರೆರೆ ಕೈತಲ್‌ ಪೋದು ಅಕುಲು ಗಲಿಲಾಯೊಗು ಪೋವೊಡಂದ್‌ದ್ ಪನ್ಲೆ. ಅವುಲು ಎನನ್ ತೂವೆರ್,” ಅಂದ್‌ದ್ ಪಂಡೆ.</verse>
				<verse number="11">ಅಕುಲು ಪೋವೊಂದುಪ್ಪುನಗ ಕಾವಲ್ದಾಕುಲೆಡ್ ಕೆಲೆವೆರ್ ಪಟ್ಟಣದುಲಯಿ ಬತ್ತ್‌ದ್ ನಡತಿ ಸಂಗತಿಲೆನ್ ಪ್ರಧಾನಯಾಜಕೆರೆಗ್ ತೆರಿಪಾಯೆರ್.</verse>
				<verse number="12">ಮೊಕುಲು ಹಿರಿಯೆರೆಡೊಪ್ಪ ಕೂಡುದು ಆಲೋಚನೆ ಮಲ್ತ್‌ದ್ ಆ ಕಾವಲ್ದಾಕುಲೆಗ್ ಮಸ್ತ್ ದುಡ್ಡು ಕೊರ್ದು,</verse>
				<verse number="13">“ಆಯನ್ ಶಿಷ್ಯೆರ್ ರಾತ್ರೆಡ್ ಬತ್ತ್‌ದ್ ಎಂಕುಲು ನಿದ್ರೆ ಮಲ್ತೊಂದುಪ್ಪುನಗ ಕಂಡೊಂದು ಪೋಯೆರ್, ಅಂದ್‌ದ್ ಪನ್ಲೆ.</verse>
				<verse number="14">ಈ ಸುದ್ಧಿ ದೇಶಾಧಿಪತಿನ ಕೆಬಿಕ್ ಬೂರುಂಡ ಎಂಕುಲು ಆಯನ್ ಸಮಾಧಾನ ಮಲ್ತ್‌ದ್ ನಿಕ್ಲೆಗ್ ದಾಲಾ ತೊಂದರೆ ಆವಂದಿಲೆಕ್ಕ ಮಲ್ಪುವ,” ಪಂಡೆರ್.</verse>
				<verse number="15">ಮೊಕುಲು ಆ ದುಡ್ಡುನು ದೆತ್ತೊಂದು ತನ್ಕುಲೆಗ್ ಪಂಡ್ದ್ ಕೊರಿಲೆಕ್ಕನೇ ಮಲ್ತೆರ್. ಈ ಪಾತೆರ ಇನಿಕ್ಲಾ ಯೆಹೂದ್ಯೆರೆಡ್ ಪರಡ್ದುಂಡು.</verse>
				<verse number="16">ಐಡ್ದ್ ಬೊಕ್ಕ ಪತ್ತೊಂಜಿ ಮಂದಿ ಶಿಷ್ಯೆರ್ ಗಲಿಲಾಯೊಗು ಪೋದು ಯೇಸು ತನ್ಕುಲೆಗ್ ಪಂಡಿ ಗುಡ್ಡೆಗ್ ಪೋಯೆರ್.</verse>
				<verse number="17">ಅವುಲು ಆಯನ್ ತೂದು ಆಯಗ್ ಅಡ್ಡಬೂರ್ಯೆರ್. ಆಂಡ ಕೆಲೆವೆರ್ ಸಂಶಯ ಮಲ್ತೆರ್.</verse>
				<verse number="18">ಅಪಗ ಯೇಸು ಕೈತಲ್‌ ಬತ್ತ್‌ದ್, “ಪರಲೋಕೊಡ್ಲಾ, ಭೂಲೋಕೊಡ್ಲಾ ಮಾತ ಅಧಿಕಾರ ಎಂಕ್ ಕೊರ್ತುಂಡು.</verse>
				<verse number="19">ಅಂಚಾಯಿನೆಡ್ದ್ ನಿಕುಲು ಪೋದು ಮಾತ ಜನಾಂಗದ ಜನೊಕುಲೆನ್ ಶಿಷ್ಯೆರಾದ್ ಮಲ್ಪುಲೆ. ಅಕ್ಲೆಗ್ ಅಮ್ಮೆ ಮಗೆ ಪರಿಶುದ್ಧಾತ್ಮ ಪುದರ್‌ಡ್ ದೀಕ್ಷಾಸ್ನಾನ ಕೊರ್ಲೆ.</verse>
				<verse number="20">ಯಾನ್ ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಕೈಕೊನ್ರೆ ಅಕ್ಲೆಗ್ ಬೋಧನೆ ಕೊರ್ಲೆ. ತೂಲೆ, ಯಾನ್ ಯುಗತ ಅಂತ್ಯ ಮುಟ್ಟಲಾ ಮಾತ ದಿನ ನಿಕ್ಲೆಡೊಪ್ಪ ಉಪ್ಪುವೆ,” ಅಂದ್‌ದ್ ಪಂಡೆ.</verse>
			</chapter>
		</book>
		<book number="41">
			<chapter number="1">
				<verse number="1">ದೇವೆರೆ ಮಗೆ ಆಯಿ ಯೇಸು ಕ್ರಿಸ್ತನ ಸುವಾರ್ತೆದ ಆರಂಭ. “‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸಮ ಮಲ್ಪುವೆ ಪಂಡ್ದ್‌ಲಾ.’ ‘ಕರ್ತವ ಮಾರ್ಗೊನು ತಯಾರ್ ಮಲ್ಪುಲೆ; ಆಯ ಸಾದಿನ್ ಸರ್ತ ಮಲ್ಪುಲೆ,’ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯನ ಸ್ವರ ಉಂಡು.” ಪ್ರವಾದಿ ಆದುಪ್ಪು ಯೆಶಾಯನ ಗ್ರಂಥೊಡು ಬರೆದುಪ್ಪು ಪ್ರಕಾರ ಸ್ನಾನಿಕೆ ಆಯಿ ಯೋಹಾನೆ ಬತ್ತ್‌ದ್ ಜನೊಕುಲೆಗ್, “ನಿಕುಲು ಪಾಪೊಲೆ ಪರಿಹಾರೊಗಾದ್ ಪಶ್ಚಾತಾಪ ಪಡೆದ್, ದೀಕ್ಷಾಸ್ನಾನ ಮಲ್ತೊನೊಡು,” ಅಂದ್‌ದ್ ಕಾಡ್‌ಡ್ ಸಾರಿಯೊಂದು ದೀಕ್ಷಾಸ್ನಾನ ಕೊರೊಂದಿತ್ತೆ.</verse>
				<verse number="2"></verse>
				<verse number="3"></verse>
				<verse number="4"></verse>
				<verse number="5">ಅಪಗ ಮಾತ ಯೂದಾಯ ಸೀಮೆದಾಕುಲುಲಾ ಯೆರೂಸಲೇಮುದಾಕುಲುಲಾ ಆಯ ಕೈತಲ್‌ ಪೋದು ತನ್ಕುಲೆ ಪಾಪೊಲೆನ್ ಪಂಡೊಂದು ಯೊರ್ದಾನ್ ತುದೆಟ್ ಆಯಡ್ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆರ್.</verse>
				<verse number="6">ಈ ಯೋಹಾನೆ ಒಂಟೆ ಕುಜಲ್‌ದ ಪೊದಿಕೆಲಾ ಸೊಂಟೊಗು ಚರ್ಮದ ಪಟ್ಟಿಲಾ ಕಟ್ಟೊಂದಿತ್ತೆ. ಮೊಂಟೆಲಾ ಕಾಡ್‌ದ ತಿಗತನೆಯಿಲಾ ಆಯನ ತಿನಸ್ ಆದಿತ್ತ್ಂಡ್.</verse>
				<verse number="7">ಯೋಹಾನೆ ಜನೊಕುಲೆಗ್ ಸಾರಿಯೊಂದು ಪಂಡಿನಿ, “ಒರಿ ಎನಡ್ದ್ ಬಲತ್ತಾಯೆ ಎನ ಬೆರಿಯೆ ಬರ್ಪೆ. ಆಯ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ತಕ್ಕದಾಯೆ ಅತ್ತ್.</verse>
				<verse number="8">ಯಾನ್ ನಿಕ್ಲೆಗ್ ನೀರ್‌ದ ದೀಕ್ಷಾಸ್ನಾನ ಕೊರೊಂದುಲ್ಲೆ; ಆಂಡ ಆಯೆ ನಿಕ್ಲೆಗ್ ಪರಿಶುದ್ಧಾತ್ಮೊಡು ದೀಕ್ಷಾಸ್ನಾನ ಮಲ್ಪಾವೆ ಅಂದ್‌ದ್ ಸಾರಿದ್ ಪಂಡೆ.”</verse>
				<verse number="9">ಆ ಸಮಯೊಡು ಯೇಸು ಗಲಿಲಾಯದ ನಜರೇತ್ ಪನ್ಪಿ ಊರುಡ್ದು ಬತ್ತ್‌ದ್ ಯೊರ್ದಾನ್ ತುದೆಟ್ ಯೋಹಾನಡ್ದ್ ದೀಕ್ಷಾಸ್ನಾನ ಮಲ್ಪಾವೊಂಡೆ.</verse>
				<verse number="10">ಯೇಸು ನೀರ್‌ದುಲಯಿಡ್ದ್ ಮಿತ್ತ್ ಬತ್ತಿನಪಗ ಪರಲೋಕ ಜತ್ತ್ಂಡ್, ಬೊಕ್ಕ ದೇವೆರಾತ್ಮ ಪಾರಿವಾಳದ ರೂಪೊಡು ಆಯ ಮಿತ್ತ್ ಜಪ್ಪುನೆನ್ ಯೋಹಾನೆ ತೂಯೆ.</verse>
				<verse number="11">ಅಪಗ ಪರಲೋಕೊಡ್ದು ಒಂಜಿ ಸ್ವರ ಆಂಡ್, “ಈ ಎನ ಪ್ರೀತಿದ ಮಗೆ, ನಿನಡ್ ಎಂಕ್ ಮೆಚ್ಚಿಗೆ ಉಂಡು.”</verse>
				<verse number="12">ಅಪಗನೇ ದೇವೆರಾತ್ಮೆ ಯೇಸುನು ಕಾಡ್‌ಗ್ ಲೆತ್ತೊಂದು ಪೋಯೆ.</verse>
				<verse number="13">ಆಯೆ ನಲ್ಪ ದಿನ ಕಾಡ್‌ಡ್ ಮೃಗೊಕ್ಕುಲೆ ಒಟ್ಟುಗು ಇತ್ತ್‌ದ್ ಸೈತಾನಡ್ದ್ ಶೋಧನೆಗ್ ಒಳಗಾಯೆ, ಬೊಕ್ಕ ದೂತೆರ್ ಆಯಗ್ ಉಪಚಾರ ಮಲ್ತೆರ್.</verse>
				<verse number="14">ಯೋಹಾನೆ ಕೈದಿ ಆಯಿ ಬೊಕ್ಕ ಯೇಸು ಗಲಿಲಾಯ ಸೀಮೆಗ್ ಬತ್ತ್‌ದ್ ಜನೊಕುಲೆಗ್, “ಕಾಲ ಕರಿಂಡ್, ದೇವೆರೆ ರಾಜ್ಯ ಕೈತಲ್ ಆವೊಂದುಂಡು. ಪಶ್ಚಾತಾಪ ಪಡೆಲೆ, ಸುವಾರ್ತೆನ್ ನಂಬುಲೆ!” ಪಂಡ್ದ್ ದೇವೆರೆ ಸುವಾರ್ತೆನ್ ಸಾರಿಯೆ.</verse>
				<verse number="15"></verse>
				<verse number="16">ಯೇಸು ಗಲಿಲಾಯ ಕಡಲ್ದ ಬರಿಟ್ಟ್ ಪೋವೊಂದುಪ್ಪುನಗ, ಸೀಮೋನೆ ಬೊಕ್ಕ ಆಯನ ಮೆಗ್ಯೆ ಅಂದ್ರೆಯೆ ಕಡಲ್ಡ್ ಬಲೆ ಬೀಪುನೆನ್ ತೂಯೆ. ಅಕುಲು ಮೀನ್ ಪತ್ತುನಾಕುಲು.</verse>
				<verse number="17">ಯೇಸು ಅಕ್ಲೆಡ, “ಎನ ಬೆರಿಯೆ ಬಲೆ, ಯಾನ್ ನಿಕ್ಲೆನ್ ನರಮಾನಿಲೆನ್ ಪತ್ತುನ ಬೆಸ್ತೆರಾದ್ ಮಲ್ಪುವೆ.” ಅಂದ್‌ದ್ ಪಂಡೆ.</verse>
				<verse number="18">ಕೂಡ್ಲೆ ಅಕುಲು ತನ್ಕುಲೆ ಬಲೆನ್ ಬುಡ್ದು ಆಯ ಬೆರಿಯೆ ಪೋಯೆರ್.</verse>
				<verse number="19">ಅಲ್ಪಡ್ದ್ ಒಂತೆ ದೂರ ಪೋನಗ ಜೆಬೆದಾಯನ ಮಗೆ ಯಾಕೋಬುನ್ಲಾ ಆಯನ ಮೆಗ್ಯೆ ಯೋಹಾನನ್ಲಾ ತೂಯೆ. ಮೊಕುಲು ಓಡೊಡು ತನ್ಕುಲೆ ಬಲೆನ್ ಸರಿ ಮಲ್ತೊಂದಿತ್ತೆರ್.</verse>
				<verse number="20">ಕೂಡ್ಲೆ ಅಕ್ಲೆನ್ಲಾ ಲೆತ್ತೆ. ಅಕುಲು ತನ್ಕುಲೆ ಅಮ್ಮೆ ಜೆಬೆದಾಯನ್ ಬೇಲೆದಾಕುಲೆಡೊಪ್ಪ ಓಡೊಡೇ ಬುಡ್ದು ಆಯ ಬೆರಿಯೆ ಪೋಯೆರ್.</verse>
				<verse number="21">ಐಡ್ದ್ ಬೊಕ್ಕ ಯೇಸುಲಾ ಆಯನ ಶಿಷ್ಯೆರ್‌ಲಾ ಕಪೆರ್ನೌಮು ಪನ್ಪಿ ಊರುಗು ಪೋಯೆರ್. ಸಬ್ಬತ್‌ದಿನೊಟ್ಟು ಯೇಸು ಸಭಾಮಂದಿರೊಗು ಪೋದು ಅಲ್ಪದ ಜನೊಕುಲೆಗ್ ಬೋಧನೆ ಕೊರಿಯೆ.</verse>
				<verse number="22">ಜನೊಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್. ದಾಯೆಗಂದ್ಂಡ ಆಯೆ ಶಾಸ್ತ್ರಿಲೆ ಲೆಕ್ಕ ಬೋಧನೆ ಕೊರಂದೆ ಅಧಿಕಾರ ಇತ್ತಿನಾಯಲೆಕ್ಕ ಅಕ್ಲೆಗ್ ಬೋಧನೆ ಕೊರೊಂದಿತ್ತೆ.</verse>
				<verse number="23">ಅಪಗ ಆ ಸಭಾಮಂದಿರೊಡು ದೆವ್ವ ಪತ್ತ್‌ದಿನ ಒರಿ ನರಮಾನಿ ಇತ್ತೆ.</verse>
				<verse number="24">ಆ ದೆವ್ವ, “ನಜರೇತ್‌ದ ಯೇಸೋ ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆ? ಎಂಕ್ಲೆನ್ ನಾಶ ಮಲ್ಪೆರೆ ಬೈದನಾ? ಈ ಏರ್ ಅಂದ್‌ದ್ ಎಂಕ್ ಗೊತ್ತುಂಡು, ಈ ದೇವೆರೆ ಪರಿಶುದ್ಧದಾಯೆನೇ.” ಅಂದ್‌ದ್ ಅರಬಾಯಿ ದೀದ್ ಪಂಡ್ಂಡ್.</verse>
				<verse number="25">ಯೇಸು ಅವೆನ್ ದಟ್ಟಿದ್, “ಮನಿಪಂದೆ ಕುಲ್ಲು, ಉಂಬ್ಯನ್ ಬುಡ್ದು ಪೋಲ,” ಅಂದ್‌ದ್ ಪನ್ನಗ</verse>
				<verse number="26">ಆ ದೆವ್ವ ಆಯನ್ ಪೊರೆಲ್ಪಾದ್, ಅರಬಾಯಿ ಕೊರ್ದು ಆಯನ್ ಬುಡ್ದು ಪೋಂಡು.</verse>
				<verse number="27">ಜನೊಕುಲು ಮಾತೆರ್ಲಾ ಅಚ್ಚಿರ ಆದ್, “ಉಂದು ದಾದ ಕತೆ? ಉಂದು ಪೊಸ ಬೋಧನೆ. ಉಂಬೆ ಅಧಿಕಾರೊಡು ದೆವ್ವೊಲೆಗ್ ಅಪ್ಪಣೆ ಕೊರ್ಪೆತ್ತಾ, ಐಕುಲು ಆಯನ ಪಾತೆರೊನು ಕೇನ್ವತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪನೊಂದಿತ್ತೆರ್.</verse>
				<verse number="28">ಅಪಗನೇ, ಯೇಸುನ ಸುದ್ಧಿ ಗಲಿಲಾಯದ ಸೀಮೆಡ್ ಮಾತ ಕಡೆಟ್ಲಾ ಪರಡ್ಂಡ್.</verse>
				<verse number="29">ಯೇಸು ಬೊಕ್ಕ ಆಯನ ಶಿಷ್ಯೆರ್ ಸಭಾಮಂದಿರೊಡ್ದು ಪಿದಾಡ್ದ್ ಯಾಕೋಬು, ಯೋಹಾನಡೊಪ್ಪ ಸೀಮೋನ ಅಂದ್ರೆಯನ ಇಲ್ಲಗ್ ಬತ್ತೆರ್.</verse>
				<verse number="30">ಅಲ್ಪ ಸೀಮೋನನ ಮಾಮಿ ಜ್ವರೊಟು ಜೆತ್ತ್‌ದಿತ್ತಲ್, ಅಪಗನೆ ಆಲೆ ಸಂಗತಿನ್ ಯೇಸುಡ ತೆರಿಪಾಯೆರ್.</verse>
				<verse number="31">ಆಯೆ ಕೈತಲ್‌ ಬತ್ತ್‌ದ್ ಆಲೆನ ಕೈ ಪತ್ತ್‌ದ್ ಲಕ್ಕಾನಗ ಆಲೆನ ಜ್ವರ ಬುಡ್ದು ಪೋಂಡು, ಆಲ್ ಅಕ್ಲೆಗ್ ಉಪಚಾರ ಮಲ್ತೊಲು.</verse>
				<verse number="32">ಬೈಯಗ್‌ ಪೊರ್ತು ಕಂತಿ ಬೊಕ್ಕ ಜನೊಕುಲು ಮಾತ ಸೀಕ್‌ದಾಕುಲೆನ್ಲಾ ದೆವ್ವ ಪತ್ತ್‌ದಿನಾಕುಲೆನ್ಲಾ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್.</verse>
				<verse number="33">ಇಡೀ ಊರುದಾಕುಲು ಬಾಕಿಲ್‌ದಲ್ಪ ಕೂಡ್ದು ಬತ್ತೆರ್.</verse>
				<verse number="34">ಅಪಗ ಯೇಸು ತರತರತ ಸೀಕ್‌ಲೆಡ್ ನರಳೊಂದಿತ್ತಿ ಮಸ್ತ್ ಜನೊಕುಲೆನ್ ಗುಣ ಮಲ್ತ್‌ದ್, ದೆವ್ವ ಪತ್ತ್‌ದಿನಕಲೆನ್ ಬುಡ್ಪಾಯೆ. ಯೇಸು ಇಂಚಿತ್ತಿನಾಯೆ ಅಂದ್‌ದ್ ದೆವ್ವೊಲೆಗ್ ತೆರಿದಿತ್ತಿನೆಡ್ದ್, ಆಯೆ ಐಕ್ಲೆನ್ ಪಾತೆರಿಯೆರೆ ಬುಡ್ಜೆ.</verse>
				<verse number="35">ಪುಲ್ಯಕಾಂಡೆ ನನಲಾ ಕತ್ತಲೆ ಉಪ್ಪುನಗ ಯೇಸು ಲಕ್ಕ್‌ದ್ ಪಿದಾಡ್ದ್ ಜನಮಾನಿದಾಂತಿನ ಜಾಗ್‌ಗ್ ಪೋದು ಅಲ್ಪ ಪ್ರಾರ್ಥನೆ ಮಲ್ತೊಂದಿತ್ತೆ.</verse>
				<verse number="36">ಸೀಮೋನೆಲಾ ಆಯ ಒಟ್ಟುಗು ಇತ್ತಿನಾಕುಲುಲಾ ಆಯನ್ ನಾಡೊಂದು ಆಯೆ ಇತ್ತಿನಡೆಗ್ ಬತ್ತ್‌ದ್,</verse>
				<verse number="37">“ಮಾತೆರ್ಲಾ ನಿನನ್ ನಾಡ್ವೆರ್,” ಅಂದ್‌ದ್ ತೆರಿಪಾಯೆರ್.</verse>
				<verse number="38">ಐಕ್ ಆಯೆ ಅಕ್ಲೆಡ ಪಂಡಿನಿ, “ಎಂಕುಲು ಕೈತಲುಪ್ಪು ಬೇತೆ ಊರುಲೆಗ್ ಪೋಯಿ. ಅಲ್ಪಲಾ ಯಾನ್ ಸುವಾರ್ತೆನ್ ಸಾರಿಯೊಡು. ನೆಕ್ಕಾದೆ ಯಾನ್ ಪಿದಾಡ್ದ್ ಬತ್ತೆ.” ಅಂದ್‌ದ್ ಪಂಡೆ.</verse>
				<verse number="39">ಬೊಕ್ಕ ಆಯೆ ಇಡೀ ಗಲಿಲಾಯದ ಮಾತ ಕಡೆಕ್ಕ್ ಪೋದು, ಸಭಾಮಂದಿರೊಲೆಡ್ ಸುವಾರ್ತೆನ್ ಸಾರಿಯೊಂದು ದೆವ್ವೊಲೆನ್ ಬುಡ್ಪಾವೊಂದಿತ್ತೆ.</verse>
				<verse number="40">ಒರಿ ಕೊಷ್ಟದಾಯೆ ಯೇಸುನ ಕೈತಲ್‌ ಬತ್ತ್‌ದ್ ಅಡ್ಡಬೂರ್ದು, “ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಪಂಡ್ದ್ ನಟ್ಟಿಯೆ.</verse>
				<verse number="41">ಯೇಸು ಕನಿಕರೊಡು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು; ಶುದ್ಧ ಆಲ,” ಪಂಡೆ.</verse>
				<verse number="42">ಕೂಡ್ಲೆ ಆಯನ ಕೊಷ್ಟ ಬುಡ್ದು ಪೋಂಡು; ಆಯೆ ಶುದ್ಧ ಆಯೆ.</verse>
				<verse number="43">ಅಪಗ ಯೇಸು ಆಯಡ, “ತೂಲ, ಉಂದೆನ್ ಏರೆಗ್ಲಾ ದಾಲ ಪನೊಡ್ಚಿ.</verse>
				<verse number="44">ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಲೆಕ್ಕನೇ ನಿನ ಶುದ್ಧಾಚಾರೊನು ಮಲ್ಪುಲ. ಅವು ಜನೊಕುಲೆಗ್ ಸಾಕ್ಷಿ ಆವಡ್,” ಪಂಡ್ದ್ ಕಡಪುಡಿಯೆ.</verse>
				<verse number="45">ಆಂಡ ಆಯೆ ಪೋದು ಮಾತೆರೆಡ ಪಂಡ್ದ್ ಊರಿಡೀ ಸಾರಿಯೆರೆ ಸುರು ಮಲ್ತೆ. ಐಡ್ದಾವರ ಯೇಸು ಮಾತೆರ್ ತೋಜುಲೆಕ್ಕ ವಾ ಊರುಗ್ಲಾ ಪೋವೆರೆ ಆವಂದೆ ಜನಮಾನಿದಾಂತಿನ ಜಾಗ್‌ಲೆಡ್ ಇತ್ತೆ. ಆಂಡ ಜನೊಕುಲು ನಾಲ್ ಕಡೆಡ್ದ್‌ಲಾ ಆಯ ಕೈತಲ್‌ ಬರೊಂದಿತ್ತೆರ್.</verse>
			</chapter>
			<chapter number="2">
				<verse number="1">ಒಂತೆ ದಿನೊಡ್ದು ಬೊಕ್ಕ ಯೇಸು ಕಪೆರ್ನೌಮುಗು ಬತ್ತೆ. ಆಯೆ ಇಲ್ಲಡ್ ಉಲ್ಲೆ ಪನ್ಪಿನ ಸುದ್ಧಿ ಜನೊಕುಲೆಗ್ ತೆರಿಂಡ್.</verse>
				<verse number="2">ಜನೊಕುಲು ಗುಂಪಾದ್ ಸೇರ್ದ್ ಬತ್ತಿನೆಡ್ದ್ ಬಾಕಿಲ್‌ದ ಬರಿಟ್ಟ್‌ಲಾ ಜಾಗ್ ಇತ್ತ್‌ಜಿ. ಅವುಲು ಯೇಸು ಅಕ್ಲೆಗ್ ದೇವೆರೆ ಪಾತೆರೊನು ಸಾರಿಯೊಂದಿತ್ತೆ.</verse>
				<verse number="3">ಅಪಗ ನಾಲ್ವೆರ್ ಒರಿ ಪಕ್ಷವಾತದಾಯನ್ ತುಂಬೊಂದು ಯೇಸು ಕೈತಲ್‌ ಕನತೆರ್.</verse>
				<verse number="4">ಆಂಡ ಜನೊಕುಲೆ ಮಲ್ಲ ಗುಂಪು ಇತ್ತಿನೆಡ್ದಾವರ ಅಕ್ಲೆಗ್ ಯೇಸುನ ಕೈತಲ್‌ ಕನವೆರೆ ಸಾದ್ಯ ಆಯಿಜಿ, ಅಂಚಾದ್ ಯೇಸು ಇತ್ತಿನ ಇಲ್ಲದ ಮಾಡ್‌ನ್ ಗಿರ್ತ್‌ದ್ ಪಕ್ಷವಾತದಾಯೆ ಜೆತ್ತ್‌ದಿತ್ತಿ ಪಜೆನ್ ತಿರ್ತ್ ಜಪುಡಾಯೆರ್.</verse>
				<verse number="5">ಯೇಸು ಅಕ್ಲೆನ ನಂಬಿಕೆನ್ ತೂದು, ಆ ಪಕ್ಷವಾತದಾಯಡ, “ಮಗಾ, ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.</verse>
				<verse number="6">ಅಲ್ಪ ಶಾಸ್ತ್ರಿಲೆಡ್ ಕೆಲೆವೆರ್ ಕುಲ್ಲುದಿತ್ತೆರ್. “ಇಂಬೆ ದಾಯೆಗ್ ಇಂಚ ಪಾತೆರ್‌ವೆ? ಉಂದು ದೇವದೂಷಣೆ, ದೇವೆರ್ ಒರಿಯೇ ಅತ್ತಂದೆ ಏರ್ಲಾ ಪಾಪೊಲೆನ್ ಬುಡುಗಡೆ ಮಲ್ಪೊಲಿಯಾ?” ಅಂದ್‌ದ್ ಅಕ್ಲೆ ಉಡಲ್‌ಡೇ ಎನ್ನೊಂದಿತ್ತೆರ್.</verse>
				<verse number="7"></verse>
				<verse number="8">ಇಂಚ ಎನ್ನೊಂದುಪ್ಪುನೆನ್ ಕೂಡ್ಲೆ ಯೇಸು ತನ ಆತ್ಮೊಡು ತೆರಿದ್ ಅಕ್ಲೆಡ, “ನಿಕುಲು ನಿಕ್ಲೆನ ಉಡಲ್‌ಡ್ ದಾಯೆಗ್ ಇಂಚ ಆಲೋಚನೆ ಮಲ್ತೊಂದುಲ್ಲರ್?</verse>
				<verse number="9">ಒವು ಸುಲಭ? ಪಕ್ಷವಾತದಾಯಗ್ ‘ನಿನ ಪಾಪೊಲು ಮಾಪು ಆತ್ಂಡ್ ಪನ್ಪಿನವಾ,’ ಇಜ್ಜಿಂಡ, ‘ಲಕ್ಕ್‌ದ್ ನಿನ ಪಜೆನ್ ಪತ್ತೊಂದು ನಡಪು ಪನ್ಪಿನವಾ?’</verse>
				<verse number="10">ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಪಕ್ಷವಾತದಾಯನ್ ತೂದು,</verse>
				<verse number="11">“ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋಲ,” ಅಂದ್‌ದ್ ನಿಕ್ಕ್ ಪನ್ಪೆ ಪಂಡ್ದ್ ಪಂಡೆ.</verse>
				<verse number="12">ಆಯೆ ಲಕ್ಕ್‌ದ್ ಅಪಗನೇ ತನ ಪಜೆನ್ ಪತ್ತೊಂದು ಮಾತೆರೆ ಎದುರುಡ್ದು ಪಿದಾಡ್ದ್ ಪೋಯೆ. ಉಂದೆನ್ ತೂದು ಮಾತೆರ್ಲಾ ಅಚ್ಚಿರೊಡು, “ಈತ್‌ನೆಟ್ಟ ಎಂಕುಲು ಇಂಚಿನ ಕಾರ್ಯೊನು ತೂತಿನೆ ಇಜ್ಜಿ,” ಪನೊಂದು ದೇವೆರೆನ್ ಪುಗರಿಯೆರ್.</verse>
				<verse number="13">ಯೇಸು ಕುಡ ಕಡಲ ಬರಿಕ್ಕ್ ಪೋಯೆ. ಜನೊಕುಲೆ ಗುಂಪು ಆಯನ ಕಡೆಕ್ಕ್ ಬತ್ತಿನಪಗ ಆಯೆ ಅಕ್ಲೆಗ್ ಬೋಧನೆ ಮಲ್ತೆ.</verse>
				<verse number="14">ಅಲ್ಪಡ್ದ್ ಯೇಸು ಕಡಲ್ದ ಬರಿಟ್ಟೇ ಪೋವೊಂದುಪ್ಪುನಗ ಸುಂಕ ವಸೂಲಿ ಮಲ್ತೊಂದಿತ್ತಿ ಅಲ್ಫಾಯನ ಮಗೆ ಲೇವಿನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಲೆಪ್ಪುನಗ, ಆಯೆ ಲಕ್ಕ್‌ದ್ ಯೇಸುನ ಬೆರಿಯೆ ಪೋಯೆ.</verse>
				<verse number="15">ಐಡ್ದ್ ಬೊಕ್ಕ ಯೇಸು ಲೇವಿನ ಇಲ್ಲಡ್ ವಣಸ್‌ಗ್ ಕುಲ್ಲೊಂದುಪ್ಪುನಗ ಮಸ್ತ್ ಜನ ಸುಂಕದಾಕುಲುಲಾ ಪಾಪಿಷ್ಟೆರ್‌ಲಾ ಯೇಸು ಬೊಕ್ಕ ಆಯ ಶಿಷ್ಯೆರೆ ಪಂತೆಡ್ ವಣಸ್‌ಗ್ ಕುಲ್ಲುದಿತ್ತೆರ್. ಮೊಕ್ಲೆಡ್ ಮಸ್ತ್ ಜನ ಯೇಸುನ ಬೆರಿಯೆ ಪೋಪಿನಾಕುಲು ಆದಿತ್ತೆರ್.</verse>
				<verse number="16">ಪರಿಸಾಯೆರಾಯಿ ಶಾಸ್ತ್ರಿಲು, ಆಯೆ ಪಾಪಿಲು ಬೊಕ್ಕ ಸುಂಕದಾಕುಲೆಡೊಪ್ಪ ವಣಸ್ ಮಲ್ಪುನೆನ್ ತೂದು, ಆಯನ ಶಿಷ್ಯೆರೆಡ, “ಆಯೆ ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ದಾಯೆಗ್ ವಣಸ್ ಮಲ್ಪುವೆ ತೂಲೆ.” ಅಂದ್‌ದ್ ಪಂಡೆರ್.</verse>
				<verse number="17">ಯೇಸು ಅವೆನ್ ಕೇಂಡ್ದ್ ಅಕ್ಲೆಡ, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ, ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು. ಯಾನ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್, ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಪಂಡೆ.</verse>
				<verse number="18">ಯೋಹಾನನ ಶಿಷ್ಯೆರ್‌ಲಾ ಪರಿಸಾಯೆರ್‌ಲಾ ಉಪವಾಸೊಡುಪ್ಪುನಗ, ಕೆಲೆವೆರ್ ಯೇಸುನ ಕೈತಲ್‌ ಬತ್ತ್‌ದ್, “ಯೋಹಾನನ ಶಿಷ್ಯೆರ್ ಬೊಕ್ಕ ಪರಿಸಾಯೆರೆ ಶಿಷ್ಯೆರ್‌ಲಾ ಉಪವಾಸ ಮಲ್ಪುವೆರತ್ತಾ? ನಿನ ಶಿಷ್ಯೆರ್ ದಾಯೆಗ್ ಉಪವಾಸ ಮಲ್ಪುಜೆರ್?” ಅಂದ್‌ದ್ ಕೇಂಡೆರ್.</verse>
				<verse number="19">ಐಕ್ ಯೇಸು ಅಕ್ಲೆಡ, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪುನಗ ಉಪವಾಸ ಮಲ್ಪೊಲಿಯಾ? ಮದ್ಮಯೆ ತನ್ಕುಲೆಡೊಪ್ಪ ಉಪ್ಪುನ ಮುಟ್ಟ ಅಕುಲು ಉಪವಾಸ ಮಲ್ಪಯೆರ್.</verse>
				<verse number="20">ಆಂಡ ಮದ್ಮಯನ್ ಅಕ್ಲೆನ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು, ಆ ಕಾಲೊಡು ಉಪವಾಸ ಮಲ್ಪುವೆರ್.</verse>
				<verse number="21">“ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಆ ಪೊಸ ಪತ್ತೆ ಪರ ಕುಂಟುನು ಒಯ್ತ್‌ದ್ ಪರ್ತೆಲ್ ಹೆಚ್ಚಾವು.</verse>
				<verse number="22">ಅಂಚೆನೇ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್. ದಿಂಜಾಂಡ ದ್ರಾಕ್ಷಾರಸ ಚೀರವು ಪುಡಾದ್ ದ್ರಾಕ್ಷಾರಸಲಾ ಚೀರವುಲಾ ಹಾಳಾದ್ ಪೋಪುಂಡು. ಅಂಚಾಯಿನೆಡ್ದ್ ಪೊಸ ದ್ರಾಕ್ಷಾರಸೊನು ಪೊಸ ಚೀರವುಡು ಪಾಡ್ದ್ ದೀವೊಡು,” ಅಂದ್‌ದ್ ಪಂಡೆ.</verse>
				<verse number="23">ಯೇಸು ಸಬ್ಬತ್‌ದಿನೊಟು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಕೊರಲ್ ರುಂಬುದು ತಿನೊಂದಿತ್ತೆರ್.</verse>
				<verse number="24">ಪರಿಸಾಯೆರ್ ಯೇಸುಡ, “ತೂಲ, ಮೊಕುಲು ಸಬ್ಬತ್‌ದಿನೊಟು ಮಲ್ಪಂದಿ ಬೇಲೆನ್ ದಾಯೆಗ್ ಮಲ್ಪುವೆರ್?” ಅಂದ್‌ದ್ ಕೇಂಡೆರ್.</verse>
				<verse number="25">ಅಪಗ ಯೇಸು ಅಕ್ಲೆಡ, “ದಾವೀದೆ, ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ?</verse>
				<verse number="26">ಪ್ರಧಾನಯಾಜಕೆ ಆಯಿ ಅಬಿಯಾತರನ ಕಾಲೊಡು ದಾವೀದೆ ದೇವೆರೆ ಆಲಯದ ಉಲಯಿ ಪೋದು ಯಾಜಕೆರ್ ಅತ್ತಂದೆ ಬೇತೆ ಏರ್ಲಾ ತಿನಂದಿನ ನೈವೇದ್ಯದ ರೊಟ್ಟಿನ್ ತಾನ್ ತಿಂದ್‌ದ್, ತನಡೊಪ್ಪ ಇತ್ತಿನಾಕುಲೆಗ್ಲಾ ಕೊರಿಯೆ ಅತ್ತಾ?”</verse>
				<verse number="27">ಬೊಕ್ಕ ಅಕ್ಲೆಡ, “ಸಬ್ಬತ್‌ದಿನೊನು ದೇವೆರ್ ನರಮಾನಿಲೆಗಾದೇ ಉಂಡು ಮಲ್ತ್‌ದಿನಿ ಅತ್ತಂದೆ ನರಮಾನಿಲೆನ್ ಸಬ್ಬತ್‌ದಿನೊಕಾದ್ ಮಲ್ತ್‌ದಿನಿ ಅತ್ತ್.</verse>
				<verse number="28">ಅಂಚಾಯಿನೆಡ್ದ್ ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="3">
				<verse number="1">ಯೇಸು ಕುಡೊಂಜಿ ಸರಿ ಸಭಾಮಂದಿರೊಗು ಪೋಯೆ, ಅಲ್ಪ ಕೈ ನುಂಗುಪೋತಿನಾಯೆ ಇತ್ತೆ.</verse>
				<verse number="2">ಅಲ್ಪ ಇತ್ತಿನ ಕೆಲೆವೆರ್, ಯೇಸು ಆ ನರಮಾನಿನ್ ಸಬ್ಬತ್‌ದಿನೊಟು ಗುಣ ಮಲ್ಪುವೆನಾ ಅಂದ್‌ದ್ ಕಾತೊಂದು ಆಯನ ಮಿತ್ತ್ ತಪ್ಪು ನಾಡೊಂದಿತ್ತೆರ್.</verse>
				<verse number="3">ಯೇಸು ಕೈ ನುಂಗುಪೋತಿನಾಯಡ, “ಲಕ್ಕ್‌ದ್ ನಡುಟು ಉಂತುಲ,” ಅಂದ್‌ದ್ ಪಂಡ್ದ್</verse>
				<verse number="4">ಜನೊಕುಲೆಡ, “ನ್ಯಾಯಕಟ್ಟ್‌ದ ಪ್ರಕಾರ ಸಬ್ಬತ್‌ದಿನೊಟು ಒವೆನ್ ಮಲ್ಪುನವು ನ್ಯಾಯ? ಎಡ್ಡೆ ಮಲ್ಪುನವಾ ಹಾಳ್ ಮಲ್ಪುನವಾ? ಪ್ರಾಣೊನು ಒರಿಪಾವುನವಾ ಕೆರ್ಪಿನವಾ?” ಅಂದ್‌ದ್ ಪ್ರಶ್ನೆ ಕೇನ್ನಗ, ಅಕುಲು ಮನಿಪಂದೆ ಇತ್ತೆರ್.</verse>
				<verse number="5">ಅಪಗ ಯೇಸು ಅಕ್ಲೆನ ಉಡಲ್ ಕಲ್ಲಾದಿತ್ತಿನೆನ್ ತೂದು ದುಃಖ ಮಲ್ತ್‌ದ್, ಕೋಪೊಡು ಸುತ್ತಲಾ ಅಕ್ಲೆನ್ ತೂದು, ಆ ನರಮಾನಿಡ, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ. ಆಯೆ ನೀಡಿಯೆ, ಕೈ ಗುಣ ಆಂಡ್.</verse>
				<verse number="6">ಕೂಡ್ಲೆ ಪರಿಸಾಯೆರ್ ಪಿದಯಿ ಪೋದು, ಹೆರೋದ್ಯೆರೆನ ಗುಂಪುನು ಒಟ್ಟು ಸೇರಾದ್, ಇಂಬ್ಯನ್ ವಾ ಉಪಾಯೊಡು ಕೆರ್ಪಿನಿ ಪಂಡ್ದ್ ಆಯಗ್ ವಿರೋಧಾದ್ ಆಲೋಚನೆ ಮಲ್ತೊಂಡೆರ್.</verse>
				<verse number="7">ಯೇಸು ತನ ಶಿಷ್ಯೆರೆಡೊಪ್ಪ ಆ ಜಾಗ್‌ನ್ ಬುಡ್ದು ಕಡಲ ಬರಿಕ್ಕ್ ಪೋಯೆ. ಅಪಗ ಗಲಿಲಾಯೊಡ್ದುಲಾ ಮಸ್ತ್ ಜನೊಕುಲು ಆಯನ ಬೆರಿಯೆ ಬತ್ತೆರ್.</verse>
				<verse number="8">ಆಯೆ ಇಂಚಿಂಚಿ ಬೇಲೆಲೆನ್ ಮಲ್ಪುವೆ ಅಂದ್‌ದ್ ಕೇಂಡ್ದ್ ಮಸ್ತ್ ಜನೊಕುಲು ಯೂದಾಯೊಡ್ದುಲಾ ಯೆರೂಸಲೇಮುಡ್ದುಲಾ ಇದುಮಾಯೊಡ್ದುಲಾ ಯೊರ್ದಾನ್ ತುದೆತ ಆಯೆರೆಡ್ದ್ ತೂರ್ ಬೊಕ್ಕ ಸೀದೋನ್ ಪಟ್ಟಣದ ಸುತ್ತ ಇತ್ತಿನಾಕುಲುಲಾ ಆಯನ ಕೈತಲ್‌ಗ್ ಬತ್ತೆರ್.</verse>
				<verse number="9">ಜನೊಕುಲೆ ಗುಂಪು ಆಯನ ಮೆಯಿತ ಮಿತ್ತ್ ಬೂರಂದಿಲೆಕ್ಕ, ಆಯಗ್ ಒಂಜಿ ಓಡೊನು ತಯಾರ್ ಮಲ್ಪೆರೆ ಯೇಸು ತನ ಶಿಷ್ಯೆರೆಗ್ ಪಂಡೆ.</verse>
				<verse number="10">ದಾಯೆಗಂದ್ಂಡ ಆಯೆ ಮಸ್ತ್ ಜನೊಕುಲೆನ ಸೀಕ್‌ನ್ ಗುಣ ಮಲ್ತಿನೆಡ್ದ್, ಸೀಕ್‌ದಾಕುಲು ಮಾತೆರ್ಲಾ ಆಯನ್ ಮುಟ್ಟೊಡು ಅಂದ್‌ದ್ ಆಯನ ಮೇಲ್‌ಗ್ ಬೂರೊಂದಿತ್ತೆರ್.</verse>
				<verse number="11">ಬೊಕ್ಕ ದೆವ್ವೊಲು ಆಯನ್ ತೂಯಿ ಕೂಡ್ಲೆ ಆಯನ ಎದುರು ಅಡ್ಡಬೂರ್ದು, “ಈಯೇ ದೇವೆರೆ ಮಗೆ,” ಅಂದ್‌ದ್ ಕಲ್ಕೊಂದಿತ್ತ.</verse>
				<verse number="12">ಆಂಡ ಆಯೆ ತಾನ್ ಇಂಚಿತ್ತಿನಾಯೆ ಅಂದ್‌ದ್ ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಕಡಾ ಕಂಡಿತಾದ್ ಪಂಡೆ.</verse>
				<verse number="13">ಐಡ್ದ್ ಬೊಕ್ಕ ಯೇಸು ಗುಡ್ಡೆದ ಮಿತ್ತ್ ಪೋಯೆ. ಆಯೆ ತನ್ಕ್ ಬೋಡಾಪಿನಾಕುಲೆನ್ ಬರಿಯೆರೆ ಪನ್ನಗ ಅಕುಲು ಆಯನ ಕೈತಲ್‌ ಬತ್ತೆರ್.</verse>
				<verse number="14">ಅಪಗ ಆಯೆ ಪದ್ರಾಡ್ ಮಂದಿಲೆನ್ ಅಜತ್‌ದ್ ಅಕ್ಲೆಗ್ ಅಪೊಸ್ತಲೆರ್ ಅಂದ್‌ದ್ ಪುದರ್ ಕೊರಿಯೆ. ಅಕುಲು ತನಡೊಪ್ಪ ಉಪ್ಪೊಡಂದ್‌ದ್‌ಲಾ, ಅಕ್ಲೆನ್ ಸುವಾರ್ತೆನ್ ಸಾರಿಯೆರೆಲಾ</verse>
				<verse number="15">ದೆವ್ವೊಲೆನ್ ಬುಡ್ಪಾವುನ ಅಧಿಕಾರ ಉಪ್ಪುಲೆಕ್ಕಲಾ ನೇಮಕ ಮಲ್ತೆ.</verse>
				<verse number="16">ಅಜತ್‌ದಿನಾಕುಲು ಏರಂದ್ಂಡ, ಸೀಮೋನೆ ಪನ್ಪಿನಾಯಗ್ ಪೇತ್ರೆ ಪಂಡ್ದ್ ಪುದರ್ ದೀಯೆ.</verse>
				<verse number="17">ಜೆಬೆದಾಯನ ಮಗೆ ಆಯಿ ಯಾಕೋಬುಗ್ಲಾ ಆಯನ ಮೆಗ್ಯೆ ಆಯಿ ಯೋಹಾನಗ್ಲಾ ಬೊವನೆರ್ಗೆಸ್ ಪಂಡ್ಂಡ ತೆಡಿಲ್‌ದ ಕಿನ್ನಿಲು ಪಂಡ್ದ್ ಪುದರ್ ದೀಯೆ.</verse>
				<verse number="18">ಬೊಕ್ಕ ಒರಿದಿನಾಕುಲು ಏರಂದ್ಂಡ, ಅಂದ್ರೆಯೆ, ಫಿಲಿಪ್ಪು, ಬಾರ್ತೊಲೊಮಾಯೆ, ಮತ್ತಾಯೆ, ತೋಮೆ, ಅಲ್ಫಾಯನ ಮಗೆ ಯಾಕೋಬು, ತದ್ದಾಯೆ, ಮತಾಭಿಮಾನಿ ಅಂದ್‌ದ್ ಲೆಪ್ಪವೊಂಡಿ ಸೀಮೋನೆ,</verse>
				<verse number="19">ಬೊಕ್ಕ ಯೇಸುನು ಪತ್ತ್‌ದ್ ಕೊರಿ ಇಸ್ಕಾರಿಯೋತ ಯೂದೆ ಮೊಕುಲೇ.</verse>
				<verse number="20">ಯೇಸು ಇಲ್ಲದುಲಯಿ ಬತ್ತಿನಪಗ ಜನೊಕುಲೆ ಗುಂಪು ಕುಡ ಸೇರಿನೆಡ್ದ್ ಆಯಗ್ಲಾ ಆಯನ ಶಿಷ್ಯೆರೆಗ್ಲಾ ವಣಸ್ ಮಲ್ಪೆರೆ ಆಯಿಜಿ.</verse>
				<verse number="21">ಉಂದೆನ್ ಕೇಂಡ್ದ್ ಆಯನ ಸಂಬಂದಿಕೆರ್, “ಆಯಗ್ ಮರ್ಲ್ ಪತ್ತ್‌ದ್ಂಡ್,” ಅಂದ್‌ದ್ ಆಯನ್ ಪತ್ತಿಯೆರೆ ಪಿದಾಡಿಯೆರ್,</verse>
				<verse number="22">ಉಂದತ್ತಂದೆ ಯೆರೂಸಲೇಮುಡ್ದು ಬತ್ತ್‌ತ್ತಿ ಶಾಸ್ತ್ರಿಲು, “ಇಂಬ್ಯನ್ ಬೆಲ್ಜೆಬೂಲೆ ಪತ್ತ್‌ದ್ಂಡ್, ಇಂಬೆ ದೆವ್ವೊಲೆ ಮುಖ್ಯಸ್ಥನ ಸಹಾಯೊಡ್ದು ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪನೊಂದಿತ್ತೆರ್.</verse>
				<verse number="23">ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ, ಉಪಕತೆತ್ತ ರೂಪೊಡು ಪಂಡಿನಿ ದಾನೆಂದ್ಂಡ, “ಸೈತಾನೆ ಸೈತಾನನ್ ಬುಡ್ಪಾವುನ ಉಂಡಾ?</verse>
				<verse number="24">ಒಂಜಿ ರಾಜ್ಯದ ಉಲಯಿ ಭೇದ ಉಂಡಾಂಡ, ಆ ರಾಜ್ಯ ಒರಿಯಂದ್.</verse>
				<verse number="25">ಐತ ಲೆಕ್ಕನೆ ಒಂಜಿ ಇಲ್ಲದ ಉಲಯಿ ಭೇದ ಉಂಡಾಂಡ ಆ ಇಲ್ಲ್‌ಲಾ ಒರಿಯಂದ್.</verse>
				<verse number="26">ಅಂಚೆನೇ, ಸೈತಾನೆ ತನ್ಕ್ ವಿರೋಧಾದ್ ಭೇದ ಮಲ್ತೊಂಡೆಡ ಆಯೆ ನಾಶಾದ್ ಪೋವೆ.</verse>
				<verse number="27">“ಉಂದತ್ತಂದೆ ಒರಿ ಸುರುಟ್ಟು ಬಲವಂತನ್ ಕಟ್ಟ್‌ದ್ ಪಾಡಂದೆ ಆ ಬಲವಂತನ ಇಲ್ಲನ್ ಪೊಗ್ಗುದು ಸೊತ್ತುಲೆನ್ ಲೂಟಿ ಮಲ್ಪೆರೆ ಆಪುಜಿ. ಕಟ್ಟಿ ಬೊಕ್ಕನೇ ಆಯನ ಇಲ್ಲನ್ ಲೂಟಿ ಮಲ್ಪೊಲಿ.”</verse>
				<verse number="28">ಉಂದೆನ್ ಯೇಸು ಪಂಡಿನಿ ದಾಯೆಗಂದ್ಂಡ ಶಾಸ್ತ್ರಿಲು, “ಆಯಡ ದೆವ್ವೊಲು ಉಂಡು,” ಅಂದ್‌ದ್ ಪಂಡಿನೆಕ್ಕ್. ಆಯೆ ಅಕ್ಲೆಗ್, “ನಿಕ್ಲೆಗ್ ನಿಜಾದ್ ಪನ್ಪೆ ನರಮಾನಿ ಮಲ್ಪುನ ಪ್ರತಿ ಒಂಜಿ ಪಾಪೊಗ್ಲಾ ಬಾಯಿಡ್ದ್ ಬರ್ಪಿ ದೂಷಣೆಗ್ಲಾ ಮಾಪು ಉಂಡು. ಆಂಡ ಪರಿಶುದ್ಧಾತ್ಮೊಗು ವಿರೋಧಾದ್ ದೂಷಣೆ ಮಲ್ತಿನಾಯಗ್ ಏಪೊಗ್ಲಾ ಮಾಪು ಆವಂದ್. ಆಯೆ ನಿತ್ಯ ಪಾಪಿ ಆದುಪ್ಪುವೆ,” ಅಂದ್‌ದ್ ಪಂಡೆ.</verse>
				<verse number="29"></verse>
				<verse number="30"></verse>
				<verse number="31">ಯೇಸುನ ಅಪ್ಪೆಲಾ ಮೆಗ್ಯಾಡ್ಲುಲಾ ಬತ್ತ್‌ದ್ ಪಿದಯಿ ಉಂತೊಂದು ಆಯನ್ ಲೆಪ್ಪುಡಾಯೆರೆ ಕಡಪುಡಿಯೆರ್.</verse>
				<verse number="32">ಜನೊಕುಲು ಆಯಡ, “ತೂಲ, ನಿನ ಅಪ್ಪೆಲಾ ನಿನ ಮೆಗ್ಯಾಡ್ಲುಲಾ ನಿನನ್ ನಾಡೊಂದು ಪಿದಯಿ ಉಂತುದೆರ್,” ಅಂದ್‌ದ್ ಪಂಡೆರ್.</verse>
				<verse number="33">ಐಕ್ ಯೇಸು ಅಕ್ಲೆಡ, “ಎನ ಅಪ್ಪೆಲಾ ಮೆಗ್ಯಾಡ್ಲುಲಾ ಏರ್?” ಅಂದ್‌ದ್ ಕೇಂಡೆ.</verse>
				<verse number="34">ತನ ಸುತ್ತಲಾ ಕುಲ್ಲುದಿನಾಕುಲೆನ್ ತೂದು, “ಇಂದಾ, ಮೊಕುಲೇ ಎನ ಅಪ್ಪೆಲಾ, ಎನ ಮೆಗ್ಯಾಡ್ಲುಲಾ.</verse>
				<verse number="35">ಏರ್ ದೇವೆರೆ ಚಿತ್ತದ ಲೆಕ್ಕ ನಡಪುವೆನಾ ಆಯೆನೇ ಎನ ಮೆಗ್ಯೆಲಾ ಮೆಗ್ದಿಲಾ ಅಪ್ಪೆಲಾ ಆದುಲ್ಲೆರ್,” ಅಂದ್‌ದ್ ಪಂಡೆ.</verse>
			</chapter>
			<chapter number="4">
				<verse number="1">ಯೇಸು ಕುಡ ಕಡಲ ಬರಿಟ್ಟ್ ಬೋಧನೆ ಮಲ್ಪೆರೆ ಸುರು ಮಲ್ತೆ. ದಿಂಜ ಜನ ಆಯನ ಕೈತಲ್‌ ಸೇರ್ದ್ ಬತ್ತಿನೆಡ್ದ್ ಆಯೆ ಕಡಲ್‌ಡಿತ್ತಿ ಓಡ ಮಿತ್ತಾರ್ದ್ ಕುಲ್ಲಿಯೆ.</verse>
				<verse number="2">ಆ ಜನೊಕುಲೆ ಗುಂಪು ಕಡಲ್ದ ಕರೆಟ್ ಇತ್ತೆರ್. ಅಪಗ ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಕೆಲವು ಬೋಧನೆ ಮಲ್ತೆ. ಆ ಬೋಧನೆಡ್ ಪಂಡಿನಿ ದಾನೆಂದ್ಂಡ,</verse>
				<verse number="3">“ಕೇನ್ಲೆ, ಬಿತ್ತುನಾಯೆ ಬಿತ್ತಿಯೆರೆ ಪಿದಾಡಿಯೆ.</verse>
				<verse number="4">ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್‌ಂಡ್. ಪಕ್ಕಿಲು ಬತ್ತ್‌ದ್ ತಿಂದ್‌ದ್ ಬುಡಿಯ.</verse>
				<verse number="5">ಕೆಲವು ಬಿತ್ತ್ ಮಣ್ಣ್‌ದಾಂತಿ ಪಾದೆದ ನೆಲೊಟ್ಟು ಬೂರ್‌ಂಡ್. ಮಣ್ಣ್ ತೆಲ್ಪು ಇತ್ತಿನೆಡ್ದ್ ಬೇಗ ಮುಂಗೆ ಬತ್ತ್ಂಡ್.</verse>
				<verse number="6">ಆಂಡ ಸೂರ್ಯನ ದೊಂಬು ಅರ್ಲುನಗ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್ ನುಂಗುದು ಪೋಂಡು.</verse>
				<verse number="7">ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಕ್ಲೆಡ್ ಬೂರ್‌ಂಡ್. ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಯಿನೆಡ್ದ್ ಅವು ಫಲ ಕೊರ್ಜಿ.</verse>
				<verse number="8">ಕೆಲವು ಬಿತ್ತ್ ಎಡ್ಡೆ ಭೂಮಿದ ಮಿತ್ತ್ ಬೂರ್ದು, ಅವು ಕೊಡಿದ್ ಬುಲೆದ್ ಫಲ ಕೊರ್ದು ಐಟ್ಟ್ ಕೆಲವು ಮುಪ್ಪದಾತ್, ಕೆಲವು ಅಜ್ಪದಾತ್, ಕೆಲವು ನೂದೆದಾತ್ ಫಲ ಕೊರ್ಯ.”</verse>
				<verse number="9">ಬೊಕ್ಕ ಅಕ್ಲೆಡ, “ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಪಂಡೆ.</verse>
				<verse number="10">ಆಯೆ ಒರಿಯೇ ಉಪ್ಪುನಗ, ಆಯನ ಕೈತಲ್‌ದ ಪದ್ರಾಡ್ ಶಿಷ್ಯೆರ್‌ನಾಕುಲು ಆ ಉಪಕತೆತ್ತ ಸಂಗತಿಡ್ ಆಯಡ ಕೇಂಡೆರ್.</verse>
				<verse number="11">ಆಯೆ ಅಕ್ಲೆಡ ಪಂಡಿನಿ, “ದೇವೆರೆ ರಾಜ್ಯದ ಗುಟ್ಟು ನಿಕ್ಲೆಗ್ ಕೊರ್ತುಂಡು. ಆಂಡ ಪಿದಯಿದ ಜನೊಕುಲೆಗ್ ಉಪಕತೆತ್ತ ರೂಪೊಡು ತೆರಿಪಾವೆ,</verse>
				<verse number="12">ದಾಯೆಗ್ ಪಂಡ, ‘ಅಕುಲು ಕಣ್ಣ್‌ಡ್ ತೂಂಡಲಾ ಅಕ್ಲೆಗ್ ಗೊತ್ತಾಪುಜಿ, ಕೆಬಿಟ್ ಕೇಂಡಲಾ ಅಕ್ಲೆಗ್ ಅರ್ಥ ಆಪುಜಿ, ಅಂಚ ತೂದು ತೆರಿಯೊಂದು ಅಕುಲು ದೇವೆರೆ ಕಡೆಕ್ಕ್ ತಿರ್ಗಿಯೆರ್ಡ, ಪಾಪೊಡ್ದು ಮಾಪು ಅಕ್ಲೆಗ್ ಆಪುಂಡು.’”</verse>
				<verse number="13">ಐಡ್ದ್ ಬೊಕ್ಕ ಆಯೆ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಈ ಉಪಕತೆತ್ತ ಅರ್ಥ ನಿಕ್ಲೆಗ್ ಗೊತ್ತಾಯಿಜಾ? ಅಂಚಾಂಡ ಬೇತೆ ಉಪಕತೆತ್ತ ಅರ್ಥ ನಿಕುಲು ಎಂಚ ತೆರಿಯೊನ್ವರ್?</verse>
				<verse number="14">ಬಿತ್ತುನಾಯೆ ಪಾತೆರೊನು ಬಿತ್ತುವೆ.</verse>
				<verse number="15">ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸೈತಾನೆ ಬತ್ತ್‌ದ್ ಅಕ್ಲೆಡ್ ಬಿತ್ತ್‌ದಿತ್ತಿ ಪಾತೆರೊನು ದೆತ್ತ್‌ದ್ ಬುಡ್ಪೆ. ಮೊಕುಲೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತುಲು ಆದುಪ್ಪುವೆರ್.</verse>
				<verse number="16">ಅವ್ವೇ ಪ್ರಕಾರ ಬೇತೆ ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಸಂತೋಷೊಡು ಅವೆನ್ ಸ್ವೀಕಾರ ಮಲ್ಪುವೆರ್. ತನ್ಕುಲೆನ ಬೇರ್ ದಿಂಜ ಅಡಿಕ್ ಪೋವಂದಿನೆಡ್ದ್, ಮೊಕುಲು ಒಂತೆ ಕಾಲ ಮಾತ್ರ ಇತ್ತ್‌ದ್ ಆ ಪಾತೆರೊಡ್ದು, ಕಷ್ಟ ಆವಡ್ ಭಂಗ ಆವಡ್ ಬತ್ತ್ಂಡ, ಬೇಗನೇ ದಂಟ್‌ದ್ ಬೂರ್ವೆರ್. ಮೊಕುಲು ಪಾದೆ ಜಾಗ್‌ಡ್ ಬಿತ್ತ್ ಬೂರ್ದಿನಾಕುಲು ಆದುಪ್ಪುವೆರ್.</verse>
				<verse number="17"></verse>
				<verse number="18">ನನ ಕೆಲೆವೆರ್ ಪಾತೆರೊನು ಕೇಂಡಲಾ ಲೋಕದ ಚಿಂತೆಲಾ, ಐಶ್ವರ್ಯೊಡ್ದು ಆಪಿನ ಮೋಸಲಾ, ತರತರತ ಇಚ್ಚೆಡ್ ಆ ಪಾತೆರೊನು ದೆಂಗಾವುನೆಡ್ದ್ ಫಲ ಕೊರಂದೆ ಉಪ್ಪುವೆರ್. ಮೊಕುಲೇ ಮುಳ್ಳುಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆರ್.</verse>
				<verse number="19"></verse>
				<verse number="20">ಬೊಕ್ಕ ಕೆಲೆವೆರ್ ಪಾತೆರೊನು ಕೇಂಡ್ದ್ ಅಂಚೆನೆ ನಡತ್‌ದ್ ಮುಪ್ಪದಾತ್, ಅಜ್ಪದಾತ್, ನೂದೆದಾತ್ ಫಲೊನು ಕೊರ್ಪೆರ್. ಮೊಕುಲೇ ಬಿತ್ತ್ ಬೂರ್ದಿನ ಎಡ್ಡೆ ನೆಲ ಆದುಲ್ಲೆರ್.” ಅಂದ್‌ದ್ ಯೇಸು ಪಂಡೆ.</verse>
				<verse number="21">ಬೊಕ್ಕ ಯೇಸು ಅಕ್ಲೆಡ, “ತುಡರ್‌ನ್ ಕನತ್‌ದ್ ಕಲಸೆದುಲಯಿ ಇಜ್ಜಿಂಡ ಮಂಚವುದ ಅಡಿಟ್ಟ್ ದೀಪಿನ ಉಂಡಾ? ಅವೆನ್ ದೀಪಕಂಬದ ಮಿತ್ತ್ ದೀಪೆರತ್ತಾ?</verse>
				<verse number="22">ಮದೆ ಆದುಪ್ಪುನ ಮಾತಲಾ ಬೊಲ್ಪುಗು ಬರ್ಪುಂಡು, ಬೊಕ್ಕ ದೆಂಗಾದಿತ್ತಿನ ಒವಾಂಡಲಾ ಬೊಲ್ಪುಗು ಬರಂದೆ ಉಪ್ಪುಜಿ.</verse>
				<verse number="23">ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ.</verse>
				<verse number="24">ಬೊಕ್ಕ ಆಯೆ ಅಕ್ಲೆಡ, “ನಿಕುಲು ಕೆಬಿ ಕೊರ್ಪಿನ ಸಂಗತಿಡ್ ಜಾಗ್ರತೆಡುಪ್ಪುಲೆ. ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್. ನಿಕ್ಲೆಗ್ ನನಲಾ ಸೇರಾದ್ ಕೊರ್ಪೆರ್.</verse>
				<verse number="25">ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="26">ಬೊಕ್ಕ ಆಯೆ ಕುಡ ಅಕ್ಲೆಡ, “ಒರಿ ನರಮಾನಿ ಭೂಮಿಡ್ ಬಿತ್ತ್ ಬಿತ್ತ್‌ದ್, ರಾತ್ರೆ ನಿದ್ರೆ ಮಲ್ತ್‌ದ್ ಪಗೆಲ್ಡ್ ಲಕ್ಕ್‌ದ್ ತೂನಗ ಆಯಗ್ ತೆರಿಯಂದಿಲೆಕ್ಕ ಬಿತ್ತ್ ಕೊಡಿದ್ ಬುಲೆಯುಂಡು. ಅಂಚೆನೇ ದೇವೆರೆ ರಾಜ್ಯಲಾ ಉಂಡು.</verse>
				<verse number="27"></verse>
				<verse number="28">ಭೂಮಿ ದುಂಬತ್ತ ದೈ ಆದ್ ಬುಲೆದ್ ಪೈರ್ ಆದ್ ದಿಂಜಿದ್ ಕೊರಲ್ ತನ್ನಾತಿಗೆ ತಾನೇ ಬುಲೆಯುಂಡು.</verse>
				<verse number="29">ಕೆಯಿ ಬುಲೆಯಿ ಬೊಕ್ಕ ಕೊಯ್ಪಿನ ಕಾಲ ಬತ್ತ್ಂಡ್ ಅಂದ್‌ದ್, ಆಯೆ ಪರ್ಕತ್ತಿಡ್ದ್ ಕೊಯ್ಪಾವೆ,” ಪಂಡೆ.</verse>
				<verse number="30">ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯೊನು ಒಯಿಕ್ ಸಮ ಮಲ್ಪುಗ? ವಾ ಉಪಕತೆಡ್ದ್ ಅವೆನ್ ತೋಜಾದ್ ಕೊರ್ಕ?</verse>
				<verse number="31">ಅವು ದಾಸೆಮಿದ ಬಿತ್ತ್‌ದ ಲೆಕ್ಕ ಉಂಡು. ಅವು ಭೂಮಿಡ್ ಉಪ್ಪು ಮಾತ ಬಿತ್ತ್‌ಲೆಡ್ದ್‌ಲಾ ಎಲ್ಯದವು ಆದುಂಡು.</verse>
				<verse number="32">ಬಿತ್ತಿ ಬೊಕ್ಕ ಅವು ಬುಲೆದ್ ಮಾತ ಕಾಯಿಕಜಿಪು ದೈಕ್ಲೆಡ್ದ್ ಮಲ್ಲ ಆದ್ ಮಲ್ಲ ಮಲ್ಲ ಗೆಲ್ಲ್‌ಲೆಡ್ದ್ ಬುಲೆದ್ ಐತ ಗೆಲ್ಲ್‌ಲೆಡ್ ಬಾನೊಡು ರಾಪಿನ ಪಕ್ಕಿಲೆಗ್ ಐತ ನಿರೆಲ್‌ಡ್ ಗೂಡು ಕಟ್ಟ್‌ದ್ ವಾಸ ಮಲ್ಪೆರೆ ಆಪುಂಡು,” ಅಂದ್‌ದ್ ಪಂಡೆ.</verse>
				<verse number="33">ಆಯೆ ಇಂಚಿತ್ತಿ ಮಸ್ತ್ ಉಪಕತೆಲೆಡ್ದ್ ಜನೊಕುಲೆಗ್ ಅರ್ಥ ಆಪಿಲೆಕ್ಕ ದೇವೆರೆ ಪಾತೆರೊನು ಪನೊಂದಿತ್ತೆ.</verse>
				<verse number="34">ಉಪಕತೆದಾಂತೆ ಆಯೆ ಒಂಜೆನ್ಲಾ ಪಂಡಿಜೆ. ಆಂಡ ಆಯೆ ತನ ಶಿಷ್ಯೆರೆಡೊಪ್ಪ ಪ್ರತ್ಯೇಕಾದ್ ಉಪ್ಪುನಗ ಮಾತಲಾ ಬುಡ್ಪಾದ್ ಪನೊಂದಿತ್ತೆ.</verse>
				<verse number="35">ಅವ್ವೇ ದಿನೊಟು ಬೈಯದಗ ಯೇಸು ಶಿಷ್ಯೆರೆಡ, “ನಮ ಆಪೆದ ಬರಿಕ್ಕ್ ಪೋಯಿ,” ಅಂದ್‌ದ್ ಪಂಡೆ.</verse>
				<verse number="36">ಅಕುಲು ಆ ಜನೊಕುಲೆನ ಗುಂಪುನು ಬುಡ್ದು ಯೇಸುನು ಅವ್ವೇ ಓಡೊಡು ಲೆತ್ತೊಂದು ಪೋಯೆರ್. ಬೇತೆ ಓಡೊಲುಲಾ ಅಲ್ಪ ಇತ್ತ್ಂಡ್.</verse>
				<verse number="37">ಅಕುಲು ಆ ಓಡೊಡು ಪೋವೊಂದುಪ್ಪುನಗ, ಒಂಜಿ ಮಲ್ಲ ಬಿರುಗಾಳಿ ಲಕ್ಕ್‌ದ್, ಶೆರೆಕ್ಕುಲು ಆ ಓಡೊಗು ಹಾಕ್‌ದ್, ನೀರ್ ಓಡದುಲಯಿ ದಿಂಜೆರೆ ಸುರು ಆಂಡ್.</verse>
				<verse number="38">ಯೇಸು ಓಡದ ಒಂಜಿ ಮೂಲೆಡ್ ತಲೆಂಬುಡು ತರೆ ದೀದ್ ನಿದ್ರೆ ಮಲ್ತೊಂದಿತ್ತೆ. ಅಕುಲು ಆಯನ್ ಲಕ್ಕಾದ್, “ಗುರು, ಎಂಕುಲು ಮುರ್ಕೊಂದುಲ್ಲ ನಿಕ್ಕ್ ಚಿಂತೆ ಇಜ್ಜಾ?” ಅಂದ್‌ದ್ ಕೇಂಡೆರ್.</verse>
				<verse number="39">ಆಯೆ ಲಕ್ಕ್‌ದ್ ಗಾಳಿನ್ ದಟ್ಟಿಯೆ ಕಡಲ್‌ಗ್, “ಗೌಜಿ ಮಲ್ಪಡ, ಶಾಂತ ಆಲ,” ಅಂದ್‌ದ್ ಅಪ್ಪಣೆ ಕೊರಿಯೆ, ಅಪಗನೆ ಗಾಳಿ ಉಂತುದು, ಕಡಲ್ ಶಾಂತ ಆಂಡ್.</verse>
				<verse number="40">ಯೇಸು ತನ ಶಿಷ್ಯೆರೆಡ, “ನಿಕುಲು ದಾಯೆಗ್ ಪೋಡಿವರ್ ನನಲಾ ನಿಕ್ಲೆಗ್ ನಂಬಿಕೆ ಇಜ್ಜಾ?” ಅಂದ್‌ದ್ ಕೇನ್ನಗ,</verse>
				<verse number="41">ಅಕುಲು ದಿಂಜ ಪೋಡಿದ್, “ಉಂಬೆ ಏರಾದುಪ್ಪೆ? ಗಾಳಿಲಾ ಕಡಲ್‌ಲಾ ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
			</chapter>
			<chapter number="5">
				<verse number="1">ಯೇಸು ಬೊಕ್ಕ ಆಯನ ಶಿಷ್ಯೆರ್ ಕಡಲ್ ದಾಂಟ್‌ದ್ ಆಪೆದ ಬರಿಕ್ಕ್ ಗೆರಸೇನೆರೆ ಸೀಮೆಗ್ ಮುಟ್ಟಿಯೆರ್.</verse>
				<verse number="2">ಯೇಸು ಓಡೊಡ್ದು ಜತ್ತಿ ಕೂಡ್ಲೆ, ಒರಿ ದೆವ್ವ ಪತ್ತ್‌ದಿನಾಯೆ ಸಮಾಧಿದ ಮಾಟೆದುಲಯಿಡ್ದ್ ಆಯ ಎದುರು ಬತ್ತೆ.</verse>
				<verse number="3">ಸಮಾಧಿದ ಮಾಟೆಲು ಆಯನ ಇಲ್ಲ್ ಆದಿತ್ತ್ಂಡ್. ಆಯನ್ ಕುಂಟೊಲೆಡ್ಲಾ ಸಂಕಲೆಡ್ಲಾ ಕಟ್ಟ್‌ದಿತ್ತ್ಂಡಲಾ ಆಯೆ ಸಂಕಲೆನ್ಲಾ ಕುಂಟೊಲೆನ್ಲಾ ಪೊಲ್ತೊಂದುದಿತ್ತೆ. ಆಯನ್ ಏರೆಗ್ಲಾ ಸಂಕಲೆಡ್ದ್ ಕಟ್ಟಿಯೆರೆ ಆವಂದೆ ಪೋಯೆರ್. ಆಯನ್ ಪತ್ತಿಯೆರೆ ಏರೆಡ್ದ್‌ಲಾ ಆಯಿಜಿ.</verse>
				<verse number="4"></verse>
				<verse number="5">ಆಯೆ ರಾತ್ರೆ ಪಗೆಲ್ ಸಮಾಧಿ ಮಾಟೆಲೆಡ್ಲಾ ಗುಡ್ಡೆಲೆಡ್ಲಾ ಬೊಬ್ಬೆ ಪಾಡೊಂದು, ಕಲ್ಲ್‌ಡ್ ತನನ್ ಕಡ್ತೊಂದಿತ್ತೆ.</verse>
				<verse number="6">ಯೇಸುನು ಆಯೆ ದೂರೊಡ್ದು ತೂದು ಪಾರ್ ಬತ್ತ್‌ದ್ ಆಯಗ್ ಅಡ್ಡಬೂರ್ಯೆ.</verse>
				<verse number="7">ಮಲ್ಲ ಸ್ವರೊಟ್ಟು ಅರಬಾಯಿ ದೀದ್, “ಯೇಸೋ ಪರಾತ್ಪರೆ ಆದುಪ್ಪು ದೇವೆರೆ ಮಗಾ ಎನ ಸುದ್ಧಿ ನಿಕ್ಕ್ ದಾಯೆಗ್? ದೇವೆರೆ ಆಜ ಪಾಡ್ವೆ, ಎಂಕ್ ಭಂಗ ಕೊರೊಡ್ಚಿ.”</verse>
				<verse number="8">ಆಯೆ ಇಂಚ ಪಂಡಿನಿ ದಾಯೆಗಂದ್ಂಡ, ಯೇಸು, “ಓ ದೆವ್ವನೇ, ಇಂಬ್ಯನ್ ಬುಡ್ದು ಪೋಲ,” ಅಂದ್‌ದ್ ಪಂಡ್ದಿತ್ತೆ.</verse>
				<verse number="9">ಬೊಕ್ಕ ಯೇಸು ಆಯಡ, “ನಿನ ಪುದರ್ ಎಂಚಿನ?” ಅಂದ್‌ದ್ ಕೇಂಡಿನೆಕ್ಕ್ ಆಯೆ, “ಎನ ಪುದರ್ ‘ದಂಡ್,’ ದಾಯೆಗಂದ್ಂಡ, ಎಂಕುಲು ಮಸ್ತ್ ಜನ ಉಲ್ಲ,” ಅಂದ್‌ದ್ ಪಂಡೆ.</verse>
				<verse number="10">ಎಂಕ್ಲೆನ್ ಈ ಸೀಮೆಡ್ದ್ ಗಿಡ್ತ್ ಬುಡೊಡ್ಚಿ ಅಂದ್‌ದ್ ಆಯಡ ನಟ್ಟೊಂಡ.</verse>
				<verse number="11">ಅಲ್ಪ ಗುಡ್ಡೆದ ಪುಡೆಟ್ಟ್ ಪಂಜಿದ ಮಲ್ಲ ಪುಂಡು ಮೇಯೊಂದಿತ್ತ್‌ಂಡ್.</verse>
				<verse number="12">ಆ ದೆವ್ವೊಲು, “ಪಂಜಿಲೆ ಗುಂಪುದುಲಯಿ ಸೇರೊನಿಯೆರೆ ಎಂಕ್ಲೆನ್ ಕಡಪುಡ್ದು ಕೊರ್ಲ,” ಅಂದ್‌ದ್ ನಟ್ಟೊಂಡ.</verse>
				<verse number="13">ಅಪಗ ಯೇಸು ಐಕ್ಲೆಗ್ ಅಪ್ಪಣೆ ಕೊರಿಯೆ. ಬೊಕ್ಕ ದೆವ್ವೊಲು ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ; ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕಡಲ್ದ ಉಲಯಿ ಬೂರ್ದು ದಮ್ಮು ಕಟ್ಟ್‌ದ್ ಸೈತ. ಹೆಚ್ಚಿಕಡಿಮೆ ರಡ್ಡ್ ಸಾರ ಪಂಜಿಲು ಇತ್ತ.</verse>
				<verse number="14">ಪಂಜಿಲೆನ್ ಮೇಪಾವುನಕುಲು ಪಾರ್‌ಪೋದು ಊರುಡ್ಲಾ ಹಳ್ಳಿಲೆಡ್ಲಾ ನಡತಿ ಸಂಗತಿನ್ ತೆರಿಪಾಯೆರ್. ಜನೊಕುಲು ನಡತಿ ಸಂಗತಿ ದಾನೆಂದ್ ತೂಯೆರೆ ಬತ್ತೆರ್.</verse>
				<verse number="15">ಯೇಸು ಇತ್ತಿನಡೆಗ್ ಬತ್ತ್‌ದ್ ಆ ದಂಡ್ ಇನ್ಪಿ ದೆವ್ವ ಪತ್ತ್‌ದಿನಾಯೆ, ಕುಂಟು ಪಾಡೊಂದು ಸ್ವಸ್ಥ ಬುದ್ಧಿಡ್ ಕುಲ್ಲುದಿನೆನ್ ತೂದು ಪೋಡಿಯೆರ್.</verse>
				<verse number="16">ನಡತಿ ಸಂಗತಿಲೆನ್ ತೂಯಿನಾಕುಲು ಆ ದೆವ್ವ ಪತ್ತ್‌ದಿನಾಯಗ್ ಇಂಚ ಆಂಡ್ ಪನ್ಪಿನೆನ್ಲಾ ಪಂಜಿಲೆ ಸಂಗತಿನ್ಲಾ ತೆರಿಪಾನಗ</verse>
				<verse number="17">ಅಕುಲು ಯೇಸುನು, ತನ್ಕುಲೆ ಸೀಮೆನ್ ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.</verse>
				<verse number="18">ಆಯೆ ಓಡೊನು ಮಿತ್ತಾನಗ ಆ ದೆವ್ವ ಪತ್ತ್‌ದಿನಾಯೆ, “ಯಾನ್ ನಿನಡೊಪ್ಪ ಉಪ್ಪುವೆ,” ಅಂದ್‌ದ್ ಯೇಸುಡ ನಟ್ಟೊಂಡೆ.</verse>
				<verse number="19">ಆಂಡ ಯೇಸು ಆಯನ್ ಲೆತ್ತೊಂದು ಪೋಯೆರೆ ಒಪ್ಪಿಯಂದೆ ಆಯಡ, “ಈ ನಿನ ಇಲ್ಲಡೆಗ್ ನಿನ್ನಾಕುಲೆ ಕೈತಲ್‌ ಪೋದು, ಸ್ವಾಮಿ ನಿಕ್ಕ್ ಕರುಣೆ ತೋಜಾದ್ ನಿಕ್ಕ್ ಎಂಚೆಂಚಿನ ಉಪಕಾರೊನು ಮಲ್ತ್‌ದೆ,” ಅಂದ್‌ದ್ ತೆರಿಪಾಲ.</verse>
				<verse number="20">ಆಯೆ ಅಲ್ಪಡ್ದ್ ಪೋದು, ಯೇಸು ತನ್ಕ್ ಮಲ್ತಿನ ಉಪಕಾರೊನು ದೆಕಪೊಲಿ ಸೀಮೆಲೆಡ್ ಸಾರಿಯೆರೆ ಸುರು ಮಲ್ತೆ. ಮಾತೆರ್ಲಾ ಅಚ್ಚಿರ ಆಯೆರ್.</verse>
				<verse number="21">ಯೇಸು ಪಿರ ಓಡೊಡು ಈಯೆರೆಗ್ ಕಡತ್‌ದ್ ಬತ್ತಿ ಬೊಕ್ಕ ಜನೊಕುಲು ಮಲ್ಲ ಗುಂಪಾದ್ ಆಯನ ಸುತ್ತಲಾ ಕೂಡಿಯೆರ್. ಆಯೆ ಕಡಲ ಬರಿಟ್ಟಿತ್ತೆ.</verse>
				<verse number="22">ಅಪಗ ಸಭಾಮಂದಿರದ ಅಧಿಕಾರಿಲೆಡ್ ಯಾಯಿರೆ ಪನ್ಪಿನಾಯೆ ಬತ್ತ್‌ದ್, ಯೇಸುನು ತೂದು ಆಯನ ಕಾರ್‌ಗ್ ಅಡ್ಡಬೂರ್ದು,</verse>
				<verse number="23">“ಎನ ಎಲ್ಯ ಮಗಲ್ ಇತ್ತೆ ಸೈಪಿನಂಚ ಉಲ್ಲಲ್. ಆಲ್ ಗುಣ ಆದ್ ಬದುಕುಲೆಕ್ಕ ಈ ಬತ್ತ್‌ದ್ ಆಲೆನ ಮಿತ್ತ್ ಕೈ ದೀವೊಡು,” ಅಂದ್‌ದ್ ನಟ್ಟೊಂಡೆ.</verse>
				<verse number="24">ಯೇಸು ಆಯ ಒಟ್ಟುಗು ಪೋಯೆ. ಬೊಕ್ಕ ಮಸ್ತ್ ಜನೊಕುಲು ಆಯನ್ ನೂಕೊಂದು ಆಯನ ಬೆರಿಯೆ ಪೋಯೆರ್.</verse>
				<verse number="25">ಐಡ್ದ್ ಬೊಕ್ಕ ಅಲ್ಪ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು ಬತ್ತಲ್.</verse>
				<verse number="26">ಆಲ್ ಮಸ್ತ್ ವೈದ್ಯೆರೆಡ್ದ್ ಮರ್ದ್ ಮಲ್ತ್‌ದ್ ಗುಣ ಆವಂದೆ ಬಾರಿ ಕಷ್ಟೊನು ಸಹಿಸೊಂದು ಕೈಟಿತ್ತಿ ಮಾತ ಕಾಸ್‌ನ್ ಕಳೆವೊಂಡಲ್. ಸೀಕ್ ಕಡಿಮೆ ಆವಂದೆ ಹೆಚ್ಚೊಂದೇ ಪೋಂಡು.</verse>
				<verse number="27">ಆ ಪೊಂಜೊವು ಯೇಸುನ ಸುದ್ಧಿನ್ ಕೇಂಡ್ದ್, “ಯಾನ್ ಆಯನ ಕುಂಟುನು ಮುಟ್ಟುಂಡ, ಎಂಕ್ ಗುಣ ಆವು,” ಎನ್ನ್‌ದ್, ಗುಂಪುದ ಪಿರವುಡು ಬತ್ತ್‌ದ್ ಆಯನ ಕುಂಟುನು ಮುಟ್ಟಿಯಲ್.</verse>
				<verse number="28"></verse>
				<verse number="29">ಮುಟ್ಟಿ ಕೂಡ್ಲೆ ಆಲೆನ ನೆತ್ತೆರ್ ಪೋಪಿನ ಉಂತುಂಡು. ಎಂಕ್ ಉಪದ್ರ ಮಲ್ತೊಂದಿತ್ತಿ ಸೀಕ್‌ಡ್ದ್ ಗುಣ ಆಂಡ್ ಅಂದ್‌ದ್ ಆಲ್ ಅಪಗನೇ ಶರೀರೊಡು ತೆರಿಯೊಂಡಲ್.</verse>
				<verse number="30">ಆ ಗಳಿಗೆಡೇ ಯೇಸು ತನಡ್ದ್ ಬಲ ಪಿದಾಡ್ದ್ ಪೋಂಡು ಅಂದ್‌ದ್ ಅಪಗನೆ ಪಿರ ತಿರ್ಗ್‌ದ್, “ಎನ ಕುಂಟುನು ಏರ್ ಮುಟ್ಟಿನಿ?” ಅಂದ್‌ದ್ ಕೇನ್ನಗ</verse>
				<verse number="31">ಆಯನ ಶಿಷ್ಯೆರ್ ಆಯಡ, “ಜನೊಕುಲು ನಿನನ್ ಒತ್ತುನೆನ್ ತೂಂಡಲಾ ಎನನ್ ಏರ್ ಮುಟ್ಟಿನಿ ಅಂದ್‌ದ್ ಪನ್ಪನಾ?” ಪಂಡೆರ್.</verse>
				<verse number="32">ಆಂಡ ಯೇಸು ಉಂದೆನ್ ತೆರಿಯೊನೊಡು ಪಂಡ್ದ್ ಸುತ್ತಲಾ ತೂವೊಂದುಪ್ಪುನಗ,</verse>
				<verse number="33">ಆ ಪೊಂಜೊವು, ತನ್ಕ್ ಆಯಿನೆನ್ ತೆರಿದ್ ಪೋಡಿದ್ ನಡುಗೊಂದು ಬತ್ತ್‌ದ್ ಆಯ ದುಂಬು ಅಡ್ಡಬೂರ್ದು, ಆಲೆಗ್ ನಡತಿ ನಿಜ ಸತ್ಯೊನು ಪಂಡಲ್.</verse>
				<verse number="34">ಆಯೆ ಆಲೆಗ್, “ಮಗಲೇ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್. ಸಮಾಧಾನೊಡು ಪೋಲ, ನನ ಮಿತ್ತ್ ಈ ಸೀಕ್ ನಿಕ್ಕ್ ತೊಂದರೆ ಕೊರಂದ್,” ಅಂದ್‌ದ್ ಪಂಡೆ.</verse>
				<verse number="35">ಆಯೆ ನನಲಾ ಪಾತೆರೊಂದುಪ್ಪುನಗ ಸಭಾಮಂದಿರದ ಅಧಿಕಾರಿನ ಇಲ್ಲದಾಕುಲು ಬತ್ತ್‌ದ್ ಅಧಿಕಾರಿಡ, “ನಿನ ಮಗಲ್ ಸೈತಲ್, ನನ ದಾಯೆಗ್ ಗುರುಕು ತೊಂದರೆ ಕೊರ್ಪ,” ಪಂಡೆರ್.</verse>
				<verse number="36">ಅಕುಲು ಪಂಡಿನ ಪಾತೆರೊನು ಯೇಸು ಲಕ್ಷ ಮಲ್ಪಂದೆ ಸಭಾಮಂದಿರದ ಅಧಿಕಾರಿಡ, “ಪೋಡ್ಯಡ, ನಂಬಿಕೆ ಮಾತ್ರ ಉಪ್ಪಡ್,” ಪಂಡೆ.</verse>
				<verse number="37">ಬೊಕ್ಕ ಆಯೆ ಪೇತ್ರೆ, ಯಾಕೋಬು, ಯಾಕೋಬುನ ಮೆಗ್ಯೆ ಆದುಪ್ಪು ಯೋಹಾನೆ ಮೊಕ್ಲೆನ್ ಅತ್ತಂದೆ ಬೇತೆ ಏರೆನ್ಲಾ ತನಡೊಪ್ಪ ಲೆತ್ತೊಂದು ಪೋಯೆರೆ ಒಪ್ಪಿಗೆ ಕೊರ್ಜೆ.</verse>
				<verse number="38">ಅಕುಲು ಆ ಸಭಾಮಂದಿರದ ಅಧಿಕಾರಿನ ಇಲ್ಲಗ್ ಬನ್ನಗ ಆಯೆ, ಜನೊಕುಲು ಗೌಜಿ ಮಲ್ಪುನೆನ್, ಬೊಕ್ಕ ಅರಬಾಯಿ ದೀಪಿನಾಕುಲೆನ್ಲಾ ಬುಲ್ಪುನಾಕಲೆನ್ಲಾ ತೂಯೆ.</verse>
				<verse number="39">ಆಯೆ ಉಲಯಿ ಪೋದು, “ನಿಕುಲು ದಾಯೆಗ್ ಈತ್ ಗೌಜಿ ಮಲ್ತೊಂದು ಬುಲ್ತೊಂದುಲ್ಲರ್? ಪೊಣ್ಣು ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್,” ಪನ್ನಗ</verse>
				<verse number="40">ಅಕುಲು ಆಯಗ್ ಗೇಲಿ ಮಲ್ತೆರ್. ಆಂಡ ಆಯೆ ಮಾತೆರೆನ್ಲಾ ಪಿದಯಿ ಕಡಪುಡ್ದು, ಆ ಪೊಣ್ಣನ ಅಪ್ಪೆನ್ಲಾ ಅಮ್ಮೆರೆನ್ಲಾ ತನಡೊಪ್ಪ ಇತ್ತಿನಾಕುಲೆನ್ಲಾ ಆ ಪೊಣ್ಣು ಜೆತ್ತ್‌ದಿನಡೆಗ್ ಲೆತ್ತೊಂದು ಪೋಯೆ.</verse>
				<verse number="41">ಆ ಪೊಣ್ಣನ ಕೈ ಪತ್ತ್‌ದ್ ಆಲೆಡ, “ತಲಿಥಾ ಕೂಮ್,” ಅಂದ್‌ದ್ ಪಂಡೆ. “ಎಲ್ಯ ಪೊಣ್ಣೇ, ಲಕ್ಕ್‌ಲ,” ಅಂದ್‌ದ್ ನಿಕ್ಕ್ ಪನ್ಪೆ ಇನ್ಪಿನವು ಈ ಪಾತೆರದ ಅರ್ಥ.</verse>
				<verse number="42">ಅಪಗನೇ, ಆ ಪೊಣ್ಣು ಲಕ್ಕ್‌ದ್ ನಡಪೆರೆ ಸುರು ಮಲ್ತಲ್. ಆಲ್ ಪದ್ರಾಡ್ ವರ್ಸ ಪ್ರಾಯದಾಲ್. ಉಂದೆನ್ ತೂದು ಮಾತೆರ್ಲಾ ಅಚ್ಚಿರ ಆಯೆರ್.</verse>
				<verse number="43">ಯೇಸು ಅಕ್ಲೆಡ ಈ ವಿಷಯ ಏರೆಗ್ಲಾ ತೆರಿಯೆರೆ ಬಲ್ಲಿ ಪಂಡ್ದ್ ಕಂಡಿತಾದ್ ಅಪ್ಪಣೆ ಕೊರ್ದು, “ಆ ಪೊಣ್ಣಗ್ ವಣಸ್ ಮಲ್ಪಾಲೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="6">
				<verse number="1">ಯೇಸು ಅಲ್ತ್‌ಡ್ದ್ ತನ ಊರುಗು ಪಿರ ಬತ್ತೆ. ಶಿಷ್ಯೆರ್ ಆಯನ ಬೆರಿಯೆ ಬತ್ತೆರ್.</verse>
				<verse number="2">ಸಬ್ಬತ್‌ದಿನೊಟು ಸಭಾಮಂದಿರೊಗು ಪೋದು ಬೋಧನೆ ಮಲ್ಪರೆ ಸುರು ಮಲ್ತೆ. ಅವುಲು ಮಸ್ತ್ ಜನೊಕುಲು ಆಯನ ಬೋಧನೆ ಕೇಂಡ್ದ್ ಅಚ್ಚಿರ ಆಯೆರ್. “ಉಂಬ್ಯಗ್ ಈ ಪಾತೆರೊಲು ಒಲ್ತುಡ್ದು ಬತ್ತ್ಂಡ್? ಇಂಬ್ಯಗ್ ಉಪ್ಪುನ ಗೇನೊಲು ಎಂಚಿನವು? ಉಂಬ್ಯನ ಕೈಡ್ದ್ ಇಂಚಿತ್ತಿ ಕಾರ್ನಿಕೊಲು ಆಪಿನಾಂಡಲಾ ಎಂಚ?</verse>
				<verse number="3">ಉಂಬೆ ಮರತ ಬೇಲೆದಾಯೆ ಅತ್ತಾ? ಉಂಬೆ ಮರಿಯನ ಮಗೆ ಅತ್ತಾ? ಯಾಕೋಬು, ಯೋಸೆ, ಯೂದೆ, ಸೀಮೋನೆ ಮಾತ ಆಯನ ಮೆಗ್ಯಾಡ್ಲು ಅತ್ತಾ? ಇಂಬೆನ ಮೆಗ್ದಿಯಾಡ್ಲುಲಾ ಮಾತ ನಮೊಟ್ಟುಗು ಉಲ್ಲೆರತ್ತಾ?” ಅಂದ್‌ದ್ ತಿರಸ್ಕಾರ ಮಲ್ತೆರ್.</verse>
				<verse number="4">ಯೇಸು ಅಕ್ಲೆಡ, “ಪ್ರವಾದಿಗ್ ಮಾತ ಕಡೆಟ್ಲಾ ಮರ್ಯಾದಿ ಉಂಡು; ಆಂಡ ಸ್ವಂತ ಊರುಡ್ಲಾ, ಸ್ವಂತ ಜನೊಕುಲೆಡ್ಲಾ ಸ್ವಂತ ಇಲ್ಲಡ್ಲಾ ಮರ್ಯಾದಿ ಇಜ್ಜಿ,” ಪಂಡೆ</verse>
				<verse number="5">ಆಯೆ ಅಲ್ಪ ಕೆಲವು ಸೀಕ್‌ದಾಕುಲೆನ ಮಿತ್ತ್ ಕೈ ದೀದ್ ಗುಣ ಮಲ್ತಿನೇ ಅತ್ತಂದೆ ಬೇತೆ ವಾ ಕಾರ್ನಿಕೊಲೆನ್ಲಾ ಮಲ್ಪೆರೆ ಆಯಿಜಿ.</verse>
				<verse number="6">ಅಕ್ಲೆನ ಅಪನಂಬಿಕೆನ್ ತೂದು ಆಯೆ ಅಚ್ಚಿರ ಆಯೆ.</verse>
				<verse number="7">ಬೊಕ್ಕ ಪದ್ರಾಡ್ ಶಿಷ್ಯೆರೆನ್ ಕೈತಲ್ ಲೆತ್ತ್‌ದ್ ಅಕ್ಲೆನ್ ಇರ್ವೆರ್ ಇರ್ವೆರಾದ್ ಕಡಪುಡಿಯೆ. ಕಡಪುಡುನಪಗ ಆಯೆ ಅಕ್ಲೆಗ್ ದೆವ್ವೊಲೆ ಮಿತ್ತ್ ಅಧಿಕಾರ ಕೊರಿಯೆ.</verse>
				<verse number="8">“ಕೋಲು ಅತ್ತಂದೆ ಸಾದಿಗ್ ದಾಲಾ ದೆತ್ತೊಂದು ಪೋವಡೆ. ಬುತ್ತಿ, ಜೋಳಿಗೆ, ಸೊಂಟ್ಟಪಟ್ಟಿಡ್ ಕಾಸ್ ದಾಲ ಬೊಡ್ಚಿ, ಕಾರ್‌ಗ್ ಜೋಡು ಪಾಡೊಲಿ ಆಂಡ ರಡ್ಡ್ ಅಂಗಿ ಬೊಡ್ಚಿ,” ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="9"></verse>
				<verse number="10">ಉಂದತ್ತಂದೆ ಆಯೆ ಅಕ್ಲೆಡ, “ನಿಕುಲು ಒಂಜಿ ಇಲ್ಲಗ್ ಪೋಂಡ, ಆ ಊರು ಬುಡ್ಪಿನೆಟ್ಟ, ಅವುಲೇ ಉಪ್ಪುಲೆ.</verse>
				<verse number="11">ಬೊಕ್ಕ ಒವ್ವಾಂಡಲಾ ಒಂಜಿ ಊರುದಾಕುಲು ನಿಕ್ಲೆನ್ ಸೇರಾವಂದೆ, ನಿಕುಲು ಪನ್ಪಿ ಪಾತೆರೊನು ಕೇನಿಜೆರ್ಡ ಆ ಇಲ್ಲಡ್ದಾವಡ್, ಊರುಡ್ದಾವಡ್ ಪಿದಾಡ್ದ್ ಪೋನಗ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ. ಅವು ಅಕ್ಲೆಗ್ ಸಾಕ್ಷಿಯಾದ್ ಉಪ್ಪಡ್,” ಅಂದ್‌ದ್ ಪಂಡೆ.</verse>
				<verse number="12">ಅಂಚೆನೇ ಅಕುಲು ಪಿದಾಡ್ದ್ ಪೋದು ಜನೊಕುಲೆಗ್, ನಿಕುಲು ಪಶ್ಚಾತಾಪ ಪಡೆಲೆ ಅಂದ್‌ದ್ ಸಾರಿಯೊಂದು,</verse>
				<verse number="13">ಮಸ್ತ್ ದೆವ್ವೊಲೆನ್ ಬುಡ್ಪಾದ್, ಕೆಲವು ಸೀಕ್‌ದಾಕುಲೆನ್ ಎಣ್ಣೆ ಪೂಜಿದ್ ಗುಣ ಮಲ್ತೆರ್.</verse>
				<verse number="14">ಬೊಕ್ಕ ಅರಸು ಆಯಿ ಹೆರೋದೆ, ಯೇಸುನ ಸುದ್ಧಿನ್ ಕೇಂಡೆ. ದಾಯೆ ಪಂಡ ಆಯನ ಪುದರ್ ಮಸ್ತ್ ಜಾಗ್‌ಡ್ ಪುದರ್ ಪೋದಿತ್ತ್‌ಂಡ್, ಬೊಕ್ಕ ಜನೊಕುಲು ಆಯನ ಸಂಗತಿಡ್, “ಸ್ನಾನಿಕೆ ಆಯಿ ಯೋಹಾನೆ ಸೈತಿನಾಕುಲೆಡ್ದ್ ಲಕ್ಕ್‌ದ್ ಬೈದೆ. ಐಡ್ದಾವರ ಕಾರ್ನಿಕೊಲೆನ್ ನಡಪಾವು ಶಕ್ತಿ ಆಯಡ ಉಂಡು,” ಅಂದ್‌ದ್ ಪನೊಂದಿತ್ತೆರ್.</verse>
				<verse number="15">ಕೆಲೆವೆರ್, “ಆಯೆ ಎಲೀಯೆ,” ಬೊಕ್ಕ ಕೆಲೆವೆರ್, “ಆಯೆ ಒರಿ ಪ್ರವಾದಿ ಇಜ್ಜಿಡ ಪಿರಕ್‌ದ ಪ್ರವಾದಿಲೆಡ್ ಒರಿ,” ಪಂಡೆರ್.</verse>
				<verse number="16">ಆಂಡ ಹೆರೋದೆ ಆಯನ ಸುದ್ಧಿನ್ ಕೇಂಡ್ದ್, “ತಾನ್ ತರೆ ಕಡ್ಪಾದಿನ ಯೋಹಾನೆನೇ ಕುಡ ಲಕ್ಕ್‌ದ್ ಬೈದೆ,” ಪಂಡೆ</verse>
				<verse number="17">ಹೆರೋದೆ ಹೆರೋದ್ಯೆಲೆಗಾದ್ ಯೋಹಾನನ್ ಪತ್ತ್‌ದ್ ಸೆರೆಮನೆಟ್ ಪಾಡ್ದಿತ್ತೆ. ಆ ಹೆರೋದ್ಯೆಲ್ ಹೆರೋದನ ಪಲಯೆ ಆಯಿ ಫಿಲಿಪ್ಪನ ಬೊಡೆದಿ.</verse>
				<verse number="18">ಯೋಹಾನೆ ಹೆರೋದಗ್, “ನಿನ ಪಲಯನ ಬೊಡೆದಿನ್ ದೀವೊಂದುಪ್ಪುನವು ನ್ಯಾಯ ಅತ್ತ್,” ಅಂದ್‌ದ್ ಪನೊಂದಿತ್ತೆ.</verse>
				<verse number="19">ನೆಕ್ಕ್ ಹೆರೋದ್ಯೆಲ್ ಯೋಹಾನನ ಮಿತ್ತ್ ಪಗೆ ದೀವೊಂದು ಆಯನ್ ಕೆರ್ಪಾವೊಡು ಅಂದ್‌ದ್ ಇತ್ತ್ಂಡಲಾ ಆಲೆಡ ಆವಂದೆ ಪೋಂಡು.</verse>
				<verse number="20">ದಾಯೆಗ್ ಪಂಡ, ಯೋಹಾನೆ ನೀತಿವಂತೆಲಾ ಪರಿಶುದ್ಧೆ ಆಯಿ ನರಮಾನಿ ಅಂದ್‌ದ್ ಹೆರೋದೆ ತೆರಿದ್ ಆಯಗ್ ಪೋಡಿದ್ ಆಯಗ್ ವಾ ಅಪಾಯಲಾ ಬರಂದಿಲೆಕ್ಕ ಜೋಕೆ ಮಲ್ತೊಂದಿತ್ತೆ. ಉಂದತ್ತಂದೆ ಯೋಹಾನೆ ಪಂಡಿನೆನ್ ಆಯೆ ಕೇಂಡಿನಪಗ ಉಡಲ್‌ಡ್ ಬಾರಿ ಗಲಿಬಿಲಿ ಪುಟ್ಟುಂಡಲಾ ಆಯನ ಪಾತೆರೊನು ಸಂತೋಷೊಡು ಕೇನೊಂದಿತ್ತೆ.</verse>
				<verse number="21">ಇಂಚ ಉಪ್ಪುನಗ ಹೆರೋದ್ಯೆಲೆಗ್ ಅನುಕೂಲವಾಯಿನ ದಿನ ಬತ್ತ್ಂಡ್. ಎಂಚಂದ್ಂಡ ಹೆರೋದನ ಪುಟ್ಟಿ ದಿನೊಟು ತನ ಸರಕಾರದ ಅಧಿಕಾರಿಲೆಗ್ಲಾ ಸೈನಿಕೆರೆ ಅಧಿಪತಿಲೆಗ್ಲಾ, ಗಲಿಲಾಯದ ಮುಖ್ಯಸ್ಥೆರೆಗ್ಲಾ ಲೇಸ್‌ಗ್ ಲೆಪ್ಪು ಕೊರ್ದುಪ್ಪುನಗ,</verse>
				<verse number="22">ಹೆರೋದ್ಯೆಲೆನ ಮಗಲ್ ಬತ್ತ್‌ದ್ ನಾಟ್ಯ ಮಲ್ತ್‌ದ್ ಹೆರೋದನ್ಲಾ ಆಯಡೊಪ್ಪ ಪಂತೆಡ್ ಕುಲ್ಲುದಿತ್ತಿನಾಕುಲೆನ್ಲಾ ಮೆಚ್ಚಾಯಲ್. ಅರಸುಗು ಆಲೆನ ನಾಟ್ಯೊನು ತೂದು ಆಲೆಡ, “ನಿಕ್ಕ್ ಬೋಡಿತ್ತಿನೆನ್ ಕೇನ್ಲ, ಯಾನ್ ನಿಕ್ಕ್ ಕೊರ್ಪೆ.</verse>
				<verse number="23">ಈ ಎಂಚಿನ ಕೇಂಡಲಾ ಯಾನ್ ಕೊರಿಯೆರೆ ತಯಾರ್ ಉಲ್ಲೆ. ಎನ ರಾಜ್ಯೊಡು ಅರ್ಧ ರಾಜ್ಯೊನು ಕೇಂಡಲಾ ನಿಕ್ಕ್ ಕೊರ್ಪೆ,” ಅಂದ್‌ದ್ ಆಜ ದೀದ್ ಪಂಡೆ.</verse>
				<verse number="24">ಅಪಗ ಆಲ್ ಪಿದಯಿ ಪೋದು, “ದಾದ ಕೇನೊಡು?” ಅಂದ್‌ದ್ ತನ ಅಪ್ಪೆಡ ಕೇನ್ನಗ ಆಲ್, “ಸ್ನಾನಿಕೆ ಆಯಿ ಯೋಹಾನನ ತರೆನ್ ಕೇನ್ಲ,” ಅಂದಲ್.</verse>
				<verse number="25">ಕೂಡ್ಲೆ ಆಲ್ ಅರಸುನ ಕೈತಲ್‌ ಅಮಸರೊಡು ಬತ್ತ್‌ದ್, “ಸ್ನಾನಿಕೆ ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಎಂಕ್ ಇತ್ತೆನೆ ತರ್ಪಾದ್ ಕೊರ್ಲ,” ಅಂದ್‌ದ್ ಪಂಡಲ್.</verse>
				<verse number="26">ಆ ಅರಸು ಮಸ್ತ್ ದುಃಖ ಮಲ್ತೆಡಲಾ ತಾನ್ ದೀವೊಂದಿನ ಆಜಡ್ದಾವರ ತನಡೊಪ್ಪ ಪಂತೆಡ್ ಕುಲ್ಲೊಂದಿತ್ತಿನಾಕುಲೆಗಾದ್‌ಲಾ ಆಲೆನ್ ತಿರಸ್ಕಾರ ಮಲ್ಪರೆ ಆಯಗ್ ಮನಸ್ ಇಜ್ಜಾಂಡ್.</verse>
				<verse number="27">ಅಪಗನೆ ಅರಸು ತನ ಸಿಪಾಯಿಲೆಡ್ ಒರಿಯಗ್, ಈ ಪೋದು ಯೋಹಾನನ ತರೆನ್ ಕನತ್ ಕೊರು ಅಂದ್‌ದ್ ಅಪ್ಪಣೆ ಕೊರ್ದು ಕಡಪುಡಿಯೆ. ಆ ಸಿಪಾಯಿ ಸೆರೆಮನೆಕ್ಕ್‌ ಪೋದು, ಯೋಹಾನನ ತರೆನ್ ಕಡ್ತ್‌ದ್ ಹರಿವಾಣೊಡು ಕನತ್‌ದ್ ಆ ಪೊಣ್ಣಗ್ ಕೊರಿಯೆ; ಆ ಪೊಣ್ಣು ಅವೆನ್ ತನ ಅಪ್ಪೆಗ್ ಕೊರಿಯಲ್.</verse>
				<verse number="28"></verse>
				<verse number="29">ಯೋಹಾನನ ಶಿಷ್ಯೆರ್ ಈ ಸಂಗತಿನ್ ತೆರಿ ಕೂಡ್ಲೆ ಬತ್ತ್‌ದ್ ಆಯನ ಪುಣೊನು ಕೊನೊದು ಸಮಾಧಿಡ್ ದೀಯೆರ್.</verse>
				<verse number="30">ಅಪೊಸ್ತಲೆರ್ ಪಿರ ಯೇಸು ಕೈತಲ್‌ ಕೂಡ್ದು ಬತ್ತೆರ್. ಅಕುಲು ಮಲ್ತಿನ ಮಾತ ಬೋಧನೆನ್ ಬೊಕ್ಕ ಕಾರ್ಯೊನು ಆಯಗ್ ತೆರಿಪಾಯೆರ್.</verse>
				<verse number="31">ಯೇಸು ಅಕ್ಲೆಡ, “ನಿಕುಲು ಪ್ರತ್ಯೇಕಾದ್ ಕಾಡ್‌ಗ್ ಬತ್ತ್‌ದ್, ಒಂತೆ ಆಯಸ ದೆಪ್ಪುಲೆ,” ಅಂದ್‌ದ್ ಪಂಡೆ. ದಾಯೆಗಂದ್ಂಡ ಮಸ್ತ್ ಜನೊಕುಲು ಬರೊಂದು ಪೋವೊಂದು ಇತ್ತಿನೆಡ್ದ್ ಯೇಸುಗ್ಲಾ ಆಯನ ಶಿಷ್ಯೆರೆಗ್ಲಾ ವಣಸ್ ಮಲ್ಪೆರೆಗ್ ಪುರ್ಸೊತ್ತು ತಿಕ್ಕ್‌ಜಿ.</verse>
				<verse number="32">ಅಪಗ ಅಕುಲು ಓಡೊಡು ಪಿದಾಡ್ದ್ ಪ್ರತ್ಯೇಕಾದ್ ಕಾಡ್ ಜಾಗ್‌ಗ್ ಪೋಯೆರ್.</verse>
				<verse number="33">ಆಂಡ ಅಕುಲು ಪೋಪಿನೆನ್ ಮಸ್ತ್ ಜನೊಕುಲು ತೂದು ಅಕ್ಲೆನ ಗುರ್ತೊನು ಪತ್ತ್‌ದ್ ಮಾತ ಊರುಲೆಡ್ದ್ ನಡತೊಂದು ಪಾರೊಂದು ಪೋದು ಅಕ್ಲೆಡ್ದ್ ದುಂಬು ಅಡೆಗ್ ಸೇರಿಯೆರ್.</verse>
				<verse number="34">ಯೇಸು ಓಡೊಡ್ದು ಜಪ್ಪುನಗ ಮಸ್ತ್ ಜನೊಕುಲೆ ಗುಂಪುನು ತೂದು ಮೊಕುಲು ಕುರುಬೆದಾಂತಿ ಕುರಿಕುಲೆ ಲೆಕ್ಕ ಉಲ್ಲೆರತ್ತಾ ಪಂಡ್ದ್, ಕನಿಕರ ಪಡೆದ್ ಅಕ್ಲೆಗ್ ಬೋಧನೆ ಕೊರಿಯೆರೆ ತೊಡಗಿಯೆ.</verse>
				<verse number="35">ಆತ್‌ನೆಟ್ಟ ಪೊರ್ತು ಕಂತಿನೆಡ್ದಾವರ ಆಯನ ಶಿಷ್ಯೆರ್ ಕೈತಲ್‌ ಬತ್ತ್‌ದ್, “ಉಂದು ಕಾಡ್, ಪೊರ್ತು ಮಸ್ತ್ ಆತ್ಂಡ್.</verse>
				<verse number="36">ಈ ಜನೊಕುಲೆಗ್ ಅಪ್ಪಣೆ ಕೊರ್ಲ, ಮೊಕುಲು ಕೈತಲುಪ್ಪು ಊರುಲೆಗ್ ಬೊಕ್ಕ ಹಳ್ಳಿಲೆಗ್ ಪೋದು ತನ್ಕುಲೆ ವಣಸ್‌ಗಾದ್ ದಾಲಾಂಡಲಾ ದೆತ್ತೊನೆರೆ ಕಡಪುಡುಲ,” ಪಂಡಿನೆಕ್ಕ್‌</verse>
				<verse number="37">ಅಪಗ ಯೇಸು, “ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ,” ಅಂದ್‌ದ್ ಉತ್ತರ ಕೊರಿಯೆ. ಐಕ್‌ ಅಕುಲು, “ಎಂಕುಲು ಪೋದು ಇರ್ನೂದು ಬೊಳ್ಳಿದ ಕಾಸ್‌ಗ್ ರೊಟ್ಟಿನ್ ದೆತ್ತೊಂದು ಅಕ್ಲೆಗ್ ವಣಸ್ ಕೊರೊಡಾ?” ಕೇಂಡಿನೆಕ್ಕ್</verse>
				<verse number="38">ಯೇಸು, “ನಿಕ್ಲೆಡ ಏತ್ ರೊಟ್ಟಿಲು ಉಂಡು? ಪೋದು ತೂಲೆ,” ಪಂಡೆ, ಅಕುಲು ತೆರಿಯೊಂದು ಬತ್ತ್‌ದ್, “ಎಂಕ್ಲೆಡ ಐನ್ ರೊಟ್ಟಿ ರಡ್ಡ್ ಮೀನ್ ಉಂಡು,” ಪಂಡೆರ್.</verse>
				<verse number="39">ಅಪಗ ಯೇಸು ಅಕ್ಲೆಗ್ ಮಾತೆರೆಗ್ಲಾ ಪಜಿರ್‌ದ ಮಿತ್ತ್ ಪಂತೆ ಪಂತೆ ಆದ್ ಕುಲ್ಲಿಯೆರೆ ಅಪ್ಪಣೆ ಕೊರಿಯೆ.</verse>
				<verse number="40">ಜನೊಕುಲು ನೂದೆತ್ತ ಪಂತೆ, ಐವದ ಪಂತೆದ ಲೆಕ್ಕ ಸಾಲಾದ್ ಕುಲ್ಲೊಂಡೆರ್.</verse>
				<verse number="41">ಐಡ್ದ್ ಬೊಕ್ಕ ಯೇಸು ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ರೊಟ್ಟಿನ್ ಪೊಲ್ತುದು, ನಿಕುಲು ಜನೊಕುಲೆಗ್ ಪಟ್ಟ್‌ಲೆ ಅಂದ್‌ದ್ ಶಿಷ್ಯೆರೆ ಕೈಕ್ ಕೊರ್ದು; ಆ ರಡ್ಡ್ ಮೀನ್‌ನ್ಲಾ ಮಾತೆರೆಗ್ ಪಟ್ಟಾಯೆ.</verse>
				<verse number="42">ಅಕುಲು ಮಾತೆರ್ಲಾ ಬೋಡಿತ್ತಿನಾತ್ ತಿಂದೆರ್.</verse>
				<verse number="43">ಒರಿದಿನ ರೊಟ್ಟಿ ಬೊಕ್ಕ ಮೀನ್‌ದ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.</verse>
				<verse number="44">ಅಂಜೊವುಲೆ ಹೆಚ್ಚಿಕಡಿಮೆ ಐನ್ ಸಾರ ವಣಸ್ ಮಲ್ತಿನಾಕುಲು ಇತ್ತೆರ್.</verse>
				<verse number="45">ಉಂದು ಆಯಿ ಕೂಡ್ಲೆ ಯೇಸು ತನ ಶಿಷ್ಯೆರೆಗ್, “ಯಾನ್ ಈ ಜನೊಕುಲೆ ಗುಂಪುಲೆನ್ ಕಡಪುಡ್ದು ಕೊರ್ಪಿನೆಟ್ಟ ನಿಕುಲು ಓಡ ಮಿತ್ತಾರ್ದ್ ಎನಡ್ದ್ ದುಂಬು ಆಯೆರೆಗ್ ಬೆತ್ಸಾಯಿದಗ್ ಪೋಲೆ,” ಅಂದ್‌ದ್ ಒತ್ತಾಯ ಮಲ್ತೆ.</verse>
				<verse number="46">ಆಯೆ ಜನೊಕುಲೆ ಗುಂಪುನು ಕಡಪುಡಿ ಬೊಕ್ಕ ಪ್ರಾರ್ಥನೆ ಮಲ್ಪೆರೆಗಾದ್ ಗುಡ್ಡೆಗ್ ಪೋಯೆ.</verse>
				<verse number="47">ಪೊರ್ತು ಕಂತಿ ಬೊಕ್ಕ ಓಡ ಕಡಲ್ದ ನಡುಟು ಇತ್ತ್ಂಡ್. ಅಪಗ ಯೇಸು ಒರಿಯೇ ಕಡಲ್ದ ಕರೆಟ್ ಇತ್ತೆ.</verse>
				<verse number="48">ಗಾಳಿ ಎದುರುಡು ಬೀಜೊಂದಿತ್ತಿನೆಡ್ದ್ ಶಿಷ್ಯೆರ್‌ಲು ಓಡ ಒಚ್ಚು ಒಚ್ಚುದು ಒದ್ದಾಡುನೆನ್ ಯೇಸು ತೂಯೆ. ಅಪಗ ಹೆಚ್ಚಿಕಡಿಮೆ ನಾಲನೆ ಜಾಮೊಡು ಕಡಲ್ದ ಮಿತ್ತ್ ನಡತ್‌ದ್ ಅಕ್ಲೆನ್ ದಾಂಟ್‌ದ್ ದುಂಬು ಪೋವೊಂದಿತ್ತೆ.</verse>
				<verse number="49">ಆಂಡ ಅಕುಲು ಕಡಲ್ದ ಮೇಲ್‌ಡ್ ಆಯೆ ನಡಪುನೆನ್ ತೂದು, “ಅವು ಭೂತ” ಅಂದ್‌ದ್ ಎನ್ನ್‌ದ್ ಜೋರುಡು ಕಲ್ಕಿಯೆರ್.</verse>
				<verse number="50">ದಾಯೆಗ್ ಪಂಡ ಅಕುಲು ಮಾತೆರ್ಲಾ ಆಯನ್ ತೂದು ತಳಮಳ ಆಯೆರ್. ಯೇಸು ಅಪಗನೆ ಅಕ್ಲೆಡ ಪಾತೆರ್‌ದ್ ಅಕ್ಲೆಗ್, “ಧೈರ್ಯ ಮಲ್ಪುಲೆ, ಯಾನೇ, ಪೋಡ್ಯಡೆ,” ಅಂದ್‌ದ್ ಪಂಡೆ.</verse>
				<verse number="51">ಆಯೆ ಓಡೊನು ಮಿತ್ತಾರ್ದ್ ಅಕ್ಲೆನ ಕೈತಲ್‌ ಬತ್ತಿ ಬೊಕ್ಕ ಬಿರುಗಾಳಿ ಉಂತುದು ಪೋಂಡು. ಅಪಗ ಶಿಷ್ಯೆರ್ ಮಸ್ತ್ ಅಚ್ಚಿರ ಆಯೆರ್.</verse>
				<verse number="52">ದಾಯೆಗಂದ್ಂಡ, ಅಕುಲು ರೊಟ್ಟಿದ ಕಾರ್ನಿಕೊಲೆನ್ ತೂದುಲಾ ಅರ್ಥ ಮಲ್ತೊಂದಿಜೆರ್, ಅಕ್ಲೆನ ಉಡಲ್ ಕಲ್ಲಾದಿತ್ತ್‌ಂಡ್.</verse>
				<verse number="53">ಅಕುಲು ಕಡಲ್‌ನ್ ದಾಂಟ್‌ದ್ ಗೆನೇಜರೇತುದ ಕರೆಕ್ ಮುಟ್ಟುದು ಓಡೊನು ಕಡಲ್ದ ಕರೆಟ್ ಕಟ್ಟಿಯೆರ್.</verse>
				<verse number="54">ಅಕುಲು ಓಡೊಡ್ದು ಜತ್ತಿ ಕೂಡ್ಲೆ ಅಲ್ಪದ ಜನೊಕುಲು ಯೇಸುನ ಗುರ್ತ ಪತ್ತ್‌ದ್,</verse>
				<verse number="55">ಊರೀಡಿ ತಿರ್ಗ್‌ದ್ ಸೀಕ್ ಸಂಕಟದಾಕುಲೆನ್ ಪಜೆಟ್ ತುಂಬೊಂದು ಯೇಸು ಓಲುಲ್ಲೆ ಅಂದ್‌ದ್ ಕೇಂಡೆರಾ, ಅಡೆಗಡೆಗ್ ಲೆತ್ತೊಂದು ಪೋಯೆರ್.</verse>
				<verse number="56">ಆಯೆ ವಾ ಹಳ್ಳಿ, ವಾ ಊರು, ವಾ ಪೇಂಟೆಲೆಗ್ ಪೋಯೆನಾ ಅಲ್ಪದಾಕುಲು ಸೀಕ್‌ದಾಕುಲೆನ್ ಕನತ್‌ದ್ ಸಾದಿಲೆಡ್ ದೀದ್ ನಿನ ಕುಂಟುದ ಗೊಂಡೆನಾಂಡಲಾ ಮುಟ್ಟಿಯೆರೆ ಬುಡೊಡು ಅಂದ್‌ದ್ ಯೇಸುಡ ನಟ್ಟೊಂಡೆರ್. ಆಯನ್ ಮುಟ್ಟಿನಾಕುಲು ಮಾತ ಗುಣ ಆಯೆರ್.</verse>
			</chapter>
			<chapter number="7">
				<verse number="1">ಕೆಲವು ಪರಿಸಾಯೆರ್‌ಲಾ ಶಾಸ್ತ್ರಿಲುಲಾ ಯೆರೂಸಲೇಮುಡ್ದು ಬತ್ತ್‌ದ್ ಯೇಸುನ ಕೈತಲ್‌ ಬತ್ತೆರ್.</verse>
				<verse number="2">ಯೇಸುನ ಶಿಷ್ಯೆರೆಡ್ ಕೆಲೆವೆರ್ ಕೈ ದೆಕ್ಕಂದೆ ವಣಸ್ ಮಲ್ಪುನೆನ್ ಅಕುಲು ತೂಯೆರ್.</verse>
				<verse number="3">ಅಪಗ ಪರಿಸಾಯೆರ್‌ಲಾ ಯೆಹೂದ್ಯೆರ್ ಮಾತೆರ್ಲಾ ಹಿರಿಯೆರೆಡ್ದ್ ಬೈದಿನ ಸಂಪ್ರದಾಯೊನು ಪತ್ತೊಂದು ತನ್ಕುಲೆ ಕೈಕ್ಲೆನ್ ಪೊರ್ಲುಡು ದೆಕ್ಕೊನಂದೆ ವಣಸ್ ದೆತ್ತೊನುಜೆರ್.</verse>
				<verse number="4">ಬೊಕ್ಕ ಪೇಂಟೆಗ್ ಪೋದು ಬತ್ತ್ಂಡ ನೀರ್‌ನ್ ತಲ್ತೊನಂದೆ ವಣಸ್ ಮಲ್ಪುಜೆರ್. ಉಂದತ್ತಂದೆ ಚೊಂಬು, ಬಟ್ಟಲ್, ತಪಲೆನ್ ಮಂಚವುಲೆನ್ ದೆಕ್ಕುನವು, ಇಂಚಿತ್ತಿ ಮಸ್ತ್ ಸಂಪ್ರದಾಯ ಮಲ್ಪುನ ಕ್ರಮ ಇತ್ತ್ಂಡ್.</verse>
				<verse number="5">ಅಪಗ ಪರಿಸಾಯೆರ್ ಬೊಕ್ಕ ಶಾಸ್ತ್ರಿಲು ಯೇಸುಡ ಕೇಂಡೆರ್, “ನಿನ ಶಿಷ್ಯೆರ್ ಹಿರಿಯೆರೆಡ್ದ್ ಬೈದಿನ ಸಂಪ್ರದಾಯದ ಲೆಕ್ಕ ದಾಯೆಗ್ ನಡಪುಜೆರ್? ಅಕುಲು ಮೈಲೆ ಕೈ ದೆಕ್ಕಂದೆ ವಣಸ್ ದಾಯೆಗ್ ಮಲ್ಪುವೆರ್?”</verse>
				<verse number="6">ಐಕ್ ಯೇಸು, “ಕಪಟಿಲೇ, ನಿಕ್ಲೆ ಸಂಗತಿಡ್ ಯೆಶಾಯೆ ಸರಿಯಾದೇ ಪ್ರವಾದನೆ ಮಲ್ತ್‌ದೆ. ಆಯೆ ಬರೆತಿನಿ ದಾನೆಂದ್ಂಡ, ‘ಈ ಜನೊಕುಲು ಪಾತೆರೊಡು ಎನನ್ ಸನ್ಮಾನ ಮಲ್ಪುವೆರ್, ಆಂಡ ಅಕ್ಲೆನ ಮನಸ್ ಎನಡ್ದ್ ದೂರ ಆದುಂಡು.</verse>
				<verse number="7">ಅಕುಲು ನರಮಾನಿಲು ಮಲ್ತಿ ಸಂಪ್ರದಾಯೊನು ದೇವೆರೆನ ಅಪ್ಪಣೆ ಅಂದ್‌ದ್ ಕಲ್ಪಾವುನೆಡ್ದ್, ಎಂಕ್ ಭಕ್ತಿ ತೋಜಾವುನವು ಪೊಕ್ಕಡೆ.’</verse>
				<verse number="8">“ನಿಕುಲು ದೇವೆರೆ ಅಪ್ಪಣೆಲೆನ್ ಬುಡ್ದು ನರಮಾನಿಲು ಕಲ್ಪಾಯಿನ ಸಂಪ್ರದಾಯೊಲೆನ್ ಪತ್ತೊಂದರ್,” ಅಂದ್‌ದ್ ಪಂಡೆ.</verse>
				<verse number="9">ಯೇಸು ಬೊಕ್ಕಲಾ ಅಕ್ಲೆಗ್, “ನಿಕುಲು ನಿಕ್ಲೆನ ಸಂಪ್ರದಾಯೊನೆ ಪತ್ತೊಂದು ನಡಪೆರೆಗಾದ್ ದೇವೆರೆನ ಅಪ್ಪಣೆನ್ ದೆತ್ತ್‌ದ್ ಪಾಡುವರ್‌</verse>
				<verse number="10">‘ಅಪ್ಪೆನ್ಲಾ ಅಮ್ಮೆರೆನ್ಲಾ ಸನ್ಮಾನ ಮಲ್ಪುಲೆ, ಅಮ್ಮೆರೆನಾವಡ್ ಅಪ್ಪೆನಾವಡ್ ದೂಷಿಯುನಾಯಗ್ ಮರಣ ದಂಡನೆ ಆವೊಡು,’ ಪಂಡ್ದ್ ಮೋಶೆ ಪನ್ತೆ.</verse>
				<verse number="11">ನಿಕುಲಾಂಡಲಾ ಒರಿ ತನ ಅಮ್ಮೆರೆನಾವಡ್ ಅಪ್ಪೆನಾವಡ್ ತೂದು, ಯಾನ್ ನಿಕ್ಲೆಗ್ ಸಂದಾವೊಡಾಯಿನೆನ್ ಕೊರ್ಬಾನ್ ಅಂದ್ಂಡ ದೇವೆರೆಗ್ ದೆತ್ತ್‌ದ್ ದೀತೆ. ಅಂದ್‌ದ್ ಪಂಡ್ಂಡ ಯಾವು.</verse>
				<verse number="12">ದುಂಬಗ್ ಆಯಗ್ ತನ ಅಪ್ಪೆಗ್ಲಾ ಅಮ್ಮೆರೆಗ್ಲಾ ವಾ ಸಹಾಯೊನ್ಲಾ ಮಲ್ಪೆರೆ ನಿಕುಲು ಬುಡ್ಪುಜರ್.</verse>
				<verse number="13">ಅಂಚಾಯಿನೆಡ್ದ್ ನಿಕುಲು ಕಲ್ಪಾವೊಂದು ಬತ್ತಿನ ಸಂಪ್ರದಾಯೊಡ್ದು ದೇವೆರೆ ಪಾತೆರೊನು ಅರ್ಥದಾಂತಿಲೆಕ್ಕ ಮಲ್ತ್‌ದರ್. ಅಂಚೆನೇ ನಿಕುಲು ಇಂಚಿತ್ತಿ ಏತೋ ಕಾರ್ಯೊಲೆನ್ ಮಲ್ತೊಂದೆ ಉಲ್ಲರ್,” ಅಂದ್‌ದ್ ಪಂಡೆ.</verse>
				<verse number="14">ಐಡ್ದ್ ಬೊಕ್ಕ ಯೇಸು ಜನೊಕುಲೆ ಗುಂಪುನು ಕುಡ ಕೈತಲ್‌ ಲೆತ್ತ್‌ದ್ ಅಕ್ಲೆಗ್, “ಮಾತೆರ್ಲಾ ಕೆಬಿ ಕೊರ್ದು ಎನ ಪಾತೆರೊನು ಕೇನ್ಲೆ ಅರ್ಥ ಮಲ್ತೊನ್ಲೆ.</verse>
				<verse number="15">ಪಿದಯಿಡ್ದ್ ನರಮಾನಿಲೆ ಉಲಯಿ ಪೋಪಿನ ಒವುಲಾ ನರಮಾನಿನ್ ಅಶುದ್ಧ ಮಲ್ಪುಜಿ, ಆಂಡ ನರಮಾನಿನ ಉಲಯಿಡ್ದ್ ಪಿದಯಿ ಬರ್ಪಿನವೇ ನರಮಾನಿನ್ ಅಶುದ್ಧ ಮಲ್ಪುಂಡು.</verse>
				<verse number="16">ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ.</verse>
				<verse number="17">ಬೊಕ್ಕ ಯೇಸು ಆ ಗುಂಪುನು ಬುಡ್ದು ಇಲ್ಲದುಲಯಿ ಪೋನಗ, ಆಯನ ಶಿಷ್ಯೆರ್ ಆ ಉಪಕತೆತ್ತ ಅರ್ಥ ಎಂಚಿನ ಅಂದ್‌ದ್ ಕೇಂಡೆರ್.</verse>
				<verse number="18">ಯೇಸು ಅಕ್ಲೆಗ್, “ನಿಕ್ಲೆಗ್ ಆತ್ ಬುದ್ಧಿ ಇಜ್ಜಾ? ಪಿದಯಿಡ್ದ್ ನರಮಾನಿನ ಉಲಯಿ ಪೋಯಿನವು ಅವು ಆಯನ್ ಅಶುದ್ಧ ಮಲ್ಪುಜಿ, ಅವು ಉಡಲ್‌ದುಲಯಿ ಸೇರಂದೆ ಬಂಜಿದ ಉಲಯಿ ಸೇರ್ದ್ ಶರೀರೊಡ್ದು ಪಿದಯಿ ಪೋಪುಂಡು. ಅವು ನರಮಾನಿನ್ ಶುದ್ಧ ಮಲ್ಪುಂಡು, ಅಂದ್‌ದ್ ನಿಕ್ಲೆಗ್ ಅರ್ಥ ಆಪುಜ?” ಅಂದ್‌ದ್ ಪಂಡೆ. ಇಂಚ ಪಂಡಿನೆಡ್ದ್ ತಿನ್ಪಿನ ಮಾತ ವಸ್ತುಲಾ ಶುದ್ಧದವು ಅಂದ್‌ದ್ ತೆರಿಪಾಯೆ.</verse>
				<verse number="19"></verse>
				<verse number="20">ಆಯೆ ಕುಡ ಪಂಡಿನಿ ದಾನೆಂದ್ಂಡ, “ನರಮಾನಿನ ಉಡಲ್‌ಡ್ದ್ ಪಿದಾಡುನವೇ ನರಮಾನಿನ್ ಅಶುದ್ಧ ಮಲ್ಪುಂಡು.</verse>
				<verse number="21">ನರಮಾನಿನ ಉಡಲ್‌ದ ಉಲಯಿಡ್ದ್ ಸೂಳೆಗಾರಿಕೆ, ಕಂಡೊನುನವು, ಮಾನ ಕೆರ್ಪಿನವು,</verse>
				<verse number="22">ವ್ಯಭಿಚಾರ, ಕಾಸ್‌ದ ಆಸೆ, ಕೇಡ್, ಮೋಸ, ಬಂಡ್‌ತನ, ಕಿಚ್ಚಿ, ನೆರಡೆ, ಸೊರ್ಕು, ಮೂರ್ಖತನ</verse>
				<verse number="23">ಈ ಹಾಳ್ ವಿಚಾರೊಲು ಉಲಯಿಡ್ದ್ ಬರ್ಪಿನೆಡ್ದಾವರ ನರಮಾನಿನ್ ಅಶುದ್ಧ ಮಲ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="24">ಯೇಸು ಅಲ್ತ್‌ಡ್ದ್ ಪಿದಾಡ್ದ್ ತೂರ್ ಪಟ್ಟಣದ ಪ್ರಾಂತೊಲೆಗ್ ಪೋಯೆ. ಏರೆಗ್ಲಾ ಗೊತ್ತಾವರೆ ಬಲ್ಲಿ ಅಂದ್‌ದ್ ಆಯೆ ಒಂಜಿ ಇಲ್ಲದ ಉಲಯಿ ಪೋಯೆ. ಆಂಡ ದೆಂಗ್‌ದ್ ಉಪ್ಪೆರೆ ಆಯಿಜಿ,</verse>
				<verse number="25">ಅಪಗ ಒಂಜಿ ಪೊಂಜೊವು ಆಯನ ಸುದ್ಧಿನ್ ಕೇಂಡ್ದ್ ಬತ್ತ್‌ದ್ ಆಯನ ಕಾರ್‌ಗ್ ಅಡ್ಡಬೂರ್ಯಲ್, ದಾಯೆಗ್ ಪಂಡ ಆಲೆನ ಎಲ್ಯ ಮಗಲೆಗ್ ದೆವ್ವ ಪತ್ತ್‌ದಿತ್ತ್‌ಂಡ್.</verse>
				<verse number="26">ಆಲ್ ಗ್ರೀಕ್‌ದ ಸುರೋಪೊಯಿನಿಕ್ಯದಾಲ್ ಆದಿತ್ತಲ್. ಆಲ್ ತನ ಮಗಲೆಗ್ ಪತ್ತ್‌ದಿ ದೆವ್ವೊನು ಬುಡ್ಪಾವೊಡು ಅಂದ್‌ದ್ ಆಯಡ ನಟ್ಟೊಂಡಲ್.</verse>
				<verse number="27">ಐಕ್ ಯೇಸು ಆಲೆಗ್, “ಸುರು ಜೋಕುಲು ತಿಂದ್‌ದ್ ಬಂಜಾರ ಆವಡ್. ಜೋಕುಲು ತಿನ್ಪಿನ ರೊಟ್ಟಿನ್ ದೆತ್ತೊಂದು ನಾಯಿಲೆಗ್ ಪಾಡುನವು ಸರಿ ಅತ್ತ್,” ಅಂದ್‌ದ್ ಪಂಡೆ.</verse>
				<verse number="28">ಐಕ್ ಆಲ್, “ಅಂದ್ ಕರ್ತವಾ, ಈ ಪಾತೆರ ನಿಜನೆ; ಮೇಜಿದ ತಿರ್ತ್ ಇತ್ತಿನ ನಾಯಿಲುಲಾ ಜೋಕುಲೆ ಕೈಡ್ದ್ ತಿರ್ತ್ ಬೂರ್ದಿನ ರೊಟ್ಟಿದ ತುಂಡುಲೆನ್ ತಿನ್ಪುಂಡತ್ತಾ?” ಅಂದ್‌ದ್ ಉತ್ತರ ಕೊರಿಯಲ್.</verse>
				<verse number="29">ಯೇಸು ಆಲೆಡ, “ಇಂಚಿನ ಉತ್ತರ ಕೊರ್ನೆಡ್ದಾವರ, ನಿನ ಮಗಲೆನ ದೆವ್ವ ಬುಡ್ದು ಪೋಂಡು, ಈ ನಿನ ಇಲ್ಲಗ್ ಪೋ.” ಅಂದ್‌ದ್ ಪಂಡೆ.</verse>
				<verse number="30">ಆಲ್ ತನ ಇಲ್ಲಗ್ ಬತ್ತ್‌ದ್ ತೂನಗ ಮಗಲ್ ಮಂಚವುದ ಮಿತ್ತ್ ಜೆತ್ತ್‌ದಿತ್ತಲ್, ದೆವ್ವ ಆಲೆನ್ ಬುಡ್ದು ಪೋದಿತ್ತ್‌ಂಡ್.</verse>
				<verse number="31">ಐಡ್ದ್ ಬೊಕ್ಕ ಆಯೆ ತೂರ್ ಪಟ್ಟಣದ ಕೈತಲಿತ್ತಿ ಪ್ರಾಂತೊನು ಬುಡ್ದು ಸೀದೋನ್ ಪಟ್ಟಣದ ಮಾರ್ಗ ಆದ್ ದೆಕಪೊಲಿ ದಾಂಟ್‌ದ್ ಗಲಿಲಾಯ ಕಡಲ್‌ಗ್ ಬತ್ತೆ.</verse>
				<verse number="32">ಆಯೆ ಅವುಲು ಉಪ್ಪುನಗ ಕೆಲೆವೆರ್ ಆಯನ ಕೈತಲ್‌ ಗೊದ್ದೆ ಪಾತೆರುನ ಒರಿ ಕೆಪ್ಪನ್ ಲೆತ್ತೊಂದು ಬತ್ತ್‌ದ್, ಉಂಬ್ಯನ ಮಿತ್ತ್ ನಿನ ಕೈನ್ ದೀವೊಡು ಅಂದ್‌ದ್ ಆಯಡ ನಟ್ಟೊಂಡೆರ್.</verse>
				<verse number="33">ಆಯೆ ಆಯನ್, ಆ ಜನೊಕುಲೆ ಗುಂಪುಡ್ದು ಬರಿಕ್ಕ್ ಲೆತ್ತೊಂದು ಪೋದು, ತನ ಬಿರೆಲ್‌ಲೆನ್ ಆಯನ ಕೆಬಿತ ಮಿತ್ತ್ ದೀದ್, ಉಬ್ಬಿದ್ ಆಯನ ನಾಲಯಿನ್ ಮುಟ್ಟುದು,</verse>
				<verse number="34">ಪರಲೋಕದ ಕಡೆಕ್ಕ್ ತೂದು, ಮಲ್ಲ ಶ್ವಾಸ ದೀದ್ ಆಯಗ್, “ಎಫಥಾ,” ಅಂದ್‌ದ್ ಪಂಡೆ. ಆ ಶಬ್ಧೊಗು “ಜಪ್ಪಡ್,” ಅಂದ್‌ದ್ ಅರ್ಥ.</verse>
				<verse number="35">ಅಪಗನೆ ಆಯಗ್ ಸರಿ ಕೇನಿಯೆರೆ ಆಂಡ್, ಆಯನ ನಾಲಯಿ ಸಡಿಲಾಂಡ್. ಬೊಕ್ಕ ಆಯೆ ಸರಿ ಪಾತೆರಿಯೆ.</verse>
				<verse number="36">ಅಪಗ ಯೇಸು ಏರೆಗ್ಲಾ ತೆರಿಪಾಯೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರಿಯೆ. ಆಂಡ ಆಯೆ ಏತ್ ಒತ್ತುದು ಪಂಡ್‌ಂಡಲಾ ಅಕುಲು ಬೊಕ್ಕಲಾ ಹೆಚ್ಚಾದ್ ಅವೆನ್ ಸಾರಿಯೆರ್.</verse>
				<verse number="37">ಅಕುಲು ಏತೋ ಅಚ್ಚಿರ ಆದ್, “ಯೇಸು ಮಾತ ಎಡ್ಡೆ ಮಲ್ತ್‌ದೆ. ಕೆಪ್ಪೆರೆಗ್ ಕೇನುಲೆಕ್ಕಲಾ ಮೂಕೆರ್ ಪಾತೆರುಲೆಕ್ಕಲಾ ಮಲ್ಪುವೆ,” ಅಂದ್‌ದ್ ಪಂಡೊಂಡೆರ್.</verse>
			</chapter>
			<chapter number="8">
				<verse number="1">ಆ ದಿನೊಕುಲೆಡ್ ಜನೊಕುಲು ಕುಡ ಗುಂಪು ಕಟ್ಟೊಂದು ಬತ್ತೆರ್. ಅಪಗ ಅಕ್ಲೆಡ ತಿನಿಯೆರೆ ದಾಲಾ ಇಜ್ಜಂದಿನೆಡ್ದ್ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್,</verse>
				<verse number="2">ಅಕ್ಲೆಡ ಪಂಡಿನಿ, “ಈ ಜನೊಕುಲೆನ್ ತೂದು ಕನಿಕರ ಆಪುಂಡು. ಮೊಕುಲು ಎನ ಕೈತಲ್‌ ಬತ್ತ್‌ದ್ ಮೂಜಿ ದಿನ ಆಪುಂಡು. ಮೊಕ್ಲೆಗ್ ವಣಸ್‌ಗ್ ದಾಲಾ ಇಜ್ಜಿ.</verse>
				<verse number="3">ಮೊಕ್ಲೆನ್ ಉಪವಾಸೊಡು ಇಲ್ಲಗ್ ಕಡಪುಡುಂಡ ಸಾದಿಡ್ ಬರೆಲ್ದ್ ಪೋವೆರ್, ದಾಯೆಗಂದ್ಂಡ, ಮೊಕ್ಲೆಡ್ ಕೆಲೆವೆರ್ ದೂರೊಡ್ದು ಬೈದೆರತ್ತಾ,” ಅಂದ್‌ದ್ ಪಂಡಿನೆಕ್ಕ್,</verse>
				<verse number="4">ಶಿಷ್ಯೆರ್, “ಈ ಕಾಡ್‌ಡ್ ಮೊಕ್ಲೆಗ್ ಬೋಡಿತ್ತಿನಾತ್ ರೊಟ್ಟಿಲೆನ್ ಒಲ್ತುಡ್ದು ಕನವೊಲಿ?” ಪಂಡೆರ್.</verse>
				<verse number="5">ಆಯೆ, “ನಿಕ್ಲೆಡ ಏತ್ ರೊಟ್ಟಿಲು ಉಂಡು,” ಪಂಡ್ದ್ ಅಕ್ಲೆಡ ಕೇಂಡಿನೆಕ್ಕ್, “ಏಳ್ ಉಂಡು,” ಪಂಡೆರ್.</verse>
				<verse number="6">ಅಪಗ ಯೇಸು ಜನೊಕುಲೆ ಗುಂಪುಗು ನೆಲತ್ತ ಮಿತ್ತ್ ಕುಲ್ಲೆರೆ ಅಪ್ಪಣೆ ಕೊರಿಯೆ. ಆ ಏಳ್ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ರೊಟ್ಟಿನ್ ಪೊಲ್ತುದು, ಪಟ್ಟೆರೆಗಾದ್ ತನ ಶಿಷ್ಯೆರೆ ಕೈಕ್ ಕೊರಿಯೆ. ಅಕುಲು ಗುಂಪುದಾಕುಲೆಗ್ ಪಟ್ಟ್‌ದ್ ಕೊರಿಯೆರ್.</verse>
				<verse number="7">ಉಂದತ್ತಂದೆ ಅಕ್ಲೆಡ ಕೆಲವು ಎಲ್ಯ ಮೀನ್‌ಲಾ ಇತ್ತ್ಂಡ್. ಅವೆನ್ಲಾ ಆಯೆ ದೆತ್ತೊಂದು, ಸುಗಿತ್‌ದ್, ಉಂದೆನ್ಲಾ ಪಟ್ಟ್‌ದ್ ಕೊರ್ಲೆ ಅಂದ್‌ದ್ ಶಿಷ್ಯೆರೆಗ್ ಪಂಡೆ.</verse>
				<verse number="8">ಅಕುಲು ವಣಸ್ ಮಲ್ತ್‌ದ್ ಬಂಜಾರ ಆಯೆರ್. ಒರಿದಿನ ತುಂಡುಲೆನ್ ಒಟ್ಟು ಮಲ್ಪುನಗ ಏಳ್ ಪುಡಯಿ ದಿಂಜಿಂಡ್.</verse>
				<verse number="9">ಅವುಲು ವಣಸ್ ಮಲ್ತಿನಾಕುಲು ಹೆಚ್ಚಿಕಡಿಮೆ ನಾಲ್ ಸಾರ ಅಂಜೊವುಲು ಇತ್ತೆರ್.</verse>
				<verse number="10">ಬೊಕ್ಕ ಆಯೆ ಅಕ್ಲೆನ್ ಕಡಪುಡ್ದು ಕೊರ್ದು ಅಪಗನೆ ತನ ಶಿಷ್ಯೆರೆನ್ ಲೆತ್ತೊಂದು, ಓಡೊನು ಮಿತ್ತಾರ್ದ್, ದಲ್ಮನೂಥ ಸೀಮೆಗ್ ಬತ್ತೆ.</verse>
				<verse number="11">ಐಡ್ದ್ ಬೊಕ್ಕ ಪರಿಸಾಯೆರ್ ಬತ್ತ್‌ದ್ ಆಯಡ ತರ್ಕ ಮಲ್ತೊಂದು, ಪರೀಕ್ಷೆ ಮಲ್ಪೆರೆಗಾದ್, ಈ ಬಾನೊಡು ಒಂಜಿ ಗುರ್ತ ತೋಜಾದ್ ಕೊರೊಡು ಅಂದ್‌ದ್ ಕೇನ್ನಪಗ</verse>
				<verse number="12">ಯೇಸು ತನ ಆತ್ಮೊಡು ಬೇಜಾರಾದ್, “ಈ ಸಂತಾನ ಗುರ್ತೊನು ಬಯಕುನು ದಾಯೆಗ್? ನಿಕ್ಲೆಗ್ ನಿಜಾದ್ ಪನ್ಪೆ, ಈ ಸಂತಾನೊಗು ವಾ ಗುರ್ತಲಾ ತಿಕ್ಕಂದ್.” ಅಂದ್‌ದ್ ಪಂಡೆ.</verse>
				<verse number="13">ಬೊಕ್ಕ ಅಕ್ಲೆನ್ ಬುಡ್ದು ಪಿರ ಓಡೊನು ಮಿತ್ತಾರ್ದ್ ಆಪೆ ಬರಿಕ್ಕ್ ಪೋಯೆ.</verse>
				<verse number="14">ಶಿಷ್ಯೆರ್ ರೊಟ್ಟಿದ ಬುತ್ತಿ ಕಟ್ಟೊನಿಯೆರೆ ಮದತೆರ್. ಓಡೊಡು ಅಕ್ಲೆಡ ಒಂಜೇ ಒಂಜಿ ರೊಟ್ಟಿ ಮಾತ್ರ ಇತ್ತ್ಂಡ್.</verse>
				<verse number="15">ಬೊಕ್ಕ ಯೇಸು ಅಕ್ಲೆಡ, “ಜಾಗ್ರತೆಡುಪ್ಪುಲೆ! ಪರಿಸಾಯೆರೆ ಬೊಕ್ಕ ಹೆರೋದನ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಕಂಡಿತಾದ್ ಪನ್ನಗ</verse>
				<verse number="16">ಅಕುಲು, “ನಮಡ ರೊಟ್ಟಿ ಇಜ್ಜಂದಿನೆಡ್ದೇ ಆಯೆ ಇಂಚ ಪನೊಂದುಲ್ಲೆ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="17">ಉಂದೆನ್ ತೆರಿದ್ ಯೇಸು, “ರೊಟ್ಟಿ ಇಜ್ಜತ್ತಾ ಪಂಡ್ದ್, ನಿಕ್ಲೆ ಉಲಯಿ ದಾಯೆಗ್ ಪಾತೆರುವರ್? ನಿಕ್ಲೆಗ್ ನನಲಾ ತೆರಿಯುಜಾ? ಅರ್ಥ ಆಪುಜ? ನಿಕ್ಲೆನ ಉಡಲ್ ಕಲ್ಲಾತ್ತ್‌ಂಡಾ?</verse>
				<verse number="18">ನಿಕ್ಲೆಗ್ ಕಣ್ಣ್ ಇತ್ತ್‌ದ್‌ಲಾ ತೂಪುಜರಾ? ಕೆಬಿ ಇತ್ತ್‌ದ್‌ಲಾ ಕೇನುಜರಾ? ನಿಕ್ಲೆಗ್ ನೆನೆಪುಲಾ ಇಜ್ಜಾ?</verse>
				<verse number="19">ಯಾನ್ ಐನ್ ರೊಟ್ಟಿ ಪೊಲ್ತುದು ಐನ್ ಸಾರ ಜನೊಕುಲೆಗ್ ಪಟ್ಟಿನಪಗ ತಿನಂದೆ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಪದ್ರಾಡ್,” ಪಂಡೆರ್.</verse>
				<verse number="20">“ಬೊಕ್ಕ ಆ ಏಳ್ ರೊಟ್ಟಿ ನಾಲ್ ಸಾರ ಜನೊಕುಲೆಗ್ ಪಟ್ಟಿನಪಗ, ಒರಿದಿನ ತುಂಡುಲೆಡ್, ಏತ್ ಪುಡಯಿ ಒಟ್ಟು ಮಲ್ತರ್?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಏಳ್,” ಪಂಡೆರ್.</verse>
				<verse number="21">ಅಪಗ ಯೇಸು ಅಕ್ಲೆಡ, “ನಿಕ್ಲೆಗ್ ನನಲಾ ಅರ್ಥ ಆಪುಜ,” ಅಂದ್‌ದ್ ಪಂಡೆ</verse>
				<verse number="22">ಬೊಕ್ಕ ಅಕುಲು ಬೆತ್ಸಾಯಿದ ಊರುಗು ಬತ್ತೆರ್. ಅಲ್ಪ ಜನೊಕುಲು ಒರಿ ಕುರುಡನ್ ಯೇಸುನ ಕೈತಲ್‌ ಲೆತ್ತೊಂದು ಬತ್ತ್‌ದ್, ಆಯನ್ ಮುಟ್ಟೊಡು ಅಂದ್‌ದ್ ಆಯಡ ನಟ್ಟೊಂಡೆರ್.</verse>
				<verse number="23">ಆಯೆ ಕುರುಡನ ಕೈ ಪತ್ತ್‌ದ್, ಊರುದ ಪಿದಯಿ ಲೆತ್ತೊಂದು ಪೋದು, ಆಯನ ಕಣ್ಣ್‌ಗ್ ಉಬ್ಬಿದ್, ಆಯನ ಮಿತ್ತ್ ಕೈ ದೀದ್, “ನಿಕ್ಕ್ ದಾದಾಂಡಲಾ ತೋಜುಂಡಾ?” ಅಂದ್‌ದ್ ಆಯಡ ಕೇಂಡೆ.</verse>
				<verse number="24">ಆಯೆ ತರೆ ದೆರ್ತ್ತ್‌ದ್ ತೂದು, “ಅಂದ್, ಎಂಕ್ ಜನೊಕುಲು ತೋಜುವೆರ್. ಅಕುಲು ನಡಪುನ ಮರತ ಲೆಕ್ಕ ತೋಜುವೆರ್,” ಅಂದ್‌ದ್ ಪಂಡೆ.</verse>
				<verse number="25">ಕುಡ ಯೇಸು ಆಯನ ಕಣ್ಣ್‌ದ ಮಿತ್ತ್ ಕೈ ದೀಯೆ. ಆಯೆ ಆಯನ ಕಣ್ಣ್ ಬುಡ್ದು ತೂನಗ ಆಯಗ್ ಗುಣ ಆದಿತ್ತ್ಂಡ್. ಬೊಕ್ಕ ಆಯಗ್ ಮಾತಲಾ ಸರಿಯಾದ್ ತೋಜ್ಂಡ್.</verse>
				<verse number="26">ಐಡ್ದ್ ಬೊಕ್ಕ ಯೇಸು, “ಈ ಊರುದುಲಯಿ ಪೋವೊಡ್ಚಿ,” ಪಂಡ್‌ದ್ ಆಯನ್ ಆಯನ ಇಲ್ಲಗ್ ಕಡಪುಡಿಯೆ.</verse>
				<verse number="27">ಯೇಸುಲಾ ಆಯನ ಶಿಷ್ಯೆರ್‌ಲಾ ಫಿಲಿಪ್ಪಿ ಕೈಸರೆಯ ಪನ್ಪಿ ಪಟ್ಟಣಲೆಡ್ ಸೇರ್ದಿನ ಗ್ರಾಮೊಲೆಗ್ ಪಿದಾಡಿಯೆರ್. ಸಾದಿಡ್ ಆಯೆ ತನ ಶಿಷ್ಯೆರೆಡ, “ಜನೊಕುಲು, ಎನನ್ ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="28">ಅಕುಲು ಆಯಡ, “ನಿನನ್ ಕೆಲೆವೆರ್ ಸ್ನಾನಿಕೆ ಯೋಹಾನೆ, ಪನ್ಪೆರ್. ಕೆಲೆವೆರ್ ಎಲೀಯೆ ಪನ್ಪೆರ್, ನನ ಕೆಲೆವೆರ್ ಪ್ರವಾದಿಲೆಡ್ ಒರಿ ಪನ್ಪೆರ್,” ಅಂದ್‌ದ್ ಪಂಡೆರ್.</verse>
				<verse number="29">ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರ್ ಅಂದ್‌ದ್ ಪನ್ಪರ್?” ಅಂದ್‌ದ್ ಕೇನ್ನಗ ಪೇತ್ರೆ, “ಈ ಬರೊಡಾಯಿನ ಕ್ರಿಸ್ತೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="30">ಐಕ್ ಆಯೆ, “ಎನ ಸಂಗತಿಡ್ ಏರೆಗ್ಲಾ ಪನಡೆ,” ಅಂದ್‌ದ್ ಶಿಷ್ಯೆರೆಗ್ ಕಂಡಿತಾದ್ ಪಂಡೆ.</verse>
				<verse number="31">ಉಂದತ್ತಂದೆ, “ನರಮಾನಿ ಮಗೆ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ತಿರಸ್ಕಾರ ಮಲ್ತ್‌ದ್ ಕೆರ್ವೆರ್. ಮೂಜಿ ದಿನೊಡ್ದು ಬೊಕ್ಕ ಜೀವ ಆದ್ ಲಕ್ಕುವೆ,” ಅಂದ್‌ದ್ ಬೋಧನೆ ಕೊರಿಯೆರೆ ಸುರು ಮಲ್ತೆ.</verse>
				<verse number="32">ಆಯೆ ಈ ಪಾತೆರೊನು ಸ್ಪಷ್ಟಾದ್ ಪಂಡೆ. ಅಪಗ ಪೇತ್ರೆ ಆಯನ ಕೈ ಪತ್ತ್‌ದ್ ಬರಿಕ್ಕ್ ಲೆತ್ತ್‌ದ್ ಈ ಇಂಚ ಪನ್ಪಿನವು ಸರಿ ಅತ್ತ್ ಅಂದ್‌ದ್ ದಟ್ಟಿಯೆರೆ ಸುರು ಮಲ್ತೆ.</verse>
				<verse number="33">ಯೇಸು ಪಿಜಿರ್‌ದ್ ತನ ಶಿಷ್ಯೆರೆನ್ ತೂದು ಪೇತ್ರನ್ ದಟ್ಟಿದ್, “ಸೈತಾನ, ಎನ ದುಂಬು ಉಂತಡ, ನಿನ ಆಲೋಚನೆ ನರಮಾನಿನ ಆಲೋಚನೆ ಅತ್ತಂದೆ, ದೇವೆರೆನವು ಅತ್ತ್.”</verse>
				<verse number="34">ಬೊಕ್ಕ ಆಯೆ ತನ ಶಿಷ್ಯೆರೆಡೊಪ್ಪ ಜನೊಕುಲೆ ಗುಂಪುನು ಕೈತಲ್‌ ಲೆತ್ತ್‌ದ್, ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.</verse>
				<verse number="35">ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ, ಆಂಡ ಎಂಕಾದ್‌ಲಾ ಸುವಾರ್ತೆಗಾದ್‌ಲಾ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.</verse>
				<verse number="36">ಒರಿ ನರಮಾನಿ ಇಡೀ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಹಾಳ್ ಮಲ್ತೊಂಡೆಡ ಆಯಗ್ ದಾದ ಪ್ರಯೋಜನ ಉಂಡು?</verse>
				<verse number="37">ಒರಿ ತನ ಪ್ರಾಣೊಗು ಎಂಚಿನ ಪಗತೆ ಕೊರೊಲಿ?</verse>
				<verse number="38">ವ್ಯಭಿಚಾರಿಲೆಕ್ಕ ಉಪ್ಪು ಈ ಪಾಪಿಷ್ಟ ಸಂತಾನೊಡು, ಏರಾಂಡಲಾ ಎನನ್ ಬೊಕ್ಕ ಎನ ಪಾತೆರೊಗು ನಾಚಿಗೆ ಮಲ್ತೊನುವೆನಾ ಆಯಗ್ ನರಮಾನಿ ಮಗೆಲಾ ತಾನ್ ತನ ಅಮ್ಮೆರೆನ ಮೈಮೆಡ್ ಪರಿಶುದ್ಧ ದೂತೆರೆಡೊಪ್ಪ ಬನ್ನಗ ನಾಚಿಗೆ ಮಲ್ಪೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="9">
				<verse number="1">ಬೊಕ್ಕ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ಮುಲ್ಪ ಉಂತುದಿನಾಕುಲೆಡ್ ಕೆಲೆವೆರ್ ದೇವೆರೆ ರಾಜ್ಯ ಬಲೊಟು ಬರ್ಪಿನೆನ್ ತೂವ ಮುಟ್ಟ, ಸೈಪುಜರ್,” ಅಂದ್‌ದ್ ಪಂಡೆ.</verse>
				<verse number="2">ಆಜಿ ದಿನೊಡ್ದು ಬೊಕ್ಕ ಯೇಸು ಪೇತ್ರೆ, ಯಾಕೋಬೆ, ಯೋಹಾನೆ ಮೊಕ್ಲೆನ್, ಪ್ರತ್ಯೇಕಾದ್ ಒಂಜಿ ಎತ್ತರ ಗುಡ್ಡೆಗ್ ಲೆತ್ತೊಂದು ಪೋಯೆ. ಅಲ್ಪ ಅಕ್ಲೆನ ಕಣ್ಣೆದುರುಡು ಆಯನ ರೂಪ ಬೇತೆ ಆಂಡ್.</verse>
				<verse number="3">ಆಯನ ಕುಂಟು ಮಿಂಚಿದ್ ಹಿಮತ್ತಲೆಕ್ಕ ಬೊಲ್ದಾಂಡ್. ಭೂಲೋಕೊದ ವಾ ಡೋಬಿದಾಯೆಗ್ಲಾ ಆತ್ ಬೊಲ್ದು ಮಲ್ಪೆರೆ ಆವಂದ್.</verse>
				<verse number="4">ಬೊಕ್ಕ ಎಲೀಯೆಲಾ ಮೋಶೆಲಾ ಅಕ್ಲೆಗ್ ತೋಜಿದ್ ಬತ್ತ್‌ದ್ ಯೇಸುಡೊಪ್ಪ ಪಾತೆರೊಂದುಪ್ಪುನೆನ್ ಶಿಷ್ಯೆರ್ ತೂಯೆರ್.</verse>
				<verse number="5">ಅಪಗ ಪೇತ್ರೆ ಯೇಸುಡ, “ಗುರೂ ನಮ ಮೂಲೇ ಉಪ್ಪುನವು ಎಡ್ಡೆ, ಮೂಜಿ ಗುಡಾರ ಕಟ್ಟ್‌ಗ, ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ.</verse>
				<verse number="6">ತಾನ್ ಎಂಚಿನ ಪಾತೆರುವೆ ಅಂದ್‌ದ್ ಆಯಗ್ ತೆರಿದಿತ್ತಿಜಿ, ದಾಯೆಗ್ ಪಂಡ ಅಕುಲು ಬಾರಿ ಪೋಡಿದಿತ್ತೆರ್.</verse>
				<verse number="7">ಆತ್‌ನೆಟ್ಟ ಮುಗಲ್ ಬತ್ತ್‌ದ್ ಅಕ್ಲೆನ ಮಿತ್ತ್ ನಿರೆಲಾಂಡ್. ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಆಯನ ಪಾತೆರೊನು ಕೇನ್ಲೆ.” ಅಂದ್‌ದ್ ಒಂಜಿ ಮಲ್ಲ ಸ್ವರ ಆಂಡ್.</verse>
				<verse number="8">ಅಪಗ ಸುತ್ತಲಾ ತೂನಗ, ಯೇಸು ಅತ್ತಂದೆ ಬೇತೆ ಏರೆನ್ಲಾ ತೂಯಿಜೆರ್.</verse>
				<verse number="9">ಅಕುಲು ಆ ಗುಡ್ಡೆಡ್ದ್ ಜತ್ತ್‌ದ್ ಬರೊಂದುಪ್ಪುನಗ ಆಯೆ ಅಕ್ಲೆಗ್, “ನಿಕುಲು ತೂಯಿನೆನ್ ನರಮಾನಿ ಮಗೆ ಸೈತ್‌ದ್ ಜೀವಾದ್ ಲಕ್ಕ್‌ದ್ ಬನ್ನೆಟ್ಟ ಏರೆಗ್ಲಾ ತೆರಿಪಾವರೆ ಬಲ್ಲಿ,” ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="10">ಅಕುಲು ಆ ಪಾತೆರೊನು ತನ್ಕುಲೆ ಉಲಯಿ ದೀವೊಂಡೆರ್. “ಸೈತ್‌ದ್ ಜೀವಾದ್ ಲಕ್ಕುನು ಪಂಡ ದಾದ?” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.</verse>
				<verse number="11">ಬೊಕ್ಕ ಅಕುಲು, “ಎಲೀಯೆ ಸುರುಟ್ಟು ಬರ್ಪಿನವು ಅಗತ್ಯ ಅಂದ್‌ದ್ ಶಾಸ್ತ್ರಿಲು ದಾಯೆಗ್ ಪನ್ಪೆರ್?” ಆಯಡ ಕೇಂಡೆರ್.</verse>
				<verse number="12">ಐಕ್ ಯೇಸು ಅಕ್ಲೆಡ, “ಎಲೀಯೆ ಸುರುಟ್ಟು ಬತ್ತ್‌ದ್ ಮಾತೆನ್ ಸರಿ ಮಲ್ಪುನವು ನಿಜ. ಬೊಕ್ಕ ನರಮಾನಿ ಮಗೆ ಬಾರಿ ಕಷ್ಟೊನು ಸಹಿಸೊಂದು ತಿರಸ್ಕಾರ ಆವೊಡು ಅಂದ್‌ದ್ ಶಾಸ್ತ್ರೊಡು ದಾಯೆಗ್ ಬರೆತ್ಂಡ್?</verse>
				<verse number="13">ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಎಲೀಯೆ ಬತ್ತೆ, ಶಾಸ್ತ್ರೊಡು ಬರೆದುಪ್ಪುನ ಪ್ರಕಾರ ಜನೊಕುಲು ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ಆಯಗ್ ಮಲ್ತೆರ್,” ಅಂದ್‌ದ್ ಪಂಡೆ.</verse>
				<verse number="14">ಐಡ್ದ್ ಬೊಕ್ಕ ಒರಿದಿ ಶಿಷ್ಯೆರೆನ ಕೈತಲ್‌ ಬನ್ನಗ, ಸುತ್ತಲಾ ಜನೊಕುಲು ಬೊಕ್ಕ ಶಾಸ್ತ್ರಿಲು ಮಲ್ಲ ಗುಂಪುಡು ಉಂತುದು ಅಕ್ಲೆಡ ಚರ್ಚೆ ಮಲ್ಪುನೆನ್ ತೂಯೆರ್.</verse>
				<verse number="15">ಅಪಗನೆ ಜನೊಕುಲೆ ಗುಂಪು ಯೇಸುನು ತೂದು, ಬಾರಿ ಅಚ್ಚಿರ ಆದ್, ಆಯನ ಕೈತಲ್‌ ಪಾರ್‌ಪೋದು, ಆಯಗ್ ವಂದನೆ ಮಲ್ತೆರ್.</verse>
				<verse number="16">ಯೇಸು ಶಿಷ್ಯೆರೆಗ್, “ಮೊಕ್ಲೆಡೊಪ್ಪ ದಾದ ಚರ್ಚೆ ಮಲ್ತೊಂದುಲ್ಲರ್?” ಅಂದ್‌ದ್ ಕೇಂಡೆ.</verse>
				<verse number="17">ಆ ಗುಂಪುಡ್ದು ಒರಿ, “ಬೋಧಕಾ, ಎನ ಮಗನ್ ನಿನ ಕೈತಲ್‌ ಲೆತ್ತೊಂದು ಬತ್ತೆ. ಆಯನ್ ಒಂಜಿ ಬಾಯಿಬರಂದಿ ದೆವ್ವ ಪತ್ತ್‌ದ್ಂಡ್.</verse>
				<verse number="18">ಅವು ಆಯನ ಮಿತ್ತ್ ಬತ್ತ್ಂಡ ಆಯನ್ ನೆಲಕ್ ಬೂರ್ಪಾವುಂಡು. ಅಪಗ ಆಯೆ ನುರೆ ಜಪುಡಾವೊಂದು ಕಟಕಟ ಕೂಲಿ ಕಡೆವೊಂದು ಮರಕಟ್ಟ್‌ದ್ ಪೋಪೆ. ಅವೆನ್ ನಿನ ಶಿಷ್ಯೆರೆಡ ಬುಡ್ಪಾವೆರೆ ಪಂಡೆ. ಆಂಡ ಅಕ್ಲೆಡ್ದ್ ಆವಂದೆ ಪೋಂಡು.” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="19">ಐಕ್ ಆಯೆ, “ಓ! ನಂಬಿಕೆದಾಂತಿ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ಆಯನ್ ಎನ ಕೈತಲ್‌ ಕನಲೆ.” ಪಂಡೆ</verse>
				<verse number="20">ಅಪಗ ಅಕುಲು ಆ ಆಣನ್ ಯೇಸು ಕೈತಲ್‌ ಲೆತ್ತೊಂದು ಬತ್ತೆರ್. ಆಯನ್ ತೂಯಿ ಕೂಡ್ಲೆ, ಆ ದೆವ್ವ ಆ ಆಣನ್ ಮಸ್ತ್ ಒದ್ದಾಡ್ಪಾಂಡ್, ಆಯೆ ನೆಲಕ್ ಬೂರ್ದು, ನುರೆ ಜಪುಡಾವೊಂದು ಪೊರೆಲಿಯೆ.</verse>
				<verse number="21">ಯೇಸು ಆಯನ ಅಮ್ಮೆರೆಡ, “ಉಂದು ಉಂಬ್ಯಗ್ ಏತ್ ಸಮಯೊಡ್ದಿಂಚಿ ಉಂಡು?” ಅಂದ್‌ದ್ ಕೇನ್ನಗ, ಆಯೆ ಪಂಡಿನಿ, “ಎಲ್ಯ ಬಾಲೆಡ್ದಿಂಚಿ ಉಂಡು.</verse>
				<verse number="22">ಬೊಕ್ಕ ಉಂಬ್ಯನ್‌ ಕೆರೊಡು ಅಂದ್‌ದ್ ಅಪಗಪಗ, ತೂಟುಲಾ ನೀರ್‌ಡ್ಲಾ ಬೂರ್ಪಾವುಂಡು. ನಿನಡ ಸಾದ್ಯ ಇತ್ತ್ಂಡ, ಎಂಕ್ಲೆನ ಮಿತ್ತ್ ಕನಿಕರ ದೀದ್ ಎಂಕ್ಲೆಗ್ ಸಹಾಯ ಮಲ್ಪುಲ,” ಪಂಡೆ</verse>
				<verse number="23">ಯೇಸು ಆಯಡ, “ನಿನಡ ಸಾದ್ಯ ಇತ್ತ್ಂಡ ಅಂದ್‌ದ್ ಪನ್ಪನಾ? ನಂಬುನಾಯಗ್ ಮಾತಲಾ ಸಾದ್ಯ,” ಅಂದ್‌ದ್ ಪಂಡೆ.</verse>
				<verse number="24">ಕೂಡ್ಲೆ ಆ ಆಣನ ಅಮ್ಮೆ, “ಯಾನ್ ನಿನನ್ ನಂಬುವೆ, ಎಂಕ್ ನಂಬಿಕೆ ಕಡಿಮೆ ಇತ್ತ್ಂಡಲಾ ಸಹಾಯ ಮಲ್ಪು.” ಅಂದ್‌ದ್ ಬುಲ್ತುದು ಪಂಡೆ.</verse>
				<verse number="25">ಅಪಗ ಯೇಸು ಜನೊಕುಲು ಗುಂಪು ಕಟ್ಟೊಂದು ಬಲ್ತೊಂದು ಅಕ್ಲೆನ ಕಡೆಕ್ಕ್ ಬರ್ಪಿನೆನ್ ತೂದು, ಆ ದೆವ್ವೊಗು ದಟ್ಟಿದ್, “ಓ ಕೆಬಿ ಕೇನಂದಿ ಕೆಪ್ಪ ಆತ್ಮಾ, ಇಂಬ್ಯನ್ ಬುಡ್ದು ಪೋಲ, ನನ ಆಯನ ಉಲಯಿ ಬರಡ,” ಯಾನ್ ನಿಕ್ಕ್ ಅಪ್ಪಣೆ ಕೊರ್ಪೆ ಪಂಡೆ</verse>
				<verse number="26">ಅಪಗ ಅವು ಅಬ್ಬರಿತ್‌ದ್ ಆಯನ್ ಒದ್ದಾಡ್ಪಾದ್ ಬುಡ್ದು ಪೋಂಡು. ಆ ಆಣ್ ಸೈತಿನಾಯೆಲೆಕ್ಕ ಬೂರ್ದಿನೆಡ್ದ್, ಕೆಲವು ಜನೊಕುಲು, “ಆಯೆ ಸೈತೆ,” ಅಂದ್‌ದ್ ಪಂಡೆರ್.</verse>
				<verse number="27">ಆಂಡ ಯೇಸು ಆಯನ್ ಕೈ ಪತ್ತ್‌ದ್ ಲಕ್ಕಾಯೆ. ಆಯೆ ಲಕ್ಕ್‌ದ್ ಉಂತಿಯೆ.</verse>
				<verse number="28">ಯೇಸು ಇಲ್ಲಗ್ ಬತ್ತಿನಪಗ ಆಯನ ಶಿಷ್ಯೆರ್, “ಅವೆನ್ ಬುಡ್ಪಾಯೆರೆ ಎಂಕ್ಲೆಡ್ದ್ ದಾಯೆಗ್ ಆಯಿಜಿ?” ಅಂದ್‌ದ್ ಆಯಡ ಗುಟ್ಟುಡು ಕೇಂಡೆರ್.</verse>
				<verse number="29">ಐಕ್ ಯೇಸು ಅಕ್ಲೆಡ, “ಈ ಜಾತಿಲು ದೇವೆರೆ ಪ್ರಾರ್ಥನೆಡ್ದ್‌ಲಾ ಉಪವಾಸೊಡ್ದುಲಾ ಅತ್ತಂದೆ ಬೇತೆ ಒಯಿಡ್ದ್‌ಲಾ ಬುಡ್ದು ಪೋಪುಜಾ.” ಅಂದ್‌ದ್ ಪಂಡೆ.</verse>
				<verse number="30">ಅಲ್ತ್‌ಡ್ದ್ ಅಕುಲು ಗಲಿಲಾಯ ಕಡತ್‌ದ್ ಪೋವೊಂದಿತ್ತೆರ್. ಅವು ಜನೊಕುಲೆಗ್ ಗೊತ್ತಾವೆರೆ ಬಲ್ಲಿ ಪಂಡ್ದ್ ಆಯಗ್ ಮನಸಿತ್ತ್‌ಂಡ್.</verse>
				<verse number="31">ದಾಯೆಗ್ ಪಂಡ, ಆಯೆ ತನ ಶಿಷ್ಯೆರೆಗ್ ಬೋಧನೆ ಮಲ್ತೊಂದು, “ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್. ಅಕುಲು ಆಯನ್ ಕೆರ್ವೆರ್; ಸೈತ್‌ದ್ ಮೂಜನೇ ದಿನೊಟು ಆಯೆ ಜೀವಾದ್ ಲಕ್ಕುವೆ,” ಅಂದ್‌ದ್ ಪಂಡೆ.</verse>
				<verse number="32">ಆಂಡ ಅಕ್ಲೆಗ್ ಈ ಪಾತೆರದ ಅರ್ಥ ಗೊತ್ತಾಯಿಜಿ, ಬೊಕ್ಕ ಅಕುಲು ಆಯಡ ಕೇನಿಯೆರೆ ಪೋಡಿಯೆರ್.</verse>
				<verse number="33">ಬೊಕ್ಕ ಅಕುಲು ಕಪೆರ್ನೌಮುಗು ಬತ್ತೆರ್. ಅಲ್ಪ ಆಯೆ ಇಲ್ಲ್‌ಡಿತ್ತಿನಪಗ, “ನಿಕುಲು ಸಾದಿಡ್ ದಾದ ಚರ್ಚೆ ಮಲ್ತೊಂದಿತ್ತರ್?” ಅಂದ್‌ದ್ ಶಿಷ್ಯೆರೆಡ ಕೇಂಡೆ.</verse>
				<verse number="34">ಅಕುಲು ಮನಿಪಂದೆ ಇತ್ತೆರ್, ದಾಯೆ ಪಂಡ ಅಕುಲು ಸಾದಿಡ್ ತನ್ಕುಲೆ ಉಲಯಿ ಏರ್ ಮಲ್ಲಾಯೆ ಅಂದ್‌ದ್ ಪಾತೆರೊಂದಿತ್ತೆರ್.</verse>
				<verse number="35">ಬೊಕ್ಕ ಯೇಸು ಕುಲ್ಲುದು, ತನ ಪದ್ರಾಡ್ ಶಿಷ್ಯೆರೆನ್ ಲೆತ್ತ್‌ದ್ ಅಕ್ಲೆಡ, “ಏರಾಂಡಲಾ ಸುರುತ್ತಾಯೆ ಆವೊಡಾಂಡ, ಆಯೆ ಮಾತೆರೆಡ್ದ್ ಕಡೆತಾಯೆ ಆದ್, ಮಾತೆರೆ ಚಾಕ್ರಿದಾಯೆ ಆದುಪ್ಪೊಡು,” ಅಂದ್‌ದ್ ಪಂಡೆ.</verse>
				<verse number="36">ಬೊಕ್ಕ ಒಂಜಿ ಎಲ್ಯ ಬಾಲೆನ್ ದೆತ್ತೊಂದು, ಅಕ್ಲೆನ ನಡುಟು ಉಂತಾದ್, ಅರ್ಂಟ್ ಪತ್ತ್‌ದ್,</verse>
				<verse number="37">ಅಕ್ಲೆಡ, “ಏರಾಂಡಲಾ ಎನ ಪುದರ್‌ಡ್ ಇಂಚಿತ್ತಿ ಎಲ್ಯ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್. ಬೊಕ್ಕ ಏರಾಂಡಲಾ ಎನನ್ ಸೇರಾವೊಂಡೆಡ ಎನನ್ ಅತ್ತ್, ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ ಆಂಡ್,” ಅಂದ್‌ದ್ ಪಂಡೆ.</verse>
				<verse number="38">ಯೋಹಾನೆ ಯೇಸುಗು, “ಗುರೂ, ಏರಾ ಒರಿ ನಿನ ಪುದರ್‌ನ್ ಪಂಡ್ದ್ ದೆವ್ವ ಬುಡ್ಪಾವುನೆನ್ ಎಂಕುಲು ತೂದು, ಆಯೆ ಎಂಕ್ಲೆನಾಯೆ ಅತ್ತಂದಿನೆಡ್ದ್ ಆಯಗ್ ಅಡ್ಡಿ ಮಲ್ತ,” ಪಂಡೆ.</verse>
				<verse number="39">ಐಕ್ ಯೇಸು, “ಅಡ್ಡಿ ಮಲ್ಪಡೆ, ಏರ್ಲಾ ಎನ ಪುದರ್‌ಡ್ ಮಲ್ಲಕಾರ್ಯೊನು ಮಲ್ತ್‌ದ್ ಅಪಗನೆ ಎನನ್ ದೂರುನಾಯೆ ಒರಿಲಾ ಇಜ್ಜೆ.”</verse>
				<verse number="40">ನಂಕ್ ವಿರೋಧ ಆದುಪ್ಪಂದಿನಾಯೆ, ನಮ ಕಡೆತಾಯೆ ಆದುಲ್ಲೆ.</verse>
				<verse number="41">ನಿಕುಲು ಕ್ರಿಸ್ತನಾಕುಲು ಪಂಡ್ದ್, ನಿಕ್ಲೆಗ್ ಏರಾಂಡಲಾ ಎನ ಪುದರ್‌ಡ್ ಒಂಜಿ ಚೊಂಬು ನೀರ್‌ನ್ ಪರ್ಯೆರೆ ಕೊರಿಯೆಡ ಬರೊಡಾಯಿ ಪ್ರತಿಫಲ ಆಯಗ್ ತಪ್ಪುನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="42">ಎನ ಮಿತ್ತ್ ನಂಬಿಕೆ ದೀಪಿನ ಈ ಎಲ್ಯಾಕುಲೆಡ್ ಒರಿಯಗ್ ಏರಾಂಡಲಾ ಅಡ್ಡಿ ಮಲ್ತೆಡ ಅಂಚಿನಾಯನ ಕಂಟೆಲ್‌ಗ್ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್‌ಗ್ ಪಾಡೊನುನವೇ ಎಡ್ಡೆ.</verse>
				<verse number="43">ಉಂದತ್ತಂದೆ ನಿನ ಕೈ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ಲ. ರಡ್ಡ್ ಕೈ ಇತ್ತಿನಾಯೆ ಆದಿತ್ತ್‌ದ್, ತೆಕ್ಕಂದಿ ತೂ ಆಯಿನ ನರಕೊಡು ಬೂರುನೆಡ್ದ್, ಊನದಾಯೆ ಆದ್ ನಿತ್ಯಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.</verse>
				<verse number="44"></verse>
				<verse number="45">ಬೊಕ್ಕ ನಿನ ಕಾರ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ಲ. ರಡ್ಡ್ ಕಾರ್ ಇತ್ತಿನಾಯೆ ಆದಿತ್ತ್‌ದ್ ನರಕೊಡು ಬೂರುನೆಡ್ದ್, ಕುಂಟೆ ಆದ್ ನಿತ್ಯಜೀವೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.</verse>
				<verse number="46"></verse>
				<verse number="47">ನಿನ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ಲ; ರಡ್ಡ್ ಕಣ್ಣ್ ಇತ್ತಿನಾಯೆ ಆದಿತ್ತ್‌ದ್ ನರಕೊಡು ಬೂರುನೆಡ್ದ್ ಒಂಜೇ ಕಣ್ಣ್ ಇತ್ತಿನಾಯೆ ಆದ್ ದೇವೆರೆ ರಾಜ್ಯೊಡು ಸೇರುನವು ನಿಕ್ಕ್ ಏತೋ ಎಡ್ಡೆ.</verse>
				<verse number="48">ನರಕೊಡು ಅಕ್ಲೆನ್ ತುಚ್ಚುನ ಪುರಿ ಸೈಪುಜಿ, ತೂ ತೆಕ್ಕುಜಿ.</verse>
				<verse number="49">“ಪ್ರತಿಯೊರಿಗ್ಲಾ ತೂ ಪನ್ಪಿ ಉಪ್ಪುದ ಹದೊನು ಕೊರೊಡು.</verse>
				<verse number="50">“ಉಪ್ಪು ಎಡ್ಡೆಂತಿನವೇ; ಆಂಡ ಉಪ್ಪು ಚಪ್ಪೆ ಆಂಡ, ಅವೆನ್ ಒಯಿಡ್ದ್ ರುಚಿ ಮಲ್ಪುವರ್? ಅಂಚಾದ್ ನಿಕ್ಲೆಡ್ ಉಪ್ಪು ಇತ್ತಿನಾಕುಲು ಆದುಪ್ಪುಲೆ, ಒರಿಯಡ ಒರಿ ಸಮಾಧಾನೊಡು ಉಪ್ಪುಲೆ,”</verse>
			</chapter>
			<chapter number="10">
				<verse number="1">ಯೇಸು ಆ ಜಾಗ್‌ನ್ ಬುಡ್ದು, ಯೂದಾಯ ಸೀಮೆಗ್ಲಾ ಯೊರ್ದಾನ್ ತುದೆತ ಆಪೆದ ಮರ್ಗಿಲ್‌ಗ್ ಪೋಯೆ. ಅಲ್ಪ ಜನೊಕುಲು ಗುಂಪುಗುಂಪಾದ್ ಆಯನ ಕೈತಲ್‌ ಕುಡ ಬತ್ತೆರ್. ಆಯೆ ಅಕ್ಲೆಗ್ ಬೋಧನೆ ಮಲ್ಪೆರೆ ಸುರು ಮಲ್ತೆ.</verse>
				<verse number="2">ಅಪಗ ಪರಿಸಾಯೆರ್ ಆಯನ ಕೈತಲ್‌ ಬತ್ತ್‌ದ್ ಆಯನ್ ಪರೀಕ್ಷೆ ಮಲ್ಪೊಡು ಪನ್ಪಿ ಯೋಚನೆಡ್, “ಒರಿ ಮದ್ಮೆ ಆಯಿ ಬೊಕ್ಕ ತನ ಬೊಡೆದಿನ್ ಬುಡ್ದು ಬುಡ್ಪಿನವು ನ್ಯಾಯನಾ?” ಅಂದ್‌ದ್ ಕೇಂಡೆರ್.</verse>
				<verse number="3">ಯೇಸು ಐಕ್, “ಮೋಶೆ ನಿಕ್ಲೆಗ್ ವಾ ಅಪ್ಪಣೆ ಕೊರ್ತೆ?” ಅಂದ್‌ದ್ ಕೇಂಡೆ.</verse>
				<verse number="4">ಐಕ್ ಅಕುಲು, “ತ್ಯಾಗಪತ್ರೊನು ಬರೆದ್ ಕೊರ್ದು ಆಲೆನ್ ಬುಡ್ದು ಬುಡೊಲಿ ಅಂದ್‌ದ್ ಮೋಶೆ ಒಪ್ಪಿಗೆ ಕೊರ್ತೆ,” ಅಂದ್‌ದ್ ಪಂಡೆರ್.</verse>
				<verse number="5">ಆಂಡ ಯೇಸು ಅಕ್ಲೆಡ, “ಆಯೆ ನಿಕ್ಲೆನ ಹಟೊನು ತೂದು ನಿಕ್ಲೆಗ್ ಇಂಚಿತ್ತಿ ಅಪ್ಪಣೆನ್ ಬರೆದ್ ದೀತೆ.</verse>
				<verse number="6">ಸೃಷ್ಟಿದ ಸುರುಟ್ಟೇ, ‘ದೇವೆರ್ ನರಮಾನಿನ್ ಆಣ್ ಪೊಣ್ಣಾದ್ ಉಂಡು ಮಲ್ತ್‌ದೆ.’</verse>
				<verse number="7">‘ಈ ಕಾರಣೊಡ್ದು ಅಂಜೊವು ತನ ಅಪ್ಪೆಅಮ್ಮನ್ ಬುಡ್ದು ತನ ಬೊಡೆದಿನ್ ಸೇರೊನ್ವೆ. ಇರ್ವೆರ್‌ಲಾ ಒಂಜೇ ಜೀವ ಆಪೆರ್ ಪಂಡ್ದ್ ಬರೆತ್ಂಡ್.</verse>
				<verse number="8">ಇಂಚ ಉಪ್ಪುನಗ ಅಕುಲು ನನ ಇರ್ವೆರತ್ತ್. ಒಂಜೇ ಶರೀರ ಆದುಪ್ಪುವೆರ್.’</verse>
				<verse number="9">ಅಂಚಾಯಿನೆಡ್ದ್ ದೇವೆರ್ ಕೂಡಾಯಿನೆನ್ ನರಮಾನಿಲು ಬೇತೆ ಮಲ್ಪೆರೆ ಬಲ್ಲಿ,” ಅಂದ್‌ದ್ ಪಂಡೆ.</verse>
				<verse number="10">ಅಕುಲು ಇಲ್ಲಡ್ ಉಪ್ಪುನಗ ಆಯನ ಶಿಷ್ಯೆರ್ ಈ ಸಂಗತಿಡ್ ಆಯಡ ಕುಡ ಕೇಂಡೆರ್.</verse>
				<verse number="11">ಆಯೆ ಅಕ್ಲೆಡ, “ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ತನ ಬೊಡೆದಿಗ್ ವಿರೋಧಾದ್ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.</verse>
				<verse number="12">ಬೊಕ್ಕ ಬೊಡೆದಿ ತನ ಕಂಡನಿನ್ ಬುಡ್ದು ಬೊಕ್ಕೊರಿಯನ್ ಮದ್ಮೆ ಆಯಲ್‌ಡ, ಆಲ್‌ಲಾ ವ್ಯಭಿಚಾರ ಮಲ್ಪುನಾಲ್ ಆದುಲ್ಲಲ್,” ಅಂದ್‌ದ್ ಪಂಡೆ.</verse>
				<verse number="13">ಬೊಕ್ಕ ಕೆಲೆವೆರ್ ತನ್ಕುಲೆ ಎಲ್ಯ ಜೋಕುಲೆನ್ ಯೇಸು ಮುಟ್ಟೊಡು ಪಂಡ್ದ್, ಆಯನ ಕೈತಲ್‌ ಕನತಿನಪಗ ಶಿಷ್ಯೆರ್ ಅಕ್ಲೆನ್ ದಟ್ಟಿಯೆರ್.</verse>
				<verse number="14">ಆಂಡ ಯೇಸು ಅವೆನ್ ತೂದು, ಕೋಪೊಡು ಅಕ್ಲೆಡ, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ. ಅಕ್ಲೆಗ್ ಅಡ್ಡಿ ಮಲ್ಪಡೆ. ದೇವೆರೆ ರಾಜ್ಯ ಇಂಚಿತ್ತಿನಾಕುಲೆನವೇ.”</verse>
				<verse number="15">ನಿಕ್ಲೆಗ್ ನಿಜಾದ್ ಪನ್ಪೆ, ಬಾಲೆದಲೆಕ್ಕ ಒರಿ ದೇವೆರೆ ರಾಜ್ಯೊನು ದೆತ್ತೊನುಜೆಡ, ಆಯೆ ಐತ ಉಲಯಿ ಪೋವಯೆ, ಅಂದ್‌ದ್ ಪಂಡೆ.</verse>
				<verse number="16">ಐಕ್ಲೆನ್‌ ಅರ್ಂಟ್ ಪತ್ತ್‌ದ್ ಐಕ್ಲೆ ಮಿತ್ತ್ ಕೈ ದೀದ್ ಆಶೀರ್ವಾದ ಮಲ್ತೆ.</verse>
				<verse number="17">ಅಲ್ಪಡ್ದ್ ಯೇಸು ಪಿದಾಡ್ದ್, ಸಾದಿಡ್ ಪೋನಗ ಒರಿ ಪಾರೊಂದು ಬತ್ತ್‌ದ್, ಆಯನ ಎದುರು ಅಡ್ಡಬೂರ್ದು ಆಯಡ, “ಎಡ್ಡೆ ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೊಡಾಂಡ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.</verse>
				<verse number="18">ಯೇಸು ಆಯಡ, “ಎನನ್ ಎಡ್ಡೆಂತಿನಾಯೆ ಅಂದ್‌ದ್ ದಾಯೆಗ್ ಪನ್ಪ? ದೇವೆರ್ ಒರಿಯೇ ಅತ್ತಂದೆ ಬೇತೆ ಏರ್ಲಾ ಎಡ್ಡೆಂತಿನಾಯೆ ಇಜ್ಜೆ.</verse>
				<verse number="19">ಮಾನ್ಯ ಕೆರಿಯೆರೆ ಬಲ್ಲಿ, ವ್ಯಭಿಚಾರ ಮಲ್ಪೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ಮೋಸ ಮಲ್ಪೆರೆ ಬಲ್ಲಿ, ನಿನ ಅಪ್ಪೆಅಮ್ಮನ್ ಸನ್ಮಾನ ಮಲ್ಪೊಡು ಪನ್ಪಿ ದೇವೆರೆ ಅಪ್ಪಣೆಲು ನಿಕ್ಕ್ ಗೊತ್ತುಂಡತ್ತಾ,” ಅಂದ್‌ದ್ ಪಂಡೆ.</verse>
				<verse number="20">ಐಕ್ ಆಯೆ, “ಬೋಧಕಾ, ಯಾನ್ ಎಲ್ಲಿಡ್ದಿಂಚಿಲಾ ಉಂದೆಕ್ಕ್ ಮಾತೆಕ್ಲಾ ಸರಿಯಾದ್ ನಡತೊಂದು ಬೈದೆ,” ಪಂಡ್ದ್ ಪನ್ನಗ,</verse>
				<verse number="21">ಯೇಸು ಆಯನ್ ದೃಷ್ಟಿ ದೀದ್ ಪ್ರೀತಿಡ್ ಆಯಡ, “ನಿನಡ ಒಂಜಿ ಕಮ್ಮಿ ಉಂಡು. ಪೋದು ನಿನ ಆಸ್ತಿನ್ ಮಾತೆನ್ ಮಾರ್ದ್ ಬಡವೆರೆಗ್ ಕೊರ್ಲ. ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.</verse>
				<verse number="22">ಆಂಡ ಆಯಗ್ ಮಸ್ತ್ ಆಸ್ತಿ ಇತ್ತಿನೆಡ್ದ್ ಈ ಪಾತೆರೊನು ಕೇಂಡ್ದ್ ಮೋನೆ ಬಾಡಾದ್ ದುಃಖೊಡು ಪಿರ ಪೋಯೆ.</verse>
				<verse number="23">ಅಪಗ ಯೇಸು ಸುತ್ತಲಾ ತೂದು ತನ ಶಿಷ್ಯೆರೆಗ್, “ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ,” ಅಂದ್‌ದ್ ಪಂಡೆ.</verse>
				<verse number="24">ಶಿಷ್ಯೆರ್ ಆಯನ ಪಾತೆರೊಲೆನ್ ಕೇಂಡ್ದ್ ಅಚ್ಚಿರ ಆಯೆರ್. ಆಂಡ ಯೇಸು ಕುಡ ಅಕ್ಲೆಗ್, “ಜೋಕುಲೇ, ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ.</verse>
				<verse number="25">ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್, ಒಂಜಿ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ ಆದುಂಡು,” ಪಂಡೆ</verse>
				<verse number="26">ಶಿಷ್ಯೆರ್ ಈ ಪಾತೆರೊಗು ನನಲಾತ್ ಅಚ್ಚಿರ ಆದ್, “ಇಂಚಾಂಡ, ಏರೆಗ್ ರಕ್ಷಣೆ ಆವು,” ಅಂದ್‌ದ್ ತನ್ಕುಲೆಡ್ ಪಾತೆರೊಂಡೆರ್.</verse>
				<verse number="27">ಯೇಸು ಅಕ್ಲೆನ ಮಿತ್ತ್ ದೃಷ್ಟಿ ದೀದ್, “ಉಂದು ನರಮಾನಿಲೆಗ್ ಅಸಾದ್ಯದವು, ಆಂಡ ದೇವೆರೆಗ್ ಅತ್ತ್. ದೇವೆರೆಗ್ ಮಾತಲಾ ಸಾದ್ಯನೇ.” ಪಂಡೆ.</verse>
				<verse number="28">ಅಪಗ ಪೇತ್ರೆ ಆಯಡ, “ಇಂದಾ, ಎಂಕುಲು ಮಾತ ಬುಡ್ದು ನಿನ ಬೆರಿಯೆ ಬೈದ,” ಅಂದ್‌ದ್ ಪನಿಯೆರೆ ಸುರು ಮಲ್ತೆ.</verse>
				<verse number="29">ಐಕ್ ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಏರ್ ಎಂಕಾದ್ ಸುವಾರ್ತೆಗಾದ್ ಇಲ್ಲ್‌ನಾವಡ್, ಮೆಗ್ಯೆಪಲಯನಾವಡ್, ಮೆಗ್ದಿಪಲಿನಾವಡ್, ಅಪ್ಪೆನಾವಡ್, ಅಮ್ಮೆರೆನಾವಡ್, ಜೋಕುಲೆನಾವಡ್, ಆಸ್ತಿನಾವಡ್ ಬುಡ್ದು ಬುಡ್ತೆನಾ,</verse>
				<verse number="30">ಆಯಗ್ ಇತ್ತೆದ ಕಾಲೊಡು ಇಲ್ಲ್, ಮೆಗ್ಯೆಪಲಯೆ, ಮೆಗ್ದಿಪಲಿ, ಅಪ್ಪೆ, ಜೋಕುಲು, ಆಸ್ತಿ ಉಂದು ಮಾತಲಾ ಕಷ್ಟದೊಟ್ಟುಗು ನೂದೆದಾತ್ ತಿಕ್ಕುಂಡು. ಬೊಕ್ಕ ಬರ್ಪಿ ಯುಗೊಟ್ಟು ನಿತ್ಯಜೀವಲಾ ತಿಕ್ಕುಂಡು.</verse>
				<verse number="31">ಆಂಡ, ಮಸ್ತ್ ಜನ ಸುರುತ್ತಾಕುಲು ಕಡೆತ್ತಾಕುಲು ಆಪೆರ್, ಕಡೆತ್ತಾಕುಲು ಸುರುತ್ತಾಕುಲು ಆಪೆರ್,” ಅಂದ್‌ದ್ ಪಂಡೆ.</verse>
				<verse number="32">ಅಕುಲು ಯೆರೂಸಲೇಮುಗು ಪೋವೊಂದುಪ್ಪುನಗ ಸಾದಿಡ್ ಯೇಸು ಅಕ್ಲೆನ ದುಂಬುಡೇ ಪೋಯೆ, ಶಿಷ್ಯೆರ್ ತೂದು ಅಚ್ಚಿರ ಆಯೆರ್, ಬೊಕ್ಕ ಆಯನ ಬೆರಿಯೆ ಪೋಪಿನಾಕುಲು ಪೋಡಿಯೆರ್. ಅಪಗ ಆಯೆ ಕುಡ ತನ ಪದ್ರಾಡ್ ಶಿಷ್ಯೆರೆನ್ ಲೆತ್ತ್‌ದ್ ತನ್ಕ್ ಆಪಿನೆನ್ ಪನಿಯೆರೆ ಸುರು ಮಲ್ತೆ.</verse>
				<verse number="33">ತೂಲೆ, “ನಮ ಯೆರೂಸಲೇಮುಗು ಪೋವೊಂದುಲ್ಲ. ನರಮಾನಿ ಮಗನ್ ಪ್ರಧಾನಯಾಜಕೆರೆ ಬೊಕ್ಕ ಶಾಸ್ತ್ರಿಲೆನ ಕೈಕ್ ಪತ್ತ್‌ದ್ ಕೊರುವೆರ್. ಆಯಗ್ ಮರಣ ದಂಡನೆ ಆವು. ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್.</verse>
				<verse number="34">ಮೊಕುಲು ಆಯಗ್ ಗೇಲಿ ಮಲ್ತ್‌ದ್, ಆಯನ ಮಿತ್ತ್ ಉಬ್ಬಿದ್, ಆಯಗ್ ಚಾಟಿಡ್ ಹಾಕ್‌ದ್, ಕೆರ್ದ್ ಪಾಡ್ವೆರ್, ಬೊಕ್ಕ ಆಯೆ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ,” ಅಂದ್‌ದ್ ಪಂಡೆ.</verse>
				<verse number="35">ಅಪಗ ಜೆಬೆದಾಯನ ಜೋಕುಲಾಯಿ ಯಾಕೋಬು, ಯೋಹಾನೆ ಆಯನ ಕೈತಲ್‌ ಬತ್ತ್‌ದ್ ಆಯಗ್, “ಗುರೂ, ಎಂಕ್ಲೆನ ಒಂಜಿ ಆಸೆನ್ ನಡಪಾದ್ ಕೊರೊಡು” ಅಂದ್‌ದ್ ಕೇನೊಂಡೆರ್.</verse>
				<verse number="36">ಯೇಸು ಅಕ್ಲೆಡ, “ನಿಕ್ಲೆಗ್ ದಾದ ನಡಪಾದ್ ಕೊರೊಡು?” ಅಂದ್‌ದ್ ಕೇಂಡೆ.</verse>
				<verse number="37">ಅಕುಲು, “ಈ ನಿನ ಮೈಮೆದ ಪಧವಿನ್ ಪಡೆನಗ, ಎಂಕ್ಲೆಡ್ ಒರಿ ನಿನ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿ ನಿನ ದತ್ತ ಮರ್ಗಿಲ್‌ಡ್ ಕುಲ್ಲುಲೆಕ್ಕ ಮಲ್ಪೊಡು,” ಪಂಡೆರ್.</verse>
				<verse number="38">ಆಂಡ ಯೇಸು ಅಕ್ಲೆಡ, “ನಿಕುಲು ನಟ್ಟೊಂಡಿನವು ದಾನೆಂದ್ ನಿಕ್ಲೆಗ್ ತೆರಿಯಂದ್. ಎನ ಕಷ್ಟೊಡು ಪಾಲ್‌ದಾರೆರಾವೆರೆ ನಿಕ್ಲೆಗ್ ಸಾದ್ಯನಾ? ಎಂಕ್ ಆಪಿನ ದೀಕ್ಷಾಸ್ನಾನೊನು ಪಡೆಯೆರೆ ನಿಕ್ಲೆಗ್ ಸಾದ್ಯನಾ?” ಪಂಡೆ.</verse>
				<verse number="39">ಅಕುಲು ಆಯಡ, “ಆವು,” ಪಂಡೆರ್. ಅಪಗ ಯೇಸು ಅಕ್ಲೆಗ್, “ಎನ ಕಷ್ಟೊಡು ನಿಕುಲು ಪಾಲ್‌ದಾರೆರ್ ಆವರ್ ಸರಿ. ಎಂಕ್ ಆಪಿನ ದೀಕ್ಷಾಸ್ನಾನ ನಿಕ್ಲೆಗಾಪುಂಡಲಾ</verse>
				<verse number="40">ಎನ ಬಲತ್ತ ಮರ್ಗಿಲ್ಡಾವಡ್, ದತ್ತ ಮರ್ಗಿಲ್ಡಾವಡ್ ಕುಲ್ಲಾವುನ ಎನ ಬೇಲೆ ಅತ್ತ್. ಅವು ಏರೆಗ್ ತಯಾರ್ ಮಲ್ತ್‌ದುಂಡಾ, ಅಕ್ಲೆಗ್ ತಿಕ್ಕುಂಡು,” ಅಂದ್‌ದ್ ಪಂಡೆ.</verse>
				<verse number="41">ಒರಿದಿ ಪತ್ತ್ ಶಿಷ್ಯೆರ್ ಉಂದೆನ್ ಕೇಂಡ್ದ್, ಯಾಕೋಬು, ಯೋಹಾನನ ಮಿತ್ತ್ ಕೋಪ ಮಲ್ತೆರ್.</verse>
				<verse number="42">ಯೇಸು ಅಕ್ಲೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಗ್, “ಪಿದಯಿದ ಜನೊಕುಲೆನ್ ಆಳುನಾಕುಲು ಅಕ್ಲೆನ ಮಿತ್ತ್ ಅಹಂಕಾರೊಡು ನಡಪಾವೆರ್ ಬೊಕ್ಕ ಮಲ್ಲಾಕುಲು ಬಲತ್ಕಾರೊಡ್ದು ಅಧಿಕಾರ ನಡಪಾವೆರ್ ಅಂದ್‌ದ್ ನಿಕುಲು ತೆರಿದರತ್ತಾ?</verse>
				<verse number="43">ಆಂಡ ನಿಕ್ಲೆಡ್ ಅಂಚ ಉಪ್ಪೆರೆ ಬಲ್ಲಿ. ನಿಕ್ಲೆಡ್ ಮಲ್ಲಾಯೆ ಆವೊಡುಂದು ಉಪ್ಪುನಾಯೆ ಚಾಕ್ರಿದಾಯೆ ಆದುಪ್ಪೊಡು.</verse>
				<verse number="44">ಆಂಡ ನಿಕ್ಲೆಡ್ ಸುರುತ್ತಾಯೆ ಆವೊಡು ಇನ್ಪಿನಾಯೆ ನಿಕ್ಲೆ ಅಡಿಯಾಳ್ ಆದುಪ್ಪೊಡು.</verse>
				<verse number="45">ನರಮಾನಿ ಮಗೆಲಾ ಚಾಕ್ರಿ ಮಲ್ಪಾವೊನ್ರೆ ಅತ್ತ್, ಚಾಕ್ರಿ ಮಲ್ಪೆರೆಲಾ ತನ ಪ್ರಾಣೊನು ಮಸ್ತ್ ಜನೊಕುಲೆನ ಬುಡುಗಡೆಗಾದ್ ಕೊರಿಯೆರೆ ಬತ್ತೆ.” ಅಂದ್‌ದ್ ಪಂಡೆ.</verse>
				<verse number="46">ಐಡ್ದ್ ಬೊಕ್ಕ ಅಕುಲು ಯೆರಿಕೊಗು ಬತ್ತೆರ್. ಯೇಸುಲಾ ಆಯನ ಶಿಷ್ಯೆರ್‌ಲಾ ಮಸ್ತ್ ಜನೊಕುಲೆ ಗುಂಪುಲಾ ಆ ಊರುಡ್ದು ಪಿದಾಡ್ದ್ ಪೋವೊಂದುಪ್ಪುನಗ, ತಿಮಾಯನ ಮಗೆ ಕುರುಡೆ ಬಾರ್ತಿಮಾಯೆ ಇನ್ಪಿ ನಟ್ಟುನಾಯೆ, ಸಾದಿದ ಬರಿಟ್ಟ್ ಕುಲ್ಲುದಿತ್ತೆ.</verse>
				<verse number="47">ಆ ಕುರುಡೆ ಸಾದಿಡ್ ಪೋಪಿನಾಯೆ ನಜರೇತ್‌ದ ಯೇಸು ಅಂದ್‌ದ್ ಆಯೆ ತೆರಿದ್, “ಯೇಸೋ ದಾವೀದ ಮಗಾ, ಎನನ್ ಕರುಣೆ ಮಲ್ಪುಲ!” ಅಂದ್‌ದ್ ಬೊಬ್ಬೆ ದೀಯೆ.</verse>
				<verse number="48">ಕೆಲೆವೆರ್, ಮನಿಪಂದೆ ಉಪ್ಪು ಅಂದ್‌ದ್ ಆಯನ್ ದಟ್ಟಿನಗ ಆಯೆ ದಾವೀದ ಮಗಾ, “ಎಂಕ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆ.</verse>
				<verse number="49">ಅಪಗ ಯೇಸು ಉಂತುದು, “ಆಯನ್ ಲೆಪ್ಪುಲೆ.” ಅಂದ್‌ದ್ ಪನ್ನಗ ಅಕುಲು ಆ ಕುರುಡನ್ ಲೆತ್ತ್‌ದ್, “ಧೈರ್ಯೊಡುಪ್ಪುಲ, ಲಕ್ಕ್‌ಲ, ನಿನನ್ ಲೆಪ್ಪುವೆ,” ಅಂದ್‌ದ್ ಪಂಡೆರ್.</verse>
				<verse number="50">ಆಯೆ ತನ ಕುಂಟುನು ದಕ್ಕ್‌ದ್, ದಿಡ್ಕ ಲಕ್ಕ್‌ದ್, ಯೇಸುನ ಕೈತಲ್‌ ಬತ್ತೆ.</verse>
				<verse number="51">ಯೇಸು ಆಯಡ, “ಯಾನ್ ನಿಕ್ಕ್ ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ, ಆ ಕುರುಡೆ “ಗುರೂ, ಎಂಕ್ ಕಣ್ಣ್ ತೋಜುಲೆಕ್ಕ ಮಲ್ಪೊಡು,” ಪಂಡೆ.</verse>
				<verse number="52">ಯೇಸು ಆಯಗ್, “ಪೋಲ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಪಂಡ್ದ್ ಪಂಡೆ. ಅಪಗನೆ ಆಯಗ್ ಕಣ್ಣ್ ತೋಜ್ಂಡ್. ಆಯೆ ಆ ಸಾದಿಡ್ ಆಯನ ಬೆರಿಯೆ ಪೋಯೆ.</verse>
			</chapter>
			<chapter number="11">
				<verse number="1">ಅಕುಲು ಯೆರೂಸಲೇಮುಗು ಕೈತಲಾನಗ ಇಪ್ಪೆಗುಡ್ಡೆದ ಕೈತಲಿತ್ತಿ ಬೇತ್ಫಗೆಗ್ಲಾ ಬೇಥಾನ್ಯಗ್ಲಾ ಬನ್ನಗ ಆಯೆ ತನ ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್,</verse>
				<verse number="2">“ನಿಕ್ಲೆ ಎದುರುಡುಪ್ಪು ಹಳ್ಳಿಗ್ ಪೋಲೆ. ಐತ ಉಲಯಿ ಪೊಗ್ಗುನಗನೇ ಅಲ್ಪ ಕಟ್ಟ್‌ದುಪ್ಪು ಒಂಜಿ ಕತ್ತೆದ ಕಿನ್ನಿನ್ ತೂಪರ್; ಈತ್‌ನೆಟ್ಟ ಐತ ಮಿತ್ತ್ ಏರ್ಲಾ ಕುಲ್ಲುದಿಜೆರ್; ಅವೆನ್ ಗಿರ್ತ್‌ದ್ ಪತ್ತೊಂದು ಕನಲೆ.</verse>
				<verse number="3">ಏರಾಂಡಲಾ ನಿಕ್ಲೆನ್, ದಾಯೆ ಗಿರ್ಪುವರ್ ಅಂದ್‌ದ್ ಕೇಂಡೆರ್ಡ, ಉಂದು ಕರ್ತವಗ್ ಬೋಡಾತ್ಂಡ್, ಆಯೆ ತಡ ಮಲ್ಪಂದೆ ಬೇಗನೆ ಕಡಪುಡ್ದು ಕೊರುವೆ,” ಪಂಡ್ದ್ ಪನ್ಲೆಂದ್‌ದ್ ಅಕ್ಲೆನ್ ಕಡಪುಡಿಯೆ.</verse>
				<verse number="4">ಆ ಶಿಷ್ಯೆರ್‌ಲು ಊರುದುಲಯಿ ಪೋದು ಒಂಜಿ ಕತ್ತೆದ ಕಿನ್ನಿ ಸಾದಿದ ಬಾಕಿಲ್‌ದ ಕೈತಲೇ ಕಟ್ಟ್‌ದುಪ್ಪುನೆನ್ ತೂದು ಅವೆನ್ ಗಿರ್ತೆರ್.</verse>
				<verse number="5">ಅಲ್ಪ ಉಂತುದಿತ್ತಿನಾಕುಲೆಡ್ ಕೆಲೆವೆರ್, “ಈ ಕಿನ್ನಿನ್ ಗಿರ್ತ್‌ದ್ ದಾದ ಮಲ್ಪುವರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="6">ಯೇಸು ಅಪ್ಪಣೆ ಕೊರಿಲೆಕ್ಕನೇ ಅಕ್ಲೆಗ್ ಪನ್ನಗ ಆ ಜನೊಕುಲು ದೆತ್ತೊಂದು ಪೋವೆರೆ ಬುಡಿಯೆರ್.</verse>
				<verse number="7">ಶಿಷ್ಯೆರ್ ಆ ಕತ್ತೆದ ಕಿನ್ನಿನ್ ಯೇಸುನ ಕೈತಲ್‌ ಕನತ್‌ದ್ ತನ್ಕುಲೆ ಕುಂಟುಲೆನ್ ಐತ ಮಿತ್ತ್ ಪಾಡಿ ಬೊಕ್ಕ ಯೇಸು ಐತ ಮಿತ್ತ್ ಕುಲ್ಲಿಯೆ.</verse>
				<verse number="8">ಅಪಗ ಕೆಲೆವೆರ್ ತನ್ಕುಲೆ ಕುಂಟುಲೆನ್ ಸಾದಿಡ್ ಬುಡ್ಪಾಯೆರ್, ಬೇತೆ ಕೆಲೆವೆರ್ ತೋಟೊಡ್ದು ಮರತ ಕೊಡಿಕ್ಕ್‌ಲೆನ್ ಕೊಯ್ದ್ ಕನತ್‌ದ್ ಪಾಡಿಯೆರ್.</verse>
				<verse number="9">ಆಯನ ದುಂಬುಡ್ದುಲಾ ಪಿರವುಡ್ದುಲಾ ಪೋವೊಂದಿತ್ತಿನಾಕುಲು ಬೊಬ್ಬೆ ಪಾಡೊಂದು, “ಹೊಸನ್ನಾ! ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ ಆವಡ್.</verse>
				<verse number="10">ನಮ ಅಮ್ಮೆ ಆಯಿ ದಾವೀದನ ರಾಜ್ಯ ಬರ್ಪುಂಡು ಐಕ್ ಆಶೀರ್ವಾದ ಆವಡ್. ಮಿತ್ತ್‌ದ ಲೋಕೊಡು ಹೊಸನ್ನಾ!” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="11">ಐಡ್ದ್ ಬೊಕ್ಕ ಯೇಸು ಯೆರೂಸಲೇಮುಗು ಸೇರ್ದ್ ದೇವಾಲಯದುಲಯಿ ಪೋದು ಸುತ್ತಲಾ ತೂಯೆ. ಆತ್‌ನೆಟ್ಟ ಪೊರ್ತು ಕಂತಿನೆಡ್ದ್ ಪದ್ರಾಡ್ ಶಿಷ್ಯೆರೆನ್ ಲೆತ್ತೊಂದು ಬೇಥಾನ್ಯೊಗು ಪಿದಾಡ್ದ್ ಪೋಯೆ.</verse>
				<verse number="12">ಮನದಾನಿ ಅಕುಲು ಬೇಥಾನ್ಯೊನು ಬುಡ್ದು ಬರೊಂದುಪ್ಪುನಗ ಯೇಸುಗು ಬಡವು ಆಂಡ್.</verse>
				<verse number="13">ಬೊಕ್ಕ ಇರೆ ಬುಡ್ತಿನ ಒಂಜಿ ಅಂಜೂರದ ಮರೊನು ದೂರೊಡ್ದು ತೂದು, ತನ್ಕ್ ದಾದಾಂಡಲಾ ಪರ್ಂದ್ ತಿಕ್ಕು ಅಂದ್‌ದ್ ಅಡೆಗ್ ಪೋಯೆ. ಐತ ಕೈತಲ್‌ ಬನ್ನಗ ಐಟ್ಟ್ ಬಜೀ ಇರೆ ಅತ್ತಂದೆ ಬೇತೆ ದಾಲಾ ತೋಜಿಜಿ. ಅಪಗ ಅಂಜೂರ ಆಪಿನ ಕಾಲ ಆದಿತ್ತಿಜಿ.</verse>
				<verse number="14">ಅಪಗ ಯೇಸು ಆ ಮರಕ್ಕ್, “ನನ ಮಿತ್ತ್ ಒರಿಲಾ ನಿನಡ ಪರ್ಂದ್‌ನ್ ಏಪೊಗ್ಲಾ ತಿನಂದಿಲೆಕ್ಕ ಆವಡ್,” ಅಂದ್‌ದ್ ಪಂಡೆ. ಆಯನ ಶಿಷ್ಯೆರ್ ಅವೆನ್ ಕೇಂಡೆರ್.</verse>
				<verse number="15">ಅಕುಲು ಯೆರೂಸಲೇಮುಗು ಬನ್ನಗ, ಯೇಸು ದೇವಾಲಯೊಗು ಪೋದು, ಅಲ್ಪ ಮಾರುನಾಕುಲೆನ್ಲಾ ದೆತ್ತೊನುನಾಕುಲೆನ್ಲಾ ಗಿಡ್ಪೆರೆ ಸುರು ಮಲ್ತೆ, ಕಾಸ್ ಬದಲಿ ಮಲ್ಪುನಾಕುಲೆನ ಮೇಜಿಲೆನ್ಲಾ ಪುದ ಮಾರುನಾಕುಲೆನ ಮಣೆಕ್ಲೆನ್ಲಾ ಮರತ್ ಪಾಡಿಯೆ.</verse>
				<verse number="16">ಬೊಕ್ಕ ಒರಿಯನ್ಲಾ ಸಾಮಾನ್ ತುಂಬೊಂದು ದೇವಾಲಯದ ಉಲಯಿ ಪೋವೆರೆ ಬುಡ್ಜೆ.</verse>
				<verse number="17">ಬೊಕ್ಕ ಆಯೆ ಬೋಧನೆ ಮಲ್ತ್‌ದ್, “‘ಎನ ಇಲ್ಲ್ ಮಾತ ಜನಾಂಗೊಲೆಗ್ ಪ್ರಾರ್ಥನೆದ ಇಲ್ಲ್ ಆದುಂಡು,’ ಅಂದ್‌ದ್ ಬರೆತ್ಂಡತ್ತಾ? ಆಂಡ ನಿಕುಲು ಅವೆನ್ ಕಲ್ವೆರೆ ಮಾಟೆ ಮಲ್ತ್‌ದರ್,” ಅಂದ್‌ದ್ ಪಂಡೆ.</verse>
				<verse number="18">ಅವೆನ್ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಕೇಂಡ್ದ್ ಆಯನ್ ವಾ ಉಪಾಯೊಡು ಕೆರ್ಕ ಅಂದ್‌ದ್ ಗಳಿಗೆ ತೂವೊಂದಿತ್ತೆರ್. ಆಂಡ ಮಾತ ಜನೊಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯಿನೆಡ್ದ್ ಅಕುಲು ಆಯಗ್ ಪೋಡಿಯೊಂದಿತ್ತೆರ್.</verse>
				<verse number="19">ಬೈಯ ಆನಗ ಯೇಸು ಆಯನ ಶಿಷ್ಯೆರ್‌ಲಾ ಪಟ್ಟಣನ್ ಬುಡ್ದು ಪೋಯೆರ್.</verse>
				<verse number="20">ಮನದಾನಿ ಅಕುಲು ಬರೊಂದುಪ್ಪುನಗ, ಆ ಅಂಜೂರದ ಮರ ಬೇರ್‌ಡ್ದೇ ನುಂಗುದು ಪೋದಿತ್ತಿನೆನ್ ತೂಯೆರ್.</verse>
				<verse number="21">ಯೇಸು ಪಂತಿನ ಪಾತೆರ ಪೇತ್ರಗ್ ನೆನಪಾಂಡ್ ಐಕ್ ಆಯೆ ಯೇಸುಡ, “ತೂಲೆ ಗುರು, ಈ ಶಾಪ ಕೊರಿನ ಅಂಜೂರದ ಮರ ನುಂಗುದು ಪೋಂಡು,” ಪಂಡೆ.</verse>
				<verse number="22">ಐಕ್ ಯೇಸು ಉತ್ತರ ಕೊರ್ದು ಪಂಡಿನಿ, “ದೇವೆರೆಡ ನಂಬಿಕೆ ಉಪ್ಪಡ್.</verse>
				<verse number="23">ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಈ ಗುಡ್ಡೆಗ್, ಈ ಲಕ್ಕ್‌ದ್ ಪೋದು ಕಡಲ್ಡ್ ಬೂರು ಪಂಡ್ದ್ ತನ ಉಡಲ್‌ಡ್ ಸಂಶಯ ಮಲ್ಪಂದೆ ನಂಬುಂಡ, ಆಯೆ ಪಂಡಿಲೆಕ್ಕ ಆಪುಂಡು.</verse>
				<verse number="24">ಅವೆಡ್ದಾವರ, ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ನಿಕುಲು ಪ್ರಾರ್ಥನೆ ಮಲ್ಪುನಗ ಎಂಚೆಂಚಿನೆನ್ ನಟ್ಟೊನುವರಾ, ಅವು ಮಾತಲಾ ತಿಕ್ಕುಂಡು ಪಂಡ್ದ್ ನಂಬುಲೆ, ಅವು ನಿಕ್ಲೆಗ್ ತಿಕ್ಕುಂಡು.</verse>
				<verse number="25">ಉಂದತ್ತಂದೆ, ನಿಕುಲು ಉಂತೊಂದು ಪ್ರಾರ್ಥನೆ ಮಲ್ಪುನಗ, ಏರೆಡಾಂಡಲಾ ದಾದಾಂಡಲಾ ತಪ್ಪು ಇತ್ತ್ಂಡ, ಆಯಗ್ ಮಾಪು ಮಲ್ಪುಲೆ. ಮಾಪು ಮಲ್ತ್ಂಡ, ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ ಮಾಪು ಮಲ್ಪುವೆ,” ಪಂಡೆ.</verse>
				<verse number="26">ಅಂಚೆನೇ ನಿಕುಲುಲಾ, “ಮಾಪು ಮಲ್ತ್‌ಜರ್ಡ, ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ನಿಕ್ಲೆನ ತಪ್ಪುಲೆನ್ಲಾ ಮಾಪು ಮಲ್ಪುಜೆ”</verse>
				<verse number="27">ಅಕುಲು ಕುಡ ಯೆರೂಸಲೇಮುಗು ಬತ್ತೆರ್. ಬೊಕ್ಕ ಯೇಸು ದೇವಾಲಯದ ಜಾಲ್‌ಡ್ ನಡತೊಂದುಪ್ಪುನಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಹಿರಿಯೆರ್‌ಲಾ ಆಯ ಕೈತಲ್‌ ಬತ್ತ್‌ದ್</verse>
				<verse number="28">ಆಯಡ, “ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್‌ದ್ ಕೇಂಡೆರ್.</verse>
				<verse number="29">ಐಕ್ ಯೇಸು ಅಕ್ಲೆಗ್, “ಯಾನ್ ನಿಕ್ಲೆಗ್ಲಾ ಒಂಜಿ ಪಾತೆರ ಕೇನ್ವೆ, ಎಂಕ್ ಉತ್ತರ ಪಂಡರ್ಡ ಯಾನ್ಲಾ ವಾ ಅಧಿಕಾರೊಡು ಉಂದೆನ್ ಮಲ್ಪುವೆ ಪನ್ಪಿನೆನ್ ನಿಕ್ಲೆಗ್ ಪನ್ಪೆ.</verse>
				<verse number="30">ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಪರಲೋಕೊಡ್ದು ಬತ್ತ್‌ಂಡಾ? ನರಮಾನಿಲೆಡ್ದಾ? ಎಂಕ್ ಉತ್ತರ ಕೊರ್ಲೆ.”</verse>
				<verse number="31">ಉಂದೆನ್ ಕೇಂಡ್ದ್ ತನ್ಕುಲೆ ಉಲಯಿ ಚರ್ಚೆ ಮಲ್ತೆರ್, “‘ಪರಲೋಕೊಡ್ದು ಬೈದ್‌ಂಡ್,’ ಅಂದ್‌ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್,’ ಅಂದ್‌ದ್ ಪನುವೆ. ‘ನರಮಾನಿಲೆಡ್ದ್ ಬೈದ್‌ಂಡ್,’ ಅಂದ್‌ದ್ ಪಂಡ್ಂಡ ದಾನೆ ಆವು?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್. ಯೋಹಾನನ್ ಪ್ರವಾದಿ ಅಂದ್‌ದ್ ಮಾತ ಜನೊಕುಲು ಅನುಮಾನದಾಂತೆ ತೆರಿದಿತ್ತಿನೆಡ್ದ್, ಮೊಕ್ಲೆಗ್ ಜನೊಕುಲೆ ಪೋಡಿಗೆ ಇತ್ತ್ಂಡ್.</verse>
				<verse number="32"></verse>
				<verse number="33">ಇಂಚ ಉಪ್ಪುನಗ ಅಕುಲು, “ಎಂಕ್ಲೆಗ್ ಗೊತ್ತಿಜ್ಜಿ,” ಅಂದ್‌ದ್ ಯೇಸುಗು ಉತ್ತರ ಕೊರಿಯೆರ್. ಅಪಗ ಯೇಸು ಅಕ್ಲೆಗ್, “ವಾ ಅಧಿಕಾರೊಡು ಉಂದೆನ್ ಮಾತ ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ,” ಪಂಡೆ</verse>
			</chapter>
			<chapter number="12">
				<verse number="1">ಅಪಗ ಯೇಸು ಅಕ್ಲೆಡ ಉಪಕತೆಟ್ ಪಾತೆರಿಯೆರೆ ಸುರು ಮಲ್ತೆ, “ಒರಿ ನರಮಾನಿ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಐತ ಸುತ್ತಲಾ ಬೇಲಿ ಪಾಡ್ದ್ ನಡುಟು ಗಾಣ ತೋಡ್ದು ಕಾಪುನ ಗೋಪುರ ಕಟ್ಟ್‌ದ್ ಅವೆನ್ ಒಕ್ಕೆಲ್‌ದಾಕುಲೆಗ್ ಬಾಡಿಗೆಗ್ ಕೊರ್ದು ಬೊಕ್ಕೊಂಜಿ ದೇಶೊಗು ಪೋಯೆ.</verse>
				<verse number="2">ಫಲತ್ತ ಕಾಲ ಬನ್ನಗ ದ್ರಾಕ್ಷೆತೋಟದ ಬುಲೆತ ಪಾಲ್‌ನ್ ಅಕ್ಲೆಡ್ದ್ ದೆತ್ತೊನೆರೆಗಾದ್ ಒರಿ ಬೇಲೆದಾಯನ್ ಕಡಪುಡಿಯೆ.</verse>
				<verse number="3">ಆಂಡ ಅಕುಲು ಆ ಬೇಲೆದಾಯನ್ ಪತ್ತ್‌ದ್ ಹಾಕ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್.</verse>
				<verse number="4">ಆ ಧನಿ, ನನೊರಿ ಬೇಲೆದಾಯನ್ ಅಕ್ಲೆನ ಕೈತಲ್‌ ಕಡಪುಡಿಯೆ, ಅಕುಲು ಆಯನ ತರೆಕ್ ಪೆಟ್ಟ್ ಪಾಡ್ದ್ ಅವಮಾನ ಮಲ್ತೆರ್.</verse>
				<verse number="5">ಐಡ್ದ್ ಬೊಕ್ಕ ನನೊರಿ ಬೇಲೆದಾಯನ್ ಕಡಪುಡ್ನಗ, ಅಕುಲು ಆಯನ್ ಕೆರ್ದ್ ಪಾಡಿಯೆರ್. ನನಲಾ ಮಸ್ತ್ ಜನೊಕುಲೆನ್ ಕಡಪುಡಿಯೆ. ಅಕ್ಲೆಡ್ ಕೆಲೆವೆರೆಗ್ ಪೆಟ್ಟ್ ಪಾಡ್ದ್, ಕೆಲೆವೆರೆನ್ ಕೆರ್ದ್ ಪಾಡಿಯೆರ್.</verse>
				<verse number="6">ಆಯಗ್ ಕಡಪುಡಿಯೆರೆ ನನ ಒರಿ ಇತ್ತೆ, ಏರ್ ಪಂಡ ಆಯನ ಪ್ರೀತಿದ ಮಗೆನೇ. ‘ಎನ ಮಗಕ್ಕಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ಧನಿನ ಕಡೆಡ್ದ್ ಆಯನ್ ಅಕ್ಲೆ ಕೈತಲ್‌ ಕಡಪುಡಿಯೆ.</verse>
				<verse number="7">ಆಂಡ ಆ ಒಕ್ಕೆಲ್‌ದಾಕುಲು, ‘ತೋಟೊಗು ಇಂಬೆನೇ ಹಕ್ಕ್‌ದಾಯೆ, ಬಲೆ ಇಂಬ್ಯನ್ ಕೆರ್ದ್ ಪಾಡ್‌ಗ, ಅಪಗ ಸೊತ್ತು ನಮ್ಮವು ಆಪುಂಡು,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="8">ಬೊಕ್ಕ ಅಕುಲು ಆಯನ್ ಪತ್ತ್‌ದ್ ಕೆರ್ದ್ ಪಾಡ್ದ್, ದ್ರಾಕ್ಷೆತೋಟೊಡ್ದು ಪಿದಯಿ ದಕ್ಕ್‌ದ್ ಬುಡಿಯೆರ್.</verse>
				<verse number="9">“ಅಂಚಾಂಡ, ಆ ದ್ರಾಕ್ಷೆತೋಟದ ಧನಿ ಎಂಚಿನ ಮಲ್ಪೆ? ಆಯೆ ಬತ್ತ್‌ದ್ ಆ ಒಕ್ಕೆಲ್‌ದಾಕುಲೆನ್ ನಾಶ ಮಲ್ತ್‌ದ್, ತನ ತೋಟೊನು ಬೇತೆಕ್ಲೆಗ್ ಕೊರುವೆ.</verse>
				<verse number="10">ಪವಿತ್ರ ಶಾಸ್ತ್ರೊಡು ಬರೆದುಪ್ಪುನೆನ್ ನಿಕುಲು ಒದುದಿಜರಾ? ‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲಾಂಡ್.</verse>
				<verse number="11">ಉಂದು ಕರ್ತವಡ್ದೇ ಆಂಡ್. ನಂಕ್ ಅಚ್ಚಿರ ಆದ್ ತೋಜುಂಡು,’” ಅಂದ್‌ದ್ ಯೇಸು ಪಂಡೆ.</verse>
				<verse number="12">ಅಪಗ ಯೆಹೂದ್ಯೆರೆ ಮುಖ್ಯಸ್ಥೆರ್ ಈ ಉಪಕತೆನ್ ಯೇಸು ತನ್ಕ್‌ಲೆಗಾದೇ ಪಂಡೆ ಅಂದ್‌ದ್ ತೆರಿಯೊಂದು, ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್. ಆಂಡ ಜನೊಕುಲೆಗ್ ಪೋಡಿದ್, ಆಯನ್ ಬುಡ್ದು ಪೋಯೆರ್.</verse>
				<verse number="13">ಐಡ್ದ್ ಬೊಕ್ಕ, ಅಕುಲು ಯೇಸುನು ಪಾತೆರೊಡು ಪತ್ತೊಡು ಪಂಡ್ದ್, ಪರಿಸಾಯೆರೆಡ್ದ್‌ಲಾ ಹೆರೋದ್ಯೆರೆಡ್ದ್‌ಲಾ ಕೆಲೆವೆರೆನ್ ಆಯನ ಕೈತಲ್‌ ಕಡಪುಡಿಯೆರ್.</verse>
				<verse number="14">ಮೊಕುಲು ಬತ್ತ್‌ದ್, “ಗುರೂ, ಈ ಸತ್ಯವಂತೆ, ಏರೆಗ್ಲಾ ಪೋಡಿಯಂದೆ, ಜನೊಕುಲೆ ಮೋನೆ ತೂದು ಪಾತೆರುನಾಯೆ ಅತ್ತ್, ದೇವೆರೆ ಮಾರ್ಗೊನು ಸತ್ಯ ಆದ್ ಬೋಧನೆ ಮಲ್ಪುನಾಯೆ ಆದುಲ್ಲ ಅಂದ್‌ದ್ ತೆರಿದ. ಇತ್ತೆ ಪನ್ಲ, ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ? ಕೊರೊಡಾ ಬೊಡ್ಚಾ,” ಅಂದ್‌ದ್ ಆಯಡ ಕೇಂಡೆರ್.</verse>
				<verse number="15">ಆಂಡ ಯೇಸು ಅಕ್ಲೆನ ಕಪಟೊನು ತೆರಿದ್, “ನಿಕುಲು ಎನನ್ ದಾಯೆಗ್ ತಿಕ್ಕಾಯೆರೆ ತೂಪರ್? ಎಂಕ್ ಒಂಜಿ ಪಾವೊಲಿನ್ ಕನತ್‌ದ್ ತೋಜಾಲೆ,” ಪನ್ನಗ</verse>
				<verse number="16">ಅಕುಲು ಕನತ್‌ದ್ ಆಯೆ ಆ ಪಾವೊಲಿನ್ ದೆತ್ತೊಂದು ಅಕ್ಲೆಡ, “ಐಟಿತ್ತಿ ತರೆಲಾ ಮುದ್ರೆಲಾ ಏರೆನವು?” ಅಂದ್‌ದ್ ಕೇಂಡಿನೆಕ್ಕ್ ಅಕುಲು, “ಕೈಸರನವು,” ಅಂದ್‌ದ್ ಪಂಡೆರ್.</verse>
				<verse number="17">ಯೇಸು ಐಕ್, “ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ. ಅವೆನ್ ಕೇಂಡ್ದ್ ಅಕುಲು ಆಯನ ಸಂಗತಿಡ್ ಅಚ್ಚಿರ ಆಯೆರ್.</verse>
				<verse number="18">ಐಡ್ದ್ ಬೊಕ್ಕ ಸದ್ದುಕಾಯೆರ್ ಆಯೆ ಇತ್ತಿನಡೆ ಬತ್ತೆರ್. ಮೊಕುಲು ಸೈತಿನಾಕುಲು ಕುಡೊರ ಲಕ್ಕುನವು ಇಜ್ಜಿ ಪಂಡ್ದ್ ಪನ್ಪಿನಾಕುಲು. ಮೊಕುಲು ಆಯಡ ಒಂಜಿ ಪ್ರಶ್ನೆ ಮಲ್ತಿನಿ ದಾನೆಂದ್ಂಡ,</verse>
				<verse number="19">“ಗುರೂ, ‘ಪಲಯೆ ಆದಿತ್ತಿನಾಯೆ ಬೊಡೆದಿ ಜೋಕುಲುದಾಂತೆ ಸೈತೆಡ, ಆಲೆನ್ ಆಯನ ಮೆಗ್ಯೆ ಮದ್ಮೆ ಮಲ್ತೊಂದು, ತನ ಪಲಯಗ್ ಸಂತಾನೊನು ಪಡೆಯೊಡು,’ ಅಂದ್‌ದ್ ಮೋಶೆ ಎಂಕ್ಲೆಗ್ ಬರೆದ್ ದೀತೆ ಅತ್ತಾ.</verse>
				<verse number="20">ಏಳ್‌ ಜನ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಬೊಡೆದಿ ಮಲ್ತೊಂದು ಸಂತಾನದಾಂತೆ ಸೈತೆ.</verse>
				<verse number="21">ರಡ್ಡನೆದಾಯೆಲಾ ಸುರುತ್ತಾಯನ ಬೊಡೆದಿನ್ ಮದ್ಮೆ ಮಲ್ತೊಂದು ಸಂತಾನದಾಂತೆ ಸೈತೆ. ಅಂಚೆನೇ ಮೂಜನೆದಾಯೆಲಾ.</verse>
				<verse number="22">ಉಂದೇ ರೀತಿ ಏಳ್‌ ಜನಲಾ ಮದ್ಮೆ ಮಲ್ತೊಂದು ಸಂತಾನದಾಂತೆ ಸೈತೆರ್. ಕಡೆಕ್ಕ್ ಆ ಪೊಂಜೊವುಲಾ ಸೈತಲ್.</verse>
				<verse number="23">ಅಂಚಾಂಡ ಪುನರುತ್ಥಾನೊಡು ಆಲ್ ಏರೆನ ಬೊಡೆದಿ ಆದುಪ್ಪುವಲ್? ಆಲೆನ್ ಏಳ್ ಜನಲಾ ಮದ್ಮೆ ಆದಿತ್ತೆರ್ ಅತ್ತಾ?” ಪಂಡೆರ್.</verse>
				<verse number="24">ಐಕ್ ಯೇಸು, “ಶಾಸ್ತ್ರ ಆವಡ್, ದೇವೆರೆ ಬಲ ಆವಡ್ ನಿಕ್ಲೆಗ್ ತೆರಿಯಂದಿನೆಡ್ದ್ ತಪ್ಪು ಮಲ್ಪುವರ್.</verse>
				<verse number="25">ಎಂಚಂದ್ಂಡ ಅಕುಲು ಸೈತಿನಾಕುಲೆಡ್ದ್ ಜೀವಾದ್ ಲಕ್ಕಿ ಬೊಕ್ಕ ಮದ್ಮೆ ಮಲ್ತೊನುಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್, ಪರಲೋಕೊಡಿತ್ತಿನ ದೂತೆರೆ ಲೆಕ್ಕ ಉಪ್ಪುವೆರ್.</verse>
				<verse number="26">ಆಂಡ ಸೈತಿನಾಕುಲು ಜೀವಾದ್ ಲಕ್ಕುವೆರ್ ಪನ್ಪಿ ಸಂಗತಿಡ್ ಯಾನ್ ಪನ್ಪಿನಾಂಡ, ‘ಯಾನ್ ಅಬ್ರಹಾಮುನ ದೇವೆರ್, ಇಸಾಕನ ದೇವೆರ್ ಬೊಕ್ಕ ಯಾಕೋಬುನ ದೇವೆರ್ ಆದುಲ್ಲೆ.’ ದೇವೆರ್ ಮೋಶೆಗ್ ಮುಳ್ಳುದ ಪುದೆಲ್‌ಡ್ದ್ ಪಾತೆರ್‌ದಿನೆನ್, ನಿಕುಲು ಮೋಶೆನ ಗ್ರಂಥೊಡು ಓದುದಿಜರಾ?</verse>
				<verse number="27">ಆಯೆ ಬದುಕುನಾಕುಲೆಗ್ ದೇವೆರಾದುಲ್ಲೆ, ಸೈತಿದಿನಾಕುಲೆಗ್ ದೇವೆರ್ ಅತ್ತ್. ಅಂಚಾದ್ ನಿಕುಲು ಏತೋ ತತ್ತ್‌ದ್ ಪೋತರ್,” ಅಂದ್‌ದ್ ಪಂಡೆ.</verse>
				<verse number="28">ಶಾಸ್ತ್ರಿಲೆಡ್ ಒರಿ ಆಯನ ತರ್ಕೊನು ಕೇಂಡ್ದ್, ಯೇಸು ಅಕ್ಲೆಗ್ ಸಜ್ಜಿಡ್ ಉತ್ತರ ಕೊರಿಯೆ ಅಂದ್‌ದ್ ತೆರಿದ್ ಕೈತಲ್‌ ಬತ್ತ್‌ದ್, “ಮಾತ ಅಪ್ಪಣೆಲೆಡ್ ಸುರುತ್ತ ಅಪ್ಪಣೆ ಒವು?” ಅಂದ್‌ದ್ ಆಯಡ ಕೇಂಡಿನೆಕ್ಕ್</verse>
				<verse number="29">ಯೇಸು ಅಕ್ಲೆಗ್ ಉತ್ತರ ಕೊರ್ದು, “ಇಸ್ರಾಯೇಲ್ ಜನೊಕುಲೆ ಕೇನ್ಲೆ. ‘ನಮ ದೇವೆರಾಯಿ ಕರ್ತವೆ ಒರಿಯೇ ದೇವೆರ್. ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’ ಪನ್ಪಿನವೇ ಸುರುತ್ತ ಅಪ್ಪಣೆ.</verse>
				<verse number="30"></verse>
				<verse number="31">ರಡ್ಡನೆ ಮುಖ್ಯ ಅಪ್ಪಣೆ, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು,’ ಉಂದೆಡ್ದ್ ಹೆಚ್ಚಿದ ಅಪ್ಪಣೆ ಬೊಕ್ಕೊಂಜಿ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="32">ಅಪಗ ಆ ಶಾಸ್ತ್ರಿ, “ಗುರೂ, ಈ ಸರಿಯಾದ್ ಪಂಡ. ದೇವೆರ್ ಒರಿಯೇ, ಆಯೆ ಅತ್ತಂದೆ ಬೊಕ್ಕೊರಿ ದೇವೆರಿಜ್ಜೆ ಅಂದ್‌ದ್ ಈ ಪಂಡಿನವು ಸತ್ಯ.</verse>
				<verse number="33">ಆಯನ್ ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ಬೊಕ್ಕ ತನನ್ ತಾನ್ ಪ್ರೀತಿ ಮಲ್ಪುಲೆಕ್ಕ ತನ ನಿರೆತಾಯನ್ ಪ್ರೀತಿ ಮಲ್ಪುಲ. ಉಂದು ರಡ್ಡ್‌ಲಾ ಮಾತ ಹೋಮ, ಬಲಿಡ್ದ್‌ಲಾ ಮುಖ್ಯವಾಯಿನವು,” ಅಂದ್‌ದ್ ಪಂಡೆ.</verse>
				<verse number="34">ಆಯೆ ಬುದ್ಧಿಡ್ ಉತ್ತರ ಕೊರಿನೆನ್ ತೂದು ಯೇಸು ಆಯಗ್, “ಈ ದೇವೆರೆ ರಾಜ್ಯೊಗು ದೂರ ಇಜ್ಜಾ,” ಅಂದ್‌ದ್ ಪಂಡೆ. ಆನಿಡ್ದಿಂಚಿ ಆಯನ್ ಪ್ರಶ್ನೆ ಮಲ್ಪೆರೆ ಏರೆಗ್ಲಾ ಧೈರ್ಯ ಬತ್ತಿಜಿ.</verse>
				<verse number="35">ಯೇಸು ದೇವಾಲಯೊಡು ಬೋಧನೆ ಮಲ್ತೊಂದುಪ್ಪುನಗ, ಪ್ರಶ್ನೆ ಮಲ್ತ್‌ದ್, “ಶಾಸ್ತ್ರಿಲು, ಬರೊಡಾಯಿ ಕ್ರಿಸ್ತನ್ ದಾವೀದನ ಮಗೆ ಅಂದ್‌ದ್ ಪನ್ಪೆರತ್ತಾ, ಅವು ಎಂಚ?</verse>
				<verse number="36">‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ತ್‌ದ್ ಪಾಡುನೆಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ.’ ದಾವೀದೆ ಪರಿಶುದ್ಧಾತ್ಮನ ಪ್ರೇರಣೆಡ್ದ್ ಪಂಡೆ,</verse>
				<verse number="37">ಅಂಚಾನಗ ದಾವೀದೆನೇ ಆಯನ್ ‘ಕರ್ತವ,’ ಅಂದ್‌ದ್ ಲೆಪ್ಪುನಗ, ಆಯೆ ಆಯಗ್ ಮಗೆ ಆಪಿನವು ಎಂಚ?” ಅಂದ್‌ದ್ ಯೇಸು ಅಕ್ಲೆಡ ಕೇಂಡೆ. ಅವುಲು ಇತ್ತಿನ ಮಲ್ಲ ಜನೊಕುಲೆನ ಗುಂಪು ಆಯನ ಪಾತೆರೊನು ಸಂತೋಷೊಡು ಕೇನೊಂದಿತ್ತೆರ್.</verse>
				<verse number="38">ಯೇಸು ಬೋಧನೆ ಮಲ್ತೊಂದುಪ್ಪುನಗ, “ಶಾಸ್ತ್ರಿಲೆ ಬಗೆಟ್ ಎಚ್ಚರಿಕೆ ಆದುಪ್ಪುಲೆ. ನೇಲ್ಯ ಅಂಗಿನ್ ಪಾಡೊಂದು ನಡಪುನವು, ಅಂಗಡಿ ಸಾದಿಲೆಡ್ ವಂದನೆಲು,</verse>
				<verse number="39">ಸಭಾಮಂದಿರೊಡು ಮಲ್ಲಸ್ಥಾನೊಲು, ಲೇಸ್‌ಲೆಡ್ ಸುರುತ್ತ ಪಂತೆ, ಉಂದೆನ್ ಮಾತ ಇಷ್ಟ ಮಲ್ಪುನಾಕುಲು ಆದುಲ್ಲೆರ್.</verse>
				<verse number="40">ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್. ತೋರಿಕೆಗಾದ್ ಉದ್ಧದ ಪ್ರಾರ್ಥನೆನ್ ಮಲ್ಪುವೆರ್, ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್,” ಅಂದ್‌ದ್ ಪಂಡೆ.</verse>
				<verse number="41">ಯೇಸು ದೇವಾಲಯದ ಕಾಣಿಕೆ ಪೆಟ್ಟಿಗೆದ ಎದುರುಡು ಕುಲ್ಲೊಂದು, ಜನೊಕುಲು ಕಾಣಿಕೆ ಪೆಟ್ಟಿಗೆಡ್ ಕಾಸ್ ಪಾಡುನೆನ್ ತೂವೊಂದಿತ್ತೆ. ಐಶ್ವರ್ಯವಂತೆರ್ ಮಸ್ತ್ ಕಾಸ್ ಪಾಡೊಂದಿತ್ತೆರ್.</verse>
				<verse number="42">ಒಂಜಿ ಬಡವೆದಿ ಕಂಡನಿ ಸೈದಿನಾಲ್ ಬತ್ತ್‌ದ್, ರಡ್ಡ್ ಕಾಸ್ ಅಂದ್ಂಡ ಒಂಜಿ ದುಗ್ಗಾಣಿ ಪಾಡಿಯಲ್.</verse>
				<verse number="43">ಅಪಗ ಯೇಸು ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಗ್, “ಕಾಣಿಕೆ ಪೆಟ್ಟಿಗೆಡ್ ಪಾಡಿನಾಕುಲೆಡ್ ಈ ಬಡ ವಿಧವೆ ಮಾತೆರೆಡ್ದ್ ಹೆಚ್ಚ್ ಪಾಡ್ದಲ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="44">ಎಂಚಂದ್ಂಡ ಮಾತೆರ್ ತನ್ಕುಲೆಗ್ ಒರಿದಿನೆಟ್ಟ್ ಪಾಡ್ದೆರ್. ಮೋಲಾಂಡಲಾ ತನ ಬಡತನೊಡ್ಲಾ ತನಡಿತ್ತಿನೆನ್ ಮಾತ ಪಾಡಿಯಲ್. ತನ ಬದ್‌ಕ್‌ನೇ ಕೊರ್ದು ಬುಡಿಯಲ್,” ಅಂದ್‌ದ್ ಪಂಡೆ.</verse>
			</chapter>
			<chapter number="13">
				<verse number="1">ಯೇಸು ದೇವಾಲಯೊನು ಬುಡ್ದು ಪೋವೊಂದುಪ್ಪುನಗ ಆಯನ ಶಿಷ್ಯೆರೆಡ್ ಒರಿ ಆಯಗ್, “ಗುರೂ ತೂಲ, ಏತ್ ಪೊರ್ಲುದ ಕಲ್ಲುಲು, ಏತ್ ಪೊರ್ಲುದ ಕಟ್ಟೊಣೊಲು,” ಅಂದ್‌ದ್ ಪಂಡೆ.</verse>
				<verse number="2">ಯೇಸು ಆಯಗ್, “ಈ ಮಲ್ಲ ಕಟ್ಟೊಣೊಲೆನ್ ತೂಪರತ್ತಾ? ನೆತ್ತ ಒಂಜಿ ಕಲ್ಲ್‌ಲಾ, ಒಂಜೆತ್ತ ಮಿತ್ತ್ ಒಂಜಿ ಉಪ್ಪಂದ್, ಮಾತಲಾ ಮಗ್‌ರ್ದ್ ತಿರ್ತ್ ಬೂರ್ದು ಪೋವು,” ಅಂದ್‌ದ್ ಪಂಡೆ.</verse>
				<verse number="3">ಬೊಕ್ಕ ಆಯೆ ಇಪ್ಪೆಗುಡ್ಡೆದ ಮಿತ್ತ್ ದೇವಾಲಯದ ಎದುರು ಕುಲ್ಲುದಿತ್ತಿನಪಗ ಪೇತ್ರೆ, ಯಾಕೋಬು, ಯೋಹಾನೆ, ಅಂದ್ರೆಯ ಮೊಕುಲು, “ಉಂದು ಏಪ ಆವು, ಅಂಚ ಆವನಗ ವಾ ಗುರ್ತ ತೋಜಿದ್ ಬರ್ಪುಂಡು ಎಂಕ್ಲೆಗ್ ಪನ್ಲ.” ಅಂದ್‌ದ್ ಆಯಡ ಪ್ರತ್ಯೇಕಾದ್ ಕೇಂಡೆರ್.</verse>
				<verse number="4"></verse>
				<verse number="5">ಯೇಸು ಅಕ್ಲೆಗ್ ಪಂಡಿನಿ ದಾನೆ ಪಂಡ, “ಏರಾಂಡಲಾ ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ತೂವೊನ್ಲೆ.</verse>
				<verse number="6">ದಾಯೆ ಪಂಡ ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಅಂದ್‌ದ್ ಏತೋ ಜನೊಕುಲೆನ್ ಮೋಸೊಡು ಪಾಡೆರ್.</verse>
				<verse number="7">ಉಂದತ್ತಂದೆ ಯುದ್ದೊಲು ಆಪಿನೆನ್ಲಾ ಯುದ್ದೊಲು ಆಪಿಲೆಕ್ಕ ಉಂಡು ಪನ್ಪಿ ಸುದ್ಧಿಲೆನ್ಲಾ ನಿಕುಲು ಕೇನ್ನಗ ಗಲಿಬಿಲಿ ಆವೊಡ್ಚಿ. ಇಂಚಿನ ಪರಿಸ್ಥಿತಿ ಆಪಿನವು ಅಗತ್ಯ, ಆಂಡಲಾ ಉಂದು ಅಂತ್ಯಕಾಲ ಅತ್ತ್.</verse>
				<verse number="8">ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು. ಭೂಕಂಪೊಲು ಅಲ್ಪಲ್ಪ ಆಪಿನವುಲಾ ಬರಗಾಲ ಬರ್ಪಿನವುಲಾ ಉಂದು ಮಾತ (ಪೊಸ ಯುಗ ಪುಟ್ಟುನ) ಪೆದ್ದುನಪಗ ಆಪಿ ಸುರುತ್ತ ಬೇನೆಲು.</verse>
				<verse number="9">“ನಿಕುಲು ನಿಕ್ಲೆನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್; ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಹಾಕೆರ್. ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ ಸಾಕ್ಷಿ ಆವರ್.</verse>
				<verse number="10">ಆಂಡ ಅವೆಡ್ದ್ ದುಂಬು ಮಾತ ಜನಾಂಗೊಲೆಗ್ ಸುವಾರ್ತೆ ಸಾರಿಯೊಡು.</verse>
				<verse number="11">ನಿಕ್ಲೆನ್ ನ್ಯಾಯಸಭೆಕ್ಕ್ ಪತ್ತೊಂದು ಪೋದು ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್‌ದ್ ಸುರುಟ್ಟೇ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ಕಾರಣ ಆಪಿ ಪಾತೆರೊನೆ ಪನ್ಲೆ. ದಾಯೆ ಪಂಡ ಅಪಗ ಪಾತೆರುನಾಕುಲು ನಿಕುಲತ್ತ್, ಪರಿಶುದ್ಧಾತ್ಮೆನೇ ನಿಕ್ಲೆಡ್ದ್ ಪಾತೆರುವೆ.</verse>
				<verse number="12">ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್.</verse>
				<verse number="13">ಬೊಕ್ಕ ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.</verse>
				<verse number="14">“ಉಂದತ್ತಂದೆ ಹಾಳ್ ಮಲ್ಪುನ ಪೇಸಿಗೆ ವಸ್ತುಲು ಉಂತಂದಿ ಜಾಗ್‌ಡ್ ಉಂತುದಿನೆನ್ ನಿಕುಲು ತೂವನಗ, (ಉಂದೆನ್ ಓದುನಾಯೆ ತೆರಿಯೊನಡ್). ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್.</verse>
				<verse number="15">ಮಾಳಿಗೆಡ್ ಉಪ್ಪುನಾಯೆ ತಿರ್ತ್ ಜತ್ತ್‌ದ್ ಇಲ್ಲದುಲಯಿ ಪೋವಂದೆ, ತನ ಇಲ್ಲದುಲಯಿಡ್ದ್ ದಾದಾಂಡಲಾ ದೆತ್ತೊನಂದೆ ಉಪ್ಪಡ್.</verse>
				<verse number="16">ಕಂಡೊಡು ಉಪ್ಪುನಾಯೆ ತನ ಪೊದೆಪುನು ದೆತ್ತೊನಿಯೆರೆ ಪಿರ ಪೋವಂದೆ ಉಪ್ಪಡ್.</verse>
				<verse number="17">ಆಂಡ ಆ ದಿನೊಟು ಬಂಜಿನಾಕುಲೆಗ್ಲಾ ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್.</verse>
				<verse number="18">ಆ ದಿನೊಕುಲು ಸಂಕಟದ ದಿನೊಕುಲು ಆಯಿನೆಡ್ದ್ ಉಂದು ಮಾತ ಚಳಿಕಾಲೊಡು ಆವೆರೆ ಬಲ್ಲಿ ಅಂದ್‌ದ್ ಪ್ರಾರ್ಥನೆ ಮಲ್ಪುಲೆ. ಅಂಚಿನ ಸಂಕಟ ದೇವೆರ್ ಈ ಲೋಕದ ಸೃಷ್ಟಿದ ಆರಂಭದ ದಿನೊಡ್ದು ಇನಿ ಮುಟ್ಟಲಾ ಆತಿಜಿ. ನನ ಮಿತ್ತ್‌ಗ್ಲಾ ಆವಂದ್.</verse>
				<verse number="19"></verse>
				<verse number="20">ಕರ್ತವೆ ಆ ದಿನೊಕುಲೆನ್ ಕಡಿಮೆ ಮಲ್ತ್‌ಜೆಡ, ಒಂಜಿ ನರಪ್ರಾಣಿಲಾ ಬದ್‌ಕಂದ್. ಆಂಡ ತಾನ್ ಅಜತ್ ದೆತ್ತೊಂಡಿನಾಕುಲೆಗಾದ್ ಆ ದಿನೊಕುಲೆನ್ ಕಡಿಮೆ ಮಲ್ತ್‌ದೆ.</verse>
				<verse number="21">“ಅಪಗ ಏರಾಂಡಲಾ ನಿಕ್ಲೆಗ್, ‘ಇಂದಾ, ಕ್ರಿಸ್ತೆ ಮೂಲು ಉಲ್ಲೆ,’ ಇಂದಾ, ‘ಅಲ್ಪ ಉಲ್ಲೆ,’ ಅಂದ್‌ದ್ ಪಂಡೆರ್ಡ ನಂಬಡೆ.</verse>
				<verse number="22">ದಾಯೆಗಂದ್ಂಡ, ಸುಳ್ಳು ಕ್ರಿಸ್ತೆರ್ಲಾ ಸುಳ್ಳು ಪ್ರವಾದಿಲುಲಾ ತೋಜಿದ್ ಬರ್ವೆರ್. ಸಾದ್ಯ ಇತ್ತ್ಂಡ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ಲಾ ಮೋಸೊಡು ಪಾಡಿಯೆರೆಗಾದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಮಲ್ತ್‌ದ್ ತೋಜಪಾವೆರ್.</verse>
				<verse number="23">ನಿಕುಲು ಜಾಗ್ರತೆಡ್ ಉಪ್ಪುಲೆ, ಉಂದೆನ್ ಮಾತೆನ್ಲಾ ಸುರುಟ್ಟೆ ಪನ್ತೆ.</verse>
				<verse number="24">“ಉಂದತ್ತಂದೆ ಆ ದಿನೊಕುಲೆಡ್ ಆ ಸಂಕಟ ತೀರಿ ಬೊಕ್ಕ, ಸೂರ್ಯೆ ಕತ್ತಲೆ ಆದ್ ಪೋವು, ಚಂದ್ರೆ ಬೊಲ್ಪು ಕೊರಂದ್,</verse>
				<verse number="25">ನಕ್ಷತ್ರೊಲು ಬಾನೊಡ್ದು ತಾಲ್ದ್ ಬೂರು ಬಾನದ ಬಲೊಲು ಪಂದ್‌ದ್ ಪೋವು.</verse>
				<verse number="26">ಅಪಗ ನರಮಾನಿ ಮಗೆ ಬಾರಿ ಬಲೊಟ್ಲಾ ಮೈಮೆಡ್ಲಾ ಮುಗಲ್‌ಲೆಡ್ ಬರ್ಪಿನೆನ್ ತೂಪರ್.</verse>
				<verse number="27">ಬೊಕ್ಕ ಆಯೆ ತನ ದೂತೆರೆನ್ ಕಡಪುಡ್ದು, ಭೂಮಿಡ್ದ್ ಬಾನದ ಕೊಡೀಕಡೆ ಮುಟ್ಟ, ದೇವೆರ್ ಅಜತ್ ದೆತ್ತೊಂಡಿನಾಕುಲೆನ್ ನಾಲ್ ದಿಕ್ಕ್‌ಲೆಡ್ದ್ ಒಟ್ಟು ಕೂಡಾವೆರ್.</verse>
				<verse number="28">“ಅಂಜೂರದ ಮರತ ಉಪಕತೆಡ್ದ್ ಬುದ್ಧಿ ಕಲ್ತೊನ್ಲೆ. ಐತ ಗೆಲ್ಲ್ ನನಲಾ ಲತ್ತ್ ಇತ್ತ್‌ದ್ ಇರೆ ಬುಡ್ನಗ ಅರೆಗಾಲ ಕೈತಲಾಂಡ್ ಅಂದ್‌ದ್ ತೆರಿಯೊನ್ವರ್.”</verse>
				<verse number="29">ಅಂಚೆನೇ ನಿಕುಲುಲಾ ಉಂದು ಮಾತ ಆಪಿನೆನ್ ತೂನಗ, ಗಳಿಗೆ ಕೈತಲುಂಡು, ಬಾಕಿಲ್‌ದಲ್ಪನೇ ಉಂಡು ಅಂದ್‌ದ್ ತೆರಿಯೊನ್ಲೆ.</verse>
				<verse number="30">ಉಂದು ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="31">ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.</verse>
				<verse number="32">“ಉಂದತ್ತಂದೆ ಆ ದಿನತ ಬಗೆಟಾವಡ್ ಆ ಗಳಿಗೆದ ಬಗೆಟಾವಡ್ ಎನ ಅಮ್ಮೆರೆಗ್ ತೆರಿಯು ಅತ್ತಂದೆ ಬೊಕ್ಕ ಏರೆಗ್ಲಾ ತೆರಿಯಂದ್. ಪರಲೋಕೊಡುಪ್ಪು ದೂತೆರೆಗ್ಲಾ ತೆರಿಯಂದ್, ಮಗಕ್ಲಾ ತೆರಿಯಂದ್.</verse>
				<verse number="33">ಆ ಕಾಲ ಏಪ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ.</verse>
				<verse number="34">ಒರಿ ನರಮಾನಿ ತನ ಇಲ್ಲನ್ ಬುಡ್ದು ಬೇತೆ ಒಂಜಿ ದೇಶೊಗು ಪೋನಗ, ತನ ಬೇಲೆದಾಕುಲೆಗ್ ಇಲ್ಲದ ಅಧಿಕಾರೊನು ಒಪ್ಪಿಯಾದ್ ಕೊರ್ದು, ಪ್ರತಿ ಒರಿಯಗ್ ಆಯಾಯನ ಬೇಲೆನ್ ನೇಮಕ ಮಲ್ತ್‌ದ್, ಬಾಕಿಲ್ ಕಾಪುನಾಯನ್ ಲೆತ್ತ್‌ದ್, ಈ ಎಚ್ಚರಿಕೆ ಆದುಪ್ಪೊಡು ಅಂದ್‌ದ್ ಅಪ್ಪಣೆ ಕೊರಿ ಲೆಕ್ಕ ಆದುಂಡು.</verse>
				<verse number="35">ಇಲ್ಲದ ಯಜಮಾನೆ ಬೈಯಡಾವಡ್, ಮದ್ಯ ರಾತ್ರೆಡಾವಡ್, ಕೋರಿ ಕಿಲೆಪುನಗಾವಡ್, ಪುಲ್ಯ ಕಾಂಡೆಡಾವಡ್ ಏಪ ಬರ್ಪೆನಾ ನಿಕ್ಲೆಗ್ ಗೊತ್ತುದಾಂತೆ ಉಪ್ಪುನೆಡ್ದ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="36">ಆಯೆ ಪಕ್ಕನೆ ಬತ್ತೆಡ, ನಿಕುಲು ನಿದ್ರೆಡ್ ಉಪ್ಪುನೆನ್ ಆಯೆ ತೂವೆರೆ ಬಲ್ಲಿ.</verse>
				<verse number="37">ಯಾನ್ ನಿಕ್ಲೆಗ್ ಪಂತಿನೆನೇ ಮಾತೆರೆಗ್ಲಾ ಪನ್ಪೆ, ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.</verse>
			</chapter>
			<chapter number="14">
				<verse number="1">ಪಸ್ಕ ಬೊಕ್ಕ ಪುಳಿದಾಂತಿನ ರೊಟ್ಟಿದ ಪರ್ಬ ಬರಿಯೆರೆಗ್ ನನಲಾ ರಡ್ಡ್ ದಿನ ಉಪ್ಪುನಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಉಪಾಯೊಡು ಪತ್ತ್‌ದ್ ಕೆರಿಯೆರೆ ಸಾದಿನ್ ನಾಡೊಂದಿತ್ತೆರ್.</verse>
				<verse number="2">ದಾಯೆಗಂದ್ಂಡ, “ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗೌಜಿ ಆವು,” ಅಂದ್‌ದ್ ಪಾತೆರೊಂಡೆರ್.</verse>
				<verse number="3">ಆಯೆ ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತ್‌ದ್, ವಣಸ್‌ಗ್ ಕುಲ್ಲುದುಪ್ಪುನಗ, ಒರ್ತಿ ಪೊಂಜೊವು ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್, ಅವೆನ್ ಪುಡತ್‌ದ್, ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್.</verse>
				<verse number="4">ಆಂಡ ಕೆಲೆವೆರ್ ಕೋಪೊಡು, “ಈ ಎಣ್ಣೆನ್ ಹಾಳ್ ದಾಯೆಗ್ ಮಲ್ತ?</verse>
				<verse number="5">ಈ ಎಣ್ಣೆನ್ ಮುನ್ನೂದು ಕಾಸ್‌ಡ್ದ್ ಹೆಚ್ಚ್ ಬಿಲೆಕ್ ಮಾರ್ದ್, ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಆಲೆಗ್ ಕುಚ್ಚೊಂಡೆರ್.</verse>
				<verse number="6">ಆಂಡ ಯೇಸು, “ಆಲೆನ್ ಬುಡ್ಲೆ. ಮೊಲೆಗ್ ದಾಯೆಗ್ ತೊಂದರೆ ಕೊರೊಂದುಲ್ಲರ್. ಮೋಲು ಎಂಕ್ ಎಡ್ಡೆಂತಿ ಬೇಲೆ ಮಲ್ತಲ್.</verse>
				<verse number="7">ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್. ನಿಕ್ಲೆಗ್ ಮನಸ್ ಬತ್ತಿನಪಗ ಅಕ್ಲೆಗ್ ಉಪಕಾರ ಮಲ್ಪೊಲಿ. ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ.</verse>
				<verse number="8">ಮೋಲು ತನ್ಕ್ ತೀರಿನಾತ್ ಮಲ್ತ್‌ದಲ್. ಸೈತಿ ಬೊಕ್ಕ ಮಲ್ಪು ಕ್ರಿಯೊಲೆನ್ ಇತ್ತೆನೇ ಎನ ಮೆಯಿಕ್ ಈ ಎಣ್ಣೆನ್ ಪೂಜಿಯಲ್.</verse>
				<verse number="9">ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ, ಅಲ್ಪಲ್ಪ ಮೋಲು ಮಲ್ತಿನೆನ್, ಆಲೆನ ನೆನೆಪುಗಾದ್ ಪನ್ವೆರ್, ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.” ಅಂದ್‌ದ್ ಪಂಡೆ.</verse>
				<verse number="10">ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ, ಯೇಸುನು ಪ್ರಧಾನಯಾಜಕೆರೆಗ್ ಪತ್ತ್‌ದ್ ಕೊರೊಡು ಪಂಡ್ದ್, ಅಕ್ಲೆನ ಕೈತಲ್‌ ಪೋಯೆ.</verse>
				<verse number="11">ಅಕುಲು ಕೇಂಡ್ದ್ ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಪಾತೆರ ಕೊರಿಯೆರ್. ಅಪಗ ಆಯೆ, ಆಯನ್ ಎಂಚ ಪತ್ತ್‌ದ್ ಕೊರ್ಪಿನಿ ಅಂದ್‌ದ್ ಸಮಯೊನು ತೂವೊಂದಿತ್ತೆ.</verse>
				<verse number="12">ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನ ಅಂದ್ಂಡ ಪಸ್ಕದ ಕುರಿನ್ ಬಲಿ ಕೊರ್ಪಿನ ದಿನೊಟು ಆಯನ ಶಿಷ್ಯೆರ್, “ಪಸ್ಕದ ವಣಸ್ ಮಲ್ಪೆರೆಗಾದ್ ಎಂಕುಲು ಓಲು ಪೋದು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”</verse>
				<verse number="13">ಆಯೆ ತನ ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್, “ನಿಕುಲು ಪೇಂಟೆದುಲಯಿ ಪೋಲೆ. ಅಲ್ಪ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ನಿಕುಲು ಆಯನ ಬೆರಿಯೆ ಪೋಲೆ.</verse>
				<verse number="14">ಆಯೆ ವಾ ಇಲ್ಲಗ್ ಪೋಪೆನಾ ಆ ಇಲ್ಲದ ಯಜಮಾನಗ್, ‘ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ತನ್ಕ್ ಕೋಣೆ ಓಲು ಉಂಡು?’ ಅಂದ್‌ದ್ ಕೇನ್ವೆ ಅಂದ್‌ದ್ ಪನ್ಲೆ.</verse>
				<verse number="15">ಆಯೆ ತಕ್ಕ ಸಾಮಾನ್‌ಲೆನ್ ತಯಾರ್ ಮಲ್ತ್‌ದ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ನಂಕ್ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಅಕ್ಲೆನ್ ಕಡಪುಡ್ದು ಕೊರಿಯೆ.</verse>
				<verse number="16">ಶಿಷ್ಯೆರ್‌ ಪಿದಾಡ್ದ್ ಪೇಂಟೆಗ್ ಪೋದು ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.</verse>
				<verse number="17">ಬೈಯದಗ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ಬತ್ತೆ.</verse>
				<verse number="18">ಅಕುಲು ಕುಲ್ಲೊಂದು ವಣಸ್ ಮಲ್ತೊಂದುಪ್ಪುನಗ, ಯೇಸು, “ಎನಡೊಪ್ಪ ವಣಸ್ ಮಲ್ಪುನಾಯೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ ಅಂದ್‌ದ್ ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ.”</verse>
				<verse number="19">ಅಪಗ ಅಕುಲು ಬೇಜಾರ್ ಮಲ್ತ್‌ದ್, “ಯಾನತ್ತತ್ತಾ ಯಾನತ್ತತ್ತಾ,” ಅಂದ್‌ದ್ ಒರಿ ಒರಿ ಆಯಡ ಕೇನಿಯೆರೆ ಸುರು ಮಲ್ತೆರ್.</verse>
				<verse number="20">ಐಕ್ ಯೇಸು ಅಕ್ಲೆಡ, “ಎನ ಪದ್ರಾಡ್ ಶಿಷ್ಯೆರೆಡ್ ಒರಿ. ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ.</verse>
				<verse number="21">ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ. ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ. ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್,” ಅಂದ್‌ದ್ ಪಂಡೆ.</verse>
				<verse number="22">ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ದೆತ್ತೊನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.</verse>
				<verse number="23">ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, ಅಕುಲು ಮಾತೆರ್ ಐಟ್ಟ್ ಪರಿಯೆರ್.</verse>
				<verse number="24">ಬೊಕ್ಕ ಯೇಸು ಅಕ್ಲೆಡ, “ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್.</verse>
				<verse number="25">ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ದೇವೆರೆ ರಾಜ್ಯೊಡು ಪೊಸತ್ತಾದ್ ಪರ್ಪಿನ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ,” ಅಂದ್‌ದ್ ಪಂಡೆ.</verse>
				<verse number="26">ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್, ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.</verse>
				<verse number="27">ಅಪಗ ಯೇಸು ಅಕ್ಲೆಡ, “ನಿಕುಲು ಮಾತೆರ್ಲಾ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, ‘ಯಾನ್, ಕುರುಬಗ್ ಹಾಕುವೆ, ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ.</verse>
				<verse number="28">ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.</verse>
				<verse number="29">ಪೇತ್ರೆ ಆಯಗ್, “ಮಾತೆರ್ಲಾ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಪಿರಜಾರಯೆ,” ಅಂದ್‌ದ್ ಪನ್ನಗ,</verse>
				<verse number="30">ಯೇಸು, “ನಿಕ್ಕ್ ನಿಜಾದ್ ಪನ್ಪೆ ಇನಿತ ರಾತ್ರೆಡೇ ಕೋರಿ ರಡ್ಡ್ ಸರ್ತಿ ಕಿಲೆಪುನೆಡ್ದ್ ದುಂಬೇ ಈ ಎನನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.</verse>
				<verse number="31">ಆಂಡ ಆಯೆ, “ಯಾನ್ ನಿನ ಒಟ್ಟುಗು ಸೈಯೊಡಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ ಪಂಡ್ದ್ ಕಂಡಿತಾದ್ ಪಂಡೆ,” ಅಂಚೆನೇ ಮಾತೆರ್ಲಾ ಪಂಡೆರ್.</verse>
				<verse number="32">ಅಕುಲು ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಆಯೆ ತನ ಶಿಷ್ಯೆರೆಗ್, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ,” ಅಂದ್‌ದ್ ಪಂಡೆ.</verse>
				<verse number="33">ಪೇತ್ರೆ, ಯಾಕೋಬು ಬೊಕ್ಕ ಯೋಹಾನೆರೆನ್ ಯೇಸು ತನಡೊಪ್ಪ ಲೆತ್ತೊಂದು ಪೋಯೆ. ಅವುಲು ಆಯೆ ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ.</verse>
				<verse number="34">ಬೊಕ್ಕ ಯೇಸು ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡ್ದ್ ಒಂತೆ ದೂರ ಪೋದು</verse>
				<verse number="35">ನೆಲತ್ತ ಮಿತ್ತ್ ಅಡ್ಡಬೂರ್ದು, ಸಾದ್ಯ ಆಂಡ ಆ ಗಳಿಗೆ ತನಡ್ದ್ ದೂರ ಆಪಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ತೆ.</verse>
				<verse number="36">“ಅಮ್ಮೆರೇ, ಎನ ಅಮ್ಮೆರೇ, ನಿಕ್ಕ್ ಮಾತಲಾ ಸಾದ್ಯ ಉಂಡು, ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ. ಆಂಡಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.</verse>
				<verse number="37">ಐಡ್ದ್ ಬೊಕ್ಕ ಆಯೆ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಸೀಮೋನಾ, ನಿದ್ರೆ ಮಲ್ತೊಂದುಲ್ಲನಾ? ಒಂಜಿ ಗಳಿಗೆ ಆಂಡಲಾ ಎಚ್ಚರಿಕೆ ಆದುಪ್ಪೆರೆ ತೀರುಜಾ?”</verse>
				<verse number="38">“ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ; ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.</verse>
				<verse number="39">ಕುಡ ಪೋದು ಅವ್ವೇ ಪಾತೆರೊನು ಪನೊಂದು ಪ್ರಾರ್ಥನೆ ಮಲ್ತೆ.</verse>
				<verse number="40">ಯೇಸು ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್. ಕುಡೊರ ಕೇಂಡಿನೆಕ್ಕ್ ದಾದ ಉತ್ತರ ಕೊರೊಡು ಅಂದ್‌ದ್ ಅಕ್ಲೆಗ್ ತೆರಿಜಿ.</verse>
				<verse number="41">ಆಯೆ ಮೂಜನೆ ಸರ್ತಿ ಬತ್ತ್‌ದ್ ಅಕ್ಲೆಗ್, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಯಾವು, ಗಳಿಗೆ ಕೈತಲ್‌ ಬತ್ತ್ಂಡ್. ತೂಲೆ, ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್.</verse>
				<verse number="42">ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.</verse>
				<verse number="43">ಆಯೆ ನನಲಾ ಪಾತೆರೊಂದುಪ್ಪುನಗನೇ ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಪನ್ಪಿನಾಯೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಗುಂಪು, ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್.</verse>
				<verse number="44">ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ. ಆಯನ್ ಪತ್ತ್‌ದ್ ಜಾಗ್ರತೆಡ್ ಪತ್ತೊಂದು ಪೋಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರ್ದಿತ್ತೆ.</verse>
				<verse number="45">ಅಂಚೆನೇ ಯೂದೆ ಅಡೆಗ್ ಬತ್ತಿ ಕೂಡ್ಲೆ, ಆಯೆ ಯೇಸುನ ಕೈತಲ್‌ ಬತ್ತ್‌ದ್, “ಗುರೂ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.</verse>
				<verse number="46">ಅಕುಲು ಆಯನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.</verse>
				<verse number="47">ಯೇಸುನ ಕೈತಲ್‌ಡ್ ಉಂತುದಿನಾಕುಲೆಡ್ದ್ ಒರಿ ತನ ಕತ್ತಿ ಬೇರ್ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಕೆಬಿನ್ ಕಡ್ತ್‌ದ್ ಬುಡಿಯೆ.</verse>
				<verse number="48">ಅಪಗ ಯೇಸು ಅಕ್ಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ?</verse>
				<verse number="49">ಯಾನ್ ದಿನಾಲ ದೇವಾಲಯೊಡು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್; ಆಂಡ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="50">ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.</verse>
				<verse number="51">ಒರಿ ಜವನೆ ಬಜೀ ಮೆಯಿಕ್ ನಾರ್‌ಮಡಿತ ಕುಂಟುನು ಪೊದೆತೊಂದು ಯೇಸುನ ಬೆರಿಯೆ ಬರೊಂದಿತ್ತೆ. ಸಿಪಾಯಿಲು ಆಯನ್ ಪತ್ತ್‌ನಗ,</verse>
				<verse number="52">ಆಯೆ ಆ ನಾರ್‌ಮಡಿತ ಕುಂಟುನು ಬುಡ್ದು ಬಜೀ ಮೆಯಿಟ್ ಬಲ್ತ್ ಪೋಯೆ.</verse>
				<verse number="53">ಬೊಕ್ಕ ಅಕುಲು ಯೇಸುನು ಪ್ರಧಾನಯಾಜಕನ ಕೈತಲ್‌ ಲೆತ್ತೊಂದು ಪೋಯೆರ್. ಅವುಲು ಪ್ರಧಾನಯಾಜಕೆರ್‌ಲು, ಹಿರಿಯಾಕುಲು, ಶಾಸ್ತ್ರಿಲು ಮಾತೆರ್ಲಾ ಸೇರ್ದ್ ಬತ್ತೆರ್.</verse>
				<verse number="54">ಬೊಕ್ಕ ಪೇತ್ರೆ ದೂರೊಡ್ದು ಯೇಸುನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್‌ದ ಉಲಯಿ ಬತ್ತ್‌ದ್ ಪಾರದಾಕುಲೆಡೊಪ್ಪ ತೂತ ಎದುರುಡು ಕುಲ್ಲೊಂದು ಚಳಿ ಕಾಯ್ತೊಂದಿತ್ತೆ.</verse>
				<verse number="55">ಅಪಗ ಪ್ರಧಾನಯಾಜಕೆರ್‌ಲಾ, ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್. ಆಂಡ ದಾಲಾ ತಿಕ್ಕ್‌ಜಿ.</verse>
				<verse number="56">ಮಸ್ತ್ ಜನ ಬತ್ತ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್ಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.</verse>
				<verse number="57">ಕೆಲೆವೆರ್ ಲಕ್ಕ್‌ದ್ ಉಂತುದು, “ನರಮಾನಿನ ಕೈಡ್ದ್ ಕಟ್ಟ್‌ದಿನ ಈ ದೇವಾಲಯೊನು, ‘ಯಾನ್ ಮಗ್ತ್ ಪಾಡ್ದ್, ನರಮಾನಿನ ಕೈಡ್ದ್ ಕಟ್ಟಂದಿನ ಬೊಕ್ಕೊಂಜಿ ದೇವಾಲಯೊನು ಮೂಜಿ ದಿನತ ಉಲಯಿ ಕಟ್ಟುವೆ,’ ಪಂಡ್ದ್ ಪನ್ತಿನೆನ್ ಎಂಕುಲು ಕೇಂಡ್ದ.” ಅಂದ್‌ದ್ ಆಯನ ಮಿತ್ತ್ ಸುಳ್ಳು ಸಾಕ್ಷಿ ಪಂಡೆರ್.</verse>
				<verse number="58"></verse>
				<verse number="59">ಎಂಚಿನ ಪಂಡ್‌ಂಡಲಾ ಅಕ್ಲೆನ ಸಾಕ್ಷಿ ಒಂಜೇಲೆಕ್ಕ ಇತ್ತ್‌ಜಿ.</verse>
				<verse number="60">ಅಪಗ ಪ್ರಧಾನಯಾಜಕೆ ಲಕ್ಕ್‌ದ್ ನಡುಟು ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು?” ಅಂದ್‌ದ್ ಯೇಸುಡ ಪ್ರಶ್ನೆ ಮಲ್ತೆ.</verse>
				<verse number="61">ಆಂಡ ಯೇಸು ಮನಿಪಂದೆ ಇತ್ತ್‌ದ್, ದಾಲಾ ಉತ್ತರ ಕೊರ್ಜೆ. ಕುಡ ಪ್ರಧಾನಯಾಜಕೆ ಆಯಡ, “ಈ ಕ್ರಿಸ್ತೆನಾ, ಪುಗರ್ತೆಗ್ ತಕ್ಕಾದುಪ್ಪು ದೇವೆರೆ ಮಗೆನಾ?” ಅಂದ್‌ದ್ ಕೇನ್ನಗ,</verse>
				<verse number="62">ಯೇಸು, “ಯಾನ್ ಆಯೆನೇ, ಉಂದತ್ತಂದೆ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ ಬಾನದ ಮುಗಲ್‌ದೊಟ್ಟಿಗೆ ಬರ್ಪುನೆನ್ಲಾ ತೂವರ್,” ಪಂಡೆ.</verse>
				<verse number="63">ಉಂದೆನ್ ಕೇಂಡ್ದ್ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು?</verse>
				<verse number="64">ಆಯೆ ಮಲ್ತಿನ ದೂಷಣೆನೆನ್ ಕೇಂಡರತ್ತಾ? ನಿಕ್ಲೆಗ್ ಎಂಚ ತೋಜುಂಡು,” ಪಂಡಿನಪಗ, ಅಕುಲು ಮಾತೆರ್ಲಾ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ತೀರ್ಪು ಮಲ್ತೆರ್.</verse>
				<verse number="65">ಐಡ್ದ್ ಬೊಕ್ಕ ಕೆಲೆವೆರ್ ಆಯನ ಮಿತ್ತ್ ಉಬ್ಬಿದ್, ಮೋನೆಗ್ ಮುಸ್ಕು ಪಾಡ್ದ್ ಗುದ್ದುದು, “ನಿಕ್ಕ್ ಗುದ್ದಿನಾಕುಲು ಏರಂದ್‌ದ್ ಪ್ರವಾದನೆ ಪನ್ಲ.” ಬೊಕ್ಕ ಪಾರದಾಕುಲು ಆಯನ್ ಲೆತ್ತೊಂದು ಪೋದು ಆಯನ ಕೆಪ್ಪೆಗ್ ಪೆಟ್ಟ್ ಹಾಕ್‌ದ್ ತನ್ಕ್‌ಲೆ ವಶೊಕು ದೆತ್ತೊಂಡೆರ್.</verse>
				<verse number="66">ಇಂಚಿಡ್ದ್ ಪೇತ್ರೆ ತಿರ್ತ್ ಜಾಲ್‌ಡ್ ಇತ್ತಿನಪಗ ಪ್ರಧಾನಯಾಜಕನ ಚಾಕ್ರಿದಾಲ್ ಒರ್ತಿ ಬತ್ತ್‌ದ್</verse>
				<verse number="67">ಪೇತ್ರೆ ಚಳಿ ಕೈತೊಂದಿತ್ತಿನೆನ್ ತೂದು, “ಈಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ ಅತ್ತಾ?” ಅಂದ್‌ದ್ ಪಂಡಲ್.</verse>
				<verse number="68">ಆಂಡ ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್, ಅರ್ಥಲಾ ಆವೊಂದಿಜ್ಜಿ” ಅಂದ್‌ದ್ ಪಿದಯಿದ ಜಾಲ್‌ಗ್ ಪೋಯೆ. (ಅಪಗ ಕೋರಿ ಕಿಲೆತ್ತ್ಂಡ್).</verse>
				<verse number="69">ಅಲ್ಪ ಚಾಕ್ರಿದಾಲ್ ಆಯನ್ ತೂದು, ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ಅಕ್ಲೆಡ್ ಒರಿ ಅಂದ್‌ದ್ ಪನಿಯೆರೆ ಸುರು ಮಲ್ತೊಲು,”</verse>
				<verse number="70">ಆಯೆ ಕುಡ ಆರೆಂಜಿಯೆ. ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ಈ ಗಲಿಲಾಯದಾಯೆನೇ.” ಅಂದ್‌ದ್ ಪಂಡೆರ್.</verse>
				<verse number="71">ಆಂಡ ಆಯೆ, “ನಿಕುಲು ಪನ್ಪಿನ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡೊನಿಯೆರೆಗ್ಲಾ ಸುರು ಮಲ್ತೆ.</verse>
				<verse number="72">ಅಪಗನೆ ಕೋರಿ ರಡ್ಡನೆ ಸರಿ ಕಿಲೆತ್ತ್ಂಡ್. ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ತನ್ಕ್ ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಆ ಬಗೆಟ್ ಎನ್ನ್‌ದ್ ಬುಲ್ತೆ.</verse>
			</chapter>
			<chapter number="15">
				<verse number="1">ಬೊಲ್ಪಾಯಿ ಕೂಡ್ಲೆ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯಾಕುಲುಲಾ, ಶಾಸ್ತ್ರಿಲುಲಾ, ಹಿರಿಸಭೆತಾಕುಲುಲಾ ಮಾತೆರ್ಲಾ ಒಟ್ಟು ಸೇರ್ದ್ ಪಂಚಾತಿಕೆ ಮಲ್ತ್‌ದ್ ಯೇಸುನ ಕೈಕಟ್ಟ್‌ದ್ ಲೆತ್ತೊಂದು ಪೋದು ಪಿಲಾತಗ್ ಒಚ್ಚಿದ್ ಕೊರಿಯೆರ್.</verse>
				<verse number="2">ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ “ಈಯೆ ಪನೊಂದುಲ್ಲತ್ತಾ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="3">ಪ್ರಧಾನಯಾಜಕೆರ್ ಆಯನ ಮಿತ್ತ್ ಮಸ್ತ್ ದೂರು ಪನೊಂದಿತ್ತೆರ್. ಅಪಗ ಪಿಲಾತೆ ಕುಡೊರ ಕೇನ್ವೆ, “ಈ ದಾಲಾ ಉತ್ತರ ಕೊರ್ಪುಜನಾ? ತೂಲ, ಮೊಕುಲು ನಿನ ಮಿತ್ತ್ ಏತ್ ದೂರು ಪಾಡೊಂದುಲ್ಲೆರ್.”</verse>
				<verse number="4"></verse>
				<verse number="5">ಆಂಡ ಯೇಸು ದಾಲಾ ಪಾತೆರಿಜೆ. ಅವೆನ್ ತೂದು ಪಿಲಾತಗ್ ಅಚ್ಚಿರ ಆಂಡ್.</verse>
				<verse number="6">ಪ್ರತಿ ವರ್ಸ ಪರ್ಬದಾನಿ ಜನೊಕುಲು ನಟ್ಟೊಂಡಿಲೆಕ್ಕ ಸೆರೆಮನೆಡ್ದ್ ಒರಿಯನ್ ಬುಡ್ದು ಕೊರ್ಪಿನವು ಪಿಲಾತನ ಅಧಿಕಾರೊಡು ಒಂಜಿ ಕ್ರಮ ಇತ್ತ್ಂಡ್.</verse>
				<verse number="7">ಅಪಗ ಬರಬ್ಬೆ ಪನ್ಪಿನಾಯೆ ಒರಿ ಇತ್ತೆ, ಆಯನ್ ಲಡಯಿಡ್ ಮಾನೆ ಕೆರ್ಪಿನಾಕುಲೆಡೊಪ್ಪ ಸೆರೆಮನೆಡ್ ಪಾಡ್ದ್ ಇತ್ತೆರ್.</verse>
				<verse number="8">ಜನೊಕುಲು ಪಿಲಾತನ ಕೈತಲ್‌ ಪೋದು, “ಈ ಎಂಕ್ಲೆಗ್ ಮಲ್ತೊಂದು ಬತ್ತಿಲೆಕ್ಕ ಒರಿಯನ್ ಬುಡುಗಡೆ ಮಲ್ತ್‌ದ್ ಕೊರೊಡು,” ಅಂದ್‌ದ್ ಕೇನೊಂದಿತ್ತೆರ್.</verse>
				<verse number="9">ಪ್ರಧಾನಯಾಜಕೆರ್ ಕಿಚ್ಚಿಮಚ್ಚರೊಡು ಯೇಸುನು ಒಚ್ಚಿದ್ ಕೊರ್ತೆರ್ ಅಂದ್‌ದ್ ಪಿಲಾತಗ್ ಗೊತ್ತಾಯಿನೆಡ್ದ್, “ಯಾನ್ ಯೆಹೂದ್ಯೆರೆ ಅರಸುನು ನಿಕ್ಲೆಗ್ ಬುಡ್ದು ಕೊರೊಡಾ?” ಅಂದ್‌ದ್ ಅಕ್ಲೆಡ ಕೇಂಡೆ.</verse>
				<verse number="10"></verse>
				<verse number="11">ಅಲ್ಪ ಪ್ರಧಾನಯಾಜಕೆರ್ ಬರಬ್ಬನೇ ಬುಡ್ದು ಕೊರೊಡು ಅಂದ್‌ದ್ ಜನೊಕುಲೆನ್ ಲಕ್ಕಾಯೆರ್.</verse>
				<verse number="12">ಐಕ್ ಪಿಲಾತೆ ಕುಡ ಅಕ್ಲೆಡ, “ಅಂಚಾಂಡ ನಿಕುಲು ಪನ್ಪಿನ ಯೆಹೂದ್ಯೆರೆ ಅರಸುನು ಯಾನ್ ದಾನೆ ಮಲ್ಪೊಡು?” ಅಂದ್‌ದ್ ಕೇನ್ನಗ ಅಕುಲು,</verse>
				<verse number="13">“ಆಯನ್ ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಕುಡ ಬೊಬ್ಬೆ ಪಾಡಿಯೆರ್.</verse>
				<verse number="14">ಐಕ್ ಪಿಲಾತೆ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ?” ಪಂಡೆ. ಆಂಡ ಅಕುಲು, “ಆಯನ್ ಕ್ರುಸ್ಸುಗು ಪಾಡ್ಪಾಲ,” ಪಂಡ್ದ್ ಬೊಕ್ಕಲಾತ್ ಬೊಬ್ಬೆ ಪಾಡಿಯೆರ್.</verse>
				<verse number="15">ಐಕ್ ಪಿಲಾತೆ ಜನೊಕುಲೆ ಮನಸ್‌ನ್ ಸಮಾಧಾನ ಮಲ್ಪೊಡು ಪಂಡ್ದ್, ಬರಬ್ಬನ್ ಅಕ್ಲೆಗ್ ಬುಡ್ದು ಕೊರ್ದು, ಯೇಸುನು ಚಾಟಿಡ್ ಹಾಕಾದ್, ಕ್ರುಸ್ಸುಗು ಪಾಡಿಯೆರೆ ಒಚ್ಚಿದ್ ಕೊರಿಯೆ.</verse>
				<verse number="16">ಸಿಪಾಯಿಲು ಆಯನ್ ಅಧಿಪತಿನ ಅರಮನೆಕ್ ಸೇರ್ದಿನ ಜಾಲ್‌ದ ಉಲಯಿ ಕೊನೊದು, ಇಡೀ ಸಿಪಾಯಿಲೆ ದಂಡ್‌ನ್ ಒಟ್ಟುಗು ಲೆತ್ತೆರ್.</verse>
				<verse number="17">ಸಿಪಾಯಿಲು ಆಯಗ್ ಕೆಂಪುದ ಒಲ್ಲಿನ್ ಪೊದಿಪಾದ್ ಮುಳ್ಳುದ ಕಿರೀಟ ಮುಡೆದ್ ಆಯಗ್ ದೀದ್,</verse>
				<verse number="18">“ಯೆಹೂದ್ಯೆರೆ ಅರಸೋ!” ನಿಕ್ಕ್ ಸೊಲ್ಮೆಲು ಅಂದ್‌ದ್ ಆಯಗ್ ವಂದನೆ ಮಲ್ತ್‌ದ್</verse>
				<verse number="19">ಕೋಲುಡು ಆಯನ ತರೆಕ್ ಹಾಕ್‌ದ್, ಆಯನ ಮಿತ್ತ್ ಉಬ್ಬಿದ್, ಆಯನ ಎದುರುಡು ಮೊರಂಪೂರ್ದು ಅಡ್ಡ ಬೂರಿಯೆರ್.</verse>
				<verse number="20">ಇಂಚ ಆಯನ್ ಗೇಲಿ ಮಲ್ತಿ ಬೊಕ್ಕ ಆ ಕೆಂಪು ಒಲ್ಲಿನ್ ದೆತ್ತ್‌ದ್ ಆಯನ ಕುಂಟುನು ಪಾಡ್ದ್ ಆಯನ್ ಕ್ರುಸ್ಸುಗು ಪಾಡಿಯೆರೆ ಲೆತ್ತೊಂದು ಪೋಯೆರ್.</verse>
				<verse number="21">ಅಪಗ ಕಂಡೊಡ್ದು ಪಿದಾಡ್ದ್ ಆ ಮಾರ್ಗೊಡು ಬರೊಂದಿತ್ತಿ ಒರಿಯನ್ ಯೇಸುನ ಕ್ರುಸ್ಸುನು ತುಂಬೊಂದು ಕೊನೆಯೆರೆ ಒತ್ತಾಯ ಮಲ್ತೆರ್. ಉಂಬೆ ಏರ್ ಅಂದ್ಂಡ, ಅಲೆಕ್ಸಾಂದ್ರ ಬೊಕ್ಕ ರೂಫು ಇನ್ಪಿನರೆನ ಅಮ್ಮೆರ್ ಆದುಪ್ಪು ಕುರೇನ ಪಟ್ಟಣದ ಸೀಮೋನೆ.</verse>
				<verse number="22">ಬೊಕ್ಕ ಯೇಸುನು ಗೊಲ್ಗೊಥಾ ಪನ್ಪಿ ಜಾಗ್‌ಗ್ ಲೆತ್ತೊಂದು ಬತ್ತೆರ್. ಗೊಲ್ಗೊಥಾ ಅಂದ್ಂಡ ಕಪಾಲದ ಜಾಗ್.</verse>
				<verse number="23">ಅಲ್ಪ ಆಯಗ್ ರಕ್ತಬೋಳ ಬೆರಕೆ ಮಲ್ತಿ ದ್ರಾಕ್ಷಾರಸೊನು ಕೊರಿಯೆರ್, ಆಂಡ ಯೇಸು ದೆತ್ತೊನ್‌ಜೆ.</verse>
				<verse number="24">ಅಕುಲು ಆಯನ್ ಕ್ರುಸ್ಸುಗು ಪಾಡ್ದ್ ಆಯನ ಕುಂಟುನು ಒವ್ವು ಏರೇರೆಗ್ ಆವೊಡು ಅಂದ್‌ದ್ ಚೀಟಿ ಪಾಡ್ದ್ ಪಾಲ್ ಮಲ್ತೊಂಡೆರ್.</verse>
				<verse number="25">ಆಯನ್ ಕ್ರುಸ್ಸುಗು ಪಾಡ್ನಗ ಕಾಂಡೆ ಒಂರ್ಬ ಗಂಟೆ ಆದಿತ್ತ್ಂಡ್.</verse>
				<verse number="26">ಉಂದತ್ತಂದೆ, ಅಕುಲು ಪಡ್ಪಾಯಿ ಅಪರಾಧೊನು ತೆರಿಪಾವುನ ಪತ್ತೆ ಅಂದ್‌ದ್ ಕ್ರುಸ್ಸುದ ಮಿತ್ತ್ ಬರೆದಿತ್ತ್‌ಂಡ್. ಅವು ದಾನೆಂದ್ಂಡ, “ಯೆಹೂದ್ಯೆರೆ ಅರಸು,” ಪನ್ಪಿನವೇ.</verse>
				<verse number="27">ಅವತ್ತಂದೆ ಇರ್ವೆರ್ ಕಲ್ವೆರೆನ್ ಕನತ್‌ದ್ ಒರಿಯನ್ ಆಯನ ಬಲತ್ತ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಆಯಡೊಪ್ಪ ಕ್ರುಸ್ಸುಗು ಪಾಡಿಯೆರ್.</verse>
				<verse number="28"></verse>
				<verse number="29">ಅಲ್ಪ ಪೋಪಿನಾಕುಲು ತರೆ ಆಡಾದ್, “ಆಹಾ! ದೇವಾಲಯೊನು ಬೂರ್ಪಾದ್ ಮೂಜಿ ದಿನೊಟು ಕುಡ ಕಟ್ಟುನಾಯಾ, ಕ್ರುಸ್ಸುಡ್ದು ಜತ್ತ್‌ದ್ ನಿನನ್ ಬಚವು ಮಲ್ತೊನ್ಲ,” ಅಂದ್‌ದ್ ಆಯನ್ ಗೇಲಿ ಮಲ್ತೊಂದಿತ್ತೆರ್.</verse>
				<verse number="30"></verse>
				<verse number="31">ಐತ ಲೆಕ್ಕನೇ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ, ತನನ್ ಬಚವು ಮಲ್ತೊನೆರೆ ಆಯಿಜಿ? ಇಸ್ರಾಯೇಲ್ಯೆರೆ ಅರಸು ಆದುಪ್ಪು ಈ ಕ್ರಿಸ್ತೆ, ಇತ್ತೆ ಕ್ರುಸ್ಸುಡ್ದು ಜತ್ತ್‌ದ್ ಬರಡ್, ಜತ್ತ್‌ದ್ ಬತ್ತ್ಂಡ ಎಂಕುಲು ನಂಬುವ,” ಅಂದ್‌ದ್ ತನ್ಕುಲೆ ಉಲಯಿ ಗೇಲಿಡ್ ಪಾತೆರೊಂದಿತ್ತೆರ್. ಆಯಡೊಪ್ಪ ಕ್ರುಸ್ಸುಗು ಪಾಡ್ದಿತ್ತಿನಾಕುಲುಲಾ ಅಂಚೆನೇ ಆಯನ್ ನಿಂದನೆ ಮಲ್ತೊಂದಿತ್ತೆರ್.</verse>
				<verse number="32"></verse>
				<verse number="33">ಮಧ್ಯಾಹ್ನದ ಪೊರ್ತು ಇಡೀ ದೇಶದ ಮಿತ್ತ್ ಮೂಜಿ ಗಂಟೆ ಮುಟ್ಟ ಕತ್ತಲೆ ಆಂಡ್.</verse>
				<verse number="34">ಮೂಜಿ ಗಂಟೆಗ್ ಯೇಸು, “ಎಲೋಹಿ, ಎಲೋಹಿ, ಲಮಾ ಸಬಕ್ತಾನಿ,” ಪಂಡ್ಂಡ “ಎನ ದೇವೆರೇ, ಎನ ದೇವೆರೇ ದಾಯೆಗ್ ಎನ ಕೈ ಬುಡ್ತ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ.</verse>
				<verse number="35">ಕೈತಲ್‌ ಉಂತುದಿನಾಕುಲೆಡ್ ಕೆಲೆವೆರ್ ಅವೆನ್ ಕೇಂಡ್ದ್, “ತೂಲೆ ಆಯೆ ಎಲೀಯನ್ ಲೆಪ್ಪುವೆ,” ಅಂದ್‌ದ್ ಪಂಡೆರ್.</verse>
				<verse number="36">ಅಪಗ ಒರಿ ಪಾರ್‌ಪೋದು ಸ್ಪಂಜಿನ್ ಪುಳಿರಸೊಟು ಮುರ್ಕಾದ್, ಕೋಲುಗು ತಿಕ್ಕಾದ್ ಆಯಗ್ ಪರಿಯೆರೆ ಕೊರ್ದು, “ಬುಡ್ಲೆ, ಎಲೀಯೆ ಉಂಬ್ಯನ್ ಜಪುಡಾಯೆರೆ ಬರ್ಪೆನಾ ದಾನ್ನ ತೂಕ,” ಅಂದ್‌ದ್ ಪಂಡೆರ್.</verse>
				<verse number="37">ಆಂಡ ಯೇಸು ಮಲ್ಲ ಸ್ವರೊಟ್ಟು ಬುಲ್ತುದು ಪ್ರಾಣ ಬುಡಿಯೆ.</verse>
				<verse number="38">ಅಪಗ ದೇವಾಲಯದ ಪರದೆ ಮಿತ್ತ್‌ಡ್ದ್ ತಿರ್ತ್ ಮುಟ್ಟ ಪರಿದ್ ರಡ್ಡ್ ಪಾಲ್ ಆಂಡ್.</verse>
				<verse number="39">ಆಯೆ ಇಂಚ ಪ್ರಾಣ ಬುಡಿನೆನ್ ತೂದು ಆಯನ ಎದುರುಡು ಉಂತುದಿತ್ತಿ ಶತಾಧಿಪತಿ, “ನಿಜಾದ್‌ಲಾ ಈ ನರಮಾನಿ, ದೇವೆರೆ ಮಗೆನೇ,” ಅಂದ್‌ದ್ ಪಂಡೆ.</verse>
				<verse number="40">ಉಂದತ್ತಂದೆ ಅಲ್ಪ ಪೊಂಜೊವುಲುಲಾ ದೂರೊಡ್ದು ತೂವೊಂದಿತ್ತೆರ್. ಅಕ್ಲೆಡ್ ಆಯೆ ಗಲಿಲಾಯೊಡಿತ್ತಿನಪಗ ಆಯನ ಬೆರಿಯೆ ಪೋವೊಂದು ಸೇವೆ ಮಲ್ತೊಂದಿತ್ತಿ ಮಗ್ದಲದ ಮರಿಯಲಾ ಎಲ್ಯ ಯಾಕೋಬು ಯೋಸೆನ ಅಪ್ಪೆ ಆಯಿ ಮರಿಯಲಾ, ಸಲೋಮಿಲಾ ಇತ್ತೆರ್. ಆಯಡೊಪ್ಪ ಯೆರೂಸಲೇಮುಗು ಬೈದಿನ ಬೇತೆ ಮಸ್ತ್ ಪೊಂಜೊವುಲುಲಾ ಇತ್ತೆರ್.</verse>
				<verse number="41"></verse>
				<verse number="42">ಅಪಗನೆ ಬೈಯ ಆದಿತ್ತ್ಂಡ್. ಆ ದಿನ ಸಬ್ಬತ್‌ದ ದುಂಬಿನಾನಿ ಆದಿತ್ತ್ಂಡ್.</verse>
				<verse number="43">ಅಪಗ ಅರಿಮಥಾಯದ ಯೋಸೇಫೆ ಹಿರಿಸಭೆಟ್ ಪುದರ್ ಇತ್ತಿನಾಯೆ ದೇವೆರೆ ರಾಜ್ಯೊನು ಕಾತೊಂದಿತ್ತಿನಾಯೆಲಾ ಆದಿತ್ತ್‌ದ್ ಆಯೆ ಧೈರ್ಯೊಡು ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ.</verse>
				<verse number="44">ಪಿಲಾತೆ, ಯೇಸು ಈತ್ ಬೇಗ ಸೈತೆ ಅಂದ್‌ದ್ ಅಚ್ಚಿರ ಆಯೆ. ಶತಾಧಿಪತಿನ್ ಲೆಪುಡಾದ್ ಯೇಸು ಸೈತೆನಾ ಅಂದ್‌ದ್ ಆಯಡ ಕೇಂಡೆ.</verse>
				<verse number="45">ಆಯೆ ಸೈತಿನೆನ್ ಶತಾಧಿಪತಿಡ್ದ್ ತೆರಿದ್ ಪುಣೊನು ಯೋಸೇಫಗ್ ಕೊರ್ಪಾಯೆ.</verse>
				<verse number="46">ಯೋಸೇಫು ನಾರ್‌ಮಡಿತ ಕುಂಟುನು ಕ್ರಯೊಕು ದೆತ್ತೊಂದು ಯೇಸುನ ಪುಣೊನು ಕ್ರುಸ್ಸುಡ್ದು ಜಪುಡಾಯೆ. ಪುಣೊನು ನಾರ್‌ಮಡಿತ ಕುಂಟುಡು ಸುತ್ತುದು ಪಾದೆಡ್ ಕುರೆದಿತ್ತಿ ಸಮಾಧಿಡ್ ದೀದ್ ಸಮಾಧಿದ ಬಾಕಿಲ್‌ಗ್ ಕಲ್ಲ್‌ನ್ ಪೊರೆಲ್ಪಾಯೆ.</verse>
				<verse number="47">ಮಗ್ದಲದ ಮರಿಯಲಾ ಯೋಸೆನ ಅಪ್ಪೆ ಮರಿಯಲಾ ಯೇಸುನು ದೀತಿನ ಜಾಗ್‌ನ್ ತೂಯೆರ್.</verse>
			</chapter>
			<chapter number="16">
				<verse number="1">ಸಬ್ಬತ್‌ದಿನ ಆಯಿ ಬೊಕ್ಕ, ಮಗ್ದಲದ ಮರಿಯಲಾ ಯಾಕೋಬುನ ಅಪ್ಪೆ ಮರಿಯಲಾ ಸಲೋಮಿಲಾ ಯೇಸುನ ಶರೀರೊಗು ಪೂಜೆರೆಗಾದ್ ಕಮ್ಮೆನದ ಎಣ್ಣೆನ್ ಕ್ರಯೊಕು ದೆತ್ತೊಂಡೆರ್.</verse>
				<verse number="2">ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಪೊರ್ತು ಮೂಡುನಗ ಅಕುಲು ಸಮಾಧಿಗ್ ಬತ್ತೆರ್.</verse>
				<verse number="3">ಅಕುಲು ಪೋವೊಂದುಪ್ಪುನಗ, “ಸಮಾಧಿದ ಬಾಕಿಲ್‌ಡ್ ಮುಚ್ಚಿದಿತ್ತಿನ ಕಲ್ಲ್‌ನ್ ನೂಕುದು ಪುರೆಲ್ಪಾವುನಾಕುಲು ಏರುಲ್ಲೆರ್?” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.</verse>
				<verse number="4">ಅಕುಲು ಸಮಾಧಿದಡೆಗ್ ಬತ್ತಿನಪಗ ಆ ಮಲ್ಲ ಕಲ್ಲ್ ಪೊರೆಲ್ಪಾದಿತ್ತಿನೆನ್ ತೂಯೆರ್.</verse>
				<verse number="5">ಅಕುಲು ಸಮಾಧಿದ ಉಲಯಿ ಪೋನಗ, ಒರಿ ಜವ್ವನೆ ಬೊಲ್ದು ಅಂಗಿನ್ ಪಾಡೊಂದು ಬಲತ್ತ ಮರ್ಗಿಲ್‌ಡ್ ಕುಲ್ಲುದಿನೆನ್ ತೂದು ಪೋಡಿಯೆರ್.</verse>
				<verse number="6">ಆಯೆ ಅಕ್ಲೆಗ್, “ಪೋಡ್ಯಡೆ, ಕ್ರುಸ್ಸುಗು ಪಾಡ್ದಿತ್ತಿನ ನಜರೇತ್‌ದ ಯೇಸುನು ನಾಡುವರತ್ತಾ. ಆಯೆ ಜೀವಾದ್ ಲಕ್ಕ್‌ದೆ. ಮುಲ್ಪ ಇಜ್ಜೆ. ಆಯನ್ ದೀತಿನ ಜಾಗ್ ಉಂದೇ ತೂಲೆ.</verse>
				<verse number="7">ಇತ್ತೆ ನಿಕುಲು ಪೋದು, ಆಯನ ಶಿಷ್ಯೆರೆಗ್ಲಾ ಪೇತ್ರಗ್ಲಾ, ‘ಆಯೆ ನಿಕ್ಲೆಗ್ ಪಂಡಿಲೆಕ್ಕ ನಿಕ್ಲೆಡ್ದ್ ದುಂಬು ಗಲಿಲಾಯೊಗು ಪೋವೊಂದುಲ್ಲೆ, ನಿಕುಲು ಆಯನ್ ಅವುಲು ತೂವರ್,’ ಅಂದ್‌ದ್ ತೆರಿಪಾಲೆ,” ಪಂಡ್ದ್ ಪಂಡೆ.</verse>
				<verse number="8">ಆ ಪೊಂಜೊವುಲು ಅಚ್ಚಿರ ಆದ್ ನಡುಗೊಂದು, ಕೂಡ್ಲೆ ಪಿದಯಿ ಬತ್ತ್‌ದ್, ಸಮಾಧಿಡ್ದ್ ಪಾರ್‌ಪೋಯೆರ್. ಅಕುಲು ಪೋಡಿನೆಡ್ದ್ ಏರೆಗ್ಲಾ ದಾಲಾ ಪಂಡಿಜೆರ್.</verse>
				<verse number="9">(ವಾರದ ಸುರುತ್ತ ದಿನತ ಪುಲ್ಯಕಾಂಡೆ ಯೇಸು ಜೀವ ಆದ್ ಲಕ್ಕಿ ಬೊಕ್ಕ ಮಗ್ದಲದ ಮರಿಯಗ್ ಸುರುಟ್ಟು ತೋಜಿದ್ ಬತ್ತೆ. ಯೇಸು ಆಲೆಗ್ ಪತ್ತ್‌ದಿತ್ತಿ ಏಳ್ ದೆವ್ವೊಲೆನ್ ಬುಡ್ಪಾದಿತ್ತೆ.</verse>
				<verse number="10">ಆಲ್ ಪೋದು ಆಯೆ ತೋಜಿದ್ ಬತ್ತಿನೆನ್ ಆಯಡೊಪ್ಪ ಇತ್ತಿನಾಕುಲೆಗ್ ತೆರಿಪಾಯಲ್. ಮೊಕುಲು ದುಃಖೊಡು ಬುಲ್ತೊಂದಿತ್ತೆರ್.</verse>
				<verse number="11">ಆಯೆ ಬದ್‌ಕ್‌ದೆ, ಎಂಕ್ ತೋಜಿಯೆ ಪನ್ಪಿ ಪಾತೆರೊನು ಪನ್ನಗ, ಅಕುಲು ನಂಬಿಜೆರ್.</verse>
				<verse number="12">ಉಂದಾಯಿ ಬೊಕ್ಕ ಶಿಷ್ಯೆರೆಡ್ ಇರ್ವೆರ್ ಒಂಜಿ ಹಳ್ಳಿಗ್ ನಡತೊಂದು ಪೋವೊಂದುಪ್ಪುನಗ, ಯೇಸು ಅಕ್ಲೆಗ್ ಬೇತೆ ರೂಪೊಡು ತೋಜಿದ್ ಬತ್ತೆ.</verse>
				<verse number="13">ಅಕುಲು ಪೋದು ಒರಿದಿನಾಕುಲೆಗ್ ತೆರಿಪಾಯೆರ್. ಆಂಡ ಅಕುಲುಲಾ ನಂಬಿಜೆರ್.</verse>
				<verse number="14">ಕೆಲವು ದಿನೊಡ್ದು ಬೊಕ್ಕ ಪತ್ತೊಂಜಿ ಶಿಷ್ಯೆರ್ ವಣಸ್‌ಗ್ ಕುಲ್ಲುದಿತ್ತಿನಪಗ ಯೇಸು ಅಕ್ಲೆಗ್ಲಾ ತೋಜಿದ್ ಬತ್ತೆ. ತಾನ್ ಜೀವ ಆದ್ ಲಕ್ಕಿ ಬೊಕ್ಕ ತನನ್ ತೂಯಿನಾಕುಲೆನ ಪಾತೆರೊನು ಅಕುಲು ನಂಬಂದೆ ಇತ್ತಿ ಕಾರಣೊಗು ಆಯೆ ಅಕುಲು ನಂಬಂದಿನೆಕ್ಕ್‌ಲಾ ಅಕ್ಲೆನ ಕಠಿಣ ಉಡಲ್‌ಗಾದ್‌ಲಾ ದಟ್ಟಿಯೆ.</verse>
				<verse number="15">ಯೇಸು ಅಕ್ಲೆಡ, “ನಿಕುಲು ಲೋಕದ ಮಾತ ಕಡೆಕ್ಕ್ ಪೋದು ಸುವಾರ್ತೆನ್ ಮಾತ ಸೃಷ್ಟಿಗ್ ಸಾರಿಲೆ.</verse>
				<verse number="16">ನಂಬುದು ದೀಕ್ಷಾಸ್ನಾನ ಮಲ್ಪಾವೊನುನಾಯಗ್ ರಕ್ಷಣೆ ತಿಕ್ಕುಂಡು. ನಂಬಂದಿನಾಯೆ ತೀರ್ಪುಗು ಒಳಗಾಪೆ.</verse>
				<verse number="17">ಉಂದತ್ತಂದೆ ನಂಬುನಾಕುಲೆಡ್ದ್ ಈ ಕಾರ್ನಿಕೊಲು ಆಪುಂಡು. ಅಕುಲು ಎನ ಪುದರ್‌ಡ್ ದೆವ್ವೊಲೆನ್ ಬುಡ್ಪಾವೆರ್. ಪೊಸ ಭಾಷೆಲೆನ್ ಪಾತೆರುವೆರ್,</verse>
				<verse number="18">ಅಕುಲು ಸರ್ಪೊಲೆನ್ ಪತಿಯೆರ್ಡಲಾ ವಿಷತವು ಒವ್ವೆನ್ಲಾ ಪರಿಯೆರ್ಡಲಾ ಅಕ್ಲೆಗ್ ದಾಲಾ ಆವಂದ್. ಅಕುಲು ಸೀಕ್‌ದಾಕುಲೆ ಮಿತ್ತ್ ಕೈ ದೀಂಡ ಗುಣ ಆವು,” ಅಂದ್‌ದ್ ಪಂಡೆ.</verse>
				<verse number="19">ಕರ್ತವೆ ಆಯಿ ಯೇಸು ಅಕ್ಲೆಡ ಪಾತೆರಿ ಬೊಕ್ಕ ಪರಲೋಕೊಗು ಏರ್ದ್ ಪೋದು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.</verse>
				<verse number="20">ಐಡ್ದ್ ಬೊಕ್ಕ ಶಿಷ್ಯೆರ್ ಪಿದಾಡ್ದ್ ಪೋದು, ಮಾತ ಕಡೆಕ್ಲಾ ಸುವಾರ್ತೆನ್ ಸಾರಿಯೆರ್. ಬೊಕ್ಕ ಕರ್ತವೆ ಅಕ್ಲೆ ಒಟ್ಟುಗು ಬೇಲೆ ಮಲ್ತೊಂದು, ಕಾರ್ನಿಕೊಲೆಡ್ದ್ ಸುವಾರ್ತೆನ್ ಬಲ ಮಲ್ತೊಂದಿತ್ತೆ.)</verse>
			</chapter>
		</book>
		<book number="42">
			<chapter number="1">
				<verse number="1">ಮಾನ್ಯ ಥೆಯೋಫಿಲಾ, ಎಂಕುಲೆ ನಡುಟು ನಡತಿ ಕಾರ್ಯೊಲೆನ್ ಸುರುಡ್ದು ಕಣ್ಣಾರೆ ತೂದು ಸುವಾರ್ತೆದ ಪಾತೆರೊನು ಸಾರೊಂದಿತ್ತಿನಕುಲು ಯೇಸುನ ಕಾರ್ಯೊಲೆನ್ ಚರಿತ್ರೆದ ರೂಪೊಡು ಬರೆಯೆರೆ ಮಸ್ತ್ ಜನ ಪ್ರಯತ್ನ ಮಲ್ತ್‌ದೆರ್. ಅಂಚೆನೇ ಯಾನ್ಲಾ ದುಂಬುಡ್ದು ಪ್ರತಿಯೊಂಜಿ ಸಂಗತಿಲೆನ್ ಸಜ್ಜಿಡ್ ತೆರಿದಿನೆಡ್ದ್ ಅವೆನ್ ನಿಕ್ಕ್ ಕ್ರಮೊಟು ಬರೆಪಿನವು ಸರಿ ಅಂದ್‌ದ್ ಎಂಕ್‌ಲಾ ತೋಜ್ಂಡ್.</verse>
				<verse number="2"></verse>
				<verse number="3"></verse>
				<verse number="4">ನಿಕ್ಕ್ ಬೋಧನೆ ಮಲ್ತಿ ಸಂಗತಿಲು ಯಥಾರ್ಥವಾಯಿನವು ಪಂಡ್ದ್ ಉಂದೆಡ್ದ್ ನಿಕ್ಕ್ ತೆರಿದ್ ಬರು.</verse>
				<verse number="5">ಯೂದಾಯ ಸೀಮೆದ ಅರಸು ಆಯಿ ಹೆರೋದನ ಕಾಲೊಡು ಅಬೀಯ ವರ್ಗೊಗು ಸೇರ್ದಿ ಜಕರೀಯೆ ಪನ್ಪಿ ಒರಿ ಯಾಜಕೆ ಇತ್ತೆ. ಆಯನ ಬೊಡೆದಿನ ಪುದರ್ ಎಲೀಸಬೇತ್. ಆಲ್ ಆರೋನನ ಸಂತಾನದಾಲ್.</verse>
				<verse number="6">ಅಕುಲು ಇರ್ವೆರ್‌ಲಾ ಕರ್ತವ ಮಾತ ಅಪ್ಪಣೆಲೆಗ್ಲಾ ನಿಯಮೊಲೆಗ್ಲಾ ತಪ್ಪುದಾಂತೆ ನಡತೊಂದು ದೇವೆರೆ ದೃಷ್ಟಿಡ್ ನೀತಿವಂತೆರ್ ಆದಿತ್ತೆರ್.</verse>
				<verse number="7">ಇರ್ವೆರ್‌ಲಾ ಪ್ರಾಯ ಕರಿದಿನಾಕುಲು ಆದಿತ್ತ್‌ದ್ ಎಲೀಸಬೇತ್ ಬಂಜೆ ಆದಿತ್ತಿನೆಡ್ದ್ ಅಕ್ಲೆಗ್ ಜೋಕುಲು ಇಜ್ಜಾಂಡ್.</verse>
				<verse number="8">ಇಂಚ ಜಕರೀಯಗ್ ವರ್ಗದ ಸರ್ತಿಡ್ ಆಯೆ ದೇವೆರೆ ಸನ್ನಿಧಾನೊಡು ಯಾಜಕ ಬೇಲೆ ಮಲ್ತೊಂದುಪ್ಪುನಗ ಆಯಿನಿ ದಾನೆಂದ್ಂಡ,</verse>
				<verse number="9">ದೇವಾಲಯೊಗು ಪೋದು ಧೂಪ ಅರ್ಪಣೆ ಮಲ್ಪುನವು ಆಯನ ಪಾಲ್‌ಗ್ ಬತ್ತ್ಂಡ್.</verse>
				<verse number="10">ಧೂಪ ಅರ್ಪಣೆ ಮಲ್ಪುನ ಪೊರ್ತುಗು ಜನೊಕುಲೆ ಗುಂಪು ಪಿದಯಿ ಉಂತುದು ಪ್ರಾರ್ಥನೆ ಮಲ್ತೊಂದಿತ್ತೆರ್.</verse>
				<verse number="11">ಅಪಗ ಕರ್ತವನ ಒರಿ ದೂತೆ ಧೂಪದ ಬಲಿಪೀಠದ ಬಲತ್ತ ಮರ್ಗಿಲ್‌ಡ್ ಉಂತುದಿನವು ಆಯಗ್ ತೋಜಿದ್ ಬತ್ತ್ಂಡ್.</verse>
				<verse number="12">ಜಕರೀಯೆ ಆಯನ್ ತೂದು ಪೋಡಿದ್ ಕುಂಬರಿಯೆ.</verse>
				<verse number="13">ಆಂಡ ದೂತೆ ಆಯಗ್ ಜಕರೀಯಾ, “ಪೋಡ್ಯಡ; ನಿನ ಪ್ರಾರ್ಥನೆ ದೇವೆರೆಗ್ ಮುಟ್ಟುಂಡು. ನಿನ ಬೊಡೆದಿ ಎಲೀಸಬೇತ್ ಒಂಜಿ ಆಣ್ ಬಾಲೆನ್ ಪೆದ್ದುವಲ್. ಈ ಬಾಲೆಗ್ ಯೋಹಾನೆ ಇನ್ಪಿ ಪುದರ್ ದೀವೊಡು.</verse>
				<verse number="14">ನಿಕ್ಕ್ ಸಂತೋಷಲಾ ಉಲ್ಲಾಸಲಾ ಆಪುಂಡು; ಆಯೆ ಪುಟ್ಟುನೆಡ್ದ್ ಮಸ್ತ್ ಜನೊಕುಲು ಸಂತೋಷ ಮಲ್ಪೆರ್.</verse>
				<verse number="15">ಆಯೆ ಕರ್ತವ ದುಂಬು ಮಲ್ಲ ನರಮಾನಿ ಆದುಪ್ಪುವೆ; ಆಯೆ ಅಮಲ್‌ದೆನ್ಲಾ ದ್ರಾಕ್ಷಾರಸೊನ್ಲಾ ಪರಯೆ; ಆಯೆ ಅಪ್ಪೆ ಬಂಜಿಡ್ದೇ ಪರಿಶುದ್ಧಾತ್ಮೊಡು ದಿಂಜಿದಿನಾಯೆ ಆದುಪ್ಪುವೆ.</verse>
				<verse number="16">ಆಯೆ ಇಸ್ರಾಯೇಲ್ಯೆರೆಡ್ ಮಸ್ತ್ ಜನೊಕುಲೆನ್ ದೇವೆರಾದುಪ್ಪು ಕರ್ತವ ಕಡೆಕ್ಕ್ ತಿರ್ಗಾವೆ.</verse>
				<verse number="17">ಆಯೆ ಕರ್ತವ ದುಂಬು ಪೋದು ಎಲೀಯನ ಆತ್ಮೊಡ್ಲಾ ಬಲೊಟ್ಲಾ ದಿಂಜಿದಿನಾಯೆ ಆದ್ ಅಮ್ಮಾಡ್ಲೆನ ಉಡಲ್‌ನ್ ಜೋಕುಲೆ ಕಡೆಕ್ಲಾ ಹಟತಾಕುಲೆನ್ ನೀತಿವಂತೆರೆ ಗೇನದ ಕಡೆಕ್ಲಾ ತಿರ್ಗಾದ್ ಕರ್ತವಗ್ ಜನೊಕುಲೆನ್ ತಯಾರ್ ಮಲ್ಪುವೆ,” ಪಂಡೆ.</verse>
				<verse number="18">ಜಕರೀಯೆ ಆ ದೂತಗ್, “ಉಂದು ಸತ್ಯಾದಿತ್ತ್‌ಂಡ ಅವೆನ್ ಯಾನ್ ಎಂಚ ತೆರಿಯೊನೊಲಿ? ಯಾನ್ ಪರಬೆ; ಎನ ಬೊಡೆದಿಲಾ ಪ್ರಾಯ ಕರಿದಿನಾಲ್,” ಅಂದ್‌ದ್ ಪಂಡೆ.</verse>
				<verse number="19">ಐಕ್ ಆ ದೂತೆ, “ದೇವೆರೆ ಸನ್ನಿಧಿಡ್ ಉಂತೊಂದು ಉಪ್ಪುನಾಯೆ. ‘ಯಾನ್ ಗಬ್ರಿಯೇಲೆ,’ ಈ ಎಡ್ಡೆ ವರ್ತಮಾನೊನು ನಿಕ್ಕ್ ತೆರಿಪಾವೆರೆ ದೇವೆರ್ ಎನನ್ ಕಡಪುಡುದೆ.</verse>
				<verse number="20">ಈ ಎನ ಪಾತೆರ ತಕ್ಕ ಸಮಯೊಡು ನಡಪುಂಡು; ಆಂಡ ಈ ಅವೆನ್ ನಂಬಂದೆ ಪೋಯಿನೆಡ್ದ್ ಆ ಮಾತ ಸಂಗತಿಲು ಆಪಿನೆಟ್ಟ ಈ ಪಾತೆರಿಯೆರೆ ಆವಂದೆ ಪೊಟ್ಟೆ ಆದುಪ್ಪುವ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="21">ಪಿದಯಿಡ್ ಜನೊಕುಲು ಜಕರೀಯನ್ ಕಾತೊಂದಿತ್ತೆರ್. ಆಯೆ ದೇವಾಲಯದ ಉಲಯಿ ಪೊರ್ತು ಮಲ್ತಿನೆಕ್ಕ್ ಅಚ್ಚಿರ ಪಡೆಯೆರ್.</verse>
				<verse number="22">ಆಂಡ ಆಯೆ ಪಿದಯಿ ಬನ್ನಗ ಆಯಗ್ ಅಕ್ಲೆಡ ಪಾತೆರಿಯೆರೆ ಆವಂದಿನೆಡ್ದ್ ಉಂಬ್ಯಗ್ ದೇವಾಲಯೊಡು ದಾದಾಂಡಲಾ ದರ್ಶನ ಆದುಪ್ಪೊಡು ಅಂದ್‌ದ್ ಅಕುಲು ಎನ್ನಿಯೆರ್. ಆಯೆ ಅಕ್ಲೆಗ್ ಕೈ ಭಾಷೆ ಮಲ್ತೊಂದು ಪೊಟ್ಟಲೆಕ್ಕನೇ ಇತ್ತೆ.</verse>
				<verse number="23">ಆಯನ ಯಾಜಕ ಬೇಲೆದ ದಿನ ಕರಿಬೊಕ್ಕ ತನ ಇಲ್ಲಗ್ ಪೋಯೆ.</verse>
				<verse number="24">ಐಡ್ದ್ ಬೊಕ್ಕ ಆಯನ ಬೊಡೆದಿ ಎಲೀಸಬೇತ್ ಬಂಜಿನಾಲಾದ್ ಐನ್ ತಿಂಗೊಲು ಇಲ್ಲಡೇ ಮದೆ ಆದಿತ್ತ್‌ದ್</verse>
				<verse number="25">ಕರ್ತವೆ ಈ ಕಾಲೊಡು ತನ್ಕ್ ಸಹಾಯ ಮಲ್ತ್‌ದ್, “ಜನೊಕುಲೆ ಬಾಯಿದ ಅವಮಾನೊಡ್ದು ದೂರ ಮಲ್ತೆ,” ಪಂಡ್ದ್ ಪನೊಂದಿತ್ತಲ್.</verse>
				<verse number="26">ಆಜನೆ ತಿಂಗೊಲುಡು ದೇವೆರ್ ಗಬ್ರಿಯೇಲೆ ಪನ್ಪಿ ತನ ದೂತನ್ ಗಲಿಲಾಯದ ನಜರೇತ್ ಪನ್ಪಿ ಊರುಗು ಒಂಜಿ ಕನ್ಯಪೊಣ್ಣು ಕೈತಲ್‌ ಕಡಪುಡಿಯೆ.</verse>
				<verse number="27">ಆ ಕನ್ಯಪೊಣ್ಣನ ಪುದರ್ ಮರಿಯ; ಆಲೆಗ್ ದಾವೀದ್ ಸಂತಾನದ ಯೋಸೇಫು ಪನ್ಪಿ ಅಂಜೊವುಗು ನಿಚ್ಚಯ ಆದಿತ್ತ್ಂಡ್.</verse>
				<verse number="28">ಆ ದೂತೆ ಆಲೆನ ಕೈತಲ್‌ ಬತ್ತ್‌ದ್, ನಿಕ್ಕ್ ಎಡ್ಡೆ ಆವಡ್; ದೇವೆರೆ ದಯ ದಿಂಜಿದಿನಾಲೇ, ಕರ್ತವೆ ನಿನಡೊಪ್ಪ ಉಲ್ಲೆ ಅಂದ್‌ದ್ ಪಂಡೆ.</verse>
				<verse number="29">ಆಲ್ ಆ ಪಾತೆರ ಕೇಂಡ್ದ್ ಪೋಡಿಗೆಡ್ ನಡಗ್‌ದ್ ಉಂದು ವಾ ನಮೂನೆದ ಆಶೀರ್ವಾದ ಅಂದ್‌ದ್ ಆಲೋಚನೆ ಮಲ್ತೊಂದುಪ್ಪುನಗ,</verse>
				<verse number="30">ಆ ದೂತೆ ಆಲೆಗ್ ಮರಿಯ, “ಪೋಡ್ಯಡ; ದೇವೆರೆ ದಯ ನಿಕ್ಕುಂಡು.</verse>
				<verse number="31">ಇಂದಾ, ಈ ಬಂಜಿನಾಲ್ ಆದ್ ಒರಿ ಮಗನ್ ಪೆದ್ದುವ; ಆಯಗ್ ಯೇಸು ಇನ್ಪಿ ಪುದರ್ ದೀವೊಡು.</verse>
				<verse number="32">ಆಯೆ ಮಹಾಪುರುಷೆ ಆದ್ ಸರ್ವಶಕ್ತೆ ಆದುಪ್ಪು ದೇವೆರೆ ಮಗೆ ಅಂದ್‌ದ್ ಲೆಪ್ಪಾವೊನ್ವೆ; ಉಂದತ್ತಂದೆ ದೇವೆರಾದುಪ್ಪು ಕರ್ತವೆ ಆಯನ ಸಂತಾನದ ಅಮ್ಮೆ ಆದುಪ್ಪು ದಾವೀದನ ಗದ್ದಿಗೆನ್ ಆಯಗ್ ಕೊರ್ಪೆ.</verse>
				<verse number="33">ಆಯೆ ಯಾಕೋಬು ವಂಶೊನು ಏಪೊಗ್ಲಾ ಆಳೊಂದುಪ್ಪುವೆ; ಆಯನ ರಾಜ್ಯೊಗು ಅಂತ್ಯ ಉಪ್ಪಂದ್.” ಪಂಡೆ.</verse>
				<verse number="34">ಅಪಗ ಮರಿಯ ಆ ದೂತಡ, “ಉಂದು ಎಂಚ ಆವೆರೆ ಸಾದ್ಯ? ಯಾನ್ ಅಂಜೊವುನು ತೆರಿದಿನಾಲ್ ಅತ್ತ್,” ಪಂಡಲ್.</verse>
				<verse number="35">ದೂತೆ ಆಲೆಗ್, “ನಿನ ಮಿತ್ತ್ ಪರಿಶುದ್ಧಾತ್ಮ ಬರ್ಪುಂಡು; ಸರ್ವಶಕ್ತೆ ದೇವೆರೆ ಶಕ್ತಿದ ನಿರೆಲ್ ನಿನ ಮಿತ್ತ್ ಬೂರುಂಡು; ಐಡ್ದಾವರ ಪುಟ್ಟುನ ಆ ಪರಿಶುದ್ಧ ಬಾಲೆ ದೇವೆರೆ ಮಗೆ ಅಂದ್‌ದ್ ಲೆಪ್ಪಾವೊನ್ವೆ;</verse>
				<verse number="36">ಬೊಕ್ಕ ನಿನ ಕುಟುಂಬದಾಲಾಯಿ ಎಲೀಸಬೇತ್ ಉಲ್ಲಲತ್ತ, ಆಲ್‌ಲಾ ಪ್ರಾಯದಾಲ್ ಆದಿತ್ತ್‌ಂಡಲಾ ಬಂಜಿನಾಲ್ ಆತಲ್, ಆಲೆ ಬಂಜಿಡ್ ಆಣ್ ಬಾಲೆ ಉಂಡು; ಬಂಜೆ ಅಂದ್‌ದ್ ಇತ್ತಿನಲೆಗ್ ಇತ್ತೆ ಆಜನೆ ತಿಂಗೊಲು.</verse>
				<verse number="37">ದೇವೆರೆಡ್ದ್ ಆವಂದಿನ ಒವುಲಾ ಪಾತೆರ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="38">ಅಪಗ ಮರಿಯ, “ಇಂದಾ, ಯಾನ್ ಕರ್ತವ ದಾಸಿ; ಈ ಪಂಡಿ ಪಾತೆರದ ಲೆಕ್ಕನೇ ಆವಡ್.” ಅಂದ್‌ದ್ ಪಂಡಲ್. ಐಡ್ದ್ ಬೊಕ್ಕ ದೂತೆ ಆಲೆನ ಕೈತಲ್‌ಡ್ದ್ ಪೋಯೆ.</verse>
				<verse number="39">ಆ ದಿನೊಕುಲೆಡ್ ಮರಿಯ ಲಕ್ಕ್‌ದ್, ಘಟ್ಟೊಗು ಪಿದಾಡ್ದ್ ಯೆಹೂದೊಡುಪ್ಪು ಎಲೀಸಬೇತ್‌ನ ಊರುಗು ಅಮಸರೊಡು ಪೋಯಲ್.</verse>
				<verse number="40">ಆಲ್ ಜಕರೀಯನ ಇಲ್ಲಗ್ ಪೋದು ಎಲೀಸಬೇತ್‌ಗ್ ವಂದನೆ ಮಲ್ತಲ್.</verse>
				<verse number="41">ಎಲೀಸಬೇತ್ ಮರಿಯನ ವಂದನೆ ಕೇನ್ನಗನೇ ಎಲೀಸಬೇತ್‌ನ ಬಂಜಿಡಿತ್ತಿ ಬಾಲೆ ಪೊರೆಲ್ಯೆರೆ ಸುರು ಆಂಡ್. ಎಲೀಸಬೇತ್ ಪರಿಶುದ್ಧಾತ್ಮೊಡು ದಿಂಜಿದಿನಾಲ್ ಆದ್ ಮಲ್ಲ ಸ್ವರೊಟ್ಟು,</verse>
				<verse number="42">“ಈ ಪೊಂಜೊವುಲೆಡ್ ಆಶೀರ್ವಾದ ಪಡೆಯಿನಾಲ್ ಬೊಕ್ಕ ನಿನ ಬಂಜಿಡ್ದ್ ಪುಟ್ಟುನ ಬಾಲೆ ಆಶೀರ್ವಾದದವು.</verse>
				<verse number="43">ಎನ ಕರ್ತವನ ಅಪ್ಪೆ ಎನ ಕೈತಲ್‌ ಬರ್ಪಿನ ಭಾಗ್ಯ ಎಂಕ್ ಒಲ್ತುಡ್ದು ಆಂಡ್?</verse>
				<verse number="44">ನಿನ ಸ್ವರ ಎನ ಕೆಬಿಕ್ ಬೂರ್ನಗನೇ ಬಂಜಿಡಿತ್ತಿ ಎನ ಬಾಲೆ ಸಂತೋಷೊಡು ಪೊರೆಲ್‌ಂಡ್.</verse>
				<verse number="45">ಕರ್ತವೆ ನಿಕ್ಕ್ ಪಂಡಿ ಪಾತೆರೊನು ನಂಬಿನೆಡ್ದ್ ಈ ಭಾಗ್ಯವಂತೆದಿ,” ಅಂದ್‌ದ್ ಪಂಡಲ್.</verse>
				<verse number="46">ಅಪಗ ಮರಿಯ ಪಂಡಿನಿ ದಾನೆಂದ್ಂಡ, “ಎನ ಪ್ರಾಣ ಕರ್ತವನ್ ಪುಗರುಂಡು,</verse>
				<verse number="47">ಎನ ಆತ್ಮ, ಎನ ರಕ್ಷಕೆ ಆದುಪ್ಪು ದೇವೆರೆ ಬಗೆಟ್ ಉಲ್ಲಾಸ ಮಲ್ಪುಂಡು.</verse>
				<verse number="48">ಆಯೆ ತನ ದಾಸಿನ ತಗ್ಗ್‌ತನೊನು ನೆನೆಪು ದೀತೆ. ಇನಿಡ್ದ್ ಮಾತ ಜನೊಕುಲು ಎನನ್ ಭಾಗ್ಯವಂತೆದಿ ಅಂದ್‌ದ್ ಪುಗರುವೆರ್.</verse>
				<verse number="49">ಶಕ್ತಿ ಇತ್ತಿನಾಯೆ ಎಂಕ್ ಮಲ್ಲ ಉಪಕಾರೊಲೆನ್ ಮಲ್ತ್‌ದೆ; ಆಯನ ಪುದರ್ ಪರಿಶುದ್ಧದವು.</verse>
				<verse number="50">ಆಯಡ ಭಯ ಭಕ್ತಿ ದೀಪಿನಾಕುಲೆ ಮಿತ್ತ್ ಆಯನ ಕರುಣೆ ಏಪೊಗ್ಲಾ ಉಪ್ಪುಂಡು.</verse>
				<verse number="51">ಆಯೆ ತನ ಬಲೊನು ತೋಜಾದ್ ಉಡಲ್‌ದ ಬುದ್ಧಿಡ್ ಸೊರ್ಕುದಿನಾಕುಲೆನ್ ಚಲ್ಲಾಪಿಲ್ಲಿ ಮಲ್ತ್‌ದೆ.</verse>
				<verse number="52">ಅರಸರೆನ್ ಗದ್ದಿಗೆಡ್ದ್ ಜಪುಡಾದ್ ತಗ್ಗ್‌ದಿನಾಕುಲೆನ್ ಮಿತ್ತ್‌ದ ಸ್ಥಿತಿಕ್ಕ್ ಕನಪೆ.</verse>
				<verse number="53">ಬಡವುಡು ಇತ್ತಿನಾಕುಲೆಗ್ ಎಡ್ಡೆ ವಣಸ್‌ಡ್ದ್ ಗಮ್ಮತ್ ಮಲ್ತ್‌ದ್, ಸ್ಥಿತಿಟ್ಟ್ ಇತ್ತಿನಾಕುಲೆನ್ ಕಾಲಿ ಕೈಟ್ ಕಡಪುಡ್ದು ಬುಡ್ಪೆ.</verse>
				<verse number="54">ಆಯೆ ನಮ ಅಮ್ಮಾಡ್ಲೆಡ ಪಂಡಿಲೆಕ್ಕ ಅಬ್ರಹಾಮುಗ್ಲಾ ಆಯನ ಸಂತಾನದಾಕುಲೆಗ್ಲಾ ಏಪೊಗ್ಲಾ ಕರುಣೆ ತೋಜಾವೊಡು ಪನ್ಪಿನೆನ್ ನೆನೆತೊಂದು ತನ ಸೇವಕೆ ಆಯಿ ಇಸ್ರಾಯೇಲ್ಯೆರೆನ ಕೈ ಪತ್ತ್‌ದೆ,” ಅಂದ್‌ದ್ ಪಂಡಲ್.</verse>
				<verse number="55"></verse>
				<verse number="56">ಮರಿಯ ಹೆಚ್ಚಿಕಡಿಮೆ ಮೂಜಿ ತಿಂಗೊಲು ಎಲೀಸಬೇತ್‌ನ ಒಟ್ಟುಗು ಇತ್ತ್‌ದ್ ತನ ಇಲ್ಲಗ್ ಪಿರ ಪೋಯಲ್.</verse>
				<verse number="57">ಎಲೀಸಬೇತ್‌ನ ದಿನ ದಿಂಜಿದ್ ಆಣ್ ಬಾಲೆನ್ ಪೆದ್ದಿಯಲ್.</verse>
				<verse number="58">ನಿರೆಕರೆತಾಕುಲುಲಾ ಕೂಡು ಕುಟುಂಬದಾಕುಲುಲಾ ಆಲೆನ ಮಿತ್ತ್ ಕರ್ತವೆ ಕನಿಕರೊನು ತೋಜಾದೆ ಪನ್ಪಿನೆನ್ ಕೇಂಡ್ದ್ ಆಲೆಡೊಪ್ಪ ಸಂತೋಷ ಮಲ್ತೆರ್.</verse>
				<verse number="59">ಎನ್ಮನೇ ದಿನೊಟು ಸುನ್ನತಿ ಮಲ್ಪೆರೆ ಅಕುಲು ಬತ್ತ್‌ದ್ ಜಕರೀಯೆ ಪಂಡ್ದ್ ಅಮ್ಮೆರೆನ ಪುದರ್‌ನ್ ಬಾಲೆಗ್ ದೀವೊಡಂದಿತ್ತೆರ್.</verse>
				<verse number="60">ಆಂಡ ಬಾಲೆದ ಅಪ್ಪೆ, “ಇಜ್ಜಿ, ಈ ಬಾಲೆಗ್ ಯೋಹಾನೆ ಪಂಡ್ದ್ ಪುದರ್ ದೀವೊಡು,” ಪಂಡಿನಪಗ</verse>
				<verse number="61">ಅಲ್ಪ ಇತ್ತಿನ ಜನೊಕುಲು ಎಲೀಸಬೇತ್‌ಗ್, “ನಿಕ್ಲೆನ ಕೂಡು ಕುಟೊಂಬೊಡು ಈ ಪುದರ್‌ದಕುಲು ಏರ್ಲಾ ಇಜ್ಜೆರತ್ತಾ?”</verse>
				<verse number="62">ನಿನ ಬಾಲೆಗ್ ವಾ ಪುದರ್ ದೀವೊಡು ಅಂದ್‌ದ್ ಅಮ್ಮೆರೆಗ್ ಕೈಸನ್ನೆ ಮಲ್ತೆರ್.</verse>
				<verse number="63">ಆಯೆ ಕೈಸನ್ನೆ ಮಲ್ತ್‌ದ್ ಒಂಜಿ ಪಲಯಿ ತರ್ಪಾದ್, “ಆಯ ಪುದರ್ ಯೋಹಾನೆ,” ಪಂಡ್ದ್ ಬರೆನಗ ಮಾತೆರ್ಲಾ ಅಚ್ಚಿರ ಆಯೆರ್.</verse>
				<verse number="64">ಅಪಗನೆ ಆಯನ ನಾಲಯಿ ಸಡಿಲಾದ್ ಪಾತೆರಿಯೆರೆ ಸುರು ಮಲ್ತ್‌ದ್ ದೇವೆರೆನ್ ಪುಗರಿಯೆ.</verse>
				<verse number="65">ಉಂದೆನ್ ತೂಯಿನ ನಿರೆತಾಕುಲೆಗ್ ಪೋಡಿಗೆ ಆಂಡ್, ಬೊಕ್ಕ ಈ ಮಾತ ಸಂಗತಿಲೆನ್ ಯೂದಾಯದ ಸೀಮೆಡ್ ಮಾತೆರ್ಲಾ ಪಾತೆರೊಂದಿತ್ತೆರ್.</verse>
				<verse number="66">ಕೇಂಡಿನಾಕುಲು ಮಾತೆರ್ಲಾ, “ಈ ಬಾಲೆ ಎಂಚಿತ್ತಿನಾಯೆ ಆಪೆನಾ?” ಅಂದ್‌ದ್ ಈ ಸಂಗತಿಲೆನ್ ಉಡಲ್‌ಡ್ ದೀವೊಂಡೆರ್. ಬೊಕ್ಕ ಕರ್ತವ ಶಕ್ತಿ ಆಯನ ಮಿತ್ತ್ ಇತ್ತ್ಂಡ್.</verse>
				<verse number="67">ಆ ಬಾಲೆದ ಅಮ್ಮೆ ಜಕರೀಯೆ ಪರಿಶುದ್ಧಾತ್ಮೊಡ್ದು ದಿಂಜಿದ್ ಪ್ರವಾದನೆ ಮಲ್ತಿನಿ ದಾನೆಂದ್ಂಡ,</verse>
				<verse number="68">“ಇಸ್ರಾಯೇಲ್ ಜನೊಕುಲೆ ದೇವೆರಾದುಪ್ಪು ಕರ್ತವಗ್ ಸ್ತುತಿ; ಆಯೆ ಪೂರ್ವೊಡ್ದಿಂಚಿ ತನ ಪರಿಶುದ್ಧ ಪ್ರವಾದಿಲೆ ಬಾಯಿಡ್ದ್ ತಾನ್ ಪಂಡಿಲೆಕ್ಕನೇ ತನ ಜನೊಕುಲೆನ್ ಕಾತ್‌ದ್ ಅಕ್ಲೆಗ್ ಬುಡುಗಡೆ ಮಲ್ತ್‌ದೆ; ತನ ಸೇವಕೆ ಆಯಿ ದಾವೀದನ ಸಂತಾನೊಡು, ನಂಕಾದ್ ರಕ್ಷಣೆದ ಕೊಂಬುನು ಲಕ್ಕಾಯೆ.</verse>
				<verse number="69"></verse>
				<verse number="70"></verse>
				<verse number="71">ಆಯೆ ನಮ ಅಮ್ಮಾಡ್ಲೆಗ್ ಕರುಣೆನೆನ್ ತೋಜಾವುನಾಯೆ ಆದುಲ್ಲೆ. ನಮ ಅಮ್ಮೆ ಆಯಿ ಅಬ್ರಹಾಮುಗು ಪ್ರಮಾಣ ಮಲ್ತ್ ಕೊರಿನ ತನ ಪರಿಶುದ್ಧ ಒಡಂಬಡಿಕೆನ್ ನೆನೆಪು ಮಲ್ಪುನಾಯೆ ಆದಿತ್ತ್‌ದ್, ಎಂಕುಲೆ ವೈರಿಲೆಡ್ದ್‌ಲಾ ಎಂಕ್ಲೆನ್ ಪಗೆ ಮಲ್ಪು ಮಾತೆರೆ ಕೈಡ್ದ್‌ಲಾ ತಪ್ಪಾದ್ ರಕ್ಷಣೆ ಮಲ್ತ್‌ದೆ.</verse>
				<verse number="72"></verse>
				<verse number="73"></verse>
				<verse number="74">ಇಂಚ ಎಂಕುಲು ಎಂಕ್ಲೆನ ವೈರಿಲೆ ಕೈಡ್ದ್ ಬುಡುಗಡೆ ಪಡೆವೊಂದು, ಪೋಡಿಗೆದಾಂತಿನಾಕುಲಾದ್, ಎಂಕ್ಲೆನ ಜೀವಮಾನ ಕಾಲೊಡು ಪರಿಶುದ್ಧೊಡ್ಲಾ ನೀತಿಡ್ಲಾ ಆಯನ ಸೇವೆ ಮಲ್ಪುಲೆಕ್ಕ ನಂಕ್ ಇಡೆ ಮಲ್ತ್‌ದ್ ಕೊರಿಯೆ.</verse>
				<verse number="75"></verse>
				<verse number="76">ಬಾಲೆ, ಈ ಆಂಡಲಾ ಸರ್ವಶಕ್ತೆ ಆದುಪ್ಪು ದೇವೆರೆ ಪ್ರವಾದಿ ಅಂದ್‌ದ್ ಲೆಪ್ಪಾವೊನ್ವ. ಈ ಕರ್ತವ ಎದುರುಡು ಪೋದು ಆಯನ ಸಾದಿನ್ ಸರಾಗ ಮಲ್ಪುನಾಯೆಲಾ,</verse>
				<verse number="77">ದೇವೆರ್ ಕನಿಕರೊಡು ನಂಕ್ ದಯ ಮಲ್ಪುನ ಪಾಪದ ಮಾಪುಗಾದ್ ರಕ್ಷಣೆದ ಗೇನೊನು, ಆಯನ ಜನೊಕುಲೆಗ್ ಕೊರ್ಪಿನಾಯೆಲಾ ಆದುಪ್ಪುವ.</verse>
				<verse number="78">ಆ ದೇವೆರೆ ಕನಿಕರೊಡ್ದೇ ನಂಕ್ ಮಿತ್ತ್‌ಡ್ದ್ ಸೂರ್ಯನ ಉದಿಪು ಉಂಡಾದ್,</verse>
				<verse number="79">ಕತ್ತಲೆಡ್ಲಾ ಮರಣದ ಪೋಡಿಗೆಡ್ಲಾ ಇತ್ತಿ ಎಂಕ್ಲೆಗ್ ಬೊಲ್ಪು ಕೊರ್ದು ಎಂಕ್ಲೆನ್ ಸಮಾಧಾನದ ಸಾದಿಗ್ ಸೇರಾದ್ ನಡಪಾವೆ,” ಅಂದ್‌ದ್ ಪಂಡೆ.</verse>
				<verse number="80">ಆ ಬಾಲೆ ಬಲತ್‌ದ್ ಆತ್ಮಡ್ ಬಲ ಹೊಂದುದು ಬೊಕ್ಕ ಇಸ್ರಾಯೇಲ್ ಜನೊಕುಲೆಗ್ ತನನ್ ತೋಜಾವು ದಿನ ಮುಟ್ಟ ಕಾಡ್‌ಡೇ ಇತ್ತೆ.</verse>
			</chapter>
			<chapter number="2">
				<verse number="1">ಆ ಕಾಲೊಡು ಇಡೀ ರಾಜ್ಯೊಡು ಖಾನೇಷ್‌ಮಾರಿ ಬರೆಪಾವೊಡು ಪನ್ಪಿ ಅಪ್ಪಣೆ ಚಕ್ರವರ್ತಿ ಆದಿತ್ತಿ ಔಗುಸ್ತಡ್ದ್ ಪಿದಾಡ್‌ಂಡ್.</verse>
				<verse number="2">ಕುರೇನ್ಯೆ ಸುರಿಯ ದೇಶದ ಅಧಿಪತಿ ಆದುಪ್ಪುನಗ ಈ ಖಾನೇಷ್‌ಮಾರಿ ನಡತ್ಂಡ್.</verse>
				<verse number="3">ಅಪಗ ಖಾನೇಷ್‌ಮಾರಿ ಬರೆಪಾವೆರೆಗಾದ್ ಮಾತೆರ್ಲಾ ತನ್ಕುಲೆ ಊರುಲೆಗ್ ಪಿದಾಡಿಯೆರ್.</verse>
				<verse number="4">ಯೋಸೇಫುಲಾ ತಾನ್ ದಾವೀದ್ ಸಂತಾನದಾಯೆಲಾ ಗೋತ್ರದಾಯೆಲಾ ಆದಿತ್ತಿನೆಡ್ದ್ ಖಾನೇಷ್‌ಮಾರಿ ಬರೆಪಾವೆರೆಗಾದ್ ತನ್ಕ್ ನಿಚ್ಚಯ ಆದಿತ್ತಿ ಮರಿಯ ಒಟ್ಟುಗು ಗಲಿಲಾಯದ ನಜರೇತ್ ಪನ್ಪಿ ಊರುಡ್ದು ಪಿದಾಡ್ದ್ ಯೂದಾಯೊಡುಪ್ಪು ಬೇತ್ಲೆಹೇಮು ಪನ್ಪಿ ದಾವೀದನ ಊರುಗು ಪೋಯೆ. ಅಪಗ ಮರಿಯ ದಿಂಜಿದಿ ಬಂಜಿನಾಲ್ ಆದಿತ್ತಲ್.</verse>
				<verse number="5"></verse>
				<verse number="6">ಅಕುಲು ಅಲ್ಪ ಉಪ್ಪುನಗ ಆಲೆಗ್ ದಿನ ದಿಂಜಿಂಡ್.</verse>
				<verse number="7">ಆಲ್ ತನ ಕಡೀರ ಆಣ್ ಬಾಲೆನ್ ಪೆದ್ದ್‌ದ್ ಕುಂಟುಡು ಸುತ್ತುದು ಬೈಪಣೆಡ್ ಜೆಪುಡಾಯಲ್. ದಾಯೆಗಂದ್ಂಡ ಅಕ್ಲೆಗ್ ಛತ್ರೊಡು ಓಲುಲಾ ಜಾಗ್ ತಿಕ್ಕಿಜಿ.</verse>
				<verse number="8">ಆ ಊರುಡು ರಾತ್ರೆಡ್ ಕುರುಬೆರ್ ಕಂಡೊಡು ತನ್ಕುಲೆ ಕುರಿಕುಲೆ ಪುಂಡುನು ಕಾತೊಂದಿತ್ತೆರ್.</verse>
				<verse number="9">ಅಪಗ ಕರ್ತವ ದೂತೆ ಬತ್ತ್‌ದ್ ಅಕ್ಲೆನ ಎದುರುಡು ಉಂತಿಯೆ. ಕರ್ತವ ಮೈಮೆ ಅಕ್ಲೆನ ಸುತ್ತ ದಿಂಜಿಂಡ್; ಅವೆನ್ ತೂದು ಅಕುಲು ಮಸ್ತ್ ಪೋಡಿಯೆರ್.</verse>
				<verse number="10">ಆ ದೂತೆ ಅಕ್ಲೆಗ್, “ಪೋಡ್ಯಡೆ, ಕೇನ್ಲೆ, ಜನೊಕುಲೆಗ್ ಮಾತೆರೆಗ್ಲಾ ದಿಂಜ ಸಂತೋಷ ಉಂಡಾಪಿ ಎಡ್ಡೆ ವರ್ತಮಾನೊನು ತೆರಿಪಾವೆ.</verse>
				<verse number="11">ಅವು ದಾನೆಂದ್ಂಡ, ಈ ಗಳಿಗೆಡ್ ನಿಕ್ಲೆಗಾದ್ ದಾವೀದ್ ಊರುಡು ಒರಿ ರಕ್ಷಕೆ ಪುಟ್ಟುದೆ. ಆಯೆ ಕರ್ತವೆ ಆದುಪ್ಪು ಕ್ರಿಸ್ತೆನೇ.</verse>
				<verse number="12">ನಿಕ್ಲೆಗ್ ಗೊತ್ತಾವೆರೆ ಗುರ್ತ ದಾನೆಂದ್ಂಡ, ಕುಂಟುಡು ಸುತ್ತುದಿನ ಒಂಜಿ ಬಾಲೆ ಬೈಪಣೆಡ್ ಜೆಯ್ದಿನೆನ್ ತೂವರ್,” ಅಂದ್‌ದ್ ಪಂಡೆ.</verse>
				<verse number="13">ಅಪಗನೆ ಆ ದೂತಡೊಪ್ಪ ಪರಲೋಕೊಡ್ದು ಒಂಜಿ ಮಲ್ಲ ದೂತೆರೆಸೈನ್ಯ ತೋಜಿದ್ ಬತ್ತ್‌ದ್ ದೇವೆರೆನ್ ಪುಗರೊಂದು ಪಂಡೆರ್,</verse>
				<verse number="14">“ಪರಲೋಕೊಡುಪ್ಪು ದೇವೆರೆಗ್ ಮೈಮೆ, ಭೂಲೋಕೊಡು ನರಮಾನಿಲೆಗ್ ಸಮಾಧಾನ. ದೇವೆರ್ ಅಕ್ಲೆನ್ ಮೆಚ್ಚುವೆರ್.”</verse>
				<verse number="15">ದೂತೆರ್ ಅಕ್ಲೆನ ಕೈತಲ್‌ಡ್ದ್ ಪರಲೋಕೊಗು ಪೋಯಿ ಬೊಕ್ಕ ಕುರುಬೆರ್, “ನಮ ಇತ್ತೆನೇ ಬೇತ್ಲೆಹೇಮುಗು ಪೋದು ಕರ್ತವೆ ನಂಕ್ ತೆರಿಪಾಯಿ ಈ ಸಂಗತಿಲೆನ್ ತೂಕ ಲಕ್ಕ್‌ಲೆ,” ಅಂದ್‌ದ್ ಒರಿಯಡೊರಿ ಪಾತೆರೊಂದು,</verse>
				<verse number="16">ಅಪಗನೆ ಮರಿಯನ್ಲಾ ಯೋಸೇಫುನ್ಲಾ ಬೈಪಣೆಡ್ ಜೆತ್ತ್‌ದಿತ್ತಿ ಆ ಬಾಲೆನ್ಲಾ ತೂಯೆರೆ ಪೋಯೆರ್.</verse>
				<verse number="17">ಬಾಲೆನ್ ತೂಯಿ ಬೊಕ್ಕ ಅಕುಲು ಆ ಬಾಲೆದ ಬಗೆಟ್ ದೇವದೂತೆರ್ ತನ್ಕುಲೆಗ್ ಪಂಡಿ ಪಾತೆರೊನು ತೆರಿಪಾಯೆರ್.</verse>
				<verse number="18">ಕುರುಬೆರ್ ಪಂಡಿನ ಪಾತೆರೊನು ಕೇಂಡಿನ ಮಾತೆರ್ಲಾ ಸೋದ್ಯ ಆಯೆರ್.</verse>
				<verse number="19">ಆಂಡ ಮರಿಯ ಆ ಪಾತೆರೊಲೆನ್ ತನ ಉಡಲ್‌ಡ್ ದೀದ್ ಎನ್ನೊಂದಿತ್ತಲ್.</verse>
				<verse number="20">ಕುರುಬೆರ್ ತನ್ಕ್‌ಲೆಗ್ ದೂತೆರ್ ಪಂಡಿಲೆಕ್ಕ ಮಾತ ಸಂಗತಿಲೆನ್ ಕೇಂಡ್ದ್ ತೂದು ದೇವೆರೆನ್ ಪುಗರೊಂದುಲಾ ಸುಗಿತೊಂದುಲಾ ಪಿರ ಪೋಯೆರ್.</verse>
				<verse number="21">ಆ ಬಾಲೆ ಪುಟ್ಟುದು ಎನ್ಮನೆ ದಿನೊಟು ಸುನ್ನತಿ ಮಲ್ಪು ದಿನತಾನಿ ಯೇಸು ಪಂಡ್ದ್ ಪುದರ್ ದೀಯೆರ್. ಬಾಲೆ ಗರ್ಭೊಡು ಉಂಡಾಪಿ ದುಂಬೇ ದೂತೆರ್ ಅವ್ವೇ ಪುದರ್‌ನ್ ದೀವೊಡು ಪಂಡ್ದಿತ್ತೆರ್.</verse>
				<verse number="22">ಮೋಶೆನ ನ್ಯಾಯಕಟ್ಟ್‌ದ ಪ್ರಕಾರ ಅಕ್ಲೆನ ಶುದ್ಧಾಚಾರದ ದಿನೊಕುಲು ಮುಗಿ ಬೊಕ್ಕ ಆ ಬಾಲೆನ್ ಯೆರೂಸಲೇಮುಗು ಲೆತ್ತೊಂದು ಪೋಯೆರ್.</verse>
				<verse number="23">ದಾಯೆಗ್ ಪಂಡ ಕಡೀರ ಆಣ್ ಬಾಲೆನ್ ಕರ್ತವಗ್ ಪರಿಶುದ್ಧದವು ಅಂದ್‌ದ್ ಅರ್ಪಣೆ ಮಲ್ಪೊಡಂದ್‌ದ್ ಕರ್ತವ ನ್ಯಾಯಕಟ್ಟ್‌ಡ್ ಬರೆದುಂಡು.</verse>
				<verse number="24">ಐಕಾದ್ ಕರ್ತವ ನ್ಯಾಯಕಟ್ಟ್ ಪಂಡಿಲೆಕ್ಕ ಒಂಜಿ ಜೋಡಿ ಪಾರಿವಾಳ ಇಜ್ಜಿಂಡ ರಡ್ಡ್ ಪಾರಿವಾಳದ ಕಿನ್ನಿಲೆನ್ ಬಲಿ ಕೊರೊಡಿತ್ತ್‌ಂಡ್.</verse>
				<verse number="25">ಆ ಸಮಯೊಡು ಯೆರೂಸಲೇಮುಡು ಸಿಮೆಯೋನೆ ಪನ್ಪಿ ಒರಿ ನರಮಾನಿ ಇತ್ತೆ. ಆಯೆ ನೀತಿವಂತೆಲಾ ಭಕ್ತಿದಾಯೆಲಾ ಆದಿತ್ತೆ. ಇಸ್ರಾಯೇಲ್ ಜನೊಕುಲೆನ ಸಂತೈಸಿಕೆ ಕೊರ್ಪಿನಾಯೆ ಏಪ ಬರುವೆ ಅಂದ್‌ದ್ ಕಾತೊಂದಿತ್ತೆ. ಆಯೆ ಪರಿಶುದ್ಧಾತ್ಮೊನು ಪಡೆದಿತ್ತೆ.</verse>
				<verse number="26">ಕರ್ತವೆ ಕಡಪುಡೊಡಾಯಿನ ಕ್ರಿಸ್ತನ್ ತೂವಂದೆ ಈ ಸೈಪುಜ ಅಂದ್‌ದ್ ಪರಿಶುದ್ಧಾತ್ಮೊಡ್ದು ಆಯಗ್ ಅಪ್ಪಣೆ ಆದಿತ್ತ್ಂಡ್.</verse>
				<verse number="27">ಆಯೆ ಪರಿಶುದ್ಧಾತ್ಮದ ಪ್ರೇರೆಣೆಡ್ದ್ ದೇವಾಲಯೊಗು ಬತ್ತೆ; ನ್ಯಾಯಕಟ್ಟ್‌ದ ಪ್ರಕಾರ ಯೇಸುನ ಅಪ್ಪೆಅಮ್ಮೆ ಬಾಲೆನ್ ದೇವಾಲಯದ ಉಲಯಿ ಲೆತ್ತೊಂದು ಬನ್ನಗ.</verse>
				<verse number="28">ಸಿಮೆಯೋನೆ ಬಾಲೆನ್ ತೂದು ತನ ಕೈಟ್ ದೆತ್ತೊಂದು ದೇವೆರೆನ್ ಪುಗರ್‌ದ್ ಪಂಡಿನಿ,</verse>
				<verse number="29">“ಕರ್ತವಾ, ನಿನ ಪಾತೆರ ನಡತ್ಂಡ್; ಇತ್ತೆ ಸಮಾಧಾನೊಡು ಪೋವೆರೆ ನಿನ ದಾಸಗ್ ಅಪ್ಪಣೆ ಆಂಡ್.</verse>
				<verse number="30">ಈ ನೇಮಕ ಮಲ್ತಿ ರಕ್ಷಕನ್ ಯಾನ್ ಕಣ್ಣಾರೆ ತೂಯೆ.</verse>
				<verse number="31">ಮಾತ ಜನೊಕುಲೆಗ್ ತೋಜಿದ್ ಬರ್ಪಿಲೆಕ್ಕ ಆಯನ್ ಒದಗಾದ್ ಕೊರ್ತ.</verse>
				<verse number="32">ಆಯೆ ಪಿದಯಿದ ಜನೊಕುಲೆಗ್ ಗೇನ ಮೂಡುನ ಬೊಲ್ಪು, ನಿನ ಜನೊಕುಲಾಯಿ ಇಸ್ರಾಯೇಲ್ಯೆರೆಗ್ ಪುಗರಿಗೆ,” ಅಂದ್‌ದ್ ಪಂಡೆ.</verse>
				<verse number="33">ಆ ಬಾಲೆದ ಬಗೆಟ್ ಈ ಪಾತೆರೊಲೆನ್ ಕೇಂಡ್ದ್ ಬಾಲೆದ ಅಪ್ಪೆಲಾ ಅಮ್ಮೆಲಾ ಅಚ್ಚಿರ ಆಯೆರ್.</verse>
				<verse number="34">ಸಿಮೆಯೋನೆ ಅಕ್ಲೆನ್ ಆಶೀರ್ವದಿತ್‌ದ್ ಅಪ್ಪೆ ಆದುಪ್ಪು ಮರಿಯಗ್, “ಇಂದಾ, ಈ ಬಾಲೆ, ಇಸ್ರಾಯೇಲ್ಯೆರೆಡ್ ಮಸ್ತ್ ಜನ ಬೂರುನೆಕ್ಕ್‌ಲಾ ಲಕ್ಕುನೆಕ್ಕ್‌ಲಾ ಕಾರಣ ಆದುಪ್ಪುವೆ; ಬೊಕ್ಕ ಜನೊಕುಲು ಎದುರು ಪಾತೆರಿಯೆರೆಗ್ಲಾ ಗುರ್ತ ಆದುಪ್ಪುವೆ;</verse>
				<verse number="35">ಇಂಚ ಮಸ್ತ್ ಜನೊಕುಲೆನ ಉಡಲ್‌ದ ವಿಚಾರೊಲು ಪಿದಯಿ ಬರು. ಈ ಕಾರಣೊಗಾದ್ ಇಂಬೆ ಪುಟ್ಟುದೆ. ಉಂದತ್ತಂದೆ ನಿನ ಪ್ರಾಣೊಗು ಬರ್ಚಿ ಕಂತಿಲೆಕ್ಕ ಆವು,” ಅಂದ್‌ದ್ ಪಂಡೆ.</verse>
				<verse number="36">ಅಪಗ ಅಸೇರ್ ಜಾತಿದ ಫನುವೇಲ್‌ನ ಮಗಲಾಯಿ ಅನ್ನ ಪನ್ಪಿ ಒರ್ತಿ ಪ್ರವಾದಿನಿ ಇತ್ತಲ್. ಆಲ್ ಮಸ್ತ್ ಪ್ರಾಯದಾಲ್ ಆದಿತ್ತಲ್. ಆಲ್ ಮದ್ಮೆ ಆದ್ ಏಳ್ ವರ್ಸ ಮಾತ್ರ ಕಂಡನಿಡೊಪ್ಪ ಬದ್‌ಕ್‌ದ್ ಎಣ್ಪತ್ತನಾಲ್ ವರ್ಸ ವಿಧವೆ ಆದಿತ್ತಲ್.</verse>
				<verse number="37">ಆಲ್ ದೇವಾಲಯೊಡೇ ಇತ್ತ್‌ದ್ ಉಪವಾಸ ಪ್ರಾರ್ಥನೆ ಮಲ್ತೊಂದು ರಾತ್ರೆ ಪಗೆಲ್ ದೇವೆರೆ ಸೇವೆ ಮಲ್ತೊಂದಿತ್ತಲ್.</verse>
				<verse number="38">ಆಲ್ ಅವ್ವೇ ಗಳಿಗೆಡ್ ಕೈತಲ್‌ ಬತ್ತ್‌ದ್ ದೇವೆರೆಡ್ದ್ ಆಯಿ ಉಪಕಾರೊನು ನೆನೆತ್‌ದ್ ಪುಗರೊಂದು ಯೆರೂಸಲೇಮುದ ಬುಡುಗಡೆನ್ ಕಾತೊಂದಿತ್ತಿ ಮಾತೆರೆಡ ಈ ಬಾಲೆದ ಸಂಗತಿಡ್ ಪಾತೆರಿಯಲ್.</verse>
				<verse number="39">ಐಡ್ದ್ ಬೊಕ್ಕ ಅಕುಲು ಕರ್ತವ ನ್ಯಾಯಕಟ್ಟ್‌ಗ್ ಸರಿಯಾದ್ ಮಾತೆನ್ಲಾ ಮುಗಿತಿ ಬೊಕ್ಕ ಗಲಿಲಾಯೊಡುಪ್ಪು ನಜರೇತ್ ಪನ್ಪಿ ತನ್ಕುಲೆ ಊರುಗು ಪಿರ ಪೋಯೆರ್.</verse>
				<verse number="40">ಆ ಬಾಲೆ ಬಲತ್‌ದ್ ಗೇನೊಡು ದಿಂಜಿದ್ ಆತ್ಮೊಡು ಬಲ ಹೊಂದಿಯೆ, ಬೊಕ್ಕ ದೇವೆರೆ ದಯ ಆಯನ ಮಿತ್ತ್ ಇತ್ತ್ಂಡ್.</verse>
				<verse number="41">ಆಯನ ಅಪ್ಪೆಅಮ್ಮೆ ಪ್ರತಿ ವರ್ಸಲಾ ಪಸ್ಕ ಪರ್ಬದ ಜಾತ್ರೆಗ್ ಯೆರೂಸಲೇಮುಗು ಪೋವೊಂದಿತ್ತೆರ್.</verse>
				<verse number="42">ಯೇಸು ಪದ್ರಾಡ್ ವರ್ಸದಾಯೆ ಆದುಪ್ಪುನಗ ಅಕುಲು ಪರ್ಬದ ಕಟ್ಟ್‌ದ ಪ್ರಕಾರ ಅಡೆಗ್ ಪೋಯೆರ್.</verse>
				<verse number="43">ಪರ್ಬದ ದಿನೊಲೆನ್ ಮುಗಿತ್‌ದ್ ಪಿರ ಬನ್ನಗ ಬಾಲೆ ಯೇಸು ಯೆರೂಸಲೇಮುಡೇ ಉಂತಿಯೆ. ಆಯನ ಅಪ್ಪೆಅಮ್ಮೆ ತೆರಿಯಂದೆ ಪೋಯೆರ್.</verse>
				<verse number="44">ಆಯೆ ಜಾತ್ರೆದ ಗುಂಪುಡು ಸೇರೊಂದೆ ಅಂದ್‌ದ್ ಎನ್ನ್‌ದ್ ಒಂಜಿ ದಿನತ ಪ್ರಯಾಣ ಮಲ್ತ್‌ದ್ ಕುಟುಂಬದಾಕುಲೆಡ್ಲಾ ಗುರ್ತ ಇತ್ತಿನಕುಲೆಡ್ಲಾ ಆಯನ್ ನಾಡ್‌ಂಡಲಾ ತಿಕ್ಕಿಜೆ.</verse>
				<verse number="45">ಅಕುಲು ಪಿರ ಯೆರೂಸಲೇಮುಗು ನಾಡೊಂದು ಪೋಯೆರ್.</verse>
				<verse number="46">ಮೂಜಿ ದಿನೊಡ್ದು ಬೊಕ್ಕ ಆಯನ್ ದೇವಾಲಯೊಡು ತೂಯೆರ್. ಆಯೆ ಬೋಧಕೆರೆ ನಡುಟು ಕುಲ್ಲೊಂದು ಅಕ್ಲೆನ ಬೋಧನೆನ್ ಕೇನೊಂದು ಪ್ರಶ್ನೆ ಮಲ್ತೊಂದಿತ್ತೆ.</verse>
				<verse number="47">ಆಯೆ ಪನ್ಪಿ ಪಾತೆರೊಲೆನ್ ಕೇಂಡಿನ ಮಾತೆರ್ಲಾ ಆಯನ ಬುದ್ಧಿಗ್ಲಾ ಉತ್ತರೊಗ್ಲಾ ಅಚ್ಚಿರ ಆಯೆರ್.</verse>
				<verse number="48">ಅಪ್ಪೆಲಾ ಅಮ್ಮೆಲಾ ಆಯನ್ ತೂದು ಸೋದ್ಯ ಆಯೆರ್; ಬೊಕ್ಕ ಆಯನ ಅಪ್ಪೆ ಮಗಾ, “ಈ ಎಂಕ್ಲೆಗ್ ದಾಯೆಗ್ ಇಂಚ ಮಲ್ತ? ನಿನ ಅಮ್ಮೆಲಾ ಯಾನ್ಲಾ ನಿನನ್ ಏತ್ ಚಿಂತೆಡ್ ನಾಡೊಂದು ಬತ್ತ.”</verse>
				<verse number="49">ಪಂಡಿನಪಗ ಆಯೆ, “ನಿಕುಲು ಎನನ್ ದಾಯೆಗ್ ನಾಡುವರ್? ಯಾನ್ ಎನ ಅಮ್ಮೆರೆ ಇಲ್ಲಡ್ ಉಪ್ಪೊಡು ಪನ್ಪಿನವು ನಿಕ್ಲೆಗ್ ತೆರಿದಿಜಾ?” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="50">ಆಂಡ ಅಕುಲು ಆಯೆ ಪಂಡಿನ ಪಾತೆರದ ಅರ್ಥೊನು ತೆರಿಜೆರ್.</verse>
				<verse number="51">ಬೊಕ್ಕ ಆಯೆ ಅಕ್ಲೆಡೊಪ್ಪ ನಜರೇತ್ ಊರುಗು ಬತ್ತ್‌ದ್ ಅಕ್ಲೆಗ್ ಅಧೀನ ಆದಿತ್ತೆ. ಆಯನ ಅಪ್ಪೆ ಈ ಪಾತೆರೊಲೆನ್ ತನ ಉಡಲ್‌ಡ್ ದೀವೊಂಡಲ್.</verse>
				<verse number="52">ಯೇಸು ಬುದ್ಧಿಡ್ಲಾ ಶರೀರೊಡ್ಲಾ ಬಲತೊಂದು ಬತ್ತೆ; ಉಂದತ್ತಂದೆ ದೇವೆರೆನ ಬೊಕ್ಕ ನರಮಾನಿಲೆನ ದಯ ಆಯನ ಮಿತ್ತ್ ಹೆಚ್ಚಾವೊಂದು ಬತ್ತ್ಂಡ್.</verse>
			</chapter>
			<chapter number="3">
				<verse number="1">ಚಕ್ರವರ್ತಿ ಆಯಿ ತಿಬೇರಿಯೆ ಪಟ್ಟೊಗು ಬತ್ತಿ ಪದಿನೈನನೇ ವರ್ಸೊಡು, ಪೊಂತ್ಯ ಪಿಲಾತೆ ಯೂದಾಯೊಗು ಅಧಿಪತಿಲಾ ಹೆರೋದೆ ಗಲಿಲಾಯೊಗು ಉಪರಾಜೆಲಾ ಆಯನ ಮೆಗ್ಯೆ ಫಿಲಿಪ್ಪೆ ಇತುರಾಯ ತ್ರಕೋನಿತಿ ಸೀಮೆದ ಉಪರಾಜೆಲಾ ಲುಸನ್ಯೆ ಅಬಿಲೇನೆಗ್ ಉಪರಾಜೆಲಾ ಆದುಪ್ಪುನಗ</verse>
				<verse number="2">ಅನ್ನೆಲಾ ಕಾಯಫೆಲಾ ಪ್ರಧಾನಯಾಜಕೆರ್ ಆದಿತ್ತಿ ಕಾಲೊಡು ಜಕರೀಯನ ಮಗೆ ಆಯಿ ಯೋಹಾನೆ ಕಾಡ್‌ಡ್ ಉಪ್ಪುನಗ ದೇವೆರ್ ಆಯಡ ಪಾತೆರಿಯೆ.</verse>
				<verse number="3">ಆಯೆ ಯೊರ್ದಾನ್ ತುದೆತ ಸುತ್ತ ಇತ್ತಿನ ಮಾತ ಪ್ರಾಂತೊಲೆಗ್ ಬತ್ತ್‌ದ್ ಜನೊಕುಲೆಗ್, ನಿಕುಲು ಪಾಪ ಪರಿಹಾರೊಗಾದ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ ದೀಕ್ಷಾಸ್ನಾನ ಮಲ್ತೊನೊಡು ಅಂದ್‌ದ್ ಸಾರಿಯೊಂದಿತ್ತೆ.</verse>
				<verse number="4">ಉಂದು ಯೆಶಾಯ ಪ್ರವಾದಿನ ಗ್ರಂಥೊಡು ಬರೆತಿಲೆಕ್ಕ ನಡತ್ಂಡ್, ಆ ಪಾತೆರ ದಾನೆಂದ್ಂಡ: “ಕರ್ತವ ಮಾರ್ಗೊನು ತಯಾರ್ ಮಲ್ಪುಲೆ, ಆಯ ಸಾದಿನ್ ಸರ್ತ ಮಲ್ಪುಲೆ, ಮಾತ ಪಲ್ಲ ಕೆದುಕುಲು ಮುಚ್ಚಿದ್ ಪೋವು, ಮಾತ ಪರ್ವತೊಲುಲಾ ಗುಡ್ಡೆಲುಲಾ ತಗ್ಗ್‌ದ್ ಪೋವು, ಮೋಂಟು ಸಾದಿಲು ಸೀದ ಆವು, ಎತ್ತ್ ತಗ್ಗ್‌ದ ಸಾದಿಲು ಸಮ ಆವು, ಮಾತ ನರಜಾತಿಲು ದೇವೆರೆಡ್ದ್ ಆಪಿ ರಕ್ಷಣೆನ್ ತೂವೆರ್ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯ ಸ್ವರ ಉಂಡು ಪನ್ಪಿನವೇ.”</verse>
				<verse number="5"></verse>
				<verse number="6"></verse>
				<verse number="7">ತನಡ್ದ್ ದೀಕ್ಷಾಸ್ನಾನ ದೆತ್ತೊನಿಯೆರೆ ಪಿದಾಡ್ದ್ ಬತ್ತಿ ಜನೊಕುಲೆ ಗುಂಪುಲೆಗ್ ಆಯೆ ಪಂಡೆ, “ಓ ಸರ್ಪ ಜಾತಿದಾಕುಲೇ, ದುಂಬಗ್ ತೋಜಿದ್ ಬರ್ಪಿ ದೈವಕೋಪೊಡ್ದು ತಪ್ಪಾವೊನ್ರೆ ನಿಕ್ಲೆಗ್ ಎಚ್ಚರಿಕೆ ಏರ್ ಕೊರಿಯೆರ್?</verse>
				<verse number="8">ಅಂಚಾಂಡ ನಿಕಲ್ನ ಮನಸ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ಂಡ್ ಪನ್ಪಿನೆಕ್ಕ್ ತಕ್ಕ ಫಲೊಡ್ದು ತೋಜಪಾಲೆ. ಅಬ್ರಹಾಮು ಎಂಕ್ಲೆನ ಪೂರ್ವಜೆ ಪಂಡ್ದ್‌ ನಿಕ್ಲೆ ಉಲಯಿಡ್ ಪನ್ಪಿನಾಕುಲು ಆವಡೆ. ದೇವೆರ್ ಅಬ್ರಹಾಮುಗು ಈ ಕಲ್ಲ್‌ಲೆಡ್ದ್‌ಲಾ ಜೋಕುಲೆನ್ ಪುಟ್ಟಾವೆರೆ ಸಾದ್ಯ ಉಂಡು ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="9">ಇತ್ತೆನೇ ಮರತ ಬೇರ್‌ಗ್ ಕುಡರಿ ಪಾಡ್ದ್ಂಡ್; ಎಡ್ಡೆ ಫಲೊನು ಕೊರಂದಿ ಪ್ರತಿಯೊಂಜಿ ಮರೊನು ಕಡ್ತ್‌ದ್ ತೂಕು ಪಾಡ್ವೆರ್.”</verse>
				<verse number="10">ಅಪಗ ಆ ಗುಂಪುದಾಕುಲು, “ಅಂಚಾಂಡ ಎಂಕುಲು ದಾದ ಮಲ್ಪೊಡು?” ಅಂದ್‌ದ್ ಆಯಡ ಕೇಂಡಿನೆಕ್ಕ್</verse>
				<verse number="11">ಆಯೆ ಅಕ್ಲೆಗ್, “ರಡ್ಡ್ ಅಂಗಿ ಇತ್ತಿನಾಯೆ ಒಂಜೆನ್ ಇಜ್ಜಾಂದಿನಾಯಗ್ ಕೊರಡ್. ಬೋಡಾಯಿನಾತ್ ತಿನಿಯೆರೆ ಇತ್ತಿನಾಯೆ ದಾಂತಿನಾಯಗ್ ಕೊರಡ್,” ಪಂಡ್ದ್ ಉತ್ತರ ಕೊರಿಯೆ.</verse>
				<verse number="12">ಸುಂಕದಾಕುಲುಲಾ ದೀಕ್ಷಾಸ್ನಾನ ಮಲ್ತೊನ್ರೆ ಆಯನ ಕೈತಲ್‌ ಬತ್ತೆರ್. ಅಕುಲು ಬೋಧಕಾ, “ಎಂಕುಲು ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ</verse>
				<verse number="13">“ನಿಕ್ಲೆಗ್ ನೇಮಕ ಮಲ್ತಿ ಲೆಖ್ಖೊಡ್ದು ಹೆಚ್ಚಿಗೆ ಒವೆನ್ಲಾ ಒಯ್ತೊನಡೆ,” ಅಂದ್‌ದ್ ಅಕ್ಲೆಗ್ ಪಂಡೆ.</verse>
				<verse number="14">ಸಿಪಾಯಿಲುಲಾ ಬತ್ತ್‌ದ್, “ಎಂಕುಲು ದಾದ ಮಲ್ಪೊಡು?” ಅಂದ್‌ದ್ ಆಯಡ ಕೇನ್ನಗ ಆಯೆ ಅಕ್ಲೆಗ್, “ಏರೆನಲಾ ಮಂಡೆ ಹಾಕ್‌ದ್ ಸುಳ್ಳು ಪಂಡ್ದ್ ಕಾಸ್ ಒಯ್ತೊನಡೆ ನಿಕ್ಲೆ ಸಂಬಳೊಡು ತೃಪ್ತಿ ಆಲೆ,” ಪಂಡೆ.</verse>
				<verse number="15">ಇಸ್ರಾಯೇಲ್ ಜನೊಕುಲು ಬರೊಡಾಯಿನ ರಕ್ಷಕೆ ಆಯಿ ಕ್ರಿಸ್ತನ್ ಕಾತೊಂದುಪ್ಪುನಾಕುಲು ಆದಿತ್ತಿನೆಡ್ದ್ ಅಕುಲು ಮಾತೆರ್ಲಾ ಯೋಹಾನನ ಬಗೆಟ್ ಉಂಬೆನೇ ಆ ಕ್ರಿಸ್ತೆ ಆದುಪ್ಪೆನಾ ಅಂದ್‌ದ್ ತನ್ಕುಲೆ ಉಡಲ್‌ಡ್ ಎನ್ನೊಂದುಪ್ಪುನಗ</verse>
				<verse number="16">ಯೋಹಾನೆ ಅಕ್ಲೆಗ್, “ಯಾನ್ ನಿಕ್ಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ; ಆಂಡ ಎನಡ್ದ್ ಬಲ ಇತ್ತಿನಾಯೆ ಎನ ಬೆರಿಯೆ ಬರ್ಪೆ. ಆಯ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ತಕ್ಕದಾಯೆ ಅತ್ತ್. ಆಯೆ ನಿಕ್ಲೆಗ್ ಪರಿಶುದ್ಧಾತ್ಮೊಡು ಬೊಕ್ಕ ತೂಟು ದೀಕ್ಷಾಸ್ನಾನ ಕೊರುವೆ.</verse>
				<verse number="17">ಆಯನ ಕೈಟ್ ತಡ್ಪೆ ಉಂಡು, ತನ ಜಾಲ್‌ನ್ ಕೊಡೀಕಡೆ ಅಡ್ತ್‌ದ್ ಬುಲೆತ ರಾಶಿನ್ ರಾಪಾದ್ ಪುಡೆತ್‌ದ್ ತನ್ನ ಗೋದಿನ್ ತುಪ್ಪೆಡ್ ದಿಂಜಾವೆ. ಆಂಡ ದಡ್ಡ್‌ನ್ ತೆಕ್ಕಂದಿ ತೂಟು ಪೊತ್ತಾದ್ ಬುಡ್ಪೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="18">ನನ ಬೇತೆ ಮಸ್ತ್ ಪಾತೆರೊಲೆಡ್ ಆಯೆ ಇಸ್ರಾಯೇಲ್ ಜನೊಕುಲೆಗ್ ಬುದ್ಧಿ ಪಂಡ್ದ್ ಸುವಾರ್ತೆ ಸಾರೊಂದಿತ್ತೆ.</verse>
				<verse number="19">ಆಂಡ ಉಪರಾಜೆ ಹೆರೋದೆ ತನ ಪಲಯನ ಬೊಡೆದಿ ಹೆರೋದ್ಯೆಲೆಗಾದ್‌ಲಾ ತಾನ್ ಮಲ್ತಿ ಹಾಳ್ ಬೇಲೆಗ್ಲಾ ಯೋಹಾನೆ ಆಯಗ್ ದಟ್ಯೊಂದಿತ್ತಿನೆಕ್ಕ್,</verse>
				<verse number="20">ಹೆರೋದೆ ಯೋಹಾನನ್ ಸೆರೆಮನೆಟ್ ಪಾಡಾದ್ ತನ ಹಾಳ್ ಬೇಲೆದ ಲೆಖ್ಖೊನು ನನಲಾತ್ ಹೆಚ್ಚ್ ಮಲ್ತೊಂಡೆ.</verse>
				<verse number="21">ಜನೊಕುಲು ಮಾತೆರ್ ದೀಕ್ಷಾಸ್ನಾನ ದೆತ್ತೊಂದುಪ್ಪುನಗ ಯೇಸುಲಾ ನೀರ್‌ದ ದೀಕ್ಷಾಸ್ನಾನ ದೆತ್ತೊಂದು ಪ್ರಾರ್ಥನೆ ಮಲ್ತೊಂದುಪ್ಪುನಗ ಪರಲೋಕ ಜತ್ತ್ಂಡ್.</verse>
				<verse number="22">ಪರಿಶುದ್ಧಾತ್ಮ ಪಾರಿವಾಳದ ಶರೀರಾಕಾರೊಡು ಆಯನ ಮಿತ್ತ್ ಜತ್ತ್ಂಡ್. ಅಪಗ ಪರಲೋಕೊಡ್ದು ಒಂಜಿ ಸ್ವರ ಆಂಡ್, “ಈಯೇ ಎನ ಪ್ರೀತಿದ ಮಗೆ, ನಿನಡ್ ಎಂಕ್ ಮೆಚ್ಚಿಗೆ ಉಂಡು.”</verse>
				<verse number="23">ಯೇಸು ಬೋಧನೆ ಮಲ್ಪೆರೆ ಸುರು ಮಲ್ಪುನಗ ಹೆಚ್ಚಿಕಡಿಮೆ ಮುಪ್ಪ ವರ್ಸದಾಯೆ ಆದಿತ್ತೆ. ಜನ ಎನ್ನಿಲೆಕ್ಕ ಯೇಸು ಯೋಸೇಫನ ಮಗೆ. ಯೋಸೇಫು ಹೇಲೀಯನ ಮಗೆ;</verse>
				<verse number="24">ಹೇಲೀಯ ಮತ್ಥಾತನ ಮಗೆ; ಮತ್ಥಾತ ಲೇವಿನ ಮಗೆ; ಲೇವಿ ಮೆಲ್ಕಿನ ಮಗೆ; ಮೆಲ್ಕಿ ಯನ್ನಾಯನ ಮಗೆ; ಯೆನ್ನಾಯ ಯೋಸೇಫುನ ಮಗೆ;</verse>
				<verse number="25">ಯೋಸೇಫು ಮತ್ತಥೀಯನ ಮಗೆ; ಮತ್ತಥೀಯ ಅಮೋಸುನ ಮಗೆ; ಅಮೋಸು ನಹೂಮ್‌ನ ಮಗೆ; ನಹೂಮ್‌ ಎಸ್ಲಿನ ಮಗೆ; ಎಸ್ಲಿ ನಗ್ಗಾಯನ ಮಗೆ;</verse>
				<verse number="26">ನಗ್ಗಾಯ ಮಾಹಾಥನ ಮಗೆ; ಮಾಹಾಥ ಮತ್ತಥೀಯನ ಮಗೆ; ಮತ್ತಥೀಯ ಶಿಮೀಯನ ಮಗೆ; ಶಿಮೀಯ ಯೊಸೇಖನ ಮಗೆ; ಯೊಸೇಖ ಯೂದನ ಮಗೆ;</verse>
				<verse number="27">ಯೂದ ಯೋಹಾನನ ಮಗೆ; ಯೋಹಾನ ರೇಸನ ಮಗೆ; ರೇಸ ಜೆರುಬಾಬೆಲ್‌ನ ಮಗೆ; ಜೆರುಬಾಬೆಲ್ ಸಲಥಿಯೇಲ್‌ನ ಮಗೆ; ಸಲಥಿಯೇಲ್ ನೇರಿನ ಮಗೆ;</verse>
				<verse number="28">ನೇರಿ ಮೆಲ್ಕಿನ ಮಗೆ; ಮೆಲ್ಕಿ ಅದ್ದಿಯ ಮಗೆ; ಅದ್ದಿಯ ಕೋಸಾಮ್‌ನ ಮಗೆ; ಕೋಸಾಮ್‌ ಎಲ್ಮದಾಮನ ಮಗೆ; ಎಲ್ಮದಾಮ ಎರ್‌ನ ಮಗೆ;</verse>
				<verse number="29">ಎರ್ ಯೆಹೋಷುನ ಮಗೆ; ಯೆಹೋಷು ಎಲಿಯೇಜರನ ಮಗೆ; ಎಲಿಯೇಜರ್‌ ಯೋರೈಮನ ಮಗೆ; ಯೋರೈಮ ಮತ್ಥಾತನ ಮಗೆ; ಮತ್ಥಾತ ಲೇವಿನ ಮಗೆ;</verse>
				<verse number="30">ಲೇವಿ ಸಿಮೆಯೋನುನ ಮಗೆ; ಸಿಮೆಯೋನು ಯೂದನ ಮಗೆ; ಯೂದೆ ಯೋಸೇಫುನ ಮಗೆ; ಯೋಸೇಫು ಯೋನಾಮ್‌ನ ಮಗೆ; ಯೋನಾಮ್‌ ಎಲ್ಯಕೀಮನ ಮಗೆ;</verse>
				<verse number="31">ಎಲ್ಯಕೀಮ ಮೆಲೆಯೆನ ಮಗೆ; ಮೆಲೆಯೆ ಮೆನ್ನನ ಮಗೆ, ಮೆನ್ನ ಮತ್ತಾಥನ ಮಗೆ; ಮತ್ತಾಥೆ ನಾತಾನನ ಮಗೆ; ನಾತಾನೆ ದಾವೀದನ ಮಗೆ;</verse>
				<verse number="32">ದಾವೀದ್ ಇಸ್ಸಾಯನ ಮಗೆ; ಇಸ್ಸಾಯೆ ಓಬೆದನ ಮಗೆ; ಓಬೆದ್‌ ಬೋವಜ್‌ನ ಮಗೆ; ಬೋವಜ್‌ ಸಲ್ಮೋನನ ಮಗೆ; ಸಲ್ಮೋನ್‌ ನಹಸ್ಸೋನನ ಮಗೆ;</verse>
				<verse number="33">ನಹಸ್ಸೋನ್ ಅಮ್ಮೀನಾದಾಬುನ ಮಗೆ; ಅಮ್ಮೀನಾದಾಬು ಅದ್ಮಿನನ ಮಗೆ; ಅದ್ಮಿನ್‌ ಆರ್ನ್ಯೆಯನ ಮಗೆ; ಆರ್ನ್ಯೆಯೆ ಎಸ್ರೋನನ ಮಗೆ; ಎಸ್ರೋನ್‌ ಪೆರೆಸ್‌ನ ಮಗೆ; ಪೆರೆಸ್ ಯೂದನ ಮಗೆ;</verse>
				<verse number="34">ಯೂದ ಯಾಕೋಬುನ ಮಗೆ; ಯಾಕೋಬು ಇಸಾಕ್‌ನ ಮಗೆ; ಇಸಾಕ್ ಅಬ್ರಹಾಮುನ ಮಗೆ; ಅಬ್ರಹಾಮು ತೇರನ ಮಗೆ; ತೇರ ನಾಹೋರುನ ಮಗೆ;</verse>
				<verse number="35">ನಾಹೋರು ಸೆರೂಗನ ಮಗೆ; ಸೆರೂಗ್‌ ರೆಗೂವನ ಮಗೆ; ರೆಗೂವ ಪೆಲೆಗನ ಮಗೆ; ಪೆಲೆಗ್‌ ಹೇಬೆರನ ಮಗೆ; ಹೇಬೆರ್‌ ಸಾಲನ ಮಗೆ; ಸಾಲ ಕಾಯಿನಾನ ಮಗೆ;</verse>
				<verse number="36">ಕಾಯಿನ ಅರ್ಫಕ್ಷಾದನ ಮಗೆ; ಅರ್ಫಕ್ಷಾದ್‌ ಶೇಮ್‌ನ ಮಗೆ; ಶೇಮ್‌ ನೋಹನ ಮಗೆ; ನೋಹ ಲಾಮೆಕ್‌ನ ಮಗೆ;</verse>
				<verse number="37">ಲಾಮೆಕ್‌ ಮೆತೂಷಲನ ಮಗೆ; ಮೆತೂಷಲ ಹನೋಕ್‌ನ ಮಗೆ; ಹನೋಕ್‌ ಯೆರೆದ್‌ನ ಮಗೆ; ಯೆರೆದ್‌ ಮಹಲಲೇಲ್‌ನ ಮಗೆ; ಮಹಲಲೇಲ್ ಕಯಿನಾನ ಮಗೆ;</verse>
				<verse number="38">ಕಯಿನಾ ಎನೋಷನ ಮಗೆ; ಎನೋಷ ಸೇಥ್‌ನ ಮಗೆ; ಸೇಥ್‌ ಆದಾಮು ಮಗೆ; ಉಂಬೆ ದೇವೆರೆ ಮಗೆ.</verse>
			</chapter>
			<chapter number="4">
				<verse number="1">ಯೇಸು ಪರಿಶುದ್ಧಾತ್ಮಡ್ ದಿಂಜಿದಿನಾಯೆ ಆದ್ ಯೊರ್ದಾನ್ ತುದೆಡ್ದ್ ಪಿರ ಬನ್ನಗ ಆತ್ಮ ಆಯನ್ ಕಾಡ್‌ಗ್ ಲೆತ್ತೊಂದು ಪೋಂಡು.</verse>
				<verse number="2">ಅಲ್ಪ ಆಯಗ್ ನಲ್ಪ ದಿನ ಸೈತಾನಡ್ದ್ ಶೋಧನೆ ಆವೊಂದಿತ್ತ್ಂಡ್. ಆ ದಿನೊಕುಲೆಡ್ ಆಯೆ ದಾಲಾ ತಿನಂದೆ ಇತ್ತಿನೆಡ್ದ್ ಆಯಗ್ ಬಾರಿ ಬಡವಾಂಡ್.</verse>
				<verse number="3">ಅಪಗ ಸೈತಾನೆ ಯೇಸುಗು, “ಈ ದೇವೆರೆ ಮಗೆ ಆದಿತ್ತಡ ಈ ಕಲ್ಲ್‌ನ್ ರೊಟ್ಟಿ ಆಪಿಲೆಕ್ಕ ಅಪ್ಪಣೆ ಕೊರ್ಲ,” ಪಂಡೆ</verse>
				<verse number="4">ಐಕ್ ಯೇಸು ಆಯಗ್, “ನರಮಾನಿ ರೊಟ್ಟಿ ತಿಂದ್‌ಂಡ ಮಾತ್ರ ಬದುಕುಜೆ, ಅಂದ್‌ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="5">ಐಡ್ದ್ ಬೊಕ್ಕ ಸೈತಾನೆ ಆಯನ್ ಮಲ್ಲ ಗುಡ್ಡೆಗ್ ಲೆತ್ತೊಂದು ಪೋದು ಒಂಜಿ ಕ್ಷಣತ ಉಲಯಿ ಲೋಕದ ಮಾತ ರಾಜ್ಯೊಲೆನ್ ಆಯಗ್ ತೋಜಾಯೆ.</verse>
				<verse number="6">ಬೊಕ್ಕ ಸೈತಾನೆ ಆಯಗ್ ಪಂಡಿನಿ, “ನೆತ್ತ ಮಾತ ಅಧಿಕಾರೊನ್ಲಾ ಮೈಮೆನ್ಲಾ ನಿಕ್ಕ್ ಕೊರ್ಪೆ; ಅವು ಎಂಕ್ ಒಚ್ಚಿದ್ ಕೊರ್ತುಂಡು. ಉಂದೆನ್ ಎಂಕ್ ಮನಸ್ ಇತ್ತಿನಾಯಗ್ ಕೊರ್ಪೆ.</verse>
				<verse number="7">ಈ ಎನ ಎದುರು ಅಡ್ಡಬೂರ್ದು ಆರಾಧನೆ ಮಲ್ತ್ಂಡ, ಉಂದು ಮಾತ ನಿನ್ನವು ಆಪುಂಡು,” ಪಂಡೆ.</verse>
				<verse number="8">ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವಗ್ ಅಡ್ಡಬೂರ್ದು ಆಯನ್ ಒರಿಯನೇ ಆರಾಧನೆ ಮಲ್ಪೊಡಂದ್‌ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="9">ಬೊಕ್ಕ ಸೈತಾನೆ ಯೇಸುನು ಯೆರೂಸಲೇಮುಗು ಲೆತ್ತೊಂದು ಪೋದು ದೇವಾಲಯದ ಗೋಪುರದ ಮಿತ್ತ್ ಉಂತಾದ್ ಆಯಗ್, “ಈ ದೇವೆರೆ ಮಗೆ ಆದಿತ್ತಡ ಮುಲ್ತುಡ್ದು ತಿರ್ತ್ ಲೈಪುಲ.</verse>
				<verse number="10">ನಿನನ್ ಕಾಪೆರೆಗ್, ‘ದೇವೆರ್ ತನ ದೂತೆರೆಗ್ ಅಪ್ಪಣೆ ಕೊರುವೆ, ಬೊಕ್ಕ ನಿನ ಕಾರ್ ಕಲ್ಲ್‌ಗ್ ತಾಂಟಂದಿಲೆಕ್ಕ ಅಕುಲು ನಿನನ್ ಕೈಟ್ ದೆರ್ತ್ತ್ ಪತ್ತ್‌ವೆರ್ ಅಂದ್‌ದ್ ಬರೆತ್ಂಡ್,’” ಅಂದ್‌ದ್ ಪಂಡೆ.</verse>
				<verse number="11"></verse>
				<verse number="12">ಐಕ್ ಯೇಸು, “ನಿನ ದೇವೆರಾದುಪ್ಪು ಕರ್ತವನ್ ಪರೀಕ್ಷೆ ಮಲ್ಪೆರೆ ಬಲ್ಲಿ ಪಂಡ್ದ್ ಬರೆತ್ಂಡ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="13">ಇಂಚ ತರತರೊಟು ಶೋಧನೆ ಮಲ್ತಿ ಬೊಕ್ಕ ಒಂತೆ ಸಮಯೊಗು ಸೈತಾನೆ ಆಯನ್ ಬುಡ್ದು ಪೋಯೆ.</verse>
				<verse number="14">ಯೇಸು ಪರಿಶುದ್ಧಾತ್ಮದ ಬಲೊಡ್ದು ದಿಂಜಿದಿನಾಯೆ ಆದ್ ಗಲಿಲಾಯ ಸೀಮೆಗ್ ಪಿರ ಪೋಯೆ; ಆಯನ ಸುದ್ಧಿ ಕೈತಲಿತ್ತಿ ಮಾತ ಪ್ರಾಂತೊಲೆಡ್ ಪರಡ್ಂಡ್.</verse>
				<verse number="15">ಆಯೆ ಅಲ್ಪದ ಸಭಾಮಂದಿರೊಲೆಡ್ ಬೋಧನೆ ಮಲ್ತೊಂದು ಬತ್ತೆ. ಮಾತೆರ್ಲಾ ಆಯನ್ ಪುಗರಿಯೆರ್.</verse>
				<verse number="16">ಬೊಕ್ಕ ಆಯೆ ತಾನ್ ಪುಟ್ಟುದು ಬಲತಿ ನಜರೇತ್‌ಗ್ ಬತ್ತ್‌ದ್ ತನ ಕಟ್ಟ್‌ದ ಪ್ರಕಾರ ಸಬ್ಬತ್‌ದಿನೊಟು ಸಭಾಮಂದಿರೊಗು ಪೋದು ಓದೆರೆಗಾದ್ ಲಕ್ಕ್‌ದ್ ಉಂತಿಯೆ.</verse>
				<verse number="17">ಅಪಗ ಪ್ರವಾದಿ ಯೆಶಾಯೆ ಗ್ರಂಥದ ಸುರುಳಿನ್ ಆಯನ ಕೈಕ್ ಕೊರ್ನಗ ಅವೆನ್ ಬುಡ್ಪಾದ್ ಬರೆದುಪ್ಪುನೆನ್ ತೂದು ಓದಿಯೆ; ಆ ಪಾತೆರ ದಾನೆಂದ್ಂಡ:</verse>
				<verse number="18">“ಕರ್ತವ ಆತ್ಮ ಎನ ಮಿತ್ತ್ ಉಂಡು, ಆಯೆ ಎನನ್ ಬಡವೆರೆಗ್ ಸುವಾರ್ತೆನ್ ಸಾರಿಯೆರೆಗ್ ಅಭಿಷೇಕ ಮಲ್ತೆ, ಸೆರೆಮನೆಟ್ಟುಪ್ಪುನಾಕುಲೆಗ್ ಬುಡುಗಡೆ ಆಪಿನೆನ್ಲಾ ಕುರುಡೆರೆಗ್ ಕಣ್ಣ್ ತೋಜುನೆನ್ಲಾ ಮನಸ್ ಪೊಲಿದಿನಾಕುಲೆನ್ ಬುಡ್ಪಾದ್ ಕಡಪುಡಿಯೆರೆಗ್ಲಾ</verse>
				<verse number="19">ಕರ್ತವೆ ನೇಮಕ ಮಲ್ತಿ ಶುಭವರ್ಸೊನು ಸಾರಿಯೆರೆಗ್ಲಾ ಆಯೆ ಎನನ್ ಕಡಪುಡುದೆ ಪನ್ಪಿನವೇ.”</verse>
				<verse number="20">ಓದಿ ಬೊಕ್ಕ ಆಯೆ ಆ ಸುರುಳಿನ್ ಸುತ್ತುದು ಸಭಾಮಂದಿರದ ಚಾಕ್ರಿದಾಯನ ಕೈಟ್ ಕೊರ್ದು ಕುಲ್ಲೊಂಡೆ. ಅಲ್ಪ ಇತ್ತಿ ಮಾತ ಜನೊಕುಲೆ ಕಣ್ಣ್‌ದ ದೃಷ್ಟಿ ಆಯನ ಮಿತ್ತೇ ಬೂರ್ದಿತ್ತ್‌ಂಡ್.</verse>
				<verse number="21">ಅಪಗ ಯೇಸು, “ನಿಕುಲು ಎನ ಪಾತೆರೊನು ಕೇನೊಂದುಪ್ಪುನಗನೇ ಈ ಶಾಸ್ತ್ರದ ಪಾತೆರ ನಡತ್ಂಡ್,” ಅಂದ್‌ದ್ ಪನೊಂದುಪ್ಪುನಗ</verse>
				<verse number="22">ಮಾತೆರ್ಲಾ ಆಯನ್ ಪುಗರೊಂದು, ಆಯ ಬಾಯಿಡ್ದ್ ಪಿದಾಡು ದಯತ ಪಾತೆರೊಲೆಗ್ ಅಚ್ಚಿರ ಆದ್, “ಇಂಬೆ ಯೋಸೇಫು ಮಗೆ ಅತ್ತಾ?” ಅಂದ್‌ದ್ ಪಾತೆರೊಂಡೆರ್.</verse>
				<verse number="23">ಯೇಸು ಅಕ್ಲೆಗ್, “ನಿಕುಲಾಂಡಲಾ, ‘ವೈದ್ಯಾ ನಿನನ್ ಈಯೇ ಗುಣ ಮಲ್ತೊನು,’ ಪನ್ಪಿ ಗಾದೆನ್ಲಾ, ‘ಕಪೆರ್ನೌಮುಡು ಮಲ್ತಿ ಕಾರ್ಯೊಲೆನ್ ಎಂಕುಲು ಕೇಂಡ್ದ, ಅಂಚಿತ್ತಿನೆನ್ ಈ ನಿನ ಸ್ವಂತ ಜಾಗ್‌ಡ್ ಮಲ್ಪು,’ ಅಂದ್‌ದ್ ಪನುವರ್.</verse>
				<verse number="24">ನಿಕ್ಲೆಗ್ ನಿಜಾದ್ ಪನ್ಪೆ, ವಾ ಪ್ರವಾದಿಗ್ಲಾ ಆಯನ ಸ್ವಂತ ಊರುಡು ಮರ್ಯಾದಿ ತಿಕ್ಕುಜಿ.</verse>
				<verse number="25">ನಿಜಾದ್, ಎಲೀಯನ ಕಾಲೊಡು ಮೂಜಿ ವರ್ಸ ಆಜಿ ತಿಂಗೊಲು ಬಾನ ಮುಚ್ಚಿದ್ ಬರ್ಸ ಬರಂದೆ ಇಡೀ ದೇಶೊಡು ಮಲ್ಲ ಬರಗಾಲ ಉಂಡಾನಗ, ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕಂಡನಿ ಸೈತಿನಾಕುಲು ಇತ್ತಿನಿ ನಿಜ;</verse>
				<verse number="26">ಆಂಡ ಅಕ್ಲೆಡ್ ಏರೆ ಕೈತಲ್‌ಲಾ ದೇವೆರ್ ಎಲೀಯನ್ ಕಡಪುಡಂದೆ ಸೀದೋನು ದೇಶೊಗು ಸೇರ್ದಿನ ಸರೆಪ್ತ ಊರುಡಿತ್ತಿ ಒಂಜಿ ಕಂಡನಿ ಸೈತಿನಲೆನ ಕೈತಲ್‌ ಕಡಪುಡಿಯೆ.</verse>
				<verse number="27">ಬೊಕ್ಕ ಎಲೀಷ ಪನ್ಪಿ ಪ್ರವಾದಿ ಕಾಲೊಡು ಇಸ್ರಾಯೇಲ್ ಜನೊಕುಲೆಡ್ ಏತೋ ಜನ ಕೊಷ್ಟದಾಕುಲು ಇತ್ತೆರ್ಡಲಾ ಅಕ್ಲೆಡ್ ಒರಿಯಾಂಡಲಾ ಶುದ್ಧ ಆವಂದೆ ಸುರಿಯ ದೇಶದ ನಾಮಾನೆ ಮಾತ್ರ ಗುಣ ಆಯೆ,” ಅಂದ್‌ದ್ ಪಂಡೆ.</verse>
				<verse number="28">ಸಭಾಮಂದಿರೊಡು ಇತ್ತಿನಾಕುಲು ಮಾತೆರ್ ಈ ಪಾತೆರೊಲೆನ್ ಕೇಂಡ್ದ್ ಮಸ್ತ್ ಕೋಪೊಡು</verse>
				<verse number="29">ಲಕ್ಕ್‌ದ್ ಆಯನ್ ಊರುದ ಪಿದಯಿ ಗಿಡ್ತ್‌ದ್ ತನ್ಕುಲೆ ಊರುಡಿತ್ತಿ ಗುಡ್ಡೆದ ಕೊಡಿಕ್ಕ್ ನಡಪಾವೊಂದು ಪೋದು ಅಲ್ತ್‌ಡ್ದ್ ತಿರ್ತ್ ನೂಕುದು ಪಾಡೊಡು ಅಂದ್‌ದ್ ಇತ್ತೆರ್.</verse>
				<verse number="30">ಆಂಡ ಆಯೆ ಅಕ್ಲೆನ ಮದ್ಯೊಡ್ದು ತಪ್ಪಾವೊಂದು ಪೋಯೆ.</verse>
				<verse number="31">ಐಡ್ದ್ ಬೊಕ್ಕ ಆಯೆ ಘಟ್ಟ ಜತ್ತ್‌ದ್ ಗಲಿಲಾಯೊಗು ಸೇರ್ದಿನ ಕಪೆರ್ನೌಮು ಪನ್ಪಿ ಊರುಗು ಬತ್ತೆ.</verse>
				<verse number="32">ಅಲ್ಪ ಸಬ್ಬತ್‌ದಿನೊಟು ಅಕ್ಲೆಗ್ ಬೋಧನೆ ಮಲ್ತೊಂದುಪ್ಪುನಗ, ಆಯನ ಪಾತೆರೊಲು ಅಧಿಕಾರದವು ಆದಿತ್ತಿನೆಡ್ದ್ ಅಕುಲು ಆಯನ ಬೋಧನೆನ್ ಕೇಂಡ್ದ್ ಅಚ್ಚಿರ ಆಯೆರ್.</verse>
				<verse number="33">ಆ ಸಭಾಮಂದಿರೊಡು ದೆವ್ವ ಪತ್ತ್‌ದಿನ ಒರಿ ನರಮಾನಿ ಇತ್ತೆ.</verse>
				<verse number="34">ಆ ದೆವ್ವ ಓ ನಜರೇತ್‌ದ ಯೇಸೋ, “ಎಂಕ್ಲೆನ ಸುದ್ಧಿ ನಿಕ್ಕ್ ದಾಯೆ? ಎಂಕ್ಲೆನ್ ನಾಶ ಮಲ್ಪೆರೆ ಬೈದನಾ? ಈ ಏರ್ ಅಂದ್‌ದ್ ಎಂಕ್ ಗೊತ್ತುಂಡು, ಈ ದೇವೆರೆ ಪರಿಶುದ್ಧದಾಯೆನೇ.” ಅಂದ್‌ದ್ ಅರಬಾಯಿ ದೀದ್ ಪಂಡ್ಂಡ್.</verse>
				<verse number="35">ಯೇಸು ಅವೆನ್ ದಟ್ಟಿದ್, “ಮನಿಪಂದೆ ಕುಲ್ಲು, ಉಂಬ್ಯನ್ ಬುಡ್ದು ಪೋಲ!” ಅಂದ್‌ದ್ ಪನ್ನಗ ಆ ದೆವ್ವ ಆಯನ್ ಮಗ್‌ರ್‌ಪಾದ್ ಆಯಗ್ ದಾಲಾ ಉಪದ್ರ ಮಲ್ಪಂದೆ ಬುಡ್ದು ಪೋಂಡು.</verse>
				<verse number="36">ಐಕ್ ಮಾತೆರ್ಲಾ ಅಚ್ಚಿರ ಆದ್, “ಉಂದು ಎಂಚಿತ್ತಿ ಪಾತೆರ ಆದುಪ್ಪು? ಉಂಬೆ ಅಧಿಕಾರೊಡುಲಾ ಬಲೊಡ್ದುಲಾ ದೆವ್ವೊಲೆಗ್ ಅಪ್ಪಣೆ ಕೊರ್ಪೆತ್ತಾ? ಐಕುಲು ಬುಡ್ದು ಪೋಪ,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="37">ಬೊಕ್ಕ ಆಯನ ಸುದ್ಧಿ ಸುತ್ತೊಡಿತ್ತಿ ಸೀಮೆದ ಮಾತ ಊರುಲೆಡ್ ಪರಡ್ಂಡ್.</verse>
				<verse number="38">ಬೊಕ್ಕ ಯೇಸು ಸಭಾಮಂದಿರೊಡ್ದು ಲಕ್ಕ್‌ದ್ ಸೀಮೋನನ ಇಲ್ಲಗ್ ಬತ್ತೆ. ಅಲ್ಪ ಸೀಮೋನನ ಮಾಮಿ ಜ್ವರೊಟು ಕಷ್ಟ ಬರ್ಪಿನೆಡ್ದ್ ಆಲೆನ್ ಗುಣ ಮಲ್ಪೊಡಂದ್‌ದ್ ಯೇಸುಡ ನಟ್ಟೊಂಡೆರ್.</verse>
				<verse number="39">ಆಯೆ ಆಲೆ ಕೈತಲ್‌ ಉಂತುದು ಆ ಜ್ವರೊನು ದಟ್ಟಿನಗ ಅವು ಆಲೆನ್ ಬುಡ್ದು ಪೋಂಡು. ಅಪಗನೆ ಆಲ್ ಲಕ್ಕ್‌ದ್ ಅಕ್ಲೆಗ್ ಉಪಚಾರ ಮಲ್ತಲ್.</verse>
				<verse number="40">ಪೊರ್ತು ಕಂತ್‌ನಗ ಆಯಿನಿ ದಾನೆಂದ್ಂಡ ತರತರತ ಸೀಕ್‌ದಾಕುಲೆನ್ ಆಯ ಕೈತಲ್‌ಗ್ ಲೆತ್ತೊಂದು ಬತ್ತೆರ್. ಆಯೆ ಪ್ರತಿ ಒರಿಯನ ಮಿತ್ತ್ ಕೈ ದೀದ್ ಅಕ್ಲೆನ್ ಮಾತೆರೆನ್ಲಾ ಗುಣ ಮಲ್ತೆ.</verse>
				<verse number="41">ದೆವ್ವೊಲು, “ಈ ದೇವೆರೆ ಮಗೆ!” ಅಂದ್‌ದ್ ಅಬ್ಬರಿತ್‌ದ್ ಮಸ್ತ್ ಜನೊಕುಲೆನ್ ಬುಡ್ದು ಪೋಂಡು. ತಾನ್ ರಕ್ಷಕೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ಐಕ್ಲೆಗ್ ತೆರಿದಿತ್ತಿನೆಡ್ದ್ ಆಯೆ ಐಕ್ಲೆನ್ ದಟ್ಟಿದ್ ಪಾತೆರಿಯೆರೆ ಬುಡ್ಜೆ.</verse>
				<verse number="42">ಬೊಲ್ಪು ಆನಗ ಆಯೆ ಪಿದಾಡ್ದ್ ಜನಮಾನಿದಾಂತಿನ ಜಾಗ್‌ಗ್ ಪೋಯೆ; ಜನೊಕುಲು ಗುಂಪುಗುಂಪಾದ್ ಆಯನ್ ನಾಡೊಂದು ಆಯೆ ಇತ್ತಿನಡೆಗ್ ಬತ್ತೆರ್. ಈ ಎಂಕ್ಲೆನ್ ಬುಡ್ದು ಪೋವಡ ಅಂದ್‌ದ್ ಆಯನ್ ತಡೆತೆರ್.</verse>
				<verse number="43">ಆಂಡ ಆಯೆ ಅಕ್ಲೆಗ್, “ಯಾನ್ ದೇವೆರೆ ರಾಜ್ಯದ ಸುವಾರ್ತೆ ಬೇತೆ ಬೇತೆ ಊರುಲೆಗ್ ಸಾರಿಯೊಡು. ಉಂದೆಕಾದೇ ಕಡಪುಡ್ದಿನಾಯೆ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="44">ಬೊಕ್ಕ ಆಯೆ ಯೂದಾಯ ದೇಶದ ಸಭಾಮಂದಿರೊಲೆಡ್ ಸುವಾರ್ತೆನ್ ಸಾರಿಯೊಂದಿತ್ತೆ.</verse>
			</chapter>
			<chapter number="5">
				<verse number="1">ಒಂಜಿ ದಿನ ಜನೊಕುಲು ಗೆನೇಜರೇತು ಕೆರೆತಲ್ಪ ಗುಂಪು ಸೇರ್ದ್ ದೇವೆರೆ ಪಾತೆರೊನು ಕೇನೊಂದಿತ್ತೆರ್.</verse>
				<verse number="2">ಕೆರೆತ ಬರಿಟ್ಟ್ ಉಂತುದಿತ್ತಿ ಯೇಸು ರಡ್ಡ್ ಓಡೊಲೆನ್ ತೂಯೆ. ಮೀನ್ ಪತ್ತುನಾಕುಲು ತನ್ಕುಲೆ ಬಲೆನ್ ದೆಕ್ಕೊಂದಿತ್ತೆರ್.</verse>
				<verse number="3">ಐಟ್ಟ್ ಸೀಮೋನನ ಓಡೊಡು ಯೇಸು ಕುಲ್ಲುದು ಕಡಲ ಕರೆಡ್ದ್ ಒಂತೆ ದೂರ ಒಚ್ಚಿಲ ಅಂದ್‌ದ್ ಆಯಡ ಪಂಡೆ, ಬೊಕ್ಕ ಆಯೆ ಓಡದುಲಯಿ ಕುಲ್ಲೊಂದೆ ಆ ಜನೊಕುಲೆ ಗುಂಪುಗು ಬೋಧನೆ ಮಲ್ತೆ.</verse>
				<verse number="4">ಪಾತೆರ ಮುಗಿ ಬೊಕ್ಕ ಯೇಸು ಸೀಮೋನುಗು ಪಂಡೆ, “ನಿಕುಲು ಗುಂಡಿ ಇತ್ತಿ ಜಾಗ್‌ಗ್ ಓಡೊನು ಒಚ್ಚಿದ್ ಮೀನ್‌ದ ಬೋಂಟೆಗ್ ಬಲೆ ಪಾಡ್ಲೆ,” ಪಂಡೆ.</verse>
				<verse number="5">ಐಕ್ ಸೀಮೋನು ಗುರೂ, “ಎಂಕುಲು ರಾತ್ರೆ ಇಡೀ ಕಷ್ಟ ಬತ್ತಡಲಾ ದಾಲಾ ತಿಕ್ಕಿಜಿ, ಆಂಡ ನಿನ ಪಾತೆರದ ಮಿತ್ತ್ ಬಲೆ ಪಾಡ್ವ,” ಅಂದ್‌ದ್ ಪಂಡೆ.</verse>
				<verse number="6">ಪಾಡಿ ಬೊಕ್ಕ ಮೀನ್‌ದ ರಾಶಿಯೇ ತಿಕ್ಕ್‌ದ್ ಅಕ್ಲೆನ ಬಲೆ ಪರಿಯೆರೆ ಮುಟ್ಟ ಆಂಡ್.</verse>
				<verse number="7">ಅಪಗ ಅಕುಲು ಬೊಕ್ಕೊಂಜಿ ಓಡೊಡಿತ್ತಿ ಪಾಲ್‌ದಾರೆರೆನ್ ಲೆತ್ತ್‌ದ್, ಎಂಕ್ಲೆಗ್ ಸಹಾಯ ಮಲ್ಪುಲೆ ಅಂದ್‌ದ್ ಪಂಡೆರ್. ಅಕುಲು ಬತ್ತ್‌ದ್ ಅಕ್ಲೆನ ರಡ್ಡ್ ಓಡೊಲೆಡ್ ಮೀನ್‌ಲೆನ್ ದಿಂಜಾವನಗ ಅವು ಮುರ್ಕುನಡೆ ಮುಟ್ಟ ಆಂಡ್.</verse>
				<verse number="8">ಸೀಮೋನು ಪೇತ್ರೆ ಉಂದೆನ್ ತೂದು ಯೇಸುನ ಕಾರ್‌ಗ್ ಮೊರಂಪೂರೂದು, “ಕರ್ತವಾ, ಯಾನ್ ಪಾಪಿಷ್ಟೆ; ಎನನ್ ಬುಡ್ದು ಪೋಲ,” ಪಂಡೆ.</verse>
				<verse number="9">ದಾಯೆಗಂದ್ಂಡ ಆಯಗ್ಲಾ ಆಯಡೊಪ್ಪ ಇತ್ತಿನಾಕುಲೆಗ್ಲಾ ತನ್ಕುಲು ಪತ್ತಿನ ಮೀನ್‌ದ ರಾಶಿ ತೂದು ಅಚ್ಚಿರ ಆದಿತ್ತ್ಂಡ್.</verse>
				<verse number="10">ಸೀಮೋನುನ ಪಾಲ್‌ದಾರೆರಾದುಪ್ಪು ಜೆಬೆದಾಯನ ಜೋಕುಲಾಯಿ ಯಾಕೋಬು ಬೊಕ್ಕ ಯೋಹಾನೆಲಾ ಅಂಚೆನೇ ಅಚ್ಚಿರ ಆಯೆರ್. ಬೊಕ್ಕ ಯೇಸು ಸಿಮೋನುಗು, “ಪೋಡ್ಯಡ, ಆಂಡ ಇನಿಡ್ದ್ ಈ ನರಮಾನಿಲೆನ್ ಪತ್ತುನಾಯೆ ಆದುಪ್ಪುವ,” ಅಂದ್‌ದ್ ಪಂಡೆ.</verse>
				<verse number="11">ಅಕುಲು ತನ್ಕುಲೆ ಓಡೊಲೆನ್ ಕಡಲ್ದ ಕರೆಕ್ ಕನತ್‌ದ್ ಮಾತೆನ್ಲಾ ಬುಡ್ದು ಆಯ ಬೆರಿಯೆ ಪೋಯೆರ್.</verse>
				<verse number="12">ಯೇಸು ಒಂಜಾನೊಂಜಿ ಊರುಡುಪ್ಪುನಗ ಮೆಯಿ ನಿಲ್ಕೆ ಕೊಷ್ಟ ಪತ್ತ್‌ದಿನಾಯೆ ಯೇಸುನು ತೂದು ಅಡ್ಡಬೂರ್ದು, “ಕರ್ತವಾ, ನಿಕ್ಕ್ ಮನಸಿತ್ತ್‌ಂಡ ಎನನ್ ಶುದ್ಧ ಮಲ್ಪೊಲಿ,” ಪಂಡ್ದ್ ನಟ್ಟಿಯೆ.</verse>
				<verse number="13">ಯೇಸು ಕೈ ನೀಡ್ದ್ ಆಯನ್ ಮುಟ್ಟುದು, “ಎಂಕ್ ಮನಸುಂಡು ಶುದ್ಧ ಆಲ,” ಅಂದ್‌ದ್ ಪಂಡೆ. ಅಪಗನೆ ಆಯನ ಕೊಷ್ಟ ಬುಡ್ದು ಪೋಂಡು.</verse>
				<verse number="14">ಅಪಗ ಯೇಸು ಆಯಡ ಈ ಉಂದೆನ್ ಏರೆಗ್ಲಾ ಪನೊಡ್ಚಿ; ಆಂಡ ಪೋದು ಯಾಜಕೆರೆಗ್ ನಿನ ಮೆಯಿ ತೋಜಾದ್ ಮೋಶೆ ನೇಮಕ ಮಲ್ತಿ ಲೆಕ್ಕನೇ ನಿನ ಶುದ್ಧಾಚಾರೊಗು ಬೋಡಾದ್ ಕಾಣಿಕೆ ಅರ್ಪಣೆ ಮಲ್ಪುಲ ಇನ್ಪಿ ಅಪ್ಪಣೆ ಆಯಗ್ ಕೊರಿಯೆ. ಅವು ಜನೊಕುಲೆಗ್ ಸಾಕ್ಷಿ ಆವಡ್ ಪಂಡೆ.</verse>
				<verse number="15">ಆಂಡಲಾ ಆಯನ ಸುದ್ಧಿ ಹೆಚ್ಚಾದ್ ಪರಡ್ಂಡ್. ಜನೊಕುಲು ಆಯನ ಬೋಧನೆನ್ ಕೇನಿಯೆರೆ ತನ್ಕುಲೆ ಸೀಕ್ ಸಂಕಟೊಲೆಡ್ದ್ ಗುಣ ಆಯೆರೆ ಗುಂಪುಗುಂಪಾದ್ ಸೇರಿಯೆರ್.</verse>
				<verse number="16">ಆಂಡ ಆಯೆ ಒರಿಯೇ ಏಪಲಾ ಜನಮಾನಿದಾಂತಿ ಜಾಗ್‌ಗ್ ಪೋದು ಪ್ರಾರ್ಥನೆ ಮಲ್ತೊಂದಿತ್ತೆ.</verse>
				<verse number="17">ಒಂಜಾನೊಂಜಿ ದಿನೊಟು ಯೇಸು ಬೋಧನೆ ಮಲ್ತೊಂದುಪ್ಪುನಗ ಗಲಿಲಾಯದ ಮಾತ ಊರುಲೆಡ್ದ್‌ಲಾ ಯೂದಾಯದ ಮಾತ ಗ್ರಾಮೊಲೆಡ್ದ್‌ಲಾ ಯೆರೂಸಲೇಮುಡ್ದುಲಾ ಬತ್ತಿತ್ತಿ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯನ ಕೈತಲ್‌ ಕುಲ್ಲುದಿತ್ತೆರ್. ಸೀಕ್‌ದಾಕುಲೆನ್ ಗುಣ ಮಲ್ಪೆರೆ ಕರ್ತವ ಬಲ ಯೇಸುಡ ಇತ್ತ್ಂಡ್.</verse>
				<verse number="18">ಇಂಚ ಉಪ್ಪುನಗ ಕೆಲವು ಅಂಜೊವುಲು ಒರಿ ಪಕ್ಷವಾತದಾಯನ್ ಮಂಚವುದ ಮಿತ್ತ್ ತುಂಬೊಂದು ಬತ್ತೆರ್. ಆಯನ್ ಉಲಯಿ ಕೊನೊದು ಯೇಸುನ ಎದುರುಡು ದೀವೊಡು ಪಂಡ್ದ್ ಪ್ರಯತ್ನ ಮಲ್ತೆರ್.</verse>
				<verse number="19">ಆಂಡ ಜನೊಕುಲೆ ಮಲ್ಲ ಗುಂಪು ಇತ್ತಿನೆಡ್ದಾವರ ಆಯನ್ ಉಲಯಿ ಲೆತ್ತೊಂದು ಪೋವೆರೆ ಆವಂದೆ, ಅಕುಲು ಮಾಡ್‌ಗ್ ಮಿತ್ತಾದ್ ಓಡು ದೆತ್ತ್‌ದ್ ಆಯನ್ ಪಜೆದೊಟ್ಟುಗು ಯೇಸುನ ಎದುರುಡು ಜಪುಡಾಯೆರ್.</verse>
				<verse number="20">ಆಯೆ ಅಕ್ಲೆನ ನಂಬಿಕೆನ್ ತೂದು, “ಸಹೋದ್ರ, ನಿನ ಪಾಪೊಲು ಮಾಪು ಆತ್ಂಡ್,” ಪಂಡೆ.</verse>
				<verse number="21">ಐಕ್ ಆ ಶಾಸ್ತ್ರಿಲುಲಾ ಪರಿಸಾಯೆರ್‌ಲುಲಾ, ದೇವದೂಷಣೆ ಪಾತೆರುನಾಯೆ ಇಂಬೆ ಏತೆತ್ತಾಯೆ? ಪಾಪೊಲೆನ್ ಮಾಪು ಮಲ್ಪುನವು ದೇವೆರ್ ಒರಿಯಡ್ದೇ ಅತ್ತಂದೆ ಬೊಕ್ಕ ಏರೆಡ್ದ್ ಆವು ಅಂದ್‌ದ್ ಪನೊಂದಿತ್ತೆರ್.</verse>
				<verse number="22">ಅಕುಲು ಅಂಚ ಪನೊಂದುಪ್ಪುನೆನ್ ಯೇಸು ತೆರಿಯೊಂದು ಅಕ್ಲೆಡ, “ನಿಕುಲು ನಿಕ್ಲೆನ ಉಡಲ್‌ಡ್ ದಾಯೆಗ್ ಅಂಚ ಎನ್ನುವರ್?</verse>
				<verse number="23">ಒವು ಸುಲಭ, ‘ನಿನ ಪಾಪೊಲು ಮಾಪು ಆತ್ಂಡ್,’ ಪನ್ಪಿನವಾ? ‘ಲಕ್ಕ್‌ದ್ ನಡಪುಲ ಪನ್ಪಿನವಾ?’</verse>
				<verse number="24">ಆಂಡ ಪಾಪೊಲೆನ್ ಮಾಪು ಮಲ್ಪೆರೆ ನರಮಾನಿ ಮಗಕ್ಕ್ ಭೂಲೋಕೊಡು ಅಧಿಕಾರ ಉಂಡು ಪನ್ಪಿನವು ನಿಕ್ಲೆಗ್ ತೆರಿಯೊಡು,” ಅಂದ್‌ದ್ ಆ ಪಕ್ಷವಾತದಾಯನ್ ತೂದು, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ಇಲ್ಲಗ್ ಪೋಲ, ಅಂದ್‌ದ್ ನಿಕ್ಕ್ ಪನ್ಪೆ,” ಪಂಡೆ.</verse>
				<verse number="25">ಅಪಗನೆ ಆಯೆ ಅಕ್ಲೆನ ಎದುರು ಲಕ್ಕ್‌ದ್ ತಾನ್ ಜೆತ್ತ್‌ದಿತ್ತಿ ಪಜೆನ್ ಪತ್ತೊಂದು ದೇವೆರೆನ್ ಪುಗರೊಂದು ಇಲ್ಲಗ್ ಪೋಯೆ.</verse>
				<verse number="26">ತೂಯಿನಾಕುಲು ಮಾತೆರ್ಲಾ ಅಚ್ಚಿರ ಆದ್ ದೇವೆರೆನ್ ಪುಗರಿಯೆರ್. ಬೊಕ್ಕ ಅಕುಲು ಪೋಡಿದ್, “ನಮ ಇನಿ ತೂವಂದಿನೆನ್ ತೂಯ!” ಪಂಡೆರ್.</verse>
				<verse number="27">ಉಂದು ಆಯಿ ಬೊಕ್ಕ ಪಿದಾಡ್ದ್ ಪೋವೊಂದುಪ್ಪುನಗ ಸುಂಕ ದೆತ್ತೊನಿಯೆರೆ ಕುಲ್ಲೊಂದಿತ್ತಿ ಲೇವಿ ಪನ್ಪಿ ಒರಿ ಸುಂಕದಾಯನ್ ತೂದು, “ಎನ ಬೆರಿಯೆ ಬಲ,” ಅಂದ್‌ದ್ ಆಯನ್ ಲೆಪ್ಪುನಗ</verse>
				<verse number="28">ಆಯೆ ಲಕ್ಕ್‌ದ್ ಮಾತೆನ್ಲಾ ಬುಡ್ದು ಆಯನ ಬೆರಿಯೆ ಪೋಯೆ.</verse>
				<verse number="29">ಐಡ್ದ್ ಬೊಕ್ಕ ಲೇವಿ ತನ ಇಲ್ಲಡ್ ಯೇಸುಗು ಒಂಜಿ ಮಲ್ಲ ಲೇಸ್‌ದ ವಣಸ್ ಏರ್ಪಾಡ್ ಮಲ್ತೆ. ಅಲ್ಪ ಸುಂಕದಾಕುಲುಲಾ ಬಾಕಿದಾಕುಲುಲಾ ಯೇಸು ಕುಲ್ಲುದಿತ್ತಿ ಪಂತೆಡೇ ವಣಸ್‌ಗ್ ಕುಲ್ಲುದಿತ್ತೆರ್.</verse>
				<verse number="30">ಅವೆನ್ ತೂದು ಪರಿಸಾಯೆರೆಡೊಪ್ಪ ಇತ್ತಿ ಶಾಸ್ತ್ರಿಲು ಆಯನ ಶಿಷ್ಯೆರೆಡ ಗುಟ್ಟುಡು, “ನಿಕುಲು ಸುಂಕದಾಕುಲೆಡೊಪ್ಪಲಾ ಪಾಪಿಲೆಡೊಪ್ಪಲಾ ಉನ್ಪಿನಿ ದಾಯೆಗ್?” ಅಂದ್‌ದ್ ಕೇಂಡೆರ್.</verse>
				<verse number="31">ಐಕ್ ಯೇಸು, “ಸೌಖ್ಯೊಡು ಉಪ್ಪುನಾಕುಲೆಗ್ ವೈದ್ಯೆ ಬೊಡ್ಚಿ; ಸೌಖ್ಯದಾಂತಿನಾಕುಲೆಗ್ ಮಾತ್ರ ಬೋಡು.</verse>
				<verse number="32">ಪಶ್ಚಾತಾಪ ಪಡೆಲೆ ಪಂಡ್ದ್ ನೀತಿವಂತೆರೆನ್ ಲೆಪ್ಪೆರೆ ಬೈದಿನಿ ಅತ್ತ್. ಪಾಪಿಷ್ಟೆರೆನ್ ಲೆಪ್ಪೆರೆ ಬೈದಿನಿ,” ಅಂದ್‌ದ್ ಅಕ್ಲೆಗ್ ಉತ್ತರ ಕೊರಿಯೆ.</verse>
				<verse number="33">ಅಕುಲು ಆಯಗ್, “ಯೋಹಾನನ ಶಿಷ್ಯೆರ್ ಅಪಗಪಗ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಅಂಚೆನೇ ಪರಿಸಾಯೆರೆ ಶಿಷ್ಯೆರ್‌ಲಾ ಉಪವಾಸ ಪ್ರಾರ್ಥನೆ ಮಲ್ಪುವೆರ್; ಆಂಡ ನಿನ ಶಿಷ್ಯೆರ್ ಉನ್ಪಿನಿ ಪರ್ಪಿನಿ ದಾಯೆಗ್?” ಅಂದ್‌ದ್ ಪನ್ನಗ,</verse>
				<verse number="34">ಯೇಸು ಅಕ್ಲೆಗ್, “ಮದ್ಮೆದ ದಿಬ್ಬಣದಾಕುಲು ತನ್ಕುಲೆಡೊಪ್ಪ ಮದ್ಮಯೆ ಉಪ್ಪುನಗ ಅಕ್ಲೆನ್ ಉಪವಾಸ ಕುಲ್ಲಾವೆರೆ ನಿಕ್ಲೆಡ್ದ್ ಆವಾ?</verse>
				<verse number="35">ಆಂಡ ಮದ್ಮಯನ್ ಅಕ್ಲೆನ ಕೈತಲ್‌ಡ್ದ್ ದೆತ್ತೊಂದು ಪೋಪಿನ ಕಾಲ ಬರ್ಪುಂಡು; ಅಪಗ ಆ ಕಾಲೊಡು ಉಪವಾಸ ಮಲ್ಪುವೆರ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="36">ಅಕ್ಲೆಗ್ ಒಂಜಿ ಉಪಕತೆನ್ಲಾ ಪಂಡೆ ಅವು ದಾದ ಪಂಡ, “ಏರ್ಲಾ ಪೊಸ ಕುಂಟುದ ತುಂಡುನು ಪರ ಕುಂಟುಗು ಪತ್ತೆ ಪಾಡುಜೆರ್, ಪಾಡ್‌ಂಡ ಕುಂಟು ಪರಿದ್ ಪೋವು ಅತ್ತಂದೆ ಪೊಸ ಕುಂಟುದ ಪತ್ತೆ ಪರತೆಕ್ಕ್ ಎಡ್ಡೆ ತೋಜುಜಿ.</verse>
				<verse number="37">ಬೊಕ್ಕ ಪರ ಚರ್ಮದ ಚೀರವುಡು ಪೊಸ ದ್ರಾಕ್ಷಾರಸೊನು ದಿಂಜಾವುಜೆರ್; ದಿಂಜಾಂಡ ಆ ಪೊಸ ದ್ರಾಕ್ಷಾರಸತ್ತ ಚೀರವು ಪುಡಾದ್ ಪೊಸ ದ್ರಾಕ್ಷಾರಸಲಾ ಚೀರವುಲಾ ಹಾಳಾದ್ ಪೋಪುಂಡು.</verse>
				<verse number="38">ಅಂಚ ಪೊಸ ದ್ರಾಕ್ಷಾರಸೊನು ಪೊಸ ಚೀರವುಡು ಪಾಡ್ದ್ ದೀವೊಡು.</verse>
				<verse number="39">ಉಂದತ್ತಂದೆ ಪರ ಅಮಲ್‌ದ ದ್ರಾಕ್ಷಾರಸೊನು ಪರಿನಾಯೆ ಪೊಸತ್ತ್ ಬೋಡು ಪನ್ಪುಜೆ; ‘ಪರತ್ತೇ ಎಡ್ಡೆಂತಿನವು,’ ಪನ್ಪೆ.”</verse>
			</chapter>
			<chapter number="6">
				<verse number="1">ಒಂಜಾನೊಂಜಿ ಸಬ್ಬತ್‌ದಿನತಾನಿ ಯೇಸು ಬುಲೆತ ಕಂಡೊಲೆನ್ ದಾಂಟ್‌ದ್ ಪೋವೊಂದುಪ್ಪುನಗ ಆಯನ ಶಿಷ್ಯೆರ್ ಕೊರಲ್ ರುಂಬುದು ಕೈಟ್ ಪೊಜೆಂಕ್‌ದ್ ತಿನೊಂದಿತ್ತೆರ್.</verse>
				<verse number="2">ಉಂದೆನ್ ತೂಯಿ ಪರಿಸಾಯೆರೆಡ್ ಕೆಲೆವೆರ್, “ಸಬ್ಬತ್‌ದಿನೊಟು ನ್ಯಾಯಕಟ್ಟ್‌ದ ಪ್ರಕಾರ ಮಲ್ಪಂದಿ ಬೇಲೆನ್ ನಿಕುಲು ದಾಯೆಗ್ ಮಲ್ಪುವರ್?” ಅಂದ್‌ದ್ ಕೇಂಡೆರ್.</verse>
				<verse number="3">ಯೇಸು ಅಕ್ಲೆಗ್, “ದಾವೀದೆ ತಾನ್‌ಲಾ ತನಡೊಪ್ಪ ಇತ್ತಿನಾಕುಲುಲಾ ಬಡವು ಆಯಿನಪಗ ದಾದ ಮಲ್ತೆರ್ ಪನ್ಪಿನೆನ್ ನಿಕುಲು ಓದುದಿಜರಾ?</verse>
				<verse number="4">ಆಯೆ ದೇವೆರೆ ಆಲಯದ ಉಲಯಿ ಪೋದು ನ್ಯಾಯಕಟ್ಟ್‌ದ ಪ್ರಕಾರ ಯಾಜಕೆರ್ ಮಾತ್ರ ಅತ್ತಂದೆ ಬೇತೆ ಏರ್ಲಾ ತಿನಂದಿನ ನೈವೇದ್ಯದ ರೊಟ್ಟಿನ್ ದೆತ್ತೊಂದು ತಾನ್ ತಿಂದ್‌ದ್ ತನಡೊಪ್ಪ ಇತ್ತಿನಾಕುಲೆಗ್ಲಾ ಕೊರಿಯೆ ಅತ್ತಾ?” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="5">ಬೊಕ್ಕ ಅಕ್ಲೆಡ, “ನರಮಾನಿ ಮಗೆ ಸಬ್ಬತ್‌ದಿನತಲಾ ಕರ್ತವೆ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="6">ಕುಡೊಂಜಿ ಸಬ್ಬತ್‌ದಿನೊಟು ಆಯೆ ಸಭಾಮಂದಿರೊಗು ಪೋದು ಬೋಧನೆ ಮಲ್ತೊಂದುಪ್ಪುನಗ ಅಲ್ಪ ಒರಿ ಬಲತ್ತ ಕೈ ನುಂಗುಪೋತಿನಾಯೆ ಇತ್ತೆ.</verse>
				<verse number="7">ಯೇಸುನು ಎಂಚಾಂಡಲಾ ತಿಕ್ಕಾದ್ ಪಾಡಿಯೆರೆ ಕಾರಣ ನಾಡೊಂದಿತ್ತಿ ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ಸಬ್ಬತ್‌ದಿನೊಟು ಗುಣ ಮಲ್ಪುವೆನಾ ತೂಕ ಅಂದ್‌ದ್ ಆಯನ್ ಕಾತೊಂದಿತ್ತೆರ್.</verse>
				<verse number="8">ಆಂಡ ಆಯೆ ಅಕುಲು ಎನ್ನುನೆನ್ ತೆರಿದ್ ಕೈ ನುಂಗುಪೋತಿನಾಯಡ, “ಲಕ್ಕ್‌ದ್ ನಡುಟು ಉಂತುಲ,” ಅಂದ್‌ದ್ ಪನ್ನಗ ಆಯೆ ಲಕ್ಕ್‌ದ್ ಉಂತಿಯೆ.</verse>
				<verse number="9">ಅಪಗ ಯೇಸು ಅಕ್ಲೆಗ್, “ನಿಕ್ಲೆಡ ಒಂಜಿ ಪಾತೆರ ಕೇನ್ವೆ, ಸಬ್ಬತ್‌ದಿನೊಟು ಒವೆನ್ ಮಲ್ಪುನವು ನ್ಯಾಯ? ಎಡ್ಡೆ ಮಲ್ಪುನವಾ? ಹಾಳ್ ಮಲ್ಪುನವಾ? ಪ್ರಾಣೊನು ಒರಿಪಾವುನವಾ? ಹಾಳ್ ಮಲ್ಪುನವಾ?”</verse>
				<verse number="10">ಸುತ್ತಲಾ ಮಾತೆರೆನ್ಲಾ ತೂದು ಆಯಡ, “ನಿನ ಕೈ ನೀಡ್ಲ!” ಅಂದ್‌ದ್ ಪಂಡೆ.ಆಯೆ ಅಂಚೆನೇ ಮಲ್ತೆ; ಕೈ ಗುಣ ಆಂಡ್.</verse>
				<verse number="11">ಆಂಡ ಅಕ್ಲೆಡ್ ದುರ್ಬುದ್ಧಿ ದಿಂಜಿದಿತ್ತಿನೆಡ್ದ್ ಈ ಯೇಸುಗು ದಾದ ಮಲ್ಪುಗ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="12">ಆ ದಿನೊಕುಲೆಡ್ ಯೇಸು ಗುಡ್ಡೆಗ್ ಪೋದು ರಾತ್ರೆ ಇಡೀ ದೇವೆರೆಡ ಪ್ರಾರ್ಥನೆ ಮಲ್ತೊಂದಿತ್ತೆ.</verse>
				<verse number="13">ಬೊಲ್ಪು ಆಯಿ ಬೊಕ್ಕ ಆಯೆ ತನ ಶಿಷ್ಯೆರೆನ್ ಕೈತಲ್‌ ಲೆತ್ತ್‌ದ್ ಅಕ್ಲೆಡ್ದ್ ಪದ್ರಾಡ್ ಮಂದಿನ್ ಅಜತ್‌ದ್ ಅಕ್ಲೆಗ್ ಅಪೊಸ್ತಲೆರ್ ಅಂದ್‌ದ್ ಪುದರ್ ಕೊರಿಯೆ.</verse>
				<verse number="14">ಅಕುಲು ಏರೇರ್ ಅಂದ್ಂಡ, ಪೇತ್ರೆ ಪನ್ಪಿ ಪುದರ್‌ನ್ ಪಡೆಯಿ ಸೀಮೋನೆ, ಆಯನ ಮೆಗ್ಯೆ ಅಂದ್ರೆಯೆ, ಯಾಕೋಬು, ಯೋಹಾನೆ, ಫಿಲಿಪ್ಪು ಬಾರ್ತೊಲೊಮಾಯೆ, ಮತ್ತಾಯೆ, ತೋಮೆ, ಅಲ್ಫಾಯನ ಮಗೆ ಯಾಕೋಬು, ದೇಶಾಭಿಮಾನಿ ಪನ್ಪಿ ಸೀಮೋನು, ಬೊಕ್ಕ ಯಾಕೋಬುನ ಮಗೆ ಯೂದೆ. ಆಯನ್ ಒಚ್ಚಿದ್ ಕೊರಿಯೆರೆ ಉಪ್ಪುನ ದ್ರೋಹಿ ಇಸ್ಕಾರಿಯೋತ ಯೂದೆ, ಮೊಕುಲೇ.</verse>
				<verse number="15"></verse>
				<verse number="16"></verse>
				<verse number="17">ಆಯೆ ಅಕ್ಲೆಡೊಪ್ಪ ಗುಡ್ಡೆಡ್ದ್ ಜತ್ತ್‌ದ್ ಒಂಜಿ ಸಮ ತಟ್ಟ್ ಜಾಗ್‌ಡ್ ಉಂತಿಯೆ. ಆಯನ ಶಿಷ್ಯೆರೆ ಗುಂಪುಲಾ ಮಾತ ಯೂದಾಯೊಡ್ದುಲಾ ಯೆರೂಸಲೇಮುಡ್ದುಲಾ ತೂರ್ ಬೊಕ್ಕ ಸೀದೋನ್ ಪಟ್ಟಣದ ಕಡಲ ಬರಿಡ್ದ್‌ಲಾ ಜನೊಕುಲೆ ಮಲ್ಲ ಗುಂಪುಲಾ ಆಯಡೊಪ್ಪ ಇತ್ತೆರ್. ಆ ಜನೊಕುಲು ಆಯನ ಬೋಧನೆನ್ ಕೇನಿಯೆರೆಗ್ಲಾ ತನ್ಕುಲೆ ಸೀಕ್‌ಲೆನ್ ಗುಣ ಮಲ್ತೊನ್ರೆಗಾದ್‌ಲಾ ಬತ್ತಿತ್ತೆರ್.</verse>
				<verse number="18">ಅಕ್ಲೆಡ್ ಅಶುದ್ಧ ದೆವ್ವದ ಉಪದ್ರ ಇತ್ತಿನಾಕುಲು ಗುಣ ಆಯೆರ್.</verse>
				<verse number="19">ಆ ಗಳಿಗೆಡ್ ಆಯಡ್ದ್ ಬಲ ಪಿದಾಡ್ದ್ ಮಾತೆರೆನ್ ಗುಣ ಮಲ್ತೊಂದಿನೆಡ್ದ್ ಆ ಗುಂಪುದ ಜನೊಕುಲು ಮಾತೆರ್ಲಾ ಆಯನ್ ಮುಟ್ಟಿಯೆರೆ ತೂಯೆರ್.</verse>
				<verse number="20">ಆಯೆ ತನ ಶಿಷ್ಯೆರೆ ಕಡೆಕ್ಕ್ ದೃಷ್ಟಿ ದೀದ್ ಪಂಡಿನಿ ದಾನೆ ಪಂಡ, “ಆತ್ಮೊಡು ಬಡವೆರ್ ಆದಿತ್ತಿನಾಕುಲು ಭಾಗ್ಯವಂತೆರ್, ದೇವೆರೆ ರಾಜ್ಯ ನಿಕ್ಲೆನವೇ.</verse>
				<verse number="21">ಇತ್ತೆ ಬಡವು ಆದುಪ್ಪುನಾಕುಲು ಭಾಗ್ಯವಂತೆರ್, ನಿಕ್ಲೆಗ್ ತೃಪ್ತಿ ಆಪುಂಡು. ಇತ್ತೆ ಬುಲಿಪುನಾಕುಲು, ನಿಕುಲು ತೆಲಿಪುವರ್.</verse>
				<verse number="22">ನರಮಾನಿ ಮಗಡ್ದಾವರ ಜನೊಕುಲು ನಿಕ್ಲೆನ್ ಪಗೆ ಮಲ್ತ್‌ದ್, ನಿಕ್ಲೆನ್ ಬೊಡ್ಚಿ ಅಂದ್‌ದ್ ದೂರ ಮಲ್ತ್‌ದ್, ನಿಕ್ಲೆನ ಪುದರ್ ನಿಂದೆ ಮಲ್ತ್‌ದ್, ನಿಕುಲು ಪಡಿಕೆಂತಿನಾಕುಲು ಪಂಡ್ಂಡ ನಿಕುಲು ಭಾಗ್ಯವಂತೆರ್.</verse>
				<verse number="23">ಆ ದಿನೊಟು ಸಂತೋಷೊಡುಪ್ಪುಲೆ, ನಲ್ತೊಂದುಪ್ಪುಲೆ; ಪರಲೋಕೊಡು ನಿಕ್ಲೆಗ್ ದಿಂಜ ಫಲ ಉಂಡು ಅಂದ್‌ದ್ ತೆರಿಯೊನ್ಲೆ. ಈ ಜನೊಕುಲು ನಿಕ್ಲೆಗ್ ಮಲ್ತಿ ಲೆಕ್ಕನೇ, ಅಕ್ಲೆ ಪಿತೃಲು ಪ್ರವಾದಿಲೆಗ್ಲಾ ಅಂಚೆನೆ ಮಲ್ತ್‌ದೆರ್.</verse>
				<verse number="24">ಆಂಡ ಐಶ್ವರ್ಯವಂತೆರೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ. ನಿಕ್ಲೆನ ಸಂತೈಸಿಕೆ ನಿಕ್ಲೆಗ್ ತಿಕ್ಕ್‌ದಾತ್ಂಡ್.</verse>
				<verse number="25">ಇತ್ತೆ ಬಂಜಿ ದಿಂಜಿದಿನಾಕುಲೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ? ನಿಕುಲು ಬಡವುಡು ಒದ್ದಾಡುವರ್. ಇತ್ತೆ ತೆಲಿಪುನಾಕುಲೇ ನಿಕ್ಲೆನ ಗತಿನ್ ದಾನೆಂದ್ ಪನೊಲಿ? ನಿಕುಲು ದುಃಖೊಡು ಬುಲಿಪುವರ್.</verse>
				<verse number="26">ಜನೊಕುಲು ನಿಕ್ಲೆನ್ ಇತ್ತೆ ಪುಗರ್‌ಂಡ ದುಂಬಗ್ ನಿಕ್ಲೆನ ಗತಿ ಭಯಂಕರ ಆವು; ಅಕ್ಲೆನ ಪೂರ್ವಜೆರ್ ಸುಳ್ಳು ಪ್ರವಾದಿಲೆನ್ ಅಂಚೆನೇ ಪುಗರಿಯೆರ್.</verse>
				<verse number="27">“ಕೇನುನಾಕುಲೆಗ್ ಯಾನ್ ಪನ್ಪಿನಿ ದಾನೆಂದ್ಂಡ, ನಿಕ್ಲೆನ ಪಗೆನಾಕುಲೆನ್ ಪ್ರೀತಿ ಮಲ್ಪುಲೆ. ನಿಕ್ಲೆಡ ಪಗೆ ಕಟ್ಟುನಾಕುಲೆಗ್ ಎಡ್ಡೆ ಮಲ್ಪುಲೆ.</verse>
				<verse number="28">ನಿಕ್ಲೆಗ್ ಶಾಪ್ಯುನಾಕುಲೆಗ್ ಆಶೀರ್ವಾದ ಮಲ್ಪುಲೆ. ನಿಕ್ಲೆಗ್ ದೂರುನಾಕುಲೆಗ್ ಪ್ರಾರ್ಥನೆ ಮಲ್ಪುಲೆ.</verse>
				<verse number="29">ನಿನ ಕೆಪ್ಪೆಗ್ ಹಾಕುನಾಯಗ್ ಬೊಕ್ಕೊಂಜಿ ಕೆಪ್ಪೆನ್ಲಾ ತೋಜಾಲ. ನಿನ ಮೇಲಂಗಿನ್ ಒಯ್ತೊನುನಾಯಗ್ ಉಲಯಿದ ಅಂಗಿನ್ ದೆತ್ತೊನೆರೆಲಾ ಅಡ್ಡಿ ಮಲ್ಪೊಡ್ಚಿ.</verse>
				<verse number="30">ನಿನಡ ನಟ್ಟೊಂಡಿನಾಕುಲೆಗ್ ಮಾತೆರೆಗ್ಲಾ ಇತ್ತಿನೆನ್ ಕೊರ್ಲ, ನಿನಡುಪ್ಪುನೆನ್ ಕೊರಿಯಡ ಅವೆನ್ ಪಿರ ಕೇನಡ.</verse>
				<verse number="31">ಜನೊಕುಲು ನಿಕ್ಲೆಗ್ ಎಂಚೆಂಚಿನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುವೆರಾ ಅಂಚಿನೆನೇ ನಿಕುಲು ಅಕ್ಲೆಗ್ ಮಲ್ಪುಲೆ.</verse>
				<verse number="32">“ನಿಕ್ಲೆಗ್ ಪ್ರೀತಿ ತೋಜಾವುನಾಕುಲೆನೇ ನಿಕುಲು ಪ್ರೀತಿ ಮಲ್ತರ್ಡ ನಿಕ್ಲೆಗ್ ವಾ ಪುಗರಿಕೆ ಬರು. ಪಾಪಿಲುಲಾ ತನ್ಕುಲೆಗ್ ಪ್ರೀತಿ ತೋಜಾವುನಾಕುಲೆನ್ ಪ್ರೀತಿ ಮಲ್ಪುವೆರತ್ತಾ?</verse>
				<verse number="33">ನಿಕ್ಲೆಗ್ ಎಡ್ಡೆ ಮಲ್ಪುನಾಕುಲೆಗೇ ಎಡ್ಡೆ ಮಲ್ತರ್ಡ ನಿಕ್ಲೆಗ್ ದಾಲಾ ಪುಗರಿಕೆ ಇಜ್ಜಿ. ಪಾಪಿಲುಲಾ ಅಂಚೆನೇ ಮಲ್ಪುವೆರತ್ತಾ?</verse>
				<verse number="34">ಅಕುಲು ಸಾಲ ಕೊರುವೆರ್ ಅಂದ್‌ದ್ ನಿಕುಲು ಏರೆಗಾಂಡಲಾ ಸಾಲ ಕೊರಿಯರ್ಡ, ಐಟ್ಟ್ ನಿಕ್ಲೆಗ್ ದಾಲಾ ಪುಗರಿಕೆ ಇಜ್ಜಿ. ಪಾಪಿಲುಲಾ ಎಂಕುಲು ಕೊರಿನಾತ್ ತನ್ಕುಲೆಗ್ ಪಿರ ತಿಕ್ಕು ಅಂದ್‌ದ್ ನಿರೀಕ್ಷೆ ಮಲ್ತ್‌ದ್ ಪಾಪಿಲೆಗ್ ಸಾಲ ಕೊರ್ಪೆರತ್ತಾ?</verse>
				<verse number="35">ನಿಕುಲು ನಿಕ್ಲೆನ ಪಗೆನಾಕುಲೆಗ್ ಪ್ರೀತಿ ಮಲ್ತ್‌ದ್ ಅಕ್ಲೆಗ್ ಎಡ್ಡೆ ಮಲ್ಪುಲೆ. ಧೈರ್ಯೊಡು ಸಾಲ ಕೊರ್ಲೆ, ಪಿರ ತಿಕ್ಕುಂಡು ಪನ್ಪಿ ಆಸೆಡ್ ಸಾಲ ಕೊರಡೆ; ಇಂಚ ಮಲ್ತ್ಂಡ ನಿಕ್ಲೆಗ್ ಮಸ್ತ್ ಫಲ ತಿಕ್ಕುಂಡು. ಬೊಕ್ಕ ನಿಕುಲು ಸರ್ವಶಕ್ತೆ ದೇವೆರೆನ ಜೋಕುಲಾಪರ್. ದೇವೆರ್ ಉಪಕಾರ ಎನ್ನಂದಿನಾಕುಲೆಗ್ಲಾ ಪಡಿಕೆಂತಿನಾಕುಲೆಗ್ಲಾ ಉಪಕಾರದಾಯೆ ಆದುಲ್ಲೆ.</verse>
				<verse number="36">ನಿಕ್ಲೆನ ಅಮ್ಮೆ ಕನಿಕರದಾಯೆ ಆದುಪ್ಪುಲೆಕ್ಕ ನಿಕುಲುಲಾ ಕನಿಕರದಾಕುಲು ಆದುಪ್ಪುಲೆ.</verse>
				<verse number="37">“ಉಂದತ್ತಂದೆ ತೀರ್ಪು ಮಲ್ಪಡೆ, ಅಪಗ ನಿಕ್ಲೆಗ್ಲಾ ತೀರ್ಪು ಆಪುಜಿ. ಅಪರಾಧಿ ಅಂದ್‌ದ್ ನಿರ್ಧಾರ ಮಲ್ಪಡೆ; ಅಪಗ ದೇವೆರ್ ನಿಕ್ಲೆನ್ಲಾ ಅಪರಾಧಿಲು ಅಂದ್‌ದ್ ನಿರ್ಧಾರ ಮಲ್ಪಯೆರ್. ಬುಡ್ಲೆ ಅಪಗ ನಿಕ್ಲೆನ್ಲಾ ಬುಡ್ವೆರ್.</verse>
				<verse number="38">ಕೊರ್ಲೆ ಅಪಗ ನಿಕ್ಲೆಗ್ಲಾ ಜಡಿದ್ ಕುರ್ಕಾದ್ ತಮೆಲುನಾತ್ ಎಡ್ಡೆ ಲತ್ತ್‌ದ್ ನಿಕ್ಲೆನ ಸೆರಂಗ್‌ಗ್ ಪಾಡ್ವೆರ್. ನಿಕುಲು ಲಪ್ಪುನ ಆಳತೆಡ್ದೇ ನಿಕ್ಲೆಗ್ಲಾ ಲಪ್ಪುವೆರ್,” ಅಂದ್‌ದ್ ಪಂಡೆ.</verse>
				<verse number="39">ಉಂದತ್ತಂದೆ ಯೇಸು ಅಕ್ಲೆಗ್ ಒಂಜಿ ಉಪಕತೆನ್ ಪಂಡೆ ದಾನೆಂದ್ಂಡ, “ಕುರುಡೆ ಕುರುಡಗ್ ಸಾದಿ ತೊಜಾವೊಲಿಯಾ? ಅಕುಲು ಇರ್ವೆರ್‌ಲಾ ತೋಡುಡು ಬೂರ್ವೆರತ್ತಾ?</verse>
				<verse number="40">ಗುರುಡ್ದು ಶಿಷ್ಯೆ ಮಲ್ಲಾಯೆ ಅತ್ತ್. ಆಂಡ ಮಸ್ತ್ ಕಲ್ತಿ ಬೊಕ್ಕ ಪ್ರತಿ ಒರಿಲಾ ತನ ಗುರುಲೆಕ್ಕ ಆಪೆ.</verse>
				<verse number="41">“ಈ ನಿನ ಕಣ್ಣ್‌ಡುಪ್ಪು ಕಜವುನ್ ತೂವಂದೆ ನಿನ ಸಹೋದ್ರನ ಕಣ್ಣ್‌ಡುಪ್ಪು ಧೂಳುನು ದಾಯೆಗ್ ತೂಪ?</verse>
				<verse number="42">ಇಜ್ಜಾಂಡ ನಿನ ಕಣ್ಣ್‌ಡ್ ಕಜವುನ್ ದೀವೊಂದು ಸಹೋದ್ರಡ, ‘ಅಣ್ಣಾ ನಿನ ಕಣ್ಣ್‌ದುಲಯಿಡ್ದ್ ಧೂಳುನು ದೆಪ್ಪುವೆ ಬಲ,’ ಅಂದ್‌ದ್ ಎಂಚ ಪನೊಲಿ? ಕಪಟಿಯೇ, ದುಂಬತ್ತ ನಿನ ಕಣ್ಣ್‌ದುಲಯಿದ ಕಜವುನ್ ದೆತ್ತ್ ಪಾಡ್ಲ. ಐಡ್ದ್ ಬೊಕ್ಕ ನಿನ ಸಹೋದ್ರನ ಕಣ್ಣ್‌ದುಲಯಿದ ಧೂಳುನು ದೆಪ್ಪೆರೆ ಸರಿಟ್ಟ್ ತೋಜುಂಡು.</verse>
				<verse number="43">“ಎಡ್ಡೆಂತಿನ ಮರ ಹಾಳ್ ಫಲ ಕೊರ್ಪುಜಿ; ಅಂಚೆನೇ ಹಾಳ್ ಮರ ಎಡ್ಡೆ ಫಲ ಕೊರ್ಪುಜಿ.</verse>
				<verse number="44">ಪ್ರತಿಯೊಂಜಿ ಮರತ ಗುಣ ಐತ ಫಲೊಡ್ದೇ ಗೊತ್ತಾಪುಂಡು. ಮುಳ್ಳುದ ಗಿಡೊಕ್ಲೆಡ್ದ್ ಅಂಜೂರದ ಪರ್ಂದ್‌ಲೆನ್ ಕೊಯ್ಪುಜೆರ್. ಗಜಿಗೆದ ಪುದೆಲೆಡ್ದ್ ದ್ರಾಕ್ಷೆನ್ ಕೊಯ್ಪುಜೆರ್.</verse>
				<verse number="45">ಎಡ್ಡೆಂತಿನಾಯೆ ತನ ಉಡಲ್ ಇನ್ಪಿ ಎಡ್ಡೆಂತಿ ಕಜನೆದುಲಯಿಡ್ದ್ ಎಡ್ಡೆಂತಿನೆನ್ ಕನಪೆ. ಪಡಿಕೆಂತಿನಾಯೆ ಪಡಿಕೆಂತಿ ಕಜನೆದುಲಯಿಡ್ದ್ ಪಡಿಕೆಂತಿನೆನೇ ಕನಪೆ. ಉಡಲ್‌ಡ್ ದಿಂಜಿದಿತ್ತಿನವೇ ಬಾಯಿಡ್ದ್ ಪಿದಾಡುಂಡು.</verse>
				<verse number="46">“ನಿಕುಲು ಎನನ್ ಕರ್ತವಾ, ಕರ್ತವಾ, ಅಂದ್‌ದ್ ಲೆತ್ತ್‌ದ್ ಯಾನ್ ಪನ್ಪಿನೆನ್ ನಿಕುಲು ದಾಯೆಗ್ ಮಲ್ಪುಜರ್?</verse>
				<verse number="47">ಎನ ಕೈತಲ್‌ ಬತ್ತ್‌ದ್ ಎನ ಪಾತೆರೊಲೆನ್ ಕೇಂಡ್ದ್ ಐತ ಲೆಕ್ಕನೆ ನಡಪುನಾಯೆ ಏರೆಗ್ ಸಮ ಆದುಲ್ಲೆ ಪನ್ಪಿನೆನ್ ನಿಕ್ಲೆಗ್ ತೋಜಾವೆ.</verse>
				<verse number="48">ಆಯೆ ಮಲ್ಲ ಗುಂಡಿ ಗರ್ತ್‌ದ್ ಪಾದೆದ ಮಿತ್ತ್ ಪಂಚಾಂಗ ಪಾಡ್ದ್ ಇಲ್ಲ್ ಕಟ್ಟಿದಿನಾಯಗ್ ಸಮ ಆದುಲ್ಲೆ. ನೀರ್ ಏರ್ದ್ ಆ ಇಲ್ಲಗ್ ಬೊಲ್ಲ ಹಾಕ್‌ಂಡಲಾ ಅವು ಗಟ್ಟಿ ಕಟ್ಟಿನೆಡ್ದ್ ಆ ಮಲ್ಲ ಬೊಲ್ಲೊಗ್ಲಾ ಅವೆನ್ ಪಂದಾವೆರೆ ಆಯಿಜಿ.</verse>
				<verse number="49">ಆಂಡ ಎನ ಪಾತೆರೊಲೆನ್ ಕೇಂಡ್ದ್‌ಲಾ ಐತ ಲೆಕ್ಕನೆ ನಡಪಂದಿನ ಪ್ರತಿಯೊರಿಲಾ ಪಂಚಾಂಗದಾಂತೆ ನೆಲತ ಮಿತ್ತ್ ಇಲ್ಲ್‌ನ್ ಕಟ್ಟಿದಿನಾಯಗ್ ಸಮ ಆದುಲ್ಲೆ. ಬೊಲ್ಲ ಏರ್ದ್ ಐಕ್ ಹಾಕಿ ಕೂಡ್ಲೇ ಆ ಇಲ್ಲ್ ಜರಿದ್ ಬೂರ್ದು ಪೂರ ನಾಶಾದ್ ಪೋಂಡು.”</verse>
			</chapter>
			<chapter number="7">
				<verse number="1">ಜನೊಕುಲು ಕೇನುಲೆಕ್ಕ ತನ ಪಾತೆರೊಲೆನ್ ಪಂಡ್ದ್ ಮುಗಿತಿ ಬೊಕ್ಕ ಯೇಸು ಕಪೆರ್ನೌಮುಗು ಬತ್ತೆ.</verse>
				<verse number="2">ಅಲ್ಪ ಸೈನಿಕೆರೆನ ಶತಾಧಿಪತಿನ ಪ್ರೀತಿದ ಚಾಕ್ರಿದಾಯೆ ಒರಿ ಸೀಕ್‌ಡ್ದ್ ಸೈಪಿಲೆಕ್ಕ ಇತ್ತೆ.</verse>
				<verse number="3">ಶತಾಧಿಪತಿ ಯೇಸುನ ಸುದ್ಧಿನ್ ಕೇಂಡ್ದ್, ಯೆಹೂದ್ಯೆರೆ ಹಿರಿಯೆರೆನ್ ಆಯ ಕೈತಲ್‌ ಕಡಪುಡ್ದು, “ತನ ಚಾಕ್ರಿದಾಯನ್ ಗುಣ ಮಲ್ಪೆರೆ ಬರೊಡು,” ಅಂದ್‌ದ್ ಆಯಡ ನಟ್ಟೊಂಡೆ.</verse>
				<verse number="4">ಅಕುಲು ಯೇಸು ಕೈತಲ್‌ ಬತ್ತ್‌ದ್ ಎಂಕ್ಲೆನ ಶತಾಧಿಪತಿ ನಿನಡ್ದ್ ಇಂಚಿತ್ತಿ ಉಪಕಾರೊನು ಪಡೆವೆರೆ ತಕ್ಕದಾಯೆ ಆದುಲ್ಲೆ ಪಂಡ್ದ್ ನಟ್ಟೊಂಡೆರ್.</verse>
				<verse number="5">ಆಯೆ ಎಂಕ್ಲೆ ಇಸ್ರಾಯೇಲ ಜನೊಕುಲೆನ್ ಪ್ರೀತಿ ಮಲ್ಪುನಾಯೆ. ಆಯೆನೇ ಎಂಕ್ಲೆನ ಸಭಾಮಂದಿರೊನು ಎಂಕ್ಲೆಗಾದ್ ಕಟ್ಟಾದಿನಾಯೆ ಅಂದ್‌ದ್ ದಿಂಜ ನಟ್ಟೊನ್ನಗ</verse>
				<verse number="6">ಯೇಸು ಅಕ್ಲೆಡೊಪ್ಪ ಪೋಯೆ. ಆಯೆ ನನಲಾ ಇಲ್ಲಗ್ ಮುಟ್ಟಿಯೆರೆ ಒಂತೆ ದೂರ ಉಪ್ಪುನಗನೇ ಶತಾಧಿಪತಿ ಆಯ ಸ್ನೇಹಿತೆರೆನ್‌ ಆಯನ ಕೈತಲ್‌ ಕಡಪುಡ್ದು, “ಕರ್ತವಾ, ಭಂಗ ದೆತ್ತೊನೊಡ್ಚಿ. ಈ ಎನ ಮಾಡ್‌ದ ಉಲಯಿ ಬರ್ಪಿನಾತ್ ಯೋಗ್ಯತೆ ಎಂಕಿಜ್ಜಿ.</verse>
				<verse number="7">ಈ ಕಾರಣೊಡ್ದು ಯಾನ್ ನಿನ ಕೈತಲ್‌ ಬರಿಯೆರೆ ಪಿರ ನರ್ಗಿಯೆ. ಆಂಡ ಈ ಒಂಜಿ ಪಾತೆರ ಪನ್ಲ, ಎನ ಬೇಲೆದಾಯಗ್ ಗುಣ ಆವು.</verse>
				<verse number="8">ಯಾನ್ಲಾ ಬೊಕ್ಕೊರಿಯನ ಅಧಿಕಾರದ ಉಲಯಿ ಉಪ್ಪುನಾಯೆ. ಎನ ಕೈ ತಿರ್ತ್‌ಲಾ ಸಿಪಾಯಿಲು ಉಲ್ಲೆರ್; ಯಾನ್ ಅಕ್ಲೆಡ್ ಒರಿಯಗ್ ‘ಪೋ,’ ಪಂಡ್ಂಡ ಪೋಪೆ. ಬೊಕ್ಕೊರಿಯನ್ ‘ಬಲ,’ ಪಂಡ ಬರ್ಪೆ. ಎನ ಬೇಲೆದಾಯಗ್ ಇಂಚಿತ್ತಿನೆನ್ ಮಲ್ಪು,” ಪಂಡ್ಂಡ ಮಲ್ಪುವೆ.</verse>
				<verse number="9">ಯೇಸು ಉಂದೆನ್ ಕೇಂಡ್ದ್ ಆಯನ ಬಗೆಟ್ ಅಚ್ಚಿರ ಆದ್ ತನ ಪಿರವುಡು ಬರೊಂದಿತ್ತಿನಾಕುಲೆಗ್ ತೂದು, “ಯಾನ್ ಇಂಚಿತ್ತಿ ಮಲ್ಲ ನಂಬಿಕೆನ್ ಇಸ್ರಾಯೇಲ್ ಜನೊಕುಲೆಡ್ಲಾ ತೂತುಜಿ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ,” ಪಂಡೆ.</verse>
				<verse number="10">ಐಡ್ದ್ ಬೊಕ್ಕ ಆ ಶತಾಧಿಪತಿ ಕಡೆಡ್ದ್ ಬೈದಿನಾಕುಲು ಪಿರ ಇಲ್ಲಗ್ ಪೋದು ತೂನಗ ಚಾಕ್ರಿದಾಯೆ ಸೌಖ್ಯ ಆದಿತ್ತಿನೆನ್ ತೂಯೆರ್.</verse>
				<verse number="11">ಒಂತೆ ಸಮಯ ಆಯಿ ಬೊಕ್ಕ ಆಯೆ ನಾಯೀನ್ ಪನ್ಪಿ ಊರುಗು ಪೋಯೆ. ಆಯಡೊಪ್ಪ ಶಿಷ್ಯೆರ್‌ನಾಕುಲುಲಾ ಬೊಕ್ಕ ಮಸ್ತ್ ಜನೊಕುಲುಲಾ ಪೋವೊಂದಿತ್ತೆರ್.</verse>
				<verse number="12">ಆಯೆ ಊರುದ ಬಾಕಿಲ್‌ದ ಕೈತಲ್‌ ಬನ್ನಗ ಒರಿ ಸೈತಿನಾಯನ್ ಪಿದಯಿ ಕನವೊಂದಿತ್ತೆರ್. ಉಂಬೆ ತನ ಅಪ್ಪೆಗ್ ಒರಿಯೇ ಮಗೆ; ಆಲ್ ಕಂಡನಿ ಸೈತಿನಾಲಾದಿತ್ತಲ್. ಆಲೆನ ಒಟ್ಟುಗು ಊರುದ ಮಸ್ತ್ ಜನ ಇತ್ತೆರ್.</verse>
				<verse number="13">ಕರ್ತವೆ ಆಲೆನ್ ತೂದು ಕನಿಕರೊಡು, “ಬುಲ್ಪೊಡ್ಚಿ,” ಪಂಡ್ದ್</verse>
				<verse number="14">ಚಟ್ಟದ ಕೈತಲ್‌ ಪೋದು ಅವೆನ್ ಮುಟ್ಟುನಗ ತುಂಬೊಂದಿತ್ತಿನಾಕುಲು ಉಂತಿಯೆರ್. ಯೇಸು ಪಂಡೆ, “ಜವನ್ಯಾ, ಯಾನ್ ನಿಕ್ಕ್ ಪನ್ಪೆ ಲಕ್ಕ್‌ಲ.”</verse>
				<verse number="15">ಪಂಡಿನಪಗನೇ ಸೈತ್‌ದಿತ್ತಿನಾಯೆ ಲಕ್ಕ್‌ದ್ ಕುಲ್ಲೊಂದು ಪಾತೆರಿಯೆರೆ ಸುರು ಮಲ್ತೆ. ಬೊಕ್ಕ ಯೇಸು ಆಯನ ಅಪ್ಪೆಗ್ ಇಂದಾ, ನಿನ ಮಗೆ ಅಂದ್‌ದ್ ಆಯನ್ ಒಪ್ಪಿಸಾಯೆ.</verse>
				<verse number="16">ಉಂದೆನ್ ತೂದು ಮಾತೆರ್ಲಾ ಪೋಡಿಗೆಡ್, “ಮಲ್ಲ ಪ್ರವಾದಿ ನಮಡ್ದ್ ಲಕ್ಕ್‌ದೆ. ದೇವೆರ್ ತನ ಜನೊಕುಲೆನ್ ರಕ್ಷಣೆ ಮಲ್ಪೆರೆ ಬೈದೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್.</verse>
				<verse number="17">ಈ ಸುದ್ಧಿ ಯೂದಾಯೊಡ್ಲಾ ಸುತ್ತಮುತ್ತದ ಮಾತ ಪ್ರಾಂತೊಲೆಡ್ಲಾ ಪರಡ್ಂಡ್.</verse>
				<verse number="18">ಯೋಹಾನನ ಶಿಷ್ಯೆರ್ ನಡತಿ ಮಾತ ಸಂಗತಿಲೆನ್ ಆಯಗ್ ತೆರಿಪಾನಗ</verse>
				<verse number="19">ಆಯೆ ತನ ಶಿಷ್ಯೆರೆಡ್ದ್ ಇರ್ವೆರೆನ್ ಲೆತ್ತ್‌ದ್, “ಬರ್ಪಿನಾಯೆ ಈಯೆನಾ, ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ?” ಅಂದ್‌ದ್ ಕರ್ತವಡ ಕೇನಿಯೆರೆ ಅಕ್ಲೆನ್ ಕಡಪುಡಿಯೆ.</verse>
				<verse number="20">ಅಕುಲು ಆಯನ ಕೈತಲ್‌ ಬತ್ತ್‌ದ್, “ಬರ್ಪಿನಾಯೆ ಈಯೆನಾ? ಎಂಕುಲು ಬೊಕ್ಕೊರಿಯನ ಸಾದಿನ್ ತೂವೊಡಾ, ಅಂದ್‌ದ್ ಕೇನಿಯೆರೆಗಾದ್ ಸ್ನಾನಿಕೆ ಯೋಹಾನೆ ಎಂಕ್ಲೆನ್ ನಿನ ಕೈತಲ್‌ ಕಡಪುಡುದೆ,” ಪಂಡೆರ್.</verse>
				<verse number="21">ಆ ಗಳಿಗೆಡ್ ಆಯೆ ಮಸ್ತ್ ಜನೊಕುಲೆನ್ ಸೀಕ್‌ಲೆಡ್ದ್, ದೆವ್ವದ ಉಪದ್ರೊಲೆಡ್ದ್, ದುರಾತ್ಮೊಲೆಡ್ದ್ ಬುಡ್ಪಾದ್ ಗುಣ ಮಲ್ತೊಂದಿತ್ತೆ; ಬೊಕ್ಕ ಮಸ್ತ್ ಜನ ಕುರುಡೆರೆಗ್ ಕಣ್ಣ್‌ನ್ ಒದಗಾದ್ ಕೊರಿಯೆ.</verse>
				<verse number="22">ಇಂಚ ಉಪ್ಪುನಗ ಆಯೆ ಅಕ್ಲೆಗ್, “ನಿಕುಲು ಪೋದು ತೂದು ಕೇಂಡಿನೆನ್ ಮಾತೆನ್ ಯೋಹಾನಗ್ ತೆರಿಪಾಲೆ. ಕುರುಡೆರೆಗ್ ಕಣ್ಣ್ ತೋಜುಂಡು, ಕುಂಟೆರೆಗ್ ಕಾರ್ ಬರ್ಪುಂಡು, ಕೊಷ್ಟದಾಕುಲು ಶುದ್ಧ ಆಪೆರ್, ಕೆಪ್ಪೆರೆಗ್ ಕೆಬಿ ಕೇನುಂಡು. ಸೈತಿನಾಕುಲು ಲಕ್ಕುವೆರ್, ಬಡವೆರೆಗ್ ಸುವಾರ್ತೆ ಸಾರುಂಡು.</verse>
				<verse number="23">ಎನ ಸಂಗತಿಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ,” ಪಂಡ್ದ್ ಪಂಡೆ.</verse>
				<verse number="24">ಯೋಹಾನನ ದೂತೆರ್ ಪಿರ ಪೋಯಿನೆಡ್ದ್ ಬೊಕ್ಕ ಆಯೆ ಜನೊಕುಲೆ ಗುಂಪುಲೆಗ್ ಯೋಹಾನನ ಸಂಗತಿನ್ ಪನಿಯೆರೆ ಸುರು ಮಲ್ತೆ, “ನಿಕುಲು ಎಂಚಿನ ತೂವೊಡು ಅಂದ್‌ದ್ ಕಾಡ್‌ಗ್ ಪೋದಿತ್ತರ್? ಗಾಳಿಗ್ ಪಂದುನ ದಂಟ್‌ನಾ?</verse>
				<verse number="25">ಅವು ಅತ್ತಂದೆ ಎಂಚಿನ ತೂವೊಡು ಅಂದ್‌ದ್ ಪೋದಿತ್ತರ್? ನಯತ್ತ ಕುಂಟುನು ಪಾಡ್ದಿನ ನರಮಾನಿನಾ? ಐಶ್ವರ್ಯದ ವೈಭವೊಡು ಕುಂಟು ಪಾಡುನಾಕುಲು ಸಂಪೊತ್ತುಡು ಬದುಕುನಾಕುಲು ಅರಸುನ ಅರಮನೆಡ್ ಉಪ್ಪುವೆರತ್ತಾ?</verse>
				<verse number="26">ಅಪಗಾಂಡ ಒವೆನ್ ತೂಯೆರೆ ಪೋಯೆರ್? ಪ್ರವಾದಿನಾ? ಅಂದ್ ಪ್ರವಾದಿಡ್ದ್‌ಲಾ ಹೆಚ್ಚ್‌ದಾಯನ್ ತೂಯರ್ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="27">‘ಇಂದಾ, ಎನ ದೂತನ್ ನಿನ ದುಂಬು ಕಡಪುಡ್ವೆ. ಈ ಪೋಪಿನ ಸಾದಿನ್ ಆಯೆ ಸಮ ಮಲ್ಪುವೆ,’ ಅಂದ್‌ದ್ ಏರೆನ ಬಗೆಟ್ ಗ್ರಂಥೊಡು ಬರೆತ್ಂಡಾ ಆ ನರಮಾನಿ ಉಂಬೆನೇ.</verse>
				<verse number="28">ಪೊಂಜೊವುಲೆಡ್ದ್ ಪುಟ್ಟಿನಾಕುಲೆಡ್ ಯೋಹಾನಡ್ದ್ ಮಲ್ಲಾಯೆ ಒರಿಲಾ ಇಜ್ಜೆ; ಆಂಡಲಾ ದೇವೆರೆ ರಾಜ್ಯೊಡು ಬಜೀ ಎಲ್ಯಾಯೆ ಯೋಹಾನಡ್ದ್‌ಲಾ ಮಲ್ಲಾಯೆ ಆದುಲ್ಲೆ,” ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="29">ಉಂದತ್ತಂದೆ ಜನೊಕುಲುಲಾ ಸುಂಕದಾಕುಲುಲಾ ಯೋಹಾನನ ಬೋಧನೆನ್ ಕೇಂಡ್ದ್ ಆಯಡ್ದ್ ದೀಕ್ಷಾಸ್ನಾನ ಮಲ್ತೊಂಡಿನೆಡ್ದ್ ದೇವೆರ್ ನೀತಿವಂತೆ ಅಂದ್‌ದ್ ಒಪ್ಪಿಯೊಂಡೆರ್.</verse>
				<verse number="30">ಆಂಡ ಪರಿಸಾಯೆರ್‌ಲಾ ನ್ಯಾಯಕಟ್ಟ್‌ದ ಬೋಧಕೆರ್‌ಲಾ ಆಯಡ ದೀಕ್ಷಾಸ್ನಾನ ಮಲ್ತೊನಂದೆ ಪೋಯಿನೆಡ್ದ್ ತನ್ಕುಲೆ ಬಗೆಟ್ ದೇವೆರೆ ಆಲೋಚನೆನ್ ತಿರಸ್ಕಾರ ಮಲ್ತೆರ್.</verse>
				<verse number="31">ಬೊಕ್ಕ ಕರ್ತವೆ ಪಂಡಿನಿ, “ಈ ಕಾಲದ ಜನೊಕುಲೆನ್ ಏರೆಗ್ ಸಮ ಮಲ್ಪೊಲಿ? ಅಕುಲು ಏರೆಗ್ ಸಮ ಆಪೆರ್?</verse>
				<verse number="32">‘ಎಂಕುಲು ನಿಕ್ಲೆಗಾದ್ ಕೊಳಲ್ ಉರ್ತ ನಿಕುಲು ನಲ್ತ್‌ಜರ್, ನಿಕ್ಲೆಗ್ ಮುರೆಡಿಯ, ನಿಕುಲು ಬುಲ್ತುಜರ್,’ ಅಂದ್‌ದ್ ಪೇಂಟೆಡ್ ಕುಲ್ಲುದು ಒರಿ ಒರಿಯಗ್ ಬೊಬ್ಬೆ ಪಾಡುನ ಜೋಕುಲೆ ಲೆಕ್ಕ ತೋಜುವರ್.</verse>
				<verse number="33">ಎಂಚಂದ್ಂಡ ಸ್ನಾನಿಕೆ ಯೋಹಾನೆ ಬೈದೆ; ಆಯೆ ರೊಟ್ಟಿ ತಿನಂದಿನಾಯೆ, ಅಮಲ್‌ದ ದ್ರಾಕ್ಷಾರಸ ಪರಂದಿನಾಯೆ. ನಿಕುಲು ಆಯಗ್, ‘ದೆವ್ವ ಪತ್ತ್‌ದ್ಂಡ್,’ ಪನ್ಪರ್.</verse>
				<verse number="34">ನರಮಾನಿ ಮಗೆ ಬೈದೆ, ಆಯೆ ನುಪ್ಪು ನೀರ್‌ನ್ ದೆತ್ತೊನುನಾಯೆ ಆದುಲ್ಲೆ; ಅಪಗ ನಿಕುಲು, ‘ಇಂದಾ, ಇಂಬೆ ಬಂಜೆಲೆ, ಪರ್ಪೆಲೆ, ಸುಂಕದಾಕುಲೆ ಬೊಕ್ಕ ಪಾಪಿಷ್ಟೆರೆ ಸ್ನೇಹಿತೆ,’ ಅಂದ್‌ದ್ ಪನ್ಪರ್.</verse>
				<verse number="35">ಆಂಡ ಬುದ್ಧಿ ಪನ್ಪಿನವು ಅವು ನೀತಿದವು ನಿಜವಾಯಿನ ಗೇನೊಡು ದಿಂಜಿನಾಕುಲೆಡ್ದೇ ತೆರಿದ್ ಬರು,” ಅಂದ್‌ದ್ ಪಂಡೆ.</verse>
				<verse number="36">ಪರಿಸಾಯೆರೆಡ್ ಒರಿ ಯೇಸುನು ತನಡೊಪ್ಪ ವಣಸ್ ಮಲ್ಪೊಡಂದ್‌ದ್ ಕೇನೊನ್ನಗ</verse>
				<verse number="37">ಆಯೆ ಆ ಪರಿಸಾಯನ ಇಲ್ಲಗ್ ಪೋದು ವಣಸ್‌ಗ್ ಕುಲ್ಲಿಯೆ. ಅಪಗ ಆ ಊರುಡಿತ್ತಿ ಒಂಜಿ ಪಾಪಿ ಪೊಂಜೊವು, ಯೇಸು ಆ ಇಲ್ಲಡ್ ವಣಸ್‌ಗ್ ಕುಲ್ಲುದೆ ಅಂದ್‌ದ್ ತೆರಿಯೊಂದು ಒಂಜಿ ಮಸ್ತ್ ಬಿಲೆ ಇತ್ತಿ ಕಮ್ಮೆನದ ಎಣ್ಣೆದ ಕುಪ್ಪಿನ್ ಪತ್ತೊಂದು;</verse>
				<verse number="38">ಪಿರವುಡು ಆಯ ಕಾರಕೈತಲ್ ಉಂತುದು; ಬುಲ್ತೊಂದು ತನ ಕಣ್ಣೀರ್‌ಡ್ ಆಯ ಕಾರುಲೆನ್ ಚಂಡಿ ಮಲ್ತ್‌ದ್ ತನ ತರೆ ಕುಜಲ್‌ಡ್ದ್ ಒಚ್ಚಿದ್ ಐಕ್ ಮುತ್ತು ಕೊರ್ದು, ಆ ಎಣ್ಣೆನ್ ಪೂಜಿಯಲ್.</verse>
				<verse number="39">ಆಂಡ ಆಯನ್ ವಣಸ್‌ಗ್ ಲೈದಿನ ಪರಿಸಾಯೆ ಉಂದೆನ್ ತೂದು, “ಮೋಲು ಪಾಪಿ; ಉಂಬೆ ಪ್ರವಾದಿ ಆದಿತ್ತೆಡ ತನನ್ ಮುಟ್ಟಿನ ಈ ಪೊಂಜೊವು ಎಂಚಿತ್ತಿನಾಲ್, ಅಂದ್‌ದ್ ತೆರಿಯೊಂದುವೆ,” ಅಂದ್‌ದ್ ಎನ್ನಿಯೆ.</verse>
				<verse number="40">ಅಪಗ ಯೇಸು ಆಯಡ, “ಸೀಮೋನಾ, ಯಾನ್ ನಿಕ್ಕ್ ಪನೊಡಾಯಿನ ಒಂಜಿ ಪಾತೆರ ಉಂಡು.” ಐಕ್ ಆಯೆ, “ಅಂದ್ ಬೋಧಕಾ, ಪನ್ಲ,” ಪಂಡೆ.</verse>
				<verse number="41">ಅಪಗ ಯೇಸು, “ಒಂಜಿ ಸಾವುಕಾರಗ್ ಇರ್ವೆರ್ ಸಾಲ ಕೊರೊಡಿತ್ತ್‌ಂಡ್. ಒರಿ ಐನೂದು ಬೊಳ್ಳಿದ ಪಾವೊಲಿ, ಬೊಕ್ಕೊರಿ ಐವ ಬೊಳ್ಳಿದ ಪಾವೊಲಿ ಕೊರೊಡಿತ್ತ್‌ಂಡ್.</verse>
				<verse number="42">ದೆತ್ತೊಂದಿನ ಕಾಸ್‌ನ್ ಪಿರ ಕೊರಿಯೆರೆ ಅಕ್ಲೆಗ್ ಗತಿ ಇಜ್ಜಂದಿನೆಡ್ದಾದ್ ಆ ಇರ್ವೆರೆ ಸಾಲೊನ್ಲಾ ಬುಡ್ದು ಬುಡಿಯೆ. ಅಪಗಾಂಡ ಅಕ್ಲೆಡ್ ಏರ್ ಆ ಸಾಹುಕಾರನ್ ಹೆಚ್ಚಾದ್ ಪ್ರೀತಿ ಮಲ್ಪುವೆರ್?” ಅಂದ್‌ದ್ ಕೇಂಡೆ.</verse>
				<verse number="43">ಸೀಮೋನೆ ಉತ್ತರ ಕೊರ್ದು, “ಏರೆಗ್ ಹೆಚ್ಚ್ ಕಾಸ್ ಬುಡಿಯೆನಾ ಆಯೆನೇ.” ಪಂಡ್ದ್ ಎನ್ನುವೆ ಪಂಡೆ. ಯೇಸು ಆಯಗ್, “ಈ ಸರಿಯಾದ್ ತೀರ್ಪು ಮಲ್ತ.”</verse>
				<verse number="44">ಆ ಪೊಂಜೊವುನ ಕಡೆಕ್ಕ್ ತೂದು ಸೀಮೋನಗ್, “ಈ ಪೊಂಜೊವುನು ತೂಯನಾ? ಯಾನ್ ನಿನ ಇಲ್ಲಗ್ ಬತ್ತಿನಪಗ ಈ ಎನ ಕಾರ್‌ಗ್ ನೀರ್ ಕೊರ್ತುಜ. ಆಂಡ ಮೋಲು ಎನ ಕಾರ್‌ಲೆನ್ ಕಣ್ಣೀರ್‌ಡ್ ದೆಕ್ಕ್‌ದ್ ತನ ತರೆಕುಜಲ್‌ಡ್ ಒರೆಸಿಯಲ್.</verse>
				<verse number="45">ಈ ಎಂಕ್ ಮುತ್ತು ಕೊರ್ಜ. ಮೋಲು ಯಾನ್ ಉಲಯಿ ಬತ್ತಿನೆಡ್ದಿಂಜಿ ಎನ ಕಾರ್‌ಗ್ ಮುತ್ತು ಕೊರ್ಪಿನೆನ್ ಬುಡ್ತುಜಲ್.</verse>
				<verse number="46">ಈ ಎನ ತರೆಕ್ ಎಣ್ಣೆ ಪೂಜಿಜ; ಮೋಲು ಕಮ್ಮೆನದ ಎಣ್ಣೆನ್ ಕಾರ್‌ಗ್ ಪೂಜಿಯಲ್.</verse>
				<verse number="47">ಇಂಚ ಉಪ್ಪುನಗ ಯಾನ್ ಪನ್ಪಿನಿ ದಾನೆಂದ್ಂಡ ಮೋಲು ಮಲ್ತಿ ಪಾಪ ಮಸ್ತ್ ಆಂಡಲಾ ಅವು ಮಾಪು ಆತ್ಂಡ್. ನೆಕ್ಕ್ ಕಾರಣ ಆಲ್ ತೋಜಾಯಿನ ಪ್ರೀತಿಯೇ. ಆಂಡ ಏರೆಗ್ ಒಂತೆ ಮಾಪು ಆತ್ಂಡ ಆಯೆ ತೋಜಾಯಿನ ಪ್ರೀತಿಲಾ ಒಂತೆನೇ ಆದುಂಡು.”</verse>
				<verse number="48">ಬೊಕ್ಕ ಆಯೆ ಆಲೆಗ್, “ನಿನ ಪಾಪೊಲು ಮಾಪು ಆತ್ಂಡ್,” ಅಂದ್‌ದ್ ಪಂಡೆ.</verse>
				<verse number="49">ಆಯನ ಒಟ್ಟುಗು ವಣಸ್‌ಗ್ ಕುಲ್ಲೊಂದಿತ್ತಿನಾಕುಲು, “ಪಾಪೊಲೆನ್ ಮಾಪು ಮಲ್ಪುನಾಯೆ ಉಂಬೆ ಏರ್?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="50">ಆಂಡ ಆಯೆ ಆ ಪೊಂಜೊವುಗು, “ನಿನ ನಂಬಿಕೆನೇ ನಿನನ್ ರಕ್ಷಣೆ ಮಲ್ತ್ಂಡ್, ಸಮಾಧಾನೊಡು ಪೋಲ,” ಅಂದ್‌ದ್ ಪಂಡೆ.</verse>
			</chapter>
			<chapter number="8">
				<verse number="1">ಐಡ್ದ್ ಬೊಕ್ಕ ಯೇಸು ದೇವೆರೆ ರಾಜ್ಯದ ಸುವಾರ್ತೆನ್ ಊರು ಊರುಲೆಗ್ ಹಳ್ಳಿಲೆಗ್ ಪೋದು ಸಾರಿಯೊಂದಿತ್ತೆ. ಆಯಡೊಪ್ಪ ಪದ್ರಾಡ್ ಜನ ಶಿಷ್ಯೆರ್‌ಲುಲಾ ಇತ್ತೆರ್.</verse>
				<verse number="2">ದುರಾತ್ಮದ ಕಾಟದ ಸೀಕ್‌ಡ್ದ್ ಗುಣ ಆಯಿ ಕೆಲವು ಪೊಂಜೊವುಲುಲಾ ಇತ್ತೆರ್. ಆ ಪೊಂಜೊವುಲು ಏರ್ ಅಂದ್ಂಡ ಏಳ್ ದೆವ್ವೊಲು ಬುಡ್ದು ಪೋಯಿ ಮಗ್ದಲದ ಮರಿಯ.</verse>
				<verse number="3">ಹೆರೋದನ ಪಾರುಪತ್ಯಗಾರೆ ಆಯಿ ಕೂಸನ ಬೊಡೆದಿ ಯೋಹನ್ನ, ಸುಸನ್ನ, ಕುಡ ಬೇತೆ ದಿಂಜ ಮಂದಿ ಇತ್ತೆರ್. ಮೊಕುಲು ತನ್ಕುಲೆ ಕರ್ಚಿಡೇ ಯೇಸುನಲಾ ಆಯ ಶಿಷ್ಯೆರೆನಲಾ ಚಾಕ್ರಿ ಮಲ್ತೊಂದಿತ್ತೆರ್.</verse>
				<verse number="4">ಜನೊಕುಲು ಗುಂಪುಗುಂಪಾದ್ ಬೇತೆ ಬೇತೆ ಊರುಲೆಡ್ದ್ ಆಯನ ಕೈತಲ್‌ ಬರೊಂದಿತ್ತೆರ್. ಆಯೆ ಅಕ್ಲೆಗ್ ಉಪಕತೆತ್ತ ರೂಪೊಡು ಪಂಡಿನಿ ದಾನೆಂದ್ಂಡ</verse>
				<verse number="5">“ಬಿತ್ತುನಾಯೆ ಬಿತ್ತ್ ಬಿತ್ತಿಯೆರೆ ಪಿದಾಡಿಯೆ. ಆಯೆ ಬಿತ್ತ್‌ನಗ ಕೆಲವು ಬಿತ್ತುಲು ಸಾದಿದ ಬರಿಟ್ಟ್ ಬೂರ್ದು ದೊಂಕುದು ಪೋಂಡು; ಅವೆನ್ ಬಾನೊಡು ರಾಪಿನ ಪಕ್ಕಿಲು ತಿಂದ್‌ದ್ ಬುಡಿಯ.</verse>
				<verse number="6">ಕೆಲವು ಬಿತ್ತ್ ಪಾದೆದ ಮಿತ್ತ್ ಬೂರ್‌ಂಡ್; ಅವು ಮುಂಗೆ ಬತ್ತ್‌ದ್ ನೀರ್‌ದ ಪಸೆದಾಂತೆ ನುಂಗುದು ಪೋಂಡು.</verse>
				<verse number="7">ಬೊಕ್ಕ ಕೆಲವು ಬಿತ್ತ್ ಮುಳ್ಳುದ ಪುದೆಕ್ಲೆ ನಡುಟು ಬೂರ್‌ಂಡ್; ಐತ ಒಟ್ಟುಗು ಮುಳ್ಳುಗಿಡೊಕ್ಲು ಬುಲೆದ್ ಅವೆನ್ ದೆಂಗಾಂಡ್.</verse>
				<verse number="8">ನನ ಕೆಲವು ಬಿತ್ತ್ ಎಡ್ಡೆ ಭೂಮಿದ ಮಿತ್ತ್ ಬೂರ್ದು ಅವು ಕೊಡಿದ್ ನೂದೆದಾತ್ ಫಲ ಕೊರ್ಯ.” ಈ ಪಾತೆರೊಲೆನ್ ಪಂಡ್ದ್ ಆಯೆ, “ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಜೋರ್‌ಡ್ ಪಂಡೆ.</verse>
				<verse number="9">ಆಯನ ಶಿಷ್ಯೆರ್ ಈ ಉಪಕತೆತ್ತ ಅರ್ಥ ದಾದವು? ಅಂದ್‌ದ್ ಕೇನ್ನಗ</verse>
				<verse number="10">“ಆಯೆ ದೇವೆರೆ ರಾಜ್ಯದ ಗುಟ್ಟುಲೆನ್ ತೆರಿಯುನ ವರ ನಿಕ್ಲೆಗ್ ಕೊರ್ತುಂಡು. ಒರಿದಿನಾಕುಲೆಗ್ ಕಣ್ಣ್ ಇತ್ತ್ಂಡಲಾ ತೋಜಂದಿಲೆಕ್ಕ, ಕೆಬಿ ಇತ್ತ್ಂಡಲಾ ಕೇನಂದಿಲೆಕ್ಕ, ಉಪಕತೆತ್ತ ರೂಪೊಡು ಕೊರ್ತುಂಡು.</verse>
				<verse number="11">“ಈ ಉಪಕತೆತ್ತ ಅರ್ಥ ದಾನೆಂದ್ಂಡ, ಆ ಬಿತ್ತ್ ಪಂಡ್ಂಡ ದೇವೆರೆ ಪಾತೆರ.</verse>
				<verse number="12">ಕೆಲೆವೆರ್ ಪಾತೆರೊನು ಕೇಂಡಿ ಕೂಡ್ಲೆ ಅಕುಲು ನಂಬುದು ರಕ್ಷಣೆ ಹೊಂದಿಯೆರೆ ಬಲ್ಲಿ ಅಂದ್‌ದ್ ಸೈತಾನೆ ಬತ್ತ್‌ದ್ ಪಾತೆರೊನು ಅಕ್ಲೆನ ಉಡಲ್‌ಡ್ದ್ ದೆತ್ತ್‌ದ್ ಬುಡ್ಪೆ. ಮೊಕುಲೇ ಸಾದಿದ ಬರಿಟ್ಟ್ ಬೂರ್ದಿತ್ತಿ ಬಿತ್ತುಲು ಆದುಪ್ಪುವೆರ್.</verse>
				<verse number="13">ಕೆಲೆವೆರ್ ಪಾತೆರೊನು ಕೇಂಡಿನಪಗನೇ ಸಂತೋಷೊಡು ಅವೆನ್ ಸ್ವೀಕಾರ ಮಲ್ಪುವೆರ್; ಮೊಕ್ಲೆಗ್ ಬೇರ್ ಇಜ್ಜಂದಿನೆಡ್ದ್ ಒಂತೆ ಕಾಲ ಮಾತ್ರ ನಂಬೊಂದಿತ್ತ್‌ದ್ ಶೋಧನೆದ ಕಾಲೊಡು ಬೂರ್ದು ಪೋಪೆರ್; ಮೊಕುಲೇ ಪಾದೆ ಜಾಗ್‌ಡ್ ಬೂರಿನಾಕುಲು.</verse>
				<verse number="14">ಬೇತೆ ಕೆಲೆವೆರ್ ಪಾತೆರೊನು ಕೇಂಡಿ ಬೊಕ್ಕ ಈ ಜೀವಮಾನೊಡು ಬರ್ಪಿ ಚಿಂತೆ ಐಶ್ವರ್ಯದ ಸುಖ, ಬೋಗೊಡ್ದು ಮುರ್ಕುದು ಫಲೊನು ಬುಲೆಪಾವುಜೆರ್; ಮೊಕುಲೇ ಮುಳ್ಳು ಗಿಡೊಕ್ಲೆಡ್ ಬಿತ್ತ್ ಬೂರಿ ನೆಲ ಆದುಪ್ಪುವೆರ್.</verse>
				<verse number="15">ಬೊಕ್ಕ ಕೆಲೆವೆರ್ ಪಾತೆರೊನು ಕೇಂಡ್ದ್ ಸಜ್ಜಿಡ್ ತನ್ಕುಲೆ ಉಡಲ್‌ಡ್ ದೀವೊಂದು ತಾಳ್ಮೆಡ್ ಫಲೊನು ಕೊರ್ಪೆರ್; ಮೊಕುಲೇ ಬಿತ್ತ್ ಬೂರ್ದಿನ ಎಡ್ಡೆ ನೆಲ ಆದುಲ್ಲೆರ್.”</verse>
				<verse number="16">“ಉಂದತ್ತಂದೆ ಏರ್ಲಾ ತುಡರ್‌ನ್ ಪೊತ್ತಾದ್ ಬಾಜನೊಡು ಮುಚ್ಚುಜೆರ್, ಇಜ್ಜಿಂಡ ಮಂಚವುದ ಅಡಿಟ್ಟ್‌ಲಾ ದೀಪುಜೆರ್; ಅವೆನ್ ಇಲ್ಲದುಲಯಿ ಬರ್ಪಿನಾಕುಲೆಗ್ ಬೊಲ್ಪು ತೋಜುಲೆಕ್ಕ ದೀಪಕಂಬದ ಮಿತ್ತ್ ದೀಪೆರತ್ತಾ.</verse>
				<verse number="17">ಬೊಲ್ಪುಗು ಬರಂದಿನ ವಾ ಗುಟ್ಟುಲಾ ಇಜ್ಜಿ. ಬೊಕ್ಕ ಗೊತ್ತಾವಂದೆ ಬೈಲ್‌ಗ್ ಬರಂದಿನ ಒಂಜಿ ಗುಟ್ಟುಲಾ ಇಜ್ಜಿ.</verse>
				<verse number="18">“ಅವೆಡ್ದಾವರ ನಿಕುಲು ಎಂಚ ಕೆಬಿ ಕೊರೊಡು ಅಂದ್‌ದ್ ತೆರಿಯೊನ್ಲೆ; ದಾಯೆ ಪಂಡ ಇತ್ತಿನಾಯಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಂದಿನಾಯಡ ಆಯೆ ತನ್ನವು ಅಂದ್‌ದ್ ಎನ್ನಿನೆನ್ಲಾ ದೆತ್ತ್‌ದ್ ಬುಡ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="19">ಯೇಸುನ ಅಪ್ಪೆಲಾ ಮೆಗ್ಯಾಡ್ಲುಲಾ ಆಯೆ ಇತ್ತಿನಡೆಗ್ ಬತ್ತೆರ್; ಆಂಡ ಜನೊಕುಲೆ ಗುಂಪುಡ್ದು ಆಯನಡೆ ಪೋಯೆರೆ ಆಯಿಜಿ.</verse>
				<verse number="20">ಒರಿ ಆಯಗ್, “ನಿನ ಅಪ್ಪೆಲಾ ನಿನ ಮೆಗ್ಯಾಡ್ಲುಲಾ ನಿನನ್ ತೂವೆರೆ ಬೈದೆರ್,” ಅಂದ್‌ದ್ ಪನ್ನಗ</verse>
				<verse number="21">ಆಯೆ ಅಕ್ಲೆಗ್, “ಏರ್ ದೇವೆರೆ ಪಾತೆರೊನು ಕೇಂಡ್ದ್ ಐತ ಲೆಕ್ಕನೆ ನಡಪುವೆರಾ, ಅಕುಲೇ ಎನ ಅಪ್ಪೆಲಾ ಎನ ಮೆಗ್ಯಾಡ್ಲುಲಾ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="22">ಒಂಜಾನೊಂಜಿ ದಿನೊಟು ಯೇಸು ತನ ಶಿಷ್ಯೆರೆ ಒಟ್ಟುಗು ಒಂಜಿ ಓಡೊಗು ಮಿತ್ತಾರ್ದ್ ತುದೆತ ಆಪೆದ ಬರಿಕ್ಕ್ ಪೋಯಿ ಅಂದ್‌ದ್ ಪನ್ನಗ, “ಅಕುಲು ಓಡೊನು ನೀರ್‌ದುಲಯಿ ನೂಕುದು ಪಿದಾಡಿಯೆರ್.”</verse>
				<verse number="23">ಅಕುಲು ಪೋವೊಂದುಪ್ಪುನಗ ಆಯಗ್ ನಿದ್ರೆ ಬತ್ತ್ಂಡ್; ಅಪಗ ಬಿರುಗಾಳಿ ಲಕ್ಕ್‌ದ್ ಓಡದುಲಯಿ ನೀರ್ ದಿಂಜಿದ್ ಅಕುಲು ಅಪತ್ತ್‌ಡ್ ತಿಕ್ಕ್‌ದ್ ಬೂರಿಯೆರ್.</verse>
				<verse number="24">ಇಂಚ ಉಪ್ಪುನಗ ಅಕುಲು ಯೇಸುನು ಮೆನ್ತ್‌ದ್, “ಗುರೂ, ಗುರೂ, ಸೈಯೊಂದುಲ್ಲ,” ಅಂದ್‌ದ್ ಲಕ್ಕಾಯೆರ್. ಅಪಗ ಆಯೆ ಲಕ್ಕ್‌ದ್ ಗಾಳಿನ್ಲಾ ಉರ್ಕು ನೀರ್‌ನ್ಲಾ ದಟ್ಟಿಯೆ. ದಟ್ಟಿನಗನೆ ಅಬ್ಬರ ಉಂತುದು ಶಾಂತ ಆಂಡ್.</verse>
				<verse number="25">ಬೊಕ್ಕ ಆಯೆ ಅಕ್ಲೆಡ, “ನಿಕ್ಲೆ ನಂಬಿಕೆ ಓಲುಂಡು?” ಅಂದ್‌ದ್ ಕೇಂಡೆ. ಅಕುಲು ಪೋಡಿದ್, “ಉಂಬೆ ಏರಾದುಪ್ಪೆ? ಗಾಳಿಲಾ ನೀರ್‌ಲಾ ಅಪ್ಪಣೆ ಕೊರ್ನಗ ಅವು ಆಯೆ ಪಂಡಿ ಪಾತೆರೊನು ಕೇನುಂಡತ್ತಾ,” ಅಂದ್‌ದ್ ಒರಿ ಒರಿಯಗ್ ಪಾತೆರೊಂದು ಅಚ್ಚಿರ ಆಯೆರ್.</verse>
				<verse number="26">ಬೊಕ್ಕ ಅಕುಲು ಗಲಿಲಾಯೊಗು ಎದುರುಡುಪ್ಪು ಗೆರಸೇನೆರೆ ಸೀಮೆಗ್ ಮುಟ್ಟಿಯೆರ್.</verse>
				<verse number="27">ಆಯೆ ಕರೆಕ್ ಜಪ್ಪುನಗನೇ ಆ ಊರುದ ಒರಿ ನರಮಾನಿ ಯೇಸುನ ಎದುರು ಬತ್ತೆ. ಆಯಗ್ ಮಸ್ತ್ ಸಮಯೊಡ್ದಿಂಚಿ ದೆವ್ವ ಪತ್ತ್‌ದಿತ್ತ್‌ಂಡ್. ಆಯೆ ಕುಂಟುನು ಪಾಡೊನಂದೆ ವಾ ಇಲ್ಲ್‌ಡ್ಲಾ ಉಪ್ಪಂದೆ ಸ್ಮಶಾನದ ಮಾಟೆಡೇ ಇತ್ತೆ.</verse>
				<verse number="28">ಆಯೆ ಯೇಸುನು ತೂಯಿ ಕೂಡ್ಲೆ ಅರಬಾಯಿ ದೀದ್ ಆಯನ ಎದುರು ಅಡ್ಡಬೂರ್ದು ಮಲ್ಲ ಸ್ವರೊಟ್ಟು, “ಯೇಸೋ, ಪರಾತ್ಪರೆ ಆದುಪ್ಪು ದೇವೆರೆ ಮಗಾ, ಎನ ಸುದ್ಧಿ ನಿಕ್ಕ್ ದಾಯೆಗ್? ಎಂಕ್ ಭಂಗ ಕೊರೊಡ್ಚಿ,” ಅಂದ್‌ದ್ ನಿನಡ ನಟ್ಟೊನ್ವೆ ಪಂಡೆ.</verse>
				<verse number="29">ದಾಯೆಗಂದ್ಂಡ ಈ ನರಮಾನಿನ್ ಬುಡ್ದು ಪೋಲ ಅಂದ್‌ದ್ ಆಯೆ ಆ ದೆವ್ವೊಲೆಗ್ ಅಪ್ಪಣೆ ಕೊರ್ದಿತ್ತೆ. ಅವು ಮಸ್ತ್ ಸಮಯೊಡ್ದಿಂಚಿ ಆಯನ್ ಪತ್ತ್‌ದಿತ್ತ್‌ಂಡ್. ಉಂದತ್ತಂದೆ ಆಯನ ಕೈಕಾರ್‌ಗ್ ಸರಪೊಳಿಡ್ ಕಟ್ಟ್‌ದ್ ದೀದ್ ಕಾತ್ಂಡಲಾ ಅವೆನ್ ಕಡ್ತ್ ಪಾಡೊಂದಿತ್ತೆ. ಬೊಕ್ಕ ಆ ಭೂತೊಲು ಆಯನ್ ಕಾಡ್‌ಗ್ ಗಿಡ್ತೊಂದಿತ್ತ್‌ಂಡ್.</verse>
				<verse number="30">ಯೇಸು ಆಯಡ, “ನಿನ ಪುದರ್ ಎಂಚಿನ?” ಪಂಡ್ದ್ ಕೇಂಡಿನೆಕ್ಕ್ ಆಯೆ, “ಎನ ಪುದರ್ ದಂಡ್,” ಪಂಡೆ. ದಾಯೆಗಂದ್ಂಡ, ಮಸ್ತ್ ದೆವ್ವೊಲು ಆಯನ ಉಲಯಿ ಪೊಗ್ಗುದಿತ್ತ್‌ಂಡ್.</verse>
				<verse number="31">ಪಾತಾಳೊಗು ಪೋಯೆರೆ ಎಂಕ್ಲೆಗ್ ಅಪ್ಪಣೆ ಕೊರಡ ಅಂದ್‌ದ್ ಆಯಡ ನಟ್ಟೊಂಡ.</verse>
				<verse number="32">ಅಲ್ಪ ಗುಡ್ಡೆಡ್ ಮಲ್ಲ ಪಂಜಿದ ಒಂಜಿ ಪುಂಡು ಮೇಯೊಂದಿತ್ತ್‌ಂಡ್. ಆ ದೆವ್ವೊಲು ಆ ಪಂಜಿಲೆ ಉಲಯಿ ಸೇರೊನಿಯೆರೆ ಎಂಕ್ಲೆಗ್ ಅಪ್ಪಣೆ ಕೊರು ಅಂದ್‌ದ್ ಆಯಡ ನಟ್ಟೊಂಡ; ಅಪಗ ಯೇಸು ಐಕ್ಲೆಗ್ ಅಪ್ಪಣೆ ಕೊರಿಯೆ.</verse>
				<verse number="33">ಅಪಗ ಆ ದೆವ್ವೊಲು ನರಮಾನಿನ ಉಲಯಿಡ್ದ್ ಪಿದಯಿ ಬತ್ತ್‌ದ್ ಪಂಜಿಲೆ ಉಲಯಿ ಪೊಗ್ಗಿಯ; ಪಂಜಿಲು ಪಾರ್ದ್ ಸಂದ್ ಜಾಗ್‌ಲೆಡ್ದ್ ಪೋದು ಕೆರೆತ ಉಲಯಿ ಬೂರ್ದು ದಮ್ಮು ಕಟ್ಟ್‌ದ್ ಸೈತ.</verse>
				<verse number="34">ಮೇಪಾವುನಾಕುಲು ನಡತಿನೆನ್ ತೂದು ಪಾರ್‌ಪೋದು ಊರುಡ್ಲಾ ಹಳ್ಳಿಲೆಡ್ಲಾ ತೆರಿಪಾಯೆರ್.</verse>
				<verse number="35">ಜನೊಕುಲು ನಡತಿ ಸಂಗತಿಲೆನ್ ತೂವೆರೆ ಪಿದಾಡ್ದ್ ಯೇಸು ಇತ್ತಿನಡೆಗ್ ಬತ್ತಿನಪಗ ದೆವ್ವೊಲು ಬುಡ್ದು ಪೋತಿ ಆ ನರಮಾನಿ ಕುಂಟು ಪಾಡ್ದ್ ಸ್ವಸ್ಥ ಬುದ್ಧಿಡ್ ಯೇಸುನ ಕಾರ ಮುದೆಲ್‌ಡ್ ಕುಲ್ಲುದುಪ್ಪುನೆನ್ ತೂದು ಪೋಡಿಯೆರ್.</verse>
				<verse number="36">ನಡತಿ ಸಂಗತಿಲೆನ್ ತೂಯಿನಾಕುಲು ಆ ದೆವ್ವ ಪತ್ತ್‌ದಿನಾಯಗ್ ಎಂಚ ಗುಣ ಆಂಡ್ ಪಂಡ್ದ್ ಅವೆನ್ ಅಕ್ಲೆಗ್ ತೆರಿಪಾನಗ</verse>
				<verse number="37">ಗೆರಸೇನೆರೆ ಸುತ್ತ ಉಪ್ಪು ಸೀಮೆದಾಕುಲೆಗ್ ಮಾತೆರೆಗ್ ಪೋಡಿಗೆ ಉಂಡಾಯಿನೆಡ್ದ್ ಅಕುಲು ಯೇಸುಡ ಈ ಎಂಕ್ಲೆನ್ ಬುಡ್ದು ಪೋವೊಡು, ಅಂದ್‌ದ್ ನಟ್ಟೊಂಡೆರ್. ಆಯೆ ಓಡೊನು ಮಿತ್ತಾದ್ ಪಿರ ಬತ್ತೆ.</verse>
				<verse number="38">ಪಿದಾಡ್ನಗ ದೆವ್ವೊಡ್ದು ಬುಡುಗಡೆ ಆಯಿ ಆ ನರಮಾನಿ, “ಯಾನ್ಲಾ ನಿನ ಒಟ್ಟುಗು ಬರ್ಪೆ,” ಪಂಡ್ದ್ ನಟ್ಟೊನುನಗ</verse>
				<verse number="39">ಆಯೆ, “ಈ ನಿನ ಇಲ್ಲಗ್ ಪಿರ ಪೋದು ದೇವೆರ್ ನಿಕ್ಕ್ ಎಂಚೆಂಚಿನ ಉಪಕಾರೊನು ಮಲ್ತ್‌ದೆ, ಅವೆನ್ ಮಾತೆನ್ ಬುಡ್ಪಾದ್ ಪನ್ಲ,” ಅಂದ್‌ದ್ ಆಯನ್ ಕಡಪುಡಿಯೆ. ಆಯೆ ಊರುಗು ಪೋದು ಯೇಸು ತನ್ಕ್ ಮಲ್ತಿನ ಉಪಕಾರೊನು ಊರಿಡೀ ಸಾರಿಯೆ.</verse>
				<verse number="40">ಯೇಸು ಪಿರ ಬನ್ನಗ ಕಾತೊಂದಿತ್ತಿ ಜನೊಕುಲು ಮಾತೆರ್ ಆಯನ್ ಸಂತೊಸೊಡು ಎದುಕೊಂಡೆರ್.</verse>
				<verse number="41">ಅಪಗ ಸಭಾಮಂದಿರದ ಅಧಿಕಾರಿ ಆದಿತ್ತಿ ಯಾಯಿರೆ ಪನ್ಪಿ ಒರಿ ನರಮಾನಿ ಬತ್ತ್‌ದ್ ಯೇಸುನ ಕಾರ್‌ಗ್ ಅಡ್ಡಬೂರ್ಯೆ. ಹೆಚ್ಚಿ ಕಮ್ಮಿ ಪದ್ರಾಡ್ ವರ್ಸದ ಆಯನ ಒರ್ತಿಯೆ ಮಗಲ್ ಸೈಪಿನ ಪರಿಸ್ಥಿತಿಡ್ ಇತ್ತಲ್. ಯೇಸುನು ತನ ಇಲ್ಲಗ್ ಬರೊಡು ಅಂದ್‌ದ್ ನಟ್ಟೊಂಡೆ. ಆಯೆ ಪೋವೊಂದುಪ್ಪುನಗ ಜನೊಕುಲು ಗುಂಪುಗುಂಪಾದ್ ಆಯನ್ ನೂಕೊಂದಿತ್ತೆರ್.</verse>
				<verse number="42"></verse>
				<verse number="43">ಅಪಗ ಪದ್ರಾಡ್ ವರ್ಸೊಡ್ದಿಂಚಿ ನೆತ್ತೆರ್ ತಮೆಲು ಸೀಕ್‌ಡಿತ್ತಿ ಒಂಜಿ ಪೊಂಜೊವು ಬತ್ತಲ್. ಆಲ್ ವೈದ್ಯೆರೆ ಕೈತಲ್ ಪೋದು ತನ ಮಾತ ಬದ್‌ಕ್‌ನ್ ಕರ್ಚಿ ಮಲ್ತ್‌ದ್ ವಾ ಮರ್ದ್‌ಡ್ಲಾ ಗುಣ ಆವಂದೆ ಇತ್ತಲ್.</verse>
				<verse number="44">ಆಲ್ ಪಿರವುಡು ಬತ್ತ್‌ದ್ ಆಯನ ಕುಂಟುದ ಗೊಂಡೆನ್ ಮುಟ್ಟಿಯಲ್, ಅಪಗನೆ ಆಲೆನ ನೆತ್ತೆರ್ ಪೋಪಿನವು ಉಂತುಂಡು.</verse>
				<verse number="45">ಆಂಡ ಯೇಸು, “ಎನನ್ ಮುಟ್ಟಿನಾಯೆ ಏರ್?” ಅಂದ್‌ದ್ ಕೇನ್ನಗ ಮಾತೆರ್ಲಾ ಯಾನತ್ತ್ ಯಾನತ್ತ್ ಪನ್ನಗ ಪೇತ್ರೆ, “ಗುರೂ, ಏತೋ ಜನೊಕುಲು ನಿನನ್ ನೂಕೊಂದು ಮೆಯಿತ ಮಿತ್ತ್ ಬೂರೊಂದುಲ್ಲೆರತ್ತಾ?” ಪಂಡೆ.</verse>
				<verse number="46">ಆಂಡ ಯೇಸು, “ಏರಾ ಒರಿ ಎನನ್ ಮುಟ್ಟ್‌ದೆರ್; ಎನಡ್ದ್ ಬಲ ಪಿದಾಡುನ ಎಂಕ್ ಗೊತ್ತಾಂಡ್,” ಪನ್ನಗ</verse>
				<verse number="47">ಆ ಪೊಂಜೊವು ತಾನ್ ಮದೆ ಆತಿನಾಲ್ ಅತ್ತ್ ಅಂದ್‌ದ್ ತೆರಿದ್ ನಡುಗೊಂದು ಎದುರು ಬತ್ತ್‌ದ್ ಆಯಗ್ ಅಡ್ಡಬೂರ್ದು ತಾನ್ ಆಯನ್ ಮುಟ್ಟಿನ ಕಾರಣೊನ್ಲಾ ಮುಟ್ಟಿನಪಗನೇ ಗುಣ ಆಯಿನ ಸೀಕ್‌ನ್ಲಾ ಮಾತ ಜನೊಕುಲೆ ಎದುರು ತೆರಿಪಾಯಲ್.</verse>
				<verse number="48">ಯೇಸು ಆಲೆಗ್, “ಮಗಲೇ, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್. ಸಮಾಧಾನೊಡು ಪೋಲ,” ಅಂದ್‌ದ್ ಪಂಡೆ.</verse>
				<verse number="49">ಆಯೆ ನನಲಾ ಪಾತೆರೊಂದುಪ್ಪುನಗ ಸಭಾಮಂದಿರದ ಅಧಿಕಾರಿನ ಕಡೆತಾಯೆ ಒರಿ ಬತ್ತ್‌ದ್, “ನಿನ ಮಗಲ್ ಸೈತಲ್, ಗುರುಕು ತೊಂದರೆ ಕೊರೊಡ್ಚಿ,” ಪಂಡೆ.</verse>
				<verse number="50">ಆಂಡ ಯೇಸು ಅವೆನ್ ಕೇಂಡ್ದ್ ಆಯಡ, “ಪೋಡ್ಯಡ, ನಂಬಿಕೆ ಮಾತ್ರ ಉಪ್ಪಡ್, ಆಲ್ ಬದುಕುವಲ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="51">ಐಡ್ದ್ ಬೊಕ್ಕ ಆ ಇಲ್ಲಗ್ ಪೋದು ಪೇತ್ರೆ, ಯೋಹಾನೆ, ಯಾಕೋಬು, ಆ ಪೊಣ್ಣನ ಅಪ್ಪೆಅಮ್ಮನ್ ಈತ್ ಮಂದಿಲೆನ್ ಬುಡ್ದು ಬೇತೆ ಏರೆನ್ಲಾ ತನ ಒಟ್ಟುಗು ಉಲಯಿ ಬರಿಯೆರೆ ಬುಡ್ಜೆ.</verse>
				<verse number="52">ಮಾತೆರ್ಲಾ ಬುಲ್ತೊಂದು ಆಲೆಗಾದ್ ತಿಗಲೆ ಬೊಟ್ಟೊಂದು ಇತ್ತೆರ್. ಅಪಗ ಯೇಸು ಅಕ್ಲೆಡ, “ಬುಲ್ಪಡೆ ಆಲ್ ಸೈದಿಜಲ್, ನಿದ್ರೆ ಮಲ್ತೊಂದು ಉಲ್ಲಲ್,” ಅಂದ್‌ದ್ ಪಂಡೆ.</verse>
				<verse number="53">ಆಲ್ ಸೈದಿತ್ತಲ್ ಅಂದ್‌ದ್ ತೆರಿದಿನಾಕುಲು ಆಯಗ್ ಗೇಲಿ ಮಲ್ತೆರ್.</verse>
				<verse number="54">ಆಂಡ ಆಯೆ ಆಲೆ ಕೈ ಪತ್ತ್‌ದ್, “ಅಮ್ಮಣೀ, ಲಕ್ಕ್‌ಲ,” ಅಂದ್‌ದ್ ಲೆತ್ತೆ.</verse>
				<verse number="55">ಆಲೆನ ಪ್ರಾಣ ಪಿರ ಬತ್ತ್‌ದ್ ಅಪಗನೆ ಆಲ್ ಲಕ್ಕಿಯಲ್. ಬೊಕ್ಕ ಯೇಸು ಆಲೆಗ್ ವಣಸ್ ಮಲ್ಪಾಲೆ ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="56">ಆಲೆನ ಅಪ್ಪೆಅಮ್ಮೆ ಅಚ್ಚಿರ ಆಯೆರ್. ಆಯೆ ಈ ಸಂಗತಿನ್ ಏರೆಗ್ಲಾ ತೆರಿಪಾವಡೆ ಅಂದ್‌ದ್ ಅಪ್ಪಣೆ ಕೊರಿಯೆ.</verse>
			</chapter>
			<chapter number="9">
				<verse number="1">ಯೇಸು ಪದ್ರಾಡ್ ಶಿಷ್ಯೆರೆನ್ ಒಟ್ಟುಗು ಲೆತ್ತ್‌ದ್ ಅಕ್ಲೆಗ್ ಮಾತ ದೆವ್ವೊಲೆನ್ ಬುಡ್ಪಾವುನಲಾ ಸೀಕ್‌ಲೆನ್ ಗುಣ ಮಲ್ಪುನ ಬಲಲಾ ಅಧಿಕಾರಲಾ ಕೊರಿಯೆ.</verse>
				<verse number="2">ದೇವೆರೆ ರಾಜ್ಯದ ಸಂಗತಿನ್ ಸಾರಿಯೆರೆಗ್ಲಾ, ಸೀಕ್‌ಡಿತ್ತಿನಾಕುಲೆನ್ ಗುಣ ಮಲ್ಪೆರೆಗ್ಲಾ ಅಕ್ಲೆನ್ ಕಡಪುಡ್ದು ಕೊರಿಯೆ.</verse>
				<verse number="3">ಕಡಪುಡುನಪಗ ಯೇಸು ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ಸಾದಿಗ್ ದಾಲಾ ದೆತ್ತೊಂದು ಪೋವಡೆ, ಕೋಲು, ಜೋಳಿಗೆ, ರೊಟ್ಟಿ, ಕಾಸ್, ರಡ್ಡ್ ಅಂಗಿ ಬೊಡ್ಚಿ.</verse>
				<verse number="4">ಉಂದತ್ತಂದೆ ನಿಕುಲು ವಾ ಇಲ್ಲಡ್ ಉಂತಿಯರಾ ಅವುಲೆ ಉಂತುಲೆ, ಆ ಊರು ಬುಡ ಮುಟ್ಟ, ಅಲ್ತ್‌ಡ್ದೇ ಪಿದಾಡ್‌ಲೆ.</verse>
				<verse number="5">ಬೊಕ್ಕ ವಾ ಊರುದಾಕುಲಾವಡ್ ನಿಕ್ಲೆನ್ ಸೇರಾವಂದೆ ಪೋಂಡ ಆ ಊರುನು ಬುಡ್ದು ನಿಕುಲು ಪೋನಗ ಅಕ್ಲೆಗ್ ಸಾಕ್ಷಿಗಾದ್ ನಿಕ್ಲೆ ಕಾರ್‌ದ ಧೂಳುನು ಕುಡ್ತ್‌ದ್ ಪೋಲೆ,”</verse>
				<verse number="6">ಅಪಗ ಅಕುಲು ಪಿದಾಡ್ದ್ ಪೋದು ಸುವಾರ್ತೆ ಸಾರಿಯೊಂದು ಸೀಕ್‌ದಾಕುಲೆನ್ ಗುಣ ಮಲ್ತೊಂದು ಊರುಡ್ದು ಊರು ಸಂಚಾರ ಮಲ್ತೆರ್.</verse>
				<verse number="7">ಇಂಚ ಉಪ್ಪುನಗ ಗಲಿಲಾಯದ ಉಪರಾಜೆ ಆಯಿ ಹೆರೋದೆ ನಡತಿ ಸಂಗತಿಲೆನ್ ಕೇಂಡ್ದ್ ಗಡಿಬಿಡಿ ಆಯೆ. ದಾಯೆಗ್ ಪಂಡ ಕೆಲೆವೆರ್ ಯೋಹಾನೆ ಸೈತಿನಾಕುಲೆಡ್ದ್ ಲಕ್ಕ್‌ದ್ ಬೈದೆ, ಕೆಲೆವೆರ್ ಎಲೀಯೆ ತೋಜಿದ್ ಬೈದೆ, ಕೆಲೆವೆರ್ ಪರ ಕಾಲದ ಪ್ರವಾದಿಲೆಡ್ ಏರಾ ಒರಿ ಲಕ್ಕ್‌ದೆ ಅಂದ್‌ದ್ ಪನೊಂದಿತ್ತೆರ್.</verse>
				<verse number="8"></verse>
				<verse number="9">ಆಂಡ ಹೆರೋದೆ, “ಯೋಹಾನನ ತರೆ ಕಡ್ಪಾದಿನಿ ಯಾನೇ, ಇಂಬೆ ಏರ್ ಆದುಪ್ಪೆ? ಇಂಬ್ಯನ ಸಂಗತಿಡ್ ಬಾರಿ ಕೇನೋಂದುಲ್ಲೆತ್ತಾ?” ಅಂಚಾದ್ ಆಯನ್ ತೂವೊಡು ಅಂದ್‌ದ್ ಪ್ರಯತ್ನ ಮಲ್ತೆ.</verse>
				<verse number="10">ಅಪೊಸ್ತಲೆರ್ ಪಿರ ಬತ್ತ್‌ದ್ ತನ್ಕುಲು ಮಲ್ತಿನೆನ್ ಯೇಸುಗು ಬುಡ್ಪಾದ್ ಒಂಜೊಂಜಾದ್ ಪನ್ನಗ ಆಯೆ ಅಕ್ಲೆನ್ ಬೆತ್ಸಾಯಿದ ಊರುಗು ಪ್ರತ್ಯೇಕಾದ್ ಲೆತ್ತೊಂದು ಪೋಯೆ.</verse>
				<verse number="11">ಆಂಡ ಜನೊಕುಲೆ ಗುಂಪು ಉಂದೆನ್ ತೆರಿದ್ ಆಯನ ಬೆರಿಯೆ ಬರಿಯೆರೆ ಸುರು ಮಲ್ತೆರ್, ಆಯೆ ಅಕ್ಲೆನ್ ಪ್ರೀತಿಡ್ ಎದುಕೊಂದು ದೇವೆರೆ ರಾಜ್ಯದ ವಿಚಾರೊಡು ಅಕ್ಲೆಡ ಪಾತೆರ ಪಂಡ್ದ್ ಸ್ವಸ್ಥ ಆವೊಡಾಯಿನಾಕುಲೆಗ್ ಗುಣ ಮಲ್ತೆ.</verse>
				<verse number="12">ಪೊರ್ತು ಕಂತೊಂದು ಬತ್ತ್ಂಡ್. ಆ ಪದ್ರಾಡ್ ಮಂದಿ ಶಿಷ್ಯೆರ್ ಆಯನ ಕೈತಲ್‌ ಬತ್ತ್‌ದ್ ಜನೊಕುಲೆ ಗುಂಪುಗು ಅಪ್ಪಣೆ ಕೊರ್ಲ, “ಅಕುಲು ಸುತ್ತಮುತ್ತ ಉಪ್ಪು ಹಳ್ಳಿಲೆಗ್ ಪೋದು, ಅವುಲು ಇತ್ತ್‌ದ್ ವಣಸ್‌ಗ್ ಬೋಡಾಯಿನೆನ್ ದೆತ್ತೊನೆರೆ ಕಡಪುಡುಲ. ನಮ ಮುಲ್ಪ ಕಾಡ್ ಜಾಗ್‌ಡ್ ಉಲ್ಲತ್ತಾ,” ಅಂದ್‌ದ್ ಆಯಗ್ ಪನ್ನಗ</verse>
				<verse number="13">ಆಯೆ, “ನಿಕುಲೇ ಅಕ್ಲೆಗ್ ವಣಸ್ ಕೊರ್ಲೆ ಪಂಡೆ.” ಐಕ್ ಅಕುಲು ಎಂಕ್ಲೆಡ, “ಐನ್ ರೊಟ್ಟಿ ರಡ್ಡ್ ಮೀನ್ ಬುಡ್ದು ಹೆಚ್ಚಿಗೆ ದಾಲಾ ಇಜ್ಜಿ. ಎಂಕುಲು ಪೋದು ಈತ್ ಮಾತ ಜನೊಕುಲೆಗ್ ವಣಸ್ ಬಿಲೆಕ್ ದೆತ್ತೊನೊಂದು ಬರೊಡಾ?” ಅಂದ್‌ದ್ ಪಂಡೆರ್.</verse>
				<verse number="14">ಅಂಜೊವುಲೆ ಹೆಚ್ಚಿಕಡಿಮೆ ಐನ್ ಸಾರ ಜನ ಇತ್ತೆರ್. ಅಪಗ ಆಯೆ ತನ ಶಿಷ್ಯೆರೆಗ್, “ಮೊಕ್ಲೆನ್ ಒಂಜೊಂಜಿ ಪಂತೆಡ್ ಹೆಚ್ಚಿಕಡಿಮೆ ಐವ್ವ ಐವ್ವದಲೆಕ್ಕ ಕುಲ್ಲಾಲೆ,” ಅಂದ್‌ದ್ ಪಂಡೆ.</verse>
				<verse number="15">ಅಕುಲು ಮಾತೆರೆನ್ ಕುಲ್ಲಾಯೆರ್.</verse>
				<verse number="16">ಯೇಸು ಆ ಐನ್ ರೊಟ್ಟಿನ್ಲಾ ರಡ್ಡ್ ಮೀನ್‌ನ್ಲಾ ದೆತ್ತೊಂದು ಬಾನದಂಚಿ ತೂದು ದೇವೆರೆನ್ ಸುಗಿತ್‌ದ್ ಪೊಲ್ತುದು, ಶಿಷ್ಯೆರೆ ಕೈಕ್ ಕೊರ್ದು ಗುಂಪುಗು ಪಟ್ಟ್‌ಲೆ ಪಂಡೆ.</verse>
				<verse number="17">ಅಕುಲು ಮಾತೆರ್ಲಾ ಉಂಡುದು ತೃಪ್ತಿ ಆಯೆರ್. ಕಡೆಕ್ಕ್ ಒರಿದಿನೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.</verse>
				<verse number="18">ಒಂಜಾನೊಂಜಿ ದಿನ ಯೇಸು ಒರಿಯೇ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಶಿಷ್ಯೆರ್ ಆಯಡೊಪ್ಪ ಇತ್ತೆರ್. ಆಯೆ ಅಕ್ಲೆಡ, “ಎನನ್ ಸಾಮಾನ್ಯ ಜನೊಕುಲು ಏರ್ ಅಂದ್‌ದ್ ಪನ್ಪೆರ್?” ಅಂದ್‌ದ್ ಕೇಂಡಿನೆಕ್ಕ್,</verse>
				<verse number="19">ಅಕುಲು, “ನಿನನ್ ಸ್ನಾನಿಕೆ ಯೋಹಾನೆ ಪನ್ಪೆರ್, ಕೆಲೆವೆರ್ ಎಲೀಯೆ ಪನ್ಪೆರ್, ನನ ಕೆಲೆವೆರ್ ಆದಿದ ಪ್ರವಾದಿಲೆಡ್ ಏರಾ ಒರಿ ಸೈತಿನಾಕುಲೆಡ್ದ್ ಲಕ್ಕ್‌ದೆ ಪನ್ಪೆರ್,” ಅಂದ್‌ದ್ ಪಂಡೆರ್.</verse>
				<verse number="20">ಆಯೆ ಅಕ್ಲೆಡ, “ಆಂಡ ನಿಕುಲು ಎನನ್ ಏರಂದ್‌ದ್ ಪನ್ಪರ್? ಅಂದ್‌ದ್ ಕೇನ್ನಗ ಪೇತ್ರೆ ಈ ದೇವೆರೆಡ್ದ್ ಬರೊಡಾಯಿನ ಕ್ರಿಸ್ತೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="21">ಅಪಗ ಆಯೆ ಉಂದೆನ್ ಏರೆಗ್ಲಾ ಪನಡೆ, ಅಂದ್‌ದ್ ಕಂಡಿತಾದ್ ಅಪ್ಪಣೆ ಕೊರಿಯೆ.</verse>
				<verse number="22">“ನರಮಾನಿ ಮಗೆ ಮಸ್ತ್ ಕಷ್ಟ ಅನುಭವ ಮಲ್ತ್‌ದ್ ಹಿರಿಯೆರೆಡ್ದ್‌ಲಾ ಪ್ರಧಾನಯಾಜಕೆರೆಡ್ದ್‌ಲಾ ಶಾಸ್ತ್ರಿಲೆಡ್ದ್‌ಲಾ ತಿರಸ್ಕಾರ ಆದ್ ಕೆರ್ದ್, ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರೊಡಾಪುಂಡು,” ಅಂದ್‌ದ್ ಪಂಡೆ.</verse>
				<verse number="23">ಐಡ್ದ್ ಬೊಕ್ಕ ಆಯೆ ಮಾತೆರೆಗ್ಲಾ ಪಂಡಿನಿ ದಾನೆಂದ್ಂಡ, “ಏರೆಗಾಂಡಲಾ ಎನ ಬೆರಿಯೆ ಬರಿಯೆರೆ ಮನಸಿತ್ತ್‌ಂಡ ಆಯೆ ತನನ್ ತಾನ್ ತಿರಸ್ಕಾರ ಮಲ್ತ್‌ದ್ ದಿನಾಲ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರಡ್.</verse>
				<verse number="24">ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.</verse>
				<verse number="25">ಒರಿ ನರಮಾನಿ ಲೋಕೊನು ಸಂಪಾದನೆ ಮಲ್ತೊಂಡೆಡಲಾ ತನ ಪ್ರಾಣೊನು ಕಳೆವೊಂದು ಇಜ್ಜಿಡ ಹಾಳ್ ಮಲ್ತೊಂದು ಉಲ್ಲೆಡ ಆಯಗ್ ದಾದ ಪ್ರಯೋಜನ ಉಂಡು?</verse>
				<verse number="26">ಏರಾಂಡಲಾ ಎನನ್ ಬೊಕ್ಕ ಎನ ಪಾತೆರೊಗು ನಾಚಿಗೆ ಮಲ್ತೊನುವೆನಾ, ಆಯಗ್ ನರಮಾನಿ ಮಗೆ ತನ್ನಲಾ ತನ ಅಮ್ಮೆರೆಗ್ಲಾ ಪರಿಶುದ್ಧ ದೂತೆರೆಗ್ಲಾ ಉಪ್ಪುನ ಮೈಮೆಡೊಪ್ಪ ಬನ್ನಗ ನಾಚಿಗೆ ಮಲ್ಪೆ.</verse>
				<verse number="27">ನಿಕ್ಲೆಗ್ ನಿಜಾದ್ ಪನ್ಪೆ ಮುಲ್ಪ ಉಂತುದಿನಾಕುಲೆಡ್ದ್ ಕೆಲೆವೆರ್ ದೇವೆರೆ ರಾಜ್ಯೊನು ತೂವ ಮುಟ್ಟ, ಸೈಪುಜರ್,” ಅಂದ್‌ದ್ ಪಂಡೆ.</verse>
				<verse number="28">ಯೇಸು ಈ ಪಾತೆರೊಲೆನ್ ಪಂಡ್ದ್ ಸುಮಾರ್ ಎಣ್ಮ ದಿನೊಡ್ದು ಬೊಕ್ಕ ಪೇತ್ರನ್, ಯೋಹಾನನ್, ಯಾಕೋಬುನು ಮೊಕ್ಲೆನ್ ಲೆತ್ತೊಂದು ಪ್ರಾರ್ಥನೆ ಮಲ್ಪೆರೆ ಎತ್ತರದ ಗುಡ್ಡೆಗ್ ಪೋಯೆ.</verse>
				<verse number="29">ಆಯೆ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಮೋನೆದ ರೂಪ ಬೇತೆ ಆಂಡ್. ಆಯನ ಕುಂಟು ಬೊಲ್ದು ಆದ್ ಮಿಂಚೊಂದು ಬತ್ತ್ಂಡ್.</verse>
				<verse number="30">ಉಂದತ್ತಂದೆ ಇರ್ವೆರ್ ಆಯಡೊಪ್ಪ ಪಾತೆರೊಂದಿತ್ತೆರ್. ಮೊಕುಲು ಏರ್ ಪಂಡ್ಂಡ ಮೋಶೆಲಾ ಎಲೀಯೆಲಾ.</verse>
				<verse number="31">ಮೊಕುಲು ಪರಲೋಕದ ಮೈಮೆಡ್ ತೋಜಿದ್ ಯೆರೂಸಲೇಮುಡು ಆಯಡ ಮರಣದ ಸಂಗತಿಲೆನ್ ಪಾತೆರೊಂದಿತ್ತೆರ್.</verse>
				<verse number="32">ಈತ್‌ನೆಟ್ಟ ಪೇತ್ರೆಲಾ ಆಯಡೊಪ್ಪ ಇತ್ತಿನಾಕುಲುಲಾ ನಿದ್ರೆದ ಅಮಲ್‌ಡಿತ್ತೆರ್. ಆಂಡ ಎಚ್ಚರಿಕೆ ಆಯಿ ಬೊಕ್ಕ ಮೊಕುಲು ಯೇಸುನ ಮೈಮೆನ್ಲಾ ಆಯಡೊಪ್ಪ ಉಂತುದಿತ್ತಿ ಆ ಇರ್ವೆರ್ ನರಮಾನಿಲೆನ್ಲಾ ತೂಯೆರ್.</verse>
				<verse number="33">ಮೊಕುಲು ಯೇಸುನು ಬುಡ್ದು ಪೋವೊಂದುಪ್ಪುನಗ ಪೇತ್ರೆ ಯೇಸುಗು, “ಗುರೂ ನಮ ಮೂಲೇ ಉಪ್ಪುನವು ಎಡ್ಡೆ, ಮೂಜಿ ಗುಡಾರ ಕಟ್ಟ್‌ಗ, ನಿಕ್ಕೊಂಜಿ, ಮೋಶೆಗೊಂಜಿ, ಎಲೀಯಗೊಂಜಿ,” ಅಂದ್‌ದ್ ಪಂಡೆ. ಆಂಡ ತಾನ್ ಪಂಡಿನವು ದಾನೆ ಅಂದ್‌ದ್ ತನ್ಕೇ ಗೊತ್ತಾಯಿಜಿ.</verse>
				<verse number="34">ಆಯೆ ಉಂದೆನ್ ಪನೊಂದುಪ್ಪುನಗ ಅಕ್ಲೆನ ಮಿತ್ತ್ ಮುಗಲ್ ನಿರೆಲಾಂಡ್. ಅಕುಲು ಮುಗಲ್‌ದುಲಯಿ ಸೇರ್‌ನಗ ಪೋಡಿಯೆರ್.</verse>
				<verse number="35">ಆ ಮುಗಲ್‌ದ ಉಲಯಿಡ್ದ್, “ಇಂಬೆ ಎನ ಪ್ರೀತಿದ ಮಗೆ, ಯಾನ್ ಅಜತ್‌ದ್ ದೆತ್ತೊಂಡಿನಾಯೆ. ಇಂಬ್ಯನ ಪಾತೆರೊನು ಕೇನ್ಲೆ,” ಅಂದ್‌ದ್ ಒಂಜಿ ಸ್ವರ ಆಂಡ್.</verse>
				<verse number="36">ಆ ಸ್ವರ ಕೇಂಡಿ ಬೊಕ್ಕ ಯೇಸುನು ಮಾತ್ರ ತೂಯೆರ್. ತನ್ಕುಲು ತೂಯಿನ ಈ ಸಂಗತಿನ್ ಆ ಸಮಯೊಡು ಏರೆಗ್ಲಾ ತೆರಿಪಾವಂದೆ ಮನಿಪಂದೆ ಇತ್ತೆರ್.</verse>
				<verse number="37">ಮನದಾನಿ ಅಕುಲು ಗುಡ್ಡೆಡ್ದ್ ಜತ್ತ್‌ದ್ ಬನ್ನಗ ಜನೊಕುಲೆ ಗುಂಪು ಯೇಸುನು ಎದುಕೊನಿಯೆರ್.</verse>
				<verse number="38">ಗುಂಪುಡ್ದು ಒರಿ, “ಬೋಧಕಾ, ಎನ ಮಗನ ಮಿತ್ತ್ ದೃಷ್ಟಿ ದೀವೊಡು ಅಂದ್‌ದ್ ನಿನಡ ನಟ್ಟೊನ್ವೆ. ಎಂಕ್ ಉಂಬೆ ಒರಿಯೇ ಮಗೆ.</verse>
				<verse number="39">ಉಂಬ್ಯನ್ ದೆವ್ವ ಪತ್ತುಂಡು, ಪತ್ತಿನಪಗ ಬೊಬ್ಬೆ ಪಾಡ್ವೆ, ಬಾಯಿಡ್ದ್ ನುರೆ ಬನ್ನೆಟ್ಟ ಉಂಬ್ಯನ್ ಪುರೆಲ್ಪಾವುಂಡು; ಬೊಕ್ಕ ಬಾರಿ ಭಂಗ ಕೊರ್ದು ಪೊಡಿ ಪೊಡಿ ಮಲ್ಪಂದೆ ಬುಡ್ದು ಪೋಪುಜಿ.</verse>
				<verse number="40">ಅವೆನ್ ಬುಡ್ಪಾಯೆರೆ ನಿನ ಶಿಷ್ಯೆರೆಡ ನಟ್ಟೊಂಡೆ. ಆಂಡ ಅಕ್ಲೆಡ್ದ್ ಆವಂದೆ ಪೋಂಡು,” ಪಂಡೆ.</verse>
				<verse number="41">ಐಕ್ ಯೇಸು, “ಓ! ನಂಬಿಕೆದಾಂತಿ ಮೂರ್ಖ ಸಂತಾನೊಲೇ, ನನ ಏತ್ ದಿನ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್ ನಿಕ್ಲೆನ್ ಸಹಿಸೊನೊಡು? ನಿನ ಮಗನ್ ಇಡೆ ಲೆತ್ತೊಂದು ಬಲ,” ಅಂದ್‌ದ್ ಪಂಡೆ.</verse>
				<verse number="42">ಆ ಆಣ್ ಬರೊಂದುಪ್ಪುನಗ ಆ ದೆವ್ವ ಆಯನ್ ನೆಲಕ್ ಬೂರ್ಪಾದ್ ಒದ್ದಾಟ ಮಲ್ಪಾಂಡ್. ಆಂಡ ಯೇಸು ಆ ದೆವ್ವೊಗು ದಟ್ಟಿದ್ ಆ ಆಣನ್ ಗುಣ ಮಲ್ತ್‌ದ್ ಆಯನ ಅಮ್ಮೆ ಕೈಟ್ ಕೊರಿಯೆ.</verse>
				<verse number="43">ಅವೆನ್ ತೂದು ಮಾತೆರ್ ದೇವೆರೆ ಮಲ್ಲಾದಿಗೆದ ಶಕ್ತಿನ್ ಪುಗರಿಯೆರ್. ಯೇಸು ಮಲ್ತಿನ ಮಾತ ಕಾರ್ನಿಕೊಲೆಗ್ ಮಾತೆರ್ ತೂದು ಅಚ್ಚಿರ ಆವೊಂದುಪ್ಪುನಗ ಆಯೆ ತನ ಶಿಷ್ಯೆರೆಗ್, “ಈ ಪಾತೆರೊಲೆನ್ ನಿಕ್ಲೆ ಉಡಲ್‌ಡ್ ದೀವೊನ್ಲೆ ಅಂದ್‌ದ್ ಪಂಡೆ. ದಾಯೆ ಪಂಡ ನರಮಾನಿ ಮಗನ್ ಜನೊಕುಲೆ ಕೈಕ್ ಒಚ್ಚಿದ್ ಕೊರ್ಪೆರ್,” ಅಂದ್‌ದ್ ಪಂಡೆ.</verse>
				<verse number="44"></verse>
				<verse number="45">ಅಕುಲು ಈ ಪಾತೆರೊನು ತೆರಿಜೆರ್. ಅವು ಅಕ್ಲೆಗ್ ಮದೆಯಾಯಿನೆಡ್ದ್ ಐತ ಅರ್ಥೊನು ತೆರಿಯಂದೆ ಪೋಯೆರ್. ಆ ಪಾತೆರದ ಬಗೆಟ್ ಅಕುಲು ಆಯಡ ಕೇನಿಯೆರೆ ಪೋಡಿಯೆರ್.</verse>
				<verse number="46">ಯೇಸುನ ಶಿಷ್ಯೆರೆಡ್ ಏರ್ ಮಲ್ಲಾಯೆ ಪನ್ಪಿ ಒಂಜಿ ತರ್ಕ ಪುಟ್ಟುಂಡು.</verse>
				<verse number="47">ಯೇಸು ಅಕ್ಲೆನ ಉಡಲ್‌ದ ಗೇನೊನು ತೆರಿದ್ ಒಂಜಿ ಎಲ್ಯ ಬಾಲೆನ್ ಪತ್ತೊಂದು ಆಯನ ಕೈತಲ್‌ ಉಂತಾದ್,</verse>
				<verse number="48">ಅಕ್ಲೆಗ್, “ಏರಾಂಡಲಾ ಎನ ಪುದರ್‌ಡ್ ಈ ಬಾಲೆನ್ ಸೇರಾವೊಂಡೆಡ, ಎನನ್ ಸೇರಾವೊಂಡಿಲೆಕ್ಕ ಆಂಡ್. ಬೊಕ್ಕ ಏರಾಂಡಲಾ ಎನನ್ ಸೇರಾವೊಂಡೆಡ ಎನನ್ ಅತ್ತ್, ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ. ದಾಯೆ ಪಂಡ ನಿಕ್ಲೆಡ್ ಮಾತೆರೆಡ್ ಏರ್ ಎಲ್ಯ ಆಪೆನಾ ಆಯೆನೇ ಮಲ್ಲಾಯೆ,” ಅಂದ್‌ದ್ ಪಂಡೆ.</verse>
				<verse number="49">ಐಕ್ ಯೋಹಾನೆ, “ಗುರೂ, ಏರಾ ಒರಿ ನಿನ ಪುದರ್‌ನ್ ಪಂಡ್ದ್ ದೆವ್ವ ಬುಡ್ಪಾವುನೆನ್ ಎಂಕುಲು ತೂದು ಆಯೆ ಎಂಕ್ಲೆನಾಯೆ ಅತ್ತಂದಿನೆಡ್ದ್ ಆಯಗ್ ಅಡ್ಡಿ ಮಲ್ತ,” ಪಂಡೆ.</verse>
				<verse number="50">“ಆಯಗ್ ಅಡ್ಡಿ ಮಲ್ಪಡೆ,” ಯೇಸು ಆಯಗ್ ಬೊಕ್ಕ ಬೇತೆ ಶಿಷ್ಯೆರೆಗ್, “ಏರ್ ನಿಕ್ಲೆನ್ ವಿರೋಧ ಮಲ್ಪುಜೆರಾ, ಅಕುಲು ನಿಕ್ಲೆ ಕಡೆತ್ತಾಕುಲೇ ಆದುಲ್ಲೆರ್,” ಅಂದ್‌ದ್ ಪಂಡೆ.</verse>
				<verse number="51">ಯೇಸು ತಾನ್ ಪರಲೋಕೊಗು ಪೋಪಿನ ದಿನ ಕೈತಲ್‌ ಬನ್ನಗ ಯೆರೂಸಲೇಮುಗು ಪೋವೆರೆ ಮನಸ್ ದೃಢ ಮಲ್ತೊಂದು</verse>
				<verse number="52">ತನ ದೂತೆರೆನ್ ದುಂಬು ಕಡಪುಡಿಯೆ. ಮೊಕುಲು ಪಿದಾಡ್ದ್ ಆಯಗ್ ಬೋಡಾಯಿನೆನ್ ತಯಾರ್ ಮಲ್ಪೆರೆಗಾದ್ ಸಮಾರ್ಯದಾಕುಲೆನ ಒಂಜಿ ಹಳ್ಳಿಗ್ ಬತ್ತೆರ್.</verse>
				<verse number="53">ಆಂಡ ಆಯೆ ಯೆರೂಸಲೇಮುಗು ಪೋಪಿನಾಯೆ ಆದಿತ್ತಿನೆಡ್ದ್ ಆ ಸಮಾರ್ಯಾದಾಕುಲು ಆಯನ್ ಸೇರಾವೊಂಡಿಜೆರ್.</verse>
				<verse number="54">ಆಯನ ಶಿಷ್ಯೆರಾಯಿ ಯಾಕೋಬು, ಯೋಹಾನೆ ಉಂದೆನ್ ತೂದು, “ಸ್ವಾಮಿ, ಎಲೀಯೆ ಮಲ್ತಿ ಲೆಕ್ಕನೆ ಎಂಕುಲುಲಾ ಬಾನೊಡ್ದು ತೂ ಬೂರ್ದು ಮೊಕ್ಲೆನ್ ನಾಶ ಮಲ್ಪಡ್ ಅಂದ್‌ದ್ ಪನೊಡಾ,” ಅಂದ್‌ದ್ ಕೇನ್ನಗ</verse>
				<verse number="55">ಯೇಸು ಪಿಜಿರ್‌ದ್ ಅಕ್ಲೆನ್ ದಟ್ಟಿಯೆ. ನಿಕುಲು ಎಂಚಿತ್ತಿ ಆತ್ಮದಾಕುಲು ಅಂದ್‌ದ್ ತೆರಿದಿಜರಾ, ನರಮಾನಿ ಮಗೆ ನರಮಾನಿಲೆ ಪ್ರಾಣೊಲೆನ್ ನಾಶನ ಮಲ್ಪೆರೆ ಅತ್ತ್ ರಕ್ಷಣೆ ಮಲ್ಪೆರೆ ಬತ್ತೆ, ಅಂದ್‌ದ್ ಪಂಡೆ.</verse>
				<verse number="56">ಬೊಕ್ಕ ಅಕುಲು ಮಾತೆರ್ಲಾ ಬೇತೆ ಹಳ್ಳಿಗ್ ಪೋಯೆರ್.</verse>
				<verse number="57">ಅಕುಲು ಸಾದಿಡ್ ಪೋವೊಂದುಪ್ಪುನಗ ಏರಾ ಒರಿ ಯೇಸುಡ, “ಈ ಒಡೆಗ್ ಪೋಂಡಲಾ ಯಾನ್ ನಿನ ಬೆರಿಯೆ ಬರ್ಪೆ,” ಅಂದ್‌ದ್ ಪನ್ನಗ</verse>
				<verse number="58">ಯೇಸು ಆಯಗ್, “ಕುದ್‌ಕೆರ್‌ಲೆಗ್ ಮಾಟೆಲು ಉಂಡು; ಬಾನೊಡು ರಾಪಿನ ಪಕ್ಕಿಲೆಗ್ ಗೂಡುಲು ಉಂಡು; ಆಂಡ ನರಮಾನಿ ಮಗಕ್ಕ್ ತರೆ ದೀಪಿನಾತ್ ಜಾಗ್‌ಲಾ ಇಜ್ಜಿ ಅಂದ್‌ದ್ ಪಂಡೆ.”</verse>
				<verse number="59">ಆಯೆ ಬೊಕ್ಕೊರಿಯಡ, “ಎನ ಬೆರಿಯೆ ಬಲ.” ಅಂದ್‌ದ್ ಪನ್ನಗ ಆಯೆ, “ಕರ್ತವಾ, ಯಾನ್ ದುಂಬತ್ತ ಪೋದು ಎನ ಅಮ್ಮೆರೆನ್ ಕೌಂತ್‌ದ್ ಬರಿಯೆರೆ ಎಂಕ್ ಅಪ್ಪಣೆ ಆವೊಡು,” ಅಂದ್‌ದ್ ಪಂಡೆ.</verse>
				<verse number="60">ಆಂಡ ಯೇಸು ಆಯಗ್, “ಸೈತಿನಾಕುಲು ತನ್ಕುಲೆಡ್ ಸೈತ್ ಪೋತಿನಾಕುಲೆನ್ ಕೌಂಪಡ್. ಈ ಪೋದು ದೇವೆರೆ ರಾಜ್ಯೊನು ಸಾರಿಲ,” ಅಂದ್‌ದ್ ಪಂಡೆ.</verse>
				<verse number="61">ನನೊರಿಲಾ ಕರ್ತವ, “ನಿನ ಬೆರಿಯೆ ಬರ್ಪೆ, ಆಂಡ ಅವೆಡ್ದುಂಬು ಎನ ಇಲ್ಲದಾಕುಲೆಗ್ ಪಂಡ್ದ್ ಬರಿಯೆರೆ ಅಪ್ಪಣೆ ಕೊರ್ಲ,” ಪಂಡೆ.</verse>
				<verse number="62">ಯೇಸು ಆಯಗ್, “ಏರಾಂಡಲಾ ನಾಯೆರ್‌ದ ಮಿತ್ತ್ ತನ ಕೈನ್ ದೀದ್ ಪಿರ ತೂಂಡ, ಆಯೆ ದೇವೆರೆ ರಾಜ್ಯೊಗು ತಕ್ಕದಾಯೆ ಅತ್ತ್,” ಪಂಡೆ.</verse>
			</chapter>
			<chapter number="10">
				<verse number="1">ಉಂದು ಆಯಿ ಬೊಕ್ಕ ಕರ್ತವೆ ನನಲಾ ಎಲ್ಪತ್ತರಡ್ಡ್ ಜನೊಕುಲೆನ್ ನೇಮಕ ಮಲ್ತ್‌ದ್ ಅಕ್ಲೆನ್ ಇರ್ವೆರ್ ಇರ್ವೆರಾದ್ ತಾನ್ ಪೋವೊಡಿತ್ತಿ ಪ್ರತಿಯೊಂಜಿ ಊರುದ ಜಾಗ್‌ಗ್ ದುಂಬತ್ತ ಕಡಪುಡಿಯೆ.</verse>
				<verse number="2">ಕಡಪುಡ್ನಗ ಅಕ್ಲೆಗ್ ಪಂಡಿನಿ ದಾನೆ ಪಂಡ, “ಬುಲೆ ಮಸ್ತ್ ಉಂಡು, ಆಂಡ ಬೇಲೆದಾಕುಲು ಕಮ್ಮಿ. ಅವೆಡ್ದಾವರ ಬುಲೆತ ಯಜಮಾನಡ, ಆಯೆ ತನ ಬುಲೆಕ್ ಬೇಲೆದಾಕುಲೆನ್ ಕಡಪುಡೊಡು ಅಂದ್‌ದ್ ನಟ್ಟೊನ್ಲೆ.”</verse>
				<verse number="3">ಪೋಲೆ, ಚೆನ್ನನಾಯಿಲೆ ನಡುಟು ಕುರಿತ ಕಿನ್ನಿಲೆನ್ ಪೊಗ್ಗಾಯಿಲೆಕ್ಕ ಯಾನ್ ನಿಕ್ಲೆನ್ ಕಡಪುಡ್ದು ಕೊರ್ಪೆ.</verse>
				<verse number="4">ಕಾಸ್ ಆವಡ್, ಜೋಳಿಗೆ ಆವಡ್, ಕಾರ್‌ಗ್ ಜೋಡು ಆವಡ್ ದೆತ್ತೊಂದು ಪೋವಡೆ. ಸಾದಿಡ್ ಏರೆಗ್ಲಾ ವಂದನೆ ಸಂದಾವಡೆ.</verse>
				<verse number="5">ಉಂದತ್ತಂದೆ ನಿಕುಲು ವಾ ಇಲ್ಲದುಲಯಿ ಪೋಂಡಲಾ ಆ ಇಲ್ಲಗ್, “ಸಮಾಧಾನ ಆವಡ್,” ಪಂಡ್ದ್ ದುಂಬತ್ತ ಪನ್ಲೆ.</verse>
				<verse number="6">ಸಮಾಧಾನದ ಮಗೆ ಅವುಲು ಇತ್ತ್ಂಡ ನಿಕ್ಲೆನ ಸಮಾಧಾನ ಆಯನ ಮಿತ್ತ್ ಉಪ್ಪುಂಡು. ಇಜ್ಜಾಂಡ ಅವು ನಿಕ್ಲೆಗೇ ಪಿರ ಬರ್ಪುಂಡು.</verse>
				<verse number="7">ಆ ಇಲ್ಲಡೇ ಇತ್ತೊಂದು ಅಕುಲು ಕೊರ್ಪಿನೆನ್ ಉನ್ಲೆ, ಪರ್ಲೆ. ಬೇಲೆದಾಯೆ ತನ ಸಂಬಳೊಗು ತಕ್ಕದಾಯೆ ಅತ್ತಾ? ಒಂಜಿ ಇಲ್ಲನ್ ಬುಡ್ದು ಬೊಕ್ಕೊಂಜಿ ಇಲ್ಲಗ್ ಪೋದು ಕುಲ್ಲಡೆ.</verse>
				<verse number="8">ಬೊಕ್ಕ ನಿಕುಲು ವಾ ಊರುಗಾಂಡಲಾ ಪೋಯಿ ಬೊಕ್ಕ ಆ ಜನೊಕುಲು ನಿಕ್ಲೆನ್ ಸೇರಾವೊಂಡೆರ್ಡ ಅಕುಲು ಬಲಸಿನೆನೆ ಉನ್ಲೆ.</verse>
				<verse number="9">ಅಲ್ಪ ಉಪ್ಪು ಸೀಕ್‌ದಾಕುಲೆನ್ ಗುಣ ಮಲ್ಪುಲೆ; ಅವುಲು ಇತ್ತಿನ ಜನೊಕುಲೆಗ್, “ದೇವೆರೆ ರಾಜ್ಯ ಕೈತಲ್ ಬೈದ್‌ಂಡ್,” ಅಂದ್‌ದ್ ತೆರಿಪಾಲೆ.</verse>
				<verse number="10">ಆಂಡ ನಿಕುಲು ವಾ ಊರುಗಾಂಡಲಾ ಪೋಯಿ ಬೊಕ್ಕ ಆ ಜನೊಕುಲು ನಿಕ್ಲೆನ್ ಸೇರಾವಂದೆ ಇತ್ತೆರ್ಡ ನಿಕುಲು ಆ ಊರುದ ಸಾದಿಗ್ ಬತ್ತ್‌ದ್,</verse>
				<verse number="11">“ನಿಕ್ಲೆನ ಊರುಡ್ದು ಎಂಕುಲೆ ಕಾರ್‌ಗ್ ಪತ್ತಿದಿ ಧೂಳುನು ಕುಡ್ತ್‌ದ್ ಬುಡ್ಪ; ಅವು ನಿಕ್ಲೆಗೇ ಉಪ್ಪಡ್. ಆಂಡ ದೇವೆರೆ ರಾಜ್ಯ ಕೈತಲ್ ಬೈದ್‌ಂಡ್ ಪನ್ಪಿನವು ನಿಕ್ಲೆಗ್ ತೆರಿದುಪ್ಪಡ್,” ಪಂಡ್ದ್ ಪನ್ಲೆ.</verse>
				<verse number="12">ಆ ದಿನೊಟು ಆ ಊರುದ ಗತಿ ಸೋದೋಮು ಸೀಮೆದ ಗತಿಡ್ದ್‌ಲಾ ಕಠಿಣ ಆದುಪ್ಪುಂಡು ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="13">“ಅಯ್ಯೋ ಕೊರಜಿನೋ ಅಯ್ಯೋ ಬೆತ್ಸಾಯಿದಾ, ನಿಕ್ಲೆನಲ್ಪ ನಡತಿ ಮಲ್ಲಕಾರ್ನಿಕೊಲು ತೂರ್ ಬೊಕ್ಕ ಸೀದೋನ್ ಪಟ್ಟಣಲೆಡ್ ನಡತುದುಂಡ ಅಲ್ಪದಾಕುಲು ಅಪಗನೆ ಗೋಣಿತಟ್ಟು ಪೊದೆತೊಂದು ಬೊನ್ಯೊಡು ಕುಲ್ಲೊಂದು ಪಶ್ಚಾತಾಪ ಪಡೆದಿತ್ತ್‌ದ್ವೆರ್.</verse>
				<verse number="14">ಆಂಡ ನ್ಯಾಯತೀರ್ಪುದ ದಿನೊಟು ನಿಕ್ಲೆನ ಗತಿಡ್ದ್‌ಲಾ ತೂರ್ ಸೀದೋನುದ ಗತಿ ಮೇಲಾದುಪ್ಪುಂಡು.</verse>
				<verse number="15">ಕಪೆರ್ನೌಮೋ, ನಿನನ್ ಪರಲೋಕೊಗು ಏರಾವೊನುವನಾ? ಪಾತಾಳೊಗು ಜಪ್ಪುವ.</verse>
				<verse number="16">ನಿಕ್ಲೆನ ಪಾತೆರ ಕೇನುನಾಯೆ ಎನನ್ ಕೇನುನಾಯೆ ಆದುಲ್ಲೆ, ನಿಕ್ಲೆನ್ ತಾತ್ಸಾರ ಮಲ್ಪುನಾಯೆ ಎನನ್ ತಾತ್ಸಾರ ಮಲ್ಪುನಾಯೆ ಆದುಲ್ಲೆ. ಎನನ್ ತಾತ್ಸಾರ ಮಲ್ಪುನಾಯೆ ಎನನ್ ಕಡಪುಡ್ದು ಕೊರಿನಾಯನೇ ತಾತ್ಸಾರ ಮಲ್ಪುನಾಯೆ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="17">ಐಡ್ದ್ ಬೊಕ್ಕ ಆ ಎಲ್ಪತ್ತರಡ್ಡ್ ಜನ ಸಂತೋಷೊಡು ಪಿರ ಬತ್ತ್‌ದ್, “ಕರ್ತವಾ, ದೆವ್ವೊಲು ನಿನ ಪುದರ್‌ನ್ ಕೇಂಡ್ದ್ ಎಂಕ್ಲೆಗ್ ಅಡಿಯಾಳ್ ಆಪ,” ಪಂಡೆರ್.</verse>
				<verse number="18">ಯೇಸು ಅಕ್ಲೆಗ್, “ಸೈತಾನೆ ತೆಡಿಲ್‌ದಲೆಕ್ಕ ಬಾನೊಡ್ದು ಬೂರುನೆನ್ ತೂಯೆ.</verse>
				<verse number="19">ಇಂದಾ, ಸರ್ಪೊಲೆನ್, ಚೇಲ್‌ಲೆನ್, ಪಗೆನಾಯನ ಮಾತ ಬಲೊನು ದೊಂಕ್ಯೆರೆ ನಿಕ್ಲೆಗ್ ಅಧಿಕಾರ ಕೊರ್ತೆ. ಒವುಲಾ ನಿಕ್ಲೆಗ್ ಕೇಡ್ ಮಲ್ಪಂದ್.</verse>
				<verse number="20">ಆಂಡ ದೆವ್ವೊಲುಲಾ ಎಂಕ್ಲೆಗ್ ಅಡಿಯಾಳಾದುಂಡು ಅಂದ್‌ದ್ ಸಂತೋಷ ಮಲ್ಪಂದೆ, ಎಂಕ್ಲೆನ ಪುದರ್ ಪರಲೋಕೊಡು ಬರೆದುಂಡು ಅಂದ್‌ದ್ ಸಂತೋಷ ಪಡೆಲೆ,” ಅಂದ್‌ದ್ ಪಂಡೆ.</verse>
				<verse number="21">ಅವ್ವೆ ಗಳಿಗೆಡ್ ಯೇಸು ಪರಿಶುದ್ಧಾತ್ಮನ ಬಲೊಡ್ದು ಸಂತೋಷೊಡು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಪರಲೋಕ, ಭೂಲೋಕದ ಕರ್ತವಾ, ಈ ಗೇನದಾಕುಲೆಗ್ಲಾ ಬುದ್ಧಿವಂತೆರೆಗ್ಲಾ ಈ ಪಾತೆರೊಲೆನ್ ಮದೆ ಮಲ್ತ್‌ದ್ ಜೋಕುಲೆಗ್ ತೆರಿಪಾಯ ಅಂದ್‌ದ್ ನಿನನ್ ಪುಗರುವೆ. ಅಂದ್ ಅಮ್ಮೆರೇ, ಇಂಚ ಮಲ್ಪುನವೇ ಎಡ್ಡೆಂದ್‌ದ್ ನಿನ ದೃಷ್ಟಿಗ್ ತೋಜಿನೆಡ್ದ್ ನಿನನ್ ಪುಗರುವೆ.</verse>
				<verse number="22">ಎನ ಅಮ್ಮೆ ಮಾತೆನ್ ಎಂಕ್ ಒಚ್ಚಿದ್ ಕೊರ್ತೆ; ಮಗೆ ಇಂಚಿತ್ತಿನಾಯೆ ಅಂದ್‌ದ್ ಅಮ್ಮೆ ಅತ್ತಂದೆ ಬೇತೆ ಏರ್ಲಾ ತೆರಿದಿಜೆರ್; ಬೊಕ್ಕ ಅಮ್ಮೆ ಇಂಚಿತ್ತಿನಾಯೆ ಅಂದ್‌ದ್ ಮಗೆನೇ ಅತ್ತಂದೆ ಬೇತೆ ಏರ್ಲಾ ತೆರಿದಿಜೆರ್. ಬೊಕ್ಕ ಮಗೆ ಅಮ್ಮೆರೆನ್ ಏರೆಗ್ ತೋಜಾದ್ ಕೊರಿಯೆರೆ ಮನಸ್ ಮಲ್ತ್‌ದೆನಾ ಆಯೆಲಾ ಅಮ್ಮೆರೆನ್ ತೆರಿದಿನಾಯೆ ಆದುಲ್ಲೆ.” ಅಂದ್‌ದ್ ಪಂಡೆ.</verse>
				<verse number="23">ಆಯೆ ಬೊಕ್ಕ ಶಿಷ್ಯೆರೆ ಕಡೆಕ್ಕ್ ಪಿಜಿರ್‌ದ್ ಅಕ್ಲೆಗ್ ಬುಡ್ಪಾದ್ ಪಂಡಿನಿ ದಾನೆ ಪಂಡ, “ನಿಕುಲು ತೂವೊಂದುಪ್ಪುನ ಸಂಗತಿನ್ ತೂಪಿನಾಕುಲು ಭಾಗ್ಯವಂತೆರ್.</verse>
				<verse number="24">ಮಸ್ತ್ ಜನ ಪ್ರವಾದಿಲುಲಾ ಅರಸೆರ್‌ಲಾ ನಿಕುಲು ತೂವೊಂದುಪ್ಪುನ ಸಂಗತಿನ್ ತೂವೊಡಂದ್ ಆಸೆ ಮಲ್ತ್ಂಡಲಾ ತೂಯಿಜೆರ್; ನಿಕುಲು ಕೇನೊಂದುಪ್ಪುನ ಸಂಗತಿನ್ ಅಕುಲು ಕೇನೊಡಂದ್ ಆಸೆ ಮಲ್ತೆರ್ಡಲಾ ಕೇನಿಯೆರೆ ತಿಕ್ಕ್‌ದಿಜಿ,” ಪಂಡ್ದ್ ನಿಕ್ಲೆಗ್ ಪನ್ಪೆ.</verse>
				<verse number="25">ಅಪಗ ಒರಿ ನ್ಯಾಯಶಾಸ್ತ್ರಿ ಲಕ್ಕ್‌ದ್ ಆಯನ್ ಪರೀಕ್ಷೆ ಮಲ್ಪೆರೆ, “ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೆರೆ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.</verse>
				<verse number="26">ಐಕ್ ಯೇಸು ಆಯಗ್, “ನ್ಯಾಯಕಟ್ಟ್‌ಡ್ ಎಂಚಿನ ಬರೆತ್ಂಡ್? ಅವೆನ್ ಎಂಚ ಓದುದಾ,” ಅಂದ್‌ದ್ ಕೇಂಡೆ.</verse>
				<verse number="27">ಐಕ್ ಆಯೆ, “‘ನಿನ ದೇವೆರಾದುಪ್ಪು ಕರ್ತವನ್ ನಿನ ಇಡೀ ಉಡಲ್‌ಡ್ದ್‌ಲಾ ನಿನ ಇಡೀ ಪ್ರಾಣೊಡ್ದುಲಾ ನಿನ ಇಡೀ ಶಕ್ತಿಡ್ದ್‌ಲಾ ನಿನ ಇಡೀ ಬುದ್ಧಿಡ್ದ್‌ಲಾ ಪ್ರೀತಿ ಮಲ್ಪೊಡು,’ ಬೊಕ್ಕ, ‘ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು,’ ಅಂದ್‌ದ್ ಬರೆತ್ಂಡ್,” ಪಂಡೆ.</verse>
				<verse number="28">ಯೇಸು ಆಯಗ್, “ಈ ಸರಿಯಾದ್ ಉತ್ತರ ಕೊರ್ಯ; ಉಂದೆನ್ ಮಲ್ಪುಲ ಅಪಗ ಬದುಕುವ,” ಪಂಡೆ.</verse>
				<verse number="29">ಆಂಡ ಆಯೆ ತನನ್ ನೀತಿವಂತೆ ಅಂದ್‌ದ್ ತೋಜಾವೊನಿಯೆರೆ ಬಯಕ್‌ದ್, “ಎನ ನಿರೆತ್ತಾಯೆ ಏರ್?” ಅಂದ್‌ದ್ ಯೇಸುಡ ಕೇಂಡೆ.</verse>
				<verse number="30">ಐಕ್ ಯೇಸು ಆಯಗ್ ಪಂಡಿನಿ ದಾನೆ ಪಂಡ, “ಒಂಜಾನೊಂಜಿ ದಿನ ಒರಿ ನರಮಾನಿ ಯೆರೂಸಲೇಮುಡ್ದು ಘಟ್ಟ ಜತ್ತ್‌ದ್ ಯೆರಿಕೊಗು ಪೋವೊಂದುಪ್ಪುನಗ ಕಲ್ವೆರೆ ಕೈಕ್ ತಿಕ್ಕಿಯೆ. ಅಕುಲು ಆಯನ್ ಲೂಟುದು ಗಾಯ ಆಪಿನಾತ್ ಹಾಕ್‌ದ್ ಅರೆಜೀವ ಮಲ್ತ್‌ದ್ ಮೆಯಿತ ಅಂಗಿನ್ಲಾ ದೆತ್ತ್‌ದ್ ಆಯನ್ ಬುಡ್ದು ಪೋಯೆರ್.</verse>
				<verse number="31">ಅಪಗ ಒರಿ ಯಾಜಕೆ ಆ ಸಾದಿಡ್ ಜತ್ತ್‌ದ್ ಬರೊಂದು ಆಯನ್ ತೂದು ಓರೆ ಆದ್ ಪೋಯೆ.</verse>
				<verse number="32">ಅವ್ವೇ ರೀತಿಡ್ ಒರಿ ಲೇವಿಲಾ ಆ ಜಾಗ್‌ಗ್ ಬತ್ತ್‌ದ್ ಆಯನ್ ತೂದು ಓರೆ ಆದ್ ಪೋಯೆ.</verse>
				<verse number="33">ಆಂಡ ಒರಿ ಸಮಾರ್ಯದಾಯೆ ಸಾದಿಡ್ ಪೋನಗ ಆಯನ್ ತೂದು ಕನಿಕರಿತ್‌ದ್‌</verse>
				<verse number="34">ಆಯನ ಕೈತಲ್‌ ಪೋದು ಆಯನ ಗಾಯೊಲೆಗ್ ಎಣ್ಣೆಲಾ ದ್ರಾಕ್ಷಾರಸೊನ್ಲಾ ಮೈತ್‌ದ್ ಕುಂಟು ಕಟ್ಟ್‌ದ್ ತನ ಕತ್ತೆದ ಮಿತ್ತ್ ಕುಲ್ಲಾದ್ ಛತ್ರೊಗು ಲೆತ್ತೊಂದು ಪೋದು ಪರಾಂಬರಿತೆ.</verse>
				<verse number="35">ಮನದಾನಿ ಆಯೆ ರಡ್ಡ್ ಬೊಳ್ಳಿದ ಪಾವೊಲಿನ್ ಛತ್ರದಾಯಗ್ ಕೊರ್ದು, ‘ಉಂಬ್ಯನ ಚಾಕ್ರಿ ಮಲ್ಪುಲ,’ ನೆಡ್ದ್ ಹೆಚ್ಚಾದ್ ಕರ್ಚಿ ಮಲ್ತಡ, ‘ಯಾನ್ ಪಿರ ಬನ್ನಗ ನಿಕ್ಕ್ ಕೊರ್ಪೆ,’” ಪಂಡೆ</verse>
				<verse number="36">“ಕಲ್ವೆರೆ ಕೈಕ್ ತಿಕ್ಕ್‌ದಿನಾಯಗ್ ಈ ಮೂವೆರೆಡ್ ಏರ್ ನಿರೆತ್ತಾಯೆ ಅಂದ್‌ದ್ ನಿಕ್ಕ್ ತೋಜುಂಡು,” ಪನ್ಲ ಅಂದ್‌ದ್ ಕೇಂಡಿನೆಕ್ಕ್,</verse>
				<verse number="37">ಆ ನ್ಯಾಯಶಾಸ್ತ್ರಿ, “ಆಯನ ಮಿತ್ತ್ ಕರುಣೆ ತೋಜಾಯಿನಾಯೆನೇ,” ಅಂದ್‌ದ್ ಉತ್ತರ ಕೊರಿಯೆ. ಅಪಗ ಯೇಸು ಆಯಗ್, “ಪೋ, ಈಲಾ ಅಂಚೆನೇ ಮಲ್ಪು,” ಪಂಡೆ</verse>
				<verse number="38">ಯೇಸು ಬೊಕ್ಕ ಶಿಷ್ಯೆರ್‌ಲು ಸಂಚಾರ ಮಲ್ತೊಂದುಪ್ಪುನಗ ಒಂಜಾನೊಂಜಿ ಹಳ್ಳಿಗ್ ಬತ್ತೆರ್; ಅಲ್ಪ ಮಾರ್ಥ ಪನ್ಪಿ ಒಂಜಿ ಪೊಂಜೊವು ಯೇಸುನು ತನ ಇಲ್ಲಡೆ ಬರಿಯೆರೆ ಪಂಡಲ್.</verse>
				<verse number="39">ಆಲೆಗ್ ಮರಿಯ ಪನ್ಪಿ ಒರ್ತಿ ಮೆಗ್ದಿ ಇತ್ತಲ್. ಮೋಲು ಕರ್ತವನ ಕಾರ ಮುದೆಲ್‌ಡ್ ಕುಲ್ಲೊಂದು ಆಯನ ಪಾತೆರೊನು ಕೇನೊಂದಿತ್ತಲ್.</verse>
				<verse number="40">ಆಂಡ ಮಾರ್ಥ ದಿಂಜ ಬೇಲೆಡ್ದ್ ಬೇಜಾರಾದ್ ಯೇಸು ಕೈತಲ್‌ ಬತ್ತ್‌ದ್, “ಕರ್ತವ, ಎನ ಮೆಗ್ದಿ ಬೇಲೆಗ್ ಎನನ್ ಒರ್ತಿನೇ ಸೊಂದಿಯೆರೆ ಬುಡ್ತಲ್; ನಿಕ್ಕ್ ದಾಲಾ ಚಿಂತೆ ಇಜ್ಜ? ಎಂಕ್ ಸಹಾಯ ಮಲ್ಪೊಡಂದ್‌ದ್ ಆಲೆಗ್ ಪನ್ಲ,” ಅಂದ್‌ದ್ ಪಂಡಲ್.</verse>
				<verse number="41">ಕರ್ತವೆ ಆಲೆಗ್, “ಮಾರ್ಥ, ಮಾರ್ಥ, ಈ ಮಸ್ತ್ ಬಗೆಟ್ ಚಿಂತೆಡ್ಲಾ ಗಡಿಬಿಡಿಟ್ಲಾ ತಿಕ್ಕೊಂದ.</verse>
				<verse number="42">ಆಂಡ ಅಗತ್ಯ ಇತ್ತಿನವು ಒಂಜೇ; ಮರಿಯ ಆ ಎಡ್ಡೆಂತಿ ಪಾಲ್‌ನ್ ಅಜತೊಂದಲ್. ಅವು ಆಲೆಡ್ದ್ ದೆಪ್ಪಂದೆ ಪೋವು,” ಅಂದ್‌ದ್ ಉತ್ತರ ಕೊರಿಯೆ.</verse>
			</chapter>
			<chapter number="11">
				<verse number="1">ಯೇಸು ಒಂಜಿ ಜಾಗ್‌ಡ್ ಪ್ರಾರ್ಥನೆ ಮಲ್ತ್‌ದ್ ಮುಗಿಪುನಗ ಆಯನ ಶಿಷ್ಯೆರೆಡ್ ಒರಿ ಕೇನ್ವೆ, “ಕರ್ತವ, ಯೋಹಾನೆ ತನ ಶಿಷ್ಯೆರೆಗ್ ಕಲ್ಪಾಯಿ ಲೆಕ್ಕ ಎಂಕುಲೆಗ್ಲಾ ಪ್ರಾರ್ಥನೆ ಮಲ್ಪುನೆನ್ ಕಲ್ಪಾಲ,” ಅಂದ್‌ದ್ ಪಂಡೆ.</verse>
				<verse number="2">ಯೇಸು ಅಕ್ಲೆಗ್, “ನಿಕುಲು ಪ್ರಾರ್ಥನೆ ಮಲ್ಪುನಗ, ‘ಪರಲೋಕೊಡುಪ್ಪು ಎಂಕುಲೆ ಅಮ್ಮೆರೇ, ನಿನ ಪುದರ್ ಪರಿಶುದ್ಧ ಆವಡ್. ನಿನ ರಾಜ್ಯ ಬರಡ್.</verse>
				<verse number="3">ಎಂಕುಲೆ ದಿನದಿನತ ಪಡಿನ್ ಪ್ರತಿ ದಿನಲ ಕೊರ್ಲ.</verse>
				<verse number="4">ಎಂಕ್ಲೆಗ್ ತಪ್ಪು ಮಲ್ತಿನಾಕುಲೆಗ್ ಪ್ರತಿ ಒರಿಯನ್ ಎಂಕುಲು ಮಾಪು ಮಲ್ಪುಲೆಕ್ಕ, ಎಂಕ್ಲೆನ ಪಾಪೊಲೆನ್ಲಾ ಮಾಪು ಮಲ್ಪುಲ. ಎಂಕ್ಲೆನ್ ಶೋಧನೆದುಲಯಿ ಸೇರಾವಂದೆ ತಪ್ಪಾಲ,’” ಅಂದ್‌ದ್ ಪಂಡೆ.</verse>
				<verse number="5">ಬೊಕ್ಕ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ನಿಕ್ಲೆಡ್ ಒರಿಯಗ್ ಸ್ನೇಹಿತೆ ಉಪ್ಪುನಗ, ಆಯೆ ಮದ್ಯ ರಾತ್ರೆಡ್ ಆಯ ಕೈತಲ್‌ ಪೋದು, ‘ಅಣ್ಣಾ, ಎಂಕ್ ಮೂಜಿ ರೊಟ್ಟಿಲೆನ್ ಸಾಲ ಕೊರ್ಲ.</verse>
				<verse number="6">ಎನ ಸ್ನೇಹಿತೆ ಒರಿ ಪ್ರಯಾಣ ಮಲ್ತ್‌ದ್ ಎನ ಕೈತಲ್‌ ಬೈದೆ; ಆಯಗ್ ವಣಸ್ ಮಲ್ಪಾವೆರೆ ಎನಡ ದಾಲಾ ಇಜ್ಜಿ!’ ಅಂದ್‌ದ್ ಪನ್ನಗ</verse>
				<verse number="7">ಆ ಸ್ನೇಹಿತೆ, ‘ಎಂಕ್ ತೊಂದರೆ ಕೊರೊಡ್ಚಿ; ಇತ್ತೆ ಬಾಕಿಲ್ ಪಾಡ್ದೆ; ಎನ ಎಲ್ಯ ಜೋಕುಲು ಎನಡೊಪ್ಪ ಜೆಯಿದೆರ್; ಯಾನ್ ಲಕ್ಕ್‌ದ್ ನಿಕ್ಕ್ ಕೊರಿಯೆರೆ ಆವಂದ್,’ ಅಂದ್‌ದ್ ಉಲಯಿಡ್ದೇ ಉತ್ತರ ಕೊರಿಯೆಡಲಾ ಕೊರೊಲಿ.</verse>
				<verse number="8">ಆಂಡ ಸ್ನೇಹಿತಗಾದ್ ಲಕ್ಕ್‌ದ್ ಕೊರಂದೆ ಇತ್ತ್ಂಡಲಾ ಆಯನ ಕಿರಿಕಿರಿತ ದಿಸೆಟ್ಟ್ ಲಕ್ಕ್‌ದ್ ಕೇಂಡಿನಾತ್ ಆಯಗ್ ಕೊರ್ಪೆ.</verse>
				<verse number="9">ಅಂಚೆನೇ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ: ಕೇನೊನ್ಲೆ, ಅಪಗ ನಿಕ್ಲೆಗ್ ಒದಗುಂಡು; ನಾಡ್‌ಲೆ, ಅಪಗ ನಿಕ್ಲೆಗ್ ತಿಕ್ಕುಂಡು; ಬೊಟ್ಟುಲೆ, ಅಪಗ ನಿಕ್ಲೆಗ್ ಜಪ್ಪುಂಡು.</verse>
				<verse number="10">ದಾಯೆಗಂದ್ಂಡ ಕೇನುನ ಪ್ರತಿಯೊರಿಯಗ್ಲಾ ಕೊರ್ಪುಂಡು, ನಾಡುನಾಯಗ್ ತಿಕ್ಕುಂಡು, ಬೊಟ್ಟುನಾಯಗ್ ಜಪ್ಪುಂಡು.</verse>
				<verse number="11">ನಿಕ್ಲೆಡ್ ಅಮ್ಮೆ ಆದಿತ್ತಿನಾಯೆ ಮೀನ್ ಕೇನುನ ಮಗಕ್ಕ್ ಮೀನ್ ಕೊರಂದೆ ಉಚ್ಚುನು ಕೊರುವೆನಾ?</verse>
				<verse number="12">ಅತ್ತ್‌ಡ ತೆತ್ತಿನ್ ಕೇಂಡ್‌ಂಡ ಚೇಲ್‌ನ್ ಕೊರ್ಪೆನಾ?</verse>
				<verse number="13">ಅಂಚಾಂಡ ಪಡಿಕೆಂತಿನಕುಲಾಯಿ ನಿಕುಲು ನಿಕ್ಲೆನ ಜೋಕುಲೆಗ್ ಎಡ್ಡೆ ವಸ್ತುಲೆನ್ ಕೊರ್ಪಿನಕುಲಾಂಡ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ತನಡ ಕೇನುನಾಕುಲೆಗ್ ಏತೋ ಹೆಚ್ಚಾದ್ ಪರಿಶುದ್ಧಾತ್ಮನ ವರೊಕ್ಲೆನ್ಲಾ ಕೊರುವೆತ್ತಾ?” ಅಂದ್‌ದ್ ಪಂಡೆ.</verse>
				<verse number="14">ಒಂಜಿ ದಿನ ಆಯೆ ಬಾಯಿಬರಂದಿ ದೆವ್ವೊನು ಬುಡ್ಪಾವೊಂದಿತ್ತೆ. ಆ ದೆವ್ವ ಬುಡ್ದು ಪೋಯಿ ಬೊಕ್ಕ ಪೊಟ್ಟೆ ಪಾತೆರಿಯೆ; ಐಕ್ ಜನೊಕುಲು ಅಚ್ಚಿರ ಆಯೆರ್.</verse>
				<verse number="15">ಆಂಡ ಅಕ್ಲೆಡ್ ಕೆಲೆವೆರ್, “ಇಂಬೆ ದೆವ್ವೊಲೆ ಮುಖ್ಯಸ್ಥೆ ಆಯಿ ಬೆಲ್ಜೆಬೂಲಡ್ದ್ ದೆವ್ವೊಲೆನ್ ಬುಡ್ಪಾವೆ,” ಅಂದ್‌ದ್ ಪಂಡೆರ್.</verse>
				<verse number="16">ಬೇತೆ ಕೆಲೆವೆರ್ ಆಯನ್ ಪರೀಕ್ಷೆ ಮಲ್ಪೆರೆಗಾದ್ ಈ ಬಾನೊಡು ಒಂಜಿ ಗುರ್ತೊನು ತೋಜಾದ್ ಕೊರೊಡು ಅಂದ್‌ದ್ ಯೇಸುಡ ಕೇಂಡೆರ್.</verse>
				<verse number="17">ಆಯೆ ಅಕ್ಲೆನ ಆಲೋಚನೆಲೆನ್ ತೆರಿದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ, “ತನ್ಕುಲೆ ಉಲಯಿ ಭೇದ ಇತ್ತಿ ರಾಜ್ಯೊಲು ಹಾಳಾಪುಂಡು.</verse>
				<verse number="18">ಅಂಚೆನೇ ಸೈತಾನೆ ತನಡನೇ ಭೇದ ಪುಟ್ಟಾವೊಂಡೆಡ ಆಯನ ರಾಜ್ಯ ಎಂಚ ಒರಿವು? ನಿಕುಲು ಬೆಲ್ಜೆಬೂಲನ ಬಲೊಡ್ದು ಯಾನ್ ದೆವ್ವೊಲೆನ್ ಬುಡ್ಪಾವೆ ಪನ್ಪರ್.</verse>
				<verse number="19">ಯಾನ್ ಬೆಲ್ಜೆಬೂಲನ ಬಲೊಡ್ದು ದೆವ್ವೊಲೆನ್ ಬುಡ್ಪಾವುನಾಂಡ ನಿಕ್ಲೆನಾಕುಲು ಏರೆನ ಬಲೊಟು ಬುಡ್ಪಾವೆರ್? ಅಂಚಾಯಿನೆಡ್ದ್ ಅಕುಲೇ ನಿಕ್ಲೆಗ್ ನ್ಯಾಯತೀರ್ಪು ಮಲ್ಪುನಾಕುಲು ಆಪೆರ್.</verse>
				<verse number="20">ಯಾನ್ ದೇವೆರೆ ಬಲೊಡ್ದೇ ದೆವ್ವೊಲೆನ್ ಬುಡ್ಪಾವುನಾಂಡ ದೇವೆರೆ ರಾಜ್ಯ ನಿಕ್ಲೆ ಕೈತಲೇ ಬತ್ತ್‌ಂಡತ್ತಾ.</verse>
				<verse number="21">ಒರಿ ಬಲವಂತೆ ಮಾತ ಆಯುಧೊಲೆನ್ ಪತ್ತೊಂದು ತನ ಇಲ್ಲನ್ ಕಾತೊಂದಿತ್ತೆಡ ಆಯನ ಇಲ್ಲದ ವಸ್ತುಲು ಜೋಕೆಡೇ ಉಪ್ಪುಂಡು.</verse>
				<verse number="22">ಆಂಡ ಆಯಡ್ದ್ ಬಲವಂತೆ ಆಯನ್ ಸೋಪಾಯಿ ಬೊಕ್ಕ ಸುರುತ್ತಾಯೆ ನಂಬೊಂದು ಇತ್ತಿ ಆಯುಧೊಲೆನ್ ತಾನ್ ದೆತ್ತೊಂದು ತಾನ್ ಲೂಟಿ ಮಲ್ತಿನೆನ್ ಪಟ್ಟ್‌ದ್ ಕೊರ್ಪೆ.</verse>
				<verse number="23">“ಎನ ಪಕ್ಷ ಪತ್ತಂದಿನಾಯೆ ಎಂಕ್ ವಿರೋಧಿ. ಎನ ಜತೆಟ್ ಸೇರಂದಿನಾಯೆ ಚಲ್ಲಾಪಿಲ್ಲಿ ಮಲ್ಪುನಾಯೆ ಆದುಲ್ಲೆ.”</verse>
				<verse number="24">“ದೆವ್ವ ನರಮಾನಿನ್ ಬುಡ್ದು ಪೋಯಿ ಬೊಕ್ಕ ನಿಲೆ ನಾಡೊಂದು ನೀರ್ ಇಜ್ಜಾಂದಿ ಜಾಗ್‌ಡ್ ತಿರ್ಗುವ, ನಿಲೆ ತಿಕ್ಕಂದಿನೆಡ್ದ್ ಅವು ‘ಯಾನ್ ಬುಡ್ದು ಬೈದಿನ ಎನ ಇಲ್ಲಗ್ ಪಿರ ಪೋಪೆ ಅಂದ್‌ದ್ ಪನೊಂದು ಬರ್ಪ,’</verse>
				<verse number="25">ಆ ಇಲ್ಲ್ ಅಡ್ತ್‌ದ್ ಸಿಂಗಾರ ಮಲ್ತಿನೆನ್ ತೂದು ಕುಡ ಪೋದು</verse>
				<verse number="26">ತನಡ್ದ್ ಪಡಿಕೆಂತಿನ ಬೇತೆ ಏಳ್ ದೆವ್ವೊಲೆನ್ ಲೆತ್ತೊಂದು ಬರ್ಪುಂಡು. ಐಕುಲು ಉಲಯಿ ಪೊಗ್ಗುದು ಅಲ್ಪ ವಾಸ ಮಲ್ಪುವ. ಅಪಗ ಆ ನರಮಾನಿನ ಕಡೆತ ಸ್ಥಿತಿ ದುಂಬುಡ್ದು ಪಡಿಕೆಂತಿನವು ಆದುಪ್ಪುಂಡು,” ಪಂಡೆ.</verse>
				<verse number="27">ಯೇಸು ಈ ಪಾತೆರೊಲೆನ್ ಪನೊಂದುಪ್ಪುನಗ ಜನೊಕುಲೆ ನಡುಡ್ದು ಒಂಜಿ ಪೊಂಜೊವು, “ನಿನನ್ ತುಂಬೊಂಡಿ ಬಂಜಿಲಾ ಈ ಪರಿ ಮಿರೆಲಾ ಭಾಗ್ಯದವು!” ಅಂದ್‌ದ್ ಪಂಡಲ್.</verse>
				<verse number="28">ಯೇಸು ಆಲೆಗ್ ಅಂಚ ಪನಡ, “ದೇವೆರೆ ಪಾತೆರೊನು ಕೇಂಡ್ದ್ ಐಕ್ ಸರಿಯಾದ್ ನಡಪುನಾಕುಲೆ ಭಾಗ್ಯವಂತೆರ್,” ಪಂಡೆ.</verse>
				<verse number="29">ಜನೊಕುಲು ಗುಂಪುಗುಂಪಾದ್ ಬರೊಂದುಪ್ಪುನಗ ಯೇಸು ಪನಿಯೆರೆ ಸುರು ಮಲ್ತಿನವು ದಾನೆಂದ್ಂಡ, “ಈ ಸಂತಾನ ಹಾಳ್ ಸಂತಾನನೇ; ಉಂದು ಗುರ್ತೊನು ತೂವೊಡು ಅಂದ್‌ದ್ ಬಯಕುಂಡು; ಆಂಡ ಯೋನಗ್ ಆಯಿನ ಗುರ್ತನೇ ಅತ್ತಂದೆ ಬೇತೆ ಒವುಲಾ ಗುರ್ತ ನೆಕ್ಕ್ ತಿಕ್ಕಂದ್,”</verse>
				<verse number="30">ಎಂಚಂದ್ಂಡ ಯೋನೆ ನಿನವೆದಾಕುಲೆಗ್ ಒಂಜಿ ಗುರ್ತ ಆದಿತ್ತೆನಾ, ಅಂಚೆನೇ ನರಮಾನಿ ಮಗೆಲಾ ಈ ಸಂತಾನೊಗು ಒಂಜಿ ಗುರ್ತ ಆದುಪ್ಪುವೆ.</verse>
				<verse number="31">ತೆನ್‌ಕಯಿ ದೇಶದ ರಾಣಿ ನ್ಯಾಯತೀರ್ಪುನಪಗ ಈ ಸಂತಾನದೊಟ್ಟುಗು ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನ್ಪಲ್; ಆಲ್ ಸೊಲೊಮೋನನ ಗೇನೊನು ತೆರಿಯೊನಿಯೆರೆ ಭೂಮಿದ ಕಟ್ಟಕಡೆಡ್ದ್ ಬತ್ತಲ್; ಆಂಡ ಮುಲ್ಪ ಸೊಲೊಮೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.</verse>
				<verse number="32">ನ್ಯಾಯತೀರ್ಪುಡು ನಿನವೆ ಪಟ್ಟಣದಾಕುಲು ಈ ಸಂತಾನದೊಪ್ಪ ಉಂತುದು ಮೊಕ್ಲೆನ್ ಅಪರಾಧಿಲು ಅಂದ್‌ದ್ ಪನುವೆರ್. ಅಕುಲು ಯೋನೆ ಸಾರಿನ ಪಾತೆರೊಲೆನ್ ಕೇಂಡ್ದ್ ಪಶ್ಚಾತಾಪ ಪಡೆಯೆರ್. ಆಂಡ ಮುಲ್ಪ ಯೋನಡ್ದ್‌ಲಾ ಮಲ್ಲಾಯೆ ಉಲ್ಲೆ.</verse>
				<verse number="33">“ಏರ್ಲಾ ತುಡರ್‌ನ್ ಪೊತ್ತಾದ್ ಮದೆಟಾವಡ್ ಕಲಸೆದುಲಯಿ ಆವಡ್ ದೀಪುಜೆರ್. ಇಲ್ಲದುಲಯಿ ಬರ್ಪಿನಾಕುಲೆಗ್ ಬೊಲ್ಪು ತೋಜುಲೆಕ್ಕ ದೀಪಕಂಬದ ಮಿತ್ತ್ ದೀಪೆರತ್ತಾ?</verse>
				<verse number="34">ಕಣ್ಣ್ ಶರೀರೊಗು ತುಡರ್ ಆದುಂಡು. ನಿನ ಕಣ್ಣ್ ಸರ್ತ ಇತ್ತ್ಂಡ ನಿನ ಇಡೀ ಶರೀರಲಾ ಬೊಲ್ಪಾದುಪ್ಪುಂಡು. ಅವು ಹಾಳ್ ಆದಿತ್ತ್ಂಡ ನಿನ ಶರೀರಲಾ ಕತ್ತಲೆ ಆದುಪ್ಪುಂಡು.</verse>
				<verse number="35">ಅಂಚಾದುಪ್ಪುನಗ ನಿನ ಉಲಯಿಡುಪ್ಪುನ ಬೊಲ್ಪು ಕತ್ತಲೆ ಆವಂದಿಲೆಕ್ಕ ಜಾಗ್ರತೆಡ್ ತೂವೊನ್ಲ.</verse>
				<verse number="36">ನಿನ ಶರೀರ ಇಡೀ ಬೊಲ್ಪು ಆದಿತ್ತ್‌ದ್ ಒಂಜಿ ಭಾಗೊಡ್ಲಾ ಕತ್ತಲೆ ಆದುಪ್ಪಂದೆ ತುಡರ್‌ದ ಲೆಕ್ಕ ಎಡ್ಡೆ ಅರ್ಲ್‌ದ್ ಬೊಲ್ಪು ಕೊರ್ಪಿಲೆಕ್ಕನೇ ಬೊಲ್ಪಾದುಪ್ಪುಲ.”</verse>
				<verse number="37">ಯೇಸು ಪಾತೆರೊಂದುಪ್ಪುನಗ ಒರಿ ಪರಿಸಾಯೆ ಆಯನ್ ವಣಸ್‌ಗ್ ಬರೊಡಂದ್‌ದ್ ಕೇಂಡೊನ್ನಗ ಆಯೆ ಉಲಯಿ ಪೋದು ವಣಸ್‌ಗ್ ಕುಲ್ಲಿಯೆ.</verse>
				<verse number="38">ಆಂಡ ಪರಿಸಾಯೆರೆ ಪದ್ಧತಿ ಪ್ರಕಾರ ಯೇಸು ವಣಸ್‌ಡ್ದ್ ದುಂಬು ಕೈ ದೆಕ್ಕಂದೆ ವಣಸ್‌ಗ್ ಕುಲ್ಲಿನೆನ್ ತೂದು ಅಚ್ಚಿರ ಆಯೆರ್.</verse>
				<verse number="39">ಕರ್ತವೆ ಆಯಗ್, “ಪರಿಸಾಯೆರಾಯಿ ನಿಕುಲು ಕಂಚಿದ ಬಟ್ಟಲ್ದ ಪಿದಾಯಿದ ಭಾಗೊನು ಮಾತ್ರ ದೆಕ್ಕುವರ್; ಆಂಡ ನಿಕ್ಲೆನ ಉಲಯಿದ ಭಾಗ ದುರಾಸೆಡ್ದ್‌ಲಾ ಹಾಳ್ ಬುದ್ಧಿಡ್ದ್‌ಲಾ ದಿಂಜಿದುಂಡು.</verse>
				<verse number="40">ಬುದ್ಧಿದಾಂತಿನಾಕುಲೇ, ದೇವೆರ್ ಪಿದಯಿದ ಭಾಗೊನು ಮಲ್ತಿ ಲೆಕ್ಕನೆ ಉಲಯಿದ ಭಾಗೊನ್ಲಾ ಮಲ್ತ್‌ದೆ ಅತ್ತಾ? ಅಂದ್‌ದ್ ಪಂಡೆ.</verse>
				<verse number="41">ಆಂಡಲಾ ಉಲಯಿ ಇತ್ತಿನೆನ್ ಬಡವೆರೆಗ್ ದಾನ ಮಲ್ಪುಲೆ; ಅಪಗ ಮಾತಲಾ ನಿಕ್ಲೆಗ್ ಶುದ್ಧಾದುಪ್ಪುಂಡು.</verse>
				<verse number="42">“ಅಯ್ಯೋ ಪರಿಸಾಯೆರೇ, ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ಪುದಿನ, ಮೆತ್ತೆ, ಸದಪು ಇಂಚಿತ್ತಿ ಮಾತ ಕಾಯಿಕಜಿಪುಲೆಡ್ದ್ ಪತ್ತೆಟ್ಟ್ ಒಂಜಿ ಪಾಲ್ ಕೊರ್ಪರ್ ಸರಿ; ಆಂಡ ನ್ಯಾಯೊನ್ಲಾ ದೇವೆರೆ ಪ್ರೀತಿನ್ಲಾ ಮದತ್‌ದ್ ಬುಡ್ತರ್ ಉಂದೆನ್ಲಾ ನಿಕುಲು ಮಲ್ಪೊಡಿತ್ತ್‌ಂಡ್ ಅವೆನ್ ಬುಡಿಯೆರೆ ಬಲ್ಲಿ.</verse>
				<verse number="43">“ಅಯ್ಯೋ ಪರಿಸಾಯೆರೇ, ಸಭಾಮಂದಿರೊಡು ಮಲ್ಲಸ್ಥಾನೊಲು, ಅಂಗಡಿ ಸಾದಿಲೆಡ್ ವಂದನೆಲು ನಿಕ್ಲೆಗ್ ಇಷ್ಟ ಆದುಂಡು.</verse>
				<verse number="44">ನಿಕ್ಲೆನ ಗತಿ ದಾನೆಂದ್ ಪನೊಡು? ನಿಕುಲು ನೆಲ ಸಮ ಆತಿ ಸಮಾಧಿದ ಲೆಕ್ಕ ಉಲ್ಲರ್; ಐತ ಮಿತ್ತ್ ನಡಪುನ ಜನೊಕುಲೆಗ್ ಅವು ಸಮಾಧಿ ಅಂದ್‌ದ್ ತೆರಿಯಂದ್.”</verse>
				<verse number="45">ಉಂದೆನ್ ಕೇಂಡ್ದ್ ಒರಿ ನ್ಯಾಯಶಾಸ್ತ್ರಿ ಆಯಗ್, “ಬೋಧಕಾ, ಈ ಪಾತೆರೊಲೆನ್ ಪನ್ಪಿನೆಡ್ದ್ ಎಂಕ್ಲೆನ್ ಹಲ್ಕಿ ಮಲ್ತಿಲೆಕ್ಕ ಆಂಡ್,” ಅಂದ್‌ದ್ ಪನ್ನಗ</verse>
				<verse number="46">ಯೇಸು ಅಕ್ಲೆಗ್, “ನ್ಯಾಯಶಾಸ್ತ್ರಿಲೇ, ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಜನೊಕುಲೆ ಮಿತ್ತ್ ತುಂಬೆರೆ ತೀರಂದಿ ಪುದೆಕ್ಲೆನ್ ತುಂಬಾವರ್; ನಿಕುಲಾಂಡಲಾ ಆ ಪುದೆಕ್ಲೆನ್ ನಿಕ್ಲೆನ ಒಂಜಿ ಬಿರೆಲ್‌ಡ್ದ್‌ಲಾ ಮುಟ್ಟುಜರ್.</verse>
				<verse number="47">ನಿಕ್ಲೆನ ಗತಿನ್ ದಾನೆಂದ್ ಪನೊಡು? ನಿಕುಲು ಪ್ರವಾದಿಲೆ ಸಮಾಧಿಲೆನ್ ಕಟ್ಟುವರ್; ಅಕ್ಲೆನ್ ಕೆರಿನಾಕುಲು ನಿಕ್ಲೆನ ಹಿರಿಯೆರ್;</verse>
				<verse number="48">ಇಂಚ ಉಪ್ಪುನಗ ನಿಕ್ಲೆನ ಹಿರಿಯೆರ್ ಮಲ್ತಿನೆಕ್ಕ್ ನಿಕುಲೇ ಸಾಕ್ಷಿ ಆದುಲ್ಲರ್; ಅತ್ತಂದೆ ಅಕ್ಲೆನ ಬೇಲೆಲೆನ್ ನಿಕುಲು ಮಲ್ತಿಲೆಕ್ಕ ಆಂಡ್. ಅಕುಲು ಪ್ರವಾದಿಲೆನ್ ಕೆರಿಯೆರ್; ನಿಕುಲು ಗೋರಿಲೆನ್ ಕಟ್ಟುವರ್.</verse>
				<verse number="49">ಅಂಚಾಯಿನೆಡ್ದಾವರ ದೇವೆರೆ ಬುದ್ಧಿ ಪನ್ಪಿನಿ ದಾನೆಂದ್ಂಡ, ‘ಯಾನ್ ಅಕ್ಲೆನ ಕೈತಲ್‌ ಪ್ರವಾದಿಲೆನ್ಲಾ ಅಪೊಸ್ತಲೆರೆನ್ಲಾ ಕಡಪುಡ್ವೆ. ಅಕ್ಲೆಡ್ ಕೆಲೆವೆರೆನ್ ಕೆರುವೆರ್, ಭಂಗಲಾ ಕೊರುವೆರ್.’</verse>
				<verse number="50">ಇಂಚ ಲೋಕದ ಆದಿಡ್ದ್ ಹೇಬೇಲ್‌ನ ನೆತ್ತೆರೆಡ್ದ್ ಸುರುವಾದ್ ಬಲಿಪೀಠದ ಬೊಕ್ಕ ದೇವಾಲಯದ ಮದ್ಯೊಡು ಕೆರ್ದ್ ಪಾಡಿ ಜಕರೀಯನ ನೆತ್ತೆರ್ ಮುಟ್ಟ ಮಾತ ಪ್ರವಾದಿಲೆನ ನೆತ್ತೆರ್‌‌ಲೆಗ್ಲಾ ಈ ಸಂತಾನದಾಕುಲೇ ಉತ್ತರ ಕೊರೊಡು. ಅಂದ್, ಈ ಸಂತಾನದಾಕುಲೇ ಉತ್ತರ ಕೊರೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="51"></verse>
				<verse number="52">“ಅಯ್ಯೋ ನ್ಯಾಯಶಾಸ್ತ್ರಿಲೇ, ಗೇನೊಗು ಸಾದನ ಆದುಪ್ಪು ಬೀಗದ ಕೈನ್ ದೆತ್ತ್ ದೀತರ್; ನಿಕುಲಾಂಡಲಾ ಉಲಯಿ ಪೋಯಿಜರ್; ಪೋಪಿನಾಕುಲೆಗ್ಲಾ ಅಡ್ಡಿ ಮಲ್ಪುವರ್,” ಅಂದ್‌ದ್ ಪಂಡೆ.</verse>
				<verse number="53">ಬೊಕ್ಕ ಆಯೆ ಅಲ್ತ್‌ಡ್ದ್ ಬುಡ್ದು ಬನ್ನಗ ಶಾಸ್ತ್ರಿಲು ಬೊಕ್ಕ ಪರಿಸಾಯೆರ್ ಆಯನ್ ಮಸ್ತ್ ವಿರೋಧ ಮಲ್ತ್‌ದ್ ಆಯಡ ತರತರತ ಪ್ರಶ್ನೆ ಕೇನೊಂದಿತ್ತೆರ್.</verse>
				<verse number="54">ಆಯನ ಬಾಯಿ ಪಾತೆರೊಡು ತಪ್ಪು ತಿಕ್ಕೊಡು ಅಂದ್‌ದ್ ಕಾತೊಂದಿತ್ತೆರ್.</verse>
			</chapter>
			<chapter number="12">
				<verse number="1">ಐತ ಉಲಯಿ ಸಾರಸಾರ ಜನೊಕುಲು ಒರಿಯನ್ ಒರಿ ದೊಂಕು ಮುಟ್ಟ ಕೂಡ್ದುಪ್ಪುನಗ ಆಯೆ ಸುರುಟ್ಟು ತನ ಶಿಷ್ಯೆರೆಗ್ ಪನಿಯೆರೆ ಸುರು ಮಲ್ತಿನಿ ದಾನೆಂದ್ಂಡ, “ಕಪಟ ಇನ್ಪಿ ಪರಿಸಾಯೆರೆ ಪುಳಿಬಂದದ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="2">ಮದೆ ಆದುಪ್ಪು ಒವುಲಾ ತೋಜಿದ್ ಬರಂದೆ ಕುಲ್ಲಂದ್. ಪಿದಯಿ ಬರಂದೆ ಉಪ್ಪುನ ಒಂಜಿ ಗುಟ್ಟುಲಾ ಇಜ್ಜಿ.</verse>
				<verse number="3">ಇಂಚ ಉಪ್ಪುನಗ ನಿಕುಲು ಕತ್ತಲೆಡ್ ಪಂಡಿನವು ಬೊಲ್ಪುಡು ಕೇನುಂಡು; ಬೊಕ್ಕ ನಿಕುಲು ಕೋಣೆದುಲಯಿ ಪಂಡಿನ ಗುಟ್ಟು ಮಾಳಿಗೆದ ಮಿತ್ತ್ ಸಾರುಂಡು.</verse>
				<verse number="4">“ಎನ ಸ್ನೇಹಿತೆರಾಯಿ ನಿಕ್ಲೆಗ್ ಪನ್ಪೆ ಶರೀರೊನು ಕೆರ್ದ್ ಅವೆಡ್ದ್ ಮಿತ್ತ್ ದಾಲಾ ಮಲ್ಪಂದಿನಾಕುಲೆಗ್ ಪೋಡ್ಯಡೆ.</verse>
				<verse number="5">ನಿಕುಲು ಏರೆಗ್ ಪೋಡಿಯೊಡು ಪನ್ಪಿನೆನ್ ಯಾನ್ ನಿಕ್ಲೆಗ್ ತೆರಿಪಾವೆ. ಕೆರಿ ಬೊಕ್ಕ ನರಕೊಗು ಪಾಡುನ ಅಧಿಕಾರ ಉಪ್ಪು ದೇವೆರೆಗ್ ಮಾತ್ರ ಪೋಡಿಯೊಡು; ಅಂದ್, ಆಯಗೇ ಪೋಡಿಯೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="6">“ಐನ್ ಗುರ್ಬ್ಬಿಲೆನ್ ರಡ್ಡ್ ದುಡ್ಡುಗು ಮಾರುವೆರತ್ತಾ? ಆಂಡ ಐಕ್ಲೆಡ್ ಒಂಜಾಂಡಲಾ ದೇವೆರೆಗ್ ಮದತ್ ಪೋಪುಜಿ.</verse>
				<verse number="7">ಆತ್ ಮಾತ್ರ ಅತ್ತ್, ನಿಕ್ಲೆನ ತರೆಕುಜಲ್ ಮಾತಲಾ ಗೆನ್ತ್‌ದುಂಡು, ಪೋಡ್ಯಡೆ; ಮಸ್ತ್ ಗುರ್ಬ್ಬಿಲೆಡ್ದ್‌ಲಾ ನಿಕುಲು ಹೆಚ್ಚ್‌ದಾಕುಲು.</verse>
				<verse number="8">“ಏರ್ ನರಮಾನಿಲೆ ಎದುರುಡು ತಾನ್ ಯೇಸುನಾಯೆ ಅಂದ್‌ದ್ ಒಪ್ಪಿಯೊನ್ವೆನಾ ನರಮಾನಿ ಮಗೆಲಾ ಆಯನ್ ದೇವೆರೆ ದೂತೆರೆ ಎದುರುಡು ತನ್ನಾಯೆ ಅಂದ್‌ದ್ ಒಪ್ಪಿಯೊನ್ವೆ.</verse>
				<verse number="9">ಆಂಡ ಏರ್ ನರಮಾನಿಲೆ ಎದುರು ತಾನ್ ಯೇಸುನಾಯೆ ಅತ್ತ್ ಅಂದ್‌ದ್ ಪನ್ಪೆನಾ ಆಯನ್ ಯಾನ್ ದೇವೆರೆ ದೂತೆರೆ ಎದುರುಡು ಎನ್ನಾಯೆ ಅತ್ತ್ ಅಂದ್‌ದ್ ಪನ್ವೆ.</verse>
				<verse number="10">“ನರಮಾನಿ ಮಗಕ್ಕ್ ದೂಷಣೆ ಮಲ್ತೆರ್ಡ ಪ್ರತಿ ಒರಿಯಗ್ಲಾ ಮಾಪು ಆಪುಂಡು. ಆಂಡ ಪರಿಶುದ್ಧಾತ್ಮೊಗು ವಿರೋಧಾದ್ ದೂಷಣೆ ಮಲ್ಪುನಾಯಗ್ ಮಾಪು ಇಜ್ಜಿ.</verse>
				<verse number="11">“ಅಕುಲು ನಿಕ್ಲೆನ್ ಸಭಾಮಂದಿರದ ಅಧಿಕಾರಿಲೆ ಬೊಕ್ಕ ಅಧಿಪತಿಲೆ ಎದುರುಡ್ಲಾ ಉಂತಾನಗ ದಾದ ಪನೊಡು, ಎಂಚ ಉತ್ತರ ಕೊರೊಡು ಅಂದ್‌ದ್ ಚಿಂತೆ ಮಲ್ಪಡೆ.</verse>
				<verse number="12">ದಾಯೆಗಂದ್ಂಡ ನಿಕುಲು ಪನ್ಪಿನೆನ್ ಆ ಗಳಿಗೆಡ್ ಪರಿಶುದ್ಧಾತ್ಮೆನೇ ನಿಕ್ಲೆಗ್ ಕಲ್ಪಾದ್ ಕೊರ್ಪೆ.”</verse>
				<verse number="13">ಅಪಗ ಜನೊಕುಲೆಡ್ ಒರಿ ಯೇಸುಡ, “ಬೋಧಕಾ, ಅಮ್ಮೆರೆನ ಆಸ್ತಿನ್ ಎಂಕ್ ಪಾಲ್ ಮಲ್ತ್ ಕೊರಿಯೆರೆ ಎನ ಪಲಯಡ ಪನ್ಲ,” ಅಂದ್‌ದ್ ಪಂಡೆ.</verse>
				<verse number="14">ಅಪಗ ಆಯೆ, “ಓ ನರಮಾನಿಯೇ, ನಿಕ್ಲೆಗ್ ನ್ಯಾಯಾಧಿಪತಿಯಾದ್ ಪಾಲ್ ಮಲ್ಪೆರೆ ಎನನ್ ನೇಮಕ ಮಲ್ತಿನಾಕುಲು ಏರ್?” ಅಂದ್‌ದ್ ಆಯಡ ಕೇಂಡ್ದ್</verse>
				<verse number="15">ಜನೊಕುಲೆಗ್, “ಮಾತ ದುರಾಶೆಲೆಗ್ ಎಚ್ಚರಿಕೆ ಆದಿತ್ತ್‌ದ್ ನಿಕ್ಲೆನ್ ಕಾತೊನ್ಲೆ. ಒರಿಯಗ್ ಏತ್ ಆಸ್ತಿ ಇತ್ತ್ಂಡಲಾ ಅವು ಆಯ ಜೀವನೊಗು ಆಧಾರ ಆಪುಜಿ,” ಪಂಡೆ.</verse>
				<verse number="16">ಬೊಕ್ಕ ಒಂಜಿ ಉಪಕತೆನ್ ಪಂಡೆ, “ಒಂಜಾನೊಂಜಿ ಐಶ್ವರ್ಯವಂತನ ಭೂಮಿಡ್ ಎಡ್ಡೆ ಬುಲೆ ಬುಲೆಂಡ್.</verse>
				<verse number="17">ಅಪಗ ಆಯೆ ತನ ಮನಸ್‌ಡ್, ‘ಯಾನ್ ದಾದ ಮಲ್ಪೊಡು? ಎನ ಬುಲೆನ್ ದಿಂಜಾದ್ ದೀವೆರೆ ಎಂಕ್ ಜಾಗ್ ಇಜ್ಜತ್ತಾ ಅಂದ್‌ದ್ ಆಲೋಚನೆ ಮಲ್ತ್‌ದ್ ಒಂಜಿ ಬೇಲೆ ಮಲ್ಪುವೆ.</verse>
				<verse number="18">ಯಾನ್ ಎನ ಎಲ್ಯ ತುಪ್ಪೆನ್ ಗಿರ್ತ್‌ದ್ ಮಲ್ಲ ಮಲ್ತ್‌ದ್ ಐತ ಉಲಯಿ ಎನ ಮಾತ ಎಡ್ಡೆ ಹುಟ್ಟೊಳಿ ಸರಕುಲೆನ್ ದಿಂಜಾದ್ ದೀಪೆ.</verse>
				<verse number="19">ಎನ ಪ್ರಾಣೊಗು ವರ್ಸಾನುಗಟ್ಲೆಗ್ ಬೋಡಾಯಿನಾತ್ ಎಡ್ಡೆ ಹುಟ್ಟೊಳಿ ಬೂರ್ದುಂಡು; ಬೋಡಾಯಿನಾತ್ ತಿನ್ಲ, ಪರ್ಲ, ಸುಖ ಪಡೆಲ ಅಂದ್‌ದ್ ತನ್ಕ್ ಪಂಡೊನ್ವೆ,’ ಅಂದ್‌ದ್ ಎನ್ನೊಂಡೆ.</verse>
				<verse number="20">ಆಂಡ ದೇವೆರ್ ಆಯಗ್, ‘ಓ ಬುದ್ಧಿದಾಂತಿನಾಯ, ಇನಿ ರಾತ್ರೆಗೇ ನಿನ ಪ್ರಾಣೊನು ನಿನಡ್ದ್ ಕೇನ್ವೆರ್ ಅಪಗ ಈ ಕೂಡಾದ್ ದೀತಿನವು ಏರೆಗ್ ಆಪುಂಡು?’ ಅಂದ್‌ದ್ ಪಂಡೆ.</verse>
				<verse number="21">“ತನ್ಕಾದ್ ಗಂಟ್‌ಲೆನ್ ಕಟ್ಟೊಂದು ದೇವೆರೆ ಬಗೆಟ್ ಐಶ್ವರ್ಯವಂತೆ ಆವಂದಿನಾಯೆ ಬುದ್ಧಿದಾಂತಿನಾಯ ಲೆಕ್ಕನೇ ಆದುಪ್ಪುವೆ,” ಅಂದ್‌ದ್ ಪಂಡೆ.</verse>
				<verse number="22">ಬೊಕ್ಕ ಯೇಸು ತನ ಶಿಷ್ಯೆರೆಗ್ ಪಂಡಿನಿ ದಾನೆಂದ್ಂಡ, “ಈ ಕಾರಣೊಗಾದ್ ನಿಕ್ಲೆ ಪ್ರಾಣೊಗು ಒವೆನ್ ತಿನೊಡು, ಶರೀರದ ರಕ್ಷಣೆಗ್ ಒವೆನ್ ಪೊದೆತೊನೊಡು ಅಂದ್‌ದ್ ಚಿಂತೆ ಮಲ್ಪಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="23">ವಣಸ್‌ಡ್ದ್ ಪ್ರಾಣ ಮಿತ್ತ್‌ದವು; ಅಂಗಿ ಕುಂಟುಡ್ದು ಶರೀರ ಮಿತ್ತ್‌ದವು ಆದುಂಡು.</verse>
				<verse number="24">ಕಕ್ಕೆಲೆನ್ ತೂಲೆ, ಐಕುಲು ಬಿತ್ತುಜ, ಕೊಯ್ಪುಜ, ಐಕ್ಲೆಗ್ ಗೋದಾಮುಲುಲಾ ಇಜ್ಜಿ, ತುಪ್ಪೆಲಾ ಇಜ್ಜಿ. ಆಂಡಲಾ ದೇವೆರ್ ಐಕ್ಲೆನ್ ತಾಂಕ್‌ದ್ ಕಾಪುವೆ. ಪಕ್ಕಿಲೆಡ್ಡ್ ನಿಕುಲು ಏತೋ ಹೆಚ್ಚ್‌ದಾಕುಲತ್ತಾ?</verse>
				<verse number="25">ಚಿಂತೆ ಮಲ್ತ್ ಮಲ್ತ್‌ದ್ ನಿಕ್ಲೆ ಶರೀರೊಡು ಒಂಜಿ ಮೊರಂಗೆ ಉದ್ಧ ಆವೆರೆ ಏರೆಡ್ದಾವು?</verse>
				<verse number="26">ಅವೆಡ್ದಾವರ ಎಲ್ಯದೆನ್ಲಾ ಮಲ್ಪೆರೆ ಆವಂದಿ ನಿಕುಲು ಬಾಕಿದ ಬಗೆಟ್ ಚಿಂತೆ ಮಲ್ಪುನು ದಾಯೆಗ್?</verse>
				<verse number="27">ಕಾಡ್‌ದ ಪೂ ಬುಲೆಪಿನ ರೀತಿನ್ ಲಕ್ಷ್ಯದೀದ್ ತೆರಿಲೆ, ಐಕುಲು ಬೆನ್ಪುಜ, ನೂಲು ನೆಯ್ಪುಜ, ಆಂಡಲಾ ಆ ಪೂಕುಲೆಡ್ ಒಂಜೆಕ್ಕ್ ಉಪ್ಪು ಅಲಂಕಾರ ಅರಸು ಆದುಪ್ಪು ಸೊಲೊಮೋನುಗು ತನ ಮಾತ ಮೈಮೆಡ್ ಉಪ್ಪುನಗಲಾ ಇತ್ತ್‌ಜಿ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="28">ಓ ಒಂತೆ ನಂಬುನಾಕುಲೇ, ಇನಿ ಇತ್ತ್‌ದ್ ಎಲ್ಲೆ ದಿಕ್ಕೆಲ್‌ದ ಪಾಲಾಪಿ ಕಾಡ್‌ದ ಪಜಿರ್‌ಗ್ ದೇವೆರ್ ಇಂಚ ಪೊದೆಪಾವೆಡ ಅವೆಡ್ದ್ ಏತೋ ಹೆಚ್ಚಾದ್ ನಿಕ್ಲೆಗ್ ತುತ್ತಾದ್ ಪೊದೆಪಾವೆ.</verse>
				<verse number="29">“ಒವೆನ್ ತಿನೊಡು? ಒವೆನ್ ಪರೊಡು? ಅಂದ್‌ದ್ ಗಡಿಬಿಡಿ ಮಲ್ತ್‌ದ್ ಚಿಂತೆ ಮಲ್ಪಡೆ.</verse>
				<verse number="30">ಉಂದೆನ್ ಮಾತೆನ್ ಲೋಕದ ಜನೊಕುಲು ನಾಡುವೆರ್. ಉಂದು ಮಾತ ನಿಕ್ಲೆಗ್ ಬೋಡಂದ್‌ದ್ ನಿಕ್ಲೆನ ಅಮ್ಮೆರೆಗ್ ತೆರಿದುಂಡು.</verse>
				<verse number="31">ದುಂಬತ್ತ ನಿಕುಲು ದೇವೆರೆ ರಾಜ್ಯೊನು ಬಯಕ್ಲೆ; ನೆತ್ತ ಒಟ್ಟಗು, ನಿಕ್ಲೆಗ್ ಮಾತಲಾ ತಿಕ್ಕುಂಡು.</verse>
				<verse number="32">“ಎಲ್ಯ ಪುಂಡೇ, ಪೋಡ್ಯಡ; ದಾಯೆಗಂದ್ಂಡ ನಿಕ್ಲೆಗ್ ರಾಜ್ಯೊನು ಕೊರಿಯೆರೆ ನಿಕ್ಲೆ ಪರಲೋಕೊಡುಪ್ಪು ಅಮ್ಮೆರೆಗ್ ಸಂತೋಷ ಉಂಡು.</verse>
				<verse number="33">ನಿಕ್ಲೆಡಿತ್ತಿನೆನ್ ಮಾರ್ದ್ ದಾಲದಾಂತಿನಾಕುಲೆಗ್ ದಾನ ಮಲ್ಪುಲೆ; ಹಾಳಾವಂದಿ ಮಲ್ಲ ಸಂಚಿಲೆನ್ ಮಲ್ತೊಂದು ಪರಲೋಕೊಡು ನಾಶಾವಂದಿ ಗಂಟ್‌ಲೆನ್ ಕಟ್ಟೊನ್ಲೆ. ಅಲ್ಪ ಕಲ್ವೆರ್ ಮುಟ್ಟ ಬರ್ಪುಜೆರ್. ಉದಲ್ ಪತ್ತ್‌ದ್ ನಾಶ ಆಪುಜಿ.</verse>
				<verse number="34">ನಿಕ್ಲೆನ ಗಂಟ್ ಇತ್ತಿನಲ್ಪನೇ ನಿಕ್ಲೆನ ಮನಸ್ ಉಪ್ಪುಂಡತ್ತಾ.</verse>
				<verse number="35">“ನಿಕ್ಲೆನ ಸೊಂಟದ ಪಟ್ಟಿ ಕಟ್ಟ್‌ದೇ ಉಪ್ಪಡ್; ನಿಕ್ಲೆನ ತುಡರುಲು ಅರ್ಲೊಂದೇ ಉಪ್ಪಡ್.</verse>
				<verse number="36">ನಿಕುಲಾಂಡಲಾ ತನ್ಕುಲೆ ಕರ್ತವೆ ಮದ್ಮೆದ ಲೇಸ್‌ಡ್ದ್ ಬತ್ತ್‌ದ್ ಬೊಟ್ಟಿ ಕೂಡ್ಲೆ ಬಾಕಿಲ್ ದೆಪ್ಪೆರೆ ಆಯನ್ ಕಾತೊನುನ ನರಮಾನಿಲೆ ಲೆಕ್ಕ ಆದುಪ್ಪುಲೆ.</verse>
				<verse number="37">ಕರ್ತವೆ ಬನ್ನಗ ವಾ ಚಾಕ್ರಿದಾಕುಲು ಎಚ್ಚರಿಕೆ ಆದುಪ್ಪುವೆರ್ ಅಂದ್‌ದ್ ತೂಪೆನಾ ಆ ಚಾಕ್ರಿದಾಕುಲು ಭಾಗ್ಯವಂತೆರ್. ಧನಿಯೇ ಸೊಂಟ ಪಟ್ಟಿ ಕಟ್ಟೊಂದು ಅಕ್ಲೆನ್ ವಣಸ್‌ಗ್ ಕುಲ್ಲಾದ್ ಕೈತಲ್‌ ಬತ್ತ್‌ದ್ ಅಕ್ಲೆನ ಚಾಕ್ರಿ ಮಲ್ಪುವೆ ಅಂದ್‌ದ್ ನಿಕ್ಲೆಗ್ ಸತ್ಯಾದ್ ಪನ್ಪೆ,</verse>
				<verse number="38">ಮದ್ಯ ರಾತ್ರೆಡಾವಡ್, ಪುಲ್ಯ ಕಾಂಡೆಡಾವಡ್ ಧನಿನ್ ಕಾತೊಂದುಪ್ಪು ಬೇಲೆದಾಕುಲು ಭಾಗ್ಯವಂತೆರ್.</verse>
				<verse number="39">ಕಲ್ವೆ ಬರ್ಪಿನ ಗಳಿಗೆ ಇಲ್ಲದ ಯಜಮಾನಗ್ ತೆರಿದಿತ್ತ್‌ಂಡ ಆಯೆ ಎಚ್ಚರಿಕೆಡ್ ಇತ್ತ್‌ದ್ ತನ ಇಲ್ಲಗ್ ಮಾಟೆ ದೆಪ್ಪೆರೆ ಬುಡ್ತುವಯೆ ಅಂದ್‌ದ್ ತೆರಿಯೊನ್ಲೆ.</verse>
				<verse number="40">ನಿಕುಲುಲಾ ತಯಾರಾದುಪ್ಪುಲೆ. ನಿಕುಲು ಎನ್ನಂದಿ ಗಳಿಗೆಡ್ ನರಮಾನಿ ಮಗೆ ಬರ್ಪೆ.”</verse>
				<verse number="41">ಅಪಗ ಪೇತ್ರೆ, “ಸ್ವಾಮಿ, ಈ ಉಪಕತೆನ್ ಎಂಕ್ಲೆಗ್ ಮಾತ್ರ ಪನ್ಪನಾ? ಮಾತೆರೆಗ್ ಪನ್ಪನಾ?” ಅಂದ್‌ದ್ ಕೇನ್ನಗ</verse>
				<verse number="42">ಕರ್ತವೆ ಪಂಡಿನಿ ದಾನೆಂದ್ಂಡ, “ಪೊರ್ತು ಪೊರ್ತುಗು ವಣಸ್‌ಗ್ ಬೋಡಾಯಿನೆನ್ ಲತ್ತ್‌ದ್ ಕೊರಿಯೆರೆಗಾದ್ ಯಜಮಾನೆ ತನ ಇಲ್ಲದಾಕುಲೆನ ಮಿತ್ತ್ ನೇಮಕ ಮಲ್ತಿ ನಂಬಿಗೆದಾಯೆಲಾ ಬುದ್ಧಿವಂತೆಲಾ ಆದುಪ್ಪು ಆ ಬೇಲೆದಾಯೆ ಏರ್?</verse>
				<verse number="43">ಯಜಮಾನೆ ಪಿದಾಯಿ ಪೋದು ಬನ್ನಮುಟ್ಟ ಜವಾಬ್ದಾರಿಡ್ ಬೇಲೆ ಮಲ್ಪುನಾಯೆನೇ ಭಾಗ್ಯವಂತೆ.</verse>
				<verse number="44">ಅಂಚಿತ್ತಿನಾಯನ್ ಆಯೆ ತನ ಮಾತ ಆಸ್ತಿದ ಮಿತ್ತ್ ನೇಮಕ ಮಲ್ಪುವೆ,” ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="45">ಆಂಡ ಆ ಬೇಲೆದಾಯೆ ತನ ಯಜಮಾನೆ ಬರಿಯೆರೆ ತಡ ಮಲ್ಪುವೆ ಅಂದ್‌ದ್ ತನ ಉಡಲ್‌ಡ್ ಎನ್ನೊಂದು ಆಣ್ ಪೊಣ್ಣು ಬೇಲೆದಾಕುಲೆನ್ ಹಾಕಿಯೆರೆಗ್ಲಾ ತಿಂದ್‌ದ್ ಪರಿಯೆರೆಗ್ಲಾ ಸುರು ಮಲ್ತೆಡ</verse>
				<verse number="46">ಆಯೆ ಎನ್ನಂದಿ ದಿನೊಟ್ಲಾ ತೆರಿಯಂದಿ ಗಳಿಗೆಡ್ಲಾ ಆ ಬೇಲೆದಾಯನ ಯಜಮಾನೆ ಬತ್ತ್‌ದ್ ಆಯಗ್ ಭಯಂಕರ ಪೆಟ್ಟ್ ಕೊರ್ಪಾದ್ ನಂಬಿಕೆದಾಂತಿನಾಕುಲೆಗ್ ಆವೊಡಾಯಿ ಗತಿನ್ ಮಲ್ಪುವೆ.</verse>
				<verse number="47">“ತನ ಕರ್ತವನ ಚಿತ್ತೊನು ತೆರಿದಿ ಆ ಚಾಕ್ರಿದಾಯೆ ತಯಾರ್ ಮಲ್ಪಂದೆ ಪೋಂಡ ಅತ್ತ್‌ಡ ಆಯನ ಚಿತ್ತದ ಲೆಕ್ಕ ನಡತಿಜೆಡ ಬಾರಿ ಪೆಟ್ಟ್ ತಿನ್ಪೆ.</verse>
				<verse number="48">ತೆರಿಯಂದಿನಾಯೆ ಪೆಟ್ಟ್‌ಲೆಗ್ ಯೋಗ್ಯವಾಯಿನೆನ್ ನಡಪಾದ್ ಒಂತೆ ಪೆಟ್ಟ್ ತಿನ್ಪೆ. ಏರೆಗ್ ಹೆಚ್ಚಿಗೆ ಆದ್ ಕೊರ್ತುಂಡಾ ಆಯನ ಕಡೆಡ್ದ್ ಹೆಚ್ಚಿಗೆದೆನೇ ನಿರೀಕ್ಷೆ ಮಲ್ಪುಂಡು; ಉಂದತ್ತಂದೆ ಏರೆನ ಪಾಲ್‌ಗ್ ಹೆಚ್ಚಿಗೆ ಆದ್ ಒಪ್ಪಿಸಾದುಂಡಾ ಆಯನ ಕಡೆಡ್ದ್ ಐಡ್ದ್ ಹೆಚ್ಚಿಗೆದೆನೇ ಕೇನ್ವೆರ್.</verse>
				<verse number="49">“ಯಾನ್ ಭೂಮಿದ ಮಿತ್ತ್ ತೂನು ಪಾಡೊಡು ಅಂದ್‌ದ್ ಬತ್ತೆ; ಅವು ಈತ್‌ನೆಟ್ಟ ಅರ್ಲ್‌ದ್‌ಂಡ ಎಂಕ್ ಏತೋ ಸಂತೋಷ!</verse>
				<verse number="50">ಆಂಡ ಯಾನ್ ಅನುಭವ ಮಲ್ಪುನ ಒಂಜಿ ಕಷ್ಟದ ದೀಕ್ಷಾಸ್ನಾನ ಉಂಡು, ಅವು ಆಪಿನೆಟ್ಟ ಯಾನ್ ಏತೋ ಇಕ್ಕಟ್ಟ್‌ಡ್ ಉಲ್ಲೆ.</verse>
				<verse number="51">ಭೂಲೋಕೊಡು ಸಮಾಧಾನ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ಎನ್ನುವರಾ? ಐಕ್ ಬೈದಿಜಿ, ಭೇದ ಉಂಡು ಮಲ್ಪೆರೆ ಬೈದೆ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="52">ಎಂಚಂದ್ಂಡ ಇನಿಡ್ದ್ ಒಂಜೇ ಇಲ್ಲಡುಪ್ಪು ಐನ್ ಮಂದಿಲೆ ಉಲಯಿ ಇರ್ವೆರೆಗ್ ವಿರೋಧಾದ್ ಮೂವೆರ್. ಮೂವೆರಗ್ ವಿರೋಧಾದ್ ಇರ್ವೆರ್ ಒರಿ ಒರಿಯಗ್ ಭೇದ ಉಂಡಾಪುಂಡು.</verse>
				<verse number="53">ಮಗಕ್ಕ್ ವಿರೋಧಾದ್ ಅಮ್ಮೆ, ಅಮ್ಮೆರೆಗ್ ವಿರೋಧಾದ್ ಮಗೆ, ಮಗಲೆಗ್ ವಿರೋಧಾದ್ ಅಪ್ಪೆ, ಅಪ್ಪೆಗ್ ವಿರೋಧಾದ್ ಮಗಲ್. ಮರ್ಮಲೆಗ್ ವಿರೋಧಾದ್ ಮಾಮಿ, ಮಾಮಿಗ್ ವಿರೋಧಾದ್ ಮರ್ಮಲ್ ಇಂಚ ಒಂಜೇ ಇಲ್ಲಡ್ ಭೇದ ಉಂಡಾಪುಂಡು.”</verse>
				<verse number="54">ಬೊಕ್ಕ ಯೇಸು ಮಾತ ಜನೊಕುಲೆಗ್ ಪಂಡಿನಿ ದಾನೆಂದ್ಂಡ, “ಪಡ್ಡಯಿ ದಿಕ್ಕ್‌ಡ್ ಮುಗಲ್ ಲಕ್ಕುನೆನ್ ನಿಕುಲು ತೂಯಿ ಕೂಡ್ಲೆ ಗಾಳಿ ಬರ್ಸ ಬರ್ಪುಂಡು ಪನ್ಪರ್; ಅಂಚೆನೇ ಆಪುಂಡು.</verse>
				<verse number="55">ತೆನ್‌ಕಯಿ ದಿಕ್ಕ್‌ದ ಗಾಳಿ ಬೀಜ್‌ನಗ ಸೆಕೆ ಸುರು ಆಂಡ್ ಪನ್ಪರ್; ಅಂಚೆನೇ ಆಪುಂಡು.</verse>
				<verse number="56">ಕಪಟಿಲೇ, ನಿಕುಲು ಭೂಮಿ ಬಾನದ ಗುರ್ತೊನು ಪರೀಕ್ಷೆ ಮಲ್ಪೆರೆ ನಿಕ್ಲೆಗ್ ತೆರಿದುಪ್ಪುನಗ ಈ ಗಳಿಗೆನ್ ಪರೀಕ್ಷೆ ಮಲ್ಪೆರೆ ನಿಕ್ಲೆಗ್ ದಾಯೆಗ್ ಆಪುಜಿ?</verse>
				<verse number="57">“ಇಂಚಿತ್ತಿನವು ನೀತಿದವು, ಎಡ್ಡೆಂತಿನವು ಅಂದ್‌ದ್ ನಿಕುಲೇ ದಾಯೆ ತೀರ್ಪು ಮಲ್ತೊನುಜರ್?</verse>
				<verse number="58">ಈ ವಾದ ಮಲ್ಪುನಾಯಡೊಪ್ಪ ನ್ಯಾಯದ ಮುಖ್ಯಸ್ಥನಡೆ ಪೋವೊಂದುಪ್ಪುನಗ ಸಾದಿಡೇ ಆಯಡೊಪ್ಪ ರಾಜಿ ಮಲ್ತೊನುನೆಕ್ಕ್ ಪ್ರಯತ್ನ ಮಲ್ಪುಲ; ಇಜ್ಜಾಂಡ ಆಯೆ ನಿನನ್ ನ್ಯಾಯಾಧಿಪತಿನ ಕೈತಲ್‌ ಒಯ್ತೊಂದು ಪೋವೆ. ನ್ಯಾಯಾಧಿಪತಿ ನಿನನ್ ಸೆರೆಮನೆತ ಅಧಿಕಾರಿನ ವಶೊಕು ಒಚ್ಚಿದ್ ಕೊರಿಯೆರೆ ಯಾವು. ಸೆರೆಮನೆತ ಅಧಿಕಾರಿ ನಿನನ್ ಸೆರೆಮನೆಟ್ ಪಾಡ್ವೆ.</verse>
				<verse number="59">ಈ ಕಡೇ ಕಾಸ್‌ನ್ ಸಂದಾವು ಮುಟ್ಟ ಅಲ್ಪಡ್ದ್ ಪಿದಯಿ ಬರ್ಪಿನೇ ಇಜ್ಜಿ,” ಅಂದ್‌ದ್ ನಿಕ್ಕ್ ಪನ್ಪೆ.</verse>
			</chapter>
			<chapter number="13">
				<verse number="1">ಅವ್ವೆ ಪೊರ್ತುಡು ಕೆಲೆವೆರ್ ಯೇಸುನ ಕೈತಲ್ ಇತ್ತ್‌ದ್ ಪಿಲಾತೆ ಗಲಿಲಾಯದಾಕುಲೆನ ನೆತ್ತೆರ್‌ನ್ ಅಕುಲು ಬಲಿ ಕೊರಿನ ನೆತ್ತೆರ್‌ದ ಒಟ್ಟುಗು ಬೆರಕೆ ಮಲ್ತಿನೆನ್ ಯೇಸುಗು ತೆರಿಪಾಯೆರ್.</verse>
				<verse number="2">ಐಕ್ ಆಯೆ ಅಕ್ಲೆಗ್, “ಆ ಗಲಿಲಾಯದಾಕುಲು ಅಂಚಿತ್ತಿ ಮಾನ್ಯ ಕೆರ್ಪಿನೆನ್ ಅನುಭವ ಮಲ್ತಿನೆಡ್ದ್ ಅಕ್ಲೆನ್ ಮಾತೆರೆನ್ ಗಲಿಲಾಯದಾಕುಲೆಡ್ದ್ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ?</verse>
				<verse number="3">ಇಜ್ಜಿ, ಅಂಚ ಎನ್ನಡೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ಲಾ ಅಂಚೆನೇ ನಾಶಾದ್ ಪೋಪರ್, ಇಜ್ಜಿಡ, ಸಿಲೊವಾಮುಡು ಗೋಪುರ ಬೂರ್ದು ಸೈತಿ ಪದಿನೆಣ್ಮ ಜನೊಕುಲು ಯೆರೂಸಲೇಮುಡುಪ್ಪು ಮಾತ ನರಮಾನಿಲೆಡ್ದ್ ಮಲ್ಲ ಪಾಪಿಷ್ಟೆರ್ ಅಂದ್‌ದ್ ಎನ್ನುವರಾ?</verse>
				<verse number="4"></verse>
				<verse number="5">ಅಂಚ ಅತ್ತ್; ನಿಕ್ಲೆಗ್ ಪನ್ಪೆ, ಪಶ್ಚಾತಾಪ ಪಡೆಯಿಜರ್ಡ ನಿಕುಲು ಮಾತೆರ್ ಅಕ್ಲೆನ ಲೆಕ್ಕ ನಾಶಾದ್ ಪೋಪರ್,” ಅಂದ್‌ದ್ ಪಂಡೆ.</verse>
				<verse number="6">ಐಡ್ದ್ ಬೊಕ್ಕ ಆಯೆ ಒಂಜಿ ಉಪಕತೆನ್ ಪಂಡೆ ಅವು ದಾನೆಂದ್ಂಡ, “ಒರಿ ತನ ದ್ರಾಕ್ಷೆತೋಟೊಡು ಒಂಜಿ ಅಂಜೂರದ ಮರೊನು ನಡ್ಪಾದಿತ್ತೆ. ಐಟ್ಟ್ ಪರ್ಂದ್ ಉಂಡಾ ಅಂದ್‌ದ್ ನಾಡೊಂದು ಬತ್ತೆ. ಆಂಡ ಆಯಗ್ ತಿಕ್ಕಿಜಿ;</verse>
				<verse number="7">ಆಯೆ ತೋಟದ ಬೇಲೆದಾಯಡ, ‘ತೂಲ, ಯಾನ್ ಮೂಜಿ ವರ್ಸೊಡ್ಚಿಂಚಿ ಈ ಅಂಜೂರದ ಮರೊಟು ಪರ್ಂದ್ ನಾಡ್ಯೆ. ಆಂಡ ಎಂಕ್ ಇದ ಮುಟ್ಟ ತಿಕ್ಕ್‌ಜಿ. ಉಂದೆನ್ ಕಡ್ತ್‌ದ್ ಪಾಡ್; ಉಂದೆಡ್ದ್ ಭೂಮಿ ದಾಯೆ ಬಂಜೆ ಆವೊಡು,’ ಪಂಡ್ದ್ ಪಂಡೆ.</verse>
				<verse number="8">ಐಕ್ ಆ ಬೇಲೆದಾಯೆ, ‘ಕರ್ತವಾ, ಈ ವರ್ಸ ಉಂದೆನ್ ಬುಡ್ಕ; ಯಾನ್ ನೆತ್ತ ಸುತ್ತಲಾ ಗರ್ತ್‌ದ್ ಗೊಬ್ಬರ ಪಾಡುವೆ.</verse>
				<verse number="9">ದುಂಬಗ್ ಕಾಯಿ ತೋಜಿಜಿಂಡ ಅವೆನ್ ಕಡ್ತ್ ದಕ್ಕ್‌ಗ,’” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="10">ಸಬ್ಬತ್‌ದಿನೊಟು ಯೇಸು ಒಂಜಿ ಸಭಾಮಂದಿರೊಡು ಬೋಧನೆ ಮಲ್ತೊಂದಿತ್ತೆ.</verse>
				<verse number="11">ಅಲ್ಪ ಪದಿನೆಣ್ಮ ವರ್ಸೊಡ್ದಿಂಚಿ ದುರಾತ್ಮ ಪತ್ತ್‌ದಿತ್ತಿ ಒರ್ತಿ ಪೊಂಜೊವು ಇತ್ತಲ್. ಆಲ್ ಬಗ್ಗ್‌ದ್ ಪೋದು, ಸೊಂಟ ಸರ್ತ ಮಲ್ಪೆರೆ ಆವೊಂದು ಇಜ್ಜಾಂಡ್.</verse>
				<verse number="12">ಯೇಸು ಆಲೆನ್ ತೂದು ಕೈತಲ್‌ ಲೆತ್ತ್‌ದ್ ಆಲೆಗ್, “ಅಮ್ಮಾ, ನಿಕ್ಕ್ ಸೀಕ್‌ಡ್ದ್ ಬುಡುಗಡೆ ಆಂಡ್,” ಪಂಡ್ದ್ ಆಲೆನ ಮಿತ್ತ್ ಕೈ ದೀಯೆ;</verse>
				<verse number="13">ದೀಯಿ ಕೂಡ್ಲೆ ಆಲ್ ಸರ್ತ ಆಯಲ್, ದೇವೆರೆನ್ ಪುಗರಿಯಲ್.</verse>
				<verse number="14">ಆ ಸಭಾಮಂದಿರದ ಅಧಿಕಾರಿ ನಡತಿ ಸಂಗತಿನ್ ತೂದು ಸಬ್ಬತ್‌ದಿನೊಟು ಯೇಸು ಸೀಕ್‌ಲೆನ್ ಗುಣ ಮಲ್ಪುವೆ ಅಂದ್‌ದ್ ಕೋಪೊಡು ಜನೊಕುಲೆಡ, “ಬೇಲೆ ಮಲ್ಪರೆ ಆಜಿ ದಿನೊಕುಲು ಉಂಡು; ಆ ದಿನೊಲೆಡೇ ನಿಕ್ಲೆನ ಸೀಕ್‌ಲೆನ್ ಗುಣ ಮಲ್ತೊನ್ಲೆ. ಸಬ್ಬತ್‌ದಿನೊಟು ಮಾತ್ರ ಬೊಡ್ಚಿ!” ಅಂದ್‌ದ್ ಪಂಡೆ.</verse>
				<verse number="15">ಆ ಪಾತೆರೊನು ಕೇಂಡ್ದ್ ಕರ್ತವೆ ಅಕ್ಲೆಗ್, “ನಿಕುಲು ಕಪಟಿಲು, ನಿಕ್ಲೆಡ್ ಪ್ರತಿಯೊರಿಲಾ ಸಬ್ಬತ್‌ದಿನೊಟು ತನ ಬೋರಿನಾವಡ್ ಕತ್ತೆನಾವಡ್ ಬೈಪಣೆಡ್ದ್ ಗಿರ್ತ್‌ದ್ ನೀರ್ ಪರಿಯೆರೆಗಾದ್ ಕೊನೊಪರತ್ತಾ.</verse>
				<verse number="16">ಅಂಚಾಂಡ ಪದಿನೆಣ್ಮ ವರ್ಸೊಡ್ದಿಂಚಿ ಸೈತಾನನ ಬಂಧನೊಡು ಇತ್ತಿನಾಲಾದ್ ಅಬ್ರಹಾಮುನ ವಂಶದಾಲಾದುಪ್ಪು ಆಲೆನ್ ಸಬ್ಬತ್‌ದಿನೊಟು ಈ ಕಷ್ಟೊಡ್ದು ಬುಡ್ಪಾವೆರೆ ಬಲ್ಲಿಯಾ?” ಪಂಡೆ</verse>
				<verse number="17">ಈ ಪಾತೆರೊಲೆನ್ ಆಯೆ ಪನೊಂದುಪ್ಪುನಗ ಆಯನ ಮಾತ ಪಗೆಮಾನಿಲೆಗ್ ನಾಚಿಗೆ ಆಂಡ್; ಅಲ್ಪ ಸೇರ್ದಿತ್ತಿ ಜನೊಕುಲು ಮಾತೆರ್ಲಾ ಆಯಡ್ದ್ ಆಪಿನ ಮೈಮೆದ ಕಾರ್ಯೊಲೆನ್ ತೂದು ಸಂತೋಷ ಪಡೆಯೆರ್.</verse>
				<verse number="18">ಬೊಕ್ಕ ಆಯೆ ಪಂಡಿನಿ, “ದೇವೆರೆ ರಾಜ್ಯ ಒಯಿಕ್ ಸಮ ಆದುಂಡು?</verse>
				<verse number="19">ಅವೆನ್ ಯಾನ್ ಒಯಿಕ್ ಸಮ ಮಲ್ಪೊಲಿ? ಅವು ದಾಸೆಮಿದ ಬಿತ್ತ್‌ಗ್ ಸರಿ ಆದುಂಡು. ಒರಿ ನರಮಾನಿ ಅವೆನ್ ದೆತ್ತೊಂದು ಪೋದು ತನ ತೋಟೊಡು ಬಿತ್ತಿಯೆ; ಅವು ಮಲ್ಲ ಮರ ಆದ್ ಬಾನೊಡು ರಾಪಿನ ಪಕ್ಕಿಲು ಐತ ಗೆಲ್ಲ್‌ಲೆಡ್ ಗೂಡು ಕಟ್ಟ್‌ದ್ ವಾಸ ಮಲ್ಪುವ.”</verse>
				<verse number="20">ಬೊಕ್ಕ ಆಯೆ, “ದೇವೆರೆ ರಾಜ್ಯೊನು ಕುಡ ಒಯಿಕ್ ಸಮ ಮಲ್ಪೊಲಿ ಅಂದ್‌ದ್ ಪನ್ನಗ</verse>
				<verse number="21">ಅವು ಪುಳಿ ಬಂದೊಗು ಸಮ ಆದುಂಡು. ಅವೆನ್ ಒಂಜಿ ಪೊಂಜೊವು ದೆತ್ತೊಂದು ಮೂಜಿ ಸೇರ್ ಬಂದೊಡು ಕಲತ್ ದೀಯಿನಪಗ ಆ ಬಂದ ಮಾತ ಪುಳಿ ಆಂಡ್ ಪಂಡೆ.”</verse>
				<verse number="22">ಯೇಸು ಊರೂರುಗ್ಲಾ ಗ್ರಾಮಗ್ರಾಮೊಗ್ಲಾ ಪೋದು ಬೋಧನೆ ಮಲ್ತೊಂದು ಯೆರೂಸಲೇಮುದಂಚಿ ಪೋವೊಂದಿತ್ತೆ.</verse>
				<verse number="23">ಅಪಗ ಒರಿ, “ಸ್ವಾಮಿ, ರಕ್ಷಣೆ ಹೊಂದುನಾಕುಲು ಒಂತೆ ಜನೊಕುಲು ಮಾತ್ರನಾ?” ಅಂದ್‌ದ್ ಕೇನ್ನಗ</verse>
				<verse number="24">ಆಯೆ ಅಕ್ಲೆಗ್, “ಇಕ್ಕಟ್ಟಾಯಿ ಬಾಕಿಲ್‌ಡ್ದ್ ಉಲಯಿ ಪೋವೆರೆ ಪೇಚಾಡ್ಲೆ. ದಾಯೆಗಂದ್ಂಡ ಮಸ್ತ್ ಜನ ಉಲಯಿ ಪೋವೆರೆ ತೂಪೆರ್, ಆಂಡ ಅಕ್ಲೆಡ್ದ್ ಪೋವೆರೆ ತೀರಂದ್ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="25">ಇಲ್ಲದ ಧನಿ ಬಾಕಿಲ್ ಮುಚ್ಚಿ ಬೊಕ್ಕ ನಿಕುಲು ಪಿದಯಿ ಉಂತುದು ಬಾಕಿಲ್ ಬೊಟ್ಟೊಂದು ಕರ್ತವಾ, ‘ಎಂಕ್ಲೆಗ್ ಬಾಕಿಲ್ ಜಪ್ಪುಲೆ!’ ಅಂದ್‌ದ್ ಪನ್ನಗ ಆಯೆ ಉತ್ತರ ಕೊರ್ದು, ‘ನಿಕುಲು ಒಲ್ತಾಕುಲು, ನಿಕ್ಲೆನ ಗುರ್ತ ಎಂಕ್ ಗೊತ್ತಿಜ್ಜಿ,’ ಅಂದ್‌ದ್ ಪನುವೆ,</verse>
				<verse number="26">ಐಕ್ ನಿಕುಲು, ‘ಎಂಕುಲು ನಿನಡೊಪ್ಪ ಉನ್ತ, ಪರ್ತ, ಎಂಕ್ಲೆನ ಊರುಡು ಈ ಬೋಧನೆ ಮಲ್ತ್‌ದ,’ ಅಂದ್‌ದ್ ಪನಿಯೆರೆ ಸುರು ಮಲ್ಪುವರ್.</verse>
				<verse number="27">ಆಂಡ ಆಯೆ ನಿಕುಲು ಏರಾ, ‘ನಿಕ್ಲೆನ ಗುರ್ತ ಎಂಕಿಜ್ಜಿ, ಅನ್ಯಾಯ ಮಲ್ಪುನಾಕುಲೇ ನಿಕುಲು ಮಾತೆರ್ಲಾ ಎನನ್ ಬುಡ್ದು ಪೋಲೆ!’ ಅಂದ್‌ದ್ ಪನ್ಪೆ.</verse>
				<verse number="28">ಅಬ್ರಹಾಮು, ಇಸಾಕ್ ಯಾಕೋಬು ಬೊಕ್ಕ ಮಾತ ಪ್ರವಾದಿಲುಲಾ ದೇವೆರೆ ರಾಜ್ಯೊಡು ಉಪ್ಪುನೆನ್, ನಿಕ್ಲೆನ್ ಮಾತ್ರ ಪಿದಯಿ ಪಾಡ್ದಿನೆನ್ ನಿಕುಲು ತೂನಗ ನಿಕ್ಲೆಗ್ ಅಲ್ಪ ಅರಬಾಯಿಲಾ ಕೂಲಿ ಕಡೆಪಿನವುಲಾ ಉಪ್ಪುಂಡು.</verse>
				<verse number="29">ಮೂಡಯಿ ಪಡ್ಡಯಿ ಬಡಕಯಿ ತೆನ್‌ಕಯಿ ದಿಕ್ಕ್‌ಲೆಡ್ದ್ ಜನೊಕುಲು ಬತ್ತ್‌ದ್ ದೇವೆರೆ ರಾಜ್ಯೊಡು ವಣಸ್‌ಗ್ ಕುಲ್ಲುವೆರ್.</verse>
				<verse number="30">ಇಂದಾ, ಕಡೆಟ್ಟ್ ಇತ್ತಿನಾಕುಲು ಸುರುತ್ತಾಕುಲು ಆಪೆರ್ ಬೊಕ್ಕ ಸುರುಟಿತ್ತಿನಾಕುಲು ಕಡೆತ್ತಾಕುಲು ಆಪೆರ್.”</verse>
				<verse number="31">ಅವ್ವೆ ಗಳಿಗೆಡ್ ಕೆಲವು ಜನ ಪರಿಸಾಯೆರ್ ಕೈತಲ್‌ ಬತ್ತ್‌ದ್, “ಯೇಸುಗು ಈ ಮುಲ್ತುಡ್ದು ಪಿದಾಡ್ದ್ ಪೋ. ದಾಯೆಗಂದ್ಂಡ ಹೆರೋದೆ ನಿನನ್ ಕೆರೊಡು ಅಂದ್‌ದ್ ಉಲ್ಲೆ,” ಅಂದ್‌ದ್ ಪಂಡೆರ್.</verse>
				<verse number="32">ಐಕ್ ಯೇಸು, “ನಿಕುಲು ಪೋಲೆ, ‘ಯಾನ್ ಇನಿಲಾ ಎಲ್ಲೆಲಾ ದೆವ್ವ ಪತ್ತ್‌ದಿನಕುಲೆನ್ ಬುಡ್ಪಾವೊಂದು ಸೀಕ್‌ಲೆನ್ ಗುಣ ಮಲ್ತೊಂದು ಇತ್ತ್‌ದ್ ಮೂಜನೇ ದಿನೊಟು ಬೇಲೆ ಪೂರ್ತಿ ಮಲ್ತ್‌ದ್ ಬರ್ಪೆ,’ ಅಂದ್‌ದ್ ಆ ಕುದ್‌ಕಗ್ ಪನ್ಲೆ.</verse>
				<verse number="33">ಎಂಚಲಾ ಯಾನ್ ಇನಿ ಎಲ್ಲೆ ಎಲ್ಲೆಂಜಿ ಮುಲ್ಪನೇ ಪ್ರಯಾಣ ಮಲ್ಪೊಡು; ಪ್ರವಾದಿ ಆದುಪ್ಪುನಾಯೆ ಯೆರೂಸಲೇಮು ಅತ್ತಂದೆ ಬೇತೆ ಓಲುಲಾ ಕೆರ್ಪಾವುನುನವು ಸಮ ಅತ್ತ್.</verse>
				<verse number="34">“ಯೆರೂಸಲೇಮೋ, ಯೆರೂಸಲೇಮೋ ಪ್ರವಾದಿಲೆ ಪ್ರಾಣ ದೆಪ್ಪುನಾಲೇ, ದೇವೆರ್ ನಿನ ಕೈತಲ್‌ ಕಡಪುಡ್ದು ಕೊರ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರ್ಪಿನಾಲೇ, ಕೋರಿ ತನ ಕಿನ್ನಿಲೆನ್ ರೆಂಕೆದ ಅಡಿಟ್ಟ್ ಕುಲ್ಲಾವುಲೆಕ್ಕ ನಿನ ಜೋಕುಲೆನ್ ಕುಲ್ಲಾಯೆರೆ ಎಂಕ್ ಏತೋ ಸರ್ತಿ ಮನಸಿತ್ತ್‌ಂಡ್. ಆಂಡ ನಿಕ್ಲೆಗ್ ಮನಸ್‌ದಾಂತೆ ಪೋಂಡು.</verse>
				<verse number="35">ತೂಲೇ, ನಿಕ್ಲೆನ ಆಲಯ ಕಾಲಿ ಆದ್ ಬೂರ್ದುಂಡು. ‘ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ,’ ಪಂಡ್ದ್ ಪನ್ಪಿನ ಮುಟ್ಟ ನಿಕುಲು ಎನನ್ ತೂಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ.</verse>
			</chapter>
			<chapter number="14">
				<verse number="1">ಯೇಸು ಒಂಜಿ ಸಬ್ಬತ್‌ದಿನೊಟು ಒರಿ ಪರಿಸಾಯೆರೆ ಮುಖ್ಯಸ್ಥೆರೆನ ಇಲ್ಲಡೆಗ್ ವಣಸ್‌ಗ್ ಪೋದುಪ್ಪುನಗ, ಅಕುಲು ಆಯನ್ ನೋಟ ದೀದ್ ತೂವೊಂದಿತ್ತೆರ್.</verse>
				<verse number="2">ಅಪಗ ಯೇಸುನ ಎದುರು ಒರಿ ಮೆಯಿಟ್ ನೀರ್ ದಿಂಜಿದ್‌ ಬಾತ್ ಪೋತಿನಾಯನ್ ತೂದು,</verse>
				<verse number="3">“ಸಬ್ಬತ್‌ದಿನೊಟು ಗುಣ ಮಲ್ಪುನವು ಸರಿಯಾ?” ಅಂದ್‌ದ್ ಯೇಸು ನ್ಯಾಯಶಾಸ್ತ್ರಿಲೆಡಲಾ ಪರಿಸಾಯೆರೆಡಲಾ ಕೇಂಡೆ.</verse>
				<verse number="4">ಅಕುಲು ಪಾತೆರಂದೆ ಉಪ್ಪುನಗ ಸೀಕ್‌ದಾಯನ ಕೈ ಪತ್ತ್‌ದ್ ಗುಣ ಮಲ್ತ್‌ದ್ ಕಡಪುಡಿಯೆ.</verse>
				<verse number="5">ಬೊಕ್ಕ ಅಕ್ಲೆಡ, “ನಿಕ್ಲೆನ ಮಗೆ ಆವಡ್ ಬೋರಿ ಆವಡ್ ಸಬ್ಬತ್‌ದಿನೊಟು ಗುವೆಲ್‌ಗ್ ಬೂರುಂಡ, ಆಯೆ ಅವೆನ್ ಅಪಗನೆ ಮಿತ್ತ್ ದೆಪ್ಪಂದೆ ಅವುಲೇ ಬುಡ್ಪೆನಾ,” ಅಂದ್‌ದ್ ಕೇಂಡೆ.</verse>
				<verse number="6">ಐಕ್ ಅಕ್ಲೆಗ್ ಉತ್ತರ ಕೊರಿಯೆರೆ ತೀರಂದೆ ಮನಿಪಂದೆ ಇತ್ತೆರ್.</verse>
				<verse number="7">ವಣಸ್‌ಗ್ ಬತ್ತಿನಾಕುಲು ಪಂತೆದ ಸುರುತ್ತ ಸಾಲ್‌ನ್ ಅಜತ್‌ದ್ ದೆತ್ತೊನೊನೆನ್ ಯೇಸು ತೂದು ಒಂಜಿ ಉಪಕತೆನ್ ಮಾತೆರೆಗ್ಲಾ ಪಂಡೆ:</verse>
				<verse number="8">“ಏರಾಂಡಲಾ ನಿನನ್ ಮದ್ಮೆದ ವಣಸ್‌ಗ್ ಲೆತ್ತ್‌ಂಡ ಪಂತೆಡ್ ಸುರುತ್ತ ಸಾಲ್‌ಡ್ ಕುಲ್ಲೊಡ್ಚಿ. ಒಂಜಿ ವೇಳೆ ನಿನಡ್ದ್ ಹೆಚ್ಚ್ ಮಾನ ಇತ್ತಿನಾಯನ್ ಆಯೆ ಲೆತ್ತ್‌ದುಪ್ಪೆರೆ ಯಾವು.</verse>
				<verse number="9">ಬೊಕ್ಕ ನಿನನ್ಲಾ ಆಯನ್ಲಾ ಲೆತ್ತಿನಾಯೆ ಬತ್ತ್‌ದ್, ‘ಉಂಬ್ಯಗ್ ಜಾಗ್ ಬುಡು,’ ಅಂದ್‌ದ್ ನಿಕ್ಕ್ ಪನ್ನಗ ಈ ನಾಚಿಗೆಡ್ ಕಡೆತ ಸಾಲ್‌ಡ್ ಕುಲ್ಲರೆ ಪೋಪ.</verse>
				<verse number="10">ಆಂಡ ಏರಾಂಡಲಾ ನಿಕ್ಕ್ ಲೆಪ್ಪು ಕೊರ್ನಗ ಈ ಪೋದು ಕಡೆತ ಸಾಲ್‌ಡ್ ಕುಲ್ಲುಲ; ಅಪಗ ಲೆತ್ತಿನಾಯೆ ನಿನನ್ ತೂದು, ‘ಸ್ನೇಹಿತಾ, ಎದುರು ಬತ್ತ್‌ದ್ ಕುಲ್ಲ ಪನ್ಪೆ,’ ಅಪಗ ನಿನ ಜತೆಟ್ ಕುಲ್ಲುದಿತ್ತಿನಾಕುಲೆನ ಎದುರುಡು ನಿಕ್ಕ್ ಮಾನ ತಿಕ್ಕುಂಡು.</verse>
				<verse number="11">ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.”</verse>
				<verse number="12">ಆಯೆ ತಾನ್ ವಣಸ್‌ಗ್ ಲೆತ್ತಿನಾಯಗ್ಲಾ ಒಂಜಿ ಪಾತೆರ ಪಂಡೆ, “ಒಂಜಿ ವೇಳೆ ಈ ಮಧ್ಯಾಹ್ನದ ವಣಸ್‌ಗ್ ಅತ್ತ್‌ಡ ಬೈಯದ ವಣಸ್‌ಗ್ ನಿನ ಸ್ನೇಹಿತನಾವಡ್ ನಿನ ಪಲಯೆ ಮೆಗ್ಯಾಡ್ಲೆನಾವಡ್ ನಿನ ಕುಟುಂಬದಾಕುಲೆನಾವಡ್ ಸಂಪೊತ್ತು ಇತ್ತಿ ನಿರೆಕರೆತಾಕುಲೆನಾವಡ್ ಲೆಪ್ಪಡ. ಅಕುಲುಲಾ ಪಿರ ನಿನನ್ ಲೆಪ್ಪೆರ್.</verse>
				<verse number="13">ಆಂಡ ಈ ವಣಸ್‌ಗ್ ಲೆಪ್ಪುನಗ ಬಡವೆರ್, ಕೈಕಾರ್ ದಾಂತಿನಾಕುಲು, ಕುಂಟೆರ್, ಕುರುಡೆರ್, ಇಂಚಿತ್ತಿನಾಕುಲೆನ್ ಲೆಪ್ಪು.</verse>
				<verse number="14">ಅಕುಲು ನಿಕ್ಕ್ ಸಂದಾಯೊಗು ಸಂದಾಯ ಮಲ್ಪೆರೆ ದಾಲಾದಾಂತಿನಾಕುಲು ಆದಿತ್ತ್‌ಂಡಲಾ ನೀತಿವಂತೆರ್ ಜೀವ ಆದ್ ಲಕ್ಕ್‌ದ್ ಬನ್ನಗ ನಿಕ್ಕ್ ಸಂದಾಯೊಗು ಸಂದಾಯ ತಿಕ್ಕಂದಿನೆಡ್ದ್ ಈ ಭಾಗ್ಯವಂತೆ ಆಪ.” ಪಂಡೆ.</verse>
				<verse number="15">ವಣಸ್‌ಗ್ ಕುಲ್ಲುದಿತ್ತಿನಾಕುಲೆಡ್ ಒರಿ ಈ ಪಾತೆರೊನು ಕೇಂಡ್ದ್ ಯೇಸುಡ, “ದೇವೆರೆ ರಾಜ್ಯೊಡು ವಣಸ್ ಮಲ್ಪುನಾಕುಲು ಭಾಗ್ಯವಂತೆರ್,” ಅಂದ್‌ದ್ ಪನ್ನಗ</verse>
				<verse number="16">ಯೇಸು ಆಯಗ್ ಪಂಡಿನಿ, “ಒರಿ ನರಮಾನಿ ಮಲ್ಲ ಲೇಸ್ ಮಲ್ತ್‌ದ್ ಮಸ್ತ್ ಜನೊಕುಲೆನ್ ವಣಸ್‌ಗ್ ಲೆಪ್ಪುವೆ.</verse>
				<verse number="17">ಲೇಸ್‌ದ ವಣಸ್‌ದ ಪೊರ್ತುಗು ಆಯೆ ವಣಸ್‌ಗ್ ಲೆತ್ತಿನಾಕುಲೆನ್, ‘ಬಲ್ಲೆ, ವಣಸ್ ತಯಾರಾತ್ತ್‌ಂಡ್,’ ಅಂದ್‌ದ್ ಲೆಪ್ಪೆರೆ ತನ ಬೇಲೆದಾಯನ್ ಕಡಪುಡಿಯೆ.</verse>
				<verse number="18">ಆಂಡ ಅಕುಲು ಒರಿಯಡ್ದ್ ಒರಿ ಬರಿಯೆರೆ ಆಪುಜಿ ಅಂದ್‌ದ್ ಅಡ್ಡಿ ಪನಿಯೆರೆ ಸುರು ಮಲ್ತೆರ್. ಸುರುತ್ತಾಯೆ ಆ ಬೇಲೆದಾಯಡ, ‘ಯಾನ್ ಪೊಸ ಕಂಡೊನು ಕ್ರಯೊಕು ದೆತ್ತೊಂದೆ; ಎಂಕ್ ಅವೆನ್ ತೂದು ಬರೊಡು; ಎಂಕ್ ಮಾಪು ಮಲ್ಪೊಡು, ಯಾನ್ ಬರ್ಪುಜಿ, ಅಂದ್‌ದ್ ನಿನಡ ನಟ್ಟೊನ್ವೆ,’ ಪಂಡೆ.</verse>
				<verse number="19">ಬೊಕ್ಕೊರಿ, ‘ಯಾನ್ ಐನ್ ಜೋಡಿ ಬೋರಿಲೆನ್ ಕ್ರಯೊಕು ದೆತ್ತೊಂದೆ, ಅವೆನ್ ಪರೀಕ್ಷೆ ಮಲ್ಪೆರೆ ಪೋಪೆ, ಎಂಕ್ ಬರಿಯೆರೆ ಆಪುಜಿ, ಎನನ್ ಮಾಪು ಮಲ್ಪೊಡು ಅಂದ್‌ದ್ ನಿನಡ ನಟ್ಟೊನ್ವೆ,’ ಪಂಡೆ.</verse>
				<verse number="20">ನನೊರಿ, ‘ಎಂಕ್ ಮದ್ಮೆ ಆತ್ಂಡ್, ಐಡ್ದಾವರ ಎಂಕ್ ಬರಿಯೆರೆ ಆಪುಜಿ.’ ಅಂದ್‌ದ್ ಪನ್ಲ ಪಂಡೆ.</verse>
				<verse number="21">ಆ ಬೇಲೆದಾಯೆ ಬತ್ತ್‌ದ್ ತನ ಯಜಮಾನಗ್ ಈ ಸಂಗತಿಲೆನ್ ತೆರಿಪಾನಗ ಇಲ್ಲದ ಯಜಮಾನೆ ಕೋಪೊಡು ಬೇಲೆದಾಯಗ್, ‘ಈ ಇತ್ತೆನೇ ಊರುದ ಸಾದಿಲೆಗ್ ಓಣಿ ಒರ್ಕುಗು ಪೋದು ಬಡವೆರ್, ಕುರುಡೆರ್, ಕಣ್ಣ್ ಕೈಕಾರ್ ದಾಂತಿನಾಕುಲೆನ್ ಇಡೆಗ್ ಲೆತ್ತೊಂದು ಬಲ.’ ಅಂದ್‌ದ್ ಪಂಡೆ.</verse>
				<verse number="22">ಬೊಕ್ಕ ಆ ಬೇಲೆದಾಯೆ ಯಜಮಾನಗ್, ‘ಈರ್ ಅಪ್ಪಣೆ ಕೊರಿ ಲೆಕ್ಕ ಮಲ್ತೆ ಆಂಡ ನನಲಾ ಜಾಗ್ ಉಂಡು,’ ಪಂಡೆ.</verse>
				<verse number="23">ಅಪಗ ಆ ಯಜಮಾನೆ ತನ ಬೇಲೆದಾಯಗ್, ‘ಈ ಸಾದಿಲೆಗ್ಲಾ ಬೇಲಿಲೆಗ್ಲಾ ಪೋದು ಅಲ್ಪ ತಿಕ್ಕಿನಾಕುಲೆನ್ ಒತ್ತಾಯೊಡು ಲೆತ್ತೊಂದು ಬಲ. ಎನ ಇಲ್ಲ್ ದಿಂಜಡ್.</verse>
				<verse number="24">ಆಂಡ ವಣಸ್‌ಗ್ ಲೆಪ್ಪುನಗ ಬರಂದೆ ಅಡ್ಡಿ ಪಂಡಿನಾಕುಲು ಒರಿಲಾ ಯಾನ್ ಮಲ್ಪಾದಿನ ಅಟಿಲ್‌ದ ರುಚಿ ತೂವರೆ ಬಲ್ಲಿ ಅಂದ್‌ದ್ ನಿಕ್ಲೆಗ್ ತೆರಿದುಪ್ಪಡ್.’” ಪಂಡೆ.</verse>
				<verse number="25">ಮಸ್ತ್ ಜನೊಕುಲು ಗುಂಪುಗುಂಪಾದ್ ಯೇಸುನ ಒಟ್ಟುಗು ಪೋವೊಂದುಪ್ಪುನಗ ಆಯೆ ತಿರ್ಗ್‌ದ್ ಅಕ್ಲೆಗ್ ಪಂಡಿನಿ ದಾನೆಂದ್ಂಡ</verse>
				<verse number="26">“ಎನ ಕೈತಲ್‌ ಬತ್ತ್‌ದ್ ತನ ಅಪ್ಪೆ, ಅಮ್ಮನ್ ಬೊಡೆದಿ ಜೋಕುಲು ಪಲಯೆ ಮೆಗ್ಯಾಡ್ಲು ಪಲ್ದಿ ಮೆಗ್ದಿಯಾಡ್ಲೆನ್ ಮೊಕ್ಲೆನ್ಲಾ ತನ ಜೀವೊನ್ಲಾ ಪಗೆ ಮಲ್ಪುಜೆಡ ಆಯೆ ಎನ ಶಿಷ್ಯೆ ಆವೆರೆ ಸಾದ್ಯ ಇಜ್ಜಿ.</verse>
				<verse number="27">ಏರಾಂಡಲಾ ತನ ಕ್ರುಸ್ಸುನು ತುಂಬೊಂದು ಎನ ಬೆರಿಯೆ ಬರ್ಪುಜೆನಾ, ಆಯೆ ಎನ ಶಿಷ್ಯೆ ಆವಯೆ.</verse>
				<verse number="28">ನಿಕ್ಲೆಡ್ ಏರಾಂಡಲಾ ಒಂಜಿ ಗೋಪುರೊನು ಕಟ್ಟಾವೊಡು ಅಂದ್‌ದ್ ಎನ್ನ್ಂಡ ಆಯೆ ಸುರುಟ್ಟು ಕುಲ್ಲೊಂದು ಐಕ್ ಏತ್ ಕರ್ಚಿ ತಾಗು, ಅವೆನ್ ಮಲ್ತ್‌ದ್ ಮುಗಿಪಾವುನಾತ್ ಕಾಸ್ ಎನಡ ಉಂಡಾ ಅಂದ್‌ದ್ ಲೆಖ್ಖ ಪಾಡುಜೆನಾ?</verse>
				<verse number="29">ಇಂಚ ಲೆಖ್ಖ ಪಾಡಂದೆ ಐಕ್ ಅಡಿಪಾಯ ಪಾಡಿ ಬೊಕ್ಕ ಆ ಬೇಲೆನ್ ಮಲ್ಪೆರೆ ತೀರಂದೆ ಪೋಂಡ ತೂಪಿನಾಕುಲು ಇಂಬೆ ಮಲ್ಲ ಜನತ್ತಲೆಕ್ಕ</verse>
				<verse number="30">‘ಗೋಪುರ ಕಟ್ಟಾವೆರೆ ಪಿದಾಡ್ದ್ ಕೊಡಿ ಎತ್ತಾವೆರೆ ತೀರಂದೆ ಪೋಯೆ,’ ಅಂದ್‌ದ್ ತಮಾಷೆ ಮಲ್ಪೆರ್.</verse>
				<verse number="31">ಇಂಚಾಂಡ ವಾ ಅರಸು ಆಂಡಲಾ ಬೊಕ್ಕೊರಿ ಅರಸು ಮಿತ್ತ್ ಲಡಯಿ ಮಲ್ಪೆರೆ ಪೋನಗ ತನಡೊಪ್ಪ ಪತ್ತ್ ಸಾರ ಮಂದಿಲೆ ದಂಡ್‌ಲೆನ್ ದೆತ್ತೊಂದು ಬೊಕ್ಕೊರಿಯನ ಇರ್ವ ಸಾರ ಮಂದಿಲೆ ದಂಡ್ ಬರ್ಪಿನೆನ್ ತೂನಗ ಆಯಡೊಪ್ಪ ಲಡಯಿ ಮಲ್ಪೆರೆ ಎಂಕ್ ಸಾದ್ಯನಾ ಅಂದ್‌ದ್ ಕುಲ್ಲೊಂದು ಆಲೋಚನೆ ಮಲ್ಪುಜೆನಾ?</verse>
				<verse number="32">ತನ್ಕ್ ಲಡಯಿ ಮಲ್ಪೆರೆ ಶಕ್ತಿದಾಂತೆ ಪೋನಗ, ಲಡಯಿಗ್ ಬರ್ಪಿ ರಾಜೆ ನನಲಾತ್ ದೂರೊಡು ಉಪ್ಪುನಗನೇ ದೂತೆರೆನ್ ಕಡಪುಡ್ದು ಸಮಾಧಾನೊಡು ಒಪ್ಪಂದ ಮಲ್ತೊನ್ವೆ.”</verse>
				<verse number="33">“ಅಂಚೆನೇ ನಿಕ್ಲೆಡ್ ಏರೇ ಆವಡ್ ತನಡ ಇತ್ತಿನೆನ್ ಮಾತೆನ್ ಬುಡ್ದು ಬುಡಂದೆ ಪೋಂಡ ಆಯೆ ಎನ ಶಿಷ್ಯೆ ಆವಯೆ,” ಪಂಡ್ದ್ ಮುಗಿತೆ.</verse>
				<verse number="34">“ಉಪ್ಪು ಎಡ್ಡೆಂತಿನವು, ಆಂಡ ಉಪ್ಪು ಚಪ್ಪೆ ಆದ್ ಪೋಂಡ ಐಕ್ ಒಯಿಡ್ದ್ ರುಚಿ ಮಲ್ಪೆರೆ ಸಾದ್ಯ?</verse>
				<verse number="35">ಅವು ಭೂಮಿಗಾವಡ್ ಗೊಬ್ಬರೊಗಾವಡ್ ಬಳಕೆ ಆಯಿಜಿಡ ಅವೆನ್ ಪಿದಯಿ ದಕ್ಕುವೆರ್. ಕೇನಿಯೆರೆ ಕೆಬಿ ಇತ್ತಿನಾಯೆ ಕೇನಡ್,” ಅಂದ್‌ದ್ ಪಂಡೆ.</verse>
			</chapter>
			<chapter number="15">
				<verse number="1">ಯೇಸುನ ಬೋಧನೆನ್ ಕೇನಿಯೆರೆ ಮಸ್ತ್ ಸುಂಕದಾಕುಲುಲಾ ಪಾಪಿಲುಲಾ ಆಯನ ಕೈತಲ್‌ ಬರೊಂದಿತ್ತೆರ್.</verse>
				<verse number="2">ಉಂದೆನ್ ತೂದು ಪರಿಸಾಯೆರ್‌ಲಾ ಶಾಸ್ತ್ರಿಲುಲಾ, “ಉಂಬೆ ಪಾಪಿಲೆನ್ ಸೇರಾವೊಂದು ಅಕ್ಲೆಡೊಪ್ಪ ವಣಸ್ ಮಲ್ಪುವೆ,” ಅಂದ್‌ದ್ ಗುಣುಗುಟೊಂದಿತ್ತೆರ್.</verse>
				<verse number="3">ಅಪಗ ಯೇಸು ಅಕ್ಲೆಗ್ ಒಂಜಿ ಉಪಕತೆನ್ ಪಂಡೆ.</verse>
				<verse number="4">ಅವು ದಾನೆಂದ್ಂಡ, “ನಿಕ್ಲೆಡ್ ಒರಿ ನರಮಾನಿಗ್ ನೂದು ಕುರಿಕುಲು ಉಪ್ಪುನಗ ಐಟ್ಟ್ ಒಂಜಿ ಕುರಿ ತತ್ತ್‌ದ್ ಪೋಂಡ ಆಯೆ ಸೊನ್ಪತೊಂರ್ಬೊನು ಕಾಡ್‌ಡ್ ಬುಡ್ದು ತತ್ತ್ ಪೋಯಿ ಕುರಿ ತಿಕ್ಕುನೆಟ್ಟ ನಾಡೊಂದು ಪೋಪುಜೆನಾ?</verse>
				<verse number="5">ತಿಕ್ಕಿಬೊಕ್ಕ ಆಯೆ ಸಂತೋಷೊಡು ಅವೆನ್ ತನ ಪುಗೆಲ್‌ಡ್ ದೀವೊಂದು</verse>
				<verse number="6">ಇಲ್ಲಗ್ ಬತ್ತ್‌ದ್ ಸ್ನೇಹಿತೆರೆನ್‌ ನಿರೆಕರೆತಾಕುಲೆನ್ ಸೇರಾವೊಂದು, ‘ತತ್ತ್‌ದ್ ಪೋಯಿ ಕುರಿ ತಿಕ್ಕ್ಂಡ್ ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪೆ.</verse>
				<verse number="7">ಐತ ಲೆಕ್ಕನೆ ದೇವೆರೆ ಕಡೆಕ್ಕ್ ಬರಿಯೆರೆ ಅಗತ್ಯದಾಂತಿ ಸೊನ್ಪತೊಂರ್ಬ ಮಂದಿ ನೀತಿವಂತೆರೆಡ್ದ್ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ಸಂತೋಷ ಉಂಡಾಪುಂಡು.</verse>
				<verse number="8">“ಅಂಚೆನೇ ಒಂಜಿ ಪೊಂಜೊವುಡ ಪತ್ತ್ ಪಾವೊಲಿಡ್ ಒಂಜಿ ಪಾವೊಲಿ ದಕ್ಕ್‌ದ್ ಪೋಂಡ, ತುಡರ್ ಪೊತ್ತಾದ್ ಇಲ್ಲನ್ ಅಡ್ತ್‌ದ್ ಅವು ತಿಕ್ಕುನೆಟ್ಟ ಜಾಗ್ರತೆಡ್ ನಾಡುವೊಲತ್ತಾ?</verse>
				<verse number="9">ತಿಕ್ಕಿಬೊಕ್ಕ ಆಲ್ ತನ ಸ್ನೇಹಿತೆರೆನ್‌ ನಿರೆಕರೆತಾಕುಲೆನ್ ಸೇರಾವೊಂದು, ‘ದಕ್ಕ್‌ದ್ ಪೋಯಿ ಪಾವೊಲಿ ತಿಕ್ಕ್ಂಡ್ ನಿಕುಲು ಎನಡೊಪ್ಪ ಸಂತೋಷ ಮಲ್ಪುಲೆ,’ ಪನ್ಪಲತ್ತಾ?</verse>
				<verse number="10">ಐತ ಲೆಕ್ಕ ಒರಿ ಪಾಪಿ ಪಶ್ಚಾತಾಪ ಪಡೆಂಡ ಪರಲೋಕೊಡು ದೇವೆರೆ ದೂತೆರೆ ಎದುರುಡು ಸಂತೋಷ ಆಪುಂಡು.” ಪಂಡ್ದ್ ನಿಕ್ಲೆಗ್ ಪನ್ಪೆ.</verse>
				<verse number="11">ನನಲಾ ಆಯೆ ಪಂಡಿನಿ ದಾನೆಂದ್ಂಡ, “ಒರಿಯಗ್ ರಡ್ಡ್ ಜೋಕುಲಿತ್ತೆರ್.</verse>
				<verse number="12">ಐಟ್ಟ್ ಎಲ್ಯಾಯೆ ಅಮ್ಮೆರೆಡ, ‘ಅಮ್ಮೆರೇ, ಆಸ್ತಿಡ್ ಎಂಕ್ ಬರೊಡಾಯಿ ಪಾಲ್‌ನ್ ಕೊರ್ಲ,’ ಅಂದ್‌ದ್ ಕೇನ್ನಗ ಅಮ್ಮೆ ಬದ್‌ಕ್‌ನ್ ಅಕ್ಲೆಗ್ ಪಾಲ್ ಮಲ್ತ್‌ದ್ ಕೊರಿಯೆ.</verse>
				<verse number="13">ಒಂತೆ ದಿನೊಡ್ದು ಬೊಕ್ಕ ಆ ಎಲ್ಯ ಮಗೆ ಆ ಪಾಲ್‌ನ್ ದೆತ್ತೊಂದು ದೂರ ದೇಶೊಗು ಪೋಯೆ. ಅಲ್ಪ ಪಟಿಂಗತನೊಟು ಬದ್‌ಕ್‌ದ್ ತನಡ ಇತ್ತಿನೆನ್ ಮಾತ ಕಾಲಿ ಮಲ್ತೊಂಡೆ.</verse>
				<verse number="14">ಇಂಚ ಆಯೆ ಗತಿದಾಂತಿನಾಯೆ ಆದುಪ್ಪುನಗ ಆ ದೇಶೊಡು ಮಲ್ಲ ಬರಗಾಲ ಬತ್ತ್ಂಡ್.</verse>
				<verse number="15">ಅಪಗ ಆಯೆ ಆ ದೇಶದ ಒರಿಯ ಇಲ್ಲಡ್ ಬೇಲೆಗ್ ಸೇರೊಂಡೆ. ಆ ನರಮಾನಿ ಪಂಜಿಲೆನ್ ಮೇಪಾಯೆರೆ ಆಯನ್ ಕಂಡೊಗು ಕಡಪುಡಿಯೆ.</verse>
				<verse number="16">ಆಯಗ್ ಮಸ್ತ್ ಬಡವು ಆನಗ ಪಂಜಿಲು ತಿನೊಂದಿತ್ತಿನ ತೌಡುನು ತಿಂದ್‌ದ್ ಬಡವುನು ತಗ್ಗಾವೆ ಅಂದ್‌ದ್ ಎನ್ನಿಯೆ; ಆಂಡ ತಿನಿಯೆರೆ ಏರ್ಲಾ ಆಯಗ್ ದಾಲಾ ಕೊರ್ಜೆರ್.</verse>
				<verse number="17">ಅಪಗ ಆಯಗ್ ಬುದ್ಧಿ ಬತ್ತ್‌ದ್ ಆಯೆ, ‘ಎನ ಅಮ್ಮೆರೆ ಇಲ್ಲಡ್ ಏತೋ ಜನ ಬೇಲೆದಾಕುಲೆಗ್ ಬೋಡಾಯಿನಾತ್ ವಣಸ್ ಉಂಡು, ಯಾನ್ ಮುಲ್ಪ ಬಡವುಡು ಸೈಯೊಂದುಲ್ಲೆ.</verse>
				<verse number="18">ಯಾನ್ ಲಕ್ಕ್‌ದ್ ಎನ ಅಮ್ಮೆರೆನ ಕೈತಲ್‌ ಪೋದು, “ಅಮ್ಮೆರೇ, ಪರಲೋಕದ ದೇವೆರೆಗ್ಲಾ ನಿಕ್ಕ್‌ಲಾ ವಿರೋಧಾದ್ ಪಾಪ ಮಲ್ತ್‌ದೆ; ನನ ಯಾನ್ ನಿನ ಮಗೆ ಅಂದ್‌ದ್ ಲೆಪ್ಪಾವೊನಿಯೆರೆ ಯೋಗ್ಯತೆ ಎಂಕಿಜ್ಜಿ,</verse>
				<verse number="19">ಎನನ್ ನಿನ ಬೇಲೆದಾಕುಲೆಡ್ ಒರಿಯಲೆಕ್ಕ ದೀವೊನ್ಲ,” ಅಂದ್‌ದ್ ಪನ್ಪೆ.’</verse>
				<verse number="20">ಅಂಚ ಎನ್ನೊಂದು ಲಕ್ಕ್‌ದ್ ತನ ಅಮ್ಮೆರೆನ ಕೈತಲ್‌ಗ್ ಬತ್ತೆ. ಆಂಡ ಆಯೆ ನನಲಾ ದೂರೊಡು ಉಪ್ಪುನಗ ಅಮ್ಮೆ ಆಯನ್ ತೂದು ಉಡಲ್ ಕರಗ್‌ದ್ ಪಾರ್‌ಪೋದು ಆಯನ್ ಅರಾದ್ ಪತ್ತ್‌ದ್ ಆಯಗ್ ಮುತ್ತ ಕೊರಿಯೆ.</verse>
				<verse number="21">ಆಂಡ ಮಗೆ ಆಯಗ್, ‘ಅಮ್ಮೆರೇ,’ ‘ಪರಲೋಕದ ದೇವೆರೆ ವಿರೋಧಲಾ ನಿನ ವಿರೋಧಲಾ ಪಾಪ ಮಲ್ತ್‌ದೆ; ಯಾನ್ ನಿನ ಮಗೆ ಅಂದ್‌ದ್ ಪನಿಯೆರೆ ಯೋಗ್ಯತೆ ಎಂಕಿಜ್ಜಿ,’ ಅಂದ್‌ದ್ ಪಂಡೆ.</verse>
				<verse number="22">ಆಂಡ ಅಮ್ಮೆ ತನ ಬೇಲೆದಾಕುಲೆನ್ ಲೆತ್ತ್‌ದ್, ‘ಮಗಕ್ಕ್ ಎಡ್ಡೆಂತಿನ ಅಂಗಿನ್ ತುತ್ತಾಲೆ. ಉಂಬ್ಯನ ಕೈಕ್ ಉಂಗಿಲ ಪಾಡ್ಲೆ. ಕಾರ್‌ಗ್ ಜೋಡು ಪಾಡ್ಲೆ.</verse>
				<verse number="23">ಚರ್ಬಿದ ಕುರಿ ಕಡ್ಪುಲೆ, ಪರ್ಬ ಮಲ್ಪುಗ, ಸಂತೋಷ ಮಲ್ಪುಗ.</verse>
				<verse number="24">ಈ ಮಗೆ ಸೈತ್ ಪೋದಿತ್ತೆ, ಇತ್ತೆ ಆಯೆ ಕುಡ ಬದ್‌ಕ್‌ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ,’ ಅಂದ್‌ದ್ ಪಂಡೆ. ಬೊಕ್ಕ ಅಕುಲು ಸಂತೋಷ ಮಲ್ಪೆರೆ ಸುರು ಮಲ್ತೆರ್.</verse>
				<verse number="25">ಆ ಪೊರ್ತುಡು ಆಯನ ಮಲ್ಲ ಮಗೆ ಕಂಡೊಡು ಕೆಲಸೊಡು ಇತ್ತೆ. ಆಯೆ ಇಲ್ಲ್ ಮುಟ್ಟುನಗ ವಾದ್ಯೊನ್ಲಾ ನಲಿಪುನೆನ್ಲಾ ಕೇಂಡೆ.</verse>
				<verse number="26">ಬೇಲೆದಾಕುಲೆಡ, ‘ಉಂದು ದಾದ ಆವೊಂದುಂಡು?’ ಅಂದ್‌ದ್ ಕೇಂಡೆ.</verse>
				<verse number="27">ಐಕ್ ಬೇಲೆದಾಯೆ ಆಯಗ್, ‘ನಿನ ಮೆಗ್ಯೆ ಬೈದೆ; ಆಯೆ ಎಡ್ಡೆಡ್ ಬತ್ತಿನೆಕ್ಕ್ ನಿನ ಅಮ್ಮೆ ಚರ್ಬಿದ ಕುರಿ ಕಡ್ಪಾದೆ,’ ಪಂಡೆ.</verse>
				<verse number="28">ಉಂದೆನ್ ಕೇಂಡ್ದ್ ಆಯಗ್ ಕೋಪ ಬತ್ತ್‌ದ್ ಇಲ್ಲದುಲಯಿ ಪೋವಂದೆ ಉಂತಿಯೆ. ಅಪಗ ಆಯನ ಅಮ್ಮೆ ಪಿದಾಯಿ ಬತ್ತ್‌ದ್ ಆಯಡ ಉಲಯಿ ಬರಿಯೆರೆ ನಟ್ಟೊಂಡೆ.</verse>
				<verse number="29">ಆಂಡ ಆಯೆ ತನ ಅಮ್ಮೆರೆಗ್, ‘ತೂಲ, ಈತ್ ವರ್ಸ ಚಾಕ್ರಿದಾಯಲೆಕ್ಕ ನಿಕ್ಕ್ ಸೊಂದಿಯೆ, ಬೊಕ್ಕ ಯಾನ್ ನಿನ ಅಪ್ಪಣೆನ್ ಏಪಲಾ ಮೀರ್‌ದಿಜಿ. ಆಂಡ ಎಂಕ್ ಎನ ಸ್ನೇಹಿತೆರೆಡೊಪ್ಪ ಸಂತೋಷ ಮಲ್ಪೆರೆ ಒಂಜಿ ಏಡ್‌ನಾಂಡಲಾ ಕೊರ್ತುಜ.</verse>
				<verse number="30">ಆಂಡ ಈ ನಿನ ಮಗೆ ಸೂಳೆಲೆನ್ ಕಟ್ಟೊಂದು ನಿನ ಬದ್‌ಕ್‌ನ್ ಹಾಳ್ ಮಲ್ತ್ ಬುಡ್ತಿನಾಯಗ್ ಚರ್ಬಿದ ಕುರಿ ಕಡ್ಪಾಯ,’ ಪಂಡೆ.</verse>
				<verse number="31">ಐಕ್ ಅಮ್ಮೆ, ‘ಮಗಾ,’ ‘ಈ ಏಪಲಾ ಎನಡೊಪ್ಪ ಉಲ್ಲ, ಎನ್ನವು ಮಾತಲಾ ನಿನ್ನವೇ.</verse>
				<verse number="32">ಆಂಡ ಉಲ್ಲಾಸ ಮಲ್ಪುನವು ಸಂತೋಷ ಪಡೆಪಿನವು ನ್ಯಾಯದವೇ. ದಾಯೆ ಪಂಡ ಈ ನಿನ ಮೆಗ್ಯೆ ಸೈತ್ ಪೋದಿತ್ತೆ, ಇತ್ತೆ ಬದ್‌ಕ್‌ದ್ ಬೈದೆ; ಪೋಲಿ ಪೋದಿತ್ತೆ, ತಿಕ್ಕಿಯೆ ಅಂದ್‌ದ್ ಪಂಡೆ.’”</verse>
			</chapter>
			<chapter number="16">
				<verse number="1">ಯೇಸು ತನ ಶಿಷ್ಯೆರೆಗ್ ಇಂಚ ಪಂಡೆ, “ಒರಿ ಐಶ್ವರ್ಯವಂತಗ್ ಒರಿ ಗುಮಾಸ್ತೆ ಇತ್ತೆ. ಆಯನ ಬಗೆಟ್, ಯಜಮಾನನ ಕೈತಲ್‌ ಬತ್ತ್‌ದ್‌, ‘ಇಂಬೆ ನಿನ ಆಸ್ತಿನ್ ಹಾಳ್ ಮಲ್ತೊಂದುಲ್ಲೆ,’ ಅಂದ್‌ದ್ ಏರಾ ದೂರು ಪಂಡೆರ್.</verse>
				<verse number="2">ಯಜಮಾನೆ ಆಯನ್ ಲೆತ್ತ್‌ದ್ ಆಯಡ, ‘ಈ ಎನ ಆಸ್ತಿನ್ ಲೂಟಿ ಮಲ್ತೊಂದುಲ್ಲಂದ್‌ದ್ ನಿನ ಬಗೆಟ್ ಯಾನ್ ಕೇನೊಂದುಲ್ಲೆ. ಈ ಮಲ್ತೊಂದಿತ್ತಿ ಗುಮಾಸ್ತಿಕೆದ ಲೆಖ್ಖೊನು ಕೊರ್ಲ. ನನ ಈ ಎನ ಗುಮಾಸ್ತೆ ಆದುಪ್ಪೆರೆ ಸಾದ್ಯ ಇಜ್ಜಿ.’ ಪಂಡೆ.</verse>
				<verse number="3">ಉಂದೆನ್ ಕೇಂಡ್ದ್, ‘ನನ ಯಾನ್ ದಾದ ಮಲ್ಪುನು? ಎನ ಯಜಮಾನೆ ಎನನ್ ಈ ಗುಮಾಸ್ತಿಕೆಡ್ ದೆತ್ತ್‌ದ್ ಬುಡ್ಪೆ ಅತ್ತಾ? ಗರ್ಪೆರೆ ಎಂಕ್ ತೀರಂದ್, ನಟ್ಟರೆ ಎಂಕ್ ನಾಚಿಗೆ ಆಪುಂಡು.</verse>
				<verse number="4">ಈ ಗುಮಾಸ್ತಿಕೆಡ್ದ್ ಎನನ್ ದೆತ್ತಿ ಬೊಕ್ಕ ಜನೊಕುಲು ಎನನ್ ತನ್ಕುಲೆ ಇಲ್ಲದುಲಯಿ ಸೇರಾಯಿಜೆರ್ಡ ಎನ ಪರಿಸ್ಥಿತಿ ಭಯಂಕರ ಅವು,’ ಅಂದ್‌ದ್ ತನ ಉಲಯಿ ಎನ್ನೊಂದು,</verse>
				<verse number="5">ತನ ಕರ್ತವಗ್ ಕೊರೊಡಾಯಿ ಸಾಲದಾಕುಲೆಡ್ ಒರಿ ಒರಿಯನ್ ಕೈತಲ್‌ ಲೆತ್ತ್‌ದ್ ಸುರುತ್ತಾಯಡ, ‘ಈ ಎನ ಧನಿಕ್ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇಂಡೆ.</verse>
				<verse number="6">ಐಕ್ ಆಯೆ, ‘ನೂದು ಡಬ್ಬಿ ಎಣ್ಣೆ,’ ಅಂದ್‌ದ್ ಪನ್ನಗ ಆಯಡ, ನಿನ ಬಿಲೆಪತ್ರಿಕೆನ್ ದೆತ್ತೊಂದು, ‘ಬೇಗ ಕುಲ್ಲೊಂದು ಐವ ಡಬ್ಬಿ ಅಂದ್‌ದ್ ಬರೆಲ,’ ಪಂಡೆ</verse>
				<verse number="7">ಬೊಕ್ಕೊರಿಯನ್, ‘ಈ ಏತ್ ಸಾಲ ಕೊರೊಡು?’ ಅಂದ್‌ದ್ ಕೇನ್ನಗ ‘ನೂದು ಖಂಡಿಗೆ ಗೋದಿ,’ ಪಂಡೆ. ಆಯಡ, ‘ಈ ನಿನ ಬಿಲೆಪತ್ರಿಕೆನ್ ದೆತ್ತೊಂದು, ಎಣ್ಪ ಖಂಡಿಗೆ ಅಂದ್‌ದ್ ಬರೆಲ,’ ಪಂಡೆ</verse>
				<verse number="8">ಯಜಮಾನೆ ಉಂದೆನ್ ಕೇಂಡ್ದ್ ಅನ್ಯಾಯ ಮಲ್ತಿ ಗುಮಾಸ್ತನ್ ಉಂಬೆ ಎಡ್ಡೆ ಮಲ್ತೆ ಅಂದ್‌ದ್ ಪುಗರಿಯೆ. ದಾಯೆ ಪಂಡ ಲೋಕದಾಕುಲು ಬೊಲ್ಪುದ ಜನೊಕುಲೆಡ್ದ್‌ಲಾ ಬುದ್ಧಿವಂತೆರಾದುಲ್ಲೆರ್.</verse>
				<verse number="9">ಈ ಲೋಕೊಡುಪ್ಪುನಗ ಅನ್ಯಾಯದ ಕಾಸ್‌ಡ್ದ್ ಬಡವೆರೆಗ್ ಸಹಾಯ ಕೊರ್ದು ಸ್ನೇಹಿತೆರೆನ್‌ ಮಲ್ತೊನ್ಲೆ. ಇಂಚ ಮಲ್ತ್ಂಡ ನಿಕ್ಲೆನ ಕೈ ಬುಡ್ದು ಪೋನಗ ನಿಕ್ಲೆಗ್ ನಿತ್ಯ ಗುಡಾರೊಡು ಸೇರಾವೊನ್ವೆರ್ ಅಂದ್‌ದ್ ಯಾನ್ ಪನ್ಪೆ.</verse>
				<verse number="10">ಒಂತೆಡ್ ನಂಬಿಕೆ ಇತ್ತಿನಾಯೆ ಮಸ್ತ್‌ಡ್ಲಾ ನಂಬಿಗೆದಾಯೆ ಆಪೆ. ಒಂತೆದೆಟ್ ಅನ್ಯಾಯಗಾರೆ ಆಂಡ ಮಸ್ತ್‌ದೆಟ್ಲಾ ಅನ್ಯಾಯಗಾರೆ ಆಪೆ.</verse>
				<verse number="11">ಇಂಚ ಉಪ್ಪುನಗ ಅನ್ಯಾಯದ ಆಸ್ತಿದ ಬಗೆಟ್ ನಿಕುಲು ನಂಬಿಕೆದಾಕುಲು ಆಯಿಜರ್ಡ ನಿಜವಾಯಿನ ಆಸ್ತಿನ್ ನಿಕ್ಲೆ ವಶೊಕ್ಕು ಏರ್ ಕೊರುವೆರ್?</verse>
				<verse number="12">ಬೊಕ್ಕೊರಿಯನ ಸೊತ್ತುದ ಸಂಗತಿಡ್ ನಿಕುಲು ನಂಬಿಗಸ್ತೆರಾಯಿಜರ್ಡ ನಿಕ್ಲೆ ಸ್ವಂತದೆನ್ ನಿಕ್ಲೆಗ್ ಏರ್ ಕೊರುವೆರ್?</verse>
				<verse number="13">ವಾ ಬೇಲೆದಾಯೆಲಾ, ರಡ್ಡ್ ಯಜಮಾನನ ಚಾಕ್ರಿ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಒರಿಯನ್ ಪಗೆ ಮಲ್ತ್‌ದ್ ಬೊಕ್ಕೊರಿಯನ್ ಪ್ರೀತಿ ಮಲ್ಪುವೆ. ಇಜ್ಜಾಂಡ ಒರಿಯನ್ ಎಡ್ಡೆ ಮಲ್ತೊಂದು ಬೊಕ್ಕೊರಿಯನ್ ತಾತ್ಸಾರ ಮಲ್ಪುವೆ. ನಿಕುಲು ದೇವೆರೆನ್ಲಾ ಕಾಸ್‌ನ್ಲಾ ಒಟ್ಟುಗು ಸೇವೆ ಮಲ್ಪೆರೆ ಆವಂದ್.”</verse>
				<verse number="14">ಪರಿಸಾಯೆರ್ ಈ ಮಾತ ಪಾತೆರೊಲೆನ್ ಕೇಂಡ್ದ್ ತನ್ಕುಲು ಕಾಸ್‌ದಾಸೆ ಇತ್ತಿನಾಕುಲು ಆದಿತ್ತಿನೆಡ್ದ್ ಯೇಸುನು ಮಸ್ಕಿರಿ ಮಲ್ತೆರ್.</verse>
				<verse number="15">ಅಪಗ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ನರಮಾನಿಲೆ ಎದುರುಡು ನೀತಿವಂತೆರ್ ಅಂದ್‌ದ್ ನಿಕುಲು ತೋಜಾವೊನುನಾಕುಲು ನಿಕುಲು; ಆಂಡಲಾ ದೇವೆರ್ ನಿಕ್ಲೆ ಉಡಲ್‌ನ್ ತೆರಿದುಲ್ಲೆ. ನರಮಾನಿಲೆಡ್ ಮಿತ್ತ ಸ್ಥಾನದಾಯೆ ಅಂದ್‌ದ್ ಪನ್ಪಾವೊನುನವು ದೇವೆರೆ ದೃಷ್ಟಿಡ್ ಪೇಸಿಗೆ ಆದುಂಡು.</verse>
				<verse number="16">“ನ್ಯಾಯಕಟ್ಟ್‌ಲಾ ಪ್ರವಾದಿಲುಲಾ ಯೋಹಾನನ ಮುಟ್ಟ ಮಾತ್ರ. ಐಡ್ದ್ ಬೊಕ್ಕ ದೇವೆರೆ ರಾಜ್ಯದ ಸುವಾರ್ತೆ ಸಾರಿಯೊಂದು ಉಂಡು. ಐಟ್ಟ್ ಮಾತೆರ್ಲಾ ಬಲತ್ಕಾರೊಡು ನೂರುವೆರ್.</verse>
				<verse number="17">ಬಾನಲಾ ಭೂಮಿಲಾ ಆಳಿದ್ ಪೋಪಿನವು ಸುಲಭ. ಆಂಡ ನ್ಯಾಯಕಟ್ಟ್‌ದ ಒಂಜಿ ಸೊನ್ನೆಲಾ ಬೂರ್ದು ಪೋವಂದ್.</verse>
				<verse number="18">“ತನ ಬೊಡೆದಿನ್ ಬುಡ್ದು ಬೊಕ್ಕೊರ್ತಿನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.</verse>
				<verse number="19">“ಒರಿ ಐಶ್ಚರ್ಯವಂತೆ ಇತ್ತೆ. ಆಯೆ ಪೊರ್ಲುದ ನೇರಲೆ ಅಂಗಿನ್ಲಾ ನಾರ್‌ಮಡಿತ ಕುಂಟುನು ತುತ್ತೊಂದು ಪ್ರತಿದಿನಲಾ ಗನಸ್ಥಿಕೆಡ್ ಸುಖ ಸಂತೋಷ ಪಡೆಯೊಂದಿತ್ತೆ.</verse>
				<verse number="20">ಆಯನ ಇಲ್ಲದ ಬಾಕಿಲ್‌ದಲ್ಪ ಲಾಜರೆ ಪನ್ಪಿ ಒರಿ ನಟ್ಟುನಾಯೆ ಇತ್ತೆ. ಉಂಬೆ ಮೆಯಿ ನಿಲಿಕೆ ಗಜ್ಜಿ ಇತ್ತಿನಾಯೆ.</verse>
				<verse number="21">ಐಶ್ಚರ್ಯವಂತನ ಮೇಜಿಡ್ದ್ ಬೂರಿನ ಮಡೆನ್ ತಿನೊಂದಿತ್ತೆ; ನಾಯಿಲು ಬತ್ತ್‌ದ್ ಆಯನ ಗಾಯೊಲೆನ್ ನಕ್ಕೊಂದಿತ್ತ.</verse>
				<verse number="22">ಇಂಚ ಉಪ್ಪುನಗ ಒಂತೆ ಸಮಯೊಡ್ದು ಬೊಕ್ಕ ಆ ನಟ್ಟುನಾಯೆ ಸೈತೆ; ದೂತೆರ್ ಆಯನ್ ದೆತ್ತೊಂದು ಪೋದು ಅಬ್ರಹಾಮುನ ತಿಗಲೆಗ್ ಒರಗಾಯೆರ್. ಆ ಐಶ್ವರ್ಯವಂತೆಲಾ ಸೈತೆ; ಆಯನ ಸೈತಿ ಕರ್ಮಕ್ರಿಯ ಆಂಡ್.</verse>
				<verse number="23">ಆಯೆ ಪಾತಾಳದುಲಯಿ ನರಕೊಂದು ಉಪ್ಪುನಗ ಕಣ್ಣ್ ದೆರ್ತ್ತ್‌ದ್ ದೂರೊಡ್ದು ಅಬ್ರಹಾಮುನ ತಿಗಲೆಗ್ ಒರಗೊಂದಿತ್ತಿ ಲಾಜರನ್ ತೂದು,</verse>
				<verse number="24">‘ಅಮ್ಮೆರೇ, ಅಬ್ರಹಾಮೋ, ಎನ ಮಿತ್ತ್ ಕನಿಕರ ಮಲ್ತ್‌ದ್ ಲಾಜರನ್ ಕಡಪುಡು. ಆಯೆ ತನ ಕೊಡಿ ಬಿರೆಲ್‌ನ್ ನೀರ್‌ಡ್ ಮುರ್ಕಾದ್ ಎನ ನಾಲಯಿನ್ ಪಸೆ ಮಲ್ಪಡ್; ಈ ಉರಿಟ್ಟ್ ಸಂಕಟ ಪಡೆಯೊಂದುಲ್ಲೆ,’ ಅಂದ್‌ದ್ ಬುಲ್ತೆ.</verse>
				<verse number="25">ಆಂಡ ಅಬ್ರಹಾಮು, ‘ಮಗಾ, ನಿನ ಬದ್‌ಕ್‌ಡ್ ಈ ಆಸೆ ಮಲ್ತಿನ ಮಾತ ಎಡ್ಡೆನ್ ಪಡೆತ; ಅಂಚೆನೇ ಲಾಜರೆಲಾ ಕಷ್ಟೊನು ಪಡೆತೆ ಪನ್ಪಿನೆನ್ ನೆನೆಪು ಮಲ್ಪುಲ. ಆಂಡ ಇತ್ತೆ ಆಯೆ ಮುಲ್ಪ ಸುಖ ಪಡೆಪೆ; ನಿಕ್ಕ್ ಅವುಲು ಸಂಕಟ.</verse>
				<verse number="26">ಉಂದು ಮಾತ್ರತ್ತಂದೆ ಎಂಕುಲೆಗ್ಲಾ ನಿಕ್ಲೆಗ್ಲಾ ನಡುಟು ಒಂಜಿ ಕಣಿ ಉಂಡು; ಅವೆಡ್ದಾವರ ಈ ಕಡೆಡ್ದ್ ನಿಕ್ಲೆನ ಕಡೆಕ್ಕ್ ಪೋಯೆರ್ ಸಾದ್ಯ ಇಜ್ಜಿ; ಬೊಕ್ಕ ಆ ಕಡೆಡ್ದ್ ಎಂಕ್ಲೆನ ಕಡೆಕ್ಕ್ ಏರ್ಲಾ ದಾಂಟ್ಯೆರೆ ಸಾದ್ಯ ಇಜ್ಜಿ,’ ಪಂಡೆ.</verse>
				<verse number="27">ಅಪಗ ಆಯೆ, ‘ಅಮ್ಮೆರೇ, ಅಂಚಾಂಡ ಲಾಜರನ್ ಎನ ಅಮ್ಮೆರೆನ ಇಲ್ಲಗ್ ಕಡಪುಡೊಡು ಅಂದ್‌ದ್ ನಿನಡ ನಟ್ಟೊನ್ವೆ.</verse>
				<verse number="28">ಎಂಕ್ ಐನ್ ಜನ ಪಲಯೆ ಮೆಗ್ಯಾಡ್ಲು ಉಲ್ಲೆರ್; ಅಕುಲುಲಾ ಈ ಬೇನೆದ ಜಾಗ್‌ಗ್ ಬರಂದಿಲೆಕ್ಕ ಲಾಜರೆ ತಾನ್ ತೂಯಿನೆನ್ ಅಕ್ಲೆಗ್ ಮಾತ ತೆರಿಪಾವಡ್,’ ಅಂದ್‌ದ್ ನಟ್ಟೊನ್ವೆ.</verse>
				<verse number="29">ಆಂಡ ಅಬ್ರಹಾಮು ಆಯಡ, ‘ಮೋಶೆನ ಬೊಕ್ಕ ಪ್ರವಾದಿಲೆ ಗ್ರಂಥೊಲು ಅಕ್ಲೆಡ ಉಂಡು; ಅವೆನ್ ಓದಡ್,’ ಪಂಡೆ.</verse>
				<verse number="30">ಐಕ್ ಆಯೆ, ‘ಅಮ್ಮೆರೇ, ಅಬ್ರಹಾಮೋ, ಅಂಚತ್ತ್; ಸೈತಿನಕಲೆನ ಕಡೆಡ್ದ್ ಒರಿ ಅಕ್ಲೆನ ಕೈತಲ್‌ ಪೋಂಡ ಒಂಜಿ ವೇಳೆ ಅಕುಲು ದೇವೆರೆ ಕಡೆಕ್ಕ್ ತಿರ್ಗ್‌ದ್ವೆರ್,’ ಪಂಡೆ.</verse>
				<verse number="31">ಅಬ್ರಹಾಮು ಆಯಡ, ‘ಅಕುಲು ಮೋಶೆನಲಾ ಪ್ರವಾದಿಲೆ ಪಾತೆರೊನ್ಲಾ ಕೇನುಜೆರ್ಡ ಸೈತ್‌ದ್ ಪೋದಿತ್ತಿನಾಯೆ ಒರಿ ಜೀವ ಆದ್ ಲಕ್ಕ್ಂಡಲಾ ಅಕುಲು ನಂಬಯೆರ್,’” ಅಂದ್‌ದ್ ಪಂಡೆ.</verse>
			</chapter>
			<chapter number="17">
				<verse number="1">ಯೇಸು ತನ ಶಿಷ್ಯೆರೆಡ ಪಂಡಿನಿ, “ಜನೊಕುಲೆನ್ ಶೋಧನೆಗ್ ನಡಪಾವುನ ಸಂಗತಿಲು ಬರಂದೆ ಉಪ್ಪಂದ್; ಆಂಡಲಾ ಅವು ಏರೆಡ್ದ್ ಬರ್ಪುಂಡಾ ಆಯನ ಗತಿನ್ ದಾನೆಂದ್ ಪನೊಲಿ?</verse>
				<verse number="2">ಆಯೆ ಈ ಎಲ್ಯಾಕುಲೆಡ್ ಒರಿಯಗ್ ತೊಂದರೆ ಕೊರ್ಪಿನೆಡ್ದ್ ತನ ಕಂಟೆಲ್‌ಗ್ ಮಲ್ಲ ಬೀಸುನ ಕಲ್ಲ್ ಕಟ್ಟ್‌ದ್ ಕಡಲ್‌ಗ್ ಪಾಡೊನುನವೇ ಎಡ್ಡೆ ಅಂದ್‌ದ್ ತೋಜುಂಡು.</verse>
				<verse number="3">ನಿಕ್ಲೆನ ಬಗೆಟ್ ಎಚ್ಚರಿಕೆ ಆದುಪ್ಪುಲೆ. ನಿನ ಸಹೋದರೆ ಪಾಪ ಮಲ್ತ್ಂಡ ಆಯಗ್ ದಟ್ಟಿಲ. ಆಯೆ ಪಶ್ಚಾತಾಪ ಪಡೆಂಡ ಆಯನ ಪಾಪೊನು ಮಾಪು ಮಲ್ಪು.</verse>
				<verse number="4">ನಿನ ಸಹೋದರೆ ಒಂಜಿ ದಿನೊಟು ಏಳ್ ಸರ್ತಿ ನಿಕ್ಕ್ ಪಾಪ ಮಲ್ತೆಡ, ಆಯೆ ಏಳ್ ಸರ್ತಿ ನಿನ ಕೈತಲ್‌ ಬತ್ತ್‌ದ್, ‘ಯಾನ್ ಪಶ್ಚಾತಾಪ ಪಡೆಪೆ,’ ಎನನ್ ಮಾಪು ಮಲ್ಪುಲ ಪಂಡ್ಂಡ ಆಯನ್ ಮಾಪು ಮಲ್ಪುಲ.”</verse>
				<verse number="5">ಅಪೊಸ್ತಲೆರ್ ಕರ್ತವಡ, “ಎಂಕ್ಲೆನ ನಂಬಿಕೆನ್ ಬಲ ಮಲ್ಪುಲ,” ಪಂಡೆರ್.</verse>
				<verse number="6">ಐಕ್ ಕರ್ತವೆ ಪಂಡಿನಿ, “ದಾಸೆಮಿ ಬಿತ್ತ್‌ದಾತ್ ನಂಬಿಕೆ ಇತ್ತ್ಂಡ, ‘ಈ ಅರ್ತಿದ ಮರೊಕು ಬೇರ್‌ದೊಟ್ಟಿಗೆ ಕಡಲ್ಡ್ ಬೂರ್ಲ’ ಅಂದ್‌ದ್ ಪಂಡಡ, ಅವುಲಾ ನಿಕ್ಲೆನ ಪಾತೆರೊನು ಕೇನುಂಡು.</verse>
				<verse number="7">“ನಿಕ್ಲೆಡ್ ಏರೆಗಾಂಡಲಾ ದಪ್ಪುನ ಅತ್ತ್‌ಂಡ ಕುರಿ ಮೇಪಾವು ಚಾಕ್ರಿದಾಯೆ ಇತ್ತ್ಂಡ ಆಯೆ ಕಂಡೊಡ್ದು ಇಲ್ಲಗ್ ಬತ್ತಿ ಕೂಡ್ಲೆ, ಬೇಲೆದಾಯಗ್ ಇತ್ತೆನೇ ಬತ್ತ್‌ದ್ ವಣಸ್‌ಗ್ ಕುಲ್ಲು ಅಂದ್‌ದ್ ಪನ್ಪೆನಾ?</verse>
				<verse number="8">ಇಜ್ಜಿ, ಅಂಚ ಪನಂದೆ, ‘ಈ ಎನ ವಣಸ್ ತಯಾರ್ ಮಲ್ಪು ಯಾನ್ ವಣಸ್ ಮಲ್ತ್‌ದ್ ಬರ್ಪಿನೆಟ್ಟ ಎನ ಚಾಕ್ರಿ ಮಲ್ಪುಲ; ಐಡ್ದ್ ಬೊಕ್ಕ ಈ ವಣಸ್ ಮಲ್ಪುಲ,’ ಅಂದ್‌ದ್ ಪನ್ಪೆ ಅತ್ತಾ?</verse>
				<verse number="9">ತಾನ್ ಅಪ್ಪಣೆ ಮಲ್ತಿ ಬೇಲೆ ಮುಗಿ ಬೊಕ್ಕ ಚಾಕ್ರಿದಾಯಗ್ ನಿನಡ್ದ್ ಉಪಕಾರ ಆಂಡ್ ಅಂದ್‌ದ್ ಆಯಗ್ ಪನ್ಪೆನಾ? ಇಂಚೆನೆ ನಿಕ್ಲೆನ ಸಂಗತಿಲಾ.</verse>
				<verse number="10">ನಿಕ್ಲೆಗ್ ಅಪ್ಪಣೆ ಕೊರಿನವು ಮಾತೆನ್ಲಾ ಮಲ್ತಿ ಬೊಕ್ಕ, ‘ಎಂಕುಲು ಚಾಕ್ರಿದಾಕುಲು ದಾಲಾ ಪ್ರಯೋಜನದಾಂತಿನಾಕುಲು, ಎಂಚಂದ್ಂಡ ಮಲ್ಪೊಡಾಯಿನೆನ್ ಮಾತ್ರ ಎಂಕುಲು ಮಲ್ತ, ಪನ್ಲೆ ಅಂದ್‌ದ್ ಪಂಡೆ.’”</verse>
				<verse number="11">ಯೇಸು ಸಮಾರ್ಯ ಗಲಿಲಾಯೊನು ಕಡತ್‌ದ್ ಯೆರೂಸಲೇಮುಗು ಪೋಯೆ.</verse>
				<verse number="12">ಒಂಜಿ ಹಳ್ಳಿಗ್ ಬತ್ತಿನಪಗ ಪತ್ತ್ ಜನ ಕೊಷ್ಟದಾಕುಲು ಆಯಡ್ದ್ ದೂರೊಡು ಉಂತುದು</verse>
				<verse number="13">“ಯೇಸೋ, ಗುರೂ, ಎಂಕ್ಲೆನ ಮಿತ್ತ್ ಕನಿಕರ ತೋಜಾಲ!” ಪಂಡ್ದ್ ಬುಲ್ತುದು ಪಂಡೆರ್.</verse>
				<verse number="14">ಯೇಸು ಅಕ್ಲೆನ್ ತೂದು, “ನಿಕುಲು ಪೋದು ಯಾಜಕೆರ್‌ಗ್ ಮೆಯಿ ತೋಜಾಲೆ,” ಅಂದ್‌ದ್ ಪಂಡೆ. ಅಕುಲು ಪೋನಗನೇ ಶುದ್ಧ ಆಯೆರ್.</verse>
				<verse number="15">ಅಕ್ಲೆಡ್ ಒರಿ ತನ್ಕ್ ಗುಣ ಆದುಪ್ಪುನೆನ್ ತೂದು ಮಲ್ಲ ಶಬ್ಧೊಡು ದೇವೆರೆನ್ ಪುಗರ್‌ದ್ ಪಿರ ಬತ್ತ್‌ದ್,</verse>
				<verse number="16">ಯೇಸುನ ಪಾದೊಲೆಗ್ ಅಡ್ಡಬೂರ್ದು ಸೊಲ್ಮೆ ಸಂದಾದ್ ಸುಗಿತೆ. ಆಯೆ ಸಮಾರ್ಯದಾಯೆ.</verse>
				<verse number="17">ಯೇಸು ಉಂದೆನ್ ತೂದು, “ಪತ್ತ್ ಜನ ಶುದ್ಧ ಆಯೆರತ್ತಾ ಬಾಕಿದ ಒಂರ್ಬ ಜನ ಓಲ್ಲೆರ್?</verse>
				<verse number="18">ದೇವೆರೆಗ್ ಮೈಮೆ ಕೊರಿಯೆರೆ ಪರದೇಶದಾಯೆ ಅತ್ತಂದೆ ಬೇತೆ ಏರ್ಲಾ ಪಿರ ಬತ್ತಿಜೆರತ್ತಾ?” ಅಂದ್‌ದ್ ಪಂಡ್ದ್</verse>
				<verse number="19">ಯೇಸು ಆಯಡ, “ಲಕ್ಕ್‌ದ್ ಪೋಲ, ನಿನ ನಂಬಿಕೆ ನಿನನ್ ಗುಣ ಮಲ್ತ್ಂಡ್,” ಅಂದ್‌ದ್ ಪಂಡೆ.</verse>
				<verse number="20">ದೇವೆರೆ ರಾಜ್ಯ ಏಪ ಬರ್ಪುಂಡು ಅಂದ್‌ದ್ ಪರಿಸಾಯೆರ್ ಆಯಡ ಕೇನ್ನಗ ಆಯೆ ಅಕ್ಲೆಡ “ದೇವೆರೆ ರಾಜ್ಯ ಡಂಭಾಚಾರೊಡು ಬರ್ಪುಜಿ.</verse>
				<verse number="21">ಇಂದಾ, ‘ಮೂಲುಂಡು,’ ಅಂದಾ, ‘ಅವುಲುಂಡು,’ ಅಂದ್‌ದ್ ಏರೆಗ್ಲಾ ಪನಿಯೆರೆ ಆಪುಜಿ, ದಾಯೆಗ್ ಪಂಡ ದೇವೆರೆ ರಾಜ್ಯ ಅವು ನಿಕ್ಲೆ ಉಲಯಿ ಉಂಡು ಅಂದ್‌ದ್ ತೆರಿಯೊನ್ಲೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="22">ಬೊಕ್ಕ ಯೇಸು ತನ ಶಿಷ್ಯೆರೆಡ ಪಂಡಿನಿ ದಾನೆಂದ್ಂಡ, “ಒಂಜಿ ಕಾಲ ಬರ್ಪುಂಡು, ಐಟ್ಟ್ ನಿಕುಲು ನರಮಾನಿ ಮಗನ ದಿನೊಕುಲೆಡ್ ಒಂಜಿ ದಿನೊನು ತೂವೊಡು ಅಂದ್‌ದ್ ಆಸೆ ಮಲ್ತರ್ಡಲಾ ಅವೆನ್ ತೂವಂದೆ ಉಪ್ಪುವರ್.</verse>
				<verse number="23">ಜನೊಕುಲು ನಿಕ್ಲೆಗ್ ಆಯೆ ‘ಅವುಲುಲ್ಲೆ,’ ‘ಮೂಲುಲ್ಲೆ,’ ಅಂದ್‌ದ್ ಪಂಡ್ಂಡ ನಿಕುಲು ನಂಬೊಡ್ಚಿ, ಅಕ್ಲೆನ ಬೆರಿ ಪತ್ತುನಲಾ ಬೊಡ್ಚಿ.</verse>
				<verse number="24">ಮಿಂಚಿ ಮಿಂಚೊಂದು ಬಾನೊಡು ಒಂಜಿ ಕಡೆಡ್ದ್ ಬೊಕ್ಕೊಂಜಿ ಕಡೆಕ್ಕ್ ಎಂಚ ಬೊಲ್ಪು ಕೊರ್ಪುಂಡಾ ಅಂಚೆನೇ ನರಮಾನಿ ಮಗೆ ತನ ದಿನೊಟು ತೋಜುವೆ.</verse>
				<verse number="25">ಆಂಡ ದುಂಬತ್ತ ಆಯೆ ಮಸ್ತ್ ಕಷ್ಟೊಲೆನ್ ಅನುಭವ ಮಲ್ತ್‌ದ್ ಈ ಕಾಲದ ಜನೊಕುಲೆಡ್ದ್ ತಿರಸ್ಕಾರ ಪಡೆವೊಡು.</verse>
				<verse number="26">ನೋಹನ ದಿನೊಕುಲೆಡ್ ಎಂಚ ಇತ್ತ್ಂಡ ಅಂಚೆನೇ ನರಮಾನಿ ಮಗನ ದಿನೊಟುಲಾ ನಡಪುಂಡು.</verse>
				<verse number="27">ನೋಹೆ ಕಪ್ಪಲ್‌ಡ್ ಸೇರಿನ ದಿನ ಮುಟ್ಟ ಜನೊಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ಬೊಕ್ಕ ಮದ್ಮೆ ಮಲ್ತೊಂದಿತ್ತೆರ್ ಮದ್ಮೆ ಮಲ್ತ್ ಕೊರೊಂದಿತ್ತೆರ್. ಆ ಸಮಯೊಡು ಮಲ್ಲ ಬೊಲ್ಲ ಬತ್ತ್‌ದ್ ಮಾತೆರೆನ್ ನಾಶ ಮಲ್ತ್ಂಡ್.</verse>
				<verse number="28">ಬೊಕ್ಕ ಲೋಟನ ದಿನೊಟು ನಡತಿ ಪ್ರಕಾರ ನಡಪುಂಡು. ಅಕುಲು ಉನೊಂದಿತ್ತೆರ್, ಪರೊಂದಿತ್ತೆರ್, ದೆತ್ತೊನೊಂದಿತ್ತೆರ್, ಮಾರೊಂದಿತ್ತೆರ್, ನಡೊಂದಿತ್ತೆರ್, ಕಟ್ಟೊಂದಿತ್ತೆರ್.</verse>
				<verse number="29">ಆಂಡ ಲೋಟೆ ಸೋದೋಮು ಪಟ್ಟಣನ್‌ ಬುಡ್ದು ಪೋಯಿ ಬೊಕ್ಕ ಬಾನೊಡ್ದು ತೂ ಬೊಕ್ಕ ಗಂಧಕೊಲು ಬೂರ್ದು ಅಕ್ಲೆನ್ ಮಾತೆರೆನ್ ನಾಶ ಮಲ್ತ್ಂಡ್.</verse>
				<verse number="30">ನರಮಾನಿ ಮಗೆ ತೋಜಿದ್ ಬರ್ಪಿ ದಿನೊಟು ಅವ್ವೇ ರೀತಿಡ್ ಉಪ್ಪು.</verse>
				<verse number="31">“ಆ ದಿನೊಟು ಮಾಳಿಗೆಡ್ ಉಪ್ಪುನಾಯೆ ಇಲ್ಲದುಲಯಿ ತನ ವಸ್ತುಲೆನ್ ದೆತ್ತೊನಿಯೆರೆ ತಿರ್ತ್ ಜಪ್ಪೆರೆ ಬಲ್ಲಿ; ಅವ್ವೇ ಪ್ರಕಾರ ಕಂಡೊಡು ಉಪ್ಪುನಾಯೆಲಾ ಪಿರ ಇಲ್ಲಡೆ ಪೋಯೆರೆ ಬಲ್ಲಿ.</verse>
				<verse number="32">ಲೋಟನ ಬೊಡೆದಿನ್ ನೆನೆಪು ಮಲ್ತೊನ್ಲೆ.</verse>
				<verse number="33">ತನ ಪ್ರಾಣೊನು ಒರಿಪಾವೊಡು ಅಂದ್‌ದ್ ಉಪ್ಪುನಾಯೆ ಅವೆನ್ ಕಳೆವೊನ್ವೆ. ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಒರಿಪಾವೊನ್ವೆ.</verse>
				<verse number="34">ಆ ರಾತ್ರೆಡ್ ಒಂಜೇ ಮಂಚವುದ ಮಿತ್ತ್ ಇರ್ವೆರ್ ಜೆತ್ತ್‌ದ್ದುಪ್ಪುನಗ; ಒರಿಯನ್ ದೆತ್ತೊನುವೆರ್, ಬೊಕ್ಕೊರಿಯನ್ ಬುಡ್ಪೆರ್.</verse>
				<verse number="35">ಇರ್ವೆರ್ ಪೊಂಜೊವುಲು ಒಂಜೇ ಕಲ್ಲ್‌ಡ್ ಬೀಸೊಂದುಪ್ಪುವೆರ್; ಒರ್ತಿನ್ ದೆತ್ತೊನ್ವೆರ್ ಒರ್ತಿನ್ ಬುಡ್ಪೆರ್.”</verse>
				<verse number="36">ಇರ್ವೆರ್ ಕಂಡೊಡು ಉಪ್ಪುವೆರ್, ಒರಿಯನ್ ದೆತ್ತೊನ್ವೆರ್, ಒರಿಯನ್ ಬುಡ್ಪೆರ್.</verse>
				<verse number="37">ಈ ಪಾತೆರೊಗು ಶಿಷ್ಯೆರ್‌ಲು, “ಕರ್ತವಾ, ಅವು ಒಲ್ಪ ಆಪುಂಡು?” ಅಂದ್‌ದ್ ಕೇನ್ನಗ ಆಯೆ ಅಕ್ಲೆಗ್, “ಪುಣೊಕುಲು ಓಲುಂಡಾ ಅಲ್ಪನೇ ಗಿಡಿಕುಲು ಕೂಡುಂಡು,” ಅಂದ್‌ದ್ ಪಂಡೆ.</verse>
			</chapter>
			<chapter number="18">
				<verse number="1">ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, ಬೇಜಾರ್ ಮಲ್ತೊನಂದೆ ಏಪಲಾ ಪ್ರಾರ್ಥನೆ ಮಲ್ತೊಂದುಪ್ಪುಲೆ ಅಂದ್‌ದ್ ಒಂಜಿ ಉಪಕತೆನ್ ಪಂಡೆ.</verse>
				<verse number="2">“ಒಂಜಾನೊಂಜಿ ಊರುಡು ಒರಿ ನ್ಯಾಯಾಧಿಪತಿ ಇತ್ತೆ. ಆಯೆ ದೇವೆರೆಗ್ ಪೋಡಿಯಂದೆ ನರಮಾನಿಲೆನ್ಲಾ ಲಕ್ಷ್ಯ ಮಲ್ಪಂದೆ ಇತ್ತೆ.</verse>
				<verse number="3">ಅವ್ವೇ ಊರುಡು ಒರ್ತಿ ವಿಧವೆ ಇತ್ತಲ್. ಆಲ್ ಆಯನ ಕೈತಲ್‌ ಬತ್ತ್‌ದ್, ‘ಎನ ಪಗೆಮಾನಿಲೆಡ್ದ್ ಎನನ್ ನ್ಯಾಯ ತೀರ್ತ್‌ದ್ ಬುಡ್ಪಾಲ ಅಂದ್‌ದ್ ನಟ್ಟೊಂದಿತ್ತಲ್!’</verse>
				<verse number="4">ಆಯೆ ಕೆಲವು ದಿನ ಮನಸ್ ಕೊರ್ಜೆ. ‘ಯಾನ್ ದೇವೆರೆಗ್ ಪೋಡಿಯುನಾಯೆ ಅತ್ತ್; ನರಮಾನಿಲೆನ್ ಗಣ್ಯ ಮಲ್ಪುನಾಯೆಲಾ ಅತ್ತ್.</verse>
				<verse number="5">ಆಂಡಲಾ ಈ ವಿಧವೆ ಗಡಿಗಡಿ ಬತ್ತ್‌ದ್ ಕಾಟ ಕೊರ್ಪಿನೆಡ್ದ್ ಆಲೆನ್ ನ್ಯಾಯ ತೀರ್ತ್‌ದ್ ಬುಡ್ಪಾವೆ; ಇಜ್ಜಾಂಡ ಮೋಲು ಬತ್ತ್‌ದ್ ಕಡೆಕ್ಕ್ ಎನ ಜೀವೊನು ಅರ್ಧ ಮಲ್ಪಲ್,’” ಅಂದ್‌ದ್ ಎನ್ನೊಂಡೆ.</verse>
				<verse number="6">ಕರ್ತವೆ ಈ ಉಪಕತೆನ್ ಪಂಡಿ ಬೊಕ್ಕ, “ಇಂದಾ, ಅನ್ಯಾಯಗಾರೆ ಆಯಿ ಈ ನ್ಯಾಯಾಧಿಪತಿ ಎನ್ನೊಂಡಿನೆನ್ ಆಲೋಚನೆ ಮಲ್ಪುಲೆ.</verse>
				<verse number="7">ದೇವೆರೆನ್ ಅಜತೊಂಡಿನಾಕುಲು ರಾತ್ರೆ ಪಗೆಲ್ ಮುರೆಡ್ನಗ ಆಯೆ ಅಕ್ಲೆ ಸಂಗತಿಡ್ ತಡ ಮಲ್ತ್ಂಡಲಾ ಅಕ್ಲೆ ನ್ಯಾಯೊನು ತೀರ್ಪಂದೆ ಉಪ್ಪೆನಾ?</verse>
				<verse number="8">ಅಕ್ಲೆಗ್ ಬೇಗ ನ್ಯಾಯ ತೀರ್ಸಾವೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಇಂಚ ಇತ್ತ್ಂಡಲಾ ನರಮಾನಿ ಮಗೆ ಬನ್ನಗ ಭೂಮಿದ ಮಿತ್ತ್ ನಂಬಿಕೆನ್ ತೂವೆನಾ?” ಪಂಡೆ.</verse>
				<verse number="9">ಉಂದತ್ತಂದೆ ತನ್ಕುಲೇ ನೀತಿವಂತೆರ್ ಅಂದ್‌ದ್ ನಂಬೊಂದು ಬಾಕಿದಾಕುಲೆನ್ ಉದಾಸೀನದಾಕುಲು ಎನ್ನುನಾಕುಲೆಗ್ ಯೇಸು ಒಂಜಿ ಉಪಕತೆನ್ ಪಂಡೆ.</verse>
				<verse number="10">ಅವು ದಾದ ಪಂಡ, “ಪ್ರಾರ್ಥನೆ ಮಲ್ಪೆರೆಗಾದ್ ರಡ್ಡ್ ಜನೊಕುಲು ದೇವಾಲಯೊಗು ಪೋಯೆರ್. ಒರಿ ಪರಿಸಾಯೆ, ಒರಿ ಸುಂಕದಾಯೆ.</verse>
				<verse number="11">ಪರಿಸಾಯೆ ಉಂತೊಂದು ಪ್ರಾರ್ಥನೆ ಮಲ್ಪುನಗ ದೇವೆರೇ, ‘ಯಾನ್ ಲೂಟಿ ಮಲ್ಪುನಾಯೆ ಅತ್ತ್, ಅನ್ಯಾಯಗಾರೆ ಅತ್ತ್, ವ್ಯಭಿಚಾರ ಮಲ್ಪುನಾಯೆ ಅತ್ತ್, ಬಾಕಿದ ಜನೊಕುಲೆ ಲೆಕ್ಕ ಯಾನತ್ತ್, ಈ ಸುಂಕದಾಯನ ಲೆಕ್ಕಲಾ ಅತ್ತ್. ಅಂಚಾಯಿನೆಡ್ದ್ ನಿಕ್ಕ್ ಉಪಕಾರ ಸಂದಾವೆ.</verse>
				<verse number="12">ವಾರೊಗು ರಡ್ಡ್ ಸರ್ತಿ ಉಪವಾಸ ಮಲ್ಪುವೆ, ಯಾನ್ ಸಂಪಾದನೆ ಮಲ್ತಿನೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಕೊರ್ಪೆ,’ ಅಂದ್‌ದ್ ಪಂಡೊಂಡೆ.</verse>
				<verse number="13">ಆಂಡ ಆ ಸುಂಕದಾಯೆ ದೂರೊಡು ಉಂತುದು ಬಾನದ ಕಡೆಕ್ಕ್ ಕಣ್ಣ್ ಜತ್ತ್‌ದ್ ತೂವೆರೆಲಾ ಮನಸಿಜ್ಜಂದೆ ತಿಗಲೆಗ್ ಹಾಕೊಂದು, ‘ದೇವೆರೇ ಪಾಪಿ ಆಯಿ ಎಂಕ್ ಕನಿಕರ ತೋಜಾಲ!’ ಅಂದ್‌ದ್ ನಟ್ಟಿಯೆ.</verse>
				<verse number="14">ಉಂಬೆ ನೀತಿವಂತೆ ಆದ್ ತನ ಇಲ್ಲಗ್ ಪೋಯೆ. ಆ ಪರಿಸಾಯೆ ಸುಂಕದಾಯ ಲೆಕ್ಕ ನೀತಿವಂತೆ ಆದ್ ಪೋಯಿಜೆ ಅಂದ್‌ದ್ ನಿಕ್ಲೆಗ್ ಪನ್ಪೆ. ಏರ್ ತನನ್ ಹೆಚ್ಚಾವೊನ್ವೆನಾ ದೇವೆರ್ ಆಯನ್ ತಗ್ಗಾವೆ. ಏರ್ ತನನ್ ತಾನ್ ತಗ್ಗಾವೊನ್ವೆನಾ ದೇವೆರ್ ಆಯನ್ ಮಲ್ಲ ಸ್ಥಾನೊಗು ಏರಾವೆ.”</verse>
				<verse number="15">ಕೆಲೆವೆರ್ ಜೋಕುಲೆನ್ ಯೇಸು ಮುಟ್ಟೊಡು ಅಂದ್‌ದ್ ಆಯನ ಕೈತಲ್‌ ಕನತಿನಪಗ ಶಿಷ್ಯೆರ್ ತೂದು ಅಕ್ಲೆನ್ ದಟ್ಟಿಯೆರ್.</verse>
				<verse number="16">ಆಂಡ ಯೇಸು ಆ ಜೋಕುಲೆನ್ ತನ ಕೈತಲ್‌ ಲೆಪುಡಾದ್, “ಜೋಕುಲೆನ್ ಎನ ಕೈತಲ್‌ ಬರಿಯೆರೆ ಬುಡ್ಲೆ; ಅಕ್ಲೆಗ್ ಅಡ್ಡಿ ಮಲ್ಪಡೆ; ದೇವೆರೆ ರಾಜ್ಯ ಇಂಚಿತ್ತಿನಾಕುಲೆನವೇ.</verse>
				<verse number="17">ನಿಕ್ಲೆಗ್ ನಿಜಾದ್ ಪನ್ಪೆ, ಬಾಲೆದಲೆಕ್ಕ ಒರಿ ದೇವೆರೆ ರಾಜ್ಯೊನು ದೆತ್ತೊನುಜೆಡ, ಆಯೆ ಐತ ಉಲಯಿ ಪೋವಯೆ,” ಅಂದ್‌ದ್ ಪಂಡೆ.</verse>
				<verse number="18">ಒರಿ ಅಧಿಕಾರಿ ಬತ್ತ್‌ದ್ ಯೇಸುಡ, “ಎಡ್ಡೆ ಬೋಧಕಾ, ಯಾನ್ ನಿತ್ಯಜೀವೊಗು ಭಾದ್ಯಸ್ಥೆ ಆವೆರೆ ದಾದ ಮಲ್ಪೊಡು?” ಅಂದ್‌ದ್ ಕೇಂಡೆ.</verse>
				<verse number="19">ಯೇಸು ಆಯಡ, “ಎನನ್ ಎಡ್ಡೆಂತಿನಾಯೆ ಅಂದ್‌ದ್ ದಾಯೆಗ್ ಪನ್ಪ? ದೇವೆರ್ ಒರಿಯೇ ಅತ್ತಂದೆ ಬೇತೆ ಏರ್ಲಾ ಎಡ್ಡೆಂತಿನಾಯೆ ಇಜ್ಜೆ.</verse>
				<verse number="20">‘ವ್ಯಭಿಚಾರ ಮಲ್ಪೆರೆ ಬಲ್ಲಿ, ಮಾನ್ಯ ಕೆರಿಯೆರೆ ಬಲ್ಲಿ, ಕಂಡೊನಿಯೆರೆ ಬಲ್ಲಿ, ಸುಳ್ಳು ಸಾಕ್ಷಿ ಪನಿಯೆರೆ ಬಲ್ಲಿ, ನಿನ ಅಪ್ಪೆಅಮ್ಮನ್ ಸನ್ಮಾನ ಮಲ್ಪೊಡು ಪನ್ಪಿ ದೇವೆರೆ ಅಪ್ಪಣೆಲು ನಿಕ್ಕ್ ಗೊತ್ತುಂಡತ್ತಾ?’” ಅಂದ್‌ದ್ ಪಂಡೆ.</verse>
				<verse number="21">ಐಕ್ ಆಯೆ, “ಯಾನ್ ಎಲ್ಲಿಡ್ದಿಂಚಿಲಾ ಉಂದೆಕ್ಕ್ ಮಾತೆಕ್ಲಾ ಸರಿಯಾದ್ ನಡತೊಂದು ಬೈದೆ.” ಪಂಡ್ದ್ ಪನ್ನಗ,</verse>
				<verse number="22">ಯೇಸು ಅವೆನ್ ಕೇಂಡ್ದ್ ಆಯಡ, “ನಿನಡ ಒಂಜಿ ಕಮ್ಮಿ ಉಂಡು. ಪೋದು ನಿನ ಆಸ್ತಿನ್ ಮಾತೆನ್ ಮಾರ್ದ್ ಬಡವೆರೆಗ್ ಕೊರ್ಲ. ಪರಲೋಕೊಡು ನಿಕ್ಕ್ ಆಸ್ತಿ ಉಪ್ಪುಂಡು; ಬೊಕ್ಕ ಎನ ಬೆರಿಯೆ ಬಲ,” ಪಂಡ್ದ್ ಪಂಡೆ.</verse>
				<verse number="23">ಆಯೆ ಮಸ್ತ್ ಐಶ್ವರ್ಯವಂತೆ ಆದಿತ್ತಿನೆಡ್ದ್ ಉಂದೆನ್ ಕೇಂಡ್ದ್ ಮಸ್ತ್ ದುಃಖ ಮಲ್ತೆ.</verse>
				<verse number="24">ಅಪಗ ಯೇಸು ಆಯನ್ ತೂದು, “ಐಶ್ವರ್ಯ ಇತ್ತಿನಾಕುಲು ದೇವೆರೆ ರಾಜ್ಯೊಡು ಸೇರುನವು ಏತೋ ಕಷ್ಟ.</verse>
				<verse number="25">ಅಂದ್, ಐಶ್ವರ್ಯವಂತೆ ದೇವೆರೆ ರಾಜ್ಯೊಡು ಸೇರುನೆಡ್ದ್ ಒಂಟೆ ಸೂಜಿದ ಕಣ್ಣ್‌ಡ್ ನೂರುನವು ಸುಲಭ,” ಪಂಡೆ.</verse>
				<verse number="26">ಈ ಪಾತೆರೊನು ಕೇಂಡಿನಾಕುಲು, “ಏರೆಗ್ ರಕ್ಷಣೆ ಆವು?” ಅಂದ್‌ದ್ ಕೇನ್ನಗ</verse>
				<verse number="27">ಯೇಸು, “ನರಮಾನಿಲೆಗ್ ಅಸಾಧ್ಯದ ಕಾರ್ಯೊಲು ದೇವೆರೆಗ್ ಸಾದ್ಯ,” ಪಂಡೆ.</verse>
				<verse number="28">ಅಪಗ ಪೇತ್ರೆ, “ಇಂದಾ, ಎಂಕುಲು ಎಂಕ್ಲೆ ಇಲ್ಲ್ ಬದ್‌ಕ್‌ನ್ ಬುಡ್ದು ನಿನ ಬೆರಿಯೆ ಬೈದ,” ಅಂದ್‌ದ್ ಪಂಡೆ.</verse>
				<verse number="29">ಐಕ್ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ ಏರ್ ದೇವೆರೆ ರಾಜ್ಯೊಗಾದ್ ಇಲ್ಲ್‌ನಾವಡ್ ಬೊಡೆದಿನಾವಡ್ ಮೆಗ್ಯೆಪಲಯಾಡ್ಲೆನಾವಡ್ ಅಪ್ಪೆಅಮ್ಮನಾವಡ್ ಬಾಲೆಲೆನಾವಡ್ ಬುಡ್ತಿನಾಕುಲೆಗ್‌</verse>
				<verse number="30">ಇತ್ತೆದ ಲೋಕೊಡೇ ಮಸ್ತ್ ಪಾಲ್ ತಿಕ್ಕ್‌ದೇ ತಿಕ್ಕುಂಡು, ಬೊಕ್ಕ ಬರ್ಪಿ ಲೋಕೊಡು ನಿತ್ಯಜೀವಲಾ ತಿಕ್ಕುಂಡು,” ಅಂದ್‌ದ್ ಪಂಡೆ.</verse>
				<verse number="31">ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಬರಿಕ್ಕ್ ಲೆತ್ತೊಂದು ಪೋದು ಅಕ್ಲೆಗ್, “ತೂಲೆ, ಎಂಕುಲು ಯೆರೂಸಲೇಮುಗು ಪೋವೊಂದುಲ್ಲ; ಬೊಕ್ಕ ನರಮಾನಿ ಮಗನ ಬಗೆಟ್ ಪ್ರವಾದಿಲು ಬರೆತಿನವು ಮಾತಲಾ ಪೂರ್ತಿ ಆವು; ಎಂಚ ಪಂಡ,</verse>
				<verse number="32">ಆಯನ್ ಪಿದಯಿದ ಜನೊಕುಲೆ ಕೈಕ್ ಒಚ್ಚಿದ್ ಕೊರುವೆರ್. ಮೊಕುಲು ಆಯಗ್ ಗೇಲಿ ಮಲ್ತ್‌ದ್, ನೆರ್ಪೆರ್, ಆಯನ ಮಿತ್ತ್ ಉಬ್ಬಿದ್, ಆಯಗ್ ಚಾಟಿಡ್ ಹಾಕ್‌ದ್, ಕೆರ್ದ್ ಪಾಡ್ವೆರ್,</verse>
				<verse number="33">ಬೊಕ್ಕ ಆಯೆ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರ್ಪೆ.”</verse>
				<verse number="34">ಅಕುಲು ಈ ಸಂಗತಿನ್ ಒಂಜೆನ್ಲಾ ಅರ್ಥ ಮಲ್ತೊನ್ಜೆರ್, ಈ ಪಾತೆರೊಲು ಅಕ್ಲೆಗ್ ಮದೆಯಾಯಿನೆಡ್ದ್ ಐತ ಅರ್ಥೊನು ಅಕುಲು ತೆರಿಯಂದೆ ಪೋಯೆರ್.</verse>
				<verse number="35">ಯೇಸು ಯೆರಿಕೋವುಗು ಕೈತಲ್‌ ಬನ್ನಗ ಸಾದಿದ ಬರಿಟ್ಟ್ ಒರಿ ಕುರುಡೆ ಕುಲ್ಲೊಂದು ನಟ್ಟೊಂದಿತ್ತೆ.</verse>
				<verse number="36">ಆಯೆ ಜನೊಕುಲೆನ ಶಬ್ಧೊನು ಕೇಂಡ್ದ್, “ಉಂದು ದಾದ?” ಅಂದ್‌ದ್ ಕೇನ್ನಗ</verse>
				<verse number="37">ಅಕುಲು ಆಯಡ, “ನಜರೇತ್‌ದ ಯೇಸು ಆ ಸಾದಿಡ್ ಪೋವೊಂದುಲ್ಲೆ,” ಅಂದ್‌ದ್ ತೆರಿಪಾನಗ</verse>
				<verse number="38">ಆಯೆ ಯೇಸೋ, “ದಾವೀದ್ ಮಗಾ, ಎನನ್ ಕರುಣೆ ಮಲ್ಪುಲ,” ಅಂದ್‌ದ್ ಬುಲ್ತೆ.</verse>
				<verse number="39">ದುಂಬುಡು ಪೋವೊಂದಿತ್ತಿನಾಕುಲು ಆಯನ್ ಮನಿಪಂದೆ ಉಪ್ಪೊಡಂದ್‌ದ್ ದಟ್ಟಿನಗ ಆಯೆ, “ದಾವೀದ ಮಗಾ, ಎಂಕ್ ಕನಿಕರ ತೋಜಾಲ,” ಅಂದ್‌ದ್ ಬೊಕ್ಕಲಾತ್ ಬೊಬ್ಬೆ ದೀಯೆ.</verse>
				<verse number="40">ಅಪಗ ಯೇಸು ಉಂತುದು ಆಯನ್ ಲೆತ್ತೊಂದು ಬರಿಯೆರೆ ಅಪ್ಪಣೆ ಕೊರಿಯೆ. ಅಕುಲು ಆಯನ್ ಲೆತ್ತೊಂದು ಬತ್ತೆರ್.</verse>
				<verse number="41">ಯೇಸು ಆಯಡ, “ಯಾನ್ ನಿಕ್ಕ್ ದಾದ ಮಲ್ಪೊಡು?” ಅಂದ್‌ದ್ ಕೇನ್ನಗ ಆಯೆ, “ಕರ್ತವಾ, ಎಂಕ್ ಕಣ್ಣ್ ತೋಜುಲೆಕ್ಕ ಮಲ್ಪೊಡು,” ಅಂದ್‌ದ್ ಪಂಡೆ.</verse>
				<verse number="42">ಯೇಸು ಆಯಡ, “ನಿಕ್ಕ್ ಕಣ್ಣ್‌ಗ್ ದೃಷ್ಟಿ ಬರಡ್, ನಿನ ನಂಬಿಕೆನೇ ನಿನನ್ ಗುಣ ಮಲ್ತ್ಂಡ್,” ಪಂಡ್ದ್ ಪಂಡೆ</verse>
				<verse number="43">ಅಪಗನೆ ಆಯಗ್ ಕಣ್ಣ್ ತೋಜ್ಂಡ್. ಆಯೆ ದೇವೆರೆನ್ ಪುಗರೊಂದು ಆಯನ ಬೆರಿಯೆ ಪೋಯೆ. ಜನೊಕುಲು ಮಾತೆರ್ಲಾ ನಡತಿ ಸಂಗತಿನ್ ತೂದು ದೇವೆರೆನ್ ಸುಗಿತೆರ್.</verse>
			</chapter>
			<chapter number="19">
				<verse number="1">ಯೇಸು ಯೆರಿಕೊ ಪಟ್ಟಣದ ಉಲಯಿ ಕಡತ್‌ದ್ ಪೋವೊಂದುಪ್ಪುನಗ</verse>
				<verse number="2">ಅಲ್ಪ ಜಕ್ಕಾಯೆ ಪನ್ಪಿ ಒರಿ ನರಮಾನಿ ಇತ್ತೆ. ಆಯೆ ಸುಂಕದ ಗುತ್ತಿಗೆದಾಯೆಲಾ ಐಶ್ವರ್ಯವಂತೆಲಾ ಆದಿತ್ತೆ.</verse>
				<verse number="3">ಆಯೆ ಯೇಸು ಏರಂದ್‌ದ್ ತೂವೆರೆ ಮನಸ್ ಮಲ್ತೆಡಲಾ ತಾನ್ ಕುದ್ಯ ಇತ್ತಿನೆಡ್ದ್ ಜನೊಕುಲೆ ಗುಂಪುಡ್ದು ತೋಜಂದೆ ಪೋಯೆ.</verse>
				<verse number="4">ಐಡ್ದಾವರ ಆಯನ್ ತೂವೆರೆಗಾದ್ ಎದುರು ಪಾರ್‌ಪೋದು ಯೇಸು ಬರೊಂದುಪ್ಪು ಮಾರ್ಗೊಡು ಇತ್ತಿ ಗೋಳಿದ ಮರೊಕು ಮಿತ್ತರಿಯೆ.</verse>
				<verse number="5">ಯೇಸು ಆ ಜಾಗ್‌ಗ್ ಬನ್ನಗ ಮಿತ್ತ್ ತೂದು ಜಕ್ಕಾಯ, “ಇತ್ತೆನೇ ಜತ್ತ್‌ದ್ ಬಲ, ಯಾನ್ ಇನಿ ನಿನ ಇಲ್ಲಡ್ ಉಂತುವೆ,” ಅಂದ್‌ದ್ ಆಯಡ ಪನ್ನಗ</verse>
				<verse number="6">ಆಯೆ ಅಪಗನೆ ಮರೊಡ್ದು ಜತ್ತ್‌ದ್ ಯೇಸುನು ಮಸ್ತ್ ಸಂತೋಷೊಡು ಇಲ್ಲಗ್ ಲೆತ್ತೊಂದು ಪೋಯೆ.</verse>
				<verse number="7">ಉಂದೆನ್ ತೂಯಿನಾಕುಲು ಮಾತೆರ್ ಗುಣುಗುಟ್ಟುದು, “ಉಂಬೆ ಪಾಪಿ ಆದುಪ್ಪುನಾಯನ ಒಟ್ಟುಗು ಉಂತಿಯರೆ ಪೋಪೆ,” ಅಂದ್‌ದ್ ಪಂಡೆರ್.</verse>
				<verse number="8">ಆಂಡ ಜಕ್ಕಾಯೆ ಕರ್ತವಾ, “ತೂಲ, ಎನ ಆಸ್ತಿಡ್ ಅರ್ಧೊನು ಬಡವೆರೆಗ್ ಕೊರ್ಪೆ; ಬೊಕ್ಕ ಅನ್ಯಾಯೊಡು ಏರೆಗಾಂಡಲಾ ಮೋಸ ಮಲ್ತಿನವು ಉಂಡುಡ ಐತ ನಾಲ್ ಪಾಲ್ ದಾತ್ ಪಿರ ಕೊರ್ಪೆ,” ಅಂದ್‌ದ್ ಪಂಡೆ.</verse>
				<verse number="9">ಉಂದೆನ್ ಕೇಂಡ್ದ್ ಯೇಸು ಆಯಗ್ ಪಂಡೆ, “ಇನಿಡ್ದೇ ಈ ಇಲ್ಲಗ್ ರಕ್ಷಣೆ ಆಂಡ್; ಉಂಬೆಲಾ ಅಬ್ರಹಾಮುನ ಸಂತಾನದಾಯೆ ಅತ್ತಾ?</verse>
				<verse number="10">ನರಮಾನಿ ಮಗೆ ತತ್ತ್‌ದ್ ಪೋಯಿನೆನ್ ನಾಡಿಯೆರೆಲಾ ರಕ್ಷಣೆ ಮಲ್ಪೆರೆಲಾ ಬತ್ತೆ.”</verse>
				<verse number="11">ಶಿಷ್ಯೆರ್ ಈ ಪಾತೆರೊನು ಕೇನೊಂದುಪ್ಪುನಗ ಯೇಸು ಯೆರೂಸಲೇಮುದ ಕೈತಲ್‌ ಇತ್ತಿನೆಡ್ದ್‌ಲಾ ದೇವೆರೆ ರಾಜ್ಯ ಬೇಗ ಬರ್ಪುಂಡು ಅಂದ್‌ದ್ ಎನ್ನೊಂದಿತ್ತಿನೆಡ್ದ್‌ಲಾ ಆಯೆ ನನಲಾ ಒಂಜಿ ಉಪಕತೆನ್ ಪಂಡೆ.</verse>
				<verse number="12">ಅವು ಇಂಚಾದುಂಡು, “ಒರಿ ಮಲ್ಲ ಕುಲತ ನರಮಾನಿ ತಾನ್ ರಾಜ್ಯಾಧಿಕಾರೊನು ಪಡೆಯೊಂದು ಪಿರ ಬರಿಯೆರೆ ದೂರ ದೇಶೊಗು ಪೋಯೆ.</verse>
				<verse number="13">ಆಯೆ ಪೋಪಿನೆಡ್ದ್ ದುಂಬು ತನ ಬೇಲೆದಾಕುಲೆಡ್ ಪತ್ತ್ ಜನೊಕುಲೆನ್ ಲೆತ್ತ್‌ದ್ ಅಕ್ಲೆಗ್, ‘ಪ್ರತಿ ಒರಿಯಗ್ ಒಂಜಿ, ಒಂಜಿ ಬಂಗಾರ್‌ದ ಪಾವೊಲಿ ಕೊರ್ದು ಯಾನ್ ಬನ್ನೆಟ್ಟ ಬ್ಯಾರ ಮಲ್ತೊಂದುಪ್ಪುಲೆ,’ ಅಂದ್‌ದ್ ಪೋಯೆ.</verse>
				<verse number="14">ಆ ಪಟ್ಟಣದ ಜನೊಕುಲು ಆಯನ್ ದೂರುದು, ‘ಎಂಕ್ಲೆನ ಮಿತ್ತ್ ರಾಜನ ಅಧಿಕಾರ ಮಲ್ಪುನವು ಎಂಕ್ಲೆಗ್ ಇಷ್ಟ ಇಜ್ಜಿ,’ ಅಂದ್‌ದ್ ರಾಯಭಾರಿಡ ಪನ್ಪಾದ್ ಕಡಪುಡಿಯೆರ್.</verse>
				<verse number="15">ಬೊಕ್ಕ ಆಯೆ ರಾಜ್ಯೊನು ಪಡೆಯೊಂದು ಪಿರ ಬತ್ತೆ. ಆಯೆ ಪಣವುನು ಕೊರ್ತಿ ಬೇಲೆದಾಕುಲೆನ್ ಬ್ಯಾರೊಡ್ದು ಏತೇತ್ ಲಾಭ ಸಂಪಾದನೆ ಮಲ್ತೊಂದೆರ್ ಅಂದ್‌ದ್ ತೆರಿಯೆರೆಗಾದ್ ಅಕ್ಲೆನ್ ತನ ಕೈತಲ್‌ ಲೆಪ್ಪುಡಾಯೆ.</verse>
				<verse number="16">ಸುರುತ್ತಾಯೆ ಬತ್ತ್‌ದ್, ‘ಯಜಮಾನ ಈ ಕೊರ್ತಿನ ಬಂಗಾರ್‌ದ ಪಾವೊಲಿಡ್ದ್ ಪತ್ತ್ ಬಂಗಾರ್‌ದ ಪಾವೊಲಿ ಸಂಪಾದನೆ ಮಲ್ತ್‌ದೆ,’ ಪನ್ನಗ</verse>
				<verse number="17">ಆಯೆ ಆಯಡ, ‘ಪೊರ್ಲು ಆಂಡ್‌, ಎಡ್ಡೆ ಬೇಲೆದಾಯಾ, ಈ ಒಂತೆದೆಟ್ ನಂಬಿಗಸ್ತೆ ಆದಿತ್ತಿನೆಡ್ದ್ ಪತ್ತ್ ಗ್ರಾಮೊಲೆಗ್ ಅಧಿಕಾರಿ ಆದುಪ್ಪುಲ,’ ಅಂದ್‌ದ್ ಪಂಡೆ.</verse>
				<verse number="18">ರಡ್ಡನೆದಾಯೆ ಬತ್ತ್‌ದ್, ‘ಯಜಮಾನ ಈ ಕೊರ್ತಿನ ಬಂಗಾರ್‌ದ ಪಾವೊಲಿಡ್ದ್ ಐನ್ ಬಂಗಾರ್‌ದ ಪಾವೊಲಿ ತಿಕ್ಕ್ಂಡ್,’ ಅಂದ್‌ದ್ ಪಂಡೆ.</verse>
				<verse number="19">ಆಯೆ ಆ ಬೇಲೆದಾಯಡ, ‘ಈಲಾ ಐನ್ ಗ್ರಾಮೊಲೆ ಮಿತ್ತ್ ಅಧಿಕಾರಿ ಆಲ,’ ಅಂದ್‌ದ್ ಪಂಡೆ.</verse>
				<verse number="20">ಬೊಕ್ಕೊರಿ ಬತ್ತ್‌ದ್, ‘ಯಜಮಾನ ಇಂದಾ, ಈ ಕೊರ್ತಿನ ಬಂಗಾರ್‌ದ ಪಾವೊಲಿ. ಅವೆನ್ ಕುಂಟುಡು ಕಟ್ಟ್‌ದ್ ದೀಯೆ.</verse>
				<verse number="21">ಈ ದೀವಂದಿನೆನ್ ದೆತ್ತೊಂದು ಪೋಪ; ಬಿತ್ತಂದಿನೆನ್ ಕೊಯ್ಪ; ಈ ಕಠಿಣ ನರಮಾನಿ, ಅಂದ್‌ದ್ ನಿಕ್ಕ್ ಪೋಡಿದ್ ಅವೆನ್ ಕುಂಟುಡು ಕಟ್ಟ್‌ದ್ ದೆಂಗಾದ್ ದೀಯೆ,’ ಪಂಡೆ.</verse>
				<verse number="22">ಐಕ್ ಆಯೆ, ‘ಈ ಪ್ರಯೋಜನದಾಂತಿ ಬೇಲೆದಾಯೆ, ನಿನ ಪಾತೆರದ ಮಿತ್ತೆ ನಿಕ್ಕ್ ತೀರ್ಪು ಕೊರ್ಪೆ. ಯಾನ್ ದೀವಂದೆ ಉಪ್ಪುನೆನ್ ದೆತ್ತೊಂದು ಪೋಪೆ, ಬಿರ್ಕಂದಿನೆನ್ ಕೊಯ್ಪಿನಾಯೆ ಕಠಿಣ ನರಮಾನಿ ಅಂದ್‌ದ್ ನಿಕ್ಕ್ ಗೊತ್ತ್‌ತ್ತಿಂಡತ್ತಾ?</verse>
				<verse number="23">ಈ ಎನ ಕಾಸ್‌ನ್ ಸಾಹುಕಾರನ ಕೈತಲ್‌ ಬಡ್ಡಿಗ್ ದಾಯೆಗ್ ಕೊರ್ಜ? ಯಾನ್ ಬತ್ತ್‌ದ್ ಅವೆನ್ ಬಡ್ಡಿಸಮೇತ ಆಯಡ ದೆತ್ತೊಂದುವೆ ಅತ್ತಾ?’ ಅಂದ್‌ದ್ ಪಂಡೆ.</verse>
				<verse number="24">ಕೈತಲ್‌ ಉಂತುದಿನಾಕುಲೆಡ, ‘ಆ ಬಂಗಾರ್‌ದ ಪಾವೊಲಿನ್ ಆಯಡ್ದ್ ದೆತ್ತೊಂದು ಪತ್ತ್ ಬಂಗಾರ್‌ದ ಪಾವೊಲಿ ಉಪ್ಪುನಾಯಗ್ ಕೊರ್ಲೆ,’ ಅಂದ್‌ದ್ ಪಂಡೆ.</verse>
				<verse number="25">ಆಂಡ ಅಕುಲು ಆಯಡ, ‘ಯಜಮಾನ, ಪತ್ತ್ ಬಂಗಾರ್‌ದ ಪಾವೊಲಿ ಆಯಡ ಉಂಡತ್ತಾ?’ ಅಂದ್‌ದ್ ಪಂಡೆರ್.</verse>
				<verse number="26">ಐಕ್ ಆಯೆ, ‘ಇತ್ತಿನಾಕುಲೆಗ್ ದೇವೆರ್ ಹೆಚ್ಚಾದ್ ಕೊರುವೆ, ಇಜ್ಜಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು, ಪಂಡ್ದ್ ಪಂಡೆ.</verse>
				<verse number="27">ಬೊಕ್ಕ ಯಾನ್ ನಿಕ್ಲೆನ ಮಿತ್ತ್ ಅಧಿಕಾರ ಮಲ್ಪುನವು ಇಷ್ಟ ಇಜ್ಜಿ ಅಂದ್‌ದ್ ಪಂಡಿನ ಪಗೆನಾಕುಲೆನ್ ಎನ ಕೈತಲ್‌ ಕನತ್‌ದ್ ಎನ ಎದುರುಡು ಕೆರ್ದ್ ಪಾಡೊಡು,’” ಅಂದ್‌ದ್ ಪಂಡೆ.</verse>
				<verse number="28">ಯೇಸು ಈ ಪಾತೆರೊಲೆನ್ ಪಂಡಿ ಬೊಕ್ಕ ಘಟ್ಟ ಮಿರ್ತ್ತಾದ್ ಯೆರೂಸಲೇಮುಗು ದುಂಬು ದುಂಬು ಪೋಯೆ.</verse>
				<verse number="29">ಬೊಕ್ಕ ಆಯೆ ಇಪ್ಪೆದ ಪಾಡಿ ಇನ್ಪಿ ಗುಡ್ಡೆದ ಕೈತಲಿತ್ತಿ ಬೇತ್ಫಗೆಗ್ಲಾ ಬೇಥಾನ್ಯಗ್ಲಾ ಮುಟ್ಟಾನಗ ಅಲ್ಪ ಯೇಸು ಶಿಷ್ಯೆರೆಡ್ ಇರ್ವೆರೆನ್ ಲೆತ್ತ್‌ದ್,</verse>
				<verse number="30">“ನಿಕ್ಲೆನ ಎದುರು ತೋಜುನ ಹಳ್ಳಿಗ್ ಪೋಲೆ; ಐತ ಉಲಯಿ ಪೊಗ್ಗುನಗನೇ ಅಲ್ಪ ಕಟ್ಟ್‌ದುಪ್ಪು ಒಂಜಿ ಕತ್ತೆದ ಕಿನ್ನಿನ್ ತೂಪರ್; ಈತ್‌ನೆಟ್ಟ ಐತ ಮಿತ್ತ್ ಏರ್ಲಾ ಕುಲ್ಲುದಿಜೆರ್; ಅವೆನ್ ಗಿರ್ತ್‌ದ್ ಪತ್ತೊಂದು ಕನಲೆ.</verse>
				<verse number="31">ಏರಾಂಡಲಾ ನಿಕ್ಲೆನ್, ದಾಯೆ ಗಿರ್ಪುವರ್ ಅಂದ್‌ದ್ ಕೇಂಡೆರ್ಡ, ಉಂದು ಕರ್ತವಗ್ ಬೋಡಾತ್ಂಡ್,” ಪಂಡ್ದ್ ಪನ್ಲೆ.</verse>
				<verse number="32">ಅಕುಲು ಇರ್ವೆರ್‌ಲಾ ಹಳ್ಳಿದುಲಯಿ ಪೋದು ಯೇಸು ತನ್ಕುಲೆಗ್ ಪಂಡಿಲೆಕ್ಕನೇ ತೂಯೆರ್.</verse>
				<verse number="33">ಅಕುಲು ಆ ಕತ್ತೆದ ಕಿನ್ನಿನ್ ಗಿರ್ತೊಂದುಪ್ಪುನಗ ಐತ ಧನಿ ಅಕ್ಲೆಡ, “ಈ ಕಿನ್ನಿನ್ ಗಿರ್ತ್‌ದ್ ದಾದ ಮಲ್ಪುವರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="34">ಅಕುಲು, “ಉಂದು ಕರ್ತವಗ್ ಬೋಡಾತ್ಂಡ್,” ಅಂದ್‌ದ್ ಪಂಡೆರ್.</verse>
				<verse number="35">ಅವೆನ್ ಯೇಸುನ ಕೈತಲ್‌ ಕನತ್‌ದ್ ತನ್ಕುಲೆ ಕುಂಟುಲೆನ್ ಆ ಕತ್ತೆದ ಕಿನ್ನಿದ ಮಿತ್ತ್ ಪಾಡಿ ಬೊಕ್ಕ ಯೇಸುನು ಐತ ಮಿತ್ತ್ ಕುಲ್ಲಾಯೆರ್.</verse>
				<verse number="36">ಆಯೆ ಪೋವೊಂದುಪ್ಪುನಗ ಜನೊಕುಲು ತನ್ಕುಲೆ ಕುಂಟುಲೆನ್ ಸಾದಿಡ್ ಬುಡ್ಪಾಯೆರ್.</verse>
				<verse number="37">ಯೇಸು ಯೆರೂಸಲೇಮುಗು ಕೈತಲಾದ್ ಇಪ್ಪೆಗುಡ್ಡೆಡ್ದ್ ಜಪ್ಪುನ ಜಾಗ್‌ಗ್ ಬನ್ನಗ ಶಿಷ್ಯೆರ್‌ನಾಕುಲು ಸಂತೋಷ ಪಡೆದ್ ತನ್ಕುಲು ತೂಯಿನ ಮಾತ ಕಾರ್ನಿಕೊಲೆ ಬಗೆಟ್, “ಕರ್ತವ ಪುದರ್‌ಡ್ ಬರ್ಪಿನ ಅರಸುಗು ಆಶೀರ್ವಾದ, ಪರಲೋಕೊಡು ಸಮಾಧಾನ, ಮಿತ್ತ್‌ದ ಲೋಕೊಡು ಮೈಮೆ ಅಂದ್‌ದ್ ಮಲ್ಲ ಶಬ್ಧೊಡು ದೇವೆರೆನ್ ಪುಗರಿಯೆರೆ ಸುರು ಮಲ್ತೆರ್.”</verse>
				<verse number="38"></verse>
				<verse number="39">ಜನೊಕುಲೆ ಗುಂಪುದುಲಯಿ ಇತ್ತಿ ಪರಿಸಾಯೆರೆಡ್ ಕೆಲೆವೆರ್ ಯೇಸುಗು, “ಬೋಧಕಾ, ನಿನ ಶಿಷ್ಯೆರೆನ ಬಾಯಿ ಮುಚ್ಚಾಲ,” ಪಂಡ್ದ್ ಪಂಡಿನೆಕ್ಕ್</verse>
				<verse number="40">ಯೇಸು ಅಕ್ಲೆಡ, “ಮೊಕುಲು ಮನಿಪಂದೆ ಇತ್ತೆರ್ಡ ಈ ಕಲ್ಲ್‌ಲು ಬುಲ್ಪ,” ಪಂಡೆ.</verse>
				<verse number="41">ಬೊಕ್ಕ ಯೇಸು ಕೈತಲಾನಗ ಯೆರೂಸಲೇಮು ಪಟ್ಟಣನ್‌ ತೂದು ಐತ ಸಂಗತಿಡ್ ಬುಲ್ತುದು,</verse>
				<verse number="42">“ಈ ಆಂಡಲಾ ಸಮಾಧಾನೊಗು ಬೋಡಿತ್ತಿನೆನ್ ಇನಿಯೇ ತೆರಿಯೊಂಡಡ ಏತೋ ಎಡ್ಡೆ ಇತ್ತ್ಂಡ್. ಆಂಡ ಇತ್ತೆ ಅವು ನಿನ ಕಣ್ಣ್‌ಗ್ ಮದೆ ಆತ್ಂಡ್.</verse>
				<verse number="43">ದೇವೆರ್ ನಿಕ್ಕ್ ದರ್ಶನ ಕೊರಿ ಗಳಿಗೆನ್ ಈ ತೆರಿಯೊಂಡಿಜ. ಐಡ್ದಾವರ ನಿನ ಪಗೆಮಾನಿಲು ಗುಂಪು ಕಟ್ಟ್‌ದ್ ನಿನ ಸುತ್ತಲಾ ಸೇರ್ದ್ ಮಾತ ಕಡೆಡ್ದ್‌ಲಾ ನಿನನ್ ಮುಚ್ಚಿದ್, ನಿನನ್ಲಾ ನಿನಡುಪ್ಪು ನಿನ ಬಾಲೆಲೆನ್ಲಾ ನೆಲ ಸಮ ಮಲ್ತ್‌ದ್ ಕಲ್ಲ್‌ದ ಮಿತ್ತ್ ಕಲ್ಲ್ ಉಂತಂದಿಲೆಕ್ಕ ಮಲ್ಪುನ ದಿನೊಕುಲು ನಿನ ಮಿತ್ತ್ ಬರು,” ಅಂದ್‌ದ್ ಪಂಡೆ.</verse>
				<verse number="44"></verse>
				<verse number="45">ಬೊಕ್ಕ ಯೇಸು ದೇವಾಲಯೊಗು ಪೋದು ಮಾರುನಾಕುಲೆನ್ ಗಿಡ್ಪೆರೆ ಸುರು ಮಲ್ತೆ.</verse>
				<verse number="46">ಅಕ್ಲೆಗ್, “ಎನ ಇಲ್ಲ್ ಪ್ರಾರ್ಥನೆದ ಇಲ್ಲ್ ಆದುಂಡು ಅಂದ್‌ದ್ ಬರೆತ್ಂಡ್, ಆಂಡ ನಿಕುಲು ಅವೆನ್ ಕಲ್ವೆರೆ ಮಾಟೆ ಮಲ್ತ್‌ದರ್,” ಅಂದ್‌ದ್ ಪಂಡೆ.</verse>
				<verse number="47">ಬೊಕ್ಕ ಆಯೆ ದಿನಾಲ ದೇವಾಲಯೊಡು ಬೋಧನೆನ್ ಮಲ್ತೊಂದಿತ್ತೆ. ಆತ್‌ನೆಟ್ಟ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಜನೊಕುಲೆನ ಮುಖ್ಯಸ್ಥೆರ್‌ಲಾ ಆಯನ್ ಕೆರಿಯೆರೆ ಗಳಿಗೆ ತೂವೊಂದಿತ್ತೆರ್,</verse>
				<verse number="48">ಆಂಡ ಜನೊಕುಲು ಮಾತೆರ್ ಆಯನ ಕೈತಲಿತ್ತ್‌ದ್ ಬೋಧನೆನ್ ಕೆಬಿ ಕೊರ್ದು ಕೇನೊಂದಿತ್ತಿನೆಡ್ದ್ ಯೇಸುನು ದಾದ ಮಲ್ಪೊಡಂದ್‌ದ್ ತೋಜಿಜಿ.</verse>
			</chapter>
			<chapter number="20">
				<verse number="1">ಒಂಜಿ ದಿನ ಯೇಸು ದೇವಾಲಯೊಡು ಜನೊಕುಲೆಗ್ ಬೋಧನೆ ಮಲ್ತೊಂದು ಸುವಾರ್ತೆ ಸಾರಿಯೊಂದುಪ್ಪುನಪಗ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸಭೆತ ಹಿರಿಯಾಕುಲುಲಾ ಯೇಸುನ ಕೈತಲ್‌ ಬತ್ತ್‌ದ್</verse>
				<verse number="2">“ಈ ವಾ ಅಧಿಕಾರೊಡು ಉಂದೆನ್ ಮಾತ ಮಲ್ತೊಂದುಲ್ಲ? ಈ ಅಧಿಕಾರೊನು ನಿಕ್ಕ್ ಏರ್ ಕೊರಿಯೆರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="3">ಯೇಸು ಅಕ್ಲೆಡ, “ಯಾನ್ಲಾ ನಿಕ್ಲೆಡ ಒಂಜಿ ಪಾತೆರ ಕೇನ್ವೆ ಎಂಕ್ ಪನ್ಲೆ.</verse>
				<verse number="4">ದೀಕ್ಷಾಸ್ನಾನ ಮಲ್ಪಾವುನ ಅಧಿಕಾರ ಯೋಹಾನಗ್ ಪರಲೋಕೊಡ್ದಾ ನರಮಾನಿಲೆಡ್ದಾ?” ಅಂದ್‌ದ್ ಕೇಂಡೆ.</verse>
				<verse number="5">ಅಕುಲು ಒಟ್ಟು ಕೂಡುದು ಚರ್ಚೆ ಮಲ್ತೆರ್, “‘ಪರಲೋಕೊಡ್ದು,’ ಅಂದ್‌ದ್ ನಮ ಪಂಡ್ಂಡ, ‘ನಿಕುಲು ಆಯನ್ ದಾಯೆಗ್ ನಂಬುಜರ್?’ ಅಂದ್‌ದ್ ಪನುವೆ.</verse>
				<verse number="6">‘ನರಮಾನಿಲೆಡ್ದ್ ಬೈದ್‌ಂಡ್,’ ಅಂದ್‌ದ್ ಪಂಡ್ಂಡ, ಜನೊಕುಲು ಮಾತೆರ್ಲಾ ಯೋಹಾನನ್ ಪ್ರವಾದಿ ಅಂದ್‌ದ್ ನಂಬೊಂದು ಉಪ್ಪುನೆಡ್ದ್ ಅಕುಲು ನಮನ್ ಕಲ್ಲ್ ದಕ್ಕ್‌ದ್ ಕೆರ್ವೆರ್,” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="7">ಐಡ್ದ್ ಬೊಕ್ಕ ಅಕುಲು, “ಅವು ಒಲ್ತುಡ್ದು ಬತ್ತ್ಂಡ್ ಪಂಡ್ದ್ ಎಂಕ್ಲೆಗ್ ಗೊತ್ತುಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="8">ಅಪಗ ಯೇಸು ಅಕ್ಲೆಗ್, “ಉಂದೆನ್ ವಾ ಅಧಿಕಾರೊಡು ಮಲ್ಪುವೆನಾ ಅವೆನ್ ಯಾನ್ಲಾ ನಿಕ್ಲೆಗ್ ಪನ್ಪುಜಿ,” ಅಂದ್‌ದ್ ಪಂಡೆ.</verse>
				<verse number="9">ಅಪಗ ಯೇಸು ಜನೊಕುಲೆಗ್ ಒಂಜಿ ಉಪಕತೆನ್ ಪನಿಯೆರೆ ಸುರು ಮಲ್ತೆ, “ಒರಿ ನರಮಾನಿ ಒಂಜಿ ದ್ರಾಕ್ಷೆತೋಟೊನು ಮಲ್ತ್‌ದ್ ಅವೆನ್ ಒಕ್ಕೆಲ್‌ದಾಕುಲೆಗ್ ಬೆನಿಯೆರೆ ಕೊರ್ದು ಬೊಕ್ಕೊಂಜಿ ದೇಶೊಗು ಪೋದು ಅಲ್ಪ ಮಸ್ತ್ ಕಾಲ ಇತ್ತೆ.</verse>
				<verse number="10">ಫಲತ್ತ ಕಾಲ ಬನ್ನಗ ದ್ರಾಕ್ಷೆತೋಟದ ಬುಲೆತ ಪಾಲ್‌ನ್ ದೆತ್ತೊನೊರೆಗಾದ್ ಒರಿ ಚಾಕ್ರಿದಾಯನ್ ಒಕ್ಕೆಲ್‌ದಾಕುಲೆನ ಕೈತಲ್‌ ಕಡಪುಡಿಯೆ. ಆಂಡ ಆ ಒಕ್ಕೆಲ್‌ದಾಕುಲು ಆಯಗ್ ಹಾಕ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್.</verse>
				<verse number="11">ಆ ಧನಿ ನನೊರಿ ಬೇಲೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಹಾಕ್‌ದ್ ಅವಮಾನ ಮಲ್ತ್‌ದ್ ಕಾಲಿ ಕೈಟ್ ಕಡಪುಡ್ದು ಬುಡಿಯೆರ್.</verse>
				<verse number="12">ಬೊಕ್ಕ ಮೂಜನೆದಾಯನ್ ಕಡಪುಡ್ನಗ ಅಕುಲು ಆಯನ್ಲಾ ಗಾಯ ಆಪಿನಾತ್ ಹಾಕ್‌ದ್ ಪಿದಯಿ ಪಾಡಿಯೆರ್.</verse>
				<verse number="13">ಅಪಗ ಆ ದ್ರಾಕ್ಷೆತೋಟದ ಧನಿ, ‘ಯಾನ್ ನನ ದಾನೆ ಮಲ್ಪೊಲಿ? ಎನ ಪ್ರೀತಿದ ಮಗನ್ ಕಡಪುಡ್ವೆ, ಒಂಜಿ ವೇಳೆ ಆಯಗಾಂಡಲಾ ಮರ್ಯಾದಿ ತೋಜಾವೆರೆ ಯಾವು,’ ಅಂದ್‌ದ್ ಪಂಡೆ.</verse>
				<verse number="14">ಆಂಡ ಆ ಒಕ್ಕೆಲ್‌ದಾಕುಲು ಯಜಮಾನನ ಮಗನ್ ತೂದು, ‘ಇಂಬೆನೇ ಹಕ್ಕ್‌ದಾರೆ, ಇಂಬ್ಯನ್ ಕೆರ್ದ್ ಪಾಡ್‌ಗ, ಇಂಬ್ಯನ ಸೊತ್ತು ನಮ್ಮವು ಆವು,’ ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="15">ಬೊಕ್ಕ ಅಕುಲು ಆಯನ್ ದ್ರಾಕ್ಷೆತೋಟೊಡ್ದು ಪಿದಯಿ ನೂಕುದು ಕೆರ್ದ್ ಪಾಡಿಯೆರ್. “ಅಂಚಾಂಡ ದ್ರಾಕ್ಷೆತೋಟದ ಧನಿ ಅಕ್ಲೆಗ್ ಎಂಚಿನ ಮಲ್ಪೆ?</verse>
				<verse number="16">ಆಯೆ ಬತ್ತ್‌ದ್ ಆ ಒಕ್ಕೆಲ್‌ದಾಕುಲೆನ್ ನಾಶ ಮಲ್ತ್‌ದ್, ತನ ತೋಟೊನು ಬೇತೆಕ್ಲೆಗ್ ಕೊರುವೆ.” ಉಂದೆನ್ ಜನೊಕುಲು ಕೇಂಡ್ದ್, “ದೇವೆರ್ ಅಂಚ ಆವೆರೆ ಬುಡಿಯೆರೆ ಬಲ್ಲಿ,” ಪಂಡೆರ್.</verse>
				<verse number="17">ಆಂಡ ಯೇಸು ಅಕ್ಲೆನ್ ದೃಷ್ಟಿ ದೀದ್ ತೂದು, “ಅಂಚಾಂಡ, ‘ಇಲ್ಲ್ ಕಟ್ಟುನಾಕುಲು ಬೊಡ್ಚಿಂದ್‌ದ್ ಬುಡ್ತಿನ ಕಲ್ಲೇ ಮೂಲೆದ ತರೆಕಲ್ಲಾಂಡ್,’ ಅಂದ್‌ದ್ ಬರೆತಿ ಪಾತೆರದ ಅರ್ಥ ಎಂಚಿನಾದುಪ್ಪು?</verse>
				<verse number="18">ಈ ಕಲ್ಲ್‌ದ ಮಿತ್ತ್ ಬೂರುನ ಪ್ರತಿಯೊರಿಲಾ ತುಂಡು ತುಂಡಾದ್ ಪೋಪೆ; ಉಂದು ಏರೆನ ಮಿತ್ತ್ ಬೂರುಂಡಾ ಆಯನ್ ಪೊಡಿ ಪೊಡಿ ಮಲ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="19">ಶಾಸ್ತ್ರಿಲುಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ತನ್ಕ್‌ಲೆಗೇ ಈ ಉಪಕತೆನ್ ಪಂಡೆ ಅಂದ್‌ದ್ ತೆರಿಯೊಂದು; ಅವ್ವೇ ಗಳಿಗೆಡ್ ಆಯನ್ ಪತ್ತಿಯೆರೆ ಸಮಯ ತೂವೊಂದಿತ್ತೆರ್, ಆಂಡ ಜನೊಕುಲೆಗ್ ಪೋಡಿಯೆರ್.</verse>
				<verse number="20">ಬೊಕ್ಕ ಅಕುಲು ಯೇಸುನು ಅಧಿಕಾರೊಗ್ಲಾ ಅಧಿಪತಿನ ವಶೊಕ್ಲಾ ಒಪ್ಪಿಸಾವೊಡು ಅಂದ್‌ದ್ ಕಾತೊಂದಿತ್ತೆರ್. ನೀತಿವಂತೆರೆಲೆಕ್ಕ ನಟನೆ ಮಲ್ಪು ಗೂಢಾಚಾರೆರೆನ್ ಆಯನ ಪಾತೆರೊಲೆಡ್ ಎಂಚಾಂಡಲಾ ಪತ್ತಿಯೆರೆ ತಿಕ್ಕೆನಾ ಅಂದ್‌ದ್ ಕಡಪುಡಿಯೆರ್.</verse>
				<verse number="21">ಮೊಕುಲು ಯೇಸುಡ, “ಬೋಧಕಾ, ಈ ಸರಿಯಾದ್ ಪಾತೆರೊಂದು ಬೋಧನೆ ಮಲ್ಪುವ; ನಿನ ಮೋನೆಡ್ ದಾಕ್ಷಿಣದಾಂತೆ ದೇವೆರೆ ಮಾರ್ಗೊನು ಸತ್ಯ ಆದ್ ಬೋಧನೆ ಮಲ್ಪುನಾಯೆ ಆದುಲ್ಲ ಅಂದ್‌ದ್ ತೆರಿದ.</verse>
				<verse number="22">ರೋಮ್ ದೇಶದ ಅರಸು ಆಯಿ ಕೈಸರಗ್ ತೆರಿಗೆ ಕೊರ್ಪಿನವು ಸರಿಯಾ? ತಪ್ಪಾ?” ಅಂದ್‌ದ್ ಕೇಂಡೆರ್.</verse>
				<verse number="23">ಯೇಸು ಅಕ್ಲೆನ ಉಪಾಯೊನು ತೆರಿಯೊಂದು ಅಕ್ಲೆಗ್ ಪಂಡೆ,</verse>
				<verse number="24">“ಎಂಕ್ ಒಂಜಿ ಪಾವೊಲಿನ್ ತೋಜಾಲೆ, ಉಂದೆಟ್ ಏರೆನ ತರೆಲಾ ಮುದ್ರೆಲಾ ಉಂಡು?” ಅಂದ್‌ದ್ ಕೇಂಡಿನೆಕ್ಕ್, ಅಕುಲು “ಕೈಸರನವು,” ಅಂದ್‌ದ್ ಪಂಡೆರ್.</verse>
				<verse number="25">ಅಂಚಾಂಡ, “ಕೈಸರನೆನ್ ಕೈಸರಗ್ ಕೊರ್ಲೆ ಬೊಕ್ಕ ದೇವೆರ್‌ನೆನ್ ದೇವೆರೆಗ್ ಕೊರ್ಲೆ,” ಅಂದ್‌ದ್ ಪಂಡೆ.</verse>
				<verse number="26">ಆಯನ ಪಾತೆರೊಡು ಅಕ್ಲೆಗ್ ದಾಲಾ ತಪ್ಪು ತಿಕ್ಕಂದೆ ಜನೊಕುಲೆ ಎದುರುಡು ಆಯೆ ಕೊರಿನ ಉತ್ತರೊಗು ಅಚ್ಚಿರ ಆದ್ ಮನಿಪಂದೆ ಕುಲ್ಲಿಯೆರ್.</verse>
				<verse number="27">ಬೊಕ್ಕ ಸೈತಿನಾಕುಲು ಲಕ್ಕ್‌ನವು ಇಜ್ಜಿ ಅಂದ್‌ದ್ ಪನ್ಪಿನ ಸದ್ದುಕಾಯೆರೆಡ್ ಕೆಲೆವೆರ್ ಯೇಸು ಕೈತಲ್‌ ಬತ್ತ್‌ದ್ ಆಯಗ್ ಪ್ರಶ್ನೆ ಮಲ್ತೆರ್.</verse>
				<verse number="28">“ಬೋಧಕಾ. ‘ಮದ್ಮೆ ಆದಿತ್ತಿನಾಯೆ ಜೋಕುಲು ಇಜ್ಜಂದೆ ಸೈತ್ಂಡ ಆಯನ ಮೆಗ್ಯೆ ಆಲೆನ್ ಮದ್ಮೆ ಮಲ್ತೊಂದು ತನ ಪಲಯಗ್ ಸಂತಾನೊನು ಪಡೆಯೊಡು ಅಂದ್‌ದ್ ಮೋಶೆ ಎಂಕ್ಲೆಗ್ ಬರೆದ್ ದೀತೆ ಅತ್ತಾ?’</verse>
				<verse number="29">ಅಂಚೆನೇ, ಏಳ್ ಮೆಗ್ಯೆಪಲಯಾಡ್ಲು ಇತ್ತೆರ್. ಸುರುತ್ತಾಯೆ ಬೊಡೆದಿ ಮಲ್ತೊಂದು ಜೋಕುಲುದಾಂತೆ ಸೈತೆ.</verse>
				<verse number="30">ರಡ್ಡನೆದಾಯೆಲಾ ಆಯಡ್ದ್ ಬೊಕ್ಕ ಮೂಜನೆದಾಯೆಲಾ ಆಲೆನ್ ಮದ್ಮೆ ಮಲ್ತೊಂಡೆರ್ ಉಂದೇ ರೀತಿ ಏಳ್ ಜನಲಾ ಮದ್ಮೆ ಮಲ್ತೊಂದು ಜೋಕುಲುದಾಂತೆ ಸೈತೆರ್.</verse>
				<verse number="31"></verse>
				<verse number="32">ಕಡೆಕ್ಕ್ ಆ ಪೊಂಜೊವುಲಾ ಸೈತಲ್.</verse>
				<verse number="33">ಅಂಚಾಂಡ ಪುನರುತ್ಥಾನೊಡು ಆ ಪೊಂಜೊವು ಏರೆನ ಬೊಡೆದಿ ಆದುಪ್ಪುವಲ್? ಆಲೆನ್ ಏಳ್ವೆರ್ಲಾ ಮದ್ಮೆ ಆದಿತ್ತೆರ್ ಅತ್ತಾ?” ಪಂಡೆರ್.</verse>
				<verse number="34">ಯೇಸು ಅಕ್ಲೆಗ್, “ಈ ಲೋಕದ ಜನೊಕುಲು ಮದ್ಮೆ ಮಲ್ತೊನುವೆರ್, ಮದ್ಮೆ ಮಲ್ತ್ ಕೊರ್ಪೆರ್.</verse>
				<verse number="35">ಆಂಡ ಆ ಲೋಕೊಡು ಸೈತಿನಾಕುಲೆಡ್ದ್ ಕುಡ ಲಕ್ಕ್‌ದ್ ನನೊಂಜಿ ಜನ್ಮೊಗು ತಕ್ಕಾದಿತ್ತಿನಾಕುಲು ಮದ್ಮೆ ಮಲ್ತೊನ್ಜೆರ್, ಬೊಕ್ಕ ಮದ್ಮೆ ಮಲ್ತ್‌ದ್‌ಲಾ ಕೊರ್ಪುಜೆರ್.</verse>
				<verse number="36">ಅಕುಲು ನನ ಸೈಪಿನಿಲಾ ಇಜ್ಜಿ. ಸೈತಿನಾಕುಲೆಡ್ದ್ ಲಕ್ಕ್‌ದ್ ದೂತೆರೆಗ್ ಸರಿಯಾದ್ ದೇವೆರೆ ಜೋಕುಲು ಆಪೆರ್.</verse>
				<verse number="37">ಸೈತಿನಾಕುಲು ಬದ್‌ಕ್‌ದ್ ಲಕ್ಕುವೆರ್ ಪನ್ಪಿನೆನ್ ಮೋಶೆಲಾ ಪನ್ತೆ. ಆಯೆ ಪುದೆಲ್‌ದ ಸಂಗತಿದ ಅದ್ಯಾಯೊಡು, ಕರ್ತವನ್ ಅಬ್ರಹಾಮುನ ದೇವೆರ್ ಇಸಾಕನ ದೇವೆರ್ ಯಾಕೋಬುನ ದೇವೆರ್, ಅಂದ್‌ದ್ ಪನ್ತೆ.</verse>
				<verse number="38">ಆಯೆ ಸೈತಿದಿನಾಕುಲೆನ ದೇವೆರ್ ಅತ್ತ್, ಜೀವ ಇತ್ತಿನಾಕುಲೆನ ದೇವೆರಾದುಲ್ಲೆ. ಆಯನ ದೃಷ್ಟಿಡ್ ಮಾತೆರ್ಲಾ ಬದುಕುನಾಕುಲೇ,” ಅಂದ್‌ದ್ ಪಂಡೆ.</verse>
				<verse number="39">ಶಾಸ್ತ್ರಿಲೆಡ್ ಕೆಲೆವೆರ್, “ಬೋಧಕಾ, ಸರಿಯಾದ್ ಪಂಡ,” ಪಂಡೆರ್.</verse>
				<verse number="40">ಆಯಡ ನನ ದಾಲಾ ಕೇನಿಯೆರೆ ಅಕ್ಲೆಗ್ ಏರೆಗ್ಲಾ ಧೈರ್ಯ ಬತ್ತಿಜಿ.</verse>
				<verse number="41">ಅಪಗ ಆಯೆ, “ಬರೊಡಾಯಿ ಕ್ರಿಸ್ತೆ ದಾವೀದನ ಮಗೆ ಅಂದ್‌ದ್ ಪನ್ಪೆರತ್ತಾ ಅವು ಎಂಚ?” ಕೇಂಡೆ.</verse>
				<verse number="42">“‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ,’ ಅಂದ್‌ದ್ ಕೀರ್ತನೆ ಗ್ರಂಥೊಡು ದಾವೀದೆ ತಾನೇ ಪನ್ಪೆ ಅತ್ತಾ?</verse>
				<verse number="43"></verse>
				<verse number="44">ದಾವೀದೆ ಆಯನ್ ‘ಕರ್ತವೆ’ ಅಂದ್‌ದ್ ಪಂಡಿ ಬೊಕ್ಕ ಆಯೆ ಆಯಗ್ ಮಗೆ ಆಪಿನವು ಎಂಚ?” ಅಂದ್‌ದ್ ಅಕ್ಲೆಡ ಕೇಂಡೆ.</verse>
				<verse number="45">ಜನೊಕುಲು ಮಾತೆರ್ ಕೇನೊಂದುಪ್ಪುನಗ ಆಯೆ ತನ ಶಿಷ್ಯೆರೆಗ್ ಪಂಡೆ;</verse>
				<verse number="46">“ಶಾಸ್ತ್ರಿಲೆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ. ನೇಲ್ಯ ಅಂಗಿನ್ ಪಾಡೊಂದು ನಡಪುನವು, ಅಂಗಡಿ ಸಾದಿಲೆಡ್ ವಂದನೆಲು, ಸಭಾಮಂದಿರೊಡು ಮಲ್ಲಸ್ಥಾನೊಲು, ಲೇಸ್‌ಲೆಡ್ ಸುರುತ್ತ ಪಂತೆ, ಉಂದೆನ್ ಮಾತ ಇಷ್ಟ ಮಲ್ಪುನಾಕುಲಾದುಲ್ಲೆರ್.</verse>
				<verse number="47">ಮೊಕುಲು ಕಂಡನಿದಾಂತಿನಾಕುಲೆನ ಇಲ್ಲ್‌ಲೆನ್ ಸ್ವಾದೀನ ಮಲ್ಪುವೆರ್, ತೋರಿಕೆಗಾದ್ ಉದ್ಧದ ಪ್ರಾರ್ಥನೆನ್ ಮಲ್ಪುವೆರ್. ಇಂಚಿತ್ತಿನಾಕುಲು ಹೆಚ್ಚಿನ ದಂಡನೆಗ್ ಒಳಗಾಪೆರ್,” ಅಂದ್‌ದ್ ಪಂಡೆ.</verse>
			</chapter>
			<chapter number="21">
				<verse number="1">ಯೇಸು ತರೆ ದೆರ್ತ್ತ್‌ದ್ ತೂದು ಐಶ್ವರ್ಯವಂತೆರ್ ಕಾಣಿಕೆನ್ ಕಾಣಿಕೆ ಪೆಟ್ಟಿಗೆಡ್ ಪಾಡುನೆನ್ ತೂಯೆ.</verse>
				<verse number="2">ಒಂಜಿ ಬಡ ವಿಧವೆ ಬತ್ತ್‌ದ್ ರಡ್ಡ್ ಕಾಸ್‌ನ್ ಪಾಡುನೆನ್ ತೂಯೆ.</verse>
				<verse number="3">ನಿಕ್ಲೆಗ್ ಸತ್ಯಾದ್ ಪನ್ಪೆ, “ಈ ಬಡ ವಿಧವೆ ಮಾತೆರೆಡ್ದ್ ಹೆಚ್ಚ್ ಪಾಡ್ದಲ್.</verse>
				<verse number="4">ಎಂಚಂದ್ಂಡ ಮಾತೆರ್ ತನ್ಕುಲೆಗ್ ಒರಿದಿನೆಟ್ಟ್ ಪಾಡ್ದೆರ್. ಮೋಲಾಂಡಲಾ ತನ ಬಡತನೊಡ್ಲಾ ತನಡಿತ್ತಿ ಬದ್‌ಕ್‌ನೇ ಕೊರ್ದು ಬುಡಿಯಲ್,” ಅಂದ್‌ದ್ ಪಂಡೆ.</verse>
				<verse number="5">ಶಿಷ್ಯೆರ್ ಕೆಲೆವೆರ್ ದೇವಾಲಯದ ಬಗೆಟ್ ಅವು ಪೊರ್ಲುದ ಕಲ್ಲ್‌ಲೆಡ್ದ್‌ಲಾ ಕಾಣಿಕೆಲೆಡ್ದ್‌ಲಾ ಅಲಂಕಾರ ಆದುಂಡು ಪನೊಂದುಪ್ಪುನಗ</verse>
				<verse number="6">ಯೇಸು ಅಕ್ಲೆಗ್, “ನಿಕುಲು ಉಂದೆನ್ ಮಾತ ತೂಪರತ್ತಾ? ಮುಲ್ಪ ಕಲ್ಲ್‌ದ ಮಿತ್ತ್ ಕಲ್ಲ್ ಒರಿಯಂದೆ ಮಾತ ಬೂರ್ದು ಪೋಪಿ ದಿನೊಕುಲು ಬರ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="7">ಅಪಗ ಅಕುಲು ಬೋಧಕಾ, “ಅಂಚಾಂಡ ಉಂದು ಏಪ ಆವು? ಬೊಕ್ಕ ಉಂದು ಆಪಿ ಸಮಯದ ಗುರ್ತ ಎಂಚಿನ ಆದುಪ್ಪು,” ಅಂದ್‌ದ್ ಕೇಂಡೆರ್.</verse>
				<verse number="8">ಅಪಗ ಯೇಸು ಅಕ್ಲೆಗ್, “ನಿಕುಲು ಮೋಸೊಗು ಬಲಿ ಆವಂದಿಲೆಕ್ಕ ತೂವೊನ್ಲೆ. ಕೆಲೆವೆರ್ ಬತ್ತ್‌ದ್ ಎನ ಪುದರ್ ದೆತ್ತೊಂದು, ‘ಯಾನೇ ಕ್ರಿಸ್ತೆ,’ ಪನೊಂದು ‘ಆ ಕಾಲ ಕೈತಲಾಂಡ್’ ಪಂಡ್ದ್‌ಲಾ ಪನ್ವೆರ್; ಅಕ್ಲೆನ ಬೆರಿಯೆ ಪೋವಡೆ.</verse>
				<verse number="9">ಉಂದತ್ತಂದೆ ಲಡಯಿಲಾ ಗಡಿಬಿಡಿಲಾ ಆಪಿನೆನ್ ನಿಕುಲು ಕೇನ್ನಗ ಪೋಡ್ಯಡೆ; ದಾಯೆ ಪಂಡ ಇಂಚಿತ್ತಿ ಗುರ್ತೊಲು ದುಂಬು ತೋಜಿದ್ ಬರ್ಪಿನವು ಅಗತ್ಯ; ಆಂಡಲಾ ಅಪಗನೆ ಅಂತ್ಯಕಾಲ ಬರ್ಪುಜಿ.”</verse>
				<verse number="10">ಬೊಕ್ಕ ಆಯೆ ಅಕ್ಲೆಡ ಪಂಡಿನಿ ದಾನೆಂದ್ಂಡ, “ಜನಾಂಗದ ವಿರೋಧಾದ್ ಜನಾಂಗೊಲುಲಾ; ರಾಜ್ಯೊಗು ವಿರೋಧಾದ್ ರಾಜ್ಯೊಲುಲಾ ಲಕ್ಕುಂಡು.</verse>
				<verse number="11">ಬೊಕ್ಕ ಮಲ್ಲ ಭೂಕಂಪೊಲು ಆಪುಂಡು; ಅಲ್ಪಲ್ಪ ಬರಗಾಲ, ಉಪದ್ರೊಲು ತೋಜಿದ್ ಬರ್ಪುಂಡು; ಭಯಂಕರ ಘಟನೆಲು, ಬಾನೊಡು ಮಲ್ಲ ಗುರ್ತೊಲು ತೋಜಿದ್ ಬರ್ಪುಂಡು.</verse>
				<verse number="12">ಆಂಡ ಉಂದು ಮಾತ ನಡಪುನೆಡ್ದ್ ದುಂಬು ಎನ ಪುದರ್‌ಗಾದ್ ಅಕುಲು ನಿಕ್ಲೆನ್ ಪತ್ತ್‌ದ್ ಸಭಾಮಂದಿರದ ಬೊಕ್ಕ ಸೆರೆಮನೆತ ಅಧಿಕಾರಿಲೆನ ವಶೊಕ್ಕು ಕೊರುವೆರ್. ನಿಕ್ಲೆನ್ ಅರಸುಲೆ ಎದುರುಡು ಅಧಿಕಾರಿಲೆ ಎದುರುಡು ಲೆತ್ತೊಂದು ಪೋದು ಭಂಗ ಬರ್ಪಾವೆರ್.</verse>
				<verse number="13">ಉಂದು ನಿಕ್ಲೆಗ್ ಸಾಕ್ಷಿ ಪನಿಯೆರೆ ಅನುಕೂಲ ಆಪುಂಡು.</verse>
				<verse number="14">ನಿಕುಲು ದಾದ ಉತ್ತರ ಕೊರೊಡು ಪನ್ಪಿ ಬಗೆಟ್ ಎಂಕುಲು ಸುರುಟ್ಟೇ ಆಲೋಚನೆ ಮಲ್ಪುಜ ಅಂದ್‌ದ್ ನಿಕ್ಲೆನ ಉಡಲ್‌ಡ್ ನಿಚ್ಚಯ ಮಲ್ತೊನ್ಲೆ.</verse>
				<verse number="15">ದಾಯೆ ಪಂಡ ನಿಕ್ಲೆನ ಮಾತ ಪಗೆನಾಕುಲು ಎದುರುಂತಿಯೆರೆಲಾ ಎದುರು ಪಾತೆರಿಯೆರೆಲಾ ಆವಂದಿ ಬಾಯಿನ್ಲಾ ಬುದ್ಧಿನ್ಲಾ ಯಾನೇ ನಿಕ್ಲೆಗ್ ಕೊರ್ಪೆ.</verse>
				<verse number="16">ಆಂಡ ಅಪ್ಪೆ ಅಮ್ಮಾಡ್ಲು, ಪಲಯೆ, ಮೆಗ್ಯಾಡ್ಲು, ಕುಟುಂಬದಾಕುಲು, ಸ್ನೇಹಿತೆರ್ ನಿಕ್ಲೆನ್ ಒಚ್ಚಿದ್ ಕೊರುವೆರ್; ಬೊಕ್ಕ ನಿಕ್ಲೆಡ್ ಕೆಲೆವೆರೆನ್ ಕೆರ್ಪಾವೆರ್.</verse>
				<verse number="17">ಎನ ಪುದರ್‌ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್.</verse>
				<verse number="18">ಆಂಡಲಾ ನಿಕ್ಲೆನ ತರೆಕುಜಲ್ ಒಂಜಿಲಾ ತಿರ್ತ್ ಬೂರಂದ್.</verse>
				<verse number="19">ನಿಕ್ಲೆ ತಾಳ್ಮೆಡ್‌ ನಿಕ್ಲೆ ಪ್ರಾಣೊಲೆನ್ ಒರಿತೊನುವರ್.</verse>
				<verse number="20">“ಆಂಡ ಸೈನ್ಯೊಲು ಯೆರೂಸಲೇಮು ಪಟ್ಟಣದ ಸುತ್ತಲಾ ಉಪ್ಪುನೆನ್ ನಿಕುಲು ತೂನಗ ಅವು ಅಂತ್ಯಾಪಿನ ಕಾಲ ಮುಟ್ಟ ಬತ್ತ್‌ಂಡ್‌ಂದ್ ತೆರಿಯೊನ್ಲೆ.</verse>
				<verse number="21">ಅಪಗ ಯೂದಾಯೊಡು ಉಪ್ಪುನಾಕುಲು ಪರ್ವತೊಲೆಗ್ ಪಾರ್ದ್ ಪೋವಡ್; ಪಟ್ಟಣೊಡು ಇತ್ತಿನಾಕುಲು ಪಿದಾಡ್ದ್ ಪೋವಡ್; ಹಳ್ಳಿದಾಕುಲು ಪೇಂಟೆದ ಉಲಯಿ ಪೋವಂದೆ ಉಪ್ಪಡ್.</verse>
				<verse number="22">ದಾಯೆಗಂದ್ಂಡ ಬರೆತಿನವು ಮಾತ ನಡಪೆರೆಗಾದ್ ‘ಅವು ನ್ಯಾಯತೀರ್ಪುದ ದಿನೊಕುಲು ಆದುಂಡು.’</verse>
				<verse number="23">ಆ ದಿನೊಟು ಬಂಜಿನಾಕುಲೆಗ್ಲಾ, ಬಾಲೆಗ್ ಮಿರೆ ಕೊರ್ಪಿ ಅಪ್ಯಾಡ್ಲೆಗ್ಲಾ ಬರ್ಪಿ ಕಷ್ಟೊನು ಪನಿಯೆರೆ ತೀರಂದ್. ಭೂಮಿದ ಮಿತ್ತ್ ಮಲ್ಲ ಭಂಗಲಾ ಈ ಜನೊಕುಲೆ ಮಿತ್ತ್ ಕೋಪಲಾ ಉಪ್ಪು.</verse>
				<verse number="24">ಅಕುಲು ಕತ್ತಿದ ಬಾಯಿಗ್ ಬೂರ್ವೆರ್; ಅಕ್ಲೆನ್ ಮಾತ ಬೇತೆ ದೇಶೊಲೆಗ್ ಸೆರೆ ಪತ್ತ್‌ದ್ ಕೊನೊವೆರ್; ಪಿದಯಿದ ಜನೊಕುಲೆನ ಸಮಯ ಮುಗಿಯುನ ಮುಟ್ಟ ಯೆರೂಸಲೇಮು ಪಟ್ಟಣ ಪಿದಯಿದ ಜನೊಕುಲೆಡ್ದ್ ತೊರ್ಪಾಟೊಗು ಬಲಿಯಾಪುಂಡು.</verse>
				<verse number="25">“ಉಂದತ್ತಂದೆ ಸೂರ್ಯೆ ಚಂದ್ರೆ ನಕ್ಷತ್ರೊಲೆಡ್ ಗುರ್ತೊಲು ತೋಜುಂಡು. ಭೂಮಿದ ಮಿತ್ತ್ ಕಡಲ್ದ ಬೊಕ್ಕ ಸೆರೆಕ್ಕುಲೆ ಶಬ್ಧೊಡ್ದು ಜನೊಕುಲೆಗ್ ದಿಕ್ಕ್ ತೋಜಂದೆ ಸಂಕಟ ಉಂಡಾಪುಂಡು.</verse>
				<verse number="26">ಬಾನದ ಶಕ್ತಿ ಪಂದ್‌ದ್ ಪೋಪಿನೆಡ್ದ್ ನರಮಾನಿಲು ಪೋಡಿಗೆ ಪತ್ತ್‌ದಿನಾಕುಲಾದ್ ಲೋಕೊಡು ದಾದ ಆಪುಂಡು ಅಂದ್‌ದ್ ಎದುರು ತೂವೊಂದು ಜೀವ ಪೋಯಿಲೆಕ್ಕ ಆವು.</verse>
				<verse number="27">ಅಪಗ ನರಮಾನಿ ಮಗೆ ಬಲೊಟ್ಲಾ ಬಾರಿ ಮೈಮೆಡ್ಲಾ ಮುಗಲ್‌ಡ್ ಬರ್ಪಿನೆನ್ ತೂಪರ್.</verse>
				<verse number="28">ಆಂಡ ಉಂದು ಆವೊಡ್ದುಂಬೇ ಮಿತ್ತ್ ತೂಲೆ, ನಿಕ್ಲೆನ ತರೆ ದೆರ್ಪುಲೆ, ನಿಕ್ಲೆನ ಬುಡುಗಡೆ ಕೈತಲಾತ್ತ್ಂಡ್,” ಅಂದ್‌ದ್ ಪಂಡೆ.</verse>
				<verse number="29">ಆಯೆ ಅಕ್ಲೆಗ್ ಒಂಜಿ ಉಪಕತೆ ಪಂಡೆ, “ಅಂಜೂರದ ಮರೊನು ತೂಲೆ.</verse>
				<verse number="30">ಅವು ತೆಗ್‌ಲ್‌ನಗ ಇತ್ತೆ ಅರೆಗಾಲ ಬತ್ತ್ಂಡ್ ಅಂದ್‌ದ್ ನಿಕುಲಾದೆ ತೆರಿಯೊನ್ವರ್.</verse>
				<verse number="31">ಅಂಚೆನೇ ಉಂದೆನ್ ತೂನಗ ದೇವೆರೆ ರಾಜ್ಯ ಕೈತಲುಂಡು, ಅಂದ್‌ದ್ ತೆರಿಯೊನ್ಲೆ.</verse>
				<verse number="32">ಮಾತ ಆಪಿನೆಟ್ಟ ಈ ಸಂತಾನ ಆಳಿದ್ ಪೋಪಿನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ.</verse>
				<verse number="33">ಬಾನಲಾ ಭೂಮಿಲಾ ಆಳಿದ್ ಪೋವು, ಆಂಡ ಎನ ಪಾತೆರೊಲು ಆಳಿದ್ ಪೋಪಿನೆ ಇಜ್ಜಿ.</verse>
				<verse number="34">“ನಿಕ್ಲೆನ ಬಗೆಟ್ ಜಾಗ್ರತೆ ಆದುಪ್ಪುಲೆ. ಬಂಜಾರ ವಣಸ್‌ಡ್ದ್‌ಲಾ ಅಮಲ್‌ಡ್ದ್‌ಲಾ ಲೋಕದ ಚಿಂತೆಲೆಡ್ದ್‌ಲಾ ನಿಕ್ಲೆ ಉಡಲ್ ದುನ್ನ ಆದಿತ್ತಿನೆಡ್ದ್,</verse>
				<verse number="35">ಆ ದಿನ ಗೊತ್ತಿಜ್ಜಂದೆನೆ ಒರನೆ ಇಡೀ ಭೂಮಿಡುಪ್ಪುನಾಕುಲೆ ಮಾತೆರೆ ಮಿತ್ತ್ ಉರ್ಲುದ ಲೆಕ್ಕನೆ ಬರು.</verse>
				<verse number="36">ಅಂಚಾಯಿನೆಡ್ದ್ ಉಂದು ಆಪಿನವು ಮಾತೆಕ್ ತಪ್ಪಾವೊನಿಯೆರೆಲಾ ನರಮಾನಿ ಮಗನ ಎದುರುಡು ಉಂತಿಯೆರೆಗ್ಲಾ ನಿಕುಲು ಪೂರ್ತಿ ಶಕ್ತಿವಂತೆರ್ ಆಪಿಲೆಕ್ಕ ಮಾತ ಕಾಲೊಡ್ಲಾ ದೇವೆರೆಡ ನಟ್ಟೊಂದು ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="37">ಆಯೆ ಪಗೆಲ್ಡ್ ದೇವಾಲಯೊಡು ಬೋಧನೆ ಮಲ್ತೊಂದು ರಾತ್ರೆಡ್ ಪೇಂಟೆದ ಪಿದಯಿ ಪೋದು ಇಪ್ಪೆಗುಡ್ಡೆಡ್ ತಡೆಯೆ.</verse>
				<verse number="38">ಜನೊಕುಲು ಮಾತೆರ್ ಆಯನ ಬೋಧನೆನ್ ಕೇನಿಯೆರೆ ಕಾಂಡೆ ದೇವಾಲಯೊಗು ಬರೊಂದಿತ್ತೆರ್.</verse>
			</chapter>
			<chapter number="22">
				<verse number="1">ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪಸ್ಕ ಪನ್ಪಿ ಪರ್ಬ ಕೈತಲಾನಗ</verse>
				<verse number="2">ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಯೇಸುನು ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂದು ಜನೊಕುಲೆಗ್ ಪೋಡಿದ್ ತಕ್ಕ ಸಾದಿನ್ ನಾಡೊಂದಿತ್ತೆರ್.</verse>
				<verse number="3">ಅಪಗ ಸೈತಾನೆ, ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದನ ಉಲಯಿ ಪೊಗ್ಗಿಯೆ.</verse>
				<verse number="4">ಆಯೆ ಪ್ರಧಾನಯಾಜಕೆ ಬೊಕ್ಕ ಕಾವಲ್‌ದ ಮುಖ್ಯಸ್ಥನ ಕೈತಲ್‌ ಪೋದು ಯೇಸುನು ಪತ್ತ್‌ದ್ ಕೊರ್ಪಿನ ಉಪಾಯೊನು ಅಕ್ಲೆಡ ಪಾತೆರಿಯೆ.</verse>
				<verse number="5">ಅಕುಲು ಸಂತೋಷೊಡು ನಿಕ್ಕ್ ಕಾಸ್ ಕೊರ್ಪ ಅಂದ್‌ದ್ ಒಪ್ಪಂದ ಮಲ್ತೆರ್.</verse>
				<verse number="6">ಆಯೆ ಒಪ್ಪಿದ್ ಏರೆಗ್ಲಾ ತೆರಿಯಂದಿಲೆಕ್ಕ ಯೇಸುನು ಅಕ್ಲೆಗ್ ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.</verse>
				<verse number="7">ಪುಳಿದಾಂತಿ ರೊಟ್ಟಿನ್ ತಿನ್ಪಿನ ಪರ್ಬ ಸುರು ಆದ್‌ ಪಸ್ಕದ ಕುರಿ ಕಡ್ಪುನ ದಿನ ಬತ್ತಿನಪಗ,</verse>
				<verse number="8">ಯೇಸು ಪೇತ್ರಗ್ಲಾ ಯೋಹಾನಗ್ಲಾ, “ನಿಕುಲು ಪೋದು ನಮ ಪಸ್ಕದ ವಣಸ್ ಉನ್ಪಿಲೆಕ್ಕ ತಯಾರ್ ಮಲ್ಪುಲೆ,” ಅಂದ್‌ದ್ ಅಕ್ಲೆನ್ ಕಡಪುಡಿಯೆ.</verse>
				<verse number="9">ಅಕುಲು ಆಯಡ, “ಎಂಕುಲು ಓಲು ತಯಾರ್ ಮಲ್ಪೊಡು,” ಅಂದ್‌ದ್ ಕೇನ್ನಗ,</verse>
				<verse number="10">ಆಯೆ ಅಕ್ಲೆಗ್, “ತೂಲೆ, ನಿಕುಲು ಪೇಂಟೆದ ಉಲಯಿ ಪೋಯಿ ಬೊಕ್ಕ ಒರಿ ನರಮಾನಿ ನೀರ್ ದಿಂಜಿದಿ ಕೊಡಪಾನೊನು ತುಂಬೊಂದು ಪೋಪಿನಾಯೆ ನಿಕ್ಲೆನ ಎದುರು ಬರ್ಪೆ. ಆಯೆ ಪೋಪಿನ ಇಲ್ಲಗ್ ನಿಕುಲು ಆಯನ ಬೆರಿಯೆ ಪೋಲೆ.</verse>
				<verse number="11">‘ಆ ಇಲ್ಲದ ಯಜಮಾನಗ್ ಎಂಕ್ಲೆನ ಬೋಧಕೆ ತನ ಶಿಷ್ಯೆರೆಡೊಪ್ಪ ಪಸ್ಕದ ವಣಸ್‌ನ್ ಮಲ್ಪರೆ ಕೋಣೆ ಓಲು ಉಂಡು? ಅಂದ್‌ದ್ ನಿನಡ ಕೇನ್ವೆ,’ ಅಂದ್‌ದ್ ಪನ್ಲೆ.</verse>
				<verse number="12">ಅಪಗ ಆಯೆ ತಕ್ಕ ಸಾಮಾನ್ ದೀದಿತ್ತಿ ಮೇಲುಪ್ಪರಿಗೆದ ಮಲ್ಲ ಕೋಣೆನ್ ನಿಕ್ಲೆಗ್ ತೋಜಾವೆ. ಅಲ್ಪ ವಣಸ್‌ಗ್ ತಯಾರ್ ಮಲ್ಪುಲೆ,” ಪಂಡ್ದ್ ಕಡಪುಡಿಯೆ.</verse>
				<verse number="13">ಅಕುಲು ಪಿದಾಡ್ದ್ ಆಯೆ ತನ್ಕುಲೆಗ್ ಯೇಸು ಪಂಡಿಲೆಕ್ಕನೇ ಮಾತೆನ್ಲಾ ತೂದು, ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.</verse>
				<verse number="14">ಪಸ್ಕ ವಣಸ್ ಮಲ್ಪುನ ಸಮಯ ಬತ್ತಿನಪಗ ಯೇಸು ತನ ಪದ್ರಾಡ್ ಅಪೊಸ್ತಲೆರೆ ಒಟ್ಟುಗು ವಣಸ್‌ಗ್ ಕುಲ್ಲಿಯೆ.</verse>
				<verse number="15">ಅಪಗ ಆಯೆ ಅಕ್ಲೆಗ್, “ಯಾನ್ ಕಷ್ಟ ಅನುಭವ ಮಲ್ಪುನೆಡ್ದ್ ದುಂಬು ನಿಕ್ಲೆನ ಒಟ್ಟುಗು ಈ ಪಸ್ಕದ ವಣಸ್‌ನ್ ಮಲ್ಪೆರೆ ಆಸೆ ಮಲ್ತೊಂದುಲ್ಲೆ.</verse>
				<verse number="16">ಉಂದು ದೇವೆರೆ ರಾಜ್ಯೊಡು ಪೂರ್ತಿ ಆವ ಮುಟ್ಟ ಯಾನ್ ನನ ಮಿತ್ತ್ ಈ ವಣಸ್‌ನ್ ಮಲ್ಪುನೇ ಇಜ್ಜಿ,” ಅಂದ್‌ದ್ ಪಂಡೆ.</verse>
				<verse number="17">ಯೇಸು ದ್ರಾಕ್ಷಾರಸತ್ತ ಪಾತ್ರೆನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್, “ಉಂದೆನ್ ದೆತ್ತೊಂದು ನಿಕ್ಲೆಡ ಪಟ್ಟೊನ್ಲೆ.</verse>
				<verse number="18">ಇನಿಡ್ದ್ ದೇವೆರೆ ರಾಜ್ಯ ಬರ್ಪಿನೆಟ್ಟ ಯಾನ್ ದ್ರಾಕ್ಷಾರಸೊನು ಪರ್ಪಿನೇ ಇಜ್ಜಿ,” ಅಂದ್‌ದ್ ನಿಕ್ಲೆಗ್ ಪನ್ಪೆ ಪಂಡೆ.</verse>
				<verse number="19">ಐಡ್ದ್ ಬೊಕ್ಕ ಆಯೆ ರೊಟ್ಟಿನ್ ದೆತ್ತೊಂದು ಸುಗಿತ್‌ದ್ ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ,” ಪಂಡೆ.</verse>
				<verse number="20">ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ನಿಕ್ಲೆಗ್ ಬೋಡಾದ್ ಗುತ್ತುದಿನ ಎನ ನೆತ್ತೆರ್‌ಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು.”</verse>
				<verse number="21">“ಆಂಡ ತೂಲೆ ಎನನ್ ಪತ್ತ್‌ದ್ ಕೊರ್ಪಿನಾಯೆ ಎನಡೊಪ್ಪ ಮೇಜಿದ ಮಿತ್ತ್ ಕೈ ದೀದ್ ವಣಸ್ ಮಲ್ತೊಂದುಲ್ಲೆ.</verse>
				<verse number="22">ನರಮಾನಿ ಮಗೆ ದೇವೆರೆನ ಯೋಜನೆದ ಲೆಕ್ಕ ಪಿದಾಡ್ದ್ ಪೋಪೆ ಸರಿ; ಆಂಡ ಆಯನ್ ಪತ್ತ್‌ದ್ ಕೊರ್ಪಿನ ನರಮಾನಿನ ಗತಿನ್ ದಾನೆಂದ್ ಪನೊಲಿ!” ಪಂಡೆ.</verse>
				<verse number="23">ಉಂದೆನ್ ಕೇಂಡ್ದ್ ಶಿಷ್ಯೆರ್ ಇಂಚಿತ್ತಿ ನೀಚ ಕೆಲಸೊನು ಮಲ್ಪುನಾಯೆ ಏರಾದುಲ್ಲೆ ಅಂದ್‌ದ್ ಒರಿಯನ್ ಒರಿ ಕೇನಿಯೆರೆ ಸುರು ಮಲ್ತೆರ್.</verse>
				<verse number="24">ಉಂದತ್ತಂದೆ ತನ್ಕುಲೆ ನಡುಟು ಏರ್ ಮಲ್ಲಾಯೆ ಪನ್ಪಿ ಬಗೆಟ್ ಅಕ್ಲೆನ ಉಲಯಿ ಚರ್ಚೆ ಪುಟ್ಟುಂಡು.</verse>
				<verse number="25">ಅಪಗ ಯೇಸು ಅಕ್ಲೆಗ್, “ಪಿದಯಿದ ಜನೊಕುಲೆ ಅರಸುಲು ಅಕ್ಲೆ ಮಿತ್ತ್ ದೊರೆತನ ನಡಪಾವೆರ್ ಬೊಕ್ಕ ಅಕ್ಲೆನ ಮಿತ್ತ್ ಅಧಿಕಾರ ನಡಪಾವೆರ್, ‘ಅಧಿಕಾರ ನಡಪಾವುನಾಕುಲು ಉಪಕಾರಿಲು,’ ಅಂದ್‌ದ್ ಪನ್ಪೆರ್.</verse>
				<verse number="26">ನಿಕುಲು ಅಂಚ ಉಪ್ಪೆರೆ ಬಲ್ಲಿ; ನಿಕ್ಲೆಡ್ ಮಲ್ಲಾಯೆ ಎಲ್ಯಾಯೆಲೆಕ್ಕ ಆದುಪ್ಪೊಡು, ಮುಖ್ಯಸ್ಥೆ ಚಾಕ್ರಿದಾಯಲೆಕ್ಕ ಆದುಪ್ಪೊಡು.</verse>
				<verse number="27">ಮಲ್ಲಾಯೆ ಏರ್? ಪಂತೆಡ್ ಕುಲ್ಲುದಿನಾಯೆನಾ ಇಜ್ಜಿಂಡ ಚಾಕ್ರಿ ಮಲ್ಪುನಾಯೆನಾ? ಪಂತೆಡ್ ಕುಲ್ಲುದಿನಾಯೆ ಅತ್ತಾ. ಆಂಡ ಯಾನ್ ನಿಕ್ಲೆ ನಡುಟು ಚಾಕ್ರಿ ಮಲ್ಪುನಾಯಲೆಕ್ಕ ಉಲ್ಲೆ.</verse>
				<verse number="28">“ನಿಕುಲು ಎನ ಶೋಧನೆಡ್ ಎನಡೊಪ್ಪ ಏಪೊಗ್ಲಾ ಇತ್ತಿನಾಕುಲು.</verse>
				<verse number="29">ಐಡ್ದಾವರ ಎನ ಅಮ್ಮೆ ಎಂಕ್ ರಾಜ್ಯೊನು ಆಳಿಯೆರೆ ಅಧಿಕಾರ ನೇಮಕ ಮಲ್ತಿ ಲೆಕ್ಕನೇ ಯಾನ್ಲಾ ನಿಕ್ಲೆಗ್ ನೇಮಕ ಮಲ್ಪುವೆ;</verse>
				<verse number="30">ಎನ ರಾಜ್ಯೊಡು ನಿಕುಲು ಎನ ಮೇಜಿಡ್ ವಣಸ್ ಮಲ್ಪುವರ್, ಪರ್ಪರ್; ಬೊಕ್ಕ ಗದ್ದಿಗೆಡ್ ಕುಲ್ಲೊಂದು ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ನ್ಯಾಯತೀರ್ಪು ಮಲ್ಪುವರ್.</verse>
				<verse number="31">“ಸೀಮೋನಾ, ಸೀಮೋನಾ ಕೇನ್ಲ, ಸೈತಾನೆ ನಿನನ್ ಗೋದಿದಲೆಕ್ಕ ಪೊಡೆಪೊಡು ಅಂದ್‌ದ್ ಅಪ್ಪಣೆ ಕೇನೊಂಡೆ.</verse>
				<verse number="32">ಆಂಡ ನಿನ ನಂಬಿಕೆ ಕುಂದುದು ಪೋವೆರೆ ಬಲ್ಲಿ ಅಂದ್‌ದ್ ಯಾನ್ ನಿನ ಬಗೆಟ್ ದೇವೆರೆಡ ನಟ್ಟೊಂಡೆ; ಈ ಪರಿವರ್ತನೆ ಆಯಿ ಬೊಕ್ಕ ನಿನ ಸಹೋದ್ರೆರೆನ್ ದೃಢ ಮಲ್ಪುಲ,” ಅಂದ್‌ದ್ ಪಂಡೆ.</verse>
				<verse number="33">ಆಂಡ ಆಯೆ, “ಕರ್ತವಾ, ನಿನಡೊಪ್ಪ ಸೆರೆಮನೆಗ್ ಪೋವೆರೆಗ್ಲಾ ಸೈಯೆರೆಗ್ಲಾ ತಯಾರ್ ಆದುಲ್ಲೆ,” ಅಂದ್‌ದ್ ಪನ್ನಗ</verse>
				<verse number="34">ಯೇಸು ಆಯಡ, “ಪೇತ್ರ, ಯಾನ್ ನಿಕ್ಕ್ ಪನ್ಪೆ, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.</verse>
				<verse number="35">ಬೊಕ್ಕ ಯೇಸು ಶಿಷ್ಯೆರೆಗ್, “ಯಾನ್ ನಿಕ್ಲೆನ್ ಕಾಸ್‌ದ ಚೀರವು, ಜೋಳಿಗೆ, ಜೋಡುದಾಂತೆ ಕಡಪುಡಿನಪಗ ನಿಕ್ಲೆಗ್ ದಾದಾಂಡಲಾ ಕಡಿಮೆ ಆತ್ಂಡಾ?” ಅಂದ್‌ದ್ ಕೇನ್ನಗ, “ಅಕುಲು ದಾಲಾ ಇಜ್ಜಿ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="36">ಐಕ್ ಆಯೆ, “ಇತ್ತೆ ಗಂಟ್ ಇತ್ತಿನಾಯೆ ಅವೆನ್ ದೆತ್ತೊನಡ್, ಜೋಳಿಗೆನ್ಲಾ ದೆತ್ತೊನಡ್, ಬೊಕ್ಕ ಕತ್ತಿ ಇಜ್ಜಾಂದಿನಾಯೆ, ತನ ಮಿತ್ತ್‌ದ ಕುಂಟು ಮಾರ್ದ್ ಒಂಜಿ ಕತ್ತಿ ದೆತ್ತೊನಡ್,</verse>
				<verse number="37">ದಾಯೆಗ್ ಪಂಡ ಆಯೆ, ‘ಅನ್ಯಾಯಗಾರೆರೆಡೊಪ್ಪ ಒರಿ ಪಂಡ್ದ್ ಗೆನ್ತ್‌ದ್ಂಡ್,’ ಅಂದ್‌ದ್ ಬರೆದುಪ್ಪುನ ಪಾತೆರ ನಡಪುಡೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಇತ್ತೆ ಎನ ವಿಷಯ ಅಂಚೆನೇ ಆವೊಂದುಂಡು,” ಪಂಡೆ</verse>
				<verse number="38">ಅಕುಲು ಆಯಡ, “ಕರ್ತವಾ, ಇಂದಾ ಮೂಲು ರಡ್ಡ್ ಕತ್ತಿಲು ಉಂಡು,” ಪನ್ನಗ ಆಯೆ ಅಕ್ಲೆಡ, “ಆತೆ ಯಾವು!” ಪಂಡೆ.</verse>
				<verse number="39">ಬೊಕ್ಕ ಯೇಸು ಏಪಲಾ ಪೋಪಿಲೆಕ್ಕ ಇಪ್ಪೆಗುಡ್ಡೆಗ್ ಪೋಯೆ. ಶಿಷ್ಯೆರ್‌ಲಾ ಆಯನ ಬೆರಿಯೆ ಪೋಯೆರ್.</verse>
				<verse number="40">ಆಯೆ ಏಪಲಾ ಪೋಪಿನ ಜಾಗ್‌ಗ್ ಬತ್ತಿನಪಗ ಅಕ್ಲೆಡ, “ನಿಕುಲು ಶೋಧನೆಗ್ ಬೂರಂದಿಲೆಕ್ಕ ದೇವೆರೆಡ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="41">ಬೊಕ್ಕ ಆಯೆ ಅಕ್ಲೆನ್ ಬುಡ್ದು ಕಲ್ಲ್ ದಕ್ಕುನಾತ್ ದೂರ ಪೋದು ಮೊರಂಪೂರ್ದು ಪ್ರಾರ್ಥನೆ ಮಲ್ತ್‌ದ್</verse>
				<verse number="42">“ಅಮ್ಮೆರೇ, ನಿಕ್ಕ್ ಮನಸಿತ್ತ್‌ಂಡ ಈ ಕಷ್ಟ ಅನುಭವಿಪುನ ದುನ್ನೊನು ಎನಡ್ದ್ ದೆಪ್ಪುಲ, ಎಂಚಲಾ ಎನ ಚಿತ್ತ ಅತ್ತ್, ನಿನ ಚಿತ್ತನೇ ನಡಪಡ್,” ಅಂದ್‌ದ್ ಪ್ರಾರ್ಥನೆ ಮಲ್ತೆ.</verse>
				<verse number="43">ಅಪಗ ಪರಲೋಕೊಡ್ದು ಬತ್ತಿ ಒರಿ ದೂತೆ ಆಯಗ್ ತೋಜಿದ್ ಆಯನ್ ಬಲ ಪಡೆಪಾಯೆ.</verse>
				<verse number="44">ಆಯ ಮನಸ್‌ಡ್ ದುಃಖ ಇತ್ತ್‌ದ್ ಮಸ್ತ್ ಆಸಕ್ತಿಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ಆಯನ ಬೆಗರ್ ನೆತ್ತೆರ್‌ದ ಮಲ್ಲ ಪನಿತ್ತ ಲೆಕ್ಕ ಭೂಮಿದ ಮಿತ್ತ್ ಬೂರ್‌ಂಡ್.</verse>
				<verse number="45">ಆಯೆ ಪ್ರಾರ್ಥನೆ ಮುಗಿತ್‌ದ್ ಶಿಷ್ಯೆರೆ ಕೈತಲ್‌ ಬನ್ನಗ ಅಕುಲು ದುಃಖೊಡು ಬಚ್ಚಿದ್ ನಿದ್ರೆ ಮಲ್ತೊಂದಿತ್ತಿನೆನ್ ತೂದು</verse>
				<verse number="46">ಅಕ್ಲೆಡ, “ನಿಕುಲು ನಿದ್ರೆ ಮಲ್ತೊಂದುಲ್ಲರಾ? ಲಕ್ಕ್‌ಲೆ, ಶೋಧನೆಗ್ ಬೂರಂದಿಲೆಕ್ಕ ಪ್ರಾರ್ಥನೆ ಮಲ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="47">ಯೇಸು ನನಲಾ ಪಾತೆರೊಂದುಪ್ಪುನಗನೇ, ಜನೊಕುಲೆ ಗುಂಪು ಅಡೆಗ್ ಬತ್ತ್ಂಡ್. ಶಿಷ್ಯೆರೆಡ್ ಯೂದೆ ಪನ್ಪಿನಾಯೆ ಆ ಜನೊಕುಲೆ ಎದುರುಡಿತ್ತೆ. ಆಯೆ ಯೇಸುಗು ಮುತ್ತು ಕೊರಿಯೆರೆಗಾದ್ ಆಯನ ಕೈತಲ್‌ ಬನ್ನಗ</verse>
				<verse number="48">ಯೇಸು ಆಯಡ, “ಯೂದಾ, ನರಮಾನಿ ಮಗನ್ ಮುತ್ತು ಕೊರ್ದು ಪತ್ತ್‌ದ್ ಕೊರ್ಪನಾ?” ಅಂದ್‌ದ್ ಕೇಂಡೆ.</verse>
				<verse number="49">ಆಯನ ಶಿಷ್ಯೆರ್ ದುಂಬಗ್ ನಡಪುನೆನ್ ತೆರಿದ್, “ಕರ್ತವಾ, ಎಂಕುಲು ಕತ್ತಿಡ್ ಕಡ್ಪೊಡಾ?” ಅಂದ್‌ದ್ ಕೇಂಡೆರ್.</verse>
				<verse number="50">ಶಿಷ್ಯೆರೆಡ್ ಒರಿ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ.</verse>
				<verse number="51">ಆಂಡ ಯೇಸು, “ಈತೆಕೆ ಬುಡ್ಲೆ!” ಅಂದ್‌ದ್ ಆ ಕೆಬಿನ್ ಮುಟ್ಟುದು ಆಯನ್ ಗುಣ ಮಲ್ತೆ.</verse>
				<verse number="52">ಐಡ್ದ್ ಬೊಕ್ಕ ಯೇಸುನು ಪತ್ತಿಯೆರೆ ಬತ್ತಿ ಪ್ರಧಾನಯಾಜಕಗ್ಲಾ ದೇವಾಲಯದ ಕಾವಲ್‌ದ ಮುಖ್ಯಸ್ಥಗ್ಲಾ ಹಿರಿಯಾಕುಲೆಗ್ಲಾ, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ?</verse>
				<verse number="53">ಯಾನ್ ದಿನಾಲ ದೇವಾಲಯೊಡು ನಿಕ್ಲೆಡೊಪ್ಪ ಉಪ್ಪುನಗ ನಿಕುಲು ಎನ ಮಿತ್ತ್ ಕೈ ಪಾಡ್ದ್‌ಜರ್; ಆಂಡ ಉಂದು ನಿಕ್ಲೆನ ಗಳಿಗೆಲಾ ಕತ್ತಲೆದ ಅಧಿಕಾರಲಾ ಆದುಂಡು.” ಪಂಡೆ.</verse>
				<verse number="54">ಬೊಕ್ಕ ಅಕುಲು ಆಯನ್ ಪತ್ತ್‌ದ್ ಪ್ರಧಾನಯಾಜಕನ ಇಲ್ಲದುಲಯಿ ಲೆತ್ತೊಂದು ಪೋಯೆರ್; ಪೇತ್ರೆ ದೂರೊಡ್ದು ಬೆರಿಯೆ ಪೋಯೆ.</verse>
				<verse number="55">ಜಾಲ್‌ದ ನಡುಟು ಅಕುಲು ತೂ ಪೊತ್ತಾದ್ ಕುಲ್ಲೊಂದುಪ್ಪುನಗ ಅಕ್ಲೆನ ಒಟ್ಟುಗು ಪೇತ್ರೆಲಾ ಕುಲ್ಲಿಯೆ.</verse>
				<verse number="56">ಆಯೆ ಬೊಲ್ಪುಗು ಮೋನೆ ಪಾಡ್ದ್ ಕುಲ್ಲೊಂದುಪ್ಪುನಗ ಒರ್ತಿ ಚಾಕ್ರಿದಾಲ್ ಆಯನ್ ಸರಿಯಾದ್ ತೂದು, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಅಂದಲ್.</verse>
				<verse number="57">ಆಂಡ ಪೇತ್ರೆ, “ಯಾನ್ ಆಯನ್ ತೆರಿಯಯೆ ಅಮ್ಮ,” ಅಂದ್‌ದ್ ಆರೆಂಜಿಯೆ.</verse>
				<verse number="58">ಒಂತೆ ಪೊರ್ತುಡ್ದು ಬೊಕ್ಕ ಬೊಕ್ಕೊರಿ ಆಯನ್ ತೂದು, “ಈಲಾ ಅಕ್ಲೆಡ್ ಒರಿ!” ಅಂದ್‌ದ್ ಪನ್ನಗ ಪೇತ್ರೆ, “ಅತ್ತಪ್ಪಾ,” ಪಂಡೆ.</verse>
				<verse number="59">ಹೆಚ್ಚಿಕಡಿಮೆ ಒಂಜಿ ಗಂಟೆ ಆಯಿ ಬೊಕ್ಕ ಬೊಕ್ಕೊರಿ, “ನಿಜಾದ್ ಉಂಬೆಲಾ ಆಯಡೊಪ್ಪ ಇತ್ತಿನಾಯೆ, ಉಂಬೆ ಗಲಿಲಾಯದಾಯೆನೇ,” ಅಂದ್‌ದ್ ನಿಗಂಟಾದ್ ಪಂಡೆ.</verse>
				<verse number="60">ಆಂಡ ಪೇತ್ರೆ, “ಈ ಎಂಚಿನ ಪನ್ಪನಾ ಎಂಕ್ ಗೊತ್ತಾಯಿಜಿ ಅಂದ್‌ದ್ ಪಂಡೆ.” ಆಯೆ ಈ ಪಾತೆರೊನು ಪನೊಂದುಪ್ಪುನಗನೇ ಕೋರಿ ಕಿಲೆತ್ತ್ಂಡ್.</verse>
				<verse number="61">ಕರ್ತವೆ ಪಿರ ತಿರ್ಗ್‌ದ್ ಪೇತ್ರನ್ ದೃಷ್ಟಿ ದೀದ್ ತೂಯೆ. ಅಪಗ ಪೇತ್ರೆ, “ಕೋರಿ ಕಿಲೆಪುನೆಡ್ದ್ ದುಂಬು ಮೂಜಿ ಸರ್ತಿ ಕರ್ತವನ್ ತೆರಿಯಯೆ ಪನ್ಪ,” ಪಂಡಿನ ಪಾತೆರೊನು ಎನ್ನ್‌ದ್</verse>
				<verse number="62">ಪೇತ್ರೆ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.</verse>
				<verse number="63">ಐಡ್ದ್ ಬೊಕ್ಕ ಯೇಸುನು ಪತ್ತಿನಾಕುಲು ಆಯಗ್ ಮಸ್ಕಿರಿ ಮಲ್ತ್‌ದ್ ಹಾಕಿಯೆರ್.</verse>
				<verse number="64">ಬೊಕ್ಕ ಆಯಗ್ ಮುಸ್ಕು ಪಾಡ್ದ್, “ನಿಕ್ಕ್ ಹಾಕಿನಾಕುಲು ಏರ್? ಅಂದ್‌ದ್ ಪ್ರವಾದನೆ ಪನ್ಲ,” ಅಂದ್‌ದ್ ಆಯಡ ಕೇಂಡೆರ್.</verse>
				<verse number="65">ಆಯಗ್ ನನಲಾ ದೂಷಣೆದ ಪಾತೆರೊನು ಪಂಡ್ದ್ ಸಸಾರ ಮಲ್ತೆರ್.</verse>
				<verse number="66">ಬೊಲ್ಪಾನಗ ಯೆಹೂದ್ಯೆರೆ ಹಿರಿಸಭೆತಾಕುಲುಲಾ ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಸೇರ್ದ್ ಆಯನ್ ನ್ಯಾಯತೀರ್ಪುದ ಸಭೆಕ್ ಲೆತ್ತೊಂದು ಬತ್ತ್‌ದ್,</verse>
				<verse number="67">“ಈ ಕ್ರಿಸ್ತೆ ಆದುಲ್ಲನಾ? ಎಂಕ್ಲೆಗ್ ಪನ್ಲ,” ಪಂಡೆರ್. ಆಯೆ ಅಕ್ಲೆಡ, “ಯಾನ್ ನಿಕ್ಲೆಗ್ ಪಂಡ್ಂಡ ನಿಕುಲು ನಂಬುಜರ್.</verse>
				<verse number="68">ಯಾನ್ ನಿಕ್ಲೆಗ್ ಪ್ರಶ್ನೆ ಕೇಂಡ್‌ಂಡ ನಿಕುಲು ಉತ್ತರ ಕೊರ್ಪುಜರ್.</verse>
				<verse number="69">ಆಂಡ ಇನಿಡ್ದಿಂಚಿ ನರಮಾನಿ ಮಗೆ ಸರ್ವಶಕ್ತೆ ಆದುಪ್ಪು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುವೆ,” ಅಂದ್‌ದ್ ಪಂಡೆ.</verse>
				<verse number="70">ಅಪಗ ಮಾತೆರ್ಲಾ, “ಅಂಚಾಂಡ ಈ ದೇವೆರೆ ಮಗೆನಾ,” ಅಂದ್‌ದ್ ಕೇನ್ನಗ, ಆಯೆ ಅಕ್ಲೆಗ್, “ಯಾನ್ ಆಯೆನೇ ಅಂದ್‌ದ್ ನಿಕುಲೇ ಪನ್ಪರ್.” ಪಂಡೆ.</verse>
				<verse number="71">ಐಕ್ ಅಕುಲು, “ನಂಕ್ ಸಾಕ್ಷಿ ನನ ದಾಯೆಗ್ ಬೋಡು? ನಮನೇ ಆಯನ ಬಾಯಿಡ್ದ್ ಕೇಂಡತ್ತಾ,” ಅಂದ್‌ದ್ ಪಂಡೆರ್.</verse>
			</chapter>
			<chapter number="23">
				<verse number="1">ಅಲ್ಪ ಸೇರ್ದಿನಾಕುಲು ಮಾತೆರ್ ಆಯನ್ ಪಿಲಾತನ ಕೈತಲ್‌ ಲೆತ್ತೊಂದು ಪೋದು.</verse>
				<verse number="2">ಅಕುಲು ಉಂಬೆನೇ ರಕ್ಷಕೆ ಆದುಪ್ಪು ಕ್ರಿಸ್ತೆ ಪನ್ಪಿ ಒರಿ ಅರಸು ಪಂಡ್ದ್‌ಲಾ ಕೈಸರಗ್ ತೆರಿಗೆ ಕೊರಿಯೆರೆ ಬಲ್ಲಿ ಅಂದ್‌ದ್ ಅಡ್ಡಿ ಮಲ್ತ್‌ದ್ ಎಂಕ್ಲೆನ ದೇಶದ ಜನೊಕುಲೆನ ಮನಸ್‌ನ್ ಹಾಳ್ ಮಲ್ಪುನೆನ್ ತೂಯ ಅಂದ್‌ದ್ ಆಯನ ಮಿತ್ತ್ ದೂರು ಕೊರಿಯೆರ್.</verse>
				<verse number="3">ಪಿಲಾತೆ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಪಂಡ್ದ್ ಕೇನ್ನಗ ಯೇಸು, “ಈಯೆ ಪನೊಂದುಲ್ಲತ್ತಾ,” ಅಂದ್‌ದ್ ಪನ್ನಗ,</verse>
				<verse number="4">ಪಿಲಾತೆ ಪ್ರಧಾನಯಾಜಕೆರೆಗ್ಲಾ ಜನೊಕುಲೆ ಗುಂಪುಗ್ಲಾ, “ಈ ನರಮಾನಿಗ್ ಶಿಕ್ಷೆ ಕೊರ್ಪಿಲೆಕ್ಕ ಅಂಚಿನ ತಪ್ಪು ದಾಲಾ ಎಂಕ್ ತೋಜುಜಿ ಪಂಡೆ.”</verse>
				<verse number="5">ಐಕ್ ಅಕುಲು ಉಂಬೆ ಗಲಿಲಾಯೊಡು ಸುರು ಮಲ್ತ್‌ದ್ ಯೂದಾಯದ ಮುಟ್ಟಲಾ ಬೋಧನೆ ಮಲ್ತೊಂದು ಜನೊಕುಲೆ ನಡುಟು ಲಡಯಿ ಮಲ್ಪಾವೆ ಅಂದ್‌ದ್ ಒತ್ತುದು ಪಂಡೆರ್.</verse>
				<verse number="6">ಉಂದೆನ್ ಪಿಲಾತೆ ಕೇಂಡ್ದ್ ಈ ನರಮಾನಿ ಗಲಿಲಾಯದಾಯೆ ಅಂದ್‌ದ್ ಗೊತ್ತಾದ್</verse>
				<verse number="7">ಉಂಬೆ ಹೆರೋದನ ಅಧಿಕಾರೊಗು ಸೇರ್ದಿತ್ತಿನಾಯೆ ಅಂದ್‌ದ್ ಆಯನ್ ಹೆರೋದನ ಕೈತಲ್‌ ಕಡಪುಡಿಯೆ. ಹೆರೋದೆ ಆ ದಿನೊಕುಲೆಡ್ ಯೆರೂಸಲೇಮುಡೇ ಇತ್ತೆ.</verse>
				<verse number="8">ಹೆರೋದೆ ಯೇಸುನು ತೂದು ಸಂತೋಷ ಪಡೆಯೆ. ಹೆರೋದೆ ಯೇಸುನ ಸಂಗತಿಡ್ ಮಸ್ತ್ ಸಂಗತಿಲೆನ್ ಕೇನಿನೆಡ್ದ್ ಆಯನ್ ತೂವೊಡು ಅಂದ್‌ದ್ ಮಸ್ತ್ ಸಮಯೊಡ್ದಿಂಚಿ ನಿರೀಕ್ಷೆ ಮಲ್ತೊಂದಿತ್ತೆ. ಆಯಡ್ದ್ ಒವ್ವಾಂಡಲಾ ಕಾರ್ನಿಕೊಲೆನ್ ತೂವೊಡು ಅಂದ್‌ದ್ ಎನ್ನ್‌ದಿತ್ತೆ.</verse>
				<verse number="9">ಆಯೆ ಮಸ್ತ್ ಪಾತೆರೊಲೆಡ್ದ್ ಯೇಸುಗು ಪ್ರಶ್ನೆ ಮಲ್ತ್ಂಡಲಾ ಯೇಸು ಆಯಗ್ ದಾಲಾ ಉತ್ತರ ಕೊರ್ಜೆ.</verse>
				<verse number="10">ಪ್ರಧಾನಯಾಜಕೆರ್‌ಲಾ ಶಾಸ್ತ್ರಿಲುಲಾ ಉಂತೊಂದು ಆಯನ ಮಿತ್ತ್ ಕಠಿಣಾದ್ ದೂರುನು ಪನೊಂದಿತ್ತೆರ್.</verse>
				<verse number="11">ಕಡೆಕ್ಕ್ ಹೆರೋದೆ ತನ ಸಿಪಾಯಿಲೆನ್ ಸೇರೊಂದು ಆಯಗ್ ತಿರಸ್ಕಾರಲಾ ಗೇಲಿಲಾ ಮಲ್ತ್‌ದ್ ಎಡ್ಡೆ ಅಂಗಿ ಪಾಡಾದ್ ಪಿಲಾತನ ಕೈತಲ್‌ ಪಿರ ಕಡಪುಡ್ದು ಕೊರಿಯೆ.</verse>
				<verse number="12">ಅವ್ವೇ ದಿನೊಟು ಹೆರೋದೆಲಾ ಪಿಲಾತೆಲಾ ಒರಿಯಗ್ ಒರಿ ಸ್ನೇಹಿತೆರ್ ಆಯೆರ್; ಅವೆಡ್ದುಂಬು ಪಗೆಟಿತ್ತೆರ್.</verse>
				<verse number="13">ಬೊಕ್ಕ ಪಿಲಾತೆ ಪ್ರಧಾನಯಾಜಕೆರೆನ್ಲಾ ಯೆಹೂದ್ಯೆರೆ ಅಧಿಕಾರಿಲೆನ್ಲಾ ಜನೊಕುಲೆನ್ಲಾ ಒಟ್ಟಾದ್ ಲೆಪ್ಡಾದ್,</verse>
				<verse number="14">ಅಕ್ಲೆಡ ಪಂಡಿನಿ, “ಈ ನರಮಾನಿ ಜನೊಕುಲೆನ್ ತಪ್ಪು ಸಾದಿಗ್ ತಿರ್ಗಾವುನಾಯೆ ಅಂದ್‌ದ್ ಉಂಬ್ಯನ್ ಎನ ಕೈತಲ್‌ ಕನತ್‌ದ್ ದೂರು ಕೊರಿಯರ್. ಯಾನ್ ನಿಕ್ಲೆನ ಎದುರುಡೇ ವಿಚಾರಣೆ ಮಲ್ಪುನಗ ಉಂಬ್ಯಗ್ ಶಿಕ್ಷೆ ಕೊರ್ಪಿನಂಚಿನ ಒಂಜಿ ತಪ್ಪುಲಾ ಎಂಕ್ ತೋಜಿಜಿ;</verse>
				<verse number="15">ಹೆರೋದಗ್ಲಾ ತೋಜಿಜಿ; ಆಯೆ ಉಂಬ್ಯನ್ ಪಿರ ಎಂಕ್ಲೆನ ಕೈತಲ್‌ ಕಡಪುಡುದೆ ಅತ್ತಾ. ಇಂದಾ, ಉಂಬೆ ಮರಣ ದಂಡನೆಗ್ ತಕ್ಕವಾಯಿನೆನ್ ಮಲ್ತಿನಾಯೆ ಅತ್ತ್;</verse>
				<verse number="16">ಅವೆಡ್ದಾವರ ಯಾನ್ ಉಂಬ್ಯಗ್ ಹಾಕಾದ್ ಬುಡ್ದು ಬುಡ್ಪೆ,” ಪಂಡೆ.</verse>
				<verse number="17">ಪಿಲಾತಗ್ ಪರ್ಬದ ಸಮಯೊಡು ಒರಿಯನ್ ಸೆರೆಮೆನೆಡ್ದ್ ಬುಡ್ದು ಕೊರ್ಪಿನ ಕ್ರಮ ಇತ್ತ್ಂಡ್.</verse>
				<verse number="18">ಆಂಡ ಅಕುಲು, “ಆಯನ್ ಕೆರ್ಪಾಲ, ಎಂಕ್ಲೆಗ್ ಬರಬ್ಬನ್ ಬುಡ್ದು ಕೊರು,” ಅಂದ್‌ದ್ ಒಟ್ಟಾದ್ ಬೊಬ್ಬೆ ಪಾಡಿಯೆರ್.</verse>
				<verse number="19">ಈ ಬರಬ್ಬನ್ ಪಟ್ಟಣೊಡು ಗಲಾಟೆ ಮಲ್ತ್‌ದ್ ಒರಿಯನ್ ಕೆರ್ತಿನೆಡ್ದ್ ಸೆರೆಮನೆಟ್ ಪಾಡ್ದ್ ಇತ್ತೆರ್.</verse>
				<verse number="20">ಪಿಲಾತಗ್ ಯೇಸುನು ಬುಡ್ಪಾವುನ ಮನಸ್ ಇತ್ತಿನೆಡ್ದ್ ಕುಡ ಅಕ್ಲೆಡ ಪಾತೆರಿಯೆ.</verse>
				<verse number="21">ಆಂಡ ಅಕುಲು, “ಯೇಸುನು ಕ್ರುಸ್ಸುಗು ಪಾಡ್ಪಾಲ, ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಬೊಬ್ಬೆ ಪಾಡೊಂದಿತ್ತೆರ್.</verse>
				<verse number="22">ಮೂಜನೆ ಸರ್ತಿ ಅಕ್ಲೆಡ, “ದಾಯೆಗ್? ಅಂಚಿನ ದಾದ ಹಾಳ್ ಬೇಲೆ ಮಲ್ತ್‌ದೆ? ಎಂಕ್ ಆಯಡ ಮರಣದ ದಂಡನೆಗ್ ತಕ್ಕಂತಿ ಅಪರಾಧ ದಾಲಾ ತೋಜುಜಿ. ಐಡ್ದಾವರ ಉಂಬ್ಯನ್ ಹಾಕಾದ್ ಬುಡ್ದು ಬುಡ್ಪೆ,” ಅಂದ್‌ದ್ ಅಕ್ಲೆಗ್ ಪಂಡೆ.</verse>
				<verse number="23">ಆಂಡ ಅಕುಲು ಮಲ್ಲ ಅರಬಾಯಿ ದೀವೊಂದು, “ಆಯನ್ ಕ್ರುಸ್ಸುಗು ಪಾಡೊಡು,” ಅಂದ್‌ದ್ ಬಲವಂತ ಮಲ್ತೆರ್; ಅಕ್ಲೆನ ಅರಬಾಯಿ ಗೆಂದ್‌ಂಡ್.</verse>
				<verse number="24">ಪಿಲಾತೆ, “ನಿಕುಲು ಕೇಂಡೊಂಡಿ ಲೆಕ್ಕ ಆವಡ್,” ಅಂದ್‌ದ್ ಯೇಸುನು ಕೆರಿಯೆರೆ ತೀರ್ಪು ಕೊರಿಯೆ.</verse>
				<verse number="25">ಗಲಾಟೆ ಮಲ್ತ್‌ದ್ ಮಾನ್ಯ ಕೆರ್ದ್ ಸೆರೆಮನೆಟ್ ಇತ್ತಿ ಬರಬ್ಬನ್ ಅಕುಲು ಕೇಂಡೊಂಡಿ ಪ್ರಕಾರ ಬುಡ್ದು ಕೊರ್ದು ಯೇಸುನು ಅಕ್ಲೆ ಚಿತ್ತೊಗು ಒಚ್ಚಿದ್ ಕೊರಿಯೆ.</verse>
				<verse number="26">ಸಿಪಾಯಿಲು ಆಯನ್ ಲೆತ್ತೊಂದು ಪೋನಗ ಕಂಡೊಡ್ದು ಬರೊಂದಿತ್ತಿ ಕುರೇನೆ ಪೇಂಟೆದ ಸೀಮೋನೆ ಪನ್ಪಿನಾಯನ್ ಪತ್ತ್‌ದ್ ಕ್ರುಸ್ಸುನು ಆಯನ ಪುಗೆಲ್‌ಡ್ ದೀದ್ ಯೇಸುನ ಪಿರವುಡೆ ತುಂಬೊಂದು ಬರಿಯೆರೆ ಪಂಡೆರ್.</verse>
				<verse number="27">ಜನೊಕುಲುಲಾ ಪೊಂಜೊವುಲುಲಾ ಮಲ್ಲ ಗುಂಪಾದ್ ಆಯನ ಬೆರಿಯೆ ಪೋಯೆರ್. ಆ ಪೊಂಜೊವುಲು ತಿಗಲೆ ದರ್ತೊಂದು ಆಯಗಾದ್ ಬುಲ್ತೊಂದು ಇತ್ತೆರ್.</verse>
				<verse number="28">ಯೇಸು ಅಕ್ಲೆನ ಕಡೆಕ್ಕ್ ತಿರ್ಗ್‌ದ್, “ಯೆರೂಸಲೇಮುದ ಪೊಂಜೊವುಲೇ, ಎಂಕಾದ್ ಬುಲ್ಪೊಡ್ಚಿ; ನಿಕ್ಲೆಗಾದ್‌ಲಾ ನಿಕ್ಲೆನ ಜೋಕುಲೆಗಾದ್‌ಲಾ ಬುಲ್ಪುಲೆ.</verse>
				<verse number="29">ದಾಯೆಗಂದ್ಂಡ ಬಂಜಿನಾಕುಲು ಆವಂದಿನಾಕುಲುಲಾ ಮಿರೆ ಪೇರ್ ಪರ್ಪಾವಂದಿನಾಕುಲುಲಾ ಭಾಗ್ಯವಂತೆರ್ ಅಂದ್‌ದ್ ಜನೊಕುಲು ಪನ್ಪಿ ದಿನೊಕುಲು ಬರ್ಪುಂಡು.</verse>
				<verse number="30">ಆ ಕಷ್ಟದ ಕಾಲೊಡು ಜನೊಕುಲೆಗ್ ತಡೆವೊನೆರೆ ಬಲ ಇಜ್ಜಂದಿನಪಗ, ‘ಪರ್ವತಲೇ ಎಂಕ್ಲೆನ ಮಿತ್ತ್ ಬೂರ್ಲೆ!’ ಗುಡ್ಡೆಲೇ ‘ಎಂಕ್ಲೆನ್ ಮುಚ್ಚೊನ್ಲೆ!’ ಪನ್ಪರ್.</verse>
				<verse number="31">ಮರ ಪಜ್ಜಿ ಉಪ್ಪುನಗನೇ ಇಂಚ ಮಾತ ಮಲ್ತ್ಂಡ ನುಂಗೆಲ್ ಮರೊಕು ದಾದ ಅವು?”</verse>
				<verse number="32">ಯೇಸುನ ಒಟ್ಟುಗು ಕೆರಿಯೆರೆ ಕಲ್ವೆರಾದಿತ್ತಿ ಬೇತೆ ಇರ್ವೆರೆನ್ ಲೆತ್ತೊಂದು ಪೋಯೆರ್.</verse>
				<verse number="33">ಅಕುಲು “ಕಪಾಲ,” ಪನ್ಪಿ ಜಾಗ್‌ಗ್ ಬನ್ನಗ ಅಲ್ಪ ಆಯನ್ಲಾ ಆ ಕಲ್ವೆರೆನ್ಲಾ ಕ್ರುಸ್ಸುಗು ಪಾಡಿಯೆರ್ ಒರಿಯನ್ ಬಲತ್ತ ಮರ್ಗಿಲ್‌ಡ್ ಬೊಕ್ಕೊರಿಯನ್ ದತ್ತ ಮರ್ಗಿಲ್‌ಡ್ ಪಾಡಿಯೆರ್.</verse>
				<verse number="34">ಅಪಗ ಯೇಸು, “ಅಮ್ಮೆರೇ, ಅಕ್ಲೆಗ್ ಮಾಪು ಮಲ್ಪು; ತನ್ಕುಲು ದಾದ ಮಲ್ಪುವೆರ್ ಪನ್ಪಿನೆನ್ ತೆರಿದಿಜೆರ್,” ಅಂದ್‌ದ್ ಪಂಡೆ. ಐಡ್ದ್ ಬೊಕ್ಕ ಆಯನ ಕುಂಟುನು ಪಾಲ್ ಮಲ್ತ್‌ದ್ ಚೀಟಿ ಪಾಡಿಯೆರ್.</verse>
				<verse number="35">ಜನೊಕುಲು ತೂವೊಂದೇ ಉಂತಿಯೆರ್. ಉಂದತ್ತಂದೆ ಅಧಿಕಾರಿಲು ಮಸ್ಕಿರಿ ಮಲ್ತ್‌ದ್, “ಆಯೆ ಬೇತೆಕ್ಲೆನ್ ಬಚವು ಮಲ್ತೆ. ಆಯೆ ದೇವೆರ್ ಅಜತ್ ದೆತ್ತೊಂಡಿ ಕ್ರಿಸ್ತೆ ಆದಿತ್ತೆಡ, ತನನ್ ತಾನೇ ಬಚವು ಮಲ್ತೊನಡ್ ಅಂದ್‌ದ್ ಗೇಲಿ ಮಲ್ತೆರ್.”</verse>
				<verse number="36">ಸಿಪಾಯಿಲು ಆಯನ್ ಗೇಲಿ ಮಲ್ತೆರ್. ಅಕುಲು ಆಯನ ಕೈತಲ್‌ ಬತ್ತ್‌ದ್ ಪುಳಿರಸೊನು ತೋಜಾದ್</verse>
				<verse number="37">“ಈ ಯೆಹೂದ್ಯೆರೆ ಅರಸು ಆದಿತ್ತಡ ನಿನನ್ ಬಚವು ಮಲ್ತೊನ್ಲ,” ಪಂಡೆರ್.</verse>
				<verse number="38">ಉಂದತ್ತಂದೆ ಆಯನ ಕ್ರುಸ್ಸುದ ಮಿತ್ತ್‌ಡ್ “ಯೆಹೂದ್ಯೆರೆ ಅರಸು,” ಅಂದ್‌ದ್ ಒಂಜಿ ಪಲಯಿಡ್ ಬರೆದ್ ಪಾಡ್ದ್ ಇತ್ತೆರ್.</verse>
				<verse number="39">ನೇಲಾದಿ ಆ ಕಲ್ವೆರೆಡ್ ಒರಿ ಆಯನ್ ದೂಷಣೆ ಮಲ್ತ್‌ದ್, “ಈ ಬರೊಡಾಯಿನ ಕ್ರಿಸ್ತೆ ಅತ್ತಾ, ನಿನನ್ ಬಚವು ಮಲ್ತೊನ್ಲ, ಎಂಕ್ಲೆನ್ಲಾ ಬಚವು ಮಲ್ಪು,” ಪಂಡೆ.</verse>
				<verse number="40">ಐಕ್ ರಡ್ಡನೆದಾಯೆ ಆಯನ್ ದಟ್ಟಿದ್, “ಈ ಉಂದೇ ನ್ಯಾಯತೀರ್ಪುಡು ಉಪ್ಪುನಗ ದೇವೆರೆಗ್ ಪೋಡಿಯುಜನ?</verse>
				<verse number="41">ನಮಾಂಡಲಾ ನ್ಯಾಯದ ದಂಡನೆಡ್ ಉಪ್ಪುನವು ನ್ಯಾಯನೇ. ನಮ ಮಲ್ತಿನೆಕ್ಕ್ ತಕ್ಕ ಪ್ರತಿಫಲೊನು ಪಡೆಯೊಂದು ಉಲ್ಲ; ಉಂಬೆ ಅಂಚಿನ ದಾಲಾ ಮಲ್ತ್‌ಜೆ,” ಅಂದ್‌ದ್ ಪಂಡ್ದ್</verse>
				<verse number="42">“ಯೇಸೋ, ಈ ನಿನ ರಾಜ್ಯೊಗು ಬನ್ನಗ ಎನನ್ ನೆನೆಪು ಮಲ್ಪು,” ಪಂಡೆ.</verse>
				<verse number="43">ಐಕ್ ಯೇಸು, “ಇನಿಯೇ ಎನಡೊಪ್ಪ ಪರದೈಸೊಡು ಉಪ್ಪುವ ಅಂದ್‌ದ್ ನಿಕ್ಕ್ ಸತ್ಯಾದ್ ಪನ್ಪೆ,” ಪಂಡ್ದ್ ಉತ್ತರ ಕೊರಿಯೆ.</verse>
				<verse number="44">ಈತಾನಗ ಮಧ್ಯಾಹ್ನ ಆಂಡ್. ಸೂರ್ಯನ ದೊಂಬು ಮಾಜಿದ್ ಮೂಜಿ ಗಂಟೆ ಮುಟ್ಟ ಆ ದೇಶದ ಮಿತ್ತ್ ಕತ್ತಲೆ ಆಂಡ್; ಆತಿ ಪರಿಶುದ್ಧ ಆದುಪ್ಪು ದೇವಾಲಯದ ಪರದೆ ನಡುಟು ಪರಿದ್ ರಡ್ಡ್ ಪಾಲ್ ಆಂಡ್.</verse>
				<verse number="45"></verse>
				<verse number="46">ಐಡ್ದ್ ಬೊಕ್ಕ ಯೇಸು, “ಅಮ್ಮೆರೆ, ಎನ ಆತ್ಮೊನು ನಿನ ಕೈಕ್ ಒಪ್ಪಿಸಾವೆ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬುಲ್ತೆ. ಉಂದೆನ್ ಪಂಡಿ ಬೊಕ್ಕ ಪ್ರಾಣ ಬುಡಿಯೆ.</verse>
				<verse number="47">ಶತಾಧಿಪತಿ ನಡತಿ ಸಂಗತಿನ್ ತೂದು, “ನಿಜಾದ್ ಈ ನರಮಾನಿ ನೀತಿವಂತೆ,” ಅಂದ್‌ದ್ ದೇವೆರೆನ್ ಪುಗರಿಯೆ.</verse>
				<verse number="48">ಈ ಸಂಗತಿನ್ ತೂವೆರೆ ಸೇರ್ದಿತ್ತಿ ಜನೊಕುಲು ನಡತಿ ಸಂಗತಿನ್ ತೂದು, ತಿಗಲೆ ದರ್ತೊಂದು ಪಿರ ಪೋಯೆರ್.</verse>
				<verse number="49">ಪೊಲಬು ಇತ್ತಿನಾಕುಲು ಮಾತೆರ್ ಗಲಿಲಾಯೊಡ್ದು ಬೈದಿನ ಪೊಂಜೊವುಲು ದೂರೊಡು ಉಂತೊಂದು ಈ ಸಂಗತಿನ್ ತೂವೊಂದಿತ್ತೆರ್.</verse>
				<verse number="50">ಅರಿಮಥಾಯೆ ಪನ್ಪಿ ಯೆಹೂದ್ಯೆರೆ ಪಟ್ಟಣದ ಒರಿ ನರಮಾನಿ ಇತ್ತೆ. ಆಯನ ಪುದರ್ ಯೋಸೇಫೆ, ಆಯೆ ಹಿರಿಸಭೆತಾಯೆ, ಎಡ್ಡೆಂತಿನಾಯೆ, ನೀತಿದಾಯೆ, ದೇವೆರೆ ರಾಜ್ಯೊನು ಎದುರು ತೂವೊಂದಿತ್ತಿನಾಯೆ ಆದಿತ್ತೆ. ಆಯೆ ಹಿರಿಸಭೆತಾಕುಲೆನ ಆಲೋಚನೆಗ್ಲಾ ಕೆಲಸೊಗ್ಲಾ ಒಪ್ಪಿಗೆ ಕೊರ್ತುಜೆ.</verse>
				<verse number="51"></verse>
				<verse number="52">ಆಯೆ ಪಿಲಾತನ ಕೈತಲ್‌ ಪೋದು ಯೇಸುನ ಶರೀರೊನು ಎಂಕ್ ಕೊರ್ಲೆ ಅಂದ್‌ದ್ ನಟ್ಟೊಂಡೆ.</verse>
				<verse number="53">ಅವೆನ್ ಕ್ರುಸುಡ್ದ್ ಜಪುಡಾದ್ ನಾರ್‌ಮಡಿತ ಕುಂಟುಡು ಸುತ್ತುದು ತೋಡ್‌ದಿತ್ತಿನ ಕಲ್ಲ್‌ದ ಸಮಾಧಿಡ್ ದೀಯೆ. ಆ ಸಮಾಧಿಡ್ ಆತ್‌ನೆಟ್ಟ ಏರೆನ್ಲಾ ದೀದಿತ್ತಿಜೆರ್.</verse>
				<verse number="54">ಆನಿ ತಯಾರ್ ಮಲ್ಪು ದಿನ ಆದಿತ್ತ್‌ದ್ ಬೊಕ್ಕ ಸಬ್ಬತ್‌ದಿನ ಸುರು ಆವೆರೆ ಒಂತೆ ಪೊರ್ತು ಮಾತ್ರ ಇತ್ತ್ಂಡ್.</verse>
				<verse number="55">ಗಲಿಲಾಯೊಡ್ದು ಬತ್ತಿ ಪೊಂಜೊವುಲು ಆಯ ಬೆರಿಯೆ ಪೋದು, ಸಮಾಧಿನ್ಲಾ ಆಯ ಶರೀರೊನು ದೀತಿನ ರೀತಿನ್ಲಾ ತೂಯೆರ್;</verse>
				<verse number="56">ಇಲ್ಲಗ್ ಪಿರ ಪೋದು ಕಮ್ಮೆನ ದ್ರವ್ಯೊಲೆನ್ಲಾ ಕಮ್ಮೆನದ ಎಣ್ಣೆನ್ಲಾ ತಯಾರ್ ಮಲ್ತ್‌ದ್ ಅಪ್ಪಣೆದಲೆಕ್ಕ ಸಬ್ಬತ್‌ಡ್ ಮನಿಪಂದೆ ಇತ್ತೆರ್.</verse>
			</chapter>
			<chapter number="24">
				<verse number="1">ಆ ಪೊಂಜೊವುಲು ವಾರದ ಸುರುತ್ತ ದಿನೊಟು ಪುಲ್ಯ ಆನಗ ತನ್ಕುಲು ತಯಾರ್ ಮಲ್ತ್‌ದಿತ್ತಿ ಕಮ್ಮೆನದ ಎಣ್ಣೆನ್ ದೆತ್ತೊಂದು ಸಮಾಧಿಗ್ ಬತ್ತೆರ್.</verse>
				<verse number="2">ಸಮಾಧಿ ಮುಚ್ಚಿದಿತ್ತಿನ ಕಲ್ಲ್ ಪೊರೆಲ್‌ದಿತ್ತೆನೆನ್ ತೂದು ಉಲಯಿ ಪೋಯೆರ್.</verse>
				<verse number="3">ಆಂಡ ಯೇಸು ಕರ್ತವನ ಶರೀರ ಅಲ್ಪ ಇಜ್ಜಾಂಡ್.</verse>
				<verse number="4">ಅಕುಲು ಗಲಿಬಿಲಿ ಆಯೆರ್. ಅಪಗ ಮಿಂಚುನ ಅಂಗಿ ಪಾಡೊಂದಿತ್ತಿ ಇರ್ವೆರ್ ಅಂಜೊವುಲು ಅಕಸ್ಮತಾದ್ ಅಕ್ಲೆನ ಬರಿಟ್ಟೆ ಉಂತೊಂಡೆರ್.</verse>
				<verse number="5">ಆ ಪೊಂಜೊವುಲು ಪೋಡಿದ್ ತನ್ಕುಲೆ ಮೋನೆಲೆನ್ ನೆಲಕ್ ಬಗ್ಗಾಯೆರ್. ಆ ಅಂಜೊವುಲು ಅಕ್ಲೆಗ್, “ಬದುಕುನಾಯನ್ ಸೈತಿನಾಕುಲೆ ಸಮಾಧಿಡ್ ನಾಡುನು ದಾಯೆಗ್?”</verse>
				<verse number="6">ಆಯೆ ಮುಲ್ಪ ಇಜ್ಜೆ, ಆಯೆ ಜೀವಾದ್ ಲಕ್ಕ್‌ದೆ. ಆಯೆ ಗಲಿಲಾಯೊಡು ಇತ್ತಿನಪಗ ನರಮಾನಿ ಮಗನ್ ಪಾಪಿಷ್ಟೆರಾದುಪ್ಪು ನರಮಾನಿಲೆ ಕೈಕ್ ಒಪ್ಪಿಯಾದ್ ಕ್ರುಸ್ಸುಗ್ ಪಾಡ್ದ್ ಮೂಜನೇ ದಿನೊಟು ಲಕ್ಕ್‌ದ್ ಬರ್ಪಿನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತಿನೆನ್ ನೆನೆಪು ಮಲ್ತೊನ್ಲೆ ಅಂದ್‌ದ್ ಪಂಡೆರ್.</verse>
				<verse number="7"></verse>
				<verse number="8">ಪೊಂಜೊವುಲು ಆಯನ ಪಾತೆರೊಲೆನ್ ನೆನೆಪುಗು ದೆತ್ತೊಂದು</verse>
				<verse number="9">ಸಮಾಧಿಡ್ದ್ ಪಿರ ಬತ್ತ್‌ದ್ ಪತ್ತೊಂಜಿ ಜನ ಅಪೊಸ್ತಲೆರೆಗ್ಲಾ ಒರಿದಿನಾಕುಲೆಗ್ಲಾ ತೆರಿಪಾಯೆರ್.</verse>
				<verse number="10">ಆ ಪೊಂಜೊವುಲು ಏರ್ ಅಂದ್ಂಡ ಮಗ್ದಲದ ಮರಿಯ, ಯೋಹನ್ನ, ಯಾಕೋಬುನ ಅಪ್ಪೆ ಆಯಿ ಮರಿಯ ಮೊಕುಲೇ. ಮೊಕ್ಲೆನ ಒಟ್ಟುಗಿತ್ತಿ ಪೊಂಜೊವುಲುಲಾ ಅಪೊಸ್ತಲೆರೆಗ್ ಈ ಸಂಗತಿಲೆನ್ ಪಂಡೆರ್.</verse>
				<verse number="11">ಅಕುಲು ನಂಬಿಜೆರ್; ಅಕ್ಲೆಗ್ ತಮಾಸೆದ ಪಾತೆರದ ಲೆಕ್ಕ ತೋಜ್ಂಡ್. ಆಂಡ ಪೇತ್ರೆ ಲಕ್ಕ್‌ದ್ ಸಮಾಧಿಗ್ ಪಾರ್‌ಪೋದು ಬಗ್ಗ್‌ದ್ ತೂಯೆ. ಅಲ್ಪ ಯೇಸುನ ಶರೀರೊಗು ಸುತ್ತುದಿನ ನಾರ್‌ದ ಕುಂಟುನು ಮಾತ್ರ ತೂದು ಅಚ್ಚಿರ ಆದ್ ಪಿದಾಡ್ದ್ ಪೋಯೆ.</verse>
				<verse number="12"></verse>
				<verse number="13">ಅವ್ವೇ ದಿನೊಟು ಶಿಷ್ಯೆರೆಡ್ ಇರ್ವೆರ್ ಯೆರೂಸಲೇಮುಗು ಏಳ್ ಮೈಲ್ ದೂರೊಡಿತ್ತಿ ಎಮ್ಮಾಹು ಪನ್ಪಿ ಹಳ್ಳಿಗ್ ಪೋವೊಂದುಪ್ಪುನಗ</verse>
				<verse number="14">ನಡತಿ ಪ್ರತಿ ಒಂಜಿ ಕಾರ್ಯೊಲೆ ಬಗೆಟ್ ಪಾತೆರೊಂದಿತ್ತೆರ್.</verse>
				<verse number="15">ಅಕುಲು ಪಾತೆರೊಂದು ಚರ್ಚೆ ಮಲ್ತೊಂದು ಪೋನಗ ಯೇಸು ಕೈತಲ್‌ ಬತ್ತ್‌ದ್ ಅಕ್ಲೆಡೊಪ್ಪ ಪೋಯೆ.</verse>
				<verse number="16">ಆಂಡ ಅಕ್ಲೆಗ್ ಆಯನ ಗುರ್ತ ಪತ್ತಿಯೆರೆ ಆಯಿಜಿ. ಕಣ್ಣ್ ಕಟ್ಟಿಲೆಕ್ಕ ಆಂಡ್.</verse>
				<verse number="17">ಯೇಸು ಅಕ್ಲೆಡ ನಿಕುಲು ಮಾರ್ಗೊಡು ಪೋವೊಂದು ಚರ್ಚೆ ಮಲ್ತ್‌ದ್ ಪಾತೆರೊಂದುಪ್ಪು ಈ ಸಂಗತಿಲು ದಾದ ಅಂದ್‌ದ್ ಕೇನ್ನಗ ಅಕುಲು ಮೋನೆ ಬಾಡ್‌ದಿನಕುಲಾದ್ ಉಂತಿಯೆರ್.</verse>
				<verse number="18">ಅಕ್ಲೆಡ್ ಕ್ಲೆಯೋಫೆ ಪನ್ಪಿನಾಯೆ ಆಯಗ್ ಯೆರೂಸಲೇಮುಡು ಬುಡಾರ ಮಲ್ಪುನಾಕುಲೆಡ್ ನಿಕ್ಕ್ ಒರಿಯಗ್ ಮಾತ್ರ ಗೊತ್ತಿಜ್ಜಾ? ಅಂದ್‌ದ್ ಕೇನ್ನಗ</verse>
				<verse number="19">ಆಯೆ ಅಕ್ಲೆಡ, “ವಾ ಸಂಗತಿಲು?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ನಜರೇತ್‌ದ ಯೇಸುನ ಸಂಗತಿಲು. ಆಯೆ ದೇವೆರೆ ಎದುರುಡು ಬೊಕ್ಕ ಜನೊಕುಲೆ ಎದುರುಡು ಕಾರ್ಯೊಡ್ಲಾ ಪಾತೆರೊಡ್ಲಾ ಬಲ ಇತ್ತಿ ಪ್ರವಾದಿ ಆದಿತ್ತೆ.</verse>
				<verse number="20">ಆಯನ್ ಪ್ರಧಾನಯಾಜಕೆರ್‌ಲಾ ನಮ ಅಧಿಕಾರಿಲುಲಾ ಮರಣದ ನ್ಯಾಯತೀರ್ಪುಗು ಒಪ್ಪಿಸಾದ್ ಕ್ರುಸ್ಸುಗ್ ಪಾಡಾಯೆರ್.</verse>
				<verse number="21">ಇಸ್ರಾಯೇಲ್ ಜನೊಕುಲೆನ್ ಬುಡ್ಪಾಯೆರೆ ತಕ್ಕಂತಿನಾಯೆ ಆಯೆನೇ ಅಂದ್‌ದ್ ಎಂಕುಲು ನಿರೀಕ್ಷೆ ಮಲ್ತೊಂದಿತ್ತ. ಉಂದು ಮಾತ್ರ ಅತ್ತಂದೆ ಆ ಕಾರ್ಯೊಲು ನಡತ್‌ದ್ ಇನಿಕ್ ಮೂಜನೇ ದಿನ;</verse>
				<verse number="22">ಆಂಡ ಕೆಲವು ಪೊಂಜೊವುಲು ಬೊಲ್ಪು ಆನಗ ಸಮಾಧಿದ ಕೈತಲ್‌ ಪೋದು</verse>
				<verse number="23">ಆಯನ ಶರೀರೊನು ತೂವಂದೆ ತನ್ಕುಲೆಗ್ ದೂತೆರ್ ದರ್ಶನ ಕೊರ್ದು ಯೇಸು ಜೀವಾದ್ ಲಕ್ಕ್‌ದೆ ಅಂದ್‌ದ್ ಪಂಡಿನೆನ್ ಅಕುಲು ತೆರಿಪಾದ್ ಎಂಕ್ಲೆಗ್ ಮಲ್ಲ ಅಚ್ಚಿರೊನು ಉಂಡು ಮಲ್ತೆರ್.</verse>
				<verse number="24">ಎಂಕ್ಲೆನ ಒಟ್ಟುಗು ಇತ್ತಿನಾಕುಲೆಡ್ದ್ ಕೆಲೆವೆರ್ ಸಮಾಧಿಗ್ ಪೋದು ಆ ಪೊಂಜೊವುಲು ಪಂಡಿಲೆಕ್ಕನೇ ತೂಯೆರ್; ಆಯನ್ ಮಾತ್ರ ತೂಯಿಜೆರ್,” ಅಂದ್‌ದ್ ಪಂಡೆರ್.</verse>
				<verse number="25">ಯೇಸು ಅಕ್ಲೆಗ್ ಬುದ್ಧಿದಾಂತಿನಾಕುಲೇ, ಪ್ರವಾದಿಲು ಪಂಡಿನೆನ್ ಮಾತೆನ್ ನಂಬುನ ಮಂದ ಉಡಲ್‌ದಾಕುಲೇ,</verse>
				<verse number="26">ಕ್ರಿಸ್ತೆ ಇಂಚಿತ್ತಿ ಭಂಗೊಲೆನ್ ಅನುಭವ ಮಲ್ತ್‌ದ್ ತನ ಮಲ್ಲ ಮೈಮೆದ ಸ್ಥಾನೊಗು ಪರಲೋಕೊಗು ಸೇರುನವು ಅಗತ್ಯದವು ಆದಿತ್ತ್‌ಂಡತ್ತಾ?</verse>
				<verse number="27">ಬೊಕ್ಕ ಯೇಸು ತನ ಬಗೆಟ್ ಮೋಶೆ ಬೊಕ್ಕ ಮಾತ ಪ್ರವಾದಿಲೆ ಶಾಸ್ತ್ರೊಡು ಬರೆತಿಲೆಕ್ಕ ಅವೆನ್ ಮಾತ ಅಕ್ಲೆಗ್ ಬುಡ್ಪಾದ್ ಪಂಡೆ.</verse>
				<verse number="28">ಅಕುಲು ಪೋವೊಂದುಪ್ಪುನ ಹಳ್ಳಿದ ಕೈತಲ್‌ ಬನ್ನಗ ಆಯೆ ನನಲಾ ದುಂಬು ಪೋಪಿಲೆಕ್ಕ ತೋಜ್ಂಡ್.</verse>
				<verse number="29">ಆಂಡ ಅಕುಲು ಬೈಯ ಆಂಡ್ ಪೊರ್ತು ಕಂತೊಂದು ಬತ್ತ್ಂಡ್ ಎಂಕ್ಲೆನ ಒಟ್ಟುಗು ತಡೆಲ ಅಂದ್‌ದ್ ಆಯಗ್ ಒತ್ತಾಯ ಮಲ್ಪುನಗ ಆಯೆ ಅಕ್ಲೆನ ಒಟ್ಟುಗು ಉಂತಿಯೆರೆ ಊರುದುಲಯಿ ಪೋಯೆ.</verse>
				<verse number="30">ಆಯೆ ಅಕ್ಲೆನ ಒಟ್ಟುಗು ವಣಸ್‌ಗ್ ಕುಲ್ಲುದಿನಪಗ ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ತುಂಡು ಮಲ್ತ್‌ದ್,</verse>
				<verse number="31">ಅಕ್ಲೆಗ್ ಕೊರ್ನಗ ಅಕ್ಲೆನ ಕಣ್ಣ್‌ಲು ಜತ್ತ್ಂಡ್, ಯೇಸುನ ಗುರ್ತ ಪತ್ತಿಯೆರ್; ಆ ಸಮಯೊಡು ಆಯೆ ಅಕ್ಲೆನ ಕಣ್ಣ್‌ಗ್ ತೋಜಂದೆ ಪೋಯೆ.</verse>
				<verse number="32">ಐಡ್ದ್ ಬೊಕ್ಕ ಅಕುಲು ಒರಿಯಗ್ ಒರಿ ಆಯೆ ಸಾದಿಡ್ ಎಂಕ್ಲೆನ ಒಟ್ಟುಗು ಪಾತೆರ್‌ನಗಲಾ ಶಾಸ್ತ್ರೊಲೆ ಅರ್ಥೊನು ನಂಕ್ ಬುಡ್ಪಾದ್ ಪನ್ನಗಲಾ ಎಂಕುಲೆ ಉಡಲ್ ತೂ ಪೊತ್ತಿಲೆಕ್ಕ ಆಂಡತ್ತಾ ಪಂಡೆರ್.</verse>
				<verse number="33">ಅವ್ವೇ ಗಳಿಗೆಡ್ ಅಕುಲು ಇರ್ವೆರ್‌ಲಾ ಯೆರೂಸಲೇಮುಗು ಪಿರ ಪೋಯೆರ್. ಅಲ್ಪ ಪತ್ತೊಂಜಿ ಜನ ಶಿಷ್ಯೆರ್‌ಲಾ,</verse>
				<verse number="34">ಅಕ್ಲೆನ ಒಟ್ಟುಗು ಇತ್ತಿನಾಕುಲುಲಾ ಸೇರೊಂದು, ಕರ್ತವೆ ಲಕ್ಕ್‌ದಿನಿ ನಿಜ, ಆಯೆ ಸೀಮೋನಗ್ ತೋಜಿದ್ ಬತ್ತೆ ಅಂದ್‌ದ್ ಪನೊಂದಿತ್ತೆರ್.</verse>
				<verse number="35">ಉಂದೆನ್ ತೂದು ಆ ರಡ್ಡ್ ಶಿಷ್ಯೆರ್ ಸಾದಿಡ್ ನಡತಿ ಸಂಗತಿನ್ಲಾ ರೊಟ್ಟಿ ತುಂಡು ಮಲ್ಪುನೆನ್ ತೂದು ಆಯನ ಗುರ್ತ ಪತ್ತಿಯ ಪಂಡ್ದ್‌ಲಾ ಒರಿದಿನಾಕುಲೆಗ್ ತೆರಿಪಾಯೆರ್.</verse>
				<verse number="36">ಆ ರಡ್ಡ್ ಶಿಷ್ಯೆರ್ ಈ ಸಂಗತಿಡ್ ಪಾತೆರೊಂದುಪ್ಪುನಗ ಯೇಸುವೇ ಅಕ್ಲೆನ ನಡುಟು ಉಂತುದು ನಿಕ್ಲೆಗ್ ಸಮಾಧಾನ ಆವಡ್ ಅಂದ್‌ದ್ ಅಕ್ಲೆಗ್ ಪಂಡೆ.</verse>
				<verse number="37">ಅಕುಲು ತೂಯಿನವು ಆತ್ಮ ಅಂದ್‌ದ್ ಪೋಡಿದ್ ನಡಿಗಿಯೆರ್.</verse>
				<verse number="38">ಆಯೆ ಅಕ್ಲೆಡ, “ದಾಯೆಗ್ ಗಲಿಬಿಲಿ ಆಪರ್? ನಿಕುಲು ಉಡಲ್‌ಡ್ ಅಂಚ ದಾಯೆಗ್ ಎನ್ನುವರ್? ಎನ ಕೈ ಕಾರ್‌ಲೆನ್ ತೂಲೆ, ಯಾನೇ ಅತ್ತಾ. ಎನನ್ ಮುಟ್ಟುದು ತೂಲೆ,</verse>
				<verse number="39">ನಿಕ್ಲೆಗ್ ತೋಜುನ ಪ್ರಕಾರ ಎಂಕ್ ಮಾಸಲಾ ಎಲುಲಾ ಉಂಡು; ಅವು ಆತ್ಮೊಗು ಇಜ್ಜಿ,” ಅಂದ್‌ದ್ ಪಂಡೆ.</verse>
				<verse number="40">ಉಂದೆನ್ ಪಂಡಿ ಬೊಕ್ಕ ಆಯೆ ತನ ಕೈ ಕಾರ್‌ಲೆನ್ ಅಕ್ಲೆಗ್ ತೋಜಾಯೆ.</verse>
				<verse number="41">ಆಂಡ ಅಕುಲು ಸಂತೋಷದ ದಿಸೆಟ್ಟ್ ನನಲಾ ನಂಬಂದೆ ಅಚ್ಚಿರ ಪಡೆಯೊಂದುಪ್ಪುನಗ ಆಯೆ ಅಕ್ಲೆಡ, “ತಿನಿಯೆರೆ ದಾದಾಂಡಲಾ ಮುಲ್ಪ ಉಂಡಾ?” ಅಂದ್‌ದ್ ಕೇಂಡೆ.</verse>
				<verse number="42">ಅಕುಲು ಕೈತಿ ಮೀನ್‌ದ ಒಂಜಿ ತುಂಡು ಆಯಗ್ ಕೊರಿಯೆರ್.</verse>
				<verse number="43">ಆಯೆ ದೆತ್ತೊಂದು ಅಕ್ಲೆನ ಎದುರುಡೆ ತಿಂದೆ.</verse>
				<verse number="44">ಬೊಕ್ಕ ಆಯೆ ಅಕ್ಲೆಡ, “ಯಾನ್ ನಿಕ್ಲೆಡೊಪ್ಪ ಉಪ್ಪುನಗ ಉಂದೆನ್ ಮಾತ ನಿಕ್ಲೆಗ್ ತೆರಿಪಾದಿಜೆನಾ? ಎನ ಬಗೆಟ್ ಮೋಶೆನ ನ್ಯಾಯಕಟ್ಟ್‌ಡ್ಲಾ ಪ್ರವಾದಿಲೆ ಗ್ರಂಥೊಲೆಡ್ಲಾ ಕೀರ್ತನೆಲೆಡ್ಲಾ ಬರೆತಿ ಮಾತ ನಡಪುನವು ಅಗತ್ಯ ಅಂದ್‌ದ್ ನಿಕ್ಲೆಗ್ ಪನ್ತೆ ಅತ್ತಾ?” ಪಂಡೆ.</verse>
				<verse number="45">ಬೊಕ್ಕ ಅಕ್ಲೆನ ಉಡಲ್‌ನ್ ಜತ್ತ್‌ದ್ ಶಾಸ್ತ್ರ ವಚನೊಲೆನ್ ತೆರಿಯೊನುಲೆಕ್ಕ ಆಯೆ ಅಕ್ಲೆಗ್ ಬುಡ್ಪಾದ್ ಪಂಡೆ.</verse>
				<verse number="46">ಯೇಸು ಅಕ್ಲೆಡ, “ಇಂಚೆನೆ ಬರೆತ್ಂಡ್ ಕ್ರಿಸ್ತೆ ಭಂಗ ಬತ್ತ್‌ದ್ ಸೈತ್‌ದ್ ಮೂಜನೇ ದಿನೊಟು ಜೀವಾದ್ ಲಕ್ಕ್‌ದ್ ಬರುವೆ.</verse>
				<verse number="47">ಬೊಕ್ಕ ಪಾಪೊಲೆ ಪರಿಹಾರೊಗಾದ್ ಮಾತೆರ್ಲಾ ಪಶ್ಚಾತಾಪ ಪಡೆಯೊಡು ಪನ್ಪಿ ಪಾತೆರ ಯೆರೂಸಲೇಮುಡ್ದು ಸುರು ಆದ್ ಸಮಸ್ತ ಭೂಲೋಕೊಡು ಉಪ್ಪುನ ಮಾತ ಜನಾಂಗದ ಜನೊಕುಲೆಗ್ ಆಯನ ಪುದರ್‌ಡ್ ಸಾರಿಯೊಡು ಪಂಡ್ದ್‌ಲಾ ಬರೆತ್ಂಡ್.</verse>
				<verse number="48">ಉಂದೆತ್ತ ಸಂಗತಿಡ್ ನಿಕುಲೇ ಸಾಕ್ಷಿ ಆದುಪ್ಪುವರ್.</verse>
				<verse number="49">ಇಂದಾ, ಎನ ಅಮ್ಮೆ ವಾಗ್ದಾನ ಮಲ್ತಿನ ಪರಿಶುದ್ಧಾತ್ಮೊನು ನಿಕ್ಲೆಗ್ ಕಡಪುಡ್ದು ಕೊರ್ಪೆ. ದೇವೆರ್ ಮಿತ್ತ್‌ದ ಲೋಕೊಡ್ದು ಆತ್ಮದ ಬಲ ಕೊರ್ಪಿನೆಂಗೆ ನಿಕುಲು ಯೆರೂಸಲೇಮುಡೇ ಕಾತೊಂದುಪ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="50">ಬೊಕ್ಕ ಆಯೆ ಅಕ್ಲೆನ್ ಬೇಥಾನ್ಯ ಮುಟ್ಟ ಲೆತ್ತೊಂದು ಪೋಯೆ. ಯೇಸು ತನ ಕೈ ದೆರ್ತ್ತ್‌ದ್ ಅಕ್ಲೆನ್ ಆಶೀರ್ವಾದ ಮಲ್ತೆ.</verse>
				<verse number="51">ಆಶೀರ್ವಾದ ಮಲ್ತೊಂದುಪ್ಪುನಗನೇ ಆಯೆ ಅಕ್ಲೆನ್ ಬುಡ್ದು, ಪರಲೋಕೊಗು ಏರ್ದ್ ಪೋಯೆ.</verse>
				<verse number="52">ಅಕುಲು ಆಯಗ್ ಆರಾಧನೆ ಮಲ್ತ್‌ದ್ ಬಾರಿ ಸಂತೋಷೊಡು ಯೆರೂಸಲೇಮುಗು ಪಿರ ಪೋಯೆರ್.</verse>
				<verse number="53">ಅವುಲು ಏಪಲಾ ದೇವಾಲಯೊಗು ಪೋದು ದೇವೆರೆನ್ ಪುಗರೊಂದಿತ್ತೆರ್.</verse>
			</chapter>
		</book>
		<book number="43">
			<chapter number="1">
				<verse number="1">ಆದಿಡ್ ವಾಕ್ಯ ಇತ್ತ್ಂಡ್, ಆ ವಾಕ್ಯ ದೇವೆರೆ ಕೈತಲ್ ಇತ್ತ್ಂಡ್, ಆ ವಾಕ್ಯ ದೇವೆರ್ ಆದಿತ್ತ್ಂಡ್.</verse>
				<verse number="2">ಆ ವಾಕ್ಯ ಪನ್ಪಿನಾಯೆ ಆದಿಡ್ ದೇವೆರೆ ಕೈತಲ್ ಇತ್ತೆ.</verse>
				<verse number="3">ಆಯಡ್ದ್ ಮಾತ ವಸ್ತುಲಾ ಉಂಡಾತ್ಂಡ್. ಉಂಡಾಯಿನ ವಸ್ತುಡು ಆಯೆದಾಂತೆ ಒಂಜಿಲಾ ಉಂಡಾಯಿಜಿ.</verse>
				<verse number="4">ಆಯಡ ಜೀವ ಇತ್ತ್ಂಡ್, ಆ ಜೀವ ನರಮಾನಿಲೆಗ್ ಬೊಲ್ಪು ಆದಿತ್ತ್ಂಡ್.</verse>
				<verse number="5">ಆ ಬೊಲ್ಪು ಕತ್ತಲೆಡ್ ಮಿಂಚೊಂದಿತ್ತ್‌ಂಡ್ ಕತ್ತಲೆ ಅವೆನ್ ದೆಂಗಾಯಿಜಿ.</verse>
				<verse number="6">ದೇವೆರ್ ಒರಿ ನರಮಾನಿನ್ ಕಡಪುಡಿಯೆ. ಆಯನ ಪುದರ್ ಯೋಹಾನೆ. ಆ ಯೋಹಾನೆ ಸಾಕ್ಷಿಗಾದ್ ಬತ್ತೆ, ಮಾತೆರ್ಲಾ ನಂಬೊಡು ಅಂದ್‌ದ್ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಬತ್ತೆ.</verse>
				<verse number="7"></verse>
				<verse number="8">ಆಯೆ ಆ ಬೊಲ್ಪು ಆದಿತ್ತಿಜೆ, ಆಂಡ ಆ ಬೊಲ್ಪುದ ಸಂಗತಿಡ್ ಸಾಕ್ಷಿ ಕೊರಿಯೆರೆಗಾದ್ ಬತ್ತೆ.</verse>
				<verse number="9">ನಿಜವಾಯಿನ ಬೊಲ್ಪು ಲೋಕೊಗು ಬರಿಯೆರೆ ಇತ್ತ್ಂಡ್. ಆ ಬೊಲ್ಪೇ ಪ್ರತಿ ಒರಿಯಗ್ ಬೊಲ್ಪು ಕೊರ್ಪಿನವು ಆದಿತ್ತ್ಂಡ್.</verse>
				<verse number="10">ಆಯೆ ಲೋಕೊಡಿತ್ತೆ. ಲೋಕ ಆಯಡ್ದೇ ಉಂಡಾಂಡ್, ಆಂಡಲಾ ಲೋಕ ಆಯನ್ ತೆರಿಯಿಜಿ.</verse>
				<verse number="11">ಆಯೆ ತನ ಸ್ವಂತದಾಕುಲೆ ಕೈತಲ್‌ ಬತ್ತೆ. ಆಂಡ ಆಯನ ಸ್ವಂತದಾಕುಲು ಆಯನ್ ಅಂಗೀಕಾರ ಮಲ್ತ್‌ಜೆರ್.</verse>
				<verse number="12">ಆಂಡ ಏರೇರ್ ಆಯನ್ ಅಂಗೀಕಾರ ಮಲ್ತೊಂಡೆರಾ, ಆಯನ ಪುದರ್‌ಡ್ ನಂಬಿಕೆ ದೀಯೆರಾ ಅಕ್ಲೆಗ್ ದೇವೆರೆ ಬಾಲೆಲಾಪಿ ಅಧಿಕಾರ ಕೊರಿಯೆ.</verse>
				<verse number="13">ಮೊಕುಲು ನೆತ್ತೆರ್‌ದ ಸಮ್ಮಂಧೊಡ್ದು ಆವಡ್, ಶರೀರ ಸಮ್ಮಂಧೊಡ್ದು ಆವಡ್, ನರಮಾನಿಲೆ ಸಂಕಲ್ಪೊಡ್ದು ಆವಡ್ ಪುಟ್ಟುದಿನಾಕುಲತ್ತ್ ಆಂಡ ದೇವೆರೆಡ್ದೇ ಪುಟ್ಟಿನಾಕುಲು.</verse>
				<verse number="14">ಆ ವಾಕ್ಯ ಪನ್ಪಿನಾಯೆ ನರಮಾನಿ ರೂಪೊಡು ನಮ ನಡುಟು ಬದ್‌ಕಿಯೆ. ನಮ ಆಯನ ಮೈಮೆನ್ ತೂಯ. ಆ ಮೈಮೆ ಅಮ್ಮೆರೆಡ್ದ್ ಬತ್ತಿತ್ತಿ ಒರಿಯೇ ಮಗಕ್ಕ್ ಉಪ್ಪೊಡಾಯಿ ಮೈಮೆ. ಆಯೆ ದಯೊಟ್ಲಾ ಸತ್ಯೊಡ್ಲಾ ದಿಂಜಿದಿನಾಯೆ ಆದಿತ್ತೆ.</verse>
				<verse number="15">ಯೋಹಾನೆ ಆಯ ಸಂಗತಿಡ್ ಸಾಕ್ಷಿ ಕೊರ್ಪೆ ಎಂಚಂದ್ಂಡ, “ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ದುಂಬುದಾಯೆ ಆಯೆ, ಪಂಡ್ದ್ ಯಾನ್ ಪಂಡಿನಾಯೆ ಇಂಬೆನೇ.” ಬೊಬ್ಬೆ ದೀದ್ ಪಂಡೆ.</verse>
				<verse number="16">ನಮ ಮಾತೆರ್ಲಾ ಆಯನ ದಿಂಜಿದಿ ದಯೊಟ್ಟು ದಯತ ಮಿತ್ತ್ ದಯ ಪಡೆವೊಂಡ.</verse>
				<verse number="17">ದೇವೆರ್ ನ್ಯಾಯಕಟ್ಟ್‌ನ್ ಮೋಶೆಡ್ದ್ ಕೊರಿಯೆ, ಆಂಡ ದಯಲಾ ಸತ್ಯಲಾ ಯೇಸು ಕ್ರಿಸ್ತಡ್ದ್ ತಿಕ್ಕ್ಂಡ್.</verse>
				<verse number="18">ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ಅಮ್ಮೆ ಮರ್ಗಿಲ್‌ಡುಪ್ಪು ಒರಿಯೇ ಮಗೆ ದೇವೆರೆನ ಗುರ್ತ ತೆರಿಪಾಯೆ.</verse>
				<verse number="19">ಯೋಹಾನೆ ಕೊರಿನ ಸಾಕ್ಷಿ ದಾನೆಂದ್ಂಡ, ಯೆಹೂದ್ಯೆರ್ ಯೆರೂಸಲೇಮುಡ್ದು ಯಾಜಕೆರೆನ್ಲಾ ಲೇವಿಯೆರೆನ್ಲಾ ಯೋಹಾನನ ಕೈತಲ್ ಕಡಪುಡ್ದು, “ಈ ಏರ್,” ಅಂದ್‌ದ್ ಕೇಂಡಿನೆಕ್ಕ್,</verse>
				<verse number="20">ಯೋಹಾನೆ ಮದೆಮಲ್ಪಂದೆ, “ಯಾನ್ ಕ್ರಿಸ್ತೆ ಅತ್ತ್,” ಅಂದ್‌ದ್ ಮಾತೆರೆ ಎದುರುಡ್ ಪಂಡೆ.</verse>
				<verse number="21">“ಅಂಚಾಂಡ ಈ ಏರ್?” ಈ ಎಲೀಯೆನಾ? ಅಂದ್‌ದ್ ಅಕುಲು ಕೇನ್ನಗ, ಅತ್ತ್ ಪಂಡೆ. “ಈ ಬರಿಯೆರೆ ಇತ್ತಿ ಆ ಪ್ರವಾದಿಯಾ?” ಅಂದ್‌ದ್ ಕೇಂಡಿನೆಕ್ಕ್ “ಯೋಹಾನೆ ಅತ್ತ್,” ಪಂಡೆ.</verse>
				<verse number="22">ಅಪಗ ಅಕುಲು, “ಈ ಏರ್? ಎಂಕ್ಲೆನ್ ಕಡಪುಡ್ದಿನಾಕುಲೆಗ್ ಎಂಕುಲು ಉತ್ತರ ಕೊರೊಡತ್ತಾ; ನಿನ ಸಂಗತಿಡ್ ಈ ಎಂಚಿನ ಪನ್ಪ?” ಅಂದ್‌ದ್ ಕೇನ್ನಗ ಆಯೆ,</verse>
				<verse number="23">“ಪ್ರವಾದಿ ಯೆಶಾಯೆ ಪಂಡಿಲೆಕ್ಕ, ‘ಕರ್ತವ ಸಾದಿನ್ ಸರ್ತ ಮಲ್ಪುಲೆ,’ ಅಂದ್‌ದ್ ಕಾಡ್‌ಡ್ ಬೊಬ್ಬೆ ಪಾಡುನಾಯ ಸ್ವರ ಉಂಡು ಪಂಡ್ದ್ ಕೇನ್ದರತ್ತ? ಆ ಸ್ವರನೇ ಯಾನಾದುಲ್ಲೆ.”</verse>
				<verse number="24">ಬತ್ತಿತ್ತಿನಾಕುಲು ಪರಿಸಾಯೆರೆ ಕಡೆತ್ತಾಕುಲಾದಿತ್ತ್‌ದ್,</verse>
				<verse number="25">“ಈ ಕ್ರಿಸ್ತೆ ಆವಡ್, ಎಲೀಯೆ ಆವಡ್, ಆ ಪ್ರವಾದಿ ಆವಡ್ ಅತ್ತ್‌ಡ ನೀರ್‌ದ ದೀಕ್ಷಾಸ್ನಾನ ಎಂಚ ಕೊರೊಂದುಲ್ಲ?” ಅಂದ್‌ದ್ ಆಯಡ ಕೇಂಡೆರ್.</verse>
				<verse number="26">ಯೋಹಾನೆ ಅಕ್ಲೆಗ್, “ಯಾನ್ ಜನೊಕುಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾಯೆ, ಆಂಡ ನಿಕ್ಲೆಗ್ ತೆರಿಯಂದಿ ಒರಿ ನಿಕ್ಲೆನ ನಡುಟು ಉಂತೊಂದೆ.</verse>
				<verse number="27">ಆಯೆನೇ ಎನ ಬೆರಿಯೆ ಬರ್ಪಿನಾಯೆ. ಆಯ ಕಾರ್‌ದ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ಯೋಗ್ಯದಾಯೆ ಅತ್ತ್,” ಪಂಡೆ.</verse>
				<verse number="28">ಉಂದು ಮಾತ ಯೊರ್ದಾನ್ ತುದೆತ ಆಯೆರೆಡುಪ್ಪು ಬೇಥಾನ್ಯೊಡು ನಡತ್ಂಡ್. ಅಲ್ಪ ಯೋಹಾನೆ ನೀರ್‌ಡ್ ದೀಕ್ಷಾಸ್ನಾನ ಕೊರೊಂದಿತ್ತೆ.</verse>
				<verse number="29">ಮನದಾನಿ ಯೋಹಾನೆ ಯೇಸು ತನ ಕೈತಲ್‌ ಬರ್ಪಿನೆನ್ ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತಿ ಕುರಿತ ಕಿನ್ನಿ, ಲೋಕದ ಪಾಪೊನು ತುಂಬೊಂದು ಪೋಪಿನಾಯೆ.</verse>
				<verse number="30">‘ಎನಡ್ದ್ ಬೊಕ್ಕ ಬರ್ಪಿನಾಯೆ, ಎನಡ್ದ್ ದುಂಬೇ ಇತ್ತಿನೆಡ್ದ್ ಎಂಕ್‌ ದುಂಬುದಾಯೆ ಆಯೆ,’ ಅಂದ್‌ದ್ ಯಾನ್ ನಿಕ್ಲೆಗ್ ಪನೊಂದಿತ್ತಿನವು ಇಂಬ್ಯನ ವಿಷಯೊಡೇ.”</verse>
				<verse number="31">ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ; ಆಂಡ ಆಯನ್ ಇಸ್ರಾಯೇಲ್ಯೆರೆಗ್ ತೆರಿಪಾವೆರೆಗಾದ್ ಯಾನ್ ನೀರ್‌ದ ದೀಕ್ಷಾಸ್ನಾನ ಕೊರಿಯೆರೆ ಬತ್ತೆ ಅಂದ್‌ದ್ ಪಂಡೆ.</verse>
				<verse number="32">ಉಂದತ್ತಂದೆ ಯೋಹಾನೆ ಸಾಕ್ಷಿ ಕೊರ್ದು ಪಂಡಿನಿ ದಾನೆಂದ್ಂಡ, “ದೇವೆರಾತ್ಮ ಪಾರಿವಾಳದ ರೂಪೊಡು ಬಾನೊಡ್ದು ತಿರ್ತ್ ಜಪ್ಪುನೆನ್ ತೂಯೆ. ಅವು ಆಯ ಮಿತ್ತ್ ನಿಲೆ ಆಂಡ್.</verse>
				<verse number="33">ಎಂಕ್‌ಲಾ ಆಯನ ಗುರ್ತ ಇತ್ತ್‌ಜಿ, ಆಂಡ ನೀರ್‌ದ ದೀಕ್ಷಾಸ್ನಾನ ಮಲ್ಪೆರೆಗಾದ್ ಎನನ್ ಕಡಪುಡ್ದಿನಾಯೆ, ‘ಏರೆ ಮಿತ್ತ್ ಆತ್ಮ ಬರ್ಪಿನೆನ್ ತೂಯನಾ ಆಯೆನೇ ಪರಿಶುದ್ಧಾತ್ಮಡ್ ದೀಕ್ಷಾಸ್ನಾನೊನು ಕೊರ್ಪಿನಾಯೆ,’ ಅಂದ್‌ದ್ ಎಂಕ್ ಪಂಡೆ.</verse>
				<verse number="34">ಯಾನ್ ಅವೆನ್ ತೂದು ಇಂಬೆನೇ ದೇವೆರೆ ಮಗೆ,” ಅಂದ್‌ದ್ ಸಾಕ್ಷಿ ಪಂಡೆ.</verse>
				<verse number="35">ಮನದಾನಿ ಕುಡ ಯೋಹಾನೆಲಾ ಆಯನ ಇರ್ವೆರ್ ಶಿಷ್ಯೆರೆಡೊಪ್ಪ ಉಂತೊಂದುಪ್ಪುನಗ</verse>
				<verse number="36">ಯೋಹಾನೆ ಅಲ್ಪ ತಿರ್ಗೊಂದಿತ್ತಿ ಯೇಸುನು ತೂದು, “ಇಂದಾ, ಬಲಿ ಅರ್ಪಣೆಗಾದ್ ದೇವೆರ್ ನೇಮಕ ಮಲ್ತ್‌ದಿನ ಕುರಿತ ಕಿನ್ನಿ!” ಅಂದ್‌ದ್ ಪಂಡೆ.</verse>
				<verse number="37">ಆ ಇರ್ವೆರ್ ಶಿಷ್ಯೆರ್ ಅವೆನ್ ಕೇಂಡ್ದ್ ಯೇಸುನ ಬೆರಿಯೆ ಪೋಯೆರ್.</verse>
				<verse number="38">ಯೇಸು ತಿರ್ಗ್‌ದ್ ಅಕುಲು ತನ ಬೆರಿಯೆ ಬರ್ಪಿನೆನ್ ತೂದು, “ನಿಕ್ಲೆಗ್ ದಾದ ಬೋಡು,” ಅಂದ್‌ದ್ ಕೇನ್ನಗ ಅಕುಲು, “ರಬ್ಬಿ” (ರಬ್ಬಿ ಪಂಡ್ಂಡ ಗುರು) “ಈ ಉಪ್ಪುನು ಒಲ್ಪ?” ಅಂದ್‌ದ್ ಕೇಂಡೆರ್.</verse>
				<verse number="39">ಐಕ್ ಯೇಸು, “ಬತ್ತ್‌ದ್ ತೂಲೆ,” ಅಂದ್‌ದ್ ಪನ್ನಗ ಅಕುಲು ಪೋದು ಆಯೆ ಉಪ್ಪು ಜಾಗ್‌ನ್ ತೂದು, ಆ ದಿನ ಆಯಡೊಪ್ಪ ಇತ್ತೆರ್. ಅಪಗ ಹೆಚ್ಚಿಕಡಿಮೆ ಬೈಯದ ನಾಲ್ ಗಂಟೆ ಆದಿತ್ತ್ಂಡ್.</verse>
				<verse number="40">ಯೋಹಾನನ ಪಾತೆರೊನು ಕೇಂಡ್ದ್ ಯೇಸು ಬೆರಿಯೆ ಪೋಯಿ ಆ ಇರ್ವೆರೆಡ್ ಒರಿ ಸೀಮೋನ ಪೇತ್ರನ ಮೆಗ್ಯೆ ಅಂದ್ರೆಯೆ.</verse>
				<verse number="41">ಇಂಬೆ ದುಂಬತ್ತ ತನ ಪಲಯೆ ಸೀಮೋನನ್ ತೂದು ಆಯಡ ಪಂಡಿನಿ ದಾನೆಂದ್ಂಡ, “ಮೆಸ್ಸೀಯೆ ಎಂಕ್ಲೆಗ್ ತಿಕ್ಕಿಯೆ.” (ಮೆಸ್ಸೀಯೆ ಪಂಡ್ಂಡ ಕ್ರಿಸ್ತೆ)</verse>
				<verse number="42">ಆಯನ್ ಯೇಸು ಕೈತಲ್‌ ಲೆತ್ತೊಂದು ಬತ್ತೆ. ಯೇಸು ಆಯನ್ ತೂದು, “ಈ ಯೋಹಾನನ ಮಗೆ ಸೀಮೋನೆ ನನ ಮಿತ್ತ್ ಈ ಕೇಫ ಅಂದ್‌ದ್ ಲೆಪ್ಪಾವೊನುವ.” (ಕೇಫ ಪಂಡ್ಂಡ ಪೇತ್ರೆ).</verse>
				<verse number="43">ಮನದಾನಿ ಯೇಸು ಗಲಿಲಾಯೊಗು ಪೋವೊಡಂದ್‌ದ್ ಉಪ್ಪುನಗ ಫಿಲಿಪ್ಪುನ್ ತೂದು ಆಯಡ, “ಎನ ಬೆರಿಯೆ ಬಲ.” ಪಂಡೆ</verse>
				<verse number="44">ಫಿಲಿಪ್ಪೆ ಬೆತ್ಸಾಯಿದಾಯೆ ಅಂದ್ರೆಯೆಲಾ ಪೇತ್ರೆಲಾ ಅವ್ವೇ ಊರುದಾಕುಲು.</verse>
				<verse number="45">ಫಿಲಿಪ್ಪೆ ನತಾನಿಯೇಲನ್ ತೂದು ಆಯಡ, “ಏರೆ ವಿಷಯೊಡು ಮೋಶೆ ನ್ಯಾಯಕಟ್ಟ್‌ಲೆ ಬೊಕ್ಕ ಪ್ರವಾದಿಲು ಬರೆತೆರಾ, ಆಯೆ ಎಂಕ್ಲೆಗ್ ತಿಕ್ಕಿಯೆ. ಆಯೆ ಏರಂದ್ಂಡ ಯೋಸೇಫು ಮಗೆ ಆಯಿ ನಜರೇತ್‌ದ ಯೇಸು.” ಅಂದ್‌ದ್ ಪಂಡೆ.</verse>
				<verse number="46">ಅಪಗ ನತಾನಿಯೇಲೆ, “ಎಡ್ಡೆಂತಿನವು ದಾಲಾಂಡಲಾ ನಜರೇತ್‌ಡ್ದ್ ಬರಿಯೆರೆ ಉಂಡಾ?” ಪನ್ನಗ ಫಿಲಿಪ್ಪು “ಬತ್ತ್‌ದ್ ತೂಲ.” ಅಂದ್‌ದ್ ಪಂಡೆ.</verse>
				<verse number="47">ಯೇಸು ತನ ಕೈತಲ್‌ ಬರ್ಪಿ ನತಾನಿಯೇಲನ್ ತೂದು ಆಯ ಸಂಗತಿಡ್, “ಇಂದಾ, ಆಯೆ ನಿಜ ಇಸ್ರಾಯೇಲ್ಯೆ, ಆಯಡ ಕಪಟ ಇಜ್ಜಿ!” ಪಂಡೆ.</verse>
				<verse number="48">ನತಾನಿಯೇಲೆ, “ಎನ ಗುರ್ತ ನಿಕ್ಕ್ ಎಂಚ?” ಅಂದ್‌ದ್ ಯೇಸುಡ ಕೇಂಡಿನೆಕ್ಕ್ ಆಯೆ, “ಫಿಲಿಪ್ಪೆ ನಿನನ್ ಲೆಪ್ಪುನೆಡ್ದ್ ದುಂಬು, ಈ ಅಂಜೂರದ ಮರತ ಅಡಿಟ್ಟ್ ಉಪ್ಪುನಗ ಯಾನ್ ತೂಯೆ.” ಪಂಡೆ.</verse>
				<verse number="49">ಐಕ್ ನತಾನಿಯೇಲೆ, “ಓ ಗುರೂ, ಈ ದೇವೆರೆ ಮಗೆ, ಈಯೇ ಇಸ್ರಾಯೇಲ್ಯೆರೆ ಅರಸು!” ಪಂಡೆ.</verse>
				<verse number="50">ಐಕ್ ಯೇಸು, “ಆ ಅಂಜೂರದ ಮರತ ಅಡಿಟ್ಟ್ ಯಾನ್ ನಿನನ್ ತೂಯೆ ಅಂದ್‌ದ್ ನಿನಡ ಪಂಡಿನೆಡ್ದ್ ಈ ನಂಬುವನಾ? ಉಂದೆಡ್ದ್ ಮಲ್ಲ ಕಾರ್ಯೊಲೆನ್ ತೂವ.” ಪಂಡೆ.</verse>
				<verse number="51">ಉಂದತ್ತಂದೆ ಕುಡ ಆಯಡ, “ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಪರಲೋಕ ಜತ್ತ್‌ದುಪ್ಪುನೆನ್ಲಾ ನರಮಾನಿ ಮಗ ಮಿತ್ತ್ ದೇವೆರೆ ದೂತೆರ್ ಏರ್ದ್ ಪೋಪಿನೆನ್ಲಾ ಜತ್ತ್‌ದ್ ಬರ್ಪಿನೆನ್ಲಾ ತೂವರ್.” ಅಂದ್‌ದ್ ಪಂಡೆ.</verse>
			</chapter>
			<chapter number="2">
				<verse number="1">ಮೂಜನೇ ದಿನೊಟು ಗಲಿಲಾಯದ ಕಾನಾ ಪನ್ಪಿ ಊರುಡು ಒಂಜಿ ಮದ್ಮೆ ನಡತ್ಂಡ್, ಯೇಸುನ ಅಪ್ಪೆಲಾ ಅಲ್ಪ ಇತ್ತಲ್;</verse>
				<verse number="2">ಯೇಸುನ್ಲಾ ಆಯನ ಶಿಷ್ಯೆರೆನ್ಲಾ ಮದ್ಮೆಗ್ ಲೆತ್ತ್‌ದಿತ್ತೆರ್.</verse>
				<verse number="3">ದ್ರಾಕ್ಷೆದರಸ ಕಡಿಮೆ ಆಯಿನೆಡ್ದ್ ಯೇಸುನ ಅಪ್ಪೆ ಆಯಡ, “ಅಕ್ಲೆಡ ದ್ರಾಕ್ಷೆದರಸ ಇಜ್ಜಿ.” ಪಂಡಲ್‌.</verse>
				<verse number="4">ಅಪಗ ಯೇಸು ಆಲೆಗ್, “ಅಮ್ಮಾ ಉಂದೆನ್ ಎನಡ ದಾಯೆಗ್ ಪನ್ಪ? ಎನ ಗಳಿಗೆ ನನಲಾ ಬೈದ್‌ಜಿ.” ಅಂದ್‌ದ್ ಪನ್ನಗ,</verse>
				<verse number="5">ಆಯನ ಅಪ್ಪೆ ಬೇಲೆದಾಕುಲೆಡ, “ಆಯೆ ದಾದ ಪನ್ಪೆನಾ ಅಂಚ ಮಲ್ಪುಲೆ.” ಪಂಡಲ್.</verse>
				<verse number="6">ಯೆಹೂದ್ಯೆರ್‌ನಾಕುಲೆನ ಶುದ್ಧಾಚಾರದ ಕ್ರಮತ್ತ ಪ್ರಕಾರ ಅಲ್ಪ ರಡ್ದ್, ಮೂಜಿ ಮರಾಯಿ ನೀರ್ ಪತ್ತುನಾತ್ ಆಜಿ ಕಲ್ಲ್‌ದ ಬೀಯಮ್‌ಲೆನ್ ದೀದಿತ್ತ್‌ಂಡ್.</verse>
				<verse number="7">ಯೇಸು ಬೇಲೆದಾಕುಲೆಡ, “ಆ ಬೀಯಮ್‌ಗ್ ನೀರ್ ದಿಂಜಾಲೆ.” ಅಂದ್‌ದ್ ಪನ್ನಗ ಅಕುಲು ಐಕ್ ನಿಲಿಕೆ ನೀರ್ ದಿಂಜಾಯೆರ್.</verse>
				<verse number="8">ಅಪಗ ಯೇಸು ಬೇಲೆದಾಕುಲೆಡ, “ಇತ್ತೆ ಅವೆನ್ ತೋಡ್ದು ಗುರ್ಕಾರಗ್ ಕೊರ್ಲೆ.” ಅಂದ್‌ದ್ ಪನ್ನಗ ದೆತ್ತೊಂದು ಪೋದು ಕೊರಿಯೆರ್.</verse>
				<verse number="9">ಅವು ಒಲ್ತುಡ್ದು ಬತ್ತ್ಂಡ್ ಇನ್ಪಿನವು ನೀರ್‌ನ್ ತೋಡ್ದಿನ ಬೇಲೆದಾಕುಲೆಗ್ ತೆರಿದಿತ್ತ್‌ಂಡ್ ಅತ್ತಂದೆ ಗುರ್ಕಾರಗ್ ತೆರಿಯಂದಿನೆಡ್ದ್ ಆಯೆ ಆ ದ್ರಾಕ್ಷಾರಸತ್ತ ರುಚಿ ತೂದು,</verse>
				<verse number="10">ಮದ್ಮಯನ್ ಲೆತ್ತ್‌ದ್, “ಮಾತೆರ್ಲಾ ದುಂಬತ್ತ ಎಡ್ಡೆ ದ್ರಾಕ್ಷಾರಸೊನು ಕೊರ್ದು ಅಮಲ್ ಆಯಿ ಬೊಕ್ಕ ಸುಮಾರ್ದೆನ್ ಕೊರ್ಪೆರ್; ಆಂಡ ಈ ಎಡ್ಡೆ ದ್ರಾಕ್ಷಾರಸೊನು ಈತ್‌ನೆಂಗೆ ದೀವೊಂದ.” ಪಂಡೆ</verse>
				<verse number="11">ಯೇಸು ಸುರುಟ್ಟು ಮಲ್ತಿ ಈ ಕಾರ್ನಿಕೊಲೆಡ್ದ್ ಗಲಿಲಾಯದ ಕಾನಾ ಪನ್ಪಿ ಊರುಡು ತನ ಮೈಮೆನ್ ತೋಜಾಯೆ. ಬೊಕ್ಕ ಶಿಷ್ಯೆರ್‌ನಾಕುಲು ಆಯನ ಮಿತ್ತ್ ನಂಬಿಕೆ ದೀಯೆರ್.</verse>
				<verse number="12">ಉಂದು ನಡತಿ ಬೊಕ್ಕ ಆಯೆಲಾ ಆಯ ಅಪ್ಪೆಲಾ ಮೆಗ್ಯಾಡ್ಲುಲಾ ಶಿಷ್ಯೆರ್‌ಲಾ ಕಪೆರ್ನೌಮುಗು ಪೋದು ಅಲ್ಪ ಒಂತೆ ದಿನ ಇತ್ತೆರ್.</verse>
				<verse number="13">ಯೆಹೂದ್ಯೆರೆನ ಪಸ್ಕ ಪರ್ಬ ಕೈತಲ್‌ ಬತ್ತ್‌ತ್ತಿನೆಡ್ದ್ ಯೇಸು ಯೆರೂಸಲೇಮುಗು ಪೋಯೆ.</verse>
				<verse number="14">ಅಲ್ಪ ದೇವಾಲಯೊಡು ಕೈಕಂಜಿಲು, ಕುರಿ, ಪಾರಿವಾಳ ಮಾರುನಾಕುಲೆನ್ಲಾ ಕಾಸ್ ಬದಲಿ ಮಲ್ಪುನಾಕುಲೆನ್ಲಾ ತೂದು</verse>
				<verse number="15">ಆಯೆ ಒಂಜಿ ಬಲ್ಲ್‌ಡ್ದ್ ಚಾಟಿ ಮಲ್ತ್‌ದ್ ಐಡ್ದ್ ಕುರಿ, ಕೈಕಂಜಿಲೆನ್, ಮಾತೆನ್ ದೇವಾಲಯೊಡ್ದು ಪಿದಯಿ ಗಿಡ್ತ್‌ದ್, ಕಾಸ್‌ದ ಬ್ಯಾರ ಮಲ್ಪುನಾಕುಲೆನ ಕಾಸ್ ಚಲ್ಲಾಪಿಲ್ಲಿ ಮಲ್ತ್‌ದ್ ಮೇಜಿಲೆನ್ ಮರತ್ ಪಾಡಿಯೆ.</verse>
				<verse number="16">ಪಾರಿವಾಳ ಮಾರುನಾಕುಲೆಗ್, “ಉಂದೆಕ್ಲೆನ್ ಮುಲ್ತುಡ್ದು ದೆತ್ತೊಂದು ಪೋಲೆ ಎನ ಅಮ್ಮೆರೆನ ಇಲ್ಲನ್ ಸಂತೆ ಮಲ್ಪೊಡ್ಚಿ,” ಅಂದ್‌ದ್ ಪಂಡೆ.</verse>
				<verse number="17">ಅಪಗ “ಎನ ಇಲ್ಲದ ಮಿತ್ತುಪ್ಪು ಅಭಿಮಾನ ಎನ ಉಲಯಿ ತೂತ ಲೆಕ್ಕ ಪೊತ್ತೊಂದುಂಡು.” ಅಂದ್‌ದ್ ಬರೆತಿ ಪಾತೆರ ಶಿಷ್ಯೆರೆನ ನೆನೆಪುಗು ಬತ್ತ್ಂಡ್.</verse>
				<verse number="18">ಯೆಹೂದ್ಯೆರ್ ಆಯಡ, “ಉಂದೆನ್ ಮಾತ ಮಲ್ಪೆರೆ ನಿಕ್ಕ್ ಅಧಿಕಾರ ಉಂಡು ಪನ್ಪಿನೆನ್ ತೋಜಾದ್ ಕೊರ್ಪಿನಂಚಿನ ವಾ ಕಾರ್ನಿಕೊಲೆನ್ ಮಲ್ತ್‌ದ್ ತೋಜಾವ,” ಅಂದ್‌ದ್ ಕೇನ್ನಗ</verse>
				<verse number="19">ಯೇಸು, “ಈ ದೇವಾಲಯನ್ ಗಿರ್ಪುಲೆ, ಯಾನ್ ಮೂಜಿ ದಿನೊಟು ಅವೆನ್ ಲಕ್ಕಾವೆ,” ಅಂದ್‌ದ್ ಪಂಡೆ.</verse>
				<verse number="20">ಐಕ್ ಯೆಹೂದ್ಯೆರ್, “ಈ ದೇವಾಲಯನ್ ಕಟ್ಟಿಯೆರೆ ನಲ್ಪತ್ತಾಜಿ ವರ್ಸ ತಾಗ್‌ದ್‌ಂಡ್, ಈ ಅವೆನ್ ಗಿರ್ತ್‌ದ್ ಮೂಜಿ ದಿನೊಟು ಲಕ್ಕಾವನಾ?” ಅಂದ್‌ದ್ ಕೇಂಡೆರ್.</verse>
				<verse number="21">ಆಂಡ ಆಯೆ ತನ ಶರೀರ ಇನ್ಪಿ ದೇವಾಲಯದ ವಿಷಯೊಡು ಈ ಪಾತೆರೊನು ಪಂಡ್ದಿತ್ತೆ.</verse>
				<verse number="22">ಐಡ್ದಾವರ ಆಯೆ ಸೈತಿನಾಕುಲೆಡ್ದ್ ಲಕ್ಕಿ ಬೊಕ್ಕ ಈ ಪಾತೆರ ಆಯ ಶಿಷ್ಯೆರೆ ಗೇನೊಗು ಬತ್ತ್‌ದ್ ಶಾಸ್ತ್ರೊಡು ಬರೆತಿನೆನ್ಲಾ ಯೇಸುನ ಪಾತೆರೊಲೆನ್ಲಾ ಅಕುಲು ನಂಬಿಯೆರ್.</verse>
				<verse number="23">ಆಯೆ ಪಸ್ಕ ಪರ್ಬೊಡು ಯೆರೂಸಲೇಮುಡು ಉಪ್ಪುನಗ ಮಸ್ತ್ ಜನೊಕುಲು ಆಯೆ ಮಲ್ತ್‌ದಿನ ಕಾರ್ನಿಕೊಲೆನ್ ತೂದು ಆಯನ ಪುದರ್‌ದ ಮಿತ್ತ್ ನಂಬಿಕೆ ದೀಯೆರ್.</verse>
				<verse number="24">ಆಂಡ ಯೇಸು ಮಾತೆರೆನ್ಲಾ ತೆರಿದಿತ್ತಿನಾಯೆ ಆಯಿನೆಡ್ದಾವರ ಅಕ್ಲೆಗ್ ವಶ ಆಯಿಜೆ.</verse>
				<verse number="25">ಆಯೆ ಮಾತ ನರಮಾನಿಲೆ ಉಡಲ್‌ನ್ ತೆರಿದುಪ್ಪುನೆಡ್ದ್ ಏರ್ಲಾ ವಾ ನರಮಾನಿಲೆ ವಿಷಯೊಡ್ಲಾ ಆಯಗ್ ಸಾಕ್ಷಿ ಪನ್ಪಿ ಅಗತ್ಯ ಇತ್ತ್‌ಜಿ.</verse>
			</chapter>
			<chapter number="3">
				<verse number="1">ಪರಿಸಾಯೆರೆಡ್ ಯೆಹೂದ್ಯೆರೆ ಹಿರಿಸಭೆತ ಒರಿ ಅಧಿಕಾರಿ ನಿಕೋದೇಮು ಪನ್ಪಿನಾಯೆ ಇತ್ತೆ.</verse>
				<verse number="2">ಆಯೆ ರಾತ್ರೆಡ್ ಯೇಸುನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಈ ದೇವೆರೆ ಕಡೆಡ್ದ್ ಬೈದಿನ ಬೋಧಕೆ ಅಂದ್‌ದ್ ತೆರಿದುಲ್ಲ. ಈ ಮಲ್ತ್‌ದ್ ತೋಜಾವುನ ಕಾರ್ನಿಕೆದ ಕಾರ್ಯೊಲೆನ್ ದೇವೆರೆ ಸಹಾಯದಾಂತೆ ಏರೆಡ್ದ್‌ಲಾ ಮಲ್ಪೆರೆ ಆವಂದ್.” ಅಂದ್‌ದ್ ಪಂಡೆ.</verse>
				<verse number="3">ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ಪೊಸತ್ತಾದ್ ಪುಟ್ಟುಜೆಡ ಆಯೆ ದೇವೆರೆ ರಾಜ್ಯೊನು ತೂಪಿನೆ ಇಜ್ಜಿ.” ಅಂದ್‌ದ್ ಪಂಡೆ.</verse>
				<verse number="4">ನಿಕೋದೇಮು ಆಯಡ, “ನರಮಾನಿ ಪರಬೆ ಆಯಿ ಬೊಕ್ಕ ಪೊಸತ್ತಾದ್ ಪುಟ್ಟುನವು ಎಂಚ? ಆಯೆ ತನ ಅಪ್ಪೆ ಬಂಜಿಡ್ ಸೇರ್ದ್ ಕುಡೊರ ಪುಟ್ಯರೆ ಸಾದ್ಯನಾ?” ಅಂದ್‌ದ್ ಕೇಂಡೆ.</verse>
				<verse number="5">ಐಕ್ ಯೇಸು, “ಯಾನ್ ನಿಕ್ಕ್ ನಿಜಾದ್ ಪನ್ಪೆ, ಒರಿ ನೀರ್‌ಡ್ದ್‌ಲಾ ಆತ್ಮೊಡ್ದುಲಾ ಪುಟ್ಟುಜೆಡ ದೇವೆರೆ ರಾಜ್ಯೊಗು ಸೇರಯೆ.</verse>
				<verse number="6">ಶರೀರೊಡ್ದು ಪುಟ್ಟಿನವು ಶರೀರನೇ, ಆತ್ಮೊಡ್ದು ಪುಟ್ಟಿನವು ಆತ್ಮನೇ.</verse>
				<verse number="7">‘ನಿಕುಲು ಪೊಸತ್ತಾದ್ ಕುಡ ಪುಟ್ಟೊಡು,’ ಅಂದ್‌ದ್ ಯಾನ್ ನಿಕ್ಕ್ ಪಂಡಿನೆಡ್ದ್ ಅಚ್ಚಿರ ಪಡೆವೊಡ್ಚಿ.</verse>
				<verse number="8">ಗಾಳಿ ಮನಸ್ ಬತ್ತಿನಡೆ ಬೀಜುಂಡು, ಈ ಐತ ಶಬ್ಧೊನು ಕೇನ್ವ. ಆಂಡ ಅವು ಒಲ್ತು ಬರ್ಪುಂಡು ಒಡೆಗ್ ಪೋಪುಂಡು ನಿಕ್ಕ್ ತೆರಿಯಂದ್; ಅಂಚೆನೇ ಆತ್ಮಡ್ದ್ ಪುಟ್ಟಿನಾಯೆ ಐತ ಲೆಕ್ಕನೇ,” ಅಂದ್‌ದ್ ಪಂಡೆ.</verse>
				<verse number="9">ಐಕ್ ನಿಕೋದೇಮು, “ಉಂದು ಆಪಿನಿ ಎಂಚ?” ಅಂದ್‌ದ್ ಕೇನ್ನಗ,</verse>
				<verse number="10">ಯೇಸು ಆಯಗ್ ಪಂಡಿನಿ ದಾನೆಂದ್ಂಡ, “ಈ ಇಸ್ರಾಯೇಲ್ಯೆರೆ ಬೋಧಕೆ ಆದ್‌ಲಾ ನಿಕ್ಕ್ ಉಂದು ತೆರಿದಿಜಾ?</verse>
				<verse number="11">ಯಾನ್ ನಿಕ್ಕ್ ಸತ್ಯಾದ್ ಪನ್ಪೆ, ಎಂಕುಲು ತೆರಿದಿನೆನ್ ಪಾತೆರ್‌ವ. ತೂಯಿನೆಕ್ಕ್ ಸಾಕ್ಷಿ ಕೊರ್ಪ, ನಿಕುಲು ಎಂಕ್ಲೆನ ಸಾಕ್ಷಿನ್ ನಂಬುಜರ್.</verse>
				<verse number="12">ಯಾನ್ ಭೂಲೋಕೊಡು ನಡಪು ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪನ್ನಗ ನಿಕುಲು ನಂಬಂದೆ ಪೋಂಡ ಪರಲೋಕದ ಕಾರ್ಯೊಲೆ ಬಗೆಟ್ ನಿಕ್ಲೆಗ್ ಪಂಡ್ಂಡ ಎಂಚ ನಂಬರ್?</verse>
				<verse number="13">ಪರಲೋಕೊಡ್ದು ಜತ್ತ್‌ದ್ ಬತ್ತಿನಾಯೆನೇ ಅಂದ್ಂಡ ನರಮಾನಿ ಮಗೆನೇ ಅತ್ತಂದೆ ಬೇತೆ ಏರ್ಲಾ ಪರಲೋಕೊಗು ಪೋತಿನಾಯೆ ಇಜ್ಜೆ.”</verse>
				<verse number="14">“ಉಂದತ್ತಂದೆ ಜನೊಕುಲು ತೂದು ಬದ್‌ಕ್‌ದ್ ಒರಿಯೊಡು ಅಂದ್‌ದ್ ಕಾಡ್‌ಡ್ ಪ್ರವಾದಿ ಆಯಿ ಮೋಶೆ ಸರ್ಪೊನು ಎತ್ತರೊಡು ದೀತಿ ಲೆಕ್ಕನೇ.</verse>
				<verse number="15">ನರಮಾನಿ ಮಗನ್ಲಾ ನಂಬುನಾಕುಲೆಗ್ ಮಾತೆರೆಗ್ಲಾ ನಿತ್ಯಜೀವ ಪಡೆವೊಡು ಅಂದ್‌ದ್ ಎತ್ತರೊಡು ದೀಪಾವೊಡು.</verse>
				<verse number="16">ದೇವೆರ್ ಲೋಕದ ಮಿತ್ತ್ ಏತೋ ಪ್ರೀತಿ ದೀದ್ ತನ ಒರಿಯೇ ಮಗನ್ ಕೊರಿಯೆ, ಆಯನ್ ನಂಬುನ ಒರಿಲಾ ನಾಶ ಆವಂದೆ ಮಾತೆರ್ಲಾ ನಿತ್ಯಜೀವೊನು ಪಡೆಯೊಡು ಅಂದ್‌ದ್ ಆಯನ್ ಕೊರಿಯೆ.</verse>
				<verse number="17">ದೇವೆರ್ ತನ ಮಗನ್ ಲೋಕೊಗು ಕಡಪುಡ್ದಿನವು ಲೋಕೊನು ತೀರ್ಪು ಮಲ್ಪೆರೆ ಅತ್ತ್, ಆಂಡ ಮಗಡ್ದ್ ಲೋಕೊನು ರಕ್ಷಣೆ ಮಲ್ಪೆರೆ ಕಡಪುಡಿಯೆ.</verse>
				<verse number="18">“ಆಯನ್ ನಂಬುನಾಯಗ್ ನ್ಯಾಯತೀರ್ಪು ಆಪುಜಿ. ಆಂಡ ನಂಬಂದಿನಾಯಗ್ ದೇವೆರೆ ಒರಿಯೇ ಮಗನ ಪುದರ್‌ನ್ ನಂಬಂದಿನೆಡ್ದ್ ಅಪಗನೇ ನ್ಯಾಯತೀರ್ಪು ಆದ್ ಪೋಂಡು.</verse>
				<verse number="19">ಆ ನ್ಯಾಯತೀರ್ಪು ದಾನೆಂದ್ಂಡ, ಬೊಲ್ಪು ಲೋಕೊಗು ಬತ್ತಿತ್ತ್‌ಂಡಲಾ ನರಮಾನಿಲೆ ಬೇಲೆಲು ಹಾಳ್ ಆದುಪ್ಪುನೆಡ್ದ್ ಅಕುಲು ಬೊಲ್ಪುಡ್ದು ಹೆಚ್ಚಿಗೆ ಕತ್ತಲೆನೇ ಪ್ರೀತಿ ಮಲ್ತೆರ್.</verse>
				<verse number="20">ಹಾಳ್ ಬೇಲೆ ಮಲ್ಪುನಾಕುಲು ಬೊಲ್ಪುನು ಪಗೆ ಮಲ್ಪುವೆರ್, ಅಕುಲು ಬೊಲ್ಪುಗು ಬರ್ಪುಜೆರ್ ದಾಯೆಗಂದ್ಂಡ ಅಕ್ಲೆನ ಹಾಳ್ ಕೆಲಸೊಲೆನ್ ಬೊಲ್ಪು ತೋಜಾದ್ ಕೊರ್ಪುಂಡು.</verse>
				<verse number="21">ಆಂಡ ಸತ್ಯದ ಬೆರಿಯೆ ಪೋಪಿನಾಯೆ ತಾನ್ ದೇವೆರೆಡ್ದ್ ನಡಪಾವೊಂದು ತನ ಕಾರ್ಯೊಲೆನ್ ಮಲ್ತೆ ಪಂಡ್ದ್ ತೋಜಿದ್ ಬರ್ಪಿಲೆಕ್ಕ ಬೊಲ್ಪುಗು ಬರ್ಪೆ.”</verse>
				<verse number="22">ಐಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆ ಒಟ್ಟುಗು ಯೂದಾಯ ಸೀಮೆಗ್ ಪೋದು ಅಲ್ಪ ಅಕ್ಲೆಡೊಪ್ಪ ಇತ್ತ್‌ದ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ.</verse>
				<verse number="23">ಯೋಹಾನೆಲಾ ಸಲಿಮೂರುದ ಕೈತಲುಪ್ಪು ಐನೊನು ಪನ್ಪಿ ಜಾಗ್‌ಡಿತ್ತ್‌ದ್ ದೀಕ್ಷಾಸ್ನಾನ ಮಲ್ಪಾವೊಂದಿತ್ತೆ. ಅಲ್ಪ ದಿಂಜ ನೀರಿತ್ತ್‌ಂಡ್, ಜನೊಕುಲು ಬತ್ತ್‌ದ್ ದೀಕ್ಷಾಸ್ನಾನ ದೆತ್ತೊನೊಂದಿತ್ತೆರ್.</verse>
				<verse number="24">ಉಂದು ಆಯಿನಿ ಯೋಹಾನನ್ ಸೆರೆಮನೆಕ್ ಪಾಡುನೆಡ್ದ್ ದುಂಬು.</verse>
				<verse number="25">ಇಂಚ ಉಪ್ಪುನಗ ಯೋಹಾನನ ಶಿಷ್ಯೆರೆಡ್ ಕೆಲೆವೆರೆಗ್ ಯೆಹೂದ್ಯೆರೆಡೊಪ್ಪ ಶುದ್ಧಾಚಾರದ ಸಂಗತಿಡ್ ಚರ್ಚೆ ನಡತ್ಂಡ್.</verse>
				<verse number="26">ಅಪಗ ಅಕುಲು ಯೋಹಾನನ ಕೈತಲ್‌ ಬತ್ತ್‌ದ್ ಆಯಡ, “ಗುರುಕುಲೇ, ಯೊರ್ದಾನ್ ತುದೆತ ಆಯೆರೆಡ್ ನಿನಡೊಪ್ಪ ಇತ್ತಿನಾಯನ ಸಂಗತಿಡ್ ಈ ಸಾಕ್ಷಿ ಕೊರಿಯತ್ತಾ, ಆಯೆಲಾ ನೀರ್‌ದ ದೀಕ್ಷಾಸ್ನಾನ ಕೊರ್ಪೆ ಆಯನ ಕೈತಲ್‌ ಮಾತೆರ್ಲಾ ಪೋವೊಂದುಲ್ಲೆರ್!” ಅಂದ್‌ದ್ ಪನ್ನಗ</verse>
				<verse number="27">ಯೋಹಾನೆ, “ದೇವೆರ್ ಪರಲೋಕೊಡ್ದು ದಯ ಮಲ್ತ್ ಕೊರ್ಪಿನವು ಅತ್ತಂದೆ ನರಮಾನಿಗ್ ಹೆಚ್ಚಿಗೆದವು ದಾಲಾ ತಿಕ್ಕಂದ್.</verse>
				<verse number="28">‘ಯಾನ್ ಕ್ರಿಸ್ತೆ ಅತ್ತ್. ಆಯನ ದುಂಬುಡ್ದು ಕಡಪುಡ್ದಿನಾಯೆ ಆದುಲ್ಲೆ,’ ಅಂದ್‌ದ್ ಯಾನ್ ಪಂಡಿನೆಕ್ಕ್ ನಿಕುಲೇ ಸಾಕ್ಷಿ.</verse>
				<verse number="29">ಮದ್ಮಲ್ ಉಪ್ಪುನಾಯೆನೇ ಮದ್ಮಯೆ. ಆಂಡಲಾ ಮದ್ಮಯನ ಸ್ನೇಹಿತೆ ಆಯ ಕೈತಲ್‌ ಉಂತೊಂದು ಆಯನ ಪಾತೆರೊಲೆನ್ ಕೇಂಡ್ದ್ ಮದ್ಮಯನ ಸ್ವರೊಕ್ಕು ಸಂತೋಷ ಪಡೆಪೆ ಅತ್ತಾ. ನೆತ್ತ ಲೆಕ್ಕನೆ ಎಂಕುಪ್ಪು ಸಂತೋಷ ಪೂರ್ತಿ ಆಂಡ್.</verse>
				<verse number="30">ಆಯೆ ಹೆಚ್ಚಾವೊಡು, ಯಾನ್ ತಗ್ಗೊಡು,” ಅಂದ್‌ದ್ ಪಂಡೆ.</verse>
				<verse number="31">“ಮಿತ್ತ್‌ಡ್ದ್ ಬರ್ಪಿನಾಯೆ ಮಾತೆರೆ ಮಿತ್ತ್ ಉಲ್ಲೆ, ಭೂಲೋಕೊಡು ಪುಟ್ಟಿನಾಯೆ ಭೂಲೋಕದಾಯೆ ಆದಿತ್ತ್‌ದ್ ಭೂಲೋಕದ ಪಾತೆರೊಲೆನ್ ಪಾತೆರ್‌ವೆ, ಪರಲೋಕೊಡ್ದು ಬರ್ಪಿನಾಯೆ ಮಾತೆರೆಡ್ದ್ ಮಿತ್ತ್‌ದಾಯೆ.</verse>
				<verse number="32">ತಾನ್ ತೂದು ಕೇಂಡಿನೆಕ್ಕ್ ಸಾಕ್ಷಿ ಕೊರ್ಪೆ. ಆಂಡ ಆಯನ ಸಾಕ್ಷಿನ್ ಏರ್ಲಾ ನಂಬಿಜೆರ್.</verse>
				<verse number="33">ಆಯ ಸಾಕ್ಷಿನ್ ನಂಬಿನಾಯೆ ದೇವೆರ್ ಸತ್ಯವಂತೆ ಪನ್ಪಿ ಪಾತೆರೊನು ಮುದ್ರೆ ಒತ್ತುದಿನಾಯೆ ಆದುಲ್ಲೆ.</verse>
				<verse number="34">ಎಂಚಂದ್ಂಡ ದೇವೆರ್ ಏರೆನ್ ಕಡಪುಡುದೆನಾ ಆಯಗ್ ಧಾರಾಳಾದ್ ಆತ್ಮೊನು ಕೊರ್ತಿನೆಡ್ದ್ ಆಯೆ ದೇವೆರೆ ಪಾತೆರೊಲೆನೇ ಪಾತೆರ್‌ವೆ.</verse>
				<verse number="35">ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಪ್ರೀತಿ ಮಲ್ತ್‌ದ್ ಮಾತೆನ್ ಆಯ ಕೈಟ್ ಕೊರ್ತೆ.</verse>
				<verse number="36">ಆಯನ ಮಗನ್ ನಂಬುನಾಯಗ್ ನಿತ್ಯಜೀವ ಉಂಡು ಆಯನ್ ನಂಬಂದಿನಾಯೆ ನಿತ್ಯಜೀವೊನು ತೂಪಿನೆ ಇಜ್ಜಿ. ದೇವೆರೆ ಕೋಪ ಆಯನ ಮಿತ್ತ್ ನಿಲೆ ಆದುಂಡು.”</verse>
			</chapter>
			<chapter number="4">
				<verse number="1">ಯೇಸು ಯೋಹಾನಡ್ದ್ ಹೆಚ್ಚ್ ಶಿಷ್ಯೆರೆನ್ ಮಲ್ತೊಂದು ಅಕ್ಲೆಗ್ ದೀಕ್ಷಾಸ್ನಾನ ಮಲ್ಪಾವೊಂದುಲ್ಲೆ ಪನ್ಪಿ ಸುದ್ಧಿನ್ ಪರಿಸಾಯೆರ್ ಕೇಂಡ್ದೆರ್ ಅಂದ್‌ದ್ ಕರ್ತವಗ್ ತೆರಿನಗ</verse>
				<verse number="2">ಆಯೆ ಯೂದಾಯೊನು ಬುಡ್ದು ಗಲಿಲಾಯೊಗು ಕುಡ ಪೋಯೆ. ಆಂಡಲಾ ಅಲ್ಪ ದೀಕ್ಷಾಸ್ನಾನ ಮಲ್ತೊಂದಿತ್ತಿನಿ ಯೇಸು ಅತ್ತ್. ಆಯನ ಶಿಷ್ಯೆರೇ ಮಲ್ತೊಂದಿತ್ತೆರ್.</verse>
				<verse number="3"></verse>
				<verse number="4">ಆಯೆ ಸಮಾರ್ಯೊನು ಕಡತ್‌ದ್ ಪೋವೊಡಾಂಡ್.</verse>
				<verse number="5">ಪೋನಗ ಸಮಾರ್ಯ ಸೀಮೆಡಿತ್ತಿ ಸುಖರ್ ಪನ್ಪಿ ಊರುಗು ಬತ್ತೆ. ಅವು ಯಾಕೋಬು ತನ ಮಗೆ ಆಯಿ ಯೋಸೇಫುಗು ಕೊರ್ತಿನ ಜಾಗ್‌ದ ಕೈತಲಿತ್ತ್‌ಂಡ್.</verse>
				<verse number="6">ಅಲ್ಪ ಯಾಕೋಬು ತೋಡಾದಿ ಒಂಜಿ ಗುವೆಲಿತ್ತ್‌ಂಡ್. ಯೇಸು ಸಾದಿಡ್ ನಡತ್‌ದ್ ಸೋತು ಪೋದು ಆ ಗುವೆಲ್ದ ಬರಿಟ್ಟ್ ಕುಲ್ಲೊಂಡೆ. ಹೆಚ್ಚಿಕಡಿಮೆ ಮಧ್ಯಾಹ್ನ ಆದಿತ್ತ್ಂಡ್.</verse>
				<verse number="7">ಆಯನ ಶಿಷ್ಯೆರ್ ವಣಸ್‌ಗ್ ಬೋಡಾಯಿನೆನ್ ದೆತ್ತೊಂದು ಕನವೆರೆ ಊರುದ ಉಲಯಿ ಪೋದುಪ್ಪುನಗ ಸಮಾರ್ಯದ ಒಂಜಿ ಪೊಂಜೊವು ಆ ಗುವೆಲ್ದ ನೀರ್ ಒಯ್ಪೆರೆ ಬತ್ತಲ್. ಯೇಸು ಆಲೆಡ, “ಅಮ್ಮಾ, ಎಂಕ್ ಪರಿಯೆರೆ ನೀರ್ ಕೊರ್ಲ,” ಅಂದ್‌ದ್ ಕೇಂಡೆ.</verse>
				<verse number="8"></verse>
				<verse number="9">ಯೆಹೂದ್ಯೆರೆಗ್ಲಾ ಸಮಾರ್ಯದಾಕುಲೆಗ್ಲಾ ಹೊಕ್ಕು ಬಳಿಕೆದಾಂತಿನೆಡ್ದ್ ಆ ಸಮಾರ್ಯದಾಲ್ ಯೇಸುಡ, “ಯೆಹೂದ್ಯೆ ಆದುಪ್ಪು ಈ, ಸಮಾರ್ಯದಾಲಾಯಿ ಎನಡ ಪರಿಯೆರೆ ನೀರ್ ಎಂಚ ಕೇನ್ವ,” ಅಂದ್‌ದ್ ಪಂಡಲ್.</verse>
				<verse number="10">ಐಕ್ ಯೇಸು, “ದೇವೆರ್ ಕೊರ್ಪಿನ ಉಡಿಗೆರೆ ದಾದ ಅಂದ್‌ದ್‌ಲಾ ನಿನಡ ಪರಿಯೆರೆ ನೀರ್ ಕೊರು ಅಂದ್‌ದ್ ಕೇಂಡಿನಾಯೆ ಏರಂದ್‌ದ್‌ಲಾ ನಿಕ್ಕ್ ತೆರಿದಿತ್ತ್‌ಂಡ ಆಯಡ ಈ ನಟ್ಟೊಂದ್ವ. ಆಯೆ ನಿಕ್ಕ್ ಜೀವದ ನೀರ್‌ನ್ ಕೊರ್ತ್ವೆ,” ಅಂದ್‌ದ್ ಪಂಡೆ.</verse>
				<verse number="11">ಆ ಪೊಂಜೊವು ಆಯಡ, “ಅಯ್ಯಾ, ನೀರ್ ದೆಪ್ಪೆರೆ ನಿನಡ ದಾಲಾ ಇಜ್ಜಿ, ಗುವೆಲ್ ಗುಂಡಿ ಉಂಡು. ಇಂಚ ಉಪ್ಪುನಗ ಆ ಜೀವದ ನೀರ್ ನಿಕ್ಕ್ ಓಲ್ತ್ ಬತ್ತ್ಂಡ್?</verse>
				<verse number="12">ಎಂಕ್ಲೆನ ಹಿರಿಯಾಯೆ ಆಯಿ ಯಾಕೋಬುಡ್ದುಲಾ ಈ ಮಲ್ಲಾಯೆನಾ? ಆಯೆನೇ ಈ ಗುವೆಲ್‌ನ್ ಎಂಕ್ಲೆಗ್ ತೋಡ್ದು ಕೊರ್ತಿನಾಯೆ. ಆಯೆಲಾ ಆಯ ಜೋಕುಲುಲಾ ಕೈಕಂಜಿಲುಲಾ ಉಂದೇ ಗುವೆಲ್ದ ನೀರ್‌ನ್ ಪರಿಯೆರ್,” ಅಂದ್‌ದ್ ಪನ್ನಗ</verse>
				<verse number="13">ಯೇಸು ಆಲೆಡ, “ಈ ನೀರ್‌ನ್ ಪರ್ಪಿನಾಕುಲೆಗ್ ಮಾತೆರೆಗ್ಲಾ ಕುಡ ಬಾಜೆಲ್ ಆವು.</verse>
				<verse number="14">ಆಂಡ ಯಾನ್ ಕೊರ್ಪಿನ ನೀರ್‌ನ್ ಪರ್ಪಿನಾಕುಲೆಗ್ ಏಪೊಗ್ಲಾ ಬಾಜೆಲ್ ಆವಂದ್‌. ಯಾನ್ ಆಯಗ್ ಕೊರ್ಪಿನ ನೀರ್ ಆಯಡ ಉರ್ಕುನ ವಸರ್ ಆದಿತ್ತ್‌ದ್ ನಿತ್ಯಜೀವೊನು ಉಂಡು ಮಲ್ಪುಂಡು,” ಅಂದ್‌ದ್ ಪಂಡೆ.</verse>
				<verse number="15">ಐಕ್ ಆ ಪೊಂಜೊವು, “ಕರ್ತವಾ, ಎಂಕ್ ಆ ನೀರ್‌ನ್ ಕೊರಿಯಡ ನನ ಮಿತ್ತ್ ಏಪೊಗ್ಲಾ ಎಂಕ್ ಬಾಜೆಲ್ ಆವಂದ್; ನೀರ್ ಒಯ್ಪರೆ ಈತ್ ದೂರ ಬರೊಡು ಪಂಡ್ದ್‌ಲಾ ಇಜ್ಜಿ,” ಅಂದ್‌ದ್ ಪಂಡಲ್.</verse>
				<verse number="16">ಐಕ್ ಯೇಸು ಆಲೆಡ, “ಪೋದು. ನಿನ ಕಂಡನಿನ್ ಇಡೆಗ್ ಲೆತ್ತೊಂದು ಬಲ,” ಪಂಡೆ.</verse>
				<verse number="17">ಐಕ್ ಆ ಪೊಂಜೊವು, “ಎಂಕ್ ಕಂಡನಿ ಇಜ್ಜೆ,” ಅಂದಲ್. ಯೇಸು ಆಲೆಡ, “ಎಂಕ್ ಕಂಡನಿ ಇಜ್ಜಿ ಅಂದ್‌ದ್ ಈ ಪಂಡಿನವು ಸರಿಯಾಯಿನ ಪಾತೆರ.</verse>
				<verse number="18">ನಿಕ್ಕ್ ಐನ್ ಜನ ಕಂಡನಿಯಾಡ್ಲು ಇತ್ತೆರ್. ಇತ್ತೆ ಉಪ್ಪುನಾಯೆ, ನಿನ ಕಂಡನಿ ಅತ್ತ್, ಈ ಪಂಡಿನವು ನಿಜವಾಯಿನ ಸಂಗತಿ,” ಅಂದ್‌ದ್ ಪಂಡೆ.</verse>
				<verse number="19">ಆ ಪೊಂಜೊವು ಆಯಡ, “ಕರ್ತವಾ, ಈ ಪ್ರವಾದಿ ಅಂದ್‌ದ್ ಎಂಕ್ ತೋಜುಂಡು.</verse>
				<verse number="20">ಎಂಕ್ಲೆನ ಹಿರಿಯಾಕುಲು ಈ ಗುಡ್ಡೆಡ್ ದೇವಾರಾಧನೆ ಮಲ್ತೊಂದಿತ್ತೆರ್. ಆಂಡ ನಿಕುಲು ಆರಾಧನೆ ಮಲ್ಪು ಜಾಗ್ ಯೆರೂಸಲೇಮು ಅಂದ್‌ದ್ ಪನ್ಪರ್.”</verse>
				<verse number="21">ಅಪಗ ಯೇಸು ಆಲೆಡ, “ಅಮ್ಮಾ, ಯಾನ್ ಪನ್ಪಿ ಪಾತೆರೊನು ನಂಬು, ಒಂಜಿ ಕಾಲ ಬರ್ಪುಂಡು, ಆ ಕಾಲೊಡು ನಿಕುಲು ಅಮ್ಮೆರೆ ಆರಾಧನೆ ಮಲ್ಪೊಡಾಂಡ ಈ ಗುಡ್ಡೆಗ್ಲಾ ಪೋಪುಜರ್, ಯೆರೂಸಲೇಮುಗ್ಲಾ ಪೋಪುಜರ್.</verse>
				<verse number="22">ಬರೊಡಾಯಿ ರಕ್ಷಣೆ ಯೆಹೂದ್ಯೆರೆಡ್ದ್ ಬರ್ಪುಂಡು. ಅವೆಡ್ದಾವರ ಎಂಕುಲು ತೆರಿದಿನೆನೇ ಆರಾಧನೆ ಮಲ್ಪುನಾಕುಲಾದುಲ್ಲ. ನಿಕುಲು ತೆರಿಯಂದೆ ಉಪ್ಪುನೆನ್ ಆರಾಧನೆ ಮಲ್ಪುನಾಕುಲು.</verse>
				<verse number="23">ಐಡ್ದ್ ಹೆಚ್ಚಾದ್, ಸತ್ಯಭಾವೊಡು ಆರಾಧನೆ ಮಲ್ಪುನಾಕುಲು ಆತ್ಮದ ರೀತಿಡ್ ಸತ್ಯೊಗು ತಕ್ಕಂತಿ ದೇವಾರಾಧನೆ ಮಲ್ಪು ಕಾಲ ಬರ್ಪುಂಡು, ಅವು ಇತ್ತೆನೇ ಬೈದ್‌ಂಡ್. ದೇವಾರಾಧನೆ ಮಲ್ಪುನಾಕುಲು ಇಂಚಿತ್ತಿನಕುಲೇ ಆದುಪ್ಪೊಡು ಅಂದ್‌ದ್ ಬಯಕುವೆ ಅತ್ತಾ</verse>
				<verse number="24">ದೇವೆರ್ ಆತ್ಮಸ್ವರೂಪಿ, ಆಯನ್ ಆರಾಧನೆ ಮಲ್ಪುನಾಕುಲು ಆತ್ಮದ ರೀತಿಡ್ ಸತ್ಯೊಗು ಸರಿಯಾದ್ ಆರಾಧನೆ ಮಲ್ಪೊಡು,” ಅಂದ್‌ದ್ ಪಂಡೆ.</verse>
				<verse number="25">ಆ ಪೊಂಜೊವು ಆಯಡ, ಮೆಸ್ಸೀಯೆ (ಪಂಡ ಕ್ರಿಸ್ತೆ) ಬರ್ಪೆ ಅಂದ್‌ದ್ ಗೊತ್ತುಂಡು. ಆಯೆ ಬತ್ತಿ ಬೊಕ್ಕ ಎಂಕ್ಲೆಗ್ ಮಾತೆನ್ ತೆರಿಪಾವೆ ಅಂದ್‌ದ್ ಪನ್ನಗ</verse>
				<verse number="26">ಯೇಸು ಆಲೆಡ, “ನಿನಡ ಇತ್ತೆ ಪಾತೆರೊಂದುಪ್ಪು ಯಾನೇ ಆ ಮೆಸ್ಸೀಯೆ,” ಅಂದ್‌ದ್ ಪಂಡೆ.</verse>
				<verse number="27">ಅಪಗ ಆಯ ಶಿಷ್ಯೆರ್ ಬತ್ತ್‌ದ್ ಆಯೆ ಒಂಜಿ ಪೊಂಜೊವು ಒಟ್ಟುಗು ಪಾತೆರುನೆನ್ ತೂದು ಅಚ್ಚಿರ ಪಡೆಯೆರ್. ಆಂಡ ಆಯಡ, “ದಾದ ಬೋಡು? ಆಲೆಡ ದಾಯೆ ಪಾತೆರ್‌ವ?” ಅಂದ್‌ದ್ ಏರ್‌ಲಾ ಕೇಂಡಿಜೆರ್.</verse>
				<verse number="28">ಅಪಗ ಆ ಪೊಂಜೊವು ತನ ಕೊಡಪಾನೊನು ಅಲ್ಪನೇ ಬುಡ್ದು ಊರುದ ಉಲಯಿ ಪೋದು</verse>
				<verse number="29">ಜನೊಕುಲೆಡ, “ಅಲ್ಪ ಒರಿ ಉಲ್ಲೆ, ಯಾನ್ ಈತ್‌ನೆಟ್ಟ ಮಲ್ತಿನೆನ್ ಮಾತ ಎಂಕ್ ಪಂಡೆ. ಬತ್ತ್‌ದ್ ಆಯನ್ ತೂಲೆ, ಬರೊಡಾಯಿ ಕ್ರಿಸ್ತೆ ಆಯೆನೇ ಆದುಪ್ಪೊಡು,” ಅಂದ್‌ದ್ ಪನ್ನಗ</verse>
				<verse number="30">ಅಲ್ತ ಜನೊಕುಲು ಪಿದಾಡ್ದ್ ಯೇಸು ಕೈತಲ್ ಬತ್ತೆರ್.</verse>
				<verse number="31">ಆತಾನಗ ಶಿಷ್ಯೆರ್, “ಗುರೂ, ವಣಸ್ ಮಲ್ಪುಲೆ ಅಂದ್‌ದ್ ಕೇನೊಂಡೆರ್!”</verse>
				<verse number="32">ಆಂಡ ಆಯೆ ಅಕ್ಲೆಡ, “ನಿಕ್ಲೆಗ್ ತೆರಿಯಂದಿನ ವಣಸ್ ತಿನರೆ ಎಂಕುಂಡು,” ಅಂದ್‌ದ್ ಪನ್ನಗ,</verse>
				<verse number="33">ಶಿಷ್ಯೆರ್, “ಆಯಗ್ ಏರಾಂಡಲಾ ವಣಸ್ ಕೊರಿಯೆರಾ ದಾನ್ನ?” ಅಂದ್‌ದ್ ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="34">ಯೇಸು ಅಕ್ಲೆಡ, “ಎನನ್ ಕಡಪುಡ್ದಿನಾಯನ ಚಿತ್ತದ ಲೆಕ್ಕ ಮಲ್ತ್‌ದ್ ಮಲ್ಪುನವೇ ಎನ ವಣಸ್.</verse>
				<verse number="35">‘ಇನಿಡ್ದ್ ನಾಲ್ ತಿಂಗೊಲು ಕರಿನೆ ಸುಗ್ಗಿ ಕೊಯ್ಪಿ ಸಮಯ ಬರ್ಪುಂಡು ಅಂದ್‌ದ್ ಪನ್ಪರತ್ತ.’ ನಿಕುಲು ಕಣ್ಣ್ ದೆರ್ತ್ತ್‌ದ್ ಕಂಡೊಲೆನ್ ತೂಲೆ, ಅವು ಬುಲೆದ್ ಕೊಯ್ಪಿ ಸಮಯ ತಯಾರಾತ್ತ್‌ಂಡ್ ಅಂದ್‌ದ್ ನಿಕ್ಲೆಗ್ ಪನ್ಪೆ.</verse>
				<verse number="36">ಕೊಯ್ಪಿನಾಯಗ್ ಇತ್ತೆನೇ ಕೂಲಿ ತಿಕ್ಕುಂಡು. ಆಯೆ ನಿತ್ಯಜೀವೊಗು ಬುಲೆನ್ ಕೂಡಾದ್ ದೀಪೆ. ಇಂಚ ಬಿತ್ತುನಾಯಗ್ಲಾ ಕೊಯ್ಪಿನಾಯಗ್ಲಾ ಸಂತೋಷ ಆಪುಂಡು.</verse>
				<verse number="37">ಒರಿ ಬಿತ್ತುವೆ, ಬೊಕ್ಕೊರಿ ಕೊಯ್ಪೆ ಪನ್ಪಿ ಸತ್ಯ ಗಾದೆದ ಲೆಕ್ಕ ಆಂಡ್.</verse>
				<verse number="38">ನಿಕುಲು ಬೆನಂದಿ ಬುಲೆನ್ ಕೊಯ್ಯೆರೆಗಾದ್ ಯಾನ್ ನಿಕ್ಲೆನ್ ಕಡಪುಡಿಯೆ. ಬೇತೆಕ್ಲು ಬೆನ್ತೆರ್, ನಿಕುಲು ಅಕ್ಲೆನ ಕಷ್ಟೊಡು ಸೇರ್ದರ್,” ಅಂದ್‌ದ್ ಪಂಡೆ.</verse>
				<verse number="39">“ಯಾನ್ ಮಲ್ತಿನೆನ್ ಮಾತೆನ್ ಆಯೆ ಎಂಕ್ ತೆರಿಪಾಯೆ.” ಅಂದ್‌ದ್ ಸಾಕ್ಷಿ ಕೊರೊಂದುಪ್ಪು, ಆ ಪೊಂಜೊವುನ ಪಾತೆರೊಡ್ದು ಆ ಊರುದ ಸಮಾರ್ಯೆರ್ ಮಸ್ತ್ ಜನ ಆಯನ್ ನಂಬುನಾಕುಲಾಯೆರ್.</verse>
				<verse number="40">ಅವೆಡ್ದಾವರ ಆ ಸಮಾರ್ಯೆರ್ ಆಯ ಕೈತಲ್‌ ಬತ್ತ್‌ದ್, ಈ ಎಂಕ್ಲೆಡೊಪ್ಪ ಉಪ್ಪುಲ ಅಂದ್‌ದ್ ಆಯಡ ನಟ್ಟೊನ್ನಗ ಆಯೆ ರಡ್ಡ್ ದಿನ ಅಕ್ಲೆಡೊಪ್ಪ ಉಂತಿಯೆ.</verse>
				<verse number="41">ಮಸ್ತ್ ಜನ ಆಯನ ಪಾತೆರ ಕೇಂಡ್ದ್ ನಂಬಿಯೆರ್.</verse>
				<verse number="42">ಆ ಊರುದ ಜನೊಕುಲು ಪೊಂಜೊವುಡ, “ಎಂಕುಲು ಆಯನ್ ನಂಬುನ ಕಾರಣ ಈ ಪಂಡಿನೆಡ್ದ್ ಮಾತ್ರ ಅತ್ತ್, ಎಂಕುಲು ಸ್ವತಃ ಕೆಬಿಟ್ ಕೇಂಡ್ದ್, ಇಂಬೆ ನಿಜಾದ್ ಲೋಕ ರಕ್ಷಕೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ತೆರಿಯೊಂದ ಅಂದ್‌ದ್ ಪಂಡೆರ್.”</verse>
				<verse number="43">ರಡ್ಡ್ ದಿನ ಕರಿಬೊಕ್ಕ ಆಯೆ ಅಲ್ತ್‌ಡ್ದ್ ಪಿದಾಡ್ದ್ ಗಲಿಲಾಯೊಗು ಪೋಯೆ.</verse>
				<verse number="44">ದಾಯೆಗಂದ್ಂಡ, “ಪ್ರವಾದಿಗ್ ಆಯನ ಸ್ವಂತ ಊರುಡು ಮರ್ಯಾದಿ ಇಜ್ಜಿ,” ಅಂದ್‌ದ್ ಯೇಸು ತಾನೇ ಪಂಡೆ.</verse>
				<verse number="45">ಗಲಿಲಾಯದಾಕುಲುಲಾ ಯೆರೂಸಲೇಮುದ ಪರ್ಬೊಗು ಪೋದು ಆಯೆ ಅಲ್ಪ ಮಲ್ತಿನೆನ್ ಮಾತೆನ್ ತೂಯಿನೆಡ್ದ್ ಆಯೆ ಗಲಿಲಾಯೊಗು ಬತ್ತಿನಪಗ ಆಯನ್ ಕುಸಿಟ್ ಸ್ವೀಕಾರ ಮಲ್ತೆರ್.</verse>
				<verse number="46">ಐಡ್ದ್ ಬೊಕ್ಕ ಯೇಸು ನೀರ್‌ನ್ ದ್ರಾಕ್ಷಾರಸ ಮಲ್ತ್‌ದಿ ಗಲಿಲಾಯೊಡುಪ್ಪು ಕಾನಾ ಪನ್ಪಿ ಊರುಗು ಕುಡೊರ ಬತ್ತೆ. ಅಪಗ ಕಪೆರ್ನೌಮುಡುಪ್ಪು ಅರಮನೆದ ಒರಿ ಮುಖ್ಯಸ್ಥನ ಮಗೆ ಸೀಕ್‌ಡಿತ್ತೆ.</verse>
				<verse number="47">ಯೇಸು ಯೂದಾಯೊಡ್ದು ಗಲಿಲಾಯೊಗು ಬತ್ತಿ ಸುದ್ಧಿನ್ ಕೇಂಡ್ದ್ ಆ ಅಧಿಕಾರಿ ತನ ಮಗೆ ಸೈಯೆರೆ ಮುಟ್ಟ ಆದಿತ್ತಿನೆಡ್ದ್ ಯೇಸುನ ಕೈತಲ್‌ ಬತ್ತ್‌ದ್, ಈ ಬತ್ತ್‌ದ್ ಎನ ಮಗನ್ ಗುಣ ಮಲ್ಪೊಡು. ಅಂದ್‌ದ್ ನಟ್ಟೊಂಡೆ.</verse>
				<verse number="48">ಯೇಸು ಆಯಡ, “ನಿಕುಲು ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ತೂಯಿಜರ್ಡ ನಂಬುನೇ ಇಜ್ಜಿ.” ಅಂದ್‌ದ್ ಪಂಡೆ.</verse>
				<verse number="49">ಐಕ್ ಆ ಮುಖ್ಯಸ್ಥೆ, “ಕರ್ತವಾ, ಎನ ಮಗೆ ಸೈಯೊಡ್ದು ದುಂಬು ಈ ಬರೊಡು,” ಅಂದ್‌ದ್ ಪನ್ನಗ,</verse>
				<verse number="50">ಯೇಸು ಆಯಗ್, “ನಿನ ಮಗೆ ಬದುಕುವೆ ಪೋಲ,” ಅಂದ್‌ದ್ ಉತ್ತರ ಕೊರಿಯೆ. ಆ ಮುಖ್ಯಸ್ಥೆ ಯೇಸು ತನ್ಕ್ ಪಂಡಿನ ಪಾತೆರೊನು ನಂಬುದು ಪಿದಾಡ್ದ್ ಪೋಯೆ.</verse>
				<verse number="51">ಆಯೆ ಗುಡ್ಡೆ ಜತ್ತ್‌ದ್ ಪೋವೊಂದುಪ್ಪುನಗನೇ ಆಯನ ಚಾಕ್ರಿದಾಕುಲು ಎದುರು ಬತ್ತ್‌ದ್, “ನಿನ ಮಗೆ ಬದುಕಿಯೆ,” ಪಂಡೆರ್‌.</verse>
				<verse number="52">ಏತ್ ಗಂಟೆಗ್ ಗುಣ ಆಯೆ ಅಂದ್‌ದ್ ಅಕ್ಲೆಡ ಕೇನ್ನಗ ಅಕುಲು, “ಕೋಡೆ ಮಧ್ಯಾಹ್ನ ಒಂಜಿ ಗಂಟೆಗ್ ಆಯನ ಜ್ವರ ಬುಡ್ದು ಪೋಂಡು,” ಪಂಡೆರ್.</verse>
				<verse number="53">ಅಪಗ, “ನಿನ ಮಗೆ ಬದುಕುವೆ” ಅಂದ್‌ದ್ ಯೇಸು ಎಂಕ್ ಪಂಡಿನ ಗಳಿಗೆಡೇ ಉಂದು ನಡತ್ಂಡ್ ಅಂದ್‌ದ್ ಅಮ್ಮೆ ತೆರಿಯೊಂಡಿನೆಡ್ದ್ ಆಯೆಲಾ ಆಯ ಇಲ್ಲದಾಕುಲುಲಾ ಆಯನ್ ನಂಬಿಯೆರ್.</verse>
				<verse number="54">ಯೇಸು ಯೂದಾಯೊಡ್ದು ಗಲಿಲಾಯೊಗು ಕುಡ ಬತ್ತ್‌ದ್ ಈ ರಡ್ಡನೆ ಕಾರ್ನಿಕೊನು ಮಲ್ತೆ.</verse>
			</chapter>
			<chapter number="5">
				<verse number="1">ಉಂದೆಡ್ದ್ ಬೊಕ್ಕ ಯೆಹೂದ್ಯೆರೆ ಪರ್ಬ ಇತ್ತಿನೆಡ್ದ್ ಯೇಸು ಯೆರೂಸಲೇಮುಗು ಪೋಯೆ.</verse>
				<verse number="2">ಯೆರೂಸಲೇಮುಡು ಕುರಿ ಅಗಸೆ ಪನ್ಪಿ ಬಾಕಿಲ್‌ದ ಕೈತಲ್‌ಡ್ ಒಂಜಿ ಕೆದು ಇತ್ತ್ಂಡ್. ಉಂದೆಕ್ಕ್ ಇಬ್ರಿಯ ಭಾಷೆಡ್ ಬೇತ್ಸಥಾ ಅಂದ್‌ದ್ ಪುದರ್ ಇತ್ತ್ಂಡ್. ಆ ಕೆದುತ ಸುತ್ತೊಡು ಐನ್ ಮಂಟಪೊಲು ಇತ್ತ್ಂಡ್.</verse>
				<verse number="3">ಐಕ್ಲೆಡ್ ಕೆಲವು ಸೀಕ್‌ದಾಕುಲು, ಕುರುಡೆರ್, ಕಾರ್‌ದಾಂತಿನಾಕುಲು, ವಾತದಾಕುಲು ಏಪಲಾ ಜೆತ್ತೊಂದಿತ್ತೆರ್.</verse>
				<verse number="4">ಅಲ್ಪ ಮುಪ್ಪತೆನ್ಮ ವರ್ಸೊಡ್ದಿಂಚಿ ಸೀಕ್‌ಡ್ ಇತ್ತಿ ಒರಿ ನರಮಾನಿ ಇತ್ತೆ.</verse>
				<verse number="5"></verse>
				<verse number="6">ಯೇಸು ಆಯನ್ ತೂದು, ಉಂಬೆ ಮಸ್ತ್ ಕಾಲೊಡ್ದಿಂಚಿ ಸೀಕ್‌ಡ್ ಉಲ್ಲೆ ಅಂದ್‌ದ್ ತೆರಿದ್, “ನಿಕ್ಕ್ ಗುಣ ಆಯೆರೆ ಮನಸುಂಡಾ?” ಅಂದ್‌ದ್ ಆಯಡ ಕೇಂಡಿನಪಗ,</verse>
				<verse number="7">ಆ ಸೀಕ್‌ದಾಯೆ, “ಕರ್ತವಾ, ನೀರ್ ಉರ್ಕುನಗ ಎನನ್ ಕೆದುತ ಉಲಯಿ ಜಪುಡಾವುನಾಕುಲು ಏರ್ಲಾ ಇಜ್ಜೆರ್. ಯಾನ್ ಅಡೆಗ್ ಪೋನಗ ಎನಡ್ದ್ ದುಂಬು ಬೊಕ್ಕೊರಿ ಜಪ್ಪುವೆ,” ಪಂಡೆ.</verse>
				<verse number="8">ಯೇಸು ಆಯಗ್, “ಲಕ್ಕ್‌ದ್ ನಿನ ಪಜೆನ್ ದೆತ್ತೊಂದು ನಡಪು,” ಅಂದ್‌ದ್ ಪಂಡೆ.</verse>
				<verse number="9">ಆ ಗಳಿಗೆಡೇ ಆಯೆ ಗುಣ ಆದ್ ತನ ಪಜೆನ್ ಪತ್ತೊಂದು ನಡತೊಂದು ಪೋಯೆ. ಆನಿದ ದಿನ ಸಬ್ಬತ್‌ದಿನ ಆದಿತ್ತ್ಂಡ್.</verse>
				<verse number="10">ಐಕಾದ್ ಯೆಹೂದ್ಯೆರೆ ಅಧಿಕಾರಿಲು ಗುಣ ಆಯಿನಾಯಡ, “ಇನಿ ಸಬ್ಬತ್‌ದಿನ ಆದುಂಡು, ನಿನ ಪಜೆನ್ ತುಂಬೊಂದು ಪೋಪಿನವು ಸರಿ ಅತ್ತ್.” ಪಂಡೆರ್.</verse>
				<verse number="11">ಐಕ್ ಆಯೆ, “ಎನನ್ ಗುಣ ಮಲ್ತಿನಾಯೆನೇ, ನಿನ ಪಜೆನ್ ಪತ್ತೊಂದು ಪೋಲ, ಅಂದ್‌ದ್ ಎನಡ ಪಂಡೆ,” ಪಂಡ್ದ್ ಉತ್ತರ ಕೊರಿಯೆ.</verse>
				<verse number="12">“ನಿನ ಪಜೆನ್ ಮಡ್ತೊಂದು ಪೋಲ, ಪಂಡಿನ ಆ ನರಮಾನಿ ಏರ್?” ಅಂದ್‌ದ್ ಯೆಹೂದ್ಯೆರೆನ ಅಧಿಕಾರಿಲು ಕೇಂಡೆರ್.</verse>
				<verse number="13">ಆಂಡ ಗುಣ ಆಯಿನಾಯಗ್ ಆಯೆ ಏರಂದ್‌ದ್ ತೆರಿದಿತ್ತಿಜಿ, ಜನೊಕುಲೆ ಗುಂಪು ಮಸ್ತ್ ಇತ್ತಿನೆಡ್ದ್ ಯೇಸು ಅಲ್ತ್‌ಡ್ದ್ ಪೋದಿತ್ತೆ.</verse>
				<verse number="14">ಐಡ್ದ್ ಬೊಕ್ಕ ಗುಣ ಆತಿನಾಯನ್ ಯೇಸು ದೇವಾಲಯೊಡು ತೂದು ಆಯಡ ಇಂಚ ಪಂಡೆ, “ಇಂದಾ, ಇತ್ತೆ ನಿನ ಸೀಕ್ ಗುಣ ಆತ್ಂಡತ್ತಾ ನನ ಪಾಪ ಮಲ್ಪೊಡ್ಚಿ, ಇಜ್ಜಾಂಡ ನಿನ ಸ್ಥಿತಿ ಉಂದೆಡ್ದ್‌ಲಾ ಭಯಂಕರ ಆವು.”</verse>
				<verse number="15">ಆ ನರಮಾನಿ ಅಲ್ತ್‌ಡ್ದ್ ಪೋದು, ಎನನ್ ಗುಣ ಮಲ್ತಿನಾಯೆ ಯೇಸುವೇ ಅಂದ್‌ದ್ ಯೆಹೂದ್ಯೆರೆಗ್ ತೆರಿಪಾಯೆ.</verse>
				<verse number="16">ಈ ಕಾರಣೊನು ತೆರಿದ್ ಯೆಹೂದ್ಯೆರ್, ಯೇಸು ಸಬ್ಬತ್‌ದಿನೊಟು ಇಂಚಿತ್ತಿ ಬೇಲೆಲೆನ್ ಮಲ್ಪುವೆ ಅತ್ತಾ ಅಂದ್‌ದ್ ಆಯಗ್ ಭಂಗ ಕೊರಿಯೆರೆ ತೂಯೆರ್.</verse>
				<verse number="17">ಐಕ್ ಯೇಸು, “ಎನ ಅಮ್ಮೆ ಇನಿ ಮುಟ್ಟಲಾ ಬೇಲೆ ಮಲ್ಪುವೆ, ಯಾನ್ಲಾ ಬೇಲೆ ಮಲ್ಪುವೆ,” ಪಂಡೆ.</verse>
				<verse number="18">ಈ ಪಾತೆರೊನು ಕೇಂಡ್ದ್ ಆಯೆ ಸಬ್ಬತ್‌ನ್ ಅಲಕ್ಷ ಮಲ್ತಿನೇ ಅತ್ತಂದೆ ದೇವೆರೆನ್ ಎನ ಅಮ್ಮೆ ಅಂದ್‌ದ್ ಪನೊಂದು, ತನನ್ಲಾ ದೇವೆರೆಗ್ ಸಮ ಮಲ್ತೊಂಡೆ ಪಂಡ್ದ್, ಯೆಹೂದ್ಯೆರೆ ಅಧಿಕಾರಿಲು ಆಯನ್ ಕೆರಿಯೆರೆ ಬೊಕ್ಕಲಾತ್ ಪ್ರಯತ್ನ ಮಲ್ತೆರ್.</verse>
				<verse number="19">ಐಕ್ ಯೇಸು ಅಕ್ಲೆಗ್, “ನಿಕ್ಲೆಗ್ ನಿಜಾದ್ ಪನ್ಪೆ, ಅಮ್ಮೆ ಮಲ್ತಿನೆನ್ ತೂದು ಮಗೆಲಾ ಮಲ್ಪುವೆ ಅತ್ತಂದೆ ತಾನಾದೆ ದಾಲಾ ಮಲ್ಪೆರೆ ಸಾದ್ಯ ಇಜ್ಜಿ. ಆಯೆ ಮಲ್ಪು ಮಾತೆನ್ಲಾ ಮಗೆಲಾ ಮಲ್ಪುವೆ.</verse>
				<verse number="20">ಅಮ್ಮೆ ಮಗನ ಮಿತ್ತ್ ಪ್ರೀತಿ ದೀದ್ ತಾನ್ ಮಲ್ಪುನೆನ್ ಮಾತೆನ್ ಆಯಗ್ ತೋಜಾವೆ. ಉಂದತ್ತಂದೆ ನೆಡ್ದ್‌ಲಾ ಮಲ್ಲ ಬೇಲೆಲೆನ್ ಆಯಗ್ ತೋಜಾವೆ, ಅವೆನ್ ತೂದು ನಿಕ್ಲೆಗ್ ಅಚ್ಚಿರ ಆಪುಂಡು.</verse>
				<verse number="21">ಅಮ್ಮೆ ಎಂಚ ಸೈತಿನಾಕುಲೆನ್ ಲಕ್ಕಾದ್ ಜೀವ ಕೊರ್ಪೆನಾ, ಅಂಚೆನೇ ಮಗೆಲಾ ತನ್ಕ್ ಬೋಡಿತ್ತಿನಾಕುಲೆಗ್ ಜೀವ ಕೊರ್ಪೆ ಪನ್ಪಿನೆನ್ ತೆರಿಯೊನ್ಲೆ.</verse>
				<verse number="22">ಉಂದತ್ತಂದೆ, ಅಮ್ಮೆ ಏರೆಗ್ಲಾ ನ್ಯಾಯತೀರ್ಪು ಮಲ್ಪುಜೆ, ನ್ಯಾಯತೀರ್ಪು ಮಲ್ಪು ಮಾತ ಅಧಿಕಾರೊನು ಮಗಕ್ಕ್ ಕೊರ್ತೆ.</verse>
				<verse number="23">ಮಾತೆರ್ಲಾ ತನ್ಕ್ ಮರ್ಯಾದಿ ಕೊರ್ಪಿಲೆಕ್ಕನೇ ಮಗಕ್ಲಾ ಮರ್ಯಾದಿ ಕೊರೊಡು ಅಂದ್‌ದ್ ಅಮ್ಮೆ ಬಯಕುವೆ. ಮಗಕ್ಕ್ ಮರ್ಯಾದಿ ಕೊರಂದಿನಾಯೆ ಆಯನ್ ಕಡಪುಡ್ದು ಕೊರಿನ ಅಮ್ಮೆರೆಗ್ಲಾ ಮರ್ಯಾದಿ ಕೊರಂದಿನಾಯೆ ಆಪೆ.</verse>
				<verse number="24">“ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಎನ ಪಾತೆರೊನು ಕೇಂಡ್ದ್ ಎನನ್ ಕಡಪುಡ್ದು ಕೊರಿನಾಯನ್ ನಂಬುಂಡ ಆಯಗ್ ನಿತ್ಯಜೀವ ಉಂಡು. ಆಯೆ ನ್ಯಾಯತೀರ್ಪುಗು ಗುರಿ ಆವಂದೆ ಮರಣೊನು ಕಡತ್‌ದ್ ಜೀವೊಗು ಸೇರ್ದ್ ಉಲ್ಲೆ.</verse>
				<verse number="25">ನಿಕ್ಲೆಗ್ ಸತ್ಯಾದ್ ಪನ್ಪೆ, ಸೈತಿನಾಕುಲು ದೇವೆರೆ ಮಗನ ಸ್ವರೊನು ಕೇನುನ ಕಾಲ ಬರ್ಪುಂಡು, ಅವು ಇತ್ತೆನೇ ಬೈದ್‌ಂಡ್, ಕೇಂಡಿನಾಕುಲು ಬದುಕುವೆರ್.</verse>
				<verse number="26">ಅಮ್ಮೆ ಎಂಚ ಸ್ವತಃ ಜೀವ ಆದುಲ್ಲೆನಾ ಅಂಚೆನೇ ಮಗನ್ಲಾ ಸ್ವತಃ ಜೀವೊಡುಪ್ಪುಲೆಕ್ಕನೇ ಮಲ್ಪುವೆ.</verse>
				<verse number="27">ನರಮಾನಿ ಮಗೆ ಆದಿತ್ತ್‌ಂಡಲಾ ನ್ಯಾಯತೀರ್ಪು ಮಲ್ಪು ಅಧಿಕಾರೊನು ಮಗಕ್ಕ್ ಕೊರ್ತೆ.</verse>
				<verse number="28">ಉಂದೆಕ್ಕ್ ಅಚ್ಚಿರ ಮಲ್ಪೊಡ್ಚಿ, ಸಮಾಧಿಡ್ ಇತ್ತಿನಾಕುಲು ಮಾತೆರ್ಲಾ ಆಯನ ಸ್ವರೊನು ಕೇಂಡ್ದ್ ಲಕ್ಕ್‌ದ್ ಪಿದಯಿ ಬರ್ಪಿ ಕಾಲ ಬರ್ಪುಂಡು.</verse>
				<verse number="29">ಎಡ್ಡೆಂತಿನೆನ್ ಮಲ್ತಿನಾಕುಲೆಗ್ ಜೀವೊಗಾದ್ ಪುನರುತ್ಥಾನ ಆಪುಂಡು. ಹಾಳ್ ಮಲ್ತಿನಾಕುಲೆಗ್ ನ್ಯಾಯತೀರ್ಪುಗಾದ್ ಪುನರುತ್ಥಾನ ಆಪುಂಡು.</verse>
				<verse number="30">“ಎನ್ನಾತೆಗ್ ಎನ ಅಧಿಕಾರೊಡು ದಾಲಾ ಮಲ್ಪಯೆ; ಅಮ್ಮೆ ಪಂಡಿನೆನ್ ಕೇಂಡ್ದ್ ನ್ಯಾಯತೀರ್ಪು ಮಲ್ಪುವೆ, ಬೊಕ್ಕ ಎನ ಸ್ವಂತ ಚಿತ್ತ ನಡಪೊಡು ಪಂಡ್ದ್ ಬಯಕಂದೆ, ಎನನ್ ಕಡಪುಡ್ದಿನಾಯನ ಚಿತ್ತ ನಡಪುಡುಡು ಪಂಡ್ದ್ ಉಪ್ಪುನೆಡ್ದ್ ಯಾನ್ ಮಲ್ಪು ತೀರ್ಪು ನ್ಯಾಯದವು ಆದುಂಡು.</verse>
				<verse number="31">“ಎನ ಸಂಗತಿಡ್ ಯಾನೇ ಸಾಕ್ಷಿ ಪಂಡ್ಂಡ ಎನ ಸಾಕ್ಷಿ ನಿಜ ಆವಂದ್.</verse>
				<verse number="32">ಎನ ಸಂಗತಿಡ್ ಸಾಕ್ಷಿ ಕೊರ್ಪಿನಾಯೆ ಬೊಕ್ಕೊರಿ ಉಲ್ಲೆ. ಎನ ಸಂಗತಿಡ್ ಆಯೆ ಪನ್ಪಿ ಸಾಕ್ಷಿ ಸತ್ಯದವು ಅಂದ್‌ದ್ ಎಂಕ್ ಗೊತ್ತುಂಡು.</verse>
				<verse number="33">ನಿಕುಲು ಯೋಹಾನಡ ಕೇನಿಯೆರೆ ಜನೊಕುಲೆನ್ ಕಡಪುಡಿಯರ್. ಆಯೆ ಸತ್ಯದ ಸಂಗತಿಡ್ ಸಾಕ್ಷಿ ಪಂಡೆ.</verse>
				<verse number="34">ಯಾನ್ ಎನ ಸಂಗತಿಡ್ ಜನೊಕುಲು ಸಾಕ್ಷಿ ಕೊರೊಡು ಅಂದ್‌ದ್ ಬಯಕುಜಿ. ಆಂಡಲಾ ನಿಕ್ಲೆಗ್ ರಕ್ಷಣೆ ಆವೊಡು ಅಂದ್‌ದ್ ಉಂದೆನ್ ಪನ್ತೆ.</verse>
				<verse number="35">ಯೋಹಾನೆ ಅರ್ಲೊಂದಿತಿನ ಒಂಜಿ ತುಡರ್‌ದ ಲೆಕ್ಕ ಬೊಲ್ಪು ಕೊರಿಯೆ. ನಿಕುಲು ಆಯ ಬೊಲ್ಪುಡು ಒಂತೆ ಸಮಯ ಸಂತೋಷೊಡುಪ್ಪರೆ ಮನಸ್ ಮಲ್ತ್‌ದಿತ್ತರ್.</verse>
				<verse number="36">ಆಂಡ ಎನ ಸಾಕ್ಷಿಲು ಯೋಹಾನಡ್ದ್‌ಲಾ ಹೆಚ್ಚ್‌ಗೆದವು, ಎಂಚ ಪಂಡ ಮಲ್ತ್‌ದ್ ತೋಜಾಯೆರೆ ಅಮ್ಮೆ ಎಂಕ್ ಕೊರ್ತಿನ ಕೆಲಸೊಲೇ. ಅಮ್ಮೆ ಎನನ್ ಕಡಪುಡ್ದು ಕೊರ್ತೆ ಅಂದ್‌ದ್ ಎನ ಕೆಲಸೊಲು ಸಾಕ್ಷಿ ಕೊರ್ಪುಂಡು.</verse>
				<verse number="37">ಉಂದತ್ತಂದೆ ಎನನ್ ಕಡಪುಡ್ದು ಕೊರಿ ಅಮ್ಮೆ ಎನ ಸಂಗತಿಡ್ ಸಾಕ್ಷಿ ಪನ್ಪೆ. ನಿಕುಲು ಆಯ ಸ್ವರೊನು ಕೇಂಡ್ದಿನೇ ಇಜ್ಜಿ, ಆಯೆ ಎಂಚ ಉಲ್ಲೆ ಪಂಡ್ದ್‌ಲಾ ತೂತ್‌ಜರ್.</verse>
				<verse number="38">ಆಯ ಪಾತೆರೊಲು ನಿಕ್ಲೆಡೊಪ್ಪ ನಿಲೆ ಆತಿನವುಲಾ ಇಜ್ಜಿ. ದಾಯೆಗಂದ್ಂಡ ಆಯೆ ಕಡಪುಡ್ದು ಕೊರಿನಾಯನ ಪಾತೆರೊನು ನಿಕುಲು ನಂಬುಜರ್.</verse>
				<verse number="39">ಶಾಸ್ತ್ರೊಲೆಡ್ದ್ ನಿತ್ಯಜೀವ ತಿಕ್ಕುಂಡು ಅಂದ್‌ದ್ ಅವೆನ್ ಓದೊಂದುಲ್ಲರತ್ತಾ, ಆಂಡ ಶಾಸ್ತ್ರೊಡುಲಾ ಎನ ವಿಷಯೊಡು ಸಾಕ್ಷಿ ತೆರಿಪಾವುಂಡು.</verse>
				<verse number="40">ಆಂಡ ನಿತ್ಯಜೀವ ಪಡೆಯೆರೆ ಎನ ಕೈತಲ್‌ ಬರಿಯೆರೆ ನಿಕ್ಲೆಗ್ ಮನಸಿಜ್ಜಿ.</verse>
				<verse number="41">“ಯಾನ್ ನರಮಾನಿಲೆಡ್ದ್ ಬರ್ಪಿ ಮಾನ ಮರ್ಯಾದಿನ್ ಬಯಕುಜಿ.</verse>
				<verse number="42">ಆಂಡ ಯಾನ್ ನಿಕ್ಲೆ ಮನಸ್‌ನ್ ತೆರಿದೆ. ದೇವೆರೆ ಮಿತ್ತ್ ನಿಕ್ಲೆಗ್ ಪ್ರೀತಿ ಇಜ್ಜಿ ಅಂದ್‌ದ್ ತೆರಿದುಲ್ಲೆ.</verse>
				<verse number="43">ಯಾನ್ ಎನ ಅಮ್ಮೆರೆ ಪುದರ್‌ಡ್ ಬೈದೆ, ಆಂಡ ನಿಕುಲು ಎನನ್ ಒಪ್ಪಿಯೊನುಜರ್, ಆಂಡ ಬೊಕ್ಕೊರಿ ಸ್ವಂತ ಪುದರ್‌ದ ಮಿತ್ತ್ ಬತ್ತೆಡ, ಆಯನ್ ಒಪ್ಪಿಯೊನುವರ್.</verse>
				<verse number="44">ದೇವೆರೆಡ್ದ್ ಒರಿಯಡ್ದೇ ಉಪ್ಪು ಮಾನೊನು ನಾಡಂದೆ; ಒರಿಯಡ್ದ್ ಒರಿ ಮಾನ ದೆತ್ತೊನುನಾಕುಲು ನಿಕುಲು ಎಂಚ ನಂಬೊಲಿ?</verse>
				<verse number="45">ಯಾನ್ ಅಮ್ಮೆರೆ ಎದುರು ನಿಕ್ಲೆನ ದೂರುಲೆನ್ ತೆರಿಪಾದ್ ಕೊರುವೆ ಅಂದ್‌ದ್ ಎನ್ನಡೆ, ನಿಕುಲು ಭರವಸ ಮಲ್ತಿ ಮೋಶೆನೇ ನಿಕ್ಲೆನ ಮಿತ್ತ್ ದೂರುಲೆನ್ ಪಾಡ್ವೆ.</verse>
				<verse number="46">ನಿಕುಲು ಮೋಸೆನ್ ನಿಜವಾದ್ ನಂಬುನಕುಲಾಂಡ ಎನನ್ಲಾ ನಂಬುದ್ವರ್. ದಾಯೆ ಪಂಡ ಮೋಶೆ ಎನ ಸಂಗತಿಡ್ ಬರೆತೆ,</verse>
				<verse number="47">ಆಯೆ ಬರೆತಿನೆನ್ ನಿಕುಲು ನಂಬಿಜರ್ಡ ಎನ ಪಾತೆರೊಲೆನ್ ಎಂಚ ನಂಬುವರ್?” ಅಂದ್‌ದ್ ಪಂಡೆ.</verse>
			</chapter>
			<chapter number="6">
				<verse number="1">ಐಡ್ದ್ ಬೊಕ್ಕ ಯೇಸು ಗಲಿಲಾಯ ಕಡಲ್ದ ಆಯೆರೆಗ್ ಪೋಯೆ, ಐಕ್ ತಿಬೇರಿಯದ ಕಡಲ್ ಪಂಡ್ದ್‌ಲಾ ಪನ್ಪೆರ್.</verse>
				<verse number="2">ಮಸ್ತ್ ಜನೊಕುಲು ಸೀಕ್‌ದಾಕುಲೆಡ್ ಮಲ್ತಿ ಕಾರ್ನಿಕೊಲೆನ್ ತೂದು ಯೇಸು ಬೆರಿಯೆ ಪೋವೊಂದಿತ್ತೆರ್.</verse>
				<verse number="3">ಆಂಡ ಯೇಸು ಒಂಜಿ ಗುಡ್ಡೆದ ಮಿತ್ತ್ ಪೋದು ತನ ಶಿಷ್ಯೆರೆ ಒಟ್ಟುಗು ಕುಲ್ಲಿಯೆ.</verse>
				<verse number="4">ಆ ಸಮಯೊಡು ಯೆಹೂದ್ಯೆರೆನ ಪಸ್ಕ ಪರ್ಬದ ದಿನ ಕೈತಲಾವೊಂದಿತ್ತ್ಂಡ್.</verse>
				<verse number="5">ಇಂಚ ಉಪ್ಪುನಗ ಯೇಸು ತನ ಕೈತಲ್‌ ಬರ್ಪಿ ಜನೊಕುಲೆ ಗುಂಪುನು ತೂದು ಫಿಲಿಪ್ಪುಡ, “ಮೊಕ್ಲೆಗ್ ವಣಸ್ ನಮ ಒಲ್ತುಡ್ದು ದೆತ್ತೊನುಗ?” ಕೇಂಡೆ.</verse>
				<verse number="6">ತಾನ್ ಮಲ್ಪೆರೆ ಇತ್ತಿನವು ತನ್ಕ್ ತೆರಿದಿತ್ತ್ಂಡಲಾ ಫಿಲಿಪ್ಪುನು ಪರೀಕ್ಷೆ ಮಲ್ಪೆರೆ ಈ ಪಾತೆರ ಪಂಡೆ.</verse>
				<verse number="7">ಐಕ್ ಫಿಲಿಪ್ಪು, “ಒರಿಯೊರಿಯಗ್ ಒಂತೊಂತೆ ತಿಕ್ಕೊಡಾಂಡಲಾ ಇರ್ನೂದು ಬೊಳ್ಳಿದ ಪಾವೊಲಿದ ರೊಟ್ಟಿಲಾ ಯಾವಂದ್,” ಪಂಡೆ</verse>
				<verse number="8">ಅಪಗ ಆಯನ ಶಿಷ್ಯೆರೆಡ್ ಸೀಮೋನು ಪೇತ್ರನ ಮೆಗ್ಯೆ ಅಂದ್ರೆಯೆ ಪಂಡೆ.</verse>
				<verse number="9">“ಮುಲ್ಪ ಒರಿ ಆಣನ ಕೈತಲ್‌ ಐನ್ ಜವೆಗೋದಿದ ರೊಟ್ಟಿಲಾ ರಡ್ಡ್ ಮೀನ್‌ಲಾ ಉಂಡು. ಆಂಡ ಈತ್ ಜನೊಕುಲೆಗ್ ಅವು ಒಯಿಕಾವು.”</verse>
				<verse number="10">ಇಂಚ ಪನ್ನಗ ಯೇಸು, “ಜನೊಕುಲೆನ್ ವಣಸ್‌ಗ್ ಕುಲ್ಲಾಲೆ.” ಪಂಡೆ. ಆ ಜಾಗ್‌ಡ್ ಎಡ್ಡೆ ಪಜಿರ್ ಬುಲೆದಿತ್ತ್‌ಂಡ್, ಜನೊಕುಲು ಕುಲ್ಲೊಂಡೆರ್. ಅಂಜೊವುಲೇ ಹೆಚ್ಚಿಕಡಿಮೆ ಐನ್ ಸಾರ ಇತ್ತೆರ್.</verse>
				<verse number="11">ಐಡ್ದ್ ಬೊಕ್ಕ ಯೇಸು ರೊಟ್ಟಿನ್ ದೆತ್ತೊಂದು ದೇವೆರೆನ್ ಸುಗಿತ್‌ದ್ ಕುಲ್ಲುದಿತ್ತಿನಾಕುಲೆಗ್ ಪಟ್ಟ್‌ದ್ ಕೊರಿಯೆ. ಐತ ಲೆಕ್ಕನೆ ಮೀನ್‌ನ್ಲಾ ಅಕ್ಲೆಗ್ ಬೋಡಾಯಿನಾತ್ ಪಟ್ಟ್‌ದ್ ಕೊರಿಯೆ.</verse>
				<verse number="12">ಅಕುಲು ಬಂಜಾರ ತಿಂದಿನೆಡ್ದ್ ಬೊಕ್ಕ ಯೇಸು ತನ ಶಿಷ್ಯೆರೆಗ್, “ಒರಿದಿನೆನ್ ಒಟ್ಟು ಮಲ್ಪುಲೆ, ನೆಟ್ಟ್ ಒವುಲಾ ಹಾಳಾವೆರೆ ಬಲ್ಲಿ,” ಪಂಡೆ.</verse>
				<verse number="13">ಆ ಐನ್ ಜವೆಗೋದಿದ ರೊಟ್ಟಿನ್ ಜನೊಕುಲು ತಿಂದ್‌ದ್, ಅಕುಲು ಒರಿದಿ ತುಂಡುಲೆನ್ ಒಟ್ಟು ಮಲ್ಪುನಗ ಪದ್ರಾಡ್ ಪುಡಯಿ ದಿಂಜಿಂಡ್.</verse>
				<verse number="14">ಯೇಸು ಮಲ್ದಿನ ಈ ಕಾರ್ನಿಕೊನು ಅವುಲು ಇತ್ತಿನ ಜನೊಕುಲು ತೂದು, “ಲೋಕೊಗು ಬರೊಡಾಯಿ ಆ ಪ್ರವಾದಿ ಉಂಬೆನೇ ನಿಜ!” ಅಂದ್‌ದ್ ಪಂಡೊಂಡೆರ್</verse>
				<verse number="15">ಅಪಗ ಯೇಸು, ಅಕುಲು ಬತ್ತ್‌ದ್ ತನನ್ ಲೆತ್ತೊಂದು ಪೋದು ಅರಸು ಮಲ್ಪುನ ಗೇನೊಡುಲ್ಲೆರ್ ಪನ್ಪಿನೆನ್ ತೆರಿಯೊಂದು, ಕುಡೊರ ತಾನ್ ಮದೆ ಆದ್ ಒರಿಯೇ ಗುಡ್ಡೆಗ್ ಪೋಯೆ.</verse>
				<verse number="16">ಬೈಯದಗ ಯೇಸುನ ಶಿಷ್ಯೆರ್ ಕಡಲ್‌ದಡೆಗ್ ಪೋದು</verse>
				<verse number="17">ಓಡ ಮಿತ್ತಾರ್ದ್ ಕಡಲ್ದ ಸಾದಿಯಾದ್ ಆಯೆರೆಗ್ ಕಪೆರ್ನೌಮುಗು ಪೋಯೆರ್. ಅಪಗನೆ ಕತ್ತಲೆ ಆದಿತ್ತ್ಂಡ್, ಆಂಡ ಯೇಸು ನನಲಾ ಅಕ್ಲೆನ ಕೈತಲ್‌ ಬತ್ತ್‌ತ್ತಿಜೆ</verse>
				<verse number="18">ಆತ್‌ನೆಂಗೆ ಸುಳಿಗಾಳಿ ಬೀಜೊಂದು ಕಡಲ್ದ ನೀರ್ ಅಡಿಮೇಲ್ ಆವೊಂದಿತ್ತ್ಂಡ್</verse>
				<verse number="19">ಅಕುಲು ಓಡೊನು ಒಚ್ಚೊಂದು ಹೆಚ್ಚಿಕಡಿಮೆ ಮೂಜಿ ಇಜ್ಜಾಂಡ ನಾಲ್ ಮೈಲ್ ದೂರ ಪೋಯಿ ಬೊಕ್ಕ ಯೇಸು ಕಡಲ್ದ ಮೇಲ್‌ಡ್ ನಡತೊಂದು ಓಡದ ಕೈತಲ್‌ ಬರ್ಪಿನೆನ್ ತೂದು ಪೋಡಿಯೆರ್.</verse>
				<verse number="20">ಐಕ್ ಯೇಸು, “ಪೋಡ್ಯಡೆ, ಯಾನೇ.” ಅಂದ್‌ದ್ ಪಂಡೆ.</verse>
				<verse number="21">ಅಪಗ ಯೇಸುನು ಓಡದ ಉಲಯಿ ದೆತ್ತೊನಿಯೆರೆಗ್ ಮನಸ್ ಮಲ್ತೆರ್, ಆ ಕ್ಷಣೊಟೇ ಓಡ ಅಕುಲು ಪೋಪಿ ಕರೆಕ್ ಮುಟ್ಟುಂಡು.</verse>
				<verse number="22">ಮನದಾನಿ ಕಡಲ್ದ ಆಪೆದ ಬರಿಟ್ಟ್ ಉಂತುದಿತ್ತಿ ಜನೊಕುಲು ಯೇಸುನು ನಾಡೊಂದಿತ್ತೆರ್. ಮುಲ್ಪ ಒಂಜಿ ಓಡ ಇತ್ತಿನತ್ತಂದೆ ಬೇತೆ ಓಡೊಲು ಇತ್ತ್‌ಜಿ ಅಂದ್‌ದ್ ಶಿಷ್ಯೆರ್ ಮಾತ್ರ ಪಿದಾಡ್ದ್ ಪೋಯಿನತ್ತಂದೆ, ಯೇಸು ತನ ಶಿಷ್ಯೆರೆಡೊಪ್ಪ ಓಡ ಮಿತ್ತಾರ್ದ್‌ಜೆ ಅಂದ್‌ದ್ ಅಕ್ಲೆಗ್ ತೆರಿದಿತ್ತ್‌ಂಡ್.</verse>
				<verse number="23">ಆಂಡ ಆತ್ ಪೊರ್ತುಗು ಬೇತೆ ಓಡೊಲು ತಿಬೇರಿಯೊಡ್ದು ಪಿದಾಡ್ದ್, ಯೇಸು ದೇವೆರೆನ್ ಸುಗಿತ್‌ದ್ ಜನೊಕುಲೆಗ್ ವಣಸ್ ಮಲ್ಪಾಯಿ ಜಾಗ್‌ದ ಕೈತಲ್ ಬತ್ತ್‌ದಿತ್ತ್ಂಡ್.</verse>
				<verse number="24">ಇಂಚ ಉಪ್ಪುನಗ ಯೇಸು ಅಲ್ಪ ಇಜ್ಜೆ, ಆಯ ಶಿಷ್ಯೆರ್‌ಲಾ ಇಜ್ಜೆರ್ ಪಂಡ್ದ್, ಆ ಜನೊಕುಲು ತೂದು ತನ್ಕುಲೆ ಎಲ್ಯ ಓಡೊಡು ಕುಲ್ಲೊಂದು ಯೇಸುನು ನಾಡೊಂದು ಕಪೆರ್ನೌಮುಗು ಬತ್ತೆರ್.</verse>
				<verse number="25">ಬೊಕ್ಕ ಕಡಲ್ದ ಅಂಚಿದ ಕರೆಟ್ ಉಂತುದಿತ್ತಿ ಯೇಸುನು ತೂದು, “ಗುರುಕುಲೇ, ಈರ್ ಏಪ ಇಡೆಗ್ ಬತ್ತರ್?” ಅಂದ್‌ದ್ ಕೇಂಡಿನೆಕ್ಕ್.</verse>
				<verse number="26">ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ತೂಯಿನ ಕಾರ್ನಿಕೊಲೆಡ್ದ್ ಅತ್ತ್, ಆಂಡ ಆ ರೊಟ್ಟಿ ತಿಂದ್‌ದ್ ಬಂಜಿ ದಿಂಜಿನೆಡ್ದೆ ಎನನ್ ನಿಕುಲು ನಾಡೊಂದುಲ್ಲರ್</verse>
				<verse number="27">ಬೆನ್ಲೆ, ಹಾಳಾದ್ ಪೋಪಿ ತಿನಸ್‌ಗಾದ್ ಬೆನೊಡ್ಚಿ, ನಿತ್ಯಜೀವೊಗು ಒರಿಯು ತಿನಸ್‌ಗಾದ್ ಬೆನ್ಲೆ. ಇಂಚಿತ್ತಿ ತಿನಸ್‌ನ್ ನರಮಾನಿ ಮಗೆ ನಿಕ್ಲೆಗ್ ಕೊರ್ಪೆ. ಐಕಾದೇ ಅಮ್ಮೆ ಆದುಪ್ಪು ದೇವೆರ್ ಆಯಗ್ ಮುದ್ರೆ ಪಾಡ್ದ್ ಅಧಿಕಾರ ಕೊರ್ತೆ.”</verse>
				<verse number="28">ಅಪಗ ಅಕುಲು ಆಯಡ, “ದೇವೆರೆಗ್ ಮೆಚ್ಚಿಗೆ ಆಪಿ ಕೆಲಸೊಲೆನ್ ಮಲ್ಪೊಡಾಂಡ ಎಂಕುಲು ದಾದ ಮಲ್ಪೊಡು?” ಪಂಡೆರ್.</verse>
				<verse number="29">ಯೇಸು ಉತ್ತರ ಕೊರ್ದು ಅಕ್ಲೆಗ್, “ದೇವೆರ್ ಮೆಚ್ಚುನ ಬೇಲೆ ದಾನೆಂದ್ಂಡ, ಆಯೆ ಕಡಪುಡ್ದು ಕೊರಿನಾಯನ್ ನಿಕುಲು ನಂಬುನವೇ,” ಪಂಡೆ.</verse>
				<verse number="30">ಐಕ್ ಅಕುಲು ಅಂಚಾಂಡ, “ಎಂಕುಲು ತೂದು ನಂಬುಲೆಕ್ಕ ವಾ ಕಾರ್ನಿಕೊನು ತೋಜಾಪಾವ? ಎಂಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದೆರ್, ಅಂದ್‌ದ್ ಶಾಸ್ತ್ರೊಡು ಬರೆತ್ತ್ಂಡತ್ತಾ, ‘ಉಂದೆನ್ ಪರಲೋಕೊಡ್ದು ಅಕ್ಲೆಗ್ ಕೊರಿಯೆ.’ ಈ ವಾ ಬೇಲೆ ಮಲ್ಪುವ?” ಅಂದ್‌ದ್ ಕೇಂಡೆರ್.</verse>
				<verse number="31"></verse>
				<verse number="32">ಯೇಸು ಅಕ್ಲೆಗ್, “ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ಮೋಶೆ ನಿಕ್ಲೆಗ್ ಪರಲೋಕೊಡ್ದು ರೊಟ್ಟಿ ಕೊರ್ತಿನಾಯೆ ಅತ್ತ್, ಎನ ಅಮ್ಮೆ ಪರಲೋಕೊಡ್ದು ನಿಜವಾಯಿನ ರೊಟ್ಟಿನ್ ನಿಕ್ಲೆಗ್ ಕೊರ್ಪೆ.</verse>
				<verse number="33">ದೇವೆರ್ ಕೊರ್ಪಿನ ಆ ರೊಟ್ಟಿ ಒವು ಪಂಡ, ಆಯೆ ಪರಲೋಕೊಡ್ದು ಜತ್ತ್‌ದ್ ಬತ್ತ್‌ದ್ ಲೋಕದ ಜನೊಕುಲೆಗ್ ಜೀವ ಕೊರ್ಪಿನವೇ,” ಅಂದ್‌ದ್ ಪಂಡೆ.</verse>
				<verse number="34">ಐಕ್ ಅಕುಲು, “ಕರ್ತವಾ, ಎಂಕ್ಲೆಗ್ ಆ ರೊಟ್ಟಿನ್ ಏಪಲಾ ಕೊರು,” ಪನ್ನಗ,</verse>
				<verse number="35">ಯೇಸು ಅಕ್ಲೆಗ್, “ಜೀವದ ರೊಟ್ಟಿ ಯಾನೇ, ಎನ ಕೈತಲ್ ಬರ್ಪಿನಾಯಗ್ ಏಪೊಗ್ಲಾ ಬಡವು ಆವಂದ್, ಎನನ್ ನಂಬುನಾಯಗ್ ಏಪೊಗ್ಲಾ ಬಾಜೆಲ್ ಆವಂದ್.</verse>
				<verse number="36">ನಿಕುಲು ಎನನ್ ತೂಯರ್ಡಲಾ ನಂಬುಜರ್ ಅಂದ್‌ದ್ ನಿಕ್ಲೆಗ್ ಪಂಡ್ದಿತ್ತೆ ಅತ್ತಾ?</verse>
				<verse number="37">ಅಮ್ಮೆ ಎಂಕ್ ಕೊರ್ಪಿನವು ಮಾತಲಾ ಎನ ಕೈತಲ್‌ ಬರು; ಬೊಕ್ಕ ಎನ ಕೈತಲ್‌ ಬರ್ಪಿನಾಕುಲೆಗ್ ಯಾನ್ ಕಂಡಿತಾದ್ ದಂಕ್‌ದ್ ಪಾಡಯೆ.</verse>
				<verse number="38">ದಾಯೆಗಂದ್ಂಡ ಎನ ಚಿತ್ತದ ಲೆಕ್ಕ ನಡಪೆರೆಗಾದ್ ಯಾನ್ ಬೈದಿಜಿ, ಎನನ್ ಕಡಪುಡ್ದಿನಾಯನ ಚಿತ್ತೊನು ಈಡೇರಿಸಾವೆರೆ ಪರಲೋಕೊಡ್ದು ಬೈದೆ. ಎನನ್ ಕಡಪುಡ್ದಿನಾಯನ ಚಿತ್ತ ದಾನೆಂದ್ಂಡ</verse>
				<verse number="39">ಆಯೆ ಕೈ ದೆರ್ತ್ತ್‌ದ್ ಕೊರಿನೆಟ್ಟ್ ಒರಿಯನ್ಲಾ ದಂಕ್‌ದ್ ಪಾಡಂದೆ, ಯಾನ್ ಕಡೆ ದಿನೊಟು ಜೀವೊಡು ಲಕ್ಕಾವೊಡು ಇನ್ಪಿನವೇ ಆಯ ಚಿತ್ತ.</verse>
				<verse number="40">ಮಗನ್ ತೂದು ಆಯನ್ ನಂಬುನ ಪ್ರತಿಯೊರಿಯಗ್ಲಾ ನಿತ್ಯಜೀವ ತಿಕ್ಕೊಡು ಪನ್ಪಿನವೇ ಎನ ಅಮ್ಮೆರೆನ ಚಿತ್ತ ಆದುಂಡು, ಬೊಕ್ಕ ಯಾನ್ ಕಡೆ ದಿನೊಟು ಆಯನ್ ಜೀವೊಡು ಲಕ್ಕಾವೆ,” ಪಂಡೆ.</verse>
				<verse number="41">ಆಯೆ, “ಪರಲೋಕೊಡ್ದು ಜತ್ತ್‌ದ್ ಬತ್ತಿ ರೊಟ್ಟಿ ಯಾನೇ,” ಅಂದ್‌ದ್ ಪಂಡಿನೆಕ್ಕ್ ಯೆಹೂದ್ಯೆರ್ ಆಯನ ಸಂಗತಿಡ್ ಗುಣುಗುಟ್ಟುದು,</verse>
				<verse number="42">“ಉಂಬೆ ಯೋಸೇಫು ಮಗೆ ಯೇಸು ಅತ್ತಾ, ಆಯನ ಅಪ್ಪೆಅಮ್ಮನ್ ಎಂಕುಲು ತೆರಿದತ್ತಾ, ಇತ್ತೆ ಉಂಬೆ ಪರಲೋಕೊಡ್ದು ಬೈದೆ ಅಂದ್‌ದ್ ಪನ್ಪಿನಿ ಎಂಚ?” ಅಂದ್‌ದ್ ಪಂಡೆರ್.</verse>
				<verse number="43">ಐಕ್ ಯೇಸು ಅಕ್ಲೆಡ, “ನಿಕುಲು ನಿಕ್ಲೆನ ಉಲಯಿ ಗುಣುಗುಟ್ಟಡೆ.</verse>
				<verse number="44">ಎನನ್ ಕಡಪುಡ್ದು ಕೊರಿನ ಅಮ್ಮೆ ಲೆಪ್ಪಂದೆ ಏರ್ಲಾ ಎನ ಕೈತಲ್‌ ಬರಯೆರ್, ಬೊಕ್ಕ ಯಾನ್ ಆಯನ್ ಆ ಕಡೇ ದಿನೊಟು ಜೀವೊಡು ಲಕ್ಕಾವೆ.</verse>
				<verse number="45">‘ಅಕುಲು ಮಾತೆರ್ಲಾ ದೇವೆರೆಡ್ದ್ ಕಲ್ತಿನಾಕುಲಾದುಲ್ಲೆರ್,’ ಅಂದ್‌ದ್ ಪ್ರವಾದಿಲೆಡ್ ಬರೆತ್ಂಡ್. ಅಮ್ಮೆರೆಡ್ದ್ ಕೇಂಡ್ದ್ ಕಲ್ತಿನಾಕುಲು ಮಾತೆರ್ಲಾ ಎನ ಕೈತಲ್‌ ಬರ್ಪೆರ್.</verse>
				<verse number="46">ಏರಾಂಡಲಾ ಅಮ್ಮೆರೆನ್ ತೂತ ಪಂಡ್ಂಡ ನಂಬಡೆ. ದೇವೆರೆ ಕಡೆಡ್ದ್ ಬೈದಿನಾಯೆ ಒರಿಯೇ ಅಮ್ಮೆರೆನ್ ತೂತಿನಾಯೆ.</verse>
				<verse number="47">ಯಾನ್ ನಿಕ್ಲೆಗ್ ನಿಜಾದ್ ಪನ್ಪೆ, ನಂಬುನಾಯೆ ನಿತ್ಯಜೀವ ಪಡೆಪೆ.</verse>
				<verse number="48">ಜೀವ ಕೊರ್ಪಿ ರೊಟ್ಟಿ ಯಾನೇ.</verse>
				<verse number="49">ನಿಕ್ಲೆನ ಹಿರಿಯೆರ್ ಕಾಡ್‌ಡ್ ಮನ್ನ ತಿಂದ್‌ಂಡಲಾ ಸೈತ್‌ದ್ ಪೋಯೆರ್.</verse>
				<verse number="50">ಪರಲೋಕೊಡ್ದು ಜತ್ತ್‌ದ್ ಬರ್ಪಿ ರೊಟ್ಟಿ ಎಂಚಿನವು ಪಂಡ, ಅವೆನ್ ತಿಂದಿನಾಯೆ ಸೈಪಿನೇ ಇಜ್ಜಿ.</verse>
				<verse number="51">ಪರಲೋಕೊಡ್ದು ಜತ್ತ್‌ದ್ ಬೈದಿ ಜೀವ ಕೊರ್ಪಿ ರೊಟ್ಟಿ ಯಾನೆ, ಈ ರೊಟ್ಟಿನ್ ಏರಾಂಡಲಾ ತಿಂದೆಡ ಆಯೆ ಏಪೊತ್ತುಗ್ಲಾ ಬದುಕುವೆ, ಬೊಕ್ಕ ಯಾನ್ ಕೊರ್ಪಿನ ರೊಟ್ಟಿ ಎನ ಮಾಸನೇ, ಅವೆನ್ ಲೋಕದ ಜನೊಕುಲೆಗ್ ಜೀವ ತಿಕ್ಕೊಡು ಅಂದ್‌ದ್ ಕೊರ್ಪೆ,” ಪಂಡೆ.</verse>
				<verse number="52">ಅಪಗ ಯೆಹೂದ್ಯೆರ್, “ಉಂಬೆ ತನ ಮಾಸೊನು ನಂಕ್ ತಿನಿಯೆರೆ ಎಂಚ ಕೊರ್ಪೆ?” ಅಂದ್‌ದ್ ತನ್ಕುಲೆ ಉಲಯಿ ಚರ್ಚೆ ಮಲ್ತೊಂಡೆರ್.</verse>
				<verse number="53">ಐಕ್ ಯೇಸು ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ನರಮಾನಿ ಮಗನ ಮಾಸೊನು ತಿನಂದೆ ಆಯನ ನೆತ್ತೆರ್‌ನ್ ಪರಂದೆ ಇತ್ತ್ಂಡ ನಿಕ್ಲೆನ ಉಲಯಿ ಜೀವ ಇಜ್ಜಿ.</verse>
				<verse number="54">ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ನಿತ್ಯಜೀವೊನು ಪಡೆಪೆ. ಬೊಕ್ಕ ಆಯನ್ ಯಾನ್ ಕಡೇ ದಿನೊಟು ಜೀವೊಡು ಲಕ್ಕಾವೆ.</verse>
				<verse number="55">ದಾಯೆ ಪಂಡ ಎನ ಮಾಸನೇ ನಿಜವಾಯಿನ ತಿನಸ್, ಎನ ನೆತ್ತೆರ್ ನಿಜವಾಯಿನ ಬಾಜೆಲ್.</verse>
				<verse number="56">ಎನ ಮಾಸೊನು ತಿಂದ್‌ದ್ ಎನ ನೆತ್ತೆರ್‌ನ್ ಪರ್ಪಿನಾಯೆ ಎನಡೊಪ್ಪ ಉಪ್ಪುವೆ, ಯಾನ್ ಆಯಡೊಪ್ಪ ಉಪ್ಪುವೆ.</verse>
				<verse number="57">ಜೀವಸ್ವರೂಪೆ ಆದುಪ್ಪು ಅಮ್ಮೆ ಎನನ್ ಕಡಪುಡುದೆ ಯಾನ್ ಅಮ್ಮೆರೆಡ್ದ್ ಬದುಕುಲೆಕ್ಕನೆ; ಎನನ್ ತಿನ್ಪಿನಾಯೆ ಆಯೆಲಾ ಎನಡ್ದ್ ಬದುಕುವೆ.</verse>
				<verse number="58">ಪರಲೋಕೊಡ್ದು ಜತ್ತ್‌ದ್ ಬೈದಿ ರೊಟ್ಟಿ ಉಂದೇ. ನಿಕ್ಲೆನ ಹಿರಿಯೆರ್ ಮನ್ನ ತಿಂಡಲಾ ಸೈತೆರ್; ಉಂದು ಅಂಚತ್ತ್, ಈ ರೊಟ್ಟಿನ್ ತಿನ್ಪಿನಾಯೆ ಏಪೊತ್ತುಗ್ಲಾ ಬದುಕುವೆ,” ಪಂಡೆ</verse>
				<verse number="59">ಯೇಸು ಕಪೆರ್ನೌಮುದ ಸಭಾಮಂದಿರೊಡು ಬೋಧನೆ ಮಲ್ಪುನಗ ಉಂದೆನ್ ಪಂಡೆ.</verse>
				<verse number="60">ಆಯ ಶಿಷ್ಯೆರೆಡ್ ಮಸ್ತ್ ಜನ ಉಂದೆನ್ ಕೇಂಡ್ದ್, “ಉಂದು ಕಠಿಣದ ಪಾತೆರ, ಉಂದೆನ್ ಏರ್ಲಾ ಕೇನಯೆರ್?” ಅಂದ್‌ದ್ ಎನ್ನೊಂಡೆರ್.</verse>
				<verse number="61">ಯೇಸು ತನ ಶಿಷ್ಯೆರ್ ಉಂದೆಕ್ಕಾದ್ ಗುಣುಗುಟ್ಟುವೆರ್ ಅಂದ್‌ದ್ ತಾನೆ ತೆರಿಯೊಂದು ಅಕ್ಲೆಡ, “ಈ ಪಾತೆರೊಲೆಡ್ದ್ ನಿಕ್ಲೆಗ್ ಬೇಜಾರ್ ಆಂಡ?</verse>
				<verse number="62">ಅಪಗಾಂಡ ನರಮಾನಿ ಮಗೆ ತಾನ್ ಸುರು ಇತ್ತಿ ನಡೆಗೇ ಏರ್ದ್ ಪೋಪಿನೆನ್ ನಿಕುಲು ತೂಯರ್ಡ, ದಾನೆ ಎನ್ನ್‌ವರ್?</verse>
				<verse number="63">ಆತ್ಮಡೇ ಜೀವ ಕೊರ್ಪಿನವು ಆತ್ಮನೇ. ಮಾಸ ಒಯಿಕ್‌ಲಾ ಬರಂದ್ ಯಾನ್ ನಿಕ್ಲೆಗ್ ಪಂಡಿ ಪಾತೆರೊಲೇ ಆತ್ಮಲಾ ಜೀವಲಾ ಆದುಂಡು</verse>
				<verse number="64">ಆಂಡ ನಿಕ್ಲೆಡ್ ಕೆಲೆವೆರ್ ಉಂದೆನ್ ನಂಬಂದಿನಾಕುಲಾದುಲ್ಲರ್,” ಪಂಡೆ. ನಂಬಂದಿನಾಕುಲು ಏರ್, ಬೊಕ್ಕ ತನನ್ ಪತ್ತ್‌ದ್ ಕೊರ್ಪಿನಾಯೆ ಏರಂದ್‌ದ್ ಯೇಸುಗು ಸುರುಡ್ದೇ ತೆರಿದಿತ್ತ್‌ಂಡ್.</verse>
				<verse number="65">ಬೊಕ್ಕ ಯೇಸು ಅಕ್ಲೆಡ, “ಅಮ್ಮೆರೆನ ಅಪ್ಪಣೆದಾಂತೆ ಎನ ಕೈತಲ್ ಬರಿಯೆರೆ ಸಾದ್ಯ ಇಜ್ಜಿ, ಅಂದ್‌ದ್ ಯಾನ್ ನಿಕ್ಲೆಗ್ ಸುರುಡ್ದೇ ಪನೊಂದಿತ್ತೆ,” ಪಂಡೆ.</verse>
				<verse number="66">ಆನಿಡ್ದ್ ಬೊಕ್ಕ ಆಯನ ಶಿಷ್ಯೆರೆಡ್ದ್ ಮಸ್ತ್ ಜನ ಆಯನ್ ಬುಡ್ದು ಪಿರ ಪೋಯೆರ್ ಬೊಕ್ಕ ಆಯನ ಒಟ್ಟುಗು ಪೋಯಿಜೆರ್.</verse>
				<verse number="67">ಯೇಸು ಉಂದೆನ್ ತೂದು ತನ ಪದ್ರಾಡ್ ಶಿಷ್ಯೆರೆಲೆಗ್ಲಾ, “ನಿಕುಲುಲಾ ಪೋವೊಡುಂದುಲ್ಲರಾ?” ಅಂದ್‌ದ್ ಕೇಂಡೆ.</verse>
				<verse number="68">ಐಕ್ ಸೀಮೋನು ಪೇತ್ರೆ, “ಕರ್ತವಾ, ನಿನನ್ ಬುಡ್ದು ಎಂಕುಲು ನನ ಬೇತೆ ಏರೆಡೊಪ್ಪ ಪೋವೊಲಿ? ನಿತ್ಯಜೀವ ಕೊರ್ಪಿನ ಪಾತೆರೊಲು ನಿನಡನೇ ಉಂಡು;</verse>
				<verse number="69">ಈ ದೇವೆರೆ ಪರಿಶುದ್ಧದಾಯೆನೇ ಪಂಡ್ದ್ ಎಂಕುಲು ನಂಬುದ ಬೊಕ್ಕ ತೆರಿದ.” ಅಂದ್‌ದ್ ಪಂಡೆ.</verse>
				<verse number="70">ಐಕ್ ಯೇಸು, “ಪದ್ರಾಡ್ ಮಂದಿ ಆಯಿ ನಿಕ್ಲೆನ್ ಯಾನ್ ಅಜತ್‌ದ್ ದೆತ್ತೊಂಡೆ ಅತ್ತಾ? ನಿಕ್ಲೆಡ್ಲಾ ಒರಿ ಸೈತಾನ ಮಗೆ ಉಲ್ಲೆ,” ಪಂಡೆ.</verse>
				<verse number="71">ಯೇಸು ಸೀಮೋನು ಇಸ್ಕಾರಿಯೋತನ ಮಗೆ ಯೂದನ ಪರವಾದ್ ಈ ಪಾತೆರೊನು ಪಂಡೆ. ಉಂಬೆ ಆ ಪದ್ರಾಡ್ ಮಂದಿಡ್ ಒರಿ ಆದಿತ್ತ್‌ದ್ ದುಂಬಗ್ ಯೇಸುನು ಪತ್ತ್‌ದ್ ಕೊರ್ಪಿನಾಯೆ ಆಯೆ.</verse>
			</chapter>
			<chapter number="7">
				<verse number="1">ಈತ್ ಸಂಗತಿಲು ನಡತಿ ಬೊಕ್ಕ ಯೇಸು ಗಲಿಲಾಯೊಡು ಸಂಚಾರ ಮಲ್ತೊಂದಿತ್ತೆ, ಆಂಡ ಯೆಹೂದ್ಯೆರ್ ಆಯನ್ ಕೆರೊಡು ಅಂದ್‌ದ್ ಕಾತೊಂದಿತ್ತಿನೆಡ್ದ್ ಆಯಗ್ ಯೂದಾಯೊಡು ಸಂಚಾರ ಮಲ್ಪೆರೆ ಮನಸಿತ್ತ್‌ಜಿ.</verse>
				<verse number="2">ಯೆಹೂದ್ಯೆರೆನ ಒಂಜಿ ಪರ್ಣಶಾಲೆದ ಪರ್ಬ ಪನ್ಪಿ ಒಂಜಿ ಜಾತ್ರೆ ಕೈತಲಾನಗ</verse>
				<verse number="3">ಆಯನ ಮೆಗ್ಯಾಡ್ಲು ಆಯಡ, “ಅಪಗ ಈ ಮಲ್ಪು ಕಾರ್ಯೊಲೆನ್ ನಿನ ಶಿಷ್ಯೆರ್‌ಲಾ ತೂಪಿಲೆಕ್ಕ ಈ ಮುಲ್ತುಡ್ದು ಪಿದಾಡ್ದ್ ಯೂದಾಯೊಗು ಪೋ.</verse>
				<verse number="4">ಪುದರ್ ಬರೊಡು ಪನ್ಪಿನಾಕುಲು ಏರಾಂಡಲಾ ತಾನ್ ಮಲ್ಪುನೆನ್ ಮದೆಟ್ ಮಲ್ಪುಜೆರತ್ತಾ, ಈ ಇಂಚಿತ್ತಿ ಕಾರ್ಯೊಲೆನ್ ಮಲ್ಪುನಾಯೆ ಆದಿತ್ತಿನೆಡ್ದ್ ಲೋಕೊಗು ತೋಜಾಪಾವೊನ್ಲ.” ಪಂಡೆರ್,</verse>
				<verse number="5">ದಾಯೆಗಂದ್ಂಡ ಆಯ ಮೆಗ್ಯಾಡ್ಲುಲಾ ಆಯನ್ ನಂಬೊಂದಿತ್‌ಜೆರ್.</verse>
				<verse number="6">ಯೇಸು ಅಕ್ಲೆಡ, “ಎನ ಪೋಪಿ ಗಳಿಗೆ ನನಲಾ ಬೈದಿಜಿ, ನಿಕ್ಲೆಗಾಂಡಲಾ ಮಾತ ಸಮಯಲಾ ಒಂಜೇ.</verse>
				<verse number="7">ಲೋಕ ನಿಕ್ಲೆನ್ ಪಗೆ ಮಲ್ಪಂದ್, ಆಂಡ ಯಾನ್ ಮಲ್ಪು ಬೇಲೆಲು ಪಡಿಕೆಂತಿನವು ಅಂದ್‌ದ್ ಸಾಕ್ಷಿ ಪನ್ಪಿನೆಡ್ದ್, ಎನನ್ ಪಗೆ ಮಲ್ಪುಂಡು.</verse>
				<verse number="8">ನಿಕುಲೇ ಜಾತ್ರೆಗ್ ಪೋಲೆ, ಎನ ಸಮಯ ನನಲಾ ಒದಗ್‌ದ್ ಬರಂದಿನೆಡ್ದಾದ್, ಯಾನ್ ಈ ಜಾತ್ರೆಗ್ ಇತ್ತೆ ಪೋಪುಜಿ.”</verse>
				<verse number="9">ಉಂದೆನ್ ಪಂಡ್ದ್ ಯೇಸು ಗಲಿಲಾಯೊಡೇ ಉಂತಿಯೆ.</verse>
				<verse number="10">ಆಂಡ ಆಯ ಮೆಗ್ಯಾಡ್ಲು ಜಾತ್ರೆಗ್ ಪೋಯಿ ಬೊಕ್ಕ ತಾನ್‌ಲಾ ಪೋಯೆ, ಆಂಡ ಜನೊಕುಲೆಗ್ ತೋಜುಲೆಕ್ಕ ಪೋವಂದೆ ದೆಂಗೊಂದು ಪೋಯೆ.</verse>
				<verse number="11">ಜಾತ್ರೆಡ್ ಯೆಹೂದ್ಯೆರೆ ಅಧಿಕಾರಿಲು, “ಯೇಸು ಓಲುಲ್ಲೆ?” ಪಂಡ್ದ್ ನಾಡೊಂದಿತ್ತೆರ್.</verse>
				<verse number="12">ಬೊಕ್ಕ ಜನೊಕುಲೆ ಗುಂಪುಲೆಡ್ ಆಯನ ಸಂಗತಿಡ್ ಗುಸುಗುಸು ಪಾತೆರ ನಡತೊಂದಿತ್ತ್‌ಂಡ್. ಕೆಲೆವೆರ್, “ಆಯೆ ಎಡ್ಡೆಂತಿನಾಯೆ,” ಪಂಡೆರ್. ನನ ಕೆಲೆವೆರ್, “ಅತ್ತ್.” ಕೆಲೆವೆರ್, “ಆಯೆ ಜನೊಕುಲೆನ್ ತಪ್ಪು ಸಾದಿಗ್ ಒಯ್ಪುಪೆ,” ಪಂಡೆರ್.</verse>
				<verse number="13">ಆಂಡ ಯೆಹೂದ್ಯೆರೆ ಅಧಿಕಾರಿಲೆ ಪೋಡಿಗೆಡ್ದ್ ಆಯ ಸಂಗತಿಡ್ ಹೆಚ್ಚ್ ಪಾತೆರಿಜೆರ್.</verse>
				<verse number="14">ಜಾತ್ರೆದ ನಡುಟು ಯೇಸು ದೇವಾಲಯೊಗು ಪೋದು ಬೋಧನೆ ಮಲ್ತೊಂದಿತ್ತೆ.</verse>
				<verse number="15">ಯೆಹೂದ್ಯೆರ್‌ ಐಕ್ ಅಚ್ಚಿರ ಆದ್, “ಬರವು ಕಲ್ಪಂದಿ ಉಂಬ್ಯಗ್ ಶಾಸ್ತ್ರೊಲು ತೆರಿದುಪ್ಪುನು ಎಂಚ?” ಪನೊಂದಿತ್ತೆರ್.</verse>
				<verse number="16">ಐಕ್ ಯೇಸು, “ಯಾನ್ ಪನ್ಪಿನ ಬೋಧನೆ ಎನ್ನವು ಅತ್ತ್, ಎನನ್ ಕಡಪುಡ್ದಿನ ದೇವೆರೆನವೇ,</verse>
				<verse number="17">ಆಯ ಚಿತ್ತದ ಲೆಕ್ಕ ನಡಪೆರೆ ಏರೆಗ್ ಮನಸುಂಡಾ ಅಕ್ಲೆಗ್ ಈ ಬೋಧನೆ ದೇವೆರೆಡ್ದ್ ಬೈದಿನವಾ, ಇಜ್ಜಿಂಡ ಎನ ಸ್ವಂತ ಅಧಿಕಾರೊಡ್ದು ಪಂಡಿನವಾ ಅಂದ್‌ದ್ ಗೊತ್ತಾವು.</verse>
				<verse number="18">ತನ ಸ್ವಂತ ಅಧಿಕಾರೊಡ್ದು ಪನ್ಪಿನಾಯೆ ತನ್ಕ್ ಮಾನಾದಿಗೆ ಬರೊಡಂದ್‌ದ್ ಬಯಕುವೆ, ತನನ್ ಕಡಪುಡ್ದಿನಾಯಗ್ ಮಾನಾದಿಗೆ ಬರೊಡಂದ್‌ದ್ ಬಯಕುನಾಯೆ ಸತ್ಯವಂತೆ. ಆಯಡ ಅನ್ಯಾಯ ಇಜ್ಜಿ.</verse>
				<verse number="19">ಮೋಶೆ ನಿಕ್ಲೆಗ್ ನ್ಯಾಯಕಟ್ಟ್ ಕೊರ್ತೆಡಲಾ ನಿಕ್ಲೆಡ್ ಒರಿಲಾ ನ್ಯಾಯಕಟ್ಟ್‌ದ ಲೆಕ್ಕ ನಡಪುಜರತ್ತಾ? ದಾಯೆ ಎನನ್ ಕೆರಿಯೆರೆ ತೂಪರ್‌?” ಅಂದ್‌ದ್ ಪಂಡೆ.</verse>
				<verse number="20">ಐಕ್ ಆ ಜನೊಕುಲು, “ನಿಕ್ಕ್ ದೆವ್ವ ಪತ್ತ್‌ದ್ಂಡ್! ನಿನನ್ ಕೆರಿಯೆರೆ ಏರ್ ತೂಪೆರ್?” ಪಂಡಿನೆಕ್ಕ್,</verse>
				<verse number="21">ಯೇಸು ಅಕ್ಲೆಡ, “ಯಾನ್ ಒಂಜೇ ಕೆಲಸೊನು ಮಲ್ತ್‌ದಿನಿ, ಐಕ್ ನಿಕುಲು ಮಾತೆರ್ಲಾ ಅಚ್ಚಿರ ಆತರ್.</verse>
				<verse number="22">ಮೋಶೆನ ಕಟ್ಟ್ ಮೀರ್‌ಯೆರೆ ಬಲ್ಲಿ ಅಂದ್‌ದ್ ಒರಿ ಸಬ್ಬತ್‌ದಿನೊಟು ಸುನ್ನತಿ ಮಲ್ತೊನ್ವೆ ಪಂಡ್ದಾಂಡ ಒಂಜಿ ಆಣ್ ಬಾಲೆಗ್ ಸುನ್ನತಿನ್ ಸಬ್ಬತ್‌ದಿನತಾನಿಲಾ ಮಲ್ಪುವರ್. ಅವು ಮೋಶೆಡ್ದ್ ಬೈದಿನವು ಅಂದ್‌ದ್ ಯಾನ್ ಪನಯೆ ಅವು ಮೂಲಪಿತೃಲೆ ಕಾಲೊಡ್ದು ಬೈದಿನವು.</verse>
				<verse number="23">ಒರಿ ಆಣ್ ಬಾಲೆಗ್ ಸಬ್ಬತ್‌ದಿನೊಟು ಸುನ್ನತಿ ಮಲ್ಪುನೆಡ್ದ್ ಮೋಶೆ ಮಲ್ತಿ ನ್ಯಾಯಕಟ್ಟ್‌ಲೆನ್ ಮೀರುಜೆ, ಆಂಡ ಯಾನ್ ಸಬ್ಬತ್‌ದಿನೊಟು ಒರಿಯನ್ ಗುಣ ಮಲ್ತಿನೆಕ್ಕ್ ಎನ ಮಿತ್ತ್ ದಾಯೆಗ್ ಕೋಪ ಮಲ್ಪುವರ್?</verse>
				<verse number="24">ಮೋನೆಗ್ ತಕ್ಕ ನ್ಯಾಯತೀರ್ಪು ಮಲ್ಪಂದೆ, ನ್ಯಾಯವಾಯಿನ ತೀರ್ಪು ಮಲ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="25">ಯೆರೂಸಲೇಮುಡು ಉಪ್ಪುನಾಕುಲೆಡ್ ಕೆಲೆವೆರ್, “ಅಕುಲು ಕೆರಿಯೆರೆ ನಾಡೊಂದಿತ್ತಿನಾಯೆ, ಇಂಬೆನೇ ಅತ್ತಾ?</verse>
				<verse number="26">ತೂಲೆ! ಇಂಬೆ ದಿಂಜ ಪಾತೆರುವೆ ಅತ್ತಾ? ಅಕುಲು ಆಯಗ್ ದಾಲಾ ಪನ್ಪುಜೆರ್‌! ಮುಖ್ಯಸ್ಥೆರ್ ಉಂಬೆನೇ ಬರೊಡಾಯಿ ಕ್ರಿಸ್ತೆ ಅಂದ್‌ದ್ ನಿಜಾದ್ ನಿಗಂಟ್ ಮಲ್ತೊಂದೆರಾ ದಾನೆ?</verse>
				<verse number="27">ಆಂಡ ಉಂಬೆ ಒಲ್ತಾಯೆ ಅಂದ್‌ದ್ ನಮ ತೆರಿದ, ಕ್ರಿಸ್ತೆ ಬನ್ನಗ ಆಯೆ ಒಲ್ತಾಯೆ ಅಂದ್‌ದ್ ಒರಿಯಗ್ಲಾ ತೆರಿಯಂದ್,” ಪಾತೆರೊಂದಿತ್ತೆರ್.</verse>
				<verse number="28">ಯೇಸು ಉಂದೆನ್ ತೆರಿದ್ ದೇವಾಲಯೊಡು ಬೋಧನೆ ಕೊರ್ದು ಗಟ್ಟಿಯಾದ್ ಪಂಡಿನಿ, “ಅಂದ್, ಎನನ್ ತೆರಿದರ್, ಯಾನ್ ಒಲ್ತಾಯೆಂದ್ ತೆರಿದರ್, ನಿಜನೇ ಆಂಡಲಾ ಯಾನ್ ಎನ್ನಾತೆಗೆ ಬೈದಿನಾಯೆ ಅತ್ತ್; ಎನನ್ ಕಡಪುಡ್ದಿನಾಯೆ ಸತ್ಯದಾಯೆ, ನಿಕುಲು ಆಯನ್ ತೆರಿದಿಜರ್.</verse>
				<verse number="29">ಯಾನ್ ಆಯನ್ ತೆರಿದೆ, ದಾಯೆಗಂದ್ಂಡ ಯಾನ್ ಆಯ ಕಡೆಡ್ದ್ ಬೈದಿನಾಯೆ ಎನನ್ ಆಯೆನೇ ಕಡಪುಡ್ದಿನಿ.”</verse>
				<verse number="30">ಅಪಗ ಆಯನ್ ಪತ್ತಿಯೆರೆ ತೂಯೆರ್, ಆಂಡಲಾ ಆಯನ್ ಪತ್ತುನ ಗಳಿಗೆ ಬರಂದೆ ಇತ್ತಿನೆಡ್ದ್ ಏರ್ಲಾ ಆಯನ ಮಿತ್ತ್ ಕೈ ಪಾಡಿಜೆರ್.</verse>
				<verse number="31">ಜನೊಕುಲೆಡ್ ಮಸ್ತ್ ಜನ ಆಯನ್ ನಂಬುದು, “ಕ್ರಿಸ್ತೆ ಬನ್ನಗ, ಉಂಬೆ ಮಲ್ತಿನೆಡ್ದ್ ಹೆಚ್ಚ್ ಕಾರ್ನಿಕೊಲೆನ್ ಮಲ್ಪುವೆನಾ?” ಪಂಡೆರ್.</verse>
				<verse number="32">ಜನೊಕುಲು ಆಯನ ಸಂಗತಿಡ್ ಗುಸುಗುಸು ಪಾತೆರೊಂದಿನೆನ್ ಪರಿಸಾಯೆರ್ ಕೇನ್ನಗ, ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತಿಯೆರೆಗ್ ಸಿಪಾಯಿಲೆನ್ ಕಡಪುಡಿಯೆರ್.</verse>
				<verse number="33">ಅಪಗ ಯೇಸು ಅಕ್ಲೆಡ, “ನನ ಒಂತೆ ಸಮಯ ಯಾನ್ ನಿಕ್ಲೆಡೊಪ್ಪ ಇತ್ತ್‌ದ್, ಐಡ್ದ್ ಬೊಕ್ಕ ಎನನ್ ಕಡಪುಡ್ದಿನಾಯ ಕೈತಲ್‌ ಪೋಪೆ.</verse>
				<verse number="34">ನಿಕುಲು ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್,” ಪಂಡೆ.</verse>
				<verse number="35">ಐಕ್ ಯೆಹೂದ್ಯೆರ್, “ಉಂಬೆ ನಂಕ್ ತಿಕ್ಕಂದಿಲೆಕ್ಕ ಒಡೆಗ್ ಪೋವೊಡು ಪಂಡ್‌ದುಲ್ಲೆ? ಗ್ರೀಕೆರೆ ಉಲಯಿ ಪರಡ್ದ್ ಪೋತಿ ನಮ್ಮಕುಲೆನ ಕೈತಲ್ ಪೋದು, ಗ್ರೀಕೆರೆಗ್ ಬೋಧನೆ ಮಲ್ಪೊಡುಂದುಲ್ಲೆನಾ?</verse>
				<verse number="36">ಎನನ್ ನಾಡುವರ್, ಆಂಡ ನಿಕ್ಲೆಗ್ ತಿಕ್ಕಯೆ, ಬೊಕ್ಕ ಯಾನ್ ಉಪ್ಪುನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಆಯೆ ಪನ್ಪಿನ ಪಾತೆರ ಎಂಚಿನಾದುಪ್ಪು?” ತನ್ಕುಲೆ ಉಲಯಿ ಪಾತೆರೊಂಡೆರ್.</verse>
				<verse number="37">ಆ ಜಾತ್ರೆದ ಮಲ್ಲ ದಿನತ ಕಡೆ ದಿನೊಟು ಯೇಸು ಲಕ್ಕ್‌ದ್ ಉಂತುದು ಸಾರಿಯೊಂದು, “ಏರೆಗಾಂಡಲಾ ಬಾಜೆಲ್ ಆದಿತ್ತ್ಂಡ ಆಯೆ ಎನ ಕೈತಲ್‌ ಬತ್ತ್‌ದ್ ಪರಡ್.</verse>
				<verse number="38">ಎನನ್ ನಂಬುನಾಯನ ಬಂಜಿಡ್ದ್ ಶಾಸ್ತ್ರೊಡು ಪಂಡಿಲೆಕ್ಕ ‘ಜೀವ ಇತ್ತಿ ನೀರ್‌ದ ತುದೆಕುಲು ಪರತೊಂದು ಪೋವು,’” ಪಂಡೆ.</verse>
				<verse number="39">ಉಂದೆನ್ ಆಯೆ ತನನ್ ನಂಬುನಾಕುಲು ಹೊಂದಿಯೆರೆ ಉಪ್ಪು ಪರಿಶುದ್ಧಾತ್ಮನ ಬಗೆಟ್ ಪಂಡೆ. ಯೇಸು ನನಲಾ ತನ ಮೈಮೆದ ಗದ್ದಿಗೆನ್ ಪಡೆವಂದೆ ಇತ್ತಿನೆಡ್ದ್, ಪರಿಶುದ್ಧಾತ್ಮ ವರ ನನಲಾ ಬತ್ತಿತ್‌ಜಿ.</verse>
				<verse number="40">ಜನೊಕುಲೆಡ್ ಕೆಲೆವೆರ್ ಆ ಪಾತೆರೊಲೆನ್ ಕೇಂಡ್ದ್, “ನಿಜಾದ್‌ಲಾ ಉಂಬೆ ಬರೊಡಾಯಿ ಆ ಪ್ರವಾದಿ!” ಅಂದ್‌ದ್ ಪಂಡೆರ್.</verse>
				<verse number="41">ಬೊಕ್ಕ ಕೆಲೆವೆರ್, “ಉಂಬೆ ಬರೊಡಾಯಿ ಕ್ರಿಸ್ತೆ ಪಂಡೆರ್. ನನ ಕೆಲೆವೆರ್ ಕ್ರಿಸ್ತೆ ಗಲಿಲಾಯೊಡ್ದು ಬರ್ಪಿನಿ ಎಂಚ?</verse>
				<verse number="42">ದಾವೀದನ ಸಂತಾನೊಡ್ದು ದಾವೀದೆ ಇತ್ತಿ ಬೇತ್ಲೆಹೇಮು ಪನ್ಪಿ ಗ್ರಾಮೊಡ್ದುಲಾ ಕ್ರಿಸ್ತೆ ಬರ್ಪೆ ಅಂದ್‌ದ್ ಶಾಸ್ತ್ರೊಡು ಉಂಡತ್ತಾ,” ಪಂಡೆರ್.</verse>
				<verse number="43">ಇಂಚ ಆಯನ ವಿಚಾರೊಡು ಜನೊಕುಲೆ ನಡುಟು ಭೇದ ಉಂಡಾಂಡ್.</verse>
				<verse number="44">ಅಕ್ಲೆಡ್ ಕೆಲೆವೆರ್ ಆಯನ್ ಪತ್ತೊಡು ಅಂದ್‌ದ್ ಇತ್ತೆರ್ಡಲಾ ಒರಿಲಾ ಆಯ ಮಿತ್ತ್ ಕೈ ಪಾಡ್ಜೆರ್.</verse>
				<verse number="45">ಐಡ್ದ್ ಬೊಕ್ಕ ಆ ಸಿಪಾಯಿಲು ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರೆ ಕೈತಲ್‌ ಬನ್ನಗ ಮೊಕುಲು, “ನಿಕುಲು ದಾಯೆ ಆಯನ್ ಪತ್ತ್‌ದ್ ಕನತಿಜರ್?” ಅಕ್ಲೆಡ ಕೇಂಡಿನೆಕ್ಕ್,</verse>
				<verse number="46">ಆ ಸಿಪಾಯಿಲು, “ಆ ನರಮಾನಿ ಪಾತೆರಿಲೆಕ್ಕ ಏರ್ಲಾ ಏಪಲಾ ಪಾತೆರ್ದ್‌ಜೆರ್‌!” ಉತ್ತರ ಕೊರಿಯೆರ್.</verse>
				<verse number="47">ಐಕ್ ಪರಿಸಾಯೆರ್, “ನಿಕುಲುಲಾ ಮರ್ಲಾಯರಾ?</verse>
				<verse number="48">ಮುಖ್ಯಸ್ಥೆರೆಡಾವಡ್, ಪರಿಸಾಯೆರೆಡಾವಡ್ ಏರಾಂಡಲಾ ಆಯನ್ ನಂಬುದೆರಾ?</verse>
				<verse number="49">ಮೋಶೆನ ನ್ಯಾಯಕಟ್ಟ್‌ನ್ ತೆರಿಯಂದಿ ಈ ಪುಂಡು ಶಾಪ ದಿಂಜಿದಿನವೇ!” ಪಂಡೆರ್.</verse>
				<verse number="50">ಅಕ್ಲೆಡ್ ಒರಿ ನಿಕೋದೇಮೆ ಪನ್ಪಿನಾಯೆ, ದುಂಬು ಯೇಸು ಕೈತಲ್‌ ಬತ್ತ್‌ತ್ತಿನಾಯೆ</verse>
				<verse number="51">ಆಯೆ ಅಕ್ಲೆಡ, “ಎಂಕ್ಲೆನ ನ್ಯಾಯಕಟ್ಟ್ ಸುರುಟ್ಟು ಒರಿಯನ್ ಪಿದುಕೊಂದು ಆಯೆ ಮಲ್ಪುನವು ದಾದ ಅಂದ್‌ದ್ ತೆರಿಯೊನಂದೆ ಆಯನ ಸಂಗತಿಡ್ ತೀರ್ಪು ಮಲ್ಪುನವು ಉಂಡಾ?” ಪಂಡಿನೆಕ್ಕ್,</verse>
				<verse number="52">ಅಕುಲು, “ಈಲಾ ಗಲಿಲಾಯದಾಯೆನಾ? ಗಲಿಲಾಯೊಡು ಪ್ರವಾದಿ ಪುಟ್ಟುನೇ ಇಜ್ಜಿ. ಶಾಸ್ತ್ರೊನು ನಾಡ್ದ್ ತೂಲ,” ಅಂದ್‌ದ್ ಪಂಡೆರ್.</verse>
				<verse number="53">ಬೊಕ್ಕ ಮಾತೆರ್ಲಾ ಅಕ್ಲಾಕ್ಲೆನ ಇಲ್ಲಗ್ ಪೋಯೆರ್.</verse>
			</chapter>
			<chapter number="8">
				<verse number="1">ಆಂಡ ಯೇಸು ಇಪ್ಪೆಗುಡ್ಡೆಗ್ ಪೋಯೆ.</verse>
				<verse number="2">ಮನದಾನಿ ಪುಲ್ಯಕಾಂಡೆ ಆಯೆ ದೇವಾಲಯೊಗು ಬನ್ನಗ ಮಾತ ಜನೊಕುಲು ಆಯ ಕೈತಲ್‌ ಬತ್ತೆರ್, ಆಯೆ ಅಲ್ಪ ಕುಲ್ಲೊಂದು ಅಕ್ಲೆಗ್ ಬೋಧನೆ ಮಲ್ತೊಂದುಪ್ಪುನಗ,</verse>
				<verse number="3">ಶಾಸ್ತ್ರಿಲುಲಾ ಪರಿಸಾಯೆರ್‌ಲಾ ವ್ಯಭಿಚಾರೊಡು ತಿಕ್ಕಿನ ಒಂಜಿ ಪೊಂಜೊವುನು ಆಯನ ಕೈತಲ್ ಕನತ್‌ದ್ ಅಕ್ಲೆನ ನಡುಟು ಉಂತಾದ್</verse>
				<verse number="4">“ಬೋಧಕ, ಈ ಪೊಂಜೊವು ವ್ಯಭಿಚಾರ ಮಲ್ಪುನಗನೇ ಕೈಕ್ ತಿಕ್ಕಿಯಲ್.</verse>
				<verse number="5">ಇಂಚಿತ್ತಿನಾಕುಲೆನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಎಂಕ್ಲೆಗ್ ಅಪ್ಪಣೆ ಕೊರ್ತೆ, ಮೊಲೆನ ಸಂಗತಿಡ್ ಈ ದಾದ ಪನ್ಪ?” ಅಂದ್‌ದ್ ಆಯಡ ಕೇಂಡೆರ್.</verse>
				<verse number="6">ಆಯ ಮಿತ್ತ್ ತಪ್ಪು ನಾಡ್ದ್ ಎಂಚಾಂಡಲಾ ಶೋಧನೆಡ್ ತಿಕ್ಕಾದ್ ಪಾಡೊಡು ಅಂದ್‌ದ್ ಎನ್ನ್‌ದ್ ಇಂಚ ಪಂಡೆರ್. ಆಂಡ ಯೇಸು ಬಗ್ಗ್‌ದ್ ಬಿರೆಲ್‌ಡ್ ನೆಲೊಟ್ಟು ಬರೆಯೊಂದಿತ್ತೆ.</verse>
				<verse number="7">ಅಕುಲು ಆಯಡ ಬುಡಂದೆ ಕೇನೊಂದಿತ್ತಿನೆಡ್ದ್, ಆಯೆ ಸರ್ತ ಆದ್ ಅಕ್ಲೆಡ, “ನಿಕ್ಲೆಡ್ ಪಾಪ ಮಲ್ಪಂದಿನಾಯೆ ಏರಾಂಡಲಾ ಇತ್ತೆರ್ಡ, ಆಯೆನೇ ದುಂಬತ್ತ ಆಲೆ ಮಿತ್ತ್ ಕಲ್ಲ್ ದಕ್ಕ್‌ಡ್.”</verse>
				<verse number="8">ಕುಡ ಬಗ್ಗ್‌ದ್ ನೆಲೊಟ್ಟು ಬರೆಯೊಂದಿತ್ತೆ.</verse>
				<verse number="9">ಆ ಪಾತೆರೊನು ಕೇಂಡ್ದ್ ತನ್ಕುಲೇ ಪಾಪಿಲಂದ್ ಉಡಲ್‌ಡೇ ಎನ್ನ್‌ದ್, ಹಿರಿಯಾಕುಲೆಡ್ದ್ ಪತ್ತ್‌ದ್ ಕಿನ್ಯಾಕುಲೆ ಮುಟ್ಟ ಒರಿಯ ಬೆರಿ ಒರಿ ಪಿದಯಿ ಪೋಯೆರ್. ಕಡೆಕ್ಕ್ ಯೇಸು ಬೊಕ್ಕ ನಡುಟು ಉಂತುದಿತ್ತಿ ಪೊಂಜೊವು ಮಾತ್ರ ಅವುಲು ಇತ್ತಲ್.</verse>
				<verse number="10">ಅಪಗ ಯೇಸು ಪೊಂಜೊವುನು ತೂದು ಆಲೆಡ, “ಅಮ್ಮಾ ನಿನ ಮಿತ್ತ್ ಅಪವಾದ ಪಾಡ್ದಿನಾಕುಲು ಓಲುಲ್ಲೆರ್? ನಿಕ್ಕ್ ಏರ್ಲಾ ತೀರ್ಪು ಕೊರ್ಜೆರಾ?” ಪಂಡೆ.</verse>
				<verse number="11">ಐಕ್ ಆಲ್, “ಏರ್ಲಾ ಇಜ್ಜಿ ಕರ್ತವಾ,” ಅಂದಲ್. ಯೇಸು ಆಲೆಗ್, “ಯಾನ್ಲಾ ನಿಕ್ಕ್ ತೀರ್ಪು ಕೊರ್ಪುಜಿ, ಪೋ, ನನ ಮಿತ್ತ್ ಪಾಪ ಮಲ್ಪಡ,” ಅಂದ್‌ದ್ ಪಂಡೆ.</verse>
				<verse number="12">ಯೇಸು ಕುಡ ಪರಿಸಾಯೆರೆಡ ಪಾತೆರಿಯೆರೆ ಸುರು ಮಲ್ತ್‌ದ್, “ಯಾನೇ ಲೋಕೊಗು ಬೊಲ್ಪು, ಎನ ಬೆರಿಯೆ ಬರ್ಪಿನಾಯೆ ಕತ್ತಲೆಡ್ ನಡಪಂದೆ ಜೀವ ಕೊರ್ಪಿ ಬೊಲ್ಪುನು ಪಡೆಯಿನಾಯೆ ಆದುಪ್ಪುವೆ,” ಅಂದ್‌ದ್ ಪಂಡೆ.</verse>
				<verse number="13">ಉಂದೆನ್ ಕೇಂಡ್ದ್ ಪರಿಸಾಯೆರ್ ಆಯಡ, “ನಿನ ಸಂಗತಿಡ್ ಈಯೇ ಸಾಕ್ಷಿ ಪನೊಂದುಲ್ಲ; ಅಂಚಾದ್ ನಿನ ಸಾಕ್ಷಿ ನಿಜ ಆವಂದ್,” ಪಂಡೆರ್.</verse>
				<verse number="14">ಕುಡ ಯೇಸು ಅಕ್ಲೆಡ, “ಯಾನ್ ಒಲ್ಪಡ್ದ್ ಬೈದಿನಾಯೆ, ಒಡೆಗ್ ಪೋಪಿನಾಯೆ ಅಂದ್‌ದ್ ಎಂಕ್ ತೆರಿದುಪ್ಪುನೆಡ್ದ್ ಎನ ಸಂಗತಿಡ್ ಯಾನೇ ಸಾಕ್ಷಿ ಪಂಡೊಂಡಲಾ ಎನ ಸಾಕ್ಷಿ ನಿಜ ಆದುಪ್ಪುಂಡು. ಆಂಡ ಯಾನ್ ಒಲ್ಪಡ್ದ್ ಬೈದಿನಾಯೆ ಒಡೆಗ್ ಪೋಪೆ ಅಂದ್‌ದ್ ನಿಕುಲು ತೆರಿದಿಜರ್.</verse>
				<verse number="15">ನಿಕುಲು ಲೋಕದಾಕುಲೆ ಲೆಕ್ಕ ತೀರ್ಪು ಮಲ್ಪುನಾಕುಲಾದುಲ್ಲರ್, ಆಂಡ ಯಾನ್ ಏರೆಗ್ಲಾ ನ್ಯಾಯತೀರ್ಪು ಮಲ್ಪುಜಿ,</verse>
				<verse number="16">ತೀರ್ಪು ಮಲ್ತ್ಂಡಲಾ ಎನ ನ್ಯಾಯತೀರ್ಪು ನಿಜವಾಯಿನವು ಆದುಪ್ಪುಂಡು. ದಾಯೆ ಪಂಡ ಯಾನ್ ಒಂಟಿ ಅತ್ತ್, ಎನನ್ ಕಡಪುಡಿ ಅಮ್ಮೆ ಎನ ಒಟ್ಟುಗು ಉಲ್ಲೆ.</verse>
				<verse number="17">ಇರ್ವೆರೆ ಸಾಕ್ಷಿ ನಿಜ ಅಂದ್‌ದ್ ನಿಕ್ಲೆನ ನ್ಯಾಯಕಟ್ಟ್‌ಡೇ ಬರೆತ್ಂಡ್.</verse>
				<verse number="18">ಎನ ಸಂಗತಿಡ್ ಯಾನೇ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ, ಅತ್ತಂದೆ ಎನನ್ ಕಡಪುಡ್ದಿನ ಅಮ್ಮೆ ಎನ ಸಂಗತಿಡ್ ಸಾಕ್ಷಿ ಪನ್ಪೆ,” ಪಂಡೆ.</verse>
				<verse number="19">ಅಪಗ ಅಕುಲು, “ನಿನ ಅಮ್ಮೆ ಓಲುಲ್ಲೆ?” ಅಂದ್‌ದ್ ಕೇನ್ನಗ ಯೇಸು ಅಕ್ಲೆಡ ಪಂಡಿನಿ, “ನಿಕುಲು ಎನನ್ಲಾ ತೆರಿದಿಜರ್, ಎನ ಅಮ್ಮೆರೆನ್ಲಾ ತೆರಿದಿಜರ್. ಎನನ್ ತೆರಿದಿತ್ತ್‌ರ್ಡ, ಎನ ಅಮ್ಮೆರೆನ್ಲಾ ತೆರಿದಿತ್ತ್‌ವರ್.”</verse>
				<verse number="20">ಯೇಸು ದೇವಾಲಯದ ಉಲಯಿ ಕಾಣಿಕೆ ದೀಪಿನ ಜಾಗ್‌ದ ಅಂಗಣೊಡು ಬೋಧನೆ ಮಲ್ತೊಂದುಪ್ಪುನಗ ಈ ಪಾತೆರೊಲೆನ್ ಪಂಡೆ. ಆಯನ ಕಾಲ ನನಲಾ ಬರಂದೆ ಇತ್ತಿನೆಡ್ದ್, ಆಯನ್ ಏರ್ಲಾ ಪತ್ತಿಜೆರ್.</verse>
				<verse number="21">ಯೇಸು ಕುಡ ಅಕ್ಲೆಡ, “ಯಾನ್ ಮುಲ್ತುಡ್ದು ಪೋಪೆ, ನಿಕುಲು ಎನನ್ ನಾಡುವರ್, ಬೊಕ್ಕ ನಿಕ್ಲೆನ ಪಾಪೊಡೇ ನಿಕುಲು ಸೈಪರ್; ಬೊಕ್ಕ ಯಾನ್ ಪೋಪಿನಡೆ ನಿಕ್ಲೆಗ್ ಬರಿಯೆರೆ ಆವಂದ್,” ಪಂಡೆ.</verse>
				<verse number="22">ಆ ಪಾತೆರೊಗು ಯೆಹೂದ್ಯೆರ್, “ಯಾನ್ ಪೋಪಿನಡೆ ನಿಕುಲು ಬರಯರ್? ಅಂದ್‌ದ್ ಪನ್ಪೆ ಅತ್ತಾ? ಉಂಬೆ ತನನ್ ತಾನೇ ಕೆರಿಯೆರೆ ತೂಪೆನಾ ದಾನ್ನ?” ಅಂದ್‌ದ್ ಪಾತೆರೊಂಡೆರ್.</verse>
				<verse number="23">ಆಯೆ ಅಕ್ಲೆಡ, “ನಿಕುಲು ತಿರ್ತ್‌ದಾಕುಲು, ಯಾನ್ ಮಿತ್ತ್‌ದಾಯೆ, ನಿಕುಲು ಈ ಲೋಕದಾಕುಲು, ಯಾನ್ ಈ ಲೋಕದಾಯೆ ಅತ್ತ್.</verse>
				<verse number="24">ಅವೆಡ್ದಾವರ ನಿಕುಲು ನಿಕ್ಲೆನ ಪಾಪೊಡ್ದೇ ಸೈಪರಂದ್‌ದ್ ನಿಕ್ಲೆಗ್ ಪನ್ಪೆ. ‘ಯಾನ್ ಆಯೆನೇ,’ ಅಂದ್‌ದ್ ನಿಕುಲು ನಂಬುಜರ್ಡ, ನಿಕುಲು ನಿಕ್ಲೆನ ಪಾಪೊಡ್ದೇ ಸೈತ್ ಪೋವರ್.”</verse>
				<verse number="25">ಅಪಗ ಅಕುಲು ಆಯಡ, “ಈ ಏರ್?” ಅಂದ್‌ದ್ ಪನ್ನಗ ಯೇಸು ಅಕ್ಲೆಡ, “ನಿಕ್ಲೆಗ್ ಸುರುಡ್ದಿಂಚಿ ತೆರಿಪಾವೊಂದು ಇತ್ತಿನಾಯೆನೆ ಯಾನ್.</verse>
				<verse number="26">ನಿಕ್ಲೆನ ಸಂಗತಿಡ್ ಪನಿಯೆರೆಗ್ ನಿಕ್ಲೆನ ಮಿತ್ತ್ ತೀರ್ಪು ಮಲ್ಪೆರೆಗ್ಲಾ ಮಸ್ತ್ ವಿಷಯೊಲು ಎಂಕುಂಡು, ಆಂಡ ಎನನ್ ಕಡಪುಡ್ದಿನಾಯೆ ಸತ್ಯವಂತೆ, ಆಯಡ್ದ್ ಕೇಂಡಿನೆನೇ ಯಾನ್ ಲೋಕೊಗು ಪನ್ಪೆ,” ಅಂದ್‌ದ್ ಪಂಡೆ.</verse>
				<verse number="27">ಯೇಸು ಅಮ್ಮೆರೆನ ಸಂಗತಿಡ್ ಪಂಡಿನಿಂದ್ ಅಕ್ಲೆಗ್ ಗೊತ್ತಾಯಿಜಿ.</verse>
				<verse number="28">ಇಂಚ ಉಪ್ಪುನಗ ಯೇಸು, “ನಿಕುಲು ನರಮಾನಿ ಮಗನ್ ಮಿತ್ತ್ ಏರಾನಗ, ಉಂಬೆ ಆಯೆನೇ ಪಂಡ್ದ್‌ಲಾ ಎನ್ನಾತೆಗ್ ಎನ ಅಧಿಕಾರೊಡು ಒವೆನ್ಲಾ ಮಲ್ಪಂದೆ, ಅಮ್ಮೆ ತನ್ಕ್ ಕಲ್ಪಾಯಿ ಪಾತೆರ ಮಾತ್ರ ಪನೊಂದುಲ್ಲೆ ಅಂದ್‌ದ್ ಎನ ಸಂಗತಿಡ್ ನಿಕ್ಲೆಗ್ ಗೊತ್ತಾವು.</verse>
				<verse number="29">ಎನನ್ ಕಡಪುಡ್ದಿನಾಯೆ ಎನಡೊಪ್ಪ ಉಲ್ಲೆ, ಯಾನ್ ಆಯಗ್ ಮೆಚ್ಚಿಗೆ ಆಪಿನೆನೇ ಏಪಲಾ ಮಲ್ಪುನೆಡ್ದ್, ಆಯೆ ಎನನ್ ಒಂಟಿಯಾದ್ ಬುಡ್ದು ಬುಡ್ತುಜೆ,” ಪಂಡೆ.</verse>
				<verse number="30">ಆಯೆ ಈ ಸಂಗತಿಲೆನ್ ಪನೊಂದುಪ್ಪುನಗ ಮಸ್ತ್ ಜನ ಆಯನ್ ನಂಬಿಯೆರ್.</verse>
				<verse number="31">ಅಪಗ ಯೇಸು ತನನ್ ನಂಬುದಿನ ಯೆಹೂದ್ಯೆರೆಡ, “ನಿಕುಲು ಎನ ಪಾತೆರೊಲೆಡ್ ನಿಲೆ ಆದಿತ್ತರ್ಡ, ನಿಜಾದ್ ಎನ ಶಿಷ್ಯೆರಾದ್ ಸತ್ಯೊನು ತೆರಿಯೊನ್ವರ್.</verse>
				<verse number="32">ಬೊಕ್ಕ ಸತ್ಯ ನಿಕ್ಲೆನ್ ಬುಡುಗಡೆ ಮಲ್ಪುಂಡು,” ಪಂಡೆ.</verse>
				<verse number="33">ಐಕ್ ಯೆಹೂದ್ಯೆರ್, “ಎಂಕುಲು ಅಬ್ರಹಾಮುನ ಸಂತಾನದಾಕುಲು, ಎಂಕುಲು ಏರೆಗ್ಲಾ ಏಪಲಾ ಗುಲಾಮೆರ್ ಆದಿತಿಜ, ಅಂಚಾದ್ ನಿಕ್ಲೆಗ್ ಬುಡುಗಡೆ ಆಪುಂಡು ಅಂದ್‌ದ್ ಈ ಪನ್ಪಿನಿ ಎಂಚ?” ಪಂಡೆರ್.</verse>
				<verse number="34">ಐಕ್ ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಪಾಪ ಮಲ್ಪುನಾಕುಲು ಮಾತೆರ್ಲಾ ಪಾಪೊಗು ಗುಲಾಮೆರ್ ಆದುಲ್ಲೆರ್.</verse>
				<verse number="35">ಗುಲಾಮೆ ಶಾಶ್ವತ ಆದ್ ಇಲ್ಲದಾಯೆ ಆದುಪ್ಪುಜೆ. ಆಂಡ ಮಗೆ ಏಪೊಗ್ಲಾ ಇಲ್ಲದಾಯೆ ಆದುಪ್ಪುವೆ.</verse>
				<verse number="36">ಅಂಚಾಯಿನೆಡ್ದ್ ಮಗೆ ನಿಕ್ಲೆನ್ ಬುಡುಗಡೆ ಮಲ್ತೆಡ, ನಿಜಾದ್‌ಲಾ ನಿಕ್ಲೆಗ್ ಬುಡುಗಡೆ ಆಪುಂಡು.</verse>
				<verse number="37">ನಿಕುಲು ಅಬ್ರಹಾಮು ಸಂತಾನದಾಕುಲು ನಿಜ; ಆಂಡಲಾ ಎನ ಪಾತೆರೊಲು ನಿಕ್ಲೆಗ್ ತಾಗಂದೆ ಸ್ವೀಕಾರ ಮಲ್ಪಂದಿನೆಡ್ದ್, ಎನನ್ ಕೆರಿಯೆರೆ ತೂಪರ್,</verse>
				<verse number="38">ಯಾನ್ ಎನ ಅಮ್ಮೆ ಒಟ್ಟುಡು ಇತ್ತ್‌ದ್ ತೂತಿನೆನ್ ಪನ್ಪೆ, ಆಂಡ ನಿಕುಲುಲಾ ನಿಕ್ಲೆನ ಅಮ್ಮೆರೆಡ್ದ್ ಕೇಂಡಿನೆನ್ ಮಲ್ಪುಲೆ,” ಅಂದ್‌ದ್ ಪಂಡೆ.</verse>
				<verse number="39">ಐಕ್ ಅಕುಲು, “ಎಂಕ್ಲೆನ ಅಮ್ಮೆ ಅಬ್ರಹಾಮು,” ಪನ್ನಗ ಯೇಸು ಅಕ್ಲೆಡ, “ನಿಕುಲು ಅಬ್ರಹಾಮುನ ಜೋಕುಲು ಆದಿತ್ತ್ಂಡ ಅಬ್ರಹಾಮು ಮಲ್ತಿ ಕಾರ್ಯೊಲೆನ್ ಮಲ್ತುದ್ವರ್.</verse>
				<verse number="40">ನಿಕುಲು ಅಂಚ ಮಲ್ಪಂದೆ ದೇವೆರೆಡ್ದ್ ಕೇಂಡಿನ ಸತ್ಯೊನು ನಿಕ್ಲೆಗ್ ಪಂಡಿನಾಯೆ, ಎನನೇ ಕೆರಿಯೆರೆ ತೂವೊಂದುಲ್ಲರ್, ಅಬ್ರಹಾಮು ಇಂಚ ಮಲ್ತ್‌ಜೆ</verse>
				<verse number="41">ನಿಕುಲು ನಿಕ್ಲೆ ಅಮ್ಮೆರೆನ ಕೆಲಸೊಲೆನ್ ಮಲ್ಪುವರ್,” ಅಂದ್‌ದ್ ಪಂಡೆ. ಐಕ್ ಅಕುಲು ಆಯಡ, “ಎಂಕುಲು ಹಾದ್ರೊಗು ಪುಟ್ಟುದಿನಾಕುಲು ಅತ್ತ್; ಎಂಕ್ಲೆಗ್ ಒರಿಯೇ ಅಮ್ಮೆ, ಆಯೆ ದೇವೆರೇ,” ಪಂಡೆರ್.</verse>
				<verse number="42">ಯೇಸು ಅಕ್ಲೆಡ, “ದೇವೆರ್ ನಿಕ್ಲೆನ ಅಮ್ಮೆ ಆದಿತ್ತ್ಂಡ, ಎನನ್ ಪ್ರೀತಿ ಮಲ್ತುದ್ವರ್. ದಾಯೆಗಂದ್ಂಡ ಯಾನ್ ದೇವೆರೆಡ್ದೇ ಪಿದಾಡ್ದ್ ಲೋಕೊಗು ಬೈದಿನಾಯೆ ಆದುಲ್ಲೆ. ಎನ್ನಾತೆಗ್ ಯಾನೇ ಬೈದಿಜಿ, ಆಯೆನೇ ಎನನ್ ಕಡಪುಡುದೆ.</verse>
				<verse number="43">ಎನ ಬೋಧನೆಗ್ ಕೆಬಿ ಕೊರಂದೆ ಉಪ್ಪುನವೇ ನೆಕ್ಕ್ ಕಾರಣ ನಿಕುಲು ಎನ ಪಾತೆರೊನು ಅರ್ಥ ಮಲ್ತೊನುಜರ್.</verse>
				<verse number="44">ನಿಕ್ಲೆನ ಅಮ್ಮೆ ಸೈತಾನೆ ನಿಕುಲು ಆ ಅಮ್ಮೆರೆಡ್ದ್ ಪುಟ್ಟಿದಿನಾಕುಲಾದ್ ನಿಕ್ಲೆ ಅಮ್ಮೆರೆನ ದುರ್ಬುಧಿನೇ ನಡಪಾವೊಡು ಪಂಡ್ದ್ ಉಲ್ಲರ್. ಆಯೆ ಸುರುಡ್ದೇ ಮಾನ ಕೆರ್ಪಿನಾಯೆ ಆದಿತ್ತ್‌ದ್, ಸತ್ಯೊಗು ಉಂತುದುಜೆ. ಆಯಡ ಸತ್ಯ ಪನ್ಪಿನ ಇಜ್ಜೇ ಇಜ್ಜಿ. ಆಯನ ಸ್ವಭಾವದಲೆಕ್ಕನೇ ಸುಳ್ಳು ಪಾತೆರ್‌ವೆ. ದಾಯೆಗ್ ಪಂಡ ಆಯೆ ಸುಳ್ಳುಗಾರೆಲಾ ಸುಳ್ಳುದ ಅಮ್ಮೆಲಾ ಆದುಲ್ಲೆ.</verse>
				<verse number="45">ಯಾನ್ ಸತ್ಯೊನು ಪನ್ಪಿನಾಯೆ ಆದಿತ್ತಿನೆಡ್ದ್ ನಿಕುಲು ಎನನ್ ನಂಬುಜರ್</verse>
				<verse number="46">ಎನಡ ಪಾಪೊನು ತೋಜಾದ್ ಕೊರ್ಪಿನಾಕುಲು ನಿಕ್ಲೆಡ್ ಏರುಲ್ಲೆರ್? ಯಾನ್ ಸತ್ಯನೇ ಪನ್ಪಿನಾಂಡ ಎನನ್ ದಾಯೆಗ್ ನಂಬುಜರ್?</verse>
				<verse number="47">ದೇವೆರೆಡ್ದ್ ಪುಟ್ಟಿದಿನಾಯೆ, ದೇವೆರೆ ಪಾತೆರೊಲೆನ್ ಕೇನ್ವೆ. ನಿಕುಲು ದೇವೆರೆಡ್ದ್ ಪುಟ್ಟಂದಿನೆಡ್ದ್, ನಿಕುಲು ದೇವೆರೆ ಪಾತೆರೊಲೆನ್ ಕೇನುಜರ್,” ಪಂಡೆ.</verse>
				<verse number="48">ಐಕ್ ಯೆಹೂದ್ಯೆರ್, “ಈ ಸಮಾರ್ಯದಾಯೆಲಾ ದೆವ್ವ ಪತ್ತ್‌ದಿನಾಯೆಲಾ ಆದುಲ್ಲ ಅಂದ್‌ದ್ ಎಂಕುಲು ಪನ್ಪಿನವು ಸರಿಯತ್ತಾ?” ಅಂದ್‌ದ್ ಕೇನ್ನಗ,</verse>
				<verse number="49">ಯೇಸು, “ಯಾನ್ ದೆವ್ವ ಪತ್ತ್‌ದಿನಾಯೆ ಅತ್ತ್, ಎನ ಅಮ್ಮೆರೆನ್ ಸನ್ಮಾನ ಮಲ್ಪುನಾಯೆ ಆದುಲ್ಲೆ, ಆಂಡಲಾ ನಿಕುಲು ಎನನ್ ಅವಮಾನ ಮಲ್ಪುವರ್.</verse>
				<verse number="50">ಎಂಕ್ ಮಾನಾದಿಗೆ ತಿಕ್ಕೊಡಂದ್ ಯಾನ್ ಬಯಕುಜಿ, ಎಂಕ್ ಮಾನಾದಿಗೆ ಬರೊಡಂದ್‌ದ್ ಬಯಕುನಾಯೆ ಒರಿ ಉಲ್ಲೆ. ಆಯೆನೇ ನ್ಯಾಯತೀರ್ಪುನಾಯೆ.</verse>
				<verse number="51">ನಿಕ್ಲೆಗ್ ನಿಜಾದ್ ಪನ್ಪೆ, ಏರಾಂಡಲಾ ಎನ ಪಾತೆರೊನು ಕೈಕೊಂದು ನಡತೆಡ, ಆಯೆ ಮರಣೊನು ಏಪೊಗ್ಲಾ ತೂವಯೆ,” ಅಂದ್‌ದ್ ಪಂಡೆ.</verse>
				<verse number="52">ಐಕ್ ಯೆಹೂದ್ಯೆರ್, “ಈ ದೆವ್ವ ಪತ್ತ್‌ದಿನಾಯೆ ಅಂದ್‌ದ್ ಇತ್ತೆ ಎಂಕ್ಲೆಗ್ ತೆರಿಂಡ್, ಅಬ್ರಹಾಮು ಸೈತೆ, ಪ್ರವಾದಿಲು ಸೈತೆರ್, ಆಂಡ ಎನ ಪಾತೆರೊನು ಕೈಕೊಂದು ನಡಪುನಾಕುಲು ಏಪೊಗ್ಲಾ ಮರಣೊನು ತೂವಯೆರ್‌ ಪನ್ಪ.</verse>
				<verse number="53">ಎಂಕ್ಲೆನ ಮೂಲದಾಯೆ ಆದುಪ್ಪು ಅಬ್ರಹಾಮುಡ್ದ್ ಈ ಮಲ್ಲಾಯೆನಾ? ಆಯೆಲಾ ಸೈತ್ ಪೋಯೆ, ಪ್ರವಾದಿಲುಲಾ ಸೈತ್ ಪೋಯೆರ್, ನಿನನ್ ಈ ಏರ್ ಅಂದ್‌ದ್ ತೆರಿಯೊನ್ವ?” ಕೇಂಡಿನೆಕ್ಕ್</verse>
				<verse number="54">ಯೇಸು, “ಎನನ್ ಯಾನ್ ಮೆಚ್ಚಾವೊಂಡೆಡ ಎನ ಮೈಮೆ ಅರ್ಥದಾಂತಿನವು. ಎನ ಮೈಮೆನ್ ತೋಜಾವುನಾಯೆ ಎನ ಅಮ್ಮೆ ನಿಕುಲು ಆಯನ್ ಎಂಕ್ಲೆನ ದೇವೆರ್ ಪನ್ಪರ್.</verse>
				<verse number="55">ಆಂಡಲಾ ನಿಕುಲು ಆಯನ್ ತೆರಿಯಂದೆ ಉಲ್ಲರ್, ಯಾನಾಂಡಲಾ ಆಯನ್ ತೆರಿದೆ. ಆಯನ್ ತೆರಿದಿಜೆ ಪಂಡ್ಂಡ ನಿಕ್ಲೆನ ಲೆಕ್ಕನೇ ಸುಳ್ಳುದಾಯೆ ಆಪೆ; ಆಂಡ ಆಯನ್ ಯಾನ್ ತೆರಿದೆ ಬೊಕ್ಕ ಆಯನ ಪಾತೆರೊಲೆನ್ ಕೈಕೊಂದು ನಡಪುವೆ.</verse>
				<verse number="56">ನಿಕ್ಲೆನ ಮೂಲಪಿತೃ ಆದುಪ್ಪು ಅಬ್ರಹಾಮು, ಎನ ದಿನೊನು ತಾನ್‌ಲಾ ತೂವೆ ಅಂದ್‌ದ್ ಕುಸಿಟಿತ್ತೆ. ಆಯೆ ಅವೆನ್ ತೂದು ಸಂತೋಷ ಪಡೆಯೆ,” ಪಂಡೆ.</verse>
				<verse number="57">ಐಕ್ ಯೆಹೂದ್ಯೆರ್, “ನಿಕ್ಕ್ ನನಲಾ ಐವ ವರ್ಸ ಆತಿಜಿ, ಅಬ್ರಹಾಮುನು ತೂತನಾ?” ಪನ್ನಗ,</verse>
				<verse number="58">ಯೇಸು, “ನಿಕ್ಲೆಗ್ ನಿಜಾದ್ ಪನ್ಪೆ, ಅಬ್ರಹಾಮು ಪುಟ್ಟುನೆಕ್ಕ್ ದುಂಬುಡ್ದಿಂಚಿ ಯಾನ್ ಉಲ್ಲೆ,” ಪಂಡೆ.</verse>
				<verse number="59">ಅಕುಲು ಈ ಪಾತೆರೊನು ಕೇಂಡ್ದ್, ಆಯನ್ ಕೆರಿಯೆರೆಗಾದ್ ಕಲ್ಲ್ ದೆತ್ತೊನಿಯೆರೆ ಪೋನಗ, ಯೇಸು ದೆಂಗೊಂದು ದೇವಾಲಯೊಡ್ದು ಪಿದಯಿ ಪೋಯೆ.</verse>
			</chapter>
			<chapter number="9">
				<verse number="1">ಯೇಸು ಪೋವೊಂದುಪ್ಪುನಗ ಒಂಜಿ ಪುಟ್ಟು ಕುರುಡನ್ ತೂಯೆ.</verse>
				<verse number="2">ಆಯನ ಶಿಷ್ಯೆರ್, “ಓ ಗುರೂ, ಉಂಬೆ ಕುರುಡೆ ಆದ್ ಪುಟ್ಟಿಯೆರೆ ಏರ್ ಪಾಪ ಮಲ್ತ್‌ದಿನಿ? ಉಂಬೆನಾ, ಉಂಬ್ಯನ ಅಪ್ಪೆಅಮ್ಮೆನಾ?” ಆಯಡ ಕೇಂಡೆರ್.</verse>
				<verse number="3">ಐಕ್ ಯೇಸು, “ಉಂಬೆಲಾ ಪಾಪ ಮಲ್ತ್‌ಜೆ, ಉಂಬ್ಯನ ಅಪ್ಪೆಅಮ್ಮೆಲಾ ಪಾಪ ಮಲ್ತ್‌ಜೆರ್, ದೇವೆರೆ ಕಾರ್ಯೊಲು ಉಂಬ್ಯಡ ತೋಜಿದ್ ಬರಿಯೆರೆ ಇಂಚ ಆಂಡ್.</verse>
				<verse number="4">ಎನನ್ ಕಡಪುಡ್ದಿನಾಯನ ಕಾರ್ಯೊಲೆನ್ ಪಗೆಲ್‌ಗೆ ಮಲ್ಪೊಡು ರಾತ್ರೆ ಬರ್ಪುಂಡು, ಅವು ಬತ್ತಿ ಬೊಕ್ಕ ಏರೆಗ್ಲಾ ಬೇಲೆ ಮಲ್ಪೆರೆ ಆಪುಜಿ</verse>
				<verse number="5">ಯಾನ್ ಲೋಕೊಡು ಉಪ್ಪುನಗ, ಲೋಕೊಗು ಬೊಲ್ಪು ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="6">ಉಂದೆನ್ ಪಂಡಿ ಬೊಕ್ಕ ನೆಲಕ್ ಉಬ್ಬಿದ್, ಆ ಉಬ್ಬಿನೀರ್‌ಡ್ದ್ ಕೆಸರ್ ಲೇಪ ಮಲ್ತ್‌ದ್, ಆ ಲೇಪೊನು ಕುರುಡನ ಕಣ್ಣ್‌ಗ್ ಪೂಜಿದ್</verse>
				<verse number="7">ಆಯಡ, “ಈ ಸಿಲೋವ ಕೆದುಕು ಪೋದು ದೆಕ್ಕೊನ್ಲ,” ಪಂಡೆ. (ಸಿಲೋವಾ ಪನ್ಪಿ ಪಾತೆರೊಗು “ಕಡಪುಡ್ದಿನಾಯೆ” ಅಂದ್‌ದ್ ಅರ್ಥ). ಆಯೆ ಪೋದು ದೆಕ್ಕೊಂದು ಪಿರ ಬನ್ನಗ ಕಣ್ಣ್ ತೋಜುನಾಯೆ ಆದ್ ಬತ್ತೆ.</verse>
				<verse number="8">ಅಪಗ ನಿರೆಕರೆತಾಕುಲು ಆಯೆ ನಟ್ಟುನಾಯೆ ಆದಿತ್ತಿನೆನ್ ಸುರುಟ್ಟು ತೂತಿನಾಕುಲು “ಉಂಬೆ ಕುಲ್ಲೊಂದಿತ್ತಿ ಆ ನಟ್ಟುನಾಯೆ ಅತ್ತಾ,” ಪಂಡೆರ್.</verse>
				<verse number="9">ಕೆಲೆವೆರ್, ಅಂದ್ “ಆಯೆನೇ, ಪಂಡೆರ್; ನನ ಕೆಲೆವೆರ್, ಆಯೆ ಉಂಬೆ ಅತ್ತ್, ಆಯ ಲೆಕ್ಕ ಉಲ್ಲೆ,” ಪಂಡೆರ್. ಆಂಡ ಆ ಕುರುಡೆ, “ಯಾನ್ ಆಯೆನೇ.” ಪಂಡೆ.</verse>
				<verse number="10">ಅಪಗ ಅಕುಲು ಆಯಡ, “ನಿಕ್ಕ್ ಕಣ್ಣ್‌ದ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಆಯಡ ಕೇಂಡಿನೆಕ್ಕ್,</verse>
				<verse number="11">“ಯೇಸು ಪನ್ಪಿನಾಯೆ ಒರಿ ಉಲ್ಲೆತ್ತಾ, ಆಯೆನೆ ಉಬ್ಬಿನೀರ್‌ಡ್ ಮಣ್ಣ್‌ದ ಲೇಪ ಮಲ್ತ್‌ದ್ ಎನ ಕಣ್ಣ್‌ಗ್ ಪೂಜಿದ್ ‘ಸಿಲೋವ ಕೆದುಕು ಪೋದು ದೆಕ್ಕೊನ್ಲ,’ ಪಂಡೆ. ಯಾನ್ ಪೋದು ದೆಕ್ಕೊಂಡೆ, ಕಣ್ಣ್‌ದ ದೃಷ್ಟಿ ಬತ್ತ್ಂಡ್,” ಪಂಡೆ</verse>
				<verse number="12">ಅಪಗ ಅಕುಲು ಆಯಡ, “ಆಯೆ ಓಲುಲ್ಲೆ?” ಅಂದ್‌ದ್ ಆಯಡ ಕೇಂಡಿನೆಕ್ಕ್ ಆಯೆ, “ಎಂಕ್ ಗೊತ್ತಿಜ್ಜಿ.” ಅಂದ್‌ದ್ ಪಂಡೆ.</verse>
				<verse number="13">ಐಡ್ದ್ ಬೊಕ್ಕ ಕುರುಡೆ ಆದಿತ್ತ್‌ದ್ ದೃಷ್ಟಿ ಬತ್ತಿ ಉಂಬ್ಯನ್ ಪರಿಸಾಯೆರೆ ಕೈತಲ್‌ ಲೆತ್ತೊಂದು ಪೋಯೆರ್.</verse>
				<verse number="14">ಯೇಸು ಮಣ್ಣ್‌ದ ಲೇಪ ಪಾಡ್ದ್ ಆಯಗ್ ಕಣ್ಣ್‌ದ ದೃಷ್ಟಿ ಕೊರ್ತಿನ ದಿನ ಸಬ್ಬತ್‌ದಿನ ಆದಿತ್ತ್ಂಡ್.</verse>
				<verse number="15">ಅವೆಡ್ದಾವರ ಆ ಪರಿಸಾಯೆರ್‌ಲಾ ಆಯನ್ ವಿಚಾರ ಮಲ್ತ್‌ದ್, “ನಿಕ್ಕ್ ಎಂಚ ಕಣ್ಣ್ ತೋಜ್ಂಡ್?” ಅಂದ್‌ದ್ ಕೇಂಡೆರ್. ಆಯೆ ಅಕ್ಲೆಡ, “ಮಣ್ಣ್‌ದ ಲೇಪ ಎನ ಕಣ್ಣ್‌ಗ್ ಪೂಜಿಯೆ. ಯಾನ್ ದೆಕ್ಕೊಂಡೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="16">ಆ ಪರಿಸಾಯೆರೆಡ್ ಕೆಲೆವೆರ್, “ಈ ನರಮಾನಿ ದೇವೆರೆಡ್ದ್ ಬೈದಿನಾಯೆ ಆದುಪ್ಪಯೆ ದಾಯೆಗ್ ಪಂಡ ಆಯೆ ಸಬ್ಬತ್‌ದಿನೊನ್ಲಾ ಗೆನ್ಪುಜೆ.” ಪಂಡೆರ್. ನನ ಕೆಲೆವೆರ್, “ಇಂಚಿತ್ತಿ ಕಾರ್ನಿಕೊಲೆನ್ ಪಾಪಿ ಆಯಿ ನರಮಾನಿನ ಕೈಡ್ದ್ ಮಲ್ಪೆರೆ ಎಂಚಾವು?” ಪಂಡೆರ್. ಇಂಚ ಅಕ್ಲೆ ಉಲಯಿ ಭೇದ ಉಂಡಾಂಡ್.</verse>
				<verse number="17">ಅಕುಲು ಕುಡ ಗುಣ ಆಯಿನ ಕುರುಡಡ, ಆಯೆ ನಿಕ್ಕ್ ಕಣ್ಣ್ ಕೊರಿನೆಡ್ದ್ ಈ ಆಯ ಸಂಗತಿಡ್ ದಾನೆ ಪನ್ಪ? ಅಂದ್‌ದ್ ಕೇನ್ನಗ ಗುಣ ಆಯಿನ ಕುರುಡೆ, “ಆಯೆ ನಿಜವಾದ್ ಒಂಜಿ ಪ್ರವಾದಿ ಆದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="18">ಆಂಡ ಕಣ್ಣ್ ಬತ್ತಿನಾಯನ ಸಂಗತಿಡ್ ಆ ಯೆಹೂದ್ಯೆರ್, ಉಂಬೆ ಕುರುಡೆ ಆದಿತ್ತೆ, ಇತ್ತೆ ಕಣ್ಣ್ ತೋಜುನಾಯೆ ಆಯೆ ಅಂದ್‌ದ್ ನಂಬಂದೆ, ಆಯನ ಅಪ್ಪೆಅಮ್ಮಾಡ್ಲೆನ್ ಲೆಪ್ಡಾದ್,</verse>
				<verse number="19">“ಉಂಬೆ ನಿಕ್ಲೆನ ಮಗೆನಾ, ಆಯೆ ಪುಟ್ಟುನಗನೇ ಕುರುಡೆ ಆದಿತ್ತೆನಾ? ಇತ್ತೆ ಆಯಗ್ ದೃಷ್ಟಿ ಎಂಚ ಬತ್ತ್ಂಡ್?” ಅಂದ್‌ದ್ ಅಕ್ಲೆಡ ಕೇಂಡೆರ್.</verse>
				<verse number="20">ಆಯ ಅಪ್ಪೆಅಮ್ಮೆ, “ಉಂಬೆ ಎಂಕ್ಲೆನ ಮಗೆನೇ ಬೊಕ್ಕ ಆಯೆ ಕುರುಡೆ ಆದ್ ಪುಟ್ಟುದಿತ್ತೆ ಪಂಡ್ದ್‌ಲಾ ಎಂಕ್ಲೆಗ್ ಗೊತ್ತುಂಡು.</verse>
				<verse number="21">ಆಂಡ ದೃಷ್ಟಿ ಎಂಚ ಬತ್ತ್ಂಡ್ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜೆ. ದೃಷ್ಟಿ ಏರ್ ಕೊರಿಯೆರ್ ಪಂಡ್ದ್‌ಲಾ ಎಂಕ್ಲೆಗ್ ತೆರಿದ್‌ಜೆ. ಉಂಬ್ಯಡನೇ ಕೇನ್ಲೆ, ಉಂಬೆ ಪ್ರಾಯದಾಯೆ ಅತ್ತಾ, ಉಂಬೆನೇ ತನ ವಿಷಯೊನು ಪನ್ಪೆ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="22">ಆಯನ ಅಪ್ಪೆಅಮ್ಮೆ ಯೆಹೂದ್ಯೆರೆಗ್ ಪೋಡಿನೆಡ್ದ್ ಇಂಚ ಪಂಡೆರ್. ದಾಯೆ ಪಂಡ, ಏರಾಂಡಲಾ ಯೇಸುನು “ಕ್ರಿಸ್ತೆ” ಅಂದ್‌ದ್ ನಂಬಿಯೆರ್ಡ, ಅಂಚಿತ್ತಿನಾಯಗ್ ಸಭೆಡ್ದ್ ಪಿದಯಿ ಪಾಡೊಡು ಅಂದ್‌ದ್ ಯೆಹೂದ್ಯೆರ್ ಅವೆಡ್ದುಂಬು ತೀರ್ಮಾನ ಮಲ್ತ್‌ದಿತ್ತೆರ್.</verse>
				<verse number="23">“ಉಂಬೆ ಪ್ರಾಯದಾಯೆ, ಉಂಬ್ಯಡನೇ ಕೇನ್ಲೆ,” ಅಂದ್‌ದ್ ಆಯ ಅಪ್ಪೆಅಮ್ಮೆ ಪಂಡಿನೆಕ್ಕ್ ಉಂದೇ ಕಾರಣ.</verse>
				<verse number="24">ಅಕುಲು ಪುಟ್ಟುಡೇ ಕುರುಡೆ ಆದಿತ್ತಿ ನರಮಾನಿನ್ ಕುಡ ಲೆತ್ತ್‌ದ್, “ಈ ದೇವೆರೆಗ್ ಮೈಮೆ ಕೊರ್ಲ; ಆ ನರಮಾನಿ ಪಾಪಿಷ್ಟೆ ಅಂದ್‌ದ್ ಎಂಕುಲು ತೆರಿದ,” ಪನ್ನಗ</verse>
				<verse number="25">ಆ ಕುರುಡೆ, “ಆಯೆ ಪಾಪಿಷ್ಟೆನಾ ದಾನ್ನ ಎಂಕ್ ತೆರಿದ್‌ಜಿ, ಆಂಡ ಒಂಜಿ ಮಾತ್ರ ಗೊತ್ತುಂಡು, ಯಾನ್ ಕುರುಡೆ ಆದಿತ್ತೆ, ಇತ್ತೆ ಎಂಕ್ ಕಣ್ಣ್ ತೋಜುಂಡು,” ಪಂಡೆ.</verse>
				<verse number="26">ಅಕುಲು ಆಯಡ, “ನಿಕ್ಕ್ ಆಯೆ ದಾದ ಮಲ್ತೆ, ನಿಕ್ಕ್ ದೃಷ್ಟಿ ಎಂಚ ಕೊರಿಯೆ?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="27">ಆ ಕುರುಡೆ, “ಯಾನ್ ನಿಕ್ಲೆಗ್ ಅಪಗನೆ ಪಂತೆ ಅತ್ತಾ, ನಿಕುಲು ಕೇಂಡ್ದ್‌ಜರ್, ದಾಯೆ ಕುಡ ಕುಡ ಕೇನೊಂದುಲ್ಲರ್? ದಾನೆ, ನಿಕ್ಲೆಗ್ಲಾ ಆಯನ ಶಿಷ್ಯೆರ್ ಆವೆರೆ ಮನಸ್ ಉಂಡಾ?” ಪಂಡೆ.</verse>
				<verse number="28">ಐಕ್ ಅಕುಲು ಆಯಗ್ ನೆರ್ದ್, “ಈ ಆ ನರಮಾನಿನ ಶಿಷ್ಯೆ, ಎಂಕುಲು ಮೋಶೆನ ಶಿಷ್ಯೆರ್.</verse>
				<verse number="29">ಮೋಶೆಡ ದೇವೆರ್ ಪಾತೆರ್‌ದೆ ಎಂಕುಲು ತೆರಿದ, ಆಂಡ ಉಂಬೆ ಒಲ್ತುಡ್ದು ಬತ್ತಿನಾಯೆ ಅಂದ್‌ದ್ ಎಂಕ್ಲೆಗ್ ತೆರಿದ್‌ಜಿ,” ಪಂಡೆರ್.</verse>
				<verse number="30">ಐಕ್ ಆ ಕುರುಡೆ, “ಆಯೆ ಎನ ಕಣ್ಣ್‌ಗ್ ದೃಷ್ಟಿ ಕೊರಿಯೆ ಬೊಕ್ಕ ಆಯೆ ಒಲ್ತುಡ್ದು ಬೈದಿನಿ ಅಂದ್‌ದ್ ನಿಕ್ಲೆಗ್ ತೆರಿಯಂದಿನ ಬಾರಿ ಅಚ್ಚಿರದ ಸಂಗತಿ!</verse>
				<verse number="31">ಪಾಪಿಷ್ಟೆರೆನ ಪ್ರಾರ್ಥನೆನ್ ದೇವೆರ್ ಕೇನುಜೆ. ದೇವೆರೆ ಭಕ್ತೆರಾದ್, ದೇವೆರೆ ಚಿತ್ತದ ಲೆಕ್ಕ ನಡಪುನಾಯನ ಪ್ರಾರ್ಥನೆನ್ ಕೇನ್ವೆ ಎಂಕುಲು ತೆರಿದ.</verse>
				<verse number="32">ಪುಟ್ಟು ಕುರುಡಗ್ ಏರಾಂಡಲಾ ದೃಷ್ಟಿ ಕೊರ್ತಿನೆನ್ ಲೋಕದ ಆದಿಡ್ದ್ ಏರ್ಲಾ ಕೇಂಡ್ದ್‌ಜೆರ್.</verse>
				<verse number="33">ಉಂಬೆ ದೇವೆರೆಡ್ದ್ ಬೈದಿನಾಯೆ ಆದಿತ್ತಿಜೆಡ, ಇಂಚಿತ್ತಿ ಕೆಲಸೊಲೆನ್ ಮಲ್ತುದ್ವಯೆ,” ಪಂಡೆ.</verse>
				<verse number="34">ಉಂದೆನ್ ಕೇಂಡ್ದ್ ಅಕುಲು, “ಈ ಪಾಪೊಡೇ ಪುಟ್ಟುದು ಬುಲೆದಿನಾಯೆ, ಎಂಕ್ಲೆಗ್ ಬೋಧನೆ ಮಲ್ಪುವನಾ?” ಅಂದ್‌ದ್ ಆಯನ್ ಸಭೆಡ್ದ್ ಪಿದಯಿ ಪಾಡಿಯೆರ್.</verse>
				<verse number="35">ಆಯನ್ ಪಿದಾಯಿ ಪಾಡ್ದೆರ್ ಅಂದ್‌ದ್ ಯೇಸು ತೆರಿದ್ ಆಯನ್ ನಾಡ್ದ್ ತಿಕ್ಕ್‌ನಗ, “ಈ ನರಮಾನಿ ಮಗನ್ ನಂಬುವನಾ?” ಅಂದ್‌ದ್ ಕೇಂಡೆ.</verse>
				<verse number="36">ಐಕ್ ಆಯೆ, “ಆಯೆ ಏರ್ ಕರ್ತವಾ, ತೆರಿಪಾಂಡ ಕಂಡಿತ ನಂಬುವೆ,” ಪಂಡೆ.</verse>
				<verse number="37">ಐಕ್ ಯೇಸು, “ಈ ಆಯನ್ ತೂತ ಅತ್ತಂದೆ ನಿನಡ ಇತ್ತೆ ಪಾತೆರೊಂದುಪ್ಪು ಯಾನೇ ಆಯೆ.” ಪಂಡೆ.</verse>
				<verse number="38">ಆಯೆ, “ಅಂದ್ ಕರ್ತವಾ, ನಂಬುವೆ! ಅಂದ್‌ದ್ ಆಯಗ್ ಅಡ್ಡಬೂರ್ಯೆ.”</verse>
				<verse number="39">ಅಪಗ ಯೇಸು, “ಕುರುಡೆರೆಗ್ ದೃಷ್ಟಿ ಕೊರಿಯೆರೆ ಬೊಕ್ಕ ಕಣ್ಣ್ ಇತ್ತಿನಾಕುಲೆಗ್ ಕುರುಡೆರ್ ಆವೊಡು ಅಂದ್‌ದ್ ಯಾನ್ ನ್ಯಾಯತೀರ್ಪುಗಾದ್ ಈ ಲೋಕೊಗು ಬೈದೆ.”</verse>
				<verse number="40">ಈ ಪಾತೆರೊನು ಆಯ ಕೈತಲ್ ಇತ್ತಿ ಪರಿಸಾಯೆರ್ ಕೇಂಡ್ದ್, “ಎಂಕುಲುಲಾ ಕುರುಡೆರಾ?” ಅಂದ್‌ದ್ ಕೇಂಡಿನಪಗ</verse>
				<verse number="41">ಯೇಸು ಅಕ್ಲೆಡ, “ನಿಕುಲು ಕುರುಡೆರ್ ಆದಿತ್ವರ್ಡ, ನಿಕ್ಲೆಗ್ ಪಾಪ ಇತ್ತ್‌ದ್ವಂದ್, ನಿಕ್ಲೆಗ್ ಕಣ್ಣ್ ತೋಜುಂಡು, ಅಂದ್‌ದ್ ಪನೊಂದುಪ್ಪುನೆಡ್ದ್ ನಿಕುಲು ಪಾಪಿಲು ಆದುಲ್ಲರ್.”</verse>
			</chapter>
			<chapter number="10">
				<verse number="1">“ನಿಕ್ಲೆಗ್ ನಿಜಾದ್ ಪನ್ಪೆ, ಕುರಿಕುಲೆ ಕೊಟ್ಯದುಲಯಿ ಬಾಕಿಲ್‌ಡೆ ಬರಂದೆ ಬೇತೆ ಒಲ್ತುಡ್ದಾಂಡಲಾ ಲಾಗ್ಯೊಂದು ಬತ್ತೆಡ ಆಯೆ ಕಲ್ವೆಲಾ ಲೂಟಿ ಮಲ್ಪುನಾಯೆಲಾ ಆದುಲ್ಲೆ.</verse>
				<verse number="2">ಬಾಕಿಲ್‌ಡ್ದ್ ಉಲಯಿ ಬರ್ಪಿನಾಯೆ ಆ ಕುರಿಕುಲೆ ಕುರುಬೆ ಆದುಲ್ಲೆ.</verse>
				<verse number="3">ಬಾಕಿಲ್ ಕಾಪುನಾಯೆ ಆಯಗ್ ಬಾಕಿಲ್ ಜಪ್ಪುವೆ. ಕುರಿಕುಲು ಕುರುಬನ ಸ್ವರೊನು ಕೇನ್ವ ಬೊಕ್ಕ ಆಯೆ ತನ ಕುರಿಕುಲೆನ ಪುದರ್ ಲೆತ್ತ್‌ದ್ ಪಿದಯಿ ದೇರೊಂದು ಪೋಪೆ.</verse>
				<verse number="4">ಐಕ್ಲೆನ್ ಪಿದಯಿ ಕಂತಿ ಬೊಕ್ಕ ಕುರಿಕುಲೆ ಪುಂಡು ಪೋವೊಂದುಪ್ಪುನಗ ಐಕ್ಲೆ ಎದುರುಡು ಪೋಪೆ, ಕುರಿಕುಲು ಆಯ ಸ್ವರೊನು ತೆರಿಯೊಂದು ಆಯ ಬೆರಿಯೆ ಪೋಪುಂಡು.</verse>
				<verse number="5">ಐಕುಲು ಪಿದಯಿದಾಕುಲೆನ ಸ್ವರೊನು ತೆರಿಯೊನುಜಿ. ಪಿದಯಿದಾಯನ ಬೆರಿಯೆ ಪೋವಂದೆ, ಆಯನ್ ಬುಡ್ದು ಪಾರ್‌ಪೋಪ.”</verse>
				<verse number="6">ಈ ಉಪಕತೆನ್ ಯೇಸು ಅಕ್ಲೆಗ್ ಪಂಡೆ, ಆಂಡಲಾ ಆಯೆ ಪನ್ಪಿನ ಪಾತೆರ ಅಕ್ಲೆಗ್ ಅರ್ಥ ಆಯಿಜಿ.</verse>
				<verse number="7">ಅಂಚಾಯಿನೆಡ್ದ್ ಯೇಸು ಕುಡೊರ ಅಕ್ಲೆಡ, “ನಿಕ್ಲೆಗ್ ನಿಜಾದ್ ಪನ್ಪೆ, ಕುರಿಕುಲೆಗ್ ಯಾನೇ ಬಾಕಿಲ್ ಆದುಲ್ಲೆ.</verse>
				<verse number="8">ಎನಡ್ದ್ ದುಂಬು ಬತ್ತಿನಾಕುಲು ಮಾತೆರ್ಲಾ ಕಲ್ವೆರ್‌ಲಾ ಲೂಟಿ ಮಲ್ಪುನಾಕುಲುಲಾ ಆದುಲ್ಲೆರ್, ಆಂಡ ಕುರಿಕುಲು ಅಕ್ಲೆಗ್ ಕೆಬಿ ಕೊರ್ಪುಜ.</verse>
				<verse number="9">ಯಾನೇ ಆ ಬಾಕಿಲ್, ಏರಾಂಡಲಾ ಎನಡ್ದ್ ಉಲಯಿ ಪೋಂಡ ಆಯಗ್ ರಕ್ಷಣೆ ತಿಕ್ಕು. ದಾಲಾ ತಡೆದಾಂತೆ ಉಲಯಿ ಪೋದು ಪಿದಯಿ ಬರ್ಪೆ. ಮೇಪಿ ಪಜಿರ್‌ನ್ ನಾಡ್ ಪತ್ತುವೆ.</verse>
				<verse number="10">ಕಲ್ವೆ ಕಂಡೊನಿಯೆರೆಲಾ ಕೆರಿಯೆರೆಲಾ ಹಾಳ್ ಮಲ್ಪೆರೆಲಾ ಬರ್ಪೆ ಅತ್ತಂದೆ ಬೇತೆ ಒಯಿಕ್‌ಲಾ ಅತ್ತ್. ಆಂಡ ಯಾನ್ ಐಕ್ಲೆಗ್ ಜೀವ ಉಪ್ಪುಲೆಕ್ಕಲಾ ಸಂಪೊತ್ತು ಉಪ್ಪುಲೆಕ್ಕಲಾ ಬತ್ತೆ.</verse>
				<verse number="11">“ಯಾನೇ ಎಡ್ಡೆಂತಿ ಕುರುಬೆ, ಎಡ್ಡೆಂತಿ ಕುರುಬೆ ತನ ಕುರಿಕುಲೆಗಾದ್ ತನ ಪ್ರಾಣೊನು ಕೊರ್ಪೆ.</verse>
				<verse number="12">ಕೂಲಿದಚಾಕ್ರಿದಾಯೆ ಕುರಿಕುಲೆನ ಕುರುಬೆಲಾ ಧನಿಲಾ ಆದುಪ್ಪಂದೆ ಚೆನ್ನನಾಯಿ ಬರ್ಪಿನೆನ್ ತೂದು ಕುರಿಕುಲೆನ್ ಬುಡ್ದು ಪಾರ್‌ಪೋಪೆ. ಚೆನ್ನನಾಯಿ ಕುರಿಕುಲೆನ್ ಪತ್ತ್‌ದ್ ಐಕ್ಲೆನ್ ಚಲ್ಲಾಪಿಲ್ಲಿ ಮಲ್ಪುವ.</verse>
				<verse number="13">ಆಯೆ ಕೂಲಿದಾಯೆ; ಕೂಲಿದಾಯಗ್ ಕುರಿಕುಲೆನ ಚಿಂತೆ ಇಜ್ಜಿ.</verse>
				<verse number="14">ಯಾನೇ ಎಡ್ಡೆಂತಿ ಕುರುಬೆ, ಅಮ್ಮೆ ಎನನ್ ಯಾನ್ ಅಮ್ಮೆರೆನ್ ತೆರಿದಿತ್ತಿಲೆಕ್ಕ, ಯಾನ್ ಎನ ಕುರಿಕುಲೆನ್ ತೆರಿದೆ ಎನ ಕುರಿಕುಲು ಎನನ್ ತೆರಿದ. ಬೊಕ್ಕ ಯಾನ್ ಎನ ಕುರಿಕುಲೆಗಾದ್ ಎನ ಪ್ರಾಣೊನು ಕೊರ್ಪೆ.</verse>
				<verse number="15"></verse>
				<verse number="16">ಉಂದತ್ತಂದೆ ಕೊಟ್ಯಗ್ ಸೇರಂದೆ ಉಪ್ಪು ಬೇತೆ ಕುರಿಕುಲೆ ಪುಂಡುಲುಲಾ ಉಂಡು. ಐಕ್ಲೆನ್ಲಾ ಯಾನ್ ಎನ ಪುಂಡುಗು ಸೇರಾವೊಡು. ಐಕುಲು ಎನ ಸ್ವರೊಕ್ಕು ಕೆಬಿ ಕೊರ್ಪ. ಅಪಗ ಮಾತಲಾ ಒಂಜೇ ಪುಂಡು ಆಪ ಬೊಕ್ಕ ಒರಿಯೇ ಕುರುಬೆ ಉಪ್ಪೆ.</verse>
				<verse number="17">“ಎನ ಪ್ರಾಣೊನು ಪಿರ ದೆತ್ತೊನುಲೆಕ್ಕ ಯಾನ್ ಅವೆನ್ ಕೊರ್ಪಿನೆಡ್ದಾವರ ಅಮ್ಮೆ ಎನನ್ ಪ್ರೀತಿ ಮಲ್ಪುವೆ.</verse>
				<verse number="18">ಎನಡ್ದ್ ಎನ ಪ್ರಾಣೊನು ಏರ್ಲಾ ದೆಪ್ಪಾಯೆರ್. ಎನ್ನಾತೆಗ್ ಎನ ಪ್ರಾಣೊನು ಯಾನ್ ಕೊರ್ಪೆ. ಅವೆನ್ ಕೊರಿಯೆರೆ ಎಂಕ್ ಅಧಿಕಾರ ಉಂಡು, ಅತ್ತಂದೆ ಅವೆನ್ ಪಿರ ದೆತ್ತೊನೆರೆಲಾ ಎಂಕ್ ಅಧಿಕಾರ ಉಂಡು. ಇಂಚ ಮಲ್ಪೊಡು ಅಂದ್‌ದ್ ಎನ ಅಮ್ಮೆ ಎಂಕ್ ಅಪ್ಪಣೆ ಕೊರ್ತೆ,” ಪಂಡೆ.</verse>
				<verse number="19">ಈ ಸಂಗತಿನ್ ಕೇಂಡಿನೆಡ್ದ್ ಯೆಹೂದ್ಯೆರೆಡ್ ಕುಡ ಭೇದ ಉಂಡಾಂಡ್.</verse>
				<verse number="20">ಅಕ್ಲೆಡ್ ಕೆಲೆವೆರ್, “ಉಂಬ್ಯಗ್ ದೆವ್ವ ಪತ್ತ್‌ದ್ಂಡ್, ಆಯೆ ಮರ್ಲೆ, ಆಯ ಪಾತೆರೊಲೆನ್ ದಾಯೆ ಕೇನ್ವರ್?” ಪಂಡೆರ್.</verse>
				<verse number="21">ಬೊಕ್ಕ ಕೆಲೆವೆರ್, “ಉಂದು ದೆವ್ವ ಪತ್ತ್‌ದಿನಾಯನ ಪಾತೆರೊಲು ಅತ್ತ್, ದೆವ್ವ ಕುರುಡೆರೆಗ್ ಕಣ್ಣ್ ಕೊರುವಾ?” ಪಂಡೆರ್.</verse>
				<verse number="22">ಆ ಕಾಲೊಡು ದೇವಾಲಯದ ಪ್ರತಿಷ್ಠೆದ ಪರ್ಬ ಯೆರೂಸಲೇಮುಡು ನಡತ್ಂಡ್; ಅಪಗ ಚಳಿಕಾಲ ಆದಿತ್ತ್ಂಡ್,</verse>
				<verse number="23">ಯೇಸು ದೇವಾಲಯೊಡು ಸೊಲೊಮೋನುನ ಮಂಟಪೊಡು ತಿರ್ಗೊಂದುಪ್ಪುನಗ</verse>
				<verse number="24">ಯೆಹೂದ್ಯೆರ್ ಆಯನ್ ಸುತ್ತು ಪಾಡ್ದ್, “ಏತ್ ಸಮಯ ಎಂಕ್ಲೆನ್ ಸಂಶಯೊಡು ದೀಪ? ಈ ಕ್ರಿಸ್ತೆ ಆದಿತ್ತಡ ಎಂಕ್ಲೆಗ್ ಸರಿಯಾದ್ ಪನ್ಲ,” ಪಂಡೆರ್.</verse>
				<verse number="25">ಐಕ್ ಯೇಸು, “ನಿಕ್ಲೆಗ್ ಏಪನೇ ಪನ್ತೆ, ಆಂಡಲಾ ನಿಕುಲು ನಂಬಂದೆ ಉಲ್ಲರ್. ಎನ ಅಮ್ಮೆರೆ ಪುದರ್‌ಡ್ ಯಾನ್ ಮಲ್ಪು ಕೆಲಸೊಲು ಎಂಕ್ ಸಾಕ್ಷಿಯಾದುಂಡು.</verse>
				<verse number="26">ಆಂಡಲಾ ನಿಕುಲು ಎನ ಕುರಿಕುಲೆ ಗುಂಪುಗು ಸೇರ್ದಿನಾಕುಲು ಅತ್ತಂದಿನೆಡ್ದ್ ನಂಬಂದೆ ಉಲ್ಲರ್ ದಾಯೆ ಪಂಡ ನಿಕುಲು ಎನ ಕುರಿಕುಲು ಅತ್ತ್.</verse>
				<verse number="27">ಎನ ಕುರಿಕುಲು ಎನ ಸ್ವರೊಕ್ಕು ಕೆಬಿ ಕೊರ್ಪ, ಯಾನ್ ಐಕ್ಲೆನ್ ತೆರಿದೆ, ಐಕುಲು ಎನ ಬೆರಿಯೆ ಬರ್ಪ.</verse>
				<verse number="28">ಯಾನ್ ಐಕ್ಲೆಗ್ ನಿತ್ಯಜೀವೊನು ಕೊರ್ಪೆ, ಐಕುಲು ಏಪೊಗ್ಲಾ ನಾಶ ಆಪಿನೇ ಇಜ್ಜಿ. ಐಕ್ಲೆನ್ ಏರ್ಲಾ ಎನ ಕೈಡ್ದ್ ಸುಲಿಯಯೆ.</verse>
				<verse number="29">ಎನ ಅಮ್ಮೆ ಕೊರ್ತಿನವು ಮಾತೆಡ್ದ್‌ಲಾ ಮಲ್ಲವು. ಎನ ಅಮ್ಮೆರೆ ಕೈಡ್ದ್ ಅವೆನ್ ಏರ್ಲಾ ಸುಲಿಯೊನಿಯೆರೆ ಆವಂದ್.</verse>
				<verse number="30">ಯಾನ್ಲಾ ಅಮ್ಮೆಲಾ ಒಂಜಾದುಲ್ಲ,” ಪಂಡೆ.</verse>
				<verse number="31">ಯೆಹೂದ್ಯೆರ್ ಆಯನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಕಲ್ಲ್‌ಲೆನ್ ದೆತ್ತೊಂದು ಬನ್ನಗ</verse>
				<verse number="32">ಯೇಸು ಅಕ್ಲೆಡ, “ಯಾನ್ ಅಮ್ಮೆರೆ ಕಡೆಡ್ದ್ ಮಸ್ತ್ ಎಡ್ಡೆ ಕಾರ್ಯೊಲೆನ್ ಮಲ್ತ್‌ದ್ ನಿಕ್ಲೆಗ್ ತೋಜಾಯೆ, ಐಟ್ಟ್ ವಾ ಕಾರ್ಯೊಗಾದ್‌ ಎನ ಮಿತ್ತ್ ಕಲ್ಲ್ ದಕ್ಕುವರ್?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="33">ಯೆಹೂದ್ಯೆರ್, “ಎಂಕುಲು ನಿನ ಮಿತ್ತ್ ಕಲ್ಲ್ ದಕ್ಕುನು, ಈ ಮಲ್ತಿ ಎಡ್ಡೆ ಕಾರ್ಯೊಲೆಗಾದ್ ಅತ್ತ್, ದೇವೆರೆನ್ ದೂಷಣೆ ಮಲ್ತಿನೆಕಾದ್ರ; ಈ ನರಮಾನಿ ಆದ್, ನಿನನ್ ಈಯೇ ದೇವೆರ್ ಅಂದ್‌ದ್ ಮಲ್ತೊನುನೆಡ್ದ್, ನಿನ ಮಿತ್ತ್ ಕಲ್ಲ್ ದಕ್ಕುವ,” ಪಂಡೆರ್.</verse>
				<verse number="34">ಐಕ್ ಯೇಸು, “‘ನಿಕುಲು ದೇವೆರ್‌ಲೇ ಅಂದ್‌ದ್ ಯಾನ್ ಪನ್ತೆ,’ ಅಂದ್‌ದ್ ನಿಕ್ಲೆನ ನ್ಯಾಯಕಟ್ಟ್‌ಡ್ ಬರೆತ್ಂಡತ್ತಾ?</verse>
				<verse number="35">ಶಾಸ್ತ್ರ ಏಪೊಗ್ಲಾ ಸುಳ್ಳಾವಂದತ್ತಾ ಅಂಚಾಂಡ ದೇವೆರೆ ಪಾತೆರೊನು ಪಡೆಯೊಂದಿನಾಕುಲೆನ್ ‘ದೇವೆರಂದ್,’ ಆಯೆ ಪಂಡ್ದುಪ್ಪುನೆಡ್ದ್,</verse>
				<verse number="36">ಅಮ್ಮೆ ಪರಿಶುದ್ಧ ಮಲ್ತ್‌ದ್ ಲೋಕೊಗು ಕಡಪುಡಿನಾಯನ್, ‘ಯಾನ್ ದೇವೆರೆ ಮಗೆ ಆದುಲ್ಲೆ,’ ಅಂದ್‌ದ್ ಪಂಡಿನೆಕ್ಕ್ ಈ ದೇವದೂಷಣೆ ಮಲ್ಪುವ ಪಂಡ್ದ್ ಪನ್ಪರಾ?</verse>
				<verse number="37">ಯಾನ್ ಎನ ಅಮ್ಮೆರೆ ಕಾರ್ಯೊಲೆನ್ ಮಲ್ಪಂದೆ ಇತ್ತ್ಂಡ ಎನ ಪಾತೆರೊಲೆನ್ ನಂಬೊಡ್ಚಿ.</verse>
				<verse number="38">ಆ ಕಾರ್ಯೊಲೆನ್ ಮಲ್ತ್ಂಡ ಎನನ್ ನಿಕುಲು ನಂಬಂದೆ ಇತ್ತ್ಂಡಲಾ ಆ ಕಾರ್ಯೊಲೆನಾಂಡಲಾ ನಂಬುಲೆ. ಅಪಗ ಎನಡ ಅಮ್ಮೆ ಉಲ್ಲೆ ಅಂದ್‌ದ್‌ಲಾ ಅಮ್ಮೆ ಎನಡ ಉಲ್ಲೆ ಅಂದ್‌ದ್‌ಲಾ ನಿಕುಲು ತೆರಿಯೊಂದು ಅರ್ಥ ಮಲ್ತೊನುವರ್,” ಅಂದ್‌ದ್ ಪಂಡೆ.</verse>
				<verse number="39">ಅಕುಲು ಕುಡ ಆಯನ್ ಪತ್ತಿಯೆರೆ ತೂಯೆರ್, ಆಂಡ ಆಯೆ ಅಕ್ಲೆನ ಕೈಡ್ದ್ ತಪ್ಪಾವೊಂದು ಪೋಯೆ.</verse>
				<verse number="40">ಐಡ್ದ್ ಬೊಕ್ಕ ಆಯೆ ಯೊರ್ದಾನ್ ತುದೆತ ಆಯೆರೆಡ್, ಯೋಹಾನೆ ದುಂಬು ನೀರ್‌ದ ದೀಕ್ಷಾಸ್ನಾನ ಕೊರೊಂದಿತ್ತಿ ಜಾಗ್‌ಗ್ ಕುಡ ಪೋದು ಅಲ್ಪ ಇತ್ತೆ.</verse>
				<verse number="41">ದಿಂಜ ಮಂದಿ ಆಯನ ಕೈತಲ್ ಬತ್ತ್‌ದ್, “ಯೋಹಾನೆ ಒಂಜಿ ಕಾರ್ನಿಕೊನ್ಲಾ ಮಲ್ತ್‌ಜೆ, ಆಂಡ ಇಂಬ್ಯನ ಸಂಗತಿಡ್ ಯೋಹಾನೆ ಪಂಡಿನವು ಮಾತ ಸತ್ಯ ಆದಿತ್ತ್ಂಡ್.” ಅಂದ್‌ದ್ ಪಾತೆರೊಂದಿತ್ತೆರ್.</verse>
				<verse number="42">ಅಲ್ಪ ಮಸ್ತ್ ಜನ ಆಯನ್ ನಂಬಿಯೆರ್.</verse>
			</chapter>
			<chapter number="11">
				<verse number="1">ಬೇಥಾನ್ಯ ಊರುಡು ಲಾಜರೆ ಪನ್ಪಿನಾಯೆ ಸೀಕ್‌ಡಿತ್ತೆ. ಅವು ಮಾರ್ಥ ಬೊಕ್ಕ ಮರಿಯ ಪನ್ಪಿ ಮೆಗ್ದಿಪಲಿ ಇತ್ತಿನ ಊರು.</verse>
				<verse number="2">ಈ ಮರಿಯ, ಕರ್ತವನ ಪಾದೊಗು ಕಮ್ಮೆನದ ಎಣ್ಣೆನ್ ಪೂಜಿದ್ ತರೆಕುಜಲ್‌ಡ್ ಒಚ್ಚಿದಿನಾಲ್. ಆಲೆನ ಮೆಗ್ಯೆ ಲಾಜರೆ ಸೀಕ್‌ಡಿತ್ತೆ.</verse>
				<verse number="3">ಇಂಚ ಉಪ್ಪುನಗ ಸಹೋದ್ರಿಲು, “ಕರ್ತವಾ, ನಿನ ಪ್ರೀತಿದ ಸ್ನೇಹಿತೆ ಸೀಕ್‌ಡುಲ್ಲೆ,” ಪಂಡ್ದ್ ಯೇಸುಗು ಪಂಡ್ ಕಡಪುಡಿಯೆರ್.</verse>
				<verse number="4">ಯೇಸು ಉಂದೆನ್ ಕೇಂಡ್ದ್, “ಈ ಸೀಕ್ ಸೈಯೆರೆಂದ್ ಬೈದಿನವು ಅತ್ತ್, ಉಂದೆಡ್ದ್ ದೇವೆರೆ ಮಗಕ್ ಮೈಮೆ ಉಂಡಾಪಿಲೆಕ್ಕ, ದೇವೆರೆ ಮೈಮೆಗಾದ್ ಬೈದಿನವು,” ಅಂದ್‌ದ್ ಪಂಡೆ.</verse>
				<verse number="5">ಮಾರ್ಥಡಲಾ ಆಲೆನ ಮೆಗ್ದಿಡಲಾ ಬೊಕ್ಕ ಲಾಜರಡಲಾ ಯೇಸುಗು ಬಾರಿ ಪ್ರೀತಿ ಇತ್ತ್ಂಡ್.</verse>
				<verse number="6">ಆಂಡಲಾ ಲಾಜರೆ ಸೀಕ್‌ಡ್ ಉಲ್ಲೆ ಪನ್ಪಿನೆನ್ ಆಯೆ ತೆರಿ ಬೊಕ್ಕ ರಡ್ಡ್ ದಿನ, ಇತ್ತಿನ ಜಾಗ್‌ಡೇ ಉಂತಿಯೆ</verse>
				<verse number="7">ಐಡ್ದ್ ಬೊಕ್ಕ ತನ ಶಿಷ್ಯೆರೆಗ್, “ಪಿರ ಯೂದಾಯೊಗು ಪೋಯಿ,” ಪಂಡೆ.</verse>
				<verse number="8">ಶಿಷ್ಯೆರ್, “ಓ ಗುರೂ, ಯೆಹೂದ್ಯೆರ್ ನಿನನ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಇತ್ತೆರ್, ಪಿರ ಅಡೆಗೇ ಪೋಪನಾ?” ಪಂಡ್ದ್ ಕೇಂಡೆರ್.</verse>
				<verse number="9">ಐಕ್ ಯೇಸು, “ಪಗೆಲ್‌ಗ್ ನನಲಾ ಪದ್ರಾಡ್ ಗಂಟೆ ಉಂಡತ್ತಾ, ಒರಿ ಪಗೆಲ್ಡ್ ತಿರ್ಗಿಯೆಡ ಈ ಲೋಕದ ಬೊಲ್ಪು ತೋಜುನೆಡ್ದ್ ಆಯೆ ದಂಟಯೆ.</verse>
				<verse number="10">ಆಂಡ ರಾತ್ರೆಡ್ ನಡಪುನಾಯೆ ಬೊಲ್ಪು ದಾಂತಿನೆಡ್ದ್ ದಂಟುವೆ,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="11">ಈ ಪಾತೆರ ಪಂಡಿ ಬೊಕ್ಕ ಅಕ್ಲೆಗ್, “ನಮ ಸ್ನೇಹಿತೆ ಲಾಜರೆ ನಿದ್ರೆ ಮಲ್ತೊಂದುಲ್ಲೆ; ಯಾನ್ ಆಯನ್ ನಿದ್ರೆಡ್ದ್ ಲಕ್ಕಾಯೆರೆಗಾದ್ ಪೋವೊಂದುಲ್ಲೆ,” ಪಂಡೆ.</verse>
				<verse number="12">ಐಕ್ ಶಿಷ್ಯೆರ್, “ಕರ್ತವಾ, ಆಯೆ ನಿದ್ರೆ ಮಲ್ತೊಂದಿತ್ತೆಡ ಸೌಖ್ಯ ಆಪೆ,” ಅಂದ್‌ದ್ ಪಂಡೆರ್.</verse>
				<verse number="13">ಯೇಸು ಲಾಜರನ ಮರಣದ ಸಂಗತಿಡ್ ತೆರಿಪಾದ್ ಪಂಡ್ದಿತ್ತೆ; ಆಂಡ ಅಕುಲು ಆಯೆ ನಿದ್ರೆದ ಬಚ್ಚೆಲ್‌ದ ಸಂಗತಿಡ್ ಪನ್ಪೆ ಅಂದ್‌ದ್ ಎನ್ನಿಯೆರ್.</verse>
				<verse number="14">ಅಪಗ ಯೇಸು ಅಕ್ಲೆಗ್ ಬುಡ್ಪಾದ್ ಪಂಡೆ, “ಲಾಜರೆ ಸೈತ್ ಪೋತೆ,</verse>
				<verse number="15">ಯಾನ್ ಅಲ್ಪ ದಾಂತಿನೆಡ್ದ್ ನಿಕ್ಲೆ ಪರವಾದ್ ಸಂತೋಷ ಮಲ್ಪುವೆ, ದಾಯೆ ಪಂಡ ಆಯಡ್ದ್ ನಿಕುಲು ನಂಬಿಯೆರೆ ಒಂಜಿ ಸಾದಿ ಆಂಡ್, ಬಲೆ ಆಯ ಕೈತಲ್‌ ಪೋಯಿ,” ಅಂದ್‌ದ್ ಪಂಡೆ.</verse>
				<verse number="16">ಅಪಗ ದಿದುಮೆ ಪನ್ಪಿ ತೋಮೆ, ಬಾಕಿದ ಶಿಷ್ಯೆರೆಡ, “ನಮಲಾ ಪೋಯಿ ಆಯಡೊಪ್ಪ ಸೈಕ,” ಪಂಡೆ.</verse>
				<verse number="17">ಯೇಸು ಬತ್ತಿತ್ತಿನಪಗ, ಲಾಜರನ್ ಸಮಾಧಿಡ್ ದೀದ್ ನಾಲ್ ದಿನ ಆದಿತ್ತ್ಂಡ್ ಅಂದ್‌ದ್ ಆಯಗ್ ತೆರಿದ್ ಬತ್ತ್ಂಡ್.</verse>
				<verse number="18">ಬೇಥಾನ್ಯ ಯೆರೂಸಲೇಮುಗು ಕೈತಲಿತ್ತ್‌ಂಡ್, ಅಲ್ತ್‌ಡ್ದ್ ಅಡೆಗ್ ಸುಮಾರ್ ಮೂಜಿ ಕಿಲೊಮೀಟರ್ ದೂರ ಇತ್ತ್ಂಡ್.</verse>
				<verse number="19">ಅಂಚಾಯಿನೆಡ್ದ್ ಯೆಹೂದ್ಯೆರೆಡ್ ಮಸ್ತ್ ಜನ ಮಾರ್ಥ ಬೊಕ್ಕ ಮರಿಯಗ್ ಅಕ್ಲೆನ ಮೆಗ್ಯನ ಮರಣದ ಸಂಗತಿಡ್ ಸಮಜೈಸಿಯೆರೆ ಬತ್ತ್‌ದಿತ್ತೆರ್.</verse>
				<verse number="20">ಇಂಚ ಉಪ್ಪುನಗ, ಯೇಸು ಬರ್ಪೆ ಇನ್ಪಿ ಸಂಗತಿನ್ ಕೇಂಡ್ದ್, ಮಾರ್ಥ ಆಯನ್ ಎದುಕೊನಿಯೆರೆ ಪೋಯಲ್, ಆಂಡ ಮರಿಯ ಇಲ್ಲಡೇ ಕುಲ್ಲೊಂದಿತ್ತಲ್.</verse>
				<verse number="21">ಬೊಕ್ಕ ಮಾರ್ಥ ಯೇಸುಗು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ.</verse>
				<verse number="22">ಆಂಡಲಾ ದೇವೆರೆಡ ಎಂಚಿನ ಕೇನ್ವನಾ, ಅವೆನ್ ದೇವೆರ್ ನಿಕ್ಕ್ ಕೊರ್ಪೆ ಇನ್ಪಿನೆನ್ ತೆರಿದೆ,” ಪಂಡಲ್.</verse>
				<verse number="23">ಯೇಸು ಆಲೆಡ, “ನಿನ ಮೆಗ್ಯೆ ಲಕ್ಕ್‌ದ್ ಜೀವ ಆದ್ ಬರ್ಪೆ,” ಅಂದ್‌ದ್ ಪಂಡೆ.</verse>
				<verse number="24">ಮಾರ್ಥ ಆಯಡ, “ಸೈತಿನಾಕುಲು ಕಡೆ ದಿನೊಟು ಪುನರುತ್ಥಾನ ಆನಗ, ಆಯೆಲಾ ಲಕ್ಕ್‌ದ್ ಬರುವೆ, ಇನ್ಪಿನೆನ್ ತೆರಿದುಲ್ಲೆ,” ಅಂದ್‌ದ್ ಪಂಡಲ್.</verse>
				<verse number="25">ಯೇಸು ಆಲೆಡ, “ಯಾನೇ ಸೈತಿನಾಕುಲೆಡ್ದ್ ಕುಡ ಲಕ್ಕುನಾಯೆಲಾ ಜೀವಲಾ ಆದುಲ್ಲೆ, ಎನನ್ ನಂಬುನಾಯೆ ಸೈತೆಡಲಾ ಬದುಕುವೆ.</verse>
				<verse number="26">ಬೊಕ್ಕ ಏರ್ಲಾ ಜೀವೊಡುಪ್ಪುನಗ ಎನನ್ ನಂಬಿನಾಯೆ, ಏಪೊಗ್ಲಾ ಸೈಯಯೆ, ಉಂದೆನ್ ಈ ನಂಬುವನಾ?” ಅಂದ್‌ದ್ ಕೇಂಡೆ.</verse>
				<verse number="27">ಐಕ್ ಆಲ್ ಆಯಡ, “ಅಂದ್ ಕರ್ತವಾ, ಲೋಕೊಗು ಬರೊಡಾಯಿ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಈಯೇ, ಅಂದ್‌ದ್ ನಂಬುದೆ.” ಪಂಡಲ್.</verse>
				<verse number="28">ಉಂದೆನ್ ಪಂಡ್ದ್ ಆಲ್ ಪೋದು ತನ ಮೆಗ್ದಿ ಮರಿಯನ್ ಗುಟ್ಟುಡು ಲೆತ್ತ್‌ದ್, “ಗುರು ಬೈದೆ, ನಿನನ್ ಲೆತ್ತೊಂದುಲ್ಲೆ,” ಅಂದಲ್.</verse>
				<verse number="29">ಮರಿಯ ಉಂದೆನ್ ಕೇಂಡಿಲೆಕ್ಕನೇ ಲಕ್ಕ್‌ದ್ ಆಯ ಕೈತಲ್‌ ಪೋಯಲ್.</verse>
				<verse number="30">ಯೇಸು ನನಲಾ ಊರುದ ಉಲಯಿ ಬತ್ತ್‌ತ್ತಿಜೆ, ಮಾರ್ಥಗ್ ತಿಕ್ಕಿನ ಜಾಗ್‌ಡೇ ಇತ್ತೆ.</verse>
				<verse number="31">ಮರಿಯಡೊಪ್ಪ ಇತ್ತ್‌ದ್ ಆಲೆನ್ ಇಲ್ಲಡ್ ಸಮಾಧಾನ ಮಲ್ತೊಂದಿತ್ತಿನ ಯೆಹೂದ್ಯೆರ್, ಆಲ್ ಒರನೆ ಲಕ್ಕ್‌ದ್ ಪೋಯಿನೆನ್ ತೂದು, ಆಲ್ ಬುಲಿಪೆರೆ ಸಮಾಧಿಗ್ ಪೋಯಲ್ ಅಂದ್‌ದ್ ಎನ್ನ್‌ದ್ ಆಲೆನ ಬೆರಿಯೆ ಪೋಯೆರ್.</verse>
				<verse number="32">ಮರಿಯ ಯೇಸು ಇತ್ತಿನಡೆಗ್ ಬತ್ತ್‌ದ್ ಆಯನ್ ತೂದು ಆಯ ಕಾರ್‌ಗ್ ಅಡ್ಡಬೂರ್ದು, “ಕರ್ತವಾ, ಈ ಮೂಲು ಇತ್ತುದ್ವಡ ಎನ ಮೆಗ್ಯೆ ಸೈತ್‌ದುವಯೆ,” ಪಂಡಲ್.</verse>
				<verse number="33">ಆಲ್ ಅರ್ಪಿನೆನ್ಲಾ ಬೊಕ್ಕ ಆಲೆಡೊಪ್ಪ ಬೈದಿನ ಯೆಹೂದ್ಯೆರ್ ಬುಲ್ಪುನೆನ್ಲಾ ಯೇಸು ತೂದು, ಮನಸ್ ಕರಗ್‌ದ್,</verse>
				<verse number="34">“ಆಯನ್ ಓಲು ದೀತರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು, “ಕರ್ತವಾ, ಬತ್ತ್‌ದ್ ತೂಲ.” ಪಂಡೆರ್.</verse>
				<verse number="35">ಯೇಸು ಕಣ್ಣೀರ್ ದೆತ್ತೆ.</verse>
				<verse number="36">ಯೆಹೂದ್ಯೆರ್ ತೂದು, “ಆಹಾ, ಉಂಬೆ ಲಾಜರ ಮಿತ್ತ್ ಏತೋ ಪ್ರೀತಿ ದೀದಿತ್ತೆ,” ಅಂದ್‌ದ್ ಪಂಡೆರ್.</verse>
				<verse number="37">ಅಕ್ಲೆಡ್ ಕೆಲೆವೆರ್, “ಇಂಬೆ ಕುರುಡಗ್ ಕಣ್ಣ್ ಕೊರಿನಾಯೆ ಅತ್ತಾ? ಈ ಲಾಜರೆ ಸೈಯಂದಿಲೆಕ್ಕ ಮಲ್ಪೆರೆ ಆತ್ವಂದಾ?” ಪಂಡೆರ್.</verse>
				<verse number="38">ಯೇಸು ಕುಡ ಮನಸ್‌ಡ್ ಕರಗೊಂದು ಸಮಾಧಿದ ಕೈತಲ್‌ ಬತ್ತೆ. ಅವು ಒಂಜಿ ಮಾಟೆ ಆದಿತ್ತ್ಂಡ್ ಐತ ಬಾಯಿಗ್ ಒಂಜಿ ಮಲ್ಲ ಕಲ್ಲ್ ದೀದ್ ಮುಚ್ಚಿದಿತ್ತೆರ್.</verse>
				<verse number="39">ಯೇಸು, “ಆ ಕಲ್ಲ್‌ನ್ ದೆಪ್ಪುಲೆ,” ಪನ್ನಗ, ಸೈತ್ ಪೋಯಿನಾಯನ ಪಲ್ದಿ ಮಾರ್ಥ, “ಕರ್ತವಾ, ಆಯೆ ಸೈತ್‌ದ್ ನಾಲ್ ದಿನ ಆಂಡ್, ಇತ್ತೆ ನಾತ ಬರು,” ಪಂಡಲ್.</verse>
				<verse number="40">ಯೇಸು ಆಲೆಗ್, “ಈ ನಂಬಿಯಡ ದೇವೆರೆ ಮೈಮೆನ್ ತೂವ ಅಂದ್‌ದ್ ನಿಕ್ಕ್ ಪಂತಿಜೆನಾ?” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="41">ಅಪಗ ಕಲ್ಲ್‌ನ್ ದೆತ್ತ್‌ದ್ ಪಾಡಿಯೆರ್, ಬೊಕ್ಕ ಯೇಸು ಮಿತ್ತ್ ತೂದು, “ಅಮ್ಮೆರೇ, ಈ ಎನ ಪ್ರಾರ್ಥನೆನ್ ಕೇಂಡಿನೆಕ್ಕಾದ್ ನಿನನ್ ಪುಗರುವೆ.</verse>
				<verse number="42">ಈ ಏಪಲಾ ಎನ ಪ್ರಾರ್ಥನೆನ್ ಕೇನ್ವ ಪನ್ಪಿನವು ಎಂಕ್ ತೆರಿದೇ ಉಂಡು; ಆಂಡಲಾ ಈಯೇ ಎನನ್ ಕಡಪುಡ್ದು ಕೊರ್ತ ಪನ್ಪಿ ಸಂಗತಿನ್ ಸುತ್ತಲಾ ಉಂತುದಿ ಜನೊಕುಲು ನಂಬೊಡು ಅಂದ್‌ದ್ ಅಕ್ಲೆಗ್ ಬೋಡಾದ್ ಈ ಪಾತೆರೊನು ಪನ್ಪೆ,” ಪಂಡೆ.</verse>
				<verse number="43">ಅವೆನ್ ಪಂಡಿ ಬೊಕ್ಕ ಮಲ್ಲ ಸ್ವರೊಟ್ಟು, “ಲಾಜರ, ಪಿದಯಿ ಬಲ!” ಪಂಡೆ</verse>
				<verse number="44">ಸೈತ್ ಪೋತಿನಾಯೆ ಪಿದಯಿ ಬತ್ತೆ. ಆಯನ ಕೈಕಾರ್ ಕುಂಟುಡು ಕಟ್ಟ್‌ದಿತ್ತ್‌ಂಡ್, ಆಯನ ಮೋನೆ ಕುಂಟುಡು ಸುತ್ತುದಿತ್ತ್‌ಂಡ್. ಯೇಸು ಅಕ್ಲೆಡ, “ಅವೆನ್ ಗಿರ್ಪುಲೆ, ಆಯೆ ಪೋವಡ್,” ಪಂಡೆ.</verse>
				<verse number="45">ಮರಿಯನಡೆ ಬತ್ತಿತ್ತಿ ಯೆಹೂದ್ಯೆರ್ ಯೇಸು ಮಲ್ತಿ ಕಾರ್ಯೊನು ತೂಯಿನೆಟ್ಟ್ ಮಸ್ತ್ ಜನ ಆಯನ್ ನಂಬಿಯೆರ್.</verse>
				<verse number="46">ಆಂಡ ಕೆಲೆವೆರ್ ಪರಿಸಾಯೆರೆ ಕೈತಲ್‌ ಪೋದು ಯೇಸು ಮಲ್ತಿನೆನ್ ಅಕ್ಲೆಗ್ ತೆರಿಪಾಯೆರ್.</verse>
				<verse number="47">ಅಪಗ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಹಿರಿಸಭೆನ್ ಸೇರಾದ್, “ನಮ ದಾದ ಮಲ್ಪೊಲಿ? ಇಂಬೆ ಮಸ್ತ್ ಕಾರ್ನಿಕೊಲೆನ್ ಮಲ್ಪುವೆ ಅತ್ತಾ?</verse>
				<verse number="48">ನಮ ಉಂಬ್ಯನ್ ಇಂಚೆನೆ ಬುಡುಂಡ ಮಾತೆರ್ಲಾ ಆಯನ ಮಿತ್ತ್ ನಂಬಿಕೆ ದೀವೆರ್; ಬೊಕ್ಕ ರೋಮಾಯೆರ್ ಬತ್ತ್‌ದ್ ನಮಡ್ದ್ ಜಾಗ್‌ನ್ಲಾ ಜನೊಕುಲೆನ್ಲಾ ದೆತ್ತೊಂಬೆರ್,” ಪಂಡೆರ್.</verse>
				<verse number="49">ಆಂಡ ಅಕ್ಲೆಡ್ ಕಾಯಫೆ ಪನ್ಪಿನಾಯೆ ಆ ವರ್ಸೊಗು ನೇಮಕಾತಿ ಪ್ರಧಾನಯಾಜಕೆ ಆದಿತ್ತ್‌ದ್, “ನಿಕ್ಲೆಗ್ ದಾಲಾ ತೆರಿಯಂದ್;</verse>
				<verse number="50">ಮಾತ ದೇಶದ ಜನೊಕುಲು ನಾಶ ಆಪಿನೆಡ್ದ್, ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ನಿಕುಲು ಆಲೋಚನೆ ಮಲ್ಪುಜರ್?” ಪಂಡೆ.</verse>
				<verse number="51">ಆಯೆ ತನ ಸ್ವಂತ ಆಲೋಚನೆಡ್ ಉಂದೆನ್ ಪಂಡಿಜೆ, ಆಂಡ ಆಯೆ ಆ ವರ್ಸದ ಪ್ರಧಾನಯಾಜಕೆ ಆದಿತ್ತ್‌ದ್ ದೇವೆರೆ ಸಹಾಯೊಡ್ದು ಯೇಸು ಯೆಹೂದ್ಯೆರೆ ಜನಾಂಗೊಗು ಬೋಡಾದ್ ಪ್ರಾಣ ಕೊರಿಯೆರೆ ಉಲ್ಲೆ ಅಂದ್‌ದ್ ಪಂಡೆ. ಯೇಸು ಆ ಜನಾಂಗೊಗು ಮಾತ್ರ ಅತ್ತಂದೆ ಚಲ್ಲಾಪಿಲ್ಲಿ ಆದ್ ಪೋಯಿ ದೇವೆರೆ ಜೋಕುಲೆನ್ ಕೂಡಾವುನೆಕ್ಕ್‌ಲಾ ಸೈಯೊಡಂದ್‌ದ್ ಪ್ರವಾದನೆ ಪಂಡೆ.</verse>
				<verse number="52"></verse>
				<verse number="53">ಆ ದಿನೊಡ್ದಿಂಚಿ ಆಯನ್ ಕೆರಿಯೆರೆ ಆಲೋಚನೆ ಮಲ್ತೊಂದಿತ್ತೆರ್.</verse>
				<verse number="54">ಇಂಚ ಉಪ್ಪುನಗ ಯೇಸು ಯೆಹೂದ್ಯೆರೆ ಮದ್ಯೊಡು ತೋಜುಲೆಕ್ಕ ತಿರ್ಗಂದೆ ಗುಡ್ಡೆದ ಕೈತಲ್‌ಡ್ ಇತ್ತಿ ಎಫ್ರಾಯಿಮ್ ಇನ್ಪಿ ಊರುಗು ಪೋದು ಶಿಷ್ಯೆರೆಡೊಪ್ಪ ಇತ್ತೆ.</verse>
				<verse number="55">ಅಪಗ ಯೆಹೂದ್ಯೆರೆ ಪಸ್ಕ ಪರ್ಬ ಕೈತಲ್‌ ಇತ್ತಿನೆಡ್ದ್, ಮಸ್ತ್ ಜನೊಕುಲು ತನ್ಕುಲೆನ್ ಶುದ್ಧ ಮಲ್ತೊನಿಯೆರೆ ಬೋಡಾದ್, ಪರ್ಬೊಡ್ದು ದುಂಬತ್ತ, ಹಳ್ಳಿಡ್ದ್ ಯೆರೂಸಲೇಮುಗು ಬತ್ತೆರ್.</verse>
				<verse number="56">ಅಕುಲು ಯೇಸುನು ನಾಡೊಂದು ದೇವಾಲಯೊಡು ಉಂತೊಂದು, “ನಿಕುಲು ದಾನೆ ಎನ್ನುವರ್, ಆಯೆ ಪರ್ಬೊಗು ಬರಂದೆ ಉಪ್ಪೆನಾ?” ನಿಕ್ಲೆಗ್ ಎಂಚ ತೋಜುಂಡು ಅಂದ್‌ದ್ ಒರಿಯಡ್ದೊರಿ ಪಾತೆರೊಂದು ಇತ್ತೆರ್.</verse>
				<verse number="57">ಆಂಡ ಪ್ರಧಾನಯಾಜಕೆರ್‌ಲಾ ಪರಿಸಾಯೆರ್‌ಲಾ ಆಯನ್ ಪತ್ತೊಡಂದ್‌ದ್ ಆಲೋಚನೆ ಮಲ್ತ್‌ದ್, ಆಯೆ ಉಪ್ಪುನ ಜಾಗ್ ಏರೆಗಾಂಡಲಾ ತೆರಿದಿತ್ತ್‌ಂಡ, ಅವೆನ್ ತನ್ಕ್‌ಲೆಗ್ ತೆರಿಪಾವೊಡು ಅಂದ್‌ದ್ ಅಪ್ಪಣೆ ಕೊರ್ದಿತ್ತೆರ್.</verse>
			</chapter>
			<chapter number="12">
				<verse number="1">ಪಸ್ಕ ಪರ್ಬೊಗು ನನಲಾ ಆಜಿ ದಿನ ಉಪ್ಪುನಗ ಯೇಸು ಬೇಥಾನ್ಯೊಗು ಬತ್ತೆ. ಸೈತಿನಾಕುಲೆಡ್ದ್ ಲಕ್ಕ್‌ದ್ ಬತ್ತಿ ಲಾಜರೆ ಅವುಲು ಇತ್ತೆ.</verse>
				<verse number="2">ಯೇಸುಗು ರಾತ್ರೆದ ವಣಸ್ ತಯಾರ್ ಮಲ್ತೆರ್, ಮಾರ್ಥ ಬಲಸೊಂದಿತ್ತಲ್. ಲಾಜರೆಲಾ ಆಯನ ಒಟ್ಟುಗು ವಣಸ್‌ಗ್ ಕುಲ್ದಿನಾಕುಲೆಡ್ ಒರಿ ಆದಿತ್ತೆ.</verse>
				<verse number="3">ಅಪಗ ಮರಿಯ ಮಸ್ತ್ ಬಿಲೆತ ಕಮ್ಮೆನದ ಜಟಮಾಂಸಿದ ಎಣ್ಣೆನ್ ಸಾಧಾರಣ ಒಂಜಿ ಸೇರ್ ದಾತ್ ಕನತ್‌ದ್ ಯೇಸುನ ಕಾರ್‌ಗ್ ಪೂಜಿದ್ ಬೊಕ್ಕ ತನ ತರೆ ಕುಜಲ್‌ಡ್ದ್ ಆಯನ ಕಾರ್‌ಲೆನ್ ಒಚ್ಚಿಯಲ್. ಆ ಎಣ್ಣೆದ ಕಮ್ಮೆನ ಇಲ್ಲ್ ನಿಲಿಕೆ ದಿಂಜಿಂಡ್.</verse>
				<verse number="4">ಅಪಗ ಆಯ ಶಿಷ್ಯೆರೆಡ್ ಒರಿ ಆದಿತ್ತಿ ಯೇಸುನು ಪತ್ತ್‌ದ್ ಕೊರಿಯೆರೆ ಆಲೋಚನೆ ಮಲ್ತೊಂದಿತ್ತಿ ಇಸ್ಕಾರಿಯೋತೆ ಯೂದೆ,</verse>
				<verse number="5">“ಈ ಎಣ್ಣೆನ್ ಮುನ್ನೂದು ಬೊಳ್ಳಿದ ಪಾವೊಲಿಗ್ ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಅಂದ್‌ದ್ ಪಂಡೆ.</verse>
				<verse number="6">ಆಯೆ ಬಡವೆರೆ ಚಿಂತೆಡ್ ಉಂದೆನ್ ಪಂಡಿಜೆ; ಆಯೆ ಕಲ್ವೆ ಆದಿತ್ತ್‌ದ್, ತನ ಕೈಟಿತ್ತಿ ಪಣವುದ ಚೀರವುಡು ಪಾಡ್ದಿನೆನ್ ಕಂಡೊನುನ ಅಭ್ಯಾಸ ಇತ್ತಿನೆಡ್ದೇ ಇಂಚ ಪಂಡೆ.</verse>
				<verse number="7">ಅಪಗ ಯೇಸು, “ಆಲೆನ್ ಬುಡ್ಲೆ; ಎನನ್ ಕೌಂಪು ದಿನೊಕಾದ್ ಉಂದೆನ್ ದೀವೊಂಡಲ್.</verse>
				<verse number="8">ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ ಪಂಡೆ.”</verse>
				<verse number="9">ಯೆಹೂದ್ಯೆರೆ ಜನೊಕುಲೆ ಮಲ್ಲ ಗುಂಪು ಆಯೆ ಅಲ್ಪ ಉಲ್ಲೆ ಅಂದ್‌ದ್ ತೆರಿದ್ ಯೇಸುನು ತೂಯೆರೆ ಮಾತ್ರತ್ತಂದೆ ಸೈತ್‌ದ್ ಜೀವ ಆದ್ ಲಕ್ಕ್‌ದಿನ ಲಾಜರ್‌ನ್ಲಾ ತೂವೊಡು ಅಂದ್‌ದ್ ಬತ್ತೆರ್.</verse>
				<verse number="10">ಆಂಡ ಪ್ರಧಾನಯಾಜಕೆರ್ ಲಾಜರ್‌ನ್ಲಾ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್.</verse>
				<verse number="11">ದಾಯೆಗಂದ್ಂಡ ಆಯನ ದಿಸೆಡ್ದ್ ಮಸ್ತ್ ಜನ ಯೆಹೂದ್ಯೆರ್ ಅಕ್ಲೆನ್ ಬುಡ್ದು, ಯೇಸುನು ನಂಬುನಾಕುಲು ಆಯೆರ್.</verse>
				<verse number="12">ಮನದಾನಿ ಪಸ್ಕ ಪರ್ಬದ ಜಾತ್ರೆಗ್ ಬೈದಿನ ಜನೊಕುಲೆ ಗುಂಪು ಯೇಸು ಯೆರೂಸಲೇಮುಗು ಬರ್ಪೆ ಅಂದ್‌ದ್ ತೆರಿದ್,</verse>
				<verse number="13">ಈಚಿಲ್‌ದ ಗೆಲ್ಲ್‌ಲೆನ್ ಪತ್ತೊಂದು ಆಯನ್ ಎದುಕೊನಿಯೆರೆ ಪಿದಯಿ ಬತ್ತ್‌ದ್, “ಹೊಸನ್ನಾ! ಕರ್ತವ ಪುದರ್‌ಡ್ ಬರ್ಪಿನಾಯಗ್ ಆಶೀರ್ವಾದ, ಇಸ್ರಾಯೇಲ್‌ದ ಅರಸುಗು ಆಶೀರ್ವಾದ,” ಬೊಬ್ಬೆ ಪಾಡಿಯೆರ್.</verse>
				<verse number="14">ಬೊಕ್ಕ ಯೇಸು ಅಲ್ಪ ಇತ್ತಿನ ಕತ್ತೆದ ಕಿನ್ನಿನ್ ತರ್ಪಾದ್ ಐತ ಮಿತ್ತ್ ಕುಲ್ಲಿಯೆ, ಉಂದೆಡ್ದ್ ಶಾಸ್ತ್ರೊಡು ಬರೆತಿನಂಚನೆ ಆಂಡ್.</verse>
				<verse number="15">“ಚೀಯೋನು ಮಗಲೇ, ಪೋಡ್ಯಡ; ಇಂದಾ, ನಿನ ಅರಸು ಕತ್ತೆದ ಕಿನ್ನಿದ ಮಿತ್ತ್ ಕುಲ್ಲೊಂದು ಬರುವೆ,” ಇನ್ಪಿ ಶಾಸ್ತ್ರದ ಪಾತೆರದಂಚೆನೇ ಮಾತ ನಡತ್ಂಡ್.</verse>
				<verse number="16">ಉಂದು ಆಯ ಶಿಷ್ಯೆರೆಗ್ ದುಂಬು ಗೊತ್ತಿಜ್ಜಾಂಡ್. ಆಂಡ ಯೇಸು ಮೈಮೆದ ಪಟ್ಟೊಗು ಸೇರಿ ಬೊಕ್ಕ, ಉಂದು ಆಯ ವಿಷಯೊಡೇ ಬರೆದಿತ್ತ್‌ಂಡ್ ಪಂಡ್ದ್‌ಲಾ ಎಂಕುಲು ಉಂದೆನ್ ಮಾತ ಆಯಗ್ ಮಲ್ತ ಪಂಡ್ದ್‌ಲಾ ನೆನೆಪುಗು ಬತ್ತ್ಂಡ್.</verse>
				<verse number="17">ಉಂದತ್ತಂದೆ ಯೇಸು ಲಾಜರ್‌ನ ಸಮಾಧಿದ ಉಲಯಿಡ್ದ್ ಲೆತ್ತ್‌ದ್, ಜೀವ ಕೊರಿನ ಗಳಿಗೆಡ್, ಆಯಡೊಪ್ಪ ಇತ್ತಿನ ಜನೊಕುಲು ಈ ವಿಷಯೊಡು ಸಾಕ್ಷಿ ಕೊರೊಂದಿತ್ತೆರ್.</verse>
				<verse number="18">ಆಯೆ ಈ ಕಾರ್ನಿಕೊಲೆನ್ ಮಲ್ತ್‌ದೆ ಅಂದ್‌ದ್ ಕೇಂಡಿನೆಡ್ದ್ ಜನೊಕುಲು ಆಯನ್ ಎದುಕೊನಿಯೆರೆ ಪೋದಿತ್ತೆರ್,</verse>
				<verse number="19">ಇಂಚ ಉಪ್ಪುನಗ ಪರಿಸಾಯೆರ್, “ನಮ ತಂತ್ರೊಲು ದಾಲಾ ನಡತಿಜಿ, ತೂಲೆ; ಲೋಕ ಮಾತ ಆಯ ಬೆರಿಯೆ ಪೋಂಡತ್ತಾ!” ಅಂದ್‌ದ್ ಒರಿಯಗ್ ಒರಿ ಪಾತೆರೊಂಡೆರ್.</verse>
				<verse number="20">ಉಂದತ್ತಂದೆ ದೇವೆರೆನ್ ಆರಾಧನೆ ಮಲ್ಪೊಡಂದ್ ಪರ್ಬೊಗು ಬೈದಿನೆಟ್ಟ್ ಕೆಲೆವೆರ್ ಗ್ರೀಕೆರ್ ಇತ್ತೆರ್.</verse>
				<verse number="21">ಮೊಕುಲು ಆಯಡ, ಗಲಿಲಾಯೊಡುಪ್ಪುನ ಬೆತ್ಸಾಯಿದ ಪನ್ಪಿ ಊರುದ ಫಿಲಿಪ್ಪನ ಕೈತಲ್‌ ಬತ್ತ್‌ದ್, “ಅಯ್ಯಾ, ಎಂಕ್ಲೆಗ್ ಯೇಸುನು ತೂವೊಡು,” ಅಂದ್‌ದ್ ನಟ್ಟೊಂಡೆರ್.</verse>
				<verse number="22">ಫಿಲಿಪ್ಪೆ ಬತ್ತ್‌ದ್ ಅಂದ್ರೇಯಗ್ ಪಂಡೆ. ಅಂದ್ರೆಯೆಲಾ ಫಿಲಿಪ್ಪೆಲಾ ಇರ್ವೆರ್‌ಲಾ ಯೇಸುಗು ಪಂಡೆರ್.</verse>
				<verse number="23">ಅಪಗ ಯೇಸು ಅಕ್ಲೆಗ್ ಉತ್ತರ ಕೊರ್ದು ಪಂಡಿನಿ, “ನರಮಾನಿ ಮಗಕ್ಕ್ ತನ ಮೈಮೆದ ಸ್ಥಾನೊನು ದೆತ್ತೊನುನ ಗಳಿಗೆ ಬೈದ್‌ಂಡ್.”</verse>
				<verse number="24">ನಿಕ್ಲೆಗ್ ನಿಜಾದ್ ಪನ್ಪೆ, ಗೋದಿದ ಬಿತ್ತ್ ಭೂಮಿಗ್ ಬೂರ್ದು ಸೈತ್‌ಜಿಡ, ಅಂಚೆನೇ ಒರಿಯುಂಡು, ಸೈತ್ಂಡ ಮಸ್ತ್ ಫಲ ಕೊರ್ಪುಂಡು.</verse>
				<verse number="25">ತನ ಪ್ರಾಣೊನು ಪ್ರೀತಿ ಮಲ್ತಿನಾಯೆ ಅವೆನ್ ಕಳೆವೊನುವೆ. ಈ ಲೋಕೊಡು ತನ ಪ್ರಾಣೊನು ಪಗೆ ಮಲ್ಪುನಾಯೆ ಅವೆನ್ ನಿತ್ಯಜೀವೊಗು ಒರಿಪಾವೊನ್ವೆ.</verse>
				<verse number="26">ಏರಾಂಡಲಾ ಎನ ಸೇವೆ ಮಲ್ಪುನಾಂಡ, ಎನ ಬೆರಿಯೆ ಬರಡ್; ಬೊಕ್ಕ ಯಾನ್ ಓಲು ಉಪ್ಪುವೆನಾ ಅವುಲು ಎನ ಸೇವಕೆಲಾ ಉಪ್ಪುವೆ. ಏರಾಂಡಲಾ ಎನ ಸೇವೆ ಮಲ್ಪುನಾಂಡ ಎನ ಅಮ್ಮೆ ಆಯಗ್ ಸನ್ಮಾನ ಮಲ್ಪುವೆ.</verse>
				<verse number="27">“ಇತ್ತೆ ಎನ ಪ್ರಾಣ ಸಂಕಟೊಡು ಉಂಡು, ‘ಅಮ್ಮೆರೇ, ಈ ಸ್ಥಿತಿಡ್ದ್ ಎನನ್ ಬುಡ್ಪಾಲ, ಪಂಡ್ದ್ ಯಾನ್ ಪನೊಡಾ?’ ಅತ್ತ್, ಉಂದೆಕ್ಕಾದ್ ಈ ಗಳಿಗೆಗ್ ಬತ್ತೆ.</verse>
				<verse number="28">ಅಮ್ಮೆರೇ, ನಿನ ಪುದರ್‌ಗ್ ಮೈಮೆ ತೋಜಾಲ!” ಅಪಗ, “ಮೈಮೆ ತೋಜಾದೆ, ಕುಡ ಮೈಮೆ ತೋಜಾವೆ.” ಪಂಡ್ದ್ ಬಾನೊಡ್ದು ಒಂಜಿ ಸ್ವರ ಕೇಂಡ್.</verse>
				<verse number="29">ಅವುಲು ಉಂತೊದಿತ್ತಿ ಜನೊಕುಲು ಅವೆನ್ ಕೇಂಡ್ದ್, ತೆಡಿಲ್ ಬತ್ತ್ಂಡ್ ಪಂಡೆರ್, ನನ ಕೆಲೆವೆರ್, “ದೂತೆ ಆಯಡ ಪಾತೆರಿಯೆ!” ಪಂಡೆರ್.</verse>
				<verse number="30">ಆಂಡ ಯೇಸು ಅಕ್ಲೆಗ್, “ಈ ಸ್ವರ ಎಂಕಾದ್ ಬೈದಿಜಿ; ನಿಕ್ಲೆಗಾದ್ ಬೈದ್‌ಂಡ್.</verse>
				<verse number="31">ಇತ್ತೆ ಈ ಲೋಕೊಗು ನ್ಯಾಯತೀರ್ಪು ಆಪುಂಡು; ಇತ್ತೆ ಈ ಲೋಕದ ಅಧಿಪತಿ ಸೈತಾನನ್ ಪಿದಯಿ ಪಾಡುಂಡು.</verse>
				<verse number="32">ಆಂಡ ಎನನ್ ಭೂಮಿಡ್ದ್ ಮಿತ್ತ್ ಏರಾನಗ, ಮಾತೆರೆನ್ಲಾ ಎನ ಕೈತಡೆ ಒಯಿತೊನುವೆ,” ಅಂದ್‌ದ್‌ ಪಂಡೆ.</verse>
				<verse number="33">ಈ ಪಾತೆರೊಡು ತಾನ್ ಇಂಚಿತ್ತಿ ಮರಣೊನು ಸೈಯರೆ ಉಲ್ಲೆ ಪಂಡ್ದ್ ಕಾರಣ ಕೊರಿಯೆ.</verse>
				<verse number="34">ಐಕ್ ಆ ಜನೊಕುಲೆನ ಗುಂಪು, “ಕ್ರಿಸ್ತೆ ಏಪೊಗ್ಲಾ ಉಪ್ಪುನಾಯೆ ಅಂದ್‌ದ್ ನ್ಯಾಯಕಟ್ಟ್‌ಡ್ ಕೇಂಡ್ದ. ಅಂಚಾಂಡ ‘ನರಮಾನಿ ಮಗೆ ಮಿತ್ತ್ ಏರಾವೊನೊಡು,’ ಅಂದ್‌ದ್ ಈ ದಾಯೆ ಪನ್ಪ? ಆ ನರಮಾನಿ ಮಗೆ ಏರ್?” ಅಂದ್‌ದ್ ಕೇಂಡೆರ್.</verse>
				<verse number="35">ಯೇಸು ಅಕ್ಲೆಗ್, “ನನ ಒಂತೆ ಸಮಯನೇ ಬೊಲ್ಪು ನಿಕ್ಲೆಡ್ ಉಪ್ಪುಂಡು, ಕತ್ತಲೆ ನಿಕ್ಲೆನ್ ಸುತ್ತು ಪಾಡೊಡ್ದು ದುಂಬೇ ಬೊಲ್ಪುದ ಸಾದಿಡ್ ನಡಪುಲೆ. ಕತ್ತಲೆದ ಸಾದಿಡ್ ನಡಪುನಾಯಗ್ ತಾನ್ ಒಡೆಗ್ ಪೋಪೆ ಅಂದ್‌ದ್ ಗೊತ್ತಾಪುಜಿ.</verse>
				<verse number="36">ಬೊಲ್ಪು ನಿಕ್ಲೆ ಕೈತಲ್‌ ಉಪ್ಪುನಗನೇ ಬೊಲ್ಪುನು ನಂಬುಲೆ; ನಂಬುಂಡ ನಿಕುಲು ಬೊಲ್ಪುದ ಜೋಕುಲು ಆದುಪ್ಪುವರ್,” ಅಂದ್‌ದ್ ಪಂಡೆ. ಉಂದೆನ್ ಪಂಡಿ ಬೊಕ್ಕ ಯೇಸು ಅಕ್ಲೆನ್ ಬುಡ್ದು ಪೋದು ದೆಂಗ್‌ದ್ ಕುಲ್ಲಿಯೆ.</verse>
				<verse number="37">ಯೇಸು ಕಾರ್ನಿಕೊಲೆನ್ ಅಕ್ಲೆ ಎದುರು ಮಲ್ತ್ಂಡಲಾ ಜನೊಕುಲು ಆಯನ್ ನಂಬಂದೆ ಪೋಯೆರ್.</verse>
				<verse number="38">ಉಂದೆಡ್ದ್ ಪ್ರವಾದಿ ಆಯಿ ಯೆಶಾಯೆ ಪಂಡಿನ ಪಾತೆರ ನಡತ್ಂಡ್; ಅವು ದಾನೆ ಪಂಡ, “ಕರ್ತವಾ, ಎಂಕ್ಲೆನ ಬೋಧನೆನ್ ಏರ್ ನಂಬಿಯೆರ್? ಕರ್ತವಾ, ನಿನ ಪುಗೆಲ್‌ದ ಬಲ ಏರೆಗ್ ತೋಜಿದ್ ಬತ್ತ್ಂಡ್?” ಪನ್ಪಿನವು.</verse>
				<verse number="39">ಅಕುಲು ನಂಬಂದೆ ಪೋಯಿನೆಕ್ಕ್, ಯೆಶಾಯೆ ತನ ಬೊಕ್ಕೊಂಜಿ ಪಾತೆರೊಡು ಕಾರಣ ಕೊರ್ತೆ, ಅವು ದಾನೆಂದ್ಂಡ,</verse>
				<verse number="40">“ಅಕುಲು ಕಣ್ಣ್‌ಡ್ ತೂವಂದೆ, ಉಡಲ್‌ಡ್ ತೆರಿಯಂದೆ, ಅಕುಲು ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ, ದೇವೆರ್ ಅಕ್ಲೆನ ಕಣ್ಣ್‌ಲೆನ್ ಮಂದ ಮಲ್ತ್‌ದ್, ಅಕ್ಲೆನ ಉಡಲ್‌ನ್ ಕಲ್ಲ್ ಮಲ್ತೆ.” ಪನ್ಪಿನವೇ.</verse>
				<verse number="41">ಯೇಸುನ ಮೈಮೆನ್ ತೂದು ಆಯನ ಸುದ್ಧಿನ್ ಪಾತೆರ್‌ನಗ ಯೆಶಾಯೆ ಈ ಪಾತೆರೊನು ಪಂಡೆ.</verse>
				<verse number="42">ಅಂಚಾಂಡಲಾ ಮುಖ್ಯ ಅಧಿಕಾರಿಲೆಡ್ ಮಸ್ತ್ ಜನ ಆಯನ್ ನಂಬಿಯೆರ್. ಆಂಡ ತನ್ಕುಲೆನ್ ಸಭೆಡ್ದ್ ಪಿದಯಿ ಪಾಡೆರ್ ಪಂಡ್ದ್ ಪರಿಸಾಯೆರೆಗ್ ಪೋಡಿದ್, ಅವೆನ್ ಜನೊಕುಲೆ ದುಂಬು ಪಂಡೊನುಜೆರ್.</verse>
				<verse number="43">ದಾಯೆ ಪಂಡ, ದೇವೆರೆಡ್ದ್ ತಿಕ್ಕು ಮಾನೊಡ್ಡು, ಜನೊಕುಲೆಡ್ದ್ ಬರ್ಪಿ ಮಾನನೇ ಅಕುಲು ಪ್ರೀತಿ ಮಲ್ತೆರ್.</verse>
				<verse number="44">ಯೇಸು ಗಟ್ಟಿಡ್ ಇಂಚ ಪಂಡೆ, “ಎನನ್ ನಂಬುನಾಯೆ, ಎನನೇ ನಂಬಿನಾಯೆ ಅತ್ತ್, ಆಂಡ ಎನನ್ ಕಡಪುಡ್ದು ಕೊರ್ತಿನಾಯನ್ ನಂಬುನಾಯೆ ಆದುಲ್ಲೆ.</verse>
				<verse number="45">ಬೊಕ್ಕ ಎನನ್ ತೂಪಿನಾಯೆ, ಎನನ್ ಕಡಪುಡ್ದು ಕೊರಿನಾಯನ್ ತೂಪಿನಾಯೆ ಆದುಲ್ಲೆ.</verse>
				<verse number="46">ಎನನ್ ನಂಬುನ ಒರಿಯಾಂಡಲಾ ಕತ್ತಲೆಡ್ ಉಪ್ಪೆರೆ ಬಲ್ಲಿ ಪಂಡ್ದ್ ಯಾನ್ ಲೋಕೊಗು ಬೊಲ್ಪಾದ್ ಬೈದೆ.</verse>
				<verse number="47">ಏರಾಂಡಲಾ ಎನ ಪಾತೆರೊಲೆನ್ ಕೇಂಡ್ದ್, ಐಕ್ ತಕ್ಕ ನಡಪಂದೆ ಪೋಂಡ, ಯಾನ್ ಅಕ್ಲೆಗ್ ತೀರ್ಪು ಮಲ್ಪುಜಿ. ಲೋಕೊಗು ತೀರ್ಪು ಮಲ್ಪೆರೆ ಯಾನ್ ಬೈದಿಜಿ, ಆಂಡ ಲೋಕೊನು ಒರಿಪಾವೆರೆ ಯಾನ್ ಬೈದೆ.</verse>
				<verse number="48">ಎನನ್ ತಿರಸ್ಕಾರ ಮಲ್ಪುನಾಯೆ, ಎನ ಪಾತೆರೊಲೆನ್ ತರಕೊನಂದೆ ಉಪ್ಪುನಾಯಗ್, ತೀರ್ಪು ಮಲ್ಪುನವು ಒಂಜಿ ಉಂಡು. ಅವು ಯಾನ್ ಪಂತಿ ಪಾತೆರನೇ, ಅವ್ವೇ ಕಡೆತ ದಿನೊಟು ಆಯಗ್ ತೀರ್ಪು ಮಲ್ಪುಂಡು.</verse>
				<verse number="49">ದಾಯೆ ಪಂಡ ಎನ್ನಾತೆಗ್ ಎನ ಅಧಿಕಾರೊಡು ಪಾತೆರ್‌ದಿಜಿ; ಎನನ್ ಕಡಪುಡ್ದು ಕೊರ್ತಿನ ಅಮ್ಮೆ, ಈ ಇಂಚಿಂಚಿನೆನ್ ಪನೊಡು, ಬೊಕ್ಕ ಇಂಚಿಂಚ ಪಾತೆರೊಡು ಪನೊಡು ಪಂಡ್ದ್ ಎಂಕ್ ಅಪ್ಪಣೆ ಕೊರ್ತೆ.</verse>
				<verse number="50">ಆಯೆ ಕೊರ್ತಿ ಅಪ್ಪಣೆ ನಿತ್ಯಜೀವದವು ಆದುಂಡಂದ್‌ದ್ ಯಾನ್ ತೆರಿದೆ. ಅಂಚಾಯಿನೆಡ್ದ್ ಯಾನ್ ಪಾತೆರುನ ಮಾತೆನ್ಲಾ ಅಮ್ಮೆ ಎಂಕ್ ಪಂಡಿಲೆಕ್ಕನೇ ಪಾತೆರ್‌ವೆ.”</verse>
			</chapter>
			<chapter number="13">
				<verse number="1">ಪಸ್ಕ ಪರ್ಬೊಡ್ದು ದುಂಬು, ಯೇಸು ತಾನ್ ಈ ಲೋಕೊನು ಬುಡ್ದು, ಅಮ್ಮೆ ಕೈತಲ್‌ ಪೋಪಿ ಕಾಲ ಬತ್ತ್ಂಡ್ ಅಂದ್‌ದ್ ತೆರಿಯೊಂದು, ಲೋಕೊಡುಪ್ಪು ತನ್ನಾಕುಲೆನ್ ಪ್ರೀತಿ ಮಲ್ತ್‌ದ್, ಕಡೆ ಮುಟ್ಟಲಾ ಅಕ್ಲೆನ್ ಪ್ರೀತಿ ಮಲ್ತೊಂದೇ ಬತ್ತೆ.</verse>
				<verse number="2">ಯೇಸು ಬೊಕ್ಕ ಆಯನ ಶಿಷ್ಯೆರ್ ರಾತ್ರೆದ ವಣಸ್‌ಗ್ ಕುಲ್ಲೊಂದಿತ್ತೆರ್. ಆತ್‌ನೆಟ್ಟ ಸೈತಾನೆ, ಸೀಮೋನನ ಮಗೆ ಆಯಿ ಇಸ್ಕಾರಿಯೋತೆ ಯೂದನ ಮನಸ್‌ಡ್ ಯೇಸುನು ಪತ್ತ್‌ದ್ ಕೊರೊಡು ಇನ್ಪಿ ಆಲೋಚನೆನ್ ಪುಟ್ಟಾಯೆ.</verse>
				<verse number="3">ಅಮ್ಮೆ ತನ ಕೈಟ್ ಮಾತೆನ್ಲಾ ಕೊರ್ತೆ ಅಂದ್‌ದ್ ತಾನ್ ದೇವೆರೆ ಕಡೆಡ್ದ್ ಬೈದಿನಾಯೆ ಆದ್ ದೇವೆರೆ ಕೈತಲ್‌ ಪೋಪೆ ಪಂಡ್ದ್‌ಲಾ ಯೇಸು ತೆರಿಯೊಂದು</verse>
				<verse number="4">ವಣಸ್‌ನ್ ಬುಡ್ದು, ತಾನ್ ಪೊದೆತೊಂದಿತ್ತಿ ಕುಂಟುನು ದೆತ್ತ್‌ದ್ ದೀದ್ ಬೈರಾಸ್‌ನ್ ದೆತ್ತೊಂದು ಸೊಂಟೊಗು ಕಟ್ಟೊಂಡೆ.</verse>
				<verse number="5">ಬೊಕ್ಕ ಬಾಜನೊಡು ನೀರ್ ಪಾಡೊಂದು ಶಿಷ್ಯೆರೆನ ಕಾರ್ ದೆಕ್ಕೊಂದು, ಸೊಂಟೊಗು ಕಟ್ಟೊಂದಿ ಬೈರಾಸ್‌ಡ್ ಒಚ್ಚೆರೆ ಸುರು ಮಲ್ತೆ.</verse>
				<verse number="6">ಇಂಚ ಸೀಮೋನು ಪೇತ್ರ ಕೈತಲ್‌ ಬನ್ನಗ, ಆಯೆ ಯೇಸುಗು, “ಕರ್ತವಾ, ಈ ಎನ ಕಾರ್ ದೆಕ್ಕುವನಾ?” ಅಂದ್‌ದ್ ಪಂಡೆ.</verse>
				<verse number="7">ಐಕ್ ಯೇಸು, “ಯಾನ್ ಇತ್ತೆ ಮಲ್ಪುನವು ನಿಕ್ಕ್ ತೆರಿಯಂದ್, ಆಂಡ ದುಂಬಗ್ ನಿಕ್ಕ್ ತೆರಿಯು,” ಪಂಡೆ.</verse>
				<verse number="8">ಅಪಗ ಪೇತ್ರೆ, “ಈ ಎನ ಕಾರ್ ಏಪೊಗ್ಲಾ ದೆಕ್ಕೆರೆ ಬಲ್ಲಿ.” ಅಂದ್‌ದ್ ಪಂಡಿನೆಕ್ಕ್ ಯೇಸು, “ಯಾನ್ ನಿನನ್ ದೆಕ್ಕಿಜೆಡ ಎನ ಒಟ್ಟುಗು ನಿಕ್ಕ್ ಪಾಲ್ ಉಪ್ಪಂದ್,” ಪಂಡೆ.</verse>
				<verse number="9">ಅಪಗ ಸೀಮೋನೆ ಪೇತ್ರೆ, “ಕರ್ತವಾ, ಎನ ಕಾರ್ ಮಾತ್ರ ಅತ್ತಂದೆ, ಕೈ ಬೊಕ್ಕ ತರೆನ್ಲಾ ದೆಕ್ಕ್‌ಲ,” ಪಂಡೆ.</verse>
				<verse number="10">ಯೇಸು ಆಯಗ್, “ಮೀದುಪ್ಪುನಾಯನ ಕಾರ್ ದೆಕ್ಕೊಡು ಅತ್ತಂದೆ, ಬೇತೆ ದಾಲಾ ದೆಕ್ಕೊಡು ಅಂದ್‌ದ್ ಇಜ್ಜಿ, ಆಯನ ಮೆಯಿ ಮಾತ ಶುದ್ಧ ಆದುಂಡು, ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್.” ಪಂಡೆ.</verse>
				<verse number="11">ಯೇಸು ತನನ್ ಒಚ್ಚಿದ್ ಕೊರ್ಪಿನಾಯೆ ಇಂಚಿತ್ತಿನಾಯೆನೇ ಅಂದ್‌ದ್ ತೆರಿದಿತ್ತಿನೆಡ್ದ್, “ನಿಕುಲು ಶುದ್ಧ ಆದುಲ್ಲರ್, ಆಂಡ ಮಾತೆರ್ಲಾ ಅತ್ತ್,” ಪಂಡೆ.</verse>
				<verse number="12">ಆಯೆ ಅಕ್ಲೆನ ಕಾರ್ ದೆಕ್ಕಿ ಬೊಕ್ಕ, ತನ ಪೊದೆಪುನು ಪೊದ್ಯೊಂದು, ಕುಡ ವಣಸ್‌ಗ್ ಕುಲ್ಲುದು ಅಕ್ಲೆಡ, “ಯಾನ್ ನಿಕ್ಲೆಗ್ ಮಲ್ತಿನವು ಎಂಚಿನವು ಅಂದ್‌ದ್ ತೆರಿಂಡಾ?”</verse>
				<verse number="13">“ನಿಕುಲು ಎನನ್ ಗುರು ಪಂಡ್ದ್‌ಲಾ ಕರ್ತವಾ ಪಂಡ್ದ್‌ಲಾ ಲೆಪ್ಪುವರ್,” ನಿಕುಲು ಲೆಪ್ಪುನವು ಸರಿ, ದಾಯೆಗಂದ್ಂಡ ಯಾನ್ ಅಂಚಿತ್ತಿನಾಯೆನೇ.</verse>
				<verse number="14">ಕರ್ತವೆಲಾ ಗುರುಲಾ ಆಯಿ ಯಾನ್, ನಿಕ್ಲೆನ ಕಾರ್ ದೆಕ್ಕಿನೆಡ್ದ್, ನಿಕುಲುಲಾ ಒರಿಯಗ್ ಒರಿ ಕಾರ್ ದೆಕ್ಕುನ ಹಂಗ್‌ದಾಕುಲಾದುಲ್ಲರ್.</verse>
				<verse number="15">ಯಾನ್ ನಿಕ್ಲೆಗ್ ಮಲ್ತ್ ತೊಜಾಯಿಲೆಕ್ಕ, ನಿಕುಲುಲಾ ಮಲ್ಪೊಡಂದ್‌ದ್ ನಿಕ್ಲೆಗ್ ಮಾದ್ರಿನ್ ತೋಜಾದೆ.</verse>
				<verse number="16">ನಿಕ್ಲೆಗ್ ನಿಜಾದ್ ಪನ್ಪೆ, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್. ಕಡಪುಡ್ದು ಕೊರಿನಾಯೆ ಕಡಪುಡ್ಡಿನಾಯಡ್ದ್ ಮಲ್ಲಾಯೆ ಅತ್ತ್.</verse>
				<verse number="17">ನಿಕುಲು ಉಂದೆನ್ ತೆರಿಯೊಂದು ನೆತ್ತಲೆಕ್ಕ ಮಲ್ತರ್ಡ ನಿಕುಲು ಭಾಗ್ಯವಂತೆರ್.</verse>
				<verse number="18">“ಯಾನ್ ನಿಕ್ಲೆನ ಸಂಗತಿಡ್ ಈ ಪಾತೆರ ಪನ್ಪಿನಿ ಅತ್ತ್. ಅಜತ್ ದೆತ್ತೊಂಡಿನಾಕುಲೆನ್ ಯಾನ್ ತೆರಿದೆ. ಆಂಡ, ‘ಎನ್ನೊಟ್ಟುಗು ವಣಸ್ ಮಲ್ಪುನಾಯೆನೇ ಎಂಕ್ ಅಡ್ಡ ಕಾರ್ ದೀತೆ.’ ಪನ್ಪಿ ಶಾಸ್ತ್ರೊಡು ಬರೆತಿ ಪಾತೆರ ನಡಪುಡೊಡು.</verse>
				<verse number="19">ಅವು ನಡಪುನಗ ‘ಯಾನೇ ಆಯೆ,’ ಅಂದ್‌ದ್ ನಿಕುಲು ನಂಬುಲೆಕ್ಕ ಅವು ನಡಪುಡುನೆಡ್ದ್ ದುಂಬು, ಅವೆನ್ ಇತ್ತೆ ನಿಕ್ಲೆಗ್ ಪನ್ಪೆ.</verse>
				<verse number="20">ನಿಕ್ಲೆಗ್ ನಿಜಾದ್ ಪನ್ಪೆ, ಯಾನ್ ಕಡಪುಡಿನಾಯನ್ ಸೇರಾವೊನುನಾಯೆ ಎನನ್ ಸೇರಾವೊಂಡಿಲೆಕ್ಕ ಆಂಡ್. ಎನನ್ ಸೇರಾವೊಂಡೆಡ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊಂಡಿಲೆಕ್ಕ ಆಂಡ್.”</verse>
				<verse number="21">ಉಂದೆನ್ ಪಂಡಿ ಬೊಕ್ಕ ಯೇಸು ಆತ್ಮೊಡು ಬೆಂಗ್‌ದ್, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಸ್ಪಷ್ಟಾದ್ ಪಂಡೆ.</verse>
				<verse number="22">ಉಂಬೆ ಏರೆನ ಸಂಗತಿಡ್ ಈ ಪಾತೆರೊನು ಪನೊಂದುಲ್ಲೆ, ಅಂದ್‌ದ್ ಶಿಷ್ಯೆರ್ ಅನುಮಾನೊಡು, ಒರಿಯನ್ ಒರಿ ತೂಪಿನಕುಲಾಯೆರ್.</verse>
				<verse number="23">ಶಿಷ್ಯೆರೆಡ್ ಒರಿ ಯೇಸುನ ಪ್ರೀತಿದ ಶಿಷ್ಯೆ, ಯೇಸುನ ತಿಗಲೆದ ಕೈತಲ್‌ ಒರಗ್ದಿತ್ತೆ.</verse>
				<verse number="24">ಆಯಗ್ ಸೀಮೋನು ಪೇತ್ರೆ ಸನ್ನೆ ಮಲ್ತ್‌ದ್, “ಏರೆನ ಸಂಗತಿಡ್ ಪಾತೆರಿಯೆ,” ಅಂದ್‌ದ್ ಯೇಸುಡ ಕೇನಿಯೆರೆ ಪಂಡೆ.</verse>
				<verse number="25">ಐಕ್ ಆ ಶಿಷ್ಯೆ ಯೇಸುನ ತಿಗಲೆದಂಚಿ ಬಗ್ಗ್‌ದ್, “ಕರ್ತವಾ, ಆಯೆ ಏರ್?” ಅಂದ್‌ದ್ ಕೇಂಡೆ.</verse>
				<verse number="26">ಐಕ್ ಯೇಸು, “ಯಾನ್ ಈ ರೊಟ್ಟಿ ತುಂಡುನು ಮುರ್ಕಾದ್ ಏರೆಗ್ ಕೊರ್ಪೆನಾ ಆಯೆನೇ,” ಅಂದ್‌ದ್ ಆ ರೊಟ್ಟಿ ತುಂಡುನು ಮುರ್ಕಾದ್, ಸೀಮೋನು ಮಗೆ ಆಯಿ ಇಸ್ಕಾರಿಯೋತೆ ಯೂದಗ್ ಕೊರಿಯೆ.</verse>
				<verse number="27">ಆಯೆ ಅವೆನ್ ದೆತ್ತೊಂಡಿ ಕೂಡ್ಲೆ ಸೈತಾನೆ ಆಯನ ಉಲಯಿ ಪೊಗ್ಗಿಯೆ. ಅಪಗ ಯೇಸು ಆಯಗ್, “ಈ ಮಲ್ಪೊಡಾಯಿನೆನ್ ಬೇಗ ಮಲ್ಪುಲ!” ಅಂದ್‌ದ್ ಪಂಡೆ.</verse>
				<verse number="28">ಯೇಸು ಆಯಗ್ ಉಂದೆನ್ ದಾಯೆಗಾದ್ ಪಂಡೆ ಪಂಡ್ದ್, ವಣಸ್‌ಗ್ ಕುಲ್ಲುದಿನಾಕುಲೆಗ್ ಏರೆಗ್ಲಾ ಗೊತ್ತಾಯಿಜಿ.</verse>
				<verse number="29">ಅಕ್ಲೆಡ್ ಕೆಲೆವೆರ್ ಪಣವುದ ಚೀರವು ಯೂದಡ ಇತ್ತಿನೆಡ್ದ್, ಪರ್ಬೊಗಾದ್ ಅಕ್ಲೆಗ್ ಬೋಡಾಯಿನೆನ್ ದೆತ್ತೊನ್ಲ ಅಂದ್‌ದ್ ಬಡವೆರೆಗ್ ದಾದಾಂಡಲಾ ಕೊರೊಡು ಪಂಡ್ದ್‌ಲಾ ಯೇಸು ಆಯಗ್ ಪನೊಂದುಲ್ಲೆ ಅಂದ್‌ದ್ ಎನ್ನಿಯೆರ್.</verse>
				<verse number="30">ಆಯೆ ಆ ರೊಟ್ಟಿ ತುಂಡುನು ದೆತ್ತೊಂದು, ಕೂಡ್ಲೇ ಪಿದಯಿ ಪೋಯೆ. ಅಪಗ ರಾತ್ರೆ ಆದಿತ್ತ್ಂಡ್.</verse>
				<verse number="31">ಆಯೆ ಪಿದಯಿ ಪೋಯಿ ಬೊಕ್ಕ ಯೇಸು, “ಇತ್ತೆ ನರಮಾನಿ ಮಗೆ ಮೈಮೆನ್ ಪಡೆಯೊಂಡೆ, ಬೊಕ್ಕ ದೇವೆರ್‌ಲಾ ಆಯಡ್ದ್ ಮೈಮೆ ಪಡೆತೆ.</verse>
				<verse number="32">ಆಯಡ್ದ್ ದೇವೆರೆಗ್ ಮೈಮೆ ಆಯಿನೆಡ್ದ್, ತನಡ್ದ್ ದೇವೆರ್ ಆಯನ್ ಮೈಮೆ ಪಡೆಪಾದ್ ಕೂಡ್ಲೆ ಮೈಮೆ ಪಡೆಪಾವೆ.</verse>
				<verse number="33">ಎನ ಜೋಕುಲೇ, ನನ ಒಂತೆ ಸಮಯ ಮಾತ್ರ ನಿಕ್ಲೆಡೊಪ್ಪ ಉಲ್ಲೆ. ನಿಕುಲು ಎನನ್ ನಾಡುವರ್, ಆಂಡ ಯಾನ್ ಪೋಪಿನಡೆ ನಿಕ್ಲೆಗ್ ಬರಿಯೆರೆ ಆವಂದ್, ಅಂದ್‌ದ್ ಯೆಹೂದ್ಯೆರೆಗ್ ಪಂಡಿಲೆಕ್ಕ ಇತ್ತೆ ನಿಕ್ಲೆಗ್ಲಾ ಪನ್ಪೆ.</verse>
				<verse number="34">ಯಾನ್ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆನ್ ಕೊರ್ಪೆ. ಅವು ದಾದ ಪಂಡ ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ಪುಲೆ; ಯಾನ್ ನಿಕ್ಲೆನ್ ಪ್ರೀತಿ ಮಲ್ತಿಲೆಕ್ಕ ನಿಕುಲುಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ.</verse>
				<verse number="35">ನಿಕುಲು ಒರಿಯನ್ ಒರಿ ಪ್ರೀತಿ ಮಲ್ತರ್ಡ, ಮಾತೆರ್ಲಾ ನಿಕ್ಲೆನ್ ಎನ ಶಿಷ್ಯೆರ್ ಅಂದ್‌ದ್ ತೆರಿಯೊನ್ವೆರ್,” ಪಂಡೆ.</verse>
				<verse number="36">ಸೀಮೋನು ಪೇತ್ರೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪ?” ಅಂದ್‌ದ್ ಕೇಂಡಿನೆಕ್ಕ್ ಯೇಸು, “ಯಾನ್ ಪೋಪಿನಡೆಗ್, ಇತ್ತೆ ಬರಯ. ಆಂಡ ಬೊಕ್ಕ ಎನ ಬೆರಿಯೆ ಬರುವ.” ಪಂಡೆ.</verse>
				<verse number="37">ಪೇತ್ರೆ ಆಯಗ್, “ಕರ್ತವಾ ಯಾನ್ ದಾಯೆ ಇತ್ತೆ ನಿನ ಬೆರಿಯೆ ಬರಯೆ? ನಿಕ್ಕಾದ್ ಎನ ಪ್ರಾಣೊನ್ಲಾ ಕೊರುವೆ,” ಅಂದ್‌ದ್ ಪನ್ನಗ</verse>
				<verse number="38">ಯೇಸು, “ಎಂಕಾದ್ ಪ್ರಾಣ ಕೊರ್ಪನಾ? ನಿಕ್ಕ್ ನಿಜಾದ್ ಪನ್ಪೆ, ಈ ಎನ ಸಂಗತಿಡ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಅರೆಂಜುನೆಟ್ಟ ಕೋರಿ ಕೆಲೆಪಂದ್,” ಪಂಡೆ.</verse>
			</chapter>
			<chapter number="14">
				<verse number="1">“ನಿಕ್ಲೆನ ಉಡಲ್ ತಳಮಳ ಆವಂದೆ ಉಪ್ಪಡ್.” “ದೇವೆರೆನ್ ನಂಬುಲೆ ಎನನ್ಲಾ ನಂಬುಲೆ.</verse>
				<verse number="2">ಎನ ಅಮ್ಮೆರೆ ಇಲ್ಲಡ್ ಮಸ್ತ್ ಬುಡಾರೊಲು ಉಂಡು. ಇಜ್ಜಾಂದೆ ಇತ್ತ್‌ದ್ಂಡ ನಿಕ್ಲೆಗ್ ಪನ್ತ್‌ವೆ, ಯಾನ್ ನಿಕ್ಲೆಗ್ ಜಾಗ್ ತಯಾರ್ ಮಲ್ಪೆರೆ ಪೋವೊಂದುಲ್ಲೆ.</verse>
				<verse number="3">ಯಾನ್ ಪೋದು, ನಿಕ್ಲೆಗ್ ಜಾಗ್ ತಯಾರ್ ಮಲ್ತಿ ಬೊಕ್ಕ, ಯಾನ್ ಉಪ್ಪು ಜಾಗ್‌ಡೇ ನಿಕುಲುಲಾ ಉಪ್ಪೊಡು ಪಂಡ್ದ್, ಕುಡ ಪಿರ ಬತ್ತ್‌ದ್ ನಿಕ್ಲೆನ್ ಲೆತ್ತೊಂದು ಪೋದು ಎನ್ನೊಟ್ಟುಗು ಸೇರಾವೊನುವೆ. ದಾಯೆಗಂದ್ಂಡ ಯಾನ್ ಉಪ್ಪುನ ಜಾಗ್‌ಡ್ ನಿಕುಲುಲಾ ಉಪ್ಪೊಡು.</verse>
				<verse number="4">ಬೊಕ್ಕ ಯಾನ್ ಪೋಪಿ ಜಾಗ್‌ದ ಸಾದಿ ನಿಕ್ಲೆಗ್ ತೆರಿದುಂಡು,” ಪಂಡೆ.</verse>
				<verse number="5">ತೋಮೆ ಯೇಸುಡ, “ಕರ್ತವಾ, ಈ ಒಡೆಗ್ ಪೋಪನಾ ಎಂಕ್ಲೆಗ್ ತೆರಿಯಂದ್, ಅಂಚಾಂಡ ಸಾದಿ ಎಂಚ ತೆರಿವು?” ಕೇಂಡೆ.</verse>
				<verse number="6">ಐಕ್ ಯೇಸು ಆಯಡ, “ಯಾನೇ ಮಾರ್ಗಲಾ ಸತ್ಯಲಾ ಜೀವಲಾ ಆದುಲ್ಲೆ. ಯಾನ್ ಅತ್ತಂದೆ ಏರ್ಲಾ ಅಮ್ಮೆರೆ ಕೈತಲ್‌ ಬರ್ಪುಜೆರ್</verse>
				<verse number="7">ನಿಕುಲು ಎನನ್ ತೆರಿದಿತ್ತರ್ಡ ಎನ ಅಮ್ಮೆರೆನ್ ತೆರಿದಿತ್ತ್‌ವರ್, ಇತ್ತೆಡ್ದ್ ಆಯನ್ ತೆರಿಯೊಂದುಲ್ಲರ್ ಬೊಕ್ಕ ಆಯನ್ ತೂತರತ್ತಾ,” ಪಂಡೆ.</verse>
				<verse number="8">ಐಕ್ ಫಿಲಿಪ್ಪೆ ಯೇಸುಡ, “ಕರ್ತವಾ ಎಂಕ್ಲೆಗ್ ಅಮ್ಮೆರೆನ್ ತೋಜಾವು, ಎಂಕ್ಲೆಗ್ ಆತೇ ಯಾವು,” ಅಂದ್‌ದ್ ಪಂಡೆ.</verse>
				<verse number="9">ಯೇಸು ಆಯಡ, “ಫಿಲಿಪ್ಪೋ, ಯಾನ್ ಈತ್ ದಿನ ನಿಕ್ಲೆಡೊಪ್ಪ ಇತ್ತ್‌ದ್‌ಲಾ ಈ ನನಲಾ ತೆರಿಯೊಂಡಿಜನಾ. ಎನನ್ ತೂತಿನಾಯೆ ಅಮ್ಮೆರೆನ್ ತೂತೆ ಅಂಚಾದ್ ಈ ಎಂಕ್ಲೆಗ್ ಅಮ್ಮೆರೆನ್ ತೋಜಾವು ಅಂದ್‌ದ್ ಪನ್ಪಿನಿ ಎಂಚ?”</verse>
				<verse number="10">ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನೊಟ್ಟುಗು ಉಲ್ಲೆ ಪನ್ಪಿನೆನ್ ಈ ನಂಬುಜನಾ? ಯಾನ್ ನಿಕ್ಲೆಗ್ ಪನ್ಪಿ ಪಾತೆರೊಲು ಎನ್ನಾತೆಗ್ ಯಾನ್ ಪಾತೆರುಜಿ. ಅಮ್ಮೆ ಎನಡೊಪ್ಪ ಇತ್ತ್‌ದ್ ತನ ಕಾರ್ಯೊಲೆನ್ ನಡಪುಡುವೆ.</verse>
				<verse number="11">ಯಾನ್ ಅಮ್ಮೆ ಒಟ್ಟುಗು ಉಲ್ಲೆ, ಅಮ್ಮೆ ಎನ ಒಟ್ಟುಗು ಉಲ್ಲೆ ಪನ್ಪಿ ಪಾತೆರೊಲೆನ್ ನಂಬುಲೆ, ಇಜ್ಜಾಂಡ ಕಾರ್ಯೊಲೆನ್ ತೂದು ಎನ ಪಾತೆರೊಲೆನ್ ನಂಬುಲೆ.</verse>
				<verse number="12">ನಿಕ್ಲೆಗ್ ನಿಜಾದ್ ಪನ್ಪೆ, ಎನನ್ ನಂಬುನಾಯೆ ಯಾನ್ ಮಲ್ಪು ಕಾರ್ಯೊಲೆನ್ ತಾನ್‌ಲಾ ಮಲ್ಪುವೆ, ಬೊಕ್ಕ ಅವೆಡ್ದ್ ಮಲ್ಲ ಮಲ್ಲಕಾರ್ಯೊಲೆನ್ಲಾ ಮಲ್ಪುವೆ. ದಾಯೆ ಪಂಡ ಯಾನ್ ಅಮ್ಮೆರೆ ಕೈತಲ್‌ ಪೋಪೆ.</verse>
				<verse number="13">ಉಂದತ್ತಂದೆ ನಿಕುಲು ಎನ ಪುದರ್‌ಡ್ ಎಂಚಿಂಚಿನ ನಟ್ಟೊಂಡರ್ಡ, ಅವೆನ್ ಮಲ್ತ್ ಕೊರ್ಪೆ. ಇಂಚ ಮಗಡ್ದ್ ಅಮ್ಮೆರೆಗ್ ಮೈಮೆ ಉಂಡಾಪುಂಡು.</verse>
				<verse number="14">ನಿಕುಲು ಎನ ಪುದರ್‌ಡ್ ದಾದಾಂಡಲಾ ನಟ್ಟೊನುವರ್ಡ ಅವೆನ್ ಮಲ್ತ್ ಕೊರ್ಪೆ.</verse>
				<verse number="15">“ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ ಎನ ಅಪ್ಪಣೆನ್ ಕೈಕೊಂದು ನಡಪುವರ್.</verse>
				<verse number="16">ಅಪಗ ಯಾನ್ ಅಮ್ಮೆರೆಡ ನಟ್ಟೊನ್ವೆ. ಆಯೆ ನಿಕ್ಲೆಗ್ ನನೊಂಜಿ ಆದರಿಪುನಾಯನ್ ಕೊರ್ದು ಆಯೆ ಏಪೊಗ್ಲಾ ನಿಕ್ಲೆಡೊಪ್ಪ ಉಪ್ಪುಲೆಕ್ಕ ಕೊರ್ಪೆ.</verse>
				<verse number="17">ಆ ಆದರಿಪುನಾಯೆ ಏರ್ ಪಂಡ್ಂಡ ಸತ್ಯದ ಆತ್ಮೆನೇ. ಲೋಕದಾಕುಲು ಆಯನ್ ತೂವಂದೆಲಾ ತೆರಿಯಂದೆಲಾ ಉಪ್ಪುನೆಡ್ದ್, ಅಕ್ಲೆಗ್ ತಿಕ್ಕುಜೆ. ನಿಕುಲು ಆಯನ್ ತೆರಿದರ್, ಎಂಚಂದ್ಂಡ ಆಯೆ ನಿಕ್ಲೆಡೊಪ್ಪ ತಡೆದ್‌ ಬೊಕ್ಕ ನಿಕ್ಲೆನ ಉಲಯಿ ಉಪ್ಪುವೆ.</verse>
				<verse number="18">“ಯಾನ್ ನಿಕ್ಲೆನ್ ದಿಕ್ಕ್‌ದಾಂತಿನಾಕುಲೆ ಲೆಕ್ಕ ಬುಡ್ಪುಜಿ. ನಿಕ್ಲೆನ ಕೈತಲ್‌ ಬರ್ಪೆ.</verse>
				<verse number="19">ನನ ಒಂತೆ ಸಮಯ ಆಯಿ ಬೊಕ್ಕ ಲೋಕ ಎನನ್ ತೂಪುಜಿ, ಆಂಡ ನಿಕುಲು ಎನನ್ ತೂವರ್. ಯಾನ್ ಬದುಕುನೆಡ್ದ್ ನಿಕುಲುಲಾ ಬದುಕುವರ್.</verse>
				<verse number="20">ಯಾನ್ ಎನ ಅಮ್ಮೆರೆಡ್ ನಿಕುಲು ಎನಡ್ ಬೊಕ್ಕ ಯಾನ್ ನಿಕ್ಲೆಡ್ ಉಪ್ಪುನೆನ್ ನಿಕುಲು ಆ ದಿನೊಟು ತೆರಿವೊನ್ವರ್.</verse>
				<verse number="21">“ಎನ ಅಪ್ಪಣೆನ್ ಪಡೆವೊಂದು ಅವೆನ್ ಕೈಕೊಂದು ನಡಪುನಾಯೆನೇ ಎನನ್ ಪ್ರೀತಿ ಮಲ್ಪುವೆ. ಎನನ್ ಪ್ರೀತಿ ಮಲ್ಪುನಾಯೆ ಎನ ಅಮ್ಮೆರೆಗ್ ಪ್ರೀತಿದಾಯೆ ಆದುಪ್ಪುವೆ. ಯಾನ್ಲಾ ಆಯನ್ ಪ್ರೀತಿ ಮಲ್ತ್‌ದ್, ಆಯಗ್ ತೋಜಿದ್ ಬರ್ಪೆ,” ಅಂದ್‌ದ್ ಪಂಡೆ.</verse>
				<verse number="22">ಯೂದೆ, (ಉಂಬೆ ಇಸ್ಕಾರಿಯೋತ ಯೂದೆ ಅತ್ತ್) ಯೇಸುಡ, “ಕರ್ತವಾ, ಈ ಲೋಕೊಗು ನಿನನ್ ತೋಜಾಪಾವಂದೆ ಎಂಕ್ಲೆಗ್ ಮಾತ್ರ ದಾಯೆಗ್ ತೋಜಾಪಾವ?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="23">ಯೇಸು ಆಯಡ, “ಏರಾಂಡಲಾ ಎನನ್ ಪ್ರೀತಿ ಮಲ್ಪುವೆಡ ಎನ ಪಾತೆರೊಲೆನ್ ಕೈಕೊಂದು ನಡಪುವೆ. ಆಯನ್ ಎನ ಅಮ್ಮೆ ಪ್ರೀತಿ ಮಲ್ಪುವೆ, ಬೊಕ್ಕ ಎಂಕುಲು ಇರ್ವೆರ್‌ಲಾ ಆಯ ಕೈತಲ್‌ಗ್ ಬತ್ತ್‌ದ್ ಆಯಡೊಪ್ಪ ಬುಡಾರ ಮಲ್ತೊನ್ವ.</verse>
				<verse number="24">ಎನನ್ ಪ್ರೀತಿ ಮಲ್ಪಂದೆ ಉಪ್ಪುನಾಯೆ ಎನ ಪಾತೆರೊಲೆನ್ ಕೈಕೊನೊಂದು ನಡಪುಜೆ, ನಿಕುಲು ಕೇನುನ ಪಾತೆರೊಲು ಎನ್ನವು ಅತ್ತ್, ಎನನ್ ಕಡಪುಡಿ ಅಮ್ಮೆರೆನವೇ ಆದುಂಡು.</verse>
				<verse number="25">“ಈ ಪಾತೆರೊಲೆನ್ ಯಾನ್ ನಿಕ್ಲೆನ ಒಟ್ಟುಗು ಉಪ್ಪುನಗನೇ ಪನ್ತೆ.</verse>
				<verse number="26">ಆಂಡ, ಎನ ಪುದರ್‌ಡ್ ಅಮ್ಮೆ ಕಡಪುಡ್ದು ಕೊರ್ತಿ ಆದರಿಪುನಾಯೆ ಪರಿಶುದ್ಧಾತ್ಮೆನೇ, ನಿಕ್ಲೆಗ್ ಮಾತೆನ್ ಬೋಧನೆ ಮಲ್ತ್‌ದ್, ಯಾನ್ ನಿಕ್ಲೆಗ್ ಪನ್ತಿನೆನ್ ಮಾತೆನ್ಲಾ ನಿಕ್ಲೆನ ನೆನೆಪುಗು ಕನಪೆ.</verse>
				<verse number="27">“ಸಮಾಧಾನೊನು ನಿಕ್ಲೆಗ್ ಬುಡ್ದು ಪೋಪೆ. ಎನ ಸಮಾಧಾನೊನು ನಿಕ್ಲೆಗ್ ಕೊರ್ಪೆ. ಲೋಕ ಕೊರ್ಪಿ ರೀತಿಡ್ ಯಾನ್ ನಿಕ್ಲೆಗ್ ಕೊರ್ಪುಜಿ. ನಿಕ್ಲೆನ ಉಡಲ್ ತಳಮಳ ಆವಂದೆ ಪೋಡಿಯಂದೆ ಉಪ್ಪಡ್.</verse>
				<verse number="28">‘ಯಾನ್ ಪೋದು ಕುಡ ನಿಕ್ಲೆನ ಕೈತಲ್‌ ಬರ್ಪೆ.’ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್. ನಿಕುಲು ಎನನ್ ಪ್ರೀತಿ ಮಲ್ಪುನಾಕುಲಾಂಡ, ಯಾನ್ ಅಮ್ಮೆರೆ ಕೈತಲ್‌ ಪೋಪಿ ಸಂಗತಿಡ್ ಸಂತೋಷ ಪಡೆತ್ವರ್, ದಾಯೆ ಪಂಡ ಅಮ್ಮೆ ಎನಡ್ದ್ ಮಲ್ಲಾಯೆ.</verse>
				<verse number="29">ಉಂದು ಮಾತ ಆನಗ ನಿಕುಲು ಎನನ್ ನಂಬೊಡು ಪಂಡ್ದ್, ಮಾತ ಆವೊಡ್ದುಂಬೇ ಯಾನ್ ನಿಕ್ಲೆಗ್ ಪನ್ಪೆ.</verse>
				<verse number="30">ನನ ಯಾನ್ ನಿಕ್ಲೆಡೊಪ್ಪ ಹೆಚ್ಚ್ ಪಾತೆರುಜಿ, ದಾಯೆ ಪಂಡ ಭೂಲೋಕದ ಅಧಿಪತಿ ಬರ್ಪೆ. ಆಯಗ್ ಸಂಬಂಧ ಪಡೆಯಿನ ದಾಲಾ ಎನಡ ಇಜ್ಜಿ.</verse>
				<verse number="31">ಆಂಡಲಾ ಯಾನ್ ಅಮ್ಮೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ಲೋಕೊಗು ತೆರಿದುಪ್ಪೊಡು ಅಂದ್‌ದ್ ಅಮ್ಮೆ ಎಂಕ್ ಕೊರಿ ಅಪ್ಪಣೆಗಾದ್ ಉಂದೆನ್ ಮಲ್ಪುವೆ. ಲಕ್ಕ್‌ಲೆ, ನಮ ಮುಲ್ತುಡ್ದು ಪೋಯಿ.”</verse>
			</chapter>
			<chapter number="15">
				<verse number="1">“ಯಾನೇ ನಿಜವಾಯಿನ ದ್ರಾಕ್ಷೆಬೂರು. ಎನ ಅಮ್ಮೆ ತೋಟದಾಯೆ.</verse>
				<verse number="2">ಎನಡಿತ್ತ್‌ದ್ ಫಲ ಕೊರಂದಿ ಪ್ರತಿಯೊಂಜಿ ಗೆಲ್ಲ್‌ಲೆನ್ ಆಯೆ ದೆತ್ತ್ ಪಾಡ್ವೆ. ಫಲ ಕೊರ್ಪಿನ ಪ್ರತಿಯೊಂಜಿ ಗೆಲ್ಲ್‌ಲೆನ್ ಹೆಚ್ಚ್ ಫಲ ಕೊರ್ಪಿಲೆಕ್ಕ ಅವೆನ್ ಶುದ್ಧ ಮಲ್ಪುವೆ.</verse>
				<verse number="3">ಯಾನ್ ನಿಕ್ಲೆಗ್ ಪಂಡಿನ ಪಾತೆರೊಡ್ದು ನಿಕುಲು ಇತ್ತೆ ಶುದ್ಧ ಆದುಲ್ಲರ್.</verse>
				<verse number="4">ನಿಕುಲು ಎನಡ ನಿಲೆ ಆದುಪ್ಪುಲೆ, ಯಾನ್ಲಾ ನಿಕ್ಲೆಡ ನಿಲೆ ಆದುಪ್ಪುವೆ. ಗೆಲ್ಲುಲು ತನ್ನಾತೆಗ್ ಫಲ ಕೊರಿಯೆರೆ ಸಾದ್ಯ ಇಜ್ಜಿ. ಗೆಲ್ಲ್ ಬೂರುದೊಟ್ಟುಗು ಇತ್ತ್ಂಡ ಮಾತ್ರ ಫಲ ಕೊರೊಲಿ. ಅಂಚೆನೇ ನಿಕುಲುಲಾ ಎನಡ ನಿಲೆ ಆದ್ ಇಜ್ಜರ್ಡ ನಿಕುಲು ಫಲ ಕೊರಯರ್.</verse>
				<verse number="5">“ಯಾನ್ ದ್ರಾಕ್ಷೆಬೂರು, ನಿಕುಲು ಐತ ಗೆಲ್ಲ್‌ಲು. ಏರ್ಲಾ ಒರಿ ಎನಡ ಯಾನ್ ಆಯಡ ನಿಲೆ ಆದಿತ್ತ್ಂಡ ಮಾತ್ರ ಆಯೆ ಹೆಚ್ಚ್ ಫಲ ಕೊರ್ಪೆ. ನಿಕುಲು ಎನನ್ ಬುಡ್ದು ದಾಲಾ ಮಲ್ಪೆರೆ ಆಪುಜಿ.</verse>
				<verse number="6">ಏರ್ ಎನಡ ನಿಲೆ ಆದುಪ್ಪುಜೆನಾ ಆಯನ್ ಕಡ್ತಿನ ಗೆಲ್ಲ್‌ದಲೆಕ್ಕ ಪಿದಯಿ ದಕ್ಕುವೆರ್ ಅವು ನುಂಗುದು ಪೋಪುಂಡು. ಅಂಚಿತ್ತಿ ಗೆಲ್ಲ್‌ಲೆನ್ ಕೂಡಾದ್ ತೂಕು ಪಾಡ್ವೆರ್, ಅವು ಪೊತ್ತುದು ಪೋಪುಂಡು.</verse>
				<verse number="7">ನಿಕುಲು ಎನಡೊಪ್ಪಲಾ ಎನ ಪಾತೆರೊಲು ನಿಕ್ಲೆಡೊಪ್ಪಲಾ ನಿಲೆ ಆದಿತ್ತ್ಂಡ, ನಿಕ್ಲೆಗ್ ಬೋಡಾಯಿನೆನ್ ಕೇನೊಂಡ, ಅವು ನಿಕ್ಲೆಗ್ ತಿಕ್ಕುಂಡು.</verse>
				<verse number="8">ನಿಕುಲು ಹೆಚ್ಚ್ ಫಲ ಕೊರ್ಪಿನೆಡ್ದೇ ಎನ ಅಮ್ಮೆರೆಗ್ ಮೈಮೆ ಉಂಡಾಪುಂಡು, ಅವೆಡ್ದ್ ನಿಕುಲು ಎನ ಶಿಷ್ಯೆರಂದ್‌ದ್ ತೋಜಾವುಂಡು.</verse>
				<verse number="9">ಅಮ್ಮೆ ಎನನ್ ಪ್ರೀತಿ ಮಲ್ತಿಲೆಕ್ಕ, ಯಾನ್ಲಾ ನಿಕ್ಲೆನ್ ಪ್ರೀತಿ ಮಲ್ತ್‌ದೆ. ಎನ ಪ್ರೀತಿಡ್ ನಿಕುಲು ನಿಲೆ ಆದುಪ್ಪುಲೆ.</verse>
				<verse number="10">ಯಾನ್ ಎನ ಅಮ್ಮೆರೆನ ಅಪ್ಪಣೆಲೆನ್ ಕೈಕೊಂದು, ಆಯಡ ಪ್ರೀತಿಡ್ ನಿಲೆ ಆದಿತ್ತಿಲೆಕ್ಕ, ನಿಕುಲು ಎನ ಅಪ್ಪಣೆಲೆನ್ ಕೈಕೊನುವರ್ಡ, ಎನ ಪ್ರೀತಿಡ್ ನಿಕುಲು ನಿಲೆ ಆದುಪ್ಪುವರ್.</verse>
				<verse number="11">“ಎನಡ ಉಪ್ಪು ಸಂತೋಷ ನಿಕ್ಲೆಡ ಉಪ್ಪೊಡು, ಬೊಕ್ಕ ನಿಕ್ಲೆಡ ಉಪ್ಪು ಸಂತೋಷ ಪೂರ ಆದ್ ದಿಂಜೊಡು ಅಂದ್‌ದ್ ಉಂದೆನ್ ಮಾತ ನಿಕ್ಲೆಗ್ ಪನ್ತೆ.</verse>
				<verse number="12">ಯಾನ್ ನಿಕ್ಲೆನ್ ಪ್ರೀತಿ ಮಲ್ತಿಲೆಕ್ಕ, ನಿಕುಲುಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನನೇ, ಯಾನ್ ನಿಕ್ಲೆಗ್ ಕೊರ್ಪಿನ ಅಪ್ಪಣೆ ಆದುಂಡು.</verse>
				<verse number="13">ಒರಿ ಸ್ನೇಹಿತೆರೆಗಾದ್ ತನ ಪ್ರಾಣೊನೇ ಕೊರಿಯೆಡ, ಐಡ್ದ್ ಹೆಚ್ಚ್‌ದ ಪ್ರೀತಿ ಒವುಲಾ ಇಜ್ಜಿ.</verse>
				<verse number="14">ಯಾನ್ ಕೊರಿನ ಅಪ್ಪಣೆಗ್ ಸರಿಯಾದ್ ನಿಕುಲು ನಡತರ್ಡ ಮಾತ್ರ, ನಿಕುಲು ಎನ ಸ್ನೇಹಿತೆರ್.</verse>
				<verse number="15">ನನ ಮಿತ್ತ್ ಯಾನ್ ನಿಕ್ಲೆನ್ ಚಾಕ್ರಿದಾಕುಲು ಅಂದ್‌ದ್ ಪನ್ಪುಜಿ. ಧನಿ ಎಂಚಿನ ಮಲ್ಪುವೆ ಅಂದ್‌ದ್ ಬೇಲೆದಾಯಗ್ ತೆರಿಯುಜಿ. ನಿಕ್ಲೆನ್ ಸ್ನೇಹಿತೆರೆ ಅಂದ್‌ದ್ ಪನ್ತೆ, ಅಮ್ಮೆರೆಡ್ದ್ ಕೇಂಡಿನೆನ್ ಮಾತೆನ್ ನಿಕ್ಲೆಗ್ ತೆರಿಪಾದೆ.</verse>
				<verse number="16">ನಿಕುಲು ಎನನ್ ಅಜತ್‌ದ್ ದೆತ್ತೊಂದಿಜರ್, ಆಂಡ ಯಾನ್ ನಿಕ್ಲೆನ್ ಅಜತ್‌ದ್ ದೆತ್ತೊಂದೆ. ನಿಕುಲು ಪೋದು ಫಲ ಕೊರ್ಪಿನಾಕುಲು ಆದುಪ್ಪೊಡು ಅಂದ್‌ದ್‌ಲಾ ನಿಕುಲು ಕೊರ್ಪಿನ ಫಲ ನಿಲೆಯಾದುಪ್ಪುಲೆಕ್ಕ ನಿಕ್ಲೆನ್ ನೇಮಕ ಮಲ್ತ್‌ದೆ. ಇಂಚ ಉಪ್ಪುನಗ ಎನ ಪುದರ್‌ಡ್ ಅಮ್ಮೆರೆಡ ಒವೆನ್ ಕೇನೊಂಡಲಾ ಆಯೆ ನಿಕ್ಲೆಗ್ ಕೊರ್ಪೆ.</verse>
				<verse number="17">ಒರಿಯನ್ ಒರಿ ಪ್ರೀತಿ ಮಲ್ಪೊಡು ಅಂದ್‌ದ್ ಯಾನ್ ನಿಕ್ಲೆಗ್ ಅಪ್ಪಣೆ ಕೊರ್ಪೆ.</verse>
				<verse number="18">“ಲೋಕ ನಿಕ್ಲೆನ್ ಪಗೆ ಮಲ್ಪುನಾಂಡ, ಅವು ಎನನ್ಲಾ ನಿಕ್ಲೆಡ್ದ್ ದುಂಬು ಪಗೆ ಮಲ್ತ್ಂಡ್ ಪಂಡ್ದ್ ಎನ್ನೊನ್ಲೆ.</verse>
				<verse number="19">ನಿಕುಲು ಲೋಕದಾಕುಲು ಆದಿತ್ವರ್ಡ, ಲೋಕ ತನ್ನಾಯೆ ಪಂಡ್ದ್ ಪ್ರೀತಿ ಮಲ್ತುದು. ಆಂಡ ನಿಕುಲು ಲೋಕದಾಕುಲು ಆದುಪ್ಪಂದಿನೆಡ್ದ್‌ಲಾ ಯಾನ್ ನಿಕ್ಲೆನ್ ಲೋಕದುಲಯಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್‌ಲಾ ಲೋಕ ನಿಕ್ಲೆನ್ ಪಗೆ ಮಲ್ಪುಂಡು.</verse>
				<verse number="20">ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್ ಅಂದ್‌ದ್ ಯಾನ್ ಪನ್ತಿನೆನ್ ನೆನೆಪು ಮಲ್ತೊನ್ಲೆ. ಅಕುಲು ಎಂಕ್ ಭಂಗ ಕೊರ್ಪೆರ್ಡ, ನಿಕ್ಲೆಗ್ಲಾ ಭಂಗ ಕೊರುವೆರ್. ಅಕುಲು ಎನ ಪಾತೆರೊನು ಕೈಕೊಂದು ನಡತೆರ್ಡ, ನಿಕ್ಲೆನ ಪಾತೆರೊಲೆನ್ಲಾ ಕೈಕೊಂದು ನಡಪುವೆರ್.</verse>
				<verse number="21">ಆಂಡ ಅಕುಲು ಎನನ್ ಕಡಪುಡ್ದು ಕೊರಿನಾಯನ್ ತೆರಿಯಂದಿನಾಕುಲು ಆದಿತ್ತಿನೆಡ್ದ್, ಎನ ಪುದರ್‌ಗಾದ್ ಇಂಚ ಮಾತ ಮಲ್ಪುವೆರ್.</verse>
				<verse number="22">ಯಾನ್ ಬತ್ತ್‌ದ್ ಅಕ್ಲೆಡ ಪಾತೆರಂದೆ ಇತ್ತೆಡ, ಅಕ್ಲೆಗ್ ಪಾಪ ಇತ್ತ್‌ದ್ವಂದ್. ಆಂಡ ಇತ್ತೆ ಅಕುಲು ಮಲ್ತಿನ ಪಾಪೊಲೆಗಾದ್ ಅಕ್ಲೆಗ್ ನೆವನ ಕೊರಿಯೆರೆ ಆಪುಜಿ.</verse>
				<verse number="23">ಎನನ್ ಪಗೆ ಮಲ್ಪುನಾಯೆ ಎನ ಅಮ್ಮೆರೆನ್ಲಾ ಪಗೆ ಮಲ್ಪುವೆ</verse>
				<verse number="24">ಬಾಕಿದಾಕುಲು ಏರ್ಲಾ ಮಲ್ಪಂದಿ ಬೇಲೆಲೆನ್ ಯಾನ್ ಅಕ್ಲೆಡ ನಡಪಾವಂದೆ ಇತ್ತೆಡ, ಅಕ್ಲೆಗ್ ಪಾಪ ಇತ್ತ್‌ದ್ವಂದ್. ಆಂಡ ಇತ್ತೆ ಅಕುಲು ತೂತೆರ್, ಆಂಡಲಾ ಎನ ಮಿತ್ತ್‌ಲಾ ಎನ ಅಮ್ಮೆರೆ ಮಿತ್ತ್‌ಲಾ ಪಗೆ ಮಲ್ಪುವೆರ್.</verse>
				<verse number="25">‘ಅಕುಲು ಎನನ್ ಕಾರಣದಾಂತೆ ಪಗೆ ಕಟ್ಟೊಂದೆರ್,’ ಅಂದ್‌ದ್ ಅಕ್ಲೆನ ನ್ಯಾಯಕಟ್ಟ್‌ಡ್ ಬರೆದುಪ್ಪು ಪಾತೆರೊಲು ಪೂರ್ತಿ ಆಪಿಲೆಕ್ಕ ಇಂಚ ಆಂಡ್.</verse>
				<verse number="26">“ಆಂಡ ಅಮ್ಮೆರೆ ಕೈತಲ್‌ಡ್ದ್ ಯಾನ್ ನಿಕ್ಲೆಗಾದ್ ಒರಿ ಆದರಿಪುನಾಯನ್ ಕಡಪುಡ್ದು ಕೊರ್ಪೆ. ಆ ಸತ್ಯದ ಆತ್ಮೆ ಅಮ್ಮೆರೆಡ್ದ್ ಬತ್ತಿ ಬೊಕ್ಕ ಎನ ಸಂಗತಿಡ್ ಸಾಕ್ಷಿ ಕೊರ್ಪೆ.</verse>
				<verse number="27">ನಿಕುಲು ಸುರುಡ್ದು ಎನಡೊಪ್ಪ ಇತ್ತಿನೆಡ್ದ್ ಎನ ಸಂಗತಿಡ್ ಸಾಕ್ಷಿ ಕೊರ್ಪರ್.</verse>
			</chapter>
			<chapter number="16">
				<verse number="1">“ನಿಕುಲು ನಂಬಿಕೆಡ್ ಪಿರ ಜಾರಿಯೆರೆ ಬಲ್ಲಿ ಅಂದ್‌ದ್ ಉಂದೆನ್ ಮಾತ ನಿಕ್ಲೆಗ್ ಪನ್ತೆ.</verse>
				<verse number="2">ನಿಕ್ಲೆನ್ ಸಭಾಮಂದಿರೊಡ್ದು ಪಿದಯಿ ಪಾಡ್ವೆರ್. ಅವತ್ತಂದೆ ನಿಕ್ಲೆನ್ ಕೆರ್ಪಿನಾಯೆ, ತಾನ್ ದೇವೆರೆಗ್ ಯಜ್ಞ ಸೇವೆ ಮಲ್ತ್‌ದೆ ಪನ್ಪಿ ಕಾಲ ಬರ್ಪುಂಡು.</verse>
				<verse number="3">ಅಕುಲು ಎನನಾವಡ್ ಅಮ್ಮೆನಾವಡ್ ತೆರಿಯಂದೆ ಉಪ್ಪುನೆಡ್ದ್ ಉಂದೆನ್ ಮಾತ ನಿಕ್ಲೆಗ್ ಮಲ್ಪುವೆರ್.</verse>
				<verse number="4">ಆ ಕಾಲ ಬನ್ನಗ ನಿಕ್ಲೆನ ನೆನೆಪುಗು ಬರ್ಪಿಲೆಕ್ಕ ನಿಕ್ಲೆಡ ಈ ಪಾತೆರೊಲೆನ್ ಪನ್ಪೆ. ಯಾನ್ ನಿಕ್ಲೆಡೊಪ್ಪ ಇತ್ತಿನೆಡ್ದ್ ದುಂಬತ್ತನೇ ಉಂದೆನ್ ನಿಕ್ಲೆಗ್ ಪಂಡ್‌ದಿತ್ತ್‌ಜಿ.</verse>
				<verse number="5">“ಆಂಡ ಇತ್ತೆ ಯಾನ್ ಎನನ್ ಕಡಪುಡ್ದು ಕೊರಿನಾಯನ ಕೈತಲ್‌ ಪೋಪೆ, ‘ಆಂಡ ಯಾನ್ ಒಡೆಗ್ ಪೋಪೆ,’ ಅಂದ್‌ದ್ ನಿಕ್ಲೆಡ್ ಒರಿಲಾ ಎನನ್ ಕೇನುಜರ್.</verse>
				<verse number="6">ಉಂದತ್ತಂದೆ ಯಾನ್ ಈ ಪಾತೆರೊಲೆನ್ ನಿಕ್ಲೆಗ್ ಪಂಡಿನೆಡ್ದ್ ನಿಕ್ಲೆನ ಉಡಲ್ ದುಃಖೊಡು ದಿಂಜಿದುಂಡು.</verse>
				<verse number="7">ಆಂಡಲಾ ಯಾನ್ ನಿಕ್ಲೆಗ್ ಸತ್ಯೊನು ಪನ್ಪೆ, ಯಾನ್ ಪೋಪಿನವು ನಿಕ್ಲೆನ ಎಡ್ಡೆಗ್, ದಾಯೆ ಪಂಡ ಯಾನ್ ಪೋಯಿಜಿಡ ಆ ಆದರಿಪುನಾಯೆ ನಿಕ್ಲೆನ ಕೈತಲ್‌ ಬರ್ಪುಜೆ. ಯಾನ್ ಪೋಂಡ ಆಯನ್ ನಿಕ್ಲೆನ ಕೈತಲ್‌ ಕಡಪುಡ್ದು ಕೊರ್ಪೆ.</verse>
				<verse number="8">ಆಯೆ ಬತ್ತ್‌ದ್ ಪಾಪ, ನೀತಿ, ನ್ಯಾಯತೀರ್ಪುದ ಸಂಗತಿಡ್ಲಾ ಲೋಕೊಗು ತೆರಿಪಾದ್ ಕೊರ್ಪೆ.</verse>
				<verse number="9">ಅಕುಲು ಎನನ್ ನಂಬಂದೆ ಉಪ್ಪುನೆಡ್ದ್ ಪಾಪದ ಸಂಗತಿಡ್ಲಾ</verse>
				<verse number="10">ಯಾನ್ ಅಮ್ಮೆರೆ ಕೈತಲ್‌ ಪೋದು ನನ ಮಿತ್ತ್ ನಿಕ್ಲೆಗ್ ತೋಜಂದೆ ಉಪ್ಪುನೆಡ್ದ್ ನೀತಿದ ಸಂಗತಿಡ್ಲಾ</verse>
				<verse number="11">ಭೂಲೋಕದ ಅಧಿಪತಿಗ್ ನ್ಯಾಯತೀರ್ಪು ಆಯಿನೆಡ್ದ್ ನ್ಯಾಯತೀರ್ಪುದ ವಿಷಯೊಡ್ಲಾ ಲೋಕೊಗು ತೆರಿಪಾದ್ ಕೊರ್ಪೆ.</verse>
				<verse number="12">“ಯಾನ್ ನಿಕ್ಲೆಗ್ ಪನಿಯೆರೆ ಉಪ್ಪುನವು ನನಲಾ ಉಂಡು, ಆಂಡ ಸದ್ಯೊಗು ಅವೆನ್ ತುಂಬೊನಯರ್.</verse>
				<verse number="13">ಸತ್ಯದ ಆತ್ಮೆ ಬನ್ನಗ ಆಯೆ ನಿಕ್ಲೆನ್ ಮಾತ ಸಂಗತಿಲೆಡ್ ಸತ್ಯೊಗು ಸೇರಾವೆ; ಆಯೆ ತನ ಸಂಗತಿಡೇ ಪಾತೆರಂದೆ ತಾನ್ ಕೇಂಡಿನ ಪಾತೆರೊಲೆನೇ ಪನ್ಪೆ, ಅತ್ತಂದೆ ದುಂಬಗ್ ಆಪಿನೆನ್ ನಿಕ್ಲೆಗ್ ತೆರಿಪಾವೆ.</verse>
				<verse number="14">ಆಯೆ ಎನ ಉಲಯಿಡ್ ಇತ್ತಿನೆನೇ ನಿಕ್ಲೆಗ್ ತೆರಿಪಾದ್ ಎನನೇ ಮೈಮೆ ಪಡೆಪಾವೆ.</verse>
				<verse number="15">ಅಮ್ಮೆರೆಗ್ ಉಪ್ಪುನವು ಮಾತ ಎನ್ನವು. ಉಂದೆಕ್ಕಾದ್ ಎನಡ ಇತ್ತಿನೆನೇ ದೆತ್ತೊಂದು ನಿಕ್ಲೆಗ್ ತೆರಿಪಾವೆ ಅಂದ್‌ದ್ ಪಂಡೆ.</verse>
				<verse number="16">“ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್, ಕುಡ ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂವರ್” ಅಂದ್‌ದ್ ಪಂಡೆ.</verse>
				<verse number="17">ಉಂದೆನ್ ಕೇಂಡ್ದ್ ಆಯನ ಶಿಷ್ಯೆರೆಡ್ ಕೆಲೆವೆರ್, “‘ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್,’ ಕುಡ, ‘ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂವರ್. ಬೊಕ್ಕ ಯಾನ್ ಎನ ಅಮ್ಮೆರೆ ಕೈತಲ್‌ ಪೋಪೆ,’ ಪನ್ಪಿನೆತ್ತ ಅರ್ಥ ಎಂಚಿನ ಆದುಪ್ಪು?</verse>
				<verse number="18">‘ಒಂತೆ ಸಮಯ,’ ಪಂಡ ಎಂಚಿನ ಆದುಪ್ಪು? ಆಯೆ ಎಂಚಿನ ಪನ್ಪೆನಾ ಎಂಕ್ಲೆಗ್ ಗೊತ್ತಾಪುಜಿ.” ಪಂಡ್ದ್ ಪನ್ನೊಂದಿತ್ತೆರ್</verse>
				<verse number="19">ಅಪಗ ಯೇಸು ಅಕುಲು ಎನಡ ಕೇನ್ವೆರ್ ಅಂದ್‌ದ್ ತೆರಿದ್, “ಅಕ್ಲೆಗ್, ‘ಒಂತೆ ಸಮಯೊಡ್ದು ಬೊಕ್ಕ ಎನನ್ ನಿಕುಲು ತೂವಯರ್, ಕುಡ ಒಂತೆ ಸಮಯೊಡ್ದು ಬೊಕ್ಕ ಎನನ್ ತೂಪರ್,’ ಅಂದ್‌ದ್ ಯಾನ್ ಪಂಡಿನೆಕ್ಕ್, ನಿಕುಲು ನಿಕ್ಲೆನ ಉಲಯಿ ವಿಚಾರ ಮಲ್ತೊನ್ವರಾ?</verse>
				<verse number="20">ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಬುಲ್ತೊಂದು ಅರಬಾಯಿ ಕೊರೊಂದು ಉಪ್ಪುವರ್, ಆಂಡ ಲೋಕ ಸಂತೋಷ ಮಲ್ಪು, ನಿಕುಲು ದುಃಖೊಡು ಉಪ್ಪುವರ್. ಆಂಡ ನಿಕ್ಲೆನ ದುಃಖ ಪೋದು ನಿಕ್ಲೆಗ್ ಸಂತೋಷ ಆಪುಂಡು.</verse>
				<verse number="21">ಒಂಜಿ ಪೊಂಜೊವು ಪೆದ್ದೆರೆ ಆನಗ ತನ ಬೇನೆದ ಗಳಿಗೆ ಬತ್ತ್ಂಡ್ ಅಂದ್‌ದ್ ಆಲೆಗ್ ಸಂಕಟ ಆಪುಂಡು, ಆಂಡ ಬಾಲೆನ್ ಪೆದ್ದಿ ಬೊಕ್ಕ ಲೋಕೊಡು ಒರಿ ನರಮಾನಿ ಪುಟ್ಟಿಯೆ ಅಂದ್‌ದ್ ಸಂತೋಷೊಡು ಆ ಬೇನೆನ್ ಮದಪುವಲ್.</verse>
				<verse number="22">ಅಂಚೆನೇ ನಿಕ್ಲೆಗ್ಲಾ ಇತ್ತೆ ದುಃಖ ಉಂಡು, ಆಂಡ ಯಾನ್ ನಿಕ್ಲೆನ್ ಕುಡೊರ ತೂವೆ, ಅಪಗ ನಿಕ್ಲೆನ ಉಡಲ್‌ಗ್ ಸಂತೋಷ ಆಪುಂಡು, ಬೊಕ್ಕ ನಿಕ್ಲೆನ ಆ ಸಂತೋಷೊನು ಏರ್ಲಾ ನಿಕ್ಲೆಡ್ದ್ ದೆತ್ತ್‌ದ್ ಪಾಡಾಯೆರ್.</verse>
				<verse number="23">“ಆ ದಿನೊಟು ಎನಡ ದಾಲಾ ಕೇನಯರ್. ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಅಮ್ಮೆರೆಡ ಎನ ಪುದರ್‌ಡ್ ಒವೆನ್ ಕೇನೊಂಡಲಾ ಆಯೆ ನಿಕ್ಲೆಗ್ ಕೊರ್ಪೆ.</verse>
				<verse number="24">ನಿಕುಲು ಇದ ಮುಟ್ಟ ಎನ ಪುದರ್‌ಡ್ ದಾಲಾ ಕೇಂಡ್ದ್‌ಜರ್, ನಟ್ಟೊನ್ಲೆ, ಅಪಗ ನಿಕ್ಲೆಗ್ ತಿಕ್ಕುಂಡು ಬೊಕ್ಕ ನಿಕ್ಲೆನ ಸಂತೋಷ ಪರಿಪೂರ್ಣ ಆಪುಂಡು.</verse>
				<verse number="25">“ಯಾನ್ ಈ ಸಂಗತಿಲೆದ ಅರ್ಥೊನು ನಿಕ್ಲೆಗ್ ಉಪಕತೆತ್ತ ರೂಪೊಡು ಪನ್ತೆ, ಆಂಡ ನನ ಮಿತ್ತ್ ಉಪಕತೆತ್ತ ರೂಪೊಡು ನಿಕ್ಲೆಡ ಪಾತೆರಂದೆ, ಅಮ್ಮೆರೆನ ಸಂಗತಿಡ್ ಸಜ್ಜಿಡ್ ತೆರಿಪಾವುನ ಕಾಲ ಬೇಗ ಬರ್ಪುಂಡು.</verse>
				<verse number="26">ಆ ದಿನೊಟು ನಿಕುಲು ಎನ ಪುದರ್‌ಡ್ ಸೀದ ಅಮ್ಮೆರೆಡನೇ ಕೇನ್ವರ್, ನಿಕ್ಲೆಗಾದ್ ಯಾನ್ ಅಮ್ಮೆರೆಡ ನಟ್ಟೊನೊಡು ಪನ್ಪಿನ ಅಗತ್ಯ ಇಜ್ಜಿ.</verse>
				<verse number="27">ದಾಯೆಗ್ ಪಂಡ ನಿಕುಲು ಎನನ್ ಪ್ರೀತಿ ಮಲ್ತ್‌ದ್ ಯಾನ್ ದೇವೆರೆನ ಕೈತಲ್‌ಡ್ದ್ ಪಿದಾಡ್ದ್ ಬೈದಿನಾಯೆ ಅಂದ್‌ದ್ ನಂಬಿನೆಡ್ದ್ ಅಮ್ಮೆ ನಿಕ್ಲೆನ್ ಪ್ರೀತಿ ಮಲ್ಪುವೆ.</verse>
				<verse number="28">ಅಮ್ಮೆರೆ ಕೈತಲ್‌ಡ್ದ್ ಪಿದಾಡ್ದ್ ಈ ಲೋಕೊಗು ಬೈದೆ. ನನ ಈ ಲೋಕೊನು ಬುಡ್ದು ಎನ ಅಮ್ಮೆರೆ ಕೈತಲ್‌ ಪೋಪೆ,” ಪಂಡೆ.</verse>
				<verse number="29">ಐಕ್ ಶಿಷ್ಯೆರ್, “ಈ ಪನ್ಪಿನ ಸಂಗತಿಲೆನ್ ಇತ್ತೆ ಅರ್ಥ ಆಪಿಲೆಕ್ಕ ಸ್ಪಷ್ಟಾದ್ ಪನೊಂದುಲ್ಲ ಉಪಕತೆಟ್ ಅತ್ತ್.</verse>
				<verse number="30">ಈ ಸಮಸ್ತೊನ್ಲಾ ತೆರಿದಿನಾಯೆ ಪಂಡ್ದ್‌ಲಾ ನಿಕ್ಕ್ ಪ್ರಶ್ನೆ ಮಲ್ಪುನ ಅಗತ್ಯ ಇಜ್ಜಿ ಪಂಡ್ದ್‌ಲಾ ಇತ್ತೆ ತೆರಿಂಡ್. ಉಂದೆಡ್ದಾದ್ ಈ ದೇವೆರೆ ಕೈತಲ್‌ಡ್ದ್ ಬೈದಿನಾಯೆ ಅಂದ್‌ದ್ ನಂಬುವ,” ಪಂಡೆರ್.</verse>
				<verse number="31">ಐಕ್ ಯೇಸು, “ಇತ್ತೆ ನಂಬುವರಾ?</verse>
				<verse number="32">ತೂಲೆ, ನಿಕ್ಲೆಡ್ ಒರಿ ಒರಿ ಚಲ್ಲಾಪಿಲ್ಲಿ ಆದ್ ನಿಕುಲು ಮಾತೆರ್ ನಿಕ್ಲೆನ ಸ್ವಂತ ಜಾಗ್‌ಗ್ ಪೋದು ಎನನ್ ಒಂಟಿಯಾದ್ ಬುಡ್ಪಿ ಕಾಲ ಬರ್ಪುಂಡು, ಅವು ಇತ್ತೆ ಬೈದ್‌ಂಡ್, ಆಂಡ ಯಾನ್ ಒಂಟಿಯೆ ಅತ್ತ್. ಅಮ್ಮೆ ಎನಡೊಪ್ಪ ಉಲ್ಲೆ.</verse>
				<verse number="33">ನಿಕುಲು ಎನಡೊಪ್ಪ ಇತ್ತ್‌ದ್ ಉಡಲ್‌ದ ಸಮಾಧಾನೊನು ಪಡೆವೊಡು ಅಂದ್‌ದ್ ಈ ಸಂಗತಿಲೆನ್ ನಿಕ್ಲೆಗ್ ಪಂತೆ. ಲೋಕೊಡು ನಿಕ್ಲೆಗ್ ಸಂಕಟ ಉಂಡು, ಆಂಡ ಧೈರ್ಯೊಡುಪ್ಪುಲೆ, ಯಾನ್ ಲೋಕೊನು ಗೆಂದ್‌ದೆ,” ಪಂಡೆ.</verse>
			</chapter>
			<chapter number="17">
				<verse number="1">ಯೇಸು ಈ ಪಾತೆರೊಲೆನ್ ಪಂಡಿ ಬೊಕ್ಕ ಬಾನದಂಚಿ ಕಣ್ಣ್ ಲಕ್ಕಾದ್ ತೂದು ಪಂಡಿನಿ ದಾನೆಂದ್ಂಡ, “ಅಮ್ಮೆರೇ, ಸಮಯ ಬೈದ್‌ಂಡ್, ನಿನ ಮಗನ್ ಮೈಮೆ ಪಡೆಪಾಲ, ಅಪಗ ನಿನ ಮಗೆ ನಿನನ್ ಮೈಮೆ ಪಡೆಪಾವೆರೆ ಆಪುಂಡು.</verse>
				<verse number="2">ಈ ಆಯಗ್ ಏರೇರೆನ್ ಕೊರ್ತನಾ ಅಕ್ಲೆಗ್ ಮಾತೆರೆಗ್ಲಾ ನಿತ್ಯಜೀವೊನು ಕೊರೊಡು ಅಂದ್‌ದ್ ಆಯಗ್ ಮಾತ ನರಮಾನಿಲೆ ಮಿತ್ತ್ ಅಧಿಕಾರ ಕೊರ್ತ ಅತ್ತಾ?</verse>
				<verse number="3">ಒರಿಯೇ ನಿಜ ದೇವೆರ್ ಆದುಪ್ಪು ನಿನನ್ಲಾ ಈ ಕಡಪುಡ್ದಿ ಯೇಸು ಕ್ರಿಸ್ತನ್ಲಾ ತೆರಿಯೊನುನವೇ ನಿತ್ಯಜೀವ.</verse>
				<verse number="4">ಈ ಕೊರ್ತಿನ ಕೆಲಸೊನು ಯಾನ್ ಮಲ್ತ್‌ದ್ ಮುಗಿತೆ, ನಿನನ್ ಭೂಲೋಕೊಡು ಮೈಮೆ ಪಡೆಪಾಯೆ.</verse>
				<verse number="5">ಅಮ್ಮೆರೇ, ಈ ಎನನ್ ಮೈಮೆ ಪಡೆಪಾಲ ಲೋಕ ಉಂಡಾಪಿನೆಕ್ಕ್ ದುಂಬು ನಿನ ಕೈತಲ್ ಎಂಕಿತ್ತಿ ಮೈಮೆಡ್ದೇ ಎನನ್ ಇತ್ತೆ ಮೈಮೆ ಪಡೆಪಾಲ.</verse>
				<verse number="6">“ಲೋಕದ ಉಲಯಿಡ್ದ್ ಈ ಎಂಕ್ ಕೊರಿ ನರಮಾನಿಲೆಗ್ ನಿನ ಪುದರ್‌ನ್ ತೆರಿಪಾಯೆ. ಮೊಕುಲು ನಿನ್ನಾಕುಲು ಆದಿತ್ತೆರ್ಡಲಾ ಈ ಮೊಕ್ಲೆನ್ ಎಂಕ್ ಕೊರಿಯ. ಬೊಕ್ಕ ಮೊಕುಲು ನಿನ ಪಾತೆರೊನು ಕೈಕೊಂದು ನಡತ್ತ್‌ದೆರ್‌</verse>
				<verse number="7">ಈ ಎಂಕ್ ಕೊರಿನವು ಮಾತಲಾ ನಿನಡ್ದೇ ಬೈದಿನವು ಅಂದ್‌ದ್ ಇತ್ತೆ ಮೊಕುಲು ತೆರಿಯೊಂದೆರ್.</verse>
				<verse number="8">ಎಂಚಂದ್ಂಡ ಈ ಎಂಕ್ ಕೊರಿ ಪಾತೆರೊಲೆನ್ ಯಾನ್ ಮೊಕ್ಲೆಗ್ ಕೊರ್ತೆ. ಮೊಕುಲು ಆ ಪಾತೆರೊಲೆನ್ ಕೈಕೊಂದು, ಯಾನ್ ನಿನ ಕೈತಲ್‌ಡ್ದ್ ಬೈದಿನಾಯೆ ಅಂದ್‌ದ್ ನಿಜಾದ್ ತೆರಿಯೊಂದು, ಈಯೇ ಎನನ್ ಕಡಪುಡ್ದು ಕೊರ್ತಿನಾಯೆ ಅಂದ್‌ದ್ ನಂಬುದೆರ್.</verse>
				<verse number="9">“ಯಾನ್ ಮೊಕ್ಲೆಗಾದ್ ಕೇನೊನುವೆ. ಲೋಕೊಗಾದ್ ಪ್ರಾರ್ಥನೆ ಮಲ್ಪಂದೆ, ಈ ಎಂಕ್ ಕೊರ್ತಿನ ಜನೊಕುಲೆಗಾದ್ ಪ್ರಾರ್ಥನೆ ಮಲ್ಪುವೆ, ದಾಯೆಗ್ ಪಂಡ ಮೊಕುಲು ನಿನ್ನಕುಲಾದುಲ್ಲೆರ್.</verse>
				<verse number="10">ಎನ್ನವು ಮಾತಲಾ ನಿನ್ನವೇ, ನಿನ್ನವು ಮಾತಲಾ ಎನ್ನವು. ಬೊಕ್ಕ ಮೊಕ್ಲೆಡ್ದ್ ಎಂಕ್ ಮೈಮೆ ಉಂಡಾತ್ಂಡ್.</verse>
				<verse number="11">ನನ ಯಾನ್ ಲೋಕೊಡು ಉಪ್ಪುಜಿ, ಆಂಡ ಮೊಕುಲು ಲೋಕೊಡು ಉಪ್ಪುನಾಕುಲು, ಯಾನ್ ನಿನ ಕೈತಲ್‌ಗ್ ಬರ್ಪೆ. ಪರಿಶುದ್ಧ ಅಮ್ಮೆರೇ, ಎಂಕುಲು ಒಂಜಾದ್ ಇತ್ತಿಲೆಕ್ಕ ಮೊಕುಲುಲಾ ಒಂಜಾದುಪ್ಪೊಡು ಅಂದ್‌ದ್ ಈ ಎಂಕ್ ಕೊರಿ ನಿನ ಪುದರ್‌ಡ್ ಮೊಕ್ಲೆನ್ ಕಾತೊನ್ಲ.</verse>
				<verse number="12">ಯಾನ್ ಮೊಕ್ಲೆಡೊಪ್ಪ ಉಪ್ಪುನಗ, ಈ ಎಂಕ್ ಕೊರ್ತಿನ ನಿನ ಪುದರ್‌ಡ್ ಮೊಕ್ಲೆನ್ ಕಾತೊಂಡೆ. ಶಾಸ್ತ್ರದ ಪಾತೆರ ನಡಪುಲೆಕ್ಕ ನಾಶನೊಗು ಗುರಿ ಆಯಿ ಮಗೆನೇ ಅತ್ತಂದೆ ಮೊಕ್ಲೆಡ್ ಬೇತೆ ಏರ್ಲಾ ನಾಶ ಆತಿಜೆರ್.</verse>
				<verse number="13">ಆಂಡ ಇತ್ತೆ ನಿನ್ನಡೆ ಬರ್ಪಿನಾಯೆ ಆದುಲ್ಲೆ, ಅವೆಡ್ದಾವರ ಮೊಕ್ಲೆಡ್ ಎನ ಸಂತೋಷ ಪರಿಪೂರ್ಣ ಆಪಿಲೆಕ್ಕ ಈ ಪಾತೆರೊಲೆನ್ ಲೋಕೊಡು ಇತ್ತ್‌ದ್ ಪನೊಂದುಲ್ಲೆ.</verse>
				<verse number="14">ಯಾನ್ ನಿನ ಪಾತೆರೊನು ಅಕ್ಲೆಗ್ ತೆರಿಪಾದೆ, ಯಾನ್ ಲೋಕದಾಯೆ ಅತ್ತಂದೆ ಉಪ್ಪುಲೆಕ್ಕ ಮೊಕುಲುಲಾ ಲೋಕದಕುಲತ್ತ್, ಅಂಚಾದ್ ಲೋಕ ಮೊಕ್ಲೆನ್ ಪಗೆ ಮಲ್ಪುಂಡು.</verse>
				<verse number="15">ಮೊಕ್ಲೆನ್ ಲೋಕೊಡ್ದು ದೆತ್ತೊಂದು ಪೋವೊಡಂದ್‌ದ್ ಯಾನ್ ಕೇನುಜಿ, ಸೈತಾನ ಕೈಡ್ದ್ ತಪ್ಪಾಲ ಅಂದ್‌ದ್ ನಟ್ಟೊಂದುಲ್ಲೆ.</verse>
				<verse number="16">ಯಾನ್ ಲೋಕದಾಯೆ ಆದುಪ್ಪಂದಿಲೆಕ್ಕನೇ ಮೊಕುಲುಲಾ ಲೋಕದಕುಲತ್ತ್,</verse>
				<verse number="17">ನಿನ ಸತ್ಯೊಡು ಅಕ್ಲೆನ್ ಪರಿಶುದ್ಧ ಮಲ್ಪುಲ. ನಿನ ಪಾತೆರ ಸತ್ಯದವು.</verse>
				<verse number="18">ಈ ಎನನ್ ಲೋಕೊಗು ಕಡಪುಡ್ದು ಕೊರಿಲೆಕ್ಕನೇ ಯಾನ್ಲಾ ಮೊಕ್ಲೆನ್ ಲೋಕೊಗು ಕಡಪುಡ್ದು ಕೊರಿಯೆ.</verse>
				<verse number="19">ಮೊಕುಲು ನಿಜಾದ್‌ಲಾ ಸತ್ಯೊಡು ಪರಿಶುದ್ಧೆರ್ ಆತಿನಕುಲಾದುಪ್ಪೊಡು ಅಂದ್‌ದ್ ಮೊಕ್ಲೆಗಾದ್ ಯಾನ್ ಎನನ್ ಪರಿಶುದ್ಧ ಮಲ್ತೊನ್ವೆ.</verse>
				<verse number="20">“ಆಂಡ ಮೊಕ್ಲೆಗಾದ್ ಮಾತ್ರ ಅತ್ತಂದೆ, ಮೊಕ್ಲೆನ ಬೋಧನೆನ್ ಕೇಂಡ್ದ್ ಎನನ್ ನಂಬುನಾಕುಲೆಗಾದ್‌ಲಾ ನಟ್ಟೊಂದುಲ್ಲೆ.</verse>
				<verse number="21">ಅಮ್ಮೆರೇ, ಮಾತೆರ್ಲಾ ಒಂಜಾದುಪ್ಪೊಡು ಅಂದ್‌ದ್ ಈ ಎನನ್ ಕಡಪುಡ್ದು ಕೊರ್ತ ಅಂದ್‌ದ್ ಲೋಕದಾಕುಲು ನಂಬುನೆಕ್ಕಾದ್, ಈ ಎನಡ್ ಯಾನ್ ನಿನಡ್ ಉಪ್ಪುಲೆಕ್ಕ ಅಕುಲುಲಾ ನಮಡ್ ಒಂಜಾದುಪ್ಪೊಡು ಅಂದ್‌ದ್‌ಲಾ ಯಾನ್ ನಟ್ಟೊನ್ವೆ.</verse>
				<verse number="22">ಎಂಕುಲು ಒಂಜಾದುಪ್ಪುಲೆಕ್ಕ ಅಕುಲುಲಾ ಒಂಜಾದುಪ್ಪೊಡು ಅಂದ್‌ದ್, ಈ ಎಂಕ್ ಕೊರ್ತಿ ಮೈಮೆನ್ ಯಾನ್ ಅಕ್ಲೆಗ್ ಕೊರ್ತೆ.</verse>
				<verse number="23">ಯಾನ್ ಅಕ್ಲೆಡಲಾ ಈ ಎನಡಲಾ ಉಪ್ಪುನಗ, ಅಕ್ಲೆನ ಸಮ್ಮಂಧಲಾ ತೋಜಿದ್ ಬರ್ಪಿನೆಡ್ದ್, ಈ ಎನನ್ ಕಡಪುಡ್ದು ಕೊರ್ತ ಪಂಡ್ದ್‌ಲಾ ಈ ಎನನ್ ಪ್ರೀತಿ ಮಲ್ತಿಲೆಕ್ಕ ಅಕ್ಲೆನ್ಲಾ ಈ ಪ್ರೀತಿ ಮಲ್ತ್‌ದ ಪಂಡ್ದ್‌ಲಾ ಲೋಕೊಗು ತೆರಿದ್ ಬರ್ಪುಂಡು.</verse>
				<verse number="24">“ಅಮ್ಮೆರೇ, ಈ ಏರೆನ್ ಎಂಕ್ ಕೊರ್ತನಾ ಅಕುಲು ಯಾನ್ ಉಪ್ಪು ಜಾಗ್‌ಡ್ ಎನ ಒಟ್ಟುಗು ಇತ್ತೊಂದು, ಲೋಕ ಉಂಡಾಪಿನೆಡ್ದ್ ದುಂಬೇ ಈ ಎನನ್ ಪ್ರೀತಿ ಮಲ್ತ್‌ದ್ ಎಂಕ್ ಕೊರಿ ಮೈಮೆನ್ ಅಕುಲು ತೂವೊಡು ಅಂದ್‌ದ್ ಬಯಕುವೆ.</verse>
				<verse number="25">ನೀತಿದ ಅಮ್ಮೆರೇ, ಲೋಕ ಆಂಡಲಾ ನಿನನ್ ತೆರಿಯಿಜಿ. ಆಂಡ ಯಾನ್ ನಿನನ್ ತೆರಿದೆ, ಬೊಕ್ಕ ಎನ ಶಿಷ್ಯೆರ್‌ಲು, ಈಯೇ ಎನನ್ ಕಡಪುಡ್ದ ಅಂದ್‌ದ್ ತೆರಿಯೊಂದೆರ್.</verse>
				<verse number="26">ಯಾನ್ ಅಕ್ಲೆಗ್ ನಿನ ಪುದರ್‌ನ್ ತೆರಿಪಾದೆ ನನಲಾ ತೆರಿಪಾವೆ. ದಾಯೆಗಂದ್ಂಡ ಈ ಎನ ಮಿತ್ತ್ ದೀತಿ ಪ್ರೀತಿ ಅಕ್ಲೆಡ ಉಪ್ಪೊಡಂದ್‌ದ್ ಯಾನ್ಲಾ ಅಕ್ಲೆಡ ಉಪ್ಪೊಡಂದ್‌ದ್ ಪ್ರಾರ್ಥನೆ ಮಲ್ಪುವೆ.”</verse>
			</chapter>
			<chapter number="18">
				<verse number="1">ಯೇಸು ಪ್ರಾರ್ಥನೆ ಮಲ್ತಿ ಬೊಕ್ಕ ತನ ಶಿಷ್ಯೆರೆಡೊಪ್ಪ ಕೆದ್ರೋನ್ ಕೆದುತ ಆಪೆ ಬರಿಕ್ಕ್ ಪೋಯೆ. ಅಲ್ಪ ಒಂಜಿ ತೋಟ ಇತ್ತ್ಂಡ್, ಐತ ಉಲಯಿ ಆಯೆಲಾ ಆಯ ಶಿಷ್ಯೆರ್‌ಲುಲಾ ಪೋಯೆರ್.</verse>
				<verse number="2">ಯೇಸುಲಾ ಆಯ ಶಿಷ್ಯೆರ್‌ಲಾ ಅಪಗಾಪಗ ಈ ಜಾಗ್‌ಗ್ ಬರೊಂದಿತ್ತಿನೆಡ್ದ್ ಯೇಸುನು ಪತ್ತ್‌ದ್ ಕೊರ್ಪಿ ಯೂದಗ್ಲಾ ಆ ಜಾಗ್ ಗೊತ್ತಿತ್ತ್ಂಡ್.</verse>
				<verse number="3">ಇಂಚ ಉಪ್ಪುನಗ ಯೂದೆ ಸಿಪಾಯಿಲೆ ಪಟ್ಲಾಮುಲೆನ್ಲಾ ಪ್ರಧಾನಯಾಜಕೆರೆ ಬೊಕ್ಕ ಪರಿಸಾಯೆರ್ ಕಡಪುಡಿ ಅಧಿಕಾರಿಲೆನ್ಲಾ ಲೆತ್ತೊಂದು ತೂಟೆ, ಕತ್ತಿ ಇಂಚಿನ ಆಯುಧೊಲೆನ್ ಪತ್ತೊಂದು ಅಡೆಗ್ ಬತ್ತೆ.</verse>
				<verse number="4">ಅಪಗ ಯೇಸುಗು ತನ ಮಿತ್ತ್ ಬರ್ಪಿನವು ಮಾತಲಾ ಗೊತ್ತಾದ್, ಪಿದಯಿ ಬತ್ತ್‌ದ್ ನಿಕುಲು, “ಏರೆನ್ ನಾಡೊಂದುಲ್ಲರ್?” ಅಕ್ಲೆಡ ಕೇಂಡೆ.</verse>
				<verse number="5">ಐಕ್ ಅಕುಲು, “ನಜರೇತ್‌ದ ಯೇಸುನು” ಪಂಡೆರ್. ಯೇಸು ಅಕ್ಲೆಡ, “ಯಾನೇ ಆಯೆ” ಪಂಡೆ. ಆಯನ್ ಪತ್ತ್‌ದ್ ಕೊರ್ಪಿ ಯೂದೆಲಾ ಅಕ್ಲೆನೊಟ್ಟುಗು ಉಂತುದಿತ್ತೆ.</verse>
				<verse number="6">ಯೇಸು ಅಕ್ಲೆಡ, “ಯಾನೇ,” ಅಂದ್‌ದ್ ಪನ್ನಗ ಅಕುಲು ಪಿರಜಾರ್ದ್ ನೆಲತ್ತ ಮಿತ್ತ್ ಬೂರ್ಯೆರ್.</verse>
				<verse number="7">ಯೇಸು ಕುಡ ಅಕ್ಲೆಡ, “ಏರೆನ್ ನಾಡೊಂದುಲ್ಲರ್?” ಅಂದ್‌ದ್ ಕೇನ್ನಗ, ಅಕುಲು, “ನಜರೇತ್‌ದ ಯೇಸುನು ನಾಡುವ,” ಪಂಡೆರ್.</verse>
				<verse number="8">ಐಕ್ ಯೇಸು, “ಯಾನ್ ಆಯೆನೇ ಅಂದ್‌ದ್ ನಿಕ್ಲೆಗ್ ಪನ್ಪೆ ಅತ್ತಾ, ನಿಕುಲು ಎನನೇ ನಾಡುನಾಕುಲಾಂಡ ಮೊಕ್ಲೆನ್ ಪೋವೆರೆ ಬುಡ್ಲೆ,” ಪಂಡೆ.</verse>
				<verse number="9">“ಈ ಎಂಕ್ ಕೊರಿನೆಟ್ಟ್ ಒರಿಯನ್ಲಾ ಯಾನ್ ಕಳೆವೊಂಡಿಜಿ,” ಅಂದ್‌ದ್ ಆಯೆ ಪಂಡಿನ ಪಾತೆರ ಪೂರ್ತಿ ಆವೊಡು ಅಂದ್‌ದ್ ಇಂಚ ಕೂಡುದು ಬತ್ತ್ಂಡ್.</verse>
				<verse number="10">ಸೀಮೋನು ಪೇತ್ರಡ ಒಂಜಿ ಕತ್ತಿ ಇತ್ತ್ಂಡ್ ಅವೆನ್ ದೆತ್ತೊಂದು ಆಯೆ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತೆ. ಆ ಬೇಲೆದಾಯನ ಪುದರ್ ಮಲ್ಕೆ.</verse>
				<verse number="11">ಅಪಗ ಯೇಸು ಪೇತ್ರಗ್, “ಕತ್ತಿನ್ ಬರಿಕ್ಕ್ ಪಾಡ್ಲ. ಅಮ್ಮೆ ಎಂಕ್ ಕೊರ್ತಿನ ಪಾತ್ರೆಡ್‌ ಯಾನ್ ಪರಿಯೆರೆ ಬಲ್ಲಿಯಾ?” ಅಂದ್‌ದ್ ಕೇಂಡೆ.</verse>
				<verse number="12">ಐಡ್ದ್ ಬೊಕ್ಕ ಸಿಪಾಯಿಲೆ ಪಟ್ಲಾಮುಲಾ ಸಹಸ್ರಾಧಿಪತಿಲಾ ಯೆಹೂದ್ಯೆರೆ ಚಾಕ್ರಿದಾಕುಲುಲಾ ಯೇಸುನು ಪತ್ತ್‌ದ್ ಕಟ್ಟಿಯೆರ್.</verse>
				<verse number="13">ಸುರುಟ್ಟು ಅನ್ನ ಕೈತಲ್‌ ಪೋಯೆರ್. ಅನ್ನೆ ಆ ವರ್ಸೊಡು ಪ್ರಧಾನಯಾಜಕೆ ಆಯಿ ಕಾಯಫನ ತಮ್ಮಲೆ ಆದಿತ್ತೆ.</verse>
				<verse number="14">ಒರಿ ನರಮಾನಿ ಜನೊಕುಲೆಗಾದ್ ಸೈಪಿನವು ಎಡ್ಡೆಂದ್‌ದ್ ಯೆಹೂದ್ಯೆರೆಗ್ ಆಲೋಚನೆ ಕೊರ್ತಿನಾಯೆ ಆ ಕಾಯಫೆನೇ.</verse>
				<verse number="15">ಸೀಮೋನು ಪೇತ್ರೆಲಾ ಬೊಕ್ಕೊರಿ ಶಿಷ್ಯೆಲಾ ಯೇಸುನ ಬೆರಿಯೆ ಪೋಯೆರ್. ಆ ಶಿಷ್ಯಗ್ ಪ್ರಧಾನಯಾಜಕನ ಗುರ್ತ ಇತ್ತಿನೆಡ್ದ್ ಯೇಸುಡೊಪ್ಪ ಪ್ರಧಾನಯಾಜಕನ ಜಾಲ್‌ಗ್ ಪೋಯೆ.</verse>
				<verse number="16">ಪೇತ್ರೆ ಪಿದಯಿ ಬಾಕಿಲ್‌ದ ಕೈತಲ್ ಉಂತುದಿತ್ತಿನೆಡ್ದ್ ಪ್ರಧಾನಯಾಜಕನ ಗುರ್ತ ಇತ್ತಿ ಶಿಷ್ಯೆ ಪಿದಯಿ ಬತ್ತ್‌ದ್ ಬಾಕಿಲ್ ಕಾಪುನ ಚಾಕ್ರಿದಲೆಡ ಪಾತೆರ್‌ದ್ ಪೇತ್ರನ್ ಉಲಯಿ ಲೆತ್ತೊಂದು ಪೋಯೆ.</verse>
				<verse number="17">ಅಪಗ ಬಾಕಿಲ್ ಕಾಪುನ ಚಾಕ್ರಿದಾಲ್, “ಈಲಾ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಪೇತ್ರಡ ಕೇಂಡಿನೆಕ್ಕ್ ಆಯೆ, “ಯಾನ್ ಅತ್ತ್,” ಪಂಡೆ.</verse>
				<verse number="18">ಅಪಗ ಚಳಿ ಇತ್ತಿನೆಡ್ದ್ ಚಾಕ್ರಿದಾಕುಲುಲಾ ಸಿಪಾಯಿಲುಲಾ ಕನಕ್‌ಡ್ ತೂ ಮಲ್ತ್‌ದ್ ಚಳಿ ಕಾಯ್ತೊಂದು ಉಪ್ಪುನಗ, ಪೇತ್ರೆಲಾ ಅಕ್ಲೆಡೊಪ್ಪ ಇತ್ತ್‌ದ್ ಚಳಿ ಕೈತೊಂದಿತ್ತೆ.</verse>
				<verse number="19">ಅಪಗ ಪ್ರಧಾನಯಾಜಕೆ ಯೇಸುಡ ಆಯನ ಶಿಷ್ಯೆರೆ ಸಂಗತಿಡ್ಲಾ ಆಯ ಬೋಧನೆದ ಸಂಗತಿಡ್ಲಾ ಪ್ರಶ್ನೆ ಮಲ್ತೆ.</verse>
				<verse number="20">ಐಕ್ ಯೇಸು, “ಯಾನ್ ಲೋಕದ ಜನೊಕುಲೆ ಎದುರುಡು ಪಾತೆರ್‌ದೆ. ಮಾತ ಯೆಹೂದ್ಯೆರ್ ಸೇರು ಜಾಗ್ ಆಯಿ ಸಭಾಮಂದಿರೊಲೆಡ್ಲಾ ದೇವಾಲಯೊಲೆಡ್ಲಾ ಏಪಲಾ ಬೋಧನೆ ಮಲ್ತೊಂದೇ ಬೈದೆ. ಮದೆಟ್ ಒವೆನ್ಲಾ ಪಾತೆರ್‌ದಿಜಿ.</verse>
				<verse number="21">ಎನನ್ ದಾಯೆ ಪ್ರಶ್ನೆ ಮಲ್ಪುವ? ಯಾನ್ ಪಾತೆರಿದಿನೆನ್ ಕೇಂಡಿನಾಕುಲೆಡ ವಿಚಾರ ಮಲ್ಪುಲ, ಯಾನ್ ಪಂತಿನವು ಮಾತ ಅಕ್ಲೆಗ್ ಗೊತ್ತುಂಡತ್ತಾ?” ಪಂಡೆ.</verse>
				<verse number="22">ಯೇಸು ಈ ಪಾತೆರೊನು ಪನ್ನಗ ಕೈತಲ್‌ ಉಂತುದಿತ್ತಿ ಅಧಿಕಾರಿಲೆಡ್ ಒರಿ ಆಯ ಕೆಪ್ಪೆಗ್ ಹಾಕ್‌ದ್, “ಪ್ರಧಾನಯಾಜಕಗ್ ಈ ಇಂಚ ಉತ್ತರ ಕೊರ್ಪನಾ?” ಪಂಡೆ.</verse>
				<verse number="23">ಯೇಸು ಆಯಗ್, “ಯಾನ್ ಪಾತೆರ್‌ನೆಟ್ಟ್ ದಾದಾಂಡಲಾ ದೋಷ ಇತ್ತ್ಂಡ ಆ ದೋಷ ಇಂಚಿತ್ತಿನವು ಅಂದ್‌ದ್ ಸಾಕ್ಷಿ ಪನ್ಲ. ಯಾನ್ ಪಾತೆರುನವು ಸರಿಯಾದ್ ಇತ್ತ್ಂಡ ಎಂಕ್ ದಾಯೆ ಹಾಕುವಾ?” ಅಂದ್‌ದ್ ಕೇಂಡೆ.</verse>
				<verse number="24">ಅಪಗ ಅನ್ನೆ ಆಯನ್ ಕಟ್ಟ್‌ದ್ ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್‌ ಕಡಪುಡ್ದು ಕೊರಿಯೆ.</verse>
				<verse number="25">ಇಂಚಿಡ್ದ್ ಸೀಮೋನೆ ಪೇತ್ರೆ ಉಂತೊಂದು ಚಳಿ ಕೈತೊಂದಿತ್ತೆ. ಅಪಗ ಅಲ್ಪ ಇತ್ತಿನಾಕುಲು ಆಯಡ, “ಈ ಯೇಸುನ ಶಿಷ್ಯೆರೆಡ್ ಒರಿ ಅತ್ತಾ?” ಅಂದ್‌ದ್ ಕೇನ್ನಗ, ಆಯೆ “ಯಾನ್ ಅತ್ತ್.” ಅಂದ್‌ದ್ ಆರೆಂಜಿಯೆ.</verse>
				<verse number="26">ಪ್ರಧಾನಯಾಜಕನ ಬೇಲೆದಾಕುಲೆಡ್, ಪೇತ್ರೆ ಕೆಬಿ ಕತೆರ್ದ್ ಪಾಡ್ದಿನಾಯನ ಸಮ್ಮಂಧದಾಯೆ ಆದಿತ್ತಿ ಒರಿ, “ಯಾನ್ ನಿನನ್ ತೋಟೊಡು ಆಯಡೊಪ್ಪ ಇತ್ತಿನೆನ್ ತೂತೆ ಅತ್ತಾ?” ಪಂಡೆ.</verse>
				<verse number="27">ಐಕ್ ಪೇತ್ರೆ ಕುಡ, “ಯಾನ್ ಅತ್ತ್,” ಪಂಡೆ. ಅಪಗನೆ ಕೋರಿ ಕಿಲೆತ್ತ್ಂಡ್.</verse>
				<verse number="28">ಐಡ್ದ್ ಬೊಕ್ಕ ಅಕುಲು ಯೇಸುನು ಕಾಯಫ ಕೈತಲ್‌ಡ್ದ್ ಅರಮನೆಕ್ ಲೆತ್ತೊಂದು ಪೋಯೆರ್. ಅಪಗ ಪುಲ್ಯ ಆದಿತ್ತ್ಂಡ್. ಅಕುಲು ತನ್ಕುಲೆಗ್ ಮೈಲೆ ಆದ್ ಪಸ್ಕದ ವಣಸ್ ಮಲ್ಪರೆ ಅಡ್ಡಿ ಆವು ಅಂದ್‌ದ್ ಅರಮನೆತ್ತ ಉಲಯಿ ಪೋಯಿಜೆರ್.</verse>
				<verse number="29">ಇಂಚ ಉಪ್ಪುನಗ ಪಿಲಾತೆ ಪಿದಾಯಿ ಅಕ್ಲೆನ ಕೈತಲ್‌ ಬತ್ತ್‌ದ್, “ಈ ನರಮಾನಿನ ಮಿತ್ತ್ ವಾ ದೂರುನು ಕನೈದರ್?” ಅಂದ್‌ದ್ ಕೇಂಡೆ.</verse>
				<verse number="30">ಅಕುಲು ಪಿಲಾತಗ್, “ಉಂಬೆ ಪಡಿಕೆಂತಿನಾಯೆ ಅತ್ತ್‌ಡ ಎಂಕುಲು ಉಂಬ್ಯನ್ ನಿಕ್ಕ್ ಒಪ್ಪಿಸದ್ವಯ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="31">ಅಪಗ ಪಿಲಾತೆ ಅಕ್ಲೆಗ್, “ನಿಕುಲೇ ಆಯನ್ ಲೆತ್ತೊಂದು ಪೋದು ನಿಕ್ಲೆನ ನ್ಯಾಯಕಟ್ಟ್‌ದ ಪ್ರಕಾರ ಆಯಗ್ ತೀರ್ಪು ಮಲ್ಪುಲೆ,” ಪಂಡೆ. ಐಕ್ ಯೆಹೂದ್ಯೆರ್, “ಮರಣದ ಶಿಕ್ಷೆನ್ ಕೊರ್ಪಿ ಅಧಿಕಾರ ಎಂಕ್ಲೆಗ್ ಇಜ್ಜಿ” ಪಂಡೆರ್.</verse>
				<verse number="32">ನೆಡ್ದ್ ಯೇಸು ತಾನ್ ಎಂಚಿತ್ತಿ ಮರಣೊನು ಸೈಯೆರೆ ಉಲ್ಲೆ ಪನ್ಪಿ ಪಾತೆರೊಲು ನಡತ್ಂಡ್.</verse>
				<verse number="33">ಅಪಗ ಪಿಲಾತೆ ಕುಡ ಅರಮನೆತ್ತ ಉಲಯಿ ಪೋದು ಯೇಸುನು ಲೆತ್ತ್‌ದ್ ಆಯಡ, “ಈ ಯೆಹೂದ್ಯೆರೆ ಅರಸು ಅಂದಾ?” ಅಂದ್‌ದ್ ಕೇಂಡೆ.</verse>
				<verse number="34">ಐಕ್ ಯೇಸು, “ನಿನ್ನಾತೆಗೇ, ಈ ಉಂದೆನ್ ಪನೊಂದುಲ್ಲತ್ತಾ? ಬೊಕ್ಕೊರಿ ಎನ ಸಂಗತಿಡ್ ನಿಕ್ಕ್ ದಾಲಾ ಪನ್ತೆರಾ,” ಅಂದ್‌ದ್ ಕೇಂಡೆ.</verse>
				<verse number="35">ಐಕ್ ಪಿಲಾತೆ, “ಯಾನ್ ದಾನೆ ಯೆಹೂದ್ಯೆನಾ? ನಿನ ಸ್ವಂತ ಜನೊಕುಲುಲಾ ಪ್ರಧಾನಯಾಜಕೆರ್‌ಲುಲಾ ನಿನನ್ ಎಂಕ್ ಒಪ್ಪಿಸಾದೆರ್. ಈ ದಾದ ಮಲ್ತ್‌ದ?” ಅಂದ್‌ದ್ ಕೇಂಡಿನೆಕ್ಕ್</verse>
				<verse number="36">ಯೇಸು, “ಎನ ರಾಜ್ಯ ಈ ಲೋಕದವು ಅತ್ತ್, ಎನ ರಾಜ್ಯ ಈ ಲೋಕದವು ಆದಿತ್ತ್ಂಡ ಯಾನ್ ಯೆಹೂದ್ಯೆರೆ ಕೈಕ್ ತಿಕ್ಕ್‌ದ್ ಬೂರಂದಿಲೆಕ್ಕ ಎನ ಸೇವಕೆರ್ ಲಡಯಿ ಮಲ್ತ್‌ದ್ವೆರ್. ಆಂಡ ಎನ ರಾಜ್ಯ ಮುಲ್ತವು ಅತ್ತ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="37">ಐಕ್ ಪಿಲಾತೆ, “ಅಂಚಾಂಡ ಈ ಅರಸು ಅಂದತ್ತಾ?” ಅಂದ್‌ದ್ ಪಂಡೆ. ಅಪಗ ಯೇಸು ಆಯಡ, “ಎನನ್ ಅರಸು ಅಂದ್‌ದ್ ಈಯೆ ಪಂಡ. ಯಾನ್ ಸತ್ಯದ ಸಂಗತಿಡ್ ಸಾಕ್ಷಿ ಕೊರಿಯೆರೆ ಪುಟ್ಟುದಿನಾಯೆ, ಐಕಾದೇ ಈ ಲೋಕೊಗು ಬೈದೆ. ಸತ್ಯೊಗು ಸೇರ್ದಿನಾಕುಲು ಮಾತೆರ್ ಎನ ಪಾತೆರೊಗು ಕೆಬಿ ಕೊರ್ಪೆರ್,” ಅಂದ್‌ದ್ ಉತ್ತರ ಕೊರಿಯೆ.</verse>
				<verse number="38">ಐಕ್ ಪಿಲಾತೆ, “ಸತ್ಯ ಪಂಡ ದಾದ?” ಅಂದ್‌ದ್ ಕೇಂಡೆ. ಉಂದೆನ್ ಪಂಡ್ದ್ ಪಿಲಾತೆ ಕುಡ ಯೆಹೂದ್ಯೆರೆ ಕೈತಲ್‌ ಬತ್ತ್‌ದ್, “ಎಂಕ್ ಆಯಡ ವಾ ಅಪರಾಧಲಾ ತೋಜಿದ್ ಬರ್ಪುಜಿ.</verse>
				<verse number="39">ಆಂಡ ಪಸ್ಕ ಪರ್ಬೊಡು ಯಾನ್ ಒರಿಯನ್ ನಿಕ್ಲೆಗ್ ಬುಡ್ದು ಕೊರ್ಪಿ ಕ್ರಮ ಉಂಡತ್ತಾ, ಯಾನ್ ಯೆಹೂದ್ಯೆರೆ ಅರಸುನು ಬುಡ್ದು ಕೊರ್ಪಿನವು ನಿಕ್ಲೆಗ್ ಇಷ್ಟನಾ?” ಅಂದ್‌ದ್ ಅಕ್ಲೆಡ ಕೇಂಡೆ.</verse>
				<verse number="40">ಐಕ್ ಅಕುಲು, “ಯೇಸುನು ಬೊಡ್ಚಿ, ಬರಬ್ಬನ್ ಬುಡ್ದು ಕೊರೊಡು!” ಅಂದ್‌ದ್ ಕುಡೊರ ಅರಬಾಯಿ ದೀದ್ ಪಂಡೆರ್. ಆ ಬರಬ್ಬೆ ಒರಿ ಕಲ್ವೆ ಆದಿತ್ತೆ.</verse>
			</chapter>
			<chapter number="19">
				<verse number="1">ಐಡ್ದ್ ಬೊಕ್ಕ ಪಿಲಾತೆ ಯೇಸುನು ಲೆತ್ತೊಂದು ಪೋದು ಚಾಟಿಡ್ ಹಾಕಾಯೆ.</verse>
				<verse number="2">ಸಿಪಾಯಿಲು ಮುಳ್ಳುದ ಕಿರೀಟ ಮುಡೆದ್ ಆಯನ ತರೆತ ಮಿತ್ತ್ ದೀದ್ ಕೆಂಪು ಒಲ್ಲಿನ್ ಪೊದಿಪಾದ್</verse>
				<verse number="3">ಆಯ ಕೈತಲ್‌ ಬತ್ತ್‌ದ್, “ಯೆಹೂದ್ಯೆರೆ ಅರಸೋ ನಿಕ್ಕ್ ವಂದನೆ!” ಅಂದ್‌ದ್ ಆಯ ಕೆಪ್ಪೆಗ್ ಹಾಕಿಯೆರ್.</verse>
				<verse number="4">ಐಡ್ದ್ ಬೊಕ್ಕ ಪಿಲಾತೆ ಕುಡ ಪಿದಾಯಿ ಬತ್ತ್‌ದ್ ಯೆಹೂದ್ಯೆರೆಗ್, “ಎಂಕ್ ಆಯಡ ವಾ ಅಪರಾಧಲಾ ತೋಜುಜಿ ಅಂದ್‌ದ್ ನಿಕ್ಲೆಗ್ ತೆರಿಯುಲೆಕ್ಕ ಆಯನ್ ನಿಕ್ಲೆ ಕೈತಲ್ ಪಿದಯಿ ಕನಪೆ, ತೂಲೆ!” ಅಂದ್‌ದ್ ಪಂಡೆ.</verse>
				<verse number="5">ಅಪಗ ಯೇಸು ಮುಳ್ಳುದ ಕಿರೀಟೊನ್ಲಾ ಕೆಂಪು ಒಲ್ಲಿನ್ ತುತ್ತೊಂದು ಪಿದಯಿ ಬತ್ತೆ. ಪಿಲಾತೆ ಅಕ್ಲೆಡ, “ಇಂದಾ, ಈ ನರಮಾನಿ!” ಪಂಡೆ</verse>
				<verse number="6">ಪ್ರಧಾನಯಾಜಕೆರ್‌ಲಾ ಸಿಪಾಯಿಲುಲಾ ಆಯನ್ ತೂದು, “ಕ್ರುಸ್ಸುಗು ಪಾಡ್ಪಾಲ ಕ್ರುಸ್ಸುಗು ಪಾಡ್ಪಾಲ!” ಅಂದ್‌ದ್ ಅರಬಾಯಿ ದೀಯೆರ್. ಪಿಲಾತೆ ಅಕ್ಲೆಡ, “ಬೋಡಾಂಡ ನಿಕುಲೇ ಆಯನ್ ದೆತ್ತೊಂದು ಪೋದು ಕ್ರುಸ್ಸುಗು ಪಾಡ್ಲೆ, ಎಂಕ್ ಆಯಡ ವಾ ಅಪರಾಧಲಾ ತೋಜುಜಿ,” ಪಂಡೆ</verse>
				<verse number="7">ಯೆಹೂದ್ಯೆರ್ ಆಯಡ, “ಎಂಕ್ಲೆಗ್ ಒಂಜಿ ನ್ಯಾಯಕಟ್ಟ್ ಉಂಡು. ಆ ಕ್ರಮತ್ತ ಪ್ರಕಾರ ಉಂಬೆ ಸೈಯೊಡಾಯಿನಾಯೆ, ದಾಯೆಗಂದ್ಂಡ ಆಯೆ ತನನ್ ತಾನೇ ದೇವೆರೆ ಮಗೆ ಮಲ್ತೊಂದೆ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="8">ಪಿಲಾತೆ ಈ ಪಾತೆರೊನು ಕೇಂಡ್ದ್ ಬೊಕ್ಕಲಾತ್ ಪೋಡಿದ್</verse>
				<verse number="9">ಪಿರ ಅರಮನೆತ್ತ ಉಲಯಿ ಪೋದು, “ಈ ಒಲ್ತುಡ್ದು ಬೈದಿನಾಯೆ,” ಅಂದ್‌ದ್ ಯೇಸುಡ ಕೇಂಡೆ. ಐಕ್ ಯೇಸು ಆಯಗ್ ಉತ್ತರ ಕೊರ್ಜೆ.</verse>
				<verse number="10">ಐಕ್ ಪಿಲಾತೆ, “ಈ ಎನಡ ಪಾತೆರುಜನಾ? ನಿನನ್ ಬುಡ್ಪಾವುನ ಅಧಿಕಾರಲಾ ನಿನನ್ ಕ್ರುಸ್ಸುಗು ಪಾಡಾವುನ ಅಧಿಕಾರಲಾ ಎಂಕ್ ಉಂಡು ಪನ್ಪಿನವು ನಿಕ್ಕ್ ಗೊತ್ತಿಜ್ಜಾ?” ಅಂದ್‌ದ್ ಆಯಡ ಕೇಂಡೆ.</verse>
				<verse number="11">ಐಕ್ ಯೇಸು, “ಮಿತ್ತ್‌ಡ್ದ್ ನಿಕ್ಕ್ ಅಧಿಕಾರ ಕೊರಿಜಾಂಡ ಎನ ಮಿತ್ತ್ ನಿಕ್ಕ್ ವಾ ಅಧಿಕಾರಲಾ ಇತ್ತ್‌ದ್ವಂದ್. ಅವೆಡ್ದಾವರ ಎನನ್ ನಿಕ್ಕ್ ಒಪ್ಪಿಸಾದಿನಾಯಗ್ ಹೆಚ್ಚ್ ಪಾಪ ಉಂಡು,” ಅಂದ್‌ದ್ ಪಂಡೆ.</verse>
				<verse number="12">ಈ ಪಾತೆರದ ದಿಸೆಡ್ದ್ ಪಿಲಾತೆ ಆಯನ್ ಬುಡ್ಪಾವೆರೆ ಪೇಚಾಡಿಯೆ, ಆಂಡ ಯೆಹೂದ್ಯೆರ್, “ಈ ಉಂಬ್ಯನ್ ಬುಡ್ಪಾಯಡ ಈ ಚಕ್ರವರ್ತಿನ ಸ್ನೇಹಿತೆ ಅತ್ತ್, ತನನ್ ಅರಸು ಮಲ್ತೊನುನಾಯೆ ಚಕ್ರವರ್ತಿಗ್ ವಿರೋಧಿ,” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="13">ಈ ಪಾತೆರೊಲೆನ್ ಪಿಲಾತೆ ಕೇಂಡ್ದ್ ಯೇಸುನು ಪಿದಯಿ ಲೆಪ್ಡಾದ್, ಇಬ್ರಿಯ ಪಾತೆರೊಡು ಗಬ್ಬಥಾ ಪನ್ಪಿ ಕಲ್ಲ್‌ದಕಟ್ಟೆದ ಜಾಗ್‌ಗ್ ಪೋದು ನ್ಯಾಯಾಸನದ ಮಿತ್ತ್ ಕುಲ್ಲೊಂಡೆ.</verse>
				<verse number="14">ಪಸ್ಕ ಪರ್ಬದ ತಯಾರ್ ಮಲ್ಪುನ ದಿನತಾನಿ ಹೆಚ್ಚ್‌ಕಡಿಮೆ ಮಧ್ಯಾಹ್ನ ಆದಿತ್ತ್ಂಡ್. ಪಿಲಾತೆ ಯೆಹೂದ್ಯೆರೆಡ, “ತೂಲೆ ನಿಕ್ಲೆನ ಅರಸು!” ಪಂಡೆ.</verse>
				<verse number="15">ಐಕ್ ಅಕುಲು, “ಆಯನ್ ಕೆರ್ಪಾಲ, ಕೆರ್ಪಾಲ, ಕ್ರುಸ್ಸುಗು ಪಾಡ್ಪಾಲ,” ಅಂದ್‌ದ್ ಅರಬಾಯಿ ದೀಯೆರ್. ಪಿಲಾತೆ, “ನಿಕ್ಲೆ ಅರಸುನು ಕ್ರುಸ್ಸುಗು ಪಾಡಾವೊಡಾ?” ಅಂದ್‌ದ್ ಪಂಡಿನೆಕ್ಕ್ ಪ್ರಧಾನಯಾಜಕೆರ್, “ಕೈಸರೆ ಅತ್ತಂದೆ ಎಂಕ್ಲೆಗ್ ಬೇತೆ ಅರಸು ಇಜ್ಜೆ,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="16">ಅಪಗ ಆಯೆ ಯೇಸುನು ಕ್ರುಸ್ಸುಗು ಪಾಡಾವರೆ ಅಕ್ಲೆನ ವಶೊಕ್ಕು ಕೊರಿಯೆ. ಅಕುಲು ಯೇಸುನು ಲೆತ್ತೊಂದು ಪೋಯೆರ್.</verse>
				<verse number="17">ಯೇಸು ತನ ಕ್ರುಸ್ಸುನು ತಾನೇ ತುಂಬೊಂದು, ಕಪಾಲ ಪನ್ಪಿ ಜಾಗ್‌ಗ್ ಪೋಯೆ. ನೆಕ್ಕ್ ಇಬ್ರಿಯ ಭಾಷೆಡ್ “ಗೊಲ್ಗೊಥಾ” ಅಂದ್‌ದ್ ಪುದರ್.</verse>
				<verse number="18">ಅಲ್ಪ ಆಯನ್ಲಾ ಆಯ ಒಟ್ಟುಗು ಬೇತೆ ಇರ್ವೆರೆನ್ಲಾ ಕ್ರುಸ್ಸುಗು ಪಾಡಿಯೆರ್. ಅಕ್ಲೆಡ್ ಒರಿಯನ್ ಅಂಚಿ ಬೊಕ್ಕೊರಿಯನ್ ಇಂಚಿ ಪಾಡ್ದ್ ನಡುಟು ಯೇಸುನು ದೀಯೆರ್.</verse>
				<verse number="19">ಉಂದತ್ತಂದೆ ಪಿಲಾತೆ, “ನಜರೇತ್‌ದ ಯೇಸು ಯೆಹೂದ್ಯೆರೆ ಅರಸು,” ಪನ್ಪಿ ಒಂಜಿ ಮೇಲ್ಬರವುನು ಬರೆದ್ ಯೇಸುನ ಕ್ರುಸ್ಸುದ ಮಿತ್ತ್ ಪತ್ತಾಯೆ.</verse>
				<verse number="20">ಅಕುಲು ಯೇಸುನು ಕ್ರುಸ್ಸುಗು ಪಾಡಿನ ಜಾಗ್ ಪಟ್ಟಣಗ್ ಕೈತಲ್‌ ಇತ್ತಿನೆಡ್ದ್, ಯೆಹೂದ್ಯೆರೆಡ್ ಮಸ್ತ್ ಜನ ಕ್ರುಸ್ಸುದ ಮಿತ್ತ್ ಪತ್ತಾದಿನ ಮೇಲ್ಬರವುನು ಓದಿಯೆರ್. ಅವು ಇಬ್ರಿಯ ಲಾತೀನ್ ಬೊಕ್ಕ ಗ್ರೀಕ್ ಭಾಷೆಡ್ ಬರೆದಿತ್ತ್‌ಂಡ್.</verse>
				<verse number="21">ಅಂಚಾದುಪ್ಪುನಗ ಯೆಹೂದ್ಯೆರೆ ಪ್ರಧಾನಯಾಜಕೆರ್ ಪಿಲಾತಡ, “‘ಯೆಹೂದ್ಯೆರೆ ಅರಸು,’ ಅಂದ್‌ದ್ ಬರೆಯಂದೆ, ‘ಯಾನ್ ಯೆಹೂದ್ಯೆರೆ ಅರಸು ಅಂದ್‌ದ್ ಪನ್ತಿನಾಯೆ,’ ಅಂದ್‌ದ್ ಬರೆಯೊಡು,” ಪಂಡೆರ್.</verse>
				<verse number="22">ಐಕ್ ಪಿಲಾತೆ, “ಯಾನ್ ಬರೆತಿನ ಬರೆದಾಂಡ್.” ಅಂದ್‌ದ್ ಪಂಡೆ.</verse>
				<verse number="23">ಸಿಪಾಯಿಲು ಯೇಸುನು ಕ್ರುಸ್ಸುಗು ಪಾಡಿ ಬೊಕ್ಕ ಅಕುಲು ಯೇಸುನ ಪೊದೆಪುನು ದೆತ್ತೊಂದು ನಾಲ್ ಪಾಲ್ ಮಲ್ತೊಂದು ಒರಿ ಒರಿ ಸಿಪಾಯಿಗ್ ಒಂಜೊಂಜಿ ಪಾಲ್‌ದಲೆಕ್ಕ ಪಾಲ್ ಮಲ್ತೊಂಡೆರ್. ಯೇಸುನ ಉಲಯಿದ ಉದ್ಧ ಅಂಗಿನ್ಲಾ ದೆತ್ತೊಂಡೆರ್. ಆಂಡ ಆ ಅಂಗಿಗ್ ಪೊಲಿಗೆ ಇತ್ತ್‌ಜಿ. ಅವು ಮಿತ್ತ್‌ಡ್ದ್ ತಿರ್ತ್ ಮುಟ್ಟ ನೆಯಿತಿನವು ಆದಿತ್ತ್ಂಡ್,</verse>
				<verse number="24">ಅವೆನ್ ತೂದು ಅಕುಲು, “ನಮ ಉಂದೆನ್ ಪರ್ಪೆರೆ ಬಲ್ಲಿ, ಚೀಟ್ ಪಾಡ್ದ್ ಏರೆಗ್ ಬರ್ಪುಂಡಾ ತೂಕ.” ಅಂದ್‌ದ್ ಪಾತೆರೊಂಡೆರ್. ಉಂದೆಡ್ದ್ “ಎನ ಕುಂಟುಲೆನ್ ತನ್ಕುಲೆಡ್ ಪಾಲ್ ಮಲ್ತೊಂಡೆರ್. ಎನ ಅಂಗಿಗಾದ್ ಚೀಟ್ ಪಾಡಿಯೆರ್.” ಪನ್ಪಿ ಶಾಸ್ತ್ರದ ಪಾತೆರ ನಡತ್ಂಡ್. ಸಿಪಾಯಿಲು ಉಂದೆನ್ ಮಾತ ಮಲ್ತೆರ್.</verse>
				<verse number="25">ಯೇಸುನ ಕ್ರುಸ್ಸುದ ಕೈತಲ್‌ ಆಯ ಅಪ್ಪೆ, ಅಪ್ಪೆನ ಮೆಗ್ದಿ, ಕ್ಲೋಪನ ಬೊಡೆದಿ ಆಯಿ ಮರಿಯ, ಮಗ್ದಲದ ಮರಿಯಲಾ ಉಂತುದಿತ್ತೆರ್.</verse>
				<verse number="26">ಯೇಸು ತನ ಅಪ್ಪೆನ್ಲಾ ಕೈತಲ್‌ಡ್ ಉಂತುದಿತ್ತಿ ಪ್ರೀತಿದ ಶಿಷ್ಯನ್ಲಾ ತೂದು, ಅಪ್ಪೆಗ್, “ಅಮ್ಮಾ, ತೂಲ ನಿನ ಮಗೆ!” ಪಂಡೆ.</verse>
				<verse number="27">ಐಡ್ದ್ ಬೊಕ್ಕ ಆ ಶಿಷ್ಯಡ, “ಇಂದಾ ನಿನ ಅಪ್ಪೆ!” ಪಂಡೆ. ಆ ಗಳಿಗೆಡ್ದ್ ಆ ಶಿಷ್ಯೆ ಆಲೆನ್ ತನ ಇಲ್ಲಡೇ ತಾಂಕಿಯೆ.</verse>
				<verse number="28">ಉಂದು ಆಯಿ ಬೊಕ್ಕ ಯೇಸು ಇತ್ತೆ ಮಾತ ಮುಗಿಂಡ್ ಪಂಡ್ದ್ ತೆರಿದ್, ಶಾಸ್ತ್ರದ ಪಾತೆರ ನಡಪುಲೆಕ್ಕ, “ಎಂಕ್ ಬಾಜೆಲ್ ಆಪುಂಡು,” ಪಂಡ್ದ್ ಯೇಸು ಪಂಡೆ.</verse>
				<verse number="29">ಅಲ್ಪ ಪುಳಿರಸ ದಿಂಜಿದಿ ಕಡ್ಯ ದೀದ್ ಇತ್ತ್ಂಡ್. ಅಕುಲು ಸ್ಪಂಜಿನ್ ಪುಳಿರಸೊಟು ಮುರ್ಕಾದ್, ಅವೆನ್ ಹಿಸ್ಸೋಪ್ ಗಿಡತ ಕೋಲುಗು ತಿಕ್ಕಾದ್, ಯೇಸುನ ಬಾಯಿಗ್ ಮುಟ್ಟಾಯೆರ್.</verse>
				<verse number="30">ಯೇಸು ಆ ಪುಳಿರಸೊನು ದೆತ್ತೊಂಡಿ ಬೊಕ್ಕ “ತೀರ್‌ಂಡ್” ಅಂದ್‌ದ್ ತರೆನ್ ತಗ್ಗಾದ್ ತನ ಪ್ರಾಣನೊನು ದೇವೆರೆಗ್ ಒಪ್ಪಿಸಾದ್ ಕೊರಿಯೆ.</verse>
				<verse number="31">ಆ ಪೊರ್ತು ತಯಾರ್ ಮಲ್ಪುನ ದಿನ ಆದುಪ್ಪುನೆಡ್ದ್ ಯೆಹೂದ್ಯೆರ್, ಸಬ್ಬತ್‌ದಿನೊಕುಲೆಡ್ ಸೈತಿ ಪುಣೊಕುಲು ಕ್ರುಸ್ಸುದ ಮಿತ್ತ್ ಉಪ್ಪೆರೆ ಬಲ್ಲಿ ಅಂದ್‌ದ್ ಪಿಲಾತಡ, ಅಕ್ಲೆ ಕಾರ್‌ಲೆನ್ ಪೊಲ್ತುದು ಅಕ್ಲೆನ್ ಕ್ರುಸ್ಸುಡ್ದು ದೆತ್ತ್‌ದ್ ಪಾಡೊಡು ಅಂದ್‌ದ್ ಕೇಂಡೊಂಡೆರ್. ದಾಯೆ ಪಂಡ ಆ ಸಬ್ಬತ್‌ದಿನ ಬಾರಿ ವಿಶೇಷದ ದಿನ.</verse>
				<verse number="32">ಅವೆಡ್ದಾವರ ಸಿಪಾಯಿಲು ಬತ್ತ್‌ದ್ ಸುರುತ್ತಾಯನ ಕಾರ್‌ಲೆನ್ಲಾ ಯೇಸು ಒಟ್ಟುಗು ಕ್ರುಸ್ಸುಗು ಪಾಡ್ಪಾವೊಂದಿನ ಬೊಕ್ಕೊರಿಯನ ಕಾರ್‌ಲೆನ್ಲಾ ಪೊಲ್ತೆರ್.</verse>
				<verse number="33">ಆಂಡ ಯೇಸುನ ಕೈತಲ್‌ ಬನ್ನಗ ಯೇಸು ಅಪಗನೆ ಸೈತ್‌ದಿತ್ತಿನೆನ್ ಅಕುಲು ತೂದು ಆಯ ಕಾರ್‌ಲೆನ್ ಪೊಲ್ತ್‌ಜೆರ್.</verse>
				<verse number="34">ಆಂಡಲಾ ಸಿಪಾಯಿಲೆಡ್ ಒರಿ ಬರ್ಚಿಡ್ ಆಯ ಅಲ್ಲೆಗ್ ನೋಂತೆ, ನೋಂತಿ ಕೂಡ್ಲೆ ನೆತ್ತೆರ್‌‌ಲಾ ನೀರ್‌ಲಾ ಜತ್ತ್ಂಡ್.</verse>
				<verse number="35">ಅವೆನ್ ತೂಯಿನಾಯನೇ ಸಾಕ್ಷಿ ಪನ್ತೆ. ಆಯ ಸಾಕ್ಷಿ ಸತ್ಯದವೇ ತಾನ್ ಪನ್ಪಿನವು ಸತ್ಯದವು ಅಂದ್‌ದ್ ಆಯೆ ತೆರಿದೆ. ನಿಕುಲುಲಾ ಉಂದೆನ್ ನಂಬೊಡು ಅಂದ್‌ದ್ ಪನ್ತೆ.</verse>
				<verse number="36">ದಾಯೆ ಪಂಡ, “ಆಯನ ಒಂಜಿ ಎಲುಲಾ ಪೊಲ್ಪೆರೆ ಬಲ್ಲಿ” ಅಂದ್‌ದ್ ಶಾಸ್ತ್ರೊಡು ಬರೆಯಿಲೆಕ್ಕ ಉಂದು ಮಾತ ನಡತ್ಂಡ್.</verse>
				<verse number="37">ಬೊಕ್ಕ “ಅಕುಲು ತನ್ಕುಲು ಬೆತ್ತ್‌ದಿನಾಯನ್ ದಿಟ್ಟಿದ್ ತೂಪೆರ್” ಅಂದ್‌ದ್ ಶಾಸ್ತ್ರೊಡು ಬೊಕ್ಕೊಂಜಿ ಪಾತೆರ ಪಂಡ್‌ದುಂಡು.</verse>
				<verse number="38">ಉಂದು ಆಯಿ ಬೊಕ್ಕ ಯೆಹೂದ್ಯೆರೆ ಪೋಡಿಗೆಡ್ ಗುಟ್ಟುಡು ಯೇಸುನ ಶಿಷ್ಯೆ ಆದಿತ್ತಿ ಅರಿಮಥಾಯದ ಯೋಸೇಫು, ಯೇಸುನ ಪುಣೊನು ದೆತ್ತೊಂದು ಪೋವೆರೆ ಅಪ್ಪಣೆ ಕೊರೊಡು ಅಂದ್‌ದ್ ಪಿಲಾತಡ ನಟ್ಟೊಂಡೆ. ಪಿಲಾತೆ ಬುಡ್ದು ಕೊರಿ ಬೊಕ್ಕ ಆಯೆ ಬತ್ತ್‌ದ್, ಯೇಸುನ ಪುಣೊನು ದೆತ್ತೊಂದು ಪೋಯೆ.</verse>
				<verse number="39">ಉಂದತ್ತಂದೆ ಸುರುಟ್ಟು ಒಂಜಿ ಸರಿ ರಾತ್ರೆದ ಪೊರ್ತುಡು ಯೇಸು ಕೈತಲ್‌ ಬತ್ತಿತ್ತಿ ನಿಕೋದೇಮುಲಾ ನೂದು ಸೇರ್ ದಾತ್ ರಕ್ತಬೋಳ ಬೊಕ್ಕ ಅಗರ್ ಕಲತಿನ ಚೂರ್ಣೊನು ದೆತ್ತೊಂದು ಅಡೆಗ್ ಬತ್ತೆ.</verse>
				<verse number="40">ಅಕುಲು ಯೇಸುನ ಪುಣೊನು ದೆತ್ತೊಂದು ಯೆಹೂದ್ಯೆರೆಡ್ ಕೌಂಪುನ ಕ್ರಮತ್ತ ಪ್ರಕಾರ ಐಕ್ ಕಮ್ಮೆನದ ಎಣ್ಣೆನ್ ಪೂಜಿದ್ ನಾರ್‌ಮಡಿತ ಕುಂಟುಡು ಸುತ್ತಿಯೆರ್.</verse>
				<verse number="41">ಯೇಸುನು ಕ್ರುಸ್ಸುಗು ಪಾಡ್ದಿತ್ತಿ ಜಾಗ್‌ಡ್ ಒಂಜಿ ತೋಟ ಇತ್ತ್ಂಡ್. ಆ ತೋಟೊಡು ಒಂಜಿ ಪೊಸ ಸಮಾಧಿ ಇತ್ತ್ಂಡ್. ಐಟ್ಟ್ ಈತ್‌ನೆಟ್ಟ ಏರೆನ್ಲಾ ದೀದಿತ್ತ್‌ಜೆರ್.</verse>
				<verse number="42">ಆ ದಿನ ಯೆಹೂದ್ಯೆರೆ ತಯಾರ್ ಮಲ್ಪುನ ದಿನ ಆದಿತ್ತಿನೆಡ್ದ್ ಆ ಸಮಾಧಿ ಕೈತಲೆ ಇತ್ತಿನೆಡ್ದ್ ಯೇಸುನು ಅವುಲೇ ದೀಯೆರ್.</verse>
			</chapter>
			<chapter number="20">
				<verse number="1">ವಾರದ ಸುರುತ್ತ ದಿನ ಮಗ್ದಲದ ಮರಿಯ ಪುಲ್ಲ್ಯಕೆಲೊಗು ನನಲಾ ಕತ್ತಲೆ ಉಪ್ಪುನಗನೇ ಯೇಸುನ ಸಮಾಧಿದಡೆಗ್ ಬತ್ತ್‌ದ್ ಅವುಲು ತೂನಗ ಸಮಾಧಿದ ಕಲ್ಲ್ ಪೊರೆಲ್‌ದಿತ್ತಿನೆನ್ ತೂಯಲ್.</verse>
				<verse number="2">ಆಲ್ ಅಪಗನೆ ಬಲ್ತೊಂದು ಸೀಮೋನು ಪೇತ್ರೆ ಬೊಕ್ಕ ಯೇಸುನ ಪ್ರೀತಿದ ಬೊಕ್ಕೊರಿ ಶಿಷ್ಯನ ಕೈತಲ್‌ ಪೋದು ಪನ್ಪಲ್, “ನಮ ಸ್ವಾಮಿನ್ ಸಮಾಧಿಡ್ದ್ ದೆತ್ತ್‌ದ್ ಓಲು ಕೊನೊದು ದೀತೆರ್ ಅಂದ್‌ದ್ ಗೊತ್ತಿಜ್ಜಿ,” ಪಂಡಲ್.</verse>
				<verse number="3">ಪೇತ್ರೆಲಾ ಆ ನನೊಂಜಿ ಶಿಷ್ಯೆಲಾ ಸಮಾಧಿದಡೆಗ್ ಪೋಯೆರ್.</verse>
				<verse number="4">ಇರ್ವೆರ್‌ಲಾ ಬಲ್ತೊಂದು ಪೋನಗ ಆ ನನೊಂಜಿ ಶಿಷ್ಯೆ ಪೇತ್ರಡ್ದ್ ದುಂಬು ಬಲ್ತ್‌ದ್ ಆಯೆ ಸಮಾಧಿಗ್ ಸುರು ಮುಟ್ಟುವೆ.</verse>
				<verse number="5">ಆಯೆ ಬಗ್ಗ್‌ದ್ ಸಮಾಧಿದ ಉಲಯಿ ತೂನಗ ಬೂರ್ದಿತ್ತಿನ ನಾರ್‌ದ ಕುಂಟುನು ತೂಯೆ ಆಂಡ ಉಲಯಿ ಪೋಯಿಜೆ.</verse>
				<verse number="6">ಸೀಮೋನು ಪೇತ್ರೆ ಆಯನ ಬೆರಿಯೆ ಬತ್ತ್‌ದ್ ಸಮಾಧಿದ ಉಲಯಿ ಪೋದು ಯೇಸುನು ಸುತ್ತುದಿನ ನಾರ್‌ದ ಕುಂಟುನು ತೂಯೆ.</verse>
				<verse number="7">ಯೇಸುನ ತರೆಕ್ ಕಟ್ಟ್‌ದಿನ ಕುಂಟು, ಬೇತೆ ನಾರ್‌ದ ಕುಂಟುದ ಒಟ್ಟುಗು ದೀವಂದೆ, ಒತ್ತರೆ ಒಂಜಿ ಜಾಗ್‌ಡ್ ಮಡ್ತ್‌ದ್ ದೀತಿನೆನ್ಲಾ ತೂಯೆ.</verse>
				<verse number="8">ಅಪಗ ದುಂಬು ಸಮಾಧಿದ ಕೈತಲ್‌ಗ್ ಬತ್ತಿ ಆ ಬೊಕ್ಕೊರಿ ಶಿಷ್ಯೆಲಾ ಉಲಯಿ ಪೋದು, ತೂದು ನಂಬಿಯೆ.</verse>
				<verse number="9">ಶಿಷ್ಯೆರೆಗ್ ಯೇಸು ಸೈತ್‌ದ್ ಕುಡ ಜೀವಾದ್ ಲಕ್ಕುವೆ ಅಂದ್‌ದ್ ಶಾಸ್ತ್ರೊಡು ಬರೆತಿನ ಪಾತೆರ ನನಲಾ ಅರ್ಥ ಆದಿತ್ತಿಜಿ.</verse>
				<verse number="10">ಐಡ್ದ್ ಬೊಕ್ಕ ಆ ಶಿಷ್ಯೆರ್‌ಲು ಅಕ್ಲೆನ ಜನೊಕುಲೆ ಕೈತಲ್ ಪೋಯೆರ್.</verse>
				<verse number="11">ಆಂಡ ಮಗ್ದಲದ ಮರಿಯ ಸಮಾಧಿದ ಪಿದಯಿಡ್ದ್ ಉಂತುದು ಬುಲ್ತೊಂದು ಇತ್ತಲ್. ಬುಲ್ತೊಂದುನಪಗ ಸಮಾಧಿದ ಉಲಯಿ ನಿಲ್ಕ್‌ದ್ ತೂನಗ,</verse>
				<verse number="12">ಬೊಲ್ದು ಕುಂಟು ತುತ್ತುದಿತ್ತಿನ ಇರ್ವೆರ್ ದೂತೆರೆನ್ ತೂಯಲ್. ಅಕುಲು ಯೇಸುನ ಶರೀರ ದೀದಿತ್ತಿನಲ್ಪ ಒರಿ ದೂತೆ ತರೆದಲ್ಪ, ಬೊಕ್ಕೊರಿ ದೂತೆ ಕಾರ್‌ದಲ್ಪ ಕುಲ್ಲುದಿತ್ತೆರ್.</verse>
				<verse number="13">ಅಕುಲು ಆಲೆಡ, “ಅಮ್ಮಾ, ಈ ದಾಯೆಗ್ ಬುಲ್ಪುನಿ?” ಪಂಡ್ದ್ ಕೇಂಡೆರ್. ಅಪಗ ಆಲ್, “ಎನ ಸ್ವಾಮಿನ್ ಏರಾ ಕೊನೊತೆರ್ ಬೊಕ್ಕ ಓಲು ದೀತೆರ್? ಅಂದ್‌ದ್ ಎಂಕ್ ಗೊತ್ತುಜ್ಜಿ?” ಅಂದಲ್.</verse>
				<verse number="14">ಉಂದೆನ್ ಪಂಡ್ದ್ ಪಿರ ತಿರ್ಗ್‌ದ್ ತೂನಗ ಯೇಸು ಉಂತುದಿನೆನ್ ತೂಯಲ್. ಆಂಡ ಆಯೆ ಯೇಸು ಅಂದ್‌ದ್ ಆಲೆಗ್ ತೆರಿಜಿ.</verse>
				<verse number="15">ಯೇಸು ಆಲೆಡ, “ಅಮ್ಮಾ, ಈ ದಾಯೆಗ್ ಬುಲ್ಪುನಿ, ಏರೆನ್ ನಾಡೊಂದುಲ್ಲಾ?” ಪಂಡೆ. ಮರಿಯ ಆಯನ್ ಅಲ್ಪದ ತೋಟದಾಯೆ ಅಂದ್‌ದ್ ಎನ್ನ್‌ದ್ ಆಯಡ, “ಸ್ವಾಮಿ, ಈ ಆಯನ್ ತುಂಬೊಂದು ಪೋದಿತ್ತಡ ಓಲು ದೀತ ಎಂಕ್ ಪನ್ಲ, ಯಾನ್ ಕೊನೊಪೆ,” ಅಂದ್‌ದ್ ಪಂಡಲ್.</verse>
				<verse number="16">ಯೇಸು ಆಲೆಗ್, “ಮರಿಯ” ಅಂದ್‌ದ್ ಪಂಡೆ. ಆಲ್ ತಿರ್ಗ್‌ದ್ ಇಬ್ರಿಯೆರೆನ ಭಾಷೆಡ್ “ರಬ್ಬೂನಿ” ಪಂಡಲ್. ಐತ ಅರ್ಥ ಗುರುವೇ,</verse>
				<verse number="17">ಯೇಸು ಆಲೆಡ, “ಎನನ್ ಮುಟ್ಟೊಡ್ಚಿ ಯಾನ್ ಎನ ಅಮ್ಮೆರೆ ಕೈತಲ್‌ ನನಲಾ ಪೋತುಜಿ. ಈ ಎನ ಸಹೋದರೆರೆ ಕೈತಲ್‌ ಪೋದು, ‘ಯಾನ್ ಎನ ಅಮ್ಮೆಲಾ ನಿಕ್ಲೆ ಅಮ್ಮೆಲಾ ಬೊಕ್ಕ ಎನ ದೇವೆರ್‌ಲಾ ನಿಕ್ಲೆ ದೇವೆರ್‌ಲಾ ಆದುಪ್ಪುನಾಯ ಕೈತಲ್‌ ಏರ್ದ್ ಪೋವೊಂದುಲ್ಲೆ ಅಂದ್‌ದ್ ಅಕ್ಲೆಡ ಪನ್ಲ,’” ಪಂಡ್ದ್ ಪಂಡೆ.</verse>
				<verse number="18">ಮಗ್ದಲದ ಮರಿಯ ಯೇಸುನ ಶಿಷ್ಯೆರೆಗ್ ಪೋದು, “ಯಾನ್ ಕರ್ತವನ್ ತೂಯೆ,” ಅಂದ್‌ದ್ ಆಯೆ ಪಂಡಿನೆನ್ ಅಕ್ಲೆಗ್ ತೆರಿಪಾಯಲ್.</verse>
				<verse number="19">ಆನಿಯೆ ಪಂಡ, ವಾರದ ಸುರುತ್ತ ದಿನ ಯೇಸುನ ಶಿಷ್ಯೆರ್ ಒಂಜಿ ಇಲ್ಲಡ್ ಬೈಯದ ಪೊರ್ತು ಒಟ್ಟುಗು ಕೂಡ್ದಿತ್ತೆರ್, ಅಕುಲು ಯೆಹೂದ್ಯೆರೆನ ಪೋಡಿಗೆಡ್ ಬಾಕಿಲ್ ಮುಚ್ಚಿದ್ ಕುಲ್ಲುದಿತ್ತೆರ್, ಅಪಗ ಯೇಸು ಅಕ್ಲೆ ನಡುಟು ಉಂತುದು, “ನಿಕ್ಲೆಗ್ ಸಮಾಧಾನ ಆವಡ್,” ಪಂಡೆ.</verse>
				<verse number="20">ಬೊಕ್ಕ ಯೇಸು ತನ ಕೈಲೆನ್ಲಾ ಮರ್ಗಿಲ್‌ನ್ಲಾ ತೋಜಾಯೆ. ಶಿಷ್ಯೆರ್ ಕರ್ತವನ್ ತೂದು ಬಾರಿ ಸಂತೋಷ ಪಡೆಯೆರ್.</verse>
				<verse number="21">ಯೇಸು ಕುಡ, “ನಿಕ್ಲೆಡ ಸಮಾಧಾನ ಉಪ್ಪಡ್,” ಅಮ್ಮೆ ಎನನ್ ಕಡಪುಡುದಿಲೆಕ್ಕ ನಿಕ್ಲೆನ್ ಯಾನ್ ಕಡಪುಡ್ವೆ ಪಂಡೆ.</verse>
				<verse number="22">ಬೊಕ್ಕ ಯೇಸು ಆಯನ ಶ್ವಾಸೊನು ಶಿಷ್ಯೆರೆನ ಮಿತ್ತ್ ಉರ್ತುದು ಅಕ್ಲೆಡ, “ಪರಿಶುದ್ಧಾತ್ಮ ವರೊನು ದೆತ್ತೊನ್ಲೆ.</verse>
				<verse number="23">ನಿಕುಲು ಏರೆನ ಪಾಪೊನು ಮಾಪು ಮಲ್ಪುವರ, ಅಕ್ಲೆನ ಪಾಪ ಮಾಪು ಆಪುಂಡು. ಏರೆಗ್ ಮಾಪು ಮಲ್ಪುಜರಾ ಅವು ಅಕ್ಲೆಗ್ ಒರಿಯುಂಡು,” ಅಂದ್‌ದ್ ಪಂಡೆ.</verse>
				<verse number="24">ಯೇಸು ಬನ್ನಗ, ಪದ್ರಾಡ್ ಶಿಷ್ಯೆರೆಡ್ ಒರಿ, ದಿದುಮೆ ಪನ್ಪಿ ತೋಮೆ ಅಕ್ಲೆಡೊಪ್ಪ ಇತ್ತ್‌ಜೆ.</verse>
				<verse number="25">ಅವೆಡ್ದಾವರ ಬಾಕಿದ ಶಿಷ್ಯೆರ್‌ಲು, “ಎಂಕುಲು ಕರ್ತವನ್ ತೂಯ,” ಅಂದ್‌ದ್ ಆಯಗ್ ಪಂಡೆರ್. ಐಕ್ ಆಯೆ, “ಯೇಸುನ ಕೈಟ್ ಆದುಪ್ಪು ಗಾಯೊಲೆನ್ ತೂದು ಆ ಗಾಯೊಲೆಡ್ ಎನ ಬಿರೆಲ್‌ಲೆನ್ ದೀದ್, ಆಯನ ಅಲ್ಲೆಡ್ ಎನ ಕೈ ಪಾಡಂದೆ ನಿಕ್ಲೆನ ಪಾತೆರೊಲೆನ್ ಯಾನ್ ನಂಬುನೇ ಇಜ್ಜಿ,” ಪಂಡೆ.</verse>
				<verse number="26">ಎಣ್ಮ ದಿನ ಆಯಿ ಬೊಕ್ಕ ಯೇಸುನ ಶಿಷ್ಯೆರ್‌ಲಾ ಅಕ್ಲೆಡೊಪ್ಪ ತೋಮೆಲಾ ಇಲ್ಲದ ಉಲಯಿ ಇತ್ತೆರ್. ಬಾಕಿಲ್ ಮುಚ್ಚಿದಿತ್ತ್‌ಂಡ್. ಅಪಗ ಯೇಸು ಬತ್ತ್‌ದ್ ನಡುಟು ಉಂತುದು, “ನಿಕ್ಲೆಡ ಸಮಾಧಾನ ಆವಡ್,” ಪಂಡೆ.</verse>
				<verse number="27">ಐಡ್ದ್ ಬೊಕ್ಕ ತೋಮಗ್, “ನಿನ ಕೈ ಬಿರೆಲ್‌ನ್ ಇಂಚಿ ನೀಡ್ದ್ ಎನ ಕೈ ಮುಟ್ಟುದು ತೂಲ, ನಿನ ಕೈನ್ ನೀಡ್ದ್ ಎನ ಅಲ್ಲೆಡ್ ಪಾಡ್ಲ, ನಂಬಿಕೆದಾಂತಿನಾಯೆ ಆದುಪ್ಪಡ. ನಂಬುನಾಯೆ ಆಲ,” ಅಂದ್‌ದ್ ಪಂಡೆ.</verse>
				<verse number="28">ತೋಮೆ ಉತ್ತರ ಕೊರ್ದು ಆಯಡ, “ಎನ ಕರ್ತವಾ, ಎನ ದೇವೆರ್!” ಅಂದ್‌ದ್ ಪಂಡೆ.</verse>
				<verse number="29">ಯೇಸು ಆಯಡ, “ಈ ಎನನ್ ತೂಯಿನೆಡ್ದ್ ನಂಬಿಯ. ತೂವಂದೆ ನಂಬಿನಾಕುಲು ಭಾಗ್ಯವಂತೆರ್!” ಪಂಡೆ.</verse>
				<verse number="30">ಯೇಸು ನನಲಾ ಬೇತೆ ಏತೋ ಕಾರ್ನಿಕೊಲೆನ್ ತನ ಶಿಷ್ಯೆರೆ ಎದುರುಡು ಮಲ್ತ್‌ದಿತ್ತೆ. ಅವು ಈ ಪುಸ್ತಕೊಡು ಬರೆತಿಜಿ.</verse>
				<verse number="31">ಆಂಡ ಯೇಸು ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಅಂದ್‌ದ್ ನಿಕುಲು ನಂಬುಲೆಕ್ಕಲಾ ನಂಬುದು ಆಯ ಪುದರ್‌ಡ್ ನಿಕ್ಲೆಗ್ ನಿತ್ಯಜೀವ ಉಪ್ಪುಲೆಕ್ಕಲಾ ಈತ್ ಮಾತ ಬರೆತ್ಂಡ್.</verse>
			</chapter>
			<chapter number="21">
				<verse number="1">ಐಡ್ದ್ ಬೊಕ್ಕ ಯೇಸು ತಿಬೇರಿಯ ಕಡಲ್ದ ಬರಿಟ್ಟ್ ಆಯನ ಶಿಷ್ಯೆರೆಗ್ ಕುಡ ತೋಜಾವೊಂಡಿನ ರೀತಿ ಎಂಚಂದ್ಂಡ.</verse>
				<verse number="2">ಸೀಮೋನು ಪೇತ್ರೆ ದಿದುಮೆ ಪನ್ಪಿ ತೋಮೆ ಗಲಿಲಾಯ ಕಾನಾ ಊರುದ ನತಾನಿಯೇಲೆ ಜೆಬೆದಾಯನ ಜೋಕುಲು ಆಯ ಶಿಷ್ಯೆರೆಡ್ ಕುಡ ಇರ್ವೆರ್ ಸೇರ್ದಿತ್ತೆರ್.</verse>
				<verse number="3">ಅಕ್ಲೆಡ ಸೀಮೋನು ಪೇತ್ರೆ, “ಯಾನ್ ಮೀನ್ ಪತ್ತೆರೆ ಪೋಪೆ.” ಪನ್ನಗ ಅಕುಲು, “ಎಂಕುಲುಲಾ ನಿನಡೊಪ್ಪ ಬರ್ಪ.” ಪಂಡೆರ್. ಅಕುಲು ಪಿದಾಡ್ದ್ ಓಡ ಮಿತ್ತಾರಿಯೆರ್. ಆಂಡ ಆ ರಾತ್ರೆಡ್ ಒಂಜಿ ಮೀನ್‌ಲಾ ತಿಕ್ಕಿಜಿ</verse>
				<verse number="4">ಪುಲ್ಯ ಆನಗ ಯೇಸು ಕಡಲ್ದ ಕರೆಟ್ ಉಂತೊಂದಿತ್ತೆ. ಆಂಡ ಶಿಷ್ಯೆರೆಗ್ ಆಯೆ ಯೇಸು ಅಂದ್‌ದ್ ಗೊತ್ತಾಯಿಜಿ.</verse>
				<verse number="5">ಅಪಗ ಯೇಸು ಅಕ್ಲೆಡ, “ಜೋಕುಲೇ, ನಿಕ್ಲೆಗ್‌ ವಣಸ್‌ಗ್ ದಾಲಾ ಇಜ್ಜಾ?” ಅಂದ್‌ದ್ ಕೇನ್ನಗ, ಅಕುಲು “ಇಜ್ಜಿ” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="6">ಆಯೆ ಅಕ್ಲೆಡ, “ನಿಕುಲು ಓಡದ ಬಲತ್ತ ಮರ್ಗಿಲ್‌ಡ್ ಬಲೆ ಬೀತರ್ಡ ನಿಕ್ಲೆಗ್ ಮೀನ್ ತಿಕ್ಕುಂಡು,” ಪಂಡೆ. ಅಕುಲು ಅಂಚೆನೇ ಬಲೆ ಪಾಡ್ನಗ ಮೀನ್ ಹೆಚ್ಚ್ ತಿಕ್ಕಿನೆಡ್ದ್, ಬಲೆನ್ ಮಿತ್ತ್ ಒಯ್ಪರೆ ಅಕ್ಲೆಗ್ ಆಯಿಜಿ.</verse>
				<verse number="7">ಅಪಗ ಯೇಸುನ ಪ್ರೀತಿದ ಶಿಷ್ಯೆ ಪೇತ್ರಡ, “ಆಯೆ ಕರ್ತವೆ!” ಪಂಡೆ. ಆಯೆ ಕರ್ತವೆ ಪಂಡ್ದ್ ಕೇಂಡ್ದ್ ಸೀಮೋನು ಪೇತ್ರೆ ಮೆಯಿತ ಮಿತ್ತ್ ಕುಂಟು ಇಜ್ಜಂದಿನೆಡ್ದ್ ಅಂಗಿನ್ ಸುತ್ತೊಂದು ಯೇಸು ಕೈತಲ್‌ ಪೋಯೆರೆ ಕಡಲ್‌ಗ್ ಲಾಗಿಯೆ.</verse>
				<verse number="8">ಕಡಲ್ದ ಕರೆ ದೂರ ಉಪ್ಪಂದೆ ಹೆಚ್ಚಿಕಡಿಮೆ ಇರ್ನೂದು ಮೊರಂಗೆದಾತ್‌ ದೂರ ಇತ್ತಿನೆಡ್ದ್ ಬಾಕಿದ ಶಿಷ್ಯೆರ್‌ಲು ಮೀನ್ ದಿಂಜಿದಿ ಆ ಬಲೆನ್ ಒಯ್ತೊಂದು ಓಡೊಡೇ ಬತ್ತೆರ್.</verse>
				<verse number="9">ಅಕುಲು ಓಡೊಡ್ದು ಕರೆಕ್ ಜಪ್ಪುನಗ ಅರ್ಲೊಂದಿತ್ತಿ ಗೆಂಡೊನ್ಲಾ ಐತ ಮಿತ್ತ್ ದೀದಿತ್ತಿ ಮೀನ್ ಬೊಕ್ಕ ರೊಟ್ಟಿನ್ಲಾ ತೂಯೆರ್.</verse>
				<verse number="10">ಅಪಗ ಯೇಸು ಅಕ್ಲೆಡ, “ಇತ್ತೆ ನಿಕುಲು ಪತ್ತಿನ ಮೀನ್‌ಲೆಡ್ ಕೆಲೆವೆನ್ ಕನಲೆ,” ಪಂಡೆ</verse>
				<verse number="11">ಸೀಮೋನು ಪೇತ್ರೆ ಓಡ ಮಿತ್ತಾರ್ದ್ ಬಲೆನ್ ಕರೆಕ್ ಒಯ್ತೊಂದು ಬತ್ತೆ. ಐಟ್ಟ್ ನೂತ್ತ ಐವತ್ತ ಮೂಜಿ ಮಲ್ಲ ಮಲ್ಲ ಮೀನ್‌ಲು ದಿಂಜಿದಿತ್ತ್ಂಡ್. ಆತ್ ಮೀನ್‌ಲು ಇತ್ತ್ಂಡಲಾ ಬಲೆ ಪರಿದಿಜಿ.</verse>
				<verse number="12">ಯೇಸು ಅಕ್ಲೆಡ, “ಬತ್ತ್‌ದ್ ಉನ್ಲೆ,” ಪಂಡೆ. ಶಿಷ್ಯೆರ್ ಆಯೆ ಕರ್ತವೆ, ಪಂಡ್ದ್ ತೆರಿದಿತ್ತಿನೆಡ್ದ್, “ಈ ಏರ್?” ಅಂದ್‌ದ್ ಕೇನಿಯೆರೆ ಅಕ್ಲೆಡ್ ಏರ್ಲಾ ಧೈರ್ಯ ಮಲ್ತ್‌ಜೆರ್.</verse>
				<verse number="13">ಯೇಸು ಬತ್ತ್‌ದ್ ರೊಟ್ಟಿನ್ ದೆತ್ತೊಂದು ಅಕ್ಲೆಗ್ ಕೊರಿಯೆ, ಅಂಚೆನೇ ಮೀನ್‌ನ್ಲಾ ಕೊರಿಯೆ.</verse>
				<verse number="14">ಯೇಸು ಸೈತ್‌ದ್ ಜೀವೊಡು ಲಕ್ಕಿ ಬೊಕ್ಕ ಶಿಷ್ಯೆರೆಗ್ ತೋಜಿದ್ ಬತ್ತಿನವು ಉಂದು ಮೂಜನೇ ಸರ್ತಿ.</verse>
				<verse number="15">ಅಕುಲು ಉಂಡಿಬೊಕ್ಕ ಯೇಸು ಸೀಮೋನು ಪೇತ್ರಡ, “ಯೋಹಾನ ಮಗೆ ಆಯಿ ಸೀಮೋನು, ಎನನ್ ಮೊಕ್ಲೆಡ್ದ್ ಹೆಚ್ಚ್ ಪ್ರೀತಿ ಮಲ್ಪುವನಾ?” ಕೇನ್ನಗ, ಆಯೆ, “ಅಂದ್ ಕರ್ತವಾ, ನಿನನ್ ಪ್ರೀತಿ ಮಲ್ಪುವೆ ಅಂದ್‌ದ್ ಈಯೇ ತೆರಿದ,” ಪಂಡಿನಪಗ ಯೇಸು ಆಯಡ, “ಎನ ಕುರಿತ ಕಿನ್ನಿಲೆನ್ ಮೇಪಾಲ,” ಪಂಡೆ</verse>
				<verse number="16">ಯೇಸು ಕುಡ ರಡ್ಡನೆ ಸರಿ ಆಯಡ, “ಯೋಹಾನ ಮಗೆ ಆಯಿ ಸೀಮೋನು, ಎನನ್ ಪ್ರೀತಿ ಮಲ್ಪುವನಾ?” ಕೇನ್ನಗ, ಆಯೆ, “ಅಂದ್ ಕರ್ತವಾ, ನಿನನ್ ಪ್ರೀತಿ ಮಲ್ಪುವೆ ಪನ್ಪಿನೆನ್ ಈಯೇ ತೆರಿದ,” ಪಂಡೆ. ಯೇಸು ಆಯಡ, “ಎನ ಕುರಿಕುಲೆನ್ ಕಾಪು,” ಪಂಡೆ.</verse>
				<verse number="17">ಯೇಸು ಮೂಜಿನೇ ಸರ್ತಿ, ಯೋಹಾನನ ಮಗೆ ಆಯಿ ಸೀಮೋನೋ, ಎನನ್ ಪ್ರೀತಿ ಮಲ್ಪುವನಾ ಅನ್ನಗ, ಆಯೆ ಮೂಜನೆ ಸರ್ತಿ ಎನನ್ ಪ್ರೀತಿ ಮಲ್ಪುವನಾ ಅಂದ್‌ದ್ ಕೇಂಡಿನೆಡ್ದ್ ಪೇತ್ರೆ ದುಃಖ ಮಲ್ತ್‌ದ್ ಆಯಡ, “ಕರ್ತವಾ, ಈ ಮಾತೆನ್ಲಾ ತೆರಿದಿನಾಯೆ ಆದುಲ್ಲ. ನಿನನ್ ಪ್ರೀತಿ ಮಲ್ಪುವೆ ಅಂದ್‌ದ್ ನಿಕ್ಕ್ ತೆರಿದ್‌ಂಡ್,” ಪಂಡೆ. ಯೇಸು ಆಯಡ ಪಂಡಿನಿ, “ಎನ ಕುರಿಕುಲೆನ್ ಮೇಪಾಲ.”</verse>
				<verse number="18">ನಿಕ್ಕ್ ಸತ್ಯಾದ್ ಪನ್ಪೆ, ಈ ಜವ್ವನೆ ಆದುಪ್ಪುನಗ ಈಯೇ ಕುಂಟು ತುತ್ತೊಂದು ಸೊಂಟ ಕಟ್ಟೊಂದು ಇಷ್ಟ ಇತ್ತಿನಡೆ ಕುಸಿಟ್ ಪೋವೊಂದಿತ್ತ. ಆಂಡ ಈ ಪರಬೆ ಆನಗ ಕೈ ನೀಡ್ವ, ಬೊಕ್ಕೊರಿ ನಿನ ನಡು ಕಟ್ಟ್‌ದ್ ನಿಕ್ಕ್ ಕುಸಿ ಇಜ್ಜಂದಿನಡೆಗ್ ನಿನನ್ ಲೆತ್ತೊಂದು ಪೋಪೆ.</verse>
				<verse number="19">ಆಯೆ ಎಂಚಿತ್ತಿ ಮರಣೊಡ್ದು ದೇವೆರೆನ್ ಮೈಮೆ ಮಲ್ಪಾವೆ ಪನ್ಪಿನೆನ್ ಯೇಸು ಈ ಪಾತೆರೊಡು ತೋಜಾಯೆ. ಉಂದೆನ್ ಪಂಡಿ ಬೊಕ್ಕ ಆಯಡ, “ಎನ ಬೆರಿಯೆ ಬಲ,” ಪಂಡೆ.</verse>
				<verse number="20">ಪೇತ್ರೆ ತಿರ್ಗ್‌ದ್ ಯೇಸುನ ಪ್ರೀತಿದ ಶಿಷ್ಯೆ ಬೆರಿಯೆ ಬರ್ಪಿನೆನ್ ತೂಯೆ. ಆ ಶಿಷ್ಯೆ ವಣಸ್ ಮಲ್ಪುನಗ ಯೇಸುನ ತಿಗಲೆಗ್ ಒರಗ್‌ದ್ ಕರ್ತವಾ, ನಿನನ್ ಪತ್ತ್‌ದ್ ಕೊರ್ಪಿನಾಯೆ ಏರ್ ಅಂದ್‌ದ್ ಕೇಂಡಿನಾಯೆನೇ,</verse>
				<verse number="21">ಉಂಬ್ಯನ್ ಪೇತ್ರೆ ತೂದು, ಯೇಸುಡ, “ಕರ್ತವಾ, ಉಂಬ್ಯನ ಸಂಗತಿ ದಾನೆ?” ಅಂದ್‌ದ್ ಕೇಂಡೆ.</verse>
				<verse number="22">ಯೇಸು ಆಯಡ, “ಯಾನ್ ಬರ್ಪಿನೆಟ್ಟ ಆಯೆ ಉಪ್ಪೊಡಂದ್‌ದ್ ಎಂಕ್ ಮನಸಿತ್ತ್‌ಂಡ ನಿಕ್ಕ್ ದಾನೆ? ಈ ಎನ ಬೆರಿಯೆ ಬಲ” ಅಂದ್‌ದ್ ಪಂಡೆ.</verse>
				<verse number="23">ಉಂದೆತ್ತ ದಿಸೆಟ್ಟ್ ಆ ಶಿಷ್ಯೆ ಸೈಪುಜೆ ಪನ್ಪಿ ಪಾತೆರ ಸಹೋದರೆರೆ ನಡುಟು ಪಸರ್ಂಡ್. ಆಂಡ ಆಯೆ ಸೈಪುಜೆ ಅಂದ್‌ದ್ ಯೇಸು ಆಯಗ್ ಪನ್ತ್‌ಜೆ. “ಯಾನ್ ಬರ್ಪಿನೆಟ್ಟ ಆಯೆ ಉಪ್ಪೊಡಂದ್‌ದ್ ಎನ ಮನಸಿತ್ತ್‌ಂಡ ನಿಕ್ಕ್ ದಾನೆ?” ಅಂದ್‌ದ್ ಮಾತ್ರ ಪಂಡ್ದಿತ್ತೆ.</verse>
				<verse number="24">ಈ ಸಂಗತಿಲೆನ್ ಬರೆದ್ ನೆತ್ತ ಸಂಗತಿಡ್ ಸಾಕ್ಷಿ ಕೊರ್ತಿನ ಶಿಷ್ಯೆ ಆಯೆನೇ. ಆಯ ಸಾಕ್ಷಿ ಸತ್ಯದವು ಅಂದ್‌ದ್ ಎಂಕುಲು ತೆರಿದ.</verse>
				<verse number="25">ಉಂದತ್ತಂದೆ ಯೇಸು ಮಲ್ತಿನವು ನನಲಾ ಮಸ್ತ್ ಉಂಡು, ಅವೆನ್ ಮಾತೆನ್ ಒಂಜೊಂಜಾದ್ ಬರೆಂಡ ಬರೆಯಿನ ಪುಸ್ತಕೊಲೆನ್ ದೀವೆರೆ, ಲೋಕನೇ ಯಾವಂದ್ ಅಂದ್‌ದ್ ಎನ್ನುವೆ. ಆಮೆನ್.</verse>
			</chapter>
		</book>
		<book number="44">
			<chapter number="1">
				<verse number="1">ಸನ್ಮಾನ್ಯ ಥಿಯೊಫಿಲಾ, ಯೇಸು ತಾನ್ ಅಜತ್‌ದ್ ದೆತ್ತೊಂಡಿ ಅಪೊಸ್ತಲೆರೆಗ್ ಪರಿಶುದ್ಧಾತ್ಮಡ್ ಅಪ್ಪಣೆ ಕೊರಿ ಬೊಕ್ಕ ಆಯನ್ ಈ ಲೋಕೊಡ್ದು ಮಿತ್ತ್ ದೆರ್ತಿ ದಿನತ ಮುಟ್ಟ, ಯೇಸು ಸುರು ಮಲ್ತಿನ ಮಾತೆತ್ತ ವಿಷಯ ಯಾನ್ ದುಂಬತ್ತ ವಿವರ ಮಲ್ತ್‌ದೆ. ಆಯೆ ಕಷ್ಟ ಬತ್ತ್‌ದ್ ಸೈತಿ ಬೊಕ್ಕ ಜೀವಾದುಲ್ಲೆ ಅಂದ್‌ದ್ ಬೇತೆ ಬೇತೆ ದೃಷ್ಟಾಂತೊಲೆಡ್ದ್ ಅಪೊಸ್ತಲೆರೆಗ್ ನಲ್ಪ ದಿನ ಮುಟ್ಟ ಅಪಗಪಗ ಅಕ್ಲೆಗ್ ತೋಜಾವೊಂದು ದೇವೆರೆ ರಾಜ್ಯದ ವಿಷಯೊಲೆನ್ ಪನೊಂದಿತ್ತೆ.</verse>
				<verse number="2"></verse>
				<verse number="3"></verse>
				<verse number="4">ಇಂಚಾದುಪ್ಪುನಗ ಒಂಜಿ ಸರ್ತಿ ಅಪೊಸ್ತಲೆರೆ ಒಟ್ಟಗು ಕೂಡ್ದುಪ್ಪುನಗ ಯೇಸು ಪಂಡಿನಿ ದಾನೆಂದ್ಂಡ, “ಯೋಹಾನೆ ಜನೊಕುಲೆಗ್ ನೀರ್‌ಡ್ ದೀಕ್ಷಾಸ್ನಾನ ಮಲ್ಪಾದಿತ್ತೆ. ಆಂಡ ಒಂತೆ ದಿನತ ಉಲಯಿ ನಿಕ್ಲೆಗ್ ಪರಿಶುದ್ಧಾತ್ಮೊಡ್ದು ದೀಕ್ಷಾಸ್ನಾನ ಆವು. ಎನ ಅಮ್ಮೆ ಒಂಜಿ ವಾಗ್ದಾನ ಮಲ್ತ್‌ದೆ. ಯಾನ್ ಐತ ಬಗೆಟ್ ನಿಕ್ಲೆಗ್ ದುಂಬೇ ತೆರಿಪಾದೆ. ಆ ವಾಗ್ದಾನದ ವರೊಕ್ಕಾದ್ ನಿಕುಲು ಯೆರೂಸಲೇಮುಡೇ ಕಾತೊಂದುಪ್ಪುಲೆ,” ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="5"></verse>
				<verse number="6">ಅಪೊಸ್ತಲೆರ್ ಒಟ್ಟಾದುಪ್ಪುನಗ ಯೇಸುಡ ಕೇಂಡೆರ್, “ಕರ್ತವಾ, ಈ ಉಂದೇ ಸಮಯೊಡು ಇಸ್ರಾಯೇಲ್ ಜನೊಕುಲೆಗ್ ಕುಡೊರ ರಾಜ್ಯೊನು ಸಮ ಮಲ್ತ್‌ದ್ ಕೊರ್ಪನಾ?” ಪಂಡ್ದ್ ಕೇನ್ನಗ ಯೇಸು ಅಕ್ಲೆಡ ಪನ್ಪೆ, “ದಿನ ಬೊಕ್ಕ ಕಾಲೊಲೆನ್ ನಿರ್ಧಾರ ಮಲ್ಪುನ ಅಧಿಕಾರ ಅಮ್ಮೆರೆಗ್ ಒರಿಯಗ್ ಮಾತ್ರ ಉಪ್ಪುನು, ಅವೆನ್ ತೆರಿಯೊನ್ನವು ನಿಕ್ಲೆನವು ಅತ್ತ್.</verse>
				<verse number="7"></verse>
				<verse number="8">ಆಂಡ ಪರಿಶುದ್ಧಾತ್ಮೆ ನಿಕ್ಲೆ ಉಲಯಿ ಬನ್ನಗ ನಿಕುಲು ಬಲ ಪಡೆದ್ ಯೆರೂಸಲೇಮುಡ್ಲಾ ಇಡೀ ಯೂದಾಯೊಡ್ಲಾ ಸಮಾರ್ಯೊಡ್ಲಾ ಭೂಮಿದ ಕಡೆ ಮುಟ್ಟಲಾ, ನಿಕುಲು ಎನ ಸಾಕ್ಷಿದಾಕುಲಾದುಪ್ಪುವರ್.”</verse>
				<verse number="9">ಈ ಪಾತೆರೊಲೆನ್ ಅಪೊಸ್ತಲೆರೆಗ್ ಪಂಡಿ ಬೊಕ್ಕ ಅಕುಲು ತೂವೊಂದುಪ್ಪುನಗ ಆಯನ್ ಮಿತ್ತ್ ದೆರ್ತ್ತ್‌ಂಡ್ ಮುಗಲ್ ಆಯನ್ ಮದೆ ಮಲ್ತಿನೆಡ್ದ್ ಅಕ್ಲೆ ಕಣ್ಣ್‌ಗ್ ತೋಜಂದೆ ಪೋಯೆ.</verse>
				<verse number="10">ಯೇಸು ಮಿತ್ತ್ ಪೋವೊಂದುಪ್ಪುನಗ ಅಪೊಸ್ತಲೆರ್ ಬಾನದಂಚಿ ದೃಷ್ಟಿ ದೀದ್ ತೂವೊಂದುಪ್ಪುನಗ ಬೊಲ್ದು ಕುಂಟು ಪಾಡ್ದಿನ ರಡ್ಡ್ ಜನೊಕುಲು ಒರನೆ ಅಕ್ಲೆ ಕೈತಲ್‌ ಬತ್ತ್‌ದ್ ಉಂತಿಯೆರ್,</verse>
				<verse number="11">“ಗಲಿಲಾಯದಾಕುಲೇ, ದಾಯೆಗ್ ಬಾನೊನೇ ತೂವೊಂದು ಉಂತುದರ್? ಉಂದೇ ಯೇಸು ನಿಕ್ಲೆ ಕಣ್ಣೆದುರುಡು ಎಂಚ ಪರಲೋಕೊಗು ಮಿತ್ತ್ ಏರ್ದ್ ಪೋಯೆನಾ ಅವ್ವೇ ರೀತಿಡ್ ಪಿರ ಬರ್ಪೆ,” ಅಂದ್‌ದ್ ಪಂಡೆರ್.</verse>
				<verse number="12">ಬೊಕ್ಕ ಅಕುಲು ಇಪ್ಪೆಗುಡ್ಡೆಡ್ದ್ ಯೆರೂಸಲೇಮುಗು ಪಿರ ಬತ್ತೆರ್. ಆ ಗುಡ್ಡೆಗ್ಲಾ ಯೆರೂಸಲೇಮುಗ್ಲಾ ಸಬ್ಬತ್‌ದಿನತ್ತ ಸಾದಿದಾತ್ ಅಂದ್ಂಡ ಸುಮಾರ್ ಮುಕ್ಕಾಲ್ ಮೈಲ್‌ದಾತ್ ದೂರ ಇತ್ತ್ಂಡ್.</verse>
				<verse number="13">ಅಕುಲು ಪೇಂಟೆಗ್ ಬತ್ತ್‌ದ್ ತನ್ಕುಲು ಉಪ್ಪುನ ಮಾಳಿಗೆದ ಕೋಣೆಗ್ ಪೋಯೆರ್. ಅಕುಲು ಏರೇರ್ ಪಂಡ ಪೇತ್ರೆ, ಯೋಹಾನೆ, ಯಾಕೋಬು, ಅಂದ್ರೆಯೆ, ಫಿಲಿಪ್ಪು ತೋಮೆ, ಬಾರ್ತೊಲೊಮಾಯೆ, ಮತ್ತಾಯೆ, ಅಲ್ಫಾಯನ ಮಗೆ ಯಾಕೋಬು, ದೇಶಾಭಿಮಾನಿ ಪನ್ಪಿ ಸೀಮೋನು, ಬೊಕ್ಕ ಯಾಕೋಬುನ ಮಗೆ ಯೂದೆ.</verse>
				<verse number="14">ಮೊಕುಲು ಮಾತೆರ್ಲಾ ಒಂಜೇ ಮನಸ್‌ಡ್ ದೇವೆರೆಡ ಇಡೆ ಬುಡಂದೆ ಪ್ರಾರ್ಥನೆ ಮಲ್ತೊಂದಿತ್ತೆರ್. ಕೆಲವು ಪೊಂಜೊವುಲುಲಾ ಯೇಸುನ ಅಪ್ಪೆ ಆದುಪ್ಪು ಮರಿಯಲಾ ಆಯನ ಸಹೋದ್ರೆರ್‌ಲಾ ಅಪೊಸ್ತಲೆರೆ ಒಟ್ಟುಗು ಇತ್ತೆರ್.</verse>
				<verse number="15">ಆ ದಿನೊಕುಲೆಡ್ ಸುಮಾರ್ ನೂತ್ತ ಇರ್ವ ಮಂದಿ ಸಹೋದ್ರೆರ್ ಸೇರ್ದುಪ್ಪುನಗ ಪೇತ್ರೆ ಅಕ್ಲೆ ನಡುಟು ಉಂತುದು ಇಂಚ ಪಂಡೆ.</verse>
				<verse number="16">“ಎನ ಸಹೋದ್ರೆರೇ, ಯೇಸುನು ಪತ್ತಿಯೆರೆ ಸಾದಿ ತೋಜಾಯಿ ಯೂದ ಸಂಗತಿಡ್ ಪರಿಶುದ್ಧಾತ್ಮೆ ದಾವೀದನ ಬಾಯಿಡ್ದ್ ಪವಿತ್ರ ಶಾಸ್ತ್ರೊಡು ದುಂಬು ಪನ್ತಿನ ಸಂಗತಿ ನಡಪುನವು ಅಗತ್ಯದವು ಆದಿತ್ತ್ಂಡ್.</verse>
				<verse number="17">ಯೂದೆ ನಮ ಒಟ್ಟುಡು ಇತ್ತ್‌ದ್ ಈ ಸೇವೆಡ್ ಪಾಲ್ ಪಡೆತಿನಾಯೆ ಆದಿತ್ತೆ.</verse>
				<verse number="18">“ಈ ನರಮಾನಿ ತನ ಅನ್ಯಾಯೊಡ್ದು ತಿಕ್ಕಿನ ದುಡ್ಡುಡು ಒಂಜಿ ಕಂಡೊನು ದೆತ್ತೊಂಡೆ; ಬೊಕ್ಕ ಕುತ್ತ ಬೂರ್ದು ಬಂಜಿ ಪುಡಾದ್ ಕರ್ಲ್ ಪೂರ ಪಿದಿಯಿ ಬತ್ತ್ಂಡ್.</verse>
				<verse number="19">ನೆತ್ತ ವಿಷಯ ಯೆರೂಸಲೇಮುದ ಮಾತ ಜನೊಕುಲೆಗ್ ತೆರಿದ್ ಬತ್ತಿನೆಡ್ದ್ ಆ ಕಂಡೊಗು ಅಕ್ಲೆನ ಪಾತೆರೊಡು ಅಕೆಲ್‌ದಮಾ, ಪಂಡ್ಂಡ, ‘ನೆತ್ತೆರ್‌ದ ಕಂಡ,’ ಅಂದ್‌ದ್ ಪುದರ್ ದೀಯೆರ್.</verse>
				<verse number="20">“ಆಯನ ಸಂಗತಿಡ್, ‘ಆಯನ ಇಲ್ಲ್ ಹಾಳಾದ್ ಪೋವಡ್, ಐಟ್ಟ್ ಒಕ್ಕೆಲ್‌ದಾಂತೆ ಉಪ್ಪಡ್, ಆಯನ ಉದ್ಯೋಗ ನನೊರಿಯಗಾವಡ್,’ ಪಂಡ್ದ್‌ಲಾ, ಕೀರ್ತನೆ ಗ್ರಂಥೊಡು ಬರೆದುಂಡು.”</verse>
				<verse number="21">“ಅಂಚಾಯಿನೆಡ್ದ್, ಕರ್ತವೆ ಆದುಪ್ಪು ಯೇಸು ನಮ್ಮೌಲು ಬರೊಂದು ಪೋವೊಂದು ಇತ್ತಿ ಮಾತ ಸಮಯೊಡು ಅಂದ್ಂಡ ಯೋಹಾನೆ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊಂದಿತ್ತಿ ಕಾಲೊಡ್ದು ಯೇಸು ನಮ ಕೈತಲ್‌ಡ್ದ್ ಮೇಲೋಕೊಗು ಏರ್ದ್ ಪೋಯಿನ ದಿನ ಮುಟ್ಟ ಎಂಕ್ಲೆಡೊಪ್ಪ ಯೇಸು ಸೈತಿನಾಕುಲೆಡ್ದ್ ಲಕ್ಕಿನೆಕ್ಕ್ ಸಾಕ್ಷಿ ಪನ್ಪಿನಾಯೆ ಆವೊಡು.”</verse>
				<verse number="22"></verse>
				<verse number="23">ಅಪೊಸ್ತಲೆರ್ ಇರ್ವೆರೆನ್ ಉಂತಾಯೆರ್. ಒರಿ ಬಾರ್ಸಬೆ ಪನ್ಪಿ ಯೋಸೇಫು, ಆಯನ್ ಯುಸ್ತೆ ಅಂದ್‌ದ್ ಮೇಲ್ ಪುದರ್‌ಡ್ ಲೆತ್ತೊಂದಿತ್ತೆರ್ ಬೊಕ್ಕೊರಿ ಮತ್ತೀಯೆ.</verse>
				<verse number="24">ಬೊಕ್ಕ ಅಕುಲು ಇಂಚ ಪ್ರಾರ್ಥನೆ ಮಲ್ತೆರ್, “ಕರ್ತವ ಮಾತೆರ್ನ ಉಡಲ್‌ನ್ ತೆರಿದುಲ್ಲ. ಯೂದೆ ಅಪೊಸ್ತಲೆ ಪನ್ಪಿ ಈ ಸ್ಥಾನೊನು ಬುಡ್ದು ತನ ಜಾಗ್‌ಗ್ ಪೋಯಿನೆಡ್ದ್ ಆ ಸ್ಥಾನೊನು ಸೇರಿಯೆರೆ ಈ ಇರ್ವೆರೆಡ್ದ್ ಏರೆನ್ ಈ ಅಜತ್‌ದನಾ ಆಯನ್ ತೋಜಾದ್ ಕೊರ್ಲ.”</verse>
				<verse number="25"></verse>
				<verse number="26">ಬೊಕ್ಕ ಅಪೊಸ್ತಲೆರ್ ಇರ್ವೆರೆನ ಪುದರ್‌ಡ್ ಚೀಟ್ ಪಾಡಿಯೆರ್, ಚೀಟ್ ಮತ್ತೀಯಗ್ ಬತ್ತ್ಂಡ್. ಬಾಕಿದ ಪತ್ತೊಂಜಿ ಜನ ಅಪೊಸ್ತಲೆರೆ ಒಟ್ಟುಗು ಮತ್ತೀಯೆಲಾ ಲೆಖ್ಖೊಗು ಸೇರಿಯೆ.</verse>
			</chapter>
			<chapter number="2">
				<verse number="1">ಪಂಚಾಶತಮ ಪರ್ಬದ ದಿನ ಬನ್ನಗ ಅಕುಲು ಮಾತೆರ್ಲಾ ಒಂಜೇ ಮನಸ್‌ಡ್ ಒಂಜಿ ಜಾಗ್‌ಡ್ ಸೇರ್ದಿತ್ತೆರ್.</verse>
				<verse number="2">ಅಪಗ ಬಿರುಗಾಳಿ ಬೀಜುನಂಚ ಬಾನೊಡು ಒಂಜಿ ಶಬ್ಧ ಉಂಡಾದ್ ಅಕುಲು ಕುಲ್ಲುದಿತ್ತಿನ ಇಲ್ಲಡ್ ದಿಂಜಿದ್ ಪೋಂಡು.</verse>
				<verse number="3">ಬೊಕ್ಕ ಅರ್ಲೊಂದಿತ್ತಿ ತೂತ ಲೆಕ್ಕಂತಿನ ನಾಲಯಿಲು ಪಾಲ್ ಆದ್ ಅಕ್ಲೆಗ್ ತೋಜಿದ್ ಅವು ಒರಿ ಒರಿಯನ ಮಿತ್ತ್ ಕುಲ್ಲುಂಡು.</verse>
				<verse number="4">ಅಪಗ ಅಕುಲು ಮಾತೆರ್ಲಾ ಪರಿಶುದ್ಧಾತ್ಮದ ಶಕ್ತಿಡ್ ದಿಂಜಿದ್ ಬೇತೆ ಬೇತೆ ಭಾಷೆಲೆಡ್ ಪಾತೆರಿಯೆರೆ ಸುರು ಮಲ್ತೆರ್.</verse>
				<verse number="5">ಬಾನದ ತಿರ್ತ್ ಉಪ್ಪು ಮಾತ ಜನಾಂಗೊಲೆಡ್ದ್ ಬೈದಿನ ಭಕ್ತೆರಾಯಿ ಯೆಹೂದ್ಯೆರ್, ಯೆರೂಸಲೇಮುಡು ಒಟ್ಟಾದಿತ್ತೆರ್.</verse>
				<verse number="6">ಆ ಮಲ್ಲ ಸ್ವರೊನು ಕೇಂಡ್ದ್ ಜನೊಕುಲೆನ ಒಂಜಿ ಮಲ್ಲ ಗುಂಪು ಸೇರ್ದ್ ಬತ್ತ್‌ದ್ ಪ್ರತಿ ಒರಿಯಡ ತನ್ಕುಲೆ ಭಾಷೆಡ್ ಪಾತೆರುನೆನ್ ಕೇಂಡ್ದ್ ಅಚ್ಚಿರೊಡು ದಿಂಜಿದ್ ಪೋಯೆರ್. ಮಾತೆರ್ಲಾ ಬೆಚ್ಚಿದ್ ಒರಿಯಡೊರಿ ಪಂಡಿನಿ ದಾನೆಂದ್ಂಡ, “ಇಂದಾ, ಪಾತೆರೊಂದುಪ್ಪುನ ಮೊಕುಲು ಗಲಿಲಾಯದಾಕುಲ್ಲತ್ತಾ?</verse>
				<verse number="7"></verse>
				<verse number="8">ಆಂಡ ನಮ ಸ್ವಂತ ಭಾಷೆಡೇ ಮೊಕುಲು ಪಾತೆರುನೆನ್ ಕೇನೊಂದುಲ್ಲತ್ತಾ ಉಂದು ಎಂಚ?</verse>
				<verse number="9">ನಮ್ಮ ನಡುಟು ಪಾರ್ಥ್ಯೆರ್, ಮೇದ್ಯೆರ್, ಎಲಾಮ್ಯೆರ್, ಮೆಸೊಪೊತಾಮ್ಯೆರ್, ಯೂದಾಯೆರ್, ಕಪ್ಪದೋಕ್ಯೆರ್, ಪೊಂತ, ಆಸ್ಯ,</verse>
				<verse number="10">ಫ್ರುಗ್ಯ, ಪಂಫುಲ್ಯ, ಐಗುಪ್ತ, ಕುರೇನೆದ ಬರಿಟ್ಟುಪ್ಪು ಲಿಬ್ಯ ಈ ಜಾಗ್‌ಡುಪ್ಪುನಾಕಲುಲಾ ರೋಮುಡ್ದು ಬತ್ತಿ ಪ್ರಯಾಣಿಕೆರ್, ಐಟ್ಟ್ ಕೆಲೆವೆರ್ ಪುಟ್ಟು ಯೆಹೂದ್ಯೆರ್, ಬಾಕಿದಾಕುಲು ಮತೊಕು ಸೇರ್ದಿನಾಕುಲುಲಾ ಕ್ರೇತ್ಯೆರ್, ಅರಾಬ್ಯೆರ್ ಆದುಪ್ಪು ನಮ್ಮಕುಲು ನಮ ಭಾಷೆಡೇ ದೇವೆರೆನ ಮಲ್ಲಕಾರ್ಯೊಲೆ ಬಗೆಟ್ ಪನ್ಪಿನೆನ್ ಕೇನೊಂದುಲ್ಲತ್ತಾ,” ಅಂದ್‌ದ್ ಪಂಡೆರ್.</verse>
				<verse number="11"></verse>
				<verse number="12">ಮಾತೆರ್ಲಾ ಅಚ್ಚಿರೊಡು, “ಉಂದು ದಾನೆ ಆದುಪ್ಪು?” ಅಂದ್‌ದ್ ಒರಿಯಡೊರಿ ಕೇನೊಂದಿತ್ತೆರ್.</verse>
				<verse number="13">ಕೆಲೆವೆರ್, “ಮೊಕುಲು ಪೊಸ ದ್ರಾಕ್ಷಾರಸ ಪರ್ದ್ ಅಮಲಾತೆರ್,” ಅಂದ್‌ದ್ ಗೇಲಿ ಮಲ್ತೆರ್.</verse>
				<verse number="14">ಅಪಗ ಪೇತ್ರೆ ಪತ್ತೊಂಜಿ ಜನ ಅಪೊಸ್ತಲೆರೆ ಒಟ್ಟುಗು ಉಂತುದು ಮಲ್ಲ ಸ್ವರೊಟ್ಟು ಅಕ್ಲೆಗ್ ಇಂಚ ಬೋಧನೆ ಪನಿಯೆರೆ ಸುರು ಮಲ್ತೆ. “ಯೆಹೂದ್ಯೆರೇ, ಯೆರೂಸಲೇಮುಡುಪ್ಪು ಮಾತ ಜನೊಕುಲೇ, ಈ ಸಂಗತಿ ದಾನೆ ಅಂದ್‌ದ್ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪಾತೆರೊಗು ಕೆಬಿ ಕೊರ್ಲೆ.</verse>
				<verse number="15">ನಿಕುಲು ಎನ್ನಿಲೆಕ್ಕ ಮೊಕುಲು ಅಮಲೇರ್ದಿನಕುಲತ್ತ್‌, ಇತ್ತೆ ಕಾಂಡೆ ಒಂರ್ಬ ಗಂಟೆ ಆತಿನಾತೆ.</verse>
				<verse number="16">ಆಂಡ ಈ ಪೊರ್ತು ಮೂಲು ನಡತೊಂದಿತ್ತಿನ ಬಗೆಟ್ ಯೋವೆಲ್ ಪ್ರವಾದಿಡ್ದ್ ಪಂಡಿನವೇ,</verse>
				<verse number="17">‘ಕಡೇ ದಿನೊಟು ಯಾನ್ ಮಾತ ಜನೊಕುಲೆ ಮಿತ್ತ್ ಎನ ಆತ್ಮೊನು ಕಡಪುಡುವೆ. ನಿಕ್ಲೆ ಅಂಜೊವುಲ್ಲಾ ಪೊಂಜೊವುಲ್ಲಾ ಪ್ರವಾದನೆ ಮಲ್ಪೆರ್, ನಿಕ್ಲೆ ಜವನ್ಯೆರ್ ದರ್ಶನೊಲೆನ್ ತೂಪೆರ್, ನಿಕ್ಲೆನ ಹಿರಿಯಾಕುಲೆಗ್ ಕನ ಕಟ್ಟು.</verse>
				<verse number="18">ಉಂದತ್ತಂದೆ ಆ ದಿನೊಟು ಎನ ದಾಸೆರೆ ಮಿತ್ತ್‌ಲಾ ದಾಸಿಯೆರೆ ಮಿತ್ತ್‌ಲಾ ಎನ ಆತ್ಮೊನು ಕಡಪುಡ್ದು ಅಕುಲುಲಾ ಪ್ರವಾದನೆ ಮಲ್ಪೆರ್.</verse>
				<verse number="19">ಕರ್ತವೆ ಕುಡೊರ ಬರ್ಪಿನ ಗಂಭಿರದ ದಿನ ಬರ್ಪಿನೆಕ್ಕ್ ದುಂಬು ಯಾನ್ ಬಾನೊಡು ಕಾರ್ನಿಕೊಲೆನ್ ತೋಜಾವೆ, ಭೂಮಿಡ್ಲಾ ಗುರ್ತೊಲೆನ್ ಉಂಡು ಮಲ್ಪುವೆ, ನೆತ್ತೆರ್, ತೂ ಬೊಕ್ಕ ಮಿತ್ತ್ ಪೋಪಿನ ಪುಗೆ ಮಾತ ಉಪ್ಪು, ಸೂರ್ಯೆ ಕತ್ತಲೆ ಆವು, ಚಂದ್ರೆ ನೆತ್ತೆರ್‌ದಂಚ ಕೆಂಪಾವು.</verse>
				<verse number="20"></verse>
				<verse number="21">ಆಂಡ ಕರ್ತವ ಪುದರ್‌ನ್ ಲೆಪ್ಪುನಾಕುಲೆಗ್ ರಕ್ಷಣೆ ಆವು,’ ಅಂದ್‌ದ್ ದೇವೆರ್ ಪನ್ಪೆ.</verse>
				<verse number="22">“ಇಸ್ರಾಯೇಲ್ ಜನೊಕುಲೇ, ಎನ ಪಾತೆರೊಲೆನ್ ಕೇನ್ಲೆ, ನಿಕ್ಲೆಗ್ ತೆರಿದುಪ್ಪುಲೆಕ್ಕ ದೇವೆರ್ ನಜರೇತ್‌ದ ಯೇಸುನ ಕೈಡ್ದ್ ಬಲತ್ತ ಕಾರ್ಯೊಲೆನ್ಲಾ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ನಿಕ್ಲೆ ಉಲಯಿ ಮಲ್ತಿನೆಡ್ದ್ ಆಯೆ ನಿಕ್ಲೆಗ್ ಮೆಚ್ಚಿಗೆ ಆತಿನಾಯೆ ಪಂಡ್ದ್ ನಿಕ್ಲೆಗ್ ತೋಜಾದ್ ಕೊರಿಯೆ.</verse>
				<verse number="23">ಆ ಯೇಸು, ದೇವೆರೆನ ಯೋಜನೆದ ಪ್ರಕಾರ ನಿರ್ಧಾರ ಆತಿನೆಡ್ದ್ ನಿಕುಲು ಅನ್ಯಾಯಗಾರೆರೆ ಕೈಕ್ ಕೊರ್ದು ಆಯನ್ ಕ್ರುಸ್ಸುಗ್ ಪಾಡ್ದ್ ಕೆರಿಯರ್.</verse>
				<verse number="24">ಆಂಡ ದೇವೆರ್ ಆಯನ್ ಮರಣದ ಬೇನೆಡ್ದ್ ಬುಡ್ಪಾದ್ ಲಕ್ಕಾಯೆ. ದಾಯೆಗಂದ್ಂಡ, ಆಯನ್ ಮರಣ ಬಂಧನೊಡು ದೀಯೆರೆ ಸಾದ್ಯ ಇಜ್ಜಾಂಡ್.</verse>
				<verse number="25">ಆಯನ ಸಂಗತಿಡ್ ದಾವೀದೆ, ‘ಕರ್ತವೆ ಏಪಲಾ ಎನ ಎದುರುಡೇ ಉಪ್ಪುನೆನ್ ತೂವೊಂದಿತ್ತೆ, ಯಾನ್ ಪಂದಂದಿಲೆಕ್ಕ ಆಯೆ ಎನ ಬಲತ್ತ ಮರ್ಗಿಲ್‌ಡೇ ಉಲ್ಲೆ.</verse>
				<verse number="26">ಅಂಚಾಯಿನೆಡ್ದ್ ಎನ ಉಡಲ್ ಸಂತೋಷೊಡುಂಡು; ಎನ ನಾಲಯಿ ಆನಂದೊಡು ಪಾತೆರೊಂದುಂಡು; ಎನ ಶರೀರ ನಿರೀಕ್ಷೆಡ್ ನಿಲೆ ಆದುಂಡು.</verse>
				<verse number="27">ದಾಯೆಗಂದ್ಂಡ, ಈ ಎನ ಜೀವಾತ್ಮೊನು ಪಾತಾಳೊಡು ಬುಡ್ಪುಜ. ನಿನ ಮೋಕೆದಾಯಗ್ ಕುರಿಯುನ ಅವಸ್ಥೆನ್‌ ತೋಜಾವುಜ.</verse>
				<verse number="28">ಜೀವದ ಸಾದಿನ್ ಎಂಕ್ ತೆರಿಪಾಯ. ನಿನ ಎದುರು ಯಾನ್ ಸಂತೋಷೊಡು ಉಪ್ಪುಲೆಕ್ಕ ಮಲ್ಪುವ,’ ಅಂದ್‌ದ್ ಪನ್ತೆ.</verse>
				<verse number="29">“ಸಹೋದ್ರೆರೇ, ಆಂಡ ಪೂರ್ವಜೆರ್ ಆದಿತ್ತಿನ ದಾವೀದನ ಸಂಗತಿಡ್ ಯಾನ್ ಧೈರ್ಯ ಮಲ್ತ್‌ದ್ ನಿಕ್ಲೆಡೊಪ್ಪ ಪಾತೆರೊಲಿ ಅವು ದಾನೆಂದ್ಂಡ ಆಯೆ ಸೈತಿ ಬೊಕ್ಕ ಆಯನ್ ಸಮಾಧಿ ಮಲ್ತೆರ್. ಆಯನ ಸಮಾಧಿ ಇನಿ ಮುಟ್ಟಲಾ ನಮ್ಮಲ್ಪನೇ ಉಂಡು.</verse>
				<verse number="30">ದಾವೀದೆ ಪ್ರವಾದಿ ಆದಿತ್ತ್‌ದ್ ನಿನ ಸಂತತಿಡೇ ಯಾನ್‌ ಒರಿಯನ್ ನಿನ ಗದ್ದಿಗೆಡ್ ಕುಲ್ಲಾವೆ ಪಂಡ್ದ್ ದೇವೆರ್ ಆಜ ಪಾಡ್ದ್ ಪನ್ತಿನೆನ್ ತೆರಿದಿನಾಯೆ ಆದ್‌</verse>
				<verse number="31">ದುಂಬಗ್ ಆಪಿನೆನ್ ತೆರಿದ್ ಕ್ರಿಸ್ತನ ಪುನರುತ್ಥಾನದ ಬಗೆಟ್‌ ಆಯೆ ಪಾತಾಳೊಡೆ ಒರಿಯುಜೆ; ಆಯನ ಶರೀರೊನು ಕುರಿಯೆರೆ ಬುಡ್ಪುಜಿ ಪಂಡ್ದ್‌ಲಾ ಪಂಡೆ.</verse>
				<verse number="32">“ಈ ಯೇಸುನೇ ದೇವೆರ್ ಲಕ್ಕಾಯೆ ಉಂದೆಕ್ಕ್ ಎಂಕುಲು ಮಾತೆರ್ಲಾ ಸಾಕ್ಷಿದಾಕುಲಾದುಲ್ಲ.</verse>
				<verse number="33">ಯೇಸು ದೇವೆರೆ ಬಲತ್ತ ಕೈಡ್ದ್ ಮಿತ್ತ ಸ್ಥಾನೊಗು ಏರ್ದ್ ಪೋದು ವಾಗ್ದಾನ ಮಲ್ತ್‌ದಿನ ಪರಿಶುದ್ಧಾತ್ಮ ವರೊನು ಅಮ್ಮೆರೆಡ್ದ್ ಪಡೆದ್ ಎಂಕುಲೆ ಮಿತ್ತ್ ಮೈತ್‌ದ್ ನಿಕುಲು ಇತ್ತೆ ತೂಪಿನಲಾ ಕೇನುನಲಾ ಅವ್ವೇ ಆದುಂಡು.</verse>
				<verse number="34">ಪರಲೋಕೊಗು ಏರ್ದ್ ಪೋತಿನಿ ದಾವೀದೆ ಅತ್ತ್. ತಾನೇ ಪನ್ತಿನ ಪಾತೆರ ದಾನೆಂದ್ಂಡ, ‘ಯಾನ್ ನಿನ ವೈರಿಲೆನ್ ನಿನ ಪಾದಪೀಠ ಮಲ್ಪುನ ಮುಟ್ಟ ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಅಂದ್‌ದ್ ಕರ್ತವೆ ಎನ ಕರ್ತವಡ ಪಂಡೆ.’</verse>
				<verse number="35"></verse>
				<verse number="36">“ಅಂಚಾಯಿನೆಡ್ದ್ ನಿಕುಲು ಕ್ರುಸ್ಸುಗು ಪಾಡ್ಪಾಯಿನ ಈ ಯೇಸುನೇ, ದೇವೆರ್ ಕರ್ತವೆ ಆದ್‌ಲಾ ಕ್ರಿಸ್ತೆ ಆದ್‌ಲಾ ಮಲ್ತೆ ಪನ್ಪಿನ ಪಾತೆರ ಇಸ್ರಾಯೇಲ್ಯೆರೆನ ಗೋತ್ರದಾಕುಲೆಗ್ ಮಾತೆರೆಗ್‌ ಸರಿಯಾದ್ ತೆರಿದುಪ್ಪಡ್,” ಅಂದ್‌ದ್ ಪಂಡೆ.</verse>
				<verse number="37">ಉಂದೆನ್ ಕೇಂಡ್ದ್ ಅಕ್ಲೆ ಉಡಲ್‌ಗ್ ಹಾಕಿಲೆಕ್ಕ ಆಂಡ್. ಅಕುಲು ಪೇತ್ರಗ್ಲಾ ಬಾಕಿದ ಅಪೊಸ್ತಲೆರೆಗ್ಲಾ, “ಸಹೋದರೆರೆ, ಇತ್ತೆ ಎಂಕುಲು ದಾನೆ ಮಲ್ಪೊಡು,” ಅಂದ್‌ದ್ ಕೇಂಡೆರ್.</verse>
				<verse number="38">ಪೇತ್ರೆ ಅಕ್ಲೆಗ್, “ನಿಕ್ಲೆನ ಪಾಪೊಲು ಪರಿಹಾರ ಆವರೆಗಾದ್ರ ನಿಕುಲು ಮಾತೆರ್ಲಾ ಪಶ್ಚಾತಾಪ ಪಡೆದ್ ಯೇಸು ಕ್ರಿಸ್ತನ ಪುದರ್‌ಡೇ ದೀಕ್ಷಾಸ್ನಾನ ಮಲ್ತೊನ್ಲೆ, ಅಪಗ ನಿಕುಲು ಪರಿಶುದ್ಧಾತ್ಮನ ವರೊನು ಹೊಂದುವರ್, ಅಂದ್‌ದ್ ಪಂಡೆ.</verse>
				<verse number="39">ಆ ವಾಗ್ದಾನ ನಿಕ್ಲೆಗ್ಲಾ ನಿಕ್ಲೆನ ಜೋಕುಲೆಗ್ಲಾ ದೂರದಾಕುಲೆಗ್ಲಾ ಬೊಕ್ಕ ನಮ ದೇವೆರಾದುಪ್ಪು ಕರ್ತವೆ ತನ ಕಡೆಕ್ಕ್ ಲೆಪ್ಪುನಾತ್ ಜನೊಕುಲೆಗ್ಲಾ ಉಂಡು.” ಅಂದ್‌ದ್ ಪಂಡೆ.</verse>
				<verse number="40">ಪೇತ್ರೆ ನನಲಾ ಕೆಲವು ಪಾತೆರೊಲೆಡ್ದ್ ಅಕ್ಲೆಗ್ ಎಚ್ಚರಿಕೆ ಕೊರ್ದು, “ಮೊಡಂಕ್ ಬುದ್ಧಿದ ಈ ಸಂತಾನೊಡ್ದು ತಪ್ಪಾವೊನ್ಲೆ,” ಪಂಡ್ದ್ ನಟ್ಟೊಂಡೆ.</verse>
				<verse number="41">ಅಪಗ ಆಯ ಪಾತೆರೊನು ಒಪ್ಪಿನಾಕುಲು ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್. ಆ ದಿನೊಟು ಸುಮಾರ್ ಮೂಜಿ ಸಾರ ಜನ ಅಕ್ಲೆ ಒಟ್ಟುಗು ಸೇರಿಯೆರ್.</verse>
				<verse number="42">ಮೊಕುಲು ಅಪೊಸ್ತಲೆರೆನ ಬೋಧನೆನ್ ಕೇನುನೆಟ್ಲಾ ಸಹೋದ್ರೆರೆನ ಅನ್ಯಮನ್ಯೊಡು ರೊಟ್ಟಿ ಪೊಲ್ಪುನೆಟ್ಲಾ ಪ್ರಾರ್ಥನೆಡ್ಲಾ ನಿಲೆ ಆದಿತ್ತೆರ್.</verse>
				<verse number="43">ಮಾತ ಜನೊಕುಲೆಗ್ಲಾ ಪೋಡಿಗೆ ಪತ್ತ್ಂಡ್. ಮಸ್ತ್ ಕಾರ್ನಿಕೊಲುಲಾ, ತೋಜಿದ್ ಬರ್ಪಿ ಕಾರ್ಯೊಲುಲಾ ಅಪೊಸ್ತಲೆರೆ ಕೈಡ್ದ್ ನಡತ್ಂಡ್.</verse>
				<verse number="44">ನಂಬಿನಾಕುಲು ಮಾತೆರ್ಲಾ ಒಟ್ಟುಗು ಇತ್ತ್‌ದ್ ತನ್ಕುಲೆಡಿತ್ತಿನೆನ್ ಸಂತೋಷೊಡು ಪಟ್ಟೊಂದು ಜೀವನ ಮಲ್ತೊಂದಿತ್ತೆರ್.</verse>
				<verse number="45">ತನ್ಕುಲೆ ಭೂಮಿ ಆಸ್ತಿಲೆನ್ಲಾ ವಸ್ತುಲೆನ್ಲಾ ಮಾರ್ದ್ ಬತ್ತಿ ಕಾಸ್‌ನ್ ಮಾತೆರೆಗ್ಲಾ ಅಕಲ್ನಕಲ್ನ ಅಗತ್ಯೊಗು ತಕ್ಕ ಪಟ್ಟ್‌ದ್ ಕೊರೊಂದಿತ್ತೆರ್.</verse>
				<verse number="46">ಅಕುಲು ದಿನಾಲ ಒಂಜೇ ಮನಸ್ಸಾದ್ ದೇವಾಲಯೊಡು ಕೂಡೊಂದಿತ್ತೆರ್. ಅಕ್ಲೆನ ಇಲ್ಲ್ ಇಲ್ಲಡ್ ರೊಟ್ಟಿ ಪೊಲ್ತುದು ಸಂತೋಷೊಡ್ಲಾ ಶುದ್ಧ ಮನಸ್‌ಡ್ಲಾ ವಣಸ್ ಮಲ್ತೊಂದಿತ್ತೆರ್.</verse>
				<verse number="47">ದೇವೆರೆಗ್ ಸ್ತುತಿ ಮಲ್ಪುನಾಕುಲುಲಾ ಮಾತ ಜನೊಕುಲೆ ದಯೊನು ಪಡೆಯೊಂದಿತ್ತೆರ್‌. ಪ್ರತಿ ದಿನ ಹೆಚ್ಚೆಚ್ಚ ಜನೊಕುಲು ರಕ್ಷಣೆ ಪಡೆಯೊಂದು, ಕರ್ತವೆ ಅಕ್ಲೆನ್ ಮಾತೆರೆನ್ಲಾ ಕೂಟೊಗು ಕೂಡಾವೊಂದಿತ್ತೆ.</verse>
			</chapter>
			<chapter number="3">
				<verse number="1">ಒಂಜಿ ದಿನ ಪೇತ್ರೆಲಾ ಯೋಹಾನೆಲಾ ಮಧ್ಯಾಹ್ನ ಮೂಜಿ ಗಂಟೆಗ್ ನಡಪುನ ಪ್ರಾರ್ಥನೆಗಾದ್ ದೇವಾಲಯೊಗು ಪೋಯೆರ್.</verse>
				<verse number="2">ಅವುಲು ಪುಟ್ಟಿ ದಿನೊಡ್ದೇ ಕುಂಟೆ ಇತ್ತಿನಾಯನ್ ಕೆಲೆವೆರ್ ತುಂಬೊಂದು ಬತ್ತ್‌ದ್, ಆಯನ್ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದ ಬರಿಟ್ಟ್ ದಿನಾಲ ಬಿಕ್ಷೆ ನಟ್ಟೆರೆಗಾದ್ ಕುಲ್ಲಾವೊಂದಿತ್ತೆರ್.</verse>
				<verse number="3">ಆಯೆ ದೇವಾಲಯದ ಉಲಯಿ ಪೋಪಿನ ಪೇತ್ರನ್ಲಾ ಯೋಹಾನನ್ಲಾ ತೂದು ಬಿಕ್ಷೆ ನಟ್ಟಿಯೆ.</verse>
				<verse number="4">ಪೇತ್ರೆ, ಯೋಹಾನೆ ಇರ್ವೆರ್‌ಲಾ ಆಯನ್ ದೃಷ್ಟಿ ದೀದ್ ತೂಯೆರ್. ಪೇತ್ರೆ ಆಯಗ್, “ಎಂಕ್ಲೆನ್ ತೂಲ,” ಪಂಡೆ.</verse>
				<verse number="5">ಆಯೆ ಅಕ್ಲೆಡ್ದ್ ದಾಲಾಂಡಲಾ ತಿಕ್ಕು ಅಂದ್‌ದ್ ಆಸೆಡ್ ಅಕ್ಲೆನ್ ಲಕ್ಷ ದೀದ್ ತೂಯೆ.</verse>
				<verse number="6">ಅಪಗ ಪೇತ್ರೆ, “ಎನಡ ಬೊಳ್ಳಿ ಬಂಗಾರ್ ದಾಲಾ ಇಜ್ಜಿ, ಎನಡ ಇತ್ತಿನೆನ್ ನಿಕ್ಕ್ ಕೊರ್ಪೆ. ನಜರೇತ್‌ದ ಯೇಸು ಕ್ರಿಸ್ತನ ಪುದರ್‌ಡ್ ಲಕ್ಕ್‌ದ್ ನಡಪುಲ.” ಪಂಡ್ದ್</verse>
				<verse number="7">ಆಯನ ಬಲ ಕೈ ಪತ್ತ್‌ದ್ ದೆರ್ತ್ತ್‌ದ್ ಲಕ್ಕಾಯೆ. ಅವ್ವೇ ಗಳಿಗೆಡ್ ಆಯನ ಕಾರ್‌ಗ್ಲಾ ಗಂಟ್‌ಗ್ಲಾ ಬಲ ಬತ್ತ್ಂಡ್.</verse>
				<verse number="8">ಆಯೆ ಲೈತ್‌ದ್ ಉಂತುದು ನಡತೆ. ಬೊಕ್ಕ ನಡತೊಂದು ಲೈತೊಂದು ದೇವೆರೆನ್ ಪುಗರೊಂದು ಅಕ್ಲೆನ ಒಟ್ಟುಗು ದೇವಾಲಯದ ಉಲಯಿ ಪೋಯೆ.</verse>
				<verse number="9">ಆಯೆ ನಡಪುನೆನ್ಲಾ ಬೊಕ್ಕ ದೇವೆರೆನ್ ಪುಗರುನೆನ್ಲಾ ಜನೊಕುಲು ಮಾತೆರ್ಲಾ ತೂದು,</verse>
				<verse number="10">ಇಂಬೆ ದೇವಾಲಯದ ಪೊರ್ಲು ಬಾಕಿಲ್ ಪನ್ಪಿ ಬಾಕಿಲ್‌ದಲ್ಪ ಕುಲ್ಲುದು ಬಿಕ್ಷೆ ನಟ್ಟುನಾಯೆನೇ ಅಂದ್‌ದ್ ಆಯನ ಗುರ್ತ ಪತ್ತ್‌ದ್ ಆಯಗ್ ಗುಣ ಆದುಪ್ಪುನೆನ್ ತೂದು ಮಾತೆರ್ಲಾ ಸೋದ್ಯೊಡುಲಾ ಬೆರ್ಮೆಡ್‌ಲಾ ದಿಂಜ್‌ದ್ ಪೋಯೆರ್‌.</verse>
				<verse number="11">ಆಯೆ ಪೇತ್ರನ ಬೊಕ್ಕ ಯೋಹಾನನ ಕೈ ಪತ್ತೊಂದು ಉಂತೊಂದುಪ್ಪುನಗ ಅಚ್ಚಿರ ಪಡೆಯಿನ ಜನೊಕುಲು ಮಾತೆರ್ಲಾ ಸೊಲೊಮೋನು ಪನ್ಪಿ ಪುದರಿತ್ತಿನ ಮಂಟಪೊಗು ಗುಂಪುಗುಂಪಾದ್ ಪಾರ್ದ್ ಬತ್ತೆರ್.</verse>
				<verse number="12">ಪೇತ್ರೆ ಉಂದೆನ್ ತೂದು ಜನೊಕುಲೆಗ್, “ಇಸ್ರಾಯೇಲ್ ಜನೊಕುಲೇ ನಿಕುಲು ದಾಯೆಗ್ ನೆಕ್ಕ್ ಅಚ್ಚಿರ ಪಡೆಪರ್? ನಿಕುಲು ಎಂಕ್ಲೆನೇ ದೃಷ್ಟಿ ದೀದ್ ತೂಪಿನಿ ದಾಯೆ? ಎಂಕುಲು ಸ್ವಂತ ಬಲೊಡ್ದಾವಡ್ ದೇವಭಕ್ತಿಡ್ದಾವಡ್ ಇಂಬ್ಯನ್ ನಡಪುಲೆಕ್ಕ ಮಲ್ತ ಅಂದ್‌ದ್ ಎನ್ನಡೆ.</verse>
				<verse number="13">ನಮ ಪಿತೃಲಾಯಿ ಅಬ್ರಹಾಮು, ಇಸಾಕ್ ಯಾಕೋಬುನ ದೇವೆರ್ ತನ ಸೇವಕೆ ಆದುಪ್ಪು ಯೇಸುನು ಮೈಮೆ ಪಡೆಪಾದೆ. ನಿಕುಲು ಆಯನ್ ಅಧಿಕಾರಿಲೆಗ್ ಪತ್ತ್‌ದ್ ಕೊರಿಯರ್ ಬೊಕ್ಕ ಪಿಲಾತೆ ಆಯನ್ ಬುಡ್ಪಾವೊಡು ಅಂದ್‌ದ್ ನಿರ್ಧಾರ ಮಲ್ತಿನಪಗ ಆಯನ್ ಬೊಡ್ಚಿ ಅಂದ್‌ದ್ ತಡೆತರ್.</verse>
				<verse number="14">ಯೇಸು ಪರಿಶುದ್ಧೆಲಾ ನೀತಿವಂತೆಲಾ ಆದಿತ್ತ್‌ಂಡಲಾ ಆಯನ್ ತಿರಸ್ಕಾರ ಮಲ್ತ್‌ದ್ ಕೊಲೆಗಾರನ್ ಬುಡುಗಡೆ ಮಲ್ಪೊಡು ಅಂದ್‌ದ್ ಪಿಲಾತಡ ನಟ್ಟೊಂಡರ್.</verse>
				<verse number="15">ಜೀವದ ಅಧಿಪತಿನ್ ಕೆರ್ಪಾಯೆರ್. ಆಂಡ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ. ಈ ಸಂಗತಿಡ್ ಎಂಕುಲೇ ಸಾಕ್ಷಿಲು.</verse>
				<verse number="16">ನಿಕುಲು ತೂದು ಗುರ್ತ ಪತ್ತಿನ ಈ ನರಮಾನಿ ಗುಣ ಆವೆರೆ ಕಾರಣ ಆಯೆ ಯೇಸುನ ಪುದರ್‌ಡ್ ದೀಯಿನ ನಂಬಿಕೆನೇ; ಆ ಯೇಸುನ ಪುದರ್ ಆಯನ್ ಬಲ ಪಡೆಪಾಂಡ್, ಅಂದ್, ಆಯಡ ಉಂಡಾಯಿನ ನಂಬಿಕೆನೇ ಇಂಬ್ಯನ್ ನಿಕ್ಲೆ ಎದುರು ಪೂರ ಗುಣ ಮಲ್ತ್ಂಡ್.</verse>
				<verse number="17">“ಸಹೋದ್ರೆರೇ, ಅವು ಉಪ್ಪಡ್, ನಿಕುಲು ಆ ಕಾರ್ಯೊನು ತೆರಿಯಂದೆ ಮಲ್ತರ್ ಅಂದ್‌ದ್ ತೆರಿದೆ; ನಿಕ್ಲೆನ ಅಧಿಕಾರಿಲುಲಾ ತೆರಿಯಂದೆ ಮಲ್ತೆರ್.</verse>
				<verse number="18">ಇಂಚ ಆಪುಂಡು ಅಂದ್‌ದ್ ದೇವೆರ್ ಸುರುಟ್ಟೇ ತೆರಿಪಾದಿತ್ತೆ. ಕ್ರಿಸ್ತೆ ಶ್ರಮೆ ಅನುಭವ ಮಲ್ತ್‌ದ್ ಸೈಯೊಡು ಅಂದ್‌ದ್ ಮಾತ ಪ್ರವಾದಿಲೆ ಬಾಯಿಡ್ದ್ ದುಂಬೇ ಪನ್ಪಾದಿನ ಪಾತೆರೊಲು ಇಂಚ ನಡಪಾಯೆ.</verse>
				<verse number="19">ಅಂಚಾಯಿನೆಡ್ದ್ ದೇವೆರ್ ನಿಕ್ಲೆ ಪಾಪೊಲೆನ್ ಮಾಜಾದ್ ಬುಡ್ಪಿಲೆಕ್ಕ ನಿಕುಲು ಪಶ್ಚಾತಾಪ ಪಡೆದ್ ಆಯ ಕಡೆಕ್ಕ್ ತಿರ್ಗ್‌ಲೆ. ತಿರ್ಗಿಯರ್ಡ ದೇವೆರ್ ಕೊರ್ಪಿ ಸಮಾಧಾನದ ದಿನೊಕುಲು ಒದಗ್‌ದ್ ಬರು.</verse>
				<verse number="20">ಬೊಕ್ಕ ಆಯೆ ನಿಕ್ಲೆಗ್ ನೇಮಕ ಮಲ್ತಿ ಕ್ರಿಸ್ತೆ ಆದುಪ್ಪು ಯೇಸುನು ಕಡಪುಡ್ದು ಕೊರುವೆ.</verse>
				<verse number="21">ಆಂಡ ಮಾತೆನ್ಲಾ ಸರಿ ಮಲ್ಪು ಕಾಲ ಬರ್ಪಿ ಮುಟ್ಟ ಯೇಸು ಪರಲೋಕೊಡೇ ಉಪ್ಪೊಡು. ಆ ಕಾಲದ ಸಂಗತಿಡ್ ದೇವೆರ್ ಪೂರ್ವೊಡ್ದಿಂಚಿ ತನ ಪರಿಶುದ್ಧ ಪ್ರವಾದಿಲೆ ಬಾಯಿಡ್ದೆ ಪನ್ಪಾದೆ.</verse>
				<verse number="22">ಮೋಶೆ ಇಂಚ ಪನ್ತೆ, ‘ದೇವೆರಾದುಪ್ಪು ಕರ್ತವೆ ಎನನ್ ತಯಾರ್ ಮಲ್ತಿಲೆಕ್ಕ ನಿಕ್ಲೆನ ಸಹೋದ್ರೆರೆಡ್ ಬೊಕ್ಕೊರಿ ಪ್ರವಾದಿನ್ ನಿಕ್ಲೆಗ್ ತಯಾರ್ ಮಲ್ತ್‌ದ್ ಕೊರುವೆ. ಆಯೆ ನಿಕ್ಲೆಗ್ ಪನ್ಪಿನ ಮಾತ ಪಾತೆರೊಲೆಗ್ ಕೆಬಿ ಕೊರ್ದು ಕೇನ್ಲೆ.</verse>
				<verse number="23">ಆ ಪ್ರವಾದಿನ ಪಾತೆರ ಕೇನಂದೆ ಉಪ್ಪುನ ಪ್ರತಿ ಒರಿಲಾ ನಮ ಜನೊಕುಲೆಡ್ದ್ ದೂರ ಆದ್ ನಾಶ ಆಪೆ,’ ಪನ್ಪಿನವೇ.</verse>
				<verse number="24">ಉಂದತ್ತಂದೆ ಸಮುವೇಲೆಲಾ ಆಯಡ್ದ್ ಬೊಕ್ಕ ಬತ್ತ್‌ದ್ ಪ್ರವಾದನೆ ಮಲ್ತಿನ ಮಾತ ಪ್ರವಾದಿಲುಲಾ ಈ ದಿನೊಕುಲೆ ವಿಷಯೊಡು ತೆರಿಪಾದೆರ್.</verse>
				<verse number="25">ನಿಕುಲು ಆ ಪ್ರವಾದಿಲೆ ಶಿಷ್ಯೆರ್, ದೇವೆರ್ ನಮ ಪಿತೃಲೆ ಒಟ್ಟುಗು ಮಲ್ತ್‌ದಿ ಒಡಂಬಡಿಕೆಗ್ ಬಾಧ್ಯೆರಾದುಲ್ಲರ್. ಆಯೆ ಅಬ್ರಹಾಮುಗು, ‘ನಿನ ಸಂತಾನೊಡ್ದು ಭೂಮಿದ ಮಾತ ಕುಟುಂಬೊಲೆಗ್ ಆಶೀರ್ವಾದ ತಿಕ್ಕು,’ ಅಂದ್‌ದ್ ಆ ಒಡಂಬಡಿಕೆನ್ ಮಲ್ತ್‌ದೆ ಅತ್ತಾ?</verse>
				<verse number="26">ಸುರು ನಿಕ್ಲೆಗಾದೇ, ದೇವೆರ್ ತನ ಸೇವಕನ್ ತಯಾರ್ ಮಲ್ತ್‌ದ್ ನಿಕ್ಲೆಡ್ ಒರಿ ಒರಿಯನ್ ಅಕುಲಾಕುಲೆ ಪಡಿಕೆಂತಿ ಗುಣೊಡ್ದು ತಿರ್ಗಾದ್ ನಿಕ್ಲೆನ್ ಆಶೀರ್ವಾದ ಮಲ್ಪೊಡು ಅಂದ್‌ದ್ ಯೇಸುನು ಕಡಪುಡ್ದೆ,” ಪಂಡ್ದ್ ಪಂಡೆ.</verse>
			</chapter>
			<chapter number="4">
				<verse number="1">ಅಪೊಸ್ತಲೆರ್ ಜನೊಕುಲೆ ಒಟ್ಟುಗು ಪಾತೆರೊಂದುಪ್ಪುನಗ ಯಾಜಕೆರ್‌ಲಾ ಸದ್ದುಕಾಯೆರ್‌ಲಾ ದೇವಾಲಯ ಕಾಪುನ ಸಿಪಾಯಿಲೆನ ಮುಖ್ಯಸ್ಥೆಲಾ ಅವುಲು ಬತ್ತೆರ್.</verse>
				<verse number="2">ಸೈತಿನಾಕುಲು ಜೀವೊಡು ಲಕ್ಕುವೆರ್ ಇನ್ಪಿನೆನ್ ಯೇಸುನ ದೃಷ್ಟಾಂತೊಡ್ದು ಇರ್ವೆರ್ ಅಪೊಸ್ತಲೆರ್ ಜನೊಕುಲೆ ನಡುಟು ಸಾರಿಯೊಂದುಪ್ಪುನೆನ್ ತೂದು ಅಕ್ಲೆಗ್ ಗರ್ವ ಬತ್ತ್ಂಡ್.</verse>
				<verse number="3">ಅಪಗ ಬೈಯ ಆದುಪ್ಪುನೆಡ್ದಾವರ ಅಕುಲು ಅಕ್ಲೆನ್ ಪತ್ತ್‌ದ್ ಮನದಾನಿ ಮುಟ್ಟ ಪಾರೊಡು ದೀಯೆರ್.</verse>
				<verse number="4">ಆಂಡ ಪೇತ್ರೆ ಬೊಕ್ಕ ಯೋಹಾನನ ಬೋಧನೆನ್ ಕೇಂಡ್ದ್ ಮಸ್ತ್ ಜನ ನಂಬಿಯೆರ್. ಅಂಜೊವುಲೆ ಸುಮಾರ್ ಐನ್ ಸಾರ ಮುಟ್ಟ ಇತ್ತೆರ್.</verse>
				<verse number="5">ಮನದಾನಿ ಯೆಹೂದ್ಯೆರೆನ ಅಧಿಕಾರಿಲು, ಹಿರಿಯೆರ್‌ಲು, ಶಾಸ್ತ್ರಿಲು ಯೆರೂಸಲೇಮುಡು ಸೇರ್ದ್ ಬತ್ತೆರ್.</verse>
				<verse number="6">ಅಕ್ಲೆ ಒಟ್ಟುಗು ಪ್ರಧಾನಯಾಜಕೆ ಆಯಿ ಅನ್ನ, ಕಾಯಫೆ, ಯೋಹಾನೆ, ಅಲೆಕ್ಸಾಂದ್ರೆ, ಪ್ರಧಾನಯಾಜಕ ಸಂತಾನದಾಕುಲು ಮಾತೆರ್ಲಾ ಇತ್ತೆರ್.</verse>
				<verse number="7">ಅಕುಲು ಪೇತ್ರೆ ಬೊಕ್ಕ ಯೋಹಾನನ್ ನಡುಟು ಉಂತಾದ್, “ನಿಕುಲು ಆ ಕುಂಟನ್ ವಾ ಬಲೊಟು ಇಜ್ಜಾಂಡ ವಾ ಪುದರ್‌ಡ್ ಉಂದೆನ್ ಮಲ್ತರ್,” ಅಂದ್‌ದ್ ಕೇಂಡೆರ್.</verse>
				<verse number="8">ಅಪಗ ಪೇತ್ರೆ ಪರಿಶುದ್ಧಾತ್ಮೊಡ್ದು ದಿಂಜಿದ್ ಅಕ್ಲೆಗ್, “ಜನೊಕುಲೆ ಅಧಿಕಾರಿಲೇ, ಹಿರಿಯಾಕುಲೇ,</verse>
				<verse number="9">ಒರಿ ಕುಂಟಗ್ ಆಯಿ ಉಪಕಾರೊಗಾದ್ ಆಯಗ್ ಒಯಿಡ್ದ್ ಗುಣ ಆಂಡ್ ಅಂದ್‌ದ್ ನಿಕುಲು ಎಂಕ್ಲೆಡ ಇನಿ ಕೇನುನಾಂಡ,</verse>
				<verse number="10">ನಿಕ್ಲೆಗ್ ಮಾತೆರೆಗ್ಲಾ ಇಸ್ರಾಯೇಲ್ ಜನೊಕುಲೆಗ್ಲಾ ತೆರಿಯೊಡು ಅಂದ್‌ದ್ ಎನ ಆಸೆ. ನಿಕುಲು ಕ್ರುಸ್ಸುಗ್ ಪತ್ತಾಯಿ ಬೊಕ್ಕ ದೇವೆರ್ ಸೈತಿನಾಕುಲೆಡ್ದ್ ಲಕ್ಕಾಯಿನ ನಜರೇತ್‌ದ ಯೇಸು ಕ್ರಿಸ್ತ ಪುದರ್‌ಡೇ ಈ ನರಮಾನಿ ಗುಣ ಆದ್ ನಿಕ್ಲೆ ಎದುರುಡು ಉಂತುದೆ.</verse>
				<verse number="11">‘ಇಲ್ಲ್ ಕಟ್ಟ್‌ನಾಕುಲಾದುಪ್ಪು ನಿಕುಲು ಬೊಡ್ಚಿಂದ್‌ದ್ ಬುಡ್ತಿನ ಕಲ್ಲ್ ಆಯೆನೇ, ಆಯೆನೇ ಮೂಲೆದ ತರೆಕಲ್ಲಾಯೆ.’</verse>
				<verse number="12">ಬರೊಡಾಯಿ ರಕ್ಷಣೆ ಏರೆಡ್ದ್‌ಲಾ ತಿಕ್ಕುಜಿ; ಆ ಪುದರ್‌ಡೇ ಅತ್ತಂದೆ ಬಾನದ ತಿರ್ತ್ ಕೊರ್ತಿನ ಬೇತೆ ವಾ ಪುದರ್‌ಡ್ಲಾ ನಂಕ್ ರಕ್ಷಣೆ ಆಪುಜಿ ಅಂದ್‌ದ್ ಪಂಡೆ.”</verse>
				<verse number="13">ಪೇತ್ರೆ ಬೊಕ್ಕ ಯೋಹಾನೆ ಧೈರ್ಯೊಡು ಪಾತೆರುನೆನ್ ತೂದು ಅಕುಲು ವಿದ್ಯೆ ಇಜ್ಜಂದಿನ ಸದಾರಣದಾಕುಲು ಅಂದ್‌ದ್ ತೆರಿದ್ ಅಚ್ಚಿರ ಆಯೆರ್. ಮೊಕುಲು ಯೇಸುನ ಒಟ್ಟುಗು ಇತ್ತಿನಾಕುಲು ಅಂದ್‌ದ್ ಗುರ್ತ ಪತ್ತಿಯೆರ್.</verse>
				<verse number="14">ಬೊಕ್ಕ ಗುಣ ಆತಿನಾಯೆ ಅಕ್ಲೆ ಒಟ್ಟುಗು ಉಂತುದುಪ್ಪುನೆನ್ ತೂದು ಎದುರು ಪಾತೆರಂದೆ ಇತ್ತೆರ್.</verse>
				<verse number="15">ಐಡ್ದ್ ಬೊಕ್ಕ ಸಭೆಡ್ದ್ ಒಂತೆ ಪಿದಯಿ ಪೋಲೆ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಕೊರ್ದು,</verse>
				<verse number="16">“ಮೊಕ್ಲೆನ್ ನಮ ದಾನೆ ಮಲ್ಪುಗ? ಮೊಕುಲು ಈತ್ ಮಲ್ಲ ಕಾರ್ನಿಕೊನು ಮಲ್ತಿನೆಡ್ದ್ ಯೆರೂಸಲೇಮುಡು ಮಾತೆರೆಗ್ಲಾ ಗೊತ್ತಾತ್ತ್ಂಡ್, ಅವು ಆತಿಜಿ ಅಂದ್‌ದ್ ಪನಿಯೆರೆ ಆಪುಜಿ.</verse>
				<verse number="17">ಆಂಡ ಈ ಪುದರ್ ಜನೊಕುಲೆ ಉಲಯಿ ನನಲಾ ಪರಡಂದಿಲೆಕ್ಕ ದುಂಬಗ್ ಆ ಯೇಸುನ ಪುದರ್‌ನ್ ದೆರ್ತ್ತ್‌ದ್ ನನ ಮಿತ್ತ್ ಏರೆ ಒಟ್ಟುಗುಲಾ ಪಾತೆರಿಯೆರೆ ಬಲ್ಲಿ ಅಂದ್‌ದ್ ಅಕ್ಲೆನ್ ಪೋಡಿಯಾಗ,” ಪಂಡ್ದ್ ಪಂಡೆರ್.</verse>
				<verse number="18">ಅಕ್ಲೆನ್ ಕುಡ ಉಲಯಿ ಲೆತ್ತ್‌ದ್, ಯೇಸುನ ಪುದರ್‌ಡ್ ದಾಲಾ ಪನಿಯೆರೆ ಬಲ್ಲಿ, ಬೋಧನೆಲಾ ಮಲ್ಪೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಕೊರಿಯೆರ್.</verse>
				<verse number="19">ಐಕ್ ಪೇತ್ರೆ ಬೊಕ್ಕ ಯೋಹಾನೆ ಅಕ್ಲೆಗ್, “ಎಂಕುಲು ನಿಕ್ಲೆನ ಪಾತೆರೊನು ಕೇನೊಡಾ ಇಜ್ಜಿಂಡ ದೇವೆರೆ ಪಾತೆರೊನು ಕೇನೊಡಾ? ನೆಟ್ಟ್ ಒವು ದೇವೆರೆಗ್ ಸರಿ ಆದುಂಡು ಅಂದ್‌ದ್ ನಿಕುಲೇ ತೀರ್ಪು ಮಲ್ತೊನ್ಲೆ.</verse>
				<verse number="20">ಎಂಕುಲು ಎಂಚಲಾ ಮನಿಪಂದೆ ಕುಲ್ಲಯ. ಎಂಕುಲು ತೂಯಿನ ಬೊಕ್ಕ ಕೇಂಡಿನ ಸಂಗತಿಲೆನ್ ಪನೊಡೇ ಆಪುಂಡು,” ಅಂದ್‌ದ್ ಉತ್ತರ ಕೊರಿಯೆರ್.</verse>
				<verse number="21">ನಡತಿನ ಕಾರ್ಯೊಗಾದ್ ಜನೊಕುಲು ದೇವೆರೆನ್ ಪುಗರೊಂದು ಇತ್ತಿನೆಡ್ದ್ ಅಪೊಸ್ತಲೆರೆಗ್ ನಿಂದನೆ ಮಲ್ಪೆರೆ ಆವಂದೆ ಅಕ್ಲೆನ್ ಪೋಡಿಗಟ್ಟಾದ್ ಬುಡ್ದು ಬುಡಿಯೆರ್.</verse>
				<verse number="22">ಈ ಮಲ್ಲ ಕಾರ್ನಿಕೊಡ್ದು ಗುಣ ಆಯಿನ ನರಮಾನಿಗ್ ನಲ್ಪ ವರ್ಸೊಡ್ದು ಹೆಚ್ಚ್ ಪ್ರಾಯ ಆದಿತ್ತ್ಂಡ್.</verse>
				<verse number="23">ಅಕ್ಲೆನ್ ಬುಡಿ ಬೊಕ್ಕ ಅಕುಲು ತನ್ಕುಲೆ ಜನೊಕುಲೆ ಕೈತಲ್‌ಗ್ ಬತ್ತ್‌ದ್ ಪ್ರಧಾನಯಾಜಕೆರ್‌ಲಾ ಹಿರಿಯೆರ್‌ಲಾ ಪನ್ತಿನ ಪ್ರತಿ ಒಂಜಿ ಪಾತೆರೊಲೆನ್ ತೆರಿಪಾಯೆರ್.</verse>
				<verse number="24">ಅಕುಲು ಕೇಂಡ್ದ್ ಒಂಜೇ ಮನಸಾದ್ ಮಲ್ಲ ಸ್ವರೊಟ್ಟು ದೇವೆರೆಡ ಇಂಚ ನಟ್ಟೊಂಡೆರ್, “ಸರ್ವತ್ರಾಣಿ ಕರ್ತವಾ, ಬಾನೊನು, ಭೂಮಿನ್ ಕಡಲ್‌ನ್ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತಿನಾಯೆನೇ,</verse>
				<verse number="25">ನಮ ಪಿತೃ ಆದಿತ್ತಿನ ದಾವೀದೆ ನಿನ ಸೇವಕೆ ಪರಿಶುದ್ಧಾತ್ಮೊಡ್ದು ಈ ಪಾತೆರೊಲೆನ್ ಬರೆತೆ. ‘ಪಿದಯಿದ ಜನೊಕುಲು ದಾಯೆಗ್ ಬೊಬ್ಬೆ ಪಾಡುನು? ಈ ದೇಶದ ಜನೊಕುಲು ದಾಯೆಗ್ ವ್ಯರ್ಥಕಾರ್ಯೊಲೆನ್ ಆಲೋಚನೆ ಮಲ್ಪುವೆರ್?</verse>
				<verse number="26">ಕರ್ತವಗ್ಲಾ ಆಯ ಅಭಿಷೇಕ ಮಲ್ತಿನ ಕ್ರಿಸ್ತಗ್ಲಾ ವಿರೋಧಾದ್ ಭೂಮಿದ ಅರಸುಲು ಲಕ್ಕ್‌ದ್ ಉಂತಿಯೆರ್ ಅಧಿಕಾರಿಲು ಒಟ್ಟುಗು ಕೂಡೊಂಡೆರ್.’</verse>
				<verse number="27">ಆ ಪಾತೆರೊಗು ಸರಿಯಾದ್ ಹೆರೋದ ರಾಜೆಲಾ ಪೊಂತ್ಯ ಪಿಲಾತೆಲಾ ಪಿದಯಿದ ಜನೊಕುಲುಲಾ ಇಸ್ರಾಯೇಲ್ ಜನೊಕುಲುಲಾ ಒಟ್ಟಾದ್ ಸೇರ್ದ್ ಈ ಅಭಿಷೇಕ ಮಲ್ತ್‌ದಿನ ನಿನ ಪರಿಶುದ್ಧ ಸೇವಕೆ ಆಯಿ ಯೇಸುನು ವಿರೋಧ ಮಲ್ತಿನಪಗ ಈ ಸಂಗತಿಲು ನಿಜವಾದ್‌ಲಾ ಆದಿತ್ತ್ಂಡ್.</verse>
				<verse number="28">ನಿನ ಕೈಲಾ ನಿನ ಆಲೋಚನೆಲಾ ದುಂಬು ನೇಮಕ ಮಲ್ತ್‌ದಿನೆನೇ ನಡಪುಡಿಯೆರ್.</verse>
				<verse number="29">ಕರ್ತವಾ ಇತ್ತೆ ಈ ಅಕ್ಲೆನ ಪೋಡಿಯಾಟಿಕೆನ್ ತೂದು ನಿನ ಪರಿಶುದ್ಧ ಸೇವಕೆ ಆದುಪ್ಪು ಯೇಸುನ ಪುದರ್‌ಡ್ ಸೀಕ್‌ಲೆ ಪರಿಹಾರೊನ್ಲಾ ಗುರ್ತೊನ್ಲಾ ಕಾರ್ನಿಕೊಲೆನ್ಲಾ ಉಂಡಾಪಿಲೆಕ್ಕ ನಿನ ಕೈ ನೀಡಿನಲ್ಪ ನಿನ ದಾಸೆರ್ ನಿನ ಪಾತೆರೊಲೆನ್ ಧೈರ್ಯೊಡು ಪನ್ಪಿಲೆಕ್ಕ ಮಲ್ಪುಲ,” ಅಂದ್‌ದ್ ಪಂಡೆರ್.</verse>
				<verse number="30"></verse>
				<verse number="31">ಇಂಚ ಪ್ರಾರ್ಥನೆ ಮಲ್ತಿ ಬೊಕ್ಕ ಅಕುಲು ಸೇರ್ದಿತ್ತಿನ ಜಾಗ್ ಅದ್‌ರ್ಂಡ್, ಅಕುಲು ಮಾತೆರ್ಲಾ ಪರಿಶುದ್ಧಾತ್ಮೊಡು ದಿಂಜಿದ್ ದೇವೆರೆ ಪಾತೆರೊನು ಧೈರ್ಯೊಡು ಪನ್ಪಿನಾಕುಲಾಯೆರ್.</verse>
				<verse number="32">ನಂಬುನಾಕುಲೆ ಮಾತೆರೆ ಉಡಲ್‌ಲಾ ಪ್ರಾಣಲಾ ಒಂಜೇ ಆದಿತ್ತ್ಂಡ್. ಒರಿ ಆಂಡಲಾ ಅಕ್ಲೆಡಿತ್ತಿನ ಆಸ್ತಿಡ್ ಒಂಜೆನಾಂಡಲಾ ತನ್ಕುಲೆನ ಅಂದ್‌ದ್ ಪನಂದೆ ಮಾತೆರ್ಲಾ ಅವೆನ್ ಪಟ್ಟೊಂದಿತ್ತೆರ್.</verse>
				<verse number="33">ಬೊಕ್ಕ ಕರ್ತವೆ ಆದುಪ್ಪು ಯೇಸು ಸೈತ್‌ದ್ ಜೀವಾದ್ ಲಕ್ಕ್‌ದ್ ಬೈದೆ ಅಂದ್‌ದ್ ಅಪೊಸ್ತಲೆರ್ ಬಲವಾದ್ ಸಾಕ್ಷಿ ಪನೊಂದಿತ್ತೆರ್. ದೇವೆರೆ ದಯ ಅಕ್ಲೆ ಮಾತರೆ ಮಿತ್ತ್ ಇತ್ತ್ಂಡ್.</verse>
				<verse number="34">ಅಕ್ಲೆ ಒಟ್ಟುಗು ಕೊರತೆ ಇತ್ತಿನಾಯೆ ಒರಿಲಾ ಇಜ್ಜಾಂಡ್. ದಾಯೆಗಂದ್ಂಡ ಕಂಡೊಲು ಬೊಕ್ಕ ಇಲ್ಲುಲು ಇತ್ತಿನಾಕುಲು ಮಾತೆರ್ ಅವೆನ್ ಮಾರ್ದ್</verse>
				<verse number="35">ಬತ್ತಿ ಕಾಸ್‌ನ್ ಕನತ್‌ದ್ ಅಪೊಸ್ತಲೆರೆನ ಕಾರ್‌ದ ಮುದೆಲ್‌ಡ್ ದೀವೊಂದಿತ್ತೆರ್. ಅವೆನ್ ಪ್ರತಿ ಒರಿಯಗ್ ಆಯಾಯನ ಅಗತ್ಯೊಗು ತಕ್ಕ ಪಟ್ಟ್‌ದ್ ಕೊರೊಂದಿತ್ತೆರ್.</verse>
				<verse number="36">ಇಂಚೆನೇ ನಂಬುನಾಕುಲೆಡ್ ಕುಪ್ರದ್ವೀಪೊಡು ಪುಟ್ಟಿ ಯೋಸೇಫು ಇನ್ಪಿ ಒರಿ ಲೇವಿ ಇತ್ತೆ, ಅಪೊಸ್ತಲೆರ್ ಆಯನ್ ಬಾರ್ನಬೆ ಅಂದ್ಂಡ ಸಂತೈಸಿಕೆದ ಮಗೆ ಇನ್ಪಿ ಮೇಲ್‌ಪುದರ್ ಪಾಡಿಯೆರ್.</verse>
				<verse number="37">ಆಯೆ ತನ್ಕ್ ಇತ್ತಿ ಜಾಗ್‌ನ್ ಮಾರ್ದ್ ಬತ್ತಿನ ಕಾಸ್‌ನ್ ದುಕನತ್‌ದ್ ಅಪೊಸ್ತಲೆರೆನ ಕಾರ್‌ದಲ್ಪ ದೀಯೆ.</verse>
			</chapter>
			<chapter number="5">
				<verse number="1">ಅನನೀಯೆ ಪನ್ಪಿನಾಯೆ ಒರಿ ನರಮಾನಿ ತನ ಬೊಡೆದಿ ಸಪ್ಫೈರನ ಒಪ್ಪಿಗೆಡ್ದ್ ಒಂಜಿ ಜಾಗ್‌ನ್ ಮಾರಿಯೆ.</verse>
				<verse number="2">ಆಂಡ ಮಾರ್ದ್ ಬತ್ತಿನ ಕಾಸ್‌ಡ್ದ್ ಒಂತೆ ಪಾಲ್‌ನ್ ಮಾತ್ರ ಅಪೊಸ್ತಲೆರೆನ ಕಾರ ಮುದೆಲ್‌ಡ್ ದೀಯೆ. ಒಂತೆ ಕಾಸ್‌ನ್ ಗುಟ್ಟುಡು ದೀಯೆ. ಆಯನ ಬೊಡೆದಿಗ್ಲಾ ಗೊತ್ತಿತ್ತ್ಂಡ್.</verse>
				<verse number="3">ಅಪಗ ಪೇತ್ರೆ, “ಅನನೀಯಾ, ಈ ಆ ಕಂಡದ ಕ್ರಯೊಡ್ದು ಒಂಜಿ ಪಾಲ್ ಗುಟ್ಟುಡು ದೀದ್ ಪರಿಶುದ್ಧಾತ್ಮನ್ ಮೋಸ ಮಲ್ಪುಲೆಕ್ಕ ಸೈತಾನನ್ ನಿನ ಉಡಲ್‌ಡ್ ದಾಯೆಗ್ ದಿಂಜಾದ.</verse>
				<verse number="4">ಆ ಆಸ್ತಿ ಮಾರುನೆಡ್ದ್ ದುಂಬು ನಿನ್ನವು ಆದಿತ್ತ್ಂಡ್‌ತ್ತಾ, ಮಾರ್ದ್ ಬತ್ತಿನ ಕಾಸ್‌ಲಾ ನಿನಡನೇ ಇತ್ತ್ಂಡತ್ತಾ? ಈ ಬೊಡ್ಚಾಂದಿನ ಕಾರ್ಯೊನು ನಿನ ಉಡಲ್‌ಡ್ ದಾಯೆಗ್ ಮಲ್ತೊಂಡ? ಈ ಸುಳ್ಳು ಪಂಡಿನಿ ನರಮಾನಿಲೆಗ್ ಅತ್ತ್ ದೇವೆರೆಗ್.” ಅಂದ್‌ದ್ ಪಂಡೆ.</verse>
				<verse number="5">ಈ ಪಾತೆರೊನು ಅನನೀಯೆ ಕೇಂಡಿನಪಗನೇ ಬೂರ್ದು ಪ್ರಾಣ ಬುಡಿಯೆ. ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರಿ ಪೋಡಿಗೆ ಪತ್ತ್ಂಡ್.</verse>
				<verse number="6">ಅಪಗ ಜವನ್ಯೆರ್ ಲಕ್ಕ್‌ದ್ ಆಯನ್ ಕುಂಟುಡು ಸುತ್ತುದು ಪಿದಯಿ ಪೋದು ಕೌಂತೆರ್.</verse>
				<verse number="7">ಸುಮಾರ್ ಮೂಜಿ ಗಂಟೆ ಆಯಿ ಬೊಕ್ಕ ಆಯನ ಬೊಡೆದಿಗ್ ನಡತಿನ ಸಂಗತಿ ತೆರಿಯಂದೆ ಉಲಯಿ ಬತ್ತಲ್.</verse>
				<verse number="8">ಪೇತ್ರೆ ಆಲೆನ್ ತೂದು, “ನಿಕುಲು ಆ ಜಾಗ್‌ನ್ ಮಾರ್ದಿನಿ ಈತೇ ಕಾಸ್‌ಗಾ,” ಅಂದ್‌ದ್ ಕೇನ್ನಗ ಆಲ್, “ಅಂದ್, ಈತೆಕ್ಕೇ,” ಅಂದ್‌ದ್ ಪಂಡಲ್.</verse>
				<verse number="9">ಅಪಗ ಪೇತ್ರೆ ಆಲೆಗ್, ನಿಕುಲು ಇರ್ವೆರ್‌ಲಾ ಕರ್ತವನ ಆತ್ಮೊನು ಪರೀಕ್ಷೆ ಮಲ್ಪೆರೆ ದಾಯೆಗ್ ಮನಸ್ ಮಲ್ತೊಂಡರ್? ತೂಲ, ನಿನ ಕಂಡನಿನ್ ಕೌಂತುದಿನಾಕುಲು ಬತ್ತ್‌ದ್ ಬಾಕಿಲ್‌ಡ್ ಕಾರ್ ದೀತೆರ್, ನಿನನ್ಲಾ ತುಂಬೊಂದು ಪೋಪೆರ್ ಅಂದ್‌ದ್ ಪಂಡೆ.</verse>
				<verse number="10">ಅಪಗನೆ ಆಲ್ ಆಯನ ಕಾರ್‌ದ ಕೈತಲ್‌ ಬೂರ್ದು ಪ್ರಾಣ ಬುಡಿಯಲ್. ಆ ಜವನ್ಯೆರ್ ಉಲಯಿ ಬತ್ತ್‌ದ್ ಆಲ್ ಸೈತ್‌ದುಪ್ಪುನೆನ್ ತೂದು, ಆಲೆನ್ ತುಂಬೊಂದು ಪೋದು ಕಂಡನಿನ ಬರಿಟ್ಟೇ ಕೌಂತೆರ್.</verse>
				<verse number="11">ಇಡೀ ಸಭೆಕ್ಲಾ ಉಂದೆನ್ ಕೇಂಡಿನಾಕುಲೆಗ್ ಮಾತೆರೆಗ್ಲಾ ಬಾರೀ ಪೋಡಿಗೆ ಪುಟ್ಟುಂಡು.</verse>
				<verse number="12">ಉಂದತ್ತಂದೆ ಅಪೊಸ್ತಲೆರೆ ಕೈಡ್ದ್ ಮಸ್ತ್ ಗುರ್ತೊಲು ಕಾರ್ನಿಕೊಲು ಜನೊಕುಲೆ ಮದ್ಯೊಡು ಆವೊಂದಿತ್ತ್ಂಡ್ ಬೊಕ್ಕ ಮಾತೆರ್ಲಾ ಒಗ್ಗಟ್ಟಾದ್ ಸೊಲೊಮೋನನ ಮಂಟಪೊಡು ಕೂಡೊಂದಿತ್ತೆರ್.</verse>
				<verse number="13">ಬಾಕಿದ ಜನೊಕುಲೆಡ್ ಒರಿಯಗ್ಲಾ ಅಕ್ಲೆ ಒಟ್ಟುಗು ಕೂಡೊನಿಯೆರೆ ಧೈರ್ಯ ಇತ್ತ್‌ಜಿ. ಆಂಡಲಾ ಜನೊಕುಲು ಅಕ್ಲೆನ್ ಬಾರೀ ಪುಗರೊಂದಿತ್ತೆರ್.</verse>
				<verse number="14">ಆಂಡ ನನಲಾ ಏತೋ ಜನ ಅಂಜೊವುಲುಲಾ ಪೊಂಜೊವುಲುಲಾ ಕರ್ತವಡ್ ನಂಬಿಕೆ ದೀಪಿನಾಕುಲಾದ್ ಸಭೆಕ್ ಸೇರೊಂದಿತ್ತೆರ್.</verse>
				<verse number="15">ಇಂಚಾದುಪ್ಪುನಗ ಜನೊಕುಲು ಸೀಕ್‌ದಾಕುಲೆನ್ ಜೋಳಿಗೆಡ್ಲಾ ಪಜೆಟ್ಲಾ ದೀದ್ ಪೇತ್ರೆ ಮಾರ್ಗೊಡು ಪೋವೊಂದುಪ್ಪುನಗ ಆಯನ ನಿರೆಲಾಂಡಲಾ ಅಕ್ಲೆನ ಮಿತ್ತ್ ಬೂರಡ್ ಅಂದ್‌ದ್ ಅಕ್ಲೆನ್ ಮಾರ್ಗದ ಬರಿಕ್ಕ್ ಲೆತ್ತೊಂದು ಬರೊಂದಿತ್ತೆರ್.</verse>
				<verse number="16">ಯೆರೂಸಲೇಮುದ ಸುತ್ತ ಉಪ್ಪುನ ಊರುದ ಜನೊಕುಲು ಸೀಕ್‌ದಾಕುಲೆನ್ಲಾ ದೆವ್ವೊಲೆ ಉಪದ್ರ ಇತ್ತಿನಾಕುಲೆನ್ಲಾ ದೆರ್ತೊಂದು ಗುಂಪುಗುಂಪಾದ್ ಬರೊಂದಿತ್ತೆರ್, ಮಾತೆರ್ಲಾ ಗುಣ ಆವೊಂದಿತ್ತೆರ್.</verse>
				<verse number="17">ಆಂಡ ಪ್ರಧಾನಯಾಜಕೆಲಾ ಆಯ ಒಟ್ಟುಗು ಇತ್ತಿ ಸದ್ದುಕಾಯೆರ್ ಮತಾಭಿಮಾನಿಲು ಮಾತೆರ್ಲಾ ಲಕ್ಕ್‌ದ್ ನಂಜಿಡ್ ದಿಂಜಿದ್</verse>
				<verse number="18">ಅಪೊಸ್ತಲೆರೆನ್ ಪತ್ತ್‌ದ್ ಊರುದ ಸೆರೆಮನೆಟ್ ಪಾಡಿಯೆರ್.</verse>
				<verse number="19">ಆಂಡ ಕರ್ತವನ ದೂತೆ ರಾತ್ರೆಡ್ ಸೆರೆಮನೆತ ಬಾಕಿಲ್‌ನ್ ಜತ್ತ್‌ದ್ ಅಕ್ಲೆನ್ ಪಿದಯಿ ಕನತ್‌ದ್, “ನಿಕುಲು ದೇವಾಲಯೊಡು ಉಂತುದು ಈ ಪೊಸ ಜೀವನದ ಮಾತ ವಿಷಯೊನು ಜನೊಕುಲೆಗ್ ಪೋದು ಪನ್ಲೆ.” ಅಂದ್‌ದ್ ಪಂಡೆ.</verse>
				<verse number="20"></verse>
				<verse number="21">ಅಕುಲು ಈ ಅಪ್ಪಣೆನ್ ಕೇಂಡ್ದ್ ಬೊಲ್ಪು ಆವೊಡ್ಡನೇ ದೇವಾಲಯೊಗು ಪೋದು ಬೋಧನೆ ಕೊರಿಯೆರ್. ಇಂಚಿಡ್ದ್ ಪ್ರಧಾನಯಾಜಕೆಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಬತ್ತ್‌ದ್ ಹಿರಿಸಭೆಟುಪ್ಪುನ ಮಾತ ಇಸ್ರಾಯೇಲ್ಯೆರೆ ಮಖ್ಯಸ್ಥೆರೆನ್‌ ಕೂಡಾದ್ ಅಪೊಸ್ತಲೆರೆನ್ ಲೆತ್ತೊಂದು ಬರಿಯೆರೆ ಸೆರೆಮನೆಗ್ ಕಡಪುಡಿಯೆರ್.</verse>
				<verse number="22">ಈ ಅಧಿಪತಿಲು ಸೆರೆಮನೆಗ್ ಬತ್ತ್‌ದ್ ತೂನಗ ಅಪೊಸ್ತಲೆರ್ ಇಜ್ಜಾಂದಿನೆನ್ ತೂದು, ಪಿರ ಬತ್ತ್‌ದ್ ಹಿರಿಸಭೆತ್ತ ನಾಯಕೆರೆಗ್ ತೆರಿಪಾಯೆರ್.</verse>
				<verse number="23">ಸೆರೆಮನೆತ ಬಾಕಿಲ್ ಬದ್ರೊಡು ಮುಚ್ಚಿದಿತ್ತ್‌ಂಡ್, ಬಾಕಿಲ್‌ಗ್ ಬೀಗ ಪಾಡ್ದ್‌ಲಾ ಇತ್ತ್ಂಡ್. ಜೈಲ್ ಕಾಪುನಾಕುಲು ಬಾಕಿಲ್‌ದ ಕೈತಲೇ ಉಂತುದಿನೆನ್ಲಾ ತೂಯ. ಆಂಡ ಬಾಕಿಲ್ ಜತ್ತ್‌ದ್ ತೂನಗ ಉಲಯಿ ಒರಿಲಾ ತೋಜಿಜೆರ್ ಅಂದ್‌ದ್ ಪಂಡೆರ್.</verse>
				<verse number="24">ದೇವಾಲಯದ ಅಧಿಪತಿಲಾ ಪ್ರಧಾನಯಾಜಕೆರ್‌ಲಾ ಈ ಪಾತೆರೊಲೆನ್ ಕೇಂಡ್ದ್ ಗಲಿಬಿಲಿ ಆದ್ ಉಂದೆಡ್ದ್ ನನ ದಾನೆ ಆಪುಂಡಾ ಅಂದ್‌ದ್ ಪೋಡಿಯೆರ್.</verse>
				<verse number="25">ಅಪಗ ಒರಿ ಬತ್ತ್‌ದ್, “ತೂಲೆ, ನಿಕುಲು ಸೆರೆಮನೆಟ್ ದೀತಿನ ಆ ಜನೊಕುಲು ದೇವಾಲಯೊಡು ಉಂತುದು ಜನೊಕುಲೆಗ್ ಬೋಧನೆ ಮಲ್ತೊಂದುಲ್ಲೆರ್,” ಅಂದ್‌ದ್ ಅಕ್ಲೆಗ್ ತೆರಿಪಾಯೆ.</verse>
				<verse number="26">ಅಪಗ ಮುಖ್ಯಸ್ಥೆ ಅಧಿಪತಿ ಒಟ್ಟುಗು ಪೋದು ಅಪೊಸ್ತಲೆರೆನ್ ಲೆತ್ತೊಂದು ಬತ್ತೆ. ಆಂಡ ತನ್ಕುಲೆಗ್ ಜನೊಕುಲು ಕಲ್ಲ್ ದಕ್ಕೆರ್ ಅಂದ್‌ದ್ ಪೋಡಿದ್ ಬಲಾತ್ಕಾರ ಮಲ್ತ್‌ಜೆರ್.</verse>
				<verse number="27">ಅಕ್ಲೆನ್ ಲೆತ್ತೊಂದು ಬತ್ತ್‌ದ್ ಹಿರಿಸಭೆತ ದುಂಬು ಉಂತಾಯೆರ್. ಪ್ರಧಾನಯಾಜಕೆ ಅಪೊಸ್ತಲೆರೆಗ್ ಪನ್ಪೆ</verse>
				<verse number="28">ನಿಕುಲು ಈ ಪುದರ್‌ಡ್ ಬೋಧನೆ ಕೊರಿಯೆರೆ ಬಲ್ಲಿ ಅಂದ್‌ದ್ ಎಂಕುಲು ನಿಕ್ಲೆಗ್ ಅಪ್ಪಣೆ ಕೊರ್ತ ಅತ್ತಾ ಆಂಡಲಾ ನಿಕುಲು ಯೆರೂಸಲೇಮುನು ನಿಕ್ಲೆನ ಬೋಧನೆಡ್ದ್ ದಿಂಜಾಯರ್, ಬೊಕ್ಕ ಆ ನರಮಾನಿನ ನೆತ್ತೆರ್‌‌ಗ್ ಎಂಕುಲೇ ಜವಾಬ್ದಾರೆರ್ ಅಂದ್‌ದ್ ನಿಕುಲು ಪನೊಂದುಲ್ಲರ್ ಅಂದ್‌ದ್ ಪಂಡಿನೆಕ್ಕ್,</verse>
				<verse number="29">ಪೇತ್ರೆಲಾ ಬಾಕಿದ ಅಪೊಸ್ತಲೆರ್‌ಲಾ, “ಎಂಕುಲು ನರಮಾನಿಲೆಡ್ದ್ ಹೆಚ್ಚ್ ದೇವೆರೆಗ್ ಒಳಗಾದುಪ್ಪೊಡು.</verse>
				<verse number="30">ನಿಕುಲು ಮರತ ಕಂಬೊಗು ನೇಲಾದ್ ಕೆರ್ತಿನ ಯೇಸುನು ಎಂಕ್ಲೆ ಪಿತೃಲೆನ ದೇವೆರ್ ಲಕ್ಕಾಯೆ.</verse>
				<verse number="31">ಇಸ್ರಾಯೇಲ್ಯೆರೆಗ್ ಪಶ್ಚಾತಾಪೊನ್ಲಾ ಪಾಪ ಪರಿಹಾರೊನ್ಲಾ ಕೊರಿಯೆರೆ ಬೋಡಾದ್ ದೇವೆರೆ ತನ್ನ ಬಲತ್ತ ಕೈಡ್ದ್ ಮಿತ್ತ್‌ದ ಸ್ಥಾನೊಗು ಏರಾದ್ ಆಯನ್ ನಾಯಕೆಲಾ, ರಕ್ಷಕೆಲಾ ಮಲ್ತೆ.</verse>
				<verse number="32">ಈ ಕಾರ್ಯೊಲೆಗ್ ಎಂಕುಲು ಸಾಕ್ಷಿಲು; ದೇವೆರ್ ತನ್ಕ್ ಒಳಗಾದುಪ್ಪುನಾಕುಲೆಗ್ ಕೊರಿ ಪರಿಶುದ್ಧಾತ್ಮೆಲಾ ಸಾಕ್ಷಿ ಆದುಲ್ಲೆ,” ಅಂದ್‌ದ್ ಪಂಡೆರ್.</verse>
				<verse number="33">ಯೆಹೂದ್ಯ ನಾಯಕೆರ್ ಉಂದೆನ್ ಕೇಂಡ್ದ್ ಭಯಂಕರ ಕೋಪೊಡು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್;</verse>
				<verse number="34">ಆಂಡ ಮಾತ ಜನೊಕುಲೆಡ್ ಮಾನ ಪಡೆತಿನ ನ್ಯಾಯಶಾಸ್ತ್ರಿಯಾಯಿನ ಗಮಲಿಯೇಲ್ ಪನ್ಪಿನ ಒರಿ ಪರಿಸಾಯೆ ಹಿರಿಸಭೆಟ್ಟ್ ಲಕ್ಕ್‌ದ್ ಈ ನರಮಾನಿಲೆನ್ ಒಂತೆ ಪೊರ್ತು ಪಿದಯಿ ಕಡಪುಡೊಡು ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="35">ಐಡ್ದ್ ಬೊಕ್ಕ ಹಿರಿಸಭೆತಾಕುಲೆಗ್ ಎನ ಇಸ್ರಾಯೇಲ್ ಸಹೋದ್ರೆರೇ, ನಿಕುಲು ಈ ನರಮಾನಿಲೆಗ್ ಎಂಚಿನ ಮಲ್ಪೆರೆ ತೂಪರ ಆ ಸಂಗತಿಡ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="36">ಉಂದೆಡ್ದ್ ದುಂಬು ಥೈದೆ ಪನ್ಪಿನಾಯೆ ಒರಿ ಇತ್ತೆ. ತಾನ್ ಬಾರೀ ಮಲ್ಲ ಜನ ಅಂದ್‌ದ್ ಲಕ್ಕ್‌ದ್ ಆಯನ ಪಕ್ಷೊಗು ನಾಲ್ನೂದು ಜನ ಸೇರೊಂಡೆರ್, ಆಯನ್ ಕೆರಿಯೆರ್, ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್.</verse>
				<verse number="37">ಆಯಡ್ದ್ ಬೊಕ್ಕ ಖಾನೇಷ್‌ಮಾರಿದ ಕಾಲೊಡು ಗಲಿಲಾಯದ ಯೂದೆ ಲಕ್ಕ್‌ದ್ ಉಂತುದು ಜನೊಕುಲೆನ್ ತನ ಒಟ್ಟುಗು ಸೇರೊನಿಯೆರೆ ಪಂಡೆ. ಆಯೆ ಹಾಳಾದ್ ಪೋಯೆ; ಬೊಕ್ಕ ಆಯ ಪಕ್ಷದಾಕುಲು ಪಂಡ್ದ್ ಇತ್ತಿನಾಕುಲು ಮಾತೆರ್ಲಾ ದಿಕ್ಕ್ ಪಾಲ್ ಆಯೆರ್.</verse>
				<verse number="38">ಇಂಚಾದುಪ್ಪುನಗ ನಿಕುಲು ಆ ಜನೊಕುಲೆನ ಸುದ್ಧಿಗ್ ಪೋವೊಡ್ಚಿ. ಅಕ್ಲೆನ್ ಬುಡ್ಲೆ; ದಾಯೆಗಂದ್ಂಡ ಈ ಯೋಚನೆ ದೇವೆರೆನ ಅತ್ತಂದೆ ಜನೊಕುಲೆಡ್ದೆ ಆದಿತ್ತ್ಂಡ ಅವು ಹಾಳಾದ್ ಪೋವು;</verse>
				<verse number="39">ಅವು ದೇವೆರೆಡ್ದ್ ಆದಿತ್ತ್ಂಡ ಅವೆನ್ ಹಾಳ್ ಮಲ್ಪೆರೆ ನಿಕ್ಲೆಡ್ದ್ ಆವಂದ್. ನಿಕುಲು ಒಂಜಿ ವೇಳೆ ದೇವೆರೆಡ ನ್ಯಾಯ ಮಲ್ಪುನಾಕುಲಾದ್ ತೋಜಿದ್ ಬರುವರ್ ಅಂದ್‌ದ್ ಪಂಡೆ.</verse>
				<verse number="40">ಅಕುಲು ಆಯನ ಪಾತೆರೊಗು ಒಪ್ಪಿದ್ ಅಪೊಸ್ತಲೆರೆನ್ ಲೆಪ್ಡಾದ್ ಹಾಕ್‌ದ್ ಯೇಸುನ ಪುದರ್‌ಡ್ ಪಾತೆರಿಯೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರ್ದು ಅಕ್ಲೆನ್ ಬುಡ್ದು ಬುಡಿಯೆರ್.</verse>
				<verse number="41">ಅಪೊಸ್ತಲೆರ್ ಯೇಸುನ ಪುದರ್‌ಡ್ದ್ ಅವಮಾನ ಪಡೆಯೆರೆ ಯೋಗ್ಯದಾಕುಲು ಅಂದ್‌ದ್ ಸಂತೋಷ ಮಲ್ತ್‌ದ್ ಹಿರಿಸಭೆಡ್ದ್ ಪಿದಾಡ್ದ್ ಪೋಯೆರ್.</verse>
				<verse number="42">ಅಕುಲು ಪ್ರತಿದಿನ ದೇವಾಲಯೊಡ್ಲಾ ಇಲ್ಲ್ ಇಲ್ಲಡ್ಲಾ ಬೋಧನೆ ಮಲ್ತೊಂದು ಕ್ರಿಸ್ತೆ ಆದುಪ್ಪು ಯೇಸುನ ಸುವಾರ್ತೆನ್ ಸಾರೊಂದಿತ್ತೆರ್.</verse>
			</chapter>
			<chapter number="6">
				<verse number="1">ಆ ದಿನೊಕುಲೆಡ್ ಯೇಸುನ ಶಿಷ್ಯೆರ್ ಹೆಚ್ಚೊಂದಿತ್ತೆರ್. ಅಕ್ಲೆ ನಡುಟು ಗ್ರೀಕ್ ಭಾಷೆ ಪಾತೆರುನಾಕುಲು ಇಬ್ರಿಯ ಭಾಷೆ ಪಾತೆರುನಾಕುಲೆ ಮಿತ್ತ್ ದಿನದಿನತ ಉಪಚಾರೊಡು ವಿಧವೆರೆನ್ ಸಜ್ಜಿಡ್ ಚಾಕ್ರಿ ಮಲ್ಪುಜೆರ್ ಅಂದ್‌ದ್ ಅಪೊಸ್ತಲೆರೆಡ ದೂರು ಕೊರಿಯೆರ್</verse>
				<verse number="2">ಅಪಗ ಪದ್ರಾಡ್ ಮಂದಿ ಅಪೊಸ್ತಲೆರೆ ಶಿಷ್ಯೆರೆ ಕೂಟೊನು ಲೆತ್ತ್‌ದ್, “ನಮ ದೇವೆರೆನ ವಾಕ್ಯೊಪದೇಶೊನು ಬುಡ್ದು ಚಾಕ್ರಿ ಮಲ್ಪುನ ಸರಿ ಅತ್ತ್;</verse>
				<verse number="3">ಅಂಚಾಯಿನೆಡ್ದಾವರ ಸಹೋದ್ರೆರೇ, ಪರಿಶುದ್ಧಾತ್ಮೊಡು ದಿಂಜಿದ್, ಜ್ಞಾನ ಇತ್ತಿ ಗುಣವಂತೆರಾಯಿ ಏಳ್ ಜನೊಕುಲೆನ್ ಅಜತ್‌ದ್ ಅಕ್ಲೆನ್ ಈ ಬೇಲೆದ ಮಿತ್ತ್ ನೇಮಕ ಮಲ್ಪುಗ.</verse>
				<verse number="4">ಅಪಗ ನಮ ಸಮಯೊನು ಪೂರ ಪ್ರಾರ್ಥನೆಗ್ಲಾ ವಾಕ್ಯೊನು ಸಾರಿಯೆರೆಗ್ಲಾ ಕೊರಿಯೆರೆ ಸಾದ್ಯ ಆಪುಂಡು,” ಅಂದ್‌ದ್ ಪಂಡೆರ್.</verse>
				<verse number="5">ಈ ಪಾತೆರ ಇಡೀ ಗುಂಪುಗು ಎಡ್ಡೆ ಅಂದ್‌ದ್ ತೋಜ್ಂಡ್. ಐಡ್ದಾವರ ಅಕುಲು ಏಳ್ ಜನೊಕುಲೆನ್ ಅಜತ್‌ದ್ ದೆತ್ತೊಂಡೆರ್. ನಂಬಿಕೆಡ್ಲಾ ಪರಿಶುದ್ಧಾತ್ಮಡ್ದ್‌ಲಾ ದಿಂಜಿದಿ ನರಮಾನಿ ಆದುಪ್ಪು ಸ್ತೇಫನನ್, ಫಿಲಿಪ್ಪು ಪ್ರೊಕೋರೆ, ನಿಕನೋರೆ, ತೀಮೋನೆ, ಪರ್ಮೇನೆ, ಯೆಹೂದ್ಯ ಮತೊಕು ಸೇರ್ದಿನಾಯೆ ಅಂತಿಯೋಕ್ಯದ ನಿಕೊಲಾಯನ್ ಅಪೊಸ್ತಲೆರೆನ ಎದುರುಡು ಉಂತಾಯೆರ್.</verse>
				<verse number="6">ಅಪೊಸ್ತಲೆರ್ ಪ್ರಾರ್ಥನೆ ಮಲ್ತ್‌ದ್ ಅಕ್ಲೆ ತರೆತ ಮಿತ್ತ್ ಕೈ ದೀದ್ ನೇಮಕ ಮಲ್ತೆರ್.</verse>
				<verse number="7">ಬೊಕ್ಕ ದೇವೆರೆ ವಾಕ್ಯ ಹೆಚ್ಚಾದ್ ಜನೊಕುಲೆಗ್ ತಿಕ್ಕ್ಂಡ್. ಶಿಷ್ಯೆರ್‌ನ ಸಂಖ್ಯೆ ಯೆರೂಸಲೇಮುಡು ಹೆಚ್ಚೊಂದು ಬತ್ತ್ಂಡ್. ಯಾಜಕೆರೆಡ್ದ್‌ಲಾ ದಿಂಜ ಜನ ನಂಬಿಕೆಗ್ ಬರೊಂದಿತ್ತೆರ್.</verse>
				<verse number="8">ಸ್ತೇಫನೆ ದೇವೆರೆ ದಯೊಡ್ದುಲಾ ಬಲೊಡ್ದುಲಾ ದಿಂಜಿದಿನಾಯೆ ಆದ್ ಜನೊಕುಲೆ ಮದ್ಯೊಡು ಬಲತ್ತ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ಮಲ್ತೊಂದಿತ್ತೆ.</verse>
				<verse number="9">ಆಂಡ ಲಿಬೆರ್ತೀನೆರ್, ಪನ್ಪಿನಾಕುಲೆನ ಸಭೆಕ್ ಸೇರ್ದಿನ ಕುರೇನ್ಯೆರ್, ಅಲೆಕ್ಸಾಂದ್ರೆಯೆರ್ ಕಿಲಿಕ್ಯ ಬೊಕ್ಕ ಆಸ್ಯ ಪ್ರದೇಶೊಡ್ದು ಬೈದಿನ ಕೆಲೆವೆರ್ ಸ್ತೇಫನಡ ತರ್ಕ ಮಲ್ತೆರ್.</verse>
				<verse number="10">ಸ್ತೇಫನನ ಪಾತೆರೊಲೆಡ್ ಬುದ್ಧಿ ಬೊಕ್ಕ ಆತ್ಮದ ಬಲ ಇತ್ತಿನೆಡ್ದ್ ಆಯನ್ ವಿರೋಧ ಮಲ್ಪೆರೆ ಆಯಿಜಿ.</verse>
				<verse number="11">ಅಪಗ ಅಕುಲು ಸುಳ್ಳು ಸಾಕ್ಷಿ ಪನ್ಪಿನ ಜನೊಕುಲೆನ್ ಸೇರಾವೊಂದು ಇಂಬೇ ಮೋಶೆಗ್ಲಾ ದೇವೆರೆಗ್ಲಾ ವಿರೋಧಾದ್ ದೂಷಣೆದ ಪಾತೆರೊಲೆನ್ ಪಾತೆರುನೆನ್ ಎಂಕುಲು ಕೇಂಡ್ದ ಅಂದ್‌ದ್ ಪನ್ಪಾಯೆರ್.</verse>
				<verse number="12">ಬೊಕ್ಕ ಜನೊಕುಲೆನ್ಲಾ ಹಿರಿಯೆರೆನ್ಲಾ ಶಾಸ್ತ್ರಿನಾಕುಲೆನ್ಲಾ ನೋಚಾದ್ ಆಯನ್ ಪತ್ತ್‌ದ್ ಹಿರಿಸಭೆಕ್ ಲೆತ್ತೊಂದು ಪೋದು ಸುಳ್ಳು ಸಾಕ್ಷಿ ಕೊರ್ಪಿನ ಜನೊಕುಲೆ ಎದುರು ಉಂತಾಯೆರ್.</verse>
				<verse number="13">ಆ ಸುಳ್ಳುಸಾಕ್ಷಿಲು, “ಈ ನರಮಾನಿ ಈ ಪರಿಶುದ್ಧ ದೇವಾಲಯದ ಬೊಕ್ಕ ಮೋಶೆನ ನ್ಯಾಯಕಟ್ಟ್‌ಲೆಗ್ ವಿರೋಧಾದ್ ಪಾತೆರುನೆನ್ ಬುಡ್ಪಿನೇ ಇಜ್ಜಿ,” ಅಂದ್‌ದ್ ಪಂಡೆರ್.</verse>
				<verse number="14">ಆ ನಜರೇತ್‌ದ ಯೇಸು ಈ ದೇವಾಲಯೊನು ದರ್ತ್‌ದ್ ಮೋಶೆ ಎಂಕ್ಲೆಗ್ ಕೊರ್ತಿನ ಆಚಾರೊಲೆನ್ ಬೇತೆ ಮಲ್ಪುವೆ ಅಂದ್‌ದ್ ಇಂಬೇ ಪನ್ಪಿನೆನ್ ಎಂಕುಲು ಕೇಂಡ್ದ ಅಂದ್‌ದ್ ಪಂಡೆರ್.</verse>
				<verse number="15">ಅಪಗ ಹಿರಿಸಭೆಟ್ಟ್ ಕುಲ್ಲುದಿನಾಕುಲು ಮಾತೆರ್ಲಾ ಸ್ತೇಫನನ ಮಿತ್ತ್ ದೃಷ್ಟಿದೀದ್ ತೂನಗ, ಆಯನ ಮೋನೆ ದೂತನ ಮೋನೆದ ಲೆಕ್ಕ ಉಪ್ಪುನೆನ್ ತೂಯೆರ್.</verse>
			</chapter>
			<chapter number="7">
				<verse number="1">ಅಪಗ ಪ್ರಧಾನಯಾಜಕೆ ಸ್ತೇಫನಡ, “ಈ ಪಾತೆರೊಲು ನಿಜನಾ?” ಅಂದ್‌ದ್ ಕೇಂಡಿನೆಕ್ಕ್,</verse>
				<verse number="2">ಆಯೆ ಪಂಡಿನಿ, “ಸಹೋದ್ರೆರೇ, ಅಮ್ಮಾಡ್ಲೆ, ಕೇನ್ಲೆ, ನಮ ಮೂಲಪಿತೃ ಆದುಪ್ಪು ಅಬ್ರಹಾಮು ಹಾರಾನ್‌ಡ್ ಉಪ್ಪೊಡ್ದು ದುಂಬು ಮೆಸೊಪೊತಾಮ್ಯೊಡು ಮೈಮೆದ ದೇವೆರ್ ಆಯಗ್ ತೋಜಿದ್ ಬತ್ತೆ.</verse>
				<verse number="3">‘ಈ, ನಿನ ದೇಶೊನು ನಿನ ಕುಟಂಬದಾಕುಲೆನ್ಲಾ ಬುಡ್ದು ಯಾನ್ ತೋಜಾವು ದೇಶೊಗು ಪಿದಾಡ್ದ್ ಪೋಲ,’ ಅಂದ್‌ದ್ ಪಂಡೆ.</verse>
				<verse number="4">ಅಪಗ ಆಯೆ ಕಸ್ದೀಯೆರ್‌ನ ದೇಶೊಡ್ದು ಪಿದಾಡ್ದ್ ಪೋದು ಹಾರಾನ್‌ಡ್ ನಿಲೆ ಆಯೆ. ಆಯನ ಅಮ್ಮೆ ಸೈತಿ ಬೊಕ್ಕ ದೇವೆರ್ ಆಯನ್ ಅಲ್ತ್‌ಡ್ದ್ ನಿಕುಲು ಇತ್ತೆ ಉಪ್ಪುನ ದೇಶೊಗು ಬರ್ಪಿಲೆಕ್ಕ ಮಲ್ತೆ.</verse>
				<verse number="5">ಉಂದೆಟ್ಟ್ ಆಯಗ್ ಕಾರ್ ದೀಪಿನಾತ್ ಜಾಗ್ ಇಜ್ಜಂದಿನಪಗ, ಈ ದೇಶೊನು ನಿಕ್ಕ್‌ಲಾ ನಿನಡ್ದ್ ಬೊಕ್ಕ ಬರ್ಪಿನ ಸಂತಾನೊಗ್ಲಾ ಹಕ್ಕಾದ್ ಕೊರ್ಪೆ ಅಂದ್‌ದ್ ಆಯೆ ಜೋಕುಲ್‌ದಾಂತಿನಾಯೆ ಆದುಪ್ಪುನಗ ವಾಗ್ದಾನ ಮಲ್ತೆ.</verse>
				<verse number="6">ಅವು ಅತ್ತಂದೆ ದೇವೆರ್ ಆಯಗ್ ಪಂಡಿನಿ ದಾನೆಂದ್ಂಡ, ‘ನಿನ ಸಂತಾನದಾಕುಲು ಪರದೇಶದಾಕುಲು ಆದುಪ್ಪುವೆರ್. ಆ ಪರದೇಶದಾಕುಲು ಅಕ್ಲೆನ್ ಚಾಕ್ರಿದಾಕುಲಾದ್ ಮಲ್ತೊಂದು ನಾನೂದು ವರ್ಸ ಮುಟ್ಟ ಭಯಂಕರ ಕಷ್ಟೊಡು ನಡಪಾವೆರ್.</verse>
				<verse number="7">ಬೊಕ್ಕ ನಿನ ಸಂತಾನದಾಕುಲೆನ್ ಚಾಕ್ರಿದಾಕುಲೆಲೆಕ್ಕ ಮಲ್ತ್‌ದಿನ ಪಿದಯಿದ ಜನೊಕುಲೆನ್ ಯಾನೇ ನ್ಯಾಯಾತೀರ್ಪು ಮಲ್ಪುವೆ ಅಂದ್‌ದ್ ದೇವೆರ್ ಪನ್ತೆ. ಐಡ್ದ್ ಬೊಕ್ಕ ಅಕುಲು ಪಿದಾಡ್ದ್ ಈ ಜಾಗ್‌ಡೇ ಎನ ಆರಾಧನೆ ಮಲ್ಪೆರ್.’</verse>
				<verse number="8">ಅವು ಅತ್ತಂದೆ ದೇವೆರ್ ಆಯಗ್ ಒಂಜಿ ಸುನ್ನತಿ ಪನ್ಪಿನ ಒಡಂಬಡಿಕೆನ್ ನೇಮಕ ಮಲ್ತೆ. ಐಕಾದ್ ಅಬ್ರಹಾಮು ಇಸಾಕ್ ಪುಟ್ಟಿನ ಎನ್ಮನೇ ದಿನೊಟು ಆಯಗ್ ಸುನ್ನತಿ ಮಲ್ತೆ. ಇಸಾಕ್ ತನ ಮಗೆ ಯಾಕೋಬುಗ್ಲಾ ಸುನ್ನತಿ ಮಲ್ತೆ. ಬೊಕ್ಕ ಯಾಕೋಬುಲಾ ತನ ಪದ್ರಾಡ್ ಜೋಕುಲೆಗ್ಲಾ ಸುನ್ನತಿ ಮಲ್ತೆ. ಆ ಪದ್ರಾಡ್ ಆಣ್ ಜೋಕುಲೇ ಮೂಲ ಪಿತೃಲಾಯೆರ್.</verse>
				<verse number="9">“ಈ ಮೂಲ ಪಿತೃಲು ಕಿಚ್ಚಿಮಚ್ಚರೊಡು ಯೋಸೇಫುನು ಐಗುಪ್ತೊಗು ಮಾರ್ದ್ ಬುಡಿಯೆರ್. ಅಲ್ಪ ದೇವೆರ್ ಆಯನ ಒಟ್ಟುಗು ಇತ್ತೆರ್.</verse>
				<verse number="10">ಆಯಗ್ ಬತ್ತಿನ ಮಾತ ಕಷ್ಟೊಲೆಡ್ ಆಯನ್ ಬುಡ್ಪಾಯೆ. ಐಗುಪ್ತ ದೇಶದ ಅರಸು ಆದುಪ್ಪು ಫರೋಹನ ಎದುರುಡು ದಯಲಾ ಬುದ್ಧಿಲಾ ಇತ್ತಿನೆಡ್ದ್ ಆಯನ್ ಐಗುಪ್ತ ದೇಶೊಡ್ಲಾ ಬೊಕ್ಕ ತನ ಅರಮನೆದ ಮಿತ್ತ್‌ಲಾ ಮುಖ್ಯಸ್ಥೆ ಮಲ್ತ್ ಬುಡಿಯೆ.</verse>
				<verse number="11">ಅಪಗ ಐಗುಪ್ತ ಬೊಕ್ಕ ಕಾನಾನ್ ದೇಶೊಲೆಡ್ ಮಾತ ಕಡೆಟ್ಲಾ ಬರಗಾಲ ಬತ್ತ್‌ದ್ ಬಾರೀ ಕಷ್ಟ ಆಂಡ್. ನಮ ಪಿತೃಲೆಗ್ ತಿನರೆ ತಿನಸ್ ತಿಕ್ಕೊಂದಿತ್ತಿಜಿ.</verse>
				<verse number="12">ಆಂಡ ಐಗುಪ್ತ ದೇಶೊಡು ದಾನ್ಯೊಲು ಉಂಡು ಅಂದ್‌ದ್ ಯಾಕೋಬು ತೆರಿದ್ ನಮ ಪಿತೃಲೆನ್ ಸುರು ಒಂಜಿ ಸರ್ತಿ ಅಡೆಗ್ ಕಡಪುಡಿಯೆ.</verse>
				<verse number="13">ಅಕುಲು ರಡ್ಡನೆ ಸರ್ತಿ ಬನ್ನಗ ಯೋಸೇಫು ತನ ಪಲಯಾಡ್ಲೆಗ್ ಆಯೆ ಏರಂದ್‌ದ್ ತೆರಿಪಾಯೆ. ಬೊಕ್ಕ ಯೋಸೇಫುನ ಸಂತಾನ ಫರೋಹಗ್ ತೆರಿದ್ ಬತ್ತ್ಂಡ್.</verse>
				<verse number="14">ಬೊಕ್ಕ ಯೋಸೇಫು ತನ ಅಮ್ಮೆ ಆದುಪ್ಪು ಯಾಕೋಬುನ್ಲಾ ತನ ಮಾತ ಸಂತಾನದಾಕುಲೆಡೊಪ್ಪ ಎಲ್ಪತೈನ್ ಜನೊನು ಲೆಪ್ಪುಡಾಯೆ.</verse>
				<verse number="15">ಯಾಕೋಬು ಐಗುಪ್ತೊಗು ಪೋಯಿ ಬೊಕ್ಕ ಅಲ್ಪ ಆಯೆಲಾ ನಮ ಪಿತೃಲುಲಾ ಸೈತ್ ಪೋಯೆರ್.</verse>
				<verse number="16">ಅಕ್ಲೆನ ಶರೀರೊನು ಸಿಕೇಮುಗು ದೆತ್ತೊಂದು ಪೋದು ಅಲ್ಪ ಹಮೋರನ ಜೋಕುಲೆಡ್ದ್ ಅಬ್ರಹಾಮು ಬೊಳ್ಳಿ ಕೊರ್ದು ದೆತ್ತೊಂದಿನ ಸಮಾಧಿಡ್ ದೀಯೆರ್.</verse>
				<verse number="17">“ಆಂಡ ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತ್‌ದಿನ ಕಾಲ ಕೈತಲ್‌ ಬರೊಂದುಪ್ಪುನಗ ನಮ ಜನೊಕುಲು ಐಗುಪ್ತ ದೇಶೊಡು ದಿಂಜೊಂಡೆರ್.</verse>
				<verse number="18">ಕಡೆಕ್ಕ್ ಯೋಸೇಫುನು ತೆರಿಯಂದಿನ ಬೇತೆ ಒರಿ ಅರಸು ಐಗುಪ್ತದ ಅಧಿಕಾರೊಗು ಬತ್ತೆ.</verse>
				<verse number="19">ಈ ಅರಸು ನಮ ಜನೊಕುಲೆನ್ ಪಗೆ ಮಲ್ತ್‌ದ್ ಅಕ್ಲೆನ ಬಾಲೆಲೆನ್ ಜೀವೊಡು ಒರಿಪಾವೆರೆ ಬಲ್ಲಿ ಅಂದ್‌ದ್ ಪಿದಯಿ ಪಾಡ್ಪಾಯೆ. ನಮ ಪಿತೃಲೆನ್ ಮಸ್ತ್ ಭಂಗ ಬರ್ಪಾಯೆ;</verse>
				<verse number="20">ಆ ಸಮಯೊಡೇ ಮೋಶೆ ಪುಟ್ಟಿಯೆ. ಆಯೆ ದೇವೆರೆಗ್ ಪೊರ್ಲಗಂಟಾದಿತ್ತೆ. ಆಯನ್ ಅಮ್ಮೆರೆನ ಇಲ್ಲಡ್ ಮೂಜಿ ತಿಂಗೊಲು ತಾಂಕಿಯೆರ್;</verse>
				<verse number="21">ಐಡ್ದ್ ಬೊಕ್ಕ ಆಯನ್ ಪಿದಯಿ ಪಾಡಿನಪಗ ಫರೋಹನ ಮಗಲ್ ಆಯನ್ ಪತ್ತೊಂದು ಪೋದು ತನ ಮಗಲೆಕ್ಕ ತಾಂಕಿಯಲ್.</verse>
				<verse number="22">ಮೋಶೆ ಐಗುಪ್ತ ದೇಶದ ಮಾತ ವಿದ್ಯೆಲೆನ್ ಕಲ್ತೊಂದು ಪಾತೆರೊಡ್ಲಾ ಕಾರ್ಯೊಡ್ಲಾ ಸಮರ್ಥೆ ಆದಿತ್ತೆ.</verse>
				<verse number="23">“ಆಯಗ್ ನಲ್ಪ ವರ್ಸ ಪ್ರಾಯ ಆದುಪ್ಪುನಗ ಇಸ್ರಾಯೇಲ್ ಸಂತಾನದಾಕುಲಾಯಿನ ತನ ಸಹೋದ್ರೆರೆನ್ ಪೋದು ತೂವೊಡು ಪನ್ಪಿನ ಆಸೆ ಆಯನ ಉಡಲ್‌ಡ್ ಆಂಡ್.</verse>
				<verse number="24">ಅಕ್ಲೆಡ ಒರಿಯಗ್ ಅನ್ಯಾಯ ಆಪಿನೆನ್ ಆಯೆ ತೂದು ಆಯಗ್ ಸಹಾಯ ಮಲ್ತ್‌ದ್ ತೊಂದರೆ ಕೊರ್ಪಿನ ಐಗುಪ್ತ್ಯನ್ ಕೆರ್ದ್ ಪಗೆ ತಿರಿಸಾಯೆ.</verse>
				<verse number="25">ಅಕ್ಲೆನ್ ಬುಡುಗಡೆ ಮಲ್ಪೆರೆ ದೇವೆರ್ ಮೋಸೆನ್ ಉಪಯೋಗ ಮಲ್ತೊಂದುಲೆ ಅಂದ್‌ದ್ ತನ ಸಹೋದ್ರೆರೆಗ್ ಗೊತ್ತಾವು ಅಂಚ ಎನ್ನಿಯೆ. ಆಂಡ ಅಕುಲು ಅಂಚ ತೆರಿಯೊಂಡಿಜೆರ್,</verse>
				<verse number="26">ಮನದಾನಿ ಇರ್ವೆರ್ ಇಸ್ರಾಯೇಲ್ಯೆರ್ ಲಡಯಿ ಮಲ್ತೊಂದುಪ್ಪುನಗ ಆಯೆ ಅಕ್ಲೆ ಎದುರಾದ್, ‘ಜನೊಕುಲೇ ನಿಕುಲು ಸಹೋದರೆರತ್ತಾ? ನಿಕುಲು ದಾಯೆಗ್ ಒರಿ ಒರಿಯಗ್ ಅನ್ಯಾಯ ಮಲ್ಪುವರ್,’ ಪಂಡ್ದ್ ಅಕ್ಲೆನ್ ಸಮಾಧಾನ ಮಲ್ಪೆರೆ ತೂಯೆ.</verse>
				<verse number="27">ಆಂಡ ಅನ್ಯಾಯ ಮಲ್ತಿನಾಯಡ್ದ್ ಒರಿ ಮೋಸೆನ್ ಪಿರ ನೂಕುದು ಪನ್ಪೆ, ‘ನಿನನ್ ಎಂಕ್ಲೆನ ಮಿತ್ತ್ ಅಧಿಪತಿಲಾ ನ್ಯಾಯಾಧಿಪತಿಲಾ ಮಲ್ತಿನಾಕುಲು ಏರ್?</verse>
				<verse number="28">ಕೋಡೆ ಆ ಐಗುಪ್ತ್ಯನ್ ಕೆರಿಲೆಕ್ಕ ಎನನ್ಲಾ ಕೆರೊಡು ಪಂಡ್ದುಲ್ಲನಾ?’ ಅಂದ್‌ದ್ ಆಯನ್ ನೂಕುದು ಬುಡಿಯೆ.</verse>
				<verse number="29">ಈ ಪಾತೆರೊನು ಕೇಂಡ್ದ್ ಮೋಶೆ ಪಾರ್‌ಪೋದು ಮಿದಿಯಾನ್ ದೇಶೊಡು ಪರ ಊರುದಾಯೆ ಆದಿತ್ತೆ. ಅಲ್ಪ ರಡ್ಡ್ ಆಣ್ ಜೋಕುಲು ಪುಟ್ಟಿಯೆರ್.</verse>
				<verse number="30">“ನಲ್ಪ ವರ್ಸ ಕರಿಬೊಕ್ಕ ಕರ್ತವನ ದೂತೆ ಸೀನಾಯಿ ಪರ್ವತದ ಕಾಡ್‌ದ ಪುದೆಲ್‌ಡ್ ಅರ್ಲುನ ತೂಟು ತೋಜಿಯೆ.</verse>
				<verse number="31">ಮೋಶೆ ಅವೆನ್ ತೂದು ಅಚ್ಚಿರ ಆಯೆ. ಸಮ ತೂವೊಡು ಅಂದ್‌ದ್ ಕೈತಲ್‌ ಪೋನಗ,</verse>
				<verse number="32">‘ಯಾನ್ ನಿನ ಪಿತೃಲೆನ ದೇವೆರ್, ಅಬ್ರಹಾಮು ಇಸಾಕ್ ಯಾಕೋಬುನ ದೇವೆರ್,’ ಅಂದ್‌ದ್ ಕರ್ತವನ ಸ್ವರೊನು ಕೇಂಡೆ. ಅಪಗ ಮೋಶೆ ಕುಂಬರೊಂದು ಸಮ ತೂವೆರೆ ಧೈರ್ಯ ಮಲ್ತ್‌ಜೆ.</verse>
				<verse number="33">ಬೊಕ್ಕ ಕರ್ತವೆ ಆಯಗ್ ಪಂಡೆ, ‘ನಿನ ಕಾರ್‌ದ ಜೋಡುನು ದೆಪ್ಪು; ಈ ಉಂತುದಿನ ಜಾಗ್ ಪರಿಶುದ್ಧ ನೆಲ.</verse>
				<verse number="34">ಐಗುಪ್ತ ದೇಶೊಡುಪ್ಪುನ ಎನ ಜನೊಕುಲೆನ ಕಷ್ಟೊನು ತೂತೆ; ಅಕುಲು ನರಕುನೆನ್ ಕೇಂಡ್ದ್ ಅಕ್ಲೆನ್ ಬುಡ್ಪಾವೆರೆ ಜತ್ತ್‌ದ್ ಬೈದೆ. ಇತ್ತೆ ಬಲ, ನಿನನ್ ಐಗುಪ್ತೊಗು ಕಡಪುಡ್ವೆ,’ ಅಂದ್‌ದ್ ಪಂಡೆ.</verse>
				<verse number="35">“‘ನಿನನ್ ಎಂಕ್ಲೆನ ಮಿತ್ತ್ ಅಧಿಪತಿಲಾ ನ್ಯಾಯಾಧಿಪತಿಲಾ ಮಲ್ತಿನಾಕುಲು ಏರ್,’ ಅಂದ್‌ದ್ ತಿರಸ್ಕಾರ ಆತಿನ ಮೋಶೆಗ್ ದೇವೆರ್ ಪುದೆಲ್‌ಡ್ ತೋಜಿದ್ ಬತ್ತ್‌ದ್ ದೂತನ ಕೈಡ್ದ್ ಆಯನ್ ಅಧಿಪತಿಲಾ ಬುಡ್ಪಾವುನಾಯೆಲಾ ಮಲ್ತ್‌ದ್ ಕಡಪುಡಿಯೆ.</verse>
				<verse number="36">ಇಂಬೆ ಅಕ್ಲೆನ್ ಐಗುಪ್ತ ದೇಶೊಡ್ಲಾ ಕೆಂಪು ಕಡಲ್ ದಾಂಟ್‌ದ್ ನಲ್ಪ ವರ್ಸ ಮುಟ್ಟ ಕಾಡ್‌ಡ್ಲಾ ಕಾರ್ನಿಕೊಲೆನ್ಲಾ ಗುರ್ತೊಲೆನ್ಲಾ ಮಲ್ತೊಂದು ನಡಪಾವೊಂದು ಬತ್ತೆ.</verse>
				<verse number="37">ದೇವೆರ್ ಎನನ್ ತಯಾರ್ ಮಲ್ತಿಲೆಕ್ಕ ನಿಕ್ಲೆನ ಸಹೋದ್ರೆರೆಡ್ ಬೊಕ್ಕೊರಿ ಪ್ರವಾದಿನ್ ನಿಕ್ಲೆಗ್ ತಯಾರ್ ಮಲ್ತ್‌ದ್ ಕೊರುವೆ ಅಂದ್‌ದ್ ಈ ಮೋಶೆನೇ ಇಸ್ರಾಯೇಲ್ ಜನೊಕುಲೆಗ್ ಪಂಡಿನಾಯೆ.</verse>
				<verse number="38">ಈ ಮೋಶೆನೇ ಸೀನಾಯಿ ಪರ್ವತದ ಬರಿಟ್ಟ್ ದೂತನ ಒಟ್ಟುಗು ಪಾತೆರ್‌ದಿನಾಯೆಲಾ, ನಮ ಪಿತೃಲೆ ಒಟ್ಟುಗು ಕಾಡ್‌ದ ಸಭೆಟ್ ಮದ್ಯಸ್ಥೆ ಆದ್ ಇತ್ತಿನಾಯೆಲಾ ಜೀವ ಇತ್ತಿನ ಅಪ್ಪಣೆಲೆನ್ ದೇವೆರೆಡ್ದ್ ಸ್ವೀಕಾರ ಮಲ್ತ್‌ದ್ ಅವೆನ್ ನಂಕ್ ಕೊರಿನಾಯೆಲಾ ಆದುಲ್ಲೆ.</verse>
				<verse number="39">“ಆಂಡ ನಮ ಪಿತೃಲು ಆಯನ ಪಾತೆರೊಲೆನ್ ಕೇನುನೆಕ್ಕ್ ಮನಸ್‌ದಾಂತೆ ಆಯನ್ ತಿರಸ್ಕಾರ ಮಲ್ತ್‌ದ್ ತನ್ಕುಲೆ ಉಡಲ್‌ಡ್ ಕುಡ ಐಗುಪ್ತದ ಕಡೆಕ್ಕ್ ಮನಸ್ ದೀಯೆರ್.</verse>
				<verse number="40">ಅಕುಲು ಆರೋನಗ್, ‘ಐಗುಪ್ತ ದೇಶೊಡ್ದು ನಮನ್ ಲೆತ್ತೊಂದು ಬತ್ತಿನ ಆ ಮೋಶೆಗ್ ದಾನೆ ಆಂಡ್ ಅಂದ್‌ದ್ ಗೊತ್ತಿಜ್ಜಿ. ಐಡ್ದಾವರ ಎಂಕ್ಲೆನ ಎದುರುಡು ಪೋವೆರೆ ಒಂಜಿ ದೇವೆರೆನ್ ಮಲ್ತ್‌ದ್ ಕೊರ್ಲ,’ ಅಂದ್‌ದ್ ಪಂಡೆರ್.</verse>
				<verse number="41">ಆ ದಿನೊಟು ಅಕುಲು ಒಂಜಿ ಬಸವನ ಮೂರ್ತಿನ್ ಮಲ್ತ್‌ದ್ ಐಕ್ ಬಲಿ ಅರ್ಪಣೆ ಕೊರ್ದು ತನ್ಕುಲೆನ ಕೈಡ್ದೇ ಮಲ್ತಿನ ವಸ್ತುಡು ಸಂತೋಷ ಪಡೆಯೆರ್.</verse>
				<verse number="42">ಆಂಡ ದೇವೆರ್ ಅಕ್ಲೆನ್ ತಿರಸ್ಕಾರ ಮಲ್ತ್‌ದ್ ಬಾನದ ನಕ್ಷತ್ರೊಲೆನ್ ಆರಾಧನೆ ಮಲ್ಪೆರೆ ಬುಡ್ದು ಬುಡಿಯೆ. ಪ್ರವಾದಿಲೆನ ಗ್ರಂಥೊಲೆಡ್ ಬರೆತಿ ಲೆಕ್ಕನೇ, ‘ಇಸ್ರಾಯೇಲ್ ಸಂತಾನದಾಕುಲೇ, ನಿಕುಲು ಕಾಡ್‌ಡ್ ನಲ್ಪ ವರ್ಸೊಡು ದಿನ ದೆಪ್ಪುನಗ ಪ್ರಾಣಿಲೆನ್ ಕೆರ್ದ್ ಎಂಕ್ ಬಲಿ ಕೊರ್ತರಾ, ಇಜ್ಜತ್ತಾ?</verse>
				<verse number="43">ಐತ ಬದಲಿಗ್ ಪೂಜೆ ಮಲ್ಪೊಡು ಅಂದ್‌ದ್ ಮಲ್ತೊಂದಿನ ಮೂರ್ತಿಲೆನ್, ಮೋಲೋಕುನ ಗುಡಾರೊನ್ಲಾ ರೋಂಫಾ ದೇವಿನ ನಕ್ಷತ್ರದ ಮೂರ್ತಿನ್ಲಾ ತುಂಬೊಂದು ಪೋಯರ್. ಅಂಚಾಯಿನೆಡ್ದ್ ಯಾನ್ ನಿಕ್ಲೆನ್ ಬಾಬೆಲ್‌ದ ಅಂಚಿದ ದಿಕ್ಕ್‌ಗ್ ಗಡಿಪಾರ್ ಮಲ್ಪುವೆ.’</verse>
				<verse number="44">“ಸಾಕ್ಷಿದ ಗುಡಾರ ಕಾಡ್‌ದ ಉಲಯಿ ನಮ ಪಿತೃಲೆನ ಕೈತಲ್ ಇತ್ತ್ಂಡ್. ದೇವೆರ್ ಮೋಶೆಡ ಪಂಡಿಲೆಕ್ಕನೇ ಅವ್ವೇ ರೀತಿಡ್ ಗುಡಾರೊನು ಮಲ್ಪಾವೊಡು ಅಂದ್‌ದ್ ನೇಮಕ ಮಲ್ತೆ.</verse>
				<verse number="45">ಅವ್ವೇ ಗುಡಾರೊನು ನಮ ಪಿತೃಲು ಪಡೆಯೆರ್; ಯೆಹೋಶುವೆ ನಮ ಪಿತೃಲೆನ್ ದುಂಬು ಕೊನೊ ಪೋದು ದೇವೆರ್ ಪಿದಯಿದ ಜನೊಕುಲೆನ್ ಅಕ್ಲೆಗಿತ್ತಿ ದೇಶೊಡ್ದು ನಮ ಪಿತೃಲೆ ಎದುರು ಪಿದಯಿ ಪಾಡ್ದ್ ದೇಶೊನು ಸ್ವಾದೀನ ಮಲ್ತ್‌ದ್ ಆ ಗುಡಾರೊನ್ಲಾ ಕನತೆರ್. ಅವು ದಾವೀದ ಕಾಲ ಮುಟ್ಟ ಅಲ್ಪನೇ ಇತ್ತ್ಂಡ್.</verse>
				<verse number="46">ದಾವೀದಗ್ ದೇವೆರೆ ಎದುರು ದಯ ತಿಕ್ಕಿನೆಡ್ದ್ ಯಾಕೋಬು ಗೊತ್ರದಾಕುಲೆಗ್ ಒಂಜಿ ದೇವಾಲಯೊನು ಕಟ್ಟಾಯೆರೆ ಒಂಜಿ ಅಪ್ಪಣೆ ಕೊರೊಡು ಅಂದ್‌ದ್ ದೇವೆರೆಡ ಕೇನೊಂಡೆ.</verse>
				<verse number="47">ಆಂಡ ಆ ದೇವಾಲಯೊನು ಕಟ್ಟಾಯಿನಾಯೆ ಸೊಲೊಮೋನೆ.</verse>
				<verse number="48">“ಆಂಡಲಾ ಸರ್ವಶಕ್ತೆ ದೇವೆರ್ ನರಮಾನಿ ಕೈಡ್ದ್ ಕಟ್ಟಾದಿನ ಇಲ್ಲಡ್ ನಿಲೆ ಆದುಪ್ಪುನಾಯೆ ಅತ್ತ್.</verse>
				<verse number="49">‘ಪರಲೋಕ ಎನ ಗದ್ದಿಗೆ, ಭೂಮಿ ಎನ ಪಾದಪೀಠ. ನಿಕುಲು ಎಂಕ್ ಎಂಚಿನ ಇಲ್ಲನ್ ಕಟ್ಟ್‌ದ್ ಕೊರುವರ್‌? ಎನ ವಿಶ್ರಾಂತಿಗ್ ತಕ್ಕದ ಜಾಗ್ ಒವ್ವು? ಎನ ಕೈ ಉಂದೆನ್ ಮಾತೆನ್ಲಾ ಉಂಡು ಮಲ್ತಿನಿ ಅತ್ತಾ?’ ಅಂದ್‌ದ್ ಪ್ರವಾದಿ ಪನ್ಪೆ.</verse>
				<verse number="50"></verse>
				<verse number="51">“ಅರ್ಗಂಟ್ ಮಲ್ಪುನಾಕುಲೇ, ಉಡಲ್‌ಲಾ ಕಣ್ಣ್‌ಲಾ ಶುದ್ಧದಾಂತಿನಾಕುಲೇ, ನಿಕ್ಲೆನ ಪಿತೃಲು ಮಲ್ತಿ ಲೆಕ್ಕನೆ ನಿಕುಲುಲಾ ಏಪಲಾ ಪರಿಶುದ್ಧಾತ್ಮೊನು ವಿರೋಧ ಮಲ್ಪುನಾಕುಲೇ ಆದುಲ್ಲರ್.</verse>
				<verse number="52">ನಿಕ್ಲೆ ಪಿತೃಲೆಡ್ದ್ ಪ್ರವಾದಿಲೆಗ್ ಭಂಗ ಕೊರಂದಿನಾಕುಲು ಏರ್ ಉಲ್ಲೆರ್? ನೀತಿವಂತೆ ಬರ್ಪಿನ ವಿಷಯೊನು ತೆರಿಪಾಯಿನಾಕುಲೆನ್ ಕೆರಿಯರ್. ನಿಕುಲು ಇತ್ತೆ ಆಯನ್ ಒಚ್ಚಿದ್ ಕೊರ್ದು ಕುಡ ಕೆರ್ತಿನಾಕುಲಾಯರ್.</verse>
				<verse number="53">ದೂತೆರೆಡ್ದ್ ನ್ಯಾಯಕಟ್ಟ್ ಪಡೆದಿತ್ತ್‌ಂಡಲಾ ನಿಕುಲು ಐತ ಲೆಕ್ಕನೆ ನಡಪುಜರ್,” ಪಂಡೆ.</verse>
				<verse number="54">ಸ್ತೇಫನೆ ಪಂಡಿನ ಪಾತೆರೊಲೆನ್ ಕೇಂಡ್ದ್ ಅಕ್ಲೆ ಉಡಲ್ ಕಂತಿಲೆಕ್ಕ ಆಂಡ್. ಆಯ ಮಿತ್ತ್ ಗರ್ವೊಡು ಕೂಲಿ ಕಡೆಯೆರ್.</verse>
				<verse number="55">ಆಂಡ ಸ್ತೇಫನೆ ಪರಿಶುದ್ಧಾತ್ಮೊಡು ದಿಂಜಿದ್ ಆಯೆ ಪರಲೋಕೊಗು ಕಣ್ಣ್ ದೆರ್ತ್ತ್‌ದ್ ತೂನಗ ದೇವೆರೆ ಮೈಮೆನ್ಲಾ ದೇವೆರೆ ಬಲತ್ತ ಮರ್ಗಿಲ್‌ಡ್ ಉಂತುದಿನ ಯೇಸುನ್ಲಾ ತೂಯೆ.</verse>
				<verse number="56">ತೂಲೆ, ಪರಲೋಕ ಜತ್ತ್‌ದುಪ್ಪುನೆನ್‌ಲಾ ನರಮಾನಿ ಮಗೆ ದೇವೆರೆ ಬಲತ್ತ ಮರ್ಗಿಲ್‌ಡ್ ಉಂತುದಿನೆನ್ಲಾ ತೂಪೆ ಅಂದ್‌ದ್ ಪಂಡೆ.</verse>
				<verse number="57">ಆಂಡ ಅಕುಲು ಗಟ್ಟಿ ಸ್ವರೊಟ್ಟು ಬೊಬ್ಬೆ ಪಾಡ್ದ್ ಕೆಬಿ ಮುಚ್ಚೊಂದು ಒಟ್ಟಾದ್ ಆಯನ ಮಿತ್ತ್ ಬೂರಿಯೆರ್.</verse>
				<verse number="58">ಬೊಕ್ಕ ಆಯನ್ ಊರುದ ಪಿದಯಿ ನೂಕೊಂದು ಪೋದು ಕೆರಿಯೆರೆ ಕಲ್ಲ್ ದಕ್ಕಿಯೆರ್. ಸಾಕ್ಷಿದಾಕುಲು ತನ್ಕುಲೆನ ಕುಂಟುಲೆನ್ ದೆತ್ತ್‌ದ್ ಸೌಲು ಪನ್ಪಿ ಒರಿ ಜವನ್ಯನ ಕಾರ್‌ದ ಕೈತಲ್‌ ದೀಯೆರ್.</verse>
				<verse number="59">ಅಕುಲು ಸ್ತೇಫನನ ಮಿತ್ತ್ ಕಲ್ಲ್ ದಕ್ಕೊಂದು ಉಪ್ಪುನಗ ಆಯೆ ಕರ್ತವನ್ ಲೆತ್ತ್‌ದ್, “ಯೇಸು ಕರ್ತವ, ಎನ ಆತ್ಮೊನು ಸೇರಾವೊನ್ಲ,” ಅಂದ್‌ದ್ ಪ್ರಾರ್ಥನೆ ಮಲ್ತೆ.</verse>
				<verse number="60">ಆಯೆ ಮುಂಡುಬೂರ್ದು, “ಕರ್ತವಾ, ಈ ಪಾಪೊನು ಅಕ್ಲೆನ ಮಿತ್ತ್ ಪಾಡಡ,” ಅಂದ್‌ದ್ ಗಟ್ಟಿ ಸ್ವರೊಟ್ಟು ಬುಲ್ತೆ. ಉಂದೆನ್ ಪಂಡ್ದ್ ಪ್ರಾಣ ಬುಡಿಯೆ.</verse>
			</chapter>
			<chapter number="8">
				<verse number="1">ಸ್ತೇಫನನ್ ಕೆರಿಯೆರೆ ಸೌಲುನ ಒಪ್ಪಿಗೆ ಇತ್ತ್ಂಡ್. ಆ ದಿನೊಟು ಯೆರೂಸಲೇಮುಡು ಇತ್ತಿನ ಸಭಾಮಂದಿರೊಗು ಮಲ್ಲ ಕಷ್ಟ ಬತ್ತ್ಂಡ್. ಅಪೊಸ್ತಲೆರೆನ್ ಬುಡ್ದು, ನಂಬುನಾಕುಲು ಮಾತೆರ್ಲಾ ಯೂದಾಯ ಬೊಕ್ಕ ಸಮಾರ್ಯದ ಸೀಮೆಲೆಡ್ ಪರಡ್ದ್ ಪೋಯೆರ್.</verse>
				<verse number="2">ಭಕ್ತೆರಾಯಿನ ಜನೊಕುಲು ಸ್ತೇಫನನ್ ಕೌಂತುದು ಆಯಗಾದ್ ಮಸ್ತ್ ದುಃಖ ಮಲ್ತೆರ್.</verse>
				<verse number="3">ಆಂಡ ಸೌಲು ಇಲ್ಲ್ ಇಲ್ಲಗ್ ಪೊಗ್ಗುದು ಅಂಜೊವುಲೆನ್ಲಾ ಪೊಂಜೊವುಲೆನ್ಲಾ ಪಿದಾಯಿ ಒಯ್ತೊಂದು ಸೆರೆಮನೆಗ್ ಪಾಡ್ದ್ ಸಭೆನ್ ಹಾಳ್ ಮಲ್ತೊಂದಿತ್ತೆ.</verse>
				<verse number="4">ಪರಡ್ದ್ ಪೋಯಿನಾಕುಲು ಅಲ್ಪಲ್ಪ ಪೋದು ಯೇಸುನ ಸುವಾರ್ತೆನ್ ಸಾರೊಂದಿತ್ತೆರ್.</verse>
				<verse number="5">ಫಿಲಿಪ್ಪು ಸಮಾರ್ಯ ಇನ್ಪಿ ಪಟ್ಟಣೊಗು ಪೋದು ಅಲ್ತಕುಲೆಗ್ ಕ್ರಿಸ್ತನ್ ಸಾರಿಯೆ.</verse>
				<verse number="6">ಗುಂಪಾದ್ ಸೇರ್ದಿನ ಜನೊಕುಲು ಫಿಲಿಪ್ಪನ ಪಾತೆರೊಲೆನ್ ಕೇಂಡ್ದ್ ಬೊಕ್ಕ ಆಯೆ ಮಲ್ತಿನ ಕಾರ್ನಿಕೊಲೆನ್ ತೂದು, ಆಯೆ ಪಂಡಿನೆನ್ ಒಂಜೇ ಮನಸಾದ್ ಕೆಬಿ ಕೊರ್ದು ಕೇನಿಯೆರ್.</verse>
				<verse number="7">ದಾಯೆಗ್ ಪಂಡ ಮಸ್ತ್ ಜನೊಕುಲೆ ಉಲಯಿಡ್ದ್ ದೆವ್ವೊಲು ದೊಂಡೆ ಬಾಯಿ ದೀದ್ ಪಿದಯಿ ಬತ್ತ್ಂಡ್; ಬೊಕ್ಕ ಮಸ್ತ್ ಜನ ವಾತದಾಕುಲುಲಾ ಕುಂಟೆರ್‌ಲಾ ಗುಣ ಪಡೆಯೆರ್.</verse>
				<verse number="8">ಆ ಪೇಂಟೆಡ್ ಮಸ್ತ್ ಸಂತೋಷ ಉಂಡಾಂಡ್.</verse>
				<verse number="9">ಆಂಡ ಮಸ್ತ್ ಸಮಯೊಡ್ದಿಂಚಿ ಆ ಪೇಂಟೆಡ್ ಸೀಮೋನೆ ಪನ್ಪಿನಾಯೆ ಒರಿ ನರಮಾನಿ ತಾನ್ ಬಾರೀ ಮಲ್ಲ ಜನ ಅಂದ್‌ದ್ ಎನ್ನೊಂದು ಮಂತ್ರವಾದ ಮಲ್ತೊಂದು ಸಮಾರ್ಯದ ಜನೊಕುಲೆನ್ ಬೆರ್ಮೆ ಮಲ್ತೊಂದಿತ್ತೆ.</verse>
				<verse number="10">ಎಲ್ಯಾಕುಲೆಡ್ದ್ ಮುಖ್ಯಸ್ಥೆರೆ ಮುಟ್ಟ ಮಾತೆರ್ಲಾ ಇಂಬ್ಯಡ ಮಲ್ಲ ಶಕ್ತಿ ಪಂಡ ದೇವೆರೆ ಶಕ್ತಿ ಉಂಡು ಅಂದ್‌ದ್ ಆಯಗೇ ಗಮನ ಕೊರೊಂದಿತ್ತೆರ್.</verse>
				<verse number="11">ಮಸ್ತ್ ದಿನೊಡ್ದು ಆಯೆ ಮಂತ್ರವಾದ ಮಲ್ತೊಂದು ಜನೊಕುಲೆನ್ ಮರ್ಲ್ ಮಲ್ಪಾಯಿನೆಡ್ದ್ ಅಕುಲು ಆಯನ ಪಾತೆರೊಗು ಕೆಬಿ ಕೊರೊಂದಿತ್ತೆರ್.</verse>
				<verse number="12">ಆಂಡ ಫಿಲಿಪ್ಪು ದೇವೆರೆ ರಾಜ್ಯದ ವಿಷಯೊಡ್ಲಾ ಯೇಸು ಕ್ರಿಸ್ತನ ಪುದರ್‌ಡ್ಲಾ ಸುವಾರ್ತೆನ್ ಸಾರಿನಗ ಫಿಲಿಪ್ಪು ಪಂಡಿನೆನ್ ನಂಬುದು ಅಂಜೊವೊಲುಲಾ ಪೊಂಜೊವೊಲುಲಾ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.</verse>
				<verse number="13">ಆ ಸೀಮೋನೆಲಾ ನಂಬುದು ನೀರ್‌ದ ದೀಕ್ಷಾಸ್ನಾನ ಮಲ್ತೊಂದು ಫಿಲಿಪ್ಪು ಒಟ್ಟುಗು ಏಪಲಾ ಇತ್ತ್‌ದ್ ಆಯೆ ಮಲ್ಪುನ ಕಾರ್ನಿಕೊಲೆನ್ಲಾ ಮಲ್ಲಕಾರ್ಯೊಲೆನ್ಲಾ ತೂದು ಅಚ್ಚಿರ ಆಯೆ.</verse>
				<verse number="14">ಸಮಾರ್ಯದಾಕುಲು ದೇವೆರೆ ಪಾತೆರೊನು ಸ್ವೀಕಾರ ಮಲ್ತಿನ ವರ್ತಮಾನೊನು ಯೆರೂಸಲೇಮುಡಿತ್ತಿ ಅಪೊಸ್ತಲೆರ್ ಕೇಂಡ್ದ್ ಪೇತ್ರೆ ಯೋಹಾನನ್ ಅಕ್ಲೆ ಕೈತಲ್‌ ಕಡಪುಡಿಯೆರ್.</verse>
				<verse number="15">ಮೊಕುಲು ಅಡೆಗ್ ಬತ್ತ್‌ದ್ ಆ ಜನೊಕುಲೆಗ್ ಪರಿಶುದ್ಧಾತ್ಮ ತಿಕ್ಕೊಡು ಅಂದ್‌ದ್ ಅಕ್ಲೆಗಾದ್ ಪ್ರಾರ್ಥನೆ ಮಲ್ತೆರ್.</verse>
				<verse number="16">ದಾಯೆಗಂದ್ಂಡ ಆನಿ ಮುಟ್ಟ ಪರಿಶುದ್ಧಾತ್ಮ ಒರಿಯ ಮಿತ್ತ್‌ಲಾ ಬತ್ತ್‌ದಿಜ್ಜಾಂಡ್. ಆಂಡ ಅಕುಲು ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಾತ್ರ ಮಲ್ಪಾವೊಂದಿತ್ತೆರ್.</verse>
				<verse number="17">ಪೇತ್ರೆ ಯೋಹಾನೆ ಅಕ್ಲೆ ತರೆ ಮಿತ್ತ್ ಕೈ ದೀನಗ ಅಕುಲು ಪರಿಶುದ್ಧಾತ್ಮ ಪಡೆವೊಂಡೆರ್.</verse>
				<verse number="18">ಅಪೊಸ್ತಲೆರ್ ಕೈ ದೀಪಿನೆಡ್ದ್ ಪರಿಶುದ್ಧಾತ್ಮ ಬರ್ಪಿನೆನ್ ಸೀಮೋನೆ ತೂದು ದುಡ್ಡು ತೋಜಪಾದ್</verse>
				<verse number="19">ಯಾನ್ ಏರೆನ ಮಿತ್ತ್ ಕೈ ದೀಪೆನಾ ಅಕುಲುಲಾ ಪರಿಶುದ್ಧಾತ್ಮ ಪಡೆಪಿಲೆಕ್ಕ ಈ ಅಧಿಕಾರೊನು ಎಂಕ್‌ಲಾ ಕೊರ್ಲೆ ಪಂಡೆ.</verse>
				<verse number="20">ಆಂಡ ಪೇತ್ರೆ ಆಯಗ್, ನಿನ ದುಡ್ಡು ನಿನಡೊಪ್ಪನೇ ಹಾಳಾದ್ ಪೋವಡ್. ದೇವೆರೆ ಉಡಿಗೆರೆನ್ ದುಡ್ಡುಡು ದೆತ್ತೊನೊಲಿ ಅಂದ್‌ದ್ ಎನ್ನಿಯನಾ?</verse>
				<verse number="21">ಈ ಸೇವೆಡ್ ನಿಕ್ಕ್ ವಾ ಪಾಲ್‌ಲಾ ಇಜ್ಜಿ, ವಾ ಹಕ್ಕ್‌ಲಾ ಇಜ್ಜಿ. ನಿನ ಉಡಲ್ ದೇವೆರೆ ಎದುರು ಸರಿ ಇಜ್ಜಿ.</verse>
				<verse number="22">ಅಂಚಾಯಿನೆಡ್ದ್ ಈ ನಿನ ದುಷ್ಟತನೊಡ್ದು ಪಶ್ಚಾತಾಪ ಪಡೆಲ. ಕರ್ತವೆ ನಿನ ಉಡಲ್‌ದ ದುಷ್ಟ ಆಲೋಚನೆನ್ ಮಾಪು ಮಲ್ಪೆರೆ ಆಯಡ ಪ್ರಾರ್ಥನೆ ಮಲ್ಪುಲ.</verse>
				<verse number="23">ದಾಯೆಗ್ ಪಂಡ ಈ ಪಡಿಕೆಂತಿನ ವಿಷೊಟ್ಲಾ ಅನ್ಯಾಯದ ಬಲೆಟ್ಲಾ ತಿಕ್ಕ್‌ದುಲ್ಲ ಅಂದ್‌ದ್ ತೋಜುಂಡು.</verse>
				<verse number="24">ಐಕ್ ಸೀಮೋನೆ, ನಿಕುಲು ಪಂಡಿನ ಸಂಗತಿಲೆಡ್ ಒವುಲಾ ಎನ ಮಿತ್ತ್ ಬರಂದಿಲೆಕ್ಕ ಎಂಕಾದ್ ನಿಕುಲೇ ಕರ್ತವಡ ಪ್ರಾರ್ಥನೆ ಮಲ್ಪುಲೆ ಅಂದ್‌ದ್ ಪಂಡೆ.</verse>
				<verse number="25">ಇಂಚಾದುಪ್ಪುನಗ ಅಕುಲು ಕರ್ತವ ಪಾತೆರೊಲೆನ್ ಪಾತೆರ್‌ದ್ ಎಡ್ಡೆ ಸಾಕ್ಷಿ ಕೊರ್ದು ಸಮಾರ್ಯದಾಕುಲೆನ ಕೆಲವು ಊರುಡು ಸುವಾರ್ತೆನ್ ಸಾರಿಯೊಂದು ಯೆರೂಸಲೇಮುಗು ಪಿರ ಬತ್ತೆರ್.</verse>
				<verse number="26">ಆತಾನಗ ಕರ್ತವನ ದೂತೆ ಫಿಲಿಪ್ಪುಗು, “ಈ ಲಕ್ಕ್‌ದ್ ತೆನ್‌ಕಯಿಗ್ ಪೋದು ಯೆರೂಸಲೇಮುಡ್ದು ಗಾಜಗ್ ಪೋಪಿನ ಕಾಡ್ ಸಾದಿಡ್ ಪೋಲ” ಪಂಡ್ದ್ ಪಂಡೆ.</verse>
				<verse number="27">ಆಯೆ ಪಿದಾಡ್ದ್ ಪೋಯೆ; ಪೋವೊಂದುಪ್ಪುನಗ ಐಥಿಯೋಪ್ಯದ ಒರಿ ನರಮಾನಿನ್ ತೂಯೆ. ಆಯೆ ಕಂಚುಕಿ ಐಥಿಯೋಪ್ಯದ ರಾಣಿ ಆದಿತ್ತಿನ ಕಂದಾಕೆನ ಕೈ ತಿರ್ತ್ ಮಲ್ಲ ಅಧಿಕಾರಿಲಾ ಆಲೆನ ಮಾತ ಖಜಾನೆದ ಉಸ್ತುವಾರಿ ತೂಪಿನಾಯೆಲಾ ಆದಿತ್ತೆ. ಆಯೆ ಆರಾಧನೆಗಾದ್ ಯೆರೂಸಲೇಮುಗು ಬತ್ತ್‌ದಿತ್ತೆ</verse>
				<verse number="28">ಆಯೆ ಪಿರ ಪೋವೊಂದುಪ್ಪುನಗ ತನ ರಥೊಟು ಕುಲ್ಲೊಂದು ಯೆಶಾಯೆ ಪ್ರವಾದಿನ ಗ್ರಂಥೊನು ಓದೊಂದಿತ್ತೆ.</verse>
				<verse number="29">ದೇವೆರಾತ್ಮ ಫಿಲಿಪ್ಪುಗು ಈ ಆ ರಥಥ ಕೈತಲ್‌ ಪೋದು ಐತ ಒಟ್ಟುಗೇ ನಡಪುಲ ಅಂದ್‌ದ್ ಪಂಡೆ.</verse>
				<verse number="30">ಫಿಲಿಪ್ಪು ಪಾರ್‌ಪೋದು ಆ ಕಂಚುಕಿ ಯೆಶಾಯೆ ಪ್ರವಾದಿನ ಗ್ರಂಥೊನು ಓದುನೆನ್ ಕೇಂಡ್ದ್ ಅಂದಾ ಈ ಓದುನವು ನಿಕ್ಕ್ ಅರ್ಥ ಆಪುಂಡಾ?</verse>
				<verse number="31">ಅಂದ್‌ದ್ ಕೇನ್ನಗ ಆಯೆ, “ಏರಾಂಡಲಾ ಐತ ಅರ್ಥ ಎಂಕ್ ಪಂಡಿಜಾಂಡ ಎಂಕ್ ಎಂಚ ಅರ್ಥ ಆಪುಂಡು?” ಅಂದ್‌ದ್ ಈ ರಥೊನು ಮಿತ್ತಾರ್ದ್ ಎನ ಕೈತಲ್‌ ಕುಲ್ಲು ಅಂದ್‌ದ್ ಫಿಲಿಪ್ಪುಡ ನಟ್ಟೊಂಡೆ.</verse>
				<verse number="32">ಆಯೆ ಓದೊಂದಿತ್ತಿನ ಶಾಸ್ತ್ರದ ಬರವು ಇಂಚ ಉಂಡು, “ಕುದ್ಪೆರೆ ಕೊನೊಪಿನ ಕುರಿತಲೆಕ್ಕ ಆಯನ್ ಕೊನೊಯೆರ್; ಕುರಿತ್ತ ಕಿನ್ನಿ ಕುಜಲ್‌ನ್ ಕತ್ತೆರ್‌ನಾಯನ ಎದುರುಡು ಮನಿಪಂದೆ ಉಂತುಲೆಕ್ಕ ಆಯೆ ಬಾಯಿ ಜತ್ತಿನೆ ಇಜ್ಜಿ.</verse>
				<verse number="33">ಆಯಗ್ ಉಂಡಾಯಿ ಕಷ್ಟದ ಮಿತ್ತ್ ನ್ಯಾಯದಾಂತೆ ಪೋಂಡು; ಆಯನ ಸಂತಾನದ ಸಂಗತಿಡ್ ಪನಿಯೆರೆ ದಾದ ಉಂಡು? ಆಯನ ಜೀವೊನು ಈ ಭೂಮಿಡ್ದ್ ದೆತ್ತ್‌ದ್ ಬುಡಿಯರತ್ತಾ.”</verse>
				<verse number="34">ಕಂಚುಕಿ, “ಈ ಪಾತೆರದ ಸಂಗತಿಡ್, ಪ್ರವಾದಿ ಉಂದೆನ್ ಏರೆನ ಸಂಗತಿಡ್ ಪನ್ಪೆ? ತನ ವಿಷಯೊಡಾ ಇಜ್ಜಿಂಡ ಬೊಕ್ಕೊರಿಯನ ವಿಷಯೊಡಾ? ದಯ ಮಲ್ತ್‌ದ್ ಪನೊಡು,” ಅಂದ್‌ದ್ ಫಿಲಿಪ್ಪುನು ನಟ್ಟೊನ್ವೆ.</verse>
				<verse number="35">ಫಿಲಿಪ್ಪು ಅವ್ವೇ ಶಾಸ್ತ್ರದ ಆಧಾರ ಮಲ್ತೊಂದು ಪಾತೆರಿಯೆರೆ ಸುರು ಮಲ್ತ್‌ದ್ ಆಯಗ್ ಯೇಸುನ ವಿಷಯದ ಸುವಾರ್ತೆ ತೆರಿಪಾಯೆ.</verse>
				<verse number="36">ಅಕುಲು ಸಾದಿಡ್ ಪೋವೊಂದುಪ್ಪುನಗ ನೀರ್‌ದ ಕೈತಲ್‌ ಬತ್ತೆರ್. ಕಂಚುಕಿ, “ತೂಲ, ಮೂಲು ನೀರ್ ಉಂಡು; ಎಂಕ್ ನೀರ್‌ದ ದೀಕ್ಷಾಸ್ನಾನ ಆಪಿನೆಕ್ಕ್ ಅಡ್ಡಿ ದಾಲ ಉಂಡಾ?” ಅಂದ್‌ದ್</verse>
				<verse number="37">ರಥೊನು ಉಂತಾಯೆರೆ ಅಪ್ಪಣೆ ಕೊರಿಯೆ. ಫಿಲಿಪ್ಪುಲಾ ಕಂಚುಕಿಲಾ ಇರ್ವೆರ್‌ಲಾ ನೀರ್‌ದ ಉಲಯಿ ಜತ್ತೆರ್. ಫಿಲಿಪ್ಪು ಆಯಗ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾಯೆ.</verse>
				<verse number="38"></verse>
				<verse number="39">ಅಕುಲು ನೀರ್ ಬುಡ್ದು ಮಿತ್ತ್ ಬನ್ನಗ ಕರ್ತವ ಆತ್ಮೆ ಫಿಲಿಪ್ಪುನು ದೆರ್ತೊಂದು ಪೋಂಡು. ಕಂಚುಕಿ ಆಯನ್ ಬೊಕ್ಕ ತೂಯಿನೇ ಇಜ್ಜಿ. ಕಂಚುಕಿ ಸಂತೋಷೊಡು ತನ ಸಾದಿ ಪತ್ತೊಂದು ದುಂಬು ಪೋಯೆ.</verse>
				<verse number="40">ಬೊಕ್ಕ ಫಿಲಿಪ್ಪು ಅಜೋತುಡು ತೂವೆರೆ ತಿಕ್ಕಿಯೆ, ಅಲ್ತ್‌ಡ್ದ್ ಕೈಸರೆಯಗ್ ಮುಟ್ಟುನೆಂಗೆ ಮಾತ ಊರುಲೆಡ್ ತಿರ್ಗೊಂದು ಸುವಾರ್ತೆ ಸಾರಿಯೆ.</verse>
			</chapter>
			<chapter number="9">
				<verse number="1">ಆಂಡ ಸೌಲು ಕರ್ತವ ಶಿಷ್ಯೆರೆ ಮಿತ್ತ್ ನನಲಾತ್ ಗರ್ವೊಡು ಪೋಡಿಯವೊಂದುಲಾ ಅಕ್ಲೆನ್ ಕೆರೊಡಂದ್‌ದ್‌ಲಾ ಪ್ರಧಾನಯಾಜಕನ ಕೈತಲ್‌ ಪೋಯೆ.</verse>
				<verse number="2">ಈ ಪೊಸ ಮಾರ್ಗೊಗು ಸೇರಿನಾಕುಲು ಏರಾಂಡಲಾ ತಿಕ್ಕ್ಂಡ ಅಕುಲು ಅಂಜೊವುಲಾಂಡಲಾ ಸರಿ, ಪೊಂಜೊವುಲಾಂಡಲಾ ಸರಿ, ಯಾನ್ ಅಕ್ಲೆಗ್ ಕೋಳ ಪಾಡ್ದ್ ಯೆರೂಸಲೇಮುಗು ಕನಪಿಲೆಕ್ಕ ದಮಸ್ಕೊಡುಪ್ಪುನ ಮಾತ ಸಭಾಮಂದಿರೊಲೆಗ್ ಈ ಪತ್ರ ಕೊರೊಡು ಅಂದ್‌ದ್ ಆಯಡ ನಟ್ಟೊಂಡೆ.</verse>
				<verse number="3">ಆಯೆ ಪ್ರಯಾಣ ಮಲ್ತೊಂದು ದಮಸ್ಕದ ಕೈತಲ್‌ ಬನ್ನಗ ಒರನೆ ಬಾನದ ಉಲಯಿಡ್ದ್ ಒಂಜಿ ಬೊಲ್ಪು ಆಯನ ಸುತ್ತಲಾ ಮಿಂಚಿಂಡ್.</verse>
				<verse number="4">ಅಪಗನೆ ಸೌಲು ನೆಲಕ್ ಬೂರಿಯೆ, ಸೌಲಾ, ಸೌಲಾ, ಈ ಎಂಕ್ ದಾಯೆಗ್ ಭಂಗ ಕೊರ್ಪ ಅಂದ್‌ದ್ ಪನ್ಪಿನ ಸ್ವರೊನು ಕೇಂಡೆ.</verse>
				<verse number="5">ಐಕ್ ಸೌಲೆ, “ಕರ್ತವಾ ಈ ಏರ್?” ಕೇಂಡಿನೆಕ್ಕ್ ಕರ್ತವೆ, “ಈ ಭಂಗ ಕೊರ್ಪಿನ ಯೇಸು ಯಾನ್.</verse>
				<verse number="6">ಈ ಇತ್ತೆ ಲಕ್ಕ್‌ದ್ ಊರುದುಲಯಿ ಪೋಲ. ಈ ಮಲ್ಪೊಡಾಯಿನ ಬೇಲೆ ಅಲ್ಪ ನಿಕ್ಕ್ ತೆರಿದ್ ಬರು,” ಅಂದ್‌ದ್ ಪಂಡೆ.</verse>
				<verse number="7">ಆಯನ ಒಟ್ಟುಗು ಪ್ರಯಾಣ ಮಲ್ತೊಂದಿತ್ತಿನಾಕುಲು ಸ್ವರೊನು ಮಾತ್ರ ಕೇಂಡ್ದ್ ಏರೆನ್ಲಾ ತೂವಂದೆ ಬೆಪ್ಪೆರಾದ್ ಉಂತಿಯೆರ್.</verse>
				<verse number="8">ಸೌಲು ನೆಲಡ್ದ್ ಲಕ್ಕ್‌ದ್ ಉಂತುದು ಕಣ್ಣ್ ಜಪ್ಪುನಗ ದಾಲಾ ತೋಜಿಜಿ. ಅಪಗ ಅಕುಲು ಆಯನ್ ಕೈ ಪತ್ತ್‌ದ್ ದಮಸ್ಕದ ಉಲಯಿ ಲೆತ್ತೊಂದು ಪೋಯೆರ್.</verse>
				<verse number="9">ಆಯೆ ಮೂಜಿ ದಿನ ಕಣ್ಣ್ ತೋಜಂದೆ ದಾಲಾ ತಿನಂದೆ, ಪರಂದೆ ಇತ್ತೆ.</verse>
				<verse number="10">ದಮಸ್ಕಡ್ ಅನನೀಯಾ ಪನ್ಪಿ ಒರಿ ಶಿಷ್ಯೆ ಇತ್ತೆ; ಕರ್ತವೆ ದರ್ಶನೊಡು, “ಅನನೀಯಾ,” ಅಂದ್‌ದ್ ಆಯನ್ ಲೆಪ್ಪುನಗ, ಆಯೆ, “ಕರ್ತವಾ, ಇಂದಾ ಯಾನ್ ಉಲ್ಲೆ,” ಪಂಡೆ.</verse>
				<verse number="11">ಕರ್ತವೆ ಆಯಗ್ ಪಂಡೆ, “ಈ ಲಕ್ಕ್‌ದ್ ಸರ್ತ ಸಾದಿ ಪನ್ಪಿ ಓಣಿಗ್ ಪೋದು ಯೂದನ ಇಲ್ಲಡ್ ತಾರ್ಸುದ ಸೌಲು ಪನ್ಪಿನಾಯನ ಸುದ್ಧಿನ್ ಕೇನ್ಲ; ಆಯೆ ಪ್ರಾರ್ಥನೆ ಮಲ್ತೊಂದುಲ್ಲೆ.</verse>
				<verse number="12">ಬೊಕ್ಕ ದರ್ಶನೊಡು ಅನನೀಯಾ ಪನ್ಪಿ ಒರಿ ನರಮಾನಿ ಉಲಯಿ ಬತ್ತ್‌ದ್ ತನ್ಕ್ ಕುಡ ಕಣ್ಣ್ ತೋಜುಲೆಕ್ಕ ಆಯನ ಮಿತ್ತ್ ಕೈ ದೀದ್ ಪ್ರಾರ್ಥನೆ ಮಲ್ಪುನೆನ್ ತೂಯೆ.”</verse>
				<verse number="13">ಐಕ್ ಅನನೀಯೆ, “ಕರ್ತವಾ, ಈ ನರಮಾನಿ ಯೆರೂಸಲೇಮುಡು ನಿನನ್ ನಂಬಿನ ದೇವಜನೊಕುಲೆಗ್ ಮಸ್ತ್ ಕಷ್ಟ ಕೊರೊಂದುಲ್ಲೆ ಪನ್ಪಿನ ಮಸ್ತ್ ಜನೊಕುಲೆಡ್ದ್ ಕೇಂಡ್ದೆ.</verse>
				<verse number="14">ಬೊಕ್ಕ ಮುಲ್ಪಲಾ ನಿನ ಪುದರ್‌ಡ್ ಅರಿಕೆ ಮಲ್ಪುನಾಕುಲೆಗ್ ಕೋಳ ಪಾಡ್ಪಾವುನ ಅಧಿಕಾರೊನು ಪ್ರಧಾನಯಾಜಕೆರೆಡ್ದ್ ಒಪ್ಪಿಗೆ ದೆತ್ತೊಂದು ಬೈದೆ,” ಪಂಡೆ.</verse>
				<verse number="15">ಕರ್ತವೆ ಆಯಗ್, “ಈ ಪೋಲ; ಆ ನರಮಾನಿ ಪಿದಯಿದ ಜನೊಕುಲೆಗ್ಲಾ ಅರಸರೆಗ್ಲಾ ಇಸ್ರಾಯೇಲ್ಯೆರೆಗ್ಲಾ ಎನ ಪುದರ್‌ಡ್ ಸೇವೆ ಮಲ್ಪೆರೆಗಾದ್ ಬೊಕ್ಕ ಎನ ಪುದರ್ ಸಾರಿಯೆರೆಗಾದ್‌ಲಾ ಯಾನ್ ಆಯನ್ ಅಜತ್ ದೆತ್ತೊಂದಿನಾಯೆ ಆದುಲ್ಲೆ.</verse>
				<verse number="16">ಆಯೆ ಎನ ಪುದರ್‌ಡ್ದ್ ಮಸ್ತ್ ಭಂಗ ಅನುಭವ ಮಲ್ಪೊಡು ಪನ್ಪಿನೆನ್ ಯಾನೇ ಆಯಗ್ ತೋಜಾವೆ,” ಅಂದ್‌ದ್ ಪಂಡೆ.</verse>
				<verse number="17">ಅಪಗ ಅನನೀಯೆ ಪಿದಾಡ್ದ್ ಆ ಇಲ್ಲದ ಉಲಯಿ ಪೋದು ಸೌಲುನ ಮಿತ್ತ್ ತನ ಕೈ ದೀದ್ ಸೌಲಾ, ಎನ ಸಹೋದ್ರಾ, ಈ ಬತ್ತಿ ಸಾದಿಡ್ ನಿನಡ ಪಾತೆರಿನ ಕರ್ತವೆ ಆದುಪ್ಪು ಯೇಸು ನಿಕ್ಕ್ ಕಣ್ಣ್ ತೋಜುಲೆಕ್ಕಲಾ ಈ ಪರಿಶುದ್ಧಾತ್ಮೊಡು ದಿಂಜಿನಾಯೆ ಆವೊಡು ಅಂದ್‌ದ್‌ಲಾ ಎನನ್ ನಿನ ಕೈತಲ್‌ ಕಡಪುಡ್ದೆ.</verse>
				<verse number="18">ಅಪಗನೆ ಆಯನ ಕಣ್ಣ್‌ಡ್ದ್ ಪರೆ ತಿರ್ತ್ ಬೂರ್ದು ಆಯಗ್ ಕಣ್ಣ್ ತೋಜ್ಂಡ್. ಆಯೆ ಲಕ್ಕ್‌ದ್ ಪೋದು ನೀರ್‌ದ ದೀಕ್ಷಾಸ್ನಾನ ದೆತ್ತೊಂಡೆ.</verse>
				<verse number="19">ಐಡ್ದ್ ಬೊಕ್ಕ ವಣಸ್ ಮಲ್ತ್‌ದ್ ಬಲ ಪಡೆಯೆ. ಬೊಕ್ಕ ಆಯೆ ದಮಸ್ಕೊಡಿತ್ತಿನ ಶಿಷ್ಯೆರ್‌ನ ಒಟ್ಟುಗು ಒಂತೆ ದಿನ ಇತ್ತೆ.</verse>
				<verse number="20">ಆಯೆ ತಡ ಮಲ್ಪಂದೆ ಸಭಾಮಂದಿರೊಲೆಡ್ ಯೇಸುನ ಬಗೆಟ್ ಆಯೆನೇ ದೇವೆರೆ ಮಗೆ ಅಂದ್‌ದ್ ಸಾರಿಯೆರೆ ಸುರು ಮಲ್ತೆ.</verse>
				<verse number="21">ಕೇಂಡಿನಾಕುಲು ಮಾತೆರ್ಲಾ ಕಂಗಾಲಾದ್ ಈ ಪುದರ್ ಅರಿಕೆ ಮಲ್ಪುನಾಕುಲೆನ್ ಯೆರೂಸಲೇಮುಡು ಹಾಳ್ ಮಲ್ತಿನಾಯೆ ಇಂಬೆ ಅತ್ತಾ? ಅಂಚಿನಾಕುಲೆನ್ ಕೋಳ ಪಾಡ್ದ್ ಪ್ರಧಾನಯಾಜಕೆರೆ ಕೈತಲ್‌ ಲೆತ್ತೊಂದು ಪೋವೊಡಂದ್ದೇ ಇಡೆಗ್ ಬೈದೆ ಅತ್ತಾ ಅಂದ್‌ದ್ ಪಾತೆರೊಂಡೆರ್.</verse>
				<verse number="22">ಆಂಡ ಸೌಲು ನನಲಾ ಹೆಚ್ಚ್ ಬಲ ಪಡೆದ್ ಯೇಸು ಆಯೆನೇ ಕ್ರಿಸ್ತೆ ಆದುಲ್ಲೆ ಅಂದ್‌ದ್ ದೃಢ ಮಲ್ತ್‌ದ್ ದಮಸ್ಕೊಡಿತ್ತಿನ ಯೆಹೂದ್ಯೆರೆನ್ ಪಿರ ಪಾತೆರಂದಿಲೆಕ್ಕ ಮಲ್ತೆ.</verse>
				<verse number="23">ಕೆಲವು ದಿನ ಕರಿಬೊಕ್ಕ ಯೆಹೂದ್ಯೆರ್ ಆಯನ್ ಕೆರೊಡು ಅಂದ್‌ದ್ ಉಪಾಯ ಮಲ್ತೊಂಡೆರ್.</verse>
				<verse number="24">ಅಕ್ಲೆನ ಉಪಾಯ ಸೌಲುಗು ತೆರಿದ್ ಬತ್ತ್ಂಡ್. ಆಯನ್ ಕೆರ್ಪಿನೆಕ್ಕಾದ್ ಅಕುಲು ರಾತ್ರೆ ಪಗೆಲ್ ಊರುದ ಬಾಕಿಲ್‌ಡ್ ಕಾತೊಂದಿತ್ತೆರ್.</verse>
				<verse number="25">ಆಂಡ ಆಯನ ಶಿಷ್ಯೆರ್ ರಾತ್ರೆದ ಪೊರ್ತುಡು ಆಯನ್ ಲೆತ್ತೊಂದು ಪೋದು ಒಂಜಿ ಪುಡಯಿಡ್ ಕುಲ್ಲಾದ್ ಗೋಡೆಡ್ದ್ ತಿರ್ತ್ ಜಪುಡಾಯೆರ್.</verse>
				<verse number="26">ಆಯೆ ಯೆರೂಸಲೇಮುಗು ಬತ್ತ್‌ದ್ ಶಿಷ್ಯೆರೆ ಒಟ್ಟುಗು ಕೂಡಿಯೆರೆ ತೂನಗ ಮಾತೆರ್ಲಾ ಆಯನ್ ಯೇಸುನ ಶಿಷ್ಯೆ ಅತ್ತ್ ಅಂದ್‌ದ್ ನಂಬಂದೆ ಆಯಗ್ ಪೋಡಿಯೆರ್.</verse>
				<verse number="27">ಆಂಡ ಬಾರ್ನಬೆ ಆಯನ್ ಲೆತ್ತೊಂದು ಅಪೊಸ್ತಲೆರೆನ ಕೈತಲ್‌ ಪೋಯೆ. ಸೌಲು ಸಾದಿಡ್ ಕರ್ತವನ್ ತೂಯಿನೆನ್ಲಾ ಕರ್ತವೆ ಆಯನ ಒಟ್ಟುಗು ಪಾತೆರ್ದಿನೆನ್ಲಾ ದಮಸ್ಕದ ಉಲಯಿ ಧೈರ್ಯೊಡು ಯೇಸುನ ಪುದರ್‌ಡ್ ಸಾರಿನೆನ್ಲಾ ಅಕ್ಲೆಗ್ ಬುಡ್ಪಾದ್ ಪಂಡೆ.</verse>
				<verse number="28">ಐಡ್ದ್ ಬೊಕ್ಕ ಸೌಲು ಅಪೊಸ್ತಲೆರೆ ಒಟ್ಟುಗು ಯೆರೂಸಲೇಮುಡು ಇತ್ತೆ. ಆಯೆ ಕರ್ತವನ ಪುದರ್‌ಡ್ ಧೈರ್ಯೊಡು ಸಾರಿಯೆ. ಬೊಕ್ಕ ಗ್ರೀಕ್ ಭಾಷೆ ಪಾತೆರುನ ಯೆಹೂದ್ಯೆರೆನ ಒಟ್ಟಗು ಪಾತೆರ್‌ದ್ ತರ್ಕ ಮಲ್ತೊಂದಿತ್ತೆ. ಆಂಡ ಅಕುಲು ಆಯನ್ ಕೆರಿಯೆರೆ ತೂಯೆರ್.</verse>
				<verse number="29"></verse>
				<verse number="30">ಉಂದು ಸಹೋದ್ರೆರೆಗ್ ತೆರಿನೆಡ್ದ್ ಅಕುಲು ಆಯನ್ ಕೈಸರೆಯಗ್‌ ಲೆತ್ತೊಂದು ಪೋದು ಅಲ್ತ್‌ಡ್ದ್ ತಾರ್ಸೊಗು ಕಡಪುಡಿಯೆರ್.</verse>
				<verse number="31">ಇಂಚಾದುಪ್ಪುನಗ ಯೂದಾಯ ಗಲಿಲಾಯ ಸಮಾರ್ಯೊಡಿತ್ತಿನ ಸಭೆಟ್ ಸಮಾಧಾನ ಉಂಡಾಂಡ್. ಅಕುಲು ತನ್ಕುಲೆ ಉಲಯಿ ಭಕ್ತಿಡ್ ಅಭಿವೃದ್ಧಿ ಆದ್, ಕರ್ತವ ಪೋಡಿಗೆಡ್ ನಡತೊಂದು ಪರಿಶುದ್ಧಾತ್ಮದ ಸಮಜಯಿಸಿಗೆಡ್ ಬಲ ಪಡೆದ್ ಸಭೆ ಹೆಚ್ಚಾಂಡ್.</verse>
				<verse number="32">ಪೇತ್ರೆ ಮಾತ ಕಡೆಟ್ಲಾ ಪ್ರಯಾಣ ಮಲ್ತೊಂದುಪ್ಪುನಗ ಲುದ್ಧೊಡುಪ್ಪು ದೇವಜನೊಕುಲೆನ ಕೈತಲ್‌ ಬತ್ತೆ.</verse>
				<verse number="33">ಅಲ್ಪ ಸಂದ್‌ವಾತದಾಯೆ ಎಣ್ಮ ವರ್ಸೊಡ್ದಿಂಚಿ ಪಜೆತ ಮಿತ್ತ್‌ ಇತ್ತಿನ ಐನೇಯೆ ಪನ್ಪಿನ ಒರಿ ನರಮಾನಿನ್ ತೂಯೆ.</verse>
				<verse number="34">ಪೇತ್ರೆ ಆಯಗ್, “ಐನೇಯಾ, ಯೇಸು ಕ್ರಿಸ್ತೆ ನಿನನ್ ಗುಣ ಮಲ್ಪುವೆ. ಈ ಲಕ್ಕ್‌ದ್ ನಿನ ಪಜೆನ್ ಸಮ ಮಲ್ತೊನ್ಲ,” ಅಂದ್‌ದ್ ಪಂಡೆ. ಅಪಗನೆ ಆಯೆ ಲಕ್ಕಿಯೆ.</verse>
				<verse number="35">ಬೊಕ್ಕ ಲುದ್ಧಡ್ಲಾ ಸಾರೋನುಡ್ಲಾ ಉಪ್ಪುನಾಕುಲು ಮಾತೆರ್ಲಾ ಆಯನ್ ತೂದು ಕರ್ತವ ಕಡೆಕ್ಕ್ ತಿರ್ಗಿಯೆರ್.</verse>
				<verse number="36">ಯೊಪ್ಪೊಡು ತಬಿಥಾ ಪನ್ಪಿನ ಒರ್ತಿ ಶಿಷ್ಯೆದಿ ಇತ್ತಲ್. ಆ ಪುದರ್‌ಗ್ ಗ್ರೀಕ್ ಭಾಷೆಡ್ ದೊರ್ಕ ಪನ್ನಗ ಜಿಂಕೆ. ಆಲ್ ಏಪಲಾ ಎಡ್ಡೆ ಕಾರ್ಯೊಲೆನ್ ಬೊಕ್ಕ ಬಡವೆರೆಗ್ ದಾನ ಧರ್ಮೊಲೆನ್ ಮಲ್ತೊಂದಿತ್ತಲ್.</verse>
				<verse number="37">ಆ ಸಮಯೊಡು ಆಲ್ ಸೀಕ್‌ಡ್ ಬೂರ್ದು ಸೈತಲ್, ಬೊಕ್ಕ ಆಲೆನ ಪುಣೊನು ಮೀಪಾದ್ ಉಪ್ಪರಿಗೆಡ್ ದೀಯೆರ್.</verse>
				<verse number="38">ಯೊಪ್ಪೊಗು ಲುದ್ಧ ಕೈತಲ್ ಆದಿತ್ತ್‌ದ್ ಪೇತ್ರೆ ಅಲ್ಪ ಉಲ್ಲೆ ಪನ್ಪಿನೆನ್ ಶಿಷ್ಯೆರ್ ತೆರಿದ್ ರಡ್ಡ್ ಜನೊನು ಆಯನ ಕೈತಲ್‌ ಕಡಪುಡ್ದು, “ಕೂಡ್ಲೆ ಎಂಕುಲೆ ಕೈತಲ್‌ ಬರೊಡು,” ಅಂದ್‌ದ್ ನಟ್ಟೊಂಡೆರ್.</verse>
				<verse number="39">ಪೇತ್ರೆ ಲಕ್ಕ್‌ದ್ ಅಕ್ಲೆನ ಒಟ್ಟುಗು ಪೋಯೆ. ಆಯೆ ಬತ್ತಿನೆನ್ ತೂದು ಆಯನ್ ಉಪ್ಪರಿಗೆಗ್ ಲೆತ್ತೊಂದು ಪೋಯೆರ್. ಅಲ್ಪ ಕಂಡನಿದಾಂತಿನಾಕುಲು ಮಾತೆರ್ಲಾ ಬುಲ್ತೊಂದು ಪೇತ್ರನ ಕೈತಲ್‌ ಉಂತೊಂದು ದೊರ್ಕ ಜೀವೊಡುಪ್ಪನಗ ಮಲ್ತ್ ಕೊರ್ತಿನ ಅಂಗಿಲೆನ್ ಕುಂಟುಲೆನ್ ತೋಜಾಯೆರ್.</verse>
				<verse number="40">ಪೇತ್ರೆ ಅಕ್ಲೆನ್ ಮಾತೆರೆನ್ಲಾ ಪಿದಯಿ ಕಡಪುಡ್ದು ಮುಂಡುಬೂರ್ದು ಪ್ರಾರ್ಥನೆ ಮಲ್ತ್‌ದ್ ಪುಣತ ಕಡೆಕ್ಕ್ ತೂದು, “ತಬಿಥಾ, ಲಕ್ಕ್‌ಲ,” ಪಂಡೆ. ಆಲ್ ಕಣ್ಣ್ ಜತ್ತ್‌ದ್ ಪೇತ್ರನ್ ತೂದು ಲಕ್ಕ್‌ದ್ ಕುಲ್ಲೊಂಡಲ್.</verse>
				<verse number="41">ಆಯೆ ಆಲೆಗ್ ಕೈ ನೀಡ್ದ್ ಲಕ್ಕಾಯೆ. ಬೊಕ್ಕ ದೇವಜನೊಕುಲೆನ್ಲಾ ಕಂಡನಿದಾಂತಿನಾಕುಲೆನ್ಲಾ ಲೆತ್ತ್‌ದ್ ಜೀವೊಡು ಲಕ್ಕಿನಲೆನ್ ಅಕ್ಲೆನ ಎದುರು ಉಂತಾಯೆ.</verse>
				<verse number="42">ಈ ಸುದ್ಧಿ ಯೊಪ್ಪೊಡು ಪೂರ ತೆರಿದ್ ದಿಂಜ ಜನ ಕರ್ತವ ಮಿತ್ತ್ ನಂಬಿಕೆ ದೀಯೆರ್.</verse>
				<verse number="43">ಐಡ್ದ್ ಬೊಕ್ಕ ಪೇತ್ರೆ ಯೊಪ್ಪೊಡು ಚರ್ಮದ ಬೇಲೆ ಮಲ್ಪುನ ಸೀಮೋನು ಕೈತಲ್‌ ದಿಂಜ ದಿನ ಇತ್ತೆ.</verse>
			</chapter>
			<chapter number="10">
				<verse number="1">ಕೈಸರೆಯಡ್ ಕೊರ್ನೇಲಿಯೆ ಪನ್ಪಿನಾಯೆ ಒರಿ ಇತಾಲ್ಯದ ದಂಡ್‌ದ ಶತಾಧಿಪತಿ ಆದಿತ್ತೆ</verse>
				<verse number="2">ಆಯೆ ತನ ಇಲ್ಲದಾಕುಲೆನ ಒಟ್ಟುಗು ದೇವೆರೆಗ್ ಪೋಡಿಯುನಾಯೆಲಾ ಭಕ್ತೆಲಾ ಆದಿತ್ತ್‌ದ್ ಜನೊಕುಲೆಗ್ ಬಾರಿ ದಾನಧರ್ಮ ಮಲ್ತೊಂದು ದೇವೆರೆಗ್ ಏಪಲಾ ಪ್ರಾರ್ಥನೆ ಮಲ್ತೊಂದಿತ್ತೆ.</verse>
				<verse number="3">ಮಧ್ಯಾಹ್ನದ ಸುಮಾರ್ ಮೂಜಿ ಗಂಟೆಗ್ ಆಯಗ್ ಒಂಜಿ ದರ್ಶನೊಡು ಒರಿ ದೇವೆರೆ ದೂತೆ ತನ ಕೈತಲ್‌ ಬತ್ತ್‌ದ್, “ಕೊರ್ನೇಲಿಯಾ,” ಅಂದ್‌ದ್ ಲೆಪ್ಪುನೆನ್ ಸಜ್ಜಿಡ್ ತೂಯೆ.</verse>
				<verse number="4">ಆಯೆ ಆ ದೂತನ್ ದೃಷ್ಟಿ ದೀದ್ ತೂನಗ ಪೋಡಿದ್, “ಕರ್ತವಾ, ದಾನೆ ಬೋಡು?” ಅಂದ್‌ದ್ ಕೇನ್ನಗ, ದೂತೆ ಆಯಗ್, “ನಿನ ಪ್ರಾರ್ಥನೆಲಾ ನಿನ ದಾನಧರ್ಮೊಲುಲಾ ದೇವೆರೆ ಎದುರು ನೆನೆಪುಗು ಮಿತ್ತ್ ಏರ್ದ್ಂಡ್.”</verse>
				<verse number="5">ಇತ್ತೆ ಈ ಯೊಪ್ಪೊಗು ಜನೊಕುಲೆನ್ ಕಡಪುಡ್ದು ಪೇತ್ರೆ ಪನ್ಪಿ ಸೀಮೋನನ್ ಲೆಪ್ಪುಡಾವೊಡು.</verse>
				<verse number="6">ಆಯೆ ಚರ್ಮದ ಬೇಲೆ ಮಲ್ಪುನ ಸೀಮೋನನ ಇಲ್ಲಡ್ ಬುಡಾರ ಮಲ್ತೊಂದುಲ್ಲೆ; ಈ ಸಿಮೋನನ ಇಲ್ಲ್ ಕಡಲ್ದ ಬರಿಟ್ಟ್ ಉಂಡು ಅಂದ್‌ದ್ ಪಂಡೆ.</verse>
				<verse number="7">ಕೊರ್ನೇಲಿಯೆ ತನ ಒಟ್ಟುಗು ಪಾತೆರ್‌ನ ದೂತೆ ಪೋಯಿ ಬೊಕ್ಕ ತನ ಚಾಕ್ರಿದಾಕುಲೆಡ್ ಇರ್ವೆರೆನ್, ಬೊಕ್ಕ ತನ ಕೈತಲ್‌ ಏಪಲಾ ಉಪ್ಪು ಸೈನಿಕೆರೆಡ್ ಒರಿ ದೇವಭಕ್ತನ್ಲಾ ಲೆತ್ತ್‌ದ್</verse>
				<verse number="8">ಅಕ್ಲೆಗ್ ಈ ಸಂಗತಿಲೆನ್ ಪೂರ ಬುಡ್ಪಾದ್ ಪಂಡ್ದ್ ಯೊಪ್ಪೊಗು ಕಡಪುಡಿಯೆ.</verse>
				<verse number="9">ಮನದಾನಿ ಅಕುಲು ಪ್ರಯಾಣ ಮಲ್ತ್‌ದ್ ಆ ಊರುದ ಕೈತಲಾನಗ, ಪೇತ್ರೆ ಸಾಧಾರಣ ಮಧ್ಯಾಹ್ನದ ಪೊರ್ತುಡು ಪ್ರಾರ್ಥನೆ ಮಲ್ಪೆರೆಗಾದ್ ಉಪ್ಪರಿಗೆಗ್ ಮಿತ್ತರಿಯೆ.</verse>
				<verse number="10">ಆಯಗ್ ಮಸ್ತ್ ಬಡವು ಆದಿತ್ತ್ಂಡ್ ವಣಸ್ ಮಲ್ಪೊಡು ಅಂದ್‌ದ್ ಎನ್ನ್‌ನಗ ವಣಸ್‌ಗ್ ತಯಾರ್ ಆವೊಂದಿತ್ತ್ಂಡ್.</verse>
				<verse number="11">ಅಪಗ ಒಂಜಿ ದರ್ಶನ ಆಂಡ್. ಆಯೆ ಬಾನ ಜತ್ತ್‌ದ್ ನಾಲ್ ಮೂಲೆಲಿತ್ತಿ ಮಲ್ಲ ಮಂದ್ರಿದ ಲೆಕ್ಕನೆ ಇತ್ತಿ ಜೋಳಿಗೆ ಭೂಮಿದ ತಿರ್ತ್ ಬರ್ಪಿನೆನ್ ತೂಯೆ.</verse>
				<verse number="12">ಐಟ್ಟ್ ತರತರತ ಪಶುಕುಲುಲಾ ಕಾಡ್‌ಮೃಗೊಲುಲಾ ನೆಲತ್ತ ಮಿತ್ತ್ ಪರಪುನ ಕ್ರಿಮಿಕೀಟೊಲುಲಾ ಬಾನೊಡು ರಾಪಿನ ಪಕ್ಕಿಲುಲಾ ಇತ್ತ್ಂಡ್.</verse>
				<verse number="13">ಅಪಗ ಆಯಗ್ ಒಂಜಿ ಸ್ವರ ಕೇಂಡ್, “ಪೇತ್ರ, ಲಕ್ಕ್‌ದ್ ಕುತ್ತುದು ತಿನ್ಲ.”</verse>
				<verse number="14">ಐಕ್ ಪೇತ್ರೆ, “ಬೊಡ್ಚಿ ಕರ್ತವ, ಯಾನ್ ಏಪಲಾ ಪೇಸಿಗೆದೆನ್ ಅಶುದ್ಧದೆನ್ ತಿಂತಿನಾಯೆ ಅತ್ತ್,” ಅಂದ್‌ದ್ ಪಂಡೆ.</verse>
				<verse number="15">ದೇವೆರ್ ಶುದ್ಧ ಮಲ್ತಿನೆನ್ ಈ ಅಶುದ್ಧ ಅಂದ್‌ದ್ ಪನೊಡ್ಚಿ. ಕುಡ ರಡ್ಡನೆ ಸರ್ತಿ ಆಯಗ್ ಸ್ವರ ಕೇಂಡ್.</verse>
				<verse number="16">ಇಂಚ ಮೂಜಿ ಸರ್ತಿ ಆಯಿ ಕೂಡ್ಲೆ ಆ ಜೋಳಿಗೆ ಬಾನದ ಉಲಯಿ ಸೇರ್‌ಂಡ್.</verse>
				<verse number="17">ಪೇತ್ರೆ ತಾನ್ ತೂಯಿನ ದರ್ಶನದ ಅರ್ಥ ದಾನೆ ಆದುಪ್ಪು ಅಂದ್‌ದ್ ನೆನೆತೊಂದುಪ್ಪುನಗನೇ, ಕೊರ್ನೇಲಿಯೆ ಕಡಪುಡ್ದಿನ ಆ ನರಮಾನಿಲು ಸೀಮೋನನ ಇಲ್ಲ್ ಒವು ಅಂದ್‌ದ್ ಕೇನೊಂದು ಆ ಇಲ್ಲದ ಬಾಕಿಲ್‌ಡ್ ಉಂತಿಯೆರ್.</verse>
				<verse number="18">“ಪೇತ್ರೆ ಪನ್ಪಿ ಸೀಮೋನು ಮುಲ್ಪ ಉಲ್ಲೆನಾ,” ಅಂದ್‌ದ್ ಲೆತ್ತ್‌ದ್ ಕೇಂಡೆರ್.</verse>
				<verse number="19">ಪೇತ್ರೆ ಆ ದರ್ಶನದ ಸಂಗತಿಡ್ ಯೋಚನೆ ಮಲ್ತೊಂದುಪ್ಪುನಗ ದೇವೆರೆ ಆತ್ಮೆ ಆಯಗ್, “ತೂಲ, ಮೂವೆರ್ ನಿನನ್ ಕೇನೊಂದುಲ್ಲೆರ್,</verse>
				<verse number="20">ಈ ತಿರ್ತ್ ಜತ್ತ್‌ದ್ ದಾಲಾ ಸಂಶಯ ಮಲ್ಪಂದೆ ಅಕ್ಲೆಡೊಪ್ಪ ಪೋಲ, ಯಾನೇ ಅಕ್ಲೆನ್ ಕಡಪುಡ್ದೆ,” ಅಂದ್‌ದ್ ಪಂಡೆ.</verse>
				<verse number="21">ಪೇತ್ರೆ ತಿರ್ತ್ ಜತ್ತ್‌ದ್ ಆ ಜನೊಕುಲೆ ಕೈತಲ್‌ ಬತ್ತ್‌ದ್, “ಇಂದಾ, ನಿಕುಲು ಕೇನೊಂದುಪ್ಪುನಾಯೆ ಯಾನೇ; ನಿಕುಲು ಇಡೆಗ್ ದಾಯಗ್ ಬೈದರ್?” ಅಂದ್‌ದ್ ಕೇಂಡೆ.</verse>
				<verse number="22">ಐಕ್ ಅಕುಲು, “ಕೊರ್ನೇಲಿಯೆ ಪನ್ಪಿ ಒರಿ ಶತಾಧಿಪತಿ ಉಲ್ಲೆ. ಆಯೆ ನೀತಿವಂತೆಲಾ ದೇವೆರೆಗ್ ಪೋಡಿಯುನಾಯೆಲಾ ಯೆಹೂದ್ಯೆರೆಡ್ದ್ ಎಡ್ಡೆ ಪುದರ್ ದೆತ್ತೊಂಡಿನಾಯೆಲಾ ಆದುಲ್ಲೆ; ನಿನನ್ ತನ ಇಲ್ಲಗ್ ಲೆಪುಡಾದ್ ಈ ಪನ್ಪಿನ ಸಂಗತಿಲೆನ್ ಕೇನೊಡು ಅಂದ್‌ದ್ ಪರಿಶುದ್ಧ ದೂತಡ್ದ್ ಆಯಗ್ ಅಪ್ಪಣೆ ಆತ್ಂಡ್,” ಅಂದ್‌ದ್ ಪಂಡೆರ್.</verse>
				<verse number="23">ಪೇತ್ರೆ ಉಂದೆನ್ ಕೇಂಡ್ದ್ ಅಕ್ಲೆನ್ ಉಲಯಿ ಲೆತ್ತ್‌ದ್ ಉಪಚಾರ ಮಲ್ತೆ. ಮನದಾನಿ ಆಯೆ ಲಕ್ಕ್‌ದ್ ಅಕ್ಲೆನ ಒಟ್ಟುಗು ಪಿದಾಡಿಯೆ; ಯೊಪ್ಪೊಡಿತ್ತಿನ ಸಹೋದ್ರೆರೆಡ್ ಕೆಲೆವೆರ್ ಆಯನ ಒಟ್ಟುಗು ಪೋಯೆರ್.</verse>
				<verse number="24">ಮನದಾನಿ ಆಯೆ ಕೈಸರೆಯಗ್‌ ಸೇರಿಯೆ. ಕೊರ್ನೇಲಿಯೆ ತನ ಸಂತಾನದಾಕುಲೆನ್ಲಾ ಮುಟ್ಟದ ಸ್ನೇಹಿತೆರೆನ್ಲಾ ಲೆತ್ತ್‌ದ್ ಪೇತ್ರನ್ ಕಾತೊಂದಿತ್ತೆ.</verse>
				<verse number="25">ಪೇತ್ರೆ ಬನ್ನಗ ಕೊರ್ನೇಲಿಯೆ ಆಯನ್ ಎದುಕೊಂದು ಆಯನ ಕಾರ್‌ಗ್ ಅಡ್ಡಬೂರ್ದು ವಂದನೆ ಮಲ್ತೆ.</verse>
				<verse number="26">ಆಂಡ ಪೇತ್ರೆ ಆಯನ್ ಲಕ್ಕಾದ್, “ಲಕ್ಕ್‌ಲ, ಯಾನ್ಲಾ ನಿನ ಲೆಕ್ಕ ಒರಿ ನರಮಾನಿ.” ಅಂದ್‌ದ್ ಪಂಡೆ.</verse>
				<verse number="27">ಪೇತ್ರೆ ಕೊರ್ನೇಲಿಯನ ಒಟ್ಟುಗು ಪಾತೆರೊಂದು ಇಲ್ಲದ ಉಲಯಿ ಬತ್ತೆ. ಪೇತ್ರೆ ಅಲ್ಪ ಕೂಡ್ದಿನ ಜನೊಕುಲೆನ ಒಂಜಿ ಮಲ್ಲ ಗುಂಪುನು ತೂಯೆ.</verse>
				<verse number="28">ಪೇತ್ರೆ ಅಕ್ಲೆಡ, “ಯೆಹೂದ್ಯೆರ್ ಪಿದಯಿದ ಜನೊಕುಲೆ ಒಟ್ಟುಗು ಕೂಡೊನುನವು ಅತ್ತ್‌ಡ ಅಕ್ಲೆ ಒಟ್ಟುಗು ವ್ಯವಹಾರ ಮಲ್ಪುನವು ಯೆಹೂದ್ಯೆರೆನ ಸಂಪ್ರದಾಯೊಗು ಅನ್ಯಾಯ ಆದುಂಡು ಅಂದ್‌ದ್ ನಿಕ್ಲೆಗ್ ತೆರಿದುಂಡುತ್ತಾ. ಆಂಡ ಏರೆನ್ಲಾ ಹೀನೆ ಇಜ್ಜಿಡ ಅಶುದ್ಧದಾಯೆ ಅಂದ್‌ದ್ ಪನಿಯೆರೆ ಬಲ್ಲಿ ಅಂದ್‌ದ್ ದೇವೆರೇ ಎಂಕ್ ತೋಜಾದೆ.</verse>
				<verse number="29">ಅಂಚಾಯಿನೆಡ್ದ್ ನಿಕುಲು ಎನನ್ ಲೆತ್ತಿನಪಗ ಯಾನ್ ದಾಲಾ ಕೇನಂದೆ ಬತ್ತೆ. ಇತ್ತೆ ನಿಕುಲು ಎನನ್ ಲೆತ್ತಿನ ಉದ್ದೇಶ ದಾನೆ ಅಂದ್‌ದ್ ಎಂಕ್ ತೆರಿಪಾಲೆ.”</verse>
				<verse number="30">ಐಕ್ ಕೊರ್ನೇಲಿಯೆ, “ಯಾನ್ ನಾಲ್ ದಿನತ ದುಂಬು ಮಧ್ಯಾಹ್ನದ ಮೂಜಿ ಗಂಟೆಗ್ ಇಲ್ಲಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ಮಿಂಚುನ ಕುಂಟು ಪಾಡ್ದಿನ ಒರಿ ನರಮಾನಿ ಎನ ಎದುರುಡು ಉಂತುದು</verse>
				<verse number="31">ಕೊರ್ನೇಲಿಯಾ, ‘ನಿನ ಪ್ರಾರ್ಥನೆಲಾ ನಿನ ದಾನಧರ್ಮೊಲುಲಾ ದೇವೆರೆ ಎದುರು ನೆನೆಪುಗು ಬತ್ತ್ಂಡ್.</verse>
				<verse number="32">ಈ ಯೊಪ್ಪೊಗು ನಿನ ಜನೊಕುಲೆನ್ ಕಡಪುಡ್ದು, ಪೇತ್ರೆ ಪನ್ಪಿ ಸೀಮೋನನ್ ಲೆಪ್ಪುಡಾವೊಡು; ಆಯೆ ಚರ್ಮದ ಬೇಲೆ ಮಲ್ಪುನ ಸಿಮೋನನ ಇಲ್ಲಡ್ ಉಲ್ಲೆ; ಆ ಇಲ್ಲ್ ಕಡಲ್ದ ಬರಿಟ್ಟ್ ಉಂಡು,’ ಅಂದ್‌ದ್ ಪಂಡೆ.</verse>
				<verse number="33">ಯಾನ್ ತಡ ಮಲ್ಪಂದೆ ನಿನ ಕೈತಲ್‌ ಜನೊಕುಲೆನ್ ಕಡಪುಡಿಯೆ. ಈ ಬತ್ತಿನ ಉಪಕಾರ ಆಂಡ್. ಇಂಚಾದುಪ್ಪುನಗ ಕರ್ತವೆ ನಿಕ್ಕ್ ಅಪ್ಪಣೆ ಕೊರ್ತಿನ ಮಾತ ಪಾತೆರೊಲೆನ್ ಕೇನುನೆಕ್ಕ್ ಎಂಕುಲು ಮಾತೆರ್ಲಾ ಇತ್ತೆ ದೇವೆರೆ ಸನ್ನಿಧಿಡ್ ಸೇರ್ದ್ ಬೈದ,” ಅಂದ್‌ದ್ ಪಂಡೆ.</verse>
				<verse number="34">ಅಪಗ ಪೇತ್ರೆ ಬೋಧನೆ ಮಲ್ಪೆರೆ ಸುರು ಮಲ್ತ್‌ದ್ ಇಂಚ ಪಂಡೆ, “ನಿಜಾದ್ ದೇವೆರ್ ಪಕ್ಷಪಾತ ಮಲ್ಪುನಾಯೆ ಅತ್ತ್</verse>
				<verse number="35">ವಾ ಜನಾಂಗೊಡುಲಾ ದೇವೆರೆಗ್ ಪೋಡಿದ್ ನೀತಿಡ್‌ ನಡಪುನಾಕುಲು ಆಯಗ್ ಮೆಚ್ಚಿಗೆದಾಕುಲು ಆದುಲ್ಲೆರ್, ಅಂದ್‌ದ್ ಇತ್ತೆ ಕಂಡಿತಾದ್ ಎಂಕ್ ತೆರಿದ್ ಬತ್ತ್ಂಡ್.</verse>
				<verse number="36">ಮಾತ ಜನೊಕುಲೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ದೇವೆರ್ ಸಮಾಧಾನದ ಸುವಾರ್ತೆನ್ ಪ್ರಕಟ ಮಲ್ತೊಂದು ಇಸ್ರಾಯೇಲ್ ಜನೊಕುಲೆಗ್ ಸಾರಿದೆರ್. ಈ ಸಂಗತಿಲು ನಿಕ್ಲೆಗ್ ತೆರಿದುಪ್ಪು.</verse>
				<verse number="37">ನೀರ್‌ದ ದೀಕ್ಷಾಸ್ನಾನ ಮಲ್ತೊನೊಡು ಅಂದ್‌ದ್ ಯೋಹಾನೆ ಸಾರಿ ಬೊಕ್ಕ ಈ ದೇವೆರೆ ಪಾತೆರ ಗಲಿಲಾಯೊಡ್ದು ಸುರುವಾದ್ ಯೂದಾಯೊಡು ಹೆಚ್ಚಾಂಡ್;</verse>
				<verse number="38">ದೇವೆರ್ ನಜರೇತ್‌ದ ಯೇಸುನು ಪರಿಶುದ್ಧಾತ್ಮೊಡ್ದುಲಾ ಬಲೊಡ್ದುಲಾ ಅಭಿಷೇಕ ಮಲ್ತೆ; ದೇವೆರ್ ಆಯ ಒಟ್ಟುಗು ಇತ್ತಿನೆಡ್ದ್ ಆಯೆ ಮಾತೆರೆಗ್ಲಾ ಎಡ್ಡೆ ಮಲ್ತೊಂದು; ಸೈತಾನನ ಬಂಧನೊಡು ಇತ್ತಿನಾಕುಲೆನ್ ಗುಣ ಮಲ್ತೊಂದು ಮಾತ ಜಾಗ್‌ಗ್ ಪೋವೊಂದಿತ್ತೆ. ಉಂದು ಮಾತ ನಿಕ್ಲೆಗ್ ಗೊತ್ತಾದುಪ್ಪು.</verse>
				<verse number="39">ಆಯೆ ಯೆಹೂದ್ಯೆರೆನ ದೇಶೊಡ್ಲಾ ಯೆರೂಸಲೇಮುಡ್ಲಾ ಮಲ್ತಿನ ಮಾತ ಕಾರ್ಯೊಲೆಗ್ ಎಂಕುಲು ಸಾಕ್ಷಿ ಆದುಲ್ಲ. ಆಯನ್ ಮರತ ಕಂಬೊಗು ನೇಲಾದ್ ಕೆರಿಯೆರ್.</verse>
				<verse number="40">ದೇವೆರ್ ಆಯನ್ ಮೂಜನೆ ದಿನೊಟು ಲಕ್ಕಾದ್ ಜನೊಕುಲೆಗ್ ತೋಜಿದ್ ಬರ್ಪಿಲೆಕ್ಕ ಮಲ್ತೆ;</verse>
				<verse number="41">ಆಯೆ ಮಾತ ಜನೊಕು ತೋಜಿದ್ ಬರಂದೆ ದೇವೆರ್ ಸುರುಟ್ಟೇ ಅಜತ್ ದೆತ್ತೊಂಡಿ ಸಾಕ್ಷಿಲಾಯಿನ ಎಂಕ್ಲೆಗ್ ತೋಜಿದ್ ಬತ್ತೆ. ಆಯೆ ಸೈತಿನಾಕುಲೆ ಉಲಯಿಡ್ದ್ ಜೀವೊಡು ಲಕ್ಕ್‌ದ್ ಬತ್ತಿ ಬೊಕ್ಕ ಎಂಕುಲು ಆಯನ ಒಟ್ಟುಗು ಉಂಡುದು ಪರಿಯ.</verse>
				<verse number="42">ಯೇಸು ಜೀವೊಡುಪ್ಪುನಾಕುಲೆಗ್ಲಾ ಸೈತಿನಾಕುಲೆಗ್ಲಾ ನ್ಯಾಯಾಧಿಪತಿ ಆದ್ ದೇವೆರೆಡ್ದ್ ನೇಮಕ ಆತಿನಾಯೆ ಪನ್ಪಿನೆನ್ ಜನೊಕುಲೆಗ್ ಸಾರಿದ್ ಸಾಕ್ಷಿ ಪನೊಡು ಅಂದ್‌ದ್ ದೇವೆರ್ ಎಂಕ್ಲೆಗ್ ಅಪ್ಪಣೆ ಕೊರ್ತೆ.</verse>
				<verse number="43">ಆಯಡ ನಂಬಿಕೆ ದೀಪಿನ ಪ್ರತಿ ಒರಿಯಗ್ಲಾ ಆಯನ ಪುದರ್‌ಡ್ ಪಾಪೊಗು ಪರಿಹಾರ ತಿಕ್ಕುಂಡು ಅಂದ್‌ದ್ ಆಯನ ಸಂಗತಿಡ್ ಪ್ರವಾದಿಲು ಮಾತೆರ್ಲಾ ಸಾಕ್ಷಿ ಪನ್ತೆರ್ ಅಂದ್‌ದ್ ಪಂಡೆ.”</verse>
				<verse number="44">ಪೇತ್ರೆ ಈ ಪಾತೆರೊಲೆನ್ ನನಲಾ ಪನೊಂದುಪ್ಪುನಗ ಆಯನ ಪಾತೆರೊನು ಕೇಂಡಿನಾಕುಲೆನ ಮಿತ್ತ್ ಪರಿಶುದ್ಧಾತ್ಮ ಜತ್ತ್ಂಡ್.</verse>
				<verse number="45">ಅಕುಲು ಬೇತೆ ಬೇತೆ ಭಾಷೆಡ್ ಪಾತೆರೊಂದು ದೇವೆರೆನ್ ಪುಗರೊಂದುಪ್ಪುನೆನ್ ತೂದು ಪೇತ್ರನ ಒಟ್ಟುಗು ಬೈದಿನ ಸುನ್ನತಿದಾಕುಲು ಆದಿತ್ತಿ ನಂಬುನಾಕುಲು ಮಾತೆರ್ಲಾ ಪಿದಯಿದ ಜನೊಕುಲೆಗ್ಲಾ ಪರಿಶುದ್ಧಾತ್ಮ ಒದಗ್‌ದ್ ಬತ್ತ್ಂಡತಾ ಅಂದ್‌ದ್ ಅಚ್ಚಿರ ಆಯೆರ್.</verse>
				<verse number="46"></verse>
				<verse number="47">ನಡತಿನ ಸಂಗತಿಲೆನ್ ಪೇತ್ರೆ ತೂದು, “ನಮಲೆಕ್ಕನೆ ಪರಿಶುದ್ಧಾತ್ಮನ್ ಪಡೆದ್, ಮೊಕುಲು ನೀರ್‌ದ ದೀಕ್ಷಾಸ್ನಾನ ಪಡೆಯೆರೆ ಬಲ್ಲಿ ಅಂದ್‌ದ್ ಏರೆಗಾಂಡಲಾ ಅಡ್ಡಿ ಮಲ್ಪೊಲಿಯಾ?”</verse>
				<verse number="48">ಅಕ್ಲೆಡ, “ನಿಕುಲು ಯೇಸು ಕ್ರಿಸ್ತ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾವೊನೊಡು,” ಅಂದ್‌ದ್ ಅಪ್ಪಣೆ ಕೊರಿಯೆ. ಐಡ್ದ್ ಬೊಕ್ಕ ನನಲಾ ಒಂತೆ ದಿನ ಎಂಕುಲೆ ಒಟ್ಟುಗು ಉಪ್ಪೊಡು ಅಂದ್‌ದ್ ಅಕುಲು ಪೇತ್ರಡ ನಟ್ಟೊಂಡೆರ್.</verse>
			</chapter>
			<chapter number="11">
				<verse number="1">ಪಿದಯಿದ ಜನೊಕುಲುಲಾ ದೇವೆರೆ ಪಾತೆರೊನು ಸ್ವೀಕಾರ ಮಲ್ತೆರ್ ಪನ್ಪಿನ ಸುದ್ಧಿ ಅಪೊಸ್ತಲೆರೆಗ್ಲಾ ಯೂದಾಯೊಡಿತ್ತಿನ ಸಹೋದರೆರೆಗ್ಲಾ ತೆರಿಂಡ್.</verse>
				<verse number="2">ಪೇತ್ರೆ ಯೆರೂಸಲೇಮುಗು ಬತ್ತಿನಪಗ ಕೆಲವು ಯೆಹೂದ್ಯೆರ್, “ಈ ಸುನ್ನತಿ ಮಲ್ಪಂದಿನಾಕುಲೆಡೊಪ್ಪ ಸೇರ್ದ್ ಅಕ್ಲೆನ ಒಟ್ಟುಗು ವಣಸ್ ಮಲ್ತ ಅತ್ತಾ,” ಅಂದ್‌ದ್ ಆಯಡ ತರ್ಕ ಮಲ್ತೆರ್.</verse>
				<verse number="3"></verse>
				<verse number="4">ಅಪಗ ಪೇತ್ರೆ ನಡತಿನ ಸಂಗತಿಲೆನ್ ಅಕ್ಲೆಗ್ ಕ್ರಮೊಟು ವಿವರಿಸಾದ್ ಪಂಡೆ.</verse>
				<verse number="5">“ಯಾನ್ ಯೊಪ್ಪ ಪೇಂಟೆಡ್ ಪ್ರಾರ್ಥನೆ ಮಲ್ತೊಂದುಪ್ಪುನಗ ದೇವೆರೆನ ಒಂಜಿ ದರ್ಶನ ಆಂಡ್. ಅವು ದಾನೆ ಪಂಡ ಬಾನೊಡ್ದು ಒಂಜಿ ನಾಲ್ ಮೂಲೆಲಿತ್ತಿ ಮಲ್ಲ ಮಂದ್ರಿದ ಲೆಕ್ಕನೆ ಇತ್ತಿನ ಜೋಳಿಗೆ ಜತ್ತ್‌ದ್ ಯಾನಿತ್ತಿನಡೆಗ್ ಬತ್ತ್ಂಡ್.</verse>
				<verse number="6">ಅವು ಎಂಚಿನ ಅಂದ್‌ದ್ ಸರಿಯಾದ್ ತೂನಗ ನೆಲತ್ತ ಮಿತ್ತ್ ಪರಪುನ ಪಶುಕುಲುಲಾ ಕಾಡ್‌ಮೃಗೊಲುಲಾ ಕ್ರಿಮಿಕೀಟೊಲುಲಾ ಬಾನೊಡು ರಾಪಿನ ಪಕ್ಕಿಲೆನ್ಲಾ ತೂಯೆ.</verse>
				<verse number="7">ಬೊಕ್ಕ ಪೇತ್ರಾ, ‘ಲಕ್ಕ್‌ದ್ ಕುತ್ತುದು ತಿನ್ಲ,’ ಅಂದ್‌ದ್ ಎಂಕ್ ಪನ್ಪಿನ ಸ್ವರೊನು ಕೇಂಡೆ.</verse>
				<verse number="8">ಆಂಡ ಯಾನ್, ‘ಬೊಡ್ಚಿ ಕರ್ತವಾ, ಪೇಸಿಗೆದ ಅಶುದ್ಧದ ವಸ್ತು ಏಪಲಾ ಎನ ಬಾಯಿಗ್ ಪೋತುಜಿ,’ ಪಂಡೆ.</verse>
				<verse number="9">ಐಕ್, ‘ದೇವೆರ್ ಶುದ್ಧ ಮಲ್ತಿನೆನ್ ಈ ಅಶುದ್ಧ ಅಂದ್‌ದ್ ಪನಡ,’ ಅಂದ್‌ದ್ ರಡ್ಡನೆ ಸರ್ತಿ ಬಾನೊಡ್ದು ಸ್ವರ ಕೇಂಡೆ.</verse>
				<verse number="10">ಇಂಚ ಮೂಜಿ ಸರ್ತಿ ಆಂಡ್. ಐಡ್ದ್ ಬೊಕ್ಕ ಮಾತಲಾ ಕುಡ ಬಾನೊಗು ಏರ್ದ್ ಪೋಂಡು.</verse>
				<verse number="11">ಅವ್ವೇ ಗಳಿಗೆಡ್ ಮೂಜಿ ಜನ ಎಂಕುಲು ಇತ್ತಿನ ಇಲ್ಲದ ಎದುರು ಉಂತುದಿತ್ತೆರ್. ಅಕ್ಲೆನ್ ಕೈಸರೆಯಡ್ದ್ ಎನ ಕೈತಲ್‌ ಕಡಪುಡ್ದಿತ್ತೆರ್.</verse>
				<verse number="12">ದೇವೆರೆ ಆತ್ಮೆ ಈ ಸಂಶಯದಾಂತೆ ಅಕ್ಲೆಡೊಪ್ಪ ಪೋಲ ಅಂದ್‌ದ್ ಎಂಕ್ ಪಂಡೆ. ಮೊಕುಲು ಆಜಿ ಜನ ಸಹೋದ್ರೆರ್‌ಲಾ ಎನಡೊಪ್ಪ ಬತ್ತೆರ್.</verse>
				<verse number="13">ಆ ನರಮಾನಿನ ಇಲ್ಲದುಲಯಿ ಪೋನಗ ಆಯೆ ಎಂಕ್ಲೆಗ್ ತನ ಇಲ್ಲಡ್ ಒರಿ ದೂತೆ ಉಂತುದುಪ್ಪುನೆನ್ ತೂಯೆ. ಆ ದೂತೆ, ‘ಈ ಯೊಪ್ಪೊಗು ನಿನ ಜನೊಕುಲೆನ್ ಕಡಪುಡ್ದು ಪೇತ್ರೆ ಪನ್ಪಿ ಸೀಮೋನುನು ಲೆಪ್ಪುಡಾಲ;</verse>
				<verse number="14">ಆಯೆ ನಿಕ್ಕ್ ಕೆಲವು ಪಾತೆರ ಪನ್ಪೆ, ಆ ಪಾತೆರೊಡ್ದು ನಿಕ್ಕ್‌ಲಾ ನಿನ ಇಲ್ಲಡುಪ್ಪು ಮಾತೆರೆಗ್ಲಾ ರಕ್ಷಣೆ ಆಪುಂಡು,’ ಅಂದ್‌ದ್ ತೆರಿಪಾಯೆ.</verse>
				<verse number="15">ಯಾನ್ ಪಾತೆರಿಯೆರೆ ಸುರು ಮಲ್ಪುನಗ ಪರಿಶುದ್ಧಾತ್ಮ ವರ ಸುರುಟ್ಟು ನಮ ಮಿತ್ತ್ ಬತ್ತಿಲೆಕ್ಕನೇ ಅಕ್ಲೆ ಮಿತ್ತ್‌ಲಾ ಜತ್ತ್‌ದ್ ಬತ್ತ್ಂಡ್.</verse>
				<verse number="16">ಅಪಗ, ‘ಯೋಹಾನೆ ಜನೊಕುಲೆಗ್ ನೀರ್‌ದ ದೀಕ್ಷಾಸ್ನಾನ ಮಲ್ಪಾಯೆ; ಆಂಡ ನಿಕ್ಲೆಗ್ ಪರಿಶುದ್ಧಾತ್ಮೊಡ್ದು ದೀಕ್ಷಾಸ್ನಾನ ಆವು,’ ಅಂದ್‌ದ್ ಕರ್ತವೆ ಪಂತಿನ ಪಾತೆರೊಲೆನ್ ನೆನೆಪು ಮಲ್ತೆ.</verse>
				<verse number="17">ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮಿತ್ತ್ ನಂಬಿಕೆ ದೀತಿನಕುಲಾದುಪ್ಪು ನಂಕ್ ನಂಬಿಕೆದ ವರೊನು ಕೊರ್ತಿಲೆಕ್ಕ ಅಕ್ಲೆಗ್ಲಾ ಆ ವರೊನು ಕೊರ್ದುಪ್ಪುನಗ ದೇವೆರೆನ್ ತಡೆಯೆರೆ ಎಂಕ್ ಸಾದ್ಯನಾ?”</verse>
				<verse number="18">ಇಂಚ ಪಂಡಿನ ಪಾತೆರೊಲೆನ್ ಆ ಯೆಹೂದ್ಯೆರ್ ಕೇಂಡ್ದ್ ತರ್ಕ ಮಲ್ಪುನೆನ್ ಉಂತಾಯೆರ್. ಅಂಚಾಂಡ, “ದೇವೆರ್ ಪಿದಯಿದ ಜನೊಕುಲೆಗ್ಲಾ ಜೀವ ಕೊರೊಡು ಅಂದ್‌ದ್ ಅಕ್ಲೆ ಉಡಲ್‌ಡ್ಲಾ ಪಶ್ಚಾತಾಪ ಕೊರಿಯೆ,” ಅಂದ್‌ದ್ ದೇವೆರೆನ್ ಪುಗರಿಯೆರ್.</verse>
				<verse number="19">ಸ್ತೇಫನನ್ ಕೆರ್ದ್ ಉಂಡಾಯಿನ ಭಂಗೊಡ್ದು ದಿಕ್ಕ್ ಪಾಲಾಯಿನಾಕುಲು ಫೊಯಿನೀಕೆ, ಕುಪ್ರ ಅಂತಿಯೋಕ್ಯ ಊರುಲೆ ಮುಟ್ಟ ಪ್ರಯಾಣ ಮಲ್ತ್‌ದ್ ಯೆಹೂದ್ಯೆರೆಗ್ ಮಾತ್ರ ದೇವೆರೆ ಪಾತೆರೊನು ತೆರಿಪಾವೊಂದಿತ್ತೆರ್.</verse>
				<verse number="20">ಅಕ್ಲೆಡ್ ಕೆಲೆವೆರ್ ಕುಪ್ರ ದ್ವೀಪದಾಕುಲು, ಕೆಲೆವೆರ್ ಕುರೇನ್ಯೆರ್ ಅಂತಿಯೋಕ್ಯಗ್ ಬತ್ತ್‌ದ್ ಗ್ರೀಕೆರೆಡಲಾ ಪಾತೆರ್‌ದ್ ಕರ್ತವೆ ಆದುಪ್ಪು ಯೇಸುನ ಸುವಾರ್ತೆನ್ ಸಾರಿಯೆರ್.</verse>
				<verse number="21">ಕರ್ತವ ಸಹಾಯ ಇತ್ತಿನೆಡ್ದ್ ಮಸ್ತ್ ಜನ ನಂಬುದು ಕರ್ತವ ಕಡೆಕ್ಕ್ ತಿರ್ಗೊಂಡೆರ್.</verse>
				<verse number="22">ಮೊಕ್ಲೆನ ಸುದ್ಧಿ ಯೆರೂಸಲೇಮುಡಿತ್ತಿ ಸಭೆತಾಕುಲೆಗ್ ಗೊತ್ತಾಯಿನೆಡ್ದ್ ಅಕುಲು ಬಾರ್ನಬನ್ ಅಂತಿಯೋಕ್ಯಗ್ ಕಡಪುಡಿಯೆರ್.</verse>
				<verse number="23">ಆಯೆ ಎಡ್ಡೆಂತಿನಾಯೆಲಾ ಪರಿಶುದ್ಧಾತ್ಮನ್ ಹೊಂದಿನಾಯೆಲಾ ನಂಬಿಕೆಡ್ ದಿಂಜಿದಿನಾಯೆಲಾ ಆದಿತ್ತೆ. ಅಂಚಾಯಿನೆಡ್ದ್ ಅಡೆಗ್ ಬತ್ತ್‌ದ್ ದೇವೆರೆನ ದಯತ ಕಾರ್ಯೊಲೆನ್ ತೂದು ಸಂತೋಷ ಪಡೆದ್ ನಿಕುಲು ದೃಢ ಮನಸ್‌ಡ್ದ್ ಕರ್ತವಡ್ ನಿಲೆ ಆದುಪ್ಪೊಡು ಅಂದ್‌ದ್ ಮಾತೆರೆಗ್ಲಾ ಉಮೇದ್ ಕೊರಿಯೆ. ಅಪಗ ಮಸ್ತ್ ಜನ ಕರ್ತವಡ್ ಸೇರೊಂಡೆರ್.</verse>
				<verse number="24"></verse>
				<verse number="25">ಬಾರ್ನಬೆ ಸೌಲುನು ನಾಡುನೆಕ್ಕಾದ್ ತಾರ್ಸೊಗು ಪೋದು ಆಯನ್ ಅಂತಿಯೋಕ್ಯಗ್ ಲೆತ್ತೊಂದು ಬತ್ತೆ.</verse>
				<verse number="26">ಐಡ್ದ್ ಬೊಕ್ಕ ಅಕುಲು ಇಡೀ ಒಂಜಿ ವರ್ಸ ಸಭೆಟ್ ಸೇರೊಂದು ಮಸ್ತ್ ಜನೊಕುಲೆಗ್ ಬೋಧನೆ ಮಲ್ತೆರ್. ಶಿಷ್ಯೆರೆಗ್ ಕ್ರೈಸ್ತೆರ್ ಪನ್ಪಿನ ಪುದರ್ ಸುರುಟ್ಟು ಅಂತಿಯೋಕ್ಯಡ್ದ್ ಬತ್ತ್ಂಡ್.</verse>
				<verse number="27">ಆ ಕಾಲೊಡು ಪ್ರವಾದಿಲಾದಿತ್ತಿನ ಕೆಲೆವೆರ್ ಯೆರೂಸಲೇಮುಡ್ದು ಅಂತಿಯೋಕ್ಯಗ್ ಬತ್ತೆರ್.</verse>
				<verse number="28">ಅಗಬೆ ಪನ್ಪಿನ ಒರಿ ನರಮಾನಿ ಲಕ್ಕ್‌ದ್ ಭೂಮಿದ ಮಿತ್ತ್ ಒಂಜಿ ಮಲ್ಲ ಬರಗಾಲ ಬರ್ಪುಂಡು ಅಂದ್‌ದ್ ಪರಿಶುದ್ಧಾತ್ಮನ ಪ್ರೇರಣೆಡ್ದ್ ಸೂಚನೆ ಕೊರಿಯೆ. ಅವು ಕ್ಲೌದಿಯ ಚಕ್ರವರ್ತಿನ ಕಾಲೊಡು ಆಂಡ್;</verse>
				<verse number="29">ಅಪಗ ಆ ಶಿಷ್ಯೆರೆಡ್ ಪ್ರತಿ ಒರಿಲಾ ಯೂದಾಯ ಪ್ರದೇಶೊಡು ನಿಲೆ ಆದಿತ್ತಿನ ಸಹೋದ್ರೆರೆಗ್ ತನ್ಕುಲೆಗ್ ತೀರುನಾತ್ ಕಾಸ್‌ದ ಸಹಾಯ ಮಲ್ಪೊಡು ಅಂದ್‌ದ್ ನಿಚ್ಚಯ ಮಲ್ತೊಂಡೆರ್.</verse>
				<verse number="30">ಅಂಚೆನೇ ಮಲ್ತ್‌ದ್ ಅವೆನ್ ಬಾರ್ನಬ ಸೌಲೆರೆನ ಕೈಡ್ದ್ ಸಭೆತ ಹಿರಿಯೆರೆಗ್ ಕೊರ್ದು ಕಡಪುಡಿಯೆರ್.</verse>
			</chapter>
			<chapter number="12">
				<verse number="1">ಆ ಸಮಯೊಡೇ ಅರಸು ಹೆರೋದೆ ಸಭೆತ ಕೆಲವು ಜನೊಕುಲೆಗ್ ಭಂಗ ಕೊರಿಯೆರೆ ಸುರು ಮಲ್ತೆ.</verse>
				<verse number="2">ಯೋಹಾನನ ಪಲಯೆ ಯಾಕೋಬುನು ಕತ್ತಿಡ್ದ್ ಕೆರ್ಪಾಯೆ.</verse>
				<verse number="3">ಯೆಹೂದ್ಯೆರೆಗ್ ಸಂತೋಷ ಆಂಡ್ ಅಂದ್‌ದ್ ಗೊತ್ತಾಯಿನೆಡ್ದ್ ಪೇತ್ರನ್ಲಾ ಪತ್ತಿಯೆರೆ ಪೋಯೆರ್. ಉಂದು ಆತಿನಿ ಯೆಹೂದ್ಯೆರೆನ ಪುಳಿ ಇಜ್ಜಂದಿ ರೊಟ್ಟಿಲೆ ಪರ್ಬದ ಸಮಯೊಡು.</verse>
				<verse number="4">ಆಯನ್ ಪಸ್ಕ ಪರ್ಬೊಡ್ದು ಬೊಕ್ಕ ಜನೊಕುಲೆ ಎದುರು ಉಂತಾವೊಡು ಪನ್ಪಿನ ಆಲೋಚನೆಡ್ದ್ ಸೆರೆಮನೆಟ್ ಪಾಡ್ದ್‌ ಆಯನ್ ಕಾಪೆರೆ ನಾಲ್ವೆರ್ ನಾಲ್ವೆರ್ ಸೈನಿಕೆರಿತ್ತಿನ ನಾಲ್ ಗುಂಪುಲೆ ವಶೊಕು ಕೊರಿಯೆ.</verse>
				<verse number="5">ಪೇತ್ರೆ ಸೆರೆಮನೆಟ್ಟ್‌ ಉಪ್ಪುನಗ ಸಭೆತಾಕುಲು ಆಯಗಾದ್ ಇಡೆ ಬುಡಂದೆ ದೇವೆರೆಡ ಪ್ರಾರ್ಥನೆ ಮಲ್ತೊಂದಿತ್ತೆರ್.</verse>
				<verse number="6">ಹೆರೋದೆ ಪೇತ್ರನ್ ಜನೊಕುಲೆನ ಎದುರು ಉಂತಾವೊಡು ಪಂಡ್ದ್ ಆ ರಾತ್ರೆಡ್ ರಡ್ಡ್ ಸರಪೊಳಿಡ್ದ್ ಆಯನ್ ಕಟ್ಟ್ ದೀದ್ ರಡ್ಡ್ ಸೈನಿಕೆರೆ ನಡುಟು ನಿದ್ರೆ ಮಲ್ತೊಂದಿತ್ತೆ. ಕಾಪುನಾಕುಲು ಬಾಕಿಲ್‌ದವುಲು ಉಂತುದು ಸೆರೆಮನೆನ್ ಕಾತೊಂದಿತ್ತೆರ್.</verse>
				<verse number="7">ಒರನೆ ಕರ್ತವ ದೂತೆ ಪೇತ್ರನ ಎದುರು ಉಂತಿಯೆ. ಆಯೆ ಇತ್ತಿನ ಕೋಣೆಡ್ ಬೊಲ್ಪಾಂಡ್. ಆಯೆ ಪೇತ್ರ ಮರ್ಗಿಲ್‌ಗ್ ತಟ್ಟ್‌ದ್ ಲಕ್ಕಾದ್, “ಬೇಗ ಲಕ್ಕ್‌ಲ,” ಪಂಡೆ. ಅಪಗನೆ ಆಯನ ಕೈಕ್ ಪಾಡ್ದಿನ ಸಂಕಲೆ ಕದೆಲ್‌ದ್ ಬೂರ್‌ಂಡ್.</verse>
				<verse number="8">ಆ ದೂತೆ ಆಯಗ್ ಸೊಂಟ ಕಟ್ಟೊಂದು, ನಿನ ಜೋಡು ತಿಕ್ಕಾವೊನ್ಲ ಅಂದ್‌ದ್ ಪನ್ನಗ ಆಯೆ ಅಂಚೆನೇ ಮಲ್ತೆ. ನಿನ ಮೇಲ್ ಅಂಗಿನ್ ಪಾಡೊಂದು ಎನ ಪಿರವುಡು ಬಲ ಅಂದ್‌ದ್ ಪಂಡೆ.</verse>
				<verse number="9">ಪೇತ್ರೆ ಆಯನ ಬೆರಿಯೇ ಪೋವೊಂದು ದೂತಡ್ದ್ ನಡತಿನ ಸಂಗತಿ ನಿಜವಾಯಿನವು ಅಂದ್‌ದ್ ತೆರಿಯಂದೆ ತಾನ್ ತೂಯಿನವು ದರ್ಶನ ಅಂದ್‌ದ್ ಎನ್ನೊಂಡೆ.</verse>
				<verse number="10">ಅಕುಲು ಸುರುತ್ತಲಾ ರಡ್ಡನೆದಲಾ ಕಾಪುನಾಕುಲೆನ್ ಕಡತ್‌ದ್ ಪೇಂಟೆಗ್ ಪೋಪಿನ ಕರ್ಬದ ಬಾಕಿಲ್‌ಗ್ ಬನ್ನಗ ಅವು ತನ್ನಾತೆಗ್ ತಾನೇ ಜತ್ತ್ಂಡ್. ಅಕುಲು ಪಿದಯಿ ಬತ್ತ್‌ದ್ ಒಂಜಿ ಓಣಿನ್ ಕಡತ್‌ದ್ ಪೋಯಿ ಬೊಕ್ಕ; ಅಪಗನೆ ಆ ದೂತೆ ಆಯನ್ ಬುಡ್ದು ಪೋಯೆ.</verse>
				<verse number="11">ನಡತಿನ ಸಂಗತಿ ಪೇತ್ರಗ್ ಬೊಕ್ಕ ತೆರಿದ್, “ಕರ್ತವೆ ತನ ದೂತನ್ ಕಡಪುಡ್ದು ಹೆರೋದ್ಯ ಕೈಡ್ದ್‌ಲಾ ಯೆಹೂದ್ಯೆರೆ ಜನೊಕುಲೆಡ್ದ್‌ಲಾ ಮಾತ ಬರ್ಪಿನ ಕಷ್ಟೊಡ್ದುಲಾ ಬುಡ್ಪಾಯೆ,” ಅಂದ್‌ದ್ ನಿಜಾದ್ ಎಂಕ್ ತೆರಿದ್ ಬತ್ತ್ಂಡ್.</verse>
				<verse number="12">ಐಡ್ದ್ ಬೊಕ್ಕ ಆಯೆ ಆಲೋಚನೆ ಮಲ್ತೊಂದು ಮಾರ್ಕೆ ಪನ್ಪಿನ ಯೋಹಾನನ ಅಪ್ಪೆ ಆಯಿ ಮರಿಯನ ಇಲ್ಲಗ್ ಪೋಯೆ. ಅಲ್ಪ ಮಸ್ತ್ ಜನ ಸೇರೊಂದು ಪ್ರಾರ್ಥನೆ ಮಲ್ತೊಂದಿತ್ತೆರ್.</verse>
				<verse number="13">ಪೇತ್ರೆ ಬಾಕಿಲ್ ಬೊಟ್ಟುನಗ ರೋದ ಪನ್ಪಿನ ಒರ್ತಿ ಚಾಕ್ರಿದಾಲ್ ತೂವೆರೆ ಬತ್ತಲ್</verse>
				<verse number="14">ಆಲ್ ಪೇತ್ರನ ಸ್ವರತ್ತ ಗುರ್ತ ಪತ್ತ್‌ದ್ ಸಂತೋಷೊಡು ಬಾಕಿಲ್‌ನ್ ಜಪ್ಪಂದೆ ಉಲಯಿ ಪಾರ್‌ಪೋದು ಪೇತ್ರೆ ಬಾಕಿಲ್‌ದ ಎದುರು ಉಂತುದೆ ಅಂದ್‌ದ್ ತೆರಿಪಾಯಲ್.</verse>
				<verse number="15">ಅಕುಲು ಆಲೆಗ್ ನಿಕ್ಕ್ ಮರ್ಲ್ ಪತ್ತ್‌ದ್ಂಡ್ ಅಂದ್‌ದ್ ಪಂಡೆರ್ ಆಂಡ ಆಲ್ ಯಾನ್ ಸತ್ಯವಾದ್ ಪನ್ಪೆ ಅಂದ್‌ದ್ ಪನೊಂದುಪ್ಪುನಗ, ಅಕುಲು ಆಯನ ದೂತೆ ಆದುಪ್ಪೊಡು ಅಂದ್‌ದ್ ಪಂಡೆರ್.</verse>
				<verse number="16">ಆಂಡ ಪೇತ್ರೆ ನನಲಾ ಬಾಕಿಲ್ ಬೊಟ್ಟೊಂದೆ ಉಪ್ಪುನಗ ಅಕುಲು ಬಾಕಿಲ್ ಜತ್ತ್‌ದ್ ಆಯನ್ ತೂದು ಸೋದ್ಯ ಆಯೆರ್.</verse>
				<verse number="17">ಆಂಡ ಆಯೆ ಅಕ್ಲೆಗ್ ಮನಿಪಂದೆ ಉಪ್ಪರೆ ಕೈಸನ್ನೆ ಮಲ್ತೆ. ತನನ್ ಕರ್ತವೆ ಸೆರೆಮನೆಡ್ದ್ ಪಿದಯಿ ಲೆತ್ತೊಂದು ಬತ್ತಿನ ವಿಷಯೊನು ಒಂಜೊಂಜಾದ್ ತೆರಿಪಾದ್ ಈ ವಿಷಯೊಲೆನ್ ಯಾಕೋಬುಗ್ಲಾ ಸಹೋದರೆರೆಗ್ಲಾ ತೆರಿಪಾಲೆ ಅಂದ್‌ದ್ ಬೇತೆ ಜಾಗ್‌ಗ್ ಪೋವರೆ ಅಲ್ತ್‌ಡ್ದ್ ಪಿದಾಡಿಯೆ.</verse>
				<verse number="18">ಮನದಾನಿ ಪೇತ್ರೆ ಇಜ್ಜಾಂದಿನ ತೂದು ಅಲ್ಪ ಕಾಪುನಾಕುಲೆಗ್ ಪೋಡಿಗೆ ಆಂಡ್.</verse>
				<verse number="19">ಹೆರೋದೆ ಆಯನ್ ಓಲೋಲು ನಾಡ್‌ಂಡಲಾ ಆಯೆ ತಿಕ್ಕಂದಿನೆಡ್ದ್ ಕಾಪುನಾಕುಲೆಗ್ ಮರಣದ ದಂಡನೆ ಕೊರಿಯೆ. ಐಡ್ದ್ ಬೊಕ್ಕ ಆಯೆ ಯೂದಾಯೊಡ್ದು ಕೈಸರೆಯಗ್‌ ಪೋದು ಅಲ್ಪ ಇತ್ತೆ.</verse>
				<verse number="20">ಆ ಸಮಯೊಡು ತೂರ್ ಬೊಕ್ಕ ಸೀದೋನ್ ಜನೊಕುಲೆ ಮಿತ್ತ್ ಹೆರೋದನ ಬಾರಿ ಕೋಪ ಇತ್ತಿನೆನ್ ತೂದು, ಅಕುಲು ಒಂಜೇ ಮನಸ್‌ಡ್ ಆಯ ಕೈತಲ್‌ ಬತ್ತ್‌ದ್ ಅರಸುನ ಅರಮನೆದ ಅಧಿಕಾರಿ ಆದುಪ್ಪುನ ಬ್ಲಾಸ್ತನ್ ಮೆಚ್ಚಾದ್ ಸಮಾಧಾನ ಆವೊಡು ಅಂದ್‌ದ್ ಅರಸುನು ಕೇನೊಂಡೆರ್. ದಾಯೆಗ್ ಪಂಡ, ಅಕ್ಲೆನ ಸೀಮೆಗ್ ಹೆರೋದನ ಸೀಮೆಡ್ದ್ ದಾನ್ಯ ಬರೊಂದಿತ್ತ್‌ಂಡ್.</verse>
				<verse number="21">ಒಂಜಿ ದಿನ ನಿಗಂಟ್ ಮಲ್ತೆ. ಆ ದಿನ ಹೆರೋದೆ ರಾಜಕುಂಟುನು ಪಾಡೊಂದು ರಾಜಾಸನದ ಮಿತ್ತ್ ಕುಲ್ಲುದು ಅಕ್ಲೆಗ್ ಭಾಷಣ ಮಲ್ತೆ.</verse>
				<verse number="22">ಉಂದು ನರಮಾನಿನ ಪಾತೆರ ಅತ್ತ್ ದೇವೆರೆನವೇ ಆದುಂಡು ಪಂಡ್ದ್ ಬೊಬ್ಬೆ ಪಾಡಿಯೆರ್.</verse>
				<verse number="23">ಆ ಮೈಮೆನ್ ದೇವೆರೆಗ್ ಕೊರಂದಿನೆಡ್ದ್ ಕರ್ತವ ದೂತೆ ಆ ಗಳಿಗೆಡೇ ಸೀಕ್‌ಡ್ ಪಾಡ್ದ್ ಆಯೆ ಪುರಿ ಬೂರ್ದ್ ಸೈತೆ.</verse>
				<verse number="24">ಆಂಡ ದೇವೆರೆ ಪಾತೆರ ಜನೊಕುಲೆಗ್ ಪನೊಂದಿತ್ತಿನೆಡ್ದ್ ನಂಬುನಾಕುಲು ನನಲಾ ಹೆಚ್ಚೊಂದು ಬತ್ತೆರ್.</verse>
				<verse number="25">ಬಾರ್ನಬೆ ಸೌಲೆ ಅಕ್ಲೆನ ಸೇವೆ ತೀರಿಸಾದ್ ಮಾರ್ಕೆ ಪನ್ಪಿನ ಮೇಲ್‌ಪುದರ್ ಇತ್ತಿ ಯೋಹಾನನ್ ಲೆತ್ತೊಂದು ಯೆರೂಸಲೇಮುಡ್ದು ಪಿರ ಬತ್ತೆರ್.</verse>
			</chapter>
			<chapter number="13">
				<verse number="1">ಅಂತಿಯೋಕ್ಯದ ಸಭೆಟ್ ಕೆಲವು ಪ್ರವಾದಿಲುಲಾ ಬೋಧಕೆರ್‌ಲಾ ಇತ್ತೆರ್; ಅಕುಲು ಏರೇರ್ ಪಂಡ ಬಾರ್ನಬೆ, ನೀಗರ್ ಪನ್ಪಿ ಸಿಮೆಯೋನು, ಕುರೇನ್ಯದ ಲೂಕ್ಯೆ, ಉಪರಾಜೆ ಆಯಿ ಹೆರೋದನ ತಾಂಕ್‌ದಿನ ಮೆಗ್ಯೆ ಆಯಿ ಮೆನಹೇನೆ, ಸೌಲು ಮೊಕುಲೇ.</verse>
				<verse number="2">ಮೊಕುಲು ಕರ್ತವಗ್ ಆರಾಧನೆ ಮಲ್ತ್‌ದ್ ಉಪವಾಸ ಮಲ್ತೊಂದುಪ್ಪುನಗ ಪರಿಶುದ್ಧಾತ್ಮೆ ಅಕ್ಲೆಗ್ ಪಂಡಿನಿ, “ಯಾನ್ ವಿಶೇಷ ಆದಿತ್ತಿನ ಕಾರ್ಯೊಗು ಬಾರ್ನಬನ್ಲಾ ಸೌಲುನ್ಲಾ ಅಜತ್ ದೆತ್ತೊಂದೆ ಆ ಕೆಲಸೊಗಾದ್ ಅಕ್ಲೆನ್ ಬೇತೆ ಮಲ್ಪುಲೆ.”</verse>
				<verse number="3">ಐಡ್ದಾವರ ಸಭೆತಾಕುಲು ಉಪವಾಸ ಇತ್ತ್‌ದ್ ಪ್ರಾರ್ಥನೆ ಮಲ್ತ್‌ದ್ ಇರ್ವೆರೆನ ಮಿತ್ತ್‌ಲಾ ಕೈ ದೀದ್ ಅಕ್ಲೆನ್ ಕಡಪುಡ್ದು ಕೊರಿಯೆರ್.</verse>
				<verse number="4">ಇಂಚ ಅಕುಲು ಪರಿಶುದ್ಧಾತ್ಮಡ್ದ್ ಕಡಪುಡ್ದಿನಾಕುಲಾದ್ ಸೆಲೂಕ್ಯಗ್ ಬತ್ತೆರ್; ಅಲ್ತ್‌ಡ್ದ್ ಕಡಲ ಸಾದಿ ಆದ್ ಕುಪ್ರದ್ವೀಪೊಗು ಪೋಯೆರ್.</verse>
				<verse number="5">ಸಲಾಮಿಸ್ ಪನ್ಪಿ ಜಾಗ್‌ಗ್ ಬತ್ತಿನಪಗ ಯೆಹೂದ್ಯೆರೆನ ಸಭಾಮಂದಿರೊಲೆಡ್ ದೇವೆರೆ ಪಾತೆರೊನು ಸಾರಿಯೆರ್. ಮಾರ್ಕೆ ಪನ್ಪಿ ಯೋಹಾನೆ ಸಹಾಯಕೆ ಆದ್ ಅಕ್ಲೆನ ಒಟ್ಟುಗು ಇತ್ತೆ.</verse>
				<verse number="6">ಅಕುಲು ಆ ದ್ವೀಪೊಲೆಡ್ ಪ್ರಯಾಣ ಮಲ್ತ್‌ದ್ ಪಾಫೊಸ್ ಪನ್ಪಿ ಊರು ಮುಟ್ಟಿಯೆರ್, ಅಲ್ಪ ಒರಿ ಸುಳ್ಳು ಪ್ರವಾದಿಲಾ ಮಂತ್ರವಾದಿಲಾ ಆದಿತ್ತಿನ ಬಾರ್‌ಯೇಸು ಪನ್ಪಿ ಯೆಹೂದ್ಯನ್ ತೂಯೆರ್.</verse>
				<verse number="7">ಬುದ್ಧಿವಂತೆ ಆದಿತ್ತಿ ಸೆರ್ಗ್ಯ ಪೌಲು ಪನ್ಪಿನ ರಾಜ್ಯಪಾಲನ ಕೈತಲ್‌ ಏಪಲಾ ಇತ್ತೆ. ಆಯೆ ದೇವೆರೆ ಪಾತೆರೊನು ಕೇನಿಯೆರೆ ಬಾರ್ನಬೆ ಸೌಲೆರೆನ್ ಲೆತ್ತ್‌ದಿತ್ತೆ.</verse>
				<verse number="8">ಆಂಡ ಮಂತ್ರವಾದಿ ಆದಿತ್ತಿನ ಎಲುಮೆ, ಅಕ್ಲೆನ್ ವಿರೋಧ ಮಲ್ತೆ. ರಾಜ್ಯಪಾಲಗ್ ಯೇಸುನು ನಂಬಂದಿಲೆಕ್ಕ ಅಡ್ಡಿ ಮಲ್ಪೆರೆಲಾ ಪ್ರಯತ್ನ ಮಲ್ತೆ. ಎಲುಮೆ ಪನ್ಪಿ ಪುದರ್‌ಗ್ ಮಂತ್ರವಾದಿ ಪಂಡ್ದೆ ಅರ್ಥ.</verse>
				<verse number="9">ಅಪಗ ಸೌಲು ಇನ್ಪಿ ಪೌಲು ಪರಿಶುದ್ಧಾತ್ಮೆ ದಿಂಜಿದಿನಾಯೆ ಆದ್ ದೃಷ್ಟಿ ದೀದ್ ಆಯೆನೇ ತೂಯೆ,</verse>
				<verse number="10">“ಮಾತ ಮೋಸೊಡು ಮಾತ ವಂಚನೆಡ್ ದಿಂಜಿದಿನಾಯ, ಸೈತಾನನ ಮಗ, ಮಾತ ನೀತಿಗ್ ವಿರೋಧ ಇತ್ತಿನಾಯ ಈ ಕರ್ತವನ ಸರಿಯಾಯಿನ ಸಾದಿನ್ ಮೊಡಂಕ್ ಮುಲ್ಪುನೆನ್ ಬುಡ್ಪುಜನಾ?</verse>
				<verse number="11">ಇಂದಾ, ಕರ್ತವೆ ನಿನ ವಿರೋಧಾದ್ ಕೈ ದೆರ್ತ್ತ್‌ದೆ; ಈ ಕುರುಡೆ ಆದ್ ಒಂತೆ ಸಮಯ ಸೂರ್ಯನ ಬೊಲ್ಪುನು ತೂವಂದೆ ಉಪ್ಪುವ,” ಅಂದ್‌ದ್ ಪಂಡೆ. ಆ ಗಳಿಗೆಡೇ ಆಯಗ್ ಕಣ್ಣ್ ಕತ್ತಲೆ ಆಂಡ್; ಕೈ ಪತ್ತುನಾಕುಲು ಏರಾಂಡಲಾ ತಿಕ್ಕುವೆರಾ ಅಂದ್‌ದ್ ನಾಡೊಂದು ತಿರ್ಗಿಯೆ.</verse>
				<verse number="12">ರಾಜ್ಯಪಾಲೆ ಈ ಸಂಗತಿನ್ ತೂದು ಕರ್ತವ ಬೋಧನೆಡ್ ಅಚ್ಚಿರ ಪಡೆದ್ ನಂಬುನಾಯೆ ಆಯೆ.</verse>
				<verse number="13">ಐಡ್ದ್ ಬೊಕ್ಕ ಪೌಲುಲಾ ಆಯನ ಒಟ್ಟುಗು ಇತ್ತಿನಾಕುಲುಲಾ ಪಾಫೊಸ್ ಪನ್ಪಿ ಊರುನು ಬುಡ್ದು ಕಡಲ್ದ ಸಾದಿಡ್‌ ಪಂಫುಲ್ಯ ದೇಶೊಗು ಸೇರ್ದಿನ ಪೆರ್ಗಗ್ ಬತ್ತೆರ್; ಯೋಹಾನೆ ಅಕ್ಲೆನ್ ಬುಡ್ದು ಪಿರ ಯೆರೂಸಲೇಮುಗು ಪೋಯೆ.</verse>
				<verse number="14">ಐಡ್ದ್ ಬೊಕ್ಕ ಅಕುಲು ಪೆರ್ಗಡ್ದ್ ಪ್ರಯಾಣ ಮಲ್ತ್‌ದ್ ಪಿಸಿದ್ಯ ದೇಶೊಗು ಸೇರ್ದಿನ ಅಂತಿಯೋಕ್ಯ ಪೇಂಟೆಗ್ ಬತ್ತೆರ್. ಸಬ್ಬತ್‌ದಿನೊಟು ಅಕುಲು ಸಭಾಮಂದಿರೊಲೆಗ್ ಪೋದು ಕುಲ್ಲೊಂಡೆರ್.</verse>
				<verse number="15">ಮೋಶೆನ ನ್ಯಾಯಕಟ್ಟ್‌ಡ್ ಬೊಕ್ಕ ಪ್ರವಾದಿಲೆನ ಗ್ರಂಥದ ಪಾರಾಯಣ ಓದಿ ಬೊಕ್ಕ ಸಭಾಮಂದಿರದ ನಾಯಕೆರ್, “ಸಹೋದರೆರೆ ಮೂಲು ಇತ್ತಿನ ಜನೊಕುಲೆಗ್ ಸಹಾಯ ಆಪಿನಂಚ ಉಮೇದದ ಪಾತೆರ ನಿಕ್ಲೆಡಿತ್ತ್‌ಂಡ ಪನ್ಲೆ,” ಅಂದ್‌ದ್ ಅಕ್ಲೆಗ್ ಪಂಡ್ದ್ ಕಡಪುಡಿಯೆರ್.</verse>
				<verse number="16">ಅಪಗ ಪೌಲು ಲಕ್ಕ್‌ದ್ ಕೈ ತೋಜಾಪಾದ್ ಇಂಚ ಪಂಡೆ, “ಎನ ಇಸ್ರಾಯೇಲ್‌ದ ಸಹೋದರೆರೆ, ಬೊಕ್ಕ ನಿಜ ದೇವೆರೆಗ್ ಪೋಡಿಯು ಪಿದಯಿದ ಜನೊಕುಲೇ, ಕೇನ್ಲೆ.</verse>
				<verse number="17">ಇಸ್ರಾಯೇಲ್ಯೆರೆನ ದೇವೆರ್ ನಮ ಪಿತೃಲೆನ್ ಅಜತ್ ದೆತ್ತೊಂದು ನಮ ಜನೊಕುಲು ಐಗುಪ್ತ ದೇಶೊಡು ಪರದೇಶಿಲು ಆದುಪ್ಪುನಗ ತನ ಜನೊಕುಲೆನ್ ವೃದ್ಧಿಗ್ ಕನತೆ. ದೇವೆರ್ ತನ ಬಲಶಕ್ತಿಡ್ ಅಕ್ಲೆನ್ ಆ ದೇಶೊಡ್ದು ಪಿದಯಿ ಕನತೆ.</verse>
				<verse number="18">ಮರುಭೂಮಿಡ್ ನಲ್ಪ ವರ್ಸ ಮುಟ್ಟ ಕಾಡ್‌ಡ್ ಅಕ್ಲೆನ ಪಿರಿಪಿರಿನ್ ಸಹಿಸೊಂಡೆ.</verse>
				<verse number="19">ದೇವೆರ್ ಕಾನಾನ್ ದೇಶೊಡಿತ್ತಿನ ಪಿದಯಿದ ಜನೊಕುಲೆನ ಏಳ್ ರಾಜ್ಯೊಲೆನ್ ನಾಶ ಮಲ್ತ್‌ದ್ ತನ ಜನೊಕುಲೆಗ್ ಹಕ್ಕಾದ್ ಕೊರಿಯೆ.</verse>
				<verse number="20">ಈತಾನಗ ಸುಮಾರ್ ನಾನ್ನೂತೈವ ವರ್ಸ ದಾಂಟ್ಂಡ್. “ಉಂದಾಯಿನೆಡ್ದ್ ಬೊಕ್ಕ ಪ್ರವಾದಿ ಆದುಪ್ಪು ಸಮುವೇಲ್‌ನ ಕಾಲದ ಮುಟ್ಟ ನ್ಯಾಯಾಧಿಪತಿಲೆನ್ ಕೊರಿಯೆ.</verse>
				<verse number="21">ಐಡ್ದ್ ಬೊಕ್ಕ ಅಕುಲು ಎಂಕ್ಲೆಗ್ ಅರಸು ಬೋಡು ಅಂದ್‌ದ್ ಕೇನೊನ್ನಗ ದೇವೆರ್ ಅಕ್ಲೆಗ್ ಬೆನ್ಯಾಮೀನ್ ಕುಲತ ಕೀಷುನ ಮಗೆ ಆದುಪ್ಪು ಸೌಲುನು ಕೊರಿಯೆ. ಆಯೆ ನಲ್ಪ ವರ್ಸ ಆಳಿಯೆ.</verse>
				<verse number="22">ಐಡ್ದ್ ಬೊಕ್ಕ ದೇವೆರ್ ಸೌಲುನು ದೆತ್ತ್ ಪಾಡ್ದ್ ದಾವೀದನ್ ಅಕ್ಲೆ ಮಿತ್ತ್ ಅರಸು ಆದ್ ಮಲ್ತೆ. ‘ಇಸ್ಸಾಯನ ಮಗೆ ದಾವೀದೆ ಎಂಕ್ ತಿಕ್ಕಿಯೆ, ಎನ ಮೆಚ್ಚಿಕೆದಾಯೆ ಆದುಲ್ಲೆ. ಆಯೆ ಎನ ಮನಸ್‌ಗ್ ಒಪ್ಪಿಯುನಾಯೆ, ಎನ ಆಸೆಲೆನ್ ತೀರಿಸಾವುನಾಯೆ,’ ಅಂದ್‌ದ್ ಆಯನ ಸಂಗತಿಡ್ ಸಾಕ್ಷಿ ಪಂಡೆ.</verse>
				<verse number="23">ಆಯನ ಸಂತಾನೊಡ್ದು ದೇವೆರ್ ತನ ಒಡಂಬಡಿಕೆ ಮಲ್ತಿ ಲೆಕ್ಕನೇ ಇಸ್ರಾಯೇಲ್ಯೆರೆಗ್ ಯೇಸು ಪನ್ಪಿ ಒರಿ ರಕ್ಷಕನ್ ಕೊರಿಯೆ.</verse>
				<verse number="24">ಯೇಸು ಬರ್ಪಿನೆಕ್ಕ್ ದುಂಬೇ ಯೋಹಾನೆ ಇಸ್ರಾಯೇಲ್ ಜನೊಕುಲೆಗ್ ಮಾತೆರೆಗ್ಲಾ ನಿಕ್ಲೆನ ಪಾಪೊಗಾದ್ ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗ್‌ದ್ ನೀರ್‌ದ ದೀಕ್ಷಾಸ್ನಾನ ಮಲ್ತೊನೊಡು ಅಂದ್‌ದ್ ಸಾರಿಯೆ.</verse>
				<verse number="25">ಯೋಹಾನೆ ತನ ಸೇವೆನ್ ತೀರಿಸಾನಗ ಜನೊಕುಲೆಗ್, ‘ನಿಕುಲು ಎನನ್ ಏರ್ ಅಂದ್‌ದ್ ಎನ್ನುವರ್? ಯಾನ್ ಆಯೆ ಅತ್ತ್, ಆಂಡ ಇಂದಾ, ಎನ ಬೆರಿಯೆ ಒರಿ ಬರ್ಪೆ, ಆಯ ಕಾರ್‌ದ ಜೋಡುದ ಪಟ್ಟಿನ್ ಗಿರ್ಪೆರೆಗ್ಲಾ ಯಾನ್ ತಕ್ಕದಾಯೆ ಅತ್ತ್,’ ಅಂದ್‌ದ್ ಪಂಡೆ.</verse>
				<verse number="26">“ಸಹೋದ್ರೆರೇ, ಅಬ್ರಹಾಮುನ ಸಂತಾನದಾಕುಲೇ, ಬೊಕ್ಕ ನಿಕ್ಲೆಡ್ ದೇವೆರೆಗ್ ಪೋಡಿಯುನಾಕುಲೇ ಈ ರಕ್ಷಣೆದ ಪಾತೆರೊನು ಕಡಪುಡ್ದಿನಿ ನಂಕಾದೇ.</verse>
				<verse number="27">ಯೆರೂಸಲೇಮುಡು ಉಪ್ಪು ಯೆಹೂದ್ಯೆರ್‌ಲಾ ಅಕ್ಲೆನ ಅಧಿಕಾರಿನಾಕುಲುಲಾ ಯೇಸು ರಕ್ಷಕೆ ಅಂದ್‌ದ್ ಅರ್ಥ ಮಲ್ತಿಜೆರ್. ಪ್ರತೀ ಸಬ್ಬತ್‌ದಿನೊಟು ಪಾರಾಯಣ ಆಪಿನ ಪ್ರವಾದಿಲೆನ ಪಾತೆರೊಲೆನ್ ಅರ್ಥ ಮಲ್ತೊನಂದೆ ಆಯನ್ ಅಪರಾಧಿ ಅಂದ್‌ದ್ ತೀರ್ಪು ಮಲ್ತೆರ್. ಅಂಚ ಮಲ್ತಿನೆಡ್ದ್ ಆ ಪ್ರವಾದಿಲು ಪಂತಿನ ಪಾತೆರೊಲು ಕೊಡಿಮುಟ್ಟುಂಡು.</verse>
				<verse number="28">ಮರಣದ ದಂಡನೆಗ್ ಕಾರಣ ದಾಲಾ ತಿಕ್ಕಿಜಿಡಲಾ ಆಯನ್ ಕೆರ್ಪಾವೊಡು ಅಂದ್‌ದ್ ಪಿಲಾತನ್ ಕೇನೊಂಡೆರ್.</verse>
				<verse number="29">ಆಯನ ಸಂಗತಿಡ್ ಶಾಸ್ತ್ರೊಡು ಬರೆದುಪ್ಪುನೆನ್ ಮಾತ ಮಲ್ತಿ ಬೊಕ್ಕ ಆಯನ್ ಮರತ ಕಂಬೊಡ್ದು ಜಪುಡಾದ್ ಸಮಾಧಿಡ್ ದೀಯೆರ್.</verse>
				<verse number="30">ಆಂಡ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ,</verse>
				<verse number="31">ಬೊಕ್ಕ ಆಯೆ ಗಲಿಲಾಯೊಡ್ದು ಯೆರೂಸಲೇಮುಗು ಯೇಸುನ ಒಟ್ಟುಗು ಇತ್ತಿನಾಕುಲೆಗ್ ಮಸ್ತ್ ದಿನ ಮುಟ್ಟ ತೋಜಾವೊಂಡೆ. ಅಕುಲು ಇತ್ತೆ ಜನೊಕುಲೆ ದುಂಬು ಆಯಗ್ ಸಾಕ್ಷಿ ಆದುಲ್ಲೆರ್.</verse>
				<verse number="32">ಈ ಸುವಾರ್ತೆನ್ ಎಂಕುಲು ನಿಕ್ಲೆಗ್ ಸಾರಿಯುನಾಕುಲಾದುಲ್ಲ. ದೇವೆರ್ ನಮ ಪಿತೃಲೆಗ್ ಮಲ್ತಿನ ಒಡಂಬಡಿಕೆನ್ ನಂಕಾದ್ ಪೂರ ಮಲ್ತ್‌ದೆರ್.</verse>
				<verse number="33">ದೇವೆರ್ ಯೇಸುನು ಲಕ್ಕಾಯಿನೆಡ್ದಾವರ, ‘ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ,’ ಅಂದ್‌ದ್ ರಡ್ಡನೆ ಕೀರ್ತನೆಲೆಡ್ ಬರೆದುಪ್ಪುನ ಪಾತೆರ ಪೂರ್ತಿ ಆಂಡ್.</verse>
				<verse number="34">“ಉಂದು ಅತ್ತಂದೆ ದೇವೆರ್ ಯೇಸುನು ಸೈತಿನಾಕುಲೆಡ್ದ್ ಲಕ್ಕಾಯಿನೆಡ್ದ್ ಆಯೆ ನನ ಏಪಲಾ ಕುರಿಯುನ ಸ್ಥಿತಿಕ್ಕ್ ಸೇರುನಾಯೆ ಅತ್ತ್ ಪನ್ಪಿನ ಸಂಗತಿಡ್ ದೇವೆರ್ ಪನ್ತಿನಿ ದಾನೆಂದ್ಂಡ, ‘ದಾವೀದಗ್ ನಿಜಾದ್ ವಾಗ್ದಾನ ಮಲ್ತ್‌ದಿನ ಪರಿಶುದ್ಧ ಬೊಕ್ಕ ದಯತ ವರೊಲೆನ್ ನಿಕ್ಲೆಗ್ ಕೊರ್ಪೆ. ಅವು ನಂಬಿಕೆಗ್ ತಕ್ಕದವೇ.’</verse>
				<verse number="35">ಐಕ್ ಸರಿಯಾದ್ ಆಯೆ, ‘ಈ ನಿನ ಪರಿಶುದ್ಧದಾಯನ ಶರೀರೊನು ಕುರಿಯೆರೆ ಬುಡ್ಪುಜಿ,’ ಅಂದ್‌ದ್ ಬೊಕ್ಕೊಂಜಿ ಕ್ರೀರ್ತನೆಡ್ ಪನ್ತೆ.</verse>
				<verse number="36">“ದಾವೀದೆ ಆಂಡಲಾ, ದೇವೆರೆ ಚಿತ್ತೊಗು ಸರಿಯಾದ್ ತನ ಸ್ವಂತ ಜನೊಕುಲೆ ಒಟ್ಟುಗು ಸೇವೆ ಮಲ್ತ್‌ದ್ ನಿದ್ರೆ ಪೋದು ತನ ಪಿತೃಲೆ ಬರಿಟ್ಟ್ ಕೌಂತುದು ಕುರಿಯುನ ಅವಸ್ಥೆನ್ ಪಡೆಯೆ.</verse>
				<verse number="37">ಆಂಡ ದೇವೆರೇ ಲಕ್ಕಾಯಿನಾ ಯೇಸುನ ಶರೀರ ಕುರಿಯುನ ಅವಸ್ಥೆನ್ ತೂತುಜಿ.</verse>
				<verse number="38">ಅಂಚಾಯಿನೆಡ್ದ್ ಸಹೋದ್ರೆರೇ, ಆಯಡ್ದ್ ಪಾಪೊಲೆ ಪರಿಹಾರ ತಿಕ್ಕುಂಡು ಪನ್ಪಿನವು ನಿಕ್ಲೆಗ್ ಸಾರಿಯೊಂದುಲ್ಲ ಅಂದ್‌ದ್ ತೆರಿದುಪ್ಪಡ್. ಮೋಶೆನ ನ್ಯಾಯಕಟ್ಟ್‌ದ ಮುಖಾಂತ್ರ ನಿಕ್ಲೆಗ್ ಬುಡುಗಡೆ ಆದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಜಿ. ಆಂಡ ಯೇಸುನು ನಂಬುನ ಮಾತೆರ್ಲಾ ಮಾತೆಡ್ದ್ ಬುಡುಗಡೆ ಹೊಂದುದು ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಂಡು.</verse>
				<verse number="39"></verse>
				<verse number="40">ಇಂಚಾದ್ ಪ್ರವಾದಿಲೆ ಗ್ರಂಥೊಡು ಪಂಡಿನವು ನಿಕ್ಲೆಗ್ ಬರಂದಿಲೆಕ್ಕ ತೂವೊನ್ಲೆ. ಅವು ದಾನೆಂದ್ಂಡ,</verse>
				<verse number="41">‘ಓ ತಿರಸ್ಕಾರ ಮಲ್ಪುನಾಕುಲೆ, ಸೋದ್ಯ ಆದ್, ನಾಶಾದ್ ಪೋವರ್. ನಿಕ್ಲೆ ದಿನೊಟು ಯಾನ್ ಒಂಜಿ ಕಾರ್ಯೊನು ಮಲ್ಪುವೆ; ಆ ಕಾರ್ಯೊನು ಒರಿ ನಿಕ್ಲೆಗ್ ತೆರಿಪಾಂಡಲಾ ನಿಕುಲು ಅವೆನ್ ನಂಬಂದೆ ಪೋವರ್.’”</verse>
				<verse number="42">ಪೌಲುಲಾ ಬಾರ್ನಬೆಲಾ ಸಭಾಮಂದಿರೊನು ಬುಡ್ದು ಪೋವೊಂದುಪ್ಪುನಗ ಜನೊಕುಲು ಈ ಪಾತೆರೊಲೆನ್ ಬರ್ಪಿ ಸಬ್ಬತ್‌ದಿನೊಟುಲಾ ಎಂಕ್ಲೆಗ್ ಪನೊಡು ಅಂದ್‌ದ್ ನಟ್ಟೊಂಡೆರ್.</verse>
				<verse number="43">ಸಭಾಕೂಟ ಮುಗಿ ಬೊಕ್ಕ ಮಸ್ತ್ ಯೆಹೂದ್ಯೆರ್‌ಲಾ ಯೆಹೂದ್ಯ ಮತ ಸೇರ್ದಿನಾಕುಲೆಡ್ಲಾ ಕೆಲೆವೆರ್ ಪೌಲು ಬಾರ್ನಬನ ಒಟ್ಟುಗು ಪೋಯೆರ್. ಮೊಕುಲು ಅಕ್ಲೆನ ಒಟ್ಟುಗು ಪಾತೆರ್‌ದ್ ದೇವೆರೆನ ದಯೊಟು ನಿಲೆ ಆದುಪ್ಪೊಡು ಅಂದ್‌ದ್ ಅಕ್ಲೆಗ್ ಉಮೇದ್ ಕೊರಿಯೆರ್.</verse>
				<verse number="44">ಬರ್ಪಿ ಸಬ್ಬತ್‌ಡ್ ಹೆಚ್ಚ್ ಕಮ್ಮಿ ಇಡೀ ಊರು ದೇವೆರೆ ಪಾತೆರೊನು ಕೇನಿಯೆರೆ ಸೇರ್ದ್ ಬತ್ತೆರ್.</verse>
				<verse number="45">ಆಂಡ ಜನೊಕುಲು ಗುಂಪಾದ್ ಬರ್ಪಿನೆನ್ ತೂದು ಯೆಹೂದ್ಯೆರ್ ನಂಜಿಡ್ ಪೌಲು ಪಂಡಿನ ಪಾತೆರೊಗು ಎದುರು ಪಾತೆರೊಂದು ದೂಷಣೆ ಮಲ್ತೊಂದಿತ್ತೆರ್.</verse>
				<verse number="46">ಅಪಗ ಪೌಲುಲಾ ಬಾರ್ನಬೆಲಾ ಧೈರ್ಯೊಡು ಪಾತೆರ್‌ದ್, “ದೇವೆರೆ ಪಾತೆರೊನು ದುಂಬತ್ತ ನಿಕ್ಲೆಗೇ ಪನ್ಪಿನ ಅಗತ್ಯ ಇತ್ತ್ಂಡ್. ಆಂಡ ನಿಕುಲು ಅವೆನ್ ತಿರಸ್ಕಾರ ಮಲ್ತ್‌ದ್ ನಿಕುಲು ನಿತ್ಯಜೀವೊಗು ಸೇರ್ದಿನಾಕುಲತ್ತ್ ಅಂದ್‌ದ್ ತೀರ್ಪು ಮಲ್ತೊನೆಡ್ದ್, ಇಂದಾ, ಎಂಕುಲು ನಿಕ್ಲೆನ್ ಬುಡ್ದು ಪಿದಯಿದ ಜನೊಕುಲೆ ಕೈತಲ್‌ ಪೋಪ.</verse>
				<verse number="47">ಅಂಚೆನೇ ಕರ್ತವೆ ಎಂಕ್ಲೆಗ್ ಅಪ್ಪಣೆ ಕೊರ್ತೆ; ಎಂಚ ಪಂಡ, ‘ಈ ಲೋಕದ ಕಡೆ ಮುಟ್ಟ ರಕ್ಷಣೆಗಾದ್ ಈ ಉಪ್ಪುಲೆಕ್ಕ ಯಾನ್ ನಿನನ್ ಪಿದಯಿದ ಜನೊಕುಲೆಗ್ ಬೊಲ್ಪು ಆದುಪ್ಪೆರೆ ನೇಮಕ ಮಲ್ತ್‌ದೆ,’” ಪನ್ಪಿನವೇ.</verse>
				<verse number="48">ಅಲ್ಪ ಇತ್ತಿನ ಪಿದಯಿದ ಜನೊಕುಲು ಈ ಪಾತೆರೊನು ಕೇಂಡ್ದ್ ಸಂತೋಷ ಪಡೆದ್ ದೇವೆರೆ ಪಾತೆರೊನು ಪುಗರಿಯೆರ್; ಬೊಕ್ಕ ನಿತ್ಯಜೀವೊಗು ನೇಮಕ ಆತಿನಾಕುಲು ಮಾತೆರ್ಲಾ ನಂಬಿಯೆರ್.</verse>
				<verse number="49">ಕರ್ತವ ವಾಕ್ಯೊಲು ಆ ಪ್ರದೇಶೊಡು ಮಾತ ಕಡೆಟ್ಲಾ ಪರಡೊಂದು ಬತ್ತ್ಂಡ್.</verse>
				<verse number="50">ಆಂಡ ಯೆಹೂದ್ಯೆರ್, ಕೆಲವು ಭಕ್ತಿ ಇತ್ತಿ ಮರ್ಯಾದಿದ ಪೊಂಜೊವುಲೆನ್ಲಾ ಪಟ್ಟಣದ ಮುಖ್ಯಸ್ಥೆರೆನ್ಲಾ ನೋಚಾದ್ ಪೌಲು ಬಾರ್ನಬೆರೆಗ್ ಭಂಗ ಕೊರ್ದು ತನ್ಕುಲೆ ಊರುಡ್ದು ಗಿಡ್ತೆರ್.</verse>
				<verse number="51">ಐಡ್ದಾವರ ಪೌಲು ಬಾರ್ನಬೆ ತನ್ಕುಲೆ ಕಾರ್‌ದ ಧೂಳುನು ಕುಡ್ತ್‌ದ್ ಇಕೋನ್ಯಗ್ ಪೋಯೆರ್.</verse>
				<verse number="52">ಆಂಡಲಾ ಯೇಸುನ ಶಿಷ್ಯೆರಾಯಿನಾಕುಲು ಸಂತೋಷೊಡ್ಲಾ ಪರಿಶುದ್ಧಾತ್ಮೊಡ್ಲಾ ದಿಂಜಿದಿನಕುಲಾದಿತ್ತೆರ್.</verse>
			</chapter>
			<chapter number="14">
				<verse number="1">ಇಕೋನ್ಯೊಡು ಪೌಲು ಬಾರ್ನಬೆ ಇರ್ವೆರ್‌ಲಾ ಯೆಹೂದ್ಯೆರೆನ ಸಭಾಮಂದಿರೊಲೆಗ್ ಪೋದು, ಧೈರ್ಯೊಡು ದೇವೆರೆನ ಪಾತೆರೊನು ಪಂಡಿನೆಡ್ದ್ ಮಸ್ತ್ ಜನ ಯೆಹೂದ್ಯೆರೆಡ್ಲಾ ಗ್ರೀಕೆರೆಡ್ಲಾ ನಂಬುನಾಕುಲಾಯೆರ್.</verse>
				<verse number="2">ಆಂಡ ಯೆಹೂದ್ಯೆರೆಡ್ ನಂಬಂದೆ ಪೋಯಿನ ಕೆಲೆವೆರ್ ಪಿದಯಿದ ಜನೊಕುಲೆನ ಉಡಲ್‌ನ್ ಸಹೋದ್ರೆರೆಗ್ ವಿರೋಧಾದ್ ನೋಚಾದ್ ಹಾಳ್ ಮಲ್ತೆರ್.</verse>
				<verse number="3">ಇಂಚಾದುಪ್ಪುನಗ ಪೌಲು ಬಾರ್ನಬೆ ದಿಂಜ ಸಮಯ ಅಲ್ಪ ಇತ್ತ್‌ದ್ ಕರ್ತವೆ ಅಕ್ಲೆನ ಕೈಡ್ದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ನಡಪುಡ್ದು ತನ ದಯತ ಪಾತೆರೊಗು ಸಾಕ್ಷಿ ಕೊರಿನೆಡ್ದ್ ದೇವೆರೆ ಮಿತ್ತ್ ಭರವಸ ದೀದ್ ಧೈರ್ಯೊಡು ಪಾತೆರೊಂದಿತ್ತೆರ್.</verse>
				<verse number="4">ಅಪಗ ಆ ಊರುದ ಜನೊಕುಲೆಡ್ ಒಂಜಿ ಭೇದ ಪುಟ್ಟುಂಡು; ಕೆಲೆವೆರ್ ಯೆಹೂದ್ಯೆರೆನ ಗುಂಪುದಾಕುಲಾಯೆರ್ ಬಾಕಿದಾಕುಲು ಅಪೊಸ್ತಲೆರೆ ಗುಂಪುದಾಕುಲಾಯೆರ್.</verse>
				<verse number="5">ಪಿದಯಿದ ಜನೊಕುಲುಲಾ ಯೆಹೂದ್ಯೆರ್‌ಲಾ ಸೇರ್ದ್ ತನ್ಕುಲೆ ಅಧಿಪತಿಲೆನ ಒಪ್ಪಿಗೆಡ್ ಅಪೊಸ್ತಲೆರೆನ್ ಅವಮಾನ ಮಲ್ತ್‌ದ್ ಕಲ್ಲ್ ದಕ್ಕ್‌ದ್ ಕೆರೊಡು ಅಂದ್‌ದ್ ಇತ್ತೆರ್.</verse>
				<verse number="6">ಅಪೊಸ್ತಲೆರ್ ಅವೆನ್ ತೆರಿದ್ ಲುಕವೋನ್ಯೊಡಿತ್ತಿನ ಲುಸ್ತ್ರ ದೆರ್ಬೆ ಪನ್ಪಿ ಆ ಊರುದ ಸುತ್ತಮುತ್ತದ ಪ್ರದೇಶೊಗು ಪಾರ್‌ಪೋಯೆರ್.</verse>
				<verse number="7">ಅಕುಲು ಅಡೆಗ್ ಪೋದು ಸುವಾರ್ತೆ ಸಾರೊಂದೆ ಇತ್ತೆರ್.</verse>
				<verse number="8">ಲುಸ್ತ್ರೊಡು ಒರಿ ಮನುಷ್ಯೆ ಇತ್ತೆ, ಆಯೆ ತನ ಅಪ್ಪೆ ಗರ್ಭೊಡ್ದೇ ಮೋಂಟೆ ಆದ್ ಕಾರ್‌ಡ್ ಬಲದಾಂತೆ ನಡಪಂದೆ ಇತ್ತೆ.</verse>
				<verse number="9">ಪೌಲು ಪನ್ಪಿನ ಪಾತೆರೊಲೆನ್ ಆಯೆ ಕೆಬಿ ಕೊರ್ದು ಕೇನೊಂದಿತ್ತೆ. ಪೌಲು ಆಯನ್ ದೃಷ್ಟಿ ದೀದ್ ತೂದು, ದೇವೆರ್ ತನನ್ ಗುಣ ಮಲ್ಪೆ ಪನ್ಪಿನ ನಂಬಿಕೆ ಉಂಡು ಅಂದ್‌ದ್ ತೆರಿದ್</verse>
				<verse number="10">ನಿನ ಕಾರೂರುದು ಸರ್ತ ಉಂತುಲ ಅಂದ್‌ದ್ ಗಟ್ಟಿಡ್ ಪಂಡೆ. ಅಪಗನೆ ಆ ನರಮಾನಿ ಲಾಗಿದ್ ನಡತೆ.</verse>
				<verse number="11">ಪೌಲು ಮಲ್ತಿನೆನ್ ಜನೊಕುಲು ತೂದು ದೇವತೆಲು ನರಮಾನಿಲೆನ ರೂಪೊಡು ನಮ ಕೈತಲ್‌ ಜತ್ತ್‌ದ್ ಬೈದೆರ್ ಅಂದ್‌ದ್ ಲುಕವೋನ್ಯ ಭಾಷೆಡ್ ಕಲ್ಕಿಯೆರ್.</verse>
				<verse number="12">ಬಾರ್ನಬನ್ ದೈಸ್‌ದೇವೆರ್ ಪಂಡ್ದ್‌ಲಾ ಪೌಲು ಪಾತೆರುನೆಟ್ಟ್ ಮುಖ್ಯ ಆದಿತ್ತಿನೆಡ್ದ್ ಆಯನ್ ಹೆರ್ಮೆಸ್ ದೇವೆರ್ ಅಂದ್‌ದ್ ಲೆತ್ತೆರ್.</verse>
				<verse number="13">ದೈಸ್‌ದೇವೆರ್ನ ದೇವಸ್ಥಾನ ಪಟ್ಟಣದ ಬಾಕಿಲ್‌ದ ಪಿದಯಿಡ್ ಇತ್ತ್ಂಡ್. ದೇವಾಸ್ಥಾನದ ಪುಜಾರಿ ಕೆಲವು ಬೋರಿಲೆನ್ ಪೂತ ಮಾಲೆನೆಲ್ಲಾ ಕನತ್‌ದ್ ಜನೊಕುಲೆಡೊಪ್ಪ ಅಕ್ಲೆಗ್ ಬಲಿ ಕೊರೊಡು ಅಂದ್‌ದ್ ಇತ್ತೆ.</verse>
				<verse number="14">ಉಂದೆನ್ ಕೇಂಡ್ದ್ ಅಪೊಸ್ತಲೆರಾಯಿನ ಬಾರ್ನಬೆ ಪೌಲೆರ್ ತನ್ಕುಲೆನ ಕುಂಟುನು ಪರ್ತೊಂದು ಜನೊಕುಲೆನ ಗುಂಪುಗು ಪೊಗ್ಗುದು ಇಂಚ ಬೊಬ್ಬೆ ಪಾಡಿಯೆರ್</verse>
				<verse number="15">ಜನೊಕುಲೇ, ನಿಕುಲು ದಾದ ಮಲ್ತೊಂದುಲ್ಲರ್? ಎಂಕುಲುಲಾ ನರಮಾನಿಲೇ, ನಿಕ್ಲೆಲೆಕ್ಕನೇ ಸ್ವಭಾವದಾಕುಲು, ನಿಕುಲು ಈ ಬೊಡ್ಚಾವಂದಿನ ಕೆಲಸೊಲೆನ್ ಬುಡ್ದು ಬಾನೊನು, ಭೂಮಿನ್ ಕಡಲ್‌ನ್ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತಿನ ಜೀವಸ್ವರೂಪೆ ಆದುಪ್ಪು ದೇವೆರೆ ಕಡೆಕ್ಕ್ ತಿರ್ಗೊಡು ಅಂದ್‌ದ್ ಸುವಾರ್ತೆ ನಿಕ್ಲೆಗ್ ಸಾರಿದ್ ಪನ್ಪಿನಾಕುಲಾದುಲ್ಲ.</verse>
				<verse number="16">ಕರಿದ್ ಪೋಯಿನ ಕಾಲೊಡು ದೇವೆರ್ ಮಾತ ಜನಾಂಗೊಲೆನ್ ತನ್ಕುಲೆ ಮನಸ್‌ಗ್ ಬತ್ತಿಲೆಕ್ಕ ನಡಪೆರೆ ಬುಡಿಯೆ.</verse>
				<verse number="17">ಆಂಡ ಆಯೆ ತನ ಸಂಗತಿಡ್ ಸಾಕ್ಷಿ ಕೊರಂದೆ ಇಜ್ಜಾಂಡ್. ನಿಕ್ಲೆಗ್ ಬಾನೊಡ್ದು ಬರ್ಸೊನು ಫಲತ್ತ ಕಾಲೊಡು ಫಲೊನ್ಲಾ ಬೋಡಾಯಿನಾತ್ ಆಹಾರೊನ್ಲಾ ಕೊರ್ದು ನಿಕ್ಲೆನ ಮನಸ್‌ನ್ ಸಂತೋಷೊಡು ದಿಂಜಾದ್ ಎಡ್ಡೆನ್ ಮಲ್ತೊಂದು ಬತ್ತಿನಾಯೆ ಆಯೆನೇ ಅಂದ್‌ದ್ ಪಂಡೆರ್.</verse>
				<verse number="18">ಅಕ್ಲೆಗ್ ಈ ಪಾತೆರೊಲೆನ್ ತೆರಿಪಾಂಡಲಾ ಎಂಕ್ಲೆಗ್ ಬಲಿ ಕೊರಂದಿಲೆಕ್ಕ ಜನೊಕುಲೆನ್ ತಡೆಪೆರೆ ಭಂಗ ಆಂಡ್.</verse>
				<verse number="19">ಉಂದೆಡ್ದ್ ಬೊಕ್ಕ ಅಂತಿಯೋಕ್ಯಡ್ದ್‌ಲಾ ಇಕೋನ್ಯೊಡ್ದುಲಾ ಯೆಹೂದ್ಯೆರ್ ಬತ್ತ್‌ದ್ ಜನೊಕುಲೆನ್ ಲಕ್ಕಾದ್ ಪೌಲುನು ಕೆರಿಯೆರೆ ಕಲ್ಲ್ ದಕ್ಕ್‌ದ್ ಆಯೆ ಸೈತೆ ಅಂದ್‌ದ್ ಎನ್ನ್‌ದ್ ಊರುದ ಪಿದಯಿ ಒಯ್ತ್ ಪಾಡಿಯೆರ್.</verse>
				<verse number="20">ಆಂಡ ಯೇಸುನ ಶಿಷ್ಯೆರ್ ಆಯನ ಸುತ್ತಲಾ ಉಂತೊಂದುಪ್ಪುನಗ ಆಯೆ ಲಕ್ಕ್‌ದ್ ಊರುದ ಉಲಯಿ ಪೋಯೆ. ಮನದಾನಿ ಬಾರ್ನಬನ ಒಟ್ಟುಗು ದೆರ್ಬೆಗ್ ಪಿದಾಡಿಯೆ.</verse>
				<verse number="21">ದೆರ್ಬೆ ಊರುಡು ಆಯೆ ಸುವಾರ್ತೆ ಸಾರಿದ್ ಕೆಲವು ಶಿಷ್ಯೆರಾಯಿ ಬೊಕ್ಕ ಲುಸ್ತ್ರೊಗ್ಲಾ ಇಕೋನ್ಯಗ್ಲಾ ಅಂತಿಯೋಕ್ಯಗ್ಲಾ ಪಿರ ಬತ್ತ್‌ದ್</verse>
				<verse number="22">ಶಿಷ್ಯೆರ್‌ನ ಉಡಲ್‌ನ್ ದೃಢ ಮಲ್ತ್‌ದ್ ನಂಬಿಕೆಡ್ ನಿಲೆ ಆದುಪ್ಪುಲೆ ಪಂಡ್ದ್ ಉಮೇದ್ ಕೊರಿಯೆರ್, ಬೊಕ್ಕ ನಮ ಬಾರಿ ಸಂಕಟ ತಾಳ್‌ದ್ ದೇವೆರೆ ರಾಜ್ಯೊಗು ಸೇರೊಡು ಅಂದ್‌ದ್ ಬೋಧನೆ ಕೊರಿಯೆರ್.</verse>
				<verse number="23">ಉಂದತ್ತಂದೆ ಪ್ರತಿ ಸಭೆಟ್ಲಾ ಸಭೆತಾಕುಲೆನ ಒಪ್ಪಿಗೆಡ್ದ್ ಹಿರಿಯೆರೆನ್ ನೇಮಕ ಮಲ್ತ್‌ದ್ ಉಪವಾಸೊಡು ಪ್ರಾರ್ಥನೆ ಮಲ್ತ್‌ದ್ ಅಕುಲು ನಂಬುದಿನ ಕರ್ತವ ಕೈಕ್ ಅಕ್ಲೆನ್ ಒಚ್ಚಿದ್ ಕೊರಿಯೆರ್.</verse>
				<verse number="24">ಐಡ್ದ್ ಬೊಕ್ಕ ಪಿಸಿದ್ಯ ಪ್ರದೇಶ ದಾಂಟ್‌ದ್ ಪಂಫುಲ್ಯ ದೇಶೊಗು ಬತ್ತೆರ್.</verse>
				<verse number="25">ಐಕ್ ಸೇರ್ದುಪ್ಪುನ ಪೆರ್ಗಡ್ ಕರ್ತವ ಪಾತೆರೊನು ಪಂಡಿ ಬೊಕ್ಕ ಅತ್ತಾಲ್ಯಗ್ ಪೋಯೆರ್.</verse>
				<verse number="26">ಅಲ್ತ್‌ಡ್ದ್ ಅಕುಲು ಸುರಿಯ ಆದ್ ಅಂತಿಯೋಕ್ಯಗ್ ಕಡಲ್ದ ಸಾದಿಯಾದ್ ಮುಟ್ಟಿಯೆರ್. ಅಕುಲು ತೀರಿಸಾದ್ ಬತ್ತಿನ ಕೆಲಸೊಗಾದ್ ದೇವೆರೆನ ದಯೊಟು ಒಚ್ಚಿದ್ ಕೊರ್ತಿನಾಕುಲಾದ್ ಆ ಊರುಡ್ದೆ ಪಿದಾಡಿಯೆರ್.</verse>
				<verse number="27">ಅಲ್ಪ ಸಭೆನ್ ಕೂಡಾದ್ ದೇವೆರ್ ತನ್ಕುಲೆ ಒಟ್ಟುಗಿತ್ತ್‌ದ್ ಮಲ್ತಿನ ಮಾತೆನ್ಲಾ ಆಯೆ ಪಿದಯಿದ ಜನೊಕುಲೆಗ್ ನಂಬಿಕೆದ ಬಾಕಿಲ್‌ನ್ ಜತ್ತ್‌ದಿನೆನ್ಲಾ ವಿವರಿಸಾದ್ ಪಂಡೆರ್.</verse>
				<verse number="28">ಐಡ್ದ್ ಬೊಕ್ಕ ಅಕುಲು ಅಲ್ಪ ಶಿಷ್ಯೆರೆ ಒಟ್ಟುಗು ದಿಂಜ ಸಮಯ ತಡೆಯೆರ್.</verse>
			</chapter>
			<chapter number="15">
				<verse number="1">ಬೊಕ್ಕ ಕೆಲೆವೆರ್ ಯೂದಾಯೊಡ್ದು ಅಂತಿಯೋಕ್ಯಗ್ ಬತ್ತ್‌ದ್, “ನಿಕುಲು ಮೋಶೆನ ನ್ಯಾಯಕಟ್ಟ್‌ದ ನೇಮದ ಪ್ರಕಾರ ಸುನ್ನತಿ ಮಲ್ತೊನುಜರ್ಡ ನಿಕ್ಲೆಗ್ ರಕ್ಷಣೆ ಆವಂದ್,” ಅಂದ್‌ದ್ ಸಹೋದ್ರೆರೆಗ್ ಬೋಧನೆ ಮಲ್ತೊಂದಿತ್ತೆರ್.</verse>
				<verse number="2">ಐಡ್ದಾವರ ಪೌಲು ಬೊಕ್ಕ ಬಾರ್ನಬಡ ಮಲ್ಲ ತರ್ಕ ಉಂಡಾಂಡ್. ಉಂದೆತ್ತ ಸಂಗತಿಡ್ ಪೌಲುಲಾ ಬಾರ್ನಬೆಲಾ ತನ್ಕುಲೆಡ್ದೇ ಬೇತೆ ಕೆಲೆವೆರೆನ್ಲಾ ಯೆರೂಸಲೇಮುಡಿತ್ತಿ ಅಪೊಸ್ತಲೆರೆ ಬೊಕ್ಕ ಸಭೆತ ಹಿರಿಯೆರ್‌ನ ಕೈತಲ್‌ ಪೋವೊಡು ಅಂದ್‌ದ್ ತೀರ್ಮಾನ ಮಲ್ತೆರ್.</verse>
				<verse number="3">ಸಭೆತಾಕುಲು ಅಕ್ಲೆನ್ ಕಡುಪುಡುದು ಕೊರಿ ಬೊಕ್ಕ ಅಕುಲು ಫೊಯಿನೀಕೆ ಬೊಕ್ಕ ಸಮಾರ್ಯದ ದೇಶ ದಾಂಟ್‌ದ್ ಪೋವೊಂದುಪ್ಪುನಗ ಪಿದಯಿದ ಜನೊಕುಲು ಕರ್ತವ ಕಡೆಕ್ಕ್ ತಿರ್ಗುನ ಸಂಗತಿಲೆನ್ ಅಲ್ಪ ಇತ್ತಿನ ಸಹೋದ್ರೆರೆಗ್ ಬುಡ್ಪಾದ್ ಪಂಡ್ದ್ ಅಕ್ಲೆನ್ ಮಾತೆರೆನ್ಲಾ ಸಂತೋಷ ಮಲ್ಪಾಯೆರ್.</verse>
				<verse number="4">ಅಕುಲು ಯೆರೂಸಲೇಮುಗು ಬತ್ತಿ ಬೊಕ್ಕ ಸಭೆಲಾ ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ಅಕ್ಲೆನ್ ಸೇರಾವೊಂಡೆರ್. ದೇವೆರ್ ತನ್ಕುಲೆ ಒಟ್ಟುಗು ಇತ್ತ್‌ದ್ ಮಲ್ತ್‌ದಿನ ಕಾರ್ಯೊಲೆನ್ ಪೂರ ಅಕ್ಲೆಗ್ ತೆರಿಪಾಯೆರ್.</verse>
				<verse number="5">ಆಂಡ ಪರಿಸಾಯೆರೆ ಗುಂಪುದಾಕುಲೆಡ್ ಯೇಸುನು ನಂಬುದಿನ ಕೆಲೆವೆರ್ ಲಕ್ಕ್‌ದ್ ದೇವೆರೆ ಕಡೆಕ್ಕ್ ತಿರ್ಗ್‌ದುಪ್ಪುನ ಪಿದಯಿದ ಜನೊಕುಲೆಗ್ ಸುನ್ನತಿ ಮಲ್ಪಾವೊಡು, ಬೊಕ್ಕ ಮೋಶೆನ ನ್ಯಾಯದ ನಿಯಮೊನು ಕೈಕೊಂದು ನಡಪೆರೆ ಅಕ್ಲೆಗ್ ಅಪ್ಪಣೆ ಕೊರೊಡು ಅಂದ್‌ದ್ ಪಂಡೆರ್.</verse>
				<verse number="6">ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ಈ ಸಂಗತಿನ್ ವಿಚಾರಣೆ ಮಲ್ಪೆರೆ ಕೂಡ್ದುಪ್ಪುನಗ ಅಕ್ಲೆ ನಡುಟು ಮಸ್ತ್ ತರ್ಕ ನಡತಿ ಬೊಕ್ಕ</verse>
				<verse number="7">ಪೇತ್ರೆ ಲಕ್ಕ್‌ದ್ ಅಕ್ಲೆಗ್, “ಸಹೋದರೆರೆ, ಪಿದಯಿದ ಜನೊಕುಲು ಎನ ಬಾಯಿಡ್ದ್ ಸುವಾರ್ತೆದ ಪಾತೆರೊನು ಕೇಂಡ್ದ್ ನಂಬೊಡು ಅಂದ್‌ದ್ ದೇವೆರ್ ನಿಕ್ಲೆಡ್ದ್ ಎನನ್ ಅಜತ್‌ದ್ ದೆತ್ತೊಂಡಿನವು ನಿಕ್ಲೆಗ್ ತೆರಿದುಂಡು.</verse>
				<verse number="8">ಬೊಕ್ಕ ಉಡಲ್‌ನ್ ತೆರಿದಿನಾಯೆ ಆದುಪ್ಪು ದೇವೆರ್ ಎಂಚ ಪರಿಶುದ್ಧಾತ್ಮ ವರೊನು ನಂಕ್ ಕೊರಿಯೆನಾ, ಅಂಚೆನೇ ಅಕ್ಲೆಗ್ಲಾ ಕೊರ್ದು ತನ ಜನೊಕುಲು ಅಂದ್‌ದ್ ಸಾಕ್ಷಿ ಕೊರಿಯೆ</verse>
				<verse number="9">ಉಂದತ್ತಂದೆ ದೇವೆರ್ ಎಂಕ್ಲೆಗ್ಲಾ ಅಕ್ಲೆಗ್ಲಾ ದಾಲಾ ಭೇದ ಮಲ್ಪಂದೆ, ಅಕುಲು ನಂಬಿನೆಡ್ದ್ ದೇವೆರ್ ಅಕ್ಲೆ ಉಡಲ್‌ನ್ಲಾ ಶುದ್ಧ ಮಲ್ತೆ.</verse>
				<verse number="10">ಇಂಚಾದುಪ್ಪುನಗ ಎಂಕುಲಾವಡ್ ನಮ ಪಿತೃಲಾವಡ್ ತುಂಬೊನಿಯೆರೆ ಆವಂದಿ ಪುದೆನ್ ನಿಕುಲು ಶಿಷ್ಯೆರ್‌ನ ಪುಗೆಲ್‌ದ ಮಿತ್ತ್ ಪಾಡ್ದ್ ದೇವೆರೆನ್ ಪರೀಕ್ಷೆ ಮಲ್ಪುನು ದಾಯೆಗ್?</verse>
				<verse number="11">ಕರ್ತವೆ ಆದುಪ್ಪು ಯೇಸುನ ದಯೊಡ್ದೇ ನಮ ರಕ್ಷಣೆ ಹೊಂದುವ ಅಂದ್‌ದ್ ನಂಬುವ ಅತ್ತಾ; ಅಂಚೆನೇ ಅಕುಲುಲಾ ಹೊಂದುವೆರ್,” ಅಂದ್‌ದ್ ಪಂಡೆ.</verse>
				<verse number="12">ಗುಂಪುಗು ಸೇರ್ದಿನಾಕುಲು ಮಾತೆರ್ಲಾ ಈ ಪಾತೆರೊಲೆನ್ ಕೇಂಡ್ದ್ ಮನಿಪಂದೆ ಇತ್ತ್‌ದ್ ಬಾರ್ನಬೆಲಾ ಪೌಲುಲಾ ತನ್ಕುಲೆಡ್ದ್ ದೇವೆರ್ ಪಿದಯಿದ ಜನೊಕುಲೆ ನಡುಟು ಮಲ್ತಿನ ಮಾತ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ಪನ್ಪಿನೆನ್ ಕೆಬಿ ಕೊರ್ದು ಕೇಂಡೆರ್.</verse>
				<verse number="13">ಅಕುಲು ಪಂಡ್ದ್ ಮುಗಿತಿ ಬೊಕ್ಕ ಯಾಕೋಬು ಪಂಡೆ, “ಸಹೋದರೆರೆ, ಯಾನ್ ಪನ್ಪಿನೆನ್ ಕೇನ್ಲೆ.</verse>
				<verse number="14">ದೇವೆರ್ ಸುರುಟ್ಟು ಪಿದಯಿದ ಜನೊಕುಲೆನ್ ಕರುಣೆ ಮಲ್ತ್‌ದ್ ತನ ಪುದರ್‌ಗಾದ್ ಅಕ್ಲೆಡ್ದ್ ಒಂಜಿ ಪ್ರಜೆನ್ ಅಜತ್‌ದಿನ ರೀತಿನ್ ಸಿಮೆಯೋನೆ ಬುಡ್ಪಾದ್ ಪಂಡೆ.</verse>
				<verse number="15">ಉಂದು ಪ್ರವಾದಿಲು ಬರೆತಿ ಪಾತೆರೊಲೆಗ್ ಸಮ ಬೂರುಂಡು.</verse>
				<verse number="16">‘ಉಂದೆಡ್ದ್ ಬೊಕ್ಕ ಯಾನ್ ಪಿರ ಬತ್ತ್‌ದ್ ದಾವೀದನ ಬೂರ್ದು ಪೋತಿ ಗುಡಾರೊನು ಕುಡ ಕಟ್ಟುವೆ. ಚಲ್ಲಾಪಿಲ್ಲಿ ಆತಿನೆನ್ ಸರಿ ಮಲ್ತ್‌ದ್ ಅವೆನ್ ಸರ್ತ ಉಂತಾವೆ.</verse>
				<verse number="17">ನರಮಾನಿಲೆಡ್ದ್ ಒರಿದಿ ಜನೊಕುಲುಲಾ ಅಂದ್ಂಡ ಎನ ಪುದರ್ ಏರೇ ಮಿತ್ತ್ ಉಂಡಾ ಆ ಮಾತ ಪಿದಯಿದ ಜನೊಕುಲುಲಾ ಕರ್ತವನ್ ನಾಡುನಾಕುಲಾವೊಡು ಅಂದ್‌ದ್ ಕರ್ತವೆ ಪನ್ಪೆ ಅಂದ್‌ದ್ ಬರೆತ್ಂಡ್.</verse>
				<verse number="18">ಆದಿಡ್ದೆ ಈ ಕಾರ್ಯೊಲೆನ್ ಮಾತ ತೆರಿಪಾದುಂಡು.’</verse>
				<verse number="19">ಇಂಚಾದುಪ್ಪುನಗ ಎನ ಅಭಿಪ್ರಾಯ ದಾನೆ ಪಂಡ, ಪಿದಯಿದ ಜನೊಕುಲೆಡ್ ದೇವೆರೆ ಕಡೆಕ್ಕ್ ತಿರ್ಗುನಾಕುಲೆಗ್ ಅಡ್ಡಿ ಮಲ್ಪೆರೆ ಬಲ್ಲಿ.</verse>
				<verse number="20">ಆಂಡ ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪೊಡು ಅಂದ್‌ದ್ ನಮ ಅಕ್ಲೆಗ್ ಕಾಕಜಿ ಬರೆದ್ ಅಪ್ಪಣೆ ಕೊರ್ಕ.</verse>
				<verse number="21">ದಾಯೆಗ್ ಪಂಡ ಆದಿ ಕಾಲೊಡ್ದು ಮಾತ ಊರುಲೆಡ್ ಮೋಶೆನ ಗ್ರಂಥೊಲೆನ್ ಬೋಧನೆ ಮಲ್ಪುನಾಕುಲು ಉಲ್ಲೆರ್; ಅವು ಪ್ರತಿ ಸಬ್ಬತ್‌ದಿನೊಟು ಸಭಾಮಂದಿರೊಲೆಡ್ ಪಾರಾಯಣ ಆಪುಂಡತ್ತಾ,” ಅಂದ್‌ದ್ ಪಂಡೆ.</verse>
				<verse number="22">ಅಪಗ ಅಪೊಸ್ತಲೆರ್ ಸಭೆತ ಹಿರಿಯೆರ್ ಮಾತ ಸಭೆತ ಒಪ್ಪಿಗೆಡ್ ತನ್ಕುಲೆಡ್ ಕೆಲೆವೆರೆನ್ ಅಜತ್‌ದ್ ಪೌಲು ಬಾರ್ನಬಡೊಪ್ಪ ಅಂತಿಯೋಕ್ಯಗ್ ಕಡಪುಡುನ ಎಡ್ಡೆ ಅಂದ್‌ದ್ ತೀರ್ಮಾನ ಮಲ್ತೆರ್. ಆ ಕಾರಣೊಡ್ದು ಸಹೋದ್ರೆರೆಡ್ ಮುಖ್ಯ ಆದಿತ್ತಿನ ಬಾರ್ಸಬೆ ಪನ್ಪಿನ ಯೂದನ್ಲಾ ಸೀಲನ್ಲಾ ಅಜತ್‌ದ್ ಅಕ್ಲೆನ ಒಟ್ಟುಗು ಕಡಪುಡ್ದು ಕೊರಿಯೆರ್.</verse>
				<verse number="23">ಮೊಕ್ಲೆ ಕೈಟ್ ಅಕುಲು ಬರೆದ್ ಕಡಪುಡಿನಿ ದಾನೆಂದ್ಂಡ, ಸಹೋದ್ರೆರ್ ಆದುಪ್ಪುನ ಅಪೊಸ್ತಲೆರ್‌ಲಾ ಹಿರಿಯೆರ್‌ಲಾ ಅಂತಿಯೋಕ್ಯ, ಸುರಿಯ, ಕಿಲಿಕ್ಯಡುಪ್ಪುನ ಪಿದಯಿದ ಜನೊಕುಲೆಡ್ದ್ ಸಹೋದ್ರೆರ್ ಆಯಿನಾಕುಲೆಗ್ ಮಲ್ಪುನ ವಂದನೆಲು.</verse>
				<verse number="24">ನಮ ಸಮುದಾಯೊಡ್ದು ಪೋತಿನ ಕೆಲೆವೆರ್ ಎಂಕ್ಲೆಡ್ದ್ ದಾಲಾ ಅಪ್ಪಣೆ ದೆತ್ತೊನಂದೆ ನಿಕುಲು ಸುನ್ನತಿ ಮಲ್ಪೊಡು ಬೊಕ್ಕ ನ್ಯಾಯಕಟ್ಟ್‌ನ್ ಕೈಕೊನೊಡು ಪಂಡ್‌ದ್ ಅಕ್ಲೆ ಪಾತೆರೊಡ್ದು ನಿಕ್ಲೆಡ ಗಲಿಬಿಲಿ ಪುಟ್ಟಾದ್ ನಿಕ್ಲೆ ಉಡಲ್‌ನ್ ತಳಮಳ ಮಲ್ತೆರ್ ಅಂದ್‌ದ್ ಎಂಕ್ಲೆಗ್ ತೆರಿಂಡ್.</verse>
				<verse number="25">ನಮ ಕೆಲೆವೆರೆನ್ ಅಜತ್‌ದ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಗಾದ್ ಜೀವದ ಹಂಗ್‌ನ್ ಬುಡ್ತಿನ ನಮ ಪ್ರೀತಿದ ಬಾರ್ನಬೆ ಪೌಲೆರೆನ ಒಟ್ಟುಗು ನಿಕ್ಲೆ ಕೈತಲ್‌ ಕಡಪುಡುನವು ಎಡ್ಡೆ ಅಂದ್‌ದ್ ಎಂಕುಲು ಮಾತ ಒಂಜೇ ಮನಸಾದ್ ತೀರ್ಮಾನ ಮಲ್ತ.</verse>
				<verse number="26"></verse>
				<verse number="27">ಅಂಚಾಯಿನೆಡ್ದ್ ಯೂದನ್ಲಾ ಸೀಲನ್ಲಾ ಕಡಪುಡ್ದು ಕೊರ್ತ. ಅಕುಲು ಈ ವಿಚಾರೊಲೆನ್ ಬಾಯಿ ಪಾತೆರೊಡು ನಿಕ್ಲೆಗ್ ತೆರಿಪಾವೆರ್.</verse>
				<verse number="28">ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪುನವು ಅಗತ್ಯದವು ಆದುಂಡು. ಉಂದೆಡ್ದ್ ಹೆಚ್ಚ್ ದುನ್ನೊನು ನಿಕ್ಲೆನ ಮಿತ್ತ್ ಪಾಡಿಯೆರೆ ಬಲ್ಲಿ ಅಂದ್‌ದ್ ಪರಿಶುದ್ಧಾತ್ಮಗ್ಲಾ ನಂಕ್‌ಲಾ ಎಡ್ಡೆ ಅಂದ್‌ದ್ ತೋಜ್ಂಡ್. ನಿಕುಲು ಎಚ್ಚರಿಕೆ ಆದಿತ್ತ್‌ದ್ ಉಂದೆತ್ತ ಕೈತಲ್‌ ಪೋಯಿಜರ್ಡ ನಿಕ್ಲೆಗ್ ಎಡ್ಡೆ ಆವು, ಎಡ್ಡೆ ಆವಡ್.</verse>
				<verse number="29"></verse>
				<verse number="30">ಅಪಗ ಅಕುಲು ಅಪ್ಪಣೆ ದೆತ್ತೊಂದು ಯೆರೂಸಲೇಮುಡ್ದು ಪಿದಾಡ್ದ್ ಅಂತಿಯೋಕ್ಯಗ್ ಪೋಯೆರ್. ಅಲ್ಪದ ಭಕ್ತಿಸಭೆನ್ ಒಟ್ಟು ಕೂಡಾದ್ ಆ ಕಾಕಜಿನ್ ಕೊರಿಯೆರ್.</verse>
				<verse number="31">ಅಕುಲು ಅವೆನ್ ಓದುದು ಆಧಾರಣೆದ ಪಾತೆರೊನು ಕೇಂಡ್ದ್ ಸಂತೋಷ ಮಲ್ತೆರ್.</verse>
				<verse number="32">ಯೂದೆಲಾ ಸೀಲೆಲಾ ಮೊಕುಲೇ ಪ್ರವಾದಿಲಾದಿತ್ತಿನೆಡ್ದ್ ಸಹೋದ್ರೆರೆನ್ ದಿಂಜ ಪಾತೆರೊಡ್ದು ಉಮೇದ್ ಕೊರ್ದು ಬಲ ಪಡೆಪಾಯೆರ್.</verse>
				<verse number="33">ಅಲ್ಪ ಒಂತೆ ಸಮಯ ಕರಿಬೊಕ್ಕ ಸಮಾಧಾನದ ಆಶೀರ್ವಾದ ಪಡೆಯೊಂದು ಸಹೋದ್ರೆರೆಡ್ದ್ ಅಪ್ಪಣೆ ದೆತ್ತೊಂದು ಅಕ್ಲೆನ್ ಕಡಪುಡ್ದಿನಾಕುಲೆನ ಕೈತಲ್‌ ಯೆರೂಸಲೇಮುಗು ಪಿರ ಪೋಯೆರ್.</verse>
				<verse number="34">ಆಂಡ ಸೀಲಗ್ ಅವುಲು ಉಪ್ಪುನವು ಸಮ ತೋಜುಂಡು.</verse>
				<verse number="35">ಆಂಡ ಪೌಲೆಲಾ ಬಾರ್ನಬೆಲಾ ಅಂತಿಯೋಕ್ಯಡೇ ಉಂತುದು ಬೇತೆ ಕೆಲೆವೆರೊಟ್ಟುಗು ಕರ್ತವ ಪಾತೆರೊನು ಬೋಧನೆ ಮಲ್ತೊಂದು ಸುವಾರ್ತೆ ಸಾರೊಂದಿತ್ತೆರ್.</verse>
				<verse number="36">ಒಂತೆ ದಿನೊಡ್ದು ಬೊಕ್ಕ ಪೌಲು ಬಾರ್ನಬಗ್, “ನಮ ಕರ್ತವ ಪಾತೆರೊನು ಸಾರಿದಿನ ಮಾತ ಊರುಲೆಗ್ ಕುಡೊರ ಪಿರ ಪೋದು ಅಲ್ಪ ಉಪ್ಪುನ ಸಹೋದ್ರೆರ್ ಎಂಚ ಉಲ್ಲೆರ್ ತೂದು ಬರ್ಕ,” ಪಂಡ್ದ್ ಪಂಡೆ.</verse>
				<verse number="37">ಐಕ್ ಬಾರ್ನಬೆ ಮಾರ್ಕೆ ಪನ್ಪಿ ಯೋಹಾನನ್ ಒಟ್ಟುಗು ಲೆತ್ತೊಂದು ಪೋವೊಡು ಪಂಡ್ದಿತ್ತೆ.</verse>
				<verse number="38">ಆಂಡ ಪೌಲು ನಮ ಒಟ್ಟುಗು ಕೆಲಸೊಗು ಬರಂದೆ ಪಂಫುಲ್ಯೊಡು ನಮನ್ ಬುಡ್ತಿನಾಯನ್ ಲೆತ್ತೊಂದು ಪೋಪಿನವು ಸಮ ಅತ್ತ್ ಅಂದ್‌ದ್ ಎನ್ನಿಯೆ.</verse>
				<verse number="39">ನೆತ್ತ ಸಂಗತಿಡ್ ಮಲ್ಲ ತರ್ಕ ಮಲ್ತ್‌ದ್ ಪೌಲುಲಾ ಬಾರ್ನಬೆಲಾ ಬೇತೆ ಬೇತೆ ಆಯೆರ್, ಬಾರ್ನಬೆ ಮಾರ್ಕನ್ ಲೆತ್ತೊಂದು ಕಡಲ್ದ ಸಾದಿಯಾದ್ ಕುಪ್ರದ್ವೀಪೊಗು ಪೋಯೆ.</verse>
				<verse number="40">ಪೌಲು ಸೀಲನ್ ಅಜತ್‌ದ್ ದೆತ್ತೊಂಡೆ; ಸಹೋದ್ರೆರ್ ಆಯನ್ ದೇವೆರೆ ದಯೊಕು ಒಚ್ಚಿದ್ ಕಡಪುಡ್ದು ಕೊರಿಯೆರ್.</verse>
				<verse number="41">ಬೊಕ್ಕ ಅಲ್ಪಡ್ದ್ ಸುರಿಯ ಕಿಲಿಕ್ಯ ದೇಶೊಲೆಗ್ ಸಂಚಾರ ಮಲ್ತೊಂದು ಸಭೆಕ್ಲೆನ್ ದೃಢ ಮಲ್ತೆರ್.</verse>
			</chapter>
			<chapter number="16">
				<verse number="1">ಐಡ್ದ್ ಬೊಕ್ಕ ಆಯೆ ದೆರ್ಬೆಗ್ಲಾ ಲುಸ್ತ್ರೊಗ್ಲಾ ಬತ್ತೆ. ಲುಸ್ತ್ರೊಡು ತಿಮೋಥಿ ಪನ್ಪಿನ ಒರಿ ಶಿಷ್ಯೆ ಇತ್ತೆ. ಇಂಬ್ಯನ ಅಪ್ಪೆ ಕರ್ತವನ್ ನಂಬುನ ಯೆಹೂದಿ ಆದಿತ್ತಲ್. ಆಯನ ಅಮ್ಮೆ ಗ್ರೀಕೆ ಆದಿತ್ತೆ.</verse>
				<verse number="2">ತಿಮೋಥಿನ ಸಂಗತಿಡ್ ಲುಸ್ತ್ರೊಡ್ಲಾ ಇಕೋನ್ಯಡ್ಲಾ ಇತ್ತಿನ ಸಹೋದ್ರೆರ್ ಎಡ್ಡೆ ಸಾಕ್ಷಿ ಪನೊಂದಿತ್ತೆರ್.</verse>
				<verse number="3">ಪೌಲು ತಿಮೋಥಿನ್ ತನ ಒಟ್ಟುಗು ಲೆತ್ತೊಂದು ಪೋವೊಡು ಅಂದ್‌ದ್ ಆಲೋಚನೆ ಮಲ್ತ್‌ದ್ ಯೆಹೂದ್ಯೆರೆಗಾದ್ ಆಯಗ್ ಸುನ್ನತಿ ಮಲ್ಪಾಯೆ. ದಾಯೆಗ್ ಪಂಡ ಆಯನ ಅಮ್ಮೆ ಗ್ರೀಕೆ ಅಂದ್‌ದ್ ಮಾತೆರೆಗ್ಲಾ ಗೊತ್ತಿತ್ತ್ಂಡ್.</verse>
				<verse number="4">ಐಡ್ದ್ ಬೊಕ್ಕ ಅಕುಲು ಊರೂರುಗು ಪೋವೊಂದುಪ್ಪುನಗ ಯೆರೂಸಲೇಮುಡಿತ್ತಿ ಅಪೊಸ್ತಲೆರ್‌ಲಾ ಸಭೆತ ಹಿರಿಯಾಕುಲುಲಾ ನಿರ್ಧಾರ ಮಲ್ತ್‌ದಿನ ಆಚಾರೊಲೆನ್ ಅಕ್ಲೆಗ್ ತೆರಿಪಾದ್ ಅವೆನ್ ಕೈಕೊನೊಂದು ನಡಪುಡೊಡು ಅಂದ್‌ದ್ ಪಂಡೆರ್.</verse>
				<verse number="5">ದಿನ ಪೋಯಿಲೆಕ್ಕ ಸಭೆಕುಲು ಕ್ರಿಸ್ತ ನಂಬಿಕೆಡ್ ಬಲ ಪಡೆದ್ ಸಭೆತ ಸಂಖ್ಯೆ ಹೆಚ್ಚಾವೊಂದು ಪೋಂಡು.</verse>
				<verse number="6">ಆಸ್ಯ ದೇಶೊಡು ವಾಕ್ಯ ಪನಿಯೆರೆ ಬಲ್ಲಿ ಅಂದ್‌ದ್ ಪರಿಶುದ್ಧಾತ್ಮೆ ತಡೆತಿನೆಡ್ದ್ ಅಕುಲು ಫ್ರುಗ್ಯ ಬೊಕ್ಕ ಗಲಾತ್ಯ ದೇಶೊನು ಕಡತ್‌ದ್ ಪೋನಗ</verse>
				<verse number="7">ಮೂಸ್ಯ ದೇಶದ ಕೈತಲಾನಗ ಬಿಥೂನ್ಯೊಗು ಪೋಯೆರೆ ಪ್ರಯತ್ನ ಮಲ್ತೆರ್. ಅಲ್ಪಲಾ ಯೇಸುನ ಆತ್ಮೆ ಅಕ್ಲೆನ್ ಪೋವರೆ ಬುಡ್ಜಿ.</verse>
				<verse number="8">ಅಪಗ ಅಕುಲು ಮೂಸ್ಯ ಕಡತ್‌ದ್ ತ್ರೋವೊಗು ಬತ್ತೆರ್.</verse>
				<verse number="9">ಅಲ್ಪ ರಾತ್ರೆಡ್ ಪೌಲುಗು ಒಂಜಿ ದರ್ಶನ ಆಂಡ್; ಮಕೆದೋನ್ಯ ದೇಶದ ಒರಿ ನರಮಾನಿ ಉಂತೊಂದು, “ಈ ಮಕೆದೋನ್ಯೊಗು ಬತ್ತ್‌ದ್ ಎಂಕ್ಲೆಗ್ ಸಹಾಯ ಮಲ್ಪೊಡು,” ಅಂದ್‌ದ್ ನಟ್ಟೊಂಡೆ.</verse>
				<verse number="10">ಆಯಗ್ ದರ್ಶನ ಆಯಿ ಬೊಕ್ಕ ಆ ಸೀಮೆದಾಕುಲೆಗ್ ಸುವಾರ್ತೆನ್ ಸಾರಿಯೆರೆ ದೇವೆರ್ ಎಂಕ್ಲೆನ್ ಲೆತ್ತ್‌ದೆ ಅಂದ್‌ದ್ ಅಪಗನೆ ಮಕೆದೋನ್ಯೊಗು ಪಿದಾಡ್ದ್ ಪೋಪಿನ ಪ್ರಯತ್ನ ಮಲ್ತ.</verse>
				<verse number="11">ಎಂಕುಲು ತ್ರೋವೊಡ್ದು ಕಡಲ್ಡ್ ಪ್ರಯಾಣ ಮಲ್ತ್‌ದ್ ಸೀದ ಸಮೊಥ್ರೊ ದ್ವೀಪೊಗು ಬತ್ತ್‌ದ್ ಮನದಾನಿ ನೆಯಾಪೊಲಿಗ್ ಸೇರಿಯ.</verse>
				<verse number="12">ಅಲ್ತ್‌ಡ್ದ್ ಫಿಲಿಪ್ಪಿಗ್ ಮುಟ್ಟಿಯ. ಅವು ರೋಮಾಪುರದಾಕುಲೆನ ವಶೊಟು ಇತ್ತಿನ ಜಾಗ್ ಅವು ಮಕೆದೋನ್ಯೊಡು ಒಂಜಿ ಮಲ್ಲ ಪಟ್ಟಣಲಾ ಆದುಂಡು. ಈ ಊರುಡು ಎಂಕುಲು ಒಂತೆ ದಿನ ಇತ್ತ.</verse>
				<verse number="13">ತುದೆ ಬರಿಟ್ಟ್ ದೇವೆರೆನ ಪ್ರಾರ್ಥನೆ ಮಲ್ಪುನ ಜಾಗ್ ಉಪ್ಪು ಅಂದ್‌ದ್ ಎನ್ನ್‌ದ್ ಸಬ್ಬತ್‌ದಿನೊಟು ಊರ ಬಾಕಿಲ್‌ದ ಪಿದಯಿ ಪೋದು ಅಲ್ಪ ಸೇರ್ದ್ ಬೈದಿನ ಪೊಂಜೊವುಲೆ ಒಟ್ಟುಗು ಕುಲ್ಲುದು ಪಾತೆರಿಯ.</verse>
				<verse number="14">ಲುದ್ಯ ಪನ್ಪಿ ಒರ್ತಿ ಪೊಂಜೊವು ಇತ್ತಲ್. ಆಲ್ ನೇರೊಲ್ ಬಣ್ಣದ ಕುಂಟುಲೆನ್ ಮಾರುನಾಲ್‌ಲಾ ಥುವತೈರ ಪನ್ಪಿ ಊರುದ ದೇವೆರೆನ ಭಕ್ತೆದಿ ಆದಿತ್ತಲ್. ಪೌಲು ಪಂಡಿನ ಪಾತೆರೊಲೆಗ್ ಮನಸ್ ಕೊರಿಯೆರೆ ಕರ್ತವೆ ಆಲೆನ ಉಡಲ್‌ಡ್ ಕಾರ್ಯ ಮಲ್ತೆ</verse>
				<verse number="15">ಆಲ್‌ಲಾ ಆಲೆನ ಇಲ್ಲದಾಕುಲುಲಾ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡಿ ಬೊಕ್ಕ ಆಲ್, “ಯಾನ್ ಕರ್ತವನ್ ನಂಬುನಾಲ್ ಪಂಡ್ದ್ ನಿಜವಾದ್ ಎನ್ನ್‌ವರ್ಡ, ಎನ ಇಲ್ಲಗ್ ಬತ್ತ್‌ದ್ ಉಪ್ಪುಲೆ,” ಅಂದ್‌ದ್ ನಟ್ಟೊಂದು ಒತ್ತಾಯ ಮಲ್ತಲ್.</verse>
				<verse number="16">ಎಂಕುಲು ಪ್ರಾರ್ಥನೆ ನಡಪುನ ಜಾಗ್‌ಗ್ ಪೋವೊಂದುಪ್ಪುನಗ ಬಲ್ಮೆದ ಆತ್ಮ ಇತ್ತಿ ಒರ್ತಿ ಚಾಕ್ರಿದಾಲ್ ಎಂಕುಲೆ ಎದುರು ಬತ್ತಲ್. ಆಲ್ ಬಲ್ಮೆ ಪನ್ಪಿನೆಡ್ದ್ ಆಲೆನ ಯಜಮಾನಗ್ ಮಸ್ತ್ ಕಾಸ್ ಆವೊಂದಿತ್ತ್ಂಡ್.</verse>
				<verse number="17">ಪೌಲುಲಾ ಎಂಕುಲುಲಾ ಪೋವೊಂದುಪ್ಪುನಗ ಆಲ್ ಪಿರವುಡ್ದು ಬತ್ತ್‌ದ್, ಈ ನರಮಾನಿಲು ಪರಾತ್ಪರನ ದೇವೆರೆನ ಸೇವಕೆರ್; ನಿಕ್ಲೆಗ್ ರಕ್ಷಣೆದ ಮಾರ್ಗೊನು ಸಾರುವೆರ್ ಅಂದ್‌ದ್ ಬೊಬ್ಬೆ ಪಾಡೊಂದಿತ್ತಲ್.</verse>
				<verse number="18">ಇಂಚ ದಿಂಜ ದಿನ ಮಲ್ತೊಂದಿತ್ತಲ್. ಪೌಲು ಬಾರಿ ಬೇಜಾರಾದ್ ಪಿರ ತಿರ್ಗ್‌ದ್ ಆ ಆತ್ಮೊಗು ಆಲೆನ್ ಬುಡ್ದು ಪೋಲ ಅಂದ್‌ದ್ ಯೇಸು ಕ್ರಿಸ್ತನ ಪುದರ್‌ಡ್ ಅಪ್ಪಣೆ ಕೊರಿನೆಟ್ಟ್, ಅವ್ವೆ ಗಳಿಗೆಡ್ ಬುಡ್ದು ಪೋಂಡು.</verse>
				<verse number="19">ಆಲೆನ ಯಜಮಾನಗ್ ತನ್ಕ್ ಬರ್ಪಿನ ಲಾಭದ ನಿರೀಕ್ಷೆ ತತ್ತ್‌ಂಡ್ ಅಂದ್‌ದ್ ಪೌಲನ್ಲಾ ಸೀಲನ್ಲಾ ಪತ್ತ್‌ದ್ ಪೇಂಟೆದ ಅಧಿಕಾರಿನ ಕೈತಲ್‌ ಒಯ್ತೊಂದು ಪೋಯೆರ್.</verse>
				<verse number="20">ಅಕ್ಲೆನ್ ಅಧಿಪತಿಲೆ ಎದುರು ಕನತ್‌ದ್, “ಈ ನರಮಾನಿಲು ಯೆಹೂದ್ಯೆರ್, ನಮ ಊರುನು ಬಾರಿ ಗಲಿಬಿಲಿ ಮಲ್ಪುವೆರ್.</verse>
				<verse number="21">ಮೊಕುಲು ಯೆಹೂದ್ಯೆರ್ ಆದಿತ್ತ್‌ದ್ ಎಂಕುಲು ರೋಮಾಯೆರ್ ಮಲ್ಪೆರೆ ಆವಂದಿ ಆಚಾರೊಲೆನ್ ಮಲ್ಪೊಡು ಅಂದ್‌ದ್ ಸಾರುವೆರ್.”</verse>
				<verse number="22">ಬೊಕ್ಕ ಜನೊಕುಲೆನ ಗುಂಪು ಕೂಡ್ದು ಅಕ್ಲೆಗ್ ವಿರೋಧಾದ್ ಲಕ್ಕಿಯೆರ್; ಬೊಕ್ಕ ಅಧಿಪತಿಲು ಅಕ್ಲೆನ ಕುಂಟುನು ಪರ್ತ್‌ದ್ ದೆತ್ತ್‌ದ್ ಚಾಟಿಡ್ ಪೆಟ್ಟ್ ಪಾಡಿಯೆರೆ ಅಪ್ಪಣೆ ಕೊರಿಯೆರ್.</verse>
				<verse number="23">ಅಕ್ಲೆಗ್ ದಿಂಜ ಪೆಟ್ಟ್ ಕೊರಿ ಬೊಕ್ಕ ಸೆರೆಮನೆಟ್ ಪಾಡಾಯೆರ್. ಮೊಕ್ಲೆನ್ ಜಾಗ್ರತೆಡ್ ಕಾಪೊಡು ಅಂದ್‌ದ್ ಸೆರೆಮನೆತ ಅಧಿಕಾರಿಗ್ ಅಪ್ಪಣೆ ಕೊರಿಯೆರ್.</verse>
				<verse number="24">ಅಧಿಕಾರಿ ಅಪ್ಪಣೆ ಕೊರಿ ಲೆಕ್ಕ ಅಕ್ಲೆನ್ ಸೆರೆಮನೆತ ಉಲಯಿದ ಕೋಣೆಡ್ ಪಾಡ್ದ್ ಅಕ್ಲೆನ ಕಾರ್ ಕೋಳೊಡು ತಿಕ್ಕಾದ್ ಬಿಗಿತೆರ್.</verse>
				<verse number="25">ನಡು ರಾತ್ರೆಡ್ ಪೌಲುಲಾ ಸೀಲೆಲಾ ಪ್ರಾರ್ಥನೆ ಮಲ್ಪುನಾಕುಲಾದ್ ದೇವೆರೆಗ್ ಸ್ತುತಿಪದ ಪನ್ನೊಂದಿತ್ತೆರ್; ಬೇತೆ ಸೆರೆಮನೆಟಿತ್ತಿ ಜನೊಕುಲು ಮನಸ್ ಕೊರ್ದು ಕೇನೊಂದಿತ್ತೆರ್.</verse>
				<verse number="26">ಅಪಗನೆ ಮಲ್ಲ ಭೂಕಂಪ ಆಂಡ್. ಸೆರೆಮನೆತ ಬುನಾದಿ ಅದ್‌ರ್ಂಡ್. ಬಾಕಿಲ್ ಜತ್ತ್ಂಡ್ ಮಾತೆರೆನ ಕೈಕಾರ್‌ಗ್ ಕಟ್ಟ್‌ದಿನ ಮರತ ತುಂಡು ಕದೆಲ್‌ದ್ ಬೂರುಂಡು.</verse>
				<verse number="27">ಸೆರೆಮನೆತ ಅಧಿಕಾರಿ ನಿದ್ರೆಡ್ದ್ ಲಕ್ಕ್‌ದ್ ಸೆರೆಮನೆತ ಮಾತ ಬಾಕಿಲ್ ಜತ್ತ್‌ದುಪ್ಪುನೆನ್ ತೂದು ಕೈದಿಲು ಪೂರ ತಪ್ಪಾವೊಂದು ಬಲ್ತ್ ಪೋಯೆರ್ ಅಂದ್‌ದ್ ಎನ್ನಿಯೆ, ತನ ಕೈಟ್ ಇತ್ತಿನ ಕತ್ತಿನ್ ಪತ್ತೊಂದು ಪ್ರಾಣಹತ್ಯ ಮಲ್ಪೊಡು ಪಂಡ್ದುಪ್ಪುನಗನೆ</verse>
				<verse number="28">ಪೌಲು ಆಯಗ್, “ಈ ದಾಲಾ ನಿನ ಜೀವೊಗು ಅಪಾಯ ಮಲ್ತೊನಡ. ಎಂಕುಲು ಮಾತೆರ್ಲಾ ಮೂಲೇ ಉಲ್ಲ,” ಅಂದ್‌ದ್ ಬೊಬ್ಬೆ ಪಾಡ್ದ್ ಪಂಡೆ.</verse>
				<verse number="29">ಸೆರೆಮನೆತ ಅಧಿಕಾರಿ ತುಡರ್ ಕನಯೆರೆ ಅಂದ್‌ದ್ ಸೆರೆಮನೆತ ಉಲಯಿ ನಡಗೊಂದು ಪೋದು ಪೌಲು ಸೀಲೆರೆನ ಎದುರು ಬೂರಿಯೆ.</verse>
				<verse number="30">ಬೊಕ್ಕ ಅಕ್ಲೆನ್ ಪಿದಯಿ ಲೆತ್ತೊಂದು ಬತ್ತ್‌ದ್, “ಸ್ವಾಮಿಲೇ, ಎಂಕ್ ರಕ್ಷಣೆ ತಿಕ್ಕೊಡಾಂಡ ಯಾನ್ ದಾನೆ ಮಲ್ಪೊಡು,” ಅಂದ್‌ದ್ ಕೇಂಡೆ.</verse>
				<verse number="31">ಅಕುಲು, “ಕರ್ತವೆ ಆದುಪ್ಪು ಯೇಸುನ ಮಿತ್ತ್ ನಂಬಿಕೆ ದೀಲ, ಅಪಗ ಈಲಾ ನಿನ ಇಲ್ಲದಾಕುಲುಲಾ ರಕ್ಷಣೆ ಹೊಂದುವರ್,” ಪಂಡ್ದ್ ಉತ್ತರ ಕೊರಿಯೆರ್‌.</verse>
				<verse number="32">ಬೊಕ್ಕ ಅಕುಲು ಆಯನ ಇಲ್ಲಡಿತ್ತಿ ಮಾತೆರೆಗ್ಲಾ ಕರ್ತವ ಪಾತೆರೊನು ತೆರಿಪಾಯೆರ್.</verse>
				<verse number="33">ಐಡ್ದ್ ಬೊಕ್ಕ ಆಯೆ ರಾತ್ರೆದ ಅವ್ವೆ ಪೊರ್ತುಡು ಅಕ್ಲೆನ್ ಲೆತ್ತೊಂದು ಪೋದು ಅಕ್ಲೆನ ಗಾಯೊನು ದೆಕ್ಕಿಯೆ. ಬೊಕ್ಕ ಆಯೆಲಾ ಆಯನ ಇಲ್ಲದಾಕುಲು ಮಾತೆರ್ಲಾ ಅಪಗನೆ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.</verse>
				<verse number="34">ಐಡ್ದ್ ಬೊಕ್ಕ ಅಕ್ಲೆನ್ ತನ ಇಲ್ಲಗ್ ಲೆತ್ತೊಂದು ಪೋದು ವಣಸ್ ಮಲ್ಪಾಯೆ. ದೇವೆರೆನ್ ನಂಬುನಾಯೆ ಆದ್ ತನ ಇಲ್ಲದಾಕುಲೆ ಸಮೇತ ಸಂತೋಷ ಪಡೆಯೆ.</verse>
				<verse number="35">ಪುಲ್ಯ ಆಯಿ ಬೊಕ್ಕ ಅಧಿಪತಿಲು, “ಆ ನರಮಾನಿಲೆನ್ ಬುಡ್ದು ಬುಡ್ಲ,” ಅಂದ್‌ದ್ ಸೈನಿಕೆರ್‌ಡ ಪಂಡ್ದ್ ಕಡಪುಡಿಯೆರ್.</verse>
				<verse number="36">ಸೆರೆಮನೆತ ನಾಯಕೆರ್ ಈ ಪಾತೆರೊನು ಪೌಲುಗು ತೆರಿಪಾದ್, “ಅಧಿಪತಿಲು ನಿಕ್ಲೆಗ್ ಬುಡುಗಡೆ ಆಂಡ್ ಅಂದ್‌ದ್ ಕಡಪುಡಿಯೆರ್ ಅಂಚಾಯಿನೆಡ್ದ್ ಇತ್ತೆ ನಿಕುಲು ಸಮಾಧಾನೊಡು ಪಿದಾಡ್ದ್ ಪೋಲೆ,” ಅಂದ್‌ದ್ ಪಂಡೆ.</verse>
				<verse number="37">ಐಕ್ ಪೌಲು, “ಸೈನಿಕೆರ್‌ಡ ಪನ್ಪೆ, ಅಕುಲು ನೀತಿನ್ಯಾಯ ಕೇನಂದೆ ರೋಮಾಪುರದ ಹಕ್ಕುದಾರೆರಾಯಿನ ಎಂಕ್ಲೆನ್ ಮಾತೆರೆನ ಎದುರುಡು ಹಾಕಾದ್ ಸೆರೆಮನೆಟ್ ಪಾಡ್ಪಾಯೆರ್, ಇತ್ತೆ ಎಂಕ್ಲೆನ್ ಗುಟ್ಟುಡ್ ಪಿದಯಿ ಕಡಪುಡ್ವೆರಾ? ಅಂಚ ಆವೆರೆ ಬಲ್ಲಿ; ಅಕುಲೇ ಬತ್ತ್‌ದ್ ಎಂಕ್ಲೆನ್ ಲೆತ್ತೊಂದು ಪೋವೊಡು,” ಅಂದ್‌ದ್ ಪಂಡೆ.</verse>
				<verse number="38">ಸೈನಿಕೆರ್ ಈ ಪಾತೆರೊಲೆನ್ ಅಧಿಪತಿಲೆಗ್ ತೆರಿಪಾಯಿನಗ ರೋಮಾಪುರದ ಹಕ್ಕ್‌ದಾರೆರ್ ಪನ್ಪಿ ಪಾತೆರೊನು ಕೇಂಡ್ದ್ ಪೋಡಿಯೆರ್,</verse>
				<verse number="39">ಬೊಕ್ಕ ಅಕ್ಲೆನ ಕೈತಲ್‌ ಪೋದು ಪೊರ್ಲುಡು ಪಾತೆರ್‌ದ್ ಪಿದಯಿ ಲೆತ್ತೊಂದು ಬತ್ತ್‌ದ್ ನಿಕುಲು ಉಂದು ಊರುನು ಬುಡ್ದು ಪೋವೊಡು ಅಂದ್‌ದ್ ನಟ್ಟೊಂಡೆರ್.</verse>
				<verse number="40">ಅಪಗ ಪೌಲುಲಾ ಸೀಲೆಲಾ ಸೆರೆಮನೆಡ್ದ್ ಪಿದಾಡ್ದ್ ಲುದ್ಯನ ಇಲ್ಲಗ್ ಬತ್ತ್‌ದ್ ಸಹೋದ್ರೆರೆನ್ ತೂದು ಅಕ್ಲೆಗ್ ಧೈರ್ಯ ಕೊರ್ದು ಪಿದಾಡ್ದ್ ಪೋಯೆರ್.</verse>
			</chapter>
			<chapter number="17">
				<verse number="1">ಅಕುಲು ಅಂಫಿಪೊಲಿ ಬೊಕ್ಕ ಅಪೊಲೋನ್ಯ ಪನ್ಪಿ ಊರುನು ದಾಂಟ್‌ದ್ ಥೆಸ್ಸಲೋನಿಕೊಗು ಬತ್ತೆರ್. ಅಲ್ಪ ಯೆಹೂದ್ಯೆರೆನ ಒಂಜಿ ಸಭಾಕೂಟ ಇತ್ತ್ಂಡ್.</verse>
				<verse number="2">ಪೌಲು ತನ ಸಂಪ್ರದಾಯದ ಲೆಕ್ಕ ಅಲ್ಪ ಇತ್ತಿನಾಕ್ಲೆನ ಕೈತಲ್‌ ಪೋದು ಮೂಜಿ ಸಬ್ಬತ್‌ದಿನೊಕುಲೆಡ್ ಶಾಸ್ತ್ರದ ಆಧಾರೊಡು ಅಕ್ಲೆ ಒಟ್ಟುಗು ತರ್ಕ ಮಲ್ತೆ,</verse>
				<verse number="3">ಶಾಸ್ತ್ರದ ಅರ್ಥೊನು ಬುಡ್ಪಾದ್ ಕ್ರಿಸ್ತೆ ಕಷ್ಟ ಅನುಭವ ಮಲ್ತ್‌ದ್, ಸೈತ್‌ದ್, ಲಕ್ಕ್‌ದ್ ಬರೊಡೇ ಇತ್ತ್ಂಡ್ ಪಂಡ್ದ್, “ಯಾನ್ ನಿಕ್ಲೆಗ್ ಸಾರಿನ ಈ ಯೇಸುವೇ ಕ್ರಿಸ್ತೆ,” ಅಂದ್‌ದ್ ಪೌಲು ಸ್ಪಷ್ಟ ಮಲ್ತೆ.</verse>
				<verse number="4">ಕೆಲೆವೆರ್ ಯೆಹೂದ್ಯೆರೆಡ್, ಕೆಲೆವೆರ್ ಭಕ್ತೆರಾಯಿನ ಗ್ರೀಕೆರೆಡ್ ಮಲ್ಲ ಗುಂಪು, ಕೆಲೆವೆರ್ ಪೊಂಜೊವುಲೆಡ್ ಮುಖ್ಯಸ್ಥೆರ್‌ಲಾ, ಆಲೋಚನೆ ಮಲ್ತ್‌ದ್ ಪೌಲು ಸೀಲೆರೆನ್ ಸೇರೊಂಡೆರ್.</verse>
				<verse number="5">ಯೆಹೂದ್ಯೆರ್ ಮಚ್ಚರೊಡು ಪೇಂಟೆಡ್ ತಿರ್ಗುನ ಕೆಲವು ಪೋಕ್ರಿಲೆನ್ ಲೆತ್ತೊಂದು ಬತ್ತ್‌ದ್ ಗುಂಪು ಕಟ್ಟಾದ್ ಊರುಡು ಗಲಾಟೆ ಲಕ್ಕಾಯೆರ್. ಪೌಲು ಸೀಲೆರೆನ್ ಜನತ ಗುಂಪುದ ಎದುರುಗ್ ಕನವೊಡು ಅಂದ್‌ದ್ ಅಕ್ಲೆನ್ ನಾಡೊಂದು ಯಾಸೋನುನ ಇಲ್ಲದ ಕೈತಲ್‌ ಬತ್ತೆರ್.</verse>
				<verse number="6">ಅಕುಲು ತಿಕ್ಕಂದೆ ಪೋಯಿನೆಡ್ದ್ ಆ ಜನೊಕುಲು ಯಾಸೋನುನ್ಲಾ ಕೆಲವು ನಂಬುನ ಸಹೋದ್ರೆರೆನ್ಲಾ ಊರುದ ಅಧಿಕಾರಿ ಕೈತಲ್‌ ಒಯ್ತೊಂದು ಪೋದು, “ಲೋಕೊನು ಅಡಿಮೇಲ್ ಮಲ್ತಿನ ಜನೊಕುಲು ಇಡೆಗ್ಲಾ ಬೈದೆರ್,</verse>
				<verse number="7">ಯಾಸೋನು ಅಕ್ಲೆನ್ ಸೇರ್ಸಾವೊಂದೆ, ಅಕುಲು ಮಾತೆರ್ಲಾ ಯೇಸು ಪನ್ಪಿ ಬೇತೆ ಒರಿ ಅರಸು ಉಲ್ಲೆ ಅಂದ್‌ದ್ ಚಕ್ರವರ್ತಿನ ಅಪ್ಪಣೆಲೆಗ್ ವಿರೋಧಾದ್ ನಡತೊನ್ವೆರ್,” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="8">ಈ ಪಾತೆರೊಲೆನ್ ಕೇಂಡ್ದ್ ಊರುದ ಅಧಿಕಾರಿಲುಲಾ ಊರುದಾಕುಲುಲಾ ಕಂಗಾಲ್ ಆಯೆರ್.</verse>
				<verse number="9">ಅಕುಲು ಯಾಸೋನುಡ್ಲಾ ಬಾಕಿದಾಕುಲೆಡ್ಲಾ ಜಾಮೀನ್ ದೆತ್ತೊಂದು ಅಕ್ಲೆನ್ ಬುಡಿಯೆರ್.</verse>
				<verse number="10">ಅಪಗನೆ ಸಹೋದ್ರೆರ್ ರಾತ್ರೆಡ್ ಪೌಲು ಸೀಲೆರೆನ್ ಬೆರೋಯೊಗು ಕಡಪುಡಿಯೆರ್. ಅಕುಲು ಅಡೆಗ್ ಸೇರ್ದ್ ಯೆಹೂದ್ಯೆರೆನ ಸಭಾಮಂದಿರೊಗು ಪೋಯೆರ್.</verse>
				<verse number="11">ಈ ಯೆಹೂದ್ಯೆರ್ ಥೆಸ್ಸಲೋನಿಕದ ಯೆಹೂದ್ಯೆರೆಡ್ದ್‌ಲಾ ಎಡ್ಡೆ ಗುಣತಾಕುಲು ಆದಿತ್ತೆರ್. ಪೌಲು ಸೀಲೆ ಪನ್ಪಿನ ಪಾತೆರೊಲೆನ್ ಮೊಕುಲು ಬಾರಿ ಮನಸ್ ದೀದ್ ಕೇಂಡೆರ್. ಅವು ಸಂಗತಿಲು ನಿಜ ಆದುಂಡು ಅಂದ್‌ದ್ ತೆರಿಯೊನೆರೆ ಶಾಸ್ತ್ರೊಡು ಪ್ರತಿದಿನ ಉಂಡಾ ಇಜ್ಜಾ ಅಂದ್‌ದ್ ನಾಡೊಂದಿತ್ತೆರ್.</verse>
				<verse number="12">ಅಂಚಾಯಿನೆಡ್ದ್ ಮಸ್ತ್ ಜನ ನಂಬಿಯೆರ್; ಅವು ಅತ್ತಂದೆ ಮುಖ್ಯ ಸ್ಥಾನೊಡುಪ್ಪುನ ಗ್ರೀಕೆರೆ ಪೊಂಜೊವುಲುಲಾ ಅಂಜೊವುಲುಲಾ ಮಸ್ತ್ ಜನ ನಂಬಿಯೆರ್.</verse>
				<verse number="13">ಆಂಡ ಪೌಲು ಬೆರೋಯೊಡು ದೇವೆರೆ ಪಾತೆರೊನು ಸಾರಿಯೊಂದುಲ್ಲೆ ಪನ್ಪಿನ ವರ್ತಮಾನ ಥೆಸ್ಸಲೋನಿಕದ ಯೆಹೂದ್ಯೆರೆಗ್ ತೆರಿದ್ ಬನ್ನಗ ಅಕುಲು ಅಡೆಗ್ಲಾ ಪೋದು ಜನೊಕುಲೆ ಗುಂಪುನು ಗರ್ವ ಲಕ್ಕಾದ್ ಕಲಡಾಯೆರ್.</verse>
				<verse number="14">ಅಪಗನೆ ಸಹೋದ್ರೆರ್ ಪೌಲುನು ಕಡಲ್ದ ಬರಿಕ್ಕ್ ಕಡಪುಡಿಯೆರ್. ಆಂಡ ಸೀಲೆಲಾ ತಿಮೋಥಿಲಾ ಅಲ್ಪನೆ ಉಂತಿಯೆರ್.</verse>
				<verse number="15">ಪೌಲುನ ಒಟ್ಟುಗು ಪೋತಿನ ನಂಬುನಾಕುಲು ಆಯನ್ ಅಥೇನೆಗ್ ಮುಟ್ಟಾಯೆರ್. ಸೀಲನ್ಲಾ ತಿಮೋಥಿನ್ಲಾ ಆಯಿನಾತ್ ಬೇಗ ಎನ ಕೈತಲ್‌ ಬರಿಯೆರೆ ಪನೊಡು ಅಂದ್‌ದ್ ಅಪ್ಪಣೆ ಆಯಡ್ದ್ ಹೊಂದುದು ಪಿದಾಡ್ದ್ ಪೋಯೆರ್.</verse>
				<verse number="16">ಪೌಲು ಅಕ್ಲೆಗಾದ್ ಅಥೇನೆಡ್ ಕಾತೊಂದುಪ್ಪುನಗ ಆ ಊರುಡು ಮಾತ ಕಡೆಟ್ಲಾ ಮೂರ್ತಿನ್ ತೂದು ಆಯನ ಆತ್ಮ ಉರಿಂಡ್.</verse>
				<verse number="17">ಇಂಚಾಯಿನೆಡ್ದ್ ಆಯೆ ಸಭಾಮಂದಿರೊಡು ಯೆಹೂದ್ಯೆರೆನ ಬೊಕ್ಕ ಭಕ್ತೆರಾಯಿ ಮತೊಟುಪ್ಪು ಗ್ರೀಕೆರೆ ಒಟ್ಟುಡು ಪೇಂಟೆಡ್ ವ್ಯಾಪಾರದ ಜಾಗ್‌ಲೆಡ್ ದಿನಾಲ ಪಾತೆರೊಂದಿತ್ತೆ.</verse>
				<verse number="18">ಉಂದತ್ತಂದೆ ಎಪಿಕೂರಿಯೆರ್ ಸ್ತೋಯಿಕೆರ್ ಪನ್ಪಿ ತತ್ವಜ್ಞಾನಿಲು ಆಯನ ಒಟ್ಟುಗು ತರ್ಕ ಮಲ್ತೆರ್. ಅಕ್ಲೆಡ್ ಕೆಲೆವೆರ್, “ಈ ಚರಚರ ಪಾತೆರುನಾಯೆ ದಾನೆ ಪನೊಂದುಲ್ಲೆ?” ಆಯೆ ಯೇಸುನ ಸಂಗತಿಡ್ಲಾ ಸೈತಿನಾಕುಲು ಲಕ್ಕ್‌ದ್ ಬರ್ಪೆರ್ ಪನ್ಪಿನ ಸಂಗತಿಡ್ಲಾ ಸಾರೊಂದಿತ್ತಿನೆಡ್ದ್, “ಇಂಬೆ ಪರದೇಶದ ದೈವೊಲೆನ್ ಸಾರಿಯುನಾಯೆ ಅಂದ್‌ದ್ ತೋಜುಂಡು,” ಪಂಡೆರ್.</verse>
				<verse number="19">ಅಕುಲು ಆಯನ್ ಪತ್ತ್‌ದ್ ಅರಿಯೊಪಾಗೊಗು ಲೆತ್ತೊಂದು ಪೋದು, “ಈ ಪನ್ಪಿನ ಈ ಪೊಸತ್ತಾಯಿನ ಬೋಧನೆನ್ ಎಂಕುಲು ತೆರಿಯೊನೊಲಿಯಾ?</verse>
				<verse number="20">ಈ ಅಪರೂಪದ ವಿಷಯೊಲು ಅವು ದಾನೆ ಆದುಪ್ಪೊಲಿ ಅಂದ್‌ದ್ ತೆರಿಯೊನಿಯೆರೆ ಎಂಕ್ಲೆಗ್ ಆಸೆ ಉಂಡು,” ಅಂದ್‌ದ್ ಪಂಡೆರ್.</verse>
				<verse number="21">ಮಾತ ಅಥೇನ್ಯೆರ್‌ಲಾ ಅಲ್ಪ ನಿಲೆ ಆದಿತ್ತಿನ ಪರ ಊರುದಾಕುಲುಲಾ ಪೊಸ ಪೊಸ ಸಂಗತಿಲೆನ್ ಪನ್ಪಿನೆಕ್ಕ್‌ಲಾ ಕೇನುನೆಕ್ಕ್‌ಲಾ ಅತ್ತಂದೆ ಬೇತೆ ಒಯಿಕ್‌ಲಾ ಪೊರ್ತು ಕೊರೊಂದಿತ್ತ್‌ಜೆರ್.</verse>
				<verse number="22">ಪೌಲು ಅರಿಯೊಪಾಗುದ ಸಭೆತ ಎದುರುಡು ಉಂತೊಂದು ಇಂಚ ಪಂಡೆ ಅಥೇನ್ಯೆದ ಜನೊಕುಲೆ, “ನಿಕುಲು ಮಾತೆಟ್ಲಾ ಬಾರಿ ಭಕ್ತಿದಾಕುಲು ಅಂದ್‌ದ್ ಎಂಕ್ ತೋಜುಂಡು.</verse>
				<verse number="23">ಯಾನ್ ನಿಕ್ಲೆನ ಊರುಡು ತಿರ್ಗೊಂದು ನಿಕುಲು ಪೂಜೆ ಮಲ್ಪುನ ದೇವೆರೆನ ಮೂರ್ತಿಲೆನ್ ತೂವೊಂದು ಉಪ್ಪುನಗ ಒಂಜಿ ಬಲಿಪೀಠ ಎನ ಕಣ್ಣ್‌ಗ್ ತೋಜುಂಡು ಐತ ಮಿತ್ತ್, ‘ತೆರಿಯಂದಿನ ದೇವೆರೆಗ್,’ ಅಂದ್‌ದ್ ಬರೆದಿತ್ತ್‌ಂಡ್. ಆ ಕಾರಣೊಡ್ದು ನಿಕುಲು ಒವೆನ್ ತೆರಿಯಂದೆ ಪೂಜೆ ಮಲ್ತೊಂದಿತ್ತರಾ ಅವೆನೇ ನಿಕ್ಲೆಗ್ ಸಾರಿಯುವೆ, ಕೇನ್ಲೆ;</verse>
				<verse number="24">ಲೋಕೊನ್ಲಾ ಐಟ್ಟುಪ್ಪು ಮಾತ ವಸ್ತುಲೆನ್ಲಾ ಉಂಡು ಮಲ್ತಿನಾಯೆನೇ ಆ ದೇವೆರ್. ಆಯೆನೇ ಭೂಮಿ ಬಾನದ ಯಜಮಾನೆ ಆದುಲ್ಲೆ. ಆಯೆ ಕೈಡ್ದ್ ಕಟ್ಟ್‌ದಿನ ಗುಡಿಟ್ ಕುಲ್ಲುನಾಯೆ ಅತ್ತ್;</verse>
				<verse number="25">ನರಮಾನಿಗ್ ಜೀವೊನು, ಶ್ವಾಸೊನು ಮಾತೆನ್ ಕೊರ್ಪಿನಾಯೆ ಆ ದೇವೆರೇ. ಆಯಗ್ ಜನೊಕುಲೆನ ಸೇವೆ ದಾಲಾ ಅಗತ್ಯ ಇಜ್ಜಿ. ಆಯಗ್ ಕೊರತೆಲಾ ಇಜ್ಜಿ.</verse>
				<verse number="26">ಆಯೆ ಒರಿಯಡ್ದೆ ಮಾತ ಜನಾಂಗದಾಕುಲೆನ್ ಪುಟ್ಟಾದ್ ಅಕುಲಾಕುಲು ಉಪ್ಪೊಡಾಯಿನ ಕಾಲೊನ್ಲಾ ಅಕುಲಾಕುಲು ಉಪ್ಪುನ ಜಾಗ್‌ದ ಬರಿಲೆನ್ಲಾ ಅಕುಲಾಕುಲೆನ ಭೂಮಿದ ಕೊಡಿನ್ಲಾ ಗೊತ್ತು ಮಲ್ತ್‌ದೆ.</verse>
				<verse number="27">ಜನೊಕುಲು ಆಯನ್ ನಾಡೊಡು ಅಂದ್‌ದ್ ದೇವೆರೆನ ನಿರೀಕ್ಷೆ ಆದಿತ್ತ್ಂಡ್. ಇಡೀ ಭೂಮಿಡ್ ನಿಲೆ ಮಲ್ಪಾದ್ ಒಂಜಿ ವೇಳೆ ಅಕುಲು ತಡವಾದ್ ತೆರಿಯೊನ್ವೆರ್ ಅಂದ್‌ದ್ ತನನ್ ನಾಡುನಾಕುಲಾದ್ ಮಲ್ತೆ. ಆಯೆ ಎಂಕ್ಲೆಗ್ ಏತ್ ಮಾತ್ರೊಗ್ಲಾ ದೂರ ಆತಿನಾಯೆ ಅತ್ತ್.</verse>
				<verse number="28">ದಾಯೆಗಂದ್ಂಡ, ‘ಆಯಡೊಪ್ಪ ನಮ ಬದುಕುವ, ನಡಪುವ, ಉಪ್ಪುವ.’ ನಿಕ್ಲೆಡ್ ಪದಕಟ್ಟುನಾಕುಲುಲಾ ಕೆಲೆವೆರ್, ‘ನಮ ಆಯನ ಸಂತಾನದಾಕುಲೇ,’ ಅಂದ್‌ದ್ ಪನ್ತೆರ್.</verse>
				<verse number="29">“ಅಂಚಾಯಿನೆಡ್ದ್ ನಮ ದೇವೆರೆ ಸಂತಾನದಾಕುಲಾದುಪ್ಪುನಗ, ದೈವೊಲು ಜನೊಕುಲೆನ ಬಿರ್ಸಾದಿಗೆಡ್ದ್‌ಲಾ ಆಲೋಚನೆಡ್ದ್‌ಲಾ ಉಂಡಾಯಿ ಕೆಲಸೊಗು ಕೆತ್‌ದಿನ ಬಂಗಾರ್‌ಗಾವಡ್ ಬೊಳ್ಳಿಗಾವಡ್ ಕಲ್ಲ್‌ಗಾವಡ್ ಸಮ ಆದುಂಡು ಅಂದ್‌ದ್ ನಮ ಎನ್ನೆರೆ ಬಲ್ಲಿ.</verse>
				<verse number="30">ಅಪಗದ ತಿಳುವಳಿಕೆದಾಂತಿ ಕಾಲೊನು ದೇವೆರ್ ನೆನೆಪುಗು ಕನತಿಜೆ. ಇತ್ತೆ ಆಂಡಲಾ ಆಯೆ ನಾಲ್ ದಿಕ್ಕ್‌ಡುಪ್ಪುನ ಜನೊಕುಲು ಮಾತೆರ್ಲಾ ಪಶ್ಚಾತಾಪ ಪಡೆದ್ ತನ ಕೈತಲ್‌ ತಿರ್ಗೊನೊಡು ಅಂದ್‌ದ್ ಅಪ್ಪಣೆ ಕೊರ್ಪೆ.</verse>
				<verse number="31">ದಾಯೆಗಂದ್ಂಡ, ದೇವೆರ್ ನೇಮಕ ಮಲ್ತಿ ಒರಿ ನರಮಾನಿಡ್ದ್ ಭೂಲೋಕೊನು ನೀತಿಡ್ ನ್ಯಾಯತೀರ್ಪು ಮಲ್ಪೆರೆ ಒಂಜಿ ದಿನ ದೀತೆ. ಆಯೆ ಸೈತ್ ಪೋದು ಲಕ್ಕಿನೆಡ್ದಾವರ ನಂಬುನ ಮಾತೆರೆಗ್ಲಾ ಆಧಾರ ಕೊರ್ತೆ,” ಅಂದ್‌ದ್ ಪಂಡೆ.</verse>
				<verse number="32">ಸೈತಿನಾಕುಲು ಲಕ್ಕ್‌ದ್ ಬರ್ಪಿನ ಸಂಗತಿಡ್ ಕೇನ್ನಗ ಕೆಲೆವೆರ್ ಚೇಷ್ಟೆ ಮಲ್ತೆರ್. ಕೆಲೆವೆರ್, “ಈ ಪನ್ಪಿನ ವಿಷಯೊನು ನನೊರ ಕೇನ್ವ,” ಅಂದ್‌ದ್ ಪಂಡೆರ್.</verse>
				<verse number="33">ಇಂಚಾದುಪ್ಪುನಗ ಪೌಲು ಅಕ್ಲೆನ ನಡುಡ್ದು ಪಿದಾಡ್ದ್ ಪೋಯೆ.</verse>
				<verse number="34">ಕೆಲೆವೆರ್ ಆಯನ್ ನಂಬುದು ಆಯನ್ ಸೇರೊಂಡೆರ್; ನಂಬಿನಾಕುಲೆಡ್ ಅರಿಯೊಪಾಗದ ಸಭೆತಾಯೆ ಆದುಪ್ಪುನ ದಿಯೊನೂಸಿಯೆಲಾ ದಾಮರಿ ಪನ್ಪಿನಾಲ್‌ಲಾ ಬೇತೆ ಜನಲಾ ಇತ್ತೆರ್.</verse>
			</chapter>
			<chapter number="18">
				<verse number="1">ಉಂದೆಡ್ದ್ ಬೊಕ್ಕ ಪೌಲು ಅಥೇನೆನ್ ಬುಡ್ದು ಕೊರಿಂಥ್ಯೊಗು ಪೋಯೆ.</verse>
				<verse number="2">ಪೊಂತುಡು ಪುಟ್ಟುದಿನ ಅಕ್ವಿಲ ಪನ್ಪಿ ಒರಿ ಯೆಹೂದ್ಯನ್ ಅಲ್ಪ ತೂಯೆ. ಯೆಹೂದ್ಯೆರ್ ಮಾತೆರ್ಲಾ ರೋಮುನು ಬುಡ್ದು ಪೋವೊಡು ಅಂದ್‌ದ್ ಕ್ಲೌದಿಯೆ ಚಕ್ರವರ್ತಿ ಅಪ್ಪಣೆ ಕೊರಿನ ಕಾರಣ ಅಕ್ವಿಲೆಲಾ ಆಯನ ಬೊಡೆದಿ ಪ್ರಿಸ್ಕಿಲಲಾ ಒಂತೆ ದಿನೊಡ್ದು ದುಂಬು ಇತಾಲ್ಯಡ್ದ್ ಅಡೆಗ್ ಬತ್ತಿತ್ತೆರ್. ಪೌಲು ಅಕ್ವಿಲ ಬೊಕ್ಕ ಪ್ರಿಸ್ಕಿಲನ್ ತಿಕ್ಕರೆ ಪೋಯೆ.</verse>
				<verse number="3">ಮೊಕ್ಲೆ ಬೇಲೆ ತಂಬು ಮಲ್ಪುನವು. ಅಕ್ಲೆ ಕೈತಲ್‌ ಆಯೆ ಪೋದು ತಾನ್ ಅವ್ವೇ ಬೇಲೆದಾಯೆ ಆದಿತ್ತಿನೆಡ್ದ್ ಅಕ್ಲೆಡೊಪ್ಪ ಇತ್ತ್‌ದ್ ಬೇಲೆ ಮಲ್ತೆ.</verse>
				<verse number="4">ಆಯೆ ಮಾತ ಸಬ್ಬತ್‌ದಿನೊಟುಲಾ ಸಭಾಮಂದಿರೊಡು ತರ್ಕ ಮಲ್ತ್‌ದ್ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ಅರ್ಥ ಮಲ್ಪಾವೊಂದಿತ್ತೆ.</verse>
				<verse number="5">ಸೀಲೆಲಾ ತಿಮೋಥಿಲಾ ಮಕೆದೋನ್ಯೊಡ್ದು ಬತ್ತಿನಪಗ ಪೌಲು ದೇವೆರೆ ಸುವಾರ್ತೆನ್ ಸಾರಿಯುನೆಟ್ಟ್ ಆಸಕ್ತಿ ಇತ್ತಿನಾಯೆ ಆದ್ ಯೇಸುವೇ ಬರೊಡಾಯಿ ಕ್ರಿಸ್ತೆ ಅಂದ್‌ದ್ ಯೆಹೂದ್ಯೆರೆಗ್ ಸಾಕ್ಷಿ ಪಂಡೆ.</verse>
				<verse number="6">ಅಕುಲು ಆಯಗ್ ವಿರೋಧಾದ್ ದೂಷಣೆ ಮಲ್ಪುನಗ ಆಯೆ ತನ ಕುಂಟು ಕುಡ್ತ್‌ದ್ ಅಕ್ಲೆಗ್, “ನಿಕ್ಲೆ ನೆತ್ತೆರ್ ನಿಕ್ಲೆ ತರೆತ ಮಿತ್ತೆ! ಯಾನ್ ಶುದ್ಧ ಮನಸ್ ಇತ್ತಿನಾಯೆ ಆದ್ ಪಿದಯಿದ ಜನೊಕುಲೆ ಕೈತಲ್‌ ಪೋಪೆ,” ಅಂದ್‌ದ್ ಪಂಡೆ.</verse>
				<verse number="7">ಪೌಲು ಆ ಜಾಗ್‌ನ್ ಬುಡ್ದು ದೇವೆರೆಗ್ ಪೋಡಿಯುನಾಯೆ ಆದಿತ್ತಿನ ತೀತ ಯುಸ್ತ ಪನ್ಪಿನಾಯನ ಇಲ್ಲಗ್ ಪೋಯೆ. ಆಯನ ಇಲ್ಲ್ ಸಭಾಮಂದಿರದ ಬರಿಟ್ಟೇ ಇತ್ತ್ಂಡ್.</verse>
				<verse number="8">ಸಭಾದ್ಯಕ್ಷೆ ಆದುಪ್ಪು ಕ್ರಿಸ್ಪೆ ತನ ಇಡೀ ಇಲ್ಲ್‌ದಾಕುಲೆಡೊಪ್ಪ ಕರ್ತವಡ್ ನಂಬಿಕೆ ದೀಯೆ. ಬೊಕ್ಕ ಕೊರಿಂಥ್ಯೆರೆಡ್ ಮಸ್ತ್ ಜನ ಪೌಲು ಪನ್ಪಿನ ಬೋಧನೆನ್ ಕೇಂಡ್ದ್ ನಂಬುದು ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.</verse>
				<verse number="9">ಕರ್ತವೆ ರಾತ್ರೆಡ್ ಪೌಲುಗು ದರ್ಶನ ಕೊರ್ದು, “ಈ ಪೋಡ್ಯಡ; ಪಾತೆರೊಂದೆ ಉಪ್ಪುಲ, ಆಂಡ ಮನಿಪಂದೆ ಕುಲ್ಲೊಡ್ಚಿ.</verse>
				<verse number="10">ಯಾನ್ ನಿನಡೊಪ್ಪ ಉಲ್ಲೆ; ಏರ್ಲಾ ನಿಕ್ಕ್ ಕೈ ದೆರ್ಪಾಯೆರ್, ನಿಕ್ಕ್ ನಷ್ಟ ಆವಂದ್. ಈ ಪಟ್ಟಣೊಡು ಎನನ್ ನಂಬುನಾಕುಲು ಮಸ್ತ್ ಜನ ಉಲ್ಲೆರ್,” ಅಂದ್‌ದ್ ಪಂಡೆ.</verse>
				<verse number="11">ಆಯೆ ಒಂಜಿ ವರ್ಸ ಆಜಿ ತಿಂಗೊಲು ಅಲ್ಪನೇ ಇತ್ತೊಂದು ಆ ಜನೊಕುಲೆಗ್ ದೇವೆರೆ ಪಾತೆರೊನು ಬೋಧನೆ ಮಲ್ತೊಂದಿತ್ತೆ.</verse>
				<verse number="12">ಗಲ್ಲಿಯೋನೆ ಅಖಾಯ ಪ್ರದೇಶದ ಅಧಿಪತಿ ಆದುಪ್ಪುನಗ ಯೆಹೂದ್ಯೆರ್ ಒಗ್ಗಟ್ಟಾದ್ ಪೌಲುನು ಪತ್ತ್‌ದ್ ನ್ಯಾಯಾಸನದ ಎದುರು ಕನತೆರ್.</verse>
				<verse number="13">“ಇಂಬೆ ನ್ಯಾಯಕಟ್ಟ್‌ಗ್ ವಿರೋಧಾದ್ ದೇವೆರೆನ ಪೂಜೆ ಮಲ್ಪುನೆಕ್ಕ್ ಜನೊಕುಲೆಗ್ ಒತ್ತಾಯ ಮಲ್ಪುವೆ,” ಅಂದ್‌ದ್ ದೂರು ಪಂಡೆರ್.</verse>
				<verse number="14">ಪೌಲು ಪ್ರತಿವಾದ ಮಲ್ಪೊಡು ಪಂಡ್ದುಪ್ಪುನಗ ಗಲ್ಲಿಯೋನೆ ಯೆಹೂದ್ಯೆರೆಗ್, “ಓ ಯೆಹೂದ್ಯೆರೇ, ದಾಲಾ ಒಂಜಿ ಅನ್ಯಾಯ ಇಜ್ಜಿಡ ದುಷ್ಟಕಾರ್ಯೊಲು ಆತ್ಂಡ ಯಾನ್ ನಿಕ್ಲೆ ಪಾತೆರೊನು ತಾಳ್ಮೆಡ್ ಕೇನುನವು ನ್ಯಾಯ ಆದುಂಡು.</verse>
				<verse number="15">ಆಂಡ ನಿಕ್ಲೆ ಉಲಯಿ ಉಪ್ಪು ಬೋಧನೆ, ಪುದರ್, ನ್ಯಾಯಕಟ್ಟ್ ಉಂದೆತ್ತ ತರ್ಕ ಇತ್ತ್ಂಡಲಾ ಅವೆನ್ ನಿಕುಲೇ ತೂವೊನ್ಲೆ. ಇಂಚಿನ ಸಂಗತಿಲೆನ್ ನ್ಯಾಯತೀರ್ಪು ಮಲ್ಪೆರೆ ಎಂಕಂತು ಮನಸಿಜ್ಜಿ,” ಅಂದ್‌ದ್ ಕಡಪುಡಿಯೆ.</verse>
				<verse number="16">ಅಕ್ಲೆನ್ ನ್ಯಾಯಾಸನೊಡ್ದು ಪಿದಯಿ ಪಾಡಿಯೆ.</verse>
				<verse number="17">ಅಪಗ ಜನೊಕುಲು ಮಾತೆರ್ಲಾ ಸಭಾದ್ಯಕ್ಷೆ ಆದುಪ್ಪುನ ಸೋಸ್ಥೆನನ್ ಪತ್ತ್‌ದ್ ನ್ಯಾಯಾಸನದ ಎದುರುಡೆ ಪೆಟ್ಟ್ ಪಾಡಿಯೆರ್. ಗಲ್ಲಿಯೋನೆ ಅವೆನ್ ಒಂಜೆನ್ಲಾ ಗೇನೊಗು ದೆತ್ತೊಂಡಿಜೆ.</verse>
				<verse number="18">ಪೌಲು ಕೊರಿಂಥ್ಯೊಡು ಒಂತೆ ಸಮಯ ಇತ್ತ್‌ದ್, ತನ ಸಹೋದ್ರೆರೆಡ್ದ್ ಅಪ್ಪಣೆ ದೆತ್ತೊಂದು ತನ್ಕ್ ಒಂಜಿ ಪರಕೆ ಇತ್ತಿನೆಡ್ದ್ ಕೆಂಕ್ರೇಯಡ್ ತರೆಕುಜಲ್ ದೆತ್ತ್‌ದ್ ಬೊಕ್ಕ ಕಪ್ಪಲ್ ಮಿತ್ತಾರ್ದ್ ಪ್ರಿಸ್ಕಿಲ ಬೊಕ್ಕ ಅಕ್ವಿಲೆ ಒಟ್ಟುಗು ಸುರಿಯಗ್ ಪೋಯೆ.</verse>
				<verse number="19">ಆಯೆ ಎಫೆಸಗ್ ಮುಟ್ಟುನಗ ಅಕ್ಲೆನ್ ಅಲ್ಪನೇ ಬುಡಿಯೆ ತಾನ್ ಸಭಾಮಂದಿರೊಗು ಪೋದು ಯೆಹೂದ್ಯೆರೆ ಒಟ್ಟುಗು ತರ್ಕ ಮಲ್ತೆ.</verse>
				<verse number="20">ಅಕುಲು ಆಯನ್ ನನಲಾ ಒಂತೆ ಸಮಯ ಉಪ್ಪೊಡು ಅಂದ್‌ದ್ ಕೇನೊನ್ನಗ ಆಯೆ ಒಪ್ಪಂದೆ</verse>
				<verse number="21">“ದೇವೆರೆನ ಚಿತ್ತ ಆಂಡ ಕುಡ ನಿಕ್ಲೆನ ಕೈತಲ್‌ ಬರ್ಪೆ,” ಅಂದ್‌ದ್ ಅಕ್ಲೆಡ್ದ್ ಅಪ್ಪಣೆ ದೆತ್ತೊಂದು ಅಲ್ತ್‌ಡ್ದ್ ಪೋಯೆ. ಐಡ್ದ್ ಬೊಕ್ಕ ಎಫೆಸಡ್ದ್ ಕಡಲ್ ಪ್ರಯಾಣ ಮಲ್ತ್‌ದ್</verse>
				<verse number="22">ಕೈಸರೆಯಗ್‌ ಮುಟ್ಟಿಯೆ. ಬೊಕ್ಕ ಯೆರೂಸಲೇಮುಗು ಪೋದು ಸಭೆಕ್ ವಂದಿತ್‌ದ್ ಅಂತಿಯೋಕ್ಯಗ್ ಬತ್ತೆ.</verse>
				<verse number="23">ಪೌಲು ಅಂತಿಯೋಕ್ಯಡ್ ಒಂತೆ ಸಮಯ ಇತ್ತ್‌ದ್ ಗಲಾತ್ಯ ದೇಶೊಡ್ಲಾ ಫ್ರುಗ್ಯಡ್ಲಾ ಪ್ರಯಾಣ ಮಲ್ತೊಂದು ಶಿಷ್ಯೆರೆನ್ ಬಲ ಪಡೆಪಾಯೆ.</verse>
				<verse number="24">ಅಲೆಕ್ಸಾಂದ್ರಿಯಡ್ ಪುಟ್ಟುದಿನ ಅಪೊಲ್ಲೋಸೆ ಪನ್ಪಿ ಒರಿ ಯೆಹೂದ್ಯೆ ಎಫೆಸಗ್ ಬತ್ತೆ. ಆಯೆ ಪಾತೆರೊಡು ಬಾರಿ ಬಿರ್ಸೆ ಆದಿತ್ತ್‌ದ್ ಶಾಸ್ತ್ರೊಡು ಬಿರ್ಸೆ ಆದಿತ್ತೆ.</verse>
				<verse number="25">ಆಯೆ ಕರ್ತವ ಮಾರ್ಗೊಡು ಬೋಧನೆ ಪಡೆತಿನಾಯೆ ಆದಿತ್ತೆ. ಬೊಕ್ಕ ಆತ್ಮೊಡು ಚುರುಕು ಮನಸ್ ಇತ್ತಿನಾಯೆ ಆದಿತ್ತ್‌ದ್ ಯೋಹಾನನ ನೀರ್‌ದ ದೀಕ್ಷಾಸ್ನಾನ ತೆರಿದಿನಾಯೆ ಆದಿತ್ತ್‌ಂಡಲಾ ಯೇಸುನ ಸಂಗತಿಲೆನ್ ಸೂಕ್ಷ್ಮಾದ್ ಪಂಡ್ದ್ ಬೋಧನೆ ಮಲ್ತೊಂದಿತ್ತೆ.</verse>
				<verse number="26">ಆಯೆ ಸಭಾಮಂದಿರೊಡು ಧೈರ್ಯೊಡು ಪಾತೆರೊಂದಿತ್ತೆ. ಆಯನ ಪಾತೆರೊಲೆನ್ ಪ್ರಿಸ್ಕಿಲ ಬೊಕ್ಕ ಅಕ್ವಿಲೆ ಕೇಂಡ್ದ್ ಆಯನ್ ತನ್ಕುಲೆ ಇಲ್ಲಗ್ ಲೆತ್ತೊಂದು ಪೋದು ದೇವೆರೆ ಮಾರ್ಗೊನು ಆಯಗ್ ನನಲಾತ್ ಸೂಕ್ಷ್ಮಾದ್ ಬುಡ್ಪಾದ್ ಪಂಡೆರ್.</verse>
				<verse number="27">ಐಡ್ದ್ ಬೊಕ್ಕ ಅಖಾಯಗ್ ಪೋವೊಡು ಅಂದ್‌ದ್ ಅಪೊಲ್ಲೋಸ್ ಮನಸ್ ಉಪ್ಪುನಗ ಸಹೋದ್ರೆರ್ ಆಯಗ್ ಉಮೇದ್ ಕೊರ್ದು ಅಲ್ಪ ಇತ್ತಿನ ಶಿಷ್ಯೆರೆಗ್ ಅಪೊಲ್ಲೋಸುನು ಎದುಕೊನೊಡು ಅಂದ್‌ದ್ ಕಾಕಜಿ ಬರೆದ್ ಕೊರಿಯೆರ್. ಆಯೆ ಅವುಲು ಮುಟ್ಟುದು, ದಯ ಹೊಂದುದು ನಂಬುನಾಕುಲೆಗ್ ದಿಂಜ ಸಹಾಯ ಮಲ್ತೆ.</verse>
				<verse number="28">ಆಯೆ ಜನೊಕುಲೆಗ್ ಯೇಸು ಒರಿಯೇ ಕ್ರಿಸ್ತೆ ಅಂದ್‌ದ್ ಶಾಸ್ತ್ರದ ಆಧಾರೊಡು ತೋಜಾದ್ ಜನೊಕುಲೆನ ಎದುರುಡು ಬಲವಾದ್ ಯೆಹೂದ್ಯೆರೆನ್ ಕಂಡಿಸಾದ್ ದೇವೆರೆನ್ ನಂಬುನಾಕುಲೆಗ್ ಸಹಾಯ ಮಲ್ತೆ.</verse>
			</chapter>
			<chapter number="19">
				<verse number="1">ಅಪೊಲ್ಲೋಸೆ ಕೊರಿಂಥ್ಯೊಡು ಉಪ್ಪುನಪಗ ಪೌಲು ಮಲೆನಾಡ್‌ಡ್ಡ್ ಪ್ರಯಾಣ ಮಲ್ತ್‌ದ್ ಎಫೆಸಗ್ ಬತ್ತ್‌ದ್ ಕೆಲವು ಜನ ಶಿಷ್ಯೆರೆನ್ ತೂದು,</verse>
				<verse number="2">ಪೌಲು ಅಕ್ಲೆಡ ಕೇಂಡೆ, “ನಿಕುಲು ನಂಬಿನಪಗ ಪರಿಶುದ್ಧಾತ್ಮ ತಿಕ್ಕ್‌ದ್ಂಡ?” ಅಕುಲು ಉತ್ತರ ಕೊರ್ದು, “ಇಜ್ಜಿ, ಪರಿಶುದ್ಧಾತ್ಮ ಉಂಡು ಪನ್ಪಿನೆನ್ ಎಂಕುಲು ಈತ್‌ನೆಂಗೆ ಕೇಂಡ್ದಿಜ.”</verse>
				<verse number="3">ಆಯೆ, “ನಿಕುಲು ಏರೆನ್ ನಂಬುದು ನೀರ್‌ದ ದೀಕ್ಷಾಸ್ನಾನೊನು ಮಲ್ತೊಂಡರ್,” ಅಂದ್‌ದ್ ಕೇಂಡಿನೆಕ್ಕ್ ಅಕುಲು ಯೋಹಾನನ ಬೋಧನೆನ್ ನಂಬುದು ದೀಕ್ಷಾಸ್ನಾನ ಮಲ್ತೊಂಡ.</verse>
				<verse number="4">ಐಕ್ ಪೌಲೆ, “ಯೋಹಾನೆ ಪಶ್ಚಾತಾಪ ಪಡೆದ್ ದೇವೆರೆ ಕಡೆಕ್ಕ್ ತಿರ್ಗುನಾಕುಲೆಗ್ ನೀರ್‌ದ ದೀಕ್ಷಾಸ್ನಾನ ಕೊರ್ದು ತನ ಪಿರವುಡು ಬರ್ಪಿನಾಯಡ ಅಂದ್ಂಡ ಯೇಸುಡ ನಂಬಿಕೆ ದೀವೊಡು,” ಅಂದ್‌ದ್ ಜನೊಕುಲೆಗ್ ಪಂಡೆ.</verse>
				<verse number="5">ಅಕುಲು ಆ ಪಾತೆರೊಲೆನ್ ಕೇಂಡ್ದ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ ನೀರ್‌ದ ದೀಕ್ಷಾಸ್ನಾನ ಮಲ್ತೊಂಡೆರ್.</verse>
				<verse number="6">ಪೌಲು ಅಕ್ಲೆನ ಮಿತ್ತ್ ಕೈ ದೀನಗ ಪರಿಶುದ್ಧಾತ್ಮ ಅಕ್ಲೆ ಮಿತ್ತ್ ಬತ್ತೆ. ಅಕುಲು ಬೇತೆ ಬೇತೆ ಭಾಷೆಡ್ ಪಾತೆರೊಂಡೆರ್, ಪ್ರವಾದನೆಲಾ ಮಲ್ತೆರ್.</verse>
				<verse number="7">ಆ ಗುಂಪುಡು ಪದ್ರಾಡ್ ಜನ ಅಂಜೊವುಲು ಇತ್ತೆರ್.</verse>
				<verse number="8">ಆ ಊರುಡು ಪೌಲು ಸಭಾಮಂದಿರದ ಉಲಯಿ ಪೋದು ಮೂಜಿ ತಿಂಗೊಲು ಅಲ್ಪನೇ ದೇವೆರೆ ರಾಜ್ಯದ ಸಂಗತಿಡ್ ತರ್ಕ ಮಲ್ತೊಂದು ಜನೊಕುಲೆಗ್ ಉಮೇದ್ ಕೊರ್ದು ಧೈರ್ಯೊಡು ಪಾತೆರಿಯೆ.</verse>
				<verse number="9">ಕೆಲೆವೆರ್ ತನ್ಕುಲೆ ಮನಸ್‌ಲೆನ್ ಕಠಿಣ ಮಲ್ತೊಂದು ನಂಬಂದೆ ಜನತ ಗುಂಪುದ ಎದುರು ಈ ದೇವೆರೆ ಮಾರ್ಗ ಪಡಿಕೆಂತಿನವು ಅಂದ್‌ದ್ ಪನ್ನಗ ಪೌಲು ಅಕ್ಲೆನ್ ಬುಡ್ದು ಪೋದು ಶಿಷ್ಯೆರೆನ್ ಬೇತೆ ಮಲ್ತ್‌ದ್ ತುರನ್ನನ ಸಾಲೆಡ್ ದಿನಾಲ ತರ್ಕ ಮಲ್ತೊಂದಿತ್ತೆ.</verse>
				<verse number="10">ಉಂದು ರಡ್ಡ್ ವರ್ಸ ನಡತಿನೆಡ್ದ್ ಆಸ್ಯ ದೇಶೊಡು ಇತ್ತಿನ ಯೆಹೂದ್ಯೆರ್‌ಲಾ ಗ್ರೀಕೆರ್‌ಲಾ ಮಾತೆರ್ಲಾ ಕರ್ತವ ಪಾತೆರೊನು ಕೇಂಡೆರ್.</verse>
				<verse number="11">ದೇವೆರ್ ಪೌಲು ಕೈಡ್ದ್ ಅಪರೂಪದ ಕಾರ್ನಿಕೊಲೆನ್ ನಡಪುಡೊಂದು ಇತ್ತಿನೆಡ್ದ್</verse>
				<verse number="12">ಜನೊಕುಲು ಕೈ ಟುವಲ್‌ನ್ ಬೊಕ್ಕ ತೋರ್ತು ಕನತ್‌ದ್ ಆಯನ ಮೆಯಿಕ್ ಮುಟ್ಟಾದ್‌ ಸೀಕ್‌ದಾಕುಲೆನ ಮಿತ್ತ್ ಪಾಡ್ನಗ ಗುಣ ಆವೊಂದಿತ್ತೆರ್ ದುರಾತ್ಮೊಲು ಬುಡ್ದು ಪೋವೊಂದಿತ್ತ.</verse>
				<verse number="13">ಕೆಲೆವೆರ್ ಮಂತ್ರ ಮಲ್ತ್‌ದ್ ತಿರ್ಗೊಂದಿತ್ತಿ ಯೆಹೂದ್ಯೆರ್‌ಲಾ ಊರೂರುಗು ಪೋವೊಂದು ದೆವ್ವೊಲೆಡ್ದ್ ಪೀಡಿತೆರಾದಿತ್ತಿನ ಜನೊಕುಲೆನ್ ಪೌಲು ಸಾರುನ ಯೇಸುನ ಆಜ ಪಂಡ್ದ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಡ್ದ್ ದುರಾತ್ಮೊಲೆನ್ ಪಿದಾಯಿ ಪಾಡೊಂದಿತ್ತೆರ್.</verse>
				<verse number="14">ಪ್ರಧಾನಯಾಜಕೆ ಸ್ಕೇವ ಪನ್ಪಿ ಒರಿ ಯೆಹೂದ್ಯನ ಏಳ್ ಜೋಕುಲು ಅಂಚ ಮಲ್ತೊಂದಿತ್ತೆರ್.</verse>
				<verse number="15">ಆಂಡ ದುರಾತ್ಮೊಲು ಉತ್ತರ ಕೊರ್ದು, “ಯೇಸುನ ಗುರ್ತ ಎಂಕುಂಡು; ಪೌಲುನ್ಲಾ ತೆರಿದ ಆಂಡ ನಿಕುಲು ಏರ್?” ಪಂಡ್ಂಡ್.</verse>
				<verse number="16">ಬೊಕ್ಕ ದುರಾತ್ಮ ಪತ್ತ್‌ದಿನ ಆ ನರಮಾನಿ ಅಕ್ಲೆ ಮಿತ್ತ್ ಬೂರ್ದು ಸೋಪಾದ್ ಬಲಾತ್ಕಾರ ಮಲ್ತಿನೆಡ್ದ್ ಅಕುಲು ಬತ್ತಲೆ ಆದ್ ಗಾಯ ಆದ್ ಇಲ್ಲದ ಉಲಯಿಡ್ದ್ ಪಿದಯಿ ಬಲ್ತೆರ್.</verse>
				<verse number="17">ಈ ಸಂಗತಿಲು ಎಫೆಸಡಿತ್ತಿನ ಮಾತ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ತೆರಿನಗ ಮಾತೆರೆಗ್ಲಾ ಪೋಡಿಗೆ ಆಂಡ್. ಬೊಕ್ಕ ಕರ್ತವೆ ಆದುಪ್ಪು ಯೇಸುನ ಪುದರ್‌ಗ್ ಸನ್ಮಾನ ತಿಕ್ಕ್ಂಡ್</verse>
				<verse number="18">ಅಪಗ ಆಯನ್ ನಂಬುನಾಕುಲೆಡ್ ದಿಂಜ ಮಂದಿ ಬತ್ತ್‌ದ್ ತನ್ಕುಲು ಮಲ್ತಿನ ಪಾಪ ಕೃತ್ಯೊಲೆನ್ ಮಾತೆರೆ ಎದುರು ಅರಿಕೆ ಮಲ್ತೆರ್.</verse>
				<verse number="19">ಉಂದತ್ತಂದೆ ಮಾಟ ಮಂತ್ರೊಲೆನ್ ನಡಪಾವೊಂದಿತ್ತಿನಾಕುಲೆಡ್ ಕೆಲೆವೆರ್ ತನ್ಕುಲೆ ಪುಸ್ತಕೊಲೆನ್ ಕೂಡಾದ್ ಮಾತೆರೆನ ದುಂಬು ಪೊತ್ತಾದ್ ಬುಡಿಯೆರ್. ಐತ ಬಿಲೆ ಲೆಖ್ಖ ಮಲ್ತ್‌ದ್ ತೂಂಡ ಐವ ಸಾರ ಬೊಳ್ಳಿದ ಪಾವೊಲಿ ಆವು ಅಂದ್‌ದ್ ತೆರಿಯೊಂಡೆರ್.</verse>
				<verse number="20">ಇಂಚ ಕರ್ತವ ಪಾತೆರೊಲು ಹೆಚ್ಚೆಚ್ಚಾದ್ ಬಲತ್ತ್‌ಂಡ್.</verse>
				<verse number="21">ಈ ಸಂಗತಿಲು ನಡೆತಿ ಬೊಕ್ಕ ಪೌಲು ತಾನ್ ಮಕೆದೋನ್ಯೊಡ್ಲಾ ಅಖಾಯೊಡ್ಲಾ ಪ್ರಯಾಣ ಮಲ್ತ್‌ದ್ ಯೆರೂಸಲೇಮುಗು ಪೋವೊಡಂದ್‌ದ್ ಮನಸ್‌ಡ್ ಆಲೋಚನೆ ಮಲ್ತ್‌ದ್, “ಅಡೆಗ್ ಪೋಯಿ ಬೊಕ್ಕ ರೋಮುನ್ಲಾ ತೂವೊಡು,” ಅಂದ್‌ದ್ ಪಂಡೆ.</verse>
				<verse number="22">ಆಂಡ ಆಯನ ಒಟ್ಟುಗು ಸೇವೆ ಮಲ್ಪುನಾಕುಲೆಡ್ ಇರ್ವೆರಾಯಿನ ತಿಮೋಥಿನ್ಲಾ ಎರಸ್ತನ್ಲಾ ಮಕೆದೋನ್ಯೊಗು ಕಡಪುಡ್ದು ತಾನ್ ಆಸ್ಯ ದೇಶೊಡು ಒಂತೆ ಸಮಯ ಉಂತಿಯೆ.</verse>
				<verse number="23">ಆ ಕಾಲೊಡು ಕ್ರಿಸ್ತನ ಮಾರ್ಗದ ಸಂಗತಿಡ್ ಬಾರಿ ಗಲಾಟೆ ಲಕ್ಕ್‌ಂಡ್.</verse>
				<verse number="24">ಅವುಲು ದೆಮೇತ್ರಿ ಪನ್ಪಿ ಒರಿ ಬೊಳ್ಳಿದ ಆಚಾರಿ ಬೊಳ್ಳಿಡ್ ಅರ್ತೆಮಿ ದೇವಿನ ಗುಡಿತ ಲೆಕ್ಕ ಎಲ್ಯೆಲ್ಯ ಗುಡಿತ ಮೂರ್ತಿನ್ ಮಲ್ಪಾವುನಾಯೆ ಆದಿತ್ತ್‌ದ್ ಬೇಲೆದಾಕುಲೆಗ್ ಬಾರಿ ಬೇಲೆ ಕೊರೊಂದಿತ್ತೆ.</verse>
				<verse number="25">ಆಯೆ ಅಕ್ಲೆನ ಸಮ್ಮಂಧವಾಯಿನ ಬೇಲೆದಾಕುಲೆನ್ ಒಟ್ಟುಗು ಲೆಪುಡಾದ್ ಅಕ್ಲೆಗ್, “ಜನೊಕುಲೇ ಈ ಬೇಲೆಡ್ದ್ ನಂಕ್ ಕೈನಿಲ್ಕೆ ದುಡ್ಡು ಬರ್ಪುಂಡು ಅಂದ್‌ದ್ ನಿಕುಲು ತೆರಿದರ್.</verse>
				<verse number="26">ಆಂಡ ಈ ಪೌಲು ಇನ್ಪಿನಾಯೆ ಎಂಚಿನ ಮಲ್ತೊಂದುಲ್ಲೆ ಅಂದ್‌ದ್ ನಿಕುಲು ತೂಲೆ! ಆಯೆ ಎಂಚಿನ ಪನ್ಪೆ ಇನ್ಪಿನೆನ್ ನಿಕುಲು ಕೇನ್ಲೆ! ಕೈಡ್ದ್ ಮಲ್ತಿನ ಮೂರ್ತಿಲು ದೇವೆರ್ ಅತ್ತ್ ಅಂದ್‌ದ್ ಎಫೆಸೊಡು ಮಾತ್ರತ್ತಂದೆ ಹೆಚ್ಚ್ ಕಮ್ಮಿ ಆಸ್ಯ ಸೀಮೆಡ್ಲಾ ಮಾತ ಜನೊಕುಲೆಗ್ ನಂಬಾದ್ ತಿರ್ಗಾದ್ ಬುಡ್ತೆ.</verse>
				<verse number="27">ಉಂದೆಡ್ದ್ ನಮ ಬೇಲೆಗ್ ಕಳಂಕ ಬರ್ಪಿನಿ ಅತ್ತಂದೆ ಅರ್ತೆಮಿ ಮಾಮಲ್ಲದೇವಿನ ದೇವಸ್ಥಾನ ಗೇನೊಗು ಬರಂದಿಲೆಕ್ಕಲಾ ಮಾತ ಆಸ್ಯ ಸೀಮೆಡ್ಲಾ ಲೋಕೊಡ್ಲಾ ಪೂಜೆ ಮಲ್ಪುನ ಈ ದೇವಿನ ವೈಭವೊಗು ಬರ್ಪಿನ ಗಂಡಾಂತ್ರಲಾ ಉಂಡು,” ಅಂದ್‌ದ್ ಪಂಡೆ.</verse>
				<verse number="28">ಅಕುಲು ಈ ಪಾತೆರೊಲೆನ್ ಕೇಂಡ್ದ್ ಕೋಪೊಡು ದಿಂಜಿದ್, “ಎಫೆಸದಾಕುಲೆನ ಅರ್ತೆಮಿ ದೇವಿ ಮಾಮಲ್ಲದೇವಿ,” ಅಂದ್‌ದ್ ಅರ್ಭಟ ದೀಯೆರ್.</verse>
				<verse number="29">ಅಪಗ ಊರುಡು ಪೂರ ಗಲಾಟೆ ಆಂಡ್. ಪ್ರಯಾಣೊಡಿತ್ತಿನ ಪೌಲುಗು ಜತೆ ಆದಿತ್ತಿನ ಮಕೆದೋನ್ಯದ ಗಾಯನ್ಲಾ ಅರಿಸ್ತಾರ್ಕನ್ಲಾ ಜನೊಕುಲು ಒಯ್ತೊಂದು ಒಗ್ಗಟ್ಟಾದ್ ನಾಟಕ ಸಾಲೆದ ಉಲಯಿ ಪೊಗ್ಗಿಯೆರ್.</verse>
				<verse number="30">ಪೌಲು ಜನೊಕುಲೆ ಉಲಯಿ ಪೋವೊಡಂದುಪ್ಪುನಗ ಶಿಷ್ಯೆರ್ ಆಯನ್ ಬುಡ್ಜೆರ್.</verse>
				<verse number="31">ಉಂದು ಅತ್ತಂದೆ ಆಸ್ಯ ದೇಶದ ಅಧಿಕಾರಿಲೆಡ್ ಕೆಲೆವೆರ್ ಆಯಗ್ ಸ್ನೇಹಿತೆರ್ ಇತ್ತಿನೆಡ್ದ್ ಆಯನ ಕೈತಲ್‌ ಜನೊಕುಲೆನ್ ಕಡಪುಡ್ದು ಈ ರಂಗಸ್ಥಳದ ಉಲಯಿ ಪೋದು ನಿನನ್ ಗಂಡಾತ್ರೊಗು ಗುರಿ ಮಲ್ತೊನಡ ಅಂದ್‌ದ್ ನಟ್ಟೊಂಡೆರ್.</verse>
				<verse number="32">ಜನತ ಗುಂಪು ಗಜಿಬಿಜಿ ಆದಿತ್ತಿನೆಡ್ದ್ ಬೊಕ್ಕ ಹೆಚ್ಚಾಯಿನ ಜನೊಕುಲೆಗ್ ತನ್ಕುಲು ಸೇರ್ದ್ ಬೈದಿನ ಕಾರಣ ಗೊತ್ತಿತ್ತ್‌ಜಿ. ಕೆಲೆವೆರ್ ಒಂಜಿ ರೀತಿ ಆದ್ ಬೊಕ್ಕ ಕೆಲೆವೆರ್ ಬೊಕ್ಕೊಂಜಿ ರೀತಿ ಆದ್ ಕಲ್ಕೊಂದಿತ್ತೆರ್.</verse>
				<verse number="33">ಯೆಹೂದ್ಯೆರ್ ಅಲೆಕ್ಸಾಂದ್ರನ್ ದುಂಬು ನೂಕನಗ ಗುಂಪುಡು ಕೆಲೆವೆರ್ ಆಯಗ್ ಸೂಚನೆ ಕೊರಿಯೆರ್. ಅಪಗ ಅಲೆಕ್ಸಾಂದ್ರೆ ಕೈ ತೋಜಾಪಾದ್ ಕೂಡ್ದು ಬೈದಿನ ಜನೊಕುಲೆಗ್ ಎದುರು ಪಾತೆರೊಡು ಅಂದ್‌ದ್ ಇತ್ತೆ.</verse>
				<verse number="34">ಆಂಡ ಆಯೆ ಯೆಹೂದ್ಯೆ ಅಂದ್‌ದ್ ತೆರಿನಗ ಮಾತೆರ್ಲಾ ಒಂಜೇ ಸ್ವರೊಟ್ಟು, “ಎಫೆಸದಾಕುಲೆನ ಅರ್ತೆಮಿ ದೇವಿ ಮಾಮಲ್ಲದೇವಿ,” ಅಂದ್‌ದ್ ರಡ್ಡ್ ಗಂಟೆ ಪೊರ್ತು ಬೊಬ್ಬೆ ಪಾಡಿಯೆರ್.</verse>
				<verse number="35">ಕಡೆಕ್ಕ್ ಪಟ್ಟಣದ ಯಜಮಾನೆ ಜನೊಕುಲೆನ ಗುಂಪುನು ಶಾಂತ ಮಲ್ಪಾದ್, “ಎಫೆಸದಾಕುಲೇ, ಅರ್ತೆಮಿ ಮಾಮಲ್ಲದೇವಿನ ದೇವಸ್ಥಾನೊನು ಕಾಪಾಡೊಂದು ಬೈದಿನ ಮಾತ ಜನೊಕುಲೆಗ್ ಗೊತ್ತುಂಡು. ಅರ್ತೆಮಿ ದೇವತೆಗ್ಲಾ ಬಾನೊಡ್ದು ಬೂರ್ದಿತ್ತಿ ದೇವಿನ ಮೂರ್ತಿಗ್ಲಾ ಪೂಜೆ ಮಲ್ಪೊಡು ಪಂಡ್ದ್ ತೆರಿಯಂದಿನ ನರಮಾನಿ ಏರುಲ್ಲೆ?</verse>
				<verse number="36">ಈ ಸಂಗತಿಲು ಅತ್ತ್ ಪನ್ಪಿನೆಕ್ಕ್ ಏರೆಡ್ದ್‌ಲಾ ಆಪುಜಿ ಅಮಸರೊಡು ದಾಲಾ ಮಲ್ಪಂದೆ ಶಾಂತೊಡು ಉಪ್ಪುಲೆ.</verse>
				<verse number="37">ನಿಕುಲು ಲೆತ್ತೊಂದು ಬೈದಿನ ಈ ನರಮಾನಿಲು ದೇವಸ್ಥಾನೊಡು ಇತ್ತಿನೆನ್ ಕಂಡೊನುನಾಕುಲು ಅತ್ತ್, ನಮ ದೇವಿನ್ ದೂಷಿಯುನಾಕುಲುಲಾ ಅತ್ತ್.</verse>
				<verse number="38">ಇಂಚಾದುಪ್ಪುನಗ ದೆಮೇತ್ರಿಯಗ್ಲಾ ಆಯನ ಬೇಲೆದಾಕುಲೆಗ್ಲಾ ಏರೆಡಾಂಡಲಾ ತಕರಾರ್ ಇತ್ತ್ಂಡ ನ್ಯಾಯಾಲಯೊಲು ಉಂಡು; ಅಧಿಪತಿಲು ಉಲ್ಲೆರ್. ಒರಿಯ ಮಿತ್ತ್ ಒರಿ ವ್ಯಾಜ್ಯ ಮಲ್ತೊನಡೆ.</verse>
				<verse number="39">ಬೇತೆ ದಾಲಾಂಡಲಾ ದೂರು ಇತ್ತ್ಂಡ ಅವು ಸಭೆಟ್ ತೀರ್ಪು ಆವೊಡು.</verse>
				<verse number="40">ಈ ದಿನೊಟು ಕಾರಣದಾಂತೆ ಸೇರ್ದಿನ ಸಭೆಟ್ ಉಂದು ಒಂಜಿ ದಂಗೆ ಅಂದ್‌ದ್ ಎಂಕುಲೆ ಮಿತ್ತ್ ಅಪವಾದನೆ ಪಾಡಿಯೆರೆ ಕಾರಣ ಆವು. ಈ ಗಲಾಟೆದ ಸಂಗತಿಡ್ ವಿಚಾರಣೆ ಮಲ್ತ್ಂಡ ನಮಡ್ದ್ ಉತ್ತರ ಕೊರಿಯೆರೆ ಆಪಿನೇ ಇಜ್ಜಿ,” ಅಂದ್‌ದ್ ಪಂಡೆ.</verse>
				<verse number="41">ಈ ಪಾತೆರೊಲೆನ್ ಪಂಡ್ದ್ ಕೂಟೊನು ಮುಗಿತೆ.</verse>
			</chapter>
			<chapter number="20">
				<verse number="1">ಗಲಾಟೆ ಉಂತಿ ಬೊಕ್ಕ ಪೌಲು ಶಿಷ್ಯೆರೆನ್ ಲೆಪುಡಾದ್ ಧೈರ್ಯ ಪಂಡ್ದ್ ಅಕ್ಲೆನ ಒಪ್ಪಿಗೆ ದೆತ್ತೊಂದು ಮಕೆದೋನ್ಯೊಗು ಪಿದಾಡಿಯೆ.</verse>
				<verse number="2">ಆ ದೇಶೊಡು ಪ್ರಯಾಣ ಮಲ್ತ್‌ದ್ ಅಲ್ತಕಲೆನ್ ದಿಂಜ ಪಾತೆರೊಲೆಡ್ದ್ ಧೈರ್ಯ ಪಡೆಪಾದ್ ಗ್ರೀಕ್ ದೇಶೊಗು ಬತ್ತೆ.</verse>
				<verse number="3">ಅಲ್ಪ ಮೂಜಿ ತಿಂಗೊಲು ಇತ್ತೆ. ಬೊಕ್ಕ ಸುರಿಯ ಪ್ರದೇಶೊಗು ಕಡಲ್ ಸಾದಿ ಆದ್ ಪೋವೊಡು ಪಂಡ್ದುಪ್ಪುನಗ ಆಯಗ್ ವಿರೋಧಾದ್ ಯೆಹೂದ್ಯೆರೆಡ್ ಕುತಂತ್ರ ಆಂಡ್. ಅಂಚಾಯಿನೆಡ್ದ್ ಆಯೆ ಮಕೆದೋನ್ಯೊಗು ಪಿರ ಪೋವರೆ ಆಲೋಚನೆ ಮಲ್ತೆ.</verse>
				<verse number="4">ಕೆಲವು ಜನೊಕುಲು ಪೌಲು ಒಟ್ಟುಗು ಇತ್ತೆರ್. ಅಕುಲು ಏರ್ ಪಂಡ ಪುರ್ರನ ಮಗೆ ಆಯಿ ಬೆರೋಯ ಪಟ್ಟಣದ ಸೋಪತ್ರೆಲಾ ಥೆಸ್ಸಲೋನಿಕದ ಅರಿಸ್ತಾರ್ಕೆಲಾ ಸೆಕುಂದೆಲಾ ದೆರ್ಬೆ ಊರುಡ್ದು ಗಾಯೆಲಾ ತಿಮೋಥಿಲಾ ಆಸ್ಯೊಡ್ದು ತುಖಿಕೆಲಾ ತ್ರೋಫಿಮೆಲಾ ಆಯನ ಒಟ್ಟುಗು ಪೋಯೆರ್.</verse>
				<verse number="5">ಮೊಕುಲು ನಮಡ್ದ್ ದುಂಬೇ ಪೋದು ಎಂಕ್ಲೆಗಾದ್ ತ್ರೋವೊಡು ಕಾತ್ ಕುಲ್ಲುದಿತ್ತೆರ್.</verse>
				<verse number="6">ಪುಳಿದಾಂತಿನ ರೊಟ್ಟಿದ ಪರ್ಬದ ದಿನ ಆಯಿ ಬೊಕ್ಕ ಫಿಲಿಪ್ಪಿಡ್ದ್ ಪಿದಾಡ್ದ್ ಕಪ್ಪಲ್‌ಡ್ ಐನ್ ದಿನದ ಪ್ರಯಾಣ ಮಲ್ತ್‌ದ್ ತ್ರೋವೊಗು ಬತ್ತ್‌ದ್ ಅಕ್ಲೆನ್ ಸೇರೊಂಡ. ಅಲ್ಪ ಏಳ್ ದಿನ ಇತ್ತ.</verse>
				<verse number="7">ವಾರದ ಸುರುತ್ತ ದಿನೊಟು ಎಂಕುಲು ರೊಟ್ಟಿ ಪೊಲ್ಪುನ ಆಚಾರೊಗಾದ್ ಸೇರ್ದಿತ್ತ. ಪೌಲು ಸಭೆಕ್ ಸೇರ್ದ್ ಬೈದಿನ ಜನೊಕುಲೆಗ್ ಮದ್ಯ ರಾತ್ರೆ ಮುಟ್ಟ ಪ್ರಸಂಗ ಮಲ್ತಿನಿ ದಾಯೆ ಪಂಡ ಮನದಾನಿ ಅಲ್ತ್‌ಡ್ದ್ ಪಿದಾಡ್ದ್ ಪೋವೊಡು ಅಂದ್‌ದ್ ಆಲೋಚನೆ ಮಲ್ತ್‌ದಿತ್ತೆ.</verse>
				<verse number="8">ಎಂಕುಲು ಸೇರ್ದಿನ ಉಪ್ಪರಿಗೆಡ್ ಸುಮಾರ್ ತುಡರ್‌ಲು ಇತ್ತ್ಂಡ್.</verse>
				<verse number="9">ಯೂತುಕೆ ಪನ್ಪಿ ಒರಿ ಜವನ್ಯೆ ಕಂಡಿಡ್ ಕುಲ್ಲೊಂದು ಜೋರು ನಿದ್ರೆದ ಅಮಲ್‌ಡ್ ಇತ್ತೆ, ಪೌಲು ನನಲಾ ಪ್ರಸಂಗ ಮಲ್ತೊಂದುಪ್ಪುನಗ ನಿದ್ರೆದ ಅಮಲ್ ಹೆಚ್ಚಾದ್ ಮೂಜನೇ ಮಾಳಿಗೆಡ್ದ್ ನೆಲಕ್ ಬೂರಿಯೆ.</verse>
				<verse number="10">ಆಯನ್ ತೂನಗ ಸೈತ್ ಪೋದಿತ್ತೆ. ಆಂಡ ಪೌಲು ಜತ್ತ್‌ದ್ ಪೋದು ಆಯನ ಮಿತ್ತ್ ಬೂರ್ದು ಅರ್ಂಟ್ ಪತ್ತ್‌ದ್, “ಚಿಂತೆ ಮಲ್ಪಡೆ, ಆಯೆ ಜೀವೊಡು ಉಲ್ಲೆ,” ಅಂದ್‌ದ್ ಪಂಡೆ.</verse>
				<verse number="11">ಬೊಕ್ಕ ಆಯೆ ಮಿತ್ತ್ ಪೋದು ರೊಟ್ಟಿ ತುಂಡು ಮಲ್ತ್‌ದ್ ವಣಸ್ ಮಲ್ತ್‌ದ್ ಪುಲ್ಯ ಮುಟ್ಟ ಪಾತೆರಿ ಬೊಕ್ಕ ಪಿದಾಡ್ದ್ ಪೋಯೆ.</verse>
				<verse number="12">ಅಕುಲು ಜೀವಾದ್ ಬತ್ತಿನ ಜವನ್ಯನ್ ಲೆತ್ತೊಂದು ಬನ್ನಗ ಅಕ್ಲೆಗ್ ದಿಂಜ ಸಮಾಧಾನ ಆಂಡ್.</verse>
				<verse number="13">ಬೊಕ್ಕ ಎಂಕುಲು ದುಂಬು ಕಪ್ಪಲ್ ಮಿತ್ತಾದ್ ಅಸ್ಸೊಸುಗು ಪೋದು ಅವುಲು ಪೌಲುನು ಸೇರಾವೊನುಡು ಅಂದ್‌ದ್ ಇತ್ತ. ಪೌಲು ತಾನ್ ನಡತೊಂದು ಪೋಯೆರೆ ಮನಸ್ ಇತ್ತಿನೆಡ್ದ್ ಇಂಚೆನೆ ಎಂಕ್ಲೆಗ್ ಅಪ್ಪಣೆ ಕೊರಿಯೆ.</verse>
				<verse number="14">ಅಸ್ಸೊಸುಡು ಆಯೆ ಎಂಕ್ಲೆಗ್ ತಿಕ್ಕಿನಪಗ ಆಯನ್ ಲೆತ್ತೊಂದು ಮಿತುಲೇನೆಗ್ ಬತ್ತ.</verse>
				<verse number="15">ಅಲ್ತ್‌ಡ್ದ್ ಪಿದಾಡ್ದ್ ಮನದಾನಿ ಖೀಯೊಸ್ ದ್ವೀಪದ ಕೈತಲ್‌ ಇತ್ತಿನ ಜಾಗ್‌ಗ್ ಬತ್ತ. ಐತ ಮನದಾನಿ ಸಾಮೊಸು ಕೈತಲ್ ಬತ್ತ. ಐತ ಮನದಾನಿ ಮಿಲೇತ್‌ಗ್ ಸೇರಿಯ.</verse>
				<verse number="16">ಪೌಲು ತನ್ಕ್ ಸಾದ್ಯ ಆಂಡ ಪಂಚಾಶತಮ ದಿನತ ಪರ್ಬೊಗು ಯೆರೂಸಲೇಮುಡು ಉಪ್ಪೊಡು ಅಂದ್‌ದ್ ಅಮಸರ ಮಲ್ತೊಂದು ಇತ್ತಿನೆಡ್ದ್ ಆಸ್ಯ ಪ್ರದೇಶೊಡು ಉಪ್ಪೆರೆ ಮನಸ್‌ದಾಂತೆ ಎಫೆಸ ಊರುನು ದಾಂಟ್‌ದ್ ಪೋವೊಡು ಅಂದ್‌ದ್ ತೀರ್ಮಾನ ಮಲ್ತೆ.</verse>
				<verse number="17">ಆಯೆ ಮಿಲೇತುಡ್ದು ಎಫೆಸೊಗು ಜನ ಕಡಪುಡ್ದು ಅಲ್ತ ಸಭೆತ ಹಿರಿಯೆರೆನ್ ಲೆಪ್ಪುಡಾಯೆ.</verse>
				<verse number="18">ಅಕುಲು ಆಯನ ಕೈತಲ್‌ ಬತ್ತಿನಪಗ ಅಕ್ಲೆಗ್ ಆಯೆ ಪಂಡಿನಿ, “ಯಾನ್ ಆಸ್ಯ ಪ್ರದೇಶೊಡು ಸುರುತ್ತ ದಿನೊಡ್ದಿಂಚಿ ನಿಕ್ಲೆನ ನಡುಟು ಮಾತ ಸಮಯೊಡು ಎಂಚ ಇತ್ತೆ ಪನ್ಪಿನೆನ್ ನಿಕುಲೇ ತೆರಿದರ್.</verse>
				<verse number="19">ಯಾನ್ ಬಾರಿ ತಗ್ಗ್‌ತನೊಡ್ದು ಕಣ್ಣೀರ್ ಪಾಡ್ದ್ ಕರ್ತವ ಚಾಕ್ರಿ ಮಲ್ತೊಂದಿತ್ತೆ. ಯೆಹೂದ್ಯೆರೆನ ಕುತಂತ್ರೊಡ್ದು ಆದುಪ್ಪುನ ಭಂಗೊನು ತಾಳೊಂದಿತ್ತೆ;</verse>
				<verse number="20">ಯಾನ್ ನಿಕ್ಲೆಗ್ ಉಪಯೋಗ ಆಪಿನ ಮಾತೆನ್ ಜನೊಕುಲೆನ ಎದುರುಲಾ ಇಲ್ಲ್ ಇಲ್ಲಡ್ಲಾ ಬೋಧನೆ ಮಲ್ಪುನೆಡ್ದ್ ಪಿರ ಜಾರ್ದಿಜಿ.</verse>
				<verse number="21">ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ಪಶ್ಚಾತಾಪ ಪಡೆದ್ ದೇವೆರೆನ ಕೈತಲ್‌ ತಿರ್ಗೊಡು, ನಮ ಕರ್ತವೆ ಆದುಪ್ಪು ಯೇಸುನ ಮಿತ್ತ್ ನಂಬಿಕೆ ದೀವೊಡು ಅಂದ್‌ದ್ ಸಾಕ್ಷಿ ಕೊರಿಯೆ; ಉಂದು ಮಾತ ನಿಕ್ಲೆಗೇ ತೆರಿದ್‌ಂಡ್.</verse>
				<verse number="22">ಇಂದಾ, ಯಾನ್ ಇತ್ತೆ ಆತ್ಮೊಗು ತಗ್ಗ್‌ದ್ ಯೆರೂಸಲೇಮುಗು ಪೋಪೆ. ಅಲ್ಪ ಬರ್ಪಿನ ಕಷ್ಟ ಎಂಕ್ ಗೊತ್ತಿಜ್ಜಿ.</verse>
				<verse number="23">ನಿಕ್ಕ್ ಕೋಳಲಾ ಸಂಕಟಲಾ ಮಾತ ಪಟ್ಟಣೊಲೆಡ್ ಕಾತೊಂದುಂಡು ಅಂದ್‌ದ್ ಪರಿಶುದ್ಧಾತ್ಮೆ ಸಾಕ್ಷಿ ಕೊರ್ಪಿನ ಈತ್ ಮಾತ್ರ ತೆರಿದೆ.</verse>
				<verse number="24">ಆಂಡ ಯಾನ್ ಎನ ಸ್ವಂತ ಜೀವದ ಸಂಗತಿಡ್ ಚಿಂತೆ ಮಲ್ಪುಜಿ. ದೇವೆರೆನ ದಯತ ಸುವಾರ್ತೆದ ಸಂಗತಿಡ್ ಸಾಕ್ಷಿ ಕೊರ್ಪಿನವೇ ಎನ ಬೇಲೆ ಆದುಂಡು. ಕರ್ತವೆ ಆದುಪ್ಪು ಯೇಸುಡ್ದು ತಿಕ್ಕಿ ಸೇವೆನ್ ಸಂತೋಷೊಡು ಪೂರೈಸುನವೇ ಎನ ಆಸೆ ಆದುಂಡು.</verse>
				<verse number="25">“ಇಂದಾ, ಈತ್ ದಿನ ನಿಕ್ಲೆಡೊಪ್ಪ ಪ್ರಯಾಣ ಮಲ್ತ್‌ದ್ ದೇವೆರೆ ರಾಜ್ಯೊನು ಸಾರಿನಾಯೆ ಆದುಪ್ಪು ಎನ ಮೋನೆನ್ ನನ ಮಿತ್ತ್ ನಿಕುಲು ಒರಿಲಾ ತೂವಯರ್ ಅಂದ್‌ದ್ ತೆರಿದೆ.</verse>
				<verse number="26">ಆ ಕಾರಣೊಡ್ದು ಯಾನ್ ಈ ಪೊರ್ತು ಪ್ರಮಾಣ ಮಲ್ತ್‌ದ್ ಪನ್ಪೆ, ಯಾನ್ ಮಾತೆರೆ ನೆತ್ತೆರ್‌ಡ್ ಶುದ್ಧದಾಯೆ ಪಂಡ್ದ್ ಇನಿತ ದಿನೊಟು ಸಾಕ್ಷಿ ಪನ್ಪೆ. ನಿಕ್ಲೆಡ ಏರಾಂಡಲಾ ನಾಶಾದ್ ಪೋಂಡ ಅವು ಎನ ಜವಾಬ್ದಾರಿ ಅತ್ತ್,</verse>
				<verse number="27">ದಾಯೆಗಂದ್ಂಡ ಒಂಜೆನ್ಲಾ ಮದೆಮಲ್ಪಂದೆ ದೇವೆರೆ ಚಿತ್ತೊಲೆನ್ ಪೂರ ನಿಕ್ಲೆಗ್ ತೆರಿಪಾಯೆ.</verse>
				<verse number="28">ದೇವೆರ್ ಸ್ವಂತ ನೆತ್ತೆರೆಡ್ದ್ ಪಡೆವೊಂದಿನ ಸಭೆಕ್ ನಿಕುಲು ಕುರುಬೆರಾದ್ ಉಲ್ಲರ್. ಐಡ್ದಾವರ ನಿಕ್ಲೆನ ಸಂಗತಿಡ್ಲಾ ಪರಿಶುದ್ಧಾತ್ಮೆ ನಿಕ್ಲೆನ ಪಾಲನೆ ವೈಸೊಂದಿನ ಪುಂಡುದ ಸಂಗತಿಡ್ಲಾ ಮಸ್ತ್ ಎಚ್ಚರಿಕೆಡ್ ಉಪ್ಪುಲೆ.</verse>
				<verse number="29">ಯಾನ್ ಪೋಯಿ ಬೊಕ್ಕ ಚೆನ್ನನಾಯಿಲು ನಿಕ್ಲೆ ಉಲಯಿ ಬರ್ಪುಂಡು ಅಂದ್‌ದ್ ಯಾನ್ ತೆರಿದೆ. ಅವು ಪುಂಡುನು ನಾಶ ಮಲ್ಪಂದೆ ಬುಡ್ಪುಜಿ.</verse>
				<verse number="30">ನಿಕ್ಲೆಡ ಕೆಲೆವೆರ್ ಸುಳ್ಳು ಬೋಧನೆ ಮಲ್ತ್‌ದ್ ಶಿಷ್ಯೆರೆನ್ ತನ್ಕುಲೆ ಪಿರವು ಒಯ್ತೊನುವೆರ್.</verse>
				<verse number="31">ಅಂಚಾಯಿನೆಡ್ದ್ ಎಚ್ಚರಿಕೆಡ್ ಉಪ್ಪುಲೆ! ಯಾನ್ ಮೂಜಿ ವರ್ಸ ನಿಕ್ಲೆ ಒಟ್ಟುಗು ಇತ್ತೆ. ಯಾನ್ ರಾತ್ರೆ ಪಗೆಲ್ ಬೋಧನೆ ಮಲ್ತೊಂದು ನಿಕ್ಲೆಗಾದ್ ಕಣ್ಣೀರ್ ಜಪುಡಾವೊಂದು ನಿಕ್ಲೆಗ್ ಎಚ್ಚರಿಕೆ ಕೊರೊಂದು ಇತ್ತಿನೆನ್ ಮದತ್ ಬುಡಡೆ.</verse>
				<verse number="32">“ಯಾನ್ ಇತ್ತೆ ನಿಕ್ಲೆನ್ ದೇವೆರೆಗ್ಲಾ ಆಯನ ದಯತ ಪಾತೆರೊಗ್ಲಾ ಒಚ್ಚಿದ್ ಕೊರ್ಪೆ. ಆಯೆ ನಿಕ್ಲೆನ್ ಬಲ ಪಡೆಪಾದ್, ಪರಿಶುದ್ಧ ಆದುಪ್ಪು ಮಾತೆರೆಡೊಪ್ಪ ನಿಕ್ಲೆನ್ ಬಾಧ್ಯಸ್ತಿಗೆ ಕೊರಿಯೆರೆ ಶಕ್ತಿ ಇತ್ತಿನಾಯೆ ಆದುಲ್ಲೆ.</verse>
				<verse number="33">ಯಾನ್ ಏರೆನಲಾ ಬೊಳ್ಳಿ ಬಂಗಾರೊನಾವಡ್ ಅಂಗಿ ಕುಂಟುಲೆಗಾವಡ್ ಆಸೆ ಮಲ್ತ್‌ದಿಜಿ.</verse>
				<verse number="34">ಈ ಕೈಬೇಲೆ ಮಲ್ತ್‌ದ್ ಎನ ಕೊರತೆನ್ಲಾ ಎನಡೊಪ್ಪ ಉಪ್ಪುನಾಕುಲೆನ ಕೊರತೆನ್ಲಾ ಉಪ್ಪಂದಿಲೆಕ್ಕ ಮಲ್ತಿನೆನ್ ನಿಕುಲು ನಿಕುಲಾದೇ ತೆರಿದುಲ್ಲರ್,</verse>
				<verse number="35">ಮಾತ ವಿಚಾರೊಡು ಯಾನ್ ನಿಕ್ಲೆಗ್ ಮಾದ್ರಿ ತೋಜಾದೆ. ಎಂಕುಲುಲಾ ಅಂಚೆನೇ ಬೆಂದ್‌ದ್ ಬಲಹೀನೆರೆಗ್ ಉಪಕಾರ ಮಲ್ಪೊಡು, ‘ಬೊಕ್ಕ ದೆತ್ತೊನುನೆಡ್ದ್ ಕೊರ್ಪಿನವೇ ಮಲ್ಲ ಭಾಗ್ಯ,’ ಅಂದ್‌ದ್ ಕರ್ತವೆ ಯೇಸು ತಾನೇ ಪಂಡಿ ಪಾತೆರೊಲೆನ್ ನೆನೆಪುಡು ದೀವೊಂದುಪ್ಪೊಡು,” ಪಂಡೆ.</verse>
				<verse number="36">ಆಯೆ ಈ ಪಾತೆರೊಲೆನ್ ಪಂಡಿ ಬೊಕ್ಕ ಮುಂಡುಬೂರ್ದು ಅಕ್ಲೆಡೊಪ್ಪ ಪ್ರಾರ್ಥನೆ ಮಲ್ತೆ,</verse>
				<verse number="37">ಅಪಗ ಅಕುಲು ಮಾತೆರ್ಲಾ ದಿಂಜ ಬುಲ್ತೆರ್. ನಿಕುಲು ನನ ಎನ ಮೋನೆನ್ ತೂಪುಜರ್ ಅಂದ್‌ದ್ ಪೌಲು ಪಂಡಿನ ಪಾತೆರೊಗು ಅಕುಲು ದಿಂಜ ದುಃಖೊಡು ಆಯನ ಕೆಕ್ಕಿಲ್‌ನ್ ಅರ್ಂಟ್ ಪತ್ತ್‌ದ್ ಆಯಗ್ ಮುತ್ತು ಕೊರಿಯೆರ್. ಐಡ್ದ್ ಬೊಕ್ಕ ಅಕುಲು ಆಯಡೊಪ್ಪ ಪೋದು ಆಯನ್ ಕಪ್ಪಲ್‌ಡ್ ಕಡಪುಡ್ದು ಬುಡಿಯೆರ್.</verse>
				<verse number="38"></verse>
			</chapter>
			<chapter number="21">
				<verse number="1">ಎಂಕುಲು ಬಾರಿ ಭಂಗೊಡು ಅಕ್ಲೆನ್ ಬುಡ್ದು ಕಪ್ಪಲ್ ಮಿತ್ತಾರ್ದ್ ಕೋಸ್ ದ್ವೀಪೊಗು ಪೋಯ. ಮನದಾನಿ ರೋದ ದ್ವೀಪಡ್ದ್ ಪತರಗ್ ಬತ್ತ.</verse>
				<verse number="2">ಅಲ್ಪ ಫೊಯಿನೀಕೆ ದೇಶೊಗು ಪೋಪಿನ ಕಪ್ಪಲ್‌ನ್ ತೂದು ಮಿತ್ತಾರ್ದ್ ಪ್ರಯಾಣೊನು ದುಂಬರಿತ.</verse>
				<verse number="3">ಬೊಕ್ಕ ಕುಪ್ರ ದ್ವೀಪದ ದತ್ತ ಮರ್ಗಿಲ್ ಬುಡ್ದು ಸುರಿಯ ದೇಶೊಗು ಪೋದು ತೂರ್ ಪಟ್ಟಣಗ್‌ ಬತ್ತ್‌ದ್ ಜತ್ತ. ಕಪ್ಪಲ್‌ದ ಸಾಮಾನುಲೆನ್ ಕಾಲಿ ಮಲ್ಪಾಯೆರೆ ಇತ್ತ್ಂಡ್.</verse>
				<verse number="4">ಅಲ್ಪ ಶಿಷ್ಯೆರೆನ್ ತೂದು ಅಕ್ಲೆ ಒಟ್ಟುಗು ಏಳ್ ದಿನ ಉಂತಿಯ. ಅಕುಲು ಆತ್ಮದ ಪ್ರೇರಣೆಡ್ದ್ ಪೌಲುಗು, “ಈ ಯೆರೂಸಲೇಮುಗು ಪೋವರೆ ಬಲ್ಲಿ,” ಅಂದ್‌ದ್ ತಡೆತೆರ್.</verse>
				<verse number="5">ಅಲ್ಪಡ್ದ್ ಎಂಕುಲು ಪಿದಾಡ್ನಗ ಶಿಷ್ಯೆರ್ ಬೊಕ್ಕ ಅಕ್ಲೆನ ಬೊಡೆದಿಯಾಡ್ಲು, ಜೋಕುಲು ಮಾತೆರ್ಲಾ ಎಂಕ್ಲೆನ್ ಕಡಪುಡ್ದು ಕೊರಿಯೆರೆ ಪೇಂಟೆದ ಪಿದಯಿ ಒಟ್ಟುಗು ಬತ್ತೆರ್ ಅಪಗ ಎಂಕುಲು ಕಡಲ್ದ ಬರಿಟ್ಟ್ ಮುಂಡುಬೂರ್ದು ಪ್ರಾರ್ಥನೆ ಮಲ್ತ್‌ದ್</verse>
				<verse number="6">ಒರಿ ಒರಿಯಗ್ ವಂದನೆ ಮಲ್ತ್‌ದ್ ಕಪ್ಪಲ್ ಮಿತ್ತಾರ್ಯ; ಅಕುಲು ತನ್ಕುಲೆನ ಇಲ್ಲಗ್ ಪೋಯೆರ್.</verse>
				<verse number="7">ಎಂಕುಲು ತೂರ್ ಪಟ್ಟಣೊಡ್ದು ಪಿದಾಡ್ದ್ ಪ್ತೊಲೆಮಾಯೊಗು ಸೇರ್ದ್ ಕಡಲ್ ಪ್ರಯಾಣೊನು ಮುಗಿತ. ಅಲ್ಪ ಇತ್ತಿನ ಸಹೋದ್ರೆರೆನ್ ಎದುಕೊಂದು ಅಕ್ಲೆನ ಕೈತಲ್‌ ಒಂಜಿ ದಿನ ಇತ್ತ</verse>
				<verse number="8">ಮನದಾನಿ ಪಿದಾಡ್ದ್ ಕೈಸರೆಯಗ್‌ ಬತ್ತ್‌ದ್ ಸುವಾರ್ತಿಕೆ ಆದುಪ್ಪು ಫಿಲಿಪ್ಪು ಇಲ್ಲಗ್ ಪೋದು ಆಯಡೊಪ್ಪ ಉಂತಿಯ. ಆಯೆ ಆ ಏಳ್ ಜನ ಸುವಾರ್ತೆ ಸಾರುನ ಸಹಾಯಕೆರೆಡ್ದ್ ಒರಿ ಆದಿತ್ತೆ.</verse>
				<verse number="9">ಆಯಗ್ ನಾಲ್ ಕನ್ಯಪೊಣ್ಣು ಜೋಕುಲು ಇತ್ತೆರ್; ಅಕ್ಲೆಗ್ ಪ್ರವಾದನೆ ಮಲ್ಪುನ ವರ ಇತ್ತ್ಂಡ್.</verse>
				<verse number="10">ನಮ ಅಲ್ಪ ದಿಂಜ ದಿನ ಇತ್ತಿ ಬೊಕ್ಕ, ಅಗಬೆ ಪನ್ಪಿನ ಒರಿ ಪ್ರವಾದಿ ಯೂದಾಯೊಡ್ದು ಎಂಕ್ಲೆನ ಕೈತಲ್‌ ಬತ್ತೆ.</verse>
				<verse number="11">ಆಯೆ ಪೌಲುನ ಸೊಂಟ ಪಟ್ಟಿನ್ ದೆತ್ತ್‌ದ್, “ಆಯನ ಕೈಕಾರ್‌ನ್ ಕಟ್ಟ್‌ದ್ ಆ ಸೊಂಟ್ಟಪಟ್ಟಿ ಏರೆನವಾ ಆ ನರಮಾನಿನ್ ಯೆಹೂದ್ಯೆರ್ ಉಂದೇ ರೀತಿಡ್ ಯೆರೂಸಲೇಮುಡು ಕಟ್ಟ್ ಪಾಡ್ದ್ ಪಿದಯಿದ ಜನೊಕುಲೆನ ಕೈಕ್ ಒಚ್ಚಿದ್ ಕೊರ್ಪೆರ್. ಇಂಚ ಪರಿಶುದ್ಧಾತ್ಮೆ ಪನ್ಪೆ,” ಅಂದ್‌ದ್ ಪಂಡೆ.</verse>
				<verse number="12">ಈ ಪಾತೆರೊನು ಕೇನ್ನಗ ಎಂಕುಲುಲಾ ಆ ಊರುದಾಕುಲುಲಾ ಪೌಲು ಯೆರೂಸಲೇಮುಗು ಪೋವೆರೆ ಬಲ್ಲಿ ಅಂದ್‌ದ್ ನಟ್ಟೊಂಡ.</verse>
				<verse number="13">ಐಕ್ ಪೌಲು, “ನಿಕುಲು ಬುಲ್ತುದು ಎನ ಮನಸ್‌ನ್ ಕರಗಾವೊಡ್ಚಿ ಯಾನ್ ಕರ್ತವೆ ಆದುಪ್ಪು ಯೇಸುನ ಪುದರ್‌ಗಾದ್ ಯೆರೂಸಲೇಮುಡು ಸೆರೆಮನೆತ ಸರಪೊಳಿಡ್ ಮಾತ್ರ ಅತ್ತಂದೆ ಸೈಯೆರೆಗ್ಲಾ ತಯಾರಾದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="14">ಆಯೆ ಒಪ್ಪಿಯಂದೆ ಇತ್ತಿನೆಡ್ದ್, “ಕರ್ತವ ಚಿತ್ತದ ಲೆಕ್ಕನೆ ಆವಡ್,” ಅಂದ್‌ದ್ ಎಂಕುಲು ಮನಿಪಂದೆ ಇತ್ತ.</verse>
				<verse number="15">ಐಡ್ದ್ ಬೊಕ್ಕ ಎಂಕುಲು ತಯಾರಾದ್ ಯೆರೂಸಲೇಮುಗು ಪಿದಾಡಿಯ.</verse>
				<verse number="16">ಕೈಸರೆಯಡ್ದ್ ಕೆಲವು ಶಿಷ್ಯೆರ್ ಎಂಕ್ಲೆಡೊಪ್ಪ ಬತ್ತ್‌ದ್ ಶಿಷ್ಯೆರೆಡ್ ಸುರುಡ್ದು ಇತ್ತಿನಾಯೆ ಕುಪ್ರ ದೇಶದ ಮ್ನಾಸೋನೆ ಪನ್ಪಿನಾಯನ ಇಲ್ಲಗ್ ಲೆತ್ತೊಂದು ಪೋದು, ಅವುಲು ಎಂಕುಲು ಉಂತಿಯ.</verse>
				<verse number="17">ಎಂಕುಲು ಯೆರೂಸಲೇಮು ಮುಟ್ಟುನಗ ಸಹೋದ್ರೆರ್ ಎಂಕ್ಲೆನ್ ಸಂತೋಷೊಡು ಸೇರಾವೊಂಡೆರ್.</verse>
				<verse number="18">ಮನದಾನಿ ಯಾಕೋಬುನು ತಿಕ್ಕರೆ ಪೌಲು ಎಂಕ್ಲೆನ್ ಲೆತ್ತೊಂದು ಪೋಯೆ. ಸಭೆತ ಮಾತ ಹಿರಿಯೆರ್‌ಲಾ ಬತ್ತೆರ್.</verse>
				<verse number="19">ಪೌಲು ಅಕ್ಲೆಗ್ ವಂದನೆ ಸಂದಾದ್ ತನ ಸೇವೆದ ಮುಖಾಂತ್ರ ದೇವೆರ್ ಪಿದಯಿದ ಜನೊಕುಲೆಡ್ ಮಲ್ತ್‌ದಿನ ಕಾರ್ಯೊಲೆನ್ ಒಂಜೊಂಜಾದ್ ಪಂಡೆ.</verse>
				<verse number="20">ಅಕುಲು ಉಂದೆನ್ ಕೇಂಡ್ದ್ ದೇವೆರೆನ್ ಪುಗರಿಯೆರ್. ಅಪಗ ಅಕುಲು ಆಯಗ್ ಪಂಡಿನಿ, “ಸಹೋದ್ರಾ, ಯೆಹೂದ್ಯೆರೆಡ್ ಯೇಸುನು ನಂಬುನಾಕುಲು ಏತೋ ಸಾರ ಜನ ಉಲ್ಲೆರ್ ಅಂದ್‌ದ್ ನಿಕ್ಕ್ ಗೊತ್ತುಂಡತ್ತಾ? ಅಕುಲು ಮಾತೆರ್ಲಾ ನ್ಯಾಯಕಟ್ಟ್‌ದ ಅಭಿಮಾನಿ ಆದುಲ್ಲೆರ್.</verse>
				<verse number="21">ಈ ಪಿದಯಿದ ಜನೊಕುಲೆ ನಡುಟುಪ್ಪು ಮಾತ ಯೆಹೂದ್ಯೆರೆಗ್ ನಿಕ್ಲೆನ ಜೋಕುಲೆಗ್ ಸುನ್ನತಿ ಮಲ್ಪಾವೊಡ್ಚಿ, ಆಚಾರೊಲೆನ್ ಸರಿಯಾದ್ ಅನುಸಾರ ಮಲ್ತ್‌ದ್ ನಡಪೊಡ್ಚಿ, ಮೋಶೆನ ಧರ್ಮೊನು ತ್ಯಾಗಪತ್ರ ಮಲ್ಪೊಡು ಅಂದ್‌ದ್ ಬೋಧನೆ ಮಲ್ಪುವ ಅಂದ್‌ದ್ ನಿನ ಸಂಗತಿಡ್ ಕೇಂಡ್ದ.</verse>
				<verse number="22">ಇಂಚಾದುಪ್ಪುನಗ ದಾನೆ ಮಲ್ಪೊಡು? ಈ ಮುಲ್ಪ ಉಪ್ಪುನ ಯೆಹೂದ್ಯೆರೆಗ್ ಗೊತ್ತುಪ್ಪು.</verse>
				<verse number="23">ಆ ಕಾರಣೊಡ್ದು ಎಂಕುಲು ನಿಕ್ಕ್ ಪನ್ಪಿನ ಕೆಲಸೊನು ಮಲ್ಪುಲ. ಎಂಕ್ಲೆಡ ಪರಕೆ ದೀತಿನಾಕುಲು ನಾಲ್ ಜನ ಉಲ್ಲೆರ್.</verse>
				<verse number="24">ಅಕ್ಲೆನ್ ಲೆತ್ತೊಂದು ಪೋದು ಅಕ್ಲೆನ ಶುದ್ಧಚಾರದ ಸಂಪ್ರದಾಯೊಡು ಈಲಾ ಸೇರ್‌ಲಾ. ಅಕ್ಲೆ ಪರೆಕೆದ ತರೆತ ಕುಜಲ್‌ನ್ ಕತ್ತೆರಿಯೆರೆ ಕಾಸ್ ಕರ್ಚಿ ಮಲ್ಪು. ಇಂಚ ಮಲ್ತ್ಂಡ ಮಾತೆರ್ಲಾ ನಿನ ವಿಚಾರೊಡು ತನ್ಕುಲು ಕೇಂಡ್ದಿನ ಸುದ್ಧಿ ಸತ್ಯವಾಯಿನ ಅತ್ತ್ ಅಂದ್‌ದ್ ತೆರಿವೆರ್, ನ್ಯಾಯಕಟ್ಟ್‌ನ್ ಈಲಾ ಕೈಕೊಂದು ನಡಪುಡ್ವ, ಅಂದ್‌ದ್ ತೆರಿಯೊನ್ವೆರ್.</verse>
				<verse number="25">ಪಿದಯಿದ ಜನೊಕುಲೆಡ್ ಯೇಸುನು ನಂಬುನಾಕುಲು ಮೂರ್ತಿಲೆಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊನು ತಿನೊಡ್ಚಿ, ಲೈಂಗಿಕ ಪಾಪೊಲೆನ್ ಮಲ್ಪೊಡ್ಚಿ, ಕಂಟೆಲ್ ಪೀಂಟಾದ್ ಕೆರ್ತಿನ ಪ್ರಾಣಿಲೆನ ನೆತ್ತೆರ್‌‌ನ್ಲಾ ಮಾಸೊನ್ಲಾ ತಿರಸ್ಕಾರ ಮಲ್ಪೊಡು ಅಂದ್‌ದ್ ಎಂಕುಲು ಆಲೋಚನೆ ಮಲ್ತ್‌ದ್ ಬರೆದ್ ಕಡಪುಡಿಯ,” ಪಂಡ್ದ್ ಪಂಡೆರ್.</verse>
				<verse number="26">ಅಪಗ ಪೌಲು ಮನದಾನಿ ಆ ನಾಲ್ ಜನೊಕುಲೆಡೊಪ್ಪ ಪೋದು. ಶುದ್ಧಾಚಾರೊಡು ಪಾಲ್ ದೆತ್ತೊಂಡೆ. ಬೊಕ್ಕ ಆಯೆ ದೇವಾಲಯೊಗು ಪೋದು ಶುದ್ಧಚಾರದ ಸಂಪ್ರದಾಯೊನು ಮುಗಿಪುನ ದಿನೊನು, ಬೊಕ್ಕ ಏಪ ಪ್ರತಿ ಒರಿಯಗಾದ್ ಬಲಿ ಅರ್ಪಣೆ ಮಲ್ಪೆರಾಪುಂಡು ಪಂಡ್ದ್ ಪ್ರಕಟಣೆ ಮಲ್ತೆ.</verse>
				<verse number="27">ಆ ಏಳ್ ದಿನ ದಿಂಜಿನಗ ಆಸ್ಯ ಪ್ರದೇಶೊಡ್ದು ಬೈದಿನ ಯೆಹೂದ್ಯೆರ್ ಪೌಲುನು ದೇವಾಲಯೊಡು ತೂದು ಅಲ್ಪ ಇತ್ತಿ ಗುಂಪುದ ಜನೊಕುಲೆನ ಮನಸ್‌ನ್ ಹಾಳ್ ಮಲ್ತ್‌ದ್ ಆಯನ್ ಪತ್ತಿಯೆರ್.</verse>
				<verse number="28">“ಇಸ್ರಾಯೇಲ್ಯೆರೆ ಜನೊಕುಲೇ, ಎಂಕ್ಲೆಗ್ ಸಹಾಯ ಮಲ್ಪುಲೆ, ನಮ ಜನೊಕುಲೆಗ್ಲಾ ನ್ಯಾಯಕಟ್ಟ್‌ಗ್ಲಾ ಈ ದೇವಾಲಯೊಗ್ಲಾ ವಿರೋಧಾದ್ ಮಾತೆರೆಗ್ಲಾ ಮಾತ ಕಡೆಟ್ಲಾ ಬೋಧನೆ ಪನ್ಪಿನ ಆ ನರಮಾನಿ ಉಂಬೆನೆ. ಉಂದು ಅತ್ತಂದೆ ಇಂಬೆ ಗ್ರೀಕೆರೆನ್ ದೇವಾಲಯದುಲಯಿ ಲೆತ್ತೊಂದು ಬತ್ತ್‌ದ್ ಈ ಪರಿಶುದ್ಧ ಜಾಗ್‌ನ್ ಮೈಲೆ ಮಲ್ತೆ,” ಅಂದ್‌ದ್ ಬೊಬ್ಬೆ ಪಾಡಿಯೆರ್.</verse>
				<verse number="29">ದುಂಬು ಆಯೆ ಎಫೆಸದ ತ್ರೋಫಿಮನ ಒಟ್ಟುಗು ಉಪ್ಪುನೆನ್ ತೂದಿತ್ತೆರ್, ಪೌಲು ದೇವಾಲಯದುಲಯಿ ಲೆತ್ತೊಂದು ಬತ್ತೆ ಅಂದ್‌ದ್ ಎನ್ನಿಯೆರ್.</verse>
				<verse number="30">ಯೆರೂಸೇಲೆಮುದ ಜನೊಕುಲು ಬಾರಿ ಕೋಪೊಡ್ದು ದಿಂಜಿದಿತ್ತೆರ್. ಮಾತ ಕಡೆಡ್ದ್‌ಲಾ ಪಾರ್ದ್ ಬತ್ತ್‌ದ್ ಪೌಲುನು ಪತ್ತ್‌ದ್ ದೇವಾಲಯದ ಪಿದಯಿ ಒಯ್ತೊಂದು ಬತ್ತೆರ್. ಕೂಡ್ಲೆ ಬಾಕಿಲ್‌ನ್ ಮುಚ್ಚಿಯೆರ್.</verse>
				<verse number="31">ಅಕುಲು ಆಯನ್ ಕೆರಿಯೆರೆ ಪ್ರಯತ್ನ ಮಲ್ತೊಂದುಪ್ಪುನಗ ಯೆರೂಸಲೇಮುಡು ಪೂರ ಗಲಾಟೆ ಆಂಡ್ ಅಂದ್‌ದ್ ರೋಮುದ ಸೇನಾಧಿಪತಿಗ್ ಸುದ್ಧಿ ಬತ್ತ್ಂಡ್.</verse>
				<verse number="32">ಸೇನಾಧಿಪತಿ ಅಪಗನೆ ಸಿಪಾಯಿಲೆನ್ಲಾ ಶತಾಧಿಪತಿದಿಲೆನ್ಲಾ ಲೆತ್ತೊಂದು ಅಕುಲು ಇತ್ತಿನಡೆ ಬತ್ತೆ. ಅಕುಲು ಸೇನಾಧಿಪತಿನ್ಲಾ ಸಿಪಾಯಿಲೆನ್ಲಾ ತೂದು ಪೌಲುಗು ಹಾಕುನೆನ್ ಬುಡಿಯೆರ್.</verse>
				<verse number="33">ಸೇನಾಧಿಪತಿ ಪೋದು ಪೌಲುನು ಕೈದ್ ಮಲ್ತ್‌ದ್ ರಡ್ಡ್ ಸರಪೊಳಿಡ್ ಕಟ್ಟಿಯೆರೆ ಸೈನಿಕೆರೆಗ್ ಅಪ್ಪಣೆ ಕೊರಿಯೆ. ಬೊಕ್ಕ ಆ ಸೇನಾಧಿಪತಿ, “ಈ ನರಮಾನಿ ಏರ್? ಆಯೆ ದಾದ ಮಲ್ತ್‌ದೆ,” ಅಂದ್‌ದ್ ಕೇನಿಯೆ.</verse>
				<verse number="34">ಜನೊಕುಲೆಡ್ ಕೆಲೆವೆರ್ ಅಂಚ ಕೆಲೆವೆರ್ ಇಂಚ ಅಂದ್‌ದ್ ಬೊಬ್ಬೆ ಪಾಡ್ನಗ ಆ ಗಲಾಟೆಡ್ದ್ ನಿಜ ಸಂಗತಿ ದಾನೆ ಅಂದ್‌ದ್ ತೆರಿಯೆರೆ ಆವಂದೆ ಆಯನ್ ಕೋಟೆದ ಉಲಯಿ ಲೆತ್ತೊಂದು ಪೋಲೆ ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="35">ಪೌಲು ಮುಟ್ಟು ಮಿತ್ತ್ ಬನ್ನಗ ಜನೊಕುಲು ಆಯಗ್ ತೊಂದರೆ ಕೊರಿನೆಡ್ದ್ ಸಿಪಾಯಿಲು ಆಯನ್ ದೆರ್ತೊಂದು ಪೋವೊಡಾಂಡ್.</verse>
				<verse number="36">ಗುಂಪಾದ್ ಕೂಡ್ದಿನ ಜನೊಕುಲು ಪಿರವುಡು ಬತ್ತ್‌ದ್, “ಆಯನ್ ಕೆರ್ಪಾಲೆ,” ಅಂದ್‌ದ್ ಬೊಬ್ಬೆ ಪಾಡೊಂದಿತ್ತೆರ್.</verse>
				<verse number="37">ಪೌಲುನು ಕೋಟೆದ ಉಲಯಿ ಸೇರಾವೊನೆಕ್ಕ್ ದುಂಬು ಆಯೆ ಆ ಸೇನಾಧಿಪತಿನ್, “ನಿನಡ ಎಂಕ್ ಒಂಜಿ ಪಾತೆರ ಪನಿಯೆರೆ ಅಪ್ಪಣೆ ಕೊರ್ಪನಾ,” ಅಂದ್‌ದ್ ಕೇನ್ನಗ, “ನಿಕ್ಕ್ ಗ್ರೀಕ್ ಭಾಷೆ ಬರ್ಪುಂಡಾ?</verse>
				<verse number="38">ಒಂತೆ ದಿನೊಡ್ದು ಪಿರವು ಗಲಾಟೆ ಲಕ್ಕಾದ್ ಆ ನಾಲ್ ಸಾರ ಜನ ದುಷ್ಟೆರೆನ್ ಕಾಡ್‌ಗ್ ಲೆತ್ತೊಂದು ಪೋಯಿನ ಆ ಐಗುಪ್ತೆ ಈಯೆ ಅತ್ತಾ?” ಅಂದ್‌ದ್ ಕೇಂಡೆ.</verse>
				<verse number="39">ಐಕ್ ಪೌಲು, “ಯಾನ್ ಯೆಹೂದ್ಯೆ, ತಾರ್ಸುದಾಯೆ, ಕಿಲಿಕ್ಯ ಪ್ರದೇಶದ ಪುದರ್ ಪೋಯಿ ಪಟ್ಟಣದ ಮೂಲಾದಾಯೆ. ಆ ಜನೊಕುಲೆಗ್ ಕೆಲವು ಪಾತೆರೊಲೆನ್ ಪನಿಯೆರೆ ಎಂಕ್ ಅಪ್ಪಣೆ ಕೊರ್ಲ,” ಅಂದ್‌ದ್ ನಟ್ಟೊನ್ವೆ.</verse>
				<verse number="40">ಸೇನಾಧಿಪತಿ ಅಪ್ಪಣೆ ಕೊರ್ನಗ ಪೌಲು ಮುಟ್ಟುದ ಮಿತ್ತ್ ಉಂತೊಂದು ಜನೊಕುಲೆಗ್ ಕೈ ಭಾಷೆ ಮಲ್ತೆ. ಅಕುಲು ಶಾಂತ ಆಯಿ ಬೊಕ್ಕ ಆಯೆ ಇಬ್ರಿಯ ಭಾಷೆಡ್ ಅಕ್ಲೆಡ ಪಾತೆರಿಯೆ.</verse>
			</chapter>
			<chapter number="22">
				<verse number="1">ಎಂಕುಲೆ ಸಹೋದ್ರೆರೇ ಬೊಕ್ಕ ಪಿತೃಲೆ, “ಇತ್ತೆ ಯಾನ್ ನಿಕ್ಲೆಗ್ ಪನ್ಪಿ ಪ್ರತಿವಾದೊನು ಕೇನ್ಲೆ.”</verse>
				<verse number="2">ಆಯೆ ಇಬ್ರಿಯ ಭಾಷೆಡ್ ಪಾತೆರುನೆನ್ ಕೇನ್ನಗ ಅಕುಲು ಬೊಕ್ಕಲಾತ್ ಶಾಂತ ಆಯೆರ್.</verse>
				<verse number="3">“ಯಾನ್ ಯೆಹೂದ್ಯೆ ಕಿಲಿಕ್ಯದ ತಾರ್ಸುಡು ಪುಟ್ಟುದಿನಾಯೆ, ಆಂಡ ಈ ಊರುಡೇ ಎಲ್ಯಡ್ದ್ ಮಲ್ಲ ಆತಿನಾಯೆ, ಗಮಾಲಿಯೇಲನ ಪಾದದಲ್ಪ ಎಂಕ್ಲೆ ಪಿತೃಲೆನ ನ್ಯಾಯಕಟ್ಟ್‌ದ ಪೂರ ಗೇನೊನು ಸೂಕ್ಷ್ಮಾದ್ ಪಡೆವೊಂದಿನಾಯೆ ಯಾನ್ ಆದುಲ್ಲೆ. ನಿಕುಲು ಇನಿ ದೇವೆರೆ ವಿಚಾರೊಡು ಅಭಿಮಾನಿಲು ಆದುಪ್ಪುನಂಚೆನೇ ಯಾನ್ ಅಭಿಮಾನಿ ಆದಿತ್ತೆ.</verse>
				<verse number="4">ಈ ಮಾರ್ಗೊನು ಕೈಕೊನೊನಾಕುಲೆನ್ ಯಾನ್ ಭಂಗ ಕೊರೊಂದಿತ್ತೆ. ಅಂಜೊವುಲೆಗ್ಲಾ ಪೊಂಜೊವುಲೆಗ್ಲಾ ಕೋಳ ಪಾಡ್ಪಾದ್ ಅಕ್ಲೆನ್ ಸೆರೆಮನೆಗ್ ಪಾಡೊಂದಿತ್ತೆ. ಅಕ್ಲೆನ್ ಕೆರಿಯೆರೆಗ್ಲಾ ಪಿರ ಜಾರಂದೆ ಭಂಗ ಕೊರೊಂದಿತ್ತೆ.</verse>
				<verse number="5">ಉಂದೆಕ್ಕ್ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಸಾಕ್ಷಿ ಆದುಲ್ಲೆರ್. ಅಂಚಾಯಿನೆಡ್ದ್ ಯಾನ್ ದಮಸ್ಕೊಡುಪ್ಪುನ ಸಹೋದ್ರೆರೆಗ್ ಕಾಕಜಿನ್ ದೆತ್ತೊಂದು ಅಡೆಗ್ ಪೋತಿನಾಕಲೆನ್ ಕೋಳ ಪಾಡ್ದ್ ಶಿಕ್ಷೆ ಕೊರಿಯೆರೆ ಅಂದ್‌ದ್ ಯೆರೂಸಲೇಮುಗು ಕನವೊಡು ಅಂದ್‌ದ್ ಪಿದಾಡಿಯೆ.</verse>
				<verse number="6">“ಯಾನ್ ಪ್ರಯಾಣ ಮಲ್ತೊಂದು ದಮಸ್ಕದ ಕೈತಲ್‌ ಬನ್ನಗ ಸುಮಾರ್ ಮಧ್ಯಾಹ್ನದ ಪೊರ್ತುಡು ಪಕ್ಕನೆ ಬಾನೊಡ್ದು ಒಂಜಿ ಮಲ್ಲ ಬೊಲ್ಪು ಎನ ಸುತ್ತಲಾ ಮಿಂಚಿಂಡ್.</verse>
				<verse number="7">ಯಾನ್ ನೆಲಕ್ ಬೂರಿಯೆ. ಅಪಗ, ‘ಸೌಲಾ, ಸೌಲಾ, ಎಂಕ್ ದಾಯೆಗ್ ಭಂಗ ಕೊರ್ಪ?’ ಅಂದ್‌ದ್ ಎನಡ ಪನ್ಪಿ ಪಾತೆರೊನು ಕೇಂಡೆ.</verse>
				<verse number="8">ಐಕ್ ಯಾನ್, ‘ಕರ್ತವಾ, ಈ ಏರ್?’ ಅಂದ್‌ದ್ ಕೇನ್ನಗ ಆಯೆ ಎನಡ, ‘ಈ ಭಂಗ ಕೊರ್ಪಿನ ನಜರೇತ್‌ದ ಯೇಸು ಯಾನೇ,’ ಪಂಡ್ದ್ ಪಂಡೆ</verse>
				<verse number="9">ಎನಡೊಪ್ಪ ಇತ್ತಿನಾಕುಲು ಬೊಲ್ಪುನು ತೂಯೆರ್ ಅತ್ತಂದೆ ಎನಡೊಪ್ಪ ಪಾತೆರಿನಾಯನ ಸ್ವರೊನು ಕೇಂಡಿಜೆರ್.</verse>
				<verse number="10">ಅಪಗ ಯಾನ್, ‘ಕರ್ತವಾ, ಯಾನ್ ದಾದ ಮಲ್ಪೊಡು?’ ಅಂದ್‌ದ್ ಕೇನ್ನಗ ಕರ್ತವೆ, ‘ಎಂಕ್ ಈ ಲಕ್ಕ್‌ದ್ ದಮಸ್ಕದ ಉಲಯಿ ಪೋಲ, ಈ ಮಲ್ಪೊಡಾಯಿನ ಬೇಲೆ ಅಲ್ಪ ನಿಕ್ಕ್ ತೆರಿದ್ ಬರು,’ ಅಂದ್‌ದ್ ಪಂಡೆ.</verse>
				<verse number="11">ಆ ಬೊಲ್ಪುದ ಪ್ರಭಾವೊಡ್ದು ಎಂಕ್ ಕಣ್ಣ್ ತೋಜಂದಿನೆಡ್ದ್ ಎನಡೊಪ್ಪ ಇತ್ತಿನಾಕುಲು ಎನನ್ ಕೈ ಪತ್ತ್‌ದ್ ದಮಸ್ಕದ ಉಲಯಿ ಲೆತ್ತೊಂದು ಪೋಯೆರ್.</verse>
				<verse number="12">“ಅಲ್ಪ ಒರಿ ನ್ಯಾಯಕಟ್ಟ್‌ಲೆಗ್ ಸರಿಯಾದ್ ನಡಪುನ ಸದ್ಭಕ್ತೆ ಊರುದ ಯೆಹೂದ್ಯೆರೆಡ ಎಡ್ಡೆಂತಿನಾಯೆ ಅಂದ್‌ದ್ ಪುದರ್ ಪಡೆತಿನಾಯೆ ಅನನೀಯೆ ಪನ್ಪಿನಾಯೆ</verse>
				<verse number="13">ಎನ ಕೈತಲ್‌ ಬತ್ತ್‌ದ್ ಉಂತುದು, ‘ಸಹೋದರೆ ಆದುಪ್ಪು ಸೌಲು ನಿಕ್ಕ್ ಕಣ್ಣ್ ತೋಜಡ್,’ ಅಂದ್‌ದ್ ಪಂಡೆ. ಪಂಡಿನಪಗನೆ ಎಂಕ್ ಕಣ್ಣ್ ತೋಜ್ಂಡ್. ಯಾನ್ ಆಯನ್ ತೂಯೆ.</verse>
				<verse number="14">ಐಡ್ದ್ ಬೊಕ್ಕ ಆಯೆ ಪಂಡಿನಿ, ‘ನಮ ಪಿತೃಲೆ ದೇವೆರ್ ತನ ಚಿತ್ತೊನು ಈ ತೆರಿಯೊನೆಕ್ಕ್‌ಲಾ ಆ ನೀತಿವಂತನ್ ತೂಪಿನೆಕ್ಕ್‌ಲಾ ಆಯನ ಬಾಯಿಡ್ದ್ ಪಾತೆರೊನು ಕೇನುನೆಕ್ಕ್‌ಲಾ ನಿನನ್ ನೇಮಕ ಮಲ್ತ್‌ದೆ.</verse>
				<verse number="15">ಈ ತೂತಿನ ಬೊಕ್ಕ ಕೇಂಡಿನ ಸಂಗತಿಲೆಗ್ಲಾ ಮಾತ ನರಮಾನಿಲೆ ಎದುರು ಸಾಕ್ಷಿಯಾದುಪ್ಪೊಡು.</verse>
				<verse number="16">ಇತ್ತೆ ಈ ದಾಯೆ ತಡ ಮಲ್ಪುವ? ಲಕ್ಕ್‌ದ್ ಕರ್ತವ ಪುದರ್‌ನ್ ಅರಿಕೆ ಮಲ್ತ್‌ದ್ ನೀರ್‌ಡ್ ದೀಕ್ಷಾಸ್ನಾನ ಮಲ್ತೊಂದು ನಿನ ಪಾಪೊಲೆನ್ ದೆಕ್ಕೊನ್ಲಾ,’ ಅಂದ್‌ದ್ ಪಂಡೆ.</verse>
				<verse number="17">“ಐಡ್ದ್ ಬೊಕ್ಕ ಯಾನ್ ಯೆರೂಸಲೇಮುಗು ಪಿರ ಬತ್ತ್‌ದ್ ದೇವಾಲಯದುಲಯಿ ಪ್ರಾರ್ಥನೆ ಮಲ್ತೊಂದುಪ್ಪುನಗ ದರ್ಶನೊಡು ಕರ್ತವನ್ ತೂಯೆ.</verse>
				<verse number="18">ಆಯೆ ಈ, ‘ಆಯಿನಾತ್ ಬೇಗ ಯೆರೂಸಲೇಮುಡ್ದು ಪಿದಾಡ್ದ್ ಪೋಲ. ಎನ ವಿಚಾರೊಡು ಈ ಪನ್ಪಿನ ಸಾಕ್ಷಿನ್ ಅಕುಲು ತರಕೊನಯೆರ್,’ ಅಂದ್‌ದ್ ಪಂಡೆ.</verse>
				<verse number="19">ಐಕ್ ಯಾನ್, ‘ಕರ್ತವಾ,’ ‘ಮಾತ ಸಭಾಮಂದಿರೊಲೆಡ್ ನಿನ ಮಿತ್ತ್ ನಂಬಿಕೆ ದೀತಿನಾಕುಲೆನ್ ಯಾನ್ ಸೆರೆಮನೆಕ್ ಪಾಡ್ದ್ ಹಾಕಾವೊಂದು ಇತ್ತೆ ಪನ್ಪಿನೆನ್ ಅಕುಲು ತೆರಿದೆರ್;</verse>
				<verse number="20">ಬೊಕ್ಕ ನಿನ ಸಾಕ್ಷಿ ಆದುಪ್ಪುನ ಸ್ತೇಫನನ ನೆತ್ತೆರ್ ಗುತ್ತಿನಪಗ ಯಾನ್ಲಾ ಕೈತಲ್‌ ಉಂತುದು ಒಪ್ಪಿಯೊಂದು ಆಯನ್ ಕೆರ್ತಿನಾಕುಲೆನ ಕುಂಟುಲೆನ್ ಕಾತೊಂದಿತ್ತೆ,’ ಅಂದ್‌ದ್ ಅಕ್ಲೆಗ್ ಗೊತ್ತುಂಡು.</verse>
				<verse number="21">ಆಂಡ ಈ, ‘ಪೋಲ,’ ‘ಯಾನ್ ನಿನನ್ ದೂರೊಗು ಪಿದಯಿದ ಜನೊಕುಲೆ ಕೈತಲ್‌ ಕಡಪುಡ್ವೆ,’” ಅಂದ್‌ದ್ ಪಂಡೆ.</verse>
				<verse number="22">ಈ ಪಾತೆರದ ಮುಟ್ಟ ಅಕುಲು ಕೇನೊಂದಿತ್ತೆರ್; ಐಡ್ದ್ ಬೊಕ್ಕ ಆಯನ ಪಾತೆರೊಗು ಕೆಬಿ ಕೊರ್ಪಿನೆನ್ ಉಂತಾದ್, “ಆಯನ್ ಕೆರ್ಲೆ, ಆಯನ್ ಭೂಮಿಡ್ದ್ ದೆತ್ತ್ ಪಾಡ್ಲೆ, ಇಂಚಿ ನರಮಾನಿಗ್ ಜೀವದ ಅವಕಾಶೊನು ಕೊರಿಯೆರೆ ಬಲ್ಲಿ.”</verse>
				<verse number="23">ಅಂಚ ಅಕುಲು ಕಲ್ಕೊಂದು ಅಕ್ಲೆನ ಕುಂಟುಲೆನ್ ದಕ್ಕೊಂದು ಧೂಳು ರಟ್ಟಾವೊಂದು ಇತ್ತೆರ್.</verse>
				<verse number="24">ವಾ ಕಾರಣೊಡ್ದು ಆಯನ ವಿರೋಧಾದ್ ಬೊಬ್ಬೆ ಪಾಡ್ವೆರ್ ಅಂದ್‌ದ್ ಸಹಸ್ರಾಧಿಪತಿ ಗೊತ್ತು ಮಲ್ಪೆರೆ ಬೋಡಾದ್ ಆಯನ್ ಕೋಟೆದ ಉಲಯಿ ಕನತ್‌ದ್ ಚಾಟಿಡ್ ಪೆಟ್ಟ್ ಪಾಡ್ದ್ ಆಯಡ ಕೇನೊಡು ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="25">ಅಕುಲು ಪೌಲುನು ಬಗ್ಗಾದ್ ಬಲ್ಲ್‌ಡ್ ಕಟ್ಟ್‌ನಗ ಆಯೆ ತನ ಕೈತಲ್‌ ಉಂತುದಿನ ಶತಾಧಿಪತಿಡ, “ರೋಮಾಪುರತ್ತ ಮೂಲದಾಯೆ ಆದುಪ್ಪು ನರಮಾನಿನ್ ನ್ಯಾಯವಿಚಾರಣೆ ಮಲ್ಪಂದೆ ಚಾಟಿಡ್ ಹಾಕಾವುನವು ನ್ಯಾಯನಾ?” ಅಂದ್‌ದ್ ಕೇಂಡೆ.</verse>
				<verse number="26">ಶತಾಧಿಪತಿ ಈ ಪಾತೆರೊನು ಕೇಂಡ್ದ್ ಸಹಸ್ರಾಧಿಪತಿ ಕೈತಲ್‌ ಪೋದು, “ಈ ದಾನೆ ಮಲ್ಪೊಡಂದ್‌ದ್ ಎನೊಂದುಲ್ಲ? ಈ ನರಮಾನಿ ರೋಮಾಪುರತ್ತ ಮೂಲದಾಯೆ,” ಅಂದ್‌ದ್ ತೆರಿಪಾಯೆ.</verse>
				<verse number="27">ಅಪಗ ಸಹಸ್ರಾಧಿಪತಿ ಪೌಲುನ ಕೈತಲ್‌ ಬತ್ತ್‌ದ್, “ರೋಮಾಪುರತ್ತ ಮೂಲದಾಯೆನಾ? ಎಂಕ್ ಪನ್ಲ,” ಅಂದ್‌ದ್ ಆಯನ್ ಕೇಂಡೆ ಆಯೆ, “ಅಂದ್,” ಪಂಡೆ.</verse>
				<verse number="28">ಐಕ್ ಸಹಸ್ರಾಧಿಪತಿ, “ಯಾನ್ ದಿಂಜ ಕಾಸ್ ಕೊರ್ದು ಈ ಹಕ್ಕ್‌ನ್ ದೆತ್ತೊಂಡೆ,” ಅಂದ್‌ದ್ ಪನ್ನಗ, ಪೌಲೆ, “ಯಾನಾಂಡ ಮೂಲದಾಯೆ ಆದ್ ಪುಟ್ಟಿನಾಯೆ ಆದುಲ್ಲೆ,” ಪಂಡೆ.</verse>
				<verse number="29">ಆಯನ್ ಪೆಟ್ಟ್ ಪಾಡ್ದ್ ಕೇನಿಯೆರೆ ಬೈದಿನಾಕುಲು ಅಪಗನೆ ಆಯನ್ ಬುಡ್ದು ಬುಡಿಯೆರ್. ಅವು ಅತ್ತಂದೆ ಆಯನ್ ರೋಮಾಪುರತ್ತ ಮೂಲದಾಯೆ ಅಂದ್‌ದ್ ಸಹಸ್ರಾಧಿಪತಿಗ್ ತೆರಿದ್ ಬನ್ನಗ ಪೌಲುನು ಕಟ್ಟ್‌ದ್ ಪಾಡ್ದಿನಾಯೆ ತಾನೇ ಅಂದ್‌ದ್ ಪೋಡಿಯೊಂಡೆ.</verse>
				<verse number="30">ಪೌಲುನ ಮಿತ್ತ್ ಯೆಹೂದ್ಯೆರ್ ವಾ ತಪ್ಪು ಎನ್ನುವೆರ್ ಪನ್ಪಿನ ವಿಚಾರೊಡು ನಿಜವಾಯಿನ ಸಂಗತಿನ್ ತೆರಿಯೊಡು ಅಂದ್‌ದ್ ಸಹಸ್ರಾಧಿಪತಿ ಮನದಾನಿ ಆಯನ ಕೋಳ ದೆತ್ತ್‌ದ್ ಪ್ರಧಾನಯಾಜಕೆರೆನ್ಲಾ ಹಿರಿಸಭೆತಾಕುಲೆನ್ಲಾ ಸೇರ್ದ್ ಬರಿಯೆರೆ ಅಪ್ಪಣೆ ಕೊರ್ದು ಪೌಲುನು ಲೆತ್ತೊಂದು ಪೋದು ಅಕ್ಲೆನ ದುಂಬು ಉಂತಾಯೆ.</verse>
			</chapter>
			<chapter number="23">
				<verse number="1">ಅಪಗ ಪೌಲು ಹಿರಿಸಭೆನ್ ದೃಷ್ಟಿ ದೀದ್, ಸಹೋದ್ರೆರೇ, “ಯಾನ್ ಈ ದಿನ ಮುಟ್ಟ ಎಡ್ಡೆ ಮನಸ್‌ಡ್ ದೇವೆರೆ ಎದುರು ನಡತೊಂದು ಬೈದೆ,” ಪಂಡೆ.</verse>
				<verse number="2">ಐಕ್ ಪ್ರಧಾನಯಾಜಕೆ ಆದುಪ್ಪುನ ಅನನೀಯೆ ಆಯನ ಬಾಯಿಗ್ ಪೆಟ್ಟ್ ಪಾಡ್ಲೆ ಅಂದ್‌ದ್ ಕೈತಲ್‌ ಉಂತುದಿತ್ತಿನಾಕುಲೆಗ್ ಅಪ್ಪಣೆ ಕೊರ್ನಗ</verse>
				<verse number="3">ಪೌಲು ಆಯಗ್, “ಸುಣ್ಣ ಪಾಡ್ದಿ ಗೋಡೆನೇ, ದೇವೆರ್ ನಿಕ್ಕ್ ಹಾಕುವೆ. ಈ ನ್ಯಾಯಕಟ್ಟ್‌ದ ಪ್ರಕಾರ ಎನನ್ ವಿಚಾರಣೆ ಮಲ್ಪೆರೆಗ್ ಕುಲ್ಲೊಂದು ಐತ ವಿರೋಧಾದ್ ಎಂಕ್ ಪೆಟ್ಟ್ ಹಾಕ್ಯೆರೆ ಅಪ್ಪಣೆ ಕೊರ್ಪನಾ?” ಅಂದ್‌ದ್ ಪಂಡೆ.</verse>
				<verse number="4">ಕೈತಲ್‌ ಉಂತುದಿನಾಕುಲು, “ದೇವೆರ್ ನೇಮಕ ಮಲ್ತಿನ ಪ್ರಧಾನಯಾಜಕಗ್ ಈ ನೆರ್ಪನಾ?” ಪಂಡೆರ್.</verse>
				<verse number="5">ಐಕ್ ಪೌಲು, “ಸಹೋದ್ರೆರೇ ಪ್ರಧಾನಯಾಜಕೆ ಅಂದ್‌ದ್ ಎಂಕ್ ತೆರಿದಿಜ್ಜಾಂಡ್, ‘ನಿನ ಜನೊಕುಲೆನ ಅಧಿಪತಿ ಆದುಪ್ಪುನಾಯನ ಸಂಗತಿಡ್ ಪಡಿಕೆಂತಿನೆನ್ ಪಾತೆರಿಯೆರೆ ಬಲ್ಲಿ,’ ಅಂದ್‌ದ್ ಬರೆತ್ಂಡತ್ತಾ?” ಅಂದ್‌ದ್ ಪಂಡೆ.</verse>
				<verse number="6">ಸಭೆತಾಕುಲೆಡ್ ಒಂಜಿ ಪಾಲ್ ಸದ್ದುಕಾಯೆರ್‌ಲಾ ಒಂಜಿ ಪಾಲ್ ಪರಿಸಾಯೆರ್‌ಲಾ ಉಪ್ಪುನೆನ್ ಪೌಲು ತೆರಿದ್, “ಸಹೋದ್ರೆರೇ, ಯಾನ್ ಪರಿಸಾಯೆ! ಯಾನ್ ಪರಿಸಾಯನ ಮಗೆ; ಸೈತಿನಾಕುಲು ಲಕ್ಕ್‌ದ್ ಬರ್ವೆರ್ ಪನ್ಪಿ ನಿರೀಕ್ಷೆದ ಸಂಗತಿಡ್ ಎನನ್ ತೀರ್ಪು ಮಲ್ಪುವೆರ್!” ಅಂದ್‌ದ್ ಬುಲ್ತುದು ಪಂಡೆ.</verse>
				<verse number="7">ಉಂದೆನ್ ಆಯೆ ಪಂಡಿನಪಗ ಪರಿಸಾಯೆರೆಗ್ಲಾ ಸದ್ದುಕಾಯೆರೆಗ್ಲಾ ಲಡಯಿ ಸುರು ಆಂಡ್; ಸಭೆಟ್ ಭೇದ ಉಂಡಾಂಡ್.</verse>
				<verse number="8">ದಾಯೆಗ್ ಪಂಡ ಸೈತಿನಾಕುಲು ಲಕ್ಕ್‌ದ್ ಬರ್ಪುಜೆರ್ ಪಂಡ್ದ್‌ಲಾ ದೂತೆ ಆವಡ್ ಶರೀರದಾಂತಿ ಆತ್ಮ ಆವಡ್ ಇಜ್ಜಿ ಪಂಡ್ದ್‌ಲಾ ಸದ್ದುಕಾಯೆರ್ ಪನ್ಪೆರ್; ಆ ರಡ್ಡ್‌ಲಾ ಉಂಡು ಅಂದ್‌ದ್ ಪರಿಸಾಯೆರ್ ಒಪ್ಪಿಯೊನುವೆರ್.</verse>
				<verse number="9">ಅಪಗ ಮಲ್ಲ ಗಲಾಟೆ ಆಂಡ್. ಪರಿಸಾಯೆರ್‌ನ ಗುಂಪುದಕುಲಾಯಿನ ಶಾಸ್ತ್ರಿಲೆಡ್ ಕೆಲೆವೆರ್ ಲಕ್ಕ್‌ದ್, “ಈ ನರಮಾನಿಡ ಎಂಕ್ಲೆಗ್ ಪಡಿಕೆಂತಿನವು ದಾಲಾ ತೋಜಿದ್ ಬರ್ಪುಜಿ; ಆತ್ಮ ಆವಡ್ ದೂತೆ ಆವಡ್ ಆಯಡ ಪಾತೆರ್‌ದ್ ಉಪ್ಪೊಲಿ,” ಅಂದ್‌ದ್ ತರ್ಕ ಮಲ್ತೆರ್.</verse>
				<verse number="10">ಲಡಯಿ ಜೋರಾನಗ ಅಕುಲು ಪೌಲುನು ಒಯಿತ್‌ದ್ ರಡ್ಡ್ ತುಂಡು ಮಲ್ಪೆರ್ ಪಂಡ್ದ್ ಶತಾಧಿಪತಿ ಪೋಡಿದ್ ಸಿಪಾಯಿಲೆಗ್ ನಿಕುಲು ಪೋದು ಅಕ್ಲೆ ನಡುಡ್ದು ಆಯನ್ ಬಲವಂತೊಡು ಪತ್ತ್‌ದ್ ಕೋಟೆದ ಉಲಯಿ ಕನವೊಡು ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="11">ಆ ದಿನತ ರಾತ್ರೆಡ್ ಕರ್ತವೆ ಪೌಲುನ ಕೈತಲ್‌ ಉಂತೊಂದು, “ಧೈರ್ಯೊಡುಪ್ಪುಲ; ಈ ಯೆರೂಸಲೇಮುಡು ಎನ ಸಂಗತಿಲೆನ್ ಪೂರ ಸಾಕ್ಷಿಯಾದ್ ಪಂಡಿಲೆಕ್ಕನೇ ರೋಮಾಪುರೊಟ್ಟುಲಾ ಸಾಕ್ಷಿ ಪನೊಡಾವು,” ಪಂಡೆ.</verse>
				<verse number="12">ಪುಲ್ಯ ಆಯಿನೆಡ್ದ್ ಬೊಕ್ಕ ಯೆಹೂದ್ಯೆರ್ ಕುತಂತ್ರ ಮಲ್ತ್‌ದ್ ನಮ ಪೌಲುನು ಕೆರ್ಪಿನ ಮುಟ್ಟ ನುಪ್ಪು ನೀರ್ ಮುಟ್ಟುಜ ಅಂದ್‌ದ್ ಕಠಿಣ ಶಪತ ಮಲ್ತೊಂಡೆರ್.</verse>
				<verse number="13">ಇಂಚ ಮಲ್ತಿನಾಕುಲೆಡ್ ಸುಮಾರ್ ನಲ್ಪ ಜನೊಡ್ದು ಹೆಚ್ಚ್ ಇತ್ತೆರ್.</verse>
				<verse number="14">ಮೊಕುಲು ಪ್ರಧಾನಯಾಜಕನ ಬೊಕ್ಕ ಸಭೆತ ಹಿರಿಯೆರೆ ಕೈತಲ್‌ ಪೋದು, “ಎಂಕುಲು ಪೌಲುನು ಕೆರ್ಪಿನ ಮುಟ್ಟ ಬಾಯಿಡ್ ದಾಲಾ ಪಾಡುಜ ಅಂದ್‌ದ್ ಕಠಿಣ ಶಪತ ಮಲ್ತೊಂದ.</verse>
				<verse number="15">ಅಂಚಾಯಿನೆಡ್ದ್ ನಿಕುಲು ಸಭೆತಾಕುಲೆನ ಒಟ್ಟುಗು ಸಹಸ್ರಾಧಿಪತಿ ಕೈತಲ್‌ ಪೋದು ಪೌಲುನ ಸಂಗತಿಲೆನ್ ನನಲಾ ಸೂಕ್ಷ್ಮ ಆದ್ ವಿಚಾರಣೆ ಮಲ್ಪೊಡು ಅಂದ್‌ದ್ ನೆಪ ಪಂಡ್ದ್ ಆಯನ್ ಕೋಟೆಡ್ದ್ ನಿಕ್ಲೆ ಕೈತಲ್‌ ಲೆತ್ತೊಂದು ಬರ್ಪಿಲೆಕ್ಕ ಕೇನೊನೊಡು, ಎಂಕುಲು ಆಯ ಕೈತಲ್‌ ಬರ್ಪಿನೆಕ್ಕ್ ದುಂಬೇ ಆಯನ್ ಕೆರಿಯೆರೆ ತಯಾರಾದುಲ್ಲ,” ಪಂಡೆರ್.</verse>
				<verse number="16">ಅಕುಲು ಉಪಾಯ ಮಲ್ತಿನೆನ್ ಪೌಲುನ ಮೆಗ್ದಿನ ಮಗೆ ಕೇಂಡ್ದ್ ಕೋಟೆದ ಉಲಯಿ ಬತ್ತ್‌ದ್ ಪೌಲುಗು ತೆರಿಪಾಯೆ.</verse>
				<verse number="17">ಪೌಲು ಶತಾಧಿಪತಿಲೆಡ್ ಒರಿಯನ್ ಲೆಪುಡಾದ್, “ಈ ಜವನ್ಯನ್ ಸಹಸ್ರಾಧಿಪತಿನ ಕೈತಲ್‌ ಲೆತ್ತೊಂದು ಪೋಲ; ಆಯಗ್ ತೆರಿಪಾವೊಡಾಯಿನ ಒಂಜಿ ಪಾತೆರ ಉಂಡು,” ಅಂದ್‌ದ್ ಪಂಡೆ.</verse>
				<verse number="18">ಶತಾಧಿಪತಿ ಆಯನ್ ಸಹಸ್ರಾಧಿಪತಿ ಕೈತಲ್‌ ಲೆತ್ತೊಂದು ಪೋದು, “ಕೈದ್ ಆದುಪ್ಪು ಪೌಲು ಎನನ್ ಲೆತ್ತ್‌ದ್ ಈ ಜವನ್ಯನ್ ನಿನ ಕೈತಲ್‌ ಲೆತ್ತೊಂದು ಪೋಪಿಲೆಕ್ಕ ಕೇನೊಂಡೆ, ನಿಕ್ಕ್ ತೆರಿಪಾವೊಡಾಯಿನ ಒಂಜಿ ಪಾತೆರ ಉಂಡು,” ಅಂದ್‌ದ್ ಪಂಡೆ.</verse>
				<verse number="19">ಅಪಗ ಸಹಸ್ರಾಧಿಪತಿ ಆಯನ್ ಕೈ ಪತ್ತ್‌ದ್ ಒಂಜಿ ಕಡೆಕ್ಕ್ ಒರಿಯನೇ ಲೆತ್ತೊಂದು ಪೋದು, “ಈ ಎಂಕ್ ಪನೊಡಾಯಿ ಪಾತೆರ ಎಂಚಿನ?” ಅಂದ್‌ದ್ ಕೇಂಡೆ.</verse>
				<verse number="20">ಐಕ್ ಆಯೆ, “ಯೆಹೂದ್ಯೆರ್ ಪೌಲುನ ವಿಷಯೊನು ನನಲಾ ಸೂಕ್ಷ್ಮ ಆದ್ ವಿಚಾರಣೆ ಮಲ್ಪೊಡು ಪನ್ಪಿನ ನೆವನ ಕೊರ್ದು, ಈ ಎಲ್ಲೆ ಆಯನ್ ಹಿರಿಸಭೆತ ಕೈತಲ್‌ ಲೆತ್ತೊಂದು ಬರೊಡು ಅಂದ್‌ದ್ ಒಪ್ಪಂದ ಮಲ್ತೊಂದೆರ್.</verse>
				<verse number="21">ಈ ಅಕ್ಲೆನ ಪಾತೆರೊಗು ಕೆಬಿ ಕೊರಡ; ದಾಯೆಗ್ ಪನ್ನಗ ನಲ್ಪೊಡ್ದು ಜಾಸ್ತಿ ನರಮಾನಿಲು ಆಯನ್ ಕೆರ್ಪಿ ಮುಟ್ಟ ನುಪ್ಪು ನೀರ್ ಮುಟ್ಟುಜ ಅಂದ್‌ದ್ ಆಜ ಪಾಡೊಂದು ಆಯಗಾದ್ ನೋಟ ಪಾಡೊಂದುಲ್ಲೆರ್. ಇತ್ತೆ ಅಕುಲು ನಿನ ಅಪ್ಪಣೆನ್ ಎದುರು ತೂವೊಂದು ತಯಾರಾದುಲ್ಲೆರ್,” ಅಂದ್‌ದ್ ಪಂಡೆ.</verse>
				<verse number="22">ಅಪಗ ಸಹಸ್ರಾಧಿಪತಿ ಆ ಜವನ್ಯಗ್, “ಈ ವಿಷಯೊನು ಎಂಕ್ ತೆರಿಪಾಯ ಅಂದ್‌ದ್ ಏರೆಗ್ಲಾ ಪನೊಡ್ಚಿ ಅಂದ್‌ದ್ ಕಂಡಿತಾದ್ ಅಪ್ಪಣೆ ಕೊರ್ದು,” ಆಯನ್ ಕಡಪುಡ್ದು ಬುಡಿಯೆ.</verse>
				<verse number="23">ಆಯೆ ಶತಾಧಿಪತಿಲೆಡ್ ಇರ್ವೆರೆನ್ ಲೆತ್ತ್‌ದ್, “ರಾತ್ರೆ ಒಂರ್ಬ ಗಂಟೆಗ್ ಕೈಸರೆಯ ಮುಟ್ಟ ಪೋಪಿಲೆಕ್ಕ ಇರ್ನೂದು ಸಿಪಾಯಿಲೆನ್ ಎಲ್ಪ ಕುದುರೆ ಸವಾರಿನಾಕುಲೆನ್ ಇರ್ನೂದು ಭರ್ಜಿದಾಕುಲೆನ್ ತಯಾರ್ ಮಲ್ಪುಲೆ.</verse>
				<verse number="24">ಬೊಕ್ಕ ಕುದುರೆಲೆನ್ ತಯಾರ್ ಮಲ್ತ್‌ದ್ ಪೌಲುನು ಲೆತ್ತೊಂದು ದೇಶಾಧಿಪತಿ ಆದುಪ್ಪುನ ಫೇಲಿಕ್ಸ್ ಕೈತಲ್‌ ಜಾಗ್ರತೆಡ್ ಲೆತ್ತೊಂದು ಪೋವೊಡು,” ಅಂದ್‌ದ್ ಪಂಡೆ.</verse>
				<verse number="25">ಆಯೆ ಈ ರೀತಿಡ್ ಒಂಜಿ ಕಾಕಜಿನ್ ಬರೆಯೆ.</verse>
				<verse number="26">“ಮಾನ್ಯ ದೇಶಾಧಿಪತಿ ಆದುಪ್ಪುನ ಫೇಲಿಕ್ಸ್‌ಗ್ ಕ್ಲೌದಿಯೆ ಲೂಸಿಯೆ ಮಲ್ಪುನ ವಂದನೆ</verse>
				<verse number="27">ಯೆಹೂದ್ಯೆರ್ ಈ ನರಮಾನಿನ್ ಪತ್ತ್‌ದ್ ಕೆರೊಡಂದ್ದುಪ್ಪುನಗ ಯಾನ್ ಸಿಪಾಯಿಲೆಡೊಪ್ಪ ಪೋದು ಆಯನ್ ರೋಮಾಪುರತ್ತ ಮೂಲದಾಯೆ ಅಂದ್‌ದ್ ತೆರಿದ್ ಆಯನ್ ತಪ್ಪಾಯೆ,</verse>
				<verse number="28">ಉಂದತ್ತಂದೆ ಆಯನ ಮಿತ್ತ್ ತಪ್ಪು ಪಂಡಿನ ಕಾರಣೊನು ತೆರಿಯೊಡು ಅಂದ್‌ದ್ ಎನ್ನ್‌ದ್ ಆಯನ್ ಅಕ್ಲೆನ ಹಿರಿಸಭೆಕ್ ಲೆತ್ತೊಂದು ಪೋಯೆ.</verse>
				<verse number="29">ಅಲ್ಪ ಅಕುಲು ತನ್ಕುಲೆ ನ್ಯಾಯಕಟ್ಟ್‌ಲೆನ್ ಪತ್ತೊಂದು ಆಯನ ಮಿತ್ತ್ ತಪ್ಪು ಅಪವಾದನೆ ಪಾಡಿನವು ಅತ್ತಂದೆ ಸೆರೆಮನೆಟ್ ಪಾಡೊಡು ಮರಣ ದಂಡನೆ ಆವೊಡು ಪನ್ಪಿನ ತಕ್ಕದ ದೂರು ಆಯಡ ಒಂಜಿಲಾ ಇಜ್ಜಿ ಅಂದ್‌ದ್ ಎಂಕ್ ತೋಜುಂಡು.</verse>
				<verse number="30">ಆಂಡ ಯೆಹೂದ್ಯೆರ್ ಈ ನರಮಾನಿಗ್ ವಿರೋಧಾದ್ ಅಪವಾದ ಮಲ್ತೊಂದುಲ್ಲೆರ್ ಅಂದ್‌ದ್ ಎಂಕ್ ತೆರಿದ್ ಬತ್ತ್ಂಡ್. ಅಪಗನೆ ಯಾನ್ ನಿನ ಕೈತಲ್‌ ಕಡಪುಡ್ದು ತಪ್ಪು ಅಪವಾದನೆ ಮಲ್ಪುನಾಕುಲೆಗ್ ನಿನ ದುಂಬೇ ಆಯಗ್ ವಿರೋಧಾದ್ ಪಾತೆರುಲೆಕ್ಕ ಅಪ್ಪಣೆ ಕೊರ್ತೆ.”</verse>
				<verse number="31">ಸಿಪಾಯಿಲು ತನ್ಕುಲೆಗ್ ಅಪ್ಪಣೆ ಆಯಿ ಲೆಕ್ಕ ರಾತ್ರೆ ಪೊರ್ತುಡು ಪೌಲುನು ಅಂತಿಪತ್ರಿ ಮುಟ್ಟ ಲೆತ್ತೊಂದು ಪೋಯೆರ್.</verse>
				<verse number="32">ಮನದಾನಿ ಆಯನ್ ಕುದುರೆ ಸವಾರಿನಾಕುಲೆ ಒಟ್ಟುಗು ಪೋಪಿಲೆಕ್ಕ ಮಲ್ತ್‌ದ್ ಬಾಕಿದಾಕುಲು ಕೋಟೆಗ್ ಪಿರ ಬತ್ತೆರ್.</verse>
				<verse number="33">ಕುದುರೆ ಸವಾರಿನಾಕುಲು ಕೈಸರೆಯಗ್‌ ಸೇರ್ದ್ ದೇಶಾಧಿಪತಿಗ್ ಕಾಕಜಿನ್ ಕೊರ್ದು ಪೌಲುನು ಆಯನ ದುಂಬು ಉಂತಾಯೆರ್.</verse>
				<verse number="34">ದೇಶಾಧಿಪತಿ ಆ ಕಾಕಜಿನ್ ಓದುದು ಪೌಲು ವಾ ಊರುದಾಯೆ ಅಂದ್‌ದ್ ಕೇಂಡ್ದ್ ಆಯೆ ಕಿಲಿಕ್ಯದಾಯೆ ಅಂದ್‌ದ್ ತೆರಿದ್</verse>
				<verse number="35">ನಿನ ಮಿತ್ತ್ ತಪ್ಪು ಅಪವಾದನೆ ಮಲ್ಪುನಾಕುಲು ಬತ್ತಿ ಬೊಕ್ಕ ನಿನ ಕಾರ್ಯೊಲೆನ್ ಪೂರ ವಿಚಾರಣೆ ಮಲ್ಪುವೆ ಅಂದ್‌ದ್ ಆಯನ್ ಹೆರೋದನ ಅರಮನೆಡ್ ದೀದ್ ಕಾಪೊಡು ಅಂದ್‌ದ್ ಅಪ್ಪಣೆ ಕೊರಿಯೆ.</verse>
			</chapter>
			<chapter number="24">
				<verse number="1">ಐನ್ ದಿನೊಡ್ದು ಬೊಕ್ಕ ಪ್ರಧಾನಯಾಜಕೆ ಅನನೀಯೆ ಸಭೆತ ಹಿರಿಯಾಕುಲೆಡ್ ಕೆಲೆವೆರೆನ್ ಬೊಕ್ಕ ತೆರ್ತುಲೆ ಪನ್ಪಿ ಒರಿ ವಕೀಲನ್ ಲೆತ್ತೊಂದು ಪೋದು ದೇಶಾಧಿಪತಿ ಎದುರುಡು ಪೌಲುನ ಮಿತ್ತ್ ದೋಷರೋಪಣೆ ಮಲ್ಪೆರೆ ಪೋಯೆರ್.</verse>
				<verse number="2">ಪೌಲುನು ಲೆತ್ತಿ ಬೊಕ್ಕ ತೆರ್ತುಲೆ ಆಯನ ಮಿತ್ತ್ ತಪ್ಪು ಅಪವಾದನೆ ಮಲ್ಪೆರೆ ಸುರು ಮಲ್ತ್‌ದ್ ಇಂಚ ಪಂಡೆ, “ಮಾನ್ಯ ಫೇಲಿಕ್ಸ! ನಿನ ರಾಜ್ಯೊಡು ಎಂಕ್ಲೆಗ್ ಸಮಾಧಾನ ಉಂಡು. ನಿನ ಪರಾಂಬರಿಕೆಡ್ದ್ ಈ ದೇಶದ ಜನೊಕುಲೆಗ್ ಮಾತ ರೀತಿಡ್ಲಾ ಮಾತ ಜಾಗ್‌ಡ್ಲಾ ಸುದಾರ್ನೆಲು ಆಪುಂಡು.</verse>
				<verse number="3">ಎಂಕುಲು ಮಾತ ಜಾಗೊಲೆಡ್ಲಾ ನಿನ ಉಪಕಾರೊನು ಪುಗರ್‌ದ್ ಒಪ್ಪಿಯೊನ್ವ.</verse>
				<verse number="4">ಆಂಡ ನಿನನ್ ಹೆಚ್ಚಾದ್ ಬೇಜಾರ್ ಮಲ್ಪುನೆಕ್ಕ್ ಮನಸ್‌ದಾಂತೆ ನಮ ಎಲ್ಯ ರೀತಿಡ್ ಪನ್ಪಿನ ಪಾತೆರೊಲೆನ್ ದಯ ದೀದ್ ಕೇನೊಡು ಅಂದ್‌ದ್ ನಟ್ಟೊನ್ವ;</verse>
				<verse number="5">ಈ ನರಮಾನಿ ಲೋಕೊಡು ಮಾತ ಕಡೆಟ್ಲಾ ಉಪ್ಪುನ ಮಾತ ಯೆಹೂದ್ಯೆರೆಡ್ ಲಡಯಿ ಲಕ್ಕಾವುನಾಯೆ ಪಂಡ್ದ್‌ಲಾ ನಜರೇತ್‌ದಾಕುಲೆನ ಮತತ ಮುಖ್ಯಸ್ಥೆ ಪಂಡ್ದ್‌ಲಾ ಎಂಕ್ಲೆಗ್ ತೋಜಿದ್ ಬತ್ತ್ಂಡ್.</verse>
				<verse number="6">ಉಂದತ್ತಂದೆ ಇಂಬೆ ದೇವಾಲಯೊನು ಭ್ರಷ್ಟ ಮಲ್ಪೆರೆ ಪ್ರಯತ್ನ ಮಲ್ತೆ; ಅಂಚಾಯಿನೆಡ್ದ್ ಇಂಬ್ಯನ್ ಎಂಕುಲು ಪತ್ತಿಯ.</verse>
				<verse number="7">ಆಂಡ ಸಹಸ್ರಾಧಿಪತಿ ಆದಿತ್ತಿನ ಲೂಸಿಯೆ ಬತ್ತ್‌ದ್ ಬಲತ್ಕಾರ ಮಲ್ತ್‌ದ್ ಆಯನ್ ಎಂಕುಲೆ ಕೈತಲ್‌ಡ್ದ್ ಬುಡ್ಪಾದ್ ಕೊನೊಯೆ.</verse>
				<verse number="8">ಇಂಬ್ಯನ್ ಈಯೇ ವಿಚಾರಣೆ ಮಲ್ತಡ ಎಂಕುಲು ಇಂಬ್ಯನ ಮಿತ್ತ್ ಪನ್ಪಿನ ಈ ತಪ್ಪುಲು ಮಾತ ನಿಜನಾ ಸುಳ್ಳಾ ಅಂದ್‌ದ್ ಇಂಬ್ಯಡ್ದೇ ತೆರಿಯೊನೊಲಿ,” ಅಂದ್‌ದ್ ಪಂಡೆ.</verse>
				<verse number="9">ಅಪಗ ಯೆಹೂದ್ಯೆರ್ ಈ ಸಂಗತಿಲು ನಿಜ ಅಂದ್‌ದ್ ಅಕುಲುಲಾ ಆ ದೋಷಾರೋಪಣೆ ಮಲ್ಪುನೆಟ್ಟ್ ಸೇರಿಯೆರ್.</verse>
				<verse number="10">ದೇಶಾಧಿಪತಿ ಫೇಲಿಕ್ಸ್ ಪೌಲುಗು ಕೈಸನ್ನೆ ಮಲ್ತ್‌ದ್ ಪಾತೆರಿಯೆರೆ ಸೂಚನೆ ಕೊರಿಯೆ. ಅಪಗ ಪೌಲು ಇಂಚ ಪಂಡೆ, “ಈ ದಿಂಜ ವರ್ಸೊಡ್ದು ಈ ದೇಶದ ಜನೊಕುಲೆಗ್ ನ್ಯಾಯಾಧಿಪತಿ ಆದುಲ್ಲ ಅಂದ್‌ದ್ ಎಂಕುಲು ತೆರಿದ್ ಯಾನ್ ಧೈರ್ಯೊಡು ಪ್ರತಿವಾದ ಮಲ್ಪುವೆ,</verse>
				<verse number="11">ಯಾನ್ ದೇವೆರೆನ್ ಆರಾಧನೆ ಮಲ್ಪುನೆಕ್ಕ್ ಯೆರೂಸಲೇಮುಗು ಪೋದು ಪದ್ರಾಡ್ ದಿನ ಮಾತ್ರ ಆಂಡ್ ಅಂದ್‌ದ್ ಈಯೇ ತೆರಿಯುವ;</verse>
				<verse number="12">ದೇವಾಲಯೊಡು ಯಾನ್ ಏರೆಡಲಾ ವಾದ ವಿವಾದ ಇಜ್ಜಾಂಡ ಸಭಾಮಂದಿರೊಡು ಜನೊಕುಲೆ ಗುಂಪು ಕೂಡಾದಿಜಿ ಅಂಚೆನೆ ಬೇತೆ ಊರುಡ್ಲಾ ಗುಂಪು ಕೂಡಾದಿನ ಮೊಕುಲು ತೂತುಜೆರ್.</verse>
				<verse number="13">ಉಂದತ್ತಂದೆ ಮೊಕುಲು ಇತ್ತೆ ಎನ ಮಿತ್ತ್ ಪನ್ಪಿನ ತಪ್ಪುಲೆನ್ ನಿಜ ಅಂದ್‌ದ್ ತೋಜಾಯೆರೆ ಆಪುಜಿ.</verse>
				<verse number="14">ಒಂಜೆನ್ ಮಾತ್ರ ನಿನ ಎದುರು ಒಪ್ಪಿಯೊನ್ವೆ, ಅವು ದಾನೆ ಪಂಡ, ಆ ಮಾರ್ಗದ ಹಿಂಬಾಲಕೆ ಆದ್ ಯಾನ್ ಎಂಕ್ಲೆನ ಪಿತೃ ಆಯಿ ದೇವೆರೆನ್ ಆರಾಧನೆ ಮಲ್ಪುವೆ, ಆ ಮಾರ್ಗ ಸರಿಯತ್ತ್ ಅಂದ್‌ದ್ ಯೆಹೂದ್ಯೆರ್ ಪನ್ಪೆರ್. ಆಂಡ ನ್ಯಾಯಕಟ್ಟ್‌ಡ್ಲಾ ಪ್ರವಾದಿಲೆ ಗ್ರಂಥೊಲೆಡ್ ಬರೆದುಪ್ಪುನ ಮಾತ ವಿಚಾರೊಲೆನ್ ನಂಬುವೆ.</verse>
				<verse number="15">ಉಂದತ್ತಂದೆ ನೀತಿವಂತೆರೆಗ್ಲಾ ನೀತಿಕೆಟ್ಟಿನಾಕುಲೆಗ್ಲಾ ಸೈತಿನಾಕುಲೆಡ್ದ್ ಲಕ್ಕುವೆರ್ ಅಂದ್‌ದ್ ಮೊಕುಲು ದೇವೆರೆಡ್ ನಿರೀಕ್ಷೆಡುಪ್ಪುಲೆಕ್ಕನೆ ಯಾನ್ಲಾ ದೇವೆರೆ ಮಿತ್ತ್ ಆಸೆ ದೀದ್ ನಿರೀಕ್ಷೆ ಮಲ್ಪುವೆ.</verse>
				<verse number="16">ಈ ಕಾರಣೊಡ್ದಾವರ, ದೇವೆರೆ ಎದುರುಲಾ ನರಮಾನಿಲೆ ಎದುರುಲಾ ಏಪಲಾ ಕಲೆದಾಂತಿ ಮನಸಾಕ್ಷಿ ಉಪ್ಪುಲೆಕ್ಕ ಪೇಚಾಡುವೆ.</verse>
				<verse number="17">“ಕೆಲವು ವರ್ಸೊಡ್ದು ಬೊಕ್ಕ ಯಾನ್ ಎನ ಸ್ವಂತ ದೇಶೊಗು ದಾನಧರ್ಮೊನು ಕೊರಿಯೆರೆಲಾ ಕಾಣಿಕೆನ್ ಅರ್ಪಣೆ ಮಲ್ಪೆರೆಲಾ ಯೆರೂಸಲೇಮುಗು ಬತ್ತೆ.</verse>
				<verse number="18">ಯಾನ್ ಶುದ್ಧ ಮಲ್ತೊಂಡಿನಾಯೆ ಆದ್ ಅವೆನ್ ಒಪ್ಪಿಯಾನಗ ಎನನ್ ದೇವಾಲಯೊಡು ಯೆಹೂದ್ಯೆರ್ ತೂಯೆರ್; ಎನ ಒಟ್ಟುಗು ಜನತ ಗುಂಪು ಇತ್ತ್‌ಜಿ; ಗಲಾಟೆಲಾ ಇತ್ತ್‌ಜಿ,</verse>
				<verse number="19">ಆಂಡ ಆಸ್ಯ ಪ್ರದೇಶೊಡ್ದು ಬೈದಿನ ಕೆಲವು ಯೆಹೂದ್ಯೆರ್ ತೂದಿತ್ತೆರ್; ಎನ ಮಿತ್ತ್ ದಾಲಾಂಡಲಾ ಇತ್ತ್ಂಡ ಅಕುಲೇ ನಿನ ದುಂಬು ತಪ್ಪು ಪನಿಯೆರೆ ಇಡೆಗ್ ಬರೊಡಿತ್ತ್‌ಂಡ್;</verse>
				<verse number="20">ಯಾನ್ ಯೆರೂಸಲೇಮುಡು ಹಿರಿಸಭೆತ ಎದುರುಡು ಉಂತಿನಪಗ ಅಕ್ಲೆಗ್ ಎನ ಮಿತ್ತ್ ತಪ್ಪು ತೋಜಿದ್ ಬತ್ತ್ಂಡ ಮೊಕುಲೆ ಪನಡ್.</verse>
				<verse number="21">ಯಾನ್ ಮೊಕ್ಲೆ ನಡುಟು ಉಂತುದು ಪುನರುತ್ಥಾನದ ಸಂಗತಿಡ್ ನಂಬುವೆ ಅಂದ್‌ದ್ ಸಾರಿನೆಕ್ಕ್ ಎನ ವಿಚಾರಣೆ ಆಪುಂಡು. ಬೇತೆ ದಾಲಾ ಅನ್ಯಾಯ ತೂತೆರ್ಡ ಅಕುಲೇ ಪನಡ್.”</verse>
				<verse number="22">ಆಂಡ ಫೇಲಿಕ್ಸೆ ಕರ್ತವ ಮಾರ್ಗೊನು ತಕ್ಕ ಮಟ್ಟ್‌ಗ್ ತೆರಿದಿನಾಯೆ ಆದಿತ್ತ್‌ಂಡಲಾ ಅಕ್ಲೆಗ್ ಸಹಸ್ರಾಧಿಪತಿ ಲೂಸಿಯೆ ಬತ್ತಿ ಬೊಕ್ಕ “ನಿಕ್ಲೆನ ಕಾರ್ಯೊನು ತೀರ್ಮಾನ ಮಲ್ಪುವೆ,” ಅಂದ್‌ದ್ ವಿಚಾರಣೆ ತಡೆ ಮಲ್ತೆ.</verse>
				<verse number="23">ಅಪಗ ಆಯೆ ಶತಾಧಿಪತಿಗ್, ಪೌಲು ಸೆರೆಮನೆಟ್ ಉಪ್ಪಡ್. ಆಂಡ ಆಯನ್ ಒಂತೆ ಸಡಿಲ್ ಬುಡ್ಲ. ಬೊಕ್ಕ ಆಯನ ಉಪಚಾರ ಮಲ್ಪೆರೆ ಆಯನ ಸ್ವಂತ ಜನೊಕುಲೆಡ್ ಏರೆಗ್ಲಾ ಅಡ್ಡಿ ಮಲ್ಪೆರೆ ಬಲ್ಲಿ ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="24">ಕೆಲವು ದಿನೊಡ್ದು ಬೊಕ್ಕ ಫೇಲಿಕ್ಸೆ ಯೆಹೂದ್ಯೆದಿ ಆಯಿ ತನ ಬೊಡೆದಿ ದ್ರುಸಿಲ್ಲಡೊಪ್ಪ ಬತ್ತ್‌ದ್ ಪೌಲುನು ಲೆಪ್ಪುಡ್ದು ಕ್ರಿಸ್ತ ಯೇಸುಡ್ ದೀಪಿ ನಂಬಿಕೆದ ಸಂಗತಿನ್ ಆಯಡ ಕೇಂಡೆ.</verse>
				<verse number="25">ಆಂಡ ನೀತಿದ ಬಾಳ್ವೆ, ಸ್ವಸ್ಥ ಬುದ್ಧಿ ಬೊಕ್ಕ ದುಂಬಗ್ ಬರಿಯೆರೆ ಇತ್ತಿನ ನ್ಯಾಯ ವಿಚಾರಣೆದ ವಿಷಯೊಲೆನ್ ಪಾತೆರ್‌ನಗ ಫೇಲಿಕ್ಸೆ ಪೋಡಿದ್ ಸದ್ಯೊಗು ಪೋಲ; ಎಂಕ್ ಸಮಯ ತಿಕ್ಕಿನಪಗ ನಿನನ್ ಲೆಪ್ಪುಡಾವೆ ಅಂದ್‌ದ್ ಪಂಡೆ.</verse>
				<verse number="26">ಉಂದತ್ತಂದೆ ಆಯಗ್ ಪೌಲುಡ್ದು ಕಾಸ್ ತಿಕ್ಕು ಅಂದ್‌ದ್ ನಿರೀಕ್ಷೆ ಇತ್ತ್ಂಡ್, ಅಪಗಪಗ ಲೆಪುಡಾದ್ ಆಯನ ಒಟ್ಟಗು ಸಂಭಾಷಣೆ ಮಲ್ತೊಂದಿತ್ತೆ.</verse>
				<verse number="27">ರಡ್ಡ್ ವರ್ಸ ದಿಂಜಿ ಬೊಕ್ಕ ಫೇಲಿಕ್ಸನ ಸ್ಥಾನೊಗು ಪೊರ್ಕಿಯ ಫೆಸ್ತೆ ಬತ್ತೆ. ಫೇಲಿಕ್ಸೆ ಯೆಹೂದ್ಯೆರೆನ ಪ್ರೀತಿನ್ ಗೆಂದೊನೊಡು ಪನ್ಪಿ ಆಸೆಡ್ದ್ ಪೌಲುನು ಅಂಚೆನೇ ಸೆರೆಮನೆಟ್ ಬುಡ್ದು ಪೋಯೆ.</verse>
			</chapter>
			<chapter number="25">
				<verse number="1">ಫೆಸ್ತೆ ದೇಶಾಧಿಪತಿ ಆದ್ ಮೂಜಿ ದಿನೊಡ್ದು ಬೊಕ್ಕ ಕೈಸರೆಯಡ್ದ್ ಯೆರೂಸಲೇಮುಗು ಪೋಯೆ.</verse>
				<verse number="2">ಅಲ್ಪ ಪ್ರಧಾನಯಾಜಕೆರ್‌ಲಾ ಯೆಹೂದ್ಯೆರೆ ಮುಖ್ಯಸ್ಥೆರ್‌ಲಾ ಪೆಸ್ತನ ಎದುರುಡ್ಲಾ ಪೌಲುನ ವಿರೋಧಾದ್ ದೋಷರೋಪಣೆಲೆನ್ ಆಯಗ್ ಪಂಡೆರ್.</verse>
				<verse number="3">ಈ ದಯ ಮಲ್ತ್‌ದ್ ಪೌಲುನು ಯೆರೂಸಲೇಮುಗು ಪಿರ ಕಡಪುಡ್ದು ಕೊರ್ಲ ಅಂದ್‌ದ್ ಫೆಸ್ತನ್ ಕೇನೊಂಡೆರ್. ಅಕುಲು ಪೂರ ಪೌಲುನು ಮಾರ್ಗೊಡು ಕೆರೊಡು ಅಂದ್‌ದ್ ಉಪಾಯ ಮಲ್ತೊಂದಿತ್ತೆರ್.</verse>
				<verse number="4">ಆಂಡ ಫೆಸ್ತೆ ಪನ್ಪೆ, “ಪೌಲುನು ಕೈಸರೆಯಡ್ ದೀವೊಡಾಪುಂಡು, ಯಾನೇ ಅಡೆಗ್ ಬೇಗೊಡು ಪೋಪಿನೆಟ್ಟ್ ಉಲ್ಲೆ.</verse>
				<verse number="5">ಅಂಚಾಯಿನೆಡ್ದ್ ನಿಕ್ಲೆನ ಮುಖ್ಯಸ್ಥೆರ್ ಎನ್ನೊಟ್ಟುಗು ಬರಡ್. ಆಯೆ ಅಪರಾಧ ಮಲ್ತಿದಿತ್ತೆಡಾ ಕೈಸರೆಯಡೇ ಆಯನ ತಪ್ಪು ತೋಜಾಪಾಲೆ.” ಅಂದ್‌ದ್ ಪಂಡೆ.</verse>
				<verse number="6">ಆಯೆ ಅಕ್ಲೆಡೊಪ್ಪ ಎಣ್ಮ ಪತ್ತ್ ದಿನೊಡ್ದು ಹೆಚ್ಚ್ ಉಪ್ಪಂದೆ ಕೈಸರೆಯಗ್‌ ಪೋದು ಮನದಾನಿ ನ್ಯಾಯಾಸನೊಡು ಕುಲ್ಲುದು ಪೌಲುನು ಕನವೊಡು ಅಂದ್‌ದ್ ಅಪ್ಪಣೆ ಮಲ್ತೆ.</verse>
				<verse number="7">ಪೌಲು ಬತ್ತಿ ಬೊಕ್ಕ ಯೆರೂಸಲೇಮುಡ್ದು ಬೈದಿನ ಯೆಹೂದ್ಯೆರ್ ಆಯನ ಸುತ್ತ ಉಂತೊಂದು ಅಕ್ಲೆಗ್ ತೀರಂದಿನಾತ್ ಮಲ್ಲ ಮಲ್ಲ ತಪ್ಪುಲೆನ್ ಪಾಡೊಂದಿತ್ತೆರ್, ಆಂಡ ಐಟ್ಟ್ ಒಯಿಕ್‌ಲಾ ಆಧಾರ ಇತ್ತ್‌ಜಿ.</verse>
				<verse number="8">ಪೌಲು ಆ ಕೂಡ್ದಿನ ಯೆಹೂದ್ಯನಾಯಕೆರೆಗ್ ಪ್ರತಿವಾದ ಮಲ್ತೊಂದು ಪನ್ಪೆ, “ಯಾನ್ ಯೆಹೂದ್ಯೆರೆನ ನ್ಯಾಯಕಟ್ಟಲೆದ ವಿರೋಧಾದ್ ಆವಡ್, ದೇವಾಲಯದ ವಿರೋಧಾದ್ ಆವಡ್, ಚಕ್ರವರ್ತಿನ ವಿಷಯೊಡಾವಡ್ ವಾ ತಪ್ಪುಲಾ ಮಲ್ತ್‌ದಿಜಿ,” ಅಂದ್‌ದ್ ಪಂಡೆ.</verse>
				<verse number="9">ಫೆಸ್ತೆ ಯೆಹೂದ್ಯೆರೆನ ಪ್ರೀತಿನ್ ಗೆಂದೊನೊಡು ಅಂದ್‌ದ್ ಆಸೆ ಮಲ್ತ್‌ದ್, ಪೌಲುನು, “ಈ ಯೆರೂಸಲೇಮುಗು ಪೋದು ಅಲ್ಪ ಈ ದೋಷರೋಪಣೆದ ಸಂಗತಿಡ್ ಯಾನ್ ಅವುಲೇ ನಿಕ್ಕ್ ತೀರ್ಪು ಕೊರೊಡಾ?” ಪಂಡೆ.</verse>
				<verse number="10">ಐಕ್ ಪೌಲು, “ಯಾನ್ ಚಕ್ರವರ್ತಿನ ನ್ಯಾಯಾಸನದ ಎದುರು ಉಂತುದೆ, ಮುಲ್ಪನೇ ಎನ ತೀರ್ಪು ಆವೊಡು. ಯೆಹೂದ್ಯೆರೆಗ್ ಯಾನ್ ಅನ್ಯಾಯ ದಾಲಾ ಮಲ್ತ್‌ದಿಜಿ; ಅವು ನಿಕ್ಲೆಗ್ ಸರಿಯಾದ್ ತೆರಿದೇ ಉಂಡು.</verse>
				<verse number="11">ಯಾನ್ ಅನ್ಯಾಯ ಮಲ್ತಿನಾಯೆ ಆದ್ ಮರಣ ದಂಡನೆದ ಶಿಕ್ಷೆಗ್ ಕಾರಣವಾಯಿನ ಒವೆನಾಂಡಲಾ ಮಲ್ತಿನಾಂಡ ಮರಣ ದಂಡನೆ ಶಿಕ್ಷೆ ಬೊಡ್ಚಿ ಪನ್ಪುಜಿ. ಮೊಕುಲು ಎನ ಮಿತ್ತ್ ಪಾಡ್ದಿನ ತಪ್ಪುಲೆಡ್ ಒಂಜಿಲಾ ಸತ್ಯ ಇಜ್ಜಂದಿನೆಡ್ದ್ ಎನನ್ ಒಚ್ಚಿದ್ ಕೊರಿಯೆರೆ ಒರಿಯಗ್ಲಾ ಅಧಿಕಾರ ಇಜ್ಜಿ. ಯಾನ್ ಚಕ್ರವರ್ತಿನ ಎದುರುಡೇ ಪರಿಶೋಧನೆ ಮಲ್ಪುವೆ,” ಅಂದ್‌ದ್ ಪಂಡೆ.</verse>
				<verse number="12">ಅಪಗ ಫೆಸ್ತೆ ತನ ಸಭೆತಾಕುಲೆ ಒಟ್ಟುಗು ಆಲೋಚನೆ ಮಲ್ತಿ ಬೊಕ್ಕ ಪೌಲುಗು, “ಚಕ್ರವರ್ತಿ ನಿನ ಪರಿಶೋಧನೆ ಮಲ್ಪೊಡು ಅಂದ್‌ದ್ ಈ ಕೇನೊಂದು ಇತ್ತಿನೆಡ್ದಾವರ ಯಾನ್ ನಿನನ್ ಚಕ್ರವರ್ತಿ ನಡೆಗೇ ಕಡಪುಡ್ದು ಕೊರ್ಪೆ,” ಅಂದ್‌ದ್ ಪಂಡೆ.</verse>
				<verse number="13">ಒಂತೆ ದಿನ ಕರಿಬೊಕ್ಕ ರಾಜೆ ಅಗ್ರಿಪ್ಪೆಲಾ ಬೆರ್ನಿಕೆಲಾ ಫೆಸ್ತನ್ ಸ್ವಗತ ಮಲ್ಪೆರೆ ಕೈಸರೆಯಗ್‌ ಬತ್ತೆರ್.</verse>
				<verse number="14">ಅವುಲು ಅಕುಲು ಸುಮಾರ್ ದಿನ ಮುಟ್ಟ ಇತ್ತೆರ್. ಫೆಸ್ತೆ ಪೌಲುನ ವಿಷಯೊಲೆನ್ ರಾಜಗ್ ಈ ರೀತಿಡ್ ತೆರಿಪಾಯೆ, “ಫೇಲಿಕ್ಸೆ ಬುಡ್ದು ಪೋತಿನ ಒರಿ ಸೆರೆಮನೆಟ್ ಉಲ್ಲೆ.</verse>
				<verse number="15">ಯಾನ್ ಯೆರೂಸಲೇಮುಗು ಪೋದುಪ್ಪುನಗ ಯೆಹೂದ್ಯೆರೆನ ಪ್ರಧಾನಯಾಜಕೆರ್‌ಲಾ ಸಭೆತ ಹಿರಿಯೆರ್‌ಲಾ ಆಯನ ಸಂಗತಿಡ್ ಎಂಕ್ ದೂರು ಪಂಡ್ದ್ ಆಯಗ್ ವಿರೋಧಾದ್ ತೀರ್ಪು ಆವೊಡು ಅಂದ್‌ದ್ ಕೇನೊಂಡೆರ್.</verse>
				<verse number="16">ಯಾನ್ ಅಕ್ಲೆಗ್, ಅಪರಾಧಿ ದೂರು ಪಂಡಿನಾಕುಲೆಗ್ ಎದುರಾದ್ ಉಂತುದು ತನ ಮಿತ್ತ್ ಆರೋಪ ಮಲ್ತಿನ ತಪ್ಪುಲೆ ಸಂಗತಿಡ್ ಪನಿಯೆರೆ ಇಡೆ ಕೊರಂದೆ ಆಯನ್ ಒಚ್ಚಿದ್ ಕೊರ್ಪಿನವು ರೋಮಾಯೆರ್‌ನ ಕ್ರಮ ಅತ್ತ್ ಅಂದ್‌ದ್ ಪಂಡೆ.</verse>
				<verse number="17">ಅಕುಲು ಇಡೆಗ್ ಸೇರ್ದ್ ಬತ್ತಿನಪಗ ಯಾನ್ ಒಂತೆಲಾ ತಡ ಮಲ್ಪಂದೆ ಮನದಾನಿಯೇ ನ್ಯಾಯಾಸನದ ಮಿತ್ತ್ ಕುಲ್ಲುದು ಆ ನರಮಾನಿನ್ ಲೆತ್ತೊಂದು ಬರೊಡಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="18">ದೂರು ಪನ್ಪಿನಾಕುಲು ಆಯನ ವಿರೋಧ ಉಂತುದು ಪಾತೆರಿನಪಗ ಯಾನ್ ಎನ್ನಿನ ದೂರುಲೆಡ್ದ್ ಒಂಜೆನಾಂಡಲಾ ಆಯನ ಮಿತ್ತ್ ಪಾಡ್ದ್ ಇತ್ತ್‌ಜೆರ್</verse>
				<verse number="19">ಆಂಡ ಅಕ್ಲೆನ ಸ್ವಂತ ಧರ್ಮೊಗು ಸಮ್ಮಂಧವಾದಿತ್ತಿನ ವಿಷಯೊಲು ಬೊಕ್ಕ ಸೈತ್ ಪೋತಿ ಒರಿ ಯೇಸು ಬದುಕುವೆ ಅಂದ್‌ದ್ ಪೌಲು ಪನ್ಪಿನೆಕ್ಕಾದ್‌ಲಾ ಅಕ್ಲೆಗ್ ಆಯಡೊಪ್ಪ ತರ್ಕ ಇತ್ತ್ಂಡ್.</verse>
				<verse number="20">ಇಂಚಿತ್ತಿ ವಿಷಯೊಲೆನ್ ಎಂಚ ವಿಚಾರಣೆ ಮಲ್ಪೊಡು ಎಂಕ್ ತೆರಿಯಂದೆ ಈ ಯೆರೂಸಲೇಮುಗು ಪೋದು ಅಲ್ಪ ಉಂದೆತ್ತ ಸಂಗತಿಡ್ ವಿಚಾರ ಮಲ್ಪೆರೆ ನಿಕ್ಕ್ ಮನಸುಂಡಾ? ಅಂದ್‌ದ್ ಯಾನ್ ಕೇಂಡೆ.</verse>
				<verse number="21">ಆಂಡ ಪೌಲು ಚಕ್ರವರ್ತಿನ ಕೈತಲ್‌ ಪೋಪಿನ ಮುಟ್ಟ ಎನನ್ ಕಾಪೊಡು ಪನ್ನಗ ಯಾನ್ ಆಯನ್ ಕೈಸರನ ಕೈತಲ್‌ಗ್ ಕಡಪುಡುನೆಂಗೆ ಕಾಪೆರೆ ಅಪ್ಪಣೆ ಕೊರಿಯೆ,” ಅಂದ್‌ದ್ ಪಂಡೆ.</verse>
				<verse number="22">ಐಕ್ ಅಗ್ರಿಪ್ಪೆ, “ಆ ನರಮಾನಿ ಪನ್ಪಿನೆನ್ ಕೇನಿಯೆರೆ ಎಂಕ್‌ಲಾ ಮನಸುಂಡು,” ಅಂದ್‌ದ್ ಪನ್ನಗ ಫೆಸ್ತೆ, “ಎಲ್ಲೆ ಕೇನೊಲಿ,” ಅಂದ್‌ದ್ ಪಂಡೆ.</verse>
				<verse number="23">ಮನದಾನಿ ಅಗ್ರಿಪ್ಪೆ ರಾಜೆಲಾ ಬೆರ್ನಿಕೆ ಬಾರಿ ಆಡಂಭರೊಡು ಬತ್ತ್‌ದ್ ಸಹಸ್ರಾಧಿಪತಿಲೆನ ಬೊಕ್ಕ ಊರುದ ಮುಖ್ಯಸ್ಥೆರ್‌ನ ಒಟ್ಟುಗು ಕಚೇರಿದ ಉಲಯಿ ಸೇರ್‌ನಗ ಫೆಸ್ತೆ ಅಪ್ಪಣೆ ಕೊರಿನೆಡ್ದ್ ಪೌಲುನ್ಲಾ ಲೆತ್ತೊಂದು ಬತ್ತೆರ್.</verse>
				<verse number="24">ಫೆಸ್ತೆ ಇಂಚ ಪಂಡೆ, “ಅಗ್ರಿಪ್ಪ ರಾಜೆರೇ, ನಮ ಒಟ್ಟುಗು ಸೇರ್ದ್ ಬೈದಿನ ಮಾತ ಜನೊಕುಲೇ, ಈ ನರಮಾನಿನ್ ತೂವೊಂದುಲ್ಲರತ್ತ. ಇಂಬ್ಯನ ಸಂಗತಿಡ್ ಯೆಹೂದ್ಯೆರ್ ಮಾತೆರ್ಲಾ ಇಂಬೆ ನನ ಮಿತ್ತ್ ಬದುಕೆರೆ ಬಲ್ಲಿ ಅಂದ್‌ದ್ ಅರಬಾಯಿ ದೀವೊಂದು ಯೆರೂಸಲೇಮುಡ್ಲಾ ಕೈಸರೆಯಡ್ಲಾ ಎನನ್ ಕೇನೊಂಡೆರ್.</verse>
				<verse number="25">ಇಂಬೆ ಮರಣ ದಂಡನೆದ ಶಿಕ್ಷೆಗ್ ಕಾರಣವಾಯಿನಂಚಿತ್ತಿನೆನ್ ಮಲ್ತ್‌ದಿಜೆ ಅಂದ್‌ದ್ ಎಂಕ್ ಗೊತ್ತಾಂಡ್. ಆಯೆನೇ ಚಕ್ರವತಿಗ್ ವಿಜ್ಞಾಪನೆ ಮಲ್ತೊಂಡಿನೆಡ್ದ್ ಇಂಬ್ಯನ್ ಕಡಪುಡಿಯೆರೆ ತೀರ್ಮಾನ ಮಲ್ತೆ.</verse>
				<verse number="26">ಇಂಬ್ಯನ ಸಂಗತಿಡ್ ಚಕ್ರವರ್ತಿಗ್ ಬರೆವೆರೆ ದಾಲಾ ಇಜ್ಜಿ, ಅಂಚಾಯಿನೆಡ್ದ್ ವಿಚಾರಣೆ ಆಯಿ ಬೊಕ್ಕ ಬರೆಯೆರೆ ದಾಲಾಂಡಲಾ ತಿಕ್ಕು ಅಂದ್‌ದ್ ಇಂಬ್ಯನ್ ನಿಕ್ಲೆ ಎದುರು ಮುಖ್ಯವಾದ್ ಅಗ್ರಿಪ್ಪ ರಾಜೆರೇ ಎದುರು ಉಂತಾದೆ.</verse>
				<verse number="27">ದಾಯೆಗ್ ಪಂಡ, ಒರಿ ಸೆರೆಮನೆಟುಪ್ಪುನಾಯನ ಮಿತ್ತುಪ್ಪು ಆರೋಪೊಲೆನ್ ತೋಜಾವಂದೆ ಆಯನ್ ಕಡಪುಡ್ದು ಕೊರ್ಪಿನವು ಸಮ ಅತ್ತ್ ಪಂಡ್ದ್ ಎಂಕ್ ತೋಜ್ಂಡ್.”</verse>
			</chapter>
			<chapter number="26">
				<verse number="1">ಅಗ್ರಿಪ್ಪೆ ಪೌಲುಗು, “ಇತ್ತೆ ಈ ನಿನ ಪರವಾದ್ ಪಾತೆರಿಯೆರೆ ನಿಕ್ಕ್ ಅಪ್ಪಣೆ ಉಂಡು,” ಪಂಡ್ದ್ ಪನ್ನಗ ಪೌಲು ಕೈ ದೆರ್ತ್ತ್‌ದ್ ಉತ್ತರ ಕೊರಿಯೆ.</verse>
				<verse number="2">“ರಾಜಾ ಅಗ್ರಿಪ್ಪ, ಯೆಹೂದ್ಯೆರ್ ಎನ ಮಿತ್ತ್ ಪಾಡ್ದಿನ ಅಪವಾದೊಲೆಗ್‌ ಯಾನ್ ಉತ್ತರ ಕೊರ್ಪೆ. ಇನಿ ನಿನ ಎದುರು ಉಂತೊಂದು ಪ್ರತಿವಾದ ಮಲ್ಪುನ ಈ ಸಂದರ್ಭ ತಿಕ್ಕ್‌ದಿನೆಕ್ಕ್ ಎನನ್ ಭಾಗ್ಯವಂತೆ ಅಂದ್‌ದ್ ಎನ್ನೊನುವೆ.</verse>
				<verse number="3">ದಾಯೆಗ್ ಪಂಡ ಯೆಹೂದ್ಯೆರೆಡ ಉಪ್ಪುನ ಮಾತ ಆಚಾರೊಲೆನ್ಲಾ ತರ್ಕೊಲೆನ್ಲಾ ಈ ಸರಿಯಾದ್ ತೆರಿದುಲ್ಲ. ಎನ ಪಾತೆರೊಲೆನ್ ತಾಳ್ಮೆಡ್ದ್ ಕೇನೊಡು ಅಂದ್‌ದ್ ನಟ್ಟೊನ್ವೆ.</verse>
				<verse number="4">“ಎನ ಇಡೀ ಜೀವಮಾನದ ವಿಷಯೊಲು ಮಾತ ಯೆಹೂದ್ಯೆರೆಗ್ ಗೊತ್ತುಂಡು. ಯಾನ್ ಎಲ್ಲಿಡ್ದಿಂಚಿ ಬದ್‌ಕ್‌ದಿನ ರೀತಿ ಎನ ದೇಶೊಡ್ಲಾ ಯೆರೂಸಲೇಮುಡ್ಲಾ ಮಾತೆರೆಗ್ ತೆರಿದೇ ಉಂಡು;</verse>
				<verse number="5">ನಮ ಧರ್ಮೊಡಿತ್ತಿನ ಪೂರ ಮತೊನು ಕೈಕೊಂದು ಪರಿಸಾಯೆ ಆದ್ ನಡತೊಂಡೆ ಅಂದ್‌ದ್ ದುಂಬುಡ್ದಿಂಚಿಲಾ ಅಕುಲು ತೆರಿದೆರ್; ಸಾಕ್ಷಿ ಪನಿಯೆರೆ ಅಕ್ಲೆಗ್ ಮನಸಿತ್ತ್‌ಂಡ ಪನೊಲಿ</verse>
				<verse number="6">ಇತ್ತೆಲಾ ದೇವೆರ್ ನಮ ಪಿತೃಲೆಗ್ ಮಲ್ತ್‌ದಿನ ವಾಗ್ದಾನೊನು ಯಾನ್ ನಿರೀಕ್ಷೆ ಮಲ್ತೊಂದಿತ್ತಿನೆಡ್ದಾವರನೇ ಯಾನ್ ಇತ್ತೆ ವಿಚಾರಣೆಗ್ ಗುರಿ ಆದುಲ್ಲೆ.</verse>
				<verse number="7">ನಮ ಪದ್ರಾಡ್ ಗೋತ್ರದಾಕುಲು ರಾತ್ರೆ ಪಗೆಲ್ ಸೇವೆ ಮಲ್ತೊಂದು ಆ ವಾಗ್ದಾನದ ಫಲ ತಿಕ್ಕು ಇನ್ಪಿ ನಿರೀಕ್ಷೆಡ್ ಉಲ್ಲೆರ್; ರಾಜೆರೇ, ಆ ನಿರೀಕ್ಷೆದ ವಿಷಯೊಡೇ ಯೆಹೂದ್ಯೆರ್ ಎನ ಮಿತ್ತ್ ದೋಷಾರೋಪಣೆ ಮಲ್ಪುವೆರ್.</verse>
				<verse number="8">ದೇವೆರ್ ಸೈತಿನಾಕುಲೆನ್ ಲಕ್ಕಾವೆಡ ಉಂದು ನಂಬೆರೆ ತೀರಂದಿ ಸಂಗತಿ ಅಂದ್‌ದ್ ನಿಕುಲು ದಾಯೆಗ್ ತೀರ್ಪು ಮಲ್ಪುವರ್?</verse>
				<verse number="9">“ನಜರೇತ್‌ದ ಯೇಸು ಪುದರ್‌ಗ್ ವಿರೋಧಾದ್ ನಡಪೊಡು ಅಂದ್‌ದ್ ಯಾನ್ಲಾ ಯೋಚನೆ ಮಲ್ತೊಂದಿತ್ತೆ.</verse>
				<verse number="10">ಯೆರೂಸಲೇಮುಡು ಅಂಚೆನೇ ಮಲ್ತೆ. ಪ್ರಧಾನಯಾಜಕೆರೆಡ್ದ್ ಅಧಿಕಾರೊನು ದೆತ್ತೊಂದು ದೇವಜನೊಕುಲೆಡ್ ಮಸ್ತ್ ಜನೊನು ಸೆರೆಮನೆಟ್ ಪಾಡಾದ್ ಅಕ್ಲೆ ಮರಣದ ತೀರ್ಪಾನಗ ಎನ ಒಪ್ಪಿಗೆನ್ ತೆರಿಪಾಯೆ.</verse>
				<verse number="11">ಮಾತ ಸಭಾಮಂದಿರೊಲೆಡ್ಲಾ ಯಾನ್ ದಿಂಜ ಸರ್ತಿ ಅಕ್ಲೆನ್ ದಂಡ್ಯಾದ್ ಅಕ್ಲೆಡ್ದ್ ದೂಷಣೆದ ಪಾತೆರೊಲೆನ್ ಪನ್ಪಾವುನೆಟ್ ಪ್ರಯತ್ನೊನು ಮಲ್ತೆ. ಉಂದು ಅತ್ತಂದೆ ಪರ ಊರುಗು ಪೋದು ಭಂಗ ಕೊರಿಯೆ.</verse>
				<verse number="12">“ಈ ಉದ್ದೇಶೊಡ್ದೇ ಯಾನ್ ಪ್ರಧಾನಯಾಜಕೆರೆಡ್ದ್ ಅಧಿಕಾರಲಾ ಅಪ್ಪಣೆಲಾ ದೆತ್ತೊಂದು ದಮಸ್ಕದ ಸಾದಿಡ್ ಪೋವೊಂದುಪ್ಪುನಗ</verse>
				<verse number="13">ಓ ರಾಜಾ, ಮಧ್ಯಾಹ್ನದ ಪೊರ್ತುಡು ಪರಲೋಕೊಡ್ದು ಉಂಡಾಯಿನ ಒಂಜಿ ಬೊಲ್ಪು ಎನ ಸುತ್ತಲಾ ಎನ ಒಟ್ಟುಗು ಪ್ರಯಾಣ ಮಲ್ತೊಂದಿತ್ತಿನಾಕುಲೆನ ಸುತ್ತಲಾ ಸೂರ್ಯಡ್ದ್‌ಲಾ ಹೆಚ್ಚಿತ್ತಿನ ಬೊಲ್ಪುನು ತೂಯೆ.</verse>
				<verse number="14">ಎಂಕುಲು ಮಾತ ನೆಲಕ್ ಬೂರ್ನಗ, ‘ಸೌಲಾ, ಸೌಲಾ, ಎಂಕ್ ದಾಯೆಗ್ ಭಂಗ ಕೊರ್ಪ? ಮುಳ್ಳುದ ಕೋಲುಗು ತೊರ್ಪುನವು ನಿಕ್ಕ್ ಕಷ್ಟ,’ ಅಂದ್‌ದ್ ಇಬ್ರಿಯ ಭಾಷೆಡ್ ಪನ್ಪಿನ ಸ್ವರೊನು ಕೇಂಡೆ.</verse>
				<verse number="15">ಅಪಗ ಯಾನ್, ‘ಕರ್ತವಾ, ಈ ಏರ್?’ ಪನ್ನಗ ಕರ್ತವೆ ಪಂಡಿನಿ, ‘ಈ ಏರೆಗ್ ಭಂಗ ಕೊರ್ಪನಾ, ಅವ್ವೇ ಯೇಸು ಯಾನ್.</verse>
				<verse number="16">ಈ ಲಕ್ಕ್‌ದ್ ಉಂತುಲ. ನಿನನ್ ಎನ ಸೇವಕೆ ಆದ್‌ಲಾ ಸಾಕ್ಷಿ ಆದ್‌ಲಾ ನೇಮಕ ಮಲ್ಪೆರೆಗಾದೇ ನಿಕ್ಕ್ ತೋಜಿದ್ ಬತ್ತೆ. ಯಾನ್ ಇತ್ತೆಲಾ ನನ ದುಂಬು ನಿಕ್ಕ್ ಕೊರಿಯೆರೆ ಉಪ್ಪುನ ದರ್ಶನೊಲೆಡ್ಲಾ ನಿಕ್ಕ್ ತೋಜಿದ್ ಬತ್ತಿನ ಸಂಗತಿಡ್ಲಾ ಈ ಸಾಕ್ಷಿ ಆದುಪ್ಪೊಡು.</verse>
				<verse number="17">ನಿನನ್ ಯಾನ್ ಇಸ್ರಾಯೇಲ್ ಜನೊಕುಲೆನ ಕೈಡ್ದ್‌ಲಾ ಪಿದಯಿದ ಜನೊಕುಲೆನ ಕೈಡ್ದ್‌ಲಾ ಬುಡ್ಪಾವೆ.</verse>
				<verse number="18">ಅಕುಲು ಕತ್ತಲೆಡ್ದ್ ಬೊಲ್ಪುಗ್ಲಾ ಸೈತಾನ ಅಧಿಕಾರೊಡ್ದು ದೇವೆರೆ ಕಡೆಕ್ಲಾ ತಿರ್ಗ್‌ದ್ ಎನಡ ನಂಬಿಕೆ ದೀಪಿನೆಡ್ದ್ ಪಾಪ ಪರಿಹಾರೊನ್ಲಾ ಪರಿಶುದ್ಧೆರ್ ಆಯಿನಾಕುಲೆಡೊಪ್ಪ ಪಾಲ್‌ಲಾ ತಿಕ್ಕುಲೆಕ್ಕ ಅಕ್ಲೆನ ಕಣ್ಣ್‌ಲೆನ್ ಜಪ್ಪೊಡು ಅಂದ್‌ದ್ ಅಕ್ಲೆನ ಕೈತಲ್‌ ನಿನನ್ ಕಡಪುಡ್ವೆ,’ ಅಂದ್‌ದ್ ಪಂಡೆ.</verse>
				<verse number="19">“ಅಂಚಾಯಿನೆಡ್ದ್ ಅಗ್ರಿಪ್ಪ ರಾಜೆರೇ, ಪರಲೋಕೊಡ್ದು ಎಂಕ್ ಉಂಡಾಯಿನ ಆ ದರ್ಶೊನೊಗು ಯಾನ್ ಎದುರುಂತುಜಿ</verse>
				<verse number="20">ಸುರುಟ್ಟು ದಮಸ್ಕದಾಕುಲೆಗ್, ಐಡ್ದ್ ಬೊಕ್ಕ ಯೆರೂಸಲೇಮುಡ್ಲಾ ಯೂದಾಯದ ಮಾತ ಪ್ರದೇಶಡುಪ್ಪುನಾಕುಲೆಗ್ಲಾ ಪಿದಯಿದ ಜನೊಕುಲೆಗ್ಲಾ ನಿಕುಲು ದೇವೆರೆ ಕೈತಲ್‌ ತಿರ್ಗ್‌ದ್ ಪಶ್ಚಾತಾಪೊಗು ಯೋಗ್ಯವಾಯಿನ ಕಾರ್ಯೊಲೆನ್ ಮಲ್ಪೊಡು ಅಂದ್‌ದ್ ಸಾರಿಯೆ.</verse>
				<verse number="21">ಈ ಕಾರಣೊಡ್ದು ಯೆಹೂದ್ಯೆರ್ ದೇವಾಲಯೊಡು ಎನನ್ ಪತ್ತ್‌ದ್ ಕೆರಿಯೆರೆ ಪ್ರಯತ್ನ ಮಲ್ತೆರ್.</verse>
				<verse number="22">ಆಂಡ ಯಾನ್ ದೇವೆರೆ ಸಹಾಯೊಡ್ದು ಈ ದಿನತ ಮುಟ್ಟಲಾ ಮೂಲು ಉಂತುದು ಎಲ್ಯಾಕ್ಲೆಗ್ಲಾ ಮಲ್ಲಾಕ್ಲೆಗ್ಲಾ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ. ಪ್ರವಾದಿಲುಲಾ ಮೋಶೆಲಾ ದುಂಬು ತೆರಿಪಾದಿನ ಸಂಗತಿಲೆನೇ ಪನೊಂದುಲ್ಲೆ ಬೇತೆ ದಾಲಾ ಪನ್ಪಿನಾಯೆ ಅತ್ತ್.</verse>
				<verse number="23">ಈ ಸಂಗತಿಲು ದಾನೆ ಪಂಡ್ಂಡ ಕ್ರಿಸ್ತೆ ಭಂಗ ಪಡೆದ್ ಸೈಯೊಡಾಂಡ್, ಬೊಕ್ಕ ಆಯೆ ಸೈತಿನಾಕುಲೆ ಉಲಯಿಡ್ದ್ ಸುರುತ್ತಾಯೆ ಆದ್ ಲಕ್ಕ್‌ದ್ ಯೆಹೂದ್ಯೆರೆಗ್ಲಾ ಪಿದಯಿದ ಜನೊಕುಲೆಗ್ಲಾ ಬೊಲ್ಪುನು ಸಾರಿಯುನಾಯೆ ಆಯೆ.”</verse>
				<verse number="24">ಇಂಚ ಪೌಲು ವಾದ ಮಲ್ಪೊಂದುಪ್ಪುನಗ ಫೆಸ್ತೆ ಮಲ್ಲ ಸ್ವರೊಟ್ಟು ಪೌಲೋ, “ಈ ಮರ್ಲಾತ ಈ ಕಲ್ಪುನ ಶಾಸ್ತ್ರೊಲು ನಿನನ್ ಮರ್ಲ್ ಮಲ್ತ್ಂಡ್,” ಅಂದ್‌ದ್ ಪಂಡೆ.</verse>
				<verse number="25">ಐಕ್ ಪೌಲು, “ಶ್ರೀಮಾನ್ ಮಹಾ ಫೆಸ್ತೆ, ಯಾನ್ ಮರ್ಲ್ ಆತಿಜಿ; ಸ್ವಸ್ಥ ಬುದ್ಧಿ ಇತ್ತಿನಾಯೆ ಆದ್ ಸತ್ಯವಾಯಿನ ಪಾತೆರೊಲೆನ್ ಪನೊಂದುಲ್ಲೆ.</verse>
				<verse number="26">ಅಗ್ರಿಪ್ಪ ರಾಜೆ ಈ ಸಂಗತಿಲೆನ್ ತೆರಿದಿನಾಯೆ; ಆಯನ ಎದುರು ಧೈರ್ಯೊಡು ಪಾತೆರ್‌ವೆ. ಉಂದೆಕ್ಲೆಡ್ ಒಂಜಾಂಡಲಾ ಆಯಗ್ ಗೊತ್ತಿಜ್ಜಾಂದಿನವು ಇಜ್ಜಿ ಅಂದ್‌ದ್ ನಂಬುವೆ. ದಾಯೆಗ್ ಪಂಡ ಉಂದು ಕೋಂಟುಡು ನಡತಿನ ಸಂಗತಿ ಅತ್ತ್.</verse>
				<verse number="27">ಅಗ್ರಿಪ್ಪ ರಾಜೆರೆ, ಪ್ರವಾದಿಲೆನ್ ಈ ನಂಬುವನಾ? ಈ ನಂಬುವ ಪಂಡ್ದ್ ಯಾನ್ ತೆರಿದೆ.”</verse>
				<verse number="28">ಐಕ್ ಅಗ್ರಿಪ್ಪೆ ಪೌಲುಗು ಪನ್ಪೆ, “ಒಂತೆ ಸಮಯೊಡೇ ಎನನ್ ಪುಸ್‌ಲಾಯಿಸಿದ್ ಕ್ರೈಸ್ತೆ ಮಲ್ಪುವನಾ?” ಅಂದ್‌ದ್ ಕೇಂಡೆ.</verse>
				<verse number="29">ಐಕ್ ಪೌಲು ಉತ್ತರ ಕೊರ್ದು, “ಒಂತೆ ಸಮಯೊಡ್ದಾವಡ್ ದಿಂಜ ಸಮಯೊಡ್ದಾವಡ್, ಈ ಮಾತ್ರ ಅತ್ತಂದೆ, ಈ ಪೊರ್ತು ಎನ ಪಾತೆರೊಲೆನ್ ಕೇನುನಾಕುಲು ಮಾತೆರ್ಲಾ ಎನ ಲೆಕ್ಕನೆ ಆವೊಡು ಅಂದ್‌ದ್ ದೇವೆರೆಗ್ ಪ್ರಾರ್ಥನೆ ಮಲ್ತೊಂದುಲ್ಲೆ ಆಂಡ ಈ ಕೋಳೊಲು ಮಾತ್ರ ನಿಕ್ಲೆಗ್ ತಿಕ್ಕಿಯೆರ್ ಬಲ್ಲಿ,” ಅಂದ್‌ದ್ ಪಂಡೆ.</verse>
				<verse number="30">ಐಡ್ದ್ ಬೊಕ್ಕ ರಾಜೆಲಾ ದೇಶಾಧಿಪತಿಲಾ ಬೆರ್ನಿಕೆಲಾ ಅಕ್ಲೆ ಒಟ್ಟುಗು ಕುಲ್ಲುದಿನಾಕುಲುಲಾ ಲಕ್ಕ್‌ದ್ ಅಂಚಿ ಪೋದು</verse>
				<verse number="31">“ಈ ನರಮಾನಿನ್ ಮರಣದಂಡನೆಗಾವಡ್ ಸೆರೆಮನೆಟ್ ದೀಯೆರೆಗಾವಡ್ ತಕ್ಕದ ಅನ್ಯಾಯ ಒಂಜಿಲಾ ಮಲ್ತ್‌ದಿಜೆ,” ಅಂದ್‌ದ್ ಒರಿ ಒರಿಯಗ್ ಪಾತೆರೊಂಡೆರ್.</verse>
				<verse number="32">ಬೊಕ್ಕ ಅಗ್ರಿಪ್ಪೆ ಫೆಸ್ತಗ್ ಪನ್ಪೆ, “ಈ ನರಮಾನಿ ಚಕ್ರವರ್ತಿಡ್ದೇ ನ್ಯಾಯ ಆವೊಡು ಅಂದ್‌ದ್ ಪನ್ತಿಜಾಂಡ ಆಯನ್ ಬುಡ್ತೊಲಿ,” ಅಂದ್‌ದ್ ಪಂಡೆ.</verse>
			</chapter>
			<chapter number="27">
				<verse number="1">ಎಂಕುಲು ಇತಾಲ್ಯಗ್ ಕಡಲ್ದ ಪ್ರಯಾಣ ಮಲ್ತೊಂದು ಪೋವೊಡು ಅಂದ್‌ದ್ ತೀರ್ಮಾನ ಆಯಿನೆಡ್ದ್ ಬೊಕ್ಕ ಪೌಲುನ್ಲಾ ಬೇತೆ ಕೆಲವು ಕೈದ್‌ಡಿತ್ತಿನಾಕುಲೆನ್ಲಾ ಚಕ್ರವರ್ತಿನ ಪಟಾಲ್‌ಗ್ ಸೇರ್ದಿನ ಜೂಲಿಯಸ್ ಪನ್ಪಿ ಒರಿ ಶತಾಧಿಪತಿಗ್ ಒಪ್ಪಿಸಾಯೆರ್.</verse>
				<verse number="2">ಎಂಕುಲು ಒಂಜಿ ಕಪ್ಪಲ್‌ನ್ ಮಿತ್ತಾರ್ದ್ ಅಲ್ತ್‌ಡ್ದ್ ಪಿದಾಡಿಯ. ಆ ಕಪ್ಪಲ್ ಅದ್ರಮಿತ್ತಿಡ್ದ್ ಬತ್ತ್‌ದಿತ್ತ್ಂಡ್ ಬೊಕ್ಕ ಆಸ್ಯ ಪ್ರದೇಶದ ಕರಾವಳಿದ ಜಾಗೊಲೆಗ್ ಪೋವರೆ ತಯಾರ್ ಆದಿತ್ತ್ಂಡ್. ಮಕೆದೋನ್ಯೊಗು ಸೇರ್ದಿನ ಥೆಸ್ಸಲೋನಿಕದ ಅರಿಸ್ತಾರ್ಕೆ ಎಂಕುಲೆ ಒಟ್ಟುಗು ಇತ್ತೆ.</verse>
				<verse number="3">ಮನದಾನಿ ಎಂಕುಲು ಸೀದೋನುಗು ಮುಟ್ಟಿಯ. ಜೂಲಿಯಸ್ ಪೌಲುಗು ದಯೆ ತೋಜಾವುನಾಯೆ ಆದಿತ್ತೆ. ಆಯನ್ ಸ್ನೇಹಿತೆರೆ ಕೈತಲ್‌ ತಿಕ್ಕರೆ ಸ್ವತಂತ್ರ ಕೊರಿಯೆ. ಈ ಸ್ನೇಹಿತೆರ್ ಆಯಗ್ ಬೋಡಿತ್ತಿನೆನ್ ಒದಗಾಯೆರ್.</verse>
				<verse number="4">ಅಲ್ತ್‌ಡ್ದ್ ಪಿದಾಡ್ನಗ ಎದುರು ಗಾಳಿ ಬೀಜೊಂದಿತ್ತಿನೆಡ್ ಕುಪ್ರ ದ್ವೀಪೊದ ಮದೆಟ್ ತೇಲಾದ್ ಬತ್ತ.</verse>
				<verse number="5">ಕಿಲಿಕ್ಯಗ್ಲಾ ಪಂಫುಲ್ಯಗ್ಲಾ ಎದುರುಡಿತ್ತಿನ ಕಡಲ್‌ನ್ ದಾಂಟ್‌ದ್ ಲುಕೀಯ ಸೀಮೆಡುಪ್ಪು ಮುರಗ್ ಬತ್ತ.</verse>
				<verse number="6">ಅಲ್ಪ ಅಲೆಕ್ಸಾಂದ್ರಿಯೊಡ್ದು ಬೈದಿನ ಇತಾಲ್ಯಗ್ ಪೋವೊಂದಿತ್ತಿನ ಕಪ್ಪಲ್‌ನ್ ಶತಾಧಿಪತಿ ತೂದು ಎಂಕ್ಲೆನ್ ಐಟ್ಟ್ ಮಿತ್ತರ್ಪಾಯೆ.</verse>
				<verse number="7">ಕೆಲವು ದಿನ ಬಾರಿ ನಿಧಾನೊಡು ಪ್ರಯಾಣ ಮಲ್ತ. ಎದುರು ಗಾಳಿ ಭಯಂಕರ ಬೀಜೊಂದು ಇತ್ತಿನೆಡ್ದಾವರ ಎಂಕುಲು ಕ್ನೀದೊಗು ಮುಟ್ಟಿಯೆರೆ ಕಷ್ಟ ಆಂಡ್. ಆ ಮಾರ್ಗೊಡು ನನ ದುಂಬು ಪ್ರಯಾಣ ಮಲ್ಪರೆ ಎಂಕ್ಲೆಗ್ ಸಾದ್ಯ ಆಯಿಜಿ. ಆಯಿನೆಡ್ದಾವರ ಎಂಕುಲು ಸಲ್ಮೋನೆ ಮುಟ್ಟ ಇತ್ತಿನ ಕ್ರೇತ್ ದ್ವೀಪದ ದಕ್ಷಿಣ ಭಾಗೊಗು ಕಡಲ್ದ ಪ್ರಯಾಣ ಮಲ್ತ.</verse>
				<verse number="8">ಎಂಕುಲು ಬಾರೀ ಪ್ರಯಾಸೊಡು ಕರಾವಳಿಡೇ ನೌಕಾಯಾನ ಮಲ್ತ. ಅಲ್ತ್‌ಡ್ದ್ ಎಂಕುಲು ಪೊರ್ಲು ಬಂದರ್ ಪನ್ಪಿ ಜಾಗ್‌ಗ್ ಬತ್ತ. ಲಸಾಯ ಪಟ್ಟಣ ಐತ ಮುಟ್ಟೊಡೇ ಇತ್ತ್ಂಡ್.</verse>
				<verse number="9">ಇಂಚ ಸುಮಾರ್ ಸಮಯ ಕರಿದಿತ್ತ್‌ಂಡ್. ಮಲ್ಲ ಉಪವಾಸದ ದಿನ ಕಡತ್ ಪೋದಿತ್ತ್‌ಂಡ್, ಕಡಲ್ ಪ್ರಯಾಣ ಮಲ್ಪುನ ಪೋಡಿಗೆದವು ಆಯಿನೆಡ್ದ್</verse>
				<verse number="10">ಪೌಲು ಅಕ್ಲೆಡ, “ಜನೊಕುಲೇ, ಈ ಪ್ರಯಾಣೊಡು ನಂಕ್ ಬಾರಿ ತೊಂದರೆ ಉಂಡು ಅಂದ್‌ದ್ ಎಂಕ್ ತೋಜುಂಡು. ಕಪ್ಪಲ್‌ಗ್ ಬೊಕ್ಕ ಕಪ್ಪಲ್‌ಡಿತ್ತಿನ ಸಾಮಾನುಲು ಪೂರ ನಷ್ಟ ಅವು, ನಮ ಪ್ರಾಣಲಾ ನಾಶಾದ್ ಪೋವರೆ ಸಾದ್ಯ ಉಂಡು,” ಅಂದ್‌ದ್ ಎಚ್ಚರಿಕೆ ಕೊರಿಯೆ.</verse>
				<verse number="11">ಪೌಲು ಪಂಡಿನ ಪಾತೆರೊಗು ಶತಾಧಿಪತಿ ಹೆಚ್ಚಾದ್ ಲಕ್ಷ ಕೊರಂದೆ ನಾವಿಕನ ಬೊಕ್ಕ ಕಪ್ಪಲ್‌ದ ಧನಿನ ಪಾತೆರೊನು ನಂಬಿಯೆ.</verse>
				<verse number="12">ಈ ಬಂದರ್ ಚಳಿಕಾಲೊಡು ಉಂತಿಯೆರೆ ಯೋಗ್ಯದಾಂತಿನವು ಆದಿತ್ತಿನೆಡ್ದ್, ಹೆಚ್ಚಾಯಿನಾಕುಲು ದುಂಬು ಪ್ರಯಾಣ ಮಲ್ತ್‌ದ್ ಫೊಯಿನಿಕ್ಸೆಗ್ ಪೋದು ಅಲ್ಪನೇ ಚಳಿಕಾಲೊನು ಕಳೆವೊಡು ಪಂಡ್ದ್ ಅಭಿಪ್ರಾಯ ಮಲ್ತೆರ್. ಉಂದು ಕ್ರೇತ್ ದ್ವೀಪೊಡು ತೆನ್‌ಕಯಿ-ಪಡ್ಡಯಿ ಬೊಕ್ಕ ಬಡಕಯಿ-ಪಡ್ಡಯಿಗ್ ಮೋನೆ ಮಲ್ತ್‌ದಿನ ಬಂದರ್ ಆದಿತ್ತ್ಂಡ್.</verse>
				<verse number="13">ತೆನ್‌ಕಯಿದ ಗಾಳಿ ಮೆಲ್ಲೊಡು ಬೀಜ್‌ನಗ ಎಂಕ್ಲೆಗ್ ಬೋಡಾಪಿನ ಗಾಳಿ ತಿಕ್ಕ್ಂಡ್ ಅಂದ್‌ದ್ ಎನ್ನ್‌ದ್ ಲಂಗರ್ ದೆರ್ತ್ತ್‌ದ್ ಕ್ರೇತ್ ದ್ವೀಪದ ಕರಾವಳಿಡೇ ಕಡಲ್ದ ಪ್ರಯಾಣ ಮಲ್ತ.</verse>
				<verse number="14">ಒಂತೆ ಪೊರ್ತು ಆಯಿ ಬೊಕ್ಕ ಬಡಕಯಿ-ಮೂಡಯಿ ಪನ್ಪಿ ಸುಳಿಗಾಳಿ ಆ ದ್ವೀಪದ ಮಿತ್ತ್‌ಡ್ದ್ ದರ್ತ್‌ಂಡ್.</verse>
				<verse number="15">ಆ ದರ್ಪಾಟೊಗು ಕಪ್ಪಲ್ ತಿಕೊಂದು ಗಾಳಿಗ್ ಎದುರು ಉಂತೆರೆ ಆವಂದೆ ಗಾಳಿ ನೂಕೊಂದು ಪೋಂಡು.</verse>
				<verse number="16">ಕ್ಲೌಡ ಪನ್ಪಿನ ಒಂಜಿ ಎಲ್ಯ ದ್ವೀಪೊದ ಬರಿಯೆ ಪೋವೊಂದುಪ್ಪುನಗ ಕಪ್ಪಲ್‌ಡಿತ್ತಿನ ಓಡೊನು ಬಾರಿ ಕಷ್ಟೊಡು ಉಲಯಿ ದೀಯ.</verse>
				<verse number="17">ಅವೆನ್ ಮಿತ್ತ್ ದೆರ್ತಿ ಬೊಕ್ಕ ಬಲ್ಲ್‌ಡ್ ಕಪ್ಪಲ್‌ದ ಅಡಿ ಬಿಗಿತೆರ್. ಐಡ್ದ್ ಬೊಕ್ಕ ಸುರ್ತಿಸ್ ಪನ್ಪಿನ ಕಲ್ಲ್‌ಪೊಯ್ಯೆ ತಿಕ್ಕ್‌ದ್ ಬೂರುಂಡು ಅಂದ್‌ದ್ ಪೋಡಿದ್ ಪಾಯಿನ್ ಸಡಿಲ್ ಮಲ್ತ್‌ದ್ ಗಾಳಿ ನೂಕೊಂದು ಪೋಂಡು.</verse>
				<verse number="18">ಮನದಾನಿ ಗಾಳಿ ಜೋರಾದ್ ಬೀಜಿನೆಡ್ದ್ ಜನೊಕುಲು ಕಪ್ಪಾಲ್‌ಡಿತ್ತಿನ ಸಾಮಾನುಲೆನ್ ಪೂರ ದಕ್ಕೊಂದಿತ್ತೆರ್.</verse>
				<verse number="19">ಮೂಜನೇ ದಿನೊಟು ಕಪ್ಪಲ್‌ದ ಅಡ್ಡ ಮರೊನು ಕೈಡ್ದೇ ಪಿದಯಿ ದೆರ್ತ್ತ್ ಪಾಡಿಯೆರ್.</verse>
				<verse number="20">ದಿಂಜ ದಿನ ಮುಟ್ಟ ಸೂರ್ಯೆ ಆವಡ್ ನಕ್ಷತ್ರೊಲಾವಡ್ ಎಂಕ್ಲೆಗ್ ತೋಜಂದೆ ಮಲ್ಲ ಬಿರುಗಾಳಿಲಾ ಎಂಕುಲೆ ಮಿತ್ತ್ ದರ್ತಿನೆಡ್ದ್ ತಪ್ಪಾವೊನ್ವ ಪನ್ಪಿನ ನಿರೀಕ್ಷೆಲಾ ಆನಿಡ್ದ್ ಇಜ್ಜಾಂದೆ ಪೋಂಡು.</verse>
				<verse number="21">ಅಕುಲು ದಿಂಜ ದಿನ ವಣಸ್‌ದಾಂತೆ ಇತ್ತಿ ಬೊಕ್ಕ ಪೌಲು ಅಕ್ಲೆ ನಡುಟು ಉಂತೊಂದು “ಜನೊಕುಲೇ ನಿಕುಲು ಕ್ರೇತೊಡ್ದು ಪಿದಾಡ್ದ್ ಈ ಕಷ್ಟನಷ್ಟೊಲೆಗ್ ಗುರಿ ಆವಂದಿಲೆಕ್ಕ ಎನ ಪಾತೆರೊನು ಕೇನೊಡಿತ್ತ್‌ಂಡ್.</verse>
				<verse number="22">ಇತ್ತೆ ನಿಕುಲು ಧೈರ್ಯೊಡು ಉಪ್ಪೊಡು ಅಂದ್‌ದ್ ನಿಕ್ಲೆಗ್ ಪನ್ಪೆ; ಕಪ್ಪಲ್ ನಷ್ಟ ಆದ್ ಪೋವು ಆಂಡ ಒರಿಯನಲಾ ಪ್ರಾಣ ನಷ್ಟ ಆವಂದ್.</verse>
				<verse number="23">ಯಾನ್ ವಾ ದೇವೆರೆನ್ ನಂಬುದು ಸೇವೆ ಮಲ್ಪುವೆನಾ ಅವ್ವೇ ದೇವೆರೆಡ್ದ್ ಒರಿ ದೂತೆ ಕೋಡೆ ರಾತ್ರೆಡ್ ಎನ ಕೈತಲ್‌ ಉಂತುದು,</verse>
				<verse number="24">‘ಪೌಲು ಪೋಡ್ಯಡ, ಈ ಚಕ್ರವರ್ತಿನ ಎದುರು ಉಂತೊಡು; ಉಂದತ್ತಂದೆ ನಿನ ಒಟ್ಟುಗು ಈ ಕಪ್ಪಲ್‌ಡ್ ಪ್ರಯಾಣ ಮಲ್ಪುನಾಕುಲೆನ ಮಾತೆರೆನ ಪ್ರಾಣೊನು ದೇವೆರ್ ದಯ ತೋಜಾದ್ ಒರಿಪಾದೆ,’ ಅಂದ್‌ದ್ ಪಂಡೆ.</verse>
				<verse number="25">ಅಂಚಾಯಿನೆಡ್ದ್ ಜನೊಕುಲೆ, ಧೈರ್ಯವಾದುಪ್ಪುಲೆ. ಎಂಕ್ ಪಂಡಿಲೆಕ್ಕನೇ ಆಪುಂಡು ಅಂದ್‌ದ್ ದೇವೆರೆನ್ ನಂಬುವೆ.</verse>
				<verse number="26">ಆಂಡ ನಮ ಒವ್ವಾಂಡ ಒಂಜಿ ದ್ವೀಪದ ಬರಿ ಸೇರೊಡು,” ಅಂದ್‌ದ್ ಪಂಡೆ.</verse>
				<verse number="27">ಪದ್ನಾಲನೆ ರಾತ್ರೆ ಬತ್ತಿ ಬೊಕ್ಕ ಎಂಕುಲು ಆದ್ರಿಯ ಕಡಲ್ಡ್ ಅಂಚಿ ಇಂಚಿ ತೆಲಾವೊಂದು ಪೋವೊಂದುಪ್ಪುನಗ ಸುಮಾರ್ ನಡು ರಾತ್ರೆಡ್ ನಾವಿಕೆರ್ ಬತ್ತ್‌ದ್ ಭೂಮಿಗ್ ಕೈತಲಾಯೆರ್ ಅಂದ್‌ದ್ ಎನ್ನ್‌ದ್</verse>
				<verse number="28">ಲಪ್ಪು ಗುಂಡುನು ಜಪುಡಾದ್ ನಲ್ಪ ಮೀಟರ್ ಉದ್ಧ ಅಂದ್‌ದ್ ತೂಯೆರ್. ಒಂತೆ ಪೊರ್ತುಡ್ದು ಬೊಕ್ಕ ಅಕುಲು ಕುಡ ಲಪ್ಪು ಗುಂಡುನು ಜಪುಡ್ದು ತೂನಗ ಮುಪ್ಪ ಮೀಟರ್ ಉದ್ಧ ಅಂದ್‌ದ್ ಗೊತ್ತಾಂಡ್.</verse>
				<verse number="29">ಪಾದೆದ ಜಾಗ್‌ನ್ ತಾಂಟುವ ಅಂದ್‌ದ್ ಪೋಡಿದ್ ಕಪ್ಪಲ್‌ದ ಪಿರವುಡ್ದು ನಾಲ್ ಲಂಗರ್ ಬುಡ್ದು ಏಪ ಬೊಲ್ಪಾವು ಅಂದ್‌ದ್ ಪ್ರಾರ್ಥನೆ ಮಲ್ತೊಂದಿತ್ತೆರ್.</verse>
				<verse number="30">ಆಂಡ ನಾವಿಕೆರ್ ದುಂಬುಡು ಲಂಗರ್ ಪಾಡೊಡು ಪನ್ಪಿನ ನೆವೊಡ್ದು ಓಡೊನು ಕಡಲ್ಡ್ ಜಪುಡಾದ್ ಕಪ್ಪಲ್‌ನ್ ಬುಡ್ದು ತಪ್ಪಾವೊನಿಯೆರೆ ಪ್ರಯತ್ನ ಮಲ್ಪುನಗ</verse>
				<verse number="31">ಪೌಲು ಶತಾಧಿಪತಿಗ್ಲಾ ಸಿಪಾಯಿಲೆಗ್ಲಾ, “ಮೊಕುಲು ಕಪ್ಪಲ್‌ಡ್ ಉಂತುಜೆರ್ಡ ನಿಕ್ಲೆ ಪ್ರಾಣ ಒರಿಯಂದ್,” ಅಂದ್‌ದ್ ಪಂಡೆ.</verse>
				<verse number="32">ಅಪಗ ಸಿಪಾಯಿಲು ಓಡದ ಬಲ್ಲ್‌ನ್ ಕಡ್ತ್‌ದ್ ಅವು ಬೂರ್ದು ಪೋಪಿಲೆಕ್ಕ ಮಲ್ತೆರ್.</verse>
				<verse number="33">ಪುಲ್ಯ ಆಪಿನಾತೆಗ್ ಪೌಲು ದಾಲಾಂಡಲಾ ತಿನಸ್ ದೆತ್ತೊನೊಡು ಅಂದ್‌ದ್ ಮಾತೆರ್‌ನ್ಲಾ ಒತ್ತಾಯ ಮಲ್ತೆ, “ನಿಕುಲು ಈ ಪೊರ್ತುಗು ಪದ್ನಾಲ್ ದಿನೊಡ್ದಿಂಚಿ ಕಾತೊಂದು ತಿನಸ್ ದಾಲಾ ದೆತ್ತೊನಂದೆ ಉಪವಾಸೊಡೇ ಉಪ್ಪುನೆಡ್ದಾದ್</verse>
				<verse number="34">ತಿನಸ್ ದೆತ್ತೊನೊಡು ಅಂದ್‌ದ್ ನಿಕ್ಲೆಡ ಕೇನೊನ್ವೆ. ಉಂದು ನಿಕ್ಲೆನ ಜೀವ ರಕ್ಷಣೆಗ್ ಅಗತ್ಯ. ನಿಕ್ಲೆನ ಏರೆನಲಾ ತರೆಡ್ದ್ ಒಂಜಿ ಕುಜಲ್‌ಲಾ ತಾಲಂದ್,” ಪಂಡೆ.</verse>
				<verse number="35">ಅಂಚ ಪಂಡ್ದ್ ಒಂತೆ ರೊಟ್ಟಿನ್ ದೆತ್ತೊಂದು ಮಾತೆರೆನ ಎದುರುಡು ದೇವೆರೆನ್ ಸುಗಿತ್‌ದ್ ಅವೆನ್ ಪೊಲ್ತುದು ತಿನಿಯೆರೆ ಸುರು ಮಲ್ತೆ.</verse>
				<verse number="36">ಅಪಗ ಮಾತೆರ್ಲಾ ಧೈರ್ಯ ಮಲ್ತೊಂದು ಅಕುಲುಲಾ ತಿನಸ್‌ನ್ ದೆತ್ತೊಂದು ತಿಂದೆರ್.</verse>
				<verse number="37">ಎಂಕುಲು ಮಾತ ಕೂಡ್ದು ಆ ಕಪ್ಪಲ್‌ಡ್ ಇರ್ನೂತ ಎಳ್ಪತ್ತಾಜಿ ಜನ ಇತ್ತ.</verse>
				<verse number="38">ಬೋಡಾಯಿನಾತ್ ತಿಂದಿ ಬೊಕ್ಕ ಗೋದಿನ್ ಕಡಲ್‌ಗ್ ದಕ್ಕ್‌ದ್ ಕಪ್ಪಲ್‌ನ್ ಹಗುರ ಮಲ್ತೆರ್.</verse>
				<verse number="39">ಪುಲ್ಯ ಆಯಿ ಬೊಕ್ಕ ಆ ದೇಶದ ಗುರ್ತ ತಿಕ್ಕಿಜಿ. ಆಂಡ ಪೊಯ್ಯೆದ ದಡತ್ತ ಮಿತ್ತ್ ಕಪ್ಪಲ್‌ನ್ ಕೊನುಪೋಯೆರೆ ಆಲೋಚನೆ ಮಲ್ತೆರ್.</verse>
				<verse number="40">ಬೊಕ್ಕ ಅಕುಲು ಲಂಗರ್‌ಲೆನ್ ಕಡ್ತ್‌ದ್ ಕಡಲ್‌ಡೇ ಬುಡ್ದು ಚುಕ್ಕಾಣಿದ ಬಲ್ಲ್‌ಲೆನ್ ಗಿರ್ತ್‌ದ್ ಮಲ್ಲ ಕುಂಟುನು ಗಾಳಿಗ್ ದೆರ್ತ್ತ್ ಕಟ್ಟ್‌ದ್ ಕಪ್ಪಲ್‌ನ್ ಕರೆಕ್ ನಡಪಾಯೆರ್.</verse>
				<verse number="41">ಆಂಡ ನಡುಟು ಪೊಯ್ಯೆದ ರಾಶಿಗ್ ಕಪ್ಪಲ್ ತಾಂಟ್‌ದ್ ಕಪ್ಪಲ್‌ಗ್ ದುಂಬು ಪೋವರೆ ಆಯಿಜಿ ಬೊಕ್ಕ ಮಲ್ಲ ಮಲ್ಲ ಶೆರೆಕ್ಕುಲು ಕಪ್ಪಲ್‌ದ ಪಿರವುಡು ಲಂಗರ್‌ಗ್ ಹಾಕ್‌ದ್ ಕಪ್ಪಲ್ ಚೂರ್ಚೂರ್ ಆಯೆರೆ ಸುರು ಆಂಡ್. ಪಿರವುದ ಮರ್ಗಿಲ್ ಅಲೆತ್ತ ರಭಸೊಗು ದರಿಯೊಂದು ಬತ್ತ್ಂಡ್.</verse>
				<verse number="42">ಆಂಡ ಬಂದಿವಾನೆರೆಡ್ ಕೆಲೆವೆರ್ ನೀಂದ್‌ದ್ ತಪ್ಪಾವೊನುವೆರ್ ಅಂದ್‌ದ್ ಸಿಪಾಯಿಲು ಅಕ್ಲೆನ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೆರ್.</verse>
				<verse number="43">ಆಂಡ ಶತಾಧಿಪತಿ ಪೌಲುನು ಒರಿಪಾವೊಡು ಅಂದ್‌ದ್ ಆಸೆ ಮಲ್ತ್‌ದ್ ಅಕ್ಲೆನ ಆಲೋಚನೆಲೆನ್ ಬೊಡ್ಚಿ ಅಂದ್‌ದ್ ನೀಂದೆರೆ ಆಪಿನಾಕಲು ಕಪ್ಪಲ್‌ಡ್ದ್ ಲೈತ್‌ದ್ ಬೇಗನೇ ಕಡಲ್ದ ಕರೆಕ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ.</verse>
				<verse number="44">ಬಂದಿವಾನೆರೆಡ್ ಕೆಲೆವೆರ್ ಪಲಯಿದ ಮಿತ್ತ್, ಕೆಲೆವೆರ್ ಕಪ್ಪಲ್‌ದ ತುಂಡುದ ಮಿತ್ತ್ ನೀಂದ್‌ದ್ ಪೋವೊಡು ಅಂದ್‌ದ್ ಅಪ್ಪಣೆ ಕೊರಿಯೆ. ಈ ರೀತಿಡ್ ಮಾತೆರ್ಲಾ ಜಾಗ್ರತೆಡ್ ಸೈಯಂದೆ ಕರೆಕ್ ಸೇರಿಯೆರ್.</verse>
			</chapter>
			<chapter number="28">
				<verse number="1">ಎಂಕುಲು ಬಚವು ಆಯಿ ಬೊಕ್ಕ ಪೊರ್ಲುಡು ಕಡಲ್ದ ಕರೆಕ್ ಮುಟ್ಟಿಯ, ಅವು ಮೆಲೀತೆ ದ್ವೀಪ ಅಂದ್‌ದ್ ಎಂಕ್ಲೆಗ್ ತೆರಿಂಡ್.</verse>
				<verse number="2">ಆಂಡ ದ್ವೀಪದ ಜನೊಕುಲು ಎಂಕ್ಲೆಗ್ ಕನಿಕರ ತೋಜಾಯೆರ್, ಎಂಚಂದ್ಂಡ ಅಪಗ ಬರ್ಸಲಾ ಚಳಿಲಾ ಇತ್ತಿನೆಡ್ದ್ ತೂ ಪೊತ್ತಾದ್ ಎಂಕ್ಲೆನ್ ಮಾತೆರೆನ್ಲಾ ಸೇರಾವೊಂಡೆರ್.</verse>
				<verse number="3">ಪೌಲು ಒಂಜಿ ಕಟ್ಟ್ ಕನಕ್ ಪೆಜ್ಜಿದ್ ಕನತ್‌ದ್ ಅವೆನ್ ತೂಕು ಪಾಡ್ನಗ ಆ ಬೆಚ್ಚದ ಉರಿಕ್ಕ್ ಒಂಜಿ ವಿಷತ ಉಚ್ಚು ಪಿದಾಯಿ ಬತ್ತ್‌ದ್ ಆಯನ ಕೈನ್ ಸುತೊಂಡು.</verse>
				<verse number="4">ಆ ಉಚ್ಚು ಆಯನ ಕೈಡ್ದ್ ನೇಲೊಂದುಪ್ಪುನೆನ್ ದ್ವೀಪದ ಜನೊಕುಲು ತೂದು, “ಈ ನರಮಾನಿ ಮಾನ್ಯ ಕೆರ್ಪಿನಾಯೆ ಆದುಪ್ಪೊಡು. ಕಡಲ್‌ಡ್ದ್ ತಪ್ಪಾವೊಂದು ಬತ್ತೆಡಲಾ ನ್ಯಾಯ ಇಂಬ್ಯನ್ ಬದ್‌ಕೆರೆ ಬುಡ್ಪುಜಿ,” ಅಂದ್‌ದ್ ಅಕ್ಲೆ ಉಲಯಿ ಪಾತೆರೊಂಡೆರ್.</verse>
				<verse number="5">ಆಂಡ ಪೌಲು ಆ ಉಚ್ಚುನು ತೂತ ಉಲಯಿ ಕುಡ್ತ್‌ದ್ ಬುಡಿಯೆ; ಆಯಗ್ ದಾಲಾ ತೊಂದರೆ ಆಯಿಜಿ.</verse>
				<verse number="6">ಆಯನ ಮೆಯಿ ಬಾತ್‌ದ್ ಇತ್ತಿನಂಚೆನೆ ಬೂರ್ದು ಸೈಪೆ ಅಂದ್‌ದ್ ಎನ್ನ್ಂಡಲಾ ಸಮಯ ಸುಮಾರ್ ಆಂಡಲಾ ಆಯನ ಜೀವೊಗು ದಾಲಾ ಕೇಡ್ ಆವಂದಿನೆಡ್ದ್ ಅಕುಲು ಬೇತೆ ಆಲೋಚನೆ ಮಲ್ತ್‌ದ್, “ಉಂಬೆ ಒರಿ ದೇವೆರೇ ಆದುಪ್ಪೊಡು,” ಅಂದ್‌ದ್ ಪನೊಂಡೆರ್.</verse>
				<verse number="7">ಆ ದ್ವೀಪೊದ ಒರಿ ಗುರ್ಖಾರೆ ಆಯಿನ ಪೋಪ್ಲಿಯೆ ಪನ್ಪಿನಾಯಗ್ ಭೂಮಿ ಇತ್ತ್ಂಡ್. ಎಂಕ್ಲೆನ್ ಸೇರ್ಸಾವೊಂದು ಮೂಜಿ ದಿನ ಎಡ್ಡೆಡ್ ಸತ್ಕಾರ ಮಲ್ತೆ.</verse>
				<verse number="8">ಪೋಪ್ಲಿಯನ ಅಮ್ಮೆ ಜ್ವರೊಡ್ದುಲಾ ನೆತ್ತಿಕಂಡೆಡ್ದ್‌ಲಾ ನೆಗರೊಂದು ಜೆತ್ತ್‌ದಿತ್ತೆ. ಪೌಲು ಆಯನ ಕೈತಲ್‌ ಪೋದು ಆಯಗ್ ಪ್ರಾರ್ಥನೆ ಮಲ್ತ್‌ದ್ ಆಯನ ಮಿತ್ತ್ ಕೈ ದೀದ್ ಆಯನ್ ಗುಣ ಮಲ್ತೆ.</verse>
				<verse number="9">ಉಂದಾಯಿ ಬೊಕ್ಕ ಆ ದ್ವೀಪೊಡಿತ್ತಿನ ಬಾಕಿದ ಸೀಕ್‌ದಾಕುಲುಲಾ ಪೌಲು ಕೈತಲ್‌ ಬತ್ತ್‌ದ್ ಗುಣ ಆಯೆರ್.</verse>
				<verse number="10">ಆ ದ್ವೀಪೊಡಿತ್ತಿನ ಜನೊಕುಲು ಎಂಕ್ಲೆನ ಸತ್ಕಾರ ಮಲ್ತೆರ್. ಎಂಕುಲು ಬುಡ್ದು ಪಿದಾಡ್ನಗ ಎಂಕ್ಲೆಗ್ ಬೋಡಾಯಿನ ವಸ್ತುಲೆನ್ ಕನತ್‌ದ್ ಕಪ್ಪಲ್‌ಡ್ ದೀಯೆರ್.</verse>
				<verse number="11">ಮೂಜಿ ತಿಂಗೊಲೊಡ್ದು ಬೊಕ್ಕ ಅಲೆಕ್ಸಾಂದ್ರಿಯೊಡ್ದು ಬತ್ತಿನ ಒಂಜಿ ಕಪ್ಪಲ್‌ನ್ ಮಿತ್ತಾರ್ದ್ ಪಿದಾಡಿಯ. ಆ ಕಪ್ಪಲ್ ಚಳಿಕಾಲೊಡು ಮೆಲೀತೆ ದ್ವೀಪೊಡೇ ಉಂತೊಂದಿತ್ತ್‌ಂಡ್. ಆ ಕಪ್ಪಲ್‌ದ ಎದುರು ಮರ್ಗಿಲ್‌ಡ್ ಕಾಸ್ಟರ್ ಬೊಕ್ಕ ಪೊಲಕ್ಸ್ ಪನ್ಪಿ ಅಮರ್ ದೇವತೆಲೆನ ಗುರ್ತ ಇತ್ತ್ಂಡ್.</verse>
				<verse number="12">ಎಂಕುಲು ಸುರಕೂಸ್ ಪಟ್ಟಣೊಗು ಬತ್ತ್‌ದ್ ಅವುಲು ಮೂಜಿ ದಿನ ಇತ್ತ.</verse>
				<verse number="13">ಅಲ್ತ್‌ಡ್ದ್ ಸುತ್ತಾದ್ ಪೋದು ರೇಗಿಯೊಗು ಸೇರಿಯ. ಒಂಜಿ ದಿನ ಆಯಿ ಬೊಕ್ಕ ತೆನ್‌ಕಯಿದ ಗಾಳಿ ಲಕ್ಕಿನೆಡ್ದ್ ರಡ್ಡನೆ ದಿನೊಟು ಪೊತಿಯೋಲುಗು ಬತ್ತ.</verse>
				<verse number="14">ಅಲ್ಪ ಕೆಲವು ಕ್ರೈಸ್ತ ಸಹೋದ್ರೆರ್ ತಿಕ್ಕಿಯೆರ್; ಅಕುಲು ಎಂಕ್ಲೆನ್ ಒಂಜಿ ವಾರ ಎಂಕುಲೆ ಒಟ್ಟುಗು ಉಂತೊಡು ಅಂದ್‌ದ್ ನಟ್ಟೊಂಡೆರ್. ಐಡ್ದ್ ಬೊಕ್ಕ ರೋಮುಗು ಬತ್ತ.</verse>
				<verse number="15">ಅಲ್ಪ ಇತ್ತಿ ಸಹೋದ್ರರೆಗ್ ಎಂಕ್ಲೆನ ಸುದ್ಧಿ ತಿಕ್ಕ್ಂಡ್ ಎಂಕ್ಲೆನ್ ಎದುಕೊನಿಯೆರೆ ಕೆಲೆವೆರೆನ್ ಅಪ್ಪೀಯ ಪೇಂಟೆ ಮುಟ್ಟಲಾ ಕೆಲೆವೆರ್ ತ್ರಿಚತ್ರ ಪನ್ಪಿ ಜಾಗ್‌ದ ಮುಟ್ಟಲಾ ಬತ್ತೆರ್. ಪೌಲು ಅಕ್ಲೆನ್ ತೂದು ದೇವೆರೆನ್ ಸುಗಿತ್‌ದ್ ಧೈರ್ಯ ಪಡೆಯೆ.</verse>
				<verse number="16">ಎಂಕುಲು ರೋಮುಗು ಬತ್ತಿ ಬೊಕ್ಕ ಪೌಲುನು ಪ್ರತ್ಯೇಕಾದ್ ಉಪ್ಪರೆ ಅಪ್ಪಣೆ ಕೊರಿಯೆರ್. ಆಂಡ ಆಯನ್ ಕಾಪೆರೆ ಒರಿ ಸೈನಿಕೆ ಆಯನ ಒಟ್ಟುಗು ಇತ್ತೆ.</verse>
				<verse number="17">ಮೂಜಿ ದಿನ ಆಯಿ ಬೊಕ್ಕ ಪೌಲು ಯೆಹೂದ್ಯೆರೆ ಮುಖ್ಯಸ್ಥೆರೆನ್ ತನ ಕೈತಲ್‌ ಲೆಪ್ಪುಡಾಯೆ. ಅಕುಲು ಸೇರಿ ಬೊಕ್ಕ ಆಯೆ ಅಕ್ಲೆಗ್, “ಸಹೋದ್ರೆರೇ ಯಾನ್ ಎಂಕ್ಲೆನ ಜನೊಕುಲೆಗ್ಲಾ ನಮ ಪಿತೃಲೆನ ಆಚಾರೊಲೆಗ್ಲಾ ವಿರೋಧಾದ್ ದಾಲಾ ಮಲ್ಪಂದಿನಾಯೆ ಆಂಡಲಾ ಯೆರೂಸಲೇಮುಡ್ದು ರೋಮಾಯೆರ್‌ನ ಕೈಕ್ ಕೈದ್‌ಡುಪ್ಪುನಾಯಲೆಕ್ಕ ಒಚ್ಚಿದ್ ಕೊರ್ತೆರ್.</verse>
				<verse number="18">ಅಕುಲು ಎನನ್ ವಿಚಾರಣೆ ಮಲ್ತ್‌ದ್ ಎನಡ ಮರಣ ದಂಡನೆ ಶಿಕ್ಷೆಗ್ ಕಾರಣವಾಯಿನವು ದಾಲಾ ಇಜ್ಜಂದಿನೆಡ್ದ್ ಎನನ್ ಬುಡ್ಪಾವೊಡು ಅಂದ್‌ದ್ ಇತ್ತೆರ್.</verse>
				<verse number="19">ಐಕ್ ಯೆಹೂದ್ಯೆರ್ ಅಡ್ಡಿ ಪಾತೆರ್‌ನೆಡ್ದ್ ಯಾನ್ ಚಕ್ರವರ್ತಿನ ಎದುರುಡು ಕೇನೊನ್ವೆ ಅಂದ್‌ದ್ ಪನೊಡೆ ಆಂಡ್, ಎನ ದೇಶದಾಕುಲೆನ ಮಿತ್ತ್ ದೋಷರೋಪಣೆ ಮಲ್ಪೊಡು ಪನ್ಪಿನ ಅಭಿಪ್ರಾಯೊಡು ಅವೆನ್ ಪನ್ತ್‌ಜಿ.</verse>
				<verse number="20">ಈ ಕಾರಣೊಡ್ದು ಯಾನ್ ನಿಕ್ಲೆನ್ ತೂದು ಪಾತೆರೊಡು ಅಂದ್‌ದ್ ಲೆಪ್ಪುಡಾಯೆ. ಇಸ್ರಾಯೇಲ್‌ದ ಜನೊಕುಲೆನ ನಿರೀಕ್ಷೆಗಾದ್ ಈ ಸರಪೊಳಿಡ್ ಕಟ್ಟ್‌ದುಲ್ಲೆ,” ಅಂದ್‌ದ್ ಪಂಡೆ.</verse>
				<verse number="21">ಅಕುಲು ಆಯಡ, “ಎಂಕ್ಲೆಗ್ ಯೂದಾಯೊಡ್ದು ಕಾಕಜಿ ಬೈದಿಜಿ; ಸಹೋದ್ರರೆಡ್ ಏರಾಂಡಲಾ ಬತ್ತ್‌ದ್ ನಿನ ಸಂಗತಿಡ್ ದಾಲ ಪಡಿಕೆಂತಿನೆನ್ ತೆರಿಪಾದಿಜೆರ್ ಪಾತೆರಿದಿನಿಲಾ ಇಜ್ಜಿ.</verse>
				<verse number="22">ಆಂಡ ನಿನ ಅಭಿಪ್ರಾಯೊನು ನಿನಡ್ದೆ ಕೇನುನ ಸರಿ ಅಂದ್‌ದ್ ತೋಜುಂಡು. ಜನೊಕುಲು ಮಾತ ಕಡೆಟ್ಲಾ ವಿರೋಧಾದ್ ಈ ಪಂಗಡದ ವಿಷಯೊನು ಪನ್ಪಿನವು ಮಾತ್ರ ಎಂಕ್ಲೆಗ್ ತೆರಿದುಂಡು,” ಅಂದ್‌ದ್ ಪಂಡೆರ್.</verse>
				<verse number="23">ಅಕುಲು ಆಯಗ್ ಒಂಜಿ ದಿನೊನು ತೆರಿಪಾದ್ ಮಸ್ತ್ ಜನ ಆಯನ ಬುಡಾರೊಗು ಬತ್ತೆರ್. ಅಕುಲು ಕಾಂಡೆಡ್ದ್ ಬೈಯ ಮುಟ್ಟಲಾ ದೇವೆರೆ ರಾಜ್ಯದ ವಿಷಯೊಲೆನ್ ಪ್ರಮಾಣ ಆದ್ ಸಾಕ್ಷಿ ಪನೊಂದು ಮೋಶೆನ ನ್ಯಾಯಕಟ್ಟ್ ಬೊಕ್ಕ ಪ್ರವಾದಿಲೆ ಗ್ರಂಥೊನು ಆಧಾರ ಮಲ್ತೊಂದು ಯೇಸುನ ಸಂಗತಿಡ್ ಅಕ್ಲೆಗ್ ಅರ್ಥ ಆಪಿಲೆಕ್ಕ ಪಂಡೆ.</verse>
				<verse number="24">ಆಯೆ ಪಂಡಿನ ಪಾತೆರೊಲೆಗ್ ಕೆಲೆವೆರ್ ಒಪ್ಪಿಯೊಂಡೆರ್. ಕೆಲೆವೆರ್ ನಂಬಂದೆ ಪೋಯೆರ್.</verse>
				<verse number="25">ಅಕ್ಲೆಡ್ ಒಗ್ಗ್‌ಟ್ಟ್ ಇಜ್ಜಂದೆ ಉಪ್ಪುನಗ ಪೌಲು ಅಕ್ಲೆಗ್ ಇಂಚ ಪಂಡೆ, “ಪರಿಶುದ್ಧಾತ್ಮೆ ಪ್ರವಾದಿ ಯೆಶಾಯನ ಬಾಯಿಡ್ದ್</verse>
				<verse number="26">ನಿಕ್ಲೆನ ಪಿತೃಲೆಗ್ ಬೋಡಿತ್ತಿನೆನ್ ಪಂಡಿನಿ ದಾನೆಂದ್ಂಡ, ‘ಈ ಜನೊಕುಲೆ ಕೈತಲ್‌ ಪೋದು ಇಂಚ ಪನ್ಲ, ನಿಕುಲು ಕೆಬಿ ಕೊರ್ದು ಕೇಂಡಲಾ ಅರ್ಥ ಮಲ್ತೊನುಜರ್; ಕಣ್ಣಾರೆ ತೂಂಡಲಾ ತೆರಿಯೊನುಜರ್ ಅಂದ್‌ದ್ ಪನ್ಲ.</verse>
				<verse number="27">ದಾಯೆಗಂದ್ಂಡ, ಈ ಜನೊಕುಲೆ ಉಡಲ್ ಕಲ್ಲಾತ್ತ್‌ಂಡ್, ಮೊಕ್ಲೆ ಕೆಬಿ ಮಂದ ಆತ್ಂಡ್, ಮೊಕ್ಲೆ ಕಣ್ಣ್ ಮುಚ್ಚೊಂದೆರ್. ತನ್ಕುಲು ಕಣ್ಣ್‌ಡ್ ತೂದು, ಕೆಬಿಟ್ ಕೇಂಡ್ದ್ ಉಡಲ್‌ಡ್ ತೆರಿದ್, ಎನ ಕಡೆಕ್ಕ್ ತಿರ್ಗಂದೆ ಯಾನ್ ಅಕ್ಲೆನ್ ಗುಣ ಮಲ್ಪಂದೆ ಉಪ್ಪುಲೆಕ್ಕ ಮಲ್ತೊಂದೆರ್ ಪನ್ಪಿನವೇ.’</verse>
				<verse number="28">“ಅಂಚಾಯಿನೆಡ್ದ್ ದೇವೆರೆಡ್ದಾಯಿನ ಈ ರಕ್ಷಣೆ ಪಿದಯಿದ ಜನೊಕುಲೆಗ್ ಆದುಂಡು. ಅಕುಲು ಐಕ್ ಕೆಬಿ ಕೊರುವೆರ್,” ಅಂದ್‌ದ್ ನಿಕ್ಲೆಗ್ ಸರಿಯಾದ್ ತೆರಿದುಪ್ಪಡ್.</verse>
				<verse number="29">ಆಯೆ ಈ ಪಾತೆರೊಲೆನ್ ಪಂಡಿ ಬೊಕ್ಕ ಅಕುಲು ಪಿದಾಡ್ದ್ ಪೋಯೆರ್. ತನ್ಕುಲೆ ಉಲಯಿ ಮಸ್ತ್ ತರ್ಕ ಮಲ್ತೆರ್.</verse>
				<verse number="30">ಐಡ್ದ್ ಬೊಕ್ಕ ಆಯೆ ತಾನೇ ಬಾಡಿಗೆದ ಇಲ್ಲಡ್ ಪೂರ ರಡ್ಡ್ ವರ್ಸ ಇತ್ತ್‌ದ್ ತನ ಕೈತಲ್‌ ಬರ್ಪಿನಾಕುಲೆಗ್ ಮಾತೆರ್‌ನ್ಲಾ ಸೇರಾವೊಂದಿತ್ತೆ.</verse>
				<verse number="31">ವಾ ಅಡ್ಡಿದಾಂತೆ ದಿಂಜ ಧೈರ್ಯೊಡು ದೇವೆರೆ ರಾಜ್ಯೊನು ಸಾರಿಯೊಂದು ಕರ್ತವ ಯೇಸು ಕ್ರಿಸ್ತನ ಸಂಗತಿಡ್ ಬೋಧನೆ ಮಲ್ತೊಂದಿತ್ತೆ.</verse>
			</chapter>
		</book>
		<book number="45">
			<chapter number="1">
				<verse number="1">ಯಾನ್ ಪೌಲು, ಯೇಸು ಕ್ರಿಸ್ತೆ ದಾಸೆಲಾ ಅಪೊಸ್ತಲೆ ಆವೆರೆ ಲೆಪ್ಪು ಇತ್ತಿನಾಯೆಲಾ ದೇವೆರೆ ಸುವಾರ್ತೆನ್ ಸಾರಿಯೆರೆ ನೇಮಕ ಆತಿನಾಯೆಲಾ ಆದುಲ್ಲೆ.</verse>
				<verse number="2">ಆ ಸುವಾರ್ತೆನ್ ಸಾರಿದ್ ತೆರಿಪಾವೆ ಪಂಡ್ದ್ ದೇವೆರ್ ಮಸ್ತ್ ಅನಾದಿಕಾಲೊಡ್ದೇ ಪರಿಶುದ್ಧ ಶಾಸ್ತ್ರೊಡು ತನ ಪ್ರವಾದಿಲೆಡ್ದ್ ಪಾತೆರ ಕೊರ್ತೆ.</verse>
				<verse number="3">ಈ ಸುವಾರ್ತೆ ದೇವೆರೆ ಮಗೆ ಆಯಿ ಯೇಸು ಕ್ರಿಸ್ತನ ವಿಷಯೊಡು ಆದುಂಡು. ಅವು ದಾನೆಂದ್ಂಡ ಆಯೆ ನರಮಾನಿ ಆದ್ ದಾವೀದನ ಸಂತಾನೊಡು ಪುಟ್ಟುದು; ಪರಿಶುದ್ಧ ಆತ್ಮೊಗು ಸರಿಯಾದ್ ಸೈತಿ ಬೊಕ್ಕ ಜೀವೊಡು ಲಕ್ಕಾಯಿನ ಮಲ್ಲ ಶಕ್ತಿಡ್ದಾದ್ ದೇವೆರೆ ಮಗೆ ಪಂಡ್ದ್ ತೆರಿದ್ ಬತ್ತಿನಾಯೆ ಆದುಲ್ಲೆ.</verse>
				<verse number="4"></verse>
				<verse number="5">ಆಯ ಪುದರ್‌ಗ್ ಬೋಡಾದ್ ಮಾತ ಪಿದಯಿದ ಜನೊಕುಲು ನಂಬುದು ಒಳಗಾಪಿಲೆಕ್ಕ ಎಂಕುಲು ಆಯಡ್ದ್ ದಯೊನ್ಲಾ ಅಪೊಸ್ತಲೆರೆನ ಉದ್ಯೋಗುನ್ಲಾ ಪಡೆಯ.</verse>
				<verse number="6">ಉಂದೆಟ್ಟ್ ಯೇಸು ಕ್ರಿಸ್ತನಾಕುಲಾವೆರೆ ಲೆಪ್ಪು ಇತ್ತಿ ನಿಕುಲುಲಾ ಸೇರ್ದುಲ್ಲರ್.</verse>
				<verse number="7">ಅಂಚೆನೆ ರೋಮಾಪುರೊಟ್ಟುಪ್ಪು ದೇವೆರೆ ಪ್ರೀತಿದಾಕುಲೆಗ್ಲಾ ಲೆಪ್ಪು ಆತಿ ದೇವಜನೊಕುಲೆಗ್ಲಾ ಮಾತೆರೆಗ್ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="8">ದುಂಬಾದ್ ಪನ್ಪಿನಿ ದಾನೆಂದ್ಂಡ, ನಿಕ್ಲೆನ ನಂಬಿಕೆ ಲೋಕೊಡು ಮಾತ ಕಡೆಟ್ಟ್ ತೆರಿದ್ ಬೈದಿನೆಡ್ದ್ ಯಾನ್ ನಿಕ್ಲೆಗಾದ್ ಯೇಸು ಕ್ರಿಸ್ತಡ್ ಎನ ದೇವೆರೆಗ್ ಉಪಕಾರ ಸಂದಾವೆ.</verse>
				<verse number="9">ಆಯನ ಮಗನ ಸುವಾರ್ತೆನ್ ಸಾರಿಯೊಂದು, ಯಾನ್ ದಿಂಜಿದಿ ಆತ್ಮೊಡು ಆಯ ಸೇವೆನ್ ಮಲ್ತೊಂದುಲ್ಲೆ. ಪ್ರಾರ್ಥನೆ ಮಲ್ಪುನಗ ಮಾತ ಸಮಯೊಡು ಮದಪಂದೆ ನಿಕ್ಲೆಗಾದ್ ನಟ್ಟೊಂದುಲ್ಲೆ ಉಂದೆಕ್ಕ್ ದೇವೆರೆ ಎನ ಸಾಕ್ಷಿ.</verse>
				<verse number="10">ನಿಕ್ಲೆ ಕೈತಲ್‌ ಬರಿಯೆರೆ ದೇವೆರೆ ದಯೊಟು ಎಂಕ್ ಎಂಚಾಂಡಲಾ ಮಾರ್ಗ ಆವೊಡು ಅಂದ್‌ದ್ ನಟ್ಟೊನ್ವೆ.</verse>
				<verse number="11">ಬೊಕ್ಕ ಎನಡ್ದ್ ನಿಕ್ಲೆಗ್ ಆತ್ಮೀಕ ವರ ಕೊರ್ದು ನಿಕ್ಲೆನ್ ದೃಢ ಮಲ್ಪೊಡು ಪಂಡ್ದ್ ಎಂಕ್ ದಿಂಜ ಆಸೆ ಉಂಡು.</verse>
				<verse number="12">ದಾಯೆಗಂದ್ಂಡ ಎನ ನಂಬಿಕೆಡ್ದಾದ್ ನಿಕುಲುಲಾ, ನಿಕ್ಲೆ ನಂಬಿಕೆಡ್ದಾದ್ ಯಾನ್ಲಾ ಒರಿ ಒರಿಯಗ್ ಸಹಾಯ ಪಡೆಯೊಲಿ ಅಂದ್‌ದ್ ಯಾನ್ ಬಯಕುವೆ.</verse>
				<verse number="13">ಸಹೋದ್ರೆರೇ, ಎನ ಬೇಲೆ ಬೇತೆ ಜನಾಂಗೊಲೆಡ್ ಆತ್ಮೀಕ ಆಶೀರ್ವಾದೊಲೆನ್ ಪಡೆಯಿಲೆಕ್ಕ, ನಿಕ್ಲೆಡ್ಲಾ ಆತ್ಮೀಕ ಆಶೀರ್ವಾದೊನು ತಿಕ್ಕುಲೆಕ್ಕ ನಿಕ್ಲೆ ಕೈತಲ್‌ ಬರೊಡು ಪಂಡ್ದ್ ಎನ್ನೊಂಡಲಾ ಇನಿ ಮುಟ್ಟಲಾ ಅಡ್ಡಿ ಬತ್ತ್ಂಡ್ ಪನ್ಪಿನ ವಿಚಾರ ನಿಕ್ಲೆಗ್ ತೆರಿದುಪ್ಪೊಡು ಪಂಡ್ದ್ ಬಯಕುವೆ.</verse>
				<verse number="14">ದಾಯೆಗ್ ಪಂಡ ಗ್ರೀಕೆರೆಗ್ಲಾ, ಬೇತೆ ಜನಾಂಗದಾಕುಲೆಗ್ಲಾ, ಬುದ್ಧಿವಂತೆರೆಗ್ಲಾ, ಬುದ್ಧಿದಾಂತಿನಾಕುಲೆಗ್ಲಾ ಋಣ ಸಂದಾಯ ಮಲ್ಪುನ ಹಂಗ್‌ದಾಯೆ ಆದುಲ್ಲೆ.</verse>
				<verse number="15">ಐಡ್ದಾವರ ರೋಮಾಪುರೊಟ್ಟುಪ್ಪು ನಿಕ್ಲೆಗ್ಲಾ ಸುವಾರ್ತೆನ್ ಸಾರಿಯೆರೆ ಉಮೇದ್‌ಡುಲ್ಲೆ.</verse>
				<verse number="16">ಸುವಾರ್ತೆದ ವಿಚಾರೊಡು ಯಾನ್ ನಾಚಿಗೆ ಮಲ್ಪುನಾಯೆ ಅತ್ತ್. ಅವು ನಂಬುನಾಕುಲೆಗ್ ಮಾತೆರೆಗ್ಲಾ ರಕ್ಷಣೆಗಾದ್ ದೇವೆರೆನ ಬಲ ಆದುಂಡು. ದುಂಬತ್ತ ಯೆಹೂದ್ಯೆರೆಗ್ಲಾ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್ಲಾ.</verse>
				<verse number="17">ಎಂಚಂದ್ಂಡ ದೇವೆರೆಡ್ದ್ ತಿಕ್ಕುನ ನೀತಿ ಸುವಾರ್ತೆಡ್ದ್ ತೋಜಿದ್ ಬರ್ಪುಂಡು. ಅವು ಸುರುಡ್ದು ಕಡೆ ಮುಟ್ಟಲಾ ನಂಬಿಕೆಡ್ದೇ ಆಪುಂಡು. “ನೀತಿವಂತೆ ನಂಬಿಕೆಡ್ದೇ ಬದುಕುವೆ,” ಪನ್ಪಿನ ಶಾಸ್ತ್ರದ ಪಾತೆರಲಾ ಉಂಡತ್ತಾ?</verse>
				<verse number="18">ಕಾರಣ ದಾನೆಂದ್ಂಡ ಸತ್ಯೊನು ತೆರಿಯಂದಿಲೆಕ್ಕ ತಡೆಪಿನ ನರಮಾನಿಲೆನ ಮಾತ ತರತ ಪಾಪದ ಮಿತ್ತ್‌ಲಾ ಅನ್ಯಾಯದ ಮಿತ್ತ್‌ಲಾ ದೇವೆರೆ ಕೋಪ ಪರಲೋಕೊಡ್ದು ತೋಜಿದ್ ಬರ್ಪುಂಡು.</verse>
				<verse number="19">ದಾಯೆಗಂದ್ಂಡ, ದೇವೆರೆ ವಿಚಾರೊಡು ತೆರಿಯೊಡಾಯಿನ ಸಂಗತಿಲೆನ್ ದೇವೆರೆ ಸೃಷ್ಟಿಡ್ ಅಕ್ಲೆಗ್ ತೋಜಾದ್ ಕೊರ್ತಿನೆಡ್ದ್ ಅಕ್ಲೆಗ್ ಅವು ಮಾತಲಾ ಸ್ಪಷ್ಟ ಆತ್ಂಡ್. ಅವೆನ್ ಅಕ್ಲೆಗ್ ದೇವೆರೇ ಸ್ದಷ್ಟಾದ್‌ ತೆರಿಪಾಯೆರ್‌.</verse>
				<verse number="20">ದೇವೆರ್ ಈ ಲೋಕೊನು ಉಂಡು ಮಲ್ದಿನೆಡ್ದಿಂಚಿ ಬಾನೊನ್ಲಾ ಭೂಮಿನ್ಲಾ ತೂತೆರ್. ಆಯನ ತೋಜಂದಿ ಗುಣೊಕುಲು ಅಂದ್ಂಡ ಆಯನ ನಿತ್ಯ ಶಕ್ತಿಲಾ ದೈವತ್ವಲಾ ಮಾತೆರೆಗ್ಲಾ ಸ್ಪಷ್ಟ ಆದುಂಡು; ದೇವೆರ್ ಉಂಡು ಮಲ್ತಿನ ಸಂಗತಿಲೆಡ್ ಅವು ತೆರಿದ್ ಬರ್ಪುಂಡು. ಅಂಚಾಯಿನೆಡ್ದ್ ಆ ಜನೊಕುಲೆಗ್ ವಾ ನೆವನಲಾ ಇಜ್ಜಿ.</verse>
				<verse number="21">ದಾಯೆಗಂದ್ಂಡ ಅಕುಲು ದೇವೆರೆನ್ ತೆರಿದೆರ್ಡಲಾ; ಆಯಗ್ ಸಂದಾವೊಡಾಯಿನ ಮಾನೊನು ಅಕುಲು ಕೊರ್ಪುಜೆರ್; ಆಯ ಉಪಕಾರೊಲೆನ್ ನೆನೆತ್‌ದ್ ಸ್ತುತಿ ಮಲ್ಪುಜೆರ್. ಪಗತೆಗ್ ಅಕ್ಲೆ ಯೋಚನೆಲು ದಡ್ಡ್ ಆದಿತ್ತ್ಂಡ್ ಬೊಕ್ಕ ಅಕ್ಲೆನ ಬುದ್ಧಿದಾಂತಿನ ಉಡಲ್ ಕತ್ತಲೆಡ್ ದಿಂಜಿದುಂಡು.</verse>
				<verse number="22">ತನ್ಕುಲು ಬುದ್ಧಿವಂತೆರ್ ಅಂದ್‌ದ್ ಪನೊಂದು ಮೂರ್ಖೆರಾಯೆರ್.</verse>
				<verse number="23">ಬೊಕ್ಕ ನಾಶಾವಂದಿ ದೇವೆರೆ ಮೈಮೆನ್ ಬುಡ್ದು ಐತ ಪಗತೆಗ್ ನಾಶಾಪಿನ ನರಮಾನಿಲೆನ, ಪಕ್ಕಿಲೆನ, ಪ್ರಾಣಿಲೆನ ಅತ್ತ್‌ಡ ಸರ್ಪೊಲೆನ ಸಮ ಬೂರು ಮೂರ್ತಿಲೆನ್ ಮಲ್ಪುವೆರ್.</verse>
				<verse number="24">ಅಂಚಾದ್ ದೇವೆರ್ ಅಕ್ಲೆನ್ ಅಕ್ಲೆ ಉಡಲ್‌ದ ಆಸೆ ಮಲ್ಪು ದುರಾಶೆಲೆಡ್ ನಡತ್‌ದ್ ತನ್ಕ್‌ಲೆ ಶರೀರೊನು ಪಡ್ಕೆಂತಿನ ಕಾರ್ಯೊಗು ಒಪ್ಪಿಸಾದ್ ಕೊರ್ತೆ.</verse>
				<verse number="25">ಅಕುಲು ಸತ್ಯ ದೇವೆರೆನ್ ಬುಡ್ದು ಸುಳ್ಳುನು ಪತ್ತೊಂದು ಸೃಷ್ಟಿನ್ ಉಂಡು ಮಲ್ತಿನಾಯ ಪಗತೆಗ್ ಆಯಡ್ದ್ ಉಂಡಾಯಿನ ವಸ್ತುಲೆನ್ ಆರಾಧನೆ ಮಲ್ತ್‌ದ್ ಐಕ್ಲೆನ ಸೇವೆ ಮಲ್ಪುವೆರ್. ಸೃಷ್ಟಿಕರ್ತವೆ ಒರಿಯೇ, ಏಪೊಗ್ಲಾ ಪುಗರೊನಿಯೆರೆ ತಕ್ಕದಾಯೆ. ಆಮೆನ್.</verse>
				<verse number="26">ಅಕುಲು ಇಂಚ ಮಲ್ಪುನೆಡ್ದ್ ದೇವೆರ್ ಅಕ್ಲೆನ್ ನಾಚಿಗೆ ಪುಟ್ಟಾವು ದುರಾಶೆಲೆಗ್ ಒಚ್ಚಿದ್ ಕೊರಿಯೆ. ಅಕ್ಲೆ ಪೊಂಜೊವುಲು ತನ್ಕುಲೆ ಶರೀರದ ಸಂಬಂಧೊನು ಶರೀರೊಗು ವಿರೋಧ ಆದುಪ್ಪುನೆಕ್ಕ್ ಪಗತೆರ್.</verse>
				<verse number="27">ಅಂಚೆನೇ ಅಂಜೊವುಲು ಪೊಂಜೊವುನ ಒಟ್ಟುದ ಶರೀರ ಸಮ್ಮಂಧೊಲೆನ್ ಬುಡ್ದು ಒರಿ ಒರಿಯಗ್ ಶರೀರದ ದುರಾಶೆಗ್ ಒಳಗಾಯೆರ್. ಅಂಜೊವುಲು ಅಂಜೊವುಲೆ ಒಟ್ಟುಡು ಸಮ್ಮಂಧ ಮಲ್ತೊಂದು ತನ್ಕುಲೆ ಅಕ್ರಮೊಲೆಗಾದ್ ಬರೊಡಾಯಿನ ಶಿಕ್ಷೆಗ್ ತಕ್ಕದಾಕುಲಾಯೆರ್.</verse>
				<verse number="28">ಉಂದತ್ತಂದೆ ದೇವೆರೆ ಗೇನ ಅಕ್ಲೆಗ್ ಇಷ್ಟದಾಂತಿನೆಡ್ದ್ ದೇವೆರ್ ಅಕ್ಲೆನ್ ಅತ್ತಂದಿನ ನೀಚ ಬುದ್ಧಿಗ್ ಒಪ್ಪಿಸಾದ್ ಕೊರಿಯೆ. ಅಂಚಾದ್ ಅಕುಲು ಬೊಡ್ಚಾಂದಿನ ಕಾರ್ಯೊಲೆನ್ ಮಲ್ತೆರ್.</verse>
				<verse number="29">ಎಂಚಂದ್ಂಡ ಅಕುಲು ಮಾತ ತರತ ಅನ್ಯಾಯ, ದುರ್ಮಾರ್ಗ, ಲೋಬಿತನೊಡ್ದುಲಾ ದುಷ್ಟತನೊಡ್ದುಲಾ, ಕಿಚ್ಚಿ, ಕೊಲೆ, ಲಡಯಿ, ಮೋಸ, ಪಗೆ ಇಂಚಿತ್ತಿನೆಡ್ದ್ ದಿಂಜಿದಿನಕುಲಾಯೆರ್.</verse>
				<verse number="30">ಬೊಕ್ಕ ಅಕುಲು ಕೆಬಿ ಉರ್ಪುನಾಕುಲುಲಾ ಚಾಡಿ ಪನ್ಪಿನಾಕುಲುಲಾ ದೇವೆರೆ ಪಗೆನಾಕುಲುಲಾ ಸೊರ್ಕುದಾಕುಲುಲಾ ಅಹಂಕಾರಿಲುಲಾ ಬಡಾಯಿ ಕೊಚ್ಚುನಾಕುಲುಲಾ ಆದಿತ್ತ್‌ದ್ ಹಾಳ್ ಮಲ್ಪುನೆಕ್ಕಾದೇ ಬಯಕುವೆರ್. ಅಪ್ಪೆಅಮ್ಮನ ಪಾತೆರೊನು ಕೇನಂದಿನಾಕುಲುಲಾ</verse>
				<verse number="31">ಬುದ್ಧಿದಾಂತಿನಾಕುಲುಲಾ ಪಾತೆರೊಗು ತಪ್ಪುನಾಕುಲುಲಾ, ಪ್ರೀತಿದಾಂತಿನಾಕುಲುಲಾ ಕನಿಕರದಾಂತಿನಾಕುಲುಲಾ ಆಯೆರ್.</verse>
				<verse number="32">ಈ ರೀತಿ ಬದುಕುನಾಕುಲೆಗ್ ಮರಣನೇ ಗತಿ; ದೇವೆರೆ ನಿಯಮೊನು ಅಕುಲು ತೆರಿದಿತ್ತ್ಂಡಲಾ ಅಕುಲು ಅವ್ವೆ ತಪ್ಪುನು ಮಲ್ಪುನತ್ತಂದೆ ತಪ್ಪು ಮಲ್ಪುನಾಕುಲೆನ್ಲಾ ಮೆಚ್ಚಾವೆರ್.</verse>
			</chapter>
			<chapter number="2">
				<verse number="1">ಓ ನರಮಾನಿಯೇ, ಈ ಅವ್ವೇ ದುರಬ್ಯಾಸೊಡಿತ್ತ್‌ದ್, ನನೊರಿಯನ್ ತಪ್ಪುಗಾರೆ ಪಂಡ್ದ್ ತೀರ್ಪು ಮಲ್ಪುನ ಉಂದು ಸರಿಯ, ಉತ್ತರ ಪನಿಯೆರೆ ನಿಕ್ಕ್ ಸಾದಿ ಇಜ್ಜಿ. ಎಂಚಂದ್ಂಡ ಬೊಕ್ಕೊರಿಯನ್ ತಪ್ಪುಗಾರೆ ಪಂಡ್ದ್ ನಿನನ್ ಈಯೇ ತಪ್ಪುಗಾರೆ ಪಂಡ್ದ್ ತೀರ್ಪು ಮಲ್ತಿಲೆಕ್ಕ ಆಂಡತ್ತಾ?</verse>
				<verse number="2">ಆಂಡ ಅಂಚಿತ್ತಿನೆನ್ ನಡಪಾವುನಾಕುಲೆನ ಸಂಗತಿಲೆಡ್ ದೇವೆರ್ ಮಲ್ಪುನ ತೀರ್ಪು ಸತ್ಯೊಗು ತಕ್ಕಾದೇ ಉಪ್ಪುಂಡು ಪಂಡ್ದ್ ತೆರಿದ.</verse>
				<verse number="3">ಈ ಬೇತೆಕ್ಲೆನ್ ತೀರ್ಪು ಮಲ್ಪುನು ಎಂಚ? ಅವ್ವೇ ಕ್ರಿಯೊಲೆನ್ ಈಲಾ ಮಲ್ತೊಂದುಲ್ಲತ್ತಾ? ನಿಕ್ಕ್ ದೇವೆರೆನ ದಂಡನೆದ ತೀರ್ಪು ತಪ್ಪಾವೊಲಿ ಪಂಡ್ದ್ ಎನ್ನುವನಾ?</verse>
				<verse number="4">ಆಯನ ಮಲ್ಲ ಕನಿಕರ, ತಾಳ್ಮೆ, ಅಳಿಯಂದಿ ಶಾಂತಿನ್ ಈ ಅಸಡ್ಡೆ ಮಲ್ಪುವನಾ? ದೇವೆರ್ ಕನಿಕರದಾಯೆ ಪಂಡ್ದ್ ಈ ಕಂಡಿತಾ ತೆರಿದ. ದಾಯೆಗಂದ್ಂಡ, ಆಯೆ ನಿನನ್ ಪಶ್ಚಾತಾಪೊಗು ನಡಪುಡಿಯೆರೆ ಪ್ರಯತ್ನ ಮಲ್ಪುವೆ.</verse>
				<verse number="5">ಈ ನಿನ ಅಲ್ಪ ಬುದ್ಧಿನ್ಲಾ ಪಶ್ಚಾತಾಪದಾಂತಿನ ಉಡಲ್‌ನ್ಲಾ ಬೆರಿ ಪತ್ತೊಂದು ಉಪ್ಪುನೆಡ್ದ್ ನಿಕ್ಕಾದ್ ಈಯೇ ದೇವೆರೆ ಕೋಪೊನು ಕೂಡಾವೊಂದುಲ್ಲ. ದೇವೆರೆನ ಕೋಪಲಾ ನೀತಿದ ತೀರ್ಪುಲಾ ತೋಜಿದ್ ಬರ್ಪಿನ ದಿನೊಕುಲು ಬರು.</verse>
				<verse number="6">ಆಯೆ ಒರಿ ಒರಿಯಗ್ ಆಯಾಯನ ಕ್ರಿಯೊಗು ತಕ್ಕ ಪ್ರತಿಫಲೊನು ಕೊರ್ಪೆ.</verse>
				<verse number="7">ಏರ್ ಮೈಮೆ, ಮಾನ, ತಾಳ್ಮೆಲೆನ್ ಪಡೆಯೊಡು ಪಂಡ್ದ್ ಎಡ್ಡೆಂತಿನೆನ್ ಬೇಜಾರ್‌ದಾಂತೆ ಮಲ್ಪುವೆರಾ ಅಕ್ಲೆಗ್ ನಿತ್ಯಜೀವೊನು ಕೊರ್ಪೆ.</verse>
				<verse number="8">ಏರ್ ತನ್ಕುಲೆ ಸ್ವಾರ್ಥೊಡು ಸತ್ಯದೆನ್ ಕೈಕೊನಂದೆ ಅನ್ಯಾಯೊನು ಕೈಕೊನುವೆರಾ, ಅಕ್ಲೆಗ್ ಕೋಪಲಾ ಉಗ್ರಲಾ ಬರ್ಪುಂಡು.</verse>
				<verse number="9">ದುಷ್ಟತನೊನು ನಡಪಾವುನ ಪ್ರತಿಯೊಂಜಿ ನರಮಾನಿಗ್ ಕಷ್ಟಲಾ ಸಂಕಟಲಾ ಬರ್ಪುಂಡು. ದುಂಬತ್ತ ಯೆಹೂದ್ಯೆರೆಗ್ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್.</verse>
				<verse number="10">ಆಂಡ ಎಡ್ಡೆಂತಿನೆನ್ ನಡಪಾವುನ ಒರಿ ಒರಿಯಗ್ ಮೈಮೆಲಾ, ಮಾನಲಾ, ಸಮಾಧಾನಲಾ ಉಂಡಾಪುಂಡು. ದುಂಬತ್ತ ಯೆಹೂದ್ಯೆರೆಗ್ ಐಡ್ದ್ ಬೊಕ್ಕ ಪಿದಯಿದ ಜನೊಕುಲೆಗ್.</verse>
				<verse number="11">ದೇವೆರೆಗ್ ಭೇದಭಾವ ಇಜ್ಜಿ.</verse>
				<verse number="12">ಪಿದಯಿದ ಜನೊಕುಲೆಗ್ ಮೋಶೆನ ನ್ಯಾಯಕಟ್ಟ್ ಇಜ್ಜಿ, ಅಕುಲು ಪಾಪ ಮಲ್ಪುವೆರ್, ನ್ಯಾಯಕಟ್ಟ್‌ದಾಂತಿನಾಕುಲಾದೇ ನಾಶಾದ್ ಪೋಪೆರ್. ಯೆಹೊದ್ಯೆರೆಗ್ ನ್ಯಾಯಕಟ್ಟ್ ಉಂಡು. ಅಕುಲು ಪಾಪ ಮಲ್ಪುವೆರ್ ನಾಯ್ಯಕಟ್ಟ್‌ಗ್ ಸರಿಯಾದೇ ತೀರ್ಪಾವು.</verse>
				<verse number="13">ದಾಯೆಗಂದ್ಂಡ, ನ್ಯಾಯಕಟ್ಟ್ ಕೇಂಡಿನೆಟ್ಟ್ ಏರ್ಲಾ ದೇವೆರೆ ಸನ್ನಿಧಾನೊಡು ನೀತಿವಂತೆರಾಪುಜೆರ್. ಆಂಡ ನ್ಯಾಯಕಟ್ಟ್‌ಡ್ ಪಂಡಿನೆನ್ ಮಲ್ಪುನೆಡ್ದ್ ಅಕುಲು ನೀತಿವಂತೆರ್ ಆಪೆರ್</verse>
				<verse number="14">ಪಿದಯಿದ ಜನೊಕುಲೆಗ್ ನ್ಯಾಯಕಟ್ಟ್ ಇಜ್ಜಿ; ಆಂಡ ನ್ಯಾಯಕಟ್ಟ್‌ಡ್ ಪನ್ತಿನೆನ್ ಅಕುಲು ಸಹಜ ಸ್ವಭಾವೊಡು ಮಲ್ತೆರ್ಡ ಅಕ್ಲೆಡ್ ನ್ಯಾಯಕಟ್ಟ್ ಇಜ್ಜಿಡಲಾ ನ್ಯಾಯಕಟ್ಟ್ ಅಕುಲೇ ಆದುಲ್ಲೆರ್.</verse>
				<verse number="15">ಎಂಚಂದ್ಂಡ ಅಕ್ಲೆನ ಉಡಲ್‌ಡ್ ನ್ಯಾಯಕಟ್ಟ್‌ದ ಅಪ್ಪಣೆ ಬರೆದುಂಡು. ನೆಕ್ಕ್ ಅಕ್ಲೆನ ಉಡಲ್‌ಲಾ ಸಾಕ್ಷಿ ಪನ್ಪುಂಡು. ಅಕ್ಲೆನ ಆಲೋಚನೆಲು ವಾದಿ ಪ್ರತಿವಾದಿಲೆಕ್ಕ, ಉಂದು ತಪ್ಪು, ಉಂದು ತಪ್ಪತ್ತ್, ಪಂಡ್ದ್ ತೋಜಾವುಂಡು.</verse>
				<verse number="16">ಯಾನ್ ಸಾರಿಯುನ ಸುವಾರ್ತೆಡ್ ಪಂಡಿಲೆಕ್ಕ ದೇವೆರ್ ಯೇಸು ಕ್ರಿಸ್ತಡ್ದ್ ನರಮಾನಿಲೆನ ಗುಟ್ಟುಲೆನ್ ಗೊತ್ತು ಮಲ್ತ್‌ದ್ ನ್ಯಾಯತೀರ್ಪು ಮಲ್ಪು ದಿನ ಬರ್ಪುಂಡು. ಆ ದಿನೊಟು ಉಂದು ಮಾತಲಾ ತೆರಿದ್ ಬರು.</verse>
				<verse number="17">ನಿನ ವಿಚಾರೊಡು ದಾನೆ? ಈ ನಿನನ್ ಯೆಹೂದ್ಯೆ ಪಂಡ್ದ್ ಪಂಡೊನುವನಾ? ಈ ನ್ಯಾಯಕಟ್ಟ್‌ದ ಮಿತ್ತ್ ಆಧಾರ ಮಲ್ತೊಂದು ದೇವೆರೆಗ್ ಸೇರ್ದಿನಾಯೆ ಅಂದ್‌ದ್ ಪುಗರೊನ್ವನಾ?</verse>
				<verse number="18">ಆಯನ ಚಿತ್ತೊನು ತೆರಿದಿನಾಯೆಲಾ ನ್ಯಾಯಕಟ್ಟ್‌ದ ಬೋಧನೆ ಪಡೆದ್ ಉಂದು ತಕ್ಕ್‌ದವು ಅತ್ತಾ ಅಂದಾ ಪಂಡ್ದ್ ಗೊತ್ತು ಮಲ್ಪುನಾಯೆಲಾ ಆದುಲ್ಲ.</verse>
				<verse number="19">ಉಂದೆಡ್ದಾದ್ ಈ ಕುರುಡೆರೆಗ್ ಸಾದಿ ತೋಜಾವುನಾಯೆಲಾ ಕತ್ತಲೆಡುಪ್ಪುನಾಕುಲೆಗ್ ಬೊಲ್ಪುಲಾ</verse>
				<verse number="20">ಬುದ್ಧಿದಾಂತಿನಾಕುಲೆಗ್ ಕಲ್ಪಾವುನಾಯೆಲಾ ದಾಲಾ ತೆರಿಯಂದಿನಾಕುಲೆಗ್ ಬೋಧಕೆಲಾ ಆದುಲ್ಲೆ ಪಂಡ್ದ್ ನಂಬೊಂದ. ನ್ಯಾಯಕಟ್ಟ್‌ಡ್ ಗೇನಲಾ ಸತ್ಯಲಾ ಪೂರ್ತಿ ಉಂಡು ಪಂಡ್ದ್ ಎನ್ನೊನುವ.</verse>
				<verse number="21">ಇಂಚಾದುಪ್ಪುನಗ ನನೊರಿಯಗ್ ಬೋಧನೆ ಮಲ್ಪುನಾಯೆ, ಈ ನಿಕ್ಕ್ ಬೋಧನೆ ಮಲ್ತೊನಂದೆ ಉಲ್ಲನಾ? “ಕಂಡೊನಿಯೆರೆ ಬಲ್ಲಿ,” ಪಂಡ್ದ್ ಸಾರಿದ್ ಈ ಕಂಡೊನುವನಾ?</verse>
				<verse number="22">“ವ್ಯಭಿಚಾರ ಮಲ್ಪೆರೆ ಬಲ್ಲಿ,” ಪನ್ಪಿನಾಯೆ ಈ ವ್ಯಭಿಚಾರ ಮಲ್ಪುವನಾ? ಮೂರ್ತಿಲೆಡ್ ನಂಬಿಕೆದಾಂತಿನಾಯೆ ಈ ದೇವಸ್ಥಾನೊಡ್ದು ಕಂಡೊನುವನಾ?</verse>
				<verse number="23">ನ್ಯಾಯಕಟ್ಟ್‌ದ ಅಭಿಮಾನಿ ಆದುಪ್ಪು ಈ ನ್ಯಾಯಕಟ್ಟ್‌ನ್ ಮೀರ್‌ದ್ ದೇವೆರೆನ್ ಅವಮಾನ ಮಲ್ಪುವನಾ?</verse>
				<verse number="24">“ನಿಕ್ಲೆನ ದಿಸೆಡ್ದ್ ಪಿದಯಿದ ಜನೊಕುಲೆಡ್ ದೇವೆರೆ ಪುದರ್ ದೂಷಣೆಗ್ ಗುರಿ ಆಪುಂಡು ಪಂಡ್ದ್ ಬರೆತ್ಂಡತ್ತಾ.”</verse>
				<verse number="25">ಈ ನ್ಯಾಯಕಟ್ಟ್‌ನ್ ಕೈಕೊನುವಡ ನಿನ ಸುನ್ನತಿಗ್ ಬಿಲೆ ಉಂಡು; ಆಂಡ ಈ ನ್ಯಾಯಕಟ್ಟ್‌ನ್ ಕೈಕೊನುಜಡ ನಿಕ್ಕ್ ಸುನ್ನತಿ ಇತ್ತ್ಂಡಲಾ ಇಜ್ಜಾಂದಿಲೆಕ್ಕ ಆವು.</verse>
				<verse number="26">ಇಂಚಾದುಪ್ಪುನಗ ಸುನ್ನತಿದಾಂತಿನಾಯೆ ನ್ಯಾಯಕಟ್ಟ್‌ದ ನಿಯಮೊಲೆಗ್ ಸರಿಯಾದ್ ನಡತೆಡ, ಸುನ್ನತಿದಾಂತಿನಾಯೆ ಆದಿತ್ತ್‌ಂಡಲಾ ಸುನ್ನತಿ ಇತ್ತಿನಾಯಲೆಕ್ಕ ಲೆಖ್ಖೊಗು ಬರುವೆ.</verse>
				<verse number="27">ಆಯೆ ಶರೀರೊಡು ಸುನ್ನತಿದಾಂತಿನಾಯೆ ಆದಿತ್ತ್‌ದ್ ನ್ಯಾಯಕಟ್ಟ್‌ಡ್ ಬರೆತಿನೆನ್ ನಡಪಾವುನೆಟ್ಟ್ ಶಾಸ್ತ್ರಲಾ ಸುನ್ನತಿಲಾ ಇತ್ತ್‌ದ್ ನ್ಯಾಯೊನು ಮೀರ್‌ದ್ ನಡಪುನ ನಿನನ್ ಪಾಪಿ ಪಂಡ್ದ್ ತೀರ್ಪು ಮಲ್ಪುವೆ.</verse>
				<verse number="28">ಪಿದಯಿಡ್ ಮಾತ್ರ ಯೆಹೂದ್ಯೆ ಆದುಪ್ಪುನಾಯೆ ಯೆಹೂದ್ಯೆ ಅತ್ತ್; ಬೊಕ್ಕ ಪಿದಯಿ ಶರೀರೊಡು ಮಾತ್ರ ಮಲ್ತ್‌ದಿನ ಸುನ್ನತಿ ನಿಜವಾಯಿನ ಸುನ್ನತಿ ಅತ್ತ್.</verse>
				<verse number="29">ಆಂಡ ಉಲಯಿ ಯೆಹೂದ್ಯೆ ಆದುಪ್ಪುನಾಯೆನೇ ನಿಜ ಯೆಹೂದ್ಯೆ. ಬೊಕ್ಕ ಉಡಲ್‌ಡ್ ಆಪಿನ ಸುನ್ನತಿಯೇ ಸುನ್ನತಿ. ಬೊಕ್ಕ ಈ ಕಾರ್ಯ ದೇವೆರೆ ಆತ್ಮನ ಬೇಲೆ ಅತ್ತಂದೆ ಬರೆತಿ ನ್ಯಾಯಕಟ್ಟ್‌ದವು ಅತ್ತ್. ಇಂಚಿತ್ತಿ ಸುನ್ನತಿ ಇತ್ತಿನಾಯಗ್ ಬರ್ಪಿ ಪುಗರಿಕೆ ದೇವೆರೆಡ್ದೇ ಅತ್ತಂದೆ ನರಮಾನಿಲೆಡ್ದ್ ಬರ್ಪಿನವು ಅತ್ತ್.</verse>
			</chapter>
			<chapter number="3">
				<verse number="1">ಅಪಗ ಏರಾಂಡಲಾ ಇಂಚ ಕೇಂಡ: ಯೆಹೂದ್ಯೆರ್ ಆದುಪ್ಪುನಾಕುಲೆಗ್ ಎಂಚಿನ ಪ್ರಯೋಜನ ಉಂಡು? ಅಂಚೆನೇ, ಸುನ್ನತಿ ಆದುಪ್ಪುನಾಕುಲೆಗ್ಲಾ ಎಂಚಿನ ಲಾಭ ಉಂಡು?</verse>
				<verse number="2">ಕಂಡಿತಾದ್‌ಲಾ ಮಸ್ತ್ ತರೊಟು ಉಂಡು. ದುಂಬತ್ತ ದೇವೆರ್ ತನ ಪಾತೆರೊಲೆನ್ ಯೆಹೂದ್ಯೆರೆ ವಶೊಕ್ಕು ಕೊರ್ತೆ.</verse>
				<verse number="3">ಅಕ್ಲೆಡ ಕೆಲೆವೆರ್ ದೇವೆರ್ ಪಂಡಿನೆನ್ ನಂಬಿಜಾಂಡ ದಾನೆ ಆಂಡ್? ದೇವೆರ್ ನಂಬಿಗಸ್ತೆ ಆದುಪ್ಪುಜೆ ಪಂಡ್ದ್ ನೆತ್ತ ಅರ್ಥನಾ? ಕಂಡಿತಾ ಅತ್ತ್.</verse>
				<verse number="4">ಮಾತ ನರಮಾನಿಲು ಸುಳ್ಳುಗಾರೆರಾಂಡಲಾ ದೇವೆರ್ ಸತ್ಯವಂತೆನೇ ಸರಿ, “ನಿನ ಮಾತ ಪಾತೆರೊಡುಲಾ ಈ ನೀತಿವಂತಲೆಕ್ಕ ತೋಜಿದ್ ಬರೊಡು; ನಿನ ಮಿತ್ತ್ ವ್ಯಾಜ್ಯ ನಡಪುನಗ ಈ ಗೆಂದೊಡು,” ಪಂಡ್ದ್ ಬರೆತ್ಂಡ್.</verse>
				<verse number="5">ನಮ ನೀತಿ ತತ್ತ್‌ದ್ ನಡಪುಡುನೆಡ್ದಾದ್; ದೇವೆರೆಡುಪ್ಪು ನೀತಿ ತೋಜಿದ್ ಬರ್ಪಿನಾಂಡ ನಮ ದಾನೆ ಪನ್ಕ? ದೇವೆರ್ ನಮನ್ ಶಿಕ್ಷೆ ಕೊರ್ನಗ ಆಯೆ ಅನ್ಯಾಯ ಮಲ್ಪುವೆ ಪಂಡ್ದ್ ನಮ ಪನೊಲಿಯಾ (ಉಂದು ಸ್ವಾಭಾವಿಕ ಆದ್ ಬರ್ಪಿನ ಪ್ರಶ್ನೆನೇ)</verse>
				<verse number="6">ಕಂಡಿತಾ ಅತ್ತ್. ದೇವೆರ್ ನ್ಯಾಯವಂತೆ ಅತ್ತ್‌ಡ, ಆಯೆ ಲೋಕೊಗು ನ್ಯಾಯತೀರ್ಪುನು ಎಂಚ?</verse>
				<verse number="7">ಎನ ಸುಳ್ಳುಡ್ದ್ ದೇವೆರೆ ಸತ್ಯ ತೋಜಿದ್ ಬತ್ತ್‌ದ್ ಆಯನ ಮೈಮೆ ಹೆಚ್ಚಾಂಡ ಎಂಕ್ ನನಲಾ ಪಾಪಿ ಪಂಡ್ದ್ ದಾಯೆಗ್ ತೀರ್ಪು ಆವೊಡು?</verse>
				<verse number="8">ಇಜ್ಜಿಡ, “ಎಡ್ಡೆಂತಿನವು ಆಪಿನೆಕ್ಕಾದ್ರ ಪಡಿಕೆಂತಿನೆನ್ ಮಲ್ಪುಗ,” ಪಂಡ್ದ್ ದಾಯೆ ಪನಿಯೆರೆ ಬಲ್ಲಿ? ಕೆಲೆವೆರ್ ಎಂಕ್ಲೆನ ವಿಷಯೊಡು ಮೊಕುಲು ಇಂಚ ಬೋಧನೆ ಮಲ್ಪುನಾಕುಲು ಪಂಡ್ದ್ ದೂರುವೆರತ್ತಾ, ಅಂಚಿತ್ತಿನಾಕುಲೆಗ್ ಶಿಕ್ಷೆದ ತೀರ್ಪು ಆಪಿನವು ನ್ಯಾಯ.</verse>
				<verse number="9">ಅಪಗಾಂಡ ದಾನೆ ಪನೊಡು? ನಮ ಪಿದಯಿದ ಜನೊಕುಲೆಡ್ದ್ ಎಡ್ಡೆ ಸ್ಥಾನೊಡು ಉಲ್ಲನಾ? ಏತ್ ಮಾತ್ರೊಗ್ಲಾ ಇಜ್ಜಿ. ಯೆಹೂದ್ಯೆರೇ ಆವಡ್, ಗ್ರೀಕೆರೇ ಆವಡ್ ಮಾತೆರ್ಲಾ ಪಾಪೊಗು ಸೇರ್ದುಲ್ಲೆರ್ ಅಂದ್‌ದ್ ಸುರುಟ್ಟೇ ತೋಜಾದ್ ಕೊರ್ತತ್ತಾ.</verse>
				<verse number="10">ಉಂದು ಶಾಸ್ತ್ರೊಡು ಬರೆತಿ ಪಾತೆರೊಲೆಗ್ ಸರಿಯಾದುಂಡು, ಅವು ದಾನೆಂದ್ಂಡ “ನೀತಿವಂತೆ ಇಜ್ಜೆ ಒರಿಲಾ ಇಜ್ಜೆ</verse>
				<verse number="11">ತೆರಿದಿನಾಯೆಲಾ ಇಜ್ಜೆ. ದೇವೆರೆನ್ ನಾಡುನಾಯೆಲಾ ಇಜ್ಜೆ.</verse>
				<verse number="12">ಮಾತೆರ್ಲಾ ಸಾದಿ ತತ್ತ್‌ದ್ ನಡಪುವೆರ್. ಮಾತೆರ್ಲಾ ಕೆಲಸೊಗು ಬರಂದಿನಾಕುಲಾದುಲ್ಲೆರ್. ಎಡ್ಡೆಂತಿನೆನ್ ಮಲ್ಪುನಾಯೆ ಒರಿಲಾ ಇಜ್ಜೆ.</verse>
				<verse number="13">ಅಕ್ಲೆನ ದೊಂಡೆ ಜತ್ತ್‌ದಿ ಸಮಾಧಿ ಆತ್ಂಡ್. ಅಕುಲು ನಾಲಯಿಡ್ದ್ ವಂಚನೆದ ಪಾತೆರೊಲೆನ್ ಪಾತೆರ್‌ವೆರ್. ಅಕ್ಲೆನ ಬಿಂಬದ ಪಿರವುಡು ಸರ್ಪದ ವಿಷ ಉಂಡು.</verse>
				<verse number="14">ಅಕ್ಲೆನ ಬಾಯಿ ಶಾಪೊಡ್ದುಲಾ ಕೋಪದ ಪಾತೆರೊಡ್ದುಲಾ ದಿಂಜಿದುಂಡು.</verse>
				<verse number="15">ಅಕ್ಲೆನ ಕಾರ್ ನೆತ್ತೆರ್ ಗುಪ್ಪೆರೆ ಅಮಸರ ಮಲ್ಪುಂಡು.</verse>
				<verse number="16">ಅಕುಲು ಪೋಯಿ ಸಾದಿಲೆಡ್ ನಾಶನಲಾ ಸಂಕಟಲಾ ಉಂಡಾಪುಂಡು.</verse>
				<verse number="17">ಸಮಾಧಾನದ ಸಾದಿ ಅಕ್ಲೆಗ್ ತೆರಿಯಂದ್.</verse>
				<verse number="18">ಅಕ್ಲೆನ ಕಣ್ಣೆದುರುಡು ದೇವೆರೆ ಪೋಡಿಗೆನೇ ಇಜ್ಜಿ ಇನ್ಪಿನವೇ.”</verse>
				<verse number="19">ನ್ಯಾಯಕಟ್ಟ್‌ದ ಮಾತ ಪಾತೆರೊಲುಲಾ ಆ ಶಾಸ್ತ್ರೊಗು ಒಳಗಾಯಿನಾಕುಲೆಗೇ ಪನ್ತ್ಂಡ್ ಪಂಡ್ದ್ ತೆರಿದತ್ತಾ, ಇಂಚ ಮಾತೆರೆ ಬಾಯಿ ಕಟ್ಟ್‌ದ್ ಪೋಪುಂಡು. ಲೋಕ ಇಡೀ ದೇವೆರೆ ಎದುರುಡು ಅಪರಾಧಿ ಆದ್ ಉಂತುಂಡು.</verse>
				<verse number="20">ದಾಯೆಗಂದ್ಂಡ ವಾ ನರಮಾನಿಲಾ ನ್ಯಾಯಕಟ್ಟ್‌ದ ಪ್ರಕಾರ ನಡಪುನೆಡ್ದ್ ದೇವೆರೆ ಸನ್ನಿಧಾನೊಡು ನೀತಿವಂತೆ ಅಂದ್‌ದ್ ತೀರ್ಪು ಆಪುಜಿ. ನ್ಯಾಯಕಟ್ಟ್‌ಡ್ದ್ ಪಾಪದ ತಿಳುವಳಿಕೆ ಗೊತ್ತಾಪುಂಡು.</verse>
				<verse number="21">ಇತ್ತೆ ಆಂಡಲಾ ದೇವೆರೆಡ್ದ್ ತಿಕ್ಕುನ ನೀತಿ ನ್ಯಾಯಕಟ್ಟ್‌ದ ನಿಯಮೊಲುದಾಂತೆ ಬೊಲ್ಪುಗು ಬೈದ್‌ಂಡ್. ಅವು ನ್ಯಾಯಕಟ್ಟ್‌ಡ್ದ್‌ಲಾ ಪ್ರವಾದಿಲೆ ಪಾತೆರೊಡ್ದುಲಾ ಸಾಕ್ಷಿನ್ ಪಡೆದುಂಡು.</verse>
				<verse number="22">ದೇವೆರೆಡ್ದ್ ಆಪಿ ಆ ನೀತಿ ಒವ್ವು ಅಂದ್ಂಡ ಯೇಸು ಕ್ರಿಸ್ತನ್ ನಂಬುನೆಡ್ದೇ, ನಂಬುನಾಕುಲೆಗ್ ಮಾತೆರೆಗ್ಲಾ ವ್ಯತ್ಯಾಸದಾಂತೆ ತಿಕ್ಕುನವು ಆದುಂಡು.</verse>
				<verse number="23">ದಾಯೆಗಂದ್ಂಡ ಮಾತೆರ್ಲಾ ಪಾಪ ಮಲ್ತ್‌ದ್ ದೇವೆರೆ ಮೈಮೆಡ್ದ್ ದೂರ ಪೋತೆರ್.</verse>
				<verse number="24">ಆಂಡ ದೇವೆರೆ ಧರ್ಮಾರ್ಥ ದಯೊಡ್ದಾದ್, ಯೇಸು ಕ್ರಿಸ್ತಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪುಂಡು, ಕ್ರಿಸ್ತೆ ಅಕ್ಲೆನ್ ಬುಡುಗಡೆ ಮಲ್ಪುವೆ.</verse>
				<verse number="25">ಉಂಬೆ ತನ ನೆತ್ತೆರ್‌ನ್ ಗುತ್ತುದು ನಂಬಿಕೆ ಇತ್ತಿನಾಕುಲೆಗಾದ್ ಪಾಪ ಮಾಪು ಆವೊಡು ಅಂದ್‌ದ್ ದೇವೆರ್ ಉಂಬ್ಯನ್ ಎದುರು ದೀಯೆರ್. ದೇವೆರ್ ಪಿರಾಕ್‌ದ ಪಾಪೊಲೆಗ್ ಶಿಕ್ಷೆ ಕೊರಂದೆ, ಸಹಿಸೊಂದಿನೆಡ್ದ್ ತನ ನೀತಿನ್ ಇತ್ತೆದ ಕಾಲೊಡು ಇಂಚ ತೋಜಾದ್ ತಾನ್ ನೀತಿಸ್ವರೂಪಿ ಆದ್‌ಲಾ ಯೇಸುಡ ನಂಬಿಕೆ ದೀಪಿನಾಕುಲೆನ್ ನೀತಿವಂತೆರ್ ಅಂದ್‌ದ್ ನಿರ್ಧಾರ ಮಲ್ಪುನಾಯೆ ಆದ್‌ಲಾ ತೋಜಾವೊಂಡೆ.</verse>
				<verse number="26"></verse>
				<verse number="27">ಅಂಚಾಂಡ ಪುಗರೊನಿಯೆರೆ ಇಡೆ ಓಲು? ಅವು ಇಜ್ಜಾಂದೆ ಪೋಂಡು. ವಾ ನ್ಯಾಯಕಟ್ಟ್‌ಡ್ದ್? ಕ್ರಿಯೊಲೆನ್ ಕೈಕೊನುನೆಡ್ದಾ? ಅತ್ತ್, ನಂಬಿಕೆದ ಮಾರ್ಗೊನು ಕೈಕೊನುನೆಡ್ದೇ.</verse>
				<verse number="28">ನರಮಾನಿಲು ನ್ಯಾಯಕಟ್ಟ್‌ದ ಕ್ರಿಯೊಲುದಾಂತೆ ನಂಬಿಕೆಡ್ದೇ ನೀತಿವಂತೆರಂದ್‌ದ್ ನಿರ್ಧಾರ ಮಲ್ಪುನಾಯೆ ಆದ್ ತೋಜಾವೊಂಡೆ.</verse>
				<verse number="29">ದೇವೆರ್ ಯೆಹೂದ್ಯೆರೆಗ್ ಮಾತ್ರ ದೇವೆರಾದುಲ್ಲೆನಾ? ಪಿದಯಿದ ಜನೊಕುಲೆಗ್ಲಾ ದೇವೆರ್ ಅತ್ತಾ?</verse>
				<verse number="30">ಅಂದ್, ದೇವೆರ್ ಒರಿಯೇ ಆದಿತ್ತ್‌ದ್ ಆಯೆ ಪಿದಯಿದ ಜನೊಕುಲೆಗ್ಲಾ ದೇವೆರಾದುಲ್ಲೆ. ಆಯೆ ಸುನ್ನತಿದಾಕುಲೆನ್ ನೀತಿವಂತೆರ್ ಪಂಡ್ದ್ ನಿರ್ಧಾರ ಮಲ್ಪೆರೆ ಅಕ್ಲೆನ ನಂಬಿಕೆನೇ ಆಧಾರ. ಸುನ್ನತಿದಾಂತಿನಾಕುಲೆನ್ಲಾ ನಿರ್ಧಾರ ಮಲ್ಪೆರೆ ನಂಬಿಕೆನೇ ಕಾರಣ.</verse>
				<verse number="31">ಅಂಚಾಂಡ ನಂಬಿಕೆಡ್ದ್ ನ್ಯಾಯಕಟ್ಟ್‌ನ್ ಅರ್ಥದಾಂತಿನವು ಮಲ್ಪುವನಾ? ಏಪೊಗ್ಲಾ ಇಜ್ಜಿ. ನ್ಯಾಯಕಟ್ಟ್‌ನ್ ದೃಢವಾದ್ ಪತ್ತುವ.</verse>
			</chapter>
			<chapter number="4">
				<verse number="1">ಅಂಚಾಂಡ ನಮ ವಂಶದ ಅಮ್ಮೆ ಆಯಿ ಅಬ್ರಹಾಮು ಬಗೆಟ್ ನಮ ದಾನೆ ಪನ್ಕ? ಆಯನ ನಂಬಿಕೆದ ಬೊಕ್ಕ ನ್ಯಾಯಕಟ್ಟ್‌ದ ಬಗೆಟ್ ಅನುಭವ ದಾನೆ?</verse>
				<verse number="2">ಅಬ್ರಹಾಮು ಎಡ್ಡೆ ಕ್ರಿಯೊಲೆಡ್ದಾದ್ ನೀತಿವಂತೆ ಅಂದ್‌ದ್ ತೀರ್ಪು ಆತಿನಾಂಡ ಆಯಗ್ ಪುಗರೊನಿಯೆರೆ ಅವಕಾಸ ಉಂಡು. ಆಂಡ ದೇವೆರೆ ದೃಷ್ಟಿಡ್ ಇಂಚ ಆಪುಜಿ.</verse>
				<verse number="3">ನೆತ್ತ ಸಂಗತಿಡ್ ಶಾಸ್ತ್ರ ಪನ್ಪಿನೆನ್ ಆಲೋಚನೆ ಮಲ್ಪುಲೆ, “ಅಬ್ರಹಾಮು ದೇವೆರೆನ್ ನಂಬಿಯೆ, ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್,” ಅಂದ್‌ದ್ ಪನ್ಪುಂಡು.</verse>
				<verse number="4">ಬೇಲೆ ಮಲ್ತಿನಾಯಗ್ ಸಂಬಳ ತಿಕ್ಕುಂಡು ಅವು ಉಡಿಗೆರೆ ಅತ್ತ್ ಆಂಡ ಸಂಪಾದನೆ ಮಲ್ತ್‌ದಿನವು ಪಂಡ್ದ್ ಆಪುಂಡು.</verse>
				<verse number="5">ಆಂಡ ಏರೇ ಆವಡ್ ಎಡ್ಡೆ ಕ್ರಿಯೊಲೆನ್ ಮಲ್ತ್‌ದಿನಾಯೆ ಆದುಪ್ಪಂದೆ, ಪಾಪಿಲೆನ್ ನೀತಿವಂತೆ ಅಂದ್‌ದ್ ನಿರ್ಧಾರ ಮಲ್ಪುನಾಯಡ ನಂಬಿಕೆ ದೀಪೆನಾ, ಆಯನ ನಂಬಿಕೆನೇ ನೀತಿದವು ಪಂಡ್ದ್ ಲೆಖ್ಖೊಗು ಬರ್ಪುಂಡು.</verse>
				<verse number="6">ದೇವೆರ್ ಏರೆನ್ ಎಡ್ಡೆ ಕ್ರಿಯೆದಾಂತೆ ನೀತಿವಂತೆ ಪಂಡ್ದ್ ಎನ್ನುವೆನಾ ಆಯೆ ಭಾಗ್ಯವಂತೆ ಪಂಡ್ದ್ ದಾವೀದೆಲಾ ಪನ್ಪೆ.</verse>
				<verse number="7">ಎಂಚಂದ್ಂಡ, “ಏರೆನ ಅನ್ಯಾಯೊಲು ಬುಡುಗಡೆ ಆತ್ಂಡ, ಏರೆ ಪಾಪೊಲು ಪರಿಹಾರ ಆತ್ಂಡ ಅಕುಲೇ ಭಾಗ್ಯವಂತೆರ್.</verse>
				<verse number="8">ಕರ್ತವೆ ಏರೆನ ಪಾಪೊಲೆನ್ ಲೆಖ್ಖೊಗು ದೆತ್ತೊನುಜೆನಾ ಆ ನರಮಾನಿಯೇ ಭಾಗ್ಯವಂತೆ.”</verse>
				<verse number="9">ಈ ಪನ್ಪಿನವು ಸುನ್ನತಿದಾಕುಲೆಗ್ ಮಾತ್ರನಾ? ಸುನ್ನತಿದಾಂತಿನಾಕುಲೆಗ್ಲಾ ಆಪುಂಡಾ? ತೂಕ, ಅಬ್ರಹಾಮುನ ಲೆಖ್ಖೊಗು ಆಯನ ನಂಬಿಕೆನೇ ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಪನ್ಪತ್ತಾ.</verse>
				<verse number="10">ಉಂದು ಏಪ ಗೆನ್ತ್‌ದ್ಂಡ್? ಆಯಗ್ ಸುನ್ನತಿ ಆಯಿ ಬೊಕ್ಕನಾ? ಸುನ್ನತಿ ಆಪಿನೆಡ್ದ್ ದುಂಬಾ? ಸುನ್ನತಿ ಆಯಿ ಬೊಕ್ಕ ಅತ್ತ್. ಸುನ್ನತಿ ಆವೊಡ್ದುಂಬೇ ಗೆನ್ತ್‌ದ್ಂಡ್.</verse>
				<verse number="11">ಐಡ್ದ್ ಬೊಕ್ಕ ಸುನ್ನತಿ ಪನ್ಪಿ ಸಂಸ್ಕಾರೊನು ಗುರ್ತ ಆದ್ ಪಡೆಯೆ. ಉಂದು ಸುನ್ನತಿ ಆವೊಡ್ದು ದುಂಬೇ ಆಯಗಿತ್ತಿನ ನಂಬಿಕೆದ ನೀತಿಗ್ ಗುರ್ತ ಆದಿತ್ತ್ಂಡ್. ಇಂಚಾದುಪ್ಪುನಗ ಆಯೆ ನಂಬುನಾಕುಲೆಗ್ ಮಾತೆರೆಗ್ಲಾ, ಅಕುಲು ಸುನ್ನತಿದಾಂತಿನಾಕುಲಾಂಡಲಾ, ಮೂಲಪಿತೃ ಆಯೆ, ಅಕುಲುಲಾ ನೀತಿವಂತೆರ್ ಅಂದ್‌ದ್ ಲೆಖ್ಖೊಗು ಬರುವೆರ್.</verse>
				<verse number="12">ಉಂದತ್ತಂದೆ, ಸುನ್ನತಿದಾಕುಲೆಡ ಏರೇರ್ ಸುನ್ನತಿ ಪಡೆಯಿನಿ ಅತ್ತಂದೆ ನಮ ಪಿತೃ ಆಯಿ ಅಬ್ರಹಾಮುಗು ಸುನ್ನತಿ ಆವೊಡ್ದುಂಬು ಇತ್ತಿ ನಂಬಿಕೆದ ಹೆಜ್ಜೆಲೆನ್ ಪತ್ತೊಂದು ನಡಪುವೆರಾ ಅಕ್ಲೆಗ್ಲಾ ಮೂಲಪಿತೃಲೆ ಅಮ್ಮೆ ಆದುಲ್ಲೆ.</verse>
				<verse number="13">ಈ ಲೋಕೊಗು ಹಕ್ಕ್‌ದಾಕುಲು ಆಪ ಪನ್ಪಿ ವಾಗ್ದಾನ ಅಬ್ರಹಾಮುಗಾವಡ್ ಆಯ ಸಂತಾನದಾಕುಲೆಗ್‌ಲಾವಡ್ ನ್ಯಾಯಕಟ್ಟ್‌ಡ್ದ್ ಆತಿನವು ಅತ್ತ್. ಆಂಡ ಆಯೆ ನಂಬಿಕೆ ದೀಯಿನೆನ್ ದೇವೆರ್ ಒಪ್ಪಿಯೊಂದು ಆಯನ್ ನೀತಿವಂತೆ ಪಂಡ್ದ್ ಮಲ್ತಿನೆಡ್ದೇ.</verse>
				<verse number="14">ನ್ಯಾಯಕಟ್ಟ್‌ದಾಕುಲು ಹಕ್ಕ್‌ದಾರೆರಾದಿತ್ತ್‌ಂಡ, ನಂಬಿಕೆ ಪೊಕ್ಕಡೆಗಾಂಡ್. ವಾಗ್ದಾನೊಗು ವಾ ಬಿಲೆಲಾ ಇಜ್ಜಿ ಪಂಡ್ದಾಪುಂಡು.</verse>
				<verse number="15">ದಾಯೆಗಂದ್ಂಡ ನ್ಯಾಯಕಟ್ಟ್ ಜನೊಕುಲೆನ್ ದೇವೆರೆ ಕೋಪೊಗು ಗುರಿ ಮಲ್ಪುನವು. ಆಂಡ ನ್ಯಾಯಕಟ್ಟ್ ಇಜ್ಜಾಂದಿನಲ್ಪ ಅವೆನ್ ಮೀರುನವುಲಾ ಇಜ್ಜಿ.</verse>
				<verse number="16">ಅಂಚಾದ್ ವಾಗ್ದಾನ ನಂಬಿಕೆದ ಮಿತ್ತ್ ಆಧಾರ ಆದುಂಡು, ಆ ಹಕ್ಕ್ ದಯೊಡ್ದೇ ತಿಕ್ಕುನವು ಅಬ್ರಹಾಮುನ ಸಂತಾನದಾಕುಲೆಗ್ ಮಾತೆರೆಗ್ಲಾ ಈ ವಾಗ್ದಾನ ಸ್ಥಿರತ್ತವು ಆದುಂಡು. ನ್ಯಾಯಕಟ್ಟ್‌ನ್ ಆಧಾರ ಮಲ್ತೊಂಡಿನಾಕುಲೆಗ್ ಮಾತ್ರ ಅತ್ತಂದೆ, ಅಬ್ರಹಾಮುಡು ಇತ್ತಿನ ನಂಬಿಕೆ ಇತ್ತಿನಾಕುಲೆಗ್ಲಾ ಸ್ಥಿರೊಟ್ಟು ಉಂತುಂಡು.</verse>
				<verse number="17">ಯಾನ್ ನಿನನ್ ದಿಂಜ ಜನಾಂಗೊಲೆಗ್ ಮೂಲಪಿತೃ ಆದ್ ನೇಮಕ ಮಲ್ತ್‌ದೆ ಪನ್ಪಿನೆನ್ ಶಾಸ್ತ್ರೊಡು ಬರೆತಿ ಪ್ರಕಾರ, ಅಬ್ರಹಾಮು ನಂಕ್ ಮಾತೆರೆಗ್ಲಾ ದೇವೆರೆ ದೃಷ್ಟಿಡ್ ಮೂಲಪಿತೃ ಆದುಲ್ಲೆ. ದೇವೆರ್ ಸೈತಿನಾಕುಲೆನ್ ಜೀವ ಮಲ್ಪುನಾಯೆ ಆದ್‌ಲಾ ಇಜ್ಜಾಂದಿನೆನ್ ಉಪ್ಪುಲೆಕ್ಕ ಲೆಪ್ಪುನಾಯೆ ಆದ್‌ಲಾ ಉಲ್ಲೆ ಅಂದ್‌ದ್ ಅಬ್ರಹಾಮು ನಂಬಿಯೆ.</verse>
				<verse number="18">ನಿರೀಕ್ಷೆಗ್ ವಾ ಆಧಾರ ಇಜ್ಜಾಂಡಲಾ, ಅಬ್ರಹಾಮು ನಂಬುದು ನಿರೀಕ್ಷೆಡ್ ಕಾತೊಂದಿತ್ತೆ. ಅಂಚಾದ್ ಪಾಕ ಜನಾಂಗೊಲೆಗ್ ಅಮ್ಮೆ ಆಯೆ. ಶಾಸ್ತ್ರೊಡು ಪನ್ತ್ಂಡ್, “ನಿನ ಸಂತಾನ ಬಾನ ಬೊಳ್ಳಿದಾತ್ ಹೆಚ್ಚಾಪೆರ್.”</verse>
				<verse number="19">ಆಯೆ ಹೆಚ್ಚಿಕಡಿಮೆ ನೂದು ವರ್ಸದಾಯೆ ಆದಿತ್ತ್‌ಂಡಲಾ, ತನ ಶರೀರ ಕುಂದುದಿತ್ತ್‌ಂಡಲಾ ಸಾರನ ಗರ್ಭ ಸೈತ್‌ದಿತ್ತ್‌ಂಡಲಾ ಆಯನ ನಂಬಿಕೆ ಕಡಿಮೆ ಆಯಿಜಿ.</verse>
				<verse number="20">ಆಯನ ನಂಬಿಕೆ ಆಯನ್ ಬುಡ್ತುಜಿ. ಆಯೆ ದೇವೆರೆ ವಾಗ್ದಾನೊನು ಸಂಶಯ ಮಲ್ತ್‌ಜೆ. ಆಯನ ನಂಬಿಕೆ ಆಯಗ್ ಬಲ ಕೊರ್‌ಂಡ್; ಆಯೆ ದೇವೆರೆಗ್ ಮೈಮೆ ಕೊರಿಯೆ.</verse>
				<verse number="21">ದೇವೆರ್ ತನ ವಾಗ್ದಾನೊಲೆನ್ ನಡಪಾವೆರೆಗ್ ಸಮರ್ಥೆ ಪಂಡ್ದ್ ಪೂರ್ತಿ ದೃಢ ನಂಬಿಕೆ ಇತ್ತಿನಾಯೆ ಆಯೆ</verse>
				<verse number="22">ಅಂಚಾಯಿನೆಡ್ದ್ ಆ ನಂಬಿಕೆನೇ, “ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್.”</verse>
				<verse number="23">ಆಂಡ ಅವು, “ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್,” ಪಂಡ್ದ್ ಪನ್ಪಿನೆನ್ ಆಯಗಾದ್ ಮಾತ್ರ ಅತ್ತಂದೆ ನಂಕಾದ್‌ಲಾ ಬರೆತ್ಂಡ್.</verse>
				<verse number="24">ನಮ ಕರ್ತವೆ ಆದುಪ್ಪು ಯೇಸುನು ಜೀವೊಡು ಲಕ್ಕಾಯಿನ ದೇವೆರೆನ್ ನಂಬುನ ನಂಕ್‌ಲಾ ಆ ನಂಬಿಕೆ ನೀತಿದವು ಪಂಡ್ದ್ ಗೆನ್ಪುಂಡು.</verse>
				<verse number="25">ದೇವೆರ್ ಆಯನ್ ನಮ ಅಪರಾಧೊಲೆಗಾದ್ ಮರಣೊಗು ಒಚ್ಚಿದ್ ಕೊರ್ದು ನಂಕ್ ನೀತಿವಂತೆರ್ ಇನ್ಪಿ ನಿರ್ಧಾರ ಉಂಡಾಪಿನೆಕ್ಕ್ ಜೀವೊಡು ಲಕ್ಕಾಯೆ.</verse>
			</chapter>
			<chapter number="5">
				<verse number="1">ಅಂಚಾಂಡ ನಂಬಿಕೆಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿ ನಂಕ್, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ದೇವೆರೆಡೊಪ್ಪ ಸಮಾಧಾನ ಉಂಡು.</verse>
				<verse number="2">ಎಂಕ್ಲೆನ ನಂಬಿಕೆಡ್ದ್ ಈ ಪೊಸ ಜೀವನದ ಅನುಭವೊನು ಆಯನ ದಯೊಡ್ದು ಆಯಡ್ದ್ ಪಡೆಯೊಂಡ. ಅವೆನ್ ಎಂಕುಲು ಪುಗರ್‌ನಗ ಎಂಕ್ಲೆಗ್ ದೇವೆರೆ ಮೈಮೆಡ್ ಪಾಲ್‌ದಾರೆರಾಪಿನ ನಿರೀಕ್ಷೆ ಉಂಡಾಪುಂಡು</verse>
				<verse number="3">ಉಂದು ಮಾತ್ರ ಅತ್ತಂದೆ ನಂಕ್ ಉಂಡಾಪಿ ಉಪದ್ರೊಲೆಡ್ಲಾ ಸಂತೋಷೊಡು ಉಲ್ಲ.</verse>
				<verse number="4">ದಾಯೆ ಪಂಡ ಉಪದ್ರೊಡ್ದು ತಾಳ್ಮೆ ಪುಟ್ಟುಂಡು. ತಾಳ್ಮೆಡ್ದ್ ಜಯತ ಅನುಭವ ಪುಟ್ಟುಂಡು. ಅನುಭವೊಡ್ದು ನಿರೀಕ್ಷೆ ಪುಟ್ಟುಂಡು ಅಂದ್‌ದ್ ನಮ ತೆರಿದ.</verse>
				<verse number="5">ಈ ನಿರೀಕ್ಷೆ ನಮಡ್ ನಿರಾಶೆ ಉಂಡು ಮಲ್ಪುಜಿ. ದಾಯೆಗಂದ್ಂಡ ನಂಕ್ ಕೊರ್ತಿನ ಪರಿಶುದ್ಧಾತ್ಮೊಡ್ದು ದೇವೆರ್ ತನ ಪ್ರೀತಿನ್ ನಮ ಉಡಲ್‌ಡ್ ಮೈತ್‌ದ್ ಕೊರ್ತೆ.</verse>
				<verse number="6">ನಮ ಬಲದಾಂತಿನಾಕುಲು ಆದುಪ್ಪುನಗನೇ ನೇಮಕ ಆತಿ ಕಾಲೊಡು ಭಕ್ತಿದಾಂತಿನಾಕುಲೆಗಾದ್ ಯೇಸು ಕ್ರಿಸ್ತೆ ತನ ಪ್ರಾಣೊನೇ ಕೊರಿಯೆ.</verse>
				<verse number="7">ನೀತಿವಂತೆರೆಗಾದ್ ಏರಾಂಡಲಾ ಪ್ರಾಣ ಕೊರ್ಪಿನವು ಅಪರೂಪ. ಉಪಕಾರ ಮಲ್ಪುನಾಯಗಾದ್ ಪ್ರಾಣ ಕೊರಿಯೆರೆ ಏರಾಂಡಲಾ ಧೈರ್ಯ ಮಲ್ತೆಡಲಾ ಮಲ್ಪೆ.</verse>
				<verse number="8">ಆಂಡ ನಮ ಪಾಪಿಲಾದುಪ್ಪುನಗಲಾ ಕ್ರಿಸ್ತೆ ನಂಕಾದ್ ಪ್ರಾಣ ಕೊರಿನೆಟ್ಟ್ ದೇವೆರ್ ನಮ ಮಿತ್ತ್ ತನ್ಕ್ ಉಪ್ಪು ಪ್ರೀತಿನ್ ತೋಜಾದ್ ಕೊರ್ತೆ.</verse>
				<verse number="9">ಇತ್ತೆ ನಮ ಆಯನ ನೆತ್ತೆರೆಡ್ದಾದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಯಿನೆಡ್ದ್ ದೇವೆರೆಡ್ದ್ ಬರ್ಪಿ ಕೋಪೊಡ್ದು ನಮನ್ ತಪ್ಪಾವೆ ಪನ್ಪಿನವು ಏತೋ ಸತ್ಯ ಆದುಂಡು.</verse>
				<verse number="10">ನಮ ನಂಬುನೆಡ್ದ್ ದುಂಬು ದೇವೆರೆ ವೈರಿಲಾದಿತ್ತ. ಆಯನ ಮಗನ ಮರಣೊನು ನಂಬಿನೆಡ್ದ್ ನಮನ್ ಆಯಡೊಪ್ಪ ಸಂದಾನ ಮಲ್ತ್‌ದ್ ಸ್ನೇಹಿತೆರಾದ್‌ ಮಲ್ತೆ. ಇತ್ತೆ ದೇವೆರೆ ಸ್ನೇಹಿತೆರಾದುಪ್ಪುನ ಕ್ರಿಸ್ತನ ಜೀವನೊಡ್ದು ರಕ್ಷಣೆ ಪಡೆಯುನವು ಏತೋ ಸತ್ಯ ಆದುಂಡು.</verse>
				<verse number="11">ಈತ್ ಮಾತ್ರ ಅತ್ತ್; ಯೇಸು ಕ್ರಿಸ್ತಡ್ದ್ ಸಂದಾನ ಪಡೆದ್ ಮಾತ ಸಂಗತಿಲೆಡ್ ನಮ ದೇವೆರೆ ಸ್ನೇಹಿತೆರಾಯಿನೆಡ್ದ್ ಸಂತೋಷ ಮಲ್ಪುವ.</verse>
				<verse number="12">ಈ ಸಂಗತಿ ದಾನೆಂದ್ಂಡ, ಒಂಜಿ ನರಮಾನಿಡ್ಡೇ ಪಾಪಲಾ ಪಾಪೊಡ್ದು ಮರಣಲಾ ಲೋಕದುಲಯಿ ಸೇರ್ದ್ಂಡ್. ಆದಾಮುಡ್ದಾದ್ ಪಾಪ ಈ ಲೋಕೊಗು ಸೇರ್‌ಂಡ್. ಮಾತೆರ್ ಪಾಪ ಮಲ್ತಿನೆಡ್ದ್ ಮರಣ ಮಾತೆರೆ ಉಲಯಿ ಬತ್ತ್ಂಡ್.</verse>
				<verse number="13">ನ್ಯಾಯಕಟ್ಟ್ ಉಂಡಾಯಿನೆಡ್ದ್ ದುಂಬೇ ಪಾಪ ಲೋಕೊಡಿತ್ತ್‌ಂಡ್. ಆಂಡ ನ್ಯಾಯಕಟ್ಟ್ ಇಜ್ಜಾಂದೆ ಉಪ್ಪುನಗ ಪಾಪ ಲೆಖ್ಖೊಗು ಬರ್ಪುಜಿ.</verse>
				<verse number="14">ಆಂಡಲಾ ಆದಾಮುನ ಕಾಲೊಡ್ದು ಮೋಶೆನ ಕಾಲ ಮುಟ್ಟಲಾ ಮರಣ ಆಳೊಂದಿತ್ತ್‌ಂಡ್. ಆದಾಮು ದೇವೆರೆ ಅಪ್ಪಣೆನ್ ಮೀರ್‌ದ್ ಮಲ್ತಿ ಪಾಪೊಗು ಸಮಾನ ಆದುಪ್ಪು ಪಾಪೊನು ಮಲ್ಪಂದೆ ಇತ್ತಿನಾಕುಲೆನ ಮಿತ್ತ್‌ಲಾ ಅವು ನಡತೊಂದಿತ್ತ್‌ಂಡ್. ಆ ಆದಾಮೆ ಬರೊಡಾಯಿ ಒರಿಯಗ್ ತೋಜಿದ್ ಬರ್ಪಿ ನರಮಾನಿ ಆದುಲ್ಲೆ.</verse>
				<verse number="15">ಆಂಡ ಆ ಅಪರಾಧದ ಸಂಗತಿಗ್ಲಾ ದೇವೆರೆ ದಯತ ದಾನದ ಸಂಗತಿಗ್ಲಾ ಬಾರೀ ಹೆಚ್ಚಿಕಡಿಮೆ ಉಂಡು. ಎಂಚಂದ್ಂಡ ಆ ಒರಿಯನ ಅಪರಾಧೊಡ್ದು ಮಾತ ನರಮಾನಿಲು ಸೈತಿನವು ನಿಜ ಅಂದ್‌ದ್ ಆಂಡ, ದೇವೆರೆ ದಯೆಲಾ ಯೇಸು ಕ್ರಿಸ್ತೆ ಪನ್ಪಿ ಈ ಒರಿ ನರಮಾನಿನ ದಯೊಡ್ದು ತಿಕ್ಕುನ ವರಲಾ ಮಾತ ನರಮಾನಿಲೆಗ್ ಧಾರಾಳವಾದ್ ತಯಾರ್ ಉಂಡು ಪನ್ಪಿನವು ನಿಜ ಅತ್ತಾ?</verse>
				<verse number="16">ಉಂದತ್ತಂದೆ ಪಾಪ ಮಲ್ತಿನ ಒರಿಯಡ್ದೇ ಬೊಡ್ಚಾಂದಿನ ಫಲ ಬತ್ತಿಲೆಕ್ಕ ಈ ವರ ಬೈದಿಜಿ. ಎಂಚಂದ್ಂಡ ಒರಿಯೇ ನರಮಾನಿನ ಪಾಪದ ದಿಸೆಡ್ದ್ ಸೈಯೊಡು ಪನ್ಪಿ ನಿರ್ಧಾರ ಉಂಡಾಂಡ್. ಆಂಡ ದೇವೆರೆ ದಯತ ದಾನಲಾ ಮಸ್ತ್ ಜನೊಕುಲೆ ಅಪರಾಧದ ಕಾರಣೊಡ್ದು ಉಂಡಾದ್ ಅಕ್ಲೆನ್ ನೀತಿವಂತೆರ್ ಅಂದ್‌ದ್ ನಿರ್ಧಾರ ಮಲ್ಪುನವು ಆದುಂಡು.</verse>
				<verse number="17">ಒರಿ ನರಮಾನಿನ ಪಾಪೊಡ್ದಾದ್ ಮರಣೊಗು ಅಧಿಕಾರ ಬತ್ತ್ಂಡ್ ಪನ್ಪಿನವು ಸತ್ಯನೇ. ದೇವೆರ್ ಧಾರಾಳವಾದ್ ಅನುಗ್ರಹ ಮಲ್ಪುನ ದಯೆ ದಾನೊಲೆನ್ಲಾ ನೀತಿದವು ಪನ್ಪಿ ವರೊನ್ಲಾ ಪಡೆಯಿನಾಕುಲು ಯೇಸು ಕ್ರಿಸ್ತೆ ಪನ್ಪಿ ಒರಿ ನರಮಾನಿಡ್ದ್ ಜೀವೊಡಿತ್ತ್‌ದ್ ಆಳುನವು ಬೊಕ್ಕಲಾ ನಿಜ ಅತ್ತಾ?</verse>
				<verse number="18">ಇಂಚ ಉಪ್ಪುನಗ ಒಂಜೇ ಅಪರಾಧೊಡ್ದು ಮಾತ ನರಮಾನಿಲೆಗ್ ಸೈಯೊಡು ಪನ್ಪಿ ನಿರ್ಧಾರ ಎಂಚ ಉಂಡಾಂಡ ಅಂಚೆನೇ ಒಂಜೇ ಎಡ್ಡೆ ಕಾರ್ಯೊಡ್ದು ಮಾತ ನರಮಾನಿಲೆಗ್ ನೀತಿವಂತೆರ್ ಪನ್ಪಿ ನಿರ್ಧಾರ ಉಂಡಾದ್ ಜೀವೊನು ಉಂಡು ಮಲ್ಪುಂಡು.</verse>
				<verse number="19">ಒರಿಯನ ತಿರಸ್ಕಾರೊಡ್ದು ಮಾತೆರ್ಲಾ ಪಾಪಿಲು ಆಯೆರಾ ಅಂಚೆನೇ ಒರಿಯನ ಎಡ್ಡೆ ಮನಸ್‌ಡ್ದ್ ಮಾತೆರ್ಲಾ ನೀತಿವಂತೆರಾಪೆರ್.</verse>
				<verse number="20">ಅಪರಾಧೊಲು ಹೆಚ್ಚಾದ್ ತೋಜಿದ್ ಬರ್ಪಿಲೆಕ್ಕ ನ್ಯಾಯಕಟ್ಟ್ ನಡುಟು ಬತ್ತ್ಂಡ್. ಆಂಡ ಪಾಪ ಹೆಚ್ಚಿನಂಚೆನೇ ದೇವೆರೆ ದಯೆಲಾ ಹೆಚ್ಚಾದ್ ಬಲ ಆಂಡ್.</verse>
				<verse number="21">ಅಂಚಾಂಡ ಪಾಪೊಡ್ದು ಮರಣ ಆಳುನಾಂಡ ದೇವೆರೆ ದಯೊಡ್ದು ನೀತಿ ಆಳುಂಡು, ನಮನ್ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಿತ್ಯಜೀವೊಗು ನಡಪುಡುಂಡು.</verse>
			</chapter>
			<chapter number="6">
				<verse number="1">ಅಪಗಾಂಡ ದಾದ ಪನ್ಕ? ದೇವೆರೆ ದಯೆ ಹೆಚ್ಚಾವಡ್ ಅಂದ್‌ದ್ ನಮ ಪಾಪ ಮಲ್ತೊಂದೆ ಉಪ್ಪುಗನಾ? ಏಪೊಗ್ಲಾ ಉಪ್ಪೆರೆ ಬಲ್ಲಿ?</verse>
				<verse number="2">ಪಾಪದ ಪಾಲ್‌ಗ್ ಸೈತಿನಕುಲಾಯಿ ಎಂಕುಲು ನನ ಐಟ್ಟೇ ಬದುಕುನು ಎಂಚ?</verse>
				<verse number="3">ಕ್ರಿಸ್ತ ಯೇಸುಡೊಪ್ಪ ಸೇರೊನಿಯೆರೆ ದೀಕ್ಷಾಸ್ನಾನ ಮಲ್ತೊಂಡಿನಕುಲಾಯಿ ಎಂಕುಲು ಮಾತೆರ್ ಆಯ ಮರಣೊಡು ಪಾಲ್‌ದಾರೆರ್ ಆವೆರೆ ದೀಕ್ಷಾಸ್ನಾನ ಪಡೆವೊಂದ ಪನ್ಪಿನವು ನಿಕ್ಲೆಗ್ ತೆರಿದಿಜಾ?</verse>
				<verse number="4">ಇಂಚ ಉಪ್ಪುನಗ ನಮ ದೀಕ್ಷಾಸ್ನಾನ ಮಲ್ತೊಂಡಿನಪಗ ಆಯ ಮರಣೊಡು ಪಾಲ್‌ದಾರೆರಾದ್ ಆಯಡೊಪ್ಪ ಕೌಂತುದಿನಾಕುಲಾಯ. ಐಡ್ದಾವರ ಕ್ರಿಸ್ತೆ ಸೈತ್‌ದ್ ಅಮ್ಮೆರೆನ ಮೈಮೆಡ್ದ್ ಜೀವೊಡು ಲಕ್ಕಾಯಿ ಲೆಕ್ಕನೆ ನಮಲಾ ಜೀವೊಡು ಲಕ್ಕ್‌ದ್ ಪೊಸಬೆರಾದ್ ನಡತೊನೊಡು.</verse>
				<verse number="5">ಎಂಚಂದ್ಂಡ ಆಯ ಮರಣೊಡು ನಮ ಆಯಡೊಪ್ಪ ಒಂಜಾಯಿ ಬೊಕ್ಕ, ಆಯ ಲೆಕ್ಕನೇ ಸೈತಿನಾಕುಲೆಡ್ದ್ ಜೀವೊಡು ಲಕ್ಕ್‌ದ್ ಆಯಡೊಪ್ಪ ಒಂಜಾದುಪ್ಪುವ.</verse>
				<verse number="6">ನಮ ಪಾಪದ ಶರೀರಭಾವ ನಾಶಾದ್ ನಮ ನನಲಾ ಪಾಪದ ವಶೊಟ್ಟುಪ್ಪಂದಿಲೆಕ್ಕ ಪರ ನರಮಾನಿನ್ ಕ್ರಿಸ್ತಡೊಪ್ಪ ಕ್ರುಸ್ಸುಗು ಪಾಡ್ದ್ ಆತ್ಂಡ್ ಪಂಡ್ದ್ ನಂಕ್ ಗೊತ್ತುಂಡು. ನಮ ನನ ಪಾಪೊಗು ಗುಲಾಮೆರಾದ್ ಇಜ್ಜ.</verse>
				<verse number="7">ಸೈತಿನಾಯೆ ಪಾಪದ ವಶೊಡ್ದು ಬುಡುಗಡೆ ಪಡೆತೆ.</verse>
				<verse number="8">ಉಂದತ್ತಂದೆ ನಮ ಕ್ರಿಸ್ತಡೊಪ್ಪ ಸೈತಿ ಪಕ್ಷೊಡು ಆಯಡೊಪ್ಪ ಬದುಕುವ ಅಂದ್‌ದ್ ನಂಬುವ.</verse>
				<verse number="9">ಕ್ರಿಸ್ತೆ ಸೈತಿ ಬೊಕ್ಕ ಜೀವಾದ್ ಲಕ್ಕ್‌ದ್ ಬತ್ತ್‌ತ್ತಿನೆಡ್ದ್ ಆಯೆ ನನ ದುಂಬಗ್ ಸೈಯೆರೆ ಉಪ್ಪುನಾಯೆ ಅತ್ತ್.</verse>
				<verse number="10">ಮರಣ ನನ ಏಪೊಗ್ಲಾ ಆಯನ್ ಆಳುಜಿ ಪನ್ಪಿನವು ನಂಕ್ ತೆರಿದ್‌ಂಡ್. ಆಯೆ ಸೈತಿನವು ಒಂಜೇ ಸರಿ, ಅವು ಪಾಪದ ಪಾಲ್‌ಗ್. ಆಯೆ ಬದುಕುನವು ದೇವೆರೆಗಾದೇ.</verse>
				<verse number="11">ಅವ್ವೇ ಪ್ರಕಾರ ನಿಕುಲುಲಾ ನಿಕ್ಲೆನ್ ಕ್ರಿಸ್ತ ಯೇಸುಡೊಪ್ಪ ಪಾಪದ ಪಾಲ್‌ಗ್ ಸೈತಿನಾಕುಲುಲಾ ದೇವೆರೆಗಾದ್ ಬದುಕುನಾಕುಲುಲಾ ಅಂದ್‌ದ್ ಎನ್ನೊನ್ಲೆ.</verse>
				<verse number="12">ಇಂಚಾದುಪ್ಪುನಗ ಸೈಯ್ಯೊಡಾಯಿನ ನಿಕ್ಲೆನ ಶರೀರದ ಮಿತ್ತ್ ಪಾಪ ಆಳಂದೆ ಉಪ್ಪಡ್, ನಿಕುಲು ಶರೀರದ ದುರಾಶೆಗ್ ಗುಲಾಮೆರಾವೊಡ್ಚಿ.</verse>
				<verse number="13">ಉಂದು ಮಾತ್ರ ಅತ್ತಂದೆ ನಿಕುಲು ನಿಕ್ಲೆನ ಅಂಗೊಲೆನ್ ಪಾಪೊಗು ಒಪ್ಪಿಯಾವುನಕುಲಾದ್ ಪಡಿಕೆ ಉದ್ದೇಶೊಲೆಗಾದ್ ಉಪಯೋಗ ಮಲ್ಪಡೆ. ಮರಣೊಡ್ದು ಜೀವೊಗು ಬೈದಿನಾಕುಲೆ ಲೆಕ್ಕ ನಿಕ್ಲೆನ್ ದೇವೆರೆಗ್ ಒಚ್ಚಿದ್ ಕೊರ್ಲೆ; ಬೊಕ್ಕ ನೀತಿದ ಕಾರ್ಯೊಲೆಗಾದ್ ಉಪಯೋಗ ಆಪಿಲೆಕ್ಕ ನಿಕ್ಲೆ ಇಡೀ ಶರೀರೊನು ಆಯ ವಶೊಕ್ಕು ಕೊರ್ಲೆ.</verse>
				<verse number="14">ದಾಯೆ ಪಂಡ ಪಾಪ ನಿಕ್ಲೆ ಮಿತ್ತ್ ಅಧಿಕಾರ ನಡಪಾವುಜಿ. ನಿಕುಲು ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಆದುಲ್ಲರ್ ಆತೇ.</verse>
				<verse number="15">ಅಪಗಾಂಡ ದಾನೆ? ನಮ ನ್ಯಾಯಕಟ್ಟ್‌ಗ್ ಒಳಗಾಯಿನಾಕುಲತ್ತ್. ದಯೊಕು ಒಳಗಾಯಿನಾಕುಲು ಪಂಡ್ದ್ ಪಾಪೊನು ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ.</verse>
				<verse number="16">ನಿಕುಲು ಏರೆಗಾಂಡಲಾ ಗುಲಾಮೆರಾದ್ ಆಯೆ ಪಂಡಿನೆನ್ ಮಾತ ಕೇನಿಯೆರೆ ನಿಕ್ಲೆನ್ ಒಚ್ಚಿದ್ ಕೊರ್ಪರಾ ಆ ಯಜಮಾನಗೇ ಗುಲಾಮೆರ್ ಆದುಪ್ಪುವರ್ ಪಂಡ್ದ್ ನಿಕ್ಲೆಗ್ ತೆರಿದಿಜಾ? ಪಾಪೊಗು ಗುಲಾಮೆರ್ ಆಂಡ ಮರಣನೇ ಫಲ, ನಂಬಿಕೆಡ್ದ್ ತಗ್ಗ್‌ತನೊಗು ಗುಲಾಮೆರ್ ಆಯರ್ಡ ನೀತಿಯೇ ಫಲ.</verse>
				<verse number="17">ಆಂಡ ನಿಕುಲು ಪಿರವುಡು ಪಾಪೊಗು ಗುಲಾಮೆರ್ ಆದಿತ್ತರ್ಡಲಾ ನಿಕ್ಲೆಗ್ ಕಲ್ಪಾಯಿ ಬೋಧನೆಲೆಗ್ ನಿಕುಲು ಉಡಲ್‌ಡ್ದ್ ಅಧೀನರಾಯರ್. ಪಾಪೊಲೆಡ್ದ್ ಬುಡುಗಡೆ ಆದ್ ನೀತಿಗ್ ಗುಲಾಮೆರ್ ಆಯಿನೆಡ್ದ್ ದೇವೆರೆಗ್ ಉಪಕಾರ ಆವಡ್.</verse>
				<verse number="18"></verse>
				<verse number="19">ನಿಕ್ಲೆನ ಶರೀರದ ಬಲಹೀನತೆದ ದಿಸೆಡ್ದ್ ಲೋಕದ ರೀತಿಡ್ ಪಾತೆರ್‌ವೆ. ಅನ್ಯಾಯ ಮಲ್ಪೆರೆ ನಿಕ್ಲೆನ ಅಂಗೊಲೆನ್ ಬಂಡ್‌ತನೊಗ್ಲಾ ಅನ್ಯಾಯೊಗ್ಲಾ ಎಂಚ ಗುಲಾಮೆರಾದ್ ಒಚ್ಚಿದ್ ಕೊರಿಯರಾ ಅಂಚೆನೆ ಇತ್ತೆ ಪರಿಶುದ್ಧೆರ್ ಆಪಿಲೆಕ್ಕ ನಿಕ್ಲೆನ ಅಂಗೊಲೆನ್ ನೀತಿಗ್ ಅಡಿಯಾಳಾದ್ ಒಪ್ಪಿಸಾಲೆ.</verse>
				<verse number="20">ನಿಕುಲು ಪಾಪೊಗು ಗುಲಾಮೆರಾದುಪ್ಪುನಗ ನೀತಿದ ಹಂಗ್‌ದಾಕುಲಾದಿತ್ತಿಜರ್.</verse>
				<verse number="21">ಆಂಡ ನಿಕುಲು ಅಪಗ ಮಲ್ತಿ ಕಾರ್ಯೊಲೆಡ್ದ್ ನಿಕ್ಲೆಗಾಯಿ ಫಲ ದಾನೆ? ಇತ್ತೆ ಐತ ಸಂಗತಿಡ್ ನಿಕ್ಲೆಗ್ ನಾಚಿಗೆ ಉಂಡತ್ತಾ? ಕಡೆಕ್ಕ್ ಐಕ್ಲೆಡ್ದ್ ಬರ್ಪಿನಿ ಮರಣ ಅತ್ತಾ?</verse>
				<verse number="22">ಇತ್ತೆ ಆಂಡಲಾ ನಿಕುಲು ಪಾಪೊಡ್ದು ಬುಡುಗಡೆ ಪಡೆದ್ ದೇವೆರೆಗ್ ಗುಲಾಮೆರ್ ಆಯಿನೆಡ್ದ್ ಪರಿಶುದ್ಧೆರಾಪಿನವೇ ನಿಕ್ಲೆಗ್ ಫಲ. ಕಡೆಕ್ಕ್ ತಿಕ್ಕುನಂಚಿನವು ನಿತ್ಯಜೀವ.</verse>
				<verse number="23">ದಾಯೆಗಂದ್ಂಡ ಪಾಪ ಕೊರ್ಪಿನ ಸಂಬಳ ಮರಣ. ದೇವೆರೆಡ್ದ್ ಧರ್ಮಾರ್ಥ ತಿಕ್ಕುನ ಉಡಿಗೆರೆ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡುಪ್ಪುನ ನಿತ್ಯಜೀವ.</verse>
			</chapter>
			<chapter number="7">
				<verse number="1">ಸಹೋದ್ರೆರೇ, ನ್ಯಾಯಕಟ್ಟ್‌ನ್ ತೆರಿದಿನಾಯಗ್ ಯಾನ್ ಪನ್ಪಿನವು ದಾನೆಂದ್ಂಡ, ಒರಿ ನರಮಾನಿ ಜೀವೊಡುಪ್ಪ ಮುಟ್ಟ ಮಾತ್ರ ಆಯ ಮಿತ್ತ್ ನ್ಯಾಯಕಟ್ಟ್‌ದ ಅಧಿಕಾರ ನಡಪುಂಡು ಪನ್ಪಿನವು ನಿಕ್ಲೆಗ್ ಗೊತ್ತಿಜ್ಜಾ?</verse>
				<verse number="2">ಐಕ್ ಒಂಜಿ ಉದಾರಣೆ, ಕಂಡನಿ ಜೀವೊಡುಪ್ಪುನೆಟ್ಟ ಬೊಡೆದಿ ನ್ಯಾಯಪ್ರಕಾರ ಆಯನಾದುಪ್ಪುವಲ್; ಕಂಡನಿ ಸೈತೆಡ ಕಂಡನಿ ಹಂಗ್ ಆಲೆಗ್ ತಪ್ಪುಂಡು.</verse>
				<verse number="3">ಇಂಚ ಉಪ್ಪುನಗ ಕಂಡನಿ ಬದ್‌ಕ್‌ದುಪ್ಪುನಗ ಆಲ್ ಬೇತೆ ಒರಿಯನೊಟ್ಟುಗು ಸೇರಿಯೊಲ್‌ಡ ಆಲ್ ವ್ಯಭಿಚಾರಿ ಪಂಡ್ದ್ ಲೆಪ್ಪಾವೊನುವೊಲು. ಆಂಡ ಕಂಡನಿ ಸೈತಿ ಬೊಕ್ಕ ಆಯನ ಹಂಗ್ ತತ್ತಿನೆಡ್ದ್ ಆಲ್ ಬೊಕ್ಕೊರಿ ಕಂಡನಿನ್ ಮಲ್ತೊಂಡಲಾ ಆಲ್ ವ್ಯಭಿಚಾರಿ ಅತ್ತ್.</verse>
				<verse number="4">ಅಂಚೆನೇ ಎನ ಸಹೋದರೆರೆ, ನಿಕುಲುಲಾ ಕ್ರಿಸ್ತನ ಶರೀರೊಡ್ದಾವರ ನ್ಯಾಯಕಟ್ಟ್‌ದ ಪಾಲ್‌ಗ್ ಸೈತ್‌ದರ್. ದೇವೆರೆಗ್ ಫಲ ಆಪಿನೆಕ್ಕಾದ್ ಬೊಕ್ಕೊರಿಯನ್ ಅಂದ್ಂಡ ಸೈತ್‌ದ್ ಜೀವ ಆದ್ ಲಕ್ಕಿನಾಯಡೊಪ್ಪ ಸೇರೊಂಡರ್.</verse>
				<verse number="5">ನಮ ಶರೀರಭಾವೊಡು ಉಪ್ಪುನಗ ಪಾಪದ ಆಸೆಲು ನ್ಯಾಯಕಟ್ಟ್‌ಡ್ದೇ ಬುಲೆದ್ ನಮ ಅಂಗೊಲೆಡ್ ಬೇಲೆ ಮಲ್ತೊಂದು ಮರಣೊಗು ಫಲೊನು ಪುಟ್ಟಾವೊಂದಿತ್ತ್‌ಂಡ್.</verse>
				<verse number="6">ಇತ್ತೆ ಆಂಡಲಾ ನಮನ್ ವಶ ಮಲ್ತೊಂಡಿ ನ್ಯಾಯಕಟ್ಟ್‌ದ ಪಾಲ್‌ಗ್ ನಮ ಸೈತಿನೆಡ್ದ್ ಆ ಕಟ್ಟ್‌ಡ್ದ್ ಬುಡುಗಡೆ ತಿಕ್ಕ್ಂಡ್. ಇಂಚ ಉಪ್ಪುನಗ ನಮ ನನ ಶಾಸ್ತ್ರದ ಬರವುದ ಪ್ರಕಾರ ಪರ ರೀತಿಡ್ ನಮ ದೇವೆರೆನ ಸೇವೆ ಮಲ್ಪುನಾಕುಲು ಅತ್ತ್. ಪರಿಶುದ್ಧಾತ್ಮಡ್ದ್ ಪೊಸ ರೀತಿಡ್ ಆಯನ ಸೇವೆ ಮಲ್ಪುನಾಕುಲು ಆದುಲ್ಲ.</verse>
				<verse number="7">ಅಂಚಾಂಡ ದಾದ ಪನ್ಕಾ? ನ್ಯಾಯಕಟ್ಟ್ ಪಾಪದ ಸ್ವರೂಪನಾ? ಏಪೊಗ್ಲಾ ಅತ್ತ್. ನ್ಯಾಯಕಟ್ಟ್‌ಡೇ ಅತ್ತಂದೆ ಪಾಪ ಪನ್ಪಿನವು ಎಂಚಿನವು ಪಂಡ್ದ್ ಎಂಕ್ ಗೊತ್ತಾತ್ವ್ಂದ್. ಉದಾರಣೆಗಾದ್ ನನೊರಿಯನ ಸೊತ್ತುನು ಆಸೆ ಮಲ್ಪೆರೆ ಬಲ್ಲಿ ಪಂಡ್ದ್ ನ್ಯಾಯಕಟ್ಟ್ ಪನ್ತ್‌ಜಿಡ ದುರಾಶೆ ಪಂಡ್ಂಡ ಎಂಚಿನವು ಅಂದ್‌ದ್ ಎಂಕ್ ತೆರಿದಿತ್ತ್‌ವಂದ್.</verse>
				<verse number="8">ಆಂಡ ಈ ಅಪ್ಪಣೆಡ್ದ್ ಪಾಪ ಬೋಡಾಯಿನಾತ್ ದುರಾಶೆಲೆನ್ ಎನಡ ಪುಟ್ಟಾಂಡ್. ನ್ಯಾಯಕಟ್ಟ್ ಇಜ್ಜಂದೆ ಉಪ್ಪುನಗ ಪಾಪ ಸೈತಿಲೆಕ್ಕನೆ.</verse>
				<verse number="9">ಸುರುಟ್ಟು ಯಾನ್ ನ್ಯಾಯಕಟ್ಟ್ ಇಜ್ಜಾಂದಿನಾಯೆ ಆದಿತ್ತ್‌ದ್ ಜೀವೊಡಿತ್ತೆ. ಅಪ್ಪಣೆ ಬತ್ತಿನಪಗ ಪಾಪ ಕುಡ ಬದ್‌ಕ್ಂಡ್. ಯಾನ್ ಸೈತೆ.</verse>
				<verse number="10">ಜೀವೊಡುಪ್ಪೆರೆಗಾದ್ ಕೊರ್ದಿತ್ತಿನ ಅಪ್ಪಣೆ ಮರಣೊಗು ಕಾರಣ ಆಂಡ್ ಪಂಡ್ದ್ ಎಂಕ್ ತೆರಿದ್ ಬತ್ತ್ಂಡ್.</verse>
				<verse number="11">ಎಂಚಂದ್ಂಡ ಪಾಪ ಅಪ್ಪಣೆಲೆಡ್ದ್ ಅನುಕೂಲ ಪಡೆದ್ ಎನನ್ ಮೋಸ ಮಲ್ತ್‌ದ್ ಆ ನಿಯಮನೇ ಎನನ್ ಕೆರ್‌ಂಡ್.</verse>
				<verse number="12">ಇಂಚ ಉಪ್ಪುನಗ ನ್ಯಾಯಕಟ್ಟ್ ಪರಿಶುದ್ಧವಾಯಿನವು. ಬೊಕ್ಕ ಅಪ್ಪಣೆಲು ಪರಿಶುದ್ಧದವುಲಾ ನ್ಯಾಯದವುಲಾ, ಎಡ್ಡೆಂತಿನವುಲಾ ಆದುಂಡು.</verse>
				<verse number="13">ಅಂಚಾಂಡ ಎಡ್ಡೆಂತಿನವು ಎಂಕ್ ಮರಣೊಗು ಕಾರಣ ಆಂಡಾ? ಅಂಚ ಏಪೊಗ್ಲಾ ಪನಿಯೆರೆ ಬಲ್ಲಿ. ಪಾಪನೇ ಮರಣೊಗು ಕಾರಣವಾಯಿನವು. ಎಡ್ಡೆಂತಿನೆಡ್ದ್ ಪಾಪ ಎಂಕ್ ಮರಣೊನು ಉಂಡು ಮಲ್ತ್ಂಡ್. ಅಂಚ ಪಾಪದ ನಿಜ ಸ್ವರೂಪ ಗೊತ್ತಾಂಡ್. ಬೊಕ್ಕ ಅಪ್ಪಣೆಡ್ದಾವರ ಪಾಪ ಪನ್ಪಿನವು ನನಲಾ ಭಯಂಕರದವು ಪಂಡ್ದ್ ತೆರಿದ್ ಬತ್ತ್ಂಡ್.</verse>
				<verse number="14">ನ್ಯಾಯಕಟ್ಟ್ ಆತ್ಮೀಕವಾಯಿನವು ಅಂದ್‌ದ್ ನಮ ತೆರಿದ. ಆಂಡ ಯಾನ್ ಶರೀರಭಾವದಾಯೆ ಪಾಪೊಗು ಸ್ವಾದೀನೊಡುಪ್ಪೆರೆ ಮಾರ್ದ್ ಪೋತಿನಾಯೆ ಆದುಲ್ಲೆ.</verse>
				<verse number="15">ಎಂಚಂದ್ಂಡ ಯಾನ್ ಮಲ್ಪುನವು ಎಂಕೇ ಗೊತ್ತಿಜ್ಜಿ. ಒವೆನ್ ಮಲ್ಪೊಡಂದ್ ಯಾನ್ ಎನ್ನ್‌ದುಪ್ಪುವೆನಾ ಅವೆನ್ ನಡಪಾವಂದೆ ಬೊಡ್ಚಾಂದಿನೆನ್ ಮಲ್ತೊಂದುಲ್ಲೆ.</verse>
				<verse number="16">ಆಂಡ ಯಾನ್ ಮಲ್ಪೆರೆ ಎನ ಮನಸ್ ಒಪ್ಪಿಜಿಡ ನ್ಯಾಯಕಟ್ಟ್ ಎಡ್ಡೆಂತಿನವು ಅಂದ್‌ದ್ ಒಪ್ಪಿಯೊಂಡಿಲೆಕ್ಕ ಆಂಡ್.</verse>
				<verse number="17">ಇಂಚ ಉಪ್ಪುನಗ ಬೊಡ್ಚಾಂದಿನೆನ್ ಮಲ್ಪುನಾಯೆ ನನ ಯಾನತ್ತ್. ಎನಡ ನಿಲೆ ಆತಿ ಪಾಪನೇ ಅವೆನ್ ಮಲ್ಪುಂಡು.</verse>
				<verse number="18">ಎನಡ ಅಂದ್ಂಡ, ಎನ ಶರೀರಭಾವೊಡು ಎಡ್ಡೆಂತಿನವು ದಾಲಾ ಇಜ್ಜಿ ಅಂದ್‌ದ್ ಎಂಕ್ ತೆರಿದ್‌ಂಡ್. ಎಡ್ಡೆಂತಿನೆನ್ ಮಲ್ಪೆರೆ ಎಂಕ್ ಮನಸುಂಡು. ಆಂಡ ಅವೆನ್ ಮಲ್ಪುನವು ಎನಡ್ದ್ ಆವಂದ್.</verse>
				<verse number="19">ಯಾನ್ ಮೆಚ್ಚುನ ಎಡ್ಡೆ ಕಾರ್ಯೊಲೆನ್ ಮಲ್ಪಂದೆ ಮೆಚ್ಚಂದಿ ಪಡಿಕೆಂತಿನೆನೇ ಮಲ್ಪುನಾಯೆ ಆದುಲ್ಲೆ.</verse>
				<verse number="20">ಮಲ್ಪೆರೆ ಬಲ್ಲಿ ಪನ್ಪಿ ಬೇಲೆನ್ ಯಾನ್ ಮಲ್ತ್ಂಡ ಅವೆನ್ ಮಲ್ತಿನಾಯೆ ಯಾನತ್ತ್. ಎನಡ ನಿಲೆ ಆದುಪ್ಪು ಪಾಪನೇ ಅವೆನ್ ಮಲ್ತ್ಂಡ್.</verse>
				<verse number="21">ಇಂಚ ಈ ನಿಯಮೊಲು ಕಾರ್ಯ ಮಲ್ತೊಂದುಂಡು ಪಂಡ್ದ್ ಎಂಕ್ ತೋಜಿದ್ ಬರ್ಪುಂಡು. ಯಾನ್ ಎಡ್ಡೆಂತಿನೆನ್ ಮಲ್ಪೆರೆ ಆಸೆ ಮಲ್ಪುನಗ ಎನ ಎದುರು ಪಡ್ಕೆಂತಿನವು ಮಾತ್ರ ಬರ್ಪುಂಡು.</verse>
				<verse number="22">ಅಂತರ್ಯದ ಉಲಯಿ ದೇವೆರೆ ನಿಯಮೊಲೆಡ್ ಸಂತೋಷ ಪಡೆಪಿನಾಯೆ ಆದುಲ್ಲೆ. ಆಂಡ ಅಂಗೊಲೆಡ್ ಬೇತೆ ಒಂಜಿ ನಿಯಮ ಉಂಡು ಪಂಡ್ದ್ ತೂಪೆ.</verse>
				<verse number="23">ಅವು ಎನ ಅಂರ್ತಯೊಡುಪ್ಪುನ ನಿಯಮೊಗು ವಿರೊದ್ಧಾದ್ ಹೋರಾಟ ಮಲ್ತ್‌ದ್ ಎನನ್ ಕೈದ್ ಮಲ್ತ್‌ದ್ ಎನ ಅಂಗೊಲೆಡ್ ಉಪ್ಪುನ ಪಾಪದ ನಿಯಮೊಗು ವಶಮಲ್ಪುನವು ಆದುಂಡು.</verse>
				<verse number="24">ಅಯ್ಯೋ ಯಾನ್ ಏತೊಂಜಿ ದುರಾವಸ್ಥೆಡ್ ಬೂರ್ದಿನ ನರಮಾನಿ! ಈ ಮರಣದ ಶರೀರೊಡ್ದು ಎನನ್ ಬುಡ್ಪಾವುನಾಯೆ ಏರ್?</verse>
				<verse number="25">ಬುಡ್ಪಾವುನಾಯೆ ಉಲ್ಲೆ ಪಂಡ್ದ್ ಪನ್ಪಿನೆಕ್ಕ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ದೇವೆರೆಗ್ ಉಪಕಾರ. ಇಂಚ ಉಪ್ಪುನಗ ಎನ್ನಾತೆಗ್ ಯಾನೇ ಅಂರ್ತಯೊಡು ದೇವೆರೆ ನಿಯಮೊಲೆಗ್ ಸೇವಕೆ ಆದ್‌ಲಾ ಶರೀರ ಸಮ್ಮಂಧೊಡು ಪಾಪ ಪನ್ಪಿ ನಿಯಮೊಲೆಗ್ ಸೇವಕೆ ಆದ್‌ಲಾ ನಡತೊನುನಾಯೆ ಆದುಲ್ಲೆ.</verse>
			</chapter>
			<chapter number="8">
				<verse number="1">ಅವೆಡ್ದಾವರ ಕ್ರಿಸ್ತ ಯೇಸುಡೊಪ್ಪ ಉಪ್ಪುನಾಕುಲೆಗ್ ಅಪರಾಧದ ತೀರ್ಪು ಇತ್ತೆ ಇಜ್ಜೇ ಇಜ್ಜಿ.</verse>
				<verse number="2">ದಾಯೆ ಪಂಡ ಜೀವ ಉಂಡು ಮಲ್ಪುನ ಪರಿಶುದ್ಧಾತ್ಮಡ್ದ್ ಉಂಡಾಯಿ ನಿಯಮೊಲು ನಿನನ್ ಪಾಪ ಮರಣೊಲೆಗ್ ಕಾರಣ ಆಪಿನ ನಿಯಮೊಲೆಡ್ದ್ ಕ್ರಿಸ್ತ ಯೇಸುಡು ಬುಡುಗಡೆ ಮಲ್ತ್ಂಡ್.</verse>
				<verse number="3">ಶರೀರಭಾವ ಬಲಹೀನ ಆದುಪ್ಪುನೆಡ್ದ್ ನ್ಯಾಯಕಟ್ಟ್‌ಗ್ ಮಲ್ಪೆರೆ ಆವಂದಿನೆನ್ ದೇವೆರೆ ಮಲ್ತೆ. ಆಯೆ ತನ ಸ್ವಂತ ಮಗನೇ ಕಡಪುಡ್ದು ಶರೀರಭಾವೊಡೇ ಉಪ್ಪು ಪಾಪೊನು ಖಂಡಿಸಾಯೆ; ಆಯೆ ನಮ ಪಾಪದ ಸ್ವಭಾವದಂಚಿನ ಸ್ವಭಾವೊಡೇ ಬತ್ತ್‌ದ್ ಪಾಪೊನು ದೆತ್ತ್‌ದ್ ಪಾಡಿಯೆ.</verse>
				<verse number="4">ದೇವೆರ್ ಇಂಚ ಮಲ್ತಿನಿ ದಾಯೆಗಂದ್ಂಡ, ಶರೀರಭಾವೊಗು ಸರಿಯಾದ್ ಬದ್‌ಕಂದೆ, ಪರಿಶುದ್ಧಾತ್ಮಗ್ ಸರಿಯಾದ್ ಬದುಕುನಾಕುಲಾದ್ ನಮಡ ನ್ಯಾಯಕಟ್ಟ್‌ದ ನಿಯಮೊಲು ಪೂರ್ತಿ ಆವೆರೆ ಸಾದಿ ಆಂಡ್.</verse>
				<verse number="5">ಶರೀರಭಾವೊಡು ಬದುಕುನಾಕುಲು ಐಕ್ ಸಮ್ಮಂಧವಾಯಿನೆತ್ತ ಮಿತ್ತ್ ಮನಸ್ ದೀಪೆರ್. ಆಂಡ ಪವಿತ್ರಾತ್ಮಭಾವೊಡು ಬದುಕುನಾಕುಲು ಪರಿಶುದ್ಧಾತ್ಮಗ್ ಸಮ್ಮಂಧವಾಯಿನೆತ್ತ ಮಿತ್ತ್ ಮನಸ್ ದೀಪೆರ್.</verse>
				<verse number="6">ಶರೀರಭಾವೊಡು ನಡಪುಡುನವು ಮರಣೊಡು ಅಂತ್ಯ ಆಪುಂಡು. ಆಂಡ ಆತ್ಮಭಾವೊಡು ನಡಪುಡುನವು ಜೀವೊಡ್ಲಾ ಸಮಾಧಾನೊಡ್ಲಾ ಅಂತ್ಯ ಆಪುಂಡು.</verse>
				<verse number="7">ಅಂಚಾದ್, ತನ್ಕುಲೆ ಶರೀರಭಾವೊಡು ನಡಪುಡುನಾಕುಲು ದೇವೆರೆಗ್ ವೈರಿಲಾಪೆರ್; ಅಕುಲು ದೇವೆರೆ ನಿಯಮೊಲೆನ್ ಕೈಕೊನುಜೆರ್, ಕೈಕೊನಿಯೆರೆ ಅಕ್ಲೆಗ್ ಆಪಿನವುಲಾ ಇಜ್ಜಿ.</verse>
				<verse number="8">ಶರೀರಭಾವೊಡು ಬದುಕುನಾಕುಲು ದೇವೆರೆನ್ ಮೆಚ್ಚಾವೆರೆ ಆಪುಜಿ.</verse>
				<verse number="9">ಆಂಡ ನಿಕುಲು ಶರೀರ ಪಂಡಿಲೆಕ್ಕ ನಡಪುಜರ್; ಪಗತೆಗ್ ನಿಕುಲು ದೇವೆರಾತ್ಮೆ ಪಂಡಿಲೆಕ್ಕ ನಡಪುವರ್. ಏರೆಗಾಂಡಲಾ ಕ್ರಿಸ್ತನ ಆತ್ಮ ಇಜ್ಜಾಂಡ ಆಯೆ ಕ್ರಿಸ್ತನಾಯೆ ಅತ್ತ್.</verse>
				<verse number="10">ಆಂಡ ಕ್ರಿಸ್ತೆ ನಿಕ್ಲೆಡಿತ್ತ್‌ಂಡ, ನಿಕ್ಲೆ ಶರೀರ ಪಾಪದ ದಿಸೆಡ್ದ್ ಸೈತ್ ಪೋಂಡಲಾ, ನಿಕ್ಲೆನ ಆತ್ಮ ನೀತಿದ ದಿಸೆಡ್ದ್ ಜೀವದವು ಆದುಂಡು.</verse>
				<verse number="11">ಯೇಸುನು ಸೈತಿನಾಕುಲೆಡ್ದ್ ಜೀವೊಡು ಲಕ್ಕಾದಿನಾಯನ ಆತ್ಮ ನಿಕ್ಲೆಡ್ ಉಪ್ಪುನಾಂಡ, ಕ್ರಿಸ್ತ ಯೇಸುನು ಸೈತಿನಾಕುಲೆಡ್ದ್ ಲಕ್ಕಾಯಿನಾಯೆ ನಿಕ್ಲೆಡ್ ಉಪ್ಪು ತನ ಆತ್ಮಡ್ದ್ ನಿಕ್ಲೆ ಮರಣದ ಶರೀರೊನ್ಲಾ ಬದ್‌ಕಾವೆ.</verse>
				<verse number="12">ಇಂಚ ಉಪ್ಪುನಗ ಸಹೋದ್ರೆರೇ, ನಮ ಹಂಗ್‌ಡುಲ್ಲ, ಆಂಡ ಪವಿತ್ರಾತ್ಮೊಗು ಸರಿಯಾದ್ ನಡಪುನ ಹಂಗ್‌ಡುಲ್ಲ ಅತ್ತಂದೆ ಶರೀರಭಾವೊಡು ಬದುಕೊಡು ಪನ್ಪಿ ಹಂಗ್‌ಡ್ ಇಜ್ಜ.</verse>
				<verse number="13">ನಿಕುಲು ಶರೀರಭಾವೊಡು ಬದ್‌ಕಿಯರ್ಡ ಸೈಪಿನಿ ಕಂಡಿತ. ನಿಕುಲು ಪರಿಶುದ್ಧಾತ್ಮಡ್ದ್ ಶರೀರೊಡು ಆಪಿ ದುರಬ್ಯಾಸೊಲೆನ್ ನಾಶ ಮಲ್ಪುನಾಂಡ ಬದುಕುವರ್.</verse>
				<verse number="14">ಏರೇರ್ ದೇವೆರೆ ಆತ್ಮೊಡ್ದು ನಡತೊನ್ವೆರಾ ಅಕುಲು ದೇವೆರೆ ಜೋಕುಲು.</verse>
				<verse number="15">ನಿಕ್ಲೆಗ್ ದೇವೆರ್ ಕೊರ್ತಿನ ಆತ್ಮೆ ನಿಕ್ಲೆನ್ ನ್ಯಾಯಕಟ್ಟ್‌ದ ಗುಲಾಮೆರಾದ್ ಮಲ್ತ್‌ದ್ ಪೋಡಿಗೆಡ್ ಪಾಡುನವು ಅತ್ತ್; ಪಗತೆಗ್ ಈ ಆತ್ಮೆ ನಿಕ್ಲೆನ್ ದೇವೆರೆ ಜೋಕುಲಂದ್‌ದ್ ಮಲ್ಪುವೆ. ಈ ಆತ್ಮನ ಬಲೊಡ್ದು ನಮ ದೇವೆರೆನ್, “ಅಮ್ಮೆರೇ! ಎನ ಅಮ್ಮೆರೆ!” ಪಂಡ್ದ್ ಲೆಪ್ಪುವ.</verse>
				<verse number="16">ನಮ ದೇವೆರೆ ಜೋಕುಲು ಆದುಲ್ಲ ಪನ್ಪಿನೆಕ್ಕ್ ಪವಿತ್ರಾತ್ಮೆನೇ ನಮ ಆತ್ಮದೊಟ್ಟಿಗೆ ಸಾಕ್ಷಿ ಪನ್ಪುಂಡು.</verse>
				<verse number="17">ನಮ ಜೋಕುಲು ಆದುಲ್ಲಡ ಹಕ್ಕ್‌ದಾಕುಲಾದುಲ್ಲ, ದೇವೆರೆ ಹಕ್ಕ್‌ದಾಕುಲಾದುಲ್ಲ, ಅಂಚೆನೆ ಕ್ರಿಸ್ತಡೊಪ್ಪಲಾ ಹಕ್ಕ್‌ದಾಕುಲಾದುಲ್ಲ. ದಾಯೆಗಂದ್ಂಡ ಕ್ರಿಸ್ತನ ಭಾದೆಲೆಡ್ ನಮ ಪಾಲ್ ದೆತ್ತೊನುವಡ ಆಯ ಮೈಮೆಡ್ಲಾ ನಂಕ್ ಪಾಲುಂಡು.</verse>
				<verse number="18">ಇತ್ತೆದ ಕಾಲೊಲೆಡ್ ನಂಕಾಪಿನ ಕಷ್ಟೊಲು ನಂಕ್ ದುಂಬಗ್ ತಿಕ್ಕುನ ಮೈಮೆದ ಎದುರುಡು ದಾಲಾ ಅತ್ತ್ ಪಂಡ್ದ್ ಯಾನ್ ಎನ್ನುವೆ.</verse>
				<verse number="19">ದೇವೆರೆ ಜೋಕುಲೆಗ್ ತಿಕ್ಕುನ ಮೈಮೆ ಏಪ ತೋಜಿದ್ ಬರು ಅಂದ್‌ದ್ ಇಡೀ ಸೃಷ್ಟಿಲಾ ಆಸೆಡ್ ಕಾತೊಂದುಂಡು.</verse>
				<verse number="20">ಇಡೀ ಸೃಷ್ಟಿ ಬೊಡ್ಚಾಂದಿನೆಕ್ಕ್ ಒಳಗಾಂಡ್, ಇಂಚ ಒಳಗಾಯಿನಿ ಐತ ಸ್ವಂತ ಚಿತ್ತೊಡ್ದಾದ್ ಅತ್ತ್; ಅವೆನ್ ಉಂಡು ಮಲ್ತಿನಾಯನ ಚಿತ್ತೊಡ್ದೇ ಆಂಡ್.</verse>
				<verse number="21">ಎಂಚ ಪಂಡ್ಂಡ ಈ ನಾಶಾಪಿನ ಗುಲಾಮತನೊಡ್ದು ಈ ಸೃಷ್ಟಿಲಾ ಒಂಜಿ ದಿನ ಬುಡುಗಡೆ ಆವು; ದೇವೆರೆ ಜೋಕುಲು ಆಪಿನ ಮೈಮೆದ ಬುಡುಗಡೆಟ್ ಪಾಲ್ ಪಡೆಯುನವೇ.</verse>
				<verse number="22">ಇನಿ ಮುಟ್ಟಲಾ ಇಡೀ ಸೃಷ್ಟಿ ಪೆದ್ಪಿ ಬೇನೆದಲೆಕ್ಕ ನರಕೊಂದುಂಡು ಪಂಡ್ದ್ ನಮ ತೆರಿದ.</verse>
				<verse number="23">ಉಂದು ಮಾತ್ರ ಅತ್ತಂದೆ ಸುರುತ್ತ ಫಲ ಆದುಪ್ಪು ಪರಿಶುದ್ಧಾತ್ಮನ ವರೊನು ಪಡೆಯಿ ನಮಾಂಡಲಾ ದೇವೆರೆ ಮಗನ ಸ್ಥಾನೊನು ಅಂದ್ಂಡ ಶರೀರೊಗು ಬರೊಡಾಯಿನ ಬುಡುಗಡೆನ್ ಕಾತೊಂದು ನಮ ಉಲಯಿ ನರಕೊಂದುಲ್ಲ.</verse>
				<verse number="24">ನಮ ರಕ್ಷಣೆ ಪಡೆಯಿನಕುಲಾಂಡಲಾ ನನಲಾ ಕಾತೊಂದುಲ್ಲ. ಕಾತೊಂದುಪ್ಪುನವು ನಂಕ್ ತೋಜಿದ್ ಬತ್ತಿತ್ತ್ಂಡಾ ನನಲಾ ಕಾತೊಂದುಪ್ಪುನು ದಾಯೆಗ್? ಬತ್ತ್‌ತ್ತಿನೆನ್ ಕಾತೊಂದುಪ್ಪೆರೆ ಉಂಡಾ?</verse>
				<verse number="25">ಆಂಡ ತೂವಂದಿನೆನ್ ನಮ ಕಾತೊಂದುಪ್ಪುನಾಂಡ, ತಾಳ್ಮೆಡ್ ಕಾತೊಂದುಪ್ಪುವ.</verse>
				<verse number="26">ಅಂಚೆನೇ ಪರಿಶುದ್ಧಾತ್ಮೆಲಾ ಬಲಹೀನೆರಾದುಪ್ಪು ನಂಕ್ ಸಹಾಯ ಮಲ್ಪುವೆ. ನಂಕ್ ಎಂಚ ಪ್ರಾರ್ಥನೆ ಮಲ್ಪೊಡಂದ್‌ದ್ ತೆರಿಯಂದಿನಪಗ ಪರಿಶುದ್ಧಾತ್ಮೆನೇ ಪನಿಯೆರೆ ಆವಂದಿ ನರಳಾಟೊಡ್ದು ನಂಕಾದ್ ನಟ್ಟೊನ್ವೆ.</verse>
				<verse number="27">ಆಂಡ ಉಡಲ್‌ನ್ ತೂಪಿನ ಪವಿತ್ರಾತ್ಮನ ಯೋಚನೆ ದಾನೆ ಪಂಡ್ದ್ ತೆರಿದುಂಡು. ಆ ಆತ್ಮೆ ದೇವೆರೆ ಚಿತ್ತೊಗು ಸರಿಯಾದ್ ದೇವಜನೊಕುಲೆಗಾದ್ ನಟ್ಟೊನ್ವೆ ಪಂಡ್ದ್ ಆಯೆ ತೆರಿದೆ.</verse>
				<verse number="28">ಉಂದತ್ತಂದೆ ದೇವೆರೆ ಸಂಕಲ್ಪೊಡ್ದು ಲೆಪ್ಪಾವೊಂದು ಪ್ರೀತಿ ಮಲ್ಪುನಾಕುಲೆನ ಎಡ್ಡೆಗ್ ಮಾತ ಕಾರ್ಯೊಲು ಅನುಕೂಲ ಆಪುಂಡು ಪಂಡ್ದ್ ನಂಕ್ ಗೊತ್ತುಂಡು.</verse>
				<verse number="29">ದಾಯೆಗಂದ್ಂಡ ದೇವೆರ್ ತನ ಮಗಕ್ಕ್ ಸುಮಾರ್ ಜನ ಸಹೋದ್ರೆರ್ ಇತ್ತ್‌ದ್ ಅಕ್ಲೆಡ್ ಆಯೆನೇ ಕಡೀರ್‌ದಾಯೆ ಆವೊಡು ಪಂಡ್ದ್ ಎನ್ನ್‌ದ್ ತಾನ್ ಏರೆನ್ ತನ್ನಾಕುಲು ಪಂಡ್ದ್ ದುಂಬು ತೆರಿಯೊಂಡೆನಾ ಅಕ್ಲೆನ್ ತನ ಮಗನಲೆಕ್ಕ ದುಂಬೇ ನೇಮಕ ಮಲ್ತೆ.</verse>
				<verse number="30">ಇಂಚ ಪ್ರತ್ಯೇಕ ಮಲ್ತ್‌ದಿನಾಕುಲೆನ್ ದೇವೆರ್ ಲೆತ್ತೆ; ಲೆತ್ತಿನಾಕುಲೆನ್ ತನಡೊಪ್ಪ ನೀತಿವಂತೆರ್ ಅಂದ್‌ದ್ ಅಕ್ಲೆಡೊಪ್ಪ ತನ ಮೈಮೆನ್ ಪಟ್ಟೊನಿಯೆ.</verse>
				<verse number="31">ಅಂಚಾಂಡ ಈ ಸಂಗತಿಲೆಡ್ ನಮ ದಾನೆ ಪನ್ಕ? ದೇವೆರ್ ನಮ ಕಡೆಟ್ಟ್ ಉಲ್ಲೆಡ ನಂಕ್ ಎದುರು ಉಂತುನಾಯೆ ಏರ್?</verse>
				<verse number="32">ತನ ಸ್ವಂತ ಮಗನ್ ಜೋಕೆ ಮಲ್ಪಂದೆ ಆಯನ್ ನಂಕಾದ್ ಒಚ್ಚಿದ್ ಕೊರಿಯೆ ಅತ್ತಾ? ಮಗನ್ ಕೊರಿ ಬೊಕ್ಕ ಸಮಸ್ತೊನ್ಲಾ ನಂಕ್ ಕೊರಂದೆ ಉಪ್ಪೆನಾ?</verse>
				<verse number="33">ದೇವೆರ್ ಅಜತ್‌ದ್ ದೆತ್ತೊಂಡಿನಾಕುಲೆನ್ ಏರ್ ದೂರೊಲಿ? ಅಕ್ಲೆನ್ ದೇವೆರ್ ತಾನೇ ನೀತಿವಂತೆರ್ ಪಂಡ್ದ್ ತೀರ್ಪು ಮಲ್ತೆ ಅತ್ತಾ?</verse>
				<verse number="34">ಅಪರಾಧಿಲು ಪಂಡ್ದ್ ತೀರ್ಪು ಮಲ್ಪುನಾಕುಲು ಏರ್? ಕ್ರಿಸ್ತ ಯೇಸು ಮರಣೊನು ಪಡೆಯಿನತ್ತಂದೆ ಜೀವೊಡು ಲಕ್ಕ್‌ದ್ ದೇವೆರೆ ಬಲತ್ತ ಮರ್ಗಿಲ್‌ಡ್ ಇತ್ತ್‌ದ್ ನಂಕಾದ್ ಮದ್ಯಸ್ತಿಕೆ ಮಲ್ಪುನಾಯೆ ಆದುಲ್ಲೆ.</verse>
				<verse number="35">ಕ್ರಿಸ್ತನ ಪ್ರೀತಿಡ್ದ್ ಏರ್ ನಮನ್ ದೂರ ಮಲ್ಪೊಲಿ? ಕಷ್ಟನಾ, ಸಂಕಟನಾ, ಭಂಗನಾ, ಬಡವಾ, ಕುಂಟುದಾಂತೆ ಉಪ್ಪುನವ, ಅಪಾಯನಾ, ಮರಣನಾ?</verse>
				<verse number="36">ಶಾಸ್ತ್ರೊಡು ಇಂಚೆನೇ ಬರೆದುಂಡು, “ದೇವೆರೇ, ಎಂಕುಲು ನಿನಡ್ದಾದ್ ದಿನ ಇಡೀ ಮರಣದ ಪೋಡಿಗೆಡ್ ಉಲ್ಲ; ಕೆರಿಯೆರೆಗುಪ್ಪುನ ಕುರಿತ ಲೆಕ್ಕನೇ ಎಂಕುಲು ಉಲ್ಲ.”</verse>
				<verse number="37">ಕ್ರಿಸ್ತೆ ನಮನ್ ಪ್ರೀತಿ ಮಲ್ಪುನೆಡ್ದ್ ನಮ ಈ ಮಾತ ಸಂಗತಿಲೆಡ್ ಪೂರ್ತಿ ಜಯಶಾಲಿಲು ಆದುಲ್ಲ.</verse>
				<verse number="38">ಎಂಚಂದ್ಂಡ ಮರಣ ಆವಡ್, ಜೀವ ಆವಡ್, ದೇವದೂತೆರಾವಡ್, ದುರಾತ್ಮೊಲಾವಡ್, ಬಲೊಲು ಆವಡ್, ಇತ್ತೆದ ಸಂಗತಿಲು ಆವಡ್ ದುಂಬದ ಸಂಗತಿಲು ಆವಡ್, ಮಿತ್ತ್‌ದ ಲೋಕ ಆವಡ್, ತಿರ್ತ್‌ದ ಲೋಕ ಆವಡ್, ಬೇತೆ ವಾ ಸೃಷ್ಟಿ ಆವಡ್ ನಮನ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ತೋಜಿದ್ ಬತ್ತಿ ದೇವೆರೆ ಪ್ರೀತಿಡ್ದ್ ದೂರ ಮಲ್ಪೆರೆಗ್ ಆವಂದ್ ಪಂಡ್ದ್ ಎಂಕ್ ನಿಗಂಟ್ ಉಂಡು.</verse>
				<verse number="39"></verse>
			</chapter>
			<chapter number="9">
				<verse number="1">ಎಂಕ್ ಮಲ್ಲ ದುಃಖಲಾ ಎನ ಉಡಲ್‌ಡ್ ಬುಡಂದಿ ಬೇನೆಲಾ ಉಂಡು. ಸುಳ್ಳು ಪನಂದೆ ಕ್ರಿಸ್ತ ಎದುರುಡು ಸತ್ಯ ಪನ್ಪೆ. ನೆಕ್ಕ್ ಪರಿಶುದ್ಧಾತ್ಮೊಗು ಅಧೀನವಾಯಿನ ಎನ ಮನಸೇ ಸಾಕ್ಷಿ.</verse>
				<verse number="2"></verse>
				<verse number="3">ಶರೀರ ಸಮ್ಮಂಧೊಡು ಎನ ಸಂತಾನದಾಕುಲು ಆದುಪ್ಪು ಎನ ಸಹೋದ್ರೆರೆಗಾದ್ ಯಾನೇ ಕ್ರಿಸ್ತಡ್ದ್ ದೂರ ಆದ್ ದೇವೆರೆ ಶಾಪೊಗು ಒಳಗಾವೆರೆಗ್ ಒಪ್ಪಿಯೊನೆರೆ ಯಾವು.</verse>
				<verse number="4">ಅಕುಲು ಇಸ್ರಾಯೇಲ್ಯೆರೆ ವಂಶದಾಕುಲುಲಾ ದೇವೆರೆ ಬಾಲೆಲೆ ಹಕ್ಕ್‌ದಾಕುಲುಲಾ ಆದುಲ್ಲೆರ್. ಅಕ್ಲೆಡ್ ದೇವೆರೆ ಮೈಮೆ ಉಂಡು. ಅಕ್ಲೆಡೊಪ್ಪ ದೇವೆರ್ ಒಡಂಬಡಿಕೆಲೆನ್ ಮಲ್ತೊಂಡೆ. ಅಕ್ಲೆಗ್ ನ್ಯಾಯಕಟ್ಟ್‌ಲಾ ದೇವಾಲಯೊಡು ನಡಪು ಆರಾಧನೆಲಾ ವಾಗ್ದಾನೊಲುಲಾ ಕೊರ್ಪಾಂಡ್.</verse>
				<verse number="5">ಅಬ್ರಹಾಮು, ಇಸಾಕ್, ಯಾಕೋಬೆರ್ ಅಕ್ಲೆನ ಪಿತೃಲೇ. ಕ್ರಿಸ್ತೆ ಶರೀರ ಸಂಬಂಧೊಡು ಅಕ್ಲೆನ ವಂಶೊಡೇ ಪುಟ್ಟಿಯೆ. ಆಯೆ ಮಾತೆತ್ತ ಮಿತ್ತ್ ಅಧಿಕಾರದಾಯೆಲಾ ಏಪೊಗ್ಲಾ ಸ್ತುತಿ ಹೊಂದಿಯೆರೆ ತಕ್ಕ ಇತ್ತಿನಾಯೆಲಾ ದೇವೆರ್‌ಲಾ ಆದುಲ್ಲೆ. ಆಮೆನ್.</verse>
				<verse number="6">ದೇವೆರ್ ಪಂಡಿನ ಪಾತೆರ ತತ್ತ್‌ಂಡ್ ಅಂದ್‌ದ್ ನಮ ಎನ್ನಿಯೆರೆ ಬಲ್ಲಿ. ದಾಯೆ ಪಂಡ ಇಸ್ರಾಯೇಲ್ ವಂಶೊಡು ಪುಟ್ಟಿನಾಕುಲು ಮಾತೆರ್ ಇಸ್ರಾಯೇಲ್ಯೆರ್ ಅತ್ತ್.</verse>
				<verse number="7">ಅಂಚೆನೇ ಅಬ್ರಹಾಮುನ ವಂಶೊಡು ಪುಟ್ಟಿ ಮಾತೆರ್ ಅಕುಲು ದೇವೆರೆ ಜೋಕುಲು ಪಂಡ್ದ್ ಪನ್ಪಾವೊನ್ಜೆರ್. ಆಂಡ ಇಸಾಕುಡ್ದು ಪುಟ್ಟುನಾಕುಲೇ ನಿನ ಸಂತಾನ ಅಂದ್‌ದ್ ಪನ್ಪಾವೊನ್ವೆರ್ ಪಂಡ್ದ್ ದೇವೆರ್ ಪಂಡೆ.</verse>
				<verse number="8">ಉಂದೆತ್ತ ಅರ್ಥ ಶರೀರ ಸಂಬಂಧೊಡು ಪುಟ್ಟಿನ ಮಾತೆರ್ಲಾ ದೇವೆರೆ ಜೋಕುಲತ್ತ್. ಆಂಡ ದೇವೆರೆ ವಾಗ್ದಾನೊಡ್ದು ಪುಟ್ಟಿನಾಕುಲೇ ಅಬ್ರಹಾಮುನ ಸಂತಾನದಾಕುಲು ಪಂಡ್ದ್ ಆಪೆರ್.</verse>
				<verse number="9">ಬರ್ಪಿ ವರ್ಸ ಉಂದೇ ಸಮಯೊಡು ಯಾನ್ ಬರ್ಪೆ. ಅಪಗ ಸಾರಗ್ ಒರಿ ಮಗೆ ಉಪ್ಪುವೆ ಪನ್ಪಿ ವಾಗ್ದತ್ತದ ಪಾತೆರ ನಿಗಂಟ್ ಆತ್ಂಡತ್ತಾ.</verse>
				<verse number="10">ಉಂದು ಮಾತ್ರ ಅತ್ತಂದೆ ರೆಬೆಕ್ಕಲಾ ಪಿತೃ ಆಯಿ ಇಸಾಕ್‌ಡ್ದ್ ಅಮರ್ ಜೋಕುಲೆಗ್ ಬಂಜಿನಾಲಾಯಿನವು ಐತ ಲೆಕ್ಕನೇ ಆಂಡ್.</verse>
				<verse number="11">ಆ ಜೋಕುಲು ಒರಿಯೇ ಅಮ್ಮೆರೆಗ್ ಜೋಕುಲಾದಿತ್ತ್‌ಂಡಲಾ ಪುಟ್ಟೊಡ್ದುಂಬೇ ವಾ ಎಡ್ಡೆ ಪಡಿಕೆಲೆನ್ ಮಲ್ಪಂದೆ ಉಪ್ಪುನಗ ಮಲ್ಲಾಯೆ ಎಲ್ಯಾಯನ ಚಾಕ್ರಿ ಮಲ್ಪುವೆ ಅಂದ್‌ದ್ ಆಲೆಗ್ ಪಂಡ್ದಿತ್ತ್‌ಂಡ್. ನೆಡ್ದ್ ದೇವೆರ್ ತನ್ಕ್ ಮನಸಿತ್ತಿನಾಕುಲೆನ್ ಅಜತೊನುವೆ ಪನ್ಪಿ ಸಂಕಲ್ಪ ಶಾಶ್ವತಾದ್ ಉಪ್ಪೊಡುಂದುದು ತೋಜಾಯೆ. ಆ ಸಂಕಲ್ಪೊಲು ಭಾಗ್ಯೊಗು ಆಧಾರ ಆದುಪ್ಪಂದೆ ಲೆಪ್ಪುನಾಯನ ಚಿತ್ತದ ಮಿತ್ತೇ ಆಧಾರ ಆದುಂಡು.</verse>
				<verse number="12"></verse>
				<verse number="13">ನೆಕ್ಕಾದ್ ಯಾಕೋಬುನು ಪ್ರೀತಿ ಮಲ್ತೆ, ಏಸಾವನ್ ಪಗೆ ಮಲ್ತೆ ಪಂಡ್ದ್ ಬರೆತ್ಂಡ್.</verse>
				<verse number="14">ಅಂಚಾಂಡ ದಾನೆ ಪನ್ಕ? ದೇವೆರೆಡ ಅನ್ಯಾಯ ಉಂಡಾ? ಇಜ್ಜೇ ಇಜ್ಜಿ.</verse>
				<verse number="15">“ಏರೆನ ಮಿತ್ತ್ ಎನ ದಯ ಉಂಡಾ ಆಯಗ್ ದಯ ತೋಜಾವೆ, ಏರೆನ ಮಿತ್ತ್ ಕರುಣೆ ಉಂಡಾ ಆಯಗ್ ಕರುಣೆ ತೋಜಾವೆ,” ಪಂಡ್ದ್ ದೇವೆರ್ ಮೋಶೆಗ್ ಪನ್ಪೆ ಅತ್ತಾ.</verse>
				<verse number="16">ಅಂಚಾಯಿನೆಡ್ದ್ ದೇವೆರೆ ದಯ ನರಮಾನಿಗ್ ಆಯನ ಆಸೆದ ಮಿತ್ತಾವಡ್ ಆಯನ ಪ್ರಯಾಸೊಡ್ದಾವಡ್ ಒದಗಂದೆ ದೇವೆರ್ ಕರುಣೆ ಮಲ್ಪುನೆಡ್ದೇ ಒದಗುಂಡು.</verse>
				<verse number="17">ದೇವೆರ್ ಫರೋಹನ ವಿಚಾರೊಡು, “ಯಾನ್ ನಿನಡ ಎನ ಶಕ್ತಿನ್ ತೋಜಾದ್ ಲೋಕ ಇಡೀ ಎನ ಪುದರ್‌ನ್ ಪ್ರಸಿದ್ಧಿ ಮಲ್ಪೊಡಂದ್‌ದೇ ನಿನನ್ ಮಿತ್ತ್‌ದ ಸ್ಥಾನೊಗು ಕನಬೈದೆ ಪಂಡ್ದ್ ಪನ್ತೆ ಪನ್ಪಿನವು ಶಾಸ್ತ್ರೊಡು ಉಂಡು.”</verse>
				<verse number="18">ದೇವೆರ್ ಏರೆನ್ ಕರುಣೆ ಮಲ್ತ್ಂಡಲಾ ಏರೆನ್ ಕಠಿಣ ಮಲ್ತ್ಂಡಲಾ ಅವು ಮಾತಲಾ ಆಯನ ಚಿತ್ತದಲೆಕ್ಕನೇ ಉಂಡು ಪನ್ಪಿನ ಉಂದೆಡ್ದ್ ತೋಜಿದ್ ಬರ್ಪುಂಡು.</verse>
				<verse number="19">“ದೇವೆರೆ ಚಿತ್ತೊಗು ಎದುರುಂತುನಾಯೆ ಇಜ್ಜಾಂಡ ಆಯೆ ಎಂಕ್ಲೆನ ತಪ್ಪು ನಾಡುನವು ಎಂಚ ಪಂಡ್ದ್ ಎನನ್ ಕೇನೊಲಿ?”</verse>
				<verse number="20">ಓ ನರಮಾನಿಯೇ ಅಂಚ ಪನಡ, ದೇವೆರೆಗ್ ಎದುರು ಪಾತೆರುನ ಈ ಎಂಚಿತ್ತಿನಾಯೆ? ರೂಪದವು ರೂಪೊನು ಉಂಡು ಮಲ್ತಿನಾಯಗ್, ಎನನ್ ಇಂಚ ದಾಯೆ ಮಲ್ತ ಪಂಡ್ದ್ ಕೇನಿಯೆರೆ ಉಂಡಾ?</verse>
				<verse number="21">ಎಡ್ಡೆಂತಿನೆಕ್ಕಾದ್ ಒಂಜಿ ಬೊಡ್ಚಾಂದಿನೆಕ್ಕ್ ಬೊಕ್ಕೊಂಜಿ ಬಾಜನೊಲೆನ್ ಒಂಜೇ ಮಣ್ಣ್‌ಡ್ದ್ ಮಲ್ಪೆರೆ ಓಡಾರಿಗ್ ಮಣ್ಣ್‌ದ ಮಿತ್ತ್ ಅಧಿಕಾರ ಇಜ್ಜಾ?</verse>
				<verse number="22">ಆಂಡ ದೇವೆರ್ ತನ ಕೋಪೊನು ತೋಜಾದ್ ತನ ಶಕ್ತಿನ್ ಪ್ರಸಿದ್ದ ಮಲ್ಪೊಡು ಪಂಡ್ದ್ ಇತ್ತ್ಂಡಲಾ ಅಂಚ ಮಲ್ಪಂದೆ ತನ ಕೋಪೊಗು ಒಳಗಾಯಿನ ನಾಶನೊಗು ಬಾಧ್ಯೆರಾಯಿನಾಕುಲೆನ್ ಬಾರಿ ಸಮಾಧಾನೊಡು ಸಹಿಸೊಂದೆ.</verse>
				<verse number="23">ಬೊಕ್ಕ ಬಲ ಹೊಂದಿಯೆರೆ ತಾನ್ ಸುರುಟ್ಟೇ ತಯಾರ್ ಮಲ್ತ್‌ದಿನ ಕರುಣೆದ ರೂಪೊಡು ತನ ಮೈಮೆನ್ ತೋಜಾದೆ.</verse>
				<verse number="24">ಆಯ ಕನಿಕರೊಡು ಎಂಕ್ಲೆನ್ ಯೆಹೂದ್ಯೆರೆ ಉಲಯಿಡ್ದ್ ಮಾತ್ರ ಲೆಪ್ಪಂದೆ ಹೊಸೇಯನ ಗ್ರಂಥದ ವಚನೊಡು ತಾನ್ ಪಂಡಿಲೆಕ್ಕ ಪಿದಯಿದ ಜನೊಕುಲೆಡ್ದ್‌ಲಾ ಲೆತ್ತೆ. ಆ ವಚನ ದಾನೆಂದ್ಂಡ, “ಎನ ಜನ ಅತ್ತಂದಿನಾಕುಲೆನ್ಲಾ ಎನ ಜನ ಪಂಡ್ದ್, ಯಾನ್ ಪ್ರೀತಿ ಮಲ್ಪಂದಿನಲೆನ್ ಎನ ಪ್ರೀತಿದಾಲ್ ಪಂಡ್ದ್ ಲೆಪ್ಪೆ.”</verse>
				<verse number="25"></verse>
				<verse number="26">ಬೊಕ್ಕ ವಾ ಜಾಗ್‌ಡ್, “ನಿಕುಲು ಎನ ಜನೊಕುಲತ್ತ್ ಪಂಡ್ದ್ ಅಕ್ಲೆಗ್ ಪಂಡಿನ ಜಾಗ್‌ಡೇ ಜೀವ ಇತ್ತಿ ದೇವೆರೆ ಜೋಕುಲು ಪಂಡ್ದ್ ಪನ್ಪಾವೊನ್ವೆರ್ ಪನ್ಪಿನವೇ.”</verse>
				<verse number="27">ಬೊಕ್ಕ ಯೆಶಾಯೆಲಾ ಇಸ್ರಾಯೇಲ್ಯೆರೆ ಬಗೆಟ್ ಪನ್ಪೆ, “ಇಸ್ರಾಯೇಲ್ ಜನ ಕಡಲ್ದ ಬರಿತ ಪೊಯ್ಯೆದ ಲೆಕ್ಕ ಇತ್ತೆರ್ಡಲಾ, ಅಕ್ಲೆಡ್ ಒಂತೆ ಮಂದಿಗ್ ಮಾತ್ರ ರಕ್ಷಣೆ ತಿಕ್ಕು;</verse>
				<verse number="28">ದಾಯಗಂದ್‌ಂಡ ದೇವೆರ್ ಲೋಕೊನು ನ್ಯಾಯತೀರ್ಪು ಮಲ್ಪುನ ದಿನ ಕೈತಲಾಂಡ್, ಅವೆನ್ ಬೇಗನೇ ತೀರಿಸಾವೆ.”</verse>
				<verse number="29">ಅವ್ವೇ ಅಬಿಪ್ರಾಯೊಡ್ದು ಯೆಶಾಯೆ ಬೊಕ್ಕೊಂಜಿ ವಚನೊಡು, “ಸೇನಾದೀಶ್ವರೆ ಆಯಿ ಕರ್ತವೆ ನಂಕ್ ಸಂತಾನೊನು ಒರಿಪಂದೆ ಪೋದಿತ್ತ್‌ಂಡ ಸೋದೋಮುದ ಗತಿಯೇ ಎಂಕ್ಲೆಗಾತು. ಗೊಮೋರದ ಗತಿಯೇ ನಡತುದು,” ಪಂಡ್ದ್ ಪನ್ಪೆ.</verse>
				<verse number="30">ಅಂಚಾಂಡ ದಾನೆ ಪನ್ಕ, ನೀತಿನ್ ಪಡೆಯೆರೆ ಪ್ರಯತ್ನ ಮಲ್ಪಂದಿ ಪಿದಯಿದ ಜನೊಕುಲು ನೀತಿನ್ ಹೊಂದಿಯೆರ್, ಅವು ನಂಬಿಕೆಡ್ದ್ ಉಂಡಾಪಿ ನೀತಿಯೇ.</verse>
				<verse number="31">ಆಂಡ ಇಸ್ರಾಯೇಲ್ಯೆರ್ ನೀತಿನ್ ಕೊರ್ಪಿನ ನ್ಯಾಯಕಟ್ಟ್‌ನ್ ಪತ್ತೊನೊಡು ಪಂಡ್ದ್ ಪ್ರಯತ್ನ ಮಲ್ತೆರ್ಡಲಾ ಆ ನ್ಯಾಯಕಟ್ಟ್‌ನ್ ಪತ್ತಿಯೆರೆ ಆವಂದೆ ಪೋಯೆರ್ ಪಂಡ್ದ್ ಪನೊಲಿ.</verse>
				<verse number="32">ಐಕ್ ಕಾರಣ ದಾನೆ? ಅಕುಲು ನಂಬಿಕೆನ್ ಆಧಾರ ಮಲ್ತೊನಂದೆ ನೇಮನಿಷ್ಟೆಲೆನೇ ಆಧಾರ ಮಲ್ತೆರ್. ಅಕುಲು ದಂಟು ಕಲ್ಲ್‌ಗ್ ದಂಟಿಯೆರ್.</verse>
				<verse number="33">ಅಂಚಾಯಿನೆಡ್ದ್ ಶಾಸ್ತ್ರೊಡು ಇಂಚ ಬರೆತ್ಂಡ್, “ಇಂದಾ ಚೀಯೋನುಡು ದಂಟುನ ಕಲ್ಲ್‌ನ್ಲಾ ದಂಟ್‌ದ್ ಬೂರುನ ಪಾದೆನ್ಲಾ ದೀತೆ. ಐತ ಮಿತ್ತ್ ನಂಬಿಕೆ ದೀಪಿನಾಯೆ ಏರ್ಲಾ ನಾಚಿಗೆಡ್ ಬೂರುಜೆರ್.”</verse>
			</chapter>
			<chapter number="10">
				<verse number="1">ಎನ ಸಹೋದ್ರಾ, ಎನ ಸ್ವಂತ ಜನೊಕುಲು ರಕ್ಷಣೆ ಪಡೆಯೊಡು ಅಂದ್‌ದ್ ಎನ ಉಡಲ್‌ದ ಆಸೆ ಆದುಂಡು. ಅಕ್ಲೆಗಾದ್ ಯಾನ್ ದೇವೆರೆಡ ಪ್ರಾರ್ಥನೆಡ್ ನಟ್ಟೊನ್ವೆ!</verse>
				<verse number="2">ದಾಯೆಗಂದ್ಂಡ, ಅಕ್ಲೆಡ ದೇವೆರೆನ ಆಸಕ್ತಿ ಉಂಡು ಅಂದ್‌ದ್ ಯಾನ್ ಅಕ್ಲೆ ಬಗೆಟ್ ಸಾಕ್ಷಿ ಕೊರ್ಪೆ. ಆಂಡಲಾ ಅಕ್ಲೆ ಆಸಕ್ತಿ ಗೇನೊಗು ಸರಿಯಾದ್ ಇಜ್ಜಿ.</verse>
				<verse number="3">ಅಕುಲು ದೇವೆರೆ ನೀತಿನ್ ತೆರಿಯಂದೆ ಸ್ವಂತ ನೀತಿನ್ ಸ್ಥಾಪನೆ ಮಲ್ಪೆರೆ ತೂದು ದೇವೆರೆ ನೀತಿಗ್ ಅಧೀನೆರ್ ಆಯಿಜೆರ್.</verse>
				<verse number="4">ನಂಬುನಾಕುಲೆಗ್ ಮಾತೆರೆಗ್ಲಾ ನೀತಿ ತಿಕ್ಕುಲೆಕ್ಕ ಕ್ರಿಸ್ತೆ ನ್ಯಾಯಕಟ್ಟ್‌ನ್ ಅಂತ್ಯ ಮಲ್ತೆ.</verse>
				<verse number="5">ಮೋಶೆಲಾ ನ್ಯಾಯಕಟ್ಟ್‌ಡ್ದ್ ಆಪಿ ನೀತಿದ ಬಗೆಟ್, “ಅವೆನ್ ಕೈಕೊನುನಾಯೆನೇ ಐಡ್ದ್ ಬದುಕುವೆ,” ಅಂದ್‌ದ್ ಬರೆಪೆ.</verse>
				<verse number="6">ಆಂಡ ನಂಬಿಕೆಡ್ದ್ ಆಪಿ ನೀತಿ ಇಂಚೆನೆ ಪನ್ಪುಂಡು, “ಕ್ರಿಸ್ತನ್ ತಿರ್ತ್ ಲೆತ್ತೊಂದು ಬರಿಯೆರೆ, ಏರ್ ಪರಲೋಕೊಗು ಏರ್ದ್ ಪೋವೆರ್?” ಅಂದ್‌ದ್ ನಿನ ಉಡಲ್‌ಡ್ ಪನಡ,</verse>
				<verse number="7">“ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾವೊಂದು ಬರಿಯೆರೆ ಏರ್ ಪಾತಾಳೊಗು ಜತ್ತ್‌ದ್ ಪೋವೆರ್?” ಪಂಡ್ದಾವಡ್ ನಿನ ಉಡಲ್‌ಡ್ ಪನಡ.</verse>
				<verse number="8">ಆಂಡ ಅವು ಎಂಚಿನ ಪನ್ಪುಂಡು, “ದೇವೆರೆ ಪಾತೆರ ನಿನ ಕೈತಲೇ ಉಂಡು. ಅವು ನಿನ ಬಾಯಿಡ್ಲಾ ನಿನ ಉಡಲ್‌ಡ್ಲಾ ಉಂಡು. ಆ ಪಾತೆರ ಎಂಕುಲು ಸಾರುನ ನಂಬಿಕೆದ ಪಾತೆರನೇ.”</verse>
				<verse number="9">ಅವು ದಾನೆ ಪಂಡ ಈ ಯೇಸುನು ಕರ್ತವೆ ಅಂದ್‌ದ್ ಬಾಯಿಡ್‌ ಅರಿಕೆ ಮಲ್ತ್‌ದ್ ದೇವೆರ್ ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಅಂದ್‌ದ್ ನಿನ ಉಡಲ್‌ಡ್ದ್ ನಂಬಿಯಡ ನಿಕ್ಕ್ ರಕ್ಷಣೆ ಆಪುಂಡು.</verse>
				<verse number="10">ಅಂದ್, ಈ ಉಡಲ್‌ಡ್ದ್ ನಂಬುಂಡ ನೀತಿವಂತೆ ಆಪ. ಬಾಯಿಡ್ದ್ ಅರಿಕೆ ಮಲ್ತ್ಂಡ ನಿಕ್ಕ್ ರಕ್ಷಣೆ ಆಪುಂಡು.</verse>
				<verse number="11">“ಆಯ ಮಿತ್ತ್ ನಂಬಿಕೆ ದೀಪಿನಾಯೆ ಏರ್ಲಾ ನಾಚಿಗೆಡ್ ಬೂರಯೆ,” ಅಂದ್‌ದ್ ಶಾಸ್ತ್ರೊಡು ಪನ್ಪುಂಡು.</verse>
				<verse number="12">ಉಂದು ಮಾತೆರೆಗ್ಲಾ ಸೇರುನ ಪಾತೆರ ದಾಯೆಗಂದ್ಂಡ ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ವಾ ಭೇದಲಾ ಇಜ್ಜಿ. ದೇವೆರ್ ಮಾತೆರೆಗ್ಲಾ ಕರ್ತವೆ ಆದುಲ್ಲೆ, ಬೊಕ್ಕ ಆಯಡ ನಟ್ಟೊನುನ ಪ್ರತಿ ಒರಿಯನ್ಲಾ ವಿಶೇಷ ಆದ್ ಆಶೀರ್ವದಿಪುವೆ.</verse>
				<verse number="13">ಶಾಸ್ತ್ರೊಡು ಪಂಡಿಲೆಕ್ಕ, “ಕರ್ತವ ಪುದರ್‌ನ್ ಲೆತ್ತ್‌ದ್ ಏರ್ ಅರಿಕೆ ಮಲ್ಪುವೆರಾ, ಅಕ್ಲೆಗ್ ಮಾತೆರೆಗ್ ರಕ್ಷಣೆ ಆವು.”</verse>
				<verse number="14">ಆಂಡ ಅಕುಲು ನಂಬಂದೆ ಇತ್ತೆರ್ಡ ಆಯಗ್ ನಟ್ಟೊನೊನು ಎಂಚ? ಬೊಕ್ಕ ಅಕುಲು ಸುವಾರ್ತೆ ಕೇಂಡಿಜೆರ್ಡ ನಂಬುನು ಎಂಚ? ಸಾರಿದ್ ಪನ್ಪಿನಾಯೆ ಇಜ್ಜಾಂಡ ಕೇನುನು ಎಂಚ?</verse>
				<verse number="15">ಬೊಕ್ಕ ಸಾರಿಯುನಾಕುಲೆನ್ ಕಡಪುಡಂದೆ ಎಂಚ ಸಾರಿಯೊಲಿ? ಶಾಸ್ತ್ರೊಡು ಬರೆತ್ಂಡ್, “ಸುವಾರ್ತೆನ್ ಸಾರಿಯೊಂದು ಬರ್ಪಿನಾಕುಲೆನ ಪಾದ ಏತ್ ಪೊರ್ಲು.”</verse>
				<verse number="16">ಆಂಡಲಾ ಮಾತೆರ್ಲಾ ಸುವಾರ್ತೆಗ್ ಕೆಬಿ ಕೊರ್ತುಜೆರ್. ಯೆಶಾಯೆ ಪನ್ಪೆ “ಕರ್ತವ ಎಂಕುಲು ಸಾರಿನ ಸುವಾರ್ತೆನ್ ಏರ್ ನಂಬಿಯೆರ್?”</verse>
				<verse number="17">ಆಂಡ ಕ್ರಿಸ್ತನ ಪಾತೆರೊನು ಸಾರಿಯುನೆಡ್ದ್ ಸುವಾರ್ತೆನ್ ಕೇನ್ವರ್. ಅವೆನ್ ಕೇಂಡಿನೆಡ್ದ್ ನಂಬಿಕೆ ಪುಟ್ಟುಂಡು.</verse>
				<verse number="18">ಆಂಡ ಯಾನ್ ಕೇನ್ವೆ: ಅಕುಲು ಸುವಾರ್ತೆನ್ ಕೇನುಜೆರ್ ಪನ್ಪಿನವು ಸತ್ಯನಾ? ಅಕುಲು ಕಂಡಿತಾದ್‌ಲಾ ಕೇಂಡ್ದೆರ್ ದಾಯೆಗಂದ್ಂಡ ಶಾಸ್ತ್ರೊಡು ಬರೆತ್ಂಡ್ “ಸಾರಿಯುನಾಕುಲೆ ಸ್ವರ ಇಡೀ ಲೋಕೊಗು ಪಸರ್ಂಡ್; ಅಕ್ಲೆ ಪಾತೆರ ಭೂಮಿದ ಕಡೆ ಮುಟ್ಟ ಮುಟ್ಟುಂಡು.”</verse>
				<verse number="19">ಕುಡಲಾ ಯಾನ್ ಕೇನ್ವೆ: ಇಸ್ರಾಯೇಲ್ಯೆರೆಗ್ ಅರ್ಥ ಆತಿಜ? ಉಂದೆಕ್ಕ್ ಮೋಶೆ ಸುರುತ್ತಾಯೆ ಆದ್ ಉತ್ತರ ಕೊರ್ಪೆ “ಜನಾಂಗ ಆದುಪ್ಪಂದಿನಾಕುಲೆಡ್ದ್ ಅಕ್ಲೆಡ್ ಮತ್ಸರ ಪುಟ್ಟಾವೆ. ಬುದ್ಧಿದಾಂತಿ ಮೂರ್ಖೆರೆಡ್ದ್ ಎನ ಜನೊಟು ಕೋಪ ಲಕ್ಕಾವೆ.”</verse>
				<verse number="20">ಯೆಶಾಯೆ ನನಲಾ ಧೈರ್ಯ ಆದ್ ಪನ್ಪೆ “ಎನನ್ ನಾಡಂದಿನಾಕುಲೆಗ್ಲಾ ಯಾನ್ ತಿಕ್ಕಿಯೆ; ಎನ ಬಗೆಟ್ ಕೇನಂದಿನಾಕುಲೆಗ್ಲಾ ಯಾನ್ ತೋಜಾವೊಂಡೆ.”</verse>
				<verse number="21">ಆಂಡ ಇಸ್ರಾಯೇಲ್ಯೆರೆ ಬಗೆಟ್ ಆಯೆ ಪನ್ಪೆ, “ಎನ ಪಾತೆರೊಗು ಬಗ್ಗಂದಿ ಅಡ್ಡ ಪಾತೆರುನ ಈ ಜನಾಂಗೊನು ಯಾನ್ ದಿನ ಇಡೀ ಕೈ ನೀಡ್ದ್ ಲೆತ್ತೊಂದುಲ್ಲೆ,” ಪನ್ಪೆ.</verse>
			</chapter>
			<chapter number="11">
				<verse number="1">ಅಪಗಾಂಡ ದೇವೆರ್ ತನ ಸ್ವಂತ ಜನೊಕುಲೆನ್ ತಿರಸ್ಕಾರ ಮಲ್ತೆನಾ ಪಂಡ್ದ್ ಕೇನ್ವೆ. ಕಂಡಿತಾದ್ ಇಜ್ಜಿ! ಯಾನ್ಲಾ ಒರಿ ಇಸ್ರಾಯೇಲ್ಯೆ; ಅಬ್ರಹಾಮುನ ಸಂತಾನದಾಯೆ, ಬೆನ್ಯಾಮೀನನ ಗೋತ್ರದಾಯೆ ಆದುಲ್ಲೆ.</verse>
				<verse number="2">ದೇವೆರ್ ತಾನ್ ದುಂಬು ತನ ಜನೊಕುಲಾವೆರೆ ಗೊತ್ತು ಮಲ್ತೊಂಡಿ ಜನೊಕುಲೆನ್ ತಿರಸ್ಕಾರ ಮಲ್ತ್‌ಜೆ. ಎಲೀಯನ ಚರಿತ್ರೆಡ್ ಶಾಸ್ತ್ರ ಪನ್ಪಿ ಪಾತೆರ ನಿಕ್ಲೆಗ್ ತೆರಿಯಂದಾ? ಆಯೆ ದೇವೆರೆ ಎದುರುಡು, “ಕರ್ತವಾ ಅಕುಲು ನಿನ ಪ್ರವಾದಿಲೆನ್ ಕೆರ್ದ್ ನಿನ ಬಲಿಪೀಠೊಲೆನ್ ದರ್ತ್ ಪಾಡ್ದೆರ್. ಯಾನ್ ಒರಿಯೇ ಒರಿದೆ, ಎನ ಪ್ರಾಣೊನ್ಲಾ ದೆಪ್ಪೊಡುಂದುಲ್ಲೆರ್,” ಪಂಡ್ದ್ ಇಸ್ರಾಯೇಲ್ಯೆರೆ ಮಿತ್ತ್ ದೂರು ಪಂಡಿನೆಕ್ಕ್</verse>
				<verse number="3"></verse>
				<verse number="4">ದೇವೆರ್ ಆಯಗ್ ದಾನೆ ಉತ್ತರ ಕೊರಿಯೆ? “ಬಾಳನ ಮೂರ್ತಿಗ್ ಪೂಜೆ ಮಲ್ಪಂದಿನ ಏಳ್ ಸಾವಿರ ಮಂದಿನ್ ಯಾನ್ ಎಂಕಾದ್ ಒರಿಪಾದೆ.”</verse>
				<verse number="5">ಐತ ಲೆಕ್ಕನೆ ಇತ್ತೆದ ಕಾಲೊಡ್ಲಾ ದೇವೆರೆ ದಯೊಡ್ದು ಅಜತ್‌ದಿನಾಕುಲಾಯಿ ಕೆಲೆವೆರ್ ಒರಿದೆರ್.</verse>
				<verse number="6">ದಯೊಡ್ದು ಅಜತೊಂದೆ ಪಂಡಿ ಬೊಕ್ಕ ಎಡ್ಡೆ ಕ್ರಿಯೊಲೆಡ್ದ್ ಅಜತೊಂಡಿನವು ಅತ್ತತ್ತಾ, ಅಂಚ ಅತ್ತ್‌ಡ ದಯೊನು ನನ ದಯೆ ಪಂಡ್ದ್ ಪನಿಯೆರೆ ಆಪುಜಿ.</verse>
				<verse number="7">ನೆಡ್ದ್ ತೆರಿಯೊಡಾಯಿನವು ದಾದವು? ಇಸ್ರಾಯೇಲ್ಯೆರ್ ನಾಡಿನವು ಅಕ್ಲೆಗ್ ಮಾತೆರೆಗ್ ತಿಕ್ಕ್‌ದಿಜಿ. ಅಕ್ಲೆಡೊಪ್ಪ ಅಜತಿನಾಕುಲೆಗ್ ತಿಕ್ಕ್ಂಡ್. ಬಾಕಿದಾಕುಲು ಹಟಮಾರಿಲು ಆಯೆರ್.</verse>
				<verse number="8">ಶಾಸ್ತ್ರೊಡು ಬರೆತಿ ಲೆಕ್ಕನೇ, “ದೇವೆರ್ ಅಕ್ಲೆಗ್ ಬಡ್ಡ್ ಆತ್ಮೊನು ಕೊರಿಯೆ. ಇನಿ ಮುಟ್ಟಲಾ ಅಕ್ಲೆಗ್ ಕೇನಿಯೆರೆಗಾವಡ್ ತೂವೆರೆಗಾವಡ್ ಆತಿಜಿ.”</verse>
				<verse number="9">ದಾವೀದ್ ಪನ್ಪೆ, “ಅಕ್ಲೆನ ವಣಸೇ ಅಕ್ಲೆಗ್ ಉರ್ಲುಲಾ ಪಂಜರಲಾ ತಡೆದಾಂತಿ ಶಿಕ್ಷೆಲಾ ಆವಡ್.</verse>
				<verse number="10">ಅಕ್ಲೆ ಕಣ್ಣ್ ಮಂದ ಆದ್ ತೂವಂದಿಲೆಕ್ಕ ಆವಡ್; ಅಕ್ಲೆ ಬೆರಿ ಏಪಲಾ ಬಗ್ಗ್‌ದುಪ್ಪುಲೆಕ್ಕ ಮಲ್ಪು,” ಪಂಡ್ದ್ ದಾವೀದೆ ಪನ್ಪೆ.</verse>
				<verse number="11">ಅಪಗ ಯಾನ್ ಕೇನ್ವೆ, ಇಸ್ರಾಯೇಲ್ಯೆರ್ ದಂಟಿನಪಗ ಅಕುಲು ನಾಶೊಡು ಬೂರಿಯೆರಾ? ಕಂಡಿತಾದ್ ಇಜ್ಜಿ! ಅಕುಲು ಅಪರಾಧಿಲು ಆದ್ ಬೂರ್ದು ಪೋಯಿನೆಡ್ದಾದ್ ರಕ್ಷಣೆ ಪಿದಯಿದ ಜನೊಕುಲೆಗ್ ತಿಕ್ಕ್ಂಡ್. ಉಂದೆಡ್ದಾದ್ ಇಸ್ರಾಯೇಲ್ಯೆರೆಗ್ ಅಕ್ಲೆ ಮಿತ್ತ್ ಮತ್ಸರ ಪುಟ್ಟಾಯಿನೆಡ್ದ್ ಅಕುಲು ಕುಡೊರ ದೇವೆರೆ ಕಡೆಕ್ಕ್ ಬರೊಲಿ.</verse>
				<verse number="12">ಅಕುಲು ಬೂರ್ದು ಪೋಯಿನವು ಲೋಕದ ಲಾಭೊಗ್ಲಾ ಅಕುಲು ಅಪರಾಧಿಲು ಆದ್ ಸೋತು ಪೋಯಿನವು ಪಿದಯಿದ ಜನೊಕುಲೆಗ್ ಐಶ್ವರ್ಯೊಗು ಮಾರ್ಗ ಆಯಿನೆಡ್ದ್‌ಲಾ ಅಕ್ಲೆನ ಪೂರ್ತಿ ರಕ್ಷಣೆ ಏತೋ ಹೆಚ್ಚಾಯಿನ ಲಾಭೊಗು ಕಾರಣ ಆಪುಂಡು.</verse>
				<verse number="13">ಪಿದಯಿದ ಜನೊಕುಲು ಆದುಪ್ಪು ನಿಕ್ಲೆಡ ಪಾತೆರ್‌ವೆ. ಯಾನ್ ಪಿದಯಿದ ಜನೊಕುಲೆಗ್ ಅಪೊಸ್ತಲೆ ಆದುಪ್ಪುನೆಡ್ದ್ ಎನ ಸೇವೆನ್ ಗನಸ್ಥಿಕೆಗ್ ಕನಪೆ.</verse>
				<verse number="14">ಇಂಚ ಒಂಜಿ ವೇಳೆ ಎನ ಸ್ವಂತ ಜನೊಕುಲೆಡ ಕಿಚ್ಚಿ ಪುಟ್ಟಾದ್ ಅಕ್ಲೆಡ್ದ್‌ಲಾ ಕೆಲೆವೆರೆನ್ ರಕ್ಷಣೆದ ಸಾದಿಗ್ ಕನವೆ.</verse>
				<verse number="15">ದಾಯೆಗಂದ್ಂಡ ಇಸ್ರಾಯೇಲ್ಯೆರೆನ್ ತಿರಸ್ಕಾರ ಮಲ್ಪುನೆಡ್ದ್ ಲೋಕ ದೇವೆರೊಡೊಪ್ಪ ಸಮಾಧಾನ ಆವೆರೆ ಸಾದಿ ಆಯಿ ಬೊಕ್ಕ ಅಕ್ಲೆನ್ ಸೇರಾವೊನುನೆಡ್ದ್ ದಾನೆ ಆಪುಂಡು? ಸೈತಿನಾಕುಲು ಜೀವೊಡು ಲಕ್ಕ್‌ದ್ ಬತ್ತಿಲೆಕ್ಕ ಆಪುಂಡತ್ತಾ.</verse>
				<verse number="16">ಬಂದದ ಒಂಜಿ ಚೂರು ಬೂರ್ದು, ಬಂದ ಪರಿಶುದ್ಧ ಆಯಿ ಬೊಕ್ಕ ಮಾತ ಪರಿಶುದ್ಧ ಆಯಿ ಲೆಕ್ಕ ಆಂಡ್. ಬೇರ್ ಪರಿಶುದ್ಧ ಆದುಂಡು ಬೊಕ್ಕ ಗೆಲ್ಲುಲು ಮಾತ ಪರಿಶುದ್ಧ ಆಪುಂಡು.</verse>
				<verse number="17">ಆಂಡ ಕೆಲವು ಗೆಲ್ಲುಲು ಪೊಲ್ತುದು ಪಾಡ್ದ್, ಕಾಟ್ ಇಪ್ಪೆ ಆದಿತ್ತಿ ನಿನನ್ ಐತ ಇಡೆಟ್ ಕಸಿ ಕಟ್ಟಾವೊಂಡಿನಾಯೆ ಆದ್, ಇಪ್ಪೆ ಮರತ ಬುಲೆದಿ ಬೇರ್‌ಡ್ ಪಾಲ್ ಪಡೆಯಿನೆಡ್ದಾವರ ಈ ಆ ಗೆಲ್ಲ್‌ಲೆನ್ ಗೆನ್ಪಂದೆ ನಿನನ್ ಹೆಚ್ಚಾವೊನಡ.</verse>
				<verse number="18">ಅಂಚಾಯಿನೆಡ್ದ್ ತುಂಡಾತಿ ಗೆಲ್ಲ್‌ದಲೆಕ್ಕಂತಿ ಇಸ್ರಾಯೇಲ್ಯೆರೆನ್ ಈ ಹೀನ ಮಲ್ತೊಂದು ಹೆಮ್ಮೆ ಪಡೆಯೊಡ್ಚಿ. ಹೆಮ್ಮೆ ಪಡೆಂಡಲಾ ಆ ಬೇರ್‌ಗ್ ಈ ಆಧಾರ ಅತ್ತ್. ಅವು ನಿಕ್ಕ್ ಆಧಾರ ಆದುಂಡು.</verse>
				<verse number="19">ಈ ಪಾತೆರೊಗು ಯಾನ್ ಕಸಿ ಕಟ್ಟಾವೊನುಲೆಕ್ಕ ಗೆಲ್ಲುಲು ಪೊಲ್ತುದು ಬೂರ್ದುಂಡತ್ತಾ ಪಂಡ್ದ್ ಈ ಒಂಜಿ ವೇಳೆ ಪನಿಯೆರೆ ಯಾವು.</verse>
				<verse number="20">ಈ ಪನ್ಪಿನವು ಸತ್ಯನೇ. ಅಕುಲು ನಂಬಂದಿನೆಡ್ದ್ ಪೊಲಿದ್ ಪೋಯೆರ್. ಈ ಉಂತುದಿನಿ ನಂಬಿಕೆಡ್ದೇ. ಹೆಚ್ಚಾವೊನಡ ಪೋಡಿಗೆಡುಪ್ಪುಲ,</verse>
				<verse number="21">ಗರ್ವ ಮಲ್ತೊನೊಡ್ಚಿ, ದೇವೆರ್ ಪುಟ್ಟು ಗೆಲ್ಲ್‌ಲೆನ್ ಒರಿಪಾವಂದೆ ಇತ್ತಿನೆಡ್ದ್ ನಿನನ್ಲಾ ಒರಿಪಾವುಜೆ.</verse>
				<verse number="22">ನೆಟ್ಟ್ ದೇವೆರ್ ಏತ್ ಕನಿಕರದಾಯೆಲಾ ಕಠಿಣ ಆದ್‌ಲಾ ಉಲ್ಲೆ ಪನ್ಪಿನವು ತೆರಿಯುಂಡು. ಆಯನ ಪಾತೆರ ಕೇನಂದಿನಾಕುಲೆಗ್ ಆಯೆ ಕಠಿಣ ಆದುಲ್ಲೆ. ಈ ಮಾತ್ರ ದೇವೆರೆ ದಯೊಟು ನಿಲೆ ಆದುಪ್ಪೊಡು ಆಯ ದಯ ಇಜ್ಜಿಡ ನಿನನ್ಲಾ ಕಡ್ತ್ ಪಾಡೆ.</verse>
				<verse number="23">ಬೊಕ್ಕ ಇಸ್ರಾಯೇಲ್ಯೆರ್ ತನ್ಕುಲೆ ಅಪನಂಬಿಕೆನ್ ಬುಡಿಯೆರ್ಡ, ಅಕುಲು ಕುಡೊರ ಸುರುಟ್ಟು ಇತ್ತಿನ ಜಾಗ್‌ಗೇ ಸೇರುವೆರ್. ದೇವೆರ್ ಅವೆನ್ ಮಲ್ಪೆರೆ ಶಕ್ತಿ ಇತ್ತಿನಾಯೆ.</verse>
				<verse number="24">ಈ ಕಾಟ್ ಇಪ್ಪೆ ಮರೊಡ್ದು ಕಡ್ತ್ ದೆತ್ತ್‌ದ್ ನಿಕ್ಕ್ ಸಮ್ಮಂಧ ಪಡೆಯಂದಿ ಊರುದ ಮರೊಟು ಕಸಿ ಕಟ್ಟಾವೊಂಡಿ ಬೊಕ್ಕ ಐಟ್ಟ್ ಪುಟ್ಟಿ ಗೆಲ್ಲುಲು ಆದುಪ್ಪು ಅಕುಲು ಸ್ವಂತ ಮರೊಟು ಕಸಿ ಕಟ್ಟಾವೊನುನವು ಏತೋ ಸರಿ ಅತ್ತಾ?</verse>
				<verse number="25">ಸಹೋದ್ರೆರೇ, ನಿಕ್ಲೆಗ್ ನಿಕುಲೇ ಬುದ್ಧಿವಂತೆರ್ ಅಂದ್‌ದ್ ಎನ್ನೊನಂದಿಲೆಕ್ಕ ಈತ್‌ನೆಟ್ಟ ಗುಟ್ಟುಡಿತ್ತಿ ಒಂಜಿ ಸಂಗತಿ ನಿಕ್ಲೆಗ್ ತೆರಿದುಪ್ಪೊಡು ಪಂಡ್ದ್ ಬಯಕುವೆ. ಅವು ದಾನೆಂದ್ಂಡ ಇಸ್ರಾಯೇಲ್ಯೆರೆಡ್ ಒಂಜಿ ಪಾಲ್ ಜನೊಕುಲೆಗ್ ಉಂಡಾಯಿ ಹಟಮಾರಿ ಏಪಲಾ ಉಪ್ಪಂದೆ ಪಿದಯಿದ ಜನೊಕುಲೆ ಗುಂಪು ದೇವೆರೆ ರಾಜ್ಯೊಡು ಸೇರುನೆಟ್ಟ ಮಾತ್ರ ಉಪ್ಪುಂಡು.</verse>
				<verse number="26">ಐಡ್ದ್ ಬೊಕ್ಕ ಇಸ್ರಾಯೇಲ್ಯೆರ್ ಮಾತೆರ್ ರಕ್ಷಣೆ ಪಡೆವೆರ್. ಉಂದೆಕ್ಕ್ ಆಧಾರ ಆದ್ ಶಾಸ್ತ್ರೊಡು ಬರೆತಿ ಪ್ರಕಾರ, “ಚೀಯೋನುಡ್ದು ಪಿದಾಡ್ದ್ ಬತ್ತಿ ಯಾಕೋಬು ಸಂತಾನದಾಕುಲೆನ ಮಾತ ದುಷ್ಟತನೊನು ದೆತ್ತ್‌ದ್ ಪಾಡ್ವೆ.</verse>
				<verse number="27">ಯಾನ್ ಅಕ್ಲೆನ ಪಾಪೊಲೆನ್ ದೆತ್ತ್ ಪಾಡ್ನಗ ಈ ಒಡಂಬಡಿಕೆನ್ ಅಕ್ಲೆಡೊಪ್ಪ ಮಲ್ಪುವೆ.”</verse>
				<verse number="28">ಅಕುಲು ಸುವಾರ್ತೆನ್ ಬೊಡ್ಚಿ ಪಂಡಿನೆಡ್ದ್ ದೇವೆರ್ ನಿಕ್ಲೆಗ್ ಎಡ್ಡೆನ್ ಉಂಡು ಮಲ್ತ್‌ದ್ ಅಕ್ಲೆನ್ ವೈರಿಲು ಪಂಡ್ದ್ ಎನ್ನಡೆ. ಆಂಡಲಾ ಅಕುಲು ತಾನ್ ಅಜತೊಂಡಿ ಅಬ್ರಹಾಮು, ಇಸಾಕ್, ಯಾಕೋಬು ಪನ್ಪಿ ಪಿತೃಲೆ ಸಂತಾನದಾಕುಲು ಆಯಿನೆಡ್ದ್ ಅಕ್ಲೆನ್ ಪ್ರೀತಿದಾಕುಲು ಅಂದ್‌ದ್ ಎನ್ನ್‌ಲೆ.</verse>
				<verse number="29">ದೇವೆರ್ ತಾನೇ ಕೊರ್ಪಿನ ಉಡಿಗೆರೆಗ್ಲಾ ಲೆಪ್ಪುಗ್ಲಾ ತನ ಮನಸ್‌ನ್ ತಿರ್ಗಾವುನಾಯೆ ಅತ್ತ್.</verse>
				<verse number="30">ಪಿದಯಿದ ಜನೊಕುಲು ಆಯಿ ನಿಕುಲಾಂಡಲಾ ಸುರುಟ್ಟು ದೇವೆರೆಗ್ ತಗ್ಗ್‌ದ್ ಬಗ್ಗ್‌ದ್ ನಡತೊಂದು ಇತ್ತ್‌ಜರ್. ಆಂಡ ಇತ್ತೆ, ಯೆಹೂದ್ಯೆರ್ ತಗ್ಗಂದೆ ಬಗ್ಗಂದೆ ಇತ್ತಿನೆಡ್ದಾವರ ದೇವೆರೆ ಕನಿಕರೊನು ಪಡೆಯರ್.</verse>
				<verse number="31">ಅಂಚೆನೇ ಅಕುಲು ಇತ್ತೆ ಪಂಡಿನೆನ್ ಕೇನುನಾಕುಲು ಆದಿತ್ತ್‌ಂಡಲಾ ನಿಕ್ಲೆಗ್ ತಿಕ್ಕಿನ ಕನಿಕರೊನು ಪಡೆವೆರ್.</verse>
				<verse number="32">ದಾಯೆ ಪಂಡ ದೇವೆರ್ ಮಾತೆರೆಗ್ಲಾ ಕನಿಕರೊನು ತೋಜಾವೊಡು ಪನ್ಪಿ ಉದ್ದೇಶೊಡು ಮಾತೆರೆನ್, ಪಂಡಿನೆನ್ ಕೇನಂದಿ ಸ್ಥಿತಿಟ್ಟ್ ಕಟ್ಟ್‌ದ್ ಪಾಡ್ದೆ.</verse>
				<verse number="33">ದೇವೆರೆ ಗೇನ, ವಿವೇಕ, ಐಶ್ವರ್ಯ ಏತೋ ಗುಂಡಿದವು! ಆಯ ತೀರ್ಮಾನೊಲೆನ್ ಗೆನ್ಪೆರೆ ತೀರಂದಿನವು, ಆಯ ಮಾರ್ಗೊಲು ನಾಡ್ ಪತ್ತಿಯೆರೆ ಸಾದ್ಯೆನೇ ಇಜ್ಜಿ.</verse>
				<verse number="34">“ಕರ್ತವ ಮನಸ್‌ನ್ ತೆರಿಯೊಂಡಿನಾಯೆ ಏರ್? ಆಯಗ್ ಆಲೋಚನೆ ಪಂಡ್ದ್ ಕೊರಿಯೆರೆ ಏರೆಗ್ ಆವು?</verse>
				<verse number="35">ಆಯೆ ಪಿರ ಕೊರ್ಪಿಲೆಕ್ಕ ಏರ್ ಆಯಗ್ ದಾಲಾಂಡಲಾ ಕೊರ್ತೆ?”</verse>
				<verse number="36">ಆಯಡ್ದೇ ಮಾತಲಾ ಉಂಡಾದ್ ಆಯಡ್ದೇ ನಡತೊಂದು ಆಯಗಾದೇ ಉಂಡು. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.</verse>
			</chapter>
			<chapter number="12">
				<verse number="1">ಅಂಚಾದ್ ಸಹೋದ್ರೆರೇ, ದೇವೆರೆ ಕನಿಕರೊನು ನಿಕ್ಲೆನ ನೆನೆಪುಗು ಕನತ್‌ದ್ ನಿಕ್ಲೆಡ ನಟ್ಟೊನೊನು ದಾನೆಂದ್ಂಡ, ನಿಕುಲು ನಿಕ್ಲೆನ ಶರೀರೊಲೆನ್ ದೇವೆರೆಗ್ ಪರಿಶುದ್ಧಲಾ ಮೆಚ್ಚಿಗೆಲಾ ಆದುಪ್ಪು ಸಜೀವ ಯಜ್ಞದ ಬಲಿ ಆದ್ ಒಚ್ಚಿದ್ ಕೊರ್ಲೆ. ಉಂದೇ ನಿಕ್ಲೆನ ನಿಜವಾಯಿನ ಆರಾಧನೆ.</verse>
				<verse number="2">ಲೋಕದ ನಡತೆಗ್ ಸರಿಯಾದ್ ನಡಪಂದೆ ಪೊಸ ಮನಸ್‌ನ್ ಪಡೆಯೊಂದು ಪರಲೋಕದಾಕುಲಾಲೆ. ಇಂಚಾಂಡ ದೇವೆರೆ ಚಿತ್ತೊಗು ಸರಿಯಾಯಿನವು ಅಂದ್ಂಡ ಎಡ್ಡೆಂತಿನವುಲಾ, ಮೆಚ್ಚಿಗೆ ಆಯಿನವುಲಾ, ದೋಷದಾಂತಿನವುಲಾ ಒವ್ವು ಅಂದ್‌ದ್ ತೆರಿಯೊನ್ವರ್.</verse>
				<verse number="3">ದೇವೆರ್ ಎಂಕ್ ದಯ ಮಲ್ತಿನ ಸೇವೆನ್ ನಡಪಾದ್ ನಿಕ್ಲೆಡ ಒರಿ ಒರಿಯಗ್ ಪನ್ಪಿನಿ ದಾನೆಂದ್ಂಡ, ಏರ್ಲಾ ತನ ಯೋಗ್ಯತೆನ್ ಮೀರ್‌ದ್ ತನನ್ ತಾನೇ ಎನ್ನೊನಂದೆ, ಐತ ಪಗತೆಗ್ ನಿಕ್ಲೆ ಯೋಚನೆಡ್ ತಕ್ಕದಾಕುಲಾದಿತ್ತ್‌ದ್ ದೇವೆರ್ ನಿಕ್ಲೆಗ್ ಕೊರ್ತಿನ ನಂಬಿಕೆಗ್ ಸರಿಯಾದ್ ನಿಕ್ಲೆನ್ ತೀರ್ಪು ಮಲ್ತೊನ್ಲೆ.</verse>
				<verse number="4">ದಾಯೆಗಂದ್ಂಡ ನಂಕುಪ್ಪು ಒಂಜೇ ಶರೀರೊಡು ಕೆಲವು ಅಂಗೊಲುಪ್ಪುನಗ ಆ ಮಾತ ಅಂಗೊಲೆಗ್ ಒಂಜೇ ಬೇಲೆ ಉಪ್ಪುಜಿ.</verse>
				<verse number="5">ಅಂಚೆನೇ ನಮ ಮಾತೆರ್ ಒಂಜಾದ್ ಕ್ರಿಸ್ತಡ್ ಒಂಜೇ ಶರೀರ ಆದ್ ಒರಿಯಗ್ ಒರಿ ಸಂಬಂಧ ಪಡೆಯಿ ಅಂಗೊಲು ಆದುಲ್ಲ.</verse>
				<verse number="6">ದೇವೆರ್ ನಂಕ್ ದಯ ಮಲ್ತಿಲೆಕ್ಕ ನಮ ಬೇತೆ ಬೇತೆ ವರೊಕ್ಲೆನ್ ಪಡೆತ. ಪಡೆಯಿನ ವರೊಕ್ಲು ಪ್ರವಾದನೆದ ರೂಪದವು ಆದಿತ್ತ್ಂಡ ನಮ ನಂಬಿಕೆ ವರೊಕ್ಲೆಗ್ ತಕ್ಕ ಪ್ರವಾದನೆ ಪನ್ಕ.</verse>
				<verse number="7">ಅವು ಸಭೆತ ಸೇವೆದ ರೂಪದವು ಆದಿತ್ತ್ಂಡ ಸಭೆತ ಸೇವೆನ್ ಮಲ್ತೊಂದುಪ್ಪುಗ.</verse>
				<verse number="8">ಬೋಧನೆ ಮಲ್ಪುನಾಯೆ ಬೋಧನೆ ಮಲ್ತೊಂದುಲಾ ಬುದ್ಧಿ ಪನ್ಪಿನಾಯೆ ಬುದ್ಧಿ ಪನೊಂದುಲಾ ಉಪ್ಪಡ್. ದಾನ ಕೊರ್ಪಿನಾಯೆ ಯಥಾರ್ಥ ಮನಸ್‌ಡ್ ಕೊರಡ್. ಹಿರಿಯಾದಿಗೆ ನಡಪಾವುನಾಯೆ ಇಷ್ಟೊಡು ನಡಪಾವಡ್. ಕರುಣೆ ತೋಜಾವುನಾಯೆ ಸಂತೋಷೊಡು ಮಲ್ಪಡ್.</verse>
				<verse number="9">ಅಂಚೆನೇ ನಿಕ್ಲೆನ ಪ್ರೀತಿ ಕಪಟದಾಂತಿನವು ಆದುಪ್ಪಡ್. ಬೊಡ್ಚಾಂದಿನೆನ್ ಬುಡ್ದು ಎಡ್ಡೆಂತಿನೆನ್ ಪತ್ತೊನ್ಲೆ.</verse>
				<verse number="10">ಕ್ರೈಸ್ತ ಸಹೋದ್ರೆರ್ ಮೆಗ್ಯೆಪಲಯೆ ಪಂಡ್ದ್ ಒರಿಯನ್ ಒರಿ ಪ್ರೀತಿ ಮಲ್ಪುಲೆ. ಮಾನಮರ್ಯಾದೆನ್ ತೋಜಾವುನೆಟ್ಟ್ ಒರಿಯಡ್ದ್ ಒರಿ ದುಂಬುಪ್ಪುಲೆ.</verse>
				<verse number="11">ಸೋಮಾರಿಲು ಆದುಪ್ಪಂದೆ, ಕಷ್ಟ ಬುಡ್ದು ಬೆನ್ಲೆ. ಆಸಕ್ತಿಡ್ ಕರ್ತವ ಸೇವೆ ಮಲ್ಪುನಾಕುಲು ಆದುಪ್ಪುಲೆ.</verse>
				<verse number="12">ಕ್ರೈಸ್ತೆರ್ ಕಾತೊಂದುಪ್ಪುನ ಆ ಮಲ್ಲ ಪದೊನು ನೆನೆತೊಂದು ಸಂತೋಷೊಡುಪ್ಪುಲೆ. ಉಪದ್ರೊಲೆಡ್ ತಾಳ್ಮೆದಾಕುಲಾಲೆ. ಬೇಜಾರ್‌ದಾಂತೆ ಪ್ರಾರ್ಥನೆ ಮಲ್ಪುಲೆ.</verse>
				<verse number="13">ದೇವಜನೊಕುಲೆಗ್ ಭಂಗ ಬನ್ನಗ ಸಹಾಯ ಮಲ್ಪುಲೆ. ಬಿನ್ನೆರೆನ್ ಸುದಾರಿಪುನೆನ್ ಅಭ್ಯಾಸ ಮಲ್ಪುಲೆ.</verse>
				<verse number="14">ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಆಶೀರ್ವಾದ ಮಲ್ಪುಲೆ.</verse>
				<verse number="15">ಸಂತೋಷೊಡು ಉಪ್ಪುನಾಕುಲೆಡೊಪ್ಪ ಸಂತೋಷೊಡು ಉಪ್ಪುಲೆ; ಬುಲ್ಪುನಾಕುಲೆಡೊಪ್ಪ ಬುಲ್ಪುಲೆ.</verse>
				<verse number="16">ನಿಕ್ಲೆ ನಿಕ್ಲೆನ ಉಲಯಿ ಒಂಜೇ ಮನಸ್‌ದಾಕುಲು ಆದುಪ್ಪುಲೆ. ಮಲ್ಲಾದಿಗೆಡ್ ಮನಸ್ ದೀವಂದೆ ತಗ್ಗ್‌ದಿನಾಕುಲೆಡೊಪ್ಪ ಕೂಡೊನ್ಲೆ. ನಿಕ್ಲೆನ್ ನಿಕುಲೇ ಬುದ್ಧಿವಂತೆರಂದ್‌ದ್ ಎನ್ನೊನಡೆ.</verse>
				<verse number="17">ಏರೆಗ್ಲಾ ಅಪಕಾರೊಗು ಅಪಕಾರ ಮಲ್ಪಡೆ. ಮಾತೆರೆ ದೃಷ್ಟಿಡ್ ಎಡ್ಡೆಂತಿನೆನೇ ಮಲ್ಪುಲೆ.</verse>
				<verse number="18">ಸಾದ್ಯ ಆಂಡ ಮಾತೆರೆಡೊಪ್ಪ ಸಮಾಧಾನೊಡು ಉಪ್ಪುಲೆ.</verse>
				<verse number="19">ಪ್ರೀತಿದಾಕುಲೇ, ನಿಕುಲೇ ಪಗತೆಗ್ ಪಗತೆ ಕೊರಂದೆ, ಶಿಕ್ಷೆ ಕೊರ್ಪಿನೆನ್ ದೇವೆರೆಗ್ ಬುಡ್ಲೆ. ದಾಯೆಗಂದ್ಂಡ ಪಗತೆಗ್ ಪಗತೆ ಕೊರ್ಪಿನವು ಎನ ಬೇಲೆ. ಯಾನೇ ಪ್ರತಿಫಲೊನು ಕೊರ್ಪೆ ಪಂಡ್ದ್ ಕರ್ತವೆ ಪನ್ಪೆ ಪಂಡ್ದ್ ಬರೆತ್ಂಡ್.</verse>
				<verse number="20">ಅಂಚಾಂಡ, “ನಿನ ವೈರಿ ಬಡವುಡಿತ್ತೆಡ, ಆಯಗ್ ವಣಸ್ ಕೊರ್ಲ; ಬಾಜೆಲ್‌ಡಿತ್ತೆಡ ಪರಿಯೆರೆ ಕೊರ್ಲ. ಇಂಚ ಮಲ್ಪುನೆಡ್ದ್ ಆಯ ತರೆತ ಮಿತ್ತ್ ಗೆಂಡ ದೀಯಿಲೆಕ್ಕ ಆಪುಂಡು.”</verse>
				<verse number="21">ಬೊಡ್ಚಾಂದಿನೆಕ್ಕ್ ಸೋತು ಪೋವಂದೆ ಎಡ್ಡೆ ಗುಣೊಡ್ದು ಬೊಡ್ಚಾಂದಿನೆನ್ ಸೋಪಾಲ.</verse>
			</chapter>
			<chapter number="13">
				<verse number="1">ತನ ಮಿತ್ತ್ ಉಪ್ಪುನ ದೇಶದ ಅಧಿಕಾರಿಲೆಗ್ ಪ್ರತಿ ಒರಿಲಾ ಅಧೀನ ಆವೊಡು. ದಾಯೆಗಂದ್ಂಡ ಮಾತ ಅಧಿಕಾರ ದೇವೆರೆಡ್ದೇ, ಬೊಕ್ಕ ಇತ್ತೆದ ಅಧಿಕಾರಿಲೆನ್ ದೇವೆರೇ ಅಕ್ಲೆನ ಸ್ಥಾನೊಡು ದೀತೆ.</verse>
				<verse number="2">ಅಂಚಾಯಿನೆಡ್ದ್ ಅಧಿಕಾರಿಲೆಗ್ ಎದುರು ಉಂತುನಾಯೆ ದೇವೆರ್ ನೇಮಕ ಮಲ್ತ್‌ದಿನೆಕ್ಕ್ ಎದುರು ಉಂತಿಲೆಕ್ಕನೆ. ಬೊಕ್ಕ ಇಂಚ ಮಲ್ಪುನಾಯೆ ಆಯನ ಮಿತ್ತ್ ತೀರ್ಪುನು ಬರ್ಪಾವೊನುನಾಯೆ ಆದುಲ್ಲೆ.</verse>
				<verse number="3">ಎಡ್ಡೆ ಮಲ್ಪುನಾಕುಲೆಗ್ ಅಧಿಕಾರಿಲೆ ಪೋಡಿಗೆ ಉಪ್ಪುಜಿ; ಹಾಳ್ ಮಲ್ಪುನಾಕುಲೆಗೇ ಮಾತ್ರ ಪೋಡಿಗೆ. ಅಧಿಕಾರೊಡುಪ್ಪುನಾಕುಲೆಗ್ ಪೋಡಿಯಂದಿಲೆಕ್ಕ ಈ ಉಪ್ಪೊಡಂದ್‌ದ್ ಬಯಕುವನಾ? ಅಂಚಾಂಡ ಎಡ್ಡೆಂತಿನೆನ್ ಮಲ್ಪುಲ, ಅಪಗ ಅಕುಲು ನಿನನ್ ಪುಗರುವೆರ್.</verse>
				<verse number="4">ಅಕುಲು ನಿನ ಎಡ್ಡೆಗಾದ್ರ ಬೇಲೆ ಮಲ್ಪುನ ದೇವೆರೆ ಸೇವಕೆರಾದುಲ್ಲೆರ್. ಆಂಡ ಹಾಳ್ ಮಲ್ಪುನಾಯೆ ಆದಿತ್ತಡ ಅಕ್ಲೆಗ್ ಪೋಡಿಲ. ದಾಯೆಗಂದ್ಂಡ ಶಿಕ್ಷೆ ಕೊರ್ಪಿನ ಅಧಿಕಾರ ಅಕ್ಲೆಗ್ ಕಂಡಿತಾದ್‌ಲಾ ಉಂಡು. ಈ ಬೊಡ್ಚಾಂದಿನೆನ್ ಮಲ್ತಡ ಪೋಡಿಯೊಡು, ಆಯೆ ಪೊಕ್ಕಡೆ ಕೈತ ಕತ್ತಿನ್ ಪತ್ತ್‌ದಿಜೆ, ಆಯೆ ದೇವೆರೆ ಸೇವಕೆ ಆದಿತ್ತ್‌ದ್ ಬೊಡ್ಚಾಂದಿನೆನ್ ಮಲ್ಪುನಾಕುಲೆ ಮಿತ್ತ್ ದೇವೆರೆ ಶಿಕ್ಷೆನ್ ಜಾರಿ ಮಲ್ಪುವೆ.</verse>
				<verse number="5">ಅಂಚಾಯಿನೆಡ್ದ್ ನಿಕುಲು ಅಧಿಕಾರಿಲೆಗ್ ತಗ್ಗ್‌ದಿನಾಕುಲಾದ್ ಉಪ್ಪುಲೆ ದೇವೆರೆ ಶಿಕ್ಷೆದ ಪೋಡಿಗೆಗಾದ್ ಮಾತ್ರ ಅತ್ತಂದೆ ನಿಕ್ಲೆ ಎಡ್ಡೆ ಮನಸಾಕ್ಷಿಗಾದ್‌ಲಾ ಅಂಚ ಮಲ್ಪುಲೆ.</verse>
				<verse number="6">ಅಧಿಕಾರಿಲು ತನ್ಕುಲೆ ಕರ್ತವ್ಯೊಲೆನ್ ಮಲ್ಪುನಗ ದೇವೆರೆ ಸೇವಕೆ ಆದ್ ಬೇಲೆ ಮಲ್ಪುನೆಡ್ದ್, ನಿಕುಲು ಸಂದಾವೊಡಾಯಿನ ತೆರಿಗೆನ್ ಕ್ರಮ ಆದ್ ಕಟ್ಟೊಡು.</verse>
				<verse number="7">ಅಂಚಾದ್ ಅಕ್ಲೆಗ್ ಸಂದಾವೊಡಾಯಿನೆನ್ ಸಂದಾಲೆ; ಏರೆಗ್ ತೆರಿಗೆನ ಅಕ್ಲೆಗ್ ತೆರಿಗೆ, ಏರೆಗ್ ಸುಂಕನ ಅಕ್ಲೆಗ್ ಸುಂಕೊನು; ಏರೆಗ್ ಪೋಡಿಯಾವೊಡು ಅಕ್ಲೆಗ್ ಪೋಡಿಗೆನ್, ಏರೆಗ್ ಮಾರ್ಯಾದಿಯಾ ಅಕ್ಲೆಗ್ ಮಾರ್ಯಾದಿನ್ ಸಂದಾಲೆ.</verse>
				<verse number="8">ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನ ಒಂಜೇ ಋಣ ನಿಕ್ಲೆಗುಪ್ಪಡ್. ಉಂದೆನ್ ಕೈಕೊನುನಾಯೆ ನ್ಯಾಯಕಟ್ಟ್‌ಲೆನ್ ಕೈಕೊನುನಾಯೆ ಆದುಲ್ಲೆ.</verse>
				<verse number="9">ಎಂಚಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ; ಮಾನ್ಯ ಕೆರಿಯೆರೆ ಬಲ್ಲಿ; ಕಂಡೊನಿಯೆರೆ ಬಲ್ಲಿ; ನನೊರಿಯನ ಸೊತ್ತುನು ಆಸೆ ಮಲ್ಪೆರೆ ಬಲ್ಲಿ,” ಪನ್ಪಿನ ಈ ಮಾತ ಅಪ್ಪಣೆಲು, “ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ” ಪನ್ಪಿ ಒಂಜೇ ಅಪ್ಪಣೆಡ್ ಸೇರ್ದುಂಡು.</verse>
				<verse number="10">ನಿಕುಲು ಬೇತೆಕ್ಲೆನ್ ಪ್ರೀತಿ ಮಲ್ಪುನಾಂಡ ಅಕ್ಲೆಗ್ ಅಪಕಾರ ಮಲ್ಪಯರ್. ಅಂಚಾಂಡ ಪ್ರೀತಿ ಮಲ್ಪುನು ಅಂದ್ಂಡ ಇಡೀ ನ್ಯಾಯಕಟ್ಟ್‌ನೇ ಕೈಕೊನುನವು ಆದುಂಡು.</verse>
				<verse number="11">ಬೊಕ್ಕ ನಮ ನಿದ್ರೆಡ್ದ್ ಎಚ್ಚರಿಕೆ ಆವೊಡಾಯಿನ ಸಮಯ ಕೈತಲ್‌ ಬತ್ತ್ಂಡ್ ಅಂದ್‌ದ್ ತೆರಿನೆಡ್ದ್ ಉಂದೆನ್ ಮಾತ ಮಲ್ಪುಲೆ. ದಾಯೆಗಂದ್ಂಡ ನಂಕ್ ರಕ್ಷಣೆ ತಿಕ್ಕುನ ಸಮಯ ನಮ ಸುರುಟ್ಟು ನಂಬಿನ ಪೊರ್ತುಡ್ದುಲಾ ಇತ್ತೆ ಮಸ್ತ್ ಕೈತಲಾತ್ತ್ಂಡ್.</verse>
				<verse number="12">ರಾತ್ರೆ ಹೆಚ್ಚ್ ಮಟ್ಟ್‌ಗ್ ಕರಿಂಡ್, ಪಗೆಲ್ ಕೈತಲಾತ್ತ್ಂಡ್. ಕತ್ತಲೆಗ್ ಸೇರ್ದಿನ ಕ್ರಿಯೊಲೆನ್ ಉಂತಾದ್ ಬೊಲ್ಪುಡು ಲಡಯಿ ಮಲ್ಪುನೆಕ್ಕಾದ್ರ ತಯಾರ್ ಆದ್ ಆಯುಧೊಲೆನ್ ಪತ್ತೊನುಗ.</verse>
				<verse number="13">ಪಗೆಲ್‌ದ ಬೊಲ್ಪುಡು ಉಪ್ಪುನಾಕುಲೆ ಲೆಕ್ಕ ನಮ ಸರಿಯಾದ್ ನಡಪುಗ. ನಾಚಿಗೆದ ಕೆಲಸೊಲೆಡಾವಡ್, ಬೊಡ್ಚಾಂದಿ ತಮ್ಮಣ, ಪರ್ಪಾಟ, ಅನೀತಿದ ಕಾರ್ಯೊಡಾವಡ್, ಲಡಯಿ, ಕಿಚ್ಚಿಮಚ್ಚರೊಲೆಡಾವಡ್ ಪೊರ್ತು ಕಳೆವಂದೆ ಪಗೆಲ್‌ದಾಕುಲೆ ತಕ್ಕ ಮಾನಸ್ಥೆರಾದ್ ನಡಪುಗ.</verse>
				<verse number="14">ಶರೀರದ ಆಸೆ ಪೂರ ಮಲ್ಪುನೆಕ್ಕಾದ್ ಚಿಂತೆ ಮಲ್ಪಂದೆ, ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಹೊಂದೊನ್ಲೆ.</verse>
			</chapter>
			<chapter number="14">
				<verse number="1">ನಂಬಿಕೆಡ್ ಬಲಹೀನ ಇತ್ತಿನಾಕುಲೆನ್ಲಾ ಸೇರಾವೊನ್ಲೆ; ಆಂಡ ಅಕ್ಲೆನ ಎದರುಡು ಸಂಶಯದ ಸಂಗತಿಲೆನ್ ಚರ್ಚೆ ಮಲ್ಪಡೆ.</verse>
				<verse number="2">ಒರಿ ಒವೆನಾಂಡಲಾ ತಿನೊಲಿ ಪಂಡ್ದ್ ನಂಬುವೆ. ನಂಬಿಕೆಡ್ ಬಲ ಇಜ್ಜಂದಿನಾಯೆ ಕಾಯಿಕಜಿಪುನು ಮಾತ್ರ ತಿನ್ಪೆ.</verse>
				<verse number="3">ತಿನ್ಪಿನಾಯೆ ತಿನಂದಿನಾಯನ್ ಹೀನ ಮಲ್ಪೆರೆ ಬಲ್ಲಿ. ತಿನಂದಿನಾಯೆ ತಿನ್ಪಿನಾಯನ್‌ ದೋಷಿ ಪಂಡ್ದ್ ಎನ್ನೆರೆ ಬಲ್ಲಿ. ದೇವೆರ್ ಇರ್ವೆರೆನ್ಲಾ ಸೇರಾವೊಂದೆ ಅತ್ತಾ?</verse>
				<verse number="4">ನನೊರಿಯನ ಬೇಲೆದಾಯನ್ ತೀರ್ಪು ಮಲ್ಪೆರೆ ಈ ಏರ್? ಆಯೆ ತಪ್ಪುದಾಂತಿನಾಯೆ ಆದ್ ಉಂತುದೆಡಲಾ ತಪ್ಪುದಾಯೆ ಆದಿತ್ತ್‌ದ್ ಬೂರ್ದಿತ್ತೆಡಲಾ ಅವು ಆಯ ಯಜಮಾನಗ್ ಸೇರ್ದಿನವು. ಆಯೆ ತಪ್ಪುದಾಂತಿನಾಯೆ ಆದ್ ಉಂತುವೆ. ಆಯನ್ ಉಂತಾವೆರೆ ಕರ್ತವೆ ಶಕ್ತೆ ಆದುಲ್ಲೆ.</verse>
				<verse number="5">ಒರಿ ಒಂಜಿ ದಿನೊಡ್ದು ಬೊಕ್ಕೊಂಜಿ ದಿನೊನು ವಿಶೇಷದವು ಪಂಡ್ದ್ ಎನ್ನುವೆ. ಬೊಕ್ಕೊರಿ ಮಾತ ದಿನೊಲೆನ್ ವಿಶೇಷದವು ಪಂಡ್ದ್ ಎನ್ನುವೆ, ಪ್ರತಿಯೊರಿಲಾ ತನ ತನ ಮನಸ್‌ಡ್ ತೀರ್ಮಾನ ಮಲ್ತಿಲೆಕ್ಕ ನಡಪಡ್.</verse>
				<verse number="6">ದಿನೊಲೆನ್ ವಿಶೇಷ ಪಂಡ್ದ್ ಎನ್ನುನಾಯೆ ಕರ್ತವಗಾದ್ ಅಂಚ ಎನ್ನುವೆ. ತಿನ್ಪಿನಾಯೆ ಕರ್ತವಗಾದ್ ತಿನ್ಪೆ. ಆಯೆ ದೇವೆರೆಗ್ ಉಪಕಾರ ಮಲ್ಪುವೆ ಅತ್ತಾ. ತಿನಂದಿನಾಯೆಲಾ ಕರ್ತವಗಾದ್ ತಿನಂದೆ ದೇವೆರೆಗ್ ಉಪಕಾರ ಮಲ್ಪುವೆ.</verse>
				<verse number="7">ನಮಡ ಒರಿಯಾಂಡಲಾ ತನ್ಕಾದ್ ಬದುಕುನುಲಾ ಇಜ್ಜಿ. ತನ್ಕಾದ್ ಸೈಪಿನಲಾ ಇಜ್ಜಿ.</verse>
				<verse number="8">ನಮ ಬದುಕುವಡ ಕರ್ತವಗಾದ್ ಬದುಕುವ, ಸೈತ್ಂಡ ಕರ್ತವಗಾದ್ ಸೈಪ.</verse>
				<verse number="9">ಬದ್‌ಕ್ಂಡಲಾ ಸೈತ್ಂಡಲಾ ನಮ ಕರ್ತವನಾಕುಲೇ. ದಾಯೆ ಪಂಡ ಸೈತಿನಾಕಲೆಗ್ಲಾ ಬದುಕುನಾಕುಲೆಗ್ಲಾ ಕರ್ತವೆ ಆದುಪ್ಪೊಡು ಪಂಡ್ದೇ ಕ್ರಿಸ್ತೆ ಸೈತ್‌ದ್ ಕುಡ ಜೀವೊಡು ಲಕ್ಕ್‌ದ್ ಬತ್ತೆ.</verse>
				<verse number="10">ತಿನಂದಿನಾಯಾ ನಿನ ಸಹೋದ್ರನ ಬಗೆಟ್ ಈ ತೀರ್ಪು ಮಲ್ಪುನು ದಾಯೆ? ತಿನ್ಪಿನಾಯಾ ನಿನ ಸಹೋದ್ರನ್ ಈ ಕೀಳ್ ಮಲ್ಪುನು ದಾಯೆ? ನಮ ಮಾತೆರ್ ದೇವೆರೆ ನ್ಯಾಯಾಸನದ ಎದುರುಡು ಉಂತೊಡತ್ತಾ?</verse>
				<verse number="11">“ಎನ ಜೀವದಾಣೆ, ಮಾತೆರ್ ಎಂಕ್ ಅಡ್ಡಬೂರ್ವೆರ್. ಮಾತೆರ್ ಎನನ್ ದೇವೆರ್ ಪಂಡ್ದ್ ಅರಿಕೆ ಮಲ್ಪುವೆರ್,” ಪಂಡ್ದ್ ಕರ್ತವೆ ಪನ್ತೆ ಪಂಡ್ದ್ ಬರೆತ್ಂಡ್.</verse>
				<verse number="12">ಅಂಚಾದ್ ನಮಡ ಪ್ರತಿ ಒರಿಲಾ ದೇವೆರೆ ಎದುರುಡು ಉತ್ತರ ಕೊರೊಡು.</verse>
				<verse number="13">ಐಕಾದ್ ನಮ ಒರಿಯನ್ ಒರಿ ತೀರ್ಪು ಮಲ್ಪುನೆನ್ ಉಂತಾಗ. ಐತ ಬದಲಿಗ್ ಸಹೋದ್ರಗ್ ದಂಟೆರೆಗಾವಡ್ ಪಾಪೊಡು ಬೂರ್ಯೆರೆಗಾವಡ್ ಆಪಿಲೆಕ್ಕ ಮಲ್ಪುನೆನ್ ಏಪಲಾ ಮಲ್ಪುಜ ಪಂಡ್ದ್ ತೀರ್ಮಾನ ಮಲ್ತೊನ್ಲೆ.</verse>
				<verse number="14">ವಾ ತಿನ್ಪಿ ವಸ್ತುಲಾ ಅಶುದ್ಧದವು ಅತ್ತ್ ಪಂಡ್ದ್ ತೆರಿದೆ ಬೊಕ್ಕ ಕರ್ತವೆ ಆದುಪ್ಪು ಯೇಸುಡೊಪ್ಪ ಇತ್ತ್‌ದ್ ದೃಢವಾದ್ ನಂಬುದೆ. ಆಂಡ ನಿಕುಲು ವಾ ತಿನ್ಪಿನ ವಸ್ತುಲೆನ್ ಅಶುದ್ಧ ಪಂಡ್ದ್ ನಂಬುವರ್ಡ ಅವು ನಿಕ್ಲೆಗ್ ಅಶುದ್ಧದವು ಆದುಂಡು.</verse>
				<verse number="15">ಆಂಡ ಈ ತಿನ್ಪಿನ ವಸ್ತುಲೆಡ್ದ್ ನಿನ ಸಹೋದ್ರನ ಮನಸ್‌ಗ್ ಬೇನೆ ಮಲ್ಪುವಡ ಈ ಪ್ರೀತಿಗ್ ತಕ್ಕ ನಡತೊನುಜ. ಕ್ರಿಸ್ತೆ ಏರೆಗಾದ್ ಸೈತ್ ಪೋಯೆನಾ, ಆಯಗ್ ಈ ತಿನ್ಪಿನ ವಸ್ತುಲೆಡ್ದ್ ನಾಶ ಮಲ್ಪಡ.</verse>
				<verse number="16">ನಿಕುಲು ಎಡ್ಡೆ ಪಂಡ್ದ್ ಎನ್ನುನೆಕ್ಕ್ ದೂಷಣೆ ಆವಂದಿಲೆಕ್ಕ ತೂವೊನ್ಲೆ.</verse>
				<verse number="17">ದಾಯೆಗಂದ್ಂಡ ತಿನ್ಪಿನವುಲಾ ಪರ್ಪಿನವುಲಾ ದೇವೆರೆ ರಾಜ್ಯ ಅತ್ತ್. ನೀತಿಲಾ, ಸಮಾಧಾನಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಸಂತೋಷ ಆದುಂಡು.</verse>
				<verse number="18">ಬೊಕ್ಕ ನಿಕುಲು ಈ ರೀತಿಡ್ ಕ್ರಿಸ್ತನ ಸೇವೆ ಮಲ್ಪುನಾಂಡ ನಿಕುಲು ದೇವೆರೆಗ್ ಮೆಚ್ಚೆಗೆದಾಕುಲು ಆದ್‌ಲಾ ನರಮಾನಿಲೆಗ್ ಯೋಗ್ಯದಾಕುಲುಲಾ ಆದುಪ್ಪುವರ್ ಆತೇ.</verse>
				<verse number="19">ಅಂಚಾದ್ ನಮ ಸಮಾಧಾನೊನ್ಲಾ ಒರಿಯಗ್ ಒರಿ ಭಕ್ತಿವೃದ್ಧಿಗ್ಲಾ ಅನುಕೂಲ ಆಪಿನೆನ್ ತೂವೊನುಗ.</verse>
				<verse number="20">ದೇವೆರ್ ಕಟ್ಟಿನೆನ್ ತಿನ್ಪಿ ವಸ್ತುಲೆ ಕಾರಣೊಡ್ದಾದ್ ನಾಶ ಮಲ್ಪಡ. ಮಾತ ವಸ್ತುಲುಲಾ ಶುದ್ಧದವೇ. ಆಂಡ ತಿಂದ್‌ದ್ ಬೊಕ್ಕೊರಿಯಗ್ ಅಡ್ಡಿ ಮಲ್ಪುನವು ತಪ್ಪು.</verse>
				<verse number="21">ಮಾಸ ತಿನ್ಪಿನಾವಡ್ ದ್ರಾಕ್ಷಾರಸ ಪರ್ಪಿನಾವಡ್ ನಿನ ಸಹೋದ್ರಗ್ ಅಡ್ಡಿ ಮಲ್ಪುನ ಬೇತೆ ಒವೆನ್ಲಾ ಬುಡ್ದು ಬುಡ್ಪಿನವೇ ಎಡ್ಡೆ.</verse>
				<verse number="22">ನಿಕ್ಕುಪ್ಪು ನಂಬಿಕೆ ದೇವೆರೆಗ್ ಮಾತ್ರ ತೋಜುಲೆಕ್ಕ ಉಪ್ಪಡ್. ತನ್ಕುಲೆ ಮನಸ್‌ಡ್ ಸರಿ ಪಂಡ್ದ್ ಕಂಡಿತ ಮಲ್ತೊನೊಂದು ಅವೆನ್ ಮಲ್ಪುನಗ ಮನಸ್‌ಡ್ ಸಂಶಯ ಮಲ್ಪಂದಿನಾಯೆನೇ ಭಾಗ್ಯವಂತೆ.</verse>
				<verse number="23">ಆಂಡ ತಿನ್ಪಿನೆತ್ತ ಬಗೆಟ್ ಏರೆಗಾಂಡಲಾ ಸಂಶಯ ಉಂಡುಡ, ಅಂಚಿತ್ತಿನೆನ್ ತಿನ್ಪಿನಾಕುಲೆನ್ ದೇವೆರ್ ಕಂಡಿಸಾವೆ. ದಾಯೆಗಂದ್ಂಡ ಅಕ್ಲೆನ ಕ್ರಿಯೆಗ್ ನಂಬಿಕೆದ ಆಧಾರ ಇಜ್ಜಿ. ಬೊಕ್ಕ ನಂಬಿಕೆಡ್ದ್ ಆವಂದಿನವು ಮಾತಲಾ ಪಾಪನೇ.</verse>
			</chapter>
			<chapter number="15">
				<verse number="1">ನಂಬಿಕೆಡ್ ಬಲ ಇತ್ತಿನಾಕುಲು ನಮ, ಬಲದಾಂತಿನಾಕುಲೆ ದುನ್ನೊನು ತುಂಬೊನಿಯೆರೆಗ್ ಕೈ ಕೊರೊಡು. ನಮನೇ ನಮನ್ ಮೆಚ್ಚಾವೊನಿಯೆರೆ ಬಲ್ಲಿ.</verse>
				<verse number="2">ಐತ ಪಗತೆಗ್ ನಮಡ್ ಪ್ರತಿ ಒರಿ ತನ ನಿರೆತಾಯನ್ ಎಡ್ಡೆಗಾದ್‌ಲಾ ನಂಬಿಕೆಡ್ ಬಲಪಡೆಪಾವುನೆಕ್ಕಾದ್‌ಲಾ ಮೆಚ್ಚಾವಡ್.</verse>
				<verse number="3">ದಾಯೆಗಂದ್ಂಡ, ಕ್ರಿಸ್ತೆಲಾ ತನನ್ ತಾನೇ ಮೆಚ್ಚಾವೊನುಜೆ. ಬದಲ್‌ಗ್ ಶಾಸ್ತ್ರೊಡು ಬರೆತಿಲೆಕ್ಕ “ನಿನನ್ ದೂಷಿಯುನಾಕುಲೆನ ದೂಷಣೆಲು ಮಾತ ಎನ ಮಿತ್ತ್ ಬೂರ್‌ಂಡ್.”</verse>
				<verse number="4">ದುಂಬು ಶಾಸ್ತ್ರೊಡು ಬರೆತಿನವು ಪ್ರತಿಯೊಂಜಿ ನಮ ಬೋಧನೆಗಾದ್ ಬರೆತ್ಂಡ್. ನಮ ಓದುದು ಅವ್ವೆಡ್ದ್ ನಂಕ್ ಸ್ಥಿರ ಮನಸ್‌ಲಾ, ತಾಳ್ಮೆಲಾ ಉಮೇದ್‌ಲಾ ಪಡೆದ್ ನಿರೀಕ್ಷೆದಾಕುಲು ಆದುಪ್ಪುಲೆಕ್ಕ ಆ ಗ್ರಂಥೊನು ಬರೆತ್ಂಡ್.</verse>
				<verse number="5">ಕ್ರಿಸ್ತ ಯೇಸುನ ಮಾದ್ರಿನ್ ಅನುಕರಣೆ ಮಲ್ಪುನೆಡ್ದ್ ನಿಕ್ಲೆಗ್ಲಾ ಸಮ್ಮಂಧೊಡು ಉಪ್ಪೆರೆ ದೇವೆರ್ ಅವ್ವೇ ರೀತಿದ ತಾಳ್ಮೆನ್ಲಾ ಉಮೇದ್‌ನ್ಲಾ ಕೊರಡ್.</verse>
				<verse number="6">ಅಪಗ ನಿಕುಲು ಮಾತೆರ್ಲಾ ಒಟ್ಟಾದ್ ಒಂಜೇ ಸ್ವರೊಟ್ಟು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆಲಾ ದೇವೆರ್‌ಲಾ ಆದುಪ್ಪುನಾಯನ್ ಪುಗರುವರ್.</verse>
				<verse number="7">ಅಂಚಾಂಡ ಕ್ರಿಸ್ತೆ ನಿಕ್ಲೆನ್ ಸೇರಾವೊಂಡಿಲೆಕ್ಕನೇ ದೇವೆರೆ ಮೈಮೆಗಾದ್ ಒರಿಯನ್ ಒರಿ ಸೇರಾವೊನ್ಲೆ.</verse>
				<verse number="8">ಯಾನ್ ಪನ್ಪಿನಿ ದಾನೆಂದ್ಂಡ, ಕ್ರಿಸ್ತೆ ಯೆಹೂದ್ಯೆರೆಗ್ ಸೇವಕೆ ಆದ್ ಅಕ್ಲೆ ಮೂಲ ಪಿತೃಲೆಗ್ ಮಲ್ತ್‌ದಿನ ವಾಗ್ದಾನೊಲೆನ್ ದೃಢ ಮಲ್ತ್‌ದ್ ದೇವೆರೆ ಸತ್ಯೊನು ತೋಜಾವೆರೆಗಾದ್ ಸುನ್ನತಿ ಇನ್ಪಿ ಸಂಸ್ಕಾರೊಗು ಒಳಗಾಯೆ.</verse>
				<verse number="9">ದೇವೆರೆ ದಯೊಡ್ದು ಪಿದಯಿದ ಜನೊಕುಲೆ ನಡುಟು ದೇವೆರೆನ್ ಪುಗರಿಯೆರೆ ಅವಕಾಸ ಆಂಡ್. ಶಾಸ್ತ್ರೊಡು ಬರೆತಿನಿ ದಾನೆ ಪಂಡ್ಂಡ, “ಉಂದೆಡ್ದಾದ್ ಪಿದಯಿದ ಜನೊಕುಲೆ ನಡುಟು ಯಾನ್ ನಿನನ್ ಪುಗರುವೆ; ನಿನ ಪುದರ್‌ಗ್ ರಾಗ ಮಲ್ಪುವೆ!”</verse>
				<verse number="10">ಕುಡ ಇಂಚ ಬರೆತ್ಂಡ್ “ಮಾತ ಪಿದಯಿದ ಜನೊಕುಲೇ, ದೇವಜನೊಕುಲೆ ಒಟ್ಟುಗು ಉಲ್ಲಾಸ ಮಲ್ಪುಲೆ.”</verse>
				<verse number="11">ಬೊಕ್ಕೊಂಜಿ ಜಾಗ್‌ಡ್ “ಜನಾಂಗದ ಮಾತ ಜನೊಕುಲೇ ಕರ್ತವನ್ ಕೀರ್ತಿಪುಲೆ; ಮಾತ ಪ್ರಜೆಕುಲುಲಾ ಆಯನ್ ಪುಗರಡ್!” ಪಂಡ್ದ್‌ಲಾ ಬರೆತ್ಂಡ್.</verse>
				<verse number="12">ಬೊಕ್ಕ ಯೆಶಾಯೆ ಬರೆತೆ, “ಇಸ್ಸಾಯನ ಮೂಲದಾಯೆ ಒರಿ ತೋಜಿದ್ ಬರ್ಪೆ. ಆಯೆ ಪಿದಯಿದ ಜನೊಕುಲೆನ್ ಆಳೆರೆಗಾದ್ ಬರ್ಪೆ. ಅಕುಲು ಆಯ ಮಿತ್ತ್ ತನ್ಕುಲೆ ನಿರೀಕ್ಷೆನ್ ದೀಪೆರ್.”</verse>
				<verse number="13">ನಿರೀಕ್ಷೆಗ್ ಮೂಲ ಆದುಪ್ಪು ದೇವೆರ್, ನಿಕುಲು ಆಯ ಮಿತ್ತ್ ದೀತಿನ ನಂಬಿಕೆಡ್ದ್ ಮಾತೆರೆನ್ಲಾ ಸಂತೋಷ, ಸಮಾಧಾನೊಲೆಡ್ ದಿಂಜಾದ್ ನಿಕ್ಲೆ ನಿರೀಕ್ಷೆ ಪರಿಶುದ್ಧಾತ್ಮನ ಬಲೊಡ್ದು ಬುಲೆವೊಂದು ಉಪ್ಪುಲೆಕ್ಕ ಸಹಾಯ ಮಲ್ಪಡ್.</verse>
				<verse number="14">ಎನ ಸಹೋದ್ರೆರೇ, ನಿಕುಲು ಎಡ್ಡೆತನೊಡ್ದು ದಿಂಜಿದಿನಾಕುಲಾದ್ ಮಾತ ಗೇನೊನು ಪಡೆವೊಂದಿನಾಕುಲಾದ್ ಒರಿ ಒರಿಯಗ್ ಕಲ್ಪಾವೆರೆಗ್ ತಕ್ಕದಾಕುಲಾದುಲ್ಲರ್ ಅಂದ್‌ದ್ ಎಂಕ್ ಭರವಸ ಉಂಡು.</verse>
				<verse number="15">ದೇವೆರ್ ಎಂಕ್ ಕೊರ್ತಿ ದಯೊಕಾದ್ ಒಂತೆದೆಟ್ ನೆನೆಪು ಪುಟ್ಟಾದ್ ಯಾನ್ ನಿಕ್ಲೆಗ್ ಮಸ್ತ್ ಸಂಗತಿಲೆನ್ ಧೈರ್ಯಾದ್ ಬರೆತೆ.</verse>
				<verse number="16">ಪಿದಯಿದ ಜನೊಕುಲೆಗಾದ್ ಬೇಲೆ ಮಲ್ಪೆರೆ, ದೇವೆರ್ ಯೇಸು ಕ್ರಿಸ್ತನ ಸೇವಕೆ ಆದುಪ್ಪೆರೆ ಎಂಕ್ ಕೊರಿನ ಎಡ್ಡೆ ಸಂದರ್ಭೊಡ್ದಾದ್ ಎಂಕ್ ಈ ಧೈರ್ಯ ಉಂಡಾಂಡ್. ದೇವೆರೆಡ್ದ್ ಬತ್ತಿನ ಈ ಸುವಾರ್ತೆ ಸಾರಿಯುನೆಟ್ಟ್ ಯಾನ್ ಒರಿ ಯಾಜಕಲೆಕ್ಕ ಸೇವೆ ಮಲ್ಪುವೆ. ಉಂದೆಡ್ದ್ ಪಿದಯಿದ ಜನೊಕುಲುಲಾ ಪರಿಶುದ್ಧಾತ್ಮೊಡ್ದು ಯೋಗ್ಯದಾಕುಲಾಯಿ ಅರ್ಪಣೆ ಆವಡ್ ಅಂದ್‌ದ್ ಎನ ಆಸೆ.</verse>
				<verse number="17">ಕ್ರಿಸ್ತಡೊಪ್ಪ ಒಂಜಾದ್ ಯಾನ್ ದೇವೆರೆಗ್ ಮಲ್ಪುನ ಈ ಸೇವೆದ ಕಾರಣೊಡ್ದು ಎಂಕ್ ಹೆಮ್ಮೆ ಉಂಡು.</verse>
				<verse number="18">ಕ್ರಿಸ್ತೆ ಪಿದಯಿದ ಜನೊಕುಲೆನ್ ಅಧೀನ ಮಲ್ಪುನೆಕ್ಕಾದ್ ಎನ ಪಾತೆರೊಡ್ದುಲಾ ಕ್ರಿಯೊಲೆಡ್ದ್‌ಲಾ ಗುರ್ತೊಲೆಡ್ದ್‌ಲಾ ಕಾರ್ನಿಕೊಲೆ ಬಲೊಡ್ದುಲಾ ದೇವೆರೆ ಪರಿಶುದ್ಧಾತ್ಮೊಡ್ದುಲಾ ಮಲ್ತ್‌ದಿನ ಕಾರ್ಯೊಲತ್ತಂದೆ ಬೇತೆ ವಾ ಕಾರ್ಯೊಲೆಡ್ದ್‌ಲಾ ಪನಿಯೆರೆ ಎಂಕ್ ಧೈರ್ಯ ಯಾವಂದ್. ಯಾನ್ ಯೆರೂಸಲೇಮುಡ್ದು ಇಲ್ಲೂರಿಕ ಸೀಮೆದ ಸುತ್ತಮುತ್ತ ಪ್ರಯಾಣ ಮಲ್ತ್‌ದ್ ಕ್ರಿಸ್ತನ ಸುವಾರ್ತೆನ್ ಸಾರಿಯುನೆನ್ ಮುಗಿತ್‌ದೆ.</verse>
				<verse number="19"></verse>
				<verse number="20">ಬೊಕ್ಕೊರಿ ಪಾಡ್ದಿನ ಅಡಿಪಾಯದ ಮಿತ್ತ್ ಕಟ್ಟುಜಿ ಪಂಡ್ದ್ ಎನ್ನ್‌ದ್, ಕ್ರಿಸ್ತನ ಪುದರ್‌ನ್ ತೆರಿಪಾಯಿನಲ್ಪ ಸುವಾರ್ತೆನ್ ಸಾರಿಯುನೇ ಇಜ್ಜಿ ಪಂಡ್ದ್ ನಿರ್ಧಾರ ಮಲ್ತೊಂಡೆ.</verse>
				<verse number="21">ಶಾಸ್ತ್ರೊಡು ಬರೆತಿಲೆಕ್ಕ “ಆಯನ ವಿಚಾರೊಡು ತೆರಿಯಂದಿನಾಕುಲೇ ಆಯನ್ ತೂವೆರ್; ಕೇನಂದಿನಾಕುಲೇ ಆಯನ್ ತೆರಿಯೊನ್ವೆರ್.”</verse>
				<verse number="22">ಈ ಕಾರಣೊಡ್ದು ನಿಕ್ಲೆನಡೆ ಬರಿಯೆರೆಗ್ ಎಂಕ್ ಸುಮಾರ್ ಸರ್ತಿ ಅಡ್ಡಿ ಆಂಡ್.</verse>
				<verse number="23">ಆಂಡ ಇತ್ತೆ ಮುಲ್ತ ಬೇಲೆ ಮುಗಿನೆಡ್ದ್ ಬೊಕ್ಕ ಯಾನ್ ಪಾಕ ವರ್ಸೊಡ್ದಿಂಚಿ ನಿಕ್ಲೆನ್ ತೂವೊಡು ಅಂದ್‌ದ್ ಇತ್ತಿನೆಡ್ದ್ ಸ್ಪೇನ್‌ಗ್ ಪೋಪಿನ ಸಾದಿಡ್ ನಿಕ್ಲೆನ್ ತೂವೊಡಂದುಲ್ಲೆ. ನಿಕ್ಲೆಡೊಪ್ಪ ಒಂತೆ ಸಮಯ ಇತ್ತಿ ಬೊಕ್ಕ ನಿಕುಲು ಆ ದೇಶೊಗು ಎನನ್ ಪೊರ್ಲುಡು ಸಾಗಾವರ್ ಪಂಡ್ದ್ ನಂಬುದೆ.</verse>
				<verse number="24"></verse>
				<verse number="25">ಆಂಡ ಸದ್ಯೊಗು ಯಾನ್ ಯೆರೂಸಲೇಮುದ ದೇವಜನೊಕುಲೆನ ಸೇವೆಗಾದ್ ಅಡೆಗ್ ಪೋವೊಂದುಲ್ಲೆ.</verse>
				<verse number="26">ದಾಯೆಗಂದ್ಂಡ ಯೆರೂಸಲೇಮುಡುಪ್ಪು ದೇವಜನೊಕುಲೆ ಉಲಯಿ ಬಡವೆರೆಗಾದ್ ಒಂತೆ ಕಾಸ್‌ದ ಸಹಾಯ ಮಲ್ಪೊಡು ಅಂದ್‌ದ್ ಮಕೆದೋನ್ಯ ಅಖಾಯ ಸಭೆತಾಕುಲು ತೀರ್ಮಾನ ಮಲ್ತ್‌ದೆರ್.</verse>
				<verse number="27">ಉಂದೆನ್ ಮಲ್ಪೆರೆ ಮೊಕುಲು ಇಷ್ಟ ಪಡೆಯಿನಿ ಅತ್ತಂದೆ ಅಕ್ಲೆನ ಹಂಗ್‌ಡುಲ್ಲೆರ್, ಎಂಚಂದ್ಂಡ ಪಿದಯಿದ ಜನೊಕುಲು ಅಕ್ಲೆನ ಆತ್ಮ ಸಮ್ಮಂಧವಾಯಿ ಸಂಪೊತ್ತೊಗು ಪಾಲ್‌ದಾರೆರಾಯಿ ಬೊಕ್ಕ ಲೋಕದ ಕಾರ್ಯೊಲೆಡ್ ಅಕ್ಲೆಗ್ ಸೇವೆ ಮಲ್ಪುನ ಹಂಗ್‌ಡುಲ್ಲೆರತ್ತಾ.</verse>
				<verse number="28">ಯಾನ್ ಈ ಬೇಲೆನ್ ಮುಗಿತ್‌ದ್ ಈ ಪ್ರೀತಿದ ಫಲೊನು ಅಲ್ತಕುಲೆನ ವಶೊಕ್ಕು ಕೊರಿ ಬೊಕ್ಕ ಅಲ್ತ್‌ಡ್ದ್ ಸ್ಪೇನ್ ದೇಶೊಗು ಪೋಪೆ.</verse>
				<verse number="29">ಉಂದತ್ತಂದೆ ಯಾನ್ ನಿಕ್ಲೆ ಕೈತಲ್‌ ಬನ್ನಗ ಕ್ರಿಸ್ತಡ್ದ್ ಉಂಡಾಪಿ ವರೊಕ್ಲೆನ್ ಕನಪೆ ಪಂಡ್ದ್ ತೆರಿದೆ.</verse>
				<verse number="30">ಸಹೋದ್ರೆರೇ, ನಿಕುಲು ದೇವೆರೆಡ ಎಂಕಾದ್ ಮಲ್ಪು ಪ್ರಾರ್ಥನೆಲೆಡ್ ಎನಡೊಪ್ಪ ನಟ್ಟೊನೊಡು ಪಂಡ್ದ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ಪರಿಶುದ್ಧಾತ್ಮಡ್ದ್ ಉಂಡಾಪಿ ಪ್ರೀತಿಡ್ದ್‌ಲಾ ನಿಕ್ಲೆಡ ಕೇನೊಂದುಲ್ಲೆ.</verse>
				<verse number="31">ದೇವೆರ್ ಎನನ್ ಯೂದಾಯದ ನಂಬಿಕೆದಾಂತಿನಾಕುಲೆ ಕೈಡ್ದ್ ತಪ್ಪಾವೊಡು ಪಂಡ್ದ್‌ಲಾ ಯೆರೂಸಲೇಮುಗಾದ್ ಎನ ಸೇವೆ ಅಲ್ತ ದೇವಜನೊಕುಲೆಗ್ ಮೆಚ್ಚಿಗೆ ಆಪಿಲೆಕ್ಕ ನಟ್ಟೊನ್ಲೆ.</verse>
				<verse number="32">ಅಂಚಾಂಡ, ದೇವೆರೆ ಚಿತ್ತ ಇತ್ತ್ಂಡ ಯಾನ್ ನಿಕ್ಲೆನಡೆಗ್ ಪೂರ್ತಿ ಸಂತೋಷೊಡು ಬರ್ಪೆ; ನಿಕ್ಲೆಡೊಪ್ಪ ಸಂತೋಷ ಮಲ್ತ್‌ದ್ ಪೊಸ ಬಲ ಪಡೆಯೊನ್ವೆ.</verse>
				<verse number="33">ನಮ ಸಮಾಧಾನದ ಮೂಲ ಆದುಪ್ಪು ದೇವೆರ್ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್, ಆಮೆನ್.</verse>
			</chapter>
			<chapter number="16">
				<verse number="1">ಯಾನ್ ಕೆಂಕ್ರೇಯ ಸಭೆತ ಸೇವಕಿ ಆದುಪ್ಪು ಸಹೋದ್ರಿ ಫೊಯಿಬೆನ್ ನಿಕ್ಲೆನ ಕೈತಲ್‌ಗ್ ಕಡಪುಡ್ವೆ.</verse>
				<verse number="2">ದೇವಜನೊಕುಲೆಗ್ ತಕ್ಕ ಇತ್ತಿಲೆಕ್ಕನೆ ಆಲೆನ್ ಕರ್ತವಡ್ ಸೇರಾಲೆ. ಆಲೆಗ್ ದಾಲಾಂಡಲಾ ನಿಕ್ಲೆಡ್ದ್ ಸಹಾಯ ಬೋಡಾಂಡ ಮಲ್ಪುಲೆ. ಆಲ್ ಎಂಕ್‌ಲಾ ಮಸ್ತ್ ಜನೊಕುಲೆಗ್ಲಾ ಸಹಾಯ ಮಲ್ತ್‌ದಲ್.</verse>
				<verse number="3">ಕ್ರಿಸ್ತ ಯೇಸುನ ಸೇವೆಡ್ ಎನ ಜತೆಸೇವಕೆರಾದಿತ್ತಿನ ಅಕ್ವಿಲಗ್ಲಾ ಪ್ರಿಸ್ಕಿಲಗ್ಲಾ ಎನ ವಂದನೆಲು.</verse>
				<verse number="4">ಅಕುಲು ಎನ ಜೀವೊಗಾದ್ ಅಪಾಯೊನು ಎದುರಿಸಾಯೆರ್. ಯಾನ್ ಅಕ್ಲೆಗ್ ಋಣಿ ಆದುಲ್ಲೆ. ಯಾನ್ ಮಾತ್ರತ್ತಂದೆ, ಮಾತ ಪಿದಯಿದ ಜನೊಕುಲೆ ಸಭೆತಾಕುಲುಲಾ ಪುಗರುವೆರ್. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದೆರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್.</verse>
				<verse number="5">ಅಕ್ಲೆ ಇಲ್ಲಡ್ ಕೂಡ್ದು ಬರ್ಪಿನ ಸಭೆತಾಕುಲೆಗ್ಲಾ ವಂದನೆಲು. ಆಸ್ಯ ಸೀಮೆಡ್ ಕ್ರಿಸ್ತನ್ ನಂಬಿನ ಎನ ಸುರುತ್ತ ಪ್ರೀತಿದ ಸ್ನೇಹಿತೆ ಎಪೈನೇತಗ್ಲಾ ವಂದನೆ</verse>
				<verse number="6">ನಿಕ್ಲೆಗಾದ್ ಮಸ್ತ್ ಪ್ರಯಾಸ ಬುಡಿನ ಮರಿಯಗ್ ವಂದನೆ</verse>
				<verse number="7">ಎನಡೊಪ್ಪ ಸೆರೆಮನೆಟ್ ಇತ್ತಿನ ಅಂದ್ರೋನಿಕಗ್ಲಾ ಯೂನ್ಯಗ್ಲಾ ವಂದನೆಲು. ಅಪೊಸ್ತಲೆರೆಡ್ ಅಕ್ಲೆನ್ ಮಾತೆರ್ಲಾ ತೆರಿದರ್ ಬೊಕ್ಕ ಅಕುಲು ಎನಡ್ದ್ ದುಂಬು ಕ್ರೈಸ್ತೆರಾತೆರ್.</verse>
				<verse number="8">ಕರ್ತವಡ್ ಎನ ಪ್ರೀತಿದ ಅಂಪ್ಲೀಯಗ್ಲಾ ವಂದನೆ</verse>
				<verse number="9">ಕ್ರಿಸ್ತ ಸೇವೆಡ್ ಎಂಕುಲೆ ಜತೆಸೇವಕೆ ಉರ್ಬಾನಗ್ಲಾ ಎನ ಪ್ರೀತಿದ ಸ್ತಾಖುಗ್ಲಾ ವಂದನೆಲು.</verse>
				<verse number="10">ಕ್ರಿಸ್ತನ ಸೇವೆಡ್ ಯೋಗ್ಯದಾಯೆ ಆದುಪ್ಪು ಅಪೆಲ್ಲಗ್ ವಂದನೆ ಅರಿಸ್ತೊಬೂಲುನ ಇಲ್ಲದಾಕುಲೆಗ್ ವಂದನೆಲು.</verse>
				<verse number="11">ಎನ ಸಂಬಂಧಿಕೆ ಆದುಪ್ಪು ಹೆರೋದಿಯಗ್ಲಾ ನಾರ್ಕಿಸ್ಸ್‌ನ ಇಲ್ಲಡ್ ಕರ್ತವಡ್ ಉಪ್ಪುನಾಕುಲೆಗ್ಲಾ ವಂದನೆಲು.</verse>
				<verse number="12">ಕರ್ತವ ಸೇವೆಡುಪ್ಪುನ ತ್ರುಫೈನಗ್ಲಾ ತ್ರುಫೋಸಗ್ಲಾ ವಂದನೆಲು. ಕರ್ತವಗಾದ್ ಮಸ್ತ್ ಪ್ರಯಾಸ ಬುಡ್ತಿನ ಪ್ರೀತಿದ ಪೆರ್ಸೀಸಗ್ಲಾ ವಂದನೆ</verse>
				<verse number="13">ಕರ್ತವ ಭಕ್ತೆರೆಡ್ ಅಜತ್‌ದಿನಾಯೆ ಆದುಪ್ಪು ರೂಫಗ್ಲಾ ಎಂಕ್ ಅಪ್ಪೆಲೆಕ್ಕ ಇತ್ತಿ ಆಯ ಅಪ್ಪೆಗ್ಲಾ ವಂದನೆಲು.</verse>
				<verse number="14">ಅಸುಂಕ್ರೀತಗ್ಲಾ ಫ್ಲೆಗೋನುಗ್ಲಾ ಹೆರ್ಮಾನುಗ್ಲಾ ಪತ್ರೋಬುಗ್ಲಾ ಹೆರ್ಮೇಯೆಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ಸಹೋದರೆರೆಗ್ಲಾ ವಂದನೆಲು.</verse>
				<verse number="15">ಫಿಲೊಲೋಗುಗ್ಲಾ ಯೂಲ್ಯಗ್ಲಾ ನೇರ್ಯಗ್ಲಾ ಆಯನ ಮೆಗ್ದಿಗ್ಲಾ ಒಲುಂಪಸ್‌ಗ್ಲಾ ಅಕ್ಲೆಡೊಪ್ಪ ಉಪ್ಪುನ ಮಾತ ದೇವಜನೊಕುಲೆಗ್ಲಾ ವಂದನೆಲು.</verse>
				<verse number="16">ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ. ಮುಲ್ತ ಕ್ರಿಸ್ತನ ಸಭೆತಾಕುಲು ಅಕ್ಲೆನ ವಂದನೆಲೆನ್ ತೆರಿಪಾದೆರ್.</verse>
				<verse number="17">ಎನ ಸಹೋದ್ರೆರೇ, ನಿಕುಲು ಕಲ್ತೊಂಡಿ ಬೋಧನೆಗ್ ವಿರೋಧಾದ್ ಭೇದ ಆತಂಕ ಮಲ್ಪುನಾಕುಲೆ ಮಿತ್ತ್ ಕಣ್ಣ್ ದೀದ್ ಅಕ್ಲೆಡ್ದ್ ದೂರ ಉಪ್ಪುಲೆ ಪಂಡ್ದ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="18">ಇಂಚ ಮಲ್ಪುನಾಕುಲು ನಮ ಕರ್ತವೆ ಆದುಪ್ಪು ಕ್ರಿಸ್ತನ ಸೇವೆನ್ ಮಲ್ಪಂದೆ ತನ್ಕುಲೆ ಬಂಜಿದ ಸೇವೆನೇ ಮಲ್ಪುನಾಕುಲು. ಅಕುಲು ಪೊರ್ಲುದ ಪುಗರಿಕೆದ ಪಾತೆರೊಲೆಡ್ದ್ ತೆರಿಯಂದಿ ಜನೊಕುಲೆನ ಉಡಲ್‌ನ್ ಮೋಸೊಗು ಪಾಡ್ವೆರ್</verse>
				<verse number="19">ನಿಕ್ಲೆನ ತಗ್ಗ್‌ತನ ಮಾತೆರೆಗ್ ಗೊತ್ತಿತ್ತ್‌ನೆಡ್ದ್ ಉಂದೆನ್ ಬರೆತೆ. ನಿಕ್ಲೆನ ಸಂಗತಿಡ್ ಸಂತೋಷ ಪಡೆಪೆ. ನಿಕುಲು ಎಡ್ಡೆಂತಿನೆಟ್ಟ್ ಬಿರ್ಸೆರ್ ಹಾಳ್‌ದೆಟ್ಟ್ ಕಪಟದಾಂತಿನಾಕುಲು ಆದುಪ್ಪೊಡು ಅಂದ್‌ದ್ ಬಯಕುವೆ.</verse>
				<verse number="20">ಸಮಾಧಾನದ ದೇವೆರ್ ಬೇಗೊಡು ಸೈತಾನನ್ ನಿಕ್ಲೆ ಕಾರಡಿಕ್ ಪಾಡ್ದ್ ದೊಂಕಾವೆ. ನಮ ಕರ್ತವೆ ಆದುಪ್ಪು ಯೇಸುನ ದಯ ನಿಕ್ಲೆಡೊಪ್ಪ ಉಪ್ಪಡ್.</verse>
				<verse number="21">ಎನ ಜತೆಸೇವಕೆ ತಿಮೋಥಿ, ನಿಕ್ಲೆಗ್ ವಂದನೆಲೆನ್ ತೆರಿಪಾದೆ. ಅಂಚೆನೇ ಸಂಬಂಧಿಕೆರಾಯಿನ ಲೂಕ್ಯೆಲಾ ಯಾಸೋನುಲಾ ಸೋಸಿಪತ್ರೆಲಾ ವಂದನೆಲೆನ್ ಪನ್ಪೆರ್.</verse>
				<verse number="22">ಈ ಪತ್ರಿಕೆನ್ ಬರೆತಿ ತೆರ್ತಿಯೆ ಇನ್ಪಿ ಯಾನ್ ನಿಕ್ಲೆಗ್ ಕರ್ತವಡ್ ವಂದನೆಲೆನ್ ತೆರಿಪಾವೆ.</verse>
				<verse number="23">ಸಭೆ ಒಟ್ಟಾದ್ ಸೇರ್ದ್ ಬರ್ಪಿ ಇಲ್ಲದ ಗಾಯೆಲಾ ನಿಕ್ಲೆಗ್ ವಂದನೆ ಪನ್ಪೆ. ಈ ಊರುದ ಖಜಾನೆದ ಮುಖ್ಯಸ್ಥೆ ಆದುಪ್ಪು ಎರಸ್ತೆಲಾ ನಮ ಸಹೋದರೆ ಕ್ವರ್ತೆಲಾ ವಂದನೆ ಪನ್ಪೆರ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.</verse>
				<verse number="24"></verse>
				<verse number="25">ದೇವೆರೆಗ್ ಮೈಮೆ ಆವಡ್. ಪಿರಾಕ್‌ದ ಕಾಲೊಲೆಡ್ ವರ್ಸಾನುಗಟ್ಟಲೆ ಮದೆ ಆದಿತ್ತಿನ ಮರ್ಮೊಲು ಇತ್ತೆ ತೋಜಿದ್ ಬತ್ತಿಲೆಕ್ಕ, ಯಾನ್ ನಿಕ್ಲೆಗ್ ಸಾರಿನ ಯೇಸು ಕ್ರಿಸ್ತನ ಸುವಾರ್ತೆಗ್ ತಕ್ಕ ನಿಕ್ಲೆಡ್ ಉಂಡಾಯಿನ ನಂಬಿಕೆಡ್ ಸ್ಥಿರಾದ್ ಉಂತುಲೆ. ಇತ್ತೆ ಆ ಮರ್ಮ ಪ್ರವಾದಿಲೆ ಬರವುಡ್ದ್ ತೆರಿದ್ ಬತ್ತ್ಂಡ್. ಬೊಕ್ಕ ಮಾತ ಜನಾಂಗೊಲುಲಾ ಅವೆನ್ ಕೇನುಲೆಕ್ಕಲಾ ಐಕ್ ತಗ್ಗ್‌ದಿನಾಕುಲಾದ್ ಉಪ್ಪುಲೆಕ್ಕಲಾ ನಿತ್ಯ ದೇವೆರೆ ಅಪ್ಪಣೆಡ್ದ್‌ಲಾ ಅವು ಮಾತೆರೆಗ್ ತೋಜಿದ್ ಬತ್ತ್ಂಡ್.</verse>
				<verse number="26"></verse>
				<verse number="27">ಒರಿಯೇ ಸರ್ವಜ್ಞಾನಿ ಆದುಪ್ಪು ನಿತ್ಯ ದೇವೆರೆಗ್ ಯೇಸು ಕ್ರಿಸ್ತಡ್ದ್ ಏನಿತ್ಯೇನಿಗ್ಲಾ ಮಾನ ಮೈಮೆ ಉಂಡಾವಡ್, ಆಮೆನ್.</verse>
			</chapter>
		</book>
		<book number="46">
			<chapter number="1">
				<verse number="1">ದೇವೆರೆ ಚಿತ್ತೊಗು ಸರಿಯಾದ್ ಕ್ರಿಸ್ತ ಯೇಸುನ ಅಪೊಸ್ತಲೆ ಆದುಪ್ಪೆರೆ ಲೆಪ್ಪು ಪಡೆಯಿನ ಪೌಲುಲಾ, ಎಂಕುಲೆ ಸಹೋದರೆ ಸೋಸ್ಥೆನೆಲಾ,</verse>
				<verse number="2">ಕೊರಿಂಥ್ಯೊಡು ಉಪ್ಪುನ ದೇವೆರೆ ಸಭೆಕ್ ಬರೆಪಿನಿ. ನಿಕುಲು ಕ್ರಿಸ್ತ ಯೇಸುಡು ಪ್ರತಿಷ್ಟೆ ಆತಿನಾಕುಲುಲಾ ದೇವಜನೊಕುಲು ಆವೆರೆ ಲೆತ್ತ್‌ದಿ ಮಾತ ಜನೊಕುಲೆ ಒಟ್ಟುಗು ಓಲಿತ್ತ್‌ಂಡಲಾ ಎಂಕ್ಲೆನ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಆರಾಧನೆ ಮಲ್ಪುನ ದೇವಜನೊಕುಲು ಆದುಲ್ಲರ್. ಯೇಸು ಕ್ರಿಸ್ತೆ ಅಕ್ಲೆನಲಾ ಎಂಕ್ಲೆನಲಾ ಕರ್ತವೆ ಆದುಲ್ಲೆ.</verse>
				<verse number="3">ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="4">ಕ್ರಿಸ್ತ ಯೇಸುಡು ದೇವೆರ್ ನಿಕ್ಲೆಗ್ ಕೊರ್ತಿ ದಯೊಕಾದ್ರ ಯಾನ್ ನಿಕ್ಲೆ ಸಂಗತಿಡ್ ಏಪಲಾ ದೇವೆರೆಗ್ ಉಪಕಾರ ಮಲ್ಪುವೆ.</verse>
				<verse number="5">ದಾಯೆಗಂದ್ಂಡ ಕ್ರಿಸ್ತನ ಸಾಕ್ಷಿ ನಿಕ್ಲೆಡ್ ಗಟ್ಟಿ ಆದ್ ನಿಲೆ ಆದುಪ್ಪುನೆಡ್ದ್, ಆಯಡ್ದ್ ನಿಕುಲು ಮಾತ ಪಾತೆರೊಡ್ಲಾ ಮಾತ ತಿಳುವಳಿಕೆಡ್ಲಾ ಸಂಪನ್ನೆರ್ ಆದುಲ್ಲರ್.</verse>
				<verse number="6"></verse>
				<verse number="7">ಇಂಚ ನಿಕುಲು ವಾ ಆತ್ಮೀಕ ವರೊಟ್ಲಾ ಕಡಿಮೆದಾಕುಲು ಆದುಪ್ಪಂದೆ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಕುಡ ಬರ್ಪಿನೆನ್ ಕಾತೊಂದುಲ್ಲರ್.</verse>
				<verse number="8">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಕುಡೊರ ಬನ್ನಗ, ಏರ್ಲಾ ನಿಕ್ಲೆ ಮಿತ್ತ್ ದೂರು ಪಾಡಂದಿಲೆಕ್ಕ ಆಯೆ ನಿಕ್ಲೆನ್ ಕಡೆ ಮುಟ್ಟ ದೃಢ ಮಲ್ಪುವೆ.</verse>
				<verse number="9">ದಾಯೆಗಂದ್ಂಡ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಇನ್ಪಿ ತನ ಮಗನ ಅನ್ಯಮನ್ಯಡ್ ನಿಕ್ಲೆನ್ ಲೆತ್ತಿ ದೇವೆರ್ ನಂಬಿಗಸ್ತೆ ಆದುಲ್ಲೆ.</verse>
				<verse number="10">ಸಹೋದ್ರೆರೇ, ನಿಕ್ಲೆನ ಪಾತೆರ ಒಂಜೇ ಆದುಪ್ಪೊಡು; ನಿಕ್ಲೆಡ ಭೇದ ಉಪ್ಪೆರೆ ಬಲ್ಲಿ; ಆಂಡ ನಿಕುಲು ಒಂಜೇ ಮನಸ್‌ಡ್ಲಾ ಒಂಜೇ ಭಾವೊಡ್ಲಾ ಒಂಜಾದುಪ್ಪೊಡು ಅಂದ್‌ದ್ ಯಾನ್ ಎಂಕುಲೆ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ಪುದರ್‌ಡ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="11">ದಾಯೆಗಂದ್ಂಡ ಎನ ಸಹೋದ್ರೆರೇ, ನಿಕ್ಲೆ ಉಲಯಿ ತರ್ಕೊಲು ಉಂಡು ಅಂದ್‌ದ್ ಕ್ಲೋವೆನ ಇಲ್ಲದಾಕುಲೆಡ್ದ್ ಎಂಕ್ ತೆರಿದ್ ಬತ್ತ್ಂಡ್.</verse>
				<verse number="12">ಅವು ದಾನೆಂದ್ಂಡ, ನಿಕ್ಲೆಡ್ ಒರಿ ಯಾನ್ ಪೌಲು ಕಡೆತಾಯೆ, ನನೊರಿ ಯಾನ್ ಪೇತ್ರ ಕಡೆತಾಯೆ, ಬೊಕ್ಕೊರಿ ಯಾನ್ ಅಪೊಲ್ಲೋಸು ಕಡೆತಾಯೆ, ಬೇತೆ ಒರಿ ಯಾನ್ ಕ್ರಿಸ್ತನಾಯೆ ಅಂದ್‌ದ್ ಪನ್ಪರ್.</verse>
				<verse number="13">ಕ್ರಿಸ್ತೆ ಪಾಲ್ ಆತೆನಾ? ನಿಕ್ಲೆಗಾದ್ರ ಕ್ರುಸ್ಸುಡು ಸೈತ್‌ದಿನಾಯೆ ಪೌಲಾ? ನಿಕುಲು ಪೌಲುನ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊಂದರಾ?</verse>
				<verse number="14">ನಿಕ್ಲೆ ನಡುಟು ಕ್ರಿಸ್ಪಗ್ಲಾ, ಗಾಯಗ್ಲಾ ಅತ್ತಂದೆ ಬೇತೆ ಏರೆಗ್ಲಾ ಯಾನ್ ದೀಕ್ಷಾಸ್ನಾನ ಕೊರ್ತುಜಿ. ಅಂಚಾಯಿನೆಡ್ದ್ ನಿಕುಲು ಎನ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊಂಡರ್ ಅಂದ್‌ದ್ ಏರ್ಲಾ ಪನಿಯೆರೆ ಆವಂದ್. ಐಕಾದ್ ದೇವೆರೆಗ್ ಉಪಕಾರ ಮಲ್ಪುವೆ.</verse>
				<verse number="15"></verse>
				<verse number="16">ಬೊಕ್ಕ ಯಾನ್ ಸ್ತೇಫನನ ಇಲ್ಲದಾಕುಲೆಗ್ಲಾ ದೀಕ್ಷಾಸ್ನಾನ ಕೊರ್ತೆ. ಮೊಕ್ಲೆಗ್ ಮಾತ್ರ ಅತ್ತಂದೆ ಬೇತೆ ಏರೆಗ್ಲಾ ಯಾನ್ ದೀಕ್ಷಾಸ್ನಾನ ಕೊರ್ತಿನವು ಎಂಕ್ ತೆರಿಯಂದ್.</verse>
				<verse number="17">ದೀಕ್ಷಾಸ್ನಾನ ಕೊರಿಯೆರೆಗ್ ಅತ್ತ್, ಸುವಾರ್ತೆ ಸಾರಿಯೆರೆ ಕ್ರಿಸ್ತೆ ಎನನ್ ಕಡಪುಡ್ದಿನಿ. ಆಂಡ ಪಾತೆರದ ಬುದ್ಧಿವಂತಿಕೆಡ್ ಸಾರಿಯೊಡು ಅಂದ್‌ದ್ ಕಡಪುಡ್ದಿನಿ ಅತ್ತ್; ಅಂಚ ಸಾರಿಂಡ ಕ್ರಿಸ್ತನ ಕ್ರುಸ್ಸುದ ಶಕ್ತಿ ಕುಂದು ಪೋವು.</verse>
				<verse number="18">ಕ್ರುಸ್ಸುದ ಪಾತೆರ ನಾಶನದ ಸಾದಿಡುಪ್ಪುನಾಕುಲೆಗ್ ಮರ್ಲ್ ಪಾತೆರ ಆದ್ ತೋಜುಂಡು. ಆಂಡ ರಕ್ಷಣೆಡುಪ್ಪು ನಂಕಾಂಡಲಾ ಅವು ದೇವೆರ್‌ನ ಬಲ ಆದುಂಡು.</verse>
				<verse number="19">“ಯಾನ್ ಬುದ್ಧಿವಂತೆರೆ ಬುದ್ಧಿವಂತಿಗೆನ್ ನಾಶ ಮಲ್ಪುವೆ, ಗ್ರಹಿಕೆದಾಕುಲೆ ಗ್ರಹಿಕೆನ್ ದೆತ್ತ್‌ದ್ ಪಾಡುವೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡ್.</verse>
				<verse number="20">ದೇವೆರ್ ಈ ಯುಗತ್ತ ಬುದ್ಧಿವಂತಿಕೆನ್ ಹೆಡ್ಡ್‌ತನ ಮಲ್ತಿನೆಡ್ದ್ ಬುದ್ಧಿವಂತೆಲಾ ಇಜ್ಜೆ, ಶಾಸ್ತ್ರಿಲಾ ಇಜ್ಜೆ, ಈ ಲೋಕದ ತರ್ಕದಾಯೆಲಾ ಇಜ್ಜೆ.</verse>
				<verse number="21">ಎಂಚಂದ್ಂಡ ಲೋಕ ಗೇನ ಪನ್ಪಿ ಮಾರ್ಗೊಡ್ದು ದೇವೆರೆನ್ ತೆರಿಯಂದೆ ಪೋಯಿನವು ದೇವೆರೆ ಗೇನದ ಸಂಕಲ್ಪನೆ; ಇಂಚಾಯಿ ಬೊಕ್ಕ ಮರ್ಲ್ ಪಾತೆರ ಪಂಡ್ದ್ ಎನ್ನಿನವು ಎಂಕುಲೆ ಪ್ರಸಂಗೊಡ್ದೇ ನಂಬುನಾಕುಲೆನ್ ರಕ್ಷಣೆ ಮಲ್ಪುನವು ದೇವೆರೆಗ್ ಎಡ್ಡೆಂದ್‌ದ್ ತೋಜ್ಂಡ್.</verse>
				<verse number="22">ಯೆಹೂದ್ಯೆರ್ ಗುರ್ತೊನು ಕೇನ್ವೆರ್, ಗ್ರೀಕೆರ್ ಗೇನೊನು ನಾಡ್ವೆರ್.</verse>
				<verse number="23">ಎಂಕುಲಾಂಡಲಾ ಕ್ರುಸ್ಸುಗು ಪಾಡ್ದಿನಾಯೆ ಆದುಪ್ಪು ಕ್ರಿಸ್ತನ್ ಸಾರಿಯ. ಆ ಪಾತೆರ ಯೆಹೂದ್ಯೆರೆಗ್ ಆತಂಕದ ಕಲ್ಲ್, ಪಿದಯಿದ ಜನೊಕುಲೆಗ್ ಹೆಡ್ಡ್‌ತನ ಆದುಂಡು.</verse>
				<verse number="24">ಆಂಡ ದೇವೆರೆಡ್ದ್ ಲೆಪ್ಪು ಇತ್ತಿನಾಕುಲು ಯೆಹೂದ್ಯೆರಾವಡ್, ಗ್ರೀಕೆರಾವಡ್, ಅಕ್ಲೆಗ್ ಕ್ರಿಸ್ತೆ ದೇವೆರೆ ಬಲಲಾ, ದೇವೆರೆ ಗೇನಲಾ ಆದುಲ್ಲೆ.</verse>
				<verse number="25">ಲೋಕದಾಕುಲು ದೇವೆರೆಡ್ ಒವೆನ್ ಹೆಡ್ಡ್‌ತನ ಅಂದ್‌ದ್ ಎನ್ನುವೆರಾ ಅವು ನರಮಾನಿನ ಬುದ್ಧಿಡ್ದ್‌ಲಾ ಹೆಚ್ಚಿನ ಬುದ್ಧಿ ಆದುಂಡು. ಅಕುಲು ದೇವೆರೆಡ್ ಒವೆನ್ ಬಲದಾಂತಿನವು ಅಂದ್‌ದ್ ಎನ್ನುವೆರಾ ಅವು ನರಮಾನಿನ ಬಲೊಡ್ದುಲಾ ಹೆಚ್ಚಿನವು ಆದುಂಡು.</verse>
				<verse number="26">ಸಹೋದ್ರೆರೇ ದೇವೆರ್ ನಿಕ್ಲೆನ್ ಲೆತ್ತಿನಪಗ ಎಂಚಿತ್ತಿನಾಕುಲೆನ್ ಲೆತ್ತೆ ಅಂದ್‌ದ್ ಎನ್ನೊನ್ಲೆ. ನಿಕ್ಲೆಡ್ ಲೋಕದ ದೃಷ್ಟಿಡ್ ಬುದ್ಧಿವಂತೆರ್ ಮಸ್ತ್ ಜನ ಇತ್ತಿಜೆರ್, ಅಧಿಕಾರಿಲುಲಾ ಮಸ್ತ್ ಜನ ಇತ್ತಿಜೆರ್, ಪುದರ್ ಪೋಯಿನಾಕುಲುಲಾ ಮಸ್ತ್ ಜನ ಇತ್ತಿಜೆರ್.</verse>
				<verse number="27">ದೇವೆರ್ ಬುದ್ಧಿವಂತೆರೆನ್ ನಾಚಿಗೆ ಆಪಿಲೆಕ್ಕ ಈ ಲೋಕದ ಬುದ್ಧಿದಾಂತಿನಾಕುಲೆನ್ ಅಜತ್‌ದ್ ದೆತ್ತೊಂಡೆ; ಬಲವಂತೆರೆಗ್ ನಾಚಿಗೆ ಆಪಿಲೆಕ್ಕ ಈ ಲೋಕದ ಬಲಹೀನೆರೆನ್ ಅಜತ್‌ದ್ ದೆತ್ತೊಂಡೆ.</verse>
				<verse number="28">ದೇವೆರ್ ಈ ಲೋಕದ ಹೀನವಾಯಿನೆನ್ಲಾ ಅಲಕ್ಷವಾಯಿನೆನ್ಲಾ ಅಜತ್‌ದಿನಿ ಅತ್ತಂದೆ ಗನ್ಯೆರೆನ್ ಇಜ್ಜಾಂದಿಲೆಕ್ಕ ಮಲ್ಪೆರೆ ಬೋಡಾದ್ ಅಲ್ಪೆರೆನ್ ಅಜತೊಂಡೆ.</verse>
				<verse number="29">ಇಂಚಾಯಿನೆಡ್ದ್ ದೇವೆರೆ ಎದುರು ಪುಗರೊನಿಯೆರೆಗ್ ಏರೆಗ್ಲಾ ಆಪುಜಿ.</verse>
				<verse number="30">ದೇವೆರ್ ಈ ರೀತಿ ಮಲ್ತಿನೆಡ್ದಾವರನೇ ಇತ್ತೆ ನಿಕುಲು ಕ್ರಿಸ್ತ ಯೇಸುಡು ಜೀವನ ಮಲ್ತೊಂದುಲ್ಲರ್; ಆಯೆ ನಂಕ್ ದೇವೆರೆಡ್ ಬುದ್ಧಿಲಾ ನೀತಿಲಾ ಪರಿಶುದ್ಧತೆಲಾ ಅತ್ತಂದೆ ಪಾಪೊಡ್ದು ಬುಡುಗಡೆ ಮಲ್ಪುನಾಯೆಲಾ ಆದುಲ್ಲೆ. ಪುಗರೊನುನಾಯೆ ಕರ್ತವಡೇ ಪುಗರೊನಡ್ ಪನ್ಪಿನ ಶಾಸ್ತ್ರೊಡು ಬರೆತಿನವು ಪೂರ್ತಿ ಆಯೆರೆ ಸಾದಿ ಆಂಡ್.</verse>
				<verse number="31"></verse>
			</chapter>
			<chapter number="2">
				<verse number="1">ಸಹೋದ್ರೆರೇ, ಯಾನ್ ನಿಕ್ಲೆನಡೆ ಬತ್ತ್‌ದುಪ್ಪುನಗ ದೇವೆರೆ ಸಾಕ್ಷಿನ್ ನಿಕ್ಲೆಗ್ ಮಲ್ಲ ಪಾತೆರೊಡಾವಡ್ ಮಲ್ಲ ಬುದ್ಧಿಡಾವಡ್ ಸಾರಿಯೊಂದು ಬೈದಿಜಿ.</verse>
				<verse number="2">ಯಾನ್ ಕ್ರುಸ್ಸುಗು ಪತ್ತಾದಿನಾಯೆ ಆದುಪ್ಪು ಯೇಸು ಕ್ರಿಸ್ತನೇ ಅತ್ತಂದೆ ಬೇತೆ ಒವೆನ್ಲಾ ಪನಂದೆ, ನಿಕ್ಲೆ ನಡುಟು ಉಪ್ಪುವೆ ಪಂಡ್ದ್ ತೀರ್ಮಾನ ಮಲ್ತೊಂಡೆ.</verse>
				<verse number="3">ಬೊಕ್ಕ ಯಾನ್ ನಿಕ್ಲೆ ಕೈತಲ್‌ ಬತ್ತ್‌ದುಪ್ಪುನಪಗ ಬಲದಾಂತಿನಾಯೆಲಾ ಪೋಡಿಗೆದಾಯೆಲಾ ದಿಂಜ ನಡುಗುನಾಯೆಲಾ ಆದಿತ್ತೆ.</verse>
				<verse number="4">ಎನ ಪಾತೆರೆಲಾ ಪ್ರಸಂಗಲಾ ನರಮಾನಿನ ಗೇನದ ಪೊರ್ಲು ಪಾತೆರೊಲೆನ್ ಪನಂದೆ, ಐತ ಪಗತೆಗ್ ದೇವೆರಾತ್ಮೊಡ್ದುಲಾ ಬಲೊಡ್ದುಲಾ ದಿಂಜಿದಿತ್ತ್ಂಡ್.</verse>
				<verse number="5">ದಾಯೆಗಂದ್ಂಡ ನಿಕ್ಲೆನ ನಂಬಿಕೆ ನರಮಾನಿನ ಗೇನೊಡು ಆಧಾರ ಮಲ್ಪಂದೆ ದೇವೆರೆ ಬಲೊಟು ಆಧಾರ ಮಲ್ಪೊಡು ಅಂದ್‌ದ್ ಎನ ಉದ್ದೇಶ ಆದಿತ್ತ್ಂಡ್.</verse>
				<verse number="6">ಆಂಡ ನಂಬಿಕೆಡ್ ದೃಢ ಆದುಪ್ಪುನಾಕುಲೆಡ ಎಂಕುಲು ಗೇನೊಡೇ ಪಾತೆರ್‌ವ; ಆಂಡ ಈ ಲೋಕದ ಗೇನೊಡತ್ತ್; ನಾಶಾದ್ ಪೋಪಿನ ಈ ಲೋಕದ ಅಧಿಕಾರಿಲೆ ಬುದ್ಧಿವಂತಿಕೆಡ್ಲಾ ಅತ್ತ್.</verse>
				<verse number="7">ಈತ್‌ನೆಟ್ಟ ಮದೆ ಆದಿತ್ತಿನ ದೇವೆರೆ ಗೇನೊನೇ ಪಾತೆರ್‌ವ; ಅವು ಒವ್ವು ಪಂಡ ನಮ ಮೈಮೆಗಾದ್ ಯುಗೊಲೆಡ್ದ್ ದುಂಬೇ ನೇಮಕ ಮಲ್ತ್‌ದ್ ಮದೆ ಮಲ್ತಿನ ಗೇನನೇ ಆದುಂಡು.</verse>
				<verse number="8">ಉಂದೆನ್ ಲೋಕದ ಅಧಿಕಾರಿಲೆಡ್ ಏರ್ಲಾ ತೆರಿಯೊಂಡಿಜೆರ್; ತೆರಿಯೊಂದ್ವೆರ್ಡ ಮೈಮೆದ ಕರ್ತವನ್ ಕ್ರುಸ್ಸುಗು ಪಾಡ್ದ್‌ವಯೆರ್.</verse>
				<verse number="9">ಆಂಡ ಗ್ರಂಥೊಡು ಬರೆದುಪ್ಪುಲೆಕ್ಕ “ದೇವೆರ್ ತನನ್ ಪ್ರೀತಿ ಮಲ್ತೊಂದು ಉಪ್ಪುನಾಕುಲೆಗ್ ತಯಾರ್ ಮಲ್ತಿನೆನ್ ಏರ್ಲಾ ತೂತುಜೆರ್; ಏರ್ಲಾ ಕೇಂಡ್ದಿಜೆರ್, ಅವು ನರಮಾನಿ ಉಡಲ್‌ಡ್ ಸೇರ್ದಿಜಿ.”</verse>
				<verse number="10">ಎಂಕ್ಲೆಗಾಂಡಲಾ ದೇವೆರ್ ತನ ಆತ್ಮೊಡ್ದು ಅವೆನ್ ತೋಜಾದ್ ಕೊರಿಯೆ. ಆ ಆತ್ಮೆ ಮಾತ ವಿಷಯೊನ್ಲಾ ದೇವೆರೆ ಮದೆ ಆದಿತ್ತಿನ ವಿಷಯೊನ್ಲಾ ನಾಡ್ ಪತ್ತುಂಡು.</verse>
				<verse number="11">ನರಮಾನಿನ ಉಲಯಿದ ಆಲೋಚನೆಲು ಆಯಡೊಪ್ಪ ಉಪ್ಪುನ ಆತ್ಮೊಗು ಅತ್ತಂದೆ ಬೇತೆ ಏರೆಗ್ ತೆರಿಯು? ಅಂಚೆನೇ ದೇವೆರೆ ಆಲೋಚನೆಲೆನ್ಲಾ ದೇವೆರೆ ಆತ್ಮೆ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.</verse>
				<verse number="12">ಎಂಕುಲು ಲೋಕದ ಆತ್ಮನ್ ಪಡೆಯಂದೆ ದೇವೆರ್ ನಂಕ್ ದಯ ಮಲ್ತಿನ ವರೊಕ್ಲೆನ್ ತೆರಿಯೊನಿಯೆರೆ ದೇವೆರೆಡ್ದ್ ಬೈದಿ ಆತ್ಮೊನೇ ಪಡೆವೊಂದ.</verse>
				<verse number="13">ಉಂದೆನ್ ಎಂಕುಲು ನರಮಾನಿನ ಬುದ್ಧಿ ಪಾತೆರೊಲೆಡ್ದ್ ಪನಂದೆ ದೇವೆರಾತ್ಮೆ ಕಲ್ಪಾಯಿನ ಪಾತೆರೊಲೆಡೇ ಪಂಡ. ಇಂಚ ಆತ್ಮದ ಸತ್ಯೊನು ಆತ್ಮಭಾವದಾಕುಲೆಗ್ ಯೋಗ್ಯವಾಯಿನ ರೀತಿಡ್ ತೆರಿಪಾವ.</verse>
				<verse number="14">ಲೋಕದ ನರಮಾನಿ ದೇವೆರೆ ಆತ್ಮದ ಸಂಗತಿಲೆನ್ ಬೊಡ್ಚಿ ಪನ್ಪೆ. ಅವು ಆಯಗ್ ಹೆಡ್ಡೆರೆ ಪಾತೆರದ ಲೆಕ್ಕ ತೋಜುಂಡು; ಆಯೆ ಅವೆನ್ ತೆರಿಯೊನುಜೆ. ದಾಯೆಗಂದ್ಂಡ ಅವೆನ್ ದೇವೆರೆ ಆತ್ಮಭಾವೊಡ್ದೇ ಪರೀಕ್ಷೆ ಮಲ್ತ್‌ದ್ ಸರಿಯಾದ್ ತೆರಿಯೊನಿಯೆರೆ ಸಾದ್ಯ.</verse>
				<verse number="15">ದೇವೆರಾತ್ಮೊಡ್ದು ನಡಪುನಾಯೆ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್ ತೆರಿಯೊನ್ವೆ. ಆಂಡ ಆಯನ್ ಪರೀಕ್ಷೆ ಮಲ್ಪೆರೆ ಏರೆಡ್ದ್‌ಲಾ ಆವಂದ್.</verse>
				<verse number="16">“ಕರ್ತವ ಮನಸ್‌ನ್ ಏರ್ ತೆರಿದುಲ್ಲೆ? ಕರ್ತವಗ್ ಉಪದೇಶ ಮಲ್ಪುನಾಕುಲು ಏರುಲ್ಲೆರ್?” ಪಂಡ್ದ್ ಗ್ರಂಥೊಡು ಬರೆದುಂಡು. ನಂಕಾಂಡಲಾ ಕ್ರಿಸ್ತನ ಮನಸ್ ಉಂಡು.</verse>
			</chapter>
			<chapter number="3">
				<verse number="1">ಎನ ಸಹೋದ್ರೆರೇ, ನಿಕುಲು ಆತ್ಮಭಾವೊಡು ಭಕ್ತಿವಂತೆರ್ ಅಂದ್‌ದ್ ನಿಕ್ಲೆಡ ಪಾತೆರಂದೆ, ನನಲಾ ಶರೀರಭಾವದಾಕುಲು ಕ್ರಿಸ್ತಡ್ ಪುರುಬಾಲೆಲು ಆದುಪ್ಪುನಾಕುಲೆ ಲೆಕ್ಕ ನಿಕ್ಲೆಡ ಪಾತೆರೊಡಾಂಡ್.</verse>
				<verse number="2">ಯಾನ್ ನಿಕ್ಲೆಗ್ ಪೇರ್ ಪರ್ಪಾಯೆ. ನುಪ್ಪು ಕೊರ್ತುಜಿ; ದಾಯೆ ಪಂಡ ನಿಕುಲು ನುಪ್ಪು ತಿನಿಯೆರೆ ಇದ ಮುಟ್ಟ ಶಕ್ತಿ ಇಜ್ಜಾಂಡ್, ಇತ್ತೆಲಾ ಶಕ್ತಿ ಇಜ್ಜಿ.</verse>
				<verse number="3">ದಾಯೆಗಂದ್ಂಡ ನಿಕುಲು ಶರೀರಭಾವದಾಕುಲಾದ್ ಬದುಕೊಂದು ಉಲ್ಲರ್; ನಿಕ್ಲೆ ಉಲಯಿ ಮಚ್ಚರ, ಲಡಾಯಿಲು ಉಪ್ಪುನೆಡ್ದ್ ನಿಕುಲು ಶರೀರಭಾವ ಇತ್ತಿನಕುಲಾದ್ ಸಾಧಾರಣ ನರಮಾನಿಲೆಕ್ಕ ಉಲ್ಲರತ್ತಾ?</verse>
				<verse number="4">“ಒರಿ ಯಾನ್ ಪೌಲುನಾಯೆ, ಬೊಕ್ಕೊರಿ ಯಾನ್ ಅಪೊಲ್ಲೋಸನಾಯೆ ಅಂದ್‌ದ್ ಪಂಡೊನ್ನಗ ನಿಕುಲು ಬಜೀ ನರಮಾನಿಲಾದ್ ಉಲ್ಲರತ್ತಾ?”</verse>
				<verse number="5">ಅಪಗಾಂಡ ಅಪೊಲ್ಲೋಸೆ ಏರ್? ಪೌಲು ಏರ್? ಅಕುಲು ಸೇವೆ ಮಲ್ಪುನಾಕುಲು; ಅಕ್ಲೆ ಪಾತೆರೊಡ್ದಾದ್ ನಿಕುಲು ಕ್ರಿಸ್ತನ್ ನಂಬಿಯರ್; ಕರ್ತವೆ ನಂಕ್ ಒರಿ ಒರಿಯಗ್ ಬೇಲೆ ಕೊರಿ ಲೆಕ್ಕ ಅಕುಲು ಬೇಲೆ ಮಲ್ಪುನಾಕುಲಾದ್ ಉಲ್ಲೆರ್.</verse>
				<verse number="6">ಯಾನ್ ನಿಕ್ಲೆಗ್ ಸುರುಟ್ಟು ಸುವಾರ್ತೆ ಬೀಜದಲೆಕ್ಕ ಬಿತ್ತಿಯೆ. ಅಪೊಲ್ಲೋಸೆ ನೀರ್ ಮೈತೆ. ಆಂಡ ಬುಲೆಪಾವೊಂದು ಬತ್ತಿನಾಯೆ ದೇವೆರ್.</verse>
				<verse number="7">ಇಂಚ ಉಪ್ಪುನಗ, ಬಿತ್ತಿನಾಯೆ ನೀರ್ ಮೈಪುನಾಯೆಲಾ ವಿಶೇಷದಾಕುಲು ಅತ್ತ್, ಬುಲೆಪಾವುನ ದೇವೆರೇ ವಿಶೇಷದಾಯೆ.</verse>
				<verse number="8">ಬಿತ್ತ್ ಬಿತ್ತಿನಾಯೆಲಾ ನೀರ್ ಮೈಪುನಾಯೆಲಾ ಒಂಜೇ ಆದುಲ್ಲೆರ್. ಆಂಡಲಾ ಪ್ರತಿ ಒರಿಯಗ್ಲಾ ಆಯಾಯನ ಕಷ್ಟೊಗು ತಕ್ಕದ ಕೂಲಿ ತಿಕ್ಕುಂಡು.</verse>
				<verse number="9">ದಾಯೆಗಂದ್ಂಡ, ಎಂಕುಲು ದೇವೆರೆ ಕೆಲಸೊಡು ಜತೆಸೇವಕೆರ್; ನಿಕುಲು ನಂಬುನಾಕುಲು ದೇವೆರೆ ಕಂಡಲಾ ದೇವೆರೆ ಕಟ್ಟಡಲಾ ಆದುಲ್ಲರ್.</verse>
				<verse number="10">ದೇವೆರ್ ಎಂಕ್ ದಯೆಡ್ದ್ ಕೊರಿನ ಕೆಲಸೊನು ನಡಪಾದ್ ಯಾನ್ ಬುದ್ಧಿ ಇತ್ತಿ ಮೇಸ್ತ್ರಿಲೆಕ್ಕ ಪಂಚಾಂಗ ಪಾಡಿಯೆ, ನನೊರಿ ಐತ ಮಿತ್ತ್ ಕಟ್ಟುವೆ. ಪ್ರತಿ ಒರಿಲಾ ತಾನ್ ಐತ ಮಿತ್ತ್ ಎಂಚ ಕಟ್ಟೊಂದುಲ್ಲೆ ಅಂದ್‌ದ್ ಎಚ್ಚರಿಕೆಡುಪ್ಪೊಡು.</verse>
				<verse number="11">ದಾಯೆಗಂದ್ಂಡ, ಪಾಡ್ದಿನ ಪಂಚಾಂಗ ಯೇಸು ಕ್ರಿಸ್ತೆನೇ. ಈ ಪಂಚಾಂಗ ಅತ್ತಂದೆ ಬೇತೆ ಒಂಜಿ ಪಂಚಾಂಗೊನು ಏರೆಗ್ಲಾ ಪಾಡಿಯೆರೆಗ್ ಆವಂದ್.</verse>
				<verse number="12">ಕೆಲೆವೆರ್ ಈ ಪಂಚಾಂಗದ ಮಿತ್ತ್ ಬಂಗಾರ್, ಬೊಳ್ಳಿ, ಮಸ್ತ್ ಬಿಲೆ ಇತ್ತಿ ಕಲ್ಲ್‌ಡ್ದ್, ಆಂಡ ಬಾಕಿ ಕೆಲೆವೆರ್ ಕನಕ್, ಪಜಿರ್, ಒಡ್ಡು ಇಂಚಿತ್ತಿನೆಟ್ಟ್ ಕಟ್ಟುವೆರ್.</verse>
				<verse number="13">ಕ್ರಿಸ್ತೆ ಬರ್ಪಿನ ದಿನೊಟು ಪ್ರತಿ ಒರಿಯನ ಬೇಲೆ ತೂಟು ತೋಜಿದ್ ಬರು. ಬೊಕ್ಕ ತೂ ಆಯಾಯನ ಎಂಚಿತ್ತಿನ ಬೇಲೆ ಅಂದ್‌ದ್ ಪರೀಕ್ಷೆ ಮಲ್ಪುಂಡು.</verse>
				<verse number="14">ಒರಿ ಆ ಪಂಚಾಂಗದ ಮಿತ್ತ್ ಕಟ್ಟ್‌ದಿನವು ಒರಿಂಡ ಆಯಗ್ ಇನಾಮ್ ತಿಕ್ಕುಂಡು.</verse>
				<verse number="15">ಒರಿಯನ ಬೇಲೆ ಪೊತ್ತುದು ಪೋಂಡ ಆಯಗ್ ನಷ್ಟ ಆವು. ಆಂಡ ಆಯಗ್ ರಕ್ಷಣೆ ಆವು, ಬೊಕ್ಕ ತೂತ ಉಲಯಿಡ್ದ್ ತಪ್ಪಾವೊಂಡಿಲೆಕ್ಕ ಉಪ್ಪೆ.</verse>
				<verse number="16">ನಿಕುಲು ಮಾತೆರ್ಲಾ ದೇವೆರೆ ಆಲಯ ಆದುಲ್ಲರ್ ಅಂದ್‌ದ್ ದೇವೆರೆ ಆತ್ಮೆ ನಿಕ್ಲೆಡ್ ವಾಸ ಮಲ್ಪುವೆ ಪಂಡ್ದ್‌ಲಾ ತೆರಿದಿಜರಾ?</verse>
				<verse number="17">ಏರಾಂಡಲಾ ದೇವೆರೆ ಆಲಯೊನು ಹಾಳ್ ಮಲ್ತೆಡ ದೇವೆರ್ ಆಯನ್ ಹಾಳ್ ಮಲ್ಪುವೆ; ದಾಯೆಗಂದ್ಂಡ ದೇವೆರೆ ಆಲಯ ಪರಿಶುದ್ಧಾದುಂಡು; ಅವು ನಿಕುಲೇ.</verse>
				<verse number="18">ಏರ್ಲಾ ತನನ್ ತಾನೇ ಮೋಸ ಮಲ್ತೊನಂದೆ ಉಪ್ಪಡ್. ನಿಕ್ಲೆಡ್ ಏರ್ಲಾ ತನನ್ ಈ ಲೋಕೊಡು ಬುದ್ಧಿವಂತೆ ಅಂದ್‌ದ್ ಎನ್ನೊನುವೆಡ ಆಯೆ ನಿಜಾದ್ ಬುದ್ಧಿವಂತೆ ಆಪಿಲೆಕ್ಕ ತನನ್ ತಾನ್ ಹೆಡ್ಡೆಲೆಕ್ಕ ಮಲ್ತೊನಡ್.</verse>
				<verse number="19">ದಾಯೆಗಂದ್ಂಡ ಈ ಲೋಕದ ಬುದ್ಧಿವಂತಿಕೆ ದೇವೆರೆದುರುಡು ಹೆಡ್ಡ್‌ತನ ಆದುಂಡು. ಬುದ್ಧಿವಂತೆರೆನ್ ಅಕ್ಲೆನ ತಂತ್ರೊಡೇ ಪತ್ತುವೆ. ಬುದ್ಧಿವಂತೆರೆ ಯೋಚನೆಲು ವ್ಯರ್ಥದವು ಅಂದ್‌ದ್ ಕರ್ತವೆ ತೆರಿಯೊನ್ವೆ ಪಂಡ್ದ್‌ಲಾ ಬರೆತ್ಂಡ್.</verse>
				<verse number="20"></verse>
				<verse number="21">ಅಂಚಾಯಿನೆಡ್ದ್ ಏರ್ಲಾ ನರಮಾನಿಲೆ ಸಂಗತಿಲೆಡ್ ಹೆಚ್ಚಲ್ಮೆ ಮಲ್ಪಂದೆ ಉಪ್ಪಡ್. ದಾಯೆಗಂದ್ಂಡ ಮಾತಲಾ ನಿಕ್ಲೆನವು;</verse>
				<verse number="22">ಪೌಲುನಾವಡ್, ಅಪೊಲ್ಲೋಸನಾವಡ್, ಪೇತ್ರನಾವಡ್ ಲೋಕ ಆವಡ್, ಜೀವ ಆವಡ್, ಮರಣ ಆವಡ್ ಇತ್ತೆ ಉಪ್ಪುನವು ಆವಡ್, ಬರ್ಪಿನವು ಆವಡ್ ಮಾತಲಾ ನಿಕ್ಲೆನವು.</verse>
				<verse number="23">ನಿಕುಲು ಕ್ರಿಸ್ತನಾಕುಲು; ಬೊಕ್ಕ ಕ್ರಿಸ್ತೆ ದೇವೆರೆನಾಯನೇ.</verse>
			</chapter>
			<chapter number="4">
				<verse number="1">ಜನೊಕುಲು ಎಂಕ್ಲೆನ್ ಕ್ರಿಸ್ತನ ಸೇವಕೆರ್ ಅಂದ್‌ದ್‌ಲಾ ದೇವೆರೆ ಮರ್ಮೊಲೆ ಪಾರುಪತ್ತೆದಾರೆರ್ ಅಂದ್‌ದ್‌ಲಾ ಎನ್ನೊನಡ್.</verse>
				<verse number="2">ಇಂಚ ಉಪ್ಪುನಗ, ಪಾರುಪತ್ತೆದಾಯೆ ನಂಬಿಗಸ್ತೆ ಆದ್ ತೋಜಿದ್ ಬರ್ಪಿನವು ಅಗತ್ಯ ಅತ್ತಾ?</verse>
				<verse number="3">ಆಂಡಲಾ ಎಂಕ್ ನಿಕ್ಲೆಡ್ದಾವಡ್, ನರಮಾನಿಲೆ ನ್ಯಾಯಾಲಯಡ್ದಾವಡ್ ವಿಚಾರಣೆ ಆಪಿನವು ಬಜೀ ಎಲ್ಯ ಸಂಗತಿ ಆದುಂಡು; ಯಾನ್ಲಾ ಎನನ್ ತೀರ್ಪು ಮಲ್ತೊನುಜಿ.</verse>
				<verse number="4">ಎನಡ್ ದೋಷ ಉಂಡು ಅಂದ್‌ದ್ ಎನ ಮನಸಾಕ್ಷಿಗ್ ತೋಜಿದ್ ಬತ್ತಿಜಿಡಲಾ ನೀತಿವಂತೆ ಅಂದ್‌ದ್ ತೀರ್ಪು ಉಂದೆಡ್ದ್ ಆಪುಜಿ; ಎನನ್ ಪರೀಕ್ಷೆ ಮಲ್ತ್‌ದ್ ತೀರ್ಪು ಮಲ್ಪುನಾಯೆ ಕರ್ತವೆನೇ.</verse>
				<verse number="5">ಅಂಚಾಯಿನೆಡ್ದ್ ಕಾಲೊಗು ದುಂಬು ಒವ್ವೆನ್ಲಾ ತೀರ್ಪು ಮಲ್ಪಡೆ; ಕರ್ತವೆ ಬರ್ಪಿನೆಟ್ಟ ತಡೆಲೆ. ಆಯೆ ಕತ್ತಲೆಡ್ ಮದೆ ಆದಿತ್ತಿ ಸಂಗತಿಲೆನ್ ಬೊಲ್ಪುಗು ಕನವೆ. ಉಡಲ್‌ದ ಆಲೋಚನೆಲೆನ್ ತೋಜಾದ್ ಕೊರುವೆ. ಅಪಗ ಪ್ರತಿ ಒರಿಯಗ್ ಬರೊಡಾಯಿ ಪುಗರಿಗೆ ದೇವೆರೆಡ್ದ್ ಬರು.</verse>
				<verse number="6">ಸಹೋದ್ರೆರೇ, ಯಾನ್ ನಿಕ್ಲೆ ಪ್ರಯೋಜನಗಾದೇ ಸರಿ ಇತ್ತಿ ರೂಪೊಡು ಎನ ಸಂಗತಿಡ್ಲಾ ಅಪೊಲ್ಲೋಸನ ಸಂಗತಿಡ್ಲಾ ಪಂಡೆ. ದಾಯೆಗಂದ್ಂಡ ನಿಕುಲು “ಶಾಸ್ತ್ರೊಡು ಬರೆತಿನೆನ್ ಮೀರ್‌ಯೆರೆ ಬಲ್ಲಿ,” ಅಂದ್‌ದ್ ಕಲ್ತೊನೊಡು. ಅಂಚ ಕಲ್ತ್ಂಡ ನಿಕ್ಲೆಡ್ ಏರ್ಲಾ ಒರಿ ಬೋಧಕನ್ ವಿರೋಧ ಮಲ್ತೊಂದು ಬೊಕ್ಕೊರಿಯನ್ ಪತ್ತೊಂದು ಸೊರ್ಕುದು ಪೋವಡೆ.</verse>
				<verse number="7">ದಾಯೆಗಂದ್ಂಡ, ನಿನನ್ ನನೊರಿಯಡ್ದ್ ಮಲ್ಲ ಮಲ್ಪುನಾಯೆ ಏರ್? ದೇವೆರೆಡ್ದ್ ತಿಕ್ಕಂದಿನವು ನಿನಡ ಒಂಜಾಂಡಲಾ ಉಂಡಾ? ತಿಕ್ಕಿಬೊಕ್ಕ, ಅವು ನಿನಡ್ದೇ ಆಯಿ ಲೆಕ್ಕ ಈ ದಾಯೆ ಪುಗರೊನ್ವ?</verse>
				<verse number="8">ಈತ್ ಬೇಗ ದಿಂಜಿದ್ ಪೋಯರ್ ಪಂಡ್ದ್ ಎನ್ನುವರಾ, ಈತ್ ಬೇಗ ಆತ್ಮೀಕ ರೀತಿಡ್ ಮಲ್ಲಾದಿಗೆದಾಕುಲು ಆಯರ್ ಅಂದ್‌ದ್ ಎನ್ನುವರಾ. ಎಂಕುಲೆ ಸಹಾಯದಾಂತೆ ಅರಸೆರಾಯರ್. ನಿಕುಲು ನಿಜವಾದ್ ಅರಸೆರ್ ಆದಿತ್ತ್ಂಡ ಎಂಕ್ ಏತೋ ಸಂತೋಷ ಆತು. ಅಪಗ ಎಂಕುಲುಲಾ ನಿಕ್ಲೆಡೊಪ್ಪ ಅರಸೆರಾದಿತ್ತ್‌ದ್ವ.</verse>
				<verse number="9">ಅಂಚಾವಂದೆ ದೇವೆರ್ ಅಪೊಸ್ತಲೆರಾಯಿ ಎಂಕ್ಲೆನ್ ಮರಣೊಗು ಮುಟ್ಟ ಆತಿನಾಕುಲು ಇನ್ಪಿಲೆಕ್ಕ ಕಡೆಟ್ಟ್ ದೀತೆ ಅಂದ್‌ದ್ ಯಾನ್ ಎನ್ನುವೆ. ಎಂಕುಲು ಲೋಕೊಗು ದೂತೆರೆಗ್ಲಾ ನರಮಾನಿಲೆಗ್ಲಾ ನೋಟದಕುಲಾಯ.</verse>
				<verse number="10">ಎಂಕುಲು ಕ್ರಿಸ್ತಗಾದ್ ತೂವೆರೆ ಹೆಡ್ಡೆರೆಲೆಕ್ಕ ತೋಜುವ; ಆಂಡ ನಿಕುಲು ಕ್ರಿಸ್ತಡ್ ಬುದ್ಧಿವಂತೆರಾದುಲ್ಲರ್ ಅಂದ್‌ದ್ ಎನ್ನುವರ್. ಎಂಕುಲು ಬಲಹೀನೆರ್; ನಿಕುಲು ಬಲವಂತೆರ್; ನಿಕುಲು ಮಾನದಾಕುಲು, ಎಂಕುಲು ಮಾನದಾಂತಿನಾಕುಲು.</verse>
				<verse number="11">ಈ ಗಳಿಗೆ ಮುಟ್ಟಲಾ ಎಂಕುಲು ಬಡವುದಾಕುಲುಲಾ ಬಾಜೆಲ್ ಆದುಪ್ಪುನಾಕುಲುಲಾ ಮೆಯಿಕ್ ಕುಂಟು ಕಡಿಮೆ ಇತ್ತಿನಾಕುಲುಲಾ ಆದುಲ್ಲಾ. ಅಪಗಪಗ ಗುದ್ದು ತಿನ್ಪಿನಾಕುಲುಲಾ; ಇಲ್ಲ್‌ದಾಂತಿನಾಕುಲುಲಾ ಆದುಲ್ಲ</verse>
				<verse number="12">ಎಂಕುಲು ಸ್ವಂತ ಕೈಟ್ ಬೇಲೆ ಮಲ್ತ್‌ದ್ ಬೆನ್ಪಿನಾಕುಲುಲಾ ಆದುಲ್ಲ. ನೆರ್ಪಣೆ ತಿಂದ್‌ದ್ ಆಶೀರ್ವದಿಪುವ; ಭಂಗ ಕೊರ್ನಗ ತಾಳೊನ್ವ; ಎಂಕ್ಲೆನ್ ದೂಷಣೆ ಮಲ್ಪುನಗ ಸಮಾಧಾನ ಪನ್ಪ.</verse>
				<verse number="13">ಎಂಕುಲು ಲೋಕದ ಕಜವುದಲೆಕ್ಕನೆ, ಇದ ಮುಟ್ಟ ಮಾತೆತ್ತ ಗಸಂಟ್ ಆಯ.</verse>
				<verse number="14">ನಿಕ್ಲೆಗ್ ನಾಚಿಗೆ ಪುಟ್ಟಾವರೆಗ್ ಉಂದೆನ್ ಬರೆವಂದೆ ಎನ ಪ್ರೀತಿದ ಜೋಕುಲು ಅಂದ್‌ದ್ ಎನ್ನ್‌ದ್ ನಿಕ್ಲೆಗ್ ಬುದ್ಧಿ ಪನಿಯೆರೆ ಬೋಡಾದೆ ಈ ಪಾತೆರೊಲೆನ್ ಬರೆತೆ.</verse>
				<verse number="15">ನಿಕ್ಲೆಗ್ ಕ್ರಿಸ್ತಡ್ ಪತ್ತ್ ಸಾರದಾತ್ ಕಲ್ಪಾವುನಾಕುಲು ಇತ್ತೆರ್ಡ ನಿಕ್ಲೆಗ್ ಅಮ್ಮಾಡ್ಲು ಮಸ್ತ್ ಜನ ಇಜ್ಜೆರ್. ಯಾನೇ ನಿಕ್ಲೆನ್ ಸುವಾರ್ತೆಡ್ದ್ ಕ್ರಿಸ್ತ ಯೇಸುಡು ಪಡೆಯೆ.</verse>
				<verse number="16">ಅಂಚಾದ್ ನಿಕ್ಲೆಡ ನಟ್ಟೊನ್ವೆ, ಎನನ್ ತೂದು ಅಂಚೆನೇ ನಡತೊನ್ಲೆ.</verse>
				<verse number="17">ಐಕಾದೇ ಕರ್ತವಡ್ ಎನ ಮಗೆ ಆದುಪ್ಪು ತಿಮೋಥಿನ್ ನಿಕ್ಲೆ ಕೈತಲ್‌ ಕಡಪುಡ್ದು ಕೊರ್ತೆ. ಆಯೆ ಎಂಕ್ ಪ್ರೀತಿದಾಯೆಲಾ ನಂಬಿಗಸ್ತೆಲಾ ಆದುಲ್ಲೆ. ಆಯೆ ಕ್ರಿಸ್ತನ ಸೇವೆಡುಪ್ಪು ಎನ ನಡಾವಳಿಕೆನ್, ಪಂಡ ಯಾನ್ ಮಾತ ಕಡೆಟ್ಟ್ ಬೊಕ್ಕ ಮಾತ ಸಭೆಕ್ಲೆಡ್ಲಾ ಬೋಧನೆ ಮಲ್ಪುನ ರೀತಿನ್ ನಿಕ್ಲೆನ ನೆನೆಪುಗು ಕನವೆ.</verse>
				<verse number="18">ನಿಕ್ಲೆಡ್ ಕೆಲೆವೆರ್, ಪೌಲು ಎಂಕುಲೆ ಕೈತಲ್‌ ಬರಯೆ ಅಂದ್‌ದ್ ಸೊರ್ಕುದುಪ್ಪೆರ್.</verse>
				<verse number="19">ಆಂಡ, ಕರ್ತವ ಚಿತ್ತ ಇತ್ತ್ಂಡ ಯಾನ್ ಬೇಗ ನಿಕ್ಲೆ ಕೈತಲ್‌ ಬತ್ತ್‌ದ್ ಆ ಸೊರ್ಕುದಿನಾಕುಲೆನ ಪಾತೆರೊಲೆನ್ ಅತ್ತ್, ಅಕ್ಲೆನ ಬಲೊನು ಗೊತ್ತು ಮಲ್ತೊನ್ವೆ.</verse>
				<verse number="20">ದಾಯೆಗಂದ್ಂಡ ದೇವೆರೆ ರಾಜ್ಯ ಪಾತೆರೊಡು ಅತ್ತ್ ಬಲೊಟೇ ಉಂಡು.</verse>
				<verse number="21">ನಿಕ್ಲೆಗ್ ಎಂಚಿನವು ಇಷ್ಟ? ಬೆತ್ತ ಪತ್ತೊಂದು ನಿಕ್ಲೆ ಕೈತಲ್‌ ಬರೊಡಾ? ಇಜ್ಜಾಂಡ ಪ್ರೀತಿಡ್ಲಾ ತಗ್ಗ್‌ತನೊಟ್ಲಾ ಬರೊಡಾ?</verse>
			</chapter>
			<chapter number="5">
				<verse number="1">ನಿಕ್ಲೆಡ್ ಹಾದ್ರ ಉಂಡು ಅಂದ್‌ದ್ ಜನೊಕುಲು ಪಾತೆರೊನ್ವೆರ್ ಒರಿ ತನ ಅಮ್ಮೆರೆನ ಬೊಡೆದಿನೇ ದೀವೊಂದೆಗೆ; ಇಂಚಿತ್ತಿ ಹಾದ್ರ ಪಿದಯಿದ ಜನೊಕುಲೆಡ್ಲಾ ಇಜ್ಜಿ.</verse>
				<verse number="2">ಇಂಚ ಇತ್ತ್ಂಡಲಾ ನಿಕುಲು ದುಃಖೊನು ತೋಜಾವಂದೆ ಇಂಚ ಮಲ್ತಿನಾಯನ್ ನಿಕ್ಲೆ ಉಲಯಿಡ್ದ್ ದೆತ್ತ್ ಪಾಡಂದೆ ಪುಗರೊಂದೇ ಉಲ್ಲರತ್ತಾ?</verse>
				<verse number="3">ಯಾನ್ ಶರೀರದ ರೀತಿಡ್ ನಿಕ್ಲೆಡ್ದ್ ದೂರ ಇತ್ತ್ಂಡಲಾ ಆತ್ಮೊಡು ನಿಕ್ಲೆ ಕೈತಲೇ ಇತ್ತ್‌ದ್ ಇಂಚಿತ್ತಿ ಕಾರ್ಯ ಮಲ್ತಿನಾಯನ ಬಗೆಟ್ ಕೈತಲ್ ಇತ್ತಿನಾಯಲೆಕ್ಕನೆ ತೀರ್ಪು ಮಲ್ಪುವೆ.</verse>
				<verse number="4">ನಿಕುಲು ನಮ ಕರ್ತವೆ ಆದುಪ್ಪು ಯೇಸು ಪುದರ್‌ಡ್ ಒಟ್ಟು ಸೇರ್ದ್ ಬನ್ನಗ, ಯಾನ್ ಆತ್ಮೊಡು ನಿಕ್ಲೆಡೊಪ್ಪ ಉಪ್ಪುವೆ. ನಮ ಕರ್ತವೆ ಆದುಪ್ಪು ಯೇಸುನ ಶಕ್ತಿ ನಮೊಟ್ಟುಗು ಉಪ್ಪುನಗ</verse>
				<verse number="5">ಅಂಚಿತ್ತಿನಾಯನ ಪಾಪದ ಸ್ವಭಾವ ನಾಶಾದ್ ಕರ್ತವೆ ಆದುಪ್ಪು ಯೇಸುನ ದಿನೊಟು ಆಯನ ಆತ್ಮ ರಕ್ಷಣೆ ಆಪಿಲೆಕ್ಕ ಆಯನ್ ಸೈತಾನನ ವಶೊಕ್ಕು ಕೊರ್ಲೆ.</verse>
				<verse number="6">ನಿಕುಲು ಪುಗರಿಕೆ ಮಲ್ತೊನುನವು ಎಡ್ಡೆ ಅತ್ತ್; ಒಂತೆ ಪುಳಿ ಬಂದ ಮಾತ ಬಂದೊನು ಪುಳಿ ಮಲ್ಪುಂಡು ಪಂಡ್ಂಡ ಒರಿಯನ ಪಾಪೊಡ್ದು ಮಾತೆರೆನ್ ಹಾಳ್ ಮಲ್ಪುಂಡು ಅಂದ್‌ದ್ ನಿಕ್ಲೆಗ್ ತೆರಿದಿಜಾ?</verse>
				<verse number="7">ಪಾಪ ಮಲ್ಪುನಾಯೆ ಪುಳಿ ಬಂದದಲೆಕ್ಕ ಉಲ್ಲೆ, ಆಯನ್ ದೆತ್ತ್ ಪಾಡ್ಲೆ. ನಿಕುಲು ಪುಳಿದಾಂತಿನಾಕುಲು ಆದುಪ್ಪುನೆಡ್ದ್ ಪರ ಪುಳಿ ದೆತ್ತ್ ಪಾಡ್ದ್ ಪೊಸ ಬಂದದಲೆಕ್ಕ ಆಲೆ. ದಾಯೆಗಂದ್ಂಡ ನಮ ಪಸ್ಕದ ಕುರಿ ಆಯಿ ಕ್ರಿಸ್ತೆ ನಂಕಾದ್ ಬಲಿ ಆಯೆರ್;</verse>
				<verse number="8">ಅಂಚಾಯಿನೆಡ್ದ್ ನಮ ದುಷ್ಟತನ, ಹಾಳ್‌ತನ ಪನ್ಪಿ ಪುಳಿಹಿಟ್ಟ್‌ನ್ ಬುಡ್ದು ಬುಡ್ಕ, ಪಂಡ ಪುಳಿನ್ ದೀವೊನಂದೆ ಯಥಾರ್ಥಲಾ ಸತ್ಯಲಾ ಪನ್ಪಿ ಪುಳಿದಾಂತಿ ರೊಟ್ಟಿನೇ ದೆತ್ತೊಂದು ಪರ್ಬ ಆಚಾರಣೆ ಮಲ್ಪುಗ.</verse>
				<verse number="9">ವ್ಯಭಿಚಾರಿಲೆ ಕೂಡಾಟ ಮಲ್ಪಡೆ ಅಂದ್‌ದ್ ಎನ ಕಾಕಜಿಡ್ ಬರೆದಿತ್ತೆ ಅತ್ತಾ.</verse>
				<verse number="10">ಈ ಲೋಕೊಡುಪ್ಪು ವ್ಯಭಿಚಾರಿಲು, ಲೋಭಿಲು, ಸುಲಿಗೆ ಮಲ್ಪುನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲೆನ್ ಬುಡ್ದು ದೂರ ಪೋವೊಡಂದ್‌ದ್ ಅತ್ತ್. ಅಂಚ ಮಲ್ಪೊಡಾಂಡ ನಿಕುಲು ಈ ಲೋಕೊನೇ ಬುಡ್ದು ಪೋವೊಡಾವು.</verse>
				<verse number="11">ಆಂಡ ಕ್ರೈಸ್ತ ಸಹೋದರೆ ಪಂಡೊಂದು ಒರಿ ಹಾದ್ರದಾಯೆನಾ ಲೋಭಿಯಾ ಮೂರ್ತಿಪೂಜೆ ಮಲ್ಪುನಾಯೆನಾ ಅಮಲ್‌ದಾಯೆನಾ ಸುಲಿಯುನಾಯೆನಾ ಆದುಲ್ಲೆಡ, ಅಂಚಿತ್ತಿನಾಯಡೊಪ್ಪ ಕೂಡೊನಿಯೆರೆಲಾ ಉನಿಯೆರೆಲಾ ಬಲ್ಲಿ ಪಂಡ್ದ್ ಬರೆದಿತ್ತೆ.</verse>
				<verse number="12">ಸಭೆಡ್ದ್ ಪಿದಯಿ ಉಪ್ಪುನಾಕುಲೆ ಬಗೆಟ್ ತೀರ್ಪು ಮಲ್ಪೆರೆ ಎಂಕ್ ವಾ ಹಕ್ಕ್ ಉಂಡು? ಉಲಯಿ ಉಪ್ಪುನಾಕುಲೆ ಬಗೆಟ್ ತೀರ್ಪು ಮಲ್ಪುನಾಕುಲು ನಿಕುಲತ್ತಾ,</verse>
				<verse number="13">ಪಿದಯಿ ಉಪ್ಪುನಾಕುಲೆಗ್ ತೀರ್ಪು ಮಲ್ಪುನಾಯೆ ದೇವೆರ್. “ಆ ದುಷ್ಟನ್ ನಿಕ್ಲೆ ಮದ್ಯೊಡ್ದು ದೆತ್ತ್ ಪಾಡೊಡು.”</verse>
			</chapter>
			<chapter number="6">
				<verse number="1">ನಿಕ್ಲೆಡ್ ಒರಿಯಗ್ ಸಹೋದ್ರನ ಮಿತ್ತ್ ವ್ಯಾಜ್ಯ ಉಂಡುಡ ನ್ಯಾಯತೀರ್ಪುಗು ದೇವಜನೊಕುಲೆ ದುಂಬು ಪೋವಂದೆ, ನೀತಿಕೆಟ್ಟಿನಾಕುಲೆ ಎದುರು ಪೋಯೆರೆ ನಿಕ್ಲೆಗ್ ಧೈರ್ಯ ಎಂಚ ಬತ್ತ್ಂಡ್?</verse>
				<verse number="2">ದೇವಜನೊಕುಲು ಲೋಕೊನು ತೀರ್ಪು ಮಲ್ಪುನಾಕುಲು ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಲೋಕೊಗು ನಿಕ್ಲೆಡ್ದ್ ತೀರ್ಪು ಆಪಿನವು ಆಂಡ, ನಿಕುಲು ಬಜೀ ಎಲ್ಲ್ಯ ಸಂಗತಿಲೆನ್ ತೀರ್ಪು ಮಲ್ಪೆರೆ ಆವಂದಿನಾಕುಲಾ?</verse>
				<verse number="3">ದೂತೆರೆನ್ಲಾ ನಮ ತೀರ್ಪು ಮಲ್ಪುವ ಅಂದ್‌ದ್ ನಿಕ್ಲೆಗ್ ಗೊತ್ತಿಜ್ಜಾ? ಅಂಚಾಂಡ ಈ ಲೋಕದ ವ್ಯಾಜ್ಯೊಲೆನ್ ತೀರ್ಪುನವು ಮಲ್ಲೆನಾ?</verse>
				<verse number="4">ಅಂಚಾಂಡ ಲೋಕದಜೀವ ಸಮ್ಮಂಧೊಡು ನಿರ್ಧಾರ ಮಲ್ಪು ಕಾರ್ಯೊಲು ನಿಕ್ಲೆಡ ಇತ್ತ್ಂಡ, ತೀರ್ಪು ಮಲ್ಪೆರೆ ಸಭೆಟ್ ಮಾನ ಪಡೆವಂದಿನಾಕುಲೆ ಎದುರು ಅವೆನ್ ದೆತ್ತೊಂದು ಪೋಪರಾ?</verse>
				<verse number="5">ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಇಂಚ ಪಾತೆರ್‌ವೆ. ಸಹೋದರೆರೆ ಉಲಯಿದ ವ್ಯಾಜ್ಯೊನು ತೀರ್ಪೆರೆ ನಿಕ್ಲೆ ನಡುಟು ಏರ್ಲಾ ಒರಿ ಬುದ್ಧಿವಂತೆ ಇಜ್ಜೆನಾ?</verse>
				<verse number="6">ಸಹೋದರೆ ತನ ಸಹೋದ್ರನ ಮಿತ್ತ್ ವ್ಯಾಜ್ಯ ಮಲ್ಪುನು ಅತ್ತಂದೆ ಅವೆನ್ ನಂಬಿಕೆದಾಂತಿನಾಕುಲೆ ಎದುರು ಕೊನೊಪಿನವು ಸರಿಯಾ?</verse>
				<verse number="7">ನಿಕ್ಲೆ ಉಲಯಿಡ್ ವ್ಯಾಜ್ಯೊಲು ಇತ್ತ್ಂಡ ನಿಕುಲು ಸೋತಿನಾಕುಲು ಪನ್ಪಿನೆಕ್ಕ್ ಗುರ್ತ. ಅವೆಡ್ದ್ ಅನ್ಯಾಯೊನು ತಾಳೊನುನವು ಎಡ್ಡೆ ಅತ್ತಾ? ಆಸ್ತಿ ನಷ್ಟೊನು ತಾಳೊಂದು ಸಮಾಧಾನೊಡು ಉಪ್ಪುನವು ಎಡ್ಡೆ ಅತ್ತಾ?</verse>
				<verse number="8">ಐತ ಬದಲ್‌ಗ್ ನಿಕುಲು ಅನ್ಯಾಯ ಮಲ್ಪುವರ್, ಬೇತೆಕ್ಲೆನ ಆಸ್ತಿ ಸುಲಿಗೆ ಮಲ್ಪುವರ್; ಅವುಲಾ ಸಹೋದ್ರೆರೆಗ್ ಇಂಚ ಮಲ್ಪುವರ್.</verse>
				<verse number="9">ಅನ್ಯಾಯಗಾರೆರ್ ದೇವೆರೆ ರಾಜ್ಯೊಗು ಹಕ್ಕ್‌ದಾರೆರ್ ಆಪುಜೆರ್ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಮೋಸೊಗು ಗುರಿ ಆವೊಡ್ಚಿ, ಹಾದ್ರದಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ವ್ಯಭಿಚಾರಿಲು, ಪುರುಷಗಾಮಿಲು,</verse>
				<verse number="10">ಕಲ್ವೆರ್, ಲೋಭಿಲು, ಪರ್ಪೆಲೆರ್, ನೆರ್ಪಿನಾಕುಲು, ಸುಲಿಗೆ ಮಲ್ಪುನಾಕುಲು ಮೊಕ್ಲೆಡ್ ಒರಿಯಗ್ಲಾ ದೇವೆರೆ ರಾಜ್ಯದ ಹಕ್ಕ್ ತಿಕ್ಕಂದ್.</verse>
				<verse number="11">ನಿಕ್ಲೆಡ್ ಕೆಲೆವೆರ್ ಇಂಚಿತ್ತಿನಾಕುಲಾದುಲ್ಲರ್; ಆಂಡಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಎಂಕುಲೆ ದೇವೆರೆ ಆತ್ಮೊಡು ಶುದ್ಧರಾಯರ್, ದೇವಜನೊಕುಲಾಯರ್, ನೀತಿವಂತೆರ್ ಪನ್ಪಿ ತೀರ್ಪು ಪಡೆಯರ್.</verse>
				<verse number="12">ಕೆಲೆವೆರ್ ಇಂಚ ಪನೊಲಿ, “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಮಾತಲಾ ಪ್ರಯೋಜನೊಗು ಬೂರುಜಿ. “ಎಂಕ್ ಮಾತೆನ್ಲಾ ಮಲ್ಪುನ ಸ್ವತಂತ್ರ ಉಂಡು.” ಆಂಡ ಯಾನ್ ಒಯಿಕ್‌ಲಾ ಒಳಗಾಪುಜಿ.</verse>
				<verse number="13">ಕೆಲೆವೆರ್ ಇಂಚ ಪನೊಲಿ, “ತಿನ್ಪಿನ ವಸ್ತುಲು ಬಂಜಿಗಾದ್‌ಲಾ ಬಂಜಿ ತಿನ್ಪಿನ ವಸ್ತುಲೆಗಾದ್‌ಲಾ ಉಂಡು.” ಆಂಡ ದೇವೆರ್ ಉಂದೆನ್ಲಾ ಅವೆನ್ಲಾ ದೆತ್ತ್‌ದ್ ಪಾಡ್ವೆ. ಆಂಡ ಶರೀರ ಹಾದ್ರೊಗಾದ್ ಉಪ್ಪುನವು ಅತ್ತ್, ಕರ್ತವಗಾದ್ ಉಂಡು ನಮ ಶರೀರೊಲುಲಾ ಆಯನ ಸೇವೆಗಾದ್ ಉಂಡು.</verse>
				<verse number="14">ದೇವೆರ್ ಕರ್ತವನ್ ಲಕ್ಕಾಯಿ ಲೆಕ್ಕನೇ, ನಮನ್ಲಾ ತನ ಬಲೊಡ್ದು ಲಕ್ಕಾವೆ.</verse>
				<verse number="15">ನಿಕ್ಲೆ ಶರೀರೊಲು ಕ್ರಿಸ್ತನ ಅಂಗೊಲಾದ್ ಉಲ್ಲ ಅಂದ್‌ದ್ ನಿಕ್ಲೆಗ್ ತೆರಿದಿಜಾ? ಅಂಚಾದ್ ಯಾನ್ ಕ್ರಿಸ್ತನ ಅಂಗೊಲಾದ್ ಉಪ್ಪುನೆನ್ ದೆತ್ತ್‌ದ್ ಸೂಳೆನ ಅಂಗೊಲಾದ್ ಮಲ್ಪೊಲಿಯಾ? ಏಪೊಗ್ಲಾ ಮಲ್ಪೆರೆ ಬಲ್ಲಿ.</verse>
				<verse number="16">ಸೂಳೆಡೊಪ್ಪ ಕೂಡೊನುನಾಯೆ ಆಲೆಡೊಪ್ಪ ಒಂಜೇ ಶರೀರ ಆದುಪ್ಪುವೆ ಅಂದ್‌ದ್ ಗೊತ್ತಿಜ್ಜಾ? “ಅಕುಲು ಇರ್ವೆರ್ ಒಂಜೇ ಶರೀರ ಆದುಲ್ಲೆರ್.” ಅಂದ್‌ದ್ ದೇವೆರ್ ಪನ್ಪೆ ಅತ್ತಾ?</verse>
				<verse number="17">ಆಂಡ ಕರ್ತವನ್ ಕೂಡೊನುನಾಯೆ ಆಯಡೊಪ್ಪ ಒಂಜೇ ಆತ್ಮ ಆದುಲ್ಲೆ.</verse>
				<verse number="18">ಹಾದ್ರೊಗು ದೂರ ಆದುಪ್ಪುಲೆ, ನರಮಾನಿ ಮಲ್ಪುನ ಬೇತೆ ಮಾತ ಪಾಪ ಕೆಲಸೊಲು ಶರೀರೊಗು ತೊಂದರೆ ಆಪುಜಿ. ಆಂಡ ಹಾದ್ರ ಮಲ್ಪುನಾಯೆ ತನ ಶರೀರೊಗು ತೊಂದರೆ ಆಪಿನ ಪಾಪೊನು ಮಲ್ಪುವೆ.</verse>
				<verse number="19">ದೇವೆರೆಡ್ದ್ ನಿಕ್ಲೆಡ್ ನಿಲೆ ಆದುಪ್ಪುನ ಪರಿಶುದ್ಧಾತ್ಮೊಗು ನಿಕ್ಲೆ ಶರೀರ ದೇವಾಲಯ ಆದುಂಡು ಅಂದ್‌ದ್ ನಿಕ್ಲೆಗ್ ತೆರಿಯಂದಾ? ನಿಕುಲು ನಿಕ್ಲೆನ ಸ್ವಂತ ಸೊತ್ತು ಅತ್ತ್.</verse>
				<verse number="20">ನಿಕುಲು ಮಸ್ತ್ ಕ್ರಯೊಕು ದೆತ್ತೊಂಡಿನಾಕುಲು; ಅಂಚಾಯಿನೆಡ್ದ್ ನಿಕ್ಲೆ ಶರೀರೊಡ್ದು ದೇವೆರೆಗ್ ಮೈಮೆ ಪಡೆಪಾಲೆ.</verse>
			</chapter>
			<chapter number="7">
				<verse number="1">ನಿಕುಲು ಬರೆತಿ ವಿಚಾರೊಡು ಎನ ಅಭಿಪ್ರಾಯ ದಾನೆಂದ್ಂಡ, ಪೊಂಜೊವುನು ಮುಟ್ಟಂದೆ ಉಪ್ಪುನವು ನರಮಾನಿಗ್ ಏತೋ ಎಡ್ಡೆ.</verse>
				<verse number="2">ಆಂಡ ಹಾದ್ರೊಗು ಶೋಧನೆ ಆವಂದಿಲೆಕ್ಕ ಪ್ರತಿ ಒರಿಯಗ್ ಸ್ವಂತ ಬೊಡೆದಿ ಉಪ್ಪಡ್; ಪ್ರತಿ ಪೊಂಜೊವುಗು ಆಲೆನ ಸ್ವಂತ ಕಂಡನಿ ಉಪ್ಪಡ್.</verse>
				<verse number="3">ಕಂಡನಿ ಬೊಡೆದಿಗ್ ಸಂದಾವೊಡಾಯಿನೆನ್ ಸಂದಾವಡ್; ಅಂಚೆನೇ ಬೊಡೆದಿ ಕಂಡನಿಗ್ ಸಂದಾವಡ್.</verse>
				<verse number="4">ಬೊಡೆದಿಗ್ ತನ ಶರೀರದ ಮಿತ್ತ್ ಅಧಿಕಾರ ಇಜ್ಜಿ; ಅವು ಕಂಡನಿಗ್ ಉಂಡು. ಅಂಚೆನೇ ಕಂಡನಿಗ್ ತನ ಶರೀರದ ಮಿತ್ತ್ ಅಧಿಕಾರ ಇಜ್ಜಿ; ಅವು ಬೊಡೆದಿಗ್ ಉಂಡು.</verse>
				<verse number="5">ಪ್ರಾರ್ಥನೆಗ್ ಮನಸ್ ಕೊರಿಯೆರೆಗಾದ್ ನಿಕುಲು ಒರಿ ಒರಿಯಗ್ ಒಪ್ಪಿಯೊಂದು ಒಂತೆ ಸಮಯ ದಂಪತಿಲೆ ಧರ್ಮ ಬುಡ್ದು ದೂರ ಆದುಪ್ಪೊಲಿ. ಅತ್ತಂದೆ ಬೇತೆ ಕಾರಣೊಗು ಅಂಚ ಮಲ್ಪೆರೆ ಬಲ್ಲಿ. ದಾಯೆಗಂದ್ಂಡ ನಿಕ್ಲೆಡ್ ಶರೀರದಾಶೆ ಹತೋಟಿ ಇಜ್ಜಂದಿನಾಕುಲೆನ್ ತೂದು ಸೈತಾನೆ ಶೋಧನೆ ಕೊರಂದಿಲೆಕ್ಕ ಬೇಗ ಒಂಜಾಲೆ.</verse>
				<verse number="6">ಇಂಚ ಮಲ್ಪುಲೆ ಅಂದ್‌ದ್ ಪನ್ಪಿನವು ಎನ ಆಲೋಚನೆ, ಆಂಡ ಅಪ್ಪಣೆ ಅತ್ತ್.</verse>
				<verse number="7">ಯಾನ್ ಉಪ್ಪುಲೆಕ್ಕನೇ ಮಾತ ನರಮಾನಿಲು ಉಪ್ಪೊಡಂದ್‌ದ್ ಎನ ಆಸೆ; ಆಂಡ ದೇವೆರೆಡ್ದ್ ಸ್ವಂತ ವರ ಉಂಡು. ಒರಿಯಗ್ ಮದ್ಮೆದ ವರ, ಬೊಕ್ಕೊರಿಯಗ್ ಮದ್ಮೆ ಆವಂದೆ ಒರಿಯೇ ಉಪ್ಪುನ ವರ.</verse>
				<verse number="8">ಮದ್ಮೆ ಆವಂದಿನಾಕುಲೆಗ್ಲಾ ಕಂಡನಿ ಸೈತ್‌ದಿನಾಕುಲೆಗ್ಲಾ ಯಾನ್ ಪನ್ಪಿನಿ ದಾನೆಂದ್ಂಡ, ಯಾನ್ ಉಪ್ಪುಲೆಕ್ಕನೇ ಅಕುಲು ಉಪ್ಪುನವು ಎಡ್ಡೆ.</verse>
				<verse number="9">ಕಾಮತಾಪೊಡು ಉಪ್ಪುನೆಡ್ದ್ ಅಕುಲು ಮದ್ಮೆ ಮಲ್ತೊನಡ್; ಶರೀರದಾಶೆ ತಡೆತೊನಿಯೆರೆ ಆಪುಜಿಡ ಮದ್ಮೆ ಮಲ್ತೊನೊನವು ಎಡ್ಡೆ.</verse>
				<verse number="10">ಮದ್ಮೆ ಮಲ್ತೊಂದಿನಾಕುಲೆಗ್ ಎನ ಅಪ್ಪಣೆ ಮಾತ್ರತ್ತಂದೆ ಕರ್ತವ ಅಪ್ಪಣೆ ದಾನೆ ಪಂಡ, ಬೊಡೆದಿ ಕಂಡನಿನ್ ಬುಡ್ದು ಬೇತೆ ಆವೆರೆ ಬಲ್ಲಿ;</verse>
				<verse number="11">ಒಂಜಿ ವೇಳೆ ಬೇತೆ ಆಂಡಲಾ ಮದ್ಮೆ ಆವಂದೆ ಉಪ್ಪೊಡು; ಇಜ್ಜಿಡ ಕಂಡನಿ ಒಟ್ಟುಗು ಸಮಾಧಾನೊಡು ರಾಜಿ ಮಲ್ತೊನಡ್. ಬೊಕ್ಕ ಕಂಡನಿ ಬೊಡೆದಿನ್ ಬುಡಿಯೆರೆ ಬಲ್ಲಿ.</verse>
				<verse number="12">ಬಾಕಿದಾಕುಲೆನ ಸಂಗತಿಡ್ ಕರ್ತವ ಪಾತೆರ ಇಜ್ಜಾಂಡಲಾ ಯಾನ್ ಪನ್ಪಿನಿ ದಾನೆ ಪಂಡ, ಒರಿ ಸಹೋದ್ರಗ್ ನಂಬಿಕೆದಾಂತಿನ ಬೊಡೆದಿ ಇತ್ತಲ್‌ಡ, ಆಲ್ ಆಯ ಒಟ್ಟುಗು ಉಪ್ಪೆರೆ ಒಪ್ಪಿಯುನಾಂಡ ಆಯೆ ಆಲೆನ್ ಬುಡಿಯೆರೆ ಬಲ್ಲಿ.</verse>
				<verse number="13">ಅಂಚೆನೇ ಒರ್ತಿಗ್ ನಂಬಿಕೆದಾಂತಿನ ಕಂಡನಿ ಉಲ್ಲೆಡ, ಆಯೆ ಆಲೆಡೊಪ್ಪ ಉಪ್ಪೆರೆಗ್ ಒಪ್ಪಿಯುನಾಂಡ ಆಲ್ ಆಯನ್ ಬುಡಿಯೆರೆ ಬಲ್ಲಿ.</verse>
				<verse number="14">ದಾಯೆಗಂದ್ಂಡ ನಂಬಿಕೆದಾಂತಿನ ಕಂಡನಿ ಬೊಡೆದಿಡ್ದಾದ್ ದೇವಜನೊಕುಲೆನ ಸಮ್ಮಂಧೊನು ಪಡೆಪಿನಾಯೆ ಆಪೆ. ಅಂಚೆನೇ ನಂಬಿಕೆದಾಂತಿನ ಬೊಡೆದಿ ಕಂಡನಿಡ್ದಾದ್ ದೇವಜನೊಕುಲೆನ ಸಮ್ಮಂಧೊನು ಪಡೆಪಿನಾಲ್ ಆಪಲ್. ಅಂಚ ಇಜ್ಜಾಂಡ ನಿಕ್ಲೆ ಜೋಕುಲು ಅಶುದ್ಧ ಆದಿತ್ತ್‌ದ್ವೆರ್. ಆಂಡ ಇತ್ತೆ ಅಕುಲುಲಾ ದೇವಜನೊಕುಲೆಡ್ ಸೇರ್ದಿನಾಕುಲು ಆದುಲ್ಲೆರ್.</verse>
				<verse number="15">ಆಂಡ ನಂಬಿಕೆದಾಂತಿನಾಕುಲು ಬೇತೆ ಆದ್ ಪೋಪೆರ್ಡ ಪೋವಡ್. ಇಂಚಿತ್ತಿ ಸಮಯೊಡು ಒರಿ ಸಹೋದರೆ ಆವಡ್, ಸಹೋದ್ರಿ ಆವಡ್ ಮದ್ಮೆದ ಒತ್ತಾಂಕೆಡ್ ಉಪ್ಪುಜೆರ್. ಸಮಾಧಾನೊಡು ಉಪ್ಪೊಡು ಅಂದ್‌ದ್ ದೇವೆರ್ ನಮನ್ ಲೆತ್ತ್‌ದೆ.</verse>
				<verse number="16">ಓ ಪೊಂಜೊವೇ! ನಿನಡ್ದಾದ್ ನಿನ ಕಂಡನಿಗ್ ರಕ್ಷಣೆ ಆವು ಅಂದ್‌ದ್ ನಿಕ್ಕ್ ಎಂಚ ಗೊತ್ತು? ಓ ಅಂಜೊವೇ! ನಿನಡ್ದಾದ್ ನಿನ ಬೊಡೆದಿಗ್ ರಕ್ಷಣೆ ಆವು ಅಂದ್‌ದ್ ನಿಕ್ಕ್ ಎಂಚ ಗೊತ್ತು?</verse>
				<verse number="17">ಆಂಡಲಾ ಕರ್ತವೆ ಪ್ರತಿ ಒರಿಯಗ್ ವಾ ಸ್ಥಿತಿನ್ ನೇಮಕ ಮಲ್ತ್‌ದೆನಾ, ದೇವೆರ್ ಲೆಪ್ಪುನಗ ಪ್ರತಿಯೊರಿ ವಾ ಸ್ಥಿತಿಟ್ಟ್ ಉಪ್ಪುವೆನಾ, ಆ ಸ್ಥಿತಿಕ್ಕ್ ತಕ್ಕ ನಡತೊನಡ್. ಇಂಚ ಮಾತ ಸಭೆಟ್ಲಾ ಅಪ್ಪಣೆ ಕೊರ್ಪೆ.</verse>
				<verse number="18">ದೇವೆರ್ ಲೆತ್ತಿ ಕಾಲೊಡು ಏರಾಂಡಲಾ ಸುನ್ನತಿದಾಯೆ ಆದುಲ್ಲೆನಾ, ಆಯೆ ಸುನ್ನತಿದಾಂತಿನಾಯಲೆಕ್ಕ ಆಯೆರೆ ಬಲ್ಲಿ. ದೇವೆರ್ ಲೆತ್ತಿನಪಗ ಏರಾಂಡಲಾ ಸುನ್ನತಿದಾಂತಿನಾಯೆ ಆದಿತ್ತ್ಂಡ ಆಯೆ ಸುನ್ನತಿ ಮಲ್ತೊನಿಯೆರೆ ಬಲ್ಲಿ.</verse>
				<verse number="19">ಸುನ್ನತಿ ಆಪಿನವುಲಾ ವಿಶೇಷದವು ಅತ್ತ್; ಸುನ್ನತಿದಾಂತೆ ಉಪ್ಪುನವುಲಾ ವಿಶೇಷದವು ಅತ್ತ್; ದೇವೆರೆ ಅಪ್ಪಣೆಲೆನ್ ಕೈಕೊಂದು ನಡಪುನವೇ ವಿಶೇಷದವು.</verse>
				<verse number="20">ದೇವೆರ್ ಲೆಪ್ಪುನಗ ಪ್ರತಿಯೊರಿಲಾ ವಾ ಸ್ಥಿತಿಟ್ಟ್ ಉಲ್ಲೆನಾ ಅವ್ವೇ ಸ್ಥಿತಿಟ್ಟ್ ಉಪ್ಪೊಡು.</verse>
				<verse number="21">ದೇವೆರ್ ಲೆಪ್ಪುನಗ ಈ ಬೊಕ್ಕೊರಿಯನ ದಾಸೆ ಆದುಲ್ಲನಾ? ಐಕಾದ್ ಚಿಂತೆ ಮಲ್ಪಡ. ಆಂಡ ಬುಡುಗಡೆ ಆಯೆರೆ ನಿನ ಕೈಡ್ದ್ ಆಪುಂಡಾ ಸ್ವತಂತ್ರೆ ಆಪಿನವೇ ಎಡ್ಡೆ.</verse>
				<verse number="22">ಒರಿ ದಾಸೆ ಆದ್ ಕರ್ತವಡ್ ಲೆಪ್ಪು ತಿಕ್ಕ್ಂಡ, ಆಯೆ ಕರ್ತವಡ್ ಸ್ವತಂತ್ರೊಡು ಉಲ್ಲೆ. ಅಂಚೆನೇ ಒರಿ ಸ್ವತಂತ್ರೆ ಆದ್ ಕರ್ತವಡ್ ಲೆಪ್ಪು ತಿಕ್ಕ್ಂಡ, ಆಯೆ ಕ್ರಿಸ್ತಗ್ ದಾಸೆ ಆದುಲ್ಲೆ.</verse>
				<verse number="23">ದೇವೆರ್ ನಿಕ್ಲೆನ್ ಮಸ್ತ್ ಕ್ರಯೊಕು ದೆತ್ತೊಂದಿನೆಡ್ದ್ ನರಮಾನಿಲೆಗ್ ದಾಸೆರಾವಡೆ.</verse>
				<verse number="24">ಸಹೋದ್ರೆರೇ, ಪ್ರತಿ ಒರಿ ಲೆಪ್ಪು ಆನಗ ವಾ ಸ್ಥಿತಿಟ್ಟ್ ಉಲ್ಲೆನಾ ಅವ್ವೇ ಸ್ಥಿತಿಟ್ಟ್ ದೇವೆರೆ ಸಮ್ಮಂಧೊಡು ಉಂತಡ್.</verse>
				<verse number="25">ಕನ್ಯಪೊಣ್ಣುಲೆ ವಿಚಾರೊಡು ಕರ್ತವಡ್ದ್ ಬತ್ತಿನ ವಾ ಅಪ್ಪಣೆಲಾ ಇಜ್ಜಿ. ಆಂಡ ನಂಬಿಗಸ್ತೆ ಆದುಪ್ಪೆರೆ ಕರ್ತವಡ್ದ್ ಕರುಣೆ ತಿಕ್ಕಿದಿನಾಯಗ್ ಎನ ಆಲೋಚನೆಲೆನ್ ಪನ್ಪೆ.</verse>
				<verse number="26">ಇತ್ತೆ ಕಷ್ಟಕಾಲೊಲು ಉಪ್ಪುನೆಡ್ದ್ ನರಮಾನಿಗ್ ಅಂಚೆನೇ ಉಪ್ಪುನವು ಎಡ್ಡೆ ಅಂದ್‌ದ್ ಎನ್ನುವೆ.</verse>
				<verse number="27">ಬೊಡೆದಿನ್ ಕಟ್ಟೊಂದನಾ? ಬುಡುಗಡೆ ಆಯೆರೆ ತೂವಡ. ಬೊಡೆದಿದಾಂತಿನಾಯೆ ಆದುಲ್ಲನಾ? ಬೊಡೆದಿನ್ ಮಲ್ತೊನೆರೆ ಪ್ರಯತ್ನ ಮಲ್ಪಡ.</verse>
				<verse number="28">ಒಂಜಿ ವೇಳೆ ಈ ಮದ್ಮೆ ಆಂಡಲಾ ಪಾಪ ಅತ್ತ್. ಕನ್ಯಪೊಣ್ಣು ಮದ್ಮೆ ಆಂಡಲಾ ಪಾಪ ಅತ್ತ್. ಆಂಡ ಮದ್ಮೆ ಆಯಿನಾಕುಲೆಗ್ ಶರೀರೊಡು ಕಷ್ಟ ಬರ್ಪುಂಡು. ನಿಕ್ಲೆಗ್ ಅಂಚ ಆವೆರೆ ಬಲ್ಲಿ ಅಂದ್‌ದ್ ಎನ ಆಸೆ.</verse>
				<verse number="29">ಸಹೋದ್ರೆರೇ, ಯಾನ್ ಪನ್ಪಿನಿ ದಾನೆಂದ್ಂಡ, ಸಮಯ ಒಂತೆ ಉಪ್ಪುನೆಡ್ದ್ ನನ ದುಂಬಗ್ ಬೊಡೆದಿ ಇತ್ತಿನಾಕುಲು ಬೊಡೆದಿ ಇಜ್ಜಾಂದಿನಾಕುಲೆ ಲೆಕ್ಕ;</verse>
				<verse number="30">ಬುಲ್ಪುನಾಕುಲು ಬುಲ್ಪಂದಿನಾಕುಲೆಲೆಕ್ಕ ಸಂತೋಷ ಮಲ್ಪುನಾಕುಲು ಸಂತೋಷ ಮಲ್ಪಂದಿನಾಕುಲೆಲೆಕ್ಕ ಕ್ರಯೊಕು ದೆತ್ತೊಂಡಿನಾಕುಲು ಅವು ತನ್ಕುಲೆನವು ಅತ್ತಂದಿಲೆಕ್ಕನೇ ಉಪ್ಪಡ್.</verse>
				<verse number="31">ಈ ಲೋಕದ ವ್ಯವಹಾರೊಡು ಉಪ್ಪುನಾಕುಲು ಐಟ್ಟೇ ಮುರ್ಕುದುಪ್ಪೆರೆ ಬಲ್ಲಿ. ದಾಯೆಗಂದ್ಂಡ ಈ ಲೋಕದ ರೂಪರೇಕೆ ಕಡೆಕ್ಕ್ ಮಾಜಿದ್ ಪೋಪುಂಡು.</verse>
				<verse number="32">ಆಂಡ ನಿಕುಲು ಚಿಂತೆ ಇಜ್ಜಂದೆ ಇತ್ತಿನಕುಲಾದ್ ಉಪ್ಪೊಡು ಅಂದ್‌ದ್ ಎನ ಆಸೆ. ಮದ್ಮೆ ಆವಂದಿನಾಯೆ ತಾನ್ ಕರ್ತವನ್ ಎಂಚ ಮೆಚ್ಚಾವುನು ಅಂದ್‌ದ್ ಕರ್ತವ ಕಾರ್ಯೊಲೆಗಾದ್ ಚಿಂತೆ ಮಲ್ಪುವೆ.</verse>
				<verse number="33">ಆಂಡ ಮದ್ಮೆ ಆತಿನಾಯೆ ಬೊಡೆದಿನ್ ಎಂಚ ಮೆಚ್ಚಾವುನು ಅಂದ್‌ದ್ ಈ ಲೋಕದ ಸಂಗತಿಲೆಗಾದ್ರ ಚಿಂತೆ ಮಲ್ಪುವೆ.</verse>
				<verse number="34">ಆಯನ ಮನಸ್ ರಡ್ಡ್ ಕಡೆಕ್ಲಾ ಒಯ್ತೊಂದುಪ್ಪುಂಡು. ಆಂಡ ಮದ್ಮೆ ಆವಂದಿನಾಲ್‌ಲಾ ಕನ್ಯಪೊಣ್ಣುಲಾ ತನ ಶರೀರೊಡ್ಲಾ ಆತ್ಮೊಡ್ಲಾ ಪರಿಶುದ್ಧ ಆದಿತ್ತ್‌ದ್ ಕರ್ತವನ ಸಂಗತಿಲೆಗಾದ್ ಚಿಂತೆ ಮಲ್ಪುವಲ್, ಆಂಡ ಮದ್ಮೆ ಆತಿನಾಲ್ ತನ ಕಂಡನಿನ್ ಎಂಚ ಮೆಚ್ಚಾವುನು ಅಂದ್‌ದ್ ಈ ಲೋಕದ ಸಂಗತಿಲೆಗಾದ್ರ ಚಿಂತೆ ಮಲ್ಪುವಲ್.</verse>
				<verse number="35">ನಿಕ್ಲೆನ್ ಬಂಧನೊಡು ದೀವೆರೆ ಅತ್ತ್, ನಿಕ್ಲೆ ಪ್ರಯೋಜನೊಗಾದೇ ಉಂದೆನ್ ಪನ್ಪೆ. ನಿಕುಲು ಸಜ್ಜನೆರಾದ್ ನಡತ್‌ದ್ ರಡ್ಡ್ ಮನಸ್‌ದಾಂತೆ ಕರ್ತವಗ್ ಪಾದಸೇವೆ ಮಲ್ಪುನಾಕುಲು ಆವೊಡು ಅಂದ್‌ದ್ ಎನ ಆಸೆ.</verse>
				<verse number="36">ಒರಿ ತನ ನಿಚ್ಚಯ ಆದಿತ್ತಿ ಕನ್ಯಪೊಣ್ಣು ಮದ್ಮೆದಾಂತೆ ಉಪ್ಪುನವು ಮರ್ಯಾದಿ ಅತ್ತ್ ಅಂದ್‌ದ್ ಎನ್ನುವೆಡ, ಬೊಕ್ಕ ಆಲೆಗ್ ಪ್ರಾಯ ಕರಿದ್ ಪೋಪುಂಡತ್ತಾ, ಮದ್ಮೆ ಆಪಿನವು ಎಡ್ಡೆ ಅಂದ್‌ದ್ ಆಯಗ್ ತೋಜಿಂಡ ಆಯೆ ಅಂಚೆನೇ ಮಲ್ಪಡ್. ಆಯೆ ಪಾಪ ಮಲ್ಪುಜೆ, ಮದ್ಮೆ ಮಲ್ತ್ ಕೊರಡ್.</verse>
				<verse number="37">ಆಂಡ ಒರಿ ದೃಢ ಮನಸ್‌ಡ್ ಬಲಾತ್ಕಾರ ದಾಲಾದಾಂತೆ ತನ ಚಿತ್ತೊಲೆನ್ ನಡಪಾವೆರೆ ಹಕ್ಕ್ ಇತ್ತಿನಾಯೆ ಆದಿತ್ತ್‌ದ್ ತನ ಕನ್ಯಪೊಣ್ಣ್‌ನ ಮದ್ಮೆ ಮಲ್ತ್ ಕೊರ್ಪುಜಿ ಅಂದ್‌ದ್ ತನ ಉಲಯಿ ನಿರ್ಧಾರ ಮಲ್ತೊಂಡೆಡ ಅಂಚೆನೇ ಮಲ್ಪುನವು ಎಡ್ಡೆ.</verse>
				<verse number="38">ಅಂಚಾಂಡ ತನ ನಿಚ್ಚಯ ಆದಿತ್ತಿ ಕನ್ಯಪೊಣ್ಣನ್ ಮದ್ಮೆ ಮಲ್ತ್ ಕೊರ್ಪಿನಾಯೆ ಎಡ್ಡೆನೇ ಮಲ್ಪುವೆ. ಮದ್ಮೆ ಮಲ್ತ್ ಕೊರಂದೆ ಉಪ್ಪುನಾಯೆ ನನಲಾ ಎಡ್ಡೆಂತಿನೆನ್ ಮಲ್ಪುವೆ.</verse>
				<verse number="39">ಮದ್ಮೆ ಆತಿನಾಲ್ ತನ ಕಂಡನಿ ಜೀವೊಡು ಉಪ್ಪುನೆಟ್ಟ ಆಲೆಗ್ ಆಯನ ಕಟ್ಟ್ ಉಂಡು. ಆಯೆ ಸೈತ್ ಪೋಯೆಡ, ತನ್ಕ್ ಬೋಡಾಯಿನಾಯಡ ಮದ್ಮೆ ಆವೆರೆ ಆಲೆಗ್ ಸ್ವತಂತ್ರ ಉಂಡು. ಆಂಡ ಆಯೆ ಕ್ರಿಸ್ತ ನಂಬಿಕೆಡ್ ಉಪ್ಪೊಡು.</verse>
				<verse number="40">ಆಂಡ ಆಲ್ ಮದ್ಮೆ ಮಲ್ತೊನುನೆಡ್ದ್, ಮದ್ಮೆ ಆವಂದೆ ಉಪ್ಪುನವು ಆಲೆಗ್ ಸುಖ ಅಂದ್‌ದ್ ಎನ ಅಭಿಪ್ರಾಯ; ಎಂಕ್‌ಲಾ ದೇವೆರೆ ಆತ್ಮೆ ಉಲ್ಲೆ ಅಂದ್‌ದ್ ಎನ್ನುವೆ.</verse>
			</chapter>
			<chapter number="8">
				<verse number="1">ಇತ್ತೆ ಮೂರ್ತಿಪೂಜೆಗ್ ನೈವೇದ್ಯ ಮಲ್ತಿನ ವಸ್ತುಲೆ ಬಗೆಟ್ ತೂಕ. ನಂಕ್ ಮಾತೆರೆಗ್ಲಾ ಗೇನ ಉಂಡು ಅಂದ್‌ದ್ ತೆರಿದ. ಉಂದು ಉಬ್ಬೆರುನೆಕ್ಕ್ ಕಾರಣ ಆಪುಂಡು, ಆಂಡ ಪ್ರೀತಿ ಆತ್ಮೀಕತೆನ್ ದೃಢ ಮಲ್ಪುಂಡು.</verse>
				<verse number="2">ಉಂದೆನ್ ಮಾತ ತೆರಿದೆ ಅಂದ್‌ದ್ ಎನ್ನುನಾಯೆ ತಾನ್ ತೆರಿಯೊಡಾಯಿನ ರೀತಿಡ್ ನನಲಾ ತೆರಿದಿಜೆ.</verse>
				<verse number="3">ಆಂಡ ಒರಿ ದೇವೆರೆನ್ ಪ್ರೀತಿ ಮಲ್ಪುವೆಡ, ಆಯನ್ ದೇವೆರ್ ತೆರಿಯೊನ್ವೆ.</verse>
				<verse number="4">ಮೂರ್ತಿಪೂಜೆಗ್ ನೈವೇದ್ಯ ಮಲ್ತ್‌ದಿನ ವಸ್ತುಲೆನ್ ತಿನ್ಪಿನ ಬಗೆಟ್ ದಾನೆಂದ್ಂಡ, ಲೋಕೊಡು ಮೂರ್ತಿಪೂಜೆಲು ದಾಲಾ ಅತ್ತ್, ದೇವೆರ್ ಒರಿಯೇ, ಬೇತೆ ದೇವೆರ್ ಇಜ್ಜೆ ಅಂದ್‌ದ್ ತೆರಿದುಲ್ಲ.</verse>
				<verse number="5">ಮಸ್ತ್ ದೇವೆರೆನ್ಲಾ ಕರ್ತವನ್ಲಾ ಪೂಜೆ ಮಲ್ಪುನಾಕುಲು ಉಲ್ಲೆರ್. ನಿಜನೇ; ಪರಲೋಕೊಡಾವಡ್, ಭೂಮಿದ ಮಿತ್ತಾವಡ್ ದೇವೆರ್ ಅಂದ್‌ದ್ ಎನ್ನೊನುನಾಕುಲು ಇತ್ತೆರ್ಡಲಾ</verse>
				<verse number="6">ನಂಕ್ ಒರಿಯೇ ದೇವೆರ್ ಉಲ್ಲೆ; ಆಯೆ ಅಮ್ಮೆ ಆದುಪ್ಪುನಾಯೆನೇ; ಎಂಕುಲು ಆಯಗಾದ್ ಉಂಡಾದ್ ಬದುಕುವ. ಬೊಕ್ಕ ನಂಕ್ ಒರಿಯೇ ಕರ್ತವೆ; ಆಯೆ ಯೇಸು ಕ್ರಿಸ್ತೆನೇ; ಆಯಡ್ದ್ ಮಾತ ಉಂಡಾಂಡ್, ಎಂಕುಲುಲಾ ಆಯಡ್ದೇ ಜೀವೊಡುಲ್ಲ.</verse>
				<verse number="7">ಆಂಡ ಈ ಬುದ್ಧಿ ಮಾತೆರೆಡ್ಲಾ ಇಜ್ಜಿ; ಕೆಲೆವೆರ್ ಇತ್ತೆಲಾ ಮೂರ್ತಿಲೆ ಕೈತಲ್‌ ಪೋಪಿನ ರೂಢಿಡ್ ಉಪ್ಪುನೆಡ್ದ್ ತನ್ಕುಲು ತಿನ್ಪಿನೆನ್ ಮೂರ್ತಿಗ್ ನೈವೇದ್ಯ ಮಲ್ತಿನವು ಅಂದ್‌ದ್ ಎನ್ನೊಂದು ತಿನ್ಪೆರ್; ಇಂಚ ಅಕ್ಲೆ ಮನಸಾಕ್ಷಿ ಬಲದಾಂತಿನವು ಆಯಿನೆಡ್ದ್ ಅಕುಲು ಅಶುದ್ಧೆರ್ ಅಂದ್‌ದ್ ಎನ್ನುವೆರ್.</verse>
				<verse number="8">ಆಂಡ ತಿನ್ಪಿನವು ಎಂಕ್ಲೆನ್ ದೇವೆರೆ ಸನ್ನಿಧಿಗ್ ಸೇರಾವಂದ್. ತಿಂದ್‌ಜಿಡ ಎಂಕ್ಲೆಗ್ ಕಡಿಮೆ ಇಜ್ಜಿ, ತಿಂದ್‌ಂಡ ನಂಕ್ ಹೆಚ್ಚಿಗೆ ಆಪುಜಿ.</verse>
				<verse number="9">ಆಂಡಲಾ ನಿಕ್ಲೆನ ಈ ಸ್ವತಂತ್ರ ನಂಬಿಕೆಡ್ ಬಲಹೀನೆರೆಗ್ ಒಂಜಿ ವೇಳೆ ಅಡ್ಡಿ ಆವು, ಎಚ್ಚರಿಕೆ ಆದುಪ್ಪುಲೆ.</verse>
				<verse number="10">ಬುದ್ಧಿದಾಯೆ ಈ ದೇವಸ್ಥಾನೊಡು ವಣಸ್‌ಗ್ ಕುಲ್ಲುದುಪ್ಪುನಗ, ಬಲದಾಂತಿ ಮನಸ್‌ದ ಒರಿ ಸಹೋದರೆ ತೂಯೆಡ ಆಯೆಲಾ ಮೂರ್ತಿಗ್ ನೈವೇದ್ಯ ಮಲ್ತಿನ ವಸ್ತುಲೆನ್ ತಿನಿಯೆರೆ ಧೈರ್ಯ ಮಲ್ಪೆ ಅತ್ತಾ?</verse>
				<verse number="11">ಇಂಚ ನಿನ ಗೇನೊಡ್ದಾದ್ ಆ ಬಲದಾಂತಿ ಸಹೋದರೆ ಆತ್ಮೀಕ ರೀತಿಡ್ ನಾಶಾಪೆ ಅತ್ತಾ? ಆಯಗಾದ್‌ಲಾ ಕ್ರಿಸ್ತೆ ತನ ಜೀವ ಕೊರ್ತೆ ಅತ್ತಾ.</verse>
				<verse number="12">ಇಂಚ ಉಪ್ಪುನಗ ನಿನ ಸಹೋದ್ರಗ್ ವಿರೋಧಾದ್ ಪಾಪ ಮಲ್ತ್‌ದ್ ಆಯ ಬಲದಾಂತಿ ಮನಸಾಕ್ಷಿಗ್ ಬೇನೆ ಕೊರಿಯಡ ಕ್ರಿಸ್ತಗ್ ವಿರೋಧಾದ್ ಪಾಪ ಮಲ್ಪುನಾಯೆ ಆದುಪ್ಪುವ.</verse>
				<verse number="13">ಅಂಚಾದ್, ತಿನ್ಪಿನೆಟ್ ಎನ ಸಹೋದ್ರಗ್ ಅಡ್ಡಿ ಆಪಿನಾಂಡ ಯಾನ್ ಏಪೊಗ್ಲಾ ಮಾಸನೇ ತಿನಯೆ; ಯಾನ್ ಎನ ಸಹೋದ್ರಗ್ ಅಡ್ಡಿ ಆಯೆರೆ ಬಲ್ಲಿ ಅತ್ತಾ?</verse>
			</chapter>
			<chapter number="9">
				<verse number="1">ಯಾನ್ ಸ್ವತಂತ್ರೆ ಅತ್ತಾ? ಯಾನ್ ಅಪೊಸ್ತಲೆ ಅತ್ತಾ? ನಮ ಕರ್ತವೆ ಆದುಪ್ಪು ಯೇಸುನು ತೂಯಿನಾಯೆ ಅತ್ತಾ? ಯಾನ್ ಕರ್ತವ ಸೇವೆಡ್ ಮಲ್ತಿ ಬೇಲೆದ ಪ್ರತಿಫಲ ನಿಕುಲೇ ಅತ್ತಾ?</verse>
				<verse number="2">ಬೇತೆಕ್ಲೆಗ್ ಯಾನ್ ಅಪೊಸ್ತಲೆ ಅತ್ತ್‌ಡಲಾ ನಿಕ್ಲೆಗಾಂಡಲಾ ಅಪೊಸ್ತಲೆ ಆದುಲ್ಲೆ. ದಾಯೆಗಂದ್ಂಡ ಕರ್ತವಡ್ ಎನ ಅಪೊಸ್ತಲ ಕೆಲಸೊಗು ನಿಕುಲೇ ಎನ ಮುದ್ರೆ ಆದುಲ್ಲರ್.</verse>
				<verse number="3">ಎನನ್ ವಿಚಾರಣೆ ಮಲ್ಪುನಾಕುಲೆಗ್ ಉಂದೇ ಎನ ಉತ್ತರ.</verse>
				<verse number="4">ಎಂಕ್ಲೆಗ್ ಉನಿಯೆರೆ, ಪರಿಯೆರೆ ಅಧಿಕಾರ ಇಜ್ಜಾ?</verse>
				<verse number="5">ಬೊಡೆದಿನ್ ಒಟ್ಟುಗು ಲೆತ್ತೊಂದು ಪೋಯೆರೆ ಒರಿದಿನ ಅಪೊಸ್ತಲೆರೆಲೆಕ್ಕಲಾ ಕರ್ತವ ಸಹೋದ್ರೆರೆಲೆಕ್ಕಲಾ, ಕೇಫಲೆಕ್ಕಲಾ ಎಂಕ್ಲೆಗ್ ಹಕ್ಕ್ ಇಜ್ಜಾ.</verse>
				<verse number="6">ಅತ್ತ್‌ಡ, ಕೈಬೇಲೆ ಮಲ್ಪಂದೆ ಜೀವನ ಮಲ್ಪೆರೆ ಬೇತೆಕ್ಲೆಗ್ ಹಕ್ಕ್ ಇತ್ತಿಲೆಕ್ಕನೆ, ಎಂಕ್‌ಲಾ ಬಾರ್ನಬಗ್ಲಾ ಹಕ್ಕ್ ಇಜ್ಜಾ?</verse>
				<verse number="7">ಯುದ್ಧೊಗು ಏರಾಂಡಲಾ ತನ ಸ್ವಂತ ಖರ್ಚಿಡ್ ಪೋಪೆನಾ? ದ್ರಾಕ್ಷೆತೋಟ ಮಲ್ತಿನಾಯೆ ಐತ ಫಲೊನು ತಿನಂದೆ ಉಪ್ಪುನವು ಉಂಡಾ? ಕೈಕಂಜಿ ತಾಂಕಿನಾಯೆ ಐತ ಪೇರ್‌ದ ವಸ್ತುಲೆಡ್ ಜೀವನ ಮಲ್ಪಂದೆ ಉಪ್ಪೆನಾ?</verse>
				<verse number="8">ಯಾನ್ ಪಂಡಿನವು ಲೋಕರೂಢಿದ ಪಾತೆರ ಆದುಂಡಾ? ನ್ಯಾಯಕಟ್ಟ್‌ಲೆಡ್ಲಾ ಉಂದೆನೇ ಪನ್ಪುಂಡತ್ತಾ?</verse>
				<verse number="9">“ಕೆಯಿ ದೊಂಕುನ ಬೋರಿದ ಬಾಯಿನ್ ಕಟ್ಟಿಯೆರೆ ಬಲ್ಲಿ,” ಅಂದ್‌ದ್ ಮೋಶೆನ ನ್ಯಾಯಕಟ್ಟ್‌ಡ್ ಬರೆತ್ಂಡ್. ದೇವೆರ್ ಬೋರಿಲೆಗಾದ್ ಚಿಂತೆ ಮಲ್ಪುವೆನಾ? ಅತ್ತ್‌ಡ, ನಂಕಾದ್ ಪನ್ಪೆನಾ?</verse>
				<verse number="10">ಅಂದ್, ಕಂಡಿತಾದ್ ನಂಕಾದ್ ಬರೆತ್ಂಡ್. ದಪ್ಪುನಾಯೆ ತನ್ಕ್ ಪಾಲ್ ತಿಕ್ಕುಂಡು ಅಂದ್‌ದ್ ಭರವಸೊಡು ದಪ್ಪುವೆ. ಒಕ್ಕುನಾಯೆ ತನ್ಕ್ ಪಾಲ್ ತಿಕ್ಕುಂಡು ಪಂಡ್ದೇ ಭರವಸೊಡು ಒಕ್ಕುವೆ.</verse>
				<verse number="11">ಎಂಕುಲು ನಿಕ್ಲೆಗಾದ್ ಆತ್ಮಸಮ್ಮಂಧವಾಯಿನ ಬಿತ್ತ್‌ನ್ ಬಿತ್ತಿ ಬೊಕ್ಕ ನಿಕ್ಲೆಡ್ದ್ ಲೋಕಸಮ್ಮಂಧವಾಯಿನೆನ್ ಎಂಕುಲು ಕೊಯ್ಪಿನವು ಮಲ್ಲೆನಾ?</verse>
				<verse number="12">ಈ ಹಕ್ಕ್ ಬೇತೆಕ್ಲೆಗ್ ನಿಕ್ಲೆ ಮಿತ್ತ್ ಉಪ್ಪುನಾಂಡ, ಎಂಕ್‌ಲಾ ಬಾರ್ನಬಗ್ಲಾ ಏತೋ ಹೆಚ್ಚ್ ಉಪ್ಪೊಡತ್ತಾ. ಆಂಡಲಾ ಎಂಕುಲು ಈ ಹಕ್ಕ್‌ನ್ ತೋಜಾವಂದೆ ಕ್ರಿಸ್ತನ ಸುವಾರ್ತೆಗ್ ತಡೆ ಆಯೆರೆ ಬಲ್ಲಿ ಅಂದ್‌ದ್ ಮಾತೆನ್ ಸಹಿಸೊಂಡ.</verse>
				<verse number="13">ದೇವಾಲಯದ ಚಾಕ್ರಿದಾಕುಲು ದೇವಾಲಯದ ಸಂಪೊತ್ತುಡೇ ಬದುಕುವೆರ್ ಅಂದ್‌ದ್ ಬಲಿಪೀಠದ ಸೇವೆಡುಪ್ಪುನಾಕುಲು ಆ ಬಲಿಪೀಠಗ್ ಬರ್ಪಿನೆಟ್ಟ್ ಪಾಲ್‌ದಾರೆರ್ ಆದುಲ್ಲೆರ್ ಪಂಡ್ದ್‌ಲಾ ನಿಕ್ಲೆಗ್ ಗೊತ್ತಿಜ್ಜಾ?</verse>
				<verse number="14">ಅಂಚೆನೇ ಸುವಾರ್ತೆ ಸಾರಿಯುನಾಕುಲು ಸುವಾರ್ತೆಡೇ ಜೀವನ ಮಲ್ಪೊಡಂದ್‌ದ್ ಕರ್ತವೆ ಅಪ್ಪಣೆ ಕೊರ್ತೆ.</verse>
				<verse number="15">ಯಾನ್, ಈ ಹಕ್ಕ್‌ಲೆಡ್ ಒಂಜೆನ್ಲಾ ತೋಜಪಾದಿಜಿ; ಎನ ವಿಷಯೊಡ್ಲಾ ಇಂಚೆನೇ ಎಂಕ್ ತಿಕ್ಕೊಡು ಅಂದ್‌ದ್ ಈ ಸಂಗತಿಲೆನ್ ಬರೆತಿಜಿ. ಅವೆಡ್ದ್ ಸೈಪಿನವೇ ಎಂಕ್ ಎಡ್ಡೆ. ಪುಗರೊನಿಯೆರೆಗ್ ಎಂಕುಪ್ಪುನ ಈ ಅವಕಾಶೊನು ಏರ್ಲಾ ದೆತ್ತ್ ಪಾಡಿಯೆರೆ ಬಲ್ಲಿ.</verse>
				<verse number="16">ಯಾನ್ ಸುವಾರ್ತೆ ಸಾರಿಯೆಡಲಾ ಪುಗರೊನಿಯೆರೆ ಎಂಕ್ ಅವಕಾಶನೇ ಇಜ್ಜಿ. ಸಾರಿಯೊಡೇ ಅಂದ್‌ದ್ ಎಂಕ್ ಒತ್ತಾಯ ಉಂಡು. ಯಾನ್ ಸಾರಿಯಂದೆ ಇತ್ತ್ಂಡ ಎನ ಗತಿನ್ ದಾನೆ ಪನೊಲಿ?</verse>
				<verse number="17">ಉಂದೆನ್ ಯಾನ್ ಮನಸ್ ಕೊರ್ದು ಮಲ್ಪುವೆಡ ಎಂಕ್ ಉಡಿಗೆರೆ ತಿಕ್ಕುಂಡು; ಬೊಕ್ಕೊರಿಯನ ಇಷ್ಟದಂಚ ಮಲ್ತ್ಂಡ ಜವಾಬ್ದಾರಿಕೆ ಎಂಕ್ ಕೊರ್ತಿನವು ಆದುಂಡು.</verse>
				<verse number="18">ಅಪಗ ಎಂಕ್ ತಿಕ್ಕು ಉಡಿಗೆರೆ ಎಂಚಿನವು? ಯಾನ್ ಸುವಾರ್ತೆ ಸಾರಿನಗ ಐಡ್ದ್ ಜೀವನ ಮಲ್ಪುನ ಹಕ್ಕ್‌ನ್ ಉಪಯೋಗ ಮಲ್ಪಂದೆ ಎಡ್ಡೆ ರೀತಿಡ್ ಸುವಾರ್ತೆ ಸಾರಿಯುನನೇ ಎನ ಪ್ರತಿಫಲ.</verse>
				<verse number="19">ಯಾನ್ ಮಾತ ಸಂಗತಿಡ್ ಸ್ವತಂತ್ರೆ ಆದಿತ್ತ್‌ಂಡಲಾ ಹೆಚ್ಚಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಎನನ್ ಯಾನ್ ಮಾತೆರೆಗ್ಲಾ ಗುಲಾಮೆ ಆದ್ ಮಲ್ತೊಂಡೆ.</verse>
				<verse number="20">ಯೆಹೂದ್ಯೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯೆಹೂದ್ಯೆರೆಗ್ ಯಾನ್ ಒರಿ ಯೆಹೂದ್ಯೆ ಆಯೆ. ಯಾನ್ ಮೋಶೆನ ನ್ಯಾಯಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಯೆ ಅತ್ತ್‌ಡಲಾ ಕಟ್ಟ್‌ಲೆಗ್ ಅಡಿಯಾಳ್ ಆಯಿನಾಕುಲೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ಲಾ ಕಟ್ಟ್‌ಲೆಗ್ ಅಡಿಯಾಳ್ ಆತಿನಾಯೆ ಆಯೆ.</verse>
				<verse number="21">ಯಾನ್ ದೇವೆರೆ ನ್ಯಾಯಕಟ್ಟ್‌ದಾಂತಿನಾಯೆ ಅತ್ತ್, ಕ್ರಿಸ್ತನ ಕಟ್ಟ್‌ಗ್ ಅಡಿಯಾಳ್ ಆತಿನಾಯೆನೇ; ಆಂಡಲಾ ಮೋಶೆನ ಕಟ್ಟ್‌ದಾಂತಿನಾಕುಲೆನ್ ರಕ್ಷಣೆದ ಮಾರ್ಗೊಗು ನಡಪಾಯೆರೆಗಾದ್ರ ಯಾನ್ ಅಕ್ಲೆಗ್ ಕಟ್ಟ್‌ದಾಂತಿನಾಯಲೆಕ್ಕನೆ ಆಯೆ</verse>
				<verse number="22">ಬಲಹೀನೆರೆನ್ ರಕ್ಷಣೆಗ್ ನಡಪಾಯೆರೆಗಾದ್ರ ಯಾನ್ ಬಲಹೀನೆ ಆಯೆ. ಎಂಚಾಂಡಲಾ ಕೆಲೆವೆರೆನ್ ರಕ್ಷಣೆ ಮಲ್ಪೆರೆ ಮಾತೆರೆಗ್ ಮಾತಲಾ ಆಯೆ.</verse>
				<verse number="23">ಯಾನ್ ಬೇತೆಕ್ಲೆ ಒಟ್ಟುಗು ಸುವಾರ್ತೆದ ಫಲೊಟು ಪಾಲ್‌ದಾರೆ ಆಯೆರೆ ಬೋಡಾದ್ ಉಂದೆನ್ ಮಾತ ಸುವಾರ್ತೆಗಾದೇ ಮಲ್ಪುವೆ.</verse>
				<verse number="24">ಓಟದ ರಂಗಸ್ಥಳೊಟು ಬಲ್ಪುನಾಕುಲು ಮಾತೆರ್ಲಾ ಪಾರಿಯೆರ್ಡಲಾ ಒರಿಯಗ್ ಮಾತ್ರ ಇನಾಮು ತಿಕ್ಕುಂಡು ಅಂದ್‌ದ್ ಗೊತ್ತಿಜ್ಜಾ? ನಿಕುಲುಲಾ ಇನಾಮು ತಿಕ್ಕೆರೆಗಾದ್ರನೇ ಪಾರ್‌ಲೆ.</verse>
				<verse number="25">ಐಟ್ಟ್ ಪೊರ್‌ಂಬುನಾಕುಲು ಮಾತ ಸಂಗತಿಡ್ಲಾ ಮಿತಿಟ್ ಉಪ್ಪುವೆರ್. ಅಕುಲು ನಾಶಾದ್ ಪೋಪಿ ಜಯಮಾಲೆನ್ ಪಡೆಯೆರೆಗಾದ್ರ ಪೊರ್‌ಂಬುವೆರ್. ನಮ ಆಂಡಲಾ ನಾಶಾವಂದಿನ ಜಯಮಾಲೆಗಾದ್ರ ಪೊರ್ಂಬುನಾಕುಲಾದುಲ್ಲ.</verse>
				<verse number="26">ಅಂಚಾಯಿನೆಡ್ದ್ ಯಾನ್ಲಾ ಗೊತ್ತುಗುರಿದಾಂತಿನಾಯಲೆಕ್ಕ ಪಾರುಜಿ; ಯಾನ್ ಗಾಳಿಗ್ ಗುದ್ದುನಾಯೆ ಆದುಪ್ಪಂದೆ ಗೆಂದೊಡಂದ್ದೇ ಗುದ್ದುವೆ.</verse>
				<verse number="27">ಬೇತೆಕ್ಲೆಗ್ ಸುವಾರ್ತೆನ್ ಪ್ರಚಾರ ಮಲ್ತ್‌ದ್ ಯಾನೇ ಯೋಗ್ಯದಾಂತಿನಾಯೆ ಆದ್ ತೋಜಿದ್ ಬರ್ಪೆನಾ ಇನ್ಪಿ ಪೋಡಿಗೆಡ್ ಎನ ಶರೀರೊನು ಪೊಡಿಮಲ್ತ್‌ದ್ ಎನ ವಶೊಕ್ಕು ಮಲ್ತೊನ್ವೆ.</verse>
			</chapter>
			<chapter number="10">
				<verse number="1">ಆಂಡ ಸಹೋದ್ರೆರೇ, ನಮ ಪೂರ್ವಿಕೆರೆ ಸಂಗತಿಡ್ ಯಾನ್ ತೆರಿಪಾವೆರೆ ಬಯಕುವೆ ಅವು ದಾನೆಂದ್ಂಡ, ದೇವೆರ್ ಅಕ್ಲೆನ್ ಮಾತೆರೆನ್ಲಾ ಮುಗಲ್‌ದ ನಿರೆಲ್‌ಡ್ ಕಾತ್‌ದ್ ಕೆಂಪು ಕಡಲ್‌ನ್ ದಾಂಟುಲೆಕ್ಕ ಮಲ್ತೆ.</verse>
				<verse number="2">ಅಕುಲು ಮಾತೆರ್ಲಾ ಮುಗಲ್‌ಡ್ಲಾ ಕಡಲ್‌ಡ್ಲಾ ದೀಕ್ಷಾಸ್ನಾನ ಪಡೆದ್ ಮೋಶೆನ ಶಿಷ್ಯೆರ್ ಆಯೆರ್;</verse>
				<verse number="3">ಅಕುಲು ಮಾತೆರ್ಲಾ ಒಂಜೇ ಆತ್ಮಭಾವದ ತಿನಸ್ ತಿಂದೆರ್.</verse>
				<verse number="4">ಬೊಕ್ಕ ಆತ್ಮಭಾವದ ಒಂಜೇ ನೀರ್‌ನ್ ಪರಿಯೆರ್; ಎಂಚ ಪಂಡ ತನ್ಕುಲೆ ಬೆರಿಯೆ ಬರೊಂದಿತ್ತಿನ ಆತ್ಮಭಾವದ ಪಾದೆದ ಉಲಯಿಡ್ದ್ ಬೈದಿನ ನೀರ್‌ನ್ ಪರಿಯೆರ್; ಆ ಪಾದೆ ಕ್ರಿಸ್ತೆನೇ.</verse>
				<verse number="5">ಆಂಡಲಾ ಅಕ್ಲೆಡ್ ಮಸ್ತ್ ಜನೊಕುಲೆ ಸಂಗತಿಡ್ ದೇವೆರ್ ಮೆಚ್ಚಿಜೆ. ಅಕುಲು ಕಾಡ್‌ಡ್ ಸೈತ್ ಪೋಯೆರ್.</verse>
				<verse number="6">ಅಕುಲು ಹಾಳ್ ವಿಷಯೊಲೆನ್ ಆಸೆ ಮಲ್ತಿಲೆಕ್ಕ ಎಂಕುಲು ಆಸೆ ಮಲ್ಪೆರೆ ಬಲ್ಲಿ ಪನ್ಪಿನೆಕ್ಕ್ ಈ ಸಂಗತಿಲು ನಂಕ್ ಮಾದ್ರಿ ಆದುಂಡು.</verse>
				<verse number="7">ಅಕ್ಲೆಡ್ ಕೆಲೆವೆರ್ ಮೂರ್ತಿಪೂಜೆಕೆರ್ ಆದಿತ್ತೆರ್; “ಜನೊಕುಲು ಉನಿಯೆರೆಲಾ ಪರಿಯೆರೆಲಾ ಕುಲ್ಲೊಂಡೆರ್, ನಲಿಪೆರೆ ಲಕ್ಕೊಂಡೆರ್,” ಅಂದ್‌ದ್ ಬರೆತ್ಂಡತ್ತಾ; ನಿಕುಲು ಮೂರ್ತಿಪೂಜೆಕೆರ್ ಆವಡೆ.</verse>
				<verse number="8">ಅಕ್ಲೆಡ್ ಕೆಲೆವೆರ್ ಹಾದ್ರ ಮಲ್ತ್‌ದ್ ಒಂಜೇ ದಿನೊಟು ಇರ್ವತ್ತ ಮೂಜಿ ಸಾರ ಜನ ಸೈತೆರ್; ಎಂಕುಲು ಹಾದ್ರೊಗು ದೂರ ಆದುಪ್ಪುಗ.</verse>
				<verse number="9">ಅಕ್ಲೆಡ್ ಕೆಲೆವೆರ್ ಕರ್ತವನ್ ಪರೀಕ್ಷೆ ಮಲ್ತ್‌ದ್ ಸರ್ಪ ತುಚ್ಚಿದ್ ನಾಶ ಆಯಿ ಲೆಕ್ಕ. ನಮ ಕರ್ತವನ್ ಪರೀಕ್ಷೆ ಮಲ್ಪಂದೆ ಉಪ್ಪುಗ.</verse>
				<verse number="10">ಕೆಲೆವೆರ್ ಗುಣುಗುಟ್ಟುದು ಹಾಳ್ ಮಲ್ಪುನ ದೂತನ ಕೈಡ್ದ್ ನಾಶ ಆಯೆರ್. ನಿಕುಲು ಗುಣುಗುಟ್ಟಡೆ.</verse>
				<verse number="11">ಉಂದು ಮಾತ ಅಕ್ಲೆಗ್ ಉದಾರಣೆಗಾದ್ ಉಂಡಾಂಡ್; ಯುಗದ ಅಂತ್ಯೊಡುಪ್ಪು ನಂಕ್ ಎಚ್ಚರಿಕೆಗಾದ್ ಬರೆತ್ಂಡ್.</verse>
				<verse number="12">ಅಂಚಾಯಿನೆಡ್ದ್ ನಂಬಿಕೆಡ್ ಉಂತುದೆ ಅಂದ್‌ದ್ ಎನ್ನುನಾಯೆ ಪಾಪೊಡು ಬೂರಂದಿಲೆಕ್ಕ ತೂವೊನಡ್.</verse>
				<verse number="13">ನರಮಾನಿ ತಾಳೊನೊಲಿ ಪನ್ಪಿನ ಶೋಧನೆ ಅತ್ತಂದೆ ಬೇತೆ ಒವ್ವುಲಾ ನಿಕ್ಲೆಗ್ ಉಂಡಾತಿಜಿ. ದೇವೆರ್ ನಂಬಿಗಸ್ತೆ; ನಿಕ್ಲೆ ಶಕ್ತಿಗ್ ಮೀರುನ ಶೋಧನೆ ಕೊರಂದೆ ನಿಕುಲು ಅವೆನ್ ತಾಳೊನಿಯೆರೆ ಶಕ್ತೆರಾಪಿಲೆಕ್ಕ ಶೋಧನೆ ಆಪಿನಪಗನೆ ತಪ್ಪಾವೊನುನ ಸಾದಿನ್ಲಾ ಮಲ್ಪುವೆ.</verse>
				<verse number="14">ಅಂಚಾದ್ ಪ್ರೀತಿದ ಸಹೋದ್ರೆರೇ, ಮೂರ್ತಿಪೂಜೆ ಮಲ್ಪುನೆನ್ ಪೂರ ಬುಡ್ದು ಬುಡ್ಲೆ.</verse>
				<verse number="15">ನಿಕುಲು ಬುದ್ಧಿವಂತೆರಂದ್‌ದ್ ಉಂದೆನ್ ಯಾನ್ ಪನ್ಪೆ: ನಿಕುಲೇ ನಿರ್ಧಾರ ಮಲ್ಪುಲೆ.</verse>
				<verse number="16">ನಮ ದೇವೆರೆನ್ ಸುಗಿತ್‌ದ್, ದೆತ್ತೊನುನ ಪಾತ್ರೆ ಕ್ರಿಸ್ತನ ನೆತ್ತೆರ್‌ಡ್ ಪಾಲ್‌ದಾರೆರಾದುಲ್ಲಾ ಪನ್ಪಿನೆನ್ ತೋಜಾವುಂಡತ್ತಾ? ನಮ ಪೊಲ್ತುದು ದೆತ್ತೊನುನ ರೊಟ್ಟಿ ಕ್ರಿಸ್ತನ ಶರೀರೊಡು ಪಾಲ್‌ದಾರೆರ್ ಆದುಲ್ಲಾ ಪನ್ಪಿನೆನ್ಲಾ ತೋಜಾವುಂಡತ್ತಾ?</verse>
				<verse number="17">ರೊಟ್ಟಿ ಒಂಜೇ ಆದುಪ್ಪುನೆಡ್ದ್ ಮಸ್ತ್ ಜನ ಆದುಪ್ಪು ನಮ ಒಂಜೇ ಶರೀರದ ಲೆಕ್ಕ ಉಲ್ಲ. ದಾಯೆಗಂದ್ಂಡ ಒಂಜೇ ರೊಟ್ಟಿಡ್ ನಮ ಮಾತೆರ್ಲಾ ಪಾಲ್ ದೆತ್ತೊಂದು ತಿನ್ಪ.</verse>
				<verse number="18">ಇಸ್ರಾಯೇಲ್ಯೆರ್ ಆದುಪ್ಪುನಾಕುಲೆನ್ ಎನ್ನೊನ್ಲೆ, ಬಲಿ ಕಡ್ತಿನೆನ್ ತಿನ್ಪಿನಾಕುಲು ಬಲಿಪೀಠಗ್ ಸೇರ್ದಿನಕುಲತ್ತಾ?</verse>
				<verse number="19">ಅಂಚಾಂಡ ಯಾನ್ ದಾನೆ ಪಂಡೆ? ಮೂರ್ತಿ ಆವಡ್, ಮೂರ್ತಿಗ್ ಕಡ್ತಿನವು ಆವಡ್ ದಾಲಾಂಡಲಾ ಬಿಲೆ ಉಂಡಾ?</verse>
				<verse number="20">ಆಂಡ ಪಿದಯಿದ ಜನೊಕುಲು ತನ್ಕುಲು ಅರ್ಪಣೆ ಮಲ್ತಿ ಬಲಿಕ್ಲೆನ್ ದೇವೆರೆಗ್ ಅತ್ತ್, ದೆವ್ವೊಲೆಗ್ ಅರ್ಪಣೆ ಮಲ್ಪುವೆರ್ ಅಂದ್‌ದ್ ಎನ ಅಂದಾಜಿ. ನಿಕುಲು ದೆವ್ವೊಲೊಟ್ಟುಗು ಸಂಸರ್ಗ ಮಲ್ಪೊಡು ಅಂದ್‌ದ್ ಎನ ಇಷ್ಟ ಅತ್ತ್.</verse>
				<verse number="21">ನಿಕುಲು ಕರ್ತವ ಪಾತ್ರೆಡ್ಲಾ ದೆವ್ವೊಲೆ ಪಾತ್ರೆಡ್ಲಾ ಪರಿಯೆರೆ ಬಲ್ಲಿ. ಕರ್ತವ ಮೇಜಿಡ್ಲಾ ದೆವ್ವೊಲೆ ಮೇಜಿಡ್ಲಾ ಉನಿಯೆರೆ ಬಲ್ಲಿ.</verse>
				<verse number="22">ನಮ ಕರ್ತವಗ್ ಉರಿ ಲಕ್ಕಾವೊಡಂದ್ ಉಲ್ಲನಾ? ಆಯಡ್ದ್‌ಲಾ ನಮ ಬಲತ್ತಾಕುಲಾ?</verse>
				<verse number="23">“ಮಾತ ಕೆಲಸೊನ್ಲಾ ಮಲ್ಪೆರೆ ಸ್ವತಂತ್ರ ಉಂಡು,” ನಿಕುಲು ಪನ್ಪರ್. ಆಂಡ ಯಾನ್ ಪನ್ಪಿನಿ, “ಮಾತಲಾ ಕೆಲಸೊಗು ಬರ್ಪುಜಿ. ಮಾತೆಕ್ ಎಂಕ್ ಸ್ವತಂತ್ರ ಉಂಡು,” ಆಂಡ ಮಾತಲಾ ಅಭಿವೃದ್ಧಿದವು ಅತ್ತ್.</verse>
				<verse number="24">ಪ್ರತಿ ಒರಿಲಾ ತನ ಸ್ವಂತ ಎಡ್ಡೆನ್ ತೂವೊನಂದೆ ನನೊರಿಯನ ಎಡ್ಡೆನ್ ಬಯಕಡ್.</verse>
				<verse number="25">ಪೇಂಟೆಡ್ ಮಾರುನವು ಮಾತೆನ್ಲಾ ಮನಸಾಕ್ಷಿಡ್ ದಾಲಾ ಸಂಶಯ ಮಲ್ಪಂದೆ ತಿನ್ಲೆ.</verse>
				<verse number="26">“ಭೂಮಿಲಾ ಐಟ್ಟ್ ಉಪ್ಪುನವು ಮಾತಲಾ ಕರ್ತವನವೇ ಆದುಂಡತ್ತಾ.”</verse>
				<verse number="27">ನಂಬಿಕೆದಾಂತಿನಾಯೆ ಒರಿ ನಿಕ್ಲೆನ್ ವಣಸ್‌ಗ್ ಲೆಪ್ಪುನಗ, ನಿಕ್ಲೆಗ್ ಪೋಯೆರೆ ಇಷ್ಟ ಇತ್ತ್ಂಡ, ನಿಕ್ಲೆಗ್ ಎಂಚಿನ ಬಲಸಿರ್ಯೆಡಲಾ ಮನಸ್‌ಡ್ ಸಂಶಯ ಮಲ್ಪಂದೆ ತಿನ್ಲೆ.</verse>
				<verse number="28">ಆಂಡ ಏರಾಂಡಲಾ ನಿಕ್ಲೆಡ, “ಉಂದು ಮೂರ್ತಿಗ್ ಅರ್ಪಣೆ ಮಲ್ತ್‌ದಿನವು,” ಅಂದ್‌ದ್ ಪಂಡೆಡ ಅವೆನ್ ತಿನೊಡ್ಚಿ. ತೆರಿಪಾಯಿನಾಯಗ್ಲಾ ಆಯನ ಮನಸಾಕ್ಷಿಗಾದ್ರಲಾ ತಿನೊಡ್ಚಿ.</verse>
				<verse number="29">ಅವು ನಿನ ಮನಸಾಕ್ಷಿಗ್ ಅತ್ತ್, “ಬೊಕ್ಕೊರಿಯನ ಮನಸಾಕ್ಷಿಗ್ಲಾ ಎನ ಸ್ವತಂತ್ರೊಗ್ಲಾ ದಾಯೆ ತೀರ್ಪಾವೊಡು?</verse>
				<verse number="30">ಯಾನ್ ಉಪಕಾರ ಪಂಡ್‌ದ್ ಉಂಡಿಬೊಕ್ಕ, ಉಪಕಾರ ಸ್ತುತಿ ಮಲ್ತ್‌ದ್ ತಿನ್ಪಿನ ತಿನಸ್‌ಗಾದ್ ಎಂಕ್ ದಾಯೆಗ್ ದೂಷಣೆ ಆವೊಡು?”</verse>
				<verse number="31">ಅಂಚಾದ್ ನಿಕುಲು ತಿಂದ್‌ಂಡಲಾ ಪರ್‌ಂಡಲಾ ದಾನೆ ಮಲ್ತ್ಂಡಲಾ ಮಾತೆನ್ಲಾ ದೇವೆರೆ ಮೈಮೆಗ್ ಮಲ್ಪುಲೆ.</verse>
				<verse number="32">ಯೆಹೂದ್ಯೆರೆಗಾವಡ್, ಗ್ರೀಕೆರೆಗಾವಡ್, ದೇವೆರೆ ಸಭೆಕಾವಡ್ ಅಡ್ಡಿ ಆದುಪ್ಪಡೆ.</verse>
				<verse number="33">ಯಾನಾಂಡಲಾ ಎನ ಸ್ವಂತ ಪ್ರಯೋಜನೊಗು ಚಿಂತೆ ಮಲ್ಪಂದೆ ಮಾತ ನರಮಾನಿಲೆಗ್ ರಕ್ಷಣೆ ತಿಕ್ಕೊಡು ಅಂದ್‌ದ್ ಅಕ್ಲೆ ಎಡ್ಡೆಗಾದ್ರ ಚಿಂತೆ ಮಲ್ತ್‌ದ್ ಮಾತೆರೆನ್ ಮಾತ ವಿಷಯೊಲೆಡ್ ಮೆಚ್ಚಾವುನಾಯೆ ಆದುಲ್ಲೆ.</verse>
			</chapter>
			<chapter number="11">
				<verse number="1">ಯಾನ್ ಕ್ರಿಸ್ತನ್ ತೂದು ನಡಪುಲೆಕ್ಕನೇ ನಿಕುಲು ಎನನ್ ತೂದು ನಡಪುಲೆ.</verse>
				<verse number="2">ನಿಕುಲು ಮಾತೆಟ್ಲಾ ಎನನ್ ಎನ್ನೊಂದು ಯಾನ್ ನಿಕ್ಲೆಗ್ ತೆರಿಪಾಯಿನ ನಿಯಮೊಲೆನ್ ಕೈಕೊನುನೆಡ್ದ್ ನಿಕ್ಲೆನ್ ಪುಗುರುವೆ.</verse>
				<verse number="3">ಆಂಡಲಾ ಒಂಜಿ ಸಂಗತಿನ್ ನಿಕುಲು ತೆರಿಯೊನೊಡು ಅಂದ್‌ದ್ ಎನ ಆಸೆ; ಅವು ದಾನೆ ಪಂಡ ಪ್ರತಿ ನರಮಾನಿಗ್ ಕ್ರಿಸ್ತೆ ತರೆ, ಪೊಂಜೊವುಗು ಅಂಜೊವೇ ತರೆ, ಕ್ರಿಸ್ತಗ್ ದೇವೆರೇ ತರೆ ಆದುಲ್ಲೆ.</verse>
				<verse number="4">ತರೆ ಮುಚ್ಚೊಂದು ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಅಂಜೊವು ತನ ತರೆ ಆದುಪ್ಪು ಕ್ರಿಸ್ತಗ್ ಅವಮಾನ ಮಲ್ಪುನಾಯೆ ಆದುಲ್ಲೆ.</verse>
				<verse number="5">ತರೆ ಮುಚ್ಚೊನಂದೆ ಪ್ರಾರ್ಥನೆ ಇಜ್ಜಿಡ ಪ್ರವಾದನೆ ಮಲ್ಪುನ ಪೊಂಜೊವು ತನ ತರೆ ಆದುಪ್ಪು ಅಂಜೊವುಗು ಅವಮಾನ ಮಲ್ಪುವಲ್. ಪೊಂಜೊವು ತರೆ ಮುಚ್ಚೊನಂದೆ ಉಪ್ಪುನವು ತರೆ ಬೋರು ಮಲ್ತೊನವುಲಾ ಒಂಜೇ ಆದುಂಡು.</verse>
				<verse number="6">ಆಲೆಗ್ ತರೆ ಮುಚ್ಚೊನಿಯೆರೆ ಆಪುಜಿಡ ಕುಜಲ್ ಕತ್ತೆರಡ್. ಆಂಡ ಕುಜಲ್ ಕತ್ತೆರುನವು ಇಜ್ಜಿಡ ಬೋರು ಮಲ್ತೊನವು ಆಲೆಗ್ ನಾಚಿಗೆದ ವಿಚಾರ ಆದುಪ್ಪುನಾಂಡ ತರೆ ಮುಚ್ಚೊನಡ್.</verse>
				<verse number="7">ಅಂಜೊವು ದೇವೆರೆ ಪ್ರತಿರೂಪಲಾ ಮೈಮೆಲಾ ಆದುಪ್ಪುನೆಡ್ದ್ ತನ ತರೆನ್ ಮುಚ್ಚೊನಿಯೆರೆ ಬಲ್ಲಿ; ಆಂಡ ಪೊಂಜೊವು ಅಂಜೊವುನ ಮೈಮೆ ಆದುಲ್ಲಲ್.</verse>
				<verse number="8">ಸುರುತ್ತ ಅಂಜೊವು ಪೊಂಜೊವುಡ್ದು ಉಂಡಾಯಿನಿ ಅತ್ತ್; ಪೊಂಜೊವು ಅಂಜೊವುಡ್ದು ಉಂಡಾಯಿನಿ.</verse>
				<verse number="9">ಬೊಕ್ಕ ಅಂಜೊವು ಪೊಂಜೊವುಗಾದ್ ಉಂಡಾಯಿನಿ ಅತ್ತ್; ಪೊಂಜೊವುನು ಅಂಜೊವುಗಾದ್ ಉಂಡು ಮಲ್ತ್‌ದಿನಿ.</verse>
				<verse number="10">ಅಂಚಾಯಿನೆಡ್ದ್ ದೂತೆರೆಗಾದ್ ಪೊಂಜೊವು ಅಂಜೊವುನ ಅಧಿಕಾರೊಗು ಒಳಗಾದುಪ್ಪು ಗುರ್ತಗಾದ್ ತನ ತರೆ ಮುಚ್ಚೊನಡ್.</verse>
				<verse number="11">ಆಂಡಲಾ ಕರ್ತವಡ್ ಅಂಜೊವು ಪೊಂಜೊವುದಾಂತೆ ಇಜ್ಜಿಡ ಪೊಂಜೊವು ಅಂಜೊವುದಾಂತೆ ಪರಿಪೂರ್ಣ ಆಪುಜೆರ್.</verse>
				<verse number="12">ಪೊಂಜೊವು ಅಂಜೊವುಡ್ದ್ ಉಂಡಾಯಲ್; ಅಂಚೆನೇ ಅಂಜೊವು ಪೊಂಜೊವುಡ್ದಾದ್ ಪುಟ್ಟುವೆ; ಮಾತೆಕ್ಕ್‌ಲಾ ದೇವೆರೇ ಮೂಲ ಆದುಲ್ಲೆ.</verse>
				<verse number="13">ನಿಕ್ಲೆ ಉಲಯಿ ನಿಕುಲೇ ನಿರ್ಧಾರ ಮಲ್ತೊನ್ಲೆ, ಪೊಂಜೊವು ತರೆ ಮುಚ್ಚೊನಂದೆ ದೇವೆರೆಗ್ ಪ್ರಾರ್ಥನೆ ಮಲ್ಪುನವು ಸರಿಯಾ?</verse>
				<verse number="14">ಅಂಜೊವು ಉದ್ಧ ಕುಜಲ್ ಬುಡಿಯೆಡ ಅವು ಆಯಗ್ ಅವಮಾನ ಆದುಂಡು;</verse>
				<verse number="15">ಆಂಡ ಪೊಂಜೊವುಗು ಉದ್ಧ ಕುಜಲ್ ಇತ್ತ್ಂಡ ಅವು ಆಲೆಗ್ ಮಾನದ ಸಂಗತಿ; ಕುಜಲ್ ಆಲೆಗ್ ಕೊಟ್ಟುದ ಬದಲಾದ್ ಕೊರ್ತಿನವು.</verse>
				<verse number="16">ಒರಿ ಈ ಸಂಗತಿಡ್ ತರ್ಕ ಮಲ್ಪುವೆಡ ಇಂಚಿತ್ತಿ ಕ್ರಮೊಕುಲು ಎಂಕ್ಲೆಡ್ ಇಜ್ಜಿ, ಬೊಕ್ಕ ದೇವೆರೆ ಸಭೆಕ್ಲೆಡ್ಲಾ ಇಜ್ಜಿ ಅಂದ್‌ದ್ ತೆರಿಯೊನಡ್.</verse>
				<verse number="17">ಯಾನ್ ಇಂಚ ನಿಕ್ಲೆಗ್ ಅಪ್ಪಣೆ ಮಲ್ಪುನೆಟ್ಟ್ ನಿಕ್ಲೆನ್ ಪುಗರುಜಿ; ದಾಯೆಗಂದ್ಂಡ ನಿಕುಲು ಸೇರ್ದ್ ಬರ್ಪಿನೆಟ್ಟ್ ಹಾಳ್ ಆಪಿನತ್ತಂದೆ ಎಡ್ಡೆ ಆಪುಜಿ.</verse>
				<verse number="18">ಸುರುತ್ತವು ದಾನೆ ಪಂಡ ಸಭೆ ಆದ್ ಸೇರ್ದ್ ಬನ್ನಗ ನಿಕ್ಲೆಡ್ ಪಂಗಡೊಲು ಉಂಡಾಪುಂಡು ಅಂದ್‌ದ್ ಕೇಂಡ್ದೆ; ಬೊಕ್ಕ ಉಂದು ಒಂತೆ ಮಟ್ಟ್‌ಗ್ ಅಂದ್, ಅಂದ್‌ದ್ ನಂಬುವೆ.</verse>
				<verse number="19">ನಿಕ್ಲೆಡ್ ಯೋಗ್ಯೆರ್ ಏರ್ ಅಂದ್‌ದ್ ತೆರಿದ್ ಬರ್ಪಿನೆಕ್ಕಾದ್ ನಿಕ್ಲೆ ಉಲಯಿ ಪಂಗಡೊಲು ಉಪ್ಪುನವು ಅವಶ್ಯನೇ.</verse>
				<verse number="20">ಆಂಡ ನಿಕುಲು ಮಾತ ಸೇರ್ದ್ ಬನ್ನಗ, ನಿಕುಲು ಉನ್ಪಿನ ಕರ್ತವ ಭೋಜನ ಅತ್ತ್.</verse>
				<verse number="21">ವಣಸ್ ಮಲ್ಪುನಗ ಪ್ರತಿಯೊರಿಲಾ ತಾನ್ ಕನಯಿದಿನೆನ್ ನನೊರಿಯಡ್ದ್ ದುಂಬೇ ತಿನ್ಪೆ. ಇಂಚ ಒರಿ ಬಡವುಡುಪ್ಪುವೆ; ಒರಿ ಪರ್ದ್ ಅಮಲ್‌ಡುಪ್ಪುವೆ.</verse>
				<verse number="22">ದಾನೆ, ತಿನಿಯೆರೆಗ್ಲಾ ಪರಿಯೆರೆಗ್ಲಾ ನಿಕ್ಲೆಗ್ ಇಲ್ಲ್ ಇಜ್ಜಂದೆ ಉಲ್ಲರಾ? ಇಜ್ಜಿಡ ದೇವೆರೆ ಸಭೆನ್ ತಾತ್ಸಾರ ಮಲ್ತ್‌ದ್ ದಾಲಾದಾಂತಿನಾಕುಲೆಗ್ ಅವಮಾನ ಮಲ್ಪುವರಾ? ಯಾನ್ ನಿಕ್ಲೆಗ್ ದಾನೆ ಪನೊಡು? ನಿಕ್ಲೆನ್ ಪುಗರೊಡಾ? ಈ ವಿಚಾರೊಡು ಯಾನ್ ಪುಗರುಜಿ.</verse>
				<verse number="23">ಯಾನ್ ನಿಕ್ಲೆಗ್ ತೆರಿಪಾಯಿನ ಈ ಬೋಧನೆನ್ ಕರ್ತವಡ್ದ್ ಹೊಂದಿಯೆ. ಆವು ದಾನೆಂದ್ಂಡ, ಕರ್ತವೆ ಆದುಪ್ಪು ಯೇಸು ತನನ್ ಒಚ್ಚಿದ್ ಕೊರಿನ ರಾತ್ರೆಡ್ ರೊಟ್ಟಿನ್ ದೆತ್ತೊಂದು,</verse>
				<verse number="24">ದೇವೆರೆನ್ ಸುಗಿತ್‌ದ್, ಪೊಲ್ತುದು ಅಕ್ಲೆಗ್ ಕೊರ್ದು, “ಉಂದು ನಿಕ್ಲೆಗಾದ್ ಕೊರ್ತಿನ ಎನ ಶರೀರ. ಎನನ್ ನೆನೆಪು ಮಲ್ಪೆರೆಗಾದ್ ಇಂಚ ಮಲ್ಪುಲೆ.”</verse>
				<verse number="25">ಅಂಚೆನೆ ವಣಸ್ ಆಯಿ ಬೊಕ್ಕ ಆಯೆ ಅವ್ವೇ ರೀತಿಡ್ ಪಾತ್ರೆನ್ ದೆತ್ತೊಂದು, “ಈ ಪಾತ್ರೆ ಎನ ನೆತ್ತೆರೆಡ್ದ್ ಉಂಡಾತಿನ ಪೊಸ ಒಡಂಬಡಿಕೆನ್ ತೋಜಾವುಂಡು. ನಿಕುಲು ಉಂದೆಟ್ಟ್ ಪರ್ಪಿನಾತ್ ಸರ್ತಿ ಎನನ್ ನೆನೆಪು ಮಲ್ಪೆರೆಗಾದ್ರ ದೆತ್ತೊನ್ಲೆ,”</verse>
				<verse number="26">ನಿಕುಲು ಈ ರೊಟ್ಟಿನ್ ತಿಂದ್‌ದ್ ಈ ಪಾತ್ರೆಡ್ ಪರ್ಪಿನಾತ್ ಸರ್ತಿ ಕರ್ತವ ಮರಣೊನು ಆಯೆ ಬನ್ನೆಂಗೆ ಸಾರಿಯೊನ್ವರ್.</verse>
				<verse number="27">ಅಂಚಾಯಿನೆಡ್ದ್ ಏರಾಂಡಲಾ ಯೋಗ್ಯದಾಂತೆ ಈ ರೊಟ್ಟಿನ್ ತಿಂದೆಡ ಇಜ್ಜಿಡ ಕರ್ತವ ಪಾತ್ರೆಡ್ ಪರಿಯೆಡ, ಕರ್ತವ ಶರೀರೊಗ್ಲಾ ನೆತ್ತೆರ್‌‌ಗ್ಲಾ ಅಪರಾಧಿ ಆದುಪ್ಪೆ.</verse>
				<verse number="28">ಅಂಚಾಂಡ ಪ್ರತಿ ನರಮಾನಿ ತನನ್ ಪರೀಕ್ಷೆ ಮಲ್ತೊಂದಿನಾಯೆ ಆದ್ ಈ ರೊಟ್ಟಿನ್ ದೆತ್ತೊಂದು ತಿನಡ್, ಈ ಪಾತ್ರೆಡ್ ಪರಡ್.</verse>
				<verse number="29">ದಾಯೆಗಂದ್ಂಡ ಕರ್ತವ ಶರೀರೊಗು ಪಂಡ್ಂಡ ಸಭೆಟ್ ಯೋಗ್ಯೆದಾಂತೆ ತಿಂದ್‌ದ್ ಪರ್ಪಿನಾಯೆ ನ್ಯಾಯತೀರ್ಪುನು ಬರ್ಪಾವುನಾಯೆ ಆದುಪ್ಪುವೆ.</verse>
				<verse number="30">ಈ ಕಾರಣೊಡ್ದಾದ್ ನಿಕ್ಲೆಡ್ ಮಸ್ತ್ ಜನ ಬಲದಾಂತಿನಾಕುಲುಲಾ ಸೀಕ್‌ದಾಕುಲುಲಾ ಆದುಲ್ಲೆರ್, ಮಸ್ತ್ ಜನ ಸೈತೆರ್.</verse>
				<verse number="31">ನಿಜಾದ್ ನಂಕ್ ನಮನೇ ವಿಚಾರಣೆ ಮಲ್ತೊಂಡಡ ನಮ ನ್ಯಾಯತೀರ್ಪುಗು ಗುರಿ ಆಪುಜ.</verse>
				<verse number="32">ಆಂಡ ನಮ ಕರ್ತವ ನ್ಯಾಯತೀರ್ಪುಗು ಒಳಗಾನಗ ಆಯೆ, ಲೋಕದಾಕುಲೆಡೊಪ್ಪ ಅಪರಾಧಿಲು ಪನ್ಪಿ ತೀರ್ಪು ಆಯೆರೆ ಬಲ್ಲಿ ಪಂಡ್ದ್ ನಂಕ್ ಶಿಕ್ಷೆನ್ ಕೊರ್ಪೆ.</verse>
				<verse number="33">ಅಂಚಾದ್ ಎನ ಸಹೋದ್ರೆರೇ, ಮೇಜಿಗ್ ಸೇರ್ದ್ ಬನ್ನಗ ಒರಿ ಒರಿಯಗ್ ಕಾತೊನ್ಲೆ.</verse>
				<verse number="34">ನಿಕುಲು ಸೇರ್ದ್ ಬನ್ನಗ ದೇವೆರೆ ನ್ಯಾಯತೀರ್ಪುಗು ಕಾರಣ ಆವಂದಿಲೆಕ್ಕ ಒರಿಯಗ್ ಬಡವು ಇತ್ತ್ಂಡ ಇಲ್ಲಡೇ ವಣಸ್ ಮಲ್ಪಡ್. ಒರಿದಿನ ಸಂಗತಿಲೆನ್ ಯಾನ್ ಬತ್ತಿನಪಗ ನೇಮಕ ಮಲ್ಪುವೆ.</verse>
			</chapter>
			<chapter number="12">
				<verse number="1">ಇತ್ತೆ ಸಹೋದ್ರೆರೇ, ಆತ್ಮಡ್ದ್ ತಿಕ್ಕುನ ವರೊಕುಲೆ ಸಂಗತಿಡ್ ತೆರಿಪಾವೆ. ನಿಕುಲು ತೆರಿಯಂದೆ ಉಪ್ಪೆರೆ ಬಲ್ಲಿ ಅಂದ್‌ದ್ ಯಾನ್ ಬಯಕುವೆ.</verse>
				<verse number="2">ನಿಕುಲು ಪಿದಯಿದ ಜನೊಕುಲು ಆದುಪ್ಪುನಗ ನಿಕುಲು ಸಾದಿ ತತ್ತ್‌ದ್ ಪೋಪಿಲೆಕ್ಕ ನಿಕ್ಲೆನ್ ಬಾಯಿಬರಂದಿ ಮೂರ್ತಿಲೆ ಕೈತಲ್‌ಗ್ ಕೊನೊ ಪೋವೊಂದಿತ್ತ್‌ಂಡ್ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.</verse>
				<verse number="3">ಅಂಚಾಯಿನೆಡ್ದ್ ಯಾನ್ ನಿಕ್ಲೆಗ್ ತೆರಿಪಾವುನೆನ್ ಕೇನ್ಲೆ; ದೇವೆರೆ ಆತ್ಮೊಡ್ದು ಪಾತೆರುನ ವಾ ನರಮಾನ್ಯೆಲಾ, “ಯೇಸುನು ಶಾಪಗ್ರಸ್ತೆ,” ಅಂದ್‌ದ್ ಪನಯೆ. ಅಂಚೆನೇ ಪರಿಶುದ್ಧಾತ್ಮೊಡು ಅತ್ತಂದೆ ವಾ ನರಮಾನ್ಯೆಲಾ, “ಯೇಸುನು ಕರ್ತವೆ,” ಅಂದ್‌ದ್ ಪನಯೆ.</verse>
				<verse number="4">ಆತ್ಮೀಕ ವರೊಕ್ಲೆಡ್ ಬೇತೆ ಬೇತೆ ವಿದ ಉಂಡು, ಆಂಡ ಆತ್ಮೆ ಒರಿಯೇ.</verse>
				<verse number="5">ಸೇವೆಲೆಡ್ ಬೇತೆ ಬೇತೆ ವಿದ ಉಂಡು, ಆಂಡ ಕರ್ತವೆ ಒರಿಯೇ.</verse>
				<verse number="6">ಕಾರ್ಯೊಲು ಬೇತೆ ಬೇತೆ ಉಂಡು, ಆಂಡ ಮಾತೆರೆಡ್ಲಾ ಮಾತ ಬೇಲೆ ಮಲ್ಪುನಾಯೆ ದೇವೆರ್ ಒರಿಯೇ.</verse>
				<verse number="7">ಆಂಡ ಒರಿ ಒರಿಯಡ ತೋಜಿದ್ ಬರ್ಪಿ ದೇವೆರಾತ್ಮನ ವರೊಕ್ಲು ಮಾತೆರೆನ ಪ್ರಯೋಜನೊಗಾದ್ ಕೊರ್ದುಪ್ಪುನವು ಆದುಂಡು.</verse>
				<verse number="8">ಎಂಚಂದ್ಂಡ ಒರಿಯಗ್ ದೇವೆರಾತ್ಮಡ್ದ್ ಗೇನದ ಪಾತೆರ, ನನೊರಿಯಗ್ ಅವ್ವೇ ಆತ್ಮಡ್ದ್ ಬುದ್ಧಿದ ಪಾತೆರ ಕೊರ್ತುಂಡು.</verse>
				<verse number="9">ಬೇತೆ ಒರಿಯಗ್ ಆ ಆತ್ಮಡ್ಡೇ ಮಲ್ಲ ನಂಬಿಕೆದ ವರ, ಬೊಕ್ಕ ನನೊರಿಯಗ್ ಸೀಕ್ ಗುಣ ಮಲ್ಪುನ ವರ,</verse>
				<verse number="10">ನನೊರಿಯಗ್ ಕಾರ್ನಿಕೊಲೆನ್ ಮಲ್ಪುನ ವರ, ನನೊರಿಯಗ್ ಪ್ರವಾದನೆದ ವರ, ನನೊರಿಯಗ್ ಆತ್ಮೊನು ತೆರಿಯೊನುನ ವರ, ನನೊರಿಯಗ್ ಬೇತೆ ಭಾಷೆಲೆಡ್ ಪಾತೆರುನ ವರ; ನನೊರಿಯಗ್ ಆ ಭಾಷೆಲೆ ಅರ್ಥೊನು ತೆರಿಪಾವುನ ವರ ಕೊರ್ದುಪ್ಪುಂಡು.</verse>
				<verse number="11">ಈ ಮಾತ ವರೊಕ್ಲೆನ್ ಆ ಒರಿಯೇ ಆತ್ಮೆ ತನ ಚಿತ್ತೊಗು ಸರಿಯಾದ್ ಪ್ರತಿ ಒರಿಯಗ್ ಪಟ್ಟ್‌ದ್ ಕೊರ್ದು ನಡಪಾವೆ.</verse>
				<verse number="12">ಎಂಚ ಶರೀರ ಒಂಜೇ ಆದಿತ್ತ್‌ಂಡಲಾ ಐಕ್ ಉಪ್ಪು ಅಂಗೊಲು ಮಸ್ತ್ ಉಲ್ಲನಾ, ಅಂಗೊಲು ಮಸ್ತ್ ಆದಿತ್ತ್‌ದ್ ಒಂಜೇ ಶರೀರ ಆದುಂಡಾ, ಅಂಚೆನೇ ಕ್ರಿಸ್ತೆಲಾ ಆದುಲ್ಲೆ.</verse>
				<verse number="13">ಯೆಹೂದ್ಯೆರಾವಡ್, ಗ್ರೀಕೆರಾವಡ್, ಗುಲಾಮೆರಾವಡ್, ಸ್ವತಂತ್ರೆರಾವಡ್ ನಮ ಮಾತೆರ್ಲಾ ಒಂಜೇ ಶರೀರ ಆವೆರೆಗಾದ್ ಒಂಜೇ ಆತ್ಮಡ್ದ್ ದೀಕ್ಷಾಸ್ನಾನ ಮಲ್ತೊಂಡ; ದೇವೆರ್ ಮಾತೆರೆಗ್ಲಾ ಒಂಜೇ ಆತ್ಮನ್ ಕೊರ್ತೆ.</verse>
				<verse number="14">ಶರೀರ ಒಂಜೇ ಅಂಗ ಅತ್ತ್, ಮಸ್ತ್ ಅಂಗೊಲಾದ್ ಉಂಡು.</verse>
				<verse number="15">ಕಾರ್, ಯಾನ್ ಕೈ ಅತ್ತಂದಿನೆಡ್ದ್ ಶರೀರದವು ಅತ್ತ್ ಪಂಡ್‌ಂಡಲಾ ಅವು ಶರೀರೊಗು ಸೇರಂದೆ ಉಂಡಾ?</verse>
				<verse number="16">ಕೆಬಿ, ಯಾನ್ ಕಣ್ಣ್ ಅತ್ತಂದಿನೆಡ್ದ್ ಯಾನ್ ಶರೀರದವು ಅತ್ತ್ ಪಂಡ್‌ಂಡಲಾ ಅವು ಶರೀರೊಗು ಸೇರಂದೆ ಉಂಡಾ?</verse>
				<verse number="17">ಇಡೀ ಶರೀರನೇ ಕಣ್ಣ್ ಆಂಡ ಕೇನುನು ಎಂಚ? ಅವು ಮಾತ ಕೆಬಿ ಆಂಡ, ಮೂಕು ಓಲು?</verse>
				<verse number="18">ಆಂಡ ದೇವೆರ್ ಈ ಅಂಗೊಲೆಡ್ ಒಂಜೊಂಜೆನ್ ತನ್ಕ್ ಸರಿ ತೋಜಿಲೆಕ್ಕ ಶರೀರದುಲಯಿ ದೀತೆ.</verse>
				<verse number="19">ಮಾತಲಾ ಒಂಜೇ ಅಂಗ ಆದಿತ್ತ್ಂಡ ಶರೀರ ಓಲುಂಡು?</verse>
				<verse number="20">ಅಂಗೊಲಾಂಡಲಾ ಮಸ್ತ್, ಶರೀರ ಒಂಜೇ.</verse>
				<verse number="21">ಕಣ್ಣ್ ಕೈಕ್, ಈ ಎಂಕ್ ಅಗತ್ಯ ಇಜ್ಜಿ ಅಂದ್‌ದ್ ತರೆ ಕಾರ್‌ಗ್, ಈ ಎಂಕ್ ಅಗತ್ಯ ಇಜ್ಜಿ ಅಂದ್‌ದ್ ಪನಿಯೆರೆ ಆವಂದ್.</verse>
				<verse number="22">ಆಂಡ ಶರೀರೊಡು ಬಲಹೀನ ಅಂದ್‌ದ್ ತೋಜುನ ಅಂಗೊಲೆನ್ಲಾ ಅಗತ್ಯ ಅಂದ್‌ದ್ ತೆರಿಯೊಡು.</verse>
				<verse number="23">ಬೊಕ್ಕ, ಎಂಕುಲೆ ಶರೀರೊಡು ಕಡಿಮೆ ಮಾನದವು ಅಂದ್‌ದ್ ತೋಜುನ ಅಂಗೊಲೆಗ್ಲಾ ತುತೈತೊಡು ಹೆಚ್ಚ್ ಮಾನೊನು ಕೊರ್ಪ ಅತ್ತಾ; ಇಂಚ ನಮಡ್ ಲಜ್ಜಾಭಾವ ಇತ್ತಿ ಅಂಗೊಲೆನ್ ಎಡ್ಡೆಡ್ ಮುಚ್ಚುವ.</verse>
				<verse number="24">ಬೊಕ್ಕ ಹೆಚ್ಚ್ ಮಾನ ಇತ್ತಿ ಅಂಗೊಲೆಗ್ ದಾಲಾ ಮಲ್ಪುನ ಅಗತ್ಯ ಇಜ್ಜಿ. ಶರೀರೊಡು ಕಡಿಮೆ ಮಾನದಾಂತಿ ಅಂಗೊಲು ಒಂಜೊಂಜೆತ್ತ ಹಿತೊನು ಚಿಂತೆ ಮಲ್ಪುಲೆಕ್ಕ ದೇವೆರ್ ಕಡಿಮೆ ಇತ್ತಿನೆಕ್ಕ್ ಹೆಚ್ಚಾಯಿನ ಮಾನೊನು ಕೊರ್ದು ಶರೀರೊನು ಹದೊಟು ಕೂಡಾದೆ.</verse>
				<verse number="25"></verse>
				<verse number="26">ಒಂಜಿ ಅಂಗೊಗು ಬೇನೆ ಆಂಡ ಮಾತ ಅಂಗೊಲೆಗ್ಲಾ ಬೇನೆ ಆಪುಂಡು; ಒಂಜಿ ಅಂಗೊಗು ಮಾನ ಆಂಡ ಮಾತ ಅಂಗೊಲೆಗ್ಲಾ ಸಂತೋಷ ಆಪುಂಡು.</verse>
				<verse number="27">ನಿಕುಲು ಕ್ರಿಸ್ತನ ಶರೀರದ ಒಂಜೊಂಜಿ ಅಂಗೊಲಾದ್ ಉಲ್ಲರ್. ಬೊಕ್ಕ ನಿಕುಲು ಒರಿ ಒರಿ ಆ ಶರೀರದ ಅಂಗ ಆದುಲ್ಲರ್</verse>
				<verse number="28">ದೇವೆರ್ ಸಭೆಟ್ ಸುರುಕ್ಕು ಅಪೊಸ್ತಲೆರೆನ್, ರಡ್ಡನೇದಾದ್ ಪ್ರವಾದಿಲೆನ್, ಮೂಜನೆದಾದ್ ಬೋಧಕೆರೆನ್ ದೀತೆ; ಐಡ್ದ್ ಬೊಕ್ಕ ಕಾರ್ನಿಕೊಲೆನ್ ಮಲ್ಪುನ ಶಕ್ತಿನ್, ಸೀಕ್ ಗುಣ ಮಲ್ಪುನ ವರೊನು, ಬೇತೆಕ್ಲೆಗ್ ಸಹಾಯ ಮಲ್ಪುನ ಗುಣೊನು, ಆಳುನ ಸಮರ್ಥೊನು ಬೇತೆ ಬೇತೆ ಭಾಷೆಡ್ ಪಾತೆರುನ ವರೊನ್ಲಾ ಅಕುಲಾಕುಲೆಗ್ ಕೊರ್ತೆ.</verse>
				<verse number="29">ಮಾತೆರ್ಲಾ ಅಪೊಸ್ತಲೆರಾ? ಮಾತೆರ್ಲಾ ಪ್ರವಾದಿಲಾ? ಮಾತೆರ್ಲಾ ಬೋಧಕೆರಾ? ಮಾತೆರ್ಲಾ ಕಾರ್ನಿಕೊಲೆನ್ ಮಲ್ಪುವೆರಾ?</verse>
				<verse number="30">ಮಾತೆರೆಗ್ ಸೀಕ್ ಗುಣ ಮಲ್ಪುನ ವರ ಉಂಡಾ? ಮಾತೆರ್ಲಾ ಬೇತೆ ಬೇತೆ ಭಾಷೆಡ್ ಪಾತೆರಿಯೆರೆ ಸಮರ್ಥೆರಾ? ಮಾತೆರ್ಲಾ ಭಾಷೆದ ಅರ್ಥ ಪನಿಯೆರೆ ಸಮರ್ಥೆರಾ?</verse>
				<verse number="31">ಆಂಡ ಎಡ್ಡೆಂತಿನ ವರೊಕ್ಕಾದ್ ಪೇಚಾಡ್ಲೆ. ನಿಕ್ಲೆಗ್ ನನಲಾ ಎಡ್ಡೆಂತಿನ ಮಾರ್ಗೊನು ತೋಜಾವೆ.</verse>
			</chapter>
			<chapter number="13">
				<verse number="1">ಯಾನ್ ನರಮಾನಿಲೆ ಭಾಷೆಲೆನ್ಲಾ ದೂತೆರೆ ಭಾಷೆಲೆನ್ಲಾ ಪಾತೆರಿಯೆಡ ಎನಡ ಪ್ರೀತಿ ಇಜ್ಜಾಂಡ ಯಾನ್ ಶಬ್ಧ ಮಲ್ಪುನ ಕಂಚಿಲಾ ಗಣಗಣ ಆಪಿನ ತಾಳಲಾ ಮಾತ್ರ ಆದುಲ್ಲೆ.</verse>
				<verse number="2">ಎಂಕ್ ಪ್ರವಾದನೆದ ವರ ಇತ್ತ್ಂಡಲಾ ಮಾತ ಗೇನ ಇತ್ತ್ಂಡಲಾ ಮಾತ ಮರ್ಮೊಲೆನ್ ತೆರಿದಿತ್ತ್ಂಡಲಾ ಪರ್ವತೊಲೆನ್ ಲಕ್ಕಾವುನಾತ್ ಮಲ್ಲ ನಂಬಿಕೆ ಇತ್ತ್ಂಡಲಾ ಎನಡ ಪ್ರೀತಿ ಇಜ್ಜಾಂಡ ದಾಲಾ ಇಜ್ಜಾಂದಿನಾಯೆ ಆದುಲ್ಲೆ.</verse>
				<verse number="3">ಎಂಕುಪ್ಪು ಮಾತ ಬದ್‌ಕ್‌ನ್ ಧರ್ಮಾದ್ ಕೊರಿಯೆರ್ಡಲಾ ಎನ ಶರೀರೊನು ಪೊತ್ತಾವೆರೆ ಒಚ್ಚಿದ್ ಕೊರಿಯೆಡಲಾ ಎನಡ ಪ್ರೀತಿ ಇಜ್ಜಾಂಡ ಎಂಕ್ ದಾಲಾ ಪ್ರಯೋಜನ ಇಜ್ಜಿ.</verse>
				<verse number="4">ಪ್ರೀತಿ ತಾಳೊನುಂಡು; ಪ್ರೀತಿ ದಯದಾಕ್ಷಿಣ ತೋಜಾವುಂಡು; ಪ್ರೀತಿ ಮಚ್ಚರ ಪಡೆವುಜಿ; ಬೂಟು ಮಲ್ಪುಜಿ; ಉಬ್ಬೆರೊನುಜಿ;</verse>
				<verse number="5">ಪ್ರೀತಿ ಮರ್ಯಾದಿ ತೆಟ್ಟ್‌ದ್ ನಡಪುಜಿ, ತನನೇ ನಾಡುಜಿ; ಕೋಪ ಮಲ್ತೊನುಜಿ, ತಪ್ಪುಮಲ್ತಿನೆನ್ ಮದಪುಂಡು.</verse>
				<verse number="6">ಅನ್ಯಾಯೊನು ತೂದು ಸಂತೋಷ ಮಲ್ಪಂದೆ, ಸತ್ಯೊಗು ಜಯ ಆಪಿನೆನ್ ತೂದು ಸಂತೋಷ ಮಲ್ಪುಂಡು;</verse>
				<verse number="7">ಪ್ರೀತಿ ಮಾತೆನ್ಲಾ ಮನಸ್‌ಡೇ ಸಹಿಸೊಂಡು, ಮಾತೆನ್ಲಾ ನಂಬುಂಡು, ಮಾತೆನ್ಲಾ ಭರವಸೆ ಮಲ್ಪುಂಡು, ಮಾತೆನ್ಲಾ ತಡೆತೊನುಂಡು.</verse>
				<verse number="8">ಪ್ರೀತಿ ಏಪಲಾ ಬೂರ್ದು ಪೋಪುಜಿ, ಪ್ರವಾದನೆಲಾಂಡಲಾ ಉಂತುದು ಪೋವು; ಬೇತೆ ಬೇತೆ ಭಾಷೆಲು ಮುಗಿಯು, ಗೇನಲಾ ಆಳಿದ್ ಪೋವು.</verse>
				<verse number="9">ನಮ ಒಂತೊಂತೆನೇ ತೆರಿಯೊನ್ವ; ಒಂತೊಂತೆನೇ ಪ್ರವಾದನೆ ಮಲ್ಪುವ.</verse>
				<verse number="10">ಆಂಡ ಪರಿಪೂರ್ಣವಾಯಿನವು ಬರ್ಪಿನಪಗ ಒಂತೊಂತೆ ಇತ್ತಿನವು ಇಜ್ಜಾಂದೆ ಪೋವು.</verse>
				<verse number="11">ಯಾನ್ ಬಾಲೆ ಆದುಪ್ಪುನಗ ಬಾಲೆದ ಲೆಕ್ಕನೇ ಪಾತೆರಿಯೆ. ಬಾಲೆದ ಲೆಕ್ಕನೇ ಎನ್ನಿಯೆ, ಬಾಲೆದ ಲೆಕ್ಕನೇ ಆಲೋಚನೆ ಮಲ್ತೆ. ಪ್ರಾಯೊಗು ಬನ್ನಗ ಬಾಲೆದೆನ್ ಬುಡ್ದು ಬುಡಿಯೆ.</verse>
				<verse number="12">ಇತ್ತೆ ನಮ (ದೇವೆರೆ ಮೋನೆನ್) ಕನ್ನಡಿಡ್ ತೋಜುಲೆಕ್ಕನೆ ತೂಪ; ಆಂಡ ಬೊಕ್ಕ ಎದುರೆದುರು ತೂವ. ಇತ್ತೆ ಎಂಕ್ ಒಂತೊಂತೆನೆ ತೆರಿದುಂಡು; ಆಂಡ ಅಪಗ ದೇವೆರ್ ಎನನ್ ತೆರಿಯೊನುಲೆಕ್ಕ ಯಾನ್ಲಾ ಪೂರ್ತಿ ಆದ್ ತೆರಿಯೊನ್ವೆ.</verse>
				<verse number="13">ಇತ್ತೆ ನಂಬಿಕೆ, ಭರವಸ, ಬೊಕ್ಕ ಪ್ರೀತಿ, ಉಂದು ಮೂಜಿ ಮಾತ್ರ ಒರಿಯುಂಡು. ಆಂಡ ಐಟ್ಟ್ ಮಾತೆಟ್ಟ್ ಮಲ್ಲವು ಪ್ರೀತಿಯೇ.</verse>
			</chapter>
			<chapter number="14">
				<verse number="1">ಪ್ರೀತಿಡ್ ಜೀವನ ಮಲ್ಪೆರೆ ತೂಲೆ. ಬೊಕ್ಕ ಆತ್ಮಡ್ದ್ ತಿಕ್ಕುನ ವರೊಕ್ಲೆಗಾದ್ ಪೇಚಾಡ್ಲೆ. ವಿಶೇಷವಾದ್ ಪ್ರವಾದನೆದ ವರೊನು ಆಸೆ ಮಲ್ಪುಲೆ.</verse>
				<verse number="2">ಬೇತೆ ಭಾಷೆಡ್ ಪಾತೆರುನಾಯೆ ದೇವೆರೆ ಒಟ್ಟುಗು ಪಾತೆರ್‌ವೆ ಅತ್ತಂದೆ ನರಮಾನಿಲೆ ಒಟ್ಟುಗು ಪಾತೆರುಜೆ. ಆಂಡ ಅವೆನ್ ಏರ್ಲಾ ತೆರಿಯೊನುಜೆರ್; ಆಯೆ ಆತ್ಮದ ಪ್ರೇರಣೆಡ್ದ್ ಗೂಢಾರ್ಥೊಲೆನ್ ಪಾತೆರ್‌ವೆ.</verse>
				<verse number="3">ಆಂಡ ಪ್ರವಾದನೆ ಮಲ್ಪುನಾಯೆ ನರಮಾನಿಲೆನ ಆತ್ಮೀಕ ದೃಢತೆಗಾದ್, ಉತ್ತೇಜನಗಾದ್, ಆಧರಣೆಗಾದ್ ಅಕ್ಲೆಡ ಪಾತೆರ್‌ವೆ.</verse>
				<verse number="4">ಬೇತೆ ಭಾಷೆಡ್ ಪಾತೆರುನಾಯೆ ತನ್ಕ್ ಮಾತ್ರ ಆತ್ಮೀಕತೆನ್ ದೃಢ ಮಲ್ತೊನ್ವೆ; ಪ್ರವಾದನೆ ಮಲ್ಪುನಾಯೆ ಸಭೆತ ಆತ್ಮೀಕತೆನ್ ದೃಢ ಮಲ್ಪುವೆ.</verse>
				<verse number="5">ನಿಕುಲು ಮಾತೆರ್ಲಾ ಬೇತೆ ಭಾಷೆಡ್ ಪಾತೆರೊಡು ಪಂಡ್ದ್ ಯಾನ್ ಆಸೆ ಮಲ್ತೆಡಲಾ ಅವ್ವೆಡ್ದ್‌ಲಾ ಹೆಚ್ಚಾದ್ ನಿಕುಲು ಪ್ರವಾದನೆ ಮಲ್ಪೊಡು ಪಂಡ್ದೇ ಎನ ಆಸೆ. ದಾಯೆಗಂದ್ಂಡ ಸಭೆತ ಆತ್ಮೀಕ ದೃಢತೆಗಾದ್ ಬೇತೆ ಭಾಷೆಲೆ ಅರ್ಥ ಪನಂದೆ ಪೋಂಡ, ಪ್ರವಾದನೆ ಮಲ್ಪುನಾಯೆ ಬೇತೆ ಭಾಷೆಲೆಡ್ ಪಾತೆರುನಾಯಡ್ದ್‌ಲಾ ಹೆಚ್ಚಿನಾಯೆ ಆದುಲ್ಲೆ.</verse>
				<verse number="6">ಅಂಚಾದ್ ಸಹೋದ್ರೆರೇ, ಯಾನ್ ನಿಕ್ಲೆನಡೆಗ್ ಬತ್ತ್‌ದ್, ಬೇತೆ ಭಾಷೆಡ್ ಪನ್ಪುನಾಯೆ ಮಾತ್ರ ಆದಿತ್ತ್ಂಡ ಎನಡ್ದ್ ನಿಕ್ಲೆಗ್ ದಾನೆ ಲಾಭ? ಆಂಡ ದೇವೆರೆ ಪ್ರಕಟಣೆನ್ ಅತ್ತ್‌ಡ ಗೇನದ ಪಾತೆರೊನು, ಅತ್ತ್‌ಡ ಪ್ರವಾದನೆನ್ ಅತ್ತ್‌ಡ ಬೋಧನೆನ್ ಕೊರ್‌ಂಡ ನಿಕ್ಲೆಗ್ ಲಾಭ ಆವು.</verse>
				<verse number="7">ಕೊಳಲ್ ಆವಡ್ ವೀಣೆ ಆವಡ್ ಇಂಚಿನ ಜಡ ವಾದ್ಯೊಲು ಸ್ವರೊಟ್ಟು ವಾ ವ್ಯತ್ಯಾಸೊನ್ಲಾ ತೋಜಾಯಿಜಿಡ ಉರ್ತಿನವು ಇಜ್ಜಿಡ ಬಾರಿಸಿನವು ಇಂಚಿನವೇ ಅಂದ್‌ದ್ ಎಂಚ ತೆರಿಯುಂಡು?</verse>
				<verse number="8">ತುತೂರಿ ಗೊತ್ತುದಾಂತಿನ ಶಬ್ಧೊನು ಕೊರ್‌ಂಡ, ಏರ್ ಲಡಯಿಗ್ ತಯಾರ್ ಆಪೆರ್?</verse>
				<verse number="9">ಅಂಚೆನೇ ನಿಕುಲು ತೆರಿಯುನ ಭಾಷೆಲೆನ್ ಬಾಯಿಡ್ ಪಾತೆರಿಜಡ, ನಿಕುಲು ಬೇತೆ ಭಾಷೆದ ಅರ್ಥೊನು ತೆರಿಯುನು ಎಂಚ? ನಿಕುಲು ಗಾಳಿಗ್ ಪಾತೆರಿಲೆಕ್ಕ ಆಪುಂಡತ್ತಾ.</verse>
				<verse number="10">ಈ ಲೋಕೊಡು ಏತೋ ತರತ ಭಾಷೆಲು ಇತ್ತ್ಂಡಲಾ ಅರ್ಥದಾಂತಿನ ಭಾಷೆ ಒವುಲಾ ಇಜ್ಜಿ.</verse>
				<verse number="11">ಭಾಷೆದ ಅರ್ಥ ಎಂಕ್ ತೆರಿಜಿಡ ಪಾತೆರಿನಾಯಗ್ ಯಾನ್ ಪರದೇಶಿ ಆದುಪ್ಪುವೆ; ಪಾತೆರುನಾಯೆಲಾ ಎಂಕ್ ಪರದೇಶಿ ಆದುಪ್ಪುವೆ.</verse>
				<verse number="12">ಅಂಚೆನೇ ನಿಕುಲುಲಾ ಆತ್ಮಡ್ದ್ ತಿಕ್ಕುನ ವರೊಕ್ಲೆಡ್ ಆಸಕ್ತಿ ಇತ್ತಿನಾಕುಲಾಯಿನೆಡ್ದ್ ಸಭೆತ ಆತ್ಮೀಕತೆನ್ ದೃಢ ಮಲ್ಪೆರೆಗಾದ್ ಹೆಚ್ಚಾದ್ ಬಯಕ್ಲೆ.</verse>
				<verse number="13">ಅಂಚಾದ್ ಬೇತೆ ಭಾಷೆಡ್ ಪಾತೆರುನಾಯೆ, ತನ್ಕ್ ಐತ ಅರ್ಥ ಪನ್ಪಿನ ಶಕ್ತಿಲಾ ಉಂಡಾವೊಡು ಅಂದ್‌ದ್ ದೇವೆರೆಡ ಪ್ರಾರ್ಥನೆ ಮಲ್ಪಡ್.</verse>
				<verse number="14">ದಾಯೆಗಂದ್ಂಡ ಯಾನ್ ಬೇತೆ ಭಾಷೆಡ್ ಪ್ರಾರ್ಥನೆ ಮಲ್ಪುವೆಡ ಎನ ಆತ್ಮ ಪ್ರಾರ್ಥನೆ ಮಲ್ಪುಂಡು. ಆಂಡ ಎನ ಬುದ್ಧಿ ಕೆಲಸೊಗು ಬರ್ಪುಜಿ.</verse>
				<verse number="15">ಅಂಚಾಂಡ ದಾನೆ? ಯಾನ್ ಆತ್ಮೊಡು ಪ್ರಾರ್ಥನೆ ಮಲ್ಪುವೆ, ಬುದ್ಧಿಡ್ಲಾ ಪ್ರಾರ್ಥನೆ ಮಲ್ಪುವೆ; ಆತ್ಮೊಡ್ಲಾ ಬುದ್ಧಿಡ್ಲಾ ರಾಗ ಮಲ್ಪುವೆ.</verse>
				<verse number="16">ಈ ಆತ್ಮೊಡು ಮಾತ್ರ ದೇವೆರೆ ಸ್ತುತಿ ಮಲ್ತ್ಂಡ ಆತ್ಮೀಕ ವರದಾಂತಿನಾಯಗ್ ಈ ಪಂಡಿನವು ತೆರಿಯಂದೆ ಉಪ್ಪುನೆಡ್ದ್ ಈ ಮಲ್ಪುನ ಸ್ತುತಿಕ್ಕ್ ಆಯೆ, “ಆಮೆನ್,” ಅಂದ್‌ದ್ ಪನ್ಪಿನಿ ಎಂಚ?</verse>
				<verse number="17">ಈಯಾಂಡ ಎಡ್ಡೆ ರೀತಿಡೇ ಸ್ತುತಿ ಕೊರ್ಪ ಸರಿ. ಆಂಡ ಆ ವರದಾಂತಿನಾಯಗ್ ಐಡ್ದ್ ಆತ್ಮೀಕ ದೃಢ ಆಪುಜಿ.</verse>
				<verse number="18">ನಿಕ್ಲೆಡ್ದ್ ಮಾತೆರೆಡ್ದ್ ಹೆಚ್ಚಾದ್ ಯಾನ್ ಬೇತೆ ಭಾಷೆಲೆಡ್ ಪಾತೆರ್‌ವೆ; ಐಕಾದ್ ದೇವೆರೆಗ್ ಉಪಕಾರ ಸ್ತುತಿ ಮಲ್ಪುವೆ.</verse>
				<verse number="19">ಆಂಡ ಸಭೆಟ್ ಯಾನ್ ಬೇತೆ ಭಾಷೆಡ್ ಪತ್ತ್ ಸಾರ ಪಾತೆರೊಲೆನ್ ಪನ್ಪಿನೆಡ್ದ್ ಎನ ಬುದ್ಧಿಡ್ದ್ ಐನೇ ಪಾತೆರೊಲೆನ್ ಅಂದ್‌ದ್ ಬೇತೆಕ್ಲೆಗ್ ಬೋಧನೆ ಮಲ್ಪುನವು ಎಂಕ್ ಇಷ್ಟವಾಯಿನವು.</verse>
				<verse number="20">ಸಹೋದ್ರೆರೇ, ಬುದ್ಧಿದ ಸಂಗತಿಡ್ ಜೋಕುಲೆ ಲೆಕ್ಕ ಉಪ್ಪಡೆ; ಪಡಿಕೆಂತಿನೆತ್ತ ವಿಷಯೊಲೆಡ್ ಜೋಕುಲಾದೆ ಇತ್ತ್‌ದ್ ಬುದ್ಧಿದ ಸಂಗತಿಡ್ ಪ್ರಾಯಸ್ಥೆರಾದುಪ್ಪುಲೆ.</verse>
				<verse number="21">ನ್ಯಾಯಕಟ್ಟ್‌ಡ್ ಇಂಚ ಬರೆತ್ಂಡ್, “ಯಾನ್ ಬೇತೆ ಭಾಷೆಲೆಡ್ಲಾ ಪರದೇಶಿಯೆರೆ ದುಡಿಲೆಡ್ದ್‌ಲಾ ಈ ಜನೊಕುಲೆಡ ಪಾತೆರ್‌ವೆ, ಆಂಡಲಾ ಅಕುಲು ಎನ ಪಾತೆರೊಗು ಕೆಬಿ ಕೊರ್ಪುಜೆರ್,” ಕರ್ತವೆ ಪನ್ಪೆ.</verse>
				<verse number="22">ಅಂಚಾಯಿನೆಡ್ದ್ ಬೇತೆ ಭಾಷೆಲೆಡ್ ಪಾತೆರುನವು ನಂಬಿಕೆದಾಂತಿನಾಕುಲೆಗ್ ಗುರ್ತ ಆದುಂಡು ನಂಬುನಾಕುಲೆಗ್ ಅತ್ತ್. ಆಂಡ ಪ್ರವಾದನೆಲು ನಂಬಂದಿನಾಕುಲೆಗ್ ಅತ್ತ್, ನಂಬುನಾಕುಲೆಗಾದುಂಡು.</verse>
				<verse number="23">ಇಡೀ ಸಭೆತಾಕುಲು ಕೂಡ್ದು ಬತ್ತಿನಲ್ಪ, ಮಾತೆರ್ಲಾ ಬೇತೆ ಭಾಷೆಲೆಡ್ ಪಾತೆರ್‌ನಗ, ಆತ್ಮೀಕ ವರದಾಂತಿನಾಕುಲು ಅತ್ತ್‌ಡ ನಂಬಿಕೆದಾಂತಿನಾಕುಲು ಉಲಯಿ ಬತ್ತೆರ್‌ಡ ನಿಕ್ಲೆಗ್ ಮರ್ಲ್ ಪತ್ತ್‌ದ್ಂಡ್ ಅಂದ್‌ದ್ ಪನಯೆರಾ?</verse>
				<verse number="24">ಐತ ಬದಲ್‌ಗ್ ಮಾತೆರ್ಲಾ ಪ್ರವಾದನೆ ಮಲ್ಪುನಗ ನಂಬಿಕೆದಾಂತಿನಾಯೆ ಅತ್ತ್‌ಡ ಆತ್ಮೀಕ ವರದಾಂತಿನಾಯೆ ಒರಿ ಉಲಯಿ ಬತ್ತೆಡಲಾ ಆಯೆ ಮಾತೆರೆ ಪಾತೆರೊಲೆನ್ ಕೇಂಡ್ದ್ ತಾನ್ ಪಾಪಿ ಪನ್ಪಿನೆನ್ ತೆರಿವೆ ಬೊಕ್ಕ ಮಾತೆರೆ ಪಾತೆರೊಡ್ದು ಆಯನ ವಿಚಾರಣೆ ಆಯಿ ಲೆಕ್ಕ ಆಪುಂಡು.</verse>
				<verse number="25">ಇಂಚ ಆಯನ ಉಡಲ್‌ದ ಮರ್ಮೊಲು ತೆರಿದ್ ಬರ್ಪುಂಡು. ಅಪಗ ಆಯೆ ಅಡ್ಡಬೂರ್ದು ದೇವೆರೆನ್ ಆರಾಧನೆ ಮಲ್ಪುವೆ. ಬೊಕ್ಕ ಸತ್ಯಾವಾದ್ ನಿಕ್ಲೆಡ್ ದೇವೆರ್ ಉಲ್ಲೆ ಅಂದ್‌ದ್ ಅರಿಕೆ ಮಲ್ಪುವೆ.</verse>
				<verse number="26">ಸಹೋದ್ರೆರೇ, ನಿಕುಲು ಕೂಡ್ದು ಬನ್ನಗ, ಸಭೆಟ್ ಮಾತೆರ್ಲಾ ಪಾಲ್ ದೆತ್ತೊನೊಡು. ಒರಿ ರಾಗ ಪನ್ಪಿನವು, ಬೊಕ್ಕೊರಿ ಬೋಧನೆ ಮಲ್ಪುನವು, ಒರಿ ತನ್ಕ್ ಪ್ರಕಟವಾಯಿನೆನ್ ತೆರಿಪಾವುನವು, ಬೊಕ್ಕೊರಿ ಬೇತೆ ಭಾಷೆಡ್ ಪನ್ಪಿನವು, ಒರಿ ಐತ ಅರ್ಥೊನು ಪನ್ಪಿನವುಲಾ ಉಂಡತ್ತಾ. ನಿಕುಲು ಎಂಚಿನ ಮಲ್ತರ್ಡಲಾ ಆತ್ಮೀಕ ದೃಢತೆಗಾದ್ ಮಲ್ಪುಲೆ.</verse>
				<verse number="27">ಒರಿ ಬೇತೆ ಭಾಷೆಡ್ ಪಾತೆರುನಾಂಡ ಇರ್ವೆರ್ ಅತ್ತ್‌ಡ ಮೂವೆರ್ ಒರಿಯಡ್ದ್ ಒರಿ ಪಾತೆರಡ್. ಬೊಕ್ಕ ಏರ್ಲಾ ಒರಿ ಐತ ಅರ್ಥೊಲೆನ್ ಪನಡ್.</verse>
				<verse number="28">ಅರ್ಥ ಪನ್ಪಿನಾಯೆ ಇಜ್ಜೆಡ ಪಾತೆರುನಾಯೆ ಸಭೆಟ್ ಮನಿಪಂದೆ ಉಪ್ಪಡ್; ಆಯೆ ತನಡಲಾ ದೇವೆರೆಡಲಾ ಪಾತೆರಡ್.</verse>
				<verse number="29">ಪ್ರವಾದಿಲು ಪ್ರವಾದನೆ ಪನ್ಪಿನಾಕುಲುಲಾ ಇರ್ವೆರಾವಡ್ ಮೂವೆರಾವಡ್ ಪನಡ್. ಬೇತೆಕ್ಲು ಅವೆನ್ ಶೋಧಿದ್ ತೂವಡ್.</verse>
				<verse number="30">ಕುಲ್ಲೊಂದುಪ್ಪು ಬೊಕ್ಕೊರಿಯಗ್ ಪ್ರಕಟಣೆ ಆಂಡ, ಸುರು ಪ್ರವಾದನೆ ಮಲ್ಪುನಾಯೆ ಮನಿಪಂದೆ ಕುಲ್ಲಡ್.</verse>
				<verse number="31">ನಿಕುಲು ಮಾತ ಒರಿಯಡ್ದ್ ಬೊಕ್ಕ ಒರಿ ಪ್ರವಾದನೆ ಮಲ್ಪುನೆಕ್ಕ್ ಅಡ್ಡಿ ಇಜ್ಜಿ; ಇಂಚ ಮಲ್ತರ್ಡ ಮಾತೆರ್ಲಾ ಕಲ್ತೊನ್ವರ್, ಮಾತೆರೆಗ್ಲಾ ಉಮೇದ್ ತಿಕ್ಕುಂಡು.</verse>
				<verse number="32">ಪ್ರವಾದಿಲೆನ ಆತ್ಮೊಲು ಪ್ರವಾದಿಲೆ ಸ್ವಾದೀನೊಡು ಉಪ್ಪೊಡು.</verse>
				<verse number="33">ದಾಯೆಗಂದ್ಂಡ ದೇವಜನೊಕಲೆನ ಮಾತ ಸಭೆಕ್ಲೆಡ್ ಇತ್ತಿಲೆಕ್ಕ ದೇವೆರ್ ಗಲಿಬಿಲಿಕ್ ಕಾರಣ ಅತ್ತ್ ಸಮಾಧಾನದ ದೇವೆರ್ ಆದುಲ್ಲೆ.</verse>
				<verse number="34">ಪೊಂಜೊವುಲು ಸಭೆತ ಕೂಟೊಲೆಡ್ ಮನಿಪಂದೆ ಉಪ್ಪೊಡು. ಅಕ್ಲೆಗ್ ಪಾತೆರಿಯೆರೆ ಅವಕಾಸ ಇಜ್ಜಿ, ಅಕುಲು ಪಾತೆರಂದೆ ಅಧೀನೆರಾದುಪ್ಪೊಡು ಇಂಚ ನ್ಯಾಯಕಟ್ಟ್‌ಡ್ ಪನ್ಪುಂಡು.</verse>
				<verse number="35">ಅಕುಲು ದಾಲಾಂಡಲಾ ತೆರಿಯೊನಿಯೆರೆ ಬಯಕುವೆರ್ಡ ಇಲ್ಲಡ್ ತನ್ಕುಲೆ ಕಂಡನಿಯಾಡ್ಲೆಡ ಕೇನಡ್. ದಾಯೆಗಂದ್ಂಡ ಸಭೆಟ್ ಪಾತೆರುನವು ಪೊಂಜೊವುಗು ನಾಚಿಗೆದ ಸಂಗತಿ.</verse>
				<verse number="36">ದೇವೆರೆ ಪಾತೆರ ನಿಕ್ಲೆ ಸಭೆಡ್ದೇ ಬೈದ್‌ಂಡಾ? ಇಜ್ಜಿಡ ಆ ಪಾತೆರ ನಿಕ್ಲೆಗ್ ಮಾತ್ರ ಬತ್ತ್‌ಂಡಾ?</verse>
				<verse number="37">ಏರಾಂಡಲಾ ತನನ್ ಪ್ರವಾದಿ ಪಂಡ್ದಾವಡ್ ದೇವೆರೆ ಆತ್ಮಡ್ದ್ ನಡಪಾವುನಾಯೆ ಪಂಡ್ದಾವಡ್ ಎನ್ನೊನುವೆಡ ಯಾನ್ ನಿಕ್ಲೆಗ್ ಬರೆತಿ ಸಂಗತಿಲೆನ್ ಕರ್ತವನ ಅಪ್ಪಣೆ ಪಂಡ್ದೇ ತೆರಿಯಡ್.</verse>
				<verse number="38">ಏರಾಂಡಲಾ ಉಂದು ತನ್ಕ್ ಗೊತ್ತಿಜ್ಜಿ ಪನ್ಪೆಡ, ಆಯೆ ತೆರಿಯಂದಿನಾಯೆ ಆದುಪ್ಪಡ್.</verse>
				<verse number="39">ಅಂಚಾದ್ ಸಹೋದ್ರೆರೇ, ಪ್ರವಾದನೆ ಪನಿಯೆರೆಗ್ ಆಸೆಡ್ ಬಯಕ್ಲೆ. ಆಂಡ ಬೇತೆ ಭಾಷೆಡ್ ಪಾತೆರ್‌ನೆಕ್ಕ್ ಅಡ್ಡಿ ಮಲ್ಪಡೆ.</verse>
				<verse number="40">ಬೊಕ್ಕ ಮಾತಲಾ ಮರ್ಯಾದಿಡ್ಲಾ ಕ್ರಮೊಟ್ಲಾ ನಡಪಡ್.</verse>
			</chapter>
			<chapter number="15">
				<verse number="1">ಇತ್ತೆ ಸಹೋದ್ರೆರೇ, ಯಾನ್ ನಿಕ್ಲೆಗ್ ತೆರಿಪಾದಿ ಸುವಾರ್ತೆ ನಿಕ್ಲೆ ನೆನೆಪುಗು ಕನಬರ್ಪೆ; ನಿಕುಲು ಅವೆನ್ ಸ್ವೀಕಾರ ಮಲ್ತ್‌ದರ್, ಐಟ್ಟ್ ಉಂತುದರ್.</verse>
				<verse number="2">ಯಾನ್ ಸಾರಿನ ಸುವಾರ್ತೆ ದೀವೊನಿಯರ್ಡ ನಿಕ್ಲೆಗ್ ರಕ್ಷಣೆ ಆವು. ಇಜ್ಜಾಂಡ ನಿಕ್ಲೆನ ನಂಬಿಕೆ ವ್ಯರ್ಥ ಆದ್ ಪೋವು.</verse>
				<verse number="3">ಯಾನ್ ನಿಕ್ಲೆಗ್ ತೆರಿಪಾದಿನ ಸುರುತ್ತ ಸಂಗತಿಲೆಡ್ ಒಂಜಿ ಸಂಗತಿನ್ ನಿಕ್ಲೆಗ್ ಮುಖ್ಯವಾದ್ ತೆರಿಪಾದ್ ಕೊರಿಯೆ. ಅವು ಯಾನ್ಲಾ ಕಲ್ತೊಂದಿನವೇ. ಅವು ದಾನೆಂದ್ಂಡ ಶಾಸ್ತ್ರೊಡು ತೆರಿಪಾಯಿ ಲೆಕ್ಕನೇ ಕ್ರಿಸ್ತೆ ನಮ ಪಾಪೊಲೆಗಾದ್ ಸೈತೆ.</verse>
				<verse number="4">ಆಯೆ ಕೌಂತುದಿನಾಯೆ ಆದ್ ಶಾಸ್ತ್ರದ ಪ್ರಕಾರನೇ ದೇವೆರ್ ಮೂಜನೇ ದಿನೊಟು ಸೈತಿನಾಕುಲೆಡ್ದ್ ಲಕ್ಕಾಯೆ.</verse>
				<verse number="5">ಬೊಕ್ಕ ಪೇತ್ರಗ್, ಐಡ್ದ್ ಬೊಕ್ಕ ಪದ್ರಾಡ್ ಅಪೊಸ್ತಲೆರೆಗ್ ತೋಜಿಯೆ.</verse>
				<verse number="6">ಐಡ್ದ್ ಬೊಕ್ಕ ಒಂಜೇ ಸರ್ತಿಗ್ ಐನೂದೆಡ್ದ್ ಹೆಚ್ಚ್ ಸಹೋದ್ರೆರೆಗ್ ತೋಜಿದ್ ಬತ್ತೆ. ಐಟ್ಟ್ ಹೆಚ್ಚಿನಾಕುಲು ಇನಿಕ್ಲಾ ಉಲ್ಲೆರ್; ಆಂಡ ಕೆಲೆವೆರ್ ಸೈತ್ ಪೋತೆರ್.</verse>
				<verse number="7">ಬೊಕ್ಕ ಆಯೆ ಯಾಕೋಬುಗ್ಲಾ ಮಾತ ಅಪೊಸ್ತಲೆರೆಗ್ಲಾ ತೋಜಿದ್ ಬತ್ತೆ.</verse>
				<verse number="8">ಕಡೆಕ್ಕ್ ಮಾತೆರೆಡ್ದ್ ದಿನ ದಿಂಜದೆ ಪುಟ್ಟಿನ ಬಾಲೆದ ಲೆಕ್ಕನೇ ಆದುಪ್ಪು ಎಂಕ್‌ಲಾ ತೋಜಿಯೆ.</verse>
				<verse number="9">ದಾಯೆಗಂದ್ಂಡ ಯಾನ್ ಅಪೊಸ್ತಲೆರೆಡ್ ಲೆಖ್ಖೊಗು ಬರಂದಿನಾಯೆ. ಯಾನ್ ದೇವೆರೆ ಸಭೆಕ್ ಭಂಗ ಕೊರಿನೆಡ್ದ್ ಅಪೊಸ್ತಲೆ ಅಂದ್‌ದ್ ಲೆಪ್ಪಾವೊನಿಯೆರೆಗ್ಲಾ ತಕ್ಕದಾಯೆ ಅತ್ತ್.</verse>
				<verse number="10">ಆಂಡ ಇತ್ತೆ ಯಾನ್ ಎಂಚಿನಾಯೆ ಆದುಲ್ಲೆನಾ, ಅವು ದೇವೆರೆ ದಯೊಡ್ದೇ. ಎನ ಮಿತ್ತ್ ತೋಜಿದ್ ಬತ್ತಿನ ಆಯನ ದಯ ವ್ಯರ್ಥ ಆದುಪ್ಪುಜಿ. ಯಾನ್ ಬೇತೆ ಅಪೊಸ್ತಲೆರೆಡ್ದ್ ಹೆಚ್ಚಾದ್ ಕಷ್ಟ ಪಡೆಯೆ. ಆಂಡ ಕಷ್ಟ ಪಡೆಯಿನಾಯೆ ಯಾನತ್ತ್, ಎನ ಮಿತ್ತುಪ್ಪುನ ದೇವೆರೆ ದಯೆನೇ.</verse>
				<verse number="11">ಅಂಚಾಂಡ, ಯಾನಾವಡ್, ಅಕುಲಾವಡ್ ದಾನೆ, ಆ ಸಂಗತಿಲೆನೇ ಸಾರಿಯೊಂದುಲ್ಲ, ನಿಕುಲು ಅವೆನ್ ನಂಬಿಯರ್.</verse>
				<verse number="12">ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾಯೆ ಪಂಡ್ದ್ ಸಾರಿನಗ, ನಿಕ್ಲೆಡ್ ಕೆಲೆವೆರ್, ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ತಿಜೆ ಪಂಡ್ದ್ ಪನ್ಪಿನಿ ಎಂಚ?</verse>
				<verse number="13">ದೇವೆರ್ ಸೈತಿನಾಕುಲೆಗ್ ಜೀವ ಕೊರ್ಪಿನವು ಇಜ್ಜಿ ಪನ್ಪಿನವು ನಿಜ ಆಂಡ ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆ ಪಂಡ್ದ್ ಆಂಡ್.</verse>
				<verse number="14">ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದಿಜೆಡ, ಎಂಕುಲೆ ಪ್ರಸಂಗ ಪೊಕ್ಕಡೆದವು; ನಿಕ್ಲೆ ನಂಬಿಕೆಲಾ ಪೊಕ್ಕಡೆದವೇ.</verse>
				<verse number="15">ದೇವೆರ್ ಯೇಸು ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದೆ ಪಂಡ್ದ್ ಎಂಕುಲು ಪಂತ. ಆಂಡ ದೇವೆರ್ ಸೈತಿನಾಕುಲೆನ್ ಲಕ್ಕಾವುಜೆ ಪಂಡ್ದ್ ಸತ್ಯ ಆಂಡ ದೇವೆರ್ ಕ್ರಿಸ್ತನ್ ಲಕ್ಕಾಯಿನೇ ಇಜ್ಜಿ; ಲಕ್ಕಾದೆ ಪಂಡ್ದ್ ಸಾಕ್ಷಿ ಕೊರಿನ ಎಂಕುಲು ದೇವೆರೆ ವಿಷಯೊಡು ಸುಳ್ಳು ಸಾಕ್ಷಿ ಪನ್ಪಿನಾಕುಲಾದ್ ತೋಜಿದ್ ಬತ್ತ.</verse>
				<verse number="16">ಸೈತಿನಾಕುಲು ಲಕ್ಕುಜೆರ್ಡ, ಕ್ರಿಸ್ತೆಲಾ ಸೈತಿನಾಕುಲೆಡ್ದ್ ಲಕ್ಕ್‌ದಿಜೆ.</verse>
				<verse number="17">ಕ್ರಿಸ್ತೆ ಸೈತಿನಾಕುಲೆಡ್ದ್ ಲಕ್ಕಾದಿಜಾಂಡ, ನಿಕ್ಲೆ ನಂಬಿಕೆ ವ್ಯರ್ಥದವು. ನಿಕುಲು ನನಲಾ ಪಾಪೊಡೇ ಉಲ್ಲರ್.</verse>
				<verse number="18">ಉಂದು ಮಾತ್ರ ಅತ್ತಂದೆ ಕ್ರಿಸ್ತನಾಕುಲಾದ್ ನಿದ್ರೆ ಪೋಯಿನಾಕುಲು ನಾಶಾದ್ ಪೋಯೆರ್.</verse>
				<verse number="19">ಈ ಜೀವಮಾನ ಕಾಲ ಪೂರ ಎಂಕುಲು ಕ್ರಿಸ್ತಡ್ ಭರವಸ ದೀವೊಂಡಿನವೇ ಅತ್ತಂದೆ ಬೇತೆ ದಾಲಾ ಇಜ್ಜಿಡ ಮಾತ ನರಮಾನಿಲೆಡ್ದ್ ಕಂಗಾಲಾಯಿನಕುಲೇ ಸರಿ.</verse>
				<verse number="20">ಆಂಡ ಕ್ರಿಸ್ತೆ ನಿಜಾದ್‌ಲಾ ಜೀವ ಆದ್ ಲಕ್ಕ್‌ದ್ ಬೈದೆ ಪನ್ಪಿನವು ಸತ್ಯ. ಸೈತಿನಾಕುಲೆಡ್ ಲಕ್ಕ್‌ದ್ ಬತ್ತಿನೆಟ್ಟ್ ಕ್ರಿಸ್ತೆನೇ ಸುರುತ್ತ ಫಲ ಆಯೆ.</verse>
				<verse number="21">ದಾಯೆಗಂದ್ಂಡ, ಒರಿ ನರಮಾನಿಡ್ದ್ ಮರಣ ಬತ್ತಿಲೆಕ್ಕನೇ ಒರಿ ನರಮಾನಿಡ್ದೇ ಸೈತಿನಾಕುಲೆಡ್ದ್ ಕುಡ ಲಕ್ಕಾವುನಲಾ ಉಂಡು.</verse>
				<verse number="22">ವಾ ರೀತಿಡ್ ಸುರುತ್ತ ನರಮಾನಿ ಆದಾಮುನ ಸಮ್ಮಂಧೊಡ್ದು ಮಾತೆರ್ಲಾ ಸೈಪುನಾಕುಲಾಯೆರಾ, ಅವ್ವೇ ರೀತಿಡ್ ಕ್ರಿಸ್ತನ ಸಮ್ಮಂಧೊಡ್ದು ಮಾತೆರ್ಲಾ ಜೀವ ಆವೆರ್.</verse>
				<verse number="23">ಆಂಡ ಪ್ರತಿ ಒರಿಲಾ ತನ ತನ ಕ್ರಮ ಪ್ರಕಾರ ಜೀವಾದ್ ಲಕ್ಕುವೆರ್, ಕ್ರಿಸ್ತೆ ಸುರುತ್ತ ಫಲ ಆದ್ ಜೀವಾದ್ ಲಕ್ಕಿಯೆ; ಬೊಕ್ಕ ಆಯೆ ಕುಡ ಬನ್ನಗ ಆಯನಾಕುಲುಲಾ ಜೀವಾದ್ ಲಕ್ಕುವೆರ್.</verse>
				<verse number="24">ಬೊಕ್ಕ ಅಂತ್ಯ ಬರ್ಪುಂಡು. ಅಪಗ ಮಾತ ದೊರೆತನೊನು, ಅಧಿಕಾರೊನು, ಮಾತ ಬಲೊನು ಆಯೆ ದೆತ್ತ್‌ದ್ ಪಾಡುವೆ, ಬೊಕ್ಕ ಅಮ್ಮೆ ಆದುಪ್ಪು ದೇವೆರೆಗ್ ರಾಜ್ಯೊನು ಒಚ್ಚಿದ್ ಕೊರ್ಪೆ,</verse>
				<verse number="25">ದಾಯೆಗಂದ್ಂಡ ದೇವೆರ್ ಮಾತ ವೈರಿಲೆನ್ ಕ್ರಿಸ್ತನ ಕಾರ್‌ದಡಿಕ್ ಪಾಡುನ ಮುಟ್ಟ ಆಳೊಡಾಪುಂಡು.</verse>
				<verse number="26">ಮರಣ ಕಡೇತ ವೈರಿ ಆದ್ ನಾಶ ಆಪುಂಡು.</verse>
				<verse number="27">“ದೇವೆರ್ ಮಾತೆನ್ಲಾ ಕ್ರಿಸ್ತನ ಕಾರ್‌ದಡಿಕ್ ಪಾಡ್ದ್ ಆಯಗ್ ಅಧೀನ ಮಲ್ಪುವೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡ್. “ಮಾತೆನ್ಲಾ” ಆಯ ಕಾರ್‌ದಡಿಕ್ ಪಾಡ್ದೆ ಪಂಡಿನಪಗ ಅಧೀನ ಮಲ್ತಿನಾಯೆ ದೇವೆರ್ ಐಟ್ಟ್ ಸೇರ್ದಿಜೆ ಪನ್ಪಿನವು ನಿಗಂಟ್ ಆಂಡ್.</verse>
				<verse number="28">ಬೊಕ್ಕ ದೇವೆರ್ ಮಾತ ವಸ್ತುಲಾ ಮಗನ ಅಧೀನೊಗು ಕೊರಿನೆಡ್ದಾವರ ಮಗೆಲಾ ತನ ದೇವೆರೆಗ್ ಅಧೀನ ಆಪೆ. ಇಂಚ ದೇವೆರ್ ಮಾತೆಟ್ಲಾ ಮಾತಲಾ ಆದುಲ್ಲೆ.</verse>
				<verse number="29">ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ ನಿಕುಲು ಸೈತಿನಾಕುಲೆ ಪುದರ್‌ಡ್ ದೀಕ್ಷಾಸ್ನಾನ ಮಲ್ತೊನುನ ಕ್ರಮ ದಾಯೆಗ್? ಸೈತಿನಾಕುಲು ಲಕ್ಕುಜೆರ್ ಪನ್ಪಿನಾಂಡ ಅಕ್ಲೆಗಾದ್ ದೀಕ್ಷಾಸ್ನಾನ ದಾಯೆಗ್ ಮಲ್ತೊನ್ವೆರ್</verse>
				<verse number="30">ಎಂಕುಲುಲಾ ಪ್ರತಿ ಗಳಿಗೆಡ್ ಸೈಪಿನ ವಿಷಯೊಡು ಪೋಡಿಗೆಡ್ ಉಪ್ಪುನು ದಾಯೆ?</verse>
				<verse number="31">ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡು ಎಂಕ್ ಉಪ್ಪುನ ಪುಗರಿಗೆದ ಮಿತ್ತ್ ಆಜ ದೀದ್ ಪನ್ಪೆ, ಯಾನ್ ದಿನಾಲ ಸೈಯೊಂದು ಉಲ್ಲೆ.</verse>
				<verse number="32">ಯಾನ್ ನರಮಾನಿ ಆಸೆಡ್ ಇತ್ತ್‌ದ್ ಈ ಕಾಡ್ ಮೃಗತ್ತಲೆಕ್ಕ ಎಫೆಸೊಡುಪ್ಪು ಜನೊಕುಲೆಡ ಉರ್ಡೊಡಾಂಡ ಎಂಕ್ ದಾನೆ ಪ್ರಯೋಜನ? ದೇವೆರ್ ಸೈತಿನಾಕುಲೆನ್ ಲಕ್ಕಾವುನವು ಇಜ್ಜಿಡ, “ನಮ ತಿನ್ಕ, ಪರ್ಕ; ದಾಯೆಗಂದ್ಂಡ ಎಲ್ಲೆ ನಮ ಸೈಪ ಅತ್ತಾ?”</verse>
				<verse number="33">ಮೋಸೊಡು ಬೂರಡೆ, “ಪಡಿಕೆಂತಿನಾಕುಲೆ ಒಟ್ಟುಗು ಸೇರೊನುಂಡ ಎಡ್ಡೆ ನಡತೆನ್ ತೆಟ್ಟಾವುಂಡು.”</verse>
				<verse number="34">ಇಂಚಿತ್ತಿನ ಅಮಲ್‌ಡ್ದ್ ಲಕ್ಕ್‌ದ್ ನೀತಿವಂತೆರಾಲೆ; ಪಾಪ ಕೆಲಸೊಲೆನ್ ಬುಡ್ಲೆ. ಕೆಲೆವೆರೆಗ್ ದೇವೆರೆ ವಿಷಯೊಡು ಗೇನನೇ ಇಜ್ಜಿ; ನಿಕ್ಲೆಗ್ ನಾಚಿಗೆ ಆವೊಡು ಅಂದ್‌ದ್ ಉಂದೆನ್ ಪನ್ಪೆ.</verse>
				<verse number="35">ಆಂಡ, “ಸೈತ್‌ದಿನಾಕುಲು ಎಂಚ ಲಕ್ಕುವೆರ್, ಎಂಚಿತ್ತಿ ಶರೀರೊಡು ಬರ್ಪೆರ್?” ಅಂದ್‌ದ್ ಒರಿ ಕೇನೊಲಿ.</verse>
				<verse number="36">ಉಂದು ಬುದ್ಧಿದಾಂತಿ ಪ್ರಶ್ನೆ! ಈ ಬಿತ್ತುನ ಬಿತ್ತ್ ಸೈತ್‌ಜಿಡ ಕೊಡಿಯೆರೆ ಇಜ್ಜಿ,</verse>
				<verse number="37">ಗೇನೊಗು ದೆತ್ತೊನ್ಲೆ; ಈ ಗೋದಿದ ಬಿತ್ತ್ ಆವಡ್, ಬೇತೆ ಒವ್ವೇ ಬಿತ್ತ್ ಆವಡ್ ಬಿತ್ತ್‌ನಗ ಬಜೀ ಬಿತ್ತೇ ಅತ್ತಂದೆ ದುಂಬು ಬುಲೆವೊಡಾಯಿ ದೈನ್ ಬಿತ್ತುಜ.</verse>
				<verse number="38">ಆಂಡ ದೇವೆರ್ ತನ್ಕ್ ಸರಿ ತೋಜುಲೆಕ್ಕ ಐಕ್ ಒಂಜಿ ಶರೀರೊನು ಕೊರ್ಪೆ. ಪ್ರತಿ ಬಿತ್ತ್‌ಗ್ಲಾ ಐಕ್ ತಕ್ಕಂತಿನ ಶರೀರೊನು ಕೊರ್ಪೆ.</verse>
				<verse number="39">ಮಾತ ಶರೀರೊಲುಲಾ ಒಂಜೆ ತರತವು ಆದುಪ್ಪುಜಿ. ನರಮಾನಿನ ಶರೀರ ಬೇತೆ, ಪಶುಕುಲೆನ ಶರೀರ ಬೇತೆ, ಪಕ್ಕಿಲೆನ ಶರೀರ ಬೇತೆ, ಮೀನ್‌ದ ಬೇತೆ.</verse>
				<verse number="40">ಉಂದತ್ತಂದೆ, ಪರಲೋಕದ ಶರೀರೊಲುಲಾ ಉಂಡು, ಭೂಲೋಕದ ಶರೀರೊಲುಲಾ ಉಂಡು, ಪರಲೋಕದ ಶರೀರೊಲೆ ಮೈಮೆ ಬೇತೆನೇ, ಭೂಲೋಕದ ಶರೀರೊಲೆ ಮೈಮೆ ಬೇತೆನೇ.</verse>
				<verse number="41">ಸೂರ್ಯನ ಮೈಮೆ ಒಂಜಿ ತರತವು; ಚಂದ್ರನ ಮೈಮೆ ಬೊಕ್ಕೊಂಜಿ ತರತವು. ನಕ್ಷತ್ರೊಲೆನ ಮೈಮೆ ಕುಡೊಂಜಿ ತರತವು. ಮೈಮೆಡ್ ಒಂಜಿ ನಕ್ಷತ್ರೊಗ್ಲಾ ಕುಡೊಂಜಿ ನಕ್ಷತ್ರೊಗ್ಲಾ ಹೆಚ್ಚಿಕಡಿಮೆ ಉಂಡತ್ತಾ?</verse>
				<verse number="42">ಸೈತಿನಾಕುಲು ಕುಡ ಲಕ್ಕುನೆಟ್ಲಾ ಅಂಚೆನೇ ಆಪುಂಡು. ಕೌಂತಿನ ಶರೀರ ನಾಶಾದ್ ಪೋಪುಂಡು, ಜೀವೊಡು ಲಕ್ಕಾಯಿನ ಶರೀರ ನಾಶಾಪುಜಿ.</verse>
				<verse number="43">ಕೌಂತಿನ ಶರೀರ ಪೊರ್ಲುದಾಂತೆ ಬಲದಾಂತೆ ಆದ್ ಪೋಪುಂಡು. ಜೀವೊಡು ಲಕ್ಕಾಯಿನ ಶರೀರ ಮೈಮೆಡ್ಲಾ ಬಲೊಟ್ಲಾ ಉಪ್ಪುಂಡು.</verse>
				<verse number="44">ಕೌಂತಿನ ಶರೀರ ನರಭಾವ ಆದುಂಡು; ಜೀವೊಡು ಲಕ್ಕುನ ಶರೀರ ಆತ್ಮೀಕ ಆದುಂಡು. ನರಭಾವದ ಶರೀರೊಲು ಉಪ್ಪುನಾಂಡ ಆತ್ಮೀಕ ಶರೀರೊಲುಲಾ ಉಂಡು.</verse>
				<verse number="45">“ಸುರುತ್ತ ನರಮಾನಿ ಆದಾಮೆ ಬದುಕುನ ಪ್ರಾಣಿ ಆಯೆ,” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡತ್ತಾ. ಕಡೇತ ಆದಾಮೆ ಪಂಡ ಕ್ರಿಸ್ತೆ ಜೀವ ಕೊರ್ಪಿನಾಯೆ ಆದುಲ್ಲೆ.</verse>
				<verse number="46">ಆತ್ಮಭಾವದವು ಸುರುತ್ತವು ಅತ್ತ್, ನರಭಾವದವು ಸುರುತ್ತವು. ಐಡ್ದ್ ಬೊಕ್ಕ ಆತ್ಮಭಾವದವು.</verse>
				<verse number="47">ಸುರುತ್ತ ನರಮಾನಿ ಭೂಮಿದ ಮಣ್ಣ್‌ಡ್ದ್ ಉಂಡಾಯಿನಾಯೆ, ರಡ್ಡನೆ ನರಮಾನಿ ಪಂಡ ಕ್ರಿಸ್ತೆ ಪರಲೋಕೊಡ್ದು ಬೈದಿನಾಯೆ.</verse>
				<verse number="48">ಭೂಮಿದಾಕುಲು ಮಣ್ಣ್‌ಡ್ ಉಂಡಾಯಿನ ನರಮಾನಿಲೆಕ್ಕ ಆಂಡ ಪರಲೋಕದಾಕುಲು ಪರಲೋಕೊಡ್ದು ಬತ್ತಿ ನರಮಾನಿಲೆಕ್ಕ.</verse>
				<verse number="49">ಎಂಕುಲು ಮಣ್ಣ್‌ಡ್ದ್ ಪುಟ್ಟಿ ಆದಾಮುನ ಸ್ವರೂಪ ಪಾಡೊಂಡಿಲೆಕ್ಕನೇ ಪರಲೋಕೊಡ್ದು ಬತ್ತಿ ಕ್ರಿಸ್ತನ ಸ್ವರೂಪೊನ್ಲಾ ಪಾಡೊನ್ವ.</verse>
				<verse number="50">ಸಹೋದ್ರೆರೇ, ಯಾನ್ ಪನ್ಪಿನಿ ದಾನೆಂದ್ಂಡ, ನಮ ಮಾಸ ನೆತ್ತೆರ್ ಇತ್ತಿನ ಶರೀರೊಲು ದೇವೆರೆ ರಾಜ್ಯೊಗು ಬಾಧ್ಯ ಆಪುಜಿ. ನಾಶ ಆಪಿನ ಶರೀರ ನಾಶ ಆವಂದಿನೆಕ್ಕ್ ಬಾಧ್ಯ ಆಪುಜಿ.</verse>
				<verse number="51">ಕೇನ್ಲೆ ಇದ ಮುಟ್ಟ ಗುಟ್ಟುಡಿತ್ತಿನ ಒಂಜಿ ಸಂಗತಿನ್ ನಿಕ್ಲೆಗ್ ತೆರಿಪಾವೆ. ನಮ ಮಾತೆರ್ಲಾ ಸೈಪುಜ; ಆಂಡ ದೇವೆರ್ ಎಂಕ್ಲೆನ್ ಮಾತೆರೆನ್ಲಾ ಬದಲಾವಣೆ ಮಲ್ಪುವೆ.</verse>
				<verse number="52">ಆಂಡ ಕಡೇತ ತುತೂರಿದ ಶಬ್ಧ ಆನಗ ಒಂಜಿ ಕ್ಷಣೊಟೇ ಕಣ್ಣ್ ಮುಚ್ಚಿ ಜಪ್ಪುನೆತ್ತ ಉಲಯಿ ಉಂದು ಆಪುಂಡು. ತುತೂರಿ ಉರ್ಪುನಗ ದೇವೆರ್ ಸೈತಿನಾಕುಲೆನ್ ಲಕ್ಕಾದ್ ನಾಶ ಆವಂದಿನಾಕುಲಾದ್ ನಮ ಬದಲಾದ್ ಪೋಪ.</verse>
				<verse number="53">ದಾಯೆಗಂದ್ಂಡ ನಾಶಾದ್ ಪೋಪಿನ ಈ ಶರೀರ ನಾಶಾವಂದಿನೆನ್ ಪಾಡೊನುಂಡು; ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನುನವು ಅಗತ್ಯ.</verse>
				<verse number="54">ನಾಶಾಪಿನ ಈ ಶರೀರ ನಾಶಾವಂದಿನೆನ್ ಪಾಡೊನ್ನಗ, ಮರಣೊಗು ಅಧೀನವಾದುಪ್ಪು ಈ ಶರೀರ ಅಮರತ್ತ್ವೊನು ಪಾಡೊನ್ನಗ ಬರೆದುಪ್ಪು ಈ ಪಾತೆರ ನೆರವೇರುಂಡು. ಆ ಪಾತೆರ ದಾನೆಂದ್ಂಡ, “ಮರಣೊನು ನಾಶ ಮಲ್ತ್‌ದ್, ಜಯೊನು ಜೈಸಿಯೆ.”</verse>
				<verse number="55">“ ಓ ಮರಣ, ನಿನ ಜಯ ಓಲು? ಓ ಮರಣ, ನಿನ ವಿಷತ ಕೊಂಡಿ ಓಲು?”</verse>
				<verse number="56">ಮರಣದ ಕೊಂಡಿ ಪಾಪನೇ; ಬೊಕ್ಕ ಪಾಪದ ಬಲೊಕು ಆಧಾರ ಮೋಶೆನ ನ್ಯಾಯಕಟ್ಟಲೆ.</verse>
				<verse number="57">ಆಂಡ, ದೇವೆರ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಂಕ್ ಜಯೊನು ಕೊರ್ತೆ, ಆಯಗ್ ಉಪಕಾರ ಸ್ತುತಿ ಆವಡ್.</verse>
				<verse number="58">ಅಂಚಾಯಿನೆಡ್ದ್ ಎನ ಪ್ರೀತಿದ ಸಹೋದ್ರೆರೇ, ನಿಕುಲು ಸ್ಥಿರಚಿತ್ತೊಡ್ಲಾ ದೃಢಾದ್‌ಲಾ ಉಪ್ಪುಲೆ. ನಿಕುಲು ಕರ್ತವ ಪುದರ್‌ಡ್ ಮಲ್ಪು ಪ್ರಯಾಸ ವ್ಯರ್ಥ ಆಪುಜಿ ಅಂದ್‌ದ್ ಎನ್ನೊಂದು ಕರ್ತವ ಕೆಲಸೊಲೆನ್ ಏಪಲಾ ಮಸ್ತ್ ಆಸಕ್ತಿಡ್ ಮಲ್ಪುಲೆ.</verse>
			</chapter>
			<chapter number="16">
				<verse number="1">ದೇವಜನೊಕುಲೆಗ್ ವಂತಿಗೆದ ಬಗೆಟ್ ಪನ್ಪಿನಿ ದಾನೆಂದ್ಂಡ, ಯಾನ್ ಗಲಾತ್ಯದ ಸಭೆಲೆಗ್ ಎಂಚ ನೇಮಿಸಿಯೆನಾ ಅಂಚೆನೆ ನಿಕುಲುಲಾ ಮಲ್ಪುಲೆ.</verse>
				<verse number="2">ಯಾನ್ ಬನ್ನಗ ವಂತಿಗೆ ಕೂಡಾವುನ ಅಗತ್ಯ ಆವಂದಿಲೆಕ್ಕ ನಿಕ್ಲೆಡ್ ಪ್ರತಿ ಒರಿಲಾ ಪ್ರತಿ ವಾರದ ಸುರುತ್ತ ದಿನೊಟು, ದೇವೆರ್ ತನ್ಕುಲೆಗ್ ಕೊರಿ ಸಂಪಾದನೆಡ್ ಕೂಡಾದ್ ದೀವೊನಡ್.</verse>
				<verse number="3">ಬೊಕ್ಕ ಯಾನ್ ಬತ್ತಿನಪಗ ನಿಕುಲು ಏರೆನ್ ಯೋಗ್ಯದಾಕುಲು ಅಂದ್‌ದ್ ಪನ್ಪರಾ ಅಕ್ಲೆಡೊಪ್ಪ ನಿಕ್ಲೆ ಕಾಣಿಕೆದ ಒಟ್ಟುಗು ಕಾಕಜಿನ್ ಕೊರ್ದು ಯಾನ್ ಯೆರೂಸಲೇಮುಗು ಕಡಪುಡ್ವೆ.</verse>
				<verse number="4">ಯಾನ್ಲಾ ಪೋಪಿನವು ಸರಿ ತೋಜಿಂಡ ಅಕುಲು ಎನ ಒಟ್ಟುಗು ಬರೊಲಿ.</verse>
				<verse number="5">ಯಾನ್ ಮಕೆದೋನ್ಯೊನು ಕಡತ್‌ದ್ ಪೋವೆರೆ ಉಪ್ಪುನೆಡ್ದ್, ಮಕದೋನ್ಯನ್ ಕಡತ್‌ದ್ ಪೋಯಿ ಬೊಕ್ಕ ನಿಕ್ಲೆನಡೆಗ್ ಬರ್ಪೆ.</verse>
				<verse number="6">ನಿಕ್ಲೆಡೊಪ್ಪ ಒಂತೆ ಸಮಯ ಉಂತುದು ಚಳಿಕಾಲ ಮುಟ್ಟ ಉಂತೆರೆ ಯಾವು. ಬೊಕ್ಕ ಯಾನ್ ಪೋವೊಡಾಯಿನ ಜಾಗ್‌ಗ್ ನಿಕುಲು ಎಂಕ್ ಸಹಾಯ ಮಲ್ಪುಲೆ.</verse>
				<verse number="7">ಯಾನ್ ಪೋಪಿ ಸಾದಿಡ್ ನಿಕ್ಲೆನ್ ಇತ್ತೆ ತೂವೆರೆ ಎಂಕ್ ಮನಸಿಜ್ಜಿ. ಕರ್ತವೆ ದಯ ಮಲ್ತೆಡ ನಿಕ್ಲೆಡೊಪ್ಪ ಒಂತೆ ಸಮಯ ಉಂತೆರೆ ಎಂಕ್ ಭರವಸ ಉಂಡು.</verse>
				<verse number="8">ಆಂಡ ಪಂಚಾಶತಮ ಪರ್ಬ ಮುಟ್ಟ ಎಫೆಸೊಡು ಉಂತುವೆ,</verse>
				<verse number="9">ದಾಯೆಗಂದ್ಂಡ ಸೇವೆ ಸಫಲ ಆಪಿನ ಮಲ್ಲ ಬಾಕಿಲ್ ಜತ್ತ್‌ದುಂಡು, ಬೊಕ್ಕ ವಿರೋಧಿಲುಲಾ ಮಸ್ತ್ ಜನ ಉಲ್ಲೆರ್.</verse>
				<verse number="10">ತಿಮೋಥಿ ಬತ್ತೆಡ ಆಯೆ ನಿಕ್ಲೆಡೊಪ್ಪ ಪೋಡಿಗೆದಾಂತೆ ಉಪ್ಪುಲೆಕ್ಕ ತೂವೊನ್ಲೆ. ಆಯೆ ಎನಲೆಕ್ಕನೇ ಕರ್ತವ ಸೇವೆನ್ ಮಲ್ತೊಂದುಲ್ಲೆ.</verse>
				<verse number="11">ಅಂಚಾದ್ ಏರ್ಲಾ ಆಯನ್ ಹೀನ ಮಲ್ಪಂದೆ ಉಪ್ಪಡ್. ಬೊಕ್ಕ ಸಮಾಧಾನೊಡು ಆಯನ್ ಎನ ಕೈತಲ್‌ ಕಡಪುಡ್ದು ಕೊರ್ಲೆ; ದಾಯೆಗಂದ್ಂಡ ಯಾನ್ ಆಯನ್ ಸಹೋದ್ರೆರೊಟ್ಟುಗು ಬರ್ಪಿನ ಸಾದಿ ತೂವೊಂದುಲ್ಲೆ.</verse>
				<verse number="12">ಸಹೋದರೆ ಆಯಿ ಅಪೊಲ್ಲೋಸನ ವಿಚಾರ ದಾನೆಂದ್ಂಡ, ಆಯೆ ಸಹೋದ್ರೆರೊಟ್ಟುಗು ನಿಕ್ಲೆ ಕಡೆಕ್ಕ್ ಬರೊಡಂದ್‌ದ್ ಯಾನ್ ಆಯಡ ದಿಂಜ ನಟ್ಟೊಂಡೆ. ಆಂಡ ಇತ್ತೆ ಬರಿಯೆರೆಗ್ ಆಯಗ್ ಒಂತೆಲಾ ಮನಸಿಜ್ಜಾಂಡ್. ಆಂಡ ಆಯೆ ಅನುಕೂಲ ಆಯಿನಪಗ ಬರುವೆ.</verse>
				<verse number="13">ಎಚ್ಚರಿಕೆ ಆದುಪ್ಪುಲೆ; ಕ್ರಿಸ್ತ ನಂಬಿಕೆಡ್ ದೃಢಾದ್ ಉಂತುಲೆ. ಬಲಿಷ್ಟೆರಾದುಪ್ಪುಲೆ.</verse>
				<verse number="14">ನಿಕುಲು ಮಲ್ಪುನೆನ್ ಮಾತೆನ್ಲಾ ಪ್ರೀತಿಡ್ ಮಲ್ಪುಲೆ.</verse>
				<verse number="15">ಆಂಡ ಸಹೋದ್ರೆರೇ, ಸ್ತೇಫನನ ಇಲ್ಲದಾಕುಲು ಅಖಾಯೊಡು ಸುರುತ್ತ ಫಲ ಪಂಡ್ದ್‌ಲಾ ಅಕುಲು ದೇವಜನೊಕುಲೆ ಸೇವೆ ಮಲ್ಪುನೆಕ್ಕ್ ಅಕ್ಲೆನೇ ಒಚ್ಚಿದ್ ಕೊರ್ತಿನಾಕುಲು ಅಂದ್‌ದ್ ನಿಕುಲು ತೆರಿದರತ್ತಾ? ನಿಕುಲು ಇಂಚಿತ್ತಿನಾಕುಲೆಗ್ಲಾ ಸೇವೆಡ್ ಸಹಾಯ ಮಲ್ಪುನಾಕುಲೆಗ್ಲಾ ಪ್ರಯಾಸ ಬುಡ್ತಿನಾಕುಲೆಗ್ಲಾ ಒಳಗಾದ್ ಉಪ್ಪೊಡಂದ್‌ದ್ ಯಾನ್ ನಟ್ಟೊನ್ವೆ.</verse>
				<verse number="16"></verse>
				<verse number="17">ಸ್ತೇಫನೆಲಾ ಫೊರ್ತುನಾತೆಲಾ ಅಖಾಯಿಕೆಲಾ ಬತ್ತಿನೆಟ್ಟ್ ಎಂಕ್ ಸಂತೋಷ ಆಂಡ್. ಎಂಕ್ ನಿಕ್ಲೆಡ್ದ್ ಆವಂದಿನೆನ್ ಅಕುಲು ಪರಿಹಾರ ಮಲ್ತೆರ್.</verse>
				<verse number="18">ಅಕುಲು ಎನ ಆತ್ಮೊಗ್ಲಾ ನಿಕ್ಲೆ ಆತ್ಮೊಗ್ಲಾ ಪೊಸ ಚೈತನ್ಯ ಪುಟ್ಟಾಯೆರ್. ಇಂಚಿತ್ತಿನಾಕುಲೆನ್ ಗಣ್ಯಮಲ್ಪುಲೆ.</verse>
				<verse number="19">ಆಸ್ಯ ಸೀಮೆದ ಸಭೆತಾಕುಲು ನಿಕ್ಲೆಗ್ ವಂದನೆ ತೆರಿಪಾವೆರ್. ಅಕ್ವಿಲೆಲಾ ಪ್ರಿಸ್ಕಿಲಲಾ ತನ್ಕುಲೆ ಇಲ್ಲಡ್ ಕೂಡ್ದು ಬರ್ಪಿ ಸಭೆತಾಕುಲೆಡೊಪ್ಪ ಕರ್ತವಡ್ ನಿಕ್ಲೆನ್ ಮಸ್ತ್ ವಂದಿಪುವೆರ್.</verse>
				<verse number="20">ಮಾತ ಸಹೋದ್ರೆರೆಡ್ದ್ ನಿಕ್ಲೆಗ್ ವಂದನೆಲು. ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ.</verse>
				<verse number="21">ಪೌಲು ಪನ್ಪಿ ಯಾನ್ ಸ್ವಂತ ಕೈಟ್ ನಿಕ್ಲೆಗ್ ವಂದನೆಲೆನ್ ಬರೆತೆ.</verse>
				<verse number="22">ಏರಾಂಡಲಾ ಕರ್ತವನ್ ಪ್ರೀತಿ ಮಲ್ತ್‌ಜೆಡ ಆಯೆ ಶಾಪಗ್ರಸ್ತೆ ಆವಡ್. ಮಾರನಥ ಪಂಡ ಎಂಕುಲೆ ಕರ್ತವ ಬಲ!</verse>
				<verse number="23">ನಮ ಕರ್ತವೆ ಆದುಪ್ಪು ಯೇಸುನ ದಯ ನಿಕ್ಲೆಡೊಪ್ಪ ಉಪ್ಪಡ್.</verse>
				<verse number="24">ಕ್ರಿಸ್ತ ಯೇಸುಡು ಎನ ಪ್ರೀತಿ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.</verse>
			</chapter>
		</book>
		<book number="47">
			<chapter number="1">
				<verse number="1">ದೇವೆರೆ ಚಿತ್ತದ ಪ್ರಕಾರ ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲುಲಾ ನಮ ಸಹೋದರೆ ಆಯಿ ತಿಮೋಥಿ ಕೊರಿಂಥ್ಯೊಡುಪ್ಪು ದೇವೆರೆ ಸಭೆಕ್ಲಾ ಅಖಾಯ ಸೀಮೆಡುಪ್ಪು ಮಾತ ದೇವಜನೊಕುಲೆಗ್ಲಾ ಈ ಪತ್ರಿಕೆನ್ ಬರೆಪಿನಿ.</verse>
				<verse number="2">ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ದಯಲಾ ಸಮಾಧಾನಲಾ ಆವಡ್.</verse>
				<verse number="3">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದೇವೆರ್‌ಲಾ ಅಮ್ಮೆಲಾ ಆದುಪ್ಪುನಾಯಗ್ ಉಪಕಾರ ಸ್ತುತಿ ಆವಡ್; ಆಯೆ ಕನಿಕರ ಇತ್ತಿ ಅಮ್ಮೆ ಮಾತ ರೀತಿಡ್ ಆದರಿಪುನಾಯೆಲಾ ಆದುಲ್ಲೆ.</verse>
				<verse number="4">ನಂಕ್ ಉಂಡಾಪಿ ಮಾತ ಭಂಗೊಲೆಡ್ಲಾ ಆಯೆ ನಮನ್ ಆದರಿಪುವೆ. ಇಂಚ ದೇವೆರೆಡ್ದ್ ನಂಕಾಪಿ ಅವ್ವೇ ಆಧಾರೊಣೆಲೆಡ್ದ್ ನಮ ತರತರತ ಭಂಗೊಡು ಬೂರ್ದಿನಾಕುಲೆನ್ ಆದರಿಪೆರೆಗ್ ಶಕ್ತೆರಾಪ.</verse>
				<verse number="5">ದಾಯೆಗಂದ್ಂಡ ಕ್ರಿಸ್ತಡ್ ನಂಕ್ ಭಂಗೊಲು ಎಂಚ ಹೆಚ್ಚಾಪುಂಡಾ ಅಂಚೆನೇ ಕ್ರಿಸ್ತಡ್ದ್ ನಂಕ್ ಆಧರಣೆಲಾ ತಿಕ್ಕುಂಡು.</verse>
				<verse number="6">ಎಂಕುಲು ಭಂಗ ಅನುಭವ ಮಲ್ತ್‌ದಿನೆಡ್ದ್ ನಿಕ್ಲೆಗ್ ಆಧರಣೆಲಾ ರಕ್ಷಣೆಲಾ ಉಂಡಾಪುಂಡು. ಎಂಕ್ಲೆಗ್ ಆಧರಣೆ ಆಂಡ ಐಟ್ಟ್ ನಿಕ್ಲೆಗ್ ಆಧರಣೆ ಆಪುಂಡು. ಅಂಚೆನೇ ಎಂಕುಲು ಸಹಿಸೊನಿನ ಭಂಗೊಲೆನ್ ನಿಕುಲುಲಾ ತಾಳ್ಮೆಡ್ ಸಹಿಸೊನಿಯೆರೆ ನಿಕ್ಲೆಗ್ ಬಲ ಕೊರ್ಪುಂಡು.</verse>
				<verse number="7">ನಿಕುಲು ಎಂಕುಲೆ ಭಂಗೊಲೆಡ್ ಪಾಲ್‌ದಾರೆರಾಯಿ ಲೆಕ್ಕನೇ ಆಧಾರಣೆಲೆಡ್ಲಾ ಪಾಲ್‌ದಾರೆರಾದುಲ್ಲರ್ ಅಂದ್‌ದ್ ಎಂಕ್ಲೆಗ್ ತೆರಿದಿತ್ತಿನೆಡ್ದ್ ನಿಕ್ಲೆ ಸಂಗತಿಡ್ ಎಂಕುಲೆಡುಪ್ಪು ಭರವಸ ಸ್ಥಿರ ಆದುಂಡು.</verse>
				<verse number="8">ಸಹೋದ್ರೆರೇ, ಆಸ್ಯ ಸೀಮೆಡ್ ಎಂಕ್ಲೆಗಾಯಿ ಭಂಗದ ಸಂಗತಿಡ್ ನಿಕ್ಲೆಗ್ ತೆರಿದುಪ್ಪಡ್ ಅಂದ್‌ದ್ ಎಂಕುಲು ಬಯಕುವ. ಎಂಕುಲು ಬದ್‌ಕ ಇನ್ಪಿ ಆಸೆದಾಂತಿನಾತ್ ಬಲ ಮೀರು ಭಂಗೊಲೆನ್ ಅನುಭವ ಮಲ್ತ್‌ದ್ ಕುಂದುದು ಪೋಯ.</verse>
				<verse number="9">ಸತ್ಯಾದ್ ಮರಣ ಕಂಡಿತ ಪನ್ಪಿ ನಿಗಂಟ್ ಎಂಕ್ಲೆಗಾಂಡ್. ಆಂಡ ಎಂಕುಲು ಎಂಕುಲೆ ಮಿತ್ತ್ ಭರವಸೆ ದೀವೊನಂದೆ ಸೈತಿನಾಕುಲೆನ್ ಲಕ್ಕಾವುನ ದೇವೆರೆ ಮಿತ್ತೇ ಭರವಸ ದೀಪಿನಾಕುಲು ಆದುಪ್ಪೊಡು ಅಂದ್‌ದ್ ಇಂಚ ಆಂಡ್.</verse>
				<verse number="10">ಆಯೆ ಎಂಕ್ಲೆನ್ ಅಂಚಿತ್ತಿ ಭಯಂಕರ ಮರಣೊಡ್ದು ತಪ್ಪಾಯೆ; ದುಂಬಗ್ಲಾ ತಪ್ಪಾವೆ. ಆಯೆ ನನಲಾ ಎಂಕ್ಲೆನ್ ತಪ್ಪಾವೆ ಅಂದ್‌ದ್ ಎಂಕ್ಲೆಗ್ ಆಯ ಮಿತ್ತ್ ಭರವಸ ಉಂಡು.</verse>
				<verse number="11">ಐಕ್ ನಿಕ್ಲೆನ ಪ್ರಾರ್ಥನೆಡ್ದ್ ಎಂಕ್ಲೆಗ್ ಸಹಾಯ ಆಪುಂಡು. ಅಂಚಾದ್ ಮಸ್ತ್ ಜನೊಕುಲೆನ ಪ್ರಾರ್ಥನೆಡ್ದ್ ಎಂಕ್ಲೆಗ್ ತಿಕ್ಕುನ ಉಪಕಾರೊಗಾದ್ ಮಸ್ತ್ ಜನೊಕುಲೆಡ್ದ್ ದೇವೆರೆಗ್ ಸ್ತುತಿ ಕೊರ್ಪಿಲೆಕ್ಕ ಆಪುಂಡು.</verse>
				<verse number="12">ಎಂಕುಲು ನರಮಾನಿ ಗೇನೊನು ಅತ್ತಂದೆ, ದೇವೆರೆ ದಯೊನು ಆಶ್ರಯ ಮಲ್ತೊಂದ. ದೇವೆರೆಡ್ದ್ ಉಂಡಾಪಿನ ಸಜ್ಜನಿಗೆಡ್ಲಾ ಕಪಟದಾಂತೆಲಾ ಈ ಲೋಕೊಡು ವಿಶೇಷವಾದ್ ನಿಕ್ಲೆ ಎದುರುಡು ನಡತೊಂಡ ಅಂದ್‌ದ್ ಎಂಕುಲೆ ಮನಸ್ ಸಾಕ್ಷಿ ಪನ್ಪುಂಡು; ಉಂದೇ ಎಂಕ್ಲೆಗ್ ಉಪ್ಪುನ ಪುಗರಿಕೆ.</verse>
				<verse number="13">ನಿಕುಲು ಎಂಕುಲೆ ಪತ್ರಿಕೆಲೆಡ್ ಓದುದು ತೆರಿಯುನ ವಿಷಯಲೆನೇ ಅತ್ತಂದೆ ಬೇತೆ ವಾ ವಿಷಯೊಲೆನ್ಲಾ ನಿಕ್ಲೆಗ್ ಬರೆತ್‌ಜ. ನಿಕುಲು ಎಂಕ್ಲೆನ್ ಒಂತೆ ತೆರಿದಿತ್ತಿಲೆಕ್ಕನೇ ನನಲಾ ಹೆಚ್ಚ್ ತೆರಿಯೊನ್ವರ್ ಪನ್ಪಿ ನಿರೀಕ್ಷೆ ಯಾನ್ ಮಲ್ಪುವೆ. ಅಪಗ ನಿಕುಲುಲಾ ಕರ್ತವೆ ಆದುಪ್ಪು ಯೇಸು ಕುಡೊರ ಬರ್ಪಿ ದಿನೊಟು ಎಂಕುಲು ನಿಕ್ಲೆಗ್ ಪುಗರಿಕೆಗ್ ಕಾರಣ ಆದುಲ್ಲ. ಅಂಚೆನೇ ನಿಕುಲುಲಾ ಎಂಕ್ಲೆಗ್ ಪುಗರಿಕೆ ಕನವರ್.</verse>
				<verse number="14"></verse>
				<verse number="15">ಎಂಕ್ ಇಂಚಿತ್ತಿ ಮಾತ ವಿಷಯೊಲೆಡ್ ಭರವಸ ಇತ್ತಿನೆಡ್ದಾವರ ನಿಕ್ಲೆಗ್ ರಡ್ಡ್ ಸರಿ ಎಂಕುಲೆಡ್ದ್ ದಯತ ವರ ತಿಕ್ಕುಲೆಕ್ಕ ಯಾನ್ ಸುರುಟ್ಟು ನಿಕ್ಲೆ ಕೈತಲ್‌ ಬರೊಡು ಅಂದ್‌ದ್ ಎನ್ನ್‌ದಿತ್ತೆ.</verse>
				<verse number="16">ಸುರುಟ್ಟು ನಿಕ್ಲೆ ಕೈತಲ್‌ ಬತ್ತ್‌ದ್ ಅಲ್ತ್‌ಡ್ದ್ ಮಕೆದೋನ್ಯೊಗು ಪೋದು, ಕುಡ ನಿಕ್ಲೆನ ಕೈತಲ್‌ ಬತ್ತ್‌ದ್ ಅಲ್ತ್‌ಡ್ದ್ ನಿಕುಲು ಎನನ್ ಯೂದಾಯೊಗು ಕಡಪುಡೊಡು ಅಂದ್‌ದ್ ಎನ್ನ್‌ದಿತ್ತೆ.</verse>
				<verse number="17">ಇಂಚ ಎನ್ನುನೆಟ್ಟ್ ಯಾನ್ ಹಗುರ ಮನಸ್‌ದಾಯೆ ಆದಿತ್ತೆನಾ? ಯಾನ್ ಎನ್ನುನೆನ್ ಎನ ಬುದ್ಧಿಡ್ ಎನ್ನ್‌ದ್ ಒರ “ಅಂದ್,” ಪಂಡಿ ಬೊಕ್ಕ ಕುಡೊರ “ಅತ್ತ್,” ಅಂದ್‌ದ್ ನರಮಾನಿ ಸ್ವಭಾವೊಡು ಪನ್ಪಿನಾಯಲೆಕ್ಕ ಆದುಲ್ಲೆನಾ?</verse>
				<verse number="18">ದೇವೆರ್ ನಂಬಿಗಸ್ತೆ ಆದುಪ್ಪುನೆಡ್ದ್ ಎಂಕುಲು ನಿಕ್ಲೆಗ್ ಪಂಡಿ ಪಾತೆರ ಒಂಜಿ ಸರಿ “ಅಂದ್,” ಅಂದ್‌ದ್ ಬೊಕ್ಕೊರ “ಅತ್ತ್,” ಆದುಪ್ಪುಜಿ.</verse>
				<verse number="19">ಯಾನ್, ಸಿಲ್ವಾನೆ, ತಿಮೋಥಿ ನಿಕ್ಲೆಡ್ ಪ್ರಚಾರ ಮಲ್ತಿನ ದೇವೆರೆ ಮಗೆ ಆದುಪ್ಪು ಯೇಸು ಕ್ರಿಸ್ತೆ ಒಂಜಿ ಕ್ಷಣೊಟು “ಅಂದ್,” ಬೊಕ್ಕೊಂಜಿ ಕ್ಷಣೊಟು “ಅತ್ತ್,” ಪಂಡ್ದ್‌ಲಾ ಇತ್ತ್‌ಜಿ. ಯೇಸು ಕ್ರಿಸ್ತಡ್ ಏಪಲಾ “ಅಂದ್,” ಪಂಡ್ದೇ ಇತ್ತ್ಂಡ್.</verse>
				<verse number="20">ದಾಯೆಗಂದ್ಂಡ ದೇವೆರೆ ವಾಗ್ದಾನೊಲು ಏತ್ ಇತ್ತ್ಂಡಲಾ ಅವು ಯೇಸು ಕ್ರಿಸ್ತಡ್ “ಅಂದ್‌ಲಾ,” ಆಯಡ್ ನಿಜಲಾ ಆದುಂಡು. ಅವೆಡ್ದಾವರ ದೇವೆರೆ ಮೈಮೆ ಆಪಿಲೆಕ್ಕ ಯೇಸು ಕ್ರಿಸ್ತಡ್ ಎಂಕುಲು “ಆಮೆನ್,” ಪನ್ಪ.</verse>
				<verse number="21">ಆಂಡ ಎಂಕ್ಲೆನ್ ನಿಕ್ಲೆಡೊಪ್ಪ ಕ್ರಿಸ್ತ ಕಡೆಕ್ಕ್ ಸ್ಥಿರ ಮಲ್ತ್‌ದ್, ಎಂಕ್ಲೆಗ್ ಅಭಿಷೇಕ ಕೊರಿನಾಯೆ ದೇವೆರೇ;</verse>
				<verse number="22">ಆಯೆ ನಂಕ್ ಧನಿ ಆದ್ ಮುದ್ರೆ ಪಾಡ್ದ್ ಪರಿಶುದ್ಧಾತ್ಮನ್ ನಮ ಉಡಲ್‌ಡ್ ಸಂಚಿಕಾರ ಆದ್ ಕೊರ್ತೆ.</verse>
				<verse number="23">ಆಂಡ ಎನ ಪ್ರಾಣದ ಮಿತ್ತ್ ದೇವೆರೆನ್ ಸಾಕ್ಷಿಗ್ ಲೆತ್ತ್‌ದ್ ಯಾನ್ ನಿಕ್ಲೆಗ್ ತೊಂದರೆ ಆವೆರೆ ಬಲ್ಲಿ ಪಂಡ್ದೇ ಕೊರಿಂಥಗ್ ಬತ್ತ್‌ಜಿ.</verse>
				<verse number="24">ಎಂಕುಲು ನಂಬಿಕೆದ ವಿಷಯೊಡು ನಿಕ್ಲೆನ ಮಿತ್ತ್ ಯಜಮಾನಿಕೆ ಮಲ್ಪುನಾಕುಲು ಅತ್ತ್. ನಿಕುಲು ನಂಬಿಕೆದ ಸಂಗತಿಡ್ ಸ್ಥಿರಾದ್ ಇತ್ತಿನೆಡ್ದ್ ನಿಕ್ಲೆನ ಸಂತೊಷೊಗು ಎಂಕುಲು ಜತೆಸೇವಕೆರಾದುಲ್ಲ.</verse>
			</chapter>
			<chapter number="2">
				<verse number="1">ಆಂಡ ಯಾನ್ ಕುಡೊರ ನಿಕ್ಲೆನಡೆಗ್ ಬನ್ನಗ ದುಃಖೊಡು ಬರ್ಪುಜಿ ಅಂದ್‌ದ್ ತೀರ್ಮಾನ ಮಲ್ತೊಂಡೆ.</verse>
				<verse number="2">ದಾಯೆಗಂದ್ಂಡ, ಯಾನ್ ನಿಕ್ಲೆಗ್ ದುಃಖ ಪುಟ್ಟಾಂಡ ಎಂಕ್ ಸಂತೋಷ ಕೊರ್ಪಿನಾಯೆ ಏರುಲ್ಲೆರ್? ಎನಡ್ದ್ ದುಃಖ ಆಯಿನಾಕುಲು ನಿಕುಲೇ ಅತ್ತಾ?</verse>
				<verse number="3">ಅಂಚಾಯಿನೆಡ್ದ್ ಯಾನ್ ಬತ್ತಿನಪಗ ಎಂಕ್ ಸಂತೋಷ ಕೊರ್ಪಿನಾಕುಲೆಡ್ದೇ ದುಃಖ ಉಂಡಾವೆರೆ ಬಲ್ಲಿ ಅಂದ್‌ದ್ ಉಂದೆನ್ ಪತ್ರಿಕೆಡ್ ನಿಕ್ಲೆಗ್ ಬರೆದ್ ತೆರಿಪಾದೆ; ಎನ ಸಂತೋಷ ನಿಕ್ಲೆನ ಮಾತೆರೆನ ಸಂತೋಷ ಅಂದ್‌ದ್ ನಿಕ್ಲೆ ಮಾತೆರೆ ಸಂಗತಿಡ್ ಎಂಕ್ ಭರವಸ ಉಂಡು,</verse>
				<verse number="4">ನಿಕ್ಲೆ ಮಿತ್ತ್ ಎಂಕುಪ್ಪು ಮಸ್ತ್ ಪ್ರೀತಿನ್ ನಿಕುಲು ತೆರಿಯೊನೊಡು ಪಂಡ್ದೇ ಯಾನ್ ಮಸ್ತ್ ಕಣ್ಣೀರ್ ಬುಡ್ದು ಉಡಲ್‌ಡಾಪಿ ಮಾಮಲ್ಲ ಸಂಕಟೊಡ್ಲಾ ಬೇನೆಡ್ಲಾ ನಿಕ್ಲೆಗ್ ಬರೆಯೆ. ಆಂಡ ನಿಕ್ಲೆಗ್ ದುಃಖ ಆವೊಡು ಅಂದ್‌ದ್ ಅತ್ತ್.</verse>
				<verse number="5">ಆಂಡ ನಿಕ್ಲೆಡ್ ಏರಾಂಡಲಾ ದುಃಖ ಕೊರಿನಾಯೆ ಉಲ್ಲೆಡ, ಆಯೆ ಎಂಕ್ ಮಾತ್ರ ದುಃಖೊನು ಕೊರಂದೆ, ಒಂಜಿ ರೀತಿಡ್ ನಿಕ್ಲೆ ಮಾತೆರೆಗ್ಲಾ ದುಃಖ ಕೊರ್ತಿನಾಯೆ ಆದುಲ್ಲೆ. ಆ ದುಃಖ ಮಾತೆರೆಡ್ಲಾ ಉಂಡಾಂಡ್ ಅಂದ್‌ದ್ ಯಾನ್ ಪನ್ಪುಜಿ.</verse>
				<verse number="6">ಇಂಚಿತ್ತಿನಾಯಗ್ ನಿಕ್ಲೆಡ್ ಹೆಚ್ಚಾಯಿನ ಜನೊಕುಲೆಡ್ದ್ ಆಯಿನ ಆ ಶಿಕ್ಷೆನೇ ಯಾವು.</verse>
				<verse number="7">ಅಂಚಾದ್ ನನಲಾ ಆಯಗ್ ಮಾಪು ಮಲ್ತ್‌ದ್ ಆದರಿಪುಲೆ. ಇಜ್ಜಾಂಡ ಆಯೆ ದುಃಖೊಡೇ ಮುರ್ಕುದು ಪೋವೆ.</verse>
				<verse number="8">ಅವೆಡ್ದಾವರ ಆಯಗ್ ನಿಕ್ಲೆನ ಪ್ರೀತಿ ತೋಜಾವೊಡು ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="9">ನಿಕುಲು ಮಾತ ವಿಷಯೊಲೆಡ್ ನಿಕ್ಲೆನ್ ಪರೀಕ್ಷೆ ಮಲ್ತ್‌ದ್ ವಿಧೇಯರಾದುಲ್ಲರಾ ಅಂದ್‌ದ್ ತೆರಿಯೊನೊಡು ಪನ್ಪಿ ಉದ್ದೇಶೊಡು ಇಂಚ ಬರೆಯೆ.</verse>
				<verse number="10">ನಿಕುಲು ಏರೆಗ್ ಮಾಪು ಮಲ್ಪುವರಾ ಅಕ್ಲೆನ್ ಯಾನ್ಲಾ ಮಾಪು ಮಲ್ಪುವೆ. ಯಾನ್ ಒವೆನಾಂಡಲಾ ಮಾಪು ಮಲ್ಪೆರೆ ಇತ್ತ್ಂಡ ಅವು ಕ್ರಿಸ್ತನ ಸನ್ನಿಧಿಡ್ ನಿಕ್ಲೆಗಾದೆ ಮಾಪು ಮಲ್ತ್‌ದೆ.</verse>
				<verse number="11">ದಾಯೆಗಂದ್ಂಡ ಸೈತಾನನ ತಂತ್ರೊಲೆನ್ ನಮ ತೆರಿಯಂದಿನಾಕುಲತ್ತ್, ಆಯೆ ನಮನ್ ವಂಚನೆ ಮಲ್ತ್‌ದ್ ನಂಕ್ ನಷ್ಟ ಮಲ್ಪೆರೆ ಬಲ್ಲಿ ಅಂದ್‌ದ್ ತೂವೊನೊಡು.</verse>
				<verse number="12">ಕ್ರಿಸ್ತನ ಸುವಾರ್ತೆನ್ ಸಾರಿಯೆರೆಗಾದ್ ತ್ರೋವೊಗು ಬನ್ನಗ ಕರ್ತವ ದಯೊಡ್ದು ಎಂಕ್ ಒಂಜಿ ಎಡ್ಡೆ ಸಂದರ್ಭ ಉಂಡಾಂಡ್.</verse>
				<verse number="13">ಆಂಡಲಾ ಎನ ಸಹೋದರೆ ಆಯಿ ತೀತೆ ಎಂಕ್ ತಿಕ್ಕಂದಿನೆಡ್ದ್ ಎನ ಆತ್ಮೊಗು ಸಮಾಧಾನ ಇಜ್ಜಾಂದೆ ಅಲ್ಪ ಇತ್ತಿನಾಕುಲೆನ್ ಬುಡ್ದು ಮಕೆದೋನ್ಯೊಗು ಬತ್ತೆ.</verse>
				<verse number="14">ಕ್ರಿಸ್ತನ ಅನ್ಯೊನ್ಯತೆಡ್ ನಮನ್ ಏಪಲಾ ಜಯತ ಉಮೇದ್‌ಡ್ ನಡಪಾವೆ. ಬೊಕ್ಕ ಆಯನ ಬುದ್ಧಿದ ಕಮ್ಮೆನೊನು ನಮ ಕಡೆಡ್ದ್ ಮಾತ ಜಾಗ್‌ಲೆಗ್ ಪೋಪುಂಡು. ಐಕ್ ದೇವೆರೆಗ್ ಉಪಕಾರ ಸ್ತುತಿ.</verse>
				<verse number="15">ದಾಯೆಗಂದ್ಂಡ ರಕ್ಷಣೆಡ್ ಉಪ್ಪುನಾಕುಲೆಗ್ಲಾ ನಾಶನೊಡು ಉಪ್ಪುನಾಕುಲೆಗ್ಲಾ ಎಂಕುಲು ದೇವೆರೆ ಎದುರುಡು ಕ್ರಿಸ್ತನ ಕಮ್ಮೆನ ಆದುಲ್ಲ.</verse>
				<verse number="16">ಆಂಡ ಎಂಕುಲು ನಾಶನೊಡು ಉಪ್ಪುನಾಕುಲೆಗ್ ಮರಣೊನು ಪುಟ್ಟಾವುನ ಮರಣದ ವಾಸನೆ ಆದುಲ್ಲ. ರಕ್ಷಣೆಡ್ ಉಪ್ಪುನಾಕುಲೆಗ್ ಜೀವೊನು ಪುಟ್ಟಾವುನ ಜೀವದ ಕಮ್ಮೆನ ಆದುಲ್ಲ. ಇಂಚಿತ್ತಿ ಕಾರ್ಯೊಲೆನ್ ಮಲ್ಪೆರೆ ಏರ್ ಯೋಗ್ಯೆರ್?</verse>
				<verse number="17">ಆಂಡ ಎಂಕುಲು ದೇವೆರೆ ಪಾತೆರೊನು ಬೆರಕೆ ಮಲ್ಪುನು ವ್ಯಾಪಾರದಾಕುಲೆ ಲೆಕ್ಕ ಉಪ್ಪಂದೆ ಯಥಾರ್ಥ ಆದ್ ದೇವೆರೆಡ್ದ್ ಬತ್ತಿಲೆಕ್ಕನೇ ಯೇಸು ಕ್ರಿಸ್ತನ ಅನ್ಯೊನ್ಯತೆಡ್ ಇತ್ತೊಂದು ದೇವೆರೆ ಉಪಸ್ಥಿತಿಟ್ಟೇ ಪಾತೆರೊಂದೆ ಉಪ್ಪುವ.</verse>
			</chapter>
			<chapter number="3">
				<verse number="1">ಎಂಕ್ಲೆನೇ ಎಂಕುಲು ಪುಗರೊನಿಯೆರೆ ಕುಡ ಸುರು ಮಲ್ತೊಂದುಲ್ಲನಾ? ಇಜ್ಜಾಂಡ ಕೆಲೆವೆರೆಗ್ ಬೋಡಾಪಿಲೆಕ್ಕ ನಿಕ್ಲೆಗ್ ತೋಜಾವೆರೆಗಾದ್ ಪ್ರಮಾಣ ಪತ್ರ ಎಂಕ್ಲೆಗ್ ಅಗತ್ಯನಾ? ಅತ್ತ್‌ಡ ಅಂಚಿತ್ತಿ ಪತ್ರಿಕೆಲೆನ್ ನಿಕ್ಲೆಡ್ದ್ ದೆತ್ತೊನೊಡಾ?</verse>
				<verse number="2">ನಿಕುಲೇ ಎಂಕ್ಲೆನ ಪುಗರಿಕೆದ ಪತ್ರ, ಅವು ಎಂಕುಲೆ ಉಡಲ್‌ಡೇ ಬರೆತ್ಂಡ್, ಆ ಪತ್ರೊನು ಮಾತೆರ್ ತೆರಿದೆರ್, ಮಾತೆರ್ಲಾ ಓದುವೆರ್.</verse>
				<verse number="3">ನಿಕುಲು ಎಂಕುಲೆ ಸೇವೆಡ್ದ್ ಆಯಿ ಕ್ರಿಸ್ತನ ಪತ್ರ ಆದುಲ್ಲರ್ ಅಂದ್‌ದ್ ತೋಜುವರ್. ಅವು ಶಾಯಿಡ್ ಬರೆತಿನವು ಅತ್ತ್, ಜೀವ ಇತ್ತಿ ದೇವೆರೆ ಆತ್ಮೊಡ್ದೇ ಬರೆತಿನವು. ಕಲ್ಲ್‌ದ ಪಲಯಿದ ಮಿತ್ತ್ ಅತ್ತ್ ನರಮಾನಿನ ಉಡಲ್‌ಡ್ ಬರೆತಿನವು ಆದುಂಡು.</verse>
				<verse number="4">ಇಂಚಿತ್ತಿ ಭರವಸ ಯೇಸು ಕ್ರಿಸ್ತಡ್ದೇ ನಂಕ್ ದೇವೆರೆ ಮಿತ್ತ್ ಉಂಡು.</verse>
				<verse number="5">ಎಂಕ್ಲೆಡ್ದೇ ಒವ್ವಾಂಡಲಾ ಉಂಡಾಂಡ್ ಪನಿಯೆರೆಗ್ ಎಂಕ್ಲೆಡ್ ಸಾಮರ್ಥ್ಯ ಇಜ್ಜಿ. ಎಂಕ್ಲೆನ ಸಾಮರ್ಥ್ಯ ದೇವೆರೆಡ್ದೇ ಬೈದಿನವು.</verse>
				<verse number="6">ಎಂಕ್ಲೆನ್ ಆಯೆ ಪೊಸ ಒಡಂಬಡಿಕೆದ ಎಡ್ಡೆ ಸೇವಕೆರಾದ್ ಮಲ್ತೆ. ಅವು ಬರೆತಿನ ನಿಯಮೊಲು ಆದುಪ್ಪಂದೆ ದೇವೆರಾತ್ಮದ ಸಮ್ಮಂಧ ಆದುಂಡು. ಬರೆತಿನ ನಿಯಮೊಲು ಮರಣೊನು ಕೊರೊಂದುಪ್ಪುಂಡು; ಆಂಡ ದೇವೆರಾತ್ಮ ಜೀವೊನು ಕೊರೊಂದುಪ್ಪುಂಡು.</verse>
				<verse number="7">ಮರಣದಂಡನೆ ಕೊರ್ಪಿನ ನ್ಯಾಯಕಟ್ಟಲೆದ ಸೇವೆ ಕಲ್ಲ್‌ದ ಪಲಯಿದ ಮಿತ್ತ್ ಬರೆತಿ ಅಕ್ಷರದ ಮಿತ್ತ್ ಆದಾರವಾದಿತ್ತ್ಂಡಲಾ ಆ ನ್ಯಾಯಕಟ್ಟಲೆ ದೇವೆರೆ ಮೈಮೆಡ್ದ್ ಬತ್ತಿನೆಡ್ದ್ ಮೋಶೆನ ಮೋನೆಡಿತ್ತಿನ ಬೊಲ್ಪುನು ಇಸ್ರಾಯೇಲ್ಯೆರೆಗ್ ತೂಯೆರೆ ಆಯಿಜಿ. ಆತ್ ಮೈಮೆಡಿತ್ತ್‌ಂಡಲಾ ಐತ ಬೊಲ್ಪು ಮಾಜಿದ್ ಪೋದಿತ್ತ್‌ಂಡ್.</verse>
				<verse number="8">ಇಂಚ ಉಪ್ಪುನಗ ಪೊಸ ರೀತಿಡ್ ದೇವೆರಾತ್ಮದ ಸೇವೆಲು ಏತೋ ಹೆಚ್ಚ್‌ದ ಮೈಮೆದವು ಆದುಪ್ಪೊಡತ್ತಾ?</verse>
				<verse number="9">ಜನೊಕುಲೆನ್ ತೀರ್ಪು ಮಲ್ಪುನ ಪರ ರೀತಿದ ಸೇವೆಲು ಮೈಮೆದವು ಆದಿತ್ತ್ಂಡ, ಜನೊಕುಲೆನ್ ನೀತಿವಂತೆರ್ ಮಲ್ಪುನ ಪೊಸ ರೀತಿದ ಸೇವೆಲು ಐಡ್ದ್‌ಲಾ ಹೆಚ್ಚ್ ಮೈಮೆದವು ಆದುಂಡು.</verse>
				<verse number="10">ನಿಜಾದ್ ಪೊಸ ರೀತಿದ ಮೈಮೆ ಹೆಚ್ಚ್ ಮೈಮೆದವು ಆದಿತ್ತಿನೆಡ್ದ್ ಆ ಪರ ರೀತಿದ ಮೈಮೆಗ್ ಹೋಲಿಕೆ ಮಲ್ತ್ಂಡ ಅವು ದಾಲಾ ಮೈಮೆದಾಂತಿನವು ಆದುಂಡು.</verse>
				<verse number="11">ಮಾಜಿದ್ ಪೋಪಿನವು ಈತ್ ಮೈಮೆದವು ಆದಿತ್ತ್ಂಡ ಏಪೊಗ್ಲಾ ಒರಿಯುನವು ಐಡ್ದ್‌ಲಾ ಹೆಚ್ಚ್ ಮೈಮೆದವು ಆದುಪ್ಪೊಡತ್ತಾ.</verse>
				<verse number="12">ಅಂಚಾಂಡ ಇಂಚಿತ್ತಿ ಭರವಸೆ ಎಂಕ್ಲೆಗ್ ಉಪ್ಪುನೆಡ್ದಾದ್, ಎಂಕುಲು ಧೈರ್ಯೊಡುಪ್ಪುವ.</verse>
				<verse number="13">ಎಂಕುಲು ಮೋಶೆ ಲೆಕ್ಕ ಅತ್ತ್; ಮಾಜಿದ್ ಪೋಪಿನ ಮೈಮೆದ ಅಂತ್ಯೊನು ಇಸ್ರಾಯೇಲ್ಯೆರ್ ತೂವಂದಿಲೆಕ್ಕ ಆಯೆ ತನ ಮೋನೆಗ್ ಮುಸ್ಕುನು ಪಾಡೊಂದಿತ್ತೆ.</verse>
				<verse number="14">ಆಂಡ, ಅಕ್ಲೆನ ಉಡಲ್ ಮಂದ ಆದ್ ಪೋಂಡು; ಈ ದಿನ ಮುಟ್ಟಲಾ ಪರ ಒಡಂಬಡಿಕೆದ ಪಾರಾಯಣ ಆನಗ ಆ ಮುಸ್ಕು ದೆರ್ಪಂದೆ ಉಂಡು. ಆಂಡ ಅವೆನ್ ಕ್ರಿಸ್ತಡ್ದ್ ದೆತ್ತ್ ಪಾಡಿಯೆರೆ ಸಾದ್ಯ ಆಂಡ್.</verse>
				<verse number="15">ಇನಿಕ್ಲಾ ಮೋಶೆನ ಗ್ರಂಥೊಲೆನ್ ಓದುನಗ ಈ ಮುಸ್ಕು ಅಕ್ಲೆ ಉಡಲ್‌ದ ಮಿತ್ತ್ ಪಾಡ್ದುಂಡು.</verse>
				<verse number="16">ಏರಾಂಡಲಾ ಕರ್ತವ ಕಡೆಕ್ಕ್ ತಿರ್ಗ್‌ಂಡನೇ ಆ ಮುಸ್ಕು ದೆತ್ತ್ ಪಾಡ್ದಿನವು ಆಪುಂಡು.</verse>
				<verse number="17">ದಾಯೆಗಂದ್ಂಡ, “ಕರ್ತವೆ,” ದೇವೆರಾತ್ಮೆ ಆದುಲ್ಲೆ; ಕರ್ತವ ಆತ್ಮೆ ಓಲ್ ಉಲ್ಲೆನಾ ಅಕ್ಲೆಗ್ ಬುಡುಗಡೆ ಉಂಡು.</verse>
				<verse number="18">ನಮ ಮಾತೆರ್ಲಾ ಮುಸುಕು ಇಜ್ಜಂದಿನ ಮೋನೆಡ್ ಕರ್ತವನ ಮೈಮೆದ ಬೊಲ್ಪುನು ತೋಜಾವ. ಆಯೆ ನಮನ್ ಕರ್ತವಲೆಕ್ಕ ಬದಲಾವಣೆ ಮಲ್ಪುವೆ. ಒಂಜಿ ಮೈಮೆಡ್ದ್ ಬೊಕ್ಕೊಂಜಿ ಮೈಮೆದ ರೂಪೊಗು ಸೇರಾವೆ. ಉಂದು ಆಪಿನಿ ಆತ್ಮೆ ಆದುಪ್ಪು ಕರ್ತವಡ್ದ್.</verse>
			</chapter>
			<chapter number="4">
				<verse number="1">ಅಂಚಾಯಿನೆಡ್ದ್, ಈ ಸೇವೆ ಎಂಕ್ಲೆಗ್ ದೇವೆರೆ ಕರುಣೆಡ್ ತಿಕ್ಕಿನೆಡ್ದ್ ಧೈರ್ಯ ತತ್ತ್‌ದ್ ಪೋಪುಜ.</verse>
				<verse number="2">ಆಂಡ ನಾಚಿಗೆ ಪುಟ್ಟಾವುನ ಬೊಕ್ಕ ದೆಂಗ್ದಿನ ಕಾರ್ಯೊಲೆನ್ ಬುಡ್ದು, ತಂತ್ರೊಡು ನಡತೊನಂದೆ, ದೇವೆರೆ ಪಾತೆರೊಗು ಬೆರಕೆ ಮಲ್ಪಂದೆ, ಸತ್ಯೊನು ಎಡ್ಡೆ ರೀತಿಡ್ ಬೋಧನೆ ಮಲ್ತೊಂದು ಎಂಕ್ಲೆನ್ ದೇವೆರೆ ದುಂಬು ಮಾತ ನರಮಾನಿಲೆ ಉಡಲ್‌ಡ್ ಸಜ್ಜನೆರಾದ್ ತೋಜಿದ್ ಬರ್ಪಿಲೆಕ್ಕ ನಡತೊಂದುಲ್ಲ.</verse>
				<verse number="3">ಆಂಡ ಎಂಕುಲು ಸಾರಿಯುನ ಸುವಾರ್ತೆ ಕೆಲೆವೆರೆಗ್ ಬೊಕ್ಕಲಾ ಮದೆ ಆದಿತ್ತ್ಂಡ ಅವು ನಾಶನ ಆಪಿನಾಕುಲೆಗ್ ಮದೆ ಆದುಂಡು.</verse>
				<verse number="4">ದೇವೆರೆ ಪ್ರತಿರೂಪ ಆಯಿ ಕ್ರಿಸ್ತ ಮೈಮೆ ಪನ್ಪಿ ಸುವಾರ್ತೆದ ಬೊಲ್ಪು ಮಿಂಚಂದಿಲೆಕ್ಕ, ಈ ಲೋಕದ ದೇವೆರಾದುಪ್ಪು ಸೈತಾನೆ ನಂಬಿಕೆದಾಂತಿನಾಕುಲೆನ ಮನಸ್‌ನ್ ಮಂದ ಮಲ್ತ್‌ದೆ.</verse>
				<verse number="5">ದಾಯೆಗಂದ್ಂಡ ಎಂಕುಲು ಎಂಕ್ಲೆನೇ ಸಾರಿಯೊನಂದೆ, ಯೇಸು ಕ್ರಿಸ್ತೆ ಕರ್ತವೆ ಪಂಡ್ದ್‌ಲಾ ಯೇಸುಗಾದ್ ನಿಕ್ಲೆನ ಸೇವಕೆರ್ ಪಂಡ್ದ್‌ಲಾ ಸಾರಿಯುವ.</verse>
				<verse number="6">ದಾಯೆಗ್ ಪಂಡ, “ಕತ್ತಲೆದ ಉಲಯಿಡ್ದ್ ಬೊಲ್ಪು ಆವಡ್,” ಪಂಡಿ ದೇವೆರ್, ಕ್ರಿಸ್ತನ ಮೋನೆಡ್ ತೋಜುನ ಮೈಮೆದ ಗೇನ ಪನ್ಪಿ ಬೊಲ್ಪು ಉಂಡಾಪಿಲೆಕ್ಕ ದೇವೆರ್ ತಾನೇ ಎಂಕ್ಲೆನ ಉಡಲ್‌ಡ್ ಬೊಲ್ಪು ಕೊರಿಯೆ.</verse>
				<verse number="7">ಇಂಚಿತ್ತಿ ಮಲ್ಲ ಬಲ ಎಂಕ್ಲೆನವು ಅತ್ತ್, ದೇವೆರೆನವೇ ಅಂದ್‌ದ್ ತೋಜಿದ್ ಬರ್ಪಿಲೆಕ್ಕ ಈ ದ್ರವ್ಯ ಎಂಕ್ಲೆಗ್ ಮಣ್ಣ್‌ದ ಪಾತ್ರೆಲೆಡ್ ಉಂಡು.</verse>
				<verse number="8">ಮಾತ ಕಡೆಡ್ದ್ ಎಂಕ್ಲೆಗ್ ಭಂಗ ಇತ್ತ್ಂಡಲಾ ಎಂಕುಲು ಸೋತುದು ಪೋತುಜ; ದಿಕ್ಕ್ ತೋಜಂದಿಲೆಕ್ಕ ಇತ್ತ್ಂಡಲಾ ನಿರಾಶೆಗ್ ಬೂರ್ದುಜ.</verse>
				<verse number="9">ಭಂಗ ಬತ್ತ್‌ಂಡಲಾ ಕೈ ಬುಡ್ತಿನಾಕುಲಾದ್ ಇಜ್ಜ. ಮರತ್ತ್ ಬೂರ್ದಿನಾಕುಲು ಆಂಡಲಾ ನಾಶ ಆತಿಜ.</verse>
				<verse number="10">ಎಂಕುಲೆ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಯೇಸುನ ಮರಣದ ಅನುಭವೊನು ಎಂಕುಲು ಎಂಕ್ಲೆನ ಶರೀರೊಡು ಏಪಲಾ ಅನುಭವ ಮಲ್ತೊಂದುಪ್ಪುವ.</verse>
				<verse number="11">ಎಂಚಂದ್ಂಡ ಎಂಕುಲೆ ಸೈಪಿ ಶರೀರೊಡು ಯೇಸುನ ಜೀವ ತೋಜಿದ್ ಬರ್ಪಿನೆಡ್ದಾವರ ಜೀವೊಡುಪ್ಪು ಎಂಕ್ಲೆನ್ ಯೇಸುಗಾದ್ ಏಪಲಾ ಮರಣೊಗು ಒಚ್ಚಿದ್ ಕೊರ್ಪ.</verse>
				<verse number="12">ಇಂಚ ಎಂಕ್ಲೆಡ್ ಮರಣ ಕಾರ್ಯ ಮಲ್ಪುಂಡು; ಆಂಡ ನಿಕ್ಲೆಡ್ ಜೀವ ಕಾರ್ಯ ಮಲ್ಪುಂಡು.</verse>
				<verse number="13">ಇಂಚ ಇತ್ತ್ಂಡ “ಯಾನ್ ನಂಬಿಯೆ; ಅಂಚಾದ್ ಪಾತೆರಿಯೆ,” ಅಂದ್‌ದ್ ಶಾಸ್ತ್ರೊಡು ಬರೆತಿ ನಂಬಿಕೆದ ಅವ್ವೇ ಆತ್ಮ ಎಂಕ್ಲೆಡುಪ್ಪುನೆಡ್ದ್ ನಂಬಿನಾಕುಲಾದ್ ಪಾತೆರ್‌ವ.</verse>
				<verse number="14">ಕರ್ತವೆ ಆದುಪ್ಪು ಯೇಸುನು ಲಕ್ಕಾಯಿನಾಯೆ ಎಂಕ್ಲೆನ್ಲಾ ಯೇಸುಡೊಪ್ಪ ಲಕ್ಕಾದ್ ನಿಕ್ಲೆ ಒಟ್ಟುಗು ತನ ದುಂಬು ಉಂತಾವೆ ಅಂದ್‌ದ್ ಎಂಕುಲು ತೆರಿದ.</verse>
				<verse number="15">ಉಂದು ಮಾತಲಾ ನಿಕ್ಲೆಗಾದೆ ಎಂಕ್ಲೆಗ್ ಉಂಡಾಪುಂಡು. ಐಟ್ಟ್ ದೈವ ದಯೆ ಮಸ್ತ್ ಜನೊಕುಲೆಗ್ ಹೆಚ್ಚಾದ್ ತಿಕ್ಕುನೆಡ್ದಾವರ ದೇವೆರೆ ಮೈಮೆಗ್ ಹೆಚ್ಚಾದ್ ಉಪಕಾರ ಸ್ತುತಿ ಉಂಡಾಪುಂಡು.</verse>
				<verse number="16">ಅಂಚಾಯಿನೆಡ್ದ್ ಎಂಕುಲು ಧೈರ್ಯ ತತ್ತ್‌ದ್ ಪೋಪುಜ. ಎಂಕುಲೆ ಶರೀರ ನಾಶಾವೊಂದು ಇತ್ತ್ಂಡಲಾ ಎಂಕುಲೆ ಅಂತರ್ಯ ದಿನ ದಿನ ಪೊಸತ್ತಾವೊಂದು ಬರ್ಪುಂಡು.</verse>
				<verse number="17">ದಾಯೆಗಂದ್ಂಡ, ಒಂತೆ ಸಮಯ ಮಾತ್ರ ಹಗುರಾದುಪ್ಪುನ ಎಂಕುಲೆ ಭಂಗ, ನಿತ್ಯ ಮೈಮೆದ ರಾಶಿನ್ ಎಂಕ್ಲೆಗ್ ಉಂಡು ಮಲ್ಪುಂಡು.</verse>
				<verse number="18">ಎಂಕುಲು ತೋಜುನ ವಿಷಯೊಲೆನ್ ತೂವಂದೆ, ತೋಜಂದಿನ ವಿಷಯೊಲೆನ್ ತೂವೊಂದುಪ್ಪುನಾಕುಲಾದುಲ್ಲ; ತೋಜುನವು ಒಂತೆ ಸಮಯ ಮಾತ್ರ ಉಪ್ಪುಂಡು; ತೋಜಂದಿನವು ನಿತ್ಯೊಗ್ಲಾ ಉಪ್ಪುಂಡು.</verse>
			</chapter>
			<chapter number="5">
				<verse number="1">ದಾಯೆಗಂದ್ಂಡ ಈ ಭೂಮಿದ ಮಿತ್ತ್ ನಮ ಶರೀರ ಪನ್ಪಿ ಗುಡಾರ ನಾಶಾಂಡ ದೇವೆರೆಡ್ದ್ ಉಂಡಾಯಿನ ಒಂಜಿ ಇಲ್ಲ್ ಪರಲೋಕೊಡು ಎಂಕ್ಲೆಗುಂಡು ಅಂದ್‌ದ್ ನಂಕ್ ಗೊತ್ತುಂಡು. ಅವು ಕೈಟ್ ಕಟ್ಟ್‌ದಿನವು ಆದುಪ್ಪಂದೆ ನಿತ್ಯದವು ಆದುಂಡು.</verse>
				<verse number="2">ಅಂದ್, ಇತ್ತೆ ಈ ಶರೀರೊಡು ಎಂಕುಲು ನರಕೊಂದುಪ್ಪುವ. ಪೊಸ ಕುಂಟು ಪಾಡೊಂಡಿಲೆಕ್ಕ ಪರಲೋಕೊಡುಪ್ಪು ಆ ಇಲ್ಲ್ ಏಪ ತಿಕ್ಕುಂಡು ಅಂದ್‌ದ್ ಬಯಕೊಂದುಲ್ಲ.</verse>
				<verse number="3">ಅಂಚಾದ್ ಆ ಕುಂಟು ಪಾಡೊಂಡಿನಪಗ ನಮ ಬತ್ತಲೆತನ ಪೋಪುಂಡು.</verse>
				<verse number="4">ಎಂಕುಲು ಭೂಮಿದ ಗುಡಾರೊಡು ಉಪ್ಪುನಾತ್ ದಿನ ದುನ್ನ ತುಂಬೊಂದು ನರಕೊಂದು ಬದುಕುವ. ಅಂಚಾದ್ ಈ ಶರೀರೊಡ್ದು ಬುಡುಗಡೆ ಆವೊಡು ಅಂದ್‌ದ್ ಎಂಕ್ಲೆನ ಆಸೆ ಅತ್ತ್. ಅವತ್ತಂದೆ ಪರಲೋಕದ ಶರೀರೊನು ಪಾಡೊನಿಯೆರೆ ಆಸೆ ಮಲ್ಪುವ. ಅಂಚಾಯಿನೆಡ್ದ್ ಈ ಸೈಪಿನ ಶರೀರೊನು ಜೀವೊಡುಪ್ಪು ಶರೀರೊಗು ಬದಲಾವಣೆ ಮಲ್ಪುವೆ.</verse>
				<verse number="5">ಎಂಕ್ಲೆನ್ ಈ ಸ್ಥಿತಿಕ್ಕ್ ತಯಾರ್ ಮಲ್ತ್‌ದ್ ತನ ಪರಿಶುದ್ಧಾತ್ಮೊನು ಸಂಚಿಕಾರ ಆದ್ ಕೊರಿನಾಯೆ ದೇವೆರೇ.</verse>
				<verse number="6">ಅಂಚಾಯಿನೆಡ್ದ್ ನಮ ಏಪಲಾ ಧೈರ್ಯೊಡೇ ಉಪ್ಪುವ. ಈ ಶರೀರೊಡು ಉಪ್ಪುನೆಂಗೆ ಕರ್ತವಡ್ ದೂರೊಡುಪ್ಪುವ ಅಂದ್‌ದ್ ಎಂಕುಲು ತೆರಿದ.</verse>
				<verse number="7">ನಮ ತೂಪಿನಾಕುಲಾದ್ ಉಪ್ಪಂದೆ ನಂಬುನಕುಲಾದೇ ಬದುಕುವ.</verse>
				<verse number="8">ಅಂದ್, ಎಂಕುಲು ಧೈರ್ಯೊಡಿತ್ತ್‌ದ್ ಶರೀರೊನು ಬುಡ್ದು ಕರ್ತವ ಕೈತಲ್‌ ಸೇರಿಯೆರೆ ಬಯಕುವ.</verse>
				<verse number="9">ಅಂಚಾದ್ ಎಂಕುಲು ಶರೀರೊಡಿತ್ತ್‌ಂಡಲಾ ಐಡ್ದ್ ಬುಡುಗಡೆ ಆಂಡಲಾ ನಮ ಕರ್ತವಗ್ ಮೆಚ್ಚಿಗೆ ಆದ್ ಉಪ್ಪೊಡಂದ್‌ದ್ ಪೇಚಾಡುವ.</verse>
				<verse number="10">ದಾಯೆಗಂದ್ಂಡ ಪ್ರತಿ ಒರಿಲಾ ತನ ಭೂಮಿದ ಶರೀರೊಡು ಮಲ್ತಿನ ಎಡ್ಡೆಂತಿನೆಕಾವಡ್ ಪಡಿಕೆಂತಿನೆಕ್ಕಾವಡ್ ದೇವೆರೆಡ್ದ್ ಪ್ರತಿಫಲ ತಿಕ್ಕುಲೆಕ್ಕ ನಮ ಮಾತೆರ್ಲಾ ಕ್ರಿಸ್ತನ ನ್ಯಾಯಾಸನದ ಎದುರುಡು ಉಂತೊಡಾಪುಂಡು.</verse>
				<verse number="11">ಕರ್ತವ ಪೋಡಿಗೆ ಎಂಕ್ಲೆಗುಪ್ಪುನೆಡ್ದ್ ಜನೊಕುಲು ಒಪ್ಪಿಯೊನುಲೆಕ್ಕ ಮಲ್ಪುವ. ದೇವೆರೆಗ್ ಎಂಕ್ಲೆ ಯಥಾರ್ಥತ್ವ ತೆರಿದುಂಡು; ನಿಕ್ಲೆ ಮನಸ್‌ಗ್ಲಾ ಉಂದು ತೆರಿದುಂಡು ಅಂದ್‌ದ್ ಎನ ಭರವಸ ಆದುಂಡು.</verse>
				<verse number="12">ಎಂಕ್ಲೆನ್ ಎಂಕುಲು ನಿಕ್ಲೆ ಎದುರುಡು ಕುಡೊರ ಪುಗರೊನುಜ; ಆಂಡ ಎಂಕಲೆಗಾದ್ ಪುಗರೊನಿಯೆರೆ ನಿಕ್ಲೆಗ್ ಅವಕಾಸ ಕೊರ್ಪ; ಇಂಚ ಉಡಲ್‌ಡ್ ಕೊಚ್ಚೊನಂದೆ ಪಿದಯಿಡ್ ಕೊಚ್ಚೊಂದು, ನಿಕುಲು ಉತ್ತರ ಕೊರ್ಪಿಲೆಕ್ಕ ಶಕ್ತೆರಾಪರ್.</verse>
				<verse number="13">ಎಂಕುಲೆ ಬುದ್ಧಿ ತತ್ತ್‌ದಿತ್ತ್‌ಂಡ ಅವು ದೇವೆರೆಗಾದುಂಡು; ಎಂಕ್ಲೆಗ್ ಸ್ವಸ್ಥ ಬುದ್ಧಿ ಇತ್ತ್ಂಡ ಅವು ನಿಕ್ಲೆಗಾದುಂಡು.</verse>
				<verse number="14">ಕ್ರಿಸ್ತನ ಪ್ರೀತಿ ಎಂಕ್ಲೆಗ್ ಒತ್ತಾಯ ಮಲ್ಪುಂಡು. ದಾಯೆಗಂದ್ಂಡ ಮಾತೆರೆಗಾದ್ ಒರಿ ಸೈತಿನೆಡ್ದಾವರ ಮಾತೆರ್ಲಾ ಸೈತಿ ಲೆಕ್ಕ ಆಂಡ್ ಅಂದ್‌ದ್ ತೆರಿಯೊಂಡ.</verse>
				<verse number="15">ಬೊಕ್ಕ ಆಯೆ ಮಾತೆರೆಗಾದ್ ಸೈತಿನೆಡ್ದಾವರ ಬದುಕುನಾಕುಲು ನನ ದುಂಬು ತನ್ಕುಲೆಗಾದ್ ಬದ್‌ಕಂದೆ, ಅಕ್ಲೆಗಾದ್ ಸೈತ್‌ದ್ ಜೀವೊಡು ಲಕ್ಕ್‌ದಿನ ಕ್ರಿಸ್ತಗಾದ್ ಬದುಕುವೆರ್.</verse>
				<verse number="16">ಅಂಚಾಯಿನೆಡ್ದ್ ನನ ದುಂಬು ಎಂಕುಲು ಏರೆನ್ಲಾ ಲೋಕದ ರೀತಿಡ್ ತೆರಿಯುಜ; ಕ್ರಿಸ್ತನ್ ಎಂಕುಲು ಲೋಕದ ರೀತಿಡ್ ತೆರಿಯೊಂಡಲಾ ನನ ಅಂಚ ಮಲ್ಪುಜ.</verse>
				<verse number="17">ಅಂಚಾದ್ ಏರಾಂಡಲಾ ಕ್ರಿಸ್ತಡ್ ಉಲ್ಲೆಡ, ಆಯೆ ಪೊಸ ಸೃಷ್ಟಿ ಆದುಲ್ಲೆ; ಪರತ್ತ್‌ದವು ಕಡತ್‌ದ್ ಪೋಂಡು, ಇಂದಾ ಮಾತಲಾ ಪೊಸತಾಂಡ್.</verse>
				<verse number="18">ಬೊಕ್ಕ ಉಂದು ಮಾತಲಾ ದೇವೆರೆಡ್ದೇ ಉಂಡಾಯಿನವು. ಆಯೆ ನಮನ್ ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂದು ರಾಜಿ ಮಲ್ಪುನ ಸೇವೆನ್ ಎಂಕ್ಲೆಗ್ ಕೊರ್ತೆ.</verse>
				<verse number="19">ಅವು ದಾನೆಂದ್ಂಡ ದೇವೆರ್ ನರಮಾನಿನ ಪಾಪೊಲೆನ್ ಅಕ್ಲೆ ಲೆಖ್ಖೊಗು ದೆತ್ತೊನಂದೆ, ಲೋಕೊನು ಕ್ರಿಸ್ತಡ್ ತನ್ಕ್ ರಾಜಿ ಮಲ್ತೊಂಡೆ ಪನ್ಪಿನವೇ. ಆ ರಾಜಿದ ಸೇವೆನ್ ಸಾರಿಯೆರೆ ಎಂಕ್ಲೆನ್ ನೇಮಕ ಮಲ್ತ್‌ದೆ.</verse>
				<verse number="20">ಎಂಕುಲು ಕ್ರಿಸ್ತನ ರಾಯಭಾರಿಲು ಆದುಲ್ಲ. ಅಂಚಾದ್ ದೇವೆರೇ ಎಂಕ್ಲೆ ಪಗತೆಗ್ ನಟ್ಟೊನ್ವೆ. “ನಿಕುಲು ದೇವೆರೆಡೊಪ್ಪ ರಾಜಿ ಮಲ್ತೊನ್ಲೆ,” ಅಂದ್‌ದ್ ಕ್ರಿಸ್ತನ ಪುದರ್‌ಡ್ ನಿಕ್ಲೆಡ ನಟ್ಟೊನ್ವ.</verse>
				<verse number="21">ದೇವೆರ್ ಪಾಪದಾಂತಿನ ಕ್ರಿಸ್ತನ್ ಎಂಕ್ಲೆಗಾದ್ ಪಾಪಿಯಾದ್ ಮಲ್ತೆ. ನಮ ಕ್ರಿಸ್ತಡ್ದ್ ನೀತಿವಂತೆರ್ ಆವೊಡು ಅಂದ್‌ದ್ ದೇವೆರ್ ಇಂಚ ಮಲ್ತೆರ್.</verse>
			</chapter>
			<chapter number="6">
				<verse number="1">ಎಂಕುಲು ದೇವೆರೆಡೊಪ್ಪ ಜತೆಸೇವಕೆರಾದುಲ್ಲ. ಅಂಚಾದ್ ನಿಕುಲು ದೇವೆರೆಡ್ದ್ ತಿಕ್ಕ್‌ದಿನ ದಯೊನು ವ್ಯರ್ಥ ಮಲ್ತೊನಡೆ ಅಂದ್‌ದ್ ಎಂಕುಲು ನಟ್ಟೊಂದುಲ್ಲ.</verse>
				<verse number="2">“ಸರಿ ಸಮಯೊಡು ಯಾನ್ ನಿನ ಲೆಪ್ಪುಗು ಕೆಬಿ ಕೊರಿಯೆ; ರಕ್ಷಣೆದ ದಿನೊಟು ಯಾನ್ ನಿಕ್ಕ್ ಸಹಾಯ ಮಲ್ತೆ.” ಅಂದ್‌ದ್ ದೇವೆರ್ ಪನ್ಪೆ ಅತ್ತಾ. ಇತ್ತೆನೇ ಆ ಸರಿತ್ತ ಸಮಯ; ಇನಿಯೇ ಆ ರಕ್ಷಣೆದ ದಿನ.</verse>
				<verse number="3">ಎಂಕುಲೆ ಸೇವೆನ್ ದೂರಂದಿಲೆಕ್ಕ ಎಂಕುಲು ಏರೆಗ್ಲಾ ಅಡ್ಡಿ ಮಲ್ಪುಜ.</verse>
				<verse number="4">ಆಂಡ ಮಾತ ವಿಷಯೊಲೆಡ್ ಎಂಕ್ಲೆನೇ ದೇವೆರೆ ಸೇವಕೆರ್ ಅಂದ್‌ದ್ ಎಂಕುಲು ತೋಜಾವುನವು. ಎಂಕುಲು ದಿಂಜ ಸಹಿಸೊನೆಟ್ಟ್ ಭಂಗೊಲೆಡ್ ಕೊರತೆಲೆಡ್ ಇಕ್ಕಟ್ಟ್‌ಡ್</verse>
				<verse number="5">ಪೆಟ್ಟ್‌ಲೆಡ್, ಸೆರೆಮನೆಟ್, ದೊಂಬಿಲೆಡ್, ಭಂಗದ ಕೆಲಸೊಲೆಡ್, ನಿದ್ರೆದಾಂತಿ ಸ್ಥಿತಿಟ್ಟ್, ಉಪವಾಸೊಡ್ಲಾ</verse>
				<verse number="6">ಎಂಕುಲು ಎಂಕ್ಲೆನ್ ಶುದ್ಧತ್ವೊಡು, ಗೇನೊಡು, ತಾಳ್ಮೆಡ್, ದಯೆಟ್, ಪರಿಶುದ್ಧಾತ್ಮೊಡು, ಕಪಟದಾಂತಿ ಪ್ರೀತಿಡ್,</verse>
				<verse number="7">ಸತ್ಯ ಪಾತೆರೊಡು, ದೇವೆರೆ ಶಕ್ತಿಡ್ ಎಂಕುಲು ದೇವೆರೆ ಸೇವಕೆರ್ ಅಂದ್‌ದ್ ತೋಜಾವೊನುವ. ದತ್ತ ಬಲತ್ತ ಕೈಟ್‌ ನೀತಿ ಪನ್ಪಿ ಆಯುಧೊಲೆನ್ ಎಂಕುಲು ಪತ್ತೊಂದಿನಾಕುಲಾದುಲ್ಲಾ.</verse>
				<verse number="8">ಕೆಲೆವೆರ್ ಮಾನ ಕೊರಡ್, ಕೆಲೆವೆರ್ ಹೀನ ಮಲ್ಪಡ್, ಕೆಲೆವೆರ್ ತುಚ್ಚಿಕಾರ ಮಲ್ಪಡ್, ಕೆಲೆವೆರ್ ಪುಗರಡ್, ಎಂಕುಲು ಸತ್ಯ ಪಾತೆರುನಾಕುಲು ಆದಿತ್ತ್‌ಂಡಲಾ ಸುಳ್ಳುಗಾರೆರ್ ಅಂದ್‌ದ್ ಲೆಪ್ಪುವೆರ್.</verse>
				<verse number="9">ಎಂಕುಲು ಮಾತೆರ್ಲಾ ತೆರಿಯಂದಿನಾಕುಲಾದಿತ್ತ್‌ಂಡಲಾ ತೆರಿದಿನಾಕುಲಾದುಲ್ಲ, ಸೈಪಿನಾಕುಲಾದ್ ತೋಜಿಂಡಲಾ ಬದುಕುನಾಕುಲಾದುಲ್ಲ. ಶಿಕ್ಷೆ ತಿಂದ್‌ಂಡಲಾ ಸೈಯಂದಿನಾಕುಲಾದುಲ್ಲ.</verse>
				<verse number="10">ದುಃಖ ಮಲ್ತೊಂದಿತ್ತ್‌ಂಡಲಾ ಏಪಲಾ ಸಂತೋಷ ಮಲ್ತೊಂದಿತ್ತಿನಾಕುಲು ಆದುಲ್ಲ. ಬಡವೆರಾಂಡಲಾ ಮಸ್ತ್ ಜನೊಕುಲೆಗ್ ಐಶ್ವರ್ಯವಂತೆರಾದ್ ಮಲ್ಪುನಾಕುಲು ಆದುಲ್ಲ. ದಾಲಾ ದಾಂತಿನಾಕುಲಾಂಡಲಾ ಮಾತಲಾ ಇತ್ತಿನಾಕುಲಾದುಲ್ಲ.</verse>
				<verse number="11">ಕೊರಿಂಥದಾಕುಲೇ, ಎಂಕುಲು ನಿಕ್ಲೆಡ ಸತ್ಯಾದ್ ಪಾತೆರೊಂದೆ ಉಪ್ಪುವ, ಎಂಕುಲೆ ಉಡಲ್ ನಿಕ್ಲೆಗ್ ಜತ್ತ್‌ದ್‌ಂಡ್.</verse>
				<verse number="12">ಎಂಕುಲು ನಿಕ್ಲೆಗ್ ತೋಜಾವುನ ಪ್ರೀತಿನ್ ಉಂತಾದಿಜ; ಆಂಡ ನಿಕುಲು ನಿಕ್ಲೆ ಉಡಲ್‌ಡ್ ಎಂಕ್ಲೆಗ್ ತೋಜಾವುನ ಪ್ರೀತಿನ್ ಕಡಿಮೆ ಮಲ್ತೊಂಡರ್.</verse>
				<verse number="13">ಎನ ಜೋಕುಲೆಗ್ ಪಂಡಿಲೆಕ್ಕ ಪನ್ಪೆ, ನಿಕುಲುಲಾ ನಿಕ್ಲೆ ಉಡಲ್‌ನ್ ಜಪ್ಪುಲೆ.</verse>
				<verse number="14">ನಂಬಿಕೆದಾಂತಿನಾಕುಲೆಡೊಪ್ಪ ಒಟ್ಟಾವಡೆ. ದಾಯೆಗಂದ್ಂಡ ನೀತಿಗ್ಲಾ ಅನ್ಯಾಯೊಗ್ಲಾ ಪಾಲ್ ಉಂಡಾ? ಬೊಲ್ಪುಗ್ಲಾ ಕತ್ತೆಲೆಗ್ಲಾ ಸಮ್ಮಂಧ ಉಂಡಾ?</verse>
				<verse number="15">ಕ್ರಿಸ್ತಗ್ಲಾ ಸೈತಾನಗ್ಲಾ ಒಪ್ಪಂದ ಮಲ್ಪೊಲಿಯಾ? ನಂಬುನಾಯಗ್ಲಾ ನಂಬಂದಿನಾಯಗ್ಲಾ ಪಾಲ್‌ದಾರಿಕೆ ಉಂಡಾ?</verse>
				<verse number="16">ದೇವೆರೆ ಇಲ್ಲ್‌ಗ್ಲಾ ಮೂರ್ತಿಲೆಗ್ಲಾ ಒಪ್ಪಂದ ದಾನೆ? ದಾಯೆಗಂದ್ಂಡ ನಮ ಜೀವಸ್ವರೂಪೆ ಆದುಪ್ಪು ದೇವೆರೆ ಇಲ್ಲ್ ಆದುಲ್ಲತ್ತಾ. “ಯಾನ್ ಅಕ್ಲೆಡೊಪ್ಪ ಇತ್ತ್‌ದ್ ಅಕ್ಲೆನ್ ನಡಪಾವೆ. ಯಾನ್ ಅಕ್ಲೆ ದೇವೆರಾದುಲ್ಲೆ, ಅಕುಲು ಎನ ಜನೊಕುಲಾದುಪ್ಪುವೆರ್,” ಅಂಚ ದೇವೆರ್ ಪನ್ತೆರತ್ತಾ.</verse>
				<verse number="17">“ಅಂಚಾದ್ ಪಿದಯಿದ ಜನೊಕುಲೆ ಮದ್ಯೊಡ್ದು ಪಿದಾಡ್ದ್ ಅಕ್ಲೆಡ್ದ್ ಪ್ರತ್ಯೇಕಾದುಪ್ಪುಲೆ ಅಂದ್‌ದ್ ಕರ್ತವೆ ಪನ್ಪೆ. ಅಶುದ್ಧವಾಯಿನೆನ್ ಒವೆನ್ಲಾ ಮುಟ್ಟಡೆ, ಅಪಗ ಯಾನ್ ನಿಕ್ಲೆನ್ ಸೇರಾವೊನ್ವೆ.</verse>
				<verse number="18">ಬೊಕ್ಕ, ಯಾನ್ ನಿಕ್ಲೆಗ್ ಅಮ್ಮೆ ಆದುಪ್ಪುವೆ; ನಿಕುಲು ಎನ ಮಗೆಲಾ ಮಗಲ್ಲಾ ಆದುಪ್ಪುವರ್ ಅಂದ್‌ದ್ ಸರ್ವತ್ರಾಣಿ ಆದುಪ್ಪು ಕರ್ತವೆ ಪನ್ಪೆ.”</verse>
			</chapter>
			<chapter number="7">
				<verse number="1">ಪ್ರೀತಿದಾಕುಲೇ, ಈ ವಾಗ್ದಾನೊಲು ನಂಕುಪ್ಪುನೆಡ್ದ್, ನಮ ಶರೀರದ ಬೊಕ್ಕ ಆತ್ಮದ ಮೈಲೆನ್ ಶುದ್ಧ ಮಲ್ತೊಂದು, ಪರಿಶುದ್ಧೆರಾಪಿಲೆಕ್ಕ ದೇವೆರೆ ಪೋಡಿಗೆಡ್ ಉಪ್ಪೆರೆ ಪ್ರಯತ್ನ ಮಲ್ಪುಗ.</verse>
				<verse number="2">ನಿಕ್ಲೆ ಉಡಲ್‌ಡ್ ಎಂಕ್ಲೆಗ್ ಜಾಗ್ ಕೊರ್ಲೆ; ಎಂಕುಲು ನಿಕ್ಲೆಗ್ ಏರೆಗ್ಲಾ ಅನ್ಯಾಯ ಮಲ್ತ್‌ದಿಜ; ಏರೆನ್ಲಾ ಹಾಳ್ ಮಲ್ತ್‌ದಿಜ; ಏರೆಗ್ಲಾ ಮೋಸ ಲಾಭ ಮಲ್ತ್‌ದಿಜ.</verse>
				<verse number="3">ನಿಕ್ಲೆನ್ ದೂಷಣೆ ಮಲ್ಪೊಡು ಅಂದ್‌ದ್ ಉಂದೆನ್ ಪನ್ಪುಜಿ. ಒಟ್ಟುಗೇ ಸೈಯೆರೆಗ್ಲಾ ಒಟ್ಟುಗೇ ಬದುಕೆರೆಗ್ಲಾ ನಿಕುಲು ಎಂಕುಲೆ ಉಡಲ್‌ಡ್ ಉಲ್ಲರ್ ಅಂದ್‌ದ್ ಯಾನ್ ದುಂಬೇ ಪಂಡ್ದಿತ್ತೆ.</verse>
				<verse number="4">ಎಂಕ್ ನಿಕ್ಲೆಡ್ ಎಡ್ಡೆ ಭರವಸೆ ಉಂಡು; ನಿಕ್ಲೆ ಸಂಗತಿಡ್ ಹೆಮ್ಮೆ ಉಂಡು. ಎಂಕುಲೆ ಮಾತ ಸಂಕಟೊಲೆಡ್ಲಾ ಆಧಾರಣೆಡ್ದ್ ದಿಂಜಿದುಲ್ಲ ಬೊಕ್ಕ ಮಾತ ಭಂಗೊಲೆಡ್ದ್‌ಲಾ ಎನ ಸಂತೋಷ ಹೆಚ್ಚಾಪುಂಡು.</verse>
				<verse number="5">ಎಂಕುಲು ಮಕೆದೋನ್ಯೊಗು ಬತ್ತಿನಪಗ ಎಂಕುಲೆ ಶರೀರೊಗು ಸುಖ ಇಜ್ಜಾಂಡ್. ಮಾತ ಕಡೆಟ್ಲಾ ಭಂಗ ಆಂಡ್. ಪಿದಯಿಡ್ ಲಡಾಯಿಲು; ಉಲಯಿಡ್ ಪೋಡಿಗೆ ಇತ್ತ್ಂಡ್.</verse>
				<verse number="6">ಆಂಡ ಕುಗ್ಗು ಪೋಯಿನಾಕುಲೆನ್ ಆದರಿಪುನ ದೇವೆರ್, ತೀತೆ ಬರ್ಪಿನೆಡ್ದ್ ಎಂಕ್ಲೆನ್ ಆದರಿತೆ.</verse>
				<verse number="7">ಆಯೆ ಬತ್ತಿನೆಡ್ದ್ ಮಾತ್ರ ಅತ್ತ್, ನಿಕ್ಲೆಡ್ದ್ ಆಯಗ್ ಮಸ್ತ್ ಆಧರಣೆ ತಿಕ್ಕ್‌ದ್ಂಡ್ ಪಂಡ್ದ್ ಪಂಡಿನೆಡ್ದ್‌ಲಾ ಎಂಕ್ಲೆಗ್ ಸಮಾಧಾನ ಕೊರಿಯೆ, ನಿಕ್ಲೆ ಆಸೆಲಾ, ನಿಕುಲು ಮಲ್ತಿನ ದುಃಖಲಾ, ಎನ ಕಡೆಕ್ಕ್ ನಿಕ್ಲೆಡಿತ್ತಿನ ಆಸಕ್ತಿನ್ ತೆರಿಪಾಯಿನೆಡ್ದ್‌ಲಾ ಎಂಕ್ ಮಸ್ತ್ ಸಂತೋಷ ಆಂಡ್.</verse>
				<verse number="8">ಯಾನ್ ಬರೆತಿ ಪತ್ರಿಕೆಡ್ ನಿಕ್ಲೆಗ್ ದುಃಖ ಆಂಡಲಾ ಎಂಕ್ ಪಶ್ಚಾತಾಪ ಇಜ್ಜಿ. ಅವು ಒಂತೆ ಸಮಯ ನಿಕ್ಲೆನ್ ದುಃಖ ಮಲ್ತ್ಂಡ್ ಅಂದ್‌ದ್ ಯಾನ್ ದುಂಬು ಪಶ್ಚಾತಾಪ ಪಡೆದಿತ್ತ್‌ಂಡಲಾ ಇತ್ತೆ ಸಂತೋಷ ಮಲ್ಪುವೆ.</verse>
				<verse number="9">ಇತ್ತೆ ಎಂಕ್ ಸಂತೋಷ ಆಂಡ್, ನಿಕ್ಲೆಗ್ ದುಃಖ ಆಂಡ್ ಪನ್ಪಿನೆಕ್ಕಾದ್ ಅತ್ತ್; ಆಂಡ ನಿಕ್ಲೆ ದುಃಖ ನಿಕ್ಲೆನ್ ಪಶ್ಚಾತಾಪೊಗು ನಡಪುಡಿನೆಕ್ಕಾದ್, ನಿಕುಲು ದೇವೆರೆ ಚಿತ್ತದ ಪ್ರಕಾರ ದುಃಖ ಮಲ್ತಿನೆಡ್ದ್ ಎಂಕ್ಲೆಡ್ದ್ ನಿಕ್ಲೆಗ್ ದಾಲಾ ನಷ್ಟ ಆದುಪ್ಪುಜಿ.</verse>
				<verse number="10">ದೇವೆರೆ ಚಿತ್ತಾನುಸಾರ ದುಃಖ ಮನಸ್‌ನ್ ತಿರ್ಗಾದ್ ರಕ್ಷಣೆಗ್ ಕಾರಣ ಆಪುಂಡು; ಐಟ್ಟ್ ಪಶ್ಚಾತಾಪ ಬರ್ಪುಂಡು: ಆಂಡ ಲೋಕದ ರೀತಿದ ದುಃಖ ಮರಣೊಗು ಕಾರಣ ಆಪುಂಡು.</verse>
				<verse number="11">ದೇವೆರೆ ಚಿತ್ತಾನುಸಾರ ದುಃಖ ನಿಕ್ಲೆಗಾಯಿನೆಡ್ದ್, ನಿಕ್ಲೆಗ್ ಎಂಚಿತ್ತಿ ಆಸಕ್ತಿ, ನಿಕ್ಲೆನ್ ನಿರಾಪರಾಧಿ ಮಲ್ತೊನಿಯೆರೆ ಎಂಚಿತ್ತಿ ಉಮೇದ್, ಎಂಚಿತ್ತಿ ಕೋಪ, ಎಂಚಿತ್ತಿ ಎಚ್ಚರಿಕೆ, ಎಂಚಿತ್ತಿ ಮನೊವ್ಯಥೆ, ಎಂಚಿತ್ತಿ ಕಾಳಜಿ, ತಪ್ಪು ಮಲ್ತಿನಾಕುಲೆಗ್ ಶಿಕ್ಷೆ ಕೊರಿಯೆರೆಗ್ ಎಂಚಿತ್ತಿ ಕಟ್ಟ್‌ನಿಟ್ಟ್ ಉಂಡಾಂಡ್; ಉಂದೆಟ್ಟ್ ಮಾತ ನಿಕುಲು ನಿರಾಪರಾಧಿಲು ಅಂದ್‌ದ್ ಮಾತ ರೀತಿಡ್ಲಾ ತೋಜಾವೊನಿಯೆರೆ ಪ್ರಯಾಸ ಬುಡಿಯರ್.</verse>
				<verse number="12">ಯಾನ್ ನಿಕ್ಲೆಗ್ ಬರೆಯಿನವು ಅನ್ಯಾಯ ಮಲ್ತಿನಾಯಗಾದ್ ಅತ್ತ್, ಅತ್ತ್‌ಡ ಅನ್ಯಾಯ ಸಹಿಸೊನುನಾಯಗಾದ್‌ಲಾ ಅತ್ತ್, ಆಂಡ ದೇವೆರೆಡ್ ಎಂಕ್ಲೆಗ್ ನಿಕ್ಲೆ ಕಡೆಕ್ಕ್ ಉಪ್ಪುನ ಆಸಕ್ತಿ ನಿಕ್ಲೆಗ್ ತೋಜಿದ್ ಬರಡ್ ಅಂದ್‌ದ್ ಮಾತ್ರ.</verse>
				<verse number="13">ಉಂದೆಕ್ಕಾದೆ ಎಂಕುಲೆಗ್ಲಾ ಆಧರಣೆ ಆಂಡ್. ಅವ್ವೇ ಅತ್ತಂದೆ ನಿಕ್ಲೆಡ್ದಾದ್ ತೀತಗ್ ಮಸ್ತ್ ಆತ್ಮ ಸಂತೋಷ ಉಂಡಾಂಡ್ ಪಂಡಿನೆನ್ ಯಾನ್ ತೆರಿದ್ ಎಂಕುಲೆಗ್ಲಾ ಮಸ್ತ್ ಸಂತೋಷ ಆಂಡ್.</verse>
				<verse number="14">ಯಾನ್ ನಿಕ್ಲೆ ವಿಚಾರ ಆಯಡ ದಾದಾಂಡಲಾ ಪುಗರೊಂದಿತ್ತೆಡಲಾ ಐಕಾದ್ ಎಂಕ್ ನಾಚಿಗೆ ಆಯಿಜಿ. ಯಾನ್ ನಿಕ್ಲೆಡ ಏಪಲಾ ಸತ್ಯನೇ ಪಂಡಿಲೆಕ್ಕ ಯಾನ್ ತೀತನ ಎದುರು ಪುಗರೊಂಡಿನವುಲಾ ಸತ್ಯನೇ ಆದ್ ತೋಜಿದ್ ಬತ್ತ್ಂಡ್.</verse>
				<verse number="15">ಆಯನ್ ನಿಕುಲು ಪೋಡಿದ್ ನಡ್‌ಗ್‌ದ್ ಸೇರಾವೊಂಡಿನೆಟ್ಟ್ ನಿಕ್ಲೆ ವಿಧೇಯತೆ ತೋಜಿದ್ ಬತ್ತ್ಂಡ್. ಆಯೆ ಅವೆನ್ ನೆನಪು ಮಲ್ಪುನಗ ಆಯನ ಉಡಲ್‌ಡ್ ನಿಕ್ಲೆ ಮಿತ್ತ್ ಇತ್ತಿನ ಕನಿಕರ ಜಾಸ್ತಿ ಆಂಡ್.</verse>
				<verse number="16">ಅಂಚಾದ್ ಎಂಕ್ ನಿಕ್ಲೆಡ ಮಾತ ಸಂಗತಿಡ್ ಭರವಸ ಇತ್ತಿನೆಡ್ದ್ ಯಾನ್ ಸಂತೋಷ ಮಲ್ಪುವೆ.</verse>
			</chapter>
			<chapter number="8">
				<verse number="1">ಬೊಕ್ಕ ಸಹೋದ್ರೆರೇ, ಮಕೆದೋನ್ಯೊದ ಸಭೆತಾಕುಲು ಪಡೆತಿನ ದೇವೆರೆ ದಯತ ಸಂಗತಿಡ್ ನಿಕ್ಲೆಗ್ ತೆರಿಪಾವೆ,</verse>
				<verse number="2">ಅಕ್ಲೆಗ್ ಮಸ್ತ್ ಭಂಗ ಇತ್ತ್ಂಡಲಾ ಅಕ್ಲೆಡ ಸಂತೋಷ ದಿಂಜಿದಿತ್ತಿನೆಡ್ದ್ ಬಡತನದ ಮದ್ಯೊಡ್ಲಾ ಎಡ್ಡೆ ಮನಸ್‌ಡ್ ಕೊರಿಯೆರ್.</verse>
				<verse number="3">ತನ್ಕುಲೆಗ್ ಸಾದ್ಯ ಆಪಿನಾತ್ ಮಾತ್ರತ್ತಂದೆ ಅವ್ವೆಡ್ದ್‌ಲಾ ಹೆಚ್ಚಾದ್ ಶಕ್ತಿ ಮೀರ್‌ದ್ ತನ್ಕುಲಾದೇ ಕೊರಿಯೆರ್. ಉಂದೆಕ್ಕ್ ಯಾನೇ ಸಾಕ್ಷಿ.</verse>
				<verse number="4">ದೇವಜನೊಕುಲೆಗ್ ಸಹಾಯ ಮಲ್ಪುನ ಈ ದಯತ ಕಾರ್ಯೊಡು ಪಾಲ್‌ದಾರೆರಾಪಿಲೆಕ್ಕ ಅಪ್ಪಣೆ ಆವೊಡು ಅಂದ್‌ದ್ ಮಸ್ತ್ ನಟ್ಟೊಂಡೆರ್.</verse>
				<verse number="5">ಉಂದೆನ್ ಎಂಕುಲು ಎನ್ನಿಲೆಕ್ಕ ಅಕುಲು ಮಲ್ತಿನತ್ತ್. ಅಕುಲು ಸುರುಕ್ಕು ತನ್ಕುಲೆನೇ ಕರ್ತವಗ್ ಒಚ್ಚಿದ್ ಕೊರಿಯೆರ್. ಬೊಕ್ಕ ದೇವೆರೆ ಚಿತ್ತದ ಪ್ರಕಾರ ಎಂಕುಲೆಗ್ಲಾ ಒಪ್ಪಿಸಾಯೆರ್.</verse>
				<verse number="6">ಉಂದೆಡ್ದಾದ್ ನಿಕ್ಲೆಡ್ ದುಂಬು ಈ ದಯತ ಕಾರ್ಯೊನು ತೀತಡ್ದ್ ಸುರು ಮಲ್ತಿನೆನ್ ಆಯೆ ಅವೆನ್ ನಿಕ್ಲೆಡ್ ತೀರಿಸಾವಡ್ ಅಂದ್‌ದ್ ಎಂಕುಲು ಆಯಡ ಕೇನೊಂಡ.</verse>
				<verse number="7">ಆಂಡ ನಿಕುಲು ನಂಬಿಕೆಡ್, ಪಾತೆರೊಡು, ಗೇನೊಡು, ಮಾತ ಆಸಕ್ತಿಡ್, ನಿಕುಲು ಎಂಕ್ಲೆಗ್ ತೋಜಾವು ಪ್ರೀತಿಡ್ ಉಂದು ಮಾತೆಟ್ಟ್ ಎಂಚ ಹೆಚ್ಚಿಗೆದಾಕುಲಾದ್ ಉಲ್ಲರಾ, ಅಂಚೆನೇ ಈ ದಾನದ ಕಾರ್ಯೊಡ್ಲಾ ಹೆಚ್ಚಿಗೆದಾಕುಲಾದ್ ತೋಜಾವೊನ್ಲೆ.</verse>
				<verse number="8">ಉಂದೆನ್ ಯಾನ್ ನಿಕ್ಲೆಗ್ ಅಪ್ಪಣೆ ಅಂದ್‌ದ್ ಪನಂದೆ, ಬೇತೆಕ್ಲೆನ ಆಸಕ್ತಿದ ಎದುರು ನಿಕ್ಲೆನ ಪ್ರೀತಿಲಾ ನಿಜನೇ ಅಂದ್‌ದ್ ಪರೀಕ್ಷೆ ಮಲ್ಪೊಡಂದ್‌ದ್ ಪನ್ಪೆ.</verse>
				<verse number="9">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯೊನು ನಿಕುಲು ತೆರಿದರತ್ತಾ? ಆಯೆ ಐಶ್ವರ್ಯೊಡಿತ್ತೆಡಲಾ ತಾನ್ ಬಡತನೊಡು ಸೇರಿನೆಡ್ದ್ ನಿಕುಲು ಐಶ್ವರ್ಯವಂತೆರ್ ಆವೊಡು ಅಂದ್‌ದ್ ನಿಕ್ಲೆಗಾದ್ ಬಡವೆ ಆಯೆ.</verse>
				<verse number="10">ಈ ದಾನದ ಕಾರ್ಯದ ಸಂಗತಿಡ್ ಎನ ಅಭಿಪ್ರಾಯ ತೆರಿಪಾವೆ, ಉಂದು ನಿಕ್ಲೆನ ಎಡ್ಡೆಗಾದ್ರ; ಅವೆನ್ ಒಂಜಿ ವರ್ಸದ ಪಿರವು ನಿಕುಲು ಸುರು ಮಲ್ಪೆರೆ ತೊಡಗಿಯರ್. ಅವೆನ್ ದುಂಬು ಕೊನೊದು ಕಾರ್ಯರೂಪೊಗು ಕನವೆರೆ ಪ್ರಯತ್ನ ಮಲ್ಪುಲೆ.</verse>
				<verse number="11">ಇತ್ತೆ ಅವೆನೇ ಪೂರ್ತಿ ಮಲ್ಪುಲೆ. ನಿಕ್ಲೆಡ್ ಈ ಕಾರ್ಯೊಗಾದ್ ಆಸಕ್ತಿ ಸುರುಟ್ಟು ತೋಜಿದ್ ಬತ್ತಿಲೆಕ್ಕನೇ ನಿಕ್ಲೆಡ್ ಇತ್ತಿನೆಟ್ಟ್ ಅವೆನ್ ತೀರಿಸಾಲೆ.</verse>
				<verse number="12">ದಾಯೆಗಂದ್ಂಡ ಕೊರ್ಪಿನ ಮನಸ್ ನಿಕ್ಲೆಡ ಇತ್ತ್ಂಡ, ಒರಿ ತನ್ಕ್ ಇತ್ತಿನೆಟ್ಟ್ ಕೊರಡ್ ಅವು ಸ್ವೀಕಾರ ಆಪುಂಡು. ತನಡ್ ದಾಂತಿನೆನ್ ದೇವೆರ್ ಕೇನುಜೆ.</verse>
				<verse number="13">ಬೇತೆಕ್ಲೆಗ್ ಭಂಗ ಪರಿಹಾರ, ನಿಕ್ಲೆಗ್ ಭಂಗ ಆವೊಡು ಅಂದ್‌ದ್ ಆಸೆ ಅತ್ತ್; ಮಾತೆರ್ಲಾ ಒಂಜೇಲೆಕ್ಕ ಉಪ್ಪೊಡು ಅಂದ್‌ದ್ ಎನ ಆಸೆ.</verse>
				<verse number="14">ಈ ಕಾಲೊಡು ನಿಕ್ಲೆ ಸಮೃದ್ಧಿ ಅಕ್ಲೆನ ಕೊರತೆಡ್ ಸಹಾಯ ಆಪುಂಡು. ದುಂಬಗ್ ಅಕ್ಲೆನ ಸಮೃದ್ಧಿ ನಿಕ್ಲೆನ ಕೊರತೆಡ್ ಸಹಾಯ ಆವು; ಇಂಚ ಮಾತೆರ್ಲಾ ಒಂಜೇಲೆಕ್ಕ ಉಪ್ಪೊಡು.</verse>
				<verse number="15">“ಮಸ್ತ್ ಕೂಡಾಯಿನಾಯಗ್ ದಾಲ ಹೆಚ್ಚಾತಿಜಿ; ಕಡಿಮೆ ಕೂಡಾಯಿನಾಯಗ್ ದಾಲಾ ಕಡಿಮೆ ಆತಿಜಿ.” ಅಂದ್‌ದ್ ಶಾಸ್ತ್ರೊಡು ಬರೆತಿಲೆಕ್ಕ ಆಪುಂಡು.</verse>
				<verse number="16">ನಿಕ್ಲೆ ಸಂಗತಿಡ್ ಎಂಕುಪ್ಪುನ ಉಂದೇ ಉಮೇದ್‌ನ್ ದೇವೆರ್ ತೀತನ ಉಡಲ್‌ಡ್ಲಾ ಕೊರಿನೆಕ್ಕಾದ್ ದೇವೆರೆಗ್ ಉಪಕಾರ ಸ್ತುತಿ.</verse>
				<verse number="17">ಆಯೆ ನಿಕ್ಲೆ ಕೈತಲ್‌ ಪೋವೊಡು ಅಂದ್‌ದ್ ಎಂಕುಲು ಕೇನೊಂಡಿನಪಗ ಸ್ವೀಕಾರ ಮಲ್ತಿನಿ ಮಾತ್ರತ್ತಂದೆ, ನಿಕ್ಲೆ ಕೈತಲ್‌ ಬರಿಯೆರೆಗ್ ತಾನಾದೇ ಮಸ್ತ್ ಆಸಕ್ತಿಡ್ ಪಿದಾಡ್ದಿತ್ತೆ.</verse>
				<verse number="18">ಆಯ ಒಟ್ಟುಗು ಬೊಕ್ಕೊರಿ ಸಹೋದ್ರನ್ ಕಡಪುಡುದ; ಈ ಸಹೋದರೆ ಸುವಾರ್ತೆ ಸಾರಿದ್ ಮಾತ ಸಭೆಕ್ಲೆಡ್ ಪುದರ್ ದೆತ್ತೊಂದಿನಾಯೆ ಆದುಲ್ಲೆ.</verse>
				<verse number="19">ಮಾತ್ರತ್ತಂದೆ ಈ ದಯತ ಕೆಲಸೊಗಾದ್ ಎಂಕುಲೆಡೊಪ್ಪ ಬರಿಯೆರೆಗ್ ಸಭೆತಾಕುಲುಲಾ ಆಯನ್ ಅಜತ್‌ದ್ ದೆತ್ತೊಂಡೆರ್, ಈ ದಯತ ಕಾರ್ಯೊಡ್ದಾದ್ ಕರ್ತವಗ್ ಮೈಮೆ ಬೊಕ್ಕ ಎಂಕ್ಲೆಡಿತ್ತಿ ಉಮೇದ್ ತೋಜುಂಡು.</verse>
				<verse number="20">ಎಂಕುಲು ಕಾಣಿಕೆ ಕೂಡಾವುನ ಈ ಸೇವೆಡ್ ಏರ್ಲಾ ಎಂಕ್ಲೆನ್ ದೂರಂದಿಲೆಕ್ಕ ಎಂಕುಲು ಎಚ್ಚರಿಕೆಡ್ ಉಲ್ಲ.</verse>
				<verse number="21">ದಾಯೆಗಂದ್ಂಡ ಕರ್ತವ ದೃಷ್ಟಿಡ್ ಮಾತ್ರತ್ತಂದೆ ನರಮಾನಿಲೆ ದೃಷ್ಟಿಡ್ಲಾ ಎಡ್ಡೆಂತಿನೆನ್ ಮಲ್ಪುನವೇ ಎಂಕ್ಲೆನ ಉದ್ದೇಶ.</verse>
				<verse number="22">ಬೊಕ್ಕ ಮೊಕ್ಲೆಡೊಪ್ಪ ಎಂಕುಲು ನನೊರಿ ಸಹೋದ್ರನ್ ಕಡಪುಡಿಯ. ಎಂಕುಲು ಮಸ್ತ್ ಸರ್ತಿ, ಮಸ್ತ್ ಕಾರ್ಯೊಡು ಆಯನ್ ಪರೀಕ್ಷೆ ಮಲ್ತ್‌ದ್ ಆಯೆ ಆಸಕ್ತೆ ಅಂದ್‌ದ್ ತೆರಿದುಲ್ಲ. ಇತ್ತೆ ನಿಕ್ಲೆ ಮಿತ್ತ್ ಉಪ್ಪು ಭರವಸೊಡ್ದಾದ್ ಆಯೆ ನನಲಾ ಹೆಚ್ಚಾದ್ ಆಸಕ್ತಿದಾಯೆ ಆದುಲ್ಲೆ.</verse>
				<verse number="23">ಏರಾಂಡಲಾ ತೀತನ ಸಂಗತಿಡ್ ಕೇನ್ವೆರ್ಡ, ಆಯೆ ಎನ ಪಾಲ್‌ದಾರೆಲಾ ನಿಕ್ಲೆನ ಸೇವೆಗಾದ್ ಎಂಕ್ ಜತೆಸೇವಕೆಲಾ ಆದುಲ್ಲೆ. ಆಯನೊಟ್ಟುಗು ಬರ್ಪಿ ಬಾಕಿ ಸಹೋದರೆರೆ ಸಂಗತಿಡ್ ಕೇನ್ವರ್ಡ, ಅಕುಲು ಸಭೆಲೆಡ್ದ್ ಕಡಪುಡ್ದಿನಾಕುಲು ಕ್ರಿಸ್ತಗ್ ಮೈಮೆ ಕನಪಿನಾಕುಲುಲಾ ಆದುಲ್ಲೆರ್.</verse>
				<verse number="24">ಅಂಚಾದ್ ಮೊಕ್ಲೆನ್ ಪ್ರೀತಿಡ್ ತೂವೊನ್ಲೆ ಬೊಕ್ಕ ನಿಕ್ಲೆನ್ ಎಂಕುಲು ಪುಗರ್‌ದಿನಿ ನಿಜ ಅಂದ್‌ದ್ ಉಂದೆಡ್ದ್ ಸಭೆಕ್ ತೋಜಾಪಾದ್ ಕೊರ್ಲೆ.</verse>
			</chapter>
			<chapter number="9">
				<verse number="1">ದೇವಜನೊಕುಲೆಗಾದ್ ಕಾಣಿಕೆ ಕೂಡಾವುನ ಸೇವೆದ ಸಂಗತಿಡ್ ಯಾನ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ.</verse>
				<verse number="2">ನಿಕುಲು ಸಹಾಯ ಮಲ್ಪೆರೆ ತಯಾರ್ ಆದುಲ್ಲರಂದ್‌ದ್ ಎಂಕ್ ತೆರಿದುಂಡು. ಒಂಜಿ ವರ್ಸದ ಪಿರವು ಅಖಾಯೊಡುಪ್ಪು ನಿಕುಲು ಸಹಾಯ ಮಲ್ಪೆರೆ ತಯಾರಾದುಲ್ಲರ್ ಅಂದ್‌ದ್ ಯಾನ್ ಮಕೆದೋನ್ಯದಾಕುಲೆ ಎದುರುಡು ನಿಕ್ಲೆನ್ ಪುಗರೊಂದುಲ್ಲೆ. ನಿಕ್ಲೆನ ಆಸಕ್ತಿ ಅಕ್ಲೆಡ್ ಮಸ್ತ್ ಜನೊಕುಲೆಗ್ ಉಮೇದ್ ಕೊರ್ತುಂಡು.</verse>
				<verse number="3">ಆಂಡಲಾ ಯಾನ್ ನಿಕ್ಲೆನ್ ಪುಗರಿನ ಪೊಕ್ಕಡೆ ಆವಂದೆ, ಯಾನ್ ನಿಕ್ಲೆಗ್ ಪಂಡಿಲೆಕ್ಕ ನಿಕ್ಲೆನ ಕಾಣಿಕೆ ತಯಾರಾದುಪ್ಪೊಡು ಅಂದ್‌ದ್ ಯಾನ್ ಆ ಸಹೋದ್ರೆರೆನ್ ಕಡುಪುಡುದು ಕೊರಿಯೆ.</verse>
				<verse number="4">ಇಜ್ಜಾಂಡ ಒಂಜಿ ವೇಳೆ ಮಕೆದೋನ್ಯದಾಕುಲು ಎನಡೊಪ್ಪ ಬನ್ನಗ ನಿಕ್ಲೆನ ಕಾಣಿಕೆ ತಯಾರಾದುಪ್ಪಂದಿನೆನ್ ತೂಯೆರ್ಡ ಎಂಕುಲು ನಿಕ್ಲೆನ ಮಿತ್ತ್ ಇಂಚಿನ ಭರವಸೆ ದೀಯಿನೆಡ್ದ್ ಎಂಕ್ಲೆಗ್ ನಾಚಿಗೆ ಆವು ಅಂಚೆನೆ ನಿಕ್ಲೆಗ್ಲಾ ನಾಚಿಗೆ ಆವು.</verse>
				<verse number="5">ಅಂಚಾಯಿನೆಡ್ದ್ ಈ ಸಹೋದ್ರರೆನ್ ದುಂಬತ್ತ ನಿಕ್ಲೆನಡೆಗ್ ಬತ್ತ್‌ದ್ ನಿಕುಲು ಸುರುಟ್ಟೆ ವಾಗ್ದಾನ ಮಲ್ತಿನ ಕಾಣಿಕೆನ್ ತಯಾರ್ ಮಲ್ಪೆರೆ ನಿಕ್ಲೆಗ್ ಸಹಾಯ ಮಲ್ಪುಲೆಕ್ಕ ಅಕ್ಲೆನ್ ಒತ್ತಾಯ ಮಲ್ಪುನವು ಅವಶ್ಯ ಅಂದ್‌ದ್ ಯಾನ್ ಎನ್ನಿಯೆ. ಅಂಚ ಈ ಕಾಣಿಕೆ ಸುಲಿಗೆ ಅಂದ್‌ದ್ ಆವಂದೆ, ಅವು ಮನಪೂರ್ವಕದ ಕಾಣಿಕೆ ಪಂಡ್ದಾಪುಂಡು.</verse>
				<verse number="6">ಆಂಡ ಉಂದೆನ್ ಪನ್ಪೆ, ಒಂತೆನ್ ಬಿತ್ತುನಾಯೆ ಒಂತೆನೇ ಕೊಯ್ಪೆ; ದಿಂಜ ಬಿತ್ತುನಾಯೆ ದಿಂಜನೇ ಕೊಯ್ಪೆ.</verse>
				<verse number="7">ಪ್ರತಿ ಒರಿಲಾ ಅಕ್ಲೆ ಅಕ್ಲೆ ಉಡಲ್‌ಡ್ ನಿಚ್ಚಯ ಮಲ್ತೊನಿಲೆಕ್ಕನೇ ಕೊರಡ್. ಏರ್ಲಾ ಒತ್ತಾಯಡಾವಡ್ ದುಃಖೊಡು ಆವಡ್ ಕೊರಿಯೆರೆ ಬಲ್ಲಿ; ದಾಯೆ ಪಂಡ ಸಂತೋಷೊಡು ಕೊರ್ಪಿನಾಯನ್ ದೇವೆರ್ ಪ್ರೀತಿ ಮಲ್ಪುವೆ.</verse>
				<verse number="8">ನಿಕುಲು ಏಪಲಾ ಮಾತೆಟ್ಲಾ ಸಮೃದ್ಧಿದಾಕುಲಾದಿತ್ತ್‌ದ್ ಮಾತ ಎಡ್ಡೆ ಕಾರ್ಯೊಲೆಗ್ ಧಾರಾಳವಾದ್ ಕೊರಿಯೆರೆ ಆಪಿಲೆಕ್ಕ ದೇವೆರ್ ನಿಕ್ಲೆಗ್ ಮಾತ ದಯೊನು ತೋಜಾವೆ.</verse>
				<verse number="9">“ಆಯೆ ಬಡವೆರೆಗ್ ಮಿತಿ ಮೀರ್‌ದ್ ಕೊರಿಯೆ. ಆಯನ ನೀತಿ ಏನಿತ್ಯೇನಿಗ್ಲಾ ಒರಿಯುಂಡು.” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡತ್ತಾ?</verse>
				<verse number="10">ದೇವೆರ್ ಬಿತ್ತುನಾಯಗ್ ಬಿತ್ತ್‌ಲಾ, ತಿನ್ಪಿನಾಯಗ್ ನುಪ್ಪುಲಾ ಕೊರ್ದು ಅಂಚೆನೇ ನಿಕ್ಲೆಗ್ ಬಿತ್ತೆರೆ ಬಿತ್ತ್‌ನ್ ಕೊರ್ದು ಅವೆನ್ ಹೆಚ್ಚ್ ಮಲ್ತ್‌ದ್ ನಿಕ್ಲೆ ನೀತಿದ ಫಲ ಹೆಚ್ಚಾಪಿಲೆಕ್ಕ ಮಲ್ಪುವೆ.</verse>
				<verse number="11">ಇಂಚಾದ್ ನಿಕುಲು ಮಾತ ಸಂಗತಿಡ್ಲಾ ಐಶ್ವರ್ಯವಂತೆರಾದ್ ಉದಾರಾದ್ ಕೊರಿಯೆರೆಗ್ ಶಕ್ತೆರಾಪರ್. ಉಂದತ್ತಂದೆ ನಿಕ್ಲೆ ಕಾಣಿಕೆಲು ಎಂಕ್ಲೆಡ್ದ್ ಬೇತೆಕ್ಲೆಗ್ ತಿಕ್ಕ್‌ನಗ, ಅವು ದೇವೆರೆಗ್ ಉಪಕಾರ ಸ್ತುತಿ ಉಂಡು ಮಲ್ಪುಂಡು.</verse>
				<verse number="12">ಈ ದಾನದ ಸೇವೆಡ್ದಾದ್ ದೇವಜನೊಕುಲೆ ಕೊರತೆ ಕಡಿಮೆ ಆಪುಂಡು. ಅವತ್ತಂದೆ ದೇವೆರೆಗ್ ಮಸ್ತ್ ಉಪಕಾರ ಸ್ತುತಿ ಸಂದಾಯೆರೆ ಕಾರಣ ಆಪುಂಡು.</verse>
				<verse number="13">ನಿಕುಲು ಮಲ್ತ್‌ದಿನ ಸಹಾಯೊಡ್ದು ನಿಕ್ಲೆನ ಯೋಗ್ಯಭಾವೊನು ಜನೊಕುಲು ತೂನಗ, ನಿಕುಲು ಮಲ್ತ್‌ದಿನ ಕ್ರಿಯೆಗ್ ಸರಿಯಾದ್, ಕ್ರಿಸ್ತನ ಸುವಾರ್ತೆನ್ ಕೈಕೊನುನೆಡ್ದ್‌ಲಾ ಅಕ್ಲೆಗ್ಲಾ ಬೊಕ್ಕ ಮಾತೆರೆಗ್ಲಾ ನಿಕುಲು ಉದಾರಾದ್ ಸಹಾಯ ಮಲ್ಪುನೆಡ್ದ್‌ಲಾ ದೇವೆರೆಗ್ ಮೈಮೆ ಸಂದಾವರ್.</verse>
				<verse number="14">ಉಂದತ್ತಂದೆ ನಿಕ್ಲೆಗ್ ದೇವೆರ್ ಕೊರ್ತಿನ ವಿಶೇಷ ದಯೊಡ್ದು ಅಕುಲು ನಿಕ್ಲೆನ್ ಉಡಲ್‌ಡ್ದ್ ಬಯಕೊಂದು ನಿಕ್ಲೆಗಾದ್ ದೇವೆರೆಡ ಪ್ರಾರ್ಥನೆ ಮಲ್ಪುವೆರ್.</verse>
				<verse number="15">ಪನಿಯೆರೆ ತೀರಂದಿನ ವರೊಕ್ಲೆಗಾದ್ ದೇವೆರೆಗ್ ಉಪಕಾರ.</verse>
			</chapter>
			<chapter number="10">
				<verse number="1">ನಿಕ್ಲೆ ಎದುರುಡುಪ್ಪುನಗ ತಗ್ಗ್‌ದಿನಾಯೆಲಾ ದೂರೊಡುಪ್ಪುನಗ ಧೈರ್ಯೊಡುಪ್ಪುನಾಯೆಲಾ ಆದ್ ನಿಕುಲು ಎನ್ನುನ ಪೌಲು ಪನ್ಪಿ ಯಾನ್ ಕ್ರಿಸ್ತನ ತಾಳ್ಮೆಡ್ಲಾ ಸಜ್ಜನಿಗೆಡ್ಲಾ ನಿಕ್ಲೆಡ ಪಾತೆರ್‌ವೆ.</verse>
				<verse number="2">ಎಂಕುಲು ಈ ಲೋಕೊಗು ಸರಿಯಾದ್ ನಡತೊಂದುಲ್ಲ ಅಂದ್‌ದ್ ಎನ್ನುನಾಕುಲೆ ಎದುರುಡು ಶರೀರೊಡು ಧೈರ್ಯೊನು ತೋಜಾಪಾವೊಡು ಅಂದ್‌ದ್ ಯಾನ್ ಎನ್ನೊಂದುಲ್ಲೆ. ಆಂಡ ಯಾನ್ ನಿಕ್ಲೆ ಕೈತಲ್‌ ಬನ್ನಗ ಅಂಚಿನ ಧೈರ್ಯೊನು ತೋಜಾಪಾವರೆ ಇಡೆ ಕೊರೊಡ್ಚಿ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="3">ಎಂಕುಲು ಲೋಕೊಡುಪ್ಪುನಾಕುಲು ಆದಿತ್ತ್‌ಂಡಲಾ ಲೋಕದ ರೀತಿಡ್ ಲಡಯಿ ಮಲ್ಪುನಾಕುಲತ್ತ್.</verse>
				<verse number="4">ಎಂಕುಲು ಲಡಯಿಗ್ ಉಪಯೋಗ ಮಲ್ಪುನ ಆಯುಧೊಲು ಲೋಕದ ರೀತಿದ ಆಯುಧೊಲು ಅತ್ತ್. ಅವು ದೇವೆರೆಡ್ ಬಲತ್ತವು ಆದಿತ್ತ್‌ದ್ ಕೋಟೆಲೆನ್ ಮರಪುನಂಚಿತ್ತಿನವು ಆದುಂಡು.</verse>
				<verse number="5">ಎಂಕುಲು ತರ್ಕೊಲೆನ್ ಬೊಕ್ಕ ದೇವೆರೆ, ಗೇನೊಗು ಎದುರಾಪಿನ ಮಾತ ಅಹಂಕಾರದೆನ್ಲಾ ನಾಶ ಮಲ್ತ್‌ದ್, ಪ್ರತಿಯೊಂಜಿ ಯೋಚನೆಲೆನ್ಲಾ ವಶ ಮಲ್ತ್‌ದ್ ಕ್ರಿಸ್ತಗ್ ಅಧೀನ ಆಪಿಲೆಕ್ಕ ಮಲ್ಪುವ.</verse>
				<verse number="6">ನಿಕುಲು ಕ್ರಿಸ್ತಗ್ ಪೂರ್ತಿ ವಿಧೇಯ ಆಯಿ ಬೊಕ್ಕ ವಿಧೇಯ ಆವಂದಿ ಬೇಲೆಲೆಗ್ ಶಿಕ್ಷೆ ಕೊರಿಯೆರೆ ತಯಾರಾದುಲ್ಲ.</verse>
				<verse number="7">ನಿಕುಲು ಪಿದಯಿದ ತೋರಿಕೆನ್ ಮಾತ್ರ ತೂಪರ್. ಏರಾಂಡಲಾ ಒರಿ ಕ್ರಿಸ್ತಗ್ ಸೇರ್ದಿನಾಯೆ ಅಂದ್‌ದ್ ಭರವಸೆ ಮಲ್ತೊನುವೆಡ, ಎಂಕುಲುಲಾ ಆಯ ಲೆಕ್ಕನೇ ಕ್ರಿಸ್ತಗ್ ಸೇರ್ದಿನಾಕುಲು ಅಂದ್‌ದ್ ಆಲೋಚನೆ ಮಲ್ಪಡ್.</verse>
				<verse number="8">ಎಂಕುಲೆಡುಪ್ಪು ಅಧಿಕಾರದ ಬಗೆಟ್ ಎಂಕುಲು ಹೆಚ್ಚಿಗೆ ಪುಗರೊಂಡಲಾ ಅಂಚ ಪುಗರೊನುನೆಟ್ಟ್ ನಾಚಿಗೆ ಮಲ್ಪೆರೆ ಇಜ್ಜಿ. ಎಂಚಂದ್ಂಡ, ನಿಕ್ಲೆನ್ ಬೂರುಲೆಕ್ಕ ಅತ್ತ್, ಕಟ್ಟುನೆಕ್ಕಾದ್ ಕರ್ತವೆ ಎಂಕ್ಲೆಗ್ ಆ ಅಧಿಕಾರೊನು ಕೊರ್ತೆ.</verse>
				<verse number="9">ಎನ ಪತ್ರಿಕೆಲೆಡ್ ನಿಕ್ಲೆನ್ ಪೋಡಿಯಾವುನಾಯೆ ಆದ್ ತೋಜಿಯೆರೆ ಎಂಕ್ ಮನಸ್ ಇಜ್ಜಿ.</verse>
				<verse number="10">ದಾಯೆ ಪಂಡ ಕೆಲೆವೆರ್ ಪನುವೆರ್, “ಆಯೆ ಬರೆಪಿನ ಪತ್ರಿಕೆಲು ಕಠಿಣದವುಲಾ ಬಲತ್ತವುಲಾ ಆದುಂಡು. ಆಂಡಲಾ ಆಯೆ ಶರೀರೊಡು ಎದುರು ಬನ್ನಗ ಬಲದಾಂತಿನಾಯೆಲಾ ಆಯನ ಪಾತೆರೊಲು ಯೋಗ್ಯದಾಂತಿನವುಲಾ ಆದ್ ತೋಜುಂಡು.”</verse>
				<verse number="11">ಎಂಕುಲು ದೂರೊಡು ಪತ್ರಿಕೆದ ಪಾತೆರೊಡು ಎಂಚ ಉಲ್ಲನಾ, ಕೈತಲ್‌ ಬನ್ನಗ ಕಾರ್ಯರೂಪೊಡ್ಲಾ ಅಂಚೆನೇ ಉಲ್ಲ ಅಂದ್‌ದ್ ಪನ್ಪಿನಾಕುಲು ತೆರಿಯೊನಡ್.</verse>
				<verse number="12">ತನ್ಕುಲೆನ್ ತಾನೆ ಪುಗರುನ ಕೆಲೆವೆರೆಡ್ ಎಂಕ್ಲೆನ್ ಸೇರಾವೊನಿಯೆರೆ ಆವಡ್ ಅಕ್ಲೆಡೊಪ್ಪ ಹೋಲಿಕೆ ಮಲ್ಪೆರೆಗಾವಡ್ ಎಂಕುಲು ಪ್ರಯತ್ನ ಮಲ್ಪುಜ. ಅಕುಲಾಂಡಲಾ ತನ್ಕುಲೆ ಉಲಯಿಡೇ ತನ್ಕುಲೆನ್ ಲತ್ತೊಂದು ತನ್ಕುಲೆನ್ ತನ್ಕುಲೆಗೇ ಹೋಲಿಕೆ ಮಲ್ತೊಂದು ಬುದ್ಧಿದಾಂತಿನಾಕುಲೆ ಲೆಕ್ಕ ಉಲ್ಲೆರ್.</verse>
				<verse number="13">ಎಂಕುಲಾಂಡಲಾ ಮಿತಿ ತತ್ತ್‌ದ್ ಎಂಕ್ಲೆನ್ ಪುಗರೊನುಜ. ದೇವೆರ್ ಎಂಕ್ಲೆಗ್ ಕೊರ್ತಿನ ಮಿತಿತ ಉಲಯಿಡೇ ಪುಗರೊಂದು ಈ ಮಿತಿತ ಉಲಯಿ ಇತ್ತ್‌ದ್ ನಿಕ್ಲೆನ ಕೈತಲ್‌ ಬೈದ.</verse>
				<verse number="14">ಎಂಕುಲು ಕ್ರಿಸ್ತನ ಸುವಾರ್ತೆನ್ ಸಾರಿಯೊಂದು ಸುರು ನಿಕ್ಲೆ ಕೈತಲ್‌ ಬೈದಿನೆಡ್ದ್ ನಿಕ್ಲೆ ಮಿತ್ತ್ ಅಧಿಕಾರ ಇಜ್ಜಂದಿಲೆಕ್ಕ ಮಿತಿ ತತ್ತ್‌ದ್ ಪೋಪುಜ.</verse>
				<verse number="15">ಅತ್ತ್‌ಡ ಎಂಕುಲು ಮಿತಿ ಮೀರ್‌ದ್ ನನೊರಿ ಮಲ್ತ್‌ದಿನ ಕೆಲಸೊಲೆಗಾದ್ ಪುಗರೊನುಜ. ನಿಕ್ಲೆ ನಂಬಿಕೆ ಹೆಚ್ಚಾವೊಂದು ಬನ್ನಗ, ನಿಕ್ಲೆ ನಡುತ ಎಂಕ್ಲೆ ಸೇವೆಲಾ ವಿಸ್ತಾರ ಆವು ಅಂದ್‌ದ್ ಎಂಕ್ಲೆನ ನಿರೀಕ್ಷೆ.</verse>
				<verse number="16">ಅಪಗ ಎಂಕುಲು ನಿಕ್ಲೆಡ್ದ್ ಆಪೆದಿಕ್ಕ್‌ಡ್ ಪೋದು ಬೇತೆ ಜಾಗ್‌ಲೆಡ್ ಸುವಾರ್ತೆ ಸಾರಿಯೊಲಿ, ನನೊರಿಯನ ಜಾಗ್‌ಡ್ ಆತಿನ ಬೇಲೆದ ಸಂಗತಿಡ್ ಪುಗರೊನುಜ.</verse>
				<verse number="17">“ಪುಗರೊನುನಾಯೆ ಕರ್ತವಡೇ ಪುಗರೊನಡ್.”</verse>
				<verse number="18">ತನನ್ ತಾನೇ ಮೆಚ್ಚಾವುನುನಾಯೆ ಯೋಗ್ಯದಾಯೆ ಅತ್ತ್. ಕರ್ತವೆ ಏರೆನ್ ಮೆಚ್ಚುವೆನಾ ಆಯೆನೇ ತಕ್ಕದಾಯೆ ಆದುಲ್ಲೆ.</verse>
			</chapter>
			<chapter number="11">
				<verse number="1">ಎನನ್ ಬುದ್ಧಿದಾಂತಿನಾಯೆ ಅಂದ್‌ದ್ ನಿಕುಲು ಸಹಿಸೊನುವರ್ ನನಲಾ ಎನನ್ ಸಹಿಸೊನ್ಲೆ.</verse>
				<verse number="2">ದೇವೆರೆಡುಪ್ಪು ಚಿಂತೆಡ್ದೇ ಯಾನ್ ನಿಕ್ಲೆನ ವಿಷಯೊಡ್ಲಾ ಚಿಂತೆ ಮಲ್ಪುವೆ. ದಾಯೆ ಪಂಡ ನಿಕ್ಲೆನ್ ಕ್ರಿಸ್ತೆ ಪನ್ಪಿ ಒರಿ ನರಮಾನಿಗ್ ಶುದ್ಧ ಕನ್ಯ ಪೊಣ್ಣಲೆಕ್ಕ ಒಪ್ಪಿಯಾವೊಡು ಅಂದ್‌ದ್ ನಿಕ್ಲೆನ್ ಆಯಗ್ ನಿಚ್ಚಯ ಮಲ್ತೆ.</verse>
				<verse number="3">ಆಂಡ ಸರ್ಪದ ಕುತಂತ್ರೊಡ್ದು ಹವ್ವಗ್ ಮೋಸ ಮಲ್ತಿ ಲೆಕ್ಕನೇ ನಿಕ್ಲೆ ಬುದ್ಧಿಲಾ ಕ್ರಿಸ್ತ ಕಡೆಕ್ಕ್ ಉಪ್ಪು ಪೂರ್ತಿ ಬೊಕ್ಕ ಶುದ್ಧಭಕ್ತಿ ತೆಟ್ಟ್‌ದ್ ಪೋವು ಪನ್ಪಿನ ಪೋಡಿಗೆ ಎಂಕುಂಡು.</verse>
				<verse number="4">ದಾಯೆ ಪಂಡ ಎಂಕುಲು ತೆರಿಪಾವಂದಿನ ನನೊರಿ ಯೇಸುನು ನಿಕ್ಲೆ ಕೈತಲ್‌ ಬರ್ಪಿನಾಕುಲು ತೆರಿಪಾಯೆರ್ಡ, ಅತ್ತ್‌ಡ ನಿಕುಲು ಹೊಂದುದಿನ ಆತ್ಮೊಡ್ದು ಬೇತೆ ರೀತಿದ ಆತ್ಮೊನು ನಿಕುಲು ಹೊಂದಿಯರ್ಡ, ನಿಕುಲು ಸ್ವೀಕಾರ ಮಲ್ತ್‌ದಿ ಸುವಾರ್ತೆನ್ ಅತ್ತಂದೆ ಬೇತೆ ರೀತಿದ ಸುವಾರ್ತೆನ್ ಸಾರಿಯರ್ಡ ಅಂಚಿತ್ತಿನೆನ್ ನಿಕುಲು ಸುಲಭೊಡು ಒಪ್ಪಿಯೊನುವರ್.</verse>
				<verse number="5">ಆ ಪುದರ್ ಪೋಯಿ “ಅಪೊಸ್ತಲೆರೆಡ್ದ್,” ಯಾನ್ ವಾ ರೀತಿಡ್ದ್‌ಲಾ ಕಡಿಮೆದಾಯೆ ಅತ್ತ್ ಅಂದ್‌ದ್ ಎನ್ನುವೆ.</verse>
				<verse number="6">ಯಾನ್ ಪಾತೆರುನೆಟ್ಟ್ ಬಿರ್ಸೆ ಅತ್ತ್‌ಡಲಾ, ಗೇನೊಡು ಬಿರ್ಸೆ ಆದುಲ್ಲೆ. ಉಂದೆನ್ ನಿಕ್ಲೆಗ್ ಮಾತ ಸಮಯೊಡು ಎಂಕುಲು ತೆರಿಪಾದ.</verse>
				<verse number="7">ನಿಕ್ಲೆ ಅಭಿವೃದ್ಧಿಗಾದ್ ಎನನ್ ಯಾನೇ ತಗ್ಗಾವೊಂದು ದೇವೆರೆ ಸುವಾರ್ತೆ ನಿಕ್ಲೆಗ್ ಸಾರಿದ್ ಯಾನ್ ಪಾಪ ಮಲ್ತೆನಾ?</verse>
				<verse number="8">ನಿಕ್ಲೆನ ಸೇವೆ ಮಲ್ಪೆರೆಗ್ ಯಾನ್ ಬೇತೆ ಸಭೆಕ್ಲೆಡ್ದ್ ಸಹಾಯೊನು ಅಕ್ಲೆಡ್ದ್ ವಸೂಲಿ ಮಲ್ತೊಂದಿತ್ತೆ.</verse>
				<verse number="9">ಬೊಕ್ಕ ನಿಕ್ಲೆ ಕೈತಲ್ ಉಪ್ಪುನಗ ಎಂಕ್ ಕೊರತೆ ಆನಗ ಯಾನ್ ಏರೆಗ್ಲಾ ದುನ್ನ ಕೊರ್ತುಜಿ; ಮಕೆದೋನ್ಯೊಡ್ದು ಬೈದಿನ ಸಹೋದ್ರೆರ್ ಎಂಕ್ ಬೋಡಾತಿನೆನ್ ಒದಗಾಯೆರ್. ನಿಕ್ಲೆಗ್ ಇದ ಮುಟ್ಟ ವಾ ದುನ್ನಲಾ ಕೊರ್ತುಜಿ; ನನಲಾ ಕೊರ್ಪುಜಿ.</verse>
				<verse number="10">ಕ್ರಿಸ್ತನ ಸತ್ಯ ಎನಡ ಉಪ್ಪುನೆಡ್ದ್, ಈ ಎನ ಪುಗರಿಕೆನ್ ಅಖಾಯ ಪ್ರಾಂತೊಲೆಡ್ ಏರೆಗ್ಲಾ ತಡೆಯೆರೆ ಸಾದ್ಯ ಇಜ್ಜಿ.</verse>
				<verse number="11">ಅವು ದಾಯೆಗ್? ನಿಕ್ಲೆ ಮಿತ್ತ್ ಪ್ರೀತಿದಾಂತಿನೆಡ್ದಾ? ನಿಕ್ಲೆ ಮಿತ್ತ್ ಪ್ರೀತಿ ಉಂಡು ಪನ್ಪಿನವು ದೇವೆರೆಗ್ ಗೊತ್ತು.</verse>
				<verse number="12">ಅಕುಲು ತನ್ಕುಲೆ ಬೇಲೆದ ವಿಷಯೊಡು ಪುಗರೊಂದುಲ್ಲೆರ್. ಆ ಪುಗರಿಕೆಗ್ ಕಾರಣ ಆವಂದಿಲೆಕ್ಕ ಯಾನ್ ಇತ್ತೆ ಮಲ್ಪುನೆನ್ ನನಲಾ ಮಲ್ತೊಂದೇ ಉಪ್ಪುವೆ.</verse>
				<verse number="13">ಅಂಚಿತ್ತಿನಾಕುಲು ಸುಳ್ಳು ಪ್ರವಾದಿಲು, ಮೋಸದ ಸೇವಕೆರ್, ಕ್ರಿಸ್ತನ ಅಪೊಸ್ತಲೆರಂದ್‌ದ್ ವೇಷ ಪಾಡ್ದಿನಾಕುಲು ಆದುಲ್ಲೆರ್.</verse>
				<verse number="14">ಉಂದು ಅಚ್ಚಿರದವು ಅತ್ತ್, ಸೈತಾನೆ ತಾನ್‌ಲಾ ಬೊಲ್ಪುದ ದೂತನ ವೇಷ ಪಾಡೊನ್ವೆ.</verse>
				<verse number="15">ಅಂಚಾದ್ ಆಯನ ಸೇವಕೆರ್‌ಲಾ ನೀತಿದ ಸೇವಕೆರೆ ವೇಷ ಪಾಡೊನುನವು ಅಚ್ಚಿರ ಅತ್ತ್. ಅಕ್ಲೆ ಕೆಲಸೊಗು ತಕ್ಕನೇ ಅಕ್ಲೆ ಅಂತ್ಯಲಾ ಅವು.</verse>
				<verse number="16">ಯಾನ್ ಬುದ್ಧಿದಾಂತಿನಾಯೆ ಅಂದ್‌ದ್ ಏರ್ಲಾ ಎನನ್ ಎನ್ನಿಯೆರೆ ಬಲ್ಲಿ ಅಂದ್‌ದ್ ಕುಡೊರ ಪನ್ಪೆ. ಒಂಜಿ ವೇಳೆ ಅಂಚ ಎನ್ನಿಯರ್ಡಲಾ ಎನನ್ ಬುದ್ಧಿದಾಂತಿನಾಯೆ ಅಂದ್‌ದ್ ಸ್ವೀಕಾರ ಮಲ್ಪಡ್. ಅಪಗ ಎಂಕ್ ಒಂತೆ ಪುಗರೊನಿಯೆರೆಗ್ ಆಪುಂಡು.</verse>
				<verse number="17">ಇಂಚ ಯಾನ್ ಇತ್ತೆ ಪಾತೆರುನ ಪಾತೆರೊಲು ಕರ್ತವನ ಅಧಿಕಾರೊಡು ತಕ್ಕಾದ್ ಪಾತೆರಂದೆ ಭರವಸೊಡು ತನನ್ ಪುಗರೊನುನೆಟ್ಟ್ ಬುದ್ಧಿದಾಂತಿನಾಯ ಲೆಕ್ಕನೇ ಪಾತೆರ್‌ವೆ.</verse>
				<verse number="18">ದಿಂಜ ಜನ ಲೋಕದ ರೀತಿಡ್ ತನ್ಕುಲೆನ್ ಪುಗರುನೆಡ್ದ್ ಯಾನ್ಲಾ ಪುಗರೊಂದುಲ್ಲೆ.</verse>
				<verse number="19">ನಿಕುಲು ಬುದ್ಧಿವಂತೆರಾದಿತ್ತಿದ್ ಬುದ್ಧಿದಾಂತಿನಾಕುಲೆನ್ ಸಂತೋಷೊಡು ಸಹಿಸೊನುವರತ್ತಾ?</verse>
				<verse number="20">ಒರಿ ನಿಕ್ಲೆನ್ ತನ್ಕುಲೆಗ್ ವಶ ಮಲ್ತೊಂಡೆಡ ನಿಕ್ಲೆನ್ ದೋಚಿಯೆಡ ನಿಕ್ಲೆನ್ ಉಪಯೋಗ ಮಲ್ತೊಂಡೆಡ ನಿಕ್ಲೆ ಎದುರುಡು ಒರಿ ಹೆಚ್ಚಾಳ್ಮೆ ಮಲ್ತೊಂಡೆಡ ನಿಕ್ಲೆ ಮೋನೆಗ್ ಹಾಕಿಯೆಡಲಾ ಅಂಚಿತ್ತಿನಾಕುಲೆನ್ ಸಹಿಸೊನುವರತ್ತಾ?</verse>
				<verse number="21">ಐಕ್ ಎಂಕುಲು ಬಲಹೀನೆರ್ ಆದಿತ್ತ ಅಂದ್‌ದ್ ಯಾನ್ ನಾಚಿಗೆ ಬುಡ್ದು ಪನ್ಪೆ. ಒರಿ ಒಯಿಟ್ ತನನ್ ಧೈರ್ಯೊಡು ಪುಗರೊನ್ವೆನಾ, ಐಟ್ಟೇ ಯಾನ್ಲಾ ಎನನ್ ಧೈರ್ಯೊಡು ಪುಗರೊನ್ವೆ. (ಉಂದೆನ್ ಯಾನ್ ಬುದ್ಧಿದಾಂತೆ ಪಾತೆರ್‌ವೆ ಅಂದ್‌ದ್ ಎನ್ನೊನ್ಲೆ.)</verse>
				<verse number="22">ಅಕುಲು ಇಬ್ರಿಯೆರಾ? ಯಾನ್ಲಾ ಇಬ್ರಿಯೆನೇ. ಅಕುಲು ಇಸ್ರಾಯೇಲ್ಯೆರಾ? ಯಾನ್ಲಾ ಇಸ್ರಾಯೇಲ್ಯೆ, ಅಕುಲು ಅಬ್ರಹಾಮು ಸಂತಾನನಾ? ಯಾನ್ಲಾ ಆಯ ಸಂತಾನನೇ.</verse>
				<verse number="23">ಅಕುಲು ಕ್ರಿಸ್ತನ ಸೇವಕೆರಾ? (ಮೂಲು ಯಾನ್ ಬುದ್ಧಿ ತತ್ತಿನಾಯಲೆಕ್ಕ ಪಾತೆರ್‌ವೆ.) ಯಾನ್ಲಾ ಅಕ್ಲೆಡ್ದ್ ಹೆಚ್ಚಾದ್ ಸೇವೆ ಮಲ್ಪುನಾಯೆನೇ. ಆಯನ ಸೇವೆಡ್ ಅಕ್ಲೆಡ್ದ್ ಹೆಚ್ಚ್ ಪ್ರಯಾಸ ಬುಡಿಯೆ; ಮಸ್ತ್ ಸರ್ತಿ ಸೆರೆಮನೆಟ್ ಬೂರಿಯೆ; ಹೆಚ್ಚಾದ್ ಚಡಿತ ಪೆಟ್ಟ್ ತಿಂದೆ, ಅಪಗಪಗ ಮರಣೊಗು ಎದುರಾಯೆ.</verse>
				<verse number="24">ಐನ್ ಸರ್ತಿ ಯೆಹೂದ್ಯೆರೆಡ್ದ್ ಮುಪ್ಪತ್ತೊಂರ್ಬ ಪೆಟ್ಟ್‌ಲೆನ್ ತಿಂದೆ.</verse>
				<verse number="25">ಮೂಜಿ ಸರ್ತಿ ಬೆತ್ತೊಡು ಹಾಕಿಯೆರ್, ಒರ ಕೆರಿಯೆರೆಗಾದ್ ಕಲ್ಲ್ ದಕ್ಕಿಯೆರ್; ಮೂಜಿ ಸರ್ತಿ ಯಾನಿತ್ತಿನ ಕಪ್ಪಲ್ ಪುಡಾದ್ ಪೋಂಡು; ಕಡಲ್ದ ನೀರ್‌ಡ್ ಒಂಜಿ ರಾತ್ರೆ ಒಂಜಿ ಪಗೆಲ್ ದೆತ್ತೆ.</verse>
				<verse number="26">ಆಯನ ಸೇವೆಡ್ ಪ್ರಯಾಣ ಮಲ್ತೊಂದೆ ಇತ್ತೆ. ತುದೆಟ್ ಅಪಾಯ, ಕಲ್ವೆರೆಡ್ದ್ ಅಪಾಯ ಸ್ವಂತ ಜನೊಕುಲೆಡ್ದ್ ಅಪಾಯ, ಪಿದಯಿದ ಜನೊಕುಲೆಡ್ದ್‌ಲಾ ಅಪಾಯ, ಪಟ್ಟಣೊಡು ಅಪಾಯ, ಕಾಡ್‌ಡ್ ಅಪಾಯ, ಕಡಲ್ಡ್ ಅಪಾಯ, ಸುಳ್ಳು ಸಹೋದರೆರೆ ಒಟ್ಟುಗು ಅಪಾಯ ಉಂಡಾಂಡ್.</verse>
				<verse number="27">ಪ್ರಯಾಸೊಡ್ಲಾ ಬೇಲೆ ಮಲ್ತೆ, ಮಸ್ತ್ ಸರ್ತಿ ನಿದ್ರೆದಾಂತೆಲಾ ಇತ್ತೆ. ಬಡವುಡು ಬಾಜೆಲ್‌ಡ್ಲಾ ಇತ್ತೆ, ಮಸ್ತ್ ಸರ್ತಿ ಉಪವಾಸೊಡ್ಲಾ ಕುಂಟುದಾಂತೆಲಾ ಇತ್ತೆ. ಚಳಿಟ್ಲಾ ನಡುಗೊಂದು ಇತ್ತೆ.</verse>
				<verse number="28">ಇಂಚಿನ ಬೇತೆ ಸಂಗತಿಲೆಡ್ದ್ ಅತ್ತಂದೆ ಮಾತ ಸಭೆಕ್ಲೆ ಚಿಂತೆಲಾ ದಿನದಿನಾಲ ಎಂಕ್ ಪೀಡೆ ಕೊರೊಂದಿತ್ತ್‌ಂಡ್.</verse>
				<verse number="29">ಏರಾಂಡಲಾ ಬಲಹೀನೆ ಆದಿತ್ತೆಡ ಯಾನ್ಲಾ ಬಲಹೀನೆ ಆದುಪ್ಪುವೆ. ಏರಾಂಡಲಾ ಪಾಪೊಡು ತಿಕ್ಕೊಂಡೆಡ ಯಾನ್ಲಾ ದುಃಖ ಮಲ್ತೊನ್ವೆ.</verse>
				<verse number="30">ಯಾನ್ ಪುಗರೊನುನಾಂಡ ಎನ ಬಲಹೀನತೆನ್ ತೋಜಾವುನ ವಿಷಯೊಲೆಡ್ ಪುಗರೊನ್ವೆ.</verse>
				<verse number="31">ಯಾನ್ ಪನ್ಪಿನವು ಸುಳ್ಳು ಅತ್ತ್ ಅಂದ್‌ದ್ ನಮ ಕರ್ತವೆ ಆದುಪ್ಪು ಯೇಸುನ ಅಮ್ಮೆ ಆದುಪ್ಪು ದೇವೆರೆಗ್ ಗೊತ್ತುಂಡು. ಆಯೆ ಸದಾಕಾಲೊಗು ಸ್ತುತಿ ದೆತ್ತೊನುನಾಯೆ ಆದುಲ್ಲೆ.</verse>
				<verse number="32">ದಮಸ್ಕೊಡು ಅರೇತ ರಾಜನ ಅಧೀನಡುಪ್ಪುನಗ ಅಧಿಪತಿ ಎನನ್ ಪತ್ತೆರೆಗಾದ್ ದಮಸ್ದದ ಬಾಕಿಲ್‌ಡ್ ಪಾರ ದೀದಿತ್ತೆರ್.</verse>
				<verse number="33">ಆಂಡ ಎನನ್ ಒಂಜಿ ಪುಡಯಿಡ್ ಕುಲ್ಲಾದ್ ಗೋಡೆಡಿತ್ತಿ ಕಂಡಿಡ್ದ್ ಜಪುಡಾಯೆರ್; ಅಂಚ ಆಯಡ್ದ್ ಯಾನ್ ತಪ್ಪಾವೊಂಡೆ.</verse>
			</chapter>
			<chapter number="12">
				<verse number="1">ಪುಗರೊನುನವು ಪ್ರಯೋಜನ ಇಜ್ಜಾಂಡಲಾ ಎಂಕ್ ಪುಗರೊನುನವು ಅವಶ್ಯ ಆದುಂಡು. ಆಂಡ ಕರ್ತವೆ ಎಂಕ್ ಕೊರ್ತಿನ ದರ್ಶನೊಲೆನ್ ಬೊಕ್ಕ ಗುಟ್ಟುದ ಪಾತೆರೊಲೆನ್ ಪನೊಂದುಲ್ಲೆ.</verse>
				<verse number="2">ಕ್ರಿಸ್ತಡುಪ್ಪು ಒರಿ ನರಮಾನಿ ಪದ್ನಾಲ್ ವರ್ಸದ ಪಿರವುಡು ಆಯನ್ ಮೂಜೆನೇ ಪರಲೋಕೊಗು ದೇವೆರ್ ದೆತ್ತೊಂದು ಪೋಯೆ ಅಂದ್‌ದ್ ಎಂಕ್ ಗೊತ್ತುಂಡು. ಆ ಸಮಯೊಡು ಶರೀರೊಡಿತ್ತಿನಾಯೆ ಆದ್ ಪೋಯೆನಾ, ಶರೀರೊನು ಬುಡ್ತಿನಾಯೆ ಆದ್ ಪೋಯೆನಾ ಯಾನ್ ತೆರಿಯಯೆ. ದೇವೆರೆಗೇ ಗೊತ್ತು.</verse>
				<verse number="3">ಆಯನ್ ಪರದೈಸೊಗು ದೇವೆರ್ ದೆತ್ತೊಂದು ಆಯೆ ಅವುಲು ನರಮಾನಿ ಪಾತೆರಿಯೆರೆ ಆವಂದಿನವುಲಾ ಪನಿಯೆರೆ ಬಲ್ಲಿ ಪನ್ಪಿನ ಪಾತೆರೊನ್ಲಾ ಕೇನಿಯೆ. ಆ ಸಮಯೊಡು ಶರೀರೊಡಿತ್ತಿನಾಯೆ ಆದ್ ಪೋಯೆನಾ, ಶರೀರೊನು ಬುಡ್ತಿನಾಯೆ ಆದ್ ಪೋಯೆನಾ ಯಾನ್ ತೆರಿಯಯೆ. ದೇವೆರೆಗೇ ಗೊತ್ತು.</verse>
				<verse number="4"></verse>
				<verse number="5">ಅಂಚಿತ್ತಿ ನರಮಾನಿನ ಸಂಗತಿಡ್ ಯಾನ್ ಪುಗರೊನ್ವೆ; ಆಂಡ ಯಾನ್ ಎನ ಸಂಗತಿಡ್ ಪುಗರೊನುಜಿ. ಅತ್ತಂದೆ ಎನ ಬಲದಾಂತಿ ಸ್ಥಿತಿನೇ ಪುಗರೊನ್ವೆ.</verse>
				<verse number="6">ಯಾನ್ ಪುಗರೊನಿಯೆರೆ ಮನಸ್ ಮಲ್ತೆಡಲಾ ಯಾನ್ ಆ ಸಂಗತಿಡ್ ಬುದ್ಧಿದಾಂತಿನಾಯೆ ಆವಯೆ; ದಾಯೆ ಪಂಡ ಯಾನ್ ಸತ್ಯೊನೇ ಪನೊಂದುಲ್ಲೆ. ಆಂಡ ಯಾನ್ ಪುಗರೊನುಜಿ. ದಾಯೆಗಂದ್ಂಡ ಏರ್ಲಾ ಎನಡ್ದ್ ತೂಪಿನೆಡ್ದಾವಡ್, ಯಾನ್ ಪನ್ಪಿನೆನ್ ಕೇನುನೆಡ್ದಾವಡ್ ಹೆಚ್ಚಾದ್ ಎನನ್ ಎನ್ನಿಯೆರೆ ಬಲ್ಲಿ.</verse>
				<verse number="7">ಎಂಕ್ ತೆರಿಪಾಯಿನ ಗುಟ್ಟುದ ಪಾತೆರೊಲು ಎನನ್ ಹೆಚ್ಚಲ್ಮೆ ಮಲ್ಪಂದಿಲೆಕ್ಕ ದೇವೆರ್ ಎನ ಶರೀರೊಡು ಒಂಜಿ ಮುಳ್ಳು ದೀದಿತ್ತೆ. ಅವು ಮುಳ್ಳು ದಾನೆಂದ್ಂಡ ಯಾನ್ ಮಿತಿ ಮೀರ್‌ದ್ ಹೆಚ್ಚಲ್ಮೆ ಮಲ್ತೊನಂದಿಲೆಕ್ಕ ಎಂಕ್ ಬೇನೆ ಕೊರ್ಪಿನ ಸೈತಾನನ ಒರಿ ದೂತೆನೇ.</verse>
				<verse number="8">ಮೂಜಿ ಸರ್ತಿ ಅವೆನ್ ಎನಡ್ದ್ ದೆತ್ತ್‌ದ್ ಪಾಡಿಯೆರೆ ಕರ್ತವಡ ನಟ್ಟೊಂಡೆ.</verse>
				<verse number="9">ಆಂಡ ಯೇಸು ಎಂಕ್ ಪಂಡೆ, “ಎನ ದಯನೇ ನಿಕ್ಕ್ ಯಾವು. ಬಲದಾಂತಿನಪಗನೇ ನಿಕ್ಕ್ ಪೂರ್ತಿ ಬಲ ತಿಕ್ಕುಂಡು.” ಅಂಚಾದ್ ಕ್ರಿಸ್ತನ ಬಲ ಎನಡ ಸ್ಥಿರ ಆಪಿಲೆಕ್ಕ ಯಾನ್ ಎನ ಬಲದಾಂತಿ ಸ್ಥಿತಿಟ್ಟೆ ಮಸ್ತ್ ಸಂತೋಷೊಡು ಪುಗರೊನ್ವೆ.</verse>
				<verse number="10">ಐಡ್ದಾವರ ಕ್ರಿಸ್ತಗ್ ಬೋಡಾದ್ ಎಂಕಾಯಿನ ಬಲಹೀನತೆಡ್, ಅಪಮಾನೊಲೆಡ್, ಭಂಗೊಲೆಡ್, ಇಕ್ಕಟ್ಟ್‌ಡ್ ಯಾನ್ ಸಂತೋಷೊಡುಲ್ಲೆ. ದಾಯೆಗಂದ್ಂಡ ಯಾನ್ ಬಲಹೀನೆ ಆದುಪ್ಪುನಗನೇ ಯಾನ್ ಬಲವಂತೆ ಆದುಲ್ಲೆ.</verse>
				<verse number="11">ಯಾನ್ ಬುದ್ಧಿದಾಂತಿನಾಯಲೆಕ್ಕ ಪಾತೆರಿಯೆ. ನಿಕುಲು ಎನನ್ ಅಂಚ ಆಯೆರೆ ಬಲವಂತ ಮಲ್ತ್‌ದರ್. ನಿಕ್ಲೆಡ್ದೇ ಎಂಕ್ ಪುಗರಿಕೆ ಆವೊಡಿತ್ತ್‌ಂಡ್, ದಾಯೆಗಂದ್ಂಡ ಯಾನ್ ದಾಲಾ ಇಜ್ಜಂದಿನಾಯೆ ಆದಿತ್ತ್‌ಂಡಲಾ ಆ ಮಲ್ಲ “ಅಪೊಸ್ತಲೆರೆಡ್ದ್,” ಯಾನ್ ಒಯಿಟ್‌ಲಾ ಕಡಿಮೆದಾಯೆ ಅತ್ತ್.</verse>
				<verse number="12">ನಿಜ ಅಪೊಸ್ತಲೆರೆ ಲಕ್ಷಣೊಲು ಪಂಡ್ಂಡ ಗುರ್ತೊಲು, ಕಾರ್ನಿಕೊಲು, ಬಲತ್ತ ಕಾರ್ಯೊಲು, ಮಾತ ಸಜ್ಜನಿಗೆಡ್ ನಿಕ್ಲೆ ಮದ್ಯೊಡು ಮಲ್ತೆ.</verse>
				<verse number="13">ಯಾನ್ ನಿಕ್ಲೆಗ್ ದಾಲಾ ದುನ್ನ ಆದಿತ್ತಿಜಿ ಪನ್ಪಿನೆನ್ ಬುಡುಂಡ ನಿಕುಲು ಬೇತೆ ವಾ ಸಭೆಕ್ಲೆಡ್ದ್‌ಲಾ ಕಡಿಮೆದಾಕುಲು ಅತ್ತತ್ತಾ? ಈ ಅನ್ಯಾಯೊಗಾದ್ ಎನನ್ ಮಾಪು ಮಲ್ಪುಲೆ.</verse>
				<verse number="14">ಯಾನ್ ಮೂಜನೇ ಸರ್ತಿ ನಿಕ್ಲೆ ಕೈತಲ್‌ ಬರಿಯೆರೆ ತಯಾರಾದುಲ್ಲೆ; ಅಪಗಲಾ ನಿಕ್ಲೆಗ್ ದಾಲಾ ದುನ್ನ ಆದುಪ್ಪುಜಿ. ದಾಯೆ ಪಂಡ ನಿಕ್ಲೆ ಸೊತ್ತುನು ಬಯಕಂದೆ ನಿಕ್ಲೆನೇ ಯಾನ್ ಬಯಕುವೆ. ಜೋಕುಲು ಅಪ್ಪೆಅಮ್ಮೆಗಾದ್ ಆಸ್ತಿ ಕೂಡಾವುನತ್ತ್; ಅಪ್ಪೆಅಮ್ಮೆ ಜೋಕಲೆಗಾದ್ ಆಸ್ತಿ ಕೂಡಾದ್ ದೀಪಿನವೇ.</verse>
				<verse number="15">ನಿಕ್ಲೆ ಆತ್ಮ ರಕ್ಷೆಣೆಗಾದ್ ಆತಿ ಸಂತೊಸೊಡು ಎನನೇ ಕೊರೊಂದುಲ್ಲೆ. ಯಾನ್ ನಿಕ್ಲೆನ್ ಹೆಚ್ಚಾದ್ ಪ್ರೀತಿ ಮಲ್ಪುನಗ ನಿಕುಲು ಎನನ್ ಕಡಿಮೆ ಪ್ರೀತಿ ಮಲ್ಪುವರಾ?</verse>
				<verse number="16">ಅವು ಎಂಚಲಾ ಆವಡ್. ಯಾನ್ ನಿಕ್ಲೆಗ್ ದುನ್ನ ಆದಿತ್ತಿಜಿಡಲಾ, ನಿಕುಲು ಆಯೆ ಉಪಾಯೊಡು ಎಂಕ್ಲೆನ್ ಸುಲಿಗೆ ಮಲ್ತೆ ಅಂದ್‌ದ್ ಪನುವರ್. ಅಂಚಿತ್ತಿನೆನ್ ಯಾನ್ ಮಲ್ತ್‌ದೆನಾ?</verse>
				<verse number="17">ಯಾನ್ ನಿಕ್ಲೆ ಕೈತಲ್‌ಗ್ ಕಡಪುಡಿನಾಕುಲೆಡ್ ಏರೆಡ್ದಾಂಡಲಾ ನಿಕ್ಲೆನ್ ವಂಚನೆ ಮಲ್ತ್‌ದ್ ದಾಲಾಂಡಲಾ ದೋಚಿಯೆನಾ?</verse>
				<verse number="18">ತೀತನ್ ನಿಕ್ಲೆನಡೆಗ್ ಪೋವೆರೆ ಯಾನ್ ಒತ್ತಾಯ ಮಲ್ತೆ. ಆಯನೊಟ್ಟುಗು ಬೊಕ್ಕೊರಿ ಸಹೋದ್ರನ್ಲಾ ಕಡಪುಡಿಯೆ. ತೀತೆ ನಿಕ್ಲೆನ್ ವಂಚನೆ ಮಲ್ತ್‌ದ್ ದಾಲಾಂಡಲಾ ದೋಚಿಯೆನಾ? ಎಂಕುಲು ಇರ್ವೆರ್‌ಲಾ ಒಂಜೇ ಆತ್ಮಡ್ದ್ ಪ್ರೇರಣೆ ಆದ್ ಒಂಜೇ ಹೆಜ್ಜೆಡ್ ನಡತಿಜನಾ?</verse>
				<verse number="19">ಎಂಕುಲು ಇತೊರ್ತು ನಿಕ್ಲೆನ ಎದುರುಡು ಪ್ರತಿವಾದ ಮಲ್ಪುವ ಅಂದ್‌ದ್ ನಿಕುಲು ಎನ್ನುವರಾ? ದೇವೆರೆ ಸನ್ನಿಧಿಡ್ ಕ್ರಿಸ್ತಡ್ ಇತ್ತಿನಾಕುಲಾದ್ ಪಾತೆರುನಾಕುಲಾದುಲ್ಲ. ಪ್ರೀತಿದಾಕುಲೆ, ಮಾತಲಾ ನಿಕ್ಲೆನ್ ಭಕ್ತಿವೃದ್ಧಿ ಮಲ್ಪುನೆಕ್ಕಾದ್ ಪನ್ಪ.</verse>
				<verse number="20">ಯಾನ್ ಬತ್ತಿನಪಗ ನಿಕುಲು ಯಾನ್ ಎನ್ನಿಲೆಕ್ಕ ತೋಜುವರಾ ಇಜ್ಜಾ, ಯಾನ್ ನಿಕುಲು ಎನ್ನಿಲೆಕ್ಕ ತೋಜುವೆನಾ ಇಜ್ಜಾ ಎಂಕ್ ಪೋಡಿಗೆ ಉಂಡು. ಒಂಜಿ ವೇಳೆ ನಿಕ್ಲೆಡ್ ಲಡಯಿ, ಮಚ್ಚರ, ಕೋಪ, ಸ್ವಾರ್ಥ, ಅವಮಾನ, ಚಾಡಿ ಪನ್ಪಿನವು, ಸೊರ್ಕು, ಗಲಿಬಿಲಿ ಪುಟ್ಟಾವುಂಡು ಪನ್ಪಿನ ಪೋಡಿಗೆ ಎಂಕುಂಡು.</verse>
				<verse number="21">ಯಾನ್ ಕುಡೊರ ಬನ್ನಗ ಎನ ದೇವೆರ್ ನಿಕ್ಲೆ ಎದುರುಡು ಎನನ್ ತಗ್ಗಾವೆ. ದಾಯೆಗ್ ಪಂಡ ನಿಕ್ಲೆ ನಡುಟು ದುಂಬುದಲೆಕ್ಕ ಪಾಪ ಮಲ್ತ್‌ದ್ ಬಂಡ್‌ತನ, ಹಾದ್ರ, ಸೂಳೆಗಾರಿಕೆ ಮಲ್ತ್‌ದ್‌ಲಾ ಪಶ್ಚಾತಾಪ ಮಲ್ಪಂದಿನ ಮಸ್ತ್ ಜನೊಕುಲೆ ಸಂಗತಿಡ್ ದುಃಖ ಮಲ್ಪೊಡಾವು ಪನ್ಪಿನ ಪೋಡಿಗೆ ಎಂಕುಂಡು.</verse>
			</chapter>
			<chapter number="13">
				<verse number="1">ಯಾನ್ ನಿಕ್ಲೆನಡೆಗ್ ಬರ್ಪಿನಿ ಉಂದು ಮೂಜನೇ ಸರ್ತಿ. ಪ್ರತಿಯೊಂಜಿ ಸಂಗತಿಡ್ಲಾ ರಡ್ಡ್ ಮೂಜಿ ಜನ ಸಾಕ್ಷಿದಾಕುಲೆ ಬಾಯಿಡ್ದ್ ಸ್ಥಿರ ಆವೊಡು.</verse>
				<verse number="2">ಯಾನ್ ನಿಕ್ಲೆ ನಡುಟು ರಡ್ಡನೆ ಸರ್ತಿ ಬತ್ತ್‌ದುಪ್ಪುನಗ ನಿಕ್ಲೆಗ್ ಶಿಕ್ಷೆ ಕೊರಂದೆ ಕುಲ್ಲಯೆ ಪಂಡ್ದ್ ಪನ್ತೆನಾ ಅಂಚೆನೇ ಇತ್ತೆ ದೂರ ಇತ್ತ್ಂಡಲಾ ಪಾಪ ಮಲ್ತಿನಾಕುಲೆನ್ ಮಾತೆರೆನ್ಲಾ ಎಚ್ಚರಿಕೆ ಮಲ್ತೊಂದುಲ್ಲೆ. ಯಾನ್ ಕುಡ ಬನ್ನಗ ಏರೆನ್ಲಾ ಬುಡ್ಪುಜಿ.</verse>
				<verse number="3">ಕ್ರಿಸ್ತೆ ಎನಡ ಪಾತೆರ್‌ವೆ ಪನ್ಪಿನೆಕ್ಕ್ ನಿಕುಲು ಪುರಾವೆ ಕೇನಿನೆಡ್ದ್ ಯಾನ್ ಇಂಚ ಪನ್ಪೆ. ಆಯೆ ನಿಕ್ಲೆ ಸಂಗತಿಡ್ ಬಲಹೀನೆ ಆದುಪ್ಪಂದೆ; ನಿಕ್ಲೆ ನಡುಟು ಬಲವಂತೆ ಆದುಲ್ಲೆ.</verse>
				<verse number="4">ಆಯನ್ ಕ್ರುಸ್ಸುಗು ಪಾಡ್ನಗ ಬಲದಾಂತಿನಾಯೆ ಆದಿತ್ತೆ. ಆಂಡಲಾ ದೇವೆರೆ ಬಲೊಟು ಬದುಕುನಾಯೆ ಆದುಲ್ಲೆ. ಎಂಕುಲುಲಾ ಆಯನ ಬಲದಾಂತಿನೆಟ್ಟ್ ಪಾಲ್‌ದಾರೆರಾದುಲ್ಲ. ಆಂಡಲಾ ಆಯಡೊಪ್ಪ ದೇವೆರೆ ಬಲೊಡ್ದು ನಿಕ್ಲೆಗಾದ್ ಎಂಕುಲು ಬದುಕೊಂದುಲ್ಲ.</verse>
				<verse number="5">ನಿಕುಲು ನಂಬುನಾಕುಲು ಆದಿತ್ತ್ಂಡ ನಿಕ್ಲೆನ್ ನಿಕುಲೇ ಶೋಧಿಯೊನ್ಲೆ, ನಿಕ್ಲೆನ್ ನಿಕುಲೇ ಪರೀಕ್ಷೆ ಮಲ್ತೊನ್ಲೆ. ಯೇಸು ಕ್ರಿಸ್ತೆ ನಿಕ್ಲೆಡ್ ಉಲ್ಲೆ ಅಂದ್‌ದ್ ನಿಕ್ಲೆಗ್ ತೆರಿಯುಜಾ? ಆಯೆ ನಿಕ್ಲೆಡ್ ಇಜ್ಜೆಡ ನಿಕುಲು ಯೋಗ್ಯೆರ್ ಅತ್ತ್.</verse>
				<verse number="6">ಎಂಕುಲು ಪರೀಕ್ಷೆಡ್ ಸೋತು ಪೋತಿಜ ಪನ್ಪಿನೆನ್ ನಿಕುಲು ತೆರಿಯೊನ್ವರ್ ಅಂದ್‌ದ್ ಎಂಕ್ ನಿರೀಕ್ಷೆ ಉಂಡು.</verse>
				<verse number="7">ನಿಕುಲು ದಾಲಾ ಪಡಿಕೆಂತಿನೆನ್ ಮಲ್ಪೆರೆ ಬಲ್ಲಿ ಅಂದ್‌ದ್ ಎಂಕುಲು ದೇವೆರಡ ನಟ್ಟೊನ್ವ. ಉಂದೆಟ್ಟ್ ಎಂಕುಲೇ ಪರೀಕ್ಷೆಡ್ ಗೆಂದ್‌ದ ಅಂದ್‌ದ್ ತೋಜಿದ್ ಬರೊಡು ಅಂದ್‌ದ್ ಎಂಕ್ಲೆನ ಉದ್ದೇಶ ಅತ್ತ್. ಆಂಡ ಎಂಕುಲು ಆ ಪರೀಕ್ಷೆಡ್ ಸೋತುದಿತ್ತ್‌ಂಡಲಾ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆವೊಡು ಅಂದ್‌ದೇ ಎಂಕ್ಲೆನ ಉದ್ದೇಶ.</verse>
				<verse number="8">ದಾಯೆಗಂದ್ಂಡ ಎಂಕುಲು ಸತ್ಯೊಗು ವಿರೋಧಾದ್ ದಾಲಾ ಮಲ್ಪೆರೆ ಆಪುಜಿ, ಸತ್ಯೊಗು ಬೋಡಾದೇ ಮಲ್ಪುವ.</verse>
				<verse number="9">ಎಂಕುಲು ಬಲದಾಂತಿನಾಕುಲು ಆದಿತ್ತ್‌ಂಡಲಾ ನಿಕುಲು ಬಲತ್ತಾಕುಲು ಆದುಪ್ಪುನೆಟ್ಟ್ ಎಂಕುಲು ಸಂತೋಷ ಮಲ್ಪುವ. ನಿಕುಲು ಕ್ರೈಸ್ತ ಜೀವನೊಡು ಸಮರ್ಥೆರ್ ಆವೊಡು ಪಂಡ್ದ್ ದೇವೆರೆಡ ಎಂಕುಲು ನಟ್ಟೊನ್ವ.</verse>
				<verse number="10">ಐಕಾದೇ ಯಾನ್ ನಿಕ್ಲೆಡ್ದ್ ದೂರ ಇತ್ತೊಂದು ಈ ವಿಷಯೊಲೆನ್ ಬರೆತೆ. ದಾಯೆಗ್ ಪಂಡ ಯಾನ್ ಬನ್ನಗ ದೇವೆರ್ ಎಂಕ್ ಕೊರ್ತಿ ಅಧಿಕಾರೊಡು ಯಾನ್ ಕಠಿಣ ಆದ್ ತೋಜಿದ್ ಬರಂದಿಲೆಕ್ಕ ಆಸೆ ಮಲ್ತೊಂದುಲ್ಲೆ. ದೇವೆರ್ ಈ ಅಧಿಕಾರೊನು ನಿಕ್ಲೆನ್ ಮರಪುನೆಕ್ಕಾದ್ ಕೊರಂದೆ ಕಟ್ಟುನೆಕ್ಕಾದ್ ಕೊರ್ತೆ.</verse>
				<verse number="11">ಕಡೆಕ್ಕ್ ಸಹೋದ್ರೆರೇ, ಸಂತೋಷೊಡುಪ್ಪುಲೆ, ಪೂರ್ತಿ ಸರಿ ಆವೊನ್ಲೆ. ಎನ ಬುದ್ಧಿ ಪಾತೆರೊಗು ಕೆಬಿ ಕೊರ್ಲೆ. ಒಂಜೆ ಮನಸ್‌ದಾಕುಲು ಆದುಪ್ಪುಲೆ, ಸಮಾಧಾನೊಡುಪ್ಪುಲೆ. ಅಪಗ ಪ್ರೀತಿನ್ಲಾ ಶಾಂತಿನ್ಲಾ ಕೊರ್ಪಿನ ದೇವೆರ್ ನಿಕ್ಲೆಡೊಪ್ಪ ಉಪ್ಪುವೆ.</verse>
				<verse number="12">ಒರಿಯಗ್ ಒರಿ ಪರಿಶುದ್ಧದ ಮುದ್ದು ಕೊರ್ದು ವಂದಿತೊನ್ಲೆ.</verse>
				<verse number="13">ಮಾತ ದೇವಜನೊಕುಲು ನಿಕ್ಲೆಗ್ ವಂದಿಪುವೆರ್. ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ, ದೇವೆರೆ ಪ್ರೀತಿ, ಪರಿಶುದ್ಧಾತ್ಮನ ಅನ್ಯಮನ್ಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್. ಆಮೆನ್.</verse>
				<verse number="14"></verse>
			</chapter>
		</book>
		<book number="48">
			<chapter number="1">
				<verse number="1">ನರಮಾನಿಲೆಡ್ದಾವಡ್, ನರಮಾನಿಲೆ ಅಧಿಕಾರೊಡ್ದಾವಡ್ ಅಪೊಸ್ತಲೆ ಆವಂದೆ ಯೇಸು ಕ್ರಿಸ್ತಡ್ದ್‌ಲಾ ಆಯನ್ ಸೈತಿನಾಕುಲೆಡ್ದ್ ಲಕ್ಕಾದಿ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಅಪೊಸ್ತಲ ಬೇಲೆನ್ ಪಡೆಯಿನ ಪೌಲು ಇನ್ಪಿ ಯಾನ್ಲಾ ಎನಡೊಪ್ಪ ಉಪ್ಪು ಮಾತ ಸಹೋದ್ರೆರ್‌ಲಾ ಗಲಾತ್ಯೊಡುಪ್ಪು ಸಭೆತಾಕುಲೆಗ್ ಬರೆಪಿನಿ ದಾನೆಂದ್ಂಡ,</verse>
				<verse number="2"></verse>
				<verse number="3">ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="4">ಆಯೆ ಇತ್ತೆದ ದುಷ್ಟ ಲೋಕೊಡ್ದು ನಮನ್ ಬುಡ್ಪಾವೆರೆಗಾದ್, ನಮ ಅಮ್ಮೆ ಆದುಪ್ಪು ದೇವೆರೆ ಚಿತ್ತೊಗು ಸರಿಯಾದ್ ನಮ ಪಾಪೊಲೆಗ್ ಬೋಡಾದ್ ತನನ್ ತಾನೇ ಬಲಿಯಾದ್ ಅರ್ಪಿಸಾಯೆ.</verse>
				<verse number="5">ಅಂಚಾದ್ ದೇವೆರೆಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್; ಆಮೆನ್.</verse>
				<verse number="6">ಕ್ರಿಸ್ತನ ದಯೊಡ್ದು ನಿಕ್ಲೆನ್ ಲೆತ್ತಿನಾಯನ್ ನಿಕುಲು ಈತ್ ಬೇಗ ಬುಡ್ದು ಬೇತೆ ಸುವಾರ್ತೆ ಪತ್ತೊಂಡಿನೆಕ್ಕ್ ಅಚ್ಚಿರ ಆಪುಂಡು.</verse>
				<verse number="7">ಅವು ಸುವಾರ್ತೆನೇ ಅತ್ತ್, ಆಂಡ ಕೆಲೆವೆರ್ ನಿಕ್ಲೆ ನಡುಟು ಗಲಿಬಿಲಿ ಪುಟ್ಟಾದ್ ಕ್ರಿಸ್ತನ ಸುವಾರ್ತೆ ಬೇತೆ ಮಲ್ಪೆರೆಗ್ ಪ್ರಯತ್ನ ಮಲ್ತೊಂದುಲ್ಲೆರ್.</verse>
				<verse number="8">ಆಂಡ ಎಂಕುಲು ನಿಕ್ಲೆಗ್ ಸಾರಿನ ಸುವಾರ್ತೆಗ್ ವಿರೋಧಾದ್ ಎಂಕುಲಾವಡ್ ಪರಲೋಕೊಡ್ದು ಬತ್ತಿನ ಒರಿ ದೂತೆನೇ ಆವಡ್ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆವಡ್.</verse>
				<verse number="9">ಇತ್ತೆ ನಿಕುಲು, ಒಪ್ಪಿನ ಸುವಾರ್ತೆಗ್ ವಿರೋಧವಾಯಿನೆನ್ ಬೇತೆ ಒವ್ವೆನಾಂಡಲಾ ಏರಾಂಡಲಾ ನಿಕ್ಲೆಗ್ ಸಾರಿಯೆಡ, ಆಯೆ ಶಾಪಗ್ರಸ್ತೆ ಆದುಪ್ಪಡ್ ಅಂದ್‌ದ್ ಎಂಕುಲು ದುಂಬು ಪಂಡಿಲೆಕ್ಕನೆ ಇತ್ತೆಲಾ ಕುಡ ಯಾನ್ ಪನ್ಪೆ.</verse>
				<verse number="10">ಯಾನ್ ಇತ್ತೆ ಏರೆನ್ ಒಪ್ಪಿಯಾವೆರೆ ಪ್ರಯತ್ನ ಮಲ್ತೊಂದುಲ್ಲೆ? ನರಮಾನಿಲೆನಾ? ದೇವೆರೆನಾ? ಅತ್ತ್‌ಡ ಯಾನ್ ನರಮಾನಿಲೆನ್ ಮೆಚ್ಚಾವೆರೆ ತೂಪೆನಾ? ನನಲಾ ಯಾನ್ ನರಮಾನಿಲೆನ್ ಮೆಚ್ಚಾವೊಡಂದ್ ಇತ್ತೆಡ ಯಾನ್ ಕ್ರಿಸ್ತನ ದಾಸೆ ಅತ್ತ್.</verse>
				<verse number="11">ಸಹೋದ್ರೆರೇ, ಯಾನ್ ಸಾರಿದಿ ಸುವಾರ್ತೆ ನರಮಾನಿ ಆಲೋಚನೆದವು ಅತ್ತ್ ಅಂದ್‌ದ್ ನಿಕ್ಲೆಗ್ ತೆರಿಯೊಡು.</verse>
				<verse number="12">ಯಾನ್ ಅವೆನ್ ನರಮಾನಿಲೆಡ್ದ್ ಹೊಂದುದಿಜಿ, ಎಂಕ್ ಏರ್ಲಾ ಬೋಧನೆ ಮಲ್ತ್‌ದಿಜೆರ್, ಯೇಸು ಕ್ರಿಸ್ತೆನೇ ಎಂಕ್ ತೆರಿಪಾದೆ.</verse>
				<verse number="13">ಎಂಚಂದ್ಂಡ ದುಂಬು ಯಾನ್ ಯೆಹೂದ್ಯ ಮತೊಟು ಉಪ್ಪುನಗ ಎನ ನಡತೆನ್ ಕೇಂಡ್ದರತ್ತಾ. ಯಾನ್ ದೇವೆರೆ ಸಭೆನ್ ಭಂಗ ಬರ್ಪಾದ್ ಅವೆನ್ ಹಾಳ್ ಮಲ್ತೊಂದಿತ್ತೆ.</verse>
				<verse number="14">ಉಂದತ್ತಂದೆ ಯಾನ್ ಎನ ಹಿರಿಯೆರೆಡ್ದ್ ಬೈದಿನ ಆಚಾರ ವಿಚಾರೊಡು ಬಾರಿ ಪ್ರೀತಿಡ್ ಇತ್ತ್‌ದ್ ಎನ ಸಮಪ್ರಾಯದ ಜನೊಕುಲೆ ಒಟ್ಟುಗು ಮಾತೆರೆಡ್ದ್ ಹೆಚ್ಚ್ ಯೆಹೂದಿ ಮತತ ಆಚಾರೊಡು ಆಸಕ್ತಿದಾಯೆ ಆದಿತ್ತೆ.</verse>
				<verse number="15">ಆಂಡ ಯಾನ್ ಅಪ್ಪೆ ಬಂಜಿಡ್ಡುಪುನಗನೇ ಪ್ರತ್ಯೇಕ ಮಲ್ತ್‌ದ್ ತನ ದಯೊಟು ಲೆತ್ತಿನ ದೇವೆರ್ ಎನನ್ ಅಜತ್ ದೆತ್ತೊಂಡೆ.</verse>
				<verse number="16">ತನ ಮಗನ್, ಯಾನ್ ಪಿದಯಿದ ಜನೊಕುಲೆಗ್ ಸಾರಿಯುಲೆಕ್ಕ ಆಯನ್ ಎನಡ ತೆರಿಪಾದ್ ಕೊರಿಯೆರೆ ದೇವರೆನ ಚಿತ್ತ ಆದಿತ್ತ್ಂಡ್. ಉಂದು ಆಯಿನಪಗ ಯಾನ್ ವಾ ನರಮಾನಿಲೆ ಕೈತಡೆಗ್ಲಾ ಪೋಯಿಜಿ.</verse>
				<verse number="17">ಯೆರೂಸಲೇಮುಡು ಎನಡ್ದ್ ದುಂಬು ಅಪೊಸ್ತಲೆರಾಯಿನಾಕುಲೆ ಕೈತಲ್‌ ಪೋವಂದೆ ಯಾನ್ ಅರೇಬ್ಯಗ್ ಪೋದು, ಪಿರ ದಮಸ್ಕೊಗು ಬತ್ತೆ.</verse>
				<verse number="18">ಮೂಜಿ ವರ್ಸೊಡ್ದು ಬೊಕ್ಕ ಪೇತ್ರನ ಗುರ್ತ ಮಲ್ತೊನೊಡಂದ್‌ದ್ ಯೆರೂಸಲೇಮುಗು ಪೋದು ಆಯಡೊಪ್ಪ ಪದಿನೈನ್ ದಿನ ಇತ್ತೆ.</verse>
				<verse number="19">ಆಂಡ ಕರ್ತವೆ ಆದುಪ್ಪು ಯೇಸುನ ಮೆಗ್ಯೆ ಯಾಕೋಬುನು ಅತ್ತಂದೆ ಅಪೊಸ್ತಲೆರೆಡ್ ಬೇತೆ ಏರೆನ್ಲಾ ತೂತಿಜಿ.</verse>
				<verse number="20">ಯಾನ್ ನಿಕ್ಲೆಗ್ ಬರೆಪಿನ ಸಂಗತಿಲು ಸುಳ್ಳು ಅತ್ತ್ ಅಂದ್‌ದ್ ದೇವೆರೆ ಎದುರು ಪ್ರಮಾಣ ಮಲ್ಪುವೆ.</verse>
				<verse number="21">ಐಡ್ದ್ ಬೊಕ್ಕ ಯಾನ್ ಸುರಿಯ ಬೊಕ್ಕ ಕಿಲಿಕ್ಯ ಸೀಮೆಲೆಗ್ ಪೋಯೆ.</verse>
				<verse number="22">ಆಂಡ ಕ್ರಿಸ್ತಡುಪ್ಪು ಯೂದಾಯದ ಸಭೆತ ಜನೊಕುಲೆಗ್ ಎನ ಗುರ್ತ ಇತ್ತ್‌ಜಿ.</verse>
				<verse number="23">ಆ ಸಭೆತ ಜನೊಕುಲೆಗ್ ಈತೇ ಗೊತ್ತಿತ್ತ್ಂಡ್, “ದುಂಬು ಎಂಕ್ಲೆಗ್ ಭಂಗ ಬರ್ಪಾಯಿನಾಯೆಲಾ ಬೊಕ್ಕ ಕ್ರಿಸ್ತನ ಸಭೆನ್ ಹಾಳ್ ಮಲ್ಪೆರೆ ತೂವೊಂದು ಇತ್ತಿನಾಯೆಲಾ, ಇತ್ತೆ ಅಂಚಿನಾಯೆ ಕ್ರಿಸ್ತನ ನಂಬಿಕೆನ್ ಸಾರಿಯುವೆ ಇನ್ಪಿನೆನ್ ಮಾತ್ರ ಕೇಂಡ್ದ.”</verse>
				<verse number="24">ಅಂಚಾದ್ ಅಕುಲು ಎನ ದಿಸೆಡ್ದ್ ದೇವೆರೆನ್ ಪುಗರಿಯೆರ್.</verse>
			</chapter>
			<chapter number="2">
				<verse number="1">ಪದ್ನಾಲ್ ವರ್ಸೊಡ್ದು ಬೊಕ್ಕ ಯಾನ್ ಬಾರ್ನಬಡೊಪ್ಪ ತೀತನ್ಲಾ ಲೆತ್ತೊಂದು ಕುಡ ಯೆರೂಸಲೇಮುಗು ಪೋಯೆ.</verse>
				<verse number="2">ದೇವೆರೆನ ಪ್ರೇರಣೆಡ್ದಾವರ ಪಿದಯಿದ ಜನೊಕುಲೆ ನಡುಟು ಯಾನ್ ಸಾರಿಯುನ ಸುವಾರ್ತೆನ್ ಎಂಚಿನ ಅಂದ್‌ದ್ ಅಲ್ಪದಾಕುಲೆಗ್ ತೆರಿಪಾಯೆ. ಯಾನ್ ಮಲ್ತಿನ ಬೇಲೆ ಆವಡ್, ಪ್ರಯಾಸ ಆವಡ್ ವ್ಯರ್ಥ ಆವೆರೆ ಬಲ್ಲಿ ಅಂದ್‌ದ್ ಪ್ರತ್ಯೇಕಾದ್ ಅಲ್ಪದ ಪುದರ್ ಪೋಯಿನಾಕುಲೆ ದುಂಬುಲಾ ದೀಯೆ.</verse>
				<verse number="3">ಎನಡೊಪ್ಪ ಇತ್ತಿ ತೀತೆ ಗ್ರೀಕೆ ಆದಿತ್ತ್‌ಂಡಲಾ ಆಯಗ್ ಸುನ್ನತಿ ಆವೊಡು ಅಂದ್‌ದ್ ಏರ್ಲಾ ಬಲತ್ಕಾರ ಮಲ್ತಿಜೆರ್.</verse>
				<verse number="4">ಸಭೆಕ್ ಕಲ್ವತನೊಟು ಸೇರ್ದಿನ ಕೆಲವು ಸುಳ್ಳು ಸಹೋದ್ರೆರ್ ಅಲ್ಪ ಇತ್ತಿನೆಡ್ದಾವರ ಬಲತ್ಕಾರ ಆವು ಇನ್ಪಿನ ಪೋಡಿಗೆ ಇತ್ತ್ಂಡ್. ಅಕುಲು ಕ್ರಿಸ್ತ ಯೇಸುನ ಬಲಿದಾನೊಡ್ದು ಎಂಕುಲೆಗುಪ್ಪುನ ಸ್ವತಂತ್ರೊನು ದೆತ್ತ್ ಪಾಡ್ದ್ ಯೆಹೂದಿ ಆಚಾರೊಲೆನ್ ಕೈಕೊಂದು ಗುಲಾಮತನೊಡು ಉಪ್ಪೊಡು ಅಂದ್‌ದ್ ಪ್ರಯತ್ನ ಮಲ್ತೊಂದಿತ್ತೆರ್.</verse>
				<verse number="5">ಆಂಡ ಸುವಾರ್ತೆದ ಸತ್ಯಾರ್ಥ ನಿಕ್ಲೆಡ್ ಸ್ಥಿರಾದುಪ್ಪೊಡು ಅಂದ್‌ದ್ ಎಂಕುಲು ಒಂಜಿ ಕ್ಷಣೊಕಾಂಡಲಾ ಅಕ್ಲೆಗ್ ಒಪ್ಪಿಜ.</verse>
				<verse number="6">ಆಂಡ ಪುದರ್ ಪೋಯಿನಾಕುಲೆಡ್ದ್ ಎಂಕ್ ದಾಲಾ ತಿಕ್ಕ್‌ದಿಜಿ. ಅಕುಲು ಪಿರಕ್‌ಡ್ ಎಂಚಿತ್ತಿನಾಕುಲು ಆದಿತ್ತೆರಾ ಎಂಕ್ ಗೊತ್ತಿಜಿ. ದೇವೆರೆಗ್ ವಾ ಪಕ್ಷಪಾತಲಾ ಇಜ್ಜಿ. ಅಕುಲು ಎನ ಪಾತೆರೊಗು ಒಪ್ಪಿಯೆರ್ ಆಂಡ ಎಂಕ್ ದಾಲಾ ಕಲ್ಪಾದ್ ಕೊರ್ಜೆರ್.</verse>
				<verse number="7">ಐತ ಪಗತೆಗ್ ಸುನ್ನತಿದಾಕುಲೆಗ್ ಸುವಾರ್ತೆ ಸಾರಿಯುನ ಜವಾಬ್ದಾರಿನ್ ದೇವೆರ್ ನಂಬಿಕೆಡ್ ಪೇತ್ರಗ್ ಕೊರಿಲೆಕ್ಕನೇ, ಸುನ್ನತಿದಾಂತಿನಾಕುಲೆಗ್ ಸುವಾರ್ತೆ ಸಾರಿಯುನ ಜವಾಬ್ದಾರಿನ್ ಎಂಕ್‌ಲಾ ಕೊರ್ದಿತ್ತೆ.</verse>
				<verse number="8">ದಾಯೆಗಂದ್ಂಡ ಸುನ್ನತಿದಾಕುಲೆಗ್ ಅಪೊಸ್ತಲ ಕೆಲಸೊನು ಪೇತ್ರಗ್ ಒದಗಾಯಿನ ದೇವೆರ್ ಎಂಕ್‌ಲಾ ಪಿದಯಿದ ಜನೊಕುಲೆಗ್ ಸುವಾರ್ತೆ ಸಾರಿಯುನ ಕೆಲಸೊನು ಒದಗಾಯೆ.</verse>
				<verse number="9">ಉಂದತ್ತಂದೆ, ಸಭೆತಕಂಬೊಲು ಅಂದ್‌ದ್ ಪುದರ್ ಪೋಯಿ ಯಾಕೋಬುಲಾ ಪೇತ್ರೆಲಾ ಯೋಹಾನೆಲಾ ದೇವೆರ್ ಎಂಕ್ ಕೊರ್ತಿನ ದಯೊನು ತೆರಿಯೊಂದು ಬಾರ್ನಬನ್ಲಾ ಎನನ್ಲಾ ತನ್ಕುಲೆ ಜತೆಸೇವಕೆರ್ ಅಂದ್‌ದ್ ದೆತ್ತೊಂಡೆರ್. ಪಿದಯಿದ ಜನೊಕುಲೆಗ್ ಸುವಾರ್ತೆ ಸಾರಿಯೊಂದೇ ಉಪ್ಪುಲೆ ಅಂದ್‌ದ್ ಎಂಕ್ಲೆಗ್ ಉತ್ತೇಜನ ಮಲ್ತೆರ್; ಆಂಡ ತನ್ಕುಲು ಸುನ್ನತಿದಾಕುಲೆ ನಡುಟು ಬೇಲೆ ಮಲ್ಪುವ ಅಂದ್‌ದ್ ಅನ್ಯಮನ್ಯದ ಬಲತ್ತ ಕೈ ಕೊರಿಯೆರ್.</verse>
				<verse number="10">ಆಂಡ ನಿಕುಲು ಎಂಕ್ಲೆ ಒಟ್ಟುಗುಪ್ಪುನ ಬಡವೆರೆನ್ ನೆನೆಪು ಮಲ್ತೊನೊಡು ಪಂಡ್ದ್ ಒಂಜೇ ಸಂಗತಿನ್ ನಟ್ಟೊಂಡೆರ್; ಅವೆನ್ ಮಲ್ಪೆರೆ ಯಾನ್ ಉಮೇದ್‌ಡ್ ಇತ್ತೆ.</verse>
				<verse number="11">ಪೇತ್ರೆ ಅಂತಿಯೋಕ್ಯಗ್ ಬತ್ತಿನಪಗ ಆಯೆ ತಪ್ಪುಗಾರೆ ಆದ್ ತೋಜಿದ್ ಬತ್ತಿನೆಡ್ದ್ ಯಾನ್ ಆಯನ್ ಎದುರುಡೇ ಜೋರ್ ಮಲ್ತೆ.</verse>
				<verse number="12">ದಾಯೆಗಂದ್ಂಡ ಯಾಕೋಬುನ ಕಡೆಡ್ದ್ ಕೆಲೆವೆರ್ ಬರೊಡ್ದು ದುಂಬು ಪೇತ್ರೆ ಪಿದಯಿದ ಜನೊಕುಲೆ ಒಟ್ಟುಗು ವಣಸ್ ಮಲ್ತೊಂದಿತ್ತೆ. ಆಂಡ ಸುನ್ನತಿ ಆವೊಡೇ ಪನ್ಪಿನಾಕುಲೆಡ್ದ್ ತನ್ಕ್ ವಿರೋಧ ಬರು ಅಂದ್‌ದ್ ಯಾಕೋಬುನ ಸ್ನೇಹಿತೆರ್ ಬತ್ತಿನಪಗ ಪೇತ್ರೆ ಪಿದಯಿದ ಜನೊಕುಲೆಡೊಪ್ಪ ವಣಸ್ ಮಲ್ಪೆರೆ ಪೋಡಿಯೆ.</verse>
				<verse number="13">ಅಂಚೆನೇ ಬೇತೆ ಯೆಹೂದಿ ಕ್ರೈಸ್ತೆರ್‌ಲಾ ಆಯಡೊಪ್ಪ ಸೇರೊಂದು ಅಂಚೆನೇ ನಾಟಕ ಮಲ್ತೆರ್. ಅಂಚೆನೇ ಬಾರ್ನಬೆಲಾ ನಾಟಕೊಗು ಒಳಗಾಯೆ.</verse>
				<verse number="14">ಅಕುಲು ಸುವಾರ್ತೆದ ಸತ್ಯೊಗು ಸರಿಯಾದ್ ನಡಪುಜೆರ್ ಅಂದ್‌ದ್ ಯಾನ್ ತೂನಗ ಮಾತೆರೆ ಎದುರು ಪೇತ್ರಡ ಪಂಡಿನಿ, “ಈ ಒರಿ ಯೆಹೂದಿ ಆದಿತ್ತ್‌ದ್ ಯೆಹೂದ್ಯೆರ್ ಲೆಕ್ಕ ನಡಪಂದೆ ಈ ಪಿದಯಿದ ಜನೊಕುಲೆ ಲೆಕ್ಕ ನಡತೊಂದು ಉಲ್ಲತ್ತಾ. ಪಿದಯಿದ ಜನೊಕುಲೆಗ್ ನಿಕುಲು ಯೆಹೂದ್ಯೆರೆ ಪದ್ದತಿನ್ ಕೈಕೊನೊಡು ಅಂದ್‌ದ್ ಈ ಒತ್ತಾಯ ಮಲ್ಪುನ ಸರಿಯಾ?”</verse>
				<verse number="15">ನಮ ಆಂಡಲಾ ಪುಟ್ಟು ಯೆಹೂದ್ಯೆರ್. ಪಾಪಿಲು ಅಂದ್‌ದ್ ಲೆಪ್ಪುನ ಪಿದಯಿದ ಜನೊಕುಲು ಅತ್ತ್.</verse>
				<verse number="16">ಆಂಡಲಾ ಒರಿ ನರಮಾನಿ ನೀತಿವಂತೆ ಅಂದ್‌ದ್ ತೀರ್ಪು ಆಪುಜಿ ಯೇಸು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನೆಡ್ದೇ ಅತ್ತಂದೆ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಅತ್ತ್. ಉಂದೆನ್ ತೆರಿಯೊಂದಿನ ಎಂಕುಲುಲಾ ನ್ಯಾಯಕಟ್ಟ್‌ನ್ ಬುಡ್ದು, ಕ್ರಿಸ್ತ ಯೇಸುಡು ನಂಬಿಕೆ ದೀಪಿನಕುಲಾಯ. ದಾಯೆಗಂದ್ಂಡ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಏರ್ಲಾ ದೇವೆರೆ ಒಟ್ಟಗು ನೀತಿವಂತೆ ಅಂದ್‌ದ್ ತೀರ್ಪು ಆವೆರೆ ಸಾದ್ಯ ಇಜ್ಜಿ.</verse>
				<verse number="17">ಆಂಡ ನಮ ಕ್ರಿಸ್ತಡ್ ನೀತಿವಂತೆರ್ ಆವೆರೆ ಪ್ರಯತ್ನ ಮಲ್ಪುನಗ ನಮ ನ್ಯಾಯಕಟ್ಟ್‌ನ್ ಬುಡಿಯ ಪನ್ಪಿನೆಕ್ಕಾದ್ ಪಾಪಿಲಾದ್ ತೋಜಿದ್ ಬರುವನಾ? ಕ್ರಿಸ್ತೆ ನಮ ಪಾಪೊಗು ಸಹಾಯಕೆ ಅಂದ್‌ದ್ ನೆತ್ತ ಅರ್ಥನಾ? ಕಂಡಿತಾದ್ ಅತ್ತ್.</verse>
				<verse number="18">ಯಾನ್ ಬೂರ್ಪಾಯಿನೆನೇ ಕುಡೊರ ಕಟ್ಟಿಯೆಡ, ಎನನ್ ಯಾನೇ ಅಪರಾಧಿ ಅಂದ್‌ದ್ ತೋಜಾದ್ ಕೊರ್ಪೆತ್ತಾ?</verse>
				<verse number="19">ಯಾನಾಂಡಲಾ ದೇವೆರೆಗಾದ್ ಬದುಕುಲೆಕ್ಕ ನ್ಯಾಯಕಟ್ಟ್‌ಡ್ದ್ ನ್ಯಾಯಕಟ್ಟ್‌ದ ಪಾಲ್‌ಗ್ ಸೈತ್ ಪೋಯೆ. ಎನ ದುಂಬುದ ಸ್ವಭಾವ ಕ್ರಿಸ್ತಡೊಪ್ಪ ಕ್ರುಸ್ಸುಗು ಪಾಡ್ದಿನವು ಆದುಂಡು. ನನ ಬದುಕುನು ಯಾನತ್ತ್, ಕ್ರಿಸ್ತೆ ಎನಡ್ ಬದುಕೊಂದುಲ್ಲೆ. ಇತ್ತೆ ಶರೀರೊಡು ಯಾನ್ ಬದುಕುನು ಎಂಚಂದ್ಂಡ ದೇವೆರೆ ಮಗನ ಮಿತ್ತ್ ನಂಬಿಕೆ ದೀಯಿನೆಡ್ದ್. ಆಯೆ ಎನನ್ ಪ್ರೀತಿ ಮಲ್ತ್‌ದ್ ಎಂಕಾದ್ ತನನೇ ಒಚ್ಚಿದ್ ಕೊರಿಯೆ.</verse>
				<verse number="20"></verse>
				<verse number="21">ದೇವೆರೆ ದಯೊನು ಯಾನ್ ಅರ್ಥದಾಂತಿನವು ಅಂದ್‌ದ್ ಎನ್ನುಜಿ. ನ್ಯಾಯಕಟ್ಟ್‌ಡ್ದ್ ನೀತಿವಂತೆ ಇನ್ಪಿ ತೀರ್ಪು ಆಪಿನಾಂಡ ಕ್ರಿಸ್ತೆ ಸೈಪಿನ ಅಗತ್ಯ ಇತ್ತ್‌ಜಿ.</verse>
			</chapter>
			<chapter number="3">
				<verse number="1">ಓ, ಬುದ್ಧಿದಾಂತಿ ಗಲಾತ್ಯದಾಕುಲೇ! ನಿಕ್ಲೆನ್ ಏರ್ ಮರ್ಲ್ ಮಲ್ತೆರ್? ಕ್ರುಸ್ಸುಗು ಪತ್ತಾದಿ ಯೇಸು ಕ್ರಿಸ್ತನ ಮರಣೊನು ನಿಕುಲು ಕಣ್ಣೆದುರು ಸ್ಪಷ್ಟಾದ್ ತೂತರತ್ತಾ</verse>
				<verse number="2">ಒಂಜಿ ಸಂಗತಿನ್ ನಿಕ್ಲೆಡ ಕೇನ್ವೆ. ಮೋಶೆನ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾವರ ನಿಕ್ಲೆಗ್ ದೇವೆರಾತ್ಮ ತಿಕ್ಕ್‌ಂಡಾ? ಇಜ್ಜಿಂಡ ಕ್ರಿಸ್ತನ ಸುವಾರ್ತೆ ಕೇಂಡ್ದ್ ನಂಬಿನೆಡ್ದ್ ನಿಕ್ಲೆಗ್ ದೇವೆರಾತ್ಮ ತಿಕ್ಕ್‌ಂಡಾ?</verse>
				<verse number="3">ನಿಕುಲು ಈತ್ ಬುದ್ಧಿದಾಂತಿನಾಕುಲು ಆದುಲ್ಲರಾ? ದೇವೆರಾತ್ಮೊಡು ಕ್ರೈಸ್ತ ಜೀವನೊನು ಸುರು ಮಲ್ತ್‌ದ್ ಇತ್ತೆ ದಾಯೆಗ್ ನಿಕುಲು ಸ್ವಂತ ಶಕ್ತಿಡ್ದ್ ಪೂರ್ತಿ ಮಲ್ಪೆರೆ ತೂವೊಂದುಲ್ಲರಾ?</verse>
				<verse number="4">ನಿಕ್ಲೆಗಾಯಿನ ಈತ್ ಮಾತ ಅನುಭವ ವ್ಯರ್ಥ ಆಂಡಾ? ಅವು ಕಂಡಿತಾದ್ ವ್ಯರ್ಥ ಆತಿಜತ್ತಾ?</verse>
				<verse number="5">ದೇವೆರ್ ತನ ಆತ್ಮೊನು ಕೊರ್ದು, ನಿಕ್ಲೆ ನಡುಟು ಬಲತ್ತ ಕಾರ್ಯೊಲೆನ್ ಮಲ್ಪುನ ಅಧಿಕಾರ ನಿಕುಲು ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾವರ ತಿಕ್ಕ್‌ಂಡಾ ಇಜ್ಜಿಂಡ ನಿಕುಲು ಕ್ರಿಸ್ತನ ಸುವಾರ್ತೆ ಕೇಂಡ್ದ್ ನಂಬಿನೆಡ್ದೇ ತಿಕ್ಕ್‌ಂಡಾ?</verse>
				<verse number="6">ಅಂಚೆನೇ ಅಬ್ರಹಾಮು ದೇವೆರೆನ್ ನಂಬಿಯೆ, ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಅಂದ್‌ದ್ ಬರೆತ್ಂಡ್ ಅತ್ತಾ?</verse>
				<verse number="7">ಆ ನಂಬಿಕೆಡ್ದೇ, ನಿಕುಲು ಅಬ್ರಹಾಮುನ ಜೋಕುಲು ಅಂದ್‌ದ್ ತೆರಿಯೊನ್ಲೆ.</verse>
				<verse number="8">ದೇವೆರ್ ದುಂಬೇ ಶಾಸ್ತ್ರೊಡು ಪಂಡಿಲೆಕ್ಕ, ನಂಬಿಕೆದ ಮಿತ್ತ್ ಪಿದಯಿದ ಜನೊಕುಲೆನ್ ನೀತಿವಂತೆರ್ ಅಂದ್‌ದ್ ತೀರ್ಪು ಮಲ್ಪುವೆ. ಐಕ್ ದೇವೆರ್, “ಅಬ್ರಹಾಮುಡ್ದು ಮಾತ ಜನಾಂಗದಾಕುಲೆಗ್ಲಾ ಆಶೀರ್ವಾದ ಉಂಡಾಪುಂಡು,” ಪನ್ಪಿನ ಸುವಾರ್ತೆ ದುಂಬೇ ತೆರಿಪಾದೆ.</verse>
				<verse number="9">ಅಂಚಾಯಿನೆಡ್ದ್ ನಂಬುನಾಕುಲೆಗ್ ನಂಬಿಕೆ ಇತ್ತಿ ಅಬ್ರಹಾಮುಡೊಪ್ಪ ಆಶೀರ್ವಾದ ತಿಕ್ಕುಂಡು.</verse>
				<verse number="10">ಆಂಡ ದೇವೆರೆಡೊಪ್ಪ ನೀತಿವಂತೆ ಆಪಿನೆಕ್ಕ್ ನ್ಯಾಯಕಟ್ಟ್‌ನ್ ಆಧಾರ ಮಲ್ತೊನುನಾಕುಲು ಶಾಪಗ್ರಸ್ತೆರೆ. ದಾಯೆಗ್ ಪಂಡ ಶಾಸ್ತ್ರೊಡು ಪನ್ಪುಂಡು, “ದೇವೆರ್ ನ್ಯಾಯಕಟ್ಟ್‌ದ ಪುಸ್ತಕೊಡು ಬರೆತಿನವು ಮಾತೆನ್ಲಾ ಪ್ರತಿದಿನಲಾ ಕೈಕೊನೊಂದು ನಡಪಂದಿನಾಕುಲು ಪ್ರತಿಯೊರಿಲಾ ಶಾಪಗ್ರಸ್ತೆರಾದುಲ್ಲೆರ್.”</verse>
				<verse number="11">ಅಂಚಾದ್ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದ್ ಏರ್ಲಾ ದೇವೆರೆ ಎದುರುಗ್ ನೀತಿವಂತೆರ್ ಅಂದ್‌ದ್ ತೀರ್ಪು ಆವೆರೆಗ್ ಸಾದ್ಯ ಇಜ್ಜಿ ಪನ್ಪಿನವು ಸ್ವಷ್ಟಾದುಂಡು. ದಾಯೆಗ್ ಪಂಡ “ನೀತಿವಂತೆ ನಂಬಿಕೆಡ್ದೇ ಬದುಕುವೆ.” ಅಂದ್‌ದ್ ಬರೆತ್ಂಡ್.</verse>
				<verse number="12">ಅಂಚೆನೇ ನ್ಯಾಯಕಟ್ಟ್ ನಂಬಿಕೆದ ಮಾರ್ಗ ಅತ್ತ್, “ಐತ ನಿಯಮೊಲೆನ್ ಸರಿಯಾದ್ ಆಚರಣೆ ಮಲ್ಪುನಾಯೆನೇ ಬದುಕುವೆ,” ಅಂದ್‌ದ್ ಬರೆತ್ಂಡ್.</verse>
				<verse number="13">ಕ್ರಿಸ್ತೆ ನಮನ್ ಶಾಪೊಡ್ದು ಬುಡ್ಪಾವೆರೆಗಾದ್ ತಾನೇ ಶಾಪಗ್ರಸ್ತೆ ಆಯೆ. ದಾಯೆಗ್ ಪಂಡ ನ್ಯಾಯಕಟ್ಟ್‌ಡ್ ಬರೆತ್ಂಡ್, “ಮರತ ಕಂಬೊಡು ನೇಲ್‌ದ್ ಸೈತಿನ ಪ್ರತಿಯೊರಿ ಶಾಪಗ್ರಸ್ತೆನೇ.”</verse>
				<verse number="14">ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತಿನ ಅವ್ವೇ ಆಶೀರ್ವಾದೊನು ಕ್ರಿಸ್ತ ಯೇಸುಡ್ದು ಪಿದಯಿದ ಜನೊಕುಲೆಗ್ಲಾ ಕೊರಿಯೆ. ಅಂಚಾಯಿನೆಡ್ದ್ ನಮ ನಂಬುನಾಕುಲೆಗ್ಲಾ ನಂಬಿಕೆಡ್ದೇ ವಾಗ್ದಾನದ ಆತ್ಮೊನ್ಲಾ ತಿಕ್ಕುಲೆಕ್ಕ ಮಲ್ತೆ.</verse>
				<verse number="15">ಸಹೋದ್ರೆರೇ, ನಮ ಜೀವನದ ಒಂಜಿ ದೃಷ್ಟಾಂತೊನು ಯಾನ್ ಪನ್ಪೆ. ಒಂಜಿ ಒಡಂಬಡಿಕೆ ಬಜೀ ನರಮಾನಿನವೇ ಆದಿತ್ತ್‌ಂಡಲಾ ಅವೆನ್ ಏರ್ಲಾ ದೆತ್ತ್‌ದ್ ಪಾಡುಜೆರ್, ಏರ್ಲಾ ಐಕ್ ದಾಲಾ ಹೆಚ್ಚಿದೆನ್ ಕೂಡಾವುಜೆರ್.</verse>
				<verse number="16">ಅಂಚೆನೇ ದೇವೆರ್ ಅಬ್ರಹಾಮುಗ್ಲಾ, ಆಯನ ಸಂತಾನೊಗ್ಲಾ ವಾಗ್ದಾನ ಮಲ್ತ್‌ದಿತ್ತೆ. ದೇವೆರ್ ನಿನ ಸಂತಾನದಾಕುಲೆಗ್ ಪಂಡ್ದ್ ಮಾತೆರೆನ್ಲಾ ಸೇರಿಸಾವಂದೆ, ನಿನ ಸಂತಾನೊಗು ಪಂಡ್ದ್ ಒರಿಯನೇ ಸೇರಿಸಾವೊಡು ಪಂಡ್ದ್ ಪಂಡೆ. ಆ ಒರಿಯೇ ಕ್ರಿಸ್ತೆ ಆದುಲ್ಲೆ.</verse>
				<verse number="17">ಬೊಕ್ಕ ಯಾನ್ ನಿಕ್ಲೆಗ್ ಪನ್ಪಿನವು ಉಂದೇ. ದೇವೆರ್ ಅಬ್ರಹಾಮುಡೊಪ್ಪ ಮಲ್ತ್‌ದಿನ ಒಡಂಬಡಿಕೆನ್ ನಾಲ್ನೂತ್ತ ಮುಪ್ಪ ವರ್ಸೊಡ್ದು ಬೊಕ್ಕ ಬತ್ತಿನ ನ್ಯಾಯಕಟ್ಟ್ ದೆತ್ತ್ ಪಾಡಂದೆ ಆ ವಾಗ್ದಾನೊನು ವ್ಯರ್ಥ ಮಲ್ಪುಜೆ.</verse>
				<verse number="18">ಬಾಧ್ಯಸ್ತಿಗೆ ನ್ಯಾಯಕಟ್ಟ್‌ಡ್ದ್ ತಿಕ್ಕುನಾಂಡ, ದೇವೆರೆ ವಾಗ್ದಾನೊಡ್ದು ಅತ್ತ್ ಪಂಡ್ದಾಂಡ್. ಆಂಡ ದೇವೆರ್ ಅಬ್ರಹಾಮುಗು ಕೊರ್ತಿನ ಬಾಧ್ಯಸ್ತಿಗೆನ್ ವಾಗ್ದಾನೊಡ್ದೇ ದಯ ಮಲ್ತೆ.</verse>
				<verse number="19">ಅಂಚಾಂಡ ಮೋಶೆನ ನ್ಯಾಯಕಟ್ಟ್ ದಾಯೆಗ್? ವಾಗ್ದಾನದ ಸಂತಾನದಾಯೆ ಬನ್ನಮುಟ್ಟ ದೇವೆರ್ ಪಾಪ ಪಂಡ ದಾನೆ ಅಂದ್‌ದ್ ತೋಜಾವೆರೆಗಾದ್ ಅವೆನ್ ವಾಗ್ದಾನೊಡು ನೇಮಕ ಮಲ್ತ್‌ದ್ ದೂತೆರೆಡ್ದ್ ಮೋಶೆಗ್ ಕೊರಿನೆಡ್ದ್ ಮೋಶೆ ದೇವೆರೆಗ್ಲಾ ಜನೊಕುಲೆಗ್ಲಾ ನಡುತ ಮದ್ಯಸ್ತೆಗಾರೆ ಆಯೆ.</verse>
				<verse number="20">ಒಂಜೆ ಪಕ್ಷ ಇತ್ತ್ಂಡ ಮದ್ಯಸ್ತೆ ಬೋಡಂದ್ ಇಜ್ಜಿ. ಆಂಡ ದೇವೆರಾಂಡಲಾ ಒರಿಯೇ.</verse>
				<verse number="21">ಅಂಚಾಂಡ ನ್ಯಾಯಕಟ್ಟ್‌ಗ್ಲಾ ದೇವೆರೆನ ವಾಗ್ದಾನೊಗ್ಲಾ ವಿರೋಧ ಉಂಡಾ? ಅಂಚ ಏಪಲಾ ತೆರಿಯೊನರೆ ಬಲ್ಲಿ, ಒರಿಯನ್ ಬದ್‌ಕಿಯೆರೆ ನ್ಯಾಯಕಟ್ಟ್ ಕೊರ್ದಿತ್ತ್‌ಂಡ, ಕಂಡಿತಾದ್ ನ್ಯಾಯಕಟ್ಟ್‌ಡ್ದ್ ನೀತಿ ಉಂಡಾತು.</verse>
				<verse number="22">ಆಂಡ ಶಾಸ್ತ್ರ ಪನ್ಪುಂಡು, ನಮ ಮಾತೆರ್ಲಾ ಪಾಪೊಗು ದಾಸೆರಾದುಲ್ಲ. ಅಂಚಾದ್ ದೇವೆರೆನ ವಾಗ್ದಾನ, ನಮ ಯೇಸು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನೆಡ್ದ್ ಮಾತ್ರ ತಿಕ್ಕುಂಡು.</verse>
				<verse number="23">ಕ್ರಿಸ್ತ ನಂಬಿಕೆದ ಕಾಲ ಬರ್ಪಿನೆಕ್ಕ್ ದುಂಬು, ನಂಕ್ ದುಂಬಗ್ ತೋಜಿಯೆರೆ ಇತ್ತಿ ಆ ನಂಬಿಕೆಗ್ ವಶ ಆಪಿನೆಕ್ಕಾದ್ ನ್ಯಾಯಕಟ್ಟ್‌ದ ಕೈ ತಿರ್ತ್ ಬಂಧನೊಡು ಇತ್ತ.</verse>
				<verse number="24">ಅಂಚಾಯಿನೆಡ್ದ್ ನಂಕ್ ನಂಬಿಕೆಡ್ದ್ ನೀತಿವಂತೆರ್ ಅಂದ್‌ದ್ ತೀರ್ಪು ಆಪಿಲೆಕ್ಕ ನ್ಯಾಯಕಟ್ಟ್‌ದ ಕಾಲ ಕ್ರಿಸ್ತ ಕಡೆಕ್ಕ್ ಸೇರು ಮುಟ್ಟ ನಮನ್ ಕಾತ್ಂಡ್.</verse>
				<verse number="25">ಇತ್ತೆ ನಂಬಿಕೆದ ಕಾಲ ಬತ್ತಿ ಬೊಕ್ಕ ನಂಕ್ ನ್ಯಾಯಕಟ್ಟ್ ಕಾಪುನ ಅಗತ್ಯ ಇಜ್ಜಿ.</verse>
				<verse number="26">ಕ್ರಿಸ್ತ ಯೇಸುಡು ನಂಬಿಕೆ ದೀಪಿನೆಡ್ದಾದ್ ನಿಕುಲು ಮಾತೆರ್ಲಾ ದೇವೆರೆ ಜೋಕುಲು ಆದುಲ್ಲರ್.</verse>
				<verse number="27">ದಾಯೆಗಂದ್ಂಡ ಕ್ರಿಸ್ತಡ್ ಸೇರಾಯೆರೆಗಾದ್ ದೀಕ್ಷಾಸ್ನಾನ ಮಲ್ತೊಂದಿನ ನಿಕುಲು ಕ್ರಿಸ್ತಡ್ ಒಂಜಾಯರ್.</verse>
				<verse number="28">ನಿಕುಲು ಮಾತ ಕ್ರಿಸ್ತ ಯೇಸುಡ್ದು ಒಂಜೇ ಆದಿತ್ತಿನೆಡ್ದಾವರ, ಯೆಹೂದ್ಯೆರ್, ಗ್ರೀಕೆರ್, ಪನ್ಪಿನವು, ಗುಲಾಮೆ, ಸ್ವತಂತ್ರದಾಯೆ ಪನ್ಪಿನವು, ಆಣ್ ಪೊಣ್ಣು ಪನ್ಪಿನವು ಭೇದ ಇಜ್ಜಿ.</verse>
				<verse number="29">ಇತ್ತೆ ನಿಕುಲು ಕ್ರಿಸ್ತನಾಕುಲಾದಿತ್ತ್‌ಂಡ, ನಿಕುಲು ಅಬ್ರಹಾಮುನ ಸಂತಾನಲಾ ದೇವೆರ್ ಅಬ್ರಹಾಮುಗು ಕೊರಿನ ವಾಗ್ದಾನದ ಬಾಧ್ಯಸ್ತೆರ್‌ಲಾ ಆದುಲ್ಲರ್.</verse>
			</chapter>
			<chapter number="4">
				<verse number="1">ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ಒರಿ ಬಾಲೆ ತನ ಅಮ್ಮೆರೆನ ಮಾತ ಬಾಧ್ಯಸ್ತಿಗೆಗ್ ಹಕ್ಕ್‌ದಾರೆ ಆದಿತ್ತ್‌ಂಡಲಾ, ಆಯೆ ಪ್ರಾಯೊಗು ಬನ್ನಮುಟ್ಟ ಆ ಬಾಧ್ಯಸ್ತಿಗೆಗ್ ಗುಲಾಮಲೆಕ್ಕನೇ ಉಪ್ಪುವೆ.</verse>
				<verse number="2">ಅಕ್ಲೆನ ಅಮ್ಮೆ ನೇಮಕ ಮಲ್ತ್‌ದಿನ ಪ್ರಾಯ ಬನ್ನಮುಟ್ಟ ಅಕುಲು ತನ್ಕುಲೆನ ಯಜಮಾನಗ್ ಬೊಕ್ಕ ಪಾರುಪತ್ಯಗಾರೆರೆಗ್ ಸರಿಯಾದ್ ನಡತೊಂದುಪ್ಪೊಡು.</verse>
				<verse number="3">ಅಂಚೆನೇ ನಮಲಾ ಬಾಲೆಲ್ ಆದುಪ್ಪುನಗ ಲೋಕದ ಕಟ್ಟ್‌ಕಟ್ಟಲೆಗ್ ಗುಲಾಮೆರಾದಿತ್ತ.</verse>
				<verse number="4">ಆಂಡ ಕಾಲ ದಿಂಜಿದ್ ಬನ್ನಗ ದೇವೆರ್ ತನ ಮಗನ್ ಕಡಪುಡ್ದು ಕೊರಿಯೆ. ನ್ಯಾಯಕಟ್ಟ್‌ಗ್ ಒಳಗಾದ್ ಒಂಜಿ ಪೊಂಜೊವುಡು ಪುಟ್ಟುದು ಬರ್ಪಿಲೆಕ್ಕ ಮಲ್ತೆ.</verse>
				<verse number="5">ನ್ಯಾಯಕಟ್ಟ್‌ಗ್ ಗುಲಾಮೆರಾದಿತ್ತಿ ನಮನ್ ಬುಡ್ಪಾದ್, ಮಗಕ್ಕ್ ಅಮ್ಮೆರೆಡ್ದ್ ತಿಕ್ಕುನ ಮಾತ ಪಾಲ್‌ದ ಅಧಿಕಾರ ತಿಕ್ಕೆರೆ ಬೋಡಾದ್ ದೇವೆರ್ ಇಂಚ ಮಲ್ತೆ.</verse>
				<verse number="6">ನಿಕುಲು ಇತ್ತೆ ದೇವೆರೆ ಬಾಲೆಲು ಆದುಪ್ಪುನೆಡ್ದ್, ದೇವೆರ್, “ಅಮ್ಮೆರೇ, ಎನ ಅಮ್ಮೆರೇ,” ಅಂದ್‌ದ್ ಲೆಪ್ಪು ತನ ಮಗನ ಆತ್ಮೊನು ನಿಕ್ಲೆ ಉಡಲ್‌ದ ಉಲಯಿ ಕಡಪುಡ್ದು ಕೊರಿಯೆ.</verse>
				<verse number="7">ಅಂಚಾಯಿನೆಡ್ದ್ ಇತ್ತೆ ಈ ಗುಲಾಮೆ ಅತ್ತ್, ಮಗೆ ಆದುಲ್ಲ. ಮಗೆ ಆದುಪ್ಪುನೆಡ್ದ್ ದೇವೆರೆಡ್ದ್ ಪೂರ ಆಸ್ತಿಗ್ಲಾ ಸಂಪೊತ್ತುಗ್ಲಾ ಬಾಧ್ಯಸ್ತೆ ಆದುಲ್ಲ.</verse>
				<verse number="8">ಪೂರ್ವಕಾಲೊಡು ನಿಕುಲು ದೇವೆರೆನ್ ತೆರಿಯಂದೆ ಉಪ್ಪುನಗ, ದೇವೆರೆ ಗುಣಲಕ್ಷಣದಾಂತಿನೆಡ್ದ್ ಗುಲಾಮೆರಾದಿತ್ತರ್.</verse>
				<verse number="9">ಆಂಡ ಇತ್ತೆ ದೇವೆರೆನ್ ತೆರಿಯೊಂದುಲ್ಲರ್, ಅಂಚೆನೇ ದೇವೆರ್‌ಲಾ ನಿಕ್ಲೆನ್ ತೆರಿಯೊಂದುಲ್ಲೆ. ಅಂಚ ಆದುಪ್ಪುನಗ ಕುಡ ಪಿರ ಪೋದು, ನಿಕುಲು ಕೆಲಸೊಗು ಬರಂದಿನ ದರಿದ್ರ ಲೋಕದ ಕಟ್ಟ್‌ಕಟ್ಟಲೆಗ್ ಗುಲಾಮೆರಾದುಪ್ಪೆರೆ ದಾಯೆಗ್ ಬಯಕುವರ್?</verse>
				<verse number="10">ನಿಕುಲು ಪ್ರತಿಯೊಂಜಿ ಎಡ್ಡೆ ದಿನೊನು, ತಿಂಗೊಲೊನು, ಕಾಲೊಲೆನ್, ವರ್ಸ ದಿನೊಕ್ಲೆನ್ ಆಚರಣೆ ಮಲ್ಪುವರ್.</verse>
				<verse number="11">ಯಾನ್ ನಿಕ್ಲೆ ನಡುಟು ಮಲ್ತಿನ ಪ್ರಯಾಸ ಪೂರ ವ್ಯರ್ಥ ಆಂಡಾ ಪಂಡ್ದ್ ಎಂಕ್ ನಿಕ್ಲೆ ಸಂಗತಿಡ್ ಪೋಡಿಗೆ ಆಪುಂಡು.</verse>
				<verse number="12">ಸಹೋದ್ರೆರೇ, ಯಾನ್ ನಿಕ್ಲೆಲೆಕ್ಕನೆ ಆದುಪ್ಪುನೆಡ್ದ್ ಎನ ಲೆಕ್ಕನೆ ಆಲೆ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ. ನಿಕುಲು ಎಂಕ್ ದಾಲಾ ಅನ್ಯಾಯ ಮಲ್ತ್‌ಜರ್.</verse>
				<verse number="13">ಯಾನ್ ಸುರುತ್ತ ಸರ್ತಿ ಶರೀರೊಡು ಬಲಹೀನೆ ಆದ್ ನಿಕ್ಲೆಗ್ ಸುವಾರ್ತೆ ಸಾರಿದಿನವು ನಿಕುಲು ತೆರಿದುಲ್ಲರ್.</verse>
				<verse number="14">ಎನ ಶರೀರದ ಕಷ್ಟೊಡು ನಿಕ್ಲೆಗ್ ತಾಪತ್ರಯ ಆನಗ ನಿಕುಲು ಎನನ್ ಅಸಹ್ಯ ಮಲ್ಪಂದೆ, ತಿರಸ್ಕಾರ ಮಲ್ಪಂದೆ, ಎನನ್ ದೇವೆರೆಡ್ದ್ ಬೈದಿನ ಒರಿ ದೂತಲೆಕ್ಕನೆ, ಕ್ರಿಸ್ತ ಯೇಸು ಇನ್ಪಿಲೆಕ್ಕನೆ ಸೇರಾವೊಂಡರ್.</verse>
				<verse number="15">ಆತ್ ಸಂತೋಷಡಿತ್ತಿನಾಕುಲು ಇತ್ತೆ ನಿಕ್ಲೆನ ಸಂತೋಷ ಒಡೆಗ್ ಪೋಂಡು? ಅಪಗ ಸಾದ್ಯ ಇತ್ತ್ಂಡ, ನಿಕ್ಲೆ ಕಣ್ಣ್‌ಲೆನೇ ದೆತ್ತ್‌ದ್ ಕೊರಿಯೆರೆಗ್ಲಾ ತಯಾರಾದಿತ್ತರ್ ಅಂದ್‌ದ್ ಯಾನ್ ಸಾಕ್ಷಿ ಪನ್ಪೆ.</verse>
				<verse number="16">ಅಂಚಾದ್ ಯಾನ್ ನಿಕ್ಲೆಗ್ ಸತ್ಯ ಇತ್ತಿನೆನ್ ಪನ್ಪಿನೆಡ್ದಾವರ, ನಿಕ್ಲೆನ ಪಗೆನಾಯೆ ಆಯೆನಾ?</verse>
				<verse number="17">ಆ ಸುಳ್ಳು ಬೋಧಕೆರ್ ನಿಕ್ಲೆನ್ ಮೆಚ್ಚಾಯೆರೆಗಾದ್ ಪ್ರಯಾಸ ಬುಡ್ಪೆರ್, ಆಂಡ ಅಕ್ಲೆನ ಉದ್ದೇಶ ಎಡ್ಡೆಂತಿನವು ಅತ್ತ್. ನಿಕುಲು ಅಕ್ಲೆಗ್ ಮಾತ್ರ ಮೆಚ್ಚಿಗೆ ಆದುಪ್ಪೊಡು ಅಂದ್‌ದ್ ಎನಡ್ದ್ ನಿಕ್ಲೆನ್ ದೂರ ಮಲ್ಪೊಡು ಅಂದ್‌ದ್ ಅಕ್ಲೆನ ಆಸೆ.</verse>
				<verse number="18">ಯಾನ್ ನಿಕ್ಲೆಡೊಪ್ಪ ಉಪ್ಪುನಗ ಮಾತ್ರ ಅತ್ತ್, ಏಪಲಾ ಎಡ್ಡೆ ವಿಷಯೊಗಾದ್ ಮೆಚ್ಚಿಗೆ ತೋಜಾವುನವು ಎಡ್ಡೆನೇ.</verse>
				<verse number="19">ಓ, ಎನ ಪ್ರೀತಿದ ಜೋಕುಲೇ, ಕ್ರಿಸ್ತೆ ನಿಕ್ಲೆ ಜೀವನೊಡು ಸಾರೂಪ್ಯ ಆನಮುಟ್ಟ, ಯಾನ್ ನಿಕ್ಲೆಗಾದ್ ಕುಡೊರ ಪೆದ್ಪಿನ ಬೇನೆ ಸಹಿಸೊಂದುಲ್ಲೆ.</verse>
				<verse number="20">ನಿಕ್ಲೆ ಸಂಗತಿಡ್ ಎಂಚಿನ ಮಲ್ಪೊಡಂದ್‌ದ್ ಎಂಕ್ ತೆರಿಯುಜಿ. ಯಾನ್ ಇತ್ತೆಲಾ, ನಿಕ್ಲೆಡೊಪ್ಪ ಇತ್ತ್‌ದ್ ಬೇತೆ ಬೇತೆ ನಮೂನೆಡ್ ಪಾತೆರಿಯೆರೆ ಆಸೆ ಮಲ್ಪುವೆ.</verse>
				<verse number="21">ನ್ಯಾಯಕಟ್ಟ್‌ದ ಕೈ ತಿರ್ತ್ ಬದುಕೊಡು ಅಂದ್‌ದ್ ಬಯಕುನಾಕುಲೇ ನ್ಯಾಯಕಟ್ಟ್ ನಿಜಾದ್‌ಲಾ ದಾನೆ ಪನ್ಪುಂಡು ಅಂದ್‌ದ್ ನಿಕುಲು ತೆರಿದರಾ?</verse>
				<verse number="22">ನ್ಯಾಯಕಟ್ಟ್‌ಡ್ ಬರೆತ್ಂಡ್, ಅಬ್ರಹಾಮುಗು ರಡ್ಡ್ ಆಣ್ ಬಾಲೆಲು ಇತ್ತೆರ್. ಒರಿ ಆಯನ ಚಾಕ್ರಿದಾಲೆಡ್ದ್ ಪುಟ್ಟಿನಾಯೆ, ಬೊಕ್ಕೊರಿ ಆಯನ ಸ್ವಂತ ಬೊಡೆದಿಡ್ದ್ ಪುಟ್ಟಿನಾಯೆ.</verse>
				<verse number="23">ಚಾಕ್ರಿದಾಲೆಡ್ದ್ ಪುಟ್ಟುದಿನ ಮಗೆ ಶರೀರದಾಶೆಡ್ದ್ ಪುಟ್ಟುದಿತ್ತೆ. ಸ್ವಂತ ಬೊಡೆದಿಡ್ದ್ ಪುಟ್ಟುದಿನ ಮಗೆ ದೇವೆರೆ ವಾಗ್ದಾನೊಡ್ದೇ ಪುಟ್ಟುದಿತ್ತೆ.</verse>
				<verse number="24">ಈ ರಡ್ಡ್ ಪೊಂಜೊವುಲು ದೇವೆರೆನ ರಡ್ಡ್ ಒಡಂಬಡಿಕೆಗ್ ಸೂಚನೆ ಆದುಲ್ಲೆರ್. ಒಂಜಿ ಸೀನಾಯಿ ಪರ್ವತೊಡು ಆದ್. ಸುರು ಗುಲಾಮತನೊಟು ಉಪ್ಪುನ ಜೋಕುಲೆನ್ ಪುಟ್ಟಾವುನವು. ಅವ್ವೇ ಹಾಗರ್.</verse>
				<verse number="25">ಹಾಗರ್ ಇನ್ಪಿನವು ಅರೇಬಿಸ್ಥಾನೊಡು ಉಪ್ಪು ಸೀನಾಯಿ ಪರ್ವತ ಆದುಂಡು; ಆಲ್ ಇತ್ತೆದ ಯೆರೂಸಲೇಮುಗು ಸರಿ ಆದ್, ತನ ಬಾಲೆಲೆಡೊಪ್ಪ ನ್ಯಾಯಕಟ್ಟ್‌ದ ಗುಲಾಮತನೊಟು ಉಲ್ಲಲ್.</verse>
				<verse number="26">ಆಂಡ ಅಬ್ರಹಾಮುನ ಸ್ವಂತ ಬೊಡೆದಿ ಸಾರಾ, ಪರಲೋಕದ ಯೆರೂಸಲೇಮುಗು ಸೂಚನೆ ಆದುಲ್ಲಲ್. ಆಲ್ ನ್ಯಾಯಕಟ್ಟ್‌ಗ್ ಸ್ವತಂತ್ರದಾಲ್ ಆದಿತ್ತ್‌ದ್ ನಮ ಅಪ್ಪೆ ಆದುಲ್ಲಲ್.</verse>
				<verse number="27">ಶಾಸ್ತ್ರೊಡು ಬರೆತಿಲೆಕ್ಕ, “ಪೆದ್ದಂದಿನಾಲೆ, ಈ ಸಂತೋಷ ಮಲ್ಪುಲ. ಪೆದ್ದುನ ಬೇನೆ ತಿನಂದಿನಾಲೇ, ಸ್ವರ ಲಕ್ಕಾದ್, ಅರ್ಭಟ ಮಲ್ಪುಲ. ದಾಯೆಗ್ ಪಂಡ ಕಂಡನಿ ಇತ್ತಿನಲೆಡ್ದ್ ಕಂಡನಿ ಬುಡ್ತಿನಲೆಗ್ ಜೋಕುಲು ಜಾಸ್ತಿ.” ಪಂಡ್ದ್ ಬರೆತ್ಂಡತ್ತಾ.</verse>
				<verse number="28">ಬೊಕ್ಕ ಸಹೋದ್ರೆರೇ, ನಮ ಇಸಾಕಲೆಕ್ಕನೆ ವಾಗ್ದಾನೊಡು ಪುಟ್ಟಿದಿನ ಜೋಕುಲಾದುಲ್ಲ.</verse>
				<verse number="29">ಆಂಡ ದುಂಬು ಶರೀರದ ಆಸೆಡ್ ಪುಟ್ಟುದಿನಾಯೆ, ದೇವೆರಾತ್ಮದ ಬಲೊಟು ಪುಟ್ಟುದಿನಾಯಗ್ ಭಂಗ ಕೊರಿಲೆಕ್ಕನೆ ಇತ್ತೆಲಾ ಉಂಡು.</verse>
				<verse number="30">ಆಂಡ ಶಾಸ್ತ್ರೊಡು ನೆತ್ತ ಸಂಗತಿಡ್ ದಾನೆ ಪನ್ಪುಂಡು? “ಚಾಕ್ರಿದಾಲೆನ್ಲಾ ಆಲೆನ ಮಗನ್ಲಾ ಪಿದಯಿ ಪಾಡ್ಲ. ದಾಯೆಗಂದ್ಂಡ ಚಾಕ್ರಿದಲೆಗ್ ಪುಟ್ಟಿ ಮಗಕ್ಕ್ ಸ್ವಂತ ಬೊಡೆದಿ ಮಗಡೊಪ್ಪ ಬಾಧ್ಯಸ್ತಿಗೆ ತಿಕ್ಕಂದ್.”</verse>
				<verse number="31">ಅಂಚಾದ್ ಸಹೋದ್ರೆರೇ, ನಮ ಚಾಕ್ರಿದಾಲೆನ ಜೋಕುಲು ಅತ್ತ್. ನಮ ಸ್ವಂತ ಬೊಡೆದಿನ ಜೋಕುಲೇ ಅಂದ್‌ದ್ ತೆರಿಯೊನ್ಲೆ.</verse>
			</chapter>
			<chapter number="5">
				<verse number="1">ಕ್ರಿಸ್ತೆ ನಮನ್ ಸ್ವತಂತ್ರದಾಕುಲು ಆದುಪ್ಪೆರೆ ಬುಡುಗಡೆ ಮಲ್ತ್‌ದೆ. ನಿಕುಲು ಐಟ್ಟೇ ನಿಲೆ ಆದುಪ್ಪುಲೆ, ಕುಡೊರ ಗುಲಾಮತನತ ನುಗೊಟು ತಿಕ್ಕ್‌ದ್ ಬೂರಡೆ.</verse>
				<verse number="2">ಕೇನ್ಲೆ, ಪೌಲು ಇನ್ಪಿ ಯಾನ್ ಪನೊಂದುಲ್ಲೆ, ನಿಕುಲು ಸುನ್ನತಿ ಮಲ್ತೊಂಡರ್ಡ ಕ್ರಿಸ್ತಡ್ದ್ ನಿಕ್ಲೆಗ್ ವಾ ಪ್ರಯೋಜನಲಾ ಇಜ್ಜಿ.</verse>
				<verse number="3">ಏರ್ ಸುನ್ನತಿ ಮಲ್ತೊನುವೆನಾ, ಆಯೆ ನ್ಯಾಯಕಟ್ಟ್‌ಡ್ ಬರೆತಿ ಪ್ರತಿಯೊಂಜೆನ್ ಕೈಕೊನುನ ಹಂಗ್‌ಗ್ ಬೂರ್ವೆ ಅಂದ್‌ದ್ ಕುಡೊರ ಎಚ್ಚರಿಕೆ ಪನ್ಪೆ.</verse>
				<verse number="4">ದಾಯೆಗಂದ್ಂಡ ನಿಕ್ಲೆಡ್ ಏರಾಂಡಲಾ ನ್ಯಾಯಕಟ್ಟ್‌ನ್ ಕೈಕೊನುನೆಡ್ದಾದ್ ನೀತಿವಂತೆರ್ ಆವೆರೆ ಬಯಕುವರ್ಡ ಅಕುಲು ಕ್ರಿಸ್ತಡ್ದ್ ದೂರ ಆಪೆರ್. ಬೊಕ್ಕ ದೇವೆರೆ ದಯೊಡ್ದು ತತ್ತ್‌ದ್ ಬೂರ್ವೆರ್.</verse>
				<verse number="5">ಆಂಡ ನಮ ದೇವೆರಾತ್ಮಡ್ದ್ ದೇವೆರೆನ ಮಿತ್ತ್ ನಂಬಿಕೆ ದೀದ್ ದೇವೆರೆ ಒಟ್ಟುಗು ನೀತಿವಂತೆರ್ ಆಪ ಇನ್ಪಿನ ನಿರೀಕ್ಷೆಡ್ ಉಲ್ಲ. ಈ ನಿರೀಕ್ಷೆ ಸಫಲ ಆವು ಅಂದ್‌ದ್ ಎದುರು ತೂವೊಂದುಲ್ಲ.</verse>
				<verse number="6">ದಾಯೆಗಂದ್ಂಡ ನಮ ಕ್ರಿಸ್ತ ಯೇಸುಡು ಉಪ್ಪುನಗ, ಸುನ್ನತಿ ಆಂಡಲಾ ಪ್ರಯೋಜನ ಇಜ್ಜಿ. ಸುನ್ನತಿದಾಂತೆಲಾ ಪ್ರಯೋಜನ ಇಜ್ಜಿ, ಪ್ರೀತಿಡ್ ಯೇಸುನ ಮಿತ್ತ್ ನಂಬಿಕೆ ದೀದ್ ನಡಪುನವೇ ಪ್ರಯೋಜನ ಆದುಂಡು.</verse>
				<verse number="7">ನಿಕುಲು ಎಡ್ಡೆಡ್ ಬಲ್ತೊಂದಿತ್ತರ್. ಸತ್ಯೊಗು ಒಳಗಾವಂದಿಲೆಕ್ಕ ನಿಕ್ಲೆನ್ ಏರ್ ತಡೆತೆರ್?</verse>
				<verse number="8">ಈ ಬೋಧನೆ ನಿಕ್ಲೆಗ್ ಲೆತ್ತಿನಾಯಡ್ದ್ ಬೈದಿನವು ಅತ್ತಾ?</verse>
				<verse number="9">ಈ ಸುಳ್ಳು ಬೋಧನೆ ಒಂತೆ ಪುಳಿಬಂದದ ಲೆಕ್ಕನೆ ಇಡೀ ಬಂದೊನು ಪುಳಿ ಮಲ್ಪುಂಡು.</verse>
				<verse number="10">ನಿಕುಲು ಬೇತೆ ಸಾದಿಡ್ ಪೋಪುಜರ್ ಅಂದ್‌ದ್ ಕರ್ತವಡ್ ಎಂಕ್ ಭರವಸೆ ಉಂಡು. ನಿಕ್ಲೆಡ್ ಗಲಿಬಿಲಿ ಪುಟ್ಟಾವುನಾಯೆ ಏರೇ ಆವಡ್, ಆಯೆ ನ್ಯಾಯತೀರ್ಪುಗು ಗುರಿ ಆಪೆ.</verse>
				<verse number="11">ಸಹೋದ್ರೆರೇ, ಸುನ್ನತಿ ಮಲ್ಪೊಡಂದ್‌ದ್ ನನಲಾ ಸಾರಿಯುವೆಡ ಎಂಕ್ ನನಲಾ ಭಂಗ ದಾಯೆಗ್? ಅಂಚಾದಿತ್ತ್ಂಡ ಕ್ರುಸ್ಸುದ ದಿಸೆಡ್ದ್ ಉಂಡಾತಿನ ಆತಂಕ ಪೋಂಡತ್ತಾ?</verse>
				<verse number="12">ನಿಕ್ಲೆನ್ ಏರ್ ಗಲಿಬಿಲಿ ಮಲ್ಪುವೆರಾ, ಅಕುಲು ಅಕ್ಲೆನ ಅಂಗೊನು ಕಡ್ತ್ ಪಾಡುನನೇ ಎಡ್ಡೆ.</verse>
				<verse number="13">ಎನ ಸಹೋದ್ರೆರೇ, ನಿಕುಲು ಸ್ವತಂತ್ರೆರಾದುಪ್ಪೊಡು ಅಂದ್‌ದ್ ದೇವೆರೆ ಲೆಪ್ಪು ಆತಿನಾಕುಲು. ಆಂಡ ನಿಕ್ಲೆ ಸ್ವತಂತ್ರೊನು ಶರೀರಭಾವೊಗು ತೃಪ್ತಿ ಮಲ್ಪೆರೆಗಾದ್ ಬಳಕೆ ಮಲ್ಪಂದೆ, ಪ್ರೀತಿಡ್ ಒರಿ ಒರಿಯಗ್ ಸೇವೆ ಮಲ್ತೊಂದುಪ್ಪುಲೆ.</verse>
				<verse number="14">“ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪುಲ.” ಅಂದ್‌ದ್ ಇಡೀ ನ್ಯಾಯಕಟ್ಟ್‌ಡ್ ಒಂಜಿ ಪಾತೆರೊಡೇ ತೋಜಾವುಂಡು.</verse>
				<verse number="15">ನಿಕುಲು ಒರಿಯಗ್ ಒರಿ ತುಚ್ಚಿದ್ ಪರ್ತೊಂದು ದಿಂಗುನಾಕುಲಾಯರ್ಡ ಒರಿಯಡ್ದೊರಿ ನಾಶ ಆಪರ್, ತೂವೊನ್ಲೆ.</verse>
				<verse number="16">ಅಂಚಾದ್ ನಿಕ್ಲೆ ಜೀವನೊನು ಪರಿಶುದ್ಧಾತ್ಮ ನಡಪುಡಡ್ ಅಂದ್‌ದ್ ಯಾನ್ ಪನ್ಪೆ. ಅಪಗ ನಿಕುಲು ನಿಕ್ಲೆನ ಶರೀರಭಾವದ ಇಚ್ಚೆನ್ ಏತ್ ಮಾತ್ರೊಗ್ಲಾ ಮಲ್ಪಯರ್.</verse>
				<verse number="17">ದಾಯೆಗಂದ್ಂಡ ಶರೀರಭಾವದ ಇಚ್ಚೆ ಆತ್ಮೊಗು ವಿರೋಧ ಆದುಂಡು. ಆತ್ಮ ಶರೀರಭಾವದ ಇಚ್ಚೆಗ್ ವಿರೋಧ ಆದುಂಡು. ಈ ರಡ್ಡ್ ಶಕ್ತಿಲು ನಿಕುಲು ಬಯಕುನೆನ್ ಮಲ್ಪಂದಿಲೆಕ್ಕ ಒಂಜೆಕ್ಕೊಂಜಿ ವಿರೋಧ ಆದ್ ಹೋರಾಟ ಮಲ್ತೊಂದೇ ಉಪ್ಪುವ.</verse>
				<verse number="18">ಆಂಡ ನಿಕುಲು ಆತ್ಮೊಡ್ದು ನಡತೊಂದು ಉಪ್ಪುನಾಕುಲಾಂಡ ನ್ಯಾಯಕಟ್ಟ್‌ದ ಅಧೀನೆರತ್ತ್.</verse>
				<verse number="19">ಶರೀರಭಾವದ ಸ್ವಭಾವೊಲು ಬಯಲಾದುಂಡು; ಅವು ಒವು ಪಂಡ, ಹಾದ್ರ, ಬಂಡ್‌ತನ, ನಾಚಿಗೆದಾಂತಿನವು</verse>
				<verse number="20">ಮೂರ್ತಿಪೂಜೆ, ಮಾಟಮಂತ್ರ, ವೈರತ್ವ, ಪೆಟ್ಟ್‌ಪುಡೆ, ಕಿಚ್ಚಿ, ಎದುರು ಕೋಪ, ಸ್ವಾರ್ಥ, ತರ್ಕ, ಜಾತಿಭೇದ,</verse>
				<verse number="21">ದ್ವೇಷ, ಕುಡ್ಚೆಲ್, ದರ್ಬಾರ್, ಇಂಚಿತ್ತಿನವೇ. ಇಂಚಿತ್ತಿನೆನ್ ಮಲ್ಪುನಾಯಗ್ ದೇವೆರೆ ರಾಜ್ಯೊಡು ಬಾಧ್ಯಸ್ತಿಗೆ ತಿಕ್ಕಂದ್ ಅಂದ್‌ದ್ ಯಾನ್ ದುಂಬು ಪಂಡಿಲೆಕ್ಕನೆ ಇತ್ತೆಲಾ ಪನ್ಪೆ.</verse>
				<verse number="22">ಆಂಡ ದೇವೆರಾತ್ಮೊಡ್ದು ಉಂಡಾಪಿನ ಫಲ ದಾನೆಂದ್ಂಡ ಪ್ರೀತಿ, ಸಂತೋಷ, ಸಮಾಧಾನ, ತಾಳ್ಮೆ, ಉಪಕಾರ, ಎಡ್ಡೆತನ, ನಂಬಿಕೆ, ಸಜ್ಜನಿಗೆ, ಬೊಕ್ಕ ಕಷ್ಟ ತಡೆತೊನುನವು ಇಂಚಿತ್ತಿನವೇ.</verse>
				<verse number="23">ಇಂಚಿತ್ತಿನೆಕ್ಕ್ ವಾ ನ್ಯಾಯಕಟ್ಟ್‌ಲಾ ವಿರೋಧ ಮಲ್ಪುಜಿ.</verse>
				<verse number="24">ಕ್ರಿಸ್ತ ಯೇಸುಗು ಸೇರ್ದಿನಾಕುಲು ತನ್ಕುಲೆ ಶರೀರಭಾವದ ಇಚ್ಚೆಲೆನ್ ಕ್ರುಸ್ಸುಗು ಪಾಡ್ದಿನಾಕುಲಾದುಲ್ಲೆರ್.</verse>
				<verse number="25">ನಮ ಆತ್ಮಡ್ದ್ ಬದುಕುನಾಕುಲಾದ್ ಆತ್ಮಗ್ ಸರಿಯಾದ್ ನಡಪುಗ.</verse>
				<verse number="26">ನಮ ಪೊಕ್ಕಡೆದ ಪುಗರಿಕೆಗ್ ಆಸೆ ಮಲ್ಪಂದೆ ಒರಿ ಒರಿಯಗ್ ಕೋಪ ಲಕ್ಕಾವಂದೆ, ಒರಿ ಒರಿಯಗ್ ಮಚ್ಚರ ಮಲ್ಪಂದೆ ಉಪ್ಪುಗ.</verse>
			</chapter>
			<chapter number="6">
				<verse number="1">ಸಹೋದ್ರೆರೇ, ಒರಿ ಏರಾಂಡಲಾ ಪಾಪೊಡು ತಿಕ್ಕೊಂಡೆಡ, ಆತ್ಮಭಾವದಾಕುಲಾಯಿ ನಿಕುಲು ಅಂಚಿತ್ತಿನಾಯನ್ ಸಜ್ಜನಿಗೆದ ಆತ್ಮೊಡು ಶಾಂತ ರೀತಿಡ್ ಪಾಪೊಡ್ದು ಪಿದಾಯಿ ಕನವೊಡು. ನಿಕುಲುಲಾ ಅವ್ವೇ ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದುಪ್ಪುಲೆ.</verse>
				<verse number="2">ಒರಿ ಬೊಕ್ಕೊರಿಯನ ಪುದೆನ್ ತುಂಬೊಂದು, ಕ್ರಿಸ್ತ ನ್ಯಾಯಕಟ್ಟ್‌ನ್ ಪೂರ್ತಿ ಮಲ್ಪುಲೆ.</verse>
				<verse number="3">ಒರಿ ದಾಲಾ ಆದುಪ್ಪಂದೆ ತನನ್ ತಾನ್ ಮಲ್ಲಾಯೆ ಅಂದ್‌ದ್ ಎನ್ನುವೆಡ, ತನ್ಕ್ ತಾನೇ ಮೋಸ ಮಲ್ತೊನ್ವೆ.</verse>
				<verse number="4">ಪ್ರತಿ ಒರಿಲಾ ಆಯೆ ಮಲ್ತಿನ ಕೆಲಸೊನು ಪರೀಕ್ಷೆ ಮಲ್ತ್‌ದ್ ತೂವಡ್. ಅಂಚಾಂಡ ಮಾತ್ರ ಆಯೆ ಮಲ್ತಿನ ಕೆಲಸೊಲೆಡ್ ಪುಗರಿಗೆ ಪಡೆಯೊಲಿ ಬೇತೆಕ್ಲು ಮಲ್ತಿನ ಕೆಲಸೊಗು ಅತ್ತ್.</verse>
				<verse number="5">ದಾಯೆಗಂದ್ಂಡ ನಮ ಪ್ರತಿ ಒರಿಲಾ ಆಯಾಯನ ಪುದೆನ್ ತುಂಬೊನೊಡು.</verse>
				<verse number="6">ದೇವೆರೆ ಪಾತೆರದ ಬೋಧನೆನ್ ಕೇನುನಾಯೆ, ಬೋಧನೆನ್ ಮಲ್ಪುನಾಯಗ್ ತನಡುಪ್ಪುನ ಮಾತ ಎಡ್ಡೆಂತಿನೆಟ್ಟ್ ಪಾಲ್ ಕೊರಡ್.</verse>
				<verse number="7">ಮೋಸೊಗು ತಿಕ್ಕ್‌ದ್ ಬೂರೊಡ್ಚಿ, ದೇವೆರ್ ತಿರಸ್ಕಾರ ಸಹಿಸೊನುನಾಯೆ ಅತ್ತ್. ನರಮಾನಿ ಎಂಚಿನ ಬಿತ್ತುವೆನಾ ಅವೆನೇ ಕೊಯ್ಪೆ.</verse>
				<verse number="8">ತನ್ಕುಲೆ ಸ್ವಂತ ಶರೀರಭಾವೊನು ಬಿತ್ತುನಾಯೆ ಶರೀರಭಾವೊಡ್ದು ನಾಶನೊನು ಕೊಯ್ಪೆ. ಆಂಡ ಆತ್ಮನ ವಿಷಯೊಡು ಬಿತ್ತುನಾಯೆ ಆತ್ಮಡ್ದೇ ನಿತ್ಯಜೀವೊನು ಕೊಯ್ಪೆ.</verse>
				<verse number="9">ಅಂಚಾದ್ ಎಡ್ಡೆ ಮಲ್ಪುನೆಟ್ಟ್ ನಮ ಬೇಜಾರ್ ಮಲ್ಪಂದೆ ಉಪ್ಪುಗ. ನಮ ಬೇಜಾರ್ ಮಲ್ಪುಜಡ, ತಕ್ಕ ಸಮಯೊಡು ಆಶೀರ್ವಾದದ ಬುಲೆನ್ ಕೊಯ್ಪ.</verse>
				<verse number="10">ಅಂಚಾದ್ ಎಡ್ಡೆ ಮಲ್ಪೆರೆ ನಂಕ್ ಅವಕಾಸ ಉಪ್ಪುನಗ ಮಾತೆರೆಗ್ಲಾ ಎಡ್ಡೆನೇ ಮಲ್ಪುಗ. ಮುಖ್ಯಾದ್ ಒಂಜೇ ಇಲ್ಲದಾಕುಲೆಲೆಕ್ಕ ಕ್ರಿಸ್ತ ನಂಬಿಕೆಡ್ ಉಪ್ಪುನಾಕುಲೆಗ್ ಮಲ್ಪುಗ.</verse>
				<verse number="11">ಈ ಕಡೆತ ಪಾತೆರೊಲೆನ್ ಯಾನ್ ಎನ ಸ್ವಂತ ಕೈಟ್ ಬರೆನಗ ಏತ್ ಮಲ್ಲ ಅಕ್ಷರೊಡು ಪತ್ರಿಕೆ ಬರೆತೆ ಅಂದ್‌ದ್ ತೂಲೆ.</verse>
				<verse number="12">ಶರೀರೊಡು ನಿಕ್ಲೆನ್ ಸುನ್ನತಿ ಮಲ್ತೊನಿಯೆರೆ ಒತ್ತಾಯ ಮಲ್ಪುನಾಕುಲು ಬೇತೆಕ್ಲೆ ಎದುರುಡು ಎಡ್ಡೆಂತಿನಾಕುಲಾದ್ ತೋಜಾವೊನಿಯೆರೆ ಬಯಕುವೆರ್. ದಾಯೆಗಂದ್ಂಡ ಕ್ರಿಸ್ತನ ಕ್ರುಸ್ಸುಡ್ದು ಭಂಗ ತಾಳೊನಿಯೆರೆ ಅಕ್ಲೆಗ್ ಮನಸ್ ಇಜ್ಜಿ.</verse>
				<verse number="13">ಸುನ್ನತಿ ಆತಿನಾಕುಲು, ಅಕುಲೇ ನ್ಯಾಯಕಟ್ಟ್‌ಗ್ ಸರಿಯಾದ್ ನಡತೊಂದು ಇಜ್ಜೆರ್. ಅಕುಲು ನಿಕ್ಲೆ ಶರೀರೊಡು ಪುಗರಿಗೆ ಪಡೆಯೊನಿಯೆರೆ ನಿಕ್ಲೆಗ್ ಸುನ್ನತಿ ಆವೊಡು ಅಂದ್‌ದ್ ಆಸೆ ಮಲ್ಪುವೆರ್.</verse>
				<verse number="14">ಎಂಕಾಂಡಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಕ್ರುಸ್ಸುಡು ಅತ್ತಂದೆ ಬೇತೆ ವಾ ಪುಗರಿಗೆಲಾ ಬೊಡ್ಚಿ. ಆಯಡ್ದಾದ್ ಯಾನ್ ಲೋಕೊನು ಕ್ರುಸ್ಸುಗು ಪಾಡೊಂದಿನಾಯೆ ಆದ್ ಎನ ಪಾಲ್‌ಗ್ ಸೈತೆ. ಬೊಕ್ಕ ಯಾನ್ ಕ್ರುಸ್ಸುಗು ಪಾಡೊಂದಿನಾಯೆ ಆದ್ ಲೋಕದ ಪಾಲ್‌ಗ್ ಸೈತೆ.</verse>
				<verse number="15">ಸುನ್ನತಿ ಆಪಿನೆಡ್ದ್ ದಾಲಾ ಇಜ್ಜಿ, ಸುನ್ನತಿ ಆವಂದೆ ಉಪ್ಪುನವುಲಾ ದಾಲಾ ಇಜ್ಜಿ. ನಂಕ್ ನಿಜಾದ್ ಪೊಸ ಸೃಷ್ಟಿಯೇ ಬೋಡು.</verse>
				<verse number="16">ಈ ಸೂತ್ರೊಗು ಸರಿಯಾದ್ ನಡಪುನಾಕುಲೆಗ್ ಮಾತೆರೆಗ್ಲಾ ಪಂಡ್ಂಡ, ನಿಜ ಇಸ್ರಾಯೇಲ್ಯೆರೆ ದೇವಜನೊಕುಲೆಗ್ ದಯಲಾ ಸಮಾಧಾನಲಾ ಉಪ್ಪಡ್.</verse>
				<verse number="17">ಇಂಚಿನ ಸಂಗತಿಲೆಡ್ದಾದ್ ನನ ಎಂಕ್ ಏರ್ಲಾ ತೊಂದರೆ ಕೊರಡೆ. ದಾಯೆಗಂದ್ಂಡ ಎನ ಶರೀರದ ಮಿತ್ತುಪ್ಪುನ ಗಾಯದ ಕಲೆತ ಗುರ್ತ, ಯಾನ್ ಯೇಸುನ ಸೇವಕೆ ಪಂಡ್ದ್ ತೋಜಾವುಂಡತ್ತಾ.</verse>
				<verse number="18">ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮಡೊಪ್ಪ ಉಪ್ಪಡ್, ಆಮೆನ್.</verse>
			</chapter>
		</book>
		<book number="49">
			<chapter number="1">
				<verse number="1">ದೇವೆರೆ ಚಿತ್ತದ ಪ್ರಕಾರ, ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲು, ಎಫೆಸೊಡುಪ್ಪುನ ದೇವಜನೊಕುಲೆಗ್ಲಾ ಕ್ರಿಸ್ತ ಯೇಸುಡು ನಂಬುನಾಕುಲೆಗ್ಲಾ ಬರೆಪಿನಿ ದಾನೆಂದ್ಂಡ,</verse>
				<verse number="2">ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="3">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದೇವೆರ್‌ಲಾ, ಅಮ್ಮೆಲಾ ಆದುಪ್ಪುನಾಯಗ್ ಉಪಕಾರ ಸ್ತುತಿ. ನಮ ಕ್ರಿಸ್ತಡ್ ಒಂಜಾದುಪ್ಪುನೆಡ್ದಾದ್ ನಂಕ್ ಪರಲೋಕದ ಮಾತ ಆತ್ಮೀಕ ವರೊಲೆನ್ ಒದಗಾದ್ ಕೊರ್ತೆ.</verse>
				<verse number="4">ಎಂಚಂದ್ಂಡ ನಮ ಆಯನ ಸನ್ನಿಧಾನೊಡು ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಆದುಪ್ಪೊಡಂದ್‌ದ್ ಲೋಕೊನು ಉಂಡು ಮಲ್ಪುನೆಡ್ದ್ ದುಂಬೇ ಕ್ರಿಸ್ತಡ್ ನಮನ್ ಅಜತ್ ದೆತ್ತೊಂಡೆ.</verse>
				<verse number="5">ದೇವೆರ್ ನಮನ್ ಯೇಸು ಕ್ರಿಸ್ತಡ್ ತನ ಸ್ವಂತ ಜೋಕುಲು ಆವೊಡು ಅಂದ್‌ದ್ ಪ್ರೀತಿಡ್ ದುಂಬೇ ನಿರ್ಧಾರ ಮಲ್ತ್‌ದಿತ್ತೆ. ಉಂದು ಆಯನ ಸಂತೋಷ ಬೊಕ್ಕ ಚಿತ್ತ ಆದಿತ್ತ್ಂಡ್.</verse>
				<verse number="6">ಅಂಚಾದ್ ನಮ ಆಯನ ಪ್ರೀತಿದ ಮಗಕ್ಕ್ ಸೇರ್ದಿನಾಕುಲಾದ್, ನಂಕ್ ಉಂಬೊಲಿ ಆದ್ ಕೊರಿನ ಮೈಮೆದ ದಯೊಕಾದ್, ನಮ ದೇವೆರೆನ್ ಪುಗರುವ.</verse>
				<verse number="7">ಅಂಚಾಯಿನೆಡ್ದ್ ಆಯನ ನೆತ್ತೆರೆಡ್ದ್ ನಮ ಪಾಪೊಲು ಪರಿಹಾರ ಆದ್ ನಂಕ್ ಬುಡುಗಡೆ ಆಂಡ್. ಉಂದು ದೇವೆರೆನ ದಯತ ಐಶ್ವರ್ಯನೇ ಆದುಂಡು.</verse>
				<verse number="8">ದೇವೆರ್ ತನ ಚಿತ್ತದ ಗುಟ್ಟುನು ತೆರಿಪಾಯಿನೆಡ್ದ್, ನಂಕ್ ಗೇನ, ಬುದ್ಧಿನ್ ಕೊರ್ದು, ಆಯನ ದಯೊನು ಬೊಕ್ಕಲಾ ಹೆಚ್ಚಾದ್ ತೋಜಾಯೆ.</verse>
				<verse number="9">ಬೊಕ್ಕ ದೇವೆರೆನ ಉಲಯಿದ ಚಿತ್ತದ ಗುಟ್ಟುನು ಆಯನ ಇಷ್ಟದ ಪ್ರಕಾರ ಕ್ರಿಸ್ತಡ್ ನಂಕ್ ದುಂಬೇ ತೋಜಾದ್ ಕೊರಿಯೆ.</verse>
				<verse number="10">ಆ ಗುಟ್ಟು ಉಂದೇ, ಕಾಲ ಸಂದ್‌ನಗ, ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪುನ ಮಾತಲಾ ಕ್ರಿಸ್ತಡ್ ಒಂಜಾದುಪ್ಪೊಡಂದೇ ನಿರ್ಧಾರ ಆದಿತ್ತ್ಂಡ್.</verse>
				<verse number="11">ಉಂದತ್ತಂದೆ, ನಮ ಆಯಡ್ದ್ ದೇವೆರೆನ ಸ್ವಂತ ಜನೊಕುಲಾಯ. ಬರ್ಪಿಂಚಿತ್ತಿ ಕ್ರಿಸ್ತನ್ ಭರವಸೊಡು ಎದುರು ತೂವೊಂದಿತ್ತ. ನಮ ಆಯನ ಮೈಮೆನ್ ಲೋಕೊಗು ತೆರಿಪಾವೊಡು ಅಂದ್‌ದ್ ಮಾತ ಕಾರ್ಯೊಲೆನ್ ತನ ಇಷ್ಟೊಗು ಸರಿಯಾದ್ ನಡಪುನ ದೇವೆರ್ ನಮನ್ ಆದಿಡ್ದೇ ಅಜತ್ ದೆತ್ತೊಂಡೆ.</verse>
				<verse number="12"></verse>
				<verse number="13">ಬೊಕ್ಕ ನಿಕುಲುಲಾ ನಿಕ್ಲೆ ರಕ್ಷಣೆದ ಸುವಾರ್ತೆ ಇನ್ಪಿನ ಸತ್ಯದ ಪಾತೆರೊನು ಕೇಂಡ್ದ್, ಕ್ರಿಸ್ತನ್ ನಂಬುನಕುಲಾದ್ ವಾಗ್ದತ್ತ ಆದುಪ್ಪು ಪರಿಶುದ್ಧಾತ್ಮಡ್ದ್ ಮುದ್ರೆಲಾ ಹೊಂದಿಯರ್.</verse>
				<verse number="14">ದೇವೆರ್ ತನ ಸ್ವಂತ ಜನೊಕುಲೆನ ಬುಡುಗಡೆಗಾದ್ ಪರಿಶುದ್ಧಾತ್ಮೆನೇ ನಮ ಬಾಧ್ಯಸ್ತಿಗೆದ ಆಧಾರ ಆದುಲ್ಲೆ. ಈ ಕಾರಣೊಡ್ದು ನಮ ದೇವೆರೆನ್ ಪುಗರೊಂದು ಮೈಮೆನ್ ಸಂದಾಗ.</verse>
				<verse number="15">ಇಂಚಾದುಪ್ಪುನಗ, ಕರ್ತವೆ ಆದುಪ್ಪು ಯೇಸುಡು ದೀತಿನ ನಂಬಿಕೆನ್ಲಾ ಮಾತ ದೇವಜನೊಕುಲೆಗ್ ನಿಕುಲು ತೋಜಾವುನ ಪ್ರೀತಿನ್ಲಾ ಯಾನ್ ಕೇನಿನೆಡ್ದಿಂಚಿ, ನಿಕ್ಲೆಗ್ ಬೋಡಾದ್ ಎನ ಪ್ರಾರ್ಥನೆಲೆಡ್ ಬುಡಂದೆ ಉಪಕಾರ ಸ್ತುತಿ ಮಲ್ತ್‌ದ್ ನಿಕ್ಲೆನ್ ನೆನೆಪು ಮಲ್ತೊಂದುಲ್ಲೆ.</verse>
				<verse number="16"></verse>
				<verse number="17">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ದೇವೆರ್ ಆದುಪ್ಪು ಮೈಮೆದ ಅಮ್ಮೆ, ನಿಕ್ಲೆಗ್ ತಿಳುವಳಿಕೆದ ಆತ್ಮೊನ್ಲಾ ಪ್ರಕಟನೆನ್ಲಾ ಕೊರ್ದು, ನಿಕುಲು ದೇವೆರೆ ಗೇನೊಡು ಬುಲೆವೊಡು ಅಂದ್‌ದ್ ಯಾನ್ ನಟ್ಟೊನ್ವೆ.</verse>
				<verse number="18">ಈ ಗೇನದ ಬೊಲ್ಪು ನಿಕ್ಲೆ ಉಡಲ್‌ದ ಕಣ್ಣ್‌ನ್ ಜಪ್ಪಡ್. ಅಪಗ ಆಯೆ ತಾನ್ ಲೆತ್ತ್‌ದಿನ ದೇವಜನೊಕುಲೆಡ್, ತನ ಮೈಮೆದಲಾ ಐಶ್ವರ್ಯದಲಾ ಆಸ್ತಿ ಏತ್ ಅಂದ್‌ದ್‌ಲಾ ಬೊಕ್ಕ ನಿಕ್ಲೆಗುಪ್ಪುನ ನಿರೀಕ್ಷೆ ದಾನೆ ಪಂಡ್ದ್‌ಲಾ ನಿಕುಲು ತೆರಿಯೊನ್ವರ್.</verse>
				<verse number="19">ಬೊಕ್ಕ ನಂಬುನಾಕುಲಾಯಿ ನಮಡ್ ಕಾರ್ಯ ಸಾದನೆ ಮಲ್ಪುನ ಆಯನ ಶಕ್ತಿ, ತ್ರಾಣದ ಪ್ರಕಾರ ಮಿತಿಮೀರು ಮಲ್ಲಾದಿಗೆ ಏತ್ ಅಂದ್‌ದ್ ನಿಕ್ಲೆಗ್ ತೆರಿಯುಲೆಕ್ಕ ಮಲ್ಪಡ್ ಅಂದ್‌ದ್ ನಟ್ಟೊನ್ವೆ.</verse>
				<verse number="20">ಈ ಬಲ ಶಕ್ತಿಡ್ದೇ ದೇವೆರ್ ಕ್ರಿಸ್ತನ್ ಸೈತಿನಾಕುಲೆಡ್ದ್ ಲಕ್ಕಾದ್ ಮಾತ ಕಾನೂನು, ಅಧಿಕಾರ, ದೊರೆತನ, ಬೊಕ್ಕ ಮಾತ ಅಧಿಕಾರದ ಮಿತ್ತ್‌ಲಾ ಈ ಲೋಕೊಡು ಮಾತ್ರತ್ತಂದೆ, ನನ ಬರಿಯೆರೆ ಉಪ್ಪುನ ಲೋಕೊಡ್ಲಾ ಪುದರ್ ಪೋಯಿನಾಕುಲೆನ ಮಾತ ಪುದರ್‌ದ ಮಿತ್ತ್‌ಲಾ ಪರಲೋಕೊಡು ಆಯನ್ ತನ ಬಲತ್ತ ಮರ್ಗಿಲ್‌ಡ್ ಕುಲ್ಲಾಯೆ.</verse>
				<verse number="21"></verse>
				<verse number="22">ಉಂದತ್ತಂದೆ ದೇವೆರ್ ಮಾತೆನ್ಲಾ ಕ್ರಿಸ್ತನ ಕಾರ್‌ದಡಿಕ್ ಪಾಡ್ದೆ. ಬೊಕ್ಕ ಸಭೆತ ಪ್ರಯೋಜನೊಗಾದ್ ಆಯೆ ಮಾತೆತ್ತಲಾ ತರೆ ಆದುಲ್ಲೆ.</verse>
				<verse number="23">ಬೊಕ್ಕ ಸಭೆ ಕ್ರಿಸ್ತನ ಶರೀರ ಆದುಂಡು, ಮಾತೆನ್ಲಾ ಮಾತ ರೀತಿಡ್ಲಾ ಪೂರೈಸುನಾಯಡ್ದ್ ಪರಿಪೂರ್ಣತೆ ಆದುಂಡು. ಆಮೆನ್.</verse>
			</chapter>
			<chapter number="2">
				<verse number="1">ನಿಕುಲು ಅಪರಾಧ ಬೊಕ್ಕ ಪಾಪದ ದಿಸೆಡ್ದ್ ಒರ ಸೈತಿನಾಕುಲು ಆದಿತ್ತಿ ನಿಕ್ಲೆನ್ಲಾ ಬದ್‌ಕಾಯೆ.</verse>
				<verse number="2">ನಿಕುಲು ದುಂಬು ಅಪರಾಧೊನ್ಲಾ ಪಾಪೊನ್ಲಾ ಮಲ್ಪುನಾಕುಲು ಆದಿತ್ತ್‌ದ್ ಲೋಕದ ರೀತಿ ರಿವಾಜ್‌ಗ್ ತಕ್ಕ ನಡತೊಂಡರ್. ಬಾನಮಂಡಲೊಡು ಅಧಿಕಾರ ನಡಪಾವುನ ಅಧಿಪತಿಗ್, ಅಂದ್ಂಡ ನಂಬೊಲ್ಕೆದಾಂತಿನಾಕುಲೆನ್ ಈ ಲೋಕೊಡು ದಂಕ್‌ದ್ ನಡಪುಡುನ ಆತ್ಮೊಗು ಸರಿಯಾದ್ ನಡತೊಂಡರ್.</verse>
				<verse number="3">ಮೊಕ್ಲೆಡ್ ನಮ ಮಾತೆರ್ಲಾ ಒಂಜಿ ಸಮಯೊಡು ದಂಕ್‌ದ್ ನಡಪುನಾಕುಲಾದಿತ್ತ್‌ದ್ ಶರೀರದ ಆಸೆಲೆಗ್ ಉಲಯಿ ಆದ್, ಶರೀರೊಗ್ಲಾ ಮನಸ್‌ಗ್ಲಾ ಸಮ್ಮಂಧ ಇತ್ತಿನ ಇಚ್ಚೆಲೆಡ್ ನಡತೊಂದು ನಮ ಈ ಸ್ವಭಾವೊಡ್ದಾದ್ ಬೇತೆಕ್ಲೆಲೆಕ್ಕನೇ ದೇವೆರೆ ಕೋಪೊಗು ಗುರಿ ಆದಿತ್ತ.</verse>
				<verse number="4">ಆಂಡ ದೇವೆರ್ ಏತೋ ಕನಿಕರದಾಯೆ ಆದಿತ್ತ್‌ದ್ ನಮನ್ ಏತೋ ಹೆಚ್ಚಾದ್ ಪ್ರೀತಿ ಮಲ್ತ್‌ದೆ.</verse>
				<verse number="5">ಅಂಚಾದೇ, ಅಪರಾಧದ ದಿಸೆಡ್ದ್ ಸೈತಿನಾಕುಲು ಆದಿತ್ತಿ ನಮನ್ ಕ್ರಿಸ್ತ ಒಟ್ಟುಗು ಬದ್‌ಕಾಯೆ. (ದೇವೆರೆ ದಯೊಡ್ದೇ ನಿಕ್ಲೆಗ್ ರಕ್ಷಣೆ ತಿಕ್ಕ್ಂಡ್.)</verse>
				<verse number="6">ಸೈತಿನಾಕುಲೆಡ್ದ್ ಲಕ್ಕಾಯಿನಿ ಮಾತ್ರ ಅತ್ತ್ ನಮ ಕ್ರಿಸ್ತ ಯೇಸುಡು ಒಂಜಾದ್ ಇತ್ತಿನೆಡ್ದ್ ದೇವೆರ್ ದುಂಬು ಬರ್ಪಿ ಯುಗತ್ತ ಜನೊಕುಲೆಗ್ ಕ್ರಿಸ್ತ ಯೇಸುಡು ಗೆನ್ಪೆರೆ ತೀರಂದಿನಾತ್ ತನ ದಯ ಪನ್ಪಿ ಐಶ್ವರ್ಯೊನು ಒದಗಾದ್ ನಮನ್ ಸೈತಿನಾಕುಲೆಡ್ದ್ ಲಕ್ಕಾದ್ ಪರಲೋಕೊಡು ಆಯಡೊಪ್ಪ ಕುಲ್ಲಾವೆ.</verse>
				<verse number="7"></verse>
				<verse number="8">ನಿಕುಲು ನಂಬಿನಪಗ ದೇವೆರ್ ನಿಕ್ಲೆನ್ ದಯೊಡ್ದಾದ್ ರಕ್ಷಣೆ ಮಲ್ತೆ. ಉಂದು ನಿಕ್ಲೆ ಸ್ವಂತ ಯೋಗ್ಯತೆ ಕ್ರಿಯೊಲೆಡ್ದಾದ್ ಅತ್ತ್. ಅವು ದೇವೆರೆನ ಒಂಜಿ ಉಡಿಗೆರೆನೇ.</verse>
				<verse number="9">ರಕ್ಷಣೆ ಇನ್ಪಿನವು ನಮ ಮಲ್ತ್‌ದಿನ ಎಡ್ಡೆ ಕೆಲೊಸೊಲೆ ಫಲ ಅತ್ತ್. ಅಂಚಾದ್ ನಮ ಏರ್ಲಾ ಐಕಾದ್ ಪುಗರೊನಿಯೆರೆ ಆಪುಜಿ. ನಮ ದೇವೆರೆನ ಸೃಷ್ಟಿ.</verse>
				<verse number="10">ದಾಯೆಗಂದ್ಂಡ ನಮ ದೇವೆರೆ ಕೈಬೇಲೆ. ಕ್ರಿಸ್ತ ಯೇಸುಡು ಎಡ್ಡೆ ಕಾರ್ಯೊಲೆನ್ ಮಲ್ಪೆರೆಗಾದ್ ನಮನ್ ಉಂಡು ಮಲ್ತ್‌ದೆ. ಉಂದೆಟ್ಟ್ ನಡಪುಲೆಕ್ಕ ದೇವೆರ್ ನಮನ್ ದುಂಬೇ ನೇಮಕ ಮಲ್ತ್‌ದೆ.</verse>
				<verse number="11">ಉಂದೆಕ್ಕಾದ್ ನಿಕುಲು ಪುಟ್ಟುಡ್ದು ಪಿದಯಿದ ಜನೊಕುಲಾದಿತ್ತರ್. ಶರೀರೊಡು ಸುನ್ನತಿ ಆತಿನಾಕುಲು ನಿಕ್ಲೆನ್ ಸುನ್ನತಿ ಆವಂದಿ ಅಧರ್ಮಿಲು ಅಂದ್‌ದ್ ಲೆತ್ತೊಂದಿತ್ತೆರ್.</verse>
				<verse number="12">ಆ ದಿನೊಕುಲೆಡ್ ನಿಕುಲು ಕ್ರಿಸ್ತಡ್ ದೂರ ಆದಿತ್ತರ್. ನಿಕುಲು ಇಸ್ರಾಯೇಲ್ಯೆರೆ ಹಕ್ಕ್‌ಡ್ ಪಾಲ್‌ದಾಂತಿನಾಕುಲುಲಾ ದೇವೆರ್ ಅಕ್ಲೆಡೊಪ್ಪ ಮಲ್ತ್‌ದಿನ ಒಡಂಬಡಿಕೆದ ವಾಗ್ದಾನೊಡು ಪಿದಯಿದಾಕುಲುಲಾ ಆದಿತ್ತರ್. ಈ ಲೋಕೊಡು ದೇವೆರ್‌ದಾಂತೆಲಾ ನಿರೀಕ್ಷೆದಾಂತೆಲಾ ಆದಿತ್ತರ್ ಅಂದ್‌ದ್ ನೆನೆಪು ಮಲ್ತೊನ್ಲೆ.</verse>
				<verse number="13">ಆಂಡ ಇತ್ತೆ ನಿಕುಲು ಕ್ರಿಸ್ತ ಯೇಸುಡು ಸೇರ್ದುಲ್ಲರ್. ಒರ ನಿಕುಲು ದೇವೆರೆಡ್ದ್ ಮಸ್ತ್ ದೂರ ಆದಿತ್ತರ್. ಆಂಡ ಇತ್ತೆ ಕ್ರಿಸ್ತನ ನೆತ್ತೆರೆಡ್ದ್ ಆಯಗ್ ಕೈತಲಾದುಲ್ಲರ್.</verse>
				<verse number="14">ನಿಕ್ಲೆನ್ಲಾ ನಮನ್ಲಾ ಒಂಜಿ ಮಲ್ತ್‌ದಿನ ಆಯೆನೇ ನಂಕ್ ಸಮಾಧಾನ ಕೊರ್ಪಿನಾಯೆ ಆದುಲ್ಲೆ. ಆಯೆ ತನ ಶರೀರೊನು ಅರ್ಪಣೆ ಮಲ್ತ್‌ದ್ ನ್ಯಾಯಕಟ್ಟ್‌ಡ್ ಬರೆದಿತ್ತಿನ ಅಪ್ಪಣೆಲೆನ್ ದೆತ್ತ್‌ದ್ ಪಾಡ್ದ್ ಇತ್ತಿನ ಪಗೆನ್ ತೀರಿಸಾದ್ ನಮನ್ ದೂರ ಮಲ್ತ್‌ದಿನ ಅಡ್ಡ ಗೋಡೆನ್ ದೆತ್ತ್‌ದ್ ಪಾಡಿಯೆ. ಆಯೆ ಯೆಹೂದ್ಯೆರೆನ್ಲಾ ಪಿದಯಿದಾಕುಲೆನ್ಲಾ ಸಮಾಧಾನ ಮಲ್ತ್‌ದ್ ತನಡ್ ರಡ್ಡ್ ಗುಂಪುಲೆನ್ಲಾ ಒಂಜಿ ಮಲ್ತ್‌ದ್ ಪೊಸ ಜನೊಕುಲೆ ಲೆಕ್ಕ ಮಲ್ತೆ.</verse>
				<verse number="15"></verse>
				<verse number="16">ನಮಡ್ ಇತ್ತಿನ ಪಗೆತನೊನು ಕ್ರಿಸ್ತೆ ತನ ಕ್ರುಸ್ಸುದ ಮರಣೊಡ್ದು ನಾಶ ಮಲ್ತ್‌ದ್ ರಡ್ಡ್ ಗುಂಪುಲೆನ್ಲಾ ಒಂಜೇ ಶರೀರದ ಲೆಕ್ಕ ಮಲ್ತ್‌ದ್ ದೇವೆರೆಡೊಪ್ಪ ಸಮಾಧಾನ ಮಲ್ತೆ.</verse>
				<verse number="17">ಆಯೆ ಬತ್ತ್‌ದ್ ದೂರ ಇತ್ತಿ ನಿಕ್ಲೆಗ್ಲಾ ಕೈತಲಿತ್ತಿ ಯೆಹೂದ್ಯೆರ್‌ಗ್ಲಾ ಸಮಾಧಾನದ ಸುವಾರ್ತೆನ್ ಸಾರಿಯೆ.</verse>
				<verse number="18">ಇಂಚ ಆದುಪ್ಪುನೆಡ್ದಾವರ, ಆಯಡ್ದ್ ನಮಲಾ ನಿಕುಲುಲಾ ಒಂಜೇ ಆತ್ಮೊನು ಪಡೆತಿನಾಕುಲಾದ್ ಅಮ್ಮೆರೆ ಕೈತಲ್‌ಗ್ ಸೇರಿಯೆರೆ ಸಾದಿ ಆಂಡ್.</verse>
				<verse number="19">ಅಂಚಾದ್ ನಿಕುಲು ನನ ದುಂಬು ಪರದೇಶಿಲುಲಾ ಪಿದಯಿದ ಜನೊಕುಲುಲಾ ಆದುಪ್ಪಂದೆ ದೇವಜನೊಕುಲೆ ಒಟ್ಟುಗು ಒಂಜೇ ಊರುದಾಕುಲುಲಾ ದೇವೆರೆ ಇಲ್ಲದಾಕುಲುಲಾ ಆದುಲ್ಲರ್.</verse>
				<verse number="20">ಅಪೊಸ್ತಲೆರ್ ಬೊಕ್ಕ ಪ್ರವಾದಿಲು ಇನ್ಪಿ ಪಂಚಾಂಗದ ಮಿತ್ತ್ ಕಟ್ಟ್‌ದಿನ ದೇವೆರೆ ಇಲ್ಲ್ ಆದುಲ್ಲ. ಐತ ಮೂಲೆಕಲ್ಲ್ ಕ್ರಿಸ್ತ ಯೇಸು ತಾನೇ ಆದುಲ್ಲೆ.</verse>
				<verse number="21">ಆಯೆ ಕಟ್ಟ್‌ದಿನ ಈ ಕಟ್ಟೊಣ ಮಾತ ಮರ್ಗಿಲುಲಾ, ಮಾತ ಕೋಣೆಲುಲಾ ಒಂಜೆಕ್ಕ್ ಒಂಜಿ ಕೂಡ್ದು ಉಂಡು, ಆ ಕಟ್ಟೊಣ ವೃದ್ಧಿ ಆದ್ ಕರ್ತವನ ಪರಿಶುದ್ಧ ದೇವಾಲಯ ಆಪುಂಡು.</verse>
				<verse number="22">ಆಯಡ್ದಾದ್ ಪಿದಯಿದ ಜನೊಕುಲು ಆದಿತ್ತಿನ ನಿಕುಲುಲಾ ಆತ್ಮಡ್ ದೇವೆರೆ ಇಲ್ಲ್ ಆದುಪ್ಪುಲೆಕ್ಕ ನಮ ಒಟ್ಟುಗು ಕಟ್ಟ್‌ದಿನಾಕುಲು ಆದುಲ್ಲರ್.</verse>
			</chapter>
			<chapter number="3">
				<verse number="1">ಉಂದೆಕ್ಕಾದ್ ಪೌಲು ಇನ್ಪಿನಾಯೆ ಯಾನ್, ಪಿದಯಿದ ಜನೊಕುಲೆಗಾದ್ರ ಕ್ರಿಸ್ತ ಯೇಸುನ ವಶ ಆದುಲ್ಲೆ.</verse>
				<verse number="2">ನಿಕುಲು ಕಂಡಿತಾದ್ ಇದ ಮುಟ್ಟ ಕೇಂಡ್ದ್ ಉಪ್ಪರ್, ಎಂಚ ದೇವೆರೆನ ದಯೊಟು ಸಾರಿಯುನ ಬೇಲೆ ನಿಕ್ಲೆ ಎಡ್ಡೆಗಾದ್ ಎಂಕ್ ಕೊರ್ತುಂಡುತ್ತಾ?</verse>
				<verse number="3">ದೇವೆರ್ ತನ ಗುಟ್ಟುದ ಯೋಜನೆನ್ ಎಂಕ್ ತೆರಿಪಾದಿನೆನ್ ಯಾನ್ ದುಂಬು ಒರ ನಿಕ್ಲೆಗ್ ಸೂಕ್ಷ್ಮಾದ್ ಬರೆತೆ.</verse>
				<verse number="4">ಯಾನ್ ಬರೆತಿನೆನ್ ನಿಕುಲು ಓದುನಗ ಕ್ರಿಸ್ತನ ವಿಷಯದ ಈ ಗುಟ್ಟು ಎಂಕ್ ಎಂಚ ತೆರಿದ್‌ಂಡ್ ಅಂದ್‌ದ್ ನಿಕ್ಲೆಗ್ ಗೊತ್ತಾಪುಂಡು.</verse>
				<verse number="5">ಆ ಗುಟ್ಟುನು ಈ ಕಾಲೊಲೆಡ್ ಪರಿಶುದ್ಧ ಅಪೊಸ್ತಲೆರೆಗ್ಲಾ ಪ್ರವಾದಿಲೆಗ್ಲಾ ಪರಿಶುದ್ಧಾತ್ಮೊಡು ತೆರಿಪಾಯಿಲೆಕ್ಕ ಬೇತೆ ಕಾಲೊಡು ಇತ್ತಿನ ಜನೊಕುಲೆಗ್ ತೆರಿಪಾದಿಜಿ.</verse>
				<verse number="6">ಅವು ದಾನೆಂದ್ಂಡ ಪಿದಯಿದ ಜನೊಕುಲು ಸುವಾರ್ತೆಡ್ದ್ ಕ್ರಿಸ್ತ ಯೇಸು ಒಟ್ಟುಗು ಸೇರ್ದಿನಾಕುಲಾದ್ ಯೆಹೂದ್ಯೆರೆ ಒಟ್ಟುಗು ಬಾಧ್ಯೆರ್ ಆದ್ ಒಂಜೇ ಶರೀರದ ಅಂಗೊಲುಲಾ ಅಬ್ರಹಾಮುಗು ಆತಿನ ವಾಗ್ದಾನೊಡು ಪಾಲ್‌ದಾರೆರ್‌ಲಾ ಆದುಲ್ಲೆರ್ ಇನ್ಪಿನವೇ.</verse>
				<verse number="7">ದೇವೆರ್‌ ತನ ಬಲೊಡ್ದು ಎಡ್ಡೆ ಬೇಲೆ ಮಲ್ತ್‌ದ್ ದಯತ ಉಡಿಗೆರೆನ್ ಎಂಕ್ ಕೊರಿನೆಡ್ದ್ ಯಾನ್ ಈ ಸುವಾರ್ತೆಗ್ ಚಾಕ್ರಿದಾಯೆ ಆಯೆ. ಯಾನ್ ಕ್ರಿಸ್ತನ ಶೋಧಿಯೆರೆ ತಿರಂದಿ ಐಶ್ವರ್ಯದ ಸುವಾರ್ತೆನ್ ಪಿದಯಿದ ಜನೊಕುಲೆಗ್ ತೆರಿಪಾವೆರೆಗಾದ್ರ ಮಾತೆನ್ ಉಂಡು ಮಲ್ತಿನ ದೇವೆರ್ ಆದಿಡ್ದಿಂಚಿ ತೋಜಂದಿನ ಗುಟ್ಟುನು ತೆರಿಪಾವುನ ರೀತಿ ಎಂಚಿನ ಅಂದ್‌ದ್ ಸಾರಿಯೆರೆಗಾದ್ ದೇವಜನೊಕುಲೆಡ್ ಅಲ್ಪದಾಯೆ ಆದುಪ್ಪು ಎಂಕ್ ಈ ದಯ ಕೊರ್ತುಂಡು.</verse>
				<verse number="8"></verse>
				<verse number="9"></verse>
				<verse number="10">ಆಯನ ನಿತ್ಯ ನಿರ್ಧಾರದ ಪ್ರಕಾರ ಅವೆನ್ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡು ಪರಿಪೂರ್ಣ ಮಲ್ತೆ. ಉಂದು ಮಾತೆಟ್ಟ್ ದೇವೆರೆನ ಉದ್ದೇಶ ದಾನೆಂದ್ಂಡ ತನ ಗೇನದ ಐಶ್ವರ್ಯೊನು ಪರಲೋಕೊಡುಪ್ಪುನ ಮಾತ ಅಧಿಕಾರೊಲೆಗ್ಲಾ ಅಧಿಪತಿಲೆಗ್ಲಾ ಇತ್ತೆ ಕ್ರೈಸ್ತ ಸಭೆಡ್ದ್ ಗೊತ್ತಾವೊಡು ಇನ್ಪಿನವೇ.</verse>
				<verse number="11"></verse>
				<verse number="12">ಕ್ರಿಸ್ತಡ್ದಾದ್‌ಲಾ, ಆಯ ಮಿತ್ತ್‌ದ ನಮ ನಂಬಿಕೆಡ್ದಾದ್‌ಲಾ ಇತ್ತೆ ದೇವೆರೆ ಸನ್ನಿಧಾನೊಗು ನಮ ಧೈರ್ಯೊಡು ಬರೊಲಿ.</verse>
				<verse number="13">ಅಂಚಾದ್ ಯಾನ್ ನಿಕ್ಲೆಗ್ ಬೋಡಾದ್ ಬರ್ಪಿ ಭಂಗೊಲು ಅವು ನಿಕ್ಲೆ ಮೈಮೆಗಾದ್ ಅಂದ್‌ದ್ ಎನ್ನ್‌ದ್ ಸೋತುದು ಪೋವಡೆ.</verse>
				<verse number="14">ಈ ಕಾರಣೊಗಾದ್ ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪು ಒಂಜೇ ಕುಟುಂಬೊಗು ಅಮ್ಮೆ ಆದುಪ್ಪುನಾಯಗ್ ಯಾನ್ ಮೊರಂಪೂರ್ದು ನಟ್ಟೊನ್ವೆ.</verse>
				<verse number="15"></verse>
				<verse number="16">ನಿಕುಲು ಅಂತರ್ಯೊಡು ದೇವೆರಾತ್ಮೊಡ್ದು ಮೈಮೆದ ಐಶ್ಚರ್ಯೊಡ್ದು ಬಲವಂತೆರ್ ಆವೊಡು ಪಂಡ್ದ್, ಯಾನ್ ಪ್ರಾರ್ಥನೆ ಮಲ್ಪುವೆ.</verse>
				<verse number="17">ಅಪಗ ನಿಕ್ಲೆ ನಂಬಿಕೆಡ್ದಾದ್ ಕ್ರಿಸ್ತೆ ನಿಕ್ಲೆ ಉಡಲ್‌ಡ್ ವಾಸ ಮಲ್ಪುವೆ. ನಿಕ್ಲೆ ಬೇರ್ ದೇವೆರೆ ಪ್ರೀತಿಡ್ ಮಸ್ತ್ ಅಡಿಕ್ ಪೋದು ನಿಕ್ಲೆನ್ ಬಲ ಪಡೆಪಾವುಂಡು.</verse>
				<verse number="18">ನಿಕುಲು ದೇವೆರೆ ಪ್ರೀತಿಡ್ ನಿಲೆ ಆದ್ ಉಂತುದು ದೇವಜನೊಕುಲೆ ಒಟ್ಟುಗು ಐತ ಅಗೆಲ, ಉದ್ಧ, ಎತ್ತರ ಬೊಕ್ಕ ಗುಂಡಿ ಏತ್ ಪನ್ಪಿನೆನ್ ತೆರಿಯೊನೆಕ್ಕ್ ಶಕ್ತೆರಾಪಿಲೆಕ್ಕ</verse>
				<verse number="19">ಗೇನೊನು ಮೀರುನ ಕ್ರಿಸ್ತ ಪ್ರೀತಿನ್ ತೆರಿಯೊಂದು ಸಾಮರ್ಥ್ಯ ಇತ್ತಿನಕುಲಾದ್ ದೇವೆರೆ ಮಾತ ಸದ್ಗುಣೊಲೆಡ್ ದಿಂಜೊಂದು ಬರೊಡು ಅಂದ್‌ದ್ ಯಾನ್ ನಟ್ಟೊನ್ವೆ.</verse>
				<verse number="20">ತನ ಬಲೊಡ್ದು ನಮಡ್ ಕೆಲಸ ನಡಪುಡ್ದು ನಮ ನಟ್ಟೊನುನೆಡ್ದ್‌ಲಾ, ವಿಚಾರ ಮಲ್ಪುನೆಡ್ದ್‌ಲಾ ಏತೋ ಹೆಚ್ಚಾದ್ ಮಾತೆನ್ಲಾ ಮಲ್ಪೆರೆ ಸಾಮರ್ಥ್ಯ ಇತ್ತಿ ದೇವೆರೆಗ್, ಸಭೆಟ್ಲಾ ಕ್ರಿಸ್ತ ಯೇಸುಡ್ಲಾ ಮಾತ ಸಂತಾನೊಗು ಏನಿತ್ಯೇನಿಗ್ಲಾ ಮೈಮೆ ಆವಡ್. ಆಮೆನ್.</verse>
				<verse number="21"></verse>
			</chapter>
			<chapter number="4">
				<verse number="1">ನಿಕುಲು ದೇವೆರೆಡ್ ಲೆಪ್ಪು ಆದಿತ್ತಿನಕುಲಾದ್ ಆ ಲೆಪ್ಪುಗು ಯೋಗ್ಯೆರಾದ್ ನಡಪುಡೊಡು ಅಂದ್‌ದ್ ಕರ್ತವನ ಸೇವೆಗ್ ಸೆರೆಮನೆಟುಪ್ಪು ಯಾನ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="2">ನಿಕುಲು ಏಪಲಾ ತಗ್ಗ್‌ತನೊಟ್ಲಾ ಸಜ್ಜನಿಗೆಡ್ಲಾ ತಾಳ್ಮೆಡ್ಲಾ ನಡತೊಂದು ಒರಿಯನ್ ಒರಿ ಪ್ರೀತಿಡ್ ತಾಳೊನ್ಲೆ.</verse>
				<verse number="3">ಸಮಾಧಾನದ ಬಂಧನೊಡು ಕಟ್ಟ್‌ದಿನಕುಲಾದ್ ಪರಿಶುದ್ಧಾತ್ಮಡ್ದ್ ಉಂಡಾಯಿ ಒಗ್ಗಟ್ಟ್‌ನ್ ಕಾತೊನಿಯೆರೆ ಪ್ರಯತ್ನ ಮಲ್ಪುಲೆ.</verse>
				<verse number="4">ನಿಕುಲು ಒಂಜೇ ಶರೀರ, ಒಂಜೇ ಆತ್ಮನ್ ಪಡೆಯಿನಾಕುಲು ಒಂಜೆ ಪಧವಿನ್ ನಿರೀಕ್ಷೆ ಮಲ್ಪೆರೆ ಲೆಪ್ಪು ಇತ್ತಿನಾಕುಲಾದುಲ್ಲರ್. ನಿಕ್ಲೆಗ್ ಕರ್ತವೆ ಒರಿಯೆ, ಭರವಸೆ ಒಂಜೆ, ದೀಕ್ಷಾಸ್ನಾನ ಒಂಜೆ.</verse>
				<verse number="5"></verse>
				<verse number="6">ಮಾತೆರೆಗ್ ಅಮ್ಮೆ ಆದುಪ್ಪು ದೇವೆರ್ ಒರಿಯೇ. ಆಯೆ ಮಾತೆರೆ ಮಿತ್ತ್ ಉಪ್ಪುನಾಯೆಲಾ ಮಾತೆರೆಡ್ದ್ ಕಾರ್ಯ ಮಲ್ಪುನಾಯೆಲಾ ಮಾತೆರೆಡೊಪ್ಪ ಉಪ್ಪುನಾಯೆಲಾ ಆದುಲ್ಲೆ.</verse>
				<verse number="7">ಆಂಡ ಕ್ರಿಸ್ತನ ದಯೊಡ್ದಾದ್ ಆಯೆ ನಂಕ್ ಪ್ರತಿ ಒರಿಯಗ್ ಒಂಜಿ ವಿಶೇಷ ವರೊನು ಕೊರ್ತೆ.</verse>
				<verse number="8">ಅಂಚಾದೇ ಶಾಸ್ತ್ರ ಪನ್ಪುಂಡು, “ಆಯೆ ಮಿತ್ತ್ ಏರ್ದ್ ಪೋನಗ, ತಾನ್ ಜೈಸಿನ ದಿಂಜ ಸೆರೆತ್ತಾಕುಲೆಡೊಪ್ಪ ಪೋದು ತನ ಜನೊಕುಲೆಗ್ ಉಡಿಗೆರೆಲೆನ್ ಕೊರಿಯೆ.”</verse>
				<verse number="9">“ಆಯೆ ಏರ್ದ್ ಪೋತಿನಾಯೆ” ಪನ್ಪಿನಾಂಡ ಭೂಮಿದ ತಿರ್ತ್‌ಲಾ ಜತ್ತ್‌ದಿನಾಯೆಲಾ ಆದುಲ್ಲೆ ಅತ್ತಾ?</verse>
				<verse number="10">ಬೊಕ್ಕ ತಿರ್ತ್ ಜತ್ತ್‌ದ್ ಬೈದಿನಾಯೆ ಇಡೀ ಲೋಕೊನು ತಾನೇ ತನ ಬಲೊಡ್ದು ದಿಂಜಾವೆರೆಗಾದ್ ಮಾತ ಮಿತ್ತ್‌ದ ಲೋಕೊಡ್ದು ಪರಲೋಕೊಲೆಗ್ ಏರ್ದ್ ಪೋತಿನಾಯೆಲಾ ಆದುಲ್ಲೆ.</verse>
				<verse number="11">ಸಭೆಕ್ ಕ್ರಿಸ್ತೆ ಕೊರ್ತಿನ ವರೊಕ್ಲು ಉಂದೇ. ಕೆಲೆವೆರೆನ್ ಅಪೊಸ್ತಲೆರ್, ಕೆಲೆವೆರೆನ್ ಪ್ರವಾದಿಲು, ಕೆಲೆವೆರೆನ್ ಸುವಾರ್ತಿಕೆರ್, ಬೊಕ್ಕ ಕೆಲೆವೆರೆನ್ ಸಭಾಸೇವಕೆರ್ ಬೊಕ್ಕ ಕೆಲೆವೆರೆನ್ ಬೋಧಕೆರ್ ಮಲ್ತ್‌ದ್ ಕೊರಿಯೆ.</verse>
				<verse number="12">ನಮ ನಂಬಿಕೆಡ್ ಐಕ್ಯತೆ ಉಂಡಾದ್ ದೇವೆರೆ ಮಗನ ಗೇನೊಡು ವೃದ್ಧಿ ಆದ್ ನಮ ಕರ್ತವಡ್ ಬಲ ಹೊಂದುದು ಕ್ರಿಸ್ತನ ಪೂರ್ತಿ ಯೋಗ್ಯತೆಗ್ ತಕ್ಕದಕುಲಾನ ಮುಟ್ಟ ಅಕ್ಲೆ ಸೇವೆಲು ದುಂಬು ಪೋಪುಂಡು. ದಾಯೆಗಂದ್ಂಡ ದೇವಜನೊಕುಲು ದೇವೆರೆ ಸೇವೆಗ್ ತನ್ಕುಲೆನ್ ತಯಾರ್ ಮಲ್ಪೆರೆ, ಬೊಕ್ಕ ಕ್ರಿಸ್ತನ ಶರೀರ ಆದುಪ್ಪು ಸಭೆನ್ ವೃದ್ಧಿ ಮಲ್ಪೆರೆ ಅಕ್ಲೆನ್ ಕೊರಿಯೆ.</verse>
				<verse number="13"></verse>
				<verse number="14">ಅಂಚಾದ್ ಎಂಕುಲು ನನ ಮಿತ್ತ್ ಬಾಲೆಲೆಕ್ಕ ಉಪ್ಪೆರೆ ಬಲ್ಲಿ, ನರಮಾನಿ ಮೋಸೊಡು ಕಲ್ಪಾವುನ ಬೋಧನೆ, ಮೋಸಗಾರಿಕೆಡ್ ಬೂರ್ದು ಕಡಲ್ದ ಸೆರೆತ್ತ ಲೆಕ್ಕ ಅಂಚಿಂಚಿ ಮಾಲೊಂದು ಉಪ್ಪೆರೆ ಬಲ್ಲಿ.</verse>
				<verse number="15">ಐತ ಪಗತೆಗ್ ಪ್ರೀತಿಡ್ ಸತ್ಯೊನೇ ಪಾತೆರೊಂದು ಸಭೆತ ತರೆ ಆದುಪ್ಪು ಕ್ರಿಸ್ತಡ್ ಬಲಪೊಡು.</verse>
				<verse number="16">ಇಡೀ ಶರೀರ ಸರಿಯಾದ್ ಕೂಡ್ದು ಉಪ್ಪುಲೆಕ್ಕ ಮಲ್ಪುವೆ. ಪ್ರತಿಯೊಂಜಿ ಅಂಗ ತನ ಪ್ರತ್ಯೇಕ ಕೆಲಸೊನು ಮಲ್ಪುನಗ ಬೇತೆ ಅಂಗೊಲು ಬಲಪೆರೆಗ್ಲಾ ಸಹಾಯ ಆಪುಂಡು. ಅಪಗ ಇಡೀ ಶರೀರ ಸೌಖ್ಯೊಡು ಇತ್ತ್‌ದ್ ಪ್ರೀತಿಡ್ ದಿಂಜಿದ್ ಬಲತೊಂದುಪ್ಪುಂಡು.</verse>
				<verse number="17">ಅಂಚಾಯಿನೆಡ್ದ್ ಪಿದಯಿದ ಜನೊಕುಲು ನಡಪುಲೆಕ್ಕ ನಿಕುಲು ನನ ಮಿತ್ತ್ ನಡಪೆರೆ ಬಲ್ಲಿ ಅಂದ್‌ದ್ ಕರ್ತವಡ್ ಇತ್ತಿನಾಯೆ ಆದ್ ನಿಕ್ಲೆಗ್ ಕಂಡಿತಾದ್ ಪನ್ಪೆ.</verse>
				<verse number="18">ಅಕ್ಲೆ ಉಡಲ್ ಪೂರ್ತಿ ಕತ್ತಲೆಡ್ ದಿಂಜಿದುಂಡು. ಅಕ್ಲೆನ ಮನಸ್ ಬಾರಿ ಕಠಿಣ ಆದಿತ್ತಿನೆಡ್ದ್ ದೇವೆರ್ ಕೊರ್ಪಿನ ಜೀವನೊಡ್ದು ಅಕುಲು ಮಸ್ತ್ ದೂರ ಆದುಲ್ಲೆರ್.</verse>
				<verse number="19">ಅಕ್ಲೆಗ್ ವಾ ನಾಚಿಗೆಲಾ ಇಜ್ಜಿ. ತನ್ಕುಲು ಬಂಡ್‌ತನೊಕು ಒಚ್ಚಿದ್ ಕೊರ್ದು ಮಾತ ತರತ ಕೀಳ್ ಕೆಲಸೊಲೆನ್ ನಡಪಾವುನಾಕುಲಾದುಲ್ಲೆರ್.</verse>
				<verse number="20">ನಿಕುಲಾಂಡಲಾ ಕ್ರಿಸ್ತನ ಬೋಧನೆಡ್ ಅಂಚಿತ್ತಿನೆನ್ ಕಲ್ತ್‌ದಿಜರ್.</verse>
				<verse number="21">ಯೇಸುಡ ಸತ್ಯ ಉಂಡು ಅಂದ್‌ದ್ ನಿಕುಲು ಆಯ ಸಂಗತಿಡ್ ಕೇಂಡ್ದ್ ಬೋಧನೆ ಪಡೆಯರತ್ತಾ.</verse>
				<verse number="22">ಅಂಚಾಂಡ ಆಯಡ್ದ್ ಬರ್ಪಿನ ಸತ್ಯೊನು ಕಲ್ತಿನೆಡ್ದ್ ನಿಕ್ಲೆನ ದುಂಬುದ ಪಾಪದ ನಡತೆನ್ ಬುಡ್ದು ಪರ ಸ್ವಭಾವೊನು ದೆತ್ತ್ ಪಾಡ್ಲೆ. ಅವು ಮೋಸೊಡ್ದು ದಿಂಜಿದಿನ ದುರಾಶೆಲೆಡ್ದ್ ತೆಟ್ಟ್‌ದ್ ಪೋಪಿನವು.</verse>
				<verse number="23">ಐತ ಪಗತೆಗ್ ದೇವೆರಾತ್ಮೆ ನಿಕ್ಲೆ ಮನಸ್‌ನ್ ಪರಿವರ್ತನೆ ಮಲ್ಪಡ್.</verse>
				<verse number="24">ಆ ಸ್ವಭಾವ ದೇವೆರೆಗ್ ಸರಿಯಾದ್ ಉಂಡು. ಅವು ಸತ್ಯದವುಲಾ ನೀತಿದವುಲಾ ಪರಿಶುದ್ಧದವುಲಾ ಆದ್ ಉಂಡಾತ್ತ್‌ಂಡ್.</verse>
				<verse number="25">ಅಂಚಾಯಿನೆಡ್ದ್ ಸುಳ್ಳು ಪಾತೆರೊನು ಬುಡ್ದು ಪ್ರತಿ ಒರಿ ತನ ನಿರೆಕರೆತಾಕುಲೆಡ ಸತ್ಯನೇ ಪಾತೆರಡ್. ನಮ ಮಾತೆರ್ಲಾ ಒರಿಯಗ್ ಒರಿ ಅಂಗೊಲು ಆದುಲ್ಲತ್ತಾ.</verse>
				<verse number="26">ಕೋಪ ಮಲ್ಪೊಡಾಂಡಲಾ ಪಾಪ ಮಲ್ಪೊಡ್ಚಿ, ಸೂರ್ಯ ಕಂತುನೆಡ್ದ್ ದುಂಬು ಕೋಪೊನು ಮದಪುಲೆ.</verse>
				<verse number="27">ಸೈತಾನಗ್ ಅವಕಾಸ ಕೊರೊಡ್ಚಿ.</verse>
				<verse number="28">ಕಂಡೊನುನಾಯೆ ನನ ಮಿತ್ತ್ ಕಂಡೊನಂದೆ ಒಂಜಿ ಎಡ್ಡೆ ಬೇಲೆ ಬೆನಡ್. ಅಪಗ ಕಷ್ಟೊಡುಪ್ಪುನಾಕುಲೆಗ್ ಕೊರಿಯೆರೆಗ್ ಆಯಡ್ದ್ ಆಪುಂಡು.</verse>
				<verse number="29">ನಿಕ್ಲೆನ ಬಾಯಿಡ್ದ್ ವಾ ಕುರ್ತೆಲ್ ಪಾತೆರಲಾ ಬರಿಯೆರೆ ಬಲ್ಲಿ. ಭಕ್ತಿನ್ ವೃದ್ಧಿ ಮಲ್ಪುನ ಕಾಲೊಗು ಸರಿಯಾಯಿನ ಎಡ್ಡೆ ಪಾತೆರ ಇತ್ತ್ಂಡ ಕೇನುನಾಕುಲೆಗ್ ಪ್ರಯೋಜನ ಆಪಿಲೆಕ್ಕ ಪಾತೆರಡ್.</verse>
				<verse number="30">ದೇವೆರೆ ಪರಿಶುದ್ಧಾತ್ಮೊಗು ದುಃಖ ಬರ್ಪಾವೊಡ್ಚಿ. ಆಯಡ್ದೇ ಬುಡುಗಡೆದ ದಿನೊಕಾದ್ ಮುದ್ರೆ ಪಡೆವೊಂದರತ್ತಾ?</verse>
				<verse number="31">ಅಂಚಾದ್ ಮಾತ ಕೈಪೆ ಮನಸ್, ಉಗ್ರ, ಕೋಪ, ದುಷ್ಟತನ, ದೂಷಣೆ, ಮಾತ ತರತ ಹಾಳ್ ನಡತೆಲೆನ್ ಬುಡ್ದು ಬುಡ್ಲೆ.</verse>
				<verse number="32">ಒರಿಯಡ್ದ್ ಒರಿಯಗ್ ಉಪಕಾರ ಮಲ್ಪುನಾಕುಲುಲಾ ಕನಿಕರದಾಕುಲುಲಾ, ಕ್ಷಮಿಪುನಾಕುಲುಲಾ ಆದುಪ್ಪುಲೆ. ದೇವೆರ್ ನಿಕ್ಲೆನ್ ಕ್ರಿಸ್ತಡ್ ಮಾಪು ಮಲ್ತ್‌ದೆ ಅತ್ತಾ?</verse>
			</chapter>
			<chapter number="5">
				<verse number="1">ನಿಕುಲು ದೇವೆರೆನ ಪ್ರೀತಿದ ಜೋಕುಲು ಆದುಪ್ಪುನೆಡ್ದ್ ದೇವೆರೆಗ್ ಸರಿಯಾದ್ ನಡತೊನ್ಲೆ.</verse>
				<verse number="2">ಕ್ರಿಸ್ತೆ ನಮನ್ ಪ್ರೀತಿ ಮಲ್ತ್‌ದ್ ನಂಕ್ ಬೋಡಾದ್ ಕಮ್ಮೆನ ಇತ್ತಿ ಕಾಣಿಕೆ ಆದ್‌ಲಾ ಬಲಿ ಆದ್‌ಲಾ ದೇವೆರೆಗ್ ಒಚ್ಚಿದ್ ಕೊರಿಯೆ ಅತ್ತಾ. ಅಂಚೆನೇ ನಿಕುಲುಲಾ ಪ್ರೀತಿಡ್ ನಡತೊನ್ಲೆ.</verse>
				<verse number="3">ಹಾದ್ರತನ, ನೀಚತನ, ಲೋಭಿತನ ಇಂಚಿತ್ತಿನವು ನಿಕ್ಲೆ ನಡುಟು ಉಪ್ಪೆರೆ ಬಲ್ಲಿ. ದಾಯೆಗಂದ್ಂಡ ಉಂದು ಪೂರ ದೇವಜನೊಕುಲೆಗ್ ಯೋಗ್ಯದವು ಅತ್ತ್,</verse>
				<verse number="4">ಕುರ್ತೆಲ್ ಪಾತೆರೊಲು, ಹೆಡ್ಡ್‌ತನದ ಪಾತೆರೊಲು, ತಮಾಸೆದ ಪಾತೆರೊಲು, ಉಂದು ಪೂರ ದೇವಜನೊಕುಲೆಗ್ ತಕ್ಕದವು ಅತ್ತ್. ಉಂದೆತ್ತ ಪಗತೆಗ್ ದೇವೆರೆಗ್ ಉಪಕಾರ ಸ್ತುತಿ ಮಲ್ಪುನವೇ ಎಡ್ಡೆ ಆದುಂಡು.</verse>
				<verse number="5">ವಾ ಹಾದ್ರದಾಯಗಾವಡ್, ಅಶುದ್ಧದಾಯಗಾವಡ್, ಮೂರ್ತಿಪೂಜೆಗ್ ಸಮ ಆದುಪ್ಪು ಲೋಭಿಲೆಗಾವಡ್, ಮೊಕ್ಲೆಗ್ ಮಾತೆರೆಗ್ಲಾ ಕ್ರಿಸ್ತನ ಬೊಕ್ಕ ದೇವೆರೆ ರಾಜ್ಯೊಡು ಪಾಲ್‌ದಾರೆರ್ ಆಯೆರೆ ಸಾದ್ಯೆನೇ ಇಜ್ಜಿ ಅಂದ್‌ದ್ ನಿಕ್ಲೆಗ್ ತೆರಿದುಂಡು ಅತ್ತಾ?</verse>
				<verse number="6">ಪ್ರಯೋಜನಗ್ ಬರಂದಿ ಪಾತೆರೊಲೆಡ್ದ್ ಮೋಸೊಗು ಬೂರಡೆ. ದಾಯೆಗಂದ್ಂಡ ಇಂಚಿತ್ತಿ ಕಾರ್ಯೊಲೆಡ್ದ್ ದೇವೆರೆ ಕೋಪ ಪಾತೆರ ಕೇನಂದಿನಾಕುಲೆ ಮಿತ್ತ್ ಬರು.</verse>
				<verse number="7">ಅಂಚಾದ್ ಅಕ್ಲೆ ಒಟ್ಟುಗು ಕೂಡೊಡ್ಚಿ.</verse>
				<verse number="8">ನಿಕುಲು ದುಂಬು ಕತ್ತಲೆಡಿತ್ತರ್, ಆಂಡ ಇತ್ತೆ ನಿಕುಲು ಕರ್ತವಡ್ ಬೊಲ್ಪು ಆದುಲ್ಲರ್. ಬೊಲ್ಪುಡು ಉಪ್ಪುನಾಕುಲಾದ್ ನಡತೊನ್ಲೆ.</verse>
				<verse number="9">ದಾಯೆಗಂದ್ಂಡ ನಿಕ್ಲೆ ಉಲಯಿಡುಪ್ಪುನ ಈ ಬೊಲ್ಪು ಎಡ್ಡೆಂತಿನೆನ್ಲಾ ನೀತಿನ್ಲಾ, ಸತ್ಯೊನ್ಲಾ ಮಾತ್ರ ಉಂಡು ಮಲ್ಪುಂಡು.</verse>
				<verse number="10">ಕರ್ತವಗ್ ಮೆಚ್ಚಿಗೆ ಇತ್ತಿನವು ಒವ್ವು ಅಂದ್‌ದ್ ಕಲ್ತೊನ್ಲೆ.</verse>
				<verse number="11">ಕತ್ತಲೆಗ್ ಸಮ್ಮಂಧವಾಯಿನ ವಾ ಬೇಲೆಲಾ, ಪ್ರಯೋಜನೊಗು ಬರ್ಪುಜಿ. ಐಟ್ಟ್ ಪಾಲ್‌ದಾರೆರ್ ಆದುಪ್ಪಂದೆ ಅವೆನ್ ಎದುರು ಕನತ್‌ದ್ ಕಂಡಿಸಾಲೆ.</verse>
				<verse number="12">ದಾಯೆಗಂದ್ಂಡ ಆ ಜನೊಕುಲು ದೆಂಗ್‌ದ್ ಮಲ್ಪುನ ಕಾರ್ಯೊಲೆ ಬಗೆಟ್ ಪಾತೆರುನವು ನಾಚಿಗೆ ಆದುಂಡು.</verse>
				<verse number="13">ಆಂಡ ಬೊಲ್ಪುಡು ಮಾತ ಕಾರ್ಯದ ನಿಜ ಗುಣ ತೋಜಿದ್ ಬರ್ಪುಂಡು. ಐಡ್ದಾವರ ಪಡಿಕೆಂತಿನವು ಪಡಿಕೆಂತಿನವೇ ಅಂದ್‌ದ್ ತೋಜಿದ್ ಬರ್ಪುಂಡು.</verse>
				<verse number="14">ಆ ಬೊಲ್ಪುಗು ಬರ್ಪಿನವು ಮಾತಲಾ ತೋಜುಂಡು. ಐಡ್ದಾವರ, “ನಿದ್ರೆ ಮಲ್ಪುನಾಯ ಎಚ್ಚರಿಕೆ ಆಲ, ಸೈತಿನಾಕುಲೆಡ್ದ್ ಲಕ್ಕ್‌ಲ, ಕ್ರಿಸ್ತೆ ನಿಕ್ಕ್ ಬೊಲ್ಪು ಕೊರ್ಪೆ,” ಅಂದ್‌ದ್ ಪನ್ತ್ಂಡತ್ತಾ.</verse>
				<verse number="15">ಅಂಚಾದ್ ನಿಕುಲು ಬದುಕುನ ರೀತಿನ್ ಜೋಕೆಡ್ ತೂವೊನ್ಲೆ. ಬುದ್ಧಿದಾಂತಿನಾಕುಲು ಆವಂದೆ ಬುದ್ಧಿ ಇತ್ತಿನಾಕುಲಾದುಪ್ಪುಲೆ.</verse>
				<verse number="16">ದಾಯೆಗಂದ್ಂಡ ಆ ದಿನೊಕುಲು ಪಡ್ಕೆಂತಿನವು, ಅಂಚಾದ್ ತಿಕ್ಕುನ ಪ್ರತಿಯೊಂಜಿ ಗಳಿಗೆನ್ಲಾ ಎಡ್ಡೆ ರೀತಿಡ್ ಉಪಯೋಗ ಮಲ್ತೊನ್ಲೆ.</verse>
				<verse number="17">ಬುದ್ಧಿಕೆಟ್ಟಿನಾಕುಲು ಆದುಪ್ಪಂದೆ, ಕರ್ತವ ಚಿತ್ತ ಎಂಚಿನ ಅಂದ್‌ದ್ ತೆರಿಯೊಂದು ಐಕ್ ಸರಿಯಾದ್ ನಡಪುಲೆ.</verse>
				<verse number="18">ಗಂಗಸರ ಪರ್ದ್ ಅಮಲ್ ಆವೊಡ್ಚಿ. ದಾಯೆಗಂದ್ಂಡ ಅವು ಪಟಿಂಗತನೊನು ಪುಟ್ಟಾವುಂಡು. ಆಂಡ ಪರಿಶುದ್ಧಾತ್ಮಡ್ ದಿಂಜಿದಿನಾಕುಲಾದ್ ಕೀರ್ತನೆ, ರಾಗ, ಆತ್ಮಭಾವದ ಪದ ಮಲ್ತೊಂದು, ಒರಿಯಡೊರಿ ಪಾತೆರೊಂದು, ನಿಕ್ಲೆ ಉಡಲ್‌ಡ್ ಕರ್ತವಗ್ ರಾಗ ಮಲ್ತೊಂದು ಪುಗರೊಂದುಪ್ಪುಲೆ.</verse>
				<verse number="19"></verse>
				<verse number="20">ಬೊಕ್ಕ ಮಾತೆಟ್ಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ಪುದರ್‌ಡ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಪನೊಂದುಪ್ಪುಲೆ.</verse>
				<verse number="21">ಒರಿಯಗ್ ಒರಿ ತಗ್ಗೊಂದು, ಕ್ರಿಸ್ತಗ್ ಪೋಡಿಯೊಂದುಪ್ಪುಲೆ.</verse>
				<verse number="22">ಬೊಡೆದಿಯಾಡ್ಲೇ, ಕರ್ತವಗ್ ವಶ ಆದುಪ್ಪುಲೆಕ್ಕ ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.</verse>
				<verse number="23">ದಾಯೆಗಂದ್ಂಡ ಕ್ರಿಸ್ತೆ ಸಭೆಕ್ ತರೆ ಆದಿತ್ತಿಲೆಕ್ಕನೇ ಕಂಡನಿ ತನ ಬೊಡೆದಿಗ್ ತರೆ ಆದುಲ್ಲೆ. ಕ್ರಿಸ್ತೆ ತನ ಶರೀರ ಆದುಪ್ಪು ಸಭೆಕ್ ರಕ್ಷಕೆ ಆದುಲ್ಲೆ.</verse>
				<verse number="24">ಸಭೆ ಕ್ರಿಸ್ತಗ್ ಎಂಚ ವಶ ಆದುಪ್ಪುಂಡ ಅಂಚೆನೇ ನಿಕುಲು ಬೊಡೆದಿಯಾಡ್ಲು ಮಾತೆಟ್ಲಾ ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.</verse>
				<verse number="25">ಕಂಡನಿಯಾಡ್ಲೇ, ಕ್ರಿಸ್ತೆ ಸಭೆನ್ ಎಂಚ ಪ್ರೀತಿ ಮಲ್ತ್‌ದ್ ಜೀವ ಕೊರ್ದಿತ್ತೆನಾ ಅಂಚೆನೇ ಕಂಡನಿಯಾಡ್ಲು ಬೊಡೆದಿಯಾಡ್ಲೆನ್ ಪ್ರೀತಿ ಮಲ್ಪುಲೆ.</verse>
				<verse number="26">ಕ್ರಿಸ್ತೆ ಸಭೆನ್ ನೀರ್‌ಡ್ದ್ ದೆಕ್ಕಿಲೆಕ್ಕ ಪಾತೆರೊಡ್ದು ಶುದ್ಧ ಮಲ್ತ್‌ದ್ ಅರ್ಪಣೆ ಮಲ್ತೆ.</verse>
				<verse number="27">ಅವೆನ್ ಕಲಂಕ್, ನೆರಿ ಇಂಚಿತ್ತಿ ಒವುಲಾ ಇಜ್ಜಂದೆ, ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಮೈಮೆದವುಲಾ ಇತ್ತಿ ಸಭೆತ ಲೆಕ್ಕನೇ ತನ್ಕಾದ್ ಅರ್ಪಣೆ ಮಲ್ತೆ.</verse>
				<verse number="28">ಅವ್ವೇ ರೀತಿಡ್ ಕಂಡನಿ ತನ ಬೊಡೆದಿನ್ ತನ ಶರೀರ ಅಂದ್‌ದ್ ಪ್ರೀತಿ ಮಲ್ಪಡ್. ತನ ಬೊಡೆದಿನ್ ಪ್ರೀತಿ ಮಲ್ಪುನಾಯೆ ತನನ್ ತಾನೇ ಪ್ರೀತಿ ಮಲ್ತೊನುಲೆಕ್ಕ ಆಪುಂಡು.</verse>
				<verse number="29">ಏರ್ಲಾ ತನ ಸ್ವಂತ ಶರೀರೊನು ಪಗೆ ಮಲ್ಪುಜೆ, ಪ್ರತೀ ಒರಿಲಾ ತನ ಶರೀರೊನು ತಾಂಕ್‌ದ್ ಜೋಕೆ ಮಲ್ಪುವೆ. ನಮಲಾ ಕ್ರಿಸ್ತನ ಶರೀರದ ಅಂಗೊಲು ಆದುಲ್ಲ. ಅಂಚೆನೇ ಕ್ರಿಸ್ತೆ ಸಭೆನ್ ತಾಂಕ್‌ದ್ ಜೋಕೆ ಮಲ್ಪುವೆ.</verse>
				<verse number="30"></verse>
				<verse number="31">ಉಂದೆಡ್ದಾದ್, “ಒರಿ ಅಂಜೊವು ತನ ಅಪ್ಪೆಅಮ್ಮಾಡ್ಲೆನ್ ಬುಡ್ದು ತನ ಬೊಡೆದಿನ್ ಸೇರೊನ್ವೆ. ಅಕುಲು ಇರ್ವೆರ್‌ಲಾ ಒಂಜೇ ಶರೀರ ಆಪೆರ್,” ಅಂದ್‌ದ್ ಶಾಸ್ತ್ರೊಡ್ಲಾ ಪನ್ಪುಂಡು.</verse>
				<verse number="32">ಯಾನ್ ಕ್ರಿಸ್ತಗ್ಲಾ ಸಭೆಕ್ಲಾ ಇತ್ತಿನ ಸಮ್ಮಂಧದ ಬಗೆಟ್ ಪಾತೆರೊಂದುಲ್ಲೆ. ಉಂದು ಇನಿ ಮುಟ್ಟ ಬಾರೀ ಗುಟ್ಟುಡು ಇತ್ತಿನ ಗಂಭೀರ ಆದಿತ್ತಿನ ಸತ್ಯಾರ್ಥ ಆದುಂಡು.</verse>
				<verse number="33">ಅಂಚಾದ್ ನಿಕ್ಲೆಡ್ ಪ್ರತೀ ಕಂಡನಿ, ಬೊಡೆದಿನ್ ತನಲೆಕ್ಕನೇ ಪ್ರೀತಿ ಮಲ್ಪಡ್. ಅಂಚೆನೇ ಬೊಡೆದಿ ಕಂಡನಿಗ್ ಮರ್ಯಾದಿ ಕೊರಡ್.</verse>
			</chapter>
			<chapter number="6">
				<verse number="1">ಜೋಕುಲೇ, ನಿಕುಲು ಕರ್ತವಗ್ ಸೇರ್ದಿನಾಕುಲು ಆದುಪ್ಪುನೆಡ್ದ್ ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ನೀತಿ ಆದುಂಡು.</verse>
				<verse number="2">ಉಂದು ವಾಗ್ದಾನ ಇತ್ತಿನ ಸುರುತ್ತ ಅಪ್ಪಣೆ ಇಂಚ ಉಂಡು, “ನಿನ ಅಪ್ಪೆಅಮ್ಮಾಡ್ಲೆಗ್ ಸನ್ಮಾನ ಮಲ್ಪುಲ.</verse>
				<verse number="3">ಸನ್ಮಾನ ಮಲ್ತಡ ನಿಕ್ಕ್ ಮಾತಲಾ ಎಡ್ಡೆ ಆಪುಂಡು ಬೊಕ್ಕ ಈ ಭೂಮಿದ ಮಿತ್ತ್ ದಿಂಜಕಾಲ ಬದುಕುವ.”</verse>
				<verse number="4">ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆಗ್ ಕೋಪ ಲಕ್ಕಾವಂದೆ, ಕರ್ತವಡ್ದ್ ಬರ್ಪಿನ ಬೋಧನೆನ್ಲಾ ಶಿಸ್ತ್‌ನ್ಲಾ ಅಕ್ಲೆಗ್ ಕಲ್ಪಾದ್ ತಾಂಕ್ಲೆ.</verse>
				<verse number="5">ಚಾಕ್ರಿದಾಕುಲೇ, ಈ ಲೋಕದ ನಿಕ್ಲೆ ಯಜಮಾನೆರೆಗ್ ಮಾರ್ಯಾದಿಡ್ಲಾ, ಪೋಡಿಗೆಡ್ಲಾ ತಗ್ಗ್‌ಬಗ್ಗ್‌ದಿನಾಕುಲಾದ್‌ಲಾ ಉಪ್ಪುಲೆ. ಕ್ರಿಸ್ತಗ್ ಸೇವೆ ಮಲ್ಪುಲೆಕ್ಕನೇ ಅಕ್ಲೆನ ಸೇವೆನ್ ಉಡಲ್ ದಿಂಜಿದ್ ಮಲ್ಪುಲೆ.</verse>
				<verse number="6">ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕ್ರಿಸ್ತನ ಚಾಕ್ರಿದಾಕುಲಾದ್ ದೇವೆರೆನ ಚಿತ್ತೊಗು ಸರಿಯಾದ್ ಉಡಲ್ ದಿಂಜಿದ್ ಚಾಕ್ರಿ ಮಲ್ಪುಲೆ.</verse>
				<verse number="7">ನರಮಾನಿಲೆಗಾದ್ ಅತ್ತ್, ಕರ್ತವನ ಚಿತ್ತೊಗು ಸರಿಯಾದ್ ದಿಂಜಿದಿ ಉಡಲ್‌ಡ್ದ್ ಸೇವೆ ಮಲ್ಪುಲೆ.</verse>
				<verse number="8">ದಾಯೆಗಂದ್ಂಡ, ನಮ ಚಾಕ್ರಿದಾಕುಲಾಂಡಲಾ, ಯಜಮಾನೆರಾಂಡಲಾ ನಮ ಮಲ್ತಿನ ಎಡ್ಡೆ ಬೇಲೆಗಾದ್ ಕರ್ತವೆ ನಂಕ್ ಉಡಿಗೆರೆ ಕೊರ್ಪೆ ಇನ್ಪಿನೆನ್ ಮದಪಡೆ.</verse>
				<verse number="9">ಯಜಮಾನೆರೇ, ನಿಕ್ಲೆ ಚಾಕ್ರಿದಾಕುಲೆನ್ಲಾ ಅಂಚೆನೇ ತೂವೊನ್ಲೆ. ಅಕ್ಲೆನ್ ಪೋಡಿಯಾವಡೆ. ನಿಕ್ಲೆಗ್ ಇರ್ವೆರೆಗ್ಲಾ ಪರಲೋಕೊಡು ಒರಿ ಯಜಮಾನೆ ಉಲ್ಲೆ. ಆಯಡ ಯಜಮಾನೆ ಬೊಕ್ಕ ಚಾಕ್ರಿದಾಯೆ ಪನ್ಪಿನ ಪಕ್ಷಪಾತ ಇಜ್ಜಿ ಇನ್ಪಿನೆನ್ ಮದಪಡೆ.</verse>
				<verse number="10">ಕಡೆತ ಪಾತೆರ ದಾನೆಂದ್ಂಡ, ನಿಕುಲು ಕರ್ತವಡ್ಲಾ ಆಯನ ಶಕ್ತಿಡ್ಲಾ ಬಲ ಪಡೆಲೆ.</verse>
				<verse number="11">ಸೈತಾನನ ಮಾತ ತಂತ್ರೊಲೆನ್ ಎದುರಿಸಾದ್ ಗಟ್ಟಿಯಾದ್ ಉಂತೆರೆ ಆಪಿಲೆಕ್ಕ ದೇವೆರೆನ ಮಾತ ಆಯುಧೊಲೆನ್ ಪಾಡೊನ್ಲೆ.</verse>
				<verse number="12">ನಮ ಲಡಯಿ ಮಲ್ಪುನು ನರಮಾನಿಲೆಡ ಅತ್ತಂದೆ ತೋಜಂದಿನ ದುಷ್ಟ ಲೋಕದ ಅಧಿಕಾರಿಲೆ ವಿರೋಧಲಾ, ಈ ಕತ್ತಲೆದ ಲೋಕದ ಅಧಿಪತಿಲೆ ವಿರೋಧಲಾ, ಪರಲೋಕೊಲೆಡುಪ್ಪು ದುಷ್ಟ ಆತ್ಮೊಲೆ ವಿರೋಧಲಾ ಲಡಯಿ ಮಲ್ಪುನಾಕುಲು ಆದುಲ್ಲ.</verse>
				<verse number="13">ಉಂದೆಕ್ಕಾದ್ ಹಾಳ್ ದಿನೊಟು ವೈರಿಲೆನ ಎದುರು ಉಂತೆರೆ ಬೋಡಿತ್ತಿನೆನ್ ತಯಾರ್ ಮಲ್ತ್‌ದ್ ಜಯಶಾಲಿಲು ಆವೆರೆ, ದೇವೆರ್ ನಂಕ್ ಒದಗಾದಿನ ಪೂರ ಆಯುಧೊಲೆನ್ಲಾ ದೆತ್ತೊನ್ಲೆ.</verse>
				<verse number="14">ಸತ್ಯ ಇನ್ಪಿ ಸೊಂಟ ಪಟ್ಟಿನ್ ಕಟ್ಟೊಂದು, ಗಟ್ಟಿಯಾದ್ ಉಂತುಲೆ. ದೇವೆರೆ ನೀತಿ ಇನ್ಪಿ ಶರೀರದ ಕವಚೊನು ಪಾಡೊನ್ಲೆ.</verse>
				<verse number="15">ಸುವಾರ್ತೆಡ್ದ್ ಬರ್ಪಿನ ಸಮಾಧಾನ ಇನ್ಪಿ ಜೋಡುಲೆನ್ ಪಾಡೊನ್ಲೆ.</verse>
				<verse number="16">ಈ ಹಾಳ್ ದಿನೊಕುಲೆಡ್ ಈತೇ ಅತ್ತ್, ನೆಡ್ದ್ ಬೊಕ್ಕ ನಂಬಿಕೆ ಇನ್ಪಿನ ಅಡ್ಡಣೊನು ಪತ್ತೊಂದುಪ್ಪುಲೆ, ದಾಯೆಗಂದ್ಂಡ ಈ ಅಡ್ಡಣೊಡು ಸೈತಾನೆ ಕಡಪುಡುನ ತೂತ ಬಾಣೊಲೆನ್ ತೆಕ್ಕಾವೆರೆ ಸಾದ್ಯ ಆಪುಂಡು.</verse>
				<verse number="17">ಉಂದೇ ಅತ್ತ್, ರಕ್ಷಣೆ ಪನ್ಪಿನ ಟೊಪ್ಪಿ ತರೆತ ಮಿತ್ತ್ ದೀವೊನ್ಲೆ. ದೇವೆರೆ ಪಾತೆರ ಇನ್ಪಿನ ಆತ್ಮನ ಕತ್ತಿನ್ ಪತ್ತೊನ್ಲೆ.</verse>
				<verse number="18">ಮಾತ ಕಾಲೊಲೆಡ್ಲಾ ಪ್ರತಿಯೊಂಜಿ ಸಂಗತಿಗಾದ್ರಲಾ, ಆತ್ಮಡ್ ಪ್ರಾರ್ಥನೆ ಮಲ್ಪುಲೆ. ಎಚ್ಚರಿಕೆ ಆದಿತ್ತ್‌ದ್ ಮಾತ ದೇವಜನೊಕುಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ಪುನಾಕುಲು ಆದುಪ್ಪುಲೆ.</verse>
				<verse number="19">ಯಾನ್ ಬಾಯಿ ಜಪ್ಪುನಗ ಪೂರ್ವಕಾಲೊಡು ದೆಂಗ್‌ದಿತ್ತಿನ ಸುವಾರ್ತೆದ ಸತ್ಯೊನು ಧೈರ್ಯೊಡು ತೆರಿಪಾವೆರೆ ದೇವೆರ್ ಎಂಕ್ ಒದಗಾದ್ ಕೊರಡ್ ಪಂಡ್ದ್‌ಲಾ ಪ್ರಾರ್ಥನೆ ಮಲ್ಪುಲೆ.</verse>
				<verse number="20">ಯಾನ್ ಸುವಾರ್ತೆಗ್ ಬೋಡಾದ್ ರಾಯಭಾರಿ ಆದ್ ಸಂಕಲೆಡ್ ಉಪ್ಪುನಗ ಯಾನ್ ಎಂಚ ಪಾತೆರೊಡು, ಆ ದೇವೆರೆ ವಿಷಯೊನು ಧೈರ್ಯೊಡು ಎಂಚ ತೆರಿಪಾವೊಡು ಅಂದ್‌ದ್ ಪ್ರಾರ್ಥನೆ ಮಲ್ತೊಂದುಪ್ಪುಲೆ.</verse>
				<verse number="21">ಎನ ಸಂಗತಿಲೆನ್ಲಾ ಕೆಲಸ ಕಾರ್ಯೊಲೆನ್ಲಾ ನಿಕ್ಲೆಗ್ ಗೊತ್ತಾಪಿಲೆಕ್ಕ ಎನ ಪ್ರೀತಿದ ಸಹೋದ್ರೆಲಾ, ಕರ್ತವಡ್ ನಂಬಿಗಸ್ತೆ ಚಾಕ್ರಿದಾಕುಲುಲಾ ಆದುಪ್ಪು ತುಖಿಕೆ ನಿಕ್ಲೆಗ್ ಮಾತ ತೆರಿಪಾವೆ.</verse>
				<verse number="22">ನಿಕುಲು ಎಂಕುಲೆ ಸ್ಥಿತಿಗತಿನ್ ತೆರಿಯುಲೆಕ್ಕಲಾ ಆಯೆ ನಿಕ್ಲೆ ಉಡಲ್‌ನ್ ಉಮೇದ್ ಕೊರ್ಪಿಲೆಕ್ಕಲಾ ಯಾನ್ ಆಯನ್ ನಿಕ್ಲೆ ಕೈತಲ್‌ಗ್ ಕಡಪುಡ್ದೆ.</verse>
				<verse number="23">ಸಹೋದ್ರೆರೇ, ನಿಕ್ಲೆಡ್ ಸಮಾಧಾನ ಉಪ್ಪಡ್. ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಿಕ್ಲೆಗ್ ಪ್ರೀತಿನ್ಲಾ ಐತ ಒಟ್ಟುಗು ನಂಬೊಲ್ಕೆನ್ಲಾ ಕೊರಡ್.</verse>
				<verse number="24">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ್ ಏಪಲಾ ಪ್ರೀತಿ ಮಲ್ಪುನಾಕುಲೆಗ್ ಮಾತೆರೆಗ್ ದೇವೆರೆ ದಯ ಉಪ್ಪಡ್. ಆಮೆನ್.</verse>
			</chapter>
		</book>
		<book number="50">
			<chapter number="1">
				<verse number="1">ಕ್ರಿಸ ಯೇಸುನ ದಾಸೆರಾದುಪ್ಪು ಪೌಲುಲಾ ತಿಮೋಥಿಲಾ ಫಿಲಿಪ್ಪಿಡುಪ್ಪು ಕ್ರಿಸ್ತ ಯೇಸುಡು ದೇವಜನೊಕುಲೆಗ್ಲಾ ಸಭಾದ್ಯಕ್ಷೆರೆಗ್ಲಾ ಸಭಾಸೇವಕೆರೆಗ್ಲಾ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="2"></verse>
				<verse number="3">ಯಾನ್ ನಿಕ್ಲೆಗಾದ್ ದೇವೆರೆಡ ಪ್ರಾರ್ಥನೆ ಮಲ್ಪುನ ಮಾತ ಸಮಯೊಲೆಡ್ ಸಂತೋಷೊಡು ಪ್ರಾರ್ಥನೆ ಮಲ್ಪುವೆ. ದಾಯೆಗಂದ್ಂಡ ನಿಕುಲು ಸುರುಡ್ದು ಇನಿ ಮುಟ್ಟಲಾ ಸುವಾರ್ತೆ ಸಾರಿಯುನೆಟ್ಟ್ ಪಾಲ್‌ದಾರೆರಾದ್ ಉಲ್ಲರ್ ಅಂದ್‌ದ್ ಎನ ದೇವೆರೆಗ್ ಉಪಕಾರ ಮಲ್ಪುವೆ.</verse>
				<verse number="4"></verse>
				<verse number="5"></verse>
				<verse number="6">ಈ ಎಡ್ಡೆ ಬೇಲೆನ್ ನಿಕ್ಲೆಡ್ ಸುರು ಮಲ್ತ್‌ದಿನ ದೇವೆರ್ ಅವೆನ್ ದುಂಬು ಸಾಗಾದ್ ಯೇಸು ಕ್ರಿಸ್ತೆ ಬನ್ನಮುಟ್ಟ ಪೂರ್ತಿ ಮಲ್ಪುವೆ ಪನ್ಪಿ ಭರವಸ ಎಂಕ್ ಉಂಡು.</verse>
				<verse number="7">ನಿಕ್ಲೆ ಮಾತೆರೆ ಕಡೆಕ್ಕ್ ಯಾನ್ ಇಂಚ ಎನ್ನುನವು ಸರಿಯಾದುಪ್ಪುನವೇ. ಯಾನ್ ಸೆರೆಮನೆಟ್ ಉಪ್ಪುನಗ ಸುವಾರ್ತೆದ ಸತ್ಯೊನು ದೃಢವಾದ್ ಸಾರಿನಗ ನಿಕುಲು ಎನಡೊಪ್ಪ ದೇವೆರೆ ದಯೊಟು ಪಾಲ್‌ದಾರೆರ್ ಆದುಲ್ಲರಂದ್‌ದ್ ನಿಕ್ಲೆನ್ ಎನ ಉಡಲ್‌ಡ್ ದೀವೊಂಡೆ.</verse>
				<verse number="8">ಯಾನ್ ಕ್ರಿಸ್ತ ಯೇಸುಡುಪ್ಪುನ ಕನಿಕರೊಡು ನಿಕ್ಲೆನ್ ಏತೋ ಬಯಕುವೆ ಅಂದ್‌ದ್ ಉಂದೆಕ್ಕ್ ದೇವೆರೇ ಸಾಕ್ಷಿ.</verse>
				<verse number="9">ಬೊಕ್ಕ ನಿಕ್ಲೆನ ಪ್ರೀತಿ ನನಲಾ ಹೆಚ್ಚೆಚ್ಚಾದ್ ಗೇನೊಡ್ಲಾ ತಿಳುವಳಿಕೆಡ್ಲಾ ಕೂಡ್ದು ಉಪ್ಪೊಡು ಪಂಡ್ದ್‌ಲಾ ಯಾನ್ ಪ್ರಾರ್ಥನೆ ಮಲ್ಪುವೆ.</verse>
				<verse number="10">ನಿಜಾದ್ ಅವಶ್ಯ ಉಪ್ಪುನವು ದಾನೆಂದ್ಂಡ ನಿಕುಲು ಸರಿಯಾದ್ ತೆರಿಯೊಂದು, ಕ್ರಿಸ್ತೆ ಬನ್ನಮುಟ್ಟ ನಿರ್ಮಲ ಆದಿತ್ತ್‌ದ್ ವಾ ಕಪಟದಾಂತಿನಾಕುಲಾದ್ ಉಪ್ಪೊಡಂದ್‌ದೇ ಎನ ಆಸೆ.</verse>
				<verse number="11">ಯೇಸು ಕ್ರಿಸ್ತಡ್ದ್ ಆಪಿ ನೀತಿದ ಫಲ ನಿಕ್ಲೆಡ ಏಪಲಾ ದಿಂಜಿದ್ ತೋಜಿದ್ ಬರಡ್ ಪಂಡ್ದ್‌ಲಾ ದೇವೆರೆಗ್ ದಿಂಜ ಮೈಮೆಲಾ ಸ್ತುತಿಲಾ ಸಂದಾವೊಡು ಪಂಡ್ದ್‌ಲಾ ನಟ್ಟೊನ್ವೆ.</verse>
				<verse number="12">ಸಹೋದ್ರೆರೇ, ಎಂಕ್ ಮೂಲು ಆದುಪ್ಪುನವು ಮಾತಲಾ ಸುವಾರ್ತೆದ ಪ್ರಚಾರೊಗು ಸಹಾಯ ಆಂಡ್ ಅಂದ್‌ದ್ ನಿಕುಲು ತೆರಿಯೊನೊಡು ಅಂದ್‌ದ್ ಎನ ಆಸೆ.</verse>
				<verse number="13">ಎಂಚಂದ್ಂಡ ಯಾನ್ ಸೆರೆಮನೆಟ್ ಉಪ್ಪುನವು ಕ್ರಿಸ್ತಡ್ದಾವರ ಅಂದ್‌ದ್ ಇಡೀ ಅರಮನೆದ ಕಾವಲ್‌ದಾಕುಲೆಗ್ಲಾ ಅಂಚೆನೇ ಒರಿದಿನಾಕುಲೆಗ್ಲಾ ತೆರಿದ್ ಬತ್ತ್ಂಡ್.</verse>
				<verse number="14">ಬೊಕ್ಕ ಯಾನ್ ಸೆರೆಮನೆಟ್ ಉಪ್ಪುನೆಡ್ದಾದ್ ಮುಲ್ಪದ ಸಹೋದ್ರೆರೆಡ್ದ್ ಹೆಚ್ಚಿನ ವಿಶ್ವಾಸಿಲು ದೇವೆರೆ ಪಾತೆರೊನು ಪೋಡಿಗೆದಾಂತೆ ತೆರಿಪಾವೆರೆ ಧೈರ್ಯಲಾ ಭರವಸಲಾ ಮಲ್ತ್‌ದೆರ್.</verse>
				<verse number="15">ಕೆಲೆವೆರ್ ಮಚ್ಚರೊಡು ತರ್ಕೊಗಾದ್ ಬೇತೆ ಕೆಲೆವೆರ್ ಎಡ್ಡೆ ಮನಸ್‌ಡ್ದ್ ಕ್ರಿಸ್ತನ್ ಸಾರಿಯುವೆರ್.</verse>
				<verse number="16">ಮೊಕುಲಾಂಡಲಾ ಯಾನ್ ಸುವಾರ್ತೆನ್ ಒರಿಪಾವೆರೆಗಾದ್ ಯಾನ್ ಮೂಲು ಉಲ್ಲೆ ಅಂದ್‌ದ್ ತೆರಿಯೊಂದು ಪ್ರೀತಿಡ್ ಸುವಾರ್ತೆ ಸಾರಿಯುವೆರ್.</verse>
				<verse number="17">ಬೇತೆ ತರೊಟಾವಡ್ ಯಾನ್ ಸೆರೆಮನೆಟ್ ಉಪ್ಪುನಗ ಎಂಕ್ ನನಲಾ ಬೇನೆ ಆವೊಡು ಅಂದ್‌ದ್ ಎನ್ನ್‌ದ್ ಕ್ರಿಸ್ತನ್ ಯಥಾರ್ಥಾದ್ ಸಾರಿಯಂದೆ ಸ್ವಾರ್ಥದ ಉದ್ದೇಶೊಡು ಸಾರಿಯುವೆರ್.</verse>
				<verse number="18">ಆಂಡ ಅವು ಮಲ್ಲೆ ಅತ್ತ್. ವಾ ರೀತಿಡಾಂಡಲಾ ಸ್ವಾರ್ಥೊಡಾವಡ್ ಸತ್ಯೊಡಾವಡ್ ಕ್ರಿಸ್ತನ್ ಸಾರಿಯುನೆಡ್ದ್ ಯಾನ್ ಸಂತೋಷ ಮಲ್ಪುವೆ. ನನ ದುಂಬಗ್ಲಾ ಸಂತೋಷ ಮಲ್ತೊಂದೇ ಉಪ್ಪುವೆ.</verse>
				<verse number="19">ದಾಯೆಗಂದ್ಂಡ ನಿಕುಲು ಎಂಕಾದ್ ಪ್ರಾರ್ಥನೆ ಮಲ್ಪುನೆಡ್ದ್‌ಲಾ ಯೇಸು ಕ್ರಿಸ್ತನ ಆತ್ಮ ಎಂಕ್ ಸಹಾಯ ಮಲ್ಪುನೆಡ್ದ್‌ಲಾ ಉಂದು ಮಾತಲಾ ಎನ ಬುಡುಗಡೆಗಾದ್ ಕೂಡ್ದು ಬರ್ಪುಂಡು ಅಂದ್‌ದ್ ಯಾನ್ ತೆರಿದೆ.</verse>
				<verse number="20">ಯಾನ್ ವಾ ವಿಷಯೊಗಾಂಡಲಾ ನಾಚಿಗೆಗ್ ಗುರಿ ಆವಂದೆ ಏಪೊಗ್ಲಾ ಇತ್ತಿಲೆಕ್ಕ ಇದ ಮುಟ್ಟಲಾ ಧೈರ್ಯೊಡು ಉಪ್ಪುನೆಡ್ದ್. ಯಾನ್ ಬದುಕೊಂದಿತ್ತ್‌ಂಡಲಾ ಸರಿ, ಸೈತ್ಂಡಲಾ ಸರಿ ಎನ ಶರೀರೊಡ್ದು ಕ್ರಿಸ್ತಗ್ ಮೈಮೆ ಉಂಡಾವೊಡು ಅಂದ್‌ದ್ ಎಂಕ್ ಆಸೆಲಾ ಭರವಸೆಲಾ ಉಂಡು.</verse>
				<verse number="21">ಎಂಕಾಂಡಲಾ ಬದುಕುನು ಪಂಡ ಕ್ರಿಸ್ತೆನೇ, ಸೈಪಿನವು ಎಂಕ್ ಲಾಭನೇ.</verse>
				<verse number="22">ಆಂಡ ಬದುಕೊಂದಿತ್ತ್‌ಂಡ ಕ್ರಿಸ್ತಗಾದ್ ಹೆಚ್ಚ್ ಫಲ ಕೊರ್ಪಿನ ಬೇಲೆ ಮಲ್ಪುನವೇ ಅನುಕೂಲ. ಅಂಚಾಯಿನೆಡ್ದ್ ಯಾನ್ ಒವೆನ್ ಅಜತ್ ದೆಪ್ಪೊಡು ಅಂದ್‌ದ್ ಎಂಕ್ ಗೊತ್ತಾಪುಜಿ.</verse>
				<verse number="23">ಈ ರಡ್ಡೆತ್ತ ನಡುಟು ಯಾನ್ ಒದ್ದಾಡೊಂದುಲ್ಲೆ; ಯಾನ್ ಮುಲ್ತು ಪೋದು ಕ್ರಿಸ್ತಡೊಪ್ಪ ಉಪ್ಪೆರೆಗ್ ಆಸೆ ಮಲ್ಪುವೆ; ಅವು ಎಂಕ್ ಮಸ್ತ್ ಎಡ್ಡೆಂತಿನವು.</verse>
				<verse number="24">ಆಂಡ ನಿಕ್ಲೆಗಾದ್ರ ಯಾನ್ ಶರೀರೊಡು ಉಪ್ಪುನವು ಎಡ್ಡೆನೇ.</verse>
				<verse number="25">ಅಂಚಾಯಿನೆಡ್ದ್ ನಿಕ್ಲೆಗ್ ಕ್ರಿಸ್ತ ನಂಬಿಕೆಡ್ ಅಭಿವೃದ್ಧಿಲಾ ಸಂತೋಷಲಾ ಉಂಡಾಪಿಲೆಕ್ಕ ಯಾನ್ ಜೀವೊಡು ಇತ್ತ್‌ದ್ ನಿಕ್ಲೆ ಒಟ್ಟುಗು ಉಪ್ಪುವೆ ಅಂದ್‌ದ್ ಭರವಸೊಡುಲ್ಲೆ.</verse>
				<verse number="26">ಬೊಕ್ಕ ಯಾನ್ ಕುಡೊರ ನಿಕ್ಲೆ ಕೈತಲ್‌ ಬನ್ನಗ ಎನನ್ ತೂದು, ನಿಕುಲು ಕ್ರಿಸ್ತ ಯೇಸುಡು ಸಂತೋಷ ಮಲ್ಪೆರೆ ನನಲಾ ಹೆಚ್ಚಿನ ಕಾರಣ ಆಪುಂಡು.</verse>
				<verse number="27">ಎಂಚಿನಾಂಡಲಾ ನಿಕುಲು ಕ್ರಿಸ್ತನ ಸುರ್ವಾತೆಗ್ ಯೋಗ್ಯೆರಾದ್ ನಡಪುಲೆ. ಅಪಗ ಯಾನ್ ಕುಡ ನಿಕ್ಲೆ ಕೈತಲ್‌ ಬತ್ತ್‌ದ್ ನಿಕ್ಲೆನ್ ತೂಯೆಡಲಾ ಸರಿ, ದೂರೊಡ್ದು ಇತ್ತ್‌ದ್ ನಿಕ್ಲೆ ಸಂಗತಿಡ್ ಕೇಂಡಲಾ ಸರಿ, ನಿಕುಲು ನಿಕ್ಲೆ ವೈರಿಲೆಗ್ ವಾ ವಿಷಯೊಡ್ಲಾ ಪೋಡಿಯಂದೆ ಒಂಜೇ ಆತ್ಮೊಡು ದೃಢ ಉಂತುದು ಸುವಾರ್ತೆಡ್ ದೀತಿನ ನಂಬಿಕೆಗಾದ್ ಒಟ್ಟಾದ್ ಹೋರಾಟ ಮಲ್ಪುನಾಕುಲು ಆದುಲ್ಲರ್ ಅಂದ್‌ದ್ ಯಾನ್ ತೆರಿಯೊನ್ವೆ.</verse>
				<verse number="28">ನಿಕುಲು ಇಂಚ ಉಪ್ಪುನೆಡ್ದ್ ವೈರಿಲೆನ ನಾಶನೊಗ್ಲಾ ನಿಕ್ಲೆನ ರಕ್ಷಣೆಗ್ಲಾ ಒಂಜಿ ಗುರ್ತ ಆಪುಂಡು. ಅವು ದೇವೆರೆಡ್ದೇ ಬತ್ತಿನ ಗುರ್ತ ಆದುಪ್ಪುಂಡು.</verse>
				<verse number="29">ದಾಯೆಗಂದ್ಂಡ ನಿಕುಲು ಕ್ರಿಸ್ತ ಮಿತ್ತ್ ನಂಬಿಕೆ ದೀಪಿನಿ ಮಾತ್ರತ್ತಂದೆ ಆಯಗ್ ಬೋಡಾದ್ ಭಂಗ ದೆತ್ತೊನಿಯೆರೆಲಾ ನಿಕ್ಲೆಗ್ ದಯ ತಿಕ್ಕ್‌ದ್ಂಡ್.</verse>
				<verse number="30">ಎನ ಈ ಹೋರಾಟೊಲೆನ್ ನಿಕುಲು ತೂತರ್; ನನಲಾ ಯಾನ್ ಹೋರಾಟದ ನಡುಟೇ ಉಲ್ಲೆ ಅಂದ್‌ದ್ ನಿಕ್ಲೆಗ್ ತೆರಿದುಂಡು. ಆ ಹೋರಾಟ ನಿಕ್ಲೆಗ್ಲಾ ಉಂಡು.</verse>
			</chapter>
			<chapter number="2">
				<verse number="1">ಕ್ರಿಸ್ತಡ್ದ್ ಉಮೇದ್ ಉಂಡಾಪಿನಾಂಡ, ಆಯ ಪ್ರೀತಿಡ್ದ್ ಆಧರಣೆ ತಿಕ್ಕುನಾಂಡ, ಪರಿಶುದ್ಧಾತ್ಮಡ್ ಅನ್ಯಮನ್ಯ ಉಂಡಾಪಿನಾಂಡ, ನಿಕ್ಲೆ ಉಡಲ್ ಮೆದುಲಾ ಕನಿಕರದವುಲಾ ಉಪ್ಪುನಾಂಡ</verse>
				<verse number="2">ನಿಕುಲು ಒಂಜೇ ಮನಸ್‌ದಾಕುಲಾದ್, ಒಂಜೇ ಪ್ರೀತಿ ಉಪ್ಪುನಾಕುಲಾದ್ ಅನ್ಯಮನ್ಯೊಡು ಇತ್ತಿನಾಕುಲಾದ್ ಅಂಚೆನೇ ಒಂಜೇ ಅಭಿಪ್ರಾಯದಾಕುಲು ಆದಿತ್ತ್‌ದ್ ಎನ ಸಂತೋಷೊನು ಪೂರ್ತಿ ಮಲ್ಪುಲೆ.</verse>
				<verse number="3">ಸ್ವಾರ್ಥದಾಕುಲಾವಡೆ, ನನೊರಿಯನ್ ಮೆಚ್ಚಾವೆರೆ ಪೋವಡೆ, ತಗ್ಗಾವೊನ್ಲೆ, ನನೊರಿಯನ್ ತನ್ಕುಲೆಡ್ದ್ ಹೆಚ್ಚ್‌ದಾಕುಲು ಅಂದ್‌ದ್ ಎನ್ನ್‌ಲೆ.</verse>
				<verse number="4">ನಿಕ್ಲೆಡ್ ಪ್ರತಿ ಒರಿಲಾ ತನ ಎಡ್ಡೆನ್ ಮಾತ್ರ ತೂವಂದೆ ಬೊಕ್ಕೊರಿಯನ ಎಡ್ಡೆನ್ಲಾ ತೂವೊಡು.</verse>
				<verse number="5">ಕ್ರಿಸ್ತ ಯೇಸುಡು ಇತ್ತಿನಂಚಿನ ಮನಸ್ ನಿಕ್ಲೆಡ್ಲಾ ಉಪ್ಪಡ್.</verse>
				<verse number="6">ಆಯೆ ದೇವೆರೆ ರೂಪೊಡು ಉಪ್ಪುನಾಯೆ ಆದಿತ್ತ್‌ಂಡಲಾ, ದೇವೆರೆಗ್ ಸರಿ ಸಮಾನ ಆದಿತ್ತಿನ ಪಧವಿನ್ ಬುಡ್ಪುಜಿ ಪಂಡ್ದ್ ಪನಂದೆ,</verse>
				<verse number="7">ಐತ ಪಗತೆಗ್, ತನ ದೈವಿಕ ಪದೊನು ಬುಡ್ದು ಕೊರ್ದು, ದಾಸನ ರೂಪೊನು ದೆತ್ತೊಂದು ನರಮಾನಿ ಆದ್ ತೋಜಿದ್ ಬತ್ತೆ.</verse>
				<verse number="8">ಇಂಚ ಆಯೆ ನರಮಾನಿ ರೂಪೊಡು ತೋಜಿದ್ ಬತ್ತಿನಪಗ, ಆಯೆ ತನನ್ ತಗ್ಗಾವೊಂದು ಮರಣ ಮುಟ್ಟ ಪಂಡ, ಕ್ರುಸ್ಸುದ ಮರಣದ ಮುಟ್ಟ ಒಪ್ಪಿಸಾದ್ ಕೊರಿಯೆ.</verse>
				<verse number="9">ಈ ಕಾರಣೊಡ್ದು ದೇವೆರ್ ಆಯನ್ ಮಿತ್ತ್‌ದ ಮಾನಾದಿಗೆದ ಸ್ಥಾನೊಗು ಏರಾದ್, ಮಾತ ಪುದರ್‌ಡ್ದ್‌ಲಾ ಮಿತ್ತ್‌ದ ಪುದರ್‌ನ್ ಆಯಗ್ ಕೊರಿಯೆ.</verse>
				<verse number="10">ಅಂಚಾಯಿನೆಡ್ದ್ ಪರಲೋಕ, ಭೂಮಿ, ಭೂಮಿದ ತಿರ್ತ್ ಉಪ್ಪು ಮಾತೆರ್ಲಾ ಯೇಸು ಇನ್ಪಿ ಪುದರ್‌ಗ್ ಮೊರಂಪೂರ್ದು,</verse>
				<verse number="11">ಯೇಸು ಕ್ರಿಸ್ತನ್ ಕರ್ತವೆ ಅಂದ್‌ದ್ ಮಾತ ನಾಲಯಿ ಅರಿಕೆ ಮಲ್ತ್‌ದ್, ಅಮ್ಮೆ ಆದುಪ್ಪು ದೇವೆರೆಗ್ ಮೈಮೆನ್ ಸಂದಾವೆರ್.</verse>
				<verse number="12">ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಎನ ಪಾತೆರೊಲೆನ್ ಏಪಲಾ ಕೇಂಡಿಲೆಕ್ಕ ಇತ್ತೆಲಾ ಕೇನ್ಲೆ. ಯಾನ್ ನಿಕ್ಲೆಡೊಪ್ಪ ಉಪ್ಪಂದಿನಪಗಲಾ ದಿಂಜ ಪೋಡಿಗೆಡ್ ನಡುಗುನಾಕುಲಾದ್ ನಿಕ್ಲೆ ರಕ್ಷಣೆದ ಫಲೊನು ತೋಜಾವೆರೆಗ್ ಪ್ರಯತ್ನ ಮಲ್ಪುಲೆ.</verse>
				<verse number="13">ದಾಯೆಗಂದ್ಂಡ ದೇವೆರ್ ನಿಕ್ಲೆಡ್ ಬೇಲೆ ಮಲ್ತ್‌ದ್, ಆಯಗ್ ಮೆಚ್ಚಿಗೆ ಇತ್ತಿನೆನ್ ಮಲ್ಪುನ ಆಸೆನ್ ನಿಕ್ಲೆಡ್ ಪುಟ್ಟಾದ್ ಐಕ್ ಬೋಡಾಪಿ ತ್ರಾಣೊನು ಕೊರ್ಪೆ.</verse>
				<verse number="14">ಗುಣುಗುಟ್ಟಂದೆಲಾ ವಾದ ಮಲ್ಪಂದೆಲಾ ಮಾತೆನ್ ಮಲ್ಪುಲೆ.</verse>
				<verse number="15">ಅಪಗ ನಿಕುಲು ತಪ್ಪುದಾಂತಿನಾಕುಲಾದ್‌ಲಾ ಯಥಾರ್ಥ ಮನಸಿತ್ತಿನಾಕುಲಾದ್‌ಲಾ ವಂಚನೆದ ದುಷ್ಟ ಜನೊಕುಲೆ ನಡುಟು ದೇವೆರೆ ಕಲಂಕ್‌ದಾಂತಿನ ಜೋಕುಲಾಪರ್. ನಿಕುಲು ಮಾತೆರೆಗ್ಲಾ ಜೀವದ ಪಾತೆರೊಲೆನ್ ತೋಜಾದ್ ಕೊರ್ಪಿನಾಕುಲಾದ್ ಲೋಕೊಡು ಮಿಂಚುನ ಬೊಳ್ಳಿದಲೆಕ್ಕ ತೋಜಿದ್ ಬರ್ಪರತ್ತಾ. ಇಂಚ ನಿಕುಲು ನಡತರ್ಡ ಯಾನ್ ಮಲ್ತ್‌ದಿನ ಸಾದನೆಲಾ ಬೇಲೆಲಾ ಪ್ರಯತ್ನಲಾ ವ್ಯರ್ಥ ಆತಿಜಿ ಪನ್ಪಿನ ಹೆಮ್ಮೆ ಕ್ರಿಸ್ತನ ದಿನೊಟು ಎಂಕ್ ಉಂಡಾಪುಂಡು.</verse>
				<verse number="16"></verse>
				<verse number="17">ನಿಕ್ಲೆನ ನಂಬಿಕೆ ಪನ್ಪಿ ಬಲಿನ್ ದೇವೆರೆಗ್ ಅರ್ಪಣೆ ಮಲ್ಪುನ ಸೇವೆಡ್ ಯಾನೇ ನೀರ್‌ದ ಲೆಕ್ಕ ಕರಗ್‌ದ್ ಬಲಿ ಆವೊಡಾಂಡಲಾ ಎಂಕ್ ಸಂತೋಷ.</verse>
				<verse number="18">ಅಂಚೆನೇ ನಿಕುಲುಲಾ ಸಂತೋಷ ಮಲ್ತ್‌ದ್ ಎನಡೊಪ್ಪ ಸಂತೋಷ ಮಲ್ಪುಲೆ.</verse>
				<verse number="19">ಆಂಡ ಕರ್ತವೆ ಆದುಪ್ಪು ಯೇಸುನ ಚಿತ್ತ ಇತ್ತ್ಂಡ, ಯಾನ್ ನಿಕ್ಲೆ ಕೈತಲ್‌ಗ್ ತಿಮೋಥಿನ್ ಬೇಗೊಡು ಕಡಪುಡೊಡು ಅಂದ್‌ದ್ ಉಲ್ಲೆ. ಆಯಡ್ದ್ ನಿಕ್ಲೆ ಸಂಗತಿಲೆನ್ ತೆರಿದ್ ಎಂಕ್ ಸಂತೋಷ ಆವು.</verse>
				<verse number="20">ಆಯ ಲೆಕ್ಕ ಕಪಟದಾಂತೆ ನಿಕ್ಲೆ ಎಡ್ಡೆ ಕಾರ್ಯೊಲೆ ಬಗೆಟ್ ಯಥಾರ್ಥತೊಡು ಚಿಂತೆ ಮಲ್ಪುನಾಕುಲು, ಎನ ಕೈತಲ್‌ ಬೇತೆ ಏರ್ಲಾ ಇಜ್ಜೆರ್.</verse>
				<verse number="21">ಬೇತೆ ಮಾತೆರ್ಲಾ ಸ್ವಂತ ಕಾರ್ಯೊಲೆ ಮಿತ್ತ್ ಮನಸ್ ದೀಪೆರತ್ತಂದೆ, ಯೇಸು ಕ್ರಿಸ್ತನ ಕಾರ್ಯೊಲೆ ಮಿತ್ತ್ ಮನಸ್ ದೀಪುಜೆರ್.</verse>
				<verse number="22">ಆಂಡ ತಿಮೋಥಿ ಎಂಚ ನಡತ್ತ್‌ದೆ ಅಂದ್‌ದ್ ನಿಕುಲೇ ತೆರಿದರ್. ದಾಯೆಗ್ ಪಂಡ, ಮಗೆ ಅಮ್ಮೆರೆಗ್ ಎಂಚನಾ, ಅವ್ವೇ ತರೊಟು ಆಯೆ ಎನಡೊಪ್ಪ ಸುವಾರ್ತೆದ ಪ್ರಚಾರೊಗಾದ್ ಸೇವೆ ಮಲ್ತ್‌ದ್ ಯೋಗ್ಯದಾಯೆ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.</verse>
				<verse number="23">ಅಂಚಾಯಿನೆಡ್ದ್ ಎನ ಸಂಗತಿಡ್ ದಾನೆ ಆವು ಪನ್ಪಿನೆನ್ ತೆರಿ ಕೂಡ್ಲೆ, ಆಯನ್ ಕಡಪುಡಿಯೆರೆ ಬಯಕುವೆ.</verse>
				<verse number="24">ಬೊಕ್ಕ ಆಯಿನಾತ್ ಬೇಗ ಯಾನ್ಲಾ ನಿಕ್ಲೆನ್ ತೂವೆರೆ ಬರುವೆ ಪನ್ಪಿ ಭರವಸ ಕರ್ತವಡ್ ಎಂಕುಂಡು.</verse>
				<verse number="25">ಎನ ಸಹಾಯೊಗು ಬೋಡಾದ್ ನಿಕುಲು ಕಡಪುಡ್ದಿನ ಎನ ಸಹೋದ್ರೆಲಾ ಜತೆಸೇವಕೆಲಾ ಜತೆಸೈನಿಕೆಲಾ ಆಯಿ ಎಪಫ್ರೊದಿತನ್ ನಿಕ್ಲೆ ಕೈತಲ್‌ ಕಡಪುಡುನ ಅಗತ್ಯ ಉಂಡು ಅಂದ್‌ದ್ ಎನ್ನಿಯೆ.</verse>
				<verse number="26">ಆಯೆ ನಿಕ್ಲೆನ್ ತೂವೊಡು ಅಂದ್‌ದ್ ಆಸೆ ಮಲ್ಪುವೆ, ಆಂಡ ತಾನ್ ಸೌಖ್ಯದಾಂತಿನೆನ್ ನಿಕುಲು ಕೇಂಡ್ದರ್ ಅಂದ್‌ದ್ ತೆರಿದ್ ಆಯಗ್ ಬೇಜಾರ್ ಆಂಡ್.</verse>
				<verse number="27">ಆಯೆ ಸೀಕ್‌ಡ್ ಬೂರ್ದು ಸೈಯೆರಾದಿತ್ತೆ ಪನ್ಪಿನವು ನಿಜನೇ. ಆಂಡ ದೇವೆರ್ ಆಯ ಮಿತ್ತ್ ದಯ ದೀಯೆರ್. ಆಯನ್ ಮಾತ್ರತ್ತಂದೆ ಎಂಕ್ ಒಂಜೆತ್ತ ಮಿತ್ತ್ ಒಂಜಿ ದುಃಖ ಆವಂದಿಲೆಕ್ಕ ಎಂಕ್ ಕರುಣೆ ತೋಜಪಾಯೆರ್.</verse>
				<verse number="28">ಅಂಚಾಯಿನೆಡ್ದ್ ನಿಕುಲು ಆಯನ್ ತೂದು ಕುಡೊರ ಸಂತೋಷ ಆವೊಡು ಅಂದ್‌ದ್ ಬೊಕ್ಕ ಎಂಕ್‌ಲಾ ದುಃಖ ಕಡಿಮೆ ಆವೊಡು ಪಂಡ್ದ್‌ಲಾ ಆಸಕ್ತಿಡ್ ಆಯನ್ ಕಡಪುಡ್ವೆ.</verse>
				<verse number="29">ದಾಯೆಗ್ ಪಂಡ ನಿಕುಲು ಮಲ್ಪೆರೆ ಆವಂದಿ ಸತ್ಕಾರೊಡು ಕೊರತೆ ಇತ್ತಿನೆನ್ ಪೂರ್ತಿ ಮಲ್ಪೆರೆಗಾದ್ ತನ ಜೀವದ ಆಸೆನ್ ಲಕ್ಷ ಮಲ್ಪಂದೆ, ಕ್ರಿಸ್ತನ ಸೇವೆಡ್ ಸೈಪಿನ ಸ್ಥಿತಿಡಿತ್ತೆ. ಆಯನ್ ಪೂರ್ತಿ ಸಂತೋಷೊಡು ಕರ್ತವ ಪುದರ್‌ಡ್ ಸೇರಾಲೆ. ಇಂಚಿತ್ತಿನಾಕುಲೆಗ್ ತಕ್ಕದ ಮರ್ಯಾದಿನ್ ಕೊರ್ಲೆ.</verse>
				<verse number="30"></verse>
			</chapter>
			<chapter number="3">
				<verse number="1">ಕಡೇತ ಪಾತೆರ ದಾನೆಂದ್ಂಡ, ಎನ ಸಹೋದ್ರೆರೇ, ಎಂಚಿನ ಆಂಡಲಾ ಕರ್ತವಡ್ ಸಂತೋಷ ಮಲ್ಪುಲೆ. ಎಂಕ್ ಈ ಪಾತೆರೊಲೆನ್ ಕುಡ ನಿಕ್ಲೆಗ್ ಬರೆಪಿನೆಟ್ಟ್ ದಾಲಾ ಬೇಜರ್ ಇಜ್ಜಿ; ಅವು ನಿಕ್ಲೆನ್ ಜೋಕೆಡ್ ಕಾತೊಂದುಪ್ಪುಂಡು.</verse>
				<verse number="2">ಆ ನಾಯಿಲೆಡ್ದ್ ಎಚ್ಚರಿಕೆ ಆದುಪ್ಪುಲೆ. ಹಾಳ್ ಮನಸ್‌ಡ್ ಬೇಲೆ ಮಲ್ಪುನಾಕುಲೆಡ್ದ್‌ಲಾ ಎಚ್ಚರಿಕೆ ಆದುಪ್ಪುಲೆ. ಸುನ್ನತಿ ಆವೊಡು ಪನೊಂದು ಅಂಗೊನು ಕಡ್ತ್ ಪಾಡುನಾಕುಲೆಡ್ದ್‌ಲಾ ಎಚ್ಚರಿಕೆ ಆದುಪ್ಪುಲೆ.</verse>
				<verse number="3">ನಿಜವಾಯಿನ ಸುನ್ನತಿದಾಕುಲು ಏರ್ ಅಂದ್ಂಡ, ದೇವೆರಾತ್ಮೊಡ್ದು ಪ್ರೇರಣೆ ಆದ್ ಆರಾಧನೆ ಮಲ್ಪುನಾಕುಲುಲಾ ಕ್ರಿಸ್ತ ಯೇಸುಡು ಸಂತೋಷ ಮಲ್ಪುನಾಕುಲುಲಾ ಶರೀರ ಸಮ್ಮಂಧವಾದುಪ್ಪುನೆಟ್ ಭರವಸ ದೀವಂದೆ ಉಪ್ಪು ನಮನೇ.</verse>
				<verse number="4">ಯಾನಾಂಡಲಾ ಶರೀರ ಸಮ್ಮಂಧವಾಯಿನೆಟ್ ಭರವಸ ದೀಂಡಲಾ ದೀವೊಲಿ. ಬೇತೆ ಏರಾಂಡಲಾ ಶರೀರ ಸಮ್ಮಂಧವಾಯಿನೆಟ್ ಭರವಸ ದೀವೊಲಿ ಅಂದ್‌ದ್ ಆಲೋಚನೆ ಮಲ್ಪುವೆಡಲಾ ಯಾನ್ ಆಯಡ್ದ್‌ಲಾ ಹೆಚ್ಚಾದ್ ಅಂಚ ಆಲೋಚನೆ ಮಲ್ಪೆರೆ ಕಾರಣ ಉಂಡು.</verse>
				<verse number="5">ಪುಟ್ಟುದಿನ ಎನ್ಮನೆ ದಿನೊಟು ಎಂಕ್ ಸುನ್ನತಿ ಆಂಡ್. ಯಾನ್ ಇಸ್ರಾಯೇಲ್ ವಂಶದಾಯೆ. ಬೆನ್ಯಾಮೀನ್ ಗೋತ್ರೊಗು ಸೇರಿದಿನಾಯೆ. ಇಬ್ರಿಯೆರೆಡ್ದ್ ಪುಟ್ಟುದಿನ ಇಬ್ರಿಯೆ ಆದುಲ್ಲೆ. ನ್ಯಾಯಕಟ್ಟಲೆದ ಲೆಕ್ಕೊಡು ತೂಂಡ ಯಾನ್ ಪರಿಸಾಯೆ.</verse>
				<verse number="6">ಎನ ಧರ್ಮಾಭಿಮಾನ ಏತ್ ಇತ್ತ್ಂಡ್ ಪಂಡ್ಂಡ ಯಾನ್ ಕ್ರೈಸ್ತ ಸಭೆಕ್ ಮಸ್ತ್ ಭಂಗ ಕೊರಿನಾಯೆ. ನೀತಿದ ವಿಚಾರೊಡು ತೂಪುಂಡ ಯಾನ್ ನ್ಯಾಯಕಟ್ಟ್‌ಡುಪ್ಪುನೆನ್ ಸರಿಯಾದ್ ಕೈಕೊಂದು ತಪ್ಪುದಾಂತಿನಾಯೆ ಆದುಲ್ಲೆ.</verse>
				<verse number="7">ಉಂದು ಮಾತ ಲಾಭ ಅಂದ್‌ದ್ ಯಾನ್ ಒರ ಎನ್ನೊಂದಿತ್ತೆ, ಆಂಡ ಕ್ರಿಸ್ತನ ಕಾರ್ಯದ ಎದುರುಡು ಅವು ಮಾತ ನಷ್ಟ ಅಂದ್‌ದ್ ಎನ್ನುವೆ.</verse>
				<verse number="8">ಅಂದ್, ನೆಡ್ದ್ ಹೆಚ್ಚಾದ್ ಎನ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುನು ತೆರಿಯೊನುನೆತ್ತ ಮಲ್ಲ ಭಾಗ್ಯದ ಎದುರುಡು ಉಂದು ಮಾತಲಾ ವ್ಯರ್ಥ ಆದುಂಡು. ಆಯಗಾದ್ ಮಾತೆನ್ ಕಳೆವೊಂದು ಯಾನ್ ಅವೆನ್ ಕಜವು ಅಂದ್‌ದ್ ಎನ್ನ್‌ದೆ.</verse>
				<verse number="9">ಇಂಚ ಯಾನ್ ಕ್ರಿಸ್ತನ್ ಪಡೆಯೊಂದು ಆಯಡ ಒಂಜಿ ಆವೆರೆ ಆಪುಂಡು. ನ್ಯಾಯಕಟ್ಟ್ ಕೈಕೊನುನೆಡ್ದ್ ನೀತಿವಂತೆ ಆತೆ ಪನ್ಪಿನೆನ್ ಯಾನ್ ಗೆನ್ಪಂದೆ, ಇತ್ತೆ ಯಾನ್ ಕ್ರಿಸ್ತಡ್ ನಂಬಿಕೆ ದೀಪಿನೆಡ್ದೇ ನೀತಿವಂತೆ ಆತೆ ಅಂದ್‌ದ್ ನಂಬುವೆ. ದಾಯೆಗಂದ್ಂಡ ತನ ಒಟ್ಟುಗು ದೇವೆರ್ ನಮನ್ ನೀತಿವಂತೆರ್ ಮಲ್ಪುನವು ನಮ ನಂಬಿಕೆದ ಮಿತ್ತ್ ಆಧಾರ ಆದುಂಡು.</verse>
				<verse number="10">ಯೇಸು ಕ್ರಿಸ್ತನ್ ತೆರಿಯೊಂದು ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯಿನ ಮಲ್ಲ ಶಕ್ತಿನ್ ಅನುಭವ ಮಲ್ತೊಂದು, ಆಯಡೊಪ್ಪ ಶ್ರಮೆನ್ ಸೈಸೊಂದು ಆಯ ಮರಣೊಡು ಪಾಲ್‌ದಾರೆ ಆವೊಡು ಅಂದ್‌ದ್ ಆಸೆ ಮಲ್ಪುವೆ.</verse>
				<verse number="11">ಅಂಚಾಂಡ, ಸೈತಿನಾಕುಲೆಡ್ದ್ ಕುಡ ಲಕ್ಕುನ ಅನುಭವ ಆವು ಪನ್ಪಿನ ನಿರೀಕ್ಷೆ ಎಂಕುಂಡು.</verse>
				<verse number="12">ಉಂದೆತ್ತ ಅರ್ಥ ಯಾನ್ ಇತ್ತೆನೇ ಮಾತೆನ್ ಪಡೆಯೊಂಡೆ ಪಂಡ್ದಾವಡ್, ಪರಿಪೂರ್ಣತೆಗ್ ಮುಟ್ಟಿಯೆ ಪಂಡ್ದಾವಡ್ ಪನ್ಪುಜಿ. ಆಂಡ ಕ್ರಿಸ್ತ ಯೇಸು ಒಯಿಕಾದ್ ಎನನ್ ಪತ್ತಿಯೆನಾ ಅವೆನ್ ಪತ್ತೊನೊಡು ಅಂದ್‌ದ್ ಪ್ರಯತ್ನ ಮಲ್ತೊಂದುಲ್ಲೆ.</verse>
				<verse number="13">ಸಹೋದ್ರೆರೇ, ಯಾನ್ ಗಡುಕು ಕಂಡಿತಾದ್ ಮುಟ್ಟುದುಜಿ ಅಂದ್‌ದ್ ಎನ್ನುವೆ, ಆಂಡ ಯಾನ್ ಒಂಜೆನೇ ದೃಷ್ಟಿಡ್ ದೀವೊಂದೆ, ಅವು ದಾನೆ ಪಂಡ್ಂಡ, ಪಿರವುದೆನ್ ಮದತ್ ಬುಡ್ದು ಎದುರು ಇತ್ತಿನೆಕ್ಕ್ ಗಮನ ದೀದ್,</verse>
				<verse number="14">ಈ ಪಾರುನೆತ್ತ ಕಡೆ ಮುಟ್ಟೆರೆಗಾದ್ ಪ್ರಯಾಸ ಮಲ್ತೊಂದುಲ್ಲೆ; ನಮನ್ ದೇವೆರ್, ಕ್ರಿಸ್ತ ಯೇಸುಡ್ದಾದ್ ಲೆತ್ತಿನ ಆ ಪರಲೋಕದ ಉಡಿಗೆರೆನ್ ದೆತ್ತೊನೆರೆಗಾದ್ ಪಾರೊಂದುಲ್ಲೆ.</verse>
				<verse number="15">ನಮ್ಮಾಕುಲೆಡ್ ಮಾತೆರ್ಲಾ ಆತ್ಮೀಕ ರೀತಿಡ್ ಪರಿಪೂರ್ಣ ಆತಿನಾಕುಲು ಉಂದೇ ಅಭಿಪ್ರಾಯದಾಕುಲು ಆದುಪ್ಪುಗ. ಬೊಕ್ಕ ಒವ್ವಾಂಡಲಾ ಒಂಜಿ ಸಂಗತಿಡ್ ನಿಕ್ಲೆಡ್ ಬೇತೆ ಅಭಿಪ್ರಾಯದಾಕುಲು ಆದಿತ್ತೆರ್ಡ ದೇವೆರ್ ಅವೆನ್ ನಿಕ್ಲೆಗ್ ಸ್ಪಷ್ಟ ಮಲ್ತ್‌ದ್ ತೋಜಾವೆ.</verse>
				<verse number="16">ಆಂಡಲಾ, ನಮ ವಾ ಕ್ರಮೊನು ಪತ್ತೊಂದು ಇದ ಮುಟ್ಟ ಬೈದನಾ ಅವೆನೇ ಪತ್ತೊಂದು ನಡತೊನುಗ.</verse>
				<verse number="17">ಸಹೋದ್ರೆರೇ, ನಿಕುಲು ಮಾತೆರ್ಲಾ ಎನ ಪಾಡ್‌ದಾಕುಲಾದುಪ್ಪುಲೆ ಬೊಕ್ಕ ಎಂಕುಲು ನಿಕ್ಲೆಗ್ ತೋಜಾಯಿನ ಮಾದ್ರಿದ ಲೆಕ್ಕ ಏರ್ ನಡತೊನ್ವೆರಾ ಅಕ್ಲೆನ್ ಲಕ್ಷ ದೀದ್ ತೂಲೆ.</verse>
				<verse number="18">ದಾಯೆಗಂದ್ಂಡ ಮಸ್ತ್ ಜನ ಕ್ರಿಸ್ತನ ಕ್ರುಸ್ಸುದ ವೈರಿಲಾದ್ ನಡತೊಂದುಲ್ಲೆರ್. ಅಕ್ಲೆನ ಸಂಗತಿಡ್ ನಿಕ್ಲೆಗ್ ಸುರುಟ್ಟು ಮಸ್ತ್ ಸರ್ತಿ ಪನ್ತೆ. ಇತ್ತೆಲಾ ಕಣ್ಣೀರ್ ಬುಡ್ದು ಕುಡ ಪನ್ಪೆ</verse>
				<verse number="19">ನಾಶನನೇ ಅಕ್ಲೆನ ಕಡೆತ ಸ್ಥಿತಿ, ಬಂಜಿಯೇ ಅಕ್ಲೆನ ದೇವೆರ್, ನಾಚಿಗೆದ ಬೇಲೆನೇ ಅಕ್ಲೆನ ಗತ್ತ್. ಅಕುಲು ಲೋಕದ ಕಾರ್ಯೊಲೆ ಮಿತ್ತ್ ಚಿಂತೆ ಮಲ್ಪುನಾಕುಲು.</verse>
				<verse number="20">ಎಂಕುಲಾಂಡಲಾ ಪರಲೋಕ ರಾಜ್ಯದಾಕುಲು, ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಅಲ್ತ್‌ಡ್ದೇ ನಮ ರಕ್ಷಕೆ ಆದ್ ಬರ್ಪಿನೆನ್ ಕಾತೊಂದುಲ್ಲ.</verse>
				<verse number="21">ಆಯೆ ಮಾತೆನ್ಲಾ ತನ್ಕ್ ವಶ ಮಲ್ತೊನೊಡಾಪಿನ ಕಾರ್ಯೊನು ಸಾದನೆ ಮಲ್ತ್‌ದ್ ಬಲಹೀನ ಸ್ಥಿತಿಟ್ಟೆ ಉಪ್ಪುನ ನಮ ಶರೀರೊನು ಮಾರ್ಪಾಟ ಮಲ್ತ್‌ದ್ ಮೈಮೆ ಇತ್ತಿ ತನ ಶರೀರದ ಸಮರೂಪ ಆಪಿಲೆಕ್ಕ ಮಲ್ಪುವೆ.</verse>
			</chapter>
			<chapter number="4">
				<verse number="1">ಅಂಚಾಯಿನೆಡ್ದ್ ಎನ ಪ್ರೀತಿದ ಇಷ್ಟೆರಾಯಿ ಸಹೋದ್ರೆರೇ, ಎಂಕ್ ಸಂತೋಷಲಾ ಜಯಮಾಲೆಲಾ ಆದುಪ್ಪುನಾಕುಲೇ, ಯಾನ್ ಪಂಡಿಲೆಕ್ಕ ಕರ್ತವಡ್ ದೃಢವಾದ್ ಉಂತುಲೆ.</verse>
				<verse number="2">ಕರ್ತವಡ್ ಒಂಜೇ ಮನಸ್‌ದಾಕುಲು ಆದುಪ್ಪೊಡು ಅಂದ್‌ದ್ ಯುವೋದ್ಯಡಲಾ ಸಂತುಕೆಡಲಾ ನಟ್ಟೊನ್ವೆ.</verse>
				<verse number="3">ಬೊಕ್ಕ ಎನ ನಿಜ ಜತೆಗಾರಾ, ಈ ರಡ್ಡ್ ಪೊಂಜೊವುಲೆಗ್ ಸಹಾಯ ಮಲ್ಪೊಡು ಅಂದ್‌ದ್ ನಿನನ್ಲಾ ಕೇನೊನ್ವೆ. ದಾಯೆಗಂದ್ಂಡ, ಬೇತೆಕ್ಲೆಗ್ ಸುವಾರ್ತೆ ತೆರಿಪಾವುನೆಟ್ ಅಕುಲು ಎನಡೊಪ್ಪ ಎಡ್ಡೆ ಬೇಲೆ ಮಲ್ತ್‌ದೆರ್. ಅಕುಲು ಕ್ಲೆಮೆಂತುಡೊಪ್ಪಲಾ ಎನ ಬೇತೆ ಜತೆಸೇವಕೆರೆಡೊಪ್ಪಲಾ ಎನ ಒಟ್ಟುಗು ಸುವಾರ್ತೆಗಾದ್ ಕಷ್ಟ ಬೈದೆರ್. ಅಕ್ಲೆನ ಮಾತೆರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆದುಂಡು.</verse>
				<verse number="4">ಕರ್ತವಡ್ ಏಪಲಾ ಸಂತೋಷ ಮಲ್ಪುಲೆ. ಕುಡ ಪನ್ಪೆ ಸಂತೋಷ ಮಲ್ಪುಲೆ.</verse>
				<verse number="5">ನಿಕ್ಲೆ ಸಜ್ಜನಿಗೆ ಮಾತ ನರಮಾನಿಲೆಗ್ ತೋಜಿದ್ ಬರಡ್, ಕರ್ತವೆ ಬೇಗ ಬರೊಂದುಲ್ಲೆ.</verse>
				<verse number="6">ವಾ ವಿಷಯೊಡ್ಲಾ ಚಿಂತೆ ಮಲ್ಪಂದೆ, ಮಾತ ಸಂಗತಿಡ್ ದೇವೆರೆನ ದುಂಬು ಉಪಕಾರ ಸ್ತುತಿನ್ಲಾ ಪ್ರಾರ್ಥನೆ ಅರಿಕೆಲೆನ್ಲಾ ಮಲ್ತೊಂದು, ನಿಕ್ಲೆಗ್ ಬೋಡಾಪಿನೆನ್ ತೆರಿಪಾಲೆ.</verse>
				<verse number="7">ಅಪಗ ಮಾತ ಬುದ್ಧಿನ್ ಮೀರುನ ದೇವೆರೆ ಸಮಾಧಾನ ನಿಕ್ಲೆ ಉಡಲ್‌ನ್ಲಾ ನಿಕ್ಲೆ ಆಲೋಚನೆನ್ಲಾ ಕ್ರಿಸ್ತ ಯೇಸುಡು ಕಾತೊಂದುಪ್ಪುಂಡು.</verse>
				<verse number="8">ಕಡೆಕ್ಕ್ ಸಹೋದ್ರೆರೇ, ಒವು ಮಾತ ಸತ್ಯದವು ಮಾರ್ಯಾದಿದವು ನೀತಿದವು, ನಿರ್ಮಲದವು ಪ್ರೀತಿದವು ಬೊಕ್ಕ ಮಾತೆರ್ ಮೆಚ್ಚುನವು ಆದುಂಡಾ ಒವು ಎಡ್ಡೆಂತಿನ ಆದುಂಡಾ ಬೊಕ್ಕ ಪುಗರಿಕೆಗ್ ಯೋಗ್ಯದವು ಆದುಂಡಾ ಅವೆನ್ ಮಾತ ನೆನೆಪುಗು ಕನಲೆ.</verse>
				<verse number="9">ನಿಕುಲು ಎನಡ್ದ್ ಎಂಚಿನ ಕಲ್ತ್‌ದರಾ ಬೊಕ್ಕ ಒವೆನ್ ಎನಡ್ದ್ ಕೇಂಡ್ದ್ ತೂಯರಾ ಅವೆನೇ ಮಲ್ತೊಂದು ಬಲ್ಲೆ. ಇಂಚ ಮಲ್ತರ್ಡ ಸಮಾಧಾನದ ದೇವೆರ್ ನಿಕ್ಲೆಡೊಪ್ಪ ಉಪ್ಪುವೆ.</verse>
				<verse number="10">ನಿಕುಲು ಎಂಕಾದ್ ಕುಡೊರ ಚಿಂತೆ ಮಲ್ತಿನೆಕ್ಕಾದ್ ಯಾನ್ ಕರ್ತವಡ್ ಏತೊಂಜಿ ಸಂತೋಷ ಮಲ್ಪುವೆ. ಎನ ಮಿತ್ತ್ ನಿಕ್ಲೆಗ್ ನಿಜಾದ್ ಚಿಂತೆ ಉಂಡು ಅಂದ್‌ದ್ ಎಂಕ್ ಗೊತ್ತಾಂಡ್; ಆಂಡ ಅವೆನ್ ತೋಜಾವೆರೆಗ್ ನಿಕ್ಲೆಗ್ ಅವಕಾಸ ಆದಿತ್ತಿಜಿ.</verse>
				<verse number="11">ಎಂಕ್ ಕೊರತೆ ಉಂಡು ಅಂದ್‌ದ್ ಉಂದೆನ್ ಪನ್ಪುಜಿ, ಮಾತ ಪರಿಸ್ಥಿತಿಡ್ಲಾ ಯಾನ್ ತೃಪ್ತಿಡುಪ್ಪೆರೆ ಕಲ್ತೊಂದೆ.</verse>
				<verse number="12">ಬಡವೆ ಆದುಪ್ಪೆರೆಗ್ಲಾ ಸಿರಿತನತ ಸ್ಥಿತಿಟ್ಟುಪ್ಪೆರೆಗ್ಲಾ ಗೊತ್ತುಂಡು. ಯಾನ್ ತೃಪ್ತಿಡ್ ಇತ್ತ್ಂಡಲಾ ಬಡವುಡ್ ಇತ್ತ್ಂಡಲಾ ದಾರಾಳ ಇತ್ತಿನಾಯೆ ಆದಿತ್ತ್‌ಂಡಲಾ, ಗತಿದಾಂತಿನಾಯೆ ಆದಿತ್ತ್‌ಂಡಲಾ ವಾ ಸ್ಥಿತಿಟ್ಟುಪ್ಪುನಾಯೆ ಆದಿತ್ತ್‌ಂಡಲಾ ಐತ ಗುಟ್ಟು ಎಂಕ್ ತೆರಿದುಂಡು.</verse>
				<verse number="13">ಎನನ್ ಬಲ ಪಡೆಪಾವು ಕ್ರಿಸ್ತಡ್ ಎಂಕ್ ಮಾತೆನ್ಲಾ ಮಲ್ಪೆರೆ ಸಾದ್ಯ ಉಂಡು.</verse>
				<verse number="14">ಆಂಡಲಾ ಎನ ಇತ್ತೆದ ಕಷ್ಟೊಡು ನಿಕುಲು ಸಹಾಯ ಕೊರಿನವು ಎಡ್ಡೆನೇ ಆಂಡ್.</verse>
				<verse number="15">ಉಂದತ್ತಂದೆ ಫಿಲಿಪ್ಪಿದಾಕುಲೇ, ನಿಕ್ಲೆಗ್ ಸುರುಕ್ಕು ಸುವಾರ್ತೆ ಸಾರಿದ್ ಬೊಕ್ಕ ಮಕೆದೋನ್ಯೊಗು ಪೋಯಿನಪಗ ಎಂಕ್ ಕಾಸ್‌ದ ಸಹಾಯ ಕೊರಿನಾಕುಲು ಫಿಲಿಪ್ಪಿ ಸಭೆತಾಕುಲು ಮಾತ್ರ, ಬೇತೆ ವಾ ಸಭೆಲಾ ಪಾಲ್‌ದಾರೆರ್ ಆದಿತ್ತಿಜೆರ್.</verse>
				<verse number="16">ಯಾನ್ ಥೆಸ್ಸಲೋನಿಕೊಡುಪ್ಪುನಗ ನಿಕುಲು ಮಸ್ತ್ ಸರ್ತಿ ಅಗತ್ಯ ಇತ್ತಿನಪಗ ಎಂಕ್ ಸಹಾಯ ಕಡಪುಡ್ದರ್.</verse>
				<verse number="17">ನಿಕ್ಲೆಡ್ದ್ ಎಂಕ್ ಸಹಾಯ ಬೋಡಂದ್‌ದ್ ಈ ಪಾತೆರ ಪನೊಂದಿಜ್ಜಿ. ಆಂಡ ನಿಕ್ಲೆ ಲೆಖ್ಖೊಗು ಬೂರು ಉಡಿಗೆರೆ ಹೆಚ್ಚಾವೊಡು ಅಂದ್‌ದ್ ಬಯಕುವೆ. ಇತ್ತೆ ಎಂಕ್ ಬೋಡಾಪಿನಾತ್ ಎನಡ ದಾರಾಳ ಆದುಂಡು.</verse>
				<verse number="18">ಎಪಫ್ರೊದಿತನ ಕೈಟ್ ನಿಕುಲು ಕೊರ್ದು ಕಡಪುಡ್ದಿನವು ಎಂಕ್ ಬತ್ತ್‌ದ್ ಮುಟ್ಟುದುಂಡು ಅವು ಹೆಚ್ಚಿಗೆದವುಲಾ ಆದುಂಡು. ಅವು ದೇವೆರೆಗ್ ಮೆಚ್ಚಿಗೆದವುಲಾ ಕಮ್ಮೆನದವುಲಾ ಆದುಪ್ಪುನ ಇಷ್ಟ ಬಲಿನೇ ಆದುಂಡು.</verse>
				<verse number="19">ದೇವೆರ್ ಕ್ರಿಸ್ತ ಯೇಸುಡು ನಂಕ್ ಕೊರ್ತಿನ ಮೈಮೆದ ಐಶ್ವರ್ಯೊಡು ತಕ್ಕ ಇತ್ತಿ ರೀತಿಡ್ ನಿಕ್ಲೆ ಮಾತ ಅಗತ್ಯೊನು ಬೋಡಿತ್ತಿಲೆಕ್ಕ ತೀರಿಸಾವೆ.</verse>
				<verse number="20">ನಮ ಅಮ್ಮೆ ಆದುಪ್ಪು ದೇವೆರೆಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.</verse>
				<verse number="21">ಕ್ರಿಸ್ತ ಯೇಸುಗು ಸೇರ್ದಿನ ಮಾತ ದೇವಜನೊಕುಲೆಗ್ ವಂದಿಪುಲೆ. ಎನಡೊಪ್ಪ ಉಪ್ಪುನ ಸಹೋದ್ರೆರ್‌ಲಾ ನಿಕ್ಲೆಗ್ ವಂದನೆ ತೆರಿಪಾದೆರ್</verse>
				<verse number="22">ಬೊಕ್ಕ ಬೇತೆ ಮಾತ ದೇವಜನೊಕುಲು ಮುಖ್ಯಾದ್ ಚಕ್ರವರ್ತಿನ ಇಲ್ಲಗ್ ಸೇರ್ದಿನಾಕುಲೆಡ್ದ್‌ಲಾ ನಿಕ್ಲೆಗ್ ವಂದನೆಲು.</verse>
				<verse number="23">ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮಡೊಪ್ಪ ಉಪ್ಪಡ್. ಆಮೆನ್.</verse>
			</chapter>
		</book>
		<book number="51">
			<chapter number="1">
				<verse number="1">ದೇವೆರೆ ಚಿತ್ತದ ಪ್ರಕಾರ ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲುಲಾ ನಮ ಸಹೋದರೆ ತಿಮೋಥಿಲಾ ಕೊಲೊಸ್ಸಿಡುಪ್ಪು ದೇವಜನೊಕುಲೆಗ್ಲಾ ಕ್ರಿಸ್ತಡ್ ನಂಬಿಗಸ್ತೆರಾಯಿ ಸಹೋದ್ರೆರ್‌ಲೆಗ್ಲಾ ಬರೆಪಿನಿ ದಾನೆಂದ್ಂಡ, ನಮ ಅಮ್ಮೆ ಆದುಪ್ಪು ದೇವೆರೆಡ್ದ್ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="2"></verse>
				<verse number="3">ನಿಕುಲು ಕ್ರಿಸ್ತ ಯೇಸುಡು ದೀತಿನ ನಂಬಿಕೆದ ವಿಷಯೊಡ್ಲಾ ದೇವಜನೊಕುಲೆಡ್ ದೀತಿನ ಪ್ರೀತಿದ ವಿಷಯೊಡ್ಲಾ ಎಂಕುಲು ಕೇಂಡ್ದ್ ಎಂಕುಲು ಪ್ರಾರ್ಥನೆ ಮಲ್ಪುನಗ ಏಪಲಾ ನಿಕ್ಲೆನ ಸಂಗತಿಡ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಮಲ್ಪುವ.</verse>
				<verse number="4"></verse>
				<verse number="5">ಪರಲೋಕೊಡು ನಿಕ್ಲೆಗಾದ್ ತಯಾರಾತಿನ ಮಿತ್ತ್‌ದ ನಿರೀಕ್ಷೆನ್ ಸುವಾರ್ತೆದ ಸತ್ಯ ಪಾತೆರೊಡು ಸುರುಟೆ ಕೇಂಡ್ದರ್.</verse>
				<verse number="6">ನಿಕುಲು ಸತ್ಯೊಡು ದೇವೆರೆ ದಯೊನು ಕೇಂಡ್ದ್ ಅರ್ಥ ಮಲ್ತೊಂದಿನ ದಿನೊಡ್ದಿಂಚಿ, ಈ ಸುವಾರ್ತೆ ಫಲ ಕೊರ್ದು ಬುಲೆಪುಲೆಕ್ಕನೇ ಇಡೀ ಲೋಕೊಡು ದಿಂಜಿದ್ ಫಲ ಕೊರ್ದು ಬುಲೆವೊಂದುಂಡು.</verse>
				<verse number="7">ಎಂಕುಲೆ ಪ್ರೀತಿದ ಜತೆಸೇವಕೆ ಆಯಿ ಎಪಫ್ರಡ್ದ್ ನಿಕುಲು ಈ ಸತ್ಯದ ಬೋಧನೆನ್ ಕಲ್ತೊಂಡರ್. ಆಯೆ ನಿಕ್ಲೆಗಾದ್ ಕ್ರಿಸ್ತನ ನಂಬಿಗಸ್ತೆ ಸೇವಕೆ ಆದುಲ್ಲೆ.</verse>
				<verse number="8">ಪರಿಶುದ್ಧಾತ್ಮೊಡುಪ್ಪು ನಿಕ್ಲೆ ಪ್ರೀತಿದ ವಿಷಯೊನು ಎಂಕ್ ತೆರಿಪಾಯಿನಿ ಆಯೆನೇ.</verse>
				<verse number="9">ಅಂಚಾಯಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಲೆನ್ ಕೇಂಡ್ದಿನ ದಿನೊಡ್ದಿಂಚಿ ನಿಕ್ಲೆಗಾದ್ ಬುಡಂದೆ ಪ್ರಾರ್ಥನೆ ಮಲ್ತೊಂದುಲ್ಲ. ನಿಕುಲು ಮಾತ ಆತ್ಮೀಕ ಗೇನೊನ್ಲಾ ಗ್ರಹಿಕೆನ್ಲಾ ಪಡೆಯೊಂದು ದೇವೆರೆ ಚಿತ್ತದ ತಿಳುವಳಿಕೆಡ್ ದಿಂಜೊಂದು ಬರೊಡು</verse>
				<verse number="10">ಬೊಕ್ಕ ಕರ್ತವಗ್ ಮೆಚ್ಚಿಗೆಯಾದ್ ಏಪಲಾ ಯೋಗ್ಯೆರಾದ್ ನಡತ್‌ದ್ ಪ್ರತಿ ಒಂಜಿ ವಿಷಯೊಡ್ಲಾ ಸಂತೋಷ ಕೊರ್ಪಿನಕುಲಾದುಪ್ಪುಲೆ. ನಿಕ್ಲೆ ಎಡ್ಡೆ ಕೆಲಸೊಡು ಫಲ ಕೊರ್ದು ದೇವೆರೆ ಗೇನೊಡು ಬಲತೊಂದು ಪೋಲೆ.</verse>
				<verse number="11">ಬೊಕ್ಕ ಆಯನ ಮೈಮೆದ ಬಲೊಡ್ದಾದ್ ಬಲ ಪಡೆದ್, ಮಾತೆನ್ಲಾ ಸಂತೋಷೊಡ್ಲಾ ತಾಳ್ಮೆಡ್ಲಾ ಉಪ್ಪುನಾಕುಲು ಆಲೆ.</verse>
				<verse number="12">ಬೊಕ್ಕ ಬೊಲ್ಪುದ ರಾಜ್ಯೊಡು ದೇವಜನೊಕುಲೆ ಬಾಧ್ಯಸ್ತಿಗೆದ ಪಾಲ್‌ಗ್ ನಿಕ್ಲೆನ್ ತಕ್ಕದಾಕುಲಾದ್ ಮಲ್ತ್‌ದಿನ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಮಲ್ಪುನಾಕುಲು ಆದುಪ್ಪೊಡು ಅಂದ್‌ದ್ ದೇವೆರೆನ್ ನಟ್ಟೊನ್ವೆ.</verse>
				<verse number="13">ದೇವೆರ್ ನಮನ್ ಕತ್ತಲೆದ ಅಧಿಕಾರೊಡ್ದು ಬುಡ್ಪಾದ್ ತನ ಪ್ರೀತಿದ ಮಗನ ರಾಜ್ಯೊಗು ಸೇರಿಸಾಯೆ.</verse>
				<verse number="14">ಆ ಮಗಡ್ದ್ ನಮ ಪಾಪೊಲು ಪರಿಹಾರ ಆದ್ ನಂಕ್ ಬುಡುಗಡೆ ಆಂಡ್.</verse>
				<verse number="15">ಕ್ರಿಸ್ತೆ ಕಣ್ಣ್‌ಗ್ ತೋಜಂದಿ ದೇವೆರೆ ಸ್ವರೂಪ ಆದುಲ್ಲೆ, ಮಾತ ಸೃಷ್ಟಿದ ಸರ್ವಶ್ರೇಷ್ಠ ಕಡೀರ್‌ದ ಮಗನ ಸ್ಥಾನ ಪಡೆಯಿನಾಯೆ ಆದುಲ್ಲೆ.</verse>
				<verse number="16">ಪರಲೋಕ ಭೂಲೋಕೊಡುಪ್ಪು ಮಾತಲಾ ಕಣ್ಣ್‌ಗ್ ತೋಜುನವು, ತೋಜಂದಿನವು ಪಂಡ್ಂಡ ಗದ್ದಿಗೆಲಾವಡ್, ಮಲ್ಲಾದಿಗೆ ಆವಡ್, ದೊರೆತನೊಲಾವಡ್, ಅಧಿಕಾರೊಲಾವಡ್ ಆಯಡ್ದೇ ಸೃಷ್ಟಿ ಆತಿನಾದುಂಡು. ಮಾತಲಾ ಆಯಡ್ದೇ ಆಯಗಾದ್‌ಲಾ ಸೃಷ್ಟಿ ಆತಿನಾದುಂಡು.</verse>
				<verse number="17">ಆಯೆ ಮಾತೆಡ್ದ್‌ಲಾ ದುಂಬು ಇತ್ತಿನಾಯೆ, ಮಾತೆಕ್ಲಾ ಆಯೆನೇ ಆಧಾರ.</verse>
				<verse number="18">ಸಭೆ ಇನ್ಪಿ ಶರೀರೊಗು ಆಯೆ ತರೆ ಆದುಲ್ಲೆ. ತಾನ್ ಮಾತೆಟ್ಟ್ ದುಂಬುದಾಯೆ ಆಪಿಲೆಕ್ಕ ಆಯೆ ಸುರುತ್ತಾಯೆಲಾ ಸೈತಿನಾಕುಲೆಡ್ದ್ ದುಂಬತ್ತ ಲಕ್ಕ್‌ದ್ ಕಡೀರ್‌ದಾಯೆಲಾ ಮಾತೆಟ್ಲಾ ಸರ್ವಶ್ರೇಷ್ಠದಾಯೆಲಾ ಆದುಲ್ಲೆ.</verse>
				<verse number="19">ದಾಯೆಗಂದ್ಂಡ ದೇವೆರ್ ಆಯಡ್ ತನ ಪರಿಪೂರ್ಣತೆಡ್ ವಾಸ ಮಲ್ಪೆರೆ ಇಷ್ಟ ಮಲ್ತೊಂಡೆ.</verse>
				<verse number="20">ಬೊಕ್ಕ ಆಯನ ಕ್ರುಸ್ಸುಡ್ ಗುತ್ತುದಿನ ನೆತ್ತೆರ್‌ಡ್ದ್ ಸಮಾಧಾನ ಉಂಡು ಮಲ್ತ್‌ದ್ ಪರಲೋಕೊಡ್ಲಾ ಭೂಲೋಕೊಡ್ಲಾ ಉಪ್ಪುನ ಮಾತಲಾ ತನ ಮಗಡ್ದ್ ರಾಜಿ ಆವೊಡು ಅಂದ್‌ದ್ ದೇವೆರೆನ ಚಿತ್ತ ಆದಿತ್ತ್ಂಡ್.</verse>
				<verse number="21">ಉಂದತ್ತಂದೆ ನಿಕುಲು ಒಂಜಿ ಕಾಲೊಡು ಪಿದಯಿದ ಜನೊಕುಲುಲಾ ಹಾಳ್ ಬೇಲೆ ಮಲ್ಪುನಾಕುಲಾದ್ ಪಗೆತ ಮನಸ್‌ದಾಕುಲು ಆದಿತ್ತರ್.</verse>
				<verse number="22">ಆಂಡ ಇತ್ತೆ ದೇವೆರ್ ತನ ಮಗನ ಶರೀರದ ಮರಣೊಡ್ದಾದ್ ನಿಕ್ಲೆನ್ ತನಡೊಪ್ಪ ರಾಜಿ ಮಲ್ತೊಂಡೆ. ಉಂದೆಡ್ದಾದ್ ಆಯೆ ನಿಕ್ಲೆನ್ ತನ ಕೈತಲ್‌ ಕನತ್‌ದ್ ಆಯನ ಸನ್ನಿಧಾನೊಡು ಪರಿಶುದ್ಧೆರ್ಲಾ ದೋಷದಾಂತಿನಾಕುಲುಲಾ ಕುಂದೆಲ್‌ದಾಂತೆಲಾ ಆದ್ ಉಂತುದರ್.</verse>
				<verse number="23">ಆಂಡ ನಿಕುಲು ಬಾನದ ತಿರ್ತ್ ಉಪ್ಪು ಮಾತ ಸೃಷ್ಟಿಗ್ ಸಾರಿನ ಸುವಾರ್ತೆಡ್ದ್ ಉಂಡಾಯಿನ ಭರವಸೆನ್ ಬುಡ್ದು ಪೋವಂದೆ ಪಾಡ್ದಿ ಪಂಚಾಂಗದ ಮಿತ್ತ್ ಸ್ಥಿರಾದಿತ್ತ್‌ದ್ ನಂಬಿಕೆಡ್ ನಿಲೆ ಆದಿತ್ತರ್ಡ ಆ ಸ್ಥಾನ ನಿಕ್ಲೆಗ್ ಒದಗ್‌ದ್ ಬರ್ಪುಂಡು. ಪೌಲು ಇನ್ಪಿ ಯಾನ್ ಸುವಾರ್ತೆದ ಸೇವಕೆ ಆದುಲ್ಲೆ.</verse>
				<verse number="24">ಯಾನ್ ಇತ್ತೆ ನಿಕ್ಲೆಗಾದ್ ಅನುಭವ ಮಲ್ತಿ ಭಂಗೊಲೆಡ್ ಸಂತೋಷ ಪಡೆಯೊಂದುಲ್ಲೆ. ಕ್ರಿಸ್ತನ ಭಂಗೊಲೆಡ್ ಬಾಕಿ ಒರಿದಿನೆನ್ ಸಭೆ ಇನ್ಪಿ ಆಯನ ಶರೀರೊಗಾದ್ ಎನ ಶರೀರೊಡು ಅನುಭವ ಮಲ್ತ್‌ದ್ ತೀರಿಸಾವೆ.</verse>
				<verse number="25">ಯಾನ್ ಸಭಾಸೇವಕೆ ಆಯೆ; ದೇವೆರೆ ಪಾತೆರೊನು ಪೂರ್ತಿ ಆದ್ ತೆರಿಪಾವು ಕೆಲಸೊನು ನಿಕ್ಲೆನ ಪ್ರಯೋಜನೊಗಾದ್ ಎಂಕ್ ಒದಗಾಯೆ.</verse>
				<verse number="26">ಈ ಪಾತೆರ ಯುಗಯುಗೊಡ್ದು ತರೆತರೆಡ್ದಿಂಚಿ ದೆಂಗ್‌ದಿತ್ತ್‌ಂಡ್. ಅವು ಇತ್ತೆದ ಕಾಲೊಲೆಡ್ ಪರಿಶುದ್ಧ ದೇವಜನೊಕುಲೆಗ್ ತೋಜಿದ್ ಬತ್ತ್ಂಡ್.</verse>
				<verse number="27">ದಾಯೆಗಂದ್ಂಡ ಕ್ರಿಸ್ತನ ಮೈಮೆಲಾ ಐಶ್ವರ್ಯಲಾ ಪಿದಯಿದ ಜನೊಕುಲೆಗ್ಲಾ ಉಂಡು ಇನ್ಪಿನೆನ್ ಅಕುಲುಲಾ ತೆರಿಯೊನೊಡು ಅಂದ್‌ದ್ ದೇವೆರ್ ಬಯಕಿಯೆ. ಈ ಮರ್ಮ ದಾನೆಂದ್ಂಡ ಕ್ರಿಸ್ತೆ ನಿಕ್ಲೆಡೊಪ್ಪ ಇತ್ತ್‌ದ್ ಮೈಮೆದ ನಿರೀಕ್ಷೆಗ್ ಉಪ್ಪುನವೇ.</verse>
				<verse number="28">ಆಯನ್ ಎಂಕುಲು ಸಾರಿಯುನಾಕುಲಾದ್ ಮಾತೆರೆಗ್ಲಾ ಬುದ್ಧಿದ ಪಾತೆರ ಪನೊಂದು ಮಾತೆರೆಗ್ಲಾ ಪೂರ್ತಿ ಗೇನದ ಬೋಧನೆ ಮಲ್ತೊಂದು ದೇವೆರೆ ದುಂಬು ಮಾತೆರೆನ್ಲಾ ಕ್ರಿಸ್ತನ ತಿಳುವಳಿಕೆಡ್ ಪೂರ್ತಿ ಆದ್ ಉಂತಾವೆರೆ ಪ್ರಯತ್ನ ಮಲ್ತೊಂದುಲ್ಲ.</verse>
				<verse number="29">ಎನಡ್ ಕಾರ್ಯ ಮಲ್ಪುನ ದೇವೆರೆ ಬಲೊನು ಉಪಯೋಗ ಮಲ್ತೊಂದು ಐಕಾದೇ ಉರ್ಡೊಂದು ಕಷ್ಟ ಬರೊಂದುಲ್ಲೆ.</verse>
			</chapter>
			<chapter number="2">
				<verse number="1">ನಿಕ್ಲೆಗಾದ್‌ಲಾ ಲವೊದಿಕೀಯದ ಸಭೆಕಾದ್‌ಲಾ ಎನನ್ ಕಣ್ಣಾರೆ ತೂವಂದಿನಾಕುಲೆಗಾದ್‌ಲಾ ಏತೊಂಜಿ ಉರ್ಡಾಟ ಮಲ್ತೊಂದುಲ್ಲೆ ಇನ್ಪಿನೆನ್ ನಿಕುಲು ತೆರಿಯೊಡು ಅಂದ್‌ದ್ ಯಾನ್ ಆಸೆ ಮಲ್ಪುವೆ.</verse>
				<verse number="2">ದಾಯೆಗಂದ್ಂಡ, ನಿಕುಲು ಮಾತೆರ್ಲಾ ಪ್ರೀತಿಡ್ ಒಂಜಾದಿತ್ತ್‌ದ್ ಬುದ್ಧಿಡ್ ದಿಂಜಿದ್ ನಿಚ್ಚಯ ಇನ್ಪಿನ ಭಾಗ್ಯೊನು ಪಡೆವೊಂದು ದೇವೆರ್ ತೋಜಾದ್ ಕೊರಿ ಗುಟ್ಟುನು ಅಂದ್ಂಡ, ತನಡೇ ಬುದ್ಧಿಗ್ಲಾ ಗೇನೊಗ್ಲಾ ಸಮ್ಮಂಧವಾಯಿನ ಸಂಪೊತ್ತು ಮಾತೆನ್ಲಾ ಪಡೆಯೊಂದಿ ಕ್ರಿಸ್ತನ್ ತೆರಿಯೊಂಡಿನೆಕ್ಕಾದ್ ಉಡಲ್‌ಡ್ ಸ್ಥಿರ ಆದ್ ಉಪ್ಪೊಡಿನ್ಪಿನ ಉತ್ತೇಜನ ಎಂಕುಂಡು.</verse>
				<verse number="3"></verse>
				<verse number="4">ಏರಾಂಡಲಾ ಚಕ್ಕಂದ ಪಾತೆರೊಲೆಡ್ದ್ ನಿಕ್ಲೆನ್ ಮೋಸೊಗು ಪಾಡ್ವೆರ್ ಪನ್ಪಿನ ಪೋಡಿಗೆ ಎಂಕುಪ್ಪುನೆಡ್ದ್ ಉಂದೆನ್ ಪನೊಂದುಲ್ಲೆ.</verse>
				<verse number="5">ಯಾನ್ ಶರೀರೊಡು ನಿಕ್ಲೆಡೊಪ್ಪ ಇಜ್ಜಿಡಲಾ ಆತ್ಮೊಡು ನಿಕ್ಲೆಡೊಪ್ಪನೇ ಉಲ್ಲೆ. ನಿಕುಲು ಕ್ರಮೊಟು ನಡಪುನೆನ್ಲಾ ಕ್ರಿಸ್ತ ನಂಬಿಕೆಡ್ ಸ್ಥಿರಾದ್ ಉಂತುನೆನ್ಲಾ ತೂದು ಸಂತೋಷ ಪಡೆಪೆ.</verse>
				<verse number="6">ಅಂಚಾಯಿನೆಡ್ದ್ ಕ್ರಿಸ್ತ ಯೇಸುನು ನಿಕ್ಲೆ ಕರ್ತವೆ ಅಂದ್‌ದ್ ಸ್ವೀಕಾರ ಮಲ್ತಿ ಲೆಕ್ಕನೇ, ಆಯಡೊಪ್ಪ ಬದುಕೊಂದುಪ್ಪುಲೆ.</verse>
				<verse number="7">ಆಯಡ್ ಬದುಕೊಂದಿತ್ತ್‌ದ್ ಭಕ್ತಿಡ್ ಅಭಿವೃದ್ಧಿ ಆದ್ ನಿಕ್ಲೆಗ್ ಕಲ್ಪಾದಿನ ಬೋಧನೆಗ್ ಸರಿಯಾದ್ ಕ್ರಿಸ್ತ ನಂಬಿಕೆಡ್ ದೃಢ ಆದ್ ದೇವೆರೆಗ್ ಹೆಚ್ಚಾದ್ ಉಪಕಾರ ಸ್ತುತಿ ಮಲ್ಪುನಾಕುಲು ಆದುಪ್ಪುಲೆ.</verse>
				<verse number="8">ಕ್ರಿಸ್ತ ಬೆರಿಯೆ ಪೋವಂದೆ ನರಮಾನಿಲೆ ಆಚಾರ ವಿಚಾರೊನ್ಲಾ ಈ ಲೋಕದ ಬಾಲ ಬೋಧನೆನ್ ಕೈಕೊನುನಾಕುಲು ನಿಕ್ಲೆನ ನಡುಕು ಬತ್ತ್‌ದ್ ಮೋಸೊಡು ದಿಂಜಾದ್ ಅಗತ್ಯದಾಂತಿನ ತತ್ವಜ್ಙಾನ ಬೋಧನೆಡ್ದ್ ಮನಸ್‌ನ್ ತೆಟ್ಟಾದ್ ನಿಕ್ಲೆನ್ ವಶೀಕರಣ ಮಲ್ತೊನ್ವೆರ್, ಜಾಗ್ರತೆ ಆದುಪ್ಪುಲೆ.</verse>
				<verse number="9">ದಾಯೆಗಂದ್ಂಡ ದೇವೆರೆ ಸದ್ಗುಣೊಲು ಕ್ರಿಸ್ತನ ಶರೀರೊಡೇ ನಿಲೆ ಆದುಂಡು.</verse>
				<verse number="10">ಬೊಕ್ಕ ನಿಕ್ಲೆನ ಜೀವನ ಕ್ರಿಸ್ತಡ್ ಒಂಜಾದುಪ್ಪುನೆಡ್ದ್ ಪರಿಪೂರ್ಣ ಆದುಲ್ಲರ್. ದಾಯೆಗಂದ್ಂಡ ಕ್ರಿಸ್ತೆ ಮಾತ ಅಧಿಕಾರೊಗ್ಲಾ ಅಧಿಪತಿಲೆಗ್ಲಾ ತರೆ ಆದುಲ್ಲೆ.</verse>
				<verse number="11">ನಿಕುಲು ಆಯಡ್ದೇ ಸುನ್ನತಿ ಪಡೆತರ್ ಈ ಸುನ್ನತಿ ಕೈಡ್ದ್ ಮಲ್ತ್‌ದಿನ ಅತ್ತ್ ಉಂದು ಶರೀರಭಾವೊನು ಬುಡ್ದು ಬುಡ್ಪಿನವೇ ಉಂದೇ ಕ್ರಿಸ್ತಡ್ದ್ ಆತಿನ ಸುನ್ನತಿ.</verse>
				<verse number="12">ಅವತ್ತಂದೆ ನಿಕುಲು ದೀಕ್ಷಾಸ್ನಾನೊಡು ಕ್ರಿಸ್ತಡೊಪ್ಪ ಕೌಂತುದಿನಾಕುಲು ಆಯಿನೆಡ್ದ್ ಆ ಸುನ್ನತಿನ್ ಪಡೆಯರ್. ಉಂದತ್ತಂದೆ ಆಯನ್ ಸೈತಿನಾಕುಲೆಡ್ದ್ ಲಕ್ಕಾದಿನ ದೇವೆರೆ ಬಲೊಟು ನಿಕುಲು ನಂಬಿಕೆ ದೀಯಿನೆಡ್ದ್ ಕ್ರಿಸ್ತನ ಒಟ್ಟುಗು ಕುಡ ಲಕ್ಕ್‌ದ್ ಬೈದರ್.</verse>
				<verse number="13">ಅಪರಾಧೊನು ಮಲ್ಪುನೆಡ್ದ್‌ಲಾ ಅಂಚೆನೆ ಸುನ್ನತಿದಾಂತಿ ಶರೀರಬಾವೊಡ್ದುಲಾ ಸೈತಿನಾಕುಲಾದಿತ್ತಿ ನಿಕ್ಲೆನ್ಲಾ ದೇವೆರ್ ಕ್ರಿಸ್ತಡೊಪ್ಪ ಬದ್‌ಕಾಯೆ. ಆಯೆ ನಮ ಮಾತ ಅಪರಾಧೊಲೆನ್ ಮಾಪು ಮಲ್ತ್‌ದ್ ನಮ ಮಿತ್ತ್ ಇತ್ತಿನ ದೂರು ಪಾಡುನ ಬೊಕ್ಕ ನಂಕ್ ವಿರೋಧ ಆದುಪ್ಪು ನಿಯಮೊಲು ಇನ್ಪಿ ಕಾನೂನು ಪತ್ರೊನು ರದ್ದ್ ಮಲ್ತ್‌ದ್ ಅವೆನ್ ಕ್ರುಸ್ಸುಗು ಪಾಡ್ದ್ ದಾಂತಿಲೆಕ್ಕ ಮಲ್ತೆ.</verse>
				<verse number="14"></verse>
				<verse number="15">ಆಯೆ ಮಾತ ದೊರೆತನೊನ್ಲಾ ಅಧಿಕಾರೊಲೆನ್ಲಾ ಬಲ ಇಜ್ಜಂದಿಲೆಕ್ಕ ಮಲ್ತ್‌ದ್ ಜಯತ ಉತ್ಸಾಹ ಮಲ್ಪುಲೆಕ್ಕನೇ ಮಾತೆನ್ಲಾ ತನ ಕ್ರುಸ್ಸುದ ಮಿತ್ತ್ ಅವೆನ್ ಗೆಂದಿನಾಯೆ ಆದ್ ಮೆರೆವೊಂದು ತೋಜಾಯೆ.</verse>
				<verse number="16">ಅಂಚಾದ್ ತಿನ್ಪಿನ, ಪರ್ಪಿನ ಸಂಗತಿಗಾವಡ್, ಅತ್ತ್‌ಡ ಪರ್ಬ, ಅಮಾಸೆ, ಅಂಚೆನೆ ಸಬ್ಬತ್ತ್‌ನ್ ಆಚರಣೆ ಮಲ್ಪಂದಿನೆಕ್ಕಾವಡ್ ಏರ್ಲಾ ನಿಕ್ಲೆನ್ ತೀರ್ಪು ಮಲ್ಪಂದಿಲೆಕ್ಕ ತೂವೊನ್ಲೆ.</verse>
				<verse number="17">ಉಂದು ಮಾತ ನನ ದುಂಬಗ್ ಬರಿಯೆರೆ ಉಪ್ಪುನ ಕಾರ್ಯೊಲೆ ನಿರೆಲ್ ಆದುಂಡು. ಉಂದೆತ್ತ ನಿಜ ಸ್ವರೂಪ ಕ್ರಿಸ್ತೆನೇ!</verse>
				<verse number="18">ಕೆಲೆವೆರ್ ತೀರಾ ತಗ್ಗಾವೊನ್ನೆಟ್ಲಾ ದೂತೆರೆ ಪೂಜೆ ಮಲ್ತ್‌ದ್ ತನ್ಕುಲೆಗ್ ದರ್ಶನ ಆತ್ಂಡ್ ಅಂದ್‌ದ್ ಪುಗರೊನ್ವೆರ್ ಬೊಕ್ಕ ಲೌಕೀಕ ಬುದ್ಧಿಡ್ ಆಧಾರದಾಂತೆ ಸೊರ್ಕುದು ಪೋತೆರ್.</verse>
				<verse number="19">ಆಂಡ ಕ್ರಿಸ್ತೆ ಇನ್ಪಿ ತರೆತ ಸಮ್ಮಂಧೊನು ಬುಡ್ದು ಬುಡ್ತೆರ್. ಇಂಚಿತ್ತಿನಾಕುಲು ನಿಕ್ಲೆಗ್ ಬತ್ತಿ ಪುದರ್‌ನ್ ದೆತ್ತ್ ಪಾಡ್ಯೆರೆ ಇಂಬು ಕೊರಡೆ. ಆ ತರೆಡ್ದೆ ಇಡೀ ಶರೀರಲಾ ಸಂದ್‌ದ ನರಂಬುಲೆಡ್ದ್ ಬೋಡಾಯಿನ ಸಹಾಯೊನು ಪಡೆವೊಂದು ದೇವೆರ್ ಕೊರ್ಪಿನ ಸತ್ವೊಡ್ದು ಅವು ಬಳಪುಂಡು.</verse>
				<verse number="20">ಲೌಕಿಕತ್ವದ ಬಾಲ ಬೋಧನೆದ ಮಟ್ಟ್‌ಗ್ ನಿಕುಲು ಕ್ರಿಸ್ತ ಒಟ್ಟುಗು ಸೈತಿನೆಡ್ದ್ ನನಲಾ ಲೋಕೊಡು ಬದುಕುನಾಕುಲೆಲೆಕ್ಕನೆ ನರಮಾನಿಲೆ ಆಜ್ಞೆಲೆಗ್ಲಾ ಬೋಧನೆಗ್ಲಾ ಒಳಗಾದುಲ್ಲರ್.</verse>
				<verse number="21">ಉಂದೆನ್ ಮುಟ್ಟೊಡ್ಚಿ, ಐತ ರುಚಿ ತೂವೊಡ್ಚಿ</verse>
				<verse number="22">ಬೊಕ್ಕೊಂಜೆನ್ ಮುಟ್ಟೊಡ್ಚಿ ಇನ್ಪಿನ ಕಟ್ಟ್‌ಪಾಡ್‌ಲೆಗ್ ನಿಕುಲು ದಾಯೆಗ್ ಸೇರೊಂದುಲ್ಲರ್? ಅವು ಮಾತ ವಸ್ತುಲ್ಲಾ ಉಪಯೋಗ ಮಲ್ಪುನಗನೇ ನಾಶ ಆದ್ ಪೋಪುಂಡು.</verse>
				<verse number="23">ಇಂಚಿನ ಬೋಧನೆಲು ಸ್ವಂತ ಕಲ್ಪನೆದ ಆಚಾರೊಲೆನ್ಲಾ, ವಿಪರೀತ ತಗ್ಗ್‌ತನೊನ್ಲಾ, ಶರೀರದ ದಂಡನೆನ್ಲಾ ಪಂಡೊಂದು ಪುದರ್‌ಗ್ ಮಾತ್ರನೇ ಗೇನ ಅಂದ್‌ದ್ ಪನ್ಪಾವೊಂದು, ಐಡ್ದ್ ಶರೀರದ ಇಚ್ಚೆಲೆನ್ ದೆತ್ತ್‌ದ್ ಪಾಡಿಯೆರೆ ವಾ ಒಂಜಿ ಪ್ರಯೋಜನೊಗ್ಲಾ ಬರ್ಪಿನವು ಅತ್ತ್.</verse>
			</chapter>
			<chapter number="3">
				<verse number="1">ನಿಕುಲು ಕ್ರಿಸ್ತಡ್ ಲಕ್ಕಾದಿನಾಕುಲಾದ್ ಉಪ್ಪುನೆಡ್ದ್, ನಿಕುಲು ಮಿತ್ತ್‌ದ ಸಂಗತಿಲೆಡ್ ಮನಸ್ ದೀಲೆ. ಅವುಲು ಕ್ರಿಸ್ತೆ ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಲ್ಲೆ.</verse>
				<verse number="2">ಪರಲೋಕದ ಸಂಗತಿಲೆಡ್ ಮನಸ್ ದೀಲೆ. ಲೋಕದ ಸಂಗತಿಲೆಡ್ ಅತ್ತ್.</verse>
				<verse number="3">ದಾಯೆಗಂದ್ಂಡ ನಿಕುಲು ಸೈತ್‌ದರ್. ಬೊಕ್ಕ ನಿಕ್ಲೆನ ಪೊಸ ಜೀವನ ಕ್ರಿಸ್ತಡೊಪ್ಪ ದೇವೆರೆಡ್ ಮದೆ ಆದುಂಡು.</verse>
				<verse number="4">ನಂಕ್ ಜೀವಾದುಪ್ಪು ಕ್ರಿಸ್ತೆ ತೋಜಿದ್ ಬನ್ನಗ ನಿಕುಲುಲಾ ಆಯ ಒಟ್ಟುಗು ಆಯನ ಮೈಮೆಡ್ ದಿಂಜಿದಿನಾಕುಲಾದ್ ತೋಜಿದ್ ಬರ್ಪರ್.</verse>
				<verse number="5">ಅಂಚಾಯಿನೆಡ್ದ್ ನಿಕ್ಲೆ ಉಡಲ್‌ಡುಪ್ಪು ಲೌಕೀಕ ಆಸೆಲೆನ್ ಕೆರ್ದ್ ಪಾಡ್ಲೆ. ಹಾದ್ರೊನು, ಬಂಡ್‌ತನೊನು, ಕಾಮೊನು, ಹಾಳ್ ಆಸೆನ್ ಬೊಕ್ಕ ಮೂರ್ತಿಪೂಜೆಗ್ ಸಮಾನಾದುಪ್ಪು ಕಾಸ್‌ದ ಆಸೆನ್ ಮಾತೆನ್ಲಾ ದೆತ್ತ್‌ದ್ ಪಾಡ್ಲೆ.</verse>
				<verse number="6">ಉಂದೆಡ್ದಾದ್ ದೇವೆರೆ ಕೋಪ ನಂಬಂದಿನಾಕುಲೆ ಮಿತ್ತ್ ಬರ್ಪುಂಡು.</verse>
				<verse number="7">ಸುರುಟ್ಟು ನಿಕುಲುಲಾ ಈ ಹಾಳ್ ಸ್ವಭಾವೊಡು ಬದುಕೊಂದುಪ್ಪುನಗ ಅಂಚಿನ ಕೆಲಸೊಲೆನ್ ಮಲ್ತೊಂದಿತ್ತರ್.</verse>
				<verse number="8">ಆಂಡ ಇತ್ತೆ ಉಗ್ರ, ಕೋಪ, ದುಷ್ಟತನ, ದೂಷಣೆ, ನಿಕ್ಲೆ ಬಾಯಿಡ್ದ್ ಬರ್ಪಿ ಹಾಳ್ ಪಾತೆರ ಉಂದು ಮಾತೆನ್ ಬುಡ್ದು ಬುಡ್ಲೆ.</verse>
				<verse number="9">ಒರಿ ಒರಿಯಗ್ ಸುಳ್ಳು ಪನಡೆ, ದಾಯೆಗಂದ್ಂಡ ನಿಕುಲು ನಿಕ್ಲೆಡುಪ್ಪು ಹಾಳ್ ಸ್ವಭಾವೊಲೆನ್ ದೆತ್ತ್‌ದ್ ಪಾಡ್ದ್ ಪೊಸ ಸ್ವಭಾವೊನು ಪಾಡೊಂದರತ್ತಾ?</verse>
				<verse number="10">ಈ ಸ್ವಭಾವ ದೇವೆರೆಗ್ ಸರಿಯಾದ್ ಉಂಡು. ಆಯನ ಗೇನೊಡ್ದು ಬಲತೊಂದು ಬರ್ಪಿ ಪೊಸ ನರಮಾನಿನ ರೂಪೊನು ಪಾಡೊನ್ಲೆ.</verse>
				<verse number="11">ಉಂದೆನ್ ಪಾಡುನೆಡ್ದ್ ಗ್ರೀಕೆರ್, ಯೆಹೂದ್ಯೆರ್ ಇನ್ಪಿ ಭೇದ ಇಜ್ಜಿ; ಸುನ್ನತಿದಾಯೆ, ಸುನ್ನತಿ ಆವಂದಿನಾಯೆ ಇನ್ಪಿ ಭೇದಲಾ ಇಜ್ಜಿ; ನಾಗರಿಕ ಅನಾಗರಿಕ ಇನ್ಪಿ ಭೇದಲಾ ಇಜ್ಜಿ; ಗುಲಾಮೆ, ಸ್ವತಂತ್ರದಾಯೆ ಇನ್ಪಿ ಭೇದಲಾ ಇಜ್ಜಿ. ಆಂಡ ಕ್ರಿಸ್ತೆ ಮಾತೆರೆಡ್ಲಾ ಮಾತಲಾ ಆದುಲ್ಲೆ.</verse>
				<verse number="12">ಅಂಚಾಯಿನೆಡ್ದ್ ನಿಕುಲು ದೇವೆರೆಡ್ದ್ ಅಜತ್‌ದ್ ದೆತ್ತೊಂಡಿನಾಕುಲಾದ್ ಪರಿಶುದ್ಧೆರ್ಲಾ ಪ್ರೀತಿದಾಕುಲುಲಾ ಆದುಪ್ಪುನೆಡ್ದಾವರ ಕನಿಕರ, ದಯ, ತಗ್ಗ್‌ದಿ ಮನಸ್, ಸಜ್ಜನಿಗೆ, ತಾಳ್ಮೆ ಇನ್ಪಿ ಸದ್ಗುಣಲೆನ್ ಪಾಡೊನ್ಲೆ.</verse>
				<verse number="13">ಬೊಕ್ಕೊರಿಯನ ಮಿತ್ತ್ ತಪ್ಪು ಪಾಡಿಯೆರೆ ಕಾರಣ ಇತ್ತ್ಂಡಲಾ ತಪ್ಪು ಪಾಡಂದೆ ಒರಿಯನ್ ಒರಿ ಸೈಸೊಂದು ಮಾಪು ಮಲ್ಪುಲೆ. ಕರ್ತವೆ ನಿಕ್ಲೆನ್ ಮಾಪು ಮಲ್ತಿ ಲೆಕ್ಕನೇ ನಿಕುಲುಲಾ ಮಾಪು ಮಲ್ಪುಲೆ.</verse>
				<verse number="14">ಉಂದು ಮಾತೆತ್ತ ಮಿತ್ತ್ ಪ್ರೀತಿನ್ ಪೊದೆತೊನ್ಲೆ; ಅವು ಮಾತೆನ್ಲಾ ಪೂರ್ತಿ ಮಲ್ಪುನ ಕಟ್ಟ್ ಆದುಂಡು.</verse>
				<verse number="15">ಬೊಕ್ಕ ಕ್ರಿಸ್ತಡ್ದ್ ಬರ್ಪಿನ ಸಮಾಧಾನ ನಿಕ್ಲೆ ಉಡಲ್‌ನ್ ಆಳಡ್. ನಿಕುಲು ಒಂಜೇ ಶರೀರೊಗು ಸೇರ್ದಿನಾಕುಲಾದುಪ್ಪುನೆಡ್ದ್ ಸಮಾಧಾನೊಡು ಬದುಕುನೆಕ್ಕಾದ್ ಲೆಪ್ಪು ಇತ್ತಿನಾಕುಲಾದುಲ್ಲರ್. ಉಂದತ್ತಂದೆ ಉಪಕಾರ ಎನ್ನುನಾಕುಲಾದುಪ್ಪುಲೆ.</verse>
				<verse number="16">ಕ್ರಿಸ್ತನ ಪಾತೆರ ನಿಕ್ಲೆಡ್ ದಿಂಜಿದ್ ಉಪ್ಪಡ್. ಆಯೆ ಕೊರ್ಪಿನ ಮಾತ ಗೇನೊಡ್ದಾದ್ ಒರಿಯಡೊರಿ ಬೋಧನೆ ಮಲ್ಪುಲೆ, ಬುದ್ಧಿ ಪನೊಂದುಪ್ಪುಲೆ. ಕೀರ್ತನೆ, ರಾಗ, ಆತ್ಮಭಾವದ ಪದ ಮಲ್ತೊಂದು ಉಪಕಾರ ದಿಂಜಿದಿ ಉಡಲ್‌ಡ್ದ್ ದೇವೆರೆಗ್ ರಾಗ ಮಲ್ಪುಲೆ.</verse>
				<verse number="17">ಬೊಕ್ಕ ನಿಕುಲು ಬಾಯಿದ ಪಾತೆರೊಡಾವಡ್ ನಡಾವಳಿಕೆಡಾವಡ್ ಎಂಚಿನ ಮಲ್ತರ್ಡಲಾ ಮಾತೆನ್ಲಾ ಕರ್ತವೆ ಆದುಪ್ಪು ಯೇಸುನ ಪುದರ್‌ಡೇ ಮಲ್ಪುಲೆ. ಆಯಡ್ದ್ ಅಮ್ಮೆ ಆದುಪ್ಪು ದೇವೆರೆಗ್ ಉಪಕಾರ ಸ್ತುತಿ ಸಂದಾಲೆ.</verse>
				<verse number="18">ಬೊಡೆದಿಯಾಡ್ಲೇ, ನಿಕ್ಲೆ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ. ಉಂದು ಕರ್ತವಗ್ ಸೇರ್ದಿನಾಕುಲೆಗ್ ಯೋಗ್ಯಾದುಂಡು.</verse>
				<verse number="19">ಕಂಡನಿಯಾಡ್ಲೇ, ನಿಕ್ಲೆ ಬೊಡೆದಿಯಾಡ್ಲೆನ್ ಪ್ರೀತಿ ಮಲ್ಪುಲೆ; ಅಕ್ಲೆಗ್ ಕೈಪೆ ಆದುಪ್ಪಡೆ.</verse>
				<verse number="20">ಜೋಕುಲೇ, ಮಾತ ವಿಚಾರೊಡು ನಿಕ್ಲೆನ ಅಪ್ಪೆಅಮ್ಮಾಡ್ಲೆಗ್ ಒಳಗಾದುಪ್ಪುಲೆ. ಉಂದು ಕರ್ತವಗ್ ಮೆಚ್ಚಿಗೆದವು ಆದುಂಡು.</verse>
				<verse number="21">ಅಪ್ಪೆಅಮ್ಮಾಡ್ಲೇ, ನಿಕ್ಲೆ ಜೋಕುಲೆನ್ ಕೋಪ ಲಕ್ಕಾವಡೆ; ಇಜ್ಜಾಂಡ ಅಕುಲು ಕುಗ್ಗುದು ಪೋವೆರ್.</verse>
				<verse number="22">ದಾಸೆರೇ, ನಿಕುಲು ಲೋಕದ ಯಜಮಾನೆರೆಗ್ ಮಾತೆಟ್ಟ್ ತಗ್ಗ್‌ದ್ ನಡಪುಲೆ. ನರಮಾನಿಲೆನ್ ಮೆಚ್ಚಾವುನಾಕುಲು ಮಲ್ಪುಲೆಕ್ಕ ನಿಕ್ಲೆ ಯಜಮಾನ್ಯೆರ್ ತೂವೊಂದುಪ್ಪುನಗ ಮಾತ್ರ ಚಾಕ್ರಿ ಮಲ್ಪಂದೆ ಕರ್ತವಗ್ ಪೋಡಿಯುನಾಕುಲಾದ್ ಸಜ್ಜನಿಗೆದ ಉಡಲ್‌ಡ್ದ್ ಚಾಕ್ರಿ ಮಲ್ಪುಲೆ.</verse>
				<verse number="23">ನಿಕುಲು ವಾ ಬೇಲೆ ಮಲ್ತ್ಂಡಲಾ ಅವೆನ್ ನರಮಾನಿಲೆಗಾದ್ ಅತ್ತ್, ಕರ್ತವಗಾದೇ ಮಲ್ತೊಂದುಲ್ಲ ಅಂದ್‌ದ್ ಮನಸ್ ದೀದ್ ಮಲ್ಪುಲೆ.</verse>
				<verse number="24">ಕರ್ತವೆ ನಿಕ್ಲೆಗ್ ಬಾಧ್ಯಸ್ತಿಗೆನ್ ಉಡಿಗೆರೆ ಆದ್ ಕೊರ್ಪೆ ಇನ್ಪಿನೆನ್ ಎನ್ನೊನ್ಲೆ. ನಿಕುಲು ಕರ್ತವೆ ಆದುಪ್ಪು ಕ್ರಿಸ್ತಗೇ ಚಾಕ್ರಿದಾಕುಲಾದುಲ್ಲರ್.</verse>
				<verse number="25">ಆಂಡ ನಿಕುಲು ಅನ್ಯಾಯ ಮಲ್ತರ್ಡ, ಆ ಅನ್ಯಾಯೊಗು ತಕ್ಕ ಪ್ರತಿಫಲ ತಿಕ್ಕು. ದೇವೆರೆಡ ಪಕ್ಷಪಾತ ಇಜ್ಜಿ.</verse>
			</chapter>
			<chapter number="4">
				<verse number="1">ಯಜಮಾನೆರೇ, ನಿಕ್ಲೆಗ್ಲಾ ಪರಲೋಕೊಡು ಒರಿ ಯಜಮಾನೆ ಉಲ್ಲೆ ಇನ್ಪಿನೆನ್ ತೆರಿಯೊಂದು ನಿಕ್ಲೆ ಚಾಕ್ರಿದಾಕುಲೆಗ್ ನ್ಯಾಯವಾಯಿನೆನ್ಲಾ ಎಡ್ಡೆಂತಿನೆನ್ಲಾ ಮಲ್ಪುಲೆ.</verse>
				<verse number="2">ಪ್ರಾರ್ಥನೆಡ್ ನಿಲೆ ಆದಿತ್ತ್‌ದ್ ಉಪಕಾರ ಸ್ತುತಿ ಮಲ್ತ್‌ದ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="3">ಉಂದತ್ತಂದೆ ಎಂಕುಲೆಗಾದ್‌ಲಾ ಪ್ರಾರ್ಥನೆ ಮಲ್ಪುಲೆ. ಕ್ರಿಸ್ತ ವಿಚಾರೊಡು ದೇವೆರ್ ತೆರಿಪಾದಿನ ಸತ್ಯಾರ್ಥೊನು ಸಾರಿದ್ ತೆರಿಪಾವೆರೆ ಅನುಕೂಲದ ಸಂದರ್ಭೊನು ಎಂಕ್ಲೆಗ್ ಒದಗಾದ್ ಕೊರ್ಪಿಲೆಕ್ಕಲಾ, ಅವೆನ್ ಪನೊಡಾಯಿ ರೀತಿಡ್ ಪನ್ಪಿಲೆಕ್ಕಲಾ ಸಹಾಯ ಮಲ್ಪೊಡು ಅಂದ್‌ದ್ ನಟ್ಟೊನ್ಲೆ. ಆ ಸತ್ಯೊಗಾದ್ರನೇ ಯಾನ್ ಇತ್ತೆ ಸೆರೆಮನೆಟ್ ಉಲ್ಲೆ.</verse>
				<verse number="4"></verse>
				<verse number="5">ಸಮಯೊನು ಪೊಕ್ಕಡೆ ಕಳೆವಂದೆ ತಿಕ್ಕುನ ಪ್ರತಿಯೊಂಜಿ ಗಳಿಗೆನ್ಲಾ ಎಡ್ಡೆ ರೀತಿಡ್ ಉಪಯೋಗ ಮಲ್ತೊನ್ಲೆ. ಪಿದಯಿದಾಕುಲೆ ಎದುರು ಬುದ್ಧಿವಂತೆರಾದ್ ನಡಪುಲೆ.</verse>
				<verse number="6">ನಿಕ್ಲೆನ ಪಾತೆರಕತೆ ಏಪಲಾ ದಯತವುಲಾ ರುಚಿ ಆದುಪ್ಪುನವುಲಾ ಆದುಪ್ಪಡ್. ಇಂಚ ನಿಕುಲು ಏರೇರೆಗ್ ಎಂಚ ಉತ್ತರ ಕೊರೊಡು ಅವೆನ್ ತೆರಿಯೊನ್ವರ್.</verse>
				<verse number="7">ಪ್ರೀತಿದ ಸಹೋದ್ರೆಲಾ, ನಂಬಿಗಸ್ತೆ ಸೇವಕೆಲಾ, ಕರ್ತವಡ್ ಎನಡೊಪ್ಪ ಜತೆಸೇವಕೆಲಾ ಆದುಪ್ಪು ತುಖಿಕೆ ಎನ ಸಂಗತಿಲೆನ್ ನಿಕ್ಲೆಗ್ ತೆರಿಪಾವೆ.</verse>
				<verse number="8">ನಿಕುಲು ಎನ ಸ್ಥಿತಿಗತಿನ್ ತೆರಿಯುಲೆಕ್ಕಲಾ ಆಯೆ ನಿಕ್ಲೆ ಉಡಲ್‌ನ್ ಉಮೇದ್ ಕೊರ್ಪಿಲೆಕ್ಕಲಾ</verse>
				<verse number="9">ಯಾನ್ ಆಯನ್ ನಂಬಿಕೆ ಇತ್ತಿ ಪ್ರೀತಿದ ಸಹೋದರೆ ಆಯಿ ನಿಕ್ಲೆನ ಊರುದ ಒನೇಸಿಮಡೊಪ್ಪ ಕಡಪುಡ್ವೆ. ಅಕುಲು ಮೂಲು ಆಪಿನ ಸಂಗತಿಲೆನ್ ನಿಕ್ಲೆಗ್ ತೆರಿಪಾವೆರ್.</verse>
				<verse number="10">ಎನಡೊಪ್ಪ ಸೆರೆಟುಪ್ಪುನ ಅರಿಸ್ತಾರ್ಕೆಲಾ ಅಂಚೆನೇ ಬಾರ್ನಬನ ಸಹೋದರೆ ಮಾರ್ಕೆಲಾ ತನ್ಕುಲೆ ವಂದನೆಲೆನ್ ತೆರಿಪಾದೆರ್. ಮಾರ್ಕನ ಸಂಗತಿಡ್ ನಿಕ್ಲೆಗ್ ಅಪ್ಪಣೆ ತಿಕ್ಕ್‌ದ್ಂಡತ್ತಾ. ಆಯೆ ನಿಕ್ಲೆ ಕೈತಲ್‌ ಬತ್ತೆಡ ಸೇರಾವೊನ್ಲೆ.</verse>
				<verse number="11">ಎಂಕುಲು ಯುಸ್ತೆ ಅಂದ್‌ದ್ ಲೆಪ್ಪುನ ಯೇಸುಲಾ ತನ ವಂದನೆ ತೆರಿಪಾದೆ. ಸುನ್ನತಿದಾಕುಲೆಡ್ ಮೊಕುಲು ಮಾತ್ರ ದೇವೆರೆ ರಾಜ್ಯೊಗಾದ್ ಎನ ಜತೆಸೇವಕೆರ್ ಆದುಲ್ಲೆರ್. ಮೊಕ್ಲೆಡ್ದ್ ಎಂಕ್ ದಿಂಜ ಆಧರಣೆ ಉಂಡಾಂಡ್.</verse>
				<verse number="12">ಕ್ರಿಸ್ತ ಯೇಸುನ ಸೇವಕೆ ಆಯಿ ನಿಕ್ಲೆ ಊರುದಾಯೆ ಎಪಫ್ರೆ ತನ ವಂದನೆಲೆನ್ ತೆರಿಪಾದೆ. ಆಯೆ ಪ್ರಾರ್ಥನೆ ಮಲ್ತೊಂದುಪ್ಪುನಗ ನಿಕ್ಲೆಗ್ ಬೋಡಾದ್ ಹೋರಾಟ ಮಲ್ತೊಂದು ನಿಕುಲು ತಿಳುವಳಿಕೆ ಇತ್ತಿನಕುಲಾದ್ ಮಾತೆಟ್ಟ್ ದೇವೆರೆ ಚಿತ್ತೊಗು ಒಳಗಾದ್ ದೃಢ ನಿಚ್ಚಯೊಡು ನಿಲೆ ಆಪಿಲೆಕ್ಕ ಆಸಕ್ತಿಡ್ ನಟ್ಟೊಂದುಲ್ಲೆ.</verse>
				<verse number="13">ಆಯೆ ನಿಕ್ಲೆಗಾದ್‌ಲಾ ಲವೊದಿಕೀಯೊಡು ಅಂಚೆನೆ, ಹಿರಾಪೊಲಿಯೊಡು ಜನೊಕುಲೆಗಾದ್‌ಲಾ ದಿಂಜ ಕಷ್ಟ ದೆತ್ತೊನ್ವೆ ಅಂದ್‌ದ್ ಯಾನ್ ಸಾಕ್ಷಿ ಪನ್ಪೆ.</verse>
				<verse number="14">ಪ್ರೀತಿದ ವೈದ್ಯೆ ಆಯಿ ಲೂಕೆಲಾ ದೇಮೆಲಾ ನಿಕ್ಲೆಗ್ ತನ್ಕುಲೆ ವಂದನೆಲೆನ್ ತೆರಿಪಾದೆರ್.</verse>
				<verse number="15">ಲವೊದಿಕೀಯೊಡುಪ್ಪು ಎಂಕುಲೆ ಸಹೋದ್ರರೆಗ್ಲಾ, ನುಂಫಗ್ಲಾ, ಆಲೆನ ಇಲ್ಲಡ್ ಕೂಡ್ದು ಬರ್ಪಿನ ಸಭೆತಾಕುಲೆಗ್ಲಾ ಎನ ವಂದನೆಲೆನ್ ತೆರಿಪಾಲೆ.</verse>
				<verse number="16">ನಿಕುಲು ಈ ಪತ್ರಿಕೆನ್ ಓದುದು ಆಯಿ ಬೊಕ್ಕ ಲವೊದಿಕೀಯದ ಸಭೆತಾಕುಲೆಗ್ಲಾ ಅವೆನ್ ಓದುಲೆಕ್ಕ ಮಲ್ಪುಲೆ. ಬೊಕ್ಕ ಯಾನ್ ಅಕ್ಲೆಗ್ ಬರೆತಿ ಪತ್ರಿಕೆನ್ ನಿಕುಲುಲಾ ಓದುಲೆ.</verse>
				<verse number="17">ಬೊಕ್ಕ ಅರ್ಖಿಪ್ಪಗ್, ಈ ಕರ್ತವಡ್ ಪಡೆಯಿನ ಸೇವೆನ್ ಎಚ್ಚರಿಕೆಡಿತ್ತ್‌ದ್ ತೀರಿಸಾವೆರೆ ಪನ್ಲೆ.</verse>
				<verse number="18">ಉಂದು ಪೌಲು ಇನ್ಪಿ ಯಾನ್ ಎನ ಸ್ವಂತ ಕೈಟ್ ವಂದನೆಲೆನ್ ಬರೆತೆ. ಯಾನ್ ಸೆರೆಮನೆಟ್ ಉಲ್ಲೆ ಇನ್ಪಿನೆನ್ ನೆನೆಪು ಮಲ್ತೊಂದುಪ್ಪುಲೆ. ದೇವೆರೆನ ದಯ ನಿಕ್ಲೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="52">
			<chapter number="1">
				<verse number="1">ಅಮ್ಮೆ ಆದುಪ್ಪು ದೇವೆರೆಡ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ಲಾ ಉಪ್ಪು ಥೆಸ್ಸಲೋನಿಕ ಸಭೆಕ್, ಪೌಲು, ಸೀಲೆ, ತಿಮೋಥಿ ಪನ್ಪಿ ಎಂಕುಲು ಬರೆಪಿನಿ ದಾನೆಂದ್ಂಡ, ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="2">ಎಂಕುಲು ನಂಬಿಕೆದ ಫಲವಾಯಿ ನಿಕ್ಲೆ ಬೇಲೆನ್ಲಾ ಪ್ರೀತಿ ದಿಂಜಿದುಪ್ಪು ನಿಕ್ಲೆ ಪ್ರಯಾಸೊನ್ಲಾ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮಿತ್ತ್‌ದ ನಿರೀಕ್ಷೆಡ್ದ್ ಉಂಡಾಯಿ ನಿಕ್ಲೆನ ತಾಳ್ಮೆನ್ಲಾ ನಮ ಅಮ್ಮೆ ಆದುಪ್ಪು ದೇವೆರೆ ದುಂಬು ಮದಪಂದೆ ನೆನೆಪು ಮಲ್ತೊಂದು ಎಂಕ್ಲೆ ಪ್ರಾರ್ಥನೆಲೆಡ್ ನಿಕ್ಲೆಗಾದ್ ನಟ್ಟೊನ್ನಗ ನಿಕ್ಲೆ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಸಂದಾವ.</verse>
				<verse number="3"></verse>
				<verse number="4">ಸಹೋದ್ರೆರೇ, ದೇವೆರ್ ನಿಕ್ಲೆನ್ ಪ್ರೀತಿ ಮಲ್ತ್‌ದ್ ನಿಕ್ಲೆನ್ ತನ ಸ್ವಂತದಾಕುಲಾದ್ ಅಜತ್‌ದ್ ದೆತ್ತೊಂದೆ ಪಂಡ್ದ್‌ಲಾ ಎಂಕ್ಲೆಗ್ ತೆರಿದುಂಡು.</verse>
				<verse number="5">ದಾಯೆಗಂದ್ಂಡ ಎಂಕುಲು ನಿಕ್ಲೆಗ್ ಸುವಾರ್ತೆ ಬಾಯಿ ಪಾತೆರೊಡು ಮಾತ್ರ ತೆರಿಪಾದಿನಿ ಅತ್ತ್, ಶಕ್ತಿಡ್ದ್‌ಲಾ ಪರಿಶುದ್ಧಾತ್ಮಡ್ದ್‌ಲಾ ಐತ ಸತ್ಯೊಲೆ ಮಿತ್ತ್ ಪೂರ್ತಿ ಭರವಸೊಡ್ದು ತೆರಿಪಾಯ. ನಿಕ್ಲೆಡೊಪ್ಪ ಉಪ್ಪುನಗ ಎಂಕುಲು ಎಂಚ ಜೀವನ ಮಲ್ತ ಪನ್ಪಿನೆನ್ ನಿಕುಲುಲಾ ತೆರಿದರ್.</verse>
				<verse number="6">ಉಂದತ್ತಂದೆ ನಿಕುಲು ಮಸ್ತ್ ಭಂಗ ಅನುಭವ ಮಲ್ಪೆರೆ ಇತ್ತ್ಂಡಲಾ ಪರಿಶುದ್ಧಾತ್ಮಡ್ದ್ ಉಂಡಾಯಿ ಸಂತೋಷದೊಟ್ಟುಗು ದೇವೆರೆ ಪಾತೆರೊಲೆನ್ ಅಂಗೀಕಾರ ಮಲ್ತ್‌ದ್ ಎಂಕ್ಲೆನ್ಲಾ ಕರ್ತವೆ ಆದುಪ್ಪು ಯೇಸುನ್ಲಾ ಬೆರಿ ಪತ್ತುನಾಕುಲು ಆಯರ್.</verse>
				<verse number="7">ಇಂಚ ಮಕೆದೋನ್ಯೊಡ್ಲಾ ಬೊಕ್ಕ ಅಖಾಯೊಡ್ಲಾ ಕ್ರಿಸ್ತನ್ ನಂಬುನಾಕುಲೆಗ್ ಮಾತೆರೆಗ್ಲಾ ಮಾದ್ರಿ ಆಯರ್.</verse>
				<verse number="8">ಕರ್ತವನ ಪಾತೆರ ನಿಕ್ಲೆಡ್ದೇ ಮಕೆದೋನ್ಯೊಡ್ಲಾ ಬೊಕ್ಕ ಅಖಾಯೊಡ್ಲಾ ಪ್ರಕಟ ಆಯಿನಿ ಅತ್ತಂದೆ ದೇವೆರೆ ಮಿತ್ತ್ ನಿಕುಲು ದೀತಿನ ನಂಬಿಕೆ ಮಾತ ಜಾಗ್‌ಲೆಡ್ಲಾ ಸುದ್ಧಿಗ್ ಬತ್ತ್ಂಡ್, ಅಂಚಾಯಿನೆಡ್ದ್ ಎಂಕುಲು ದಾಲಾ ಪನಿಯೆರೆ ಇಜ್ಜಿ.</verse>
				<verse number="9">ಎಂಕುಲು ನಿಕ್ಲೆನಡೆ ಬತ್ತಿನಪಗ ನಿಕುಲು ಎಂಕ್ಲೆನ್ ಎಂಚ ಸ್ವೀಕಾರ ಮಲ್ತರ್ ಇನ್ಪಿನೆನ್ ಅಲ್ಪದ ಜನೊಕುಲು ತನ್ಕುಲೇ ಪಾತೆರ್‌ವೆರ್. ಅವು ಅತ್ತಂದೆ ನಿಕುಲು ಎಂಚ ಮೂರ್ತಿಪೂಜೆ ಬುಡ್ದು ದೇವೆರೆ ಕಡೆಕ್ಕ್ ತಿರ್ಗ್‌ದ್ ನಿಜವಾಯಿನ ಜೀವೊಡುಪ್ಪು ದೇವೆರೆನ ಸೇವೆ ಮಲ್ತರ್,</verse>
				<verse number="10">ಬೊಕ್ಕ ಮರಣೊಡ್ದು ಲಕ್ಕಾಯಿನ ದೇವೆರೆ ಮಗೆ ಆದುಪ್ಪು ಯೇಸುನು ಬಾನದ ಉಲಯಿಡ್ದ್ ಬರ್ಪಿನೆನ್ ನಿಕುಲು ಎಂಚ ಎದುರು ತೂಪಿನಕುಲಾದುಲ್ಲರ್ ಪಂಡ್ದ್‌ಲಾ ಆ ಜನೊಕುಲೇ ಪನ್ಪೆರ್. ಉಂದೇ ಯೇಸು ದುಂಬಗ್ ಬರ್ಪಿ ದೈವಕೋಪೊಡ್ದು ನಮನ್ ತಪ್ಪಾವುನಾಯೆ.</verse>
			</chapter>
			<chapter number="2">
				<verse number="1">ಸಹೋದ್ರೆರೇ, ಎಂಕುಲು ಪೊಕ್ಕಡೆ ನಿಕ್ಲೆ ಕೈತಲ್‌ ಬೈದಿಜ ಇನ್ಪಿನೆನ್ ನಿಕುಲು ತೆರಿದರ್.</verse>
				<verse number="2">ಎಂಕುಲು ದೇವೆರೆ ಬೇಲೆ ಮಲ್ಪೆರೆ ಥೆಸ್ಸಲೋನಿಕಗ್ ಬರ್ಪಿನೆಕ್ಕ್ ದುಂಬು, ಫಿಲಿಪ್ಪಿ ಪಟ್ಟಣೊಡು ಭಂಗ ಬೊಕ್ಕ ಅವಮಾನ ಆತಿನವು ನಿಕ್ಲೆಗ್ ತೆರಿದೇ ಉಂಡು. ಮಸ್ತ್ ವಿರೋಧ ಇತ್ತ್ಂಡಲಾ ದೇವೆರ್ ಎಂಕ್ಲೆಗ್ ಬಲ ಕೊರಿನೆಡ್ದ್ ನಿಕ್ಲೆಗ್ ಧೈರ್ಯೊಡು ಸುವಾರ್ತೆ ತೆರಿಪಾಯ.</verse>
				<verse number="3">ಐಡ್ದಾವರ ಎಂಕ್ಲೆನ ಬೋಧನೆ ಕಪಟದವುಲಾ ಅತ್ತ್, ಅಶುದ್ಧವಾಯಿನವುಲಾ ಅತ್ತ್, ಮೋಸದವುಲಾ ಅತ್ತ್,</verse>
				<verse number="4">ಆಂಡ ದೇವೆರ್ ಎಂಕ್ಲೆನ್ ತಕ್ಕದಾಕುಲು ಪಂಡ್ದ್, ಈ ಸುವಾರ್ತೆ ಎಂಕ್ಲೆನ ವಶೊಕ್ಕು ಕೊರಿಯೆ. ಎಂಕುಲು ನರಮಾನಿರೆನ್ ಮೆಚ್ಚಾವಂದೆ ಉಡಲ್‌ನ್ ಪರೀಕ್ಷೆ ಮಲ್ಪುನ ದೇವೆರೆನ್ ಮೆಚ್ಚಾವೊಡು ಅಂದ್‌ದ್ ಪಾತೆರೊಂದುಲ್ಲ.</verse>
				<verse number="5">ಉಂದು ನಿಕ್ಲೆಗ್ ಸರಿಯಾದ್ ತೆರಿದುಪ್ಪುಲೆಕ್ಕ ಎಂಕ್ಲೆನ ಈ ಬೋಧನೆ ಕಾಲಿ ಬಡಾಯಿ ಕೊಚ್ಚುನ ಪಾತೆರೊಲೆಡ್ದ್‌ಲಾ ಕಾಸ್‌ದ ಆಸೆಗ್ ಬೋಡಾದ್ ವೇಷ ಪಾಡೊಂದುಲಾ ಬೈದಿನಿ ಅತ್ತ್, ಉಂದೆಕ್ಕ್ ದೇವೆರೇ ಸಾಕ್ಷಿ.</verse>
				<verse number="6">ಉಂದತ್ತಂದೆ ಎಂಕುಲು ಕ್ರಿಸ್ತನ ಅಪೊಸ್ತಲೆರಾದುಪ್ಪುನೆಡ್ಡ್ ಎಂಕ್ಲೆಗ್ ಮರ್ಯಾದಿ ಕೊರೊಡು ಅಂದ್‌ದ್ ಪನೊಲಿಯಾಂಡಲಾ ನರಮಾನಿಲೆಡ್ದ್ ಬರ್ಪಿ ಮೈಮೆನ್ ನಿಕ್ಲೆಡ್ದಾವಡ್, ಬೇತೆಕ್ಲೆಡ್ದಾವಡ್ ಆಸೆ ಮಲ್ಪುನಾಕುಲು ಆದಿಜ್ಜ. ಆಂಡ ಅಪ್ಪೆ ತನ ಜೋಕುಲೆನ್ ತಾಂಕುಲೆಕ್ಕನೇ ಎಂಕುಲು ನಿಕ್ಲೆ ನಡುಟು ಸಮಾಧಾನಿಲಾದ್ ಇತ್ತ.</verse>
				<verse number="7"></verse>
				<verse number="8">ನಿಕುಲು ಎಂಕ್ಲೆಗ್ ಬಾರಿ ಪ್ರೀತಿದಾಕುಲು ಆದಿತ್ತಿನೆಡ್ದಾವರ ಎಂಕುಲು ನಿಕ್ಲೆಗ್ ಪ್ರೀತಿಡ್ ದೇವೆರೆನ ಸುವಾರ್ತೆ ಪನಿಯೆರೆ ಮಾತ್ರತ್ತಂದೆ ನಿಕ್ಲೆಗಾದ್ ಎಂಕ್ಲೆನ ಇಡೀ ಪ್ರಾಣೊನೇ ಕೊರಿಯೆರೆ ತಯಾರಾದಿತ್ತ.</verse>
				<verse number="9">ಸಹೋದ್ರೆರೇ, ಎಂಕುಲು ನಿಕ್ಲೆಡ್ ಏರೆಗ್ಲಾ ದುನ್ನ ಆವಂದಿಲೆಕ್ಕ ರಾತ್ರೆ ಪಗೆಲ್ ಬೆಂದ್‌ದ್ ಜೀವನ ಮಲ್ತೊಂದು, ದೇವೆರೆ ಸುವಾರ್ತೆ ನಿಕ್ಲೆಗ್ ಸಾರಿಯ. ಎಂಕ್ಲೆನ ಭಂಗಲಾ ಪ್ರಯಾಸಲಾ ನಿಕುಲು ನೆನೆಪು ಮಲ್ತೊಂದುಪ್ಪರ್.</verse>
				<verse number="10">ನಂಬುನಾಕುಲಾಯಿ ನಿಕ್ಲೆಡ್ ಎಂಕುಲು ಎಂಚ ಭಕ್ತಿಡ್ ನೀತಿವಂತೆರಾದ್, ತಪ್ಪುದಾಂತೆ ಇತ್ತ ಇನ್ಪಿನೆಕ್ಕ್ ನಿಕುಲುಲಾ ದೇವೆರ್‌ಲಾ ಸಾಕ್ಷಿ.</verse>
				<verse number="11">ಅಮ್ಮೆ ತನ ಜೋಕುಲೆಗ್ ಬುದ್ಧಿ ಪಂಡಿಲೆಕ್ಕನೇ ಎಂಕುಲುಲಾ ನಿಕ್ಲೆಗ್ ಬುದ್ಧಿ ಪನೊಂದು ಧೈರ್ಯ ಕೊರೊಂದುಲ್ಲ.</verse>
				<verse number="12">ನಿಕ್ಲೆನ್ ತನ ರಾಜ್ಯೊಗ್ಲಾ ಮೈಮೆಗ್ಲಾ ಪಾಲ್‌ದಾರೆರ್ ಆಯೆರೆ ಲೆತ್ತಿ ದೇವೆರೆಗ್ ಯೋಗ್ಯಾದ್ ನಡತೊನೊಡು ಅಂದ್‌ದ್ ಕಂಡಿತಾದ್ ಪನ್ಪಿನೆನ್ ನಿಕುಲು ತೆರಿದುಲ್ಲರ್.</verse>
				<verse number="13">ಎಂಕುಲು ದೇವೆರೆನ್ ಏಪಲಾ ಪುಗರೊಂದುಲ್ಲ ದಾಯೆಗ್ ಪಂಡ ನಿಕುಲು ದೇವೆರೆನ ಪಾತೆರೊನು ಎಂಕ್ಲೆಡ್ದ್ ಕೇಂಡ್ದ್, ಅವೆನ್ ನರಮಾನಿಲೆ ಪಾತೆರೊಲು ಅತ್ತ್; ಉಂದು ಕಂಡಿತಾದ್ ದೇವೆರೆ ಪಾತೆರೊಲೆ ಅಂದ್‌ದ್ ನಂಬಿನೆಡ್ದಾವರ ನಿಕ್ಲೆ ಉಲಯಿ ಎಡ್ಡೆ ಕೆಲಸೊಲು ನಡತೊಂದುಂಡು.</verse>
				<verse number="14">ಅಂದ್, ಸಹೋದ್ರರೆ, ಯೂದಾಯೊಡು ದೇವೆರೆ ಸಭೆತಾಕುಲು ಕ್ರಿಸ್ತ ಯೇಸುಡು ಇತ್ತ್‌ದ್ ಯೆಹೂದ್ಯೆರೆಡ್ದ್ ಭಂಗೊಲೆನ್ ಅನುಭವ ಮಲ್ತೆರ್ ಅಂಚೆನೇ ನಿಕುಲುಲಾ ನಿಕ್ಲೆನ ಸ್ವಂತ ಜನೊಕುಲೆಡ್ದ್ ಭಂಗೊಲೆನ್ ಅನುಭವ ಮಲ್ತರ್.</verse>
				<verse number="15">ಆ ಯೆಹೂದ್ಯೆರ್ ಕರ್ತವೆ ಆದುಪ್ಪು ಯೇಸುನ್ಲಾ ಪ್ರವಾದಿಲೆನ್ಲಾ ಕೆರಿಯೆರ್, ಎಂಕ್ಲೆನ್ಲಾ ಗಿಡ್ತ್ ಬುಡಿಯೆರ್. ಅಕುಲು ದೇವೆರೆನ್ ಮೆಚ್ಚಂದಿನಾಕುಲು, ಮಾತ ನರಮಾನಿಲೆಗ್ಲಾ ವಿರೋಧಿಲು ಆದುಲ್ಲೆರ್.</verse>
				<verse number="16">ಪಿದಯಿದ ಜನೊಕುಲೆಗ್ ರಕ್ಷಣೆ ಆಪಿನ ಸುವಾರ್ತೆ ಪನಿಯೆರೆ ಬಲ್ಲಿ ಅಂದ್‌ದ್ ಎಂಕ್ಲೆಗ್ ಮಸ್ತ್ ಅಡ್ಡಿ ಮಲ್ಪುವೆರ್, ಇಂಚ ಅಕುಲು ಅಕ್ಲೆನ ಪಾಪ ಕೃತ್ಯೊಲೆನ್ ಹೆಚ್ಚ್ ಮಲ್ತೊಂದೇ ಪೋಪೆರ್. ಅಂಚಾಯಿನೆಡ್ದ್ ದೇವೆರೆನ ಕೋಪ ಕಡೆಕ್ಕ್ ಅಕ್ಲೆನ ಮಿತ್ತ್ ಬೈದ್‌ಂಡ್.</verse>
				<verse number="17">ಸಹೋದ್ರೆರೇ, ಎಂಕುಲಾಂಡಲಾ ಶರೀರೊಡು ಒಂತೆ ಸಮಯ ದೂರ ಆದಿತ್ತ್‌ಂಡಲಾ, ಉಡಲ್‌ಡ್ ಒಂಜಾದುಲ್ಲ. ನಿಕ್ಲೆನ್ ತೂವೊಡು ಪನ್ಪಿ ಆಸೆಡ್ ದಿಂಜ ಪ್ರಯಾಸಲಾ ಮಲ್ತ.</verse>
				<verse number="18">ದಾಯೆಗಂದ್ಂಡ, ನಿಕ್ಲೆನ ಕೈತಲ್‌ ಬರಿಯೆರೆ ಎಂಕ್ಲೆಗ್ ಮನಸಿತ್ತ್‌ಂಡ್. ಪೌಲು ಆಯಿ ಯಾನ್ ಒಂಜಿ ರಡ್ಡ್ ಸರ್ತಿ ನಿಕ್ಲೆ ಕೈತಲ್‌ ಬರೊಡೇ ಅಂದ್‌ದ್ ಎನ್ನೊಂದಿತ್ತೆ. ಆಂಡ ಸೈತಾನೆ ಎಂಕ್ಲೆಗ್ ಅಡ್ಡಿ ಮಲ್ತೆ.</verse>
				<verse number="19">ನಮ ಕರ್ತವೆ ಆದುಪ್ಪು ಯೇಸು ತೋಜಿದ್ ಬನ್ನಗ, ಆಯನ ದುಂಬು ಎಂಕ್ಲೆನ ಭರವಸಲಾ, ಸಂತೋಷಲಾ, ಪುಗರಿಗೆದ ಕಿರೀಟಲಾ ಏರ್? ಅವು ನಿಕುಲೇ ಅತ್ತಾ.</verse>
				<verse number="20">ನಿಜಾದ್‌ಲಾ ನಿಕುಲೇ ಎಂಕ್ಲೆನ ಗೌರವಲಾ, ಸಂತೋಷಲಾ ಆದುಲ್ಲರ್.</verse>
			</chapter>
			<chapter number="3">
				<verse number="1">ಅಂಚಾಯಿನೆಡ್ದ್ ಎಂಕ್ಲೆಗ್ ತಡೆಯೊನೆರೆ ಆವಂದೆ ಎಂಕುಲು ಒಂಟಿ ಆದ್ ಅಥೇನೆಡ್ ಉಪ್ಪುನೆಕ್ಕ್ ಒಪ್ಪಿಯೊಂಡ.</verse>
				<verse number="2">ನಿಕ್ಲೆ ಮಿತ್ತ್ ಬೈದಿನ ಕಷ್ಟ ಸಂಕಟೊಲೆಡ್ ಒರಿಲಾ ಚಂಚಲೆರ್ ಆವಂದಿಲೆಕ್ಕಲಾ ನಿಕ್ಲೆನ್ ಗಟ್ಟಿ ಮಲ್ಪುಲೆಕ್ಕಲಾ ನಿಕ್ಲೆ ನಂಬಿಕೆ ಹೆಚ್ಚಾವೆರೆಗ್ಲಾ ನಿಕ್ಲೆಗ್ ಬೋಧನೆ ಮಲ್ಪೆರೆಗ್ಲಾ ಎಂಕುಲೆ ಸಹೋದ್ರೆಲಾ ಕ್ರಿಸ್ತನ ಸುವಾರ್ತೆದ ಬೇಲೆಡ್ ದೇವೆರೆ ಸೇವಕೆಲಾ ಆದುಪ್ಪು ತಿಮೋಥಿನ್ ನಿಕ್ಲೆ ಕೈತಲ್‌ ಕಡಪುಡುವ.</verse>
				<verse number="3">ದಾಯೆಗ್ ಪಂಡ ನಿಕುಲು ಕಷ್ಟೊಲೆಡ್ದ್ ಏರ್ಲಾ ಚಂಚಲ ಆವೆರೆ ಬಲ್ಲಿ. ಬೊಕ್ಕ ನಿಕ್ಲೆಗ್ ಗೊತ್ತಿತ್ತಿ ಲೆಕ್ಕನೇ ಸಂಕೊಟೊನು ಅನುಭವ ಮಲ್ಪೆರೆನೇ ಎಂಕ್ಲೆನ್ ದೇವೆರ್ ನೇಮಕ ಮಲ್ತ್‌ದೆ.</verse>
				<verse number="4">ಎಂಕುಲು ನಿಕ್ಲೆ ಕೈತಲ್‌ ಉಪ್ಪುನಗಲಾ ಕಷ್ಟ ಸಂಕಟೊಲೆನ್ ಅನುಭವ ಮಲ್ಪೊಡಾಪುಂಡು ಅಂದ್‌ದ್ ದುಂಬೇ ನಿಕ್ಲೆಗ್ ತೆರಿಪಾದಿತ್ತ, ಅಂಚೆನೇ ಆಂಡ್. ಅವು ನಿಕ್ಲೆನ ಅನುಭವೊಗ್ಲಾ ಬತ್ತ್ಂಡ್.</verse>
				<verse number="5">ಅಂಚಾದ್ ಯಾನ್ ನನ ತಡೆತೊನಿಯೆರೆ ಆವಂದೆ, ಒಂಜಿ ವೇಳೆ ಸೈತಾನೆ ನಿಕ್ಲೆನ್ ಶೋಧಿನೆಡ್ದ್ ಎಂಕುಲೆ ಪ್ರಯಾಸ ಪೊಕ್ಕಡೆಗ್ ಆಂಡಾ ಅಂದ್‌ದ್ ನಿಕ್ಲೆ ನಂಬಿಕೆದ ವಿಷಯೊನು ತೆರಿಯೊನಿಯೆರೆ ತಿಮೋಥಿನ್ ಕಡಪುಡಿಯೆ.</verse>
				<verse number="6">ಆಂಡ ತಿಮೋಥಿ ಎಂಕುಲೆ ಕೈತಲ್‌ ಬತ್ತ್‌ದ್ ನಿಕ್ಲೆನ ನಂಬಿಕೆ, ಪ್ರೀತಿದ ಸಂಗತಿಡ್ ಎಡ್ಡೆ ವರ್ತಮಾನ ಕೊರಿಯೆ. ನಿಕುಲು ಎಂಕ್ಲೆನ್ ಏಪಲಾ ಎಡ್ಡೆ ನೆನೆಪು ಮಲ್ತಿ ಲೆಕ್ಕನೇ ಎಂಕುಲುಲಾ ನಿಕ್ಲೆನ್ ತೂವೆರೆ ಆಸೆ ಮಲ್ಪುವ. ಅಂಚೆನೇ ನಿಕುಲುಲಾ ಎಂಕ್ಲೆನ್ ತೂವೆರೆ ಆಸೆ ಮಲ್ತೊಂದುಲ್ಲರ್ ಅಂದ್‌ದ್ ತೆರಿಪಾಯೆ.</verse>
				<verse number="7">ಅಂಚಾಯಿನೆಡ್ದ್ ಸಹೋದ್ರೆರೇ, ಉಂದೆನ್ ಕೇಂಡ್ದ್ ಎಂಕ್ಲೆನ ಮಾತ ಕೊರತೆಡ್ಲಾ ಭಂಗೊಲೆಡ್ಲಾ ನಿಕ್ಲೆನ ನಂಬಿಕೆಡ್ದಾದ್ ಎಂಕ್ಲೆಗ್ ಆಧರಣೆ ಆಂಡ್.</verse>
				<verse number="8">ನಿಕುಲು ಕರ್ತವಡ್ ಗಟ್ಟಿಯಾದ್ ಉಂತುವರ್ಡ ಎಂಕುಲು ಏತ್‌ಲಾ ಕಷ್ಟೊನು ಸಹಿಸೊಂದು ಬದುಕುವ.</verse>
				<verse number="9">ಎಂಕುಲು ದೇವೆರೆನ್ ಏತ್ ಪುಗರ್‌ಂಡಲಾ ಅವು ಕಮ್ಮಿಯೆ. ಆಂಡ ದೇವೆರೆ ಎದುರುಡು ನಿಕ್ಲೆಡ್ದ್ ಎಂಕ್ಲೆಗ್ ತಿಕ್ಕಿನ ಸಂತೋಷ ಅವು ಮಸ್ತ್ ಆದುಂಡು.</verse>
				<verse number="10">ನಿಕ್ಲೆನ ಮೋನೆ ತೂವರೆಗ್ಲಾ, ನಿಕ್ಲೆನ ನಂಬಿಕೆಡ್ ಕಡಿಮೆ ಆದುಪ್ಪುನೆನ್ ದಿಂಜಾಯೆರೆಗ್ಲಾ ಎಂಕ್ಲೆಗ್ ಅನುಕೂಲ ಆವೊಡು ಅಂದ್‌ದ್ ಎಂಕುಲು ರಾತ್ರೆ ಪಗೆಲ್ ದೇವೆರೆನ್ ಆಯಿನಾತ್ ನಟ್ಟೊಂದುಲ್ಲ.</verse>
				<verse number="11">ಇತ್ತೆ ಎಂಕುಲೆ ಅಮ್ಮೆ ಆದುಪ್ಪು ದೇವೆರ್‌ಲಾ, ಕರ್ತವ ಆದುಪ್ಪು ಯೇಸುಲಾ ಎಂಕ್ಲೆಗ್ ನಿಕ್ಲೆ ಕೈತಲ್‌ ಬರ್ಪಿನ ಅವಕಾಶೊನು ತಯಾರ್ ಮಲ್ಪಡ್.</verse>
				<verse number="12">ನಿಕ್ಲೆಡ್ ಎಂಕ್ಲೆನ ಪ್ರೀತಿ ಎಂಚ ಉಂಡಾ ಅಂಚೆನೇ ನಿಕ್ಲೆನ ಪ್ರೀತಿಲಾ ಒರಿ ಒರಿಯನ ಮಿತ್ತ್‌ಲಾ, ಮಾತ ನರಮಾನಿಲೆ ಮಿತ್ತ್‌ಲಾ ಇತ್ತ್‌ದ್ ಅಭಿವೃದ್ಧಿ ಆದ್ ಬುಲೆವೊಂದು ಪೋಪಿಲೆಕ್ಕ ಕರ್ತವೆ ನಡಪಾವಡ್.</verse>
				<verse number="13">ನಮ ಕರ್ತವೆ ಆದುಪ್ಪು ಯೇಸು ನಿಕ್ಲೆ ಉಡಲ್‌ನ್ ದೃಢ ಮಲ್ತ್‌ದ್ ತನ ಮಾತ ಭಕ್ತೆರೆಡೊಪ್ಪ ಬನ್ನಗ, ನಮ ಅಮ್ಮೆ ಆದುಪ್ಪು ದೇವೆರೆ ಎದುರು ನಿಕುಲು ಪರಿಶುದ್ಧೆರಾದ್, ಕಲೆದಾಂತೆ ಉಪ್ಪುಲೆಕ್ಕ ಮಲ್ಪಡ್.</verse>
			</chapter>
			<chapter number="4">
				<verse number="1">ಕಡೆಕ್ಕ್ ಸಹೋದ್ರೆರೇ, ದೇವೆರೆಗ್ ಮೆಚ್ಚಿಗೆ ಆಪಿನ ಜೀವನ ಎಂಚ ಮಲ್ಪೊಡಂದ್‌ದ್ ಎಂಕ್ಲೆಡ್ದ್ ಕಲ್ತೊಂಡರ್. ಅಂಚೆನೇ ನಡತೊಂದುಲ್ಲರ್; ನನಲಾ, ಹೆಚ್ಚೆಚ್ಚಾದ್ ನಡಪುಡೊಡು ಅಂದ್‌ದ್ ಎಂಕುಲು ಕರ್ತವೆ ಆದುಪ್ಪು ಯೇಸುಡ ನಟ್ಟೊಂದು ಬುದ್ಧಿ ಪನ್ಪ.</verse>
				<verse number="2">ಅಂಚೆನೇ ಎಂಕುಲು ಕರ್ತವೆ ಆದುಪ್ಪು ಯೇಸುನ ಅಧಿಕಾರೊಡು ನಿಕ್ಲೆಗ್ ಕೊರ್ತಿನ ಅಪ್ಪಣೆಲೆನ್ ನಿಕುಲು ತೆರಿದರತ್ತಾ.</verse>
				<verse number="3">ದೇವೆರೆನ ಚಿತ್ತ ನಿಕುಲು ಪರಿಶುದ್ಧೆರಾದ್ ಉಪ್ಪೊಡು ಪಂಡ್ದೇ. ಅಂಚಾಯಿನೆಡ್ದ್ ನಿಕುಲು ಹಾದ್ರೊಗು ದೂರ ಆದುಪ್ಪೊಡು.</verse>
				<verse number="4">ದೇವೆರೆನ್ ತೆರಿಯಂದಿನ ಪಿದಯಿದ ಜನೊಕುಲೆ ಲೆಕ್ಕ ಕಾಮದಾಶೆಗ್ ಒಳಗಾವೆರೆ ಬಲ್ಲಿ. ಪ್ರತಿ ಒರಿಲಾ ಮದ್ಮೆ ಆದ್ ಬೊಡೆದಿ ಒಟ್ಟುಗು ಪರಿಶುದ್ಧತೆಡ್ಲಾ ಮರ್ಯಾದಿಡ್ಲಾ ಉಪ್ಪೊಡು.</verse>
				<verse number="5"></verse>
				<verse number="6">ಈ ವಿಷಯೊಲೆಡ್ ನಿಕ್ಲೆಡ್ ಏರ್ಲಾ ತನ ಸಹೋದ್ರನ್ ಮೋಸ ಮಲ್ತ್‌ದ್ ಆಯಗ್ ಪಗೆ ಮಲ್ಪೆರೆ ಬಲ್ಲಿ. ಎಂಕುಲು ದುಂಬೇ ನಿಕ್ಲೆಗ್ ಎಚ್ಚರಿಕೆ ಕೊರ್ತಿನಂಚೆನೇ ಕುಡಲಾ ಪನ್ಪ, ಇಂಚಿತ್ತಿ ಪಾಪ ಕೃತ್ಯೊಲೆನ್ ಮಲ್ತಿನಾಕುಲೆಗ್ ಕರ್ತವೆ ಪಗತೆ ಕೊರ್ಪಿನಾಯೆ ಆದುಲ್ಲೆ.</verse>
				<verse number="7">ದೇವೆರ್ ನಮನ್ ಅಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ ಅತ್ತ್, ಪರಿಶುದ್ಧ ಜೀವನ ಮಲ್ಪೆರೆ ಲೆಯ್ದಿನಿ.</verse>
				<verse number="8">ಇಂಚ ಉಪ್ಪುನಗ ಈ ಪಾತೆರೊಲೆನ್ ತಿರಸ್ಕಾರ ಮಲ್ಪುನಾಯೆ ನರಮಾನಿಲೆನ್ ತಿರಸ್ಕಾರ ಮಲ್ಪುನು ಮಾತ್ರತ್ತಂದೆ, ನಿಕ್ಲೆಗ್ ಪರಿಶುದ್ಧಾತ್ಮ ವರ ಕೊರ್ಪಿನ ದೇವೆರೆನ್ಲಾ ತಿರಸ್ಕಾರ ಮಲ್ಪುನಾಯೆ ಆದುಲ್ಲೆ.</verse>
				<verse number="9">ಸಹೋದ್ರ ಪ್ರೀತಿದ ಬಗೆಟ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ, ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನೆನ್ ನಿಕುಲೇ ದೇವೆರೆಡ್ದ್ ಕಲ್ತ್‌ದ್‌ರ್‌.</verse>
				<verse number="10">ಉಂದೆನ್ ನಿಕುಲು ಇಡೀ ಮಕೆದೋನ್ಯೊಡುಪ್ಪು ಮಾತ ಸಹೋದ್ರೆರೆಗ್ ಮಲ್ಪುನಾಕುಲು ಆದುಲ್ಲರ್. ಆಂಡಲಾ ಸಹೋದ್ರೆರೇ, ನಿಕುಲು ಪ್ರೀತಿಡ್ ನನಲಾ ಬುಲೆವೊಂದು ಬರೊಡು ಅಂದ್‌ದ್ ನಿಕ್ಲೆಡ ಕೇನೊನ್ವ.</verse>
				<verse number="11">ನಿಕ್ಲೆಗ್ ಅಪ್ಪಣೆ ಕೊರ್ತಿ ಪ್ರಕಾರ, ನನೊರಿಯನ ಕೆಲಸೊಡು ತರೆ ಪಾಡಂದೆ ಶಾಂತೊಡು ಬದ್‌ಕ್‌ದ್ ಸ್ವಂತ ಕೆಲಸೊನು ಮಲ್ತೊಂದು ಉಪ್ಪುನವೇ ಎಡ್ಡೆ.</verse>
				<verse number="12">ಇಂಚ ಇತ್ತರ್ಡ ನಿಕುಲು ಪಿದಯಿದ ಜನೊಕುಲೆ ಎದುರುಡು ಮರ್ಯಾದಿಡ್ ನಡತೊಂದುಪ್ಪುವರ್, ನಿಕ್ಲೆಗ್ ಒಯಿಕ್‌ಲಾ ಕಡಿಮೆ ಆವಂದ್.</verse>
				<verse number="13">ಸಹೋದ್ರೆರೇ ನಿಕುಲು ಈ ಸತ್ಯೊನು ತೆರಿಯೊನೊಡು, ಸೈತ್ ಪೋತಿನಾಕುಲೆನ ಸಂಗತಿಡ್ ಭರವಸೆದಾಂತಿ ಜನೊಕುಲೆ ಲೆಕ್ಕ ದುಃಖ ಮಲ್ಪೊಡ್ಚಿ.</verse>
				<verse number="14">ಯೇಸು ಸೈತ್ ಪೋದು ಲಕ್ಕಿಯೆ ಅಂದ್‌ದ್ ನಮ ನಂಬುವಡ, ಅಂಚೆನೇ ದೇವೆರ್ ಯೇಸುಡೊಪ್ಪ ಇತ್ತಿನಾಕುಲು ಸೈತ್ ಪೋಯೆರ್ಡಲಾ ಅಕ್ಲೆನ್ ಲೆತ್ತೊಂದು ಬರುವೆ ಪನ್ಪಿ ವಿಷಯೊನ್ಲಾ ನಂಬೊಡು.</verse>
				<verse number="15">ಎಂಕುಲು ಕರ್ತವ ಪಾತೆರದ ಆಧಾರೊಡು ನಿಕ್ಲೆಗ್ ಬೋಧನೆ ಕೊರ್ಪಿನಿ ದಾನೆ ಪಂಡ ಕರ್ತವೆ ಬನ್ನಮುಟ್ಟ ಜೀವೊಡುಪ್ಪುನಾಕುಲು ಸೈತಿನಾಕುಲೆಡ್ದ್ ದುಂಬು ಏರ್ದ್ ಪೋವಯ.</verse>
				<verse number="16">ಕರ್ತವೆ ಸ್ವತಃ ಬನ್ನಗ ಮಲ್ಲ ಘೋಷಣೆಡ್ಲಾ ಮುಂದೂತನ ಶಬ್ಧದೊಟ್ಟುಡ್ಲಾ ದೇವೆರೆ ತುತೂರಿದ ಸ್ವರತ್ತ ಒಟ್ಟುಗು ಬಾನೊಡ್ದು ಜತ್ತ್‌ದ್ ಬರುವೆ, ಅಪಗ ಕ್ರಿಸ್ತಗಾದ್ ಸೈದಿನಾಕುಲು ದುಂಬತ್ತ ಲಕ್ಕುವೆರ್.</verse>
				<verse number="17">ಜೀವೊಡುಪ್ಪು ನಮಲಾ ಅಕ್ಲೆಡೊಪ್ಪ ಒಟ್ಟುಗು ಮುಗಲ್‌ದ ಮದ್ಯೊಡು, ಬಾನೊಡು ಕರ್ತವನ್ ಎದುಕೊನಿಯೆರೆ ದೆರ್ತಿನಾಕುಲಾದುಪ್ಪುವ, ಬೊಕ್ಕ ನಮ ಏಪಲಾ ಕರ್ತವಡೊಪ್ಪ ಉಪ್ಪುವ.</verse>
				<verse number="18">ಅಂಚಾಯಿನೆಡ್ದ್ ಈ ಪಾತೆರೊಲೆಡ್ದ್ ಒರಿಯನ್ ಒರಿ ಉಮೇದ್ ಕೊರ್ಲೆ.</verse>
			</chapter>
			<chapter number="5">
				<verse number="1">ಆಮೆನ್.ಸಹೋದ್ರೆರೇ, ಈ ಸಂಗತಿಲು ಆಪಿನ ಕಾಲೊಲು ಬೊಕ್ಕ ಗಳಿಗೆದ ಸಂಗತಿಡ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ.</verse>
				<verse number="2">ರಾತ್ರೆಡ್ ಕಲ್ವೆ ಬರ್ಪಿಲೆಕ್ಕನೇ, ಕರ್ತವ ದಿನಲ ಬರ್ಪುಂಡು ಅಂದ್‌ದ್ ನಿಕುಲು ಸರಿಯಾದ್ ತೆರಿದರತ್ತಾ.</verse>
				<verse number="3">ಜನೊಕುಲು ಸಮಾಧಾನೊಡ್ಲಾ ಪೋಡಿಗೆದಾಂತೆಲಾ ಉಲ್ಲ ಅಂದ್‌ದ್ ಪನೊಂದುಪ್ಪುನಪಗನೇ, ಬಂಜಿನಲೆಗ್ ಪೆದ್ಪಿಬೇನೆ ಬರ್ಪಿಲೆಕ್ಕ ಅಕ್ಲೆ ಮಿತ್ತ್ ನಾಶನ ಬರು. ಐಡ್ದ್ ತಪ್ಪಾವೆರೆ ಸಾದ್ಯೆನೇ ಇಜ್ಜಿ.</verse>
				<verse number="4">ಸಹೋದ್ರೆರೇ, ಕಲ್ವೆ ಬರ್ಪಿಲೆಕ್ಕನೇ ಆ ದಿನ ನಿಕ್ಲೆ ಮಿತ್ತ್ ಬರಿಯೆರೆ ಬಲ್ಲಿ. ಕಾರಣ ನಿಕುಲು ಕತ್ತಲೆಡ್ ಇತ್ತಿನಾಕುಲತ್ತ್.</verse>
				<verse number="5">ನಿಕುಲು ಬೊಲ್ಪುದಾಕುಲುಲಾ ಪಗೆಲ್‌ದಾಕುಲುಲಾ ಆದುಲ್ಲರ್, ನಮ ರಾತ್ರೆದಾಕುಲುಲಾ ಅತ್ತ್, ಕತ್ತಲೆದಾಕುಲುಲಾ ಅತ್ತ್.</verse>
				<verse number="6">ಐಡ್ದಾವರ ನಮ ಬೇತೆಕ್ಲೆ ಲೆಕ್ಕ ನಿದ್ರೆಡ್ ಜೆತೊಂದುಪ್ಪುನ ಬೊಡ್ಚಿ. ನಮ ಎಚ್ಚರಿಕೆಡಿತ್ತ್‌ದ್ ಸ್ವಸ್ಥಚಿತ್ತೊಡುಪ್ಪುಗ.</verse>
				<verse number="7">ನಿದ್ರೆ ಮಲ್ಪುನಾಕುಲು ರಾತ್ರೆಡ್ ನಿದ್ರೆ ಮಲ್ಪುವೆರ್, ಅಮಲಾಪಿನಾಕುಲು ರಾತ್ರೆಡ್ ಅಮಲಾಪೆರತ್ತಾ.</verse>
				<verse number="8">ನಮ ದಿನೊಕು ಸೇರ್ದಿನಾಕುಲು ಬೊಲ್ಪುದಾಕುಲು ಆದಿತ್ತಿನೆಡ್ದಾವರ ಸ್ವಸ್ಥಚಿತ್ತೊಡು ಉಪ್ಪೊಡು. ನಂಬಿಕೆ ಬೊಕ್ಕ ಪ್ರೀತಿ ಪನ್ಪಿ ತಿಗಲೆದ ಕವಚೊನ್ಲಾ ರಕ್ಷಣೆದ ಭರವಸ ಪನ್ಪಿನ ಟೊಪ್ಪಿನ್ಲಾ ಪಾಡೊಂದು ಎಚ್ಚರಿಕೆಡುಪ್ಪುಗ.</verse>
				<verse number="9">ದಾಯೆಗಂದ್ಂಡ, ದೇವೆರ್ ನಮನ್ ಕೋಪೊಗು ಗುರಿ ಆವೊಡು ಅಂದ್‌ದ್ ನೇಮಕ ಮಲ್ಪಂದೆ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ರಕ್ಷಣೆನ್ ಸಂಪಾದನೆ ಮಲ್ಪೊಡಂದ್‌ದ್ ನೇಮಕ ಮಲ್ತ್‌ದೆ.</verse>
				<verse number="10">ನಮ ಎಚ್ಚರಿಕೆಡಿತ್ತ್‌ಂಡಲಾ ಸರಿ, ನಿದ್ರೆಡಿತ್ತ್‌ಂಡಲಾ ಸರಿ, ತನ ಒಟ್ಟುಗೇ ಬದುಕೊಡು ಅಂದ್‌ದ್ ಆಯೆ ನಂಕಾದ್ ಸೈತೆ.</verse>
				<verse number="11">ಅಂಚಾಯಿನೆಡ್ದ್ ನಿಕುಲು ಇತ್ತೆ ಉಪ್ಪುಲೆಕ್ಕನೇ ಒರಿಯಗ್ ಒರಿ ಉಮೇದ್ ಕೊರ್ದು ಒರಿಯನ್ ಒರಿ ಭಕ್ತಿಡ್‌ ವೃದ್ಧಿ ಮಲ್ತೊಂದುಪ್ಪುಲೆ.</verse>
				<verse number="12">ಸಹೋದ್ರೆರೇ, ಎಂಕುಲು ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ, ಏರ್ ನಿಕ್ಲೆಡ್ ಪ್ರಯಾಸ ಮಲ್ತ್‌ದ್ ಕರ್ತವ ಕಾರ್ಯೊಡು ನಿಕ್ಲೆ ಮಿತ್ತ್ ಮುಖ್ಯಸ್ಥೆರಾದ್ ನಿಕ್ಲೆಗ್ ಬುದ್ಧಿ ಪನ್ಪೆರ್ಡ ಅಕ್ಲೆ ಮಿತ್ತ್ ಹೆಚ್ಚಿನ ಗಮನ ಕೊರ್ಲೆ.</verse>
				<verse number="13">ಅಕ್ಲೆನ ಬೇಲೆದ ಸಂಗತಿಡ್ ಅಕ್ಲೆನ್ ಪ್ರೀತಿಡ್ ಮಸ್ತ್ ಸನ್ಮಾನ ಮಲ್ಪೊಡು ಅಂದ್‌ದ್ ನಿಕ್ಲೆಡ ನಟ್ಟೊನ್ವ. ನಿಕ್ಲೆನಿಕ್ಲೆ ನಡುಟು ಸಮಾಧಾನೊಡುಪ್ಪುಲೆ.</verse>
				<verse number="14">ಸಹೋದ್ರೆರೇ, ಸೋಮಾರಿತನೊಟು ಉಪ್ಪುನಾಕುಲೆಗ್ ಬುದ್ಧಿ ಪನ್ಲೆ, ಮನಸ್ ಕುಂದುದು ಪೋಯಿನಾಕುಲೆಗ್ ಧೈರ್ಯ ಕೊರ್ಲೆ, ಬಲಹೀನೆರೆಗ್ ಆಧಾರ ಕೊರ್ಲೆ, ಮಾತೆರೆ ಒಟ್ಟುಡ್ಲಾ ತೀರುನಾತ್ ತಾಳ್ಮೆಡುಪ್ಪುಲೆ ಅಂದ್‌ದ್ ನಿಕ್ಲೆನ್ ಕೇನೊನ್ವೆ.</verse>
				<verse number="15">ಏರ್ಲಾ ಅನ್ಯಾಯ ಮಲ್ತಿನಾಕುಲೆಗ್ ಅನ್ಯಾಯ ಮಲ್ಪೊಡ್ಚಿ. ಏಪಲಾ ನಿಕುಲು ಒರಿ ಒರಿಯಗಾದ್‌ಲಾ ಮಾತೆರೆಗಾದ್‌ಲಾ ಎಡ್ಡೆ ಮಲ್ಪೆರೆ ತೂಲೆ.</verse>
				<verse number="16">ಏಪಲಾ ಸಂತೋಷೊಡುಪ್ಪುಲೆ.</verse>
				<verse number="17">ಬುಡಂದೆ ಪ್ರಾರ್ಥನೆ ಮಲ್ಪುಲೆ.</verse>
				<verse number="18">ಮಾತ ವಿಷಯೊಡ್ಲಾ ಉಪಕಾರ ಸ್ತುತಿ ಮಲ್ಪುಲೆ. ಉಂದೇ ನಿಕ್ಲೆನ ಸಂಗತಿಡ್ ಕ್ರಿಸ್ತ ಯೇಸುಡ್ದು ತೋಜಿದ್ ಬರ್ಪಿನ ದೇವೆರೆನ ಚಿತ್ತ ಆದುಂಡು.</verse>
				<verse number="19">ನಿಕ್ಲೆಡಿತ್ತಿನ ಪರಿಶುದ್ಧಾತ್ಮದ ತೂನು ತೆಕ್ಕಾವಡೆ.</verse>
				<verse number="20">ಪ್ರವಾದನೆನ್ ಹೀನ ಮಲ್ಪಡೆ, ಐಕ್ ಸನ್ಮಾನ ಕೊರ್ಲೆ.</verse>
				<verse number="21">ಆಂಡ ಮಾತೆನ್ಲಾ ಪರೀಕ್ಷೆ ಮಲ್ತ್‌ದ್, ಐಟ್ಟ್ ಎಡ್ಡೆಂತಿನೆನೇ ಗಟ್ಟಿಯಾದ್ ಪತ್ತೊನ್ಲೆ.</verse>
				<verse number="22">ಮಾತ ತರತ ಪಡಿಕೆತನೊಡ್ದು ದೂರ ಉಪ್ಪುಲೆ.</verse>
				<verse number="23">ಸಮಾಧಾನದ ದೇವೆರ್ ತಾನೇ ನಿಕ್ಲೆನ್ ಪೂರ್ತಿ ಆದ್ ಪರಿಶುದ್ಧ ಮಲ್ಪಡ್. ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನ ಸಮಯೊಡು, ನಿಕ್ಲೆ ಆತ್ಮ, ಪ್ರಾಣ, ಶರೀರ, ತಪ್ಪುದಾಂತೆ ಪರಿಪೂರ್ಣ ಆದ್ ತೋಜುಲೆಕ್ಕ ಕಾಪಡ್.</verse>
				<verse number="24">ನಿಕ್ಲೆನ್ ಲೆಪ್ಪುನಾಯೆ ನಂಬಿಗಸ್ತೆ, ಉಂದೆನ್ ಆಯೆನೇ ಮಲ್ಪುವೆ.</verse>
				<verse number="25">ಸಹೋದ್ರೆರೇ, ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ.</verse>
				<verse number="26">ಪರಿಶುದ್ಧದ ಮುದ್ದು ಕೊರ್ದು ಸಹೋದ್ರೆರೆನ್ ವಂದಿಪುಲೆ.</verse>
				<verse number="27">ಈ ಪತ್ರಿಕೆನ್ ಮಾತ ಸಹೋದ್ರೆರೆಗ್ ಓದುದು ತೆರಿಪಾವೊಡು ಅಂದ್‌ದ್ ಕರ್ತವಡ್ ಒತ್ತಾಯ ಮಲ್ಪುವೆ.</verse>
				<verse number="28">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆಡೊಪ್ಪ ಉಪ್ಪಡ್. ಆಮೆನ್.</verse>
			</chapter>
		</book>
		<book number="53">
			<chapter number="1">
				<verse number="1">ನಮ ಅಮ್ಮೆ ಆದುಪ್ಪು ದೇವೆರೆಡ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ಲಾ ಉಪ್ಪು ಥೆಸ್ಸಲೋನಿಕೆರೆ ಸಭೆಕ್ ಪೌಲು, ಸೀಲೆ, ತಿಮೋಥಿಯೆರೊಡೊಪ್ಪ ಬರೆಪಿನ ದಾನೆಂದ್ಂಡ,</verse>
				<verse number="2">ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="3">ಸಹೋದ್ರೆರೇ, ನಿಕ್ಲೆನ ನಂಬಿಕೆ ದಿನೊಡ್ದು ದಿನ ಬುಲೆವೊಂದುಂಡು. ಬೊಕ್ಕ ನಿಕ್ಲೆ ಉಲಯಿದ ಪ್ರೀತಿ ನಿಕ್ಲೆ ಮಾತೆರೆಡ್ ಹೆಚ್ಚೊಂದು ಬರ್ಪಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು.</verse>
				<verse number="4">ನಿಕ್ಲೆಗ್ ಬೈದಿನ ಮಾತ ಭಂಗದ ನಡುಟ್ಲಾ ನಿಕ್ಲೆ ತಾಳ್ಮೆನ್ಲಾ ನಂಬಿಕೆನ್ಲಾ ನೆನೆತ್‌ದ್ ದೇವೆರೆ ಸಭೆಟ್ ನಿಕ್ಲೆ ಸಂಗತಿಡ್ ಪುಗರೊನ್ವ.</verse>
				<verse number="5">ನಿಕುಲು ದೇವೆರೆ ರಾಜ್ಯೊಗು ಯೋಗ್ಯೆರಾವೊಡಂದ್ದೇ ದೇವೆರೆನ ಆಸೆ. ಐಕಾದ್ ತಾಳ್ಮೆಡ್ ಇತ್ತ್‌ದ್ ಕಷ್ಟ ತಾಳೊಡು, ಉಂದು ಮಾತ ದೇವೆರೆನ ನೀತಿದ ನ್ಯಾಯೊಗು ಸರಿ ಆದುಂಡು. ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಅಂಚೆನೇ ಭಂಗ ಕೊರ್ಪಿನವು ದೇವೆರೆನ ನ್ಯಾಯದ ಸಾಕ್ಷಿ ಆದುಂಡು.</verse>
				<verse number="6"></verse>
				<verse number="7">ಬೊಕ್ಕ ತೊಂದರೆಡುಪ್ಪು ನಿಕ್ಲೆಗ್ ನೆಮ್ಮದಿಗೆನ್ ಒದಗಾವು ಲೆಕ್ಕನೆ ನಿಕ್ಲೆ ಒಟ್ಟುಗು ಎಂಕುಲೆಗ್ಲಾ ಒದಗಾವೆ. ಅವು ಯೇಸು ಕ್ರಿಸ್ತೆ ತನ ಬಲೊಟು ದೂತೆರೆಡೊಪ್ಪ ಅರ್ಲುನ ತೂತ ನಡುಟು ಬಾನೊಡು ತೋಜಿದ್ ಬನ್ನಗ ಆವು. ಆಯೆ ದೇವೆರೆನ್ ತೆರಿಯಂದಿನಾಕುಲೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಸುವಾರ್ತೆಗ್ ಒಳಗಾವಂದಿನಾಕುಲೆಗ್ಲಾ ಶಿಕ್ಷೆನ್ ಕೊರ್ಪೆ.</verse>
				<verse number="8"></verse>
				<verse number="9">ಅಂಚಿತ್ತಿನಾಕುಲು ಕರ್ತವ ಸನ್ನಿಧಾನೊಡ್ದುಲಾ ಮಾನ ಮೈಮೆಡ್ದ್‌ಲಾ ದೂರ ಆದ್ ನಿತ್ಯನಾಶನದ ಶಿಕ್ಷೆಗ್ ಗುರಿ ಆಪೆರ್.</verse>
				<verse number="10">ಆ ದಿನೊಟು ಆಯೆ ತನ ಪರಿಶುದ್ಧವಂತೆರೆಡ್ ಮೈಮೆ ಪಡೆವೊಂದು ಮಾತ ನಂಬುನಾಕುಲೆಗ್ ಮೆಚ್ಚಿಗೆದಾಯೆ ಆದ್ ತೋಜಿದ್ ಬರುವೆ. ಇಂಚ ಉಪ್ಪುನಗ ಎಂಕುಲು ಕೊರಿ ಸಾಕ್ಷಿನ್ ನಂಬಿ ನಿಕುಲುಲಾ ಅಕ್ಲೆಡೊಪ್ಪ ಉಪ್ಪರ್.</verse>
				<verse number="11">ಉಂದೆನ್ ನೆನೆತೊಂದು ಎಂಕುಲು ಏಪಲಾ ನಿಕ್ಲೆಗ್ ಬೋಡಾದ್ ಇಂಚ ಪ್ರಾರ್ಥನೆ ಮಲ್ತೊಂದುಲ್ಲ. ನಮ ದೇವೆರ್ ನಿಕ್ಲೆನ್ ಆಯನ ರಾಜ್ಯೊಗು ಯೋಗ್ಯೆರಾದ್ ಮಲ್ಪಡ್, ತನ ಎಡ್ಡೆಂತಿನ ಚಿತ್ತೊನ್ಲಾ ನಂಬಿಕೆದ ಕೆಲಸೊನ್ಲಾ ತನ ಬಲೊಟು ತೀರಿಸಾವಡ್.</verse>
				<verse number="12">ಇಂಚ ನಮ ದೇವೆರೆನಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನಲಾ ದಯೆಡ್ದ್ ನಮ ಕರ್ತವೆ ಆದುಪ್ಪು ಯೇಸು ಪುದರ್‌ಗ್ ಮೈಮೆ ಆವಡ್ ಬೊಕ್ಕ ಆಯಡ್ದ್ ನಿಕ್ಲೆಗ್ಲಾ ಮೈಮೆ ಆವಡ್. ಆಮೆನ್.</verse>
			</chapter>
			<chapter number="2">
				<verse number="1">ಸಹೋದ್ರೆರೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಬರ್ಪಿನೆತ್ತ ವಿಷಯೊಡ್ಲಾ ನಮ ಆಯ ಕೈತಲ್‌ ಒಟ್ಟು ಆಪಿನ ವಿಷಯೊಡ್ಲಾ ನಿಕ್ಲೆಡ ನಟ್ಟೊಂದುಲ್ಲ ದಾನೆಂದ್ಂಡ,</verse>
				<verse number="2">ಕರ್ತವೆ ಬರ್ಪಿನ ದಿನ ಕೈತಲಾತ್ತ್ಂಡ್ ಅಂದ್‌ದ್ ಕೆಲೆವೆರ್ ಆತ್ಮೊಡ್ದುಲಾ ಕೆಲೆವೆರ್ ಪಾತೆರೊಡ್ದುಲಾ, ಕೆಲೆವೆರ್ ಎಂಕುಲು ಇಂಚ ಪತ್ರಿಕೆ ಬರೆತ ಪಂಡ್ದ್‌ಲಾ ಪನ್ವೆರ್. ಉಂದೆನ್ ಕೇಂಡ್ದ್ ನಿಕ್ಲೆ ಮನಸ್‌ಡ್ ಬೇಗನೆ ಬುದ್ಧಿಕೆಟ್ಟ್‌ದ್ ಚಂಚಲ ಆವಡೆ.</verse>
				<verse number="3">ಏರ್ಲಾ ನಿಕ್ಲೆನ್ ವಾ ವಿಷಯೊಡ್ಲಾ ಮೋಸೊಡು ಪಾಡಂದೆ ಉಪ್ಪಡ್. ದಾಯೆಗಂದ್ಂಡ, ದೇವೆರೆಗ್ ವಿರೋಧ ಆಪಿ ಸಮಯ ಬತ್ತಿ ಬೊಕ್ಕ ನಿತ್ಯನಾಶನ ಕನಪಿನ ಅನ್ಯಾಯಗಾರೆ ಬೈಲ್‌ಗ್ ಬರ ಮುಟ್ಟ ಆ ದಿನ ಬರ್ಪುಜಿ.</verse>
				<verse number="4">ಆ ಅನ್ಯಾಯಗಾರೆ ಪ್ರತಿಯೊಂಜೆನ್ ವಿರೋಧ ಮಲ್ತ್‌ದ್ ತಾನೇ ಮಲ್ಲಾಯೆ ಅಂದ್‌ದ್ ಮೆಚ್ಚಾವೊಂದು, ತಾನೇ ದೇವೆರ್ ಪನೊಂದು, ಪೂಜೆಗ್ ತಕ್ಕದಾಯೆ ಅಂದ್‌ದ್ ದೇವೆರೆನ ಗರ್ಭಗುಡಿಟೇ ಕುಲ್ಲುವೆ.</verse>
				<verse number="5">ಯಾನ್ ನಿಕ್ಲೆ ಒಟ್ಟುಗು ಉಪ್ಪುನಗ ಈ ಸಂಗತಿನ್ ಪಂಡ್ದಿತ್ತೆ, ಅವು ನಿಕ್ಲೆಗ್ ನೆನೆಪು ಇಜ್ಜಾ?</verse>
				<verse number="6">ಆ ನರಮಾನಿ ನೇಮಕ ಆತಿನ ಸಮಯೊಡೇ ತೋಜಿದ್ ಬರ್ಪಿನೆಕ್ಕ್ ಎಂಚಿನ ತಡೆ ಮಲ್ಪುಂಡು ಅಂದ್‌ದ್ ಅವು ನಿಕ್ಲೆಗ್ ತೆರಿದೇ ಉಂಡು.</verse>
				<verse number="7">ಅನ್ಯಾಯ ಇತ್ತೆಲಾ ಗುಟ್ಟುಡು ನಡತೊಂದು ಉಂಡು. ಉಂದೆಕ್ಕ್ ಅಡ್ಡಿ ಮಲ್ಪುನಾಯನ್ ದೆತ್ತೊನುನ ಮುಟ್ಟ ಅನ್ಯಾಯದ ಕೆಲಸೊನು ಆಯೆ ಗುಟ್ಟುಡೆ ಮಲ್ತೊಂದುಪ್ಪುವೆ.</verse>
				<verse number="8">ಐಡ್ದ್ ಬೊಕ್ಕ ಆ ಅನ್ಯಾಯಗಾರೆ ತೋಜಿದ್ ಬರ್ಪೆ. ಅಪಗ ಕರ್ತವೆ ಆದುಪ್ಪು ಯೇಸು ತನ ಬಾಯಿದ ಶ್ವಾಸೊಡ್ದು ಆಯನ್ ಕೆರ್ದ್, ತನ ಮೈಮೆದ ಬೊಲ್ಪುಡು ಬನ್ನಗ ಆಯನ್ ನಾಶ ಮಲ್ಪುವೆ. ಆ ಅನ್ಯಾಯದ ನರಮಾನಿ ಬನ್ನಗ ಸೈತಾನನ ಕಾರ್ಯೊಲು ಬಲೊಟ್ಲಾ ಗುರ್ತ ಕಾರ್ನಿಕೊಲೆಡ್ಲಾ ನಡಪು.</verse>
				<verse number="9"></verse>
				<verse number="10">ಬೊಕ್ಕ ನಾಶಾದ್ ಪೋಪಿನಾಕುಲೆನ್ ಆಯೆ ಅನ್ಯಾಯದ ವಂಚನೆಡ್ ತಿಕ್ಕಾವೆ. ದಾಯೆಗಂದ್ಂಡ, ಅಕುಲು ಸತ್ಯದ ಮಿತ್ತ್ ಪ್ರೀತಿ ದೀವಂದಿನೆಡ್ದಾವರ ರಕ್ಷಣೆ ಹೊಂದಂದೆ ನಾಶ ಆಪೆರ್.</verse>
				<verse number="11">ಆ ಕಾರಣೊಡ್ದಾವರ, ದೇವೆರ್ ಅಕ್ಲೆಗ್ ಸುಳ್ಳುನು ನಂಬಿಯೆರೆ ಭ್ರಮೆನ್ ಕಡಪುಡ್ದು ಆ ಸುಳ್ಳುನು ನಂಬಿಯೆರೆ ಅಕ್ಲೆನ್ ಬುಡ್ಪೆ.</verse>
				<verse number="12">ಉಂದೆಡ್ದ್ ಅಕುಲು ಸತ್ಯೊನು ನಂಬಂದೆ, ಇಂಚಿನ ಅನ್ಯಾಯೊಡು ಸಂತೋಷ ಮಲ್ಪುನಾಕುಲಾದ್ ನ್ಯಾಯತೀರ್ಪುಗು ಗುರಿ ಆಪೆರ್.</verse>
				<verse number="13">ಆಂಡ ಕರ್ತವಗ್ ಪ್ರೀತಿ ಇತ್ತಿ ಸಹೋದ್ರೆರೇ, ದೇವೆರ್ ಸುರುಡ್ದು ನಿಕ್ಲೆನ್ ಪರಿಶುದ್ಧಾತ್ಮಡ್ ಶುದ್ಧ ಮಲ್ತ್‌ದ್ ಸತ್ಯದ ನಂಬಿಕೆಡ್ ತಿಕ್ಕು ರಕ್ಷಣೆಗ್ ಆದಿಡ್ದ್ ಅಜತ್‌ದ್ ದೆತ್ತೊಂಡಿನೆಡ್ದ್ ಎಂಕುಲು ನಿಕ್ಲೆನ ಸಂಗತಿಡ್ ದೇವೆರೆಗ್ ಏಪಲಾ ಉಪಕಾರ ಮಲ್ಪುನವು ಅಗತ್ಯ ಆದುಂಡು.</verse>
				<verse number="14">ಎಂಕ್ಲೆನ ಸುವಾರ್ತೆಡ್ದ್ ದೇವೆರ್ ನಿಕ್ಲೆನ್ ರಕ್ಷಣೆಗ್ ಲೆತ್ತೆ, ಐಡ್ದಾವರ ನಿಕುಲು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಮೈಮೆಡ್ ಪಾಲ್‌ದಾರೆರಾದುಲ್ಲರ್.</verse>
				<verse number="15">ಅಂಚಾದ್ ಸಹೋದ್ರೆರೇ, ನಿಕುಲು ಎಂಕುಲೆ ಪಾತೆರೊಡ್ದುಲಾ ಪತ್ರಿಕೆಡ್ದ್‌ಲಾ ನಿಕ್ಲೆಗ್ ಕಲ್ಪಾದಿನ ಸತ್ಯೊನು ಪತ್ತೊಂದು ಐತ ಮಿತ್ತ್ ಗಟ್ಟಿಯಾದ್ ಉಂತುಲೆ.</verse>
				<verse number="16">ನಮ ಅಮ್ಮೆ ಆದುಪ್ಪು ದೇವೆರ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆಲಾ ನಮನ್ ಮಸ್ತ್ ಪ್ರೀತಿ ಮಲ್ತ್‌ದ್ ದಯೊಟು ನಂಕ್ ನಿತ್ಯದ ಆಧಾರಣೆನ್ಲಾ, ಎಡ್ಡೆ ನಿರೀಕ್ಷೆನ್ಲಾ ಕೊರ್ದು</verse>
				<verse number="17">ನಿಕ್ಲೆನ ಉಡಲ್‌ನ್ ಸಂತೈಸಿದ್ ಮಾತ ಎಡ್ಡೆ ಕೆಲಸೊಡ್ಲಾ ಪಾತೆರೊಡ್ಲಾ ಗಟ್ಟಿ ಮಲ್ಪಡ್.</verse>
			</chapter>
			<chapter number="3">
				<verse number="1">ಕಡೆತ ಪಾತೆರ ದಾನೆಂದ್ಂಡ ಸಹೋದ್ರೆರೇ, ನಿಕುಲು ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ. ಕರ್ತವ ಪಾತೆರೊಲು ಎಂಚ ನಿಕ್ಲೆಗ್ ಮುಟ್ಟುದು ನಿಕ್ಲೆಡ್ ಎಂಚ ಪ್ರಖ್ಯಾತ ಆದ್ ಪರಡೊಂದು ಉಂಡಾ ಅಂಚೆನೇ ಆ ಪಾತೆರೊಲು ಅಲ್ಪಲ್ಪ ಬೇಗನೆ ಪರಡಡ್.</verse>
				<verse number="2">ದೇವೆರ್ ಎಂಕ್ಲೆನ್ ದುಷ್ಟೆರಾದುಪ್ಪು ಹಾಳ್ ಜನೊಕುಲೆಡ್ದ್ ತಪ್ಪಾವೊಡಂದ್‌ದ್ ಪ್ರಾರ್ಥನೆ ಮಲ್ತೊಂದುಪ್ಪುಲೆ, ದಾಯೆಗಂದ್ಂಡ ಮಾತೆರೆಡ್ ಕ್ರಿಸ್ತ ನಂಬಿಕೆ ಉಪ್ಪುಜತ್ತಾ.</verse>
				<verse number="3">ಆಂಡ ಕರ್ತವೆ ನಂಬಿಗಸ್ತೆ, ಆಯೆ ನಿಕ್ಲೆನ್ ಗಟ್ಟಿ ಮಲ್ತ್‌ದ್ ಪಡಿಕೆಂತಿನಾಯಡ್ದ್ ತಪ್ಪಾದ್ ಕಾಪುವೆ.</verse>
				<verse number="4">ಎಂಕುಲು ನಿಕ್ಲೆಗ್ ಕೊರ್ತಿನ ಅಪ್ಪಣೆದಂಚೆನೇ, ನಿಕುಲು ನಡತೊಂದುಲ್ಲರ್. ಅಂಚೆನೇ ನನಲಾ ದುಂಬಗ್ ನಡಪುವರ್ ಅಂದ್‌ದ್ ಕರ್ತವಡ್ ಎಂಕ್ಲೆಗ್ ಭರವಸ ಉಂಡು.</verse>
				<verse number="5">ಕರ್ತವೆ ನಿಕ್ಲೆ ಉಡಲ್‌ನ್ ದೇವೆರೆ ಪ್ರೀತಿಡ್ಲಾ ಕ್ರಿಸ್ತನ ತಾಳ್ಮೆಡ್ಲಾ ಉಪ್ಪುಲೆಕ್ಕ ನಡಪಾವಡ್.</verse>
				<verse number="6">ಆಂಡ ಸಹೋದ್ರೆರೇ, ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಪುದರ್‌ಡ್ ಎಂಕುಲು ನಿಕ್ಲೆಗ್ ಅಪ್ಪಣೆ ಕೊರ್ಪ ದಾನೆ ಪಂಡ ಎಂಕ್ಲೆಡ್ದ್ ತಿಕ್ಕಿನ ಬೋಧನೆನ್ ಬುಡ್ದು ಸೋಮಾರಿತನೊಟು ಉಪ್ಪುನ ಸಹೋದ್ರೆರೆಡ್ದ್ ದೂರಾದುಪ್ಪುಲೆ.</verse>
				<verse number="7">ಎಂಕ್ಲೆನ್ ತೂದು ಎಂಚ ನಡಪುಡೊಡು ಅಂದ್‌ದ್ ನಿಕ್ಲೆಗೇ ಗೊತ್ತುಂಡು. ಎಂಕುಲು ನಿಕ್ಲೆ ಒಟ್ಟುಗು ಉಪ್ಪುನಗ ಸೋಮಾರಿತನೊಟು ಏಪಲಾ ಇತ್ತ್‌ಜ.</verse>
				<verse number="8">ಕಾಸ್ ಕೊರಂದೆ ಏರೆನಲಾ ರೊಟ್ಟಿ ಪೊಕ್ಕಡೆಗ್ ತಿಂತ್‌ಜ. ಎಂಕುಲು ರಾತ್ರೆ ಪಗೆಲ್ ಕಷ್ಟೊಡು ಬೆಂದ್‌ದ್ ನಿಕ್ಲೆಗ್ ಏರೆಗ್ಲಾ ದುನ್ನ ಆವಂದಿಲೆಕ್ಕ ಜೀವನ ಮಲ್ತೊಂದಿತ್ತ.</verse>
				<verse number="9">ಎಂಕ್ಲೆಗ್ ನಿಕ್ಲೆಡ್ದ್ ನಿಜಾದ್ ವಣಸ್ ದೆತ್ತೊನುನ ಹಕ್ಕ್ ಇತ್ತ್ಂಡ್, ಆಂಡ ಎಂಕುಲು ಇಂಚ ಮಲ್ತಿನಿ ದಾಯೆಗ್ ಪಂಡ ನಿಕ್ಲೆಗ್ ಒಂಜಿ ಮಾದ್ರಿ ಆದ್ ನಿಕುಲು ಎಂಕುಲೆ ಲೆಕ್ಕನೆ ಉಪ್ಪೊಡು ಪಂಡ್ದ್.</verse>
				<verse number="10">ಎಂಕುಲು ನಿಕ್ಲೆ ಒಟ್ಟುಗು ಉಪ್ಪುನಗ, ಬೇಲೆ ಮಲ್ಪಂದಿನಾಯೆ ವಣಸ್‌ಲಾ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ ಅಪ್ಪಣೆ ಕೊರ್ತ.</verse>
				<verse number="11">ಆಂಡ ನಿಕ್ಲೆಡ್ ಕೆಲೆವೆರ್ ಸೋಮಾರಿತನೊಟು ಇತ್ತ್‌ದ್ ಬೇತೆಕ್ಲೆನ ಕೆಲಸೊಗು ತರೆ ಪಾಡ್ದ್, ದಿನ ದೆಪ್ಪುನಾಕುಲಾದ್ ಉಲ್ಲರಂದ್‌ದ್ ಎಂಕುಲು ಇಂಚಲಾ ವರ್ತಮಾನ ಕೇನೊಂದುಲ್ಲ.</verse>
				<verse number="12">ಇಂಚಿತ್ತಿನಾಕುಲೆಗ್ ಎಂಕುಲು ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ಅಪ್ಪಣೆ ಕೊರ್ದು ಎಚ್ಚರಿಕೆ ಕೊರೊಂದುಲ್ಲ ದಾನೆ ಪಂಡ, ಶಾಂತೊಡು ಸ್ವಂತ ಕೆಲಸೊನು ಮಲ್ತ್‌ದ್, ತನ್ಕುಲು ಸಂಪಾದನೆ ಮಲ್ತಿನೆಟ್ಟೇ ದಿನ ದೆಪ್ಪೊಡು.</verse>
				<verse number="13">ಸಹೋದ್ರೆರೇ, ನಿಕುಲು ಎಡ್ಡೆ ಮಲ್ಪುನೆಕ್ಕ್ ಬೇಜಾರ್ ಮಲ್ಪೊಡ್ಚಿ.</verse>
				<verse number="14">ಆಂಡ ಎಂಕುಲು ಪತ್ರಿಕೆಡ್ ಬರೆತಿ ಪಾತೆರದ ಲೆಕ್ಕ ಒರಿ ನಡತಿಜೆಡ, ಆಯನ್ ಗುರ್ತ ದೀದ್, ಆಯಗ್ ನಾಚಿಗೆ ಆಪಿಲೆಕ್ಕ ಆಯನ ಸುದ್ಧಿಗ್ ಪೋವೊಡ್ಚಿ.</verse>
				<verse number="15">ಆಂಡಲಾ ಆಯನ್ ಪಗೆನಾಯೆ ಅಂದ್‌ದ್ ಎನ್ನಂದೆ, ಸಹೋದರೆ ಅಂದ್‌ದ್ ಎನ್ನ್‌ದ್ ಬುದ್ಧಿ ಪನ್ಲೆ.</verse>
				<verse number="16">ಸಮಾಧಾನದ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ತಾನೇ ನಿಕ್ಲೆಗ್ ಏಪಲಾ, ಪ್ರತಿಯೊಂಜಿ ವಿಷಯೊಡ್ಲಾ, ಸಮಾಧಾನ ಕೊರಡ್. ಕರ್ತವೆ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.</verse>
				<verse number="17">ಪೌಲು, ಯಾನ್ ಎನ ಸ್ವಂತ ಕೈಟ್ ನಿಕ್ಲೆಗ್ ವಂದನೆ ಬರೆಪಿನಿ. ಎನ ಮಾತ ಪತ್ರಿಕೆಡ್ಲಾ ಉಂದೇ ಗುರ್ತ ಇಂಚೆನೆ ಬರೆಪೆ.</verse>
				<verse number="18">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="54">
			<chapter number="1">
				<verse number="1">ನಮ ರಕ್ಷಕೆ ಆದುಪ್ಪು ದೇವೆರೆಡ್ದ್‌ಲಾ ನಮ ನಿರೀಕ್ಷೆಗ್ ಆಧಾರ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ಅಪ್ಪಣೆಗ್ ಸರಿಯಾದ್ ನೇಮಕವಾಯಿನ ಯೇಸು ಕ್ರಿಸ್ತನ ಅಪೊಸ್ತಲೆ ಪೌಲು,</verse>
				<verse number="2">ನಂಬಿಕೆಡ್ ನಿಜ ಮಗೆ ಆದುಪ್ಪು ತಿಮೋಥಿಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ನಿಕ್ಕ್ ದಯಲಾ ಕರುಣೆಲಾ ಸಮಾಧಾನಲಾ ಆವಡ್.</verse>
				<verse number="3">ಯಾನ್ ಮಕೆದೋನ್ಯೊಗು ಪೋನಗ ಈ ಎಫೆಸಡೆ ಇತ್ತ್‌ದ್ ಅಲ್ಪ ಉಪ್ಪುನ ಕೆಲೆವೆರೆಗ್, ನಿಕುಲು ಬೇತೆ ಬೋಧನೆನ್ ಮಲ್ಪೆರೆ ಬಲ್ಲಿ ಪಂಡ್ದ್‌ಲಾ</verse>
				<verse number="4">ಅಂಚೆನೇ, ಕಟ್ಟುಕತೆಕ್ಲೆಗ್ಲಾ ಕೊಡಿಮುದೆಲ್ ಇಜ್ಜಂದಿನ ಸಂತಾನ ಪಟ್ಟಿಲೆಗ್ಲಾ ಗೇನ ಕೊರಿಯೆರೆ ಬಲ್ಲಿ ಪಂಡ್ದ್, ದುಂಬು ಯಾನ್ ನಿಕ್ಕ್ ಅಪ್ಪಣೆ ಕೊರ್ತಿ ಲೆಕ್ಕನೇ ಇತ್ತೆಲಾ ಪನೊಂದುಲ್ಲೆ. ಇಂಚಿತ್ತಿನವು ದುಂಬಗ್ ತರ್ಕ ಪುಟ್ಟಾವುನವು ಅತ್ತಂದೆ ದೇವೆರ್ ಮಲ್ಪೊಡಿತ್ತಿ ಕೆಲಸೊಲೆಗ್ ಬಳಕೆ ಆಪುಜಿ. ಅವು ನಂಬಿಕೆಡ್ದ್ ಸಾದ್ಯ ಆಪುಂಡು. ಶುದ್ಧ ಹೃದಯ, ಎಡ್ಡೆ ಮನಸಾಕ್ಷಿ, ಕಪಟದಾಂತಿ ನಂಬಿಕೆ, ಇಂಚಿತ್ತಿನೆಡ್ದ್ ಉಂಡಾಯಿ ಪ್ರೀತಿಯೇ ದೇವೆರೆ ಪಾತೆರದ ಬೋಧನೆ ಆದುಂಡು.</verse>
				<verse number="5"></verse>
				<verse number="6">ಕೆಲೆವೆರ್ ಈ ಮುಖ್ಯ ವಿಷಯೊಲೆಡ್ದ್ ತತ್ತ್‌ದ್ ಪೋದು ಬೊಡ್ಚಾವಂದಿನ ತರ್ಕೊಲೆಗ್ ಬೂರ್ದೆರ್.</verse>
				<verse number="7">ಅಕುಲು ನ್ಯಾಯಕಟ್ಟ್‌ದ ಬೋಧಕೆರ್ ಅಂದ್‌ದ್ ತೋಜಾವೊನಿಯೆರೆ ಆಸೆ ಮಲ್ಪುವೆರ್. ಆಂಡ ಅಕುಲು ತನ್ಕುಲು ಮಲ್ಪುನ ಬೋಧನೆನ್ಲಾ ಪಾತೆರುನ ವಿಷಯೊನ್ಲಾ ತೆರಿಯಂದಿನಾಕುಲಾದುಲ್ಲೆರ್.</verse>
				<verse number="8">ನ್ಯಾಯಕಟ್ಟ್ ಎಡ್ಡೆ ಅಂದ್‌ದ್ ನಮ ತೆರಿದ, ಆಂಡ ಅವೆನ್ ಉದ್ದೇಶೊಗು ಸರಿಯಾದ್ ಉಪಯೋಗ ಮಲ್ಪೊಡು.</verse>
				<verse number="9">ಈ ನ್ಯಾಯಕಟ್ಟ್ ನೀತಿವಂತೆರೆಗ್ ಅತ್ತ್, ಆಂಡ ಅನ್ಯಾಯಗಾರೆರ್, ಅವಿಧೇಯೆರ್, ಭಕ್ತಿಹೀನೆರ್, ಪಾಪಿಷ್ಟೆರ್, ಲೋಕದಾಕುಲು, ನೀಚೆರ್, ತನ್ಕುಲೆ ಅಪ್ಪೆಅಮ್ಮಾಡ್ಲೆಗ್ ಪೆಟ್ಟು ಪಾಡುನಾಕುಲು, ಮಾನ್ಯ ಕೆರ್ಪಿನಾಕುಲು, ಹಾದ್ರದಾಕುಲು, ಪುರುಷಗಾಮಿಲು, ಗುಲಾಮೆರೆ ವ್ಯಾಪಾರ ಮಲ್ಪುನಾಕುಲು, ಸುಳ್ಳುಗಾರೆರ್, ಪಾತೆರ ತತ್ತಿನಾಕುಲು, ಎಡ್ಡೆ ಬೋಧನೆಗ್ ವಿರೋಧಾದ್ ಬೇತೆ ಒವಾಂಡಲಾ ಮಲ್ಪುನಾಕುಲು, ಇಂಚಿತ್ತಿನ ನೀತಿಕೆಟ್ಟಿನಾಕುಲೆಗಾದ್ ಅವು ನೇಮಕ ಆತ್ಂಡ್.</verse>
				<verse number="10"></verse>
				<verse number="11">ಬೊಕ್ಕ ಯಾನ್ ನಿಕ್ಕ್ ಪನ್ಪಿನ ಈ ಉಪದೇಶ ಭಾಗ್ಯವಂತೆ ಆದುಪ್ಪು ದೇವೆರೆನ ಮೈಮೆದ ಬೊಲ್ಪುನು ಪ್ರಕಾಶ ಮಲ್ಪುನ ಸುವಾರ್ತೆಗ್ ಸರಿಯಾದ್ ಉಂಡು. ಎಂಕ್ ಈ ಸುವಾರ್ತೆದ ಸೇವೆದ ಜವಾಬ್ದಾರಿ ಕೊರ್ದುಂಡು.</verse>
				<verse number="12">ಎನನ್ ಬಲ ಪಡೆಪಾಯಿನ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಗು ಯಾನ್ ಉಪಕಾರ ಪನ್ಪೆ. ಎನನ್ ಆಯೆ ನಂಬಿಗಸ್ತೆ ಅಂದ್‌ದ್ ಗೆನ್ತ್‌ದ್ ಆಯನ ಸೇವೆಗ್ ಅಜತ್ ದೆತ್ತೊನಿಯೆ. ದುಂಬು ಯೇಸುನು ದೂಷಣೆ ಮಲ್ಪುನಾಯೆಲಾ ಭಂಗ ಬರ್ಪಾವುನಾಯೆಲಾ ಬಲಾತ್ಕಾರ ಮಲ್ಪುನಾಯೆಲಾ ಆದಿತ್ತೆ. ಆಂಡ ಅವೆನ್ ಯಾನ್ ಅಪನಂಬಿಕೆಡ್ ತೆರಿಯಂದೆ ಮಲ್ತಿನೆಡ್ದ್ ಆಯೆ ಎಂಕ್ ಕರುಣೆ ತೋಜಾಯೆ.</verse>
				<verse number="13"></verse>
				<verse number="14">ನಮ ಕರ್ತವನ ದಯ ಹೆಚ್ಚಾಯಿನೆಡ್ದ್, ಕ್ರಿಸ್ತ ಯೇಸುಡ್ದು ಬರ್ಪಿನ ನಂಬಿಕೆಲಾ ಪ್ರೀತಿಲಾ ಎನಡ ಏತೋ ಹೆಚ್ಚಾಂಡ್.</verse>
				<verse number="15">ಕ್ರಿಸ್ತ ಯೇಸು ಪಾಪಿಷ್ಟೆರೆನ್ ರಕ್ಷಣೆ ಮಲ್ಪೆರೆ ಲೋಕೊಗು ಬತ್ತೆ ಇನ್ಪಿ ಪಾತೆರ ನಂಬಿಕೆದವುಲಾ ದೆತ್ತೊನುನೆಕ್ಕ್ ಯೋಗ್ಯದವುಲಾ ಆದುಂಡು. ಆ ಪಾಪಿಲೆಡ್ ಯಾನೇ ದುಂಬುದಾಯೆ.</verse>
				<verse number="16">ಆಯೆ ಪಾಪಿಯಾಯಿ ಎಂಕ್ ಕರುಣೆ ತೋಜಾದ್, ಎನ ಮಿತ್ತ್ ತನ ಪರಿಪೂರ್ಣ ಆದುಪ್ಪು ತಾಳ್ಮೆನ್ ತೋಜಪಾಯೆ. ಇಂಚ ಕ್ರಿಸ್ತ ಯೇಸುಡು ನಂಬಿಕೆ ದೀದ್ ನಿತ್ಯಜೀವ ಪಡೆಪಿನ ಮಾತೆರೆಗ್ಲಾ ಮಾದ್ರಿ ಆದುಪ್ಪರೆ ಎಂಕ್ ಈ ಕರುಣೆ ತಿಕ್ಕ್ಂಡ್.</verse>
				<verse number="17">ನಿತ್ಯೊಗು ರಾಜ್ಯ ಆಳುನ ಅರಸುಲಾ, ನಾಶಾವಂದಿನಾಯೆಲಾ ಕಣ್ಣ್‌ಗ್ ತೋಜಂದಿನಾಯೆಲಾ ಆದುಪ್ಪು ಒರಿಯೇ ದೇವೆರೆಗ್ ಏನಿತ್ಯೇನಿಗ್ಲಾ ಮಾನಲಾ ಮೈಮೆಲಾ ಆವಡ್, ಆಮೆನ್.</verse>
				<verse number="18">ಮಗೆ ಆಯಿ ತಿಮೋಥಿ, ನಿನ ವಿಷಯೊಡು ದುಂಬು ಪನ್ತಿ ಪ್ರವಾದನೆಲೆನ್ ಯಾನ್ ಎನ್ನ್‌ದ್ ಈ ಐಟ್ಟ್ ಧೈರ್ಯವಂತೆ ಆದ್, ಎಡ್ಡೆ ಯುದ್ದ ಮಲ್ಪೊಡು ಇನ್ಪಿ ಅಪ್ಪಣೆನ್ ನಿಕ್ಕ್ ಕೊರ್ಪೆ.</verse>
				<verse number="19">ನಂಬಿಕೆನ್ಲಾ, ಎಡ್ಡೆ ಮನಸಾಕ್ಷಿನ್ಲಾ ಗಟ್ಟಿಡ್ ಪತ್ತೊನ್ಲ. ಕೆಲೆವೆರ್ ಅಕ್ಲೆನ ಎಡ್ಡೆ ಸಾಕ್ಷಿನ್ ಬುಡ್ದು ಕ್ರಿಸ್ತ ನಂಬಿಕೆದ ಸಂಗತಿಡ್ ದರಿದ್ ಪೋತಿ ಕಪ್ಪಲ್‌ದ ಲೆಕ್ಕ ನಷ್ಟ ಆತಿನಾಕುಲೆ ಲೆಕ್ಕ ಉಲ್ಲೆರ್.</verse>
				<verse number="20">ಅಕ್ಲೆಡ್ ಹುಮೆನಾಯೆಲಾ ಅಲೆಕ್ಸಾಂದ್ರೆಲಾ ಇಂಚಿತ್ತಿನಾಕುಲೇ. ಮೊಕುಲು ದೇವೆರೆನ್ ದೂಷಣೆ ಮಲ್ಪೆರೆ ಬಲ್ಲಿ ಪನ್ಪಿನೆನ್ ಕಲ್ಪುಲೆಕ್ಕ ಮೊಕ್ಲೆನ್ ಸೈತಾನಗ್ ಒಪ್ಪಿಸಾದ್ ಕೊರಿಯೆ.</verse>
			</chapter>
			<chapter number="2">
				<verse number="1">ಮಾತೆಡ್ದ್ ದುಂಬು ಮಾತ ನರಮಾನಿಲೆಗಾದ್ ದೇವೆರೆಡ ನಟ್ಟೊಂದು, ಪ್ರಾರ್ಥನೆ ಮಲ್ತೊಂದು, ಮದ್ಯಸ್ತಿಕೆ ಬೊಕ್ಕ ಉಪಕಾರ ಸ್ತುತಿ ಮಲ್ಪೊಡು ಅಂದ್‌ದ್ ಕೇನೊನ್ವೆ.</verse>
				<verse number="2">ನಂಕ್ ಸುಖ ಸಮಾಧಾನ ಉಂಡಾದ್ ನಮ ಪೂರ್ತಿ ಭಕ್ತಿಡ್ಲಾ ಮರ್ಯಾದಿಡ್ಲಾ ಜೀವನ ಮಲ್ಪುಲೆಕ್ಕ ಅರಸರೆಗ್ಲಾ ಮಾತ ಅಧಿಕಾರೊಡುಪ್ಪುನಾಕುಲೆಗ್ಲಾ ದೇವೆರೆಡ ನಟ್ಟೊನೊಡು.</verse>
				<verse number="3">ಬೊಕ್ಕ ಇಂಚ ಮಲ್ಪುನವು ನಮ ರಕ್ಷಕೆ ಆಯಿ ದೇವೆರೆ ಸನ್ನಿಧಿಡ್ ಎಡ್ಡೆದವುಲಾ ಮೆಚ್ಚಿಗೆದವುಲಾ ಆದುಂಡು.</verse>
				<verse number="4">ಮಾತ ನರಮಾನಿಲು ರಕ್ಷಣೆ ಹೊಂದುದು ಅಕುಲು ಸತ್ಯದ ಗೇನೊಡು ಸೇರೊಡು ಪನ್ಪಿನ ದೇವೆರೆನ ಚಿತ್ತ.</verse>
				<verse number="5">ದಾಯೆಗಂದ್ಂಡ ದೇವೆರ್ ಒರಿಯೇ, ದೇವೆರೆನ್ಲಾ ನರಮಾನಿಲೆನ್ಲಾ ಒಂಜಿ ಮಲ್ಪುನ ಮದ್ಯಸ್ತೆಗಾರೆಲಾ ಒರಿಯೇ. ಆಯೆ ನರಮಾನಿ ಆಯಿ ಯೇಸು ಕ್ರಿಸ್ತೆನೇ</verse>
				<verse number="6">ಆಯೆ ಮಾತೆರೆನ ಬುಡುಗಡೆಗಾದ್ ತನನ್ ಒಚ್ಚಿದ್ ಕೊರಿಯೆ. ಬೊಕ್ಕ ಉಂದು ತಕ್ಕ ಸಮಯೊಡು ಪನೊಡಾಯಿನ ಸಾಕ್ಷಿ ಆದುಂಡು.</verse>
				<verse number="7">ಈ ಸಾಕ್ಷಿನ್ ಪ್ರಸಿದ್ಧಿ ಮಲ್ಪೆರೆಗಾದ್ ಯಾನ್ ಸಾರಿಯುನಾಯೆಲಾ ಅಪೊಸ್ತಲೆಲಾ ಆದ್ ನಂಬಿಕೆಡ್ಲಾ ಸತ್ಯೊಡ್ಲಾ ಪಿದಯಿದ ಜನೊಕುಲೆಗ್ ಬೋಧಕೆ ಆದ್ ನೇಮಕ ಆತೆ. ಯಾನ್ ಇಂಚಿತ್ತಿನಾಯೆ ಪನ್ಪಿನ ಸುಳ್ಳು ಅತ್ತ್, ಸತ್ಯನೇ.</verse>
				<verse number="8">ಅಂಚಾದ್ ಅಂಜೊವುಲು ಮಾತ ಜಾಗ್‌ಡ್ ಕೋಪಲಾ, ತರ್ಕದಾಂತಿನಾಕುಲುಲಾ ಆದ್ ಪರಿಶುದ್ಧ ಕೈಕ್ಲೆನ್ ದೆರ್ತ್ತ್‌ದ್ ಪ್ರಾರ್ಥನೆ ಮಲ್ಪೊಡಂದ್‌ದ್ ಎನ ಮನಸಾದುಂಡು.</verse>
				<verse number="9">ಅಂಚೆನೇ ಪೊಂಜೊವುಲು ಮರ್ಯಾದಿದಾಕುಲಾದ್, ಡಂಭಾಚಾರೊನು ಬುಡ್ದು ಮರ್ಯಾದಿಗ್ ತಕ್ಕದ ಅಂಗಿನ್ ಪಾಡೊನಡ್. ಅಕುಲು ಕುಜಲ್ ನೆಯ್ಪಿನವು, ಬಂಗಾರ ಮುತ್ತು ದಿಂಜ ಬಿಲೆ ಇತ್ತಿ ಕುಂಟುಲೆಡ್ದ್ ತನ್ಕುಲೆನ್ ಅಲಂಕಾರ ಮಲ್ತೊನಂದೆ, ದೇವೆರೆನ ಭಕ್ತಿಡ್ ಎಡ್ಡೆಂತಿನ ಕೆಲಸೊಲೆಡ್ ಐತ ಮಲ್ತೊನಡ್.</verse>
				<verse number="10"></verse>
				<verse number="11">ಪೊಂಜೊವುಲು ಮನಿಪಂದೆ ಇತ್ತ್‌ದ್ ಮಾತೆಟ್ಲಾ ತಗ್ಗ್ ಬಗ್ಗ್‌ದ್ ಇತ್ತ್‌ದ್ ಬೋಧನೆ ಕೇನೊಡು</verse>
				<verse number="12">ಬೋಧನೆ ಮಲ್ಪೆರೆಗಾವಡ್ ಅಂಜೊವುಲೆ ಮಿತ್ತ್ ಅಧಿಕಾರ ತೋಜಾವರೆಗಾವಡ್ ಪೊಂಜೊವುಲೆಗ್ ಅಪ್ಪಣೆ ಯಾನ್ ಕೊರ್ಪುಜಿ. ಅಕುಲು ಮನಿಪರೆ ಬಲ್ಲಿ</verse>
				<verse number="13">ದಾಯೆಗಂದ್ಂಡ ಆದಾಮುನು ದುಂಬು ಉಂಡು ಮಲ್ತ್‌ದಿನಿ, ಐಡ್ದ್ ಬೊಕ್ಕ ಹವ್ವನ್.</verse>
				<verse number="14">ಅವು ಅತ್ತಂದೆ ಆದಾಮು ಮೋಸೊಗು ಬೂರುಜೆ, ಆಂಡ ಪೊಂಜೊವು ಮೋಸೊಡು ತಿಕೊಂದು ಪಾಪೊಡು ಬೂರಿಯಲ್.</verse>
				<verse number="15">ಆಂಡ ಪೊಂಜೊವುಲು ಮಾರ್ಯಾದಿಡ್ ಇತ್ತ್‌ದ್ ನಂಬಿಕೆಡ್ಲಾ, ಪ್ರೀತಿಡ್ಲಾ, ಪರಿಶುದ್ಧತೆಡ್ಲಾ ನಿಲೆ ಆದಿತ್ತೆರ್ಡ ಜೋಕುಲೆನ್ ಪೆದ್ದುನೆಟ್ಟ್ ರಕ್ಷಣೆ ಹೊಂದುವೆರ್.</verse>
			</chapter>
			<chapter number="3">
				<verse number="1">ಸಭಾಧ್ಯಕ್ಷನ ಉದ್ಯೋಗೊನು ಒರಿ ಪಡೆವೊಡು ಅಂದ್‌ದ್ ಮನಸ್ ಮಲ್ಪುವೆಡ ಆಯೆ ಎಡ್ಡೆ ಕೆಲಸೊನು ಅಪೇಕ್ಷೆ ಮಲ್ಪುನಾಯೆ ಇನ್ಪಿನ ಪಾತೆರ ನಂಬಿಕೆಗ್ ತಕ್ಕದವೇ.</verse>
				<verse number="2">ಸಭಾದ್ಯಕ್ಷೆ ದೋಷದಾಂತಿನಾಯೆಲಾ ಒಂಜೇ ಬೊಡೆದಿ ಇತ್ತಿನಾಯೆಲಾ ಆದುಪ್ಪೊಡು. ಪರಂದಿನಾಯೆಲಾ ಹದತಾಯೆಲಾ ಮಾನಸ್ತೆಲಾ ಬಿನ್ನೆರೆನ್ ಸುದಾರಿಪುನಾಯೆಲಾ ಬೋಧನೆ ಪನ್ಪುನೆಟ್ ಬಿರ್ಸೆಲಾ ಆದುಪ್ಪೊಡು.</verse>
				<verse number="3">ಆಯೆ ಪರ್ದ್ ಅಮಲೇರಿನಾಯೆಲಾ ಲಡಯಿ ಮಲ್ಪುನಾಯೆಲಾ ಆದುಪ್ಪಂದೆ ಸಜ್ಜನೆ ಆದುಪ್ಪೊಡು. ಪೊಕ್ಕಡೆ ತರ್ಕಮಲ್ಪಂದಿನಾಯೆಲಾ ಕಾಸ್‌ದಾಸೆದಾಂತಿನಾಯೆಲಾ ಆದುಪ್ಪೊಡು.</verse>
				<verse number="4">ಪೂರ್ತಿ ಮಾರ್ಯಾದಿಡ್ ತನ ಜೋಕುಲೆನ್ ಅಧೀನೊಡು ದೀವೊಂದು ಸ್ವಂತ ಇಲ್ಲದಾಕುಲೆನ್ ಪೊರ್ಲುಡು ನಡಪುಡುನಾಯೆ ಆದುಪ್ಪೊಡು.</verse>
				<verse number="5">ದಾಯೆಗಂದ್ಂಡ ಒರಿ ಸ್ವಂತ ಇಲ್ಲದಾಕುಲೆನ್ ತೂವೆರೆ ತೀರಂದಿನಾಯೆ ದೇವೆರೆ ಸಭೆನ್ ಎಂಚ ತೂವೊನೊಲಿ?</verse>
				<verse number="6">ಆಯೆ ಪೊಸತ್ತಾದ್ ಸಭೆಕ್ ಸೇರ್ದಿನಾಯೆ ಆದುಪ್ಪರೆ ಬಲ್ಲಿ. ಇಂಚಾಂಡ ಆಯೆ ಅಹಂಕಾರದಾಯೆ ಆದ್ ಸೈತಾನಗ್ ಬರ್ಪಿ ತೀರ್ಪು ಆಯ ಮಿತ್ತ್‌ಲಾ ಬರಿಯೆರೆ ಕಾರಣ ಆವು.</verse>
				<verse number="7">ಅತ್ತಂದೆ ಆಯೆ ಪಿದಯಿದ ಜನೊಕುಲೆಡ ಎಡ್ಡೆ ಪುದರ್ ದೆತ್ತೊಂದಿನಾಯೆ ಆದುಪ್ಪೊಡು. ಇಜ್ಜಾಂಡ ಆಯೆ ಅವಮಾನೊಗು ಒಳಗಾದ್ ಸೈತಾನನ ಉರ್ಲುಗು ತಿಕ್ಕ್‌ದ್ ಬೂರ್ವೆ.</verse>
				<verse number="8">ಅಂಚೆನೇ ಸಭಾಸೇವಕೆರ್‌ ಮಾರ್ಯಾದಿದಾಕುಲು ಆದುಪ್ಪೊಡು ಅತ್ತಂದೆ ಅಕುಲು ರಡ್ಡ್ ಪಾತೆರದಾಕುಲುಲಾ, ಪರ್ಪಿನ ಅಭ್ಯಾಸದಾಕುಲುಲಾ, ದುಡ್ಡುದ ಆಸೆದಾಕುಲುಲಾ ಆದುಪ್ಪಂದೆ;</verse>
				<verse number="9">ನಂಬುದು ಅರ್ಥ ಮಲ್ತೊಂದಿನ ಸತ್ಯದ ಗುಟ್ಟುನು ಶುದ್ಧ ಮನಸಾಕ್ಷಿಡ್ ಕಾತೊನುನಾಕುಲು ಆದುಪ್ಪೊಡು.</verse>
				<verse number="10">ಅವತ್ತಂದೆ ಮೊಕ್ಲೆನ್ ದುಂಬು ಪರೀಕ್ಷೆ ಮಲ್ತ್‌ದ್ ದೂರುದಾಂತಿನಕುಲಾದ್ ತೋಜುವೆರ್ಡ ಸೇವೆಕೆರೆ ಉದ್ಯೋಗೊನು ನಡಪಾವಡ್.</verse>
				<verse number="11">ಅಂಚೆನೇ ಸೇವೆ ಮಲ್ಪುನ ಪೊಂಜೊವುಲು ಮಾರ್ಯಾದಿದಾಕುಲುಲಾ ಚಾಡಿ ಪನಂದಿನಾಕುಲುಲಾ ಹದತಕುಲುಲಾ ಮಾತ ಕೆಲಸೊಲೆಡ್ ನಂಬಿಕೆದಾಕುಲುಲಾ ಆದುಪ್ಪೊಡು.</verse>
				<verse number="12">ಸಭಾಸೇವಕೆರ್ ಒಂಜೇ ಬೊಡೆದಿ ಇತ್ತಿನಾಕುಲುಲಾ ತನ್ಕುಲೆನ ಜೋಕುಲೆನ್ಲಾ ಇಲ್ಲದಕುಲೆನ್ಲಾ ಎಡ್ಡೆಡ್ ನಡಪಾವುನಾಕುಲುಲಾ ಆದುಪ್ಪೊಡು.</verse>
				<verse number="13">ಸಭಾಸೇವೆಕೆರಾದ್ ಎಡ್ಡೆ ಸೇವೆ ಮಲ್ಪುನಾಕುಲು ಆದಿತ್ತ್ಂಡ, ಎಡ್ಡೆ ಪದವಿನ್ಲಾ ಕ್ರಿಸ್ತ ಯೇಸುಡೊಪ್ಪ ಉಪ್ಪುನ ನಂಬಿಕೆಡ್ ದಿಂಜ ಧೈರ್ಯೊನ್ಲಾ ಸಂಪಾದನೆ ಮಲ್ಪುನಾಕುಲಾದ್ ತೋಜಾವೊನ್ವೆರ್.</verse>
				<verse number="14">ಬೇಗನೆ ನಿನ ಕೈತಲ್‌ಗ್ ಬರ್ಪೆ ಪನ್ಪಿನ ಭರವಸ ಇತ್ತಿನೆಡ್ದ್ ಯಾನ್ ಈ ವಿಷಯೊಲೆನ್ ನಿಕ್ಕ್ ಬರೆಪೆ.</verse>
				<verse number="15">ಆಂಡ ಒಂಜಿ ವೇಳೆ ಯಾನ್ ತಡ ಮಲ್ತೆಡೆಲಾ, ಜೀವ ಇತ್ತಿ ದೇವೆರೆ ಸಭೆ ಪನ್ಪಿ ಇಲ್ಲನ್ ಎಂಚ ನಡಪುಡೊಡು ಅಂದ್‌ದ್ ಗೊತ್ತಾಪಿಲೆಕ್ಕ ಈ ಪತ್ರಿಕೆಡ್ದ್ ನಿಕ್ಕ್ ಗೊತ್ತಾವು. ಈ ಸಭೆ ಸತ್ಯದ ಕಂಬಲಾ ಅಡಿಪಾಯಲಾ ಆದುಂಡು.</verse>
				<verse number="16">ಉಂದತ್ತಂದೆ ನಂಕ್ ಗೊತ್ತಾಪಿಲೆಕ್ಕ ದೇವಭಕ್ತಿಗ್ ಆಧಾರವಾಯಿನ ಸತ್ಯದ ಗುಟ್ಟು, ಅವು ನಿಜಾದ್ ವಿಶೇಷವಾಯಿನ ಆದುಂಡು ಅಂದ್‌ದ್ ನಮ ಒಪ್ಪಿಯೊನ್ವ. ಕ್ರಿಸ್ತೆ ನರಮಾನಿ ರೂಪೊಡು ತೋಜಿಯೆ, ಆತ್ಮ ಸಮ್ಮಂಧೊಡು ಕ್ರಿಸ್ತೆ ನೀತಿವಂತೆ ಅಂದ್‌ದ್ ತೋಜಾದ್ ಕೊರಿಯೆ. ದೂತೆರೆಗ್ ತೋಜಿಯೆ, ಪಿದಯಿದ ಜನೊಕುಲೆ ನಡುಟು ಆಯನ್ ಸಾರಿಂಡ್, ಲೋಕದಾಕುಲು ಆಯನ್ ನಂಬಿಯೆರ್. ಪರಲೋಕದ ಮೈಮೆಡ್ ಆಯನ್ ಮಿತ್ತ್ ದೆತ್ತೊಂಡೆರ್.</verse>
			</chapter>
			<chapter number="4">
				<verse number="1">ಬರ್ಪಿನ ದಿನೊಕುಲೆಡ್ ಕೆಲೆವೆರ್ ಮೋಸ ಮಲ್ಪುನ ಆತ್ಮೊಲೆ ಪಾತೆರೊಗ್ಲಾ ದೆವ್ವೊಲೆ ಬೋಧನೆಗ್ಲಾ ಮನಸ್ ಕೊರ್ಪಿನಾಕುಲಾದ್ ಕ್ರಿಸ್ತ ನಂಬಿಕೆಡ್ದ್ ತತ್ತ್ ಪೋಯಿನಾಕುಲಾದ್ ಉಪ್ಪುವೆರ್ ಅಂದ್‌ದ್ ದೇವೆರಾತ್ಮ ಸ್ಪಷ್ಟಾದ್ ತೆರಿಪಾವೊಂದುಂಡು.</verse>
				<verse number="2">ಸುಳ್ಳು ಬೋಧಕೆರ್ ಬತ್ತ್‌ದ್ ಸ್ವಂತ ಮನಸ್‌ಡ್ ಕಪಟದಾಕುಲಾಂಡಲಾ ತನ್ಕುಲು ನೀತಿವಂತೆರ್ ಅಂದ್‌ದ್ ತೋಜಾವೊನ್ವೆರ್.</verse>
				<verse number="3">ಜನೊಕುಲೆನ್ ಮರ್ಲ್ ಮಲ್ಪುನಾಕುಲಾದ್ ಅಕುಲು ಮದ್ಮೆ ಆವೆರೆ ಬಲ್ಲಿ ಪಂಡ್ದ್‌ಲಾ, ಕೆಲವು ತಿನಸ್‌ಲೆನ್ ತಿನಿಯೆರೆ ಬಲ್ಲಿ ಪಂಡ್ದ್‌ಲಾ ಪನ್ಪೆರ್. ಆಂಡ ಏರ್ ದೇವೆರೆನ್ ನಂಬುನಾಕುಲಾದ್ ಸತ್ಯೊನು ತೆರಿಯೊಂದಿನಾಕುಲಾದ್ ಉಲ್ಲೆರಾ ಅಕುಲು ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ತಿನರೆಗಾದ್ ದೇವೆರ್ ಮಾತ ತರತ ತಿನಸ್‌ಲೆನ್ ಉಂಡು ಮಲ್ತ್‌ದೆ.</verse>
				<verse number="4">ದೇವೆರ್ ಉಂಡು ಮಲ್ತಿನವು ಮಾತಲಾ ಎಡ್ಡೆಂತಿನವು ಆಯಿನೆಡ್ದ್, ದೇವೆರೆಗ್ ಉಪಕಾರ ಸ್ತುತಿ ಮಲ್ತ್‌ದ್ ದೆತ್ತೊಂಡ, ಒವೆನ್ಲಾ ಬೊಡ್ಚಿ ಅಂದ್‌ದ್ ಪನಿಯೆರೆ ಬಲ್ಲಿ.</verse>
				<verse number="5">ದಾಯೆಗಂದ್ಂಡ ದೇವೆರೆ ಪಾತೆರೊಡ್ದುಲಾ ಪ್ರಾರ್ಥನೆಡ್ದ್‌ಲಾ ಅವು ಶುದ್ಧ ಆಪುಂಡು.</verse>
				<verse number="6">ಈ ಸಂಗತಿಲೆನ್ ಸಹೋದ್ರೆರೆಗ್ ತೆರಿಪಾಂಡ, ಈ ಕೈಕೊಂದು ನಡಪುನ ಕ್ರಿಸ್ತ ನಂಬಿಕೆದ ಬೊಕ್ಕ ಎಡ್ಡೆ ಬೋಧನೆದ ಪಾತೆರೊಲೆಡ್ ಬಲವಾದ್ ಉಂತುದಿನಾಯೆ ಆದ್ ಕ್ರಿಸ್ತ ಯೇಸುನ ಒರಿ ಎಡ್ಡೆ ಸೇವಕೆ ಆದುಪ್ಪುವ.</verse>
				<verse number="7">ಬಜೀ ಅಜ್ಜಿಕತೆತ ಲೆಕ್ಕ ಲೋಕದ ಕತೆಕ್ಲೆನ್ ದೂರ ಮಲ್ತ್‌ದ್ ಐತ ಪಗತೆಗ್ ದೇವಭಕ್ತಿಡ್ ಉಪ್ಪೆರೆ ನಿನನ್ ತಯಾರ್ ಮಲ್ತೊನ್ಲ.</verse>
				<verse number="8">ದಾಯೆಗಂದ್ಂಡ ಶರೀರದ ವ್ಯಾಯಾಮ ಒಂತೆದೆಕ್ ಪ್ರಯೋಜನ, ಆಂಡ ದೇವೆರೆ ಭಕ್ತಿ ಮಾತ ಸಂಗತಿಡ್ಲಾ ಪ್ರಯೋಜನದವು ಆದಿತ್ತ್‌ದ್ ಈ ಲೋಕೊಡ್ಲಾ ನನ ದುಂಬದ ಲೋಕೊಡ್ಲಾ ಜೀವ ಕೊರ್ಪಿನ ವಾಗ್ದಾನ ಆದುಂಡು.</verse>
				<verse number="9">ಈ ಪಾತೆರ ನಂಬಿಕೆದವುಲಾ, ದೆತ್ತೊನುನೆಕ್ಕ್ ತೀರಾ ಯೋಗ್ಯದವುಲಾ ಆದುಂಡು.</verse>
				<verse number="10">ಉಂದೆಕ್ಕಾದ್ ಎಂಕುಲು ಭಂಗ ಬತ್ತ್‌ದ್ ಪ್ರಯಾಸೊಡು ಬೇಲೆ ಮಲ್ತೊಂದುಲ್ಲ, ದಾಯೆಗಂದ್ಂಡ ಮಾತ ನರಮಾನಿಲೆಗ್, ಮುಖ್ಯಾದ್ ನಂಬುನಾಕುಲೆಗ್ ರಕ್ಷಕೆ ಆಯಿ ಜೀವ ಇತ್ತಿ ದೇವೆರೆ ಮಿತ್ತ್ ನಮ ಭರವಸೆ ದೀತಿನಾಕುಲಾದುಲ್ಲ.</verse>
				<verse number="11">ಈ ಮಾತ ಸಂಗತಿಲೆಗ್ ಅಪ್ಪಣೆ ಕೊರ್ದು ಬೋಧನೆ ಮಲ್ಪುಲ.</verse>
				<verse number="12">ಈ ಜವ್ವನೆ ಅಂದ್‌ದ್ ಏರ್ಲಾ ನಿನನ್ ಅಸಡ್ಡೆ ಮಲ್ಪಂದೆ ಏರೆಗ್ಲಾ ಅವಕಾಸ ಕೊರಂದೆ ನಿನ ಪಾತೆರೊಡು, ನಡತೆಡ್, ಪ್ರೀತಿಡ್, ನಂಬಿಕೆಡ್, ಶುದ್ಧತೆಡ್ ನಂಬುನಾಕುಲೆಗ್ ಈಯೇ ಮಾದ್ರಿ ಆದುಪ್ಪುಲ.</verse>
				<verse number="13">ಯಾನ್ ಬನ್ನಮುಟ್ಟ ವಾಕ್ಯ ಓದುನೆಟ್ಲಾ ಬೋಧನೆ ಕೊರ್ಪಿನೆಟ್ಟ್‌ಲಾ ಬುದ್ಧಿ ಪನ್ಪಿನೆಟ್ಲಾ ಉಮೇದ್‌ಡುಪ್ಪುಲ.</verse>
				<verse number="14">ನಿನಡ ಉಪ್ಪುನ ಆತ್ಮೀಕ ವರೊಕ್ಲೆನ್ ಅಸಡ್ಡೆ ಮಲ್ಪಡ. ಸಭಾ ಹಿರಿಯೆರ್ ಅಕ್ಲೆಗ್ ದೇವೆರೆಡ್ ಆಯಿ ಪ್ರವಾದನೆಡ್ದ್ ನಿನ ಮಿತ್ತ್ ಕೈ ದೀಯಿನೆಡ್ದ್ ಅವು ನಿಕ್ಕ್ ತಿಕ್ಕ್‌ಂಡತ್ತಾ.</verse>
				<verse number="15">ನಿನ ಕಾರ್ಯೊಲೆನ್ ಗೇನ ಕೊರ್ದು ಪೂರ ಮಲ್ಪುಲ, ನಿನ ಕೆಲಸೊಲೆಡ್ ಪೂರ್ತಿಯಾದ್ ತೊಡಗ್‌ಲ. ಇಂಚ ಈ ಬಲಪುನೆನ್ ಮಾತೆರ್ಲಾ ತೂವಡ್.</verse>
				<verse number="16">ಅತ್ತಂದೆ ನಿನ ಬಗೆಟ್ಲಾ ಈ ಕೊರ್ಪಿ ಬೋಧನೆದ ಬಗೆಟ್ಲಾ ಜಾಗ್ರತೆಡುಪ್ಪುಲ. ಈ ಐಟ್ಟೇ ನಿಲೆ ಆದುಪ್ಪುಲ, ಅಪಗ ಈ ನಿನನ್ಲಾ ಬೊಕ್ಕ ನಿನ ಬೋಧನೆನ್ ಕೇನುನಾಕುಲೆನ್ಲಾ ರಕ್ಷಣೆ ಮಲ್ಪುವ.</verse>
			</chapter>
			<chapter number="5">
				<verse number="1">ಪ್ರಾಯದಾಕುಲೆನ್ ಜೋರ್ ಮಲ್ಪಂದೆ ನಿನ ಸ್ವಂತ ಅಮ್ಮೆ ಅಂದ್‌ದ್ ಎನ್ನ್‌ದ್ ಬುದ್ಧಿ ಪನ್ಲ. ಜವನ್ಯೆರೆನ್ ಮೆಗ್ಯೆಪಲಯೆ ಅಂದ್‌ದ್ ಎನ್ನೊನ್ಲ.</verse>
				<verse number="2">ಪ್ರಾಯದ ಪೊಂಜೊವುಲೆನ್ ಅಪ್ಪೆ ಪಂಡ್ದ್, ಜವ್ವಂದಿ ಪೊಣ್ಣುಲೆನ್ ಮೆಗ್ದಿ ಪಲ್ದಿ ಪಂಡ್ದ್‌ಲಾ ಶುದ್ಧ ಭಾವೊಡು ತೂಲ.</verse>
				<verse number="3">ದಿಕ್ಕ್‌ದಾಂತಿ ಕಂಡನಿ ಸೈತಿನಾಕುಲೆಗ್ ಆಶ್ರಯ ಕೊರ್ಲ. ಆಂಡ ಒರ್ತಿ ವಿಧವೆಗ್ ಬಾಲೆಲು ಪುಲ್ಲಿಯಾಡ್ಲು ಇತ್ತ್ಂಡ ದುಂಬತ್ತ ಇಲ್ಲದಾಕುಲೆನ್ ಭಕ್ತಿಡ್ ನಡಪಾವುನೆನ್ಲಾ ತನ್ಕುಲೆನ ಅಪ್ಪೆಅಮ್ಮಾಡ್ಲೆಗ್‌ ಉಪಕಾರ ಮಲ್ಪುನೆನ್ಲಾ ಕಲ್ತೊನಡ್. ಉಂದು ದೇವೆರೆನ ದೃಷ್ಟಿಡ್ ಮೆಚ್ಚಿಗೆದವು ಆದುಂಡು.</verse>
				<verse number="4"></verse>
				<verse number="5">ದಿಕ್ಕ್‌ದಾಂತಿ ಒಂಟಿ ವಿಧವೆ, ದೇವೆರೆನ ಮಿತ್ತ್ ಭರವಸೆ ದೀದ್, ರಾತ್ರೆ ಪಗೆಲ್ ನಟ್ಟೊನುನೆಟ್ಲಾ ಪ್ರಾರ್ಥನೆಡ್ಲಾ ನಿಲೆ ಆದುಪ್ಪುವಲ್.</verse>
				<verse number="6">ಆಂಡ ಸುಖ ಬೋಗೊಡು ಉಪ್ಪುನ ವಿಧವೆ ಬದ್‌ಕ್‌ದುಪ್ಪುನಗನೆ ಸೈತ್ ಪೋಯಿನಾಲ್ ಆದುಲ್ಲಲ್.</verse>
				<verse number="7">ವಿಧವೆ ತಪ್ಪುದಾಂತಿನಾಕುಲು ಆದುಪ್ಪುಲೆಕ್ಕ ಈ ಅಪ್ಪಣೆನ್ ಕೊರ್ಲ.</verse>
				<verse number="8">ಆಂಡ ತನ್ಕುಲೆ ಸಮ್ಮಂಧದಾಕುಲೆನ್, ಐಟ್ಟ್‌ಲಾ ಸ್ವಂತ ಇಲ್ಲದಾಕುಲೆನ್ ತೂವಂದಿನಾಕುಲು ನಿಜ ನಂಬಿಕೆನ್ ತಿರಸ್ಕಾರ ಮಲ್ಪುನಾಕುಲು ಆದುಲ್ಲೆರ್. ಇಂಚಿತ್ತಿನಾಕುಲು ನಂಬಿಕೆದಾಂತಿನಾಕುಲೆಡ್ದ್‌ಲಾ ಕಡೆ ಆದುಲ್ಲೆರ್.</verse>
				<verse number="9">ಒರಿಯಗೇ ಬೊಡೆದಿ ಆದಿತ್ತ್‌ದ್ ಅಜ್ಪ ವರ್ಸೊಡ್ದು ಮಿತ್ತ್ ಇತ್ತಿನ ಪ್ರಾಯದ ವಿಧವೆನ್ ವಿಧವೆರೆನ ಪಟ್ಟಿಗ್ ಸೇರಾವೊನೊಲಿ.</verse>
				<verse number="10">ಆಲ್ ಎಡ್ಡೆ ಕೆಲೊಸೊಡು ಪುದರ್ ಪಡೆಯಿನಾಲ್ ಆದುಪ್ಪೊಡು, ಪಂಡ ಜೋಕುಲೆನ್ ತಾಂಕ್‌ದಿನಾಲ್‌ಲಾ, ಬಿನ್ನೆರೆನ್ ಸುದರಿಪುನಾಲ್‌ಲಾ, ದೇವಜನೊಕುಲೆನ್ ಸತ್ಕಾರ ಮಲ್ಪುನಾಲ್‌ಲಾ, ಭಂಗೊಡು ಇತ್ತಿನಾಕುಲೆಗ್ ಸಹಾಯ ಮಲ್ಪುನಾಲ್‌ಲಾ ಮಾತ ಎಡ್ಡೆ ಕೆಲೊಸೊಡು ಆಸಕ್ತಿದಾಲ್‌ಲಾ ಆದುಪ್ಪೊಡು.</verse>
				<verse number="11">ಆಂಡ ಜವ್ವನ ಪ್ರಾಯದ ವಿಧವೆನ್ ಪಟ್ಟಿಡ್ ಸೇರಾವೊನೊಡ್ಚಿ. ದಾಯೆಗಂದ್ಂಡ ಅಕುಲು ಶರೀರದ ಆಸೆಡ್ ಕ್ರಿಸ್ತಗ್ ವಿರೋಧಾದ್ ದುಂಬಗ್ ಮದ್ಮೆ ಆವೆರ್.</verse>
				<verse number="12">ಇಂಚಿತ್ತಿನಾಕುಲು ದುಂಬು ಕೊರ್ತಿನ ನಂಬಿಕೆದ ಪಾತೆರೊಗು ತತ್ತ್‌ದ್ ತೀರ್ಪುಗು ಗುರಿ ಆಪೆರ್.</verse>
				<verse number="13">ಉಂದತ್ತಂದೆ ಅಕುಲು ಸೋಮಾರಿಲು ಆದ್ ಇಲ್ಲ್ ಇಲ್ಲಗ್ ತಿರ್ಗೊಂದುಪ್ಪುವೆರ್. ಸೋಮಾರಿಲು ಆದುಪ್ಪುನು ಅತ್ತಂದೆ ಹರಟೆ ಪಾತೆರುನೆಟ್ಲಾ, ಬೇತೆಕ್ಲೆ ವ್ಯವಹಾರೊಲೆಡ್ ಕೈ ಪಾಡ್ದ್ ಅತ್ತಂದಿನ ಪಾತೆರೊಂದು ಸಮಯ ದೆಪ್ಪುವೆರ್.</verse>
				<verse number="14">ಅಂಚಾದ್ ಜವ್ವಂದಿ ವಿಧವೆ ಮದ್ಮೆ ಆದ್ ಜೋಕುಲೆನ್ ಪೆದ್ದ್‌ದ್ ಇಲ್ಲದ ಯಜಮಾನಿ ಆದುಪ್ಪುನ ಎಡ್ಡೆ ಅಂದ್‌ದ್ ಎಂಕ್ ತೋಜುಂಡು. ಅಪಗ ಅಕ್ಲೆಗ್ ವಿರೋಧಿಲೆನ ನಿಂದನೆಗ್ ಅವಕಾಸ ಉಪ್ಪುಜಿ.</verse>
				<verse number="15">ಇದ ಮುಟ್ಟ ಕೆಲೆವೆರ್ ಸಾದಿ ತತ್ತ್‌ದ್ ಸೈತಾನ ಬೆರಿ ಪೋತೆರ್.</verse>
				<verse number="16">ಕ್ರಿಸ್ತನ್ ನಂಬುನ ಪೊಂಜೊವುನ ಅಧೀನೊಡು ವಿಧವೆ ಇತ್ತಲ್‌ಡ ಆಲ್ ಆಲೆನ್ ತೂವೊನಡ್, ಈ ಭಾರೊನು ಸಭೆತ ಮಿತ್ತ್ ಪಾಡಿಯೆರೆ ಬಲ್ಲಿ. ಅಂಚಾಂಡ ಸಭೆ ನಿಜಾದ್‌ಲಾ ದಿಕ್ಕ್‌ದಾಂತಿ ವಿಧವೆರೆನ್ ತೂವೊನಿಯೆರೆಗ್ ಆಪುಂಡು.</verse>
				<verse number="17">ಎಡ್ಡೆ ರೀತಿಡ್ ಅಧಿಕಾರ ಮಲ್ಪುನ ಸಭಾ ಹಿರಿಯೆರೆಗ್ ಮುಖ್ಯಾದ್ ಬೋಧನೆಡ್ಲಾ ಪ್ರಸಂಗೊಡ್ಲಾ ಭಂಗ ಬರ್ಪಿನಾಕುಲೆಗ್ ರಡ್ಡ್ ಪಾಲ್ ದಾತ್ ಮಾನೊಗು ಯೋಗ್ಯೆರಂದ್ ಎನ್ನೊಡು.</verse>
				<verse number="18">“ಕೆಯಿ ದೊಂಕುನ ಬೋರಿದ ಬಾಯಿನ್ ಕಟ್ಟಿಯೆರೆ ಬಲ್ಲಿ,” ಬೊಕ್ಕ “ಬೇಲೆದಾಯೆ ತನ ಸಂಬಳೊಗು ತಕ್ಕದಾಯೆ,” ಅಂದ್‌ದ್ ಶಾಸ್ತ್ರೊಡು ಪನ್ಪುಂಡತ್ತಾ.</verse>
				<verse number="19">ಒರಿ ಸಭಾ ಹಿರಿಯಾಯಗ್ ವಿರೋಧಾದ್ ದೂರು ಬತ್ತ್ಂಡ ರಡ್ಡ್ ಇಜ್ಜಿಡ ಮೂಜಿ ಸಾಕ್ಷಿಲೆ ಬಾಯಿಡ್ ಅವೆನ್ ಕಂಡಿತ ಮಲ್ತೊನಂದೆ ಐಕ್ ಕೆಬಿ ಕೊರಡ.</verse>
				<verse number="20">ಪಾಪೊಡು ನಡಪುನಾಕುಲೆಗ್ ಮಾತೆರೆನ ಎದುರುಡೇ ಜೋರ್ ಮಲ್ಪು, ಅಂಚಾಂಡ ಬಾಕಿದಾಕುಲು ಪೋಡಿವೆರ್.</verse>
				<verse number="21">ಈ ವಿಚಾರಣೆ ಮಲ್ಪುನೆಡ್ದ್ ದುಂಬೇ ಅಕ್ಲೆನ ಮಿತ್ತ್ ತಪ್ಪು ಪನಂದೆ, ಭೇದಭಾವೊಡು ದಾಲಾ ಮಲ್ಪಂದೆ, ಯಾನ್ ನಿಕ್ಕ್ ಪಂತಿನ ಪಾತೆರೊನು ಕೈಕೊನೊಡು ಅಂದ್‌ದ್ ದೇವೆರೆ ದುಂಬುಲಾ, ಕ್ರಿಸ್ತ ಯೇಸುನ ದುಂಬುಲಾ, ಅಜತ್ ದೆತ್ತೊಂದಿನ ದೂತೆರೆನ ದುಂಬುಲಾ ಅಪ್ಪಣೆ ಕೊರ್ಪೆ.</verse>
				<verse number="22">ಏರೆನ ತರೆತ ಮಿತ್ತ್‌ಲಾ ಅಮಸರೊಡು ಕೈ ದೀದ್ ಸಭೆತ ಕೆಲಸೊಗು ನೇಮಕ ಮಲ್ಪಡ. ಈ ಅಂಚ ಮಲ್ಪುನಾಂಡ ಬೇತೆಕ್ಲು ಮಲ್ತಿನ ಪಾಪೊಡು ಈ ಪಾಲ್‌ದಾರೆ ಅಂದ್‌ದ್ ತೋಜಿದ್ ಬರು. ಈ ಶುದ್ಧದಾಯೆ ಆದುಪ್ಪುಲೆಕ್ಕ ತೂಲ.</verse>
				<verse number="23">ನನ ಮಿತ್ತ್ ನೀರ್‌ನ್ ಮಾತ್ರ ಪರ್ಪಿನಾಯೆ ಆದುಪ್ಪಂದೆ, ನಿನ ಬಂಜಿದ ಅಜೀರ್ಣೊಗ್ಲಾ ಅಪಗಪಗ ಬರ್ಪಿನ ಸೀಕ್‌ಗ್ ಬೂರಂದಿಲೆಕ್ಕ ಒಂತೆ ದ್ರಾಕ್ಷಾರಸೊನು ದೆತ್ತೊನ್ಲ.</verse>
				<verse number="24">ಕೆಲೆವೆರೆನ ಪಾಪೊಲು ದುಂಬೇ ತೆರಿದ್ ಬರ್ಪುಂಡು, ಅಕುಲು ನ್ಯಾಯತೀರ್ಪುಗು ಗುರಿ ಆಪೆರ್. ಬೇತೆ ಕೆಲೆವೆರೆನ ಪಾಪೊಲು ದೆಂಗ್‌ದಿತ್ತ್‌ದ್ ಅವು ಬೊಕ್ಕ ತೋಜಿದ್ ಬರ್ಪುಂಡು.</verse>
				<verse number="25">ಅಂಚೆನೇ ಕೆಲೆವೆರೆನ ಎಡ್ಡೆ ಕೆಲಸೊಲು ತೋಜಿದ್ ಬರ್ಪುಂಡು. ಬೊಕ್ಕ ಬೇತೆ ಕೆಲೆವೆರೆನ ಎಡ್ಡೆ ಕೆಲಸೊಲು ತೋಜಿದ್ ಬತ್ತಿಜಿಡಲಾ ಒಂಜಿ ದಿನ ಬೈಲ್‌ಗ್ ಬರಂದೆ ಉಪ್ಪಂದ್.</verse>
			</chapter>
			<chapter number="6">
				<verse number="1">ದಾಸೆರಾದ್ ಬೊಕ್ಕೊರಿಯನ ಅಧೀನೊಡು ಉಪ್ಪುನಾಕುಲು ತನ್ಕುಲೆನ ಯಜಮಾನೆರೆಗ್ ಮಾತ ಮಾನೊಗು ಯೋಗ್ಯದಾಕುಲು ಅಂದ್‌ದ್ ಎನ್ನಡ್. ಇಜ್ಜಾಂಡ ದೇವೆರೆ ಪುದರ್‌ಗ್ಲಾ ನಮ ಬೋಧನೆಗ್ಲಾ ದೂಷಣೆ ಆವು.</verse>
				<verse number="2">ಏರೆಗಾಂಡಲಾ ಕ್ರಿಸ್ತನ್ ನಂಬುನ ಯಜಮಾನೆರ್ ಇತ್ತೆರ್ಡ ಅಕುಲು ಆ ಯಜಮಾನನ್ ಸಹೋದರೆ ಅಂದ್‌ದ್ ಉದಾಸೀನ ಮಲ್ಪಂದೆ, ತನ್ಕುಲೆನ ಬೇಲೆದ ಫಲೊನು ಹೊಂದುನಾಕುಲುಲಾ ನಂಬುನಾಕುಲುಲಾ ಪ್ರೀತಿದಾಕುಲುಲಾ ಆದುಲ್ಲೆರಂದ್‌ದ್ ತೆರಿದ್ ಅಕ್ಲೆ ಸೇವೆನ್ ಹೆಚ್ಚಾದ್ ಮಲ್ಪಡ್. ಈ ಬೋಧನೆ ಕೊರ್ದು ಎಚ್ಚರಿಕೆ ಮಲ್ಪುಲ.</verse>
				<verse number="3">ಏರಾಂಡಲಾ ಒರಿ ಬೇತೆ ಬೋಧನೆ ಕೊರ್ದು ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಸರಿ ಇತ್ತಿ ಪಾತೆರೊಗ್ಲಾ ಭಕ್ತಿಗ್ ತಕ್ಕಾದುಪ್ಪು ಬೋಧನೆಗ್ಲಾ ಒಪ್ಪಿಯಂದೆ ಪೋಂಡ,</verse>
				<verse number="4">ಆಯೆ ಒಂಜೆನ್ಲಾ ತೆರಿಯಂದೆ ತರ್ಕಲಾ ಚರ್ಚೆಲಾ ಮಲ್ಪುನಾಯೆ ಆದ್ ಅಹಂಕಾರೊಡು ಕಣ್ಣ್ ತೋಜಂದಿನಾಯೆ ಆದುಲ್ಲೆ. ಉಂದೆಡ್ದಾದ್ ಮಚ್ಚರ, ಲಡಯಿ, ದೂಷಣೆ, ಹಾಳ್ ಸಂಶಯೊಲು ಮಾತ ಪುಟ್ಟುಂಡು.</verse>
				<verse number="5">ಅತ್ತಂದೆ ಬುದ್ಧಿಕೆಟ್ಟ್‌ದ್ ಸತ್ಯೊನು ಬುಡ್ತಿನಾಕುಲಾದ್, ದೇವಭಕ್ತಿನ್ ಒಂಜಿ ಲಾಭದ ಉದ್ಯೋಗ ಅಂದ್‌ದ್ ಎನ್ನುನ ಈ ನರಮಾನಿಲೆಡ ನಿತ್ಯದ ಕಚ್ಚಾಟ ಆವೊಂದುಪ್ಪುಂಡು.</verse>
				<verse number="6">ತೃಪ್ತಿ ಕೊರ್ಪಿನ ಭಕ್ತಿ ಮಲ್ಲ ಲಾಭ ಇತ್ತಿನವೇ ಆದುಂಡು.</verse>
				<verse number="7">ನಮ ಲೋಕೊಗು ಬನ್ನಗ ದಾಲಾ ಪತ್ತೊಂದು ಬೈದ್‌ಜ, ಅಂಚೆನೇ ಲೋಕೊಡ್ದು ಪೋನಗ ದಾಲಾ ದೆತ್ತೊಂದು ಪೋಪುಜ.</verse>
				<verse number="8">ನಂಕ್ ನುಪ್ಪು ಕುಂಟು ಇತ್ತ್ಂಡ ಯಾವು, ಐಟ್ಟ್ ತೃಪ್ತೆರಾದುಪ್ಪುಗ.</verse>
				<verse number="9">ಐಶ್ವರ್ಯವಂತೆ ಆವೊಡು ಅಂದ್‌ದ್ ಆಸೆ ಮಲ್ಪುನಾಕುಲು ಶೋಧನೆಗ್ ಬೂರ್ದು ನಾನಾ ರೀತಿದ ಬುದ್ಧಿದಾಂತಿನ ಬೊಕ್ಕ ನಾಶಾಪಿನ ದುರಾಶೆಲೆಗ್ ತಿಕ್ಕ್‌ದ್ ಬೂರ್ವೆರ್. ಇಂಚಿತ್ತಿ ಆಸೆಲು ನರಮಾನಿಲೆನ್ ಕೇಡ್‌ಗ್ಲಾ ನಾಶೊನೊಗ್ಲಾ ಪಾಡುಂಡು.</verse>
				<verse number="10">ದಾಯೆಗಂದ್ಂಡ ಕಾಸ್‌ದಾಸೆ ಮಾತ ದುಷ್ಟತನೊಕು ಬೇರ್ ಆದುಂಡು. ಐಕ್ ಕೆಲೆವೆರ್ ಮನಸ್ ದೀದ್ ಕ್ರಿಸ್ತನ ಮಿತ್ತ್‌ದ ನಂಬಿಕೆಡ್ ಸಾದಿ ತತ್ತ್ ಪೋಯಿನಕುಲಾದ್, ತನ್ಕುಲೆಗ್ ದಿಂಜ ಬೇನೆ ಮಲ್ತೊಂಡೆರ್.</verse>
				<verse number="11">ಆಂಡ ತಿಮೋಥಿ, ಈ ಒರಿ ದೇವೆರೆ ನರಮಾನಿ. ಈ ಮಾತ ಪಡಿಕೆಂತಿನೆಡ್ದ್ ದೂರ ಪಾರ್ದ್ ನೀತಿಗ್, ಭಕ್ತಿಗ್, ನಂಬಿಕೆಗ್, ಪ್ರೀತಿಗ್, ತಾಳ್ಮೆಗ್, ಸಜ್ಜನಿಗೆಗ್ ಪ್ರಯತ್ನ ಮಲ್ಪುಲ.</verse>
				<verse number="12">ಕ್ರಿಸ್ತ ನಂಬಿಕೆದಾಕುಲು ಮಲ್ಪುನ ಎಡ್ಡೆ ಉರ್ಡಾಟೊನು ಮಲ್ಪುಲ, ನಿತ್ಯಜೀವೊನು ಗಟ್ಟಿಯಾದ್ ಪತ್ತೊನ್ಲ. ಐಕಾದ್ರನೆ ದೇವೆರ್ ನಿನನ್ ಲೆತ್ತ್‌ದೆ. ಬೊಕ್ಕ ಈ ದಿಂಜ ಸಾಕ್ಷಿಲೆ ಎದುರುಡು ಎಡ್ಡೆ ಅರಿಕೆ ಮಲ್ತ್‌ದ.</verse>
				<verse number="13">ಮಾತ ಸೃಷ್ಟಿಗ್ಲಾ ಜೀವ ಕೊರ್ಪಿನ ದೇವೆರೆ ದುಂಬುಲಾ, ಪೊಂತ್ಯ ಪಿಲಾತನ ಎದುರುಡು ಎಡ್ಡೆ ಅರಿಕೆನ್ ಸಾಕ್ಷಿ ಆದ್ ಕೊರಿನ ಕ್ರಿಸ್ತ ಯೇಸುನ ಎದುರುಡ್ಲಾ ಯಾನ್ ನಿಕ್ಕ್ ಕಂಡಿತಾದ್ ಪನ್ಪಿನಿ ದಾನೆಂದ್ಂಡ,</verse>
				<verse number="14">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ತೋಜಿದ್ ಬನ್ನೆಂಗೆ ಈ ಸುವಾರ್ತೆದ ಅಪ್ಪಣೆನ್ ಕುರೆದಾಂತೆ ತಪ್ಪುದಾಂತೆ ಕೈಕೊನ್ಲ.</verse>
				<verse number="15">ಭಾಗ್ಯವಂತೆ ಆಯಿ ಒರಿಯೇ ಸರ್ವತ್ರಾಣಿ ದೇವೆರ್‌ಲಾ, ರಾಜಾದಿರಾಜೆಲಾ ಕರ್ತವೆರೆ ಕರ್ತವೆಲಾ ಆದುಪ್ಪು ಯೇಸು ಬರ್ಪಿನೆನ್ ದೇವೆರ್ ತಕ್ಕ ಸಮಯೊಡು ತೋಜಾವೆ.</verse>
				<verse number="16">ಆಯೆ ಒರಿಯೇ ಏಪಲಾ ಸೈಯಂದಿನಾಯೆಲಾ ತೀರಂದಿ ಬೊಲ್ಪುಡು ಉಪ್ಪುನಾಯೆಲಾ ಆದುಲ್ಲೆ. ನರಮಾನಿಲೆಡ್ ಏರ್ಲಾ ಆಯನ್ ತೂತುಜೆರ್, ಏರೆಗ್ಲಾ ಆಯನ್ ತೂವೆರೆ ಆವಂದ್; ಆಯಗ್ ಮಾನಲಾ ನಿತ್ಯ ಬಲಲಾ ಉಪ್ಪಡ್ ಆಮೆನ್.</verse>
				<verse number="17">ಈ ಲೋಕದ ಐಶ್ವರ್ಯವಂತೆರೆಗ್ ಅಪ್ಪಣೆ ಕೊರೊಡು ದಾನೆಂದ್ಂಡ, ಅಕುಲು ಅಹಂಕಾರಿಲಾವಂದೆ, ತನ್ಕುಲೆ ಸ್ಥಿರದಾಂತಿ ಐಶ್ವರ್ಯದ ಮಿತ್ತ್ ಭರವಸ ದೀವಂದೆ, ನಮ ಸಂತೋಷಗಾದ್ ನಂಕ್ ಮಾತೆನ್ಲಾ ಧಾರಾಳವಾದ್ ಕೊರ್ಪಿನ ದೇವೆರೆ ಮಿತ್ತ್ ಭರವಸ ದೀವೊಡು.</verse>
				<verse number="18">ನಿಜವಾಯಿನ ಜೀವೊನು ಪಡೆವೆರೆ ಬೋಡಾದ್ ಅಕುಲು ಎಡ್ಡೆಂತಿನೆನ್ ಮಲ್ಪುನಾಕುಲುಲಾ ಎಡ್ಡೆ ಕಾರ್ಯೊಲೆಡ್ ಐಶ್ವರ್ಯವಂತೆರ್ಲಾ ದಾನಧರ್ಮ ಮಲ್ಪುನಾಕುಲುಲಾ ಉದಾರ ಮನಸ್‌ದಾಕುಲುಲಾ ಆದುಪ್ಪೊಡು.</verse>
				<verse number="19">ತನ್ಕುಲು ನಿತ್ಯಜೀವೊನು ಪತ್ತೊನುಲೆಕ್ಕ ಬರ್ಪಿ ಕಾಲೊಗು ಎಡ್ಡೆ ಬುನಾದಿನ್ ತನ್ಕುಲೆಗ್ ಕೂಡಾವೊನೊಡು ಪಂಡ್ದ್ ಅಕ್ಲೆಗ್ ಅಪ್ಪಣೆ ಕೊರ್ಲ.</verse>
				<verse number="20">ಓ ತಿಮೋಥಿ, ಈ ಗೇನದ ಬೋಧನೆ ಅಂದ್‌ದ್ ಭಕ್ತಿದಾಂತಿ ಬೋಧನೆಗ್ ಸಮ್ಮಂಧ ಆದುಪ್ಪು ಪ್ರಪಂಚದ ವ್ಯರ್ಥ ಪಾತೆರೊಲೆಗ್ಲಾ, ತರ್ಕೊಲೆಗ್ಲಾ ದೂರ ಆದ್, ದೇವೆರ್ ನಿಕ್ಕ್ ಒಚ್ಚಿದ್ ಕೊರಿನೆನ್ ಜೋಕೆಡ್ ಕಾಪುಲ.</verse>
				<verse number="21">ಕೆಲೆವೆರ್ ಆ ಸುಳ್ಳು ಗೇನೊನು ಪತ್ತೊಂದು ಕ್ರಿಸ್ತಡ್ ದೀತಿನ ನಂಬಿಕೆಡ್ದ್ ತತ್ತ್‌ದ್ ಪೋಯೆರ್. ದೇವೆರೆ ದಯ ನಿಕ್ಲೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="55">
			<chapter number="1">
				<verse number="1">ಕ್ರಿಸ್ತ ಯೇಸುಡುಪ್ಪು ಜೀವ ವಾಗ್ದಾನೊನು ತೆರಿಪಾವುನೆಕ್ಕಾದ್ ದೇವೆರೆ ಚಿತ್ತೊಡು ಕ್ರಿಸ್ತ ಯೇಸುನ ಅಪೊಸ್ತಲೆ ಆಯಿ ಪೌಲುಡ್ದು ಎನ ಪ್ರೀತಿದ ಮಗೆ ಆದುಪ್ಪು ತಿಮೋಥಿಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ಕರ್ತವೆ ಆದುಪ್ಪು ಕ್ರಿಸ್ತ ಯೇಸುಡ್ದ್‌ಲಾ ನಿಕ್ಕ್ ದಯಲಾ, ಕರುಣೆಲಾ, ಸಮಾಧಾನಲಾ ಆವಡ್.</verse>
				<verse number="2"></verse>
				<verse number="3">ಯಾನ್ ರಾತ್ರೆ ಪಗೆಲ್ ಎನ ಪ್ರಾರ್ಥನೆಲೆಡ್ ನಿನನ್ ಬುಡಂದೆ ನೆನೆಪು ಮಲ್ಪುವೆ. ಅತ್ತಂದೆ ಯಾನ್ ಎನ ಪೂರ್ವಿಕೆರೆ ಭಕ್ತಿದ ಮಾರ್ಗೊಡು ನಡತೊಂದು ಶುದ್ಧ ಮನಸಾಕ್ಷಿಡ್ ಸೇವೆ ಮಲ್ಪುನ ದೇವೆರೆಗ್ ನಿನ ಸಂಗತಿಡ್ ಉಪಕಾರ ಸಂದಾವೆ.</verse>
				<verse number="4">ಯಾನ್ ನನಲಾ ನಿನ ಕಣ್ಣೀರ್‌ನ್ ಮದತ್‌ಜಿ, ನಿನನ್ ಕುಡೊರ ತೂದು ಸಂತೋಷೊಡು ದಿಂಜೊಡು ಅಂದ್‌ದ್ ಆಸೆ ಮಲ್ಪುವೆ.</verse>
				<verse number="5">ನಿನಡುಪ್ಪು ಕಪಟದಾಂತಿ ನಂಬಿಕೆನ್ ನೆನೆಪು ಮಲ್ತೊನ್ವೆ. ಅವು ದುಂಬತ್ತ ನಿನ ಅಜ್ಜಿ ಲೋವಿಡಲಾ ನಿನ ಅಪ್ಪೆ ಯೂನೀಕೆಡಲಾ ಇತ್ತ್ಂಡ್. ಅಂಚೆನೇ ಅವು ನಿನಡಲಾ ಉಂಡು ಅಂದ್‌ದ್ ಯಾನ್ ದೃಢಾದ್ ನಂಬುದೆ.</verse>
				<verse number="6">ಅಂಚಾಯಿನೆಡ್ದೇ ಯಾನ್ ಎನ ಕೈನ್ ನಿನ ತರೆಕ್ ದೀಯಿನಪಗ ದೇವೆರ್ ನಿಕ್ಕ್ ಕೊರಿನ ಆತ್ಮೀಕ ವರದಾನೊನು ನನಲಾ ಹೆಚ್ಚಾದ್ ತೋಜಿದ್ ಬರ್ಪಿಲೆಕ್ಕ ಮಲ್ಪೊಡಂದ್‌ದ್ ಕುಡ ನೆನೆಪು ಪುಟ್ಟಾವೆ.</verse>
				<verse number="7">ದಾಯೆಗಂದ್ಂಡ ದೇವೆರ್ ನಂಕ್ ಕೊರ್ತಿನ ಆತ್ಮ ಅವು ಬಲತ್ತವು, ಪ್ರೀತಿದವು, ತಿಳುವಳಿಕೆ ಇತ್ತಿನವು ಅತ್ತಂದೆ ಪೋಡಿಗೆದ ಆತ್ಮ ಅತ್ತ್.</verse>
				<verse number="8">ಅಂಚಾದ್ ಕರ್ತವಗ್ ಕೊರ್ಪಿನ ಸಾಕ್ಷಿದ ಬಗೆಟಾವಡ್ ಆಯಗಾದ್ ಸೆರೆಮನೆಟ್ ಉಪ್ಪುನ ಎನ ಬಗೆಟಾವಡ್ ನಾಚಿಗೆ ಮಲ್ಪಡ. ಆಂಡ ದೇವೆರ್ ನಿಕ್ಕ್ ಕೊರ್ಪಿನ ಬಲೊಡ್ದು ಸುವಾರ್ತೆಗಾದ್ ಎನಡೊಪ್ಪ ಕಷ್ಟೊಲೆನ್ ತಾಳೊನ್ಲ.</verse>
				<verse number="9">ದೇವೆರ್ ನಮ ಎಡ್ಡೆ ಕೆಲಸೊನು ತೂದು ಅತ್ತ್, ತನ ಚಿತ್ತದ ಪ್ರಕಾರ ದಯೆಟ್ ನಮನ್ ರಕ್ಷಣೆ ಮಲ್ತ್‌ದ್ ಪರಿಶುದ್ಧರಾಯೆರೆಗಾದ್ ಲೆತ್ತೆ. ಈ ದಯ ಆದಿಕಾಲೊಗು ದುಂಬು ಕ್ರಿಸ್ತ ಯೇಸುಡು ನಂಕ್ ದೀತ್ಂಡ್. ಇತ್ತೆ ನಮ ರಕ್ಷಕೆ ಆದುಪ್ಪುನ ಯೇಸು ಕ್ರಿಸ್ತಡ್ ತೋಜಿದ್ ಬತ್ತಿನೆಡ್ದ್ ಅವು ನಂಕ್ ತೆರಿದ್ ಬತ್ತ್ಂಡ್. ಆಯೆ ಮರಣದ ಬಲೊನು ಪೊಲ್ತುದು ಸುವಾರ್ತೆಡ್ದ್ ಜೀವೊಗ್ಲಾ ನಿತ್ಯತ್ವೊಗ್ಲಾ ಉಪ್ಪುನ ಸಾದಿದ ಬೊಲ್ಪುನು ತೋಜಾಯೆ.</verse>
				<verse number="10"></verse>
				<verse number="11">ಸುವಾರ್ತೆದ ಅಭಿವೃದ್ಧಿಗಾದ್ ಯಾನ್ ಸುವಾರ್ತೆನ್ ಸಾರಿಯುನೆಕ್ಕ್‌ಲಾ ಅಪೊಸ್ತಲೆ ಆದ್ ಬೋಧನೆ ಮಲ್ಪೆರೆಗಾದ್‌ಲಾ ನೇಮಕ ಆತೆ.</verse>
				<verse number="12">ಈ ಕಾರಣೊಗಾದ್ ಯಾನ್ ಈ ಭಂಗೊಲೆನ್ ತಾಳೊಂದುಲ್ಲೆ. ಆಂಡ ಯಾನ್ ನಾಚಿಗೆ ಮಲ್ಪುಜಿ, ಯಾನ್ ನಂಬುನಾಯನ್ ತೆರಿದೆ, ಆಯೆ ಎಂಕ್ ಒಚ್ಚಿದ್ ಕೊರಿನೆನ್ ಆ ದಿನಕಾದ್ ಕಾಪೆರೆಗ್ ಶಕ್ತಿ ಇತ್ತಿನಾಯೆ ಆದುಲ್ಲೆ ಅಂದ್‌ದ್ ಯಾನ್ ದೃಢಾದ್ ನಂಬುವೆ.</verse>
				<verse number="13">ಈ ಕ್ರಿಸ್ತ ಯೇಸುಡು ನಂಬಿಕೆಲಾ ಪ್ರೀತಿಲಾ ಇತ್ತಿನಾಯೆ ಆದ್, ಎನಡ್ದ್ ಕೇಂಡಿನ ಸ್ವಸ್ಥ ಬೋಧನೆನ್ ಮಾದ್ರಿ ಆದ್ ದೀದ್ ಬುಡಂದೆ ಪತ್ತೊನ್ಲ.</verse>
				<verse number="14">ನಿಕ್ಕ್ ಒಚ್ಚಿದ್ ಕೊರ್ತಿನ ಸತ್ಯೊನು ಎಡ್ಡೆಂತಿನ ಅಂದ್‌ದ್ ತೆರಿದ್ ನಮಡುಪ್ಪು ಪರಿಶುದ್ಧಾತ್ಮೊಡ್ದು ಕಾತೊನ್ಲ.</verse>
				<verse number="15">ಆಸ್ಯ ಸೀಮೆದ ಮಾತೆರ್ಲಾ ಎನನ್ ಕೈ ಬುಡಿಯೆರಂದ್‌ದ್ ಈ ತೆರಿದ. ಐಟ್ಟ್ ಫುಗೇಲೆಲಾ ಹೆರ್ಮೊಗೇನೆಲಾ ಸೇರ್ದೆರ್.</verse>
				<verse number="16">ಒನೇಸಿಫೊರನ ಇಲ್ಲದಾಕುಲೆಗ್ ಕರ್ತವೆ ತನ ಕರುಣೆನ್ ತೋಜಾವಡ್, ದಾಯೆಗಂದ್ಂಡ ಆಯೆ ಅಪಗಪಗ ಎನ ಕೈತಲ್‌ ಬತ್ತ್‌ದ್ ಎಂಕ್ ಉತ್ತೇಜನ ಕೊರಿಯೆ. ಯಾನ್ ಸಂಕಲೆಡ್ ಉಲ್ಲೆ ಅಂದ್‌ದ್ ನಾಚಿಗೆ ಮಲ್ತ್‌ಜೆ.</verse>
				<verse number="17">ಆಯೆ ರೋಮುಗು ಬತ್ತಿ ಕೂಡ್ಲೆ ಯಾನ್ ಆಯಗ್ ತಿಕ್ಕುನ ಮುಟ್ಟ ದಿಂಜ ಆಸಕ್ತಿಡ್ ಆಯೆ ಎನನ್ ನಾಡಿಯೆ.</verse>
				<verse number="18">ಕ್ರಿಸ್ತೆ ಬರ್ಪಿನ ದಿನೊಟು ಕರ್ತವೆ ಆಯಗ್ ಕರುಣೆ ತೋಜಾವಡ್. ಬೊಕ್ಕ ಆಯೆ ಎಫೆಸೊಡು ಎಂಕ್ ಏತ್ ಸಹಾಯ ಕೊರಿಯೆ ಅಂದ್‌ದ್ ನಿಕ್ಕ್‌ಲಾ ಸರಿಯಾದ್ ಗೊತ್ತುಂಡು.</verse>
			</chapter>
			<chapter number="2">
				<verse number="1">ಎನ ಮಗೆ ಆದುಪ್ಪು ತಿಮೋಥಿ, ಈ, ಕ್ರಿಸ್ತ ಯೇಸುಡು ಉಪ್ಪು ದಯೊಟು ಬಲ ಪಡೆಲ.</verse>
				<verse number="2">ದಿಂಜ ಸಾಕ್ಷಿಲೆ ಎದುರು ಈ ಎನಡ್ದ್ ಕೇಂಡಿನ ಬೋಧನೆಗ್ ಸರಿಯಾದ್ ಬೇತೆ ಜನೊಕುಲೆಗ್ ಬೋಧನೆ ಮಲ್ಪೆರೆ ಸಾಮರ್ಥ್ಯ ಇತ್ತಿ ನಂಬಿಕೆದ ನರಮಾನಿಲೆಗ್ ಅವೆನ್ ಒಚ್ಚಿದ್ ಕೊರ್ಲ.</verse>
				<verse number="3">ಕ್ರಿಸ್ತ ಯೇಸುನ ಎಡ್ಡೆ ಸೈನಿಕನಂಚ ಎನಡೊಪ್ಪ ಕಷ್ಟೊನು ತಾಳೊನ್ಲ.</verse>
				<verse number="4">ಲಡಯಿಗ್ ಪೋಪಿನ ಸೈನಿಕೆ ಈ ಲೋಕದ ಬೊಡ್ಚಾವಂದಿನ ಕೆಲಸೊಲೆಡ್ ಸೇರಂದೆ ತನನ್ ದಂಡ್‌ಗ್ ಸೇರಾಯಿನಾಯನ್ ಮೆಚ್ಚಾವು ಲೆಕ್ಕ ಪ್ರಯಾಸ ಬರ್ಪೆ ಅತ್ತಾ?</verse>
				<verse number="5">ಅತ್ತಂದೆ ಏರಾಂಡಲಾ ಓಟದ ಸ್ಪರ್ಧೆಡ್ ಪಾಲ್ ದೆತ್ತೊಂದು, ಐತ ನಿಯಮೊನು ಪಾಲನೆ ಮಲ್ತಿಜೆಡ ಆಯಗ್ ಕಿರೀಟ ತಿಕ್ಕಂದ್.</verse>
				<verse number="6">ಭಂಗ ಬರ್ಪಿ ಬೆನ್ನಿದಾಯಗ್ ಬೆನ್ನಿದ ಫಲೊಟು ಸುರುತ್ತ ಪಾಲ್ ತಿಕ್ಕೊಡು.</verse>
				<verse number="7">ಯಾನ್ ಪನ್ಪಿನೆನ್ ಆಲೋಚನೆ ಮಲ್ಪುಲ, ದಾಯೆಗಂದ್ಂಡ ಈ ಮಾತ ಸಂಗತಿಲೆನ್ ತೆರಿಯೊನಿಯೆರೆ ಕರ್ತವೆ ನಿಕ್ಕ್ ಸಹಾಯ ಮಲ್ಪುವೆ.</verse>
				<verse number="8">ಸೈತಿನಾಕುಲೆಡ್ದ್ ಲಕ್ಕಿನಾಯೆಲಾ ದಾವೀದ್ ಸಂತಾನದಾಯೆಲಾ ಆದುಪ್ಪು ಯೇಸು ಕ್ರಿಸ್ತನ್ ನೆನೆಪು ಮಲ್ತೊನ್ಲ. ಉಂದೇ ಯಾನ್ ಸಾರಿಯುನ ಸುವಾರ್ತೆ ಆದುಂಡು.</verse>
				<verse number="9">ಬೊಕ್ಕ ಯಾನ್ ಈ ಸುವಾರ್ತೆ ಸಾರಿನೆಡ್ದ್ ದಿಂಜ ಭಂಗ ಬತ್ತಿನಾಯೆ ಆದ್ ದುಷ್ಕರ್ಮಿಲೆಕ್ಕ ಸಂಕಲೆಡ್ ಉಲ್ಲೆ, ಆಂಡ ದೇವೆರೆ ಪಾತೆರೊಗು ಬಂಧನ ಇಜ್ಜಿ.</verse>
				<verse number="10">ಅಂಚಾದ್ ದೇವೆರ್ ಅಜತ್‌ದಿನಾಕುಲು ಎನ ಒಟ್ಟುಗು ಕ್ರಿಸ್ತ ಯೇಸುಡುಪ್ಪು ರಕ್ಷಣೆನ್ ನಿತ್ಯ ಮೈಮೆದೊಟ್ಟುಗು ಹೊಂದೊಡು ಅಂದ್‌ದ್ ಯಾನ್ ಅಕ್ಲೆಗಾದ್ ಮಾತೆನ್ಲಾ ತಾಳೊನ್ವೆ</verse>
				<verse number="11">ಈ ಪಾತೆರ ನಂಬಿಕೆದವು ದಾನೆಂದ್ಂಡ: ನಮ ಆಯ ಒಟ್ಟುಗು ಸೈತ್ ಪೋಪಡ, ಆಯ ಒಟ್ಟುಗು ಬದುಕುವ.</verse>
				<verse number="12">ನಮ ಭಂಗೊನು ತಾಳೊನ್ವಡ, ಆಯ ಒಟ್ಟುಗು ಆಳುವ. ಬೊಕ್ಕ ನಮ ಯೇಸುನು ಆರೆಂಜುವಡ, ಆಯೆಲಾ ನಮನ್ ಆರೆಂಜುವೆ,</verse>
				<verse number="13">ನಮ ಆಯಗ್ ಅಪನಂಬಿಕೆದಾಕುಲು ಆದಿತ್ತ್‌ಂಡಲಾ ಆಯೆ ನಂಬಿಗಸ್ತೆ ಆದುಲ್ಲೆ, ದಾಯೆಗಂದ್ಂಡ ಆಯೆ ತನ ಸ್ವಭಾವೊಡು ಬದಲಾಪುಜೆ.</verse>
				<verse number="14">ಈ ಸಂಗತಿಲೆನ್ ಮಾತೆರೆಗ್ ನೆನೆಪು ಪುಟ್ಟಾಲ, ಕೇನುನಾಕುಲೆಗ್ ತೊಂದರೆ ಆಪಿನತ್ತಂದೆ, ವಾ ಪ್ರಯೋಜನೊಗ್ಲಾ ಬರಂದಿ ತರ್ಕೊಲೆನ್ಲಾ ಮಲ್ಪೆರೆ ಬಲ್ಲಿ ಅಂದ್‌ದ್ ಅಕ್ಲೆಗ್ ದೇವೆರೆ ಸನ್ನಿಧಿಡ್ ಅಪ್ಪಣೆ ಕೊರ್ಪೆ.</verse>
				<verse number="15">ಈ ದೇವೆರೆ ದೃಷ್ಟಿಡ್ ಮೆಚ್ಚಿಗೆದಾಯೆ ಆದ್ ತೋಜಿದ್ ಬರಿಯೆರೆ ಪ್ರಯಾಸ ಮಲ್ಪುಲ. ನಾಚಿಗೆಗ್ ಗುರಿ ಆವಂದಿಲೆಕ್ಕಲಾ ಸತ್ಯದ ಪಾತೆರೊನು ಸರಿಯಾದ್ ಬೋಧನೆ ಮಲ್ಪುನಾಯೆಲಾ ಆದುಪ್ಪುಲ.</verse>
				<verse number="16">ಲೋಕದ ಹರಟೆ ಪಾತೆರೊಲೆಗ್ ದೂರ ಆದುಪ್ಪುಲ. ದಾಯೆಗ್ ಪಂಡ್ಂಡ ಅಂಚಿನ ಪಾತೆರೊಗು ಮನಸ್ ಕೊರ್ಪಿನಾಕುಲು ಹೆಚ್ಚೆಚ್ಚಾದ್ ಭಕ್ತಿದಾಂತಿನಾಕುಲಾದ್ ಪೋಪೆರ್</verse>
				<verse number="17">ಇಂಚಿನ ವ್ಯರ್ಥ ಪಾತೆರೊಲು ಗಾಯದಲೆಕ್ಕ ಗಜೆಲೊಂದು ಪರಡುಂಡು. ಅಂಚಿತ್ತಿನಾಕುಲೆಡ್ ಹುಮೆನಾಯೆಲಾ ಪಿಲೇತೆಲಾ ಉಲ್ಲೆರ್.</verse>
				<verse number="18">ಮೊಕುಲು ಸತ್ಯದ ಸಾದಿನ್ ಬುಡ್ದು ಸೈತಿನಾಕುಲು ಲಕ್ಕುನವು ಆದ್ ಪೋಂಡು ಪನೊಂದು ಕೆಲೆವೆರೆನ ನಂಬಿಕೆನ್ ಹಾಳ್ ಮಲ್ತೊಂದುಲ್ಲೆರ್.</verse>
				<verse number="19">ಆಂಡಲಾ ದೇವೆರೆ ಬುನಾದಿ ಸ್ಥಿರ ಆದ್ ಉಂತುದುಂಡು. ಬೊಕ್ಕ, “ಕರ್ತವೆ ತನ್ನಾಯೆ ಪನ್ಪಿನೆನ್ ತೆರಿದೆ. ಕರ್ತವನ ಪುದರ್‌ನ್ ಅರಿಕೆ ಮಲ್ಪುನ ಮಾತೆರ್ಲಾ ಅನ್ಯಾಯೊನು ಬುಡ್ದು ಬುಡೊಡು,” ಅಂದ್‌ದ್ ಐಟ್ಟ್ ಬರೆತಿನ ಉಂಡು.</verse>
				<verse number="20">ಮಲ್ಲ ಇಲ್ಲಡ್ ಬೊಳ್ಳಿ ಬಂಗಾರ್‌ದ ಬಾಜನೊಲು ಮಾತ್ರ ಅತ್ತಂದೆ ಮರತ ಬಾಜನೊಲು ಬೊಕ್ಕ ಮಣ್ಣ್‌ದ ಬಾಜನೊಲು ಉಪ್ಪುಂಡು. ಐತ ಕೆಲವು ಬಾಜನೊಲು ಎಡ್ಡೆ ಬಳಕೆಗ್ಲಾ ಕೆಲವು ಸಮಾನ್ಯ ಬಳಕೆಗ್ಲಾ ಬರ್ಪುಂಡು.</verse>
				<verse number="21">ಅಂಚಾದ್ ಒರಿ ಹಾಳ್ ನಡತೆದಾಯನ ಸಹವಾಸೊನು ಬುಡ್ದು ತನನ್ ಶುದ್ಧ ಮಲ್ತೊಂಡೆಡ ಆಯೆ ಎಡ್ಡೆ ಬಳಕೆಗ್ ತಕ್ಕದಾಯೆ ಆದುಪ್ಪುವೆ. ಆಯೆ ದೇವೆರೆ ಸೇವೆಗ್ ಒಚ್ಚಿದ್ ಕೊರ್ತಿನಾಯೆ ಆದ್ ತನ ಯಜಮಾನಗ್ ಪ್ರಯೋಜನದಾಯೆಲಾ, ಮಾತ ಎಡ್ಡೆ ಕಾರ್ಯೊಲೆನ್ ಮಲ್ಪೆರೆಗ್ ತಯಾರಾದುಪ್ಪುವೆ.</verse>
				<verse number="22">ಜವ್ವನ ಪ್ರಾಯದ ಇಚ್ಚೆಲೆಡ್ದ್ ದೂರ ಇತ್ತ್‌ದ್, ನೀತಿನ್, ನಂಬಿಕೆನ್, ಪ್ರೀತಿನ್ ಸಮಾಧಾನೊನು ಸಂಪಾದನೆ ಮಲ್ಪೆರೆಗಾದ್ ಶುದ್ಧ ಉಡಲ್‌ಡ್ದ್ ಕರ್ತವನ್ ಅರಿಕೆ ಮಲ್ಪುನಾಕುಲೆಡೊಪ್ಪ ಈಲಾ ಪ್ರಯತ್ನ ಮಲ್ಪುಲ.</verse>
				<verse number="23">ಬುದ್ಧಿದಾಂತಿ ವ್ಯರ್ಥ ತರ್ಕೊಲು ಅವು ಲಡಯಿಗ್ ಕಾರಣಾದುಂಡು ಪನ್ಪಿನೆನ್ ಈ ತೆರಿದ್ ಐತ ಸುದ್ಧಿಗ್ ಪೋವಡ.</verse>
				<verse number="24">ಕರ್ತವ ಸೇವಕೆ ಲಡಯಿ ಮಲ್ಪಂದೆ, ಮಾತೆರೆಗ್ ದಯ ತೋಜಾವುನಾಯೆಲಾ, ಬೋಧನೆ ಮಲ್ಪೆರೆ ತಕ್ಕದಾಯೆಲಾ, ತಾಳ್ಮೆಡ್ ಉಪ್ಪುನಾಯೆಲಾ ಆದುಪ್ಪೊಡು.</verse>
				<verse number="25">ಎದುರುಂತುನಾಕುಲೆನ್ ನಿಧಾನೊಡು ತಿದ್ದುನಾಯೆ ಆದುಪ್ಪೊಡು. ಒಂಜಿ ವೇಳೆ ದೇವೆರ್ ಎದುರುಂತುನಾಕುಲೆನ ಮನಸ್‌ನ್ ತನ ಕಡೆಕ್ಕ್ ತಿರ್ಗಾದ್ ಅಕ್ಲೆಗ್ ಸತ್ಯದ ಗೇನೊನು ಕೊರಿಯೆರೆ ಯಾವು.</verse>
				<verse number="26">ಸೈತಾನನ ಬಲೆಟ್ ತಿಕೊಂದು ಒಂಜಿ ವೇಳೆ ಮೊಕುಲು ತಪ್ಪಾವೊಂದು ದೇವೆರೆ ಚಿತ್ತದ ಪ್ರಕಾರ ಸ್ವಸ್ಥ ಬುದ್ಧಿಗ್ ಬರಿಯೆರೆ ಯಾವು.</verse>
			</chapter>
			<chapter number="3">
				<verse number="1">ಆಂಡ ಕಡೆ ದಿನೊಕುಲೆಡ್ ಬಾರಿ ಭಂಗದ ಕಾಲ ಬರು ಇನ್ಪಿನೆನ್ ತೆರಿಯೊನ್ಲ</verse>
				<verse number="2">ಜನೊಕುಲು ತನ್ಕುಲೆನೇ ಪ್ರೀತಿ ಮಲ್ಪುನಾಕುಲು, ಕಾಸ್‌ದಾಸೆದಾಕುಲು, ಬೂಟುಲಾ ಹೆಚ್ಚಾಳ್ಮೆ ಇತ್ತಿನಾಕುಲು, ದೂಷಣೆ ಮಲ್ಪುನಾಕುಲು, ಅಪ್ಪೆಅಮ್ಮೆ ಪಂಡಿನೆನ್ ಕೇನಂದಿನಾಕುಲು, ಉಪಕಾರ ಎನ್ನಂದಿನಾಕುಲು, ಅಶುದ್ಧದಾಕುಲು,</verse>
				<verse number="3">ಪ್ರೀತಿದಾಂತಿನಾಕುಲು, ಸಮಾಧಾನ ಆವಂದಿನಾಕುಲು, ಚಾಡಿ ಪನ್ಪಿನಾಕುಲು, ಸ್ವಸ್ಥ ಬುದ್ಧಿದಾಂತಿನಾಕುಲು, ಕ್ರೂರೆರ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪಂದಿನಾಕುಲು,</verse>
				<verse number="4">ದೇವೆರೆನ ಪೋಡಿಗೆದಾಂತಿನಾಕುಲು, ಹೆಮ್ಮೆದಾಕುಲು, ಮೂರ್ಖೆರ್, ದೇವೆರೆನ್ ಪ್ರೀತಿ ಮಲ್ಪುನೆಡ್ದ್ ಹೆಚ್ಚಾದ್ ಭೋಗೊಲೆನ್ ಪ್ರೀತಿ ಮಲ್ಪುನಾಕುಲು,</verse>
				<verse number="5">ಭಕ್ತಿದ ವೇಷೊಡಿತ್ತ್‌ದ್ ಐತ ಬಲೊನು ತಿರಸ್ಕಾರ ಮಲ್ಪುನಾಕುಲು ಆದುಪ್ಪೆರ್. ಇಂಚಿತ್ತಿನಾಕುಲೆನ ಸಹವಾಸ ಮಲ್ಪಡ.</verse>
				<verse number="6">ಅಕ್ಲೆಡ್ ಕೆಲವು ಜನ ಇಲ್ಲ್ ಇಲ್ಲಗ್ ಪೊಗ್ಗುದು, ಪಾಪೊಲೆಡ್ ದಿಂಜಿದ್ ಬೊಕ್ಕ ತರತರತ ಆಸೆಡ್ ಮುರ್ಕುದಿನ ಬುದ್ಧಿದಾಂತಿ ಪೊಂಜೊವುಲೆನ್ ವಶ ಮಲ್ಪುನಾಕುಲು ಮೊಕ್ಲೆಡೊಪ್ಪ ಸೇರ್ದುಪ್ಪುವೆರ್.</verse>
				<verse number="7">ಇಂಚಿತ್ತಿ ಪೊಂಜೊವುಲು ಏಪಲಾ ಪೊಸ ಬೋಧನೆಲೆ ಪಿರವು ಪೋಪೆರ್. ಆಂಡ ಸತ್ಯೊನು ಏಪೊಗ್ಲಾ ಅರ್ಥ ಮಲ್ತೊನ್ಜೆರ್.</verse>
				<verse number="8">ಯನ್ನ, ಯಂಬ್ರ, ಇನ್ಪಿನಾಕುಲು ಮೋಶೆಗ್ ಎದುರುಂತಿಲೆಕ್ಕನೆ ಮೊಕುಲುಲಾ ಸತ್ಯೊಗು ಎದುರುಂತುವೆರ್, ಬುದ್ಧಿಡ್ ಹಾಳಾಯಿನಾಕುಲುಲಾ ಯೇಸು ಮಿತ್ತ್ ದೀತಿ ನಂಬಿಕೆಡ್ ತೆಟ್ಟ್‌ದ್ ಪೋಯಿನಾಕುಲಾದುಲ್ಲೆರ್.</verse>
				<verse number="9">ಆಂಡ ಅಕ್ಲೆ ಪ್ರಯತ್ನೊಲು ನನ ದುಂಬಗ್ ಹೆಚ್ಚ್ ಬಾಳಂದೆ ಆ ಯನ್ನ ಬೊಕ್ಕ ಯಂಬ್ರೆನ ದುರ್ಬುದ್ಧಿ ಮಾತೆರೆಗ್ಲಾ ತೋಜಿಲೆಕ್ಕ ಮೊಕ್ಲೆನಲಾ ತೋಜಿದ್ ಬರು.</verse>
				<verse number="10">ಈಯಾಂಡಲಾ ಎನ ಬೆರಿ ಬರ್ಪಿನಾಯೆ ಆದ್ ಎನ ಬೋಧನೆ, ನಡತೆ, ಉದ್ದೇಶ, ನಂಬಿಕೆ, ತಾಳ್ಮೆ, ಪ್ರೀತಿ, ಸಹನೆ ಉಂದೆನ್ ಮಾತ ತೆರಿದ.</verse>
				<verse number="11">ಅಂತಿಯೋಕ್ಯಡ್, ಇಕೋನ್ಯಡ್, ಲುಸ್ತ್ರಡ್ ಯಾನ್ ಏತ್ ಭಂಗೊನ್ಲಾ, ಕಷ್ಟೊನ್ಲಾ ಅನುಭವ ಮಲ್ತ್‌ದೆ ಅಂದ್‌ದ್ ನಿಕ್ಕ್ ಗೊತ್ತುಂಡು. ಈ ಮಾತ ಕಡೆಟ್ಟ್ ಯಾನ್ ಎಂಚೆಂಚಿತ್ತಿನ ಭಂಗೊಲೆನ್ ತಾಳೊಂದು ಉಲ್ಲೆ ಇನ್ಪಿನೆನ್ಲಾ ಈ ತೆರಿದ, ಬೊಕ್ಕ ಈ ಮಾತ ಕಷ್ಟೊಲೆಡ್ ಕರ್ತವೆ ಎನನ್ ಬುಡ್ಪಾಯೆ.</verse>
				<verse number="12">ಅಂದ್, ಕ್ರಿಸ್ತ ಯೇಸುಡು ಭಕ್ತಿದ ಜೀವನ ಮಲ್ಪೊಡು ಅಂದ್‌ದ್ ಆಸೆ ಮಲ್ಪುನ ಪ್ರತಿಯೊರಿಲಾ ಭಂಗೊನು ಅನುಭವ ಮಲ್ಪೊಡೇ.</verse>
				<verse number="13">ಆಂಡ ದುಷ್ಟೆರ್‌ಲಾ, ವಂಚನೆದಾಕುಲುಲಾ, ಬಾಕಿದಾಕುಲೆನ್ ಮೋಸ ಮಲ್ತೊಂದು ಅಕುಲೇ ಕಡೆಕ್ಕ್ ಮೋಸೊಗು ಬೂರ್ದು ಹೆಚ್ಚ್ ಹೆಚ್ಚ್ ಹಾಳ್ ಆದ್ ಪೋಪೆರ್.</verse>
				<verse number="14">ಈಯಾಂಡ ಕಲ್ತ್‌ದ್ ದೃಢಾದ್ ನಂಬುನ ಬೋಧನೆಡ್ ನಿಲೆ ಆದುಪ್ಪುಲ. ನಿಕ್ಕ್ ಏರ್ ಕಲ್ಪಾದಿನಿ ಅಂದ್‌ದ್ ಈ ತೆರಿದ. ಈ ಎಲ್ಲಿಡ್ದಿಂಚಿಲಾ ಪರಿಶುದ್ಧ ಗ್ರಂಥೊಲೆನ್ ಕಲ್ತ್‌ದ ಅತ್ತಾ.</verse>
				<verse number="15">ಆ ಗ್ರಂಥೊಲು ಕ್ರಿಸ್ತ ಯೇಸುಡುಪ್ಪು ನಂಬಿಕೆಡ್ದ್ ರಕ್ಷಣೆನ್ ಪಡೆಯುನ ಗೇನೊನು ಕೊರ್ಪಿನೆಕ್ಕ್ ಸಾದ್ಯ ಉಂಡು.</verse>
				<verse number="16">ದೇವೆರೆ ಆತ್ಮಡ್ದ್ ಉಂಡಾಯಿನ ಒಂಜೊಂಜಿ ವಾಕ್ಯ ನಮನ್ ಬೋಧನೆ ಮಲ್ಪುನೆಕ್ಕ್‌ಲಾ, ನಂಕ್ ಎಚ್ಚರಿಕೆ ಕೊರ್ಪಿನೆಕ್ಕ್‌ಲಾ ನಮನ್ ತಿದ್ದುನೆಕ್ಕ್‌ಲಾ, ನೀತಿದ ಶಿಕ್ಷೆಗ್ಲಾ ಪ್ರಯೋಜನ ಆದುಂಡು.</verse>
				<verse number="17">ಅಂಚಾದ್ ದೇವೆರೆ ಜನೊಕುಲು ಮಾತ ಎಡ್ಡೆ ಕೆಲಸೊಗು ಪರಿಪೂರ್ಣೆರಾದ್ ತಯಾರಾದುಪ್ಪುವೆರ್.</verse>
			</chapter>
			<chapter number="4">
				<verse number="1">ದೇವೆರೆ ಎದುರುಲಾ ಬೊಕ್ಕ ಬದುಕುನಾಕುಲೆಗ್ಲಾ ಸೈತಿನಾಕುಲೆಗ್ಲಾ ನ್ಯಾಯತೀರ್ಪೆರೆ ಉಪ್ಪು ಯೇಸು ಕ್ರಿಸ್ತ ಎದುರುಲಾ ಆಯೆ ಬರ್ಪಿನೆನ್ಲಾ ಆಯನ ರಾಜ್ಯದ ಮಿತ್ತ್‌ಲಾ ಆಜ ದೀದ್ ಯಾನ್ ನಿಕ್ಕ್ ಪನ್ಪಿನಿ ದಾನೆಂದ್ಂಡ,</verse>
				<verse number="2">ದೇವೆರೆ ಪಾತೆರೊನು ಸಾರಿಲ, ಅನುಕೂಲದ ಸ್ಥಿತಿ ಇತ್ತ್ಂಡಲಾ ಇಜ್ಜಿಡಲಾ ಐಟ್ಟ್ ಆಸಕ್ತಿಡುಪ್ಪುಲ. ತಾಳ್ಮೆಡ್ ತಿದ್ದ್‌ಲ, ಶಿಕ್ಷೆ ಕೊರ್ಲ, ಎಚ್ಚರಿಕೆ ಕೊರ್ಲ, ಬೊಕ್ಕ ಎಡ್ಡೆ ಬೋಧನೆನ್ ಕೊರ್ದು ಅಕ್ಲೆಗ್ ಉಮೇದ್ ಕೊರ್ಲ.</verse>
				<verse number="3">ದಾಯೆಗಂದ್ಂಡ ಜನೊಕುಲು ಸತ್ಯ ಇತ್ತಿ ಬೋಧನೆಗ್ ಕೆಬಿ ಕೊರಂದಿನಾಕುಲಾದ್, ತನ್ಕುಲೆಗ್ ಬೋಡಿತ್ತಿನೆನ್ ಕೇನುಲೆಕ್ಕ ಇತ್ತಿ ದುರಾಶೆಲೆಗ್ ಅನುಕೂಲವಾಯಿ ಬೋಧಕರೆನ್ ದೀವೊನ್ವೆರ್.</verse>
				<verse number="4">ಅಕುಲು ಸತ್ಯ ಬೋಧನೆಗ್ ಕೆಬಿ ಕೊರಂದೆ ಕಟ್ಟ್ ಕತೆಕ್ಲೆನ್ ಕೇನರೆ ಪೋವೆರ್.</verse>
				<verse number="5">ಆಂಡ ಈ ಮಾತೆಟ್ಟ್ ಜಾಗ್ರತೆದಾಯೆ ಆದುಪ್ಪುಲ. ಕಷ್ಟ ತಾಳೊಂದು ಸುವಾರ್ತೆದ ಕೆಲಸೊನು ಮಲ್ಪುಲ. ನಿಕ್ಕ್ ಒಚ್ಚಿದ್ ಕೊರಿನ ಸೇವೆನ್ ಸರಿಯಾದ್ ಮಲ್ಪುಲ.</verse>
				<verse number="6">ಯಾನಾಂಡ ಇತ್ತೆನೇ ನೀರ್‌ದ ಲೆಕ್ಕ ಅರ್ಪಣೆ ಆವೊಂದುಲ್ಲೆ. ಯಾನ್ ಈ ಲೋಕೊಡ್ದು ಪೋಪಿನ ಸಮಯ ಕೈತಲ್‌ ಬತ್ತ್ಂಡ್.</verse>
				<verse number="7">ಯಾನ್ ಎಡ್ಡೆ ಉರ್ಡಾಟೊನು ಮಲ್ತ್‌ದೆ. ಎನ ಬಲ್ಪಾಟೊನು ಮುಗಿಪಾದೆ ಬೊಕ್ಕ ಕ್ರಿಸ್ತ ನಂಬಿಕೆನ್ ಒರಿಪಾವೊಂದೆ.</verse>
				<verse number="8">ನೀತಿವಂತೆರೆಗ್ ತಿಕ್ಕುನ ಜಯಮಾಲೆ ಎಂಕ್ ದುಂಬಗ್ ತಯಾರಾದುಂಡು. ಅವೆನ್ ನೀತಿಡ್ ನ್ಯಾಯತೀರಿಸುನ ಕರ್ತವೆ ಆ ದಿನೊಟು ಎಂಕ್ ಕೊರ್ಪೆ. ಎಂಕ್ ಮಾತ್ರತ್ತಂದೆ ಆಯೆ ಬರ್ಪಿನೆನ್ ಪ್ರೀತಿಡ್ ಎದುರು ತೂವೊಂದುಪ್ಪುನ ಪ್ರತಿ ಒರಿಯಗ್ಲಾ ಕೊರ್ಪೆ.</verse>
				<verse number="9">ಎನ ಕೈತಲ್‌ ಬೇಗ ಬರಿಯೆರೆಗ್ ಪ್ರಯತ್ನ ಮಲ್ಪುಲ.</verse>
				<verse number="10">ದಾಯೆಗಂದ್ಂಡ ದೇಮೆ ಈ ಲೋಕೊನು ಪ್ರೀತಿ ಮಲ್ತ್‌ದ್ ಎನನ್ ಬುಡ್ದು ಥೆಸ್ಸಲೋನಿಕೊಗು ಪೋಯೆ. ಕ್ರೆಸ್ಕೆ ಗಲಾತ್ಯೊಗ್ಲಾ ತೀತೆ ದಲ್ಮಾತ್ಯೊಗ್ಲಾ ಪೋಯೆರ್.</verse>
				<verse number="11">ಲೂಕೆ ಮಾತ್ರ ಎನಡೊಪ್ಪ ಉಲ್ಲೆ. ಈ ಬನ್ನಗ ನಿನಡೊಪ್ಪ ಮಾರ್ಕನ್ ಲೆತ್ತೊಂದು ಬಲ. ಆಯೆ ಎನ ಸೇವೆಡ್ ಪ್ರಯೋಜನದಾಯೆ ಆದುಲ್ಲೆ.</verse>
				<verse number="12">ತುಖಿಕನ್ ಎಫೆಸೊಗು ಕಡಪುಡುದೆ. ತ್ರೋವೊಡು ಯಾನ್ ಕರ್ಪನ ಕೈತಲ್‌ ಬುಡ್ದು ಬೈದಿನ ಎನ ಮೇಲಂಗಿನ್ ಕನವೆರೆ ಮದಪಡ. ಎನ ಪುಸ್ತಕೊನು ಬೊಕ್ಕ ಮುಖ್ಯಾದ್ ಚರ್ಮದ ಪತ್ರಿಕೆನ್ಲಾ ಪತ್ತೊಂದು ಬಲ.</verse>
				<verse number="13"></verse>
				<verse number="14">ತಾಮ್ರದ ಬೇಲೆದ ಅಲೆಕ್ಸಾಂದ್ರೆ ಎಂಕ್ ಬಾರಿ ಉಪದ್ರ ಕೊರಿಯೆ. ಕರ್ತವೆ ಆಯನ ಕೆಲಸೊಗು ತಕ್ಕ ಪ್ರತಿಫಲ ಕೊರ್ಪೆ.</verse>
				<verse number="15">ಈಲಾ ಆಯನ ಸಂಗತಿಡ್ ಎಚ್ಚರಿಕೆ ಆದುಪ್ಪುಲ. ಆಯೆ ಎಂಕುಲೆ ಪಾತೆರೊಲೆಗ್ ದಿಂಜ ಎದುರುಂತಿಯೆ.</verse>
				<verse number="16">ಯಾನ್ ಸುರುತ್ತ ಸರ್ತಿ ನ್ಯಾಯಾಧಿಪತಿ ಎದುರು ಉಂತುನಗ ಎನಡೊಪ್ಪ ಏರ್ಲಾ ಬತ್ತಿಜೆರ್. ಮಾತೆರ್ಲಾ ಎನನ್ ಬುಡ್ದು ಪೋಯೆರ್. ಅವೆನ್ ಅಕ್ಲೆ ಲೆಖ್ಖೊಗು ಸೇರಿಸಾವಂದೆ ಉಪ್ಪಡ್.</verse>
				<verse number="17">ಆಂಡ ಕರ್ತವೆ ಎನ ಕಡೆಟ್ಟ್ ಉಂತುದು, ಎನನ್ ಬಲ ಪಡೆಪಾದ್, ಎನಡ್ದ್ ಸುವಾರ್ತೆ ಪೂರ್ತಿ ಆದ್ ಸಾರಿಯೆರೆಲಾ ಬೊಕ್ಕ ಪಿದಯಿದ ಜನೊಕುಲೆಗ್ ಕೇನುಲೆಕ್ಕಲಾ ಮಲ್ತೆ. ಅವು ಅತ್ತಂದೆ ಆಯೆ ಎನನ್ ಸಿಮ್ಮದ ಬಾಯಿಡ್ದ್ ತಪ್ಪಾಯೆ.</verse>
				<verse number="18">ಯಾನ್ ಒವುಲಾ ಹಾಳ್ ಕಾರ್ಯೊಲೆನ್ ಮಲ್ಪಂದಿಲೆಕ್ಕ ಕರ್ತವೆ ಎನನ್ ತಪ್ಪಾದ್ ತನ ಪರಲೋಕ ರಾಜ್ಯೊಗು ಮುಟ್ಟುನೆಂಗೆ ಕಾಪುವೆ. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.</verse>
				<verse number="19">ಪ್ರಿಸ್ಕಿಲಗ್ಲಾ, ಅಕ್ವಿಲಗ್ಲಾ ಒನೇಸಿಫೊರನ ಇಲ್ಲದಾಕುಲೆಗ್ಲಾ ವಂದನೆ ತೆರಿಪಾಲ.</verse>
				<verse number="20">ಎರಸ್ತೆ ಕೊರಿಂಥ್ಯೊಡು ಉಂತಿಯೆ. ತ್ರೋಫಿಮಗ್ ಸೌಖ್ಯದಾಂತಿನೆಡ್ದ್ ಆಯನ್ ಮಿಲೇತುಡು ಬುಡ್ದು ಬತ್ತೆ.</verse>
				<verse number="21">ಚಳಿಕಾಲೊಡ್ದು ದುಂಬು ಇಡೆಗ್ ಬರಿಯೆರೆಗ್ ಪ್ರಯತ್ನ ಮಲ್ಪುಲ. ಯುಬೂಲೆ, ಪೊದೆಯೆ, ಲೀನೆ, ಕ್ಲೌದೀಯೆಲಾ ಅತ್ತಂದೆ ಬೇತೆ ಮಾತ ಸಹೋದ್ರೆರ್‌ಲಾ ನಿಕ್ಕ್ ವಂದನೆ ಮಲ್ಪುವೆರ್.</verse>
				<verse number="22">ಕರ್ತವೆ ನಿನ ಆತ್ಮಡೊಪ್ಪ ಉಪ್ಪಡ್. ಆಯನ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="56">
			<chapter number="1">
				<verse number="1">ದೇವೆರೆ ದಾಸೆಲಾ ಯೇಸು ಕ್ರಿಸ್ತನ ಅಪೊಸ್ತಲೆಲಾ ಆಯಿ ಪೌಲು ನಂಕ್ ಒಟ್ಟುಗುಪ್ಪು ನಂಬಿಕೆದ ಬಗೆಟ್ ತನ ನಿಜ ಮಗೆ ಆದುಪ್ಪು ತೀತಗ್ ಬರೆಪಿನಿ ದಾನೆಂದ್ಂಡ, ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಕ್ ದಯಲಾ, ಸಮಾಧಾನಲಾ ಆವಡ್.</verse>
				<verse number="2"></verse>
				<verse number="3">ದೇವೆರ್ ಅಜತಿನಾಕುಲೆ ನಂಬಿಕೆನ್ಲಾ, ಭಕ್ತಿನ್ಲಾ ಉಂಡು ಮಲ್ಪುನ ಸತ್ಯದ ಗೇನೊಗ್ಲಾ ಅಭಿವೃದ್ಧಿ ಮಲ್ಪೆರೆಗಾದ್ರಲಾ ಯಾನ್ ಅಪೊಸ್ತಲೆ ಆತೆ. ಆ ನಂಬಿಕೆಗ್ಲಾ ಸತ್ಯದ ಗೇನೊಗ್ಲಾ ನಿತ್ಯಜೀವದ ನಿರೀಕ್ಷೆನೇ ಆಧಾರ ಆದುಂಡು.</verse>
				<verse number="4">ಸುಳ್ಳು ಪನಂದಿನ ದೇವೆರ್ ಆ ನಿತ್ಯಜೀವೊನು ಕೊರ್ಪೆ ಅಂದ್‌ದ್ ಆದಿಡ್ದೇ ವಾಗ್ದತ್ತ ಮಲ್ತ್‌ದ್ ಸರಿಯಾಯಿನ ಸಮಯೊಡು ವಾಗ್ದಾನೊನು ಮುಗಿತ್‌ದ್ ಪ್ರಸಂಗೊಡು ಪ್ರಕಟ ಮಲ್ತೆ. ಆ ಬೋಧನೆದ ಉದ್ಯೋಗೊನು ನಮ ರಕ್ಷಕೆ ಆದುಪ್ಪು ದೇವೆರೆನ ಅಪ್ಪಣೆದ ಮಿತ್ತ್ ಎಂಕ್ ಒಪ್ಪಿಸಾದ್ ಕೊರ್ತೆ.</verse>
				<verse number="5">ಯಾನ್ ನಿಕ್ಕ್ ಅಪ್ಪಣೆ ಕೊರ್ತಿಲೆಕ್ಕ ಕ್ರೇತ್ ದ್ವೀಪೊಡು ಒರಿದಿ ಕೆಲಸೊನು ಈ ತೀರಿಸಾದ್ ಸಮ ಮಲ್ಪೊಡಂದ್‌ದ್‌ಲಾ, ಊರು ಊರುಡು ಹಿರಿಯಾಕುಲೆನ್ ನೇಮಕ ಮಲ್ಪೊಡಂದ್‌ದ್‌ಲಾ ನಿನನ್ ಅವುಲು ಬುಡ್ದು ಬತ್ತೆ.</verse>
				<verse number="6">ಸಭೆತ ಹಿರಿಯಾಯೆ ದೂರುದಾಂತಿನಾಯೆಲಾ, ಒರ್ತಿ ಬೊಡೆದಿ ಇತ್ತಿನಾಯೆಲಾ ಆದುಪ್ಪೊಡು. ಆಯನ ಜೋಕುಲು ಪಟಿಂಗೆರ್ ಇಜ್ಜಿಂಡ ಎದುರುಂತುನಾಕುಲು ಆದುಪ್ಪಂದೆ ನಂಬಿಕೆದಾಕುಲು ಆದುಪ್ಪೊಡು.</verse>
				<verse number="7">ಒರಿ ಸಭಾದ್ಯಕ್ಷೆ ದೇವೆರೆ ಇಲ್ಲದ ಪಾರುಪತ್ತೆಗಾರೆ ಆದುಲ್ಲೆ. ಅಂಚಾದ್ ಆಯೆ ದೂರುದಾಂತಿನಾಯೆ ಆದುಪ್ಪೊಡು. ಆಯೆ ಛಲತಾಯೆಲಾ ಎದುರು ಕೋಪ ಮಲ್ಪುನಾಯೆಲಾ ಪರ್ದ್ ಲಡಯಿ ಮಲ್ಪುನಾಯೆಲಾ ಪೆಟ್ಟು ಪಾಡುನಾಯೆಲಾ ದುಡ್ಡುದಾಶೆದಾಯೆಲಾ ಆದುಪ್ಪೆರೆ ಬಲ್ಲಿ.</verse>
				<verse number="8">ಐತ ಪಗತೆಗ್ ತನ ಇಲ್ಲಡ್ ಬಿನ್ನೆರೆನ್ ಸೇರಾವೊನುನಾಯೆ ಆದಿತ್ತ್‌ದ್, ಎಡ್ಡೆಂತಿನೆನ್ ಪ್ರೀತಿ ಮಲ್ಪುನಾಯೆ ಆದುಪ್ಪೊಡು. ಬುದ್ದಿವಂತಿಕೆಡುಪ್ಪುನಾಯೆಲಾ ನೀತಿದಾಯೆಲಾ ಪರಿಶುದ್ಧದಾಯೆಲಾ ಮಿತಿಟುಪ್ಪುನಾಯೆಲಾ ಆದಿತ್ತ್‌ದ್,</verse>
				<verse number="9">ಆಯೆ ಎಡ್ಡೆ ಬೋಧನೆದ ವಿಚಾರೊಡು ಬೇತೆಕ್ಲೆಗ್ ಉಮೇದ್ ಕೊರಿಯೆರೆಗ್ಲಾ ವಿರೋಧ ಮಲ್ಪುನಾಕುಲೆನ ಬಾಯಿ ಕಟ್ಟಿಯೆರೆಗ್ಲಾ ಬೋಧನೆಗ್ ಸಮಾದುಪ್ಪು ನಂಬಿಕೆದ ಪಾತೆರೊನು ದೃಢಾದ್ ಕೈಕೊನುನಾಯೆಲಾ ಆದುಪ್ಪೊಡು.</verse>
				<verse number="10">ದಾಯೆಗಂದ್ಂಡ ಐಟ್ಟ್ ಹೆಚ್ಚಿನಾಕುಲು ಸುನ್ನತಿದಾಕುಲು, ಬಜೀ ವ್ಯರ್ಥ ಹರಟೆಲೆಡ್ ಮುರ್ಕುದು ಬೇತೆಕ್ಲೆನ್ ಮೋಸೊಗು ಪಾಡ್ದ್ ಅಧಿಕಾರೊಗು ಎದುರುಂತುನಾಕುಲು ಮಸ್ತ್ ಜನ ಉಲ್ಲೆರ್,</verse>
				<verse number="11">ಮೊಕುಲು ವಾ ತರೊಟುಲಾ ಲಾಭ ಮಲ್ತೊನೊಡಂದ್‌ದ್ ತಪ್ಪು ಬೋಧನೆನ್ ಮಲ್ತ್‌ದ್ ಇಡೀ ಇಲ್ಲ್‌ನೆ ಕಂಕಣೆ ಪಾಡ್ವೆರ್. ಅಕ್ಲೆನ ಬಾಯಿ ಮುಚ್ಚೊಡು.</verse>
				<verse number="12">ಕ್ರೇತ್ ದ್ವೀಪದಾಕುಲು ಏಪಲಾ ಸುಳ್ಳುಗಾರೆರ್, ದುಷ್ಟ ಮೃಗೊಲು, ದಡ್ಡೆರ್, ಬಂಜೆಲೆರ್ ಅಂದ್‌ದ್ ಅಕ್ಲೆನ ಉಲಯಿಡೇ ಇತ್ತಿನ ಒರಿ ಪ್ರವಾದಿ ಪನ್ತೆ,</verse>
				<verse number="13">ಈ ಸಾಕ್ಷಿ ನಿಜನೇ. ಅಂಚಾದ್ ಅಕ್ಲೆನ್ ನಂಬಿಕೆಡ್ ದೃಢ ಮಲ್ಪೆರೆಗಾದ್, ಅಕುಲು ಯೆಹೂದ್ಯೆರೆ ಆಚಾರೊಲೆನ್ಲಾ ಸತ್ಯೊಡ್ದು ದೂರ ಪೋತಿನ ಜನೊಕುಲೆನ ಅಪ್ಪಣೆನ್ಲಾ ಕೇನುನೆನ್ ಬುಡ್ಪಿಲೆಕ್ಕ ಅಕ್ಲೆನ್ ಬಲವಾದ್ ಖಂಡಿಸಾಲ.</verse>
				<verse number="14"></verse>
				<verse number="15">ನಿರ್ಮಲದಾಕುಲೆಗ್ ಮಾತಲಾ ಶುದ್ಧನೇ, ಆಂಡ ಮೈಲೆದಾಕುಲೆಗ್ಲಾ ನಂಬಿಕೆದಾಂತಿನಾಕುಲೆಗ್ಲಾ ಒವುಲಾ ಶುದ್ಧ ಆದುಪ್ಪುಜಿ. ಅಕ್ಲೆ ಮನಸ್‌ಲಾ ಮನಸಾಕ್ಷಿಲಾ ರಡ್ಡ್‌ಲಾ ಮೈಲೆ ಆದುಪ್ಪುಂಡು.</verse>
				<verse number="16">ಅಂಚಿತ್ತಿನಾಕುಲು ದೇವೆರೆನ್ ತೆರಿದ ಅಂದ್‌ದ್ ಪಂಡೆರ್ಡಲಾ ತನ್ಕುಲೆ ನಡತೆಡ್ ಆಯನ್ ಅರೆಂಜುನಕುಲಾದುಲ್ಲೆರ್. ಅಕುಲು ಅಸಹ್ಯದಾಕುಲುಲಾ ತಗ್ಗಂದಿನಾಕುಲುಲಾ ಒವುಲಾ ಎಡ್ಡೆ ಕೆಲಸೊನು ಮಲ್ಪೆರೆ ಆವಂದಿನಾಕುಲುಲಾ ಆದುಲ್ಲೆರ್.</verse>
			</chapter>
			<chapter number="2">
				<verse number="1">ಈಯಾಂಡಲಾ ತೀತ, ಸ್ವಸ್ಥ ಬೋಧನೆಗ್ ತಕ್ಕಾದ್ ಬೋಧನೆ ಕೊರ್ಲ.</verse>
				<verse number="2">ಪರಬೆರೆಗ್ ಇಂಚ ಬೋಧನೆ ಮಲ್ಪುಲ, ಅಕುಲು ಪರ್ಪಿ ಅಭ್ಯಾಸೊಡ್ದು ದೂರ ಉಪ್ಪುನಾಕುಲು, ಘನತಾಕುಲು, ಬುದ್ದಿವಂತಿಕೆದಾಕುಲು, ನಂಬಿಕೆಡ್, ಪ್ರೀತಿಡ್, ತಾಳ್ಮೆಡ್ ಗೆಲವುದಾಕುಲು ಆದುಪ್ಪೊಡು.</verse>
				<verse number="3">ಅಂಚೆನೇ ಪ್ರಾಯದ ಪೊಂಜೊವುಲೆಗ್ ಇಂಚ ಬೋಧನೆ ಮಲ್ಪುಲ, ಅಕುಲು ಚಾಡಿಗಾರೆರ್, ಪರ್ಪಿ ಅಭ್ಯಾಸೊಗು ಗುಲಾಮೆರ್ ಆದುಪ್ಪಂದೆ, ದೇವಭಕ್ತಿಗ್ ಯೋಗ್ಯಾದ್ ನಡಪುನ ಎಡ್ಡೆ ಬೋಧನೆ ಪನ್ಪಿನಾಕುಲು ಆದುಪ್ಪೊಡು.</verse>
				<verse number="4">ಉಂದತ್ತಂದೆ ಅಕುಲು ಜವ್ವಂದಿ ಪೊಂಜೊವುಲೆಗ್ ನಿಕ್ಲೆಡ್ದ್ ದೇವೆರೆ ಪಾತೆರೊಗು ದೂಷಣೆ ಆವಂದಿಲೆಕ್ಕ ನಿಕ್ಲೆನ ಕಂಡನಿಯಾಡ್ಲೆನ್ ಜೋಕುಲೆನ್ ಪ್ರೀತಿ ಮಲ್ಪುನಾಕುಲುಲಾ ಬುದ್ದಿವಂತಿಕೆದಾಕುಲುಲಾ ಪತಿವ್ರತೆರ್ಲಾ ಸ್ವಂತ ಇಲ್ಲಡ್ ಬೇಲೆ ಮಲ್ತೊಂದುಪ್ಪುನಾಕುಲುಲಾ, ಎಡ್ಡೆಂತಿನಾಕುಲುಲಾ ತನ್ಕುಲೆ ಕಂಡನಿಯಾಡ್ಲೆಗ್ ಒಳಗಾದುಪ್ಪೊಡು ಅಂದ್‌ದ್ ಬುದ್ಧಿ ಕಲ್ಪಾವುಲೆಕ್ಕ ಬೋಧನೆ ಕೊರ್ಲ. ಅಂಚೆನೇ ಮಾತ ಬಗೆಟ್ಲಾ ಬುದ್ದಿವಂತಿಕೆಡುಪ್ಪೊಡು ಅಂದ್‌ದ್ ಈ ಜವನ್ಯೆರೆನ್ ಎಚ್ಚರಿಸಾಲ.</verse>
				<verse number="5"></verse>
				<verse number="6"></verse>
				<verse number="7">ಮಾತ ಎಡ್ಡೆ ಕಾರ್ಯೊಲೆನ್ ಮಲ್ಪುನೆಟ್ಟ್ ಈಯೆ ಮಾದ್ರಿ ಆದುಪ್ಪುಲ. ನಿನ ಬೋಧನೆಡ್ ಯಥಾರ್ಥತೆಲಾ, ಗಂಭೀರತೆಲಾ ತೋಜಿದ್ ಬರಡ್.</verse>
				<verse number="8">ಅಪಗ ನಂಕ್ ವಿರೋಧ ಉಂತುನಾಕುಲು ನಮ ಸಂಗತಿಡ್ ಪಡಿಕೆಂತಿನೆನ್ ಪನಿಯೆರೆ ಅವಕಾಶದಾಂತಿನೆಡ್ದ್ ನಾಚಿಗೆಗ್ ಗುರಿ ಆಪೆರ್.</verse>
				<verse number="9">ಚಾಕ್ರಿದಾಕುಲು ಮಾತೆಟ್ಲಾ ತನ್ಕುಲೆ ಯಜಮಾನೆರೆಗ್ ವಿಧೇಯೆರಾದುಪ್ಪೊಡು, ಅಕ್ಲೆನ್ ಮಾತೆಟ್ಲಾ ಮೆಚ್ಚಾವೆರೆಗ್ ಪ್ರಯಾಸ ಮಲ್ಪೊಡು.</verse>
				<verse number="10">ಅಕುಲು ಎದುರು ಪಾತೆರಂದೆ ಒವ್ವೆನ್ಲಾ ಕಂಡೊನಂದೆ ಪೂರ ನಂಬಿಗಸ್ತೆರ್‌ಲಾ, ಎಡ್ಡೆಂತಿನಾಕುಲುಲಾ ಆದ್ ತೋಜಿದ್ ಬರೊಡು. ಅಪಗ ಅಕ್ಲೆಡ್ದಾದ್ ನಮ ರಕ್ಷಕೆ ಆದುಪ್ಪು ದೇವೆರೆ ಬೋಧನೆಗ್ ಮಾತ ಬಗೆಟ್ಲಾ ಮಾನ ಕನಪಿಲೆಕ್ಕ ಆವು.</verse>
				<verse number="11">ದಾಯೆಗಂದ್ಂಡ ಮಾತ ನರಮಾನಿಲೆಗ್ ರಕ್ಷಣೆನ್ ಉಂಡು ಮಲ್ಪುನ ದೇವೆರೆನ ದಯ ತೋಜಿದ್ ಬೈದ್‌ಂಡ್.</verse>
				<verse number="12">ನಮ ಭಕ್ತಿದಾಂತಿ ಮನಸ್‌ನ್ಲಾ, ಲೋಕದ ಇಚ್ಚೆಲೆನ್ಲಾ ಬುಡ್ದು, ಭಾಗ್ಯ ಇತ್ತಿ ನಿರೀಕ್ಷೆನ್ ಪತ್ತೊಂದು, ನಮ ಮಲ್ಲ ದೇವೆರ್‌ಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತ ಮೈಮೆಡ್ ತೋಜಿದ್ ಬರ್ಪಿನೆನ್ ಕಾತೊಂದು ಇತ್ತ್‌ದ್ ಈ ಲೋಕೊಡು ಹದೊಟು, ನೀತಿಡ್, ಭಕ್ತಿಡ್ ಬದ್‌ಕೊಡು ಪಂಡ್ದ್‌ಲಾ ದೇವೆರೆ ದಯ ನಂಕ್ ಬೋಧನೆ ಕೊರ್ಪುಂಡು.</verse>
				<verse number="13"></verse>
				<verse number="14">ನಮನ್ ಮಾತ ಅನ್ಯಾಯೊಡ್ದು ಬುಡುಗಡೆ ಮಲ್ಪೆರೆಗಾದ್‌ಲಾ, ಎಡ್ಡೆ ಕೆಲಸೊಲೆಡ್ ಆಸಕ್ತಿ ಇತ್ತಿ ಜನೊಕುಲು ಆದುಪ್ಪೊಡಂದ್‌ದ್‌ಲಾ, ತನ ಸ್ವಂತ ಜನ ಆದ್ ಶುದ್ಧ ಮಲ್ಪುನೆಕ್ಕಾದ್‌ಲಾ ಯೇಸು ತನನ್ ತಾನೆ ನಂಕ್ ಬೋಡಾದ್ ಒಚ್ಚಿದ್ ಕೊರಿಯೆ.</verse>
				<verse number="15">ಈ ಕಾರ್ಯದ ಸಂಗತಿಡ್ ಬೋಧನೆ ಮಲ್ತೊಂದು, ಎಚ್ಚರಿಕೆ ಕೊರೊಂದು ಪೂರ್ತಿ ಅಧಿಕಾರೊಡು ಖಂಡಿಸಾಲ. ಏರ್ಲಾ ನಿನನ್ ಪಿಲ್ಯಾವಂದಿಲೆಕ್ಕ ತೂವೊನ್ಲ.</verse>
			</chapter>
			<chapter number="3">
				<verse number="1">ಸರಕಾರೊಗ್ಲಾ ಐತ ಅಧಿಕಾರಿಲೆಗ್ಲಾ ಅಧೀನೆರಾದ್ ಉಪ್ಪೊಡಂದ್‌ದ್ ನಂಬುನಾಕುಲೆಗ್ ನೆನೆಪು ಪುಟ್ಟಾಲ. ಅಕುಲು ತಗ್ಗ್‌ದಿನಾಕುಲಾದಿತ್ತ್‌ದ್ ಎಡ್ಡೆಂತಿನೆನ್ ಮಲ್ಪೆರೆ ತಯಾರಾದುಪ್ಪೊಡು.</verse>
				<verse number="2">ಏರೆನ್ಲಾ ದೂಷಣೆ ಮಲ್ಪಂದೆ, ಲಡಯಿ ಮಲ್ಪಂದೆ, ತಗ್ಗ್‌ತನೊಟು ಮಾತೆರೊಟ್ಟುಗು ಸಮಾಧಾನಿಲಾದ್ ನಡಪಡ್.</verse>
				<verse number="3">ಒಂಜಿ ಕಾಲೊಡು ನಮಲಾ ಬುದ್ಧಿದಾಂತಿನಾಕುಲುಲಾ ಅವಿಧೇಯೆರ್‌ಲಾ ಆದಿತ್ತ. ನಮ ಸಾದಿ ತತ್ತ್‌ದಿನಕುಲಾದ್ ದಿಂಜ ಆಸೆ ದುರಾಶೆಲೆಗ್ ಗುಲಾಮೆರಾದಿತ್ತ. ನಮ ಜೀವನ ಪಡಿಕೆಂತಿನೆಡ್ಲಾ ಮತ್ಸರೊಡ್ಲಾ ದಿಂಜಿದಿತ್ತ್‌ದ್ ನಮ ಒರಿಯನ್ ಒರಿ ಪಗೆ ಮಲ್ತೊಂದಿತ್ತ.</verse>
				<verse number="4">ಆಂಡ ನಮ ರಕ್ಷಕೆ ಆದುಪ್ಪು ದೇವೆರೆ ದಯಲಾ ಪ್ರೀತಿಲಾ ನರಮಾನಿಲೆಗ್ ಪ್ರಕಟ ಆದುಪ್ಪುನಗ,</verse>
				<verse number="5">ನಮ ಮಲ್ತ್‌ದಿನ ಎಡ್ಡೆ ಕ್ರಿಯೊಲೆಗಾದ್ ಅತ್ತ್, ಆಂಡ ಆಯನ ಕರುಣೆಡ್ದೇ ನಮ ಪಾಪೊಲೆನ್ ದೆಕ್ಕ್‌ದ್ ಒಂಜಿ ಪೊಸ ಪುಟ್ಟುನ್ಲಾ ಪರಿಶುದ್ಧಾತ್ಮೊಡ್ದು ಪೊಸ ಜೀವನೊನ್ಲಾ ಕೊರ್ದು ನಮನ್ ರಕ್ಷಣೆ ಮಲ್ತೆ.</verse>
				<verse number="6">ಆಯೆ ನಮ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತನ ದಯೊಡ್ದಾದ್ ನಮನ್ ನೀತಿವಂತೆರ್ ಅಂದ್‌ದ್ ತೀರ್ಪು ಹೊಂದುದು ನಂಕ್ ನಿತ್ಯಜೀವದ ನಿರೀಕ್ಷೆನ್ ಕೊರಿಯೆ. ಐಕ್ ಭಾದ್ಯಸ್ತೆರಾವೊಡು ಅಂದ್‌ದ್ ದೇವೆರ್ ಯೇಸು ಕ್ರಿಸ್ತಡ್ದ್ ನಮ ಮಿತ್ತ್ ತನ ಪರಿಶುದ್ಧಾತ್ಮೊನು ಉದಾರಾದ್ ದಂಡ್ಯಾದೆ. ಉಂದು ನಂಬಿಕೆಗ್ ಯೋಗ್ಯದ ಪಾತೆರ ಆದುಂಡು.</verse>
				<verse number="7"></verse>
				<verse number="8">ದೇವೆರೆಡ್ ನಂಬಿಕೆ ದೀತಿನ ಮಾತೆರ್ಲಾ ಎಡ್ಡೆಂತಿನೆನ್ ಮಲ್ಪೆರೆಗಾದ್ರ ತನ್ಕುಲೆನ್ ಒಚ್ಚಿದ್ ಕೊರ್ಪಿಲೆಕ್ಕ ಈ ಪಾತೆರೊಲೆನ್ ಕಂಡಿತಾದ್ ಪನ್ಲ ಅಂದ್‌ದ್ ನಿಕ್ಕ್ ಪನ್ಪೆ. ಉಂದು ನರಮಾನಿಲೆಗ್ ಎಡ್ಡೆಲಾ ಪ್ರಯೋಜನಲಾ ಆದುಂಡು.</verse>
				<verse number="9">ಬುದ್ಧಿದಾಂತಿನ ತರ್ಕೊಲೆಗಾವಡ್ ಸಂತಾನ ಪಟ್ಟಿಲೆಗಾವಡ್ ನ್ಯಾಯಕಟ್ಟ್‌ಗ್ ಸಮ್ಮಂಧ ಪಡೆಯಿನ ಮಾತ ತರ್ಕ ಲಡಾಯಿಲೆಗಾವಡ್ ದೂರ ಆದುಪ್ಪುಲ. ಉಂದು ಮಾತ ಪ್ರಯೋಜನದಾಂತಿನವುಲಾ ಕೆಲಸೊಗು ಬರಂದಿನವುಲಾ ಆದುಂಡು.</verse>
				<verse number="10">ಸಭೆಟ್ ಭೇದ ಪುಟ್ಟಾವುನ ನರಮಾನಿಲೆಗ್ ಒಂಜಿ ರಡ್ಡ್ ಸರ್ತಿ ಬುದ್ಧಿ ಪಂಡಿ ಬೊಕ್ಕ ಆಯನ್ ಬೊಡ್ಚಿ ಅಂದ್‌ದ್ ಬುಡ್ದು ಬುಡ್ಲ.</verse>
				<verse number="11">ಇಂಚಿತ್ತಿನಾಯೆ ಮಾರ್ಗ ತತ್ತ್‌ದಿನಾಯೆಲಾ ಪಾಪ ಮಲ್ಪುನಾಯೆಲಾ ಆದುಲ್ಲೆ. ಆಯೆ ತಾನ್ ಶಿಕ್ಷೆಗ್ ತಕ್ಕದಾಯೆ ಅಂದ್‌ದ್ ಆಯನ ಉಡಲೇ ತೀರ್ಪು ಮಲ್ಪುಂಡು.</verse>
				<verse number="12">ನಿಕೋಪೊಲಿಡ್ ಚಳಿಕಾಲ ಮುಗಿಯಮುಟ್ಟ ಅಲ್ಪನೇ ಉಂತೊಡು ಅಂದ್‌ದ್ ಎನ್ನುವೆ. ಅರ್ತೆಮಾನನಾವಡ್, ತುಖಿಕನಾವಡ್ ನಿನ ಕೈತಲ್‌ ಕಡಪುಡಿ ಕೂಡ್ಲೆ ಎನ ಕೈತಲ್‌ ಬರಿಯೆರೆ ಪ್ರಯತ್ನ ಮಲ್ಪುಲ.</verse>
				<verse number="13">ನ್ಯಾಯಶಾಸ್ತ್ರಿ ಆಯಿ ಜೇನಗ್ಲಾ ಬೊಕ್ಕ ಅಪೊಲ್ಲೋಸಗ್ಲಾ ಅಕ್ಲೆನ ಪ್ರಯಾಣೊಗು ಸಹಾಯ ಮಲ್ಪುಲ. ಅಕ್ಲೆಗ್ ದಾಲಾ ಕೊರತೆ ಆವಂದಿಲೆಕ್ಕ ತೂಲ.</verse>
				<verse number="14">ನಮ್ಮ ಜನೊಕುಲು ಫಲದಾಂತಿನಾಕುಲು ಆದುಪ್ಪಂದಿಲೆಕ್ಕ ಬೋಡಿತ್ತಿ ಸಂಗತಿಲೆಗಾದ್ ಎಡ್ಡೆ ಬೇಲೆಲೆನ್ ಮಲ್ಪೆರೆ ಕಲ್ತೊನಡ್.</verse>
				<verse number="15">ಎನಡೊಪ್ಪ ಉಪ್ಪುನ ಮಾತೆರ್ಲಾ ವಂದನೆ ತೆರಿಪಾವೆರ್. ಕ್ರಿಸ್ತನ್ ನಂಬುನಾಕುಲಾದ್ ನಮನ್ ಪ್ರೀತಿ ಮಲ್ಪುನಾಕುಲೆಗ್ ವಂದನೆ ತೆರಿಪಾಲ. ದೇವೆರೆ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="57">
			<chapter number="1">
				<verse number="1">ಕ್ರಿಸ್ತ ಯೇಸುಗಾದ್ ಕೈದ್‌ಡುಪ್ಪು ಪೌಲುಲಾ ಸಹೋದರೆ ತಿಮೋಥಿಲಾ ಎಂಕ್ಲೆಗ್ ಪ್ರೀತಿದಾಯೆಲಾ ಜತೆಸೇವಕೆಲಾ ಆಯಿ ಫಿಲೆಮೋನುಗ್ಲಾ</verse>
				<verse number="2">ಸಹೋದ್ರಿ ಅಪ್ಫಿಗ್ಲಾ ಎಂಕುಲೆ ಜತೆಸಿಪಾಯಿ ಆಯಿ ಅರ್ಖಿಪ್ಪಗ್ಲಾ ನಿನ ಇಲ್ಲಡ್ ಕೂಡುದು ಬರ್ಪಿ ಸಭೆಕ್ಲಾ ಬರೆಪಿನಿ ದಾನೆ ಪಂಡ,</verse>
				<verse number="3">ನಮ ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್.</verse>
				<verse number="4">ಕರ್ತವೆ ಆದುಪ್ಪು ಯೇಸು ಮಿತ್ತ್ ದೀತಿನ ನಂಬಿಕೆನ್ಲಾ ದೇವಜನೊಕುಲೆ ಮಿತ್ತ್ ದೀತಿ ಪ್ರೀತಿದ ಸಂಗತಿಡ್ಲಾ ಕೇಂಡ್ದ್, ಯಾನ್ ಪ್ರಾರ್ಥನೆ ಮಲ್ಪುನಾತ್ ಸರ್ತಿ ನಿನನ್ ನೆನೆಪು ಮಲ್ತೊಂದು ಯಾನ್ ದೇವೆರೆಗ್ ಏಪಲಾ ಉಪಕಾರ ಮಲ್ತ್‌ದ್ ನಿಕ್ಲೆಗಾದ್ ದೇವೆರೆಡ ನಟ್ಟೊನ್ವೆ.</verse>
				<verse number="5"></verse>
				<verse number="6">ಕ್ರಿಸ್ತಡ್ ನಂಕ್ ಒದಗ್‌ದ್ ಬೈದಿನ ಮಾತ ಎಡ್ಡೆ ವರೊಕ್ಲೆ ಸಂಗತಿಡ್ ಈ ತಿಳುವಳಿಕೆನ್ ಪಡೆತಿನಾಯೆ ಆದ್ ಕ್ರಿಸ್ತ ನಂಬಿಕೆಡ್ ಉಪ್ಪುನ ನಿನ ಅನ್ಯಮನ್ಯ ಕ್ರಿಸ್ತಗ್ ಹೆಚ್ಚಿಗೆದ ಮೈಮೆನ್ ಮಲ್ಪೊಡು ಅಂದ್‌ದ್ ಪ್ರಾರ್ಥನೆ ಮಲ್ಪುವೆ.</verse>
				<verse number="7">ಸಹೋದ್ರ, ನಿನಡ್ದಾವರ ದೇವಜನೊಕುಲೆ ಉಡಲ್‌ಡ್ ಉಮೇದ್ ಉಂಡಾಯಿನೆಡ್ದ್, ನಿನ ಪ್ರೀತಿಡ್ದಾವರ ಎಂಕ್ ಮಸ್ತ್ ಸಂತೋಷಲಾ ಆಧರಣೆಲಾ ಉಂಡಾಂಡ್.</verse>
				<verse number="8">ಅಂಚಾಯಿನೆಡ್ದ್ ನಿಕ್ಕ್ ಬೋಡಾಪಿನೆನ್ ಅಪ್ಪಣೆ ಕೊರಿಯೆರೆ ಎಂಕ್ ಕ್ರಿಸ್ತಡ್ ಪೂರ ಅಧಿಕಾರ ಇತ್ತ್ಂಡಲಾ ಅಂಚ ಮಲ್ಪಂದೆ</verse>
				<verse number="9">ಪರಬೆಲಾ ಇತ್ತೆ ಕ್ರಿಸ್ತ ಯೇಸುಗಾದ್ ಸೆರೆಮನೆಟುಪ್ಪು ಪೌಲು ಪ್ರೀತಿಡ್ ನಿನಡ ಕೇನೊನ್ವೆ.</verse>
				<verse number="10">ಯಾನ್ ಸೆರೆಮನೆಟುಪ್ಪುನಗ ಎಂಕ್ ತಿಕ್ಕ್‌ದಿನ ಎನ ಮಗೆ ಆದುಪ್ಪು ಒನೇಸಿಮಗಾದ್ ನಿನಡ ಕೇನೊನ್ವೆ.</verse>
				<verse number="11">ಆಯೆ ದುಂಬು ನಿಕ್ಕ್ ಪ್ರಯೋಜನದಾಂತಿನಾಯೆ ಆದಿತ್ತೆ, ಇತ್ತೆ ಕಂಡಿತಾದ್ ನಿಕ್ಕ್‌ಲಾ ಎಂಕ್‌ಲಾ ಬೋಡಾಪಿನಾಯೆ ಆದುಲ್ಲೆ.</verse>
				<verse number="12">ಆಯೆ ಎನ ಪ್ರಾಣದಲೆಕ್ಕ ಇತ್ತೆಡಲಾ ಆಯನ್ ನಿನ ಕೈತಲ್‌ ಪಿರ ಕಡಪುಡ್ದು ಕೊರ್ತೆ.</verse>
				<verse number="13">ಯಾನ್ ಸುವಾರ್ತೆಗಾದ್ ಸೆರೆಮನೆಟುಪ್ಪುನಗ ನಿನ ಪಗತೆಗ್ ಆಯೆ ಎಂಕ್ ಸೇವೆ ಮಲ್ಪುಲೆಕ್ಕ ಆಯನ್ ಎನ ಕೈತಲೇ ದೀವೊನೊಡು ಅಂದ್‌ದ್ ಆಲೋಚನೆ ಮಲ್ತ್‌ದಿತ್ತೆ.</verse>
				<verse number="14">ಆಂಡ ನಿನ ಉಪಕಾರ ಬಲತ್ಕಾರೊಡು ಆವಂದೆ ಎಡ್ಡೆ ಮನಸ್‌ಡ್ದೇ ಆಪಿಲೆಕ್ಕ ನಿನ ಒಪ್ಪಿಗೆದಾಂತೆ ದಾಲ ಮಲ್ಪೆರೆ ಎಂಕ್ ಮನಸ್ ಇತ್ತ್‌ಜಿ.</verse>
				<verse number="15">ಆಯೆ ಏಪೊಗ್ಲಾ ನಿನ್ನಾಯೆ ಆಯಿನೆಕ್ಕಾದ್ ಒಂತೆ ದಿನ ನಿನಡ್ದ್ ದೂರ ಆಯೆ.</verse>
				<verse number="16">ನನ ಮಿತ್ತ್ ಆಯೆ ಗುಲಾಮೆ ಆದುಪ್ಪಂದೆ ಗುಲಾಮಡ್ದ್ ಹೆಚ್ಚಿಗೆದಾಯೆ ಆದ್ ಪ್ರೀತಿದ ಸಹೋದರೆ ಆದುಪ್ಪೊಡು. ಆಯೆ ಎಂಕ್ ಬಾರಿ ಪ್ರೀತಿದಾಯೆ ಆದುಪ್ಪುನೆಡ್ದ್ ನಿಕ್ಕ್ ಲೋಕದೃಷ್ಟಿಡ್ಲಾ ಕರ್ತವ ಸಮ್ಮಂಧೊಡ್ಲಾ ನನಲಾ ಏತೋ ಪ್ರೀತಿದಾಯೆ ಆದುಪ್ಪುವೆ.</verse>
				<verse number="17">ಅಂಚಾಂಡ ಈ ಎನನ್ ನಿನ ಪಾಲ್‌ದಾರೆ ಅಂದ್‌ದ್ ಎನ್ನುವಡ ಎನನ್ ಸೇರಾವೊನುಲೆಕ್ಕನೇ ಆಯನ್ಲಾ ಸೇರಾವೊನ್ಲ.</verse>
				<verse number="18">ಆಯಡ್ದ್ ನಿಕ್ಕ್ ದಾಲ ಅನ್ಯಾಯ ಮಲ್ತಿನವು ಉಂಡುಡ, ಅತ್ತ್‌ಡ ಆಯೆ ದಾಲ ಸಾಲ ತೀರಿಸಾವೆರೆ ಇತ್ತ್ಂಡಲಾ ಅವೆನ್ ಎನ ಲೆಖ್ಖೊಗು ಪಾಡ್ಲ.</verse>
				<verse number="19">ಯಾನೇ ಕೊರ್ದು ತೀರಿಸಾವೆ ಅಂದ್‌ದ್ ಪೌಲು ಪನ್ಪಿ ಯಾನ್ ಎನ ಕೈಡ್ದೇ ಬರೆತೆ, ನಿನ ಆತ್ಮದ ಸಂಗತಿಡ್ ಈಯೇ ಎನ ಸಾಲೊಡುಲ್ಲ ಅತ್ತಾ?</verse>
				<verse number="20">ಅಂದ್, ಸಹೋದ್ರ, ಕರ್ತವಡ್ ನಿನಡ್ದ್ ಎಂಕ್ ಪ್ರಯೋಜನ ಆಪಿಲೆಕ್ಕ ಮಲ್ಪುಲ; ಕ್ರಿಸ್ತಡ್ ಎನ ಉಡಲ್‌ಗ್ ಸಂತೋಷ ಪಡೆಪಾಲ.</verse>
				<verse number="21">ಎನ ಪಾತೆರೊನು ಕೇನ್ವ, ಅಂದ್‌ದ್ ಎಂಕ್ ಭರವಸ ಉಪ್ಪುನೆಡ್ದ್ ನಂಬಿಕೆಡ್ ಈ ಪತ್ರಿಕೆನ್ ನಿಕ್ಕ್ ಬರೆತೆ. ಯಾನ್ ಪನ್ಪಿನೆಡ್ದ್‌ಲಾ ಹೆಚ್ಚಾದ್ ಮಲ್ಪುವ ಅಂದ್‌ದ್ ಎಂಕ್ ತೆರಿದುಂಡು.</verse>
				<verse number="22">ಉಂದತ್ತಂದೆ, ದೇವೆರ್ ನಿನ ಪ್ರಾರ್ಥನೆನ್ ಕೇಂಡ್ದ್ ಎನನ್ ನಿಕ್ಲೆ ಕೈತಲ್‌ ಬರಿಯೆರೆ ಸಹಾಯ ಮಲ್ಪುವೆ ಪನ್ಪಿ ನಿರೀಕ್ಷೆ ಉಂಡು. ಅಂಚಾಯಿನೆಡ್ದ್ ಎಂಕ್ ಉಂತಿಯೆರೆ ಬುಡಾರ ತಯಾರ್ ಮಲ್ಪುಲ.</verse>
				<verse number="23">ಕ್ರಿಸ್ತ ಯೇಸುಡು ಎನ ಜತೆಸೆರೆತಾಯೆ ಆದುಪ್ಪು ಎಪಫ್ರೊದಿತೆ</verse>
				<verse number="24">ಎನ ಜತೆಸೇವಕೆರಾಯಿನ ಮಾರ್ಕೆ, ಅರಿಸ್ತಾರ್ಕೆ, ದೇಮಸ್, ಲೂಕೆ ನಿನನ್ ವಂದಿಪುವೆರ್.</verse>
				<verse number="25">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ನಿಕ್ಲೆ ಆತ್ಮೊಡೊಪ್ಪ ಉಪ್ಪಡ್.</verse>
			</chapter>
		</book>
		<book number="58">
			<chapter number="1">
				<verse number="1">ದೇವೆರ್ ಆದಿ ಕಾಲೊಡು ಎಂಕ್ಲೆನ ಪಿತೃಲೆ ಒಟ್ಟುಗು ಪ್ರವಾದಿಲೆ ಬಾಯಿಡ್ದ್ ದಿಂಜ ಸರ್ತಿ ಬೇತೆ ಬೇತೆ ರೀತಿಡ್ ಪಾತೆರ್ದೆರ್.</verse>
				<verse number="2">ಆಂಡ ಈ ಕಡೇ ದಿನೊಕುಲೆಡ್ ಆಯೆ ತನ ಮಗಡ್ದ್ ನಮಡ ಪಾತೆರ್ವೆ. ಆಯನ್‌ ಮಾತೆತ್ತಲಾ ಹಕ್ಕ್‌ದಾಯೆ ಮಲ್ತ್‌ದ್ ಆಯಡ್ದೇ ಮಾತ ಲೋಕೊನು ಉಂಡು ಮಲ್ತ್‌ದೆ.</verse>
				<verse number="3">ಇಂಬೆ ದೇವೆರೆ ಮೈಮೆದ ಬೊಲ್ಪುಲಾ ಆಯ ಸ್ವಭಾವದ ಪ್ರತಿರೂಪಲಾ ಆದಿತ್ತ್‌ದ್ ತನ ಬಾಯಿ ಪಾತೆರದ ಶಕ್ತಿಡ್ದ್ ಮಾತೆಕ್ ಆಧಾರ ಆದುಲ್ಲೆ. ಆಯೆ ಜನೊಕುಲೆನ್ ಪಾಪೊಲೆಡ್ದ್ ಶುದ್ಧ ಮಲ್ತಿ ಬೊಕ್ಕ ಪರಲೋಕೊಡು ಮಲ್ಲಾದಿಗೆದ ಸ್ಥಾನೊಡು ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.</verse>
				<verse number="4">ಆಯೆ ದೂತೆರೆಡ್ದ್‌ಲಾ ಏತೋ ಮಲ್ಲಾಯೆ. ಅಕ್ಲೆಡ್ದ್ ಏತೋ ಮಲ್ಲ ಪುದರ್‌ನ್ಲಾ ದೆತ್ತೊಂದೆ ಅತ್ತಾ?</verse>
				<verse number="5">ದಾಯೆಗಂದ್ಂಡ, “ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ.” ಅಂದ್‌ದ್‌ಲಾ ಕುಡ “ಯಾನ್ ಆಯಗ್ ಅಮ್ಮೆ ಆದುಪ್ಪುವೆ; ಆಯೆ ಎಂಕ್ ಮಗೆ ಆದುಪ್ಪುವೆ.” ಅಂದ್‌ದ್‌ಲಾ ದೇವೆರ್ ವಾ ದೂತಡಲಾ ಏಪಾಂಡಲಾ ಪಂಡಿನವು ಉಂಡಾ?</verse>
				<verse number="6">ಬೊಕ್ಕ ಆಯೆ ತನ ಸುರುತ್ತ ಮಗನ್ ಈ ಲೋಕೊಗು ಕಡಪುಡುನಗ “ದೇವೆರೆ ದೂತೆರ್ ಮಾತೆರ್ಲಾ ಆಯಗ್ ಅಡ್ಡಬೂರಡ್,” ಅಂದ್‌ದ್ ಪನ್ಪೆ.</verse>
				<verse number="7">ದೂತೆರೆನ ಸಂಗತಿಡ್, “ಆಯೆ ತನ ದೂತೆರೆನ್ ಗಾಳಿದ ಲೆಕ್ಕಲಾ ತನ ಸೇವಕೆರೆನ್ ತೂತ ನಾಲಯಿದ ಲೆಕ್ಕಲಾ ಕಡಪುಡ್ವೆ.”</verse>
				<verse number="8">ಆಂಡ ಮಗನ ಸಂಗತಿಡ್, “ದೇವೆರೇ, ನಿನ ಗದ್ದಿಗೆ ಸದಾಕಾಲೊಗು ಉಪ್ಪುನವು, ನಿನ ರಾಜ್ಯದ ಕೋಲು ನೀತಿದ ಕೋಲು ಆದುಂಡು.”</verse>
				<verse number="9">ಈ ನೀತಿನ್ ಪ್ರೀತಿ ಮಲ್ತ್‌ದ, ಅನ್ಯಾಯೊನು ಪಗೆ ಮಲ್ತ. ಅಂಚಾದ್ ದೇವೆರ್ ನಿನ ದೇವೆರೇ, ನಿನನ್ ನಿನ ಪಾಸಡಿದಾಕುಲೆಡ್ದ್ ಮಲ್ಲ ಸ್ಥಾನೊಗು ಏರಾದ್ ಸಂತೋಷದ ಎಣ್ಣೆನ್ ಮೈತ್‌ದ್ ನಿನನ್ ಅಭಿಷೇಕ ಮಲ್ತ್‌ದೆ.</verse>
				<verse number="10">ಉಂದತ್ತಂದೆ, “ಕರ್ತವಾ, ಈ ಆದಿಡ್ ಭೂಮಿಗ್ ಅಡಿಪಾಯೊನು ಪಾಡ್ದ್ ಪರಲೋಕ ನಿನ ಕೈಬೇಲೆ ಆದುಂಡು.</verse>
				<verse number="11">ಅವು ಆಳಿದ್ ಪೋವು; ಆಂಡ ಈ ಮಾತ್ರ ಏನಿತ್ಯೇನಿಗ್ಲಾ ಉಪ್ಪುವ. ಅವು ಮಾತಲಾ ಕುಂಟುದಲೆಕ್ಕನೇ ಪರತ್ತಾವು.</verse>
				<verse number="12">ಈ ಅವೆನ್ ಅಂಗಿದಲೆಕ್ಕ ಮಡ್ತ್‌ದ್ ದಕ್ಕ್‌ದ್ ಪೊಸತ್ತ್ ಅಂಗಿನ್ ಪಾಡಿಲೆಕ್ಕ ಆವು. ಆಂಡ ಈ ಏಪಲಾ ಇತ್ತಿಲೆಕ್ಕನೆ ಉಪ್ಪುವ; ನಿನ ವರ್ಸೊಲು ಮುಗಿಯಂದ್,” ಅಂದ್‌ದ್ ಪನ್ಪೆ.</verse>
				<verse number="13">ಬೊಕ್ಕ ದೇವೆರ್ ವಾ ದೂತೆರೆಗ್ಲಾ ಇಂಚ ಪನ್ತಿಜೆ, “ಯಾನ್ ನಿನ ವೈರಿಲೆನ್ ನಿಕ್ಕ್ ಪಾದಪೀಠ ಮಲ್ಪುನ ಮುಟ್ಟ, ಎನ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಪ್ಪುಲ, ಇನ್ಪಿನೆನ್ ಏಪಲಾ ಪನ್ತಿನ ಉಂಡಾ?”</verse>
				<verse number="14">ಅಕುಲು ಮಾತೆರ್ಲಾ ಬುಡುಗಡೆ ತಿಕ್ಕುನಾಕುಲೆನ ಸೇವೆಗಾದ್ ಕಡಪುಡ್ದಿನ ಸೇವಾತ್ಮೊಲು ಆದುಲ್ಲೆರತ್ತಾ?</verse>
			</chapter>
			<chapter number="2">
				<verse number="1">ಅವೆಡ್ದಾವರ ನಮ ಕೇಂಡಿನ ಪಾತೆರೊಲೆಗ್ ನಮ ತತ್ತ್‌ದ್ ಪೋವಂದಿಲೆಕ್ಕ ಪೋಡಿದ್ ಐಕ್ ಹೆಚ್ಚಾದ್ ಬುದ್ಧಿ ಕೊರ್ಪಿನಕುಲಾದುಪ್ಪೊಡು.</verse>
				<verse number="2">ದಾಯೆಗ್ ಪಂಡ, ದೇವದೂತೆರೆಡ್ದ್ ಪಂಡಿ ಪಾತೆರೊಲು ದೃಢಾದ್ ಇತ್ತಿನೆಡ್ದ್ ಅವೆನ್ ಮೀರ್‌ದ್ ಮಲ್ತಿ ಪ್ರತಿಯೊಂಜಿ ತಪ್ಪುಗ್ಲಾ, ಅಲಕ್ಷ ಮಲ್ಪುನಾಕುಲೆಗ್ಲಾ ನೀತಿ ಇತ್ತಿ ಶಿಕ್ಷೆ ತಿಕ್ಕುಂಡು.</verse>
				<verse number="3">ಇಂಚಿತ್ತಿ ಮಲ್ಲ ರಕ್ಷಣೆನ್ ನಮ ಅಲಕ್ಷ ಮಲ್ತ್ಂಡ ಎಂಚ ತಪ್ಪಾವೊನ್‌ಂಬ? ಉಂದು ಕರ್ತವಡ್ದ್ ಸುರುಡ್ದೇ ತೆರಿಪಾದಿನವು ಆದುಂಡು. ಆಯಡ್ದ್ ಕೇಂಡಿನಾಕುಲು ಅವೆನ್ ನಂಕ್ ದೃಢ ಮಲ್ತೆರ್.</verse>
				<verse number="4">ಬೊಕ್ಕ ದೇವೆರ್ ಅಕ್ಲೆನ ಕೈಡ್ದ್ ಗುರ್ತೊಲೆನ್ಲಾ ಕಾರ್ನಿಕೊಲೆನ್ಲಾ ತರತರತ ಬಲತ್ತ ಕಾರ್ಯೊಲೆನ್ಲಾ ನಡಪಾದ್ ಪರಿಶುದ್ಧಾತ್ಮನ ವರೊಕ್ಲೆನ್ ತನ ಚಿತ್ತೊಗು ಸರಿಯಾದ್ ಪಟ್ಟ್‌ದ್ ಕೊರಿನೆಡ್ದ್ ಐಕ್ ಸಾಕ್ಷಿ ಕೊರಿಯೆ.</verse>
				<verse number="5">ಎಂಕುಲು ಪನ್ಪಿನವು ಬರಿಯೆರೆ ಉಪ್ಪು ಆ ಲೋಕೊನು ಆಯೆ ದೇವದೂತೆರೆಗ್ ಅಧೀನ ಮಲ್ತ್‌ದ್‌ಜೆ ಅತ್ತಾ.</verse>
				<verse number="6">ಶಾಸ್ತ್ರದ ಒಂಜಿ ಕಡೆಟ್ಟ್, “ನರಮಾನಿ ಎಂಚಿತ್ತಿನಾಯೆ? ಆಯನ್ ಈ ದಾಯೆ ನೆನೆಪೊಡು? ನರಮಾನಿ ಮಗೆ ಏತೆತ್ತಾಯೆ ಆಯನ್ ದಾಯೆಗ್ ಗೆನ್ಪೊಡು?</verse>
				<verse number="7">ಆಯನ್ ದೂತೆರೆಡ್ದ್ ಒಂತೆನೇ ಕಡಿಮೆ ಮಲ್ತ್‌ದತ್ತಾ, ಪ್ರಭಾವೊನ್ಲಾ ಮಾನೊನ್ಲಾ ಆಯಗ್ ಕಿರೀಟ ಆದ್ ದೀದ್,</verse>
				<verse number="8">ಮಾತೆನ್ಲಾ ಆಯನ ಕಾರ್‌ದಡಿಕ್ ಪಾಡ್ದ್ ಆಯಗ್ ಅಧೀನ ಮಲ್ತತ್ತಾ?” ಪಂಡ್ದ್ ಸ್ಪಷ್ಟಾದ್ ಪನ್ತ. ಆಯೆ ಮಾತೆನ್ಲಾ ನರಮಾನಿಗ್ ಅಧೀನ ಮಲ್ತ್‌ದೆ ಪನ್ಪಿನೆಟ್ ಆಯಗ್ ಒಂಜೆನಾಂಡಲಾ ಅಧೀನ ಮಲ್ಪಂದೆ ಬುಡ್ತುಜೆ ಪಂಡ್ದ್ ಪಂಡಿಲೆಕ್ಕ ಆಂಡ್. ಆಂಡ ಮಾತಲಾ ಆಯಗ್ ಅಧೀನ ಆದುಪ್ಪುನೆನ್ ನಮ ನನಲಾ ತೂತಿಜ.</verse>
				<verse number="9">ಆಂಡಲಾ ದೂತೆರೆಡ್ದ್ ಒಂತೆ ಕಡಿಮೆ ಮಲ್ಪಾಯಿ ಒರಿ ಅಂದ್ಂಡ ಯೇಸು, ಪ್ರಭಾವೊನ್ಲಾ ಮಾನೊನ್ಲಾ ಕಿರೀಟ ಆದ್ ಪಡೆದುಪ್ಪುನೆನ್ ನಮ ತೂಪ. ಆಯೆ ಸೈತಿನೆಡ್ದೇ ಮಾನ ಪ್ರಭಾವೊನು ಹೊಂದಿಯೆ. ಆಯೆ ದೇವೆರೆ ದಯೊಡ್ದು ಮಾತೆರೆಗಾದ್ ಮರಣೊನು ಅನುಭವ ಮಲ್ಪೊಡೇ ಆದಿತ್ತ್ಂಡ್.</verse>
				<verse number="10">ಸಮಸ್ತಲಾ ಏರೆಡ್ದ್ ಏರೆಗಾದ್ ಉಂಡಾಂಡ, ಆಯೆ ದಿಂಜ ಬಾಲೆಲೆನ್ ತನ ಮೈಮೆಗ್ ಸೇರಾವೊಡಂದ್‌ದ್ ಉಪ್ಪುನಗ, ಅಕ್ಲೆ ರಕ್ಷಣೆದ ಕರ್ತವನ್ ಕಷ್ಟೊಲೆಡ್ದ್ ಗೆಂದಾವುನವು ಆಯಗ್ ತಕ್ಕದವು ಆದಿತ್ತ್ಂಡ್.</verse>
				<verse number="11">ದಾಯೆಗಂದ್ಂಡ ಪರಿಶುದ್ಧ ಮಲ್ಪುನಾಯಗ್ಲಾ ಪರಿಶುದ್ಧ ಆಪಿನ ಮಾತೆರೆಗ್ಲಾ ಒರಿಯೇ ಅಮ್ಮೆ ಉಲ್ಲೆ. ಈ ಕಾರಣೊಡ್ದು ಪರಿಶುದ್ಧ ಮಲ್ಪುನಾಯೆ ಪರಿಶುದ್ಧ ಆಪಿನಾಕುಲೆನ್ ಸಹೋದ್ರೆರ್ ಪನ್ಪಿನೆಕ್ಕ್ ನಾಚಿಗೆ ಮಲ್ಪುಜೆ.</verse>
				<verse number="12">ಕೀರ್ತನೆಡ್ ಇಂಚ ಪನ್ಪೆ, “ನಿನ ಪುದರ್‌ದ ಮೈಮೆನ್ ಎನ ಸಹೋದ್ರೆರೆಗ್ ತೆರಿಪಾವೆ. ಯಾನ್ ಸಭೆತ ಮದ್ಯೊಡು ನಿಕ್ಕ್ ಸ್ತುತಿಪದೊಕುಲೆನ್ ಪನ್ಪೆ.”</verse>
				<verse number="13">“ಯಾನ್ ದೇವೆರೆ ಮಿತ್ತ್ ಭರವಸ ದೀಯಿನಾಯೆ ಆದುಲ್ಲೆ.” “ಇಂದಾ! ಯಾನ್ಲಾ ದೇವೆರ್ ಎಂಕ್ ಒದಗಾದ್ ಕೊರ್ತಿ ಬಾಲೆಲುಲಾ ಉಲ್ಲೆರ್,” ಅಂದ್‌ದ್ ಪನ್ಪೆ.</verse>
				<verse number="14">ಉಂದತ್ತಂದೆ ಜೋಕುಲು ನೆತ್ತೆರ್ ಮಾಸ ಇತ್ತಿನ ನರಮಾನಿ ಆದುಪ್ಪುನೆಡ್ದ್ ಯೇಸುಲಾ ಅಕ್ಲೆಲೆಕ್ಕನೇ ಆಯೆ. ತನ ಮರಣೊಡ್ದೇ ಮರಣಾಧಿಕಾರಿನ್ ಅಂದ್ಂಡ ಸೈತಾನನ್ ನಾಶ ಮಲ್ತೆ.</verse>
				<verse number="15">ಮರಣದ ಪೋಡಿಗೆದ ದಿಸೆಡ್ದ್ ಗುಲಾಮತನೊಟು ಇತ್ತಿನಾಕುಲೆನ್ ಬುಡ್ಪಾವರೆಗ್ ಅಕ್ಲೆ ಲೆಕ್ಕ ನರಮಾನಿ ಆಯೆ.</verse>
				<verse number="16">ನಿಜಾದ್ ಆಯೆ ದೂತೆರೆಗ್ ಸಹಾಯ ಮಲ್ಪೆರೆಗ್ ಅತ್ತ್, ಅಬ್ರಹಾಮುನ ಸಂತಾನೊಗು ಸಹಾಯ ಮಲ್ಪೆರೆಗಾದ್ ಬೈದಿನಾಯೆ ಅತ್ತಾ.</verse>
				<verse number="17">ಅಂಚಾಯಿನೆಡ್ದ್ ಆಯೆ ಮಾತ ಸಂಗತಿಡ್ ತನ ಸಹೋದ್ರೆರೆಗ್ ಸಮಾದುಪ್ಪುನ ಅಗತ್ಯ ಇತ್ತ್ಂಡ್. ಇಂಚ ಆಯೆ ನರಮಾನಿಲೆನ ಪಾಪೊಲೆನ್ ಮಾಜಾವುನೆಕ್ಕಾದ್ ದೇವೆರೆ ಕಾರ್ಯೊಲೆಡ್ ಕನಿಕರಲಾ ನಂಬಿಕೆಲಾ ಇತ್ತಿ ಪ್ರಧಾನಯಾಜಕೆ ಆಯೆ.</verse>
				<verse number="18">ತಾನೇ ಸ್ವತಃ ಶೋಧನೆ ಶ್ರಮೆಲೆನ್ ಅನುಭವ ಮಲ್ತಿನೆಡ್ದ್ ನಂಕ್ ಶೋಧನೆ ಆನಗ ಸಹಾಯ ಮಲ್ಪೆರೆಗ್ ಸಮರ್ಥೆ ಆದುಲ್ಲೆ.</verse>
			</chapter>
			<chapter number="3">
				<verse number="1">ಅಂಚಾಯಿನೆಡ್ದ್ ದೇವಜನೊಕುಲಾಯಿ ಸಹೋದ್ರೆರೇ ಪರಲೋಕದ ಭಾಗ್ಯೊಡು ಪಾಲ್‌ದಾರೆರಾವೆರೆ ಲೆಪ್ಪು ಪಡೆತಿನಾಕುಲೆ, ನಮ ನಿಗಂಟ್ ಮಲ್ತೊಂದು ಒಪ್ಪಿಯೊಂಡಿನ ಅಪೊಸ್ತಲೆಲಾ ಪ್ರಧಾನಯಾಜಕೆಲಾ ಆಯಿ ಯೇಸುನು ಗೇನ ಕೊರ್ದು ಯೋಚನೆ ಮಲ್ಪುಲೆ.</verse>
				<verse number="2">ಮೋಶೆ ದೇವೆರೆ ಇಡೀ ಇಲ್ಲಡ್ ನಂಬಿಗಸ್ತೆ ಆದಿತ್ತಿಲೆಕ್ಕನೇ, ಯೇಸುಲಾ ತನನ್ ನೇಮಕ ಮಲ್ತ್‌ದಿನಾಯಗ್ ನಂಬಿಗಸ್ತೆ ಆದುಲ್ಲೆ.</verse>
				<verse number="3">ಇಲ್ಲ್‌ಡ್ದ್‌ಲಾ ಇಲ್ಲ್ ಕಟ್ಟಿನಾಯಗ್ ಹೆಚ್ಚಿಗೆದ ಮಾನ ಉಪ್ಪುನೆಡ್ದ್ ಮೋಶೆಡ್ದ್ ಯೇಸು ಏತೋ ಹೆಚ್ಚಿಗೆದ ಮಾನೊಗು ತಕ್ಕದಾಯೆ ಅಂದ್‌ದ್ ತೋಜಿದ್ ಬೈದೆ.</verse>
				<verse number="4">ಪ್ರತಿಯೊಂಜಿ ಇಲ್ಲನ್ ಏರಾ ಒರಿ ಕಟ್ಟ್‌ದುಪ್ಪುವೆ. ಆಂಡ ಮಾತೆನ್ಲಾ ಕಟ್ಟಿನಾಯೆ ದೇವೆರೇ.</verse>
				<verse number="5">ಮೋಶೆ ಒರಿ ಸೇವಕೆ ಆದ್ ದೇವೆರೆ ಇಲ್ಲಡ್ ಮಾತ ಸಂಗತಿಡ್ ನಂಬಿಗೆದಾಯೆ ಆದಿತ್ತೆ, ಆಯೆ ದುಂಬಗ್ ತೋಜಿದ್ ಬರ್ಪಿನ ಸಂಗತಿಲೆಗ್ ಸಾಕ್ಷಿ ಆದಿತ್ತೆ.</verse>
				<verse number="6">ಆಂಡ ಕ್ರಿಸ್ತೆ ಮಗೆ ಆದ್ ದೇವೆರೆನ ಇಲ್ಲದ ಮಿತ್ತ್ ಅಧಿಕಾರಿ ಆದುಲ್ಲೆ. ನಮ, ನಮ್ಮ ಧೈರ್ಯೊನ್ಲಾ ನಮ ನಂಬಿಕೆಡ್ದ್ ಉಂಡಾಪಿ ಭರವಸೊನ್ಲಾ ಕಡೇ ಮುಟ್ಟ ಗಟ್ಟಿಯಾದ್ ಪತ್ತೊಂಡಿನಕುಲಾಂಡ ನಮನೇ ದೇವೆರೆ ಇಲ್ಲದಾಕುಲು.</verse>
				<verse number="7">ಅವೆಡ್ದಾವರ ಪರಿಶುದ್ಧಾತ್ಮೆ ಪನ್ಪಿನ ಪ್ರಕಾರ “ಇನಿ ನಿಕುಲು ದೇವೆರೆನ ಸ್ವರೊಕ್ಕು ಕೆಬಿ ಕೊರಿಯರ್ಡ</verse>
				<verse number="8">ನಿಕ್ಲೆನ ಹಿರಿಯಾಕುಲು ದೇವೆರೆನ್ ಕೋಪ ಲಕ್ಕಾದಿ ಜಾಗ್‌ಡ್ ಕಾಡ್‌ದುಲಯಿ, ದೇವೆರೆನ್ ಪರೀಕ್ಷೆ ಮಲ್ತಿನ ದಿನೊಕುಲೆಡ್ ಮಲ್ತಿಲೆಕ್ಕ ನಿಕ್ಲೆನ ಉಡಲ್‌ನ್ ಕಠಿಣ ಮಲ್ತೊನಡೆ.”</verse>
				<verse number="9">ಅಕುಲು ಕಾಡ್‌ಡ್ ಎನನ್ ಶೋಧಿದ್ ಪರೀಕ್ಷೆ ಮಲ್ತ್‌ದ್ ನಲ್ಪ ವರ್ಸ ಮುಟ್ಟ ಯಾನ್ ಮಲ್ತೊಂದಿತ್ತಿ ಕೆಲಸೊಲೆನ್ ತೂಯೆರ್.</verse>
				<verse number="10">ಐಕಾದ್ ಯಾನ್ ಈ ಸಂತಾನದ ಮಿತ್ತ್ ಮಸ್ತ್ ಬೇಜಾರ್ ಮಲ್ತ್‌ದ್, ಅಕುಲು ಏಪಲಾ ಉಡಲ್‌ಡ್ ತತ್ತ್ ಪೋಪಿನಾಕುಲು ಅಂದ್‌ದ್ ಪಂಡೆ. ಆಂಡ ಅಕುಲು ಎನ ಮಾರ್ಗೊಲೆನ್ ತೆರಿಯೊಂಡಿಜೆರ್.</verse>
				<verse number="11">ಇಂಚ ಉಪ್ಪುನಗ, “ಮೊಕುಲು ಎನ ವಿಶ್ರಾಂತಿಡ್ ಸೇರುನೇ ಇಜ್ಜಿ ಪಂಡ್ದ್ ಕೋಪೊಡು ಆಜ ಪಾಡೊಂಡೆ.”</verse>
				<verse number="12">ಸಹೋದ್ರೆರೇ ತೂವೊನ್ಲೆ, ಜೀವದ ನಿಜ ರೂಪ ಆದುಪ್ಪು ದೇವೆರೆನ್ ಬುಡ್ದು ಪೋಪಿನ ಅಪನಂಬಿಕೆ ಇತ್ತಿ ಪಡಿಕೆಂತಿನ ಉಡಲ್ ನಿಕ್ಲೆಡ ಏರೆಡಲಾ ಉಪ್ಪೆರೆ ಬಲ್ಲಿ.</verse>
				<verse number="13">ನಿಕ್ಲೆಡ್ ಒರಿಯಾಂಡಲಾ ಪಾಪೊಡ್ದು ಮೋಸ ಪೋದು ಕಠಿಣ ಆವಂದಿಲೆಕ್ಕ “ಈ ಪೊರ್ತು” ಪನ್ಪಿ ಕಾಲ ಉಪ್ಪುನೆಟ್ಟ ದಿನನಿತ್ಯ ಒರಿ ಒರಿಯಗ್ ಬುದ್ಧಿ ಪಂಡೊನ್ಲೆ.</verse>
				<verse number="14">ಸುರುಡ್ದಿಂಚಿ ಇತ್ತಿನ ಭರವಸೊನು ಕಡೆ ಮುಟ್ಟಲಾ ಗಟ್ಟಿಯಾದ್ ಪತ್ತೊನುವಡ ಕ್ರಿಸ್ತಡ ಪಾಲ್‌ದಾರೆರ್ ಆದುಲ್ಲತ್ತಾ.</verse>
				<verse number="15">ಶಾಸ್ತ್ರ ಇಂಚ ಪನ್ಪುಂಡು, “ಇನಿ ನಿಕುಲು ದೇವೆರೆನ ಸ್ವರೊಕ್ಕು ಕೆಬಿ ಕೊರಿಯರ್ಡ, ನಿಕ್ಲೆನ ಹಿರಿಯಾಕುಲು ದೇವೆರೆನ್ ಕೋಪ ಲಕ್ಕಾದಿ ಜಾಗ್‌ಡ್ ಮಲ್ತಿಲೆಕ್ಕ ನಿಕ್ಲೆನ ಉಡಲ್‌ನ್ ಕಠಿಣ ಮಲ್ತೊನಡೆ.”</verse>
				<verse number="16">ಆಯೆ ಪನ್ಪಿನೆನ್ ಕೇಂಡ್ದ್ ಕೋಪ ಲಕ್ಕಾಯಿನಾಕುಲು ಏರ್? ಮೋಶೆ ಕೈ ತಿರ್ತ್ ಇತ್ತ್‌ದ್ ಐಗುಪ್ತದ ಉಲಯಿಡ್ದ್ ಪಿದಾಡ್ದ್ ಬತ್ತಿನ ಮಾತೆರ್ಲಾ ಅತ್ತಾ.</verse>
				<verse number="17">ಬೊಕ್ಕ ನಲ್ಪ ವರ್ಸ ಆಯೆ ಏರೇ ಮಿತ್ತ್ ದಿಂಜ ಕೋಪ ಮಲ್ತೊಂಡೆ? ಪಾಪ ಮಲ್ತಿನಾಕುಲೆ ಮಿತ್ತೆ ಅತ್ತಾ? ಅಕ್ಲೆನ ಪುಣೊಕುಲು ಕಾಡ್‌ಡ್ ಬೂರ್ದುಂಡತ್ತಾ?</verse>
				<verse number="18">ಎನ ವಿಶ್ರಾಂತಿಡ್ ನಿಕುಲು ಸೇರುನೇ ಇಜ್ಜಿ ಅಂದ್‌ದ್ ಏರೆನ ಸಂಗತಿಡ್ ಆಜ ಪಾಡೊಂಡೆ? ಆಯನ ಪಾತೆರೊನು ಕೇನಂದಿನಾಕುಲೆಗ್ ಅತ್ತಾ?</verse>
				<verse number="19">ಅಕುಲು ಸೇರಂದೆ ಪೋಯಿನಿ ಅಪನಂಬಿಕೆಡ್ದೇ ಅಂದ್‌ದ್ ತೆರಿಯೊನ್ವ.</verse>
			</chapter>
			<chapter number="4">
				<verse number="1">ಇಂಚ ಉಪ್ಪುನಗ ದೇವೆರೆ ವಿಶ್ರಾಂತಿಡ್ ಸೇರೊಲಿ ಪನ್ಪಿ ವಾಗ್ದಾನ ನನಲಾ ಉಪ್ಪುನೆಡ್ದ್ ನಿಕ್ಲೆಡ್ ಏರಾಂಡಲಾ ಆ ವಾಗ್ದಾನದ ಫಲೊನು ಪಡೆಯಂದೆ ತತ್ತ್‌ದ್ ಪೋಯೆರೆ ಬಲ್ಲಿ ಪಂಡ್ದೇ ನಮ ಪೋಡಿಯೊನುಗ.</verse>
				<verse number="2">ಅಕ್ಲೆಗ್ ತೆರಿಪಾಯಿನ ಸುವಾರ್ತೆನ್ ನಂಕ್‌ಲಾ ತೆರಿಪಾದ್‌ಂಡ್. ಆಂಡ ಆ ಕಾಲೊಡು ಕೇಂಡಿನಾಕುಲು ನಂಬಂದೆ ಇತ್ತಿನೆಡ್ದ್ ಆ ಸಂದೇಶೊಡ್ದು ಅಕ್ಲೆಗ್ ವಾ ಪ್ರಯೋಜನಲಾ ಆಯಿಜಿ.</verse>
				<verse number="3">ದೇವೆರೆ ಕಾರ್ಯೊಲು ಲೋಕದ ಆದಿಡ್ದೇ ಮುಗಿದ್ ಆಯನ ವಿಶ್ರಾಂತಿ ತಯಾರಿತ್ತ್‌ಂಡಲಾ, ಆಯೆ, “ಎನ ವಿಶ್ರಾಂತಿಡ್ ಮೊಕುಲು ಸೇರುನೇ ಇಜ್ಜಿ ಪಂಡ್ದ್ ಕೋಪೊಡು ಆಜ ಪಾಡೊಂಡೆ ಅಂದ್‌ದ್ ಪನ್ತೆ ಅತ್ತಾ?” ನಂಬಿನ ನಮಾಂಡಲಾ ಆ ವಿಶ್ರಾಂತಿಡ್ ಸೇರೊಂದೇ ಉಲ್ಲ.</verse>
				<verse number="4">ಒಂಜಿ ಕಡೆಟ್ಟ್ ಏಳನೇ ದಿನತ ಬಗೆಟ್, ದೇವೆರ್ ತನ ಸೃಷ್ಟಿದ ಕಾರ್ಯೊಲೆನ್ ಮಾತೆನ್ ಮುಗಿತ್‌ದ್ ಏಳನೇ ದಿನೊಟು ವಿಶ್ರಾಂತಿ ದೆತ್ತೊಂಡೆ ಪಂಡ್ದ್ ಬರೆತ್ಂಡ್.</verse>
				<verse number="5">ಆಂಡ ನನೊಂಜಿ ಕಡೆಟ್ಟ್, “ಮೊಕುಲು ಎನ ವಿಶ್ರಾಂತಿಡ್ ಸೇರುನೇ ಇಜ್ಜಿ,” ಅಂದ್‌ದ್ ಪನ್ತೆ.</verse>
				<verse number="6">ಇಂಚಾಯಿನೆಡ್ದ್ ಆ ವಿಶ್ರಾಂತಿಡ್ ಕೆಲೆವೆರ್ ಸೇರೊನೊಡು ಇನ್ಪಿ ಪಾತೆರ ನನಲಾ ಉಪ್ಪುನೆಡ್ದ್ ದುಂಬು ಸುವಾರ್ತೆದ ಪಾತೆರೊನು ಕೇನಂದಿನಾಕುಲು ಅವಿಧೇಯರಾಯಿನೆಡ್ದ್ ಐಟ್ಟ್ ಸೇರಂದೆ ಪೋಯೆರ್.</verse>
				<verse number="7">ಸುಮಾರ್ ಕಾಲ ಪೋಯಿ ಬೊಕ್ಕ ಆಯೆ ದಾವೀದನ ಬಾಯಿಡ್ದ್ ಪಾತೆರ್‌ದ್ “ಈ ಪೊರ್ತೇ” ಅಂದ್‌ದ್ ಕುಡೊಂಜಿ ದಿನೊನು ನೇಮಕ ಮಲ್ಪುವೆ; ಎಂಚಂದ್ಂಡ, “ಇನಿ ನಿಕುಲು ದೇವೆರೆನ ಸ್ವರೊಕ್ಕು ಕೆಬಿ ಕೊರಿಯರ್ಡ ನಿಕ್ಲೆನ ಉಡಲ್‌ನ್ ಕಠಿಣ ಮಲ್ತೊನಡೆ,” ಪಂಡ್ದ್ ಮಿತ್ತ್‌ದ ವಚನೊಡು ಪನ್ಪೆ.</verse>
				<verse number="8">ಯೆಹೋಶುವೆ ಅಕ್ಲೆನ್ ಆ ವಿಶ್ರಾಂತಿಡ್ ಸೇರಾದಿತ್ವೆಡ ದೇವೆರ್ ಐಡ್ದ್ ಬೊಕ್ಕ ಬೇತೆ ಒಂಜಿ ದಿನತ ಸುದ್ಧಿ ಪನ್ತ್‌ವಯೆ.</verse>
				<verse number="9">ಅಂಚಾಯಿನೆಡ್ದ್ ದೇವೆರೆ ಜನೊಕುಲು ಅನುಭವ ಮಲ್ಪೆರೆ ಉಪ್ಪುನ ಸಬ್ಬತ್ ಪನ್ಪಿ ವಿಶ್ರಾಂತಿ ನನಲಾ ಉಂಡು.</verse>
				<verse number="10">ಎಂಚಂದ್ಂಡ ದೇವೆರ್ ತನ ಕೆಲಸೊಲೆನ್ ಮುಗಿತ್‌ದ್ ಎಂಚ ವಿಶ್ರಾಂತಿ ದೆತ್ತೊಂಡೆನಾ, ಅಂಚೆನೇ ದೇವೆರೆ ವಿಶ್ರಾಂತಿಡ್ ಸೇರ್ದಿನಾಯೆಲಾ ತನ ಬೇಲೆಲೆನ್ ಮುಗಿತ್‌ದ್ ವಿಶ್ರಾಂತಿ ದೆತ್ತೊನ್ವೆ.</verse>
				<verse number="11">ಅಂಚಾದ್ ನಮಡ ಒರಿಯಾಂಡಲಾ ಅಪನಂಬಿಕೆಡ್ ಬೂರಂದಿಲೆಕ್ಕ ಆ ವಿಶ್ರಾಂತಿಡ್ ಸೇರಿಯೆರೆ ಪ್ರಯಾಸ ಮಲ್ಪುಗ.</verse>
				<verse number="12">ದಾಯೆಗಂದ್ಂಡ, ದೇವೆರೆ ಪಾತೆರ ಜೀವ ಇತ್ತಿನವು, ಕಾರ್ಯ ಮಲ್ಪುನವು, ವಾ ಇರ್ಬಾಯಿದ ಕತ್ತಿಡ್ದ್‌ಲಾ ಪರ್ತೆದವು. ಆತ್ಮ ಪ್ರಾಣೊಲೆನ್ ಕೀಲ್‌ದ ಚರ್ಬಿಲೆನ್ ಭಾಗ ಮಲ್ಪುನ ಮಟ್ಟೊಗ್ಲಾ ಪೋಪಿನವು. ಉಡಲ್‌ದ ಆಲೋಚನೆಲೆನ್ಲಾ, ಉದ್ದೇಶೊಲೆನ್ಲಾ ಶೋಧಿದ್ ತೂಪಿನವು ಆದುಂಡು.</verse>
				<verse number="13">ನಮ ಏರೆಗ್ ಲೆಖ್ಖ ಒಪ್ಪಿಯಾವೊಡಾ ಆಯನ ದೃಷ್ಟಿಗ್ ಸಮಸ್ತಲಾ ಮದೆ ಆವಂದೆಲಾ ಬಯಲಾದಿತ್ತಿನವುಲಾ ಆದುಂಡು. ಆಯ ಸನ್ನಿಧಾನೊಡು ತೋಜಂದಿನವು ಸೃಷ್ಟಿಡ್ ಒಂಜಿಲಾ ಇಜ್ಜಿ.</verse>
				<verse number="14">ಪರಲೋಕೊಲೆನ್ ದಾಂಟ್‌ದ್ ಪೋಯಿ ದೇವೆರೆ ಮಗೆ ಯೇಸು ಇನ್ಪಿನಾಯೆ, ಪ್ರಧಾನಯಾಜಕೆ ನಂಕ್ ಉಪ್ಪುನೆಡ್ದ್ ನಮ ಮಲ್ತ್‌ದಿನ ಅರಿಕೆನ್ ಗಟ್ಟಿ ಪತ್ತೊನುಗ.</verse>
				<verse number="15">ದಾಯೆ ಪಂಡ ನಂಕುಪ್ಪು ಪ್ರಧಾನಯಾಜಕೆ, ನಮ ಬಲಹೀನತೆಲೆಡ್, ಆಯೆ ಕನಿಕರದಾಂತಿನಾಯೆ ಅತ್ತ್. ದಾಯೆಗಂದ್ಂಡ ನಮ ಲೆಕ್ಕನೇ ಮಾತ ಸಂಗತಿಡ್ ಶೋಧನೆ ಆಯಗ್ಲಾ ಆದಿತ್ತ್ಂಡ್ ಪಾಪ ಮಾತ್ರ ಮಲ್ತ್‌ದಿಜೆ.</verse>
				<verse number="16">ಅಂಚಾಯಿನೆಡ್ದ್ ನಮ ಕನಿಕರೊನು ಪಡೆಪಿಲೆಕ್ಕಲಾ ನಂಕ್ ತಕ್ಕ ಸಮಯದ ಸಹಾಯೊಗು ದಯ ತಿಕ್ಕುಲೆಕ್ಕಲಾ ಧೈರ್ಯೊಡು ದಯತ ಗದ್ದಿಗೆದ ಕೈತಲ್‌ ಪೋಯಿ.</verse>
			</chapter>
			<chapter number="5">
				<verse number="1">ಪ್ರತಿಯೊರಿ ಪ್ರಧಾನಯಾಜಕೆ ಜನೊಕುಲೆಡ್ದ್ ಅಜತ್ ದೆತ್ತಿನಾಯೆ ಆದಿತ್ತ್‌ದ್ ಜನೊಕುಲೆಗಾದ್ ದೇವೆರೆ ಕಾರ್ಯೊಲೆನ್ ಮಲ್ಪೆರೆಗಾದ್ ನೇಮಕ ಆದುಪ್ಪುವೆ ಅತ್ತಾ? ಆಯೆ ಅಕ್ಲೆಗಾದ್ ಕಾಣಿಕೆಲೆನ್ಲಾ ಪಾಪ ಮಾಜಾವುನೆಕ್ಕಾದ್ ಬಲಿಲೆನ್ಲಾ ಅರ್ಪಣೆ ಮಲ್ಪೊಡು.</verse>
				<verse number="2">ತಾನ್‌ಲಾ ಬಲಹೀನೆ ಆದುಪ್ಪುನೆಡ್ದ್ ಆಯೆ ಬುದ್ಧಿದಾಂತಿನಾಕುಲೆನ್ಲಾ, ಮಾರ್ಗ ತತ್ತ್‌ದ್ ನಡಪುನಾಕುಲೆನ್ಲಾ ತಾಳ್ಮೆಡ್ ತರಕೊನಿಯೆರೆ ಶಕ್ತೆ ಆದುಲ್ಲೆ.</verse>
				<verse number="3">ಆ ಬಲಹೀನತೆದ ಕಾರಣೊಡ್ದು ಆಯೆ ಜನೊಕುಲೆಗಾದ್ ಎಂಚನಾ ಅಂಚೆನೇ ತನ್ಕಾದ್‌ಲಾ ಪಾಪ ಮಾಜಾವುನೆಕ್ಕಾದ್ ಬಲಿ ಅರ್ಪಣೆ ಮಲ್ಪೊಡಾಯಿನಾಯೆ ಆದುಲ್ಲೆ.</verse>
				<verse number="4">ಉಂದತ್ತಂದೆ ಏರ್ಲಾ ತನ್ನಾತೆಗೆ ತಾನ್ ಈ ಮಾನೊನು ವೈಸೊನಂದೆ ದೇವೆರೆಡ್ದ್ ನೇಮಕಾದ್ ವೈಸೊನ್ವೆ. ಆರೋನೆಲಾ ದೇವೆರೆಡ್ದೇ ನೇಮಕ ಆದ್ ಆ ಮಾನೊನು ವೈಸೊಂಡೆ ಅತ್ತಾ?</verse>
				<verse number="5">ಅಂಚೆನೆ ಕ್ರಿಸ್ತೆಲಾ ತನ್ಕ್ ತಾನ್ ಪ್ರಧಾನಯಾಜಕೆ ಆಪಿನ ಈ ಮಾನೊನು ವೈಸೊಂಡ್ಜೆ, ಆಂಡ, “ಎಂಕ್ ಈಯೇ ಮಗೆ; ಇನಿ ಯಾನೇ ನಿನನ್ ಪಡೆತೆ.”</verse>
				<verse number="6">ಪಂಡ್ದ್ ಪಂಡಿನಾಯೆನೇ ಈ ಮಾನೊನು ಆಯಗ್ ಕೊರಿಯೆ. ಆಯೆ ಬೊಕ್ಕೊಂಜಿ ಕಡೆಟ್ಟ್, “ಈ ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಯಾಜಕೆ ಆದುಲ್ಲ,” ಪಂಡ್ದ್ ಪನ್ಪೆ.</verse>
				<verse number="7">ಕ್ರಿಸ್ತೆ ತಾನ್ ಭೂಲೋಕೊಡುಪ್ಪುನಗ ಮರಣೊಗು ತಪ್ಪಾದ್ ಕಾಪುನ ಶಕ್ತಿ ಇತ್ತಿನಾಯಗ್ ಮಲ್ಲ ಬುಲ್ಪುಡ್ದುಲಾ ಕಣ್ಣ್ ನೀರ್ ಜಪುಡಾದ್‌ಲಾ ಪ್ರಾರ್ಥನೆ ಕೋರಿಕೆಲೆನ್ ಸಂದಾದ್ ದೇವೆರೆ ಮಿತ್ತ್ ಭಯ ಭಕ್ತಿ ದೀಯಿನೆಡ್ದ್ ದೇವೆರ್ ಆಯನ ಪ್ರಾರ್ಥನೆಲೆನ್ ಕೇಂಡೆ.</verse>
				<verse number="8">ಇಂಚ ಆಯೆ ದೇವೆರೆ ಮಗೆ ಆದಿತ್ತೆಡಲಾ ತನ್ಕ್ ಆದುಪ್ಪು ಕಷ್ಟೊಲೆಡ್ದೇ ತಗ್ಗ್‌ತನೊನು ಕಲ್ತೊಂಡೆ.</verse>
				<verse number="9">ಉಂದತ್ತಂದೆ ಆಯೆ ಪರಿಪೂರ್ಣೆ ಆದ್ ದೇವೆರೆಡ್ದ್ ಮೆಲ್ಕೀಜೆದೇಕ್‌ನ ತರತ ಪ್ರಧಾನಯಾಜಕೆ ಪಂಡ್ದ್ ಪನ್ಪಾವೊಂಡಿನಾಯೆ ಆಯೆ. ತನ ಪಾತೆರೊನು ತಗ್ಗ್‌ತನೊಟು ಕೇನುನಾಕುಲೆಗ್ ಮಾತೆರೆಗ್ಲಾ ನಿತ್ಯ ರಕ್ಷಣೆ ತಿಕ್ಕುಲೆಕ್ಕ ಕಾರಣ ಆಯೆ.</verse>
				<verse number="10"></verse>
				<verse number="11">ನೆತ್ತ ಸಂಗತಿಡ್ ಎಂಕುಲು ಪನಿಯೆರೆ ಉಪ್ಪುನ ಪಾತೆರೊಲು ಮಸ್ತ್ ಉಂಡು; ಆಂಡ ನಿಕ್ಲೆನ ಕೆಬಿ ಮಂದ ಆದುಪ್ಪುನೆಡ್ದ್ ಅವೆನ್ ಬುಡ್ಪಾದ್ ತೆರಿಪಾವುನವು ಕಷ್ಟ ಆದುಂಡು.</verse>
				<verse number="12">ಕಾಲೊನು ತೂಂಡ ನಿಕುಲು ಈತ್‌ನೆಟ್ಟ ಬೋಧಕೆರಾದ್ ಉಪ್ಪೊಡಿತ್ತ್‌ಂಡಲಾ ಒರಿ ನಿಕ್ಲೆಗ್ ದೇವೆರೆ ಪಾತೆರೆದ ಮೂಲ ಪಾಠೊಲೆನ್ ಕುಡಲಾ ಕಲ್ಪಾವೊಡಾಪುಂಡು. ನಿಕುಲು ಪೇರ್ ಪರ್ಪಿನಾಕುಲೇ ಅತ್ತಂದೆ ಗಟ್ಟಿದ ತಿನಸ್ ತಿನ್ಪಿನಾಕುಲು ಅತ್ತ್.</verse>
				<verse number="13">ಪೇರ್ ಬೋಡಾಯಿನಾಯೆ ಬಾಲೆದಲೆಕ್ಕ ಇತ್ತ್‌ದ್ ನೀತಿದ ವಾಕ್ಯೊಲೆಡ್ ಅನುಭವದಾಂತಿನಾಯೆ ಆದುಲ್ಲೆ.</verse>
				<verse number="14">ಗಟ್ಟಿದ ತಿನಸ್ ಪ್ರಾಯಸ್ಥೆರೆಗ್ ಅಂದ್ಂಡ ಗೇನ ಸಾದನೆಡ್ದ್ ಉಂದು ಎಡ್ಡೆಂತಿನ ಉಂದು ಹಾಳ್ ಇನ್ಪಿ ಭೇದೊನು ತೆರಿದಿನಾಕುಲೆಗಾದುಂಡು.</verse>
			</chapter>
			<chapter number="6">
				<verse number="1">ಅವೆಡ್ದಾವರ ಜೀವದಾಂತಿ ಕೆಲಸೊಲೆ ಮಿತ್ತ್ ನಂಬಿಕೆನ್ ಬುಡ್ದು ದೇವೆರೆಡನೇ ನಂಬಿಕೆ ದೀವೊಡಾಯಿನವು, ಪಶ್ಚಾತಾಪ ಪಡೆಪಿನ, ದೀಕ್ಷಾಸ್ನಾನ, ಹಸ್ತಾರ್ಪಣೆದ ಬೋಧನೆ, ಸೈತಿನಾಕುಲೆಡ್ದ್ ಲಕ್ಕುನವು, ನಿತ್ಯನ್ಯಾಯತೀರ್ಪು ಉಂಡು ಪನ್ಪಿನವು. ಇಂಚಿತ್ತಿನೆತ್ತ ಕ್ರಿಸ್ತಡುಪ್ಪು ಅಡಿಪಾಯೊನು ಗಡಿಗಡಿ ಪಾಡಂದೆ ಪೂರ್ತಿ ಆಯಿ ತಿಳುವಳಿಕೆಗ್ ಸಾಗೊಂದು ಪೋಯಿ.</verse>
				<verse number="2"></verse>
				<verse number="3">ಬೊಕ್ಕ ದೇವೆರೆ ಚಿತ್ತ ಇತ್ತ್ಂಡ, ಇಂಚನೆ ಸಾಗೊಂದು ಪೋಯಿ.</verse>
				<verse number="4">ಒಂಜಿ ಸರ್ತಿ ಗೇನದ ಬೊಲ್ಪುಗು ಸೇರಿ ಬೊಕ್ಕ ಪರಲೋಕೊಡ್ಡಾಯಿನ ದಾನದ ಅನುಭವೊನು ಮಲ್ತ್‌ದ್ ಪರಿಶುದ್ಧಾತ್ಮಡ್ ಪಾಲ್‌ದಾರೆರಾದ್</verse>
				<verse number="5">ದೇವೆರೆ ಎಡ್ಡೆ ಪಾತೆರೊಲೆನ್ಲಾ ಬರ್ಪಿ ಯುಗತ್ತ ಬಲೊನ್ಲಾ ಅನುಭವ ಮಲ್ತಿನಾಕುಲು ಪಿರ ಜಾರುವೆರ್‌ಡ,</verse>
				<verse number="6">ಅಕ್ಲೆಡ ಕುಡೊರ ಪಶ್ಚಾತಾಪ ಪುಟ್ಟಾಯೆರೆ ಸಾದ್ಯ ಇಜ್ಜಿ. ದಾಯೆಗಂದ್ಂಡ ಅಕುಲು ತನ್ಕುಲೆ ಪಾಲ್‌ಗ್ ದೇವೆರೆ ಮಗನ್ ಕುಡೊರ ಕ್ರುಸ್ಸುಗು ಪಾಡುನಾಕುಲುಲಾ ಆಯನ್ ಅವಮಾನ ಮಲ್ಪುನಾಕುಲುಲಾ ಆದುಲ್ಲೆರ್.</verse>
				<verse number="7">ಭೂಮಿ ತನ ಮಿತ್ತ್ ದಿಂಜ ಸರ್ತಿ ಬೂರುನ ಬರ್ಸೊನು ಒಯ್ತೊಂದು ಅವು ಏರೆಗಾದ್ ಬೆನ್ನಿ ಮಲ್ಪಾವುಂಡಾ ಅಕ್ಲೆಗ್ ಎಡ್ಡೆ ಬುಲೆ ಕೊರ್‌ಂಡ ದೇವೆರೆ ಆಶೀರ್ವಾದೊನು ಹೊಂದುಂಡು.</verse>
				<verse number="8">ಆಂಡ ಅವು ಮುಳ್ಳುಗಿಡೊಕ್ಲೆನ್ಲಾ ಕಳ್ಳಿಲೆನ್ಲಾ ಬುಲೆಪಾಂಡ ತಕ್ಕಂತಿನವು ಆವಂದೆ ಶಾಪದವು ಆಪುಂಡು. ಐತ ಅಂತ್ಯ ಪೊತ್ತುದು ಪೋಪಿನವೇ.</verse>
				<verse number="9">ಆಂಡ ಪ್ರೀತಿದಾಕುಲೇ, ಈ ರೀತಿಯಾದ್ ಎಂಕುಲು ಪಾತೆರ್‌ಂಡಲಾ ನಿಕುಲು ಉಂದೆಡ್ದ್ ಎಡ್ಡೆ ರೀತಿಡ್ಲಾ ರಕ್ಷಣೆಡ್ಲಾ ಉಲ್ಲರಂದ್‌ದ್ ದೃಢಾದ್ ನಂಬುದ.</verse>
				<verse number="10">ನಿಕುಲು ದೇವಜನೊಕುಲೆಗ್ ಉಪಚಾರ ಮಲ್ತ್‌ದರ್ ನನಲಾ ಮಲ್ತೊಂದುಲ್ಲರ್. ಈ ಕೆಲಸೊನ್ಲಾ ನೆಟ್ಟ್ ನಿಕುಲು ದೇವೆರೆನ ಪುದರ್‌ದ ಮಿತ್ತ್ ತೋಜಾಯಿನ ಪ್ರೀತಿನ್ಲಾ ಆಯೆ ಮದತ್‌ದ್ ಬುಡ್ಪುಜೆ, ದಾಯೆಗ್ ಪಂಡ ದೇವೆರ್ ಅನ್ಯಾಯಗಾರೆ ಅತ್ತ್.</verse>
				<verse number="11">ನಿಕುಲು ಉಪಚಾರ ಮಲ್ಪುನೆಟ್ಟ್ ವಾ ಆಸಕ್ತಿನ್ ತೋಜಾದರಾ, ನಿಕ್ಲೆನ ನಿರೀಕ್ಷೆ ದೃಢ ಮಲ್ತೊಂದು ಕಡೆ ಮುಟ್ಟ ಪತ್ತೊನ್ನೆಟ್ಟ್‌ಲಾ ನಿಕ್ಲೆಡ್ ಪ್ರತಿ ಒರಿ ಅವ್ವೇ ಆಸಕ್ತಿನ್ ತೂಪಾವೊಡು ಅಂದ್‌ದ್ ಬಯಕುವೆ.</verse>
				<verse number="12">ನಿಕುಲು ಉದಾಸೀನೆರ್ ಆದುಪ್ಪಂದೆ, ವಾಗ್ದಾನೊಲೆನ್ ನಂಬುದು ಐತ ಫಲೊಕ್ಕಾದ್ ಮಸ್ತ್ ದಿನ ಮುಟ್ಟ ಕಾತೊಂದಿತ್ತ್‌ದ್ ಆ ಫಲೊನು ಪಡೆವೆರೆ ಪ್ರಯತ್ನ ಮಲ್ತೊಂದು ಉಪ್ಪೊಡಂದ್‌ದ್ ಬಯಕುವೆ.</verse>
				<verse number="13">ದೇವೆರ್ ಅಬ್ರಹಾಮುಗು ವಾಗ್ದಾನ ಮಲ್ತಿನಪಗ ತನಡ್ದ್ ಹೆಚ್ಚಿಗೆದಾಯನ ಆಜ ದೀವೆರೆ ಆವಂದೆ ಇತ್ತಿನೆಡ್ದ್ ತನ ಮಿತ್ತೇ ಆಜ ದೀವೊಂಡೆ.</verse>
				<verse number="14">“ನಿಜಾದ್ ಯಾನ್ ನಿನನ್ ಆಶೀರ್ವದಿಪುವೆ. ನಿನ ಸಂತಾನದಾಕುಲೆನ್ ಲೆಖ್ಖ ಮಲ್ಪೆರೆ ಆವಂದಿನಾತ್ ಹೆಚ್ಚ್ ಮಲ್ಪುವೆ.”</verse>
				<verse number="15">ಆ ವಾಗ್ದಾನದ ಫಲೊಕ್ಕಾದ್ ಅಬ್ರಹಾಮು ಮಸ್ತ್ ದಿನ ಕಾತೊಂದಿತ್ತ್‌ದ್ ಆ ಫಲೊನು ದೇವೆರ್ ಪಂಡಿಲೆಕ್ಕನೇ ಪಡೆಯೆ.</verse>
				<verse number="16">ನರಮಾನಿಲು ತನ್ಕುಲೆಡ್ದ್ ಹೆಚ್ಚ್‌ದಾಯನ ಮಿತ್ತ್ ಆಜ ಪಾಡ್ದ್ ನಿಗಂಟ್ ಮಲ್ತಿ ಬೊಕ್ಕ ಅಕ್ಲೆನ ಉಲಯಿ ವಾದ ದಾಲಾ ಉಪ್ಪುಜಿ.</verse>
				<verse number="17">ಅಂಚೆನೇ ದೇವೆರ್ ತನ ಮನಸ್ ಸ್ಥಿರವಾಯಿನವು ಪನ್ಪಿನೆನ್ ವಾಗ್ದಾನದ ಫಲೊಕ್ಕು ಹಕ್ಕ್‌ದಾರೆರಾಪಿನಾಕುಲೆಗ್ ಸರಿಯಾದ್ ತೋಜಾವೊಡು ಅಂದ್‌ದ್ ಆಜ ದೀದ್ ತನ ಪಾತೆರೊನು ಗಟ್ಟಿ ಮಲ್ತೊಂಡೆ. ನಿಲೆ ತಿಕ್ಕೊಡು ಪಂಡ್ದ್ ಪಾರ್ ಬತ್ತ್‌ದ್ ನಮ ಎದುರುಡು ದೀತಿನ ಕಾತೊಂದಿತ್ತಿನೆನ್ ಪತ್ತೊಂಡಿನಕುಲಾಯಿ ಎಂಕ್ಲೆಗ್ ರಡ್ಡ್ ಸ್ಥಿರವಾಯಿನ ಆಧಾರೊಲು ಉಪ್ಪುನೆಡ್ದ್ ಧೈರ್ಯ ಉಂಡಾಂಡ್.</verse>
				<verse number="18"></verse>
				<verse number="19">ಈ ಆಧಾರೊಲೆನ್ ಕೊರಿನೆಡ್ದಲಾ ದೇವೆರ್ ಸುಳ್ಳು ಪನ್ತ್‌ಜೆ. ಆ ನಿರೀಕ್ಷೆಲಾ ನಮ ಪ್ರಾಣದ ಲಂಗರ್‌ದ ಲೆಕ್ಕ ಇತ್ತ್‌ದ್ ಭರವಸೊಗು ಯೋಗ್ಯಾದಿತ್ತಿನಲಾ ಸ್ಥಿರವಾದಿತ್ತಿನಲಾ ಆದುಂಡು. ಅವು ನಮನ್ ಪರದೆದ ಉಲಯಿದ ದೇವೆರೆ ಸನ್ನಿಧಾನೊಗು ನಡಪುಡುನವು.</verse>
				<verse number="20">ಯೇಸು ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಪ್ರಧಾನಯಾಜಕೆ ಆದಿತ್ತ್‌ದ್ ನಂಕಾದ್ ದುಂಬೇ ಆ ಸನ್ನಿಧಾನದ ಉಲಯಿ ಪೋತೆ.</verse>
			</chapter>
			<chapter number="7">
				<verse number="1">ಈ ಮೆಲ್ಕೀಜೆದೇಕ್ ಸಾಲೇಮ್ ಊರುದ ಅರಸುಲಾ ಪರಾತ್ಪರ ದೇವೆರೆನ ಯಾಜಕೆಲಾ ಆದಿತ್ತೆ. ಅಬ್ರಹಾಮು ಅರಸರೆನ್ ಸೋಪಾದ್ ಪಿರ ಬನ್ನಗ, ಮೆಲ್ಕೀಜೆದೇಕ್ ಆಯಗ್ ತಿಕ್ಕಿಯೆ, ಬೊಕ್ಕ ಆಯನ್ ಆಶೀರ್ವಾದ ಮಲ್ತೆ.</verse>
				<verse number="2">ಅಪಗ ಅಬ್ರಹಾಮು ತಾನ್ ಲಡಾಯಿಡ್ ಗೆಂದಿನ ಮಾತೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಮೆಲ್ಕೀಜೆದೇಕ್‌ಗ್ ಕೊರಿಯೆ. ಮೆಲ್ಕೀಜೆದೇಕ್ ಇನ್ಪಿನೆತ್ತ ಅರ್ಥ, “ನೀತಿದ ಅರಸು.” ಬೊಕ್ಕ ಸಾಲೇಮುದ ರಾಜೆ ಪನ್ನಗ, “ಸಮಾಧಾನದ ಅರಸು,” ಅಂದ್‌ದ್ ಅರ್ಥ.</verse>
				<verse number="3">ಮೆಲ್ಕೀಜೆದೇಕ್‌ನ ಅಪ್ಪೆ, ಅಮ್ಮೆ ಬೊಕ್ಕ ಆಯನ ಪೂರ್ವಜೆರ್ ಏರ್ ಅಂದ್‌ದ್ ವಾ ಸಂಗತಿಲಾ ಗೊತ್ತುಜ್ಜಿ. ಜನ್ಮದ ಪ್ರಾರಂಭಲಾ ಆಯುಷ್ಯದ ಅಂತ್ಯಲಾ ಇಜ್ಜಿ. ಆಯೆ ದೇವೆರೆ ಮಗೆ ಆದುಪ್ಪು ಯೇಸುಗು ಸಮ ಆದುಲ್ಲೆ. ಆಯೆ ಏಪೊಗ್ಲಾ ಯಾಜಕೆ ಆದುಲ್ಲೆ.</verse>
				<verse number="4">ಈ ಮೆಲ್ಕೀಸೆದೇಕ್ ಏತ್ ಮಲ್ಲಾಯೆ ಅಂದ್‌ದ್ ಆಲೋಚನೆ ಮಲ್ಪುಲೆ. ಇಸ್ರಾಯೇಲ್ಯೆರೆ ಮೂಲ ಅಮ್ಮೆ ಆದಿತ್ತಿನ ಅಬ್ರಹಾಮುಲಾ ಉಂದೆನ್ ತೆರಿಯೊಂದು ತಾನ್ ಲಡಾಯಿಡ್ ಗೆಂದಿನ ಮಾತೆತ್ತ ಪತ್ತೆಟ್ಟ್ ಒಂಜಿ ಪಾಲ್‌ನ್ ಆಯಗ್ ಕೊರಿಯೆ.</verse>
				<verse number="5">ಅಬ್ರಹಾಮುಡ್ದು ಪುಟ್ಟಿ ಲೇವಿ ಸಂತಾನದಾಕುಲು ಯಾಜಕ ಕೆಲಸೊಗು ನೇಮಕ ಆದಿತ್ತ್‌ದ್ ಜನೊಕುಲೆಡ್ದ್ ಪಂಡ್ಂಡ ತನ್ಕುಲೆ ಸಹೋದ್ರೆರೆಡ್ದ್ ಪತ್ತೆಟ್ಟ್ ಒಂಜಿ ಪಾಲ್ ಕಾಣಿಕೆ ದೆತ್ತೊನೊಡು ಅಂದ್‌ದ್ ನ್ಯಾಯಕಟ್ಟ್‌ಡ್ ಅಪ್ಪಣೆ ಉಂಡು.</verse>
				<verse number="6">ಆಂಡ ಮೆಲ್ಕೀಜೆದೇಕ್ ಲೇವಿನ ವಂಶೊಗು ಸೇರ್ದಿನಾಯೆ ಅತ್ತ್, ಆಂಡಲಾ ಅಬ್ರಹಾಮುಡ್ದು ಪತ್ತೆಟ್ಟ್ ಒಂಜಿ ಪಾಲ್‌ನ್ ದೆತ್ತೊಂಡೆ. ಬೊಕ್ಕ ದೇವೆರೆ ವಾಗ್ದಾನೊಗು ಸರಿಯಾದ್ ಅಬ್ರಹಾಮುನು ಮೆಲ್ಕೀಸೆದೇಕ್ ಆಶೀರ್ವಾದ ಮಲ್ತೆ.</verse>
				<verse number="7">ಆಶೀರ್ವಾದ ಕೊರ್ಪಿನಾಯೆ ಕಂಡಿತಾದ್‌ಲಾ ಆಶೀರ್ವಾದ ದೆತ್ತೊನುನಾಯಡ್ದ್ ಮಲ್ಲಾಯೆ. ಉಂದೆಟ್ಟ್ ದಾಲಾ ಬೇತೆ ಪಾತೆರ ಇಜ್ಜಿ.</verse>
				<verse number="8">ಉಂದತ್ತಂದೆ ಲೇವಿಯೆರೆ ಕ್ರಮೊನು ತೂಂಡ ಸೈಯೆರೆ ಇತ್ತಿ ನರಮಾನಿಲು ಪತ್ತೆಟ್ಟ್ ಒಂಜಿ ಭಾಗೊನು ದೆತ್ತೊನುವೆರ್, ಆಂಡ ಮೆಲ್ಕೀಜೆದೇಕ್‌ನ ಕ್ರಮೊನು ತೂಂಡ ನಿತ್ಯೊಗು ಉಪ್ಪುನಾಯೆ ಆದುಲ್ಲೆ ಅಂದ್‌ದ್ ಸಾಕ್ಷಿ ಪನ್ಪುಂಡು.</verse>
				<verse number="9">ಬೊಕ್ಕ ಕಾಣಿಕೆ ಸ್ವೀಕಾರ ಮಲ್ಪು ಲೇವಿ ಗೋತ್ರದ ಯಾಜಕೆರ್‌ಲಾ ಅಬ್ರಹಾಮುಡ್ದು ಮೆಲ್ಕೀಜೆದೇಕ್‌ಗ್ಲಾ ಕಾಣಿಕೆ ಕೊರಿ ಲೆಕ್ಕ ಆಂಡ್.</verse>
				<verse number="10">ಅಪಗ ಲೇವಿ ಪುಟ್ಟುದಿತ್ತಿಜೆಡಲಾ ಆಯೆ ಅಬ್ರಹಾಮುಡ್ದು ಬತ್ತಿನಾಯೆ ಆದಿತ್ತ್‌ದ್ ಮೆಲ್ಕೀಸೆದೇಕ್ ಅಬ್ರಹಾಮುಡ ಕಾಣಿಕೆ ದೆತ್ತೊನುನಗ ಅಬ್ರಹಾಮುನ ಶರೀರೊಡು ಲೇವಿಲಾ ಇತ್ತೆ ಅಂದ್‌ದ್ ಪನೊಲಿ.</verse>
				<verse number="11">ನ್ಯಾಯಕಟ್ಟ್‌ದ ಕ್ರಮ ಪ್ರಕಾರ ಲೇವಿನ ಯಾಜಕತ್ವೊಡು ದೇವೆರ್ ಪರಿಪೂರ್ಣತೆನ್ ಪಡೆದಿತ್ತ್‌ಂಡ; ದೇವೆರ್ ಲೇವಿ, ಆರೋನೆರೆನ್ ಬುಡ್ದು ಮೆಲ್ಕೀಜೆದೇಕ್‌ನ ತರತ ಬೊಕ್ಕೊರಿ ಯಾಜಕೆ ಬರ್ಪಿನ ದಾನೆ ಅಗತ್ಯ ಇತ್ತ್ಂಡ್?</verse>
				<verse number="12">ಬೊಕ್ಕ ಯಾಜಕ ಬೇಲೆ ಬದಲಾಂಡ, ನ್ಯಾಯಕಟ್ಟ್‌ಲಾ ಬದಲಾವೊಡು ಅಂದ್‌ದ್ ಅಗತ್ಯ ಉಂಡು.</verse>
				<verse number="13">ಮಿತ್ತ್ ಪಂತಿ ಪಾತೆರ ಏರೆನ ಸಂಗತಿಡ್ ಪನ್ತ್ಂಡಾ ಆಯೆ ಬೇತೆ ಒಂಜಿ ಗೋತ್ರೊಡು ಪುಟ್ಟಿನಾಯೆ. ಆ ಗೋತ್ರೊಡ್ದು ಒರಿಯಾಂಡಲಾ ಬಲಿಪೀಠದಲ್ಪ ಬೇಲೆ ಮಲ್ತಿನಾಕುಲು ಅತ್ತ್.</verse>
				<verse number="14">ನಮ ಕರ್ತವೆ ಯೂದನ ಗೋತ್ರೊಡ್ದು ಪುಟ್ಟಿನಾಯೆ ಲೇವಿನ ಗೋತ್ರೊಡ್ದು ಅತ್ತ್. ಬೊಕ್ಕ ಯೂದನ ಗೋತ್ರೊಡ್ದು ಯಾಜಕೆರ್ ಬರ್ಪೆರ್ ಅಂದ್‌ದ್ ಮೋಶೆ ಓಲುಲಾ ಪನ್ತ್‌ಜೆ.</verse>
				<verse number="15">ಮೆಲ್ಕೀಜೆದೇಕ್ ತರೊಟು ಬೇತೆನೇ ಒರಿ ಯಾಜಕೆ ಬತ್ತಿನಪಗ, ಈ ವ್ಯತ್ಯಾಸ ನ್ಯಾಯಕಟ್ಟ್‌ಡ್ ಸ್ಪಷ್ಟಾದ್ ಗೋಚರ ಆಪುಂಡು.</verse>
				<verse number="16">ಯೇಸು ಶರೀರ ರೀತಿಡ್ ಲೇವಿ ಗೋತ್ರೊಗು ಸೇರ್ದ್ ಯಾಜಕೆ ಆಯಿನಿ ಅತ್ತ್; ಆಂಡ ನಾಶಾವಂದಿನ ಜೀವದ ಶಕ್ತಿಡ್ದೇ.</verse>
				<verse number="17">ದೇವೆರ್ ಯೇಸುಗು ಶಾಸ್ತ್ರೊಡು ಸಾಕ್ಷಿ ಪಂಡಿಲೆಕ್ಕ, “ಈ ಸದಾಕಾಲೊಗು ಮೆಲ್ಕೀಜೆದೇಕ್‌ನ ತರತ ಯಾಜಕೆ ಆದುಲ್ಲ.”</verse>
				<verse number="18">ಅಂದ್‌ದ್ ಯಾಜಕತ್ವದ ಅಪ್ಪಣೆಲು ಬಲದಾಂತಿನವುಲಾ ಕೆಲಸೊಗು ಬರಂದಿನವುಲಾ ಆದಿತ್ತಿನೆಡ್ದ್ ದೇವೆರ್ ಅವೆನ್ ದೆತ್ತ್ ಪಾಡೊಡಾಂಡ್.</verse>
				<verse number="19">ದಾಯೆಗಂದ್ಂಡ ಮೋಶೆನ ನ್ಯಾಯಕಟ್ಟ್ ಒವ್ವೆನ್ಲಾ ಪರಿಪೂರ್ಣ ಮಲ್ಪುಜಿ. ಆಂಡ ಇತ್ತೆ ದೇವೆರ್ ನಂಕ್ ನಿರೀಕ್ಷೆದ ಸಾದಿ ಮಲ್ತ್‌ದೆ. ಉಂದೆಡ್ದ್ ನಮ ಆಯ ಕೈತಲ್‌ ಬರ್ಪ.</verse>
				<verse number="20">ದೇವೆರ್ ಯೇಸುನು ಒಂಜಿ ಆಜ ದೀದ್ ನೇಮಕ ಮಲ್ತೆ. ಆರೋನನ ಗೋತ್ರದಾಕುಲು ಆಜದಾಂತೆ ಯಾಜಕೆರಾದ್ ನೇಮಕ ಆತೆರ್.</verse>
				<verse number="21">ಆಂಡ ಯೇಸುನ ಸಂಗತಿಡ್ ಒಂಜಿ ಆಜ ಉಂಡು. ದೇವೆರ್ ಆಯಗ್ ಪಂಡೆ, “‘ಈ ಸದಾಕಾಲೊಗು ಯಾಜಕೆ ಆದುಪ್ಪುವ,’ ಅಂದ್‌ದ್ ಕರ್ತವೆ ಇನ್ಪಿ ಯಾನ್ ಆಜ ದೀತೆ; ಬೊಕ್ಕ ಆಯೆ ಮನಸ್‌ಡ್ ಬದಲಾಪುಜೆ.”</verse>
				<verse number="22">ಈ ಆಜಡ್ದಾವರ ಯೇಸು ಎಡ್ಡೆಂತಿನ ಒಡಂಬಡಿಕೆನ್ ದೃಢ ಮಲ್ಪುನಾಯೆ ಆದುಲ್ಲೆ.</verse>
				<verse number="23">ಲೇವಿಯೆರ್ ಶಾಶ್ವತ ಆದ್ ಬೇಲೆ ಮಲ್ಪೆರೆಗ್ ಮರಣ ಅಡ್ಡಿ ಆದುಪ್ಪುನೆಡ್ದ್ ಅಕ್ಲೆಡ್ ದಿಂಜ ಜನ ಯಾಜಕೆರಿತ್ತೆರ್.</verse>
				<verse number="24">ಆಂಡ ಯೇಸು ಏಪೊಗ್ಲಾ ಉಪ್ಪುನೆಡ್ದ್ ಆಯನ ಯಾಜಕತ್ವಲಾ ಬೇತೆಕ್ಲೆಗ್ ಪೋಪುಜಿ.</verse>
				<verse number="25">ಅಂಚಾಯಿನೆಡ್ದ್ ಆಯಡ್ದ್ ದೇವೆರೆ ಕೈತಲ್‌ ಬರ್ಪಿನಾಕುಲೆಗ್ ಏಪಲಾ ಪೂರ್ತಿ ರಕ್ಷಣೆ ಮಲ್ಪೆರೆ ಸಾದ್ಯ ಆಂಡ್. ಆಯೆ ಅಕ್ಲೆಗಾದ್ ಏಪಲಾ ದೇವೆರೆಡ ಮದ್ಯಸ್ತಿಕೆ ಮಲ್ಪೆರೆಗಾದ್ರ ಏನಿತ್ಯೇನಿಗ್ಲಾ ಬದುಕುವೆ.</verse>
				<verse number="26">ಇಂಚಿತ್ತಿನಾಯೆನೇ ಎಂಕ್ಲೆಗ್ ಬೊಡಾಯಿ ಪ್ರಧಾನಯಾಜಕೆ. ಆಯೆ ಪರಿಶುದ್ಧೆಲಾ ದೋಷದಾಂತಿನಾಯೆಲಾ ಕಲೆದಾಂತಿನಾಯೆಲಾ ಪಾಪಿಲೆಡ್ದ್ ಪ್ರತ್ಯೇಕ ಇತ್ತಿನಾಯೆಲಾ ಆದಿತ್ತ್‌ದ್, ಪರಲೋಕೊಡು ಮೈಮೆದ ಸ್ಥಾನೊಡು ಉಪ್ಪುನಾಯೆ ಆದುಲ್ಲೆ.</verse>
				<verse number="27">ದುಂಬತ್ತ ತನ್ಕುಲೆ ಪಾಪೊಗಾದ್ ಬೊಕ್ಕ ಜನೊಕುಲೆ ಪಾಪೊಗಾದ್ ಬಲಿ ಅರ್ಪಣೆ ಮಲ್ಪುನ ಲೇವಿಕ ಪ್ರಧಾನಯಾಜಕಲೆಕ್ಕ ಆಯೆ ಪ್ರತಿದಿನ ಬಲಿ ಕೊರೊಡು ಅಂದ್‌ದ್ ಅಗತ್ಯ ಇಜ್ಜಿ, ದಾಯೆಗಂದ್ಂಡ ಒಂಜೇ ಸರ್ತಿ ತನನ್ ತಾನೇ ಬಲಿ ಕೊರ್ದು ಆ ಕೆಲಸೊನು ಮಲ್ತ್ ಮುಗಿತೆ.</verse>
				<verse number="28">ನ್ಯಾಯಕಟ್ಟ್ ಪ್ರಕಾರ ನೇಮಕ ಆತಿನ ಪ್ರಧಾನಯಾಜಕೆರ್‌ಲು ನರಮಾನಿಲೆಕ್ಕ ಬಲದಾಂತಿನಾಕುಲು ಆದಿತ್ತೆರ್. ಆಂಡ ನ್ಯಾಯಕಟ್ಟ್ ಕೊರಿನ ಮಸ್ತ್ ವರ್ಸದ ಬೊಕ್ಕ ದೇವೆರ್ ತನ ಮಗನ್ ಆಜ ದೀದ್ ಪರಿಪೂರ್ಣತೆಗಾದ್ ಏಪೊಗ್ಲಾ ಪ್ರಧಾನಯಾಜಕೆ ಆದ್ ನೇಮಕ ಮಲ್ತೆ.</verse>
			</chapter>
			<chapter number="8">
				<verse number="1">ಎಂಕುಲು ಇತ್ತೆ ಪನ್ಪಿ ಸಂಗತಿಲೆಡ್ ಮುಖ್ಯವಾಯಿನ ಪಾತೆರ ದಾನೆಂದ್ಂಡ, ಪರಲೋಕದುಲಯಿ ಘನ ಇತ್ತಿ ದೇವೆರೆ ಗದ್ದಿಗೆದ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದಿ ಪ್ರಧಾನಯಾಜಕೆ ನಂಕುಲ್ಲೆ.</verse>
				<verse number="2">ಉಂಬೆ ಪರಿಶುದ್ಧಸ್ಥಾನೊಡು ಅಂದ್ಂಡ, ನರಮಾನಿ ಪಾಡಂದೆ ಕರ್ತವೆನೇ ಪಾಡಿನ ನಿಜವಾಯಿನ ದೇವೆರೆ ದರ್ಶನದ ಗುಡಾರೊಡು ಯಾಜಕ ಕೆಲಸೊನು ನಡಪಾವುನಾಯೆ ಆದುಲ್ಲೆ.</verse>
				<verse number="3">ಪ್ರತಿಯೊರಿ ಪ್ರಧಾನಯಾಜಕೆ ಕಾಣಿಕೆಲೆನ್ಲಾ ಬಲಿಲೆನ್ಲಾ ಅರ್ಪಣೆ ಮಲ್ಪೆರೆ ನೇಮಕ ಆದುಪ್ಪುವೆ ಆತೇ. ಅವೆಡ್ದಾವರ ಅರ್ಪಣೆ ಮಲ್ಪರೆ ಆ ಪ್ರಧಾನಯಾಜಕಗ್ಲಾ ದಾದಾಂಡಲಾ ಉಪ್ಪೊಡು.</verse>
				<verse number="4">ಇಂಬೆ ನನಲಾ ಭೂಮಿದ ಮಿತ್ತ್ ಇತ್ತುದ್ವೆಡ ಯಾಜಕೆ ಆತುದ್ವಯೆ. ದಾಯೆ ಪಂಡ ನ್ಯಾಯಕಟ್ಟ್‌ದ ಪ್ರಕಾರ ಕಾಣಿಕೆ ಅರ್ಪಣೆ ಮಲ್ಪುನಾಕುಲು ಇತ್ತುದ್ವೆರ್.</verse>
				<verse number="5">ಅಕುಲು ಪರಲೋಕೊಡುಪ್ಪು ದೇವಾಲಯದ ಪ್ರತಿರೂಪಲಾ ನಿರೆಲ್ಲಾ ಆದುಪ್ಪು ದೇವಾಲಯೊಡು ಯಾಜಕ ಕೆಲಸೊನು ಮಲ್ಪುನಾಕುಲು ಆದುಲ್ಲೆರ್. ಮೋಶೆ ದೇವೆರೆ ದರ್ಶನದ ಗುಡಾರೊನು ಮಲ್ಪೆರೆ ಉಪ್ಪುನಗ ಪರ್ವತೊಡು ಯಾನ್ ತೋಜಾಯಿ ಮಾದ್ರಿದ ಲೆಕ್ಕನೇ ಮಾತೆನ್ ಮಲ್ಪಾವೊಡು ಪನ್ಪಿ ದೈವೋಕ್ತಿ ಆಯಗ್ ಉಂಡಾಂಡತ್ತಾ.</verse>
				<verse number="6">ಆಂಡ ಕ್ರಿಸ್ತೆ ಐಡ್ದ್ ಶ್ರೇಷ್ಟವಾಯಿನ ಯಾಜಕತ್ವೊನು ಪಡೆತಿನಾಯೆ ಆದುಲ್ಲೆ. ಎಡ್ಡೆಂತಿನ ವಾಗ್ದಾನೊಲೆ ಮಿತ್ತ್ ಉಂಡಾಯಿನ ಎಡ್ಡೆಂತಿನ ಒಡಂಬಡಿಕೆಗ್ ಮದ್ಯಸ್ತೆ ಆದುಲ್ಲೆ.</verse>
				<verse number="7">ಆ ಸುರುತ್ತ ಒಡಂಬಡಿಕೆ ದೋಷದಾಂತಿನವು ಆದಿತ್ತ್ಂಡ ರಡ್ಡನೆದ ಒಡಂಬಡಿಕೆಗ್ ಅವಕಾಸ ಇತ್ತ್‌ದ್ವಂದ್.</verse>
				<verse number="8">ಆಂಡ ದೇವೆರ್ ಆ ಒಡಂಬಡಿಕೆಗ್ ಸೇರಿನಾಕುಲೆನ ಮಿತ್ತ್ ತಪ್ಪು ತೋಜಾದ್ ಇಂಚ ಪಂಡೆ, “ಇಂದಾ, ಯಾನ್ ಇಸ್ರಾಯೇಲ್ ಇಲ್ಲ್‌ಡೊಪ್ಪಲಾ ಯೆಹೂದ ಇಲ್ಲ್‌ಡೊಪ್ಪಲಾ ಪೊಸತ್ತಾಯಿನ ಒಂಜಿ ಒಡಂಬಡಿಕೆ ಮಲ್ತೊನುನ ದಿನೊಕುಲು ಬರ್ಪುಂಡು.</verse>
				<verse number="9">ಈ ಒಡಂಬಡಿಕೆ ಯಾನ್ ಮೊಕ್ಲೆನ ಪಿತೃಲೆನ್ ಕೈ ಪತ್ತ್‌ದ್ ಐಗುಪ್ತ ದೇಶದುಲಯಿಡ್ದ್ ಲೆತ್ತೊಂದು ಬತ್ತಿ ಕಾಲೊಡು ಅಕ್ಲೆಡೊಪ್ಪ ಮಲ್ತೊಂಡಿ ಒಡಂಬಡಿಕೆದಂಚಿನವು ಅತ್ತ್. ಅಕುಲು ಎನ ಒಡಂಬಡಿಕೆಡ್ ಗಟ್ಟಿಯಾದ್ ಉಂತಂದಿನೆಡ್ದ್ ಯಾನ್ ಅಕ್ಲೆನ ಚಿಂತೆನ್ ಬುಡಿಯೆ ಅಂದ್‌ದ್ ಕರ್ತವೆ ಪನ್ಪೆ.</verse>
				<verse number="10">ಆ ದಿನೊಕುಲು ಬತ್ತಿ ಬೊಕ್ಕ ಯಾನ್ ಇಸ್ರಾಯೇಲ್ ಇಲ್ಲ್‌ಡೊಪ್ಪ ಮಲ್ತೊನುನ ಒಡಂಬಡಿಕೆ ಇಂಚ ಉಪ್ಪುಂಡು. ಎನ ನ್ಯಾಯಕಟ್ಟ್‌ಲೆನ್ ಅಕ್ಲೆನ ಮನಸ್‌ಡ್ ದೀಪೆ. ಅಕ್ಲೆನ ಉಡಲ್‌ಡ್ ಅವೆನ್ ಬರೆಪೆ. ಯಾನ್ ಅಕ್ಲೆಗ್ ದೇವೆರಾದುಪ್ಪುವೆ; ಅಕುಲು ಎನ ಪ್ರಜೆಕುಲು ಆದುಪ್ಪುವೆರ್.</verse>
				<verse number="11">ಒಂಜೇ ಊರುದಾಕುಲುಲಾ ಸಹೋದರೆರೆಗ್ಲಾ ಕರ್ತವ ಗೇನೊನು ಪಡೆಯೊನ್ಲೆ ಪಂಡ್ದ್ ಕಲ್ಪಾವೊಡಂದಿಜ್ಜಿ. ಎಲ್ಯಕುಲೆಡ್ದ್ ಸುರು ಆದ್ ಮಲ್ಲಾಯೆ ಮುಟ್ಟ ಮಾತೆರ್ಲಾ ಎನ ಗೇನೊನು ಪಡೆದುಪ್ಪುವೆರ್.</verse>
				<verse number="12">ಯಾನ್ ಅಕ್ಲೆನ ಅನ್ಯಾಯೊನು ದಯೊಟು ಮಾಪು ಮಲ್ಪುವೆ; ಅಕ್ಲೆ ಪಾಪೊಲೆನ್ ಯಾನ್ ನನ ಏಪೊಗ್ಲಾ ನೆನೆಪುಗು ಕನವಯೆ, ಪಂಡ್ದ್ ಕರ್ತವೆ ಪನ್ಪೆ.”</verse>
				<verse number="13">ಮುಲ್ಪ ಪೊಸ ಒಡಂಬಡಿಕೆ ಅಂದ್‌ದ್ ಪನ್ಪಿನೆಟ್ ದುಂಬುದೆನ್ ಪರತ್ ಅಂದ್‌ದ್ ಮಲ್ತೆ. ಆಂಡ ಪರತಾವೊಂದಿತ್ತ್‌ದ್ ಪರತಾಯಿನೆಕ್ಕ್ ಅಂತ್ಯಲಾ ಉಂಡು.</verse>
			</chapter>
			<chapter number="9">
				<verse number="1">ಇಂಚ ಇತ್ತ್ಂಡಲಾ ಸುರುತ್ತ ಒಡಂಬಡಿಕೆಡ್ ದೇವಾರಾಧನೆದ ನಿಯಮೊಲು ಬೊಕ್ಕ ದೇವಾಲಯ ಇತ್ತ್ಂಡ್. ಅವು ಈ ಲೋಕೊಗು ಸಮ್ಮಂಧ ಪಡೆಯಿನವು.</verse>
				<verse number="2">ಅಂದ್ಂಡ ಒಂಜಿ ಗುಡಾರ ಕಟ್ಟ್‌ದ್ಂಡ್. ಐತ ಸುರುತ್ತ ಭಾಗೊಡು ದೀಪಕಂಬ, ಮೇಜಿ, ಅರ್ಪಣೆ ಮಲ್ತಿನ ರೊಟ್ಟಿ ಇತ್ತ್ಂಡ್. ಐಕ್ ಪರಿಶುದ್ಧ ಜಾಗ್ ಅಂದ್‌ದ್ ಪುದರ್.</verse>
				<verse number="3">ಬೊಕ್ಕ ರಡ್ಡನೆ ಪರದೆದ ಅಂಚಿಡ್ ಬಾರಿ ಪರಿಶುದ್ಧದ ತಂಬು ಇತ್ತ್ಂಡ್.</verse>
				<verse number="4">ಐಟ್ಟ್ ಬಂಗಾರ್‌ದ ಧೂಪಾರತಿ, ಉಲಯಿ ಪಿದಯಿ ಬಂಗಾರ್‌ದ ತಗಡ್ ಮುಚ್ಚಿದಿನ ಒಡಂಬಡಿಕೆದ ಮಂಜೂಷೊಲು ಇತ್ತ್ಂಡ್. ಆ ಮಂಜೂಷದುಲಯಿ ಮನ್ನ ದೀತಿನ ಬಂಗಾರ್‌ದ ಬಾಜನಲಾ ಆರೋನನ ತೆಗ್‍ಲ್ದಿನ ಕೋಲುಲಾ ಒಡಂಬಡಿಕೆ ಬರೆತಿ ಕಲ್ಲ್‌ದ ಪಲಯಿಲುಲಾ ಇತ್ತ್ಂಡ್.</verse>
				<verse number="5">ಐತ ಮಿತ್ತ್ ದೇವೆರೆ ಮೈಮೆನ್ ತೋಜಾವುನ ಕೆರೂಬೆರ್ ದಯತ ಗದ್ದಿಗೆಗ್ ಮಿತ್ತ್ ನಿರೆಲ್‌ದ ಲೆಕ್ಕ ಬುಡ್ಪಾದಿತ್ತ್‌ಂಡ್. ಸದ್ಯೊಗು ಈ ಸಂಗತಿಲೆನ್ ಬುಡ್ಪಾದ್ ಪನಿಯೆರೆ ಆಪುಜಿ.</verse>
				<verse number="6">ಉಂದು ಇಂಚ ತಯಾರ್ ಮಲ್ತಿ ಬೊಕ್ಕ ಯಾಜಕೆರ್ ಏಪಲಾ ಗುಡಾರದ ಎದುರುದ ಅದೆತ್ತುಲಯಿ ಪೋದು ದೇವಾರಾಧನೆನ್ ನಡಪಾವೆರ್.</verse>
				<verse number="7">ಆಂಡ ರಡ್ಡನೆದೆತ್ತ ಉಲಯಿ ಪ್ರಧಾನಯಾಜಕೆ ಒರಿಯೇ ವರ್ಸೊಗು ಒಂಜೇ ಸರಿ ಪೋಪೆ. ಆಯೆ ನೆತ್ತೆರ್‌ನ್ ದೆತ್ತೊನಂದೆ ಪೋಪುಜೆ, ಆ ನೆತ್ತೆರ್‌ನ್ ತನ್ಕಾದ್‌ಲಾ ಜನೊಕುಲೆ ತಪ್ಪುಲೆಗಾದ್‌ಲಾ ಅರ್ಪಣೆ ಮಲ್ಪುವೆ.</verse>
				<verse number="8">ಈ ಏರ್ಪಾಡ್‌ಡ್ದ್ ಗುಡಾರೊಡು ಎದುರುದ ಭಾಗ ಉಪ್ಪುನೆಟ್ಟ ದೇವೆರೆ ಸನ್ನಿಧಾನೊಗು ಪೋಪಿನ ಸಾದಿ ಇದ ಮುಟ್ಟಲಾ ತೋಜಿದಿಜಿ ಪನ್ಪಿನೆನ್ ಪರಿಶುದ್ಧಾತ್ಮೆ ತೆರಿಪಾವೆ.</verse>
				<verse number="9">ಆ ಗುಡಾರ ಇತ್ತೆದ ಕಾಲದಾಕುಲೆಗಾದ್ ಒಂಜಿ ಉಲಯಿದ ಅರ್ಥೊನು ತೂಪಾವುಂಡು. ದಾನೆಂದ್ಂಡ ಐತ ಕ್ರಮೊಕಾದ್ ಅರ್ಪಣೆ ಆಪಿನ ಕಾಣಿಕೆನ್ಲಾ, ಯಜ್ಞೊನ್ಲಾ ದೇವಾರಾಧನೆ ಮಲ್ಪುನಾಕುಲೆನ ಮನಸಾಕ್ಷಿ ಒಪ್ಪುಲೆಕ್ಕ ಮಲ್ತ್‌ದ್ ಕನಯೆರೆ ಆವಂದೆ ಪೋಂಡು.</verse>
				<verse number="10">ನುಪ್ಪುನೀರ್‌ಲಾ ತರತರತ ಮೀಪಾಟಿಕೆಲುಲಾ ಒಟ್ಟಾದ್ ಶರೀರೊಗು ಮಾತ್ರ ಸಮ್ಮಂಧ ಪಡೆಯಿನ ನಿಯಮೊಲು ಆದಿತ್ತ್‌ದ್ ಸುಧಾರಣೆದ ಕಾಲದ ಮುಟ್ಟ ಮಾತ್ರ ನೇಮಕವಾಯಿನವು ಆದುಂಡು.</verse>
				<verse number="11">ಆಂಡ ಕ್ರಿಸ್ತೆ ಬರಿಯೆರೆ ಉಪ್ಪು ಎಡ್ಡೆಂತಿನೆತ್ತ ಪ್ರಧಾನಯಾಜಕೆ ಆದ್ ಬತ್ತ್‌ದ್ ಕೈಡ್ದ್ ಕಟ್ಟಂದಿನ ಅಂದ್ಂಡ ಈ ಸೃಷ್ಟಿಗ್ ಸಮ್ಮಂಧ ಪಡೆಯಂದಿ ಘನತವುಲಾ ಪೂರ್ತಿ ಇತ್ತಿನವುಲಾ ಉಪ್ಪುನ ಗುಡಾರೊಡು ಸೇವೆನ್ ಮಲ್ಪುನಾಯೆ ಆಯೆ.</verse>
				<verse number="12">ಏಡ್ ಬೊಕ್ಕ ಆಣ್ ಕಂಜಿಲೆ ನೆತ್ತೆರ್‌ನ್ ದೆತ್ತೊನಂದೆ ಸ್ವಂತ ನೆತ್ತೆರ್‌ನೇ ದೆತ್ತೊಂದು ನಂಕಾದ್ ನಿತ್ಯ ಬುಡುಗಡೆನ್ ಸಂಪಾದನೆ ಮಲ್ತೊಂಡಿನಾಯೆ ಆದ್ ಒಂಜೇ ಸರಿ ದೇವೆರೆ ಪರಿಶುದ್ಧತೆತ ಸನ್ನಿಧಾನೊಗು ಸೇರಿಯೆ.</verse>
				<verse number="13">ಮೈಲೆ ಆದಿತ್ತಿನಾಯನ ಮಿತ್ತ್ ಏಡ್ ಬೋರಿಲೆ ನೆತ್ತೆರ್‌‌ನ್ಲಾ ಗಡಸ್‌ದ ಬೊನ್ಯೊನ್ಲಾ ತಲ್ತ್‌ದ್ ಶರೀರದ ಮೈಲೆನ್ ಪರಿಶುದ್ಧ ಮಲ್ಪುನಾಂಡ,</verse>
				<verse number="14">ನಿತ್ಯ ಆತ್ಮೊಡ್ದು ತನನ್ ದೋಷದಾಂತೆ ದೇವೆರೆಗ್ ಅರ್ಪಣೆ ಮಲ್ತೊಂಡಿ ಕ್ರಿಸ್ತನ ನೆತ್ತೆರ್ ಏತೋ ಹೆಚ್ಚಾದ್ ನಮನ್ ಜೀವದಾಂತಿ ಕರ್ಮೊಲೆಡ್ದ್ ಬುಡ್ಪಾದ್ ನಮ ಜೀವ ಇತ್ತಿ ದೇವೆರೆನ್ ಆರಾಧನೆ ಮಲ್ಪುನಾಕುಲು ಆಪಿಲೆಕ್ಕ ನಮ ಮನಸ್‌ಲೆನ್ ಶುದ್ಧ ಮಲ್ಪುಂಡು.</verse>
				<verse number="15">ಬೊಕ್ಕ ಈ ಕಾರಣೊಡ್ದು ಆಯೆ ಒಂಜಿ ಪೊಸ ಒಡಂಬಡಿಕೆಗ್ ಮದ್ಯಸ್ತೆಗಾರೆ ಆದುಲ್ಲೆ. ಸುರುತ್ತ ಒಡಂಬಡಿಕೆದ ಕಾಲೊಡು ನಡತಿನ ಅಕ್ರಮೊಲೆ ಪರಿಹಾರೊಗಾದ್ ಆಯೆ ಮರಣೊನು ಅನುಭವ ಮಲ್ತಿನೆಡ್ದ್ ದೇವೆರೆಡ್ದ್ ಲೆಪ್ಪಾವೊಂಡಿನಾಕುಲು ವಾಗ್ದಾನ ಆದಿತ್ತಿ ನಿತ್ಯ ಬಾಧ್ಯಸ್ತಿಗೆನ್ ಪಡೆಯೆರೆ ಆಯಡ್ದ್ ಸಾದಿ ಆಂಡ್.</verse>
				<verse number="16">ವೀಲ್‌ನಾಮೆ ಉಪ್ಪುನವುಲು ಅವೆನ್ ಬರೆಪಾಯಿನಾಯನ ಮರಣಲಾ ಆದುಪ್ಪೊಡು.</verse>
				<verse number="17">ವೀಲ್‌ನಾಮೆ ಸೈತಿ ಬೊಕ್ಕ ನಡಪುನವು ಅತ್ತಂದೆ ಬರೆಪಾಯಿನಾಯೆ ಜೀವೊಡು ಉಪ್ಪುನಗ ಏಪೊಗ್ಲಾ ಸಂದುಜಿ.</verse>
				<verse number="18">ಇಂಚ ಉಪ್ಪುನಗ ಸುರುತ್ತ ಒಡಂಬಡಿಕೆಯಾಂಡಲಾ ನೆತ್ತೆರ್‌ದಾಂತೆ ಉಂಡಾತಿಜಿ.</verse>
				<verse number="19">ಮೋಶೆ ದೇವೆರೆ ಮಾತ ವಿಧಿಲೆನ್ ನ್ಯಾಯಕಟ್ಟ್‌ದ ಪ್ರಕಾರ ಜನೊಕುಲೆಗ್ ಮಾತೆರೆಗ್ ಪಂಡಿ ಬೊಕ್ಕ ನೀರ್, ಕೆಂಪು ಉಣ್ಣೆ, ಹಿಸ್ಸೋಪ್‍ದ ಕಡ್ಡಿ ನೆತ್ತೊಟ್ಟುಗು ಬೋರಿ ಕಂಜಿಲೆ ಬೊಕ್ಕ ಏಡ್‌ಲೆ ನೆತ್ತೆರ್‌ನ್ ದೆತ್ತೊಂದು, ಉಂದು ದೇವೆರ್ ನಿಕ್ಲೆಗ್ ಅಪ್ಪಣೆ ಕೊರಿ ಒಡಂಬಡಿಕೆನ್ ಸ್ಥಿರ ಮಲ್ಪುನ ನೆತ್ತೆರ್ ಆದುಂಡು ಪಂಡ್ದ್ ಅವೆನ್ ಗ್ರಂಥದ ಮಿತ್ತ್‌ಲಾ ಮಾತ ಜನೊಕುಲೆ ಮಿತ್ತ್‌ಲಾ ತಲ್ತೆ.</verse>
				<verse number="20"></verse>
				<verse number="21">ಉಂದತ್ತಂದೆ ಗುಡಾರದ ಮಿತ್ತ್‌ಲಾ ದೇವೆರೆ ಕೆಲಸೊಗು ಬೋಡಾಪಿ ಮಾತ ವಸ್ತುಲೆ ಮಿತ್ತ್‌ಲಾ ಅವ್ವೇ ರೀತಿಡ್ ನೆತ್ತೆರ್‌ನ್ ತಲ್ತೆ.</verse>
				<verse number="22">ನಿಜಾದ್ ನ್ಯಾಯಕಟ್ಟ್‌ದ ಪ್ರಕಾರ ಹೆಚ್ಚಿಕಡಿಮೆ ಮಾತ ವಸ್ತುಲು ನೆತ್ತೆರ್‌ಡ್ದೇ ಶುದ್ಧ ಆಪುಂಡು. ನೆತ್ತೆರ್ ಗುಪ್ಪಂದೆ ಪಾಪ ಪರಿಹಾರ ಉಂಡಾಪುಜಿ.</verse>
				<verse number="23">ಪರಲೋಕದ ವಸ್ತುಲೆಗ್ ಪ್ರತಿರೂಪ ಆದುಪ್ಪು ವಸ್ತುಲೆ ಶುದ್ಧೀಕರಣೊಗಾದ್ ಇಂಚಿತ್ತಿ ಬಲಿಲು ಅವಶ್ಯ ಆದಿತ್ತಿನೆಡ್ದ್ ಪರಲೋಕದೆಕ್ಕ್ ಉಂದೆಡ್ದ್ ಹೆಚ್ಚಿದ ಯಜ್ಞೊಲು ಬೋಡು.</verse>
				<verse number="24">ದಾಯೆಗಂದ್ಂಡ ಕ್ರಿಸ್ತೆ ನಿಜವಾಯಿನ ದೇವಾಲಯೊಗು ತಕ್ಕದಾಯೆ ಆದಿತ್ತ್‌ದ್ ಕೈಡ್ದ್ ಕಟ್ಟ್‌ದುಪ್ಪುನ ಆಲಯೊಡು ಪೊಗ್ಗಂದೆ ದೇವೆರೆ ಎದುರುಡು ನಂಕಾದ್ ತೋಜಾವೊನಿಯೆರೆ ಇತ್ತೆ ಪರಲೋಕೊಗು ಸೇರಿಯೆ.</verse>
				<verse number="25">ಉಂದತ್ತಂದೆ ಪ್ರಧಾನಯಾಜಕೆ ವರ್ಸ ವರ್ಸಲಾ ಬಾಕಿದ ನೆತ್ತೆರ್‌ನ್ ದೆತ್ತೊಂದು ಪರಿಶುದ್ಧ ಆಲಯೊಡು ಪೋಪಿಲೆಕ್ಕನೆ ಆಯೆ ತನನ್ ದಿಂಜ ಸರ್ತಿ ಅರ್ಪಣೆ ಮಲ್ಪುನೆಕ್ಕಾದ್ ಪರಲೋಕೊಗು ಪೋಯಿಜೆ.</verse>
				<verse number="26">ಅಂಚ ಅರ್ಪಣೆ ಮಲ್ಪೊಡಾಯಿ ಪಕ್ಷೊಡು ಆಯೆ ಲೋಕಾದಿಡ್ದೇ ಏತೋ ಸರಿ ಸಂಕಟೊನು ಅನುಭವ ಮಲ್ತ್‌ದ್ ಸೈಯೊಡಿತ್ತ್‌ಂಡ್. ಆಂಡ ಅಂಚತ್ತ್, ಒಂಜೇ ಸರ್ತಿಗ್ ಯುಗಾಂತ್ಯಕಾಲೊಡೇ ಆಯೆ ಪಾಪೊಲೆನ್ ದೆತ್ತ್ ಪಾಡುನೆಕ್ಕಾದ್ ತನನ್ ಯಜ್ಞಮಲ್ಪುನಾಯೆ ಆದ್ ತೋಜಿದ್ ಬತ್ತೆ.</verse>
				<verse number="27">ಒಂಜೇ ಸರಿ ಸೈಪಿನವುಲಾ ಐಡ್ದ್ ಬೊಕ್ಕ ನ್ಯಾಯತೀರ್ಪುಲಾ ನರಮಾನಿಲೆಗ್ ಎಂಚ ನೇಮಕ ಆತ್ಂಡ,</verse>
				<verse number="28">ಅಂಚೆನೇ ಕ್ರಿಸ್ತೆಲಾ ಮಾತ ನರಮಾನಿಲೆ ಪಾಪೊಲೆನ್ ತುಂಬೊನಿಯೆರೆಗಾದ್ ಒಂಜೇ ಸರಿ ಅರ್ಪಣೆ ಮಲ್ತೊಂಡೆ. ಬೊಕ್ಕ ತನನ್ ನಿರೀಕ್ಷೆ ಮಲ್ಪುನಾಕುಲೆಗಾದ್ ರಕ್ಷಣೆನ್ ಉಂಡು ಮಲ್ಪುನೆಕ್ಕಾದ್ ಪಾಪ ಸಮ್ಮಂಧದಾಂತಿನಾಯೆ ಆದ್ ರಡ್ಡನೆ ಸರ್ತಿ ತೋಜಿದ್ ಬರ್ಪೆ.</verse>
			</chapter>
			<chapter number="10">
				<verse number="1">ನ್ಯಾಯಕಟ್ಟ್‌ಡ್ ದುಂಬಗ್ ಬರಿಯರೆ ಉಪ್ಪು ಎಡ್ಡೆಂತಿನ ಪ್ರತಿಬಿಂಬನೇ ಅತ್ತಂದೆ ಐಕ್ಲೆ ನಿಜ ರೂಪದವು ಅತ್ತಂದಿನೆಡ್ದ್ ಆ ನ್ಯಾಯಕಟ್ಟ್ ವರ್ಸವರ್ಸೊಗು ಕುಡ ಕುಡ ಅರ್ಪಣೆ ಆಪಿನ ಒಂಜೇ ತರತ ಬಲಿಲೆನ್ ಅರ್ಪಣೆ ಮಲ್ತ್‌ದ್ ದೇವೆರೆ ಕೈತಲ್‌ಗ್ ಬರ್ಪಿನಾಕುಲೆಗ್ ಏಪೊಗ್ಲಾ ಪರಿಪೂರ್ಣತೆಗ್ ಕನವಂದ್.</verse>
				<verse number="2">ಕಂತಿನ ಪಕ್ಷೊಡು ಆ ಯಜ್ಞದ ಅರ್ಪಣೆ ಮಲ್ಪುನವು ಉಂತುದು ಪೋತು. ದಾಯೆ ಪಂಡ ದೇವಾರಾಧನೆ ಮಲ್ಪುನಾಕುಲು ಒಂಜೇ ಸರಿ ಶುದ್ಧ ಆಯಿ ಬೊಕ್ಕ ಅಕ್ಲೆಗ್ ಪಾಪ ಉಂಡು ಅಂದ್‌ದ್ ಅಕ್ಲೆನ ಮನಸ್ ನನಲಾ ಸಾಕ್ಷಿ ಕೊರ್ಪಿನಿ ದಾಯೆಗ್?</verse>
				<verse number="3">ಆಂಡ ಆ ಬಲಿ ಅರ್ಪಣೆಲೆಡ್ದ್ ಪ್ರತಿ ವರ್ಸೊಡ್ಲಾ ಪಾಪೊಲೆ ನೆನೆಪು ಆಪುಂಡು.</verse>
				<verse number="4">ಬೋರಿಲೆ ಬೊಕ್ಕ ಏಡ್‌ಲೆ ನೆತ್ತೆರ್‌ಡ್ದ್ ಪಾಪೊಲು ಪರಿಹಾರ ಆಪಿನವು ಸಾದ್ಯದಾಂತಿನವು ಆದುಂಡತ್ತಾ.</verse>
				<verse number="5">ಅಂಚಾಯಿನೆಡ್ದ್ ಕ್ರಿಸ್ತೆ ಭೂಲೋಕದ ಉಲಯಿ ಬನ್ನಗ, “ದೇವೆರೇ ಬಲಿ ಅರ್ಪಣೆಲು ನಿಕ್ಕ್ ಇಷ್ಟ ಆದಿತ್ತಿಜಿ. ಎಂಕ್ ಶರೀರೊನು ತಯಾರ್ ಮಲ್ತ್ ಕೊರಿಯ.</verse>
				<verse number="6">ಸರ್ವಾಂಗ ಹೋಮೊಲೆಡ್ದ್‌ಲಾ ಪಾಪ ಪರಿಹಾರದ ಬಲಿಡ್ದ್‌ಲಾ ಈ ಸಂತೋಷ ಪಡೆಯಿಜ.</verse>
				<verse number="7">ಅಪಗ ಯಾನ್, ‘ಇಂದಾ ದೇವೆರೇ, ಯಾನ್ ನಿನ ಚಿತ್ತೊನು ಮಲ್ಪೆರೆಗಾದ್ ಬೈದೆ.’ ಗ್ರಂಥದ ಸುರುಳಿಡ್ ಎನ ಬಗೆಟ್ ಬರೆತ್ಂಡ್,” ಪಂಡೆ</verse>
				<verse number="8">ನ್ಯಾಯಕಟ್ಟ್‌ದ ಪ್ರಕಾರ ಸಮರ್ಪಣೆ ಆವೊಂದು ಬರ್ಪಿ ಬಲಿ ಅರ್ಪಣೆಲುಲಾ ಸರ್ವಾಂಗ ಹೋಮೊಲುಲಾ ಪಾಪ ಪರಿಹಾರ ಯಜ್ಞೊಲುಲಾ ನಿಕ್ಕ್ ಇಷ್ಟ ಆದಿತ್ತಿಜಿ. ಈ ಐಡ್ದ್ ಸಂತೋಷ ಪಡೆಪುಜ ಪಂಡ್ದ್ ಪಂಡಿನಪಗನೇ,</verse>
				<verse number="9">“ಇಂದಾ ನಿನ ಚಿತ್ತೊನು ಮಲ್ಪೆರೆ ಬೈದೆ,” ಪಂಡ್ದ್ ಪನ್ತೆ. ಆಯೆ ರಡ್ಡನೆದೆನ್ ಸ್ಥಾಪನೆ ಮಲ್ಪೆರೆಗಾದ್ ಸುರುತ್ತೆನ್ ದೆತ್ತ್‌ದ್ ಬುಡ್ಪೆ.</verse>
				<verse number="10">ಯೇಸು ಕ್ರಿಸ್ತೆ ಒಂಜೇ ಸರಿ ತನ ಶರೀರೊನು ಅರ್ಪಣೆ ಮಲ್ತ್‌ದ್ ದೇವೆರೆ ಚಿತ್ತೊನು ನಡಪಾಯಿನೆಡ್ದೇ ನಮ ಶುದ್ಧ ಆಯ.</verse>
				<verse number="11">ಉಂದತ್ತಂದೆ ಮಾತ ಯಾಜಕೆರ್ ದಿನಾಲ ಸೇವೆ ಮಲ್ತೊಂದು ಏಪೊಗ್ಲಾ ಪಾಪ ನಿವಾರಣೆ ಮಲ್ಪರೆ ಆವಂದಿ ಒಂಜೇ ತರತ ಬಲಿಲೆನ್ ಗಡಿಗಡಿ ಅರ್ಪಣೆ ಮಲ್ತೊಂದು ಉಂತೊಂದುಪ್ಪುವೆರ್.</verse>
				<verse number="12">ಆಂಡ ಈ ಕ್ರಿಸ್ತೆ ಪಾಪ ಪರಿಹಾರೊಗಾದ್ ಉಂತೊಂದುಪ್ಪುನ ಒಂಜೇ ಯಜ್ಞೊನು ಅರ್ಪಣೆ ಮಲ್ತ್‌ದ್ ದೇವೆರೆ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂಡೆ.</verse>
				<verse number="13">ಆನಿಡ್ದ್ ತನ ವೈರಿಲೆನ್ ತನ ಪಾದಪೀಠ ಆದ್ ಪಾಡುನೆಟ್ಟ ಆಯೆ ಕಾತೊಂದುಪ್ಪುವೆ.</verse>
				<verse number="14">ಪರಿಶುದ್ಧೆರಾಪಿನಾಕುಲೆನ್ ಒಂಜೆ ಬಲಿಡ್ದ್ ನಿತ್ಯೊಗ್ಲಾ ಪರಿಪೂರ್ಣತೆಗ್ ಕನೈದೆ.</verse>
				<verse number="15">ಪರಿಶುದ್ಧಾತ್ಮೆಲಾ ನಂಕ್ ಸಾಕ್ಷಿ ಕೊರ್ಪಿನಾಯೆ ಆದ್,</verse>
				<verse number="16">“ಆ ದಿನೊಕುಲು ಬತ್ತಿ ಬೊಕ್ಕ ಯಾನ್ ಅಕ್ಲೆಡೊಪ್ಪ ಮಲ್ತೊನುನ ಒಡಂಬಡಿಕೆ ಇಂಚ ಉಪ್ಪುಂಡು. ಎನ ನ್ಯಾಯಕಟ್ಟ್‌ಲೆನ್ ಅಕ್ಲೆನ ಮನಸ್‌ಡ್ ದೀಪೆ. ಅಕ್ಲೆನ ಉಡಲ್‌ಡ್ ಅವೆನ್ ಬರೆಪೆ. ಪಂಡ್ದ್ ಕರ್ತವೆ ಪನ್ಪೆ,” ಪಂಡ್ದ್ ಪಂಡಿ ಬೊಕ್ಕ,</verse>
				<verse number="17">“ನನ ಅಕ್ಲೆನ ಪಾಪೊಲೆನ್ಲಾ ಅನ್ಯಾಯೊಲೆನ್ಲಾ ಯಾನ್ ನನ ಏಪೊಗ್ಲಾ ನೆನೆಪುಗು ಕನವಯೆ,” ಪಂಡ್ದ್ ಪನ್ಪೆ.</verse>
				<verse number="18">ಪಾಪೊಲು ಪರಿಹಾರ ಆಂಡ ನನಲಾ ಐತ ಸಂಗತಿಡ್ ಅರ್ಪಣೆ ಮಲ್ಪುನ ಅಗತ್ಯ ಇಜ್ಜಿ.</verse>
				<verse number="19">ಇಂಚ ಉಪ್ಪುನಗ ಸಹೋದ್ರೆರೇ, ಯೇಸು ನಂಕಾದ್ ಬಲಿ ಆಯಿನ ಜೀವ ಇತ್ತಿ ಪೊಸ ಸಾದಿಡ್ ಆಯ ನೆತ್ತೆರ್‌ಡ್ದಾದ್ ಆಯನ ಶರೀರ ಪನ್ಪಿ ಪರದೆಡ್ದಾದ್ ದೇವೆರೆ ಪರಿಶುದ್ಧ ಸನ್ನಿಧಾನದ ಉಲಯಿ ಪೋವೆರೆ ನಂಕ್ ಧೈರ್ಯ ಉಂಡಾಂಡ್.</verse>
				<verse number="20"></verse>
				<verse number="21">ದೇವೆರೆ ಇಲ್ಲದ ಮಿತ್ತ್ ಅಧಿಕಾರಿ ಆಯಿ ಮಲ್ಲ ಯಾಜಕೆ ನಂಕುಪ್ಪುವೆ.</verse>
				<verse number="22">ಅವೆಡ್ದಾವರ ಹಾಳ್ ಉಡಲ್‌ನ್ಲಾ ನಮ ಶರೀರೊನ್ಲಾ ತಲಿಪಾವೊಂದು ಶುದ್ಧ ನೀರ್‌ಡ್ದ್ ದೆಕ್ಕೊಂದು ಪರಿಪೂರ್ಣವಾಯಿನ ನಂಬಿಕೆ ಇತ್ತಿನಾಕುಲಾದ್‌ಲಾ ಸತ್ಯ ಮನಸಿತ್ತಿನಾಕುಲಾದ್‌ಲಾ ದೇವೆರೆ ಕೈತಲ್‌ ಬರ್ಕ.</verse>
				<verse number="23">ನಮ ನಿರೀಕ್ಷೆದ ಸಂಗತಿಡ್ ನಮ ಮಲ್ತಿನ ವಾಗ್ದಾನೊನು ಚಂಚಲಾವಂದೆ ದೃಢಾದ್ ಪತ್ತೊನುಗ. ವಾಗ್ದಾನ ಮಲ್ತಿನಾಯೆ ನಂಬಿಗಸ್ತೆ.</verse>
				<verse number="24">ಎಂಕುಲು ಒರಿಯನ್ ಒರಿ ಚಿಂತೆಕೆರಾದ್ ಪ್ರೀತಿ ಮಲ್ಪುನಾಕುಲಾದ್‌ಲಾ ಎಡ್ಡೆ ಬೇಲೆಲೆನ್ ಮಲ್ಪುನಾಕುಲಾದ್‌ಲಾ ಒರಿಯಗ್ ಒರಿ ಉಮೇದ್ ಕೊರ್ಕ.</verse>
				<verse number="25">ಸಭೆಯಾದ್ ಕೂಡ್ದು ಬರ್ಪಿನೆನ್ ಕೆಲೆವೆರ್ ರೂಢಿಯಾದ್ ಬುಡ್ತಿ ಪ್ರಕಾರ ಎಂಕುಲು ಬುಡ್ದು ಬುಡಂದೆ ಒರಿಯಗ್ ಒರಿ ಎಚ್ಚರಿಕೆ ಮಲ್ತೊನುಗ, ಕರ್ತವೆ ಬರ್ಪಿನ ದಿನ ಕೈತಲಾವೊಂದು ಬರ್ಪುಂಡು ಪಂಡ್ದ್ ನಿಕುಲು ತೂಪಿನೆಡ್ದ್ ಉಂದೆನ್ ಬೊಕ್ಕಲಾ ಮಲ್ಪುಲೆ.</verse>
				<verse number="26">ದಾಯೆ ಪಂಡ ಸತ್ಯದ ಗೇನೊನು ನಮ ಪಡೆಯಿ ಬೊಕ್ಕ ಬೋಡಂದ್ ಪಾಪ ಮಲ್ತ್ಂಡ, ಪಾಪ ಪರಿಹಾರೊಗಾದ್ ನನ ವಾ ಬಲಿಲಾ ಉಪ್ಪುಜಿ.</verse>
				<verse number="27">ಬಾರಿ ಪೋಡಿಗೆಡ್ ಕಾತೊಂದುಪ್ಪುನ ನ್ಯಾಯತೀರ್ಪುಲಾ ದೇವೆರೆ ವಿರೋಧಿಲೆನ್ ಪೊತ್ತಾವುನ ತೂತ ಉರಿಲಾ ಉಂದೇ ಎಂಕ್ಲೆನ ಎದುರು ಉಪ್ಪುನವು.</verse>
				<verse number="28">ಮೋಶೆನ ನ್ಯಾಯಕಟ್ಟ್‌ನ್ ಅಸಡ್ಡೆ ಮಲ್ತಿನಾಯಗ್ ಇರ್ವೆರ್ ಇಜ್ಜಾಂಡ ಮೂವೆರೆ ಸಾಕ್ಷಿಲೆ ಪಾತೆರದ ಮಿತ್ತ್ ಕನಿಕರದಾಂತೆ ಮರಣ ದಂಡನೆ ಆಪುಂಡಾತೆ.</verse>
				<verse number="29">ಏರ್ ದೇವೆರೆ ಮಗನ್ ದೊಂಕುದು, ನಮನ್ ಪರಿಶುದ್ಧ ಮಲ್ಪುನ ಒಡಂಬಡಿಕೆದ ನೆತ್ತೆರ್‌ನ್ ಅಶುದ್ಧ ಅಂದ್‌ದ್ ಎನ್ನ್‌ದ್, ದೇವೆರೆ ದಯತ ಆತ್ಮನ್ ತಿರಸ್ಕಾರ ಮಲ್ತ್‌ದೆನಾ ಆಯೆ ನನಲಾ ಏತೋ ಹೆಚ್ಚಿಗೆದ ಶಿಕ್ಷೆ ಹೊಂದುವೆ ಅಂದ್‌ದ್ ಆಲೋಚನೆ ಮಲ್ಪುಲೆ.</verse>
				<verse number="30">“ಪಗತೆಗ್ ಪಗತೆ ಕೊರ್ಪಿನವು ಎನ ಬೇಲೆ. ಯಾನೇ ಪ್ರತಿಫಲೊನು ಕೊರ್ಪೆ,” ಪಂಡ್ದ್ ಪಂಡಿನಾಯನ್ ತೆರಿದ. ಉಂದತ್ತಂದೆ, “ಕರ್ತವೆ ತನ ಜನೊಕುಲೆ ನ್ಯಾಯೊನು ವಿಚಾರ ಮಲ್ಪುವೆ,” ಪಂಡ್ದ್‌ಲಾ ಪನ್ತ್ಂಡ್.</verse>
				<verse number="31">ಜೀವ ಇತ್ತಿ ದೇವೆರೆ ಕೈಟ್ ಬೂರುನವು ಏತೋ ಭಯಂಕರವಾಯಿನವು.</verse>
				<verse number="32">ಅಂಚಾಯಿನೆಡ್ದ್ ನಿಕುಲು ಗೇನದ ಬೊಲ್ಪುಗು ಸೇರ್ದ್ ಕಷ್ಟ ಅನುಭವ ಪನ್ಪಿ ಮಲ್ಲ ಹೋರಾಟೊನು ಸಹಿಸೊಂದಿನ ಪಿರವುದ ದಿನೊಲೆನ್ ನೆನೆಪು ಮಲ್ತೊನ್ಲೆ.</verse>
				<verse number="33">ಮಸ್ತ್ ಸರ್ತಿ ನಿಕುಲು ನಿಂದೆ ಭಂಗ ಅನುಭವ ಮಲ್ತ್‌ದ್ ಹಾಸ್ಯೊಗು ಒಳಗಾಯರ್. ಕೆಲವು ಸರಿ ಅಂಚಿತ್ತಿನೆನ್ ಅನುಭವ ಮಲ್ಪುನಾಕುಲೆಡೊಪ್ಪ ಸೇರ್ದಿನಾಕುಲಾದ್ ಭಂಗ ಅನುಭವ ಮಲ್ಪುನಾಕುಲು ಆಯರ್.</verse>
				<verse number="34">ಸೆರೆಮನೆಟ್ ಬೂರಿನಾಕುಲೆನ ಭಂಗೊನು ತೂದು ಅಕ್ಲೆಡೊಪ್ಪ ನಿಕುಲು ಕನಿಕರ ಪಡೆಯಿನಿ ಅತ್ತಂದೆ ನಂಕ್ ಎಡ್ಡೆಂತಿನವುಲಾ ಸ್ಥಿರವಾದ್‌ಲಾ ಇತ್ತಿನ ಆಸ್ತಿ ಉಂಡು ಪಂಡ್ದ್ ಸರಿಯಾದ್ ತೆರಿಯೊಂದು ನಿಕ್ಲೆನ ಸೊತ್ತುಲೆನ್ ಒಯ್ತೊನುನಾಕುಲೆಗ್ ಸಂತೋಷೊಡು ಬುಡಿಯರ್.</verse>
				<verse number="35">ಅಂಚಾಂಡ ನಿಕ್ಲೆನ ಧೈರ್ಯೊನು ಬುಡ್ದು ಬುಡಡೆ. ಐಕ್ ಮಲ್ಲ ಪ್ರತಿಫಲ ಉಂಡು.</verse>
				<verse number="36">ದೇವೆರೆ ಚಿತ್ತೊನು ತೀರಿಸಾದ್ ವಾಗ್ದಾನದ ಫಲೊನು ಪಡೆವೊಡಾಂಡ ನಿಕ್ಲೆಗ್ ತಾಳ್ಮೆ ಬೋಡು.</verse>
				<verse number="37">“ಬರ್ಪಿನಾಯೆ ನನ ಒಂತೆ ಸಮಯೊಡು ಬರ್ಪೆ ತಡ ಮಲ್ಪುಜೆ.”</verse>
				<verse number="38">ಆಂಡ, “ಎನ್ನಾಯೆ ಆದುಪ್ಪು ನೀತಿವಂತೆ ನಂಬಿಕೆಡ್ದೇ ಬದುಕುವೆ. ಆಯೆ ಪಿರ ಜಾರಿಯೆಡ ಎನ ಪ್ರಾಣೊಗು ಆಯಡ ಮೆಚ್ಚಿಗೆ ಇಜ್ಜಿ,” ಅಂದ್‌ದ್ ಬರೆತ್ಂಡ್.</verse>
				<verse number="39">ಎಂಕುಲಾಂಡಲಾ ಪಿರಜಾರ್ದ್ ನಾಶ ಆಪಿನಾಕುಲತ್ತ್, ನಂಬುನಾಕುಲಾದ್ ಪ್ರಾಣ ರಕ್ಷಣೆನ್ ಪಡೆಪಿನಾಕುಲಾದುಲ್ಲಾ.</verse>
			</chapter>
			<chapter number="11">
				<verse number="1">ನಂಬಿಕೆ ನಮ ನಿರೀಕ್ಷೆ ಮಲ್ಪುನೆತ ಸಂಗತಿಡ್ ಭರವಸೊಡು ಉಪ್ಪುನವುಲಾ ಕಣ್ಣ್‌ಗ್ ತೋಜಂದಿನೆನ್ ನಿಜ ಅಂದ್‌ದ್ ತೆರಿಯೊನುನವುಲಾ ಆದುಂಡು.</verse>
				<verse number="2">ನಮ ಹಿರಿಯಾಕುಲು ನಂಬಿಕೆಡ್ದೇ ದೇವೆರೆನ ಎಡ್ಡೆ ಪುದರ್‌ನ್ ಪಡೆಯೊಂಡೆರ್.</verse>
				<verse number="3">ಈ ಲೋಕ ದೇವೆರೆ ಪಾತೆರೊಡ್ದು ಉಂಡಾಯಿನವು ಪಂಡ್ದ್ ನಂಬಿಕೆಡ್ದೇ ಎಂಕುಲು ತೆರಿಯೊಂದು ತೋಜುನ ಈ ಲೋಕ ತೂಪಾಠಿಕೆದ ವಸ್ತುಲೆಡ್ದ್ ಉಂಡಾತಿಜಿ ಅಂದ್‌ದ್ ತೆರಿಯೊನುವ.</verse>
				<verse number="4">ನಂಬಿಕೆಡ್ದಾದೇ ಹೇಬೆಲ್ ಕಾಯಿನನ ಯಜ್ಞೊಡ್ದು ಎಡ್ಡೆಂತಿ ಯಜ್ಞೊನು ದೇವೆರೆಗ್ ಅರ್ಪಣೆ ಮಲ್ತೆ. ದೇವೆರ್ ಆಯ ಕಾಣಿಕೆನ್ ಮೆಚ್ಚಿನೆಡ್ದ್ ನೀತಿವಂತೆ ಪನ್ಪಿ ಸಾಕ್ಷಿ ಹೊಂದಿಯೆ. ಆಯೆ ಸೈತ್ ಪೋಯೆಡಲಾ ಆಯ ನಂಬಿಕೆ ನನಲಾ ಪಾತೆರುಂಡು.</verse>
				<verse number="5">ಹನೋಕೆ ಮರಣೊನು ಅನುಭವ ಮಲ್ಪಂದೆ ಮಿತ್ತ್ ಪೋಯಿನಿ ನಂಬಿಕೆಡ್ದಾದೇ, ದೇವೆರ್ ಆಯನ್ ದೆತ್ತೊಂದು ಪೋಯಿನೆಡ್ದ್ ಆಯೆ ಏರೆಗ್ಲಾ ತಿಕ್ಕಿಜೆ. ಆಯೆ ದೆತ್ತೊಂದು ಪೋಪಿನೆಡ್ದ್ ದುಂಬೇ ಆಯೆ ದೇವೆರೆಗ್ ಮೆಚ್ಚಿಗೆ ಆದಿತ್ತಿನಾಯೆ ಅಂದ್‌ದ್ ಸಾಕ್ಷಿ ಉಂಡು.</verse>
				<verse number="6">ಆಂಡ ನಂಬಿಕೆದಾಂತೆ ದೇವೆರೆನ್ ಮೆಚ್ಚಾವುನವು ಅಸಾದ್ಯದವು. ದೇವೆರೆ ಕೈತಲ್‌ ಬರ್ಪಿನಾಯೆ ದೇವೆರ್ ಉಲ್ಲೆ ಬೊಕ್ಕ ತನನ್ ನಾಡುನಾಕುಲೆಗ್ ಪ್ರತಿಫಲೊನು ಕೊರ್ಪೆ ಪಂಡ್ದ್ ನಂಬುನವು ಅಗತ್ಯ.</verse>
				<verse number="7">ನಂಬಿಕೆಡ್ದಾದೇ ನೋಹೆ ಅದಮುಟ್ಟ ತೋಜಂದಿನ ಸಂಗತಿಲೆ ಬಗೆಟ್ ದೇವೆರೆ ಪಾತೆರೊನು ಪಡೆದ್ ಭಯ ಭಕ್ತಿ ಇತ್ತಿನಾಯೆ ಆದ್ ತನ ಇಲ್ಲದಾಕುಲೆನ್ ಒರಿಪಾವೆರೆಗಾದ್ ಮಲ್ಲ ಕಪ್ಪಲ್‌ನ್ ಕಟ್ಟ್‌ದ್ ತಯಾರ್ ಮಲ್ತೆ. ಅಂಚಾಯಿನೆಡ್ದ್ ಆಯೆ ಲೋಕದಾಕುಲೆನ್ ತೀರ್ಪುಗು ತಕ್ಕದಾಕುಲು ಪಂಡ್ದ್ ನಿಗಂಟ್ ಮಲ್ತೊಂದು ನಂಬಿಕೆದ ಫಲವಾಯಿನ ನೀತಿಗ್ ಹಕ್ಕ್‌ದಾರೆ ಆಯೆ.</verse>
				<verse number="8">ನಂಬಿಕೆಡ್ದಾದೇ, ಅಬ್ರಹಾಮು ಲೆಪ್ಪು ಕೇಂಡಿ ಕೂಡ್ಲೆ ಲೆತ್ತಿನಾಯನ ಪಾತೆರೊನು ಕೇಂಡ್ದ್ ತಾನ್ ಹಕ್ಕ್‌ಡ್ ಪಡೆಯೊಡಾಯಿ ಜಾಗ್‌ಗ್ ಪಿದಾಡ್ದ್ ಪೋಯೆ. ತಾನ್ ಪೋವೊಡಾಯಿನ ಜಾಗ್ ಒವು ಪಂಡ್ದ್ ತೆರಿಯಂದೆ ಪೋಯೆ.</verse>
				<verse number="9">ನಂಬಿಕೆಡ್ದಾದೇ, ಆಯೆ ವಾಗ್ದಾನ ಮಲ್ತ್‌ದಿನ ದೇಶೊಗು ಬತ್ತಿನಪಗ ಅಲ್ಪ ಬಾಕಿ ದೇಶೊಡು ಇತ್ತಿನಾಯಲೆಕ್ಕ ಡೇರೆಲೆಡ್ ಇತ್ತೊಂದು ಒಂಜಿ ಪ್ರವಾಸಿಲೆಕ್ಕನೇ ಬದ್‌ಕಿಯೆ. ಅವ್ವೇ ವಾಗ್ದಾನೊಗು ಪಾಲುದಾರೆರ್ ಆದುಪ್ಪುನ ಇಸಾಕೆಲಾ ಯಾಕೋಬೆಲಾ ಆಯ ಲೆಕ್ಕನೆ ಡೇರೆಲೆಡ್ ವಾಸ ಮಲ್ತೆರ್.</verse>
				<verse number="10">ದಾಯೆಗಂದ್ಂಡ ಆಯೆ ಸ್ಥಿರವಾಯಿನ ಅಡಿಪಾಯೊಲಿತ್ತಿನ ಪೇಂಟೆನ್‌ ಪಂಡ್ಂಡ ದೇವೆರ್ ತಯಾರ್ ಮಲ್ತಿ ಪೇಂಟೆನ್‌ ಎದುರು ತೂವೊಂದಿತ್ತೆ.</verse>
				<verse number="11">ಉಂದತ್ತಂದೆ ಸಾರಲಾ ವಾಗ್ದಾನ ಮಲ್ತಿನಾಯನ್ ನಂಬಿಕೆಗ್ ತಕ್ಕದಾಯೆ ಅಂದ್‌ದ್ ಎನ್ನ್‌ದ್ ತಾನ್ ಪ್ರಾಯ ಕರಿದಿನಾಲ್ ಆದಿತ್ತ್‌ಂಡಲಾ ನಂಬಿಕೆಡ್ದೇ ಬಂಜಿನಾಲ್ ಆವೆರೆ ಶಕ್ತಿನ್ ಪಡೆವೊಂಡಲ್.</verse>
				<verse number="12">ಅಂಚಾಯಿನೆಡ್ದ್ ಸೈಪಿನ ಪ್ರಾಯ ಆತಿನ ಒರಿಯಡ್ದ್ ಬಾನದ ಬೊಳ್ಳಿಲೆ ಲೆಕ್ಕಲಾ ಕಡಲ್ದ ಬರಿತ ಪೊಯ್ಯೆದ ಲೆಕ್ಕಲಾ ಲೆಕ್ಕದಾಂತಿನಾತ್ ಸಂತಾನದ ಜೋಕುಲು ಪುಟ್ಟಿಯೆರ್.</verse>
				<verse number="13">ಮೊಕುಲು ಮಾತೆರ್ಲಾ ವಾಗ್ದಾನದ ಫಲೊಕ್ಲೆನ್ ಪಡೆವಂದೆ ಐಕ್ಲೆನ್ ದೂರೊಡ್ದು ತೂದು ಸಂತೋಷೊಡು ಸೊಲ್ಮೆ ಸಂದಾದ್ ನಂಬಿಕೆ ಇತ್ತಿನಕುಲಾದ್ ಸೈತ್ ಪೋಯೆರ್. ತನ್ಕುಲು ಭೂಮಿದ ಮಿತ್ತ್ ಪರದೇಶಿದಾಕುಲುಲಾ ಪ್ರವಾಸಿಲುಲಾ ಆದುಲ್ಲ ಅಂದ್‌ದ್ ಒಪ್ಪಿಯೊಂಡೆರ್.</verse>
				<verse number="14">ಇಂಚಿತ್ತಿನ ಪಾತೆರೊಲೆನ್ ಪಾತೆರುನಾಕುಲು ತನ್ಕುಲು ಸ್ವದೇಶೊನು ನಾಡುನಾಕುಲು ಪನ್ಪಿ ಅರ್ಥೊನು ತೋಜಾವೆರ್.</verse>
				<verse number="15">ತನ್ಕುಲು ಪಿದಾಡ್ದ್ ಬೈದಿ ದೇಶದ ಮಿತ್ತ್ ಮನಸ್ ದೀತಿನಾಕುಲು ಆದಿತ್ತ್ಂಡ ಪಿರ ಅಡೆಗ್ ಪೋಪಿನೆಕ್ಕ್ ಅಕ್ಲೆಗ್ ಏಪಲಾ ಅವಕಾಸ ಇತ್ತ್ಂಡ್.</verse>
				<verse number="16">ಆಂಡ ಅಕುಲು ಪರಲೋಕ ಇನ್ಪಿ ಎಡ್ಡೆ ದೇಶೊನು ಎದುರು ತೂಪಿನಾಕುಲು ಆದುಪ್ಪುನೆಡ್ದ್ ದೇವೆರ್ ಅಕ್ಲೆನ ದೇವೆರ್ ಪಂಡ್ದ್ ಪಂಡೊನಿಯೆರೆ ನಾಚಿಗೆ ಮಲ್ಪಂದೆ ಅಕ್ಲೆಗಾದ್ ಪೇಂಟೆನ್‌ ತಯಾರ್ ಮಲ್ತೆ.</verse>
				<verse number="17">ಅಬ್ರಹಾಮುನು ಶೋಧಿಯುನಗ ಆಯೆ ನಂಬಿಕೆಡ್ದೇ ಇಸಾಕನ್ ಅರ್ಪಣೆ ಮಲ್ತೆ. ಇಸಾಕೆ ಆಯನ ಒರಿಯೇ ಮಗೆ ಆದಿತ್ತ್‌ಂಡಲಾ ಬೊಕ್ಕ ಇಸಾಕುಡ್ದು ಪುಟ್ಟುನಾಕುಲೇ ನಿನ ಸಂತಾನದಾಕುಲು ಪಂಡೊನ್ವೆರ್ ಅಂದ್‌ದ್ ದೇವೆರ್ ಆಯಗ್ ಪನ್ತ್ಂಡಲಾ ಆ ವಾಗ್ದಾನೊಲೆನ್ ಪಡೆಯಿನಾಯೆ ಆದ್ ಆ ಒರಿಯೇ ಮಗನ್ ಬಲಿ ಅರ್ಪಣೆ ಮಲ್ಪೆರೆ ಇತ್ತೆ.</verse>
				<verse number="18"></verse>
				<verse number="19">ತನ ಮಗೆ ಸೈತ್ಂಡಲಾ ದೇವೆರ್ ಆಯನ್ ಬದ್‌ಕಾಯೆರೆ ಸಾದ್ಯದಾಯೆ ಅಂದ್‌ದ್ ತೆರಿಯೊಂಡೆ. ಬೊಕ್ಕ ಸೈತಿನಾಕುಲೆಡ್ದ್ ಇಸಾಕ್‌ನ್ ಕುಡ ಬದ್‌ಕಾದ್ ಬತ್ತಿನಾಯಲೆಕ್ಕ ಪಡೆಯೆ.</verse>
				<verse number="20">ನಂಬಿಕೆಡ್ದೇ ಇಸಾಕೆ ಯಾಕೋಬನ್ಲಾ ಏಸಾವನ್ಲಾ ಆಶೀರ್ವದಿಪುನಗ ದುಂಬು ಆವೊಡ್ಡಿತ್ತಿನ ಸಂಗತಿಲೆನ್ ತೆರಿಪಾಯೆ.</verse>
				<verse number="21">ಯಾಕೋಬು ತಾನ್ ಸೈಯೊಂದುಪ್ಪುನಗ ನಂಬಿಕೆಡ್ದೇ ಯೋಸೇಫುನ ರಡ್ಡ್ ಆಣ್ ಬಾಲೆಲೆಗ್ ಆಶೀರ್ವಾದ ಕೊರಿಯೆ. ತನ ದಂಟೆದ ಮಿತ್ತ್ ಬಗ್ಗ್‌ದ್ ದೇವೆರೆಗ್ ಸೊಲ್ಮೆ ಸಂದಾಯೆ.</verse>
				<verse number="22">ಯೋಸೇಫೆ ಸೈಪಿನೆಡ್ದ್ ದುಂಬು ಇಸ್ರಾಯೇಲ್ಯೆರ್ ಐಗುಪ್ತ ದೇಶೊಡ್ದು ಪಿದಾಡುನೆನ್ ನಂಬಿಕೆಡೇ ಪಾತೆರ್‌ದ್ ತನ ಪುಣೊನು ದೆತ್ತೊಂದು ಪೋಪಿನ ಸಂಗತಿಡ್ ಅಪ್ಪಣೆ ಕೊರಿಯೆ.</verse>
				<verse number="23">ಮೋಶೆ ಪುಟ್ಟಿನಪಗ ಆಯನ ಅಪ್ಪೆಅಮ್ಮೆ ಬಾಲೆ ಪೊರ್ಲುಂಡು ಅಂದ್‌ದ್ ತೂದು ಅರಸು ಅಪ್ಪಣೆಗ್ ಪೋಡಿಯಂದೆ ಆಯನ್ ನಂಬಿಕೆಡೇ ಮೂಜಿ ತಿಂಗೊಲು ದೆಂಗಾದ್ ದೀಯೆರ್.</verse>
				<verse number="24">ಮೋಶೆ ಮಲ್ಲಾಯಿ ಬೊಕ್ಕ ಫರೋಹನ ಮಗಲೆನ ಮಗೆ ಅಂದ್‌ದ್ ಪಂಡೊನ್ನವು ಬೊಡ್ಚಿ ಪಂಡಿನಿ ನಂಬಿಕೆಡ್ದೇ.</verse>
				<verse number="25">ಒಂತೆ ಕಾಲ ಪಾಪ ಭೋಗೊನು ಅನುಭವ ಮಲ್ಪುನೆಡ್ದ್ ದೇವೆರೆ ಜನೊಕುಲೆಡೊಪ್ಪ ಕಷ್ಟೊಲೆನ್ ಅನುಭವಿಪುನವು ಎಡ್ಡೆಂದ್‌ದ್ ತೀರ್ಮಾನ ಮಲ್ತೊಂಡೆ.</verse>
				<verse number="26">ಐಗುಪ್ತ ದೇಶದ ಮಾತ ಐಶ್ವರ್ಯೊಡ್ದುಲಾ ಕ್ರಿಸ್ತಡ್ದ್ ಉಂಡಾಪಿ ನಿಂದೆಲೇ ಎಡ್ಡೆಂತಿನವು ಅಂದ್‌ದ್ ಎನ್ನೊಂಡೆ. ದಾಯೆಗಂದ್ಂಡ ಬರ್ಪಿನ ಪ್ರತಿಫಲದ ಮಿತ್ತ್ ಕಣ್ಣ್ ದೀದಿತ್ತೆ.</verse>
				<verse number="27">ಆಯೆ ಅರಸುನ ಕೋಪೊಗು ಪೋಡಿಯಂದೆ ಐಗುಪ್ತ ದೇಶೊನು ಬುಡ್ದು ಪೋಯಿನವು ನಂಬಿಕೆಡ್ದೇ. ಆಯೆ ಕಣ್ಣ್‌ಗ್ ತೋಜಂದಿನಾಯನ್ ತೂಪೆನಾ ದಾನ್ನ ಪನ್ಪಿಲೆಕ್ಕ ಸ್ಥಿರೊಟ್ಟಿತ್ತೆ.</verse>
				<verse number="28">ಸುರುತ್ತ ಬಾಲೆಲೆನ್ ಕೆರ್ಪುನಾಯೆ ಇಸ್ರಾಯೇಲ್ಯೆರೆನ್ ಮುಟ್ಟಂದಿ ಲೆಕ್ಕ ಆಯೆ ಪಸ್ಕ ಇನ್ಪಿ ವಣಸ್‌ನ್ಲಾ ನೆತ್ತೆರ್ ತಲಿಪುನಾ ಆಚಾರೊನ್ಲಾ ನೇಮಕ ಮಲ್ತಿನಿ ನಂಬಿಕೆಡ್ದೇ.</verse>
				<verse number="29">ನಂಬಿಕೆಡ್ದೇ ಇಸ್ರಾಯೇಲ್ಯೆರ್ ಕೆಂಪು ಕಡಲ್‌ನ್ ನುಂಗು ಪೋತಿ ನೆಲತ್ತ ಮಿತ್ತ್ ನಡಪುಲೆಕ್ಕ ದಾಂಟಿಯೆರ್. ಆಂಡ ಐಗುಪ್ತ್ಯೆರ್ ಬೆರಿಯೆ ಬತ್ತ್‌ದ್ ಮಾತೆರ್ಲಾ ಮುರ್ಕುದು ಸೈತೆರ್.</verse>
				<verse number="30">ನಂಬಿಕೆಡ್ದೇ ಇಸ್ರಾಯೇಲ್ಯೆರ್ ಏಳ್ ದಿನ ಮುಟ್ಟ ಯೆರಿಕೊ ಪಟ್ಟಣದ ಗೋಡೆಲೆನ್ ಸುತ್ತು ಬನ್ನಗ ಗೋಡೆಲು ಬೂರ್ದು ಪೋಂಡು.</verse>
				<verse number="31">ನಂಬಿಕೆಡ್ದೇ, ರಹಾಬ್ ಪನ್ಪಿ ಸೂಳೆ ಗೂಢಾಚಾರೆರೆನ್ ಸಮಾಧಾನೊಡು ಸೇರಾವೊಂದು ನಂಬಂದಿನಾಕುಲೆಡೊಪ್ಪ ನಾಶ ಆದುಪ್ಪುಜಲ್.</verse>
				<verse number="32">ನನಲಾ ದಾನೆ ಪನೊಡು? ಗಿಡಿಯೋನೆ ಬಾರಾಕೆ ಸಂಸೋನೆ ಎಪ್ತಾಹೆ, ದಾವೀದೆ, ಸಮುವೇಲೆ ಇನ್ಪಿನಾಕುಲೆನ ಚರಿತ್ರೆನ್ಲಾ ಪ್ರವಾದಿಲೆನ ಚರಿತ್ರೆನ್ಲಾ ಬುಡ್ಪಾದ್ ಪನೊಡಾಂಡ ಎಂಕ್ ಸಮಯ ಯಾವಂದ್.</verse>
				<verse number="33">ನಂಬಿಕೆಡ್ದೇ ಅಕುಲು ರಾಜ್ಯೊಲೆನ್ ಜೈಸಿಯೆರ್, ನೀತಿಡ್ ಆಳಿಯೆರ್, ವಾಗ್ದಾನೊಲೆನ್ ಪಡೆಯೊಂಡೆರ್. ಸಿಮ್ಮೊಲೆ ಬಾಯಿ ಕಟ್ಟಿಯೆರ್.</verse>
				<verse number="34">ತೂತ ಬಲೊನು ತೆಕ್ಕಾಯೆರ್; ಕತ್ತಿದ ಬಾಯಿಗ್ ತಪ್ಪಾವೊಂಡೆರ್, ಬಲದಾಂತಿನಾಕುಲಾದ್ ಬಲತ್ತಾಕುಲು ಆಯೆರ್. ಲಡಾಯಿಡ್ ಗೆಂದುನಾಕುಲಾಯೆರ್, ಬಾಕಿದಾಕುಲೆನ ದಂಡ್‌ಲೆನ್ ಗಿಡ್ತ್ ಬುಡಿಯೆರ್.</verse>
				<verse number="35">ಪೊಂಜೊವುಲು ಸೈತ್ ಪೋದಿತ್ತಿ ಸ್ವಂತದಾಕುಲೆನ್ ಕುಡ ಜೀವಾದ್ ಪಡೆವೊಂಡೆರ್. ಕೆಲೆವೆರ್ ತನ್ಕುಲು ಭಂಗದ ಯಂತ್ರೊಗು ಕಟ್ಟಾವೊಂಡಿನಪಗ ಪುನರುತ್ಥಾನೊನು ಪಡೆವೆರೆಗಾದ್ ಬುಡುಗಡೆ ಬೊಡ್ಚಿ ಪಂಡ್ದ್ ಪನೊಂದು ಪೆಟ್ಟ್‌ಡ್ ಸೈತೆರ್.</verse>
				<verse number="36">ಬೇತೆ ಕೆಲೆವೆರ್ ಅಪಹಾಸ್ಯ, ಕೊರಡೆದ ಪೆಟ್ಟ್, ಸರಪೊಳಿ, ಸೆರೆಮನೆಟ್ ಉಂದೆನ್ ಮಾತ ಅನುಭವ ಮಲ್ತೆರ್.</verse>
				<verse number="37">ಕೆಲೆವೆರೆನ್ ಜನೊಕುಲು ಕಲ್ಲ್ ದಕ್ಕ್‌ದ್ ಕೆರಿಯೆರ್. ಕೆಲೆವೆರೆನ್ ಗರಗಸೊಡ್ದು ಕುತ್ತುದು ಕೆರಿಯೆರ್ ದೇವೆರೆಗ್ ವಿರೋಧಾದ್ ಪ್ರಾಣೊನು ಒರಿತೊನ್ಲೆ ಪಂಡ್ದ್ ಕೆಲೆವೆರೆನ್ ಪುಸಲಾಯಿಸಿಯೆರ್. ಕೆಲೆವೆರೆನ್ ಕತ್ತಿಡ್ ಕೆರಿಯೆರ್, ಕೆಲೆವೆರ್ ದಾಲಾದಾಂತೆ ಇತ್ತ್‌ದ್ ಭಂಗ ಕಷ್ಟೊಲೆನ್ ಅನುಭವ ಮಲ್ತಿನಾಕುಲಾದ್ ಕುರಿ ಏಡ್‌ಲೆನ ಚರ್ಮಲೆನ್ ತುತ್ತೊಂದು ತಿರ್ಗೊಂದಿತ್ತೆರ್‌</verse>
				<verse number="38">ಇಂಚಿತ್ತಿನಾಕುಲೆಗ್ ಈ ಲೋಕ ಯೋಗ್ಯವಾಯಿನ ಜಾಗ್ ಅತ್ತ್, ಅಕುಲು ತನ್ಕುಲೆನ ದೇಶದ ಕಾಡ್, ಗುಡ್ಡೆ, ಮಾಟೆ, ತೋಡುಲೆಡ್ ತಿರ್ಗುನಾಕುಲಾದಿತ್ತೆರ್.</verse>
				<verse number="39">ಮೊಕುಲು ಮಾತೆರ್ಲಾ ನಂಬಿಕೆಡ್ದ್ ಎಡ್ಡೆ ಪುದರ್‌ನ್ ಸಂಪಾದನೆ ಮಲ್ತೊಂದಿತ್ತ್‌ಂಡಲಾ ವಾಗ್ದಾನದ ಫಲೊನು ಪಡೆಯಿಜೆರ್.</verse>
				<verse number="40">ದೇವೆರ್ ನಂಕಾದ್ ಶ್ರೇಷ್ಟವಾಯಿನ ಭಾಗ್ಯೊನು ಏರ್ಪಾಡ್ ಮಲ್ತ್‌ದ್ ಎಂಕುಲುದಾಂತೆ ಅಕುಲು ಪರಿಪೂರ್ಣ ಆವೆರೆ ಬಲ್ಲಿ ಅಂದ್‌ದ್ ನೇಮಕ ಮಲ್ತೆ.</verse>
			</chapter>
			<chapter number="12">
				<verse number="1">ಅಂಚಾಯಿನೆಡ್ದ್ ಈತ್ ಜನ ಸಾಕ್ಷಿದಾಕುಲು ಮುಗಲ್‌ದ ಲೆಕ್ಕ ನಮ ಸುತ್ತಲಾ ಉಲ್ಲೆರ್. ನಂಕ್ ಅಡ್ಡಿ ಮಲ್ಪುನ ಮಾತ ಭಾರೊನ್ಲಾ ಅಂಟುನ ಪಾಪೊನ್ಲಾ ನಮ ದೆತ್ತ್ ದೀದ್ ನಂಬಿಕೆನ್ ಪುಟ್ಟಾವುನಾಯೆಲಾ ಕೊರ್ಪಿನಾಯೆಲಾ ಆದುಪ್ಪು ಯೇಸುನ ಮಿತ್ತ್ ದೃಷ್ಟಿ ದೀಕ. ನಂಕ್ ನೇಮಕ ಆದುಪ್ಪು ಬಲ್ಪಾಟೊನು ತಾಳ್ಮೆಡ್ ಬಲ್ಪುಗ. ಆಯೆ ತನ ದುಂಬು ದೀದಿತ್ತಿ ಸಂತೋಷಗಾದ್ ಅವಮಾನೊನು ಅಸಡ್ಡೆ ಮಲ್ತ್‌ದ್ ಕ್ರುಸ್ಸುದ ಮರಣೊನು ಸೈಸೊಂದು ದೇವೆರೆ ಗದ್ದಿಗೆದ ಬಲತ್ತ ಮರ್ಗಿಲ್‌ಡ್ ಕುಲ್ಲೊಂದುಲ್ಲೆ.</verse>
				<verse number="2"></verse>
				<verse number="3">ನಿಕ್ಲೆ ಪ್ರಾಣೊಡು ಸೋತಿನಾಕುಲಾದ್ ಬೇಜಾರ್ ಆವಂದಿಲೆಕ್ಕ ಆಯನ್ ಎನ್ನೊನ್ಲೆ. ಆಯೆ ಪಾಪಿಲೆಡ್ದ್ ಏತೋ ಪಗೆನ್ ಸೈಸೊಂಡೆ.</verse>
				<verse number="4">ನಿಕುಲು ಪಾಪೊಗು ವಿರೋಧಾದ್ ಪೊಂರ್ಬುನೆಟ್ ನೆತ್ತೆರ್ ಗುಪ್ಪುನೆಟ್ಟಲಾ ವಿರೋಧ ಮಲ್ತ್‌ಜರ್.</verse>
				<verse number="5">ಜೋಕುಲೆಗ್ ಪನ್ಪಿಲೆಕ್ಕ ನಿಕ್ಲೆಗ್ ಪಂಡಿನ ಎಚ್ಚರಿಕೆದ ಪಾತೆರೊಲೆನ್ ಮದತ್ ಬುಡಿಯರಾ? ದಾನೆಂದ್ಂಡ “ಮಗಾ, ಕರ್ತವನ ಶಿಕ್ಷೆನ್ ತಿರಸ್ಕಾರ ಮಲ್ಪಡ; ಆಯೆ ನಿನನ್ ದಡ್ಡಿನಗ ಬೇಜಾರ್ ಮಲ್ಪಡ;</verse>
				<verse number="6">ಕರ್ತವೆ ತಾನ್ ಪ್ರೀತಿ ಮಲ್ಪುನಾಯಗೇ ಶಿಕ್ಷೆ ಕೊರ್ಪೆ; ತಾನ್ ಸೇರಾವೊನುನ ಪ್ರತಿಯೊಂಜಿ ಮಗಕ್ಕ್ ಹಾಕುವೆ ಪನ್ಪಿನವು.”</verse>
				<verse number="7">ನಿಕುಲು ತೆರಿದಿನಾಕುಲು ಆವೊಡು ಪಂಡ್ದೇ ನಿಕ್ಲೆಗ್ ಶಿಕ್ಷೆ ಆಪುಂಡು ಅಂದ್‌ದ್ ತೆರಿದ್ ಅವೆನ್ ಸಹಿಸೊನ್ಲೆ. ದೇವೆರ್ ನಿಕ್ಲೆನ್ ಜೋಕುಲಂದ್‌ದ್ ನಡಪಾವೆ.</verse>
				<verse number="8">ಅಮ್ಮೆರೆಡ್ದ್ ಶಿಕ್ಷೆ ಪಡೆವಂದಿನ ಮಗೆ ಓಲ್ಲೆ? ಜೋಕುಲು ಮಾತೆರ್ ಪಡೆಯುನ ಶಿಕ್ಷೆ ನಿಕ್ಲೆಗ್ ಉಂಡಾಯಿಜಿಡ ನಿಕುಲು ಹಾದ್ರೊಡ್ದು ಪುಟ್ಟುದಿನಾಕುಲೇ ಅತ್ತಂದೆ ಮಗಾಡ್ಲು ಅತ್ತ್.</verse>
				<verse number="9">ಉಂದು ಮಾತ್ರ ಅತ್ತಂದೆ ನಂಕ್ ಶಿಕ್ಷೆ ಕೊರಿನ ಶರೀರ ಸಮ್ಮಂಧವಾಯಿನ ಅಮ್ಮಾಡ್ಲೆಗ್ ನಮ ಮರ್ಯಾದಿ ಕೊರಿ ಲೆಕ್ಕ, ನಮ್ಮ ಆತ್ಮೊಲೆಗ್ ಅಮ್ಮೆ ಆದುಪ್ಪುನಾಯಗ್ ನಮ ನನಲಾ ತಗ್ಗ್‌ದ್ ಬದುಕೊಡು.</verse>
				<verse number="10">ಆ ಅಮ್ಮಾಡ್ಲು ಕೆಲವು ದಿನತ ಪ್ರಯೋಜನೊಲೆನ್ ಲಕ್ಷೊಗು ದೆತ್ತೊಂದು ತನ್ಕುಲೆಗ್ ಮನಸ್ ಬತ್ತಿಲೆಕ್ಕ ನಂಕ್ ಶಿಕ್ಷೆನ್ ಕೊರಿಯೆರ್. ಆಂಡ ದೇವೆರ್ ನಮ ಆಯನ ಪರಿಶುದ್ಧತೆಡ್ ಪಾಲ್‌ದಾರೆರಾವೊಡು ಪಂಡ್ದ್ ನಮ ಎಡ್ಡೆಗಾದ್ ಶಿಕ್ಷೆ ಕೊರ್ಪೆ.</verse>
				<verse number="11">ವಾ ಶಿಕ್ಷೆ ಆಂಡಲಾ ಆ ಸಮಯೊಗು ನಂಕ್ ಸಂತೋಷದವು ಆದ್ ತೋಜಂದೆ ದುಃಖದವು ಆದ್ ತೋಜುಂಡು, ಆಂಡಲಾ ಐಡ್ದ್ ಬೊಕ್ಕ ಅವು ಶಿಕ್ಷೆ ಪಡೆಪಿನಾಕುಲೆಗ್ ನೀತಿ ಪನ್ಪಿ ಫಲೊನು ಕೊರ್ದು ಮನಸ್‌ಗ್ ಸಮಾಧಾನೊನು ಉಂಡು ಮಲ್ಪುಂಡು.</verse>
				<verse number="12">ಐಡ್ದಾವರ ಬಲದಾಂತಿ ಕೈಲೆನ್ಲಾ ನಡುಗುನ ಮೊರಂಪುಲೆನ್ಲಾ ಸುದಾರಿತೊನ್ಲೆ.</verse>
				<verse number="13">ನಿಕ್ಲೆ ಕಾರ್‌ಗ್ ಸರ್ತ ಸಾದಿನ್ ಮಲ್ತೊನ್ಲೆ. ಇಂಚ ಮಲ್ತರ್ಡ ಕುಂಟುನ ಕಾರ್ ಕುಸ್ಕುದು ಪೋವಂದೆ ಗುಣ ಆಪುಂಡು.</verse>
				<verse number="14">ಮಾತೆರೆಡೊಪ್ಪ ಸಮಾಧಾನೊಡುಪ್ಪೆರೆಲಾ ಪರಿಶುದ್ಧತೆಡ್ ಉಪ್ಪುನೆಕ್ಕ್‌ಲಾ ಪ್ರಯತ್ನ ಮಲ್ಪುಲೆ. ಪರಿಶುದ್ಧತೆ ಇಜ್ಜಂದೆ ಏರ್ಲಾ ಕರ್ತವನ್ ತೂಪುಜೆರ್.</verse>
				<verse number="15">ನಿಕ್ಲೆಡ್ ಏರಾಂಡಲಾ ದೇವೆರೆ ದಯೊಕು ತತ್ತ್‌ದ್ ಪಿರಜಾರಂದಿಲೆಕ್ಕ ವಾ ವಿಷತ ಬೇರ್‌ಲಾ ನಿಕ್ಲೆಡ ತೆಗ್‌ಲ್‌ದ್ ಅಸಮಾಧಾನೊನು ಪುಟ್ಟಾದ್ ಸಭೆತಾಕುಲೆನ್ ಹಾಳ್ ಮಲ್ಪಂದಿಲೆಕ್ಕ ತೂಲೆ.</verse>
				<verse number="16">ವಾ ಹಾದ್ರದಾಯೆ ಆವಡ್, ಏಸಾವಲೆಕ್ಕ ಲೋಕದಾಯೆ ಆವಡ್ ನಿಕ್ಲೆಡ್ ಇಜ್ಜಂದಿಲೆಕ್ಕ ಜಾಗ್ರತೆಡ್ ತೂವೊನ್ಲೆ. ಆ ಏಸಾವೆ ಒಂಜೇ ಒಂಜಿ ವಣಸ್‌ಗಾದ್ ತನ ಕಡೀರ್‌ದ ಹಕ್ಕ್‌ನ್ ಕೊರ್ದು ಬುಡಿಯೆ.</verse>
				<verse number="17">ಐಡ್ದ್ ಬೊಕ್ಕ ತನ ಅಮ್ಮೆರೆನ ಆಶೀರ್ವಾದೊನು ಹಕ್ಕ್‌ಡ್ ಪಡೆವೊಡು ಅಂದ್‌ದ್ ಕಣ್ಣೀರ್ ಜಪುಡಾವೊಂದು ಪಶ್ಚಾತಾಪ ಪಡೆಯೆಡಲಾ ನಡತಿನೆನ್ ಇಜ್ಜಂದಿಲೆಕ್ಕ ಮಲ್ಪೆರೆ ಸಾದಿ ಇಜ್ಜಂದೆ ತಿರಸ್ಕಾರೊಡು ಬೂರಿನೆನ್ ತೆರಿದರ್.</verse>
				<verse number="18">ನಿಕುಲು ಮುಟ್ಟಿಯೆರೆ ಸಾದ್ಯ ಇತ್ತಿನ ಬೊಕ್ಕ ತೂ ಪತ್ತ್‌ದಿ ಪರ್ವತೊಗ್ಲಾ, ಮುಗಲ್‌ಡ್ದ್ ದಿಂಜಿದಿ ಕತ್ತೆಲೆಗ್ಲಾ, ಬಿರುಗಾಳಿಗ್ಲಾ ತುತೂರಿದ ಸ್ವರೊಕುಲಾ ಪಾತೆರೊಲೆ ಶಬ್ಧೊಗ್ಲಾ ಬೈದಿನಾಕುಲು ಅತ್ತ್. ಆ ಶಬ್ಧೊನು ಕೇಂಡಿನಾಕುಲು ತನ್ಕುಲೆಗ್ ನನ ಒಂಜಿ ಪಾತೆರೊನಾಂಡಲಾ ಪನೊಡ್ಚಿ ಅಂದ್‌ದ್ ನಟ್ಟೊಂಡೆರ್.</verse>
				<verse number="19"></verse>
				<verse number="20">ದಾಯೆಗಂದ್ಂಡ, “ಒಂಜಿ ಪ್ರಾಣಿಯಾಂಡಲಾ ಈ ಪರ್ವತೊನು ಮುಟ್ಟುಂಡ ಅವೆನ್ ಕಲ್ಲ್ ದಕ್ಕ್‌ದ್ ಕೆರೊಡು,” ಪನ್ಪಿ ದೇವೆರೆ ಅಪ್ಪಣೆನ್ ತಡೆಯೊನೆರೆ ಆವಂದೆ ಇತ್ತೆರ್.</verse>
				<verse number="21">ಉಂದತ್ತಂದೆ ಅವುಲು ತೋಜಿದಿನವು ಆತ್ ಭಯಂಕರದವು ಆದುಪ್ಪುನೆಡ್ದ್ ಮೋಶೆ, ಎಂಕ್ ಬಾರಿ ಪೋಡಿಗೆ ಆಪುಂಡು, ನಡುಗೊಂದುಲ್ಲೆ ಅಂದ್‌ದ್ ಪನ್ತೆ.</verse>
				<verse number="22">ಆಂಡ ನಿಕುಲು ಚೀಯೋನು ಪರ್ವತೊಗ್ಲಾ ಜೀವ ಇತ್ತಿ ದೇವೆರೆ ಪಟ್ಟಣ ಆದುಪ್ಪುನ ಪರಲೋಕದ ಯೆರೂಸಲೇಮುಗ್ಲಾ ಸೇರ್ದುಪ್ಪು ಕೋಟ್ಯಾನುಕೋಟಿ ದೇವದೂತೆರೆ ಕೈತಲ್‌ ಬೈದರ್.</verse>
				<verse number="23">ಪರಲೋಕೊಡು ಪುದರ್ ಬರೆಪಾವೊಂಡಿ ಕಡೀರ್‌ದ ಜೋಕುಲೆನ ಸಭೆಕ್ಲಾ, ಮಾತೆರೆಗ್ ನ್ಯಾಯಾಧಿಪತಿ ಆಯಿ ದೇವೆರೆ ಕೈತಲ್‌ಗ್ಲಾ, ಸಂಪೂರ್ಣ ಆಯಿ ನೀತಿವಂತೆರೆ ಆತ್ಮೊಲೆ ಕೈತಲ್‌ಗ್ಲಾ ಬೈದರ್.</verse>
				<verse number="24">ಪೊಸ ಒಡಂಬಡಿಕೆದ ಮದ್ಯಸ್ತೆಗಾರೆ ಆದುಪ್ಪು ಯೇಸು ಕೈತಲ್‌ಗ್ ತಲಿಪು ನೆತ್ತರ್‌ದಡೆಗ್ ಬತ್ತರ್. ಈ ನೆತ್ತೆರ್ ಹೇಬೆಲ್‌ನೆಡ್ದ್ ಎಡ್ಡೆದೆನ್ ಪಾತೆರುಂಡು.</verse>
				<verse number="25">ನಿಕುಲು ಪಾತೆರುನಾಯನ ಪಾತೆರೊನು ಕೇನುಜಿ ಅಂದ್‌ದ್ ಪನಿಯೆರೆ ಬಲ್ಲಿ. ಭೂಮಿದ ಮಿತ್ತ್ ದೇವೆರೆ ಪಾತೆರೊಲೆನ್ ಪಾತೆರ್ದಿನಾಯಗ್ ಕೆಬಿ ಕೊರಿಯೆರೆ ಮನಸಿಜ್ಜಂದೆ ಇತ್ತಿ ಇಸ್ರಾಯೇಲ್ಯೆರ್ ಶಿಕ್ಷೆಗ್ ತಪ್ಪಾವೊಂಡಿಜೆರ್ಡ ಪರಲೋಕೊಡ್ದು ಪಾತೆರ್ನಾಯಗ್ ಎಂಕುಲು ಕೆಬಿ ಕೊರಿಯೆರೆ ಮನಸಿಜ್ಜಂದೆ ಪೋಂಡ ಎಂಚ ತಪ್ಪಾವೊನುವಾ?</verse>
				<verse number="26">ಆಯನ ಸ್ವರ ಆ ಕಾಲೊಡು ಭೂಮಿನ್ ಅದ್‌ರಾಂಡ್; ಇತ್ತೆಲಾ ಆಯೆ ನನೊಂಜಿ ಸರ್ತಿ ಮಾತ್ರ ಯಾನ್ ಭೂಮಿನ್ ಮಾತ್ರ ಅತ್ತಂದೆ ಪರಲೋಕೊನ್ಲಾ ಪಂದಾವೆ ಅಂದ್‌ದ್ ವಾಗ್ದಾನ ಮಲ್ತ್‌ದೆ.</verse>
				<verse number="27">ನನೊಂಜಿ ಸರ್ತಿ ಇನ್ಪಿ ಪಾತೆರೊನು ಯೋಚನೆ ಮಲ್ತ್ಂಡ ಅದ್‌ರಂದಿನ ವಸ್ತುಲು ಉಂಡಾಯಿನವು ಆದಿತ್ತಿನೆಡ್ದ್ ದೆತ್ತ್‌ದ್ ಪಾಡೊಡು ಪನ್ಪಿನವು ಸ್ಪಷ್ಟ ಆಪುಂಡು. ಅಪಗ ಅದ್‌ರಂದೆ ಉಪ್ಪುನ ವಸ್ತುಲು ಗಟ್ಟಿಯಾದ್ ಉಂತುಂಡು.</verse>
				<verse number="28">ಅಂಚಾಯಿನೆಡ್ದ್ ಏರ್ಲಾ ಪಂದಾವೆರೆ ಆವಂದಿ ರಾಜ್ಯೊನು ಪಡೆತಿನಾಕುಲಾಯಿ, ಎಂಕುಲು ಉಪಕಾರ ಎನ್ನೊಂದು ಆಯಗ್ ಆರಾಧನೆನ್ ಭಕ್ತಿಡ್ಲಾ ಪೋಡಿಗೆಡ್ಲಾ ಮಲ್ಪುಗ. ದಾಯೆಗಂದ್ಂಡ ನಮ ದೇವೆರ್ ತಿಂದ್‌ದ್ ಬುಡ್ಪಿ ತೂತಲೆಕ್ಕನೆ ಉಲ್ಲೆ.</verse>
				<verse number="29"></verse>
			</chapter>
			<chapter number="13">
				<verse number="1">ಸಹೋದ್ರ ಪ್ರೀತಿ ನಿಲೆ ಆದುಪ್ಪಡ್.</verse>
				<verse number="2">ಬಿನ್ನೆರೆನ್ ಸುದಾರಿಪುನೆನ್ ಮದತ್ ಬುಡಡೆ. ಅವೆನ್ ಮಲ್ಪುನೆಟ್ಟ್ ಕೆಲೆವೆರ್ ತೆರಿಯಂದೆ ದೂತೆರೆನ್ಲಾ ಸುದಾರಿತ್‌ದೆರ್.</verse>
				<verse number="3">ಸೆರೆಮನೆಟ್ಟುಪ್ಪುನಾಕುಲೆ ಒಟ್ಟುಗು ನಿಕುಲುಲಾ ಸೆರೆಮನೆಟ್ ಉಲ್ಲರ್ ಇನ್ಪಿಲೆಕ್ಕ ತರಕೊನ್ಲೆ. ನಿಕುಲು ನನಲಾ ಶರೀರೊಡು ಉಪ್ಪುನಾಕುಲು ನಿಕ್ಲೆಗ್ಲಾ ಅನ್ಯಾಯ ಆವು ಅಂದ್‌ದ್ ತೆರಿದ್ ಅನ್ಯಾಯ ಅನುಭವ ಮಲ್ಪುನಾಕುಲೆನ್ ನೆನೆಪು ಮಲ್ತೊನ್ಲೆ.</verse>
				<verse number="4">ಮದ್ಮೆನ್ ಮಾನ್ಯದವು ಪಂಡ್ದ್ ಎನ್ನೊಡು. ಕಂಡನಿ ಬೊಡೆದಿನ ಸಮ್ಮಂಧೊಲು ಮೈಲೆದಾಂತಿನವು ಆದುಪ್ಪೊಡು. ದಾಯೆಗ್ ಪಂಡ ನಡತೆ ಸರಿದಾಂತಿನಾಕುಲೆಗ್ಲಾ ವ್ಯಭಿಚಾರಿಲೆಗ್ಲಾ ದೇವೆರ್ ನ್ಯಾಯತೀರ್ಪು ಕೊರುವೆ ಅಂದ್‌ದ್ ತೆರಿಯೊನ್ಲೆ.</verse>
				<verse number="5">ಕಾಸ್‌ದಾಸೆ ಇಜ್ಜಾಂದಿನಕುಲಾದುಪ್ಪುಲೆ. ನಿಕ್ಲೆಗ್ ಇತ್ತಿನೆಟ್ಟ್ ತೃಪ್ತಿ ಪಡೆಲೆ. “ಯಾನ್ ನಿಕ್ಲೆನ್ ಏಪಲಾ ಕೈ ಬುಡಯೆ, ಏಪಲಾ ಬುಡ್ದು ಪಾಡಯೆ,” ಅಂದ್‌ದ್ ದೇವೆರ್ ತಾನೇ ಪನ್ತೆ.</verse>
				<verse number="6">ಅಂಚಾದ್ “ಕರ್ತವೆ, ಎನ ಸಹಾಯಕೆ, ಪೋಡಿಯಯೆ. ನರಮಾನಿ ಎಂಕ್ ದಾನೆ ಮಲ್ಪೆ?” ಅಂದ್‌ದ್ ಧೈರ್ಯೊಡು ಪನೊಲಿ.</verse>
				<verse number="7">ನಿಕ್ಲೆಗ್‌ ದೇವೆರೆ ಪಾತೆರೊನು ತೆರಿಪಾಯಿನ ಸಭೆತ ನಾಯಕೆರೆನ್ ನೆನೆತೊನ್ಲೆ. ಅಕುಲು ವಾ ರೀತಿಡ್ ಬದ್‌ಕ್‌ದ್ ಪ್ರಾಣ ಬುಡಿಯೆರ್ ಪನ್ಪಿನೆನ್ ಆಲೋಚನೆ ಮಲ್ಪುಲೆ. ಅಕ್ಲೆನ ನಂಬಿಕೆನ್ ಮಾದ್ರಿಯಾದ್ ದೆತ್ತೊನ್ಲೆ.</verse>
				<verse number="8">ಯೇಸು ಕ್ರಿಸ್ತೆ ಕೋಡೆ ಇತ್ತಿಲೆಕ್ಕನೆ ಇನಿಲಾ ಉಲ್ಲೆ, ಏಪೊಗ್ಲಾ ಅಂಚನೇ ಉಪ್ಪುವೆ.</verse>
				<verse number="9">ನಾನಾ ತರತ ಬೋಧನೆಲೆ ಸುಳಿಕ್ ತಿಕ್ಕ್‌ದ್ ಬೂರಡೆ. ದೇವೆರೆ ದಯೊನು ಪಡೆವೊಂದು ಉಡಲ್‌ನ್ ಗಟ್ಟಿ ಮಲ್ತೊನವು ಎಡ್ಡೆನೇ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ಪಡೆ. ತಿನ್ಪಿನ ತಿನಸ್‌ಲೆನ್ ವಿಶೇಷ ಮಲ್ತಿನಾಕುಲು ವಾ ಪ್ರಯೋಜನಲಾ ಪಡೆಯಿಜೆರ್.</verse>
				<verse number="10">ಎಂಕುಲೆಗೊಂಜಿ ಬಲಿಪೀಠ ಉಂಡು, ಈ ಬಲಿಪೀಠದ ತಿನಸ್‌ಲೆನ್ ತಿನಿಯೆರೆಗ್ ಗುಡಾರೊಡು ಸೇವೆ ಮಲ್ಪುನಾಕುಲೆಗ್ ಹಕ್ಕ್ ಇಜ್ಜಿ.</verse>
				<verse number="11">ದಾಯೆಗಂದ್ಂಡ, ಪಾಪ ಪರಿಹಾರೊಗಾದ್ ಪಶುತ ನೆತ್ತೆರ್‌ನ್ ಪ್ರಧಾನಯಾಜಕೆ ಪರಿಶುದ್ಧ ಜಾಗ್‌ಗ್ ಕೊನುಪೋದು ಬೊಕ್ಕ ಆ ಪಶುತ ಪುಣೊನು ದಂಡ್‌ಡ್ದ್ ಪಿದಯಿ ಪೊತ್ತಾದ್ ಬುಡ್ಪುಂಡು.</verse>
				<verse number="12">ಐತ ಲೆಕ್ಕನೆ ಯೇಸುಲಾ ತನ ಸ್ವಂತ ನೆತ್ತೆರೆಡ್ದ್ ತನ ಜನೊಕುಲೆನ್ ಪರಿಶುದ್ಧ ಮಲ್ಪೆರೆಗಾದ್ ಪಟ್ಟಣದ ಪಿದಯಿ ಸೈತೆ.</verse>
				<verse number="13">ಅಂಚಾಯಿನೆಡ್ದ್ ನಮ ಆಯಡ್ದಾದ್ ಬರ್ಪಿನ ಅವಮಾನೊನು ತಾಳೊಂದು ಅಕ್ಲೆ ಕೂಟೊಡ್ದು ಪಿದಾಡ್ದ್ ಆಯ ಕೈತಲ್‌ಗ್ ಪೋಯಿ.</verse>
				<verse number="14">ದಾಯೆಗಂದ್ಂಡ ಲೋಕೊಡು ನಂಕ್ ಶಾಶ್ವತ ಪಟ್ಟಣ ಇಜ್ಜಿ. ನಮ ನನ ದುಂಬಗ್ ಆಪಿ ಪೇಂಟೆನ್‌ ಕಾತೊಂದುಲ್ಲ.</verse>
				<verse number="15">ಅಂಚಾಯಿನೆಡ್ದ್ ಆಯಡ್ದ್ ದೇವೆರೆಗ್ ಸುಗಿಪುನ ಬಲಿನ್ ಬುಡಂದೆ ಅರ್ಪಣೆ ಮಲ್ಪುಗ. ಆಯೆ ಕರ್ತವೆ ಅಂದ್‌ದ್ ನಮ ಬಾಯಿಡ್ದ್ ಅರಿಕೆ ಮಲ್ಪುನವೇ ನಮ ಕೊರ್ಪಿನ ಫಲ ಆದುಂಡು.</verse>
				<verse number="16">ಉಂದತ್ತಂದೆ ಪರೋಪಕಾರೊನ್ಲಾ ದಾನಧರ್ಮ ಮಲ್ಪುನೆನ್ಲಾ ಮದಪಡೆ, ಉಂದು ದೇವೆರ್ ಮೆಚ್ಚುನ ಬಲಿ.</verse>
				<verse number="17">ನಿಕ್ಲೆ ಸಭಾನಾಯಕೆರೆ ಪಾತೆರೊನು ಕೇನ್ಲೆ, ಅಕ್ಲೆಗ್ ಅಧೀನೆರಾದುಪ್ಪುಲೆ. ಅಕುಲು ನಿಕ್ಲೆನ ಆತ್ಮೊಲೆನ್ ಕಾಪುನಾಕುಲಾದ್ ನಿಕ್ಲೆ ಸಂಗತಿಡ್ ಲೆಖ್ಖ ಕೊರ್ಪಿನಕುಲಾದುಲ್ಲೆರ್. ಅಕುಲು ಬೇಜಾರ್ ಮಲ್ಪಂದೆ ಸಂತೋಷೊಡು ಉಂದೆನ್ ಮಲ್ಪುಲೆಕ್ಕ ತೂವೊನ್ಲೆ. ಅಕುಲು ಬೇಜಾರ್‌ಡ್ ಉಪ್ಪುನವು ನಿಕ್ಲೆಗ್ ಪ್ರಯೋಜನ ಆಪಿನವು ಅತ್ತ್.</verse>
				<verse number="18">ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪುಲೆ. ಎಂಕುಲು ಮಾತ ವಿಚಾರೊಲೆಡ್ ಸಜ್ಜನೆರಾದ್ ನಡಪೊಡು ಪಂಡ್ದ್ ಅಪೇಕ್ಷ ಮಲ್ಪುನಾಕುಲಾದ್ ಎಂಕುಲೆ ಉಡಲ್‌ಡ್ ಎಡ್ಡೆ ಸಾಕ್ಷಿ ಪಡೆಯೊಂದ ಪಂಡ್ದ್ ನಿಚ್ಚಯ ಮಲ್ತೊಂದ.</verse>
				<verse number="19">ಎಂಕ್ಲೆಗಾದ್ ಪ್ರಾರ್ಥನೆ ಮಲ್ಪೊಡು ಅಂದ್‌ದ್ ನಿಕ್ಲೆಡ ದಿಂಜ ನಟ್ಟೊನ್ವೆ, ದಾಯೆಗಂದ್ಂಡ ನಿಕ್ಲೆನ ಪ್ರಾರ್ಥನೆಡ್ದ್ ಯಾನ್ ಆಯಿನಾತ್ ಬೇಗ ನಿಕ್ಲೆ ಕೈತಲ್‌ ಕುಡೊರ ಬರುವೆ.</verse>
				<verse number="20">ಸಭೆ ಪನ್ಪಿ ಕುರಿಕುಲೆ ಮಲ್ಲ ಕುರುಬೆ ಆದುಪ್ಪು ಯೇಸು ಕ್ರಿಸ್ತೆ ನಿತ್ಯವಾಯಿನ ಒಡಂಬಡಿಕೆನ್ ನಿಚ್ಚಯ ಮಲ್ಪೆರೆಗಾದ್ ತನ ನೆತ್ತೆರ್‌ನ್ ಗುತ್ತುದೆ. ಸಮಾಧಾನದ ದೇವೆರ್ ನಮ ಕರ್ತವೆ ಆದುಪ್ಪು ಯೇಸುನು ಸೈತಿನಾಕುಲೆಡ್ದ್ ಜೀವೊಡು ಲಕ್ಕಾಯೆ. ನಿಕುಲು ಇಂಚಿತ್ತಿ ದೇವೆರೆ ಚಿತ್ತೊನು ಮಲ್ಪುಲೆಕ್ಕ ಮಾತ ಎಡ್ಡೆ ಕಾರ್ಯೊಲೆಗ್ ಬೋಡಾಪಿ ಅಗತ್ಯೊಲೆನ್ ನಿಕ್ಲೆಗ್ ಕೊರಡ್. ಯೇಸು ಕ್ರಿಸ್ತಡ್ ತನ್ಕ್ ಸರಿ ತೋಜುನೆನ್ ನಮಡ ನಡಪಾವಡ್. ಆಯಗ್ ಏನಿತ್ಯೇನಿಗ್ಲಾ ಮೈಮೆ ಉಂಡಾವಡ್. ಆಮೆನ್.</verse>
				<verse number="21"></verse>
				<verse number="22">ಸಹೋದ್ರೆರೇ, ಈ ಎಚ್ಚರಿಕೆದ ಪಾತೆರೊನು ಸಹಿಸೊನೊಡು ಪಂಡ್ದ್ ನಿಕ್ಲೆಡ ಕೇಂಡೊನ್ವೆ, ನಿಕ್ಲೆಗ್ ಒಂತೆಡ್ ಬರೆತೆ.</verse>
				<verse number="23">ನಮ ಸಹೋದರೆ ಆಯಿ ತಿಮೋಥಿಗ್ ಬುಡುಗಡೆ ಆಂಡ್ ಪನ್ಪಿನವು ನಿಕ್ಲೆಗ್ ತೆರಿದುಪ್ಪಡ್, ಆಯೆ ಬೇಗ ಬತ್ತೆಡ ಯಾನ್ಲಾ ಆಯಡೊಪ್ಪ ಬತ್ತ್‌ದ್ ನಿಕ್ಲೆನ್ ತೂಪೆ.</verse>
				<verse number="24">ನಿಕ್ಲೆನ ಸಭೆತ ಮಾತ ನಾಯಕೆರೆಗ್ಲಾ ಮಾತ ದೇವಜನೊಕುಲೆಗ್ಲಾ ವಂದನೆ ತೆರಿಪಾಲೆ. ಇತಾಲ್ಯ ದೇಶೊಡ್ದು ಬೈದಿನಾಕುಲು ನಿಕ್ಲೆಗ್ ವಂದನೆ ಪನ್ಪೆರ್.</verse>
				<verse number="25">ದೇವೆರೆ ದಯ ನಿಕ್ಲೆ ಮಾತೆರೆಡೊಪ್ಪ ಉಪ್ಪಡ್.</verse>
			</chapter>
		</book>
		<book number="59">
			<chapter number="1">
				<verse number="1">ದೇವೆರೆಗ್ಲಾ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಗ್ಲಾ ದಾಸೆ ಆದುಪ್ಪು ಯಾಕೋಬು ಬೇತೆ ದೇಶೊಲೆಡ್ ಪರಡ್ದ್ ಉಪ್ಪುನ ಇಸ್ರಾಯೇಲ್‌ದ ಪದ್ರಾಡ್ ಗೋತ್ರೊಲೆಗ್ ಬರೆಪಿನಿ. ನಿಕ್ಲೆಗ್ ಎಡ್ಡೆ ಆವಡ್.</verse>
				<verse number="2">ಎನ ಸಹೋದ್ರೆರೇ, ನಿಕ್ಲೆನ ನಂಬಿಕೆಗ್ ಆಪಿನ ಪರೀಕ್ಷೆ ತಾಳ್ಮೆನ್ ಪುಟ್ಟಾವುಂಡು ಅಂದ್‌ದ್ ತೆರಿಯೊಂದು, ನಿಕುಲು ತರತರತ ಭಂಗೊಡು ತಿಕ್ಕ್‌ದ್ ಬೂರ್ನಗ, ಅವು ಸಂತೋಷನೆ ಅಂದ್‌ದ್ ಎನ್ನೊನ್ಲೆ.</verse>
				<verse number="3"></verse>
				<verse number="4">ಆ ತಾಳ್ಮೆ ನಿಕ್ಲೆಡ ಪೂರ್ತಿ ಆದ್ ತೋಜಿದ್ ಬನ್ನಗ ನಿಕುಲು ಮಾತ ಎಡ್ಡೆ ಗುಣತಾಕುಲುಲಾ ಕಡಿಮೆದಾಂತಿನಾಕುಲುಲಾ ಆದುಪ್ಪುವರ್.</verse>
				<verse number="5">ನಿಕ್ಲೆಡ್ ಗೇನ ಕಡಿಮೆ ಇತ್ತ್ಂಡ, ಅಂಚಿನಾಕುಲು ದೇವೆರೆಡ ನಟ್ಟೊನಡ್. ಆಯೆ ಅವೆನ್ ನಿಕ್ಲೆಗ್ ಕೊರುವೆ. ನಿಕುಲು ನಟ್ಟಿನೆಕ್ಕಾದ್ ಆಯೆ ನಿಕ್ಲೆಗ್ ಬೇಜಾರ್‌ದಾಂತೆ ಕೊರ್ಪೆ.</verse>
				<verse number="6">ಆಂಡ ಸಂಶಯ ಮಲ್ಪಂದೆ ನಂಬಿಕೆಡ್ ನಟ್ಟೊಡು. ಸಂಶಯ ಮಲ್ಪುನಾಯೆ ಗಾಳಿಗ್ ಅಡಿಮೇಲ್ ಆಪಿ ಕಡಲ್ದ ಸೆರೆಕ್ಕ್ ಸಮ ಆದುಲ್ಲೆ.</verse>
				<verse number="7">ಆಯೆ ಸ್ಥಿರ ಆದುಪ್ಪುಜೆ, ಅಂಚಿತ್ತಿನಾಯೆ ಕರ್ತವಡ್ದ್ ದಾದಾಂಡಲಾ ತಿಕ್ಕುಂಡು ಅಂದ್‌ದ್ ಎನ್ನುನ ಬೊಡ್ಚಿ.</verse>
				<verse number="8">ಆಯೆ ರಡ್ಡ್ ಮನಸ್‌ದಾಯೆ ಆದ್ ಮಾತೆಟ್ಲಾ ಸ್ಥಿರದಾಂತಿನಾಯೆ ಆದುಲ್ಲೆ.</verse>
				<verse number="9">ಬಡತನೊಡು ಉಪ್ಪು ಸಹೋದರೆ ಮಿತ್ತ ಸ್ಥಿತಿಕ್ಕ್ ಬತ್ತೆ ಅಂದ್‌ದ್ ಸಂತೋಷ ಮಲ್ಪಡ್.</verse>
				<verse number="10">ಮಲ್ಲಾದಿಗೆ ಇತ್ತಿನಾಯೆ ದೇವೆರ್ ತನ್ಕ್ ಬಡತನ ಕೊರಿನೆಕ್ಕಾದ್ ಸಂತೋಷ ಮಲ್ಪಡ್. ದಾಯೆಗಂದ್ಂಡ, ಮಲ್ಲಾದಿಗೆ ಇತ್ತಿನಾಯೆ ಪಜಿರ್‌ದ ಪೂತ ಲೆಕ್ಕನೆ ನಾಶಾದ್ ಪೋಪೆ.</verse>
				<verse number="11">ಎಂಚಂದ್ಂಡ, ಸೂರ್ಯೆ ಮೂಡ್ದು ದೊಂಬು ಹಾಕ್‌ನಗ ಪಜಿರ್ ನುಂಗುಂಡು, ಬೊಕ್ಕ ಪೂ ತಾಲ್ದ್ ಐತ ಪೊರ್ಲು ನಾಶಾದ್ ಪೋಪಿಲೆಕ್ಕ ಮಲ್ಲಾದಿಗೆ ಇತ್ತಿನಾಯೆಲಾ ತನ ಪ್ರಯತ್ನೊಲೆಡ್ ನಾಶಾದ್ ಪೋಪೆ.</verse>
				<verse number="12">ಶೋಧನೆನ್ ಸಹಿಸೊಂದು ಸ್ಥಿರ ಆದುಪ್ಪುನಾಯೆ ಭಾಗ್ಯವಂತೆ; ಆಯೆ ತಕ್ಕದಾಯೆ ಅಂದ್‌ದ್ ತೋಜಿಯೆಡ ದೇವೆರೆನ್ ಪ್ರೀತಿ ಮಲ್ಪುನಾಕುಲೆಗ್ ವಾಗ್ದಾನ ಮಲ್ತ್‌ದಿನ ನಿತ್ಯಜೀವದ ಕಿರೀಟ ಆಯಗ್ ತಿಕ್ಕುಂಡು.</verse>
				<verse number="13">ಏರೆಗ್ಲಾ ಶೋಧನೆ ಆನಗ, “ಎಂಕ್ ದೇವೆರೆಡ್ದ್ ಶೋಧನೆ ಬೈದ್‌ಂಡ್,” ಅಂದ್‌ದ್ ಪನಡೆ. ದೇವೆರ್ ಪಡಿಕೆಂತಿನೆಕ್ಕ್ ಸಮ್ಮಂಧದಾಯೆ ಅತ್ತ್, ಆಯೆ ಏರೆನ್ಲಾ ಶೋಧನೆ ಮಲ್ಪುಜೆ.</verse>
				<verse number="14">ಆಂಡ ಪ್ರತಿಯೊರಿ ತನ ಸ್ವಂತ ದುರಾಶೆಗ್ ಬಲಿ ಆದ್ ತಿಕ್ಕ್‌ದ್ ಬೂರಿನೆಡ್ದಾದ್ ಶೋಧನೆ ಆಪುಂಡು.</verse>
				<verse number="15">ಆ ದುರಾಶೆಲೆಡ್ದ್ ಪಾಪದ ಕ್ರಿಯೊಲು ಪುಟ್ಟುಂಡು. ಬೊಕ್ಕ ಪಾಪ ಪೂರ್ತಿ ಆದ್ ಮರಣೊನು ಕನಪುಂಡು.</verse>
				<verse number="16">ಎನ ಪ್ರೀತಿದ ಸಹೋದ್ರೆರೇ, ಮೋಸೊಡು ಬೂರಡೆ.</verse>
				<verse number="17">ಮಾತ ಎಡ್ಡೆಂತಿನವುಲಾ ಕುಂದೆಲ್‌ದಾಂತಿ ಉಡಿಗೆರೆಲಾ ಬೊಲ್ಪುಲೆನ್ ಉಂಡು ಮಲ್ತಿ ಪರಲೋಕದ ಅಮ್ಮೆ ಆದುಪ್ಪು ದೇವೆರೆಡ್ದ್ ಜತ್ತ್‌ದ್ ಬರ್ಪುಂಡು. ಆಯೆ ಏಪೊಗ್ಲಾ ಎಡ್ಡೆಂತಿನೆನೇ ಕೊರ್ಪಿನಾಯೆ, ಅತ್ತ್‌ಡ ಆಯೆ ನಿರೆಲ್‌ದ ಲೆಕ್ಕ ದುಂಬು ಪಿರ ಪೋಪಿನಾಯೆ ಅತ್ತ್.</verse>
				<verse number="18">ತನ ಸತ್ಯ ಪಾತೆರೊನು ನಂಕ್ ಕೊರ್ದು ನಮನ್ ಪುಟ್ಟಾಯಿನೆಡ್ದ್ ನಮ ಆಯನ ಮಾತ ಸೃಷ್ಟಿಡ್ಲಾ ಆಯಗ್ ಸುರುತ್ತ ಫಲ ಆದುಲ್ಲ.</verse>
				<verse number="19">ಎನ ಪ್ರೀತಿದ ಸಹೋದ್ರೆರೇ, ಉಂದೆನ್ ತೆರಿಯೊನ್ಲೆ, ಪ್ರತಿಯೊರಿಲಾ ಕೇನುನೆಕ್ಕ್ ಬೇಗ, ಪಾತೆರ್‌ನೆಕ್ಕ್ ಮೆಲ್ಲ ಬೊಕ್ಕ ಕೋಪೊಗು ನಿಧಾನಿ ಆದುಪ್ಪೊಡು.</verse>
				<verse number="20">ದಾಯೆಗಂದ್ಂಡ, ನರಮಾನಿ ಕೋಪ, ದೇವೆರೆಗ್ ಮೆಚ್ಚಿಗೆ ಆದುಪ್ಪು ನೀತಿಗ್ ಸರಿ ಆದುಪ್ಪುಜಿ.</verse>
				<verse number="21">ಅಂಚಾದ್ ನಿಕ್ಲೆ ಜೀವನೊಡ್ದು ಮಾತ ನೀಚತನೊನ್ಲಾ ದುಷ್ಟತನೊನ್ಲಾ ದೆತ್ತ್‌ದ್ ಪಾಡ್ದ್, ದೇವೆರ್ ನಿಕ್ಲೆ ಉಡಲ್‌ಡ್ ದೀತಿನ ಪಾತೆರೊಗು ದೀನತೆಡ್ ಇಡೆ ಕೊರ್ಲೆ, ದಾಯೆಗಂದ್ಂಡ ನಿಕ್ಲೆನ ಆತ್ಮೊನು ರಕ್ಷಣೆ ಮಲ್ಪುನ ಶಕ್ತಿ ಆ ಪಾತೆರೊಗು ಉಂಡು.</verse>
				<verse number="22">ಆಂಡ ದೇವೆರೆ ಪಾತೆರೊನು ಕೇನುನು ಮಾತ್ರ ಅತ್ತಂದೆ, ಅವು ದಾನೆ ಪನ್ಪುಂಡು ಅಂಚೆನೇ ನಡಪುನಾಕುಲು ಆದುಪ್ಪುಲೆ, ಇಜ್ಜಾಂಡ ನಿಕುಲು ನಿಕ್ಲೆಗೇ ಮೋಸ ಮಲ್ತೊಂದುಪ್ಪುವರ್.</verse>
				<verse number="23">ಏರಾಂಡಲಾ ದೇವೆರೆ ಪಾತೆರೊನು ಕೇಂಡ್ದ್ ಐಕ್ ತಕ್ಕ ನಡತಿಜಿಡ, ಆಯೆ ತನ ಮೋನೆನ್ ಕನ್ನಡಿಡ್ ತೂಪಿ ನರಮಾನಿಗ್ ಸಮ ಆದುಲ್ಲೆ.</verse>
				<verse number="24">ಅಂಚಿತ್ತಿನಾಯೆ ತನನ್ ತೂದು ಪಿದಾಡ್ದ್ ಪೋಯಿ ಕೂಡ್ಲೆ ತಾನ್ ಎಂಚ ಇತ್ತೆ ಅಂದ್‌ದ್ ಅಪಗನೆ ಮದತ್‌ದ್ ಬುಡ್ಪೆ.</verse>
				<verse number="25">ಆಂಡ ತನನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಗ್ ಬುದ್ಧಿ ಕೊರ್ದು ಕೇಂಡಿನೆನ್ ಮದಪಂದೆ, ಐತ ಪ್ರಕಾರ ನಡಪುನಾಯೆ ಆದುಲ್ಲೆಡ ದೇವೆರ್ ಆಯನ್ ಆಶೀರ್ವದಿಪುವೆ.</verse>
				<verse number="26">ಏರಾಂಡಲಾ ತನ ನಾಲಯಿಗ್ ಕಡಿವಾಣ ಪಾಡಂದೆ, ಭಕ್ತೆ ಅಂದ್‌ದ್ ಎನ್ನುನಾಯೆ ತನ ಉಡಲ್‌ಗ್ ಮೋಸ ಮಲ್ತೊಂದುಪ್ಪುವೆ. ಆಯನ ಭಕ್ತಿ ವ್ಯರ್ಥ ಆದುಂಡು.</verse>
				<verse number="27">ಸಂಕಟೊಡು ಬೂರ್ದು ದಿಕ್ಕ್‌ದಾಂತಿನಾಕುಲೆನ್ಲಾ ವಿಧವೆರೆನ್ಲಾ ಪರಾಂಬರಿತ್‌ದ್, ಲೋಕದ ದೋಷ ಆಯಗ್ ತಾಗಂದಿಲೆಕ್ಕ ಕಾಪುನವೇ ಅಮ್ಮೆ ಆದುಪ್ಪು ದೇವೆರೆ ಎದುರುಡು ಶುದ್ಧಲಾ ಮೈಲೆದಾಂತಿನವುಲಾ ಆದುಪ್ಪು ಭಕ್ತಿ.</verse>
			</chapter>
			<chapter number="2">
				<verse number="1">ಎನ ಸಹೋದ್ರೆರೇ, ಮೈಮೆದ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ ನಂಬಿಕೆ ದೀತಿನಕುಲಾದುಪ್ಪು ನಿಕುಲು ಭೇದಭಾವ ಮಲ್ಪೆರೆ ಬಲ್ಲಿ.</verse>
				<verse number="2">ಎಂಚಂದ್ಂಡ, ಒರಿ ಬಂಗಾರ್‌ದ ಉಂಗಿಲ, ಎಡ್ಡೆ ಕುಂಟುನು ಪಾಡೊಂದು ಬೊಕ್ಕೊರಿ ಬಡವೆ ಮೈಲೆ ಕುಂಟು ಪಾಡೊಂದು ನಿಕ್ಲೆ ಸಭೆಕ್ ಬನ್ನಗ,</verse>
				<verse number="3">ನಿಕುಲು ಎಡ್ಡೆ ಕುಂಟು ಪಾಡ್ದಿನಾಯಗ್, “ಮರ್ಯಾದಿ ಕೊರ್ದು ಎದುರುಡು ಕುಲ್ಲಾದ್,” ಬೊಕ್ಕ ಬಡವಗ್, “ಈ ಅಲ್ಪ ದೂರೊಡು ಉಂತುಲ, ಇಜ್ಜಾಂಡ ಎನ ಕಾರಕೈತಲ್ ಕುಲ್ಲುಲ,” ಅಂದ್‌ದ್ ಪಂಡರ್ಡ,</verse>
				<verse number="4">ನಿಕುಲು ನಿಕ್ಲೆ ಉಲಯಿ ಭೇದಭಾವ ಮಲ್ತ್‌ದ್, ಹಾಳ್ ಆಲೋಚನೆಡ್ದ್ ತೀರ್ಪು ಮಲ್ಪುನಾಕುಲು ಆಯರತ್ತಾ?</verse>
				<verse number="5">ಎನ ಪ್ರೀತಿದ ಸಹೋದ್ರೆರೇ ಕೇನ್ಲೆ, ದೇವೆರ್ ಈ ಲೋಕದ ಬಡವನ್ ಅಜತ್‌ದ್ ನಂಬಿಕೆಡ್ ಐಶ್ವರ್ಯವಂತೆ ಆದ್ ಮಲ್ತ್‌ದಿಜೆನಾ? ತನನ್ ಪ್ರೀತಿ ಮಲ್ಪುನಾಕುಲೆಗ್ ದೇವೆರ್ ವಾಗ್ದಾನ ಮಲ್ತ್‌ದಿನ ಪರಲೋಕ ರಾಜ್ಯ ಅಕ್ಲೆಗ್ಲಾ ಅಕ್ಲೆನ ಸ್ವಂತ ಆದ್ ತಿಕ್ಕುಂಡತ್ತಾ?</verse>
				<verse number="6">ನಿಕುಲಾಂಡಲಾ ಬಡವೆರೆಗ್ ಅವಮಾನ ಮಲ್ಪುವರ್ ಅತ್ತಂದೆ ನಿಕ್ಲೆನ್ ಬಲಾತ್ಕಾರೊಡು ನ್ಯಾಯಾಲಯೊಗು ಒಯ್ಪುನಾಕುಲು ಐಶ್ವರ್ಯವಂತೆರೇ ಅತ್ತಾ?</verse>
				<verse number="7">ನಿಕುಲು ಆರಾಧನೆ ಮಲ್ಪುನ ಕ್ರಿಸ್ತನ ಎಡ್ಡೆ ಪುದರ್‌ನ್ ದೂಷಿಯುನಾಕುಲು ಅಕುಲೇ ಅತ್ತಾ?</verse>
				<verse number="8">ಆಂಡಲಾ ನ್ಯಾಯಕಟ್ಟ್‌ಗ್ ಸರಿಯಾದ್ ನಿನ ನಿರೆತಾಯನ್ ನಿನಲೆಕ್ಕನೇ ಪ್ರೀತಿ ಮಲ್ಪೊಡು ಇನ್ಪಿನ ರಾಜ ನಿಯಮೊಲೆನ್ ಕೈಕೊನುವರ್ಡ ನಿಕುಲು ಎಡ್ಡೆಂತಿನೆನ್ ಮಲ್ಪುನಾಕುಲು ಆದುಲ್ಲರ್.</verse>
				<verse number="9">ಆಂಡ ನಿಕುಲು ಭೇದಭಾವ ಮಲ್ಪುನಾಕುಲು ಆದಿತ್ತ್ಂಡ ಪಾಪ ಮಲ್ಪುನಾಕುಲು ಆದಿತ್ತ್‌ದ್ ಅಪರಾಧಿಲು ಅಂದ್‌ದ್ ನ್ಯಾಯಕಟ್ಟ್‌ಡ್ದ್‌ ನಿಕ್ಲೆಗ್ ತೀರ್ಪು ಆಪುಂಡು.</verse>
				<verse number="10">ದಾಯೆಗಂದ್ಂಡ, ಒರಿ ಇಡೀ ನ್ಯಾಯಕಟ್ಟ್‌ದ ಲೆಕ್ಕ ನಡತ್‌ದ್ ಒಂಜೆಟ್ಟ್ ತತ್ತೆಡ, ಆಯೆ ಮಾತೆಟ್ಲಾ ತತ್ತಿನಾಯೆ ಆದುಲ್ಲೆ.</verse>
				<verse number="11">ದಾಯೆಗಂದ್ಂಡ, “ವ್ಯಭಿಚಾರ ಮಲ್ಪೆರೆ ಬಲ್ಲಿ” ಪಂಡಿನ ಅವ್ವೇ ದೇವೆರ್, “ಕೆರಿಯೆರೆ ಬಲ್ಲಿ” ಪಂಡ್ದ್‌ಲಾ ಪನ್ತೆ. ಅಂಚಾದ್ ಈ ವ್ಯಭಿಚಾರ ಮಲ್ತ್‌ಜಿಡಲಾ ಒರಿಯನ್ ಕೆರಿಯಡ, ನ್ಯಾಯಕಟ್ಟ್‌ಗ್ ತತ್ತಿನಾಯೆ ಆದುಲ್ಲ.</verse>
				<verse number="12">ಅಂಚಾದ್ ನಿಕ್ಲೆನ್ ಬುಡುಗಡೆ ಮಲ್ಪುನ ನ್ಯಾಯಕಟ್ಟ್‌ಡ್ದೇ ನಿಕ್ಲೆಗ್ ತೀರ್ಪು ಆಪುಂಡು ಇನ್ಪಿನೆನ್ ತೆರಿಯೊಂದು ಐಕ್ ತಕ್ಕ ಪಾತೆರ್ಲೆ, ಕಾರ್ಯ ಮಲ್ಪುಲೆ.</verse>
				<verse number="13">ದಾಯೆಗಂದ್ಂಡ, ಕರುಣೆ ತೋಜಾವಂದಿನಾಯಗ್ ಕರುಣೆ ತಿಕ್ಕಂದ್. ಆಂಡ ಈ ಕರುಣೆ ತೋಜಾಯಡ, ದೇವೆರ್ ನಿನನ್ ನ್ಯಾಯತೀರ್ಪು ಮಲ್ಪುನಗ ನಿಕ್ಕ್ ಕರುಣೆ ತೋಜಾವೆ.</verse>
				<verse number="14">ಎನ ಸಹೋದ್ರೆರೇ, ನಿಕ್ಲೆಡ್ ಒರಿ ನಂಬಿಕೆ ಉಂಡು ಅಂದ್‌ದ್ ಪನೊಂದು, ಆಯ ಕ್ರಿಯೊಲೆಡ್ ಅವು ತೋಜಿದ್ ಬತ್ತ್‌ಜಿಡ ದಾನೆ ಪ್ರಯೋಜನ? ಅಂಚಿತ್ತಿ ನಂಬಿಕೆ ಆಯನ್ ರಕ್ಷಣೆ ಮಲ್ಪುಂಡಾ?</verse>
				<verse number="15">ಒರಿ ಸಹೋದ್ರಗ್ ಅತ್ತ್‌ಡ ಸಹೋದ್ರಿಗ್ ಕುಂಟು, ದಿನತ ಪಡಿ ದಾಂತೆ ಉಪ್ಪುನಗ,</verse>
				<verse number="16">ನಿಕ್ಲೆಡ್ ಒರಿ ಅಕ್ಲೆ ಶರೀರೊಗು ಬೋಡಾಪಿನೆನ್ ಕೊರಂದೆ, ಸಮಾಧಾನೊಡು ಪೋಲೆ, ಚಳಿ ಕೈತೊನ್ಲೆ, ಬಂಜಾರ ಉನ್ಲೆ ಅಂದ್‌ದ್ ಪಾತೆರೊಡು ಪಂಡ್ಂಡ ದಾನೆ ಪ್ರಯೋಜನ?</verse>
				<verse number="17">ಅಂಚಿನ ಕ್ರಿಯೊಲುದಾಂತಿನ ನಂಬಿಕೆ ತನಡ ಜೀವದಾಂತಿನವು ಆದುಂಡು.</verse>
				<verse number="18">ಆಂಡ ಏರಾಂಡಲಾ ಒರಿ, “ಒರಿಯಡ ನಂಬಿಕೆ ಉಂಡು, ಬೊಕ್ಕೊರಿಯಡ ಕ್ರಿಯೊಲು ಉಂಡು” ಅಂದ್‌ದ್ ಪನ್ಪೆ. ಆಂಡ ಎನ ಉತ್ತರ, “ಏರಾಂಡಲಾ ಕ್ರಿಯೊಲಿಜ್ಜಂದೆ ನಂಬಿಕೆನ್ ಎಂಚ ತೋಜಾವೊಲಿ, ಯಾನ್ ಎನ ಕ್ರಿಯೊಲೆಡ್ ನಂಬಿಕೆನ್ ನಿಕ್ಕ್ ತೋಜಾವೆ,” ಅಂದ್‌ದ್ ಪನುವೆ ಅತ್ತಾ?</verse>
				<verse number="19">ಒರಿಯೇ ದೇವೆರ್ ಉಲ್ಲೆ ಅಂದ್‌ದ್ ಈ ನಂಬುವನಾ? ಅವು ಎಡ್ಡೆನೇ. ದೆವ್ವೊಲುಲಾ ಉಂದೆನ್ ನಂಬುದು ಪೋಡಿಗೆಡ್ ನಡುಗುವ.</verse>
				<verse number="20">ಓ ಬುದ್ಧಿದಾಂತಿನಾಯಾ, ಕ್ರಿಯೆದಾಂತಿ ನಂಬಿಕೆ ವ್ಯರ್ಥ ಆದುಂಡು ಪನ್ಪಿನೆಕ್ಕ್ ದೃಷ್ಟಾಂತ ಬೋಡಾ?</verse>
				<verse number="21">ನಮ ಅಮ್ಮೆ ಆಯಿ ಅಬ್ರಹಾಮು ತನ ಮಗೆ ಇಸಾಕನ್ ಬಲಿಪೀಠದ ಮಿತ್ತ್ ಅರ್ಪಣೆ ಮಲ್ಪುನಗ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಯಿನಿ ನಂಬಿಕೆದ ಕ್ರಿಯೊಲೆಡ್ದೇ ಅತ್ತಾ?</verse>
				<verse number="22">ಆಯನ ನಂಬಿಕೆಲಾ ಕ್ರಿಯೊಲುಲಾ ಅಲ್ಪ ಒಟ್ಟಾದ್ ಬೇಲೆ ಮಲ್ತ್ಂಡ್. ಆಯನ ಕ್ರಿಯೊಲೆಡ್ದಾದ್ ಆಯನ ನಂಬಿಕೆ ಪೂರ್ತಿ ಆಂಡ್ ಅಂದ್‌ದ್ ತೋಜುಂಡತ್ತಾ.</verse>
				<verse number="23">ಅಬ್ರಹಾಮು ದೇವೆರೆನ್ ನಂಬಿಯೆ. ಬೊಕ್ಕ ಆ ನಂಬಿಕೆನೇ ಆಯನ ಲೆಖ್ಖೊಗು ನೀತಿದವು ಅಂದ್‌ದ್ ಗೆನ್ತ್‌ದ್ಂಡ್ ಪನ್ಪಿನ ಶಾಸ್ತ್ರದ ಪಾತೆರ ಇಂಚ ಪೂರ್ತಿ ಆಂಡ್. ಬೊಕ್ಕ ದೇವೆರೆ ಸ್ನೇಹಿತೆ ಪನ್ಪಿನ ಪುದರ್ ಆಯಗ್ ಬತ್ತ್ಂಡ್.</verse>
				<verse number="24">ನರಮಾನಿ ಕ್ರಿಯೊಲೆಡ್ದ್ ನೀತಿದಾಯೆ ಅಂದ್‌ದ್ ತೀರ್ಪು ಪಡೆಪೆ ಅತ್ತಂದೆ ಬಜೀ ನಂಬಿಕೆಡ್ದೇ ಅತ್ತ್ ಅಂದ್‌ದ್ ತೂಪರ್.</verse>
				<verse number="25">ಅವ್ವೇ ರೀತಿಡ್ ವೇಶ್ಯೆ ರಹಾಬುಲಾ ಗೂಢಾಚಾರೆರೆನ್ ತನ ಇಲ್ಲಡ್ ಸೇರಾವೊಂದು, ಬೇತೆ ಸಾದಿಡ್ ಅಕ್ಲೆನ್ ಕಡಪುಡ್ದು ಕೊರ್ದು ಕ್ರಿಯೊಲೆಡ್ದ್ ನೀತಿವಂತೆದಿ ಅಂದ್‌ದ್ ತೀರ್ಪು ಪಡೆಯಲ್ ಅತ್ತಾ?</verse>
				<verse number="26">ಆತ್ಮದಾಂತಿ ಶರೀರ ಎಂಚ ಜೀವದಾಂತಿನವು ಆದುಂಡಾ, ಅಂಚೆನೇ ಕ್ರಿಯೆದಾಂತಿ ನಂಬಿಕೆಲಾ ಜೀವದಾಂತಿನವು ಆದುಂಡು.</verse>
			</chapter>
			<chapter number="3">
				<verse number="1">ಎನ ಸಹೋದ್ರೆರೇ, ಬೋಧಕೆರ್ ಆಯಿ ನಂಕ್ ಕಠಿಣವಾಯಿನ ತೀರ್ಪು ಆಪುಂಡು ಅಂದ್‌ದ್ ತೆರಿಯೊಂದು ದಿಂಜ ಮಂದಿ ಬೋಧಕೆರ್ ಆವಡೆ.</verse>
				<verse number="2">ಮಸ್ತ್ ಸಂಗತಿಡ್ ನಮ ಮಾತೆರ್ಲಾ ದಿಂಜ ತಪ್ಪು ಮಲ್ಪುನಾಕುಲೇ. ಒರಿ ಪಾತೆರೊಡು ತಪ್ಪುಜೆಡ ಆಯೆ ತಕ್ಕದಾಯೆ, ತನ ಶರೀರೊನು ಹತೋಟಿಡ್ ದೀವೊನುನಾಯೆ ಪರಿಪೂರ್ಣೆ ಆದುಲ್ಲೆ.</verse>
				<verse number="3">ಕುದುರೆಲೆನ್ ತನ ಹತೋಟಿಡ್ ದೀವೊನಿಯೆರೆಗಾದ್ ಐಕ್ಲೆ ಬಾಯಿಗ್ ಕಡಿವಾಣ ಪಾಡ್ವೆ. ಅಪಗ ಐಕ್ಲೆ ಶರೀರೊನು ನಂಕ್ ಬೋಡಾಯಿಲೆಕ್ಕ ತಿರ್ಗಾವೆರೆ ಸಾದ್ಯ ಆಪುಂಡು.</verse>
				<verse number="4">ಕಪ್ಪಲ್‌ನ್ ತೂಲೆ, ಅವು ಮಲ್ಲ ಆದಿತ್ತ್‌ಂಡಲಾ ಬಲವಾಯಿನ ಗಾಳಿಡ್ದ್ ನೂಕೊಂದು ಪೋಪುಂಡು. ಆಂಡಲಾ ಅವೆನ್ ನಡಪಾವುನಾಯೆ ಬಜೀ ಎಲ್ಯ ಚುಕ್ಕಾಣಿಡ್ದ್ ತನ್ಕ್ ಮನಸ್ ಬತ್ತಿ ಕಡೆಕ್ಕ್ ತಿರ್ಗಾವೆ.</verse>
				<verse number="5">ಅಂಚೆನೇ ನಾಲಯಿಲಾ ಒಂಜಿ ಎಲ್ಯ ಅಂಗ ಆದಿತ್ತ್‌ದ್ ಮಲ್ಲ ಕಾರ್ಯೊಲೆನ್ ಕೊಚ್ಚೊನುಂಡು. ತೂಲ, ಒಂಜಿ ಎಲ್ಯ ತೂತ ಕಿಡಿ ಏತ್ ಮಲ್ಲ ಕಾಡ್‌ನ್ಲಾ ಪೊತ್ತಾವುಂಡು.</verse>
				<verse number="6">ನಾಲಯಿಲಾ ಒಂಜಿ ತೂತ ಕಿಡಿ ಆದುಂಡು. ಅವು ಲೋಕದ ಮಾತ ಅನ್ಯಾಯೊಡ್ದು ದಿಂಜಿದಿತ್ತ್‌ದ್ ಇಡೀ ಶರೀರೊನೇ ಹಾಳ್ ಮಲ್ಪುಂಡು. ಐಟ್ಟ್ ನರಕದ ತೂ ಉಪ್ಪುನೆಡ್ದ್ ಇಡೀ ಬದ್‌ಕ್‌ನೇ ಪೊತ್ತಾದ್ ಪಾಡುಂಡು.</verse>
				<verse number="7">ನರಮಾನಿ ಮಾತ ತರತ ಪ್ರಾಣಿ ಪಕ್ಷಿ ಪರಪುನವು ನೀರ್‌ಡ್ ಉಪ್ಪುನವು ಮಾತೆನ್ಲಾ ಹತೋಟಿಡ್ ದೀವೊನೊಲಿ.</verse>
				<verse number="8">ಆಂಡ ಏರೆಗ್ಲಾ ನಾಲಯಿನ್ ಹತೋಟಿಡ್ ದೀವೊನಿಯೆರೆಗ್ ಆವಂದ್. ಅವು ಮನಿಪಂದೆ ಕುಲ್ಲಂದಿನವುಲಾ, ಪಡಿಕೆಂತಿನವುಲಾ ಆದಿತ್ತ್‌ದ್ ಕೆರ್ಪಿ ವಿಷೊಡ್ದು ದಿಂಜಿದುಂಡು.</verse>
				<verse number="9">ನಮ ನಾಲಯಿಡ್ ನಮ ಕರ್ತವೆ ಆದುಪ್ಪು ಅಮ್ಮೆರೆನ್ ಪುಗರುವ, ಅವ್ವೇ ನಾಲಯಿಡ್ ನಮ ದೇವೆರೆ ರೂಪೊಡು ಉಂಡು ಮಲ್ತ್‌ದಿನ ನರಮಾನಿಲೆನ್ ಶಾಪಿಯುವ.</verse>
				<verse number="10">ಇಂಚ ಒಂಜೇ ನಾಲಯಿಡ್ದ್ ಆಶೀರ್ವಾದಲಾ ಶಾಪಲಾ ಪಿದಾಡ್ದ್ ಬರ್ಪುಂಡು. ಎನ ಸಹೋದ್ರೆರೇ, ಇಂಚ ಉಪ್ಪುನ ಸರಿ ಅತ್ತ್.</verse>
				<verse number="11">ಒಂಜೇ ವಸರ್‌ದ ದಂಡ್‌ಡ್ದ್ ಚೀಪೆ ನೀರ್‌ಲಾ ಕೈಪೆ ನೀರ್‌ಲಾ ಒಟ್ಟುಗು ಬರಿಯೆರೆ ಸಾದ್ಯ ಉಂಡಾ?</verse>
				<verse number="12">ಎನ ಸಹೋದ್ರೆರೇ, ಅಂಜೂರದ ಮರೊಟು ಇಪ್ಪೆದ ಪರ್ಂದ್ ಬುಡ್ಪುಂಡ; ಇಜ್ಜಿಡ ದ್ರಾಕ್ಷೆಬೂರುಡು ಅಂಜೂರದ ಪರ್ಂದ್ ಬುಡಿಯೆರೆ ಸಾದ್ಯ ಉಂಡಾ? ಕಂಡಿತಾದ್ ಇಜ್ಜಿ. ಅಂಚೆನೇ, ಉಪ್ಪುನೀರ್‌ದ ವಸರ್‌ಡ್ದ್ ಚೀಪೆ ನೀರ್ ಬರಿಯೆರೆ ಸಾದ್ಯ ಇಜ್ಜಿ.</verse>
				<verse number="13">ನಿಕ್ಲೆಡ್ ಬುದ್ಧಿವಂತೆಲಾ ಆಲೋಚನೆದಾಯೆಲಾ ಏರ್? ಆಯೆ ಎಡ್ಡೆ ನಡತೆಡ್ದ್ ಸಜ್ಜನಿಗೆದ ಬುದ್ಧಿಡ್ ತನ ಕ್ರಿಯೊಲೆನ್ ತೋಜಾವಡ್.</verse>
				<verse number="14">ಆಂಡ ನಿಕ್ಲೆ ಉಡಲ್‌ಡ್ ಮಚ್ಚರಲಾ ಸ್ವಾರ್ಥೊಡ್ಲಾ ದಿಂಜಿದಿತ್ತ್‌ಂಡ, ನಿಕುಲು ಸತ್ಯೊಗು ವಿರೋಧಾದ್ ಸುಳ್ಳು ಪಾತೆರಂದೆ ಪುಗರೊನಂದೆ ಉಪ್ಪುಲೆ.</verse>
				<verse number="15">ಉಂದು ಮಿತ್ತ್‌ಡ್ದ್ ಬರ್ಪಿ ಗೇನ ಅತ್ತ್, ಈ ಸಂಗತಿಲು ಲೋಕದವುಲಾ ಅಧರ್ಮದವುಲಾ ಆದಿತ್ತ್‌ದ್, ದೆವ್ವೊಲೆಗ್ ಸಮ್ಮಂಧ ಆದುಂಡು.</verse>
				<verse number="16">ದಾಯೆಗಂದ್ಂಡ ಮಚ್ಚರಲಾ ಸ್ವಾರ್ಥಲಾ ಓಲು ಉಂಡಾ, ಅಲ್ಪ ಗಲಿಬಿಲಿಲಾ ಮಾತ ತರತ ಪಡಿಕೆಂತಿನವುಲಾ ಉಪ್ಪುಂಡು.</verse>
				<verse number="17">ಆಂಡ ಮಿತ್ತ್‌ಡ್ದ್ ಬರ್ಪಿನ ಗೇನ, ಸುರುಟ್ಟು ನಿರ್ಮಲದವು ಆದುಪ್ಪುಂಡು. ಅವು ಸಮಾಧಾನದವು, ಶಾಂತದವು, ಒಪ್ಪಿಯೊನ್ನವು, ಕರುಣೆ ಬೊಕ್ಕ ಎಡ್ಡೆ ಫಲೊಕ್ಲೆಡ್ ದಿಂಜಿದಿನವು, ಭೇದಭಾವದಾಂತಿನವು, ಕಪಟದಾಂತಿನವು ಆದುಂಡು.</verse>
				<verse number="18">ಬೊಕ್ಕ ಸಮಾಧಾನ ಬಯಕುನಾಕುಲು ಸಮಾಧಾನದ ಬಿತ್ತ್‌ನ್ ಬಿತ್ತ್‌ದ್ ನೀತಿದ ಫಲೊನು ಕೊಯ್ಪೆರ್.</verse>
			</chapter>
			<chapter number="4">
				<verse number="1">ನಿಕ್ಲೆ ಉಲಯಿ ಲಡಾಯಿಲಾ ಉರ್ಡಾಟಲಾ ದಾಯೆಗ್ ಆಪುಂಡು? ಅವು ನಿಕ್ಲೆನ ಹಾಳ್ ದುರಾಶೆಲೆಡ್ದ್ ಬರ್ಪಿನವು ಅತ್ತಾ?</verse>
				<verse number="2">ನಿಕುಲು ಬಯಕುವರ್, ಆಂಡ ತಿಕ್ಕುಜಿ. ಕೆರಿಯೆರೆ ತಯಾರಾಪರ್, ಮಚ್ಚರ ಮಲ್ಪುವರ್, ನಿಕ್ಲೆಗ್ ಅವು ತಿಕ್ಕಂದೆ ಪೋನಗ ಅವು ತಿಕ್ಕೆರೆ ಬೋಡಾದ್ ನಿಕುಲು ಉರ್ಡಾಟಲಾ ಲಡಾಯಿಲಾ ಮಲ್ಪುವರ್. ನಿಕುಲು ದೇವೆರೆಡ ನಟ್ಟೊನಂದೆ ಇತ್ತಿನೆಡ್ದ್ ನಿಕ್ಲೆಗ್ ದಾಲಾ ತಿಕ್ಕುಜಿ.</verse>
				<verse number="3">ನಿಕುಲು ನಟ್ಟೊನ್ನಗ ನಿಕ್ಲೆನ ಆಲೋಚನೆ ಪಡಿಕೆಂತಿನವು ಆದಿತ್ತಿನೆಡ್ದ್ ನಿಕ್ಲೆಗ್ ತಿಕ್ಕುಜಿ. ನಿಕುಲು ನಿಕ್ಲೆನ ಸ್ವಂತ ಶರೀರದ ಆಸೆಗಾದ್ ಮಾತ್ರ ನಟ್ಟೊನುವರ್.</verse>
				<verse number="4">ಹಾದ್ರದ ಬುದ್ಧಿದಾಕುಲೇ, ಲೋಕದ ಪಡಿಕೆಂತಿ ಪ್ರೀತಿಡ್ ಉಪ್ಪುನವು ದೇವೆರೆಗ್ ವಿರೋಧದವು ಆದುಂಡು ಇನ್ಪಿನೆನ್ ನಿಕುಲು ತೆರಿದಿಜರಾ? ಅಂಚಾಂಡ ಲೋಕದ ಪಡಿಕೆಂತಿ ಪ್ರೀತಿಡ್ ಈ ಉಪ್ಪುವಡ, ಈ ನಿನ ದೇವೆರೆಗ್ ಪಗೆನಾಯೆ ಆದುಪ್ಪುವ.</verse>
				<verse number="5">“ನಮ ಉಲಯಿಡ್ ದೇವೆರ್ ದೀತಿನ ಆತ್ಮ, ದೇವೆರೆಡೊಪ್ಪನೇ ಉಪ್ಪೊಡು ಅಂದ್‌ದ್ ದೇವೆರ್ ಬಯಕುವೆ,” ಇನ್ಪಿನ ಶಾಸ್ತ್ರದ ಪಾತೆರ ಅರ್ಥದಾಂತಿನವು ಅಂದ್‌ದ್ ಎನ್ನುವರಾ?</verse>
				<verse number="6">ಆಂಡ ಆಯೆ ದಿಂಜ ದಯ ಕೊರ್ಪೆ. ಶಾಸ್ತ್ರೊಡು ಪನ್ಪಿಲೆಕ್ಕನೇ, “ದೇವೆರ್ ಅಹಂಕಾರಿಲೆಗ್ ಎದುರುಂತುವೆ, ಆಂಡ ತಗ್ಗ್‌ದಿನಾಕುಲೆಗ್ ದಯ ಕೊರ್ಪೆ.”</verse>
				<verse number="7">ಅಂಚಾಯಿನೆಡ್ದ್ ದೇವೆರೆ ಎದುರುಡು ನಿಕ್ಲೆನ್ ತಗ್ಗಾವೊನ್ಲೆ. ಸೈತಾನಗ್ ಎದುರುಂತುಲೆ, ಅಪಗ ಸೈತಾನೆ ತಾನೆ ನಿಕ್ಲೆನ್ ಬುಡ್ದು ದೂರ ಬಲ್ಪುವೆ.</verse>
				<verse number="8">ದೇವೆರ್ ಕೈತಲ್‌ ಬರ್ಪೆ, ಪಾಪಿಲೇ, ನಿಕ್ಲೆ ಕೈನ್ ದೆಕ್ಕೊನ್ಲೆ. ರಡ್ಡ್ ಮನಸ್‌ದಾಕುಲೇ ನಿಕ್ಲೆ ಉಡಲ್‌ನ್ ಶುದ್ಧ ಮಲ್ತೊನ್ಲೆ.</verse>
				<verse number="9">ನಿಕುಲು ಮಲ್ತಿನೆಕ್ಕಾದ್ ಮುರೆಡ್ಲೆ, ದುಃಖ ಮಲ್ಪುಲೆ, ಬುಲ್ಪುಲೆ. ನಿಕ್ಲೆನ ತೆಲಿಕೆ ದುಃಖ ಆದ್ ಪೋವಡ್, ನಿಕ್ಲೆ ಸಂತೋಷ ಬೇಜಾರ್‌ಡ್ ಪೋವಡ್.</verse>
				<verse number="10">ಕರ್ತವ ಎದುರುಡು ನಿಕ್ಲೆನ್ ತಗ್ಗಾವೊನ್ಲೆ. ಅಪಗ ಆಯೆ ನಿಕ್ಲೆನ್ ಮಿತ್ತ್ ಕನಪೆ.</verse>
				<verse number="11">ಸಹೋದ್ರೆರೇ, ಒರಿಯಗ್ ಒರಿ ನಿಂದೆ ಮಲ್ಪಡೆ. ಏರಾಂಡಲಾ ತನ ಸಹೋದ್ರಗ್ ನಿಂದೆ ಮಲ್ತ್‌ದ್ ತನ ಸಹೋದ್ರನ ಸಂಗತಿಡ್ ತೀರ್ಪು ಮಲ್ತ್ಂಡ, ಆಯೆ ನ್ಯಾಯಕಟ್ಟ್‌ಗ್ ನಿಂದೆ ಮಲ್ತ್‌ದ್ ತೀರ್ಪು ಮಲ್ತಿಲೆಕ್ಕ ಆವು. ಆಂಡ ಈ ನ್ಯಾಯಕಟ್ಟ್‌ಡ್ ಬರೆತಿನೆನ್ ತೀರ್ಪು ಮಲ್ಪುವಡ, ಈ ನ್ಯಾಯತೀರ್ಪುನಾಯೆ ಅಂದ್‌ದ್ ಎನ್ನುವ ಅತ್ತಂದೆ ನ್ಯಾಯಕಟ್ಟ್‌ನ್ ಕೈಕೊನುನಾಯೆ ಆದುಪ್ಪುಜ,</verse>
				<verse number="12">ನ್ಯಾಯಕಟ್ಟ್ ಕೊರ್ತಿನಾಯೆಲಾ ನ್ಯಾಯಾಧಿಪತಿಲಾ ಒರಿಯೇ; ರಕ್ಷಣೆ ಮಲ್ಪುನಾಯೆಲಾ ನಾಶ ಮಲ್ಪುನಾಯೆಲಾ ಆಯೆನೇ. ಆಂಡ ನಿನ ನಿರೆತ್ತಾಯನ ಸಂಗತಿಡ್ ತೀರ್ಪು ಮಲ್ಪುನಾಯೆ ಈ ಏರ್?</verse>
				<verse number="13">“ಇನಿ ಇಜ್ಜಿಡ ಎಲ್ಲೆ ಇಂಚಿತ್ತಿ ಊರುಗು ಪೋದು ಅಲ್ಪ ಒಂಜಿ ವರ್ಸ ಉಂತುಗ, ಅಲ್ಪ ವ್ಯಾಪಾರ ಮಲ್ತ್‌ದ್ ಲಾಭ ಮಲ್ಪುಗ,” ಅಂದ್‌ದ್ ಪನ್ಪಿನಾಕುಲೇ ಇಂಚಿ ಕೇನ್ಲೆ,</verse>
				<verse number="14">ಎಲ್ಲೆ ನಿಕ್ಲೆ ಜೀವನ ದಾದ ಆಪುಂಡು ಅಂದ್‌ದ್ ನಿಕ್ಲೆಗ್ ತೆರಿದ್‌ಂಡಾ? ನಿಕ್ಲೆ ಜೀವನ ಕಾಂಡೆದ ಮೈಂದ್‌ದ ಲೆಕ್ಕನೇ ಉಂಡು; ಅವು ಇತ್ತೆ ಒಂತೆ ಪೊರ್ತು ಉಪ್ಪುಂಡು, ಬೊಕ್ಕ ತೋಜಂದೆ ಪೋಪುಂಡು.</verse>
				<verse number="15">ಐಕಾದ್ ನಿಕುಲು ಅಂಚಿತ್ತಿ ಪಾತೆರ ಬುಡ್ದು, ಕರ್ತವ ಚಿತ್ತ ಇತ್ತ್ಂಡ, ಎಂಕುಲು ಬದ್‌ಕ್‌ದ್ ಈ ಬೇಲೆ ಅತ್ತ್‌ಡ ಆ ಬೇಲೆನ್ ಮಲ್ಪುವ ಅಂದ್‌ದ್ ಪನೊಡು.</verse>
				<verse number="16">ಇಂಚ ನಿಕುಲು ಪನಂದೆ ಬೂಟುಡು ಪುಗರೊನ್ವರ್, ಇಂಚಿತ್ತಿ ಪುಗರಿಗೆ ಮಾತಲಾ ಹಾಳ್ ಆದುಂಡು.</verse>
				<verse number="17">ಅಂಚಾಯಿನೆಡ್ದ್ ಎಡ್ಡೆಂತಿನೆನ್ ಮಲ್ಪೆರೆ ತೆರಿದಿತ್ತ್ಂಡಲಾ ಅವೆನ್ ಮಲ್ಪಂದೆ ಉಪ್ಪುನವು ಪಾಪನೇ.</verse>
			</chapter>
			<chapter number="5">
				<verse number="1">ಐಶ್ವರ್ಯವಂತೆರೇ, ಇಂಚಿ ಕೇನ್ಲೆ, ನಿಕ್ಲೆಗ್ ಬರಿಯೆರೆ ಉಪ್ಪುನ ಭಯಂಕರ ಉಪದ್ರೊಲೆಗಾದ್ ಕಣ್ಣೀರ್ ದೀದ್ ಬುಲ್ಪುಲೆ.</verse>
				<verse number="2">ನಿಕ್ಲೆ ಐಶ್ವರ್ಯ ಹಾಳಾದ್ ಪೋತುಂಡು ಬೊಕ್ಕ ನಿಕ್ಲೆನ ಎಡ್ಡೆ ಕುಂಟುಲು ಕುಟ್ಟೆ ತಿಂದ್‌ದ್ ಪೋತುಂಡು.</verse>
				<verse number="3">ನಿಕ್ಲೆನ ಬೊಳ್ಳಿ ಬಂಗಾರೊಗು ಕಲೆಂಗ್ ಪತ್ತ್‌ದ್ಂಡ್. ಐತ ಕಲೆಂಗ್ ನ್ಯಾಯತೀರ್ಪುದ ದಿನೊಟು ನಿಕ್ಲೆಗ್ ವಿರೋಧಾದ್ ಸಾಕ್ಷಿ ಆದ್ ಉಂತುಂಡು. ಆ ಕಲೆಂಗ್ ನಿಕ್ಲೆ ಶರೀರೊನು ತೂತ ಲೆಕ್ಕ ತಿಂದ್‌ದ್ ಪಾಡುಂಡು. ಅಂತ್ಯದಿನೊಕುಲೆಗ್ ನಿಕುಲು ಸಂಪೊತ್ತುನು ಕೂಡಾವೊಂಡರ್.</verse>
				<verse number="4">ಕೇನ್ಲೆ, ಮಜೂರಿ ಕೊರಂದೆ ನಿಕುಲು ಕಂಡದ ಬೇಲೆದಾಕುಲೆಗ್ ಮೋಸ ಮಲ್ತ್‌ದರ್, ಅಕುಲು ಬುಲ್ಪುವೆರ್. ಅಕ್ಲೆನ ಬುಲ್ಪು ಪರಲೋಕ ಸೈನ್ಯದ ಕರ್ತವ ಕೆಬಿಕ್ ಬೂರ್ದುಂಡು.</verse>
				<verse number="5">ಭೂಮಿದ ಮಿತ್ತ್ ನಿಕುಲು ಸಂಭ್ರಮೊಡು ಬೊಕ್ಕ ಮನಸ್ ಬತ್ತಿಲೆಕ್ಕ ನಡತೊಂಡರ್. ಬಲಿ ಕೊರ್ಪಿನ ದಿನೊಟು ನಿಕ್ಲೆ ಉಡಲ್‌ನ್ ಸೊರ್ಕಾವೊಂದರ್.</verse>
				<verse number="6">ನಿಕುಲು ನೀತಿವಂತನ್ ಕಂಡಿಸಾದ್ ಕೆರ್ದ್ ಪಾಡಿಯರ್. ಆಯೆ ನಿಕ್ಲೆಗ್ ಎದುರುಂತುಜೆ.</verse>
				<verse number="7">ಸಹೋದ್ರೆರೇ, ಕರ್ತವೆ ಬನ್ನಮುಟ್ಟ ತಾಳ್ಮೆಡ್ ಕಾತೊಂದುಪ್ಪುಲೆ. ಬೆನ್ನಿದಾಯನ್ ತೂಲೆ, ಆಯೆ ಭೂಮಿದ ಎಡ್ಡೆ ಫಲೊನು ಕಾತೊಂದು, ಸುರುತ್ತ ಬರ್ಸೊಗ್ಲಾ ಅಕೇರಿದ ಬರ್ಸೊಗ್ಲಾ ತಾಳ್ಮೆಡ್ ಕಾತೊಂದುಪ್ಪುವೆ.</verse>
				<verse number="8">ನಿಕುಲುಲಾ ಅಂಚೆನೇ ತಾಳ್ಮೆಡುಪ್ಪುಲೆ. ನಿಕ್ಲೆ ಉಡಲ್‌ನ್ ಸ್ಥಿರ ಮಲ್ತೊನ್ಲೆ, ದಾಯೆಗಂದ್ಂಡ, ಕರ್ತವೆ ಬರ್ಪಿ ದಿನ ಕೈತಲ್‌ ಉಂಡು.</verse>
				<verse number="9">ಸಹೋದ್ರೆರೇ, ನಿಕ್ಲೆಗ್ ನ್ಯಾಯತೀರ್ಪು ಆವಂದಿಲೆಕ್ಕ ಒರಿಯಗ್ ಒರಿ ಗುಣುಗುಟ್ಟಡೆ. ತೂಲೆ, ನ್ಯಾಯಾಧಿಪತಿ ಬಾಕಿಲ್‌ಡೇ ಉಲ್ಲೆ.</verse>
				<verse number="10">ಸಹೋದ್ರೆರೇ, ಕರ್ತವ ಪುದರ್‌ಡ್ ಪಾತೆರಿ ಪ್ರವಾದಿಲೆನ್ ನೆನೆಪು ಮಲ್ತೊನ್ಲೆ. ಭಂಗೊನು ತಾಳ್ಮೆಡ್ ತಾಳೊನುನೆಟ್ ಅಕ್ಲೆನ್ ಮಾದ್ರಿ ಆದ್ ಮಲ್ತೊನ್ಲೆ.</verse>
				<verse number="11">ಇಂದಾ, ತಾಳ್ಮೆಡ್ ತಾಳೊನುನಾಕುಲು ಅಂದ್‌ದ್ ನಮ ಪನ್ಪ. ಯೋಬನ ತಾಳ್ಮೆದ ಸಂಗತಿಡ್ ಕೇನ್ಲೆ, ಕರ್ತವೆ ಕಡೆಕ್ಕ್ ಆಯಗ್ ಮಲ್ತಿನೆನ್ ತೂಲೆ, ಕರ್ತವೆ ದಿಂಜ ಕನಿಕರದಾಯೆಲಾ ಕರುಣೆದಾಯೆಲಾ ಆದುಲ್ಲೆ.</verse>
				<verse number="12">ಎನ ಸಹೋದ್ರೆರೇ, ಆಜ ಪಾಡಡೆ, ಪರಲೋಕದ ಮಿತ್ತ್ ಆವಡ್, ಭೂಮಿದ ಮಿತ್ತ್ ಆವಡ್, ಬೇತೆ ಒಯಿತಾಂಡಲಾ ಮಿತ್ತ್ ಆವಡ್ ಆಜ ಪಾಡಡೆ. ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಇಂಚಾಂಡ ನಿಕುಲು ನ್ಯಾಯತೀರ್ಪುಗು ಸೇರುಜರ್.</verse>
				<verse number="13">ನಿಕ್ಲೆಡ್ ಒರಿ ಭಂಗೊಡು ಉಲ್ಲೆನಾ ಆಯೆ ಪ್ರಾರ್ಥನೆ ಮಲ್ಪಡ್, ಒರಿ ಸಂತೋಷೊಡು ಉಲ್ಲೆನಾ ಆಯೆ ದೇವೆರೆಗ್ ಸ್ತುತಿರಾಗ ಮಲ್ಪಡ್.</verse>
				<verse number="14">ನಿಕ್ಲೆಡ್ ಏರಾಂಡಲಾ ಸೀಕ್‌ಡ್ ಉಲ್ಲೆರಾ? ಆಯೆ ಸಭೆತ ಹಿರಿಯೆರೆನ್ ಬರಿಯೆರೆ ಪನಡ್, ಅಕುಲು ಬತ್ತ್‌ದ್ ಕರ್ತವ ಪುದರ್‌ಡ್ ಎಣ್ಣೆ ಪೂಜಿದ್, ಆಯಗಾದ್ ಪ್ರಾರ್ಥನೆ ಮಲ್ಪಡ್.</verse>
				<verse number="15">ನಂಬಿಕೆಡ್ ಮಲ್ತಿನ ಪ್ರಾರ್ಥನೆ ಸೀಕ್‌ದಾಯನ್ ಗುಣ ಮಲ್ಪುಂಡು ಬೊಕ್ಕ ಕರ್ತವೆಲಾ ಆಯನ್ ಗುಣ ಮಲ್ಪುವೆ. ಆಯೆ ಪಾಪ ಮಲ್ತ್‌ದಿತ್ತ್‌ಂಡ ಆಯಗ್ ಬುಡುಗಡೆ ಆಪುಂಡು.</verse>
				<verse number="16">ಅಂಚಾದ್ ನಿಕುಲು ಗುಣ ಆವೊಡಾಂಡ ನಿಕ್ಲೆನ ಪಾಪೊಲೆನ್ ಒರಿಯಗ್ ಒರಿ ಅರಿಕೆ ಮಲ್ತೊಂದು ಒರಿಯಗ್ ಬೋಡಾದ್ ಒರಿ ಪ್ರಾರ್ಥನೆ ಮಲ್ಪುಲೆ. ನೀತಿವಂತನ ಅತ್ಯಾಸಕ್ತಿದ ಪ್ರಾರ್ಥನೆ ಬಾರಿ ಬಲತ್ತವು ಆದುಂಡು.</verse>
				<verse number="17">ಎಲೀಯೆ ನಮ ಲೆಕ್ಕಂತಿ ಸ್ವಭಾವದ ಒರಿ ನರಮಾನಿ ಆದಿತ್ತೆ. ಆಂಡ ಆಯೆ ಪ್ರಾರ್ಥನೆದ ಮಿತ್ತ್ ಪ್ರಾರ್ಥನೆ ಮಲ್ಪುನಗ ಮೂಜಿ ವರ್ಸ ಆಜಿ ತಿಂಗೊಲು ಭೂಮಿದ ಮಿತ್ತ್ ಬರ್ಸನೇ ಬತ್ತ್‌ಜಿ.</verse>
				<verse number="18">ಬೊಕ್ಕ ಆಯೆ ಕುಡ ಪ್ರಾರ್ಥನೆ ಮಲ್ಪುನಗ ಬಾನೊಡ್ದು ಬರ್ಸ ದೊರಿಂಡ್, ಭೂಮಿಡ್ ಬುಲೆ ಬುಲೆಂಡ್.</verse>
				<verse number="19">ಎನ ಸಹೋದ್ರೆರೇ, ನಿಕ್ಲೆಡ್ ಏರಾಂಡಲಾ ಒರಿ ಸತ್ಯೊನು ಬುಡ್ದು ದೂರ ಪೋಯೆಡ, ಅಂಚಿತ್ತಿನಾಯನ್ ಕುಡ ಪಿರ ಕನಲೆ.</verse>
				<verse number="20">ಒರಿ ಪಾಪಿನ್ ತತ್ತಿ ಸಾದಿಡ್ದ್ ಪಿರ ಕನ ಬತ್ತಿನಾಯೆ, ಆಯನ ಆತ್ಮೊನು ಮರಣೊಡ್ದು ತಪ್ಪಾದ್, ಆಯನ ಲೆಕ್ಕದಾಂತಿ ಪಾಪೊಲೆಗ್ ಮಾಪು ತಿಕ್ಕುಂಡು ಅಂದ್‌ದ್ ತೆರಿಯೊನಡ್.</verse>
			</chapter>
		</book>
		<book number="60">
			<chapter number="1">
				<verse number="1">ಯೇಸು ಕ್ರಿಸ್ತನ ಅಪೊಸ್ತಲೆ ಆಯಿ ಪೇತ್ರೆ, ಪೊಂತು, ಗಲಾತ್ಯ, ಕಪ್ಪದೋಕ್ಯ, ಆಸ್ಯ, ಬಿಥೂನ್ಯ ಈ ಪ್ರದೇಶೊಲೆಡ್ ಚದರಾದುಪ್ಪು ಪ್ರವಾಸಿಲಾಯಿ ದೇವಜನೊಕುಲೆಗ್ ಬರೆಪಿನ ಕಾಕಜಿ. ಅಮ್ಮೆ ಆದುಪ್ಪು ದೇವೆರೆಗ್ ದುಂಬೆ ಗೊತ್ತು ಇತ್ತ್‌ದ್ ನಿಕ್ಲೆನ್ ಅಜತ್‌ದ್ ದೆತ್ತೊಂಡೆ. ಬೊಕ್ಕ ಆಯನ ಪರಿಶುದ್ಧಾತ್ಮ ನಿಕ್ಲೆನ್ ಪರಿಶುದ್ಧ ಮಲ್ತಿನೆಡ್ದ್ ನಿಕುಲು ಯೇಸು ಕ್ರಿಸ್ತಗ್ ವಿಧೇಯರಾಯರ್ ಬೊಕ್ಕ ಆಯನ ನೆತ್ತೆರ್‌ಡ್ದ್ ನಿಕುಲು ತಲಿತಿದಿನಾಕುಲು ಆದ್ ಶುದ್ಧ ಆಯರ್. ನಿಕ್ಲೆಗ್ ದಯಲಾ ಸಮಾಧಾನಲಾ ಹೆಚ್ಚೆಚ್ಚಾದ್ ತಿಕ್ಕಡ್.</verse>
				<verse number="2"></verse>
				<verse number="3">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಮ್ಮೆಲಾ ದೇವೆರ್‌ಲಾ ಆದುಪ್ಪುನಾಯಗ್ ಉಪಕಾರ ಸ್ತುತಿ ಆವಡ್. ದೇವೆರೆನ ಮಲ್ಲ ಕರುಣೆಡ್ದ್ ನಮ ಪೊಸತ್ತಾದ್ ಕುಡ ಪುಟ್ಟುದ. ದಾಯೆಗಂದ್ಂಡ ಯೇಸು ಕ್ರಿಸ್ತೆ ಸೈತ್‌ದ್ ಲಕ್ಕಿನೆಡ್ದ್ ನಂಕ್ ಜೀವ ಇತ್ತಿ ನಿರೀಕ್ಷೆ ಉಂಡು.</verse>
				<verse number="4">ದೇವೆರ್ ನಂಕಾದ್ ಇತ್ತೆ ಪರಲೋಕೊಡು ದೀತಿ ಬಾಧ್ಯಸ್ತಿಗೆನ್ ನಮ ಎದುರು ತೂವೊಂದುಲ್ಲ. ಅವು ನಾಶಾದ್ ಪೋಪುಜಿ, ಮೈಲೆ ಆಪುಜಿ, ಪೊರ್ಲು ಬಾಡ್ದ್ ಪೋಪುಜಿ.</verse>
				<verse number="5">ಅಂತ್ಯ ಕಾಲೊಡು ತೋಜಿದ್ ಬರಿಯೆರೆಗ್ ತಯಾರಾದುಪ್ಪು ರಕ್ಷಣೆ, ನಂಬಿಕೆಡ್ ಉಪ್ಪುನಾಕುಲೆಗ್ ತಿಕ್ಕೊಡು ಅಂದ್‌ದ್ ದೇವೆರ್ ತನ ಬಲೊಟು ಕಾಪುವೆ.</verse>
				<verse number="6">ದಾಯೆಗಂದ್ಂಡ ನಿಕ್ಲೆಗ್ ಸದ್ಯೊಗು ಮಾತ ರೀತಿದ ಶೋಧನೆ ಬತ್ತ್‌ಂಡಲಾ ಸಂತೋಷ ಮಲ್ಪುನಾಕುಲು ಆದುಪ್ಪುಲೆ.</verse>
				<verse number="7">ಇಂಚಿನ ಶೋಧನೆಲೆಡ್ದ್ ನಿಕ್ಲೆ ನಂಬಿಕೆ ಸ್ಥಿರಾದ್ ತೋಜಿದ್ ಬರು. ನಾಶಾದ್ ಪೋಪಿ ಬಂಗಾರೊನ್ಲಾ ತೂಕು ಪಾಡ್ದ್ ಶುದ್ಧ ಮಲ್ಪುವೆರ್, ಅಂಚೆನೆ ನಿಕ್ಲೆ ನಂಬಿಕೆ ಬಂಗಾರೊಡ್ದುಲಾ ಆತಿ ಬಿಲೆ ಇತ್ತಿನೆಡ್ದ್ ಕಷ್ಟ ನಿಕ್ಲೆನ್ ಶೋದ್ಯಾವು. ನಿಕ್ಲೆನ ನಂಬಿಕೆ ಯಥಾರ್ಥ ಇತ್ತ್ಂಡ ಯೇಸು ಕ್ರಿಸ್ತೆ ಕುಡ ಬನ್ನಗ ನಿಕ್ಲೆಗ್ ಪುಗರಿಕೆ, ಮೈಮೆ, ಮಾನೊಲು ತಿಕ್ಕುಂಡು.</verse>
				<verse number="8">ನಿಕುಲು ಆಯನ್ ಕಣ್ಣಾರೆ ತೂಯಿಜರ್ಡಲಾ ಆಯನ್ ಪ್ರೀತಿ ಮಲ್ಪುವರ್. ಇತ್ತೆ ನಿಕುಲು ಆಯನ್ ತೂಯಿಜರ್ಡಲಾ ಆಯ ಮಿತ್ತ್ ನಂಬಿಕೆ ದೀದ್ ನಿಕ್ಲೆ ನಂಬಿಕೆದ ಅಂತ್ಯ ಫಲ ಆದುಪ್ಪು ಆತ್ಮ ರಕ್ಷಣೆನ್ ಪಡೆಯಿನಾಕುಲಾದ್ ಗೆನ್ಪೆರೆ ತೀರಂದಿನಾತ್ ಮೈಮೆಡ್ ದಿಂಜಿದ್ ಸಂತೋಷ ಮಲ್ಪುವರ್.</verse>
				<verse number="9"></verse>
				<verse number="10">ಈ ರಕ್ಷಣೆದ ವಿಷಯೊನ್ಲಾ ಪ್ರವಾದಿಲು ಸೂಕ್ಷ್ಮೊಡು ನಾಡ್ದ್ ಪರೀಕ್ಷೆ ಮಲ್ತ್‌ದ್ ದೇವೆರ್ ದುಂಬಗ್ ನಿಕ್ಲೆಗ್ ಕೊರ್ಪಿನ ಆ ದಯತ ವಿಷಯೊಡ್ಲಾ ಅಕುಲು ಪ್ರವಾದನೆ ಮಲ್ತ್‌ದಿತ್ತೆರ್.</verse>
				<verse number="11">ಕ್ರಿಸ್ತನ ಆತ್ಮ ಅಕ್ಲೆ ಉಲಯಿ ಇತ್ತಿನೆಡ್ದ್ ಕ್ರಿಸ್ತಗ್ ಬರ್ಪಿ ಶ್ರಮೆ ಬೊಕ್ಕ ಶ್ರಮೆಲೆಡ್ದ್ ತಿಕ್ಕು ಮೈಮೆನ್ಲಾ ಆದಿಡ್ ತೆರಿಪಾದಿನೆಡ್ದ್, ಆ ಸಮಯ ಏಪ ಬರ್ಪುಂಡು ಎಂಚ ಬರ್ಪುಂಡು ಅಂದ್‌ದ್ ಎದುರು ತೂವೊಂದಿತ್ತೆರ್.</verse>
				<verse number="12">ದೇವೆರ್ ಪ್ರವಾದಿಲೆಗ್ ತೆರಿಪಾಯಿನ ಪಾತೆರೊಲು ಅವು ಅಕ್ಲೆಗಾದ್ ಅತ್ತ್, ನಿಕ್ಲೆಗಾದೇ ಪನ್ಪಿನವು ಅಂದ್‌ದ್ ದೇವೆರ್ ಅಕ್ಲೆಗ್ ತೋಜಾದ್ ಕೊರಿಯೆರ್. ಆಂಡ ಇತ್ತೆ ಆ ಸುವಾರ್ತೆ ಪರಲೋಕೊಡ್ದು ಕಡಪುಡುದಿ ಪರಿಶುದ್ಧಾತ್ಮನ ಬಲೊಟು ನಿಕ್ಲೆಗ್ ಸಾರಿಯೆರ್. ದೂತೆರ್‌ಲಾ ಈ ಸಂಗತಿಲೆನ್ ಗೇನ ಕೊರ್ದು ತೂವೊಡು; ಅಂದ್‌ದ್ ಬಯಕೊಂದಿತ್ತೆರ್.</verse>
				<verse number="13">ಅಂಚಾಯಿನೆಡ್ದ್ ನಿಕುಲು ನಿಕ್ಲೆ ಉಡಲ್‌ನ್ ಸೇವೆಗಾದ್ ತಯಾರ್ ಮಲ್ಪುಲೆ, ಸ್ವಸ್ಥಚಿತ್ತೊಡುಪ್ಪುಲೆ. ಯೇಸು ಕ್ರಿಸ್ತೆ ಕುಡೊರ ಬನ್ನಗ ನಿಕ್ಲೆಗ್ ತಿಕ್ಕುನ ದಯತ ಮಿತ್ತ್ ನಿರೀಕ್ಷೆನ್ ದೀಲೆ.</verse>
				<verse number="14">ಆಂಡ ನಿಕುಲು ದೇವೆರೆನ ಜೋಕುಲೆ ಲೆಕ್ಕ ವಿಧೇಯೆರಾದ್ ನಡಪುಲೆ, ನಿಕುಲು ದುಂಬು ಬುದ್ಧಿದಾಂತಿನಾಕುಲು ಆದುಪ್ಪುನಗ ದುರಾಶೆಲೆಡ್ ನಡತಿಲೆಕ್ಕ ಇತ್ತೆ ನಡಪಡೆ.</verse>
				<verse number="15">ಆಂಡ ನಿಕ್ಲೆನ್ ಲೆತ್ತಿನಾಯೆ ಪರಿಶುದ್ಧದಾಯೆ, ಅಂಚೆನೇ ನಿಕುಲುಲಾ ಮಾತ ನಡವಳಿಕೆಡ್ಲಾ ಪರಿಶುದ್ಧ ಆದುಪ್ಪುಲೆ.</verse>
				<verse number="16">ದಾಯೆಗಂದ್ಂಡ ಬರೆದುಪ್ಪುಲೆಕ್ಕ “ಯಾನ್ ಪರಿಶುದ್ಧ ಆದುಪ್ಪುನೆಡ್ದ್ ನಿಕುಲುಲಾ ಪರಿಶುದ್ಧ ಆದುಪ್ಪುಲೆ.”</verse>
				<verse number="17">ಪ್ರತಿ ಒರಿಯನ ಕೆಲಸೊಲೆನ್ ತೂದು ಪಕ್ಷಪಾತದಾಂತೆ ತೀರ್ಪುಮಲ್ಪು ದೇವೆರೆಗ್ ಅಮ್ಮೆ ಅಂದ್‌ದ್ ಪಾರ್ಥನೆ ಮಲ್ಪುನೆಡ್ದ್ ನಿಕ್ಲೆನ ಪ್ರವಾಸಕಾಲೊನು ಈ ಲೋಕೊಡು ಪೋಡಿಗೆಡ್ ನಡತೊನ್ಲೆ.</verse>
				<verse number="18">ನಿಕ್ಲೆ ಹಿರಿಯಾಕುಲು ಕಲ್ಪಾದಿನ ವ್ಯರ್ಥವಾಯಿನ ನಡವಳಿಕೆಡ್ದ್‌ಲಾ ನಾಶಾದ್ ಪೋಪಿನ ಬೊಳ್ಳಿ ಬಂಗಾರೊಡ್ದುಲಾ ನಿಕ್ಲೆಗ್ ಬುಡುಗಡೆ ಆತಿನತ್ತ್.</verse>
				<verse number="19">ಆಂಡ ಊನದಾಂತಿ ಕಲೆದಾಂತಿ ಬಲಿತ ಕುರಿ ಆದುಪ್ಪು ಕ್ರಿಸ್ತನ ಬಿಲೆ ಇತ್ತಿ ನೆತ್ತೆರ್‌ಡ್ದ್ ಅಂದ್‌ದ್ ನಿಕುಲು ತೆರಿದರ್.</verse>
				<verse number="20">ಲೋಕ ಉಂಡಾಪಿನೆಡ್ದ್ ದುಂಬೇ ದೇವೆರ್ ಆಯನ್ ಅಜತ್‌ದ್ ನಿಕ್ಲೆಗ್ ಬೋಡಾದ್ ಕಡೆ ಕಾಲೊಡು ತೋಜಾದ್ ಕೊರಿಯೆ.</verse>
				<verse number="21">ನಿಕುಲು ಯೇಸು ಕ್ರಿಸ್ತಡ್ದ್ ದೇವೆರೆನ್ ನಂಬುನಾಕುಲು ಆಯರ್. ಆಯನ್ ಸೈತಿನಾಕುಲೆಡ್ದ್ ಲಕ್ಕಾಯಿನೆಡ್ದ್ ದೇವೆರೆಗ್ ಮೈಮೆ ಆಂಡ್, ಐಡ್ದಾವರ ನಿಕ್ಲೆ ನಂಬಿಕೆಲಾ ನಿರೀಕ್ಷೆಲಾ ದೇವೆರೆ ಮಿತ್ತ್ ನಿಲೆ ಆದುಪ್ಪುಂಡು.</verse>
				<verse number="22">ನಿಕುಲು ಸತ್ಯೊಗು ವಿಧೇಯೆರಾದ್ ನಿಕ್ಲೆ ಆತ್ಮೊಲೆನ್ ಶುದ್ಧ ಮಲ್ತಿನೆಡ್ದ್ ಸಹೋದರೆ ಲೆಕ್ಕ ಕಪಟದಾಂತಿ ಪ್ರೀತಿಡುಪ್ಪುಲೆ. ಒರಿಯನ್ ಒರಿ ಶುದ್ಧ ಉಡಲ್‌ಡ್ದ್ ಸ್ಥಿರಾದ್ ಪ್ರೀತಿ ಮಲ್ಪುಲೆ.</verse>
				<verse number="23">ದಾಯೆಗಂದ್ಂಡ ನಿಕುಲು ಪೊಸತ್ತಾದ್ ಕುಡ ಪುಟುದರ್. ಆ ಜೀವ ನಾಶಾದ್ ಪೋಪಿ ಬಿತ್ತ್‌ಡ್ದ್ ಅತ್ತ್, ಆಂಡ ಏನಿತ್ಯೇನಿಗ್ಲಾ ಜೀವ ಇತ್ತಿ ದೇವೆರೆ ಪಾತೆರೊಡ್ದು ಉಂಡಾಯಿನವು.</verse>
				<verse number="24">ಅಂಚೆನೆ ಗ್ರಂಥ ಪನ್ಪುಂಡು “ಮಾತ ನರಜಾತಿಲು ಪಜಿರ್‌ದ ಲೆಕ್ಕನೆ ಉಲ್ಲೆರ್. ಅಕ್ಲೆನ ಮೈಮೆ ಪಜಿರ್‌ದ ಪೂತ ಲೆಕ್ಕನೆ ಉಂಡು. ಪಜಿರ್ ನುಂಗುದು ಪೋವು, ಐತ ಪೂ ತಾಲ್ದ್ ಪೋವು.</verse>
				<verse number="25">ಆಂಡ ಕರ್ತವ ಪಾತೆರ ಏನಿತ್ಯೇನಿಗ್ಲಾ ಉಪ್ಪು.” ಅವು ದಾನೆಂದ್ಂಡ ನಿಕ್ಲೆಗ್ ಸಾರಿನ ಸುವಾರ್ತೆನೇ.</verse>
			</chapter>
			<chapter number="2">
				<verse number="1">ಅಂಚಾಯಿನೆಡ್ದ್ ಮಾತ ಪಡಿಕೆಂತಿನೆನ್, ಮಾತ ವಂಚನೆನ್, ಕಪಟೊನು, ಕಿಚ್ಚಿನ್, ಮಾತ ತರತ ನಿಂದೆಲೆನ್ ಬುಡ್ದು ಬುಡ್ಲೆ.</verse>
				<verse number="2">ಪುರುಬಾಲೆಲೆ ಲೆಕ್ಕ ನಿಕುಲು ದೇವೆರೆ ವಾಕ್ಯ ಪನ್ಪಿ ಶುದ್ಧವಾಯಿನ ಆತ್ಮೀಕ ಪೇರ್‌ನ್ ಬಯಕ್ಲೆ. ಐಟ್ಟ್ ಬಲ ಪಡೆದ್ ರಕ್ಷಣೆನ್ ಪಡೆವರ್.</verse>
				<verse number="3">ಕರ್ತವೆ ಕರುಣೆದಾಯೆ ಅಂದ್‌ದ್ ನಿಕುಲು ಅನುಭವ ಮಲ್ತ್‌ದ್ ತೆರಿಯೊಂದರ್.</verse>
				<verse number="4">ನಿಕುಲು ಜೀವ ಇತ್ತಿ ಕಲ್ಲಾದುಪ್ಪು ಕ್ರಿಸ್ತನ ಕೈತಲ್‌ ಬೈದರ್. ಆ ಕಲ್ಲ್‌ನ್ ನರಮಾನಿಲು ತಿರಸ್ಕಾರ ಮಲ್ತೆರ್ಡಲಾ ಅವು ದೇವೆರೆಡ್ದ್ ಅಜತ್‌ದಿನವುಲಾ ಬಿಲೆ ಇತ್ತಿನವುಲಾ ಆದುಂಡು.</verse>
				<verse number="5">ಐತ ಲೆಕ್ಕನೇ ನಿಕುಲುಲಾ ಜೀವ ಇತ್ತಿ ಕಲ್ಲ್‌ಲು ಆದುಲ್ಲರ್. ನಿಕ್ಲೆನ್ ದೇವೆರ್ ಆತ್ಮಸಮ್ಮಂಧವಾಯಿನ ಮಂದಿರದಂಚ ಕಟ್ಟಾವೊಂದು ಉಲ್ಲರ್. ಬೊಕ್ಕ ಯೇಸು ಕ್ರಿಸ್ತಡ್ದ್ ದೇವೆರೆಗ್ ಒಪ್ಪಿಗೆ ಇತ್ತಿ ಆತ್ಮೀಕ ಬಲಿನ್ ಸಮರ್ಪಣೆ ಮಲ್ಪುನ ಪರಿಶುದ್ಧ ಯಾಜಕ ವರ್ಗದಾಕುಲಾದುಲ್ಲರ್.</verse>
				<verse number="6">ಗ್ರಂಥೊಡು ಪನ್ಪಿಲೆಕ್ಕ, “ಇಂದಾ, ಯಾನ್ ಚೀಯೋನುಡು ಅಜತ್‌ದಿನ ಬಿಲೆ ಇತ್ತಿ ಮೂಲೆಕಲ್ಲ್‌ನ್ ಪಾಡ್ವೆ; ಆಯ ಮಿತ್ತ್ ನಂಬಿಕೆ ದೀಪಿನಾಯಗ್ ನಾಚಿಗೆ ಆವಂದ್.”</verse>
				<verse number="7">ಅಂಚಾಯಿನೆಡ್ದ್ ನಂಬುನಾಕುಲೆಗ್ ಈ ಕಲ್ಲ್ ಬಿಲೆ ಇತ್ತಿನವು ಆದುಂಡು; ನಂಬಂದೆ ಉಪ್ಪುನಾಕುಲು, “ಈ ಕಲ್ಲ್‌ನ್ ಬೊಡ್ಚಿಂದ್‌ದ್ ಬುಡಿಯೆರ್. ಆಂಡ ಬೊಡ್ಚಿಂದ್‌ದ್ ಬುಡ್ತಿ ಕಲ್ಲೇ ಮೂಲೆದ ತರೆಕಲ್ಲಾಂಡ್.”</verse>
				<verse number="8">ಆಂಡ, “ಆ ಕಲ್ಲ್ ಜನೊಕುಲೆನ್ ದಂಟುಲೆಕ್ಕ ಮಲ್ಪು. ಅಂಚೆನೇ ಆ ಕಲ್ಲ್ ಪಾದೆದ ಲೆಕ್ಕ ಜನೊಕುಲೆನ್ ಬೂರುಲೆಕ್ಕ ಮಲ್ಪು,” ಅಂದ್‌ದ್ ಬರೆತಿ ಪಾತೆರ ಸರಿ ಆದುಂಡು. ಅಕುಲು ದೇವೆರೆ ಪಾತೆರೊಗು ಒಳಗಾವಂದಿನೆಡ್ದ್ ದಂಟ್‌ದ್ ಬೂರ್ವೆರ್. ಅಕುಲು ಐಕಾದೆ ನೇಮಕ ಆತೆರ್.</verse>
				<verse number="9">ಆಂಡ ನಿಕುಲು ಅಜತ್‌ದಿನ ಜನಾಂಗೊಲು, ಮಾಮಲ್ಲ ಯಾಜಕ ವರ್ಗದಾಕುಲು, ಪರಿಶುದ್ಧ ಜನಾಂಗೊಲು, ದೇವೆರೆನ ಸ್ವಂತ ಜನೊಕುಲು ಆದುಲ್ಲರ್. ದೇವೆರೆ ಕಾರ್ನಿಕೊಲೆನ್ ತೆರಿಪಾವೆರೆ ಅಜತ್‌ದಿನಾಕುಲು ಆದುಪ್ಪುನೆಡ್ದ್ ದೇವೆರ್ ನಿಕ್ಲೆನ್ ಪಾಪದ ಗರ್ಗಂಡ ಕತ್ತಲೆಡ್ದ್ ಲೆತ್ತ್‌ದ್ ತನ ಮೈಮೆದ ಬೊಲ್ಪುಗು ಸೇರಾದಿನಾಯೆ ಆಯೆನೇ.</verse>
				<verse number="10">ಒಂಜಿ ಸಮಯೊಡು ನಿಕುಲು ಪ್ರಜೆಕುಲು ಆದಿತ್ತಿಜರ್; ಇತ್ತೆ ನಿಕುಲು ದೇವೆರೆ ಪ್ರಜೆಕುಲು ಆದುಲ್ಲರ್. ಆ ಸಮಯೊಡು ನಿಕ್ಲೆಗ್ ಕರುಣೆ ತಿಕ್ಕ್‌ದಿಜ್ಜಾಂಡ್; ಇತ್ತೆ ನಿಕ್ಲೆಗ್ ಕರುಣೆ ತಿಕ್ಕ್‌ದ್ಂಡ್.</verse>
				<verse number="11">ಪ್ರೀತಿದಾಕುಲೇ, ನಿಕುಲು ಈ ಲೋಕದ ಪ್ರಯಾಣಿಕೆರ್‌ಲಾ ಪರದೇಶಿಲುಲಾ ಆದುಪ್ಪುನೆಡ್ದ್ ಆತ್ಮೊಗು ವಿರೋಧ ಆಪಿನ ಶರೀರದ ದುರಾಶೆಲೆಡ್ದ್ ದೂರ ಆದುಪ್ಪುಲೆ ಅಂದ್‌ದ್ ನಿಕ್ಲೆಡ ನಟ್ಟೊನ್ವೆ.</verse>
				<verse number="12">ನಿಕ್ಲೆನ ನಡತೆ ಲೋಕದ ಜನೊಕುಲೆ ನಡುಟು ಎಡ್ಡೆಂತಿನವು ಆದುಪ್ಪಡ್; ಅಪಗ ಅಕುಲು ವಾ ಸಂಗತಿಡ್ ನಿಕ್ಲೆನ್ ಅಕ್ರಮದಾಕುಲು ಅಂದ್‌ದ್ ನಿಂದನೆ ಮಲ್ಪುವೆರಾ, ಅಂಚೆನೆ ನಿಕ್ಲೆನ ಎಡ್ಡೆ ನಡತೆನ್ ತೂದು ಆಯೆ ಕುಡ ಬರ್ಪಿ ದಿನೊಟು ಅಕುಲು ದೇವೆರೆನ್ ಪುಗರ್‌ವೆರ್.</verse>
				<verse number="13">ಕರ್ತವಗಾದ್ ಈ ಲೋಕದ ಅಧಿಕಾರಿಲೆಗ್ ಅಧೀನೆರಾದುಪ್ಪುಲೆ. ಸರ್ವಾಧಿಕಾರಿ ಆದಿತ್ತಿನ ಅರಸುಗ್ಲಾ ಅಧೀನೆರಾದುಪ್ಪುಲೆ.</verse>
				<verse number="14">ಅರಸು ಕಡಪುಡುನ ಅಧಿಕಾರಿಲೆಗ್ಲಾ ಅಧೀನೆರಾದುಪ್ಪುಲೆ. ದಾಯೆಗಂದ್ಂಡ ಅಧಿಕಾರಿಲು ತಪ್ಪು ಮಲ್ತಿನಾಕುಲೆನ್ ಶಿಕ್ಷೆ ಕೊರಿಯೆರೆಗ್ಲಾ ಎಡ್ಡೆಂತಿನಾಕುಲೆಗ್ ಉತ್ತೇಜನ ಕೊರಿಯೆರೆಗ್ಲಾ ಸರಕಾರೊಡ್ದು ನೇಮಕ ಆತಿನಾಕುಲು ಪಂಡ್ದ್ ಎನ್ನ್‌ದ್ ಅಕ್ಲೆನ ಪಾತೆರೊನು ಕೇನ್ಲೆ.</verse>
				<verse number="15">ತೆರಿಯಂದೆ ಪಾತೆರುನ ಹೆಡ್ಡೆರೆನ ಬಾಯಿನ್ ನಿಕ್ಲೆನ ಎಡ್ಡೆ ನಡತೆಡ್ ಮುಚ್ಚಾವೊಡು ಪನ್ಪಿನವೇ ದೇವೆರೆ ಚಿತ್ತ ಆದುಂಡು.</verse>
				<verse number="16">ಸ್ವತಂತ್ರದಾಕುಲೆ ಲೆಕ್ಕ ನಡಪುಲೆ; ಆಂಡ ಪಡಿಕೆಂತಿನೆನ್ ದೆಂಗಾವೆರೆಗ್ ಬೋಡಾದ್ ನಿಕ್ಲೆ ಸ್ವತಂತ್ರೊನು ದುರುಪಯೋಗ ಮಲ್ಪಡೆ. ಆಂಡ ನಿಕುಲು ದೇವೆರೆಗ್ ದಾಸೆರಾದ್ ನಡತೊನ್ಲೆ.</verse>
				<verse number="17">ಮಾತೆರೆಗ್ ಮಾನ ಕೊರ್ಲೆ; ಸಹೋದ್ರೆರೆನ್ ಪ್ರೀತಿ ಮಲ್ಪುಲೆ; ದೇವೆರೆ ಪೋಡಿಗೆಡ್ ನಡಪುಲೆ; ಸರಕಾರೊಗು ಒಳಗಾಲೆ.</verse>
				<verse number="18">ಚಾಕ್ರಿದಾಕುಲೇ, ನಿಕ್ಲೆನ ಯಜಮಾನ್ಯೆರೆಗ್ ಮಾನ ಕೊರ್ದು ಅಧೀನೆರಾದುಪ್ಪುಲೆ. ಎಡ್ಡೆಂತಿನಾಕುಲೆಗ್ಲಾ ಸಜ್ಜನೆರೆಗ್ಲಾ ಮಾತ್ರ ಅತ್ತ್ ಕಠಿಣಾದುಪ್ಪುನಾಕುಲೆಗ್ಲಾ ತಗ್ಗ್‌ದುಪ್ಪುಲೆ.</verse>
				<verse number="19">ಮನಸಾಕ್ಷಿಡ್ ದೇವೆರೆ ದಯ ಉಂಡು ಅಂದ್‌ದ್ ನೆನೆಪುನಾಯೆ ಅನ್ಯಾಯ ತಾಳ್‌ದ್ ಕಷ್ಟೊನು ಸಹಿಸೊಂಡ ಆಯನ್ ದೇವೆರ್ ಮೆಚ್ಚುವೆ ಅಂದ್‌ದ್ ಆಯಗ್ ಗೊತ್ತುಂಡು.</verse>
				<verse number="20">ಆಂಡ ತಪ್ಪು ಮಲ್ತ್‌ದ್ ಪೆಟ್ಟ್ ತಿನ್ಪಿನೆಟ್ ತಾಳ್ಮೆಡ್ ಉಪ್ಪುನಾಂಡ ಐಟ್ಟ್ ದಾನೆ ಪುಗರಿಕೆ? ಆಂಡ ಎಡ್ಡೆಂತಿನೆನ್ ಮಲ್ತ್‌ದ್ ಕಷ್ಟೊನು ತಾಳ್ಮೆಡ್ ಸಹಿಸೊಂಡ ಅವು ದೇವೆರೆ ದುಂಬು ಮೆಚ್ಚಿಗೆದವು ಆದುಂಡು.</verse>
				<verse number="21">ಐಕಾದ್ ದೇವೆರ್ ನಿಕ್ಲೆನ್ ಎಡ್ಡೆ ಕೆಲಸೊನು ಮಲ್ತ್‌ದ್ ಕಷ್ಟ ಸೈಸೊನಿಯೆರೆ ಲೆತ್ತ್‌ದೆ, ಅಂಚೆನೆ ಕ್ರಿಸ್ತೆಲಾ ನಿಕ್ಲೆಗ್ ಬೋಡಾದ್ ಕಷ್ಟ ತಿಂದ್‌ದ್, ನಿಕುಲು ಆಯನ ಪಿರವುಡು ನಡಪುಲೆಕ್ಕ ಮಾದ್ರಿ ತೋಜಾಯೆ.</verse>
				<verse number="22">“ಆಯೆ ವಾ ಪಾಪಲಾ ಮಲ್ತ್‌ದಿಜೆ; ಆಯನ ಬಾಯಿಡ್ದ್ ವಾ ಕುರ್ತೆಲ್ ಪಾತೆರಲಾ ಬೈದಿಜಿ.”</verse>
				<verse number="23">ಆಯಗ್ ನೆರ್ಪಿನಾಕುಲೆಗ್ ಪಿರ ನೆರ್ತಿಜೆ; ದಿಂಜ ಶ್ರಮೆನ್ ಅನುಭವ ಮಲ್ಪುನಗ ಏರೆನ್ಲಾ ಪೋಡಿಯಾಯಿಜೆ. ಆಂಡ ನೀತಿಡ್ ನ್ಯಾಯತೀರ್ಪು ಮಲ್ಪು ದೇವೆರೆಗ್ ತನನ್ ಒಪ್ಪಿಸಾಯೆ.</verse>
				<verse number="24">ನಮ ಪಾಪೊಲೆಗಾದ್ ಸೈತ್‌ದ್ ನೀತಿವಂತೆರಾದ್ ಬದುಕುಲೆಕ್ಕ ಯೇಸು ನಮ ಪಾಪೊಲೆನ್ ತಾನೇ ತನ ಶರೀರೊಡು ತುಂಬೊಂದು ಮರಣದ ಕಂಬೊನು ಏರಿಯೆ. ಆಯನ ಗಾಯೊಡ್ದು ನಂಕ್ ಗುಣ ಆಂಡ್.</verse>
				<verse number="25">ನಿಕುಲು ಸಾದಿ ತತ್ತ್‌ದ್ ಪೋತಿ ಕುರಿಕುಲು ಆದಿತ್ತರ್. ಆಂಡ ಇತ್ತೆ ನಿಕುಲು ಪಿರ ತಿರ್ಗ್‌ದ್ ನಿಕ್ಲೆನ ಆತ್ಮೊನು ಕಾಪುನ ಕುರುಬೆಲಾ ಪರಂಬರಿಪುನಾಯೆಲಾ ಆದುಪ್ಪು ಯೇಸು ಕ್ರಿಸ್ತನ ಕೈತಲ್‌ ಬೈದರ್.</verse>
			</chapter>
			<chapter number="3">
				<verse number="1">ಅಂಚೆನೆ ಪೊಂಜೊವುಲೆ, ನಿಕ್ಲೆನ ಕಂಡನಿಯಾಡ್ಲೆಗ್ ವಶ ಆದುಪ್ಪುಲೆ.</verse>
				<verse number="2">ಮೊಕ್ಲೆಡ್ ಕೆಲೆವೆರ್ ದೇವೆರೆ ಪಾತೆರೊನು ನಂಬಂದೆ ಇತ್ತ್ಂಡಲಾ,</verse>
				<verse number="3">ನಿಕ್ಲೆನ ಎಡ್ಡೆತನೊನ್ಲಾ ಭಯಭಕ್ತಿದ ನಡತೆನ್ಲಾ ತೂದು ವಾಕ್ಯೊಪದೇಶ ಇಜ್ಜಾಂಡಲಾ ಎಡ್ಡೆ ಸಾದಿಗ್ ಬರುವೆರ್.</verse>
				<verse number="4">ತರೆಕುಜಲ್ ನೆಯ್ಪಿನವು, ಬಂಗಾರ್ ಪಾಡೊನುನವು, ಊಂಚಿದ ಕುಂಟು ಪಾಡೊನುನವು, ಉಂದು ನಿಕ್ಲೆನ ಪಿದಯಿದ ಅಲಂಕಾರ ಆದುಪ್ಪೆರೆ ಬಲ್ಲಿ.</verse>
				<verse number="5">ನಿಕ್ಲೆ ಉಡಲ್‌ದ ಉಲಯಿ ಉಪ್ಪುನ ನಾಶಾವಂದಿ ಸಜ್ಜನಿಗೆ ಬೊಕ್ಕ ಶಾಂತದ ಆತ್ಮ ನಿಕ್ಲೆನ ಅಲಂಕಾರ ಆದುಪ್ಪಡ್, ಅವು ದೇವೆರೆ ದೃಷ್ಟಿಡ್ ಬಾರಿ ಬಿಲೆತವು ಆದುಂಡು. ಇಂಚೆನೆ ಪೂರ್ವಕಾಲೊಡು ದೇವೆರೆ ಮಿತ್ತ್ ನಿರೀಕ್ಷೆ ದೀತಿ ಭಕ್ತೆರಾದುಪ್ಪು ಪೊಂಜೊವುಲು ಇಂಚೆನೆ ತನ್ಕುಲೆನ್ ಅಲಂಕಾರ ಮಲ್ತೊಂಡೆರ್. ಅಕುಲು ತನ್ಕ್‌ಲೆ ಕಂಡನಿಯಾಡ್ಲೆಗ್ ಒಳಗಾದಿತ್ತೆರ್.</verse>
				<verse number="6">ಸಾರಲಾ ಅಂಚೆನೆ ಅಬ್ರಹಾಮುಗು ಒಳಗಾದಿತ್ತ್‌ದ್, ಆಯನ್ ತನ ಯಜಮಾನೆ ಅಂದ್‌ದ್ ಲೆತ್ತಲ್. ನಿಕುಲು ಆ ಸಾರನ ಜೋಕುಲು ಆದುಲ್ಲರ್. ನಿಕುಲು ಎಡ್ಡೆಂತಿನೆನ್ ಮಲ್ತೊಂದಿತ್ತರ್ಡ ಒಯಿಕ್‌ಲಾ ಪೋಡಿಯೊಡು ಅಂದ್‌ದ್ ಇಜ್ಜಿ.</verse>
				<verse number="7">ಅಂಚೆನೆ ಕಂಡನಿಯಾಡ್ಲೇ, ಪೊಂಜೊವುಲು ನಿಕ್ಲೆಡ್ದ್ ಕಡಿಮೆ ಬಲ ಇತ್ತಿನಾಕುಲು ಅಂದ್‌ದ್ ತೆರಿದ್ ಬೊಡೆದಿಯಾಡ್ಲೆನ್ ಅರ್ಥ ಮಲ್ತೊಂದು ಪೊರ್ಲುಡು ಜೀವನ ನಡಪಾಲೆ. ಅಕುಲು ದಯತ ಜೀವದ ವರೊಕು ನಿಕ್ಲೆನ ಒಟ್ಟುಗು ಪಾಲುದಾರೆರಾದುಲ್ಲೆರ್ ಅಂದ್‌ದ್ ಎನ್ನೊಂದು ಅಕ್ಲೆಗ್ ಮಾನೊನು ಸಂದಾಲೆ. ನಿಕುಲು ಇಂಚ ಮಲ್ತರ್ಡ ನಿಕ್ಲೆ ಪ್ರಾರ್ಥನೆಗ್ ಅಡ್ಡಿ ಆವಂದ್.</verse>
				<verse number="8">ಕಡೆಕ್ಕ್ ನಿಕುಲು ಮಾತೆರ್ಲಾ ಒಂಜೇ ಮನಸಾದ್, ಸಹೋದ್ರ ಸುಖದುಃಖೊಡು ಸೇರ್ದ್, ಮೆಗ್ಯೆಪಲಯಾಡ್ಲೆ ಲೆಕ್ಕ ಒರಿಯನೊರಿ ಪ್ರೀತಿ ಮಲ್ತೊಂದು, ಕನಿಕರ ಬೊಕ್ಕ ದೀನ ಭಾವೊಡು ಉಪ್ಪುಲೆ.</verse>
				<verse number="9">ಅಪಕಾರ ಮಲ್ಪುನಾಯಗ್ ಅಪಕಾರ ಮಲ್ಪಂದೆ, ನೆರ್ಪಿನಾಯಗ್ ನೆರಂದೆ ಆಶೀರ್ವದಿಪುಲೆ. ಐಕ್ ಬೋಡಾದ್ ದೇವೆರ್ ನಿಕ್ಲೆನ್ ಲೆತ್ತ್‌ದೆ. ನಿಕುಲು ಇಂಚ ಮಲ್ಪುವರ್ಡ ದೇವೆರೆ ಆಶೀರ್ವಾದೊನು ಪಡೆವೊನ್ವರ್.</verse>
				<verse number="10">“ಜೀವನೊಡು ಸಂತೋಷ ಮಲ್ತ್‌ದ್ ಎಡ್ಡೆಂತಿನ ದಿನೊಕುಲೆನ್ ತೂವೆರೆ ಆಸೆ ಇತ್ತಿನಾಯೆ, ಆಯೆ ತನ ಬಾಯಿಡ್ ಪಡಿಕೆಂತಿನೆನ್ ಪಾತೆರಂದಿಲೆಕ್ಕಲಾ ಬಿಮ್ಮೊಲೆಡ್ ಸುಳ್ಳು ಪನಂದಿಲೆಕ್ಕಲಾ ಬಿಗಿತ್ತ್‌ದ್ ಪತ್ತೊನಡ್.</verse>
				<verse number="11">ಆಯೆ ಪಡಿಕೆಂತಿನೆನ್ ಬುಡ್ದು ಎಡ್ಡೆಂತಿನೆನ್ ಮಲ್ಪಡ್; ಸಮಾಧಾನೊನು ನಾಡ್ದ್ ಐಕ್ ತಕ್ಕ ನಡಪೆರೆ ಪ್ರಯತ್ನ ಮಲ್ಪಡ್.</verse>
				<verse number="12">ಕರ್ತವನ ದೃಷ್ಟಿ ಎಡ್ಡೆಂತಿನಾಕುಲೆ ಮಿತ್ತ್ ಉಂಡು. ಆಯೆ ಅಕ್ಲೆನ ಪ್ರಾರ್ಥನೆಗ್ ಕೆಬಿ ಕೊರ್ಪೆ. ಆಂಡ ಕರ್ತವೆ ಪಡಿಕೆಂತಿನಾಕುಲೆಗ್ ವಿರೋಧಾದ್ ಉಲ್ಲೆ,” ಅಂದ್‌ದ್ ಬರೆತ್ಂಡತ್ತಾ?</verse>
				<verse number="13">ನಿಕುಲು ಎಡ್ಡೆಂತಿನೆನ್ ಮಲ್ಪುನೆಟ್ಟ್ ಆಸಕ್ತಿಡ್ ಮನಸ್ ಮಲ್ಪುವರ್ಡ ನಿಕ್ಲೆಗ್ ಹಾಳ್ ಮಲ್ಪುನಾಕುಲು ಏರುಲ್ಲೆರ್?</verse>
				<verse number="14">ನಿಕುಲು ನೀತಿಗಾದ್ ಭಂಗ ಸೈಸೊನಿಯರ್ಡ ನಿಕುಲು ನಿಜಾದ್ ಭಾಗ್ಯವಂತೆರ್. ಭಂಗ ಕೊರ್ಪಿ ಜನೊಕುಲೆಗ್ ಪೋಡ್ಯಡೆ,</verse>
				<verse number="15">ಗಡಿಬಿಡಿ ಆವಡೆ; ಆಂಡ ಕ್ರಿಸ್ತನ್ ನಿಕ್ಲೆ ಉಡಲ್‌ಲೆಡ್ ಪರಿಶುದ್ಧ ಕರ್ತವೆ ಅಂದ್‌ದ್ ದೀವೊನ್ಲೆ. ನಿಕ್ಲೆಡುಪ್ಪುನ ಕ್ರಿಸ್ತನ ನಿರೀಕ್ಷೆಗ್ ಎಂಚಿನ ಆಧಾರ ಅಂದ್‌ದ್ ಕೇನುನಾಕುಲೆಗ್ ಉತ್ತರ ಕೊರಿಯೆರೆ ಏಪಲಾ ತಯಾರಾದುಪ್ಪುಲೆ. ಆಂಡ ಅವೆನ್ ತಾಳ್ಮೆಡ್ಲಾ ಮರ್ಯಾದಿಡ್ಲಾ ಪನ್ಲೆ.</verse>
				<verse number="16">ಎಡ್ಡೆ ಮನಸಾಕ್ಷಿ ಇತ್ತಿನಾಕುಲು ಆದುಪ್ಪುಲೆ. ಅಪಗ ಕ್ರಿಸ್ತಡುಪ್ಪು ನಿಕ್ಲೆನ ಎಡ್ಡೆ ನಡತೆದ ವಿಚಾರೊಡು ಹಾಳ್ ಪಾತೆರುನಾಕುಲು ನಿಕ್ಲೆನ್ ನಿಂದೆ ಮಲ್ತಿನೆಕ್ಕಾದ್ ಅಕುಲೇ ನಾಚಿಗೆಗ್ ಒಳಗಾವೆರ್.</verse>
				<verse number="17">ಹಾಳ್ ಬೇಲೆ ಮಲ್ತ್‌ದ್ ಕಷ್ಟೊಡು ಬೂರುನೆಡ್ದ್ ದೇವೆರೆ ಚಿತ್ತ ಇತ್ತ್ಂಡ ಎಡ್ಡೆ ಬೇಲೆ ಮಲ್ತ್‌ದ್ ಕಷ್ಟೊಡು ಬೂರುನ ಎಡ್ಡೆ ಆದುಂಡು.</verse>
				<verse number="18">ಕ್ರಿಸ್ತೆಲಾ ನೀತಿವಂತೆ ಆದಿತ್ತ್‌ದ್ ನೀತಿಕೆಟ್ಟಿನಾಕುಲೆಗ್ ಬೋಡಾದ್ ತನ ಪ್ರಾಣೊನು ಕೊರ್ದು ಅಕ್ಲೆನ್ ದೇವೆರೆ ಕೈತಲ್‌ ಸೇರಾಯೆರೆಗಾದ್ ಅಕ್ಲೆ ಪಾಪೊನು ದೆಪ್ಪೆರೆ ಬೇನೆ ತಿಂದ್‌ದ್ ಒಂಜೇ ಸರ್ತಿ ತನ ಪ್ರಾಣೊನು ಕೊರಿಯೆ. ಆಯೆ ಶರೀರೊಡು ಸೈತೆ; ಆಂಡ ಆತ್ಮೊಡು ಕುಡೊರ ಬದುಕುನಾಯೆ ಆದುಲ್ಲೆ.</verse>
				<verse number="19">ಅವ್ವೇ ಆತ್ಮ ರೂಪೊಡು ಸೆರೆಮನೆಟುಪ್ಪು ಆತ್ಮೊಲೆ ಕೈತಲ್‌ ಪೋದು ಸಾರಿಯೆ.</verse>
				<verse number="20">ನೋಹನ ದಿನೊಕುಲೆಡ್ ಆಯೆ ಕಪ್ಪಲ್‌ನ್ ಕಟ್ಟೊಂದುಪ್ಪುನಗ ದೇವೆರ್ ತಾಳ್ಮೆಡ್ ಕಾತೊಂದುಪ್ಪುನ ಸಂಧರ್ಬೊಡು ಅವೀಧೆಯೆರಾಯಿ ಆತ್ಮೊಲೆಗ್ ಸುವಾರ್ತೆನ್ ಸಾರಿಯೆ. ಆ ಕಪ್ಪಲ್‌ಡ್ ಎಣ್ಮ ಜನನೇ ಬೊಲ್ಲದ ನೀರ್‌ಡ್ದ್ ಬಚವು ಆಯೆರ್.</verse>
				<verse number="21">ಅವ್ವೇ ನೀರ್ ಇತ್ತೆ ನಿಕ್ಲೆನ್ ರಕ್ಷಣೆ ಮಲ್ಪುನ ದೀಕ್ಷಾಸ್ನಾನದ ಚಿನ್ನೆ ಆದುಂಡು. ದೀಕ್ಷಾಸ್ನಾನ ಶರೀರದ ಕುರೆ ದೆಪ್ಪುನವು ಅತ್ತ್; ಅವು ಶುದ್ಧ ಮನಸಾಕ್ಷಿಡ್ ದೇವೆರೆಗ್ ಮಲ್ಪುನ ವಾಗ್ದಾನ ಆದುಂಡು. ಯೇಸು ಕ್ರಿಸ್ತೆ ಪುನರುತ್ಥಾನ ಆದುಪ್ಪುನೆಡ್ದ್ ಎಂಕ್ಲೆಗ್ ರಕ್ಷಣೆ ಕೊರಿಯೆ.</verse>
				<verse number="22">ಇತ್ತೆ ಆಯೆ ಪರಲೋಕೊಗು ಪೋದು ದೇವೆರೆ ಬಲತ್ತ ಮರ್ಗಿಲ್‌ಡ್ ಉಲ್ಲೆ. ದೂತೆರ್, ಅಧಿಕಾರಿಲು, ಶಕ್ತಿಲು ಮಾತಲಾ ಆಯಗ್ ಒಳಗಾದುಂಡು.</verse>
			</chapter>
			<chapter number="4">
				<verse number="1">ಕ್ರಿಸ್ತೆ ಈ ಲೋಕೊಡುಪ್ಪುನಗ ಶರೀರೊಡು ಕಷ್ಟ ತಡೆಯಿನೆಡ್ದ್ ನಿಕುಲುಲಾ ಅವ್ವೇ ರೀತಿಡ್ ನಿಕ್ಲೆ ಮನಸ್‌ನ್ ತಯಾರ್ ಮಲ್ಪುಲೆ. ದಾಯೆಗಂದ್ಂಡ ನಿಕುಲು ಶರೀರೊಡು ಕಷ್ಟ ತಡೆಯೊಂಡ ಪಾಪೊಲೆಡ್ದ್ ದೂರ ಆಪರ್.</verse>
				<verse number="2">ಒರಿದಿನ ಜೀವಮಾನ ಕಾಲೊಡು ನಿಕುಲು ಶರೀರೊಡು ನರಮಾನಿಲೆ ಆಸೆಗ್ ಬೋಡಾದ್ ಬದ್‌ಕಂದೆ ದೇವೆರೆ ಚಿತ್ತೊಗು ಬೋಡಾದ್ ಬದ್‌ಕಿಯೆರೆ ಪ್ರಯತ್ನ ಮಲ್ಪುಲೆ.</verse>
				<verse number="3">ನಿಕುಲು ಬಂಡ್‌ತನ, ದುರಾಶೆಡ್, ಅಮಲ್‌ಡ್, ದುಂದುಗಾರಿಕೆಡ್, ಒಟ್ಟು ಕೂಡ್ದು ಪರ್ಪಿನೆಟ್ಟ್ ಬೊಕ್ಕ ನೀಚ ಆಯಿ ಮೂರ್ತಿಪೂಜೆಡ್ ನಡತೊಂದು ಪಿದಯಿದ ಜನೊಕುಲೆಗ್ ಸರಿಯಾದ್ ಹಾಳ್ ಕೆಲಸೊಲೆನ್ ಮಲ್ತೊನೆಟ್ಟ್ ಕಾಲ ಕಳೆಯಿನ ಯಾವು.</verse>
				<verse number="4">ನಿಕುಲು ಅವ್ವೇ ಪಟಿಂಗತನೊಟು ಸೇರಂದಿನೆಕ್ಕ್ ಅಕುಲು ಅಚ್ಚಿರ ಆದ್ ನಿಕ್ಲೆನ್ ದೂಷಿಯುವೆರ್.</verse>
				<verse number="5">ಅಂಚಾಯಿನೆಡ್ದ್ ಅಕುಲು ಬದುಕುನಾಕುಲೆಗ್ಲಾ ಸೈತ್ ಪೋತಿನಾಕುಲೆಗ್ಲಾ ನ್ಯಾಯತೀರ್ಪೆರೆ ತಯಾರಾದುಪ್ಪು ದೇವೆರೆಗ್ ಲೆಖ್ಖ ಕೊರೊಡು.</verse>
				<verse number="6">ಉಂದೆಕ್ಕ್ ಬೋಡಾದ್ ಸೈತಿನಾಕುಲು ಶರೀರೊಡು ನರಮಾನಿಲೆ ತರೊಟು ತೀರ್ಪು ಪಡೆಯೆರ್. ಆತ್ಮೊಡು ದೇವೆರೆಗ್ ತಕ್ಕ ಬದುಕುಲೆಕ್ಕ ಅಕ್ಲೆಗ್ಲಾ ಸುವಾರ್ತೆ ಸಾರಿದುಂಡು.</verse>
				<verse number="7">ಮಾತೆತ್ತ ಅಂತ್ಯ ಆಪಿನ ಕಾಲ ಮುಟ್ಟ ಬೈದ್‌ಂಡ್; ಅಂಚಾಯಿನೆಡ್ದ್ ಪ್ರಾರ್ಥನೆಗ್ ತಯಾರಾದ್ ಸ್ವಸ್ಥ ಬುದ್ಧಿಡ್ ಎಚ್ಚರಿಕೆ ಆದುಪ್ಪುಲೆ.</verse>
				<verse number="8">ಮಾತೆಡ್ದ್ ದುಂಬು ನಿಕ್ಲೆನ ಉಲಯಿ ಯಥಾರ್ಥವಾಯಿನ ಪ್ರೀತಿ ಉಪ್ಪಡ್. ಆ ಪ್ರೀತಿ ಏತೋ ಪಾಪೊಲೆನ್ ಮಾಜಾವುಂಡು.</verse>
				<verse number="9">ಗುಣುಗುಟ್ಟಂದೆ ಒರಿ ಒರಿಯಗ್ ಸತ್ಕಾರ ಮಲ್ಪುಲೆ.</verse>
				<verse number="10">ನಿಕ್ಲೆಡ್ ಪ್ರತಿ ಒರಿಲಾ ದೇವೆರೆ ದಯೊಡ್ದು ಆತ್ಮೀಕ ವರೊನು ಬೇತೆ ಬೇತೆ ರೀತಿಡ್ ಪಡೆತರ್. ಐಡ್ದಾವರ ದೇವೆರೆ ಎಡ್ಡೆ ಸೇವಕೆರಾದ್ ಮಾತೆರೆನ ಸೇವೆ ಮಲ್ಪೆರೆ ನಿಕ್ಲೆನ ವರೊನು ಉಪಯೋಗ ಮಲ್ಪುಲೆ.</verse>
				<verse number="11">ಒರಿ ಬೋಧನೆ ಮಲ್ಪುವೆಡ ದೇವೆರೆ ಪಾತೆರ ಅಂದ್‌ದ್ ಬೋಧನೆನ್ ಮಲ್ಪಡ್. ಒರಿ ಸೇವೆ ಮಲ್ಪುವೆಡ ದೇವೆರೆಡ್ದ್ ಬಲೊನು ಪಡೆಯೊಂದು ಮಲ್ಪಡ್. ಉಂದೆಡ್ದ್ ಯೇಸು ಕ್ರಿಸ್ತಡ್ದ್ ದೇವೆರೆಗ್ ಉಪಕಾರ ಸ್ತುತಿ ಆವೊಂದುಪ್ಪುಂಡು. ಯೇಸು ಕ್ರಿಸ್ತಗ್ ಮೈಮೆಲಾ ಬಲಲಾ ಏನಿತ್ಯೇನಿಗ್ಲಾ ಆವಡ್, ಆಮೆನ್.</verse>
				<verse number="12">ಪ್ರೀತಿದಾಕುಲೇ, ನಿಕ್ಲೆಗ್ ತೂತ ಲೆಕ್ಕಂತಿನ ಕಷ್ಟ ಬನ್ನಗ ವಿಪರೀತದವು ಪಂಡ್ದ್ ಅಚ್ಚಿರ ಬುಡಡೆ. ಉಂದು ಪೂರ ನಿಕ್ಲೆನ ನಂಬಿಕೆನ್ ಪರೀಕ್ಷೆ ಮಲ್ಪುನು. ವಿಪರೀತವಾಯಿನ ಸಂಗತಿಲು ಆಪುಂಡು ಪಂಡ್ದ್ ಚಿಂತೆ ಮಲ್ಪಡೆ.</verse>
				<verse number="13">ನಿಕುಲು ಏತ್‌ನೆಂಗೆ ಕ್ರಿಸ್ತ ಶ್ರಮೆಟ್ ಪಾಲ್‌ದಾರೆರ್ ಆದುಪ್ಪುವರಾ ಆತ್‌ನೆಂಗೆ ಸಂತೋಷೊಡುಪ್ಪುಲೆ. ಅಂಚೆನೇ ಕ್ರಿಸ್ತೆ ಮೈಮೆಡ್ ತೋಜಿದ್ ಬನ್ನಗ ನಿಕುಲು ಉಲ್ಲಾಸಾದುಪ್ಪುಲೆ.</verse>
				<verse number="14">ಕ್ರಿಸ್ತನ ಪುದರ್‌ಗಾದ್ ನಿಕ್ಲೆಗ್ ನಿಂದೆ ಮಲ್ಪುವೆರ್ಡ, ನಿಕುಲು ಭಾಗ್ಯವಂತೆರ್. ದಾಯೆಗಂದ್ಂಡ ಮೈಮೆದ ಆತ್ಮೆ ಆದುಪ್ಪು ದೇವೆರೆ ಆತ್ಮೆ ನಿಕ್ಲೆ ಮಿತ್ತ್ ನಿಲೆ ಆದುಂಡು.</verse>
				<verse number="15">ನಿಕ್ಲೆಡ್ ಏರಾಂಡಲಾ ಮಾನ್ಯ ಕೆರ್ಪಿನಾಯೆ, ಕಲ್ವೆ, ದುಷ್ಟೆ ಬೊಕ್ಕ ಬೇತೆಕ್ಲೆ ಕೆಲಸೊಡು ತರೆ ಪಾಡುನಾಯ ಒಟ್ಟುಗು ಇತ್ತರ್ಡ ಕಷ್ಟೊಡು ಬೂರುವರ್.</verse>
				<verse number="16">ಆಂಡ ನಿಕುಲು ಕ್ರೈಸ್ತೆರಾದ್ ಶ್ರಮೆ ಅನುಭವ ಮಲ್ಪುವರ್ಡ ಅಂಚಿನಾಕುಲು ನಾಚಿಗೆ ಮಲ್ಪೊಡಂದ್‌ದ್ ಇಜ್ಜಿ. ಕ್ರೈಸ್ತೆರ್ ಅಂದ್‌ದ್ ಪುದರ್ ಪಡೆಯಿನೆಕ್ಕಾದ್ ದೇವೆರೆನ್ ಪುಗರೊನ್ಲೆ.</verse>
				<verse number="17">ನ್ಯಾಯತೀರ್ಪುದ ಸಮಯ ಕೈತಲ್‌ ಬೈದ್‌ಂಡ್. ಆ ತೀರ್ಪು ದೇವೆರೆ ಇಲ್ಲಡ್ದೇ ಸುರು ಆಪುಂಡು. ಅವು ನಮಡ್ದೇ ಸುರು ಆಪಿನಾಂಡ, ದೇವೆರೆ ಸುವಾರ್ತೆ ನಂಬಂದಿನಾಕುಲೆನ ಗತಿ ದಾನೆ ಅವು?</verse>
				<verse number="18">ಗ್ರಂಥೊಡು ಪನ್ಪಿಲೆಕ್ಕ, “ನೀತಿ ಇತ್ತಿನಾಯಗ್ ರಕ್ಷಣೆ ಪಡೆಯೆರೆ ಕಷ್ಟ ಆಂಡ, ಭಕ್ತಿದಾಂತಿನಾಯನಲಾ ಪಾಪಿಷ್ಟನಲಾ ಗತಿ ದಾನೆ ಆವು?”</verse>
				<verse number="19">ಅಂಚಾಯಿನೆಡ್ದ್ ದೇವೆರೆ ಚಿತ್ತದ ಪ್ರಕಾರ ಭಂಗೊನು ಅನುಭವ ಮಲ್ಪುನಾಕುಲು, ತನ್ಕುಲೆ ಪ್ರಾಣೊನು ನಂಬಿಕೆದ ಸೃಷ್ಟಿ ಕರ್ತವಗ್ ಒಪ್ಪಿಸಾದ್ ಕೊರ್ದು ಎಡ್ಡೆಂತಿನೆನ್ ಮಲ್ಪುನಾಕುಲು ಆವೊಡು.</verse>
			</chapter>
			<chapter number="5">
				<verse number="1">ಸಭೆತ ಹಿರಿಯಾಕುಲೇ, ನಿಕ್ಲೆನ ಜತೆ ಹಿರಿಯಾಯೆ ಆಯಿ ಯಾನ್ ಕ್ರಿಸ್ತ ಶ್ರಮೆಲೆಡ್ ಸಾಕ್ಷಿದಾಯೆ; ನನ ದುಂಬು ತೋಜಿದ್ ಬರ್ಪಿ ಮೈಮೆಡ್ ಪಾಲ್‌ದಾರೆ ಆಯಿ ಯಾನ್ ನಿಕ್ಲೆನ್ ಉತ್ತೇಜನ ಮಲ್ತ್‌ದ್ ಪನ್ಪಿನಿ ದಾನೆ ಪಂಡ,</verse>
				<verse number="2">ನಿಕ್ಲೆನ ವಶೊಟು ಕೊರ್ತಿನ ದೇವೆರೆ ಪುಂಡುನು ಕಾಪುಲೆ. ಬಲಾತ್ಕಾರೊಡ್ದು ಅತ್ತ್ ದೀನ ಮನಸ್‌ಡ್ದೇ, ದುಡ್ಡುದ ಆಸೆಡ್ದ್ ಅತ್ತ್, ಯಥಾರ್ಥ ಮನಸ್‌ಡ್ದ್ ಸೇವೆ ಮಲ್ಪುಲೆ.</verse>
				<verse number="3">ದೇವೆರ್ ನಿಕ್ಲೆನ ವಶೊಟು ಕೊರ್ತಿ ಸಭೆತ ಮಿತ್ತ್ ಗುರ್ಕಾಮೆ ತೋಜಾವಂದೆ ಸಭೆಕ್ ಮಾದ್ರಿ ಆದ್ ನಡಪುಲೆ.</verse>
				<verse number="4">ಮಾಮಲ್ಲ ಕುರುಬೆ ತೋಜಿದ್ ಬನ್ನಗ ನಿಕುಲು ಏನಿತ್ಯೇನಿಗ್ಲಾ ಬಾಡಂದಿ ಮೈಮೆದ ಕಿರೀಟೊನು ಪಡೆವೊನ್ವರ್.</verse>
				<verse number="5">ಅಂಚೆನೆ ಜವನ್ಯೆರೇ, ನಿಕುಲುಲಾ ಹಿರಿಯಾಕುಲೆಗ್ ವಶ ಆದುಪ್ಪುಲೆ. ನಿಕುಲು ಮಾತೆರ್ಲಾ ದೀನ ಮನಸ್‌ಡ್ ಒರಿ ಒರಿಯಗ್ ಸೇವೆ ಮಲ್ಪುಲೆ. “ದೇವೆರ್ ಅಹಂಕಾರಿಲೆಗ್ ಎದುರುಂತುವೆ, ಆಂಡ ತಗ್ಗ್‌ದಿನಾಕುಲೆಗ್ ದಯ ಕೊರ್ಪೆ.”</verse>
				<verse number="6">ಅಂಚಾಯಿನೆಡ್ದ್ ದೇವೆರೆನ ಬಲ ಇತ್ತಿ ಕೈತ ತಿರ್ತ್ ನಿಕ್ಲೆನ್ ತಗ್ಗಾವೊನ್ಲೆ; ಆಯೆ ತಕ್ಕ ಸಮಯೊಡು ನಿಕ್ಲೆನ್ ಮಿತ್ತ್ ಕನಪೆ.</verse>
				<verse number="7">ನಿಕ್ಲೆನ ಮಾತ ಚಿಂತೆಲೆನ್ ಆಯಗ್ ಒಪ್ಪಿಸಾಲೆ; ಆಯೆ ನಿಕ್ಲೆಗಾದ್ ಚಿಂತೆ ಮಲ್ಪುವೆ.</verse>
				<verse number="8">ಜಾಗ್ರತೆ ಆದುಪ್ಪುಲೆ; ಎಚ್ಚರಿಕೆ ಆದುಪ್ಪುಲೆ; ನಿಕ್ಲೆನ ವಿರೋಧಿ ಆದುಪ್ಪು ಸೈತಾನೆ ಗರ್ಜನೆ ಮಲ್ಪುನ ಸಿಮ್ಮದ ಲೆಕ್ಕನೆ ಏರೆನ್ ದಿಂಗೊಲಿ ಅಂದ್‌ದ್ ನಾಡೊಂದು, ತಿರ್ಗೊಂದುಲ್ಲೆ.</verse>
				<verse number="9">ನಿಕುಲು ನಂಬಿಕೆಡ್ ದೃಢ ಆದಿತ್ತ್‌ದ್ ಸೈತಾನಗ್ ಎದುರುಂತುಲೆ; ಲೋಕೊಡುಪ್ಪು ನಿಕ್ಲೆ ಸಹೋದ್ರೆರ್‌ಲಾ ಅಂಚಿನವೇ ಸಂಕಟೊಲೆನ್ ಅನುಭವ ಮಲ್ತೊಂದುಲ್ಲೆರ್ ಅಂದ್‌ದ್ ನಿಕ್ಲೆಗ್ ಗೊತ್ತುಂಡತ್ತಾ?</verse>
				<verse number="10">ಯೇಸು ಕ್ರಿಸ್ತಡ್ ಒಂಜಾದುಪ್ಪು ನಿಕ್ಲೆನ್ ತನ ನಿತ್ಯ ಮೈಮೆಗ್ ಲೆತ್ತಿ ಪೂರ್ತಿ ದಯತ ದೇವೆರ್, ಒಂತೆ ಸಮಯ ಸಂಕಟ ಬತ್ತಿ ಬೊಕ್ಕ ನಿಕ್ಲೆನ್ ತಕ್ಕ ಸ್ಥಿತಿಗ್ ಕನತ್‌ದ್ ದೃಢ ಮಲ್ತ್‌ದ್, ಬಲ ಪಡೆಪಾವೆ.</verse>
				<verse number="11">ಆಯಗ್ ಏನಿತ್ಯೇನಿಗ್ಲಾ ಆಧಿಪತ್ಯ ನಿಲೆ ಆದುಪ್ಪಡ್. ಆಮೆನ್.</verse>
				<verse number="12">ನಂಬಿಗಸ್ತೆ ಆದುಪ್ಪು ಸಹೋದರೆ ಸಿಲ್ವಾನನ ಸಹಾಯೊಡ್ದು ಈ ಎಲ್ಯ ಪತ್ರಿಕೆನ್ ಬರೆತಿನಿ. ಉಂದೆಡ್ದ್ ನಿಕ್ಲೆಗ್ ಉಮೇದ್ ತಿಕ್ಕೊಡು ಬೊಕ್ಕ ಉಂದು ಮಾತ ದೇವೆರೆ ದಯೊಟು ಸತ್ಯಾದುಂಡು ಅಂದ್‌ದ್ ಯಾನ್ ಸಾಕ್ಷಿ ಕೊರ್ಪೆ. ಈ ದಯೊಟು ನಿಕುಲು ಗಟ್ಟಿಯಾದ್ ಉಂತುಲೆ.</verse>
				<verse number="13">ದೇವೆರ್ ಅಜತ್‌ದ್ ದೆತ್ತೊಂಡಿ ಬಾಬೆಲ್‌ಡ್ ಉಪ್ಪು ಸಹೋದ್ರಿ ಸಭೆಲಾ ಎನ ಮಗೆ ಆದುಪ್ಪು ಮಾರ್ಕೆಲಾ ನಿಕ್ಲೆನ್ ವಂದಿಪುವೆರ್.</verse>
				<verse number="14">ಪ್ರೀತಿದ ಮುದ್ದು ಕೊರ್ದು ಒರಿಯನ್ ಒರಿ ವಂದಿಪುಲೆ. ಕ್ರಿಸ್ತಡುಪ್ಪು ಸಮಾಧಾನ ನಿಕ್ಲೆಗ್ ಮಾತೆರೆಗ್ಲಾ ಉಪ್ಪಡ್. ಆಮೆನ್.</verse>
			</chapter>
		</book>
		<book number="61">
			<chapter number="1">
				<verse number="1">ಯೇಸು ಕ್ರಿಸ್ತನ ದಾಸೆಲಾ ಅಪೊಸ್ತಲೆಲಾ ಆದುಪ್ಪು ಸಿಮೆಯೋನು ಪೇತ್ರೆ, ನಮ ದೇವೆರೆನ ಬೊಕ್ಕ ರಕ್ಷಕೆ ಆದುಪ್ಪು ಯೇಸು ಕ್ರಿಸ್ತನ ನೀತಿಡ್ದ್ ನಂಕುಪ್ಪು ದಿಂಜ ಬಿಲೆತ ನಂಬಿಕೆದಾಕುಲೆಗ್ ಬರೆಪಿನಿ ದಾನೆಂದ್ಂಡ, ದೇವೆರೆನವುಲಾ ನಮ ಕರ್ತವೆ ಆದುಪ್ಪು ಯೇಸುನವುಲಾ ಗೇನೊಡ್ದು ನಿಕ್ಲೆಗ್ ದಯಲಾ ಸಮಾಧಾನಲಾ ಹೆಚ್ಚೆಚ್ಚಾದ್ ತಿಕ್ಕಡ್.</verse>
				<verse number="2"></verse>
				<verse number="3">ತನ ಮೈಮೆಡ್ದ್‌ಲಾ ಸದ್ಗುಣೊಡ್ದ್‌ಲಾ ನಮನ್ ಲೆಯ್ದಿನ ದೇವೆರೆನ್ ತೆರಿಯೊಂದಿನಾಕುಲೆಗ್ ತನ ದಿವ್ಯ ಬಲೊಡ್ದು ಭಕ್ತಿದ ಜೀವನ ಮಲ್ಪೆರೆ ಬೋಡಾಪಿನ ಮಾತೆನ್ಲಾ ಒದಗಾದ್ ಕೊರ್ತೆ.</verse>
				<verse number="4">ಉಂದತ್ತಂದೆ ದುರಾಶೆಲೆಡ್ದ್ ಲೋಕೊಡು ಉಂಡಾಯಿ ನಾಶನೊಗು ನಮ ತಪ್ಪಾವೊನಾಕುಲಾದ್, ದೇವಸ್ವಭಾವೊಡು ಪಾಲ್‌ದಾರೆರಾಪಿಲೆಕ್ಕ, ದೇವೆರ್ ನಂಕ್ ವಿಶೇಷವಾಯಿನ ಬೊಕ್ಕ ಬಿಲೆ ಇತ್ತಿನ ವಾಗ್ದಾನೊಲೆನ್ ಕೊರ್ತೆ.</verse>
				<verse number="5">ಈ ಕಾರಣೊಡ್ದಾದ್ ದೇವೆರೆ ವಾಗ್ದಾನೊಲೆಗ್ ಸರಿಯಾದ್ ಬದ್‌ಕ್‌ಲೆ. ನಿಕ್ಲೆ ನಂಬಿಕೆಗ್ ಸದ್ಗುಣೊನು, ಸದ್ಗುಣೊಗು ಗೇನೊನು,</verse>
				<verse number="6">ಗೇನೊಗು ದಮೆನ್, ದಮೆಕ್, ತಾಳ್ಮೆನ್, ತಾಳ್ಮೆಗ್ ದೇವಭಕ್ತಿನ್,</verse>
				<verse number="7">ದೇವಭಕ್ತಿಗ್ ಸಹೋದ್ರ-ಪ್ರೀತಿನ್, ಸಹೋದ್ರ-ಪ್ರೀತಿಗ್ ಪೂರ್ತಿ ಪ್ರೀತಿನ್ ತೋಜಾಲೆ.</verse>
				<verse number="8">ಇಂಚಿತ್ತಿ ಗುಣೊಕುಲು ನಿಕ್ಲೆಡ ಇತ್ತ್‌ದ್ ಹೆಚ್ಚಾವೊಂದು ಬತ್ತ್ಂಡ ಎಂಕುಲೆ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಗೇನ ನಿಕ್ಲೆನ್ ಉದಾಸೀನದಾಕುಲುಲಾ ಫಲದಾಂತಿನಾಕುಲುಲಾ ಆವಂದಿಲೆಕ್ಕ ಮಲ್ಪುಂಡು.</verse>
				<verse number="9">ಏರೆಡ ಈ ಗುಣೊಕುಲು ಇಜ್ಜಾ, ಅಕುಲು ಕುರುಡೆರ್ಲಾ ಮಂದದೃಷ್ಟಿದಾಕುಲುಲಾ ಆದುಲ್ಲೆರ್. ತನ್ಕುಲೆ ಪಿರವುದ ಪಾಪೊಲೆಡ್ದ್ ದೆಕ್ಕ್‌ದ್ ಶುದ್ಧ ಆತೆರ್ ಇನ್ಪಿನೆನ್ ಮದತ್‌ದ್ ಬುಡ್ತೆರ್.</verse>
				<verse number="10">ಅಂಚಾದ್ ಪ್ರೀತಿದ ಸಹೋದ್ರ ಸಹೋದ್ರಿಲೆ, ದೇವೆರೆ ಲೆಪ್ಪುನ್ಲಾ ಅಜತೊಂಡಿನೆನ್ಲಾ ದೃಢ ಮಲ್ಪೆರೆ ಹೆಚ್ಚಾದ್ ಪ್ರಯಾಸ ಮಲ್ಪುಲೆ. ಈ ಸಂಗತಿಲೆನ್ ನಿಕುಲು ಮಲ್ತೊಂದಿತ್ತರ್ಡ ನಂಬಿಕೆಡ್ ಬೂರ್ದು ಪೋಪುಜರ್.</verse>
				<verse number="11">ಬೊಕ್ಕ ಎಂಕುಲೆ ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತ ನಿತ್ಯರಾಜ್ಯೊಗು ಅಡ್ಡಿದಾಂತೆ ಸೇರಿಯೆರೆ ಮಾರ್ಗ ಆವು.</verse>
				<verse number="12">ನಿಕುಲು ಈ ಸಂಗತಿಲೆನ್ ತೆರಿದಿತ್ತರ್ಡಲಾ, ನಿಕ್ಲೆಗ್ ಕಲ್ಪಾದಿನ ಸತ್ಯೊಡು ದೃಢಾದ್ ಉಂತುದಿತ್ತರ್ಡಲಾ ಉಂದೆತ್ತ ಸಂಗತಿಡ್ ಯಾನ್ ಏಪಲಾ ನಿಕ್ಲೆಗ್ ನೆನೆಪು ಪುಟ್ಟಾವೆ.</verse>
				<verse number="13">ಅಂಚಾಯಿನೆಡ್ದ್ ಯಾನ್ ಎನ ಶರೀರ ಇನ್ಪಿ ಗುಡಾರೊಡು ಉಪ್ಪುನ ಮುಟ್ಟ ನಿಕ್ಲೆಗ್ ಅಪಗಪಗ ನೆನೆಪು ಪುಟ್ಟಾವುನವು ಯೋಗ್ಯ ಅಂದ್‌ದ್ ಎನ್ನುವೆ.</verse>
				<verse number="14">ದಾಯೆಗಂದ್ಂಡ, ಯಾನ್ ಈ ಶರೀರ ಇನ್ಪಿ ಗುಡಾರೊನು ಬೇಗೊಡೆ ಬುಡೊಡು ಅಂದ್‌ದ್ ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತೆ ಎಂಕ್ ತೋಜಾದೆ.</verse>
				<verse number="15">ಅಂಚಾದ್ ಯಾನ್ ಲೋಕೊನು ಬುಡ್ದು ಪೋಯಿ ಬೊಕ್ಕಲಾ ನಿಕುಲು ಈ ಸಂಗತಿಲೆನ್ ಏಪಲಾ ನೆನೆಪುಡು ದೀವೊಡು ಅಂದ್‌ದ್ ಯಾನ್ ಪ್ರಯಾಸ ಮಲ್ಪುವೆ.</verse>
				<verse number="16">ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತ ಬಲೊನ್ಲಾ ಕುಡೊರ ಈ ಲೋಕೊಗು ಬರ್ಪಿನೆನ್ಲಾ ಎಂಕುಲು ನಿಕ್ಲೆಗ್ ತೆರಿಪಾನಗ ಕಲ್ಪನೆದ ಕತೆಕ್ಲೆನ್ ಪಂಡಿನತ್ತ್. ಆಂಡ ಆಯನ ಮೈಮೆನ್ ಕಣ್ಣಾರೆ ತೂಯಿನಾಕುಲಾದ್ ತೆರಿಪಾಯ.</verse>
				<verse number="17">“ಇಂಬೆ ಎನ ಪ್ರೀತಿದ ಮಗೆ, ಆಯಡ ಎಂಕ್ ಮೆಚ್ಚಿಗೆ ಉಂಡು,” ಇನ್ಪಿ ಘನಸ್ತಿಕೆ ಇತ್ತಿ ಮೈಮೆದ ಸ್ವರ ಆಯಗ್ ಆನಗ, ಅಮ್ಮೆ ಆದುಪ್ಪು ದೇವೆರೆಡ್ದ್ ಮಾನ ಮೈಮೆನ್ ಪಡೆಯೆ.</verse>
				<verse number="18">ಎಂಕುಲು ಆಯಡೊಪ್ಪ ಪರಿಶುದ್ಧ ಪರ್ವತೊಡು ಉಪ್ಪುನಗ ಪರಲೋಕೊಡ್ದು ಆದುಪ್ಪುನ ಆ ಸ್ವರೊನು ಕೇಂಡ.</verse>
				<verse number="19">ಉಂದತ್ತಂದೆ ಮಸ್ತ್ ದೃಢ ಉಪ್ಪು ಪ್ರವಾದನೆದ ಪಾತೆರ ಎಂಕ್ಲೆಡ ಉಂಡು. ಪುಲ್ಯ ಆನಗ ಬೊಕ್ಕ ಪುಲ್ಯಕಾಂಡೆದ ಬೊಳ್ಳಿ ನಿಕ್ಲೆನ ಉಡಲ್‌ಡ್ ಮೂಡುನಗ ಅವೆನ್ ನಿಕುಲು ಕತ್ತಲೆದ ಜಾಗ್‌ಡ್ ಅರ್ಲುನ ತುಡರಂದ್‌ದ್ ಎನ್ನೊಂದು ಐಕ್ ಲಕ್ಷ್ಯ ಕೊರಿಯರ್ಡ ಎಡ್ಡೆ ಮಲ್ಪುವರ್.</verse>
				<verse number="20">ಮಾತ್ರತ್ತಂದೆ ಶಾಸ್ತ್ರೊಡು ಬರೆತಿ ವಾ ಪ್ರವಾದನೆಲಾ ಏಪೊಗ್ಲಾ ಪ್ರವಾದಿಲೆ ಸ್ವಂತ ಬುದ್ಧಿಡ್ದ್ ಬುಡ್ಪಾದ್ ಪನ್ಪಿನಿ ಅತ್ತ್ ಇನ್ಪಿನೆನ್ ನಿಕುಲು ಸುರುಟ್ಟು ತೆರಿಯೊನೊಡು.</verse>
				<verse number="21">ದಾಯೆಗಂದ್ಂಡ, ವಾ ಪ್ರವಾದನೆದ ಪಾತೆರಲಾ ನರಮಾನಿಲೆ ಚಿತ್ತೊಡ್ದು ಉಂಡಾಯಿನವು ಅತ್ತ್, ನರಮಾನಿಲೆನ್ ಪರಿಶುದ್ಧಾತ್ಮೆ ನಡಪುಡಿನೆಡ್ದ್ ಅಕುಲು ದೇವೆರೆಡ್ದ್ ಪಡೆಯೊಂಡಿನೆನ್ ಪಾತೆರ್‌ವೆರ್.</verse>
			</chapter>
			<chapter number="2">
				<verse number="1">ಇಸ್ರಾಯೇಲ್ ಜನೊಕುಲೆ ನಡುಟು ಸುಳ್ಳು ಪ್ರವಾದಿಲು ಇತ್ತಿಲೆಕ್ಕ ನಿಕ್ಲೆ ನಡುಟ್ಲಾ ಸುಳ್ಳು ಬೋಧಕೆರ್ ಉಪ್ಪೆರ್. ಅಕುಲು ನಾಶನೊಗು ನಡಪುಡುನ ದುರ್ಬೋಧನೆಲೆನ್ ಗುಟ್ಟುಡು ಕಲ್ಪಾವೆರ್. ತನ್ಕುಲೆನ್ ಕ್ರಯೊಕು ದೆತ್ತೊಂದಿ ಯಜಮಾನನ್ಲಾ ಅರೆಂಜುನಾಕುಲಾದುಲ್ಲೆರ್. ಈ ರೀತಿಡ್ ತನ್ಕುಲೆ ಮಿತ್ತ್ ನಾಶನೊನು ಬೇಗನೆ ಬರ್ಪಾವೊನ್ವೆರ್.</verse>
				<verse number="2">ಅಕ್ಲೆನ ನಾಶನದ ಬೋಧನೆಲೆನ್ಲಾ ನಾಚಿಗೆದ ಕಾರ್ಯೊಲೆನ್ಲಾ ಮಸ್ತ್ ಜನ ಬೆರಿ ಪತ್ತುವೆರ್, ಬೊಕ್ಕ ಈ ಬೋಧಕೆರೆಡ್ದಾದ್ ಸತ್ಯದ ಮಾರ್ಗೊಗು ದೂಷಣೆ ಆಪುಂಡು.</verse>
				<verse number="3">ಅಕುಲು ದುರಾಶೆಡ್ ಕೂಡ್ದಿನಕುಲಾದ್ ನಿಕ್ಲೆನ ದುಡ್ಡುನು ಒಯ್ಪೆರೆಗಾದ್ ಸುಳ್ಳುನು ಕಲ್ಪನೆ ಮಲ್ತ್‌ದ್ ಪನ್ಪೆರ್, ಆಂಡ ದೇವೆರ್ ಅಕ್ಲೆನ್ ಏಪನೇ ದೋಷಿಲಂದ್‌ದ್ ನ್ಯಾಯತೀರ್ಪು ಮಲ್ತ್‌ದೆ. ಬೊಕ್ಕ ಅಕ್ಲೆನ ನಾಶನ ತಡದಾಂತೆ ಬರ್ಪುಂಡು.</verse>
				<verse number="4">ದಾಯೆಗಂದ್ಂಡ, ದೇವೆರ್ ಪಾಪ ಮಲ್ತಿನ ದೂತೆರೆನ್ಲಾ ಬುಡ್ತುಜೆ. ಆಯೆ ಅಕ್ಲೆನ್ ಸಂಕಲೆಡ್ ಕಟ್ಟ್‌ದ್ ನರಕೊಗು ಕತ್ತಲೆದ ಗುಂಡಿಗ್ ಪಾಡಿಯೆ. ಅಲ್ಪ ಅಕುಲು ನ್ಯಾಯತೀರ್ಪುದ ದಿನೊನು ಕಾತೊಂದುಲ್ಲೆರ್.</verse>
				<verse number="5">ಬೊಕ್ಕ ದೇವೆರ್ ಆದಿಡ್ ಭಕ್ತಿದಾಂತಿನ ಲೋಕೊನ್ಲಾ ಅಂಚೆನೇ ಬುಡಂದೆ ಅಕ್ಲೆ ಮಿತ್ತ್ ಜಲಪ್ರಳಯ ಬರ್ಪಿಲೆಕ್ಕ ಮಲ್ತೆ. ಆಂಡ ನೀತಿನ್ ಸಾರಿನ ನೋಹನ್ಲಾ ಆಯನ ಕುಟುಂಬಡೊಪ್ಪ ಒರಿದಿ ಏಳ್ ಜನೊಕುಲೆನ್ ಮಾತ್ರ ಒರಿಪಾಯೆ.</verse>
				<verse number="6">ದೇವೆರ್ ಸೋದೋಮು ಗೊಮೋರ ಪಟ್ಟಣೊಲೆಗ್ ತೀರ್ಪು ಕೊರ್ದು ಅಕ್ಲೆನ್ ಪೊತ್ತಾದ್ ಬೊನ್ಯ ಮಲ್ತೆ. ಭಕ್ತಿದಾಂತಿನಾಕುಲೆಗ್ ಆಪಿನ ಅವಸ್ಥೆ ದಾನೆ ಆವು ಇನ್ಪಿನೆಕ್ಕ್ ಅಕ್ಲೆನ್ ಒಂಜಿ ಮಾದ್ರಿ ಆದ್ ಮಲ್ತೆ.</verse>
				<verse number="7">ಆಂಡ ಅವ್ವೇ ಸಂಧರ್ಬೊಡು ಆ ದುಷ್ಟೆರೆ ನಾಚಿಗೆದಾಂತಿನ ಸ್ವಭಾವೊಡ್ದು ದುಃಖೊಡಿತ್ತಿ ನೀತಿವಂತೆ ಆಯಿ ಲೋಟನ್ ಐಡ್ದ್ ತಪ್ಪಾಯೆ.</verse>
				<verse number="8">ದಾಯೆಗಂದ್ಂಡ, ಆ ನೀತಿವಂತೆ ಅಕ್ಲೆ ನಡುಟುಪ್ಪುನಗ ತಾನ್ ದಿನಾಲ ತೂಪಿನ, ಕೇನುನ ಅನ್ಯಾಯ ಕೆಲಸೊಲೆಡ್ದಾದ್ ನೀತಿವಂತೆ ಆದುಪ್ಪು ಲೋಟನ ಉಡಲ್‌ಗ್ ದುಃಖ ಆವೊಂದಿತ್ತ್ಂಡ್</verse>
				<verse number="9">ಕರ್ತವೆ ಭಕ್ತೆರೆನ್ ಶೋಧನೆಡ್ದ್ ಒರಿಪಾವೆರೆಗ್ಲಾ ನೀತಿಕೆಟ್ಟಿನಾಕುಲೆಗ್ ಶಿಕ್ಷೆ ಕೊರಿಯೆರೆಗಾದ್ ಕಡೆ ನ್ಯಾಯತೀರ್ಪುದ ದಿನ ಮುಟ್ಟ ದೀವೆರೆಗ್ಲಾ ತೆರಿದಿನಾಯೆ ಆದುಲ್ಲೆ.</verse>
				<verse number="10">ಮುಖ್ಯಾದ್ ಬಂಡ್‌ತನೊನು ಆಸೆ ಮಲ್ತೊಂದು ಈ ಶರೀರದ ಇಚ್ಚೆ ಆಸೆಲೆಗ್ ಬೋಡಾದ್ ಬದ್‌ಕ್‌ದ್ ದೇವೆರೆನ ಅಧಿಕಾರೊನು ಅಸಡ್ಡೆ ಮಲ್ಪುನಾಕುಲೆಗ್ ಈ ರೀತಿ ಶಿಕ್ಷೆ ಕೊರ್ಪೆ. ಇಂಚಿತ್ತಿನಾಕುಲು ಏರೆಗ್ಲಾ ಪೋಡಿಯಂದೆ ಕುಸಿ ಬತ್ತಿಲೆಕ್ಕ ನಡಪುನಾಕುಲಾದ್ ಮೈಮೆದ ಜಾಗ್‌ಡಿತ್ತಿನಾಕುಲೆನ್ ಪೋಡಿಗೆದಾಂತೆ ದೂಷಿಪುವೆರ್.</verse>
				<verse number="11">ದೂತೆರ್ ಶಕ್ತಿಡ್ಲಾ ಬಲೊಟ್ಲಾ ಆ ಸುಳ್ಳು ಪ್ರವಾದಿಲೆಡ್ದ್ ಶ್ರೇಷ್ಠದಾಕುಲು ಆದಿತ್ತ್‌ಂಡಲಾ ಕರ್ತವನ ಎದುರು ಉಂತುನಗ ಅಕ್ಲೆನ್ ದೂಷಿದ್ ತೀರ್ಪು ಮಲ್ಪುಜೆರ್.</verse>
				<verse number="12">ಆಂಡ ಸ್ವಾಭಾವಿಕ ಆದ್ ಬೋಂಟೆಗ್ಲಾ ಕೆರಿಯೆರೆಗ್ಲಾ ಪುಟ್ಟುದಿನ ಬುದ್ಧಿದಾಂತಿನ ಪ್ರಾಣಿಲೆಕ್ಕ ಈ ದುರ್ಮಾರ್ಗೊಡು ಉಪ್ಪುನಾಕುಲು ತನ್ಕುಲೆಗ್ ತೆರಿಯಂದಿ ವಿಚಾರೊಡು ದೂಷಣೆ ಮಲ್ತೊಂದುಪ್ಪುವೆರ್. ಮೊಕುಲು ತನ್ಕುಲೆ ಹಾಳ್‌ತನೊಡ್ದಾದ್ ತನ್ಕುಲೇ ಹಾಳಾದ್ ಪೋಪೆರ್.</verse>
				<verse number="13">ಅಕುಲು ಬಜೀ ವೈಭೋಗೊಡು ಪಗೆಲ್‌ನ್ ಕಳೆವುನೇ ಸುಖ ಅಂದ್‌ದ್ ಎನ್ನುನಾಕುಲಾದುಲ್ಲೆರ್. ಮೊಕುಲು ನಿಕ್ಲೆಡೊಪ್ಪ ಲೇಸ್‌ಡ್ ಸೇರ್ದುಪ್ಪುನಗ ಅಕುಲು ದಗಲ್‌ಬಾಜಿಲು ಆದಿತ್ತ್‌ದ್ ಉನ್ಪಿನೆಟ್ಟ್ ಪರ್ಪಿನೆಟ್ಟ್ ಕುರೆಪಟ್ಟ್‌ಗ್ಲಾ ಅನ್ಯಾಯೊಗ್ಲಾ ಕಾರಣ ಆದುಪ್ಪುವೆರ್.</verse>
				<verse number="14">ಅಕುಲು ಕಣ್ಣ್ ದೃಷ್ಟಿಡೇ ವ್ಯಭಿಚಾರ ಮಲ್ಪುನಾಕುಲು, ಅಕ್ಲೆನ ಪಾಪದ ಆಸೆಗ್ ತೃಪ್ತಿಯೇ ಆವಂದ್, ಸ್ಥಿರದಾಂತಿನಾಕುಲೆನ್ ತಿಕ್ಕಾದ್ ಪಾಡುನಾಕುಲು, ದುಡ್ಡುದ ಆಸೆಡ್ ಮುರ್ಕುಪೋತಿ ಉಡಲ್‌ದಾಕುಲು, ಶಾಪದ ಬಾಲೆಲು ಆದುಲ್ಲೆರ್.</verse>
				<verse number="15">ಅಕುಲು ಸರ್ತ ಸಾದಿಡ್ದ್ ತೇಲಾದ್ ಬೆಯೋರನ ಮಗೆ ಬಿಳಾಮನ ಮಾರ್ಗೊಡು ಸಾಗ್‌ದ್ ತತ್ತ್‌ದ್ ಪೋತೆರ್. ಈ ಬಿಳಾಮೆ ಅನ್ಯಾಯೊಡು ತಿಕ್ಕುನ ದುಡ್ಡುನು ಪ್ರೀತಿ ಮಲ್ತೆ.</verse>
				<verse number="16">ಆಂಡ ಆಯನ ಅಕ್ರಮೊಗು ಖಂಡನೆ ಆಂಡ್. ಬಾಯಿಬರಂದಿ ಕತ್ತೆ ನರಮಾನಿ ಸ್ವರೊಟ್ಟು ಪಾತೆರ್‌ದ್ ಆ ಪ್ರವಾದಿನ ಮರ್ಲ್ ಬುದ್ಧಿಗ್ ಅಡ್ಡಿ ಮಲ್ತ್ಂಡ್.</verse>
				<verse number="17">ಇಂಚಿತ್ತಿನಾಕುಲು ನೀರ್‌ದಾಂತಿ ಗುವೆಲ್‌ದಲೆಕ್ಕಲಾ ಬಿರುಗಾಳಿಡ್ ರಾದ್ ಪೋಪಿ ಮುಗಲ್ಲಾ ಆದುಲ್ಲೆರ್. ಇಂಚಿತ್ತಿನಾಕುಲೆನ ಪಾಲ್‌ಗ್ ಗರ್ಗಂಡ ಕತ್ತಲೆ ದೀತ್ತ್ಂಡ್.</verse>
				<verse number="18">ತಪ್ಪು ಸಾದಿಡ್ ನಡಪುನಾಕುಲೆನ ಸಹವಾಸೊಡ್ದು ಇಂಚೊಗು ತಪ್ಪಾವೊಂಡಿನಾಕುಲೆನ ಒಟ್ಟುಗು, ಮೊಕುಲು ಬಂಡ್ ಪಾತೆರೊಂದು, ಮಲ್ಲ ಮಲ್ಲ ಬಂಟ್‌ನ್ ಪುಗರೊಂದು, ಶರೀರದಾಶೆನ್ ಪುಟ್ಟಾದ್ ಅಕ್ಲೆನ್ ತಿಕ್ಕಾವೆರ್.</verse>
				<verse number="19">ಅಕ್ಲೆಗ್ ಸ್ವತಂತ್ರ ಕೊರ್ಪಾವ ಅಂದ್‌ದ್ ವಾಗ್ದಾನ ಮಲ್ಪುವೆರ್, ಆಂಡ ತನ್ಕುಲು ಸ್ವತಃ ಪಡಿಕೆಂತಿನೆತ್ತ ಗುಲಾಮೆರಾದುಲ್ಲೆರ್. ಏರಾಂಡಲಾ ಒರಿ ಒಯಿಕ್ ಸೋತು ಪೋದುಪ್ಪುವೆನಾ ಆಯೆ ಐತ ಗುಲಾಮೆ ಆದುಪ್ಪುವೆ.</verse>
				<verse number="20">ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತನ ಗೇನೊನು ಪಡೆವೊಂದು ಲೋಕದ ಕುರೆಪಟ್ಟ್‌ಗ್ ತಪ್ಪಾವೊಂಡಿನಾಕುಲು ಕುಡ ಐಟ್ಟ್ ರೆಂಕೊಂದು ಸೋತು ಪೋಪೆರ್ಡ ಅಕ್ಲೆನ ಕಡೆತ ಸ್ಥಿತಿ ದುಂಬುದೆಡ್ದ್‌ಲಾ ಹೆಚ್ಚ್ ಹಾಳ್ ಆವು.</verse>
				<verse number="21">ಅಕುಲು ಆ ನೀತಿದ ಸಾದಿನ್ ತೆರಿಯೊಂದು ತನ್ಕುಲೆಗ್ ನೇಮಕ ಆತಿ ಪರಿಶುದ್ಧ ಅಪ್ಪಣೆಡ್ದ್ ತೇಲಾದ್ ಪೋಪಿನೆಡ್ದ್ ಆ ಸಾದಿನ್ ತೆರಿಯಂದೆ ಉಪ್ಪುನವೇ ಅಕ್ಲೆಗ್ ಎಡ್ಡೆ ಆದಿತ್ತುದು.</verse>
				<verse number="22">“ನಾಯಿ ತಾನ್ ಕಕ್ಕಿನೆನ್ ತಿನಿಯೆರೆ ಪಿರ ತಿರ್ಗುಂಡು” ಬೊಕ್ಕ “ದೆಕ್ಕ್‌ದಿ ಪಂಜಿ ಕೆಸರ್‌ಡ್ ಪಿರ ಪೊರೆಲೆರೆ ಪೋಪುಂಡು,” ಇನ್ಪಿ ಸತ್ಯ ಗಾದೆಗ್ ಸಮ ಆದ್ ನಡಪುನಾಕುಲು ಆಯೆರ್.</verse>
			</chapter>
			<chapter number="3">
				<verse number="1">ಪ್ರೀತಿದಾಕುಲೇ, ನಿಕ್ಲೆಗ್ ಇತ್ತೆ ಬರೆಪಿನವು ರಡ್ಡನೆ ಪತ್ರಿಕೆ. ಈ ರಡ್ಡ್ ಪತ್ರಿಕೆಡ್ಲಾ ಯಾನ್ ನಿಕ್ಲೆನ ಕಪಟದಾಂತಿ ಉಡಲ್‌ನ್ ಉತ್ತೇಜನ ಮಲ್ತೊಂದುಲ್ಲೆ.</verse>
				<verse number="2">ಪರಿಶುದ್ಧ ಪ್ರವಾದಿಲು ದುಂಬು ಪಂಡಿ ಪಾತೆರೊಲೆನ್ ಬೊಕ್ಕ ಕರ್ತವೆಲಾ ರಕ್ಷಕೆಲಾ ಆಯಿನಾಯೆ ನಿಕ್ಲೆಗ್‌ ಅಪೊಸ್ತಲೆರೆಡ್ದ್ ಕೊರ್ತಿನ ಅಪ್ಪಣೆನ್ಲಾ ನಿಕುಲು ನೆನೆಪು ಮಲ್ತೊಂದುಪ್ಪುಲೆ.</verse>
				<verse number="3">ದುಂಬತ್ತ ಉಂದೆನ್ ತೆರಿಯೊನ್ಲೆ, ಕಡೆ ದಿನೊಕುಲೆಡ್ ತನ್ಕುಲೆ ಹಾಳ್ ಆಸೆದ ಲೆಕ್ಕ ನಡಪುನ ಚೇಷ್ಠೆಗಾರೆರ್ ಮಸ್ಕಿರಿ ಮಲ್ತೊಂದು ತೋಜಿದ್ ಬರುವೆರ್.</verse>
				<verse number="4">“ಯೇಸು ಕುಡೊರ ಬರ್ಪಿನ ವಾಗ್ದಾನ ದಾನೆ ಆಂಡ್? ನಮ ಅಮ್ಮಾಡ್ಲು ನಿದ್ರೆ ಮಲ್ತ್‌ದಿನ ದಿನೊಡ್ದಿಂಚಿ ಇನಿ ಮುಟ್ಟಲಾ ಲೋಕ ಆದಿಡ್ದ್ ಇತ್ತಿಲೆಕ್ಕನೆ ಉಂಡತ್ತಾ?” ಅಂದ್‌ದ್ ಪನುವೆರ್.</verse>
				<verse number="5">ಆದಿಡ್ ಇತ್ತಿನ ಭೂಮ್ಯಾಕಾಶೊಲು ದೇವೆರೆ ವಾಕ್ಯೊಡ್ದು ನೀರ್‌ಡ್ ಉಂಡಾದ್, ಆ ನೀರ್‌ಡೇ ಉಂತುದಿನೆನ್, ಅಕುಲು ತೆರಿದಿತ್ತ್ಂಡಲಾ ಬೋಡಂದ್ದೇ ಮದತ್‌ದ್ ಬುಡ್ಪೆರ್.</verse>
				<verse number="6">ಆ ನೀರ್‌ಡ್ದೇ ಆ ಕಾಲೊಡು ಜಲಪ್ರಳಯೊಡು ಲೋಕ ನಾಶ ಆದ್ ಪೋಂಡು.</verse>
				<verse number="7">ಆಂಡ ಇತ್ತೆ ಉಪ್ಪು ಭೂಮ್ಯಾಕಾಶೊಲು ಅವ್ವೇ ವಾಕ್ಯದ ಬಲೊಡ್ದು ತೂಟು ನಾಶ ಆವೆರೆಗಾದ್ ದೀತಿನಾದುಂಡು. ಅವು ನ್ಯಾಯತೀರ್ಪುದ ದಿನೊಕಾದ್ ಬೊಕ್ಕ ದೇವೆರೆ ಭಕ್ತಿದಾಂತಿನಾಕುಲೆನ ನಾಶನೊಗಾದ್ ದೀತ್ತ್ಂಡ್.</verse>
				<verse number="8">ಪ್ರೀತಿದಾಕುಲೇ, ಕರ್ತವಗ್ ಒಂಜಿ ದಿನ ಸಾರ ವರ್ಸದ ಲೆಕ್ಕಲಾ, ಸಾರ ವರ್ಸೊಲು ಒಂಜಿ ದಿನತ ಲೆಕ್ಕಲಾ ಉಂಡು ಇನ್ಪಿನೆನ್ ಮಾತ್ರ ಮದಪಡೆ.</verse>
				<verse number="9">ಕರ್ತವೆ ತಾನ್ ಮಲ್ತಿ ವಾಗ್ದಾನೊನು ತೀರಿಸಾವೆರೆ ತಡ ಮಲ್ಪುವೆ ಅಂದ್‌ದ್ ಕೆಲೆವೆರ್ ಅರ್ಥ ಮಲ್ತೊನುಲೆಕ್ಕ ಆಯೆ ತಡ ಮಲ್ಪುನಾಯೆ ಅತ್ತ್. ಏರ್ಲಾ ನಾಶ ಆಪಿನೆಟ್ಟ್ ಆಯಗ್ ಮನಸಿಜ್ಜಿ. ಮಾತೆರ್ಲಾ ಪಶ್ಚಾತಾಪ ಪಡೆವೊಡು ಅಂದ್‌ದ್ ಮನಸಿತ್ತಿನಾಯೆ ಆದ್, ನಿಕ್ಲೆನ ಸಂಗತಿಡ್ ದಿಂಜ ತಾಳ್ಮೆಡ್ ಉಲ್ಲೆ.</verse>
				<verse number="10">ಆಂಡ ಕಲ್ವೆ ಬರ್ಪಿಲೆಕ್ಕನೇ, ಕರ್ತವ ದಿನಲ ಬರ್ಪುಂಡು. ಆ ದಿನೊಟು ಬಾನೊಲು ಮಲ್ಲ ಗೌಜಿಡ್ದ್ ಆಳಿದ್ ಪೋವು. ಸೂರ್ಯೆ, ಚಂದ್ರೆ, ನಕ್ಷತ್ರೊಲು ಪೊತ್ತುದು ನಾಶಾದ್ ಪೋವು, ಭೂಮಿಲಾ ಐಟ್ಟುಪ್ಪು ಮಾತ ಕೆಲಸೊಲು ಪೊತ್ತುದು ಪೋವು.</verse>
				<verse number="11">ಉಂದು ಮಾತ ಕೆಲಸೊಲು ಇಂಚ ಲಯ ಆದ್ ಪೋಪಿನೆಡ್ದಾವರ ನಿಕುಲು ದೇವೆರೆ ದಿನ ಬರ್ಪಿನೆನ್ ಕಾತೊಂದು ಸಾದಿನ್ ತೂವೊಂದು ಪರಿಶುದ್ಧ ನಡತೆಡ್ಲಾ ಭಕ್ತಿಡ್ಲಾ ದಿಂಜಿದುಪ್ಪೊಡತ್ತಾ. ಆ ದಿನೊಟು ಬಾನೊಲು ತೂ ಪತ್ತ್‌ದ್ ನಾಶಾದ್ ಪೋವು. ಸೂರ್ಯೆ, ಚಂದ್ರೆ, ನಕ್ಷತ್ರೊಲು ಪೊತ್ತುದು ಕರದ್ ಪೋವು.</verse>
				<verse number="12"></verse>
				<verse number="13">ಆಂಡ ನಮ ದೇವೆರೆ ವಾಗ್ದಾನೊನು ನಂಬೊಂದು ಪೊಸ ಬಾನೊನ್ಲಾ ಪೊಸ ಭೂಮಿನ್ಲಾ ಎದುರು ತೂವೊಂದುಲ್ಲ. ಐಟ್ಟ್ ದೇವೆರೆ ನೀತಿ ನಿಲೆ ಆದುಂಡು.</verse>
				<verse number="14">ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಉಂದೆನ್ ಮಾತ ಎದುರು ತೂಪಿನಾಕುಲು ಆದುಪ್ಪುನೆಡ್ದ್ ಆಯ ದುಂಬು ಸಮಾಧಾನೊಡು ಶುದ್ಧದಾಕುಲುಲಾ ದೋಷದಾಂತಿನಾಕುಲುಲಾ ಆದ್ ತೋಜಿದ್ ಬರ್ಪಿಲೆಕ್ಕ ಪೇಚಾಡ್ಲೆ.</verse>
				<verse number="15">ನಮ ಕರ್ತವನ ದಿಂಜ ತಾಳ್ಮೆ ಎಂಕುಲೆ ರಕ್ಷಣೆಗ್ ಬೋಡಾದ್ ಉಂಡು ಅಂದ್‌ದ್ ಎನ್ನ್‌ಲೆ. ಉಂದೇ ಆಲೋಚನೆಡ್ ಎಂಕುಲೆ ಪ್ರೀತಿದ ಸಹೋದರೆ ಪೌಲುಲಾ ತನ್ಕ್ ದೇವೆರ್ ಕೊರ್ತಿನ ಗೇನೊಗು ಸರಿ ಆದ್ ನಿಕ್ಲೆಗ್ ಬರೆಯೆ.</verse>
				<verse number="16">ಆಯೆ ತನ ಮಾತ ಪತ್ರಿಕೆಡ್ಲಾ ಈ ವಿಚಾರೊಡು ಬರೆನಗ ಇಂಚ ಪಂಡೆ, ಆ ಪತ್ರಿಕೆಲೆಡುಪ್ಪು ಕೆಲವು ಪಾತೆರೊಲು ತೆರಿಯೊನಿಯೆರೆ ಕಷ್ಟ ಉಂಡು. ತೆರಿಯಂದಿನಾಕುಲುಲಾ ಚಂಚಲ ಮನಸ್‌ದಾಕುಲುಲಾ ಬೇತೆ ಶಾಸ್ತ್ರೊಲೆಗ್ ಎಂಚ ತಪ್ಪು ಅರ್ಥ ಮಲ್ತೊಂಡೆರಾ ಅಂಚೆನೆ ಉಂದೆಕ್ಲಾ ತಪ್ಪು ಅರ್ಥ ಮಲ್ತೊಂದು ತನ್ಕುಲೆಗೇ ನಾಶನೊನು ಬರ್ಪಾವೊನ್ವೆರ್.</verse>
				<verse number="17">ಅಂಚಾಯಿನೆಡ್ದ್ ಪ್ರೀತಿದಾಕುಲೇ, ನಿಕುಲು ಈ ಸಂಗತಿಲೆನ್ ದುಂಬೇ ತೆರಿದಿನೆಡ್ದಾವರ ದುಷ್ಟೆರೆ ಮೋಸೊಡು ತಿಕೊಂದು ದೃಢವಾಯಿನ ನಂಬಿಕೆನ್ ಬುಡ್ದು ಪಿರ ಬೂರಂದಿಲೆಕ್ಕ ನಿಕ್ಲೆನ್ ಕಾತೊನ್ಲೆ.</verse>
				<verse number="18">ಆಂಡ ನಮ ಕರ್ತವೆಲಾ ರಕ್ಷಕೆಲಾ ಆದುಪ್ಪು ಯೇಸು ಕ್ರಿಸ್ತನ ದಯೊಟುಲಾ ಗೇನೊಡುಲಾ ಬಲಪುಲೆ, ಆಯಗ್ ಇತ್ತೆಲಾ ಏನಿತ್ಯೇನಿಗ್ಲಾ ಮೈಮೆ ಆವಡ್, ಆಮೆನ್.</verse>
			</chapter>
		</book>
		<book number="62">
			<chapter number="1">
				<verse number="1">ಎಂಕುಲು ನಿಕ್ಲೆಗ್ ಜೀವದ ವಾಕ್ಯ ಬರೆವೊಂದುಲ್ಲ. ಆ ಜೀವದ ವಾಕ್ಯ ಆದಿಡ್ದ್ ಇತ್ತಿನವು. ಅವೆನ್ ಎಂಕುಲು ಕೆಬಿಟ್ ಕೇಂಡ್ದ್, ಕಣ್ಣ್‌ಡ್ ತೂದು, ದೃಷ್ಟಿ ದೀದ್, ಎಂಕ್ಲೆನ ಕೈಟ್ ಮುಟ್ಟುದ.</verse>
				<verse number="2">ಆ ಜೀವ ಎಂಕ್ಲೆಗ್ ತೋಜಿದ್ ಬತ್ತ್ಂಡ್; ಎಂಕುಲು ಆಯನ್ ತೂಯ, ಬೊಕ್ಕ ಆಯನ ಸಂಗತಿಡ್ ಸಾಕ್ಷಿ ಪನ್ತ. ಆಯೆ ಪರಲೋಕೊಡು ಅಮ್ಮೆರೆಡೊಪ್ಪ ಇತ್ತ್‌ದ್, ಎಂಕ್ಲೆಗ್ ತೋಜಿದ್ ಬತ್ತಿನ ನಿತ್ಯಜೀವೊನು ಇತ್ತೆ ನಿಕ್ಲೆಗ್ ತೆರಿಪಾವ.</verse>
				<verse number="3">ಎಂಕ್ಲೆಗ್ ಉಪ್ಪುನ ಅನ್ಯಮನ್ಯೊಡು ನಿಕುಲುಲಾ ಸೇರೊಡಂದ್‌ದ್ ಎಂಕುಲು ತೂಯಿನೆನ್ಲಾ ಕೇಂಡಿನೆನ್ಲಾ ನಿಕ್ಲೆಗ್ ತೆರಿಪಾವ. ಎಂಕ್ಲೆನ ಅನ್ಯಮನ್ಯ ಅಮ್ಮೆರೆಡೊಪ್ಪಲಾ ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತಡೊಪ್ಪಲಾ ಉಂಡು.</verse>
				<verse number="4">ಎಂಕ್ಲೆನ ಸಂತೋಷ ಪೂರ್ತಿ ಆಪಿಲೆಕ್ಕ ಈ ಪಾತೆರೊಲೆನ್ ನಿಕ್ಲೆಗ್ ಬರೆವೊಂದುಲ್ಲ.</verse>
				<verse number="5">ದೇವೆರ್ ಬೊಲ್ಪು ಆದುಲ್ಲೆ ಬೊಕ್ಕ ಆಯಡ ಏತ್ ಮಾತ್ರಲಾ ಕತ್ತಲೆ ಇಜ್ಜಿ. ಉಂದೆನ್ ಎಂಕುಲು ಆಯಡ್ದ್ ಕೇಂಡ್ದ್ ನಿಕ್ಲೆಗ್ ತೆರಿಪಾವುನ ಪಾತೆರ ಆದುಂಡು.</verse>
				<verse number="6">ನಂಕ್ ದೇವೆರೆಡೊಪ್ಪ ಅನ್ಯಮನ್ಯೊಡು ಉಲ್ಲ ಪಂಡ್ದ್, ಕತ್ತಲೆಡ್ ಬದುಕೊಂದಿತ್ತಡ, ನಮ ಸುಳ್ಳುಗಾರೆರಾದ್ ಸತ್ಯೊಡು ಉಪ್ಪುಜ.</verse>
				<verse number="7">ಆಂಡ ದೇವೆರ್ ಬೊಲ್ಪುಡು ಉಪ್ಪುಲೆಕ್ಕನೇ ನಮಲಾ ಬೊಲ್ಪುಡು ನಡತೊನ್ವಡ, ನಂಕ್ ಒರಿಯಡೊಪ್ಪ ಒರಿಯಗ್ ಅನ್ಯಮನ್ಯ ಉಂಡು, ಬೊಕ್ಕ ದೇವೆರೆ ಮಗೆ ಆದುಪ್ಪು ಯೇಸುನ ನೆತ್ತೆರ್ ನಮನ್ ಮಾತ ಪಾಪೊಡ್ದು ಶುದ್ಧ ಮಲ್ಪುಂಡು.</verse>
				<verse number="8">ನಮಡ ಪಾಪ ಇಜ್ಜಿ ಪಂಡಡ, ನಂಕ್ ನಮನೇ ಮೋಸ ಮಲ್ತೊಂದುಪ್ಪುವ, ಬೊಕ್ಕ ಸತ್ಯ ನಮಡ ಉಪ್ಪುಜಿ.</verse>
				<verse number="9">ನಮ ಪಾಪೊಲೆನ್ ಯೇಸುಡ ಅರಿಕೆ ಮಲ್ಪುವಡ, ಆಯೆ ನಮ ಪಾಪೊಲೆನ್ ಮಾಪು ಮಲ್ತ್‌ದ್, ನಮನ್ ಮಾತ ಅನ್ಯಾಯೊಡ್ದು ಶುದ್ಧ ಮಲ್ಪುವೆ. ದಾಯೆಗಂದ್ಂಡ ಆಯೆ ನಂಬಿಗೆದಾಯೆಲಾ ನೀತಿವಂತೆಲಾ ಆದುಲ್ಲೆ.</verse>
				<verse number="10">ನಮ ಪಾಪ ಮಲ್ತ್‌ದ್‌ಜ ಅಂದ್‌ದ್ ಪಂಡಡ, ನಮ ದೇವೆರೆನ್ ಸುಳ್ಳುಗಾರೆ ಮಲ್ಪುವ ಬೊಕ್ಕ ಆಯನ ಪಾತೆರ ನಮಡ ಇಜ್ಜಿ. ಆಮೆನ್.</verse>
			</chapter>
			<chapter number="2">
				<verse number="1">ಎನ ಪ್ರೀತಿದ ಜೋಕುಲೇ, ನಿಕುಲು ಪಾಪ ಮಲ್ಪಂದಿಲೆಕ್ಕ ಯಾನ್ ಉಂದೆನ್ ನಿಕ್ಲೆಗ್ ಬರೆವೊಂದುಲ್ಲೆ. ಏರಾಂಡಲಾ ಪಾಪ ಮಲ್ತೆಡ, ನೀತಿವಂತೆ ಆದುಪ್ಪು ಯೇಸು ಕ್ರಿಸ್ತೆ ಪನ್ಪಿ ನ್ಯಾಯವಾದಿ ನಂಕ್ ಅಮ್ಮೆರೆ ಕೈತಲ್ ಉಲ್ಲೆ.</verse>
				<verse number="2">ಆಯೆ ನಮ ಪಾಪೊಲೆನ್ ಪರಿಹಾರ ಮಲ್ಪುನ ಬಲಿ ಆದುಲ್ಲೆ. ನಮ ಪಾಪೊಲೆನ್ ಮಾತ್ರ ಅತ್ತಂದೆ ಇಡೀ ಲೋಕದ ಪಾಪೊಲೆನ್ಲಾ ಪರಿಹಾರ ಮಲ್ಪುವೆ.</verse>
				<verse number="3">ಬೊಕ್ಕ ನಮ ಆಯ ಅಪ್ಪಣೆಲೆನ್ ಕೈಕೊಂದು ನಡಪುವಡ, ಕಂಡಿತಾದ್ ನಮ ಆಯನ್ ತೆರಿದ ಅಂದ್‌ದ್ ಆಪುಂಡು.</verse>
				<verse number="4">ಒರಿ, ಯಾನ್ ಆಯನ್ ತೆರಿದುಲ್ಲೆ ಪಂಡ್ದ್, ಆಯ ಅಪ್ಪಣೆಲೆನ್ ಕೈಕೊಂದು ನಡತಿಜೆಡ, ಆಯೆ ಸುಳ್ಳುಗಾರೆ ಆದುಲ್ಲೆ. ಬೊಕ್ಕ ಸತ್ಯ ಆಯಡ ಉಪ್ಪುಜಿ.</verse>
				<verse number="5">ಏರಾಂಡಲಾ ಆಯನ ಪಾತೆರೊನು ಕೈಕೊಂದು ನಡಪುವೆಡ ಆಯಡ ನಿಜಾದ್ ದೇವೆರೆ ಪ್ರೀತಿ ಪೂರ್ತಿ ಆದುಂಡು. ಇಂಚಿನ ಕಾರ್ಯೊಡ್ದು ನಮ ಆಯಡ ಒಂಜಾದುಲ್ಲ ಅಂದ್‌ದ್ ತೆರಿಯೊನ್ವ.</verse>
				<verse number="6">ದೇವೆರೆಡ್ ನಿಲೆ ಆದುಲ್ಲೆ ಅಂದ್‌ದ್ ಪನ್ಪಿನಾಯೆ, ಕ್ರಿಸ್ತೆ ಎಂಚ ನಡತೊಂಡೆನಾ ಅಂಚೆನೆ ತಾನ್‌ಲಾ ನಡತೊನೊಡಾಪುಂಡು.</verse>
				<verse number="7">ಪ್ರೀತಿದಾಕುಲೇ, ಯಾನ್ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆನ್ ಅತ್ತ್, ದುಂಬುಡ್ದಿಂಚಿ ನಿಕ್ಲೆಗ್ ಇತ್ತಿ ಪರ ಅಪ್ಪಣೆನೇ ಬರೆಪೆ. ಒರಿಯನ್ ಒರಿ ಪ್ರೀತಿ ಮಲ್ಪೊಡು ಪನ್ಪಿನ ಈ ಪರ ಅಪ್ಪಣೆ ನಿಕುಲು ಕೇಂಡಿನ ವಾಕ್ಯನೇ ಆದುಂಡು.</verse>
				<verse number="8">ಕುಡ ನಿಕ್ಲೆಗ್ ಒಂಜಿ ಪೊಸ ಅಪ್ಪಣೆ ಬರೆಪೆ. ಉಂದು ಆಯಡಲಾ ನಿಕ್ಲೆಡಲಾ ಸತ್ಯ ಆದುಂಡು. ದಾಯೆಗಂದ್ಂಡ ಕತ್ತಲೆ ಕರಿದ್ ಪೋಪುಂಡು, ನಿಜವಾಯಿನ ಬೊಲ್ಪು ಇತ್ತೆ ಮೂಡುಂಡು.</verse>
				<verse number="9">ಬೊಲ್ಪುಡುಲ್ಲೆ ಅಂದ್‌ದ್ ಪನ್ಪಿನಾಯೆ ತನ ಸಹೋದ್ರನ್ ಪಗೆ ಮಲ್ತೊಂದಿತ್ತ್‌ಂಡ, ಆಯೆ ನನಲಾ ಕತ್ತಲೆಡ್ ಉಲ್ಲೆ.</verse>
				<verse number="10">ತನ ಸಹೋದ್ರನ್ ಪ್ರೀತಿ ಮಲ್ಪುನಾಯೆ ಬೊಲ್ಪುಡು ನಿಲೆ ಆದುಲ್ಲೆ. ಬೊಕ್ಕ ಬೇತೆಕ್ಲು ದಂಟೆರೆ ಕಾರಣ ಆಪುಜೆ.</verse>
				<verse number="11">ಆಂಡ ತನ ಸಹೋದ್ರನ್ ಪಗೆ ಮಲ್ಪುನಾಯೆ ಕತ್ತಲೆಡ್ ಉಲ್ಲೆ ಬೊಕ್ಕ ಕತ್ತಲೆಡ್ ನಡತೊಂದುಲ್ಲೆ. ಕತ್ತಲೆ ಆಯನ ಕಣ್ಣ್‌ಲೆನ್ ಕುರುಡು ಮಲ್ತಿನೆಡ್ದ್ ಆಯೆ ಒಡೆಗ್ ಪೋವೊಂದುಲ್ಲೆ ಅಂದ್‌ದ್ ಆಯಗ್ ತೆರಿಯಂದ್.</verse>
				<verse number="12">ಎನ ಪ್ರೀತಿದ ಜೋಕುಲೇ, ಯೇಸು ಕ್ರಿಸ್ತನ ಪುದರ್‌ಡ್ದಾದ್ ನಿಕ್ಲೆ ಪಾಪೊಲು ಮಾಪು ಆತಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ.</verse>
				<verse number="13">ಅಮ್ಮಾಡ್ಲೇ, ಆದಿಡ್ದ್ ಇತ್ತಿನಾಯನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ. ಜವನ್ಯೆರೇ, ನಿಕುಲು ಪಡಿಕೆಂತಿನಾಯನ್ ಜೈಸಿನೆಡ್ದ್ ನಿಕ್ಲೆಗ್ ಬರೆವೊಂದುಲ್ಲೆ. ಜೋಕುಲೇ, ಅಮ್ಮೆ ಆದುಪ್ಪು ದೇವೆರೆನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆತೆ.</verse>
				<verse number="14">ಅಮ್ಮಾಡ್ಲೆ, ಆದಿಡ್ದ್ ಇತ್ತಿನಾಯನ್ ನಿಕುಲು ತೆರಿದಿನೆಡ್ದ್ ನಿಕ್ಲೆಗ್ ಬರೆತೆ. ಜವನ್ಯೆರೇ, ನಿಕುಲು ಶಕ್ತಿದಾಕುಲು ಆದಿತ್ತಿನೆಡ್ದ್‌ಲಾ ದೇವೆರೆ ಪಾತೆರ ನಿಕ್ಲೆಡ್ ನಿಲೆ ಆದಿತ್ತಿನೆಡ್ದ್‌ಲಾ ನಿಕುಲು ಪಡಿಕೆಂತಿನಾಯನ್ ಜೈಸಿನೆಡ್ದ್‌ಲಾ ನಿಕ್ಲೆಗ್ ಬರೆತೆ.</verse>
				<verse number="15">ಲೋಕೊನ್ಲಾ ಲೋಕೊಡುಪ್ಪುನೆನ್ಲಾ ಪ್ರೀತಿ ಮಲ್ಪಡೆ. ಏರಾಂಡಲಾ ಲೋಕೊನು ಪ್ರೀತಿ ಮಲ್ಪುವೆಡ, ಆಯಡ ಅಮ್ಮೆ ಆದುಪ್ಪು ದೇವೆರೆನ ಪ್ರೀತಿ ಇಜ್ಜಿ.</verse>
				<verse number="16">ಶರೀರದ ಆಸೆ, ಕಣ್ಣ್‌ಲೆ ಆಸೆ, ಬದ್‌ಕ್‌ದ ಡಂಬ ಇನ್ಪಿನ ಲೋಕೊಡುಪ್ಪುನವು ಮಾತಲಾ ಅಮ್ಮೆರೆಡ್ದ್ ಪುಟ್ಟಂದೆ ಲೋಕೊಡ್ದು ಪುಟ್ಟಿನವು ಆದುಂಡು.</verse>
				<verse number="17">ಲೋಕಲಾ ಐತ ಮಾತ ಆಸೆಲಾ ಇಜ್ಜಾಂದೆ ಪೋಪುಂಡು. ಆಂಡ ದೇವೆರೆ ಚಿತ್ತೊನು ಮಲ್ಪುನಾಯೆ ಏಪೊಗ್ಲಾ ಬದುಕುವೆ.</verse>
				<verse number="18">ಜೋಕುಲೇ, ಕಡೆ ಗಳಿಗೆ ಬೈದ್‌ಂಡ್. ಕ್ರಿಸ್ತ ವಿರೋಧಿ ಬರ್ಪೆ ಅಂದ್‌ದ್ ನಿಕುಲು ಕೇಂಡ್ದರ್. ಇತ್ತೆನೇ ಮಸ್ತ್ ಕ್ರಿಸ್ತ ವಿರೋಧಿಲು ತೋಜಿದ್ ಬೈದೆರ್. ಉಂದೆಡ್ದ್ ಕಡೆ ಗಳಿಗೆ ಬೈದ್‌ಂಡ್ ಅಂದ್‌ದ್ ನಮ ತೆರಿಯೊನ್ವ.</verse>
				<verse number="19">ಕ್ರಿಸ್ತ ವಿರೋಧಿಲು ನಮಡ್ದ್ ಪಿದಯಿ ಪೋಯಿನಾಕುಲು; ಮೊಕುಲು ನಮ್ಮಾಕುಲು ಆದಿತ್ತ್‌ಜೆರ್. ನಮ್ಮಾಕುಲು ಆದಿತ್ತೆರ್ಡ ನಮ ಒಟ್ಟುಗೇ ಇತ್ತುದ್ವೆರ್. ಆಂಡ ಅಕುಲು ನಮನ್ ಬುಡ್ದು ಪೋಯಿನೆಡ್ದ್ ನಮ್ಮಾಕುಲು ಅತ್ತ್ ಇನ್ಪಿನವು ಸ್ಪಷ್ಟಾದ್ ತೋಜಿದ್ ಬರ್ಪುಂಡು.</verse>
				<verse number="20">ಆಂಡ ನಿಕ್ಲೆಗ್ ಪರಿಶುದ್ಧ ಇತ್ತಿನಾಯಡ್ದ್ ಅಭಿಷೇಕ ಆದಿತ್ತಿನೆಡ್ದ್ ನಿಕುಲು ಮಾತೆರ್ಲಾ ಸತ್ಯೊನು ತೆರಿಯೊಂದರ್.</verse>
				<verse number="21">ನಿಕ್ಲೆಗ್ ಸತ್ಯ ತೆರಿದಿಜಿ ಅಂದ್‌ದ್ ಯಾನ್ ನಿಕ್ಲೆಗ್ ಬರೆಪಿನಿ ಅತ್ತ್. ಆಂಡ ನಿಕ್ಲೆಗ್ ಸತ್ಯ ತೆರಿದಿನೆಡ್ದ್‌ಲಾ, ಸತ್ಯೊಡು ವಾ ಸುಳ್ಳುಲಾ ಪುಟ್ಟಂದಿನೆಡ್ದ್‌ಲಾ ಯಾನ್ ನಿಕ್ಲೆಗ್ ಬರೆವೊಂದುಲ್ಲೆ.</verse>
				<verse number="22">ಸುಳ್ಳುಗಾರೆ ಏರ್? ಯೇಸುನು ಕ್ರಿಸ್ತೆ ಅತ್ತ್ ಅಂದ್‌ದ್ ಪನ್ಪಿನಾಯೆನೇ ಅತ್ತಂದೆ ಬೇತೆ ಏರ್ಲಾ ಆವೆರೆ ಸಾದ್ಯ ಇಜ್ಜಿ? ಅಮ್ಮೆ ಆದುಪ್ಪು ದೇವೆರೆನ್ಲಾ ಆಯ ಮಗನ್ಲಾ ಅರೆಂಜುನಾಯೆ ಕ್ರಿಸ್ತ ವಿರೋಧಿ ಆದುಲ್ಲೆ.</verse>
				<verse number="23">ಏರ್ ದೇವೆರೆ ಮಗನ್ ಅರೆಂಜುವೆನಾ ಆಯೆ ದೇವೆರೆಗ್ ಸೇರ್ದಿನಾಯೆ ಅತ್ತ್. ಆಂಡ ಏರ್ ಮಗನ್ ಒಪ್ಪಿಯೊನ್ವೆನಾ ಆಯೆ ಅಮ್ಮೆ ಆದುಪ್ಪು ದೇವೆರೆಗ್ ಸೇರ್ದಿನಾಯೆ ಆದುಲ್ಲೆ.</verse>
				<verse number="24">ಅಂಚಾಂಡ, ನಿಕುಲು ಆದಿಡ್ದಿಂಚಿ ಕೇಂಡ್ದಿ ಬೋಧನೆಲು ನಿಕ್ಲೆಡ್ ನಿಲೆ ಆದುಪ್ಪಡ್. ನಿಕುಲು ಆದಿಡ್ದ್ ಕೇಂಡಿನವು ನಿಕ್ಲೆಡ್ ನಿಲೆ ಆದಿತ್ತ್ಂಡ, ನಿಕುಲು ಮಗನೊಟ್ಟುಗ್ಲಾ ಅಮ್ಮೆರೊಟ್ಟುಗ್ಲಾ ಒಂಜಾದುಪ್ಪುವರ್.</verse>
				<verse number="25">ಬೊಕ್ಕ ಕ್ರಿಸ್ತೆ ನಂಕ್ ಕೊರಿ ವಾಗ್ದಾನ ನಿತ್ಯಜೀವನೇ.</verse>
				<verse number="26">ನಿಕ್ಲೆನ್ ಮೋಸೊಡು ಪಾಡುನಾಕುಲೆ ವಿಚಾರೊಡು ಉಂದೆನ್ ಯಾನ್ ನಿಕ್ಲೆಗ್ ಬರೆವೊಂದುಲ್ಲೆ.</verse>
				<verse number="27">ಆಂಡ ಆಯಡ್ದ್ ನಿಕುಲು ಪಡೆತಿನ ಅಭಿಷೇಕ ನಿಕ್ಲೆಡ್ ನಿಲೆ ಆದುಪ್ಪುನೆಡ್ದ್ ಏರ್ಲಾ ನಿಕ್ಲೆಗ್ ಕಲ್ಪಾವೊಡು ಅಂದ್‌ದ್ ಇಜ್ಜಿ. ದಾಯೆಗಂದ್ಂಡ ನಿಕ್ಲೆಗ್ ತೆರಿಯೊಡಾಯಿನೆನ್ ಮಾತಲಾ ಆತ್ಮೆ ಕಲ್ಪಾವೆ. ಬೊಕ್ಕ ಆಯೆ ಕಲ್ಪಾವುನವು ಸತ್ಯನೇ, ಸುಳ್ಳತ್ತ್. ಅಂಚಾದ್ ಆಯೆ ನಿಕ್ಲೆಗ್ ಕಲ್ಪಾದ್ ಕೊರಿ ಲೆಕ್ಕ ಕ್ರಿಸ್ತಡ್ ಒಂಜಾದುಪ್ಪುಲೆ.</verse>
				<verse number="28">ಅಂಚಾದ್ ಜೋಕುಲೇ, ಆಯೆ ಕುಡೊರ ತೋಜಿದ್ ಬನ್ನಗ ನಂಕ್ ಆಯಡ್ದ್ ನಾಚಿಗೆ ಆವಂದೆ, ಆಯ ಎದುರುಡು ಧೈರ್ಯೊಡು ಉಂತುಲೆಕ್ಕ ಕ್ರಿಸ್ತಡ್ ಒಂಜಾದುಪ್ಪುಲೆ.</verse>
				<verse number="29">ಕ್ರಿಸ್ತನ್ ನೀತಿವಂತೆ ಅಂದ್‌ದ್ ನಿಕುಲು ತೆರಿದುಲ್ಲರ್ಡ ನೀತಿಡ್ ನಡಪುನಾಯೆ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ಅಂದ್‌ದ್ ನಿಕ್ಲೆಗ್ ತೆರಿಯುಂಡು.</verse>
			</chapter>
			<chapter number="3">
				<verse number="1">ತೂಲೆ! ಅಮ್ಮೆ ಆದುಪ್ಪು ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ. ಆಯೆ ನಮನ್ ತನ ಜೋಕುಲಂದ್‌ದ್ ಲೆಪ್ಪುವೆ, ಅಂಚಾದ್ ನಮ ಆಯನ ಜೋಕುಲು ಆದುಲ್ಲ. ಆಂಡ ಈ ಲೋಕದ ಜನೊಕುಲು ದೇವೆರೆನ್ ತೆರಿಯಂದಿನೆಡ್ದ್ ನಮನ್ ಆಯನ ಜೋಕುಲು ಇನ್ಪಿನೆನ್ ತೆರಿಯೊನುಜೆರ್.</verse>
				<verse number="2">ಪ್ರೀತಿದಾಕುಲೇ, ನಮ ಇತ್ತೆ ದೇವೆರೆ ಜೋಕುಲು ಆದುಲ್ಲ. ದುಂಬಗ್ ನಮ ಎಂಚ ಉಪ್ಪುವ ಅಂದ್‌ದ್ ನಂಕ್ ಗೊತ್ತುಜ್ಜಿ. ಆಂಡ ಕ್ರಿಸ್ತೆ ತೋಜಿದ್ ಬನ್ನಗ, ನಮ ಆಯ ಲೆಕ್ಕನೆ ಉಪ್ಪುವ ಇನ್ಪಿನೆನ್ ತೆರಿದ. ದಾಯೆಗಂದ್ಂಡ ಆಯೆ ಉಪ್ಪುಲೆಕ್ಕನೇ ನಮ ಆಯನ್ ತೂಪ.</verse>
				<verse number="3">ಆಯ ಮಿತ್ತ್ ಈ ನಿರೀಕ್ಷೆ ದೀತಿನ ಪ್ರತಿ ಒರಿಲಾ ಕ್ರಿಸ್ತೆ ಶುದ್ಧ ಆದುಪ್ಪುಲೆಕ್ಕನೇ ತನನ್ ತಾನೇ ಶುದ್ಧ ಮಲ್ತೊನ್ವೆ.</verse>
				<verse number="4">ಪಾಪ ಮಲ್ಪುನ ಪ್ರತಿ ಒರಿಲಾ ಅನ್ಯಾಯೊನು ಮಲ್ಪುನಾಯೆ ಆದುಲ್ಲೆ. ಪಾಪ ಅನ್ಯಾಯನೇ.</verse>
				<verse number="5">ಪಾಪೊಲೆನ್ ದೆತ್ತ್ ಪಾಡೆರೆಗಾದ್ ಕ್ರಿಸ್ತೆ ತೋಜಿದ್ ಬತ್ತೆ ಅಂದ್‌ದ್ ನಿಕ್ಲೆಗ್ ತೆರಿದುಂಡು; ಆಂಡ ಆಯಡ ಪಾಪ ಇಜ್ಜಿ.</verse>
				<verse number="6">ಆಯಡ್ ಒಂಜಾದುಪ್ಪುನಾಯೆ ಏರ್ಲಾ ಪಾಪ ಮಲ್ಪುಜೆ. ಪಾಪ ಮಲ್ಪುನಾಯೆ ಆಯನ್ ತೂತಿನ್ಲಾ ಇಜ್ಜಿ, ಅತ್ತ್‌ಡ ತೆರಿದಿನ್ಲಾ ಇಜ್ಜಿ.</verse>
				<verse number="7">ಪ್ರೀತಿದ ಜೋಕುಲೇ, ನಿಕ್ಲೆನ್ ಮೋಸ ಮಲ್ಪಂದಿಲೆಕ್ಕ ಏರೆಗ್ಲಾ ಅವಕಾಸ ಕೊರೊಡ್ಚಿ. ಕ್ರಿಸ್ತೆ ನೀತಿವಂತೆ ಆದುಪ್ಪುಲೆಕ್ಕನೇ, ನೀತಿಡ್ ನಡುಪುನಾಯೆ ನೀತಿವಂತೆ ಆದುಲ್ಲೆ.</verse>
				<verse number="8">ಏರಾಂಡಲಾ ಪಾಪ ಮಲ್ತೊಂದೇ ಇತ್ತೆರ್ಡ ಅಕುಲು ಸೈತಾನಗ್ ಸೇರ್ದಿನಾಕುಲು ಅಂದ್‌ದ್ ತೋಜಿದ್ ಬರ್ಪುಂಡು. ಸೈತಾನೆ ಆದಿಡ್ದಿಂಚಿಲಾ ಪಾಪ ಮಲ್ತೊಂದೇ ಇತ್ತೆ. ಆಂಡ ದೇವೆರೆ ಮಗೆ ಸೈತಾನನ ಕಾರ್ಯೊಲೆನ್ ನಾಶ ಮಲ್ಪೆರೆಗಾದ್ ಬತ್ತೆ.</verse>
				<verse number="9">ದೇವೆರೆಡ್ದ್ ಪುಟ್ಟಿನಾಯೆ ಏರ್ಲಾ ಪಾಪ ಮಲ್ಪುಜೆ, ದಾಯೆಗಂದ್ಂಡ ದೇವೆರೆ ಸ್ವಭಾವ ಆಯಡ ಉಂಡು. ಆಯೆ ದೇವೆರೆಡ್ದ್ ಪುಟ್ಟಿನಾಯೆ ಆದುಪ್ಪುನೆಡ್ದ್ ಪಾಪ ಮಲ್ತೊಂದುಪ್ಪುಜೆ.</verse>
				<verse number="10">ದೇವೆರೆ ಜೋಕುಲು ಏರ್ ಬೊಕ್ಕ ಪಿಶಾಚನ ಜೋಕುಲು ಏರ್ ಇನ್ಪಿನವು ಉಂದೆಡ್ದೇ ತೆರಿದ್ ಬರ್ಪುಂಡು. ನೀತಿಡ್ ನಡಪಂದಿನಾಯೆಲಾ ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆಲಾ ದೇವೆರೆಡ್ದ್ ಪುಟ್ಟಿನಾಯೆ ಅತ್ತ್.</verse>
				<verse number="11">ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ ನಿಕುಲು ಆದಿಡ್ದಿಂಚಿಲಾ ಕೇಂಡಿನ ಪಾತೆರ ಆದುಂಡು.</verse>
				<verse number="12">ನಮ ಕಾಯಿನ ಲೆಕ್ಕ ಉಪ್ಪೆರೆ ಬಲ್ಲಿ. ಕಾಯಿನೆ ಪಡಿಕೆಂತಿನಾಯೆ ಆದಿತ್ತಿನೆಡ್ದ್ ತನ ಮೆಗ್ಯನ್ ಕೆರಿಯೆ, ಆಯೆ ದಾಯೆಗ್ ತನ ಮೆಗ್ಯನ್ ಕೆರಿಯೆ? ದಾಯೆಗಂದ್ಂಡ ತನ ಕ್ರಿಯೊಲು ಪಡಿಕೆಂತಿನವು, ತನ ಮೆಗ್ಯನ ಕ್ರಿಯೊಲು ನೀತಿದವು ಆದಿತ್ತಿನೆಡ್ದೇ.</verse>
				<verse number="13">ಎನ ಸಹೋದ್ರೆರೇ, ಲೋಕದ ಜನೊಕುಲು ನಿಕ್ಲೆನ್ ಪಗೆ ಮಲ್ತೆರ್ಡ ಅಚ್ಚಿರ ಆವಡೆ.</verse>
				<verse number="14">ನಮ ಕ್ರೈಸ್ತಸಹೋದ್ರೆರೆನ್ ಪ್ರೀತಿ ಮಲ್ಪುನಾಕುಲು ಆದುಪ್ಪುನೆಡ್ದ್ ಮರಣೊಡ್ದು ಜೀವೊಗು ದಾಂಟ್‌ದ್ ಬತ್ತ ಅಂದ್‌ದ್ ನಂಕ್ ಗೊತ್ತಾತ್ತ್ಂಡ್. ತನ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ ಮರಣೊಡೇ ಉಲ್ಲೆ.</verse>
				<verse number="15">ತನ ಸಹೋದ್ರನ್ ಪಗೆ ಮಲ್ಪುನಾಯೆ ನಿಜಾದ್ ಒರಿ ಮಾನ್ಯ ಕೆರ್ಪಿನಾಯೆ ಆದುಲ್ಲೆ. ಬೊಕ್ಕ ವಾ ಮಾನ್ಯಕೆರ್ಪಿನಾಯಡಲಾ ನಿತ್ಯಜೀವ ಇಜ್ಜಿ ಅಂದ್‌ದ್ ನಿಕ್ಲೆಗ್ ಗೊತ್ತುಂಡು.</verse>
				<verse number="16">ಕ್ರಿಸ್ತೆ ನಂಕಾದ್ ತನ ಜೀವ ಕೊರ್ತಿನೆಡ್ದ್ ನಿಜವಾಯಿನ ಪ್ರೀತಿ ದಾನೆ ಅಂದ್‌ದ್ ನಂಕ್ ತೆರಿದ್‌ಂಡ್. ಅಂಚೆನೇ ನಮಲಾ ಸಹೋದ್ರೆರೆಗಾದ್ ನಮ ಪ್ರಾಣೊನು ಕೊರಿಯೆರೆ ತಯಾರಾದುಪ್ಪೊಡು.</verse>
				<verse number="17">ಈ ಲೋಕದ ಸಂಪೊತ್ತು ಇತ್ತಿನಾಯೆ ಕೊರತೆಡುಪ್ಪು ತನ ಸಹೋದ್ರನ್ ತೂದು ಕನಿಕರ ತೋಜಾಯಿಜೆಡ, ದೇವೆರೆ ಪ್ರೀತಿ ಆಯಡ ಎಂಚ ಉಪ್ಪುನು?</verse>
				<verse number="18">ಎನ ಪ್ರೀತಿದ ಜೋಕುಲೇ, ನಿಕುಲು ಬಜೀ ಪಾತೆರೊಡ್ದಾವಡ್ ಬಾಯಿ ಪ್ರಚಾರೊಡ್ದಾವಡ್ ಪ್ರೀತಿ ಮಲ್ಪುನಾಕುಲು ಆದುಪ್ಪಡೆ. ನಿಕ್ಲೆ ಪ್ರೀತಿ ಕ್ರಿಯೊಲೆಡ್ಲಾ ಸತ್ಯೊಡ್ಲಾ ತೋಜಿದ್ ಬರಡ್.</verse>
				<verse number="19">ನಮ ಸತ್ಯೊಗು ಸೇರ್ದಿನಾಕುಲು ಅಂದ್‌ದ್ ಉಂದೆಡ್ದೇ ನಂಕ್ ಗೊತ್ತಾಪುಂಡು. ಬೊಕ್ಕ ದೇವೆರೆ ಎದುರು ನಮ ಉಡಲ್‌ಗ್ ಧೈರ್ಯ ಆಪುಂಡು.</verse>
				<verse number="20">ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ತ್ಂಡಲಾ, ದೇವೆರ್ ನಮ ಮನಸಾಕ್ಷಿಡ್ದ್ ಮಲ್ಲಾಯೆ ಆದಿತ್ತ್‌ದ್ ಆಯಗ್ ಮಾತಲಾ ತೆರಿದುಂಡು.</verse>
				<verse number="21">ಪ್ರೀತಿದಾಕುಲೇ, ನಮ ಉಡಲ್ ನಮನ್ ತಪ್ಪುಗಾರೆರ್ ಅಂದ್‌ದ್ ತೀರ್ಪು ಮಲ್ಪುಜಿಡ ನಮ ದೇವೆರೆ ಎದುರು ಧೈರ್ಯೊಡು ಬರೊಲಿ.</verse>
				<verse number="22">ನಮ ಆಯ ಅಪ್ಪಣೆಲೆನ್ ಕೈಕೊಂದು ನಡಪುನೆಡ್ದ್‌ಲಾ ಆಯಗ್ ಮೆಚ್ಚಿಗೆ ಇತ್ತಿನೆನೇ ಮಲ್ಪುನಾಕುಲು ಆದುಪ್ಪುನೆಡ್ದ್‌ಲಾ ನಮ ನಟ್ಟೊಂಡಿನೆನ್ ಮಾತೆನ್ಲಾ ಆಯಡ್ದ್ ಹೊಂದುವ.</verse>
				<verse number="23">ದೇವೆರೆ ಅಪ್ಪಣೆ ದಾನೆಂದ್ಂಡ, ಆಯ ಮಗೆ ಆದುಪ್ಪು ಯೇಸು ಕ್ರಿಸ್ತನ್ ನಮ ನಂಬುದು ಬೊಕ್ಕ ಆಯೆ ಅಪ್ಪಣೆ ಕೊರಿಲೆಕ್ಕನೇ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಇನ್ಪಿನವೇ.</verse>
				<verse number="24">ಆಯ ಅಪ್ಪಣೆಲೆನ್ ಕೈಕೊಂದು ನಡಪುನಾಯೆ ಆಯಡ್ ಒಂಜಾದುಲ್ಲೆ ಬೊಕ್ಕ ದೇವೆರ್ ಆಯಡ್ ಒಂಜಾದುಲ್ಲೆ. ಆಯೆ ನಮಡ ಒಂಜಾದುಲ್ಲೆ ಅಂದ್‌ದ್ ಆಯೆ ನಂಕ್ ಕೊರಿ ಆತ್ಮೊಡ್ದೇ ನಮ ತೆರಿಯೊನ್ವ</verse>
			</chapter>
			<chapter number="4">
				<verse number="1">ಪ್ರೀತಿದಾಕುಲೇ, ಮಸ್ತ್ ಮಂದಿ ಸುಳ್ಳು ಪ್ರವಾದಿಲು ಲೋಕದುಲಯಿ ಬೈದಿನೆಡ್ದ್ ನಿಕುಲು ಆತ್ಮಸಮ್ಮಂಧವಾಯಿನ ಮಾತ ಪಾತೆರೊಲೆನ್ ನಂಬಡೆ, ಆ ಪಾತೆರೊಲು ದೇವೆರೆಡ್ದ್ ಬೈದಿನವಾ ಪಂಡ್ದ್ ತೆರಿಯೊನಿಯೆರೆಗಾದ್ ಪರೀಕ್ಷೆ ಮಲ್ಪುಲೆ.</verse>
				<verse number="2">ದೇವೆರೆ ಆತ್ಮ ಅಕ್ಲೆಡ್ ಉಂಡಾ ಇಜ್ಜಾ ಪಂಡ್ದ್ ನಮ ಎಂಚ ತೆರಿಯೊನೊಲಿ? ಏರಾಂಡಲಾ ಒರಿ ಯೇಸು ಕ್ರಿಸ್ತೆ ನಿಜ ಶರೀರೊಡು ಬತ್ತೆ ಇನ್ಪಿನೆನ್ ಒಪ್ಪಿಯೆಡ ಆಯಡ ದೇವೆರೆ ಆತ್ಮ ಉಂಡು.</verse>
				<verse number="3">ಆಂಡ ಒರಿ, ಯೇಸುನು ಒಪ್ಪಿಯೊನುಜೆಡ ಆಯೆ ದೇವೆರೆಡ್ದ್ ಬೈದಿನಾಯೆ ಅತ್ತ್. ಆಯಡ ಕ್ರಿಸ್ತ ವಿರೋಧಿನ ಆತ್ಮ ಉಂಡು. ಇಂಚಿನ ಆತ್ಮ ಲೋಕೊಗು ಬರು ಅಂದ್‌ದ್ ನಿಕುಲು ಕೇಂಡ್ದರತ್ತಾ? ಅವು ಇತ್ತೆನೇ ಲೋಕೊಡು ಉಂಡು.</verse>
				<verse number="4">ಪ್ರೀತಿದ ಜೋಕುಲೇ, ನಿಕುಲು ದೇವೆರೆಗ್ ಸೇರ್ದಿನಾಕುಲು, ಬೊಕ್ಕ ನಿಕ್ಲೆಗ್ ಇತ್ತೆನೇ ಸುಳ್ಳು ಪ್ರವಾದಿಲೆ ಮಿತ್ತ್ ಜಯ ತಿಕ್ಕ್‌ದ್ಂಡ್. ದಾಯೆಗಂದ್ಂಡ ನಿಕ್ಲೆಡ್ ಉಪ್ಪುನಾಯೆ ಲೋಕೊಡುಪ್ಪುನಾಯಡ್ದ್ ಶಕ್ತಿದಾಯೆ ಆದುಲ್ಲೆ.</verse>
				<verse number="5">ಆ ಜನೊಕುಲು ಈ ಲೋಕೊಗು ಸೇರ್ದಿನಾಕುಲು; ಅಂಚಾದ್ ಅಕುಲು ಲೋಕದ ರೀತಿಡ್ ಪಾತೆರ್‌ವೆರ್, ಬೊಕ್ಕ ಲೋಕ ಅಕ್ಲೆಗ್ ಕೆಬಿ ಕೊರ್ಪುಂಡು.</verse>
				<verse number="6">ಆಂಡ ನಮ ದೇವೆರೆಗ್ ಸೇರ್ದಿನಾಕುಲು; ದೇವೆರೆನ್ ತೆರಿದಿನಾಕುಲು ನಂಕ್ ಕೆಬಿ ಕೊರ್ಪೆರ್. ಅಕುಲು ದೇವೆರೆಗ್ ಸೇರ್ದ್ ಇಜ್ಜೆರ್ಡ ನಂಕ್ ಕೆಬಿ ಕೊರ್ಪುಜೆರ್. ಉಂದೆಡ್ದೇ ಸತ್ಯದ ಆತ್ಮೊನ್ಲಾ ಮೋಸದ ಆತ್ಮೊನ್ಲಾ ನಮ ತೆರಿಯೊನ್ವ.</verse>
				<verse number="7">ಪ್ರೀತಿದಾಕುಲೇ, ನಮ ಒರಿಯನ್ ಒರಿ ಪ್ರೀತಿ ಮಲ್ಪಗ; ದಾಯೆಗಂದ್ಂಡ ಪ್ರೀತಿ ದೇವೆರೆಡ್ದ್ ಉಂಡಾಯಿನವು. ಪ್ರೀತಿ ಮಲ್ಪುನ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ದೇವೆರೆನ್ ತೆರಿದಿನಾಯೆ ಆದುಲ್ಲೆ.</verse>
				<verse number="8">ಆಂಡ ಪ್ರೀತಿ ಮಲ್ಪಂದಿನಾಯೆ, ದೇವೆರೆನ್ ತೆರಿಯಂದಿನಾಯೆ ಆದುಲ್ಲೆ. ದಾಯೆಗಂದ್ಂಡ ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ.</verse>
				<verse number="9">ದೇವೆರ್ ತನ ಒರಿಯೇ ಮಗನ್, ನಮ ಆಯಡ್ದ್ ಬದುಕುಲೆಕ್ಕ ಲೋಕೊಗು ಕಡಪುಡಿನೆಡ್ದೇ ದೇವೆರೆ ಪ್ರೀತಿ ತೋಜಿದ್ ಬತ್ತ್ಂಡ್.</verse>
				<verse number="10">ನಮ ದೇವೆರೆನ್ ಪ್ರೀತಿ ಮಲ್ತಿನೆಟ್ಟ್ ಅತ್ತ್, ಆಯೆ ನಮನ್ ಪ್ರೀತಿ ಮಲ್ತ್‌ದ್, ತನ ಮಗನ್ ನಮ ಪಾಪೊಲೆಗ್ ಬೋಡಾದ್ ಬಲಿ ಆದ್ ಕಡಪುಡಿನೆಟ್ಟೇ ತೋಜಿದ್ ಬರ್ಪುಂಡು.</verse>
				<verse number="11">ಪ್ರೀತಿದಾಕುಲೇ, ದೇವೆರ್ ನಮನ್ ಈತೊಂಜಿ ಪ್ರೀತಿ ಮಲ್ತಿನೆಡ್ದ್, ನಮಲಾ ಒರಿಯನ್ ಒರಿ ಪ್ರೀತಿ ಮಲ್ಪೊಡಾಪುಂಡು.</verse>
				<verse number="12">ದೇವೆರೆನ್ ಏರ್ಲಾ ಏಪಲಾ ತೂತುಜೆರ್. ಆಂಡ ನಮ ಒರಿಯನ್ ಒರಿ ಪ್ರೀತಿ ಮಲ್ಪುನಾಂಡ ದೇವೆರ್ ನಮಡ ನಿಲೆ ಆದುಲ್ಲೆ ಬೊಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು.</verse>
				<verse number="13">ಬೊಕ್ಕ ದೇವೆರ್ ನಂಕ್ ತನ ಆತ್ಮೊನು ಕೊರಿನೆಡ್ದಾವರ ಆಯೆ ನಮಡ ಉಲ್ಲೆ, ನಮ ಆಯಡ ಉಲ್ಲ ಅಂದ್‌ದ್ ತೆರಿಯೊನ್ವ.</verse>
				<verse number="14">ಅಮ್ಮೆ ಆದುಪ್ಪು ದೇವೆರ್ ತನ ಮಗನ್ ಈ ಲೋಕದ ರಕ್ಷಕೆ ಆದ್ ಕಡಪುಡ್ದಿನೆನ್ ಎಂಕುಲು ಸ್ವಂತ ಕಣ್ಣ್‌ಡ್ ತೂದು, ಇತ್ತೆ ಐಕಾದ್ ಸಾಕ್ಷಿ ಕೊರ್ಪ.</verse>
				<verse number="15">ಯೇಸು ದೇವೆರೆ ಮಗೆ ಆದುಲ್ಲೆ ಇನ್ಪಿನೆನ್ ಏರ್ ಅರಿಕೆ ಮಲ್ಪುವೆನಾ, ಆಯಡ ದೇವೆರ್ ಒಂಜಾದುಲ್ಲೆ ಅಂಚೆನೇ ದೇವೆರ್ ಆಯಡ ಒಂಜಾದುಪ್ಪುವೆ.</verse>
				<verse number="16">ಅಂಚಾದ್ ದೇವೆರ್ ನಮನ್ ಏತೊಂಜಿ ಪ್ರೀತಿ ಮಲ್ಪುವೆ ಇನ್ಪಿನವು ನಂಕ್ ತೆರಿದುಂಡು. ಬೊಕ್ಕ ನಮ ಅವೆನ್ ನಂಬುದ. ದೇವೆರ್ ಪ್ರೀತಿಸ್ವರೂಪಿ ಆದುಲ್ಲೆ, ಪ್ರೀತಿಡ್ ನಿಲೆ ಆದುಪ್ಪುನಾಯೆ ದೇವೆರೆಡ್ ನಿಲೆ ಆದುಲ್ಲೆ ಬೊಕ್ಕ ದೇವೆರ್ ಆಯಡ ನಿಲೆ ಆದುಲ್ಲೆ.</verse>
				<verse number="17">ನ್ಯಾಯತೀರ್ಪುದ ದಿನೊಟು ನಮ ಧೈರ್ಯೊಡು ಉಪ್ಪುಲೆಕ್ಕ ಆಯನ ಪ್ರೀತಿ ನಮಡ ಪೂರ್ತಿ ಆದುಂಡು. ದಾಯೆಗಂದ್ಂಡ ಕ್ರಿಸ್ತೆ ಉಪ್ಪುಲೆಕ್ಕನೇ ನಮಲಾ ಈ ಲೋಕೊಡು ಉಲ್ಲ.</verse>
				<verse number="18">ಪ್ರೀತಿ ಉಪ್ಪುನಲ್ಪ ಪೋಡಿಗೆ ಇಜ್ಜಿ. ಆಂಡ ಪೂರ್ತಿ ಇತ್ತಿ ಪ್ರೀತಿ ಪೋಡಿಗೆನ್ ದೂರ ಮಲ್ಪುಂಡು. ಪೋಡಿಗೆ ಬೇನೆ ಕೊರೊಂದೇ ಉಪ್ಪುಂಡು. ಬೊಕ್ಕ ಪೋಡಿಯುನಾಯೆ ಪ್ರೀತಿಡ್ ಪೂರ್ತಿ ಆತಿನಾಯೆ ಅತ್ತ್.</verse>
				<verse number="19">ದೇವೆರ್ ನಮನ್ ಸುರು ಪ್ರೀತಿ ಮಲ್ತಿನೆಡ್ದ್ ನಮ ಆಯನ್ ಪ್ರೀತಿ ಮಲ್ಪುವ.</verse>
				<verse number="20">ಏರಾಂಡಲಾ ಒರಿ, ಯಾನ್ ದೇವೆರೆನ್ ಪ್ರೀತಿ ಮಲ್ಪುವೆ ಅಂದ್‌ದ್ ತನ ಸಹೋದ್ರನ್ ಪಗೆ ಮಲ್ಪುವೆಡ, ಆಯೆ ಸುಳ್ಳುಗಾರೆ ಆದುಲ್ಲೆ. ತಾನ್ ತೂಪಿ ಸಹೋದ್ರನ್ ಪ್ರೀತಿ ಮಲ್ಪಂದಿನಾಯೆ, ತಾನ್ ತೂವಂದಿ ದೇವೆರೆನ್ ಎಂಚ ಪ್ರೀತಿ ಮಲ್ಪೊಲಿ?</verse>
				<verse number="21">ದೇವೆರೆನ್ ಪ್ರೀತಿ ಮಲ್ಪುನಾಯೆ ತನ ಸಹೋದ್ರನ್ಲಾ ಪ್ರೀತಿ ಮಲ್ಪೊಡು ಇನ್ಪಿ ಅಪ್ಪಣೆ ನಂಕ್ ಆಯಡ್ದ್ ತಿಕ್ಕ್‌ದ್ಂಡ್.</verse>
			</chapter>
			<chapter number="5">
				<verse number="1">ಯೇಸುನು ಕ್ರಿಸ್ತೆ ಅಂದ್‌ದ್ ನಂಬುನ ಪ್ರತಿ ಒರಿಲಾ ದೇವೆರೆಡ್ದ್ ಪುಟ್ಟಿನಾಯೆ ಆದುಪ್ಪುವೆ. ಬೊಕ್ಕ ಏರ್ ಪುಟ್ಟಾಯಿನ ಅಮ್ಮೆ ಆದುಪ್ಪು ದೇವೆರೆನ್ ಪ್ರೀತಿ ಮಲ್ಪುವೆನಾ, ಆಯೆ ದೇವೆರೆನ ಜೋಕುಲೆನ್ಲಾ ಪ್ರೀತಿ ಮಲ್ಪುವೆ.</verse>
				<verse number="2">ದೇವೆರೆನ್ ಪ್ರೀತಿ ಮಲ್ತ್‌ದ್ ಆಯ ಅಪ್ಪಣೆಲೆನ್ ಕೈಕೊನುನೆಟ್ಟೇ, ನಮ ದೇವೆರೆ ಜೋಕುಲೆನ್ ಪ್ರೀತಿ ಮಲ್ಪುವ ಅಂದ್‌ದ್ ತೆರಿಯೊನ್ವ.</verse>
				<verse number="3">ದೇವೆರೆನ್ ಪ್ರೀತಿ ಮಲ್ಪುನು ಪಂಡ; ನಮ ದೇವೆರೆ ಅಪ್ಪಣೆಲೆನ್ ಕೈಕೊನುನವು ಆದುಂಡು. ಬೊಕ್ಕ ಆಯ ಅಪ್ಪಣೆಲು ದುನ್ನದವು ಅತ್ತ್.</verse>
				<verse number="4">ದಾಯೆಗಂದ್ಂಡ ದೇವೆರೆಡ್ದ್ ಪುಟ್ಟಿನಾಯೆ ಪ್ರತಿ ಒರಿಲಾ ಈ ಲೋಕೊನು ಜೈಸಿನಾಯೆನೇ. ಬೊಕ್ಕ ಲೋಕೊನು ಜೈಸಿನ ಜಯ ನಮ ನಂಬಿಕೆನೇ.</verse>
				<verse number="5">ಲೋಕೊನು ಏರ್ ಜೈಸೊಲಿ? ಯೇಸುನು ದೇವೆರೆ ಮಗೆ ಅಂದ್‌ದ್ ನಂಬುನಾಕುಲೇ.</verse>
				<verse number="6">ಯೇಸು ಕ್ರಿಸ್ತೆ, ಆಯೆನೇ ನೀರ್‌ದ ದೀಕ್ಷಾಸ್ನಾನೊಡ್ದುಲಾ, ಕ್ರುಸ್ಸುಡು ಗುತ್ತಿನ ನೆತ್ತೆರೆಡ್ದ್‌ಲಾ ಬತ್ತಿನಾಯೆ ಆದುಲ್ಲೆ ಅಂದ್‌ದ್ ತೋಜಾಯೆ. ಆಯೆ ನೀರ್‌ಡ್ದ್ ಮಾತ್ರ ಅತ್ತ್, ನೀರ್‌ಡ್ಲಾ ನೆತ್ತೆರ್‌‌ಡ್ಲಾ ಬತ್ತಿನಾಯೆ. ಉಂದೆಕ್ಕ್ ಆತ್ಮೆ ಸಾಕ್ಷಿ ಪನ್ಪಿನಾಯೆ ಆದುಲ್ಲೆ. ದಾಯೆಗಂದ್ಂಡ ಆತ್ಮೆ ಏಪಲಾ ಸತ್ಯೊನು ತೋಜಾಪಾವೆ.</verse>
				<verse number="7"></verse>
				<verse number="8">ಅಂಚ ನಂಕ್ ಈ ಮೂಜಿ ಸಾಕ್ಷಿಲು ಉಂಡು. ಆತ್ಮೆ, ನೀರ್ ಬೊಕ್ಕ ನೆತ್ತೆರ್. ಬೊಕ್ಕ ಉಂದು ಮೂಜಿಲಾ ಒಂಜೇ ಸಾಕ್ಷಿನ್ ಒಪ್ಪಿಯೊನ್ವ.</verse>
				<verse number="9">ನರಮಾನಿಲೆ ಸಾಕ್ಷಿನ್ ನಮ ಒಪ್ಪಿಯೊನ್ವಡ, ದೇವೆರೆ ಸಾಕ್ಷಿ ಐಡ್ದ್ ಮಲ್ಲವು. ದಾಯೆಗಂದ್ಂಡ ದೇವೆರ್ ಒರಿಯೇ, ತನ ಮಗನ ಸಂಗತಿಡ್ ಸಾಕ್ಷಿ ಪನ್ತೆ.</verse>
				<verse number="10">ದೇವೆರೆ ಮಗನ್ ನಂಬುನಾಯನ ಉಡಲ್‌ಡ್ ಈ ಸಾಕ್ಷಿ ಉಂಡು; ದೇವೆರ್ ತನ ಮಗನ ಸಂಗತಿಡ್ ಪನ್ತಿನ ಸಾಕ್ಷಿನ್ ನಂಬಂದಿನಾಯೆ ದೇವೆರೆನ್ ಸುಳ್ಳುಗಾರೆ ಆದ್ ಮಲ್ಪುವೆ.</verse>
				<verse number="11">ಆ ಸಾಕ್ಷಿ ದಾನೆಂದ್ಂಡ, ದೇವೆರ್ ನಂಕ್ ನಿತ್ಯಜೀವೊನು ಕೊರ್ತೆ; ಬೊಕ್ಕ ಈ ಜೀವ ಆಯನ ಮಗಟ ಉಂಡು.</verse>
				<verse number="12">ದೇವೆರೆ ಮಗೆ ಏರೆಡ ಉಲ್ಲೆನಾ ಆಯಡ ಈ ನಿತ್ಯಜೀವ ಉಂಡು, ದೇವೆರೆ ಮಗೆ ಏರೆಡ ಇಜ್ಜೆನಾ ಆಯಡ ನಿತ್ಯಜೀವ ಇಜ್ಜಿ.</verse>
				<verse number="13">ದೇವೆರೆ ಮಗನ ಪುದರ್‌ನ್ ನಂಬುನಾಕುಲು ಆದುಪ್ಪು ನಿಕ್ಲೆಗ್ ನಿತ್ಯಜೀವ ಉಂಡು ಅಂದ್‌ದ್ ಗೊತ್ತಾಪಿಲೆಕ್ಕ ಯಾನ್ ಉಂದೆನ್ ನಿಕ್ಲೆಗ್ ಬರೆಯೆ.</verse>
				<verse number="14">ದೇವೆರೆ ಚಿತ್ತೊಗು ಸರಿಯಾದ್ ಒವೆನ್ ನಟ್ಟೊನ್ವಡಲಾ ಆಯೆ ನಮನ್ ಕೇನ್ವೆ. ಉಂದೇ ಆಯ ಮಿತ್ತ್ ನಂಕುಪ್ಪು ಧೈರ್ಯ.</verse>
				<verse number="15">ನಮ ನಟ್ಟೊನುನೆನ್ ಆಯೆ ಕೇನ್ವೆ ಅಂದ್‌ದ್ ನಂಕ್ ತೆರಿದಿತ್ತ್ಂಡಲಾ, ನಮ ನಟ್ಟೊಂಡಿನವು ಆಯಡ್ದ್ ತಿಕ್ಕುಂಡು ಪಂಡ್ದ್‌ಲಾ ನಂಕ್ ತೆರಿದುಂಡು.</verse>
				<verse number="16">ಏರಾಂಡಲಾ ಒರಿ ಸಹೋದರೆ ಮರಣೊಗು ಕಾರಣ ಅತ್ತಂದಿನ ಪಾಪ ಮಲ್ಪುನೆನ್ ತೂಂಡ, ಆಯೆ ಅಂಚಿತ್ತಿನಾಯಗ್ ಪ್ರಾರ್ಥನೆ ಮಲ್ಪಡ್. ಅಪಗ ದೇವೆರ್ ಆ ನರಮಾನಿಗ್ ಜೀವ ಕೊರ್ಪೆ. ಆಂಡ ಮರಣೊಗು ಕಾರಣ ಅತ್ತಂದಿ ಪಾಪದ ವಿಷಯೊಡೇ ಯಾನ್ ಪನೊಂದುಲ್ಲೆ. ಮರಣೊಗು ಕಾರಣ ಆದುಪ್ಪು ಪಾಪಲಾ ಉಂಡು, ಐಕ್ ಬೋಡಾದ್ ನಿಕುಲು ಪ್ರಾರ್ಥನೆ ಮಲ್ಪೊಡಂದ್‌ದ್ ಯಾನ್ ಪನ್ಪುಜಿ.</verse>
				<verse number="17">ಮಾತ ಅನ್ಯಾಯೊಲುಲಾ ಪಾಪನೇ, ಆಂಡ ಮರಣೊಗು ಕಾರಣ ಅತ್ತಂದಿನ ಪಾಪಲಾ ಉಂಡು.</verse>
				<verse number="18">ದೇವೆರೆಡ್ದ್ ಪುಟ್ಟಿನಾಯೆ ಏರ್ಲಾ ಪಾಪ ಮಲ್ಪುಜೆ ಅಂದ್‌ದ್ ನಂಕ್ ಗೊತ್ತುಂಡು. ದಾಯೆಗಂದ್ಂಡ ದೇವೆರೆಡ್ದ್ ಪುಟ್ಟಿನಾಯೆ ತನನ್ ಕಾತೊನ್ವೆ, ಪಡಿಕೆಂತಿನಾಯೆ ಆಯನ್ ಮುಟ್ಟುಜೆ.</verse>
				<verse number="19">ನಮ ದೇವೆರೆ ಜೋಕುಲು ಪಂಡ್ದ್‌ಲಾ, ಇಡೀ ಲೋಕ ಪಡಿಕೆಂತಿನಾಯನ ವಶೊಟು ಉಂಡು ಪಂಡ್ದ್‌ಲಾ ನಮ ತೆರಿದುಲ್ಲ.</verse>
				<verse number="20">ದೇವೆರೆ ಮಗೆ ಬತ್ತ್‌ದ್ ನಮ ಸತ್ಯ ಆದುಪ್ಪುನಾಯನ್ ತೆರಿಯೊನಿಯೆರೆ ಬೋಡಾಪಿ ಗೇನೊನು ನಂಕ್ ಕೊರ್ತೆ ಅಂದ್‌ದ್ ತೆರಿದ. ನಮ ನಿಜ ದೇವೆರೆಡ ಒಂಜಾದುಲ್ಲ, ಬೊಕ್ಕ ನಮ ದೇವೆರೆ ಮಗೆ ಆದುಪ್ಪು ಯೇಸು ಕ್ರಿಸ್ತಡ್ ಒಂಜಾದುಲ್ಲ. ಆಯೆನೇ ನಿಜ ದೇವೆರ್‌ಲಾ ನಿತ್ಯಜೀವಲಾ ಆದುಲ್ಲೆ.</verse>
				<verse number="21">ಪ್ರೀತಿದ ಜೋಕುಲೇ, ಮೂರ್ತಿ ಪೂಜೆಡ್ದ್ ದೂರಾದ್ ನಿಕುಲು ಜಾಗ್ರತೆಡುಪ್ಪುಲೆ. ಆಮೆನ್‌.</verse>
			</chapter>
		</book>
		<book number="63">
			<chapter number="1">
				<verse number="1">ಸಭಾ ಹಿರಿಯಾಯೆ ಆದುಪ್ಪು ಯಾನ್ ದೇವೆರೆಡ್ದ್ ಅಜತ್‌ದಿನ ಅಪ್ಪಿಯಗ್ಲಾ ಆಲೆನ ಜೋಕುಲೆಗ್ಲಾ, ಈ ಪತ್ರಿಕೆನ್ ಬರೆವೊಂದುಲ್ಲೆ. ಯಾನ್ ನಿಕ್ಲೆನ್ ಸತ್ಯೊಡು ಪ್ರೀತಿ ಮಲ್ತೊಂದುಲ್ಲೆ, ಅತ್ತಂದೆ ಸತ್ಯೊನು ತೆರಿನ ಮಾತೆರ್ಲಾ ನಿಕ್ಲೆನ್ ಪ್ರೀತಿ ಮಲ್ಪುವೆರ್. ದಾಯೆಗಂದ್ಂಡ ಸತ್ಯ ನಮಡ ಉಂಡು, ಬೊಕ್ಕ ನಮ ಒಟ್ಟುಗು ಏಪೊಗ್ಲಾ ಉಪ್ಪುಂಡು.</verse>
				<verse number="2"></verse>
				<verse number="3">ಅಮ್ಮೆ ಆದುಪ್ಪು ದೇವೆರೆಡ್ದ್‌ಲಾ, ಆ ಅಮ್ಮೆ ಮಗೆ ಆದುಪ್ಪು ಯೇಸು ಕ್ರಿಸ್ತಡ್ದ್‌ಲಾ ದಯಲಾ, ಕರುಣೆಲಾ, ಸಮಾಧಾನಲಾ ನಮಡೊಪ್ಪ ಸತ್ಯೊಡ್ಲಾ ಪ್ರೀತಿಡ್ಲಾ ನಿಲೆ ಆದುಪ್ಪಡ್.</verse>
				<verse number="4">ಅಮ್ಮೆರೆಡ್ದ್ ನಂಕ್ ಅಪ್ಪಣೆ ಆಯಿಲೆಕ್ಕನೇ, ಸತ್ಯೊಡು ನಡತೊನುನಾಕುಲು ನಿನ ಜೋಕುಲೆಡ್ ಎಂಕ್ ತೂವೆರೆ ತಿಕ್ಕಿನೆಡ್ದ್ ಎಂಕ್ ದಿಂಜ ಸಂತೋಷ ಆಂಡ್.</verse>
				<verse number="5">ಪ್ರೀತಿದ ಅಪ್ಪೆ, ನಮ ಒರಿಯನ್ ಒರಿ ಪ್ರೀತಿ ಮಲ್ಪೊಡು ಅಂದ್‌ದ್ ಕುಡ ನೆನೆಪು ಪುಟ್ಟಾವೆರೆಗಾದ್ ಯಾನ್ ಉಂದೆನ್ ಬರೆವೊಂದುಲ್ಲೆ. ಉಂದು ಒಂಜಿ ಪೊಸ ಅಪ್ಪಣೆ ಅತ್ತ್, ನಮ ದುಂಬುಡ್ದಿಂಚಿ ಕೇಂಡಿನವೇ ಆದುಂಡು.</verse>
				<verse number="6">ನಮ ದೇವೆರೆ ಅಪ್ಪಣೆಗ್ ಸರಿಯಾದ್ ನಡಪುನವೇ ಆಯನ್ ಪ್ರೀತಿ ಮಲ್ಪುನವು ಆದುಂಡು. ಬೊಕ್ಕ ಒರಿಯನ್ ಒರಿ ಪ್ರೀತಿ ಮಲ್ಪೊಡಂದ್‌ದೇ ನಿಕುಲು ದುಂಬುಡ್ದಿಂಚಿ ಕೇಂಡಿನ ಅಪ್ಪಣೆ ಆದುಂಡು.</verse>
				<verse number="7">ಯೇಸು ಕ್ರಿಸ್ತೆ ಶರೀರೊಡು ಬೈದೆ ಇನ್ಪಿನೆನ್ ಅರಿಕೆ ಮಲ್ಪಂದಿ ಮಸ್ತ್ ಮಂದಿ ಮೋಸಗಾರೆರ್ ಲೋಕೊಗು ಪಿದಾಡಿಯೆರ್. ಅಕುಲು ಮೋಸಗಾರೆರ್‌ಲಾ, ಕ್ರಿಸ್ತ ವಿರೋಧಿಲುಲಾ ಆದುಲ್ಲೆರ್.</verse>
				<verse number="8">ಎಂಕುಲು ಕಷ್ಟ ಮಲ್ತಿನವು ನಷ್ಟ ಆದ್ ಪೋವಂದಿಲೆಕ್ಕ ನಿಕುಲು ಜಾಗ್ರತೆಡುಪ್ಪುಲೆ. ನಿಕುಲು ಪೂರ್ತಿ ಉಡಿಗೆರೆ ತಿಕ್ಕುಲೆಕ್ಕ ಬುಡಂದೆ ಬೆನ್ಲೆ.</verse>
				<verse number="9">ಏರಾಂಡಲಾ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪಂದೆ ದೂರ ಪೋಯೆಡ ಆಯಡ ದೇವೆರ್ ಉಪ್ಪುಜೆ. ಆಂಡ ಕ್ರಿಸ್ತನ ಬೋಧನೆಗ್ ಸರಿಯಾದ್ ನಡಪುನಾಯಡ ಅಮ್ಮೆಲಾ ಉಲ್ಲೆ ಮಗೆಲಾ ಉಲ್ಲೆ.</verse>
				<verse number="10">ಈ ಬೋಧನೆಗ್ ಸರಿಯಾದ್ ನಡಪಂದಿನಾಯೆ ಏರ್ಲಾ ಒರಿ ನಿಕ್ಲೆ ಕೈತಲ್‌ಗ್ ಬರ್ಪೆಡ, ಆಯನ್ ನಿಕ್ಲೆ ಇಲ್ಲಗ್ ಸೇರಾವೊನೊಡ್ಚಿ.</verse>
				<verse number="11">ಅಂಚಿತ್ತಿನಾಯಗ್ ಎಡ್ಡೆ ಆವಡ್ ಪಂಡ್ದ್ ಪನ್ಪಿನಾಯೆ ಆಯನ ಹಾಳ್ ಕೆಲಸೊಡು ಪಾಲ್‌ದಾರೆ ಆದುಪ್ಪುವೆ.</verse>
				<verse number="12">ನಿಕ್ಕ್ ಬರೆವೆರೆ ಎಂಕ್ ಮಸ್ತ್ ಸಂಗತಿಲು ಇತ್ತ್ಂಡಲಾ, ಅವೆನ್ ಶಾಯಿಡ್ಲಾ ಪತ್ರಿಕೆಡ್ಲಾ ಬರೆವೆರೆ ಎಂಕ್ ಮನಸ್ ಇಜ್ಜಿ. ಆಂಡ ಯಾನ್ ನಿಕ್ಲೆ ಕೈತಲ್‌ ಬರ್ಪಿನ ಭರವಸ ಎಂಕುಂಡು. ನಿಕ್ಲೆಡೊಪ್ಪ ಎದುರೆದುರಾದ್ ಕುಲ್ಲುದು ಪಾತೆರ್‌ವೆ. ಅಪಗ ನಮ ಸಂತೋಷ ಪೂರ್ತಿ ಆವು.</verse>
				<verse number="13">ದೇವೆರೆಡ್ದ್ ಅಜತ್‌ದಿನ ನಿನ ಸಹೋದ್ರಿನ ಜೋಕುಲುಲಾ ನಿಕ್ಕ್ ವಂದನೆ ಪನ್ಪೆರ್.</verse>
			</chapter>
		</book>
		<book number="64">
			<chapter number="1">
				<verse number="1">ಸಭಾ ಹಿರಿಯಾಯೆ ಆದುಪ್ಪು ಯಾನ್ ಸತ್ಯೊಡು ಪ್ರೀತಿ ಮಲ್ಪು ಪ್ರೀಯ ಗಾಯಗ್ ಬರೆಪಿನಿ ದಾನೆಂದ್ಂಡ, ಪ್ರೀತಿದಾಯ, ಈ ಆತ್ಮೊಡು ಎಡ್ಡೆ ಉಪ್ಪುಲೆಕ್ಕನೇ, ಮಾತ ತರೊಟು ಎಡ್ಡೆ ಆವೊಡು, ಬೊಕ್ಕ ಸೌಖ್ಯೊಡು ಉಪ್ಪೊಡಂದ್‌ದ್ ಯಾನ್ ನಟ್ಟೊನ್ವೆ.</verse>
				<verse number="2"></verse>
				<verse number="3">ಸಹೋದ್ರೆರ್ ಎನ ಕೈತಲ್‌ ಬತ್ತ್‌ದ್, ಈ ಸತ್ಯೊಗು ನಂಬಿಗೆದಾಯೆ ಆದ್ ನಡಪುವ ಬೊಕ್ಕ ನಿನಡುಪ್ಪುನ ಸತ್ಯದ ವಿಚಾರೊಡು ಸಾಕ್ಷಿ ಪನ್ನಗ ಎಂಕ್ ದಿಂಜ ಸಂತೋಷ ಆಂಡ್.</verse>
				<verse number="4">ಎನ ಜೋಕುಲು ಸತ್ಯೊಡು ನಡತೊಂದುಲ್ಲೆರ್ ಇನ್ಪಿನೆನ್ ಕೇನುನಾತ್ ಮಲ್ಲ ಸಂತೋಷ ಬೇತೆ ದಾಲಾ ಇಜ್ಜಿ.</verse>
				<verse number="5">ಪ್ರೀತಿದಾಯ, ಈ ಸಹೋದರೆರೆಗ್ಲಾ ಗುರ್ತದಾಂತಿನಾಕುಲೆಗ್ಲಾ ಎಡ್ಡೆ ಕಾರ್ಯ ಮಲ್ಪುನೆಟ್ಟ್ ನಂಬಿಗೆದಾಯೆ ಆದ್ ನಡತೊಂದ.</verse>
				<verse number="6">ಅಕುಲು ಸಭೆತ ಎದುರು ಈ ಮಲ್ತಿನ ಪ್ರೀತಿಗ್ ಸಾಕ್ಷಿ ಪಂಡೆರ್. ದೇವೆರೆಗ್ ಮೆಚ್ಚಿಗೆ ಆಪಿಲೆಕ್ಕ ಅಕುಲು ಪ್ರಯಾಣೊಡು ನನಲಾ ದುಂಬು ಪೋಯೆರೆ ಸಹಾಯ ಮಲ್ಪುಲ.</verse>
				<verse number="7">ದಾಯೆಗಂದ್ಂಡ, ಅಕುಲು ಕ್ರಿಸ್ತನ ಪುದರ್‌ಡ್ ಪಿದಾಡ್ದೆರ್, ಬೊಕ್ಕ ನಂಬಿಕೆದಾಂತಿನಾಕುಲೆಡ್ದ್ ದಾದಲಾ ದೆತ್ತೊನುಜೆರ್.</verse>
				<verse number="8">ಇಂಚ ನಮ ಸತ್ಯೊಗು ಪಾಸಾಡಿದಾಕುಲು ಆಪಿಲೆಕ್ಕ ಇಂಚಿತ್ತಿನಾಕುಲೆನ್ ಸೇರಾವೊನುನ ಹಂಗ್‌ಡುಲ್ಲ.</verse>
				<verse number="9">ಯಾನ್ ಸಭೆಕ್ ಕೆಲವು ವಿಚಾರೊನು ಬರೆತೆ. ಆಂಡ ಅಕ್ಲೆಡ್ ನಾಯಕೆ ಆವೊಡು ಅಂದ್‌ದ್ ಆಸೆ ಮಲ್ಪುನ ದಿಯೋತ್ರೆಫೆ ಎಂಕುಲೆ ಅಧಿಕಾರೊನು ಒಪ್ಪಿಯೊನ್ಜೆ.</verse>
				<verse number="10">ಆಯನ ಸಂಗತಿಡ್ ಮಸ್ತ್ ಸಂಗತಿಲೆನ್ ಯಾನ್ ಬತ್ತಿನಪಗ ಆಯನ ನೆನೆಪುಗು ಕನಪೆ. ಬೊಕ್ಕ ಆಯೆ ಎಂಕುಲೆ ಮಿತ್ತ್ ಬೊಡ್ಚಾಂದಿನ ಹಾಳ್ ದೂರುಲೆನ್ ಪಾಡ್ದ್ ಅಪಪ್ರಚಾರ ಮಲ್ತೊಂದುಲ್ಲೆ. ಉಂದು ಮಾತ್ರತ್ತಂದೆ ಆಯೆ ಪ್ರಯಾಣೊಡುಪ್ಪು ಸಹೋದ್ರೆರೆನ್ ತರಕೊನಂದೆ, ಬೇತೆಕ್ಲೆಗ್ಲಾ ಸಹಾಯ ಮಲ್ಪಡೆ ಅಂದ್‌ದ್ ಪನ್ಪೆ. ಅಕುಲು ಒಂಜಿ ವೇಳೆ ಸಹಾಯ ಮಲ್ತೆರ್ಡ ಅಂಚಿತ್ತಿನಾಕುಲೆನ್ ಸಭೆಡ್ದ್ ಪಿದಯಿ ಪಾಡ್ವೆ.</verse>
				<verse number="11">ಪ್ರೀತಿದಾಯ, ಈ ಪಡಿಕೆಂತಿನ ನಡತೆಡ್ ನಡಪಂದೆ, ಎಡ್ಡೆಂತಿನೆಕ್ಕ್ ಸರಿಯಾದ್ ನಡಪುಲ. ಎಡ್ಡೆಂತಿನೆನ್ ಮಲ್ಪುನಾಕುಲು ದೇವೆರೆ ಜೋಕುಲು, ಪಡಿಕೆಂತಿನೆನ್ ಮಲ್ಪುನಾಕುಲು ದೇವೆರೆನ್ ತೆರಿಯಂದಿನಾಕುಲು ಆದುಲ್ಲೆರ್.</verse>
				<verse number="12">ದೆಮೇತ್ರಿಯನ ವಿಚಾರೊಡು ಮಾತೆರ್ಲಾ ಎಡ್ಡೆಂತಿನೆನೇ ಸಾಕ್ಷಿ ಪನ್ಪೆರ್. ಅವು ಸತ್ಯಲಾ ಆದುಂಡು. ಎಂಕುಲುಲಾ ಆಯ ವಿಚಾರೊಡು ಅವೆನೇ ಪನ್ಪ, ಬೊಕ್ಕ ಎಂಕುಲು ಸತ್ಯನೇ ಪಾತೆರ್‌ವ ಅಂದ್‌ದ್ ಈ ತೆರಿದ.</verse>
				<verse number="13">ನಿಕ್ಕ್ ಬರೆವೆರೆ ಎಂಕ್ ಮಸ್ತ್ ಸಂಗತಿಲು ಉಂಡು, ಆಂಡ ಶಾಯಿಡ್ಲಾ ಪೆನ್ನ್‌ಡ್ಲಾ ಬರೆವೆರೆ ಎಂಕ್ ಮನಸ್ ಇಜ್ಜಿ.</verse>
				<verse number="14">ದಾಯೆಗಂದ್ಂಡ ಯಾನ್ ಬೇಗೊಡು ನಿನನ್ ತೂವೆರೆಗ್ ಉಲ್ಲೆ ಇನ್ಪಿ ಭರವಸೆ ಎಂಕುಂಡು, ಅಪಗ ನಮ ಎದುರೆದುರಾದ್ ಕುಲ್ಲುದು ಪಾತೆರ್‌ಗ.</verse>
				<verse number="15">ಸಮಾಧಾನ ನಿನ ಒಟ್ಟುಗು ಉಪ್ಪಡ್. ನಿನ ಸ್ನೇಹಿತೆರ್ ನಿಕ್ಕ್ ವಂದನೆ ತೆರಿಪಾದೆರ್. ಅಲ್ಪ ಉಪ್ಪು ಪ್ರತಿಯೊರಿಯಗ್ಲಾ ಪುದರ್ ಪುದರಾದ್ ವಂದನೆ ಮಲ್ಪುಲ. ಆಮೆನ್.</verse>
			</chapter>
		</book>
		<book number="65">
			<chapter number="1">
				<verse number="1">ಅಮ್ಮೆ ಆದುಪ್ಪು ದೇವೆರ್ ಏರೆನ್ ಪ್ರೀತಿಡ್ ಲೆತ್ತ್‌ದ್ ಯೇಸು ಕ್ರಿಸ್ತಡ್ ಕಾತೊಂದುಲ್ಲೆರಾ ಅಕ್ಲೆಗ್ ಯೇಸು ಕ್ರಿಸ್ತನ ದಾಸೆಲಾ ಯಾಕೋಬುನ ಸಹೋದ್ರೆಲಾ ಆದುಪ್ಪು ಯೂದೆ ಬರೆಪಿನಿ ದಾನೆಂದ್ಂಡ, ದೇವೆರೆ ಕರುಣೆಲಾ, ಸಮಾಧಾನಲಾ, ಪ್ರೀತಿಲಾ ನಿಕ್ಲೆಗ್ ಹೆಚ್ಚೆಚ್ಚಾದ್ ತಿಕ್ಕಡ್.</verse>
				<verse number="2"></verse>
				<verse number="3">ಪ್ರೀತಿದಾಕುಲೇ, ನಂಕ್ ಒಟ್ಟುಗುಪ್ಪು ರಕ್ಷಣೆದ ಅನುಭವೊನು ಬರೆವೊಡು ಅಂದ್‌ದ್ ದಿಂಜ ಪ್ರಯಾಸ ಮಲ್ಪುನಗ ದೇವಜನೊಕುಲೆಗ್ ಒಂಜೇ ಸರ್ತಿ, ಒಚ್ಚಿದ್ ಕೊರ್ದು ನಂಬಿಕೆಗ್ ಬೋಡಾದ್ ಉರ್ಡಾಟ ಮಲ್ಪೊಡು ಅಂದ್‌ದ್ ಉಮೇದ್ ಕೊರ್ದು, ನಿಕ್ಲೆಗ್ ಬರೆಪಿನವು ಅಗತ್ಯ ಅಂದ್‌ದ್ ಎಂಕ್ ತೋಜ್ಂಡ್.</verse>
				<verse number="4">ದಾಯೆಗಂದ್ಂಡ, ಭಕ್ತಿದಾಂತಿನಾಕುಲು, ದೇವೆರೆ ದಯೊನು ಲಾಭ ಮಲ್ತೊಂದು ನಾಚಿಗೆ ಪುಟ್ಟಾವು ಕೆಲಸೊಲೆನ್ ಮಲ್ತೊನುವೆರ್. ಇಂಚಿತ್ತಿನಾಕುಲು ನಮ ಒರಿಯೇ ಯಜಮಾನೆಲಾ ನಮ ಕರ್ತವೆಲಾ ಆದುಪ್ಪು ಯೇಸು ಕ್ರಿಸ್ತನ್ ಆರೆಂಜುವೆರ್. ಇಂಚಿತ್ತಿ ಕೆಲವು ಜನೊಕುಲು ಸಭೆಕ್ ಕಲ್ವತನೊಟು ಪೊಗ್ಗುದೆರ್. ಅಕ್ಲೆಗ್ ದೇವೆರೆ ದಂಡನೆ ಆಪುಂಡು ಅಂದ್‌ದ್ ಆದಿಡೇ ಅಕ್ಲೆನ ಸಂಗತಿಡ್ ಬರೆತ್ಂಡ್.</verse>
				<verse number="5">ಉಂದು ಮಾತ ನಿಕ್ಲೆಗ್ ದುಂಬು ಗೊತ್ತು ಇತ್ತ್ಂಡಲಾ ನಿಕ್ಲೆಗ್ ನೆನೆಪು ಪುಟ್ಟಾವೆರೆ ಎಂಕ್ ಮನಸಾಂಡ್. ಕರ್ತವೆ ತನ ಜನೊಕುಲೆನ್ ಐಗುಪ್ತ ದೇಶೊಡ್ದು ಒರಿಪಾಂಡಲಾ ಅಕ್ಲೆಡ್ ನಂಬಂದಿನಾಕುಲೆನ್ ಬೊಕ್ಕ ನಾಶ ಮಲ್ತೆ.</verse>
				<verse number="6">ಬೊಕ್ಕ ತನ್ಕುಲೆಗ್ ಪರಲೋಕೊಡು ತಿಕ್ಕಿನ ಅಧಿಕಾರೊನು ಕಾತೊನಂದೆ, ಅಕ್ಲೆನ ಸ್ವಂತ ಜಾಗ್‌ನ್ ಬುಡ್ದು ಬೈದಿನ ದೂತೆರೆನ್ಲಾ ಆ ಮಲ್ಲ ದಿನತ ನ್ಯಾಯತೀರ್ಪುಗು ನಿತ್ಯೊಡು ಉಪ್ಪುನ ಸಂಕಲೆಡ್ ಕಟ್ಟ್‌ದ್ ಕತ್ತಲೆಡ್ ಪಾಡಿಯೆ.</verse>
				<verse number="7">ಅಂಚೆನೇ, ಸೋದೋಮು ಗೊಮೋರ ಐತ ಸುತ್ತುಮುತ್ತು ಇತ್ತಿ ಪಟ್ಟಣದಾಕುಲುಲಾ ಆ ದೂತೆರ್‌ಲೆಕ್ಕನೇ ನಡತೊಂಡೆರ್. ಅವ್ವತ್ತಂದೆ ಹಾದ್ರ ಮಲ್ಪುನಾಕುಲಾದ್, ಪೇಸಿಗೆದ ಕೆಲಸೊಲೆನ್ ಮಲ್ತೊಂದಿತ್ತೆರ್. ಉಂದೆಡ್ದಾದ್ ಅಕುಲು ನಿತ್ಯ ತೂತ ಶಿಕ್ಷೆನ್ ಅನುಭವ ಮಲ್ತೊಂದು, ಇತ್ತೆ ಪಾಪೊಡಿತ್ತಿನಾಕುಲೆಗ್ ಒಂಜಿ ಮಾದ್ರಿ ಆದುಲ್ಲೆರ್.</verse>
				<verse number="8">ಉಂದೇ ರೀತಿಡ್, ಈ ಜನೊಕುಲು ಕನೊಟುಪ್ಪುನಾಕುಲಾದ್ ತನ್ಕುಲೆ ಶರೀರೊನು ಪೇಸಿಗೆ ಕೆಲಸೊಗು ಒಪ್ಪಿಸಾವೆರ್. ದೇವೆರೆ ಅಧಿಕಾರೊನು ಅಸಡ್ಡೆ ಮಲ್ಪುವೆರ್, ಬೊಕ್ಕ ಮೈಮೆದ ದೂತೆರೆನ್ ದೂಷಿಪುವೆರ್.</verse>
				<verse number="9">ಆಂಡ ಮುಖ್ಯ ದೂತೆ ಆದಿತ್ತಿನ ಮಿಕಾಯೇಲ್ ಇಂಚ ಮಲ್ತ್‌ದಿತ್ತಿಜೆ. ಮೋಶೆನ ಶರೀರದ ಸಂಗತಿಡ್ ಸೈತಾನಡ ತರ್ಕ ಮಲ್ಪುನಗ, ಸೈತಾನನ್ ದೂಷಿದ್, ನ್ಯಾಯತೀರ್ಪು ಮಲ್ಪೆರೆ ಧೈರ್ಯದಾಂತೆ, “ಕರ್ತವೆ ನಿನನ್ ಕಂಡಿಸಾವಡ್” ಅಂದ್‌ದ್ ಪಂಡೆ.</verse>
				<verse number="10">ಆಂಡ ಈ ಜನೊಕುಲು ತನ್ಕುಲೆಗ್ ಗೊತ್ತುದಾಂತಿನೆನ್ ದೂಷಿಯುವೆರ್, ಬುದ್ಧಿದಾಂತಿ ಪ್ರಾಣಿಲೆ ಲೆಕ್ಕ ಪುಟ್ಟು ಸ್ವಭಾವೊಡ್ದು ತನ್ಕುಲೆನ್ ಹಾಳ್ ಮಲ್ತೊನುವೆರ್.</verse>
				<verse number="11">ಮೊಕುಲು ಮೆಗ್ಯನ್ ಕೆರ್ತಿ ಕಾಯಿನನ ಮಾರ್ಗೊಡು ನಡಪುವೆರ್, ದ್ರವ್ಯ ಸಂಪಾದನೆಗಾದ್ ಬಿಳಾಮನ ತಪ್ಪು ಮಾರ್ಗೊನು ಪತ್ತೊಂದೆರ್, ಕೋರಹ ಲೆಕ್ಕನೇ ದಂಗೆ ಮಲ್ತ್‌ದ್ ನಾಶಾದ್ ಪೋಪೆರ್. ಅಯ್ಯೋ ಮೊಕ್ಲೆನ ಗತಿ ದಾನೆ ಆವು?</verse>
				<verse number="12">ನಿಕ್ಲೆ ಲೇಸ್‌ಡ್ ಪ್ರೀತಿಡ್ ಮೊಕುಲು ಸೇರೊಂದು, ನಾಚಿಗೆದಾಂತೆ ತಿನ್ಪೆರ್ ಪರ್ಪೆರ್. ಸ್ವಂತ ಬಂಜಿನೇ ತೂವೊಂದುಪ್ಪುನ ಕುರುಬೆರೆ ಲೆಕ್ಕ ಉಲ್ಲೆರ್, ಮೊಕುಲು ಗಾಳಿ ಲಕ್ಕಾದ್ ಕೊನೊಪೋಪಿ ನೀರ್‌ದಾಂತಿ ಮುಗಲ್‌ದ ಲೆಕ್ಕ ಉಲ್ಲೆರ್, ಫಲದಾಂತಿನ, ಬಾಡ್ದಿನ, ಬೇರ್‌ಡ್ದ್ ಒಯ್ತ್ ಪೋತಿನ ರಡ್ಡ್ ಸರ್ತಿ ಸೈತಿನ ಮರೊಕುಲು ಆದುಲ್ಲೆರ್.</verse>
				<verse number="13">ಮೊಕುಲು ಸ್ವಂತ ನಾಚಿಗೆದ ನುರೆ ಕಕ್ಕುನ ಕಡಲ್ದ ಮರ್ಲ್ ಸೆರೆತ್ತ ಲೆಕ್ಕಲಾ, ಅಲೆವೊಂದುಪ್ಪು ಬೊಳ್ಳಿಲೆ ಲೆಕ್ಕಲಾ ಉಲ್ಲೆರ್. ಮೊಕ್ಲೆನ ಪಾಲ್‌ಗ್ ಗರ್ಗಂಡ ಕತ್ತಲೆ ಸದಾಕಾಲೊಗು ದೀತ್ತ್ಂಡ್.</verse>
				<verse number="14">ಆದಾಮುಡ್ದು ಏಳನೆ ತರೆತಾಯೆ ಆದಿತ್ತಿನ ಹನೋಕೆಲಾ ಮೊಕ್ಲೆ ಸಂಗತಿಡ್ ಪ್ರವಾದನೆ ಮಲ್ತ್‌ದೆ. “ತೂಲೆ, ಕರ್ತವೆ ತನ ಲೆಕ್ಕದಾಂತಿ ಪರಿಶುದ್ಧ ದೂತೆರೆಡೊಪ್ಪ ಬರ್ಪೆ.</verse>
				<verse number="15">ಬತ್ತ್‌ದ್ ಮಾತೆರೆಗ್ ನ್ಯಾಯತೀರ್ಪು ಮಲ್ತ್‌ದ್, ಭಕ್ತಿದಾಂತಿ ಮಾತೆರೆಗ್ಲಾ ಅಕುಲು ಮಲ್ತಿ ಮಾತ ಅನ್ಯಾಯದ ಕೆಲಸೊಲೆಗಾದ್‌ಲಾ ಭಕ್ತಿದಾಂತಿ ಪಾಪಿಲು ತನ್ಕ್ ವಿರೋಧಾದ್ ಪಾತೆರಿ ಮಾತ ಕಠಿಣ ಪಾತೆರೊಲೆಗಾದ್‌ಲಾ ಶಿಕ್ಷೆ ಕೊರಿಯೆರೆ ಬರ್ಪೆ,” ಅಂದ್‌ದ್ ಪಂಡೆ.</verse>
				<verse number="16">ಇಂಚಿತ್ತಿನಾಕುಲು ಗುಣುಗುಟ್ಟುನಾಕುಲು, ಒರಿಯನ ತಪ್ಪುನು ನಾಡ್ ಪತ್ತುನಾಕುಲು, ತನ್ಕುಲೆ ಇಚ್ಚೆಲೆಗ್ ತಕ್ಕ ನಡಪುನಾಕುಲು, ಬೂಟು ಪಾತೆರುನಾಕುಲು, ಅವ್ವತ್ತಂದೆ ಲಾಭೊಗಾದ್ರ ಮೋನೆಗ್ ತಕ್ಕ ಪಾತೆರುನಾಕುಲು ಆದುಲ್ಲೆರ್.</verse>
				<verse number="17">ಪ್ರೀತಿದಾಕುಲೇ, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಅಪೊಸ್ತಲೆರ್ ಮಲ್ತಿ ಪ್ರವಾದನೆಲೆನ್ ನೆನೆಪು ಮಲ್ತೊನ್ಲೆ.</verse>
				<verse number="18">“ಅಂತ್ಯಕಾಲ ಬನ್ನಗ ತಮಾಷೆ ಮಲ್ಪುನಾಕುಲು ತೋಜಿದ್ ಬರುವೆರ್. ಅಕ್ಲೆನ ಇಚ್ಚಾನುಸಾರ ಭಕ್ತಿಗ್ ವಿರೋಧಾದ್ ನಡತೊನ್ವೆರ್.”</verse>
				<verse number="19">ಈ ಜನೊಕುಲು ನಿಕ್ಲೆ ನಡುಟು ಭೇದೊನು ಉಂಡು ಮಲ್ಪುನಾಕುಲುಲಾ ಪ್ರಪಂಚದಾಕುಲುಲಾ ಶುದ್ಧ ಆತ್ಮದಾಂತಿನಾಕುಲುಲಾ ಆದುಲ್ಲೆರ್.</verse>
				<verse number="20">ಆಂಡ ಪ್ರೀತಿದಾಕುಲೇ, ನಿಕುಲಾಂಡಲಾ ನಿಕ್ಲೆಡುಪ್ಪುನ ಪರಿಶುದ್ಧವಾಯಿನ ಕ್ರಿಸ್ತ ನಂಬಿಕೆನ್ ಆಧಾರ ಮಲ್ತೊಂದು ಭಕ್ತಿಡ್ ಅಭಿವೃದ್ಧಿ ಹೊಂದೊಂದು ಪರಿಶುದ್ಧಾತ್ಮೊಡು ಪ್ರಾರ್ಥನೆ ಮಲ್ತೊಂದುಪ್ಪುಲೆ.</verse>
				<verse number="21">ದೇವೆರೆ ಪ್ರೀತಿಡ್ ನಿಕ್ಲೆನ್ ಜೋಕೆಡ್ ಕಾತೊನ್ಲೆ. ನಿತ್ಯಜೀವೊಗಾದ್ ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ಕರುಣೆನ್ ಎದುರು ತೂಲೆ.</verse>
				<verse number="22">ನಂಬಿಕೆದ ಸಂಗತಿಡ್ ಸಂಶಯದಾಕುಲೆಗ್ ಕರುಣೆ ತೋಜಪಾಲೆ.</verse>
				<verse number="23">ಕೆಲೆವೆರೆನ್ ತೂತ ಬಾಯಿಡ್ದ್ ಪಿದಯಿ ಒಯಿತ್‌ದ್ ಒರಿಪಾಲೆ. ಕೆಲವು ಜನೊಕುಲೆಗ್ ಕರುಣೆ ತೋಜಪಾನಗ ಪೋಡಿಗೆ ಉಪ್ಪಡ್, ಶರೀರೊಡು ಹಾಳ್ ನಡತೆಡ್ ಉಪ್ಪುನಾಕುಲೆನ ಕುರೆತ ಕುಂಟುನು ಅಸಹ್ಯ ಮಲ್ಪುಲೆ.</verse>
				<verse number="24">ದಂಟ್‌ದ್ ಬೂರಂದಿಲೆಕ್ಕ ನಿಕ್ಲೆನ್ ಕಾತ್‌ದ್ ದೋಷದಾಂತಿನಾಕುಲಾದ್ ಸಂತೋಷೊಡು ತನ ಮೈಮೆದ ಎದುರು ನಿಕ್ಲೆನ್ ಉಂತಾವೆರೆ ಸಾಮರ್ಥ್ಯ ಇತ್ತಿ ನಮ ರಕ್ಷಕೆ ಆದುಪ್ಪು ಒರಿಯೇ ದೇವೆರೆಗ್, ನಮ ಕರ್ತವೆ ಆದುಪ್ಪು ಯೇಸು ಕ್ರಿಸ್ತಡ್ದ್ ಮೈಮೆ, ಮಾನಾದಿಗೆ, ಬಲ, ಅಧಿಕಾರ ಮಾತ ಕಾಲೊಡು ಇತ್ತಿಲೆಕ್ಕ ಇತ್ತೆಲಾ ಏನಿತ್ಯೇನಿಗ್ಲಾ ಉಪ್ಪಡ್, ಆಮೆನ್.</verse>
				<verse number="25"></verse>
			</chapter>
		</book>
		<book number="66">
			<chapter number="1">
				<verse number="1">ಉಂದು ಯೇಸು ಕ್ರಿಸ್ತನ ಪ್ರಕಟಣೆ. ಬೇಗನೆ ನಡಪೆರೆ ಉಪ್ಪುನ ಸಂಗತಿಲೆನ್ ತನ ಸೇವಕೆರೆಗ್ ತೋಜಾವೆರೆಗಾದ್ ದೇವೆರೆಡ್ದ್ ಈ ಪ್ರಕಟಣೆನ್ ಪಡೆಯೆ. ಉಂದತ್ತಂದೆ ಕ್ರಿಸ್ತೆ ತನ ಸೇವಕೆ ಆಯಿ ಯೋಹಾನಗ್ ಈ ಪ್ರಕಟಣೆನ್ ತೆರಿಪಾವೆರೆಗಾದ್ ತನ ದೂತನ್ ಕಡಪುಡಿಯೆ.</verse>
				<verse number="2">ಯೋಹಾನೆ ತಾನ್ ತೂಯಿನೆನ್ ಮಾತೆನ್ ತೆರಿಪಾವುನಾಯೆ ಆದ್ ದೇವೆರೆ ಪಾತೆರದ ಸಂಗತಿಡ್ಲಾ ಯೇಸು ಕ್ರಿಸ್ತೆ ಪಂಡಿನ ಸಾಕ್ಷಿದ ಸಂಗತಿಡ್ಲಾ ಸಾಕ್ಷಿ ಪಂಡೆ.</verse>
				<verse number="3">ಈ ಪ್ರವಾದನೆದ ಪಾತೆರೊಲೆನ್ ಓದುನಾಯೆಲಾ, ಓದಿನೆನ್ ಕೇನುನಾಕುಲುಲಾ ಐಟ್ಟ್ ಬರೆತಿ ಪಾತೆರೊಲೆನ್ ಕೈಕೊಂದು ನಡಪುನಾಕುಲುಲಾ ಭಾಗ್ಯವಂತೆರ್‌. ದಾಯೆಗಂದ್ಂಡ ಅವು ನಡಪು ಕಾಲ ಮುಟ್ಟ ಆತ್ಂಡ್.</verse>
				<verse number="4">ಆಸ್ಯ ಸೀಮೆಡುಪ್ಪು ಏಳ್‌ ಸಭೆಲೆಗ್ ಯೋಹಾನೆ ಬರೆಪಿನಿ ದಾನೆಂದ್ಂಡ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಆದುಪ್ಪುನಾಯಡ್ದ್‌ಲಾ ಆಯನ ಗದ್ದಿಗೆದ ದುಂಬುಪ್ಪು ಏಳ್‌ ಆತ್ಮೊಲೆಡ್ದ್‌ಲಾ ನಂಬಿಕೆ ಇತ್ತಿ ಸಾಕ್ಷಿದಾಯೆಲಾ ಸೈತಿನಾಕುಲೆಡ್ದ್ ದುಂಬತ್ತ ಲಕ್ಕ್‌ದ್ ಬೈದಿನಾಯೆಲಾ ಭೂಮಿದ ಅರಸರೆನ್ ಆಳುನಾಯೆ ಆದುಪ್ಪು ಯೇಸು ಕ್ರಿಸ್ತಡ್ದ್ ನಿಕ್ಲೆಗ್ ದಯಲಾ ಸಮಾಧಾನಲಾ ಆವಡ್. ಆಯೆ ನಮನ್ ಪ್ರೀತಿ ಮಲ್ಪುನಾಯೆಲಾ, ತನ ನೆತ್ತೆರೆಡ್ದ್ ನಮನ್ ಪಾಪೊಡ್ದು ಬುಡ್ಪಾದಿನಾಯೆಲಾ ಆದುಲ್ಲೆ.</verse>
				<verse number="5"></verse>
				<verse number="6">ಬೊಕ್ಕ ನಮನ್ ತನ ಅಮ್ಮೆ ಆದುಪ್ಪು ದೇವೆರೆಗ್ ರಾಜೆರಾದ್‌ಲಾ ಯಾಜಕೆರಾದ್‌ಲಾ ಮಲ್ತಿನಾಯಗ್ ಏನಿತ್ಯೇನಿಗ್ಲಾ ಮೈಮೆಲಾ ಬಲಲಾ ಆವಡ್, ಆಮೆನ್.</verse>
				<verse number="7">“ಇಂದಾ, ಆಯೆ ಮುಗಲ್‌ಡ್ ಬರುವೆ; ಮಾತ ಕಣ್ಣ್‌ಲು ಆಯನ್ ತೂವು. ಬರ್ಚಿಡ್ ಆಯನ್‌ ನೋಂತಿನಾಕುಲುಲಾ ತೂವೆರ್, ಈ ಭೂಮಿಡುಪ್ಪು ಮಾತ ಗೋತ್ರೊಲು ಆಯನ್ ತೂದು ತಿಗಲೆಗ್ ದರ್ತೊನ್ವೆರ್.” ಅಂದ್, ಅಂಚೆನೇ ಆವು ಆಮೆನ್.</verse>
				<verse number="8">“ಯಾನ್ ಆದಿಲಾ ಅಂತ್ಯಲಾ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಉಪ್ಪುನಾಯೆಲಾ ಸರ್ವಶಕ್ತೆಲಾ ಆದುಲ್ಲೆ.” ಅಂದ್‌ದ್ ದೇವೆರಾದುಪ್ಪು ಕರ್ತವೆ ಪನ್ಪೆ.</verse>
				<verse number="9">ಯೋಹಾನೆ ಪನ್ಪಿ ಯಾನ್, ನಿಕ್ಲೆನ ಸಹೋದ್ರೆಲಾ ಯೇಸುಡ್ದು ದೇವೆರೆ ರಾಜ್ಯೊಗು ಸೇರುನಾಕುಲೆಗ್ ಬರ್ಪಿ ಪೋಪಿನ ಭಂಗೊಲೆಡ್ಲಾ, ತಾಳ್ಮೆ ಸಹನೆಡ್ಲಾ ನಿಕ್ಲೆ ಪಾಲ್‌ದಾರೆ ಆದುಲ್ಲೆ. ಯಾನ್ ದೇವೆರೆ ಪಾತೆರೊನು ಸಾರಿನೆಕ್ಕಾದ್ ಯೇಸುಗಾದ್ ಸಾಕ್ಷಿ ಪಂಡಿನೆಕ್ಕಾದ್ ಪತ್ಮೋಸ್ ದ್ವೀಪೊಡಿತ್ತೆ.</verse>
				<verse number="10">ಯಾನ್ ಕರ್ತವ ದಿನೊಟು ದೇವೆರಾತ್ಮೊಡು ವಶ ಆದಿತ್ತ್‌ದ್ ಎನ ಪಿರವುಡು ತುತೂರಿದಲೆಕ್ಕನೇ ಮಲ್ಲ ಸ್ವರೊನು ಕೇಂಡೆ.</verse>
				<verse number="11">ಅವು, “ಈ ತೂಪಿನೆನ್ ಪುಸ್ತಕೊಡು ಬರೆದ್ ಅವೆನ್ ಎಫೆಸ, ಸ್ಮುರ್ನ, ಪೆರ್ಗಮ, ಥುವತೈರ, ಸಾರ್ದಿಸ್, ಫಿಲದೆಲ್ಫಿಯಾ ಬೊಕ್ಕ ಲವೊದಿಕೀಯ ಪನ್ಪಿ ಏಳ್‌ ಪಟ್ಟಣದ ಸಭೆಲೆಗ್ ಕಡಪುಡ್ಲ,” ಅಂದ್‌ದ್ ಪಂಡ್ಂಡ್.</verse>
				<verse number="12">ಎನಡ ಪಾತೆರೊಂದಿತ್ತಿ ಸ್ವರ ಏರೆನವು ಅಂದ್‌ದ್ ತೂವೆರೆ ಯಾನ್ ಪಿರ ತಿರ್ಗಿಯೆ, ತಿರ್ಗಿನಪಗ ಏಳ್‌ ಬಂಗಾರ್‌ದ ದೀಪಕಂಬೊಲೆನ್ ತೂಯೆ.</verse>
				<verse number="13">ಈ ದೀಪಕಂಬೊಲೆ ನಡುಟು ಒರಿ ನರಮಾನಿ ಮಗೆಲೆಕ್ಕ ಇತ್ತಿನಾಯನ್ ತೂಯೆ; ಆಯೆ ನೇಲ್ಯ ಅಂಗಿನ್ ಪಾಡೊಂದು, ಬಂಗಾರ್‌ದ ಪಟ್ಟಿನ್ ತಿಗಲೆಗ್ ಕಟ್ಟ್‌ದಿತ್ತೆ.</verse>
				<verse number="14">ಆಯನ ತರೆತ ಕುಜಲ್ ಬೊಲ್ದು ಹಿಮತ್ತಲೆಕ್ಕ ಬೊಲ್ಲೆನೆ ಇತ್ತ್ಂಡ್. ಆಯನ ಕಣ್ಣ್‌ಲು ಅರ್ಲುನ ತೂತ ಲೆಕ್ಕ ಇತ್ತ್ಂಡ್.</verse>
				<verse number="15">ಆಯನ ಪಾದೊಲು ಕೆಂಡೊಡ್ದು ದೆತ್ತಿ ಪಿತ್ತಲೆದ ಲೆಕ್ಕಲಾ, ಆಯನ ಸ್ವರ ಬೊಲ್ಲದ ಕೊರೆಪಾಟದಲೆಕ್ಕಲಾ ಇತ್ತ್ಂಡ್.</verse>
				<verse number="16">ಆಯನ ಬಲತ್ತ ಕೈಟ್ ಏಳ್‌ ಬೊಳ್ಳಿಲಿತ್ತ. ಆಯನ ಬಾಯಿಡ್ದ್ ಪರ್ತೆದ ಇರ್ಬಾಯಿ ಕತ್ತಿ ಪಿದಾಡೊಂದಿತ್ತ್‌ಂಡ್. ಆಯನ ಮೋನೆ ಮಧ್ಯಾಹ್ನೊಡು ಅರ್ಲು ಸೂರ್ಯಲೆಕ್ಕ ಇತ್ತ್ಂಡ್.</verse>
				<verse number="17">ಯಾನ್ ಆಯನ್ ತೂಯಿನಪಗ ಸೈತಿನಾಯಲೆಕ್ಕ ಆಯ ಕಾರ ಮುದೆಲ್‌ಗ್ ಬೂರಿಯೆ. ಅಪಗ ಆಯೆ ತನ ಬಲತ್ತ ಕೈನ್ ಎನ ಮಿತ್ತ್ ದೀದ್ “ಪೋಡ್ಯಡ! ಯಾನ್ ಆದಿಲಾ ಅಂತ್ಯಲಾ ಏಪೊಗ್ಲಾ ಬದುಕುನಾಯೆಲಾ ಆದುಲ್ಲೆ.</verse>
				<verse number="18">ಯಾನ್ ಸೈತ್‌ದಿನಾಯೆ ಅಂದ್, ಆಂಡ ತೂಲ ಯಾನ್ ಏನಿತ್ಯೇನಿಗ್ಲಾ ಬದುಕುನಾಯೆ ಆದುಲ್ಲೆ. ಮರಣದವುಲಾ ಪಾತಾಳದವುಲಾ ಬೀಗದ ಕೈ ಎನಡ ಉಂಡು.</verse>
				<verse number="19">ಐಡ್ದಾವರ ಈ ತೂಯಿನೆನ್ಲಾ ಇತ್ತೆ ನಡಪುನೆನ್ಲಾ ದುಂಬಗ್ ಆವೊಡಾಯಿನೆನ್ಲಾ ಬರೆಲ.</verse>
				<verse number="20">ಎನ ಬಲತ್ತ ಕೈಟ್ ಈ ತೂಯಿನ ಏಳ್‌ ಬೊಳ್ಳಿಲು ಬೊಕ್ಕ ಏಳ್‌ ಬಂಗಾರ್‌ದ ದೀಪಕಂಬದ ಗೂಢಾರ್ಥೊನು ತೆರಿಪಾವೆ. ಆ ಏಳ್‌ ಬೊಳ್ಳಿಲು ಪಂಡ ಏಳ್‌ ಸಭೆತ ದೂತೆರ್. ಆ ಏಳ್‌ ದೀಪ ಕಂಬೊಲು ಅಂದ್ಂಡ ಆ ಏಳ್‌ ಸಭೆಕುಲು.</verse>
			</chapter>
			<chapter number="2">
				<verse number="1">“ಎಫೆಸೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ತನ ಬಲತ್ತ ಕೈಟ್ ಏಳ್‌ ಬೊಳ್ಳಿಲೆನ್ ಪತ್ತೊಂದಿನಾಯೆ ಏಳ್‌ ಬಂಗಾರ್‌ದ ದೀಪಕಂಬೊಲೆ ನಡುಟು ತಿರ್ಗೊಂದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,</verse>
				<verse number="2">ನಿನ ಕೆಲಸೊಲೆನ್ಲಾ ಈ ಸೊಂದುನೆನ್ಲಾ ನಿನ ತಾಳ್ಮೆನ್ಲಾ ಯಾನ್ ತೆರಿದೆ; ಈ ದುಷ್ಟೆರೆನ್ ಸಹಿಸೊನುಜ; ತನ್ಕುಲೆನ್ ಅಪೊಸ್ತಲೆರ್ ಅಂದ್‌ದ್ ಪಂಡೊನುನಾಕುಲೆನ್ ಈ ಪರೀಕ್ಷೆ ಮಲ್ತ್‌ದ್ ತೂದು ಅಕುಲು ಸುಳ್ಳುಗಾರೆರ್ ಪಂಡ್ದ್ ನಾಡ್ದ್ ಪತ್ತಿಯ.</verse>
				<verse number="3">ಈ ಎನ ಪುದರ್‌ಗಾದ್ ತಾಳ್ಮೆಡ್ ತೊಂದರೆಲೆನ್ ತಾಂಗೊಂದು ಬೇಜಾರ್ ಮಲ್ತ್‌ದ, ಉಂದು ಮಾತ ತೆರಿದೆ.</verse>
				<verse number="4">ಆಂಡಲಾ ನಿನ ಮಿತ್ತ್ ಎಂಕ್ ಒಂಜಿ ಅಪವಾದ ಉಂಡು. ಅವು ದಾನೆಂದ್ಂಡ, ಎನಡೊಪ್ಪ ಸುರುಟ್ಟಿತ್ತಿ ಪ್ರೀತಿ ಇತ್ತೆ ನಿನಡ ಇಜ್ಜಿ.</verse>
				<verse number="5">ಅಂಚಾಯಿನೆಡ್ದ್ ಈ ಒಲ್ತು ತತ್ತ್‌ದನಾ ಅವೆನ್ ನಿನ ಗೇನೊಗು ಕನತ್‌ದ್ ಪಶ್ಚಾತಾಪ ಪಡೆಲ. ಈ ದುಂಬು ಮಲ್ತೊಂದಿತ್ತಿ ಬೇಲೆಲೆನ್ ಮಲ್ಪುಲ! ಈ ಪಶ್ಚಾತಾಪ ಪಡೆಯಿಜಡ ಯಾನ್ ಬತ್ತ್‌ದ್ ನಿನ ದೀಪಕಂಬೊನು ಐತ ಜಾಗ್‌ಡ್ದ್ ದೆತ್ತ್‌ದ್ ಪಾಡ್ವೆ.</verse>
				<verse number="6">ಆಂಡ ನಿನಡ ಎಡ್ಡೆಂತಿನ ಒಂಜಿ ಉಂಡು, ಯಾನ್ ಪಗೆ ಮಲ್ತೊಂದಿತ್ತಿ *ನಿಕೋಲಾಯಿತೆರೆ ಬೇಲೆಲೆನ್ ಈಲಾ ಪಗೆ ಮಲ್ಪುವ.</verse>
				<verse number="7">“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ಪರಲೋಕೊಡುಪ್ಪು ದೇವೆರೆ ಜೀವ ಇತ್ತಿ ಮರತ ಪರ್ಂದ್‌ನ್ ತಿನಿಯೆರೆ ಕೊರ್ಪೆ.</verse>
				<verse number="8">“ಸ್ಮುರ್ನೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಆದಿಲಾ ಅಂತ್ಯಲಾ ಸೈತ್‌ದ್ ಬದ್‌ಕಿನಾಯೆ ಪನ್ಪಿನಿ ದಾನೆಂದ್ಂಡ,</verse>
				<verse number="9">ನಿನ ಸಂಕಟೊನ್ಲಾ ಬಡತನೊನ್ಲಾ ಯಾನ್ ತೆರಿದೆ. ಆಂಡಲಾ ಈ ಐಶ್ವರ್ಯವಂತೆನೇ ಆದುಲ್ಲ. ಯೆಹೂದ್ಯೆರಂದ್‌ದ್ ಪಂಡೊನುನಾಕುಲು ನಿನನ್ ದೂಷಿಯುನಲಾ ಎಂಕ್ ತೆರಿದ್‌ಂಡ್. ಆಂಡ ಅಕುಲು ಯೆಹೂದ್ಯೆರತ್ತ್. ಅಕುಲು ಸೈತಾನನ ಕೂಟದಾಕುಲು.</verse>
				<verse number="10">ನಿಕ್ಕ್ ಬರ್ಪಿನಂಚಿತ್ತಿ ಭಂಗೊಗಾದ್ ಪೋಡ್ಯಡ. ಇಂದಾ! ನಿಕ್ಲೆಡ್ ಕೆಲೆವೆರೆನ್ ಪರೀಕ್ಷೆ ಮಲ್ಪೆರೆಗಾದ್ ಸೈತಾನೆ ಸೆರೆಮನೆಟ್ ಪಾಡುವೆ. ಪತ್ತ್ ದಿನ ಸಂಕಟ ಉಪ್ಪು. ಮರಣ ಬತ್ತ್‌ಂಡಲಾ ನಂಬಿಗಸ್ತೆ ಆದುಪ್ಪುಲ. ಯಾನ್ ನಿಕ್ಕ್ ಜೀವದ ಕಿರೀಟೊನು ಕೊರ್ಪೆ.</verse>
				<verse number="11">“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ರಡ್ಡನೆ ಮರಣೊಡ್ದು ವಾ ಕೇಡ್‌ಲಾ ಆವಂದ್.</verse>
				<verse number="12">“ಪೆರ್ಗಮೊಡುಪ್ಪು ಸಭೆತ ದೂತಗ್ ಇಂಚ ಬರೆಲ, ಪರ್ತೆದ ಇರ್ಬಾಯಿ ಕತ್ತಿನ್ ಪತ್ತೊಂದಿತ್ತಿನಾಯೆ ಪನ್ಪಿನಿ ದಾನೆಂದ್ಂಡ,</verse>
				<verse number="13">ಈ ಉಪ್ಪುನ ಜಾಗ್‌ನ್ ಯಾನ್ ತೆರಿದೆ. ಅವು ಸೈತಾನನ ಗದ್ದಿಗೆ ಆದುಂಡು. ಆಂಡಲಾ ಈ ಎನ ಪುದರ್‌ನ್ ಬುಡಂದೆ ಪತ್ತೊಂದ. ಈ ಉಪ್ಪುನ ಸೈತಾನನ ಬುಡಾರೊಡು ಎಂಕ್ ನಂಬಿಗಸ್ತೆಲಾ ಸಾಕ್ಷಿದಾಯೆಲಾ ಆದಿತ್ತಿ ಅಂತಿಪನ್ ಕೆರ್ದ್ ಪಾಡಿಯೆರ್. ಆ ದಿನೊಕುಲೆಡ್ಲಾ ಈ ಎನ ಮಿತ್ತ್ ದೀತಿನ ನಂಬಿಕೆನ್ ಮದೆ ಮಲ್ತ್‌ಜ.</verse>
				<verse number="14">ಆಂಡ ನಿನ ಸಂಗತಿಡ್ ನಿನ ಮಿತ್ತ್ ಕೆಲವು ಅಪವಾದ ಉಂಡು. ಮೂರ್ತಿಗ್ ಅರ್ಪಣೆ ಮಲ್ತ್‌ದಿನ ನೈವೇದ್ಯೊಲೆನ್ ತಿನ್ಪಿನೆಟ್ಲಾ ಹಾದ್ರ ಮಲ್ಪುನೆಟ್ಲಾ ಇಸ್ರಾಯೇಲ್ಯೆರ್ ದಂಟ್‌ದ್ ಬೂರೊಡು ಅಂದ್‌ದ್ ಬಿಳಾಮೆ ಬಾಲಾಕಗ್ ಪಂಡಿನ ದುರ್ಬೋಧನೆನ್ ಪತ್ತೊಂದಿನಾಕುಲುಲಾ ನಿನಡ ಉಲ್ಲೆರ್.</verse>
				<verse number="15">ಅವ್ವೇ ರೀತಿದ ಬೋಧನೆಲೆನ್ ಪತ್ತೊಂದಿನ ನಿಕೋಲಾಯಿತೆರ್ಲಾ ನಿನಡ ಉಲ್ಲೆರ್.</verse>
				<verse number="16">ಅವೆಡ್ದಾವರ ಪಶ್ಚಾತಾಪ ಪಡೆದ್ ತಿರ್ಗಿಜೆರ್ಡ ಯಾನ್ ಬೇಗನೆ ನಿನ ಕೈತಲ್‌ಗ್ ಬತ್ತ್‌ದ್ ಎನ ಬಾಯಿಡ್ದ್ ಬರ್ಪಿ ಕತ್ತಿಡ್ದ್ ಅಕ್ಲೆಡೊಪ್ಪ ಯುದ್ದ ಮಲ್ಪುವೆ.</verse>
				<verse number="17">“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್. ಗೆಂದಿನಾಯಗ್ ದೆಂಗಾದ್ ದೀತಿನ ಮನ್ನ ಪನ್ಪಿ ತಿನಸ್‌ನ್ ಕೊರ್ಪೆ; ಪ್ರತಿಯೊರಿಯಗ್ಲಾ ಒಂಜಿ ಬೊಲ್ದು ಕಲ್ಲ್‌ನ್ ಕೊರ್ಪೆ. ಆ ಕಲ್ಲ್‌ದ ಮಿತ್ತ್ ಒಂಜಿ ಪೊಸ ಪುದರ್ ಬರೆದುಪ್ಪುಂಡು. ಆ ಪುದರ್ ಏರೆಗ್ ತಿಕ್ಕುಂಡಾ ಆಯಗ್ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.</verse>
				<verse number="18">“ಥುವತೈರೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಅರ್ಲುನ ತೂತ ಕೆಂಡದಲೆಕ್ಕ ಉಪ್ಪು ಕಣ್ಣುಲು ಪಿತ್ತಲೆದಲೆಕ್ಕಂತಿ ಕಾರುಲು ಉಪ್ಪುನ ದೇವೆರೆ ಮಗೆ ಪನ್ಪಿನಿ ದಾನೆಂದ್ಂಡ,</verse>
				<verse number="19">ನಿನ ಕೆಲಸೊಲೆನ್ಲಾ ನಿನ ಪ್ರೀತಿನ್ಲಾ ನಿನ ನಂಬಿಕೆನ್ಲಾ ನಿನ ಸೇವೆನ್ಲಾ ನಿನ ತಾಳ್ಮೆನ್ಲಾ ಯಾನ್ ತೆರಿದೆ. ಉಂದತ್ತಂದೆ ನಿನ ಕಡೆತ ಬೇಲೆಲು ದುಂಬುದೆಡ್ದ್‌ಲಾ ಹೆಚ್ಚ್‌ದವು ಅಂದ್‌ದ್ ತೆರಿದೆ.</verse>
				<verse number="20">ಆಂಡ ನಿನ ಮಿತ್ತ್ ಒಂಜಿ ಅಪವಾದ ಉಂಡು. ಅವು ದಾನೆಂದ್ಂಡ ಈಜೆಬೆಲ್ ಇನ್ಪಿ ಆ ಪೊಂಜೊವು ತನನ್ ತಾನೇ ಪ್ರವಾದಿನಿ ಅಂದ್‌ದ್ ಪನೊಂದು ಹಾದ್ರ ಮಲ್ಪೊಲಿ ಪಂಡ್ದ್‌ಲಾ ಮೂರ್ತಿಗ್ ನೈವೇದ್ಯ ಮಲ್ತಿನೆನ್ ತಿನೊಲಿ ಅಂದ್‌ದ್ ಬೋಧನೆ ಕೊರೊಂದು ಎನ ಸೇವಕೆರೆನ್ ಅಡ್ಡ ಸಾದಿಡ್ ನಡಪಾವನಗ ಈ ಆಲೆನ್ ತಡೆಪಂದೆ ಬುಡಿಯ.</verse>
				<verse number="21">ಯಾನ್ ಆಲೆಗ್ ಪಶ್ಚಾತಾಪ ಪಡೆಯೆರೆ ಸಮಯೊನು ಕೊರಿಯೆ. ಆಂಡ ಆಲೆಗ್ ಪಶ್ಚಾತಾಪ ಪಡೆದ್ ತನ ಹಾದ್ರೊನು ಬುಡ್ದು ಬುಡಿಯೆರೆ ಮನಸ್ ಇಜ್ಜಿ.</verse>
				<verse number="22">ಇಂದಾ, ಆಲ್ ಪಜೆಟ್‌ ನೆಗರುಲೆಕ್ಕ ಮಲ್ಪುವೆ. ಬೊಕ್ಕ ಆಲೆಡೊಪ್ಪ ವ್ಯಭಿಚಾರ ಮಲ್ತ್‌ದಿನಾಕುಲು ತನ್ಕುಲು ಪಶ್ಚಾತಾಪ ಪಡೆವೊಂದು ಆಲೆನ ಸಂಗೊನು ಬುಡ್ದು ಪಶ್ಚಾತಾಪ ಪಡೆಯಿಜೆರ್ಡ ಮಲ್ಲ ಸಂಕಟೊಡು ಬೂರುಲೆಕ್ಕ ಮಲ್ಪುವೆ.</verse>
				<verse number="23">ಆಲೆನ ಜೋಕುಲೆನ್ ಕೆರಂದೆ ಬುಡಯೆ; ಅಪಗ ಯಾನ್ ಮಾತ ನರಮಾನಿಲೆನ ಗೇನೊಲೆನ್ಲಾ, ಉಡಲ್‌ನ್ಲಾ ಶೋಧಿದ್ ತೆರಿಯೊನುನಾಯೆ ಅಂದ್‌ದ್ ಮಾತ ಸಭೆಲೆಗ್ ತೆರಿದ್ ಬರ್ಪುಂಡು. ನಿಕ್ಲೆಡ್ ಪ್ರತಿ ಒರಿಯಗ್ಲಾ ಆಯಾಯ ಕ್ರಿಯೊಲೆ ತಕ್ಕ ಇತ್ತಿ ಪ್ರತಿಫಲ ಯಾನ್ ಕೊರ್ಪೆ.</verse>
				<verse number="24">“ಆಂಡ ಥುವತೈರೊಡುಪ್ಪು ಬಾಕಿದಾಕುಲೆಗ್ ಅಂದ್ಂಡ ಸೈತಾನನ ಕಡೆಡ್ದೆ ಬೈದಿ ದುರ್ಬೋಧನೆಲೆನ್ ನಿಕ್ಲೆಡ್ ಏರೇರ್ ತೆರಿಯಂದೆಲಾ ತರಕೊನಂದೆಲಾ ಉಪ್ಪುವೆರಾ ಅಕ್ಲೆಗ್ ಯಾನ್ ಪನ್ಪಿನಿ ದಾನೆಂದ್ಂಡ,</verse>
				<verse number="25">ಯಾನ್ ಬನ್ನೆಂಗೆ ನಿಕ್ಲೆಡುಪ್ಪುನೆನ್ ಗಟ್ಟಿಯಾದ್ ಪತ್ತೊನ್ಲೆ.</verse>
				<verse number="26">ಬೊಕ್ಕ ಗೆಂದಿನಾಯೆ ಆದ್, ಏರ್ ಎಂಕ್ ಮೆಚ್ಚಿಗೆ ಆಪಿ ಬೇಲೆಲೆನ್ ಕಡೇ ಮುಟ್ಟ ಮಲ್ತೊಂದುಪ್ಪುವೆನಾ, ಆಯಗ್ ಯಾನ್ ಎನ ಅಮ್ಮೆರೆಡ್ದ್ ಪಡೆಯಿ ಅಧಿಕಾರದಲೆಕ್ಕ ಜನಾಂಗೊಲೆ ಮಿತ್ತ್ ಅಧಿಕಾರೊನು ಕೊರುವೆ.</verse>
				<verse number="27">ಆಯೆ ಕರ್ಬದ ಕೋಲುಡು ಅಕ್ಲೆನ್ ಆಳುವೆ. ಮಣ್ಣ್‌ದ ಕರೊಕುಲು ದರಿದ್ ಪೋಪಿಲೆಕ್ಕ ಅಕ್ಲೆನ ಬಲ ನುರಿದ್ ಪೋವು.</verse>
				<verse number="28">ಉಂದತ್ತಂದೆ ಆಯಗ್ ಪುಲ್ಯಕಾಂಡೆ ಮೂಡುನ ಬೊಳ್ಳಿನ್ ಕೊರ್ಪೆ.</verse>
				<verse number="29">“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.</verse>
			</chapter>
			<chapter number="3">
				<verse number="1">“ಸಾರ್ದಿಸ್‌ಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ದೇವೆರೆ ಏಳ್‌ ಆತ್ಮೊಲೆನ್ಲಾ ಏಳ್‌ ಬೊಳ್ಳಿಲೆನ್ಲಾ ಪಡೆತಿನಾಯೆ ಪನ್ಪಿನಿ ದಾನೆಂದ್ಂಡ, ಈ ಮಲ್ಪುನ ಮಾತ ಕೆಲಸೊಲೆನ್ ಯಾನ್ ತೆರಿದೆ. ಬದುಕುನಾಯೆ ಪನ್ಪಿ ಪುದರ್ ನಿಕ್ಕ್ ಇತ್ತ್ಂಡಲಾ ಈ ಸೈತಿನಾಯೆ ಆದುಲ್ಲ ಪನ್ಪಿನೆನ್ ತೆರಿದೆ.</verse>
				<verse number="2">ಎಚ್ಚರಿಕೆ ಆದುಪ್ಪುಲ; ಸೈಪಿಲೆಕ್ಕ ಉಪ್ಪು ಒರಿದಿನೆನ್ ಗಟ್ಟಿ ಮಲ್ತೊನು. ದಾಯೆಗಂದ್ಂಡ ಎನ ದೇವೆರೆ ಎದುರುಡು ನಿನ ವಾ ಬೇಲೆಲಾ ಪೂರ್ತಿದವು ಅಂದ್‌ದ್ ಎಂಕ್ ತೋಜಿದಿಜಿ.</verse>
				<verse number="3">ಅಂಚಾಯಿನೆಡ್ದ್ ಈ ಪಡೆವೊಂಡಿ ಬೋಧನೆನ್ಲಾ ಈ ಕೇಂಡ್ದಿ ರೀತಿನ್ಲಾ ನೆನೆಪುಗು ಕನತೊಂದು ಅವೆನ್ ಕಾತೊಂದು ಪಶ್ಚಾತಾಪ ಪಡೆಲ. ಈ ಎಚ್ಚರಿಕೆ ಆದಿತ್ತಿಜಡ ಕಲ್ವೆ ಬರ್ಪಿಲೆಕ್ಕನೇ ಯಾನ್ ಬರುವೆ, ಯಾನ್ ವಾ ಗಳಿಗೆಡ್ ನಿನ ಕೈತಲ್‌ ಬರ್ಪೆ ಇನ್ಪಿನವು ಕಂಡಿತ ನಿಕ್ಕ್ ಗೊತ್ತಾವಂದ್.</verse>
				<verse number="4">ಆಂಡಲಾ ತನ್ಕುಲೆ ಕುಂಟುನು ಮೈಲೆ ಮಲ್ತೊನಂದೆ ಉಪ್ಪು ಒಂತೆ ಜನೊಕುಲು ಸಾರ್ದಿಸ್‌ಡ್ ನಿಕ್ಕ್ ಉಲ್ಲೆರ್. ಅಕುಲು ತಕ್ಕದಾಕುಲು ಆದುಪ್ಪುನೆಡ್ದ್ ಎನಡೊಪ್ಪ ಬೊಲ್ದು ಕುಂಟು ಪಾಡೊಂದು ನಡಪುವೆರ್.</verse>
				<verse number="5">ಗೆಂದಿನಾಯಗ್ ಬೊಲ್ದು ಕುಂಟು ಪೊದೆಪಾವೆರ್. ಯಾನ್ ಆಯನ ಪುದರ್‌ನ್ ಜೀವದ ಪುಸ್ತಕೊಡು ಮಾಜಾವಂದೆ ಆಯೆ ಎನ್ನಾಯೆ ಅಂದ್‌ದ್ ಎನ ಅಮ್ಮೆರೆ ಎದುರುಲಾ ಆಯ ದೂತೆರೆ ಎದುರುಲಾ ಒಪ್ಪಿಯೊನ್ವೆ.</verse>
				<verse number="6">“ದೇವೆರಾತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.</verse>
				<verse number="7">“ಫಿಲದೆಲ್ಫಿಯದ ಸಭೆತ ದೂತಗ್ ಇಂಚ ಬರೆಲ: “ಪರಿಶುದ್ಧೆಲಾ ಸತ್ಯವಂತೆಲಾ ದಾವೀದನ ಬೀಗದ ಕೈ ಇತ್ತಿನಾಯೆಲಾ ಏರ್ಲಾ ಮುಚ್ಚಂದಿಲೆಕ್ಕ ಜಪ್ಪುನಾಯೆಲಾ, ಏರ್ಲಾ ಜಪ್ಪಂದಿಲೆಕ್ಕ ಮುಚ್ಚುನಾಯೆಲಾ ಆದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,</verse>
				<verse number="8">ನಿನ ಕೆಲಸೊಲೆನ್ ಯಾನ್ ತೆರಿದೆ. ಇಂದಾ, ನಿನ ಬಲ ಒಂತೆ ಆಂಡಲಾ ಈ ಎನ ಪುದರ್‌ನ್ ಆರೆಂಜಂದೆ ಎನ ಪಾತೆರೊನು ಕಾತೊಂಡಿನೆಡ್ದ್ ನಿನ ಎದುರುಡು ಒಂಜಿ ಬಾಕಿಲ್‌ನ್ ಜತ್ತ್‌ದ್ ದೀತೆ; ಅವೆನ್ ಏರ್ಲಾ ಮುಚ್ಚಯೆರ್.</verse>
				<verse number="9">ತನ್ಕುಲು ಯೆಹೂದ್ಯೆರಂದ್‌ದ್ ಕೊಚ್ಚೊನುನ ಸೈತಾನನ ಸಮಾಜೊಡ್ದು ಕೆಲೆವೆರ್ ಬತ್ತ್‌ದ್ ನಿನ ಕಾರ ಮುದೆಲ್‌ಗ್ ಅಡ್ಡಬೂರುಲೆಕ್ಕಲಾ ನಿನನ್ ಯಾನ್ ಪ್ರೀತಿ ಮಲ್ತ್‌ದೆ ಅಂದ್‌ದ್ ತೆರಿಯೊನುಲೆಕ್ಕಲಾ ಮಲ್ಪುವೆ.</verse>
				<verse number="10">ಈ ಎನ ಬೋಧನೆಲೆನ್ ಕಾತೊಂದು ಬತ್ತಿನೆಡ್ದ್ ಲೋಕದ ಜನೊಕುಲೆನ್ ಪರೀಕ್ಷೆ ಮಲ್ಪೆರೆಗಾದ್ ಇಡೀ ಲೋಕೊಗು ಬರ್ಪಿನ ಶೋಧನೆದ ಕಾಲೊಡು ನಿನನ್ ತಪ್ಪಾದ್ ಕಾಪುವೆ.</verse>
				<verse number="11">ಯಾನ್ ಬೇಗೊಡು ಬರ್ಪೆ. ನಿನ ಕಿರೀಟೊನು ಏರ್ಲಾ ದೆಪ್ಪಂದಿಲೆಕ್ಕ ನಿಕ್ಕುಪ್ಪುನೆನ್ ಗಟ್ಟಿಯಾದ್ ಪತ್ತೊನ್ಲ.</verse>
				<verse number="12">ಗೆಂದಿನಾಯಗ್ ಯಾನ್ ಆಯನ್ ದೇವೆರೆ ಆಲಯೊಡು ಕಂಬ ಆದ್ ಉಂತಾವೆ, ಆಯೆ ಅಲ್ಪ ಏಪೊಗ್ಲಾ ಉಪ್ಪುವೆ. ಉಂದತ್ತಂದೆ ಎನ ದೇವೆರೆ ಪುದರ್‌ನ್ಲಾ, ಎನ ದೇವೆರೆ ಕೈತಲ್‌ಡ್ದ್ ಪರಲೋಕೊಡ್ದು ಜತ್ತ್‌ದ್ ಬರ್ಪಿ ಎನ ಯೆರೂಸಲೇಮು ಪಟ್ಟಣ ಇನ್ಪಿ ಎನ ದೇವೆರೆ ಪಟ್ಟಣದ ಪುದರ್‌ನ್ಲಾ ಎನ ಪೊಸ ಪುದರ್‌ನ್ಲಾ ಆಯ ಮಿತ್ತ್ ಬರೆಪೆ.</verse>
				<verse number="13">“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.</verse>
				<verse number="14">“ಲವೊದಿಕಿಯೊಡುಪ್ಪು ಸಭೆತ ದೂತಗ್ ಇಂಚ ಬರೆಲ: “ಆಮೆನ್ ಪನ್ಪಿನಾಯೆ ನಂಬಿಕೆದ ಸತ್ಯಸಾಕ್ಷಿಲಾ ದೇವೆರೆ ಸೃಷ್ಟಿಗ್ ಅಧಿಕಾರ ಆದುಪ್ಪುನಾಯೆ ಪನ್ಪಿನಿ ದಾನೆಂದ್ಂಡ,</verse>
				<verse number="15">ನಿನ ಕೆಲಸೊಲೆನ್ ಯಾನ್ ತೆರಿದೆ; ಈ ಚೌಲಿಲಾ ಅತ್ತ್ ಬೆಚ್ಚಲಾ ಅತ್ತ್, ಈ ಚೌಲಿ ಆವಡ್ ಬೆಚ್ಚ ಆವಡ್ ಇತ್ತ್‌ದ್ಂಡ ಎಡ್ಡೆ ಇತ್ತ್ಂಡ್.</verse>
				<verse number="16">ಈ ಬೆಚ್ಚಲಾ ಚೌಲಿಲಾ ಆದುಪ್ಪಂದೆ ಉಗುರುಬೆಚ್ಚ ಉಪ್ಪುನೆಡ್ದ್ ನಿನನ್ ಎನ ಬಾಯಿಡ್ದ್ ಉಬ್ಬಿವೆ.</verse>
				<verse number="17">“ಈ ನಿನ ವಿಚಾರೊಡು, ‘ಯಾನ್ ಐಶ್ವರ್ಯವಂತೆ, ಸಂಪನ್ನೆ, ಎಂಕ್ ಒಯಿಕ್‌ಲಾ ಕಮ್ಮಿ ಇಜ್ಜಿ,’ ಪನೊಂದುಲ್ಲ. ಆಂಡ ಈ ದರಿದ್ರೆಲಾ, ಕರುಣೆಗ್ ತಕ್ಕದಾಂತಿನಾಯೆಲಾ, ನಟ್ಟುನಾಯೆಲಾ, ಕುರುಡೆಲಾ, ಮೆಯಿಕ್ ಕುಂಟುದಾಂತೆ ಬತ್ತಲೆಡುಲ್ಲ ಪನ್ಪಿನವು ನಿಕ್ಕ್ ತೆರಿಯಂದ್.</verse>
				<verse number="18">ಈ ಐಶ್ವರ್ಯವಂತೆ ಆಪಿಲೆಕ್ಕ ತೂಟು ಶುದ್ಧ ಮಲ್ತಿನ ಬಂಗಾರ್‌ನ್ಲಾ, ನಿನ ಬತ್ತಲೆನ್ ಮದೆ ಮಲ್ಪರೆ ಬೊಲ್ದು ಕುಂಟುನ್ಲಾ, ಕಣ್ಣ್ ತೋಜುಲೆಕ್ಕ ನಿನ ಕಣ್ಣ್‌ಗ್ ಪೂಜೆರೆಗಾದ್ ಅಂಜನೊನ್ಲಾ ಎನಡ್ದ್ ಕ್ರಯೊಕು ದೆತ್ತೊನೊಡು ಅಂದ್‌ದ್ ನಿಕ್ಕ್ ಬುದ್ಧಿ ಪನ್ಪೆ.</verse>
				<verse number="19">ಯಾನ್ ಏರೇರೆನ್ ಪ್ರೀತಿ ಮಲ್ಪುವೆನಾ ಅಕ್ಲೆನ್ ದಟ್ಟಿಯುವೆ ಬೊಕ್ಕ ಶಿಕ್ಷೆ ಕೊರ್ಪೆ. ಅಂಚಾಯಿನೆಡ್ದ್ ಎಚ್ಚರಿಕೆಡುಪ್ಪುಲ. ಪಶ್ಚಾತಾಪ ಪಡೆಲ.</verse>
				<verse number="20">ಇಂದಾ, ಯಾನ್ ಬಾಕಿಲ್‌ಡ್ ಉಂತೊಂದು ಬೊಟ್ಟೊಂದುಲ್ಲೆ; ಏರಾಂಡಲಾ ಎನ ಸ್ವರೊನು ಕೇಂಡ್ದ್ ಬಾಕಿಲ್‌ನ್ ಜಪ್ಪುವೆಡ, ಯಾನ್ ಉಲಯಿ ಬತ್ತ್‌ದ್ ಆಯಡೊಪ್ಪ ವಣಸ್ ಮಲ್ಪುವೆ, ಆಯೆಲಾ ಎನಡೊಪ್ಪ ವಣಸ್ ಮಲ್ಪುವೆ.</verse>
				<verse number="21">ಯಾನ್ ಗೆಂದ್‌ದ್ ಎನ ಅಮ್ಮೆರೆಡೊಪ್ಪ ಗದ್ದಿಗೆಡ್ ಕುಲ್ಲಿನಂಚೆನೇ, ಗೆಂದಿನಾಯಗ್ ಎನಡೊಪ್ಪ ಗದ್ದಿಗೆಡ್ ಕುಲ್ಲುಲೆಕ್ಕ ಮಲ್ಪುವೆ.</verse>
				<verse number="22">“ದೇವೆರೆ ಆತ್ಮೆ ಸಭೆಲೆಗ್ ಪನ್ಪಿನೆನ್ ಕೆಬಿ ಇತ್ತಿನಾಯೆ ಕೇನಡ್.”</verse>
			</chapter>
			<chapter number="4">
				<verse number="1">ಐಡ್ದ್ ಬೊಕ್ಕ ಯಾನ್ ಪರಲೋಕೊಡು ಒಂಜಿ ಬಾಕಿಲ್ ಜತ್ತ್‌ದಿನೆನ್ ತೂಯೆ. ಯಾನ್ ಸುರುಟ್ಟು ಕೇಂಡ್ದಿ ಪಾತೆರ, ಅವು ಎನಡ ತುತೂರಿದ ಲೆಕ್ಕನೆ ಪಾತೆರೊಂದುಪ್ಪುನೆನ್ ಕೇಂಡೆ. ಆ ಸ್ವರ ಪಂಡ್ಂಡ್, “ಇಡೆಗ್ ಮಿತ್ತ್ ಬಲ; ಉಂದೆಡ್ದ್ ಬೊಕ್ಕ ನಡಪೆರೆ ಉಪ್ಪುನೆನ್ ನಿಕ್ಕ್ ತೋಜಾವೆ.”</verse>
				<verse number="2">ಕೂಡ್ಲೇ ಯಾನ್ ದೇವೆರಾತ್ಮನ ವಶ ಆಯೆ. ಅಪಗ ಇಂದಾ, ಪರಲೋಕೊಡು ಒಂಜಿ ಗದ್ದಿಗೆ ಇತ್ತ್ಂಡ್, ಗದ್ದಿಗೆದ ಮಿತ್ತ್ ಒರಿ ಕುಲ್ಲೊಂದಿತ್ತೆ.</verse>
				<verse number="3">ಕುಲ್ಲುದಿತ್ತಿನಾಯನ ಕಣ್ಣ್ ಸೂರ್ಯಕಾಂತ ಬೊಕ್ಕ ಪದ್ಮರಾಗ ಮಣಿತ್ತಲೆಕ್ಕ ತೋಜೊಂದಿತ್ತ. ಗದ್ದಿಗೆದ ಸುತ್ತಲಾ ಪಚ್ಚೆ ಮಿಂಚುನ ಕಲ್ಲ್‌ದಲೆಕ್ಕ ಕಾಮನಬಿಲ್ಲ್ ಇತ್ತ್ಂಡ್.</verse>
				<verse number="4">ಉಂದತ್ತಂದೆ ಐತ ಸುತ್ತಲಾ ಇರ್ವತ್ತನಾಲ್ ಗದ್ದಿಗೆಲು ಇತ್ತ್ಂಡ್. ಆ ಗದ್ದಿಗೆಲೆಡ್ ಬೊಲ್ದು ಕುಂಟು ಪಾಡೊಂದಿತ್ತಿ ಇರ್ವತ್ತನಾಲ್ ಮಂದಿ ಹಿರಿಯೆರ್ ಕುಲ್ಲುದಿತ್ತೆರ್. ಅಕ್ಲೆ ತರೆತ ಮಿತ್ತ್ ಬಂಗಾರ್‌ದ ಕಿರೀಟ ಇತ್ತ್ಂಡ್.</verse>
				<verse number="5">ಗದ್ದಿಗೆಡ್ದ್ ಮಿಂಚಿದ ಬೊಲ್ಪುಲಾ ತೆಡಿಲ್‌ದ ಶಬ್ಧಲಾ ಬರೊಂದಿತ್ತ್‌ಂಡ್. ಗದ್ದಿಗೆದ ಎದುರುಡು ಏಳ್‌ ತೂಟೆ ಅರ್ಲೊಂದಿತ್ತ್‌ಂಡ್, ಅವು ದೇವೆರೆ ಏಳ್‌ ಆತ್ಮೊಲು.</verse>
				<verse number="6">ಉಂದತ್ತಂದೆ ಗದ್ದಿಗೆದ ಎದುರುಡು ಸ್ಫಟಿಕದಂಚಿನ ಕನ್ನಡಿದ ಕಡಲ್ ಇತ್ತಿಲೆಕ್ಕ ತೋಜಿದ್ ಬತ್ತ್ಂಡ್. ಗದ್ದಿಗೆದ ನಡುಟ್ಲಾ ಗದ್ದಿಗೆದ ಸುತ್ತಲಾ ನಾಲ್ ಕಡೆಟ್ಲಾ ನಾಲ್ ಜೀವಿಲು ಇತ್ತ. ಐಕ್ಲೆಗ್ ದುಂಬು ಪಿರವು ಕಣ್ಣುಲು ಇತ್ತ್ಂಡ್.</verse>
				<verse number="7">ಈ ಜೀವಿಲೆಡ್ ಸುರುತ್ತವು ಸಿಮ್ಮದಲೆಕ್ಕ ಇತ್ತ್ಂಡ್; ರಡ್ಡನೆದವು ಬೋರಿದಲೆಕ್ಕ; ಮೂಜನೆದೆಕ್ ನರಮಾನಿ ಮೋನೆ ಇತ್ತ್ಂಡ್, ಬೊಕ್ಕ ನಾಲನೆದವು ರಾಪಿನ ಗಿಡಿತಲೆಕ್ಕ ಇತ್ತ್ಂಡ್.</verse>
				<verse number="8">ಆ ನಾಲ್ ಜೀವಿಲೆಗ್ ಒಂಜೊಂಜೆಕ್ ಆಜಾಜಿ ರೆಂಕೆಲು ಇತ್ತ್ಂಡ್. ಸುತ್ತಲಾ ಉಲಯಿಲಾ ಪಿದಯಿಲಾ ಕಣ್ಣ್‌ಲು ಇತ್ತ್ಂಡ್. ಬೊಕ್ಕ ಆ ಜೀವಿಲು ರಾತ್ರೆ ಪಗೆಲ್ ಬುಡಂದೆ, “ದೇವೆರಾದುಪ್ಪು ಕರ್ತವೆ ಪರಿಶುದ್ಧೆ, ಪರಿಶುದ್ಧೆ, ಪರಿಶುದ್ಧದಾಯೆ ಆದುಲ್ಲೆ; ಸರ್ವತ್ರಾಣದಾಯೆ, ವರ್ತಮಾನ, ಭೂತ, ಭವಿಷ್ಯತ್ ಕಾಲೊಡು ಉಪ್ಪುನಾಯೆ,” ಅಂದ್‌ದ್ ಪನೊಂದಿತ್ತ್‌ಂಡ್.</verse>
				<verse number="9">ಏನಿತ್ಯೇನಿಗ್ಲಾ ಬದುಕುನಾಯೆ ಆದ್ ಗದ್ದಿಗೆದ ಮಿತ್ತ್ ಕುಲ್ಲುದಿನಾಯಗ್ ಆ ನಾಲ್ ಜೀವಿಲು ಮೈಮೆ, ಮಾನ, ಉಪಕಾರ ಸಂದಾವೊಂದಿತ್ತ್‌ಂಡ್.</verse>
				<verse number="10">ಆ ಇರ್ವತ್ತನಾಲ್ ಮಂದಿ ಹಿರಿಯೆರ್ ಗದ್ದಿಗೆದ ಮಿತ್ತ್ ಕುಲ್ಲುದಿನಾಯನ ಕಾರ್‌ಗ್ ಅಡ್ಡಬೂರ್ದು ಏನಿತ್ಯೇನಿಗ್ಲಾ ಬದುಕುನಾಯಗ್ ಆರಾಧನೆ ಮಲ್ತ್‌ದ್ ತನ್ಕುಲೆ ಕಿರೀಟೊಲೆನ್ ಆ ಗದ್ದಿಗೆದ ಎದುರುಡು ದೀದ್,</verse>
				<verse number="11">“ಕರ್ತವಾ, ಎಂಕುಲೆ ದೇವೆರೇ, ಈ ಮೈಮೆ, ಮಾನ, ಬಲ ಪಡೆಯುನೆಕ್ಕ್ ತಕ್ಕದಾಯೆ ಆದುಲ್ಲ, ಮಾತೆನ್ಲಾ ಸೃಷ್ಟಿ ಮಲ್ತ್‌ದಿನಾಯೆ ಈಯೇ; ಮಾತಲಾ ನಿನ ಚಿತ್ತೊಡ್ದೇ ಇತ್ತಿನವು, ನಿನ ಚಿತ್ತೊಡೇ ಉಂಡಾತಿನವು, ಅಂದ್‌ದ್ ಪನೊಂದು,” ಏನಿತ್ಯೇನಿಗ್ಲಾ ಉಪ್ಪುನಾಯನ್ ಆರಾಧನೆ ಮಲ್ತೊಂದಿತ್ತೆರ್.</verse>
			</chapter>
			<chapter number="5">
				<verse number="1">ಬೊಕ್ಕ ಗದ್ದಿಗೆಡ್ ಕುಲ್ಲುದಿತ್ತಿನಾಯನ ಬಲತ್ತ ಕೈಟ್ ಒಂಜಿ ಸುರುಳಿನ್ ತೂಯೆ. ಆ ಸುರುಳಿದ ರಡ್ಡ್ ಮರ್ಗಿಲ್‌ಡ್ಲಾ ಬರೆದಿತ್ತ್‌ಂಡ್. ಅವೆನ್ ಏಳ್‌ ಮುದ್ರೆಲೆಡ್ ಬಂದ್ ಮಲ್ತ್‌ದಿತ್ತೆರ್</verse>
				<verse number="2">ಉಂದತ್ತಂದೆ ಒರಿ ಬಲಿಷ್ಟೆ ದೂತೆ, “ಈ ಸುರುಳಿನ್ ಗಿರ್ಪೆರೆಗ್ಲಾ ಮುದ್ರೆಲೆನ್ ದರ್ಪೆರೆಗ್ಲಾ ತಕ್ಕದಾಯೆ ಏರ್ ಉಲ್ಲೆರ್?” ಅಂದ್‌ದ್ ಗಟ್ಟಿ ಸ್ವರೊಟ್ಟು ಸಾರಿಯುನೆನ್ ತೂಯೆ.</verse>
				<verse number="3">ಆಂಡ ಆ ಸುರುಳಿನ್ ಗಿರ್ಪೆರೆಗಾವಡ್ ಐತ ಉಲಯಿ ತೂವೆರೆಗಾವಡ್, ಪರಲೋಕೊಡಾವಡ್ ಈ ಭೂಮಿಡಾವಡ್ ಭೂಮಿದ ತಿರ್ತಾವಡ್ ಏರೆಗ್ಲಾ ಶಕ್ತಿ ಇತ್ತ್‌ಜಿ.</verse>
				<verse number="4">ಅಪಗ ಆ ಸುರುಳಿನ್ ಗಿರ್ಪೆರೆಗಾವಡ್ ಐಟ್ಟ್ ತೂವೆರೆಗಾವಡ್ ತಕ್ಕದಾಯೆ ತಿಕ್ಕಂದಿನೆಡ್ದಾವರ ಯಾನ್ ದಿಂಜ ಬುಲ್ತೆ.</verse>
				<verse number="5">ಐಡ್ದ್ ಬೊಕ್ಕ ಹಿರಿಯೆರೆಡ್ ಒರಿ ಎಂಕ್, “ಬುಲ್ಪೊಡ್ಚಿ ಇಂದಾ, ಯೂದ ಗೋತ್ರೊಡ್ದು ಪುಟ್ಟಿನ ಸಿಮ್ಮಲಾ, *ದಾವೀದನ ವಂಶದಾಯೆ ಆದುಪ್ಪು ಒರಿ ಗೆಂದ್‌ದೆ. ಆಯೆ ಆ ಸುರುಳಿನ್ಲಾ ಐತ ಏಳ್‌ ಮುದ್ರೆಲೆನ್ಲಾ ಗಿರ್ಪುವೆ,” ಅಂದ್‌ದ್ ಪಂಡೆ.</verse>
				<verse number="6">ಬೊಕ್ಕ ಯಾನ್ ಗದ್ದಿಗೆಲಾ ನಾಲ್ ಜೀವಿಲು ಇತ್ತಿ ಜಾಗ್‌ಗ್ಲಾ ಹಿರಿಯೆರ್ ಇತ್ತಿ ಜಾಗ್‌ಗ್ಲಾ ನಡುಟು ಯಜ್ಞದ ಒಂಜಿ ಕುರಿತ ಕಿನ್ನಿ ಉಂತುದಿನೆನ್ ತೂಯೆ. ಐಕ್ ಏಳ್‌ ಕೊಂಬುಲಾ ಏಳ್‌ ಕಣ್ಣ್‌ಲಾ ಇತ್ತ್ಂಡ್. ಅವು ಭೂಮಿದ ಮಾತ ಕಡೆಕ್ಕ್, ಕಡಪುಡ್ದಿನ ದೇವೆರೆ ಏಳ್‌ ಆತ್ಮೊಲು ಆದಿತ್ತ್ಂಡ್.</verse>
				<verse number="7">ಆಯೆ ದುಂಬು ಬತ್ತ್‌ದ್ ಗದ್ದಿಗೆಡ್ ಕುಲ್ಲೊಂದಿತ್ತಿನಾಯನ ಬಲತ್ತ ಕೈಡ್ದ್ ಆ ಸುರುಳಿನ್ ದೆತ್ತೊಂಡೆ.</verse>
				<verse number="8">ಆಯೆ ಸುರುಳಿನ್ ದೆತ್ತೊಂಡಿನಪಗ ಆ ನಾಲ್ ಜೀವಿಲುಲಾ ಇರ್ವತ್ತನಾಲ್ ಮಂದಿ ಹಿರಿಯೆರ್‌ಲಾ ಯಜ್ಞದ ಕುರಿತ ಕಿನ್ನಿದ ಎದುರು ಅಡ್ಡಬೂರ್ಯೆರ್. ಹಿರಿಯೆರೆನ ಕೈಟ್ ವೀಣೆಲಾ ದೇವಜನೊಕುಲೆ ಪ್ರಾರ್ಥನೆ ಪನ್ಪಿನ ದೂಪೊಡ್ದು ದಿಂಜಿದಿ ಬಂಗಾರ್‌ದ ಧೂಪದ ಬಾಜನಲಾ ಇತ್ತ್ಂಡ್.</verse>
				<verse number="9">ಅಕುಲು ಪೊಸ ರಾಗ ಮಲ್ತೊಂದು, “ಈ ಸುರುಳಿನ್ ದೆತ್ತೊಂದು ಜಪ್ಪೆರೆ ಐತ ಮುದ್ರೆಲೆನ್ ದರ್ಪೆರೆ ಈ ತಕ್ಕದಾಯೆ, ಈ ಬಲಿ ಆದ್ ನಿನ ನೆತ್ತೆರೆಡ್ದ್ ಬುಡುಗಡೆ ಮಲ್ತ್‌ದಿ ಮಾತ ಗೋತ್ರ, ಪ್ರಜೆ, ಭಾಷೆ, ಜನೊಕುಲು, ಬೊಕ್ಕ ಜನಾಂಗೊಲೆಡ್ದ್ ದೇವೆರೆಗಾದ್ ನರಮಾನಿಲೆನ್ ಬಿಲೆಕ್ ದೆತ್ತೊಂಡ.</verse>
				<verse number="10">ಅಕ್ಲೆನ್ ನಮ್ಮ ದೇವೆರೆಗಾದ್ ರಾಜೆರಾದ್‌ಲಾ ಯಾಜಕೆರಾದ್‌ಲಾ ಮಲ್ತ. ಅಕುಲು ಭೂಮಿದ ಮಿತ್ತ್ ಆಳುವೆರ್,” ಅಂದ್‌ದ್ ಪಂಡೆರ್.</verse>
				<verse number="11">ಉಂದತ್ತಂದೆ, ಯಾನ್ ತೂವನಗ ಗದ್ದಿಗೆ, ನಾಲ್ ಜೀವಿಲು ಬೊಕ್ಕ ಹಿರಿಯಾಕುಲೆ ಸುತ್ತಲಾ ಉಂತುದಿತ್ತಿ ಮಸ್ತ್ ದೂತೆರೆ ಸ್ವರೊನು ಕೇಂಡೆ. ಅಕ್ಲೆನ ಸಂಖ್ಯೆ ಕೋಟಿಗಟ್ಲೆಲಾ ಲಕ್ಷಗಟ್ಲೆಲಾ ಇತ್ತ್ಂಡ್.</verse>
				<verse number="12">ಬೊಕ್ಕ ಅಕುಲು ಗಟ್ಟಿ ಸ್ವರೊಟ್ಟು ರಾಗ ಮಲ್ತೊಂದಿತ್ತೆರ್, “ಬಲಿ ಆದುಪ್ಪು ಕುರಿತ ಕಿನ್ನಿ ಆದುಪ್ಪುನಾಯೆ ಬಲ, ಐಶ್ವರ್ಯ, ಗೇನ, ಸಾಮರ್ಥ್ಯ, ಮಾನ, ಮೈಮೆ ಬೊಕ್ಕ ಆಶೀರ್ವಾದ ಪಡೆವೊನ್ರೆ ತಕ್ಕದಾಯೆ ಆದುಲ್ಲೆ,” ಅಂದ್‌ದ್ ಪಂಡೆರ್.</verse>
				<verse number="13">ಉಂದತ್ತಂದೆ ಪರಲೋಕೊಡ್ಲಾ, ಭೂಮಿದ ಮಿತ್ತ್‌ಲಾ, ಭೂಮಿದ ತಿರ್ತ್‌ಲಾ ಕಡಲ್ದ ಮಿತ್ತ್‌ಲಾ ಉಪ್ಪು ಮಾತ ಸೃಷ್ಟಿಲು ಅಂದ್ಂಡ ಭೂಮಿಡ್, ಬಾನೊಡು, ಕಡಲ್ಡ್ ಉಪ್ಪು ಮಾತಲಾ, “ಗದ್ದಿಗೆಡ್ ಕುಲ್ಲ್‌ದಿನಾಯಗ್ಲಾ ಯಜ್ಞದ ಕುರಿತ ಕಿನ್ನಿಗ್ಲಾ ಆಶೀರ್ವಾದ, ಮಾನ, ಮೈಮೆ, ತ್ರಾಣ ಏನಿತ್ಯೇನಿಗ್ಲಾ ಉಪ್ಪಡ್,” ಅಂದ್‌ದ್ ಪನ್ಪಿನೆನ್ ಕೇಂಡೆ.</verse>
				<verse number="14">ಅಪಗ ಆ ನಾಲ್ ಜೀವಿಲು “ಆಮೆನ್!” ಅಂದ್‌ದ್ ಪಂಡ. ಬೊಕ್ಕ ಹಿರಿಯಾಕುಲು ಅಡ್ಡಬೂರ್ದು ಆರಾಧನೆ ಮಲ್ತೆರ್.</verse>
			</chapter>
			<chapter number="6">
				<verse number="1">ಬೊಕ್ಕ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯೆ ಆ ಏಳ್‌ ಮುದ್ರೆಲೆಡ್ ಒಂಜಿ ಮುದ್ರೆನ್ ದರ್ಪುನಗ ಯಾನ್ ತೂಯೆ. ಬೊಕ್ಕ ಆ ನಾಲ್ ಜೀವಿಲೆಡ್ ಒಂಜಿ ಜೀವಿ “ಬಲ!” ಅಂದ್‌ದ್ ತೆಡಿಲ್‌ದಂಚಿನ ಸ್ವರೊಟ್ಟು ಪನ್ಪಿನೆನ್ ಕೇಂಡೆ.</verse>
				<verse number="2">ಅಪಗ ಅಲ್ಪ ಒಂಜಿ ಬೊಲ್ದು ಕುದುರೆ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿತ್ತಿನಾಯನ ಕೈಟ್ ಬಿಲ್ಲ್ ಇತ್ತ್ಂಡ್. ಆಯಗ್ ಜಯಮಾಲೆ ಪಾಡ್ದಿತ್ತ್‌ಂಡ್. ಆಯೆ ಗೆಂದುನಾಯೆ ಆದ್ ಗೆಂದೆರೆಗಾದ್ ಪಿದಾಡಿಯೆ.</verse>
				<verse number="3">ಆಯೆ ರಡ್ಡನೆ ಮುದ್ರೆನ್ ದರ್ಪುನಗ ರಡ್ಡನೆ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ.</verse>
				<verse number="4">ಅಪಗ ಬೊಕ್ಕೊಂಜಿ ಕುದುರೆ ಪಿದಾಡ್ದ್ ಬತ್ತ್ಂಡ್. ಅವು ಕೆಂಪು ಕುದುರೆ. ಐತ ಮಿತ್ತ್ ಕುಲ್ಲುದಿನಾಯಗ್ ಭೂಮಿಡ್ದ್ ಸಮಾಧಾನೊನು ದೆತ್ತ್‌ದ್ ಬುಡಿಯೆರೆಲಾ ನರಮಾನಿಲು ಒರಿಯನ್ ಒರಿ ಕೆರ್ಪಿನಾಕುಲು ಆಪಿಲೆಕ್ಕ ಮಲ್ಪೆರೆಗ್ಲಾ ಅಧಿಕಾರ ಕೊರ್ದಿತ್ತ್‌ಂಡ್, ಆಯಗ್ ಮಲ್ಲ ಕತ್ತಿಲಾ ಕೊರ್ದಿತ್ತ್‌ಂಡ್.</verse>
				<verse number="5">ಆಯೆ ಮೂಜನೇ ಮುದ್ರೆನ್ ದರ್ಪುನಗ ಮೂಜನೇ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ. ಅಪಗ ಒಂಜಿ ಕಪ್ಪು ಕುದುರೆ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿತ್ತಿನಾಯನ ಕೈಟ್ ತ್ರಾಸ್ ಇತ್ತ್ಂಡ್.</verse>
				<verse number="6">ಬೊಕ್ಕ ನಾಲ್ ಜೀವಿಲೆ ಮದ್ಯೊಡು ಒರಿಯನ ಸ್ವರ ಕೇಂಡ್. “ಅವು ದಿನತ ಕೂಲಿಗ್ ಒಂಜಿ ಸೇರ್ ಗೋದಿ; ಅತ್ತ್‌ಡ ಮೂಜಿ ಸೇರ್ ಜವೆಗೋದಿ. ಆಂಡ ಎಣ್ಣೆನ್ಲಾ ದ್ರಾಕ್ಷಾರಸೊನ್ಲಾ ಕೇಡ್ ಮಲ್ಪಡ.” ಅಂದ್‌ದ್ ಪಂಡ್ಂಡ್.</verse>
				<verse number="7">ಆಯೆ ನಾಲನೇ ಮುದ್ರೆನ್ ದರ್ಪುನಗ ನಾಲನೇ ಜೀವಿ “ಬಲ!” ಅಂದ್‌ದ್ ಪನ್ಪಿನೆನ್ ಕೇಂಡೆ.</verse>
				<verse number="8">ಅಪಗ ಒಂಜಿ ಬೊನ್ಯ ಬಣ್ಣದ ಕುದುರೆನ್ ತೂಯೆ. ಐತ ಮಿತ್ತ್ ಕುಲ್ಲುದಿನಾಯನ ಪುದರ್ ಮರಣ. ಆಯನ ಪಿರವುಡು ಪಾತಾಳ ಪನ್ಪಿನಾಯೆ ಬತ್ತೆ. ಅಕ್ಲೆಗ್ ಭೂಮಿದ ನಾಲೆಟ್ಟ್ ಒಂಜಿ ಭಾಗೊನು ಕತ್ತಿಡ್ದ್‌ಲಾ, ಬರಗಾಲೊಡ್ದುಲಾ, ಉಪದ್ರೊಲೆಡ್ದ್‌ಲಾ, ಕಾಡ್ ಮೃಗೊಲೆಡ್ದ್‌ಲಾ ಕೆರಿಯೆರೆ ಅಧಿಕಾರ ಕೊರ್ದಿತ್ತ್‌ಂಡ್.</verse>
				<verse number="9">ಆಯೆ ಐನನೇ ಮುದ್ರೆನ್ ದರ್ಪುನಗ ದೇವೆರೆ ವಾಕ್ಯೊಡ್ದುಲಾ ಅಕುಲು ಪಂಡಿನ ಸಾಕ್ಷಿಡ್ದ್‌ಲಾ ಸೈತಿನಾಕುಲೆನ ಆತ್ಮೊಲು ಬಲಿಪೀಠದ ತಿರ್ತ್ ಉಪ್ಪುನೆನ್ ತೂಯೆ.</verse>
				<verse number="10">ಅಕುಲು, “ಓ ಸರ್ವಶಕ್ತೆ ಆದುಪ್ಪು ಕರ್ತವಾ, ಪರಿಶುದ್ಧೆಲಾ, ಸತ್ಯವಂತೆಲಾ ಆದುಪ್ಪುನಾಯ, ಭೂಮಿಡ್ ಉಪ್ಪುನಾಕುಲು ಎಂಕ್ಲೆನ್ ಕೆರಿನೆಕ್ಕಾದ್ ಈ ಏತ್ ಕಾಲ ಮುಟ್ಟ ನ್ಯಾಯತೀರ್ಪಂದೆಲಾ ದಂಡನೆ ಮಲ್ಪಂದೆಲಾ ಉಪ್ಪುವ?” ಅಂದ್‌ದ್ ಮಲ್ಲ ಶಬ್ಧೊಡು ಅರಬಾಯಿ ದೀಯೆರ್.</verse>
				<verse number="11">ಅಪಗ ಅಕ್ಲೆಡ್ ಒರಿ ಒರಿಯಗ್ ಒಂಜೊಂಜಿ ಬೊಲ್ದು ಅಂಗಿನ್ ಕೊರ್ದಿತ್ತೆರ್. ಉಂದತ್ತಂದೆ ನಿಕ್ಲೆ ಲೆಕ್ಕ ಸೈಯೊಡಾಪಿ ನಿಕ್ಲೆನ ಸಹೋದ್ರೆರ್ ಬೊಕ್ಕ ನಿಕ್ಲೆನ ಜತೆಸೇವಕೆರೆನ ಪಟ್ಟಿ ಪೂರ್ತಿ ಆಪಿನೆಟ್ಟ ನನಲಾ ಒಂತೆ ಕಾಪುಲೆ ಅಂದ್‌ದ್ ಅಕ್ಲೆಗ್ ಅಪ್ಪಣೆ ಆಂಡ್.</verse>
				<verse number="12">ಆಯೆ ಆಜನೆ ಮುದ್ರೆನ್ ದರ್ಪುನೆನ್ ತೂಯೆ. ದರ್ಪುನಗ ಮಲ್ಲ ಭೂಕಂಪ ಉಂಡಾಂಡ್. ಸೂರ್ಯೆ ಕಂಬೊಲಿದ ಲೆಕ್ಕ ಕಪ್ಪು ಆಂಡ್‌. ಚಂದ್ರೆ ನೆತ್ತೆರ್‌ದ ಲೆಕ್ಕ ಕೆಂಪು ಆಂಡ್‌.</verse>
				<verse number="13">ಬಿರುಗಾಳಿಡ್ದ್ ಪಂದುನ ಅರ್ತಿಮರತ ಕಾಯಿ ಬೂರುಲೆಕ್ಕನೇ ಬಾನದ ಬೊಳ್ಳಿಲು ಭೂಮಿಗ್ ಬೂರ್‌ಂಡ್.</verse>
				<verse number="14">ಬಾನ ಸುರುಳಿದಲೆಕ್ಕ ಸುತ್ತೊಂದು ಪೋಂಡು. ಮಾತ ಗುಡ್ಡೆಲುಲಾ ದ್ವೀಪೊಲುಲಾ ತನ್ಕುಲೆ ಜಾಗ್‌ಡ್ದ್ ಅಂಚಿಂಚಿ ಪೋವೆರೆ ಸುರು ಮಲ್ತ.</verse>
				<verse number="15">ಅಪಗ ಈ ಭೂಮಿದ ಅರಸುಲು, ಅಧಿಪತಿಲು, ಸೈನ್ಯದ ಅಧಿಕಾರಿಲು, ಐಶ್ವರ್ಯವಂತೆರ್, ಬಲತ್ತಾಕುಲು, ಗುಲಾಮೆರ್, ಸ್ವತಂತ್ರೆರ್ ಆದಿತ್ತಿನಾಕುಲು ಗುಡ್ಡೆದ ಮಾಟೆಲೆಗ್, ಪಾದೆದ ಸಂದ್‌ಲೆಗ್ ಪಾರ್ದ್ ಪೋದು ತನ್ಕುಲೆನ್ ಮದೆ ಮಲ್ತೊಂಡೆರ್;</verse>
				<verse number="16">ಅಕುಲು ಬುಲ್ತುದು ಗುಡ್ಡೆಲೆಗ್ ಪಾದೆಲೆಗ್, “ಎಂಕ್ಲೆನ ಮಿತ್ತ್ ಬೂರ್ದು ಎಂಕ್ಲೆನ್ ಮದೆ ಮಲ್ಪುಲೆ. ಗದ್ದಿಗೆದ ಮಿತ್ತ್ ಕುಲ್ಲುದಿತ್ತಿನಾಯನ ಮೋನೆಡ್ದ್‌ಲಾ ಕುರಿತ ಕಿನ್ನಿ ಆದಿತ್ತಿನಾಯನ ಕೋಪೊಡ್ದುಲಾ ಎಂಕ್ಲೆನ್ ಮದೆ ಮಲ್ಪುಲೆ.</verse>
				<verse number="17">ದಾಯೆಗಂದ್ಂಡ ಅಕ್ಲೆನ ಕೋಪ ತೋಜಿದ್ ಬರ್ಪಿ ಆ ಮಲ್ಲ ದಿನ ಬೈದ್‌ಂಡ್. ಐತ ಎದುರುಡು ಉಂತಿಯೆರೆ ಏರೆಡ್ದ್ ಆವು ಅಂದ್‌ದ್ ಪಂಡೆರ್.”</verse>
			</chapter>
			<chapter number="7">
				<verse number="1">ಉಂದು ಆಯಿ ಬೊಕ್ಕ ನಾಲ್ ದೂತೆರ್, ಭೂಮಿದ ನಾಲ್ ದಿಕ್ಕ್‌ಲೆಡ್ ಉಂತೊಂದು ಭೂಮಿದ ಮಿತ್ತಾವಡ್, ಕಡಲ್ದ ಮಿತ್ತಾವಡ್, ವಾ ಮರತ ಮಿತ್ತಾವಡ್ ಗಾಳಿ ಬೀಜಂದಿಲೆಕ್ಕ ಭೂಮಿದ ನಾಲ್ ದಿಕ್ಕ್‌ಲೆ ಗಾಳಿಲೆನ್ ತಡೆಪುನೆನ್ ತೂಯೆ.</verse>
				<verse number="2">ಅಪಗ ಮುಡಯಿಡ್ದ್ ಬೊಕ್ಕೊರಿ ದೂತೆ ಜೀವ ಇತ್ತಿ ದೇವೆರೆ ಮುದ್ರೆನ್ ಪತ್ತೊಂದು ಬರ್ಪಿನೆನ್ ತೂಯೆ. ಆಯೆ ಭೂಮಿಗ್ಲಾ ಕಡಲ್‌ಗ್ಲಾ ಕೇಡ್ ಮಲ್ಪುನ ಅಧಿಕಾರ ಪಡೆತಿನ ಆ ನಾಲ್ ದೂತೆರೆಗ್,</verse>
				<verse number="3">“ಉಂತುಲ, ನಮ ದೇವೆರೆ ಸೇವಕೆರೆ ಮುಂಡದ ಮಿತ್ತ್ ಮುದ್ರೆ ಪಾಡುನ ಮುಟ್ಟ ಭೂಮಿಗಾವಡ್, ಕಡಲ್‌ಗಾವಡ್ ಮರಕ್ಲೆಗಾವಡ್ ಕೇಡ್ ಮಲ್ಪಡೆ.”</verse>
				<verse number="4">ಮುದ್ರೆಲೆಡ್ ಒತ್ತಾವೊಂಡಿನಾಕುಲೆನ ಸಂಖ್ಯೆ ಎಂಕ್ ಕೇಂಡ್. ಇಸ್ರಾಯೇಲ್ಯೆರೆ ಪ್ರತಿಯೊಂಜಿ ಗೋತ್ರದಾಕುಲುಲಾ ಒತ್ತಾವೊಂಡೆರ್. ಅಕ್ಲೆನ ಸಂಖ್ಯೆ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಮಂದಿ.</verse>
				<verse number="5">ಮುದ್ರೆ ಪಾಡಿನಾಕುಲು ಏರೇರ್ ಪಂಡ್ಂಡ, ಯೂದನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ರೂಬೇನ್‌ನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಗಾದನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,</verse>
				<verse number="6">ಅಸೇರನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ನೆಫ್ತಲೀಮನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಮನಸ್ಸೆನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,</verse>
				<verse number="7">ಸಿಮೆಯೋನನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಲೇವಿನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಇಸ್ಸಾಕಾರನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ,</verse>
				<verse number="8">ಜಬುಲೋನುನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಯೋಸೇಫನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ, ಬೆನ್ಯಾಮೀನನ ಗೋತ್ರದಾಕುಲೆಡ್ದ್ ಪದ್ರಾಡ್ ಸಾರ ಮಂದಿ ಮುದ್ರೆ ಪಾಡಿನಾಕುಲು ಇತ್ತೆರ್.</verse>
				<verse number="9">ಉಂದೆಡ್ದ್ ಬೊಕ್ಕ ಯಾನ್ ಏರೆಡಲಾ ಗೆನ್ಪೆರೆ ತೀರಂದಿನಾತ್ ಮಲ್ಲ ಜನೊಕುಲೆ ಗುಂಪು ಗದ್ದಿಗೆದ ಎದುರುಡ್ಲಾ ಯಜ್ಞದ ಕುರಿತ ಕಿನ್ನಿದ ಎದುರುಡ್ಲಾ ಉಂತುದಿತ್ತಿನೆನ್ ತೂಯೆ. ಅಕುಲು ಮಾತ ಜನಾಂಗ, ಗೋತ್ರ, ಪ್ರಜೆ, ಭಾಷೆ, ಪಾತೆರುನಾಕುಲು ಆದಿತ್ತೆರ್. ಅಕುಲು ಬೊಲ್ದು ಅಂಗಿನ್ ಪಾಡೊಂದು ತನ್ಕುಲೆ ಕೈಟ್ ಖರ್ಜೂರದ ಗೆಲ್ಲ್‌ಲೆನ್ ಪತ್ತೊಂದಿತ್ತೆರ್.</verse>
				<verse number="10">ಅಕುಲು, “ಗದ್ದಿಗೆಡ್ ಕುಲ್ಲೊಂದಿತ್ತಿ ನಮ ದೇವೆರೆಗ್ಲಾ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯಗ್ಲಾ ಎಂಕ್ಲೆಗ್ ರಕ್ಷಣೆ ಉಂಡಾಯಿನೆಕ್ಕ್‌ಲಾ ಉಪಕಾರ ಸ್ತುತಿ,” ಅಂದ್‌ದ್ ಮಲ್ಲ ಸ್ವರೊಟ್ಟು ಬೊಬ್ಬೆ ದೀಯೆರ್.</verse>
				<verse number="11">ಅಪಗ ಮಾತ ದೂತೆರ್‌ಲಾ, ಹಿರಿಯೆರ್‌ಲಾ ಬೊಕ್ಕ ಆ ನಾಲ್ ಜೀವಿಲು ಗದ್ದಿಗೆದ ಸುತ್ತಲಾ ಉಂತೊಂದಿತ್ತೆರ್. ಅಕುಲು ಗದ್ದಿಗೆದ ಎದುರುಡು ಅಡ್ಡಬೂರ್ದು ದೇವೆರೆನ್ ಆರಾಧನೆ ಮಲ್ತೆರ್.</verse>
				<verse number="12">“ಆಮೆನ್, ಆಶೀರ್ವಾದ, ಮೈಮೆ, ಗೇನ, ಉಪಕಾರ ಸ್ತುತಿ, ಮಾನ, ಬಲ, ಅಧಿಕಾರ ಮಾತಲಾ ನಮ ದೇವೆರೆಗ್ ಏನಿತ್ಯೇನಿಗ್ಲಾ ಉಪ್ಪಡ್ ಆಮೆನ್,” ಅಂದ್‌ದ್ ರಾಗ ಮಲ್ತೆರ್.</verse>
				<verse number="13">ಉಂದೆನ್ ತೂದು ಹಿರಿಯೆರೆಡ್ ಒರಿ, ಬೊಲ್ದು ಕುಂಟು ತುತ್ತೊಂಡಿನಾಕುಲು ಮೊಕುಲು ಏರ್? ಒಲ್ತುಡ್ದು ಬತ್ತೆರ್ ಅಂದ್‌ದ್ ಎನಡ ಕೇನ್ನಗ,</verse>
				<verse number="14">“ಸ್ವಾಮಿ, ಈಯೇ ತೆರಿದ,” ಅಂದ್‌ದ್ ಪಂಡೆ. ಐಕ್ ಆಯೆ ಎನಡ ಪಂಡಿನಿ ಮೊಕುಲು ಆ ಮಲ್ಲ ಭಂಗೊನು ಅನುಭವ ಮಲ್ತ್‌ದ್ ಬತ್ತಿನಾಕುಲು; ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ನೆತ್ತೆರ್‌ಡ್ ತನ್ಕುಲೆ ಕುಂಟುಲೆನ್ ಮಡಿ ಮಲ್ತೊಂದೆರ್.</verse>
				<verse number="15">ಈ ಕಾರಣೊಡ್ದು “ಅಕುಲು ದೇವೆರೆ ಗದ್ದಿಗೆದ ಎದುರು ಇತ್ತ್‌ದ್, ಆಯನ ಆಲಯೊಡು ರಾತ್ರೆ ಪಗೆಲ್ ಸೇವೆ ಮಲ್ಪುವೆರ್. ಬೊಕ್ಕ ಗದ್ದಿಗೆಡ್ ಕುಲ್ಲೊಂದಿನಾಯೆನೇ ಅಕ್ಲೆ ನಡುಟು ಇತ್ತ್‌ದ್ ಆಶ್ರಯ ಕೊರ್ಪೆ.</verse>
				<verse number="16">‘ನನ ಮಿತ್ತ್ ಏಪೊಗ್ಲಾ ಅಕ್ಲೆಗ್ ಬಡವು ಇಜ್ಜಿ. ಬಾಜೆಲ್ ಇಜ್ಜಿ. ಅಕ್ಲೆಗ್ ದೊಂಬುಲಾ ವಾ ಸಿಕೆಲಾ ತಾಗಂದ್,’</verse>
				<verse number="17">ದಾಯೆಗಂದ್ಂಡ ಗದ್ದಿಗೆದ ಮದ್ಯೊಡುಪ್ಪು ಯಜ್ಞದ ಕುರಿತ ಕಿನ್ನಿ ಆಯಿನಾಯೆ ಅಕ್ಲೆಗ್ ಕುರುಬಲೆಕ್ಕ ಇತ್ತ್‌ದ್ ‘ಅಕ್ಲೆನ್ ಜೀವ ಇತ್ತಿ ನೀರ್‌ದ ವಸರ್‌ದ ಕೈತಲ್‌ ನಡಪುಡುವೆ.’ ‘ಬೊಕ್ಕ ದೇವೆರ್ ಅಕ್ಲೆ ಕಣ್ಣ್‌ಡ್ದ್ ಕಣ್ಣೀರ್‌ನ್ ಮಾತ ಒಚ್ಚಿದ್ ಬುಡ್ಪೆ,’” ಅಂದ್‌ದ್ ಪಂಡೆ.</verse>
			</chapter>
			<chapter number="8">
				<verse number="1">ಆ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯೆ ಏಳನೆ ಮುದ್ರೆನ್ ದರ್ಪುನಗ ಸುಮಾರ್ ಅರ್ಧ ಗಂಟೆ ಪೊರ್ತು ಮುಟ್ಟ ಪರಲೋಕೊಡು ಶಾಂತ ಆಂಡ್.</verse>
				<verse number="2">ಅಪಗ ದೇವೆರೆ ಎದುರುಡು ಉಂತುದಿತ್ತಿ ಏಳ್‌ ದೂತೆರೆನ್ ತೂಯೆ. ಅಕ್ಲೆಗ್ ದೇವೆರ್ ಏಳ್‌ ತುತೂರಿಲೆನ್ ಕೊರಿಯೆ.</verse>
				<verse number="3">ಐಡ್ದ್ ಬೊಕ್ಕ ಬೊಕ್ಕೊರಿ ದೂತೆ ಬತ್ತ್‌ದ್ ಬಂಗಾರ್‌ದ ದೂಪಾರತಿನ್ ಪತ್ತೊಂದು ಬಲಿಪೀಠದ ಕೈತಲ್‌ ಉಂತಿಯೆ. ಗದ್ದಿಗೆದ ಎದುರುಡು ಬಂಗಾರ್‌ದ ಬಲಿಪೀಠದ ಮಿತ್ತ್ ಮಾತ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ಸಮರ್ಪಣೆ ಮಲ್ಪೆರೆಗಾದ್ ಆಯಗ್ ಮಸ್ತ್ ಲೋಭಾನ ಕೊರ್ದಿತ್ತ್‌ಂಡ್.</verse>
				<verse number="4">ಅಪಗ ಧೂಪದ ಪುಗೆ ದೂತನ ಕೈಡ್ದ್ ದೇವಜನೊಕುಲೆ ಪ್ರಾರ್ಥನೆಡೊಪ್ಪ ದೇವೆರೆ ದುಂಬು ಏರ್ದ್ ಪೋಂಡು.</verse>
				<verse number="5">ಐಡ್ದ್ ಬೊಕ್ಕ ಆ ದೂತೆ ಧೂಪಾರತಿನ್‌ ದೆತ್ತೊಂದು ಬಲಿಪೀಠದ ಗೆಂಡೊಡು ದಿಂಜಾದ್ ಭೂಮಿಗ್ ದಕ್ಕಿಯೆ. ಅಪಗ ತೆಡಿಲ್‌ದ ಅಬ್ಬರಲಾ, ಮಿಂಚಿಲಾ, ಭೂಕಂಪಲಾ ಆಂಡ್.</verse>
				<verse number="6">ಏಳ್‌ ತುತೂರಿಲೆನ್ ಪತ್ತೊಂದಿತ್ತಿ ಏಳ್‌ ದೂತೆರ್ ತುತೂರಿ ಉರ್ಪೆರೆ ತಯಾರ್ ಆಯೆರ್.</verse>
				<verse number="7">ಸುರುತ್ತ ದೂತೆ ತುತೂರಿ ಉರ್ಪುನಗ ನೆತ್ತೆರ್‌ಡ್ ಕಲತ್ತ್‌ದಿನ ಆನೆಕಲ್ಲ್‌ದ ಬರ್ಸಲಾ ತೂಲಾ ಭೂಮಿದ ಮಿತ್ತ್ ದೊರಿಂಡ್. ನೆಡ್ದ್ ಭೂಮಿದ ಮೂಜೆಟ್ ಒಂಜಿ ಪಾಲ್ ಪೊತ್ತುದು ಪೋಂಡು. ಮರಕ್ಲೆಡ್ ಮೂಜೆಟ್ ಒಂಜಿ ಪಾಲ್ ಬಸ್ಮ ಆಂಡ್. ಪಜ್ಜಿ ಪಜಿರ್‌ಲಾ ಪೊತ್ತುದು ಪೋಂಡು.</verse>
				<verse number="8">ಬೊಕ್ಕ ರಡ್ಡನೆ ದೂತೆ ತುತೂರಿ ಉರ್ಪುನಗ ತೂ ಪತ್ತ್‌ದ್ ಮಲ್ಲ ಗುಡ್ಡೆದಲೆಕ್ಕ ಇತ್ತಿನೆನ್ ಕಡಲ್‌ಗ್ ಪಾಡ್ಂಡ್.</verse>
				<verse number="9">ಅಪಗ ಕಡಲ್ದ ಉಲಯಿ ಮೂಜೆಟ್ ಒಂಜಿ ಪಾಲ್ ನೆತ್ತೆರ್ ಆಂಡ್. ಕಡಲ್‌ಡಿತ್ತಿ ಜೀವಿಲೆಡ್ ಮೂಜೆಟ್ ಒಂಜಿ ಪಾಲ್ ಸೈತ್‌ಪೋಂಡು, ಕಪ್ಪಲುಲೆಡ್ ಮೂಜೆಟ್ ಒಂಜಿ ಪಾಲ್ ಹಾಳಾದ್ ಪೋಂಡು.</verse>
				<verse number="10">ಮೂಜನೇ ದೂತೆ ತುತೂರಿ ಉರ್ಪುನಗ ತೂಟೆದಲೆಕ್ಕ ಅರ್ಲುನ ಒಂಜಿ ಮಲ್ಲ ಬೊಳ್ಳಿ ಬಾನೊಡ್ದು ತಿರ್ತ್ ಬೂರ್‌ಂಡ್. ಅವು ತುದೆಲೆಡ್‌ ಮೂಜೆಟ್ ಒಂಜಿ ಪಾಲ್‌ದ ಮಿತ್ತ್‌ಲಾ ನೀರ್‌ದ ವಸರ್‌ದ ಮಿತ್ತ್‌ಲಾ ಬೂರ್‌ಂಡ್.</verse>
				<verse number="11">ಆ ಬೊಳ್ಳಿಗ್ ಮಾಚಿ ಪತ್ರೆ ಅಂದ್‌ದ್ ಪುದರ್, ನೀರ್ ಮೂಜೆಟ್ ಒಂಜಿ ಪಾಲ್ ಮಾಚಿ ಪತ್ರೆದ ಲೆಕ್ಕ ಕೈಪೆ ಆಂಡ್. ಆ ಕೈಪೆ ನೀರ್‌ನ್ ಪರಿನ ಮಸ್ತ್ ಜನ ಸೈತೆರ್.</verse>
				<verse number="12">ನಾಲನೇ ದೂತೆ ತುತೂರಿ ಉರ್ಪುನಗ ಸೂರ್ಯೆ, ಚಂದ್ರೆ ಬೊಳ್ಳಿಲೆಡ್‌ ಮೂಜೆಟ್ ಒಂಜಿ ಭಾಗೊಗು ಹಾಕ್‌ದ್ ಕತ್ತಲೆ ಆಂಡ್. ಅವೆಡ್ದಾವರ ಪಗೆಲ್‌ಡ್ಲಾ ಮೂಜೆಟ್ ಒಂಜಿ ಪಾಲ್ ಬೊಲ್ಪುದಾಂತೆ ಪೋಂಡು, ರಾತ್ರೆಡ್ಲಾ ಅಂಚೆನೇ ಆಂಡ್.</verse>
				<verse number="13">ಬೊಕ್ಕ ಯಾನ್ ತೂನಗ, ಇಂದಾ ಒಂಜಿ ಗಿಡಿ ನಡು ಬಾನೊಡು ರಾವೊಂದಿತ್ತ್‌ಂಡ್. ಅವು, “ಅಯ್ಯೋ, ಅಯ್ಯೋ, ಅಯ್ಯೋ ಒರಿದಿನ ಮೂಜಿ ದೂತೆರ್ ತನ್ಕುಲೆ ತುತೂರಿ ಉರ್ಪುನಗ ಆಪಿನ ವಿಷಯೊಲೆಡ್ದ್ ಈ ಲೋಕೊಡುಪ್ಪುನಾಕುಲೆಗ್ ಎಂಚಿತ್ತಿ ಆಪತ್ತುಲು ಆಪುಂಡು.” ಅಂದ್‌ದ್ ಮಲ್ಲ ಶಬ್ಧೊಡು ಪನ್ಪಿನೆನ್ ಕೇಂಡೆ.</verse>
			</chapter>
			<chapter number="9">
				<verse number="1">ಐನನೇ ದೂತೆ ತುತೂರಿ ಉರ್ಪುನಗ ಬಾನೊಡ್ದು ಒಂಜಿ ಬೊಳ್ಳಿ ಭೂಮಿಗ್ ಬೂರಿನೆನ್ ತೂಯೆ. ಆಯಗ್ ಪಾತಾಳದ ಬೀಗದ ಕೈ ಕೊರ್ತುಂಡು.</verse>
				<verse number="2">ಆಯೆ ಪಾತಾಳೊನು ಜಪ್ಪುನಗ, ಪಾತಾಳೊಡ್ದು ಬತ್ತಿನ ಪುಗೆ ಮಲ್ಲ ಚಿಮಿಣಿದ ಪುಗೆತ್ತ ಲೆಕ್ಕ ಏರ್‌ಂಡ್. ಈ ಪುಗೆಡ್ದ್ ಸೂರ್ಯಲಾ ಬಾನಲಾ ಕತ್ತಲೆ ಆದ್ ಪೋಂಡು.</verse>
				<verse number="3">ಈ ಪುಗೆಡ್ದ್ ಮೊಂಟೆಲು ಪಿದಾಡ್ದ್ ಭೂಮಿಡ್ ದಿಂಜಿಯ. ಭೂಮಿದ ಚೇಲ್‌ಲೆಗ್ ಉಪ್ಪು ಸಾಮರ್ಥ್ಯದಲೆಕ್ಕನೇ ಐಕ್ಲೆಗ್ಲಾ ಆ ಸಾಮರ್ಥ್ಯ ಕೊರ್ದಿತ್ತ್‌ಂಡ್.</verse>
				<verse number="4">ಭೂಮಿದ ಪಜಿರ್‌ಗಾವಡ್, ದೈಕ್ಲೆಗಾವಡ್, ಮರಕ್ಲೆಗಾವಡ್ ಕೇಡ್ ಮಲ್ಪಂದೆ ಮುಂಡದ ಮಿತ್ತ್ ದೇವೆರೆ ಮುದ್ರೆ ಇಜ್ಜಾಂದಿ ನರಮಾನಿಲೆಗ್ ಮಾತ್ರ ಕೇಡ್ ಮಲ್ಪೊಲಿ ಅಂದ್‌ದ್ ಐಕ್ಲೆಗ್ ಅಪ್ಪಣೆ ಆಂಡ್.</verse>
				<verse number="5">ಮೊಕ್ಲೆನ್ ಕೆರಂದೆ ಐನ್ ತಿಂಗೊಲು ಮುಟ್ಟ ಪೀಡೆ ಕೊರಿಯೆರೆ ಅಪ್ಪಣೆ ಆಂಡ್. ಅಕ್ಲೆಗ್ ಉಂಡಾಯಿ ಪೀಡೆ ನರಮಾನಿಗ್ ಚೇಲ್‌ ತುಚ್ಚಿನ ಪೀಡೆಗ್ ಸಮ ಆದಿತ್ತ್ಂಡ್.</verse>
				<verse number="6">ಆ ದಿನೊಕುಲೆಡ್ ನರಮಾನಿಲು ಮರಣೊನು ಬಯಕುವೆರ್. ಆಂಡ ಮರಣ ಬರಂದ್. ಅಕುಲು ಸೈಯೊಡು ಅಂದ್‌ದ್ ಆಸೆ ಮಲ್ತ್ಂಡಲಾ ಮರಣ ಅಕ್ಲೆನ ಕೈತಲ್‌ಡ್ದ್ ಪಾರ್ದ್ ಪೋಪುಂಡು.</verse>
				<verse number="7">ಆ ಮೊಂಟೆಲೆ ರೂಪ ಯುದ್ಧೊಗು ತಯಾರಾದುಪ್ಪು ಕುದುರೆಲೆ ರೂಪದ ಲೆಕ್ಕ ಇತ್ತ್ಂಡ್. ಐಕ್ಲೆ ತರೆತ ಮಿತ್ತ್ ಬಂಗಾರ್‌ದ ಕಿರೀಟದಲೆಕ್ಕ ದಾದವಾ ಇತ್ತ್ಂಡ್. ಐಕ್ಲೆ ಮೋನೆಲು ನರಮಾನಿಲೆ ಮೋನೆದ ಲೆಕ್ಕ ಇತ್ತ್ಂಡ್.</verse>
				<verse number="8">ಐಕ್ಲೆ ಕುಜಲ್ ಪೊಂಜೊವುಲೆ ಕುಜಲ್‌ದ ಲೆಕ್ಕಲಾ, ಐಕ್ಲೆ ಕೂಲಿಲು ಸಿಮ್ಮದ ಕೂಲಿದ ಲೆಕ್ಕಲಾ ಇತ್ತ್ಂಡ್.</verse>
				<verse number="9">ಐಕ್ಲೆನ ತಿಗಲೆಡ್ ಕರ್ಬದ ಕವಚದಪಟ್ಟಿ ಇತ್ತ್ಂಡ್. ಐಕ್ಲೆ ರೆಂಕೆಲೆ ಶಬ್ಧ ಯುದ್ಧೊಗು ಬಲಿಪುನ ಕುದುರೆದ ರಥೊಕ್ಲೆ ಶಬ್ಧದ ಲೆಕ್ಕ ಇತ್ತ್ಂಡ್.</verse>
				<verse number="10">ಚೇಳ್‌ಲೆಗ್ ಉಪ್ಪುಲೆಕ್ಕ ಐಕ್ಲೆಗ್ ಬೀಲಲಾ ಕೊಂಡಿಲಾ ಇತ್ತ್ಂಡ್. ನರಮಾನಿಲೆನ್ ಐನ್ ತಿಂಗೊಲು ಮುಟ್ಟ ಕೇಡ್ ಮಲ್ಪುನ ಸಾಮರ್ಥ್ಯ ಐಕ್ಲೆ ಬೀಲೊಡೇ ಉಪ್ಪುಂಡು.</verse>
				<verse number="11">ಪಾತಾಳದ ಅಧಿಕಾರಿ ಆಯಿ ದೂತೆ ಐಕ್ಲೆನ್ ಆಳುನ ಅರಸು. ಆಯಗ್ ಇಬ್ರಿಯ ಭಾಷೆಡ್ ಅಬದ್ದೋನ್ ಪಂಡ್ದ್‌ಲಾ ಗ್ರೀಕ್ ಭಾಷೆಡ್ ಅಪೊಲ್ಲಿಯೋನ್ ಪಂಡ್ದ್‌ಲಾ ಪುದರ್ ಉಂಡು.</verse>
				<verse number="12">ಸುರುತ್ತ ಗಂಡಾಂತ್ರ ಕರಿದ್ ಪೋಂಡು. ಆಂಡ ನನಲಾ ರಡ್ಡ್ ಗಂಡಾಂತ್ರೊಲು ಬರಿಯೆರೆಗುಂಡು.</verse>
				<verse number="13">ಬೊಕ್ಕ ಆಜನೆ ದೂತೆ ತುತೂರಿ ಉರ್ಪುನಗ ದೇವೆರೆ ಎದುರುಡಿತ್ತಿನ ಬಂಗಾರ್‌ದ ಬಲಿಪೀಠದ ನಾಲ್ ಕೊಂಬುಲೆಡ್ದ್ ಒಂಜಿ ಸ್ವರೊನು ಕೇಂಡೆ.</verse>
				<verse number="14">ತುತೂರಿನ್ ಪತ್ತೊಂದಿತ್ತಿ ಆಜನೆ ದೂತಗ್, “ಯೂಫ್ರೇಟೀಸ್ ಪನ್ಪಿ ಮಲ್ಲ ತುದೆತಲ್ಪ ಕಟ್ಟ್‌ದಿತ್ತಿ ನಾಲ್ ದೂತೆರೆನ್ ಬುಡುಗಡೆ ಮಲ್ಪುಲ,” ಅಂದ್‌ದ್ ಪಂಡ್ಂಡ್.</verse>
				<verse number="15">ಅಪಗ ನರಮಾನಿಲೆ ಉಲಯಿಡ್ದ್ ಮೂಜೆಡ್ದ್ ಒಂಜಿ ಪಾಲ್‌ ಜನೊಕುಲೆನ್ ಕೆರಿಯೆರೆಗಾದ್ ಗಳಿಗೆ, ದಿನ, ತಿಂಗೊಲು, ವರ್ಸ ಮಾತೆನ್ ನಿಗಂಟ್ ಮಲ್ತ್‌ದ್ ಆದಿತ್ತ್ಂಡ್. ಐಕ್ ತಯಾರಾದಿತ್ತಿನ ಆ ನಾಲ್ ದೂತೆರೆನ್ ಬುಡ್ದು ಬುಡಿಯೆರ್.</verse>
				<verse number="16">ಕುದುರೆ ದಂಡ್‌ದ ಸಂಖ್ಯೆ ಇರ್ವ ಕೋಟಿ ಜನ ಅಂದ್‌ದ್ ಪನ್ಪಿನವು ಎಂಕ್ ಕೇಂಡ್.</verse>
				<verse number="17">ಯಾನ್ ದರ್ಶನೊಡು ಕುದುರೆಲೆನ್ಲಾ ಐತ ಮಿತ್ತ್ ಕುಲ್ಲುದಿನಾಕುಲೆನ್ಲಾ ತೂಯೆ. ಮೊಕ್ಲೆಗ್ ತೂತವುಲಾ ನೀಲದವುಲಾ ಗಂಧಕದವುಲಾ ಕವಚೊಲು ಇತ್ತ್ಂಡ್. ಕುದುರೆಲೆ ತರೆಕುಲು ಸಿಮ್ಮದ ತರೆತಲೆಕ್ಕ ಇತ್ತ್ಂಡ್. ಐಕ್ಲೆ ಬಾಯಿಡ್ದ್ ತೂ, ಪುಗೆ, ಗಂಧಕ ಪಿದಾಡೊಂದಿತ್ತ್‌ಂಡ್.</verse>
				<verse number="18">ಕುದುರೆಲೆ ಬಾಯಿಡ್ದ್ ಬರ್ಪಿನ ತೂ, ಪುಗೆ, ಗಂಧಕ ಈ ಮೂಜಿ ಉಪದ್ರೊಡ್ದಾದ್ ಭೂಮಿದ ಮಾತ ಜನೊಕುಲೆಡ್ ಮೂಜೆಟ್ ಒಂಜಂಶ ಸೈತ್ ಪೋಯೆರ್.</verse>
				<verse number="19">ಆ ಕುದುರೆಲೆ ಸಾಮರ್ಥ್ಯ ಐಕ್ಲೆ ಬಾಯಿಡ್ಲಾ ಬೀಲೊಡ್ಲಾ ಇತ್ತ್ಂಡ್. ಐಕ್ಲೆನ ಬೀಲ ಸರ್ಪದ ತರೆತಲೆಕ್ಕ ಇತ್ತ್ಂಡ್. ಅವೆಡ್ದ್ ಜನೊಕುಲೆಗ್ ಕೇಡ್ ಮಲ್ಪುವ.</verse>
				<verse number="20">ಬೊಕ್ಕ ಉಪದ್ರೊಲೆಡ್ದ್ ಸೈಯಂದೆ ಒರಿದಿ ಜನೊಕುಲು ತನ್ಕುಲೆ ಮಲ್ತೊಂಡಿ ಮೂರ್ತಿಲೆನ್ ಬುಡ್ದು ಪಶ್ಚಾತಾಪ ಪಡೆಯಿಜೆರ್. ಅಕುಲು ದೆವ್ವೊಲೆ ಪೂಜೆನ್ಲಾ, ಬಂಗಾರ್, ಬೊಳ್ಳಿ, ತಾಮ್ರ, ಕಲ್ಲ್, ಮರ ತನ್ಕುಲು ಕೈಡ್ದ್ ಮಲ್ತೊಂದಿನೆಕ್ಕ್‌ಲಾ ಅಂದ್ಂಡ ತೂವರೆಗಾವಡ್ ಕೇನಿಯೆರೆಗಾವಡ್, ನಡಪೆರೆಗಾವಡ್ ಆವಂದೆ ಉಪ್ಪು ಮೂರ್ತಿಲೆ ಪೂಜೆನ್ಲಾ ಬುಡ್ದು ಬುಡ್ಜೆರ್.</verse>
				<verse number="21">ಉಂದತ್ತಂದೆ ತನ್ಕುಲು ನಡಪಾವೊಂದಿತ್ತಿ ಕೊಲೆ, ಮಾಟ, ಹಾದ್ರ, ಕಂಡೊನುನವು ಉಂದೆಡ್ದ್ ಒಂಜೆನ್ಲಾ ಬುಡಂದೆ ಪಶ್ಚಾತಾಪ ಪಡೆಯಿಜೆರ್.</verse>
			</chapter>
			<chapter number="10">
				<verse number="1">ಬೊಕ್ಕ ಬಲಿಷ್ಟೆ ಆಯಿ ಬೇತೆ ಒರಿ ದೂತೆ ಮುಗಲ್‌ನ್ ಪೊದೆತೊಂದು ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ. ಆಯ ತರೆತ ಮಿತ್ತ್ ಕಾಮನಬಿಲ್ಲ್ ಇತ್ತ್ಂಡ್. ಆಯನ ಮೋನೆ ಸೂರ್ಯನಲೆಕ್ಕಲಾ ಆಯನ ಕಾರ್ ತೂತ ಕಂಬದಲೆಕ್ಕಲಾ ಇತ್ತ್ಂಡ್</verse>
				<verse number="2">ಆಯನ ಕೈಟ್ ಗಿರ್ತ್‌ದಿನ ಒಂಜಿ ಎಲ್ಯ ಸುರುಳಿ ಇತ್ತ್ಂಡ್. ಆಯೆ ಬಲತ್ತ ಕಾರ್‌ನ್ ಕಡಲ್ದ ಮಿತ್ತ್‌ಲಾ ದತ್ತ ಕಾರ್‌ನ್ ಭೂಮಿದ ಮಿತ್ತ್‌ಲಾ ದೀದ್ ಉಂತುದಿತ್ತೆ.</verse>
				<verse number="3">ಸಿಮ್ಮ ಬೊಬ್ಬೆ ದೀಪಿಲೆಕ್ಕ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ. ಬೊಬ್ಬೆ ದೀನಗ ಏಳ್‌ ತೆಡಿಲ್ ಒಂಜೊಂಜಾದ್ ಸ್ವರ ಸೇರಾಂಡ್.</verse>
				<verse number="4">ಆ ತೆಡಿಲ್ ಒಂಜೊಂಜಾದ್ ಸ್ವರ ಕೊರ್ನಗ ಯಾನ್ ಬರೆಯೊಡು ಪಂಡ್ದಿತ್ತೆ. ಆಂಡ “ಆ ಏಳ್‌ ತೆಡಿಲ್ ಸ್ವರ ಮಲ್ಪುನಗ ಈ ಮುದ್ರೆ ಪಾಡ್ದ್ ಅವೆನ್ ಬರೆವಂದೆ ಗುಟ್ಟುಡು ದೀಲ,” ಅಂದ್‌ದ್ ಬಾನೊಡ್ದು ಒಂಜಿ ಸ್ವರ ಕೇಂಡೆ.</verse>
				<verse number="5">ಬೊಕ್ಕ ಕಡಲ್ದ ಮಿತ್ತ್‌ಲಾ ಭೂಮಿದ ಮಿತ್ತ್‌ಲಾ ಉಂತುದಿನ ದೂತೆ ತನ ಬಲತ್ತ ಕೈನ್ ಪರಲೋಕದ ಕಡೆಕ್ಕ್ ದೆರ್ತ್ತ್‌ದ್,</verse>
				<verse number="6">ಪರಲೋಕೊನ್ಲಾ ಐಟ್ಟುಪ್ಪು ಮಾತೆನ್ಲಾ ಭೂಮಿನ್ಲಾ ಐಟ್ಟುಪ್ಪು ಮಾತೆನ್ಲಾ, ಕಡಲ್‌ನ್ಲಾ ಐಟ್ಟುಪ್ಪು ಮಾತೆನ್ಲಾ ಉಂಡು ಮಲ್ತ್‌ದ್ ಏನಿತ್ಯೇನಿಗ್ಲಾ ಬದುಕುನಾಯನ ಮಿತ್ತ್ ಆಜ ಪಾಡ್ದ್ ಪಂಡಿನಿ, “ನನ ಸಮಯ ಇಜ್ಜಿ.</verse>
				<verse number="7">ದಾಯೆಗಂದ್ಂಡ, ಏಳನೇ ದೂತೆ ಶಬ್ಧ ಮಲ್ಪುನ ದಿನೊಕುಲೆಡ್ ಆಯೆ ತುತೂರಿ ಉರ್ಪೆರೆ ಉಪ್ಪು ಸಮಯೊಡು ದೇವೆರ್ ಈತ್‌ನೆಟ್ಟ ಗುಟ್ಟುಡು ದೀದಿತ್ತಿನ ದೇವೆರೆ ಮರ್ಮೊನು ತನ ಸೇವಕೆರಾಯಿ ಪ್ರವಾದಿಲೆಗ್ ಸುವಾರ್ತೆಲಾದ್ ತೆರಿಪಾಯಿ ಲೆಕ್ಕನೇ ನಡಪುಡುವೆ,” ಅಂದ್‌ದ್ ಪಂಡೆ.</verse>
				<verse number="8">ಬೊಕ್ಕ ಪರಲೋಕೊಡ್ದು ಎಂಕ್ ಕೇಂಡಿನ ಸ್ವರ ಕುಡ ಎನ್ನೊಟ್ಟುಗು ಪಾತೆರ್‌ದ್, “ಈ ಪೋದು ಕಡಲ್ದ ಮಿತ್ತ್‌ಲಾ ಭೂಮಿದ ಮಿತ್ತ್‌ಲಾ ಉಂತೊಡಿ ದೂತನ ಕೈಟ್ಟುಪ್ಪು ಗಿರ್ತ್‌ದಿ ಸುರುಳಿನ್ ದೆತ್ತೊನ್ಲ” ಅಂದ್‌ದ್ ಪಂಡ್ಂಡ್.</verse>
				<verse number="9">ಯಾನ್ ಆ ದೂತನ ಕೈತಲ್‌ ಪೋದು ಎಲ್ಯ ಸುರುಳಿನ್ ಎಂಕ್ ಕೊರು ಅಂದ್‌ದ್ ಕೇನ್ನಗ ಆಯೆ ಎಂಕ್, “ಈ ಉಂದೆನ್ ದೆತ್ತೊಂದು ತಿಂದ್ ಬುಡು. ಉಂದು ನಿನ ಬಂಜಿನ್ ಕೈಪೆ ಆಪಿಲೆಕ್ಕ ಮಲ್ಪುಂಡು. ಆಂಡ ನಿನ ಬಾಯಿಡ್ ತಿಗತನೆಯಿತ ಲೆಕ್ಕ ಚೀಪೆ ಆದುಪ್ಪುಂಡು” ಅಂದ್‌ದ್ ಪಂಡೆ.</verse>
				<verse number="10">ಅಪಗ ಯಾನ್ ಎಲ್ಯ ಸುರುಳಿನ್ ದೂತನ ಕೈಡ್ದ್ ದೆತ್ತೊಂದು ತಿಂದ್‌ದ್ ಬುಡಿಯೆ. ಅವು ಎನ ಬಾಯಿಡ್ ತಿಗತನೆಯಿತ ಲೆಕ್ಕ ಚೀಪೆ ಆದಿತ್ತ್ಂಡ್. ಅವೆನ್ ತಿಂದಿ ಬೊಕ್ಕ ಎನ ಬಂಜಿ ಕೈಪೆ ಆಂಡ್.</verse>
				<verse number="11">ಐಡ್ದ್ ಬೊಕ್ಕ ದೂತೆ ಎನಡ, “ಈ ಕುಡ ಮಸ್ತ್ ಜನೊಕುಲೆನ, ಜನಾಂಗೊಲೆನ, ಭಾಷೆದಾಕುಲೆನ ಬೊಕ್ಕ ಅರಸುಲೆನ ಸಂಗತಿಡ್ ಪ್ರವಾದನೆ ಪನೊಡು.” ಅಂದ್‌ದ್ ಪಂಡೆ.</verse>
			</chapter>
			<chapter number="11">
				<verse number="1">ಐಡ್ದ್ ಬೊಕ್ಕ ದಂಟೆದ ಲೆಕ್ಕ ಇತ್ತಿ ಒಂಜಿ ಲಪ್ಪುನ ಕೋಲುನು ಎನ ಕೈಕ್ ಕೊರ್ದು ಇಂಚ ಸ್ವರ ಆಂಡ್, “ಈ ಪೋದು ದೇವೆರೆ ಆಲಯೊನ್ಲಾ ಬಲಿಪೀಠೊನ್ಲಾ ಲತ್ತ್‌ದ್, ಆಲಯೊಡು ಆರಾಧನೆ ಮಲ್ಪುನಾಕುಲೆನ್ಲಾ ಲೆಕ್ಕ ಮಲ್ಪುಲ.</verse>
				<verse number="2">ಆಲಯೊಗು ಪಿದಯಿ ಉಪ್ಪು ಜಾಲ್‌ನ್ ಲಪ್ಪಂದೆ ಬುಡ್ದು ಬುಡು. ಅವು ಪಿದಯಿದ ಜನೊಕುಲೆಗ್ ಬುಡ್ತುಂಡು. ಅಕುಲು ಪರಿಶುದ್ಧ ಪೇಂಟೆನ್‌ ನಲ್ಪತ್ತರಡ್ಡ್ ತಿಂಗೊಲು ದೊಂಕೊಂದುಪ್ಪುವೆರ್.</verse>
				<verse number="3">ಉಂದತ್ತಂದೆ ಎನ ಇರ್ವೆರ್ ಸಾಕ್ಷಿಲು ಗೋಣಿ ಪೊದೆತೊಂದು ಒಂಜಿ ಸಾರದ ಇರ್ನೂತ ಅಜ್ಪ ದಿನ ಮುಟ್ಟ ಪ್ರವಾದನೆ ಮಲ್ಪುಲೆಕ್ಕ ಮಲ್ಪುವೆ.”</verse>
				<verse number="4">ಭೂಮಿದ ಕರ್ತವ ಎದುರುಡು ಉಂತುದುಪ್ಪು ರಡ್ಡ್ ಇಪ್ಪೆದ ಮರೊಕುಲುಲಾ ರಡ್ಡ್ ದೀಪಕಂಬೊಲುಲಾ ಮೊಕುಲೇ.</verse>
				<verse number="5">ಮೊಕ್ಲೆಗ್ ಏರಾಂಡಲಾ ಹಾನಿ ಮಲ್ಪೊಡು ಅಂದ್‌ದ್ ಇತ್ತ್ಂಡ ಮೊಕ್ಲೆ ಬಾಯಿಡ್ದ್ ತೂ ಪಿದಾಡ್ದ್ ಮೊಕ್ಲೆನ ಪಗೆತಾಕುಲೆನ್ ಪೊತ್ತಾದ್ ಬುಡ್ಪುಂಡು. ಮೊಕ್ಲೆಗ್ ಕೇಡ್ ಮಲ್ಪೊಡು ಅಂದ್‌ದ್ ಬಯಕುನಾಕುಲೆಗ್ ಆ ರೀತಿಡ್ ಕೆರೊಡು.</verse>
				<verse number="6">ತನ್ಕುಲು ಪ್ರವಾದನೆ ಮಲ್ಪುನ ದಿನೊಕುಲೆಡ್ ಬರ್ಸ ಬೂರಂದಿಲೆಕ್ಕ ಬಾನೊನು ಮುಚ್ಚುನ ಅಧಿಕಾರ ಮೊಕ್ಲೆಗ್ ಉಂಡು. ಉಂದತ್ತಂದೆ ಮೊಕ್ಲೆಗ್ ಮನಸ್‌ಗ್ ಬತ್ತಿನಪಗ ಮಾತ ತುದೆ ಸಮುದ್ರೊಲೆ ನೀರ್‌ನ್ ನೆತ್ತೆರ್ ಮಲ್ಪೆರೆಗ್ಲಾ ಭೂಮಿಗ್ ಮಾತ ತರತ ಉಪದ್ರ ಕೊರಿಯೆರೆಗ್ಲಾ ಅಧಿಕಾರ ಉಂಡು.</verse>
				<verse number="7">ಮೊಕುಲು ತನ್ಕುಲೆ ಸಾಕ್ಷಿನ್ ಪಂಡ್ದ್ ಮುಗಿತಿ ಬೊಕ್ಕ ಪಾತಾಳೊಡ್ದು ಬತ್ತಿನ ಮೃಗ ಮೊಕ್ಲೆನ ಮಿತ್ತ್ ಬೂರ್ದು ಮೊಕ್ಲೆನ್ ಸೋಪಾದ್ ಕೆರ್ಪುಂಡು.</verse>
				<verse number="8">ಈ ಸಾಕ್ಷಿಲೆ ಪುಣೊಕುಲು ಮಲ್ಲ ಪಟ್ಟಣದ ಸಾದಿಡ್ ಬೂರ್ದುಪ್ಪುಂಡು. ಆ ಪಟ್ಟಣದ ಗುರ್ತೊಗು ಸೋದೋಮು ಪಂಡ್ದ್‌ಲಾ ಐಗುಪ್ತ ಪಂಡ್ದ್‌ಲಾ ಪುದರ್‌ಲು ಉಂಡು. ಅಕ್ಲೆ ಕರ್ತವನ್ಲಾ ಅವುಲೇ ಕ್ರುಸ್ಸುಡು ಪಾಡ್ದ್ ಇತ್ತೆರ್.</verse>
				<verse number="9">ಮಾತ ಪ್ರಜೆ, ಗೋತ್ರ, ಭಾಷೆ, ಜನಾಂಗೊಲೆಗ್ ಸೇರ್ದಿನಾಕುಲು ಈ ಸಾಕ್ಷಿಲೆ ಪುಣೊನು ಮೂಜರೆ ದಿನ ಮುಟ್ಟ ತೂವೊಂದೇ ಉಪ್ಪುವೆರ್. ಐಕ್ಲೆನ್ ಸಮಾಧಿಡ್ ದೀವೆರೆ ಬುಡ್ಪುಜೆರ್.</verse>
				<verse number="10">ಈ ರಡ್ಡ್ ಪ್ರವಾದಿಲು ಲೋಕದ ಜನೊಕುಲೆನ್ ಪೀಡೆ ಕೊರಿನೆಕ್ಕಾದ್ ಮೊಕುಲು ಸೈತಿನೆಕ್ಕ್ ಲೋಕದಾಕುಲು ಸಂತೋಷ ಮಲ್ತೊಂದು ಒರಿ ಒರಿಯಗ್ ಉಡಿಗೆರೆಲೆನ್ ಪಟ್ಟೊನ್ವೆರ್.</verse>
				<verse number="11">ಆಂಡ ಮೂಜನೆ ದಿನತ ಬೊಕ್ಕ ದೇವೆರೆಡ್ದ್ ಜೀವದ ಆತ್ಮ ಆ ಪುಣೊಕುಲೆಡ್ ಸೇರುಂಡು; ಅಕುಲು ಕಾರೂರುದು ಉಂತಿಯೆರ್. ಅಕ್ಲೆನ್ ತೂಯಿನಾಕುಲೆಗ್ ಮಲ್ಲ ಪೋಡಿಗೆ ಪತ್ತ್ಂಡ್.</verse>
				<verse number="12">ಬೊಕ್ಕ ಅಕ್ಲೆಗ್, “ಮುಲ್ಪ ಮಿತ್ತ್ ಬಲೆ,” ಪನ್ಪಿ ಸ್ವರ ಬಾನೊಡ್ದು ಪಂಡ್ಂಡ್. ಅವೆನ್ ಅಕುಲು ಕೇಂಡ್ದ್ ಅಕ್ಲೆನ ಪಗೆಮಾನಿಲು ತೂವೊಂದಿತ್ತಿಲೆಕ್ಕನೇ ಮುಗಲ್‌ಡ್ ಪರಲೋಕೊಗು ಏರ್ದ್ ಪೋಯೆರ್.</verse>
				<verse number="13">ಅವ್ವೇ ಗಳಿಗೆಡ್ ಮಲ್ಲ ಭೂಕಂಪ ಉಂಡಾದ್ ಆ ಪಟ್ಟಣದ ಪತ್ತೆಟ್ಟ್ ಒಂಜಿ ಪಾಲ್ ನಾಶಾದ್ ಪೋಂಡು. ಆ ಭೂಕಂಪೊಡ್ದು ಏಳ್‌ ಸಾರ ಜನೊಕುಲು ಸೈತ್ ಪೋಯೆರ್. ಒರಿದಿನಾಕುಲು ಪೋಡಿಗೆಡ್ ಪರಲೋಕದ ದೇವೆರೆಗ್ ಮೈಮೆನ್ ಕೊರಿಯೆರ್.</verse>
				<verse number="14">ರಡ್ಡನೆ ಅಪತ್ತ್ ಕರಿದ್ ಪೋಂಡು. ಇಂದಾ ಮೂಜನೇ ಅಪತ್ತ್ ಬೇಗನೆ ಬರ್ಪುಂಡು.</verse>
				<verse number="15">ಬೊಕ್ಕ ಏಳನೇ ದೂತೆ ತುತೂರಿ ಉರ್ಪುನಗ ಪರಲೋಕೊಡು ಮಲ್ಲ ಶಬ್ಧ ಆದ್ ಪಂಡಿನಿ, “ಲೋಕದ ರಾಜ್ಯಾಧಿಕಾರ ನಮ ಕರ್ತವಗ್ಲಾ ಆಯೆ ಅಭಿಷೇಕ ಮಲ್ತಿನಾಯಗ್ಲಾ ಉಂಡಾಂಡ್, ಆಯೆ ಏನಿತ್ಯೇನಿಗ್ಲಾ ಆಳುವೆ,” ಅಂದ್‌ದ್ ಪಂಡ್ಂಡ್.</verse>
				<verse number="16">ಐಡ್ದ್ ಬೊಕ್ಕ ದೇವೆರೆ ಎದುರುಡು ಗದ್ದಿಗೆಡ್ ಕುಲ್ಲುದಿತ್ತಿನ ಇರ್ವತ್ತನಾಲ್ ಹಿರಿಯೆರ್ ಅಡ್ಡಬೂರ್ದು,</verse>
				<verse number="17">ಪಂಡಿನಿ ದಾನೆಂದ್ಂಡ, “ಕರ್ತವಾ, ಸರ್ವಶಕ್ತೆ ಆದುಪ್ಪು ದೇವೆರೆ, ಉಪ್ಪುನಾಯೆ, ಇತ್ತಿನಾಯೆ ಈ ನಿನ ಮಲ್ಲ ಅಧಿಕಾರೊನು ವೈಸೊಂದು ಆಳಿನೆಡ್ದ್ ನಿಕ್ಕ್ ಉಪಕಾರ ಸ್ತುತಿ ಸಂದಾವ.</verse>
				<verse number="18">ಜನಾಂಗೊಲು ಕೋಪೊಡು ದಿಂಜಿದಿತ್ತ. ನಿನ ಕೋಪಲಾ ತೋಜಿದ್ ಬತ್ತ್ಂಡ್. ಸೈತಿನಾಕುಲು ತೀರ್ಪು ಹೊಂದುನ ಸಮಯ ಬತ್ತ್ಂಡ್, ನಿನ ಸೇವಕೆರಾಯಿ ಪ್ರವಾದಿಲೆಗ್ಲಾ ನಿನ ದೇವಜನೊಕುಲೆಗ್ಲಾ ನಿನ ಪುದರ್‌ಗ್ ಪೋಡಿಯು ಎಲ್ಯಾಕ್ಲೆಗ್ಲಾ ಮಲ್ಲಾಕ್ಲೆಗ್ಲಾ ಉಡಿಗೆರೆನ್ ಕೊರ್ದು ಲೋಕೊನು ನಾಶ ಮಲ್ಪುನಾಕುಲೆನ್ ನಾಶ ಮಲ್ಪೆರೆಲಾ ಸಮಯ ಬತ್ತ್ಂಡ್,” ಅಂದ್‌ದ್ ಆಯಗ್ ಆರಾಧನೆ ಮಲ್ತೆರ್.</verse>
				<verse number="19">ಅಪಗ ಪರಲೋಕೊಡುಪ್ಪು ದೇವೆರೆ ಆಲಯ ಜತ್ತ್ಂಡ್. ಆಯನ ಆಲಯೊಡು ಆಯ ಒಡಂಬಡಿಕೆದ ಮಂಜೂಷ ತೋಜ್ಂಡ್. ಉಂದತ್ತಂದೆ ಮಿಂಚಿ, ಶಬ್ಧ, ತೆಡಿಲ್, ಭೂಕಂಪ, ಮಲ್ಲ ಆನೆಕಲ್ಲ್‌ದ ಬರ್ಸ ಉಂಡಾಂಡ್.</verse>
			</chapter>
			<chapter number="12">
				<verse number="1">ಬೊಕ್ಕ ಪರಲೋಕೊಡು ಒಂಜಿ ಮಲ್ಲ ಗುರ್ತ ತೋಜ್ಂಡ್. ಸೂರ್ಯನ್ ಪೊದೆತೊಂದಿತ್ತಿ ಒಂಜಿ ಪೊಂಜೊವು ಇತ್ತಲ್. ಆಲೆನ ಕಾರ್‌ದ ತಿರ್ತ್ ಚಂದ್ರೆ ಇತ್ತೆ. ಆಲೆನ ತರೆತ ಮಿತ್ತ್ ಪದ್ರಾಡ್ ಬೊಳ್ಳಿಲುಪ್ಪು ಕಿರೀಟ ಇತ್ತ್ಂಡ್.</verse>
				<verse number="2">ಆಲ್ ದಿಂಜಿದಿ ಬಂಜಿನಾಲಾದಿತ್ತ್‌ದ್ ಪೆದ್ದುನ ಸಂಕಟೊಡು ನರಳೊಂದಿತ್ತಲ್.</verse>
				<verse number="3">ಬಾನೊಡು ಬೊಕ್ಕೊಂಜಿ ಗುರ್ತ ತೋಜ್ಂಡ್. ಅಲ್ಪ ಕೆಂಪುದ ಮಲ್ಲ ಘಟಸರ್ಪೆ ಇತ್ತ್ಂಡ್, ಐಕ್ ಏಳ್‌ ತರೆಲಾ ಪತ್ತ್ ಕೊಂಬುಲಾ ಐತ ತರೆತ ಮಿತ್ತ್ ಏಳ್‌ ಕಿರೀಟಲಾ ಇತ್ತ್ಂಡ್.</verse>
				<verse number="4">ಐತ ಬೀಲ ಬಾನೊಡುಪ್ಪು ಬೊಳ್ಳಿಲೆಡ್ ಮೂಜೆಟ್ ಒಂಜಿ ಭಾಗೊನು ಒಯಿತ್‌ದ್ ಭೂಮಿಗ್ ದಕ್ಕ್‌ಂಡ್. ಪೆದ್ದೊಂದಿತ್ತಿ ಆ ಪೊಂಜೊವು ಪೆದ್ದಿ ಕೂಡ್ಲೆ ಆ ಬಾಲೆನ್ ದಿಂಗ್‌ದ್ ಬುಡೊಡು ಅಂದ್‌ದ್ ಆ ಘಟಸರ್ಪೆ ಅಲ್ಪನೇ ಕಾತೊಂದಿತ್ತ್‌ಂಡ್.</verse>
				<verse number="5">ಆಲ್ ಲೋಕದ ಮಾತ ಜನಾಂಗೊಲೆನ್ ಕರ್ಬದ ಕೋಲುಡ್ದು ಆಳುನ ಮಗನ್ ಪೆದ್ದಿಯಲ್. ಅಪಗ ಪಕ್ಕನೆ ಆ ಬಾಲೆನ್ ದೇವೆರೆ ಕಡೆಕ್ಲಾ ತನ ಗದ್ದಿಗೆದ ಕಡೆಕ್ಲಾ ಒಯ್ತೊಂಡು.</verse>
				<verse number="6">ಆ ಪೊಂಜೊವು ಕಾಡ್‌ಗ್ ಪಾರ್ದ್ ಪೋಯಲ್. ಆಲೆನ್ ಸಾರತ್ತ ಇರ್ನೂತ ಅಜ್ಪ ದಿನ ಮುಟ್ಟ ತಾಂಕೊಡು ಅಂದ್‌ದ್ ದೇವೆರ್ ಒಂಜಿ ಜಾಗ್‌ನ್ ತಯಾರ್ ಮಲ್ತ್‌ದಿತ್ತೆ.</verse>
				<verse number="7">ಬೊಕ್ಕ ಪರಲೋಕೊಡು ಲಡಯಿ ನಡತ್ಂಡ್. ಮಿಕಾಯೇಲೆಲಾ ಆಯನ ದೂತೆರ್‌ಲಾ ಘಟಸರ್ಪಡೊಪ್ಪ ಲಡಯಿ ಮಲ್ತೆರ್. ಲಡಯಿಡ್ ಘಟಸರ್ಪೆ ಸೋತು ಪೋಂಡು.</verse>
				<verse number="8">ಇಂಚ ಮೊಕ್ಲೆಗ್ ಪರಲೋಕೊಡು ಜಾಗ್ ಇಜ್ಜಾಂದೆ ಪೋಂಡು.</verse>
				<verse number="9">ಭೂಲೋಕೊಡು ಉಪ್ಪು ಮಾತೆರೆನ್ ಮೋಸ ಮಲ್ಪುನ ಆ ಮಲ್ಲ ಘಟಸರ್ಪೆ ಅಂದ್ಂಡ ಪಿಶಾಚಿ ಪಂಡ್ದ್‌ಲಾ, ಸೈತಾನೆ ಪಂಡ್ದ್‌ಲಾ ಪುದರಿತ್ತಿ ಪುರಾತನ ಸರ್ಪೆ ಪನ್ಪಿನಾಯೆಲಾ ಆಯಡೊಪ್ಪ ಆಯ ದೂತೆರ್ಲಾ ಪಿದಯಿ ನೂಕುದು ಭೂಮಿಗ್‌ ಪಾಡಿಯೆರ್.</verse>
				<verse number="10">ಅಪಗ ಪರಲೋಕೊಡು ಮಲ್ಲ ಸ್ವರೊಟ್ಟು ಇಂಚ ಪಂಡಿನೆನ್ ಕೇಂಡೆ, “ಇತ್ತೆ ರಕ್ಷಣೆಲಾ, ಬಲಲಾ ರಾಜ್ಯಲಾ ನಮ್ಮ ದೇವೆರೆಗ್ ಉಂಡಾಂಡ್. ಆಯೆ ಅಭಿಷೇಕ ಮಲ್ತಿನಾಯನ ಅಧಿಕಾರ ಕ್ರಿಸ್ತಡ್ ಇತ್ತೆ ಸುರು ಆಂಡ್. ಎಂಕುಲೆ ಸಹೋದರೆ ಸಹೋದ್ರಿಲೆನ್ ನಮ ದೇವೆರೆ ಎದುರುಡು ರಾತ್ರೆ ಪಗೆಲ್ ದೂರೊಂದುಪ್ಪುನ ಆ ದೂರುನಾಯನ್‌ ಪರಲೋಕೊಡ್ದು ನೂಕುದು ಪಾಡಿಯೆರ್.</verse>
				<verse number="11">ಅಕುಲು ಮರಣ ಮುಟ್ಟ ತನ್ಕುಲೆ ಪ್ರಾಣೊನು ಪ್ರೀತಿ ಮಲ್ಪಂದೆ, ಕುರಿತ ಕಿನ್ನಿದ ನೆತ್ತೆರೆಡ್ದ್‌ಲಾ ತನ್ಕುಲೆ ಸಾಕ್ಷಿದ ಪಾತೆರೊಡ್ದುಲಾ ಆಯನ್ ಗೆಂದಿಯೆರ್.</verse>
				<verse number="12">ಅಂಚಾಯಿನೆಡ್ದ್ ಪರಲೋಕೊಡುಪ್ಪುನಾಕುಲೇ, ಸಂತೋಷ ಮಲ್ಪುಲೆ. ಸೈತಾನೆ ತನ್ಕ್‌ ಉಪ್ಪು ಕಾಲ ಒಂತೆ ಅಂದ್‌ದ್ ತೆರಿದ್ ಭಯಂಕರ ಕೋಪೊಡು ಭೂಮಿಗ್ ಜತ್ತ್‌ದ್ ಬೈದೆ. ಅಂಚಾದ್ ಭೂಮಿಡ್ಲಾ ಸಮುದ್ರೊಡ್ಲಾ ಅಪತ್ತ್ ಬರಿಯೆರೆಗುಂಡು.”</verse>
				<verse number="13">ತಾನ್ ಭೂಮಿಗ್ ನೂಕುದು ಬೂರ್ದಿನೆನ್ ತೂದು ಘಟಸರ್ಪೆ, ಆ ಆಣ್ ಬಾಲೆನ್ ಪೆದ್ದಿನ ಪೊಂಜೊವುಗು ಭಂಗ ಕೊರಿಯೆರೆ ಗಿಡ್ತೊಂದು ಪೋಂಡು.</verse>
				<verse number="14">ಆಂಡ ಆಲ್ ಕಾಡ್‌ಡ್ ತನ್ಕಾದ್ ತಯಾರಾದಿತ್ತಿನ ಜಾಗ್‌ಗ್ ರಾವೊಂದು ಪೋಪಿಲೆಕ್ಕ ಆಲೆಗ್ ಮಲ್ಲ ಗಿಡಿಕುಪ್ಪು ರಡ್ಡ್ ರೆಂಕೆಲೆನ್ ಕೊರ್ದಿತ್ತ್‌ಂಡ್. ಅಲ್ಪ ಆಲ್ ಸರ್ಪದ ಕಣ್ಣ್‌ಗ್ ಮೂಜರೆ ವರ್ಸ ಮದೆ ಆದ್ ಇತ್ತಲ್.</verse>
				<verse number="15">ಬೊಕ್ಕ ಸರ್ಪೆ ತನ ಬಾಯಿಡ್ದ್ ನೀರ್‌ನ್ ತುದೆತ ಲೆಕ್ಕ ಜಪುಡಾದ್ ಆ ಪೊಂಜೊವು ಕೊಚ್ಚಿದ್ ಪೋಪಿಲೆಕ್ಕ ಪ್ರಯತ್ನ ಮಲ್ತೆ.</verse>
				<verse number="16">ಆಂಡ ಭೂಮಿ ಆ ಪೊಂಜೊವುನ ಸಹಾಯೊಗು ಬತ್ತ್‌ದ್ ಘಟಸರ್ಪನ ಬಾಯಿಡ್ದ್ ಬತ್ತಿನ ಮಾತ ನೀರ್‌ನ್ ದಿಂಗ್‌ದ್ ಪಾಡ್ಂಡ್.</verse>
				<verse number="17">ಅಪಗ ಘಟಸರ್ಪಗ್ ಬಾರೀ ಕೋಪ ಬತ್ತ್‌ದ್ ಆ ಪೊಂಜೊವುನ ಬಾಕಿ ಸಂತಾನದಾಕುಲೆಡೊಪ್ಪ ಅಂದ್ಂಡ ದೇವೆರೆ ಅಪ್ಪಣೆಲೆನ್ ಕೈಕೊಂದು ಯೇಸುಗಾದ್ ತನ್ಕುಲೆ ಸಾಕ್ಷಿನ್ ಪತ್ತೊಂದಿನಾಕುಲೆಡೊಪ್ಪ ಲಡಯಿಗ್ ಪಿದಾಡಿಯೆ.</verse>
				<verse number="18">ಆಯೆ ಬೊಕ್ಕ ಕಡಲ ಬರಿತ ಪೊಯ್ಯೆದ ಮಿತ್ತ್ ಉಂತೊಂಡೆ.</verse>
			</chapter>
			<chapter number="13">
				<verse number="1">ಬೊಕ್ಕ ಕಡಲ್‌ಡ್ದ್ ಒಂಜಿ ಮೃಗ ಲಕ್ಕ್‌ದ್ ಬರ್ಪಿನೆನ್ ತೂಯೆ. ಐಕ್ ಏಳ್‌ ತರೆ ಪತ್ತ್ ಕೊಂಬುಲಾ ಕೊಂಬುಲೆ ಮಿತ್ತ್ ಪತ್ತ್ ಕಿರೀಟಲಾ ಮುಂಡೊಡು ದೇವೆರೆನ್ ದೂಷಣೆ ಮಲ್ಪುನ ಪುದರ್‌ಲಾ ಇತ್ತ್ಂಡ್.</verse>
				<verse number="2">ಯಾನ್ ತೂಯಿ ಮೃಗ ಚಿಟ್ಟೆಪಿಲಿತ್ತ ಲೆಕ್ಕ ಇತ್ತ್ಂಡ್. ಐತ ಕಾರ್ ಕರಡಿದ ಕಾರ್‌ದ ಲೆಕ್ಕಲಾ ಐತ ಬಾಯಿ ಸಿಮ್ಮದ ಬಾಯಿದ ಲೆಕ್ಕಲಾ ಇತ್ತ್ಂಡ್. ಐಕ್ ಘಟಸರ್ಪೆ ತನ ಬಲೊನ್ಲಾ, ಗದ್ದಿಗೆದ ಮಲ್ಲ ಅಧಿಕಾರೊನ್ಲಾ ಕೊರ್‌ಂಡ್.</verse>
				<verse number="3">ಮೃಗತ ತರೆಲೆಡ್ ಒಂಜಿ ತರೆ ಗಾಯ ಆದ್ ಸೈಪಿಲೆಕ್ಕ ಉಪ್ಪುನೆನ್ ತೂಯೆ. ಆ ಸೈಪಿನಂಚಿ ಗಾಯ ಗುಣ ಆಂಡ್. ಭೂಮಿದಾಕುಲು ಮಾತೆರ್ ಆ ಮೃಗೊನು ತೂದು ಅಚ್ಚಿರ ಆದ್ ಐತ ಬೆರಿ ಪತ್ತಿಯೆರ್.</verse>
				<verse number="4">ಘಟಸರ್ಪೆ ಆ ಮೃಗೊಕ್ಕು ಅಧಿಕಾರೊನು ಕೊರ್ದಿತ್ತಿನೆಡ್ದ್ ಅಕುಲು ಆ ಘಟಸರ್ಪಗ್ ಆರಾಧನೆ ಸಂದಾಯೆರ್ ಅತ್ತಂದೆ ಆ ಮೃಗೊಕ್ಲಾ ಆರಾಧನೆ ಸಂದಾದ್, “ಈ ಮೃಗೊಕ್ಕು ಸಮಾನೆರ್ ಏರ್? ನೆತ್ತೊಟ್ಟುಗು ಲಡಯಿ ಮಲ್ಪುನಾಕುಲು ಏರ್?” ಪಂಡ್ದ್ ಪಂಡೆರ್.</verse>
				<verse number="5">ಆ ಮೃಗೊಕ್ಕು ದೇವೆರೆಗ್ ವಿರೋಧಾದ್ ಮಸ್ತ್ ದೂಷಣೆಲೆನ್ ಪಾತೆರುನ ಬಾಯಿನ್ ಕೊರ್ದಿತ್ತ್‌ಂಡ್. ಬೊಕ್ಕ ನಲ್ಪತ್ತರಡ್ಡ್ ತಿಂಗೊಲು ಮುಟ್ಟ ತನ ಕಾರ್ಯೊಲೆನ್ ನಡಪಾವುನ ಅಧಿಕಾರೊನ್ಲಾ ಕೊರ್ದಿತ್ತ್‌ಂಡ್.</verse>
				<verse number="6">ಆ ಮೃಗ ಬಾಯಿ ಜತ್ತ್‌ದ್ ದೇವೆರೆನ್ ದೂಷಣೆ ಮಲ್ತಿನಿ ಅತ್ತಂದೆ ಆಯನ ಪುದರ್‌ನ್ಲಾ ಆಯನ ಇಲ್ಲ್‌ನ್ಲಾ ಪರಲೋಕೊಡುಪ್ಪುನಾಕುಲೆನ್ಲಾ ದೂಷಣೆ ಮಲ್ತ್ಂಡ್. ಉಂದತ್ತಂದೆ ದೇವಜನೊಕುಲೆ ಮಿತ್ತ್ ಲಡಯಿ ಮಲ್ತ್‌ದ್ ಅಕ್ಲೆನ್ ಗೆಂದಿಯೆರೆ ಅಧಿಕಾರ ಕೊರ್ದಿತ್ತ್‌ಂಡ್. ಬೊಕ್ಕ ಮಾತ ಗೋತ್ರ, ಪ್ರಜೆ, ಭಾಷೆ, ಜನಾಂಗೊಲೆ ಮಿತ್ತ್ ಐಕ್ ಅಧಿಕಾರ ಕೊರ್ದಿತ್ತ್‌ಂಡ್.</verse>
				<verse number="7"></verse>
				<verse number="8">ಲೋಕ ಉಂಡಾಪಿನೆಡ್ದ್ ದುಂಬೇ ಬಲಿಯಾಯಿ ಕುರಿಯಾದಿತ್ತಿನಾಯಡ ಉಪ್ಪು ಜೀವದ ಪುಸ್ತಕೊಡು ಏರೇರೆನ ಪುದರ್ ಬರೆತಿಜಾ, ಅಕುಲು ಐಕ್ ಆರಾಧನೆ ಸಂದಾವೆರ್.</verse>
				<verse number="9">ಕೆಬಿ ಇತ್ತಿನಾಯೆ ಕೇನಡ್.</verse>
				<verse number="10">“ಕೈದ್‌ಗ್ ನೇಮಕ ಆತಿನಾಯೆ ಸೆರೆಮನೆಕ್ ಪೋವೆ. ಕತ್ತಿಡ್ ಕೆರಿಯೆರೆ ನೇಮಕ ಆತಿನಾಯೆ ಕತ್ತಿಡೇ ಸೈಯೊಡು.” ನೆಟ್ಟ್ ದೇವಜನೊಕುಲೆ ತಾಳ್ಮೆಲಾ ನಂಬಿಕೆಲಾ ತೋಜಿದ್ ಬರ್ಪುಂಡು.</verse>
				<verse number="11">ಬೊಕ್ಕೊಂಜಿ ಮೃಗ ಭೂಮಿದ ಉಲಯಿಡ್ದ್ ಬರ್ಪಿನೆನ್ ತೂಯೆ. ಐಕ್ ಕುರಿತ ಕಿನ್ನಿಗ್ ಉಪ್ಪುಲೆಕ್ಕ ರಡ್ಡ್ ಕೊಂಬುಲು ಇತ್ತ್ಂಡ್. ಘಟಸರ್ಪದಲೆಕ್ಕ ಪಾತೆರ್‌ಂಡ್.</verse>
				<verse number="12">ಈ ಮೃಗ ಸುರುತ್ತ ಮೃಗತ ಮಾತ ಅಧಿಕಾರೊನು ಐತೊಟ್ಟಿಗೆ ನಡಪಾವುಂಡು. ಉಂದು ಸೈಪಿನಂಚ ಗಾಯ ಗುಣ ಆದಿತ್ತಿ ಆ ಸುರುತ್ತ ಮೃಗೊಕ್ಕು ಲೋಕಲಾ ಭೂಮಿಡುಪ್ಪು ಮಾತೆರ್ಲಾ ಆರಾಧನೆ ಮಲ್ಪುಲೆಕ್ಕ ಮಲ್ತ್ಂಡ್.</verse>
				<verse number="13">ರಡ್ಡನೆ ಮೃಗ ಮಲ್ಲ ಮಲ್ಲ ಕಾರ್ನಿಕೊಲೆನ್ ನಡಪಾವೊಂದು, ಜನೊಕುಲೆ ಎದುರುಡು ತೂ ಬಾನೊಡ್ದು ಭೂಮಿಗ್ ಜತ್ತ್‌ದ್ ಬರ್ಪಿಲೆಕ್ಕ ಮಲ್ಪುವೆ.</verse>
				<verse number="14">ಆ ಸುರುತ್ತ ಮೃಗತ ಎದುರುಡು ಬಲತ್ತ ಕಾರ್ಯೊಲೆನ್ ಮಲ್ಪು ಅಧಿಕಾರ ಉಪ್ಪುನೆಡ್ದ್, ಭೂಮಿಡ್ ಉಪ್ಪುನಾಕುಲೆನ್ ಮರ್ಲ್ ಮಲ್ಪಾವುಂಡು. ಅಕ್ಲೆಗ್ ಕತ್ತಿಡ್ದ್ ಗಾಯ ಆದ್ ಸೈಯಂದೆ ಬದ್‌ಕಿನ ಮೃಗತ ಮರ್ಯಾದಿಗಾದ್ ಮೂರ್ತಿನ್ ಮಲ್ತೊನೊಡು ಪಂಡ್ದ್ ಕಲ್ಪಾವುಂಡು.</verse>
				<verse number="15">ಉಂದತ್ತಂದೆ ಆ ಮೃಗತ ಮೂರ್ತಿಗ್ ಜೀವ ಕೊರ್ಪಿ ಸಾಮರ್ಥ್ಯಲಾ ಉಂದೆಕ್ಕ್ ತಿಕ್ಕ್ಂಡ್. ಆ ಮೃಗತ ಮೂರ್ತಿ ಪಾತೆರುಂಡು. ತನ್ಕ್ ಆರಾಧನೆ ಸಂದಾವಂದಿನ ಮಾತೆರೆಗ್ ಮರಣ ದಂಡನೆ ಆಪಿಲೆಕ್ಕ ಮಲ್ಪುಂಡು.</verse>
				<verse number="16">ಬೊಕ್ಕ ಮಲ್ಲಾಕುಲು, ಎಲ್ಯಾಕುಲು ಐಶ್ವರ್ಯವಂತೆರ್, ಬಡವೆರ್, ಸ್ವತಂತ್ರೆರ್, ಗುಲಾಮೆರ್ ಮಾತೆರ್ ತನ್ಕುಲೆ ಬಲ ಕೈತ ಮಿತ್ತಾವಡ್ ಮುಂಡದ ಮಿತ್ತಾವಡ್ ಗುರ್ತ ಪಾಡೊನುಲೆಕ್ಕ ಈ ರಡ್ಡನೆ ಮೃಗ ಮಲ್ಪುಂಡು.</verse>
				<verse number="17">ಆ ಗುರ್ತ ಏರೆಗ್ ಇಜ್ಜಾ, ಅಕುಲು ದೆತ್ತೊನ್ನವು ಆವಡ್, ಮಾರುನವು ಆವಡ್ ಮಲ್ಪೆರೆ ಬಲ್ಲಿ ಪಂಡ್ದ್ ಕಟ್ಟ್ ಮಲ್ಪುಂಡು. ಆ ಗುರ್ತ ಒವು ಪಂಡ್ಂಡ ಸುರುತ್ತ ಮೃಗತ ಪುದರ್ ಅತ್ತ್‌ಡ ಐತ ಪುದರ್‌ನ್ ತೆರಿಪಾವುನ ಅಂಕೆ.</verse>
				<verse number="18">ನೆಟ್ಟ್ ಜ್ಞಾನ ಇತ್ತಿ ಬುದ್ಧಿ ಸೇರ್ದುಂಡು. ಬುದ್ಧಿವಂತೆ ಆ ಮೃಗತ ಅಂಕೆನ್ ಗೆನ್ಪಡ್. ಅವು ಒರಿ ನರಮಾನಿನ್ ಸೂಚನೆ ಮಲ್ಪು ಅಂಕೆ ಆದುಂಡು. ಐತ ಅಂಕೆ ಆಜಿನೂತ್ತ ಅಜ್ಪತ್ತಾಜಿ.</verse>
			</chapter>
			<chapter number="14">
				<verse number="1">ಯಾನ್ ತೂವನಗ ಯಜ್ಞದ ಕುರಿಯಾದಿತ್ತಿನಾಯೆ ಚೀಯೋನು ಪರ್ವತೊಡು ಉಂತುದಿನೆನ್ ತೂಯೆ. ಆಯಡೊಪ್ಪ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಮಂದಿ ಇತ್ತೆರ್. ಅಕುಲಾಕುಲೆನ ಮುಂಡೊಡು ಆಯನಲಾ ಆಯ ಅಮ್ಮೆರೆನಲಾ ಪುದರ್ ಬರೆದಿತ್ತ್‌ಂಡ್.</verse>
				<verse number="2">ಉಂದತ್ತಂದೆ ಪರಲೋಕದ ಕಡೆಡ್ದ್ ನೀರ್‌ದ ಮಲ್ಲ ಶಬ್ಧಲಾ, ತೆಡಿಲ್‌ದ ಶಬ್ಧೊನ್ಲಾ ಕೇಂಡೆ. ಯಾನ್ ಕೇಂಡಿನ ಸ್ವರ ಮಸ್ತ್ ಜನ ಒಟ್ಟಾದ್ ವೀಣೆ ಬಾರಿಸಾವೊಂದು ಪದ ಪನ್ಪಿಲೆಕ್ಕ ಇತ್ತಿ ಸ್ವರೊನು ಕೇಂಡೆ.</verse>
				<verse number="3">ಅಕುಲು ಗದ್ದಿಗೆದ ಎದುರುಡ್ಲಾ ಆ ನಾಲ್ ಜೀವಿಲೆ ಬೊಕ್ಕ ಹಿರಿಯಾಕುಲೆ ಎದುರುಡ್ಲಾ ಪೊಸ ಪದ ಪಂಡೆರ್. ಭೂಲೋಕದ ಉಲಯಿಡ್ದ್ ದೆತ್ತೊಂಡಿನ ಆ ಒಂಜಿ ಲಕ್ಷದ ನಲ್ಪತ್ತನಾಲ್ ಸಾರ ಜನೊಕುಲೆ ಅತ್ತಂದೆ ಬೇತೆ ಏರ್ಲಾ ಆ ರಾಗೊನು ಕಲ್ಪೆರೆ ಆವಂದ್.</verse>
				<verse number="4">ಪೊಂಜೊವೆ ಸಹವಾಸೊಡ್ದು ಮೈಲೆ ಆವಂದಿನಾಕುಲು ಮೊಕುಲೇ; ಮೊಕುಲು ಕನ್ಯಪೊಣ್ಣುಲೆ ಲೆಕ್ಕ ಕಳಂಕದಾಂತಿನಾಕುಲು, ಯಜ್ಞದ ಕುರಿ ಆದಿತ್ತಿನಾಯೆ, ಒಡೆಗ್ ಪೋಂಡಲಾ ಮೊಕುಲು ಆಯನ ಬೆರಿಯೆ ಪೋಪೆರ್. ಮೊಕುಲು ಜನೊಕುಲೆಡ್ದ್ ಸ್ವಂತ ಜನೊಕುಲಾದ್ ದೆತ್ತೊಂದಿನಾಕುಲಾದ್ ದೇವೆರೆಗ್ಲಾ ಯಜ್ಞದ ಕುರಿ ಆದಿತ್ತಿನಾಯಗ್ಲಾ ಸುರುತ್ತ ಫಲ ಆಯೆರ್.</verse>
				<verse number="5">ಸುಳ್ಳು ಮೊಕ್ಲೆನ ಬಾಯಿಡ್ ಬರಂದ್. ಮೊಕುಲು ದೋಷದಾಂತಿನಾಕುಲಾದುಲ್ಲೆರ್.</verse>
				<verse number="6">ಬೊಕ್ಕೊರಿ ದೂತೆ ನಡು ಬಾನೊಡು ರಾಪಿನೆನ್ ತೂಯೆ. ಭೂಮಿಡುಪ್ಪು ಮಾತ ಜನಾಂಗ, ಗೋತ್ರ, ಭಾಷೆ, ಜನೊಕುಲೆಗ್ ಸಾರಿದ್ ಪನಿಯೆರೆ ನಿತ್ಯದ ಸುವಾರ್ತೆ ಆಯಡ ಇತ್ತ್ಂಡ್.</verse>
				<verse number="7">ಆಯೆ ನಿಕುಲು ಮಾತೆರ್ಲಾ ದೇವೆರೆಗ್ ಪೋಡಿದ್ ಆಯಗ್ ಮೈಮೆನ್ ಸಂದಾಲೆ. ಆಯೆ ನ್ಯಾಯತೀರ್ಪು ಮಲ್ಪುನ ಗಳಿಗೆ ಬೈದ್‌ಂಡ್. ಭೂಲೋಕ, ಪರಲೋಕ, ಕಡಲ್, ಬೊಕ್ಕ ನೀರ್‌ದ ವಸರ್‌ನ್ ಉಂಡು ಮಲ್ತ್‌ದಿನಾಯಗ್ ಆರಾಧನೆ ಮಲ್ಪುಲೆ ಪಂಡ್ದ್ ಮಲ್ಲ ಶಬ್ಧೊಡು ಪಂಡೆ.</verse>
				<verse number="8">ಆಯನ ಪಿರವುಡು ರಡ್ಡನೆ ದೂತೆ ಬತ್ತ್‌ದ್, “ಬೂರಿಯಲ್, ಬೂರಿಯಲ್ ಬಾಬೆಲ್ ಪನ್ಪಿ ಮಲ್ಲಪಟ್ಟಣ ಬೂರಿಯಲ್. ಆಲ್ ಮಾತ ಜನಾಂಗೊಲೆಗ್ ತನ ಹಾದ್ರದ ದ್ರಾಕ್ಷಾರಸೊನು ಪರ್ಪಾಯಲ್,” ಅಂದ್‌ದ್ ಪಂಡೆ.</verse>
				<verse number="9">ಆಯನ ಪಿರವುಡು ಮೂಜನೆದ ಒರಿ ದೂತೆ ಬತ್ತ್‌ದ್ ಏರಾಂಡಲಾ ಸುರುತ್ತ ಮೃಗೊಕ್ಕುಲಾ ಐತ ಮೂರ್ತಿಗ್ಲಾ ಆರಾಧನೆ ಮಲ್ತ್‌ದ್ ತನ ಮುಂಡದ ಮಿತ್ತಾವಡ್, ಕೈತ ಮಿತ್ತಾವಡ್ ಗುರ್ತ ಪಾಡಾವೊಂಡೆಡ,</verse>
				<verse number="10">ಆಯೆ ದೇವೆರೆ ಕೋಪ ಪನ್ಪಿ ಬಾಜನೊಡು ದಾಲಾ ಬೆರಕೆ ಮಲ್ಪಂದೆ ಪಾಡ್ದಿನ ದೇವೆರೆ ಕೋಪ ಪನ್ಪಿ ದ್ರಾಕ್ಷಾರಸೊನು ಪರ್ಪೆ. ಬೊಕ್ಕ ಪರಿಶುದ್ಧ ದೂತೆರೆ ಎದುರುಡ್ಲಾ ಕುರಿತ ಕಿನ್ನಿ ಆದಿತ್ತಿನಾಯನ ಎದುರುಡ್ಲಾ ತೂಟುಲಾ, ಗಂಧಕೊಡುಲಾ, ಭಯಂಕರ ಸಂಕಟ ಪಡೆವೆ.</verse>
				<verse number="11">ಅಂಚಿತ್ತಿನಾಕುಲೆನ ಸಂಕಟದ ಪುಗೆ ಏನಿತ್ಯೇನಿಗ್ಲಾ ಏರೊಂದೇ ಪೋಪುಂಡು. ಮೃಗೊಕು ಬೊಕ್ಕ ಐತ ಮೂರ್ತಿಗ್ ಪೂಜೆ ಮಲ್ಪುನಾಕುಲುಲಾ ಐತ ಪುದರ್‌ನ್ ತೋಜಾವುನ ಗುರ್ತೊನು ಪಾಡಾವೊಂಡಿನಾಕುಲು ಮಾತೆರ್ಲಾ ರಾತ್ರೆ ಪಗೆಲ್ ವಾ ಸುಖಲಾ ಉಪ್ಪಂದೆ ಸಂಕಟ ಪಡೆವೆರ್ ಪಂಡ್ದ್ ಮಲ್ಲ ಸ್ವರೊಟ್ಟು ಪಂಡೆ.</verse>
				<verse number="12">ನೆಡ್ದ್ ದೇವೆರೆ ಅಪ್ಪಣೆನ್ಲಾ ಯೇಸುನ ಮಿತ್ತ್ ನಂಬಿಕೆ ದೀವೊಂದು ನಡಪುನಾಕುಲೆನ ದೇವಜನೊಕುಲೆ ತಾಳ್ಮೆಲಾ ತೋಜಿದ್ ಬರ್ಪುಂಡು.</verse>
				<verse number="13">ಪರಲೋಕೊಡ್ದು ಒಂಜಿ ಶಬ್ಧ ಎಂಕ್ ಕೇಂಡ್‌ಂಡ್. ಅವು, “ಇನಿಡ್ದ್ ಕರ್ತವ ಭಕ್ತೆರಾದ್ ಸೈಪಿನಾಕುಲು ಭಾಗ್ಯವಂತೆರ್ ಪಂಡ್ದ್ ಬರೆಲ ಪಂಡ್ದ್ ಎಂಕ್ ಪಂಡ್ಂಡ್.” ಐಕ್ ಆತ್ಮೆ, “ಅಂದ್, ಅಕುಲು ಭಾಗ್ಯವಂತೆರ್.” “ಅಕ್ಲೆನ ಕಷ್ಟ ತೀರ್‌ಂಡ್, ಅಕ್ಲೆಗ್ ವಿಶ್ರಾಂತಿ ಆಪುಂಡು, ಅಕ್ಲೆನ ಎಡ್ಡೆ ಕ್ರಿಯೊಲು ಅಕ್ಲೆ ಬೆರಿಯೆ ಬರ್ಪುಂಡು.” ಪಂಡ್ದ್ ಪಂಡೆ.</verse>
				<verse number="14">ಯಾನ್ ತೂವನಗ ಇಂದಾ, ಒಂಜಿ ಬೊಲ್ದು ಮುಗಲ್ ಎಂಕ್ ತೋಜ್ಂಡ್. ಆ ಮುಗಲ್‌ದ ಮಿತ್ತ್ ನರಮಾನಿ ಮಗ ಲೆಕ್ಕಂತಿನಾಯೆ ಒರಿ ಕುಲ್ಲುದಿತ್ತಿನೆನ್ ತೂಯೆ. ಆಯನ ತರೆತ ಮಿತ್ತ್ ಬಂಗಾರ್‌ದ ಕಿರೀಟಲಾ ಆಯನ ಕೈಟ್ ಪರ್ತೆದ ಪರ್ಕತ್ತಿ ಇತ್ತ್ಂಡ್.</verse>
				<verse number="15">ಅಪಗ ಬೊಕ್ಕೊರಿ ದೂತೆ ಆಲಯದ ಉಲಯಿಡ್ದ್ ಬತ್ತ್‌ದ್ ಮುಗಲ್‌ದ ಮಿತ್ತ್ ಕುಲ್ಲುದಿತ್ತಿನಾಯಗ್, “ಭೂಮಿದ ಬುಲೆ ಬುಲೆದ್‌ಂಡ್. ಕೊಯ್ಪಿ ಕಾಲ ಬತ್ತ್ಂಡ್. ನಿನ ಪರ್ಕತ್ತಿನ್ ಪಾಡ್ದ್ ಕೊಯ್ಲ,” ಪಂಡ್ದ್ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ.</verse>
				<verse number="16">ಅಪಗ ಮುಗಲ್‌ದ ಮಿತ್ತ್ ಕುಲ್ಲುದಿತ್ತಿನಾಯೆ ತನ ಪರ್ಕತ್ತಿನ್ ಭೂಮಿದ ಮಿತ್ತ್ ಪಾಡ್ದ್ ಬುಲೆನ್ ಕೊಯ್ಯೆ, ಬೊಕ್ಕ ಭೂಮಿದ ಬುಲೆನ್ ಮಾತ ಕೊಯ್ಪಾಂಡ್.</verse>
				<verse number="17">ಐಡ್ದ್ ಬೊಕ್ಕ ನನೊರಿ ದೂತೆ ಪರಲೋಕದ ಆಲಯೊಡ್ದು ಬತ್ತೆ. ಆಯ ಕೈಟ್‌ಲಾ ಒಂಜಿ ಪರ್ತೆದ ಪರ್ಕತ್ತಿ ಇತ್ತ್ಂಡ್.</verse>
				<verse number="18">ಬೊಕ್ಕ ತೂತ ಅಧಿಕಾರ ಪಡೆಯಿ ನನೊರಿ ದೂತೆ ಬಲಿಪೀಠೊಡ್ದು ಬತ್ತ್‌ದ್ ಆಯೆ ಪರ್ಕತ್ತಿ ಇತ್ತಿನಾಯಡ, “ನಿನ ಪರ್ಕತ್ತಿನ್ ಪಾಡ್ದ್ ಭೂಮಿದ ದ್ರಾಕ್ಷೆದ ಗೊಂಚಿಲ್ಲೆನ್ ಕೊಯ್ಲ. ಐತ ಪರ್‌ಂದುಲು ಪೂರ ಬುಲೆದ್‌ಂಡ್,” ಪಂಡ್ದ್ ಮಲ್ಲ ಶಬ್ಧೊಡು ಬೊಬ್ಬೆ ದೀಯೆ.</verse>
				<verse number="19">ಅಪಗ ಆ ದೂತೆ ತನ ಪರ್ಕತ್ತಿನ್ ಭೂಮಿದ ಮಿತ್ತ್ ಆಡಾಯೆ. ಮಾತ ದ್ರಾಕ್ಷೆಬೂರುನು ಕೊಯ್ದ್ ದೇವೆರೆ ಕೋಪ ಪನ್ಪಿ ಮಲ್ಲ ಗಾಣೊಗು ಪಾಡಿಯೆ.</verse>
				<verse number="20">ಪಟ್ಟಣದ ಪಿದಯಿಡಿತ್ತಿನ ಗಾಣೊಡು ದ್ರಾಕ್ಷೆನ್ ಪಾಡ್ದ್ ದೊಂಕಿಯೆರ್. ಅಪಗ ಗಾಣೊಡ್ದು ನೆತ್ತೆರ್ ಪಿದಾಡ್ದ್ ಕುದುರೆದ ಕಡಿವಾಣ ಮುಟ್ಟುನಾತ್, ನಿರ್ಪ ಇರ್ನೂದು ಮೈಲ್ ದೂರ ಪರತೊಂದು ಪೋಂಡು.</verse>
			</chapter>
			<chapter number="15">
				<verse number="1">ಪರಲೋಕೊಡು ಅಚ್ಚಿರದ ಬೊಕ್ಕೊಂಜಿ ಮಲ್ಲ ಗುರ್ತ ಎಂಕ್ ತೋಜ್ಂಡ್. ಏಳ್‌ ಮಂದಿ ದೂತೆರೆ ಕೈಟ್ ಏಳ್‌ ಉಪದ್ರೊಲು ಇತ್ತ್ಂಡ್. ಉಂದು ಕಡೆತ ಉಪದ್ರೊಲು. ಉಂದೆಡ್ದ್ ದೇವೆರೆ ಕೋಪ ಮುಗಿಯುಂಡು.</verse>
				<verse number="2">ಬೊಕ್ಕ ತೂ ಕಲಡಾಯಿ ಕನ್ನಡಿದ ಕಡಲ್‌ದಲೆಕ್ಕ ಇತ್ತಿನವು ಎಂಕ್ ತೋಜ್ಂಡ್. ಅಪಗ ಮೃಗತ ಮೂರ್ತಿಗ್ ಪೂಜೆ ಮಲ್ಪಂದೆಲಾ ಐತ ಪುದರ್‌ದ ಅಂಕೆದ ಗುರ್ತ ಪಾಡೊನಂದೆಲಾ ಐಟ್ಟ್ ಗೆಂದಿನಾಕುಲು ದೇವೆರ್ ಕೊರಿನ ವೀಣೆಲೆನ್ ಕೈಟ್ ಪತ್ತೊಂದು ಕನ್ನಡಿದ ಕಡಲ್ದ ಕೈತಲ್‌ ಉಂತುದಿತ್ತೆರ್.</verse>
				<verse number="3">ಅಕುಲು ದೇವೆರೆ ಸೇವಕೆ ಆಯಿ ಮೋಶೆನ ಬೊಕ್ಕ ಕುರಿತ ಕಿನ್ನಿ ಆದಿತ್ತಿನಾಯನ ಪದೊನು ಮಲ್ತೊಂದಿತ್ತೆರ್. ಅವು ಇಂಚ ಉಂಡು, “ಸರ್ವಶಕ್ತೆ ದೇವೆರಾಯಿ, ಕರ್ತವಾ, ನಿನ ಕಾರ್ಯೊಲು ಮಲ್ಲದವುಲಾ ಅಚ್ಚಿರದವುಲಾ ಆದುಂಡು. ಮಾತ ಜನಾಂಗೊಲೆ ಅರಸೋ, ನಿನ ಮಾರ್ಗೊಲು ನ್ಯಾಯದವುಲಾ ಸತ್ಯದವುಲಾ ಆದುಂಡು.</verse>
				<verse number="4">ಕರ್ತವಾ ನಿನ ಪುದರ್‌ಗ್ ಪೋಡಿಯಂದಿನಾಕುಲುಲಾ ನಿನ ಪುದರ್‌ನ್ ಮೈಮೆ ಪಡೆಪಾವಂದಿನಾಯೆ ಏರುಲ್ಲೆ? ಈ ಮಾತ್ರ ಪರಿಶುದ್ಧದಾಯೆ. ನಿನ ನೀತಿದ ಬೇಲೆಲು ತೋಜಿದ್ ಬತ್ತಿನೆಡ್ದ್ ಮಾತ ಜನಾಂಗೊಲು ನಿನ ಎದುರು ಬತ್ತ್‌ದ್, ನಿಕ್ಕ್ ಆರಾಧನೆ ಮಲ್ಪುವೆರ್.”</verse>
				<verse number="5">ಬೊಕ್ಕ ಯಾನ್ ತೂನಗ ಪರಲೋಕೊಡುಪ್ಪು ದೇವೆರೆ ಸಾಕ್ಷಿದ ಗುಡಾರ ಪನ್ಪಿ ದೇವಾಲಯದ ಬಾಕಿಲ್ ಜತ್ತ್ಂಡ್.</verse>
				<verse number="6">ಆ ದೇವಾಲಯೊಡ್ದು ಏಳ್‌ ಉಪದ್ರೊಲೆನ್ ಪತ್ತೊಂದಿನ ಏಳ್‌ ದೂತೆರ್ ಬತ್ತೆರ್. ಅಕುಲು ಮಿಂಚುನ ಶುದ್ಧ ನಾರ್‌ಮಡಿತ ಕುಂಟು ಪಾಡ್ದಿತ್ತೆರ್. ತನ್ಕುಲೆ ತಿಗಲೆಗ್ ಬಂಗಾರ್‌ದ ಪಟ್ಟಿನ್ ಕಟ್ಟ್‌ದಿತ್ತೆರ್.</verse>
				<verse number="7">ಬೊಕ್ಕ ನಾಲ್ ಜೀವಿಲೆಡ್ ಒಂಜಿ, ಆ ಏಳ್‌ ದೂತೆರೆಗ್ ಏನಿತ್ಯೇನಿಗ್ಲಾ ಬದುಕುನಾಯೆ ಆದುಪ್ಪು ದೇವೆರೆ ಕೋಪ ದಿಂಜಿದಿತ್ತಿನ ಏಳ್‌ ಬಂಗಾರ್‌ದ ಬಾಜನೊನು ಕೊರ್‌ಂಡ್.</verse>
				<verse number="8">ದೇವೆರೆ ಮೈಮೆ ಬೊಕ್ಕ ಬಲೊಟು ಉಂಡಾಯಿ ಪುಗೆ ಇಡೀ ಆಲಯೊಡು ದಿಂಜಿಂಡ್. ಆ ಏಳ್‌ ದೂತೆರೆ ಕೈಟ್‌ತ್ತಿನ ಏಳ್‌ ಉಪದ್ರೊಲು ಮುಗಿನೆಟ್ಟ ಆ ಪವಿತ್ರ ದೇವಾಲಯದ ಉಲಯಿ ಪೋವೆರೆ ಏರೆಡ್ದ್‌ಲಾ ಆಯಿಜಿ.</verse>
			</chapter>
			<chapter number="16">
				<verse number="1">ಅಪಗ ಆಲಯೊಡ್ದು ಒಂಜಿ ಮಲ್ಲ ಸ್ವರೊನು ಕೇಂಡೆ. ಆ ಏಳ್‌ ದೂತೆರೆಗ್, “ನಿಕುಲು ಪೋದು ಆ ಏಳ್‌ ಬಾಜನೊಡುಪ್ಪು ದೇವೆರೆ ಕೋಪೊನು ಭೂಮಿದ ಮಿತ್ತ್ ಗುಪ್ಪುಲೆ.” ಪಂಡ್ದ್ ಪಂಡ್ಂಡ್.</verse>
				<verse number="2">ಬೊಕ್ಕ ಸುರುತ್ತ ದೂತೆ ತನ ಬಾಜನೊಡಿತ್ತಿನೆನ್ ಭೂಮಿಗ್ ಗುತ್ತೆ. ಅಪಗ ಸುರುತ್ತ ಮೃಗತ ಗುರ್ತೊನು ಪಾಡೊಂದು ಐತ ಮೂರ್ತಿನ್ ಪೂಜೆ ಮಲ್ತಿನಾಕುಲೆನ ಮೆಯಿತ ಮಿತ್ತ್ ಭಯಂಕರ ಬೇನೆದ ನಂಜಿಪುಡಿ ಲಕ್ಕ್‌ಂಡ್.</verse>
				<verse number="3">ರಡ್ಡನೆದ ದೂತೆ ತನ ಬಾಜನೊಡಿತ್ತಿನೆನ್ ಕಡಲ್‌ಗ್ ಗುತ್ತೆ. ಐತ ನೀರ್ ಸೈತಿನಾಯನ ನೆತ್ತೆರ್‌ದ ಲೆಕ್ಕ ಆಂಡ್ ಬೊಕ್ಕ ಕಡಲ್‌ಡಿತ್ತಿ ಮಾತ ಜೀವಜಂತುಲು ಸೈತ್ಂಡ್.</verse>
				<verse number="4">ಮೂಜನೆ ದೂತೆ ತನ ಬಾಜನೊಡಿತ್ತಿನೆನ್ ತುದೆಕುಲೆ ಮಿತ್ತ್‌ಲಾ ನೀರ್‌ದ ವಸರ್‌ದ ಮಿತ್ತ್‌ಲಾ ಗುತ್ತೆ. ಅವು ನೆತ್ತೆರ್‌ದ ಲೆಕ್ಕ ಆಂಡ್.</verse>
				<verse number="5">ಐಡ್ದ್ ಬೊಕ್ಕ ನೀರ್‌ದ ಮಿತ್ತ್ ಅಧಿಪತಿ ಆದುಪ್ಪು ದೂತೆ, “ಏಪೊಗ್ಲಾ ಉಪ್ಪುನಾಯಾ, ಪರಿಶುದ್ಧದಾಯಾ, ಈ ಇಂಚನೆ ನ್ಯಾಯತೀರ್ಪು ಮಲ್ತಿನೆಡ್ದ್ ಈ ನೀತಿದಾಯೆನೇ ಆದುಲ್ಲ.</verse>
				<verse number="6">ಅಕುಲು ಪರಿಶುದ್ಧ ಜನೊಕುಲೆನಲಾ ಬೊಕ್ಕ ಪ್ರವಾದಿಲೆನಲಾ ನೆತ್ತೆರ್ ಗುತ್ತೆರ್. ಈ ಅಕ್ಲೆಗ್ ನೆತ್ತೆರ್‌ನೇ ಪರಿಯೆರೆ ಕೊರ್ತ. ನೆಕ್ಕ್ ಅಕುಲು ತಕ್ಕದಾಕುಲು,” ಪಂಡ್ದ್ ಪನ್ಪಿನೆನ್ ಕೇಂಡೆ.</verse>
				<verse number="7">ಐಡ್ದ್ ಬೊಕ್ಕ ಬಲಿಪೀಠೊಡ್ದು, “ಸರ್ವಶಕ್ತೆ ಆದುಪ್ಪು ಓ ದೇವೆರೇ, ನಿನ ನ್ಯಾಯತೀರ್ಪು ಸತ್ಯದವುಲಾ ನ್ಯಾಯದವುಲಾ ಆದುಂಡು ನಿಜ,” ಪಂಡ್ದ್ ಪನ್ಪಿನೆನ್ ಕೇಂಡೆ.</verse>
				<verse number="8">ನಾಲನೇ ದೂತೆ ತನ ಬಾಜನೊಡಿತ್ತಿನೆನ್ ಸೂರ್ಯನ ಮಿತ್ತ್ ಗುತ್ತೆ. ಅಪಗ ಸೂರ್ಯಗ್ ನರಮಾನಿಲೆನ್ ದೊಂಬುಡು ಕರ್‌ಂಟಾವುನ ಅಧಿಕಾರ ಕೊರ್‌ಂಡ್.</verse>
				<verse number="9">ನರಮಾನಿಲು ಆ ಭಯಂಕರ ಬೆಚ್ಚೊಗು ಬೆಯ್ತ್‌ದ್ ನರಳಿಯೆರ್ಡಲಾ ಅಕುಲು ದೇವೆರೆನ್ ಮೈಮೆ ಪಡೆಪಾವುಲೆಕ್ಕ ಪಶ್ಚಾತಾಪ ಪಡೆಯಂದೆ ಉಪದ್ರೊಲೆ ಮಿತ್ತ್ ಅಧಿಕಾರ ಇತ್ತಿ ದೇವೆರೆ ಪುದರ್‌ನ್ ದೂಷಣೆ ಮಲ್ತೆರ್.</verse>
				<verse number="10">ಐನನೇ ದೂತೆ ತನ ಬಾಜನೊಡಿತ್ತಿನೆನ್ ಸುರುತ್ತ ಮೃಗತ ಗದ್ದಿಗೆದ ಮಿತ್ತ್ ಮೈಪುನಗ ಐತ ರಾಜ್ಯ ಕತ್ತಲೆ ಆಂಡ್. ಜನೊಕುಲು ತನ್ಕುಲೆಗ್ ಆದುಪ್ಪು ಕಷ್ಟದ ದಿಸೆಡ್ದ್ ತನ್ಕುಲೆ ನಾಲಯಿಲೆನ್ ತುಚ್ಚೊಂದು,</verse>
				<verse number="11">ತನ್ಕುಲೆ ಕ್ರಿಯೊಲೆ ಸಂಗತಿಡ್ ಪಶ್ಚಾತಾಪ ಪಡೆಯಂದೆ ತನ್ಕುಲೆ ಕಷ್ಟದ ದಿಸೆಡ್ದ್‌ಲಾ ತನ್ಕ್‌ಲೆಗಾಯಿ ಪುಡಿತ್ತ ಡಿಸೆಡ್ದ್‌ಲಾ ಪರಲೋಕದ ದೇವೆರೆನ್ ದೂಷಣೆ ಮಲ್ತೆರ್.</verse>
				<verse number="12">ಆಜನೆ ದೂತೆ ತನ ಬಾಜನೊಡಿತ್ತಿನೆನ್ ಯೂಫ್ರೇಟೀಸ್ ಪನ್ಪಿ ಮಲ್ಲ ತುದೆಕ್ ಮೈಪುನಗ ಆ ತುದೆತ ನೀರ್ ಆಜಿದ್ ಪೋಂಡು. ನೆಡ್ದ್ ಮೂಡಾಯಿ ದಿಕ್ಕ್‌ಡ್ದ್ ಬರ್ಪಿ ಅರಸುಗು ಸಾದಿ ತಯಾರಾಂಡ್.</verse>
				<verse number="13">ಬೊಕ್ಕ ಘಟಸರ್ಪೆ, ಮೃಗ ಬೊಕ್ಕ ಸುಳ್ಳು ಪ್ರವಾದಿ ಮೊಕ್ಲೆನ ಬಾಯಿಡ್ದ್ ಮೂಜಿ ಕಪ್ಪೆಲೆಕ್ಕಂತಿನ ಅಶುದ್ಧ ಆತ್ಮೊಲು ಬರ್ಪಿನೆನ್ ತೂಯೆ.</verse>
				<verse number="14">ಉಂದು ಬಲತ್ತ ಕಾರ್ನಿಕೊಲೆನ್ ಮಲ್ಪುನ ದೆವ್ವೊಲು, ಭೂಲೋಕದ ಮಾತ ಅರಸೆರೆ ಕೈತಲ್‌ ಪೋದು, ಸರ್ವಶಕ್ತೆ ಆದುಪ್ಪು ದೇವೆರೆನ ಮಲ್ಲ ದಿನೊಟು ಆಪಿ ಯುದ್ಧೊಗು ಅಕ್ಲೆನ್ ಕೂಡಾವ.</verse>
				<verse number="15">“ಇಂದಾ, ಯಾನ್ ಕಲ್ವೆ ಬರ್ಪಿಲೆಕ್ಕನೇ ಬರ್ಪೆ. ತಾನ್ ಬತ್ತಲೆ ಆದ್ ತಿರ್ಗೊಂದು ಜನೊಕುಲೆಡ್ದ್ ಅವಮಾನೊಗು ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ತನ ಕುಂಟುನು ಜೋಕೆ ಮಲ್ತೊನುನಾಯೆ ಭಾಗ್ಯವಂತೆ.”</verse>
				<verse number="16">ಆ ದೆವ್ವೊಲು ಮಾತ ರಾಜೆರೆನ್ ಇಬ್ರಿಯ ಭಾಷೆಡ್ ಹರ್ಮಗೆದೋನ್ ಪನ್ಪಿ ಪುದರುಪ್ಪು ಜಾಗ್‌ಗ್ ಸೇರಾಯ.</verse>
				<verse number="17">ಏಳನೇ ದೂತೆ ತನ ಬಾಜನೊಡಿತ್ತಿನೆನ್ ಗಾಳಿ ಮಂಡಲದ ಮಿತ್ತ್ ಮೈಪುನಗ ಆಲಯೊಡುಪ್ಪು ಗದ್ದಿಗೆದ ಕಡೆಡ್ದ್ ಮಲ್ಲ ಶಬ್ಧ ಉಂಡಾದ್, “ಮುಗಿಂಡ್” ಪಂಡ್ದ್ ಪಂಡ್ಂಡ್.</verse>
				<verse number="18">ಅಪಗ ಮಿಂಚಿ, ಶಬ್ಧ, ತೆಡಿಲ್ ಉಂಡಾಂಡ್. ಉಂದತ್ತಂದೆ ಮಲ್ಲ ಭೂಕಂಪ ಆಂಡ್. ನರಮಾನಿಲು ಭೂಮಿದ ಮಿತ್ತ್ ಇತ್ತಿನೆಡ್ದಿಂಚಿ ಅಂಚಿತ್ತಿ ಭೂಕಂಪ ಆತಿನೇ ಇಜ್ಜಿ.</verse>
				<verse number="19">ಆ ಮಲ್ಲ ಪಟ್ಟಣ ಮೂಜಿ ಪಾಲಾಂಡ್. ಜನಾಂಗೊಲೆ ಮಿತ್ತ್ ಪಟ್ಟಣಲು ಬೂರುಂಡು. ಉಂದತ್ತಂದೆ ದೇವೆರ್ ಆ ಮಲ್ಲ ಬಾಬೆಲ್ ಪೇಂಟೆನ್‌ ನೆನೆಪು ಮಲ್ತೊಂದು ತನ ಕೋಪ ಪನ್ಪಿ ದ್ರಾಕ್ಷಾರಸದ ಬಾಜನೊನು ಆಲೆಗ್ ಪರಿಯೆರೆ ಕೊರಿಯೆ.</verse>
				<verse number="20">ಮಾತ ದ್ವೀಪೊಲು ಮಾಯ ಆಂಡ್. ಮಾತ ಪರ್ವತೊಲು ನೆಲ ಸಮ ಆಂಡ್.</verse>
				<verse number="21">ಬಾನೊಡ್ದು ನರಮಾನಿಲೆ ಮಿತ್ತ್ ಮಲ್ಲ ಆನೆಕಲ್ಲ್‌ದ ಬರ್ಸ ದೊರಿಂಡ್. ಒಂಜೊಂಜಿ ಬರ್ಸದ ಕಲ್ಲ್ ಹೆಚ್ಚಿಕಡಿಮೆ ನಾಲ್ ಮಣ ತೂಕ ಇತ್ತ್ಂಡ್. ಈ ಆನೆಕಲ್ಲ್‌ದ ಬರ್ಸದ ಕಾಟ ಹೆಚ್ಚಾಯಿನೆಡ್ದ್ ಆ ಬರ್ಸೊಡು ತಿಕ್ಕೊಂಡಿ ಜನೊಕುಲು ದೇವೆರೆನ್ ದೂಷಣೆ ಮಲ್ತೆರ್.</verse>
			</chapter>
			<chapter number="17">
				<verse number="1">ಬೊಕ್ಕ ಏಳ್‌ ಬಾಜನೊಲೆನ್ ಪತ್ತೊಂಡಿ ಏಳ್‌ ದೂತೆರೆಡ್ ಒರಿ ಎಂಕ್ ಬತ್ತ್‌ದ್ ಪಂಡಿನಿ, “ಬಲ, ದಿಂಜ ನೀರ್‌ದ ಮಿತ್ತ್ ಕುಲ್ಲುದಿನ ಆ ಮಲ್ಲ ಸೂಳೆಗಾಪಿ ನ್ಯಾಯತೀರ್ಪುನು ಯಾನ್ ನಿಕ್ಕ್ ತೋಜಾವೆ.</verse>
				<verse number="2">ಆಲೆನ ಒಟ್ಟುಗು ಇಡೀ ಲೋಕದ ಅರಸುನಕುಲು ಆಲೆಡೊಪ್ಪ ಹಾದ್ರ ಮಲ್ತ್‌ದೆರ್. ಬೊಕ್ಕ ಈ ಲೋಕದ ಜನೊಕುಲು ಆಲೆನ ಹಾದ್ರದ ದ್ರಾಕ್ಷಾರಸೊನು ಪರ್ದ್ ಅಮಲ್ ಆತೆರ್.” ಅಂದ್‌ದ್ ಪಂಡೆ.</verse>
				<verse number="3">ಅಪಗ ಆಯೆ ದೇವೆರಾತ್ಮ ದಿಂಜಿದ್ ಎನನ್ ದೆರ್ತೊಂದು ಕಾಡ್‌ಗ್ ಪೋಯೆ. ಅಲ್ಪ ಯಾನ್ ಕೆಂಪು ಬಣ್ಣದ ಮೃಗತ ಮಿತ್ತ್ ಕುಲ್ಲೊಂದಿತ್ತಿ ಒಂಜಿ ಪೊಂಜೊವುನು ತೂಯೆ. ದೇವೆರೆನ ದೂಷಣೆ ಮಲ್ಪು ಪುದರ್‌ಲು ಆ ಮೃಗತ ಮೈಟ್ ದಿಂಜಿದಿತ್ತ್ಂಡ್. ಐಕ್ ಏಳ್‌ ತರೆಲಾ ಪತ್ತ್ ಕೊಂಬುಲುಲಾ ಇತ್ತ್ಂಡ್.</verse>
				<verse number="4">ಆ ಪೊಂಜೊವು ನೇರಲೆ ಬೊಕ್ಕ ಕೆಂಪು ಕುಂಟುಲೆನ್ ಪಾಡೊಂದು, ಬಂಗಾರ್, ರತ್ನ, ಮುತ್ತುಲೆಡ್ದ್ ಐತ ಆದಿತ್ತಲ್. ಆಲೆನ ಕೈಟ್ ಒಂಜಿ ಬಂಗಾರ್‌ದ ಬಾಜನ ಇತ್ತ್ಂಡ್. ಅವು ಅಶುದ್ಧ ಕಾರ್ಯೊಲೆಡ್ಲಾ ಹಾದ್ರೊಡು ಉಂಡಾಯಿನ ಸಂಗತಿಲೆಡ್ಲಾ ದಿಂಜಿದಿತ್ತ್ಂಡ್.</verse>
				<verse number="5">ಆಲೆನ ಮುಂಡೊಡು, “ಬಾಬೆಲ್ ಪನ್ಪಿ ಮಲ್ಲ ಪಟ್ಟಣ, ಭೂಮಿಡುಪ್ಪು ಸೂಳೆಲೆಗ್ಲಾ ಭೂಮಿದ ಅಶುದ್ಧ ಕಾರ್ಯೊಲೆಗ್ಲಾ ಅಪ್ಪೆ,” ಪನ್ಪಿ ಅರ್ಥೊನು ತೆರಿಪಾವು ಪುದರ್ ಬರೆದಿತ್ತ್‌ಂಡ್.</verse>
				<verse number="6">ಆ ಪೊಂಜೊವು ದೇವಜನೊಕುಲೆನ ಬೊಕ್ಕ ಯೇಸುಗು ಸಾಕ್ಷಿ ಕೊರ್ದು ಸೈತಿನಾಕುಲೆನ ನೆತ್ತೆರ್‌ನ್ ಪರ್ದ್ ಅಮಲ್ ಆದಿತ್ತಿನೆನ್ ತೂಯೆ. ಯಾನ್ ಆಲೆನ್ ತೂದು ಅಚ್ಚಿರ ಪಡೆಯೆ.</verse>
				<verse number="7">ಅಪಗ ಆ ದೂತೆ ಎಂಕ್ ಪಂಡಿನಿ, “ಈ ದಾಯೆಗ್ ಅಚ್ಚಿರ ಬುಡ್ಪ? ಈ ಪೊಂಜೊವುನಲಾ ಆಲೆನ ವಾಹನ ಆದಿತ್ತ್‌ದ್ ಏಳ್‌ ತರೆಲಾ ಪತ್ತ್ ಕೊಂಬುಲಾ ಇತ್ತಿ ಮೃಗೊಡ್ದು ತೆರಿದ್ ಬರ್ಪಿ ಗುಟ್ಟುನು ಯಾನ್ ನಿಕ್ಕ್ ತೆರಿಪಾವೆ.</verse>
				<verse number="8">ಈ ತೂಯಿನ ಆ ಮೃಗ ಸುರುಟ್ಟು ಇತ್ತ್ಂಡ್, ಆಂಡ ಇತ್ತೆ ಇಜ್ಜಿ. ಆಂಡ ಪಾತಾಳೊಡ್ದು ಆಯೆ ಬೇಗೊಡು ಮಿತ್ತ್ ಬತ್ತ್‌ದ್ ನಿತ್ಯ ನಾಶನೊಗು ಪೋಪೆ. ಲೋಕ ಉಂಡಾಯಿನೆಡ್ದಿಂಚಿ ಏರೇರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆತಿಜಾ, ಅಕುಲು ಈ ಮೃಗೊನು ತೂದು ಉಂದು ಸುರುಟ್ಟು ಇತ್ತ್ಂಡ್, ಇತ್ತೆ ಇಜ್ಜಿ, ಕುಡ ಬರ್ಪುಂಡು ಅಂದ್‌ದ್ ತೆರಿದ್ ಅಚ್ಚಿರ ಪಡೆವೆರ್.</verse>
				<verse number="9">“ನೆಟ್ಟ್ ಜ್ಙಾನ ಇತ್ತಿ ಬುದ್ಧಿ ತೆರಿದಿನಾಯಗ್ ಮಾತ್ರ ಗೊತ್ತಾಪುಂಡು. ಆ ಏಳ್‌ ತರೆಕುಲು ಆ ಪೊಂಜೊವು ಕುಲ್ಲೊಂದಿನ ಏಳ್‌ ಗುಡ್ಡೆಲೆನ್ ತೋಜಾವುಂಡು.</verse>
				<verse number="10">ಅವು ಅತ್ತಂದೆ ಏಳ್‌ ರಾಜೆರೆಗ್ ಸೂಚನೆ ಆದುಂಡು. ಅಕ್ಲೆಡ್ ಐನ್ ರಾಜೆರ್ ಇದ ಮುಟ್ಟ ಬೂರ್ದು ಪೋತೆರ್; ಆಜನೆದಾಯೆ ಇತ್ತೆ ಆಳುವೆ; ಬೊಕ್ಕ ಏಳನೆದಾಯೆ ನನ ಬರಿಯೆರೆಗ್ ಉಲ್ಲೆ. ಆಂಡ ಆಯನ ಆಳಿಕೆ ಒಂತೆ ಮಾತ್ರ.</verse>
				<verse number="11">ದುಂಬು ಇತ್ತ್‌ದ್ ಇತ್ತೆ ಉಪ್ಪಂದಿನ ಆ ಮೃಗನೇ ಎನ್ಮನೇ ಅರಸು. ಆಯೆ ಆ ಏಳ್‌ ರಾಜೆರೆಗ್ ಸೇರ್ದಿನಾಯೆ, ನಾಶನೊಗು ಪೋಪೆ.</verse>
				<verse number="12">“ಈ ತೂಯಿನ ಆ ಪತ್ತ್ ಕೊಂಬುಲು ಅಂದ್ಂಡ, ರಾಜ್ಯೊನು ನನಲಾ ಆಳಂದಿನ ಪತ್ತ್ ರಾಜೆರ್‌. ಅಕುಲು ಒಂಜಿ ಗಳಿಗೆ ಮುಟ್ಟ ರಾಜಲೆಕ್ಕ ಆಳುನ ಅಧಿಕಾರೊನು ಮೃಗತೊಟ್ಟುಗು ಪಡೆವೆರ್.</verse>
				<verse number="13">ಅಕುಲು ಒಂಜೇ ಅಭಿಪ್ರಾಯ ಇತ್ತಿನಾಕುಲು ಆದಿತ್ತ್‌ದ್ ತನ್ಕುಲೆ ಬಲೊನ್ಲಾ ಅಧಿಕಾರೊನ್ಲಾ ಮೃಗೊಕ್ಕು ಕೊರ್ಪೆರ್.</verse>
				<verse number="14">ಅಕುಲು ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮಿತ್ತ್ ಲಡಯಿ ಮಲ್ಪುವೆರ್. ಆಂಡ ಆಯೆ ಕರ್ತವೆರೆ ಕರ್ತವೆಲಾ ರಾಜಾದಿರಾಜೆಲಾ ಆದಿತ್ತಿನೆಡ್ದ್ ಅಕ್ಲೆನ್ ಗೆಂದುವೆ. ಬೊಕ್ಕ ದೇವೆರ್ ಲೆತ್ತಿನಾಕುಲುಲಾ ದೇವೆರ್ ಅಜತ್‌ದಿನಾಕುಲುಲಾ ನಂಬಿಗಸ್ತೆರ್‌ಲಾ ಆದುಪ್ಪು ಆಯ ಕಡೆತಾಕುಲು ಗೆಂದುನೆಟ್ಟ್ ಪಾಲ್‌ದಾರೆರಾಪೆರ್.”</verse>
				<verse number="15">ನನಲಾ ಆ ದೂತೆ ಎನಡ ಪಂಡಿನಿ, “ಆ ಸೂಳೆ ಕುಲ್ಲುದಿ ನೀರ್‌ನ್ ಈ ತೂಯತ್ತಾ, ಅವು ಜನೊಕುಲು, ಜನಾಂಗೊಲು, ಗೋತ್ರೊಲು ಬೊಕ್ಕ ಭಾಷೆಲು ಆದುಂಡು.</verse>
				<verse number="16">ಉಂದತ್ತಂದೆ ಪತ್ತ್ ಕೊಂಬುಲೆನ್ಲಾ ಮೃಗೊನ್ಲಾ ತೂಯತ್ತಾ, ನೆಡ್ದ್ ತೋಜಿದ್ ಬರ್ಪಿನಾಕುಲು ಆ ಸೂಳೆನ್ ಪಗೆ ಮಲ್ತೊಂದು ಆಲೆನ್ ಗತಿದಾಂತಿನಲೆ ಲೆಕ್ಕಲಾ, ಕುಂಟು ದಾಂತಿನಲೆಲೆಕ್ಕಲಾ ಮಲ್ತ್‌ದ್ ಆಲೆನ ಮಾಸೊನು ತಿಂದ್‌ದ್ ಆಲೆನ್ ತೂಟು ಪೊತ್ತಾದ್ ಬುಡ್ಪೆರ್.</verse>
				<verse number="17">ದಾಯೆಗಂದ್ಂಡ ಅಕುಲು ದೇವೆರೆ ಅಭಿಪ್ರಾಯೊಲೆನ್ ನಡಪಾವೆರೆಗ್ ಒಂಜೇ ಮನಸ್‌ದಾಕುಲು ಆದಿತ್ತ್‌ದ್ ತನ್ಕುಲೆ ರಾಜ್ಯೊನು ಮೃಗೊಕು ಕೊರಿಯೆರೆಗ್ಲಾ ದೇವೆರ್ ತನ ಪಾತೆರೊಲು ನಡಪುನೆಟ್ಟ ಅಕ್ಲೆನ ಮನಸ್‌ನ್ ಒತ್ತಾಯ ಮಲ್ತೆ.</verse>
				<verse number="18">“ಈ ತೂಯಿನ ಆ ಪೊಂಜೊವು ಭೂಮಿದ ಅರಸೆರೆ ಮಿತ್ತ್ ಅಧಿಕಾರ ಪಡೆದುಪ್ಪು ಮಲ್ಲಪಟ್ಟಣನೇ.”</verse>
			</chapter>
			<chapter number="18">
				<verse number="1">ಉಂದು ಮಾತ ಆಯಿ ಬೊಕ್ಕ ಬಲತ್ತ ಅಧಿಕಾರ ಇತ್ತಿ ಬೊಕ್ಕೊರಿ ದೂತೆ ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ. ಆಯನ ಪ್ರಭಾವೊಡ್ದಾದ್ ಭೂಮಿಗ್ ಬೊಲ್ಪು ಉಂಡಾಂಡ್.</verse>
				<verse number="2">ಆಯೆ ಮಲ್ಲ ಸ್ವರೊಟ್ಟು ಬೊಬ್ಬೆ ದೀವೊಂದು, “ಬೂರಿಯಲ್, ಬೂರಿಯಲ್ ಬಾಬೆಲ್ ಪನ್ಪಿ ಮಲ್ಲ ಪಟ್ಟಣ ಬೂರಿಯಲ್. ದೆವ್ವೊಲು ಉಪ್ಪುನ ಜಾಗ್‌ಲಾ ಮಾತ ದುರಾತ್ಮೊಲೆಗ್ ಆಶ್ರಯಲಾ ಮಾತ ಮೈಲೆಲಾ ಪೇಸಿಗೆಲಾ ಇತ್ತಿ ಪಕ್ಕಿಲೆಗ್ಲಾ ಪಂಜರ ಆಯಲ್.</verse>
				<verse number="3">ಮಾತ ಜನಾಂಗೊಲು ಆಲೆನ ಹಾದ್ರದ ದ್ರಾಕ್ಷಾರಸೊನು ಪರಿಯೆರ್. ಲೋಕದ ಅರಸುನಕುಲು ಆಲೆನ ಒಟ್ಟುಗು ವ್ಯಭಿಚಾರ ಮಲ್ತೆರ್. ಆಲೆನ ಸುಖತ್ತ ಬಲೊಡ್ದು ಲೋಕದ ವ್ಯಾಪಾರಿಲು ಐಶ್ವರ್ಯವಂತೆರಾಯೆರ್,” ಅಂದ್‌ದ್ ಪಂಡೆ.</verse>
				<verse number="4">ಪರಲೋಕೊಡ್ದು ಬತ್ತಿ ಬೊಕ್ಕೊಂಜಿ ಸ್ವರೊನು ಕೇಂಡೆ ಅವು ಪಂಡಿನಿ ದಾನೆಂದ್ಂಡ, “ಎನ ಜನೊಕುಲೇ, ಆಲೆನ್ ಬುಡ್ದು ಬಲೆ. ನಿಕುಲು ಆಲೆನ ಪಾಪೊಲೆಡ್ ಪಾಲ್‌ದಾರೆರಾವೆರೆ ಬಲ್ಲಿ. ಆಲೆಗಾಪಿನ ಉಪದ್ರೊಲೆಡ್ ನಿಕುಲು ತಿಕ್ಕ್‌ದ್ ಬೂರಿಯೆರೆ ಬಲ್ಲಿ.</verse>
				<verse number="5">ಆಲೆನ ಪಾಪೊಲು ಒಂಜೆತ್ತ ಮಿತ್ತ್ ಒಂಜಿ ಸೇರ್ದ್ ಬಾನದ ಕೊಡಿ ಮುಟ್ಟ ಮುಟ್ಟುದುಂಡು. ದೇವೆರ್ ಆಲೆನ ಅನ್ಯಾಯೊನು ನೆನೆಪು ಮಲ್ತೊಂಡೆ.</verse>
				<verse number="6">ಬೇತೆಕ್ಲೆಗ್ ಆಲ್ ಮಲ್ತಿ ಲೆಕ್ಕನೇ ಆಲೆಗ್ಲಾ ಮಲ್ಪುಲೆ. ಆಲ್ ಮಲ್ತಿ ಕರ್ಮೊಲೆಗಾದ್ ಆಲೆಗ್ ರಡ್ಡ್ ಪಾಲ್ ಕೊರ್ಲೆ. ಆಲ್ ಕಲತಿನ ಬಾಜನೊಡು ಆಲೆಗ್ ರಡ್ಡೆತ್ತಾತ್ ಕಲತ್ ಕೊರ್ಲೆ.</verse>
				<verse number="7">ಆಲ್ ಏತ್‌ನೆಟ್ಟ ತನನೇ ಹೆಚ್ಚಾವೊಂದು ವೈಭೊವೊಡುಪ್ಪುವಲಾ ಅಡೆಮುಟ್ಟ ಆಲೆಗ್ ಬೇನೆನ್ಲಾ ದುಃಖೊನ್ಲಾ ಕೊರ್ಲೆ. ಆಲ್ ತನ ಉಡಲ್‌ಡ್, ‘ಯಾನ್ ರಾಣಿಯಾದ್ ಕುಲ್ಲೊಂದೆ, ಯಾನ್ ಕಂಡನಿ ಸೈತಿ ಗತಿದಾಂತಿನಾಲ್ ಅತ್ತ್. ಅಂಚಾದ್ ಯಾನ್ ಬುಲ್ಪುನವು ಅಗತ್ಯ ಇಜ್ಜಿ,’ ಅಂದ್‌ದ್ ಪನ್ಪಲ್.</verse>
				<verse number="8">ಆಲೆಗ್ ಮರಣ, ದುಃಖ, ಬರ ಇನ್ಪಿ ಇಕ್ಕಟ್ಟುಲು ಒಂಜೇ ದಿನೊಟು ಬರು. ಆಲ್ ತೂಟು ಪೊತ್ತುದು ಪೋಪಲ್. ದಾಯೆಗಂದ್ಂಡ ಆಲೆನ್ ನ್ಯಾಯತೀರ್ಪು ಮಲ್ಪು ದೇವೆರಾಯಿ ಕರ್ತವೆ ಶಕ್ತಿದಾಯೆ ಆದುಲ್ಲೆ.”</verse>
				<verse number="9">ಆಲೆಡೊಪ್ಪ ಹಾದ್ರ ಮಲ್ತ್‌ದ್ ಬೋಗಿಲಾದ್ ಬದ್‌ಕಿ ಭೂಮಿದ ಅರಸುಲು ಆಲೆನ ತೂತ ಪುಗೆನ್ ತೂನಗ</verse>
				<verse number="10">ಆಲೆನ ಸಂಕಟದ ದಿಸೆಡ್ದ್ ಪೋಡಿದ್ ದೂರೊಡು ಉಂತೊಂದು ಬೊಬ್ಬೆ ದೀವೊಂದು, ತಿಗಲೆ ಹಾಕೊಂದು, “ಅಯ್ಯೋ, ಅಯ್ಯೋ, ಮಲ್ಲಪಟ್ಟಣ, ಬಾಬೆಲೋ, ಬಲ ಇತ್ತಿ ಬಾಬೆಲೋ, ನಿಕ್ಕ್ ಏತ್ ಭಯಂಕರ ಸ್ಥಿತಿ ಆಂಡ್. ಒಂಜಿ ಗಳಿಗೆಡ್ ನಿನ ಮಿತ್ತ್ ದೇವೆರೆ ನ್ಯಾಯತೀರ್ಪು ಬತ್ತ್‌ಂಡತ್ತಾ?” ಅಂದ್‌ದ್ ಪನ್ಪೆರ್.</verse>
				<verse number="11">ಉಂದತ್ತಂದೆ ಲೋಕದ ವ್ಯಾಪಾರಿಲು ಆಲೆಗಾದ್ ಬುಲ್ತುದು ಅರಬಾಯಿ ದೀವೊಂದು, ತನ್ಕುಲೆ ಮಂಜಿಡ್ದ್ ಸಾಮಾನ್‌ಲೆನ್ ದೆತ್ತೊನುನಾಕುಲು ನನ ಇಜ್ಜೆರತ್ತಾ.</verse>
				<verse number="12">ಬಂಗಾರ್, ಬೊಳ್ಳಿ, ರತ್ನ, ಮುತ್ತು, ಎಡ್ಡೆ ನಾರ್‌ಮಡಿತ ಕುಂಟು, ನೇರಲೆ ಬಣ್ಣದ ಕುಂಟು, ರೇಶ್ಮೆ, ಕೆಂಪು ಬಣ್ಣದ ಕುಂಟು, ಕಮ್ಮೆನದ ಮರತ ವಸ್ತುಲು, ದಂತದ ಸಾಮಾನುಲು, ಎಡ್ಡೆ ಕ್ರಯತ್ತ ಮರ, ಪಿತ್ತಲೆ, ಕರ್ಬ, ಶಿಲೆ ನೆಡ್ದ್ ಮಲ್ತ್‌ದಿನ ಮಾತ ತರತ ಬಾಜನೊಲು</verse>
				<verse number="13">ಲವಂಗಚೆಕ್ಕೆ, ಧೂಪ, ರಕ್ತಬೋಳ, ಕಮ್ಮೆನದ ತೈಲ, ದ್ರಾಕ್ಷಾರಸ, ಎಣ್ಣೆ, ಎಡ್ಡೆ ಹಿಟ್ಟ್, ಗೋದಿ, ಕೈಕಂಜಿಲು, ಕುರಿ, ಕುದುರೆಲು, ರಥೊಲು, ಗುಲಾಮೆರ್, ನರಮಾನಿಲು ಉಂದೆನ್ ಮಾತೆನ್ ದೆತ್ತೊನುನಾಕುಲು ಏರ್ಲಾ ಇಜ್ಜೆರತ್ತಾ ಅಂದ್‌ದ್ ದುಃಖ ಮಲ್ಪುವೆರ್.</verse>
				<verse number="14">ವ್ಯಾಪಾರಿಲು ಆಲೆಗ್, “ಬಾಬೆಲ್ ನಿನ ಪ್ರಾಣ ಬಯಕಿ ಫಲವಸ್ತುಲು ನಿಕ್ಕ್ ತತ್ತ್‌ಂಡ್, ಮಾತ ಪೊರ್ಲು ಊಂಚಿ ಇತ್ತಿನವು ನಿನಡ್ದ್ ಪೋಂಡು, ಅವು ನಿಕ್ಕ್ ನನ ತಿಕ್ಕುನೇ ಇಜ್ಜಿ,” ಪಂಡ್ದ್ ಪಂಡೆರ್.</verse>
				<verse number="15">ವ್ಯಾಪಾರ ಮಲ್ತ್‌ದ್ ಆಲೆಡ್ದ್ ಐಶ್ವರ್ಯವಂತೆರಾಯಿ ವ್ಯಾಪಾರಿಲು ಆಲೆಗಾಯಿನ ಮಲ್ಲ ಬೇನೆನ್ ತೂದು ಪೋಡಿದ್ ದೂರ ಉಂತುದು ದುಃಖೊಡು ಬುಲ್ತೊಂದಿತ್ತೆರ್.</verse>
				<verse number="16">ಅಕುಲು “ಅಯ್ಯೋ, ಅಯ್ಯೋ, ಮೆಯಿಟ್ ಎಡ್ಡೆ ನಾರ್‌ಮಡಿತ ಕುಂಟು, ನೇರಲೆ, ಕೆಂಪು ಪಟ್ಟೆದ ಕುಂಟು ಪೊದೆತೊಂದು, ಬಂಗಾರ್, ರತ್ನ, ಮುತ್ತುಲೆಡ್ದ್ ತನನ್ ಐತ ಮಲ್ತೊಂದಿತ್ತಿ ಆ ಮಲ್ಲ ಪಟ್ಟಣೊಗು ವಾ ಗತಿ ಬತ್ತ್ಂಡ್.</verse>
				<verse number="17">ಆತ್ ಐಶ್ವರ್ಯ ಒಂಜೇ ಗಳಿಗೆಡ್ ನಾಶ ಆಂಡತ್ತಾ?” ಅಂದ್‌ದ್ ಪನೊಂದಿತ್ತೆರ್. ಉಂದತ್ತಂದೆ ಕಪ್ಪಲ್‌ದ ನಾವಿಕೆರ್ಲಾ ಗುರ್ಕಾರನಾಕುಲುಲಾ, ಕಪ್ಪಲ್‌ಡ್ ಪ್ರಯಾಣ ಮಲ್ಪುನಾಕುಲುಲಾ ಕೂಲಿದಾಕುಲುಲಾ ಕಡಲ್ಡ್ ಬೇಲೆನ್ ಮಲ್ತ್‌ದ್ ಬದುಕುನಾಕುಲುಲಾ ದೂರೊಡು ಉಂತೊಂದು,</verse>
				<verse number="18">ಪೊತ್ತೊಂದಿತ್ತಿ ಪುಗೆನ್ ತೂದು, “ಇಂಚಿತ್ತಿ ಮಲ್ಲಪಟ್ಟಣೊಗು ಸಮಾನವಾಯಿನವು ಒವ್ವಾಂಡಲಾ ಪಟ್ಟಣ ಉಂಡಾ?” ಪಂಡೆರ್.</verse>
				<verse number="19">ಅಪಗ ಅಕುಲು ತನ್ಕುಲೆ ದುಃಖೊನು ತೋಜಾವೆರೆಗಾದ್ರ ನೆಲತ್ತ ಮಣ್ಣ್‌ನ್ ತನ್ಕುಲೆ ತರೆತ ಮಿತ್ತ್ ದಕ್ಕೊಂದು ಬುಲ್ತೊಂದು ಅರಬಾಯಿ ದೀವೊಂದು, “ಅಯ್ಯೋ, ಅಯ್ಯೋ, ಕಡಲ್ಡ್ ಕಪ್ಪಲ್ ಇತ್ತಿನಾಕುಲು ಮಾತೆರ್ ಬಿಲೆ ಇತ್ತಿ ಸರಕುಲೆಡ್ದ್ ಐಶ್ವರ್ಯವಂತೆರಾದ್ ಮಲ್ತಿನ ಈ ಮಲ್ಲ ಪಟ್ಟಣೊಗು ಎಂಚಿತ್ತಿ ಗತಿ ಬತ್ತ್‌ಂಡತ್ತಾ. ಮೋಲ್ ಒಂಜೇ ಗಳಿಗೆಡ್ ಹಾಳ್ ಆಯಲ್ ಅತ್ತಾ,” ಅಂದ್‌ದ್ ಬುಲ್ತುದು ಪಂಡೆರ್.</verse>
				<verse number="20">“ಪರಲೋಕನೇ ಸಂತೋಷ ಮಲ್ಪುಲ, ದೇವಜನೊಕುಲೇ, ಅಪೊಸ್ತಲೆರೇ, ಪ್ರವಾದಿಲೇ, ಮೋಲ್ ನಿಕ್ಲೆಗ್ ಅನ್ಯಾಯ ಮಲ್ತಿನೆಕ್ಕಾದ್ ದೇವೆರ್ ಆಲೆಗ್ ತೀರ್ಪು ಮಲ್ತಿನೆಡ್ದ್ ಸಂತೋಷ ಮಲ್ಪುಲೆ ಅಂದ್‌ದ್ ಆ ಸ್ಚರ ಪಂಡ್ಂಡ್.”</verse>
				<verse number="21">ಅಪಗ ಬಲಿಷ್ಟೆ ಆದುಪ್ಪು ಒರಿ ದೂತೆ ಮಲ್ಲ ಬೀಸುನ ಕಲ್ಲ್ ದಂಚಿನ ಒಂಜಿ ಕಲ್ಲ್‌ನ್ ದೆರ್ತ್ತ್‌ದ್ ಕಡಲ್ದ ಉಲಯಿ ಪಾಡ್ದ್, “ಮಲ್ಲ ಪಟ್ಟಣ ಆದುಪ್ಪು ಬಾಬೆಲ್ ಇಂಚೆನೇ ಬೂರ್‌ಂಡ್ ನನ ಏಪೊಗ್ಲಾ ತೋಜಂದ್.</verse>
				<verse number="22">ಬಾಬೆಲ್ ನಿನಡ ವೀಣೆದಾಕುಲುಲಾ ವಾದ್ಯದಾಕುಲುಲಾ ಕೊಳಲ್ ತುತೂರಿದಾಕುಲುಲಾ ಮಲ್ಪು ಸ್ವರ ಏಪೊಗ್ಲಾ ಕೇನಂದ್. ನನ ವಾ ಕೈಗಾರಿಕೆ ಮಲ್ಪುನಾಕುಲುಲಾ ನಿನಡ ನನ ಏಪೊಗ್ಲಾ ತೂವರೆ ತಿಕ್ಕಯೆರ್. ಬೀಸುನ ಕಲ್ಲ್‌ದ ವಾ ಶಬ್ಧಲಾ ನನ ನಿನಡ ಏಪೊಗ್ಲಾ ಕೇನಂದ್.</verse>
				<verse number="23">ತುಡರ್‌ದ ಬೊಲ್ಪು ನಿನಡ ಏಪೊಗ್ಲಾ ತೋಜಂದ್. ಮದ್ಮಯೆ ಮದ್ಮಲಾಡ್ಲೆನ ಸಂತೋಷದ ಸ್ವರ ನಿನಡ ನನ ಕೇನಂದ್. ನಿನ ವ್ಯಾಪಾರಿಲು ಲೋಕೊಡೇ ಪುದರ್ ಪೋತಿನಾಕುಲಾದಿತ್ತೆರ್. ನಿನ ಮಾಟ ಮಂತ್ರೊಲೆಡ್ದ್ ಮಾತ ಜನಾಂಗದಾಕುಲು ಮರ್ಲಾಯೆರ್.</verse>
				<verse number="24">ಪ್ರವಾದಿಲೆ, ದೇವಜನೊಕುಲೆ ನೆತ್ತೆರ್‌‌ಲಾ ಭೂಮಿದ ಮಿತ್ತ್ ಕೆರ್ಪಾವೊಂಡಿನಾಕುಲೆನ ಮಾತೆರ್‌ನ ನೆತ್ತೆರ್‌‌ಲಾ ನಿನಡ ತಿಕ್ಕ್‌ಂಡತ್ತಾ ಅಂದ್‌ದ್ ಪಂಡೆ.”</verse>
			</chapter>
			<chapter number="19">
				<verse number="1">ಉಂದೆಡ್ದ್ ಬೊಕ್ಕ ಪರಲೋಕೊಡ್ದು ಮಲ್ಲ ಗುಂಪುದ ಮಲ್ಲ ಒಂಜಿ ಸ್ವರೊನು ಕೇಂಡೆ. ಅಕುಲು “ಹಲ್ಲೆಲೂಯಾ, ರಕ್ಷಣೆಲಾ ಮೈಮೆಲಾ ಬಲಲಾ ನಮ ದೇವೆರೆಗೇ ಸೇರ್ದಿನವು.</verse>
				<verse number="2">ಆಯನ ನ್ಯಾಯತೀರ್ಪು ಸತ್ಯದವುಲಾ ನ್ಯಾಯದವುಲಾ ಆದುಂಡು. ತನ ಹಾದ್ರೊಡ್ದು ಲೋಕೊನು ಪೂರ ಹಾಳ್ ಮಲ್ತ್‌ದಿನ ಆ ಮಲ್ಲ ಮಾನ್ಯ ಕೆಟ್ಟ್‌ದಿ ವೇಶ್ಯೆಗ್ ಆಯೆ ತೀರ್ಪು ಮಲ್ತ್‌ದ್ ಆಲ್ ಆಯ ಸೇವಕೆರೆನ್ ಕೆರಿನೆಕ್ಕಾದ್ ಆಲೆಗ್ ಪಗತೆ ಕೊರ್ದು ತೀರಿಸಾವೊಂಡೆ.”</verse>
				<verse number="3">ರಡ್ಡನೆ ಸರಿ, “ಹಲ್ಲೆಲೂಯಾ, ಅಂದ್‌ದ್ ಬೊಬ್ಬೆ ಪಾಡ್ದ್, ಆಲ್ ಪೊತ್ತುನೆಟ್ಟ್ ಉಂಡಾಪಿ ಪುಗೆ ಏನಿತ್ಯೇನಿಗ್ಲಾ ಏರ್ದ್ ಪೋಪುಂಡು,” ಅಂದ್‌ದ್ ಪಂಡೆರ್.</verse>
				<verse number="4">ಅಪಗ ಇರ್ವತ್ತನಾಲ್ ಹಿರಿಯೆರ್‌ಲಾ ಆ ನಾಲ್ ಜೀವಿಲುಲಾ ಅಡ್ಡಬೂರ್ದು ಗದ್ದಿಗೆಡಿತ್ತಿನ ದೇವೆರೆನ್ ಆರಾಧನೆ ಮಲ್ತ್‌ದ್, “ಆಮೆನ್, ಹಲ್ಲೆಲೂಯಾ,” ಪಂಡೆರ್.</verse>
				<verse number="5">ಐಡ್ದ್ ಬೊಕ್ಕ ಗದ್ದಿಗೆದ ಕಡೆಡ್ದ್ ಬತ್ತಿ ಒಂಜಿ ಸ್ವರ, “ದೇವೆರೆನ ಮಾತ ಸೇವಕೆರೇ, ದೇವೆರೆಗ್ ಪೋಡಿಯುನ ಹಿರಿಕಿರಿಯೆರೇ ನಮ ದೇವೆರೆನ್ ಪುಗರ್‌ಲೆ. ಅಂದ್‌ದ್ ಪಂಡ್ಂಡ್.”</verse>
				<verse number="6">ಬೊಕ್ಕ ಜನೊಕುಲೆ ಮಲ್ಲ ಗುಂಪುದ ಗೌಜಿದಲೆಕ್ಕಲಾ ನೀರ್‌ದ ಬೊಲ್ಲದ ಅಬ್ಬರದ ಲೆಕ್ಕಲಾ ಮಲ್ಲ ತೆಡಿಲ್‌ದ ಶಬ್ಧದಲೆಕ್ಕಲಾ ಇತ್ತಿ ಒಂಜಿ ಶಬ್ಧೊನು ಕೇಂಡೆ, “ಹಲ್ಲೆಲೂಯಾ, ಸರ್ವಶಕ್ತೆ ಆದಿತ್ತಿ ನಮ್ಮ ದೇವೆರಾಯಿ ಕರ್ತವೆ ಆಳುವೆ.</verse>
				<verse number="7">ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮದ್ಮೆದ ಕಾಲ ಬತ್ತ್ಂಡ್. ಆಯಗ್ ಮದ್ಮೆ ಆಪಿನ ಬೊಡೆದಿ ತನನ್ ತಯಾರ್ ಮಲ್ತೊಂದಲ್. ನಮ ಸಂತೋಷೊಡು ಉಲ್ಲಾಸ ಮಲ್ಪುಗ; ಆಯಗ್ ಮೈಮೆನ್ ಸಂದಾಗ ಅಂದ್‌ದ್ ಪಂಡ್ಂಡ್.</verse>
				<verse number="8">ಮಿಂಚುನವುಲಾ ಶುದ್ಧದವುಲಾ ಇತ್ತಿ ಎಡ್ಡೆ ನಾರ್‌ಮಡಿತ ಕುಂಟುನು ತುತ್ತೊನೆರೆ ಆಲೆಗ್ ಕೊರ್ತುಂಡು. ಆ ನಾರ್‌ಮಡಿ ಪಂಡ್ಂಡ ದೇವಜನೊಕುಲೆ ನೀತಿದ ಕಾರ್ಯೊಲು.”</verse>
				<verse number="9">ಉಂದತ್ತಂದೆ ದೂತೆ ಎನ್ನೊಟ್ಟುಗು ಪಾತೆರೊಂದು, ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಮದ್ಮೆದ ಲೇಸ್‌ಗ್ ಲೆಪ್ಪಾವೊಂಡಿನಾಕುಲು ಭಾಗ್ಯವಂತೆರ್ ಅಂದ್‌ದ್ ಬರೆಲ ಅಂದ್‌ದ್ ಎಂಕ್ ಪಂಡ್ದ್, ಈ ಪಾತೆರೊಲು ದೇವೆರೆ ಸತ್ಯದ ಪಾತೆರೊಲಾದುಂಡು ಅಂದ್‌ದ್ ಪಂಡೆ.</verse>
				<verse number="10">ಅಪಗ ಯಾನ್ ಆಯಗ್ ಅಡ್ಡ ಬೂರೊಡು ಅಂದ್‌ದ್ ಆಯ ಕಾರ ಎದುರು ಬೂರ್ನಗ ಆಯೆ, ಮಲ್ಪಡ ತೂಲ, ಯಾನ್ ನಿಕ್ಕ್‌ಲಾ ಯೇಸುನ ಸಂಗತಿದ ಸಾಕ್ಷಿನ್ ಪಂಡ್ದುಪ್ಪುನ ನಿನ ಸಹೋದರೆರೆಗ್ಲಾ ಜತೆಸೇವಕೆ ಆದುಲ್ಲೆ. ದೇವೆರೆಗೇ ಅಡ್ಡಬೂರ್ಲ ಅಂದ್‌ದ್ ಪಂಡೆ. ಯೇಸುನ ಸಾಕ್ಷಿಯೇ ಪ್ರವಾದನೆದ ಆತ್ಮ ಆದುಂಡು.</verse>
				<verse number="11">ಬೊಕ್ಕ ಪರಲೋಕ ಜತ್ತ್‌ದುಪ್ಪುನೆನ್ ಯಾನ್ ತೂಯೆ. ಅಪಗ ಇಂದಾ ಒಂಜಿ ಬೊಲ್ದು ಕುದುರೆ ಎಂಕ್ ತೋಜ್ಂಡ್. ಐತ ಮಿತ್ತ್ ಕುಲ್ಲುದಿನಾಯಗ್ ನಂಬಿಗಸ್ತೆಲಾ ಸತ್ಯದಾಯೆಲಾ ಅಂದ್‌ದ್ ಪುದರ್. ಆಯೆ ನೀತಿಡ್ ನ್ಯಾಯತೀರ್ಪು ಮಲ್ಪುವೆ. ನೀತಿಡ್ ಲಡಯಿ ಮಲ್ಪುವೆ.</verse>
				<verse number="12">ಆಯನ ಕಣ್ಣ್ ಉರಿಯುನ ತೂತ ಲೆಕ್ಕ ಉಂಡು. ಆಯ ತರೆತ ಮಿತ್ತ್ ದಿಂಜ ಕಿರೀಟೊಲು ಉಂಡು. ಆಯಗ್ ಒಂಜಿ ಪುದರ್ ಬರೆದ್ ಕೊರ್ತುಂಡು. ಅವು ಆಯಗೇ ಅತ್ತಂದೆ ಬೇತೆ ಏರೆಗ್ಲಾ ತೆರಿಯಂದ್.</verse>
				<verse number="13">ಆಯೆ ನೆತ್ತೆರ್‌ಡ್ ಮುರ್ಕಾದಿನ ಕುಂಟುನು ಪಾಡೊಂದಿತ್ತೆ. ಆಯಗ್, “ದೇವೆರೆ ಪಾತೆರ,” ಅಂದ್‌ದ್ ಪುದರ್.</verse>
				<verse number="14">ಪರಲೋಕೊಡುಪ್ಪು ಸೈನ್ಯದಾಕುಲು ಶುದ್ಧ ಬೊಲ್ದು ಎಡ್ಡೆ ನಾರ್‌ಮಡಿತ ಕುಂಟು ಪಾಡೊಂದು ಬೊಲ್ದು ಕುದುರೆಲೆ ಮಿತ್ತ್ ಕುಲ್ಲೊಂದು ಆಯ ಬೆರಿಯೆ ಬರೊಂದಿತ್ತೆರ್.</verse>
				<verse number="15">ಜನಾಂಗೊಲೆನ್ ಸೋಪಾವೆರೆಗಾದ್ರ ಒಂಜಿ ಪರ್ತೆದ ಕತ್ತಿ ಆಯ ಬಾಯಿಡ್ದ್ ಬರ್ಪುಂಡು. ಆಯೆ ಕರ್ಬದ ಕೋಲುಡ್ದು ಅಕ್ಲೆನ್ ಆಳುವೆ. ಸರ್ವಶಕ್ತೆ ಆದುಪ್ಪು ದೇವೆರೆನ ಭಯಂಕರ ಕೋಪ ಪನ್ಪಿ ದ್ರಾಕ್ಷೆದ ಗಾಣೊಡಿತ್ತಿನೆನ್ ದೊಂಕುವೆ.</verse>
				<verse number="16">ಆಯನ ತೊಡೆತ ಮಿತ್ತ್‌ದ ಕುಂಟುಡು, “ರಾಜಾದಿರಾಜೆಲಾ ಕರ್ತವೆರೆ ಕರ್ತವೆಲಾ,” ಇನ್ಪಿ ಪುದರ್ ಬರೆತ್ಂಡ್.</verse>
				<verse number="17">ಐಡ್ದ್ ಬೊಕ್ಕ ಒರಿ ದೂತೆ ಸೂರ್ಯನ ಮಿತ್ತ್ ಉಂತುದಿನೆನ್ ತೂಯೆ. ಆಯೆ ನಡು ಬಾನೊಡು ರಾವೊಂದುಪ್ಪು ಮಾತ ಪಕ್ಕಿಲೆಗ್ ಮಲ್ಲ ಶಬ್ಧೊಡು ಇಂಚ ಪನೊಂದಿತ್ತೆ, “ಬಲೆ, ದೇವೆರೆನ ಮಲ್ಲ ವಣಸ್‌ದ ಲೇಸ್‌ಗ್ ಸೇರ್ದ್ ಬಲೆ.</verse>
				<verse number="18">ಅರಸುಲೆನ ಮಾಸೊನು, ಸೇನಾಧಿಪತಿಲೆನ ಮಾಸೊನು, ಬಲಿಷ್ಟೆರೆ ಮಾಸೊನು ಕುದುರೆಲೆ ಮಾಸೊನು, ಬೊಕ್ಕ ಐತ ಮಿತ್ತ್ ಕುಲ್ಲುದಿನಾಕುಲೆನ, ಸ್ವತಂತ್ರೆರ್, ಗುಲಾಮೆರ್, ಬಡವೆರ್ ಮಲ್ಲಾಕುಲು ಮೊಕ್ಲೆನ ಮಾತೆರೆ ಮಾಸೊನು ತಿನಿಯೆರೆ ಬಲೆ.” ಅಂದ್‌ದ್ ಪಂಡೆ.</verse>
				<verse number="19">ಬೊಕ್ಕ ಆ ಸುರುತ್ತ ಮೃಗಲಾ ಭೂಮಿದ ಅರಸೆರ್‌ಲಾ ಅಕ್ಲೆನ ಸೈನ್ಯದಾಕುಲುಲಾ ಆ ಕುದುರೆದ ಮಿತ್ತ್ ಕುಲ್ಲುದಿತ್ತಿನಾಯನ ಮಿತ್ತ್‌ಲಾ ಆಯನ ಸೈನ್ಯದ ಮಿತ್ತ್‌ಲಾ ಲಡಯಿ ಮಲ್ಪೆರೆಗಾದ್ ಸೇರ್ದ್ ಬತ್ತಿನೆನ್ ತೂಯೆ.</verse>
				<verse number="20">ಅಪಗ ಮೃಗ ತಿಕ್ಕ್ಂಡ್. ಉಂದತ್ತಂದೆ ಮೃಗತ ಎದುರು ಬಲತ್ತ ಕಾರ್ನಿಕೊಲೆನ್ ಮಲ್ತ್‌ದ್ ಮೃಗತ ಗುರ್ತ ಪಾಡೊಂದಿನಾಕುಲೆನ್ಲಾ ಐತ ಮೂರ್ತಿಲೆನ್ ಆರಾಧನೆ ಮಲ್ಪುನಾಕುಲೆನ್ಲಾ ಮೋಸ ಮಲ್ತ್‌ದಿ ಆ ಸುಳ್ಳು ಪ್ರವಾದಿಲಾ ಐತ ಜತೆಟ್ ತಿಕ್ಕಿಯೆ. ಇರ್ವೆರೆನ್ಲಾ ಜೀವ ಇತ್ತಿಲೆಕ್ಕನೆ ಗಂಧಕ ಪೊತ್ತುನ ತೂತ ಕೆರೆಕ್ ದಕ್ಕಿಯೆರ್.</verse>
				<verse number="21">ಬಾಕಿದಾಕುಲು ಕುದುರೆದ ಮಿತ್ತ್ ಕುಲ್ಲುದಿನಾಯನ ಬಾಯಿಡ್ದ್ ಬತ್ತಿ ಪರ್ತೆದ ಕತ್ತಿಡ್ದ್ ನಾಶ ಆಯೆರ್. ಬೊಕ್ಕ ಮಾತ ಪಕ್ಕಿಲು ಆ ಮಾಸೊನು ಬಂಜಿ ನಿಲಿಕೆ ತಿಂದ.</verse>
			</chapter>
			<chapter number="20">
				<verse number="1">ಅಪಗ ಒರಿ ದೂತೆ ಪಾತಾಳದ ಬೀಗದ ಕೈನ್ಲಾ ಮಲ್ಲ ಸರಪೊಳಿನ್ಲಾ ಕೈಟ್ ಪತ್ತೊಂದು ಪರಲೋಕೊಡ್ದು ಜತ್ತ್‌ದ್ ಬರ್ಪಿನೆನ್ ತೂಯೆ.</verse>
				<verse number="2">ಆಯೆ ಪಿಶಾಚಿಲಾ ಸೈತಾನೆಲಾ ಆದುಪ್ಪು ಪುರಾತನ ಸರ್ಪೆ ಪನ್ಪಿ ಘಟಸರ್ಪೊನು ಪತ್ತ್‌ದ್ ಸರಪೊಳಿಡ್ ಕಟ್ಟ್‌ದ್ ಸಾರ ವರ್ಸ ಸೆರೆಮನೆಟ್ ದೀಯೆ.</verse>
				<verse number="3">ಆ ಸಾರ ವರ್ಸ ಮುಗಿನ ಮುಟ್ಟ ಸೈತಾನೆ ನನಲಾ ಜನೊಕುಲೆನ್ ಮೋಸ ಮಲ್ಪಂದಿಲೆಕ್ಕ, ದೂತೆ ಆಯನ್ ಪಾತಾಳೊಗು ನೂಕುದು ಬಾಕಿಲ್ ಮುಚ್ಚುದು ಐಕ್ ಮುದ್ರೆ ಪಾಡಿಯೆ. ಆ ಸಾರ ವರ್ಸ ಆಯಿ ಬೊಕ್ಕ ಆಯಗ್ ಒಂತೆ ಕಾಲ ಬುಡುಗಡೆ ಆವೊಡು.</verse>
				<verse number="4">ಬೊಕ್ಕ ಗದ್ದಿಗೆಲೆನ್ ತೂಯೆ. ಐತ ಮಿತ್ತ್ ಜನೊಕುಲು ಕುಲ್ಲುದಿತ್ತೆರ್. ನ್ಯಾಯತೀರ್ಪು ಮಲ್ಪುನ ಅಧಿಕಾರ ಅಕ್ಲೆಗ್ ಕೊರ್ದಿತ್ತ್‌ಂಡ್. ಬೊಕ್ಕ ಯೇಸುನ ಸಾಕ್ಷಿಗಾದ್ ದೇವೆರೆ ಪಾತೆರೊಗಾದ್ ತರೆ ಕಡ್ತ್‌ದಿನಾಕುಲೆನ ಆತ್ಮೊಲೆನ್ಲಾ ಮೃಗೊಕ್ಲಾ ಐತ ಮೂರ್ತಿಗ್ಲಾ ಅಡ್ಡಬೂರಂದೆ ತನ್ಕುಲೆ ಮುಂಡದ ಮಿತ್ತ್ ಬೊಕ್ಕ ಕೈತ ಮಿತ್ತ್ ಗುರ್ತ ಪಾಡೊನಂದೆ ಉಪ್ಪುನಾಕುಲೆನ್ಲಾ ತೂಯೆ. ಅಕುಲು ಜೀವಾದ್ ಲಕ್ಕ್‌ದ್ ಕ್ರಿಸ್ತಡೊಪ್ಪ ಸಾರ ವರ್ಸ ಆಳಿಯೆರ್.</verse>
				<verse number="5">ಒರಿದಿ ಸೈತಿನಾಕುಲು ಆ ಸಾರ ವರ್ಸ ಮುಗಿನೆಟ್ಟ ಜೀವ ಆದ್ ಲಕ್ಕುಜೆರ್. ಉಂದೇ ಸುರುತ್ತ ಪುನರುತ್ಥಾನ.</verse>
				<verse number="6">ಸುರುತ್ತ ಪುನರುತ್ಥಾನೊಡು ಸೇರ್ದುಪ್ಪುನಾಯೆ ಭಾಗ್ಯವಂತೆಲಾ ಪರಿಶುದ್ಧದಾಯೆಲಾ ಆದುಲ್ಲೆ. ಇಂಚಿತ್ತಿನಾಕುಲೆನ ಮಿತ್ತ್ ರಡ್ಡನೆ ಮರಣೊಗು ಅಧಿಕಾರ ಇಜ್ಜಿ. ಆಂಡ ಅಕುಲು ದೇವೆರೆಗ್ಲಾ ಕ್ರಿಸ್ತಗ್ಲಾ ಯಾಜಕೆರಾದ್ ಕ್ರಿಸ್ತನೊಟ್ಟುಗು ಸಾರ ವರ್ಸ ಆಳುವೆರ್.</verse>
				<verse number="7">ಆ ಸಾರ ವರ್ಸ ಕರಿಬೊಕ್ಕ ಸೈತಾನಗ್ ಸೆರೆಮನೆಡ್ದ್ ಬುಡುಗಡೆ ಆಪುಂಡು.</verse>
				<verse number="8">ಆಯೆ ಪಿದಯಿ ಬತ್ತ್‌ದ್ ಭೂಮಿದ ನಾಲ್ ದಿಕ್ಕ್‌ಲೆಡುಪ್ಪು ಗೋಗ್, ಮಾಗೋಗ್ ಪನ್ಪಿ ಜನಾಂಗೊಲೆನ್ ಮೋಸ ಮಲ್ತ್‌ದ್ ಅಕ್ಲೆನ್ ಲಡಯಿಗ್ ಒಟ್ಟು ಸೇರಾವೆ. ಅಕ್ಲೆನ ಸಂಖ್ಯೆ ಕಡಲ್ದ ಪೊಯ್ಯೆದಾತ್ ಉಪ್ಪುಂಡು.</verse>
				<verse number="9">ಅಕುಲು ಭೂಮಿಡ್ ಮಾತ ಕಡೆಟ್ಟ್ ಪಸರೊಂದು ದೇವಜನೊಕುಲೆನ ದಂಡ್‌ಗ್ಲಾ ಪ್ರೀತಿದ ಪೇಂಟೆಗ್ಲಾ ಸುತ್ತು ಪಾಡಿಯೆರ್. ಅಪಗ ಪರಲೋಕೊಡ್ದು ತೂ ಜತ್ತ್‌ದ್ ಬತ್ತ್‌ದ್ ಅಕ್ಲೆನ್ ಪೊತ್ತಾದ್ ಬುಡುಂಡು.</verse>
				<verse number="10">ಉಂದತ್ತಂದೆ ಅಕ್ಲೆನ್ ಮರ್ಲ್ ಕಟ್ಟಾಯಿ ಸೈತಾನನ್ ತೂತವುಲಾ ಗಂಧಕದವುಲಾ ಅರ್ಲುನ ಕೆದುಕು ಪಾಡ್ಪಾಂಡ್. ಅಲ್ಪ ಮೃಗಲಾ, ಸುಳ್ಳು ಪ್ರವಾದಿಲಾ ಉಲ್ಲೆರ್. ಅಕುಲು ರಾತ್ರೆ ಪಗೆಲ್ ಏನಿತ್ಯೇನಿಗ್ಲಾ ಬೇನೆಡ್ ನರಳೊಂದುಪ್ಪುವೆರ್.</verse>
				<verse number="11">ಐಡ್ದ್ ಬೊಕ್ಕ ಬೊಲ್ಲನೆದ ಮಲ್ಲ ಗದ್ದಿಗೆನ್ಲಾ ಐಟ್ಟ್ ಕುಲ್ಲುದಿನಾಯನ್ಲಾ ತೂಯೆ. ಆಯನ ಎದುರುಡ್ದು ಭೂಮಿಲಾ ಬಾನಲಾ ಪಾರ್‌ಪೋದು ತೋಜಂದಿಲೆಕ್ಕ ಆಂಡ್.</verse>
				<verse number="12">ಉಂದತ್ತಂದೆ ಸೈತ್ ಪೋತಿನ ಎಲ್ಯಾಕುಲುಲಾ ಮಲ್ಲಾಕುಲುಲಾ ಗದ್ದಿಗೆದ ಎದುರುಡು ಉಂತುದಿತ್ತಿನೆನ್ ತೂಯೆ. ಅಪಗ ಪುಸ್ತಕೊಲು ಜತ್ತ್ಂಡ್. ಬೊಕ್ಕ ನನೊಂಜಿ ಪುಸ್ತಕಲಾ ಜತ್ತ್ಂಡ್. ಅವು ಜೀವಬಾಧ್ಯೆರೆ ಪುಸ್ತಕ ಆ ಪುಸ್ತಕೊಲೆಡ್ ಬರೆದಿತ್ತಿ ಸಂಗತಿಲೆ ಆಧಾರೊಡ್ದು ಅಕುಲಾಕುಲೆ ಕ್ರಿಯೊಲೆ ಪ್ರಕಾರ ಸೈತಿನಾಕುಲೆಗ್ ನ್ಯಾಯತೀರ್ಪು ಆಂಡ್.</verse>
				<verse number="13">ಸಮುದ್ರ ತನಡಿತ್ತಿ ಸೈತಿನಾಕುಲೆನ್ ಒಪ್ಪಿಸಾಂಡ್, ಮರಣಲಾ ಪಾತಾಳಲಾ ತನ್ಕುಲೆ ವಶೊಟಿತ್ತಿನಾಕುಲೆನ್ ಒಪ್ಪಿಸಾಯ. ಅಕ್ಲೆಗ್ ಒರಿ ಒರಿಯಗ್ ಅಕುಲಾಕುಲೆ ಕ್ರಿಯೊಲೆಗ್ ತಕ್ಕಾದ್ ನ್ಯಾಯತೀರ್ಪು ಆಂಡ್.</verse>
				<verse number="14">ಐಡ್ದ್ ಬೊಕ್ಕ ಮರಣಲಾ ಪಾತಾಳಲಾ ತೂತ ಕೆರೆಕ್ ಬೂರಿಯ. ಈ ತೂತ ಕೆರೆ ರಡ್ಡನೆ ಮರಣ.</verse>
				<verse number="15">ಏರೆನ ಪುದರ್ ಜೀವಬಾಧ್ಯೆರೆ ಪುಸ್ತಕೊಡು ಬರೆದಿತ್ತಿನವು ಇಜ್ಜಾಂಡ ಅಕ್ಲೆನ್ ತೂತ ಕೆರೆಕ್ ನೂಕುದು ಪಾಡ್ಯೆರ್.</verse>
			</chapter>
			<chapter number="21">
				<verse number="1">ಬೊಕ್ಕ ಯಾನ್ ಪೊಸ ಪರಲೋಕೊನ್ಲಾ ಪೊಸ ಭೂಮಿನ್ಲಾ ತೂಯೆ. ದುಂಬುದ ಪರಲೋಕಲಾ ಭೂಮಿಲಾ ಇಜ್ಜಂದೆ ಪೋಂಡು. ಬೊಕ್ಕ ಕಡಲ್‌ಲಾ ನನ ಇಜ್ಜಿ.</verse>
				<verse number="2">ಉಂದತ್ತಂದೆ ಪರಿಶುದ್ಧ ಪಟ್ಟಣ ಆದುಪ್ಪು ಪೊಸ ಯೆರೂಸಲೇಮು, ಪರಲೋಕೊಡ್ದು ದೇವೆರೆ ಕೈತಲ್‌ಡ್ದ್ ಜತ್ತ್‌ದ್ ಬರ್ಪಿನೆನ್ ತೂಯೆ. ಅವು ತನ ಮದ್ಮಯಗಾದ್ ಐತ ಆತಿ ಮದ್ಮಲ್ ಲೆಕ್ಕ ಇತ್ತ್ಂಡ್.</verse>
				<verse number="3">ಉಂದತ್ತಂದೆ ಗದ್ದಿಗೆಡ್ದ್ ಬತ್ತಿ ಒಂಜಿ ಮಲ್ಲ ಸ್ವರ ಎಂಕ್ ಕೇಂಡ್‌ಂಡ್, “ಇಂದಾ, ದೇವೆರೆ ಗುಡಾರ ಇತ್ತೆ ಆಯನ ಜನೊಕುಲೆಡೊಪ್ಪ ಉಂಡು. ಅಕುಲು ಆಯಗ್ ಪ್ರಜೆಕುಲು ಆದುಪ್ಪುವೆರ್. ದೇವೆರ್ ತಾನೇ ಅಕ್ಲೆಡೊಪ್ಪ ಉಪ್ಪುವೆ.”</verse>
				<verse number="4">ಅಕ್ಲೆನ ಕಣ್ಣೀರ್‌ನ್ ಮಾತೆನ್ ಒಚ್ಚಿದ್ ಬುಡ್ಪೆ. ನನ ಮರಣ ಉಪ್ಪುಜಿ. ನನ ದುಃಖ ಆವಡ್, ಬುಲ್ಪುನವು ಆವಡ್, ಬೇನೆ ಆವಡ್ ಉಪ್ಪುಜಿ. ಸುರುಟ್ಟು ಇತ್ತಿನವು ಮಾತ ಇಜ್ಜಾಂದೆ ಪೋಂಡು ಅಂದ್‌ದ್ ಪಂಡ್ಂಡ್.</verse>
				<verse number="5">ಬೊಕ್ಕ ಗದ್ದಿಗೆಡ್ ಕುಲ್ಲುದಿನಾಯೆ ಪಂಡೆ, “ಇಂದಾ ಯಾನ್ ಮಾತೆನ್ಲಾ ಪೊಸತ್ತ್ ಮಲ್ಪುವೆ.” ಬೊಕ್ಕ ಆಯೆ ಎಂಕ್ ಪಂಡೆ, “ಉಂದೆನ್ ಬರೆಲ, ದಾಯೆಗಂದ್ಂಡ ಯಾನ್ ಪನ್ಪಿನ ಪಾತೆರೊಲು ನಂಬಿಕೆದವುಲಾ ಸತ್ಯದವುಲಾ ಆದುಂಡು.”</verse>
				<verse number="6">ಅಪಗ ಗದ್ದಿಗೆಡ್ ಕುಲ್ಲುದಿತ್ತಿನಾಯೆ, “ಮಾತ ನಡತ್ಂಡ್. ಯಾನೇ ಆದಿಲಾ ಅಂತ್ಯಲಾ, ಸುರುತ್ತಾಯೆಲಾ ಕಡೆತ್ತಾಯೆಲಾ ಆದುಲ್ಲೆ. ಬಾಜೆಲ್ ಆಯಿನಾಯಗ್ ಜೀವದ ವಸರ್‌ಡ್ದ್ ನೀರ್‌ನ್ ಕ್ರಯದಾಂತೆ ಪರಿಯೆರೆ ಕೊರ್ಪೆ.</verse>
				<verse number="7">ಗೆಂದಿನಾಯೆ ನೆಕ್ಕ್ ಮಾತೆಕ್ ಬಾಧ್ಯಸ್ತಿಗೆ ಆಪೆ. ಯಾನ್ ಆಯಗ್ ದೇವೆರಾದುಪ್ಪುವೆ. ಆಯೆ ಎಂಕ್ ಮಗೆ ಆದುಪ್ಪುವೆ.</verse>
				<verse number="8">ಆಂಡ ಪುಕ್ಕೆಲೆರ್, ನಂಬಿಕೆದಾಂತಿನಾಕುಲು, ಭ್ರಷ್ಟೆರ್, ಮಾನ್ಯ ಕೆರ್ಪಿನಾಕುಲು, ಹಾದ್ರದಾಕುಲು, ಮಾಟಮಂತ್ರ ಮಲ್ಪುನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಮಾತ ಸುಳ್ಳು ಪನ್ಪಿನಾಕುಲು ಮೊಕ್ಲೆಗ್ ತಿಕ್ಕುನ ಪಾಲ್ ತೂ ಗಂಧಕೊಡು ಅರ್ಲೊಂದುಪ್ಪುನ ತೂತ ಕೆರೆನೇ. ಉಂದು ರಡ್ಡನೆ ಮರಣ,” ಅಂದ್‌ದ್ ಎಂಕ್ ಪಂಡೆ.</verse>
				<verse number="9">ಕಡೆತ ಏಳ್‌ ಉಪದ್ರೊಲೆಡ್ ದಿಂಜಿದ್ ಏಳ್‌ ಬಾಜನೊಲೆನ್ ಪತ್ತೊಂದಿತ್ತಿ ಏಳ್‌ ಮಂದಿ ದೂತೆರೆಡ್ ಒರಿ ಬತ್ತ್‌ದ್ ಎನಡ ಪಾತೆರೊಂದು, “ಬಲ, ಕುರಿತ ಕಿನ್ನಿದ ಮದ್ಮಲ್ ಆಪಿನ ಬೊಡೆದಿನ್ ನಿಕ್ಕ್ ತೋಜಾವೆ,” ಅಂದ್‌ದ್ ಪಂಡೆ.</verse>
				<verse number="10">ಬೊಕ್ಕ ಆಯೆ ಎನನ್ ಆತ್ಮೊಡು ಮಲ್ಲ ಎತ್ತರದ ಒಂಜಿ ಪರ್ವತದ ಮಿತ್ತ್ ಲೆತ್ತೊಂದು ಪೋದು, ಪರಿಶುದ್ಧ ಪಟ್ಟಣ ಆದುಪ್ಪು ಯೆರೂಸಲೇಮು ಪರಲೋಕೊಡ್ದು ದೇವೆರೆ ಕಡೆಡ್ದ್ ಜತ್ತೊಂದು ಬರ್ಪಿನೆನ್ ಎಂಕ್ ತೋಜಾಯೆ.</verse>
				<verse number="11">ಅವು ದೇವೆರೆ ಮೈಮೆಡ್ ಮಿಂಚೊಂದಿತ್ತ್‌ಂಡ್; ಪಟ್ಟಣ ಬಿಲೆ ಇತ್ತಿ ರತ್ನದ ಬೊಲ್ಪುಗು ಸಮ ಆದಿತ್ತ್ಂಡ್. ಪಳಪಳ ಮಿಂಚುನ ವಜ್ರದ ಲೆಕ್ಕ ತೋಜ್ಂಡ್.</verse>
				<verse number="12">ಆ ಪಟ್ಟಣೊಗು ಎತ್ತರ ಇತ್ತಿ ಮಲ್ಲ ಗೋಡೆಲಾ ಪದ್ರಾಡ್ ಬಾಕಿಲ್‌ಲಾ ಇತ್ತ್ಂಡ್, ಅವೆನ್ ಪದ್ರಾಡ್ ದೂತೆರ್ ಕಾತೊಂದಿತ್ತೆರ್. ಬೊಕ್ಕ ಇಸ್ರಾಯೇಲ್ಯೆರೆ ಪದ್ರಾಡ್ ಗೋತ್ರದ ಪುದರ್ ಆ ಪದ್ರಾಡ್ ಬಾಕಿಲ್‌ಡ್ ಬರೆದಿತ್ತ್‌ಂಡ್.</verse>
				<verse number="13">ಮುಡಯಿ, ಪಡ್ಡಯಿ, ಬಡಕಯಿ, ತೆನ್‌ಕಯಿ ಇಂಚ ನಾಲ್ ದಿಕ್ಕ್‌ಲೆಡ್ ಒಂಜೊಂಜೆಟ್ ಮೂಜಿ ಮೂಜಿ ಬಾಕಿಲ್ ಇತ್ತ್ಂಡ್.</verse>
				<verse number="14">ಪಟ್ಟಣದ ಗೋಡೆಗ್ ಪದ್ರಾಡ್ ಪಂಚಾಂಗದ ಕಲ್ಲ್‌ಲ್ ಇತ್ತ್‌ದ್ ಐಟ್ಟ್ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನ ಪದ್ರಾಡ್ ಅಪೊಸ್ತಲೆರೆ ಪುದರ್‌ಲು ಬರೆದಿತ್ತ್‌ಂಡ್.</verse>
				<verse number="15">ಎನಡ ಪಾತೆರಿನಾಯೆ, ಆ ಪೇಂಟೆನ್‌, ಐತ ಬಾಕಿಲ್‌ಲೆನ್ಲಾ ಗೋಡೆಲೆನ್ಲಾ ಲಪ್ಪರೆಗಾದ್ ತನ ಕೈಟ್ ಬಂಗಾರ್‌ದ ಒಂಜಿ ಲಪ್ಪುನ ಕೋಲುನು ಪತ್ತೊಂದಿತ್ತೆ.</verse>
				<verse number="16">ಆ ಪಟ್ಟಣ ಚೌಕಾದಿತ್ತ್‌ಂಡ್, ಉದ್ಧದಾತೆ ಅಗೆಲಲಾ ಇತ್ತ್ಂಡ್. ಆಯೆ ಲಪ್ಪುನ ಕೋಲುದ ಉದ್ಧ, ಅಗೆಲ, ಎತ್ತರ ಮಾತಲಾ ಪದ್ರಾಡ್ ಸಾರ ಮೈಲ್ ಆದಿತ್ತ್ಂಡ್.</verse>
				<verse number="17">ಬೊಕ್ಕ ಆಯೆ ಗೋಡೆನ್ ಲಪ್ಪುನ ಕೋಲು ಅವು ನೂತ ನಲ್ಪತ್ತ ನಾಲ್‌ ಮುಳ ದಪ್ಪ ಇತ್ತ್ಂಡ್. ಅವು ಆ ದೂತೆ ಲತ್ತಿನಿ ನರಮಾನಿಲೆ ಅಳತೆದ ಲೆಕ್ಕನೇ.</verse>
				<verse number="18">ಆ ಗೋಡೆ ಸೂರ್ಯಕಾಂತಶಿಲೆಡ್ದ್ ಕಟ್ಟ್‌ದಿತ್ತ್‌ಂಡ್. ಬೊಕ್ಕ ಪಟ್ಟಣ ಕನ್ನಡಿದಲೆಕ್ಕ ಶುದ್ಧ ಆದಿತ್ತಿನ ಬಂಗಾರ್‌ದವು.</verse>
				<verse number="19">ಆ ಪಟ್ಟಣದ ಗೋಡೆನ್ ಮಾತ ಬಿಲೆ ಇತ್ತಿ ಕಲ್ಲ್‌ಲೆಡ್ ಪಂಚಾಂಗದ ಮಿತ್ತ್ ಕಟ್ಟ್‌ದಿತ್ತ್‌ಂಡ್. ಸುರುತ್ತ ಕಲ್ಲ್ ಸೂರ್ಯಕಾಂತಶಿಲೆ, ರಡ್ಡನೆದವು ನೀಲಮಣಿ, ಮೂಜನೆದವು ಪಚ್ಚೆ, ನಾಲನೆದವು ಪದ್ಮರಾಗ</verse>
				<verse number="20">ಐನ್ನೆದವು ಗೋಮೇಧಿಕ, ಆಜನೆದವು ಮಾಣಿಕ್ಯ, ಏಳನೆದವು ಪೀತರತ್ನ, ಎನ್ಮನೆದವು ಬೆರುಲ್ಲ, ಒಂರ್ಬನೆದವು ಪುಷ್ಯರಾಗ, ಪತ್ತನೆದವು ಗರುಡಪಚ್ಚೆ, ಪತ್ತೊಂಜನೆದವು ಇಂದ್ರ ನೀಲ, ಬೊಕ್ಕ ಪದ್ರಾಡನೆದವು ನೀಲಸ್ಫಟಿಕ.</verse>
				<verse number="21">ಬೊಕ್ಕ ಪದ್ರಾಡ್ ಬಾಕಿಲ್ ಪದ್ರಾಡ್ ಮುತ್ತುಲೆಡ್ದ್ ಮಲ್ತ್‌ದಿನವು. ಒಂಜೊಂಜಿ ಬಾಕಿಲ್ ಒಂಜೊಂಜಿ ಮುತ್ತುಡ್ದು ಮಲ್ತ್‌ದಿನವು. ಬೊಕ್ಕ ಐತ ಪಟ್ಟಣದ ಸಾದಿ ಕನ್ನಡಿದಲೆಕ್ಕ ಶುದ್ಧ ಬಂಗಾರ್‌ದವು ಆದಿತ್ತ್ಂಡ್.</verse>
				<verse number="22">ಆ ಪೇಂಟೆಡ್ ಎಂಕ್ ವಾ ದೇವಾಲಯಲಾ ತೋಜಿಜಿ; ದಾಯೆಗಂದ್ಂಡ ಸರ್ವತ್ರಾಣಿ ದೇವೆರಾದುಪ್ಪು ಕರ್ತವೆಲಾ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯೆಲಾ ಐತ ದೇವಾಲಯ ಆದಿತ್ತೆರ್.</verse>
				<verse number="23">ಬೊಕ್ಕ ಆ ಪಟ್ಟಣೊಗು ಸೂರ್ಯೆ ಆವಡ್ ಚಂದ್ರೆ ಆವಡ್ ಬೋಡಿತ್ತಿಜಿ. ದಾಯೆಗಂದ್ಂಡ ದೇವೆರೆ ಮೈಮೆನೇ ಆ ಪಟ್ಟಣೊಗು ತುಡರ್‌ದ ಬೊಲ್ಪು ಆದಿತ್ತ್ಂಡ್; ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯೆ ಐತ ಬೊಲ್ಪು ಆದಿತ್ತೆ.</verse>
				<verse number="24">ಐತ ಬೊಲ್ಪುಡು ಜನಾಂಗೊಲು ನಡಪುವೆರ್ ಬೊಕ್ಕ ಭೂಮಿದ ಅರಸುನಕುಲು ತನ್ಕುಲೆ ಮಾತ ಮೈಮೆ ಪ್ರಭಾವಡೊಪ್ಪ ಆ ಪಟ್ಟಣೊಗು ಪ್ರವೇಶ ಆಪೆರ್.</verse>
				<verse number="25">ಪಗೆಲ್ಡ್ ಪಟ್ಟಣದ ಬಾಕಿಲ್‌ನ್ ಮುಚ್ಚುನೆ ಇಜ್ಜಿ. ದಾಯೆಗಂದ್ಂಡ ಅಲ್ಪ ರಾತ್ರೆನೇ ಉಪ್ಪಂದ್.</verse>
				<verse number="26">ಮಾತ ಜನಾಂಗೊಲು ತನ್ಕುಲೆ ಮೈಮೆ ಪ್ರಭಾವೊಲೆನ್ ಪಟ್ಟಣದ ಉಲಯಿ ಕನಬರ್ಪೆರ್.</verse>
				<verse number="27">ಆಂಡ ಅಶುದ್ಧ ಕಾರ್ಯೊನು ಒವೆನ್ಲಾ ಪೊಗ್ಗೆರೆ ಬುಡ್ಪುಜೆರ್. ಅತ್ತ್‌ಡ ಪೇಸಿಗೆದಾಕುಲೆನ್ಲಾ, ಸುಳ್ಳು ಪನ್ಪಿನಾಕುಲೆನ್ಲಾ ಬುಡ್ಪುಜೆರ್. ಆಂಡ ಏರೇರೆನ ಪುದರುಲು ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನ ಜೀವಬಾಧ್ಯೆರೆ ಪುಸ್ತಕೊಡು ಬರೆದುಂಡಾ ಅಕುಲು ಮಾತ್ರ ಪಟ್ಟಣೊಗು ಸೇರುವೆರ್.</verse>
			</chapter>
			<chapter number="22">
				<verse number="1">ಐಡ್ದ್ ಬೊಕ್ಕ ಆಯೆ ಸ್ಫಟಿಕದ ಲೆಕ್ಕ ಮಿಂಚುನ ಶುದ್ಧ ಜೀವದ ನೀರ್‌ದ ತುದೆನ್ ಎಂಕ್ ತೋಜಾಯೆ, ಅವು ದೇವೆರೆ ಬೊಕ್ಕ ಯಜ್ಞದ ಕುರಿತ ಕಿನ್ನಿ ಆದಿತ್ತಿನಾಯನ ಗದ್ದಿಗೆಡ್ದ್ ಪಿದಾಡ್‌ಂಡ್.</verse>
				<verse number="2">ಅವು ಪಟ್ಟಣದ ಸಾದಿದ ನಡುಟು ಪರತೊಂದಿತ್ತ್‌ಂಡ್. ಆ ತುದೆತ ರಡ್ಡ್ ಬರಿಟ್ಲಾ ಜೀವದ ಮರ ಬುಲೆದಿತ್ತ್‌ಂಡ್. ಐಟ್ಟ್ ಪದ್ರಾಡ್ ಸರ್ತಿ ಫಲ ಬರ್ಪುಂಡು. ಪ್ರತಿ ತಿಂಗೊಲೊಡು ಪದ್ರಾಡ್ ತರತ ಫಲೊಕ್ಲೆನ್ ಕೊರ್ಪುಂಡು. ಐತ ಇರೆ ಜನಾಂಗೊಲೆಗ್ ಗುಣ ಮಲ್ಪೆರೆಗ್ ಉಪಯೋಗ ಮಲ್ತೊಂದಿತ್ತೆರ್. ಶಾಪ ನನ ಒವುಲಾ ಉಪ್ಪಂದ್. ದಾಯೆಗಂದ್ಂಡ ಆ ಪೇಂಟೆಡ್‌ ದೇವೆರೆನಲಾ ಯಜ್ಞದ ಕುರಿತ ಕಿನ್ನಿ ಆದುಪ್ಪುನಾಯನಲಾ ಸಿಮ್ಮಾಸನ ಉಂಡು. ದೇವೆರೆ ಸೇವಕೆರ್ ಆಯನ ಆರಾಧನೆ ಮಲ್ಪುವೆರ್.</verse>
				<verse number="3"></verse>
				<verse number="4">ಅಕುಲು ಆಯನ ಮೋನೆನ್ ತೂವೆರ್; ಆಯ ಪುದರ್ ಅಕ್ಲೆನ ಮುಂಡೊಡು ಬರೆದುಪ್ಪುಂಡು.</verse>
				<verse number="5">ಅಲ್ಪ ರಾತ್ರೆ ಉಪ್ಪುಜಿ; ತುಡರ್ ಅತ್ತ್‌ಡ ಸೂರ್ಯನ ಅಗತ್ಯ ಇಜ್ಜಿ. ಕರ್ತವೆ ಆದುಪ್ಪು ದೇವೆರ್ ಅಕ್ಲೆಗ್ ಬೊಲ್ಪು ಕೊರೊಂದುಪ್ಪುವೆ. ಅಕುಲು ಏನಿತ್ಯೇನಿಗ್ಲಾ ಆಳುವೆರ್.</verse>
				<verse number="6">ಬೊಕ್ಕ ಆ ದೂತೆ ಎನಡ ಪಂಡೆ, “ಈ ಪಾತೆರೊಲು ನಂಬಿಕೆದವುಲಾ ಸತ್ಯದವುಲಾ ಆದುಂಡು. ಪ್ರವಾದಿಲೆಗ್ ಆತ್ಮ ಕೊರಿ ದೇವೆರಾದುಪ್ಪು ಕರ್ತವೆ, ಬೇಗೊಡು ಆವೊಡಾಪಿನೆನ್ ತನ ಸೇವಕೆರೆಗ್ ತೆರಿಪಾವೆರೆಗಾದ್ ತನ ದೂತನ್ ಕಡಪುಡುದೆ.”</verse>
				<verse number="7">“ಇಂದಾ, ಯಾನ್ ಬೇಗ ಬರ್ಪೆ. ಈ ಪುಸ್ತಕೊಡು ಬರೆತಿನ ಪ್ರವಾದನೆದ ಪಾತೆರೊಲೆನ್ ಕೈಕೊನುನಾಕುಲು ಭಾಗ್ಯವಂತೆರ್.”</verse>
				<verse number="8">ಯೋಹಾನೆ ಪನ್ಪಿ ಯಾನ್ ಈ ಮಾತ ಸಂಗತಿಲೆನ್ ಕೇಂಡ್ದ್, ತೂಯಿನಾಯೆ. ಯಾನ್ ಕೇಂಡ್ದ್ ತೂಯಿ ಬೊಕ್ಕ ಉಂದೆನ್ ಎಂಕ್ ತೋಜಾಯಿ ದೂತಗ್ ಆರಾಧನೆ ಮಲ್ಪೊಡಂದ್‌ದ್ ಕಾರ್‌ಗ್ ಅಡ್ಡಬೂರ್ಯೆ.</verse>
				<verse number="9">ಅಪಗ ಆಯೆ ಪಂಡೆ, “ಬೊಡ್ಚಿ, ಇಂಚ ಮಲ್ಪಡ. ಯಾನ್ ನಿಕ್ಕ್‌ಲಾ ನಿನ ಸಹೋದರೆ ಆದಿತ್ತಿ ಪ್ರವಾದಿಲೆಗ್ಲಾ ಈ ಪುಸ್ತಕೊಡು ಬರೆತಿನೆನ್ ಕೈಕೊನುನ ಮಾತೆರೆಗ್ಲಾ ಒರಿ ಜತೆಸೇವಕೆ ಆದುಲ್ಲೆ. ದೇವೆರೆಗ್ ಆರಾಧನೆ ಮಲ್ಪುಲ.”</verse>
				<verse number="10">ಬೊಕ್ಕ ಆಯೆ ಎಂಕ್ ಪಂಡೆ, “ಈ ಪುಸ್ತಕದ ಪ್ರವಾದನೆಲೆಗ್ ಮುದ್ರೆ ಪಾಡಡ. ದಾಯೆಗಂದ್ಂಡ ಸಮಯ ಕೈತಲ್ ಬತ್ತ್ಂಡ್.</verse>
				<verse number="11">ಅನ್ಯಾಯ ಮಲ್ಪುನಾಯೆ ನನಲಾ ಅನ್ಯಾಯ ಮಲ್ಪಡ್. ಮೈಲೆ ಆತಿನಾಯೆ ತನನ್ ನನಲಾ ಮೈಲೆ ಮಲ್ತೊನಡ್. ನೀತಿವಂತೆ ನನಲಾ ನೀತಿಡ್ ನಡಪಡ್. ಪರಿಶುದ್ಧದಾಯೆ ತನನ್ ನನಲಾ ಪರಿಶುದ್ಧ ಮಲ್ಪಡ್.”</verse>
				<verse number="12">“ಇಂದಾ, ಯಾನ್ ಬೇಗೊಡು ಬರ್ಪೆ. ಮಾತೆರೆಗ್ಲಾ ಅಕ್ಲೆ ಕ್ರಿಯೊಲೆಗ್ ತಕ್ಕ ಪ್ರತಿಫಲೊನು ಯಾನ್ ಪತ್ತೊಂದು ಬರ್ಪೆ.”</verse>
				<verse number="13">ಯಾನೇ ಅ ಕಾರಲಾ ಓ ಕಾರಲಾ ಸುರುತ್ತಾಯೆಲಾ ಕಡೆತ್ತಾಯೆಲಾ ಆದಿಲಾ ಅಂತ್ಯಲಾ ಆದುಲ್ಲೆ.</verse>
				<verse number="14">“ತನ್ಕುಲೆ ಅಂಗಿಲೆನ್ ದೆಕ್ಕಿನಾಕುಲು ಭಾಗ್ಯವಂತೆರ್. ಅಕ್ಲೆಗ್ ಪಟ್ಟಣದ ಬಾಕಿಲ್‌ಡ್ದ್ ಉಲಯಿ ಬರಿಯೆರೆಗ್ಲಾ ಜೀವದ ಮರತ ಫಲೊನು ತಿನಿಯೆರೆಗ್ಲಾ ಹಕ್ಕ್ ಉಂಡು.</verse>
				<verse number="15">ನಾಯಿಲು, ಮಾಟಮಂತ್ರ ಮಲ್ಪುನಾಕುಲು, ಹಾದ್ರದಾಕುಲು, ಮಾನ್ಯ ಕೆರ್ಪಿನಾಕುಲು, ಮೂರ್ತಿಪೂಜೆ ಮಲ್ಪುನಾಕುಲು, ಬೊಕ್ಕ ಸುಳ್ಳುನು ಪ್ರೀತಿ ಮಲ್ಪುನಾಕುಲು ಮಾತೆರ್ಲಾ ಪಟ್ಟಣದ ಪಿದಯಿಡ್ ಉಲ್ಲೆರ್.</verse>
				<verse number="16">“ಯೇಸು ಇನ್ಪಿ ಯಾನೇ, ಎನ ಸಭೆಲೆಗ್ ಈ ಸಾಕ್ಷಿನ್ ನಿನಡ್ದ್ ಕೊರಿಯೆರೆಗಾದ್ ಎನ ದೂತನ್ ಕಡಪುಡುದೆ. ಯಾನ್ ದಾವೀದನ ಬೇರ್‌ಲಾ ಸಂತಾನಲಾ ಆಯ ಸಿಮ್ಮಾಸನೊಗು ಬಾಧ್ಯಸ್ತೆಲಾ ಪುಲ್ಯಕೆಲದ ಮಿಂಚುನ ಬೊಳ್ಳಿಲಾ ಆದುಲ್ಲೆ.”</verse>
				<verse number="17">ಆತ್ಮಲಾ ಮದ್ಮಲ್‌ಲಾ “ಬಲ,” ಅಂದ್‌ದ್ ಪನ್ಪೆರ್. ಉಂದೆನ್ ಕೇನುನ ಪ್ರತಿ ಒರಿಲಾ “ಬಲ” ಅಂದ್‌ದ್ ಪನೊಡು. ಬಾಜೆಲ್ ಇತ್ತಿನಾಯೆ ಬರಡ್. ಇಷ್ಟ ಇತ್ತಿನಾಯೆ ಜೀವದ ನೀರ್‌ನ್ ಕ್ರಯದಾಂತೆ ಪರಡ್.</verse>
				<verse number="18">ಈ ಪುಸ್ತಕೊಡು ಬರೆತಿ ಪ್ರವಾದನೆಲೆನ್ ಕೇನುನ ಪ್ರತಿ ಒರಿಯಗ್ಲಾ ಯಾನ್ ಸಾಕ್ಷಿಯಾದ್ ಪನ್ಪೆ, ಮುಲ್ಪ ಬರೆದಿತ್ತಿನೆಕ್ಕ್ ಏರಾಂಡಲಾ ದಾದಾಂಡಲಾ ಸೇರಾಯೆಡ ಈ ಪುಸ್ತಕೊಡು ಬರೆತಿ ಉಪದ್ರೊಲೆನ್ ದೇವೆರ್ ಆಯಗ್ ಕೊರ್ಪೆ.</verse>
				<verse number="19">ಬೊಕ್ಕ ಈ ಪ್ರವಾದನೆಲೆಡ್ದ್ ಒವೆನಾಂಡಲಾ ದೆಪ್ಪುನಾಯಗ್ ಈ ಪುಸ್ತಕೊಡು ಬರೆತಿ ಜೀವದ ಮರೊಡ್ದುಲಾ ಈ ಪರಿಶುದ್ಧ ಪೇಂಟೆಡ್ದ್‌ಲಾ ತಿಕ್ಕುನ ಪಾಲ್‌ನ್ ದೇವೆರ್ ದೆತ್ತ್‌ದ್ ಬುಡ್ಪೆ.</verse>
				<verse number="20">ಉಂದು ಮಾತೆಕ್ಕ್‌ಲಾ ಸಾಕ್ಷಿ ಆದುಪ್ಪುನಾಯೆ ಪನ್ಪೆ, “ಅಂದ್, ಯಾನ್ ಬೇಗೊಡೇ ಬರೊಂದುಲ್ಲೆ.” ಆಮೆನ್, ಕರ್ತವೆ ಆದುಪ್ಪು ಯೇಸೋ, ಬಲ.</verse>
				<verse number="21">ಕರ್ತವೆ ಆದುಪ್ಪು ಯೇಸು ಕ್ರಿಸ್ತನ ದಯ ಮಾತ ದೇವಜನೊಕುಲೆಡೊಪ್ಪ ಉಪ್ಪಡ್. ಆಮೆನ್.</verse>
			</chapter>
		</book>
	</testament>
</bible>