Ekuqaleni uNkulunkulu wadala izulu nomhlaba.
Umhlaba wawungenasimo, ungenalutho, ubumnyama busibekele utwa. UMoya kaNkulunkulu wawuvunguza phezu kwamanzi.
UNkulunkulu wathi: “Makube khona ukukhanya.” Kwaba khona ukukhanya.
UNkulunkulu wabona ukuthi ukukhanya kuhle, uNkulunkulu wayesehlukanisa ukukhanya nobumnyama.
UNkulunkulu wakubiza ukukhanya ngokuthi yimini, ubumnyama wabubiza ngokuthi wubusuku. Kwahlwa, kwabuye kwasa, kwaba ngusuku lokuqala.
UNkulunkulu wathi: “Makube khona umkhathi phakathi kwamanzi, ozokwehlukanisa amanzi kwamanye.”
UNkulunkulu wenza umkhathi wokwehlukanisa amanzi aphansi kwawo naphezu kwawo. Kwaba njalo.
UNkulunkulu wawuqamba umkhathi ngokuthi yisibhakabhaka. Kwahlwa, kwabuye kwasa, kwaba ngusuku lwesibili.
UNkulunkulu wathi: “Amanzi aphansi kwesibhakabhaka mawaqoqeleke ndawonye, kuvele umhlabathi owomileyo.” Kwaba njalo.
UNkulunkulu wawubiza umhlabathi owomileyo ngokuthi ngumhlaba, amanzi aqoqeleke ndawonye wawabiza ngokuthi wulwandle. UNkulunkulu wakubona ukuthi kuhle.
UNkulunkulu wathi: “Makumile utshani emhlabeni, nezitshalo ezithela imbewu nezihlahla ezithela izithelo ezinembewu ngezinhlobo zazo.” Kwaba njalo.
Kwamila utshani emhlabeni: izitshalo ezithela imbewu, nezihlahla ezithela izithelo ezinembewu ngezinhlobo zazo. UNkulunkulu wakubona ukuthi kuhle.
Kwahlwa, kwabuye kwasa, kwaba ngusuku lwesithathu.
UNkulunkulu wathi: “Makuvele izikhanyisi emkhathini ukuze zehlukanise imini nobusuku, zibe yinkomba yezinkathi neyezinsuku neyeminyaka,
zibe yizikhanyisi esibhakabhakeni, zikhanyisele umhlaba.” Kwaba njalo.
UNkulunkulu wenza izikhanyisi ezinkulu ezimbili, isikhanyisi esikhulu ukubusa emini, nesikhanyisi esincane ukubusa ebusuku, nezinkanyezi.
UNkulunkulu wabeka izikhanyisi esibhakabhakeni ukuba zikhanyisele umhlaba,
zibuse imini nobusuku, zehlukanise ukukhanya nobumnyama. UNkulunkulu wakubona ukuthi kuhle.
Kwahlwa, kwabuye kwasa, kwaba ngusuku lwesine.
UNkulunkulu wathi: “Makugcwale uswebezane lwezidalwa eziphilayo ezinhlobonhlobo emanzini, kundize izinyoni emkhathini.”
UNkulunkulu wadala izilo ezinkulu zasolwandle, nezidalwa zonke ezitshuza emanzini ngezinhlobo zazo, nazo zonke ezindizayo ngezinhlobo zazo. UNkulunkulu wakubona ukuthi kuhle.
Wazibusisa zonke izidalwa wathi: “Zalanani nande nigcwalise ulwandle.” Nasezinyonini wathi: “Yandani emhlabeni.”
Kwahlwa, kwabuye kwasa, kwaba ngusuku lwesihlanu.
UNkulunkulu wathi: “Umhlaba mawuveze izinhlobonhlobo zezilwane eziphilayo, ezifuywayo, ezihuquzelayo nezilwane zasendle ngezinhlobo zazo.” Kwaba njalo.
UNkulunkulu wenza zonke izilwane zomhlaba ngezinhlobo zazo, nezilwane ezifuywayo ngezinhlobo zazo, nezihuquzelayo ngezinhlobo zazo. UNkulunkulu wakubona ukuthi kuhle.
UNkulunkulu wayesethi: “Masenze abantu babe ngumfanekiso wethu, basifuze, babuse phezu kwezinhlanzi zolwandle, izinyoni zezulu, izilwane ezifuywayo, nomhlaba wonke, nezilwanyana ezinwabuzelayo emhlabeni ngezinhlobo zazo.”
UNkulunkulu wamdala umuntu waba ngumfanekiso wakhe, wamenza ukuba afuze Yena, wabadala owesilisa nowesifazane,
wababusisa, wathi: “Zalanani nande, nigcwalise umhlaba; niwubuse. Nibuse phezu kwezinhlanzi zolwandle, naphezu kwezinyoni zezulu, nazo zonke izilwane ezinwabuzela emhlabeni.”
UNkulunkulu wathi: “Bhekani, ngininika izinhlobo zonke zezitshalo ezithela imbewu ezimila emhlabeni wonke, nezihlahla ezithela izithelo ezinembewu ukuba nikudle.
Kepha zonke izilwane zasendle, nazo zonke izinyoni emkhathini, nakho konke okuhuquzelayo emhlabeni, nakho konke okunomphefumulo, ngikunike konke okuluhlaza okumilayo ukuba kukudle.” Kwaba njalo.
UNkulunkulu wakubona konke ayekudalile ukuthi kwakukuhle kakhulu. Kwahlwa, kwabuye kwasa, kwaba ngusuku lwesithupha.
Kwase kuyapheleliswa ukudalwa kwezulu nomhlaba nakho konke okukukho.
Kuthe ngosuku lwesikhombisa uNkulunkulu esewuqedile wonke umsebenzi ayewenza, wayesephumula.
Ngakho-ke uNkulunkulu walubusisa usuku lwesikhombisa walungcwelisa, ngokuba ngalo uNkulunkulu waphumula kuwo wonke umsebenzi ayesewudalile, wawenza.
Nanku umlando wokudalwa kwezulu nomhlaba, lapho uSimakade uNkulunkulu ekwenza.
Ngesikhathi uSimakade uNkulunkulu edala umhlaba kwakungakabi bikho zihlahla ezweni, kwakungakamili nazitshalo emhlabathini ngoba wayengakayinisi imvula, futhi kungekho namuntu wokulima umhlabathi.
Kepha kwakuqubuka amanzi evela phansi komhlaba awuswakamise wonke umhlabathi.
USimakade uNkulunkulu wabumba umuntu ngomhlabathi, wayesemphefumulela ngomoya wokuphila emakhaleni, umuntu waba yisidalwa esiphilayo.
USimakade uNkulunkulu watshala insimu yezithelo e-Edeni ngasempumalanga, wambeka khona umuntu ayembumbile.
USimakade uNkulunkulu watshala zonke izinhlobo zezihlahla ezibukekayo ukuba zithele izithelo ezinhle ezidliwayo. Phakathi naleyo nsimu kwakumile umuthi wokuphila, nomuthi wokwazi ukwehlukanisa okuhle nokubi.
E-Edeni kwavela umfula wokunisela insimu, wase wehlukana uba yimifula emine.
Igama lowokuqala kwakuyiPhishoni. Yiwo ogobhoza uzungeze lonke izwe iHavila, lapho kunegolide khona.
Igolide lalelo lizwe lihle, kukhona nenhlaka enamakha anuka kamnandi, namatshe ayigugu.
Igama lomfula wesibili kwakuyiGihoni. Ugobhoza uzungeze lonke iKhushi.
Umfula wesithathu kwakuyiThayigrisi. Ugobhoza wedlule empumalanga ye-Asiriya. Umfula wesine kwakuyiYufrathe.
USimakade uNkulunkulu wabeka umuntu ensimini yase-Edeni ukuze ayilime, futhi ayilinde.
USimakade uNkulunkulu wamyala umuntu wathi: “Ungazidla izithelo zanoma yimuphi umuthi osensimini,
kodwa ungadli kwezomuthi wokwazi ukwehlukanisa okuhle nokubi, ngokuba mhla wadla kuwo, uyokufa nokufa.”
USimakade uNkulunkulu wathi: “Akukuhle ukuba umuntu ahlale yedwa. Ngizomenzela umsizi omfaneleyo.”
USimakade uNkulunkulu wathatha umhlabathi wabumba zonke izilwane zasendle, nazo zonke izinyoni zezulu. Waziletha kumuntu ukuze abone ukuthi uzoziqamba athini; lawo magama umuntu aziqamba ngawo zonke izilwane eziphilayo, kwaba ngamagama azo.
Umuntu waziqamba ngamagama zonke izilwane ezifuyiweyo, izinyoni zezulu nezilwane zasendle. Kepha asikho phakathi kwalezo zilwane esatholakala sifanele ukuba ngumsizi wakhe.
USimakade uNkulunkulu wenza ukuba umuntu azunywe ngubuthongo obukhulu, kuthe esalele wathatha olunye lwezimbambo zakhe, wayivala ngesicubu leyo ndawo.
USimakade uNkulunkulu wambumba owesifazane ngobambo ayeluthathe kumuntu, wayesemletha kuye.
Umuntu wathi: “Manje lo useyithambo lamathambo ami nenyama yenyama yami. Lona uzobizwa ngokuthi ngumfazi ngoba uthathwe endodeni.”
Ngakho-ke indoda iyoshiya uyise nonina inamathele kumkayo babe nyamanye.
Indoda nomfazi babehamba ze, futhi bengenamahloni.
Inyoka yayinobuqili kunazo zonke izilwane zasendle ayezenzile uSimakade uNkulunkulu. Yathi kowesifazane: “Ushilo yini uNkulunkulu ukuthi: ‘Ningalokothi nidle nakowodwa umuthi osensimini na?’ ”
Waphendula owesifazane wathi: “Uthe singazidla izithelo zanoma yimuphi umuthi osensimini,
kodwa uNkulunkulu wathi: ‘Ningasidli isithelo somuthi omile phakathi nensimu, futhi ningasithinti ngoba niyokufa nokufa.’ ”
Kepha inyoka yathi kowesifazane: “Ngeke nife neze.
Ngokuba uNkulunkulu uyazi ukuthi mhla nisidla, amehlo enu ayovuleka, nifane naye, nazi okuhle nokubi.”
Owesifazane ebona ukuthi umuthi muhle, ufanele ukudliwa, nokuthi uyaheha emehlweni, uyanxaneleka ekuhlakaniphiseni, wakha izithelo zawo wadla, wanika nomyeni wakhe owayenaye lapho, naye wadla.
Amehlo abo bobabili ayesevuleka, bazibona ukuthi bahamba ze, beluka amaqabunga omkhiwane, bawabhinca, bafihla ubunqunu babo.
Ntambama selipholile, indoda nomkayo bezwa izigi zikaSimakade uNkulunkulu ezihambela ensimini, base becasha phakathi kwemithi.
USimakade uNkulunkulu wammemeza umuntu wathi: “Ukuphi na?”
Waphendula wathi: “Ngizwe izigi zakho ensimini, ngase ngesaba ngoba ngihamba ze, ngacasha.”
Wathi kuye: “Ngubani okutshele ukuthi uhamba ze na? Ngabe udlile yini kulowo muthi engakudonsa ngendlebe ngathi ungadli kuwo na?”
Umuntu waphendula wathi: “Lo wesifazane owanginika yena, nguyena onginike isithelo somuthi, nami-ke ngasidla.”
USimakade uNkulunkulu wabuza kowesifazane wathi: “Ukwenzeleni lokhu na?” Waphendula wathi: “Yinyoka engiluthile, ngasidla.”
USimakade uNkulunkulu wathi enyokeni: “Ngokuba wenze lokhu, usuqalekisiwe kunezilwane zonke ezifuywayo, nezilwane zonke zasendle. Uyohuquzela ngesisu, udle uthuli izinsuku zonke zokuphila kwakho.
Ngizokwenza ubutha phakathi kwakho nowesifazane, ngizonenza nizondane nenzalo yowesifazane. Inzalo yowesifazane iyochoboza ikhanda leyakho, nenzalo yakho ishaye isithende senzalo yakhe.”
Kowesifazane wathi: “Ngiyokuzwisa izinhlungu ezinkulu usakhulelwe, uzwe iminjunju lapho ubeletha. Uyohlala ulangazelela indoda yakho, yona ikubuse.”
Endodeni wathi: “Ngenxa yokuba ulalele umkakho, wadla isithelo engikudonse ngendlebe ngathi ungasidli, ngalokho umhlabathi usuqalekisiwe ngenxa yakho. Uyokhandleka ukuze uthole ukudla kuwo, izinsuku zonke zokuphila kwakho.
Umhlabathi uyokuvezela ameva namakhakhasi, uphile ngokudla okuvela kuwo.
Uyokujulukela ukudla oyokudla, uze ubuyele emhlabathini owathathwa kuwo, njengoba uwuthuli, uyobuyela othulini.”
Indoda yamqamba umkayo ngokuthi ngu-Eva, ngokuba waba ngunina wabo bonke abaphilayo.
USimakade uNkulunkulu wenzela indoda nomkayo iziphuku, wabembathisa.
USimakade uNkulunkulu wathi: “Bhekani, umuntu usefana nathi, useyakwazi okuhle nokubi. Akanqandwe ukuba angalokothi adle isithelo somuthi wokuphila, bese ephila ingunaphakade.”
USimakade uNkulunkulu wayesemxosha umuntu ensimini yase-Edeni, wamkhipha ukuba ayolima umhlabathi ayebunjwe ngawo.
Wamxosha umuntu, wayesebeka amakherubhi empumalanga nensimu yase-Edeni, nenkemba evuthayo eyayiphendukela nxazonke, ukuqapha indlela eya emthini wokuphila.
U-Adamu walala nomkakhe u-Eva, wayesekhulelwa, wazala uKhayini, wathi: “Ngifumene insizwa kuSimakade.”
Wabuye wazala enye indodana wayiqamba ngokuthi ngu-Abela. U-Abela wayengumelusi, uKhayini engumlimi.
Kwathi ngokuhamba kwezinsuku uKhayini waletha kuSimakade umnikelo wezithelo zomhlabathi.
U-Abela naye waletha amazibulo emfuyo yakhe, wanikela ngezitho zawo ezinonileyo. USimakade wamnaka u-Abela nomnikelo wakhe,
kodwa uKhayini nomnikelo wakhe wakushaya indiva. UKhayini wathukuthela wagana unwabu, wahwaqabala ebusweni.
USimakade wambuza uKhayini wathi: “Uthukutheleleni na? Bunyukubaleleni ubuso bakho na?
Uma wenza okuhle, awuzukwamukela okuhle yini na? Uma ungenzi kahle, isono sisemnyango, siyakunyonyobela; sifuna wena, kodwa wena sinqobe.”
UKhayini wathi ku-Abela umnawakhe: “Asihambe siye endle.” Kuthe sebefike endle, uKhayini wambhudukeza umnawakhe wambulala.
USimakade wambuza uKhayini wathi: “Uphi umnawakho u-Abela na?” UKhayini waphendula wathi: “Angazi. Kanti ngingumlindi womfowethu yini na?”
Wathi kuye: “Ukwenzeleni lokho na? Igazi lomnawakho liyakhala kimi lisemhlabathini!
Usuqalekisiwe emhlabathini lona ovule umlomo wawo wemukela igazi lomnawakho olichithele kuwo ngesandla sakho.
Uma ulima, umhlabathi awuyikukunika sivuno; uzoba ngumhambuma nozulane emhlabeni.”
UKhayini wathi kuSimakade: “Ngeke ngisimele lesi sijeziso, siyangisinda.
Bheka, namuhla usungixoshile emhlabeni, sengingumhambuma nozulane ezweni, ngethuswa wubala, noma ngubani ohlangana nami uzofuna ukungibulala.”
USimakade wathi kuye: “Akusoze kwenzeka lokho, ngoba uma umuntu ekubulala, uyojeziswa kasikhombisa.” USimakade wayesembeka uphawu uKhayini ukuze lwexwayise noma ngubani ohlangana naye angambulali.
UKhayini wasuka phambi kukaSimakade, wahamba wayohlala eNodi, empumalanga ye-Edeni.
UKhayini walala nomkakhe wakhulelwa, wazala u-Enokhi. UKhayini wakha umuzi wawuqamba ngegama lendodana yakhe u-Enokhi.
U-Enokhi wazala u-Iradi, uyise kaMehujayeli, uMehujayeli wazala uMethushayeli, uMethushayeli wazala uLameki.
ULameki waganwa ngabafazi ababili, u-Ada noZila.
U-Ada wazala uJabhali, ukhokho walabo abahlala emathendeni abangabafuyi bemihlambi.
Igama lomnawakhe nguJubhali. Yena wayengukhokho walabo ababengababethi bogubhu nomtshingo.
UZila wazala uThubhali Khayini, owayengumkhandi wazo zonke izinhlobo zezinto ezenziwe ngethusi nangensimbi. Udadewabo kaThubhali Khayini kwakunguNahama.
ULameki wathi komkakhe: “We Ada noZila, ake ningilalele! Bafazi bakaLameki, yizwani engikushoyo! Ngibulale umuntu ngoba engilimazile, nensizwa ngokungishaya kwayo.
Uma uKhayini eyophindiselwa kasikhombisa, uLameki uyophindiselelwa kamashumi ayisikhombisa nesikhombisa.”
U-Adamu waphinde walala nomkakhe, wayesezala indodana wayiqamba igama wathi nguSethi, ngokuba wathi: “UNkulunkulu uphinde wangipha enye ingane esikhundleni sika-Abela, ngokuba uKhayini wambulala.”
USethi naye wazibula ngendodana wayiqamba ngokuthi ngu-Enoshe. Baqala lapho-ke abantu ukukhuleka egameni likaSimakade.
Nantu uhla lozalo luka-Adamu. Ngesikhathi uNkulunkulu edala umuntu wamenza wanjengaye.
Wadala owesilisa nowesifazane, wababusisa, wababiza ngokuthi ngabantu ngosuku abadala ngalo.
Kuthe lapho u-Adamu eseqede iminyaka eyi-130, wazala indodana eyayifana naye, wayiqamba igama wathi nguSethi.
Esezelwe uSethi, u-Adamu waphila iminyaka engama-800, waphinde wazala amadodana namadodakazi.
Isiyonke iminyaka eyaphilwa ngu-Adamu yaba ngama-930, wayesefa.
Kwathi uSethi eseneminyaka eyi-105, wazala u-Enoshe.
Esezelwe u-Enoshe, uSethi waphila iminyaka engama-807 emva kokuzalwa kuka-Enoshe, waphinde wazala amadodana namadodakazi.
Isiyonke iminyaka eyaphilwa nguSethi yaba ngama-912, wayesefa.
Kwathi u-Enoshe eseneminyaka engama-90, wazala uKhenani.
Esezelwe uKhenani, u-Enoshe waphila iminyaka engama-815, waphinde wazala amadodana namadodakazi.
Isiyonke iminyaka eyaphilwa ngu-Enoshe yaba ngama-905, wayesefa.
Kwathi uKhenani eseneminyaka engama-70, wazala uMahalaleli.
Esezelwe uMahalaleli, uKhenani waphila iminyaka engama-840, waphinde wazala amadodana namadodakazi.
Isiyonke iminyaka eyaphilwa nguKhenani yaba ngama-910, wayesefa.
Kwathi uMahalaleli eseneminyaka engama-65, wazala uJaredi.
Esezelwe uJaredi, uMahalaleli waphila iminyaka engama-830, waphinde wazala amadodana namadodakazi.
Isiyonke iminyaka eyaphilwa nguMahalaleli yaba ngama-895, wayesefa.
Kwathi uJaredi eseneminyaka eyi-162, wazala u-Enokhi.
Esezelwe u-Enokhi, uJaredi waphila iminyaka engama-800, waphinde wazala amadodana namadodakazi.
Isiyonke iminyaka eyaphilwa nguJaredi yaba ngama-962, wayesefa.
Kwathi u-Enokhi eseneminyaka engama-65, wazala uMethusela.
Esezelwe uMethusela, u-Enokhi waphila iminyaka engama-300 ehamba noNkulunkulu, waphinde wazala amadodana namadodakazi.
Isiyonke iminyaka eyaphilwa ngu-Enokhi yaba ngama-365.
U-Enokhi wayehamba noNkulunkulu. Wanyamalala, ngokuba uNkulunkulu wamthabatha.
Kwathi uMethusela eseneminyaka eyi-187, wazala uLameki.
Esezelwe uLameki, uMethusela waphila iminyaka engama-782, waphinde wazala amadodana namadodakazi.
Isiyonke iminyaka eyaphilwa nguMethusela yaba ngama-969, wayesefa.
Kwathi uLameki eseneminyaka eyi-182, wazala indodana.
Wayiqamba igama wathi nguNowa, ethi: “Lo nguyena ozosiphumuza emsebenzini wethu nasemshikashikeni wezandla zethu emhlabathini awuqalekisa uSimakade.”
Esezelwe uNowa, uLameki waphila iminyaka engama-595, waphinde wazala amadodana namadodakazi.
Isiyonke iminyaka eyaphilwa nguLameki yaba ngama-777, wayesefa.
Kwathi uNowa eseneminyaka engama-500, wazala uShemu, uHamu, noJafethi.
Kuthe lapho abantu sebeqala ukwanda ebusweni bomhlaba, sebezele amadodakazi,
amadodana kaNkulunkulu abona amadodakazi abantu ukuthi mahle, aziqokela abafazi phakathi kwawo.
USimakade wathi: “UMoya wami awuyukuhlala phakathi kwabantu kuze kube phakade, ngoba bayinyama nje. Iminyaka yabo yokuphila isizoba yi-120.”
Ngalezo zinsuku nasemveni kwazo, kwaba khona iziqhwaga emhlabeni. Amadodana kaNkulunkulu alala namadodakazi abantu, awazalela abantwana. Baba ngamaqhawe asendulo, adumileyo.
USimakade wabona ukuthi ububi babantu sebubukhulu emhlabeni nokuthi izizindlo zezinhliziyo zabo zihlala zizimbi njalo,
wayesezisola uSimakade ukuthi ubadaleleni abantu emhlabeni. Lokho kwamkhathaza enhliziyweni yakhe, wayesethi:
“Ngizobashaya ngibaqothule ebusweni bomhlaba abantu engibadalileyo. Abantu nezilwane, izilwane ezihuquzelayo, nezinyoni zezulu, ngokuba ngiyazisola ukuthi ngikudaleleni.”
Nokho uNowa wafumana umusa emehlweni kaSimakade.
Nanku umlando kaNowa nezizukulwane zakhe. UNowa wayengumuntu oqotho, engenasici esizukulwaneni sakhe, ehamba noNkulunkulu.
UNowa wazala amadodana amathathu: uShemu, uHamu, noJafethi.
Umhlaba wase wonakele kakhulu phambi kukaNkulunkulu, ugcwele ubudlova.
UNkulunkulu wabona ukuthi umhlaba wonakele, ngokuba bonke abantu babeziphethe kabi emhlabeni.
UNkulunkulu wathi kuNowa: “Senginqume ukubabhubhisa bonke abantu, ngoba umhlaba ugcwele ubudlova ngenxa yabo. Bheka, ngizobabhubhisa nomhlaba.
Wena zakhele umkhumbi ngezingodo zomgoferi, uwakhe ube namakamelo, uwubhixe ngebhithumeni ngaphakathi nangaphandle.
Uzowakha kanje: ubude bawo bube ngamakhubhithi angama-300, ububanzi bube ngamakhubhithi angama-50, kuthi ukuphakama kwawo kube ngamakhubhithi angama-30.
Uwufulele, ushiye isikhala esiyikhubhithi eyodwa phakathi kophahla macala wonke. Uwakhe ube namagumbi amathathu, elinye libe phezu kwelinye, kube nomnyango eceleni.
Bheka, Mina ngizokwehlisa uzamcolo emhlabeni, ubhubhise konke okuphilayo phansi komthunzi welanga, kufe konke okuphefumulayo emhlabeni.
Kepha ngizokwenza nawe isivumelwano, uzongena emkhunjini wena nomkakho namadodana akho nomkawo,
bese ungenisa zonke izilwane ngazimbili ngezinhlobo zazo, kube yiduna nensikazi ukuze ziphile nawe.
Ungenise izinyoni ngezinhlobo zazo, nezilwane ngezinhlobo zazo, nezihuquzelayo ngezinhlobo zazo, konke lokho kungene ngakubili ukuze kuphile.
Zithathele lonke uhlobo lokudla ukulondoloze, ukuze kube ngukudla kwenu nokwazo.”
UNowa wakwenza konke lokho uNkulunkulu ayemyale ukuba akwenze.
USimakade wathi kuNowa: “Ngena emkhunjini, wena nabo bonke abendlu yakho, ngokuba ngibonile ukuthi nguwena kuphela olungile phambi kwami kulesi sizukulwane.
Thatha amabhanqa ayisikhombisa azo zonke izilwane ezihlanzekile, iduna nensikazi, nakulezo ezingahlanzekile uthathe ngazimbili, iduna nensikazi.
Uthathe kulo lonke uhlobo lwezinyoni zezulu zibe ngamabhanqa ayisikhombisa: iduna nensikazi, ukuze kulondolozeke izinhlobo zazo emhlabeni wonke.
Ngokuba emva kwezinsuku eziyisikhombisa ngizodedela imvula, ine emhlabeni izinsuku ezingama-40 nobusuku obungama-40, ngibhubhise konke okuphilayo engikudalileyo emhlabeni.”
UNowa wakwenza konke lokho njengalokhu uSimakade ayemyalile.
UNowa wayeseneminyaka engama-600 ngesikhathi liyithela ekazamcolo emhlabeni.
UNowa nowakwakhe namadodana akhe nomkawo bangena emkhunjini ukuze baphephe ezikhukhuleni zikazamcolo.
Izilwane nazo zangena ngazimbili kwezihlanzekile nezingahlanzekile, nezinyoni ngokunjalo, nezilwane zonke ezihuquzelayo emhlabeni,
zangena emkhunjini ngazimbili, iduna nensikazi kanye noNowa njengokuba uNkulunkulu ayeshilo kuye.
Uzamcolo waqala emhlabeni emva kwezinsuku eziyisikhombisa.
Kuthe lapho uNowa eseneminyaka engama-600, ngosuku lwe-17, ngenyanga yesibili, kwaqhuma zonke iziphethu zamanzi emajukujukwini, kwavuleka namafasitela ezulu.
Lana emhlabeni imini nobusuku izinsuku ezingama-40.
Ngalolo lusuku uNowa nowakwakhe namadodana akhe, uShemu, uHamu, noJafethi, nomkabo bobathathu bangena emkhunjini.
Kwangena zonke izilwane zasendle ngezinhlobo zazo, nezilwane ezifuywayo ngezinhlobo zazo, ezihuquzelayo emhlabeni ngezinhlobo zazo, nazo zonke izinyoni zezulu ngezinhlobo zazo, nakho konke okunamaphiko.
Kwangena emkhunjini kaNowa ngakubili konke okuphefumulayo,
njengalokhu uNkulunkulu ayemyalile uNowa, kwangena iduna nensikazi, kukho konke okuphilayo. Esengenile uNowa, uSimakade wavala umnyango.
Laqhubeka layithela imvula izinsuku ezingama-40, akhula amanzi, awuntantisa umkhumbi phezu komhlaba.
Amanzi akhula anda emhlabeni; umkhumbi wantanta phezu kwamanzi.
Amanzi anda kakhulu emhlabeni aze asibekela zonke iziqongo zezintaba ezinde.
Anda kakhulu aze azisibekela ngamakhubhithi ayishumi nanhlanu iziqongo zezintaba.
Kwafa konke okuphilayo emhlabeni: wena nyoni, wena nkomo, wena silo, wena silwanyana esinwabuzelayo emhlabeni, nabo bonke abantu.
Konke okuphefumulayo okwakusezweni, kwafa.
UNkulunkulu wakushaya wakuqothula konke okuphilayo ezweni: abantu nezilwane, nezilwane ezihuquzelayo nezinyoni zezulu, wakushaya wakuqothula emhlabeni. Kwasala kuphela uNowa nalabo ayenabo emkhunjini.
Amanzi anda emhlabeni kwaze kwaphela izinsuku eziyi-150.
UNkulunkulu wamkhumbula uNowa nazo zonke izilwane ezazinaye emkhunjini, ezifuywayo nezasendle. Wayesethumela umoya wavunguza phezu komhlaba, amanzi aya ngokuya ebohla.
Kwavaleka iziphethu ezisezinzulwini, kwavaleka namafasitela ezulu, yanqamuka imvula.
Amanzi aya ngokuya ebohla. Sekwedlule izinsuku eziyi-150 amanzi ayesehlile impela.
Ngosuku lwe-17 ngenyanga yesikhombisa, umkhumbi wathi cababa ezintabeni e-Ararathi.
Amanzi aya ngokuya ehla. Kwathi lulunye ngenyanga yeshumi, kwaqala kwabonakala iziqongo zezintaba.
Kwathi emveni kwezinsuku ezingama-40, uNowa wavula ifasitela lomkhumbi ayelenzile,
wakhiphela ngaphandle igwababa. Landiza njalo lehla lenyuka kwaze kwabohla amanzi emhlabeni.
Wabuye wathumela ijuba ukuze ahlole ngalo ukuthi nembala amanzi asenciphile yini ebusweni bomhlaba.
Kepha ijuba kalitholanga ndawo elalingahlala kuyo. Landiza labuyela emkhunjini, uNowa welula isandla walingenisa ngaphakathi.
Walinda izinsuku eziyisikhombisa, wabuye walikhipha ijuba.
Labuyela kuye sekuhlwile liphethe ngomlomo iqabunga lomnqumo eliluhlaza. Kwamcacela uNowa ukuthi amanzi asebohlile emhlabeni.
Walinda izinsuku eziyisikhombisa, wabuye walithumela ijuba, kodwa aliphindanga labuyela kuye.
Ngosuku lokuqala ngenyanga yokuqala uNowa eseqede iminyaka engama-601 ephila, wonke amanzi ayesehwamukile emhlabeni. UNowa waphakamisa uphahla lomkhumbi, wabona ukuthi sekomile phansi.
Kwafika usuku lwama-27 sekome nkwe phansi.
UNkulunkulu wakhuluma noNowa, wathi:
“Phuma emkhunjini, wena nomkakho namadodana akho nomkawo.
Khipha konke okuphilayo okunawe, izinyoni, zonke izilwane, nezilwane ezihuquzelayo, ukuze zizalane zande emhlabeni.”
Wayesephuma-ke uNowa nomkakhe, namadodana akhe nomkawo.
Emkhunjini kwaphuma zonke izilwane, zonke izilwane ezihuquzelayo, nazo zonke izinyoni, nakho konke okuhambayo emhlabeni ngezinhlobo zakho.
UNowa wakhela uSimakade i-althare, wathatha kuzo zonke izilwane nezinyoni ezihlanzekileyo ngezinhlobo zazo, wenza ngazo umnikelo wokushiswa kulelo althare ayelakhile.
Iphunga lalowo mnikelo lamthokozisa uSimakade, wayesethi enhliziyweni yakhe: “Umhlaba angisayukuphinde ngiwuqalekise ngenxa yabantu. Umuntu vele unemicabango emibi kusukela ebuncaneni bakhe. Ngeke ngiphinde ngikubhubhise ngozamcolo konke okuphilayo njengalokhu ngenzile.
“Inqobo nje uma umhlaba usekhona, kuyotshalwa kuvunwe, kube makhaza kushise, kube yihlobo nobusika, imini nobusuku, lokhu akuyukunqamuka.”
UNkulunkulu wambusisa uNowa namadodana akhe, wathi kubo: “Zalanani nande, nigcwalise umhlaba.
Konke ngikwethula ezandleni zenu: izinyoni zezulu nezilwane zonke zomhlaba, nezilwane ezihuquzelayo, nazo zonke izinhlanzi zolwandle; kuyakwehlelwa wuvalo, kunesabe, kuthuthumele.
Zonke izilwane eziphilayo, ziyokuba ngukudla kwenu, njengoba nganinika imifino, sengininika konke.
Kepha ningalokothi nidle inyama enegazi, ngokuba umphefumulo usegazini layo.
Maqondana negazi lenu okukulo ukuphila, ngiyakuliphindiselela kuzo zonke izilwane ngisho noma nibulalane nodwa.
“Ochitha igazi lomuntu, nelakhe liyochithwa ngumuntu, ngokuba umuntu wadalwa nguNkulunkulu, wamenza wafana naye.
Kepha nina zalanani nande, nigcwalise umhlaba, nande kuwo.”
UNkulunkulu wathi kuNowa nakumadodana akhe ayenaye:
“Bhekani, ngenza isivumelwano phakathi kwami nani, nezizukulwane zenu,
nakuzo zonke izilwane eziphilayo ezinani: izinyoni zezulu, izilwane ezifuywayo, nazo zonke izilwane eziphilayo emhlabeni enaphuma nazo emkhunjini.
Lesi yisivumelwano sami nani engithi ngaso: angisayukuphinde ngibhubhise yonke into ephilayo ngozamcolo. Akusayukuphinde kube khona uzamcolo ukuba ubhubhise umhlaba.”
UNkulunkulu wayesethi: “Lokhu kuluphawu lwesivumelwano engisenza phakathi kwami nani nazo zonke izilwane eziphilayo ezinani, nazo zonke izizukulwane ezisazozalwa:
Uthingo lwenkosazana ngilubeke emafini, ukuze lube wuphawu lwesivumelwano phakathi kwami nomhlaba.
Kuyothi lapho ngiwusibekela umhlaba ngamafu, kuvele uthingo lwenkosazana emafini,
bese ngikhumbula isivumelwano sami phakathi kwami nani nazo zonke izilwane ngezinhlobo zazo. Izikhukhula zingabe zisaphenduka uzamcolo wokucekela phansi konke okuphilayo.
Kuyothi njalo uma kuvela uthingo lwenkosazana emafini, ngilubheke qede ngikhumbule isivumelwano saphakade esikhona phakathi kwami nezilwane zonke eziphilayo emhlabeni ngezinhlobo zazo.”
UNkulunkulu wayesethi kuNowa: “Lokho kuluphawu lwesivumelwano sami engisenze phakathi kwami nabo bonke abantu emhlabeni.”
Amadodana kaNowa, uShemu, uHamu, noJafethi aphuma emkhunjini. UHamu wayenguyise kaKhanani.
Kulawa madodana kaNowa amathathu kwavela kuwo abantu abasabalala nomhlaba wonke.
UNowa owayengumlimi, waba ngowokuqala ukutshala isivini.
Kuthe esephuze iwayini, lamdaka walala enqunu ethendeni lakhe.
UHamu, uyise kaKhanani, wabona ubunqunu bukayise, waxoxela abafowabo ababengaphandle.
UShemu noJafethi bathatha ingubo bayibeka emahlombe abo, bahlehla nyovana, bangena, babufihla ubunqunu bukayise. Babufulathelisa ubuso babo ukuze bangabuboni ubunqunu bukayise.
Kwathi lapho selidamukile iwayini kuNowa, wezwa ukuthi indodana yakhe encane yenzeni kuye,
wayesethi: “Uqalekisiwe uKhanani! Uyoba yisigqila sezigqila kubafowabo.”
Wabuye wathi futhi: “Makabongwe uSimakade uNkulunkulu kaShemu, uKhanani makabe yisigqila sikaShemu.
UNkulunkulu makamnike indawo ebanzi uJafethi, ahlale emathendeni kaShemu, uKhanani abe yisigqila sabo.”
Emva kukazamcolo uNowa waphila iminyaka engama-350.
Isiyonke iminyaka eyaphilwa nguNowa yaba ngama-950, wayesefa.
Nanku umlando wamadodana kaNowa: uShemu, uHamu, noJafethi; nawo azala awawo amadodana emva kukazamcolo.
Amadodana kaJafethi kwakunguGomeri, uMagogi, uMadayi, uJavani, uThubhali, uMeshekhe noThirasi.
Amadodana kaGomeri kwakungu-Ashikenazi, uRifathi, noThogama.
Amadodana kaJavani kwakungu-Elisha, uTharishishi, uKhithimi, noDodanimi.
Kulaba kwadabuka izizwe ezisemazweni agudle ulwandle, zehlukana ngolimi, ngemindeni, nangezizwe.
Amadodana kaHamu kwakunguKhushe, uMizirayimi, uPhuthi, noKhanani.
Amadodana kaKhushe kwakunguSebha, uHavila, uSabitha, uRama, noSabhitheka. Amadodana kaRama kwakunguShebha noDedani.
UKhushe wazala uNimrodi, iqhawe lokuqala emhlabeni.
Wayeyiphisi elinamandla phambi kukaSimakade. Yingakho kunesisho esithi: “Kuhle kukaNimrodi iphisi elinamandla phambi kukaSimakade.”
Waqala ukubusa eBhabhele, e-Erekhi, e-Akhadi naseKhaline eShinari.
Wasuka kulelo lizwe walibangisa e-Asiriya lapho afike akha khona iNinive, iRehobhothi Iri, iKhala,
neReseni umuzi omkhulu ophakathi kweNinive neKhala.
UMizirayimi wazala amaLudi, ama-Anami, amaLehabi, amaNafethuhi,
amaPhathrusi, namaKhasuluhi okwadabuka kubo amaFilisti nabaseKhafithori.
UKhanani wazibula ngoSidoni, kwalandela uHethi,
nalezi zizwe: amaJebusi, ama-Amori, amaGirigashi,
amaHivi, ama-Akhi, amaSini,
ama-Arivadi, amaZemari, namaHamathi. Emveni kwalokho imindeni yamaKhanani yasabalala kulo lonke izwe,
imingcele yayo yayisuka eSidoni ibheke eGera kuze kube seGaza, iye eSodoma, eGomora, e-Adima, naseZebhoyimu, ize ifinyelele eLasha.
Yilawa amadodana kaHamu ngokwemindeni nangezilimi, emazweni nasezizweni zawo:
uShemu naye wazalelwa amadodana, ungukhokho waso sonke isizukulwane sabakwa-Ebhere nomnewabo kaJafethi.
Amadodana kaShemu kwakungu-Elamu, u-Ashuri, u-Arifaksadi, uLudi no-Aramu.
Amadodana ka-Aramu kwakungu-Uzi, uHulu, uGetheri, noMashe.
U-Arifaksadi wazala uShela, uShela wazala u-Ebhere.
U-Ebhere wazala amadodana amabili. Enye yawo kwakuthiwa nguPhelegi, ngoba ngesikhathi sakhe izwe ladatshulwa izifunda. Enye kwakuthiwa uJokithani.
UJokithani wazala u-Alimodadi, uShelefu, uHazamavete, uJera,
uHadoramu, u-Uzali, uDikila,
u-Obhali, u-Abhimayeli, uShebha,
u-Ofiri, uHavila noJobhabhu. Bonke laba babengamadodana kaJokithani.
Indawo ababakhe kuyo yayisuka eMesha ize ifike eSefari, kwelezintaba empumalanga.
Yilawo-ke amadodana kaShemu ngokwemindeni nangezilimi zawo, ezifundeni zawo nangokwezizwe zawo.
Yileyo-ke imindeni yamadodana kaNowa ngokozalo lwawo nangokwezizwe zawo. Kuwo kwavela izizwe ezasabalala nomhlaba wonke emveni kukazamcolo.
Emhlabeni wonke abantu babekhuluma lulimi lunye.
Basuka empumalanga baze bayofika emathafeni eShinari, bahlala khona.
Babonisana, bathi: “Wozani sibumbe izitini, sizipheke emlilweni ukuze ziqine!” Esikhundleni samatshe babumba izitini, esikhundleni sodaka benza ibhithumeni.
Base bethi: “Wozani sizakhele isithabathaba somuzi onombhoshongo omude ofinyelela esibhakabhakeni, ukuze ngawo sizakhele igama emhlabeni, singahlakazeki nezwe lonke!”
USimakade wehla ukuzobona umuzi nombhoshongo owawakhiwe ngabantu.
Wathi: “Bheka, laba bantu basizwe sinye, bakhuluma lulimi lunye. Lokhu kuseyisiqalo nje sezinto abazozenza. Manje sebezokwenza noma yini abazimisele ukuyenza.
Wozani sehle, siphambanise ulimi lwabo, khona bezogcina bengasezwani ukuthi omunye uthini komunye.”
USimakade wabahlakaza kanjalo-ke bagcwala umhlaba wonke, bakuyeka ukwakha umuzi.
Lowo muzi wabizwa ngokuthi yiBhabhele, ngokuba kulapho uSimakade aphambanisa khona ulimi lomhlaba wonke, wayesebahlakaza bagcwala umhlaba wonke.
Nanku umlando wezizukulwane zikaShemu. Kwaphela iminyaka emibili unqamukile uzamcolo, uShemu eseneminyaka eyikhulu, wazala u-Arifaksadi.
Esemzele u-Arifaksadi, waphila iminyaka engama-500: wayezele namanye amadodana namadodakazi.
Kuthe u-Arifaksadi eseneminyaka engama-35, wazala uShela.
Emva kokuzala uShela, u-Arifaksadi waphila iminyaka engama-403, wabuye wazala amadodana namadodakazi.
UShela wayeseneminyaka engama-30 ezala u-Ebhere.
Esemzele u-Ebhere, waphila iminyaka engama-403, wabuye wazala amadodana namadodakazi.
Kuthe u-Ebhere eseneminyaka engama-34, wazala uPhelegi.
Esemzele uPhelegi, u-Ebhere waphila iminyaka engama-430, wabuye wazala amadodana namadodakazi.
UPhelegi eseneminyaka engama-30, wazala uRegu.
Esemzele uRegu, uPhelegi waphila iminyaka engama-209, wabuye wazala amadodana namadodakazi.
URegu eseneminyaka engama-32, wazala uSerugi.
Esemzele uSerugi, uRegu waphila iminyaka engama-207, wabuye wazala amadodana namadodakazi.
USerugi eseneminyaka engama-30, wazala uNahori.
Esemzele uNahori, uSerugi waphila iminyaka engama-200, wabuye wazala amadodana namadodakazi.
UNahori eseneminyaka engama-29, wazala uThera.
Esemzele uThera, uNahori waphila iminyaka eyi-119, wabuye wazala amadodana namadodakazi.
Kuthe uThera eseneminyaka engama-70, wazala u-Abhrama, uNahori, noHarana.
Nanku umlando wezizukulwane zikaThera. UThera wazala u-Abhrama, uNahori, noHarana. UHarana wazala uLothi.
UHarana wafa kuqala kunoyise uThera ezweni ayedabuka kulo i-Uri lamaKhaledi.
U-Abhrama noNahori baganwa. U-Abhrama waganwa nguSarayi, uNahori waganwa nguMilikha, owayeyindodakazi kaHarana, owayezala u-Isikha.
USarayi wayeyinyumba, engenabantwana.
UThera wathatha indodana yakhe u-Abhrama noLothi owayezalwa nguHarana, nomalokazana wakwakhe uSarayi owayegane u-Abhrama, bonke base belifulathela i-Uri lamaKhaledi, balibangisa eKhanani. Bafika bahlala eHarana.
UThera waphila iminyaka engama-205, wafela eHarana.
USimakade wathi ku-Abhrama: “Phuma ezweni lakini, nasezihlotsheni zakho, nakwabendlu kayihlo, uye ezweni engizokukhombisa lona.
Ngizokwenza ube yisizwe esikhulu, ngikubusise, ngikunike udumo, wena ube yisibusiso.
Ngiyakubabusisa abakubusisayo, ngibaqalekise abakuqalekisayo. Yonke imindeni yomhlaba iyakubusiswa ngawe.”
U-Abhrama wayeneminyaka engama-75 ngesikhathi eqala uhambo lwakhe njengalokhu uSimakade ayemtshelile; wahamba noLothi, balifulathela iHarana.
Wathatha umkakhe uSarayi, noLothi indodana yomfowabo, nayo yonke impahla ababenayo, nezinceku ababezitholile eHarana, babhekisa amabombo eKhanani. Sebefikile eKhanani,
u-Abhrama wadabula kulo waze wafika eShekhemu nasemu-okhini eMore. Ngaleso sikhathi kulelo lizwe kwakusakhe amaKhanani.
USimakade wazibonakalisa ku-Abhrama, wathi: “Leli lizwe ngiyolinika isizukulwane sakho.” U-Abhrama wayesakha lapho i-althare likaSimakade owayezibonakalise kuye.
Wasuka lapho waya kwelezintaba empumalanga yeBhethele, wagxumeka ithende lakhe lapho. IBhethele yayingasentshonalanga, i-Ayi ingasempumalanga. Kulapho-ke akhela khona uSimakade i-althare, wakhuleka egameni likaSimakade.
Wayesekhukhula njalo waze wayofika eningizimu.
Kwase kuhlasela indlala eKhanani, u-Abhrama wayesehlela eGibhithe ukuyogogobala khona, ngokuba indlala yayidlangile ezweni lakubo.
Kuthe lapho sebezongena eGibhithe wayesethi kumkakhe uSarayi: “Ngazi kahle ukuthi ungowesifazane omuhle kakhulu.
Kuyothi uma amaGibhithe ekubona athi: ‘Ngumkakhe lo.’ Bese mina engibulala, kodwa wena akuyeke uphile.
Ubowatshela ukuthi ungudadewethu, khona ezongiphatha kahle ukuze ngisinde ngenxa yakho.”
Ekufikeni kuka-Abhrama eGibhithe, amaGibhithe ambona owesifazane ukuthi muhle ngokwedlulele.
Izikhulu zikaFaro nazo zambona zamncoma kuFaro, wayeselethwa esigodlweni sakhe.
UFaro wamphatha kahle u-Abhrama ngenxa yomkakhe, wamxoshisa ngezimvu, izinkomo, izimbongolo, amakameli, izinceku nezincekukazi.
USimakade washaya uFaro nabendlu yakhe ngobhubhane ngenxa kaSarayi umka-Abhrama.
UFaro wayesebiza u-Abhrama wathi kuye: “Yini le nto oyenze kimi na? Awungitshelanga ngani ukuthi ungumkakho na?
Usholoni ukuthi ungudadewenu ngaze ngamthatha ukuba abe ngumkami na? Manje-ke nangu umkakho. Mthathe uhambe.”
UFaro wayeseyaleza abantu bakhe ukuba babakhombe indlela ababeze ngayo o-Abhrama nomkakhe nakho konke ayenakho.
U-Abhrama nomkakhe nakho konke ayenakho basuka eGibhithe bakhuphuka babheka eningizimu noLothi.
Ngaleso sikhathi u-Abhrama wayesecebe kakhulu, enemfuyo, nesiliva negolide.
Wasuka eningizimu wahamba ephumula waze wayofika eBhethele, endaweni ephakathi kweBhethele ne-Ayi, lapho wayekade egobe khona amadlangala phambilini,
nalapho wayekade akhe khona i-althare. Wakhuleka egameni likaSimakade.
ULothi owayehambe no-Abhrama, naye wayesenezimvu, izimbuzi, izinkomo namathende.
Izwe ababehlezi kulo lalingasabenele, ngoba imfuyo yabo yabe seyande kakhulu kangangokuthi babengeke besakwazi ukuhlala ndawonye.
Abelusi bemfuyo ka-Abhrama nabekaLothi base beqale ukuxabana. Ngaleso sikhathi amaKhanani namaPherizi ayehlala kulelo lizwe.
U-Abhrama wathi kuLothi: “Masingaxabani, ingabi bikho nengxabano phakathi kwabelusi bethu, ngoba thina siyazalana.
Awuliboni yini leli lizwe eliphambi kwakho na? Masehlukane-ke. Uma uya enyakatho, mina ngizoya eningizimu. Uma uya eningizimu, mina ngizoya enyakatho.”
ULothi wabheka, walibona lonke ithafa eliseJordani kuze kube seZowari ukuthi lalivunde njengensimu kaSimakade, nanjengeGibhithe. Lokho kwenzeka uSimakade engakalibhubhisi iSodoma neGomora.
ULothi wazikhethela lonke ithafa eliseJordani, wayeselibhekisa ngasempumalanga. Ehlukana kanjalo-ke lawa madoda amabili.
U-Abhrama wayesehlala eKhanani, uLothi wahlala phakathi kwemizi esethafeni, wagxumeka ithende lakhe eduze komuzi iSodoma.
Abantu baseSodoma babonakele kakhulu, benza inkohlakalo yodwa phambi kukaSimakade.
Kwathi lapho uLothi esehambile, uSimakade wakhuluma ku-Abhrama wathi: “Manje phakamisa amehlo akho ubuke nxazonke lapho ukhona: enyakatho, eningizimu, empumalanga nasentshonalanga,
ngokuba lonke leli lizwe olibonayo ngizokunika lona; wena nezizukulwane zakho, kuze kube phakade.
Ngiyokwandisa izizukulwane zakho zibe ngangothuli lomhlaba, ukuze kuthi uma kukhona ongase akwazi ukubala uthuli lomhlaba, angazibala nezizukulwane.
Lihlole lonke leli lizwe, ngoba ngikunika lona.”
U-Abhrama wayesesusa ithende lakhe, wahamba, wafike wahlala eduze kwezihlahla ezinkulu zemi-okhi eMamre, eHebhroni, wayesemakhela khona uSimakade i-althare.
Ngalezo zinsuku kwasuka u-Amirafeli inkosi yaseShinari, no-Ariyokhi inkosi yase-Elasa, noKhedoloma inkosi yase-Elamu, noThidali inkosi yezizwe,
ahlasela uBhera inkosi yaseSodoma, noBhisha inkosi yaseGomora, noShinaba inkosi yase-Adima, noShemebha inkosi yaseZebhoyimu, nenkosi yaseBhela okuyiZowari.
Wonke lawo makhosi ahlanganisela amabutho awo esigodini iSidimu, okuwuLwandle Lukasawoti.
Lawo makhosi ayekade ekhonze kuKhedoloma iminyaka eyi-12, kodwa kuthe ngonyaka we-13 amvukela,
okuthe ngonyaka weshu-14, uKhedoloma namakhosi ayebambisene nawo bahlasela amaRefa e-Ashitherothi Karinayimu, amaZuzi eHamu, ama-Emi eShave Kiriyathayimi,
namaHori asezintabeni eSeyiri, bawanqoba, bawaxosha aze afika e-Eli Pharani ehlane.
Base bebuyela emuva, bafika e-Eni Mishiphathi okuyiKadeshi, balinqoba lonke izwe lama-Amaleki, nama-Amori ayakhe eHazezoni Thamari.
Amakhosi aseSodoma, eGomora, e-Adima, eZebhoyimu, naseBhela, elibuye laziwe ngokuthi yiZowari, ehlela esigodini iSidimu, aphaka impi yawo ngamahlandla,
abhekana noKhedoloma inkosi yakwa-Elamu, noThidali inkosi yezizwe, no-Amirafeli inkosi yaseShinari, no-Ariyokhi inkosi yase-Elasa, kungamakhosi amane ebhekene namakhosi amahlanu.
Isigodi iSidimu sasigcwele imigodi yebhithumeni, okwathi lapho amakhosi aseSodoma naseGomora ebaleka, amanye amadoda aphonseka kuyo, amanye athi galo yephuka ephikelele ezintabeni.
Amakhosi ayiphanga yonke impahla yaseSodoma, neyaseGomora nakho konke ukudla, ahamba nakho.
Amthumba noLothi, indodana yomfowabo ka-Abhrama, owayehlala eSodoma nempahla yakhe bemuka naye.
Kwafika ophume ngesamagundwane isabambene, wabikela u-Abhrama umHebheru, owayakhe eduze kwezihlahla ezinkulu zemi-okhi eMamre, umu-Amori, umfowabo ka-Eshikholi no-Aneri, ababenze isivumelwano no-Abhrama.
Kuthe angezwa u-Abhrama ukuthi isihlobo sakhe sithunjiwe, wayesekhipha amadoda angama-318 ayeqeqeshelwe impi, ezalelwe emzini wakhe, wahamba nawo; bayixosha eyesitha baze bayofika kwaDani.
Kwathi ebusuku u-Abhrama wawehlukanisa phakathi amadoda ayehamba nawo, ayithelekela nxazonke eyezitha; ayidudula aze ayithela eHobha enyakatho neDamaseku.
Wayithola yonke impahla kaLothi, wabuya naye uLothi, isihlobo sakhe, nabanye abantu nabesifazane.
U-Abhrama esebuya ekunqobeni uKhedoloma namakhosi ayemelekelela, inkosi yaseSodoma yakhuphuka yamhlangabeza esigodini iShave, okungukuthi yisigodi seNkosi.
UMelkhizedeki, inkosi yaseSalema, owayengumphristi kaNkulunkulu Ophezukonke, wamlethela isinkwa newayini.
Wambusisa u-Abhrama wathi: “U-Abhrama makabusiswe nguNkulunkulu oPhezukonke, uMdali wezulu nomhlaba.
Makabongwe uNkulunkulu oPhezukonke onikele ezandleni zakho izitha zakho.” U-Abhrama wayesenikela kuMelkhizedeki ngokweshumi kwakho konke.
Inkosi yaseSodoma yathi ku-Abhrama: “Nginike abantu, wena uthathe impahla.”
Kepha u-Abhrama waphendula wathi: “Ngifungile kuSimakade uNkulunkulu oPhezukonke, uMdali wezulu nomhlaba,
ngathi ngeke ngamukele lutho lwakho, ngisho umucwana womchilo wembadada, ukuze ungangijikeli bese uthi: ‘Yimi engimnothisile u-Abhrama.’
Ngakho-ke angizukuthatha lutho ngaphandle kwalokho osekudliwe yizinsizwa, nesabelo salawa madoda abengiphelezele: u-Aneri, u-Eshikholi, noMamre. Mabasifumane isabelo sabo.”
Emveni kwalezo zinto izwi likaSimakade lafika ku-Abhrama ngombono, lathi kuye: “Ungesabi Abhrama, ngiyisihlangu sakho, umvuzo wakho uyakuba mkhulu kakhulu.”
U-Abhrama waphendula wathi: “Nkosi Simakade, uzonginikani njengoba ngingenamntwana nje? Ngisho nefa lami imbala lizodliwa ngu-Eliyezeri waseDamaseku.”
U-Abhrama waqhubeka wathi: “Njengoba ungincishe umntwana nje, kusobala ukuthi le nceku ezalelwe lapha ekhaya yiyona ezokuba yindlalifa yami.”
Izwi likaSimakade lezwakala kuye lithi: “Le ndoda kayisoze yaba yindlalifa yakho, indlalifa yakho kuzokuba yindodana ephuma okhalo lwakho.”
Wayesemkhiphela phandle wathi: “Bheka esibhakabhakeni ubale izinkanyezi, uma ungazibala.” Wayesethi kuye: “Iyakuba ngako inzalo yakho.”
U-Abhrama wakholwa ngokwashiwo nguSimakade, ngenxa yalokho uSimakade wakubalela kuye kwaba ngukulunga.
Wayesethi ku-Abhrama: “NginguSimakade owakukhipha e-Uri lamaKhaledi ukuba ngikunike leli lizwe libe yifa lakho.”
U-Abhrama wathi kuye: “Nkosi Simakade, ngiyokwazi kanjani ukuthi liyokuba yifa lami na?”
Wathi kuye: “Ngilethele isithole esineminyaka emithathu, imbuzikazi eneminyaka emithathu, inqama eneminyaka emithathu, ihobhe nephuphu lejuba.”
U-Abhrama wakuletha kuSimakade konke lokho, wakwehlukanisa izingxenye ezimbili, wazihlela izinhlangothi zabhekana, kodwa izinyoni akazehlukanisanga.
Kwase kwehlela amanqe enyameni, kodwa u-Abhrama wawaxosha.
Kuthe seliyozilahla kunina u-Abhrama wazunywa ngubuthongo obukhulu. Esesebuthongweni wehlelwa ngubumnyama obesabekayo.
Wathi ku-Abhrama: “Yazi lokhu ukuqonde ukuthi inzalo yakho iyokuba ngabafokazi ezweni okungesilo elayo, ibe yizigqila, icindezelwe iminyaka engama-400.
Kepha ngiyosijezisa isizwe esiyobe siyigqilazile, kuthi ekugcineni iphume isinefa elikhulu.
Nokho wena uyokufa ngokuthula, amathambo akho ayobekwa nawawoyihlomkhulu, ungcwatshwe usumdala.
Kuyothi isizukulwane sakho sesine sibuyele kule ndawo, ngokuba ukona kwama-Amori akukapheleliswa.”
Selishonile ilanga, sekumnyama, kwabonakala imbawula eshunqayo nesihlonti sikhephuka ilangabi kudabula phakathi kwezinhlangothi zenyama.
Ngalolo lusuku uSimakade wenza isivumelwano no-Abhrama, wathi: “Ngiyakulinika inzalo yakho leli lizwe, kusukela emfuleni oseGibhithe kuze kube semfuleni omkhulu iYufrathe:
izwe lamaKheni, lamaKhenizi, lamaKhadimoni,
lamaHithi, lamaPherizi, lamaRefayi,
lama-Amori, lamaKhanani, lamaGirigashi, nelamaJebusi.”
USarayi umka-Abhrama wayengamtholeli bantwana; wayenencekukazi engumGibhithe, igama layo kunguHagari.
USarayi wathi ku-Abhrama: “Bheka, uSimakade ungivale inzalo. Hamba ulale nencekukazi yami, mhlawumbe ingase ingivusele umuzi.” U-Abhrama walilalela izwi lomkakhe uSarayi.
Kuthe lapho u-Abhrama esehlale iminyaka elishumi eKhanani, uSarayi umkakhe wathatha incekukazi yakhe uHagari, umGibhithe, wayinika umyeni wakhe ukuba ibe ngumkakhe.
U-Abhrama walala noHagari, wayesekhulelwa. Kwathi angazibona ukuthi usekhulelwe uHagari, waqala ukubukela phansi uSarayi inkosikazi.
USarayi wayesethi ku-Abhrama: “Sengathi lokhu okubi okwenzeka kimi lingathwalwa nguwe icala lakho. Mina ngakunika incekukazi yami, ithe ingazibona ukuthi isikhulelwe yayisingibukela phansi. USimakade makehlulele phakathi kwakho nami.”
U-Abhrama wathi: “Incekukazi yakho isezandleni zakho. Yenza noma yini oyibona ifanele.” USarayi wamhlupha uHagari waze wabaleka.
Ingelosi kaSimakade yamthola uHagari ehlane eduze kwesiphethu esasibuqamama nomgwaqo oya eShuri.
Yathi kuye: “Hagari, ncekukazi kaSarayi, uvelaphi, futhi ulibangisephi na?” Waphendula wathi: “Ngibalekela inkosikazi uSarayi.”
Ingelosi kaSimakade yathi kuye: “Buyela kuyo inkosikazi ufike uzithobe.”
Yaqhubeka yathi: “Ngiyozandisa izizukulwane zakho zibe ziningi kangangokuthi azinakubalwa.”
Ingelosi kaSimakade yathi kuye: “Ukhulelwe manje, uzozala indodana, uyiqambe igama uthi ngu-Ishmayeli, ngokuba uSimakade uluzwile usizi lwakho.
Uyakuba yindoda ewumdlwembe njengembongolo yasendle, amelane nabo bonke abantu, nabantu bonke bamelane naye, futhi uyoba nochuku ngisho nasezihlotsheni zakhe zonke.”
UHagari wayesembiza uSimakade owayekhulume naye wathi: “Ungu-Eli Royi,” ngokuba wathi: “Ngabe ngimbonile yini, ongibonayo na?”
Yingakho leso siphethu sisabizwa ngokuthi yiBheri Lahayi Royi. Siphakathi kweKadeshi neBheredi.
UHagari wamzalela u-Abhrama indodana. U-Abhrama wayiqamba indodana yakhe ngokuthi ngu-Ishmayeli.
Wayeneminyaka engama-86 u-Abhrama ngesikhathi uHagari emzalela u-Ishmayeli.
Kwathi u-Abhrama eseneminyaka engama-99, uSimakade wabonakala kuye wathi: “NginguNkulunkulu uSomandla. Hamba phambi kwami ungenasici.
Ngizosigcina isivumelwano esiphakathi kwami nawe, ngikwandise kakhulu.”
U-Abhrama wakhothama wathi mbo ngobuso, uNkulunkulu wathi kuye:
“Mina ngiyazibophezela kulesi sivumelwano engisenza nawe: uyakuba nguyise wezizwe eziningi.
Igama lakho alisayukuba ngu-Abhrama, kepha selizokuba ngu-Abhrahama, ngokuba ngikwenze uyise wezizwe eziningi.
Ngizokwandisa kakhulu, kuvele kuwe izizwe eziningi ngisho namakhosi imbala.
Ngiyakumisa isivumelwano esiphakade phakathi kwami nawe, nezizukulwane zakho, ngibe nguNkulunkulu wakho nowazo.
Ngikunika lonke iKhanani ongumfokazi kulo njengamanje, libe yifa lakho laphakade nelezizukulwane zakho, ngibe nguNkulunkulu wazo.”
Wayesethi uNkulunkulu ku-Abhrahama: “Gcina isivumelwano sami, wena nezizukulwane zakho.
Yilesi isivumelwano sami nawe nezizukulwane zakho, okufanele nisigcine: wonke umuntu wesilisa phakathi kwenu kufanele asokwe,
ukuze lokhu kube wuphawu lwesivumelwano phakathi kwami nani.
Ezizukulwaneni zonke umntwana ongumfana phakathi kwenu, osenezinsuku eziyisishiyagalombili ezelwe, kufanele asokwe, ngisho nalabo abazalelwe kwakho abangazalwa nguwe, noma ngabe bathengwe ngemali kowezizwe,
noma ngabe bazalelwe kwakho, noma bathengwe ngemali; mabasokwe. Lolu phawu alushaywe emizimbeni yenu lube yisivumelwano sami saphakade.
Bonke abesilisa abangasokile bayonqunywa, bangahlanganyeli nabantu bakubo, ngokuba basephulile isivumelwano sami.”
UNkulunkulu wabuye wathi ku-Abhrahama: “USarayi umkakho awusezukumbiza ngoSarayi, igama lakhe sekuzokuba nguSara.
Ngizombusisa akuzalele indodana, abe ngunina wezizwe eziningi okuyovela kuzo amakhosi ayobusa izizwe.”
U-Abhrahama wakhothama wathi mbo ngobuso wahleka, wakhuluma yedwa wathi: “Indoda ingayizala kanjani ingane isinekhulu leminyaka na? USara angabe esakwazi ukuzala ingane esehlanganise iminyaka engama-90, na?”
Wathi u-Abhrahama kuNkulunkulu: “Sengathi u-Ishmayeli angaphila phambi kwakho.”
UNkulunkulu wathi: “Akunjalo; ngumkakho uSara ozokuzalela indodana; uyiqambe igama uthi ngu-Isaka. Ngiyosigcina isivumelwano sami nakuye, sibe yisivumelwano saphakade ngisho nasesizukulwaneni sakhe.
Mayelana no-Ishmayeli ngisizwile isicelo sakho, naye ngizombusisa ngimuphe inzalo eningi, nezizukulwane eziningi. Uyakuba nguyise wamakhosi ayi-12, ngimenze abe yisizwe esikhulu.
Kepha isivumelwano sami ngiyosimisa no-Isaka, ozomzalelwa nguSara ngalesi sikhathi, ngonyaka ozayo.”
UNkulunkulu eseqedile ukukhuluma no-Abhrahama, wenyuka, wamshiya.
Ngalolo lusuku u-Abhrahama wabiza u-Ishmayeli nazo zonke izinceku ezazizalelwe kwakhe, nazo zonke izigqila ayezithengile, wabasoka, njengalokhu uNkulunkulu ayemyalile.
U-Abhrahama wayesehlanganise iminyaka engama-99 mhla esokwa.
U-Ishmayeli wayeseqede iminyaka eyi-13 mhla esokwa.
Ngalelo langa kwasokwa u-Abhrahama no-Ishmayeli indodana yakhe,
nabo bonke abendlu yakhe, labo ababezalelwe kwakhe, nezigqila ezazithengwe kwabezizwe.
USimakade wabonakala ku-Abhrahama ngasezihlahleni ezinkulu zemi-okhi eMamre, ezihlalele emnyango wethende lakhe, lishisa bhe.
Kwathi lapho u-Abhrahama ephakamisa amehlo, wabona amadoda amathathu emi buqamama naye. Uthe angawabona, wasuka emnyango wethende lakhe, wathathela ngejubane ewahlangabeza, wafike wakhothama wathi mbo ngobuso.
Wathi: “Nkosi yami, uma uthanda mawungayidluli inceku yakho.
Makulethwe amanzi, nigeze izinyawo, bese niphumula emthunzini.
Lokhu senize naphambukela emzini wenceku yenu, manginitholele isinkwa nimise insika, niphumule, bese niqhubeka nohambo lwenu.” Amphendula athi: “Kulungile.”
U-Abhrahama waphuthuma wangena ethendeni kuSara, wathi kuye: “Sheshisa uthathe imicengezi emithathu uyigcwalise impuphu, uyixove, wenze amaqebelengwane.”
U-Abhrahama wagijima waya emhlanjini, wafike wakhetha ithole elihle elinonophele, walinika inceku, yaphuthuma yalihlaba, yalilungisa.
Waletha izaqheqhe, nobisi, nenyama yethole ayeyilungisile, konke lokho wakubeka phambi kwawo. Ngesikhathi lawo madoda edla, yena wayemi eceleni kwawo phansi kwesihlahla.
Ambuza athi: “Uphi umkakho uSara na?” Wawaphendula wathi: “Usethendeni.”
Enye yalawo madoda yathi: “Ngizobuya noma kanjani ngalesi sikhathi ngonyaka ozayo; umkakho uSara uzobe esenendodana.” USara wakuzwa lokho esemnyango wethende ngemva kuka-Abhrahama.
U-Abhrahama noSara base bebadala, iminyaka yabo isihambile kakhulu, uSara engasakwazi ukuthola abantwana.
USara ekuzwa lokho wahleka usulu, wathi: “Kuzothi sengiguge nginje, nomyeni wami esemdala kangaka, siphinde sithokozisane na?”
USimakade wathi ku-Abhrahama: “Uhlekeleni uSara, ethi: ‘Ngisengamthola ngempela umntwana mina sengiguge nginjena na?’
Ngabe kukhona yini okulukhuni kakhulu okwehlula uSimakade na? Ngesikhathi engisinqumileyo ngonyaka ozayo, ngizobuya ngize lapha; ngizomfica uSara esenendodana.”
USara washaywa wuvalo, wenza izaba wathi: “Angihlekanga.” Kepha iNkosi yathi: “Qha, uhlekile.”
Lawo madoda asukuma ahamba alibhekisa eSodoma, u-Abhrahama wawaphelezela.
USimakade wathi: “Ngimfihlele yini u-Abhrahama engikuhlosile na?
Ngeke ngimfihlele, njengalokhu u-Abhrahama ezokuba yisizwe esikhulu nesinamandla, nezizwe zonke zomhlaba zibusiseke ngaye,
futhi ngimqokile ukuba afundise abantwana bakhe nabendlu yakhe, ukuba bagcine umyalo kaSimakade ngokwenza ukulunga nobulungiswa, ukuze uSimakade akufeze lokho amethembise khona.”
USimakade wamtshela u-Abhrahama wathi: “Isikhalo ngeSodoma neGomora sesisikhulu kakhulu, nezono zabo zimbi kakhulu.
Ngakho-ke ngizokwehlela khona ukuba ngibone ukuthi ngempela benze njengokwesikhalo esesifike kimi yini, uma kungenjalo, ngiyokwazi.”
Lawo madoda awufulathela umuzi ka-Abhrahama, alibangisa eSodoma, kodwa u-Abhrahama wasala emi phambi kukaSimakade.
U-Abhrahama wasondela kuye wathi: “Ngabe uzoqotha imbokodo nesisekelo yini kwabalungileyo nababi na?
Kungenzeka kube khona abalungileyo abangama-50 kulo muzi. Ngabe uzowuqothula wonke umuzi ungawuyeki ngenxa yabalungileyo abangama-50 abakuwo na?
Impela mazingafi ngamvunye, abalungileyo nababi. Makube kude nawe ukwenza into efana naleyo. UMehluleli womhlaba wonke angakwenza kanjani okungalungile na?”
USimakade wathi: “Uma ngithola abangama-50 abalungileyo emzini waseSodoma, ngiyakuyiyeka indawo ngingayibhubhisi ngenxa yabo.”
U-Abhrahama waphendula wathi: “Njengalokhu sengize ngazidela ngakhuluma eNkosini yize ngiwuthuli nomlotha nje,
uma kwenzeka laba abangama-50 abalungileyo behle ngabahlanu, usengawubhubhisa yini wonke umuzi ngenxa yabahlanu ababi na?” USimakade wathi: “Uma ngithola abangama-45 angiyukuwubhubhisa.”
U-Abhrahama waqhubeka wathi: “Mhlawumbe kwenzeke kutholakale abangama-40.” Wathi kuye: “Ngenxa yabangama-40 angiyukuwubhubhisa.”
Wayesethi: “Ngicela iNkosi ingangithukutheleli kengiphawule. Mhlawumbe kwenzeke kutholakale abangama-30.” Yaphendula yathi: “Angiyukuwubhubhisa uma ngithola abangama-30.”
U-Abhrahama wathi: “Njengoba sengizidelile ngakhuluma nawe Nkosi, mhlawumbe kwenzeke kutholakale abangama-20.” Yaphendula yathi: “Ngenxa yabangama-20 angiyukuwubhubhisa.”
Wayesethi: “Ngicela Nkosi ungangicasukeli, ngiphawule okokugcina. Mhlawumbe kwenzeke kutholakale lapho abalishumi.” Yaphendula yathi: “Ngenxa yabalishumi angiyukuwubhubhisa.”
Kwathi ukuba uSimakade aqede ukukhuluma no-Abhrahama, behlukana, u-Abhrahama waphindela ekhaya.
Izingelosi ezimbili zafinyelela eSodoma kusihlwa; uLothi wayehlezi esangweni eSodoma. Uthe angazibona, wasukuma, wazihlangabeza, wathi mbo ngobuso emhlabathini.
Wathi kuzo: “Makhosi ami, ake niphambukele endlini yenceku yenu ukuze nithole amanzi okugeza izinyawo, nilale okwanamuhla, bese nivuka ekuseni niqhubeke nohambo lwenu.” Zamphendula zathi: “Qha, sizohlala emgwaqweni.”
ULothi wazibelesela ezincenga zaze zaphambuka zangena endlini yakhe. Wabe esezilungisela idili, wazenzela namaqebelengwane angenamvubelo; zadla.
Kwathi lapho zingakalali, kwafika bonke abesilisa baseSodoma, abancane nabadala, bazungeza indlu kaLothi.
Bammemeza uLothi bethi: “Akuphi lawa madoda angenise kuleyo ndlu namuhla na? Akhiphele lapha phandle siwalale.”
ULothi wayesephumela phandle, wavala umnyango.
Wathi: “Bakwethu! Musani ukwenza into embi kangaka.
Lalelani lapha, nginamadodakazi amabili aseyizintombi; ngivumeleni ngininikeze wona nizibonele. Inqobo nje uma ningezukuwathinta lawa madoda angenise kwami ngokuba kuyisibopho sami ukuwavikela.”
Bathi: “Suka lapha lesi sifiki! Usuzosishayela imithetho! Sesizohlupha wena-ke kakhulu kunawo.” Ayesemdudula uLothi aze acishe awufohloza umnyango.
Amadoda ayesendlini amdonsela ngaphakathi uLothi, ayesevala umnyango.
Abesilisa abasha nabadala ababengaphandle kwendlu kaLothi bashaywa ngobumpumputhe, bawufuna umnyango baze badikibala.
Amadoda ayesendlini ambuza uLothi athi: “Uhlala nobani kuleli khaya na? Khipha amadodana akho, nabakhwenyana bakwakho, namadodakazi, nabo bonke ohlala nabo niphume kulo muzi.
Isikhalo ngalo muzi sesisikhulu phambi kukaSimakade. Ngalokho usithumile ukuba sizowubhubhisa.”
ULothi waphuma wakhuluma nabakhwenyana bakwakhe, wathi: “Phuthumani niphume niphele kulo muzi, ngokuba uSimakade uzowubhubhisa.” Kepha bekuzwa lokho bakuthatha njengamancoko nje.
Entathakusa, izingelosi zamnxusa uLothi zathi: “Lo muzi uzobhujiswa ngenxa yobubi bawo, ngalokho wena phangisa uvuke, uthathe umkakho namadodakazi akho womabili, funa ubhujiswe nawo.”
Esabamba eyeka, amadoda amxhakathisa ngesandla, yena, nomkakhe, namadodakazi akhe womabili, abakhiphela ngaphandle komuzi, ngokuba uSimakade ngomusa wakhe wayefuna ukubaphephisa.
Anele abakhipha nje, enye yamadoda yathi kuye: “Yithi galo yephuka uphephise impilo yakho. Ungajeqezi emuva futhi ungami ngisho ethafeni. Phikelela ezintabeni, ngokuba ungase uficwe ngamathonsi abanzi.”
ULothi wathi kuwo: “Yobe, makhosi ami,
ningenzele uzwelo nangiphatha ngomusa nangiphephisa. Kodwa angikwazi ukubalekela ezintabeni, funa ngehlelwe yinhlekelele, ngibhubhe.
Nankuya umuzi omncane oseduze, futhi mncane, ngingabalekela kuwo, ngiphephe.”
Yathi: “Kulungile, ngiyakuzwela kulokho, angisezukuwubhubhisa lo muzi owushoyo.
Kepha phangisa ubalekele kuwo, ngoba akukho engingakwenza ungakafiki kuwo.” Yingakho lowo muzi ubizwa ngokuthi yiZowari.
Kwathi eqambe efika eZowari uLothi, kwase kuse gelekeqe.
USimakade wehlisela ikloba lomlilo wesibabule njengemvula phezu kweSodoma neGomora, livela ezulwini.
USimakade wayibhubhisa kanjalo-ke leyo mizi nesifunda sonke, nabo bonke ababakhe kuyo, nokumile emhlabathini.
Kwathi besabaleka, umkaLothi wajeqeza emuva, wayesephenduka insika kasawoti.
U-Abhrahama wavuka kusempondozankomo waphindela endaweni lapho ayekade emi khona phambi kukaSimakade.
Kwathi lapho ethi uphonsa amehlo ezansi eSodoma naseGomora ebuka lonke izwe lamathafa, wabona isikhatha sentuthu senyuka sifana nentuthu yesithando somlilo.
Ngesikhathi uNkulunkulu ebhubhisa imizi eyayisethafeni wamkhumbula u-Abhrahama, wangambhubhisa uLothi naleyo mizi ayekade ehlala kuyo.
ULothi wasuka eZowari wakhuphukela entabeni, wahlala khona namadodakazi akhe amabili, ngokuba babesaba ukuhlala eZowari, ngakho-ke wahlala emgedeni namadodakazi akhe amabili.
Langa limbe indodakazi endala kaLothi yathi kwencane: “Ezweni lonke abantu bayaganana, kodwa lapha akukho ndoda esingayigana kanti nobaba usegugile.
Woza simgcince ngewayini adakwe, bese silala naye ukuze silondoloze uzalo lwakithi, siluphembe ngaye.”
Ngalobo busuku amgcinca ngewayini uyise, kwangena endala yalala naye, kodwa uLothi akezwanga lutho; akayizwanga ilala nalapho isivuka.
Ngakusasa indodakazi endala yathi kwencane: “Ngilalile nobaba izolo. Asimphuzise iwayini nanamhlanje bese wena ungena ulale naye, siphembe uzalo ngaye.”
Nangalobo busuku abuye amgcinca ngewayini uyise, kwase kungena indodakazi encane yalala naye, nalapho uLothi akezwanga lutho; akayizwanga ilala nalapho isivuka.
ULothi wawakhulelisa omabili amadodakazi akhe.
Indodakazi endala yazala umfana yamqamba yathi nguMowabi. Nguyena ongukhokho wesizwe sakwaMowabi nanamhlanje.
Indodakazi encane yazala nayo umfana yamqamba yathi nguBheni-Ami. Ungukhokho wesizwe sabakwa-Amoni nanamhlanje.
U-Abhrahama wayesesuka lapho ayekade egobe khona amadlangala, waya esifundeni esiseningizimu, wahlala phakathi kweKadeshi neShuri. Wahlala ngasemzini waseGerari engumfokazi.
U-Abhrahama wathi ngomkakhe uSara: “Ungudadewethu.” U-Abhimeleki, inkosi yaseGerari, wathumela ukuba alandwe uSara, ukuze azithathele yena.
UNkulunkulu wafika ebusuku ngephupho ku-Abhimeleki, wathi: “Uyabona, uzokufa ngenxa yalo wesifazane omthathile; ungumkamuntu.”
U-Abhimeleki wayengakalali noSara. Wayesethi: “Nkosi, impela uzobulala abantu abangenacala na?
Akashongo yini kimi wathi: ‘Ungudadewethu’ na? Naye luqobo uthe: ‘Ungumfowethu.’ Mina-ke ngikwenze lokhu ngenhliziyo emsulwa nangezandla ezingenacala.”
UNkulunkulu waqhubeka ephusheni, wathi kuye: “Nami impela ngiyakwazi ukuthi lokho okwenzile ukwenze ngenhliziyo emsulwa. Yingakho ngingakuvumelanga ukuba umthinte, ngakuthiya ukuze ungoni kimi.
Manje-ke lo mkamuntu mbuyisele endodeni yakhe, ngoba ingumphrofethi. Yona izokushwelezela uphile. Uma kodwa ungamphindiseli, yazi kahle ukuthi uzokufa nokufa, wena, nabo bonke abendlu yakho.”
U-Abhimeleki wavuka kusempondozankomo wabiza zonke izikhulu zakhe, wazilandisa ngalolo daba, zangenwa ngamanzi emadolweni.
U-Abhimeleki wabiza u-Abhrahama wathi: “Ukwenzeleni lokhu kithi, mina nombuso wami sikone ngani uze usethwese icala elingaka na? Wenze kithi okungafanele ukwenze.”
U-Abhimeleki wambuza u-Abhrahama wathi: “Iyini inhloso yakho ngokwenza le nto na?”
U-Abhrahama waziphendulela wathi: “Kufike kimi umcabango wokuthi uNkulunkulu akesatshwa kule ndawo, ngizobulawa ngifele umkami.
Kanti-ke nangaphezu kwalokho ungudadewethu okwangempela, sizalwa ndodanye, sehlukene ngomama, nokho-ke ngamenza umkami.
Kwathi lapho uNkulunkulu engikhipha kwabakithi ngathi kumkami: ‘Uyobe ukhombise ukuthembeka uma noma kuphi lapho sifika khona ubatshela ukuthi ngingumfowenu.’ ”
U-Abhimeleki wamnika u-Abhrahama izimvu, izinkomo nezigqila zesilisa nezesifazane, wambuyisela nomkakhe uSara.
U-Abhimeleki wayesethi: “Nanti izwe phambi kwakho, ungakha nomaphi lapho uthanda khona.”
Esebhekise kuSara wathi: “Bheka, umfowenu ngimnike izinhlamvu zesiliva eziyinkulungwane, eziyinhlawulo engishweleza ngazo ngesiphosiso asenze phambi kwabo bonke ohamba nabo, wena awunacala.”
U-Abhrahama wakhuleka kuNkulunkulu. UNkulunkulu wamelapha u-Abhimeleki, umkakhe nezigqila, wabuye wabavula izibeletho,
ngoba uSimakade wayekade ebavale izibeletho bonke abendlu ka-Abhimeleki ngenxa kaSara umka-Abhrahama.
USimakade wamhambela uSara njengoba ayekade eshilo, wamenzela lokho ayemethembise khona.
USara wakhulelwa, wamzalela u-Abhrahama indodana esemdala, ngesikhathi uNkulunkulu ayekhulume naye ngaso.
U-Abhrahama wayiqamba indodana ayizalelwe nguSara ngokuthi ngu-Isaka.
U-Abhrahama wamsoka u-Isaka esenezinsuku eziyisishiyagalombili ezelwe njengoba uNkulunkulu ayemyalile.
U-Abhrahama wayeseneminyaka eyikhulu ngesikhathi kuzalwa u-Isaka indodana yakhe.
USara wathi: “UNkulunkulu ungijabulisile ngahleka, bonke abakuzwayo lokhu bazojabula kanye nami.”
Waqhubeka wathi: “Ngubani owayengase athi ku-Abhrahama: ‘USara usengancelisa abantwana na?’ Kodwa nokho ngimzalele umntwana esemdala.”
Umntwana wakhula, walunyulwa ebeleni; u-Abhrahama wenza idili elikhulu mhla u-Isaka elunyulwa.
USara ebona ukuthi indodana ezalwa nguHagari umGibhithe, ayizalela u-Abhrahama, ihlekisa ngo-Isaka,
wathi ku-Abhrahama: “Xosha lesi sigqila nendodana yaso, ngokuba indodana yesigqila ngeke idle ifa nendodana yami u-Isaka.”
Lokhu kwamkhathaza u-Abhrahama ngenxa yendodana yakhe u-Ishmayeli.
UNkulunkulu wathi ku-Abhrahama: “Ungakhathazeki kangaka ngomfana nesigqila sakho. Lalela konke akushoyo uSara, ngokuba uzalo luka-Isaka oluyobizwa ngawe.
Kepha nozalo lwendodana yesigqila ngiyolwenza lube yisizwe esikhulu, ngoba nalo luyinzalo yakho.”
U-Abhrahama wavuka ngovivi, wathatha isinkwa nemvaba yamanzi wakunika uHagari, wayesemethwesa khona ehlombe, wamkhomba indlela benomfana. Owesifazane wazulazula ehlane eBheri Sheba.
Kwathi sekuphele amanzi emvabeni, owesifazane wambeka phansi kwesihlahla umfana.
Wasuka wathi qekelele, wahlala phansi ibanga elingangokuciba umcibisholo, ngokuba wathi: “Mangingakuboni ukufa komfana.” Wahlala phansi phambi kwakhe wadazuluka, wakhala.
UNkulunkulu wakuzwa ukukhala komfana. Ingelosi kaNkulunkulu yammemeza uHagari isezulwini, yathi kuye: “Kwenzenjani Hagari? Ungesabi, ngokuba uNkulunkulu ukuzwile ukukhala komfana, lapho ekhona.
Phakama umthathe umfana, umbambe ngesandla umqinise, ngokuba ngizomenza abe yisizwe esikhulu.”
UNkulunkulu wawavula amehlo akhe, wabona umthombo wamanzi. Waya kuwo wafike wakha amanzi, wagcwalisa imvaba, wamphuzisa umfana.
UNkulunkulu waba naye umfana, wakhula, wahlala ehlane ePharanu, waba yingcweti ngomcibisholo.
Esahlezi ehlane ePharanu, unina wamtholela umfazi eGibhithe.
Ngaleso sikhathi kwasuka u-Abhimeleki noPhikholi umkhuzi wamabutho akhe, wathi ku-Abhrahama: “UNkulunkulu unawe kukho konke okwenzayo.
Ngakho-ke funga phambi kukaNkulunkulu ukuthi ngeke usiphathe ngobuqili, mina nabantwana bami, nezizukulwane zami, kepha njengoba ngethembekile kuwe, nawe yethembeka kimi, nakuleli lizwe ogogobele kulo.”
U-Abhrahama wathi: “Ngiyafunga.”
U-Abhrahama wayesekhononda ku-Abhimeleki ngomthombo wamanzi ayewephucwe yizinceku zakhe.
U-Abhimeleki wathi: “Angazi ukuthi ngubani owenze leyo nto. Ngiyayeshwama nje namuhla, futhi nawe awukaze ungilume indlebe ngayo.”
U-Abhrahama wathatha izimvu nezinkomo wazinika u-Abhimeleki, bobabili base benza isivumelwano.
U-Abhrahama waqembula emhlanjini amawundlu ezinsikazi ayisikhombisa.
U-Abhimeleki wathi ku-Abhrahama: “Uqondeni ngalawa mawundlu ayisikhombisa osuwaqembule emhlanjini na?”
Waphendula wathi: “Yamukela lawa mawundlu ayisikhombisa abe ngubufakazi bokuthi lo mthombo wamanzi wambiwa yimi.”
Leyo ndawo yabizwa ngokuthi yiBheri Sheba, ngokuba bobabili bafunga lapho.
Base benza isivumelwano eBheri Sheba; u-Abhimeleki wasukuma noPhikholi umkhuzi wamabutho akhe baphindela ezweni lamaFilisti.
U-Abhrahama watshala umthamariske eBheri Sheba, wayesekhuleka egameni likaSimakade uNkulunkulu Ophakade.
U-Abhrahama wagogobala izinsuku eziningi ezweni lamaFilisti.
Sezedlule lezo zinto uNkulunkulu wamvivinya u-Abhrahama, wathi kuye: “Abhrahama!” Yena wathi: “Ngilapha.”
UNkulunkulu wathi kuye: “Thatha u-Isaka indodana yakho oyithandayo okungukuphela kwayo, uhambe nayo uye eMoriya, uthi ungafika khona unikele ngayo ibe ngumhlatshelo wokushiswa kwenye yezintaba engizokukhombisa yona.”
U-Abhrahama wavuka ekuseni ngovivi, wabophela imbongolo yakhe, wathatha izinceku zakhe ezimbili, no-Isaka indodana yakhe. Wacanda izinkuni zomhlatshelo wokushiswa, maqede wangena indlela, waya lapho uNkulunkulu emyalele khona.
Ngosuku lwesithathu u-Abhrahama waphakamisa amehlo akhe, wayelamela leyo ndawo ibuqamama.
Wathi ezincekwini zakhe: “Salani lapha nembongolo. Sisaya laphaya. Sizofike sikhuleke bese siyabuya size kini.”
U-Abhrahama wathatha izinkuni zomhlatshelo wokushiswa, wazethwesa u-Isaka, yena waphatha umlilo nommese ngesandla. Base besuka njalo bobabili bahamba.
U-Isaka wathi ku-Abhrahama: “Baba.” Yena wathi: “Ndodana.” Wayesethi: “Nanku umlilo nezinkuni, kodwa liphi iwundlu lomhlatshelo na?”
U-Abhrahama waphendula wathi: “Ndodana, uNkulunkulu uqobo uyakuzibonela iwundlu lomhlatshelo.” Baqhubeka nendlela yabo bobabili.
Sebefike kuleyo ndawo uNkulunkulu ayemtshele ngayo, u-Abhrahama wakha i-althare, wabeka izinkuni phezu kwalo. Wayibopha indodana yakhe u-Isaka, wayibeka phezu kwezinkuni e-althare.
U-Abhrahama welula isandla sakhe, wathatha ummese ukuba abulale indodana yakhe.
Kusenjalo, ingelosi kaSimakade yamemeza isezulwini, yathi: “Abhrahama, Abhrahama!” Wathi: “Ngilapha.”
Yathi: “Ungamthinti umfana, ungamenzi lutho, ngoba manje sengiyazi ukuthi ungumuntu omesabayo uNkulunkulu, ngokuba awungigodlelanga indodana yakho eyodwa.”
U-Abhrahama waphakamisa amehlo wabona; bheka, nansi inqama emva kwakhe ibhajwe ngezimpondo ehlozini. Wayithatha inqama wenza ngayo umhlatshelo wokushiswa esikhundleni sendodana yakhe.
U-Abhrahama wabiza igama laleyo ndawo ngokuthi: “KukwaSimakade uyabonelela,” njengoba kushiwo nanamuhla kuthiwa: “Entabeni kaSimakade kuyabonelelwa.”
Ingelosi kaSimakade yaphinda yambiza u-Abhrahama ngokwesibili isezulwini, yathi:
“Ngizifunge Mina, kusho uSimakade: ‘Ngenxa yokuba wenze lokhu, ungayigodlanga indodana yakho eyodwa,
ngizokubusisa impela, ngiyokwenza izizukulwane zakho zibe ziningi njengezinkanyezi esibhakabhakeni, nanjengesihlabathi ogwini lolwandle. Izizukulwane zakho ziyakunqoba izitha zazo, zidle nemizi yazo,
futhi zonke izizwe zomhlaba ziyakubusiswa ngezizukulwane zakho, ngokuba ulilalelile izwi lami.’ ”
U-Abhrahama waphindela ezincekwini zakhe, base besuka bephindela eBheri Sheba; u-Abhrahama wakha khona.
Emveni kwaleso sehlakalo u-Abhrahama wabikelwa ukuthi: “UMilkha uzalele umfowenu uNahori abantwana:
u-Uzi izibulo, uBhuzi umfowabo, uKhemuweli, uyise ka-Aramu,
uKhesedi, uHazo, uPhildashi, uJidilafu, noBhethuweli.”
UBhethuweli wayenguyise kaRibheka. Laba abayisishiyagalombili uMilkha wabazalela uNahori umfowabo ka-Abhrahama.
Nesancinza sakhe esigama laso kunguRehuma samzalela amadodana uTebha, uGahamu, uTahashi, noMahakha.
USara waphila iyiminyaka eyi-127.
Wafela emzini waseKhiriyathi Arbha, okusho ukuthi eHebhroni eKhanani. U-Abhrahama wangena, walila ngoSara.
U-Abhrahama wasuka eduze kwesidumbu somkakhe, wakhuluma namaHithi, wathi:
“Ngingowezizwe nomfokazi phakathi kwenu. Ngisikeleni indawo yokungcwaba ukuze ngifihle ithambo lomkami.”
AmaHithi amphendula u-Abhrahama, athi:
“Silalele nkosi yami. Wena ungowasebukhosini bukaNkulunkulu phakathi kwethu. Akekho phakathi kwethu ongenqaba nendawo yokungcwaba umkakho.”
U-Abhrahama wasukuma, wayesekhothamela amaHithi, abantu balelo lizwe.
Wathi kubo: “Uma ningivumela ukuba ngingcwabe ithambo lomkami, ngicela ningikhulumele no-Efroni indodana kaZohari
ukuba anginike umgede wakhe waseMakhaphela, osemngceleni wensimu yakhe. Makanginike le ndawo phambi kwenu, bese ngimkhokhela intengo yayo ephelele, ukuze ibe ngeyami yokungcwaba.”
U-Efroni wayehlezi phakathi kwamanye amaHithi. U-Efroni umHithi wamphendula u-Abhrahama kuzwa wonke amaHithi ayelapho esangweni lomuzi, wathi:
“Qha, nkosi yami, ngicela ungizwe kahle. Ngiyakunika le nsimu, futhi ngiyakunika nomgede okuyo. Ngikunika yona phambi kwabantu bakithi, mngcwabe umkakho kuyo.”
U-Abhrahama wayesekhothama phambi kwabantu balelo lizwe.
Wathi ku-Efroni bezwa bonke abantu balelo lizwe: “Ngilalele, ungizwe kahle mfowethu. Ngizokukhokhela yonke imali oyibizayo ngale nsimu. Vuma ukuba ngenze njalo, ukuze ngikwazi ukungcwaba umkami lapho.”
U-Efroni wamphendula u-Abhrahama, wathi:
“Mnumzane, ngilalele, lesi siqinti somhlaba singabiza amashekeli esiliva angama-400, bekuyini khona lokho phakathi kwami nawe na? Ngcwaba umkakho kuso.”
U-Abhrahama wavumelana no-Efroni, wayesembalela inani ayelibalulile phambi kwamaHithi, ngesisindo salo amashekeli ezinhlamvu zesiliva ezingama-400 ngokwezilinganiso ezazisetshenziswa ngabahwebi baleso sikhathi.
Ngakho-ke insimu ka-Efroni eseMakhaphela, eyayisempumalanga neMamre, insimu nomgede owawukuyo, nezihlahla zonke ezazingaphakathi komngcele wayo.
Konke lokho kwadluliselwa ku-Abhrahama, kwaba yimpahla yakhe phambi kwamaHithi ayelapho esangweni lomuzi.
U-Abhrahama wamngcwaba umkakhe uSara emgedeni osensimini eseMakhaphela ebhekene neMamre okuyiHebhroni eKhanani.
Insimu nomgede u-Abhrahama akunikwa ngamaHithi kwaguquka kwaba yindawo yakhe yokungcwaba.
U-Abhrahama wayesemdala, neminyaka yakhe isiminingi kakhulu. USimakade wayembusisile u-Abhrahama ezintweni zonke.
U-Abhrahama watshela inceku yakhe eyase ikhulile, futhi yengamele indlu yakhe, nakho konke ayenakho, wathi: “Faka isandla sakho phansi kwethanga lami.
Ngizakukufungisa phambi kukaSimakade uNkulunkulu wezulu nomhlaba, ukuthi ngeke uyithathele indodana yami umfazi emadodakazini amaKhanani, esihlala phakathi kwawo.
Kepha uyokuya kwelakithi ezihlotsheni zami, ufike uyithathele khona umfazi indodana yami u-Isaka.”
Inceku yathi kuye: “Mhlawumbe lowo wesifazane angathandi ukubuya nami eze lapha kuleli lizwe. Uma kunjalo-ke, indodana yakho ngiyithathe yini ngiyiyise ezweni owavela kulo na?”
U-Abhrahama wathi kuyo: “Uze ungalokothi ubuyisele indodana yami lapho.
USimakade uNkulunkulu wezulu owangikhipha endlini kababa nakwelakithi lengabade, wakhuluma kimi, wangethembisa ngesifungo, wathi: ‘Leli lizwe ngiyolinika isizukulwane sakho.’ Uyothumela ingelosi yakhe ikuhole, okwakho ukuyotholela indodana yami umfazi lapho.
Uma owesifazane lowo engathandi ukubuya nawe, uyobe ukhululekile kulesi sifungo engikufungise sona. Inqobo nje uma ungayibuyiselanga lapho indodana yami.”
Ngakho-ke inceku yafaka isandla sayo phansi kwethanga lika-Abhrahama umniniyo, yafunga yagomela ngalolo daba.
Inceku yathatha amakameli ayishumi omniniyo, yahamba iphethe izimpahla ezinhle ezinhlobonhlobo ezivela kumnumzane. Yalibangisa e-Aramu Naharayimu, emzini okwakwakhe kuwo uNahori.
Yawaguqisa amakameli ngaphandle komuzi ngasemthonjeni wamanzi, kwaze kwaba kusihlwa ngesikhathi okuphuma ngaso abesifazane ukuyokukha amanzi.
Yayisithandaza, ithi: “Simakade, Nkulunkulu wenkosi yami u-Abhrahama. Ngicela ukuba ungiphe impumelelo namhlanje, uyenzele isihawu inkosi yami u-Abhrahama.
Ngimi lapha ngasemthonjeni, izintombi zendawo ziyeza zizokukha amanzi.
Sengathi intombi engiyokuthi kuyo: ‘Ngicela uke uyethule imbiza yakho, ungiphuzise,’ iphendule ithi: ‘Phuza, futhi ngizowaphuzisa namakameli akho,’ kungaba yileyo oyimisele inceku yakho u-Isaka. Ngalokho ngiyoqiniseka ukuthi uyenzele isihawu inkosi yami.”
Ithe ingakaqedi ukuthandaza, kwafika uRibheka etshethe imbiza, wayezalwa nguBhethuweli indodana kaMilkha, umkaNahori, umfowabo ka-Abhrahama.
Wayenguzime, isiphalaphala sentombi eyayingakaze ithintwe yindoda. Wehlela emthonjeni, wagcwalisa imbiza, wayesekhuphuka.
Inceku yagijima yamhlangabeza, yathi kuye: “Ngicela ungiphuzise ithamo lamanzi embizeni yakho.”
Wayesethi: “Phuza nkosi yami.” Wayethula imbiza, wayinika inceku ukuze iphuze.
Eseyiphuzisile, wathi: “Namakameli akho nawo ngizowaphuzisa aze adele.”
Wathulula imbiza masinyane, wagijima ephindelela ethutha amanzi emthonjeni ewathela emkhombeni, aze adela wonke amakameli.
Indoda yayimile, ithule, imgqolozele, ifuna ukuqiniseka ukuthi ngabe uSimakade ulwenze uhambo lwayo lwaba yimpumelelo yini na?
Lapho amakameli eseqedile ukuphuza, inceku yathatha icici legolide lasekhaleni, elisisindo salo kuyingxenye yeshekeli, namasongo amabili asezingalweni, asisindo sawo singamashekeli ayishumi egolide,
yathi: “Ngitshele ukuthi uyindodakazi kabani na? Ikhona yini indawo endlini kayihlo engingaphumula kuyo kulobu busuku na?”
Waphendula wathi kuyo: “Ngiyindodakazi kaBhethuweli, indodana kaMilkha, ayizalela uNahori.”
Waqhubeka wathi: “Sinotshani nefolishi eliningi ekhaya, nendawo yokulala.”
Indoda yakhothama yamdumisa uSimakade uNkulunkulu,
yathi: “Makabongwe uSimakade, uNkulunkulu wenkosi yami u-Abhrahama, ongayekanga ukukhombisa umusa nokwethembeka kwakhe enkosini yami. Nami uSimakade ungiholile endleleni ngaze ngafinyelela emzini wesihlobo senkosi yami.”
URibheka wagijima wayotshela abendlu kanina ngalezo zinto.
URibheka wayenomfowabo ogama lakhe kunguLabani; uLabani wagijima waya kuleyo ndoda eyayisemthonjeni.
Kwathi ukuba abone indandatho ekhaleni, namasongo ezingalweni zikadadewabo, futhi esekuzwile okushiwo ngudadewabo uRibheka, ethi: “Ikhulume kanjalo indoda kimi,” waya kuleyo ndoda eyayimi eduze kwamakameli ngasemthonjeni.
Wathi kuyo: “Woza ungene, wena obusisekile kaSimakade. Usameleni ngaphandle lokhu sengikulungisele indlu nendawo yamakameli akho na?”
Ngakho-ke indoda yangena endlini, uLabani wawethula imithwalo amakameli, wayesewaphakela utshani nefolishi. Indoda namadoda ayeyiphelezela babanika amanzi okugeza izinyawo.
Base beyilethela okuya ngasethunjini, kodwa yathi: “Angizukudla ngize nginilandise indaba yami.” Wathi uLabani: “Silandise.”
Ngakho-ke yathi: “Ngiyinceku ka-Abhrahama.
USimakade uyibusisile kakhulu inkosi yami, iyisigwili. Uyiphe izimvu, izinkomo, isiliva, igolide, izinceku, nezincekukazi, amakameli nezimbongolo.
USara inkosikazi yenkosi yami yamzalela indlalifa esemdala, futhi uyinike konke anakho.
Inkosi yami yangifungisa yathi: ‘Uze ungayithatheli indodana yami umfazi ezintombini zamaKhanani engiphila ezweni lawo,
kodwa yana kwelakithi ezihlotsheni zami, uyithathele khona umfazi, indodana yami.’
“Ngathi enkosini yami: ‘Mhlawumbe lowo wesifazane ngeke athande ukubuya nami.’
“Yathi: ‘USimakade engiphila phambi kwakhe, uyothumela ingelosi yakhe ikuhole, enze indlela yakho ibe yimpumelelo. Wena uzakutholela indodana yami umfazi kwelakithi nasezihlotsheni zami.
Uma ufika ezihlotsheni zami bese ziyenqaba ukukuganisela, uyobe usukhululekile esifungweni engikufungise sona.’
“Ngifike namuhla emthonjeni, ngase ngithi: ‘Nkosi, Nkulunkulu wenkosi yami u-Abhrahama, yenza manje ukuba uhambo lwami lube yimpumelelo.
Ngimi lapha ngasemthonjeni, sengathi intombi efika ukuzokha amanzi engiyakuthi kuyo: “Ake ungiphuzise ithamo lamanzi embizeni yakho,”
bese ithi: “Phuza, futhi ngizokukha amanzi ngiwaphuzise namakameli akho,” kungaba yileyo ntombi uSimakade ayimisele indodana yenkosi yami.’
Ngingakaqedi ukuthandaza ngizindla enhliziyweni yami, kwathi memfu uRibheka etshethe imbiza, wehlela emthonjeni, wakha amanzi. Ngathi kuye: ‘Ngicela ungiphuzise.’
“Wayethula imbiza ngokushesha, wathi: ‘Phuza; ngizakuwaphuzisa namakameli akho.’ Ngase ngiphuza-ke; wawaphuzisa amakameli.
Ngambuza ngathi: ‘Uyindodakazi kabani na?’ “Wathi: ‘Ngiyindodakazi kaBhethuweli ozalwa nguNahori kuMilkha.’ “Ngakho-ke ngamfaka icici ekhaleni namabhengele ezihlakaleni zakhe.
Ngakhothama, ngamdumisa uSimakade, ngimbonga uSimakade uNkulunkulu wenkosi yami u-Abhrahama, ongiholile endleleni okuyiyona ngaze ngathola indodakazi yezihlobo zenkosi yami, ukuba ibe ngumfazi wendodana yayo.
Manje-ke ngicaciseleni ukuthi nizoyiphatha ngokwethembeka nangeqiniso yini inkosi yami, uma kungenjalo ngitsheleni, ukuze ngazi ukuthi ngenzenjani.”
ULabani noBhethuweli baphendula, bathi: “Le ndaba ivela kuSimakade, ngeke thina sakwazi ukusho noma yini.
Bheka, nangu uRibheka phambi kwakho. Mthathe uhambe naye, abe ngumfazi wendodana yenkosi yakho, njengoba ekhulumile uSimakade.”
Yathi ukuba inceku ka-Abhrahama iwezwe amazwi abo, yakhothama phambi kukaSimakade ubuso bayo buthinta emhlabathini.
Inceku yakhipha izipho eziwubucwebecwebe zesiliva, negolide, nezembatho, yamnika uRibheka, yanika futhi umfowabo nonina izipho eziyigugu.
Emveni kwalokho inceku nalabo eyayihamba nabo, badla, baphuza, base belala. Sebevukile ekuseni, inceku yathi: “Ngicela indlela ukuze ngiphindele enkosini yami.”
Umnewabo nonina bathi: “Ake uyivumele intombazane ihlale nathi okwesikhashana, okungenani izinsuku eziyishumi, bese niyahamba.”
Yathi kubo: “Ningangibambezeli, njengoba uSimakade eluphumelelisile uhambo lwami, ngivumeleni ngihambe ngiphindele enkosini yami.”
Base bethi: “Sizoyibiza intombazane sizwe ukuthi ithini.”
Bambiza uRibheka bathi kuye: “Uzohamba yini nalo muntu na?” Wathi: “Ngizohamba.”
Ngakho-ke bamvumela udadewabo uRibheka, nempelesi yakhe, bahamba nenceku ka-Abhrahama, nabantu bayo.
Bambusisa uRibheka bathi: “Dadewethu, sengathi ungakhula ube ngukhokho wezizukulwane eziyizinkulungwane zezigidi, izizukulwane zakho zinqobe amasango ezitha zazo.”
URibheka ekhashwa yizimpelesi zakhe basukuma, bagibela amakameli, balandela inceku. Inceku yamthatha kanjalo uRibheka, yabamba indlela.
U-Isaka wabuya ngaseBheri Lahayi Royi, ngokuba wayehlala ezweni eliseNingizimu.
Sekuhwalala u-Isaka waphuma wazulazula ensimini yakhe ezindla. Kuthe lapho ephakamisa amehlo, wabona amakameli eza.
URibheka waphakamisa amehlo, kwathi lapho embona u-Isaka, wehla ngokushesha ekamelini.
Wathi encekwini: “Ngubani lo muntu ohamba laphaya ensimini ozosihlangabeza na?” Inceku yathi: “Yinkosi yami.” URibheka wathatha imvakazi, wazemboza ngayo.
Inceku yamlandisa u-Isaka ngakho konke ekwenzileyo.
U-Isaka wamngenisa uRibheka ethendeni likanina uSara. Wamthatha uRibheka waba ngumkakhe, wamthanda, waduduzeka selokhu kwabhubha unina.
U-Abhrahama wabuye wathatha enye inkosikazi okuthiwa nguKethura.
Yamzalela uZimrani, uJokishani, uMedani, uMidiyani, u-Ishibhaki, noShuwa.
UJokishani wayenguyise kaShebha noDedani. Amadodana kaDedani kwakungama-Ashuri, amaLethushi, namaLewumi.
Amadodana kaMidiyani: kwakungu-Efa, u-Eferi, uHanokhi, u-Abhida, no-Elda. Bonke laba babeyizizukulwane zikaKethura.
U-Abhrahama walabela u-Isaka lonke ifa lakhe,
kodwa amadodana ezancinza zakhe, u-Abhrahama wawanika izipho esaphila, wayeseyawaqhelisa endodaneni yakhe u-Isaka, aya ngasempumalanga, empumalanga.
Isiyonke iminyaka eyaphilwa ngu-Abhrahama yayiyi-175.
U-Abhrahama wafa esemdala kakhulu, egculisekile yiminyaka ayiphilile, wangcwatshwa koyisemkhulu.
Amadodana akhe u-Isaka no-Ishmayeli bamngcwaba emgedeni eMakhaphela osensimini ka-Efroni indodana kaZowari umHithi, empumalanga neMamre,
insimu u-Abhrahama ayeyithenge kumaHithi. U-Abhrahama wangcwatshwa lapho kwathunwa khona umkakhe uSara.
Esefile u-Abhrahama, uNkulunkulu wayibusisa indodana yakhe u-Isaka. U-Isaka wakha e-Ebheri Lahayi Royi.
Nazi izizukulwane zika-Ishmayeli indodana ka-Abhrahama, ayizalelwa yisigqila sikaSara, uHagari umGibhithe.
Lawa ngamagama amadodana ka-Ishmayeli ngokwelamana kwawo: izibulo kwakunguNebhayothi, kulandele uKheda, u-Adibhiyeli, uMibhisamu,
uMishima, uDuma, uMasa,
uHadadi, uThema, uJethuri, uNaphishi, noKedema.
Yilawo-ke amagama amadodana ka-Ishmayeli ngokwakha kwawo emizaneni yawo, nangokuma kwawo enkanjini, ayizinhloko zezizwana ezilishumi nambili.
Isiyonke iminyaka yokuphila kuka-Ishmayeli yayiyi-137. Wafa, wangcwatshwa koyisemkhulu.
Izizukulwane zakhe zakha kusukela eHavila kuyoshaya eShuri, eduze nomngcele eGibhithe uma ulibhekise e-Ashuri. U-Ishmayeli wayengumdlwembe phakathi kwabafowabo, ehlala ebachukuluza.
Nanku umlando ka-Isaka indodana ka-Abhrahama: u-Abhrahama wazala u-Isaka.
U-Isaka wayeseneminyaka engama-40 ngesikhathi eganwa nguRibheka indodakazi kaBhethuweli umAramu wasePhadani Aramu; wayengudadewabo kaLabani umAramu.
U-Isaka wamkhulekela kuSimakade uRibheka umkakhe, ngokuba wayengabatholi abantwana, iNkosi yawuzwa umkhuleko wakhe, uRibheka wakhulelwa.
Abantwana babeqhubukushana ngaphakathi kuye, waze wathi: “Uma kuzoba nje, pho ngisaphilelani na?” Wayeseyobuza kuSimakade.
USimakade wathi kuye: “Esibelethweni sakho kukhona izizwe ezimbili; izinhlobo ezimbili zabantu ozozizala. Ziyakwehlukana ezibilini zakho; esinye isizwe siyakwehlula esinye, omkhulu akhonze omncane.”
Kwathi sesifikile isikhathi sokubeletha, wazibula ngamawele.
Owabona ilanga kuqala wayenomzimba ompofu ngebala, ephuphuzela uboya bunjengobesiphuku, lona wamqamba igama wathi ngu-Esawu.
Emva kwakhe kwazalwa umfowabo owaphuma ebambelele esithendeni sika-Esawu, wamqamba igama wathi nguJakobe. U-Isaka wayeneminyaka engama-60 ngesikhathi kuzalwa laba bafana.
Bakhula abafana, u-Esawu waba yiphisi, ekhonze ukuhlala endle; uJakobe wayengumuntu othule engumnqolo, ehlala emathendeni.
U-Isaka wayemthanda kakhulu u-Esawu, ngokuba wayeyithanda inyama yenyamazane, kanti uJakobe wayethandwa kakhulu ngunina uRibheka.
Langa limbe uJakobe epheke isilovela samalentili, kwafika u-Esawu evela endle, eyetha yindlala.
U-Esawu wathi kuJakobe: “Ake ungiphe kuleso silovela sakho esibomvu, ngafa yindlala.” Kungakho kuthiwa ungu-Edomi.
UJakobe wathi: “Ngithengisele kuqala ilungelo lobuzibulo bakho.”
U-Esawu wathi: “Ngiyafa yiphango. Linamsebenzi muni ilungelo lobuzibulo bami kimi na?”
UJakobe wathi: “Funga kuqala.” Wayesefunga-ke. U-Esawu wadayisa kanjalo-ke ngelungelo lobuzibulo bakhe kuJakobe.
UJakobe wayesemupha isinkwa nesilovela samalentili. U-Esawu wadla, waphuza, wahamba. U-Esawu walidela kanjalo ilungelo lobuzibulo bakhe.
Kwaba khona enye indlala ezweni ngaphandle kwaleyo eyayike yaba khona emihleni ka-Abhrahama. U-Isaka wathutha waya eGerari enkosini yamaFilisti u-Abhimeleki.
USimakade wabonakala ku-Isaka, wathi: “Ungehleli eGibhithe. Hlala kuleli lizwe engizokukhombisa lona.
Hlala kuleli lizwe njengomfokazi, Mina ngizoba nawe ngikubusise. Wonke lawa mazwe ngizokunika wona, wena nezizukulwane zakho, futhi ngisifeze isifungo engasenza ku-Abhrahama uyihlo.
Ngiyakusandisa isizukulwane sakho sibe siningi ngangezinkanyezi esibhakabhakeni, ngisinike wonke lawa mazwe, nezizwe zonke zomhlaba ziyobusiswa ngenxa yesizukulwane sakho,
ngoba u-Abhrahama walilalela izwi lami, wagcina imiyalo yami, imithetho, izimiso, neziyalo zami.”
U-Isaka wahlala eGerari.
Kwathi lapho amadoda akuleyo ndawo embuza ngomkakhe, wathi kuwo: “Ungudadewethu,” ngokuba wayengafuni ukulikhipha ngembaba elokuthi ngumkakhe, esaba ukuthi amadoda endawo azomsoconga ngenxa kaRibheka, kwazise wayemuhle kakhulu.
U-Isaka esenesikhathi ezinze kuleyo ndawo, u-Abhimeleki, inkosi yamaFilisti, ezibukela nje ngefasitela, wamelamela u-Isaka ewotawota umkakhe uRibheka.
U-Abhimeleki wambiza u-Isaka, wathi: “Bheka, ngumkakho lo. Kungani pho uthe ngudadewenu na?” U-Isaka waphendula wathi: “Yingoba ngangicabanga ukuthi ngingase ngife ngenxa yakhe.”
U-Abhimeleki wathi: “Kuyini lokhu okwenze kithi na? Bekungenzeka omunye wamadoda alale nomkakho, bese sithwala icala.”
U-Abhimeleki wabayala bonke abantu, wathi: “Noma ngubani oyoke athinte lo muntu nomkakhe uyofa nokufa.”
U-Isaka watshala imbewu kulelo lizwe, kwathi ngawo lowo nyaka wavuna isivuno esikhulu kakhulu. USimakade wambusisa,
waceba kakhulu, waba nempumelelo enkulu, waceba wabedlula bonke.
Waba nemfuyo, nemihlambi, nomndeni omkhulu kwaze kwavuka umona ngaye kumaFilisti.
AmaFilisti ayesesuka eyigqiba ngomhlabathi yonke imithombo izinceku zikayise ezaziyimbe emihleni ka-Abhrahama.
U-Abhimeleki wathi ku-Isaka: “Hamba, usuke phakathi kwethu, usunamandla amakhulu kunathi.”
U-Isaka wasuka lapho, wagoba amadlangala esigodini eGerari, wahlala lapho.
U-Isaka wabuye wayimba imithombo eyayikade imbiwe emihleni ka-Abhrahama, wayibiza ngamagama ayeyiqambe wona uyise, ngokuba amaFilisti ayekade eyivalile emva kokufa kuka-Abhrahama.
Kwathi lapho izinceku zika-Isaka zimba esigodini zathola umthombo ogelezayo.
Kwaqubuka umbango phakathi kwabelusi baseGerari nabaka-Isaka, abaseGerari bethi: “Lawa manzi ngawethu.” Wawuqamba lowo mthombo wathi yi-Eseki okunguthi kusembangweni, ngoba bambangisa.
Base bemba omunye umthombo, babuye bababangisa nakulowo, wayesewuqamba ethi yiSithina.
Wasuka wayokumba omunye umthombo; kulowo abambangisanga, ngakho-ke wawuqamba ngokuthi yiRehobhothi, ngokuba wathi: “Manje uSimakade usesinike indawo ebanzi, wasenza sanda ezweni.”
Wasuka lapho wakhuphukela eBheri Sheba.
Ngalobo busuku, uSimakade wabonakala kuye wathi: “NginguNkulunkulu ka-Abhrahama uyihlo. Ungesabi, ngokuba nginawe, ngizakukubusisa, ngenze isizukulwane sakho sibe siningi kakhulu ngenxa ka-Abhrahama inceku yami.”
U-Isaka wayesakha i-althare lapho, wakhuleka egameni leNkosi, wagxumeka ithende lakhe, izinceku zakhe zamba umthombo lapho.
Kwase kufika u-Abhimeleki evela eGerari, ehamba no-Ahuzathi umeluleki wakhe, noPhikholo, umkhuzi wamabutho empi yakhe.
U-Isaka wathi kubo: “Nizofunani lapha kimi, ngoba nina niyangizonda, naze nangidingisa na?”
Bathi: “Kuyasikhanyela ukuthi uSimakade unawe. Yikho sithi: ‘Masenze isifungo phakathi kwethu nawe, kube khona isivumelwano phakathi kwethu,’
ukuze ungasenzakalisi njengoba nathi singazange sikwenzakalise, kodwa sakuphatha kahle, saze sakumukisa phakathi kwethu ngokuthula. Kusobala ukuthi wena ungobusisiweyo weNkosi.”
Wabalungisela indumezulu yedili, badla, baphuza.
Bavuka entathakusa ngakusasa bafungisana. U-Isaka wabaphelekezela behlukana ngokuthula.
Ngalolo lusuku kwafika izinceku zika-Isaka, zambikela ngomthombo ezaziwumbile, zathi: “Sithole amanzi.”
Kusukela lapho lowo mthombo wabizwa ngokuthi iShiba. Yikho nje igama lomuzi oseduze nawo ubizwa ngokuthi yiBheri Sheba kuze kube namuhla.
U-Esawu wakhula waze wahlanganisa iminyaka engama-40. Wayeseganwa nguJudithi, indodakazi kaBheri, umHithi, noBhasematha indodakazi ka-Eloni, umHithi.
Labo malokazana baletha olukhulu usizi emphefumulweni ka-Isaka noRibheka.
Kwathi lapho u-Isaka esegugile, namehlo akhe esefiphele, engasaboni kahle, wabiza indodana yakhe endala, wathi: “Ndodana yami!” Yathi kuye: “Ngilapha.”
U-Isaka wathi: “Sengimdala, futhi angilwazi usuku engizofa ngalo.
Ngakho-ke thatha umcibisholo nomnsalo wakho uye endle, ungizingelele inyamazane,
ubuye ungiphekele isilovela esehla esiphundu, usilethe kimi, ngidle, bese ngikubusisa ngingakafi.”
URibheka wayelalele lapho u-Isaka ekhuluma nendodana yakhe u-Esawu. Ngakho-ke kuthe ukuba aphume u-Esawu ukuyozingela inyamazane,
uRibheka wathi endodaneni yakhe uJakobe: “Ngimzwile uyihlo ethi kumfowenu u-Esawu:
‘Ngilethele inyamazane, ungiphekele isilovela esehla esiphundu, ngidle, bese ngiyakubusisa phambi kukaSimakade ngingakafi.’
Mntanami, lalela amazwi ami, wenze engikuyala ngakho.
Hamba uye emhlanjini, ufike ungithathele amazinyane amabili ekhethelo, ukuze ngiphekele uyihlo isilovela esehla esiphundu, njengoba esithanda,
bese wena usithatha usisa kuye, asidle, akubusise engakafi.”
UJakobe wathi kunina uRibheka: “Bheka, umnewethu u-Esawu uphuphuzela uboya, kanti mina nginesikhumba esibushelelezi.
Mhlawumbe ubaba angase angiphathe ngesandla, bese kuba sengathi ngimenza isilima, ngizilethele isiqalekiso esikhundleni sesibusiso.”
Unina wathi kuye: “Isiqalekiso esibhekiswe kuwe masehlele kimi mntanami. Wena lalela engikushoyo, ungilandele amazinyane lawo.”
Wahamba wawalanda amazinyane, wawaletha kunina, unina wawapheka wenzela uyise isilovela esehla esiphundu, ayesikhonzile.
URibheka wathatha izingubo zakwanokusho zika-Esawu indodana yakhe endala, ayezibeke endlini yakhe, wazigqokisa uJakobe.
Wamfaka izikhumba zamazinyane ezandleni, nasentanyeni yakhe eyayibushelelezi.
Wayesemnika isilovela esehla esiphundu nesinkwa ayesibhakile.
UJakobe wangena kuyise wathi: “Baba!” Uyise wamphendula wathi: “Ngilapha, ungubani wena ndodana na?”
UJakobe wathi kuyise: “Ngingu-Esawu izibulo lakho. Ngenze njengoba ubushilo. Phakama, uhlale, udle nansi inyama yenyamazane ukuze ungibusise.”
U-Isaka wathi endodaneni yakhe: “Kwenzeke kanjani uyithole ngokushesha okungaka ndodana na?” UJakobe wathi: “USimakade uNkulunkulu wakho ungiphe impumelelo ngasheshe ngayithola.”
U-Isaka wathi kuJakobe: “Sondela eduzane ukuze ngikuthinte ndodana, ngizenelise ukuthi unguye ngempela u-Esawu noma qha.”
UJakobe wasondela kuyise, wamthinta, wayesethi: “Izwi ngelikaJakobe, kodwa izandla ngezika-Esawu.”
Wahluleka ukwehlukanisa ukuthi lona nguJakobe, ngoba izandla zakhe zaziphuphuzela uboya njengezika-Esawu umnewabo, ngakho-ke wambusisa.
Wathi: “Ngabe uyiyo ngempela indodana yami u-Esawu na?” Wathi: “Nginguye.”
U-Isaka wathi: “Yilethe kimi, ngidle inyama engiyilungiselwe yindodana yami, bese ngikubusisa.” Wayiletha kuye, wadla, wamlethela newayini, wehlisa ngalo.
U-Isaka uyise wathi kuye: “Sondela ungange ndodana.”
Kuthe lapho esondela kuye emanga, u-Isaka wahogela iphunga ezingutsheni zakhe, wayesembusisa. Wathi: “Iphunga lendodana yami lifana nephunga lensimu ebusiswe nguSimakade.
Sengathi uNkulunkulu angakwehlisela amazolo ezulu avundise amasimu akho. Makakuphe inala yamabele neyewayini.
Sengathi abantu bangakukhonza. Izizwe ngezizwe zikukhothamele. Busa phezu kwabafowenu, izizukulwane zikanyoko zikukhothamele. Mabaqalekiswe bonke abakuqalekisayo, babusiswe bonke abakubusisayo.”
Lapho nje eqeda u-Isaka ukubusisa uJakobe, kungakabi sikhathi esingakanani ephumile, kwangena umnewabo u-Esawu evela ekuzingeleni.
Naye wapheka isilovela esehla esiphundu, wasiletha kuyise, wathi kuyise: “Baba, phakama, uhlale udle inyama yenyamazane yendodana yakho, ukuze ungibusise.”
Uyise u-Isaka wathi kuye: “Ungubani wena na?” Wathi: “Ngiyindodana yakho, izibulo lakho u-Esawu.”
U-Isaka wethuka wagedezela, wathi: “Ngubani kanti lona ozingele inyamazane wayiletha kimi, ngayidla ungakafiki, ngambusisa na? Yebo, uyohlala engobusisekileyo impela.”
Lapho u-Esawu ezwa lawo mazwi kayise wadazuluka wakhala kalusizi, wathi kuyise: “Ngibusise nami baba!”
Kepha wathi: “Umfowenu ungene lapha ngobuqili, wathatha isibusiso sakho.”
U-Esawu wathi: “Akubanga yiphutha ukuba aqanjwe ngokuthi nguJakobe, ngokuba sekuze kwaba kabili engiqola. Wangephuca ilungelo lami lobuzibulo. Bheka manje usengithathele nesibusiso sami.” Wayesethi kuyise: “Akusekho ngisho nesisodwa nje isibusiso ongibekele sona na?”
U-Isaka wamphendula u-Esawu, wathi: “Sengimenze waba yinkosi yakho, nganikela abafowabo nodadewabo ukuba babe yizinceku zakhe, futhi ngamabela ukudla newayini. Yini-ke enye engingakwenzela yona ndodana yami na?”
U-Esawu wathi kuyise: “Baba, ubunesibusiso esisodwa na? Ngibusise nami baba!” Wadazuluka wakhala.
Uyise wayesethi kuye: “Uyohlala endaweni ekude nezwe elivundileyo, lapho kungekho mazolo avela phezulu ezulwini.
Uyophila ngenkemba yakho, ube yisikhonzi somfowenu, kodwa lapho usumvukela uyolephula ijoka lakhe entanyeni yakho.”
U-Esawu wamzonda uJakobe ngenxa yesibusiso uyise ambusisa ngaso. Wazindla enhliziyweni yakhe wathi: “Izinsuku zokulilela ubaba zingafika noma yinini. Uma sezedlule ngizombulala umfowethu uJakobe.”
Bambikela uRibheka amazwi ka-Esawu izibulo lakhe ayesongela ngawo umnawakhe uJakobe, ngakho-ke wathi kuye: “Umnewenu usonga ukukubulala ukuze aduduzeke.
Manje-ke ndodana yami ngilalele, baleka njengamanje uye kumfowethu uLabani eHarana,
uhlale lapho isikhashana luze lubohle ulaka kumnewenu.
Aze umnewenu axole, akhohlwe, ngiyobe sengikuthumelela ukuba ubuye lapho. Kungani ngizolahlekelwa yini nobabili ngalusuku lunye na?”
URibheka wayesethi ku-Isaka: “Ngikhathazekile ngempilo yami ngenxa yabesifazane bamaHithi. Uma uJakobe naye engase aganwe ngenye yezintombi zamaHithi akule ndawo, ngiyothi ngisaphilelani na?”
U-Isaka wabiza uJakobe wambusisa wayesemyala, wathi kuye: “Ungalokothi uganwe ngenye yezintombi zamaKhanani.
Hamba uye ePhadani Aramu endlini kaBhethuweli, uyihlomkhulu, ufike khona uzithathele umfazi emadodakazini kaLabani umalume wakho.
Sengathi uNkulunkulu uSomandla angakubusisa, akwandise kakhulu, ukuze kuvele kuwe izizwe eziningi.
Sengathi uNkulunkulu anganika wena, nezizukulwane zakho isibusiso sika-Abhrahama, ukuze ulidle leli lizwe ohlezi kulo manje njengomfokazi; izwe uNkulunkulu alinika u-Abhrahama.”
U-Isaka wamkhulula kanjalo-ke uJakobe, wayesengena indlela elibangisa ePhadani Aramu, kwamalume wakhe uLabani, indodana kaBhethuweli, umAramu, ongumfowabo kaRibheka, unina kaJakobe no-Esawu.
U-Esawu wabona ukuthi u-Isaka umbusisile uJakobe, wayesemthumela ePhadani Aramu ukuba ayothatha khona umfazi, nokuthi ngesikhathi embusisa wamyala wathi kuye: “Ungalokothi uganwe ngenye yezintombi zamaKhanani.”
Wezwa nokuthi uJakobe wamlalela uyise nonina waya ePhadani Aramu.
Kuthe lapho sekumkhanyela u-Esawu ukuthi abesifazane baseKhanani abamgculisi uyise u-Isaka,
u-Esawu waya ku-Ishmayeli, wathatha uMahalathi, indodakazi ka-Ishmayeli, indodana ka-Abhrahama, ongudadewabo kaNebhayothi, wengeza ngaye ebafazini bakhe.
UJakobe wasuka eBheri Sheba walibangisa eHarana.
Kwathi angafika endaweni ethile selishonile ilanga, wahlala lapho lobo busuku. Wathatha elinye lamatshe akuleyo ndawo waqamela kulo, walala.
Waphupha ebona isikhwelo simisiwe sisuka emhlabathini size sifinyelele ezulwini. Izingelosi zikaNkulunkulu zazenyuka zehla kuso.
USimakade wema eduze kwakhe, wathi kuye: “NginguSimakade uNkulunkulu kayihlomkhulu, u-Abhrahama nokayihlo u-Isaka, leli lizwe olele kulo ngiyakulabela wena nezizukulwane zakho.
Izizukulwane zakho ziyoba ngangothuli lomhlaba, uyosabalalela entshonalanga nasempumalanga, enyakatho naseningizimu; izizwe zonke zomhlaba ziyobusiswa ngawe nangezizukulwane zakho.
Yazi ukuthi nginawe; ngizokuvikela noma kuphi lapho uya khona, futhi ngiyokubuyisela kuleli lizwe, ngokuba anginakukushiya ngize ngikwenzele lokho engikwethembise khona.”
UJakobe waphaphama ebuthongweni, wathi: “Nembala uNkulunkulu ukule ndawo, bengingazi.”
Ekhungethwe wuvalo, wathi: “Yeka ukwesabeka kwale ndawo! Akusikho okunye, yindlu kaNkulunkulu, futhi leli yisango lezulu.”
UJakobe wavuka ekuseni, wathatha lelo litshe abeqamele kulo, walimisa laba yinsika, wathela amafutha esihlokweni salo.
Wayiqamba leyo ndawo ngokuthi yiBhethele, kodwa ekuqaleni igama lalowo muzi lalaziwa ngokuthi yiLuzi.
UJakobe wenza isifungo, wathi: “Uma uNkulunkulu ezoba nami, angivikele kulolu hambo lwami, angiphe ukudla nokokwembatha,
ngize ngibuyele emzini kababa ngiphephile, impela uSimakade uzokuba nguNkulunkulu wami,
naleli litshe engilimisileyo laba yinsika liyakuba yindlu kaNkulunkulu, bese kuthi konke ozongipha khona ngikunikele kuwe, kube ngokweshumi.”
UJakobe waqhubeka nohambo lwakhe, waze wayofika ezweni labantu basempumalanga.
Esabheka, wabona umthombo endle nemihlambi emithathu yezimvu ilele eduze kwawo, ngokuba yayiphuziswa kulowo mthombo. Itshe elalisemlonyeni wawo lalilikhulu kakhulu.
Kwakuthi lapho imihlambi isihlangene, abelusi bagingqe itshe emlonyeni womthombo, baphuzise izimvu, bese belibuyisela endaweni yalo, bagibekele ngalo umlomo womthombo.
UJakobe wabuza abelusi wathi: “Bafowethu, niliqhamukisaphi na?” Bamphendula bathi: “EHarana.”
Wathi kubo: “Niyamazi yini uLabani indodana kaNahori na?” Bathi: “Siyamazi.”
Wayesethi kubo: “Ngabe usaphila yini na?” Bathi: “Yebo, usaphila. Nansi indodakazi yakhe uRaheli iza nezimvu.”
Wathi kubo: “Ilanga lisaphakeme. Akukabi yisikhathi sokubuyisa imihlambi, phuzisani izimvu bese niyahamba niyoziklabisa edlelweni.”
Bathi: “Asikwazi ukwenza lokho, ize imihlambi iphelele yonke, kugingqwe itshe emlonyeni womthombo, bese siyaziphuzisa izimvu.”
Esakhuluma nabo uJakobe, kwafika uRaheli nezimvu zikayise, ngokuba nguyena owayezelusa.
Kuthe lapho uJakobe embona uRaheli, indodakazi kaLabani, umzala wakhe, nezimvu zikaLabani umalume wakhe, uJakobe wasondela, wagingqa itshe elisusa emlonyeni womthombo, waphuzisa izimvu zikaLabani umalume wakhe.
UJakobe wamanga uRaheli, wayesedazuluka ekhala kakhulu ngenxa yokujabula.
UJakobe wayesemtshela uRaheli ukuthi uhlobene noyise, ngokuba uyindodana kaRibheka. URaheli wagijima wayobikela uyise.
Lapho uLabani ezwa udaba ngomshana wakhe uJakobe, wagijima wayomhlangabeza, wamgona, wamanga, wabuyela naye emzini wakhe. UJakobe wamlandisa uLabani zonke lezo zinto.
ULabani wayesethi kuye: “Impela uyithambo lami nenyama yami.” UJakobe wahlala naye inyanga yonke.
ULabani wathi kuJakobe: “Uzongisebenzela mahhala yini ngoba uyisihlobo sami na? Ngitshele ukuthi izoba yini inkokhelo yakho na?”
ULabani wayenamadodakazi amabili, igama lenkosazana kwakunguLeya, elikathunjana kunguRaheli.
ULeya wayenamehlo ayebuthakathaka kanti uRaheli wayemuhle ngesimo ebukeka kahle.
UJakobe wamthanda uRaheli, wayesethi kuLabani: “Ngizokukusebenzela iminyaka eyisikhombisa ngoRaheli indodakazi yakho encane.”
ULabani wathi: “Kungcono ukuba ngimnike wena kunokuba ngimnike enye indoda. Hlala nami.”
UJakobe wasebenza iminyaka eyisikhombisa ukuze aganwe nguRaheli, kodwa ngenxa yothando ayemthanda ngalo uRaheli kwaba sengathi iyizinsuku ezimbalwa.
UJakobe wayesethi kuLabani: “Nginike umkami ukuze ngilale naye, ngokuba sesiphelile isikhathi esasivumelene ngaso.”
ULabani wabamema bonke abantu bakuleyo ndawo, wenza idili.
Kepha kusihlwa wathatha indodakazi yakhe uLeya wayiyisa kuJakobe; uJakobe walala nayo.
ULabani wanikela isisebenzi sakhe uZilipha ukuba sibe yisisebenzi sendodakazi yakhe uLeya.
Ekuseni wabona ukuthi ubelele noLeya. UJakobe waya kuLabani wathi kuye: “Yini lena oyenze kimi na? Angikusebenzelanga yini ukuze ngithole uRaheli na? Ungikhohliseleni na?”
ULabani wathi: “Akwenziwa lokho kuleli lizwe ukuba kuganiswe omncane engakagani omdala.
Qeda iviki lalona bese sikunika omunye naye ozomsebenzela kimi eminye iminyaka eyisikhombisa.”
UJakobe wenza kanjalo, waqeda iviki enoLeya, uLabani wayesemnika uRaheli, indodakazi yakhe, ukuba abe ngumkakhe.
ULabani wanika uRaheli, indodakazi yakhe, isisebenzi sakhe uBhiliha ukuba sibe ngesakhe.
UJakobe walala noRaheli, wamthanda kakhulu uRaheli ukwedlula uLeya. Wasebenzela uLabani eminye futhi iminyaka eyisikhombisa.
Lapho uSimakade ebona ukuthi uLeya uyisaliwakazi, wamvula isibeletho sakhe, kodwa wasivala esikaRaheli.
ULeya wakhulelwa, wazibula ngendodana, wayiqamba igama wathi nguRubeni, ngokuba wathi: “Kungoba uSimakade ulubonile usizi lwami. Impela umyeni wami usezongithanda manje.”
Wakhulelwa, wathola enye indodana, wayiqamba igama wathi nguSimeyoni, ngokuba wathi: “Kungoba uSimakade uzwile ukuthi ngiyisaliwakazi, wayesengipha nalena futhi indodana.”
Wakhulelwa futhi, wathola indodana, wayiqamba igama wathi nguLevi, ngokuba wathi: “Impela manje umyeni wami uzonamathela kimi, ngoba sengimzalele amadodana amathathu.”
Wakhulelwa futhi wathola indodana, wathi: “Manje ngizodumisa uSimakade,” wayiqamba igama wathi nguJuda, wayesema ukuthola abantwana.
URaheli ebona ukuthi akamzalele bantwana uJakobe, waba nomona ngodadewabo, wayesethi kuJakobe: “Nginike abantwana; kungenjalo ngizokufa.”
UJakobe wamthukuthelela uRaheli wathi: “Ngisesikhundleni sikaNkulunkulu yini okunguYena okuncishe inzalo na?”
URaheli wathi: “Nasi isisebenzi sami uBhiliha, lala naye ukuze angizalele abantwana, nami ngibe nezingane ngaye.”
Wamnika uBhiliha, isisebenzi sakhe saba yisancinza sakhe, uJakobe walala naye.
UBhiliha wakhulelwa, wamzalela uJakobe indodana.
URaheli wathi: “UNkulunkulu ungehlulele, futhi ulizwile izwi lokunxusa kwami, wangipha indodana.” Ngenxa yalokho wayiqamba igama wathi nguDani.
UBhiliha isisebenzi sikaRaheli saphinda sakhulelwa, samzalela uJakobe enye indodana.
URaheli wathi: “Ngibambene nodadewethu ngezikhwepha ezinkulu, ngamnqoba.” Wayeseyiqamba igama wathi nguNafethali.
ULeya esebona ukuthi usemile ukuzala, wathatha isisebenzi sakhe uZilipha wasinikela kuJakobe ukuba sibe yisancinza sakhe.
UZilipha isisebenzi sikaLeya samzalela indodana uJakobe.
ULeya wathi: “Nginenhlanhla,” wayiqamba igama wathi nguGadi.
UZilipha isisebenzi sikaLeya samzalela enye indodana uJakobe.
ULeya wathi: “Ngibusisiwe! Ngokuba abesifazane bazothi ngingobusisiweyo.” Wayiqamba igama wathi ngu-Asheri.
Ngezinsuku zokuvunwa kukakolo, uRubeni waya endle wathola amamandarike. Wawaletha kunina uLeya. URaheli wathi kuLeya: “Ake ungiphe nami amamandarike endodana yakho.”
Kepha wathi kuye: “Akwanele yini ukungithathela umyeni wami; manje usufuna ukungiphuca namamandarike omntanami na?” URaheli wathi: “Kulungile-ke, uJakobe uzolala nawe ngalobu busuku uma unginika amamandarike endodana yakho.”
Kwathi kusihlwa uJakobe esebuyela ekhaya evela emasimini, uLeya waphuma wamhlangabeza, wathi kuye: “Namhlanje uzolala nami, ngokuba ngikuqashe ngamamandarike endodana yami.” Walala naye ngalobo busuku.
UNkulunkulu wamlalela uLeya, wakhulelwa, wamzalela uJakobe indodana yesihlanu.
ULeya wathi: “UNkulunkulu ungiphe umvuzo, ngoba nginikele ngesisebenzi sami endodeni yami.” Wayiqamba igama wathi ngu-Isakhari.
ULeya wakhulelwa futhi, wamzalela uJakobe indodana yesithupha.
ULeya wathi: “UNkulunkulu ungiphe isipho esiyigugu. Umyeni wami usezongazisa manje ngoba sengimzalele amadodana ayisithupha.” Ngakho-ke wayiqamba igama wathi nguZebuloni.
Emveni kwalokho wamzalela indodakazi, wayiqamba igama wathi nguDina.
UNkulunkulu wamkhumbula noRaheli, wawuphendula umkhuleko wakhe, wasivula isibeletho sakhe.
Wakhulelwa, wazala indodana wathi: “UNkulunkulu ulisusile ihlazo lami.”
Wayiqamba igama wathi nguJosefa. “USimakade makanezele kimi ngenye indodana.”
Kwathi uRaheli esezele uJosefa, uJakobe wayesethi kuLabani: “Ngivumele ngihambe ngibuyele ekhaya kwelakithi.
Ngikhululele nomkami nabantwana bami engibasebenzeleyo ngihambe, ngokuba uyazi ukuthi ngikusebenzele kangakanani.”
ULabani wathi kuye: “Uma uzongivumela ukuba ngisho lokhu: ngizwile uma ngibhula ukuthi uSimakade ungibusise ngenxa yakho.
“Nquma iholo lakho ngizokunika lona.”
UJakobe wathi kuye: “Wena uyazi ukuthi ngikusebenzele kangakanani, nokuthi imfuyo yakho ichume kangakanani isesandleni sami;
ngokuba ngingakafiki wawunemfuyo encane, kodwa selokhu ngafika imfuyo yakho isiyande kakhulu, futhi uSimakade ukubusisile noma kuphi lapho bengiya ngakhona; kodwa manje ngizoyisebenzela nini mina indlu yami na?”
Wathi: “Ngizokunikani na?” UJakobe wathi: “Awuyukunginika lutho. Ngenzele kube kunye nje, ngizoqhubeka ngikwelusele umhlambi wakho, ngiwunakekele.
Namhlanje ngizodabula phakathi komhlambi wakho, ngisuse zonke ezimabhadubhadu, nezimabalabala, nazo zonke izimvu ezimnyama kuwo. Nginike ezinjalo kube yiholo lami.
Ubuqotho bami buzongifakazela ngomuso lapho usufika uzohlola iholo ongikhokhele lona. Leso silwane oyosithola kimi singemabhadubhadu, futhi singemabalabala ezimbuzini, nesingemnyama ezimvini zami, kuyoba ngisebile.”
ULabani wathi: “Kuhle-ke, akuye njengamagama enkehli.”
Ngalolo lusuku uLabani wakhetha zonke izimpongo ezihunqu, nezimabhadubhadu, nezimbuzikazi ezimabalabala, nezimabhadubhadu, zonke lezo ezazinamabala amhlophe, namawundlu amnyama, wakupha amadodana akhe.
Ayesehamba ibanga lezinsuku ezintathu eqhela kuJakobe, uJakobe waqhubeka nokwelusa umhlambi kaLabani.
UJakobe wathatha izinduku zikabhabhulini, nezomu-alimondi, nezesinana, wazixebula amaxolo, kwavela okumhlophe ezindukwini.
Wazibeka lezo zinduku ezixetshuliweyo kuyo yonke imikhombe ezazizophuza kuyo ukuze zibe phambi kwezimbuzikazi ngesikhathi zifika ukuzophuza, ngokuba yilapho zazikhwelana khona.
Ngenxa yokuba zazikhwelana phambi kwezinduku, zonke zazala amazinyane ahunqu, namabhadubhadu, namabalabala.
UJakobe wawehlukanisa lawo mazinyane emhlanjini kaLabani. Ngesikhathi zikhwela, wabhekisa ubuso bemihlambi kwezikaLabani, kwezinemishwi nezimnyama. Ezakhe wazehlukanisa azaze zahlangana nemihlambi kaLabani.
Kwakuthi njalo uma eziqinileyo emhlanjini zikhwelana, uJakobe abeke izinduku phambi kwazo emikhombeni ukuze zikhwelwe zibheke kuzo.
Uma kungezintekenteke emhlanjini angazibeki izinduku. Zonke ezintekenteke kwaba ngezikaLabani, eziqinile zaba ngezikaJakobe.
Ngokwenza kanjalo, uJakobe waba yisicebi esikhulu, enemihlambi emikhulu yezimvu, nezimbuzi, nezincekukazi, nezinceku, namakameli, nezimbongolo.
UJakobe wezwa ukuthi amadodana kaLabani ayakhononda, athi: “UJakobe useqole ubaba konke obekungokwakhe, nale ngcebo yonke anayo uyithole ngezinto obekungezikababa.”
UJakobe wabona nokuthi uLabani akasamnambithisisi kahle njengakuqala.
USimakade wathi kuJakobe: “Phindela ezweni lokhokho bakho nasezihlotsheni zakho, Mina ngizoba nawe.”
UJakobe wathumela wabiza uRaheli noLeya ukuba beze kuye endle lapho ayelusele khona umhlambi.
Wathi kubo: “Ngiyabona ukuthi uyihlo akasanginambithisisi kahle njengakuqala. Kepha uNkulunkulu kababa unami.
Nani niyazi ukuthi uyihlo ngimsebenzele ngokuzikhandla kangakanani,
kepha yena ungiqolile waguqula iholo lami izikhathi eziyishumi, kodwa uNkulunkulu akamvumelanga ukuba angilimaze.
Uma ebethi: ‘Ezimabhadubhadu zizoba yiholo lakho,’ yonke imihlambi ibizala amazinyane amabhadubhadu. Uma eguquka ethi: ‘Zonke ezinemishu zizoba yiholo lakho,’ yonke imihlambi ibizala ezinemishu.
Ngaleyo ndlela uNkulunkulu umephucile uyihlo imfuyo yakhe wayinika mina.
“Ngesikhathi sokukhwelana kwemihlambi ngake ngaba nephupho, ngabheka phezulu ngabona ukuthi izimpongo ezazikhwela zazinemishu, zimabhadubhadu, ezinye ziyihunqu.
Ingelosi kaNkulunkulu yayisithi kimi ephusheni: ‘Jakobe!’ “Ngathi: ‘Ngilapha.’
“Yathi: ‘Bheka phezulu, ubone ukuthi zonke izimpongo ezikhwela umhlambi zinemishu, ezinye zimabhadubhadu, nezinye ziyihunqu; ngokuba ngikubone konke uLabani akwenza kuwe.
NginguNkulunkulu waseBhethele lapho wagcoba khona insika, wenza nesifungo kimi. Manje suka, uphume kuleli lizwe ubuyele ezweni owazalelwa kulo.’ ”
URaheli noLeya bamphendula bathi: “Sikhona yini isabelo noma ifa esisenakho efeni emzini kababa na?
Akasithathi yini njengabezizwe na? Ngokuba uthengise ngathi, futhi wayisebenzisa nemali esakhishelwa yona.
Yonke impahla uNkulunkulu ayephuce ubaba ingeyethu nabantwana bethu. Ngakho-ke yenza konke uNkulunkulu akutshele khona.”
UJakobe walungiselela uhambo, abantwana bakhe, namakhosikazi akhe wabagibelisa emakamelini.
Wayiqhuba imihlambi yakhe yonke nempahla yonke ayeyithole ePhadani Aramu, walibangisa kuyise u-Isaka eKhanani.
ULabani wayengekho eyogunda izimvu zakhe, uRaheli wantshontsha onkulunkulu bakayise.
UJakobe wamkhohlisa uLabani, umAramu, ngokuba akamtshelanga ukuthi uhlose ukubaleka.
Wabaleka nakho konke ayenakho, waqala wawela umfula, walibangisa kwelezintaba kwaGileyadi.
Ngosuku lwesithathu uLabani wabikelwa ukuthi uJakobe ubalekile.
Wayesethatha izihlobo zakhe wamlandela izinsuku eziyisikhombisa, waze wamfica kwelezintaba kwaGileyadi.
Kepha uNkulunkulu wayesefikile ngephupho ebusuku kuLabani, umAramu, wathi kuye: “Uqaphele ukuba ungasho lutho kuJakobe noma ngabe kuhle noma kubi.”
ULabani wamfica uJakobe. UJakobe wayegxumeke ithende lakhe kwelezintaba, naye-ke uLabani nezihlobo zakhe bagoba amadlangala khona kwelezintaba kwaGileyadi.
ULabani wathi kuJakobe: “Yini le nto oyenzileyo na? Ungikhohlisile, wathatha amadodakazi ami ngokungathi athunjwe ngenkemba.
Ubalekeleni isinyelela wangangitshela, ngoba ngabe ngikuhambise kahle ngomgidi kuhutshwa, kushaywa ukhehlegume nezigubhu?
Awunginikanga ngani ithuba lokwanga abazukulu bami namadodakazi ami, ngibavalelise na? Okwenzileyo kungubuphukuphuku.
Kusemandleni ami ukuba ngikulimaze, kodwa uNkulunkulu kayihlo ukhulume nami ebusuku bayizolo, wathi: ‘Uqaphele ukuba ungasho lutho kuJakobe noma ngabe kuhle noma kubi.’
Noma ngabe weqe ngoba usukhumbule ekhaya kini, pho kungani untshontshe onkulunkulu bami na?”
UJakobe waphendula uLabani wathi: “Yingoba bengesaba, ngicabanga ukuthi uzongephuca amadodakazi akho ngendluzula.
Kepha-ke lowo muntu okuyotholakala kuye onkulunkulu bakho, akanakuphila. Phambi kwezihlobo zethu khomba ezintweni enginazo ukuthi yini engeyakho bese uyayithatha.” UJakobe wayengazi ukuthi uRaheli wayentshontshe onkulunkulu.
ULabani wangena ethendeni likaJakobe, kwelikaLeya, wedlulela nakwawezancinza zombili, kodwa akatholanga lutho. Waphuma ethendeni likaLeya wangena kwelikaRaheli.
URaheli wabathatha onkulunkulu bakayise, wabafaka esihlalweni sekameli, wahlala phezu kwaso. ULabani walipeketula lonke ithende, kodwa akabatholanga.
URaheli wathi kuyise: “Ungangithukutheleli ngokuba ngingazange ngisukume phambi kwakho, yingoba ngisesikhathini.” ULabani wacinga, kodwa akabatholanga onkulunkulu.
UJakobe wathukuthela wamthethisa uLabani, wathi: “Liyini icala lami na? Siyini isono sami uze ungihubhe ngale ndlela na?
Njengalokhu usupeketule yonke impahla yami nje, utholeni-ke olungolwakho na? Lubeke lapha phambi kwezihlobo zethu, zona zehlulele phakathi kwethu.
Le minyaka engama-20 ngihleli nawe, izimvukazi nezimbuzikazi zakho azikaze ziphunze, futhi angikaze ngidle nqama yomhlambi wakho.
Angikaze ngilethe kuwe edweshulwe yizilo zasendle. Uma kwenzekile yafa bengiyaye ngilithwale mina lelo cala. Ubukufuna kimi okwebiwe emhlanjini wakho, noma kwebiwe emini noma ebusuku.
Ngangishiswa yilanga emini, ngilala obenyoni ebusuku, ngiqhuqhwa ngamakhaza,
ngikusebenzele le minyaka engama-20, eyi-14 yayo ngisebenzela amadodakazi akho omabili, kwathi eyisithupha ngasebenzela imfuyo. Phezu kwalokho waliguqula kalishumi iholo lami.
Uma uNkulunkulu kababa ebengenami, uNkulunkulu ka-Abhrahama, noKwesaba kuka-Isaka, ngabe manje ungibuyisela emuva ngingenalutho. Kepha uNkulunkulu ukubonile ukuhlupheka nokuzikhandla kwami, wazibonakalisa kuwe ebusuku bayizolo, wakuthethisa.”
ULabani wamphendula uJakobe wathi: “Laba bangamadodakazi ami nalaba bangabazukulu bami, le mfuyo ingeyami, nakho konke lokhu okubonayo kungokwami. Pho-ke ngingakwenza kanjani okubi kulawa madodakazi ami nakubazukulu angizalele bona na?
Ngakho-ke mina nawe masenze isivumelwano esiyakuba ngubufakazi phakathi kwethu.”
UJakobe wathatha itshe walimisa laba yinsika.
Wayesethi ezihlotsheni zakhe: “Qoqelani ndawonye amatshe;” bawaqoqa aba yinqwatshana base bedla lapho eduze kwaleyo nqwatshana yamatshe.
ULabani wayibiza leyo ndawo ngokuthi yiJega Sahadutha, uJakobe wayibiza ngokuthi yiGaledi.
ULabani wathi: “Le nqwaba izokuba yisikhumbuzo phakathi kwethu sobabili.” Yingakho nje leyo ndawo yabizwa ngokuthi yiGaledi.
ULabani wayibiza futhi ngokuthi yiMizpha, ngokuba wathi: “USimakade makalinde phakathi kwami nawe, lapho omunye engekho phambi komunye.
Uma uyakuhlupha amadodakazi ami, noma uthatha abafazi ngaphandle kwamadodakazi ami, akukho muntu onathi; bheka, uNkulunkulu ungufakazi phakathi kwami nawe.”
ULabani wathi kuJakobe: “Bheka, nansi inqwaba yamatshe nensika yetshe engikumise phakathi kwethu.
Kokubili kungubufakazi bokuthi anginakweqela ngale kwale nqwaba ngize kuwe, nawe awunakwedlulela ngale kwale nqwaba nale nsika uzosenzakalisa.
Sengathi uNkulunkulu ka-Abhrahama noNahori, uNkulunkulu woyise, angehlulela phakathi kwethu.” UJakobe wenza isifungo ngoKwesaba kuka-Isaka, uyise.
Wanikela ngomhlatshelo elapho kwelezintaba, wamema nezihlobo zakhe ukuba zidle. Badla, base belala kulo elezintaba ngalobo busuku.
ULabani wavuka ekuseni, wanga abazukulu bakhe namadodakazi akhe, wababusisa, wayesehamba ebuyela emzini wakhe.
UJakobe wabamba eyakhe indlela, izingelosi zikaNkulunkulu zamhlangabeza.
UJakobe ezibona, wathi kuzo: “Leli yibutho likaNkulunkulu.” Wayiqamba leyo ndawo ngokuthi yiMahanayimu.
UJakobe wathumela izithunywa ukuba zimendulele ziye kumnewabo u-Esawu, owayeseSeyiri, kwa-Edomi,
waziyala wathi: “Niyakuthi ku-Esawu inkosi yami: ‘Ithi inceku yakho uJakobe: bengigogobele kwaLabani angaze ngashesha ukubuya kuze kube manje.
Nginezinkomo, izimbongolo, izimvu, izinceku zesilisa nezesifazane, ngakho-ke ngithumele ukuyazisa inkosi yami ukuze ngifumane umusa kuyo.’ ”
Izithunywa zabuyela kuJakobe zathi: “Sihambile saya kumnewenu u-Esawu, naye usendleleni ukuzokuhlangabeza, uza namadoda angama-400.”
UJakobe wesaba kakhulu, wakhathazeka, wayesehlukanisa abantu ayehamba nabo, nezimvu, nezinkomo, namakameli, kwaba ngamaqembu amabili,
ethi emcabangweni wakhe: “Uma u-Esawu efika eqenjini lokuqala elibhubhisa, elinye liyokwazi ukuphunyuka.”
UJakobe wathandaza wathi: “Nkulunkulu kababamkhulu u-Abhrahama nokababa u-Isaka. Wena Simakade wathi kimi: ‘Buyela ezweni lakini nasezihlotsheni zakho, ngizokwenzela okuhle.’
Angilufanele lolu thando ongenzele lona nokwethembeka okungaka okukhombise mina inceku yakho. Ngawela leli Jordani ngiphethe kuphela udondolo, kodwa manje senginamaqembu amabili.
Ngiyakunxusa, ngihlenge esandleni somnewethu u-Esawu, ngokuba ngiyamesaba, hleze afike angihlasele mina, nabafazi bami, nezingane zami.
Wena luqobo uthe: ‘Ngizokwenzela okuhle, ngandise izizukulwane zakho zibe njengezihlabathi zolwandle ezingenakubalwa.’ ”
Walala lapho ngalobo busuku. Kwathi ezintweni ayenazo wathathela umnewabo u-Esawu isipho:
izimbuzikazi ezingama-200, nezimpongo ezingama-20, izimvukazi ezingama-200, nezinqama ezingama-20,
amakameli ezinsikazi angama-30, namankonyane awo, izinkomazi ezingama-40, nezinkunzi ezilishumi, izimbongolo zezinsikazi ezingama-20, nezingamaduna eziyishumi.
Wazinikela zonke lezo zilwane esandleni sezinceku zakhe ukuba ziziqhube, umhlambi ngamunye. Wathi ezincekwini zakhe: “Hambani phambi kwami, nishiye isikhala phakathi kwemihlambi.”
Wathi kumholi womhlambi wokuqala: “Lapho uhlangana nomnewethu u-Esawu, bese ekubuza ethi: ‘Ungokabani wena na? Ulibangisephi? Ungokabani lo mhlambi ophambi kwakho na?’
Ubomphendula uthi: ‘Ungowenceku yakho uJakobe, uyisipho asithumelela inkosi yami u-Esawu, naye uyeza emva kwethu.’ ”
Wayala nowesibili, nowesithathu, nabo bonke ababeqhuba imihlambi, wathi: “Niyakuphendula ngokufanayo ku-Esawu lapho nihlangana naye,
futhi niyakuthi: ‘Bheka, inceku yakho uJakobe iyeza emva kwethu,’ ” ngokuba wacabanga ukuthi: “Ngingahle ngimthobise ngalesi sipho engisiqhuba phambi kwami, kuyothi lapho ngibona ubuso bakhe, mhlawumbe angemukele.”
Izipho zamendulela, kodwa yena ngalobo busuku wasala, walala lapho babekanise khona.
Ngalobo busuku wavuka, wathatha amakhosikazi akhe omabili, nezancinza zakhe zombili, namadodana akhe ayi-11, wabawelisa izibuko lomfula iJabhoki.
Wabathatha wabawelisa nempahla yonke ayenayo.
UJakobe wasala yedwa, indoda yimbe yabambana naye kwaze kwasa.
Lapho leyo ndoda ibona ukuthi ayimehluli uJakobe, yayisifinyelela enyongeni yakhe, yabhinyika esikhoxeni sayo besabambene.
Wayesethi kuJakobe: “Ngiyeke ngihambe ngokuba sekuyasa.” Wayiphendula wathi: “Anginakukudedela ungakangibusisi.”
Leyo ndoda yathi kuye: “Ungubani igama lakho na?” Wayiphendula wathi: “NginguJakobe.”
Yayisithi kuye: “Awusezukubizwa ngokuthi unguJakobe, usuzobizwa ngokuthi ungu-Israyeli, ngokuba ulwe noNkulunkulu nabantu, wanqoba.”
UJakobe wayesethi kuyo: “Ngicela ungitshele igama lakho.” Yamphendula wathi: “Ungibuzelani igama lami na?” Yayisimbusisa khona lapho.
UJakobe wayiqamba leyo ndawo wathi kusePheniyeli, ngokuba wathi: “Sibonene noNkulunkulu ubuso nobuso, angaze ngafa.”
Laphuma ilanga lapho edlula ePheniyeli, eqhuga ngenxa yokubhinyika inyonga.
Kungenxa yalokho-ke abakwa-Israyeli bengawudli umsipha onamathele ethebeni lenyonga kuze kube namuhla, ngokuba uJakobe wathintwa lapho.
UJakobe waphakamisa amehlo, wambona u-Esawu eza namadoda angama-400. Wehlukanisa abantwana bakhe, abanye bahamba noLeya, abanye noRaheli, abanye bahamba nezancinza zombili.
Wabeka izancinza nabantwana bazo phambili, kwalandela uLeya nabantwana bakhe, kwagcina uRaheli noJosefa.
Yena siqu wahamba phambili, ehamba ekhothama ngobuso emhlabathini kwaze kwaba kasikhombisa, waze wafika kumnewabo.
Kepha u-Esawu wathathela ngejubane wamhlangabeza uJakobe umnawakhe, wafike wamgona, wamgomothela, wamanga, base bekhala.
Lapho u-Esawu ephakamisa amehlo ebona abesifazane nabantwana, wathi: “Ngobani laba ohamba nabo na?” UJakobe wamphendula wathi: “Bangabantwana uNkulunkulu ngomusa wakhe abaphe inceku yakho.”
Izancinza nabantwana bazo basondela, bakhothama ngobuso emhlabathini.
Kwalandela uLeya nabantwana bakhe, nabo bakhothama, kwase kugcina uJosefa noRaheli, nabo bakhothama.
U-Esawu wathi: “Ngabe iyini injongo yakho ngayo yonke le mihlambi engihlangane nayo na?” Wamphendula wathi: “Ukuba ngithole umusa enkosini yami.”
U-Esawu wathi kuye: “Nginokwanele mnawami, zigcinele wena imfuyo yakho.”
UJakobe wathi: “Qha, uma ngifumene umusa kuwe, samukele isipho esivela kimi, ngokuba ukubona ubuso bakho nje kufana nokubona ubuso bukaNkulunkulu, njengoba ungamukele ngomusa ongaka.
Ngiyakuncenga, samukele isipho sami esithunyelwe kuwe, ngokuba uNkulunkulu ube nomusa kimi, futhi nginakho konke engikudingayo.” UJakobe waqhubeka emncenga, u-Esawu wagcina esesemukele isipho sakhe.
U-Esawu wathi: “Masisuke sihambe, mina ngizohamba phambi kwakho.”
UJakobe wathi: “Inkosi yami iyazibonela ukuthi abantwana basebancane, nokuthi izimvu nezinkomo engiziqhubayo ziyancelisa. Uma singakuxina usuku lube lunye nje, kungafa wonke umhlambi.
Ngicela inkosi yami idlule phambi kwenceku yayo, mina ngizobe ngitotobisa umhlambi nabantwana, ngize ngifinyelele emzini wenkosi yami eSeyiri.”
U-Esawu wathi: “Angikushiye namanye amadoda kulawa engihamba nawo.” UJakobe wathi: “Kungani inkosi yami ingenzela umusa ongaka na?”
Ngalolo lusuku u-Esawu waphindela emuva, wabamba indlela ebheke eSeyiri.
UJakobe walibhekisa eSukhothi, wafike wathi gozololo khona, wakha nemipheme yemfuyo yakhe. Yingakho nje leyo ndawo ayibiza ngokuthi yiSukhothi.
UJakobe wafika ephephile emzini iShekhemu owawuseKhanani, evela ePhadani Aramu, wagoba amadlangala phambi komuzi.
Wathenga isiqinti kuleyo nsimu ayegobe kuyo amadlangala, emadodaneni kaHamori, uyise kaShekhemu; sasibiza ikhulu lezinhlamvu zesiliva zenani eliphezulu.
Wakha i-althare lapho, walibiza ngokuthi yi-Eli Elohe Israyeli.
UDina, indodakazi kaLeya ayeyizalele uJakobe, wavakashela ezinye izintombi zendawo.
UShekhemu, indodana kaHamori, umHivi, owayebusa kulelo lizwe, wambona wamthatha, wamona, wamthela ngehlazo.
Wayethathekile nguDina, indodakazi kaJakobe, futhi emthanda, wakhuluma naye wathulula inhliziyo yakhe kuye.
UShekhemu wakhuluma noyise uHamori, wathi: “Ngithathele le ntombi ibe ngumkami.”
UJakobe wezwa ngesigameko sokungcoliswa kwendodakazi yakhe uDina, kodwa akaze asho lutho kwaze kwafika amadodana akhe evela ekwaluseni.
UHamori, uyise kaShekhemu wahamba waya kuJakobe eyokhonga.
Amadodana kaJakobe ayefika nje evela ekwaluseni lapho ezwa ngaleso sigameko, ashaqeka, awotha ubomvu, ngokuba wayenze ichilo kwa-Israyeli ngokungcolisa indodakazi kaJakobe, okwakuyinto eyayingafanele neze ukwenziwa.
UHamori wathi kubo: “Indodana yami uShekhemu iyayithanda indodakazi yenu. Mganiseleni yona ibe ngumkakhe.
Masiganiselane, nisinike amadodakazi enu abe ngabafazi bethu, nani nithathe amadodakazi ethu abe ngabafazi benu.
Hlalani phakathi kwethu, nanti izwe phambi kwenu. Yakhani, nithengiselane, nibe nezindawo zenu.”
UShekhemu wayesethi kuJakobe nakubafowabo bentombazane: “Uma ngifumene umusa kini, shonini enikufunayo, ngizoninika khona.
Nqumani ilobolo nezibizo zenu, akukhathaleki ukuthi nibiza kangakanani, mina ngizoninika konke enikufunayo, inqobo nje uma nizongiganisela indodakazi yenu ibe ngumkami.”
Amadodana kaJakobe aphendula uShekhemu noyise uHamori ngobuqili, ngokuba wayengcolise udadewabo uDina.
Athi kubo: “Asikwazi ukwenza into efana naleyo, yokuthatha udadewethu simendise kumuntu ongasokile, onejwabu. Lokho kuyihlazo kithi.
Siyakuvuma lokho, inqobo nje uma nizoba njengathi, kusoke bonke abesilisa bakini.
Siyakuninika amadodakazi ethu, nathi sizithathele amadodakazi enu, sihlale nani, sibe sizwe sinye.
Kepha-ke uma ningavumelani nokuthi nisokwe, sizothatha udadewethu sihambe naye.”
Amazwi abo ayithola indawo kuHamori noShekhemu indodana yakhe.
Le nsizwa ayipholisanga maseko, yasoka, kwazise yayisha amashushu ngoDina, futhi ihlonishwa kakhulu kunabo bonke abendlu kayise.
UHamori nendodana yakhe baphumela esigcawini somuzi, bakhuluma nezakhamuzi, bathi:
“Laba bantu bahlezi ngokuthula nathi. Asibavumele bahambe bazithengele izindawo ngokuba izwe libanzi nxazonke, ukuze sikwazi ukuganiselana nabo.
Bavumile ukuthi bangahlala phakathi kwethu, sibe muntu munye, kuphela nje uma bonke abesilisa phakathi kwethu bezosokwa njengoba nabo besokiwe.
Uma sibavumela, imihlambi yabo, impahla yabo, nayo yonke imfuyo yabo, akuyukuba ngokwethu na?”
Zonke izakhamuzi zavumelana noHamori nendodana yakhe uShekhemu, bonke abesilisa ababakhe kuleyo ndawo basokwa.
Kwathi ngosuku lwesithathu isabhokile iminjunju yokusokwa, amadodana kaJakobe, uSimeyoni noLevi, abafowabo bakaDina, bathatha kwaba yilowo nalowo inkemba, baphuma bayohlasela umuzi iShekhemu isinyelela, bashaya icole kwabesilisa.
Babulala uHamori noShekhemu indodana yakhe ngenkemba, bakhipha uDina endlini kaShekhemu, bahamba naye.
Afika namanye amadodana kaJakobe afica izidumbu, ayesewuphanga umuzi, ngokuba wayengcoliselwe lapho udadewabo.
Bashaqa imihlambi yezimvu, izinkomo, izimbongolo zabo, okwakusemzini nasemadlelweni,
nayo yonke ingcebo, bathumba izingane, amakhosikazi, bakuphanga konke okwakusezindlini.
UJakobe wayesethi kuSimeyoni noLevi: “Ningikhathazile, nangidonsela amanzi ngomsele kubantu bezwe, kumaKhanani namaPherizi; nina niyingcosana nje, bayakuhlangana basihlasele, bangichithe mina nendlu yami.”
Bamphendula bathi: “Bekufanele yini udadewethu aphathiswe okwesifebe na?”
UNkulunkulu wathi kuJakobe: “Suka ukhuphukele eBhethele, uhlale lapho. Yakha i-althare lapho, ulakhele uNkulunkulu ozibonakalise kuwe ngesikhathi ubalekela umnewenu u-Esawu.”
UJakobe wathi emndenini wakhe nakubo bonke ayenabo: “Lahlani bonke onkulunkulu bezizwe eninabo, nizihlambulule, bese nigqoka izingubo ezihlanzekileyo.
Sizosuka lapha silibangise eBhethele, lapho ngizofike ngakhe khona i-althare likaNkulunkulu, okunguYena owangikhulula enhluphekweni engangibishe kuyo, waba nami yonke indawo lapho bengihamba khona.”
Baletha kuJakobe bonke onkulunkulu bezizwe ababenabo, namacici ayesezindlebeni zabo. Wakuthatha wakugqiba phansi kwesihlahla somu-okhi esasiseduze neShekhemu.
Baphuma bahamba, kodwa abantu bezigodi ezazibazungezile, uNkulunkulu wabafaka ingebhe abaze bawaxosha amadodana kaJakobe.
UJakobe wafinyelela eLuzi, eKhanani, okuyiBhethele, nabo bonke ayehamba nabo.
Wakha lapho i-althare, leyo ndawo wayibiza ngokuthi yi-Eli Bhethele, ngokuba kulapho uNkulunkulu azibonakalisa kuye khona mhla ebalekela umnewabo.
UDebhora, umzanyana kaRibheka wafa, wangcwatshwa phansi kwesihlahla somu-okhi ezansi neBhethele. Ngakho-ke sabizwa ngokuthi yi-Aloni Bhakhuthi.
UNkulunkulu wabonakala futhi kuJakobe ngesikhathi ebuya ePhadani Aramu, wambusisa,
wathi: “Igama lakho unguJakobe, kodwa awusezukubizwa ngoJakobe, usuzobizwa ngo-Israyeli.” Ngakho-ke wabizwa ngo-Israyeli.
UNkulunkulu wathi kuye: “NginguNkulunkulu uSomandla. Zala wande, ube yisizwe esikhulu. Kuwe kuyovela izizwe eziningi. Nasokhalo lwakho kuyovela amakhosi.
Nezwe engalabela u-Abhrahama no-Isaka nawe ngikwabela lona nezizukulwane zakho.”
UNkulunkulu wenyuka, wamshiya uJakobe lapho ayekade ekhulume naye khona.
UJakobe wayesemisa insika lapho uNkulunkulu ayekhulume naye khona, insika yetshe, wathela amafutha kuyo, wathela nomnikelo wokuphuzwayo.
Wayibiza leyo ndawo uNkulunkulu ayekhulume naye kuyo wathi yiBhethele.
Bathutha eBhethele. Kuthe kuselibangana ukuba bafike e-Efratha, uRaheli wabeletha emveni kokuhelelwa kanzima.
Kwathi lapho isenzima ngempela imihelo yakhe, umbelethisi wamqinisa idolo, wathi: “Ungesabi, ngokuba uzothola enye indodana.”
Eseyalela sekuphuma umphefumulo, wayiqamba igama wathi nguBhenoni, kodwa uyise wathi nguBhenjamini.
URaheli wafa, wangcwatshwa ngasendleleni eya e-Efratha, okuyiBhethlehema.
UJakobe wamisa insika phezu kwethuna likaRaheli, lelo thuna liselapho kuze kube namuhla.
U-Israyeli wathutha lapho, wayogoba amadlangala ngale kombhoshongo e-Ederi.
Kwathi u-Israyeli esehleli kulelo lizwe, uRubeni walala noBhiliha isancinza sikayise. Uyise u-Israyeli wezwa ngaleyo ndaba. UJakobe wayenamadodana ali-12.
Amadodana kaLeya kwakunguRubeni, izibulo likaJakobe, kulandele uSimeyoni, uLevi, uJuda, u-Isakhare noZabuloni.
Amadodana kaRaheli kwakunguJosefa noBhenjamini.
Amadodana kaBhiliha incekukazi kaRaheli kwakunguDani noNafethali.
Amadodana kaZilipha incekukazi kaLeya kunguGadi no-Asheri. Yilawo-ke amadodana kaJakobe awazala esePhadani Aramu.
UJakobe wafika kuyise u-Isaka eMamre, iKhiriyathi Arbha, okuyiHebhroni, lapho u-Abhrahama no-Isaka babekade begogobele khona.
Iminyaka yokuphila ka-Isaka yaba yi-180 isiyonke.
U-Isaka wafa, wangcwatshwa noyisemkhulu, esekhulile impela, amadodana akhe o-Esawu noJakobe bamngcwaba.
Nanku umlando wezizukulwane zika-Esawu obuye abizwe ngo-Edomi.
U-Esawu wathatha abafazi emadodakazini amaKhanani: u-Ada, indodakazi ka-Eloni, umHithi, no-Oholibhama, indodakazi ka-Ana, indodakazi kaZibhiyoni, umHivi.
Wabuye waganwa nguBhasematha indodakazi ka-Ishmayeli, udadewabo kaNebhayothi.
U-Ada wamzalela u-Esawu u-Elifazi, uBhasematha wamzalela uRuweli,
u-Oholibhama wamzalela uJewushi, uJalamu noKhora. Yilawo-ke amadodana ka-Esawu awazalelwa eseseKhanani.
U-Esawu wathatha abafazi bakhe, amadodana akhe, amadodakazi akhe, nabo bonke ayenabo, izinkomo zakhe, yonke imfuyo yakhe, nempahla yonke ayeyithole eKhanani, wathuthela ezweni elaliqhelelene nomfowabo uJakobe.
Impahla yabo yayisiningi kakhulu ukuthi babengakwazi ukuqhubeka bahlale ndawonye. Izwe ababehlezi kulo lalingasabeneli bobabili ngenxa yemfuyo ababenayo.
U-Esawu owayaziwa ngokuthi ngu-Edomi wazinza kwelezintaba eSeyiri.
Nantu uhla lwezizukulwane zika-Esawu, ukhokho wabakwa-Edomi, ababehlala kwelezintaba eSeyiri.
Nanka amagama amadodana akhe: u-Elifazi owayezalwa ngu-Ada, noRuweli owayezalwa nguBhasematha.
Amadodana ka-Elifazi kwakunguThemane, u-Omari, uZefo, uGathamu noKhenazi.
UThimna owayeyisancinza sika-Elifazi, wamzalela indodana okuthiwa ngu-Amaleki. Laba babeyisizukulwane sika-Ada, umka-Esawu.
Amadodana kaRuweli, kwakunguNahathi, uZera, uShama, noMiza. Laba babeyisizukulwane sikaBhasemathi.
Lawa kwakungamadodana ka-Oholibhama indodakazi ka-Ana, engumzukulu kaZibhiyoni, umka-Esawu, kwakunguJewushi, uJalamu, noKhora.
Nazi izikhulu ezavela emadodaneni ka-Esawu: amadodana ka-Elifazi, izibulo lika-Esawu, kwakunguThemani, u-Omari, uZefo, uKhenazi,
uKhora, uGathamu, no-Amaleki. Yilezi-ke izikhulu ezavela ku-Elifazi kwa-Edomi zingamadodana ka-Ada.
Lawa ngamadodana kaRuweli, indodana ka-Esawu, isikhulu uNahathi, uZera, uShama, nesikhulu uMiza. Yilezo-ke izikhulu ezazalwa nguRuweli kwa-Edomi. Zaziyizizukulwane zika-Bhasematha.
Lawa ngamadodana ka-Oholibhama, umka-Esawu: kwakuyizikhulu uJewushi, uJalamu, noKhora. Yilazo-ke izikhulu ezazizalwa ngu-Oholibhama, indodakazi ka-Ana, umka-Esawu.
Yilolo-ke uhla lwamadodana nezikhulu ababezalwa ngu-Esawu ongu-Edomi.
Lawa ngamadodana kaSeyiri umHori ayehlala eSeyiri: kwakunguLothani, uShobhali, uZibhiyoni, u-Ana,
uDishoni, u-Ezeri, noDishani. Laba babengamadodana kaSeyiri ayebusa amaHori kwa-Edomi.
Amadodana kaLothani kwakunguHori noHomamu, udadewabo kaLothani kwakunguThimna.
Amadodana kaShobhali kwakungu-Alvani, uManahathi, u-Ebhali, uShefo, no-Onamu.
Amadodana kaZibhiyoni kwakungu-Ayiya no-Ana. U-Ana nguye owathola iziphethu zamanzi ashisayo ehlane, mhla eluse izimbongolo zikayise, u-Zibhiyoni.
Laba ngabantwana baka-Ana: uDishoni, no-Oholibhama owayeyintombazana.
Amadodana kaDishoni kwakunguHemidani, u-Eshibhani, u-Ithirani noKherani.
Amadodana ka-Ezeri, kwakunguBhilihani, uZavani, no-Akhani.
Amadodana kaDishani kwakungu-Uzi no-Arani.
Izikhulu zamaHori, kwakunguLothani, uShobhali, uZibhiyoni, u-Ana,
uDishoni, u-Ezeri, noDishani. Babebusa amaHori ngokwezigaba zabo eSeyiri.
Lawa ngamakhosi ayebusa kwa-Edomi kungakabi bikho nkosi kwa-Israyeli:
uBhela, indodana kaBheyori, wabusa kwa-Edomi, emzini owawubizwa ngokuthi yiDinihabha.
Kuthe ukuba akhothame uBhela, ubukhosi bathathwa uJobhabhu, indodana kaZera waseBhozira.
Wakhothama uJobhabhu, ubukhosi bathathwa uHushama waseThemane.
Wakhothama uHushama, ubukhosi bedlulela kuHadada, indodana kaBhedada owanqoba abakwaMidiyani esifundeni kwaMowabi. Igama lomuzi ayebusa kuwo kwakuthiwa yi-Avithi.
Wakhothama uHadada, kwabusa uSamila waseMasireka.
Wakhothama uSamila, kwathatha uShawuli waseRehobhothi ngasemfuleni.
Wakhothama noShawuli, kwabusa uBhali Hanana, indodana ka-Akhibhori.
Wakhothama noBhali Hanana, indodana ka-Akhibhori, kwase kubusa uHadari. Igama lomuzi ayebusa kuwo kwakuthiwa yiPhawu; igama lendlovukazi kunguMehethabheli, indodakazi kaMathiredi, owayeyindodakazi kaMezahabhi.
Lawa ngamagama ezkhulu ezadabuka ku-Esawu ngemindeni nangezifunda zawo: nguThimna, u-Alva, uJethethi,
u-Oholibhama, u-Ela, uPhinoni,
uKhenazi, uThemane, uMibhizari,
uMagidiyeli no-Iramu. Laba babeyizikhulu kwa-Edomi ezifundeni ababakhe kuzo, ezweni elaliyifa lazo. U-Esawu ngukhokho wabakwa-Edomi.
UJakobe wakha eKhanani, ezweni okwakukade kuhlala kulo uyise.
Lena yindaba kaJakobe nezizukulwane zakhe. Kwathi uJosefa eseneminyaka eyi-17, elusa umhlambi nabafowabo ababezalwa nguBhiliha noZilipha, abafazi bakayise, uJosefa wabika umbiko omubi ngabafowabo kuyise.
U-Israyeli wayemthanda uJosefa kunawo wonke amadodana akhe, kwazise wayemthole esemdala. Wamthungela ingubo enemikhono emide.
Abafowabo bakubona ukuthi uyise umthanda kunabo bonke abafowabo, ngakho-ke bamzonda, futhi ababe besakwazi ukukhuluma kahle naye.
UJosefa waphupha iphupho, wayeselitshela abafowabo, okuthe bangalizwa bamzonda ngokwedlulele.
Wathi kubo: “Ake nizwe iphupho engiliphuphileyo.
Besibopha izinyanda ensimini, kwathi inyanda yami yaphakama yema, ezenu zase ziyizungeza, zayikhothamela.”
Abafowabo bathi kuye: “Usho ukuthi uzoba yinkosi yethu usibuse na?” Yabhebhetheka kakhulu inzondo kubafowabo ngenxa yamaphupho namazwi akhe.
UJosefa wabuye waphupha, wabalandisa futhi abafowabo, wathi: “Ngiphuphe ngibona ilanga, nenyanga, nezinkanyezi eziyi-11 kungikhothamela.”
Wamlandisa noyise njengoba enze kubafowabo, kodwa uyise wamthethisa, wathi kuye: “Phupho lini leli oliphuphileyo na? Usho ukuthi unyoko nami nabafowenu siyokuza sikukhothamele na?”
Abafowabo baba nomona ngaye, kodwa uyise wawagcina enhliziyweni yakhe lawo maphupho.
Ngelinye ilanga abafowabo bakaJosefa bahamba nomhlambi kayise beyowelusela eShekhemu.
U-Israyeli wathi kuJosefa: “Abafowenu abelusele yini eShekhemu na? Woza ukuze ngikuthume kubo.” UJosefa wathi: “Ngilapha baba.”
Wathi kuye: “Hamba uyobona ukuthi abafowenu nemfuyo basaphatheke kahle yini, bese ungilethela umbiko.” Wamthuma esuka esigodini eHebhroni, waze wayofika eShekhemu.
Umuntu mumbe wamfumana ezulazula endle, wambuza wathi: “Ufunani lapha na?”
Wathi: “Ngifuna abafowethu. Ngiyakuncenga, ngitshele ukuthi ngabe belusele kuphi na?”
Leyo ndoda yathi: “Basukile lapha. Ngibezwe bethi: ‘Asihambe siye eDothani.’ ” UJosefa wahamba wabalandela, waze wabathola khona eDothani.
Bambona esekude engakasondeli eduze kwabo, base bemakhela ugobe lokumbulala.
Bathi omunye komunye: “Nansi inyanga yamaphupho iza.
Wozani siyibulale, siyiphonse komunye wemigodi, bese sithi kubaba: ‘Udliwe yisilwane esibi sasendle,’ sibone-ke ukuthi amaphupho akhe ayofika kuphi.”
URubeni ekuzwa lokho, wazama ukumphephisa kubo, wathi: “Asingambulali.
Ningalichithi igazi! Mphonseni emgodini khona lapha ehlane, ningambeki isandla!” Wayefuna ukumphephisa kubo ukuze amphindisele kuyise.
Uthe lapho uJosefa efika kubafowabo, bamhlubula ingubo yakhe ayeyigqokile embalabala, enemikhono emide.
Bamthatha, bamphonsa emgodini owawomile, ungenamanzi.
Bahlala phansi, badla; kuthe bephakamisa amehlo, babona ihele labakwa-Ishmayeli liqhamuka kwaGileyadi, amakameli abo ethwele inhlaka, nebhalisamu, nemure, bekwehlisela eGibhithe.
UJuda wathi kubafowabo: “Siyozuzani ngokubulala umfowethu, bese sifihla igazi lakhe na?
Asimthengisele abakwa-Ishmayeli engenamyocu, ngokuba ungumfowethu, uyinyama yethu.” Abafowabo bamlalela.
Kwathi lapho kwedlula abahwebi bakwaMidiyani, bamkhipha uJosefa emgodini, bamthengisa kwabakwa-Ishmayeli ngezinhlamvu zesiliva ezingama-20, ababe sebemthatha bahamba, baya naye eGibhithe.
URubeni wabuyela emgodini, washaqeka engasamfici uJosefa lapho, wayeseklebhula izingubo zakhe.
Wabuyela kubafowabo wathi kubo: “Akasekho umfana emgodini, ngizoshonaphi mina na?”
Bathatha ingubo kaJosefa ende, base behlaba impongo, bacwilisa ingubo kaJosefa egazini layo.
Bayithumela ingubo ende enemibala ehlukene kuyise, bathi: “Nakhu esikutholile. Ake uhlolisise ubone ukuthi akusiyona yini ingubo yendodana yakho na?”
UJakobe eyibona, wathi: “Yingubo yendodana yami le. Isilwane esibi sasendle simdlile. Simdwengulile uJosefa waba yizicucu.”
UJakobe wayeseklebhula izingubo zakhe, wembatha isaka okhalo lwakhe, walilela indodana yakhe izinsuku eziningi.
Onke amadodana namadodakazi akhe, afika ukuzomduduza, kepha kwanhlanga zimuka nomoya. Wathi: “Ngiyoze ngiye kwelabafileyo ngisayililela indodana yami.” Waqhubeka nokuyililela indodana yakhe.
AbakwaMidiyani bamthengisa uJosefa eGibhithe kuPotifari, inceku kaFaro, induna yabalindi.
Ngaleso sikhathi uJuda wabashiya abafowabo, wayohlala nomuntu wase-Adulama okuthiwa nguHira.
UJuda wabona indodakazi yendoda yaseKhanani egama layo linguShuwa. Wayithatha, yamgana, walala nayo.
Yakhulelwa, yazala indodana, wayiqamba igama wathi ngu-Eri.
Yabuye yakhulelwa, yazala enye indodana, wayiqamba igama wathi ngu-Onani.
Yalandelisa futhi ngenye indodana, wayiqamba igama wathi nguShela: babeseKhezibhi ngesikhathi ezalwa.
UJuda wathathela indodana yakhe eyizibulo, u-Eri, umfazi ogama lakhe linguThamari.
U-Eri, izibulo likaJuda, wayemubi phambi kukaSimakade, ngakho-ke uSimakade wambulala.
UJuda wathi ku-Onani: “Kuhle ukuba ungene umkamfowenu, umvusele umuzi.”
U-Onani wayazi ukuthi abantwana abazalwayo ngeke babizwe ngaye, kwathi noma elala nomkamfowabo wayichithela phansi imbewu, ukuze angamvuseli umfowabo umuzi.
Leyo nto ayenza yaba yimbi emehlweni kaSimakade, wayesembulala naye.
UJuda wayesethi kuThamari, umalokazana wakwakhe: “Kungcono uhlale ube ngumfelokazi emzini kayihlo kuze kukhule indodana yami uShela.” Ngokuba uJuda wathi: “Angase afe naye lo njengabafowabo.” UThamari wahamba wayohlala emzini kayise.
Emveni kwesikhathi wafa umkaJuda, indodakazi kaShuwa. UJuda esemzilele umkakhe, wakhuphukela kubagundi bezimvu zakhe eThimna, enomngani wakhe uHira wase-Adulamu.
UThamari watshelwa ukuthi: “Uyihlozala usendleleni ulibangise eThimna ukuyogunda izimvu zakhe.”
Wayesekhumula inzilo, wazemboza ngemvakazi, wahlala phansi ngasesangweni e-Enayimi, ngasemgwaqweni oya eThimna, ngokuba wabona ukuthi uShela usekhulile, kodwa wayenganikelwe kuye ukuba abe ngumkakhe.
UJuda embona lowo wesifazane, wacabanga ukuthi yisifebe nje, ngoba ezemboze ubuso.
Wayeseqonda kuye eceleni komgwaqo, wathi: “Woza ngilale nawe.” Wayengazi ukuthi lo wesifazane ungumalokazana wakwakhe. Owesifazane wambuza wathi: “Uzonginikani uma ngilala nawe na?”
Wathi yena: “Ngizokunika izinyane lembuzi emhlanjini wami.” Owesifazane wathi: “Uzonginika yini isibambiso uze ulithumele na?”
Wathi yena: “Ufuna ngikunike sibambiso sini na?” Owesifazane wathi: “Indandatho yakho yokusicilela, nomchilo wayo, nodondolo oluphethe esandleni.” Wamnika-ke, wayeselala naye, wakhulelwa.
UThamari wasuka lapho, wabuyela ekhaya, wayisusa imvakazi, wagqoka inzilo yakhe.
UJuda wayesethumela izinyane lembuzi ngesandla somngani wakhe wase-Adulamu, ukuze kubuye izimpahla zakhe ayebambise ngazo kowesifazane, kodwa akamtholanga.
Wayesebuza kubantu ababakhe lapho, wathi: “Saya ngaphi isifebe esasihlala eceleni komgwaqo e-Enayimi na?” Abantu bathi: “Akukaze kube khona sifebe lapha.”
Waphindela kuJuda, wathi: “Angisitholanga. Nabantu bakhona bathe: ‘Akukaze kube khona sifebe lapha.’ ”
UJuda wathi: “Masizithathele zona sizigcine, funa sihlazeke. Ngilithumele leli zinyane, kodwa wena awusifumananga.”
Sekwedlule izinyanga ezintathu, uJuda wathola umbiko othi: “UThamari, umalokazana wakwakho, unecala lobufebe, useze wakhulelwa kulobo bufebe bakhe.” UJuda wathi: “Mkhipheleni eshashalazini, ashiswe ngomlilo.”
Besamqhuba lona wesifazane, wathumela umyalezo kuyisezala, wathi: “Ngikhuleliswe yindoda engumnini walezi zimpahla; ake ubone ukuthi ngekabani le ndandatho yokusicilela, nomchilo, nodondolo.”
UJuda wazibona lezo zinto, wathi: “Ulungile lo wesifazane kunami, ngokuba angimnikanga uShela indodana yami.” UJuda akabuyanga walala naye.
Esebeletha, kwatholakala ukuthi ukhulelwe amawele.
Ngesikhathi ebeletha, elinye lawo lakhipha isandla. Umbelethisi wathandela intambo ebomvu esihlakaleni salo, wathi: “Lona uphume kuqala.”
Lapho esiphindisela emuva isandla sakhe, kwaphuma umfowabo. Umbelethisi wayesethi: “Hawu! Waze wafohla bo!” Wayeseqanjwa igama kwathiwa nguPherezi.
Emveni kwalokho umfowabo osandla sakhe sasinentambo ebomvu esihlakaleni, waphuma, igama lakhe kwathiwa nguZera.
UJosefa bamthatha baya naye eGibhithe, uPotifari, esinye sezikhulu zikaFaro, umphathi wabaqaphi, wamthenga kwabakwa-Ishmayeli ababefike naye.
USimakade wayenaye uJosefa, wamphumelelisa kukho konke. UJosefa wahlala endlini yenkosi yakhe yaseGibhithe.
Inkosi yakhe yabona ukuthi uNkulunkulu unaye, nokuthi uNkulunkulu uyakuphumelelisa konke akwenzayo,
ngakho-ke uJosefa wafumana umusa phambi kwayo, waba yinceku yayo; yamenza waba ngumphathi wendlu yayo, wengamela konke eyayinakho.
Kusukela ngaleso sikhathi eyambeka ngaso, waba ngumphathi wendlu yayo, nakho konke eyayinakho; uSimakade wawubusisa umuzi walowo mGibhithe, nakho konke ayenakho. Isibusiso sikaSimakade sasiphezu kwakho konke uPotifari ayenakho endlini nasemasimini.
Ngakho-ke uPotifari wakubeka konke ayenakho esandleni sikaJosefa, akabe esazihlupha ngalutho, ngaphandle kokudla okwakufanele akudle. UJosefa wayeyigeza, enesiqu, ebukeka kahle.
Emveni kwesikhathi umkaPotifari wamkhanuka, wathi kuye: “Lala nami.”
Kepha uJosefa wenqaba, wathi enkosikazini yomphathi wakhe: “Umphathi wami akakhathazeke ngalutho endlini yakhe, futhi ukunikele konke ezandleni zami.
Akamkhulu kule ndlu kunami, futhi akukho angigodlele khona ngaphandle kwakho, ngenxa yokuba ungumkakhe. Ngingakwenza kanjani-ke okubi kangaka, ngone kuNkulunkulu na?”
Nakuba umkaPotifari wayembelesela uJosefa imihla ngemihla, kodwa akavumanga ukulala naye, noma abe ndawonye naye.
Langa limbe lapho uJosefa engena endlini ezosebenza, kungekho muntu omunye endlini,
umkaPotifari wamdumela, wabamba ingubo yakhe, wathi: “Lala nami,” kodwa uJosefa waphulukundlela, washiya isembatho sakhe ezandleni zakhe, wabaleka, waphumela phandle.
Kwathi ukuba abone ukuthi ushiye ingubo esandleni sakhe, wabaleka,
wamemeza abendlu yakhe, wathi: “Ake nibheke, umyeni wami usilethele lo mHebheru ukuba azohlekisa ngathi. Uze kimi, wafuna ukulala nami, ngamemeza kakhulu;
unele wezwa ngiphakamisa izwi lami ngimemeza, washiya ingubo yakhe eduze kwami, wabaleka, waphumela phandle.”
Wayigcina leyo ngubo eduze kwakhe, waze wabuya umyeni wakhe.
Wamtshela le ndaba, wathi: “Le nceku yomHebheru owasilethela yona, ize kimi ifuna ukulala nami;
kuthe ukuba ngiphakamise izwi ngimemeza, yashiya ingubo yayo eduze kwami, yabaleka, yaphumela phandle.”
Esewezwile amazwi akhulunywe ngumkakhe, ethi: “Ingiphathe kanjalo inceku yakho,” wathukuthela wagana unwabu.
Umphathi wamthatha uJosefa, wamgquma ejele, lapho kwakuvalelwa khona iziboshwa zenkosi.
USimakade wayenaye uJosefa, wamenzela umusa, waba nogazi kumphathijele.
Umphathijele wambeka uJosefa waba yinduna yabo bonke ayevalelwe nabo, kubuzwa kuye konke okwakwenzeka lapho.
Umphathijele akabange esazikhathaza ngalutho, ngokuba konke kwakusesandleni sikaJosefa, futhi uSimakade wayemphumelelisa kukho konke akwenzayo.
Emveni kwalezo zinto umphathindebe wenkosi yaseGibhithe nombhakizinkwa bona enkosini yabo, inkosi yaseGibhithe.
UFaro wazithukuthelela zombili lezi zikhulu, induna yabaphathindebe nenduna yababhakizinkwa.
Wazivalela endlini yenduna yabalindi benkosi, zafakwa ejele, lapho kwakuvalelwe khona uJosefa.
Induna yabalindi benkosi yamqoka uJosefa ukuba azibheke, nokuba abhekane nezidingo zazo, kwaba yisikhashana zivalelwe.
Ngobunye ubusuku bobabili, umphathindebe nombhakizinkwa benkosi yaseGibhithe, ababevalelwe ejele, yilowo nalowo waphupha; yilelo nalelo phupho lalichaza okuthile.
Ngakusasa ekuseni lapho uJosefa efika kubo, wabona ukuthi bakhathazekile.
Ngakho-ke wazibuza izinceku zikaFaro ezazinaye, zivalelwe endlini yomphathi wakhe, wathi: “Yini namuhla nibukeke nidangele na?”
Bathi kuye: “Sibe namaphupho sobabili, akukho muntu ongasichazela wona.” UJosefa wathi kubo: “Ngabe incazelo ayiveli yini kuNkulunkulu na? Ngitsheleni amaphupho enu.”
Ngakho-ke induna yabaphathindebe yamtshela uJosefa iphupho layo. Yathi kuye: “Ephusheni lami bekunesihlahla somvini phambi kwami,
emvinini kukhona amagatsha amathathu. Kwathi eqeda nje ukubumba ayeseqhakaza, kwavela amahlukuzo amagilebhisi avuthiweyo kuwo.
Indebe kaFaro ibisesandleni sami; ngawathatha amagilebhisi ngawakhamela endebeni kaFaro, ngase ngimnika esandleni uFaro.”
UJosefa wathi kuye: “Nansi-ke incazelo yalo: amagatsha amathathu ayizinsuku ezintathu;
zingakapheli izinsuku ezintathu uFaro uzokuphakamisa, akubuyisele esikhundleni sakho, uzomnika indebe yakhe esandleni, njengoba wawenza ngesikhathi usengumphathindebe.
Uze ungikhumbule uma izinto sezikuhambela kahle, ungenzele umusa, uliphathe igama lami kuFaro, ukuze ngiphume kule ndawo.
Ngokuba empeleni ngathunjwa ezweni lamaHebheru, nalapha angenzanga lutho olufanele ukuba bangifake kulo mgodi.”
Lapho induna yababhakizinkwa ibona ukuthi incazelo ibe yinhle, yathi kuJosefa: “Nami ephusheni lami bekunamaqoma amathathu ezinkwa ezimhlophe ekhanda lami.
Eqomeni elingaphezulu bekukhona yonke inhlobo yokudla kukaFaro, kodwa izinyoni bezikudla kuleli qoma ebelisekhanda lami.”
UJosefa waphendula wathi: “Nansi incazelo yalo: amaqoma amathathu ayizinsuku ezintathu;
ezinsukwini ezintathu uFaro uzokunquma ikhanda, akuphanyeke esigxotsheni, izinyoni zezulu zidle inyama yakho.”
Kwathi ngosuku lwesithathu, okwakulusuku lokuzalwa kukaFaro, uFaro wenzela zonke izinceku zakhe idili. Waphakamisa phambi kwazo izikhulu zakhe, induna yabaphathindebe, nenduna yababhakizinkwa.
Wayibuyisela induna yabaphathindebe esikhundleni sayo, yabuye yanika uFaro indebe esandleni,
kodwa induna yababhakizinkwa wayiphanyeka, njengoba uJosefa ayebachazele amaphupho abo.
Nokho induna yabaphathindebe ayimkhumbulanga uJosefa; yamkhohlwa.
Emva kweminyaka emibili, uFaro waphupha emi ngasemfuleni.
Kwase kwenyuka emfuleni izinkomazi eziyisikhombisa ezibukeka kahle, zikhuluphele, zadla emhlangeni.
Kwaphinde kwenyuka emfuleni ezinye izinkomazi eziyisikhombisa, ezazibukeka kabi, zondile, zema eduze kwalezo ezazisosebeni lomfula.
Kwathi lezo ezibukeka kabi ezondileyo zadla lezo ezibukeka kahle ezondlekileyo. Wayesephaphama uFaro.
Walala, wabuye waphupha okwesibili. Bheka, kwahluma izikhwebu eziyisikhombisa ohlangeni olulodwa, zizinhle, futhi sezivuthiwe.
Wabona kuhluma ezinye izikhwebu eziyisikhombisa eziyiminconco, zizacile, futhi zishiswe ngumoya weshisandlu wasempumalanga.
Izikhwebu eziyisikhombisa ezizacileyo zagwinya izikhwebu eziyisikhombisa ezinhle nezivuthiweyo. Wayesephaphama uFaro; bheka, kwakuyiphupho.
Ekuseni uFaro wakhathazeka emoyeni wakhe, wathumela ukuba kubizwe zonke izanusi, nazo zonke izihlakaniphi zaseGibhithe, wabatshela ngamaphupho akhe, kodwa akekho namunye owakwazi ukumchazela wona.
Induna yabaphathindebe kaFaro yathi kuye: “Namhlanje ngiyawakhumbula amacala ami.
UFaro wayezithukuthelele izinceku zakhe, mina nenduna yababhakizinkwa wasigquma ejele, endlini yomphathi wabaqaphi.
Ngabusuku bunye saphupha, yilowo nalowo iphupho elinencazelo eyehlukile kwelomunye.
Kwakukhona lapho kanye nathi ibhungu lomHebheru, isigqila senduna yabalindi benkosi. Salilandisa ngamaphupho ethu, lawachaza, yilelo ngokwencazelo yalo,
kwaba njengoba lalishilo, mina ngabuyiselwa esikhundleni sami, kwathi induna yababhakizinkwa yaphanyekwa.”
UFaro wathumela ukuba kubizwe uJosefa, bashesha bamkhipha emgodini, wagunda, wagqoka izingubo ezihlanzekileyo, wayeseya kuFaro.
UFaro wathi kuJosefa: “Ngiphuphile, kodwa akekho umuntu okwazi ukungichazela. Ngizwile ngawe ukuthi kuyothi uma ulizwa leli phupho bese ungichazela.”
UJosefa wamphendula uFaro, wathi: “Angikwazi ukukwenza lokho; nguNkulunkulu ozochazela uFaro ngendlela egculisayo.”
UFaro wayesethi kuJosefa: “Ngiphuphe ngimi osebeni lomfula iNayili;
kwakhuphuka emfuleni izinkomazi eziyisikhombisa ezibukeka kahle ezikhulupheleyo, zaklaba emhlangeni.
Emva kwazo kwase kukhuphuka ezinye izinkomazi eziyisikhombisa ezondileyo zibukeka kabi. Angikaze ngizibone izinkomazi ezimbi ngale ndlela kulo lonke iGibhithe.
Izinkomazi ezondileyo, ezibukeka kabi, zadla lezi zokuqala ezikhulupheleyo.
Kuthe sezizidlile, akwabonakala mehluko wokuthi kukhona ezikudlileyo, zazibukeka zizimbi njengakuqala. Ngase ngiphaphama.”
“Ngabuye ngabona ephusheni izikhwebu eziyisikhombisa zibelethwe wuhlanga olulodwa, ziphelele, zizinhle.
Ngabuye ngabona kuhluma ezinye izikhwebu eziyisikhombisa emva kwazo, zizacile, zishiswe ngumoya weshisandlu wasempumalanga.
Izikhwebu eziyisikhombisa ezizacileyo zagwinya lezo ezinhle. Ngizazisile izanusi ngalawa maphupho, kodwa asikho esingichazele wona.”
UJosefa wayesethi kuFaro: “Iphupho likaFaro lilodwa. UNkulunkulu umambulele uFaro ngezinto azozenza.
Izinkomazi eziyisikhombisa ezinhle ziyiminyaka eyisikhombisa, nezikhwebu eziyisikhombisa ezinhle ziyiminyaka eyisikhombisa. Yiphupho elilodwa lelo.
Izinkomazi eziyisikhombisa ezondileyo nezibukeka kabi ezakhuphuka emva kwezinye, ziyiminyaka eyisikhombisa, kanjalo nezikhwebu eziyisikhombisa ezizacileyo, zashiswa ngumoya weshisandlu wasempumalanga, ziyiminyaka eyisikhombisa yendlala.
Lokhu engikushilo kuFaro, yilokho uNkulunkulu azokwenza, futhi umembulele khona uFaro.
Uyabona-ke, kuzoba khona iminyaka eyisikhombisa yenala kulo lonke iGibhithe.
Kuyolandela iminyaka eyisikhombisa yendlala, eyokwenza iminyaka yenala ikhohlweke eGibhithe, iyolikhahlameza kakhulu lonke izwe.
Akusayukukhumbuleka ukuthi kwake kwaba khona inala ngenxa yendlala elandelayo, eyoba nzima kakhulu ezweni.
Isizathu sokuba liphindwe kabili iphupho kuFaro ngukuthi uNkulunkulu usekunqumile lokhu, futhi uzosheshe akwenze.
Ngakho-ke uFaro makafune umuntu okhaliphileyo, nokwazi ukuhluza izinto, ambeke phezu kwalo lonke iGibhithe.
UFaro makenze kanjalo, aqoke izibonda zengamele lonke iGibhithe, ukuze ziqokelele ingxenye eyodwa kweziyisihlanu yesivuno esizotholakala kule minyaka eyisikhombisa yenala.
Mabaqokelele konke ukudla kule minyaka emihle yenala, bakugcine ezinqolobaneni phansi kwesandla sikaFaro, bakulondoloze emizini.
Lokhu kudla kufanele kulondolozelwe izwe lonke ukuze likwazi ukubhekana neminyaka eyisikhombisa yendlala, ezokhungatha iGibhithe, ngaleyo ndlela izwe lingashatshalaliswa yindlala.”
Lezwakala liphusile lelo qhinga kuFaro nakuzo zonke izinceku zakhe.
UFaro wazibuza izinceku wathi: “Singamtholaphi umuntu onjalo, onoMoya kaNkulunkulu na?”
UFaro wayesethi kuJosefa: “Njengalokhu uNkulunkulu ekwambulele konke lokhu, akekho omunye okwazi ukuhlaziya izinto nohlakaniphe njengawe.
Uzokwengamela isigodlo sami, nesizwe sami sonke siyokwenza njengoba usiyala; yimi kuphela ngokwesikhundla sami sobukhosi engizoba mkhulu kunawe.”
UFaro wathi kuJosefa: “Uyabona-ke, ngikubeka phezu kwalo lonke iGibhithe.”
UFaro wakhumula indandatho yakhe yokusicilela esandleni sakhe, wayifaka esandleni sikaJosefa, wamembathisa izembatho zelineni elicolekileyo, wamfaka nomgexo wegolide entanyeni.
Wamgibelisa enqoleni yempi egitshelwa yilowo ongowesibili emva kwakhe, bamemeza phambi kwakhe, bathi: “Guqani!” UFaro wambeka ngaleyo ndlela-ke uJosefa, ukuba abe ngumbusi walo lonke iGibhithe.
UFaro wathi kuJosefa: “Mina nginguFaro, kodwa ngaphandle kwemvume yakho akukho muntu oyophakamisa isandla, noma unyawo kulo lonke iGibhithe.”
UFaro wamqamba uJosefa ngokuthi unguZafenathi Phaneya, wayesemganisela u-Asenathi indodakazi kaPotifera, umphristi wase-Oni. UJosefa walithola kanjalo igunya phezu kwalo lonke iGibhithe.
UJosefa wayeneminyaka engama-30 ngesikhathi eqala ukusebenzela uFaro inkosi yaseGibhithe. UJosefa waphuma phambi kukaFaro, wahamba kulo lonke iGibhithe.
Ngaleyo minyaka eyisikhombisa yenala izwe lathela ukudla okuningi kakhulu.
UJosefa wakuqoqa konke ukudla okwatholakala ngaleyo minyaka eyisikhombisa yenala, wakulondoloza emizini: kwakungukudla okwakuvunwe emasimini azungeze yilowo nalowo muzi.
UJosefa waqoqa ukudla okusanhlamvu okwaba kuningi njengesihlabathi ogwini lolwandle, wayeka ukukubala, ngokuba kwakungasenakubalwa.
U-Asenathi, indodakazi kaPotifera, umphristi wase-Oni, wamzalela uJosefa amadodana amabili, ingakaqali iminyaka eyisikhombisa yendlala.
UJosefa waliqamba izibulo lakhe wathi nguManase, ngokuba ethi: “UNkulunkulu ungenze ngakukhohlwa ukuhlupheka kwami nendlu yonke kababa.”
Eyesibili indodana wayiqamba wathi ngu-Efrayimi, ngokuba ethi: “UNkulunkulu ungandisile ezweni lokuhlupheka kwami.”
Yaphela iminyaka eyisikhombisa yenala eyayikhona eGibhithe.
Iminyaka eyisikhombisa yendlala yaqala njengoba uJosefa ayeshilo. Kwaba nendlala kulo lonke izwe, kodwa eGibhithe kwakukhona ukudla.
Kwathi lapho indlala isiqala ukuzwela naseGibhithe, abantu bakhala kuFaro becela ukudla. UFaro wabatshela bonke abaseGibhithe wathi: “Hambani niye kuJosefa, nikwenze konke anitshela khona.”
Indlala yayisezweni lonke, ngakho-ke uJosefa wazivula zonke izinqolobane, wathengisela abaseGibhithe, ngokuba indlala yayisidlangile naseGibhithe.
Amazwe onke aya eGibhithe ukuyothenga ukudla kuJosefa, ngokuba indlala yayisinzima emhlabeni wonke.
UJakobe wezwa ukuthi kukhona ukudla eGibhithe, wayesethi emadodaneni akhe: “Kungani nilibele ukubukana na?”
Wathi: “Bhekani, ngizwile ukuthi kukhona ukudla eGibhithe. Yehlani, nisithengele okusanhlamvu khona, ukuze siphile, singafi.”
Abafowabo bakaJosefa abalishumi behla bayothenga okusanhlamvu eGibhithe.
Kepha uJakobe akamthumelanga uBhenjamini, ongumnawabo kaJosefa kanye nabo, ngokuba wathi: “Funa ehlelwe yingozi.”
Amadodana ka-Israyeli afika ukuzothenga ukudla ehambisana nabaningi ababezothenga, ngokuba indlala yayidlangile kulo lonke iKhanani.
UJosefa wayengumbusi ezweni, ethengisela bonke abantu bezwe, nabafowabo bafika, bamkhothamela bathi mbo ngobuso emhlabathini.
UJosefa wababona abafowabo, kodwa wazishaya ongabaziyo, wakhuluma nabo ngesankahlu, wathi: “Nivelaphi nina?” Bamphendula bathi: “Sivela eKhanani, sizothenga ukudla.”
UJosefa wababona abafowabo, kodwa bona abambonanga.
UJosefa wawakhumbula amaphupho ayewaphuphile. Wayesethi kubo: “Niyizinhloli, nize ukuzohlola ukuthi leli lizwe lintenga ngakuphi.”
Bamphendula bathi: “Qha nkosi, izinceku zakho zize ukuzothenga ukudla.
Sonke singamadodana endoda eyodwa, singabantu abaqotho, asiyizo izinhloli.”
Wathi kubo: “Qha, nize ukuzohlola izwe ukuthi lintengantenga kuphi.”
Bazilandulela bathi: “Izinceku zakho ziyizelamani ezili-12, zingamadodana endoda eyodwa, eyakhe eKhanani, uthunjana usele nobaba, omunye akasekho.”
UJosefa wayesethi kubo: “Kunjengoba ngishilo kini ukuthi niyizinhloli.
Ngimfunge uFaro, nizovivinywa ngalokhu, ngeke nihambe uma umfowenu omncane engafiki lapha.
Thumelani omunye wenu ukuba amlande umfowenu. Nina nonke nizoboshwa ukuze kubonakale ukuthi enikushilo kuyiqiniso yini; uma kungenjalo, ngimfunge uFaro, niyizinhloli.”
Wabagquma bonke ejele izinsuku ezintathu.
Ngosuku lwesithathu uJosefa wathi kubo: “Yenzani lokhu ukuze niphile, ngokuba ngingumuntu omesabayo uNkulunkulu.
Uma niqotho, makusale oyedwa wenu endlini yokulinda, nina nibuyele emuva emindenini yenu nokudla.
Kufanele nilethe umfowenu omncane ukuze ngibe nesiqiniseko sokuthi amazwi enu ayiqiniso; ningafi.” Nebala benza kanjalo.
Base behlanganisa amakhanda, bavumelana bathi: “Impela sinecala ngomfowethu, salubona usizi enhliziyweni yakhe, esincenga ukuba simhawukele, kodwa asimlalelanga, yingakho sivelelwa yinkathazo enje.”
URubeni wabaphendula wathi: “Angishongo yini ukuthi: ‘Ningakwenzi okuyisono kumfana,’ nangangilalela na? Manje igazi lakhe selifuneka kithi.”
Babengazi ukuthi uJosefa uyabezwa ngenxa yokuba kwakukhona ohumushayo phakathi kwabo.
Wabafulathela, wakhala; wabuye waphindela kubo, wakhuluma nabo, wayesesusa uSimeyoni kubo, waboshwa bebuka.
UJosefa wayala ukuba kugcwaliswe amasaka abo ngokusanhlamvu, futhi babuyiselwe imali emasakeni abo, baphiwe nomphako. Kwenziwa kanjalo kubo.
Bazethwesa izimbongolo zabo okusanhlamvu, base beqala uhambo lwabo.
Omunye kuthe evula isaka lakhe esikhungweni sokulala ukuba anike imbongolo yakhe ukudla, wafica imali yakhe emlonyeni wesaka.
Wathi kubafowabo: “Imali yami ibuyiselwe kimi, nansi esakeni lami.” Baphelelwa ngamandla, baqhaqhazela, babukana, bathi: “Yini lena uNkulunkulu asenza yona na?”
Sebefike kuyise uJakobe eKhanani, bamlandisa ngakho konke okwakubehlele, bathi:
“Leya ndoda engumbusi wezwe ikhulume nathi ngesihluku, yasibiza ngezinhloli ezizohlola izwe.
Sathi kuyo: ‘Siqotho thina, asizona izinhloli.
Siyizelamani ezili-12, amadodana endoda eyodwa, enye ayisekho, uthunjana kumanje usele nobaba eKhanani.’
Lowo muntu oyinkosi yalelo lizwe, wathi kithi: ‘Shiyani kimi omunye umfowenu, nihambe, nithathele imindeni yenu ukudla.
Uma senimlethile umfowenu omncane kimi, ngiyokwazi ukuthi aniyizo izinhloli, nokuthi ningamadoda aqotho; ngakho-ke ngiyobe sengininika umfowenu nihambe naye kuleli lizwe.’ ”
Kuthe lapho sebethulula amasaka abo, bamangala bonke lapho bebona ukuthi isikhwama semali salowo nalowo sisesakeni. Lapho bona noyise bebona ukuthi isikhwama salowo nalowo sisesakeni lakhe, bashaywa wuvalo.
Uyise uJakobe wayesethi kubo: “Niyangephuca abantwana bami; uJosefa akasekho, noSimeyoni akasekho, manje senifuna ukuthatha noBhenjamini; konke lokhu kungaphezu kwamandla ami.”
URubeni wathi kuyise: “Uma ngingambuyiseli kuwe, bulala amadodana ami omabili, kodwa manje mnikele esandleni sami, ngizombuyisela kuwe.”
UJakobe wathi: “Indodana yami ayiyukwehla nani, ngokuba umfowabo ufile, manje nguye yedwa osele, uma ehlelwa yingozi endleleni, niyokwenza ukuba ngiye kwelabafileyo nginomunyu.”
Indlala yayisalokhu idlangile ezweni.
Kuthe sekuphelile okusanhlamvu ababekade bekulande eGibhithe, uyise wathi kubo: “Phindelani niyosithengela okunye ukudla.”
UJuda wathi kuye: “Lowaya muntu waseGibhithe wafunga wagomela, wathi: ‘Ngeke nibubone ubuso bami ngaphandle kokuba nibuye nomfowenu.’
Uma umthumela nathi, siyakwehla sithenge ukudla.
Kepha uma ungamdedeli ahambe, nathi asiyi ndawo, ngoba lowaya muntu wasidonsa ngendlebe, wathi: ‘Ngeke nibubone ubuso bami ngaphandle kokuba nibuye nomfowenu.’ ”
U-Israyeli wababuza wathi: “Nibenzeleni lobu bubi kimi bokutshela lowo muntu ukuthi ninomunye umfowenu na?”
Bathi: “Lowaya muntu wasibuza wasiphenya nangezihlobo zethu, ethi: ‘Uyihlo usaphila yini na? Ninaye yini omunye umfowenu na?’ Thina samphendula, samtshela konke ayefuna ukukwazi. Sasingazi ukuthi angathi: ‘Lethani umfowenu.’ ”
UJuda wathi kuyise u-Israyeli: “Mdedele umfana ahambe nami, ukuze sivuke sihambe, yikhona thina sonke sizophila; singafi, thina nabantwana bethu.
Mina luqobo ngiyakuba yisibambiso sakhe; uyakumfuna kimi, uma ngingambuyisi ngimbeke phambi kwakho, lokho kuyakuba yicala lami imihla yonke yokuphila kwami,
ngokuba uma besingabambezelekanga ngabe sesibuyele kabili.”
Uyise u-Israyeli wathi kubo: “Uma kunjalo, yenzani lokhu: thathani okwekhethelo okuvela emhlabathini lapha, nikufake emasakeni enu, nifike nikuphe lowo muntu: ingcosana yebhalisamu, uju, amakha, inhlaka, amantongomane, nama-alimondi,
niphathe imali ephindwe kabili, nibuyisele leyo mali eyayifakwe emilonyeni yamasaka enu, kungenzeka ukuthi yayingene ngephutha.
Thathani umfowenu, nivuke, niphindele kulowo muntu.
Sengathi uNkulunkulu uSomandla anganenzela umusa phambi kwalowo muntu, akhulule umfowenu noBhenjamini; uma ngingafelwa ngabantwana bami, ngobe ngifile kwamina.”
Amadoda ayesethatha isipho, nemali ephindwe kabili, noBhenjamini, asuka ehlela eGibhithe, aziveza kuJosefa.
Kwathi ukuba uJosefa ambone uBhenjamini enabo, wathi enduneni eyayengamele indlu yakhe: “Ngenisa lawa madoda endlini, uhlabe, ulungise, ngokuba azodla nami emini.”
Indoda yenza njengoba uJosefa eshilo, yabangenisa endlini yakhe.
Bafikelwa yingebhe lapho bebona ukuthi bangeniswe endlini kaJosefa, bathi: “Kungenxa yemali eyabuyiselwa emasakeni ethu ekuqaleni, ngakho-ke silethwe kule ndawo ukuze asizume, asithathe asenze izigqila, aqhwage nezimbongolo zethu.”
Base beya enduneni eyayiphethe endlini kaJosefa eyayingasemnyango, bakhuluma nayo,
bathi: “Mnumzane, sicela uxolo. Safika lapha ekuqaleni sizothenga ukudla.
Kuthe lapho sesifike endlini yezihambi, sathi sivula amasaka ethu, kwaba yilowo nalowo wakhangwa yimali isemlonyeni wesaka lakhe, iphelele njengoba sasiyikhokhile, kodwa nansi ezandleni zethu siyibuyisile.
Sibuye saphatha nenye ukuze sithenge ngayo ukudla, ngokuba asazi ukuthi ngubani owafaka imali yethu emasakeni ethu.”
Yathi kubo: “Khululekani, ningesabi. UNkulunkulu wenu, uNkulunkulu kayihlo waninika umcebo emasakeni enu. Imali enathenga ngayo ngayithola.” Yayisimkhipha ejele uSimeyoni, yamletha kubo.
Induna yayisiwangenisa lawo madoda endlini kaJosefa, yawanika amanzi ukuze ageze izinyawo, yanika nezimbongolo zawo ifolishi.
Ayeselungisa isipho, alungela ukufika kukaJosefa emini, ngoba ayezwile ukuthi azodla lapho.
Kwathi lapho uJosefa efika ekhaya, amadoda ethula isipho ayefike naso, aguqa ayesethi mbo ngobuso emhlabathini.
Wawabuza impilo wathi: “Iphila kanjani indoda endala enguyihlo enangitshela ngayo na? Isawadla yini anhlamvana na?”
Bathi: “Inceku yakho ubaba ukhona, usaphila.” Baphinda bamkhothamela, bamkhulekela.
Waphakamisa amehlo, wabona umfowabo uBhenjamini, abashiyelana naye ibele, wathi: “Nguye lo umfowenu omncane enangitshela ngaye na?” Wathi kuBhenjamini: “Sengathi uNkulunkulu angaba nomusa kuwe ndodana yami.”
UJosefa wathinteka kakhulu enhliziyweni yakhe lapho ebona umnawakhe, waphuma masinyane, wafuna indawo lapho angase akhale khona. Waya endlini yakhe, wakhala lapho.
Wageza ubuso, waphuma, waziqinisa wathi: “Phakani ukudla.”
Bamphakela yedwa, base bebaphakela nabo kanjalo, nabaseGibhithe ababedla naye babaphakela ngokwabo, lokhu abaseGibhithe babengeke badle namaHebheru, ngokuba kwakuyisinengiso kubo.
Bahlaliswa phambi kwakhe ngokwelamana kwabo, izibulo ngobuzibulo balo, nomncane ngobuncane bakhe; abafowabo babhekana ngokumangala.
Baphakelwa izabelo zabo etafuleni likaJosefa, kodwa esikaBhenjamini sasiphindwe kahlanu kunezabanye. Baphuza, bathokoza naye.
UJosefa wayala induna eyayiphethe endlini yakhe, wathi: “Gcwalisa amasaka alawa madoda ngokudla ngokwamandla awo, bese uphindisela imali yawo ngayinye uyifake emilonyeni yamasaka awo.
Faka indebe yami yesiliva, nemali yokuthenga okusanhlamvu emlonyeni wesaka lomncane.” Yenza njengoba uJosefa eshilo.
Kwathi ukuba kuse, bavalelisana nalawo madoda, ayesengena indlela nezimbongolo zawo.
Esahambe ibangana ukusuka emzini, uJosefa wathi enduneni yakhe: “Suka uwalandele lawo madoda, lapho uwafica uthi kuwo: ‘Niphindiselani okuhle ngokubi na?
Akusiyo yini le indebe yenkosi yami ephuza ngayo, ibuye ibhule ngayo na? Enikwenzileyo kubi kakhulu.’ ”
Yawafica, yakhuluma kuwo lawo mazwi.
Ayesethi kuyo: “Kungani inkosi yami ikhulume amazwi anjengalawa na? Zingayenza kanjani izinceku zakho into efana naleyo na?
Bheka, imali esayithola emilonyeni yamasaka ethu, sabuya nayo sisuka eKhanani. Pho singaleba kanjani isiliva noma igolide endlini yenkosi yakho na?
Lowo ezincekwini zakho eyotholakala kuye makafe; thina sonke siyakuba yizigqila zenkosi yami.”
Yathi: “Kulungile, akuye njengamazwi enu. Lowo eyotholakala kuye uzokuba yisigqila sami, nina nonke aniyukuba nacala.”
Bawethula ngokushesha amasaka abo, bawabeka emhlabathini, bawavula, yilowo wavula isaka lakhe.
Induna yaqala ukucinga ezibulweni, yagcina ngothunjana. Indebe yatholakala esakeni likaBhenjamini.
Base beklebhula izingubo zabo, bagibelisa imithwalo ezimbongolweni, babuyela emzini.
UJuda nabafowabo bafika endlini kaJosefa, bamfica esekhona, base bezilahla phansi phambi kwakhe.
UJosefa wathi kubo: “Kuyini lokhu enikwenzileyo na? Anazi yini ukuthi umuntu onjengami uyakwazi ukubhula na?”
UJuda waphendula wathi: “Sizothini enkosini yami na? Sizakukhuluma sithini na? Sizakuzithethelela sithini na? UNkulunkulu uliveze obala icala lezinceku zakho. Bheka, silapha ukuba sibe yizigqila zenkosi yami, thina nalowo okutholakale kuye indebe.”
UJosefa wathi: “Angikwazi ukwenza into enjalo. Umuntu etholakale kuye indebe yami uzokuba yisigqila sami, nina yenyukani, nibuyele kuyihlo ngokuthula.”
UJuda wazidela amathambo, wakhuluma noJosefa wathi: “Ngicela uxolo, nkosi yami, yivumele inceku yakho ibeke libe linye nje enkosini yayo, ungayithukutheleli inceku yakho, ngokuba wena ulingana noFaro uqobo.
Inkosi yami yazibuza izinceku zayo, yathi: ‘Ninaye yini uyihlo noma umfowenu na?’
Sathi enkosini yami: ‘Sinaye ubaba osekhulile, nendodana esencane ayizala esegugile. Umfowabo sewafa, sekusele yona yodwa esiswini sikanina futhi uyise uyayithanda.’
“Wawusuthi ezincekwini zakho: ‘Mletheni kimi ukuze ngimbone.’
Sathi enkosini yami: ‘Umfana akanakumshiya uyise, ngokuba uma engamshiya, uyise angafa.’
Wathi ezincekwini zakho: ‘Uma ningezi nomfowenu omncane, ngeke niphinde nibubone ubuso bami.’
Sakhuphuka sabuyela encekwini yakho, ubaba, sambikela okushiwo yinkosi yami.
Ubaba wathi: ‘Buyelani niyosithengela ukudla.’
Thina sathi: ‘Asinakubuyela lapho uma umfowethu omncane engahambi nathi, ngokuba ngeke sibubone ubuso balowo muntu uma umfowethu omncane engekho.’
“Inceku yakho, ubaba, yathi kithi: ‘Niyazi ukuthi umkami wangizalela amadodana amabili;
omunye sewangishiya, sengize ngakuvuma ukuthi impela sewafa, wadweshulwa yisilwane sasendle, futhi angikaze ngiphinde ngimbone kuze kube namuhla lokhu.
Uma manje seningithathela nalena, bese yehlelwa yingozi, le mpunga niyoyehlisela kwelabafileyo igcwele usizi.’
“Manje uma ngibuyela encekwini yakho, ubaba, ngingabuyeli naye, lokhu inceku yakho imthanda kangaka lo mfana,
kuyothi lapho ibona ukuthi umfana akekho, ivele ife. Izinceku zakho ziyokuba yimbangela yokwehlisela le mpunga kwelabafileyo inomunyu.
Inceku yakho yethembisile kubaba ukuthi umfana uzophepha, yathi: ‘Uma ngingambuyiseli kuwe ephephile, lelo cala yimi engiyolithwala kuwe, baba, imihla yonke yokuphila kwami.’
“Ngiyacela ukuba uyivumele inceku yakho kusale yona esikhundleni somfana, ibe yisigqila sakho, kuthi umfana aphindele ekhaya nabafowabo.
Ngingabuyela kanjani kubaba engekho umfana na? Funa ngibone okubi okungahle kwehlele ubaba.”
UJosefa wayengasakwazi ukuzibamba phambi kwabo bonke ababemi naye, wakhala, wathi: “Khiphani bonke abanye abalapha phambi kwami.” Kwakungasekho muntu ngesikhathi uJosefa eziveza kubafowabo.
Wakhala kakhulu baze bezwa nabaseGibhithe, leso sililo saze safinyelela nasendlini kaFaro.
UJosefa wathi kubafowabo: “NginguJosefa. Ubaba usaphila na?” Abafowabo abakwazanga ukumphendula, ngoba babethuke kakhulu.
UJosefa wathi kubafowabo: “Sondelani kimi.” Basondela, wayesethi kubo: “NginguJosefa umfowenu, enathengisa ngaye eGibhithe.
Manje ningabe nisakhathazeka, futhi ningazisoli ngokuthi nangidayisa, ngokuba nguNkulunkulu owangithumela ukuba nginandulele ukuze ngilonde impilo.
Niyayibona le ndlala ekhona ezweni isathathe iminyaka emibili, isazoqhubeka eminye emihlanu kungalinywa, kungavunwa.
UNkulunkulu wangithuma ukunandulela ukuze nibe yinsali emhlabeni, nisindiswe, kukhululwe abaningi.
Ngakho-ke akunina enangithuma lapha, kodwa nguNkulunkulu ongenze uyise kaFaro, nombusi ophethe endlini yakhe, naphezu kwezwe lonke iGibhithe.
“Ningabe nisapholisa maseko, yanini kubaba nifike nithi kuye: ‘UJosefa indodana yakho, ithi: uNkulunkulu ungibeke ngaba ngumbusi walo lonke iGibhithe, ungabe usalibala, yehla uze kimi.
Uyohlala eGosheni ukuze ube seduze kwami, wena nabantwana bakho, nabazukulu bakho, nemihlambi yakho yonke yezimvu nezinkomo, nakho konke onakho.
Ngizonondla nikuleyo ndawo, wena nabendlu yakho, nabo bonke abangabakho, ngokuba kusazokuba yiminyaka emihlanu indlala isalokhu idlangile.’ ”
“Nani niyazibonela, ngisho nomnawami uBhenjamini uyazibonela ukuthi yimina mathupha uJosefa osho lawa mazwi kini.
Nimbikele ubaba ngakho konke ukuhlonipheka kwami eGibhithe, nangakho konke enikubonileyo, bese nisheshe nimehlisa eze lapha.”
Wazilahlela entanyeni yomfowabo uBhenjamini, wakhala; noBhenjamini wakhalela entanyeni yakhe.
Wabanga bonke abafowabo ngamunye, ekhala. Emveni kwalokho abafowabo baxoxa naye.
Kwafika umbiko endlini kaFaro, othi: “Abafowabo bakaJosefa bafikile.” Kwaba kuhle lokho kuFaro nasezincekwini zakhe.
UFaro wathi kuJosefa: “Yisho kubafowenu uthi: ‘Yethwesani izimbongolo zenu, nihambe niye eKhanani,
nithathe uyihlo nemindeni yenu nize kimi, ukuze ngininike eyekhethelo eGibhithe, nitamuze okuhle kwalo.’
“Ngiyakuyala, batshele ukuthi ngithi: ‘Zithatheleni nina nomkenu nabantwana benu izinqola lapha eGibhithe, nigibelise uyihlo nize naye lapha.
Ningakhathazeki ngempahla yenu, ngokuba konke okuhle kwezwe eGibhithe kungokwenu.’ ”
Amadodana ka-Israyeli enza njengalokhu eyaliwe. UJosefa wawanika izinqola nomphako njengokusho kukaFaro.
Wabanika kwaba yilowo nalowo ingubo yokushintsha, kodwa uBhenjamini wamnika izinhlamvu zesiliva ezingama-300, nezingubo zakwanokusho ezinhlanu.
Wayesethumelela uyise lokhu: izimbongolo eziyishumi zithwele amagugu aseGibhithe, nezimbongolo eziyishumi zezinsikazi zithwele okusanhlamvu, nezinkwa nokunye okungumphako kayise.
Wayesebakhipha abafowabo, bangena indlela. Wathi kubo: “Ningaxabani endleleni.”
Base bephuma, bakhuphuka eGibhithe baze bayofinyelela kuyise uJakobe eKhanani.
Bambikela bathi: “UJosefa usaphila, ungumbusi walo lonke iGibhithe.” UJakobe waphela amandla, wakhungatheka, akaze abakholwa.
Bamlandisa konke okwakukhulunywe nguJosefa kubo, futhi wabona nezinqola ayezikhiphile ukuba zizomlanda. Waqala uJakobe ukuvuseleleka emoyeni.
U-Israyeli wathi: “Kwanele; uJosefa indodana yami usaphila. Ngizohamba ngiyombona ngingakafi.”
U-Israyeli waphuma eKhanani nakho konke ayenakho, kwathi lapho efika eBheri Sheba, wenzela uNkulunkulu kayise u-Isaka umhlatshelo.
UNkulunkulu wakhuluma ku-Israyeli ngemibono eminingi ebusuku, wathi: “Jakobe, Jakobe!” Yena wathi: “Ngilapha.”
UNkulunkulu wathi: “NginguNkulunkulu, uNkulunkulu kayihlo; ungesabi ukwehlela eGibhithe, ngizokwenza ube yisizwe esikhulu lapho.
Ngizohamba nawe ukuya eGibhithe, futhi ngiyakukukhuphula lapho; yisandla sikaJosefa esiyokucimezisa.”
UJakobe wasuka eBheri Sheba, amadodana ka-Israyeli amgibelisa uyise, nabantwana bawo, nomkawo ezinqoleni ezazikhishwe nguFaro ukuba zibathwale.
Baqhuba yonke imihlambi yabo, bathatha nempahla yonke ababeyithole eKhanani, uJakobe wakhukhula naso sonke isizukulwane sakhe baze bayofika eGibhithe.
Amadodana akhe, namadodana awo, namadodakazi akhe, namadodakazi amadodana akhe, bonke abantwana bakhe nesizukulwane sakhe behla naye baya eGibhithe.
Nanka amagama abakwa-Israyeli abahamba baya eGibhithe noJakobe nesizukulwane sakhe: uRubeni, izibulo lakhe,
namadodana akhe uHanokhi, uPhalu, uHezironi noKharimi.
Amadodana kaSimeyoni kwakunguJemuweli, uJamini, u-Ohadi, uJakhini, uZoha noShawule, owayezalwa ngowesifazane ongumKhanani.
Amadodana kaLevi: nguGereshoni, uKhohathi, noMerari.
Amadodana kaJuda kungu-Eri, u-Onani, uShela, uPherezi, noZera. Kuwona u-Eri, no-Onani bafela eKhanani. Amadodana kaPherezi: kwakunguHezironi noHamuli.
Amadodana ka-Isakhari: kunguThola, uPhuva, uJashubi, noShimroni.
Amadodana kaZabuloni, kwakunguSeredi, u-Eloni, noJaleli.
Yilawo-ke amagama amadodana uLeya amzalela wona uJakobe ePhadani Aramu, noDina indodakazi yakhe. Esewonke amadodana namadodakazi kaJakobe ayengama-33.
Amadodana kaGadi: kwakunguZifiyoni, uHagi, uShuni, u-Ezibhoni, u-Eri, u-Arodi, no-Areli.
Amadodana ka-Asheri: kwakungu-Imna, u-Ishiva, u-Ishivi, uBheriya, noSera udadewabo. Amadodana kaBheriya: kwakunguHebhere noMalikhiyeli.
Yilawo-ke amagama amadodana ayeyi-16 kaZilipha, awazalela uJakobe. ULabani wayenike uLeya indodakazi yakhe uZilipha ukuba abe yisisebenzi sakhe.
Amadodana kaRaheli, umkaJakobe: kwakunguJosefa noBhenjamini.
Kuthe uJosefa eseGibhithe wazala uManase no-Efrayimi ku-Asenathi, indodakazi kaPotifera, umphristi wase-Oni.
Amadodana kaBhenjamini: kwakunguBhela, uBhekheri, u-Ashibheli, uGera, uNahamani, u-Ehi, uRoshi, uMuphimu, uHuphimu, no-Aridi.
Lawa kwakungamadodana kaRaheli ayemzalele wona uJakobe; esewonke ayeyi-14.
Indodana kaDani kwakunguHushimu.
Amadodana kaNafethali: kwakunguJahiziyeli, uGuni, uJezeri, noShilemu.
Lawo kwakungamadodana kaBhiliha, uLabani ayemunike yena uRaheli, indodakazi yakhe, esewonke ayeyisikhombisa.
Bonke abantu abangena eGibhithe noJakobe, abavela okhalo lwakhe ngaphandle kwabafazi babo, babengama-66.
Amadodana kaJosefa azalelwa eGibhithe aba mabili, ngakho-ke bonke abendlu kaJakobe abaya eGibhithe babengama-70.
UJakobe wathumela uJuda ukuthi ahambe phambili aye kuJosefa, ukuze abahole ukuya eGosheni. Ekufikeni kwabo eGosheni,
uJosefa wabophela inqola yakhe yempi, wakhuphuka, wamhlangabeza uyise u-Israyeli. UJosefa waziveza kuye, wamgona, wakhala isikhathi eside encike ehlombe lakhe.
U-Israyeli wathi kuJosefa: “Sengingafa manje njengoba sengizibonele ngawami ukuthi usawadla anhlamvana.”
UJosefa wayesethi kubafowabo nakwabendlu kayise: “Ake ngihambe ngiyobikela uFaro ukuthi abafowethu nabendlu kababa abebeseKhanani sebefikile ukuzohlala nami.
Lawa madoda angabelusi bemfuyo, amadoda anemihlambi, afike nayo yonke imfuyo yawo, nakho konke anakho.
Kuyothi lapho uFaro enibuza ethi: ‘Uyini umsebenzi wenu na?’
Niyothi: ‘Izinceku zakho selokhu kwathi nhlo zingabantu bemfuyo, thina nawobaba,’ ukuze anivumele nihlale eGosheni, ngokuba kwabaseGibhithe abelusi bayanengeka.”
UJosefa wangena, wabikela uFaro, wathi: “Ubaba nabafowethu, nemihlambi yabo yezimvu, neyezinkomo, nakho konke abanakho, sebefikile bevela eKhanani, manje sebeseGosheni.”
Wathatha abahlanu phakathi kwabafowabo wayobethula kuFaro.
UFaro wathi kubafowabo: “Uyini umsebenzi wenu na?” Bathi kuFaro: “Izinceku zakho zingabelusi bemihlambi, thina nobaba.”
Baqhubeka bathi kuFaro: “Size ukuzogogobala kuleli lizwe, ngokuba akukho madlelo emfuyo yezinceku zakho, lokhu indlala ibhokile eKhanani. Ngakho-ke izinceku zakho ziyacela ukuba uzivumele zihlale eGosheni.”
UFaro wathi kuJosefa: “Uyihlo nabafowenu beze kuwe,
iGibhithe lisezandleni zakho. Uyihlo nabafowenu bahlalise endaweni enhle ezweni, mabahlale eGosheni. Uma kukhona phakathi kwabo abanekhono lokwelusa, ubabeke babe ngabaphathi bemfuyo yami.”
UJosefa wayesemngenisa uyise, uJakobe, wamethula kuFaro. UJakobe wambusisa uFaro.
UFaro wathi kuJakobe: “Mingaki iminyaka yakho na?”
UJakobe waphendula wathi: “Izinsuku zokugogobala kwami emhlabeni seziyiminyaka eyi-130, zimfishane, kanti bezigcwele ubunzima. Kaziqhathaniseki nokho neminyaka eyaphilwa ngokhokho bami ngesikhathi eside sokugogobala kwabo.”
UJakobe wambusisa uFaro, wayesesuka phambi kukaFaro.
UJosefa wabahlalisa uyise nabafowabo, wabanika indawo eGibhithe, indawo enhle kakhulu eRamesesi njengoba uFaro ayebayalile.
UJosefa wamhlinzeka uyise, nabafowabo, nabo bonke abendlu kayise ngokudla, ngokwenani labantu abasezindlini zabo.
Kwakungekho kudla ezweni lonke, ngokuba indlala yayibhokile eGibhithe naseKhanani.
UJosefa waqoqa yonke imali eyayitholakala eGibhithe, neseKhanani, abantu ababeza ukuzothenga ngayo ukudla. Yonke leyo mali wayiyisa endlini kaFaro.
Lapho isiphelile imali eGibhithe naseKhanani, bonke abaseGibhithe beza kuJosefa, bathi: “Sinike ukudla. Yini ukuba sife ubhekile na? Isiphelile imali yethu.”
Wayesethi uJosefa: “Uma ningasenayo imali, lethani imfuyo yenu, mina ngizoninika ukudla.”
Baletha kuJosefa imfuyo yabo, imihlambi yezinkomo, izimbongolo, izimvu, izimbuzi, namahhashi, yena wabanika ukudla. Wabondla kanjalo-ke uJosefa ngalowo nyaka.
Kuthe sewuphelile lowo nyaka baphindela kuye ngonyaka olandelayo, bathi: “Singeke sikufihlele lokhu nkosi; imali, nemfuyo yethu, nezinkomo, sekuphelile; asisenalutho nkosi ngaphandle kwethu nomhlaba wethu.
Sizakufelani phambi kwakho na? Sithenge nemihlaba yethu, ukuze thina nemihlaba yethu sibe yizigqila zikaFaro, siphile, futhi sithole imbewu, singafi, nezwe lingabi yihlane.”
UJosefa wamthengela uFaro lonke iGibhithe, ngokuba bonke abaseGibhithe base bethengise ngamasimu abo ngenxa yokuba nzima kwendlala phezu kwabo; izwe lonke kwaba ngelikaFaro.
UJosefa wabasusa abantu kulo lonke iGibhithe, wabayisa emizini.
Umhlaba wabaphristi yiwo kuphela angawuthenganga, ngokuba kwakunesabelo sabaphristi esivela kuFaro. Babedla leso sabelo ababesinikwe nguFaro, yingakho bengawuthengisanga umhlaba wabo.
UJosefa wathi kubantu: “Njengoba manje uFaro sengimthengele nina nomhlaba wenu, nansi-ke imbewu yenu enizoniyihlwanyela emhlabathini.
Kuyakuthi lapho senivunile, uFaro nimnike ingxenye yesihlanu, izingxenye ezine zibe yimbewu yamasimu enu, nokudla kwenu, nokwabendlu yenu, nabantwana benu.”
Bathi: “Usisindisile, ngakho-ke masifumane umusa kuwe nkosi, siyakuba yizigqila zikaFaro.”
UJosefa wakumisa lokhu kwaba wumthetho mayelana nomhlaba eGibhithe; kusengumthetho osebenzayo nanamuhla, ukuthi ingxenye yesihlanu yezitshalo ingekaFaro. Ngumhlabathi wabaphristi kuphela ongazange ube ngokaFaro.
Abakwa-Israyeli bahlala eGibhithe eGosheni, baba nempahla eningi, bazalana, banda kakhulu.
UJakobe wahlala eGibhithe iminyaka eyi-17. Izinsuku zikaJakobe neminyaka yokuphila kwakhe emhlabeni kwaba yi-147.
Zasondela izinsuku zika-Israyeli zokuba afe, wayesebiza indodana yakhe uJosefa, wathi kuyo: “Uma ngifumene umusa emehlweni akho, ngiyakucela, faka isandla sakho phansi kwethanga lami, bese ungethembisa ukuthi uyongenzela umusa neqiniso. Uze ungangingcwabi lapha eGibhithe,
lapho sengilele kobaba, ubongithwala, ungikhiphe eGibhithe uyongingcwaba ethuneni lobaba.” UJosefa wathi: “Ngizokwenza njengoba ushilo.”
UJakobe wathi: “Funga.” Wayesefunga. U-Israyeli wayesekhothamela enhla nombhede.
Emveni kwalezo zinto uJosefa wathola umbiko othi: “Uyihlo uphathekile.” Wayesethatha amadodana akhe omabili uManase no-Efrayimi ukuyombona.
Kwabikwa kuJakobe kwathiwa: “Bheka, indodana yakho uJosefa iyeza izokubona.” U-Israyeli waziqinisa, wavuka, wahlala embhedeni.
UJakobe wathi kuJosefa: “UNkulunkulu uSomandla wabonakala kimi ngiseLuzi eKhanani, wangibusisa,
wathi kimi: ‘Ngizoyandisa inzalo yakho ibe yizinkumbi, ngikwenze izizwe eziningi, leli lizwe ngizolinika izizukulwane zakho libe yifa lazo laphakade.’
“Ngakho-ke lawa madodana akho amabili azalelwe lapha eGibhithe ngingakafiki, asengawami manje. U-Efrayimi noManase bangabami, njengoba kunjalo kuRubeni noSimeyoni.
Uma uthola amanye amadodana emva kwalawa, ayakuba ngawakho, kodwa ayakulotshwa phansi kohla lwabafowabo, ngokuba ifa lawo ayolithola kubo.
Lapho ngisesendleleni ngivela ePhadani Aramu, uRaheli wafela eKhanani kuselibangana ukufinyelela e-Efratha, ngase ngimngcwaba khona lapho eceleni kwendlela eya e-Efratha,” (eliyiBhethlehema).
U-Israyeli ebona amadodana kaJosefa, wabuza wathi: “Ngobani laba na?”
UJosefa wathi kuyise: “Ngamadodana ami uNkulunkulu angiphe wona ngikuleli lizwe.” Uyise wayesethi: “Alethe lapha ukuze ngiwabusise.”
Amehlo ka-Israyeli ayesenqundekile ngenxa yobudala, engasaboni kahle. Ngakho-ke uJosefa wawasondeza, wayeseyawanga, wawagona.
U-Israyeli wathi kuJosefa: “Ngangingasalindele ukuthi ngiyophinde ngibubone ubuso bakho. Manje bheka, uNkulunkulu ungivumele ukuba ngibone ngisho nabantwana bakho imbala.”
UJosefa wawasusa ethangeni likayise, wakhothamela emhlabathini wathi mbo ngobuso.
UJosefa wawathatha womabili, u-Efrayimi engakwesokunene eqondene nesokhohlo sika-Israyeli, uManase engakwesokhohlo eqondene nesokunene sika-Israyeli, wawasondeza kuye.
Kepha u-Israyeli welula isandla sakhe sokunene wasibeka ekhanda lika-Efrayimi, owayengomncane, wabeka isandla sokhohlo ekhanda likaManase, ephambanisa izandla zakhe ukuze asibeke kuManase owayeyizibulo.
Wambusisa uJosefa, wathi: “UNkulunkulu abahambe phambi kwakhe okhokho bami o-Abhrahama no-Isaka, uNkulunkulu obe ngumelusi wami yonke impilo yami kuze kube namuhla.
Ingelosi engihlenge ezingozini zonke, makabusise laba bafana, ukuze ngabo igama lami nelokhokho bami o-Abhrahama no-Isaka lichume njalo. Sengathi banganda babe baningi emhlabeni.”
UJosefa wabona ukuthi uyise ubeke isandla sakhe sokunene phezu kwekhanda lika-Efrayimi, akwaze kwamthokozisa lokho. Wasithatha isandla sikayise ukuba asisuse ekhanda lika-Efrayimi asibeke kwelikaManase.
UJosefa wathi kuyise: “Hhayi kanjalo baba, ngokuba lona nguye oyizibulo, beka isandla sakho sokunene ekhanda lakhe.”
UJakobe akavumanga, kodwa wathi: “Ngiyazi, ndodana yami, ngiyazi; naye uzokuba yisizwe, abe mkhulu. Nokho umnawakhe u-Efrayimi uzokuba mkhulu kunaye, izizukulwane zakhe zibe yizizwe eziningi.”
Ngakho-ke uJakobe wababusisa kanjalo ngalolo lusuku, ethi: “Ngawe u-Israyeli uyakubusisana athi: ‘UNkulunkulu makakwenze ufane no-Efrayimi noManase.’ ” UJakobe wambeka u-Efrayimi waba phambi kukaManase.
U-Israyeli wayesethi kuJosefa: “Sengizokufa, kodwa uNkulunkulu uzokuba nani, aniphindisele ezweni lokhokho benu.
Wena-ke ngikwabela okuthe xaxa kunabafowenu; ingxenye engayithatha ezandleni zama-Amori ngenkemba nangomnsalo wami.”
UJakobe wabiza amadodana akhe wathi: “Buthanani ukuze nginitshele okuzonehlela ezinsukwini ezizayo.
“Hlanganani, nilalele madodana kaJakobe, lalelani uyihlo u-Israyeli.
“Wena Rubeni uyizibulo lami, ungamandla ami, engabonakalisa ngawo ubudoda bami, uyingqongqo, unesithunzi, ingqongqo enamandla ukubedlula bonke.
Ubikizela njengamanzi omfula, kodwa ngeke usaba yingqongqo, ngoba wakhwela embhedeni kayihlo, wawungcolisa; wakhwela embhedeni wami.
“USimeyoni noLevi yizelamani, izinkemba zabo ziyizikhali zobudlova.
Umphefumulo wami mawungangeni emkhandlwini wabo, ungazibandakanyi nomgwamanda wabo, ngoba ekuthukutheleni kwabo babulala abantu, bagenca izinkabi imisipha.
Maluqalekiswe ulaka lwabo ngokuba luyavutha, nentukuthelo yabo ngokuba iwunya. Ngizobehlukanisela kwaJakobe, ngibahlakazele kwa-Israyeli.
“Juda, abafowenu bayokudumisa. Isandla sakho siyohlala entanyeni yezitha zakho, amadodana kayihlo akukhothamele.
UJuda uyibhongo lengonyama. Wenyuke empangweni ndodana yami. Uguqe, wacutha njengengonyama nanjengengonyamakazi, ngubani ongake akuvuse na?
Intonga yobukhosi ngeke isuke kuJuda, nodondolo lombuso ngeke lugudluzwe phakathi kwezinyawo zakhe, kuze kufike lowo ubukhosi obungobakhe; nezizwe ziyakumlalela.
Ubophela ithole lembongolo yakhe emvinini, nethole lembongolo emvinini wekhethelo. Uhlanza izingubo zakhe ewayinini, nezambatho zakhe ngegazi lezithelo zomvini.
Amehlo akhe ayakuba bomvu yiwayini, amazinyo akhe abe mhlophe kunobisi.
“UZabuloni uyokwakha ngasogwini lolwandle, abe ngasechwebeni lemikhumbi, imingcele yakhe iyoze ishaye eSidoni.
“U-Isakhari uyimbongolo enamandla, elala phakathi kwezibaya.
Uzothi angabona ukuthi izwe lihle, liyindawo yokuphumula, athobise ihlombe lakhe, ukuze athwale umthwalo, aphenduke isigqila esingakhokhelwa.
“UDani uyohola abantu bakhe njengesinye sezizwana zakwa-Israyeli.
UDani uyoba yinyoka ngasendleleni, ihobosha emzileni eliluma izithende zehhashi, ukuze umgibeli walo awe nyovane.
Nkulunkulu, ngiyilindele ngokulangazelela insindiso yakho.
“UGadi uyogaselwa yiviyo, kodwa yena uyolihlasela selibaleka.
“U-Asheri uyokudla okunonileyo, akhiqize ukudla okufanele amakhosi.
“UNafethali uyindluzelekazi ekhululekileyo, ekhuluma amazwi amnandi.
“UJosefa ungumuthi othelayo, ongasesiphethwini, omagatsha awo akhwela odongeni.
Abacibayo bamhlasela kanzima, bembambele amagqubu, futhi bangamaciko okuciba.
Nokho wawubamba umcibisholo wakhe, zaqiniswa izingalo zakhe ngonaMandla kaJakobe, okuvela kuye uMelusi oyidwala lika-Israyeli,
ngoNkulunkulu kayihlo ozokusiza, ngoSomandla ozokubusisa ngezibusiso zasezulwini phezulu, nezibusiso zasemajukujukwini omhlaba, nangezibusiso zamabele nezesibeletho.
Izibusiso zikayihlo ziqinile kunezibusiso zokhokho bami, zifinyelela ezintabeni zaphakade. Sengathi lezi zibusiso, zingehlela ekhanda likaJosefa, nasebunzini lakhe owehlukaniswa kubafowabo.
“UBhenjamini uyimpisi entwengulayo; ekuseni udla akubambileyo, kusihlwa ahlukanise akuphangileyo.”
Bonke laba yizizwana ezili-12 zakwa-Israyeli. Yilokho uyise akukhuluma ngesikhathi ebabusisa, ebusisa yilowo nalowo ngesibusiso esimfaneleyo.
UJakobe wabayala, wathi: “Sengizokufa ngingcwatshwe nobabamkhulu. Ngimbeleni nokhokho bami emgedeni osensimini ka-Efroni, umHithi,
emgedeni osensimini eMakhaphela eseduze kweMamre eKhanani, ensimini u-Abhrahama ayithenga ku-Efroni, umHithi, ukuba ibe yindawo yokungcwaba.
Kulapho u-Abhrahama noSara umkakhe bangcwatshwa khona, kulapho futhi no-Isaka nomkakhe uRibheka bengcwatshwe khona, nami ngamngcwaba lapho uLeya.
Insimu nomgede okuyo kwathengwa kumaHithi.”
Lapho uJakobe eseqedile ukukhuluma namadodana akhe, wagoqa izinyawo wazikhweza embhedeni, waphuma umphefumulo, wangcwatshwa nabakubo.
UJosefa waziphonsa phezu kukayise, wakhala, wamanga.
Wayeseyala izinceku zakhe eziyizinyanga ukuba zigqumise isidumbu sikayise ngemithi. Izinyanga zamgqumisa-ke u-Israyeli ngemithi.
Kwaphela izinsuku ezingama-40, okuyizinsuku zokugqumisa. AbaseGibhithe bamlilela izinsuku ezingama-70.
Sezedlule izinsuku zokumlilela uJakobe, uJosefa wakhuluma kwabendlu kaFaro, wathi: “Uma ngifumene umusa emehlweni enu, nginxuseleni kuFaro, nithi:
‘Ubaba wangifungisa wathi: “Sengizokufa. Uyabona-ke, ubongingcwaba ethuneni lami engazimbela lona eKhanani.” Bengicela ukuba ngidedelwe ngihambe ngiyongcwaba ubaba, bese ngibuya.’ ”
UFaro wathi: “Khuphuka uyongcwaba uyihlo njengalokhu akufungisa.”
UJosefa wakhuphuka wayofihla uyise, waphelezelwa yizinceku zikaFaro, nezikhulu zonke zendlu yakhe, nazo zonke izikhulu zaseGibhithe.
Kwaphuma nabendlu kaJosefa, abafowabo, nabendlu kayise, kwasala kuphela abantwana babo, nezimvu, nezinkomo zabo eGosheni.
Kwakhuphuka ngisho namabutho agibele izinqola zempi, nagibele amahhashi, kwaba yisixuku esikhulu kakhulu.
Kwathi lapho befika eGoreni Hathadi elingaphesheya komfula iJordani, kwasuka esinamathambo, bakhihla isililo, kwaba muncu. UJosefa wamlilela uyise izinsuku eziyisikhombisa.
Abakhileyo eKhanani bezwa leso sililo eGoreni Hathadi, bathi: “Saze sasikhulu isililo sabantu baseGibhithe bo!” Ngakho-ke bayiqamba leyo ndawo engaphesheya komfula iJordani ngokuthi kuse-Abeli Mizirayimi, okusho ukuthi yiSililo sabaseGibhithe.
Amadodana ka-Israyeli enza konke ayeyalwe ngakho nguyise.
Amadodana akhe amthatha uyise amyisa eKhanani, amngcwaba emgedeni osensimini eMakhaphela, u-Abhrahama ayewuthenge nensimu ku-Efroni umHithi, ukuze ube yindawo yokungcwaba, eduze naseMamre.
UJosefa wangcwaba uyise, qede wabuyela eGibhithe, nabafowabo, nabo bonke ababekhuphuke naye ukuyongcwaba uyise.
Kuthe ukuba abafowabo bakaJosefa babone ukuthi uyise usefile, bathi: “Mhlawumbe uJosefa usasibambele igqubu, funa azame ukuziphindiselela kithi ngabo bonke ububi esabenza kuye.”
Base bethumela kuJosefa, bathi: “Uyihlo washiya umyalelo engakafi, wathi:
‘Anotshela uJosefa ukuthi: ngiyakuncenga ukuba uxolele abafowenu isiphambeko sabo nesono sabo, ngokuba benza okubi kuwe.’ Manje siyakunxusa ukuba uxolele isiphambeko sezinceku zikaNkulunkulu kayihlo.” Kwathi ukuba lowo myalezo ufike kuJosefa, wakhala.
Abafowabo bafika kuye mathupha, bazilahla phansi phambi kwakhe, bathi: “Siyizinceku zakho.”
UJosefa wathi kubo: “Ningesabi. Kanti nginguNkulunkulu yini na?
Nakuba nangakhela uzungu nifuna ukungenzakalisa, kodwa uNkulunkulu wayehlose okuhle, ukuze namuhla kusindiswe izinkumbi zabantu.
Ngakho-ke ningesabi, ngizoninakekela nina nabantwana benu.” Wabaduduza ngokukhuluma nabo kanjalo.
UJosefa wahlala eGibhithe nabo bonke abendlu kayise. Waphila waze waba neminyaka eyi-110,
waze wabona ngisho isizukulwane sesithathu sabantwana baka-Efrayimi; nabantwana bakaMakhiri indodana kaManase, wabagona ethangeni lakhe besanda kuzalwa.
UJosefa wathi kubafowabo: “Sengizokufa mina, kodwa uNkulunkulu akasoze anilibala nakanye, uyonikhuphula kuleli lizwe, aniphindisele ezweni alethembisa ngesifungo ko-Abhrahama, no-Isaka, noJakobe.”
UJosefa wawafungisa amadodana ka-Israyeli, wathi: “UNkulunkulu uzakunihambela impela, anowakhuphula amathambo ami kule ndawo.”
UJosefa wafa eseqede iminyaka eyi-110, abantu bamgqumisa ngemithi, wayesefakwa ebhokisini lomngcwabo eGibhithe.
Lawa ngamagama amadodana ka-Israyeli afika noJakobe eGibhithe; yileyo naleyo nabedlu yayo:
uRubeni, uSimeyoni, uLevi, uJuda,
u-Isakhari, uZebuloni, uBhenjamini,
uDani, uNafethali, uGadi, no-Asheri.
Sebebonke abaphuma okhalo lukaJakobe babengabantu abangama-70. UJosefa wayevele eseseGibhithe.
UJosefa wafa, kwafa nabo bonke abafowabo, naso sonke leso sizukulwane.
Abantu bakwa-Israyeli bazalana, banda, bachuma, baba namandla amakhulu; izwe lagcwala bona.
Kwaba khona inkosi entsha eGibhithe eyayingamazi uJosefa.
Yathi kubantu bayo: “Bhekani, abakwa-Israyeli sebebaningi kakhulu, futhi banamandla kunathi.
Masibaphathe ngesihluku, ngaphandle kwalokho bazokwanda kakhulu, bese kuthi uma kusuka impi bahlangane nezitha zethu, balwe nathi, qede bahambe kuleli lizwe.”
AbaseGibhithe baqoka abaphathi bezigqila ukuze babagqilaze abantu bakwa-Israyeli ngokubaphoqa ukwenza umsebenzi onzima, bamakhele uFaro imizi yokugcina izinto ePhithomi naseRamesesi.
Kwathi lapho bebacindezela, banda kakhulu, basabalala abantu bakwa-Israyeli; abaseGibhithe baqala ukubesaba.
AbaseGibhithe babagqilaza kanzima abantu bakwa-Israyeli,
benza impilo yabo yaba muncu ngokubasebenzisa kanzima odakeni nasezitinini, nasemisebenzini yonke emasimini. Babaphatha ngendlakadla enkulu kukho konke ababebenzisa khona.
Inkosi yaseGibhithe yathi kubabelethisi bamaHebheru, okwakungoShifira noPhuwa:
“Lapho nibelethisa abesifazane bamaHebheru sebesesigqikini sokubeletha, nibona ukuthi ngumfana, niyakumbulala, kodwa uma kuyintombazane niyiyeke iphile.”
Kepha ababelethisi babemesaba uNkulunkulu, abazange benze njengokuyala kwenkosi yaseGibhithe, kodwa babayeka abafana baphila.
Inkosi yaseGibhithe yababiza ababelethisi yathi kubo: “Nikwenzeleni lokhu, nayeka abafana ukuba baphile na?”
Ababelethisi bathi kuFaro: “Kungoba abesifazane bamaHebheru kabafani nabesifazane baseGibhithe; banamandla, kuthi engakafiki umbelethisi kubo, babe sebebelethile.”
UNkulunkulu wabenzela okuhle ababelethisi; abantu banda, baba namandla amakhulu.
Ngokuba ababelethisi bamesaba uNkulunkulu wabapha nabo imindeni.
UFaro wayeseyala bonke abantu bakhe wathi: “Bonke abafana abazozalwa ngamaHebheru kufanele baphonswe emfuleni, kodwa amantombazane niwayeke aphile.”
Kwasuka indoda kwabendlu kaLevi yaganwa yindodakazi kaLevi.
Wakhulelwa lowo wesifazane wazala indodana; kwathi lapho eyibona ukuthi yinhle, wayifihla izinyanga ezintathu.
Kuthe lapho engasakwazi ukuyifihla wayithatha wayifaka ebhokisini elaliphicwe ngekhwani, lahuqwa ngebhithumeni nekoliyati, walibeka emhlangeni owawusosebeni lomfula.
Udadewabo wema buqamama ukuze abone ukuthi kuzokwenzekani kuye.
Kwase kwehla indodakazi kaFaro iyogeza emfuleni, abaphelezeli bayo bagudla osebeni lomfula; yayisibona ubhasikidi emhlangeni, yayisithumela umsizi wayo ukuyowulanda.
Kwathi lapho iwuvula yabona; bheka, kwakungumfana; wayekhala. Yamhawukela, yayisithi: “Lona ngomunye wezingane zamaHebheru.”
Udadewabo wathi endodakazini kaFaro: “Ngihambe yini ngiyokulandela umzanyana kwabesifazane bamaHebheru ukuba akuncelisele yona na?”
Indodakazi kaFaro yathi kuye: “Hamba.” Intombazane yahamba yayobiza unina wengane.
Indodakazi kaFaro yathi kuye: “Thatha lo mntwana uyongincelisela yena, ngizokukhokhela.” Owesifazane wamthatha umntwana wamncelisa.
Umntwana wakhula, wayesemyisa endodakazini kaFaro, waba yindodana yayo; yamqamba ngokuthi nguMose, ngokuba yathi: “Ngamkhipha emanzini.”
Langa limbe uMose esekhulile, waya kubantu bakubo, wabubona ubunzima ababebuthwele; wabona umGibhithe eshaya umHebheru ongomunye wabantu bakubo.
Waqalaza ngapha nangapha, wangabona muntu, wayesembulala umGibhithe, wamfihla esihlabathini.
Ngakusasa lapho ephuma, nanka amadoda amabili amaHebheru elwa; wayesethi kuleyo ndoda eyayonile: “Umshayelani umfowenu na?”
Yaphendula yathi: “Ngubani okubeke inkosi nomehluleli phezu kwethu na? Ufuna ukungibulala njengalokhu ubulele umGibhithe na?” UMose wayesesaba, wacabanga wathi: “Impela lokhu sekuyaziwa.”
Lapho uFaro esezwile ngalokho wafuna ukumbulala uMose. Kepha uMose wabaleka phambi kukaFaro, wayohlala kwaMidiyani, wahlala phansi eduze komthombo.
Kwakukhona umphristi kwaMidiyani owayenamadodakazi ayisikhombisa; eza ezokukha amanzi, ukuba agcwalise imikhombe ukuze imfuyo kayise iphuze.
Abelusi bafika bawaxosha, kodwa uMose wasukuma wawasiza, wawuphuzisa umhlambi wawo.
Lapho efika kuyise uRehuweli, wathi kuwo: “Yini eyenze nabuya masinya namuhla na?”
Athi kuye: “UmGibhithe usikhululile esandleni sabelusi, wabuye wasikhelela amanzi, wawuphuzisa nomhlambi.”
Wathi emadodakazini akhe: “Pho uphi na? Nimshiyeleni? Mbizeni ukuze azokudla.”
UMose wavuma ukuhlala nalowo muntu. Waganisela uMose indodakazi yakhe uZiphora.
Wazala indodana wayibiza ngokuthi nguGereshomu, ngokuba ethi: “Ngingumfokazi ezweni labezizwe.”
Sekwedlule izinsuku eziningi, inkosi yaseGibhithe yakhothama. Abantu bakwa-Israyeli babubula ngenxa yokucindezelwa, bakhala benxusa, ukukhala kwabo kwafinyelela kuNkulunkulu.
UNkulunkulu wakuzwa ukububula kwabo, wayesesikhumbula isivumelwano ayesenze no-Abhrahama, no-Isaka, noJakobe.
UNkulunkulu wababheka abantu bakwa-Israyeli, futhi wabanakekela.
UMose wayelusa umhlambi womukhwe wakhe uJethro, umphristi wakwaMidiyani. Wawuqhuba wedlula ehlane, waze wayofika eHorebhe entabeni kaNkulunkulu.
Ingelosi kaSimakade yabonakala kuye elangabini lomlilo phakathi kwesihlahla. Wabona ukuthi isihlahla siyavutha, kodwa asipheli.
UMose wathi: “Ake ngichezuke ukuze ngibone lesi simangaliso esingaka, ukuthi kungani isihlahla singashi.”
Lapho uSimakade ebona ukuthi uchezukile ukuyobheka, uNkulunkulu wambiza esesihlahleni, wathi: “Mose, Mose!” Yena wathi: “Ngilapha.”
UNkulunkulu wathi: “Ungasondeli lapha; khumula izimbadada ezinyaweni zakho, ngokuba indawo omi kuyo ingumhlabathi ongcwele.”
Wayesethi: “NginguNkulunkulu kayihlo, uNkulunkulu ka-Abhrahama, uNkulunkulu ka-Isaka, noNkulunkulu kaJakobe.” UMose wafihla ubuso bakhe, ngokuba wayesaba ukubheka uNkulunkulu.
USimakade wathi: “Ngikubonile ukuhlupheka kwabantu bami abaseGibhithe, futhi ngikuzwile ukukhala kwabo ngenxa yababacindezelayo, ngiyakwazi nokuhlupheka kwabo.
Ngehlile ukuzobakhulula esandleni sabaseGibhithe, nokubakhuphula kuleli lizwe, ngibayise ezweni elihle nelibanzi, izwe elichichima ubisi noju, izwe lamaKhanani, amaHithi, ama-Amori, amaPherizi, amaHivi, namaJebusi.
Manje, bheka, ukukhala kwabantu bakwa-Israyeli sekufinyelele kimi, futhi ngikubonile ukucindezelwa kwabo ngabaseGibhithe.
Ngakho-ke hamba, ngiyakuthuma kuFaro ukuba uyokhulula abantu bami eGibhithe, abantu bakwa-Israyeli.”
Kepha uMose wathi kuNkulunkulu: “Ngingubani mina ukuthi ngingaya kuFaro, ngikhulule abantu bakwa-Israyeli eGibhithe na?”
Wathi: “Ngizokuba nawe. Lesi kuyakuba yisibonakaliso sokuthi ngikuthumile: uma usubakhiphile abantu eGibhithe, niyakumkhonza uNkulunkulu kule ntaba.”
UMose wathi kuNkulunkulu: “Uma ngifika kubantu bakwa-Israyeli, ngithi kubo: ‘UNkulunkulu woyihlo ungithumile,’ bese bengibuza bethi: ‘Ngubani igama lakhe na?’ ngiyakuthini kubo na?”
UNkulunkulu wathi kuMose: “Nginguye Enginguye.” Wathi: “Uyakubatshela abantu bakwa-Israyeli uthi: ‘UNginguye ungithumile kini.’ ”
UNkulunkulu wabuye wathi kuMose: “Uyakusho kubantu bakwa-Israyeli uthi: ‘USimakade uNkulunkulu woyihlo, uNkulunkulu ka-Abhrahama, uNkulunkulu ka-Isaka, noNkulunkulu kaJakobe ungithumile kini.’ Leli yigama lami kuze kube phakade, engiyakukhunjulwa ngalo ezizukulwaneni ngezizukulwane.
“Hamba uqoqe amalunga akwa-Israyeli, uthi kuwo: ‘USimakade, uNkulunkulu wokhokho benu, uNkulunkulu ka-Abhrahama, no-Isaka, noJakobe uzibonakalisile kimi, wathi: “Ngikubonile konke okwenziwa kini eGibhithe,
ngathi ngizonikhuphula ekuhlushweni ngabaseGibhithe, nginiyise ezweni lamaKhanani, lamaHithi, lama-Amori, lamaPherizi, lamaHivi, nelamaJebusi, izwe elichichima ubisi noju.” ’
“Bayokulalela okushoyo; wena uyakuhamba namalunga akwa-Israyeli niye enkosini yaseGibhithe, nifike nithi: ‘USimakade, uNkulunkulu wamaHebheru uzibonakalisile kithi, ngakho-ke sivumele sihambe ibanga lezinsuku ezintathu, siye ehlane, ukuze sihlabele uSimakade uNkulunkulu wethu.’
Ngiyazi ukuthi inkosi yaseGibhithe ayiyukunivumela ukuba nihambe, ngaphandle kokuba ngiyicindezele ngesandla esinamandla.
Ngiyakwelula isandla sami ngilishaye iGibhithe ngezimangaliso engiyakuzenza kulo; emveni kwalokho iyakunikhulula nihambe.
“Ngiyakunenzela umusa emehlweni abaseGibhithe. Lapho senihamba, aniyukuphuma nilambatha,
kodwa yilowo nalowo owesifazane uyocela kumakhelwane wakhe nakuye ogogobele emzini wakhe, izinto zesiliva, ezegolide, nezingubo zokugqoka, niyogqokisa amadodana namadodakazi enu; nibaphange kanjalo abaseGibhithe.”
UMose waphendula wathi: “Kepha bheka, ngeke bangikholwe noma bangilalele, bayakuthi: ‘USimakade akabonakalanga kuwe.’ ”
USimakade wathi kuye: “Yini le esesandleni sakho na?” Wathi: “Yinduku.”
Wayesethi: “Yiphonse emhlabathini.” Wayiphonsa emhlabathini, yaphenduka inyoka; uMose wayibalekela.
Kepha uSimakade wathi kuMose: “Yelula isandla sakho, uyibambe ngomsila.” Waselula isandla sakhe, wayibamba; yaphenduka induku esandleni sakhe.
“Bazokholwa-ke ukuthi uSimakade, uNkulunkulu wokhokho benu, uNkulunkulu ka-Abhrahama, uNkulunkulu ka-Isaka noNkulunkulu kaJakobe ubonakele kuwe.”
USimakade wabuye wathi kuye: “Faka isandla esifubeni sakho.” Wasifaka. Lapho esikhipha, mameshane, isandla sakhe sabe sesinochoko, simhlophe njengeqhwa.
UNkulunkulu wathi kuye: “Siphindisele esifubeni isandla sakho.” Wasiphindisela esifubeni sakhe. Kuthe lapho esesikhipha, habe, sesibuyele esimweni saso, sesifana nesikhumba sakhe.
“Uma bengakukholwa, noma bengasishayi mkhuba isibonakaliso sakho sokuqala, bayosikholwa esilandelayo.
Uma bengazikholwa zombili izibonakaliso noma bengakulaleli okushoyo, uyokukha amanzi eNayili, uwathele emhlabathini owomileyo, lawo manzi owakhe emfuleni ayophenduka igazi emhlabathini owomileyo.”
UMose wathi kuSimakade: “Nkosi, ngixolele, angikaze ngibe ngumuntu oyiciko lokukhuluma, kusukela kuqala kuze kube manje njengoba ukhuluma nenceku yakho, ngokuba nginamalimi, ulimi lwami lulukhuni.”
USimakade wathi kuye: “Ngubani owenza umlomo womuntu na? Ngubani owenza isimungulu nesithulu, obonayo noyimpumputhe na? AkusiMina Simakade na?
Ngalokho-ke hamba, ngizokuba semlonyeni wakho, ngikufundise ozokusho.”
Kepha wathi: “Nkosi, ngixolele, ngiyakucela ukuba uthumele omunye.”
Intukuthelo kaSimakade yamvuthela uMose, wathi: “Akekho yini umfowenu u-Aroni ongumLevi na? Ngiyazi ukuthi uliciko lokukhuluma; bheka, uyeza uzokuhlangabeza, lapho ekubona uyothokoza enhliziyweni yakhe.
Uyokhuluma naye, umtshele amazwi azowakhuluma ngomlomo wakhe, ngizokuba semlonyeni wakho nakowakhe, nginifundise enizokwenza.
Nguye ozokukhulumela kubantu; uyakuba ngumlomo wakho, wena ufane nonkulunkulu kuye.
Phatha le nduku ngesandla sakho, wenze ngayo izibonakaliso.”
UMose wahamba wabuyela kumukhwe wakhe uJethro, wathi kuye: “Ngiyakucela, ngivumele ngihambe, ngibuyele kubahlobo bami abaseGibhithe, ngiyobona ukuthi basaphila yini.” UJethro wathi kuMose: “Hamba ngokuthula.”
USimakade wathi kuMose ekwaMidiyani: “Hamba ubuyele eGibhithe, ngokuba sebafa bonke abebefuna ukukubulala.”
UMose wathatha umkakhe namadodana akhe, wabagibelisa embongolweni, wahamba wabuyela eGibhithe. UMose wayephethe induku kaNkulunkulu ngesandla.
USimakade wathi kuMose: “Lapho usubuyele eGibhithe, qikelela ukuthi uzenze zonke izimangaliso phambi kukaFaro engakunika amandla okuba uzenze, kodwa ngiyoyenza lukhuni inhliziyo yakhe, ukuze angabavumeli abantu ukuba bahambe.
Uyakuthi kuFaro: ‘Usho kanje uSimakade: “U-Israyeli uyizibulo lami,
ngathi kuwe: yivumele indodana yami ihambe ukuze ingikhonze, kepha wenqaba ukuyidedela ihambe, uyabona-ke, ngizoyibulala indodana yakho, izibulo lakho.” ’ ”
Esendleleni, endaweni yokuphumula, uSimakade wahlangana naye, wafuna ukumbulala.
UZiphora wathatha itshe elicijile wasika ijwabu lendodana yakhe, wathinta izinyawo zikaMose, wathi: “Ungumyeni wami wegazi kimi.”
Ngalokho wamyeka uMose uSimakade, ngokuba uZiphora wathi: “Ungumyeni wami wegazi, ngenxa yokusoka.”
USimakade wathi ku-Aroni: “Hamba uye ehlane uyohlangabeza uMose.” Wahamba, wahlangana naye entabeni kaNkulunkulu, wamanga.
UMose wayesetshela u-Aroni wonke amazwi kaSimakade ayemthume wona, nazo zonke izibonakaliso ayemyale ukuba azenze.
UMose no-Aroni bahamba baqoqa wonke amalunga abantu bakwa-Israyeli.
U-Aroni wawakhuluma wonke amazwi uSimakade ayewakhulume kuMose, wenza nezibonakaliso phambi kwabantu.
Abantu bakholwa lapho bezwa ukuthi uSimakade uqaphelile, wabona futhi ukuhlupheka kwabo, base bekhothama, bakhuleka.
Emveni kwalokho, uMose no-Aroni baya kuFaro, bathi kuye: “Usho kanje uSimakade, uNkulunkulu ka-Israyeli, uthi: ‘Dedela abantu bami bahambe, ukuze bayogubha umkhosi wami ehlane.’ ”
Kepha uFaro wathi: “Ungubani uSimakade ukuthi ngingalalela izwi lakhe, ngivumele u-Israyeli ahambe na? Angimazi uSimakade, futhi anginakumdedela u-Israyeli ahambe.”
Base bethi: “UNkulunkulu wamaHebheru ubonakele kithi; sidedele sihambe uhambo lwezinsuku ezintathu, siye ehlane, siyokwenzela uSimakade uNkulunkulu wethu umhlatshelo, funa asehlisele ngobhubhane, noma asiqothe ngenkemba.”
Kepha inkosi yaseGibhithe yathi kubo: “Mose no-Aroni, nibasuselani abantu emisebenzini yabo na? Hambani niye emisebenzini yenu.”
UFaro waqhubeka wathi: “Laba bantu sebebaningi kakhulu kunabantu bakuleli lizwe, nokho nifuna ukuba bayeke ukwenza imisebenzi yabo enzima.”
Ngalolo lusuku uFaro wayala izinduna zabantu nabaphathi babo, wathi:
“Ningabe nisabanika abantu utshani bokwenza izitini, njengoba benenza kuqala; mabahambe bazilandele utshani ngokwabo.
Kepha inani lezitini abazenzayo kufanele lifane nelezitini abazenze ngayizolo; ningalehlisi, ngokuba bayavilapha. Yingakho bekhala bethi: ‘Masihambe siyokwenzela uNkulunkulu wethu umhlatshelo.’
Mawenziwe nzima umsebenzi kubo yikhona bezonaka wona, bangawalaleli amazwi adukisayo.”
Izinduna nabaphathi babantu baphuma, bathi kubantu: “Nakhu okushiwo nguFaro uthi: ‘Angizukuninika utshani.’
Hambani nizifunele nina utshani noma kuphi lapho nibuthola khona, kodwa umsebenzi wenu awuzukuncishiswa nakancane.”
Ngakho-ke abantu bahlakazeka kulo lonke iGibhithe ukuyoqoqa izinhlanga esikhundleni sotshani.
Izinduna zazibakhaca zithi: “Qedani umsebenzi ngesilinganiso sansuku zonke ebenisenza ngesikhathi nisanikwa utshani.”
Abaphathi babakwa-Israyeli ababebekwe yizinduna zikaFaro ukubaphatha, bashaywa, babuzwa ukuthi: “Aniwuqedanga ngani umsebenzi wezitini ebeniwunqunyelwe izolo nanamuhla, njengoba benenza nsuku zonke na?”
Izinduna zabakwa-Israyeli zaya kuFaro, zakhala zathi: “Uziphathelani izinceku zakho kanje na?
Izinceku zakho azisanikwa tshani, nokho bathi kithi: ‘Yenzani izitini!’ Futhi kunjalo nje izinceku zakho ziyashaywa, kepha icala likubantu bakho.”
Wathi: “Niyavilapha, yingakho nithi: ‘Sidedele sihambe siyokwenzela uSimakade umhlatshelo.’
Hambani manje niyosebenza, ngokuba anizukunikwa tshani, kodwa nisazokwenza inani elifanayo lezitini.”
Izinduna zabakwa-Israyeli zazibonela ukuthi zisengxakini engakanani lapho kuthiwa kuzo: “Aniyukulehlisa inani lezitini enilenza ngosuku.”
Zahlangana noMose no-Aroni ababemi bezozihlangabeza ngesikhathi zisuka kuFaro.
Zathi kubo: “USimakade makanibheke anehlulele. Nisenze sanuka iququ phambi kukaFaro nezinceku zakhe, nabanika inkemba ezandleni zabo ukuba basibulale.”
UMose wabuyela kuSimakade, wathi: “Nkosi, yini wenze okubi kulaba bantu na? Ungithumeleni mina kubo na?
Selokhu ngaya kuFaro ukuyokhuluma egameni lakho, ubaphatha kabi laba bantu, futhi awubakhululi abantu bakho.”
USimakade wathi kuMose: “Manje uzokubona engizokwenza kuFaro. Uzobadedela bahambe, ngenxa yesandla esinamandla; ngesandla esinamandla uzobaxosha ezweni lakhe.”
UNkulunkulu wakhuluma noMose, wathi kuye: “NginguSimakade.
Ngabonakala ku-Abhrahama, ku-Isaka, nakuJakobe njengoNkulunkulu uSomandla, kodwa igama lami, ‘uSimakade’ angibazisanga lona.
Ngenza isivumelwano nabo sokubanika iKhanani, izwe ababehlala kulo njengabafokazi.
Ngikuzwile futhi ukububula kwabantu bakwa-Israyeli abenziwe izigqila ngabaseGibhithe, ngase ngisikhumbula isivumelwano sami.
Ngakho-ke yisho kubantu bakwa-Israyeli, uthi: ‘NginguSimakade, ngiyakunikhulula emithwalweni yabaseGibhithe, nginikhulule ekugqilazweni yibo, nginihlenge ngengalo eyeluliweyo nangezenzo ezinkulu zokwehlulela.
Ngizonithatha nibe ngabantu bami, futhi ngibe nguNkulunkulu wenu. Niyokwazi ukuthi Mina Simakade nginguNkulunkulu wenu, onikhululile emithwalweni yabaseGibhithe.
Ngiyakuniyisa ezweni engafunga ukulinika u-Abhrahama, u-Isaka, noJakobe; ngiyakuninika lona libe yifa lenu. NginguSimakade.’ ”
UMose wakhuluma kanjalo kubantu bakwa-Israyeli, kodwa abazange bamlalele, ngenxa yezinhliziyo ezincane nokusebenza kanzima.
USimakade wakhuluma kuMose, ethi:
“Hamba ukhulume noFaro inkosi yaseGibhithe ukuba avumele abakwa-Israyeli baphume ezweni lakhe.”
Kepha uMose waphendula uSimakade, wathi: “Abantu abazange bangilalele; uzongilalela kanjani uFaro nginezindebe ezingasokwanga kanje na?”
USimakade wakhuluma kuMose no-Aroni ukuba bayale abantu bakwa-Israyeli noFaro inkosi yaseGibhithe ukuba akhiphe abantu bakwa-Israyeli eGibhithe.
Nazi izinhloko zokhokho ngokwezindlu zazo: amadodana kaRubeni izibulo lika-Israyeli: nguHanoki, uPhalu, uHezironi, noKharimi. Yiyo-ke le imindeni kaRubeni.
Amadodana kaSimeyoni: nguJemuweli, uJamini, u-Ohade, uJakhini, uZohari, noShawule indodana yowesifazane waseKhanani. Yiyo-ke leyo imindeni kaSimeyoni.
Lawa ngamagama amadodana kaLevi ngezizukulwane zawo: nguGereshomu, uKhohathi, noMerari. Iminyaka kaLevi yokuphila yaba yi-137.
Amadodana kaGereshomu: nguLibhini noShimeyi ngemindeni yawo.
Amadodana kaKhohathi: ngu-Amramu, uJizihari, uHebhroni, no-Uziyeli. Iminyaka kaKhohathi yokuphila yaba yi-133.
Amadodana kaMerari: nguMaheli noMushi; yiyo-ke le imindeni yabaLevi ngezizukulwane zayo.
U-Amramu wathatha uJokhebedi uyisekazi, waba ngumkakhe, wamzalela u-Aroni noMose. Iminyaka ka-Amramu yokuphila yaba yi-137.
Amadodana kaJizihari: nguKhora, uNefegi, noZikhiri.
Amadodana ka-Uziyeli: nguMishayeli, u-Elizafani, noSithiri.
U-Aroni wathatha u-Elisheba indodakazi ka-Aminadaba, udadewabo kaNaheshoni, waba ngumkakhe, wamzalela uNadabi, u-Abhihu, u-Eleyazare, no-Ithamari.
Amadodana kaKhora: ngu-Asiri, u-Elikhana, no-Abhiyasafa. Yiyo-ke le imindeni kaKhora.
U-Eleyazare indodana ka-Aroni wathatha enye yamadodakazi kaPhuthiyeli, yaba ngumkakhe, yamzalela uFinehasi. Yilezi-ke izinhloko zokhokho babaLevi ngemindeni yabo.
Yibo o-Aroni noMose uSimakade athi kubo: “Khiphani abantu bakwa-Israyeli eGibhithe ngamaviyo abo.”
Yibo laba abakhuluma noFaro inkosi yaseGibhithe ukuba ikhiphe abantu bakwa-Israyeli eGibhithe, oMose no-Aroni.
Ngosuku uSimakade akhuluma ngalo noMose eGibhithe,
uSimakade wathi kuye: “NginguSimakade, khuluma kuFaro inkosi yaseGibhithe konke engikutshela khona.”
Kepha uMose wathi phambi kukaSimakade: “Njengoba nginezindebe ezingasokwanga nje, uzongizwa kanjani uFaro na?”
USimakade wathi kuMose: “Uyabona-ke, ngikwenze wanjengonkulunkulu kuFaro, nomfowenu u-Aroni uyakuba ngumphrofethi wakho.
Wena uyakukhuluma konke engizokuyala ngakho, kuthi u-Aroni umfowenu akhulume kuFaro ukuba akhulule abantu bakwa-Israyeli, baphume ezweni lakhe.
Kepha Mina ngizokuyenza lukhuni inhliziyo kaFaro, ngiphindaphinde izibonakaliso nezimangaliso zami eGibhithe.
Uma uFaro engakulaleli, Mina ngizolishaya iGibhithe ngezenzo ezinkulu zokwehlulela, ngikhiphe abantu bami, u-Israyeli, ngamaviyo abo, eGibhithe.
AbaseGibhithe bayongazi ukuthi nginguSimakade, lapho sengilishaya iGibhithe, ngikhipha kulo abantu bakwa-Israyeli.”
UMose no-Aroni benza njengalokhu uSimakade ayebayalile.
UMose wayeseneminyaka engama-80, u-Aroni eneminyaka engama-83 ngesikhathi beyokhuluma noFaro.
USimakade wathi kuMose no-Aroni:
“Uma uFaro ethi yenzani isibonakaliso, ubokuthi ku-Aroni: ‘Thatha induku yakho uyiphonse phansi phambi kukaFaro; iyophenduka inyoka.’ ”
UMose no-Aroni baya kuFaro benza njengalokhu uSimakade ebayalile; u-Aroni wayiphonsa phansi induku yakhe phambi kukaFaro nezikhulu zakhe, yaphenduka inyoka.
UFaro wayesebiza amadoda ahlakaniphileyo, abalumbi, nosomlingo baseGibhithe, nabo benza okufanayo ngemilingo yabo.
Ngamunye baphonsa phansi izinduku zabo; zaphenduka izinyoka, kodwa induku ka-Aroni yazigwinya izinduku zabo.
Inhliziyo kaFaro yaba lukhuni, akabalalelanga, njengalokhu ayeshilo uSimakade.
USimakade wathi kuMose: “Inhliziyo kaFaro ilukhuni; uyenqaba ukuvumela abantu ukuba bahambe.
Hamba uye kuFaro ekuseni, uyaphuma njengamanje uya emfuleni. Uyokuma umlinde ngasosebeni lomfula. Phatha ngesandla induku leyo eyaphenduka inyoka.
Uyakuthi kuye: ‘USimakade, uNkulunkulu wamaHebheru ungithume kuwe ukuba ngithi: “Vumela abantu bami bahambe ukuze bayongikhonza ehlane. Kepha kuze kube manje awulalelanga.
Uthi-ke uSimakade: ngalokhu uzokwazi ukuthi nginguSimakade. Uyabona-ke, ngale nduku engiyiphethe ngesandla, ngiyoshaya amanzi omfula iNayili, ayophenduka igazi.
Izinhlanzi ezisemfuleni ziyokufa, umfula iNayili unuke phu, abaseGibhithe bayakukhathazeka bengakwazi ukuwaphuza amanzi omfula.” ’ ”
USimakade wathi kuMose: “Yisho ku-Aroni uthi: ‘Thatha induku yakho uyelulele phezu kwamanzi aseGibhithe, phezu kwemithombo, naphezu kwemifula, phezu kwamaxhaphozi, namachibi, ukuze amanzi aphenduke igazi. Kuyoba negazi kulona lonke iGibhithe, ngisho nasezitsheni zokhuni nezitsha zamatshe.’ ”
UMose no-Aroni benza njengoba uSimakade ayebayalile. Wayiphakamisa induku yakhe, washaya amanzi emfuleni phambi kukaFaro nezinceku zakhe, onke amanzi ayesemfuleni iNayili aphenduka igazi,
kwafa izinhlanzi. Umfula wanuka kangangokuthi abaseGibhithe abakwazanga ukuphuza amanzi awo: kwakunegazi kulona lonke iGibhithe.
Kepha nosomlingo baseGibhithe nabo, ngemilingo yabo, benza into efanayo, ngakho-ke inhliziyo kaFaro yaba lukhuni, akavumanga ukubadedela, njengalokhu uSimakade ayeshilo.
UFaro waphenduka wabuyela esigodlweni sakhe, akaze akunaka lokho enhliziyweni yakhe.
Bonke abaseGibhithe bamba nxazonke zomfula iNayili ukuze bathole amanzi okuphuza, ngoba babengenakuwaphuza amanzi ayesemfuleni.
Kwedlula izinsuku eziyisikhombisa uSimakade eyishayile iNayili.
USimakade wathi kuMose: “Hamba uye kuFaro uthi kuye: ‘USimakade uthi: vumela abantu bami bahambe ukuze bayongikhonza.
Uma ubenqabela ukuba bahambe, ngizolishaya lonke iGibhithe ngamasele.
Umfula iNayili uzogcwala amasele, azokwenyuka, enyukele endlini yakho, nasekamelweni lakho, embhedeni wakho, nasemizini yezinceku zakho, neyabantu bakho, nakohhavini nasezitsheni zokuxovela inhlama.
Amasele azokhuphukela kuwe nakubantu bakho, nakuzo zonke izinceku zakho.’ ”
USimakade wathi kuMose: “Yisho ku-Aroni uthi: ‘Yelula isandla ophethe ngaso induku, uselulele phezu kwemithombo, imifula, namachibi, ukhiphele eGibhithe amasele.’ ”
U-Aroni welulela isandla sakhe phezu kwamanzi eGibhithe, kwaphuma amasele agcwala kulo lonke iGibhithe.
Kepha nosomlingo benza kanjalo ngemilingo yabo, bakhuphulela amasele eGibhithe.
UFaro wabiza uMose no-Aroni, wathi kubo: “Khulekani kuSimakade ukuze asuse amasele kimi nakubantu bami, ngizobadedela abantu bayokwenzela uSimakade umhlatshelo.”
UMose wathi kuFaro: “Ngitshele ukuthi ufuna ngikukhulekele nini wena nezikhulu zakho, nabantu bakho, ukuze amasele asuke kuwe nasezindlini zakho, asale kuphela emfuleni.”
Wathi: “Kusasa.” UMose wayesethi: “Makube njengalokhu ushilo ukuze wazi ukuthi akekho noyedwa ofana noSimakade uNkulunkulu wethu.
Uzakuwasusa amasele ezindlini zakho, nezezinceku zakho, nezabantu bakho, azosala kuphela emfuleni.”
UMose no-Aroni basuka kuFaro, uMose wanxusa kuSimakade mayelana namasele ayewathumelele uFaro.
USimakade wenza njengokucela kukaMose, amasele ayesezindlini, emagcekeni, nasemasimini afa.
Bawaqoqa bawabeka izinqwaba ngezinqwaba. Izwe lanuka.
Kepha lapho uFaro ebona ukuthi uthole ikhefu, wayenza lukhuni inhliziyo yakhe, akaze abalalela njengalokhu ayeshilo uSimakade.
USimakade wathi kuMose: “Yisho ku-Aroni uthi: ‘Yelula induku yakho ushaye uthuli lomhlabathi, ukuze luphenduke omiyane eGibhithe.’ ”
Wenza kanjalo, u-Aroni welula isandla sakhe esasiphethe induku, washaya uthuli lomhlabathi, omiyane banamathela abantu nezilwane ngokufanayo. Lonke uthuli lomhlabathi lwaphenduka omiyane kulo lonke iGibhithe.
Osomlingo ngemilingo yabo bazama ukuveza omiyane, kodwa kwanhlanga zimuka nomoya. Omiyane bahlasela abantu nezilwane.
Osomlingo bathi kuFaro: “Lona ngumunwe kaNkulunkulu.” Kepha inhliziyo kaFaro yaba lukhuni, akafunanga ukubalalela njengalokhu ayeshilo uSimakade.
USimakade wayesethi kuMose: “Vuka ekuseni kakhulu uye kuFaro ngaphambi kokuba aye emfuleni, uthi kuye: ‘USimakade uthi: vumela abantu bami bahambe ukuze bayongikhonza.
Ngokuba uma ungabavumeli abantu bami, ngiyothumela izinkumbi zezibawu kuwe, ezincekwini zakho, kubantu bakho, nasezindlini zenu. Ezindlini zabaseGibhithe kuzogcwala izinkumbi zezibawu, ngisho nasezweni abahlala kulo imbala.
Ngalolo lusuku ngiyakulehlukanisa iGosheni lapho kuhlala khona abantu bami, akuyukuba bikho zinkumbi zezibawu khona, ukuze wazi ukuthi Mina Simakade ngikuleli lizwe.
Ngiyakuhlukanisa phakathi kwabantu bami nabakho. Lesi sibonakaliso sizokwenzeka kusasa.’ ”
USimakade wenza kanjalo, izinkumbi zezibawu zahlasela indlu kaFaro, nezindlu zezinceku zakhe, nalo lonke iGibhithe, kwaba nomonakalo ngenxa yezibawu.
UFaro wabiza uMose no-Aroni, wathi kubo: “Hambani kuleli lizwe niyokwenzela uNkulunkulu wenu umhlatshelo.”
Kepha uMose wathi: “Akunakwenzeka lokho, ngokuba imihlatshelo esizoyethula kuSimakade uNkulunkulu wethu ingokunengekayo kwabaseGibhithe. Singahlaba yini okunengekayo kwabaseGibhithe, singakhandwa ngamatshe na?
Siyakuhamba ibanga lezinsuku ezintathu siye ehlane, sethule umhlatshelo kuSimakade uNkulunkulu wethu njengalokhu esiyalile.”
UFaro wathi: “Ngizonivumela nihambe niyokwethula umhlatshelo kuSimakade uNkulunkulu wenu ehlane, kuphela nje uma ningezukuya kude. Ningikhulekele nami.”
UMose wathi: “Uma ngisuka lapha kuwe, ngizokhuleka kuSimakade ukuba kusasa azisuse izinkumbi zezibawu kuFaro, nasezincekwini zakhe, nakubantu bakhe. Kodwa-ke uFaro makangaphinde akhohlise ngokuthi uzakubavumela abantu bahambe ukuyokwenzela uSimakade umhlatshelo.”
UMose waphuma, wamshiya uFaro, wakhuleka kuSimakade.
USimakade wenza njengoba ecelile uMose: wazisusa izinkumbi zezibawu kuFaro, nasezincekwini zakhe, nakubantu bakhe, akwasala nasinye.
Kepha uFaro wayenza lukhuni inhliziyo yakhe nangalesi sikhathi, akaze avuma ukuba abantu bahambe.
USimakade wathi kuMose: “Hamba uye kuFaro, uthi kuye: ‘Usho kanje uSimakade uNkulunkulu wamaHebheru uthi: “Vumela abantu bami bahambe, ukuze bangikhonze.
Ngokuba uma wenqaba ukubavumela ukuba bahambe, ulokhu ubabambile,
isandla sikaSimakade sizoyishaya ngesifo imfuyo esehlane: amahhashi, izimbongolo, amakameli, izinkomo, izimvu, nezimbuzi.
Kepha uSimakade uzohlukanisa phakathi kwemfuyo yabakwa-Israyeli nemfuyo yabaseGibhithe, ukuze kungafi lutho olungolwabantu bakwa-Israyeli.” ’ ”
USimakade wanquma isikhathi wathi: “Kusasa uSimakade uzokwenza lokhu ezweni.”
Ngakusasa uSimakade wakwenza lokho; yonke imfuyo yabaseGibhithe yafa, kodwa akufanga nayinye emfuyweni yabantu bakwa-Israyeli.
UFaro wathumela, kodwa wathola ukuthi akukho nasinye isilwane emfuyweni yabakwa-Israyeli esasifile. Kepha inhliziyo kaFaro yayilukhuni, akabavumelanga abantu ukuba bahambe.
USimakade wathi kuMose no-Aroni: “Thathani umlotha eziko ugcwale izandla bese uMose ewuphonsa phezulu emoyeni phambi kukaFaro.
Uzakuphenduka uthuli phezu kwezwe lonke iGibhithe, udale amathumba kubantu nasezilwaneni kulo lonke iGibhithe.”
Base bewuthatha umlotha eziko, bama phambi kukaFaro, uMose wawuphonsa phezulu emoyeni, wase udala amathumba kubantu nasezilwaneni.
Osomlingo abakwazanga ukuma phambi kukaFaro ngenxa yamathumba, ngoba nabo babehlaselwe ngamathumba nabo bonke abaseGibhithe.
Kepha uSimakade wayenza lukhuni inhliziyo kaFaro, akabalalelanga, njengoba uSimakade ayeshilo kuMose.
USimakade wayesethi kuMose: “Vuka ekuseni kakhulu uye kuFaro, uthi kuye: ‘Usho kanje uSimakade, uNkulunkulu wamaHebheru, uthi: “Vumela abantu bami bahambe bayongikhonza.
Ngokuba kulesi sikhathi ngizothumela zonke izinhlupheko zami enhliziyweni yakho, kweyezinceku zakho, nakweyabantu bakho, ukuze nazi ukuthi akekho onjengami emhlabeni wonke.
Manje ngiselulile isandla sami ukuba ngikushaye wena nabantu bakho ngesifo, nishabalale emhlabeni.
Kodwa ngenxa yalokhu, ngikugcinile waphila ukuze ngikukhombise amandla ami, nokwenza igama lami laziwe emhlabeni wonke.
Usaziphakamisa, awufuni ukuvumela abantu bami ukuba bahambe na?
Uyabona-ke, kusasa ngalesi sikhathi ngizothumela isichotho esinamandla amakhulu, esingakaze sibonwe eGibhithe selokhu laba khona kuze kube namuhla.
Ngakho-ke thumela ukuba kubuyiswe imfuyo yakho nakho konke onakho okusendle kufakwe endaweni ephephileyo. Bonke abantu nezilwane okuzobe kusendle, isichotho sizokwehlela kukho kufe.” ’ ”
Lezo zinceku zikaFaro ezazilesaba izwi likaSimakade zaphuthuma zafaka izigqila zazo, nemfuyo yazo endaweni ephephileyo.
Lezo ezingaligqizanga qakala izwi likaSimakade zazishiya izigqila nemfuyo yazo endle.
USimakade wathi kuMose: “Yelulela isandla sakho ngasezulwini, ukuze isichotho sehlele kulo lonke iGibhithe, kubantu, ezilwaneni, nakuzo zonke izitshalo ezisemasimini eGibhithe.”
UMose waphakamisa induku yakhe wayibhekisa ngasezulwini, uNkulunkulu wathumela ukuduma nesichotho, nomlilo, kwehlela emhlabeni. USimakade wehlisa isichotho kulo lonke iGibhithe.
Kwehla isichotho nomlilo, nokuphazima okwakuhambisana nesichotho esasinamandla, esingakaze sibonwe eGibhithe selokhu laba yisizwe.
Isichotho sashaya savithiza kulo lonke iGibhithe, konke okwakusendle kusukela kubantu, izilwane, nazo zonke izitshalo emasimini; sashaya sayiphula yonke imithi yasendle.
KuseGosheni kuphela, lapho kwakuhlala khona abakwa-Israyeli, esingehlanga khona isichotho.
UFaro wathumela wabiza uMose no-Aroni, wathi kubo: “Kulokhu ngonile; uSimakade ulungile, mina nabantu bami sinecala.
Khulekani kuSimakade; sekwanele lokhu kuduma kukaNkulunkulu okungaka nesichotho. Ngizonivumela nihambe, ningabe nisachitha sikhathi lapha.”
UMose wathi kuye: “Lapho nje ngiphuma emzini ngizokwelulela izandla zami kuSimakade; ukuduma kuzophela, singabe sisehla nesichotho, ukuze wazi ukuthi umhlaba ungokaSimakade.
Kepha ngiyazi ukuthi wena nezikhulu zakho, anikamesabi uSimakade uNkulunkulu.”
Ifilakisi nebhali lashaywa lonakala, ngokuba ibhali lalikhahlele, nefilakisi seliqhakaza.
Kodwa ukolo nesipelithi akonakalanga ngoba kwakungakaqhumi.
UMose waphuma emzini kaFaro, welulela izandla zakhe kuSimakade; kwase kunqamuka ukuduma, nesichotho, nemvula, lasa.
UFaro wabona ukuthi imvula, ukuduma nesichotho sekunqamukile, wabuye wona futhi, wayenza lukhuni inhliziyo yakhe, yena nezikhulu zakhe.
Inhliziyo kaFaro yaba lukhuni akabavumelanga abantu bakwa-Israyeli ukuba bahambe, njengoba uSimakade ayeshilo ngoMose.
USimakade wayesethi kuMose: “Hamba uye kuFaro, ngokuba ngiyenze yaba lukhuni inhliziyo yakhe neyezinceku zakhe, ukuze ngikhombise lezo zibonakaliso zami kubo.
Lokhu uyoze ukuxoxele indodana yakho nabazukulu bakho ukuthi ngaliphatha ngesihluku esinjani iGibhithe, nokuthi zibonakaliso zini engazenza kulo ukuze nazi ukuthi nginguSimakade.”
UMose no-Aroni baya kuFaro, bathi kuye: “Usho kanje uSimakade uNkulunkulu wamaHebheru uthi: ‘Kuyoze kube nini wenqaba ukuzithoba phambi kwami na? Vumela abantu bami ukuba bahambe, ukuze bayongikhonza.
Uma wenqaba ukuvumela abantu bami ukuba bahambe, kusasa ngizothumela isikhonyane ezweni lakho.
Sizokwemboza izwe kungabi bikho muntu okwazi ukubona umhlabathi. Sizokudla lokho okusale esichothweni, sibhuqe yonke imithi esahlumayo emasimini.
Sizogcwala ezindlini zakho, ezindlini zezinceku zakho, nasezindlini zabo bonke abaseGibhithe, into engakaze ibonwe ngokhokho benu, ngisho nokhokho bokhokho benu, kusukela ngosuku abafika ngalo emhlabeni kuze kube yilolu lusuku lwanamuhla.’ ” Wayesephenduka, waphuma phambi kukaFaro.
Izinceku zikaFaro zathi kuye: “Kuyoze kube nini lo mfokazi ewugibe kithi na? Bavumele abantu ukuba bahambe, ukuze bayokhonza uSimakade uNkulunkulu wabo; awuboni yini ukuthi iGibhithe liyabhubha na?”
Base bebuyisa kuFaro oMose no-Aroni, wayesethi kubo: “Hambani niyokhonza uSimakade uNkulunkulu wenu. Ngobani abazohamba na?”
UMose wathi: “Sizohamba nezinsizwa, abadala, amadodana, amadodakazi ethu, izimvu, izimbuzi, izinkomo, nemihlambi yethu, ngokuba sizogubha umkhosi kaSimakade ngakho konke esinakho.”
Wayesethi kubo: “USimakade makabe nani-ke, njengokuba ngizakunivumela ukuba nihambe nezingane zenu: sekuyacaca ukuthi kukhona okubi enikuhlosile.
Phinde neze! Hambani nina madoda niyokhonza uSimakade, ngokuba yilokho enikucelileyo.” Base bexoshwa phambi kukaFaro.
USimakade wathi kuMose: “Yelula isandla sakho phezu kweGibhithe, ukuze kuphume isikhonyane phezu kwalo lonke iGibhithe, sidle konke okumilileyo ezweni, konke lokho okusale esichothweni.”
UMose welula induku yakhe phezu kweGibhithe; uSimakade wayesethumela umoya wasempumalanga ezweni imini nobusuku, ekuseni umoya wasempumalanga waletha isikhonyane.
Isikhonyane salihlasela lonke iGibhithe, sagcwala kulo lonke iGibhithe, sasinzima kakhulu. Sasingakaze sibonwe isikhonyane esinjengalesi ngaphambilini, futhi asikho esiyofana naso nasemveni kwalokhu.
Salemboza lonke iGibhithe kwangabonakala ngisho namhlabathi, kwaba mnyama kulo lonke izwe. Sashaya sabhuqa konke okumilileyo ezweni, nazo zonke izithelo ezazishiywe yisichotho ezihlahleni, kwangasala lutho oluluhlaza ezihlahleni, nakokumilileyo emasimini kulona lonke iGibhithe.
UFaro waphuthuma wabiza uMose no-Aroni, wathi kubo: “Ngonile kuSimakade uNkulunkulu wenu nakini.
Ngithetheleleni isono sami ngalesi sikhathi nje esisodwa, ningikhulekele kuSimakade uNkulunkulu wenu ukuze asuse lokhu kufa phezu kwami.”
Waphuma phambi kukaFaro, wakhuleka kuSimakade.
USimakade wayesewuguqula umoya waba ngumoya onamandla wasentshonalanga, waphephula isikhonyane wasithela oLwandle Lomhlanga, kwangasala nayinye intethe eGibhithe.
Kepha uSimakade wayenza lukhuni inhliziyo kaFaro, akabavumelanga abantu bakwa-Israyeli ukuba bahambe.
USimakade wathi kuMose: “Yelulela isandla sakho ngasezulwini ukuze kube mnyama eGibhithe, ubumnyama obuphathekayo.”
UMose wayeselulela isandla sakhe ngasezulwini, kwase kuba khona isigayegaye sobumnyama izinsuku ezintathu kulo lonke iGibhithe.
Abantu babengakwazi ukubonana, akekho owakwazi ukusuka endaweni yakhe izinsuku ezintathu, kodwa kubo bonke abantu bakwa-Israyeli kwakunokukhanya lapho babehlala khona.
UFaro wabiza uMose, wathi kuye: “Hambani niyokhonza uSimakade, kusale kuphela izimvu, izimbuzi, nezinkomo zenu; hambani ngisho nabantwana benu imbala.”
UMose wathi: “Uyakusinika yini imihlatshelo neminikelo yokushiswa esiyoyinikela kuSimakade uNkulunkulu wethu na?
Imfuyo yethu siyakuhamba nayo, akuyukusala ngisho nenselo eyodwa, ngokuba siyakuthatha kuyo ukuze sikhonze ngayo uSimakade uNkulunkulu wethu, futhi-ke ngeke sazi ukuthi siyomkhonza ngani uSimakade, singakafiki lapho.”
Kepha uSimakade wayenza lukhuni inhliziyo kaFaro, akavumanga ukubadedela ukuba bahambe.
UFaro wathi kuye: “Suka phambi kwami! Qikelela ukuba ungaphinde ubone ubuso bami, ngokuba ngosuku oyobubona ngalo ubuso bami, uyokufa.”
UMose wathi: “Njengalokhu ushilo, angiyukuphinde ngibubone ubuso bakho.”
USimakade wathi kuMose: “Ngizoletha enye futhi inhlupheko phezu kukaFaro naphezu kweGibhithe; emveni kwalokho uzonivumela ukuba nihambe lapha. Lapho enivumela uzakunixosha nokunixosha.
Ngakho-ke tshela abantu ukuthi yilowo nalowo wesilisa makacele kumakhelwane wakhe, nabesifazane bacele komakhelwane babo izimpahla zesiliva nezegolide.”
USimakade wabenzela umusa abantu phambi kwabaseGibhithe. Ngaphezu kwalokho uMose uqobo wayeyindoda eqavileyo eGibhithe, naphambi kwezinceku zikaFaro, naphambi kwabantu.
UMose wathi: “Usho kanje uSimakade: ‘Phakathi kwamabili ngizodabula kulo lonke iGibhithe.
Wonke amazibulo eGibhithe azokufa, kusukela ezibulweni likaFaro ohleli esihlalweni sobukhosi kuya ezibulweni elizalwa ngowesifazane oyisigqila ogwedla isigayo, nawo wonke amazibulo emfuyo.
Kuzokuba nesililo esikhulu, esingakaze sibe khona, futhi esingayukuphinde sibe khona kulo lonke iGibhithe.
Kepha ngasohlangothini lwabakwa-Israyeli akukho muntu nasilwane okuzokufa, ngisho inja imbala ayiyukugwavumela muntu namfuyo, ukuze nazi ukuthi uSimakade wehlukanisile phakathi kwabaseGibhithe nabakwa-Israyeli.’
Ngakho-ke zonke lezi zikhulu zizokuza kimi, zingikhothamele, zithi: ‘Hamba wena nabantu bonke abakulandelayo.’ Emveni kwalokho ngizohamba.” Waphuma wamshiya uFaro evutha bhe wulaka.
USimakade wathi kuMose: “UFaro ngeke akulalele ukuze izimangaliso zami ziphindaphindwe eGibhithe.”
UMose no-Aroni bazenza zonke lezo zimangaliso phambi kukaFaro, kodwa uSimakade wayenza lukhuni inhliziyo kaFaro, akabavumelanga abantu bakwa-Israyeli ukuba baphume ezweni lakhe.
USimakade wathi kuMose no-Aroni eGibhithe:
“Le nyanga iyakuba wuphawu kini lokuqala kwezinyanga; iyakuba yinyanga yokuqala yonyaka wenu.
Yishoni kuyo yonke inhlangano yakwa-Israyeli nithi: ‘Ngomhla zilishumi kule nyanga bayothatha yilowo nalowo mndeni, kube yiwundlu umndeni ngamunye.
Uma umndeni umncane kakhulu ukuba ungaqeda iwundlu, uyohlangana nomakhelwane ukuze uthole iwundlu; iwundlu liyakwehlukaniswa izingxenye ngokulingene abantu abayakulidla.
Iwundlu malingabi nasici, libe nonyaka, libe yiduna, ungalithatha ezimvini noma ezimbuzini.
Niyoligcina kuze kube lusuku lweshumi nane lwayo le nyanga, bese kuthi wonke umphakathi wakwa-Israyeli uhlabe amawundlu phakathi kwamabili.
Bayakuthatha ingxenye yegazi balibhece ezinsikeni zombili zomnyango, nasemakhothameni eminyango yezindlu abayakudlela kuzo.
Bayakulidla iwundlu ngalobo busuku; bayakulidla losiwe emlilweni nesinkwa esingenamvubelo nemifino ebabayo.
Ningakudli kuluhlaza noma kubiliswe ngamanzi, kodwa imilenze yalo, ikhanda, nezangaphakathi makosiwe emlilweni.
Makungasali lutho lwalo kuze kuse, okuyosala kuze kube sekuseni niyokushisa ngomlilo.
Niyakulidla kanje: izinkalo zenu ziboshiwe, nifake izimbadada ezinyaweni zenu, niphethe izindondolo zenu ngezandla, nilidle ngokuphangisa, liyiphasika likaSimakade.
“ ‘Ngokuba ngiyokwedlula eGibhithe ngalobo busuku, ngibulale wonke amazibulo eGibhithe, awabantu nawezilwane, ngibehlulele bonke onkulunkulu baseGibhithe: nginguSimakade.
Igazi liyokuba wuphawu lwenu ezindlini lapho nihleli khona: uma ngibona igazi, ngiyokwedlula kini, ngeke ubhubhane lunibhubhise lapho ngishaya iGibhithe.
“ ‘Lolo lusuku luyakuba lusuku lwesikhumbuzo kini, futhi niyakulugubha lube wumkhosi kaSimakade. Zonke izizukulwane ziyakulugcina lube yisimiso saphakade.
Niyakudla isinkwa esingenamvubelo izinsuku eziyisikhombisa. Ngosuku lokuqala niyakukhipha imvubelo ezindlini zenu, ngokuba lowo oyokudla isinkwa esinemvubelo kusukela osukwini lokuqala kuze kube lusuku lwesikhombisa uyodingiswa kwa-Israyeli.
Ngosuku lokuqala niyoba nombuthano ongcwele, nangosuku lwesikhombisa. Aniyukusebenza ngalezo zinsuku; niyolungisa kuphela lokho okuyobe kuzodliwa ngabantu bonke.
Niyogubha umkhosi wesinkwa esingenamvubelo, ngokuba ngalolo lusuku ngakhipha amaviyo enu eGibhithe. Lolu lusuku niyolugubha lube ngumkhosi omisiweyo phakade izizukulwane ngezizukulwane.
Ngenyanga yokuqala, ngosuku lwe-14 kusihlwa niyokudla isinkwa esingenamvubelo kuze kube kusihlwa ngosuku lwama-21.
Ngezinsuku eziyisikhombisa akuyukutholakala mvubelo ezindlini zenu, ngokuba lowo oyokudla okunemvubelo uyonqunywa ebandleni lakwa-Israyeli, noma ngabe ngumfokazi noma ngumnsinsi wokuzimilela.
Aniyukudla lutho olunemvubelo; kuzo zonke izindawo enihlala kuzo niyokudla isinkwa esingenamvubelo.’ ”
UMose wayesewabiza wonke amalunga akwa-Israyeli, wathi kuwo: “Hambani, nithathele imindeni yenu amawundlu, niwahlabele iphasika.
Niyothatha isixha sehisophi nisicwilise egazini elisemcengezini, bese nibheca izimpundu nezinsika zeminyango, makungaphumi muntu emnyango kuze kube ngakusasa.
Ngokuba uSimakade uzokwedlula ashaye iGibhithe, kuyothi lapho ebona igazi emakhothameni nasezinsikeni zeminyango, uSimakade awedlule lowo mnyango, angamvumeli umbhubhisi ukuba eze ezindlini zenu ukuba abhubhise.
Lesi simiso niyakusigcina sibe yisiko lenu nezizukulwane zenu nanini nanini.
Lapho nifika ezweni uSimakade ayoninika lona njengoba eshilo, niyowugubha lo mkhosi.
Kuyothi lapho abantwana benu benibuza, bethi: ‘Kuchazani ukugujwa kwalo mkhosi na?’
Niyothi: ‘Ngumhlatshelo wephasika likaSimakade, ngokuba wazedlula izindlu zabakwa-Israyeli eGibhithe, mzukwane ebulala abaseGibhithe, kodwa wazeqa izindlu zethu.’ ” Abantu bakhothama badumisa.
Abantu bakwa-Israyeli bahamba njengoba uSimakade ebayalile oMose no-Aroni.
Phakathi kwamabili uSimakade wabhubhisa wonke amazibulo abaseGibhithe, kusukela ezibulweni likaFaro owayehleli esihlalweni sakhe sobukhosi ngaleso sikhathi, kuya ezibulweni lesiboshwa esisejele, nawo wonke amazibulo emfuyo.
UFaro wavuka ebusuku nezinceku zakhe nabo bonke abaseGibhithe, ngokuba kwakunesililo esikhulu eGibhithe kungekho muzi okwakungafanga muntu kuwo.
Wabiza uMose no-Aroni khona ebusuku, wathi kubo: “Vukani, niphume niphele kubantu bami, nina nabantu bakwa-Israyeli! Hambani niyokhonza uSimakade, njengalokho nishilo.
Thathani imihlambi, izimvu, izimbuzi, nezinkomo, njengoba nishilo nihambe. Nami ningicelele isibusiso.”
AbaseGibhithe bancenga abantu ukuba basheshe baphume ezweni, ngokuba bathi: “Thina sonke sizokufa.”
Abantu bathatha inhlama yabo ngaphambi kokuba ifakwe imbiliso, nemicengezi yokuxovela, bakugoqa ngezingubo zabo bakuthwala emahlombe.
Abantu bakwa-Israyeli benza njengoba uMose ayebatshelile; bacela kwabaseGibhithe ubucwebecwebe besiliva, igolide, nezimpahla zokugqoka.
USimakade wabenzela umusa emehlweni abaseGibhithe, babanika konke abakucelayo. Babaphundla kanjalo-ke abaseGibhithe.
Abantu bakwa-Israyeli basuka eRamesesi baya eSukhothi. Kwakungamadoda abalelwa ezi-600 000 ayehamba ngezinyawo, ngaphandle kwezingane.
Ingxubevange yabantu yahamba nabo, imfuyo eningi kakhulu, imihlambi yezimbuzi, izimvu, nezinkomo.
Benza amaqebelengwane ngenhlama ababephume nayo eGibhithe; yayingenamvubelo ngokuba babexoshiwe eGibhithe bengasenakulinda, noma bagaye umphako.
Abakwa-Israyeli bahlala iminyaka engama-430 eGibhithe.
Ekupheleni konyaka wama-430, ngalo lolo lusuku, wonke amaviyo kaSimakade aphuma eGibhithe.
Kwakungubusuku bomlindo uSimakade abakhipha ngabo eGibhithe. Ngalobo busuku abakwa-Israyeli bayogcina umlindelo kaSimakade izizukulwane ngezizukulwane.
USimakade wathi kuMose no-Aroni: “Nasi isimiso sephasika: akukho mfokazi okumele ukuba alidle,
kodwa noma yisiphi isigqila esithengwe ngesiliva singalidla emva kokuba sisokiwe;
akukho sisebenzi esiqashiweyo esiyolidla.
“Liyodlelwa endlini eyodwa, aniyukukhiphela lutho oluyinyama yaleso silwane phandle, futhi aniyukwephula ngisho nelilodwa ithambo laso.
Lonke ibandla lakwa-Israyeli liyokwenza lokhu.
“Uma umfokazi ohlala nani efuna ukuligubha iphasika likaSimakade, kufanele asokwe yena nabo bonke abesilisa, bese beyasondela baligubhe iphasika, njengoba bonke abantu bengabakhe. Kepha bonke abangasokile akumele balidle iphasika.
Umthetho oyakubekelwa abozalo nabafokazi abagogobele phakathi kwenu uyakufana.”
Bonke abantu bakwa-Israyeli benza njengoba uSimakade ayebayalile ngoMose no-Aroni.
Ngalolo lusuku uSimakade wabakhipha abantu bakwa-Israyeli eGibhithe ngamaviyo abo.
USimakade wakhuluma kuMose wathi:
“Ngihlukanisele wonke amazibulo; noma yiliphi izibulo elivule isibeletho kwabakwa-Israyeli, kubantu nezilwane, ngokuba lingelami.”
UMose wathi kubantu: “Lukhumbuleni lolu lusuku enaphuma ngalo eGibhithe endlini yobugqila, ngokuba uSimakade wanikhipha lapho ngesandla sakhe esinamandla; makungadliwa sinkwa esinemvubelo ngalo.
Namuhla, niyaphuma ngenyanga u-Abibi.
Lapho uSimakade eseningenisa ezweni lamaKhanani, lamaHithi, lama-Amori, lamaHivi, nelamaJebusi, afunga ngalo koyihlomkhulu ukulinika nina, izwe elichichima ubisi noju, niyokuyigcina le nkonzo ngale nyanga.
Izinsuku eziyisikhombisa niyakudla isinkwa esingenamvubelo, kuthi ngosuku lwesikhombisa kube nomkhosi kaSimakade.
Isinkwa esingenamvubelo siyodliwa izinsuku eziyisikhombisa; akukho mvubelo eyotholakala phakathi kwenu, futhi akuyukutholakala mvubelo kuyo yonke indawo yenu.
Ngalolo lusuku uyoyitshela indodana yakho uthi: ‘Lokhu kungenxa yalokho uSimakade angenzela khona mhla ngiphuma eGibhithe.’ ”
“Kuyakuba kuwe wuphawu esandleni sakho, nesikhumbuzo esiphongweni sakho, ukuze umthetho kaSimakade uhlale ezindebeni zomlomo wakho, ngokuba ngesandla esinamandla uSimakade wakukhipha eGibhithe.
Lo mthetho uyakuwugcina ngesikhathi esifaneleyo minyaka yonke.”
“Lapho uSimakade esekungenisile ezweni lamaKhanani, wakunika lona, njengoba ayefungile kuwe nakoyihlomkhulu,
uyonikela ngawo wonke amazibulo kuSimakade, wonke amazibulo, amazibulo ezinkomo, nawo wonke amaduna ngakaSimakade.
Kepha wonke amazibulo ezimbongolo uyowahlenga ngemvu, uma ungalihlengi uyolephula intamo, kuthi wonke amazibulo abantu endlini yakho uwahlenge.
Kuyakuthi ngomuso lapho indodana yakho ikubuza, ithi: ‘Kuyini lokhu na?’ uyothi: ‘USimakade wasikhipha ngesandla esinamandla eGibhithe, indlu yobugqila.
Ngesikhathi uFaro elukhuni engavumi ukusidedela, uSimakade wabulala wonke amazibulo eGibhithe, kusukela kwawabantu kuya kwawezilwane. Ngakho-ke ngihlabela uSimakade konke okungamaduna okuvule isibeletho, kodwa ngiyawahlenga wonke amazibulo angamadodana ami.’
Lokhu kuyakuba wuphawu esandleni sakho, nesikhumbuzo esiphongweni sakho, ukuthi uSimakade wasikhipha ngesandla esinamandla eGibhithe.”
Ngesikhathi uFaro ebakhulula abantu ukuba bahambe, uNkulunkulu akabavumelanga ukuba bahambe ngendlela yasezweni lamaFilisti, nakuba yayinqamulela, ngokuba uNkulunkulu wathi: “Funa abantu, uma benqwamana nempi, baguqule umqondo bese bebuyela eGibhithe.”
UNkulunkulu wenza ukuba abantu bahambe ngendlela ethathelayo yasehlane ebheke oLwandle Lomhlanga. Abantu bakwa-Israyeli baphuma eGibhithe bezilungiselele impi.
UMose wathatha amathambo kaJosefa, wahamba nawo, ngokuba wayebafungisile abantu bakwa-Israyeli, wathi: “Impela uNkulunkulu uyakunihambela ngokwempela, anikhulule, niyakuwathwala amathambo ami lapha.”
Basuka eSukhothi bakanisa e-Ethamu emngceleni wehlane.
Emini uSimakade wayehamba phambi kwabo ngensika yefu ukubakhombisa indlela, kuthi ebusuku ahambe phambi kwabo ngensika yomlilo ukuze abakhanyisele, bahambe ubusuku nemini.
Akayisusanga phambi kwabantu insika yefu emini nensika yomlilo ebusuku.
USimakade wathi kuMose:
“Khuluma nabantu bakwa-Israyeli ukuze babuyele emuva, bayokanisa phambi kwePhi Hahirothi, phakathi kweMigidoli nolwandle, phambi kweBhali Zefoni; bakanise ngasolwandle babhekane nalo.
UFaro uyakuthi ngabantu bakwa-Israyeli: ‘Bayazulazula bedidekile ezweni, ihlane libavalele.’
“Ngiyakuyenza lukhuni inhliziyo kaFaro, uyakubalandela, ukuze ngithole udumo ngoFaro nangempi yakhe yonke; abaseGibhithe bayakukwazi ukuthi nginguSimakade.” Benza kanjalo.
Yabikelwa inkosi yaseGibhithe ukuthi abantu babalekile. UFaro nezinceku zakhe baguqula umqondo mayelana nabantu, bathi: “Yini le esiyenzileyo ukuba sikhulule abakwa-Israyeli bangabe besasisebenzela na?”
Wabophela inqola yakhe yempi, wahamba nabantu bakhe;
wathatha izinqola ezikhethiweyo ezingama-600, nazo zonke ezinye izinqola zempi zaseGibhithe, nezinduna zempi.
USimakade wayenza lukhuni inhliziyo kaFaro inkosi yaseGibhithe, wabalandela abantu bakwa-Israyeli ngokuba babephume ngesandla esiphakeme.
AbaseGibhithe babalandela ngamahhashi, nezinqola zempi zikaFaro, nempi yakhe, babafica bekanise ngasolwandle ePhi Hahirothi, phambi kweBhali Zefoni.
Kwathi lapho uFaro esesondela, abantu bakwa-Israyeli baphakamisa amehlo abo bababona abaseGibhithe bebalandela, besaba kakhulu abantu bakwa-Israyeli, base bekhala kuSimakade.
Bathi kuMose: “Yingoba abengekho yini amangcwaba eGibhithe ukuba usikhiphele kuleli hlane sizofela khona na? Yini le osenze yona ngokusikhipha eGibhithe na?
Asishongo yini kuwe siseseGibhithe sathi: ‘Siyeke ukuze sisebenzele abaseGibhithe’ na? Ngokuba bekungcono ukusebenzela abaseGibhithe kunokuba sizofela ehlane.”
Kepha uMose wathi kubantu: “Ningesabi, qinani, nibone ukukhululwa uSimakade azonenzela khona namuhla; ngokuba laba baseGibhithe enibabona namuhla anisayukuphinde nibabone naphakade.
USimakade uzonilwela, nina thulani du.”
USimakade wathi kuMose: “Ukhalelani kimi na? Khuluma kubantu bakwa-Israyeli ukuba bahambe.
Wena phakamisa induku yakho, welulele isandla sakho phezu kolwandle ulwehlukanise, yikhona abantu bakwa-Israyeli bezodabula ulwandle behamba emhlabathini owomileyo.
Mina ngiyakuyenza lukhuni inhliziyo yabaseGibhithe ukuze banilandele, ngiyofumana udumo ngoFaro nangayo yonke impi yakhe, izinqola zakhe zempi, nabagibele amahhashi.
AbaseGibhithe bayakukwazi ukuthi nginguSimakade lapho sengizitholele udumo ngoFaro, nezinqola zakhe zempi, nangabagibele amahhashi.”
Ingelosi kaNkulunkulu eyayihamba phambi kwempi yabakwa-Israyeli yasuka yaya ngemuva kwabo; nensika yefu eyayihamba phambi kwabo yasuka yaba ngemuva kwabo.
Yaba phakathi kwempi yabaseGibhithe nempi yabakwa-Israyeli. Kwakukhona ifu nobumnyama, ifu lakhanyisa ebusuku kodwa akekho owasondela komunye ubusuku bonke.
UMose welulela isandla sakhe phezu kolwandle, uSimakade walududula ulwandle ubusuku bonke ngomoya wasempumalanga onamandla, ulwandle waluphendula lwaba wumhlabathi owomileyo, amanzi ehlukana.
Abantu bakwa-Israyeli badabula olwandle behamba emhlabathini owomileyo, amanzi enza udonga kwesokunene nakwesokhohlo sabo.
AbaseGibhithe ababebaxosha bangena olwandle, amahhashi wonke kaFaro, nezinqola zakhe zempi, nabagibele amahhashi.
Entathakusa uSimakade esensikeni yomlilo nasefini, wabheka phansi emshungwini wempi yabaseGibhithe, wayenza yadideka impi.
Izinqola zabo zempi zabhajwa, amasondo ahamba kanzima, ngakho-ke abaseGibhithe bathi: “Masibalekeni phambi kwabakwa-Israyeli, ngokuba uSimakade uyabalwela, umelene nabaseGibhithe.”
USimakade wathi kuMose: “Yelulela isandla sakho phezu kolwandle, ukuze amanzi abuyele phezu kwabaseGibhithe, naphezu kwezinqola zabo zempi, naphezu kwabagibele amahhashi.”
UMose welulela isandla sakhe phezu kolwandle, ulwandle lwabuyela esimweni salo entathakusa. AbaseGibhithe babaleka, kodwa uSimakade wabaphonsa phakathi kolwandle abaseGibhithe.
Amanzi abuyela amboza izinqola zempi, nabagibele amahhashi, nayo yonke impi kaFaro eyayibalandela; baminza olwandle, akwaze kwasala namunye.
Kepha abakwa-Israyeli bahamba emhlabathini owomileyo bedabula ulwandle, amanzi aba wudonga kwesokunene nakwesokhohlo sabo.
Ngalolo lusuku uSimakade wabasindisa abakwa-Israyeli esandleni sabaseGibhithe; abakwa-Israyeli babona izidumbu zabaseGibhithe ogwini lolwandle.
U-Israyeli wawabona amandla amakhulu abonakaliswa nguSimakade phezu kwabaseGibhithe, abantu bakholwa nguSimakade nayinceku yakhe uMose.
UMose nabantu bakwa-Israyeli bahuba leli hubo kuSimakade, bathi: “Ngizohlabelela kuSimakade, ngokuba uphakeme kakhulu, ihhashi nomgibeli walo ukuphonse olwandle.
USimakade ungamandla ami nesivikelo sami, uyinsindiso yami, lona nguNkulunkulu wami, ngizokumtusa, nguNkulunkulu kababa, ngizokumphakamisa.
USimakade uyindoda yempi, nguSimakade igama lakhe.
Izinqola zikaFaro nempi yakhe ukuphonse olwandle; izikhulu zakhe ezikhethekileyo uziminzise oLwandle Lomhlanga.
Utwa lwabasibekela; bashona ezinzulwini njengetshe.
“Isandla sakho sokunene Simakade siyakhazimula ngamandla, isandla sakho sokunene Simakade sifihlize isitha.
Ebukhulwini bobukhosi bakho uthele phansi labo abamelana nawe, uthumele intukuthelo yakho yabaqothula njengamahlanga.
Ngokufutha kwamakhala akho amanzi ema aba yinqwaba, izikhukhula zaphakama njengendunduma, utwa lwashuba enhliziyweni yolwandle.
“Isitha sathi: ‘Ngizokubahubha, ngize ngibafice, ngehlukanise impango, ngizitike ngize ngidele ngabo. Ngiyakuhosha inkemba yami, isandla sami sibabhubhise.’
Uphephethe ngomoya wakho, ulwandle lwabemboza, bacwila njengomthofu emanzini anamandla.
“Ngubani onjengawe Simakade phakathi konkulunkulu na? Ngubani onjengawe ngobukhosi nangobungcwele, omangalisayo ngendumiso, owenza izimangaliso na?
Welule isandla sakho sokunene, umhlaba wabagwinya.
“Ngomusa wakho omiyo njalo uhole abantu bakho obakhululileyo; wabahola ngamandla akho wabayisa endaweni okuhlala kuyo ubungcwele bakho.
Izizwe zizwile, zathuthumela; iminjunju yehlela izakhamuzi zaseFilistiya.
Izikhulu zakwa-Edomi zaba netwetwe; izikhulu zakwaMowabi zathuthumela; zonke izakhamuzi zaseKhanani zaphelelwa ngamandla.
Behlelwe yingebhe novalo, ngobukhulu bamandla engalo yakho, bathulisa okwetshe, kwaze kwedlula abantu bakho Simakade, kwaze kwedlula abantu bakho ozithengele bona.
Uyakubabuyisa ubatshale entabeni eyifa lakho, indawo Wena Simakade ozenzele yona ukuba uhlale kuyo, indawo engcwele Simakade, emiswe yizandla zakho.
USimakade uyakubusa phakade naphakade.”
Kwathi ukuba amahhashi kaFaro, nezinqola zempi yakhe, nabagibele amahhashi bangene olwandle, uSimakade wawabuyisela phezu kwabo amanzi olwandle, kodwa abantu bakwa-Israyeli badabula behamba emhlabathini owomileyo.
Kwase kusuka uMiriyamu umphrofethikazi, udadewabo ka-Aroni, wathatha ithamborini ngesandla sakhe; waphuma nabo bonke abesifazane emva kwakhe, bephethe amathamborini, besina.
UMiriyamu wahlabelela wathi: “Hlabelelelani uSimakade, ngokuba uphakeme kakhulu, ihhashi nomgibeli walo ukuphonse olwandle.”
UMose wabahola abantu bakwa-Israyeli besuka oLwandle Lomhlanga, baze bafika ehlane iShuri, bahamba izinsuku ezintathu ehlane, kodwa abatholanga manzi.
Bafika eMara, kodwa abakwazanga ukuphuza amanzi eMara, ngokuba ayebaba, yingakho igama lendawo kwathiwa yiMara.
Abantu bakhononda ngoMose, bathi: “Siyakuphuzani na?”
Wakhala kuSimakade, uSimakade wamkhombisa umuthi; wawuphonsa emanzini, amanzi ayeseba mnandi. USimakade wabamisela khona lapho umthetho nesimiso, wayesebavivinya belapho.
Wathi: “Uma nililalela ngokucophelela izwi likaSimakade uNkulunkulu wenu, nenze okulungileyo emehlweni akhe, nigcine imiyalo yakhe, nigcine zonke izimiso zakhe, angiyukunehlisela zonke izifo engazehlisela abaseGibhithe, ngokuba nginguSimakade oniphilisayo.”
Bafika e-Elimu, lapho kwakukhona khona imithombo eyi-12 yamanzi, namasundu angama-70, bakanisa lapho ngasemanzini.
Lonke ibandla labantu bakwa-Israyeli lasuka e-Elimu laze layofika ehlane iSini phakathi kwe-Elimu neSinayi, ngosuku lwe-15, ngenyanga yesibili bephumile eGibhithe.
Lonke ibandla lakwa-Israyeli lakhononda ngoMose no-Aroni ehlane.
Abantu bakwa-Israyeli bathi kubo: “Sengathi ngabe safa ngesandla sikaSimakade eGibhithe, lapho sasihlala ngasemabhodweni, sidle inyama nokunye ukudla sisuthe; kunokuba nisilethe lapha kuleli hlane, nizobulala lonke leli bandla ngendlala.”
USimakade wayesethi kuMose: “Bheka, ngizonisela kini isinkwa esivela ezulwini, abantu bazophuma nsuku zonke babuthe esanele lolo lusuku. Ngaleyo ndlela ngizobavivinya ukuthi bazowugcina yini umthetho wami noma qha.
Ngosuku lwesithupha bazobutha okuphindiwe kunalokho abakubutha nsuku zonke.”
UMose no-Aroni bathi kubantu bakwa-Israyeli: “Kusihlwa nizokwazi ukuthi nguSimakade owanikhipha eGibhithe.
Ekuseni nizobona inkazimulo kaSimakade, ngokuba ukuzwile ukukhononda kwenu ngaye. Ngokuba besingobani thina ukuba ningakhononda ngathi na?”
UMose wayesethi: “Lapho uSimakade enipha inyama ukuba nidle kusihlwa, nesinkwa esanele ekuseni, kungokuba uSimakade ekuzwile enikhononda ngakho ngaye, thina-ke besingobani? Ukukhononda kwenu anikubhekisile kithi, kodwa kuSimakade.”
UMose wathi ku-Aroni: “Tshela bonke abantu bakwa-Israyeli, uthi: ‘Sondelani kuSimakade, ngokuba ukuzwile ukukhononda kwenu.’ ”
Kwathi nje u-Aroni esakhuluma nabantu bonke bakwa-Israyeli, baphenduka babheka ngasehlane; bheka, babona inkazimulo kaSimakade efini.
USimakade wakhuluma kuMose, wathi:
“Ngikuzwile ukukhononda kwabantu bakwa-Israyeli; khuluma kubo, uthi: ‘Ngakusihlwa niyakudla inyama, ekuseni nizitike ngesinkwa; niyokwazi ukuthi nginguSimakade uNkulunkulu wenu.’ ”
Kusihlwa kwakhuphuka izigwaca zemboza enkanjini; ekuseni kwakulele amazolo ezungeze enkanjini.
Kwathi lapho amazolo esehwamukile, bheka kwakusele untwentwesana olucolisakeleyo ehlane, lwaluluncane njengeqhwa emhlabathini.
Lapho abantu bakwa-Israyeli belubona, bakhuluma omunye komunye, bathi: “Kuyini lokhu na?” Ngokuba babengazi ukuthi kwakuyini lokho. UMose wathi kubo: “Yisinkwa uNkulunkulu aninike sona ukuba nisidle.
Yileli lizwi uSimakade aniyale ngalo wathi: ‘Kubutheni kube yilowo ngokwesilinganiso sakhe, i-omeri kumuntu ngokwesibalo sabantu, nithathele bonke abasemathendeni enu.’ ”
Abantu bakwa-Israyeli benza kanjalo, abanye babutha okuningi, abanye okuncane.
Kepha kwathi lapho bekulinganisa nge-omeri, kulabo ababebuthe okuningi akusalanga lutho, nalabo ababebuthe okuncane abantulanga: yilowo nalowo wayebuthe ngangokwesidingo sakhe.
UMose wathi kubo: “Makungabi bikho okushiyayo kuze kube sekuseni.”
Abantu nokho abamlalelanga uMose, abanye bashiya ingxenye kwaze kwaba sekuseni, yabola yaphethuka izimpethu, yanuka. UMose wabathukuthelela.
Njalo ekuseni kwaba yilowo nalowo wabutha ngangokwesidingo sakhe, kodwa lapho seliphakeme ilanga, kwakuncibilika.
Ngosuku lwesithupha babebutha ukudla okuphindwe kabili, ama-omeri amabili ngamunye. Bonke abaholi beza bambikela uMose,
wathi kubo: “USimakade ukhulumile wathi: ‘Kusasa lusuku lokuphumula, usuku olungcwele kuSimakade, bhakani enifuna ukukubhaka, nibilise enifuna ukukubilisa, okuseleyo kubekeni kuze kube sekuseni.’ ”
Bakubeka kwaze kwaba sekuseni, njengalokhu uMose ayebayalile; akunukanga, futhi akuzange kube nezimpethu.
UMose wathi: “Kudleni namuhla, ngokuba namuhla yisabatha kuSimakade, namuhla anizukukuthola endle.
Nizokubutha izinsuku eziyisithupha, kodwa kuthi ngolwesikhombisa oluyisabatha kungabi bikho.”
Ngosuku lwesikhombisa abanye abantu baphuma ukuyokubutha, kodwa abafumananga lutho.
USimakade wathi kuMose: “Kuyoze kube nini nenqaba ukugcina imiyalo yami nemithetho yami na?
Bhekani, uSimakade uninike isabatha, ngakho-ke ngosuku lwesithupha uyaninika ukudla okwanele izinsuku ezimbili, hlalani yilowo nalowo endaweni yakhe, kungaphumi noyedwa endaweni yakhe ngosuku lwesikhombisa.”
Abantu baphumula ngosuku lwesikhombisa.
Indlu yakwa-Israyeli yakubiza lokho ngokuthi yimana, kwakufana nezinhlamvu zekhoriyenda, kumhlophe, kunambitheka njengekhekhebana elinoju.
UMose wathi: “Yileli izwi uSimakade aniyala ngalo, ethi: ‘Makugcinwe i-omeri eligcwele lalokhu ukuze izizukulwane zenu zibone ukudla enganondla ngakho ehlane, lapho nginikhipha eGibhithe.’ ”
UMose wathi ku-Aroni: “Thatha isitsha, ufake kuso i-omeri lemana ligcwale, ulibeke phambi kukaSimakade ukuze ligcinelwe izizukulwane zenu.”
Njengalokhu uSimakade emyalile uMose, u-Aroni walibeka i-omeri lemana phambi kobufakazi, ukuze lilondolozeke kahle.
Abantu bakwa-Israyeli badla imana iminyaka engama-40, baze bafinyelela ezweni okwakhiwe kulo; bayidla imana baze bafika emngceleni weKhanani.
I-omeri ingokweshumi kwe-efa.
Lonke ibandla labantu bakwa-Israyeli lasuka ehlane iSini lahamba ngezigaba, njengokuyala kukaSimakade. Lakanisa eRefidimi, kodwa kwakungekho manzi okuba abantu baphuze.
Abantu baxabana noMose, bathi: “Sinike amanzi ukuze siphuze.” UMose wathi kubo: “Nilwelani nami na? Nimvivinyelani uSimakade na?”
Abantu bomela amanzi lapho; bakhononda kuMose, bathi: “Wasikhuphulelani eGibhithe ukuba usibulalise ngokoma thina nabantwana bethu nemfuyo yethu na?”
UMose wakhala kuSimakade, wathi: “Ngiyakwenzani ngalaba bantu na? Sekusele kancane ukuba bangikhande ngamatshe.”
USimakade wathi kuMose: “Hamba phambi kwabantu, uthathe amanye amalunga akwa-Israyeli, nenduku yakho owashaya ngayo umfula, yiphathe ngesandla sakho, uhambe.
Ngizobe ngimi phambi kwakho laphaya edwaleni eHorebhe. Uyakulishaya idwala kuphume amanzi kulo, ukuze abantu baphuze.” UMose wenza kanjalo ebuka amalunga akwa-Israyeli.
Leyo ndawo wayibiza ngokuthi kuseMasa neMeribha, ngenxa yokuphikisana kwabantu bakwa-Israyeli, nangenxa yokuba bamvivinya uSimakade lapho, bethi: “Ngabe uSimakade ukhona yini phakathi kwethu noma qha?”
Ama-Amaleki aphuma alwa nabakwa-Israyeli eRefidimi.
UMose wathi kuJoshuwa: “Sikhethele amadoda, uphume uyokulwa nama-Amaleki. Mina ngizobe ngimi esiqongweni sentaba, ngiphethe induku kaNkulunkulu esandleni.”
UJoshuwa wenza njengalokhu uMose eshilo kuye, walwa nama-Amaleki, ngesikhathi uMose, u-Aroni, noHure bekhuphukela esiqongweni sentaba.
Noma nini lapho isandla sikaMose siphakeme, u-Israyeli wayenqoba, kodwa uma esehlisa esiphumuza, kunqobe ama-Amaleki.
Kodwa izandla zikaMose zase zikhathele, ngakho-ke bathatha itshe balibeka phansi kwakhe, wahlala kulo. U-Aroni noHure baphakamisa izandla zakhe, omunye kuleli cala nomunye kwelinye icala, izandla zama kanjalo ziqinile laze lashona ilanga.
UJoshuwa wanqoba u-Ameleki nabantu bakhe ngenkemba.
USimakade wathi kuMose: “Kulobe lokhu encwadini kube yisikhumbuzo, ukutshele uJoshuwa ngokuba ngizowabhubhisa aphele nya ama-Amaleki phansi kwezulu, angabe esakhunjulwa nhlobo.”
UMose wakha i-althare, waliqamba ngokuthi: “uSimakade Nisi”.
Wayesethi: “Isandla sisesihlalweni sikaSimakade! USimakade uyakulwa nama-Amaleki izizukulwane ngezizukulwane.”
UJethro, umphristi wakwaMidiyani, umukhwe kaMose, wezwa konke uNkulunkulu ayekwenzele uMose nabantu bakhe bakwa-Israyeli, ukuthi uSimakade wayemkhiphe kanjani u-Israyeli eGibhithe.
UJethro, umukhwe kaMose, wathatha uZiphora umkaMose owayekade uMose emphindisele emuva,
namadodana akhe amabili, igama lenye kwakunguGereshomu, ngokuba wayethi: “Ngingumfokazi ezweni labezizwe,”
igama lenye kungu-Eliyezeri, ngokuba ethi: “UNkulunkulu kababa ulusizo lwami, ungikhululile enkembeni kaFaro.”
UJethro, umukhwe kaMose, wafika ehlane lapho uMose ayekanise khona entabeni kaNkulunkulu, nomkaMose namadodana akhe.
Wathi kuMose: “Mina Jethro, umukhwe wakho, ngiyeza kuwe, nomkakho, namadodana akho omabili.”
UMose waphuma ukuyomhlangabeza umukhwe wakhe, wakhothama, wamanga, babuzana impilo, base bengena ethendeni.
UMose wamlandisa umukhwe wakhe konke uSimakade ayekwenze kuFaro nakwabaseGibhithe ngenxa ka-Israyeli, nobunzima bonke ababehlangabezane nabo endleleni, nokuthi uSimakade wabakhulula kanjani.
UJethro wathokoza ngakho konke okuhle uSimakade ayekwenzele u-Israyeli, ebakhulula esandleni sabaseGibhithe.
UJethro wathi: “Makabongwe uSimakade, onikhululile kwabaseGibhithe nasesandleni sikaFaro.
Manje ngiyazi ukuthi uSimakade mkhulu kunabo bonke onkulunkulu, ngoba ukhulule abantu bakhe kwabaseGibhithe, lapho bebebaphethe khona ngokubaqonela.”
UJethro umukhwe kaMose, waletha umnikelo wokushiswa nemihlatshelo kuNkulunkulu; u-Aroni nawo wonke amalunga akwa-Israyeli beza bazokudla nomukhwe kaMose, phambi kukaNkulunkulu.
Ngakusasa uMose wahlalela ukwehlulela abantu, abantu bema ngakuMose kusukela ekuseni kwaze kwaba kusihlwa.
Umukhwe kaMose wakubona konke lokhu ayekwenzela abantu, wathi kuye: “Kuyini lokhu obenzela khona abantu na? Kungani uhlale wedwa, uzungezwe ngabantu kusukela ekuseni kuze kuhlwe na?”
UMose wathi kumukhwe wakhe: “Kungokuba abantu beza kimi ukuzobuza okushiwo nguNkulunkulu.
Uma kunodaba phakathi kwabo, beza kimi ukuba ngahlulele phakathi komuntu nomakhelwane wakhe, bese ngibatshela imithetho nezimiso zikaNkulunkulu.”
Umukhwe kaMose wathi kuye: “Lokhu okwenzayo akukuhle.
Uzozikhandla uzikhathaze wena nalaba bantu onabo, ngokuba lo msebenzi mkhulu kakhulu kunawe, awunakukwazi ukuwenza uwedwa.
Manje ngilalele, ngizokweluleka, uNkulunkulu abe nawe. Ufanele ukukhulumela abantu phambi kukaNkulunkulu, ulethe izindaba zabo kuNkulunkulu;
bafundise izimiso nemithetho, ubenze bayiqonde indlela okumele bahambe ngayo, nomsebenzi okufanele bawenze.
Zifunele phakathi kwabo amadoda ahloniphekile, amesabayo uNkulunkulu, amadoda athembekile, akuzondayo ukuthola inzuzo ngokungalungile, uwabeke abe yizinduna zezinkulungwane, zamakhulu, zama-50, nezeshumi.
Makube yibona abehlulela abantu ngezikhathi zonke; balethe kuwe zonke izindaba ezinkulu, kodwa amacala amancane mawanqunywe yibo, ukuze bawenze ube lula umthwalo wakho, bathwalisane nawe.
Uma ukwenza lokhu, noNkulunkulu ekuyala kanjalo, uyokwazi ukuma, nabantu bonke babuyele emizini yabo benokweneliswa.”
UMose wamlalela umukhwe wakhe, wakwenza konke ayekushilo.
UMose wakhetha amadoda anekhono phakathi kwabakwa-Israyeli, wawabeka aba yizinduna zabantu, aba yizinduna phezu kwezinkulungwane, phezu kwamakhulu, phezu kwama-50, naphezu kweshumi.
Zehlulela abantu ngezikhathi zonke. Amacala anzima zaziwedlulisela kuMose. Zonke izindaba ezilula zehlulelwa yizo.
UMose wavalelisana nomukhwe wakhe, uJethro wahamba wabuyela ezweni lakubo.
Kwathi ngenyanga yesithathu emveni kokuphuma kwabantu bakwa-Israyeli eGibhithe, ngalo lolo lusuku, bafika ehlane iSinayi.
Basuka eRefidimi bafinyelela ehlane iSinayi, bakanisa ehlane; abakwa-Israyeli bakanisa lapho-ke, phambi kwentaba.
UMose wakhuphukela kuNkulunkulu; uSimakade wambiza esentabeni, wathi: “Yisho kanje kuyo indlu kaJakobe, umemezele kubantu bakwa-Israyeli, uthi:
‘Nikubonile engikwenze kwabaseGibhithe, nokuthi nginithwale kanjani ngamaphiko okhozi nganiletha kimi.
Ngakho-ke uma nililalela ngokucophelela izwi lami, nigcine isivumelwano sami, niyokuba yisabelo sami esiligugu phakathi kwazo zonke izizwe, ngokuba umhlaba wonke ungowami.
Niyakuba ngumbuso wabaphristi kimi, nesizwe esingcwele. Yilawo mazwi oyokuwakhuluma kubantu bakwa-Israyeli.’ ”
UMose wahamba wabiza amalunga abantu, wakhuluma phambi kwawo wonke amazwi uSimakade ayemyale ngawo.
Bonke abantu baphendula ngazwi linye, bathi: “Siyokwenza konke uSimakade akushilo kithi.” UMose wabuyisela kuSimakade wonke amazwi ayekhulunywe ngabantu.
USimakade wathi kuMose: “Bheka ngizokuza kuwe ngefu elimnyama, ukuze abantu bezwe uma ngikhuluma nawe, nokuba emveni kwalokho bakholwe nguwe kuze kube phakade.” UMose wambikela uSimakade lokho okwakushiwo ngabantu.
USimakade wathi kuMose: “Hamba uye kubantu, ubangcwelise namuhla nakusasa, bahlanze izembatho zabo,
bazilungiselele usuku lwesithathu, ngokuba ngosuku lwesithathu uSimakade uyokwehlela entabeni iSinayi phambi kwabantu bonke.
Uyakubamisela abantu umngcele nxazonke, uthi: ‘Qaphelani ningenyukeli entabeni, noma nithinte umngcele wayo. Noma ngubani othinta intaba uyakubulawa impela.
Mabangathintwa ngesandla, kodwa mabakhandwe ngamatshe, noma bacitshwe ngemicibisholo, noma ngabe yisilwane, noma ngumuntu akuyukuphila.’ Lapho icilongo likhala isikhathi eside, bayokhuphukela entabeni.”
UMose wehla entabeni, waya kubantu. Wabangcwelisa abantu base behlanza izingubo zabo.
Wathi kubantu: “Zilungiseleleni lezi zinsuku ezintathu; ningasondeli kwabesifazane.”
Ngosuku lwesithathu ekuseni, kwaba nokuduma, nombani, nefu elimnyama phezu kwentaba, nokukhala okukhulu kwecilongo, abantu bonke ababesenkanjini bathuthumela.
UMose wabahola abantu enkanjini ukuba bayohlangana noNkulunkulu, bama ekuqaleni kwentaba.
Yonke intaba iSinayi yayithunqa intuthu, ngokuba uSimakade wayehlele kuyo ngomlilo, intuthu yayo yenyuka njengentuthu yesithando somlilo; intaba yonke yazamaza kakhulu.
Lapho umsindo wecilongo wawulokhu uzwakala kakhulu ungathuli, uMose wakhuluma, uNkulunkulu wamphendula ngezwi elikhulu.
USimakade wehlela esiqongweni sentaba iSinayi, wayesebiza uMose ukuba akhuphukele kuso, uMose wakhuphuka.
USimakade wathi kuye: “Yehla, uxwayise abantu bangafohli ukuba babone uSimakade, ngokuba iningi labo liyobhubha.
Nabaphristi abasondela kuSimakade mabazingcwelise, funa uSimakade ababhubhise.”
UMose wathi kuSimakade: “Abantu ngeke bakhuphukele entabeni iSinayi, ngokuba Wena usixwayisile, wathi: ‘Misa umngcele, uyingcwelise intaba.’ ”
USimakade wathi kuye: “Yehla, uhambe ubuye no-Aroni nize lapha, kodwa abaphristi nabantu mabangafohli bakhuphukele kuSimakade funa ababhubhise.”
UMose wehla wakhuluma nabantu.
UNkulunkulu wakhuluma wonke lawa mazwi, wathi:
“NginguSimakade uNkulunkulu wakho owakukhipha eGibhithe, indlu yobugqila.
Ungabi nabanye onkulunkulu ngaphandle kwami.
Ungazenzeli isithombe esibaziweyo, sanoma yini olusezulwini phezulu, noma olusemhlabeni phansi, noma olusemanzini phansi komhlaba.
Ungazikhothameli, ungahungeki ukuba uzikhonze, ngokuba Mina Simakade uNkulunkulu wakho, nginguNkulunkulu onomhawu, ngihambela ububi bawoyise kubantwana, kuso isizukulwane sesithathu nesesine sabangizondayo,
kepha ngibenzela umusa abayizinkulungwane balabo abangithandayo, bagcine imiyalelo yami.
Ungaliphathi ngeze igama likaSimakade uNkulunkulu wakho, ngokuba uSimakade akayukumyeka angamjezisi oliphatha ngeze igama lakhe.
Khumbula usuku lwesabatha, ulungcwelise.
Uyosebenza ngezinsuku eziyisithupha, uwenze wonke umsebenzi wakho,
kepha usuku lwesikhombisa luyisabatha likaSimakade, uNkulunkulu wakho; awuyukwenza msebenzi ngalo, wena nendodana yakho, indodakazi yakho, inceku yakho, incekukazi yakho, imfuyo yakho, nomfokazi ogogobele emzini wakho,
ngokuba ngezinsuku eziyisithupha uSimakade wenza izulu nomhlaba, nolwandle, nakho konke okukukho, waphumula ngosuku lwesikhombisa, ngalokho uSimakade walubusisa usuku lwesabatha, walwehlukanisela ukuba lube ngcwele.
Hlonipha uyihlo nonyoko ukuze izinsuku zakho zande ezweni, uSimakade uNkulunkulu wakho akunika lona.
Ungabulali.
Ungaphingi.
Ungebi.
Ungafakazi ngamanga ngomakhelwane wakho.
Ungayifisi indlu yomakhelwane wakho; ungamfisi umfazi womakhelwane wakho, inceku yakhe, incekukazi yakhe, inkabi yakhe, imbongolo yakhe, noma yini kamakhelwane wakho.”
Lapho bonke abantu bezwa ukuduma kwezulu, nombani, nokukhala kwecilongo, bebona nentaba ithunqa, bathuthumela, bamela kude.
Bathi kuMose: “Khuluma wena nathi, siyakukulalela, kodwa uNkulunkulu makangakhulumi nathi, funa sife.”
UMose wathi kubantu: “Ningesabi; uNkulunkulu uze ukuba anivivinye nokuba anifake uvalo ukuze ningoni.”
Kepha abantu bamela kude, kwaba nguMose kuphela osondela efini elimnyama lapho uNkulunkulu wayekhona.
USimakade wathi kuMose: “Uyakusho lokhu kubantu bakwa-Israyeli uthi: ‘Nizibonele ukuthi ngikhulume nani ngisezulwini.
Aniyukuzenzela abanye onkulunkulu ngaphandle kwami, onkulunkulu besiliva noma begolide aniyukuzenzela bona.
Niyakungakhela i-althare ngomhlabathi, nenze phezu kwalo imihlatshelo yokushishwa neyokuthula, ngezimvu nezinkomo zenu, kuzo zonke izindawo lapho ngenza khona ukuba igama lami likhunjulwe, ngiyakuza nginibusise.
Uma ningakhela i-althare lamatshe, aniyukulakha ngamatshe abaziweyo, ngokuba nilingcolisile ngamashizolo eniwasebenzise kulo.
Awuyukwenyukela e-althare lami ngezitebhisi, funa kwambulwe ubunqunu bakho.’ ”
“Yilezi izehlulelo ozakuzimisa phambi kwabo:
uma uthenga isigqila somHebheru, masikusebenzele iminyaka eyisithupha, ngonyaka wesikhombisa siyakuhamba singesikhululekileyo, singakhokhi lutho.
Uma sifike sisodwa, siyakuphuma sisodwa, uma sifike sesiganiwe siyakuhamba nomkaso.
Uma umniniso esinike umfazi samzalela amadodana noma amadodakazi, owesifazane nabantwana bayoba ngabomnini wesigqila, sona siphume sihambe sodwa.
Kepha uma isigqila sisho ngokucacile sithi: ‘Ngiyamthanda umnumzane wami, nomkami nabantwana bami, ngakho-ke anginakuhamba njengokhululekileyo,’
umniniso uyosithatha asilethe kuNkulunkulu, uyosimisa ngasemnyango noma ngasensikeni yomnyango bese umniniso esibhoboza indlebe ngosungulo, sibe yisigqila sakhe impilo yaso yonke.
“Uma indoda ithengisa ngendodakazi yayo ukuba ibe yisigqila, ayinakukhululwa njengoba kukhululwa izigqila zesilisa.
Uma singamthokozisi umniniso, owasikhetha ukuba sibe ngesakhe, uyakuvuma ukuba sihlengwe; akayukuba nalungelo lokuba asidayisele abantu bezizwe, lokhu engasiphathanga kahle yena.
Uma ithenga isigqila sesifazane ukuze isinikele endodaneni yaso ngokwesiko iyosiphatha njengendodakazi yayo.
Uma indoda ithatha omunye umfazi, kufanele umfazi wokuqala iqhubeke nokumnikeza ukudla nezingubo njengakuqala, namalungelo akhe obufazi angaguquki.
Uma indoda ingasakufezi lokhu okuthathu esigqilini sayo, kufanele isikhulule, futhi ingakhokhelwa lutho ngaso.
“Umuntu oshaya omunye ambulale, naye uyakubulawa.
Kepha uma kube yingozi engakusophile, kunguNkulunkulu omnikele esandleni sakhe, ngiyakummisela indawo lapho eyobalekela khona.
Kodwa uma umuntu ehlasela abulale omunye ngobuqili, kufanele naye asuswe e-althare lami abulawe.”
“Oshaya uyise noma unina kufanele abulawe.
“Noma ngubani othumba omunye, athengise ngaye noma atholakale kuye, kufanele abulawe.
“Noma ngubani oqalekisa uyise noma unina kufanele abulawe.
“Nxa abantu belwa, omunye ashaye umakhelwane wakhe ngetshe noma ngenqindi, angafi, kepha alale embhedeni,
uma elulama, akwazi ukuzihambela phandle ngenduku, owamshayayo akayukujeziswa, nokho uyomkhokhela ngesikhathi sakhe esichithekileyo, elashwe aze alulame.
“Uma indoda ishaye isigqila sayo sesilisa noma sesifazane ngenduku saze safa phansi kwesandla sayo, kufanele ijeziswe nokujeziswa,
kodwa uma leso sigqila siphile izinsukwana ezimbili noma ezintathu ayiyukujeziswa, ngokuba isigqila siyimpahla yayo.
“Uma abantu belwa, balimaze owesifazane okhulelwe, aphuphunyelwe yisisu, kodwa yena angalimali ndawo, lowo muntu uyohlawuliswa njengoba indoda yalowo wesifazane inqumile ukuba ahlawule, ngokwesinqumo sabehluleli.
Uma kuvela ingozi kufanele kwenanwe ukuphila ngokuphila,
iso ngeso, izinyo ngezinyo, isandla ngesandla, unyawo ngonyawo,
ukushiswa ngokushiswa, umvimbo ngomvimbo, inxeba ngenxeba.
“Uma umuntu eshaya iso lesigqila sakhe sesilisa noma sesifazane, iso alibulale, uyosikhulula ngenxa yeso laso.
Uma eshaye isigqila sakhe sesilisa noma esesifazane saphuma izinyo, isigqila siyakuhamba singokhululekileyo ngenxa yezinyo laso.”
“Uma inkabi igwaze owesilisa noma owesifazane yambulala, leyo nkabi iyakukhandwa ngamatshe, ife; inyama yayo ayiyukudliwa, umniniyo akayukuba nacala.
Uma inkabi ijwayele ukugwaza abantu, futhi nomniniyo exwayisiwe ngalokho, kodwa angayibophi, uma-ke ibulala owesilisa noma owesifazane, iyokhandwa ngamatshe, nomniniyo abulawe.
Kepha uma umniniyo ehlawulisiwe, uyakukhokha leyo nhlawulo emisiweyo ngalowo obulewe.
Uma inkabi igwaze yabulala umfana noma intombazane le mithetho engenhla yiyona eyolandelwa.
Uma inkabi igwaze yabulala isigqila sesilisa noma sesifazane, umniniyo uyokhokhela umnini wesigqila amashekeli esiliva angama-30; inkabi ikhandwe ngamatshe.
“Uma umuntu evula umgodi noma emba umgodi angawembozi bese kukhalakathela kuwo inkabi noma imbongolo,
umnini womgodi uyokhokhela umnini wesilwane ngemali; yena athathe isilwane esifileyo sibe ngesakhe.
“Uma inkabi yomunye ibulala inkabi yomunye, bobabili bayoyithengisa inkabi ephilayo bese behlukaniselana ngemali; babuye behlukaniselane ngenyama yenkabi efileyo.
Kepha uma kwaziwa ukuthi le nkabi inomkhuba wokuhlasela, nomniniyo engayivaleli, kufanele akhokhele umnini wenkabi efileyo ngenkabi ephilayo; yena agcine leyo efileyo kube ngeyakhe.
“Uma umuntu entshontsha inkabi noma imvu, bese eyihlaba noma ayithengise, uyokhokhiswa izinkabi ezinhlanu ngenkabi, nezimvu ezine ngemvu.
Uma isela libanjwe ligqekeza, liyoshaywa lize life, akuyukuba nacala legazi.
Uma libanjwe emini kwabha, kuyoba yicala legazi phezu kwalo. Isela liyokhokha ngokuphindiwe; uma lingenalutho lokukhokha, kuyothengiswa ngalo ngenxa yokweba kwalo.
“Uma okwebiweyo kutholakala esandleni salo kusaphila, kungaba yinkabi, yimbongolo noma yimvu, isela liyakukhokha ngokuphindwe kabili.
“Uma umuntu eklabisa ensimini noma esivinini, ayekele izinkomo zakhe zidle ensimini yomunye, kufanele akhokhe lokho okudliweyo; akhiphe okwekhethelo esivinini noma ensimini yakhe kube yinkokhelo.
“Uma kuqubuka umlilo, wokheleke ezihlahleni ezinameva kuze kushe nezinhlanga zamabele, noma okusanhlamvu okungakavunwa, lowo othungele umlilo kufanele akhokhe.
“Uma umuntu enika umakhelwane wakhe imali noma izimpahla ukuba amgcinele ziphephile zibe zingezebiwe endlini kamakhelwane, uma libanjwa isela, liyakukhokha ngokuphindwe kabili.
Uma isela lingabanjwanga, umnini wendlu uyakulethwa phambi kukaNkulunkulu, ukuze kucaciswe ukuthi umnini wempahla ngabe uyintshontshe kwamakhelwane yini noma qha.
“Emacaleni wonke ombango wempahla, aphathelene nenkabi, imbongolo, imvu, isembatho, noma iyiphi nje enye impahla elahlekile, bobabili ababangayo bayoletha izikhalo zabo kuNkulunkulu. Olahlwa yicala phambi kukaNkulunkulu uyomkhokhela umakhelwane wakhe kuphindwe kabili.
“Uma umuntu enika umakhelwane wakhe imbongolo, noma inkabi, noma imvu, noma silwane sini, bese isilwane siyafa noma silimale noma sithunjwe singabonwa muntu,
isifungo phambi kukaSimakade yisona esiyakunquma phakathi kwabo ukuthi omunye akabanga nasandla empahleni yomunye. Umnini wesilwane uyakusamukela isifungo kungabi bikho sinxephezelo asitholayo.
Kepha uma yebiwe, umniniyo uyothola isinxephezelo.
Uma idwengulwe yizilwane zasendle, makulethwe ubufakazi; akuyukuba bikho sinxephezelo ngokudwenguliweyo.
“Uma umuntu eboleka isilwane komunye umuntu bese leso silwane siyalimala noma sife umniniso engekho, uyakukhokhelwa ngokugcwele.
Kepha uma umininiso ebekhona, akayukukhokhelwa, uma besiqashiwe, uyokhokhelwa inani lokusiqasha kuphela.
“Uma umuntu eyenga intombi engesiyo ingoduso, alale nayo, kufanele ayilobole, imgane.
Kepha uma uyise wentombi enqaba ukumganisela, uyakukhokha inani elilingana nelobolo lentombi.
“Awuyukumvumela umlumbikazi aphile.
“Lowo olala nesilwane, makabulawe.
“Owenzela abanye onkulunkulu umhlatshelo, angenzeli uSimakade yena yedwa, uyobhujiswa.
“Awuyukumphatha kabi noma umcindezele umfokazi ohlala nawe, ngokuba nawe wawungumfokazi eGibhithe.
Aniyukumhlupha umfelokazi nentandane.
Uma ubahlukumeza, bese bekhala kimi, ngiyokuzwa ukukhala kwabo,
ulaka lwami luvuthe, nginibulale ngenkemba, omkenu babe ngabafelokazi, izingane zenu zibe yizintandane.
“Uma uboleka omunye wabantu bami imali, uboleka ompofu phakathi kwenu, awuyukumphathisa okombolekisi wemali, awuyukumbiza nzalo.
Uma uthatha ingubo kamakhelwane wakho ibe yisibambiso, uyakuyibuyisela kuye lingakashoni ilanga,
ngokuba kungenzeka kube yiyona ngubo kuphela anayo ukuyembatha; uyokwembathani uma eselala na? Uma umakhelwane wakho ekhala kimi, ngiyokumlalela, ngokuba nginomusa.
“Awunakumthuka uNkulunkulu, noma uqalekise umholi wabantu bakini.
“Awuyukukhohlwa ukuletha iminikelo yesivuno sakho sokusanhlamvu nesewayini. “Amazibulo amadodana akho uyakuwanika Mina.
Uyokwenza okufanayo ngamazibulo ezinkomo zakho, nawezimvu zakho. Uyakuwavumela abe nonina izinsuku eziyisikhombisa, bese kuthi ngosuku lwesishiyagalombili uwanikele kimi.
“Niyakuba ngabantu abangcwele kimi, ngakho-ke ningayidli inyama yesilwane esidweshulwe yizilwane zasendle, kodwa aniboyiphonsela izinja.
“Awuyukusabalalisa umbiko ongamanga, awuyukubambisana nababi ukwethula ubufakazi obungamanga.
Awuyukulilandela iningi ekwenzeni okungalungile noma lapho wethula ubufakazi ecaleni, awuyukuzihlanganisa neningi ukuze uhlanekezele umthetho.
Awuyukukhombisa ukuvuna ompofu ecaleni.
“Uma ufumana inkabi yesitha sakho noma imbongolo yaso iduka, yibuyisele kuso.
Uma ubona imbongolo yalowo okuzondayo ipatalele phansi komthwalo, uyoyeka yini ukuyikhulula? Yelekelele ukuze ikhululeke.
“Awuyukubuhlanekezela ubulungiswa ngenxa yabampofu ecaleni labo.
Ziqhelelanise nokwethwesa omunye icala lamanga, ungambulali ongenacala noma labo abaseqinisweni, ngokuba angiyukumkhulula onecala.
“Awuyukwamukela ukufunjathiswa, ngokuba ukudizelwa kuyaziphuphuthekisa izikhulu, bese kuphambanisa nendlela yalabo abahamba ngokulunga.
Awuyukumcindezela umfokazi, uyayazi inhliziyo yomfokazi, ngokuba nani naningabafokazi eGibhithe.”
“Iminyaka eyisithupha uyakutshala insimu yakho, uvune isivuno sayo,
kodwa ngonyaka wesikhombisa uyakuyiphumuza, awuyukuyilima; uyakuyiyeka ibe yifusi, ukuze abampofu bakini badle, kuthi lokho abakushiyayo kudliwe yizilwane zasendle. Uyokwenza kanjalo nangesivini sakho nangeminqumo yakho.
“Uyakusebenza izinsuku eziyisithupha, uphumule ngosuku lwesikhombisa, ukuze inkabi yakho, nembongolo yakho kuphumule, nesigqila esizalelwe kwakho, nogogobele kwakho bahlunyelelwe.
“Kuqapheleni konke engikusho kini. Ningakhuleki emagameni abanye onkulunkulu; ningawaphathi ngisho nangemilomo yenu amagama abo.”
“Uyongenzela imikhosi kathathu ngonyaka.
“Ngenyanga u-Abibi, inyanga owaphuma ngayo eGibhithe, uyogubha umkhosi wesinkwa esingenamvubelo ngendlela engakuyala ngayo. Ezinsukwini eziyisikhombisa zalo mkhosi ungasidli isinkwa esinemvubelo. Makungezi muntu phambi kwami engaphethe lutho.
“Uyogubha umkhosi wokuvuna wezithelo zokuqala zomsebenzi wakho owuhlwanyele ensimini. “Ugubhe umkhosi wokuqoqa konke okulime ensimini ekupheleni konyaka.
Kathathu ngonyaka bonke abesilisa bakho bayokuza phambi kweNkosi uSimakade.
“Awuyukuletha kimi igazi lomhlatshelo wami nanoma yini okunemvubelo, noma ugcine amanoni omkhosi wami kuze kube ngakusasa.
“Ngonyaka uyoletha endlini kaSimakade uNkulunkulu wakho okwekhethelo kwesivuno sakho sokuqala. “Ungalipheki izinyane lembuzi obisini lukanina.”
“Bheka, ngizothumela ingelosi ikwandulele ukuze ikuvikele ohambeni, futhi ikufinyelelise endaweni engiyilungisileyo.
Ilalelisise, futhi uyithobele. Ungayivukeli, ngokuba ayiyukuzithethelela iziphambeko zenu, ngokuba igama lami likuyo.
Kepha uma ulalela nokulalela izwi layo wenza konke ekutshela khona, ngiyobazonda abakuzondayo, ngibe yisitha sezitha zakho.
Ingelosi yami izokwandulela, ikuyise kuma-Amori, kumaHithi, kumaPherizi, kumaKhanani, kumaHivi, nakumaJebusi, ngiyowabhubhisa.
Ungabakhothameli onkulunkulu bawo, ungahuheki ukuba ubakhonze, ungazenzi izinto azenzayo. Kodwa uyobabhidliza onkulunkulu bawo, ucekele phansi izinsika zabo zamatshe.
Niyakumkhonza uSimakade uNkulunkulu wenu, Mina ngiyobusisa ukudla namanzi enu, ngisuse izifo phakathi kwenu.
Ezweni lakini akekho owesifazane oyophuphunyelwa yisisu, noma oyoba yinyumba. Ngiyokupha impilo ende.
“Ngiyokwenza abantu abamelene nawe bangesabe; ngilethe ukudideka phakathi kwabantu olwa nabo, ngenze zonke izitha zakho zikubalekele.
Ngiyokwenza izitha zakho zithuthumele, ngigudluze amaHivi, amaKhanani namaHithi phambi kwakho.
Angiyukuzixosha phambi kwakho ngonyaka owodwa; uma ngingenza kanjalo, izwe liyosala dengwane, kuthi izilwane zasendle zibe ziningi kunawe.
Kunalokho, ngizozixosha phambi kwakho kancane kancane, uze wande ngokwanele ukuba ulidle izwe.
Ngiyokwandisa imingcele yezwe lakho kusukela oLwandle Lomhlanga kuze kufike olwandle lwamaFilisti, kusukela ehlane kuze kushaye emfuleni. Ngiyonipha amandla phezu kwezakhamuzi zezwe, nizixoshe phambi kwenu.
Ningenzi isivumelwano nazo, noma nonkulunkulu bazo.
Abayukuhlala ezweni lakini, funa banenze none kimi, ngokuba uma nikhonza onkulunkulu bazo, bayokuba wugibe kini.”
USimakade wathi kuMose: “Khuphukela kuSimakade, wena, no-Aroni, noNadabi, no-Abhihu, namalunga angama-70 akwa-Israyeli; nikhothame ningikhonze nisekude.
NguMose kuphela oyakusondela kuSimakade, kepha abanye abayukusondela; nabantu abayukukhuphuka naye.”
UMose weza watshela abantu wonke amazwi kaSimakade nezehlulelo zonke; abantu bonke baphendula ngazwi linye, bathi: “Wonke amazwi uSimakade awakhulumile sizowenza.”
UMose wawabhala wonke amazwi kaSimakade. Wavuka ekuseni ngovivi, wakha i-althare phansi kwentaba, wamisa izinsika ezili-12 ngokwezizwe ezili-12 zakwa-Israyeli.
Wathuma izinsizwa zakwa-Israyeli zanikela ngeminikelo yokushiswa, zahlabela uSimakade amaduna ukuba abe yimihlatshelo yokuthula.
UMose wathatha ingxenye yegazi walithela ezitsheni, kwathi enye wafafaza ngayo i-althare.
Wayesethatha incwadi yesivumelwano, wayifunda belalele abantu, bonke bathi: “Konke uSimakade akukhulumile, sizokwenza, sizokukuhlonipha.”
UMose wathatha igazi wafafaza ngalo abantu, wathi: “Bhekani, leli yigazi lesivumelwano uSimakade asenze nani ngawo wonke lawa mazwi.”
UMose, u-Aroni, uNadabi, u-Abhihu namalunga akwa-Israyeli angama-70 bakhuphuka,
bambona uNkulunkulu ka-Israyeli; phansi kwezinyawo zakhe kwakukhona okwakufana nendawo egandaywe ngamatshe esafire, kungathi yizulu uqobo ngokucweba.
UNkulunkulu akazenzakalisanga izikhulu zabantu bakwa-Israyeli, kodwa zambona, zadla, zaphuza.
USimakade wathi kuMose: “Khuphukela kimi entabeni uhlale lapho, ngizokunika izibhebhe zamatshe, umthetho nemiyalelo engikubhalileyo ukuze ubafundise yona.”
UMose nenceku yakhe uJoshuwa bavuka, uMose wakhuphukela entabeni kaNkulunkulu.
Wathi kumalunga: “Silindeni lapha kule ndawo size sibuyele kini. Bhekani, u-Aroni noHure banani; noma ngubani onodaba makaye kubo.”
UMose wayesekhuphukela entabeni, ifu layisibekela intaba.
Inkazimulo kaSimakade yahlala entabeni iSinayi, ifu layisibekela intaba izinsuku eziyisithupha; kwathi ngosuku lwesikhombisa uSimakade esefini, wambiza uMose.
Ukubonakala kwenkazimulo kaSimakade kubantu bakwa-Israyeli kwakufana nomlilo oqothulayo esiqongweni sentaba.
UMose wangena phakathi efini, wakhuphukela entabeni, wayesentabeni izinsuku ezingama-40 nobusuku obungama-40.
USimakade wakhuluma kuMose, wathi:
“Khuluma nabantu bakwa-Israyeli ukuze bangilethele umnikelo, kube yilowo nalowo anikele ngokuthanda kwenhliziyo yakhe; ningilethele umnikelo wami.
Yilo umnikelo eniyakuwuletha uvela kubo: igolide, isiliva, ithusi,
okuluhlaza okwesibhakabhaka, okubukhwebezane, okubomvu, ilineni elicolekileyo, uboya bezimbuzi;
izikhumba zezinqama ezidaywe zabomvu; izikhumba zamahlengethwa, izingodo zokhuni lomkhambathi,
amafutha ezibani, amakha, amafutha okugcoba nawempepho,
amatshe amashohamu, namatshe okuhlobisa ingubo yamahlombe nasesifubeni.
“Mabangenzele ithabanakeli elingcwele ukuze ngihlale phakathi kwabo.
Yenzani konke njengalokho engizakunikhombisa khona, umfanekiso wethabanakeli, nayo yonke impahla ekulo, niyakuyenza kanjalo.”
“Bayakuwenza umphongolo ngokhuni lomkhambathi, ubude bube ngamakhubhithi amabili nengxenye, ububanzi bube yikhubhithi nengxenye, nokuphakama kwawo kube yikhubhithi nengxenye.
Uyakuwucaka ngegolide elicwengekileyo ngaphandle nangaphakathi, uwenzele umphetho wegolide nxazonke.
Uwenzele amasongo amane egolide, uwafake emilenzeni yawo yomine; amasongo abe mabili ohlangothini ngalunye.
Wenze izingongolo ngokhuni lomkhambathi bese uzicaka ngegolide,
izingongolo uzifake emasongweni asezinhlangothini zomphongolo ukuze uthwalwe ngazo.
Izingongolo kufanele zihlale emasongweni, zingasuswa kuwo.
Uyofaka emphongolweni izibhebhe zamatshe engizokunika zona.
Uyokwenza isivalo sesihlalo somusa ngegolide elicwengekileyo, ubude baso bube ngamakhubhithi amabili nengxenye, ububanzi baso bube yikhubhithi nengxenye.
Uyokwenza amakherubhi amabili ngegolide elicangcathiweyo; uwabeke emphethweni wesihlalo somusa nxazombili zaso.
Uyokwenza ikherubhi ngalinye libe sekugcineni kwezinhlangothi zombili, uwenze ekugcineni nxazombili, ahlangane nesihlalo somusa.
Amakherubhi ayokwelula amaphiko awo ngaphezulu, amboze ngawo isihlalo somusa, abhekane ngobuso; ubuso bawo buyobheka isihlalo somusa.
Uyosibeka isihlalo somusa phezu komphongolo, ufake phakathi izibhebhe zamatshe engizokunika zona.
Ngiyohlangana nawe lapho, ngikhulume nawe ngiphezu kwesihlalo somusa naphakathi kwamakherubhi amabili aphezu komphongolo wobufakazi, ngiyakukuyala ngakho konke oyakukukhuluma kubantu bakwa-Israyeli.”
“Uyokwenza itafula ngokhuni lomkhambathi, ubude balo bube ngamakhubhithi amabili, ububanzi balo bube yikhubhithi, nokuphakama kwalo kube yikhubhithi nengxenye.
Uyolicaka ngegolide elicwengekileyo, ulenzele umphetho wegolide nxazonke.
Uyolenzela unqenqema olungangesandla ububanzi nxazonke, ulenzele nomphetho wegolide nxazonke.
Uyolenzela amasongo amane ngegolide, uwafake emakhoneni omane asemilenzeni yalo.
Eduze konqenqema kuyakuba khona amasongo okuyongena kuwo izingongolo zokuthwala itafula.
Uyozenza izingongolo ngokhuni lomkhambathi, uzicake ngegolide ukuze itafula lithwalwe ngazo.
Uyokwenza izingqwembe zalo, izinkomishi, izinkezo, nezinkamba zokuthela; ukwenze ngegolide elicwengekileyo.
Uyobeka njalo phambi kwami phezu kwetafula isinkwa soBukhona bami.”
“Uyokwenza uthi lwezibani ngegolide elicwengekileyo, uyakulwenza ngomsebenzi ocangcathiweyo, isisekelo salo, nesiqu salo kwenziwe ngegolide elicangcathiweyo; izimbali zokuhlobisa, imiqumbe, namacembe, kube kunye nalo.
Kuyakuba khona amagatsha ayisithupha aphuma ezinhlangothini zalo, abe mathathu ngasohlangothini ngalunye.
Igatsha lokuqala kufanele lithwale izindebe ezintathu ezimise okwe-alimondi eliqhakazileyo, imiqumbe, namacembe avulekileyo. Igatsha lesibili kufanele lithwale izindebe ezintathu ezimise okwe-alimondi, nemiqumbe namacembe azo. Makufane kuwo wonke amagatsha ayisithupha enabele ngaphandle othini lwezibani.
Othini lwezibani makube nezindebe ezine ezimise okwe-alimondi, nemiqumbe yazo, namacembe azo.
Kuyokuba khona umqumbe phansi kwamagatsha amabili, umqumbe phansi kombanqwana bamagatsha esibili, nomqumbe phansi kombanqwana bokugcina bamagatsha, kuyoba njalo kuwo oyisithupha amagatsha enabele ngaphandle othini lwezibani.
Imiqumbe yawo, namagatsha awo ayokuba yingxenye eyodwa nawo, konke kube ngumsebenzi owodwa ocangcathiwe wegolide elicwengekileyo.
“Uyokwenza izibani eziyisikhombisa uzibeke othini, zikhanyise phambi kwalo.
Uyokwenza izindlawu nezitsha zomlotha ngegolide elicwengekileyo.
Uthi lwezibani nakho konke lokhu makwenziwe ngamathalenta egolide elicwengekileyo.
Qikelela ukuba lokho ukwenze ngendlela okhonjiswe yona kule ntaba.
“Uyokwenza ithabanakeli ngamakhethini alishumi enziwe ngelineni elicolekileyo lemicu ephothwe ngokuluhlaza okwesibhakabhaka, okubukhwebezane, nokubomvu. Ingcweti iwahlobise ngamakherubhi.
Ubude bekhethini ngalinye bube ngamakhubhithi angama-28, ububanzi balo bube ngamakhubhithi amane. Wonke amakhethini ayakulingana.
Amakhethini ayisihlanu ayothungwa ahlanganiswe ndawonye, kanjalo namanye amakhethini ayisihlanu ayothungwa ahlanganiswe ndawonye.
Uyokwenza izihibe ngokuluhlaza okwesibhakabhaka emphethweni wekhethini lokuqala, kanjalo nasemphethweni wekhethini lesibili.
Uyokwenza izihibe ezingama-50 ekhethinini lokuqala, wenze futhi izihibe ezingama-50 nakwelesibili. Izihibe uyozenza ziqondane.
Uyokwenza izinkintsho zegolide ezingama-50 bese amakhethini uwahlanganisa ndawonye ngezinkintsho, ukuze ithabanakeli libe lilodwa.
“Uyokwenza amakhethini ngoboya bezimbuzi, abe yithende phezu kwethabanakeli, uyokwenza amakhethini ayi-11.
Ubude bekhethini buyoba ngamakhubhithi angama-30, ububanzi balo bube ngamakhubhithi amane. Lawa makhethini ayi-11 kufanele alingane.
Uyohlanganisa amakhethini ayisihlanu ndawonye, namakhethini ayisithupha uyakuwahlanganisa ndawonye, bese kuthi ikhethini lesithupha uliphinde kabili phambi kwethende.
Uyokwenza izinkintsho ezingama-50 emphethweni wekhethini lokuqala elingasekugcineni, nezinye ezingama-50 emphethweni wekhethini lesibili elingasekugcineni.
Uyokwenza izinkintsho zethusi ezingama-50, ufake amahhuku ezinkintshweni, bese ulihlanganisa ndawonye ithende ukuze libe yinto eyodwa.
Ingxenye eseleyo yamakhethini ethende, ingxenye yekhethini eliseleyo iyolenga ngemuva kwethabanakeli.
Ikhubhithi kulolu hlangathi nekhubhithi ngakolunye kwalokho okuseleyo ebudeni bamakhubhithi ethende, kuyakulengiswa emaceleni ethabanakeli kulemboze.
Ithende uyolenzela isembozo ngezikhumba zezinqama ezidaywe zabomvu, nesembozo sangaphandle ngezikhumba zamahlengethwa.
“Uyokwenza amapulangwe ethabanakeli ngokhuni lomkhambathi, uwamise.
Ubude bamapulangwe bube ngamakhubhithi ayishumi, ububanzi balelo nalelo bube yikhubhithi nengxenye.
Yilelo nalelo pulangwe liyokuba nezikhonkwane ezimbili zokuwaxhumanisa; uyokwenza kanjalo kuwo wonke amapulangwe ethabanakeli.
Uyokwenza amapulangwe ethabanakeli abe ngama-20 ngasohlangothini lwaseningizimu, olubheke eningizimu.
Uyokwenza izisekelo zesiliva ezingama-40 phansi kwamapulangwe angama-20, izisekelo ezimbili zibe phansi kwepulangwe lokuqala, ukuze zibambe izimpondo zalo; izisekelo ezimbili ngaphansi kwepulangwe elilandelayo, zibe yizikhonkwane ezimbili;
nasohlangothini lwesibili lwethabanakeli olungasenyakatho uyomisa amapulangwe angama-20,
nezisekelo zesiliva ezingama-40, izisekelo ezimbili zibe phansi kwepulangwe lokuqala, ezinye ezimbili zibe phansi kwepulangwe elilandelayo.
Ohlangothini lwethabanakeli olungasemuva ngasentshonalanga uyomisa amapulangwe ayisithupha.
Uyokwenza amapulangwe amabili ngasemuva kwethabanakeli abe ngamakhona alo.
Lawa mapulangwe asemakhoneni kufanele ahlanganiswe kusukela phansi kuze kuyofika phezulu, amapulangwe amabili enza amakhona ayokwenziwa kanjalo nawo.
Ngakho-ke kuyokuba namapulangwe ayisishiyagalombili anezisekelo zesiliva ezili-16, zibe mbili phansi kwepulangwe ngalinye.
“Uyokwenza imishayo eyisihlanu ngokhuni lomkhambathi, ibe ngamapulangwe ngakolunye uhlangothi lwethabanakeli,
imishayo emihlanu ibe ngeyamapulangwe ngakolunye uhlangothi lwethabanakeli, neminye emihlanu ibe ngeyamapulangwe asohlangothini lwethabanakeli olungasemuva ngasentshonalanga.
Umshayo ophakathi, phakathi kwamapulangwe udabule uze ufinyelele kuzo zombili izinhlangothi.
Uyowacaka amapulangwe ngegolide, wenze amasongo awo ngegolide, ukuze abambe imishayo, okufanele ukuba nayo icakwe ngegolide.
“Uyolimisa ithabanakeli ngendlela owakhonjiswa yona entabeni.”
“Uyokwenza isihenqo ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, ingcweti isihlobise ngamakherubhi.
Uyosilengisa ezinsikeni ezine zokhuni lomkhambathi ezicakwe ngegolide, ezinezinkintsho zegolide, futhi zimi ezisekelweni ezine.
Uyolengisa isihenqo phansi kwamahhuku asophahleni, bese ungenisa umphongolo wesivumelwano phakathi kwesihenqo, isihenqo siyakunehlukanisela indawo engcwele nendawo engcwelengcwele.
Uyakusibeka isihlalo somusa phezu komphongolo wesivumelwano endaweni engcwelengcwele.
Uyakubeka itafula ngaphandle kwesihenqo, uthi lwezibani ngaseningizimu lethabanakeli lubhekane netafula, ulibeke itafula ngasohlangothini olungasenyakatho.
“Uyokwenza isihenqo sasemnyango wethende ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, umsebenzi womfekethisi.
Isihenqo leso uyosenzela izinsika eziyisihlanu ngokhuni lomkhambathi, uzicake ngegolide, nezinkintsho zazo zibe yigolide, uzenzele izisekelo zethusi eziyisihlanu.
“I-althare uyolenza ngokhuni lomkhambathi; ubude balo bube ngamakhubhithi ayisihlanu, ububanzi balo bube ngamakhubhithi ayisihlanu. I-althare liyakuba yisikwele; ukuphakama kwalo kube ngamakhubhithi amathathu.
Uyokwenza izimpondo zalo emakhoneni omane alo, izimpondo zalo zibe yinto eyodwa ne-althare, ulicake ngethusi.
Uyokwenza izitsha zalo zokubutha umlotha, amafosholo alo, izitsha zalo, izimfologo zalo, nemicengezi yalo yomlilo, uyozenza zonke izimpahla zalo ngethusi.
Uyakulenzela futhi isisefo sethusi esenziwe njengenetha, uyokwenza amasongo amane ethusi enetheni kuwo omane amakhona alo.
Uyolibeka ngaphansi konqenqema oluzungeze i-althare, ukuba inetha leluleke lifinyelele ngaphakathi kwe-althare ukuya phezulu.
Uyokwenza izingongolo ze-althare ngokhuni lomkhambathi, uzicake ngethusi.
Izingongolo ziyofakwa emasongweni, ukuze zibe sezinhlangothini zombili ze-althare, uma lithwelwe.
Uyolenza ngamapulangwe libe lugobhozi. Ulenze ngendlela owayikhonjiswa entabeni.
“Uyokwenza igceke lethabanakeli. Ngaseningizimu yegceke kube khona amakhethini elineni lemicu ephothiweyo elicolekileyo, ubude bawo bube ngamakhubhithi ayikhulu ohlangothini ngalunye;
izinsika zalo ezingama-20, nezisekelo zazo ezingama-20 ziyokwenziwa ngethusi; izinkintsho zezinsika nezibopho zazo zenziwe ngesiliva.
Kanjalo uyakulenzela amakhethini ngasohlangothini olungasenyakatho, ubude bawo bube ngamakhubhithi ayikhulu, izinsika zazo ezingama-20, nezisekelo zazo ezingama-20 zibe ngezethusi; izinkintsho zezinsika nezibopho zazo zenziwe ngesiliva.
“Ohlangothini olungasentshonalanga lobubanzi begceke makube khona amakhethini ububanzi bawo bube ngamakhubhithi angama-50, abe nezinsika ezilishumi, nezisekelo ezilishumi.
Ububanzi begceke ngasempumalanga ohlangothini olubheke empumalanga bube ngamakhubhithi angama-50.
Kuyokuba khona amakhethini angamakhubhithi ali-15 ngasohlangothini olulodwa, izinsika ezintathu, nezisekelo ezintathu.
Nakolunye uhlangothi kuyokuba khona amakhethini angamakhubhithi ali-15, izinsika ezintathu, nezisekelo ezintathu.
“Esangweni legceke kuyokuba khona isihenqo esingamakhubhithi angama-20; senziwe ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, okungumsebenzi womfekethisi. Siyakuba nezinsika ezine, nezisekelo ezine.
Zonke izinsika ezizungeze igceke ziyakucakwa ngesiliva, izinkintsho zazo zibe ngezesiliva, izisekelo zibe ngezethusi.
Ubude begceke buyokuba ngamakhubhithi ayikhulu, ububanzi bube ngangama-50, ukuphakama kube ngamakhubhithi ayisihlanu, kube namakhethini elineni lemicu ephothiweyo elicolekileyo, nezisekelo zibe ngezethusi.
Zonke izimpahla ezisetshenziswa ethabanakelini, izikhonkwane zakhona nazo zonke ezasegcekeni mazenziwe ngethusi.
“Uyobayala futhi abantu bakwa-Israyeli ukuba balethe kuwe amafutha omnqumo acwengekileyo, agxotshelwe ukukhanyisa, ukuze izibani zihlale zivutha njalo.
Ethendeni lokuhlangana, ngaphandle kwesihenqo esiphambi kwesivumelwano, u-Aroni namadodana akhe bayakuzinakekela phambi kukaSimakade, kusukela kusihlwa kuze kube sekuseni. Lokho kuyakuba yisimiso saphakade esiyakuhlonishwa ngabantu bakwa-Israyeli, izizukulwane ngezizukulwane.
“Biza u-Aroni umfowenu phakathi kwabantu bakwa-Israyeli namadodana akhe, uNadabi, u-Abhihu, u-Eleyazare no-Ithamari beze kuwe, ukuba babe ngabaphristi bami bangikhonze.
Uyakumthungela u-Aroni umfowenu izingubo ezingcwele, ezinhle nezokuzihlobisa.
Uyakukhuluma kubo bonke abanekhono, engibaphile ikhono ukuba bathungele u-Aroni izingubo ukuze ahlukaniswe abe ngumphristi wami, angikhonze.
Yilezi izingubo abayozithunga: isivikelo sesifuba, ingubo yamahlombe, ingubo, ibhantshi elihlotshisiweyo, umshuqulo, nombhunkulo. Lapho bethungela u-Aroni namadodana akhe lezi zingubo ezingcwele ukuze bangikhonze bengabaphristi,
bayosebenzisa okuyigolide, okuluhlaza okwesibhakabhaka, okubukhwebezane, okubomvu, nelineni elicolekileyo.
“Bayokwenza ingubo yamahlombe ngokuyigolide, ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, kube ngumsebenzi wobungcweti obukhulu.
Iyakuba neziziba ezimbili zasemahlombe ezihlanganisiwe emachosheni azo ukuze zikwazi ukubopheka.
Ibhande elikuyo liyokwenziwa ngobuciko obufanayo ngokuyigolide, ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo.
Uyothatha amatshe amabili aligugu i-oniksi, uqophe kuwo amagama ali-12 amadodana ka-Israyeli;
amagama ayisithupha etsheni elilodwa, namanye ayisithupha kwelinye itshe njengokwelamana kwawo.
Njengomqophi eqopha isisicilelo, uyowaqopha lawa matshe amabili ngamagama amadodana ka-Israyeli, bese uwafaka azungezwe yizisekelo zegolide.
Uyowabeka lawa matshe ezizibeni zengubo yamahlombe njengesikhumbuzo samadodana ka-Israyeli, bese u-Aroni awembathe amagama abo emahlombe akhe phambi kukaSimakade kube yisikhumbuzo.
Uyokwenza izisekelo zegolide,
namaketanga amabili egolide elicwengekileyo, uwenze abe njengamagoda, uwathandele ezisekelweni zegolide.
“Uyokwenza isivikelo sesifuba sokwehlulela, ngobungcweti, uyakusenza ngendlela okwenziwe ngayo ingubo yamahlombe, sibe yigolide, okuluhlaza okwesibhakabhaka, okubukhwebezane, okubomvu, nokwelineni lemicu ephothiweyo elicolekileyo.
Siyakuba yisikwele, siphindwe kabili, ubude nobubanzi baso bube ngangokuvuleka kwesandla.
Uyofaka kuso imigqa emine yamatshe. Kuyokuba ngumugqa onerubhi, yithophazi nebherili;
emugqeni wesibili; kube yithurikhosi, yisefaya, ne-emeraldi;
emugqeni wesithathu; kube yijasinithe, yi-agathe, ne-amethiyisti;
emugqeni wesine kube yikhrisolithe, yi-oniksi, nejasipheri, konke lokhu kuzungezwe ngezisekelo zegolide.
Kuyakuba ngamatshe ali-12 ngangesibalo samagama amadodana ka-Israyeli. Ayofana nezisicilelo, yilelo nalelo liqoshwe igama lesizwe ngasinye kwezili-12.
Uyokwenza kuso isivikelo sesifuba amaketanga egolide anjengamagoda aphothiweyo.
Wenze kuso amasongo amabili egolide, uwanamathelise emachosheni esivikelo sesifuba.
Uyofaka amaketanga amabili egolide nezintambo zegolide emasongweni omabili esivikelo sesifuba asemaceleni.
Amachopho amabili amagoda, uyowathandela ezisekelweni bese uwathandela phambili ezizibeni zengubo yamahlombe.
Uyokwenza amasongo amabili egolide, uwafake emachosheni omabili esivikelo sesifuba, engxenyeni engaphakathi eseduze nengubo yamahlombe.
Uyokwenza amasongo amabili egolide, uwafake phambili emachosheni omabili omphetho wengubo yamahlombe kuthi okuhlanganisiwe kube phezu kwebhande elihlotshisiweyo.
Isivikelo sesifuba siyoboshwa ngamasongo aso, siboshelwe emasongweni engubo yamahlombe ngentambo eluhlaza okwesibhakabhaka, ukuze sibe phezu kwebhande lengubo yamahlombe elifekethisiweyo, nokuba isivikelo sesifuba singakhumuki engutsheni yamahlombe.
“U-Aroni uyokwembatha amagama amadodana ka-Israyeli esivikelweni sesifuba sokwehlulela esiqondene nenhliziyo yakhe, lapho engena endaweni engcwele, kube yisikhumbuzo esingapheliyo phambi kukaSimakade.
Uyofaka esivikelweni sesifuba sokwehlulela, i-Urimi neThumimi, kuyakuba ngasenhliziyweni ka-Aroni lapho engena phambi kukaSimakade, ngakho-ke u-Aroni uyakuthwala njalo enhliziyweni yakhe phambi kukaSimakade, ukwehlulelwa kwabakwa-Israyeli.”
“Uyokwenza ingubo emboza ingubo yamahlombe ngokuluhlaza okwesibhakabhaka,
iyakuba nembobo yekhanda phakathi nayo, ibe nomphetho owelukiweyo oyizungezile le mbobo, njengembobo yebhantshi lensimbi ukuze ingadabuki.
Emphethweni wayo ongezansi uyofaka amahananadi enziwe ngokuluhlaza okwesibhakabhaka, ngokubukhwebezane, nangokubomvu, kuwuzungeze wonke umphetho wayo, kube nokhencekhence begolide phakathi kwawo,
kube yisikhencezo segolide nehananadi kuzungeze umphetho wengubo.
U-Aroni uyakuyigqoka njalo uma eyokhonza, ukukhenceza kwayo kuyozwakala lapho eya endaweni engcwele phambi kukaSimakade, nalapho ephuma, ukuze angafi.
“Uyokwenza ucwecwe lwegolide elicwengekileyo, uqophe kulo njengokuqoshwa kwendandatho, ukuthi: ‘Wehlukaniselwe uSimakade.’
Uyolubophela emshuqulweni ngentambo eluhlaza okwesibhakabhaka, lube phambi kwalo.
Luyokuba sebunzini lika-Aroni. U-Aroni uyakuthwala icala lanoma yimuphi umnikelo ongcwele, abantu bakwa-Israyeli abawehlukanisa njengomnikelo ongcwele, luyohlala njalo ebunzini lakhe ukuze bamukeleke phambi kukaSimakade.
“Uyokweluka ibhantshi ngelineni elicolekileyo, nomshuqulu ngelineni elicolekileyo, nebhande elifekethisiweyo.
Uyowathungela amabhantshi amadodana ka-Aroni, amabhande, nezigqoko, kube ngawokuhloba kwawo.
Uyokugqokisa u-Aroni, umfowenu namadodana akhe. Uyobagcoba, ubabeke, ubangcwelise ukuba bangikhonze bengabaphristi.
“Uyobenzela namabhulukwe elineni ukuze kufihlwe ubunqunu babo, asuke okhalo aze afinyelele emathangeni.
U-Aroni namadodana akhe bayowagqoka lapho bengena ethendeni lokuhlangana, nalapho besondela e-althare ukuyokhonza endaweni engcwele, uma bengenzi kanjalo bayakuzithwesa icala, bafe. Lokhu kuyakuba yisimiso saphakade kuye nasezizukulwaneni zakhe kuze kube phakade.
“Yilokhu oyokwenza lapho usubehlukanisa ukuze bangikhonze bengabaphristi. Thatha iduna lenkomo, izinqama ezimbili okungenasici,
isinkwa esingenamvubelo, namaqebelengwane angenamvubelo agcotshwe ngamafutha, ukwenze ngempuphu kakolo ecolisekileyo.
Uyokufaka eqomeni elilodwa ukulethe ngalo, ulethe neduna, nezinqama ezimbili.
Uyoletha u-Aroni namadodana akhe ngasemnyango wethende lokuhlangana, ubageze ngamanzi.
Bese uthatha izingubo zobuphristi umgqokise u-Aroni ingubo, ibhantshi, ingubo yamahlombe, nesivikelo sesifuba, umbophe ngebhande lengubo yamahlombe elifekethisiweyo.
Uyakumethwesa umshuqulu ekhanda, bese ubophela umqhele ongcwele emshuqulweni.
Uyothatha amafutha okugcoba uwathele ekhanda lakhe, umgcobe.
Uyosondeza namadodana akhe, uwagqokise amabhantshi.
Uyobopha u-Aroni namadodana akhe ngemibhunkulo okhalo lwabo, ubathwese nezigqoko, ubuphristi buyakuba ngobabo ngokwesimiso saphakade. Uyakumbeka kanjalo u-Aroni namadodana akhe.
“Uyoletha inkunzi phambi kwethende lokuhlangana. U-Aroni namadodana akhe bayokubeka izandla zabo ekhanda layo.
Uyoyihlaba inkunzi phambi kukaSimakade ngasemnyango wethende lokuhlangana.
Uyothatha ingxenye yegazi layo ulininde ngomunwe wakho ezimpondweni ze-althare, bese kuthi yonke ingxenye yegazi eliseleyo ulithululele phansi esisekelweni se-althare.
Uyowathatha wonke amafutha emboze okwangaphakathi, namanoni asesibindini, nezinso zombili namanoni akuzo, ukushise e-althare.
Kodwa inyama yenkunzi, nesikhumba sayo, nomswani wayo, uyokushisela ngaphandle kwenkambu; kungumnikelo wesono.
“Uyothatha futhi enye yezinqama, bese u-Aroni namadodana akhe bebeka izandla zabo ekhanda layo.
Uyoyihlaba inqama bese uthatha igazi layo ulifafaze nxazonke ze-althare.
Uyoyihlahla inqama, ugeze ezangaphakathi nemilenze yayo, ukubeke ndawonye nezitho nenhloko yayo.
Uyoyishisa yonke inqama e-althare ngoba ingumnikelo wokushiswa kuSimakade; iyiphunga elimnandi; ingumnikelo womlilo kuSimakade.
“Uyothatha inqama yesibili bese u-Aroni namadodana akhe bebeka izandla zabo ekhanda layo.
Uyoyihlaba inqama, bese uthatha ingxenye yegazi layo uninde indlebe ka-Aroni yakwesokunene, izindlebe zakwesokunene zamadodana akhe, izithupha zakwesokunene zezandla zabo, noqukula babo bezinyawo zakwesokunene, bese igazi ulifafaza nxazonke ze-althare.
Uyothatha ingxenye yegazi elise-althare namafutha okugcoba ufafaze ngakho u-Aroni nezingubo zakhe, namadodana akhe nezingubo zawo, ngakho-ke yena nezingubo zakhe uyokuba ngcwele, kanjalo namadodana akhe nezingubo zawo.
“Uyothatha amanoni enqama, amanoni omsila, umhlwehlwe, amanoni asesibindini, izinso zombili namanoni azo, nomlenze wangakwesokudla, ngokuba yinqama yokubekwa kwabo.
Uyothatha eqomeni elethulwe phambi kukaSimakade, isinkwa, neqebelengwane lesinkwa esinamafutha, nekhekheba,
ukubeke konke lokhu ezandleni zika-Aroni nasezandleni zamadodana akhe, ukuzungezise kube ngumnikelo wokuzungeziswa phambi kukaSimakade.
Uyobuye ukuthathe ezandleni zabo ukushise e-althare phezu komnikelo wokushiswa kube yiphunga elimnandi phambi kukaSimakade; kungumnikelo womlilo kuSimakade.
“Uyothatha isifuba senqama yokugcotshwa kuka-Aroni, usizungezise, sibe ngumnikelo wokuzungeziswa phambi kukaSimakade; sibe yisabelo sakho.
Uyobusisa isifuba esizungezisiwe njengomnikelo wokuzungeziswa nomlenze ozungezisiwe njengomnikelo wokuzungeziswa enqameni yokugcotshwa kuka-Aroni, ukwehlukanise kulokho okungokuka-Aroni namadodana akhe.
Lezi zinto ziyokuba yisimiso saphakade ku-Aroni namadodana akhe ezivela kuma-Israyeli, ngokuba lokhu kungumnikelo, futhi kuyokuba ngumnikelo wabakwa-Israyeli ovela eminikelweni yabo yokuthula, okungumnikelo kuSimakade.
“Izingubo ezingcwele zika-Aroni ziyodluliselwa emadodaneni akhe emva kwakhe, ayakugcotshwa, abekwe ngazo.
Indodana eyokuba ngumphristi esikhundleni sakhe iyozigqoka lezi zingubo izinsuku eziyisikhombisa lapho ingena ethendeni lokuhlangana izokhonza endaweni engcwele.
“Uyothatha inqama yokugcotshwa, ubilise inyama yayo endaweni engcwele.
U-Aroni namadodana akhe bayodla inyama yenqama nesinkwa esiseqomeni ngasemnyango wethende lokuhlangana.
Bona uqobo bayodla ukudla okwenzelwe ukubuyisana ukuze bangcweliswe futhi bahlukaniswe, kodwa akuyukuba khona omunye oyokudla lokhu, ngokuba kungcwele.
Uma kusale inyama yokugcotshwa noma kusale isinkwa kwaze kwaba sekuseni, kuyokushiswa ngomlilo lokho okuseleyo, kungadliwa, ngokuba kungcwele.
“Uyokwenza kanjalo ku-Aroni nakumadodana akhe, njengalokhu ngikuyalile; ukubehlukanisa kuyothatha izinsuku eziyisikhombisa.
Uyonikela futhi nsuku zonke, inkunzi ibe ngumnikelo wesono nowokubuyisana. Uyonikela umnikelo wesono we-althare, nalapho ulenzela umnikelo wokuhlanjululwa, uyoligcoba, ulehlukanise.
I-althare uyolenzela ukubuyisana izinsuku eziyisikhombisa, ulingcwelise, libe ngcwele kakhulu, ukuze kuthi konke okulithintayo nakho kube ngcwele.”
“Manje yilokhu oyokunikela e-althare: amawundlu amabili anyaka munye imihla ngemihla.
Iwundlu elilodwa uyolinikela ekuseni, kuthi elinye ulinikele kusihlwa.
Iwundlu lokuqala uyolinikela nokweshumi kwempuphu ecolisekileyo, ihlanganiswe nokwesine eshumini kwehini lamafutha agxotshiweyo, nokwesine eshumini kwehini lewayini, kube ngumnikelo wokuphuzwayo.
Uyonikela ngelinye iwundlu kusihlwa, uyolinikela nomnikelo wokusanhlamvu nowokuphuzwayo njengasekuseni, kube yiphunga elimnandi, umnikelo womlilo kuSimakade.
“Lowo kuyokuba ngumnikelo wokushiswa imihla ngemihla, izizukulwane ngezizukulwane, oyokwenziwa ngasemnyango wethende lokuhlangana, phambi kukaSimakade, lapho ngiyohlangana nani ukuba ngikhulume nani khona.
Ngiyohlangana nabantu bakwa-Israyeli lapho, leyo ndawo iyakungcweliswa yinkazimulo yami.
“Ngiyongcwelisa ithende lokuhlangana ne-althare, ngingcwelise u-Aroni namadodana akhe ukuba bangikhonze bengabaphristi.
Ngiyohlala phakathi kwabantu bakwa-Israyeli, ngibe nguNkulunkulu wabo.
Bayokwazi ukuthi nginguSimakade uNkulunkulu wabo, owabakhipha eGibhithe ukuze ngihlale phakathi kwabo; nginguSimakade uNkulunkulu wabo.
“Uyokwenza i-althare okuyoshiswa kulo impepho, uyolenza ngokhuni lomkhambathi.
Ubude balo buyokuba yikhubhithi, nobubanzi balo bube yikhubhithi, libe yisikwele, ukuphakama kwalo kube ngamakhubhithi amabili. Izimpondo zalo zihlangane nalo.
Uyolicaka phezulu ngegolide elicwengekileyo, kuthi izinhlangothi zalo nxazonke, nezimpondo zalo, uzenzele unqenqema lwegolide macala wonke.
Uyolenzela amasongo amabili egolide phansi konqenqema lwalo ezinhlangothini ezimbili ezibhekene, ayokuba yizindawo zezingongolo eliyothwalwa ngazo.
Uyokwenza izingongolo ngokhuni lomkhambathi, uzicake ngegolide.
Uyolibeka i-althare phambi kwesihenqo esingaphezu komphongolo wesivumelwano, phambi kwesihlalo somusa esingaphezu kwawo, lapho ngiyohlangana nani khona.
“U-Aroni uyoshisa impepho enuka kamnandi njalo ekuseni, uyokuyishisa njalo ekuseni lapho elungisa izibani.
Nalapho u-Aroni esokhela izibani kusihlwa, uyakuyishisa impepho. Impepho iyoshiswa njalo phambi kukaSimakade, izizukulwane ngezizukulwane.
Aniyukunikela kulo ngempepho engengcwele, noma ngomnikelo wokushiswa, nangowokusanhlamvu, futhi aniyukuthela kulo umnikelo wokuphuzwayo.
U-Aroni uyokwenza umnikelo wokubuyisana phezu kwezimpondo zalo kanye ngonyaka. Izizukulwane ngezizukulwane, u-Aroni uyokwenza inkonzo yokulihlambulula kanye ngonyaka ngegazi lomnikelo wokuhlambulula isono. Lingcwelengcwele kuSimakade.”
USimakade wakhuluma kuMose, wathi:
“Lapho kubalwa abantu bakwa-Israyeli ukuze bonke babhaliswe, lapho bebhaliswa, bonke bayakukhokha inhlawulo yempilo yabo kuSimakade, ukuze bangehlelwa ubhubhane ngenxa yokubalwa.
Yilokhu okuyakunikelwa yinoma yimuphi oyobhalisela ukubalwa: ingxenye yeshekeli ngokwesilinganiso seshekeli lendawo engcwele, ishekeli lingamagera angama-20, ingxenye yeshekeli iyokuba ngumnikelo kuSimakade.
Yilowo nalowo osebaliwe, oneminyaka engama-20 ubudala nangaphezulu uyonikela umnikelo kuSimakade.
Ocebileyo akayukunikela eqise, kanjalo nompofu akayukunikela kancane kunengxenye yeshekeli lapho niletha lo mnikelo kuSimakade ukuze nihlawulele ukuphila kwenu.
Uyothatha imali yenhlawulo kubantu bakwa-Israyeli uyisebenzisele izinkonzo ethendeni lokuhlangana. Iyokuba yisikhumbuzo sesihlengo esenziwa ngenxa yempilo yabo phambi kukaSimakade, kubantu bakwa-Israyeli.”
USimakade wakhuluma kuMose, wathi:
“Uyokwenza indishi yethusi yokugezela, ibe nesinqe sethusi, uyoyibeka phakathi kwethende lokuhlangana ne-althare, uthele amanzi kuyo.
U-Aroni namadodana bayakugeza izandla nezinyawo zabo ngalawa manzi,
lapho bengena ethendeni lokuhlangana nalapho besondela e-althare ukuyokhonza, ukuyokwenza umnikelo wokushiswa kuSimakade, bayogeza ngamanzi ukuze bangafi.
Bayogeza izandla nezinyawo zabo ukuze bangafi. Lokhu kuyakuba ngumyalo ophakade kubo, kuye nasezizukulwaneni zakhe ngokwezizukulwane zazo.”
USimakade wakhuluma kuMose, wathi:
“Thatha izinongo zekhethelo: imure engamashekeli angama-500, isinamoni engama-250, ikalamu elinuka kahle elingama-250,
ikhasiya elingama-500 ngokweshekeli lendlu engcwele, nehini lamafutha omnqumo.
Uyokwenza ngalokhu amafutha okugcoba angcwele, anamakha athakiweyo njengokwenza komthaki, ayakuba ngamafutha angcwele okugcoba.
Uyakugcoba ngawo ithende lokuhlangana, umphongolo wesivumelwano,
itafula nezinto zonke zalo, uthi lwesibani nezinto ezikulo, i-althare lempepho,
i-althare lomnikelo wokushiswa nazo zonke izitsha zalo, nomcengezi nesinqe sawo.
Uyokungcwelisa ukuze kube ngcwele kakhulu; konke okuzithintayo kuyakuba ngcwele.
“Uyogcoba u-Aroni namadodana akhe, ubangcwelise ukuba bangikhonze bengabaphristi.
Uyakuthi kubantu bakwa-Israyeli: ‘Lawa ngamafutha ami angcwele okugcoba izizukulwane ngezizukulwane.
Awayukusetshenziswa ngabantu ukuba bagcobe ngawo imizimba yabo, futhi awuyukwenza amanye axutshwe njengawo, angcwele, futhi ayoba ngcwele kini.
Noma yimuphi oyogcoba ngawo umuntu ongafanele, uyonqunywa phakathi kwabantu.’ ”
USimakade wathi kuMose: “Thatha amakha anuka kamnandi: inathafi, ishehelethe, ihelibena, namakha empepho ecwengekileyo.
Uyokwenza ngakho impepho, ukuxube namakha njengomthaki, ukufake usawoti ukuze kube yinto ecwengekileyo nengcwele.
Uyoqotha ingxenye yakho ibe yimpuphu, bese ubeka ingxenye yakho phambi komphongolo wesivumelwano ethendeni lokuhlangana, lapho ngiyohlangana nani khona, iyoba ngcwelengcwele kini.
Uma uthaka impepho ngale ndlela, awuyukuyithaka kube ngeyakho; uyoyithatha ngokuthi ingcwele kuSimakade.
Yilowo nalowo oyokwenza enjengale ukuba ayisebenzise njengamakha akhe, uyakunqunywa kubantu bakubo.”
USimakade wakhuluma kuMose wathi:
“Bheka, ngimbize ngegama uBhezaleli indodana ka-Uri, ka-Huri wesizwe sakwaJuda,
futhi ngimgcwalise ngoMoya kaNkulunkulu, ngamandla okwazi, ngokuhlakanipha nangokwazi lonke uhlobo lomsebenzi wezandla,
ukuze asebenze ngobungcweti ngegolide, ngesiliva, nangethusi,
abaze amatshe ezisekelo, abaze ukhuni, enze nayo yonke imisebenzi yezandla enhlobonhlobo.
Ngaphezu kwalokho, ngimkhethile yena no-Oholiyabe, indodana ka-Ahisamakhi wesizwe sakwaDani, futhi ngibanike ubuchwepheshe bonke abanamakhono, ukuze benze konke engikuyale ukuba ukwenze:
ithende lokuhlangana, umphongolo wesivumelwano, isihlalo somusa esiphezu kwawo, nayo yonke impahla yethende,
itafula nayo yonke impahla yalo, uthi lwezibani olwenziwe ngegolide elicwengekileyo nazo zonke izinto zalo, ne-althare lokushisela impepho,
i-althare lokushisela umnikelo nezitsha zalo, umcengezi nesinqe sawo,
izingubo ezenziwe kahle, izingubo zomphristi u-Aroni, nezamadodana akhe, zokuba bakhonze bengabaphristi,
amafutha okugcoba, nempepho enuka kahle yendawo engcwele. Bayokwenza konke lokhu njengalokhu ngikuyalile.”
USimakade wathi kuMose:
“Wena uqobo khuluma kubantu bakwa-Israyeli, uthi: ‘Niyakugcina amasabatha ami, ngokuba awuphawu phakathi kwami nani, naphakathi kwezizukulwane zenu, ukuba nazi ukuthi nginguSimakade oningcwelisayo.
Niyogcina isabatha ngokuba lingcwele kini. Yilowo nalowo olingcolisayo uyobulawa, nalowo owenza umsebenzi ngalo uyonqunywa phakathi kwabantu.
Uyokwenza umsebenzi ngezinsuku eziyisithupha, kodwa usuku lwesikhombisa luyisabatha lokuphumula, usuku olungcwele kuSimakade. Yilowo nalowo owenza umsebenzi ngosuku lwesabatha uyobulawa.
Ngakho-ke abantu bakwa-Israyeli bayoligcina isabatha, bayoligcina izizukulwane ngezizukulwane njengesivumelwano saphakade.
Liwuphawu lwaphakade phakathi kwami nabantu bakwa-Israyeli, lokuthi uSimakade wadala izulu nomhlaba ngezinsuku eziyisithupha, kwathi ngosuku lwesikhombisa waphumula, wahlumeleleka.’ ”
USimakade eseqedile ukukhuluma noMose entabeni iSinayi, wamnika izibhebhe ezimbili zesivumelwano, izibhebhe zamatshe, zibhalwe ngomunwe kaNkulunkulu.
Lapho abantu bebona ukuthi uMose usephuzile ukwehla entabeni, babuthana ku-Aroni, bathi kuye: “Woza, usenzele onkulunkulu abazohamba phambi kwethu, ngokuba lo Mose, umuntu owasikhipha eGibhithe, asazi ukuthi wehlelwe yini.”
U-Aroni wathi kubo: “Khumulani amacici egolide asezindlebeni zomkenu, nakwezamadodana enu, nakwezamadodakazi enu, niwalethe kimi.”
Bonke abantu bawakhumula amacici ayesezindlebeni zabo, bawaletha ku-Aroni.
Wawathatha ezandleni zabo, wawancibilikisa, wabumba, waqopha, wenza ithole ngalolo bumba. Abantu bathi: “Nampa onkulunkulu bakho, Israyeli, abakukhuphula eGibhithe.”
Kuthe ukuba u-Aroni akubone lokho, wakha i-althare phambi kwethole, wenza isimemezelo, wathi: “Kusasa kuzokuba nomkhosi kaSimakade.”
Abantu bavuka ekuseni ngakusasa, banikela ngeminikelo yokushiswa, baletha iminikelo yokuthula; bahlala phansi ukuba badle, baphuze; basukuma ukuba badlale.
USimakade wakhuluma kuMose, wathi: “Phuthuma wehle, ngokuba abantu bakho owabakhipha eGibhithe benze isono.
Basheshe baphambuka endleleni engabayala ngayo. Bazenzele ithole elibunjiweyo, balikhonza, balihlabela, bathi: ‘Nampa onkulunkulu bakho, Israyeli, abakukhipha eGibhithe.’ ”
USimakade wathi kuMose: “Ngibabonile laba bantu; bheka, bangabantu abantamo ilukhuni.
Ngakho-ke ngiyeke ukuze ulaka lwami lubavuthele, ngibaqede nya, wena ngikwenze ube yisizwe esikhulu.”
UMose washweleza kuSimakade uNkulunkulu wakhe, wathi: “Simakade, ulaka lwakho lubavuthelelani abantu bakho owabakhipha eGibhithe ngamandla amakhulu, nangesandla esiqinileyo na?
Abazukusho yini abaseGibhithe bathi: ‘Wabakhipha ehlose okubi, ukuba ababulalele ezintabeni, abaqothe baphele nya emhlabeni.’ Phenduka olakeni lwakho olukhulu, uguqule umqondo wakho, ungabehliseli okubi abantu bakho.
Khumbula u-Abhrahama, u-Isaka, noJakobe, izinceku zakho owazifunga Wena kuzo, wathi: ‘Ngiyokwandisa izizukulwane zenu zibe ngangezinkanyezi zezulu, ngizinike lonke leli lizwe enganethembisa lona, libe yifa lazo kuze kube phakade.’ ”
USimakade wawuguqula umqondo wakhe ngenhlekelele ayehlose ukuyehlisela abantu bakhe.
UMose waphenduka, wehla entabeni ephethe ezandleni zakhe izibhebhe ezimbili zesivumelwano ezazibhalwe nxazombili, zibhalwe ngaphambili nangemuva.
Izibhebhe lezo zazingumsebenzi kaNkulunkulu, nombhalo, ubhalwe nguNkulunkulu, wawuqopha ezibhebheni zamatshe.
Lapho uJoshuwa ezwa umsindo wabantu bememeza, wathi kuMose: “Kunomsindo wempi enkanjini.”
UMose wathi: “Akusiwo umsindo wokunqoba, noma wokwehlulwa, kodwa ngizwa umsindo wokuhlabelela.”
Kuthe esesondele enkanjini, wabona ithole nokusina, wathukuthela wagana unwabu, wazilahla phansi izibhebhe ayeziphethe, wazephula phansi kwentaba.
Wathatha ithole ababelenzile, walishisa ngomlilo, waligaya lacoliseka laba luthuli, waluvuvuzela emanzini, wabaphuzisa wona abantu bakwa-Israyeli.
UMose wathi ku-Aroni: “Benzeni kuwe laba bantu ukuba ubehlisele isono esingaka na?”
U-Aroni wathi: “Ungangithukutheleli nkosi yami. Uyabazi abantu ukuthi bathanda ukwenza okubi.
Bathi kimi: ‘Senzele onkulunkulu abazohamba phambi kwethu, ngokuba uMose lowo, umuntu owasikhipha eGibhithe, asazi ukuthi wehlelwe yini.’
Ngase ngithi kubo: ‘Umuntu onegolide makalikhumule,’ base benginika lona, ngaliphonsa emlilweni, kwaphuma leli thole.”
UMose wabona ukuthi abantu sebeyimidlwembe, ngokuba u-Aroni wayebayekile baphuma esandleni, baze bahlekwa yizitha zabo.
UMose wayesema esangweni enkanjini, wathi: “AbakaSimakade mabeze kimi.” Wonke amadodana kaLevi abuthana kuye.
Wayesethi kuwo: “Usho kanje uSimakade uNkulunkulu ka-Israyeli, uthi: ‘Yilowo nalowo makagaxe inkemba enqulwini yakhe, adabule enkanjini, ehle enyuka kusukela kwelinye isango kuya kwelinye isango enkanjini, yilowo nalowo abulale umfowabo, umngani wakhe, nomakhelwane wakhe.’ ”
Amadodana kaLevi enza njengoba ayeshilo uMose. Abulala abantu ababalelwa kwabayizi-3 000 ngalolo lusuku.
UMose wayesethi: “Namhlanje nizehlukanisele umsebenzi kaSimakade, ngokuba yilowo nalowo umelene nendodana yakhe, nomfowabo, ngaleyo ndlela nazilethela isibusiso namuhla.”
Ngakusasa uMose wathi kubantu: “Nenze isono esikhulu. Kepha manje ngizakukhuphukela kuSimakade, hleze ngikwazi ukunihlawulela isono senu.”
UMose wabuyela kuSimakade, wathi: “Maye! Laba bantu benze isono esikhulu, bazenzele onkulunkulu ngegolide.
Nokho ngiyakunxusa ukuba uthethelele isono sabo; uma ungabathetheleli, ngesule encwadini yakho oyibhalileyo.”
USimakade wathi kuMose: “Owonileyo ngiyomesula encwadini yami.
Hamba manje, uhole abantu ubayise endaweni engakhuluma ngayo kuwe. Uyabona-ke, ingelosi yami izohamba phambi kwakho, kodwa lapho lufika usuku lokubajezisa, ngiyobajezisa ngenxa yesono sabo.”
USimakade wayesebashaya abantu ngobhubhane, ngokuba benza ithole, lelo elalenziwe ngu-Aroni.
USimakade wathi kuMose: “Hamba, suka kule ndawo, wena nabantu owabakhipha eGibhithe, niye ezweni engafunga ngalo ku-Abhrahama, no-Isaka, noJakobe, ngathi: ‘Ngiyolinika izizukulwane zakho.’
Ngizothuma ingelosi phambi kwakho, ngiwaxoshe amaKhanani, ama-Amori, amaHithi, amaPherizi, amaHivi, namaJebusi.
Khuphukani niye ezweni elichichima ubisi noju, kodwa Mina ngeke ngibe phakathi kwenu, ngokuba ningabantu abantamo lukhuni, funa nginiqede nya endleleni.”
Kwathi ukuba abantu bezwe leyo ndaba embi, bakhala, akwaba bikho muntu owahloba ngobucwebecwebe bakhe.
Ngokuba uSimakade wayethe kuMose: “Shono kubantu bakwa-Israyeli, uthi: ‘Ningabantu abantamo lukhuni, uma nje ngingakhuphuka nani umzuzu ube munye, ngiyoniqothula nya. Ngakho-ke khumulani imvunulo yenu ukuze nginqume ukuthi ngizonenzenjani.’ ”
Abantu bakwa-Israyeli bayihlubula imvunulo yabo kusukela entabeni yaseHorebhe.
UMose wayevame ukuthatha ithende alimise ngaphandle kwenkambu, buqamama nayo, walibiza ngokuthi yithende lokuhlangana. Yilowo nalowo owayenodaba afuna ukuzwa ngalo kuSimakade, wayehamba aye ethendeni lokuhlangana elalingaphandle kwenkambu.
Noma nini lapho uMose eya ethendeni, bonke abantu babesukuma, kube yilowo nalowo ame ngasemnyango wethende lakhe, bambuke uMose aze ayongena ethendeni.
Lapho uMose engena ethendeni, kwakwehla insika yefu ime emnyango wethende, bese uSimakade ekhuluma noMose.
Lapho bonke abantu bebona insika yefu imi ngasemnyango wethende, bonke babesukuma, bakhothame, yilowo nalowo ngasemnyango wethende lakhe.
USimakade wakhuluma kanjalo noMose ubuso nobuso, njengomuntu ezikhulumela nomngani wakhe. Wabuyela enkanjini, kodwa inceku yakhe, insizwa enguJoshuwa indodana kaNuni, ayiphumanga ethendeni.
UMose wathi kuSimakade: “Bheka, uthe kimi: ‘Khuphula laba bantu,’ kodwa awungitshelanga ukuthi ngubani oyakumthuma nami. Uthe: ‘Ngiyakwazi ngegama, futhi ufumene umusa emehlweni ami.’
Ngakho-ke uma ngifumene umusa emehlweni akho, ake ungibonise izindlela zakho ukuba ngikwazi, ngifumane umusa emehlweni akho. Khumbula futhi ukuthi lesi sizwe singabantu bakho.”
USimakade wathi: “Ngizohamba nawe Mina uqobo, futhi ngiyakukuphumuza.”
UMose wathi kuye: “Uma Wena uqobo ungahambi nathi, ungasikhuphuli lapha.
Kuyokwaziwa kanjani ukuthi ngifumene umusa emehlweni akho, mina nabantu bakho, uma ungahambi nathi na? Akusikhona yini ukuhamba nathi okuzokwenza ukuthi mina nabantu bakho sehluke kubo bonke abanye abantu abasemhlabeni na?”
USimakade wathi kuMose: “Ngizokwenza nalokho okucelileyo, ngokuba ufumene umusa emehlweni ami, futhi ngikwazi ngegama.”
UMose wathi: “Ngiyakuncenga, ake ungibonise inkazimulo yakho.”
USimakade wathi: “Ngiyakudlulisa phambi kwakho bonke ubuhle bami, ngimemeze phambi kwakho igama likaSimakade, ngibe nomusa kulowo engithanda ukuba nomusa kuye, nesihe kulowo engithanda ukuba nesihe kuye.”
Wathi: “Awunakububona ubuso bami, ngokuba akukho muntu ongangibona qede aphile.”
USimakade wathi: “Bheka, nansi indawo ngakimi, uyokuma edwaleni.
Kuyokuthi lapho yedlula inkazimulo yami, ngikufake emfantwini wedwala, ngikusithe ngesandla sami ngize ngidlule.
Bese ngisisusa isandla sami, ubone umhlane wami, kodwa ubuso bami abuyukubonwa.”
USimakade wathi kuMose: “Zibazele izibhebhe ezimbili zamatshe zifane nezokuqala. Ngizobhala kuzo amazwi ayesezibhebheni zokuqala owazephulayo.
Zilungiselele ukuba ekuseni kusasa ukhuphukele entabeni iSinayi, uzibonakalise khona phambi kwami esiqongweni sentaba.
Akuyukukhuphuka muntu nawe, futhi makungabonakali muntu entabeni yonke, kungaklabi ngisho izimvu, izimbuzi nezinkomo phambi kwaleyo ntaba.”
UMose wabaza izibhebhe ezimbili zamatshe zafana nezokuqala, wavuka ekuseni ngovivi, wakhuphukela entabeni iSinayi njengoba uSimakade ayemyalile, ephethe izibhebhe ezimbili zamatshe.
USimakade wehla ngefu, wama naye lapho, wamemezela igama likaSimakade.
USimakade wadlula phambi kwakhe, wamemezela wathi: “USimakade! USimakade! UNkulunkulu onesihe nomusa, ophuza ukuthukuthela, novame ubumnene nokwethembeka,
ogcina umusa kubo abayizinkulungwane, athethelele ububi neziphambeko nezono, nokho ongayukumyeka engamjezisanga onecala, ohambela ububi babazali kubantwana, nakubantwana babantwana, kuze kube yisizukulwane sesithathu nesesine.”
UMose washeshe wakhothamela emhlabathini, wakhuleka.
Wathi: “Ngiyakuncenga, Nkosi, uma ngifumene umusa emehlweni akho, uSimakade makahambe nathi, nakuba laba bantu bengontamolukhuni. Sixolele ububi bethu, nezono zethu, usithathe sibe yifa lakho.”
Wathi kuMose: “Bheka, ngenza isivumelwano phambi kwabo bonke abantu bakho. Ngiyokwenza izimangaliso phambi kwabo bonke abantu bakho, ezingakaze zenziwe emhlabeni wonke, naphakathi kwezizwe zonke. Bonke abantu enihlala phakathi kwabo bayokuwubona umsebenzi kaSimakade, ngokuba kuyinto eyesabekayo lokhu engizokwenza ngawe.
Qaphela lokhu engikuyala ngakho namuhla. Uyabona-ke, ngizowaxosha phambi kwakho ama-Amori, amaKhanani, amaHithi, amaPherizi, amaHivi namaJebusi.
Qikelela ukuba ungenzi isivumelwano nabantu bezwe oya kulo, funa babe lugibe kuwe.
Kepha niyobhidliza ama-althare abo, niphihlize izinsika zabo, nigawule o-Ashera babo.
Ngokuba aniyukukhonza omunye unkulunkulu, lokhu uSimakade, ogama lakhe linguMhawu, unguNkulunkulu onomhawu.
Awuyukwenza isivumelwano nabantu balelo lizwe. Kuyothi lapho bephinga nonkulunkulu babo, bebahlabela imihlatshelo, omunye kubo akumeme, bese udla umhlatshelo wakhe;
uthathele amadodana akho amadodakazi abo aphinga nonkulunkulu babo, bese enza ukuba amadodana akho aphinge nonkulunkulu babo.
“Awuyukuzenzela onkulunkulu ababunjiweyo.
“Uyowugcina umkhosi wesinkwa esingenamvubelo. Uyakudla isinkwa esingenamvubelo izinsuku eziyisikhombisa njengoba ngakuyala, ngesikhathi esimisiweyo ngenyanga u-Abibi, ngokuba ngale nyanga waphuma eGibhithe.
“Wonke amazibulo angawami, ngisho namazibulo amaduna emfuyweni yakho, namazibulo ezinkomo zakho nezimvu zakho.
“Izibulo lembongolo uyolihlenga ngewundlu; uma ungalihlengi, uyolephula intamo. Wonke amazibulo emadodaneni akho uyowahlenga. Akuyukuza muntu phambi kwami engaphethe lutho.
“Uyosebenza izinsuku eziyisithupha, uphumule ngosuku lwesikhombisa. Uyophumula ngisho nangesikhathi sokulima nesokuvuna.
“Uyowugcina umkhosi wamaviki, owolibo lukakolo ovuniweyo, nomkhosi wokuvuna ekupheleni konyaka.
Bonke abesilisa bayobonakala kathathu ngonyaka phambi kweNkosi uSimakade, uNkulunkulu ka-Israyeli.
Ngokuba ngiyozixosha izizwe phambi kwakho, ngandise imingcele yakho, akukho muntu oyonxanela izwe lakho lapho ukhuphuka ukuyobonakala kathathu ngonyaka phambi kukaSimakade uNkulunkulu wakho.
“Awuyukunikela ngegazi lomhlatshelo wami nesinkwa esinemvubelo. Umhlatshelo womkhosi wephasika awuyukuhlala kuze kuse.
“Uyoletha endlini kaSimakade uNkulunkulu wakho isivuno sakho sokuqala. “Awuyukulipheka izinyane lembuzi ngobisi lukanina.”
USimakade wathi kuMose: “Zibhalele lawa mazwi, ngokuba ngalawa mazwi ngenzile isivumelwano nawe no-Israyeli.”
Wahlala lapho noSimakade izinsuku ezingama-40, nobusuku obungama-40, akadlanga lutho, futhi akaphuzanga manzi. Wabhala ezibhebheni amazwi esivumelwano, imiyalelo elishumi.
Ngesikhathi uMose ehla entabeni iSinayi ephethe izibhebhe ezimbili zobufakazi esandleni sakhe, wayengazi ukuthi isikhumba sobuso bakhe sasikhazimula, ngokuba wayekade ekhuluma noSimakade.
Lapho u-Aroni nabo bonke abantu bakwa-Israyeli bembona uMose, isikhumba sobuso bakhe sasikhazimula, ngakho-ke besaba ukusondela kuye.
Kepha uMose wababiza, u-Aroni nabo bonke abaholi bakwa-Israyeli, beza kuye, wakhuluma nabo.
Sekwedlule lokho, bonke abantu bakwa-Israyeli basondela, wayesebayala ngakho konke uSimakade ayekukhulume kuye entabeni iSinayi.
UMose eseqedile ukukhuluma nabo, wamboza ubuso bakhe ngemvakazi.
Kodwa lapho uMose eya phambi kukaSimakade eyokhuluma naye wayeyisusa imvakazi, aze aphume. Uma esephumile wayekhuluma kubantu bakwa-Israyeli lokho ayekuyaliwe.
Abakwa-Israyeli babubona ubuso bukaMose ukuthi isikhumba sabo siyakhazimula; uMose wayebumboza ngemvakazi aze ayisuse uma eseyokhuluma noSimakade.
UMose walihlanganisa lonke ibandla lakwa-Israyeli, wathi kulo: “Yilokhu uSimakade aniyala ngakho ukuba nikwenze:
niyosebenza izinsuku eziyisithupha, kodwa ngosuku lwesikhombisa niyokuba neSabatha likaSimakade elingcwele lokuphumula, yilowo nalowo owenza umsebenzi ngalo uyobulawa.
Aniyukuwubasa umlilo emakhaya enu ngosuku lwesabatha.”
UMose wathi kuyo yonke inhlangano yabantu bakwa-Israyeli: “Yilokhu uSimakade ayale ngakho, ethi:
thathani phakathi kwenu umnikelo ube ngokaSimakade, bonke abanenhliziyo ethandayo mabanikele kuSimakade: ngegolide, ngesiliva, ngethusi;
ngokuluhlaza okwesibhakabhaka, ngokubukhwebezane, ngokubomvu, ngelineni elicolekileyo, ngoboya bezimbuzi;
ngezikhumba zezinqama ezidaywe zabomvu, ngezikhumba zamahlengethwa, ngokhuni lomkhambathi,
ngamafutha okukhanyisa izibani, ngezinongo zamafutha okugcoba nezempepho,
nangamatshe ama-oniksi namanye aligugu ukuze afakwe engutsheni yamahlombe nasesivikelweni sesifuba.
“Bonke abanekhono phakathi kwenu bayokuza bezokwenza konke uSimakade ayale ukuba kwenziwe:
ithabanakeli, ithende lalo, nokokulifulela, izinkintsho zalo, amapulangwe alo, amabhaluko alo, izinsika zalo nezisekelo zalo;
umphongolo nezingongolo zawo, isihlalo somusa, namakhethini okuhenqa;
itafula nezinti zalo, nazo zonke izitsha zalo, nesinkwa soBukhona bakhe;
uthi lwesibani sokukhanyisa, izitsha zalo, izibani zalo, amafutha okukhanyisa,
i-althare lempepho nezingongolo zalo, amafutha okugcoba, impepho enuka kamnandi, isihenqo somnyango wokungena ethabanakeli;
i-althare lomnikelo wokushiswa, ithusi elinanyatheliselwe kulo nezingongolo zalo, nazo zonke izitsha zalo, nomcengezi nesinqe sawo,
amakhethini egceke, izinsika zalo, izisekelo zalo, ikhethini lasesangweni legceke,
izikhonkwane zethabanakeli, ezegceke, izintambo zazo,
izingubo ezifekethisiweyo zokukhonza endaweni engcwele, izingubo ezingcwele zika-Aroni umphristi, nezamadodana akhe zokukhonza bengabaphristi.”
Inhlangano yonke yabantu bakwa-Israyeli yayisisuka phambi kukaMose.
Bafika bonke labo ababenezinhliziyo ezithintekileyo, benentshisekelo emoyeni wabo. Baletha kuSimakade umnikelo owawuzosetshenziswa ethendeni lokuhlangana, nakuyo yonke eminye imisebenzi yalo, nokuthunga izingubo ezingcwele.
Beza abesilisa nabesifazane, bonke ababenezinhliziyo ezazinentshisekelo, baletha amacici, nalawo asemakhaleni, izindandatho, amasongo, nazo zonke izinto zegolide, bonke banikela kuSimakade ngomnikelo wegolide.
Bonke okwatholakala kubo okuluhlaza okwesibhakabhaka, okubukhwebezane, okubomvu, ilineni elicolekileyo, uboya bezimbuzi, izikhumba zezinqama ezidaywe zabomvu, nezikhumba zamahlengethwa, lokho bakuletha.
Bonke abanikela ngomnikelo wesiliva nowethusi bakuletha kwaba ngumnikelo kuSimakade, nabo bonke okwafunyanwa kubo izingodo zokhuni lomkhambathi ezazingenza lowo msebenzi, baziletha.
Bonke abesifazane ababenekhono, baphotha ngezandla zabo, base beletha lokho ababekuphothile okuluhlaza okwesibhakabhaka, okubukhwebezane, okubomvu, nelineni elicolekileyo.
Bonke abesifazane ababethintekile ezinhliziyweni, baphotha uboya bezimbuzi.
Abaholi baletha amatshe e-oniksi, amatshe engubo yamahlombe aligugu, awesivikelo sesifuba,
amakha, amafutha okukhanyisa nawokugcoba, nempepho enamakha amnandi.
Bonke abantu bakwa-Israyeli, abesilisa nabesifazane, baletha ngokukhululeka noma yini ukuze kwenzeke umsebenzi uSimakade ayemyalile uMose ukuba wenziwe, bakuletha kuSimakade njengomnikelo wesihle.
UMose wathi kubantu bakwa-Israyeli: “Bhekani, uSimakade umbize ngegama uBhezaleli indodana ka-Uri, kaHuri, wesizwe sakwaJuda.
Umgcwalise ngoMoya kaNkulunkulu, wamupha ikhono, ukuqonda, ulwazi lwanoma yiluphi uhlobo lomsebenzi wezandla,
ukuba enze imisebenzi yobungcweti, asebenzise igolide, isiliva nethusi,
aqophe amatshe okuhlobisa, abaze ukhuni, nokuba enze yonke imisebenzi yobungcweti.
USimakade umphile yena no-Oholiyabhe indodana ka-Ahisamakhi, wesizwe sakwa-Dani ikhono lokufundisa.
Ubagcwalise ngokuhlakanipha ukuba benze yonke imisebenzi eyenziwa ngumqophi, ingcweti, nomfekethisi, ngokuluhlaza okwesibhakabhaka, ngokubukhwezane, ngokubomvu, nangelineni elicolekileyo, nemisebenzi yomaluki, eyalabo abenza noma yimuphi umsebenzi, nabenza imisebenzi yobungcweti.
“UBhezaleli no-Oholiyabhe bayosebenza nabo bonke abanekhono, uSimakade abeke kubo ukuhlakanipha, ukuqonda nokwazi ukwenza wonke umsebenzi wokwakha indawo engcwele, ngendlela uSimakade ayale ngayo.”
UMose wabiza uBhezaleli, u-Oholiyabhe nabo bonke abanekhono, uSimakade ayebaphe ukuhlakanipha, bonke ababenhliziyo zifisa ukuba bazokwenza lo msebenzi.
UMose wabanika bonke umnikelo wesihle abantu bakwa-Israyeli ababewulethele umsebenzi wokwakhiwa kwendawo engcwele. Babewuletha kuye umnikelo wesihle njalo ekuseni imihla ngemihla,
kwaze kwathi bonke abanamakhono ababenza imisebenzi eyehlukene endaweni engcwele beza kuMose, yilowo nalowo esuka emsebenzini ayewenza,
bathi kuMose: “Abantu baletha izinto eziningi kakhulu kunalezo ezidingekileyo ukwenza umsebenzi uSimakade ayale ukuba wenziwe.”
Ngakho-ke uMose wakhipha umyalo kwase kuyamenyezelwa enkanjini kuthiwa: “Akungabe kusaba bikho muntu wesilisa nowesifazane oletha umnikelo wendawo engcwele.” Abantu banqindwa ukuletha umnikelo,
ngokuba lokho abase bekulethile kwakungaphezu kokwanele ukuqeda wonke umsebenzi.
Bonke ababeyizingcweti phakathi kwabo, bakha ithabanakeli ngamakhethini alishumi elineni lemicu ephothiweyo elicolekileyo, nangokuluhlaza okwesibhakabhaka, ngokubukhwebezane, nangokubomvu, kwathi ngobugcweti obukhulu bawahlobisa ngamakherubhi.
Ubude bekhethini babungamakhubhithi angama-28, ububanzi balo bungamakhubhithi amane; wonke ayelingana.
Bawahlanganisa amakhethini amahlanu baxhuma elinye kwelinye; namanye ayisihlanu bawahlanganisa baxhuma elinye kwelinye.
Benza izinkintsho ngokuluhlaza okwesibhakabhaka emphethweni engxenyeni engasekugcineni kwamakhethini okuqala, benza kanjalo futhi nasesiqeshini esingasekugcineni kwamakhethini esibili.
Benza izinkintsho ezingama-50 ekhithinini lokuqala. Benza nezinye ezingama-50 emphethweni wekhethini elihlanganisiweyo lesibili; amakhethini abhekana.
Benza izinkintsho zegolide ezingama-50 bahlanganisa ngazo amakhethini, ngakho-ke ithabanakeli laliyinto eyodwa.
Benza amakhethini ngoboya bezimbuzi, aba wuphahla lwethabanakeli; bawenza amakhethini aba li-11.
Ubude bekhethini babungamakhubhithi angama-30, ububanzi bawo bungamakhubhithi amane; amakhethini ali-11 ayelingana.
Bawahlanganisa amahlanu bawenza isiqephu esisodwa, nayisithupha ngokufanayo.
Benza izinkintsho ezingama-50 emphethweni wekhethini elaligcinile ekhethinini lokuqala, benza futhi izinkintsho ezingama-50 emphethweni wekhethini elaligcinile esiqeshini sesibili.
Benza izinkintsho zethusi zokuhlanganisa ithende ezingama-50, ukuze libe yinto eyodwa.
Benza okokufulela ithende ngezikhumba zezinqama ezidaywe zabomvu. Benza nokunye kokumboza phezulu ngezikhumba zamahlengethwa.
Benza amapulangwe ethende ngokhuni lomkhambathi, bawamisa.
Ubude bepulangwe babungamakhubhithi alishumi, ububanzi balo buyikhubhithi nengxenye.
Ipulangwe ngalinye lalinezikhonkwane ezimbili zokulixhumanisa; benza kanjalo kuwo wonke amapulangwe ethabanakeli.
Benza amapulangwe ethabanakeli angama-20 ohlangothini lwaseningizimu, olubheke eningizimu ngendlela efanayo.
Benza izisekelo ezingama-40, zizimbili phansi kwalelo nalelo pulangwe.
Ohlangothini lwesibili lwethabanakeli ngasenyakatho benza amapulangwe angama-20,
nezisekelo zesiliva ezingama-40, zizimbili phansi kwepulangwe ngalinye, kanjalo nalandelayo.
Ngasohlangothini olungemuva kwethabanakeli ngasentshonalanga, benza amapulangwe ayisithupha.
Benza amapulangwe amabili emagunjini angemuva ethabanakeli.
Ayehlukene phansi, ehlangene phezulu esongweni; bawenza omabili ngale ndlela emagunjini omabili.
Kwakunamapulangwe ayisishiyagalombili nezisekelo zawo zesiliva ezili-16; phansi kwalelo nalelo pulangwe kwakunezisekelo ezimbili.
Benza imishayo ngokhuni lomkhambathi, yaba mihlanu eyamapulangwe asohlangothini olulodwa lwethabanakeli,
nemishayo emihlanu yamapulangwe akolunye uhlangothi lwethabanakeli, neminye emihlanu entshonalanga ngasemuva kwethabanakeli.
Benza umshayo ophakathi nendawo, ukuba udabule usuka kulolu hlangothi, uye kolunye uhlangothi lwamapulangwe.
Bawacaka amapulangwe ngegolide, benza amasongo awo ngegolide ukuze abambe imishayo, bayicaka nemishayo ngegolide.
Benza ikhethini ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, lahlotshiswa ngamakherubhi ngobungcweti obukhulu.
Balenzela izinsika ezine ngokhuni lomkhambathi bazicaka ngegolide, izinkintsho zalo ziyigolide. Balenzela nezisekelo ezine zesiliva.
Benza amakhethini ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo, umsebenzi wengcweti yokuhlobisa.
Benza izinsika ezinhlanu nezinkintsho zazo, bacaka izihloko zezinduku nezisekelo ngegolide, kodwa izisekelo zazo ezinhlanu zazingezethusi.
UBhezaleli wawakha umphongolo ngokhuni lomkhambathi; waba ngamakhubhithi amabili nengxenye ubude, yikhubhithi nengxenye ububanzi, nekhubhithi nengxenye ukuphakama.
Wawucaka ngegolide elicolekileyo ngaphakathi nangaphandle, wenza unqenqema lwegolide lwawuzungeza.
Wawenzela amasongo amane egolide ezinyaweni zozine zawo, amasongo ngamabili ngakulolu hlangothi, namabili ngakolunye uhlangothi.
Wenza izingongolo ngokhuni lomkhambathi, wazicaka ngegolide,
wafaka izingongolo emasongweni ezinhlangothini zomphongolo, ukuze uthwalwe ngazo.
Wenza isihlalo somusa ngegolide elicolisekileyo; saba ngamakhubhithi amabili nengxenye ubude, nekhubhithi nengxenye ububanzi.
Wenza amakherubhi amabili ngegolide elicangcathiweyo; wawabeka ezinhlangothini zombili ekugcineni kwesihlalo somusa,
ikherubhi ngalinye ekugcineni kwalolu hlangothi lwesihlalo somusa, nelinye ekugcineni kolunye uhlangothi, kulelo nalelo chopho lesivalo.
Amakherubhi ayendlale amaphiko awo phezu kwesihlalo somusa, esembozile; ebhekene ngobuso bawo, ayesebheka esihlalweni somusa.
Walakha itafula ngokhuni lomkhambathi, laba ngamakhubhithi amabili ubude, nekhubhithi ububanzi, nekhubhithi nengxenye ukuphakama.
Walicaka ngegolide elicolisekileyo, wenza unqenqema lwegolide nxazonke.
Walenzela unqenqema olungangokuvuleka kwesandla ububanzi, walucaka ngegolide elicolisekileyo nxazonke.
Wenza amasongo egolide amane, wawafaka emakhoneni alo omane, asemilenzeni yalo.
Amasongo okufaka izingongolo zokulithwala ayesondelene nonqenqema.
Wenza izingongolo ngokhuni lomkhambathi, wazicaka ngegolide.
Wenza ngegolide elicolisekileyo imicengezi eyayizohlala etafuleni, izingqwembe, nezitsha zempepho, izinkezo, nezindebe ezisetshenziselwa umnikelo wewayini.
Wenza futhi nothi lwezibani ngegolide elicolisekileyo, isinqe salo nothi lwalo kwakwenziwe ngokucangcathiweyo; izindebe, izimbali nemidumba kuhlanganisiwe kwaba yinto eyodwa.
Kwakukhona amagatsha ayisithupha ayexhume esiqwini sezibani, emathathu ohlangothini ngalunye.
Kwelinye igatsha kwakunezindebe ezintathu ezazimi njengezimbali zomu-alimondi, yileyo naleyo inemidumba nembali. Kwelinye igatsha kwakunezindebe ezintathu ezazimi njengezimbali zomu-alimondi, yileyo naleyo inemidumba nembali. Kwakunjalo kuwo wonke amagatsha ayisithupha aphuma othini lwezibani.
Othini lwesibani kwakukhona izindebe ezine ezazimise okwembali yomu-alimondi, zinemidumba nembali.
Kwakunomdumba ngaphansi kwamagatsha amabili, neminye imidumba phansi kwalelo nalelo gatsha, wonke amagatsha ayisithupha ayephuma kulo.
Imidumba namagatsha ayephuma kulo, konke kwakungumsebenzi owodwa ocangcathiweyo wegolide elicwengekileyo.
Wenza izibani zalo eziyisikhombisa, nezindlawu zalo nezingqwembe zegolide elicwengekileyo zokukhongozela amalahle avuthayo.
Walwenza lona nazo zonke izimpahla zalo ngethalenta legolide elicwengekileyo.
Wenza i-althare lempepho ngokhuni lomkhambathi, ubude balo baba yikhubhithi, nobubanzi balo baba yikhubhithi; laba yisikwele, ukuphakama kwalo kwaba ngamakhubhithi amabili; kukhona nezimpondo kulo.
Walicaka ngegolide elicwengekileyo ngaphezulu, kwathi zonke izinhlangothi zalo nezimpondo zalo, wazenzela unqenqema lwegolide nxazonke.
Walenzela amasongo amabili egolide phansi konqenqema, nhlangothi zombili ukuze kungene izingongolo zokulithwala.
Walenzela izingongolo ngokhuni lomkhambathi, wazicaka ngegolide.
Wenza amafutha okugcoba angcwele, namakha empepho amnandi, ethakwe ngumthaki oyingcweti.
Wenza i-althare lomnikelo wokushiswa ngokhuni lomkhambathi; laba ngamakhubhithi ayisihlanu ubude, namakhubhithi ayisihlanu ububanzi; laba yisikwele, nokuphakama kwalo kwaba ngamakhubhithi amathathu.
Wenza izimpondo emakhoneni alo omane, izimpondo zazenzelwe kulo; wazemboza ngethusi.
Wenza zonke izimpahla ze-althare; amabhodwe, amafosholo, imicengezi, izimfologo nemicengezi yomlilo, konke wakwenza ngethusi.
Walenzela i-althare inetha lethusi elenziwe njengenetha phansi konqenqema lwe-althare ukuba lifinyelele ngaphakathi kwe-althare ukuya phezulu.
Wenza amasongo amane okulithwala, wawabeka emakhoneni omane.
Wenza izingongolo ngokhuni lomkhambathi, wazicaka ngethusi,
wazifaka izingongolo emasongweni asezinhlangothini ze-althare, ukuze lithwalwe ngazo. I-althare walenza ngamapulangwe; laba wugobhozi.
Wenza umcengezi nesinqe sawo ngethusi lezibuko zabesifazane ababesebenza emnyango wethende lokuhlangana.
Wenza negceke; ngaseningizimu kwakulenga amakhethini enziwe ngelineni lemicu ephothiweyo ecolekileyo, lingamakhubhithi ayikhulu ubude;
izinsika zalo zazingama-20, nezisekelo zalo zethusi ezingama-20; izinkintsho zezinsika nezibopho kwakuyisiliva.
Ngasohlangothini lwasenyakatho kunamakhethini angamakhubhithi ayikhulu ubude; izinsika zawo bungama-20, izisekelo zawo ezingama-20 zilithusi, izinkintsho namabhande kulisiliva.
Ngasohlangothini lwasentshonalanga kulenga amakhethini angamakhubhithi angama-50 ubude, enezinsika ezilishumi, nezisekelo ezilishumi; izinkintsho namabhande kulisiliva.
Ngasohlangothini lwasempumalanga kungamakhubhithi angama-50.
Amakhubhithi ohlangothini lwesango ayengamakhubhithi ali-15, enezinsika ezintathu, nezisekelo ezintathu.
Ngakolunye uhlangothi kusuka ngapha kuya ngale kwesango legceke kwakulenga amakhethini angamakhubhithi ali-15, enezinsika ezintathu, nezisekelo ezintathu.
Onke amakhethini eyezungeze igceke ayenziwe ngelineni lemicu ephothiweyo.
Izisekelo zezinsika zazilithusi; izinkintsho zezinsika namabhande akhona kulisiliva; izihloko zalo zicakwe ngesiliva, zonke izinsika zegceke zinezibopho zesiliva.
Isihenqo sesango legceke sasihlotshiswe ngensonto eluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo. Kwakungamakhubhithi angama-20 ubude, ukuphakama nobubanzi balo bungamakhubhithi ayisihlanu, kulingana namakhethini egceke.
Kwakunezinsika ezine nezisekelo zazo ezine kungezethusi, izinkintsho zalo kungezesiliva, izihloko zazo zembozwe ngesiliva, nezibopho zalo zingezesiliva.
Zazilithusi macala wonke zonke izikhonkwane zethabanakeli nezegceke.
Lezi kwakuyizindleko zethabanakeli; ithabanakeli lesivumelwano, ezahlanganiswa njengokuyala kukaMose, umsebenzi wabaLevi wawuphansi kuka-Ithamari, indodana ka-Aroni umphristi.
UBhezaleli indodana ka-Uri, kaHure wesizwana sakwaJuda, wenza konke lokho uSimakade ayeyale ngakho uMose.
Wayeno-Oholiyabhe indodana ka-Ahisamakhi wesizwana sakwaDani, umqophi, nengcweti yokuhlobisa, ngokuluhlaza okwesibhakabhaka, ngokubukhwebezane, ngokubomvu, nangelineni elicolekileyo.
Lonke igolide elasetshenziselwa lowo msebenzi, kuwo wonke umsebenzi wendawo engcwele, igolide lomnikelo lalingamatalenta angama-29, namashekeli angama-730 ngokweshekeli lendlu engcwele.
Isiliva elathokala enhlanganweni eyayibaliwe laba ngamathalenta alikhulu, namashekeli ayi-1 775 ngokweshekeli lendlu engcwele.
Umuntu ngamunye wanikela ngebeka, okunguhhafu weshekeli ngokweshekeli lendlu engcwele, kubo bonke ababebaliwe ngesikhathi bebalwa, kusukela kwabaneminyaka engama-20 kuya phezulu, emadodeni ayizi-603 550.
Amathalenta ayikhulu esiliva ayengawokukhanda izisekelo zendawo engcwele, nezisekelo zesihenqo; izisekelo eziyikhulu zingamathalenta ayikhulu, kuyithalenta isisekelo ngasinye.
Wenza izinkintsho zezinsika ngamashekeli ayi-1 775 wacaka izihloko zawo, wenza nezibopho zazo.
Ithusi elalinikeliwe lalingamathalenta angama-70, namashekeli ayizi-2 400;
wenza ngalo izisekelo zesango lethende lokuhlangana, i-althare lethusi, inetha lethusi, nazo zonke izimpahla ze-althare,
zonke izisekelo ezizungeze igceke, nezesango legceke, nazo zonke izikhonkwane zethabanakeli nxazonke zegceke.
Benza izingubo ezinhle zokukhonza endaweni engcwele ngokuluhlaza okwesibhakabhaka, ngokubukhwebezane nangokubomvu. Benzela u-Aroni izingubo ezingcwele njengalokhu uSimakade ayemyalile uMose.
Benza ingubo yamahlombe ngegolide, ngokuluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo.
Bacangcatha igolide laba ngamacwecwe, base bewasika aba yimidweshana bayelukela ensontweni eluhlaza okwesibhakabhaka, ebukhwebezane, ebomvu, naselinenini elicolekileyo, lokhu kwenziwa ngobuciko obukhulu.
Bayenzela iziziba zamahlombe ezihlanganisiweyo; bayixhuma emaceleni omabili.
Ibhande elihlotshisiwe lokuyibopha elalikuyo lalenziwe ngendlela efanayo nezingubo, lenziwe ngegolide, ngensonto eluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo; njengokuba uSimakade ayemyalile uMose.
Balungisa amatshe e-oniksi, ayezungezwe yizisekelo zegolide, eqoshwe njengendandatho, kwaqoshwa kuwo amagama amadodana kaJakobe.
Bawabeka ezizibeni zengubo yamahlombe, ukuze abe ngamatshe esikhumbuzo samadodana ka-Israyeli, njengalokhu uSimakade ayemyalile uMose.
Benza isivikelo sesifuba ngobuciko obufanayo njengoba benza ingubo yamahlombe, ngokuyigolide, ngokuluhlaza okwesibhakabhaka, ngokubukhwebezane, ngokubomvu nangelineni lemicu ephothiweyo elicolekileyo.
Sasiyisikwele, isivikelo sesifuba siphindeka kabili, ubude baso bungangokuvuleka kwesandla, nobubanzi baso bungangokuvuleka kwesandla, siphindwe kabili.
Bafaka kuso imigqa emine yamatshe; kowokuqala bafaka irubhi, ithophazi negarinethi;
umugqa wesibili kwaba ithekhoyise, yisafire ne-emeralidi;
umugqa wesithathu kwaba yijasinithe, i-agathe ne-amethiyisithi
emugqeni wesine kwaba yikhrisolithe, yi-oniksi, nejasiperi; ayezungezwe yizisekelo zegolide lapho ayefakwe khona.
Kwakungamatshe ali-12 alingana namagama amadodana ka-Israyeli; ayeqoshwe njengendandatho yokusicilela, kuqoshwe kulelo nalelo igama lesizwana ngasinye kwezili-12.
Benza esivikelweni sesifuba amaketanga egolide elicolisekileyo anjengamagoda aphothiweyo.
Benza izisekelo ezimbili zegolide, namasongo amabili egolide; omabili bawafaka ngenhla emachosheni esivikelo sesifuba.
Base befaka izintambo ezimbili zegolide emasongweni omabili asemachosheni esivikelo sesifuba.
Izihloko ezimbili zamaketanga athandelweyo bazifaka emiphethweni yomibili, bazibeka ezizibeni ezisemahlombe ukuya ngaphambili kwazo.
Base benza amasongo amabili egolide bawafaka emachosheni omabili esivikelo sesifuba, eceleni laso eliqondene nengubo yamahlombe ngaphakathi.
Benza amanye amasongo amabili egolide bawafaka phansi phambili ezizibeni zombili zengubo yamahlombe ngalapho ihlangana khona, ngaphezu kwebhande layo elihlotshisiweyo.
Base bebopha isivikelo sesifuba ngamasongo aso, emasongweni engubo yamahlombe basibopha ngentambo eluhlaza okwesibhakabhaka ukuba sibe phezu kwebhande elihlotshisiweyo lengubo yamahlombe, ukuze singakhumuki kuyo, njengalokhu uSimakade ayemyalile uMose.
Benza ijazi lokwemboza ingubo yamahlombe ngokwalukiweyo okuluhlaza okwesibhakabhaka kuphela.
Imbobo yengubo eyayiphakathi nayo, yayifana nembobo yejazi lensimbi, inomphetho ozungeze imbobo yalo ukuba lingadabuki.
Emphethweni wejazi ongezansi bafaka amahananadi enziwe ngokuluhlaza okwesibhakabhaka, okubukhwebezane, okubomvu nelineni elicolekileyo eliphothiweyo.
Benza izinsimbi ezikhencezayo ngegolide elicolisekileyo, bazifaka izinsimbi phakathi kwamahananadi ngasemphethweni wayo, bawuzungeza wonke umphetho wayo.
Kwaba yinsimbi ekhencezayo, yihananadi, yinsimbi nehananadi emphethweni ozungeze ingubo yokukhonza, njengalokhu uSimakade ayemyalile uMose.
Benzela u-Aroni namadodana akhe amabhantshi ngelineni elicolekileyo, okwakungumsebenzi wobuciko obukhulu
benza namaqhiya ngelineni elicolekileyo, okunye kokuthwala ekhanda ngelineni elicolekileyo, nezingubo zangaphansi ngelineni lemicu ephothiweyo elicolekileyo,
nebhande lelineni lemicu ephothiweyo, ngokuluhlaza okwesibhakabhaka, ngokubukhwebezane, ngokubomvu, okwakwenziwe ngobuciko obukhulu ngumhlobisi, njengalokhu uSimakade ayemyalile uMose.
Benza ucwecwe lomqhele ongcwele ngegolide elicwengekileyo, baqopha kulo umbhalo njengokuqoshwa kwendandatho othi kungcwele kuSimakade.
Babophela kulo intambo eluhlaza okwesibhakabhaka, base bekubeka ngaphezu kweqhiya; njengalokhu uSimakade ayemyalile uMose.
Waphothulwa kanjalo-ke wonke umsebenzi wethabanakeli lethende lokuhlangana; abantu bakwa-Israyeli benza njengakho konke uSimakade ayemyale ngakho uMose.
Baliletha ithabanakeli kuMose, ithende, nayo yonke impahla yalo: izinkintsho, amapulangwe, imishayo, izinsika nezisekelo zazo,
okokufulela okwakwenziwe ngezikhumba zezinqama ezidaywe zaba bomvu, okokufulela kwezikhumba zamahlengethwa, ikhethini lokuhenqa,
umphongolo wobufakazi, izingongolo zawo, isembozo esiyisihlalo somusa;
itafula nayo yonke impahla yalo, nesinkwa soBukhona bukaSimakade;
uthi lwezibani olwenziwe ngegolide elicwengekileyo nezibani zalo zihleliwe, nakho konke okuhambisana nalo, amafutha okukhanyisa,
i-althare legolide, amafutha okugcoba, impepho enuka kamnandi, isihenqo ekungeneni kwethende,
i-althare lethusi, inetha lalo lethusi, izingongolo zalo, nazo zonke izimpahla zalo, umcengezi nesinqe sawo,
amakhethini egceke, izinsika nezisekelo zalo, ikhethini elihenqa isango legceke, izintambo zalo, izikhonkwane zalo, nakho konke okusetshenziselwa inkonzo yethabanakeli ethendeni lokuhlangana,
izingubo zokukhonza endaweni engcwele ezenziwe ngokulukiwe, izingubo ezingcwele zika-Aroni umphristi, nezamadodana akhe zokukhonza bengabaphristi.
Abantu bakwa-Israyeli bawenza wonke umsebenzi njengalokhu uSimakade ayemyalile uMose.
UMose wawuhlola wonke umsebenzi, wawubona ukuthi wenziwe njengalokhu uSimakade ayemyalile, ngakho-ke uMose wababusisa.
USimakade wakhuluma kuMose, wathi:
“Ngosuku lokuqala lwenyanga yokuqala uyakulimisa ithabanakeli lethende lokuhlangana.
Uyakufaka kulo umphongolo wesivumelwano, bese uwuhenqela umphongolo ngesihenqo.
Uyakungenisa itafula, uhlele izinto eziphezu kwalo, uyakufaka uthi lwesibani bese ubeka izibani zalo.
Uyakubeka i-althare legolide lokushisela impepho phambi komphongolo wesivumelwano, bese ufaka isihenqo somnyango wethabanakeli.
Uyakubeka i-althare lomnikelo wokushiswa phambi komnyango wethabanakeli lethende lokuhlangana.
Ubeke umcengezi phakathi kwethende lokuhlangana ne-althare, uthele amanzi kuwo.
Uyakulungisa igceke nxazonke, bese ulengisa isihenqo sesango legceke.
“Uyakuthatha amafutha okugcoba, ugcobe ithabanakeli nakho konke okukulo, ulingcwelise nayo yonke impahla yalo, ukuze libe ngcwele.
Uyakugcoba ne-althare lomnikelo wokushiswa nayo yonke impahla yalo, ulingcwelise i-althare, ukuze i-althare libe ngcwelengcwele.
Uyakugcoba umcengezi nesinqe sawo, uwungcwelise.
“Emveni kwalokho uyakuletha u-Aroni namadodana akhe ekungeneni kwethende lokuhlangana, bese ubageza ngamanzi.
Uyakugqokisa u-Aroni izingubo ezingcwele, bese umgcoba, umngcwelise, ukuze angikhonze engumphristi.
Uyakuletha futhi namadodana akhe, uwembathise amabhantshi enkonzo.
Uwagcobe njengalokhu wenzile kuyise, ukuze angikhonze engabaphristi. Ukugcotshwa kwabo kuyobangenisa ebuphristini baphakade izizukulwane ngezizukulwane.”
UMose wenza konke njengalokhu uSimakade ayemyalile.
Ngenyanga yokuqala ngonyaka wesibili, ngosuku lokuqala lwenyanga, ithabanakeli lamiswa.
UMose walimisa ithabanakeli, wabeka izisekelo zalo, wamisa amapulangwe, wafaka imishayo, wamisa izinsika zalo.
Walendlala ithende phezu kwethabanakeli, weleka ngokokulimboza phezu kwalo, njengalokhu uSimakade ayemyalile uMose.
Wathatha izibhebhe ezimbili zamatshe wazifaka emphongolweni. Wafaka izingongolo emphongolweni, wabeka isihlalo somusa phezu komphongolo.
Wawungenisa umphongolo ethabanakelini, wamisa isihenqo sokuhenqela umphongolo wesivumelwano, njengalokhu uSimakade ayemyalile uMose.
Wafaka itafula ethendeni lokuhlangana, walibeka ohlangothini olungasenyakatho lwethabanakeli ngaphandle kwesihenqo,
wahlela kahle isinkwa phezu kwalo phambi kukaSimakade, njengalokhu uSimakade ayemyalile uMose.
Wabeka uthi lwezibani ethendeni lokuhlangana, maqondana netafula elisohlangothini olungaseningizimu yethabanakeli.
Wayesebeka izibani phambi kukaSimakade, njengalokhu uSimakade ayemyalile uMose.
Wabeka i-althare legolide ethendeni lokuhlangana phambi kwesihenqo,
wayeseshisa kulo impepho enuka kamnandi, njengalokhu uSimakade ayemyalile uMose.
Walengisa isihenqo somnyango wethende.
Wabeka i-althare lomnikelo wokushiswa ngasemnyango wethabanakeli lethende lokuhlangana, wayesenikela phezu kwalo umnikelo wokushiswa, nowokusanhlamvu, njengalokhu uSimakade ayemyalile uMose.
Wabeka umcengezi phakathi kwethende lokuhlangana ne-althare, wathela kuwo amanzi okugeza,
ababezogeza ngawo izandla nezinyawo oMose no-Aroni namadodana akhe.
Lapho bengena ethendeni lokuhlangana nalapho besondela e-althare, babegeza, njengalokhu uSimakade ayemyalile uMose.
Walungisa igceke nxazonke zethabanakeli ne-althare, walengisa isihenqo sesango lalo. Wawuphothula kanjalo-ke uMose umsebenzi.
Ifu lalisibekela ithende lokuhlangana, inkazimulo kaSimakade yagcwalisa ithabanakeli.
UMose akakwazanga ukungena ethendeni lokuhlangana, ngokuba ifu lahlala phezu kwalo, nenkazimulo kaSimakade yagcwalisa ithabanakeli.
Kwakuthi lapho ifu liphakanyiswa phezu kwethabanakeli, abantu bakwa-Israyeli baqhubeke nohambo lwabo.
Kepha uma ifu lingaphakanyiswanga babengaqhubeki nohambo kuze kube lusuku eliphakanyiswa ngalo.
Ngokuba ifu likaSimakade laliba phezu kwethabanakeli emini, kuthi ebusuku kube khona umlilo efini. Bonke abakwa-Israyeli babekubona lokhu kuleyo naleyo ngxenye yohambo lwabo.
USimakade wabiza uMose wakhuluma naye esethendeni lokuhlangana, wathi:
“Khuluma kubantu bakwa-Israyeli, uthi: ‘Noma ngubani kini oletha umnikelo wemfuyo kuSimakade, uyoletha umnikelo awuthathe ezinkomeni noma ezimvini noma ezimbuzini.
“ ‘Uma umnikelo kungumnikelo wokushiswa othathwe ezinkomeni, uyonikela ngeduna elingenasici, uyoliletha emnyango wethende lokuhlangana ukuze emukeleke phambi kukaSimakade.
Uyobeka isandla sakhe enhloko yomnikelo wokushiswa, uyokwamukelwa ngenxa yakhe, njengomnikelo wokubuyisana.
Iduna liyohlatshwa phambi kukaSimakade; amadodana ka-Aroni angabaphristi alethe igazi, alifafaze nxazonke ze-althare elingasekungeneni kwethende lokuhlangana.
Umnikelo wokushiswa uyohlinzwa, kukhishwe izitho zawo.
Bayowunika amadodana ka-Aroni, umphristi abeke amalahle avuthayo e-althare, bese ehlela izinkuni phezu kwawo.
Amadodana ka-Aroni angabaphristi ayohlela izitho: inhloko, namanoni phezu kwezinkuni ezisemlilweni e-althare,
ezangaphakathi namanqina ayokugeza ngamanzi, umphristi bese ekushisa konke kube ngumnikelo wokushiswa, umnikelo womlilo, ube yiphunga elimnandi kuSimakade.
“ ‘Uma umnikelo wakhe ewuthathe emhlanjini wezimvu noma wezimbuzi, ukuba ube ngumnikelo wokushiswa, makanikele ngeduna elingenasici.
Uyolihlabela ngasohlangothini olusenyakatho lwe-althare phambi kukaSimakade, kuthi amadodana ka-Aroni angabaphristi afafaze igazi lalo nxazonke ze-althare.
Liyakukhishwa izitho, inhloko namanoni alo, umphristi akuhlele phezu kwezinkuni eziphezu kwe-althare,
kodwa ezangaphakathi namanqina kuyakugezwa ngamanzi. Umphristi akunikele konke, akushise kube nentuthu e-althare, kube ngumnikelo wokushiswa, ngumnikelo womlilo, kube yiphunga elimnandi kuSimakade.
“ ‘Uma umnikelo wakhe kuSimakade kungowezinyoni, uyakukhetha umnikelo wakhe phakathi kwamahobhe noma amaphuphu amajuba.
Umphristi uyakuwuletha e-althare, awushumpule inhloko, awushise kube nentuthu e-althare, akhamele igazi lawo ezinhlangothini ze-althare.
Uyosusa ingingila nokuphakathi kuyo nezimpaphe zawo akuphonse ngasempumalanga ye-althare, endaweni yomlotha.
Uyakulidabula phakathi kwamaphiko, kodwa angalehlukanisi. Umphristi uyakulishisa e-althare phezu kwezinkuni ezisemlilweni, libe ngumnikelo wokushiswa, umnikelo womlilo, ube yiphunga elimnandi kuSimakade.
“ ‘Noma ngubani oletha umnikelo wokusanhlamvu kuSimakade, umnikelo kufanele ube ngowempuphu ecolisekileyo, athele amafutha kuwo, abeke nenhlaka kuwo.
Uyowuletha emadodaneni ka-Aroni angabaphristi. Ayocaphuna ngesandla impuphu ecolisekileyo, amafutha, nayo yonke inhlaka, umphristi uyokushisa kube nentuthu e-althare kube yisikhumbuzo, umnikelo womlilo, ube yiphunga elimnandi kuSimakade.
Okuseleyo emnikelweni wokusanhlamvu kuyakuba ngokuka-Aroni namadodana akhe, kuyingxenye yeminikelo yomlilo kaSimakade engcwelengcwele.
“ ‘Uma unikela ngomnikelo wokusanhlamvu obhakwe kuhhavini, mawube ngowempuphu ecolisekileyo: amaqebelengwane angenamvubelo axovwe namafutha, noma amaweyifa angenamvubelo agcotshwe ngamafutha.
Uma umnikelo wakho ungowokusanhlamvu okugazingwe ngomqengele akube ngowempuphu ecolisekileyo engenamvubelo exovwe namafutha.
Wuhlephule ube yimvuthu bese uthela amafutha kuwo, kungumnikelo wokusanhlamvu.
Uma umnikelo wakho ungowokusanhlamvu okugazingwe emcengezini, uyokwenziwa ngempuphu ecolisekileyo exovwe namafutha.
Uyakunikela kuSimakade umnikelo wokusanhlamvu olungiswe ngalezi zindlela; uwunike umphristi, yena awuyise e-althare.
Umphristi uyothatha eyakhe ingxenye, kuthi okunye akushise kube nentuthu e-althare, umnikelo womlilo, ube yiphunga elimnandi kuSimakade.
Okusale emnikelweni wokusanhlamvu kuyokuba ngokuka-Aroni namadodana akhe; kungcwelengcwele eminikelweni yomlilo kaSimakade.
“ ‘Umnikelo wokusanhlamvu eninikela ngawo kuSimakade awuyukwenziwa ngokunemvubelo, ngokuba aniyukushisa imvubelo noju kube ngumnikelo womlilo kuSimakade.
Unganikela ngakho kuSimakade kube ngumnikelo wolibo, kodwa awuyukunikela ngakho e-althare kube yiphunga elimnandi.
Yonke iminikelo yakho yokusanhlamvu uboyiyolisa ngosawoti; ungawushiyi usawoti wesivumelwano sikaNkulunkulu wakho eminikelweni yakho yokusanhlamvu; yonke iminikelo yakho iyoba nosawoti.
“ ‘Uma uletha umnikelo wokusanhlamvu wolibo kuSimakade, uyonikela ngeminyani yamabele eshiswe ngomlilo, amabele abhuliweyo eminyani emisha, kube ngumnikelo wokusanhlamvu wolibo lwakho,
uthele amafutha kuwo, ubeke inhlaka phezu kwawo; kungumnikelo wokusanhlamvu.
Umphristi ashise okuyisikhumbuzo sawo, ingxenye yokusanhlamvu okugquliweyo kwawo nengxenye yamafutha awo nayo yonke inhlaka yawo; kungumnikelo womlilo kuSimakade.
“ ‘Uma umnikelo ungumhlatshelo wokuthula, ophuma emhlanjini, noma yiduna noma yinsikazi, uyonikela ngokungenasici phambi kukaSimakade.
Uyakubeka isandla sakhe enhloko yawo, awuhlabe ngasekungeneni kwethende lokuhlangana, amadodana ka-Aroni angabaphristi ayofafaza igazi lawo nxazonke ze-althare.
Uyothatha kulowo mnikelo wokuthula anikele ngawo ube ngumnikelo womlilo kuSimakade, umhlwehlwe nawo wonke amanoni amboze ezangaphakathi,
izinso zombili namafutha azembozile ngasokhalo, nengxenye yesibindi, akukhiphe konke.
Amadodana ka-Aroni ayokushisa konke lokhu kube nentuthu e-althare, nomnikelo wokushiswa ophezu kwezinkuni, kube ngumnikelo womlilo, ube yiphunga elimnandi kuSimakade.
Uma umnikelo ungumhlatshelo wokuthula kuSimakade ovela emhlanjini, noma yiduna noma yinsikazi uyonikela ngokungenasici.
Uma enikela ngewundlu libe ngumnikelo wakhe uyoliletha phambi kukaSimakade,
abeke isandla sakhe enhloko yomnikelo wakhe. Liyohlatshwa phambi kwethende lokuhlangana. Amadodana ka-Aroni ayofafaza igazi lalo nxazonke ze-althare.
Amanoni alo awathathe emnikelweni wokuthula, uyowanikela abe ngumnikelo womlilo kuSimakade: wonke umsila walo osikwe emgogodleni, amanoni emboze ezangaphakathi, nawo wonke amanoni aphezu kwezangaphakathi,
nezinso zombili namanoni azembozile asokhalo, namanoni aphezu kwesibindi, uyowasusa nezinso.
Umphristi uyakukushisa lokhu kube nentuthu e-althare, kungumnikelo wokudla womlilo kuSimakade.
“ ‘Uma umnikelo wakhe kuyisiphongwane, uyowethula phambi kukaSimakade,
abeke isandla sakhe enhloko yaso, asihlabele phambi kwethende lokuhlangana. Amadodana ka-Aroni ayofafaza igazi laso nxazonke ze-althare.
Uyothatha kuso, anikele kube ngumnikelo wakhe womlilo kuSimakade: amanoni amboze ezangaphakathi zaso, nawo wonke akwezangaphakathi,
nezinso zombili namanoni azembozile asokhalo, namanoni aphezu kwesibindi, uyowasusa ezinsweni.
Umphristi uyokushisa kube nentuthu e-althare, umnikelo womlilo ube yiphunga elimnandi. Onke amanoni angakaSimakade.
“ ‘Lokhu kuyakuba yisimiso esiphakade ezizukulwaneni zenu ezindaweni enihlala kuzo sokuthi aniyukuwadla amanoni negazi.’ ”
USimakade wakhuluma kuMose, wathi:
“Yisho kubantu bakwa-Israyeli, uthi: ‘Uma umuntu ona engahlosile, ephule imiyalo kaSimakade ngezinto okungafanele zenziwe, yena aphikelele azenze,
uma kungumphristi ogcotshiweyo owonayo, ngaleyo ndlela ehlisele icala kubantu, uyonikela ngenxa yesono sakhe, ngeduna elingenasici liphuma emhlanjini wakhe libe ngumnikelo wakhe wesono kuSimakade.
Uyoliletha iduna phambi kukaSimakade ngasekungeneni kwethende lokuhlangana, abeke isandla sakhe enhloko yalo, iduna lihlatshwe phambi kukaSimakade.
Umphristi ogcotshiweyo uyothatha ingxenye yegazi leduna alilethe ethendeni lokuhlangana.
Umphristi uyogcobhoza umunwe wakhe egazini, achinse ingxenye yalo kasikhombisa phambi kukaSimakade phambi kwesihenqo sendlu engcwele.
Umphristi uyobheca ingxenye yegazi ezimpondweni ze-althare lempepho enephunga elimnandi elisethendeni lokuhlangana, phambi kukaSimakade: lonke igazi leduna eliseleyo uyolithululela esinqeni se-althare lomnikelo wokushiswa, elisemnyango wethende lokuhlangana.
Uyosusa wonke amanoni enyameni yeduna lomnikelo wesono; umhlwehlwe, nawo wonke amanoni aphezu kwezangaphakathi,
nezinso zombili namanoni azembozile nasokhalo, namanoni aphezu kwesibindi, awasuse nezinso,
njengalokhu enzile eduneni lomhlatshelo weminikelo yokuthula, bese umphristi ekushisa e-althare lomnikelo wokushiswa.
Isikhumba seduna nayo yonke inyama yalo, inhloko, amanqina, ezangaphakathi nomswani,
zonke izitho zeduna uyokukukhiphela ngaphandle kwenkambu, endaweni ehlambulukileyo lapho kuchithwa khona umlotha, akushise ezinkunini ezisemlilweni kuze kube ngumlotha.
“ ‘Uma kone yonke inhlangano yakwa-Israyeli ingahlosile, leyo nto ifihleke emehlweni ebandla, yenza noma ikuphi okunye okusemthethweni kaSimakade ayale ukuba kungenziwa, yaze yazenzela icala;
uma isono abasenzileyo sesaziwa, inhlangano iyonikela ngeduna livela emhlanjini libe ngumnikelo wesono, iyoliletha phambi kwethende lokuhlangana.
Amalunga enhlangano ayakubeka izandla zawo enhloko yeduna phambi kukaSimakade, bese lihlatshwa phambi kukaSimakade.
Umphristi ogcotshiweyo uyoletha ingxenye yegazi leduna ethendeni lokuhlangana.
Umphristi uyogcobhoza umunwe wakhe egazini, afafaze i-althare kasikhombisa phambi kukaSimakade naphambi kwesihenqo.
Enye ingxenye yegazi uyolibheca ezimpondweni ze-althare eliphambi kukaSimakade, ethendeni lokuhlangana, athululele lonke igazi elisele ngasesinqeni se-althare lomnikelo wokushiswa elingasemnyango wethende lokuhlangana.
Uyosusa wonke amanoni kulo awashise e-althare.
Uyokwenza ngaleli duna njengoba kwenziwe eduneni lomnikelo wesono; nakuleli uyokwenza kanjalo. Umphristi uyakubenzela ukubuyisana, bathethelelwe.
Uyolikhiphela iduna ngaphandle kwenkambu, alishise njengoba eshise elokuqala; lingumnikelo wesono webandla.
“ ‘Uma kona umholi ngokungenhloso, wephula omunye wale miyalo uSimakade uNkulunkulu wakhe ayale ngayo ukuba ingenziwa, aze azilethele icala,
uma azisiwe isono sakhe one ngaso, uyakuletha umnikelo wesiphongwane esingenasici.
Uyakubeka isandla sakhe phezu kwenhloko yesiphongwane; sihlatshelwe lapho kuhlatshelwa khona iminikelo yokushiswa phambi kukaSimakade, singumnikelo wesono.
Umphristi uyakuthatha ingxenye yegazi lomnikelo wesono ngomunwe wakhe alibhece ezimpondweni ze-althare lomnikelo wokushiswa, kuthi ingxenye yegazi eseleyo ayithululele ngasesinqeni se-althare lomnikelo wokushiswa.
Wonke amanoni aso uyowashisa kube nentuthu e-althare njengamanoni omhlatshelo wokuthula, umphristi amenzele ukubuyisana, athethelelwe.
“ ‘Uma umuntu ona engahlosile, ephula noma yimuphi umyalo kaSimakade ayale ukuba ungephulwa, aze azilethele icala,
uma azisiwe isono asenzileyo, uyoletha umnikelo wembuzi yensikazi engenasici, ngesono sakhe asenzileyo.
Uyobeka isandla sakhe enhloko yomnikelo wesono, awuhlabe umnikelo wesono endaweni yomnikelo wokushiswa.
Umphristi uyothatha igazi layo ngomunwe wakhe alibhece ezimpondweni ze-althare lomnikelo wokushiswa, kuthi lonke igazi layo alithululele ngasesinqeni se-althare.
Uyowasusa wonke amanoni ayo ngendlela okususwe ngayo amanoni emnikelweni wokuthula, umphristi ayishise kube nentuthu e-althare, kube yiphunga elimnandi kuSimakade, umphristi amenzele ukubuyisana, athethelelwe.
“ ‘Uma elethe iwundlu laba ngumnikelo wakhe wesono, uyoletha insikazi engenasici.
Uyobeka isandla sakhe enhloko yomnikelo wesono, awuhlabe ube ngumnikelo wesono lapho kuhlatshelwa khona umnikelo wokushiswa.
Umphristi uyothatha ingxenye yegazi lomnikelo wesono ngomunwe wakhe, alibhece ezimpondweni ze-althare lomnikelo wokushiswa, kuthi lonke eliseleyo alithululele ngasesinqeni se-althare.
Wonke amanoni ayo uyowasusa ngendlela okususwe ngayo amanoni emnikelweni wewundlu elinikelelwe ukuthula, umphristi awashise kube nentuthu e-althare, phezu kweminikelo yokushiswa kaSimakade, amenzele ukubuyisana ngesono sakhe asenzile, athethelelwe.
“ ‘Uma umuntu ebiziwe ukuba ethule ubufakazi obufungelwe ngalokho akuzwile, athi noma ekwazi ukubethula ubufakazi njengomuntu obonile noma olwaziyo udaba, kodwa athule angakhulumi, lowo uyothwala icala.
Noma ngubani othinta noma yini engcolileyo, kungaba yisidumbu sesilwane esingcolileyo, noma yisidumbu semfuyo engcolileyo, noma yisidumbu sesilwane esinwabuzelayo esingcolileyo, engasibonanga, nokho uyoba ngongcolileyo, abe necala.
“ ‘Othinta ukungcola komuntu, noma ngokwaluphi uhlobo, engabonanga, lapho esazi uyoba necala.
“ ‘Uma umuntu efunga egomela ngomlomo wakhe ukwenza okubi noma okuhle, kumbe akhulume budlabha afunge, engakucabangisisile, lapho esazi uyoba necala lokunye kwalokho.
“ ‘Kuyothi uma enecala lokunye kwalezi zinto, akuvume lokho akonileyo,
alethe umnikelo kuSimakade, ube yinhlawulo yesono asenzileyo, insikazi emhlanjini wakhe wezimvu noma wezimbuzi, ibe wumnikelo wesono; umphristi uyomenzela ukubuyisana ngesono sakhe.
“ ‘Uma engenamandla okukhipha imvu, uyoletha kuSimakade amahobhe amabili ngenxa yesono asenzileyo, noma amaphuphu amabili amajuba; elinye libe ngumnikelo wesono, elinye libe ngumnikelo wokushiswa.
Uyakuwaletha kumphristi, alethe kuqala elomnikelo wesono, alishuphule ikhanda entanyeni, kodwa angalehlukanisi nalo,
uyofafaza ngengxenye yegazi lomnikelo wesono ohlangothini lwe-althare, kuthi igazi eliseleyo alikhamele esinqeni se-althare; kungumnikelo wesono.
Ngelesibili uyokwenza umnikelo wokushiswa njengokwesimiso, umphristi amenzele ukubuyisana, owonile athethelelwe.
“ ‘Kepha uma engenamandla okuletha amahobhe amabili noma amaphuphu amabili amajuba, maqondana nesono sakhe, uyoletha okweshumi kwe-efa lempuphu ecolisekileyo, kube ngumnikelo wesono, akayukuthela mafutha phezu kwalo, futhi akayukubeka nhlaka phezu kwalo, ngokuba lingumnikelo wesono.
Uyoliletha kumphristi, yena acaphune kuyo isandla sigcwale, kube yisikhumbuzo, alishise e-althare phezu kweminikelo yomlilo kaSimakade; lingumnikelo wesono.
Umphristi uyakumenzela ukubuyisana mayelana nesono sakhe asenze kunoma yiyiphi kulezo zinto, athethelelwe; okuseleyo kube ngokomphristi, kungumnikelo wokusanhlamvu.’ ”
USimakade wakhuluma kuMose wathi:
“Uma omunye wenu enza isiphambeko, ona engahlosile ezintweni ezingcwele zikaSimakade, uyoletha kuSimakade umnikelo wecala, inqama enganasici ezimvini zakhe, noma kube yizinhlamvu zesiliva ngokweshekeli lendlu engcwele; lokho kungumnikelo wecala.
Uyakukhokhela lokho akonile ezintweni ezingcwele, athasisele okwesihlanu kukho, bese ekunika umphristi, umphristi uyomenzela ukubuyisana ngenqama yomnikelo wecala, athethelelwe.
“Uma umuntu ona, enza noma yini ephambene nemiyalo uSimakade aniyale ngayo ukuthi mayingenziwa, noma ebengazi, uyoba necala, futhi alithwale icala lakhe.
Uyoletha kumphristi iwundlu elingenasici alithathe emhlanjini wakhe noma okulingana nalo, kube ngumnikelo wecala; umphristi uyomenzela ukubuyisana mayelana nesiphosiso aphosise ngaso engazi, bese ethethelelwa.
Kungumnikelo wecala; nempela unecala phambi kukaSimakade.”
USimakade wakhuluma kuMose, wathi:
“Uma umuntu ona, enza isiphambeko kuSimakade ngokukhohlisa umakhelwane wakhe ngento ebekiweyo, noma eyisibambiso, noma amqole, noma ecindezela umakhelwane wakhe,
noma ethola into ebilahlekile bese eyiphika, noma afunge ngenkohliso mayelana nanoma yikuphi kwalokho akwenzileyo, uyona.
Kuyothi uma onile, wabona ukuthi unecala, akubuyisele lokho abekwebile, nakudlileyo, noma obekubekwe kuye, noma lokho okwakulahlekile, wakuthola;
nayikuphi afunge ngamanga ngakho, uyokubuyisela, aze athasisele okwesihlanu kukho, uyokunika lowo obelahlekelwe ngosuku lomnikelo wakhe wecala.
Uyoletha kuSimakade umnikelo wakhe wecala, ube yinqama engenasici ayithathe emhlanjini noma olingana nayo ngokulinganisa kwakho, ibe ngumnikelo wecala, iyiswe kumphristi,
umphristi uyomenzela ukubuyisana phambi kukaSimakade, athethelelwe konke akwenzile waba necala ngakho.”
USimakade wakhuluma kuMose, wathi:
“Yala u-Aroni namadodana akhe, uthi: ‘Nansi indlela engumthetho wokwenza umnikelo wokushiswa: umnikelo wokushiswa uyakuhlala e-althare ubusuku bonke kuze kube ngakusasa, umlilo ose-althare uhlale njalo uvutha.
Umphristi uyokwembatha isembatho sakhe selineni elimhlophe, agqoke ngaphansi ibhulukwe lakhe lelineni, bese esusa umlotha womlilo oshise umnikelo wokushiswa e-althare, awuthele eceleni kwalo.
Uyokhumula izembatho zakhe, agqoke ezinye bese ekhiphela umlotha ngaphandle kwenkambu, endaweni ehlambulukileyo.
Umlilo ose-althare kufanele uhlale uvutha, ungacinywa, umphristi uyokokhela izinkuni kuwo njalo ekuseni, ahlele umnikelo wokushiswa, ashise kulo amanoni eminikelo yokuthula.
Umlilo uyohlala uvutha njalo e-althare, ungacinywa.
“ ‘Lena yindlela yomthetho yomnikelo wokusanhlamvu eyolandelwa: amadodana ka-Aroni ayowunikela phambi kukaSimakade ngaphambi kwe-althare.
Ayocaphuna kuwo kugcwale isandla, impuphu ecolisekileyo namafutha omnikelo wokusanhlamvu, nayo yonke inhlaka ephezu komnikelo wokusanhlamvu, akushise e-althare kube yisikhumbuzo sephunga elimnandi kuSimakade.
U-Aroni namadodana akhe bayodla okusele kuwo, bakudle kungenamvubelo endaweni engcwele, egcekeni lethende lokuhlangana.
Akuyukubhakwa ngemvubelo. Ngikumisile kube yisabelo sabo eminikelweni yami yomlilo; kungcwelengcwele njengomnikelo wesono nomnikelo wecala.
Bonke abesilisa phakathi kwezizukulwane zika-Aroni bayokudla lokho, kumisiwe kwaba yisabelo saphakade ezizukulwaneni ngezizukulwane zabo, emnikelweni yomlilo kaSimakade; noma yini ewuthintayo iyakuba ngcwele.’ ”
USimakade wakhuluma kuMose, wathi:
“Lona ngumnikelo u-Aroni namadodana akhe abayakuwunikela kuSimakade mhla begcotshwa: okweshumi kwe-efa lempuphu ecolisekileyo kube ngumnikelo ojwayelekile; ingxenye yawo ekuseni nengxenye yawo kusihlwa.
Uyokwenziwa ngamafutha emqengeleni, uyowungenisa usuxutshwe kahle waba yizingcezu, uyowunikela uyizingcezu; ube yiphunga elimnandi kuSimakade.
Umphristi ogcotshiweyo esikhundleni sakhe phakathi kwamadodana akhe, uyowunikela uyisabelo esimisiwe esiphakade sikaSimakade; uyoshiswa wonke.
Yonke iminikelo yokusanhlamvu yomphristi iyoshiswa yonke; ingadliwa.”
USimakade wakhuluma kuMose, wathi:
“Yisho ku-Aroni namadodana akhe, uthi: ‘Lena yindlela yomthetho eyolandelwa ngeminikelo yesono: umnikelo wesono kufanele uhlatshelwe endaweni lapho kuhlatshelwa khona umnikelo wokushiswa phambi kukaSimakade; ungcwelengcwele.
Umphristi onikela umnikelo wesono, uyowudla endaweni engcwele, egcekeni lethende lokuhlangana.
Noma yini eyothinta inyama yawo iyoba ngcwele; lapho igazi lawo lichaphazeleke engutsheni, uyoyigeza endaweni engcwele ingxenye yengubo echaphazelekile.
Kodwa isitsha sebumba obekuphekelwe kuso siyophihlizwa, kodwa uma bekuphekelwe kwesethusi kumele siphalwe bese sigezwa ngamanzi.
Uyakudliwa yibo bonke abesilisa phakathi kwabaphristi; ungcwelengcwele.
Kepha yonke iminikelo yesono okungeniswe igazi layo ethendeni lokuhlangana ukwenza ukubuyisana endaweni engcwele, ayinakudliwa; iyoshiswa ngomlilo.’ ”
“ ‘Lena yindlela yomthetho eyolandelwa ngeminikelo yecala. Ingcwelengcwele.
Umnikelo wecala uyakuhlatshelwa lapho kuhlatshelwa khona umnikelo wokushiswa, igazi lawo lifafazwe nxazonke ze-althare.
Uyakunikela ngawo wonke amanoni awo; umsila ononileyo, nomhlwehlwe,
izinso zombili ezisokhalo namanoni akuzo, nengxenye yesibindi enonile iyosuswa nezinso.
Umphristi uyakukushisa kube nentuthu e-althare, kube ngumnikelo womlilo kuSimakade; kungumnikelo wecala.
Bonke abesilisa abangabaphristi bayowudlela endaweni engcwele. Ungcwelengcwele.
“ ‘Uma kwenziwa umnikelo wesono njengomnikelo wecala kuyolandelwa indlela yomthetho efanayo; umphristi owenza ukubuyisana ngawo kuyoba ngowakhe.
Umphristi onikela ngomnikelo wokushiswa olethwe wumuntu, isikhumba somnikelo wokushiswa awunikele kuyoba ngesakhe.
Yonke iminikelo yokusanhlamvu ebhakwe kuhhavini, naleyo elungiselwe okhambeni nasemqengeleni ombozwayo iyakuba ngeyomphristi onikele ngayo.
Yonke iminikelo yokusanhlamvu exutshwe namafutha neyomileyo iyoba ngeyawo wonke amadodana ka-Aroni, anikwe ngokulinganayo.’ ”
“ ‘Lena yindlela yomthetho eyolandelwa lapho kwenziwa imihlatshelo yeminikelo yokuthula eyonikelwa kuSimakade.
“ ‘Uma enikela ngawo ube ngumnikelo wokubonga, uyakuwunikela uhambisana nomnikelo wokubonga wamaqebelengwane angenamvubelo axutshwe namafutha, namakhekheba angenamvubelo agcotshwe ngamafutha, namaqebelengwane empuphu ecolisekileyo exutshwe namafutha.
Uyakuletha nomnikelo wokubonga umhlatshelo wakhe wokuthula namaqebelengwane esinkwa esinemvubelo.
Uyothatha libe linye iqebelengwane emnikelweni wakhe, libe ngumnikelo kuSimakade, liyoba ngelomphristi oyofafaza igazi leminikelo yokuthula.
Inyama yomnikelo wakhe wokubonga ukuthula iyodliwa ngosuku anikele ngalo; akuyukushiywa lutho lwayo kuze kube sekuseni.
“ ‘Kepha uma umhlatshelo owunikelayo ungowesifungo noma ungowesihle, uyodliwa ngosuku onikelwe ngalo; okuseleyo kuwo kuyodliwa ngakusasa,
kodwa inyama eyosala kuze kube lusuku lwesithathu, iyoshiswa ngomlilo.
Uma nje inyama yomnikelo wakhe wokuthula idliwe ngosuku lwesithathu, umnikelo wakhe awuyukwamukeleka, futhi awuyukubalelwa kulowo owunikeleyo; uyakuba yisinengiso, kanjalo nomuntu oyidlayo uyothwala icala.
“ ‘Inyama eyothintana nokungcolileyo ayiyukudliwa; iyakushiswa emlilweni, nokho enye inyama bangayidla bonke abahlambulukileyo.
Kepha oyokudla inyama yomhlatshelo wokuthula kaSimakade esangcolile uyonqunywa.
Uma umuntu ethinta into engcolileyo, ukungcola komuntu, noma isilwane esingcolileyo, noma into engcolileyo, enengekayo, bese edla inyama yomhlatshelo weminikelo yokuthula kaSimakade, lowo muntu uyakunqunywa kwabakubo.’ ”
USimakade wakhuluma kuMose, wathi:
“Yisho kubantu bakwa-Israyeli, uthi: ‘Aniyukuwadla amanoni enkomo, awenqama, nawembuzi.
Amanoni engcuba nawokudweshulwe yisilwane sasendle angasetshenziselwa yonke eminye imisebenzi, kodwa aniyukuwadla nhlobo.
Ngokuba oyokudla amanoni enkomo enikelwa kuSimakade ibe ngumnikelo womlilo, lowo owudlayo uyakudingiswa.
Aniyukulidla igazi, noma ngelenyoni noma ngelenkomo kunoma yiyiphi yezindlu zenu.
Oyodla igazi uyakunqunywa kubantu bakubo.’ ”
USimakade wakhuluma kuMose, wathi:
“Yisho kubantu bakwa-Israyeli uthi: ‘Onikela ngomhlatshelo wokuthula kuSimakade, uyakuletha umnikelo wakhe kuSimakade emnikelweni wakhe wokuthula.
Uyakuwuletha ngezandla zakhe umnikelo wokushiswa kaSimakade. Uyoletha amanoni nesifuba ukuze isifuba sizungeziswe, sibe ngumnikelo wokuzungeziswa phambi kukaSimakade.
Umphristi uyoshisa amanoni e-althare, kodwa isifuba kuyoba ngesika-Aroni namadodana akhe.
Umlenze wesokunene emhlatshelweni wokuthula, niyowunika umphristi; ube umnikelo.
Emadodaneni ka-Aroni, leyo eyonikela ngegazi leminikelo yokuthula nangamanoni, iyonikezwa umlenze wesokunene.
Isifuba sokuzungeziswa nomlenze ongumnikelo engikuthathe emihlatshelweni yeminikelo yokuthula yabakwa-Israyeli, ngikunike u-Aroni umphristi namadodana akhe kube yisabelo sabo esimisiweyo esiphakade esivela kubantu bakwa-Israyeli.’ ”
Lesi yisabelo esabelwa u-Aroni namadodana akhe eminikelweni yokushiswa kaSimakade, mhla belethwa ukuba bakhonze uSimakade bengabaphristi,
uSimakade ayala ngakho ukuba bakunikwe ngabantu bakwa-Israyeli mhla ebagcoba; kube yisabelo esimisiwe esiphakade ezizukulwaneni zabo.
Lena yindlela yomthetho eyolandelwa yeminikelo yokushiswa neminikelo yokusanhlamvu, neminikelo yesono, neminikelo yecala, nowokwehlukaniselwa, nowomhlatshelo weminikelo yokuthula,
uSimakade amyala ngawo uMose entabeni iSinayi, ngosuku ayala ngalo abakwa-Israyeli ukuba banikele ngeminikelo yabo kuSimakade ehlane iSinayi.
USimakade wakhuluma kuMose, wathi:
“Thatha u-Aroni namadodana akhe, izembatho, amafutha okugcoba, inkunzi yomnikelo wesono, izinqama ezimbili, neqoma lezinkwa ezingenamvubelo,
uqoqele yonke inhlangano emnyango wethende lokuhlangana.”
UMose wenza njengalokhu uSimakade emyalile; waqoqela inhlangano ngasemnyango wethende lokuhlangana.
UMose wathi enhlanganweni: “Nakhu uSimakade ayale ukuba kwenziwe.”
UMose waletha u-Aroni namadodana akhe, wabageza ngamanzi.
Wamgqokisa ibhantshi, wambopha ngebhande okhalo, wamembathisa ijazi, wamfaka ingubo yamahlombe, wambhincisa ibhande lengubo yamahlombe elihlotshisiweyo, wayibopha ngalo.
Wamfaka isivikelo sesifuba, wafaka kuso i-Urimi neThumimi.
Wamethwesa iqhiya ekhanda, ngaphambili ebunzini wamfaka ucwecwe lwegolide, umqhele wobungcwele, njengalokho uSimakade ayemyalile uMose.
UMose wathatha amafutha okugcoba, wagcoba ithabanakeli nakho konke okwakuphakathi kulo, wakungcwelisa.
Wafafaza ngamanye i-althare kasikhombisa, waligcoba i-althare nazo zonke izitsha zalo, nomcengezi nesinqe sawo, ukuba kungcweliswe.
Wathela amanye amafutha okugcoba ekhanda lika-Aroni, wamgcoba, wamhlukanisela umsebenzi.
UMose waletha namadodana ka-Aroni, wawagqokisa amabhantshi, wawabopha ngamabhande, wawafaka izigqoko njengalokhu uSimakade ayemyalile.
UMose wenza ukuba kusondezwe inkunzi yomnikelo wesono; u-Aroni namadodana akhe babeka izandla zabo enhloko yenkunzi yomnikelo wesono.
UMose wayihlaba, wathatha igazi walibheca ngomunwe wakhe ezimpondweni ze-althare nxazonke, walihlambulula i-althare, igazi eliseleyo walithululela esinqeni se-althare, walingcwelisa kanjalo ukuba alenzele ukubuyisana.
UMose wathatha wonke umhlwehlwe, namanoni aphezu kwesibindi, nezinso zombili amanoni azembozile, wakushisa e-althare.
Kepha inkunzi nesikhumba sayo, inyama yayo, nomswani wayo, wakushisa ngomlilo ngaphandle kwekamu, njengalokhu uSimakade ayemyalile uMose.
Wayeseletha inqama yomnikelo wokushiswa; u-Aroni namadodana akhe babeka izandla zabo enhloko yayo.
UMose wayihlaba, wayesefafaza igazi nxazonke ze-althare.
Wayihlahlela inqama; inhloko yayo, izitho zayo, namanoni wakushisa.
UMose wageza ngamanzi ezangaphakathi namanqina, yonke inyama yenqama wayishisa e-althare; yaba ngumnikelo wokushiswa, oyiphunga elimnandi, ingumnikelo womlilo kuSimakade njengalokhu uSimakade ayemyalile uMose.
Waletha nenqama yesibili, inqama yokubabeka; u-Aroni namadodana akhe babeka izandla zabo enhloko yayo.
UMose wayihlaba, wathatha ingxenye yegazi layo walibheca endlebeni ka-Aroni yesokunene, nasesithupheni sesandla sokunene, nakuqukula wonyawo lwakhe lwesokunene.
UMose wayeseletha amadodana ka-Aroni, nawo wawabheca ngegazi ezindlebeni zawo zesokunene, nasezithupheni zezandla zawo zesokunene, nakoqukula bezinyawo zawo zesokunene, wayesefafaza igazi nxazonke ze-althare.
Wathatha amanoni, umsila ononile, umhlwehlwe, amanoni aphezu kwesibindi, nezinso zombili namanoni azembozile, nomlenze wesokunene,
wathatha iqebelengwane laba linye eqomeni lezinkwa ezingenamvubelo elaliphambi kukaSimakade, neqebelengwane lesinkwa samafutha laba linye, nekhekheba lalinye, wakubeka phezu kwamanoni, naphezu komlenze wesokunene,
konke lokhu wakunika u-Aroni namadodana akhe ezandleni, wakuzulazulisa kwaba ngumnikelo wokuzulazuliswa phambi kukaSimakade.
UMose wakuthatha ezandleni zabo wakushisa e-althare emnikelweni wokushiswa; kwaba ngumnikelo wokubabeka, kwaba yiphunga elimnandi; umnikelo womlilo kuSimakade.
UMose wathatha isifuba, wasizulisa saba ngumnikelo wokuzulazuliswa phambi kukaSimakade; saba yisabelo sikaMose enqameni yokubabeka njengalokhu uSimakade ayemyalile uMose.
UMose wathatha amafutha okugcoba, negazi elalise-althare, wafafaza ngalo u-Aroni nezembatho zakhe, namadodana akhe ayenawo lapho nezembatho zawo, wamngcwelisa u-Aroni nezembatho zakhe, namadodana akhe nezembatho zawo.
UMose wathi ku-Aroni namadodana akhe: “Phekani inyama ngasemnyango wethende lokuhlangana, niyidle lapho nesinkwa esiseqomeni lokwahlukaniselwa, njengalokhu ngayala ngathi: ‘U-Aroni namadodana akhe bayokukudla.’
Okuyosala enyameni nasesinkweni niyokushisa ngomlilo.
Aniyukuphuma emnyango wethende lokuhlangana kuze kuphele izinsuku eziyisikhombisa, ngokuba ukubekwa kuyizinsuku eziyisikhombisa.
USimakade uyalile ukuba kwenziwe njengalokhu kwenziwe namuhla, ukuze nenzelwe ukubuyisana.
Niyohlala ngasemnyango wethende lokuhlangana imini nobusuku, izinsuku eziyisikhombisa, nigcine umyalo kaSimakade ukuze ningafi, ngokuba ngiyaliwe kanjalo.”
U-Aroni namadodana akhe benza konke uSimakade ayeyale ngakho ngesandla sikaMose.
Kwathi ngosuku lwesishiyagalombili, uMose wabiza u-Aroni namadodana akhe namalunga akwa-Israyeli.
Wathi ku-Aroni: “Zithathele ithole leduna libe ngumnikelo wesono, nenqama ibe ngumnikelo wokushiswa okungenasici, unikele ngakho phambi kukaSimakade.
Khuluma kubantu bakwa-Israyeli, uthi: ‘Thathani impongo nenze ngayo umnikelo wesono, nethole, newundlu okunonyaka, okungenasici, kube ngumnikelo wokushiswa,
nenkunzi nenqama kube yiminikelo yokuthula, nikuhlabe phambi kukaSimakade, nomnikelo wokusanhlamvu okuxovwe namafutha, ngokuba namuhla uSimakade uzozibonakalisa kini.’ ”
Baletha phambi kwethende lokuhlangana lokho uMose ayeyale ngakho, kwase kusondela yonke inhlangano yema phambi kukaSimakade.
UMose wayesethi: “Nakhu uSimakade aniyala ngakho ukuba nikwenze, ukuze ibonakale kini inkazimulo yakhe.”
UMose wathi ku-Aroni: “Sondela e-althare, unikele ngomnikelo wakho wesono, nangomnikelo wakho wokushiswa, uzenzele wena nabantu ukubuyisana andukuba unikele ngomnikelo wabantu ubenzele ukubuyisana, njengalokhu uSimakade eyalile.”
U-Aroni wasondela e-althare, wahlaba ithole lomnikelo wakhe wesono.
Amadodana akhe aletha igazi kuye, wagcobhoza ngomunwe kulo, walibheca ezimpondweni ze-althare, elinye igazi walithululela esinqeni se-althare,
kodwa amanoni nezinso nalawo asesibindini emnikelweni wesono wakushisa e-althare, njengalokhu uSimakade ayemyalile uMose.
Inyama nesikhumba wakushisa ngomlilo ngaphandle kwenkambu.
Wahlaba nomnikelo wokushiswa; amadodana akhe aletha igazi kuye, wafafaza ngalo macala wonke e-althare.
Amnika izitho ngezitho zomnikelo wokushiswa, nenhloko, wakushisa e-althare.
Wageza ezangaphakathi namanqina, wakushisa phezu komnikelo wokushiswa e-althare.
Wayeseletha umnikelo wabantu, wathatha impongo yomnikelo wesono ongowabantu, wayihlaba, wabahlanza ngayo, njengaphambilini.
Waletha umnikelo wokushiswa, wawunikela njengalokhu kumisiwe.
Waletha nomnikelo wokusanhlamvu, wagcwalisa isandla sakhe ngawo, wawushisa e-althare ngaphandle komnikelo wokushiswa wasekuseni.
Wahlaba inkunzi nenqama kwaba yimihlatshelo yokuthula ongowabantu; amadodana akhe aletha igazi, walifafaza nxazonke e-althare,
amanoni enkunzi, awenqama, awomsila ononileyo, umhlwehlwe, namanoni ezinso nawesibindi,
awabeka phezu kwesifuba; wawashisa kwaba nentuthu e-althare;
izifuba, nomlenze wangakwesokunene u-Aroni wakuzungezisa, kwaba ngumnikelo wokuzungeziswa phambi kukaSimakade njengalokhu ayeyalile uMose.
U-Aroni waphakamisela izandla zakhe phezu kwabantu, wababusisa; wayesehla lapho ayekade enikela khona ngomnikelo wesono, nangomnikelo wokushiswa, nangeminikelo yokuthula.
UMose no-Aroni bangena ethendeni lokuhlangana, babuye baphuma, babusisa abantu. Inkazimulo kaSimakade bayibona bonke abantu.
Kwaphuma umlilo phambi kukaSimakade, waqothula umnikelo wokushiswa, namanoni okwakuse-althare; abantu bonke bekubona lokho, bakhamuluka, bakhothama phansi ngobuso.
ONadabi no-Abhihu, amadodana ka-Aroni, bathatha izitsha zabo zempepho ngamunye, bafaka kuzo umlilo, babeka impepho phezu kwazo, banikela phambi kukaSimakade ngomlilo ongafanele, angabayalanga ngawo.
Kwaphuma umlilo phambi kukaSimakade, wabashisa, bafa phambi kukaSimakade.
UMose wayesethi ku-Aroni: “Yikho lokhu uSimakade akukhuluma, wathi: “ ‘Ngalabo abaseduze nami ngiyakuzibonakalisa ngingcwele, phambi kwabantu bonke ngiyakukhazimuliswa.’ ” U-Aroni wathula.
UMose wabiza uMishayeli no-Elizafani, amadodana ka-Uziyeli, umfowabo ka-Aroni, wathi kubo: “Sondelani, nibasuse abafowenu phambi kwendawo engcwele, nibakhiphele ngaphandle kwenkambu.”
Base besondela, babasusa bembethe amabhantshi abo, babakhiphela ngaphandle kwenkambu, njengalokhu eshilo uMose.
UMose wayesethi ku-Aroni naku-Eleyazare naku-Ithamari, amadodana akhe: “Ningaziqaqi izinwele emakhanda enu, ningaziklebhuli izembatho zenu ukuze ningafi, bese intukuthelo yehlela yonke inhlangano, kepha abafowenu, indlu yonke yakwa-Israyeli, ingalila ngenxa yokusha akulethileyo uSimakade.
Ningaphumi emnyango wethende lokuhlangana, funa nife, ngokuba amafutha okugcoba kaSimakade aphezu kwenu.” Benza-ke njengezwi likaMose.
USimakade wakhuluma ku-Aroni, wathi:
“Ungaphuzi wayini naluphuzo olunamandla, wena namadodana akho, nxa ningena ethendeni lokuhlangana, ukuze ningafi; kuyakuba yisimiso esiphakade ezizukulwaneni zenu.
Niyakwehlukanisa phakathi kokungcwele nokungengcwele, okungcolileyo nokuhlanzekileyo,
nize nifundise abantu bakwa-Israyeli zonke izimiso uSimakade azikhulume kubo ngesandla sikaMose.”
UMose wakhuluma no-Aroni no-Eleyazare no-Ithamari, amadodana akhe ayesesele, wathi: “Thathani umnikelo wokusanhlamvu osale eminikelweni yomlilo kaSimakade, niwudle ungenamvubelo, eceleni kwe-althare, ngokuba ungcwelengcwele,
niyakuwudla endaweni engcwele, ngokuba uyisabelo sakho nesabelo samadodana akho eminikelweni yokushiswa kaSimakade, ngokuba ngiyalwe kanjalo.
Isifuba sokuzungeziswa nomlenze niyakuwudla endaweni ehlambulukileyo, wena namadodana akho namadodakazi akho, ngokuba kuyisabelo sakho nesabantwana bakho enisinikwa emihlatshelweni yeminikelo yokuthula yabantu bakwa-Israyeli.
Mabalethe umlenze wokuzungeziswa, nesifuba sokuzungeziswa, neminikelo yomlilo yamanoni ukuba bakuzungezise, kube ngumnikelo wokuzungeziswa phambi kukaSimakade. Kuyoba ngokwakho nokwamadodana akho, kuyisabelo senu saphakade, njengalokhu uSimakade eyalile.”
UMose wafunisisa impongo yomnikelo wesono; bheka, yayishisiwe. Wabathukuthelela o-Eleyazare no-Ithamari, amadodana ka-Aroni ayesele, wathi kuwo:
“Aniwudlelanga ngani umnikelo wesono endaweni engcwele na? Ungcwelengcwele, futhi uSimakade uwunike nina ukuze nisuse ububi benhlangano, niyenzele ukubuyisana phambi kukaSimakade.
Igazi lawo alingeniswanga endaweni engcwele; benifanele impela ukuba niwudlele endaweni engcwele, njengalokhu ngayala.”
U-Aroni wathi kuMose: “Uyabona, namuhla banikele ngomnikelo wabo wesono nangowokushiswa phambi kukaSimakade, nokho mina ngehlelwe yilokhu. Uma bengiwudlile umnikelo wesono namuhla, bekuzakwamukeleka yini emehlweni kaSimakade na?”
Esekuzwile lokho uMose, kwaba kuhle emehlweni akhe.
USimakade wakhuluma kuMose no-Aroni, wathi kubo:
“Khulumani kubantu bakwa-Israyeli, nithi: ‘Phakathi kwazo zonke izilwane eziphilayo emhlabeni, nazi eningazidla:
zonke ezinezinselo ezehlukene, izinselo ezehlukene kabili, nezetshisayo emfuyweni, niyakuzidla.
“ ‘Kepha phakathi kwalezo ezetshisayo noma ezinselo zehlukene, aniyukuzidla lezi ezilandelayo: ikameli noma nje nalo letshisa, kodwa alinazo izinselo ezehlukene; lingcolile kini;
imbila, nakuba nayo yetshisa, kodwa ayinazo izinselo ezehlukene; ingcolile kini;
unogwaja uyetshisa, kodwa awunazo izinselo ezehlukene; ungcolile kini;
nengulube nakuba inselo yayo yehlukene, inselo ihlukene kabili, kodwa ayetshisi; ingcolile kini.
Aniyukuyidla inyama yazo, futhi aniyukuzithinta izidumbu zazo; zingcolile kini.
“ ‘Lezi niyakuzidla kuzo zonke ezisemanzini: zonke ezinezigwedlo namazenga ezisemanzini, nezisolwandle nasemifuleni, niyakuzidla.
Kepha zonke ezingenazigwedlo namazenga ezisolwandle nasemifuleni, nazo zonke ezitshuza emanzini, nakho konke okuphila emanzini kungamanyala kini.
Ziyoba yisinengiso kini; aniyukuyidla inyama yazo; nezilwane ezifile niyozithatha njengezinengekayo kini.
Zonke ezisemanzini ezingenazigwedlo namazenga ziyinto enengekayo kini.
“ ‘Nazi eziyakuba yisinengiso kini ezinyonini; aziyukudliwa, ziyisinengiso: ukhozi, inqe, ingqungqulu,
unhloyile, uheshe ngezinhlobo zakhe,
nawo wonke amagwababa ngezinhlobo zawo,
intshe, inkovana, inkanu, uklebe ngezinhlobo zakhe,
isikhova, umphishamanzi, umxwagele,
ifukezi, ivuba, iphalane,
unogolantethe, unozalizingwenya ngezinhlobo zakhe, uziningweni, nelulwane.
“ ‘Zonke izinambuzane ezinamaphiko, ezihamba ngezinyawo zozine, ziyisinengiso kini.
Kepha lezi kuzo zonke izinambuzane ezinamaphiko, ezihamba ngezinyawo zozine, niyakuzidla, ezinamanqina ngaphezu kwezinyawo ezigxuma ngazo emhlabeni;
kuzo niyodla lezi: isikhonyane ngezinhlobo zaso, amaboni ngezinhlobo zawo, amadiye ngezinhlobo zawo, nezintethe ngezinhlobo zazo.
Kodwa zonke ezinye izinambuzane ezinamaphiko nezinyawo ezine ziyisinengiso kini.
“ ‘Niyakungcoliswa yizo, kuthi bonke abathinta izidumbu zazo babe ngabangcolile kuze kuhlwe.
Bonke abathwala izilwane ezifile bayakuhlanza izingubo zabo, futhi babe ngabangcolile kuze kuhlwe.
“ ‘Zonke izilwane ezinezinselo ezehlukene inselo, zingehlukene kabili, futhi zingetshisi, zingcolile kini; bonke abazithintayo bayakuba ngabangcolile.
Zonke ezihamba ngezidladla kuzo zonke izilwane ezihamba ngezinyawo ezine zingcolile kini; bonke abathinta izidumbu zazo bayakuba ngabangcolile kuze kuhlwe.
Othwala isidumbu saso uyohlanza izingubo zakhe, abe ngongcolile kuze kuhlwe; zingcolile kini.
“ ‘Lezi zingcolile kini kuzo izilwane ezihuquzelayo emhlabeni: uchakide, impuku, uxamu ngezinhlobo zakhe,
isigcilikisha, isiquzi, intulo, isibankwa, nonwabu.
Zonke lezi zilwane zingcolile kini phakathi kwezilwane ezihuquzelayo; oyothinta isidumbu saso uyakuba ngongcolile kuze kube kusihlwa.
Konke esiyowela phezu kwakho sesifile kuyakuba ngokungcolileyo, noma ngumuthi, noma yingubo, noma yisikhumba, noma yisaka, noma ngabe yini nje okusetshenzwa ngayo; kuyakufakwa emanzini, kube ngokungcolile kuze kuhlwe; khona kuyakuhlanzeka.
Uma esinye sazo siwela ezitsheni, konke okukuzo kuyoba ngokungcolileyo, niyakusiphahlaza isitsha.
Konke ukudla okuzodliwa okukuzo kuyakuba ngokungcolileyo uma kuthintwe ngamanzi avela esitsheni esinjalo, nanoma yimaphi amanzi anokuphuzwa ayoba ngangcolileyo, uma evela esitsheni esinjalo.
Konke okuwele kukho okwesidumbu saso kuyakuba ngokungcolile, noma iziko noma ikhanzi; kuyophohlozwa; kungcolile futhi kuyohlala kungcolile kini.
Umthombo, umthombokwakhiwa, nepitsi kuyakuba ngokuhlambulukile, nokho okutholakala kunezilwane ezifile kukho kuyakuba ngokungcolile.
Uma ingxenye yesidumbu saso iwela phezu kwembewu ebekelwe ukuyohlwanyelwa, iyakuba ngehlambulukile.
Uma amanzi ethelwa embewini, bese ingxenye yesidumbu saso iwela phezu kwayo, ingcolile kini.
“ ‘Uma kufa isilwane esidliwayo, othinta leyo ngcuba uyakuba ngongcolileyo kuze kuhlwe.
Odla ingcuba makahlambulule izingubo zakhe, uyoba ngongcolile kuze kuhlwe. Othwala isidumbu saso makahlanze izingubo zakhe, abe ngongcolile kuze kuhlwe.
“ ‘Zonke izilwane ezinwabuzelayo emhlabeni ziyisinengiso; azinakudliwa.
Zonke ezihuquzela ngesisu, nazo zonke ezihamba ngezinyawo ezine noma ngezinyawo eziningi, nazo zonke ezinwabuzelayo emhlabeni, aniyukuzidla, ngokuba ziyisinengiso.
Ningazenzi isinengiso ngenxa yezilwane ezinwabuzelayo. Ningazingcolisi ngazo, bese niba ngabangcolile.
NginguSimakade uNkulunkulu wenu; ngakho-ke zingcweliseni, nibe ngcwele, ngokuba Mina ngingcwele; ningazingcolisi ngezilwane ezinwabuzelayo emhlabeni.
NginguSimakade owakukhuphula eGibhithe, ukuze ngibe nguNkulunkulu wenu; ngalokho yibani ngcwele, ngokuba Mina ngingcwele.
“ ‘Lena yindlela yomthetho elandelwayo ngezilwane nezinyoni nezilwane zonke ezitshuza emanzini, nezilwane zonke ezinwabuzelayo emhlabeni,
ukuba kwehlukaniswe phakathi kokungcolileyo nokuhlanzekileyo, naphakathi kokuphilayo okungadliwa nalokho okungedliwe.’ ”
USimakade wakhuluma kuMose, wathi:
“Khuluma kubantu bakwa-Israyeli, uthi: ‘Uma owesifazane ekhulelwe azale umntwana womfana uyakuba ngongcolile izinsuku eziyisikhombisa, njengalokhu kwenzeka lapho esesikhathini, uyoba ngongcolile.
Ngosuku lwesishiyagalombili umfana uyosokwa ijwabu.
Unina uyohlala izinsuku ezingama-33 ukuze ahlanjululwe ekopheni kwakhe. Akayukuthinta lutho olungcwele, noma angene endlini engcwele, zize ziphelele izinsuku zokuhlambuluka kwakhe.
Kodwa uma ezale intombazane, uyobe engcolile amasonto amabili njengalokhu kwenzeka lapho esesikhathini. Isikhathi sokuhlambuluka kwakhe egazini siyoba yizinsuku ezingama-66.
“ ‘Lapho seziphelile izinsuku zokuhlanjululwa kwakhe emveni kokubeletha umfana noma intombazane, uyoletha iwundlu leduna elinonyaka, libe ngumnikelo wokushiswa, nephuphu lejuba noma ihobhe, libe ngumnikelo wesono. Lokhu uyokuletha kumphristi ngasemnyango wethende lokuhlangana.
Umphristi uyokunikela phambi kukaSimakade, amenzele ukubuyisana, ukuze ahlambuluke ekopheni kwakhe. Yilowo umthetho wozele umfana noma intombazane.
“ ‘Uma engenamandla okuthola imvu, uyothatha amahobhe amabili noma amaphuphu amabili amajuba, elinye liyoba ngumnikelo wokushiswa, elinye libe ngumnikelo wesono, umphristi uyomenzela ukubuyisana; ahlambuluke.’ ”
USimakade wakhuluma kuMose no-Aroni, wathi:
“Uma umuntu emilwa iguludla esikhumbeni noma siba notwayi, noma yibala elikhanyayo bese liphenduka libe wuchoko, lowo muntu uyakulethwa ku-Aroni, umphristi, noma kwenye yamadodana akhe, angabaphristi.
Umphristi uyosihlola isifo esisesikhumbeni sakhe; uma uboya obusebaleni sebuphenduke baba mhlophe, nesifo sibonakala ukuthi sijulile esikhumbeni sakhe, kuyisifo esinzima, umphristi uyakukubona lokho bese ememezela ukuthi ungcolile.
Uma ibala elikhanyayo limhlophe esikhumbeni senyama yakhe, futhi libonakala lijulile esikhumbeni, noboya obukulo sebuphenduke baba mhlophe, umphristi uyakumvalela onesifo izinsuku eziyisikhombisa.
Umphristi uyakumhlola ngosuku lwesikhombisa, uma ebona ukuthi isifo simile asiqhubeki, umphristi uyakumvalela okwesibili ezinye izinsuku eziyisikhombisa.
Ngosuku lwesikhombisa uyakumhlola okwesibili, uma ibala lifiphele, nesifo singaqhubekanga, uyakumemezela ukuthi uhlambulukile, bekulutwayi, ageze izingubo zakhe, abe ngohlambulukile.
Kepha uma utwayi luqhubekile lwanda esikhumbeni emveni kokuba esezibonakalisile kumphristi ukuze kuqiniswe ukuthi usehlambulukile, uyophinde azibonakalise kumphristi okwesibili.
Umphristi uyakumbheka; uma ebona ukuthi utwayi lwandile esikhumbeni, uyakumemezela ukuthi ungcolile; kusho ukuthi unesifo sesikhumba esithathelanwayo.
“Uma umuntu etheleleke ngesifo sochoko, uyakuyiswa kumphristi,
umphristi uyakumbheka, uma ebona ukuthi lapho isikhumba sivuvukele khona sekumhlophe, noboya sebuphenduke baba mhlophe nokuthi kukhona inyama ebomvu ekuvuvukeni;
kusho ukuthi unesifo esinzima esithathelanwayo esisekhumbeni sakhe. Umphristi uyakumemezela ukuthi ungcolile, akayukumvalela, ngoba ungcolile.
“Uma uchoko lubhebhetheka lusibekele sonke isikhumba sakhe, kusukela ekhanda kuze kufike ezinyaweni njengokubona komphristi,
umphristi uyakumhlola, kuthi uma isifo sesiwemboze wonke umzimba, uyakusho athi onesifo uhlambulukile; konke kuphendukile kwaba mhlophe: uhlambulukile.
Kepha njalo uma kuphinda kuvela kuye inyama ebomvu, uyakuba ngongcolile.
Umphristi uyakuyihlola inyama ebomvu, bese ememezela ukuthi ungcolile; inyama ebomvu ingcolile ngokuba inochoko.
Uma-ke inyama ebomvu ibuye yaphenduka yaba mhlophe uyakuya kumphristi,
umphristi uyakumhlola, uma ibala seliphenduke laba mhlophe, umphristi uyakumemezela ukuthi uhlambulukile; obenesifo uhlambulukile.
“Uma bekunethumba esikhumbeni sayo eselipholile,
kuthi lapho bekunethumba khona kuvele iguludla elimhlophe, noma ibala elikhanyayo okubomvana kube mhlophe, liyakukhonjiswa umphristi,
umphristi uyakulihlola, uma libonakala lishonile kunesikhumba, futhi noboya sebuphenduke baba mhlophe, umphristi uyakumemezela ukuthi ungcolile: yisifo esithathelanwayo, sivele ethumbeni.
Uma umphristi elihlola kodwa bungekho uboya obumhlophe kulo, futhi lingashonile kunesikhumba, kepha selifiphele, umphristi uyakumvalela izinsuku eziyisikhombisa.
Uma libhebhetheka esikhumbeni, umphristi uyakumemezela ukuthi ungcolile; yisifo.
Kodwa uma ibala elikhanyayo limi endaweni eyodwa lingaqhubeki, sekuyisibazi sethumba; umphristi uyakumemezela ukuthi uhlambulukile.
“Uma umzimba unesibazi sokusha, inyama lapho kushe khona ibe yibala elibomvu ngokumhlophe noma elimhlophe,
umphristi uyakulihlola, uma uboya obusebaleni elikhanyayo sebuphendukile baba mhlophe, selibonakala ukuthi lishonile kunesikhumba, isifo esithathelanwayo; sivele esibazini; umphristi uyakumemezela ukuthi ungcolile; yisifo esithathelanwayo.
Kepha uma umphristi elihlola, ebona kungekho boya obumhlophe ebaleni elikhanyayo, lingashonile kunesikhumba, kodwa lifiphele, umphristi uyakumvalela izinsuku eziyisikhombisa.
Ngosuku lwesikhombisa uyomhlola, uma libhebhethekile esikhumbeni, umphristi uyakumemezela ukuthi ungcolile; yisifo esithathelanwayo.
Uma ibala elikhanyayo limi endaweni eyodwa, lingandanga esikhumbeni, kodwa lishabalele, kusele iguludla lesibazi; umphristi uyakusho ukuthi uhlambulukile, ngoba yisibazi sokusha.
“Uma owesilisa noma owesifazane enesifo ekhanda, noma esilevini,
umphristi uyakusihlola isifo; uma sibonakala sishonile kunesikhumba noboya bubuncane kuso, izinwele zimpofana, umphristi uyakumemezela ukuthi ungcolile: ngumuna, wuchoko lwekhanda noma lwesilevu.
Uma umphristi esihlola isifo somuna, sibonakala singashonile kunesikhumba, kungekho zinwele ezimnyama kuso, khona umphristi uyakumvalela onesifo somuna izinsuku eziyisikhombisa.
Ngosuku lwesikhombisa umphristi uyosihlola isifo; uma singandile futhi kungekho zinwele ezimpofu kuso, isifo sibonakala singashonile kunesikhumba,
uyakuphuca izinwele, kodwa akayukuwuphuca umuna, umphristi uyomvalela onomuna ezinye izinsuku eziyisikhombisa.
Ngosuku lwesikhombisa uyomhlola onomuna. Uma umuna ungandanga esikhumbeni, futhi ubonakala ungashonile kunesikhumba, umphristi uyakumemezela ukuthi uhlambulukile. Uyohlanza izingubo zakhe, ahlambuluke.
Kepha uma umuna wandile esikhumbeni emveni kokuba esehlambulukile,
umphristi uyobuye amhlole. Uma umuna ubhebhethekile esikhumbeni, umphristi akayukuzihlupha abheke izinwele ezimpofu; lowo ungcolile.
Kodwa uma ebona ukuthi umuna uwuhlolile, umile, awandi, sekumile nezinwele ezimnyama kuwo, usupholile, uhlambulukile; ngakho-ke umphristi uyomemezela ukuthi uhlambulukile.
“Uma owesilisa noma owesifazane eba namabala akhanyayo esikhumbeni sakhe, amabala amhlophe akhanyayo,
umphristi uyomhlola. Uma amabala akhanyayo asesikhumbeni sakhe emhloshana efiphele, yisithembuzane esimmilile, uhlambulukile.
“Uma umuntu elahlekelwa yizinwele ekhanda, eba yimpandla; uhlambulukile.
Uma elahlekelwa yizinwele zisuka ebunzini nasenhlafunweni, uyimpandla ebunzini kodwa uhlambulukile.
Kepha uma ekhanda eliyimpandla noma empandleni esesiphongweni kukhona isifo esibomvana ngokumhlophe, wuchoko lolo olumile empandleni esekhanda lakhe noma empandleni esebunzini lakhe,
umphristi uyakumhlola; uma iguludla elikhulayo limhlophe libomvana empandleni esekhanda lakhe noma empandleni esebunzini lakhe, lifana nesifo sochoko esikhumbeni sakhe,
unochoko; ungcolile; umphristi uyakumemezela ukuthi ungcolile; isifo sisekhanda lakhe.
“Umuntu onesifo sochoko ziyakuklejulwa izingubo zakhe, ikhanda lakhe linganakwa, awamboze amadevu, akhale athi: ‘Ngingcolile! Ngingcolile!’
Ungcolile ngaso sonke isikhathi. Uyohlala yedwa endlini yakhe engaphandle kwenkambu.
“Ingubo esinindeke ngesifo sochoko, noma yingubo yoboya noma yingubo yelineni,
noma ngabe sisezintanjeni eziqondileyo noma sikwezinqamulayo, ezelineni noma ezoboya bezimvu, noma sisesikhumbeni, noma sisentweni eyenziwe ngesikhumba,
uma ibala liluhlazana noma libomvana engutsheni noma esikhumbeni noma ezintanjeni eziqondileyo noma kwezinqamulayo noma entweni yesikhumba, kusho ukuthi yisifo sochoko, siyakukhonjiswa umphristi.
Umphristi uyakusihlola isifo, akuvalele konke lokho okunochoko izinsuku eziyisikhombisa,
uyobuye ayosihlola isifo ngosuku lwesikhombisa. Uma isifo sandile engutsheni noma ezintanjeni eziqondileyo noma kwezinqamulayo noma esikhumbeni, nakuba isikhumba sisetshenziswa noma kumuphi umsebenzi; isifo siluchoko olubi.
Uyoyishisa ingubo, noma izintanjana eziqondileyo noma ezinqamulayo, noma eyoboya bezimbuzi noma eyelineni, noma yini yesikhumba enesifo, ngokuba kuluchoko olubi; kuyakushiswa ngomlilo.
“Uma umphristi ehlole isifo, wathola ukuthi asandile engutsheni noma ezintanjeni eziqondileyo noma kwezinqamulayo noma entweni yesikhumba;
umphristi uyoyala ukuba kuhlanzwe lokho okunesifo, kuvalelwe ezinye izinsuku eziyisikhombisa.
Umphristi uyobuye akuhlole emveni kokuhlanzwa kwesifo. Uma ibala lingaguqukile embaleni walo, lingandile, ingcolile, uyoyishisa ngomlilo; kungumcothu odlayo noma ngaphakathi noma ngaphandle.
Uma umphristi eselihlolile ibala, wathola ukuthi selifiphele emveni kokuba lihlanziwe, uyakuliklebhula engutsheni noma esikhumbeni noma ezintanjeni eziqondileyo noma kwezinqamulayo.
Uma lisabonakala futhi engutsheni noma ezintanjeni eziqondileyo noma kwezinqamulayo noma entweni yesikhumba, uyokushisa ngomlilo lokho isifo esisavela kukho.
Ingubo noma izintanjana eziqondileyo noma ezinqamulayo noma yini yesikhumba uyakuyihlanza, uma ibala lisuka kuyo, kuyohlanzwa okwesibili, kuhlambuluke.”
Lena yindlela yomthetho eyakulandelwa esifeni sochoko engutsheni yoboya bezimvu noma kweyelineni noma ezintanjeni eziqondileyo noma kwezinqamulayo noma entweni yesikhumba, ukumemezela ukuthi kuhlambulukile noma kungcolile.
USimakade wakhuluma kuMose, wathi:
“Lena yindlela yomthetho eyolandelwa kulowo onochoko ngosuku ahlanjululwa ngalo: uyolethwa kumphristi,
umphristi uyophumela ngaphandle kwenkambu. Bheka, uyakumhlolisisa khona ukuthi isifo sochoko sesiphelile yini.
Umphristi uyoyala ukuba ozohlanjululwa alethelwe izinyoni ezimbili ezihlambulukileyo, nomsedari, indwangu ebomvu nehisopi.
Umphristi uyakuyala ukuba ihlatshwe enye yezinyoni phezu kwamanzi esitsheni sebumba.
Uyothatha inyoni ephilayo, umsedari, indwangu ebomvu nehisopi, akucwilise nenyoni ephilayo egazini lenyoni ehlatshelwe phezu kwamanzi agelezayo.
Uyakulifafaza kasikhombisa kulowo ohlanjululwayo ochokweni, amemezele ukuthi uhlambulukile, bese eyayiyeka inyoni ephilayo, indizele endle.
“Ohlanjululwayo uyohlanza izingubo zakhe, aphuce zonke izinwele zakhe, ageze ngamanzi, ahlambuluke. Emveni kwalokho uyakungena enkanjini, kodwa uyohlala ngaphandle kwethende lakhe izinsuku eziyisikhombisa.
Ngosuku lwesikhombisa uyakuphuca zonke izinwele ekhanda lakhe, nasesilevini, nasemashiyeni; yebo, uyakuziphuca zonke izinwele zakhe. Uyohlanza izingubo zakhe, ageze umzimba ngamanzi, ahlambuluke.
“Ngosuku lwesishiyagalombili uyothatha izimvu ezimbili ezingenasici ezingamaduna, nemvu yensikazi engenasici enonyaka, nokuthathu eshumini kwempuphu ecolisekileyo exutshwe namafutha, nengxenye yelitha lamafutha.
Umphristi ohlambululayo uyobeka umuntu ozohlanjululwa nalezo zinto phambi kukaSimakade ngasemnyango wethende lokuhlangana.
Umphristi uyothatha imvu yeduna, anikele ngayo ibe ngumnikelo wecala, nengxenye yelogi lamafutha, akuzungezise kube ngumnikelo wokuzungeziswa phambi kukaSimakade.
Uyoyihlaba imvu yeduna lapho kuhlatshelwa khona umnikelo wesono nomnikelo wokushiswa, endaweni engcwele, ngokuba umnikelo wecala njengomnikelo wesono, ungowomphristi; ungcwelengcwele.
Umphristi uyothatha elinye igazi lomnikelo wecala, alibhece endlebeni yesokudla yalowo ohlanjululwayo, nasesithupheni sesandla sakhe sokunene, nakuqukula wonyawo lwakhe lwesokunene.
Umphristi uyothatha amanye amafutha kulo ilogi, awathele entendeni yesandla sakhe sokhohlo;
agcobhoze umunwe wakhe wesokunene emafutheni asesandleni sakhe sokhohlo, achinse amafutha ngomunwe wakhe kasikhombisa phambi kukaSimakade.
Amanye amafutha asele esandleni sakhe umphristi uyowagcoba endlebeni yesokunene yalowo ohlanjululwayo, nasesithupheni sesandla sakhe sokunene, nakuqukula wonyawo lwakhe lwesokunene, phezu kwegazi lomnikelo wecala.
Amafutha aseleyo esandleni somphristi uyowagcoba ekhanda lalowo ozohlanjululwa, bese umphristi emenzela ukubuyisana phambi kukaSimakade.
“Umphristi uyonikela umnikelo wesono, ewenzela lowo ohlanjululwayo ukuze athole ukubuyisana ngenxa yokungcola kwakhe, andukuba ahlabe umnikelo wokushiswa.
Umphristi uyonikela ngomnikelo wokushiswa nangomnikelo wokusanhlamvu e-althare; amenzele ukubuyisana, ahlambuluke.
“Uma empofu, engenakuphumelela kulokho, uyothatha imvu eyodwa eyiduna ibe ngumnikelo wecala, uzungeziswe ukumenzela ukubuyisana, nokukodwa eshumini kwempuphu ecolisekileyo exovwe namafutha, kube ngumnikelo wokusanhlamvu, nengxenye yelogi lamafutha,
namahobhe amabili noma amaphuphu amabili amajuba, ngokwamandla akhe. Elinye liyoba ngumnikelo wesono. Elinye libe ngumnikelo wokushiswa.
“Ngosuku lwesishiyagalombili uyowaletha kumphristi ngasemnyango wethende lokuhlangana, phambi kukaSimakade, abe ngawokuhlanjululwa kwakhe.
Umphristi uyothatha imvu yomnikelo wecala nengxenye yelogi lamafutha, uyokuzungezisa kube ngumnikelo wokuzungeziswa phambi kukaSimakade.
Uyohlaba imvu yomnikelo wecala, athathe igazi lomnikelo wecala, alibhece endlebeni yesokunene yohlanjululwayo, nasesithupheni sakhe sakwesokunene, nakuqukula wakhe wesokunene.
Umphristi uyothela amanye alawa mafutha entendeni yesandla sakhe sokhohlo;
achinse kasikhombisa ngomunwe wakhe wesokunene phambi kukaSimakade amanye amafutha asesandleni sakhe sokhohlo.
Umphristi uyothatha amafutha asesandleni sakhe, awagcobe endlebeni yesokunene yohlanjululwayo, nasesithupheni sakhe sakwesokunene, nakuqukula wakhe wesokunene, akwenzele endaweni yegazi lomnikelo wecala.
Amafutha asele esandleni somphristi uyowagcoba ekhanda lohlanjululwayo ukumenzela ukubuyisana phambi kukaSimakade.
Uyonikela ngelinye lamahobhe noma ngelinye lamaphuphu ejuba, njengalokhu engaphumelela ukwenza.
Elilodwa libe ngelomnikelo wesono, elinye libe ngelomnikelo wokushiswa nomnikelo wokusanhlamvu. Umphristi uyomenzela ohlanjululwayo ukubuyisana phambi kukaSimakade.”
Lena yindlela yomthetho eyolandelwa kulowo onesifo sochoko, ongenawo amandla okuba nomnikelo oqondene nokuhlanjululwa kwakhe.
USimakade wakhuluma kuMose no-Aroni, wathi:
“Kuyothi lapho senifikile eKhanani engizakuninika lona libe yifa lenu, ngibeke isifo sochoko endlini, ezweni eniliphiweyo.
Umninindlu uyoza atshele umphristi, athi: ‘Kungathi kuvele isifo esithile endlini yami.’
Umphristi uyoyala ukuba kukhishwe okuphakathi endlini ngaphambi kokuba angene ukuyohlola ukuthi sikhona yini isifo, ukuze konke okusendlini kungangcoli, andukuba umphristi angene ukuhlola indlu.
Uyohlola ukuthi isifo sikhona yini, uma isifo sisezindongeni zendlu, kukhona amabala aluhlazana noma abomvana, nokubonakala kwawo kujulile kunodonga,
umphristi uyophuma aye ngasemnyango wendlu, ayivale indlu izinsuku eziyisikhombisa.
Umphristi uyobuya ngosuku lwesikhombisa, ukuhlola ukuthi ibala landile yini odongeni lwendlu.
Umphristi uyoyala ukuba amatshe ahlaselwe yisifo akhishwe, alahlwe endaweni engcolileyo ngaphandle komuzi.
Indlu iyophalwa ngaphakathi nhlangothi zonke, uthuli oluphaliweyo baluthele endaweni engcolileyo ngaphandle komuzi.
Bayothatha amanye amatshe bawafake endaweni yalawo akhishiweyo. Bayothatha udaka olusha bagudule ngalo indlu.
“Uma isifo sibuye savumbuka kabusha endlini emveni kokuba ekhiphe amatshe okuqala, nasemveni kokuphalwa kwendlu nokuphahlekwa kwayo,
umphristi uyohamba ayoyihlola. Uma isifo sandile endlini, kunochoko olubi olwandayo endlini; ingcolile.
Uyoyibhidliza indlu, amatshe ayo, amapulangwe ayo, nodaka lwayo akukhiphe emzini, akulahle endaweni engcolileyo.
“Oyongena endlini ngezinsuku isavaliwe uyakuba ngongcolileyo kuze kuhlwe.
Oyolala kuleyo ndlu noyodlela kuyo makahlanze izingubo zakhe.
“Uma umphristi efika ukuzoyihlola, athole ukuthi isifo asandile endlini emveni kokugudulwa kwayo, umphristi uyakumemezela ukuthi indlu ihlambulukile, ngokuba isifo siphelile.
Uyothatha izinyoni ezimbili, umsedari, indwangu ebomvu nehisopi, ukuze ahlambulule indlu.
Enye yezinyoni uyoyihlabela esitsheni sebumba phezu kwamanzi agelezayo.
Uyothatha umsedari, ihisopi, indwangu ebomvu nenyoni ephilayo, akucwilise egazini lenyoni ehlatshiweyo nasemanzini agelezayo, ayifafaze indlu kasikhombisa.
Uyakuyihlambulula indlu ngegazi lenyoni, ngamanzi agelezayo, ngenyoni ephilayo, ngomsedari, ngehisopi, nangendwangu ebomvu.
Uyoyiyeka inyoni ephilayo, indize iphume emzini iye endle, ayenzele kanjalo indlu ukubuyisana; ihlambuluke.”
Lena yindlela yomthetho eyolandelwa ngesifo sochoko esiyizinhlobonhlobo nangomuna:
uchoko lwengubo, olwendlu,
olweguludla, olotwayi, nolwebala elikhanyayo,
ukufundisa ukuthi kunini lapho umuntu engcolile nalapho ehlambulukile; yilowo-ke umthetho wochoko.
USimakade wakhuluma noMose no-Aroni, wathi:
“Yishoni kubantu bakwa-Israyeli, nithi kubo: ‘Uma owesilisa emfimfa emzimbeni wakhe, ungcolile ngokumfimfa kwakhe.
Lokho kungcola kudalwa ngukumfimfa kwakhe: noma ngabe umzimba wakhe umfimfa, noma sekunqamukile ukumfimfa, kuyakuba ngukungcola kwakhe.
“ ‘Yonke imibhede elala omfimfayo iyakuba ngengcolile; nakho konke ahlala kukho kuyakuba ngokungcolile.
Yilowo nalowo oyothinta umbhede wakhe uyakuhlanza izingubo zakhe, ageze ngamanzi, abe ngongcolileyo kuze kuhlwe.
Oyohlala entweni ekade kuhleli kuyo omfimfayo uyakuhlanza izingubo zakhe, ageze ngamanzi, abe ngongcolileyo kuze kuhlwe.
“ ‘Othinta umzimba womfimfayo uyakuhlanza izingubo zakhe, ageze ngamanzi, abe ngongcolileyo kuze kuhlwe.
“ ‘Uma omfimfayo ephimisela ngamathe ohlambulukileyo, ohlambulukileyo uyakuhlanza izingubo zakhe, ageze ngamanzi, abe ngongcolile kuze kuhlwe.
“ ‘Noma yisiphi isihlalo agibela kuso omfimfayo siyakuba ngesingcolileyo.
Bonke abathinta into ebiphansi kwakhe bayakuba ngabangcolileyo kuze kuhlwe, nalowo othwala into enjalo, uyakuhlanza izingubo zakhe, ageze ngamanzi, abe ngongcolileyo kuze kuhlwe.
“ ‘Wonke umuntu othintwe ngomfimfayo, engazigezanga izandla zakhe ngamanzi, uyakuhlanza izingubo zakhe, ageze ngamanzi, abe ngongcolileyo kuze kuhlwe.
“ ‘Isitsha sebumba esithintwe ngomfimfayo siyakuphihlizwa, zonke izitsha zokhuni ziyakuhashazwa ngamanzi.
“ ‘Uma omfimfayo ehlambulukile ekumfimfeni kwakhe, uyakuzibalela izinsuku eziyisikhombisa zokuhlanjululwa kwakhe, uyakuhlanza izingubo zakhe, ageze umzimba wakhe ngamanzi agelezayo, ahlambuluke.
Ngosuku lwesishiyagalombili uyozithathela amahobhe amabili noma amaphuphu amabili amajuba, eze phambi kukaSimakade ngasemnyango wethende lokuhlangana, awanike umphristi.
Umphristi uyakunikela ngawo, elinye libe ngumnikelo wesono, elinye libe ngumnikelo wokushiswa; uyakumenzela ukubuyisana phambi kukaSimakade ngenxa yokumfimfa kwakhe.
“ ‘Uma umuntu eshaywa yizibuko, uyakugeza wonke umzimba wakhe ngamanzi, abe ngongcolile kuze kuhlwe.
Zonke izingubo nazo zonke izikhumba elikuzo izibuko lakhe ziyakuhlanzwa ngamanzi, zibe ngezingcolileyo kuze kuhlwe.
Uma owesilisa elale nowesifazane wamthela ngesidoda, bobabili bayakugeza ngamanzi, babe ngabangcolileyo kuze kuhlwe.
“ ‘Uma owesifazane ejwayele ukumfimfa igazi emzimbeni wakhe, uyakuhlala engcolile izinsuku eziyisikhombisa; bonke abamthintayo bayakuba ngabangcolileyo kuze kuhlwe.
“ ‘Zonke izinto alala kuzo ngesikhathi engcolile ziyakuba ngezingcolileyo; noma yini ahlala kuyo iyakuba ngengcolileyo.
Lowo othinta umbhede wakhe uyakuhlanza izingubo zakhe, ageze ngamanzi, abe ngongcolileyo kuze kuhlwe.
Nalowo othinta noma yini ahlale kuyo uyakuhlanza izingubo zakhe, ageze ngamanzi, abe ngongcolile kuze kuhlwe.
Noma kungaba ngumbhede noma iyiphi enye into ahlale kuyo, uma ithintwa ngumuntu, uyakuhlala engcolile kuze kuhlwe.
“ ‘Uma owesilisa elala naye, ukungcola kwakhe kuyakuba kuye, uyakuba ngongcolile izinsuku eziyisikhombisa; nayo yonke imibhede alala kuyo iyakuba ngengcolileyo.
“ ‘Uma owesifazane emfimfa igazi izinsuku eziningi, hhayi ngesikhathi sokungcola kwakhe, noma emfimfa kwedlule esikhathini sokungcola kwakhe, ngazo zonke izinsuku zokumfimfa uyohlala engongcolile njengasezinsukwini zokungcola kwakhe; uyakuba ngongcolileyo.
Imibhede yonke alala kuyo ngazo zonke izinsuku zokumfimfa kwakhe iyakuba njengemibhede yokungcola kwakhe; nazo zonke izinto ahlala kuzo ziyakuba ngezingcolileyo njengokungcola kwalapho esesikhathini.
Noma yimuphi othinta lezi zinto uyakuba ngongcolileyo, uyakuhlanza izingubo zakhe, ageze ngamanzi, abe ngongcolileyo kuze kuhlwe.
“ ‘Uma ehlambulukile ekumfimfeni kwakhe, uyakuzibalela izinsuku eziyisikhombisa, emveni kwalokho uyobe esehlambulukile.
Ngosuku lwesishiyagalombili uyothatha amahobhe amabili noma amaphuphu amabili amajuba, awalethe kumphristi ngasemnyango wethende lokuhlangana.
Umphristi uyonikela elinye libe ngumnikelo wesono, nelinye libe ngumnikelo wokushiswa; uyomenzela ukubuyisana phambi kukaSimakade ngenxa yokumfimfa kwakhe.
“ ‘Kanjalo-ke niyakugcina abantu bakwa-Israyeli behlukanisiwe nokungcola kwabo ukuze bangafeli ekungcoleni kwabo, nokuba bangayingcolisi indawo yami engihlala kuyo phakathi kwabo.’ ”
Lena yindlela yomthetho eyolandelwa kulabo abamfimfayo: lowo oshaywa yizibuko ngaleyo ndlela abe ngongcolile,
nowesifazane osesikhathini, nanoma yimuphi omfimfayo, kungaba ngowesilisa noma ngowesifazane, nendoda elala nowesifazane ongcolileyo.
USimakade wakhuluma kuMose emva kokufa kwamadodana amabili ka-Aroni, ayesondele phambi kukaSimakade, maqede afa.
USimakade wathi kuMose: “Khuluma no-Aroni, umfowenu, ukuba angangeni noma nini endaweni engcwele emva kwesihenqo phambi kwesihlalo somusa esiphezu komphongolo, ukuze angafi, ngokuba ngiyabonakala efini phezu kwesihlalo somusa.”
U-Aroni uyongena endaweni engcwele nalokhu: iduna, libe ngumnikelo wesono, inqama, ibe ngumnikelo wokushiswa,
embethe ibhantshi lelineni elingcwele, efake ibhulukwe lelineni, ezibophe ngebhande lelineni, ethwele umshuqulu welineni. Lezo yizembatho ezingcwele. Uyakugeza umzimba wakhe ngamanzi, bese ezigqoka.
Uyothatha enhlanganweni yabantu bakwa-Israyeli izimpongo ezimbili zibe ngumnikelo wesono, nenqama ibe ngumnikelo wokushiswa.
U-Aroni makanikele ngenkunzi, ibe ngumnikelo wakhe wesono; azenzele yena nendlu yakhe ukubuyisana.
Uyothatha izimpongo ezimbili, azibeke phambi kukaSimakade ngasemnyango wethende lokuhlangana.
U-Aroni uyakwenza unkatho ngezimpongo zombili, olunye unkatho lube ngolukaSimakade, olunye unkatho lube ngoluka-Azazeli.
U-Aroni uyonikela ngempongo edliwe wunkatho lukaSimakade, ibe ngumnikelo wesono.
Kepha impongo edliwe wunkatho luka-Azazeli iyakubekwa iphila phambi kukaSimakade ukuze kwenziwe ngayo ukubuyisana, bese ithunyelwa ehlane ku-Azazeli.
U-Aroni uyonikela ngenkunzi engumnikelo wesono sakhe, azenzele ukubuyisana yena nabendlu yakhe.
Uyothatha isitsha sempepho esigcwele amalahle omlilo ase-althare phambi kukaSimakade, nempepho egxotshiwe igcwele izandla zakhe zombili, angene nayo ngaphakathi kwesihenqo.
Uyoyibeka impepho emlilweni phambi kukaSimakade ukuze ifu lempepho lisibekele isihlalo somusa esiphezu kobufakazi, ukuze angafi.
Uyothatha ingxenye yegazi lenkunzi achinse ngomunwe wakhe phambi kwesihlalo somusa ngasempumalanga, uyolichinsa ngomunwe wakhe kasikhombisa phambi kwesihlalo somusa.
Uyohlaba impongo ibe ngumnikelo wesono wabantu, alethe igazi layo ngaphakathi kwesihenqo, enze ngalo njengalokhu enzile ngegazi lenkunzi, alifafaze phezu kwesihlalo somusa naphambi kwaso.
Uyakuyenzela kanjalo ukubuyisana indawo engcwele, ngenxa yokungcola kwabantu bakwa-Israyeli, nangenxa yeziphambeko zabo, nazo zonke izono zabo. Uyakulenzela kanjalo nethende lokuhlangana elihleli phakathi kokungcola kwabo.
Akuyukuba bikho muntu ethendeni lokuhlangana kusukela ngesikhathi angena ngaso ukuyokwenza ukubuyisana endaweni engcwele kuze kube yisikhathi aphuma ngaso; esezenzele yena ukubuyisana nendlu yakhe nebandla lonke lakwa-Israyeli.
Uyakuphuma aye e-althare eliphambi kukaSimakade, alenzele ukubuyisana. Uyothatha igazi lenkunzi nelempongo, alibhece ezimpondweni ze-althare nxazonke.
Uyolichinsa ngegazi kasikhombisa ngomunwe wakhe, alihlambulule, alingcwelise ekungcoleni kwabantu bakwa-Israyeli.
Uma eseqedile ukwenzela indawo engcwele ukubuyisana, nethende lokuhlangana ne-althare, uyonikela ngempongo ephilayo.
U-Aroni uyobeka izandla zakhe zombili enhloko yempongo ephilayo, avume phezu kwayo bonke ububi babantu bakwa-Israyeli, neziphambeko zabo, nakho konke ukona kwabo, akubeke enhloko yempongo, bese eyihambisa ngesandla somuntu olungiselwe lokho, iye ehlane.
Impongo iyothwala ububi babo bonke, iye nabo kwahlongasibi, ayikhululele ehlane.
U-Aroni uyakungena ethendeni lokuhlangana, akhumule izembatho zelineni azembatha uma engena endaweni engcwele, azishiye lapho.
Uyogeza umzimba wakhe ngamanzi endaweni engcwele, agqoke izembatho zakhe, aphume, anikele ngomnikelo wakhe wokushiswa nangomnikelo wokushiswa wabantu; azenzele yena nabantu ukubuyisana.
Amanoni omnikelo wesono uyowashisa e-althare.
Lowo obehambise impongo ku-Azazeli uyohlanza izingubo zakhe, ageze umzimba ngamanzi, andukuba angene enkanjini.
Inkunzi yomnikelo wesono nempongo yomnikelo wesono, okungeniswe igazi lakho ukwenza ukubuyisana endaweni engcwele, ziyakukhishelwa ngaphandle kwenkambu, izikhumba zakho nenyama yakho nomswani wakho, kushiswe ngomlilo.
Okushisayo uyohlanza izingubo zakhe, ageze umzimba ngamanzi, andukuba angene enkanjini.
Lokhu kuyokuba yisimiso esiphakade kini: ngenyanga yesikhombisa, ngolweshumi lwenyanga, niyakuthobisa imiphefumulo yenu, ningenzi msebenzi, owolibo nomfokazi ogogobeleyo phakathi kwenu.
Ngokuba ngalolo lusuku niyokwenzelwa ukubuyisana ukuze nihlanjululwe; nihlambuluke ezonweni zenu zonke phambi kukaSimakade.
Luyisabatha lokuphumula okuphelele kini, niyozithiba; lokho kuyisimiso esiphakade.
Umphristi oyogcotshwa ahlukaniselwe ukuba abe ngumphristi esikhundleni sikayise, uyokwenza ukubuyisana, agqoke izembatho zelineni, izembatho ezingcwele.
Uyokwenzela indlu engcwele ukubuyisana, enzele abaphristi nabantu bonke bebandla ukubuyisana.
Lokhu kuyakuba yisimiso esiphakade kini ukwenzela abantu bakwa-Israyeli ukubuyisana kanye ngonyaka ngenxa yezono zabo zonke. UMose wenza njengalokhu uSimakade ayemyalile.
USimakade wakhuluma kuMose, wathi:
“Khuluma no-Aroni, namadodana akhe, nabo bonke abantu bakwa-Israyeli, uthi kubo: ‘Yilokhu uSimakade ayale ngakho, ethi:
yilowo nalowo muntu wendlu yakwa-Israyeli oyohlaba inkunzi noma imvana noma imbuzi enkanjini, noma ayihlabele ngaphandle kwenkambu,
engayilethanga emnyango wethende lokuhlangana ukunikela ngayo ibe ngumnikelo kaSimakade ngaphambi kwethabanakeli likaSimakade, lowo muntu uyakubekwa icala legazi, ngokuba uchithile igazi; lowo muntu uyakunqunywa kwabakubo.
Ngalokho abantu bakwa-Israyeli bayoletha imihlatshelo yabo abayihlabele endle, bayoyiletha kuSimakade, kumphristi ongasemnyango wethende lokuhlangana bayinikele ibe yiminikelo yokuthula kuSimakade.
Umphristi uyofafaza igazi e-althare likaSimakade ngasemnyango wethende lokuhlangana, ashise amanoni, abe yiphunga elimnandi kuSimakade,
ukuze bangaphinde banikele imihlatshelo yabo emadimonini abaphinga nawo. Lokhu kuyokuba yisimiso esiphakade kubo, ezizukulwaneni zabo.’
“Uyosho nalokhu kubo uthi: ‘Yilowo nalowo muntu wendlu yakwa-Israyeli noma umfokazi ogogobele phakathi kwabo onikela ngomnikelo wokushiswa noma ngomhlatshelo,
kodwa angawulethi emnyango wethende lokuhlangana ukuba awunikele kuSimakade, lowo muntu uyakunqunywa kwabakubo.
“ ‘Yilowo nalowo muntu wendlu yakwa-Israyeli noma umfokazi ogogobele phakathi kwabo odla igazi noma yiliphi, ngiyomelana nalowo muntu odla igazi, ngimnqume kwabakubo.
Ngokuba ukuphila komzimba kusegazini; ngininike lona ukwenzela imiphefumulo yenu ukubuyisana e-althare, yigazi elenza ukubuyisana.
Ngalokho, ngathi kubantu bakwa-Israyeli: “Makungabi bikho muntu phakathi kwenu odla igazi; nomfokazi ogogobele phakathi kwenu akayukulidla.”
“ ‘Yilowo nalowo muntu kwabakwa-Israyeli noma umfokazi ogogobele phakathi kwabo, ozingela abambe isilwane noma inyoni edliwayo, uyochitha igazi layo, alemboze ngothuli.
Ngokuba impilo yazo zonke izidalwa igazi lazo nomphefumulo wazo kusegazini lazo, ngalokho ngathi kubantu bakwa-Israyeli: “Aniyukulidla igazi lenyama yonke, ngokuba ukuphila kwazo zonke izidalwa kusegazini lazo; lowo olidlayo uyonqunywa.”
“ ‘Noma ngubani odla ingcuba noma isilwane esidweshulwe yizilo, noma ngabe ungowolibo noma ngumfokazi, uyohlanza izingubo zakhe, ageze ngamanzi, abe ngongcolileyo kuze kuhlwe, bese eyahlambuluka.
Kepha uma engazihlanzi, engawugezi umzimba wakhe, uyothwala ububi bakhe.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘NginguSimakade uNkulunkulu wenu.
Aniyukwenza njengokwemisebenzi yeGibhithe enanihlala kulo, futhi aniyukwenza njengokwemisebenzi yeKhanani enginiyisa kulo, aniyukuhamba ngemithetho yabo.
Niyokwenza izehlulelo zami, nigcine imithetho yami, nihambe ngayo; nginguSimakade uNkulunkulu wenu.
Niyogcina izimiso zami nezehlulelo zami; uma nizenza, niyakuphila ngazo; nginguSimakade.
“ ‘Akuyukuba bikho phakathi kwenu oyosondela esihlotsheni sakhe embule ubunqunu baso; nginguSimakade.
“ ‘Ubunqunu bukayihlo, nobunqunu bukanyoko, awuyukubembula; ungunyoko, awuyukubembula ubunqunu bakhe.
“ ‘Awuyukubembula ubunqunu bukamkayihlo; bungubunqunu bukayihlo.
“ ‘Awuyukubembula ubunqunu bukadadewenu, indodakazi kayihlo noma indodakazi kanyoko, ezelwe kwenu, noma ezelwe kwelinye ikhaya.
“ ‘Awuyukubembula ubunqunu bendodakazi yendodana yakho, noma bendodakazi yendodakazi yakho, ngokuba ubunqunu babo bungubunqunu bakho.
“ ‘Awuyukubembula ubunqunu bendodakazi yomkayihlo, ezalwa nguyihlo; ingudadewenu.
“ ‘Awuyukubembula ubunqunu bukababekazi wakho; uyisihlobo sikayihlo.
“ ‘Awuyukubembula ubunqunu bukadadewabo kanyoko, ngokuba uyisihlobo sikanyoko.
“ ‘Awuyukubembula ubunqunu bukamfowabo kayihlo, ungasondeli kumkakhe; ungunyoko.
“ ‘Awuyukubembula ubunqunu bukamalokazana wakho; ungumkandodana yakho.
“ ‘Awuyukubembula ubunqunu bukamkamfowenu; bungubunqunu bukamfowenu.
“ ‘Awuyukubembula ubunqunu bowesifazane nobendodakazi yakhe; awuyukuthatha indodakazi yendodana yakhe, noma indodakazi yendodakazi yakhe awuyukwembula ubunqunu bayo, ngokuba bayizihlobo; kungukonakala lokho.
“ ‘Awuyukuthatha owesifazane abe yimbangi kadadewabo ukuba wembule ubunqunu bakhe esekhona udadewabo.
“ ‘Awuyukusondela kowesifazane, wembule ubunqunu bakhe esangcolile ngokungcola kwakhe.
“ ‘Awuyukulala nomkamakhelwane ukuzingcolisa ngaye.
“ ‘Awuyukunikela ngenzalo yakho ibe ngumhlatshelo kuMolekhi, ungahlambalazi igama likaNkulunkulu wakho; nginguSimakade.
“ ‘Awuyukulala nowesilisa njengowesifazane; kuyisinengiso lokho.
“ ‘Awuyukulala nesilwane uzingcolise ngaso; nowesifazane akayukuma phambi kwesilwane ukuba alale naso; kuyichilo.
“ ‘Ningazingcolisi noma ngayiphi yalezo zinto, ngokuba izizwe engazixosha phambi kwenu zazizingcolisa ngazo.
Izwe lonakele, yingakho ngalihambela ngenxa yobubi balo ukuze ngilijezise, izwe labaphalaza abantu balo.
Niyakugcina izimiso zami nezehlulelo zami, aniyukwenza nesisodwa salezi zinengiso, noma ngabe ngowolibo noma ngumfokazi ogogobele phakathi kwenu,
ngokuba abantu bezwe abaphambi kwenu bazenzile lezi zinengiso, ngakho-ke izwe langcola.
Izwe liyakuniphalaza uma nilingcolisa, njengalokho laphalaza isizwe esasikhona phambi kwenu.
“ ‘Noma ngubani oyokwenza lezi zinengiso, lowo muntu uyonqunywa kwabakubo.
Ngalokho, gcinani umyalo wami ukuze ningenzi nasinye sezinengiso ezenziwa ngaphambi kwenu, ningazingcolisi ngazo; nginguSimakade uNkulunkulu wenu.’ ”
USimakade wakhuluma kuMose, wathi:
“Khuluma kuyo inhlangano yabantu bakwa-Israyeli, uthi kuyo: ‘Niyoba ngcwele ngokuba Mina Simakade uNkulunkulu wenu ngingcwele.
“ ‘Yilowo nalowo uyohlonipha uyise nonina, agcine amasabatha ami; nginguSimakade uNkulunkulu wenu.
“ ‘Aniyukuphendukela konkulunkulu abayize, aniyukuzenzela izithombe ezakhiwe; nginguSimakade uNkulunkulu wenu.
“ ‘Lapho ninikela ngomhlatshelo wokuthula kuSimakade, niyowunikela ngendlela eyokwenza namukeleke.
Niyowudla ngosuku eniwunikele ngalo nangakusasa, uma usalile kwaze kwaba lusuku lwesithathu, niyowushisa emlilweni.
Uma udliwa ngosuku lwesithathu, inyama yawo eseyonakele ayiyukwemukeleka.
Noma ngubani oyoyidla, uyothwala ububi bakhe, ngokuba ungcolise okungcwele kukaSimakade, lowo muntu uyonqunywa kubantu bakubo.
“ ‘Uma nivuna isivuno sezwe lakini, awuyukuvuna konke emagunjini ensimu yakho, noma ucoshe ngisho okuwe phansi ensimini yakho.
Awuyukuvuna konke esivinini sakho, awuyukubutha amagilebhisi avuthuluke kuso, uyowashiyela abampofu nabafokazi; nginguSimakade uNkulunkulu wakho.
“ ‘Aniyukweba, aniyukuphathana ngobuqili, aniyukuqambelana amanga.
“ ‘Aniyukwenza isifungo samanga ngegama lami; nize nihlambalaze igama likaNkulunkulu; nginguSimakade.
“ ‘Awuyukumcindezela umakhelwane wakho, awuyukumphanga. Awuyukugodla inkokhelo yesisebenzi esiqashiweyo kuze kube ngakusasa.
“ ‘Awuyukusiqalekisa isithulu, awuyukubeka isikhubekiso phambi kwempumputhe, kodwa uyomesaba uNkulunkulu wakho; nginguSimakade.
“ ‘Aniyukuhlanekezela ukwehlulela. Aniyukumbandlulula ompofu, nivune ocebileyo, kodwa niyomehlulela ngokulunga umakhelwane wenu.
“ ‘Awuyukuhamba unyevuza phakathi kwabantu bakini. Awuyukufuna nzuzo ngegazi likamakhelwane wakho; nginguSimakade.
“ ‘Awuyukumzonda umfowenu enhliziyweni yakho. Uyomkhuza nokumkhuza umakhelwane wakho, kodwa ungabi nasono ngaye.
“ ‘Awuyukuphindisa, awuyukuba namagqubu nabantu bakini, kodwa uyothanda umakhelwane wakho njengalokhu uzithanda wena; nginguSimakade.
“ ‘Niyakuzigcina izimiso zami. Aniyukuvumela izilwane zenu zizekwe ngolunye uhlobo. Aniyukuhlwanyela ensimini yenu izinhlobo ezimbili zembewu, futhi aniyukugqoka ingubo eyenziwe ngezinhlobo ezimbili zezintanjana.
“ ‘Oyolala nowesifazane oyisigqila eyingoduso yomunye, kodwa engahlengiwe, noma athole inkululeko, kuyokwenziwa ucwaningo, abanakubulawa ngenxa yokuba wayengakanikwa inkululeko.
Uyoletha umnikelo wakhe wecala kuSimakade ngasemnyango wethende lokuhlangana, inqama ibe ngumnikelo wecala.
Umphristi uyomenzela ukubuyisana ngenqama yomnikelo wecala phambi kukaSimakade, ngenxa yesono sakhe asenzileyo, athethelelwe esonweni sakhe asenzileyo.
“ ‘Uma senifikile ezweni, niyotshala izinhlobonhlobo zemithi edliwayo, kuthi izithelo zayo nizithathe njengokungasoki kwayo iminyaka emithathu zibe njengezingasokiwe kini: aniyukuzidla.
Kepha ngonyaka wesine zonke izithelo zayo ziyokuba ngcwele, ezokudumisa uSimakade.
Ngonyaka wesihlanu niyokudla izithelo zayo, ukuze ithele kakhulu; nginguSimakade uNkulunkulu wenu.
“ ‘Aniyukudla lutho olunegazi, aniyukwenza imilingo, noma nihumushe izimpawu.
“ ‘Aniyukudilinga amakhanda enu emaceleni; awuyukona isilevu sakho emaceleni.
“ ‘Aniyukuzigcaba emizimbeni yenu ngenxa yabafileyo; aniyukuqopha mibhalo emabalabala kuyo; nginguSimakade.
“ ‘Awuyukuyingcolisa indodakazi yakho ngokuyigqugquzela ukuba ibe yisifebe, funa izwe lehlelwe ngubufebe, ligcwale ukonakala.
“ ‘Anogcina amasabatha ami, nihloniphe indawo yami engcwele; nginguSimakade.
“ ‘Aniyukuphendukela emadlozini nakubathakathi, ningazingcolisi ngabo; nginguSimakade uNkulunkulu wenu.
“ ‘Uyosukuma nxa kumi impunga phambi kwakho, uyomhlonipha umuntu omdala, umesabe uNkulunkulu wakho; nginguSimakade.
“ ‘Uma umfokazi egogobele ezweni lakini, aniyukumcindezela.
“ ‘Umfokazi ogogobele phakathi kwenu, uyokuba njengowolibo phakathi kwenu, niyomthanda njengalokhu nizithanda nina, ngokuba nani naningabafokazi eGibhithe; nginguSimakade uNkulunkulu wenu.
“ ‘Aniyukwenza ukungalungi lapho nehlulela, nasekulinganiseni isisindo nomthamo.
Niyakuba nezilinganiso zeqiniso, nezisindo zeqiniso, ne-efa leqiniso, nehini leqiniso; nginguSimakade uNkulunkulu wenu owanikhipha eGibhithe.
“ ‘Niyozigcina zonke izimiso zami, nizenze zonke izehlulelo zami; nginguSimakade.’ ”
USimakade wakhuluma kuMose, wathi:
“Uyothi kubantu bakwa-Israyeli: ‘Noma ngubani kubantu bakwa-Israyeli, noma ngumfokazi ogogobele kwa-Israyeli, oyonikela noma ngayiphi yenzalo yakhe kuMolekhi; uyobulawa, abantu balelo lizwe bamkhande ngamatshe.
Mina uqobo ngiyomelana nalowo muntu, ngimnqume kubantu bakubo, ngokuba enikele ngenzalo yakhe kuMolekhi wangcolisa indawo yami engcwele, walihlambalaza iGama lami elingcwele.
Uma abantu balelo lizwe bethalalisa, benza sengathi ababoni lapho enikela ngenzalo yakhe kuMolekhi, bengambulali lowo muntu,
Mina uqobo ngiyakumelana nalowo muntu nomndeni wakhe, ngimnqume kubantu bakubo nabo bonke abahamba naye bayophinga, bephinga noMolekhi.
“ ‘Nalowo muntu oyakuphendukela kwabanamadlozi nakwabathakathayo ukuba aphinge nabo, ngiyomelana nalowo muntu, ngimnqume kubantu bakubo.
“ ‘Zingcweliseni nibe ngcwele, ngokuba Mina nginguSimakade, uNkulunkulu wenu.
Anogcina izimiso zami, nizenze; nginguSimakade oningcwelisayo.
“ ‘Yilowo nalowo othuka uyise nonina uyobulawa nokubulawa, lokhu ethuke uyise nonina; igazi lakhe liyoba phezu kwakhe.
“ ‘Umuntu ophinga nomfazi womunye, nomuntu ophinga nomfazi kamakhelwane wakhe, labo abaphingileyo bayakubulawa.
“ ‘Umuntu olala nomkayise, wembula ubunqunu bukayise; bobabili bayobulawa nokubulawa, igazi labo libe semakhanda abo.
“ ‘Uma umuntu elala nomalokazana wakwakhe, bobabili bayobulawa nokubulawa; benze ichilo; igazi labo liyoba semakhanda abo.
“ ‘Indoda elala nowesilisa njengowesifazane, bobabili benze okunengisayo; bayobulawa nokubulawa, igazi labo libe semakhanda abo.
“ ‘Umuntu oyothatha owesifazane nonina, kungukonakala lokho; bayakushiswa ngomlilo, yena nabo, ukuze kungabi bikho lobu bubi phakathi kwenu.
“ ‘Uma umuntu elala nesilwane, uyobulawa nokubulawa, nesilwane sibulawe.
“ ‘Uma owesifazane esondela esilwaneni ukuba alale naso, uyobulawa owesifazane nesilwane; bayobulawa nokubulawa, igazi labo libe semakhanda abo.
“ ‘Uma umuntu eyothatha udadewabo, indodakazi kayise noma indodakazi kanina, abone ubunqunu bayo, nayo ibone ubunqunu bakhe, kuyihlazo lokho; bayakunqunywa phambi kwabantu bakubo, ngokuba embulile ubunqunu bukadadewabo, uyothwala icala lakhe.
“ ‘Uma umuntu elala nowesifazane osesikhathini, embule ubunqunu bakhe, umembulile esesikhathini, naye uzembulile esesikhathini, ngakho-ke bobabili bayonqunywa kubantu bakubo.
“ ‘Ungabembuli ubunqunu bukanyokokazi, noma obukayihlokazi, ngoba uyobe unqunise isihlobo sakho; bayojeziswa.
“ ‘Umuntu olala noyisekazi, wambule ubunqunu bukayisekazi, bayakuthwala isono sabo, bafe bengazange babe nabantwana.
“ ‘Uma umuntu ethatha umkamfowabo, kungukungcola lokho; wambulile ubunqunu bomfowabo; bayokufa bengazange babe nabantwana.
“ ‘Ngakho-ke niyogcina zonke izimiso zami, nazo zonke izehlulelo zami nizenze, ukuze izwe enginiyisa kulo ukuba nihlale kulo linganiphalazi.
Aniyukuhamba ngezimiso zezizwe engizozixosha phambi kwenu, ngokuba zenzile zonke lezi zinto; nganengwa yizo.
Nokho, nganitshela ngathi: “Niyolidla izwe lazo, ngininike lona libe yifa lenu, izwe elichichima ubisi noju;” nginguSimakade uNkulunkulu wenu onehlukanisile kwezinye izizwe.
“ ‘Ngakho-ke niyohlukanisa phakathi kwesilwane esihlanzekileyo nesingcolileyo; inyoni engcolileyo nehlanzekileyo, aniyukuzenza nenyanyeke ngesilwane noma inyoni, nanoma yini nje enwabuzelayo emhlabeni, engikwehlukanisile ngathi kungcolile.
Niyakuba ngcwele kimi, ngokuba Mina Simakade ngingcwele, nginehlukanisile kwabezizwe ukuba nibe ngabami.
“ ‘Owesilisa noma owesifazane ongenwe yidlozi, noma ngumoya wokubhula, uyobulawa nokubulawa, akhandwe ngamatshe, igazi lakhe libe phezu kwakhe.’ ”
USimakade wathi kuMose: “Yisho kubaphristi, amadodana ka-Aroni, uthi kubo: ‘Makungabi bikho oyozingcolisa ngokuthinta ofileyo kubantu bakubo,
ngaphandle kwesihlobo esisondele kuye, njengonina, uyise, indodana yakhe, indodakazi yakhe, umfowabo,
udadewabo, intombi esondelene naye engenandoda, ngoba angazingcolisa ngenxa yayo.
Umyeni akayukuzingcolisa phakathi kwezihlobo zakhe; azihlambalaze.
“ ‘Abayukuphuca amakhanda abo emaceleni, noma baphuce izilevu emaceleni, abayukugcaba imizimba yabo.
Bayakuba ngcwele kuNkulunkulu wabo, bangahlambalazi igama likaNkulunkulu wabo, ngokuba banikela ngeminikelo yokushiswa kaSimakade, isinkwa sikaNkulunkulu wabo; ngalokho, bayakuba ngcwele.
“ ‘Abanakuthatha owesifazane oyisifebe nowonakeleyo, noma owesifazane olahlwe yindoda yakhe, ngokuba umphristi ungcwele kuNkulunkulu wakhe.
Uyakumehlukanisa abe ngcwele, ngokuba unikela ngesinkwa sikaNkulunkulu wakho. Uyakuba ngcwele kuwe, ngokuba Mina Simakade okwehlukanisayo, ngingcwele.
“ ‘Uma indodakazi yomphristi izingcolisa ngokufeba, ihlambalaza uyise; iyoshiswa ngomlilo.
“ ‘Ongumphristi ophakanyisiwe phakathi kwabafowabo, lowo owathelwa ngamafutha okugcoba ekhanda lakhe, wehlukaniswa ukuba embathe izembatho, akayukuwaqhaqha amagoda ekhanda lakhe, noma aklebhule izembatho zakhe,
akayukungena lapho kunofileyo khona, akayukuzingcolisa ngisho nangoyise noma unina imbala.
Akayukuphuma endaweni engcwele, akayukuyihlambalaza indawo kaNkulunkulu wakhe engcwele, ngokuba ukungcweliswa kwamafutha okugcoba kaNkulunkulu wakhe kuphezu kwakhe; nginguSimakade.
“ ‘Uyothatha owesifazane oseyintombi, amgane.
Akayukuganwa ngumfelokazi noma ngolahlwe yindoda noma owesifazane okhohlakele, nesifebe, kodwa uyothatha intombi phakathi kwabantu bakubo, ibe ngumkakhe.
Akayukuyihlambalaza inzalo yakhe phakathi kwabantu bakubo, ngokuba nginguSimakade omngcwelisayo.’ ”
USimakade wakhuluma kuMose, wathi:
“Khuluma ku-Aroni uthi: ‘Akukho muntu okhubazekile ozalweni lwakho, ezizukulwaneni zalo, oyakusondela anikele ngesinkwa kuNkulunkulu wakhe.
Umuntu okhubazekile akayukusondela: noma oyimpumputhe, noma olunyonga, onekhala elilinyaziwe, nonezitho ezingalingani,
noma umuntu ononyawo olwaphukileyo, noma isandla esaphukileyo,
onesifumbu, oyisichwe, onomlanga esweni lakhe, onesithembuzane, onomuna, noma okhubazeke emasendeni.
Akuyukuba bikho muntu wozalo luka-Aroni, umphristi, oyosondela anikele ngeminikelo yomlilo kuSimakade uma ekhubazekile; akayukusondela anikele ngesinkwa kuNkulunkulu wakhe.
Uyakusidla isinkwa sikaNkulunkulu wakhe esingcwelengcwele nesingcwele.
Akayukungena esihenqweni, noma asondele e-althare, ngokuba ukhubazekile, ukuze angazihlambalazi izindawo zami ezingcwele; nginguSimakade obangcwelisayo.’ ”
UMose wakhuluma lokho ku-Aroni, nasemadodaneni akhe, nakubo bonke abantu bakwa-Israyeli.
USimakade wakhuluma kuMose, wathi:
“Khuluma ku-Aroni namadodana akhe ukuba bahlukane nezinto ezingcwele zabantu bakwa-Israyeli, abazehlukanisela Mina njengezingcwele, ukuze bangalihlambalazi igama lami elingcwele; nginguSimakade.
“Yisho kubo uthi: ‘Yilowo nalowo, ozalweni lwenu lonke nakuzo zonke izizukulwane zenu, oyosondela ezintweni ezingcwele abantu bakwa-Israyeli abazehlukanisile njengezingcwele kuSimakade, ebe engcolile, lowo muntu uyonqunywa phambi kwami; nginguSimakade.
“ ‘Yilowo nalowo wozalo luka-Aroni onochoko noma omfimfayo akayukuzidla izinto ezingcwele aze ahlambuluke, nalowo othinta okungcoliswe yisidumbu, noma ngumuntu oshaywe yizibuko,
nalowo oyothinta okunwabuzelayo okungamngcolisa, noma yimuphi omunye umuntu ongamngcolisa, noma ngabe unakungcola kwaluhlobo luni.
Umuntu oyothinta okunjalo uyokuba ngongcolileyo kuze kuhlwe, angazidli izinto ezingcwele, aze ageze umzimba wakhe ngamanzi.
Uma selishonile ilanga uyoba ngohlambulukileyo, bese edla izinto ezingcwele, ngoba zingukudla kwakhe.
Akayukuyidla ingcuba nesilwane esidweshulwe yizilwane zasendle, ukuze angazingcolisi ngakho; nginguSimakade.
“ ‘Ngakho-ke bayogcina umyalo wami; ukuze bangabi nesono ngenxa yawo, bese befa ngokuba bewujivazile; nginguSimakade obangcwelisayo.
“ ‘Akukho mfokazi oyakudla okungcwele; ngisho umuntu ogogobele womphristi noma umqashwa, akayukukudla okungcwele.
Kepha uma umphristi ethenga umuntu, lowo amthenge ngemali yakhe uyokukudla, nalabo abazalelwe kwakhe bayosidla isinkwa sakhe.
Uma indodakazi yomphristi igana umfokazi, ayinakudla emnikelweni wezinto ezingcwele.
Kodwa uma indodakazi yomphristi ingumfelokazi noma ilahlwe yindoda, ingenamntwana, bese ibuyela endlini kayise njengasebusheni bayo, iyakusidla isinkwa sikayise, kepha umfokazi akayukusidla.
“ ‘Uma umuntu edle okungcwele ngephutha, uyothasisela ngokwesihlanu kwakho okungcwele, akunike umphristi.
Abayukuhlambalaza izinto ezingcwele abanikela ngazo kuSimakade abantu bakwa-Israyeli,
bazenze babe necala lokudla izinto ezingcwele; nginguSimakade obangcwelisayo.’ ”
USimakade wakhuluma kuMose, wathi:
“Yisho ku-Aroni namadodana akhe, nabo bonke abantu bakwa-Israyeli, uthi kubo: ‘Yilowo nalowo wendlu yakwa-Israyeli noma ongumfokazi kwa-Israyeli, onikela ngomnikelo wakhe ngenxa yesifungo nanoma yisiphi, noma umnikelo wakhe wesihle, uyowunikela kuSimakade, ube ngumnikelo wokushiswa.
Ukuze amukeleke, uyonikela ngeduna lenkomo elingenasici noma lemvu noma lembuzi.
Aniyukunikela nganoma ngani enesici, ngokuba aniyukwemukeleka.
Umuntu onikela ngomnikelo womhlatshelo wokuthula kuSimakade ukufeza isithembiso noma owomnikelo wesihle ezinkomeni noma ezimvini, ukuze emukeleke, kuyoba ngengenasici.
Aniyukunikela ngephuphuthekayo, eyaphukile, elimele, enesilonda, enokhwekhwe nenomuna, futhi aniyukunikela ngazo kuSimakade, zibe ngumnikelo womlilo e-althare lakhe.
Inkunzi noma imvu enesitho eside kunezinye noma enesitho esincane, ninganikela ngayo ibe ngumnikelo wesihle, kodwa uma kungowesifungo awuyukwamukeleka.
Aniyukunikela kuSimakade ngethenwe ngokufihlizwa noma ngokuchotshozwa noma ngokudwengulwa noma ngokuhhumpulwa; aniyukwenza kanjalo ezweni lakini.
Aniyukwemukela lutho esandleni sowezizwe, bese ninikela ngakho kube yisinkwa sikaNkulunkulu wenu, ngokuba kunikelwe kunokungcola kukho, ngakho-ke akuyukwemukeleka.’ ”
USimakade wakhuluma kuMose, wathi:
“Uma kuzalwa inkunzi noma inqama noma impongo, iyohlala nonina izinsuku eziyisikhombisa; ngosuku lwesishiyagalombili kuqhubeka iyokwemukeleka ukuba ibe ngumnikelo womlilo kuSimakade.
Aniyukuyinquma inkabi noma imvu nezinyane layo ngalusuku lunye.
“Niyohlabela uSimakade umhlatshelo wokubonga; niyakumhlabela ukuze namukeleke.
Uyakudliwa ngalolo lusuku, aniyukushiya lutho lwawo kuze kube sekuseni; nginguSimakade.
“Ngakho-ke niyoyigcina imiyalo yami, niyenze; nginguSimakade.
Aniyukulihlambalaza igama lami elingcwele; ngiyakuzibonakalisa ngingcwele phakathi kwabantu bakwa-Israyeli; nginguSimakade oningcwelisayo,
owanikhipha eGibhithe, ukuze ngibe nguNkulunkulu wenu; nginguSimakade.”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Yilena imikhosi kaSimakade emisiweyo engiyimemezelayo kini ibe yimihlangano engcwele, iyimikhosi yami emisiweyo.
“ ‘Uyokwenza umsebenzi ngezinsuku eziyisithupha, kepha usuku lwesikhombisa luyisabatha; lusuku lokuphumula lomhlangano ongcwele. Awuyukwenza msebenzi ngalo, luyisabatha kuSimakade kuzo zonke izindlu zenu.
“ ‘Nansi-ke imikhosi emisiweyo kaSimakade, imihlangano engcwele eniyoyimemezela kubo ngezikhathi ezimisiweyo:
phakathi kwamabili, ngosuku lwe-14 ngenyanga yokuqala; yiphasika likaSimakade.
Ngosuku lwe-15 lwaleyo nyanga kuyoba ngumkhosi wesinkwa esingenamvubelo kuSimakade. Niyokudla isinkwa esingenamvubelo izinsuku eziyisikhombisa.
Ngosuku lokuqala niyokuba nomhlangano ongcwele, aniyukwenza msebenzi.
Niyonikela kuSimakade ngomnikelo womlilo izinsuku eziyisikhombisa. Ngosuku lwesikhombisa kuyoba ngumhlangano ongcwele; aniyukusebenza msebenzi.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Lapho senifikile ezweni engizakuninika lona, senivunile isivuno salo; niyoletha kumphristi isithungo solibo lokuqala lwesivuno senu.
Yena uyakusizungezisa isithungo phambi kukaSimakade ukuze namukeleke. Umphristi uyakusizungezisa ngosuku olulandela isabatha.
Ngalolo lusuku enizungezisa ngalo isithungo, niyakunikela ngemvu yeduna engenasici, enonyaka; ibe ngumnikelo wokushiswa kuSimakade.
Umnikelo wokusanhlamvu uyoba ngokubili eshumini kwempuphu ecolisekileyo, exutshwe namafutha, umnikelo womlilo kuSimakade, ube yiphunga elimnandi, nomnikelo wokuphuzwayo uyoba ngokwesine kwehini lewayini.
Aniyukudla isinkwa notshwele nezikhwebu ezintsha kuze kufike lolo lusuku, nize nilethe umnikelo kaNkulunkulu wenu; lokhu kuyisimiso esiphakade ezizukulwaneni zenu, kuzo zonke izindlu zenu.
“ ‘Ngosuku olulandela isabatha eniyoletha ngalo isithungo somnikelo wokuzungeziswa, niyozibalela amasabatha ayisikhombisa apheleleyo;
kuze kube lusuku olulandela olwesabatha ngesonto lesikhombisa, niyobala izinsuku ezingama-50, bese ninikela kuSimakade ngomnikelo omusha wokusanhlamvu.
Niyoletha okuvela ezindlini zenu kube yizinkwa ezimbili zomnikelo wokuzungeziswa, okubili eshumini kwempuphu ecolisekileyo, ziyoba nemvubelo, bese ziphekwa, zibe lulibo lokuqala kuSimakade.
Niyakunikela, kanye nesinkwa, izimvu ezingamaduna eziyikhombisa ezingenasici ezinonyaka, neduna lenkomo, nezinqama ezimbili zibe ngumnikelo wokushiswa kuSimakade, umnikelo wazo wokusanhlamvu neminikelo yazo yokuphuzwayo, umnikelo womlilo, ube yiphunga elimnandi kuSimakade.
Niyakunikela ngempongo, ibe ngumnikelo wesono, nezinqama ezimbili ezinonyaka, zibe ngumhlatshelo womnikelo wokuthula.
Umphristi uyakuwuzungezisa nesinkwa solibo lokuqala kube ngumnikelo wokuzungeziswa phambi kukaSimakade; nezinqama ezimbili ziyakuba ngcwele kuSimakade, zibe ngezomphristi.
Niyakumemezela ngalolo lusuku, nibe nomhlangano ongcwele, aniyukusebenza msebenzi; lokhu kuyisimiso esiphakade ezizukulwaneni zenu, kuzo zonke izindlu zenu.
“ ‘Lapho senivuna isivuno sezwe lakini, aniyukuvuna konke emagunjini amasimu enu, aniyukuqeda konke, niyakushiyela abampofu nabafokazi; nginguSimakade uNkulunkulu wakho.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Ngenyanga yesikhombisa ngolokuqala lwenyanga, niyoba nosuku lokuphumula ngokuphelele, umhlangano ongcwele, oyoba yisikhumbuzo ngokuba nishaye amacilongo.
Aniyukwenza msebenzi, niyonikela ngomnikelo womlilo kuSimakade.’ ”
USimakade wakhuluma kuMose, wathi:
“Usuku lweshumi lwenyanga yesikhombisa luwusuku lokubuyisana; niyoba nomhlangano ongcwele, nithobise imiphefumulo yenu, ninikele ngomnikelo womlilo kuSimakade.
Aniyukwenza msebenzi ngalolo lusuku, ngokuba luwusuku lokubuyisana, ukuze nenzelwe ukubuyisana phambi kukaSimakade uNkulunkulu wenu.
Yilowo nalowo muntu ongayikuzithoba ngalolo lusuku uyonqunywa kubantu bakubo.
Yilowo nalowo muntu oyokwenza umsebenzi othile ngalolo lusuku, lowo muntu ngiyakumbhubhisa, angabe esaba khona phakathi kwabantu bakubo.
Aniyukwenza msebenzi; kuyisimiso esiphakade ezizukulwaneni zenu, kuzo zonke izindlu zenu.
Kuyoba yisabatha lokuphumula ngokuphelele kini, nithobise imiphefumulo yenu. Ngosuku lwesishiyagalolunye lwenyanga, kusihlwa, kusukela kusihlwa kuze kube kusihlwa ngakusasa, niyogcina isabatha lenu.”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Ngosuku lwe-15 lwenyanga yesikhombisa kuyakuba nguMkhosi Wamadokodo kuSimakade, izinsuku eziyisikhombisa.
Ngosuku lokuqala kuyakuba ngumhlangano ongcwele, aniyukwenza msebenzi.
Izinsuku eziyisikhombisa niyakunikela ngomnikelo womlilo kuSimakade. Ngosuku lwesishiyagalombili nibe nomhlangano ongcwele, niyonikela ngomnikelo womlilo kuSimakade, ngumhlangano ohloniphekileyo; aniyukwenza msebenzi.
“ ‘Lena yimikhosi emisiweyo kaSimakade eniyoyimemezela enhlanganweni engcwele ukuba ninikele ngayo ngomnikelo womlilo kuSimakade, umnikelo wokushiswa nomnikelo wokusanhlamvu, umhlatshelo neminikelo yokuphuzwayo, kube yilowo nalowo ngosuku lwawo,
ngaphandle kwamasabatha kaSimakade, nangaphandle kwezipho zenu, nangaphandle kwezithembiso zenu zonke, nangaphandle kweminikelo yenu yonke yesihle eniyonikela ngayo kuSimakade.
“ ‘Ngosuku lwe-15 lwenyanga yesikhombisa, lapho senibuthile izithelo zezwe, niyogubha uMkhosi kaSimakade izinsuku eziyisikhombisa. Ngosuku lokuqala nangosuku lwesishiyagalombili kuyoba yizinsuku zenu zokuphumula.
Ngosuku lokuqala niyothatha izithelo zemithi emihle, amagatsha amasundu, namagatsha emithi edumbileyo, neminyezane yemifula, nithokoze phambi kukaSimakade uNkulunkulu wenu, izinsuku eziyisikhombisa.
Niyakuwugubha uMkhosi kaSimakade izinsuku eziyikhombisa ngonyaka, lokhu kuyisimiso esiphakade ezizukulwaneni zenu; niyakuwugubha ngenyanga yesikhombisa.
Niyakuhlala emadokodweni izinsuku eziyisikhombisa, bonke abangabozalo kwa-Israyeli bayohlala emadokodweni,
ukuze izizukulwane zenu zazi ukuthi abantu bakwa-Israyeli ngabahlalisa emadokodweni emveni kokuba ngibakhiphe eGibhithe; nginguSimakade uNkulunkulu wenu.’ ”
UMose wabatshela abantu bakwa-Israyeli ngemikhosi emisiweyo kaSimakade.
USimakade wakhuluma kuMose, wathi:
“Yala abantu bakwa-Israyeli ukuba balethe kuwe amafutha eminqumo acwengekileyo, agxotshelwe ukukhanyisa, ukuze izibani zivuthe njalonjalo,
ngaphandle kwesihenqo sobufakazi, ethendeni lokuhlangana. U-Aroni uyakuzilungisa njalo phambi kukaSimakade, kusukela kusihlwa kuze kuse. Lokhu kuyoba yisimiso saphakade ezizukulwaneni zenu.
Uyakulungisa njalo izibani othini olucwengekileyo, phambi kukaSimakade.
“Uyothatha impuphu ecolisekileyo upheke ngayo amaqebelengwane ali-12, iqebelengwane ngalinye libe okubili eshumini.
Uyowabeka abe yimigqa emibili, abe yisithupha kulowo nalowo mugqa etafuleni elicwengekileyo, phambi kukaSimakade.
Uyakubeka inhlaka ecwengekileyo kuyo yomibili imigqa, ibe yisikhumbuzo somnikelo wesinkwa, umnikelo womlilo kuSimakade.
Amasabatha ngamasabatha, uyakuzihlela njalo phambi kukaSimakade, njengokuzinikela kwabantu bakwa-Israyeli, nanjengesivumelwano esiphakade.
Ziyakuba ngezika-Aroni namadodana akhe, bayozidlela endaweni engcwele, ngoba zingcwelengcwele, zingezakhe phakathi kweminikelo yomlilo kaSimakade; ngokwesimiso esiphakade.”
Indodana yowesifazane wakwa-Israyeli noyise ongowaseGibhithe yaphuma yaya phakathi kwabakwa-Israyeli. Indodana yowesifazane wakwa-Israyeli yaxabana nomuntu wakwa-Israyeli enkanjini.
Yahlambalaza igama likaSimakade, yaliqalekisa; yalethwa kuMose. Unina waleyo ndodana kwakunguShelomithi, indodakazi kaDibhiri, wesizwana sakwaDani.
Bayifaka ejele kuze kuphume isinqumo sikaSimakade ukuthi benzenjani ngayo.
USimakade wakhuluma kuMose, wathi:
“Mkhiphele ngaphandle kwenkambu lowo muntu othukile. Bonke abamuzwa mababeke izandla zabo ekhanda lakhe, inhlangano yonke imkhande ngamatshe.
Uyokhuluma nabantu bakwa-Israyeli, uthi kubo: ‘Yilowo nalowo oyakuthuka uNkulunkulu wakhe uyakujeziswa ngenxa yesono sakhe.
Ohlambalaza igama likaSimakade uyokufa nokufa. Impela inhlangano yonke iyomkhanda ngamatshe. Umfokazi noma umnsinsi wokuzimilela uyobulawa, uma ehlambalaza igama likaSimakade.
“ ‘Umuntu oshaya omunye aze afe, impela uyobulawa.
Oshaya inkomo ize ife uyoyikhokha, kube ngukuphila ngokuphila.
Umuntu olimaza omunye, kuyokwenziwa kuye njengalokho naye enzile,
kube ngukwaphuka ngokwaphuka, iso ngeso, izinyo ngezinyo; njengalokho elimazile umuntu, kuyokwenziwa kanjalo nakuye.
Obulala inkomo, uyoyikhokha; obulala umuntu, uyobulawa.
Niyoba nesehlulelo esifanayo kumfokazi nakowozalo; nginguSimakade uNkulunkulu wenu.’ ”
UMose wakhuluma nabantu bakwa-Israyeli; bamkhiphela ngaphandle kwenkambu lowo othukileyo, bamkhanda ngamatshe. Abakwa-Israyeli benza njengalokhu uSimakade ayemyalile uMose.
USimakade wakhuluma kuMose entabeni iSinayi, wathi:
“Yisho kubantu bakwa-Israyeli, uthi kubo: ‘Lapho senifikile ezweni engininika lona, izwe liyogcina isabatha kuSimakade.
Uyakulima insimu yakho iminyaka eyisithupha, iminyaka eyisithupha uthene isivini sakho, ubuthe izithelo zaso,
kodwa ngonyaka wesikhombisa kuyakuba khona isabatha lokuphumula kwezwe, isabatha kuSimakade. Awuyukulima insimu yakho, futhi awuyukusithena nesivini sakho.
Amakhikhizela esivuno sakho awuyukuwavuna, nezithelo zomvini wakho ongatheniwe awuyukuzikha; kuyakuba ngunyaka wokuphumula kwezwe.
Okuyozimilela ngonyaka wesabatha kuyoba ngukudla kwenu: okwakho nenceku yakho, nencekukazi yakho, nesisebenzi sakho, nomfokazi ogogobele kwakho,
ngisho nemfuyo yakho nezilwane zasendle, konke okuzimilele ezweni kuyakuba ngukudla kwenu.
“ ‘Uyozibalela amasabatha ayisikhombisa eminyaka, iminyaka eyisikhombisa iphindwe kasikhombisa, izinsuku eziyisikhombisa zamasabatha ayisikhombisa ngonyaka, okwenza iminyaka engama-49.
Uyoshaya icilongo limpompoloze kuzwakale kulo lonke izwe lakini, ngosuku lweshumi lwenyanga yesikhombisa, okuwusuku lokubuyisana.
Unyaka wama-50 niyakuwungcwelisa, nimemezele ukukhululeka kwazo zonke izakhamuzi. Kuyakuba ngunyaka wejubhili kini, niyakubuyela, kube yilowo nalowo efeni lakhe, yilowo nalowo abuyele emndenini wakubo.
Unyaka wama-50 uyoba yijubhili kini; aniyukulima, aniyukuwavuna amakhikhizela awo, aniyukuzikha izithelo zomvini ongatheniwe.
Uyijubhili, ngakho-ke uyakuba ngcwele kini, niyodla okuvela emasimini.
“ ‘Ngonyaka wejubhili, yilowo nalowo uyobuyela efeni lakhe.
“ ‘Lapho uthengisela owezwe lakini okuthile noma ukuthenga kuye, aniyukuqolana;
niyakuthengiselana nomakhelwane wakho kuye ngenani leminyaka emva kwejubhili nangenani leminyaka yomkhiqizo.
Uyakuyikhuphula intengo kuye ngobuningi beminyaka, kodwa uma iminyaka imincane, uyakuyinciphisa intengo, ngokuba yinani leminyaka yesivuno enithengiselana ngayo.
Ningaqolani, kepha uyomesaba uNkulunkulu wakho, ngokuba nginguSimakade uNkulunkulu wakho.
“ ‘Niyogcina zonke izimiso zami, nezehlulelo zami nizenze, ukuze nihlale nivikelekile ezweni.
Izwe liyakuthela izithelo zalo ngobuningi bazo, nidle nisuthe, nihlale kulo nivikelekile.
Uma nithi: “Siyakudlani ngonyaka wesikhombisa na? Bheka, asiyukulima, asiyukuvuna kudla;”
khona ngiyakuyala isibusiso sami sehlele phezu kwenu ngonyaka wesithupha, ukuze uthele ukudla kweminyaka emithathu.
Niyolima ngonyaka wesishiyagalombili, nibe nisadla izithelo enizigcinile; kuze kufike unyaka wesishiyagalolunye, kungene izithelo zawo, niyakudla okugcinwe ezinqolobaneni.
“ ‘Izwe aniyukulithengisa kuze kube phakade, ngokuba izwe lingelami, nina-ke ningabafokazi abagogobeleyo nami.
Izwe lonke eliyifa lenu niyakuba nelungelo lokulihlenga.
“ ‘Uma umfowenu eba mpofu, bese ethengisa ngefa lakhe, kuyofika umhlengi oyisihlobo sakhe esisondele silihlenge ifa umfowabo athengise ngalo.
Uma umuntu engenaye umhlengi oyisihlobo sakhe, kodwa bese eba ngocebileyo, athole okwanele ukulihlenga,
uyobala iminyaka selokhu alithengisa, bese kuthi okuseleyo akudlulisele kulowo muntu ayemthengisele lona, yena abuyele efeni lakhe.
Uma engawatholi amandla okulibuyisela kuye, lelo ayelithengisile liyakusala esandleni sowalithengayo, kuze kufike unyaka wejubhili. Liyokhululeka ngejubhili, bese ebuyela efeni lakhe.
“ ‘Uma umuntu ethengisa ngendlu yokuhlala emzini onogange, angayihlenga uma unyaka ungakapheli ithengisiwe, ngokuba unyaka wonke uyakuba nalo ilungelo lokuyihlenga.
Uma engayihlenganga kwaze kwaphela unyaka, leyo ndlu esemzini onogange isiyohlala ingeyalowo oyithengileyo kuze kube phakade ezizukulwaneni zakhe. Ayiyukubuyiselwa koyithengisileyo ngejubhili.
Kepha izindlu zemizana engenalo ugange macala wonke ziyakubalwa namasimu; zinokuhlengwa, zibuyiselwe kubaninizo ngejubhili.
“ ‘Kepha imizi yabaLevi, izindlu zemizi eyifa labo, abaLevi bayoba nelungelo lokuzihlenga noma nini izindlu ezisemizini eyifa labo.
Uma umLevi engeke akwazi ukuyihlenga indlu eyayithengisiwe, izindlu okwathengiselwana ngazo emizini eyifa labo, ziyobuyiselwa kuye ngejubhili, ngokuba izindlu zemizi yabaLevi ziyifa labo phakathi kwabantu bakwa-Israyeli.
Amasimu namadlelo omuzi wabo akunakuthengiswa, ngokuba kuyifa labo, kuze kube phakade.
“ ‘Uma umfowenu eba mpofu, bese encika kuwe, uyakumsekela, ahlale nawe njengomfokazi nogogobele kwakho.
Awuyukuthatha kuye inzalo nenzuzo, kodwa uyomesaba uNkulunkulu wakho, ukuze umfowenu ahlale nawe.
Awuyukumboleka imali ukuze uthole inzalo, awuyukumnika ukudla kwakho bese umfuna inzuzo.
NginguSimakade uNkulunkulu wenu, owanikhipha eGibhithe ukuninika iKhanani, ukuze ngibe nguNkulunkulu wenu.
“ ‘Uma umfowenu eba mpofu ehlala nawe, azithengise kuwe, awuyukumsebenzisa njengesigqila.
Kepha uyokuba njengesisebenzi nogogobele kwakho; uyokusebenzela kuze kufike unyaka wejubhili,
bese eyasuka angabe esahlala nawe. Uyobuyela nabantwana bakhe emndenini wakubo nasefeni lokhokho bakhe.
Bayizinceku zami engazikhipha eGibhithe, akuyukuthengiswa ngabo babe yizigqila.
Awuyukumphatha ngesihluku, kodwa uyomesaba uNkulunkulu wakho.
“ ‘Izigqila zakho zesilisa nezesifazane oyokuba nazo, uyakuzithenga kwabezizwe abanizungezileyo.
Uyakuzithenga emadodaneni abafokazi abagogobele phakathi kwenu. Nalezi zingane ezizalelwe ezweni lakini ziyoba yifa lenu, niyozithenga kwabomndeni wakubo.
Niyakuzishiyela amadodana enu zibe yifa lawo kuze kube phakade. Kepha makungabi bikho muntu oyophatha ngesihluku umfowabo kubantu bakwa-Israyeli.
“ ‘Uma umfokazi ogogobele kwakho eba nengcebo, omunye kubafowenu abe mpofu, bese ezithengisa kumfokazi noma kwenye ingxenye yomndeni wabafokazi,
uma esezithengisile unelungelo lokuhlengwa. Omunye wabafowabo angamhlenga;
kungaba nguyisekazi noma indodana kayisekazi engamhlenga, noma omunye oyisihlobo sakhe segazi angamhlenga, kodwa uma eba ngocebileyo angazihlenga yena.
Uyokhuluma nalowo omthengileyo babalelane inani leminyaka esasele kuze kufike unyaka wejubhili. Intengo okumele ayikhokhe iyoba ngangenani leminyaka; isikhathi abe naso phansi komthengi wakhe siyolingana neminyaka yokuqashwa kwakhe.
Uma kusasele iminyaka eminingi, uyakukhokha komthengileyo imali elingana naleyo athengwa ngayo.
Uma sekusele iminyaka emincane kufike unyaka wejubhili, uyobalisana naye imali njengeminyaka yakhe yokuhlengwa.
Njengesisebenzi esiqashwa iminyaka ngeminyaka, uyakuba ngaphansi kwesandla sakhe, kodwa akayukumphatha ngesihluku emehlweni akho.
“ ‘Uma engahlengwanga ngalezi zindlela, ngonyaka wejubhili uyokhululeka nabantwana bakhe.
Abantu bakwa-Israyeli bayizinceku, izinceku zami engazikhipha eGibhithe; nginguSimakade uNkulunkulu wenu.
“ ‘Aniyukuzenzela onkulunkulu abangasho lutho, aniyukuzimisela izinsika, aniyukuzibekela itshe elingumfanekiso ezweni lakini, ukuba nikukhothamele; nginguSimakade uNkulunkulu wenu.
“ ‘Niyogcina amasabatha ami, nihloniphe indawo yami engcwele; nginguSimakade.
“ ‘Uma nihamba ngezimiso zami, nigcina imiyalo yami, niyenze,
ngiyakuninika imvula ngesikhathi sayo, izwe likhiqize ukudla, imithi yasendle ithele izithelo zayo.
Niyobhula kuze kube yisikhathi sokuvuna imivini, nivune imivini kuze kube yisikhathi sokulima; niyakudla isinkwa senu, nisuthe, futhi niyohlala ezweni lakini nivikelekile.
“ ‘Ngiyakuninika ukuthula ezweni, nilale ningesatshiswa muntu. Ngiyakuziqeda nya izilwane ezimbi ezweni, nenkemba ayiyukudabula ezweni lakini.
Niyakuxosha izitha zenu, ziwe ngenkemba phambi kwenu.
Abayisihlanu kini bayakuxosha abayikhulu, abayikhulu kini baxoshe abayizi-10 000, izitha zenu ziyakuwa ngenkemba phambi kwenu.
“ ‘Ngiyonenzela umusa, nginenze nichume kakhulu, nginandise, ngiqinise isivumelwano sami nani.
Niyakudla okugcinwe ezinqolobaneni, nikhiphe okudala ukuze ningenise okusha.
Ngiyakubeka ithabanakeli lami phakathi kwenu, umphefumulo wami awuyukuninenga.
Ngiyakuhamba phakathi kwenu, ngibe nguNkulunkulu wenu, nibe ngabantu bami.
NginguSimakade uNkulunkulu wenu owanikhipha eGibhithe ukuba ningabi yizigqila zabo; ngephulile izikeyi zejoka lenu, ngenza ukuba nihambe nikhululekile.
“ ‘Kepha uma ningangilaleli, ningayigcini yonke le miyalo,
uma nilahla izimiso zami, nomphefumulo wenu unengwa yizehlulelo zami, ukuze ningayenzi yonke imiyalo yami, kodwa naphula isivumelwano sami,
nakhu engiyokwenza kini: ngiyonehlisela ingebhe, ufuba, umkhuhlane ovala amehlo, nokudangala komphefumulo. Niyotshala imbewu ningazuzi lutho, kudliwe yizitha zenu ebenikutshalile.
Ngiyomelana nani, nishaywe phambi kwezitha zenu, labo abanizondayo bayobusa phezu kwenu; niyobaleka kungekho muntu onixoshayo.
“ ‘Uma ningangilaleli nangalezi zinto, ngiyonishaya ngokuphindwe kasikhombisa ngenxa yezono zenu.
Ngiyakuqeda ukuqhosha ngamandla enu, ngenze izulu lenu libe njengensimbi, nomhlabathi wenu ube njengethusi.
Isithukuthuku senu siyophelela obala; izwe lenu aliyukuthela lutho, nemithi ekulo ayiyukuthela zithelo.
“ ‘Uma niyohamba nimelene nami, ningavumi ukungilalela, ngiyakunehlisela izinhlupheko eziphindwe kasikhombisa, ngenxa yezono zenu.
Ngiyothumela izilwane zasendle phakathi kwenu, ziyakubulala abantwana benu, zibhubhise imfuyo yenu, zinicoboshise, zibhubhise nezindlela zenu.
“ ‘Uma phezu kwazo zonke izinto enginishaye ngazo ningaphendukanga, kodwa nahamba nimelene nami,
nami ngizomelana nani, ngizakunishaya, yebo, ngokuphindwe kasikhombisa, ngenxa yezono zenu.
Ngiyonehlisela inkemba yempindiselo, engiyakuziphindiselela ngayo ngenxa yesivumelwano sami. Niyobuthana ndawonye emizini yenu, ngithumele ubhubhane phakathi kwenu; ninikelwe esandleni sezitha zenu.
Lapho nginephuca ukudla okunisimamisile, abesifazane abalishumi bayakubhaka isinkwa eziko elilodwa. Bayakunilinganisela lapho besiletha kini, nidle ningasuthi.
“ ‘Uma nangalokhu ningangilaleli, kodwa nihamba nimelene nami,
nami ngizomelana nani ngolaka, yebo, ngizonishaya kuze kube kasikhombisa, ngenxa yezono zenu.
Niyokudla inyama yamadodana namadodakazi enu.
Ngiyakuchitha izindawo zenu eziphakemeyo, ngibhidlize ama-althare enu empepho, izidumbu zenu ngizilahle phezu kwezithombe zenu ezifihlikileyo; umphefumulo wami uyonengwa yini.
Ngiyakuyenza imizi yenu ukuba ibhidlizwe, ngizenze izindawo zenu ezingcwele zibe yincithakalo; angiyukuhogela unqambothi lwephunga lenu elimnandi.
Ngiyakulenza izwe libe yincithakalo; izitha zenu ezihlala kulo ziyakumangala ngalokhu.
Nina ngiyakunihlakazela phakathi kwezizwe, ngithumele inkemba emva kwenu, izwe lakini liyakuba yincithakalo, nemizi yenu ibe ngamabibi.
Ngaleso sikhathi izwe liyakuthokoza ngamasabatha alo ngesikhathi lisele liyincithakalo, nina niyobe nisezweni lezitha zenu ngaleso sikhathi; izwe liyakuphumula, lithokoze ngamasabatha alo.
Ngesikhathi lihlezi liyincithakalo liyakuphumula, ukuphumula elingakutholi ngamasabatha enu, lapho nihlezi kulo.
“ ‘Abayosala phakathi kwenu, ngiyakubehlisela indumalo ezinhliziyweni zabo, besemazweni ezitha zabo. Bayakuxoshwa ngisho nangukuhashaza kweqabunga lipheshethwa ngumoya, babaleke njengomuntu ebalekela inkemba, bawe kungekho obaxoshayo.
Bayakukhubeka omunye ekhutshwa ngomunye kungathi babalekela inkemba, kodwa kube kungekho muntu obaxoshayo. Aniyukuba namandla okuma phambi kwezitha zenu.
Niyakubhubha phakathi kwezizwe, izwe lezitha zenu linishwabadele.
Insali yabakini iyogcugca iphelele ezweni lezitha zenu, nazo ziyobhubha ngenxa yobubi boyise.
“ ‘Bayakubuvuma ububi babo nobubi bokhokho babo okwathi ekungethembekeni kwabo, benza ukungethembeki kimi, baqhubeka bamelena nami.
Nami ngokunjalo ngamelana nabo, ngabayisa ezweni lezitha zabo. Uma ngaleso sikhathi izinhliziyo zabo ezingasokile zithobeka, bekhombisa ukuphenduka ngobubi babo,
ngiyakusikhumbula isivumelwano sami noJakobe, nesivumelwano sami no-Isaka, nesivumelwano sami no-Abhrahama. Ngiyakusikhumbula, ngilikhumbule nezwe.
Bayakulishiya izwe, lithokoze ngamasabatha alo lisahlezi liyincithakalo, kungekho muntu kulo. Bona besamukeliswa isijeziso sobubi babo, ngokuba balahla izehlulelo zami, umphefumulo wabo wanengwa yizimiso zami.
Kepha nalapho besesezweni lezitha zabo angiyukubalahla, angiyukunengwa yibo ukuba ngingaze ngibaqothule, ngephule isivumelwano sami nabo, ngokuba nginguSimakade uNkulunkulu wabo.
Ngenxa yabo ngiyosikhumbula isivumelwano nokhokho babo engabakhipha eGibhithe phambi kwezizwe, ukuba ngibe nguNkulunkulu wabo; nginguSimakade.’ ”
Lezi yizimiso nezehlulelo nemithetho okwamiswa nguSimakade phakathi kwakhe nabantu bakwa-Israyeli entabeni iSinayi, ngesandla sikaMose.
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma umuntu enquma ukwenza isithembiso esithile kuSimakade, esiyisilinganiso ngomuntu,
isilinganiso ngowesilisa siyakuba: kusukela eminyakeni engama-20 kuya kwengama-60 siyakuba ngamashekeli esiliva angama-50 ngokwesilinganiso seshekeli lasendaweni engcwele.
Uma kungowesifazane, isilinganiso kuyakuba ngamashekeli angama-30.
Uma kungowesilisa oneminyaka emihlanu kuya kwengama-20, kuyakuba ngokulinganisa kwenu ngowesilisa amashekeli angama-20, kowesifazane amashekeli alishumi.
Uma kungowesilisa onenyanga kuya eminyakeni emihlanu, ngokwesilinganiso senu kuyakuba ngamashekeli ayisihlanu esiliva, owesifazane kube ngamashekeli amathathu esiliva.
Uma kungowesilisa oneminyaka engama-60 kuya phezulu kuyakuba ngamashekeli ali-15, uma kungowesifazane kube ngamashekeli alishumi.
Kepha uma owethembisayo empofu, uyoyiswa kumphristi, umphristi uyomlinganisela ngokwamandla akhe lowo owenze isithembiso.
“ ‘Uma kuyisilwane bazakunikela ngaso kuSimakade, noma yisiphi esinjalo siyakuba ngcwele kuSimakade.
Akayukuzishintshanisa, futhi akayukuzenana ngezinye, noma kungaba ngesihle ngesibi, noma ngesibi ngesihle; uma isilwane sinanwa ngesinye isilwane, zombili okungukuthi leso nokwenanwa ngaso ziyakuba ngcwele.
Uma kuyisilwane esingcolile okungenikelwe ngaso kuSimakade, isilwane siyakulethwa phambi komphristi,
umphristi uyakusihlola ukuze abone noma sihle noma sibi; njengalokho umphristi elinganisile, kuyakuba kanjalo.
Kodwa uma ethanda ngempela ukusihlenga, uyakuthasisela okwesihlanu kwaso kukho okulinganisiweyo.
“ ‘Uma umuntu eyakwehlukanisa indlu yakhe ibe ngcwele kuSimakade, umphristi uyakuyilinganisa ukubona ukuthi yinhle noma yimbi; njengalokhu umphristi eyilinganisile, kuyakuba kanjalo.
Uma oyingcwelisayo ethanda ukuyihlenga indlu yakhe, uyakuthasisela okwesihlanu kwemali yokulinganiswa, bese iba ngeyakhe.
“ ‘Uma umuntu engcwelisela uSimakade ingxenye yensimu eyifa lakhe, ukulinganiswa kwayo kuyakuba njengokukhiqiza kwayo, kube ngamashekeli angama-50 esiliva ehomere lebhali.
Uma engcwelisa insimu yakhe kusukela ngonyaka wejubhili, ukulinganisa kwakhe kuyakuma.
Kepha uma engcwelisa insimu yakhe ngemuva kwejubhili, umphristi uyombalela imali ngokweminyaka eseleyo kuze kufike unyaka wejubhili, bese kususwa lokho okulinganisiwe.
Uma ongcwelisa insimu ethanda ngempela ukuyihlenga, uyakuthasisela kuyo okwesihlanu kwemali yokulinganiswa kwayo, bese ibuyela kuye.
Kodwa uma engayihlengi insimu yakhe, noma eyithengisele omunye umuntu, akasayukukwazi ukuyihlenga.
Lapho insimu isikhululwa ngonyaka wejubhili, njengensimu enikelwe, iyakuba ngcwele kuSimakade; ibe yifa lomphristi.
“ ‘Uma umuntu engcwelisa kuSimakade insimu ayithengileyo, okungesiyo ingxenye yefa lakhe,
umphristi uyakumbalela isamba sayo kuze kufike unyaka wejubhili, intengo eyakukhokhwa ngalolo lusuku, iyakuba ngcwele kuSimakade.
Ngonyaka wejubhili insimu iyakubuyela kulowo eyayithengwe kuye, kulowo eyifa lakhe.
Konke ukulinganisa kuyakuba ngokweshekeli lendawo engcwele; amagera angama-20 ayakuba yishekeli.
“ ‘Amazibulo ezilwane, njengamazibulo angakaSimakade, awanakungcweliswa muntu; noma ngabe eliyinkabi noma eliyimvu, angakaSimakade.
Uma kungelesilwane esingcolileyo, uyakulihlenga ngenkathi lilinganiswa, uyothasisela okwesihlanu kwakho; uma lingahlengwa, kuyakuthengiswa ngalo lapho lilinganiswa.
“ ‘Nokho yonke into enikelwe, umuntu ayahlukanisele uSimakade kukho konke anakho, kungaba ngabantu, noma yizilwane, noma yinsimu eyifa lakhe, akuyukuthengiswa, futhi akunakuhlengwa; konke okunikelwe kungcwelengcwele kuSimakade.
“ ‘Umuntu oqalekisiweyo phakathi kwabantu akasoze ahlengwa; uyobulawa nokubulawa.
“ ‘Konke okweshumi kwezwe, okwembewu noma okwezithelo zemithi yezwe, kungokukaSimakade; kungcwele kuSimakade.
Uma umuntu efuna ukuhlenga okuthile kokweshumi kwakhe, uyakuthasisela kukho okwesihlanu kwakho.
Konke okweshumi kwezinkomo noma okwezimvu, konke okuyakudlula ngaphansi kwenduku yomelusi kubalwa okweshumi, kuyakuba ngcwele kuSimakade.
Akayukukuhlola ukuthi kuhle noma kubi, akayukukwenana ngokunye, kepha uma ngempela ekwenana ngokunye, kona naloko okwenanwa ngakho kuyakuba ngcwele; akuyukuhlengwa.’ ”
Le yimiyalo uSimakade ayala ngayo uMose ngabantu bakwa-Israyeli entabeni iSinayi.
Ngosuku lokuqala lwenyanga yesibili ngonyaka, wesibili abakwa-Israyeli bephumile eGibhithe, uSimakade wakhuluma kuMose ehlane iSinayi ethendeni lokuhlangana, wathi:
“Bala yonke inhlangano yabantu bakwa-Israyeli ngemindeni yabo nangezindlu zokhokho, ngokwenani lamagama, bonke abesilisa ngezinhloko zabo;
kusukela kwabaneminyaka engama-20 kuya phezulu, bonke kwa-Israyeli asebekwazi ukuphuma baye empini, wena no-Aroni, niyobabala ngamaviyo abo.
Kuleso naleso sizwana niqoke umuntu abe munye, abe yinhloko yendlu yokhokho bakhe.
Nanka amagama amadoda azonisiza: “kwaRubeni: u-Elizuri indodana kaShedewuri.
KwaSimeyoni: uShelumiyeli indodana kaZurishadayi.
KwaJuda: uNaheshoni indodana ka-Aminadaba.
Kwa-Isakhare: uNethaneli indodana kaZuwari.
KwaZebuloni: u-Eliyabe indodana kaHeloni.
Kumadodana kaJosefa: kwa-Efrayimi: u-Elishama indodana ka-Amihudi; kwaManase: uGamaliyeli indodana kaPhedazuri.
KwaBhenjamini: u-Abhidani indodana kaGideyoni.
KwaDani: u-Ahiyezeri indodana ka-Amishadayi.
Kwa-Asheri: uPhagiyeli indodana ka-Okhirani.
KwaGadi: u-Eliyasafa indodana kaDehuweli.
KwaNafethali: u-Ahira indodana ka-Enani.”
Yilaba ababizwa enhlanganweni, abaholi bezizwana zokhokho; babeyizinhloko zemindeni yakwa-Israyeli.
UMose no-Aroni bathatha lawa madoda ayebizwe ngamagama,
ngosuku lokuqala enyangeni yesibili, baqoqa yonke inhlangano, base bebabhalisa ngokokhokho babo, ngemindeni yabo, nangokwezindlu zokhokho babo. Wonke amagama abantu besilisa abaneminyaka engama-20 nangaphezulu abhalwa, futhi abalwa,
njengalokhu uSimakade ayemyalile uMose, wababala ehlane iSinayi.
Abozalo lukaRubeni izibulo lika-Israyeli, nazo zonke izizwe zakwa-Israyeli, ngokolibo lwabo, ngemindeni yabo nangokwezizwana zokhokho babo, ngokwenani lamagama, bonke abesilisa ababeneminyaka engama-20 nangaphezulu abase bengaya empini:
labo ababalwayo kubo, abesizwana sakwaRubeni, babeyizi-46 500.
Abozalo lukaSimeyoni, ngokolibo lwemindeni yabo nangezindlu zawoyise, labo ababalwayo kubo njengokomumo wamagama, ngezinhloko zabo, bonke abesilisa, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaSimeyoni, babeyizi-59 300.
Abozalo lukaGadi, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaGadi, babeyizi-45 650.
Abozalo lukaJuda, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwe sakwaJuda, babeyizi-74 600.
Abozalo luka-Isakhare, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwe sakwa-Isakhare, babeyizi-54 400.
Abozalo lukaZebuloni, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaZebuloni, babeyizi-57 400.
Abozalo lukaJosefa, okungukuthi uzalo lwabakwa-Efrayimi, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20, bonke abangaphuma impi:
labo ababalwayo kubo, abesizwana sakwa-Efrayimi, babeyizi-40 500.
Abozalo lukaManase, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaManase, babeyizi-32 200.
Abozalo lukaBhenjamini, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaBhenjamini, babeyizi-35 400.
Abozalo lukaDani, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaDani, babeyizi-62 700.
Abozalo luka-Asheri, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwa-Asheri, babeyizi-41 500.
Abozalo lukaNafethali, ngokolibo lwemindeni yabo nangezindlu zawoyise njengokomumo wamagama, kusukela kwabaneminyaka engama-20 kuya phezulu, bonke abangaphuma impi:
labo ababalwayo kubo, abesizwana sakwaNafethali, babeyizi-53 400.
Yilabo ababalwayo, ababalwa nguMose no-Aroni nabaholi bakwa-Israyeli, bengamadoda ali-12, kwaba yileyo naleyo yamela indlu kakhokho wayo.
Bonke ababalwayo kwabakwa-Israyeli ngezindlu zokhokho babo, kusukela kwabaneminyaka engama-20 kuya phezulu, bonke abakwa-Israyeli abangaphuma impi,
sebebonke ababalwayo babeyizi-603 550.
AbaLevi ababalwanga ngokwesizwana sokhokho babo njengezinye izizwana zakwa-Israyeli.
USimakade wayekhulume kuMose, wathi:
“Yisizwana sakwaLevi kuphela esingayukubalwa, awuyukusibala sona phakathi kwabantu bakwa-Israyeli.
Kunalokho uyakubabeka abaLevi bengamele ithabanakeli lobufakazi nayo yonke impahla yalo, bayakulithwala ithabanakeli nempahla yalo yonke, bakhonze kulo, bakhe amathende abo, balizungeze.
Lapho sekusukwa, abaLevi bayoliwisa ithabanakeli, kuthi lapho kukaniswa khona, babuye balimise; umfokazi oyosondela kulo uyakubulawa.
Abantu bakwa-Israyeli bayakumisa amathende abo, kube yilowo nalowo enkanjini yabo, yilowo nalowo ngasebhaneleni labo, ngamaviyo abo.
AbaLevi bayomisa amathende abo azungeze ithabanakeli lobufakazi, ukuze ulaka lungehleli phezu kwenhlangano yabantu bakwa-Israyeli. AbaLevi bayakufeza yonke imisebenzi yokuqapha ithabanakeli lobufakazi.”
Abakwa-Israyeli benza konke njengalokhu uSimakade ayemyalile uMose.
USimakade wakhuluma kuMose no-Aroni, wathi:
“Makube yilowo nalowo kubantu bakwa-Israyeli akanise ngasebhaneleni lakhe ngasezimpawini zezindlu zokhokho bakhe; bayakukanisa nxazonke babhekane nethende lokuhlangana.”
Abakanisa ngasempumalanga ngalapho kuphuma khona ilanga kuyakuba ngabebhanela lenkambu yakwaJuda ngamabandla abo; umholi wabozalo lwabakwaJuda kunguNaheshoni indodana ka-Aminadaba.
Ibutho lakhe nalabo ababalwayo kubo babeyizi-74 600.
Abakanisa eceleni kwakhe kuyakuba yisizwana sakwa-Isakhare. Umholi wabozalo lwabakwa-Isakhare kuyakuba nguNethaneli indodana kaZuwari;
ibandla lakhe nalabo ababalwayo kulo babeyizi-54 400.
Isizwana sakwaZebuloni: umholi wabozalo lwabakwaZebuloni kungu-Eliyabe indodana kaHeloni;
ibandla lakhe nalabo ababalwayo kulo babeyizi-57 400.
Bonke ababalwayo benkambu yakwaJuda babeyizi-186 400 ngamabandla abo. Labo bayakusuka kuqala.
Ibhanela lenkambu yakwaRubeni liyakuba ngaseningizimu ngamabandla abo; umholi wabozalo lwabakwaRubeni kungu-Elizuri indodana kaShedewuri.
Ibandla lakhe nalabo ababalwayo kulo babeyizi-46 500.
Abakanisa eceleni kwakhe ngabesizwana sakwaSimeyoni; umholi wabozalo lwabakwaSimeyoni kunguShelumiyeli indodana kaZurishadayi.
Ibandla lakhe nalabo ababalwayo kubo babeyizi-59 300.
Isizwana sakwaGadi: umholi wabozalo lwabakwaGadi kungu-Eliyasafa indodana kaRehuweli.
Ibandla lakhe nalabo ababalwayo kubo babeyizi-45 650.
Bonke ababalwayo benkambu yabakwaRubeni babeyizi-151 450 ngamabandla abo. Labo bayakusuka babe ngabesibili.
Ithende lokuhlangana nenkambu yabaLevi kuyakusuka kube phakathi kwezinye izinkambu. Bayakusuka njengalokho bebekanisile, yilelo nalelo qembu endaweni yalo, ngokwamaviyo alo.
Ibhanela lenkambu yakwa-Efrayimi liyakuba ngasentshonalanga ngamabandla abo; umholo wabozalo lwabakwa-Efrayimi kuyakuba ngu-Elishama indodana ka-Amihudi.
Ibandla lakhe nalabo ababalwayo kubo babeyizi-40 500.
Eceleni kwakhe kuyakuba khona isizwana sakwaManase; umholi wabozalo lwabakaManase kunguGamaliyeli indodana kaPhedazuri.
Ibandla lakhe nalabo ababalwayo kubo babeyizi-32 200.
Isizwana sakwaBhenjamini; umholi wabozalo lwabakwaBhenjamini kungu-Abhidani indodana kaGideyoni.
Ibandla lakhe nalabo ababalwayo kubo babeyizi-35 400.
Sebebonke ababalwayo benkambu yabakwa-Efrayimi babeyizi-108 100 ngamabandla abo. Labo bayakusuka babe ngabesithathu.
Ibhanela lenkambu yakwaDani liyakuba ngasenyakatho ngamabandla abo; umholi wabozalo lwabakwaDani kungu-Ahiyezeri indodana ka-Amishadayi.
Ibandla lakhe nalabo ababalwayo kubo babeyizi-62 700.
Abakanisa eceleni kwakhe kwakuyisizwana sakwa-Asheri; umholi wabozalo lwabakwa-Asheri kunguPhagiyeli indodana ka-Okhirani.
Ibandla lakhe nalabo ababalwayo kubo babeyizi-41 500.
Isizwana sakwaNafethali: umholi wabozalo lwabakwaNafethali kungu-Ahira indodana ka-Enani.
Ibutho lakhe nalabo ababalwayo kubo babeyizi-53 400.
Sebebonke ababalwayo benkambu yakwaDani babeyizi-157 600. Labo bayakusuka babe ngabokugcina namabhanela abo.
Yilaba-ke ababalwa kubantu bakwa-Israyeli ngezindlu zokhokho babo. Bonke ababalwa enkanjini ngamaviyo abo babeyizi-603 550.
AbaLevi ababalwanga phakathi kwabantu bakwa-Israyeli, njengalokhu uSimakade ayemyalile uMose.
Abantu bakwa-Israyeli benza njengakho konke uSimakade ayemyale ngakho uMose: bakanisa ngasemabhaneleni abo, basuka ngokwemindeni yabo, yilowo nalowo ngokwendlu yokhokho bakhe.
Laba ngabozalo luka-Aroni no-Mose ngosuku uSimakade akhuluma ngalo noMose entabeni iSinayi.
Lawa ngamagama amadodana ka-Aroni: nguNadabi izibulo, u-Abhihu, u-Eleyazare no-Ithamari.
Yilawo-ke amagama amadodana ka-Aroni ayegcotshwe aba ngabaphristi abehlukaniselwe ukukhonza bengabaphristi.
UNadabi no-Abhihu bafa phambi kukaSimakade, ngesikhathi benikela kuSimakade ngomlilo ongafanele ehlane iSinayi; babengenamadodana. U-Eleyazare no-Ithamari bakhonza bengabaphristi phambi kukayise u-Aroni.
USimakade wakhuluma kuMose, wathi:
“Sondeza isizwana sakwaLevi, usimise phambi kuka-Aroni, umphristi, ukuba simsize.
Siyokwenza imisebenzi yakhe neyenhlangano yonke phambi kwethende lokuhlangana, siyokwenza nemisebenzi yethabanakeli.
Bayakunakekela yonke impahla yethende lokuhlangana nemisebenzi yabantu bakwa-Israyeli, senze umsebenzi wethabanakeli.
Uyakwethula abaLevi ku-Aroni nakumadodana akhe; bayokwethulwa kuye impela, bevela kubantu bakwa-Israyeli.
Uyoqoka u-Aroni namadodana akhe ukuba benze umsebenzi wobuphristi; umfokazi oyosondela kubo, uyakubulawa.”
USimakade wakhuluma kuMose, wathi:
“Mina ngibakhiphile abaLevi phakathi kwabantu bakwa-Israyeli esikhundleni samazibulo wonke avula isibeletho kubantu bakwa-Israyeli; abaLevi bayokuba ngabami.
Ngokuba wonke amazibulo angawami. Kusukela ngosuku engabulala ngalo wonke amazibulo eGibhithe, ngazehlukanisela wonke amazibulo akwa-Israyeli ukuba abe ngawami; kusukela kwawabantu kuya kwawezilwane. Ayokuba ngawami; nginguSimakade.”
USimakade wakhuluma kuMose ehlane iSinayi, wathi:
“Bala abozalo lwabaLevi ngezindlu zokhokho babo nangemindeni yabo; uyobala bonke abesilisa, kusukela konenyanga kuya phezulu.”
UMose wababala abaLevi njengezwi likaSimakade, njengalokhu ayemyalile uSimakade.
Lawa ngamadodana kaLevi ngamagama awo: uGereshoni, uKhohathi noMerari.
Lawa ngamagama amadodana kaGereshoni ngemindeni yawo: uLibhini noShimeyi.
Amadodana kaKhohathi ngemindeni yawo: u-Amramu, uJizihari, uHebhroni no-Uziyeli.
Amadodana kaMerari ngemindeni yawo: uMaheli noMushi. Leyo yimindeni yabaLevi ngezindlu zokhokho babo.
KuGereshomi kwavela umndeni kaLibhini nokaShimeyi, lena yiyona imindeni yakwaGereshoni.
Inani labo bonke abesilisa ababalwayo, kusukela konenyanga kuya phezulu, babeyizi-7 500.
Imindeni kaGereshoni iyakukanisa emva kwethabanakeli ngasentshonalanga.
Umholi wendlu kaGereshoni kwakungu-Eliyasafa indodana kaLayeli.
Umsebenzi wabozalo lwabakaGereshoni ethendeni lokuhlangana kwakungukunakekela ithabanakeli, ithende, isembozo salo, nekhethini elalisemnyango wethende lokuhlangana,
namakhethini asegcekeni nekhethini elisemnyango wegceke elizungeze ithabanakeli ne-althare, izintambo zalo, nayo yonke imisebenzi ephathelene nalezo zinto.
KuKhohathi kwavela le mindeni: oka-Amramu, okaJizihari, okaHebhroni noka-Uziyeli. Yilena imindeni kaKhohathi.
Inani labo bonke abesilisa, kusukela konenyanga kuya phezulu, babeyizi-8 600.
Imindeni yabozalo lwabakwaKhohathi iyakukanisa ohlangothini oluseningizimu lwethabanakeli.
Umholi wemindeni yamaKhohathi kwakungu-Elizafani indodana ka-Uziyeli.
Umsebenzi wabo kwakungukugcina umphongolo, itafula, uthi lwezibani, ama-althare, izitsha ezisetshenziswa endaweni engcwele, ikhethini nayo yonke imisebenzi eyayenziwa ngalezo zinto.
U-Eleyazare, indodana ka-Aroni, umphristi uyokwengamela abaLevi, abheke abenza imisebenzi endaweni engcwele.
KuMerari kwavela le mindeni: okaMaheli nokaMushi. Lena kwakuyimindeni kaMerari.
Inani labo bonke abesilisa ababalwa, kusukela konenyanga kuya phezulu, babeyizi-6 200.
Umholi wendlu kakhokho wemindeni yamaMerari kwakunguZuriyeli, indodana ka-Abhihayili, bona bayakukanisa ohlangothini olungasenyakatho lwethabanakeli.
Umsebenzi owawumiselwe abozalo lwakwaMerari kwakungukunakekela amapulangwe ethabanakeli: imishayo, izinsika, izisekelo zalo, nazo zonke izimpahla zalo, nayo yonke imisebenzi eyayenziwa ngalezo zinto.
Babebuye banakekele izinsika zegceke nxazonke, izisekelo, izikhonkwane, nezintambo zalo.
Ababekanise ngaphambi kwethabanakeli ngasempumalanga, phambi kwethende lokuhlangana lapho kuphuma khona ilanga, kwakunguMose, u-Aroni namadodana akhe. Umsebenzi wabo kwakungukwenza izinkonzo endaweni engcwele, bagcine umsebenzi wabantu bakwa-Israyeli; umfokazi oyosondela kubo uyobulawa.
Inani elabalwa nguMose no-Aroni kubo bonke abaLevi, kusukela konenyanga kuya phezulu, ngokwemindeni yabo njengalokhu uSimakade ayeshilo, kwakuyizi-22 000.
USimakade wathi kuMose: “Bala wonke amazibulo esilisa abantu bakwa-Israyeli, kusukela kwabanenyanga kuya phezulu, uwabhalise ngamagama awo,
ungithathele abaLevi esikhundleni samazibulo wonke abantu bakwa-Israyeli, nawemfuyo; nginguSimakade.”
UMose wawabala wonke amazibulo abantu bakwa-Israyeli, njengalokhu uSimakade ayemyalile.
Wonke amazibulo awabalayo kusukela kwabanenyanga kuya phezulu, ayeyizi-22 273.
USimakade wakhuluma kuMose, wathi:
“Thatha abaLevi esikhundleni samazibulo wonke abantu bakwa-Israyeli, nemfuyo yabaLevi esikhundleni samazibulo emfuyo yabo, ngokuba abaLevi bangabami; nginguSimakade.
Ukuze uhlenge abangama-273 bamazibulo abantu bakwa-Israyeli abangaphezu kwabaLevi,
uyakuthatha amashekeli ayisihlanu ngenhloko ngayinye, lawo ngokweshekeli lendawo engcwele. Uyothatha ishekeli elingamagera angama-20;
uyonika u-Aroni namadodana akhe leyo mali eyisihlengo salabo okweqe ngabo.”
UMose wathatha imali eyisihlengo salabo okwakweqe ngabo kulabo ababehlengwe ngabaLevi,
emazibulweni abantu bakwa-Israyeli wathatha imali engamashekeli ayi-1 365 ngokweshekeli lendawo engcwele.
UMose wayinika u-Aroni namadodana akhe imali yesihlengo njengezwi likaSimakade, njengalokhu uSimakade ayemyalile uMose.
USimakade wakhuluma kuMose no-Aroni, wathi:
“Balani bonke abozalo lukaKhohathi, abaphakathi kwabozalo lukaLevi ngokwemindeni yabo nangokwezindlu zokhokho babo,
kusukela kwabaneminyaka engama-30 kuya phezulu, kuze kufike kwabaneminyaka engama-50, bonke abangena ukuzokwenza umsebenzi ethendeni lokuhlangana.
“Umsebenzi wabozalo lukaKhohathi ethendeni lokuhlangana umayelana nezinto ezingcwelengcwele.
Uma inkambu ithutha, u-Aroni uyakungena namadodana akhe, behlise ikhethini elihenqile, bamboze ngalo umphongolo wobufakazi.
Bayowumboza ngaphezulu ngesikhumba samahlengethwa, bendlale indwangu eluhlaza okwesibhakabhaka phezu kwaso, bese befaka izingongolo zawo.
“Phezu kwetafula lezinkwa zobukhona, bayakwendlala indwangu eluhlaza okwesibhakabhaka, babeke kuyo izingqwembe, izinkezo, izinkamba, nezindebe zomnikelo wokuphuzwayo; kuhlale kunesinkwa phezu kwalo.
Bayakwendlala phezu kwazo indwangu ebomvu, bayemboze ngesikhumba samahlengethwa, bese befaka izingongolo zalo.
“Bayakuthatha indwangu eluhlaza okwesibhakabhaka, bamboze uthi lwezibani, nezibani zalo, izindlawu zalo, izitsha zalo zomlotha, nazo zonke izitsha zamafutha abazisebenzisa kulo;
bayakulufaka nezinto zalo zonke esikhumbeni samahlengethwa, bese bekubeka konke ohlakeni.
“Phezu kwe-althare legolide bayokwendlala indwangu eluhlaza okwesibhakabhaka, bayemboze ngesikhumba samahlengethwa, bese befaka izingongolo zalo.
“Bayothatha zonke izimpahla zokukhonza abakhonza ngazo endaweni engcwele, bazifake endwangwini eluhlaza okwesibhakabhaka, bazemboze ngesikhumba samahlengethwa, bazibeke ohlakeni.
“Bayakususa umlotha e-althare, bendlale phezu kwalo indwangu ebukhwebezane,
babeke kuyo zonke izimpahla zalo abakhonza ngazo kulo, imicengezi yempepho, izimfologo, amafosholo, nezimpahla zonke ze-althare, bendlale phezu kwazo isembozo sesikhumba samahlengethwa, bese befaka izingongolo zalo.
“Nxa u-Aroni namadodana akhe sebeqedile ukwemboza indawo engcwele nempahla yonke yendawo engcwele, lapho inkambu seyithutha, kuyakuza abozalo lukaKhohathi ukuzokuthwala, kodwa abayukuthinta lutho olungcwele ngokuba bayokufa. Lezi zinto zingumthwalo wabozalo lukaKhohathi ethendeni lokuhlangana.
“U-Eleyazare, indodana ka-Aroni umphristi, uyakulungisa amafutha okukhanyisa impepho ethaphukayo, umnikelo wokusanhlamvu wemihla ngemihla, namafutha okugcoba futhi anakekele ithabanakeli lonke nakho konke okukulo; indawo engcwele nempahla yayo.”
USimakade wakhuluma kuMose no-Aroni, wathi:
“Niqikelele ukuba isizwana semindeni kaKhohathi singapheli phakathi kwabaLevi,
kodwa niyakubaphatha kanje ukuze baphile, bangafi uma besondela ezintweni ezingcwelengcwele: u-Aroni namadodana akhe bayongena babanikeze yilowo nalowo umsebenzi wakhe nomthwalo wakhe.
Abanakungena ukuba babuke okungcwele ngisho umzuzwana nje, funa bafe.”
USimakade wakhuluma kuMose, wathi:
“Bala inani labozalo lukaGereshoni ngokwezindlu zokhokho babo nangemindeni yabo,
kusukela kwabaneminyaka engama-30 kuya phezulu, kuze kufike kwabaneminyaka engama-50, bonke abangena ukuyokwenza umsebenzi ethendeni lokuhlangana.
“Nanku umsebenzi wemindeni kaGereshoni, ngowokukhonza nowokuthwala:
bayakuthwala amakhethini ethabanakeli, ithende lokuhlangana, isembozo salo, isembozo esiyisikhumba samahlengethwa esiphezu kwalo, isihenqo esisemnyango wethende lokuhlangana,
amakhethini asegcekeni, isihenqo somnyango wesango legceke elingasethabanakelini nase-althare nxazonke, izintambo zalo, nayo yonke impahla abayisebenzisayo; bayokwenza konke okudinga ukwenziwa maqondana nabo.
Yonke imisebenzi yabozalo lwamaGerishoni nakho konke abakwenzayo nabayokwenza, kuyoya njengokuyala kuka-Aroni namadodana akhe, bayakuwamisela imisebenzi okumele ayenze.
Yilowo umsebenzi wemindeni yabozalo lwamaGereshoni ethendeni lokuhlangana, ebayakuyigcina phansi kwesandla sika-Ithamari, indodana ka-Aroni umphristi.
“Abozalo lukaMerari uyobabala ngemindeni yabo nangezindlu zokhokho babo;
kusukela kwabaneminyaka engama-30 kuya phezulu, kuze kube kwabaneminyaka engama-50, uyobabala bonke abangena ukuyokwenza umsebenzi ethendeni lokuhlangana.
Nakhu abayalwa ukuba bakwenze, okungumsebenzi wabo ethendeni lokuhlangana: ukuthwala amapulangwe ethabanakeli, imishayo yalo, izinsika zalo, izinyawo zalo,
izinsika zegceke nxazonke, izisekelo zalo, izikhonkwane zalo, izintambo zalo, impahla yalo yonke, nomsebenzi walo wonke, niyoyisho ngamagama impahla okufanele bayithwale.
Yilowo umsebenzi wemindeni yabozalo lukaMerari abamiselwe ukuwenza ethendeni lokuhlangana phansi kwesandla sika-Ithamari, indodana ka-Aroni umphristi.”
UMose, u-Aroni nabaholi benhlangano, babala abozalo lukaKhohathi ngemindeni yabo nangezindlu zokhokho babo,
kusukela kwabaneminyaka engama-30 kuze kube kwabeneminyaka engama-50, bonke abangena ukwenza umsebenzi wokukhonza ethendeni lokuhlangana.
Labo ababalwa ngemindeni yabo babeyizi-2 750.
Yilabo ababalwayo, bemindeni yamaKhohathi, bonke abakhonza ethendeni lokuhlangana, ababalwa nguMose no-Aroni njengesiyalezo sikaSimakade ngesandla sikaMose.
Labo ababalwayo bozalo lukaGereshoni ngemindeni yabo nangezindlu zokhokho babo,
kusukela kwabaneminyaka engama-30 kuze kube kwabaneminyaka engama-50, bonke abangena emsebenzini wokukhonza ethendeni lokuhlangana,
labo ababalwayo kubo ngemindeni yabo nangezindlu zokhokho babo, babeyizi-2 630.
Yilabo ababalwayo bemindeni yozalo lukaGereshoni, bonke abakhonza ethendeni lokuhlangana, ababalwa nguMose no-Aroni njengesiyalezo sikaSimakade.
Labo ababalwayo, bemindeni yozalo lukaMerari ngemindeni yabo nangezindlu zokhokho babo,
kusukela kwabaneminyaka engama-30 kuze kube kwabaneminyaka engama-50, bonke abangena emsebenzini wokukhonza ethendeni lokuhlangana,
labo ababalwayo kubo ngemindeni yabo, babeyizi-3 200.
Yilabo ababalwayo, bemindeni yozalo lukaMerari, ababalwa nguMose no-Aroni njengokusho kukaSimakade ngesandla sikaMose.
Bonke ababalwayo babaLevi, ababalwa nguMose no-Aroni nabaholi bakwa-Israyeli ngemindeni yabo nangezindlu zokhokho babo,
kusukela kwabaneminyaka engama-30 kuze kube kwabaneminyaka engama-50, bonke abangena ukwenza umsebenzi wenkonzo nomsebenzi wokuthwala ethendeni lokuhlangana,
labo ababalwayo kubo, babeyizi-8 580.
Babalwa-ke njengesiyalezo sikaSimakade kuMose, kwaba yilowo nalowo emsebenzini wakhe nasemthwalweni wakhe. Babalwa kanjalo-ke, njengalokhu uSimakade ayemyalile uMose.
USimakade wakhuluma kuMose, wathi:
“Yala abantu bakwa-Israyeli ukuba babakhiphe enkanjini bonke abanochoko, nabo bonke abamfimfayo, nabangcoliswe wukuthinta abafileyo.
Niyokhiphela ngaphandle kwenkambu abesilisa nabesifazane, ukuze bangalingcolisi inkambu engihlala kulo.”
Abantu bakwa-Israyeli benza kanjalo, babakhiphela ngaphandle kwenkambu; njengalokhu uSimakade ayekhulume noMose, benza kanjalo-ke abantu bakwa-Israyeli.
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma owesilisa noma owesifazane benza isono esivame esintwini sonke, baphambuke kuSimakade, lowo muntu uyoba necala.
Uyovuma isono sakhe asenzileyo, akhokhe isinxephezelo ngaso, anezelele kuso isamba esingokwesihlanu, asinike lowo amonile.
Uma umuntu owoniweyo engenasihlobo okungakhokhwa kuso isinxephezelo, isinxephezelo esikhokhwa kuSimakade siyoba ngesomphristi, ngaphandle kwenqama yokubuyisana ayokwenzelwa ngayo ukubuyisana.
Yonke iminikelo yezinto ezingcwele zabantu bakwa-Israyeli abayoyinikela kumphristi, iyakuba ngeyakhe.
Izinto zonke ezingcwele ziyakuba ngezakhe, nakho konke abayakukunikela kumphristi kuyokuba ngokwakhe.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma umfazi womuntu ephambuka, angethembeki kuye,
alale nenye indoda, immithise, kufihleke endodeni yakhe, futhi angabanjwa, uzingcolisile, noma ngabe akukho fakazi nokho ngaye, futhi engabanjwanga egila lo mkhuba.
Uma indoda yakhe iba nesikhwele ngomkayo ozingcolisile, noma ifikelwe yisikhwele ngomkayo ongazingcolisanga,
indoda iyakuletha umkayo kumphristi, imlethele umnikelo wakhe, ube okweshumi kwe-efa lempuphu yebhali, ayiyukuthela amafutha kuyo, noma ibeke nenhlaka kuyo, ngokuba kungumnikelo wokusanhlamvu wesikhwele, umnikelo wokusanhlamvu wesikhumbuzo, wokuzikhumbuza ngobubi.
“ ‘Umphristi uyakumsondeza, ammise phambi kukaSimakade.
Umphristi uyothatha amanzi angcwele esitsheni sebumba, nothuli oluphansi ethabanakelini. Uyakuluthatha alufake emanzini,
umphristi uyommisa owesifazane phambi kukaSimakade, athukulule izinwele zekhanda lowesifazane, abeke umnikelo wokusanhlamvu wesikhumbuzo ezandleni zakhe, umnikelo wokusanhlamvu wesikhwele; kuthi esandleni somphristi kube namanzi ababayo aletha isiqalekiso.
Umphristi uyomfungisa owesifazane, athi: “Uma kungekho ndoda elale nawe, uma ungaphambukelanga ekungcoleni usephansi kwendoda yakho, khululeka kulawa manzi ababayo aletha isiqalekiso,
kodwa uma uphambukile usephansi kwendoda yakho, futhi uzingcolisile, walala nenye indoda engesiye umyeni wakho,”
umphristi uyomfungisa owesifazane ngesifungo sesiqalekiso, athi: “USimakade makakwenze isiqalekiso nesifungo sesiqalekiso kwabakini; uSimakade ashwabanise ithanga lakho, avuvukalise nesisu sakho;
lawa manzi aletha isiqalekiso, ayongena ezibilini zakho, avuvukalise isisu sakho, ashwabanise ithanga lakho;” owesifazane uyakuthi: “Amen! Amen!”
“ ‘Umphristi uyozibhala lezi ziqalekiso encwadini, azesule ngamanzi ababayo.
Uyomphuzisa owesifazane amanzi ababayo aletha isiqalekiso. Uyowaphuza amanzi ababayo angene kuye amlethele isiqalekiso sezinto ezibabayo.
Umphristi uyowuthatha esandleni sowesifazane umnikelo wokusanhlamvu wesikhwele, awuzungezise umnikelo wokusanhlamvu phambi kukaSimakade, awusondeze e-althare.
Umphristi uyowucaphuna ugcwale isandla umnikelo wokusanhlamvu, ube umnikelo oyisikhumbuzo, awushise e-althare andukuba aphuzise owesifazane amanzi.
Uma esemphuzisile amanzi, kuyakuthi uma ezingcolisile wenza ukungethembeki kumyeni wakhe, amanzi aletha isiqalekiso ayongena kuye, alethe isiqalekiso esibi, avuvukalise isisu sakhe, ashwabanise ithanga lakhe, owesifazane abe yisiqalekiso phakathi kwabakubo.
Kodwa uma engazingcolisanga, ehlambulukile, uyakukhululeka, akhulelwe, athole abantwana.
“ ‘Yilona umthetho wesikhwele, uma umfazi ephambukile esephansi kwendoda yakhe, wazingcolisa,
nalapho indoda ivukwa yisikhwele, iba nesikhwele ngomkayo: iyommisa owesifazane phambi kukaSimakade, umphristi enze kuye konke okubalulwa yilo mthetho.
Indoda iyakukhululeka ebubini, kodwa owesifazane uyobuthwala ububi bakhe.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma owesilisa noma owesifazane enza isithembiso esilukhuni sokuba ngumnaziri, abe ngumnaziri kuSimakade,
uyozehlukanisa newayini nophuzo olunamandla. Akayukuwuphuza uviniga wewayini, uviniga wophuzo olunamandla, akayukuphuza lutho lwezithelo zomvini, futhi akayukuwadla amagilebhisi asemasha noma omisiwe.
Zonke izinsuku zakhe njengomnaziri, akayukudla lutho olwenziwe ngewayini lezithelo zomvini, kusukela ezimbumbulwini kuze kufike emakhasini.
“ ‘Zonke izinsuku zesithembiso sakhe sobunaziri akuyukusondela nsingo ekhanda lakhe; uyoba ngcwele zize ziphelele izinsuku azehlukanisela ngazo kuSimakade, uyakuvumela ukuba nesihluthu ekhanda.
Akayukusondela esidunjini ngazo zonke izinsuku esengumnaziri kaSimakade.
Akayukuzingcolisa noma ngabe kufa uyise noma unina, noma umfowabo noma udadewabo, ngokuba isithembiso sakhe sobunaziri sisekhanda lakhe.
Ungcwele kuSimakade, zonke izinsuku zobunaziri bakhe.
“ ‘Uma umuntu efa ngokuzuma eceleni kwakhe, angcolise ikhanda lobunaziri bakhe, uyakuphuca ikhanda lakhe ngosuku lokuhlanjululwa kwakhe, aliphuce ngosuku lwesikhombisa.
Ngosuku lwesishiyagalombili uyoletha kumphristi amahobhe amabili noma amaphuphu amabili amajuba ngasemnyango wethende lokuhlangana.
Umphristi uyonikela ngelinye libe ngumnikelo wesono nelinye libe ngumnikelo wokushiswa, amenzele ukubuyisana, ngokuba wonile ngenxa yofileyo; angcwelise ikhanda lakhe ngalolo lusuku.
Izinsuku zakhe zobunaziri uyakuzehlukanisela uSimakade, alethe imvu yeduna enonyaka, ibe ngumnikelo wecala. Izinsuku zakhe zakuqala ziyoba yize, ngokuba ubunaziri bakhe bungcolisiwe.
“ ‘Nanku umthetho womnaziri lapho izinsuku zobunaziri bakhe seziphelele: uyakulethwa emnyango wethende lokuhlangana,
anikele ngomnikelo wakhe kuSimakade, imvu yeduna enonyaka engenasici, ibe ngumnikelo wokushiswa. Anikele nangensikazi engenasici enonyaka, ibe ngumnikelo wesono, inqama engenasici ibe ngumnikelo wokuthula,
iqoma lesinkwa esingenamvubelo, amaqebelengwane empuphu ecolisekileyo exovwe namafutha, namakhekheba angenamvubelo agcotshwe ngamafutha, nomnikelo wokusanhlamvu nowokuphuzwayo.
“ ‘Umphristi uyakukuletha phambi kukaSimakade, anikele ngomnikelo wakhe wesono nangowokushiswa.
Uyonikela ngenqama ibe ngumhlatshelo womnikelo wokuthula kuSimakade neqoma lesinkwa esingenamvubelo. Umphristi uyobuye anikele ngomnikelo wayo wokusanhlamvu nangowokuphuzwayo.
“ ‘Umnaziri uyophuca ikhanda lobunaziri bakhe ngasemnyango wethende lokuhlangana, athathe izinwele zekhanda lobunaziri bakhe, azibeke emlilweni ophansi komhlatshelo weminikelo yokuthula.
“ ‘Umphristi uyothatha umkhono wenqama ophekiweyo, neqebelengwane eqomeni, nekhekheba elingenamvubelo, akubeke ezandleni zomnaziri, ngesikhathi esephucule ubunaziri bakhe.
Umphristi akuzungezise, kube ngumnikelo wokuzungeziswa phambi kukaSimakade; lokhu kungcwele kumphristi nesifuba sokuzungeziswa nomlenze wokuzungeziswa. Emveni kwalokho umnaziri angaliphuza iwayini.
“ ‘Lowo ngumthetho womnaziri owenze isithembiso, nowomnikelo wakhe kuSimakade ngenxa yobunaziri bakhe, ngaphandle kokunye angaphumelela kukho. Njengesithembiso sakhe asenzayo, uyokwenza kanjalo, kungumthetho wobunaziri.’ ”
USimakade wakhuluma kuMose, wathi:
“Yisho ku-Aroni namadodana akhe, uthi kubo: ‘Niyakubabusisa abakwa-Israyeli, niyakuthi kubo:
“ ‘USimakade makakubusise, akulondoloze;
uSimakade makakhanyise ubuso bakhe kuwe, abe nomusa kuwe;
uSimakade makaphakamise ubuso bakhe phezu kwakho, akuphe ukuthula.’ ”
“Bayakulibeka kanjalo iGama lami phezu kwabakwa-Israyeli, Mina ngibabusise.”
Kwathi ngosuku uMose aqeda ngalo ukumisa ithabanakeli, waligcoba, walingcwelisa nayo yonke impahla yalo; wagcoba, wangcwelisa i-althare, nazo zonke izitsha zalo.
Izikhulu zakwa-Israyeli, izinhloko zezindlu zawoyise nabaholi bezizwe ababebekwe phezu kwababalwayo, zenza umnikelo.
Zaletha iminikelo yazo kuSimakade: izinqola eziyisithupha ezazimboziwe nezinkabi ezili-12, inqola eyodwa yabaholi ngababili nenkabi kumholi ngamunye, zakwethula kuSimakade.
USimakade wakhuluma kuMose, wathi:
“Zemukele kuzo lezo zipho, ukuze zenze umsebenzi wokukhonza ethendeni lokuhlangana, uyozinika abaLevi kube yilowo nalowo ngokomsebenzi wakhe.”
UMose wathatha izinqola nezinkabi, wakunika abaLevi.
Izinqola ezimbili nezinkabi ezine wakunika abozalo lukaGereshoni ngokomsebenzi wabo.
Izinqola ezine nezinkabi eziyisishiyagalombili wakunika abozalo lukaMerari ngokomsebenzi wabo, ababephethwe ngu-Ithamari, indodana ka-Aroni, umphristi.
Abozalo lukaKhohathi abanikwanga lutho, ngokuba inkonzo yendlu engcwele yayingeyabo; isemahlombe abo.
Abaholi baletha futhi iminikelo yokungcweliswa kwe-althare ngosuku olwalumiselwe lokho. Abaholi bayiletha iminikelo yabo phambi kwe-althare,
uSimakade wathi kuMose: “Yilowo nalowo mholi uyakunikela ngomnikelo wakhe ngosuku lwakhe, ube ngowehlukaniselwe ukubusiswa kwe-althare.”
Ngosuku lokuqala uNaheshoni, indodana ka-Aminadaba wesizwana sakwaJuda, waletha umnikelo wakhe.
Wanikela ngoqwembe lwesiliva, isisindo salo singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
isitsha segolide esingamashekeli ayishumi sigcwele impepho,
iduna, inqama, nemvu yeduna enonyaka, ukuze kube ngumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa nguNaheshoni, indodana ka-Aminadaba.
Ngosuku lwesibili kwanikela uNethaneli, indodana kaZuwari, umholi wabozalo luka-Isakhare.
Wanikela ngesitsha sesiliva, isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
induna, inqama nemvu yeduna enonyaka ukuze kube ngumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa nguNethaneli, indodana kaZuwari.
Ngosuku lwesithathu kwanikela u-Eliyabe, indodana kaHeloni, umholi wabozalo lukaZebuloni.
Wanikela ngesitsha sesiliva, isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
iduna, inqama, nemvu yeduna enonyaka ukuze kube ngumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Eliyabe, indodana kaHeloni.
Ngosuku lwesine kwakungu-Elizuri, indodana kaShedewuri, umholi wabozalo lukaRubeni.
Wanikela ngesitsha sesiliva, isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
iduna, inqama, nemvu yeduna enonyaka kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Elizuri, indodana kaShedewuri.
Ngosuku lwesihlanu kwakunguShelumiyeli, indodana kaZurishadayi, umholi wabozalo lukaSimeyoni.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
neduna, nenqama, nemvu yeduna enonyaka kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa nguShelumiyeli, indodana kaZurishadayi.
Ngosuku lwesithupha kwakungu-Eliyasafa, indodana kaDehuweli, umholi wabozalo lukaGadi.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
iduna, inqama, nemvu yeduna enonyaka kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Eliyasafa, indodana kaDehuweli.
Ngosuku lwesikhombisa kwakungu-Elishama, indodana ka-Amihudi, umholi wabozalo luka-Efrayimi.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
iduna, inqama, nemvu yeduna enonyaka kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Eliyasafa, indodana kaDehuweli.
Ngosuku lwesishiyagalombili kwakunguGamaliyeli, indodana kaPhedazuri, umholi wabozalo lukaManase.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
neduna, nenqama, nemvu yeduna enonyaka, kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa nguGamaliyeli, indodana kaPhedazuri.
Ngosuku lwesishiyagalolunye kwakungu-Abhidani, indodana kaGideyoni, umholi wabozalo lukaBhenjamini.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
neduna, nenqama, nemvu yeduna enonyaka, kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Abhidani, indodana kaGideyoni.
Ngosuku lweshumi kwakungu-Ahiyezeri, indodana ka-Amishadayi, umholi wabozalo lukaDani.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
isitsha segolide esingamashekeli ayishumi sigcwele impepho,
iduna, inqama, imvu yeduna enonyaka, kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Ahiyezeri, indodana ka-Amishadayi.
Ngosuku lwe-11 kwakunguPhagiyeli, indodana ka-Okhirani, umholi wabozalo luka-Asheri.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
nesitsha segolide esingamashekeli ayishumi sigcwele impepho,
neduna, nenqama, nemvu yeduna enonyaka, kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa nguPhagiyeli, indodana ka-Okhirani.
Ngosuku lwe-12 kwakungu-Ahira, indodana ka-Enani, umholi wabozalo lukaNafethali.
Wanikela ngesitsha sesiliva isisindo saso singamashekeli ayi-130, nesitsha sesiliva esingumcengezi esingamashekeli angama-70 ngokweshekeli lendawo engcwele. Kokubili kwakugcwele impuphu ecolisekileyo exovwe namafutha, kungumnikelo wokusanhlamvu,
isitsha segolide esingamashekeli ayishumi sigcwele impepho,
iduna, inqama, nemvu yeduna enonyaka, kungumnikelo wokushiswa,
nempongo ukuze kube ngumnikelo wesono.
Okomhlatshelo weminikelo yokuthula kwakuyilokhu: izinkabi ezimbili, izinqama eziyisihlanu, izimpongo eziyisihlanu, izimvu zamaduna ezinonyaka eziyisihlanu; yilokho-ke okwanikelwa ngu-Ahira, indodana ka-Enani.
Yilokhu-ke okwanikelwa ngabaholi bakwa-Israyeli ngosuku i-althare elangcweliswa ngalo lehlukaniselwa uSimakade: izitsha zesiliva ezili-12, izitsha zesiliva eziyimicengezi ezili-12, nezitsha zegolide ezili-12.
Yileso naleso sitsha sesiliva sasingamashekeli ayi-130, isitsha sesiliva esingumcengezi ngasinye singamashekeli angama-70. Selilonke isiliva elenza izitsha laba yizi-2 400 ngokweshekeli lendawo engcwele.
Izitsha zegolide zili-12 zigcwele impepho, yileso naleso singamashekeli ayishumi ngokweshekeli lendawo engcwele. Lonke igolide elenza izitsha lalingamashekeli ayi-120.
Zonke izinkomo ezenza umnikelo wokushiswa kwakuyizinkunzi ezili-12, izinqama ezili-12, izimvu ezingamaduna ezinonyaka ezili-12 nomnikelo wazo wokusanhlamvu, nezimpongo zomnikelo wesono ezili-12.
Sezizonke izinkomo ezenza umhlatshelo weminikelo yokuthula kwakuyizinkunzi ezingama-24, izinqama ezingama-60, izimpongo ezingama-60, nezimvu ezingamaduna ezingama-60. Lokhu kwakungumnikelo wokwehlukaniswa kwe-althare; mhla lingcweliswa.
Kwathi lapho uMose engena ethendeni lokuhlangana ukuyokhuluma noSimakade, wezwa izwi likhuluma naye livela phezu kwesihlalo somusa ngaphezu komphongolo wobufakazi phakathi kwamakherubhi amabili, wakhuluma naye.
USimakade wakhuluma kuMose, wathi:
“Yisho ku-Aroni uthi kuye: ‘Lapho ubeka izibani, izibani eziyisikhombisa ziyakukhanyisa phambi kothi lwezibani.’ ”
U-Aroni wenza kanjalo, wabeka izibani zalo ukuze zikhanyise phambi kothi lwezibani njengalokhu uSimakade ayemyalile uMose.
Uthi lwezibani lwalwakhiwe ngegolide elicangcathiweyo, kusukela esinqeni salo kuya ezimbalini zalo. Lalifana nse nomfanekiso uSimakade awubonisa uMose; walwenza kanjalo uthi lwezibani.
USimakade wakhuluma kuMose, wathi:
“Thatha abaLevi kubantu bakwa-Israyeli, ubahlambulule.
Uyakubahlambulula kanje: bafafaze ngamanzi okuhlambulula, ubenze baphuce zonke iziboya ezisemizimbeni yabo, bahlanze izingubo zabo; bazihlambulule.
Bayothatha iduna nomnikelo wokusanhlamvu, impuphu ecolisekileyo exovwe namafutha. Uyothatha iduna lesibili libe ngumnikelo wesono.
Uyobaletha abaLevi phambi kwethende lokuhlangana, uqoqe yonke inhlangano yabantu bakwa-Israyeli.
Uyosondeza abaLevi phambi kukaSimakade, abantu bakwa-Israyeli babeke izandla zabo phezu kwamakhanda abo.
U-Aroni uyobaletha abaLevi phambi kukaSimakade babe ngumnikelo wokuzungeziswa ovela kubantu bakwa-Israyeli ukuze benze umsebenzi kaSimakade.
“AbaLevi bayobeka izandla zabo ezinhlokweni zamaduna, wena unikele ngelinye lawo libe ngumnikelo wesono, nangelinye libe ngumnikelo wokushiswa kuSimakade, ubenzele abaLevi ukubuyisana.
“AbaLevi uyakubabeka phambi kuka-Aroni namadodana akhe, unikele ngabo kuSimakade babe ngumnikelo wokuzungeziswa.
AbaLevi uyobehlukanisa phakathi kwabantu bakwa-Israyeli, abaLevi bayoba ngabami.
“Emveni kwalokho abaLevi bayongena ethendeni lokuhlangana ukuyokwenza inkonzo yalo. Uyakubahlambulula ubanikele, babe ngumnikelo wokuzungeziswa.
Banikelwe kimi bevela phakathi kwabantu bakwa-Israyeli, esikhundleni samazibulo wonke abantu bakwa-Israyeli, ngizithathele bona ukuba babe ngabami.
Wonke amazibulo phakathi kwabantu bakwa-Israyeli angawami, awabantu nawezilwane, ngazehlukanisela wona kusukela mhla ngibulala amazibulo wonke eGibhithe.
Nokho ngizithathele abaLevi esikhundleni sawo wonke amazibulo abantu bakwa-Israyeli.
AbaLevi ngibanike u-Aroni namadodana akhe ukuba abe yisipho sabo esivela kubantu bakwa-Israyeli ukuze benze umsebenzi wabantu bakwa-Israyeli ethendeni lokuhlangana, nokubenzela abakwa-Israyeli ukubuyisana, ukuze kungabi bikho sifo phakathi kwabo, lapho abantu bakwa-Israyeli besondela endaweni engcwele.”
UMose no-Aroni nayo yonke inhlangano yabantu bakwa-Israyeli, benza kubaLevi njengakho konke uSimakade ayeyale ngakho uMose ngabaLevi; abantu bakwa-Israyeli benza kanjalo-ke.
AbaLevi bazihlambulula, bahlanza nezingubo zabo. U-Aroni wayesebaletha njengomnikelo wokuzungeziswa phambi kukaSimakade, ukuze u-Aroni abenzele ukubuyisana, abahlambulule.
Emveni kwalokho abaLevi bahamba ukuyokwenza umsebenzi wabo ethendeni lokuhlangana phambi kuka-Aroni namadodana akhe, njengalokhu uSimakade ayemyalile uMose ngabo. Benza kanjalo-ke kubaLevi.
USimakade wakhuluma kuMose, wathi:
“Nanku umsebenzi wabaLevi: kusukela kwabaneminyaka engama-25 kuya phezulu, kwabayongena ukwenza umsebenzi wenkonzo ethendeni lokuhlangana.
Kusukela kwabaneminyaka engama-50 bayoyeka ukwenza umsebenzi wenkonzo, abasayukuphinde bawenze futhi.
Kepha bangabasiza abafowabo ethendeni lokuhlangana ukuze bagcine imisebenzi yabo, nokho bona ngeke besawenza lowo msebenzi. Uyokwenza kanjalo-ke kubaLevi maqondana nemisebenzi yabo.”
USimakade wakhuluma kuMose ehlane iSinayi ngonyaka wesibili ngenyanga yokuqala bephumile eGibhithe, wathi:
“Abantu bakwa-Israyeli mabagcine iPhasika ngesikhathi salo esimisiweyo.
Ngosuku lwe-14 lwaleyo nyanga kusihlwa, niyakuligcina ngesikhathi esimisiweyo, njengokwazo zonke izimiso zalo nemithetho yonke yokugcinwa kwalo.”
UMose wabatshela abantu bakwa-Israyeli ukuthi bayolenza iphasika.
Bayolenza iphasika ehlane iSinayi ngenyanga yokuqala, ngosuku lwe-14, kusihlwa, njengakho konke uSimakade ayemyale ngakho uMose, abantu bakwa-Israyeli benza kanjalo-ke.
Kwakukhona abantu abathile ababengcoliswe yisidumbu somuntu, ababengakwazi ukugcina iphasika ngalolo lusuku; beza phambi kukaMose no-Aroni ngalolo lusuku.
Labo bantu bathi kuye: “Singcoliswe yisidumbu somuntu; kungani sivinjelwa ukuletha umnikelo kaSimakade ngesikhathi esimisiweyo phakathi kwabantu bakwa-Israyeli na?”
UMose wathi kubo: “Yimani, ukuze ngizwe ukuthi uSimakade uyakuyala athini ngani.”
USimakade wakhuluma kuMose, wathi:
“Yisho kubantu bakwa-Israyeli uthi: ‘Noma yimuphi phakathi kwenu, noma owezizukulwane zenu ongcolileyo ngenxa yokuthinta isidumbu, ngisho noma esekuhambeni, ekude, uyakulenza iphasika kuSimakade.
Ngenyanga yesibili, ngosuku lwe-14, kusihlwa; bayakuligcina balidle nesinkwa esingenamvubelo nemifino ebabayo.
Abayukushiya lutho kuze kube sekuseni, abayukuphula thambo lalo. Bayakuligcina iphasika njengokwezimiso zalo zonke.
Kepha umuntu ohlambulukileyo, engekho ohambeni, ohluleka ukuligcina iphasika, lowo muntu uyakunqunywa kwabakubo, ngokuba engalethanga umnikelo kaSimakade ngesikhathi esimisiweyo; lowo muntu uyojeza.
“ ‘Uma umfokazi ogogobele phakathi kwenu, ethanda ukugcina iphasika kuSimakade, uyokwenza kanjalo njengokwesimiso sephasika nangokomthetho walo. Kuyakuba yisimiso esifanayo nakini nakogogobele phakathi kwenu nakwabokuzalwa ezweni.’ ”
Ngosuku okwamiswa ngalo ithabanakeli, ifu lalilisibekela ithabanakeli nethende lobufakazi; kusihlwa laliba phezu kwethabanakeli libonakale njengomlilo kuze kube sekuseni.
Kwakuhlala kunjalo, ifu lalilisibekela, kubonakale umlilo ebusuku.
Noma yinini lapho ifu liphakama ethendeni, abakwa-Israyeli babehamba, kuthi lapho ifu lima khona, nabo bakanise lapho.
Abakwa-Israyeli babesuka njengokusho kukaSimakade, kuthi ngokuyala kwakhe bakanise sonke isikhathi lapho ifu lihleli phezu kwethabanakeli.
Nalapho ifu lihleli phezu kwethabanakeli izinsuku eziningi, abakwa-Israyeli babesigcina isiyalo sikaSimakade, bangahambi.
Ngesinye isikhathi ifu lalima phezu kwethabanakeli izinsuku ezimbalwa. Babehlala enkanjini ngokwesiyalezo sikaSimakade, bahambe futhi njengokuyala kukaSimakade.
Kokunye ifu lalihlala ubusuku nje obubodwa kuze kube sekuseni; kuthi uma liphakanyiswa ekuseni, bahambe. Noma ngabe ifu lalingahlala ubusuku nemini, kwakuthi uma lenyuswa baqhubeke nohambo.
Noma lalihleli phezu kwethabanakeli izinsuku ezimbili, noma inyanga, noma isikhathi esingakanani, abakwa-Israyeli babehlala enkanjini bangaqhubeki nohambo, kodwa kwakuthi lapho liphakanyiswa, bahambe.
Ngezwi likaSimakade babekanisa, nangezwi likaSimakade bahambe; baligcina izwi likaSimakade aliyaleza ngesandla sikaMose.
USimakade wakhuluma kuMose, wathi:
“Zenzele amacilongo esiliva amabili abe ngumsebenzi ocangcathiweyo, uyakuwasebenzisa ukubiza inhlangano nalapho seyisuka inkambu.
Lapho bewabetha kanyekanye, yonke inhlangano iyobuthana kuwe ngasemnyango wethende lokuhlangana.
Uma kubethwa elilodwa, bonke abaholi nezinhloko zezindlu zemindeni yakwa-Israyeli, ziyakubuthana kuwe.
Uma nihlaba umkhosi, izinkambu ezingasempumalanga ziyosuka zihambe.
Uma senihlaba umkhosi okwesibili izinkambu ezingaseningizimu ziyosuka, ziyohlaba umkhosi ekusukeni kwazo.
Lapho ubiza ibandla niyobetha amacilongo, kodwa ningawuhlabi umkhosi.
“Amadodana ka-Aroni angabaphristi ayoshaya amacilongo, kuyokuba kini yisimiso saphakade ezizukulwaneni zenu.
Kuyothi lapho niphuma impi ezweni lakini ukuyokulwa nesitha esinihlaselayo, nihlabe umkhosi ngamacilongo. USimakade uNkulunkulu wenu uyonikhumbula, anisindise ezitheni zenu.
Ngezinsuku zokuthokoza kwenu, nangemikhosi emisiweyo, nasekwethwaseni kwenyanga, niyakubetha amacilongo enu phezu kweminikelo yenu yokushiswa naphezu kwemihlatshelo yeminikelo yenu yokuthula. Iyoba yisikhumbuzo senu phambi kukaNkulunkulu wenu; nginguSimakade uNkulunkulu wenu.”
Kwathi ngonyaka wesibili, ngenyanga yesibili, ngolwa-20 lwenyanga, ifu laphakanyiswa phezu kwethabanakeli lobufakazi.
Abantu bakwa-Israyeli baqala uhambo lwabo besuka ehlane iSinayi, ifu laze lema ehlane iPharanu.
Lokhu kwakungokokuqala besuka ngokwesiyalezo sikaSimakade ngesandla sikaMose.
Kwasuka kuqala ibhanela lenkambu yabozalo lukaJuda ngamaqembu abo, beholwa nguNaheshoni, indodana ka-Aminadaba.
Ibandla lesizwana sabozalo luka-Isakhare laliholwa nguNethaneli, indodana kaZuwari.
Iqembu lesizwana sabozalo lukaZebuloni laliholwa ngu-Eliyabe, indodana kaHeloni.
Ithabanakeli lathwalwa ngabozalo lukaGereshoni nabolukaMerari, abangabathwali bethabanakeli.
Kwase kusuka ibhanela lenkambu yakwaRubeni ngamaqembu ayo. Laliholwa ngu-Elizuri, indodana kaShedewari.
Phezu kweqembu lesizwana sabozalo lukaSimeyoni kwakunguShelumiyeli, indodana kaZurishadayi.
Iqembu lesizwana sabozalo lukaGadi laliholwa ngu-Eliyasafa, indodana kaDehuweli.
Kwasuka nabakwaKhohathi abangabathwali bezinto zendawo engcwele: ithabanakeli lamiswa ngaphambi kokufika kwabo.
Kwase kusuka ibhanela lenkambu yabozalo luka-Efrayimi, ngamaviyo ayo. Laliholwa ngu-Elishama, indodana ka-Amihudi.
Owayehola isizwana sabantu sabozalo lukaManase kwakunguGamaliyeli, indodana kaPhedazuri.
Iqembu lesizwana sabozalo lukaBhenjamini laliholwa ngu-Abhidani indodana kaGideyoni.
Kwase kusuka ibhanela lenkambu yabozalo lukaDani, ngamabandla ayo, lona lalisemva kwazo zonke ezinye izinkambu. Owayelihola kwakungu-Ahiyezeri, indodana ka-Amishadayi.
Ibandla lesizwana sabozalo luka-Asheri laliholwa nguPhagiyeli, indodana ka-Okhirani.
Abantu besizwana sozalo luka-Nafethali babeholwa ngu-Ahira, indodana ka-Anani.
Leyo yiyona ndlela abantu bakwa-Israyeli ababehamba ngayo ngesikhathi besuka ngokwamaqembu abo.
UMose wathi kuHobhabhi, indodana kaRuweli wakwaMidiyani, umukhwe kaMose: “Sesizakusuka siye endaweni uSimakade asitshele ngayo, wathi: ‘Ngiyoninika yona.’ Woza, hamba nathi! Siyokwenzela okuhle ngokuba uSimakade ukhulumile okuhle ngo-Israyeli.”
Wathi kuye: “Angiyukuhamba, kunalokho ngizosuka ngiye kwelakithi nasezihlotsheni zami.”
Kepha wathi kuye: “Ngiyakuncenga, ungasishiyi, njengalokhu wazi ukuthi siyakukanisa ehlane, wena uyokuba ngamehlo ethu.
Kuyothi uma uhamba nathi, kwenzeka uSimakade asenzele noma yikuphi okuhle, nathi siyokwenzela okuhle.”
Basuka entabeni kaSimakade, bahamba ibanga lezinsuku ezintathu. Umphongolo wesivumelwano sikaSimakade wahamba phambi kwabo ibanga lezinsuku ezintathu, ukubafunela indawo yokuphumula.
Ifu likaSimakade laliphezu kwabo emini, lapho besuka enkanjini.
Ekusukeni komphongolo, uMose wathi: “Vuka, Simakade; mazihlakazeke izitha zakho; abakuzondayo babaleke phambi kwakho.”
Ekumeni kwawo wathi: “Buyela, Simakade emashumini ezinkulungwane zemindeni yakwa-Israyeli.”
Abantu bakhononda, uSimakade wezwa, kwaba kubi ezindlebeni zakhe, ngakho-ke intukuthelo yakhe yavutha phakathi kwabo, umlilo kaSimakade washa ubuhanguhangu phakathi kwabo, wabhubhisa ngisho imikhawulo yenkambu.
Abantu bakhala kuMose. UMose wakhuleka kuSimakade, umlilo wabohla.
Leyo ndawo yaqanjwa ngokuthi yiThabhehera, ngokuba umlilo kaSimakade wavutha phakathi kwabo.
Ingxubevange eyayiphakathi kwabantu bakwa-Israyeli yaqala ukulangazelela izinto zaseGibhithe nabantu bakwa-Israyeli babuye bakhala, bathi: “Ngubani oyakusipha inyama ukuba sidle na?
Siyakhumbula izinhlanzi esasizidla eGibhithe ngesihle, namakhukhamba, amakhabe, amaliki, uhanyanisi neswela.
Kepha manje sekuphele nokulangazelela ukudla. Akukho lutho olunye esingaludla ngaphandle kwale mana esiyidla imihla namalanga.”
Imana yayifana nembewu yekhoriyanderi, isanhlamvana, ibukeka iphuzi, injengenhlaka yebheduliyamu.
Abantu babephuma bayiqoqe, bayigaye ematsheni, noma bayigqule ezigqulweni, bayipheke emakhanzini, benze nangayo amaqebelengwane. Yayinambitheka okweqebelengwane elinamafutha.
Lapho amazolo ehlela enkanjini ebusuku nemana yayehla.
UMose wezwa abantu bekhala emindenini yabo ngasemnyango wethende lakhe. Intukuthelo kaSimakade yavutha kakhulu, lokhu kwamdabukisa kakhulu uMose.
UMose wathi kuSimakade: “Ukwenzeleni okubi encekwini yakho na? Kungani ngingafumananga musa emehlweni akho ukuba ungethwese umthwalo wabo bonke laba bantu na?
Ngabe bonke laba bantu bakhulelwa yimi, futhi bazalwa yimi yini na? Kodwa uthi kimi: ‘Bagone wena esifubeni sakho njengomzanyana egone umntwana oncelayo, ubayise ezweni owalifungela oyise na?’
Ngiyakuyithatha kuphi inyama engingabanika yona bonke laba bantu na? Bayangikhalela ukuba ngibanike inyama badle.
Mina ngokwami, angikwazi ukubathwala bonke laba bantu, ngokuba bayangisinda.
Vele wenza lokhu kimi ukuba ungibulale; ngiyakuncenga, ngibulale ngokushesha ukuze ngifumane umusa emehlweni akho, ungangivumeli ngibone usizi lwami.”
USimakade wakhuluma kuMose, wathi: “Ngiqoqele amadoda angama-70 kumalunga akwa-Israyeli, owaziyo ukuthi angamalunga nezinduna zabantu. Uwalethe ethendeni lokuhlangana, ayoma lapho kanye nawe.
Ngiyokwehla ngikhulume nawe lapho. Ngiyothatha okomoya ophezu kwakho, ngikubeke kuwo. Ayowuthwalisana nawe umthwalo wabantu, awuyukuwuthwala wedwa.
“Yisho kubantu ukuthi: ‘Zingcweliseleni usuku lwakusasa, niyokudla inyama, lokhu nikhalile ezindlebeni zikaSimakade, nathi: “Ngubani oyosipha inyama yokuba sidle, ngokuba kwakukuhle kithi eGibhithe;” yingakho nje uSimakade ezoninika inyama ukuba niyidle.
Aniyukuyidla nje usuku lube lunye, noma izinsuku ezimbili, noma izinsuku eziyisihlanu, noma izinsuku ezilishumi, noma izinsuku ezingama-20,
kodwa inyanga yonke, ize iphume ngamakhala, niyitshokoze, niyenyanye, ngokuba nimlahlile uSimakade ophakathi kwenu, nakhala phambi kwakhe, nathi: “Kungani kube nje, saphumelani eGibhithe na?” ’ ”
Wayesethi uMose: “Abantu engiphakathi kwabo abahamba ngezinyawo bayizi-600 000, wena uthi: ‘Ngiyakubanika inyama ukuba bayidle inyanga yonke.’
Bangahlatshelwa izimvu nezinkomo ukuba zibenele na? Ukhona yini oyakubalethela izinhlanzi zonke zolwandle ukuba zibenele na?”
USimakade wathi kuMose: “Ngabe isandla sikaSimakade sifinyeziwe, asisenamandla na? Manje-ke nizakubona ukuthi izwi lami liyafezeka kini noma qha.”
UMose waphuma, wabatshela abantu amazwi kaSimakade; waqoqa amadoda angama-70 angamalunga abantu, wawamisa ethendeni nxazonke.
USimakade wehla ngefu, wakhuluma naye. Wathatha okomoya ophezu kwakhe, wakubeka kumalunga angama-70. Kwathi ukuba umoya uhlale kuwo, aphrofetha, kodwa awaphindanga akwenza lokho futhi.
Kepha kwakusele amadoda amabili enkanjini. Igama leyokuqala kwakungu-Elidadi, negama leyesibili kunguMedadi. Umoya wahlala phezu kwawo; ayephakathi kwalawo ayebhalisiwe, kodwa ayengayanga ethendeni, nawo aphrofetha enkanjini.
Kwasuka insizwa yagijima yayobikela uMose, yathi: “U-Elidadi noMedadi bayaphrofetha enkanjini.”
UJoshuwa indodana kaNuni, inceku kaMose kwasebusheni bayo, waphendula wathi: “Nkosi yami, Mose, benqabele.”
UMose wathi kuye: “Unomhawu ngenxa yami na? Sengathi ngabe bonke abantu bakaSimakade bangaba ngabaphrofethi, uSimakade abeke uMoya wakhe phezu kwabo.”
UMose wangena enkanjini, yena namalunga abakwa-Israyeli.
Kwavuka umoya ovela kuSimakade, waletha izigwaca zivela ngasolwandle, waziwisa ngasenkanjini kungathi ibanga losuku ngalapha, nebanga losuku nangale kwenkambu, nxazonke. Ukuphakama kwazo phezu komhlaba kungathi ngamakhubhithi amabili.
Abantu bavuka basebenza lonke lolo lusuku, nobusuku bonke, nangosuku olulandelayo, bebutha izigwaca. Okuncane abantu abakubuthayo kwakungamahomere alishumi; bazenekela zona zazungeza inkambu.
Kepha inyama isephakathi kwamazinyo abo, bengakayihlafuni, ulaka lukaSimakade lwabavuthela abantu. USimakade wabashaya abantu ngobhubhane olukhulu.
Igama laleyo ndawo kwathiwa yiKibhirothi Hathawa, ngokuba kwangcwatshwa lapho labo ababenenkwankwa.
Abantu basuka eKibhirothi Hathava, baya eHazerothi; bahlala eHazerothi.
UMiriyamu no-Aroni bamelena noMose ngenxa yowesifazane waseKhushe ayemthathile. Nembala wayeganwe ngowesifazane waseKhushe.
Bathi: “Ngabe uSimakade ukhuluma ngoMose kuphela na? Akakhulumile yini nangathi na?” USimakade wakuzwa lokho.
Kepha uMose wayengumuntu omnene kunabo bonke abantu ababesebusweni bomhlaba.
Ngokushesha uSimakade wakhuluma noMose no-Aroni noMiriyamu, wathi: “Wozani nobathathu ethendeni lokuhlangana.” Bahamba bobathathu.
USimakade wehla ngensika yefu, wema ngasemnyango wethende, wabiza u-Aroni noMiriyamu; baphuma bobabili baya kuye.
Wayesethi: “Yizwani manje amazwi ami: uma kukhona umphrofethi phakathi kwenu, Mina Simakade ngiyakuzibonakalisa kuye ngombono, ngikhulume naye ngephupho.
Kodwa akunjalo ngenceku yami uMose; uthembekile kuyo yonke indlu yami.
Yena, ngikhuluma ngokusobala umlomo nomlomo, hhayi ngombono noma ngamazwi ayimfumbe, futhi uyasibona isimo sikaSimakade. Kungani ningesabanga ukukhuluma ngenceku yami uMose na?”
Intukuthelo kaSimakade yabavuthela; wayesehamba.
Ifu laphakama phezu kwethende. Bheka, uMiriyamu wayesenochoko, emhlophe njengeqhwa. U-Aroni waphendukela ngakuMiriyamu, wabona ukuthi usenochoko.
U-Aroni wathi kuMose: “O Nkosi, ngixolele, ngiyakuncenga, ungabeki phezu kwethu isono esisenze ngobuwula.
Ngiyakuncenga, makangabi njengophume esibelethweni sikanina esefile, nesidumbu sakhe sidliwe ingxenye yaso.”
UMose wakhala kuSimakade, wathi: “Nkulunkulu, ngiyakuncenga, mphulukise!”
USimakade wathi kuMose: “Uma uyise ebemkhafulele ngamathe ebusweni, ubengelithwale yini ihlazo lakhe izinsuku eziyisikhombisa na? Makavalelwe ngaphandle kwenkambu izinsuku eziyisikhombisa; emveni kwalokho uyakubuye angeniswe.”
UMiriyamu wavalelwa ngaphandle kwenkambu izinsuku eziyisikhombisa. Abantu abazange bahambe, waze wabuyiswa uMiriyamu.
Emveni kwalokho abantu basuka eHazerothi bakanisa ehlane iPharanu.
USimakade wakhuluma kuMose, wathi:
“Thumela amadoda ukuba ayohlola iKhanani engizakulinika abantu bakwa-Israyeli. Uthumele umuntu abe munye kuleso naleso sizwana sokhokho babo, yilowo nalowo abe ngumholi phakathi kwaso.”
UMose wawathuma amadodana esuka ehlane iPharanu ngesiyalezo sikaSimakade. Wonke lawo madoda ayeyizinhloko zabantu bakwa-Israyeli.
Lawa ngamagama awo: Owesizwana sakwaRubeni: nguShamuwa, indodana kaZakhuri.
Owesizwana sakwaSimeyoni: nguShafathi, indodana kaHori.
Owesizwana sakwaJuda: nguKhalebhi, indodana kaJefune.
Owesizwana sakwa-Isakhare: ngu-Igali, indodana kaJosefa.
Owesizwana sakwa-Efrayimi: nguHosheya, indodana kaNuni.
Owesizwana sakwaBhenjamini: nguPhaliti, indodana kaRafu.
Owesizwana sakwaZebuloni: nguGadiyeli, indodana kaSodi.
Owesizwana sakwaJosefa, owesizwana sakwaManase: nguGadi, indodana kaSusi.
Owesizwana sakwaDani: ngu-Amiyeli, indodana kaGemali.
Owesizwana sakwa-Asheri: nguSethuru, indodana kaMikhayeli.
Owesizwana sakwaNafethali: nguNabi, indodana kaVofisi.
Owesizwana sakwaGadi: nguGewuweli, indodana kaMakhi.
Yilawo amagama amadoda athunywa nguMose ukuyohlola izwe. UMose waqamba uHosheya, indodana kaNuni, ngokuthi nguJoshuwa.
Lapho uMose ebathuma ukuyohlola iKhanani, wathi kubo: “Yenyukani ngaseningizimu, nikhuphukele ezintabeni,
nihlole ukuthi izwe linjani, nabantu abakhe kulo ukuthi banamandla noma bantekenteke, bayingcosana noma baningi yini,
nokuthi izwe abakhe kulo linjani; ngabe lihle noma libi, nokuthi imizi abahlala kuyo injani, iyizinkambu noma iyizinqaba,
nokuthi izwe linjani, livundile noma limpofu, linezinkuni noma qha. Yibani nesibindi, nibuye nezithelo zezwe.” Kwase kuyisikhathi sezithelo zokuqala zomvini.
Bahamba-ke, balihlola izwe kusukela ehlane iSini kuze kube seRehobhe ngasekungeneni eHamathi.
Benyukela ngaseningizimu, bafika eHebhroni; lapho kwakukhona u-Ahimani, uSheshayi, uThalimayi, nalabo abayizizukulwane zika-Anaki. IHebhroni lalakhiwe iminyaka eyisikhombisa ngaphambi kokwakhiwa kweZowani, eGibhithe.
Bafika esigodini i-Eshikholi, banquma lapho igatsha elinehlukuzo lamagilebhisi, balithwala ngogongolo phakathi kwababili, namahananadi namakhiwane.
Leyo ndawo yabizwa ngokuthi yisigodi i-Eshikholi ngenxa yehlukuzo abantu bakwa-Israyeli abalinquma lapho.
Babuya ekulihloleni izwe sekuzophela izinsuku ezingama-40.
Bahamba, bafika kuMose no-Aroni nalo lonke ibandla labantu bakwa-Israyeli ehlane iPharanu, eKadeshi. Bethula umbiko ngababekubonile, babakhombisa nezithelo zalelo lizwe.
Bambikela bathi: “Siyile ezweni obusithume kulo salihlola; ngempela lichichima ubisi noju; nazi izithelo zalo.
Kodwa-ke abantu abakhe ezweni banamandla, imizi ibiyelwe, mikhulu kakhulu, futhi sibone nokuthi bayizizukulwane zika-Anaki.
Ama-Amaleki ahlala ngaseningizimu; amaHithi, amaJebusi nama-Amori akhe kwelezintaba; kuthi amaKhanani ahlale ngasolwandle olukhulu, agudle iJordani.”
UKhalebhu wabathulisa abantu, wathi kuMose: “Siyakwenyuka impela, silidle; akungabazeki ukuthi sizakulinqoba.”
Kepha amadoda ayenyuke naye athi: “Asinakwenyuka sihlasele laba bantu, ngokuba banamandla kunathi.”
Abethulela umbiko omubi abantu bakwa-Israyeli ngezwe ayelihlolile, athi: “Izwe esidabule kulo ukuyolihlola, liyizwe elidla abakhileyo kulo, nabo bonke abantu esibabone kulo bayimidondoshiya.
Sibone futhi laphaya neziqhwaga zozalo luka-Anaki. Thina sazibona sibancane njengezintethe phambi kwazo, saba njalo emehlweni azo.”
Inhlangano yonke yaphakamisa izwi layo yakhala, abantu bakhala ngalobo busuku.
Bonke abantu bakwa-Israyeli bakhononda ngoMose no-Aroni, bathi kubo: “Sengathi ngabe safela eGibhithe, kunokuba sizofela kuleli hlane.
USimakade usiletheleni kuleli lizwe, ukuba sife ngenkemba na? Omkethu nabantwana bethu bayakuba yimpango, kungcono kithi ukuba siphindele eGibhithe.”
Yilowo nalowo wathi kumfowabo: “Masiqoke umholi, sibuyele eGibhithe.”
UMose no-Aroni bathi mbo ngobuso phansi, phambi kwebandla lonke lenhlangano yabantu bakwa-Israyeli.
UJoshuwa, indodana kaNuni noKhalebhu, indodana kaJefune, ababephakathi kwalabo ababeyohlola izwe, baklebhula izingubo zabo,
bathi kulo lonke ibandla labantu bakwa-Israyeli: “Izwe esadabula kulo silihlola, liyizwe elihle kakhulu.
Uma uSimakade esithanda, uyakusingenisa kuleli lizwe, futhi uyakusinika lona; liyizwe elichichima ubisi noju.
Kodwa ningamhlubuki uSimakade, ningabesabi abantu bakulelo lizwe. Bayofana nesinkwa nje kithi; umthunzi wabo usukile phezu kwabo, kodwa uSimakade unathi. Ningabesabi.”
Yonke inhlangano yathi mabakhandwe ngamatshe. Inkazimulo kaSimakade yabonakala kubo bonke abantu bakwa-Israyeli ethendeni lokuhlangana.
USimakade wayesekhuluma kuMose, wathi: “Kuyoze kube nini laba bantu bengedelela na? Kuyoze kube nini bengakholwa yimi nayizibonakaliso zonke engizenze phakathi kwabo na?
Ngiyobashaya ngobhubhane, ngibaphuce ifa, ngikwenze isizwe esikhulu nesinamandla kunabo.”
UMose wathi kuSimakade: “AbaseGibhithe bayokuzwa, ngokuba nguwe owabakhipha kubo laba bantu ngamandla akho.
Bayotshela izakhamuzi zaleli lizwe. Sizwile ukuthi Wena Simakade uphakathi kwalaba bantu, ngokuba Wena Simakade bayakubona ubuso nobuso; ifu lakho lima phezu kwabo njengensika, nokuthi Wena uhamba phambi kwabo ngensika yefu emini, nangensika yomlilo ebusuku.
Manje uma ubabulala bonke laba bantu, lezi zizwe ziyakuthi: ‘Sizwile umbiko othi:
“Ngenxa yokuba uSimakade ubengenamandla okungenisa laba bantu ezweni afunga ngalo kubo, ngalokho-ke ubabhubhisile ehlane.”
“Ngakho-ke ake ubonakalise amandla akho njengalokhu wakhuluma, wathi:
‘USimakade uyephuza ukuthukuthela, uvame umusa, uthethelela ububi neziphambeko, nokho akayeki angamjezisi onecala, uhambela ububi bawoyise kubantwana, kuze kube sesizukulwaneni sesithathu nesesine.’
Bathethelele laba bantu ububi babo ngokobukhulu bomusa wakho, njengalokho ubathethelele laba bantu kusukela eGibhithe kuze kube manje.”
USimakade wathi: “Ngiyabathethelela njengesicelo sakho.
Nokho ngifunga ngiyagomela, uma nje inkazimulo kaSimakade isawugcwalisa umhlaba wonke,
bonke labo bantu ababone inkazimulo yami nezibonakaliso zami engazenza eGibhithe nasehlane nokho bangilinga lezi zikhathi ezilishumi, abaze balilalela izwi lami,
akukho namunye kubo oyakulibona izwe engafunga kokhokho babo ngalo. Bonke labo abangedelela ehlane abayukulibona.
Kepha inceku yami uKhalebhu, ngenxa yokuba enomoya owehlukile, futhi engilandele ngenhliziyo ephelele, ngiyomngenisa ezweni aye kulo, izizukulwane zakhe ziyakulidla.
Manje, ngenxa yokuba ama-Amaleki namaKhanani akhile esigodini, jikani kusasa, nilibangise ehlane ngendlela eya oLwandle Lomhlanga.”
USimakade wakhuluma kuMose no-Aroni, wathi:
“Kuyoze kube nini le nhlangano eyonakele ikhononda ngami na? Ngikuzwile ukukhononda abantu bakwa-Israyeli abakhononda ngakho ngami.
Yishoni kubo nithi: ‘Ngifunga ngiyagomela, kusho uSimakade, ngizokwenza kini njengalokhu enikushilo ezindlebeni zami.
Izidumbu zenu ziyoba zigingqane kuleli hlane; bonke abantu ababalwayo kusukela kwabaneminyaka engama-20 kuya phezulu, abakhononde ngami,
abayukungena ezweni engafunga ngalo ukuthi ngiyakunakhisa kulo, ngaphandle kukaKhalebhu, indodana kaJefune noJoshuwa, indodana kaNuni.
Kodwa abantwana benu enithe bazoba yimpango, ngiyobangenisa kulo, balazi izwe enalilahla.
Nina-ke, izidumbu zenu ziyakuphelela kuleli hlane.
Abantwana benu bayakuba ngabelusi ehlane iminyaka engama-40, bayakuthwala icala lokuphinga kwenu, zize ziphele nya izidumbu zenu ehlane.
Njengokwenani lezinsuku enahlola ngazo izwe, izinsuku ezingama-40, usuku luyokuba unyaka. Niyakuthwala ububi benu iminyaka engama-40, nize nazi ukuthi kuba njani lapho ngimelana nani.’
Mina Simakade ngikhulumile. Ngiyakukwenza ngempela lokhu kuyo yonke le nhlangano eyonakele ehlangane yamelana nami kuleli hlane, bonke bayofela khona.”
Lawa madoda uMose ayewathumele ukuyohlola izwe, abuya ekhononda, enza nenhlangano yonke ikhononde ngaye, ngokuletha umbiko omubi ngezwe.
Lawo madoda ayelethe umbiko omubi ngezwe, aqedwa ubhubhane phambi kukaSimakade.
Kepha uJoshuwa, indodana kaNuni noKhalebhu, indodana kaJefune bona basinda kunalawo madoda ababehambe nawo ukuyohlola izwe.
UMose wakhuluma lawa mazwi kubo bonke abantu bakwa-Israyeli; abantu balila kakhulu.
Bavuka ekuseni ngovivi, benyukela esiqongweni sentaba, bathi: “Bhekani, sesilapha, siyakuya endaweni ayithembisile uSimakade, nakuba sonile.”
UMose wathi: “Kuyini lokhu? Seneqa futhi izwi likaSimakade na? Aniyukuphumelela.
Ningenyuki, ngokuba uSimakade akayukuba khona phakathi kwenu, niyokwehlulwa yizitha zenu.
Bhekani, ngiwabekile ama-Amaleki namaKhanani phambi kwenu, ayakunibhuqabhuqa ngenkemba, lokhu nimfulathele uSimakade, ngalokho uSimakade akuzukuba nani.”
Bakhuphukela esiqongweni sezwe lezintaba ngokuziqhayisa nakuba umphongolo wesivumelwano sikaSimakade noMose ungaphumanga enkanjini.
Ama-Amaleki namaKhanani ayehlala kulelo lezintaba ehla abashaya, abaqothula, abahlakaza bagcwala izinkalo kwaze kwaba seHorma.
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma nifika ezweni engizakuninika lona ukuba nihlale kulo,
senenza umnikelo womlilo kuSimakade, umnikelo wokushiswa, noma umhlatshelo wokufeza isifungo, noma umnikelo wesihle, noma owemikhosi yenu emisiweyo ukwenza iphunga elimnandi kuSimakade, ezinkomeni noma ezimvini,
khona-ke lowo onikela ngomnikelo wakhe uyoletha kuSimakade umnikelo wokusanhlamvu wokweshumi kwempuphu ecolisekileyo exovwe nokwesine kwehini lamafutha;
newayini libe ngumnikelo wokuphuzwayo, uyonikela okwesine kwehini noma nomnikelo wokushiswa kube yimvana eyodwa yomhlatshelo.
“ ‘Inqama uyakuyilungisela okweshumi okubili kwempuphu ecolisekileyo exovwe nokwesithathu kwehini lamafutha, kube ngumnikelo wokusanhlamvu.
Uyonikela okwesithathu kwehini lewayini kube ngumnikelo wokuphuzwayo nephunga elimnandi kuSimakade.
“ ‘Uma unikela ngeduna njengomnikelo wokushiswa, noma umhlatshelo wokufeza isifungo, noma iminikelo yokuthula kuSimakade,
ngaphezu kweduna lelo, uyoletha umnikelo wokusanhlamvu wokweshumi okuthathu kwempuphu ecolisekileyo exovwe nengxenye yehini lamafutha.
Uyonikela ngengxenye yehini lewayini libe ngumnikelo wokuphuzwayo, kube ngumnikelo womlilo wephunga elimnandi kuSimakade.
Kuyokwenziwa kanjalo ngaleyo naleyo nkunzi, noma ngaleyo naleyo nqama, noma ngaleyo naleyo mvana yeduna, noma ngamazinyane ezimbuzi;
njengokwenani enililungisileyo, niyokwenza kanjalo kuleyo naleyo njengokwenani lazo.
“ ‘Bonke abangabozalo bayokwenza kanjalo lezi zinto, bayonikela ngomnikelo womlilo wephunga elimnandi kuSimakade.
Umfokazi ogogobele kwakho, noma ophakathi kwenu ezizukulwaneni zenu, uyonikela ngomnikelo womlilo wephunga elimnandi kuSimakade, uyokwenza njengalokhu nani nenza.
Kuyoba yisimiso esifanayo saphakade ebandleni, kini nakumfokazi ogogobeleyo kini, ezizukulwaneni zenu; njengani uyoba njalo umfokazi phambi kukaSimakade.
Kuyoba ngumthetho munye nesimiso esisodwa kinina nakumfokazi ogogobeleyo kini.’ ”
USimakade wakhuluma kuMose, wathi:
“Yisho kubantu bakwa-Israyeli, uthi kubo: ‘Uma nifika ezweni enginiyisa kulo,
kuyothi lapho nidla isinkwa sezwe, ninikele ngomnikelo wokuphakanyiswa kuSimakade.
Niyonikela ngeqebelengwane lenhlama yenu yokuqala libe ngumnikelo wokuphakanyiswa; njengalokhu nenza umnikelo wokuphakanyiswa wesibuya, niyowenza kanjalo.
Ngenhlama yenu yokuqala, niyonika uSimakade umnikelo wokuphakanyiswa ezizukulwaneni zenu.
“ ‘Uma nona, ningayigcini yonke le miyalo uSimakade ayitshele uMose,
konke uSimakade aniyale ngakho ngomlomo kaMose, kusukela ngosuku uSimakade aniyala ngalo kuqhubeke nakuzo zonke izizukulwane zenu,
uma lokho kwenziwe kungenganhloso, futhi inhlangano ingazi, inhlangano yonke iyonikela ngeduna libe ngumnikelo wokushiswa, iphunga elimnandi kuSimakade. Iyowunikela nomnikelo wayo wokusanhlamvu, nowokuphuzwayo njengokomthetho, nempongo ibe ngumnikelo wesono.
Umphristi uyokwenzela yonke inhlangano yabantu bakwa-Israyeli ukubuyisana; ithethelelwe ngenxa yokuba kwakungeyona inhloso, futhi iwulethile umnikelo wayo, umnikelo womlilo kuSimakade, umnikelo wabo wesono phambi kukaSimakade, ngesiphosiso sayo.
Yonke inhlangano yabantu bakwa-Israyeli iyothethelelwa nomfokazi ogogobele phakathi kwayo, ngokuba bonke abantu bakwenza ngesiphosiso.
“ ‘Uma umuntu ona ngokungenhloso, uyonikela ngembuzi enonyaka, ibe ngumnikelo wesono.
Umphristi uyomenzela lowo muntu ophosisileyo ukubuyisana, ngokuba wone engahlosile phambi kukaSimakade; uyomenzela ukubuyisana, athethelelwe.
Niyoba nomthetho ofanayo kowengabadi kwa-Israyeli nomfokazi ogogobeleyo phakathi kwenu, lapho bone ngokungenhloso.
“ ‘Kodwa noma ngubani owona ngehloso noma ngabe ungowengabadi noma ngumfokazi, ahlambalaze uSimakade, uyonqunywa kubantu bakubo,
ngokuba wedelele izwi likaSimakade, wephula umyalo wakhe, lowo muntu uyonqunywa ngokuphelele, icala lakhe libe phezu kwakhe.’ ”
Abantu bakwa-Israyeli besesehlane, bafumana umuntu etheza izinkuni ngosuku lwesabatha.
Labo abamfumana etheza izinkuni, bamletha kuMose no-Aroni nakuyo yonke inhlangano.
Bamshiya evalelwe ngoba kwakungakanqunywa ukuthi kuzokwenziwani ngaye.
USimakade wathi kuMose: “Lowo muntu kufanele abulawe. Inhlangano yonke iyokumkhanda ngamatshe, ngaphandle kwenkambu.”
Inhlangano yonke yamkhiphela ngaphandle kwenkambu, yamkhanda ngamatshe, wafa, njengalokhu uSimakade ayemyalile uMose.
USimakade wathi kuMose:
“Khuluma kubantu bakwa-Israyeli, ubatshele ukuba bazenzele insephe emiphethweni yezingubo zabo ezizukulwaneni zabo, nokuba babeke igoda eliluhlaza okwesibhakabhaka ngasemiphethweni yensephe.
Le nsephe niyothi njalo uma niyibheka, nikhumbule yonke imiyalo kaSimakade, niyenze. Aniyukuhamba ngokulawulwa yizinhliziyo zenu nangokubona kwenu enanivame ukukwenza nilandela izindlela zokuphinga.
Niyohlala nikhumbula ukugcina yonke imiyalo yami, nibe ngcwele kuNkulunkulu wenu.
NginguSimakade uNkulunkulu wenu owanikhipha eGibhithe, ukuze ngibe nguNkulunkulu wenu; nginguSimakade uNkulunkulu wenu.”
UKhora, indodana kaJizihari, kaKhohathi kaLevi, ekanye namadodana amabili kaRubeni, uDathani no-Abhiramu, ababezalwa ngu-Eliyabe no-Oni ozalwa nguPhelethi baqoqa amadoda,
bamvukela uMose benamadoda akwa-Israyeli angama-250, angabaholi benhlangano, angamanxusa ebandla, amadoda adumileyo.
Bahlanganyela uMose no-Aroni, bathi kubo: “Sekwanele, yonke inhlangano ingcwele, futhi uSimakade uphakathi kwayo; niziphakamiselani phezu kwenhlangano kaSimakade na?”
Wathi ukuba uMose akuzwe lokhu wathi mbo ngobuso emhlabathini.
Wathi kuKhora neviyo lakhe: “Kusasa ekuseni uSimakade uzonazisa ukuthi ngubani ongowakhe, nongcwele, bese emsondeza kuye lowo akhetha ukumsondeza.
Yenzani lokhu: zithatheleni izitsha zempepho, wena Khora neviyo lakho lonke,
nifake kuzo amalahle avuthayo, nifake impepho kuzo kusasa phambi kukaSimakade. Kuyothi lowo uSimakade amkhethayo abe ngcwele. Kade nikwenza lokhu madodana kaLevi, kodwa namuhla nifike ekugcineni!”
UMose wathi kuKhora: “Ake nilalele nina bozalo lukaLevi:
akwanele yini kini ukuthi uNkulunkulu ka-Israyeli unehlukanisile enhlanganweni yakwa-Israyeli, ukuba nisondele kuye ukuze nenze inkonzo yethabanakeli likaSimakade nokuba nime phambi kwenhlangano, nibe yizisebenzi zayo,
futhi ukusondezile wena nabafowenu bonke, bozalo lukaLevi kanye nawe, manje senifisa nobuphristi na?
Ngakho-ke wena nalo lonke iviyo lakho nihlanganele ukuzomelana noSimakade. Ubeyini u-Aroni ukuba ningaze nikhononde ngaye na?”
UMose wathumela wabiza uDathani no-Abhiramu, amadodana ka-Eliyabe, kodwa bathi: “Ngeke sikhuphuke.
Kuyinto encane yini ukuthi wasikhuphula ezweni elichichima ubisi noju ukuba sizofela lapha ehlane; usuzozenza umbusi phezu kwethu na?
Futhi awusingenisile ezweni elichichima ubisi noju, awukasiniki ifa lethu lamasimu nezivini; usuzama ukukhohlisa laba bantu na? Ngeke neze sikhuphuke.”
UMose wathukuthela kakhulu, wathi kuSimakade: “Ungawunaki neze umnikelo wabo; angithathanga nayinye imbongolo yabo, futhi angilimazanga namunye kubo.”
UMose wathi kuKhora: “Wena neviyo lakho lonke wozani kusasa, nime phambi kukaSimakade, wena, neviyo lakho no-Aroni.
Makube yilowo nalowo athathe isitsha sakhe sempepho, afake kuso impepho asilethe kuSimakade; izitsha zempepho ezingama-250, nawe kanjalo no-Aroni, izitsha zenu zempepho.”
Bathatha yilowo nalowo isitsha sakhe sempepho bafaka kuzo amalahle base befaka nempepho. UMose no-Aroni bama ngasemnyango wethende lokuhlangana.
UKhora wayeseqoqa yonke inhlangano, base bema ngasemnyango wethende lokuhlangana. Inkazimulo kaSimakade yabonakala kuyo yonke inhlangano.
USimakade wakhuluma kuMose no-Aroni, wathi:
“Zehlukaniseni kule nhlangano ukuze ngiyiqothule ngokuphazima kweso.”
UMose no-Aroni bawa bathi mbo ngobuso phansi, bathi: “Nkulunkulu! Nkulunkulu! Mthombo wokuphila konke, usuzothukuthelela yonke inhlangano ngenxa yesono somuntu oyedwa nje?”
USimakade wathi kuMose:
“Khuluma enhlanganweni, uthi kuyo: ‘Khuphukani, niqhele ngasemathendeni oKhora noDathani no-Abhiramu.’ ”
UMose wasukuma waya kuDathani naku-Abhiramu; amalunga akwa-Israyeli amlandela.
Wakhuluma nenhlangano, wathi: “Ngiyaninxusa; dedani emathendeni alaba bantu ababi, ningathinti lutho olungolwabo, funa nibhujiswe ngezono zabo zonke.”
Base bekhuphuka ngasemathendeni oKhora noDathani no-Abhiramu. ODathani no-Abhiramu nomkabo namadodana nezingane zabo, baphuma bama ngasemnyango wamathende abo.
UMose wathi: “Ngalokhu niyokwazi ukuthi uSimakade ungithumile ukwenza yonke le misebenzi, angiyenzanga ngokwentando yami.
Uma laba bantu befa ngokufa okwejwayelekile, noma behlelwa ngokwehlela abantu bonke, uSimakade uyobe kangithumanga.
Kodwa uma uSimakade enza into entsha, umhlaba uvule umlomo wawo, ubagwinye nakho konke okwabo, baye kwalasha bephila, niyakuqonda ukuthi laba bantu bamedelelile uSimakade.”
Wathi eqeda nje ukukhuluma wonke lawa mazwi, umhlaba waqhekezeka ngaphansi kwabo.
Umhlaba wavula umlomo wawo, wabagwinya nezindlu zabo; nabo bonke abantu bakaKhora nempahla yabo yonke.
Baya kwalasha bezwa, nakho konke okungokwabo. Umhlaba wabagubuzela; bafa kanjalo phambi kwebandla.
Bonke abakwa-Israyeli ababelapho, bezwa ukukhala kwabo, bathi: “Funa umhlaba usigwinye nathi!”
Kweza umlilo uvela kuSimakade, wabaqothula abantu abangama-250 ababenikele ngempepho.
USimakade wakhuluma kuMose, wathi:
“Yisho ku-Eleyazare, indodana ka-Aroni umphristi, ukuba akhiphe izitsha zempepho emlilweni, awuhlakaze, ngokuba ungcwele.
Izitsha zempepho zalezi zoni sezingcwele ngenxa yomvuzo wempilo yazo nangokuba zaziletha kuSimakade. Zicangcathe zibe yizingcwecwe zokwemboza i-althare, zibe wuphawu futhi kubantu bakwa-Israyeli.”
U-Eleyazare, umphristi, wazithatha izitsha zempepho zethusi ababenikele ngazo labo abashayo. Wazicangcatha zaba yisembozo se-althare,
zaba yisikhumbuzo kubantu bakwa-Israyeli, ukuze kungabi bikho mfokazi ongesiye owozalo luka-Aroni oyakulokotha asondele ashise impepho phambi kukaSimakade; ukuze angabi njengoKhora neviyo lakhe, njengalokhu uSimakade akhuluma kuye ngoMose.
Ngakusasa yonke inhlangano yabantu bakwa-Israyeli yakhononda ngoMose no-Aroni, yathi: “Nibulele abantu bakaSimakade.”
Kwathi inhlangano isibavukela oMose no-Aroni, babheka ngasethendeni lokuhlangana. Bheka, ifu lalisibekela, inkazimulo kaSimakade yabonakala kulo.
UMose no-Aroni beza ngaphambi kwethende lokuhlangana.
USimakade wakhuluma kuMose, wathi:
“Khuphuka, uqhele phakathi kwale nhlangano ukuze ngiyibhubhise ngokuphazima kweso.” Bawa ngobuso babo.
UMose wathi ku-Aroni: “Thatha isitsha sempepho, ufake kuso amalahle avuthayo ase-althare, nempepho, uphuthume uye ebandleni uyolenzela ukubuyisana, ngokuba intukuthelo kaSimakade isiphumile, seluqalile ubhubhane.”
U-Aroni wasithatha njengalokhu ekhulumile uMose, wagijima waya phakathi kwebandla. Uyabona-ke, lwaseluqalile ubhubhane phakathi kwabantu; wafaka impepho, wabenzela abantu ukubuyisana.
Wama phakathi kwabafileyo nabaphilayo; lwanqamuka ubhubhane.
Ababebulewe ubhubhane babeyizi-14 700, ngaphandle kwalabo abafa ngenxa kaKhora.
U-Aroni wabuyela kuMose ngasemnyango wethende lokuhlangana; lwaselunqamukile ubhubhane.
USimakade wakhuluma kuMose, wathi:
“Khuluma kubantu bakwa-Israyeli, uthathe kubo izintonga, ibe yinye kuleyo naleyo ndlu yokhokho babo, kubo bonke abaholi ngokwezindlu zokhokho; kube yizintonga ezili-12. Uyoloba igama lomniniyo entongeni yakhe.
Entongeni kaLevi uyoloba igama lika-Aroni, ngokuba kuyoba nenhloko eyodwa kuleyo naleyo ndlu yokhokho.
Uyozibeka ethendeni lokuhlangana ngaphambi kobufakazi, lapho ngihlangana nawe khona.
Kuyothi lowo muntu engiyokumkhetha, intonga yakhe ihlume, ukuze ngiqede ukukhononda abakwa-Israyeli abanakho ngani.”
UMose wakhuluma kubantu bakwa-Israyeli, kwathi bonke abaholi bamnika izintonga zabo. Intonga ngayinye kulowo nalowo mholi njengokwezindlu zokhokho; izintonga ezili-12. Intonga ka-Aroni yayiphakathi kwezintonga zabo.
UMose wazibeka izintonga phambi kukaSimakade ethendeni lokuhlangana.
Ngakusasa uMose waya ethendeni lobufakazi; bheka, intonga ka-Aroni yendlu kaLevi yayihlumile, yaveza imiqumbe, yaqhakaza izimbali, yathela ama-alimondi avuthiweyo.
UMose wazikhipha izintonga phambi kukaSimakade wazikhiphela kubo bonke abantu bakwa-Israyeli, babona, kwaba yilowo nalowo wathatha intonga yakhe.
USimakade wathi kuMose: “Buyisela intonga ka-Aroni ngaphambi kobufakazi, igcinwe ibe wuphawu kubahlubuki ukuba uqede ukukhononda kwabo ngami, ukuze bangafi.”
UMose wenza njengalokhu uSimakade ayemyalile. Wenza kanjalo-ke.
Abakwa-Israyeli bathi kuMose: “Uyabona-ke, siyabhubha, siyashabalala, siyaphela sonke ngothi lwethu.
Bonke abasondela ethabanakelini likaSimakade bayakufa; siyakufa siphele sonke na?”
USimakade wathi ku-Aroni: “Wena namadodana akho nabendlu kayihlo niyothwala ububi bendawo engcwele. Wena namadodana akho niyothwala ububi bobuphristi benu.
Abafowenu, besizwana sakwaLevi isizwana sikayihlo, basondeze nabo ukuze bahlanganiswe nawe, bakukhonze. Kepha wena, namadodana akho, niyoba ngaphambi kwethende lobufakazi.
Bayokwenza wonke umsebenzi wakho nomsebenzi wonke wethende, kodwa abayukusondela empahleni yendlu engcwele nase-althare, ukuze bona nani ningafi.
Bayakuzihlanganisa nawe, bagcine inkonzo yethende lokuhlangana kuwo wonke umsebenzi wethende; umfokazi akayukusondela kuwe.
“Niyakugcina inkonzo yendlu engcwele nenkonzo yase-althare, ukuze ulaka lungabe lusaba khona phezu kwabantu bakwa-Israyeli.
Bhekani, Mina ngithathe abafowenu abaLevi phakathi kwabantu bakwa-Israyeli. Bayisipho kini, esehlukaniselwe uSimakade ukwenza umsebenzi wethende lokuhlangana.
Wena, namadodana akho ahlala nawe, niyakugcina ubuphristi kukho konke okuphathelene ne-althare, nakukho konke okungaphakathi kwesihenqo. Lokhu kungumsebenzi wenu, ngokuba ngininika ubuphristi bube yinkonzo eyisipho kini, umfokazi osondelayo uyobulawa.”
USimakade wakhuluma ku-Aroni, wathi: “Uyabona-ke, Mina ngikunike igunya phezu kweminikelo yami naphezu kwazo zonke izipho ezingcwele zabantu bakwa-Israyeli. Ngizinike wena namadodana akho njengengxenye eyisimiso sabaphristi phakade.
Lokhu kuyakuba ngokwenu ezintweni ezingcwelengcwele ezisale emlilweni, kuyo yonke iminikelo yabo, nakuyo yonke iminikelo yabo yokusanhlamvu, nakuyo yonke iminikelo yabo yesono, nayo yonke iminikelo yabo yecala abayonikela ngayo kimi, iyoba ngcwelengcwele kuwe nakumadodana akho.
Lokhu niyokudlela endaweni engcwelengcwele, kuyodliwa yibo bonke abesilisa; kuyoba ngcwelengcwele kini.
“Nakhu okungokwakho: umnikelo wokuphakanyiswa wesipho sabo, nayo yonke iminikelo yokuzungeziswa yabakwa-Israyeli, ngikunika wena namadodana namadodakazi akho, kube ngokwenu kuze kube phakade. Yilowo nalowo ohlambulukileyo kwabendlu yakho uyakukudla.
“Konke okuhle kwamafutha amasha nakho konke okuhle kwewayini elisha nokusanhlamvu, ulibo lwalokho abanikela ngakho kuSimakade, ngikunike khona.
Ulibo lwakho konke okusezweni lakubo abaluletha kuSimakade luyakuba ngolwakho. Yilowo nalowo ohlambulukileyo kwabendlu yakho uyakukudla.
“Konke okwehlukanisiwe kwa-Israyeli kuyoba ngokwakho.
Amazibulo wonke ezintweni eziphilayo, abayonikela ngawo kuSimakade: kungaba ngawabantu noma ngawezilwane, kuyoba ngokwakho. Nokho izibulo lomuntu uyolihlenga, nezibulo lesilwane esingcolileyo.
Intengo yokuhlengwayo, kusukela kokunenyanga ngokulinganisa kwakho, iyoba ngamashekeli ayisihlanu esiliva ngokweshekeli lendawo engcwele elingamagera angama-20.
“Kepha izibulo lenkomo, noma lemvu, noma lembuzi, awuyukulihlenga; lingcwele. Uyofafaza ngegazi lalo e-althare, ushise amanoni alo abe ngumnikelo womlilo oliphunga elimnandi kuSimakade.
Inyama yalo iyoba ngeyakho: isifuba sokuzungeziswa nomlenze wangakwesokunene kuyoba ngokwakho.
Yonke iminikelo yezinto ezingcwele zabantu bakwa-Israyeli abanikela ngayo, ngiyinika wena namadodana namadodakazi akho, ibe ngeyenu kuze kube phakade. Kuyisivumelwano sikasawoti, kuze kube phakade phambi kukaSimakade, kuwe nasezizukulwaneni zakho.”
USimakade wathi ku-Aroni: “Awuyukuba nafa ezweni lakubo, futhi awuyukuba nasabelo phakathi kwabo; Mina ngiyisabelo sakho nefa lakho phakathi kwabantu bakwa-Israyeli.
“Abozalo lukaLevi ngibanike okweshumi kwa-Israyeli ukuba kube yifa labo; ngomsebenzi abawenzayo ethendeni lokuhlangana.
Abantu bakwa-Israyeli abayukusondela ethendeni lokuhlangana, funa bathwale isono, bafe.
AbaLevi bayokwenza umsebenzi wokukhonza ethendeni lokuhlangana, bathwale ububi bawo. Kuyoba yisimiso esiphakade ezizukulwaneni zabo, naphakathi kwabantu bakwa-Israyeli abayukuba nalifa.
Okweshumi, abantu bakwa-Israyeli abanikela ngakho kube ngumnikelo wokuphakanyiswa kuSimakade, ngikunike abaLevi ukuba kube yifa labo. Yingakho ngithe kubo: ‘Abayukuba nalifa phakathi kwabantu bakwa-Israyeli.’ ”
USimakade wakhuluma kuMose, wathi:
“Uyobatshela abaLevi uthi kubo: ‘Uma nithatha okweshumi kwabantu bakwa-Israyeli engininike khona kuvela kubo, kube yifa lenu, anonikela ngomnikelo wokuphakanyiswa kuSimakade, okweshumi kokweshumi.
Umnikelo wenu uyakubalelwa kini, njengokusanhlamvu kwesibuya nanjengokugcwala kwesikhamo sewayini.
Kanjalo nani niyakunikela ngomnikelo wokuphakanyiswa kuSimakade, ngakho konke okweshumi kwenu enikwamukela kubantu bakwa-Israyeli; niyakunikela ku-Aroni umphristi, ngomnikelo wokuphakanyiswa kuSimakade.
Kuzo zonke izipho eniziphiwayo, niyakwehlukanisa umnikelo ofanele uSimakade, okwekhethelo kukho konke kuyingxenye engcwelisiweyo.’
“Yisho futhi kubo uthi: ‘Uma ninikela ngokwekhethelo kwakho, kuyakubalelwa kubaLevi njengesivuno sesibuya nanjengesivuno sesikhamo sewayini.
Niyakukudlela noma kuyiphi indawo, nina nabezindlu zenu, ngokuba kungumvuzo wenu ngomsebenzi wenu ethendeni lokuhlangana.
Lapho seninikelile ngokwekhethelo kwakho, aniyukuba nacala, kodwa aniyukuzingcolisa izinto ezingcwele zabantu bakwa-Israyeli, futhi aniyukufa.’ ”
USimakade wakhuluma kuMose no-Aroni, wathi:
“Lokhu kuyisimiso somthetho uSimakade ayale ngaso ukuba usitshele abantu bakwa-Israyeli, uthi: ‘Mabalethe kuwe isithole esibomvu esingenasici, esingasoleki, esingakaze siboshelwe ejokeni,
basinike u-Eleyazare umphristi, yena asikhiphele ngaphandle kwenkambu, asihlabe phambi kwakhe.
U-Eleyazare umphristi, uyothatha igazi laso ngomunwe wakhe, achinse ngalo kasikhombisa ngaphambi kwethende lokuhlangana.
Isithole uyosishisa phambi kwakhe, nesikhumba saso, nenyama yaso, negazi laso, nomswani waso.
Umphristi uyothatha umsedari, ihisophi, nendwangu ebomvu, akuphonse phakathi kokushayo kwesithole.
Umphristi uyohlanza izingubo zakhe, ageze umzimba ngamanzi ngaphambi kokuyongena enkanjini; abe ngongcolileyo kuze kuhlwe.
Oshisa leso sithole uyohlanza izingubo zakhe ngamanzi, ageze nomzimba wakhe, abe ngongcolileyo kuze kuhlwe.
“ ‘Umuntu ohlambulukileyo uyakubutha umlotha wesithole, ayowuchitha ngaphandle kwenkambu endaweni ehlambulukileyo, uyakugcinelwa inhlangano yabantu bakwa-Israyeli kube ngamanzi okuhlambulula; ungumnikelo wesono.
Obutha umlotha wesithole uyakuhlanza izingubo zakhe, abe ngongcolileyo kuze kube kusihlwa. Lokhu kuyakuba yisimiso esiphakade kubantu bakwa-Israyeli nakumfokazi ogogobele phakathi kwabo.
“ ‘Othinta isidumbu sanoma yimuphi umuntu uyakuba ngongcolileyo izinsuku eziyisikhombisa.
Uyozihlambulula ngamanzi ngosuku lwesithathu, ngosuku lwesikhombisa uyakuhlambuluka. Kodwa uma engazihlambululanga ngawo ngosuku lwesithathu, akayukuhlambuluka ngosuku lwesikhombisa.
Yilowo nalowo othinta isidumbu somuntu ofileyo, angazihlambululi ekungcoleni, uyongcolisa ithabanakeli likaSimakade. Lowo muntu uyonqunywa kwa-Israyeli, lokhu engafafazwanga ngamanzi okuhlambulula, uyakuhlala engongcolile; ukungcola kwakhe kungasuki kuye.
“ ‘Nanku umthetho uma umuntu efela ethendeni: yilowo nalowo ongena ethendeni nalowo osethendeni uyakuba ngongcolileyo izinsuku eziyisikhombisa.
Nazo zonke izitsha ezivulekileyo ezingenaso isisibekelo esiboshwe kuzo zingcolile.
“ ‘Yilowo nalowo othinta obulewe ngenkemba endle, noma ozifele nje, noma ithambo lomuntu, noma ithuna, uyakuba ngongcolileyo izinsuku eziyisikhombisa.
“ ‘Abangcolileyo bayakuthatha umlotha wokushayo komnikelo wesono, namanzi agobhozayo bakuthele ndawonye esitsheni,
umuntu ohlambulukileyo uyothatha ihisopi, aligcobhoze emanzini, afafaze ngawo ithende, nezitsha zonke, nabantu abalapho, nalowo othinte ithambo, noma obuleweyo, noma isidumbu, noma ithuna.
Ohlambulukileyo uyofafaza ongahlambulukile ngosuku lwesithathu nangosuku lwesikhombisa, amhlambulule ngosuku lwesikhombisa, bese ehlanza izingubo zakhe, ageze ngamanzi, ahlambuluke ngakusihlwa.
Umuntu ongcolileyo futhi ongazihlambululanga, lowo uyakunqunywa ebandleni ngoba engcolise indawo kaSimakade engcwele. Lokhu engafafazwanga ngamanzi okuhlambulula, ungcolile.
Lokhu kuyakuba yisimiso esiphakade kubo; lowo oyofafaza amanzi okuhlambulula, uyakuhlanza izingubo zakhe, nalowo othinta amanzi okuhlambulula uyakuba ngongcolileyo kuze kuhlwe.
Konke okuyothintwa ngumuntu ongcolileyo kuyoba ngokungcolile; umuntu oyokuthinta uyoba ngongcolileyo kuze kuhlwe.’ ”
Ngenyanga yokuqala, yonke inhlangano yabantu bakwa-Israyeli yafika ehlane iSini. Abantu bahlala eKadeshi, uMiriyamu wafela khona, wangcwatshwa khona futhi.
Kwakungekho manzi okuba inhlangano iphuze; ngakho-ke bahlangana ndawonye bamelana noMose no-Aroni.
Abantu balwa noMose, bakhuluma bathi: “Sengathi ngabe safa ngesikhathi kufa abafowethu phambi kukaSimakade.
Niyiletheleni kuleli hlane inhlangano kaSimakade ukuba sizofela kulo, thina nemfuyo yethu na?
Nasikhuphulelani eGibhithe, ukuze nisilethe kule ndawo embi na? Akusiyo indawo yembewu, noma yamakhiwane, noma yemivini, noma yamahananadi, futhi akukho ngisho amanzi okuphuza.”
UMose no-Aroni basuka phambi kwebandla baya ngasemnyango wethende lokuhlangana. Bawa ngobuso bathi mbo emhlabathini, base bebona kuvela inkazimulo kaSimakade.
USimakade wathi kuMose:
“Thatha intonga, uqoqe inhlangano, wena no-Aroni umfowenu, ukhulume edwaleni phambi kwamehlo abo ukuba liveze amanzi alo. Uyakubavezela amanzi edwaleni, uyinike inhlangano nezinkomo zayo okokuphuza.”
UMose wathatha intonga phambi kukaSimakade, njengalokhu ayemyalile.
UMose no-Aroni baliqoqa ibandla phambi kwedwala; wathi kubo: “Yizwani bahlubuki ndini; sizakunivezela yini amanzi kuleli dwala na?”
UMose waphakamisa isandla sakhe, walishaya kabili idwala ngentonga yakhe, kwaphuma amanzi amaningi, yaphuza inhlangano nemfuyo yayo.
USimakade wathi kuMose no-Aroni: “Njengalokhu ningakholwanga yimi, futhi ningangingcwelisanga phambi kwamehlo abantu bakwa-Israyeli, ngalokho aniyukulingenisa leli bandla ezweni engilinike lona.”
Lawa ngamanzi eMeribha, ngokuba abantu bakwa-Israyeli balwa noSimakade, Yena wazibonakalisa engcwele phakathi kwabo.
UMose eseKadeshi wathumela izithunywa enkosini yakwa-Edomi, wathi: “Usho kanje umfowenu u-Israyeli: ‘Uyabazi bonke ubunzima esihlangabezane nabo,
ukuthi okhokho bethu behlela eGibhithe, sahlala eGibhithe isikhathi eside; abaseGibhithe basiphatha kabi thina nokhokho bethu.
Sakhala kuSimakade, walizwa izwi lethu, wathuma ingelosi, wasikhipha eGibhithe; bheka manje silapha eKadeshi, umuzi osemngceleni wezwe lakho.
Siyakuncenga sivumele sidabule ezweni lakho; asiyukuhamba emasimini nasezivinini, futhi asiyukuwaphuza amanzi emithonjeni; siyohamba ngomgwaqo wenkosi, asiyukujikela ngakwesokunene nangakwesokhohlo size sidlule ezweni lakho.’ ”
U-Edomi wathi kuye: “Aniyukudabula lapha, funa ngiphume ngikusukele ngenkemba.”
Abantu bakwa-Israyeli bathi kuye: “Siyakuhamba ngomgwaqo; uma siphuza amanzi akho, mina nemfuyo yami, ngiyakukhokhela imali yawo. Mangidabule nje ngezinyawo zami, kungabi ngokunye.”
Kepha wathi: “Awuyukudabula.” U-Edomi waphuma nempi enkulu, eyayihlome iphelele, yamvimba.
Wala kanjalo-ke u-Edomi ukuba u-Israyeli adabule ezweni lakhe; u-Israyeli wabe esechezuka.
Abantu bakwa-Israyeli basuka eKadeshi baze bayofika entabeni iHori.
USimakade wathi kuMose no-Aroni, entabeni iHori esemngceleni wezwe lakwa-Edomi:
“U-Aroni uzokufa, akayukungena ezweni engibanike lona abantu bakwa-Israyeli, ngokuba naphambuka ezwini lami emanzini eMeribha.
Thatha o-Aroni no-Eleyazare, indodana yakhe, ukhuphukele nabo entabeni iHori.
Umkhumule u-Aroni izembatho zakhe, uzigqokise u-Eleyazare indodana yakhe; u-Aroni uyobuyela kwabakubo, afele khona.”
UMose wenza njengalokhu uSimakade emyalile; bakhuphukela entabeni iHori, inhlangano yonke ibabuka.
UMose wamkhumula u-Aroni izembatho zakhe, wazigqokisa u-Eleyazare, indodana yakhe. U-Aroni wafela khona lapho esiqongweni sentaba; oMose no-Eleyazare behla entabeni.
Inhlangano yonke yabona ukuthi u-Aroni ufile, yamlilela izinsuku ezingama-30, yonke indlu yakwa-Israyeli.
UmKhanani, inkosi yase-Aradi, owayakhe eningizimu, wezwa ukuthi u-Israyeli uyeza ngendlela ese-Atharimi. Walwa no-Israyeli, wathumba abanye kubo.
U-Israyeli wenza isifungo kuSimakade, wathi: “Uma ubanikela nokubanikela laba bantu esandleni sami, ngiyakuyichitha impela imizi yabo.”
USimakade walilalela izwi lika-Israyeli, wanikela kuye amaKhanani, bawaqothula nemizi yawo; igama laleyo ndawo kwathiwa yiHorma.
Basuka entabeni iHori ngendlela yoLwandle Lomhlanga ukuba bazungeze izwe lakwa-Edomi; inhliziyo yabantu yadikibala ngenxa yendlela.
Abantu bagxibha uNkulunkulu noMose, bathi: “Nisikhuphuleleni eGibhithe ukuba sizofela ehlane na? Akukho sinkwa, namanzi lapha, futhi sesidiniwe yilesi sinkwa esiludlana.”
USimakade wathumela izinyoka ezinesihlungu phakathi kwabantu bakwa-Israyeli, zabaluma, kwafa abantu abaningi kwa-Israyeli.
Abantu baya kuMose, bathi: “Sonile, ngokuba sikhulume kabi ngawe nangoSimakade; sikhulekele kuSimakade ukuba asuse izinyoka kithi.” UMose wabakhulekela abantu.
USimakade wathi kuMose: “Zenzele inyoka enesihlungu, uyiphanyeke ensikeni. Kuyothi lowo olunywe yinyoka, lapho eyibheka, asinde.”
UMose wenza inyoka yethusi, wayiphanyeka ensikeni. Kwakuthi lapho umuntu elunywe yinyoka, bese ebheka inyoka yethusi, asinde.
Abakwa-Israyeli basuka baze bayokanisa e-Obhothi.
Basuka e-Obhothi, bakanisa e-Iye Abharimi ehlane elingaphambi kwelakwaMowabi lapho ilanga liphuma ngakhona.
Basuka lapho baze bayokanisa esigodini iZeredi.
Basuka nalapho baze bayokanisa maqondana ne-Arinoni, ehlane elize liyofika endaweni yama-Amori. I-Arinoni lalingumngcele owehlukanisa elakwaMowabi nelama-Amori.
Yingakho eNcwadini yeziMpi zikaSimakade kuthiwa: “IWahebi eseSufa, nezigodi ezise-Arinoni,
nomthambeka wezigodi oholela e-Ari, oncike emngceleni wakwaMowabi.”
Basuka lapho, baya eBheri; lowo ngumthombo athi ngawo uSimakade kuMose: “Qoqa abantu ukuze ngibaphe amanzi.”
U-Israyeli wayesehlabelela leli culo elithi: “Mpompoza, mthombo! Hlabelelani ngawo!
Ngumthombo owambiwa ngamakhosana, wambiwa ngabaholi ngezintonga zazo zobukhosi nangezindondolo zabo.” Basuka ehlane, baya eMathana.
Basuka eMathana, baya eNahaliyeli; basuka eNahaliyeli, baya eBhamothi.
Basuka eBhamothi, baya esifundeni sakwaMowabi nasesiqongweni iPhisiga, elibheke ezansi ngasehlane.
U-Israyeli wathuma izithunywa kuSihoni, inkosi yama-Amori, wathi:
“Ake usivumele sidabule ezweni lakho; asiyukuchezukela emasimini noma ezivinini, futhi asiyukuphuza manzi emithonjeni yakho. Siyakuhamba ngomgwaqo wenkosi, size siphume emngceleni wezwe lakho.”
USihoni akamvumelanga u-Israyeli ukuba adabule ezweni lakhe. USihoni waqoqa bonke abantu esifundeni sakhe, waphuma wayohlasela u-Israyeli ehlane. Wafika eJahazi, walwa no-Israyeli.
Abakwa-Israyeli bamnqoba ngenkemba, badla izwe lakhe kusukela e-Arinoni kuze kufike eJabhoki, baye bangquleka kwa-Amoni, ngoba umngcele wabakwa-Amoni uqinile.
U-Israyeli wayidla yonke leyo mizi; wahlala emizini yonke yama-Amori eHeshibhoni nasemizini yonke yalo.
IHeshibhoni kwakungumuzi kaSihoni inkosi yama-Amori owayewuthathe enkosini endala yakwaMowabi, wadla lonke izwe lakhe kwaze kwayofika e-Arinoni.
Kungakho abakhuluma ngezaga bethi: “Wozani eHeshibhoni lakhiwe kabusha; umuzi kaSihoni mawuvuselelwe,
ngokuba kwaqubuka umlilo eHeshibhoni, kwalavuka amalangabi emzini kaSihoni, alishaya aliqothula i-Ari lakwaMowabi, nezakhamuzi zasezindaweni eziphakeme e-Arinoni.
Maye kuwe, Mowabi! Nibhubhile nina bantu bakaKhemoshi. Wenze amadodana akhe aba ngabakhoseli, amadodakazi akhe aba ngabathunjwa benkosi yama-Amori, uSihoni.
“Sibacibe ngemicibisholo; iHeshibhoni siyibhubhisile saze sayofinyelela eDibhoni. Sibabhubhise saze sayofika eNofa elendlalekele eMedeba.”
Wahlala kanjalo-ke u-Israyeli ezweni lama-Amori.
UMose wathumela izinhloli ukuhlola iJazeri, balidla, bathatha imizi yalo, bawaxosha ama-Amori ayelapho.
Baphenduka, balibhekisa ngaseBhashani. U-Ogi inkosi yaseBhashani waphuma, wabahlasela yena nabo bonke abantu bakhe, balwa nabo empini yase-Edireyi.
USimakade wathi kuMose: “Ungamesabi, ngokuba ngimnikele esandleni sakho nabantu bakhe bonke nezwe lakhe. Uyokwenza kuye njengalokhu wenza kuSihoni, inkosi yama-Amori, owayehlala eHeshibhoni.”
Bambulala yena namadodana akhe, nabo bonke abantu bakhe, kwangasala muntu; balidla izwe lakhe.
Abakwa-Israyeli bahamba, bakanisa emathafeni akwaMowabi, phesheya kweJordani maqondana neJerikho.
UBhalaki, indodana kaZiphori, wakubona konke u-Israyeli ayekwenze kuma-Amori.
AbakwaMowabi babesaba kakhulu abakwa-Israyeli, ngokuba babebaningi. UMowabi wangqangqazela luvalo ngenxa yabakwa-Israyeli.
UMowabi wathi ezingwevini zakwaMidiyani: “Manje lolu quqaba luzoqothula konke esinakho nxazonke, njengenkabi iqothula utshani edlelweni.” UBhalaki, indodana kaZiphori, wayeyinkosi yakwaMowabi ngaleso sikhathi.
Wathumela izithunywa kuBhileyamu, indodana kaBheyori, owayesePhethori ngasemfuleni ezweni labantwana babantu bakhe, ukuyombiza zithi kuye: “Bheka, kunoquqaba lwabantu, abaphuma eGibhithe asebegcwele yonke indawo, futhi sebehleli eduze kwami.
Ngakho-ke woza uzongiqalekisela bona, ngokuba banamandla kakhulu kunami, mhlawumbe ngiyokwazi ukubanqoba, ngibaxoshe ezweni. Ngokuba ngiyazi ukuthi ombusisayo ubusisiwe, nomqalekisayo uqalekisiwe.”
Amalunga akwaMowabi nawakwaMidiyani ahamba ephethe ugxa, aya kuBhileyamu, afike akhuluma kuye amazwi kaBhalaki.
UBhileyamu wathi kuwo: “Lalani lapha ngalobu busuku banamuhla, ngizoninika izwi njengalokho azakukusho kimi uSimakade.” Alala lapho amalunga akwaMowabi.
UNkulunkulu wafika kuBhileyamu wathi: “Ngobani lawa madoda anawe na?”
UBhileyamu wathi kuNkulunkulu: “Inkosi uBhalaki, indodana kaZiphori wakwaMowabi, ungithumelele lo myalezo, wathi:
‘Kunoquqaba lwabantu abaphuma eGibhithe asebegcwele ezweni lonke. Manje woza uzongiqalekisela bona, mhlawumbe ngingakwazi ukulwa nabo ngibaxoshe.’ ”
UNkulunkulu wathi kuBhileyamu: “Awunakuhamba, awunakubaqalekisa labo bantu, ngoba babusisiwe.”
Ngakho-ke uBhileyamu wavuka ekuseni, wathi ezikhulwini zikaBhalaki: “Phindelani ezweni lakini, ngokuba uSimakade ungenqabele ukuba ngihambe nani.”
Izikhulu zakwaMowabi zasuka, zaphindela kuBhalaki, zafike zathi: “UBhileyamu wenqabile ukukhuphuka nathi.”
UBhalaki wabuye wathumela ezinye izikhulu eziningi, neziqavile kunalezo ayezithumele kuqala.
Zafika kuBhileyamu, zathi kuye: “Usho kanje uBhalaki, indodana kaZiphori, uthi: ‘Ungavumeli lutho lukuvimbe ukuba uze kimi,
ngoba ngizokuhlonipha kakhulu, ngiyokwenzela noma yini oyifunayo. Ngiyakuncenga, woza uzongiqalekisela laba bantu.’ ”
UBhileyamu waziphendula izinceku zikaBhalaki, wathi: “Noma ngabe uBhalaki ubenganginika isigodlo sakhe sigcwele phama isiliva negolide, ngingeleqe izwi likaSimakade, uNkulunkulu wami, ngenze into noma ngabe inkulu noma incane kangakanani.
Kodwa nani ake nilale ubusuku banamuhla, yikhona ngizokuzwa ukuthi yini enye azongitshela yona uSimakade.”
Ngalobo busuku uNkulunkulu wafika kuBhileyamu, wathi: “Uma lawa madoda efikele ukuzokubiza, vuka uhambe nawo, kodwa uyokwenza kuphela lokho engizokutshela khona.”
UBhileyamu wavuka ekuseni, wabophela imbongolo yakhe, wahamba nezikhulu zakwaMowabi.
Kodwa intukuthelo kaNkulunkulu yamvuthela ngokuba wahamba nabo, ingelosi kaSimakade yema endleleni yamelana naye. UBhileyamu wayegibele embongolweni yakhe, ekhashwa yizinceku zakhe ezimbili.
Imbongolo yayibona ingelosi kaSimakade imi endleleni, ikhokhe inkemba yayo eyayiyiphethe ngesandla, yaphambuka endleleni, yayohamba ensimini. UBhileyamu wayishaya imbongolo ukuze ibuyele endleleni.
Ingelosi kaSimakade yama endleleni eyayingumngcingo phakathi kwezindonga zesivini nxazombili.
Imbongolo yaphinde yayibona ingelosi kaSimakade, yagudla yencika ngasodongeni, kwalimala unyawo lukaBhileyamu. Waphinde wayishaya.
Ingelosi kaSimakade yaqhubekela phambili yema endaweni eminyeneyo, okungekho ndlela yokuphendukela kwesokudla noma kwesokunxele.
Lapho imbongolo iyibona ingelosi kaSimakade, yalala phansi kwacindezeleka uBhileyamu egibele kuyo, wathukuthela kakhulu, wayibhonya ngenduku yakhe imbongolo.
USimakade wayivula umlomo imbongolo, yathi kuBhileyamu: “Ngenzeni kuwe ungaze ungishaye amahlandla amathathu, na?”
UBhileyamu wathi embongolweni: “Yingoba ungenza isilima! Ukuba benginenkemba esandleni, ngabe sengikubulele.”
Imbongolo yathi kuBhileyamu: “Angisiyona yini imbongolo yakho ohlale uyigibela, nanamuhla osayigibele na? Ngivamile yini ukukwenza lokhu kuwe na?” UBhileyamu wathi: “Qha.”
USimakade wavula amehlo kaBhileyamu, wayibona ingelosi kaSimakade imi endleleni, ikhokhe inkemba esandleni sayo. Wakhothama wathi mbo ngobuso.
Ingelosi kaSimakade yathi kuye: “Uyishayeleni imbongolo yakho kuze kube ngamahlandla amathathu na? Ngize ukuzomelana nawe ngoba le ndlela yakho oyithathile imbi, iyingozi.
Imbongolo ingibonile yachezuka phambi kwami kwaze kwaba kathathu. Ukuba ayizange ichezuke, ngabe sengikubulele, ngayisindisa yona.”
UBhileyamu wathi engelosini kaSimakade: “Ngonile ngokuba bengingazi ukuthi umi endleleni, umelene nami; uma kukubi ukuba ngiqhubekele phambili, ngizophindela emuva.”
Ingelosi kaSimakade yathi kuBhileyamu: “Hamba nalawa madoda, kodwa uyokhuluma kuphela lokho engizokutshela khona.” UBhileyamu wayesehamba namalunga kaBhalaki.
UBhalaki wezwa ukuthi uBhileyamu ufikile, waphuma wayomhlangabeza emzini wakwaMowabi emngceleni wase-Arinoni elingasekupheleni kwesifunda.
UBhalaki wathi kuBhileyamu: “Angithumelanga yini kuwe ngikubiza ukuba uphuthume na? Awufikanga ngani kimi na? Ubucabanga ukuthi ngeke yini ngikuhloniphe na?”
UBhileyamu wathi kuBhalaki: “Bheka, sengifikile kuwe manje, nokho anginamandla okusho utho kuwe. Ngiyokhuluma kuphela izwi uNkulunkulu alibeka emlonyeni wami.”
UBhileyamu wahamba noBhalaki, bafika eKiriyathi Huzothi.
UBhalaki wenza umhlatshelo ngezinkomo nezimvu, wayesekuthumela kuBhileyamu nezikhulu ayenazo.
Kwathi ekuseni uBhalaki wathatha uBhileyamu, benyukela eBhamothi Bhali, elapho wabona ingxenye yabantu bakwa-Israyeli.
UBhileyamu wathi kuBhalaki: “Ngakhele lapha ama-althare ayisikhombisa, bese ungilungisela izinkunzi eziyisikhombisa nezinqama eziyisikhombisa.”
UBhalaki wenza njengalokhu uBhileyamu eshilo. UBhalaki noBhileyamu banikela ngenkunzi nangenqama e-althare ngalinye.
UBhileyamu wathi kuBhalaki: “Yima maqondana nomnikelo wakho wokushiswa, mina ngizohamba, mhlawumbe uSimakade uyohlangana nami, angikhombise izwi nanoma yikuphi engifanele ukuba ngikusho kuwe.” Wayesenyukela egqumeni eliyiqwaqwasi.
UNkulunkulu wahlangana noBhileyamu, uBhileyamu wathi kuye: “Sengiwalungisile ama-althare ayisikhombisa, nganikela ngenkunzi nenqama phezu kwalelo nalelo althare.”
USimakade wamnika uBhileyamu okwakufanele akusho kuBhalaki, wathi: “Buyela kuBhalaki ukhulume uthi.”
Waphindela kuBhalaki, wamfica emile eceleni komnikelo wakhe wokushiswa, yena nazo zonke izikhulu zakwaMowabi.
UBhileyamu wayesewethula umbiko wakhe, wathi: “UBhalaki ungisuse e-Aramu wangiletha lapha, inkosi yakwaMowabi ngasezintabeni empumalanga. Yathi: ‘Woza, ungiqalekisele uJakobe; woza uzojivaza u-Israyeli.’
Ngingamqalekisa kanjani lowo uNkulunkulu angamqalekisanga na? Ngingamjivaza kanjani lowo uSimakade angamjivazanga na?
Ngiyambona ngiseziqongweni zamadwala, ngisemagqumeni, ngiyambona. Bheka, ngibona abantu abahlala bodwa abazibona beyisizwe esehlukile kwezinye izizwe.
Ngubani ongabala uthuli lukaJakobe, abale okwesine kuka-Israyeli na? Mangife ukufa kwabaqotho, isiphetho sami masifane nesakhe.”
UBhalaki wathi kuBhileyamu: “Wenzani kimi na? Ngikulethe lapha ukuba uqalekise izitha zami, kunalokho, bheka uzibusisile.”
UBhileyamu waphendula, wathi: “Akufanele yini ngiqikelele ukuba ngikutshele lokho uSimakade athe angikusho na?”
UBhalaki wathi kuye: “Woza sihambe, siye kwenye indawo lapho uzobabona khona; uzobona ingxenye yabo kuphela, hhayi bonke. Uma usulapho ungiqalekisele bona.”
Wamsusa lapho waya naye ensimini eZofimu, esiqongweni sentaba iPhisiga. Wakha ama-althare ayisikhombisa, kwathi kulelo nalelo althare wenza umnikelo ngenkunzi nenqama.
UBhileyamu wathi: “Mana lapha maqondana nomnikelo wakho wokushiswa; mina ngizoyohlangana noNkulunkulu.”
USimakade wahlangana noBhileyamu, wabeka izwi emlonyeni wakhe, wathi: “Buyela kuBhalaki ukhulume naye.”
Wabuyela kuye wamfica emi eceleni komnikelo wakhe wokushiswa ekanye nezikhulu zakwaMowabi. UBhalaki wathi kuye: “Utheni uSimakade na?”
UBhileyamu wayesewethula umbiko wakhe, wathi: “Sukuma Bhalaki, ubeke indlebe; ungilalele, wena ndodana kaZiphori.
UNkulunkulu akasiye umuntu, ukuba angaqamba amanga, futhi akasiyo indodana yomuntu ukuthi angaguquka kwakushilo. Ushilo, kanakukwenza akushilo na? Ukhulumile, kanakukufeza akushilo na?
Bheka, unginike umyalo wokuba ngibusise; Yena ubusisile, mina angikwazi ukukuguqula lokho.
Akayibonanga inhlekelele engehlela uJakobe, akabonanga nankathazo kwa-Israyeli. USimakade uNkulunkulu wabo unabo, inhlokomo yenkosi yabo iphakathi kwabo.
UNkulunkulu owabakhipha eGibhithe; unjengezimpondo zenyathi kubo.
Akukho mlingo ongamelana noJakobe, nakubhula okungamelana no-Israyeli. Manje sekuzothiwa ngoJakobe nango-Israyeli: ‘Bukani okwenziwe nguNkulunkulu!’
Laba bantu banjengengonyama; baziphakamisisa okwengonyama engaphumuli ingakayisobozeli inyamazane, iphuze igazi layo.”
UBhalaki wathi kuBhileyamu: “Ungalokothi ubaqalekise abakwa-Israyeli, futhi ungalokothi ubabusise!”
UBhileyamu waphendula, wathi kuBhalaki: “Angikutshelanga yini ukuthi konke akushoyo uSimakade ngizokwenza na?”
UBhalaki wathi kuBhileyamu: “Ngiyakuncenga woza, siye kwenye indawo, mhlawumbe uNkulunkulu uyakuthokoza ngayo bese ungiqalekisela bona lapho.”
UBhalaki wamthatha uBhileyamu wamyisa esiqongweni iPheyori elibheke ngezansi ngasehlane.
UBhileyamu wathi kuBhalaki: “Ngakhele ama-althare ayisikhombisa lapha, bese ungilungisela izinkunzi eziyisikhombisa nezinqama eziyisikhombisa.”
UBhalaki wenza njengokusho kukaBhileyamu, wanikela ngenkunzi nenqama kulelo nalelo althare.
Kuthe lapho uBhileyamu ebona ukuthi kuyamthokozisa uSimakade ukubusisa u-Israyeli, wangabe esahamba njengasemihleni ukuyofuna imilingo, kodwa waphendukela ngasogwadule.
UBhileyamu waphakamisa amehlo akhe wabona ukuthi u-Israyeli ukanise ngokwezizwe zakhe, uMoya kaNkulunkulu wehlela phezu kwakhe.
Wayesedlulisa umbiko, wathi: “Umbiko kaBhileyamu indodana kaBheyori, ukukhuluma kwalowo muntu oliso lakhe livulekile,
ukuphimisela kozwileyo amazwi kaNkulunkulu, obonile umbono kaSomandla owele phansi, kodwa amehlo akhe engamboziwe, uthi:
“Mahle kangakanani amathende akho Jakobe, namadlangala akho, Israyeli!
Endlalekise okwemfunda, nanjengezivande eziseceleni komfula, njengenhlaba etshalwe nguSimakade, nanjengemisedari ngaseceleni kwamanzi.
Amanzi ayakugobhoza, aphume ezimbizeni zakhe, imbewu yakhe ibe semanzini amaningi, inkosi yakhe ibe nkulu kuno-Agagi, umbuso wakhe uphakame.
“UNkulunkulu owabakhipha eGibhithe; unjengezimpondo zenyathi kubo; uyoqothula izizwe, izitha zakhe, ephule amathambo azo, azigwaze ngemicibisholo yakhe.
Wacutha njengengonyama, walala phansi njengengonyamakazi, ngubani oyakumvusa na? “Mababusiswe bonke abakubusisayo, baqalekiswe bonke abakuqalekisayo.”
UBhalaki wamthukuthelela kakhulu uBhileyamu, wahlanganisa izandla zakhe; wathi kuBhileyamu: “Ngikubize ukuba uzoqalekisa izitha zami, kunalokho, bheka uzibusisile kwaze kwakathathu.
Suka uphele lapha uphindele kini; ngathi ngizakukuhlonipha kakhulu, kodwa uSimakade wenqabile ukuba ngikuhloniphe.”
UBhileyamu wathi kuBhalaki: “Angizitshelanga yini izithunywa zakho owawuzithume kimi, ngathi:
‘Noma ngabe uBhalaki ubenganginika isigodlo sakhe sigcwele phama isiliva negolide, anginakuleqa izwi likaSimakade ngenze noma yini, okuhle noma okubi, ngizosho kuphela lokho uSimakade azongitshela ukuthi ngikusho na?’
Bheka, manje sengiphindela kwabakithi, kodwa-ke woza ngikweluleke ukuthi laba bantu bazokwenzani kubantu bakho ezinsukwini ezizayo.”
UBhileyamu wayesethatha ethi: “Umbiko kaBhileyamu indodana kaBheyori, umbiko womuntu oso lakhe livuliwe,
ozwileyo amazwi kaNkulunkulu, nowazi ukwazi koPhezukonke, obone umbono ovela kuSomandla, ewele phansi kodwa amehlo akhe engemboziwe, uthi:
“Ngiyambona, kodwa hhayi manje; ngiyambheka, kodwa akekho eduze. Kuyovela inkanyezi kuJakobe; intonga yobukhosi iyovuka kwa-Israyeli, iphohloze uMowabi nxazonke, ichithe amadodana kaSethi;
U-Edomi uyakuba yisabelo sakhe neSeyire izitha zakhe zibe yifa lakhe. U-Israyeli uyakudlondlobala ngamandla.
Kuyakuvela umbusi kuJakobe oyocoboshisa insali emzini.”
UBhileyamu wabona u-Amaleki, wayesewethula umbiko wakhe, wathi: “U-Amaleki wayengowokuqala ezizweni, kodwa isiphetho sakhe ngukubhujiswa.”
Wabona amaKheni wedlulisa umbiko wakhe, wathi: “Indawo ohlala kuyo ivikelekile, isidleke sakho sakhelwe edwaleni,
kodwa uKhayini uzochithwa; kuze kube yileso sikhathi u-Ashuri azonithumba ngaso.”
UBhileyamu wethula umbiko wakhe, wathi: “Maye, ngubani oyakuphila lapho uNkulunkulu enza lokhu na?
Kuyakuvela imikhumbi eKhithimi eyakuhlupha u-Ashuri no-Ebhere, nabo bagcine ngokubhujiswa.”
UBhileyamu wasuka, wahamba, waphindela kwakhe, noBhalaki wabona eze ngayo.
U-Israyeli wahlala eShithimi; abantu base beqala ukuphinga namadodakazi akwaMowabi.
Abamemela emadilini emihlatshelo yonkulunkulu bawo. Abakwa-Israyeli bafike badla, bakhothamela onkulunkulu bawo.
U-Israyeli wazihlanganisa noBhali Pheyori. Intukuthelo kaSimakade yamvuthela u-Israyeli.
USimakade wathi kuMose: “Thatha bonke abaholi babantu, ubabulalele uSimakade lingakashoni ilanga, ukuze intukuthelo kaSimakade evuthayo isuke ku-Israyeli.”
UMose wathi kubehluleli bakwa-Israyeli: “Yilowo nalowo makabulale abantu bakhe abazihlanganise noBhali Pheyori.”
Bheka, umuntu mumbe kwabakwa-Israyeli waletha owesifazane wakwaMidiyani emndenini wakhe, phambi kukaMose nebandla lonke labakwa-Israyeli, ngesikhathi bekhala emnyango wethende lokuhlangana.
UFinehasi, indodana ka-Eleyazare ka-Aroni umphristi, wakubona lokho, wasukuma phakathi kwenhlangano, wadumela umkhonto wakhe.
Wayesemlandela lowo muntu wakwa-Israyeli, wangena ethendeni lakhe, wababhokoda bobabili ngomkhonto esiswini, lwase lunqamuka ubhubhane kwabakwa-Israyeli.
Kepha lwase lwedlule nabantu abayizi-24 000.
USimakade wakhuluma kuMose, wathi:
“UFinehasi ka-Eleyazare ka-Aroni umphristi ukhalime intukuthelo yami kwabakwa-Israyeli, ngokuba utshengise intshisekelo ngami phakathi kwabo, ukuze ngingabaqothuli ngesikhwele sami.
Ngakho-ke batshele, uthi: ‘Bheka, ngizomnika isivumelwano sami sokuthula.
Siyakuba ngesakhe nezizukulwane zakhe, kube yisivumelwano sobuphristi obuphakade, ngokuba ube nentshisekelo ngoNkulunkulu wakhe, wenzela abakwa-Israyeli ukubuyisana.’ ”
Igama lendoda yakwa-Israyeli eyabulawa nowesifazane wakwaMidiyani, kwakunguZimri kaSalu, isikhulu sendlu yabakwaSimeyoni.
Igama lowesifazane wakwaMidiyani owabulawa kwakunguKhozibhi, indodakazi kaZuri owayengumholi wezizwana zabendlu yakwaMidiyani.
USimakade wakhuluma kuMose, wathi:
“Bahluphe abakwaMidiyani, bese ubabulala,
ngokuba benze ubuqili, banikhohlisa ngodaba lukaPheyori nangendaba kaKhozibhi, indodakazi yomholi wakwaMidiyani, udadewabo owabulawa ngosuku lobhubhane ngenxa kaPheyori.”
USimakade wakhuluma kuMose no-Eleyazare, indodana ka-Aroni umphristi, wathi:
“Balani inani layo yonke inhlangano yabantu bakwa-Israyeli, kusukela kwabaneminyaka engama-20 kuya phezulu, ngokwezindlu zokhokho babo, bonke abakwa-Israyeli abangaphuma baye empini.”
UMose no-Eleyazare, umphristi, bakhuluma nabakwa-Israyeli emathafeni kwaMowabi ngaseJordani, phesheya kweJerikho, bathi:
“Balani bonke abaneminyaka engama-20 kuya phezulu, abaphuma eGibhithe njengalokhu uSimakade ayemyalile uMose nabantu bakwa-Israyeli.” Nampa-ke abakwa-Israyeli abaphuma eGibhithe:
URubeni, izibulo lika-Israyeli: abozalo lukaRubeni: kuHanokhi: ngumndeni wabakwaHanokhi; kuPhalu: ngumndeni wabakwaPhalu;
kuHezironi: ngumndeni wabakwaHezironi; kuKharimi: ngumndeni wabakwaKharimi.
Yileyo imindeni yakwaRubeni; ababalwayo kuyo babeyizi-43 733.
Indodana kaPhalu: ngu-Eliyabe.
Amadodana ka-Eliyabe: nguNemuweli, uDathani no-Abhiramu. ODathani no-Abhiramu babekhethwe phakathi kwenhlangano, bamelana noMose no-Aroni beseviyweni likaKhora, lapho bavukela khona uSimakade.
Umhlaba wavula umlomo wawo, wabagwinya noKhora ekufeni kwalelo viyo, lapho umlilo wasobozela khona amadoda angama-250, aba yisixwayiso.
Kodwa amadodana kaKhora awafanga.
Abozalo lukaSimeyoni ngemindeni yabo yilaba: kuNemuweli: ngumndeni wabakwaNemuweli; kuJamini: ngumndeni wabakwaJamini; kuJakhini: ngumndeni wabakwaJakhini;
kuZera: ngumndeni wabakwaZera; kuShawule: ngumndeni wabakwaShawule.
Yileyo-ke imindeni kaSimeyoni, ababalwayo babeyizi-22 200.
Abozalo lukaGadi ngemindeni yabo yilaba: kuZefoni: ngumndeni wabakwaZefoni; kuHagi: ngumndeni wabakwaHagi; kuShuni: ngumndeni wabakwaShuni;
ku-Ozini: ngumndeni wabakwa-Ozini; ku-Eri: ngumndeni wabakwa-Eri;
ku-Arodi: ngumndeni wabakwa-Arodi; ku-Areli: ngumndeni wabakwa-Areli.
Yileyo-ke imindeni yabozalo lukaGadi, ababalwayo babeyizi-40 500.
Amadodana kaJuda: u-Eri no-Onani. U-Eri no-Onani bafela eKhanani.
Abozalo lukaJuda ngemindeni yabo yilaba: kuShela: ngumndeni wabakwaShela; kuPherezi: ngumndeni wabakwaPherezi; kuZera: ngumndeni wabakwaZera.
Abozalo lukaPherezi yilaba: kuHezironi: ngumndeni wabakwaHezironi; kuHamule: ngumndeni wabakwaHamule.
Yileyo-ke imindeni kaJuda, ababalwayo babeyizi-76 500.
Abozalo luka-Isakhare ngemindeni yabo yilaba: kuThola: ngumndeni wabakwaThola; kuPhuva ngumndeni wabakwaPhuva;
kuJashubi: ngumndeni wabakwaJashubi; kuShimroni: ngumndeni wabakwaShimroni.
Yileyo-ke imindeni ka-Isakhare, ababalwayo babeyizi-64 300.
Abozalo lukaZebuloni ngemindeni yabo yilaba: kuSeredi: ngumndeni wabakwaSeredi; ku-Eloni: ngumndeni wabakwa-Eloni; kuJaleli: ngumndeni wabakwaJaleli.
Yileyo-ke imindeni kaZebuloni, ababalwayo babeyizi-60 500.
Amadodana kaJosefa ngemindeni yawo yilawa: uManase no-Efrayimi.
Abozalo lukaManase: kuMakhiri: ngumndeni wabakwaMakhiri; uMakhiri wazala uGileyadi; kuGileyadi: ngumndeni wabakwaGileyadi.
Abozalo lukaGileyadi yilaba: ku-Iyezeri: ngumndeni wabakwa-Iyezeri; kuHeleki: ngumndeni wabakwaHeleki;
ku-Asiriyeli: ngumndeni wabakwa-Asiriyeli; kuShekhemi: ngumndeni wabakwaShekhemi;
kuShemida: ngumndeni wabakwaShemida; kuHeferi: ngumndeni wabakwaHeferi.
UZelofehadi, indodana kaHeferi, wayengenamadodana enamadodakazi wodwa. Amagama amadodakazi kaZelofehadi yilawa: kwakunguMahela, uNowa, uHogila, uMilikha noThiriza.
Yileyo-ke imindeni kaManase, ababalwayo babeyizi-52 700.
Abozalo luka-Efrayimi ngemindeni yabo yilaba: kuShuthela: ngumndeni wabakwaShuthela; kuBhekheri: ngumndeni wabakwaBhekheri; kuThahani: ngumndeni wabakwaThahani.
Abozalo lukaShuthela yilaba: ku-Eranu: ngumndeni wabakwa-Eranu.
Yileyo-ke imindeni yabozalo luka-Efrayimi, ababalwayo babeyizi-32 500. Lebo kwakungabozalo lukaJosefa ngemindeni yabo.
Abozalo lukaBhenjamini ngemindeni yabo yilaba: kuBhela: ngumndeni wabakwaBhela; ku-Ashibheli: ngumndeni wabakwa-Ashibheli; ku-Ahiramu: ngumndeni wabakwa-Ahiramu;
kuShefufamu: ngumndeni wabakwaShefufamu: kuHufamu: ngumndeni wabakwaHufamu.
Abozalo lukaBhela kwakungama-Arida namaNahamani; ku-Arida: ngumndeni wabakwa-Arida; kuNahamani: ngumndeni wabakwaNahamani.
Yilabo-ke abozalo lukaBhenjamini ngemindeni yabo; ababalwayo babeyizi-45 600.
Abozalo lukaDani ngemindeni yabo yilaba: kuShuhamu: ngumndeni wabakwaShuhamu. Yileyo-ke imindeni kaDani.
Bonke ababeyimindeni yabakwaShuhamu ababalwayo babeyizi-64 400.
Abozalo luka-Asheri ngemindeni yabo yilaba: ku-Imna: ngumndeni wabakwa-Imna; ku-Ishivi: ngumndeni wabakwa-Ishivi; kuBheriya: ngumndeni wabakwaBheriya.
Abozalo lukaBheriya yilaba: kuHebhere: ngumndeni wabakwaHebhere: kuMalikhiyeli: ngumndeni wabakwaMalikhiyeli.
Igama lendodakazi ka-Asheri nguSera.
Yileyo-ke imindeni yabozalo luka-Asheri, ababalwayo babeyizi-53 400.
Abozalo lukaNafethali ngemindeni yabo yilaba: kuJazeli: ngumndeni wabakwaJazeli; kuGuni: ngumndeni wabakwaGuni;
kuJezeri: ngumndeni wabakwaJezeri: kuShilemi: ngumndeni wabakwaShilemi.
Yileyo-ke imindeni kaNafethali, ababalwayo babeyizi-45 400.
Sebebonke abantu bakwa-Israyeli ababalwayo babeyizi-601 730.
USimakade wathi kuMose:
“Laba bayokwabelwa izwe libe yifa labo ngokwenani lamagama abo.
Abaningi uyakubabela ifa elikhulu, abayingcosana ubabele ifa elincane, yilowo nalowo abelwe ifa ngokwesibalo sabantu anabo.
Izwe liyokwabiwa ngonkatho. Yileso naleso sizwana sabelwe ngokwamagama okhokho baso.
Izwe liyakwabelwa abaningi nabayingcosana ngonkatho.”
Nampa ababalwayo kubaLevi ngemindeni yabo: kuGereshoni: ngumndeni wabakwaGereshoni; kuKhohathi: ngumndeni wabakwaKhohathi; kuMerari: ngumndeni wabakwaMerari.
Nansi imindeni yabaLevi: umndeni wabakwaLibhini, umndeni wabakwaHebhroni, umndeni wabakwaMaheli, umndeni wabakwaMushi, nomndeni wabakwaKhora. UKhohathi wazala u-Amramu.
Igama lomka-Amramu nguJokhebhedi, indodakazi kaLevi ayizalela eGibhithe; wazalela u-Amramu u-Aroni, uMose noMiriyamu udadewabo.
U-Aroni wazala uNadabhi, u-Abhihu, u-Eleyazare, no-Ithamari.
UNadabhi no-Abhihu bafela lapho ngesikhathi benikela ngomlilo ongafanele phambi kukaSimakade.
Sebebonke abaLevi besilisa kusukela konenyanga eyodwa ubudala kuya phezulu babeyizi-23 000. Bona ababalwanga nabesilisa bakwa-Israyeli, ngoba babengezukuthola sabelo esizoba yifa labo ezweni. Ababelwanga ifa kwabakwa-Israyeli.
Yilabo-ke abaLevi ababalwa nguMose no-Eleyazare, umphristi, ngesikhathi kubalwa abakwa-Israyeli emathafeni kwaMowabi ngaseJordani, phesheya kweJerikho.
Akukho namunye owasalayo phakathi kwalabo ababebalwe nguMose no-Aroni, umphristi, okuyibona ababala abakwa-Israyeli ehlane iSinayi,
ngoba uSimakade wayekhulumile ngabo, wathi: “Impela bayofela ehlane.” Akusalanga muntu kubo ngaphandle kukaKhalebhu, indodana kaJefune, noJoshuwa, indodana kaNuni.
Kwase kusondela amadodakazi kaZelofehadi kaHeferi kaGileyadi kaMakhiri emndenini kaManase, indodana kaJosefa. Nanka amagama amadodakazi akhe: kwakunguMahela, uNowa, uHogila, uMilikha noThiriza.
Ama ngasemnyango wethende lokuhlangana phambi koMose, u-Eleyazare umphristi, abaholi, nayo yonke inhlangano, athi:
“Ubaba wafela ehlane, wayengekho phakathi kweviyo labavukela uSimakade, iviyo likaKhora. Kepha wafela esakhe isono engenandodana.
Kungani igama likababa likhishiwe emndenini wakhe, yingoba engenandodana na? Sabeleni nathi ifa phakathi kwabafowabo bakababa.”
UMose walwethula udaba lwawo kuSimakade.
USimakade wakhuluma kuMose, wathi:
“Amadodakazi kaZelofehadi akhulume kahle. Uyakuwabela nokuwabela izwe eliyifa lawo kubafowabo bakayise, uledlulisele kuwo.
“Abantu bakwa-Israyeli uyobatshela, uthi: ‘Uma umuntu efa engenandodana, ifa lakhe liyodluliselwa endodakazini yakhe.
Uma engenandodakazi, niyakulabela abafowabo.
Uma engenabafowabo, niyakulabela abafowabo bakayise.
Uma uyise engenabafowabo, niyakulabela isihlobo sakhe esisondelene naye emndenini, silidle. Lokhu kuyakuba yisimiso sobulungiswa kwabakwa-Israyeli, njengalokhu uSimakade ayemyalile uMose.’ ”
USimakade wathi kuMose: “Khuphukela entabeni i-Abharimi, ubone izwe engilabele abantu bakwa-Israyeli.
Uma usulibonile, nawe uyakuyiswa koyihlomkhulu njengomfowenu u-Aroni.
Okwathi phela, lapho inhlangano ingihlubuka ehlane iSini imelana nami, nani nangangihlonipha, nangabukhombisa ubungcwele bami phambi kwayo ngasemanzini.” Lawo ngamanzi eMeribha eseKadeshi ehlane iSini.
UMose wayesethi kuSimakade:
“USimakade, uNkulunkulu wemimoya yonke, makamise umuntu phezu kwenhlangano,
ozophuma angene phambi kwayo, abakhiphe, abafake, ukuze inhlangano kaSimakade ingabi njengezimvu ezingenamelusi.”
USimakade wathi kuMose: “Thatha uJoshuwa, indodana kaNuni, umuntu onoMoya wami, ubeke isandla sakho phezu kwakhe,
ummise phambi kuka-Eleyazare, umphristi, naphambi kwenhlangano yonke, umgunyaze phambi kwayo ibuka.
Uyobeka udumo lwakho phezu kwakhe ukuze yonke inhlangano yabantu bakwa-Israyeli imhloniphe.
Uyakuma phambi kuka-Eleyazare, umphristi, oyombuzela ngokunquma kwe-Urimi phambi kukaSimakade; ngezwi lakhe bayakuphuma nangezwi lakhe bayakungena, yena nabo bonke abakwa-Israyeli, yebo, nayo yonke inhlangano.”
UMose wenza njengalokhu uSimakade ayemyalile; wamthatha uJoshuwa, wammisa phambi kuka-Eleyazare, umphristi, naphambi kwenhlangano yonke.
Wabeka izandla zakhe phezu kwakhe, wamgunyaza, njengalokhu uSimakade ayemyalile uMose.
USimakade wakhuluma kuMose, wathi:
“Yala abantu bakwa-Israyeli, uthi kubo: ‘Anoqikelela ukuba umnikelo wami, isinkwa sami seminikelo yami yomlilo yephunga elimnandi kimi, ninikele ngawo kimi ngesikhathi sawo.’
Uyothi kubo: ‘Nanku umnikelo womlilo eniyonikela ngawo kuSimakade: izimvu ezimbili ezingamaduna ezinonyaka ezingenasici, njalo ngosuku, zibe ngumnikelo oshiswa imihla yonke.
Enye imvu uyonikela ngayo ekuseni, enye kusihlwa.
Uyonikela nokweshumi kwe-efa lempuphu ecolisekileyo kube ngumnikelo wokusanhlamvu, oxovwe nokwesine kwehini lamafutha agxotshiweyo.
Kungumnikelo oshiswa imihla yonke, owamiswa entabeni iSinayi ukuze ube yiphunga elimnandi, umnikelo womlilo kuSimakade.
Umnikelo wawo wokuphuzwayo uyokuba ngokwesine kwehini ngemvu eyodwa. Umnikelo wesiphuzo esinamandla uyothululelwa uSimakade endaweni engcwele.
Enye imvu uyonikela ngayo kusihlwa. Uyonikela ngayo njengomnikelo wokusanhlamvu wasekuseni nomnikelo wawo wokuphuzwayo, umnikelo womlilo wephunga elimnandi kuSimakade.
“ ‘Ngosuku lweSabatha niyonikela ngezimvu ezimbili ezingamaduna ezinonyaka ezingenasici, nokweshumi okubili kwempuphu ecolisekileyo kube ngumnikelo wokusanhlamvu oxovwe namafutha nomnikelo wawo wokuphuzwayo.
Lo ngumnikelo oyoshiswa njalo ngeSabatha, wengeze phezu komnikelo wokushiswa wemihla ngemihla nowokuphuzwayo ohambisana nawo.
“ ‘Njalo ngosuku lokwethwasa kwenyanga, niyonikela kuSimakade ngomnikelo wokushiswa. Kuyoba ngamaduna amabili emhlanjini, inqama, amazinyane ayisikhombisa anonyaka, futhi angenasici.
Niyonikela ngokuthathu eshumini kwempuphu ecolisekileyo, ibe ngumnikelo wokusanhlamvu okuxovwe namafutha ngalelo nalelo duna. Niyonikela ngokweshumi okubili kwempuphu ecolisekileyo, kube ngumnikelo wokusanhlamvu oxovwe namafutha nenqama.
Niyonikela ngokweshumi kwempuphu ecolisekileyo exovwe namafutha, kuyoba ngumnikelo wokusanhlamvu ngaleyo naleyo mvu, umnikelo wokushiswa wephunga elimnandi, umnikelo womlilo kuSimakade.
Umnikelo wabo wokuphuzwayo uyokuba yingxenye yehini lewayini ngenkunzi, nokwesithathu kwehini ngenqama, nokwesine kwehini ngemvu; lokhu kungumnikelo wokushiswa wezinyanga zonke, kuzo zonke izinyanga zonyaka.
Nempongo iyoba ngumnikelo wesono kuSimakade; kuyonikelwa ngayo nomnikelo oshiswa imihla yonke nomnikelo wawo wokuphuzwayo.
“ ‘Ngenyanga yokuqala ngosuku lwe-14 lwayo, kuyakuba yiphasika likaSimakade.
Ngosuku lwe-15 lwaleyo nyanga, kuyakuba ngumkhosi, kudliwe isinkwa esingenamvubelo izinsuku eziyisikhombisa.
Ngosuku lokuqala kuyakuba ngumhlangano ongcwele; aniyukusebenza msebenzi.
Niyonikela kuSimakade ngomnikelo womlilo, umnikelo wokushiswa: amaduna amabili, inqama, izimvu ezingamaduna eziyisikhombisa ezinyaka munye, futhi ezingenasici.
Niyonikela ngomnikelo wazo wokusanhlamvu, impuphu ecolisekileyo exovwe namafutha, niyonikela ngokweshumi okuthathu ngenkunzi nangokweshumi okubili ngenqama.
Niyonikela ngokweshumi ngaleyo naleyo mvu yezimvana eziyisikhombisa,
nempongo ibe ngumnikelo wesono, ukunenzela ukubuyisana.
Niyonikela ngalokho nomnikelo oshiswa ekuseni, ongumnikelo oshiswa imihla yonke.
Niyonikela kanjalo imihla yonke kube izinsuku eziyisikhombisa; isinkwa somnikelo womlilo ube yiphunga elimnandi kuSimakade. Kuyonikelwa ngakho, nomnikelo oshiswa imihla yonke nomnikelo wawo wokuphuzwayo.
Ngosuku lwesikhombisa niyoba nomhlangano ongcwele; aniyukusebenza msebenzi.
“ ‘Ngosuku lolibo, lapho ninikela kuSimakade ngomnikelo omusha wokusanhlamvu emkhosini wenu wamaviki, niyoba nomhlangano ongcwele; aniyukusebenza msebenzi.
Niyonikela ngomnikelo wokushiswa, ube yiphunga elimnandi: amaduna amabili, inqama, izimvu ezingamaduna eziyisikhombisa ezinyaka munye.
Niyonikela ngomnikelo wazo wokusanhlamvu, impuphu exovwe namafutha, okuthathu eshumini ngaleyo naleyo nkunzi, nokweshumi okubili ngenqama,
nokweshumi ngaleyo naleyo mvu yezimvana eziyisikhombisa,
nempongo, ukunenzela ukubuyisana.
Niyonikela ngazo, ngaphandle komnikelo oshiswa imihla ngemihla nomnikelo wawo wokusanhlamvu, zibe ngezingenasici, neminikelo yazo yokuphuzwayo.
“ ‘Ngenyanga yesikhombisa ngosuku lokuqala lwayo, niyoba nomhlangano ongcwele, aniyukusebenza msebenzi; kuyokuba wusuku lwenu lokushaya amacilongo.
Niyonikela ngomnikelo wokushiswa, ube yiphunga elimnandi kuSimakade: iduna, inqama, izimvu ezingamaduna eziyisikhombisa ezinyaka munye ezingenasici,
nomnikelo wazo wokusanhlamvu, impuphu ecolisekileyo exovwe namafutha, okweshumi okuthathu ngenkunzi, okweshumi okubili ngenqama,
nokweshumi ngaleyo naleyo mvu yezimvana eziyisikhombisa.
Impongo ibe ngumnikelo wesono, ukunenzela ukubuyisana,
ngaphandle komnikelo wokushiswa wokwethwasa kwenyanga nomnikelo wawo wokusanhlamvu, nomnikelo oshiswa imihla yonke nomnikelo wawo wokusanhlamvu, neminikelo yayo yokuphuzwayo ngokwesimiso sayo, kube yiphunga elimnandi, umnikelo womlilo kuSimakade.
“ ‘Ngolweshumi lwenyanga yesikhombisa niyoba nomhlangano ongcwele, niyakuphumula; ningenzi msebenzi.
Niyonikela kuSimakade ngomnikelo wokushiswa ube yiphunga elimnandi: iduna, inqama, izimvu ezingamaduna eziyisikhombisa ezinonyaka ezingenasici,
nomnikelo wazo wokusanhlamvu, impuphu ecolisekileyo exovwe namafutha, okweshumi okuthathu ngenkunzi, nokweshumi okubili ngenqama,
nokweshumi ngaleyo naleyo mvu yezimvana eziyisikhombisa.
Impongo ibe ngumnikelo wesono, ngale komnikelo wesono wokubuyisana, nomnikelo oshiswa imihla yonke nomnikelo wawo wokusanhlamvu, neminikelo yayo yokuphuzwayo.
“ ‘Ngosuku lwe-15 lwenyanga yesikhombisa niyoba nomhlangano ongcwele; aniyukwenza msebenzi, niyogubhela uSimakade umkhosi izinsuku eziyisikhombisa.
Niyonikela ngomnikelo wokushiswa, umnikelo womlilo oyiphunga elimnandi kuSimakade: amaduna ali-13, izinqama ezimbili, izimvu ezingamaduna eli-14 ezinyaka munye ezingenasici,
nomnikelo wazo wokusanhlamvu, impuphu ecolisekileyo exovwe namafutha, okweshumi okuthathu ngaleyo naleyo nkunzi yezinkunzi ezili-13, nokweshumi okubili ngaleyo naleyo nqama yezinqama ezimbili,
nokweshumi ngaleyo naleyo mvu yezimvana ezili-14.
Impongo ibe ngumnikelo wesono, ngale komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Ngosuku lwesibili niyonikela ngalokhu: amaduna ali-12, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu neminikelo yayo yokuphuzwayo.
“ ‘Ngosuku lwesithathu niyonikela ngalokhu: izinkunzi ezili-11, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Ngosuku lwesine niyonikela ngalokhu: izinkunzi ezilishumi, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Ngosuku lwesihlanu niyonikela ngalokhu: izinkunzi eziyisishiyagalolunye, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Ngosuku lwesithupha niyonikela ngalokhu: izinkunzi eziyisishiyagalombili, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu neminikelo yawo yokuphuzwayo.
“ ‘Ngosuku lwesikhombisa niyonikela ngalokhu: izinkunzi eziyisikhombisa, izinqama ezimbili, izimvu ezingamaduna ezili-14 ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngezinkunzi nangezinqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Ngosuku lwesishiyagalombili niyoba nombuthano ozothileyo; aniyukwenza msebenzi,
kepha niyonikela kuSimakade ngomnikelo wokushiswa, umnikelo womlilo wephunga elimnandi: inkunzi, inqama, izimvu ezingamaduna eziyisikhombisa ezinyaka munye ezingenasici,
nomnikelo wazo wokusanhlamvu, neminikelo yazo yokuphuzwayo ngenkunzi nangenqama nangezimvu, njengokwenani lazo ngokwesimiso.
Impongo ibe ngumnikelo wesono, ngaphandle komnikelo oshiswa imihla yonke nomnikelo wawo wokusanhlamvu nomnikelo wawo wokuphuzwayo.
“ ‘Lokhu niyonikela ngakho kuSimakade ngemikhosi yenu emisiweyo, ngaphandle kwezithembiso zenu neminikelo yenu yesihle, kube yiminikelo yenu yokushiswa, neminikelo yenu yokusanhlamvu, neminikelo yenu yokuphuzwayo, neminikelo yenu yokuthula.’ ”
UMose wabatshela abantu bakwa-Israyeli konke lokho uSimakade ayemyale ngakho.
UMose wayesekhuluma nabaholi bezizwana zakwa-Israyeli, wathi: “Nakhu angiyale ngakho uSimakade:
‘Uma umuntu enza isifungo kuSimakade, noma enza isifungo ezibophezela ngaso, akayukulaphula izwi lakhe. Uyokwenza njengalokho akukhulume ngomlomo wakhe.
“ ‘Uma owesifazane enza isifungo kuSimakade, noma enze isifungo ezibophezela ngaso, esahlala ekhaya likayise, esemusha;
kuyothi uma uyise ezwa ngesifungo azibophezele ngaso, kodwa angasho lutho kuye ngaso, zonke izifungo zakhe ziyohlala zinjalo, zingaguquki, nanoma izithembiso azibophezele ngazo ziyohlala zinjalo, azinakuguquka.
Kodwa uma uyise emenqabela ngosuku ezwa ngalo, zonke izifungo nezithembiso zakhe azibophezele ngazo aziyukuma; uSimakade uyomthethelela, ngoba uyise emenqabele.
“ ‘Uma egana, emveni kokuba enze izifungo noma esheshe wakhuluma wazibophezela,
umyeni wakhe ezwe ngazo, kodwa angasho lutho kuye ngosuku ezwe ngalo, izifungo azibophezele ngazo ziyohlala zinjalo nezithembiso azibophezele ngazo ziyohlala zinjalo.
Kepha uma indoda yakhe imelana nakho ngosuku ekuzwa ngalo, uyakuzephula izifungo ayezibophezele ngazo, noma lokho asheshe wakukhuluma ngomlomo wakhe wazibophezela ngakho; uSimakade uyakumthethelela.
“ ‘Isithembiso somfelokazi noma esolahlwe yindoda, konke azibophezele ngakho, kuyohlala kunjalo kuye.
“ ‘Uma owesifazane enza isifungo esemzini wendoda ayiganile, noma ezibophezela ngaso,
bese indoda yakhe izwa ngalokho, qede ingasho lutho kuye, ingamenqabeli; zonke izifungo nezithembiso zakhe azibophezele ngazo ziyohlala zinjalo, aziyukuguquka.
Kodwa uma indoda yakhe kuthi ngosuku ezwa ngalo, ikwenze ize konke okwaphuma emlonyeni wakhe mayelana nezifungo zakhe nangesibopho sakhe, akuyukuhlala kunjalo, ngokuba indoda yakhe ikwenze ize; uSimakade uyomthethelela.
Zonke izifungo nazo zonke izithembiso azibophezele ngazo ukuzithobisa, indoda yakhe iyakuziqinisa, noma iziqede.
Kodwa uma indoda yakhe ithulile ayasho lutho kuye, kwadlula izinsuku ngezinsuku, iyaziqinisa zonke izifungo zakhe nazo zonke izibopho zakhe eziphezu kwakhe; iziqinisile, ngokuba ithulile ngosuku eyezwa ngalo.
Kepha uma izenze ize mhla izwa ngazo, iyolithwala icala lakhe.’ ”
Yilezo izimiso, uSimakade ayala ngazo uMose, eziyoba phakathi kwendoda nomkayo, uyise nendodakazi engaganile esahlala kubo.
USimakade wakhuluma kuMose, wathi:
“Phindiselela abantu bakwa-Israyeli kwabakwaMidiyani, ungakedluli emhlabeni.”
UMose wayesekhuluma nabantu, wathi: “Hlomisani amadoda phakathi kwenu ukuze ayohlasela abakwaMidiyani, aphindiselele uSimakade kwabakwaMidiyani.
Kuleso naleso sizwana sakwa-Israyeli kuphume inkulungwane, nibathumele empini.”
Ezinkulungwaneni zabakwa-Israyeli kwaqokwa inkulungwane kuleso naleso sizwana, amadoda ayehlomile; ayizi-12 000.
UMose wawathumela empini, inkulungwane ivela kuleso naleso sizwana kanye noFinehasi, indodana ka-Eleyazare, umphristi, ephethe ngesandla izitsha zendawo engcwele namacilongo okuhlaba umkhosi.
Balwa nabakwaMidiyani njengalokhu uSimakade ayemyalile uMose, babulala bonke abesilisa.
Babulala amakhosi amahlanu akwaMidiyani u-Evi, uRekhemi, uZuri, uHure, noRebha. UBhileyamu, indodana kaBheyori, naye bambulala ngenkemba.
Abakwa-Israyeli bathumba abesifazane bakwaMidiyani nezingane, bathatha yonke imfuyo yabo nawo wonke umcebo wabo, nempahla yabo, kwayimpango.
Yonke imizi yabo ezindaweni, lapho babehlala khona, nawo wonke amathende abo bakushisa ngomlilo.
Baphanga yonke impahla yabo, bathumba abantu nezilwane.
Abathunjwa nempahla ababeyidlile bakuletha kuMose no-Eleyazare, umphristi, nenhlangano yabakwa-Israyeli enkanjini emathafeni kwaMowabi angaseJordani, phesheya kweJerikho.
UMose no-Eleyazare, umphristi, nazo bonke abaholi benhlangano baphuma bayobahlangabeza ngaphandle kwenkambu.
UMose wazithukuthelela iziphathimandla zempi, izinduna zezinkulungwane nezinduna zamakhulu, ezazibuya empini.
UMose wathi kuzo: “Ngabe nibasindisile bonke abesifazane na?
Bhekani, yibo ababeyenga abantu bakwa-Israyeli belulekwe nguBhileyamu, benza abakwa-Israyeli ukuba bangathembeki kuSimakade ngalokho abakwenza ePheyori, kwase kuhlasela ubhubhane phakathi kwenhlangano kaSimakade.
Ngalokho, babulaleni manje bonke abafana, nabo bonke abesifazane asebeyazi indoda.
Kodwa wonke amantombazane angakayazi indoda, zigcineleni wona ephila.
“Bonke phakathi kwenu ababulele umuntu, nabathinte isidumbu, mabahlale ngaphandle kwenkambu izinsuku eziyisikhombisa. Zihlambululeni nabathunjwa ngosuku lwesithathu nolwesikhombisa.
Hlambululani zonke izingubo zenu, nakho konke okwenziwe ngesikhumba, nangoboya bezimbuzi noma ngokhuni.”
Umphristi, u-Eleyazare, wathi emabuthweni ayekade eye empini: “Nasi isimiso somthetho uSimakade ayale ngaso uMose:
igolide, isiliva, ithusi, insimbi, ithini, nomthofu,
konke okungeke kushe emlilweni, niyokudabulisa kuwo kuhlambuluke. Noma kunjalo niyokuhlambulula futhi ngamanzi okuhlambulula. Konke okushayo emlilweni, niyokudabulisa emanzini, kuhlambuluke.
Niyohlanza izingubo zenu ngosuku lwesikhombisa, nihlambuluke, andukuba ningene enkanjini.”
USimakade wakhuluma kuMose, wathi:
“Wena no-Eleyazare, umphristi, nabaholi bezindlu zawoyise benhlangano, yibaleni yonke impango ephangiweyo, abantu nezilwane.
Yehlukanise kabili impango, phakathi kwamabutho abeye empini nenhlangano yonke.
Uyothathela uSimakade intela emabuthweni akade esempini, kube kunye ema-500; awabantu, awezinkomo, awezimbongolo nawezimvu,
niyokuthatha engxenyeni yawo, nikunike u-Eleyazare, umphristi, kube ngumnikelo kuSimakade.
Engxenyeni yabantu bakwa-Israyeli uyothatha kube kunye ema-50, awabantu, awezinkomo, izimbongolo, nawezimvu, yebo, awezilwane zonke, ukunike abaLevi abagcina inkonzo yethabanakeli likaSimakade.”
UMose no-Eleyazare, umphristi, benza njengalokhu uSimakade ayemyalile uMose.
Impango eyasala kweyayinikwe amabutho kwaba yizimvu eziyizi-675 000,
izinkomo eziyizi-72 000,
izimbongolo eziyizi-61 000,
izintombi eziyizi-32 000.
Ingxenye eyabelwa ababephume impi kwaba yizimvu eziyizi-337 500,
kuzo kwakhishwa intela kaSimakade eyayiyizimvu ezingama-675.
Izinkomo eziyizi-36 000, intela kaSimakade kungezingama-72,
izimbongolo eziyizi-30 500, intela kaSimakade kungezingama-61.
Abantu baba yizi-16 000, intela kaSimakade kungabantu abangama-32.
UMose wanika u-Eleyazare, umphristi, intela eyayingumnikelo kaSimakade, njengalokhu uSimakade ayemyalile uMose.
Engxenyeni yempango yabantu bakwa-Israyeli, uMose ayeyehlukanise kweyamabutho ayekade esempini,
eyatholwa yinhlangano kwaba yizimvu eziyizi-337 500,
izinkomo eziyizi-36 000,
izimbongolo eziyizi-30 500,
abantu beyizi-16 000.
Engxenyeni eyatholwa ngu-Israyeli uMose, wathatha okukodwa kubantu nasezilwaneni wakunika abaLevi ababenakekela ithabanakeli likaSimakade, njengalokhu uSimakade ayemyalile uMose.
Iziphathimandla ezazingabakhuzi bezinkulungwane zebandla, izinduna zezinkulungwane nezinduna zamakhulu, zasondela kuMose,
zathi kuye: “Izinceku zakho zibale wonke amabutho asesandleni sethu, akukho nalinye elisalile.
Silethe umnikelo kaSimakade, yilowo nalowo kulokho akutholileyo: izinto zegolide, izigqizo, amasongo, izindandatho, amacici, nemigexo, ukuze senzele imiphefumulo yethu ukubuyisana phambi kukaSimakade.”
UMose no-Eleyazare, umphristi, bemukela igolide kubo, nawo wonke amagugu ezinto ezenziweyo.
Lonke igolide lomnikelo wokuphakanyiswa abanikela ngalo kuSimakade, elezinduna zezinkulungwane nelezinduna zamakhulu, laba ngamashekeli ayizi-16 750.
Amabutho wona ayezithathele impango, kwaba yilelo nalelo ngokwalo.
UMose no-Eleyazare, umphristi, bemukela igolide elalivela ezinduneni zezinkulungwane nakwezamakhulu, baliletha ethendeni lokuhlangana, laba yisikhumbuzo sabantu bakwa-Israyeli phambi kukaSimakade.
Abozalo lukaRubeni nabolukaGadi babenemfuyo eningi kakhulu. Lapho bebona ukuthi izwe lakwaJazeri nelakwaGileyadi liyindawo enhle emfuyweni yabo,
beza bakhuluma noMose, no-Eleyazare umphristi, nezikhulu zenhlangano, bathi:
“I-Atharothi, iDibhoni, iJazeri, iNimra, iHeshibhoni, i-Elehale, iSebhamu, iNebho neBhehoni,
izwe uSimakade alinqobela abakwa-Israyeli liyizwe elihle emfuyweni, kanti izinceku zakho zifuyile.”
Bathi futhi: “Uma sifumene umusa emehlweni akho, linike izinceku zakho leli lizwe libe yifa lazo; ungasiwelisi iJordani.”
UMose wathi kwabozalo lukaGadi nabolukaRubeni: “Kuyothi lapho abafowenu beyohlasela, nina nihlale lapha na?
Nibathenelani amandla abakwa-Israyeli baze bangafuni ukuwela baye ezweni uSimakade abanike lona na?
Noyihlo benza kanjalo mhlazana ngibathume ukuyohlola izwe besuka eKadeshi Bharineya.
Ekukhuphukeni kwabo beya esigodini i-Eshikholi balibona izwe, babathena amandla abakwa-Israyeli ukuba bangangeni ezweni uSimakade abanike lona.
Intukuthelo kaSimakade yavutha ngalolo lusuku, wafunga wathi:
‘Impela kulaba bantu abaphuma eGibhithe, akukho namunye kubo oyolibona izwe engafunga ngalo ku-Abhrahama, no-Isaka noJakobe, kusukela kwaba neminyaka engama-20 kuya phezulu, ngokuba abangilandelanga ngokupheleleyo.
NguKhalebhu, indodana kaJefune, umKhenizi noJoshuwa, indodana kaNuni, kuphela abamlandela ngokupheleleyo uSimakade.’
Intukuthelo kaSimakade yabavuthela abakwa-Israyeli, wabazulisa ehlane iminyaka engama-40, saze saphela sonke leso sizukulwane esasenze okubi emehlweni kaSimakade.
“Bhekani, nina nzalo yezoni, senivukile esikhundleni sawoyihlo ukwandisa intukuthelo enkulu kaSimakade ngo-Israyeli.
Uma nibuyela emuva ningamlandeli, uyophinde abashiye ehlane, nibhubhise bonke laba bantu.”
Basondela kuye, bathi: “Lapha sizokwakhela izimvu, izibaya nezingane zethu, imizi;
kodwa thina luqobo siyosheshe sihlome, sihambe phambi kwabantu bakwa-Israyeli, size sibafinyelelise endaweni yabo. Izingane zethu ziyosala emizini ebiyelweyo, ngenxa yabakhileyo ezweni.
Asiyukubuyela ezindlini zethu abakwa-Israyeli bengakalidli ifa labo, kube yilowo nalowo wabo athole isabelo sakhe.
Ngokuba asiyukulidla ifa nabo ngaphesheya kweJordani ngaleya, lokhu sesilidlile elethu ifa nganeno kweJordani, ngasempumalanga.”
UMose wayesethi kubo: “Uma senizokwenza lokhu, nihlome, nihambe phambi kukaSimakade, niyokulwa,
wonke amadoda akini ahlomile phambi kukaSimakade, awele iJordani, ephuce izitha zakhe phambi kwakhe;
izwe linqotshwe phambi kukaSimakade, khona niyobuyela emuva, ningenacala kuSimakade naku-Israyeli. Leli lizwe liyoba yifa lenu phambi kukaSimakade.
“Kepha uma ningeyukwenza kanjalo, niyobe nonile kuSimakade, futhi yazini ukuthi niyoba nesono.
Zakheleni nina nezingane zenu imizi, nakhele nezimvu zenu izibaya, nenze lokho ebenikushilo.”
Abozalo lukaGadi nabolukaRubeni bakhuluma kuMose, bathi: “Izinceku zakho ziyokwenza njengalokhu inkosi yami iyala.
Izingane zethu nomkethu nemfuyo yethu kuyohlala lapho emizini yakwaGileyadi,
kodwa izinceku zakho ziyowela, zihlomele ukulwa phambi kukaSimakade, ziyophuma zilwe, njengalokhu isho inkosi yami.”
UMose wayeseyala ngabo u-Eleyazare, umphristi noJoshuwa, indodana kaNuni, nabaholi bezindlu zawoyise bezizwana zabantu bakwa-Israyeli.
UMose wathi kubo: “Uma abakwaGadi nabakwaRubeni bewela nani iJordani, bonke behlomele ukulwa phambi kukaSimakade, izwe balinqobe phambi kwenu, niyobanika izwe lakwaGileyadi libe yifa labo.
Kodwa uma bengaweli nani behlomile, bayonikwa ifa phakathi kwenu eKhanani.”
Abozalo lukaGadi nabolukaRubeni baphendula, bathi: “Kuyoba njengalokhu uSimakade eshilo kuzo izinceku zakho, siyokwenza kanjalo.
Siyakuwela sihlomile phambi kukaSimakade, siye eKhanani, nokho izwe eliyifa lethu liyosala lingelethu ngaphesheya kweJordani.”
UMose wayesenika abozalo lukaGadi nabolukaRubeni nengxenye yesizwana sakwaManase, indodana kaJosefa, umbuso kaSihoni inkosi yama-Amori nombuso ka-Ogi inkosi yaseBhashani, izwe nemizi nezifunda ezizungeze imizi yezwe.
Abozalo lukaGadi bakha kabusha iDibhoni, ne-Athorithi, ne-Aroweri,
i-Athirothi Shofanu, iJazeri, iJogibheha,
iBhethi Nimra, neBhethi Harana, imizi ebiyelweyo nezibaya zezimvu.
Abozalo kukaRubeni bakha kabusha iHeshibhoni, i-Elehale, iKiriyathayimi,
iNebho, neBhali Mehoni neSibhima; yonke imizi bayiqamba amagama amasha.
Abozalo lukaMakhiri, indodana kaManase, badla elakwaGileyadi, baxosha ama-Amori ayekulo.
UMose wanika uMakhiri, indodana kaManase, elakwaGileyadi, wahlala kulo.
UJayiri, indodana kaManase, wahamba wadla imizana yalo, wayibiza ngokuthi yiHawothi Jayiri.
UNobha wahamba wadla iKenathi nemizi yalo, walibiza ngokuthi iNobha, okuyigama lakhe.
Nansi indlela abantu bakwa-Israyeli abahlelwa ngayo ngokwamathimba abo, ngesikhathi bephuma eGibhithe beholwa nguMose no-Aroni.
UMose waloba ngohambo lwabo lapho besuka khona, nalapho babekanisa khona njengesiyalezo sikaSimakade. Nanka amabanga abo njengokuhamba kwabo.
Basuka eRamesesi ngenyanga yokuqala ngosuku lwe-15 lwayo; ngosuku olulandela olwephasika. Abakwa-Israyeli baphuma ngendumiso bebuka bonke abaseGibhithe.
AbaseGibhithe babesangcwaba amazibulo abo ayebulawe nguSimakade. USimakade wayebehlulela nonkulunkulu babo.
Abakwa-Israyeli basuka-ke eRamesesi, bakanisa eSukhothi.
Basuka eSukhothi, bakanisa e-Ethamu eligudle ihlane.
Basuka e-Ethamu, babuyela ePhi Hahirothi elingaphambi kweBhali Zefoni; bakanisa phambi kweMigidoli.
Basuka eHahirothi, badabula phakathi kolwandle, baya ehlane. Bahamba ibanga lezinsuku ezintathu ehlane i-Ethamu, bakanisa eMara.
Basuka eMara, bafika e-Elimi; e-Elimi kwakunemithombo yamanzi eli-12 namasundu angama-70; bakanisa khona.
Basuka e-Elimi, bakanisa ngasoLwandle Lomhlanga.
Basuka oLwandle Lomhlanga, bakanisa ehlane iSini.
Basuka ehlane iSini, bakanisa eDofika.
Basuka eDofika, bakanisa e-Alushi.
Basuka e-Alushi, bakanisa eRefidimi, lapho kwakungekho manzi okuba abantu baphuze.
Basuka eRefidimi, bakanisa ehlane iSinayi.
Basuka ehlane iSinayi, bakanisa eKibhirothi Hathava.
Basuka eKibhirothi Hathava bakanisa eHazerothi.
Basuka eHazerothi, bakanisa eRithima.
Basuka eRithima, bakanisa eRimoni Pherezi.
Basuka eRimoni Pherezi, bakanisa eLibhina.
Basuka eLibhina, bakanisa eRisa.
Basuka eRisa, bakanisa eKehelatha.
Basuka eKehelatha, bakanisa entabeni iSheferi.
Basuka entabeni iSheferi, bakanisa eHarada.
Basuka eHarada, bakanisa eMakelothi.
Basuka eMakelothi, bakanisa eThahathi.
Basuka eThahathi, bakanisa eThera.
Basuka eThera, bakanisa eMithika.
Basuka eMithika, bakanisa eHashimona.
Basuka eHashimona, bakanisa eMoserothi.
Basuka eMoserothi, bakanisa eBhene Jahakani.
Basuka eBhene Jahakani, bakanisa eHori Hagidigadi.
Basuka eHori Hagidigadi, bakanisa eJothabatha.
Basuka eJothabatha, bakanisa e-Abhrona.
Basuka e-Abhrona, bakanisa e-Esiyoni Gebheri.
Basuka e-Esiyoni Gebheri, bakanisa eKadeshi elisehlane iSini.
Basuka eKadeshi, bakanisa entabeni iHori ngasemngceleni wakwa-Edomi.
U-Aroni, umphristi, wakhuphukela entabeni iHori ngokwesiyalezo sikaSimakade. Wafike wafela khona ngonyaka wama-40, emveni kokuphuma kwabakwa-Israyeli eGibhithe, ngenyanga yesihlanu ngosuku lokuqala lwayo.
U-Aroni wayeseneminyaka eyi-123 lapho efela entabeni iHori.
UmKhanani, inkosi yase-Aradi, owayehlala eningizimu eKhanani, wezwa ngokufika kwabantu bakwa-Israyeli.
Basuka entabeni iHori, bakanisa eZalimona.
Basuka eZalimona, bakanisa ePunoni.
Basuka ePunoni, bakanisa e-Obhothi.
Basuka e-Obhothi, bakanisa e-Iye Abharimi emngceleni kwaMowabi.
Basuka e-Iyimi, bakanisa eDibhoni Gadi.
Basuka eDibhoni Gadi, bakanisa e-Alimoni Dibhilathayimi.
Basuka e-Alimoni Dibhilathayimi, bakanisa ezintabeni i-Abharimi, phambi kweNebho.
Basuka ezintabeni i-Abharimi, bakanisa emathafeni kwaMowabi ngaseJordani, phesheya kweJerikho.
Bakanisa ngaseJordani kusukela eBhethi Jeshimothi kuze kufike e-Abhela Shithimi emathafeni kwaMowabi.
USimakade wakhuluma kuMose emathafeni kwaMowabi ngaseJordani, phesheya kweJerikho, wathi:
“Khuluma kwabakwa-Israyeli, uthi kubo: ‘Uma niwela iJordani ukuba ningene eKhanani,
niyakuxosha bonke abakhileyo ezweni phambi kwenu, nibhubhise yonke imifanekiso yabo, nibulale zonke izithombe zabo ezibunjiweyo, nibhidlize zonke izindawo zabo eziphakemeyo.
Izwe niyakulidla, nihlale kulo, ngokuba ngininike lona ukuba nilidle.
Niyakulidla izwe ngonkatho, ngokwemindeni yakini, abaningi niyakubabela ifa elikhulu, nabayingcosana nibabele ifa elincane, noma kuphi lapho unkatho lumudla khona umuntu, kuyakuba ngelakhe; niyakulidla ifa ngokwezizwana zoyihlo.
“ ‘Kepha uma ningabaxoshi abantu balelo lizwe phambi kwenu, eniyobashiya bayoba ngameva emehlweni enu nanjengezincijo ezinhlangothini zenu, bayonihlupha ezweni enihlala kulo.
Ngiyokwenza kini lokho engangihlose ukukwenza kubo.’ ”
USimakade wakhuluma kuMose, wathi:
“Yala abantu bakwa-Israyeli, uthi kubo: ‘Senizofika eKhanani, leli yizwe elizokuba yifa lenu, izwe lamaKhanani nemingcele yalo.
Uhlangothi lwaseningizimu luyosuka ehlane iZini, lugudle kwa-Edomi. Umngcele wenu waseningizimu uyosuka ekugcineni koLwandle Lukasawoti, ngasempumalanga.
Umngcele wenu ujike ngaseningizimu yoKhalo Lwezitha, uze wedlule eZini, uphume eningizimu eKadeshi Bharineya, uye eHazari Adari, uze ufike e-Azimoni.
Kusuka e-Asimoni, umngcele uyojika ubheke ngasemfuleni eGibhithe, uphumele olwandle.
“ ‘Umngcele wasentshonalanga kuyoba wuLwandle Olukhulu, lube ngumngcele wenu entshonalanga.
“ ‘Umngcele wenu enyakatho uyoma kanje: kusukela oLwandle Olukhulu anomisa intaba iHori ibe wumngcele.
Ukusuka entabeni iHori anoziphawulela indlela eya eHamathi, umngcele uphume eZedadi,
bese uphumela eZifroni, wedlulele eHazari Enani; uyoma kanjalo-ke umngcele wenu enyakatho.
“ ‘Umngcele wenu empumalanga uyoma kanje: niyoziklamela umngcele empumalanga usuke eHazari Enani uze ufike eShefamu;
wehle eShefamu, uye eRibhila empumalanga e-Ayini, wehle njalo uze ufinyelele emmangweni ongasolwandle iKhinerethi, empumalanga.
Umngcele wehlele eJordani, uphume ngasoLwandle Lukasawoti. Yilelo-ke izwe lenu ngokwemingcele yalo, nxazonke.’ ”
UMose wabayala abakwa-Israyeli, wathi: “Leli yizwe eniyolaba ngonkatho, uSimakade ayale ngalo ukuba linikwe izizwe eziyisishiyagalolunye nengxenye,
ngokuba isizwana sabozalo lukaRubeni ngokwezindlu zokhokho babo nesizwana sabozalo lukaGadi ngokwezindlu zokhokho babo sezilitholile ifa lazo, kanjalo nengxenye yesizwana sakwaManase.
Lezi zizwe ezimbili nengxenye zalithola ifa lazo phesheya kweJordani ngasempumalanga yeJerikho, lapho kuphuma khona ilanga.”
USimakade wakhuluma kuMose, wathi:
“Nanka amagama amadoda ayoklama izwe eliyifa lenu: u-Eleyazare, umphristi noJoshuwa, indodana kaNuni.
Niyothatha umholi ngamunye kuleso naleso sizwana ukuba abe izwe libe yifa lenu.
Nanka amagama amadoda aqokwa: esizwaneni sakwaJuda: nguKhalebhu indodana kaJefune.
“Esizwaneni sabozalo lukaSimeyoni: nguShemuweli, indodana ka-Amihudi.
Esizwaneni sakwaBhenjamini: ngu-Elidadi, indodana kaKhisiloni.
Esizwaneni sabozalo lukaDani: ngumholi uBhuki, indodana kaJogili.
Emadodaneni kaJosefa: esizwaneni sabozalo lukaManase: ngumholi uHaniyeli, indodana ka-Efodi.
Esizwaneni sabozalo luka-Efrayimi: ngumholi uKemuweli, indodana kaShifethani.
Esizwaneni sabozalo lukaZebuloni: ngumholi u-Elizafani, indodana kaPharinakhi.
Esizwaneni sabozalo luka-Isakhare: ngumholi uPhalithiyeli, indodana ka-Azani.
Esizwaneni sabozalo luka-Asheri: ngumholi u-Ahihudi, indodana kaShelomi.
Esizwaneni sabozalo lukaNafethali: ngumholi uPhedaheli, indodana ka-Amihudi.”
Yilabo uSimakade abayala ukuba behlukanisele abantu bakwa-Israyeli ifa, eKhanani.
USimakade wakhuluma kuMose emathafeni kwaMowabi ngaseJordani, phesheya kweJerikho, wathi:
“Yala abantu bakwa-Israyeli ukuba baphe abaLevi, ezweni eliyifa labo, imizi ukuba bahlale kuyo. AbaLevi niyobanika namadlelo azungeze leyo mizi, nxazonke.
Imizi iyoba ngeyabo ukuba bahlale kuyo, namadlelo ezinkomo zabo abe yimpahla yabo, nawezilwane zonke zabo.
“Amadlelo emizi eniyowanika abaLevi ayosuka ogangeni lomuzi, amakhubhithi ayinkulungwane, nxazonke.
Umuzi niyakuwulinganisa ngaphandle kanje: ngasempumalanga, kube ngamakhubhithi ayizi-2 000, eningizimu, kube ngamakhubhithi ayizi-2 000, entshonalanga, kube ngamakhubhithi ayizi-2 000 nangasenyakatho, kube ngamakhubhithi ayizi-2 000; umuzi ube phakathi. Lokho kuyoba ngamadlelo emizi yabo.
“Imizi eniyoyinika abaLevi iyoba yimizi eyisithupha yokuphephela, lapho umbulali eyobalekela khona ukuba aphephe kuyo. Ngaphandle kwayo, niyobanika imizi engama-42.
Isiyonke imizi eniyoyinika abaLevi iyoba ngama-48, namadlelo ayo.
Imizi eniyobanika yona niyoyithatha kuso isabelo sabantu bakwa-Israyeli, kwesikhulu niyothatha eminingi, kwesincane nithathe eyingcosana. Yilowo nalowo uyonika abaLevi ngokuthi athathe emizini eyisabelo sefa lakhe alidlayo.”
USimakade wakhuluma kuMose, wathi:
“Tshela abantu bakwa-Israyeli, uthi kubo: ‘Uma niwela iJordani, ningena eKhanani,
niyoqoka imizi yokuphephela lapho umbulali obulale umuntu ngokungeyona inhloso eyobalekela khona.
Kini iyokuba yimizi yokuphephela kumphindiseli, ukuze umbulali angafi engakemi phambi kwenhlangano, ahlulelwe.
Imizi eniyobanika yona ibe ngeyokuphephela, iyokuba yisithupha.
Niyoqoka imizi emithathu phesheya kweJordani, niqoke eminye emithathu eKhanani ibe yimizi yokuphephela.
Le mizi iyokuba ngeyokuphephela kubantu bakwa-Israyeli, kumfokazi, nakogogobeleyo phakathi kwabo, ukuze yilowo nalowo obulala umuntu ngokungenhloso abalekele kuyo.
“ ‘Uma umuntu eshaya omunye ngokwakhiwe ngensimbi afe, ungumbulali; impela umbulali uyobulawa.
Uma emshaya ngetshe aliphethe ngesandla, aze afe, ungumbulali; umbulali uyobulawa.
Uma ephethe isikhali sokhuni amshaye ngaso, aze afe, ungumbulali; umbulali uyobulawa.
Umphindiseli wegazi lapho ehlangana nombulali uyakumbulala.
Noma ngubani okuthi ngokuzonda omunye bese emdudula noma amcuthele, amjikijele ngokuthile, afe,
noma ngobutha, amshaye ngesibhakela, aze afe; ungumbulali. Umphindiseli wegazi lapho ehlangana nombulali uyakumbulala.
“ ‘Uma umuntu engazelele, ethuka sekungqubuzeka omunye kodwa engamzondi, noma emjikijela ngokuthile engamqamekelanga,
noma ngetshe elingambulala, engahlosile liwele kuye, afe, engeyiso isitha sakhe, futhi ebengahlose kumlimaza,
inhlangano iyokwehlulela phakathi koshayileyo nomphindiseli wegazi, ilandela lezi zehlulelo.
Inhlangano iyakumhlenga umbulali esandleni somphindiseli wegazi, imbuyisele emzini wakhe wokuphephela lapho ebebalekele khona, ahlale kuwo kuze kufe umphristi omkhulu owayegcotshwe ngamafutha angcwele.
“ ‘Uma kwenzeka umbulali eqa umngcele womuzi wokuphephela lapho ebalekele khona,
aficwe ngumphindiseli wegazi ngaphandle kwemingcele yomuzi wokuphephela, bese umphindiseli embulala umbulali, akayukuba nacala legazi,
ngokuba umbulali kufanele ahlale emzini wokuphephela kuze kufe umphristi omkhulu. Kodwa emva kokufa komphristi omkhulu, umbulali angabuyela ezweni eliyifa lakhe.
“ ‘Lokho kuyoba yisimiso sokwehlulela kini, nasezizukulwaneni zenu, kuzo zonke izindlu zenu.
“ ‘Noma ngubani obulala umuntu, uyobulawa ngenxa yobufakazi obethulwe ngaye. Kepha akekho oyobulawa ngenxa yobufakazi bomuntu oyedwa.
“ ‘Aniyukuthatha nhlawulo ukuze nisindise umbulali onecala okufanele afe ngenxa yalo, umbulali kufanele abulawe.
“ ‘Aniyukuyithatha inhlawulo kumuntu obalekele emzini wokuphephela, ukuze obhacile abuye azohlala ezweni, engakafi umphristi omkhulu.
“ ‘Aniyukulingcolisa izwe enihlala kulo, ngokuba igazi liyalingcolisa izwe; ayikho inhlawulo yezwe ngegazi elichitheke kulo, kuphela ngegazi lalowo olichithile.
Aniyukulingcolisa izwe enihlala kulo, ngokuba Mina Simakade ngihlala phakathi kwabantu bakwa-Israyeli.’ ”
Izinhloko zezindlu zoyise bemindeni yozalo lukaGileyadi kaMakhiri kaManase, nabozalo lukaJosefa, zasondela, zakhuluma phambi kukaMose naphambi kwabaholi, abayizinhloko zezindlu zoyise bakwa-Israyeli,
zathi: “USimakade wayiyala inkosi yami ukuba inike abantu bakwa-Israyeli izwe libe yifa labo ngonkatho. USimakade wayiyala futhi inkosi yami ukuba inike amadodakazi omfowethu uZelofehadi ifa lakhe, libe yifa lawo.
Uma egana amadodana ezinye zezizwe zabakwa-Israyeli, ifa lawo liyakususwa efeni lokhokho bethu, lithasiselwe efeni laleso sizwana ayakugana kuso; lisuswe ezweni esilabelwe njengefa lethu.
Ngesikhathi kufika ijubhili labantu bakwa-Israyeli, ifa lamadodakazi kaZelofehadi liyothasiselwa efeni laleso sizwana ayoba ngawaso, ifa lawo lisuswe efeni lesizwana sokhokho bethu.”
UMose wabayala abantu bakwa-Israyeli ngokwezwi likaSimakade, wathi: “Isizwana sozalo lukaJosefa siqinisile kulokhu esikushoyo.
USimakade wayala ngamadodakazi kaZelofehadi, wathi mawagane lowo athanda ukumgana, kodwa kufanele agane emndenini wesizwana sikayise,
ukuze kungabikho ifa labantu bakwa-Israyeli eliyakudluliselwa kwezinye izizwana, yilowo nalowo wabantu bakwa-Israyeli uyakunamathela efeni lesizwana sokhokho bakhe.
Yileyo naleyo ndodakazi enefa esizwaneni esithile sabakwa-Israyeli, iyakugana omunye womndeni wesizwana sikayise, ukuze bonke abakwa-Israyeli babe nefa esabelweni sokhokho babo.
Akukho lifa eliyakuthathwa lidluliselwe kwesinye isizwana, ngokuba yileso naleso sizwana sakwa-Israyeli siyakunamathela efeni laso.”
Amadodakazi kaZelofehadi enza njengalokhu uSimakade ayemyalile uMose.
UMahela, uThiriza, uHogila, uMilikha, noNowa, amadodakazi kaZelofehadi, agana amadodana abafowabo bakayise.
Agana emindenini yozalo lukaManase, indodana kaJosefa, kwathi ifa lawo lahlala esizwaneni somndeni kayise.
Yileyo imiyalelo nezehlulelo uSimakade ayala ngakho abakwa-Israyeli, ngomlomo kaMose, ngesikhathi bekanise emathafeni kwaMowabi ngaseJordani, phesheya kweJerikho.
Lawa ngamazwi uMose awakhuluma kubo bonke abakwa-Israyeli phesheya kweJordani, ehlane i-Araba, maqondana neSufi, phakathi kwePharanu, iThofeli, iLabhani, iHazerothi, neDi Zahabhi.
Kuthatha izinsuku ezili-11 ukusuka eHorebhe uya eKadeshi Bharineya uma uhamba ngendlela esentabeni iSeyiri.
Kwathi ngonyaka wama-40, ngenyanga ye-11, ngosuku lokuqala lwayo, uMose watshela abakwa-Israyeli konke lokho uSimakade ayemyale ngakho ukuba akukhulume kubo.
Lokhu kwenzeka emveni kokuba enqobe uSihoni, inkosi yama-Amori, owayehlala eHeshibhoni, no-Ogi, inkosi yaseBhashani, owayehlala e-Ashitharothi ngase-Edireyi.
Ngaphesheya kweJordani, kwaMowabi, uMose waqala ukuwuchaza lo mthetho, wathi:
“USimakade uNkulunkulu wethu wakhuluma kithi eHorebhe, wathi: ‘Senihlale isikhathi eside kule ntaba;
phendukani nihambe, niye kwelezintaba kwa-Amori nasezindaweni zonke ezakhelene nakhona e-Araba, kwelezintaba, ezansi, eningizimu, ogwini lolwandle, ezweni lamaKhanani, eLebhanoni, kuze kufike emfuleni omkhulu, umfula iYufrathe.
Bhekani, lelo lizwe ngininika lona; ngenani nilidle, yizwe uSimakade afunga kokhokho benu, o-Abhrahama, u-Isaka, noJakobe ukuthi uzobanika lona, bona nezizukulwane zabo.’
“Nganitshela ngaleso sikhathi, ngathi: ‘Anginakunithwala ngedwa.
USimakade uNkulunkulu wenu usenandisile, kangangokuthi namuhla senilukhumbintethe, ningangezinkanyezi emkhathini.
USimakade uNkulunkulu wokhokho benu makanithasisele kayinkulungwane, anibusise njengalokhu angitshela.
Mina ngedwa ngingazithwala kanjani izinhlupheko zenu, imithwalo yenu, nokuxabana kwenu na?
Ziqokeleni amadoda ahlakaniphileyo, anokuqonda futhi aziwayo ezizweni zenu, ukuze ngiwenze izinduna zenu.’
“Nangiphendula nathi: ‘Izwi ositshele lona ukuba silenze, lihle.’
“Ngase ngithatha izinhloko ngokwezizwana zenu, amadoda ahlakaniphileyo naziwayo, ngawamisa aba yizinduna zenu: aba yizinduna zezinkulungwane, izinduna zamakhulu, izinduna zama-50, izinduna zamashumi, neziphathimandla ezizwaneni zenu.
Ngabayala abehluleli benu ngaleso sikhathi, ngathi: ‘Zwanini okwenzeka phakathi kwabafowenu, bese nehlulela ngokulunga phakathi komuntu nomfowabo, nomfokazi okhosele kuye.
Maningakhethi abantu ekwehluleleni, mlaleleni omncane njengomkhulu, ningesabi buso bamuntu, ngokuba ukwehlulela kungokukaNkulunkulu. Indaba elukhuni kini niyoyiletha kimi, ngiyizwe.’
Nganiyala ngaleso sikhathi ngakho konke enaniyokwenza.
“Sasuka eHorebhe, sadabula lelo hlane elikhulu nelesabekayo enalibonayo endleleni ekwelezintaba lakwa-Amori, njengalokho uSimakade uNkulunkulu wethu ayesiyalile, saze safika eKadeshi Bharineya.
Ngase ngithi kini: ‘Senifikile kwelezintaba lakwa-Amori uSimakade uNkulunkulu wethu asinika lona.
Niyabona-ke, uSimakade uNkulunkulu wenu uninikile izwe eliphambi kwenu: khuphukani nilidle, njengalokhu uSimakade, uNkulunkulu wokhokho benu ayenitshelile. Ningesabi, ningapheli amandla.’
“Nonke ngothi lwenu nasondela kimi, nathi: ‘Masithume amadoda ahambe kuqala ayosihlolela izwe, ukuze abuye asitshele indlela esimele ukukhuphuka ngayo, nemizi esiyofika kuyo.’
“Lokho kwaba kuhle emehlweni ami, ngathatha kini amadoda ali-12, kwaba yindoda eyodwa kuleso naleso sizwana.
Wona ahamba, akhuphukela kwelezintaba, afika esigodini i-Eshikholi, asihlola.
Akha izithelo zalelo lizwe, asiphathela zona, nezwi elithi: ‘Yizwe elihle uSimakade uNkulunkulu wethu asinika lona.’
“Nokho anithandanga ukukhuphuka, kodwa nahlubuka esiyalezweni sikaSimakade uNkulunkulu wenu;
nakhononda emathendeni enu, nathi: ‘Kungenxa yokuba uSimakade esizonda okwenze ukuba asikhiphe eGibhithe ukuzosinikela esandleni sama-Amori, ukuba asibhubhise.
Siyakukhuphukelaphi na? Abafowethu benzile ukuba izinhliziyo zethu ziphele amandla, ngokuba bathe: “Abantu balo banamandla, futhi bayimidondoshiya; imizi yakhona mikhulu, ibiyelwe kuze kube sezulwini, futhi sibone abozalo luka-Anaki khona.” ’
“Ngase ngithi kini: ‘Ningabi naluvalo, ningabesabi.
USimakade uNkulunkulu wenu ohamba phambi kwenu uyonilwela, njengoba enza kini eGibhithe nibuka.
Nasehlane, nibonile ukuthi uSimakade uNkulunkulu wenu wanithwala njengendoda igqogqoshe indodana yayo, endleleni yonke enahamba ngayo, naze nafika kule ndawo.’
“Noma kunjalo, nokho anikholwanga nguSimakade uNkulunkulu wenu,
owayehamba phambi kwenu endleleni enifunela indawo yokuba nikanise kuyo. Ebusuku wayenibonisa ngomlilo indlela enizohamba ngayo, nangefu emini.
“USimakade wezwa izwi enalikhuluma, wathukuthela, wafunga wathi:
‘Impela akukho namunye kulaba bantu balesi sizukulwane esibi oyolibona izwe elihle engafunga ukulinika okhokho babo,
ngaphandle kukaKhalebhu indodana kaJefune. Nguyena kuphela oyolibona. Ngiyakumnika izwe anyathele kulo, yena nabantwana bakhe, ngokuba wamlandela ngokupheleleyo uSimakade wakhe.’
“Nami uSimakade wangithukuthelela ngenxa yenu, wathi: ‘Nawe awuyukungena kulo;
nguJoshuwa, indodana kaNuni omi phambi kwakho, oyongena kulo. Wena mqinise, ngokuba nguyena oyokwenza u-Israyeli alidle izwe.
Izingane zenu, lezi ezingakwazi ukwehlukanisa okuhle nokubi, enathi zizoba yimpango, yizona eziyongena kulo, ngizolinika zona, zilidle.
Nina-ke jikani, niye ehlane ngendlela eya oLwandle Lomhlanga.’
“Naphendula, nathi kimi: ‘Sonile kuSimakade; siyakukhuphuka silwe njengakho konke asiyala ngakho uSimakade uNkulunkulu wethu.’ Nahloma, yilowo nalowo izikhali zakhe zokulwa; kwase kuba lula kini ukuba nikhuphukele kwelezintaba.
“USimakade wayesethi kimi: ‘Yisho kubo uthi: “Ningakhuphuki, ningalwi, ngokuba ngeke ngibe khona phakathi kwenu, funa zinehlule izitha zenu.” ’
“Ngakhuluma kanjalo-ke kini, kodwa anilalelanga, kunalokho nalihlubuka izwi likaSimakade, naba nenkani, nakhuphukela kwelezintaba.
Abakwa-Amori ababehlala kwelezintaba baphuma banihlasela, banixosha kuhle kwezinyosi, baninqoba eSeyiri, kwaze kwaba seHorma.
Nabuya, nakhala phambi kukaSimakade, kodwa uSimakade akalilalelanga izwi lokukhala kwenu.
Nahlala eKadeshi izinsuku eziningi, nilokhu nihlezi khona.”
“Sabe sesiphenduka, sahamba, salibhekisa ehlane ngendlela eya oLwandle Lomhlanga, njengalokhu ayeshilo kimi uSimakade. Intaba iSeyiri sayizungeza izinsuku eziningi.
“USimakade wathi kimi:
‘Sekwanele ukuba nilokhu nizungeza le ntaba; phendukani, nilibangise enyakatho.
Yala abantu, uthi: “Niyodabula umngcele wabafowenu bozalo luka-Esawu abahlala eSeyiri. Bayonesaba, nokho anoqaphela,
ningalwi nabo, ngokuba angiyukuninika izwe labo, ngisho nendawo yamathe onyawo, ngokuba iSeyiri ngalinika u-Esawu ukuba libe yifa lakhe.
Niyothenga kubo ngesiliva ukudla eniyokudla, namanzi eniyowaphuza, niwakhokhele isiliva.” ’
“USimakade uNkulunkulu wakho ukubusisile emsebenzini wonke wesandla sakho. Ukwazile ukuhamba kwakho kuleli hlane elikhulu, nakule minyaka engama-40, uSimakade uNkulunkulu wakho ube nawe, aweswelanga lutho.
“Sabe sesidlula kubafowethu bozalo luka-Esawu, abahlala eSeyiri, sayishiya indlela e-Araba, e-Elathi, nase-Eziyoni Gebheri. Saphenduka sadlula ngendlela esehlane kwaMowabi.
“USimakade wayesethi kimi: ‘Ungamkhathazi uMowabi, ungabahlaseli ukuba ulwe nabo, ngokuba angiyukukunika izwe lakhe libe yifa lakho, njengalokhu ngabanika lona abozalo lukaLothi, i-Ari, libe yifa labo.’ ”
Kwakuhlala khona kuqala ama-Emithe, abantu abakhulu, abaningi, nabade njengama-Anaki.
Nabo njengama-Anaki, kwakuthiwa ngamaRefa, kodwa abakwaMowabi babebabiza ngama-Emi.
AmaHori ayehlala lapho eSeyiri kuqala, ephucwa izwe lawo, abhujiswa phambi kwabo ngabozalo luka-Esawu, kwaba yibo abakha endaweni yawo, njengoba no-Israyeli enza ezweni eliyifa lakhe, aliphiwa nguSimakade.
“Manje sukani, niwele umfula iZeredi.” Sabe sesiwuwela umfula iZeredi.
“Izinsuku esazihamba sisuka eKadeshi Bharineya size siyowela umfula iZeredi kwaba yiminyaka engama-38, saze saphela sonke leso sizukulwane samabutho empi phakathi kwenkambu, njengalokho uSimakade ayefungile.
Impela isandla sikaSimakade sasimelene nawo ukuwabhubhisa phakathi kwenkambu, aze aphele nya.
“Kwathi lapho esefe aphela wonke amadoda empi phakathi kwabantu,
uSimakade wakhuluma kimi, wathi:
‘Wena usuzoliwela i-Ari, umngcele kwaMowabi.
Akothi lapho ususeduze nabakwa-Amoni, ungabakhathazi, ungalwi nabo, ngokuba angiyukukunika izwe labakwa-Amoni libe yifa lenu, lokhu ngibanike lona abozalo lukaLothi libe yifa labo.’ ”
Nalelo kwakuthiwa yizwe lamaRefa, ngoba amaRefa ahlala kulo kuqala. Abakwa-Amoni babewabiza ngokuthi ngamaZamuzumi,
abantu abakhulu, abaningi, nabade njengama-Anaki. USimakade wawabhubhisa bebuka, wawaphuca izwe lawo, kwase kwakha abakwa-Amoni endaweni yawo.
Njengalokhu enza kwabozalo luka-Esawu ababehlala eSeyiri, ngesikhathi ebhubhisa amaHori phambi kwabo, ewephuca izwe lawo, kwase kuhlala bona endaweni yawo kuze kube yinamuhla.
Kanjalo nama-Avi ayehlala emizaneni kuze kufike eGaza, nawo eza, abhubhisa amaKhafithori ayevela eKhafithori, abe esakha endaweni yawo.
“ ‘Sukani nihambe, niwele umfula i-Arinoni; bhekani, nginikele esandleni sakho uSihoni, umAmori inkosi yaseHeshibhoni, nezwe lakhe: qala ukulidla ngokuba ulwe naye empini.
Namuhla ngiyakuqala ukufaka uvalo nokukwesaba phezu kwezizwe zonke eziphansi kwezulu, lapho zizwa imibiko ngawe, ziyakuthuthumela, ziqhaqhazele ngenxa yakho.’
“Ngabe sengithumela izithunywa kuSihoni inkosi yaseHeshibhoni, zisuka ehlane iKedemothi, ziphethe amazwi okuthula, athi:
‘Ngicela ukudabula ezweni lakho, ngizohamba ngomgwaqo, angizukujikela kwesokunene noma ngakwesokhohlo.
Uyongithengisela ukudla ngemali ukuba ngidle, namanzi ngemali ukuba ngiphuze; ngivumele nje kuphela ukuba ngidabule ngezinyawo,
njengalokhu kwenza kimi abozalo luka-Esawu abahlala eSeyiri nabakwaMowabi abahlala e-Ari, ngize ngiwele iJordani, ngingene ezweni uSimakade uNkulunkulu wethu asinika lona.’
Kodwa uSihoni, inkosi yaseHeshibhoni, akasivumelanga ukuba sidabule ezweni lakhe, ngokuba uSimakade uNkulunkulu wakho wawenza lukhuni umoya wakhe, wamenza waba nenkani enhliziyweni yakhe, ukuze amnikele esandleni sakho njenganamuhla.
“USimakade wayesethi kimi: ‘Bheka, sengiqalile ukunikela uSihoni nezwe lakhe kuwe: qala ukulidla izwe lakhe ukuba libe yifa lakho.’
“USihoni waphuma, yena nabo bonke abantu bakhe, ukuzobhekana nathi, alwe nathi eJahazi.
USimakade uNkulunkulu wethu wamnikela kithi, samnqoba, yena namadodana akhe nabantu bakhe bonke.
Sayidla yonke imizi yakhe ngaleso sikhathi, sayibhubhisa yonke imizi eyayinamadoda nabesifazane nezingane, sayiqeda nya; kwangasala muntu.
Sazithathela imfuyo nje yaba yimpango yethu, nalokho esakuphanga emizini esasiyinqobile.
Kusukela e-Aroweri elisosebeni lomfula i-Arinoni nasemzini osesigodini kuze kube kwaGileyadi, akubangabikho muzi owasehlulayo ngokuphakama; uSimakade uNkulunkulu wethu wayinikela yonke kithi.
Nokho izwe labakwa-Amoni awuzange usondele kulo, kusukela engxenyeni engenhla yomfula iJakobi, nemizi ekwelezintaba, njengakho konke uSimakade uNkulunkulu ayesiyale ngakho.”
“Saphenduka, sakhuphuka ngendlela eya eBhashani, u-Ogi, inkosi yaseBhashani, waphuma wazobhekana nathi, yena nabantu bakhe bonke, balwa nathi ngase-Edireyi.
USimakade wayesethi kimi: ‘Ungamesabi, ngoba yena nabantu bakhe bonke nezwe lakhe ngikunikele esandleni sakho. Uyokwenza kuye njengoba wenzile kuSihoni, inkosi yama-Amori, owayehlala eHeshibhoni.’
“USimakade uNkulunkulu wethu wamnikela esandleni sethu u-Ogi, inkosi yaseBhashani nabantu bakhe bonke; sabacekela phansi ngenkemba, akwaze kwasala muntu.
Sayidla yonke imizi yakhe ngaleso sikhathi; akwaze kwasala muzi esingawudlanga: kwakuyimizi engama-60, sonke isifunda i-Arigobhi nombuso ka-Ogi eBhashani.
Yonke leyo mizi yayibiyelwe ngezingange eziphakemeyo, inamasango nemigoqo, ngaphandle kwemizana eminingi kakhulu eyayingabiyelwe.
Sayibhubhisa yaphela nya, njengalokhu senza kuSihoni, inkosi yaseHeshibhoni, sayishaya sayiqothula yonke imizi enamadoda, abesifazane, nezingane.
Sazithathela yonke imfuyo nempango eyayisemizini.
“Salithatha ngaleso sikhathi izwe esandleni samakhosi ama-Amori ayengaphesheya kweJordani, kusukela esigodini i-Arinoni kuze kube sentabeni iHermoni.
IHermoni, abakwaSidoni bayibiza ngokuthi yiSiriyoni; ama-Amori wona ayibiza ngokuthi yiSeniri,
sayithatha yonke imizi esethafeni lakwaGileyadi, iBhashani lonke kuze kube seSalekha nase-Edireyi, imizi yasembusweni ka-Ogi eBhashani.
Ngu-Ogi kuphela, inkosi yaseBhashani, owasala ensalini yamaRefa. Bheka, ibhokisi lakhe lomngcwabo kwakungelensimbi, alitholakali yini eRabha labantu bakwa-Amoni na? Ubude balo bungamakhubhithi ayisishiyagalolunye, ububanzi balo bungamakhubhithi amane, ngokwesilinganiso.
“Leli lizwe salidla ngaleso sikhathi; izwe elisukela e-Aroweri elisesigodini i-Arinoni, nengxenye yelezintaba kwaGileyadi, nemizi yalo, sakunika abakwaRubeni nabakwaGadi.
Ingxenye esele yakwaGileyadi, nalo lonke iBhashani, umbuso ka-Ogi, lokho ngakunika ingxenye yesizwana sakwaManase, sonke isifunda i-Arigobhi neBhashani lonke elibizwa ngokuthi izwe lamaRefa.
UJayire, indodana kaManase, wathatha sonke isifunda i-Arigobhi kuze kube semngceleni wamaGeshuri nowamaMahakhathi, iBhashani, walibiza ngegama lakhe wathi yiHawothi Jayire, kuze kube yinamuhla.
UMakhiri ngamnika elakwaGileyadi.
AbakwaRubeni nabakwaGadi ngabanika kusukela kwaGileyadi kuze kube sesigodini i-Arinoni, phakathi nesigodi kwaba ngumngcele wabo. Umfula iJakobi ingumngcele wabantu bakwa-Amoni,
i-Araba, neJordani kwaba ngumngcele kusukela eKhinerethi kuze kube solwandle i-Araba, kuya oLwandle Lukasawoti, phansi kwemithambeka iPhisiga, ngasempumalanga.
“Ngaleso sikhathi nganiyala ngathi: ‘USimakade uNkulunkulu wenu uninikile leli lizwe ukuba nilidle; niyakuwelisa phambi kwabafowenu bakwa-Israyeli wonke amadoda anesibindi ehlomile.
Kuyosala omkenu, izingane zenu, nemfuyo yenu kuphela, ngiyazi ukuthi ninemfuyo eningi; konke kuyosala emizini yenu engininike yona.
USimakade aze abanike abafowenu ukuphumula njengani, nabo balidle izwe uSimakade uNkulunkulu wenu abanika lona ngaphesheya kweJordani, andukuba lowo nalowo abuyele efeni lakhe engimnike lona.’
“Ngamyala uJoshuwa ngaleso sikhathi, ngathi: ‘Amehlo akho abonile konke uSimakade uNkulunkulu wenu akwenze kulawa makhosi amabili, ngakho-ke uSimakade uyokwenza kanjalo kuyo yonke imibuso enisazodabula kuyo.
Ningabesabi, ngokuba uSimakade uNkulunkulu wenu nguye ozakunilwela.’
“Ngaleso sikhathi nganxusa kuSimakade, ngathi:
‘Nkosi Simakade, uqalile ukubonisa inceku yakho ubukhulu bakho nesandla sakho esinamandla, ngokuba ngumuphi unkulunkulu ezulwini nasemhlabeni ongenza imisebenzi enjengeyakho nongenza imisebenzi emikhulu njengeyakho na?
Ngiyacela, ngivumele ngiwele ukuze ngilibone izwe elihle elingaphesheya kweJordani, lelo lizwe elihle lezintaba kanye neLebhanoni.’
“Kepha uSimakade wangithukuthelela ngenxa yenu, akabe esangilalela. USimakade wathi kimi: ‘Kwanele manje; ungaphinde ukhulume nami ngale ndaba.
Khuphukela esicongweni iPhisiga, uphakamisele amehlo akho ngasentshonalanga, enyakatho, eningizimu, nangasempumalanga, uzibonele ngokwakho, ngokuba awuyukuliwela leli Jordani.
Kodwa yala uJoshuwa, umqunge isibindi, umqinise, ngokuba uyakuwela ehola laba bantu, abenze ukuba balidle izwe oyakulibona.’
“Sahlala-ke esigodini esimalungana neBhethi Pheyori.”
“Manje-ke, Israyeli, yizwani izimiso nezehlulelo enginifundisa zona ukuba nizenze, ukuze niphile, ningene, nilidle izwe uSimakade uNkulunkulu wokhokho benu aninika lona.
Aniyukuthasisela ezwini enginiyala ngalo, futhi aniyukunciphisa lutho kulo, kodwa gcinani imiyalo kaSimakade uNkulunkulu wenu enginiyala ngayo.
“Amehlo enu akubonile uSimakade akwenza eBhali Pheyori, ukuthi uSimakade uNkulunkulu wakho wababhubhisa kanjani bonke abantu owawukanye nabo, labo abalandela uBhali Pheyori.
Kodwa nina enanamathela kuSimakade uNkulunkulu wenu, nisaphila nonke nanamuhla.
“Bhekani, nginifundisile izimiso nezehlulelo, njengokuba uSimakade uNkulunkulu wami engiyalile ukuba nenze kanjalo phakathi kwezwe enizongena kulo ukuba nilidle.
Ngalokho niyoqaphela ukuba nizigcine, ngokuba lokhu kuyoba ngukuhlakanipha kwenu nokuqonda kwenu emehlweni ezizwe eziyakuzwa ngazo zonke lezi zimiso, futhi ziyakuthi: ‘Impela lesi sizwe esikhulu singabantu abahlakaniphileyo nabaqondayo.’
Yisiphi isizwe esikhulu esinonkulunkulu oseduze naso njengoba enjalo uSimakade uNkulunkulu wethu noma yinini lapho simbiza, na?
Yisiphi isizwe esikhulu esinezimiso nezehlulelo ezilungile njengawo wonke lo mthetho engiwubeka phambi kwenu namuhla na?
“Kepha qikelela, uqaphele kakhulu, funa ukhohlwe yizinto ozibonile ngamehlo akho, funa zisuke enhliziyweni yakho izinsuku zonke zokuhamba kwakho. Bazise zona abantwana bakho nabantwana babantwana babo nokuthi,
lwalunjani usuku owema ngalo phambi kukaSimakade uNkulunkulu wakho eHorebhe, lapho uSimakade athi kimi: ‘Ngiqoqele abantu ukuze ngibazwise amazwi ami, bafunde ukungesaba zonke izinsuku zokuhamba kwabo emhlabeni, futhi bawafundise nabantwana babo.’
“Nasondela, nema phansi kwentaba; intaba yayivutha umlilo kuze kube semkhathini, inamafu amnyama nesigayegaye sobumnyama.
USimakade wakhuluma kini ephakathi emlilweni; nezwa izwi likhuluma, kodwa anibonanga simo, nezwa izwi kuphela.
Wamemezela kini isivumelwano sakhe aniyala ngaso ukuba nisigcine, imiyalelo elishumi ayiloba ezibhebheni ezimbili zamatshe.
USimakade wangiyala ngaleso sikhathi ukuba nginifundise izimiso nezehlulelo ukuze nizigcine ezweni enizongena kulo ukulidla.
“Qaphelani kakhulu, lokhu ningabonanga simo ngalolo lusuku lapho uSimakade ekhuluma nani eHorebhe, ephakathi komlilo.
Funa nenze okubi, nizenzele izithombe ezibaziweyo, eziwumfanekiso wowesilisa noma wowesifazane,
umfanekiso wesilwane esisemhlabeni, noma wenyoni enamaphiko endiza emkhathini,
noma umfanekiso wesilwanyana esinwabuzelayo emhlabeni, noma umfanekiso wenhlanzi esemanzini phansi komhlaba;
hleze uphakamisele amehlo akho ezulwini, ubone ilanga, inyanga, izinkanyezi, nalo lonke ibandla lezulu, bese uyengeka, ukhuleke kukho, ukukhonze, lokho uSimakade uNkulunkulu wakho akwabele izizwe zonke eziphansi kwezulu.
Nokho uSimakade wakuthatha wena, wakukhipha esithandweni sensimbi, iGibhithe, ukuze nibe ngabantu abayifa lakhe njenganamuhla.
“USimakade wangithukuthelela ngenxa yenu, wafunga ukuthi angiyukuliwela iJordani nokuthi angiyukungena kulelo lizwe elihle uSimakade uNkulunkulu wakho akunika lona, libe yifa lakho.
Kepha mina sengizakufa kuleli lizwe, angizukuliwela iJordani, kodwa nina nizoliwela, nilidle leli lizwe elihle.
Qaphelani, funa nikhohlwe isivumelwano sikaSimakade uNkulunkulu wenu asenza nani, bese nizenzela izithombe ezibaziweyo ngomfanekiso wento uSimakade uNkulunkulu wakho akuyala ngayo.
Ngokuba uSimakade uNkulunkulu wakho ungumlilo oqothulayo, unguNkulunkulu onomhawu.
“Kuyothi lapho sewuzele abantwana, nabo bazala ababo, senihlale isikhathi eside ezweni, bese nona, nenze izithombe ezibaziweyo ngomfanekiso wento ethile, nenze okubi emehlweni kaSimakade uNkulunkulu wakho, nimthukuthelise,
ngibiza izulu nomhlaba ukuba kube ngufakazi ngani namuhla, ukuthi niyakuqothulwa niphele masinyane ezweni eniwela iJordani ukuba nilidle. Izinsuku zenu aziyukwanda kulo, niyakuqothulwa nokuqothulwa.
USimakade uyakunihlakazela ezizweni, nisale niyingcosana phakathi kwabezizwe, lapho uSimakade eyakunixoshela khona.
Lapho niyokhonza onkulunkulu abayimisebenzi yezandla zabantu, onkulunkulu bemithi namatshe, abangaboni, abangezwa, abangadli nabangahogeli.
Niyomfuna uSimakade uNkulunkulu wenu nilapho, nimfumane. Niyakumfuna ngenhliziyo yenu yonke nangawo wonke umphefumulo wenu.
Ekuhluphekeni kwakho, lapho wehlelwa yizo zonke lezo zinto, uyophendukela kuSimakade uNkulunkulu wakho ngezinsuku zokugcina, ulalele izwi lakhe.
USimakade uNkulunkulu wakho unguNkulunkulu onomusa; akayukukushiya, akayukukubhubhisa, futhi akayukusikhohlwa isivumelwano asifunga kokhokho bakho.
“Ake ubuze izinsuku ezidlulileyo ezaziphambi kwakho, kusukela osukwini uNkulunkulu adala ngalo abantu emhlabeni, kusukela kolunye uhlangothi lwezulu kuze kufike kolunye, ukuthi kukhona yini okufana nale nto engaka okwake kwenzeka, futhi kukhona yini okwake kwezwakala okufana nakho na?
Abantu bake balizwa yini izwi likaNkulunkulu likhuluma livela phakathi emlilweni, njengalokho ulizwile, baphila na?
Ukhona yini unkulunkulu owake walinga ukuza azithathele isizwe phakathi kwesinye isizwe ngezilingo, ngezibonakaliso, ngezimangaliso, ngempi, ngesandla esinamandla, ngengalo eyeluliweyo, nangengebhe enkulu njengakho konke uSimakade uNkulunkulu wenu anenzela khona eGibhithe, nizibonela ngawenu, na?
“Wena wakuboniswa lokho ukuze wazi ukuthi uSimakade unguNkulunkulu, akekho omunye ngaphandle kwakhe.
Esezulwini wakuzwisa izwi lakhe ukuba akufundise; emhlabeni wakubonisa umlilo wakhe omkhulu; wawezwa amazwi akhe evela phakathi komlilo.
Ngenxa yokuba ebathanda okhokho bakho, wazikhetha izizukulwane zabo emva kwakho; wakukhipha Yena uqobo eGibhithe ngamandla akhe amakhulu,
waxosha izizwe ezinkulu nezinamandla kunawe phambi kwakho, ukuze akungenise, akunike izwe lazo, libe yifa lakho njengoba kunjalo nanamuhla.
“Yazi namuhla, ukufake enhliziyweni yakho ukuthi uSimakade unguNkulunkulu ezulwini phezulu nasemhlabeni phansi; akekho omunye.
Uyogcina izimiso zakhe nemiyalo yakhe engikuyala ngakho namuhla ukuze kube kuhle kuwe, nakubantwana bakho emva kwakho, ukuze zande izinsuku zakho ezweni uSimakade uNkulunkulu wakho akunika lona, kuze kube phakade.”
UMose wehlukanisa imizi emithathu phesheya kweJordani ngasempumalanga
ukuba umbulali abalekele khona, obulala umakhelwane wakhe engahlosile, ebekade engamzondi, uyophila uma ebalekela komunye waleyo mizi:
iBhezeri elisehlane ezweni eliyithafa libe ngelabakwaRubeni, iRamothi ekwaGileyadi ibe ngeyabakwaGadi, neGolanu eseBhashani ibe ngeyabakwaManase.
Yiwo lo umthetho uMose awubeka phambi kwabantu bakwa-Israyeli,
yibo lobu ubufakazi, izimiso, nezehlulelo uMose akukhuluma kubantu bakwa-Israyeli ekuphumeni kwabo eGibhithe,
phesheya kweJordani esigodini maqondana neBhethi Pheyori ezweni likaSihoni inkosi yama-Amori, owayehlala eHeshibhoni, owanqotshwa nguMose nabantu bakwa-Israyeli ekuphumeni kwabo eGibhithe.
Balidla izwe lakhe, badla nelika-Ogi inkosi yaseBhashani, amakhosi amabili ama-Amori ayengaphesheya kweJordani ngasempumalanga,
kusukela e-Aroweri eliseceleni kwesigodi i-Arinoni kuya entabeni iSiyoni, okuyiHermoni,
nalo lonke i-Araba, phesheya kweJordani ngasempumalanga, kuze kube solwandle i-Araba phansi kwemithambeka iPhisiga.
UMose wayesebiza wonke u-Israyeli, wathi kuye: “Yizwa, Israyeli, izimiso nezehlulelo engizisho ezindlebeni zakho namuhla ukuba uzifunde bese uqikelela ukuzenza.
USimakade uNkulunkulu wethu wenza isivumelwano nathi eHorebhe.
USimakade akasenzanga lesi sivumelwano nobaba, wasenza nathi, thina sonke esilapha, esisaphila namuhla.
USimakade wakhuluma nani ubuso nobuso entabeni, esemlilweni.
Ngaleso sikhathi mina ngangimi phakathi kukaSimakade nani ukuze nginazise izwi likaSimakade, ngokuba nesaba ngenxa yomlilo, anikhuphukelanga entabeni. Wathi:
“ ‘NginguSimakade uNkulunkulu wakho owakukhipha eGibhithe, indlu yobugqila.
“ ‘Ungabi nabanye onkulunkulu ngaphandle kwami.
“ ‘Ungazenzeli izithombe ezibaziweyo zomfanekiso wokusezulwini phezulu, nokusemhlabeni phansi, nokusemanzini phansi komhlaba.
Ungazikhothameli, ungazikhonzi, ngokuba Mina Simakade uNkulunkulu wakho nginguNkulunkulu onomhawu, ngijezisela ububi bawoyise kubantwana kuso isizukulwane sesithathu nesesine sabangizondayo,
kepha ngibenzela umusa abayizinkulungwane abangithandayo, bagcine imiyalelo yami.
“ ‘Ungaliphathi ngeze igama likaSimakade uNkulunkulu wakho, ngokuba uSimakade akayukumyeka angamjezisi oliphatha ngeze igama lakhe.
“ ‘Gcina usuku lwesabatha, ulungcwelise, njengalokhu uSimakade uNkulunkulu wakho ekuyalile.
Uyosebenza izinsuku eziyisithupha, uwenze wonke umsebenzi wakho,
kepha usuku lwesikhombisa luyisabatha likaSimakade uNkulunkulu wakho; awuyukusebenza msebenzi ngalo, wena nendodana yakho, nendodakazi yakho, nenceku yakho, nencekukazi yakho, nenkabi yakho, nembongolo yakho, nayo yonke imfuyo yakho, nomfokazi ophakathi kwamasango akho, ukuze inceku yakho nencekukazi yakho baphumule njengawe.
Khumbula ukuthi nawe wawuyisigqila eGibhithe, nokuthi uSimakade uNkulunkulu wakho wakukhipha khona ngesandla esinamandla nangengalo eyeluliweyo; yingakho-ke uSimakade uNkulunkulu wakho wakuyala ukuba ugcine usuku lwesabatha.
“ ‘Yazisa uyihlo nonyoko, njengalokhu uSimakade uNkulunkulu wakho ekuyalile, ukuze izinsuku zakho zibe zinde, kube kuhle kuwe ezweni uSimakade uNkulunkulu wakho akunika lona.
“ ‘Ungabulali.
“ ‘Ungaphingi.
“ ‘Ungebi.
“ ‘Ungafakazi ngamanga ngomakhelwane wakho.
“ ‘Ungamfisi umfazi womakhelwane wakho; ungayifisi indlu yomakhelwane wakho, insimu yakhe, inceku yakhe, incekukazi yakhe, inkabi yakhe, imbongolo yakhe, nokunye kukamakhelwane wakho.’
“Yilawo amazwi uSimakade awakhuluma enhlanganweni yenu yonke entabeni, ephakathi komlilo, nefu, nesigayegaye sobumnyama, nangezwi elikhulu, akathasiselanga lutho. Wawaloba ezibhebheni ezimbili zamatshe, wanginika zona.
“Kwathi lapho nilizwa izwi elivela phakathi kobumnyama, intaba ivutha umlilo, nasondela kimi, zonke izinhloko zezizwana zenu namalunga enu,
nathi: ‘Bheka, uSimakade uNkulunkulu wethu usibonisile inkazimulo yakhe nobukhulu bakhe, salizwa izwi lakhe livela phakathi komlilo. Namuhla sibonile ukuthi uNkulunkulu uyakhuluma nomuntu, adlule aphile.
Pho siyakufelani na? Leli kloba liyakusiqeda. Uma sibuye salizwa izwi likaSimakade uNkulunkulu wethu, siyokufa,
ngokuba ngubani kubantu owake wezwa izwi likaNkulunkulu ophilayo njengathi, likhuluma livela emlilweni, waphila, na?
Sondela wena, uzwe konke lokho uSimakade uNkulunkulu wethu azokukhuluma, bese wena ukhuluma nathi, usitshele wonke amazwi uSimakade uNkulunkulu wethu azowasho kuwe, siyokulalela, siwenze.’
“USimakade wawezwa amazwi enawakhuluma kimi; uSimakade wayesethi kimi: ‘Ngiwezwile amazwi alaba bantu, abawakhulume kuwe; basho kahle konke abakukhulumile.
Sengathi kungaba njalo enhliziyweni yabo, bangesabe, bayigcine njalo yonke imiyalelo yami, ukuze kube kuhle kubo nakubantwana babo kuze kube phakade.
“ ‘Hamba, usho kubo uthi: “Buyelani emathendeni enu.”
“ ‘Kepha wena, yima lapha nami ukuze ngiyikhulume kuwe yonke imiyalo, izimiso, nezehlulelo oyakubafundisa khona konke ukuba bakwenze ezweni engibanika lona, ukuba balidle.’
“Niyoqaphela ukuba nenze njengalokhu uSimakade uNkulunkulu wenu eniyalile, ningaphendukeli ngakwesokunene noma ngakwesokhohlo.
Niyohamba njalo endleleni uSimakade uNkulunkulu wenu aniyale ngayo, ukuze niphile futhi kube kuhle kini, zande izinsuku zenu ezweni eniyakulidla.”
“Nanku umyalelo, nezimiso, nezehlulelo uSimakade uNkulunkulu wenu ayala ukuba nikufundiswe, futhi nikwenze ezweni eniya kulo ukulidla,
ukuze umesabe uSimakade uNkulunkulu wakho, ugcine zonke izimiso zakhe nemiyalo yakhe engikuyala ngakho, wena nendodana yakho nendodana yendodana yakho, zonke izinsuku zokuhamba kwakho, kwandiswe imihla yakho.
Yizwa-ke Israyeli, uqikelele ukukwenza, ukuze kube kuhle kuwe, nande kakhulu, njengalokhu uSimakade uNkulunkulu wokhokho bakho akuthembisa izwe elichichima ubisi noju.
“Yizwa, Israyeli: uSimakade uNkulunkulu wethu, uSimakade, munye.
Mthande uSimakade uNkulunkulu wakho, ngayo yonke inhliziyo yakho, nangawo wonke umphefumulo wakho, nangawo wonke amandla akho.
Lawa mazwi engikuyala ngawo namuhla mawahlale enhliziyweni yakho.
Ubafundise wona abantwana bakho, uwakhulume lapho uhlezi endlini yakho, nalapho uhamba endleleni; lapho ulala, nalapho uvuka.
Uyakuwabophela abe wuphawu esandleni sakho, abe yisikhumbuzo phakathi kwamehlo akho.
Ubowaloba ezinsikeni zomnyango wendlu yakho nasemasangweni akho.
“Kuyothi lapho uSimakade uNkulunkulu wakho ekungenisa ezweni afunga ngalo kokhokho, u-Abhrahama, u-Isaka, noJakobe, ukuthi uzoninika lona: imizi emikhulu nemihle ongayakhanga,
izindlu ezigcwele zonke izinto ezinhle ongazigcwalisanga, imithombo embiweyo ongayimbanga, izivini neminqumo ongakutshalanga, uyodla futhi usuthe,
kodwa uqaphele ukuba ungakhohlwa nguSimakade owakukhipha eGibhithe, indlu yobugqila.
“Mesabe uSimakade uNkulunkulu wakho; umkhonze Yena, ufunge igama lakhe.
Aniyukulandela abanye onkulunkulu, onkulunkulu babantu abanizungezile
ngokuba uSimakade uNkulunkulu wakho ophakathi kwakho unguNkulunkulu onomhawu, funa intukuthelo kaSimakade uNkulunkulu wakho ikuvuthele, ikushabalalise ebusweni bomhlaba.
“Ningamlingi uSimakade uNkulunkulu wenu, njengalokhu namlinga eMasa.
Niyakugcina ngokucophelela imiyalo kaSimakade uNkulunkulu wenu, nobufakazi bakhe, nezimiso zakhe akuyale ngakho.
Uyokwenza okulungile nokuhle emehlweni kaSimakade, ukuze kube kuhle kuwe, ungene, ulidle lelo lizwe elihle uSimakade afunga kokhokho bakho
ukuthi uzozixosha zonke izitha zakho phambi kwakho, njengalokhu ekhulumile uSimakade.
“Lapho indodana yakho ikubuza ngesikhathi esizayo, ithi: ‘Bufakazi buni, nezimiso, nezehlulelo uSimakade uNkulunkulu wethu aniyala ngakho, na?’
“Uyakuthi endodaneni yakho: ‘Sasiyizigqila zikaFaro eGibhithe, kodwa uSimakade wasikhipha eGibhithe ngesandla esinamandla.
USimakade wenza izibonakaliso nezimangaliso ezinkulu nezesabekayo phezu kweGibhithe, naphezu kukaFaro nendlu yakhe yonke phambi kwamehlo ethu,
wasikhipha lapho ukuze asingenise, asinike izwe alifungela kokhokho bethu.
USimakade wasiyala ukuba senze zonke lezo zimiso, simesabe uSimakade uNkulunkulu wethu, ukuze kube kuhle kithi njalo, asigcine siphilile njengoba kunjalo namuhla.
Kuyakuba ngukulunga kithi, uma siqaphela ukuyenza yonke le miyalo phambi kukaSimakade uNkulunkulu wethu, njengalokhu esiyalile.’ ”
“Kuyothi lapho uSimakade uNkulunkulu wakho ekungenisa ezweni oya kulo ukuba ulidle, axoshe izizwe eziningi phambi kwakho, amaHithi, amaGirigashi, ama-Amori, amaKhanani, amaPherizi, amaHivi, namaJebusi; izizwe eziyisikhombisa ezinkulu nezinamandla kunawe,
nalapho uSimakade uNkulunkulu wakho ezinikela phambi kwakho ukuba uzinqobe, uyozibhubhisa uziqede nya, awuyukwenza isivumelwano nazo, ungabi namusa kuzo.
Ungaganiselani nazo, ungayiniki indodana yakhe indodakazi yakho, ungathatheli indodana yakho indodakazi yakhe,
ngokuba uyakuphambukisa indodana yakho ekungilandeleni bese ikhonza abanye onkulunkulu; intukuthelo kaSimakade ikuvuthele, akubhubhise masinyane.
Niyokwenza kanje kubo: niyakudiliza ama-althare abo, niphihlize izinsika zabo, ninqume o-Ashera babo, nishise ngomlilo izithombe zabo ezibaziweyo.
Ngokuba uyisizwe esingcwele kuSimakade uNkulunkulu wakho. USimakade uNkulunkulu wakho ukukhethile ukuba ube yisizwe esiyifa lakhe phezu kwezizwe zonke ezisebusweni bomhlaba.
“USimakade akanithandanga nje kuphela, akanikhethanga kunezinye izizwe ngoba nibaningi; naniyingcosana kunezizwe zonke.
Kepha kwaba ngenxa yokuba uSimakade enithanda, nangokuba wayegcina isifungo ayesenze nokhokho benu. USimakade unikhiphe ngesandla esinamandla, wanihlenga endlini yobugqila nasesandleni sikaFaro, inkosi yaseGibhithe.
Yazi-ke ukuthi uSimakade uNkulunkulu wakho unguNkulunkulu, uNkulunkulu othembekileyo, ogcina isivumelwano somusa kwabamthandayo abagcina imiyalo yakhe kuze kube sezizukulwaneni eziyinkulungwane,
ophindiselayo kwabamzondayo, ababhubhise; akayukulibala kulowo omzondayo, uyakuphindisela kuye.
Ngalokho-ke uyakugcina imiyalo, izimiso, nezehlulelo engikuyala ngakho namuhla, ukuba ukwenze.
“Kuyothi uma nilalela lezi zehlulelo, nizigcina, nizenza, uSimakade uNkulunkulu wakho uyakusigcina isivumelwano asenza nawe nomusa afunga ngawo kokhokho bakho.
Uyakukuthanda, akubusise, akwandise, abusise nesithelo sesibeletho sakho, isithelo somhlabathi wakho, okusanhlamvu kwakho, iwayini lakho, amafutha akho, inzalo yezinkomo zakho, nezimvu zakho zande ezweni afunga ngalo kokhokho bakho ukukunika lona.
Uyakubusiswa ngaphezu kwezizwe zonke, akuyukuba bikho phakathi kwenu owesilisa ongenanzalo nowesifazane oyinyumba, naphakathi kwemfuyo yenu.
USimakade uyakususa kuwe zonke izifo, akayukubeka kuwe izifo zaseGibhithe ezimbi ozaziyo, kodwa uyozehlisela phezu kwabo bonke abakuzondayo.
Uyakuziqeda nya zonke izizwe uSimakade uNkulunkulu wakho ayakuzinikela kuwe; iso lakho aliyukuzihawukela, awuyukubakhonza onkulunkulu bazo, ngokuba lokho kuyakuba lugibe kuwe.
“Uma uyakuthi enhliziyweni yakho: ‘Lezi zizwe ziningi kunami; ngingazixosha kanjani, na?’
ungazesabi, kodwa khumbula lokho uSimakade uNkulunkulu wakho akwenza kuFaro nakulo lonke iGibhithe:
izilingo ezinkulu azibonayo amehlo akho, izibonakaliso, izimangaliso, isandla esinamandla nengalo eyeluliweyo, uSimakade uNkulunkulu wakho akukhipha ngakho. USimakade uNkulunkulu wakho uyokwenza kanjalo kuzo zonke izizwe ozesabayo.
USimakade uNkulunkulu wakho uyothumela iminyovu phakathi kwazo, kuthi bonke abaseleyo nabazithukusileyo babhubhe baphele phambi kwakho.
Ngalokho-ke ungazesabi, ngokuba uSimakade uNkulunkulu wakho, uNkulunkulu omkhulu nowesabekayo, uphakathi kwakho.
USimakade uNkulunkulu wakho uyozixosha lezi zizwe phambi kwakho kancane kancane; awuyukwazi ukuziqeda masinyane, funa izilwane zasendle zande zibe ziningi kunani.
USimakade uNkulunkulu wakho uyakuzinikela kuwe, uyakuzifaka ingebhe, zidideke, zize zibhujiswe.
Amakhosi azo uyowanikela esandleni sakho, wena uyoliqeda nya igama lawo phansi kwezulu; akukho muntu oyoma phambi kwakho, uze uqede ukuzibhubhisa.
Uyozishisa ngomlilo izithombe ezibaziweyo zonkulunkulu bazo; ungalifisi isiliva noma igolide elikuzo, awuyukuzithathela lona, funa libe wugibe kuwe, ngokuba lokho kuyanengeka kuSimakade uNkulunkulu wakho.
Awuyukungenisa into eyisinengiso endlini yakho, funa nawe umiselwe ukubhujiswa njengayo; uyakuyenyanya nokuyenyanya, unengwe nokunengwa yiyo, ngokuba iyinto yokubhujiswa.”
“Yonke imiyalo enginiyala ngayo namuhla niyakuyigcina ngokucophelela ukuze niphile; niyokwanda, ningene, nilidle izwe uSimakade afunga ngalo kokhokho benu.
Uyoyikhumbula yonke indlela uSimakade uNkulunkulu wakho akuhola ngayo le minyaka engama-40 ehlane ukuba akuthobise, akuvivinye, ukuze azi okusenhliziyweni yakho, ukuthi uyoyigcina yini imiyalo yakhe noma qha.
Wakuthobisa, wakulambisa, wakupha ukuba udle imana obungayazi, nababengayazi ngisho okhokho bakho ukuze akwenze wazi ukuthi umuntu akaphili ngesinkwa sodwa, kodwa ngakho konke okushiwo nguSimakade; yilokho umuntu aphila ngakho.
Izingubo zakho azikugugelanga, nonyawo lwakho aluvuvukalanga kule minyaka engama-40.
Uyokwazi enhliziyweni yakho ukuthi njengalokhu wonke umuntu eyiyala indodana yakhe, kanjalo uSimakade uNkulunkulu wakho uyakuyala nawe.
“Uyoyigcina imiyalo kaSimakade uNkulunkulu wakho, ngokuhamba ezindleleni zakhe nangokuba umesabe.
Ngokuba uSimakade uNkulunkulu wakho uzakukungenisa ezweni elihle, izwe elinemifudlana enamanzi, imithombo, namanzi aphuphuma ezinzulwini, ageleze ezigodini nasezintabeni,
izwe likakolo nebhali, imivini nemikhiwane namahananadi, izwe leminqumo enamafutha noju,
izwe lapho uyakudla khona isinkwa ungesweli lutho; awuyukudinga lutho; izwe elimatshe alo ayinsimbi, ezintabeni zalo uyakumba ithusi.
“Uyakudla usuthe, umbonge uSimakade uNkulunkulu wakho ngezwe elihle akunike lona.
Qaphela, funa ukhohlwe nguSimakade uNkulunkulu wakho ungayigcini imiyalo yakhe, izehlulelo zakhe, nezimiso zakhe engikuyala ngakho namuhla.
Funa lapho usudlile wasutha, nalapho usuwakhile izindlu ezinhle, wahlala kuzo,
izinkomo zakho nezimvu zakho sekwandile, isiliva negolide lakho sekukuningi, sekwandile konke onakho,
bese inhliziyo yakho iqhosha, umkhohlwe uSimakade uNkulunkulu wakho owakukhipha eGibhithe, indlu yobugqila,
wakuhola ehlane elikhulu nelesabekayo elinezinyoka ezinesihlungu nofezela nomhlabathi owomileyo, lapho kwakungekho manzi khona; wakuvezela amanzi edwaleni lensengetsha.
Wakupha imana ehlane, okhokho bakho ababengayazi, ukuze akuthobise, akuvivinye, kuthi ekugcineni akwenzele okuhle.
Uze uthi enhliziyweni yakho: ‘Amandla ami nezikhwepha zesandla sami kungizuzele yonke le mfuyo.’
“Kepha uyomkhumbula uSimakade uNkulunkulu wakho, ngokuba nguye okupha amandla okuzuza imfuyo ukuba amise isivumelwano sakhe afunga ngaso kokhokho bakho, njenganamuhla.
“Ngiyanexwayisa namuhla ukuthi uma nje nike namkhohlwa uSimakade uNkulunkulu wenu, nalandela abanye onkulunkulu, nabakhonza, nakhuleka kubo, niyakubhubha nokubhubha.
Niyobhubha njengezizwe uSimakade azibhubhisa phambi kwenu, ngokuba ningalilalelanga izwi likaSimakade uNkulunkulu wenu.”
“Yizwa Israyeli: uzakuwela iJordani namuhla, ungene ukuba wephuce izizwe ezinkulu nezinamandla kunawe, imizi emikhulu nebiyelwe kuze kube sezulwini,
abantu abakhulu nabade, abozalo lwama-Anaki obaziyo, ozwile ngabo kuthiwa: ‘Ngubani ongema phambi kwabozalo luka-Anaki na?’
“Yazi-ke namuhla ukuthi nguSimakade uNkulunkulu wakho odlula phambi kwakho njengomlilo oqothulayo; oyobabhubhisa, abanqobe phambi kwakho, wena uyakubaphuca izwe, ubabhubhise masinyane, njengalokhu uSimakade ekhulumile kuwe.
“Ungalokothi uzitshele enhliziyweni yakho, lapho uSimakade uNkulunkulu wakho esebaxoshile phambi kwakho, uthi: ‘Kwaba ngenxa yokulunga kwami ukuba uSimakade angingenise ukuze ngilidle leli lizwe,’ kodwa kungenxa yobubi balezo zizwe uSimakade azixoshile phambi kwakho.
Akubanga ngenxa yokulunga kwakho noma ubuqotho benhliziyo yakho ukuba ungene ulidle izwe lazo, kodwa kungenxa yobubi balezo zizwe uSimakade uNkulunkulu wakho azixoshile phambi kwakho, ukuze aqinise izwi uSimakade afunga ngalo kokhokho bakho, u-Abhrahama, u-Isaka noJakobe.
Yazi-ke lokhu, uSimakade uNkulunkulu wakho akakuniki leli lizwe elihle ukuba ulidle ngenxa yokulunga kwakho, ngokuba uyisizwe esintamo ilukhuni.
“Khumbula, ungakhohlwa ukuthi wamthukuthelisa uSimakade uNkulunkulu wakho ehlane. Benihlale nimhlubuka uSimakade kusukela osukwini owaphuma ngalo eGibhithe waze wafika kule ndawo.
NaseHorebhe namthukuthelisa uSimakade, uSimakade wanithukuthelela waze wafuna ukunibhubhisa.
Ngesikhathi ngikhuphukele entabeni ukuyokwemukela izibhebhe zamatshe, izibhebhe zesivumelwano uSimakade asenza nani, ngahlala entabeni izinsuku ezingama-40 nobusuku obungama-40, ngangingadli sinkwa, ngingaphuzi manzi.
USimakade wanginika izibhebhe ezimbili zamatshe, zilotshwe ngomunwe kaNkulunkulu. Kwakulotshwe kuzo wonke amazwi uSimakade ayewakhulume kini entabeni, ephakathi komlilo, ngosuku lokuhlangana.
“Ngasekupheleni kwezinsuku ezingama-40 nobusuku obungama-40, uSimakade wanginika izibhebhe ezimbili zamatshe, izibhebhe zesivumelwano.
USimakade wathi kimi: ‘Sukuma, wehle masinyane, ngokuba abantu bakho owabakhipha eGibhithe bonile, ngokushesha baphambukile endleleni engabayala ngayo; bazenzele isithombe esibunjiweyo.’
“USimakade wabuye wakhuluma kimi, wathi: ‘Ngibabonile laba bantu; bheka, bangabantu abantamo ilukhuni;
ngiyeke ukuze ngibabhubhise, ngilesule lishabalale igama labo phansi kwezulu, ngiyokwenza wena ube yisizwe esinamandla nesikhulu kunabo.’
“Ngase ngiphenduka ngehla entabeni, intaba yayivutha umlilo; izibhebhe ezimbili zesivumelwano zazisezandleni zami zombili.
Ngabona ukuthi nempela, nanonile kuSimakade uNkulunkulu wenu; nanizenzele ithole elibunjiweyo, naphambuka ngokushesha endleleni uSimakade ayeniyale ngayo.
Ngazithatha izibhebhe ezimbili, ngazilahla phansi ngazo zombili izandla zami, ngazephula phambi kwamehlo enu.
“Ngakhothama ngathi mbo phambi kukaSimakade njengakuqala, izinsuku ezingama-40 nobusuku obungama-40; ngingadli sinkwa, ngingaphuzi manzi ngenxa yesono senu enanone ngaso, nenza okubi emehlweni kaSimakade, namthukuthelisa.
Nakuba ngangilwesaba ulaka nentukuthelo uSimakade ayenithukuthelele ngakho ukuba anibhubhise, nokho uSimakade wangizwa futhi nangaleso sikhathi.
USimakade wamthukuthelela kakhulu u-Aroni, futhi wayekulungele ukuba ambhubhise; ngamkhulekela u-Aroni ngaleso sikhathi.
Ngase ngithatha isono senu, ithole enanilenzile, ngalishisa ngomlilo, ngaligxoba, ngaligayisisa laze laba njengothuli, ngaphonsa uthuli lwalo emfudlaneni owehla entabeni.
“EThabhehera, eMasa naseKibhirothi Hathava, namthukuthelisa uSimakade.
“Nalapho uSimakade enithuma, nisuka eKadeshi Bharineya, ethi: ‘Khuphukani, nilidle izwe engininike lona,’ nahlubuka ezwini likaSimakade uNkulunkulu wenu, anaze nakholwa nguye, analilalela izwi lakhe.
Nimhlubukile uSimakade kusukela osukwini enganazi ngalo.
“Ngakhothama ngathi mbo ngobuso phambi kukaSimakade, izinsuku ezingama-40 nobusuku obungama-40, ngokuba uSimakade wayethe uzonibhubhisa.
Ngakhuleka kuSimakade, ngathi: ‘Nkosi Simakade, ungababhubhisi abantu bakho nefa lakho olihlengile ngobukhulu bakho, walikhipha eGibhithe ngesandla esinamandla.
Khumbula izinceku zakho u-Abhrahama, u-Isaka noJakobe, ungabheki inkani yalaba bantu, ububi babo, nesono sabo,
funa izwe owasikhipha kulo lithi: “Kwaba ngenxa yokuba uSimakade wayengakwazi ukubangenisa ezweni ayebathembise lona, futhi ebazonda; ubakhiphile ukuze ababulalele ehlane.”
“ ‘Bangabantu bakho nefa lakho owalikhipha ngamandla akho amakhulu nangengalo yakho eyeluliweyo.’ ”
“Ngaleso sikhathi uSimakade wathi kimi: ‘Zibazele izibhebhe zamatshe ezimbili zibe njengezakuqala, bese ukhuphukela kimi entabeni, uyozenzela ngomuthi umphongolo.
Ngiyoloba ezibhebheni amazwi ayekulezo zibhebhe zokuqala owazephulayo, bese uzifaka emphongolweni.’
“Ngase ngenza umphongolo ngomtholo, ngabaza izibhebhe ezimbili ngamatshe njengezakuqala, ngase ngikhuphukela entabeni ngiziphethe zombili izibhebhe esandleni sami.
Waloba ezibhebheni njengalokhu kwakulotshiwe kuqala, imiyalelo elishumi uSimakade ayikhuluma kini entabeni, ephakathi komlilo ngosuku lokuhlangana; uSimakade wanginika zona.
Ngaphenduka ngehla entabeni, ngazifaka izibhebhe emphongolweni engiwenzile; zikhona lapho, njengalokhu uSimakade engiyalile.”
Abakwa-Israyeli basuka eBheyerothi Bhene Jahakani, baya eMosera; u-Aroni wafela lapho, wangcwatshwa khona. U-Eleyazare, indodana yakhe, yaba ngumphristi esikhundleni sakhe.
Basuka lapho, baya eGudigoda; basuka eGudigoda baya eJothabatha, izwe lemifudlana enamanzi.
Ngaleso sikhathi uSimakade wehlukanisa isizwana sakwaLevi ukuba sithwale umphongolo wesivumelwano sikaSimakade, nokuba sime phambi kukaSimakade ukumkhonza nokubusisa egameni lakhe, kuze kube namuhla.
Ngalokho uLevi akanasabelo nalifa kanye nabafowabo; uSimakade uyifa lakhe njengokusho kukaSimakade uNkulunkulu wakho kuye.
“Ngahlala entabeni njengakuqala, izinsuku ezingama-40 nobusuku obungama-40; uSimakade wangilalela nangaleso sikhathi, akathandanga ukunibhubhisa.
USimakade wayesethi kimi: ‘Sukuma uhambe phambi kwabantu, ukuze bahambe, balidle izwe engafunga ngalo kokhokho babo ukubanika lona.’ ”
“Manje-ke, Israyeli, uSimakade uNkulunkulu wakho ufunani kuwe, na? Ukuba umesabe uSimakade uNkulunkulu wakho, uhambe ngezindlela zakhe zonke, umthande, umkhonze uSimakade uNkulunkulu wakho ngayo yonke inhliziyo yakho, nangawo wonke umphefumulo wakho,
ugcine imiyalo kaSimakade nezimiso zakhe engakuyala ngakho ngalolo lusuku ukuba kube kuhle kuwe.
“Bheka, izulu nezulu lamazulu, nomhlaba nakho konke okukuwo, kungokukaSimakade uNkulunkulu wakho.
Nokho uSimakade wanamathela kokhokho benu, wabathanda, waziqoka nezizukulwane zabo emva kwabo, yebo, wakhetha nina phakathi kwezizwe zonke, njengoba kunjalo nanamuhla.
Ngalokho niyakusoka ijwabu lenhliziyo yenu, ningabe nisaba ntamo lukhuni.
Ngokuba uSimakade uNkulunkulu wenu unguNkulunkulu wonkulunkulu, neNkosi yamakhosi, uNkulunkulu omkhulu onamandla nowesabekayo, ongakhethi buso bamuntu, nongamukeli ukufunjathiswa.
Izintandane nomfelokazi ubenzela ubulungiswa. Uyathanda umfokazi, umnika ukudla nezingubo.
Bathandeni abafokazi, ngokuba nani naningabafokazi eGibhithe.
Uyomesaba uSimakade uNkulunkulu wakho, umkhonze, unamathele kuye, ufunge igama lakhe.
Uludumo lwakho, unguNkulunkulu wakho okwenzele lezi zinto ezinkulu nezesabekayo ozibonile ngamehlo akho.
Okhokho bakho babengama-70 ngesikhathi behlela eGibhithe; manje uSimakade uNkulunkulu wakho ukwenzile waba lukhumbintethe ngangezinkanyezi zezulu.”
“Ngakho-ke uyomthanda uSimakade uNkulunkulu wakho, ugcine imithetho yakhe, izimiso zakhe, izehlulelo zakhe, nemiyalo yakhe izinsuku zonke.
Yazini namuhla ukuthi akubona abantwana benu abangazanga nabangabonanga ukufundisa kukaSimakade uNkulunkulu wenu, ubukhulu bakhe, isandla sakhe esinamandla, ukwenza kwakhe okumangalisayo,
izibonakaliso zakhe, nezenzo zakhe azenza phakathi kweGibhithe, kuFaro inkosi yaseGibhithe nakulo lonke izwe lakhe,
nalokho akwenza empini yaseGibhithe, emahhashini abo, nasezinqoleni zabo zempi, lapho enza amanzi oLwandle Lomhlanga ukuba abaminzise ngesikhathi benixosha. USimakade wababhubhisa kuze kube namuhla.
Lokho akwenza kini ehlane naze nafika kule ndawo,
nalokho akwenza kuDathani naku-Abhiramu, amadodana ka-Eliyabe kaRubeni, lapho umhlaba uvula umlomo wawo ubagwinya nabendlu yabo, amathende abo, nayo yonke imfuyo yabo eyayiphakathi kwabo bonke abakwa-Israyeli.
Ngokuba amehlo enu ayibonile yonke imisebenzi kaSimakade emikhulu ayenzileyo.
“Ngalokho-ke niyoyigcina yonke imiyalo enginiyala ngayo namuhla ukuze nibe namandla, ningene, nilidle izwe eniwelela kulo ukuba nilidle,
nokuba nandise izinsuku zenu ezweni uSimakade afunga ngalo kokhokho benu ukubanika lona nezizukulwane zabo, izwe elichichima ubisi noju.
Izwe enizongena kulo ukuba nilidle alifani neGibhithe enaphuma kulo, lapho wawuvame ukuhlwanyela khona imbewu yakho, uyinisele njengesivande semifino,
kodwa izwe eniya kulo ukuba nilidle liyizwe lezintaba nezigodi, liphuza amanzi emvula yezulu.
Liyizwe uSimakade uNkulunkulu wakho alinakekelayo; amehlo kaSimakade uNkulunkulu wakho ahlala eliqaphe njalo, kusukela ekuqaleni konyaka kuze kube sekupheleni kwawo.
“Kuyothi uma nilalela nokulalela imiyalo yami enginiyala ngayo namuhla, ukuba nimthande uSimakade uNkulunkulu wenu, nimkhonze ngayo yonke inhliziyo yenu nangawo wonke umphefumulo wenu,
ngiyolinika izwe lakini imvula ngesikhathi sayo, imvula yokuqala nemvula yakamuva, ukuba ubuthe okusanhlamvu kwakho, iwayini elisha lakho, namafutha akho.
Ngiyakunika izinkomo zakho utshani emadlelweni akho; uyodla, waneliswe.
“Qaphelani funa inhliziyo yenu ikhohliseke, niphambuke, nikhonze abanye onkulunkulu, nibakhothamele,
bese intukuthelo kaSimakade inivuthela, avale izulu, ukuze kungabi bikho mvula, izwe lingabe lisathela zithelo, niphele masinyane ezweni elihle uSimakade aninika lona.
Niyakuwabeka lawa mazwi ami enhliziyweni yenu nasemphefumulweni wenu, niwabophe abe wuphawu esandleni senu, abe yisikhumbuzo phakathi kwamehlo enu.
Niyakuwafundisa abantwana benu, ngokukhuluma ngawo, lapho uhlezi endlini yakho, nalapho uhamba endleleni, nalapho ulala, nalapho uvuka.
Uyakuwaloba ezinsikeni zomnyango wendlu yakho nasemasangweni akho
ukuba zandiswe izinsuku zakho nezinsuku zabantwana bakho ezweni uSimakade afunga kokhokho bakho ukuthi uzobanika lona, inqobo nje uma umkhathi usephezu komhlaba.
“Uma niyigcina nokuyigcina yonke le miyalo enginiyala ngayo ukuba niyenze, ukuba nimthande uSimakade uNkulunkulu wenu, nihambe ngazo zonke izindlela zakhe, ninamathele kuye,
uSimakade uyakuzixosha zonke lezi zizwe phambi kwenu, nizinqobe izizwe ezinkulu nezinamandla kunani.
Yonke indawo lapho amathe onyawo lwakho eyakunyathela khona, iyakuba ngeyenu, kusukela ehlane naseLebhanoni nasemfuleni, umfula iYufrathe, kuze kube solwandle olungasentshonalanga, iyakuba yindawo yenu.
Akuyukuba bikho muntu oyoma phambi kwenu. USimakade uNkulunkulu wenu uyakufaka uvalo nokwesaba ngani ezweni lonke eniyakunyathela kulo, njengalokhu akhuluma kini.
“Bheka, ngibeka phambi kwenu namuhla isibusiso nesiqalekiso.
Isibusiso, uma niyilalela imiyalo kaSimakade uNkulunkulu wenu enginiyala ngayo namuhla.
Isiqalekiso, uma ningayilaleli imiyalo kaSimakade uNkulunkulu wenu, kepha niphambuka endleleni enginiyala ngayo namuhla, bese nilandela abanye onkulunkulu eningabaziyo.
“Kuyothi lapho uSimakade uNkulunkulu wenu eningenisa ezweni eniya kulo ukulidla, nimemezele isibusiso nisentabeni iGerizimu nesiqalekiso nisentabeni i-Ebhali.
Lezi zindawo azingaphesheya yini kweJordani endleleni ebheke entshonalanga ezweni lamaKhanani ahlala e-Araba, maqondana neGiligali ngaseceleni kwemi-okhi eMore, na?
Ngokuba niyakuwela iJordani, ningene ukuba nilidle izwe uSimakade uNkulunkulu wenu aninika lona, niyakulidla, nihlale kulo.
Niyakuqikelela ukugcina zonke izimiso nezehlulelo engizibeka phambi kwenu namuhla.”
“Nazi izimiso nezehlulelo eniyoqikelela ukuzigcina ezweni uSimakade uNkulunkulu wokhokho benu aninika lona, ukuba nilidle zonke izinsuku zokuphila kwenu emhlabeni:
niyobhubhisa nishaye icole zonke izindawo lapho izizwe eniyakuziphuca izwe zazikhonza khona onkulunkulu bazo, ezintabeni eziphakemeyo, emagqumeni, naphansi kwayo yonke imithi eluhlaza.
Niyakudiliza ama-althare azo, niphihlize izinsika zazo, nishise ngomlilo o-Ashera bazo, ninqume izithombe ezibaziweyo zonkulunkulu bazo, nilishabalalise igama lazo kuleyo ndawo.
“Nina aniyukwenza kanjalo kuSimakade uNkulunkulu wenu.
Kepha indawo uSimakade uNkulunkulu wenu ayakuyikhetha, kuzo zonke izizwe zenu, ukuba abeke igama lakhe lihlale kuyo, leyo ndawo niyakuyifuna, niye kuyo,
niyiyise lapho iminikelo yenu yokushiswa, imihlatshelo yenu, okweshumi kwenu, umnikelo wenu wokuphakanyiswa wesandla senu, izithembiso zenu, iminikelo yenu yesihle, neyamazibulo ezinkomo nezimvu zenu.
Niyakudla lapho phambi kukaSimakade uNkulunkulu wenu, nithokoze ngakho konke enibeka isandla senu kukho, nina nabendlu yenu, uSimakade uNkulunkulu wakho anibusise ngakho.
“Aniyukuzenza zonke izinto esizenza lapha namuhla, njengoba yilowo nalowo enza akubona kulungile emehlweni akhe,
ngokuba anikafiki endaweni yokuphumula nasefeni uSimakade uNkulunkulu wenu aninika lona.
Kepha niyowela iJordani, nihlale ezweni uSimakade uNkulunkulu wenu aninika lona, libe yifa lenu. Uyakuninika ukuphumula ezitheni zenu zonke, nxazonke, futhi niyohlala nilondekile.
Kuyokuthi indawo uSimakade uNkulunkulu wenu ayakuyikhetha ukuba kuhlale kuyo igama lakhe, nikuyise lapho konke enginiyala ngakho: iminikelo yenu yokushiswa, imihlatshelo yenu, okweshumi kwenu, umnikelo wokuphakanyiswa womkhiqizo wenu, nezithembiso zenu ezikhethiweyo enizethembisa uSimakade.
Niyothokoza phambi kukaSimakade uNkulunkulu wenu, nina namadodana enu, amadodakazi enu, izinceku zenu, izincekukazi zenu, nomLevi ophakathi kwamasango enu, lokhu engenasabelo nafa elingelakhe phakathi kwenu.
Xwaya ukuba unganikeli ngeminikelo yakho yokushiswa ezindaweni zonke ozibonayo,
kodwa niyonikela ngeminikelo yenu yokushiswa endaweni uSimakade ayakuyikhetha kwesinye sezizwana zenu, nikwenze khona konke enginiyala ngakho.
“Ningahlaba, nidle inyama phakathi kwayo yonke imizi yenu njengesifiso senhliziyo yenu nanjengesibusiso uSimakade uNkulunkulu wenu aniphe sona phakathi kwamasango enu. Ongcolileyo nohlambulukileyo bayokudla kukho njengalokhu benza kweyensephe neyendluzele.
Igazi kuphela eningayikulidla, kodwa niyakulichitha emhlabathini njengamanzi.
Okweshumi kokusanhlamvu kwakho, okwewayini lakho, okwamafutha akho, okwamazibulo ezinkomo zakho, okwezimvu zakho, izithembiso ozenzile, iminikelo yakho yesihle, umnikelo wokuphakanyiswa wesandla sakho, aniyukukudla ngaphakathi kwamasango enu.
Khona niyokudla phambi kukaSimakade uNkulunkulu wenu, endaweni ayoyikhetha uSimakade uNkulunkulu wenu. Kuleyo ndawo, wena nendodana yakho, indodakazi yakho, inceku yakho, incekukazi yakho, nomLevi ohlala emzini wakho, niyothokoza phambi kukaSimakade uNkulunkulu wenu ngayo yonke imikhiqizo yenu.
Qaphela, funa ningamnakekeli umLevi zonke izinsuku zokuhlala kwenu ezweni.
“Kuyothi lapho uSimakade uNkulunkulu wenu enweba umngcele wenu njengoba ayethembisile, bese nithi: ‘Ngifuna ukudla inyama,’ njengoba inhliziyo yenu ifisa ukudla inyama, niyoyidla inyama njengokufisa kwenhliziyo yenu.
Uma indawo uSimakade uNkulunkulu wenu ayikhetha ukuba abeke kuyo igama lakhe ikude nani, niyohlaba emhlanjini wenu nasezimvini zenu aniphe zona uSimakade, njengalokhu nganiyala, niyokudla lokho phakathi kwamasango enu njengokufisa kwenhliziyo yenu.
Njengalokhu nidla insephe nendluzele, niyakukudla kanjalo. Ongcolileyo nohlambulukileyo bayakudla ngokufanayo.
Qaphelani kuphela ukuba ningalidli igazi, ngokuba igazi lingumphefumulo. Aniyukuwudla umphefumulo kanye nenyama.
Aniyukulidla, kodwa niyakulichitha emhlabathini njengamanzi.
Ningalidli ukuba kube kuhle kini nakubantwana benu emva kwenu, ngokuba niyobe nenza okulungile emehlweni kaSimakade.
“Izinto zenu ezingcwele ezingezenu nezithembiso zenu niyozithatha, niye nazo endaweni ayakuyikhetha uSimakade.
Niyonikela ngeminikelo yenu yokushiswa, inyama negazi e-althare likaSimakade uNkulunkulu wenu, igazi lemihlatshelo yenu lithelwe phezu kwe-althare likaSimakade uNkulunkulu wenu, nina nidle inyama.
Qaphelani, ukuba niwezwe wonke lawa mazwi enginiyala ngawo ukuze kube kuhle kini nakubantwana benu eniyobazala kuze kube phakade, ngokuba niyobe nenza okuhle nokulungile emehlweni kaSimakade uNkulunkulu wenu.
“Lapho uSimakade uNkulunkulu wakho esezibhubhisile izizwe eziphambi kwakho, sewuzongena ukuba uzephuce izwe, nalapho sewuzephucile izwe, wahlala kulo,
emveni kokuba sezibhujisiwe, qaphela ukuba zingabi wugibe kuwe, ngokuba ubuze ngonkulunkulu bazo, uthi: ‘Lezi zizwe bezibakhonza kanjani onkulunkulu bazo, ukuze nami ngenze kanjalo na?’
Awuyukwenza kanjalo kuSimakade uNkulunkulu wakho, ngokuba zonke izinto uSimakade azenyanyayo zizenzile lezi zizwe, zenzela onkulunkulu bazo, zibashisele ngisho amadodana namadodakazi azo emlilweni.
“Konke enginiyala ngakho, qaphelani ukuba nikwenze; aniyukuthasisela kukho, futhi aniyukunciphisa lutho kukho.”
“Uma kuba khona umphrofethi phakathi kwenu, noma ophupha amaphupho, anitshele isibonakaliso nesimangaliso,
kuthi leso sibonakaliso noma isimangaliso asishilo kini senzeke, bese ethi: ‘Masilandele abanye onkulunkulu eningabaziyo, sibakhonze,’
aniyukuwalalela amazwi alowo mphrofethi, noma lowo ophupha amaphupho, ngokuba uSimakade uNkulunkulu wenu uyakunilinga ukuba azi ukuthi niyamthanda yini uSimakade uNkulunkulu wenu ngayo yonke inhliziyo yenu nangawo wonke umphefumulo wenu, na?
“Niyolandela uSimakade uNkulunkulu wenu, nimesabe, nigcine imiyalo yakhe, nilalele izwi lakhe, nimkhonze, ninamathele kuye.
Lowo mphrofethi noma lowo mphuphi wamaphupho uyobulawa, ngokuba ukhulume okunihlubukisa kuSimakade uNkulunkulu wenu owanikhipha eGibhithe. Ngokuba nahlengwa endlini yobugqila, ukuba ningaphambukiswa endleleni uSimakade uNkulunkulu wenu aniyala ukuba nihambe ngayo. Niyobususa lobo bubi phakathi kwenu.
“Uma umfowenu, indodana kanyoko, noma indodana yakho, noma indodakazi yakho, noma umkakho ocamela esifubeni sakho, noma umngani wakho eningamathe nolimi naye ekuyenga ngasese, ethi: ‘Masihambe siyokhonza abanye onkulunkulu eningabaziyo,’ nina nokhokho benu,
onkulunkulu babantu abanizungezile, abaseduze nabakude nani, kusukela kolunye uhlangothi lomhlaba kuze kufike kolunye,
aniyukumvumela, aniyukumlalela; iso lakho aliyukumdabukela, aniyukumyeka, futhi aniyukumfihla,
kepha niyombulala impela. Nguwena oyogalela kuqala bese kulandela bonke abantu lapho ebulawa.
Niyakumkhanda ngamatshe aze afe, ngokuba uzame ukunihlubukisa kuSimakade uNkulunkulu wenu owanikhipha eGibhithe, indlu yobugqila.
Wonke u-Israyeli uyakuzwa, esabe, angaphinde enze ububi obunjengalobo obuphakathi kwenu.
“Uma uzwa kukhulunywa ngomunye wemizi yenu uSimakade uNkulunkulu wenu anipha wona ukuba nakhe kuwo, kuthiwa,
abantu abathile abonakeleyo baphumile phakathi kwenu, bahlubukisa izakhamuzi zomuzi wakubo, bathi: ‘Masihambe siyokhonza abanye onkulunkulu eningabaziyo,’
uyohlola, uphenyisise, ubuzisise. Bheka, uma kuyiqiniso ukuthi leso sinengiso senziwe phakathi kwenu,
uyozibulala ngenkemba izakhamuzi zalowo muzi, uwuchithe impela, nakho konke okuphakathi kwawo, nemfuyo yawo, ukubhubhise ngenkemba.
Yonke impango yawo uyoyiqoqela phakathi nesigcawu sawo, uwushise ngomlilo, nayo yonke impango yawo, kube ngumnikelo wokushiswa kuSimakade uNkulunkulu wakho, umuzi ube yincithakalo yaphakade, ungabe usavuselelwa.
Akuyukunamathela lutho oluqalekisiweyo esandleni sakho ukuze uSimakade aphenduke entukuthelweni yakhe evuthayo, aniphathe ngomusa, abe nesihe kini, anandise, njengalokhu afunga kokhokho benu,
uma nililalela izwi likaSimakade uNkulunkulu wenu ukuba nigcine yonke imiyalo yakhe enginiyala ngayo namuhla, nenze okulungile emehlweni kaSimakade uNkulunkulu wenu.”
“Ningabantu bakaSimakade uNkulunkulu wenu; aniyukuzisika, aniyukuwaphuca amashiya enu ngenxa yofileyo.
Ngokuba ningabantu abangcwele kuSimakade uNkulunkulu wenu. Unikhethile ukuba nibe yisizwe esiyifa lakhe phakathi kwezizwe zonke ezisebusweni bomhlaba.
“Ungayidli noma yini enengekayo.
Nazi izilwane eniyakuzidla: inkomo, imvu, imbuzi,
indluzele, insephe, inyala, impala, impalampala, iwula, negogo.
Niyakuzidla zonke izilwane ezinezinselo ezihlukene, ezinezinselo ezihlukene kabili, nezetshisayo phakathi kwezilwane.
Kepha lezi aniyukuzidla kulezo ezetshisayo nezehlukene izinselo: ikamela, unogwaja, nembila, ngokuba ziyetshisa, azehlukene izinselo; zingcolile kini,
nengulube, nakuba yehlukene izinselo, kodwa ayetshisi; ingcolile kini; aniyukuyidla inyama yazo, aniyukuzithinta izidumbu zazo.
“Kuzo zonke ezisemanzini, nazi eniyozidla: zonke ezinamaphiko nezingcwecwe.
Kepha zonke ezingenawo amaphiko nezingcwecwe aniyukuzidla; zingcolile kini.
“Niyodla zonke izinyoni ezihlambulukileyo.
Kodwa yilezi eningayukuzidla: ukhozi, inqe, ingqungqulu,
isiphungumangathi, uheshe, unhloyile ngezinhlobo zakhe,
amagwababa wonke ngezinhlobo zawo,
intshe, inkovana, inkanku, uklebe ngezinhlobo zakhe,
isikhova, umxwagele, ifukezi,
ivuba, uphalane, umphishamanzi,
unogolantethe, unozalizingwenya ngezinhlobo zakhe, uziningweni, nelulwane.
“Zonke izilwanyana ezinamaphiko zingcolile kini: aniyukuzidla.
Kepha zonke ezinamaphiko ezihlambulukileyo niyozidla.
“Aniyukuyidla ingcuba; aniyukumnika umfokazi osemzini wenu ukuba ayidle, noma nithengise ngayo kowezizwe, ngokuba nina niyisizwe esingcwele kuSimakade uNkulunkulu wenu. Aniyukupheka izinyane lembuzi ngobisi lukanina.”
“Uyonikela okweshumi kwezithelo zonke zembewu yakho, ezivela ensimini unyaka nonyaka.
Uyokudla phambi kukaSimakade uNkulunkulu wakho endaweni ayoyikhetha ukuba igama lakhe lihlale kuyo, okweshumi kokusanhlamvu kwakho, okwewayini lakho, okwamafutha akho, okwamazibulo ezinkomo zakho, nokwezimvu zakho, ukuze ufunde ukumesaba njalo uSimakade uNkulunkulu wakho.
Uma indlela iyinde kakhulu kuwe ukuba ungakwazi ukukuthwala, nendawo lapho uSimakade uNkulunkulu wakho akhethe ukubeka kuyo igama lakhe ikude kakhulu kuwe, lapho uSimakade uNkulunkulu wakho ekubusisa,
uyakukwenana ngemali, uyisonge imali esandleni sakho, uye endaweni uSimakade uNkulunkulu wakho ayoyikhetha.
Uyothenga ngaleyo mali noma yini inhliziyo yakho eyithandayo: izinkabi, izimvu, iwayini, uphuzo olunamandla, noma yini efunwa yinhliziyo yakho, uyodla lapho phambi kukaSimakade uNkulunkulu wakho, uthokoze, wena nabendlu yakho;
nomLevi ophakathi kwamasango akho awuyukumlahla, ngokuba akanasabelo nafa nawe.
“Ngasekupheleni kweminyaka emithathu uyokhipha njalo konke okweshumi kwezithelo zakho ngalowo nyaka, nikugcine emizini yenu;
nomLevi, lokhu engenasabelo nafa nawe, umfokazi, intandane, nomfelokazi, abasemizini yenu. Bayoza, badle, basuthe ukuze uSimakade uNkulunkulu wenu anibusise emsebenzini wonke wesandla senu eniwenzayo.”
“Ngasekupheleni kweminyaka eyisikhombisa niyokwenza uyekelelo.
Nansi indlela eniyolwenza ngayo: yilowo nalowo otsheleka umakhelwane noma umfowabo okuthile, uyokuyeka angabe esakubiza kuye, ngokuba kuyobe sekumenyezelwe uyekelelo lukaSimakade.
Ningakubiza kowezizwe, kodwa noma yini eyakho ekulowo wezwe lakini, uyakuyiyekelela.
Ngaleyo ndlela akuyukuba bikho ontulayo phakathi kwenu. USimakade uNkulunkulu wenu impela uyonibusisa ezweni aninika lona ukuba nilidle, libe yifa lenu,
uma nililalela ngempela izwi likaSimakade uNkulunkulu wenu, niyigcina yonke le miyalo enginiyala ngayo namuhla.
USimakade uNkulunkulu wenu uyonibusisa njengokwethembisa kwakhe, niyotsheleka izizwe eziningi, kodwa nina ningatsheleki lutho kuzo. Niyobusa izizwe eziningi, kepha zona aziyukunibusa.
“Uma kukhona ompofu phakathi kwenu, engomunye wabafowenu, ehlala komunye wemizi esezweni lakini uSimakade uNkulunkulu wenu aninika lona, aniyukuyenza lukhuni inhliziyo yenu; aniyukumncisha lutho kweninakho umfowenu ontulayo.
Kepha niyomvulela isandla senu, umtsheleke ngokungathi uyamupha okwanele izidingo zakhe nokweswela kwakhe.
Qaphelani ukuba ningabi nomcabango omubi enhliziyweni yenu, nithi: ‘Unyaka wesikhombisa, unyaka woyekelelo ususondele,’ bese nimbheka kabi umfowenu ompofu, ningabe nisamnika lutho. Kuyothi lapho ekhala kuSimakade ngani, lokho kube yisono sakho.
Niyomnika ngokwevile, nangenhliziyo ekhululekile ngesikhathi nimnika, ngokuba ngenxa yalokho uSimakade uNkulunkulu wakho uyowubusisa wonke umsebenzi wenu, nakho konke enibeka isandla senu kukho.
Abampofu bayohlala bekhona ezweni; ngakho-ke ngiyaniyala, ngithi: ‘Niyomvulela nokumvulela umfowenu isandla senu ngokuphana, abampofu bakini nabasweleyo bakini ezweni lakini.’
“Uma umfowenu, umHebheru noma umHebherukazi, ezithengisa kini, ukuze anikhonze iminyaka eyisithupha, ngonyaka wesikhombisa niyakumyekela ukuba ahambe.
Uyakumyekela ukuba ahambe kodwa awuyukumhambisa elambatha.
Uyomupha kuvame izimvu, nanoma yini evela esibuyeni sakho, nasesikhamweni sakho sewayini; njengalokhu uSimakade uNkulunkulu wakho ekubusisile, wenze kanjalo nakuye.
Uyokhumbula ukuthi wawuyisigqila eGibhithe, uSimakade uNkulunkulu wakho wakuhlenga, ngakho-ke ngiyakuyala ngalokhu namuhla.
“Kuyothi uma ethi kuwe: ‘Angizukusuka kuwe,’ ngoba ekuthanda wena nendlu yakho, futhi ehlale kahle nawe,
uyothatha usungulo umbhoboze indlebe esesemnyango; abe yinceku yakho kuze kube phakade. Uyokwenza kanjalo nasencekukazini yakho.
“Ungakuthathi sengathi kungukucindezelwa nxa usumdedela ukuba ahambe, ngokuba ukukhonze iminyaka eyisithupha, umnika imali yomqashwa. USimakade uNkulunkulu wakho uyokubusisa kukho konke okwenzayo.”
“Wonke amazibulo amaduna ayozalwa ezinkomeni zakho nasezimvini zakho uyowangcwelisela uSimakade uNkulunkulu wakho; awuyukusebenza ngezibulo lezinkomo zakho, awuyukuligunda izibulo lezimvu zakho.
Wena nabendlu yakho, niyolidla phambi kukaSimakade uNkulunkulu wakho, iminyaka ngeminyaka, endaweni uSimakade ayakuyikhetha.
Uma linesici, liqhuga, noma liyimpumputhe, noma ngabe linasici sini, awuyukunikela ngalo kuSimakade uNkulunkulu wakho.
Uyolidlela emasangweni akho, ongcolileyo nohlambulukileyo ngokufanayo njengoba kwenzeka ensepheni nasendluzeleni.
Igazi lalo kuphela ongeyukulidla; uyolithela emhlabathini njengamanzi.”
“Gcina inyanga ka-Abibi, wenze iphasika kuSimakade uNkulunkulu wakho, ngokuba ngenyanga ka-Abibi, uSimakade uNkulunkulu wakho wakukhipha eGibhithe ebusuku.
Uyonikela ngephasika kuSimakade uNkulunkulu wakho ezimvini nasezinkomeni endaweni uSimakade ayoyiqokela ukuba kuhlale kuyo igama lakhe.
Awuyukudla sinkwa esivutshelweyo kanye nalo; izinsuku eziyisikhombisa uyakudla isinkwa esingenamvubelo kanye nalo, isinkwa senhlupheko, ngokuba waphuma eGibhithe ngokushesha ukuba ulukhumbule usuku owaphuma ngalo eGibhithe zonke izinsuku zokuphila kwakho.
Akuyukubonakala mvubelo kuwe endaweni yakho yonke, izinsuku eziyisikhombisa. Akuyukuba bikho nyama yomhlatshelo eyakusala ngosuku lokuqala kusihlwa, kuze kube ngakusasa.
“Iphasika awuyukulihlabela emizini yakho ewayinikwa nguSimakade uNkulunkulu,
kodwa niyokulihlabela endaweni uSimakade uNkulunkulu wenu ayoyiqokela ukuba igama lakhe lihlale kuyo. Niyolihlabela lapho iphasika ekushoneni kwelanga kusihlwa, ngesikhathi owaphuma ngaso eGibhithe.
Uyolipheka, ulidle endaweni uSimakade uNkulunkulu wakho ayoyikhetha, bese uphenduka ekuseni ubuyela emathendeni akho.
Izinsuku eziyisithupha uyokudla isinkwa esingenamvubelo. Ngosuku lwesikhombisa, kuyoba ngumhlangano ozothileyo kuSimakade uNkulunkulu wakho; awuyukwenza msebenzi ngalo.
“Uyozibalela amasonto ayisikhombisa; kusukela esikhathini oqale ngaso ukuvuna okusanhlamvu, uqale ubale amasonto ayisikhombisa.
Uyogcina umkhosi wamasonto kuSimakade uNkulunkulu wakho ngesipho somnikelo wesihle, wesandla sakho, oyakuwunikela njengalokhu uSimakade uNkulunkulu wakho ekubusisile.
Uyokwenama phambi kukaSimakade uNkulunkulu wakho, wena nendodana yakho, indodakazi yakho, inceku yakho, incekukazi yakho, umLevi ohlala emzini wakho, umfokazi, intandane, nomfelokazi ohlala phakathi kwenu, uyokwenza lokhu endaweni uSimakade uNkulunkulu wakho ayakuyikhetha ukuba igama lakhe lihlale khona.
Uyokhumbula ukuthi wawuyisigqila eGibhithe, uqaphele ukuba uzilondoloze, futhi uzenze lezi zimiso.
“Uyogcina uMkhosi Wamadokodo izinsuku eziyisikhombisa, emveni kokubutha okwesibuya sakho nokwesikhamo sakho,
wename ngomkhosi wakho, wena nendodana yakho, indodakazi yakho, inceku yakho, incekukazi yakho, umLevi, umfokazi, intandane, nomfelokazi ophakathi kwamasango akho.
Uyogcina umkhosi kuSimakade uNkulunkulu wakho izinsuku eziyisikhombisa, endaweni uSimakade ayoyikhetha, ngokuba uSimakade uNkulunkulu wakho uyokuwubusisa wonke umkhiqizo wakho, nawo wonke umsebenzi wezandla zakho, uthokoze kakhulu.
“Bonke abesilisa okanye nabo bayakuvela kathathu ngonyaka phambi kukaSimakade uNkulunkulu wakho, endaweni ayoyiqoka: ngoMkhosi Wesinkwa Esingenamvubelo, ngoMkhosi Wamasonto, nangoMkhosi Wamadokodo; abayukuza phambi kukaSimakade bengaphethe lutho olungumnikelo ezandleni.
Yilowo nalowo uyokhipha ngokwamandla akhe, nanjengokwesibusiso uSimakade uNkulunkulu wakho amuphe sona.”
“Uyozikhethela abehluleli nezinduna emizini yakho yonke uSimakade uNkulunkulu wakho akunika yona ngokwezizwe zakho. Bayokwehlulela abantu ngokwehlulela okulungileyo.
Awuyukuhlanekezela isehlulelo, ungakhethi buso bamuntu, ungafunjathiswa sipho, ngokuba isipho siyawaphuphuthekisa amehlo ohlakaniphileyo, siphendukezela amazwi olungileyo.
Uyokwenza ubulungiswa kuphela ukuze uphile, ulidle izwe uSimakade uNkulunkulu wakho akunika lona.”
“Ungazigxumekeli insika ka-Ashera yanoma luhlobo luni lwesihlahla eceleni kwe-althare likaSimakade uNkulunkulu wakho oyakuzakhela lona.
Ungazimiseli insika eyoba yisinengiso kuSimakade uNkulunkulu wakho.”
“Ungamhlabeli uSimakade uNkulunkulu wakho inkomo noma imvu enesici, enokuthile okubi, ngokuba lokho kuyisinengiso kuSimakade uNkulunkulu wakho.
Uma komunye wemizi yakho owawunikwa nguSimakade uNkulunkulu wakho, kutholakala owesilisa noma owesifazane owenza okubi emehlweni kaSimakade uNkulunkulu wakho, ngokweqa isivumelwano sakhe,
ahambe, akhonze abanye onkulunkulu, akhuleke kubo, noma kungaba yilanga, yinyanga, noma yibandla lezulu, engingayalanga ngakho ukuba kukhonzwe,
bese ubikelwa ngakho, uzwe, ubuzisise ngakho, uthole ukuthi kuyiqiniso, leyo nto enjalo eyisinengiso yenziwe kwa-Israyeli,
lowo wesilisa noma wesifazane uyomkhiphela ngaphandle komuzi lokhu enzile into embi, umkhande ngamatshe, aze afe.
Ngobufakazi bofakazi ababili noma abathathu lowo ofanele ukufa, uyakubulawa. Kodwa ngobufakazi bomuntu oyedwa, akayukubulawa.
Yilabo ofakazi abayoqala ukumkhanda ngamatshe, bese kulandela abantu. Uyobukhipha kanjalo ububi phakathi kwakho.”
“Uma kuba khona indaba okumele uyehlulele, kodwa ikwehlule ukuyehlulela, kungaba iphakathi kwegazi nokuphathelene nalo, phakathi kwecala nokuphathelene nalo, ukushaya nokulimaza, kuyizindaba zokuphikisana phakathi kwamasango akho, ubosuka uye endaweni uSimakade uNkulunkulu wakho ayoyikhetha.
Uye kubaphristi bamaLevi, nakumehluleli oyakuba khona ngalezo zinsuku, ukuze bakwazise isinqumo sokwehlulela.
Ubokwenza njengalokhu benqumile, wenze lokho abayokutshela khona kuleyo ndawo uSimakade ayoyikhetha, uqaphele ukukwenza konke lokho abakufundisa khona.
Wenze njengezwi lomthetho abayakukufundisa lona, nanjengesehlulelo abayakukutshela sona. Ungachezukeli ngakwesokunene noma ngakwesokhohlo ekwehluleleni kwabo.
Umuntu oziqhenyayo, ongafuni ukulalela umphristi omiyo okhonza phambi kukaSimakade uNkulunkulu wakho, noma umehluleli, lowo muntu umelwe ngukufa; wena ukhiphe ububi kwa-Israyeli.
Bonke abantu bayakuzwa, besabe, bangabe besalokotha benze ngaleyo ndlela.
“Lapho usufikile ezweni uSimakade uNkulunkulu wakho akunika lona ukuba ulidle, uhlale kulo, bese uthi: ‘Ngizozibekela inkosi ingibuse njengazo zonke izizwe ezingizungezile,’
uyombeka nokumbeka akubuse, uSimakade uNkulunkulu wakho ayakumkhetha; uyobeka omunye wabafowenu abe yinkosi, akubuse, ukuze ungabeki owezizwe, ongesiye umfowenu.
Kodwa akumele abe namahhashi amaningi, futhi angababuyiseli abantu eGibhithe, ukuze athole amahhashi amaningi. Ngokuba uSimakade ushilo kini, wathi: ‘Anisayukubuyela ngaleyo ndlela.’
Akayukuthola abafazi abaningi, funa inhliziyo yakhe ihlubuke, futhi angabi nesiliva negolide eliningi.
“Kuyothi lapho ehlala esihlalweni sakhe sobukhosi, azilobele ifuzela lalo mthetho, ethathisela emqulwini okubaphristi abangabaLevi.
Liyohlala kuye, alifunde zonke izinsuku zokuphila kwakhe, ukuze afunde ukumesaba uSimakade uNkulunkulu wakhe. Awagcine wonke amazwi omthetho kaSimakade, enze lezi zimiso,
angaziboni engcono kunabafowabo, angaphambuki emiyalweni aye ngakwesokunene noma ngakwesokhohlo, ukuze zande izinsuku zakhe embusweni wakhe, yena nabantwana bakhe, phakathi kuka-Israyeli.”
“Abaphristi abangabaLevi, sonke isizwana sakwaLevi asiyukuba nasabelo nafa no-Israyeli. Sona siyakudla iminikelo yomlilo kaSimakade nefa lakhe.
Abayukuba nafa phakathi kwabafowabo; uSimakade uyifa lakhe, njengalokhu eshilo kuye.
“Lokhu kuyoba yilungelo labaphristi elivela kubantu abanikela ngomhlatshelo, noma yinkomo noma yimvu; bayonika umphristi umkhono, imihlathi yomibili nenanzi.
Uyomnika futhi ulibo lokusanhlamvu kwakho, olwewayini lakho, olwamafutha akho amasha, nezandulela zoboya bezimvu zakho.
Ngokuba uSimakade uNkulunkulu wakho ukhethe yena kuzo zonke izizwe zakini ukuba ame, akhonze egameni likaSimakade, yena namadodana akhe, kuze kube phakade.
“Uma umLevi eshiya noma yimuphi wemizi yenu yonke yakwa-Israyeli, lapho kade ehlala khona, aye endaweni ayakuyikhetha uSimakade,
uyokhonza egameni likaSimakade uNkulunkulu wakhe njengabo bonke abafowabo, abaLevi, abama lapho phambi kukaSimakade, bemkhonza.
Uyodla isabelo esilingana nesabanye, ngisho noma ebethole okuthile ngokuthengisa ngefa likayise.”
“Kuyothi nxa usufike ezweni uSimakade uNkulunkulu wakho akunika lona, ungalokothi ufunde ukwenza izinengiso njengalabo bezizwe.
Makungafunyanwa muntu phakathi kwenu onikela ngendodana yakhe noma ngendodakazi yakhe ngokuyidabulisa emlilweni, noma umbhuli, ohlola imihlola, owenza imilingo, noma umlumbi,
owenza iziphonso, othinta imimoya yabangasekho, nobiza akhuphule imimoya yamadlozi.
Yilowo nalowo owenza lezo zinto uyisinengiso kuSimakade, ngenxa yalezo zinengiso, uSimakade uNkulunkulu wakho wazixosha lezo zizwe phambi kwakho.
Mawungabi nacala kuSimakade uNkulunkulu wakho.
“Lezo zizwe oyoziphuca izwe lazo ziyabalalela abahlola imihlola nezangoma, kodwa wena uSimakade uNkulunkulu wakho akakuvumelanga ukwenza kanjalo.
USimakade uNkulunkulu wakho uyokuvusela umphrofethi onjengami phakathi kwakho, kubafowenu; niyomlalela yena,
njengakho konke owakucela kuSimakade uNkulunkulu wakho eHorebhe ngosuku lomhlangano, wathi: ‘Mangingabe ngisalizwa izwi likaSimakade uNkulunkulu wami, nalo mlilo omkhulu kangaka mangingabe ngisawubona, funa ngife.’
“USimakade wayesethi kimi: ‘Benze kahle ngalokho abakukhulumile.
Ngizobavusela umphrofethi onjengawe phakathi kwabafowabo, ngibeke amazwi ami emlonyeni wakhe, uyobatshela konke engimyala ngakho.
Yilowo nalowo ongayukuwalalela amazwi ami ayowakhuluma eGameni lami, Mina ngiyobheka ukuba aziphendulele ngalokho.
Kepha umphrofethi oyozitshela ukuthi ukhuluma izwi eGameni lami, ngibe ngingamyalanga ukuba akhulume, noma okhuluma egameni labanye onkulunkulu, lowo mphrofethi uyakufa.’
“Ungasho enhliziyweni yakho, uthi: ‘Siyakulazi kanjani izwi uSimakade angalikhulumanga, na?’
“Uma umphrofethi ekhuluma egameni likaSimakade, leyo nto ingenzeki, nezwi alikhulumile lingafezeki, lelo lizwi kalikhulunywanga nguSimakade, kodwa ngumphrofethi ozikhulumele nje lokho, ezigabisa; ungamesabi.”
“Kuyothi lapho uSimakade uNkulunkulu wakho esezishabalalisile izizwe ezizwe lazo uSimakade uNkulunkulu wakho akunika lona, wena uzixoshe, bese uhlala emizini yazo nasezindlini zazo.
Uyozehlukanisela imizi emithathu phakathi nezwe lakho uSimakade uNkulunkulu wakho akunika lona ukuba ulidle.
Uyolungisa indlela, wehlukanise kathathu izifunda zezwe lakini uSimakade uNkulunkulu wakho akunika lona ukuba libe yifa, ukuze bonke ababulali babalekele lapho.
“Kuyothi uma umbulali ebalekela khona, aphile: yilowo nalowo oyobulala umakhelwane wakhe engaqondile, futhi ebengamzondi phambilini,
nomuntu oyohamba nomngani wakhe baye ehlathini ukuyogawula imithi, kuthi esagawula, kuphume insimbi emphinini wembazo imshaye umakhelwane wakhe, afe, lowo muntu uyobalekela komunye wale mizi.
Kungenzeka umphindiseli wegazi amlandele umbulali esagcwele intukuthelo enhliziyweni yakhe, amfice, ngoba umuzi ukude, amshaye aze afe, noma ebengafanele ukufa, lokhu ebengazange amzonde phambilini.
Ngalokho ngiyakuyala ngithi: ‘Uyakuzehlukanisela imizi emithathu.’
“Uma uSimakade uNkulunkulu wakho eyandisa indawo yakho, njengalokhu ayefungile kokhokho bakho, akunike lonke izwe ethembisa ukulinika okhokho bakho,
uyoyigcina yonke le miyalo engikuyala ngayo namuhla ukuba uyenze, ukumthanda uSimakade uNkulunkulu wakho, ukuhamba nsuku zonke ngezindlela zakhe, uyozithasiselela futhi ngeminye imizi emithathu ngaphezu kwalena emithathu ekhona,
ukuze igazi lomuntu ongenacala lingachithwa phakathi kwezwe lakini uSimakade uNkulunkulu wakho akunika lona ukuba libe yifa lakho, ngaphandle kwalokho, uyothwala icala legazi.
“Kepha uma umuntu ezonda umakhelwane wakhe, amlalele unyendle, amvukele, amshaye ambulale, abalekele komunye wale mizi,
amalunga akulowo muzi ayothumela, alandwe lapho, amnikele esandleni somphindiseli wegazi ukuba abulawe.
Iso lakho aliyukumhawukela, kepha uyolisusa igazi elingenacala kwa-Israyeli ukuba kube kuhle kuwe.”
“Awuyukuwugudlula umngcele kamakhelwane wakho owamiswa ngokhokho, ukuba ube yindawo yefa lakho oyakulidla ezweni uSimakade uNkulunkulu wakho akunika lona ukuba ulidle.”
“Ubufakazi obuyokwethulwa ngumuntu oyedwa abunakumcindezela umuntu ngobubi, ngesono, noma nangasiphi isono one ngaso. Kodwa ngubufakazi bofakazi ababili noma abathathu obuyoyenza indaba ime iqine.
“Uma ufakazi wamanga emvukela umuntu, afakaze ngaye ngokubi,
bobabili labo bantu abaxabeneyo bayokuma phambi kukaSimakade, naphambi kwabaphristi nabehluleli abayobe bekhona ngaleso sikhathi.
Abehluleli bayophenyisisa; bheka, uma ufakazi engufakazi mbumbulu obefakaza amanga ngomuntu wezwe lakubo,
uyokwenza kuye lokho abehlose ukukwenza kumuntu wezwe lakubo; uyobususa kanjalo ububi phakathi kwenu.
Abaseleyo bayozwa, besabe, bangabe besabenza ububi obunjalo phakathi kwenu.
Iso lakho aliyukuhawukela; makube ngukuphila ngokuphila, iso ngeso, izinyo ngezinyo, isandla ngesandla, unyawo ngonyawo.”
“Nxa uphuma uyokulwa nezitha zakho, bese ubona amahhashi, izinqola, nabantu abaningi kunawe, ungabesabi, ngokuba uSimakade uNkulunkulu wakho unawe, Yena owakukhuphula eGibhithe.
Kuyothi lapho nisondela empini, umphristi afike akhulume kubantu,
athi kubo: ‘Yizwa, Israyeli! Namuhla nisondela empini ukuhlasela izitha zenu; inhliziyo yenu mayingadangali, ningesabi, ningaqhaqhazeli, ningabi natwetwe phambi kwazo.
USimakade uNkulunkulu wakho nguye ohamba nani, anilwele nezitha zenu ukuze aniphe ukunqoba.’
“Izinduna ziyothi kubantu: ‘Iyiphi indoda eyakhe indlu entsha engakayivuli, na? Mayihambe, ibuyele endlini yayo, funa ifele empini, bese enye indoda isale iyivula.
Iyiphi indoda etshale isivini engakazidli izithelo zaso, na? Mayihambe, ibuyele endlini yayo, funa ifele empini, bese enye indoda isidla.
Ngumuphi umuntu onengoduso angakayithathi, na? Makahambe, abuyele endlini yakhe, funa afele empini, bese ithathwa ngomunye umuntu.’
Izikhulu ziyokhuluma futhi kubantu, zithi: ‘Ngumuphi umuntu owesabayo, ozizwa entekenteke enhliziyweni, na? Makahambe, abuyele endlini yakhe, funa izinhliziyo zabafowabo zibe ntekenteke njengenhliziyo yakhe.’
Kuyothi lapho izikhulu seziqedile ukukhuluma kubantu, bese zikhetha izinduna ezizohola amabutho.
“Kuyothi lapho ususondele emzini oyolwa nawo, umemezele ukuthula kuwo.
Kuthi uma impendulo kungeyezwi lokuthula, ukwemukela, abantu bonke abayotholakala kuwo bayoba yizisebenzi zakho ngempoqo, bakukhonze.
Kepha uma nawe ungafuni ukwenza ukuthula, kodwa uzimisele ukulwa, uyokuwuhlasela, uwubhubhise.
USimakade uNkulunkulu wakho uyowunikela esandleni sakho, wena uyobhubhisa abesilisa bawo ngenkemba.
Kodwa abesifazane, abantwana, izinkomo, nakho konke okusemzini, yonke impango yawo, uyothatha khona kuphela kube ngokwakho, uyakuyidla impango yezitha zakho, uSimakade uNkulunkulu wakho akunike yona.
Uyokwenza kanjalo kuyo yonke imizi ekude nawe, engesiyo imizi yalezi zizwe.
“Kepha ngemizi yalezo zizwe, uSimakade uNkulunkulu wakho akunika yona njengefa lakho, awuyukusindisa lutho oluphefumulayo kuyo.
Uyoyibhubhisa impela: uwabhubhise amaHithi, ama-Amori, amaKhanani, amaPherizi, amaHivi, namaJebusi, njengalokhu uSimakade uNkulunkulu wakho ekuyalile,
ukuze banganifundisi ukwenza zonke izinengiso zabo abazenzele onkulunkulu babo, bese nona kuSimakade uNkulunkulu wenu.
“Uma uvimbezela umuzi isikhathi eside ulwa nawo ukuze uwudle, awuyukuzicekela phansi izihlahla ngokuzigawula ngezembe, ngokuba uyakudla kuzo; ungazigawuli, ngokuba isihlahla sasendle singumuntu yini ukuba ungaze usihlasele, na?
Izihlahla ozaziyo ukuthi aziyizo ezezithelo ezidliwayo, uyakuzibhubhisa, uyakuzigawula, wakhe ngazo izinqaba ngasemzini olwa nawe, uze uwunqobe.”
“Uma kutholakala umuntu obulewe ezweni akunika lona uSimakade uNkulunkulu wakho ukuba ulidle, edindilize endle, kungaziwa ukuthi ubulewe ngubani;
izingwevu zakini nabehluleli bakini bayophuma, amabanga ukuya emizini ezungeze obuleweyo.
Kuyothi umuzi oseduze nobuleweyo, amalunga akulowo muzi athathe ezinkomeni isithole esingakaze siboshelwe, sindonse ijoka.
Amalunga alowo muzi ayokwehlisela isithole esigodini esinomfudlana ogelezayo, esingakaze silinywe noma kutshalwe kuso, bese ephula intamo yesithole khona lapho esigodini.
Abaphristi, amadodana kaLevi, bayosondela, ngokuba uSimakade uNkulunkulu wakho ubakhethile ukuba bamkhonze, babusise egameni likaSimakade; yibona abayokhipha isinqumo mayelana nakho konke ukuxabana nokulwa.
Wonke amalunga alowo muzi oseduze nalapho kubulawelwe khona lowo muntu, ayogeza izandla zawo phezu kwesithole esephulwe intamo esigodini.
Ayofakaza athi: ‘Izandla zethu azilichithanga leli gazi, namehlo ethu awakubonanga lokhu.
Simakade, thethelela abantu bakho, u-Israyeli, obahlengileyo. Susa igazi elingenacala phakathi kwabantu bakho, u-Israyeli,’ ngakho bayothethelelwa icala legazi.
Uyolisusa kanjalo-ke igazi elingenacala phakathi kwakho, uyokwenza okulungile emehlweni kaSimakade.”
“Kuyothi lapho uphuma uya empini, uSimakade uNkulunkulu wakho azinikele izitha zakho ezandleni zakho, uzithathe, uzithumbe.
Uma ubona phakathi kwabathunjwa besifazane owesifazane omuhle, ohunga inhliziyo yakho, ufune ukumthatha abe ngumkakho,
uyomyisa ekhaya lakho; uyakuphuca ikhanda lakhe, anqume izinzipho zakhe,
akhumule izingubo zakhe zokuthunjwa; uyohlala endlini yakho, alilele uyise nonina inyanga yonke, andukuba uye kuye ulale naye, ube yindoda yakhe, yena abe ngumkakho.
Kepha uma ungenelisekile ngaye, uyomkhulula ahambe aye lapho ethanda ukuya khona; impela awuyukuthengisa ngaye ngemali, awuyukumphatha njengesigqila, ngokuba umthele ngehlazo, walala naye.”
“Uma indoda inabafazi ababili, omunye eyintandokazi, omunye eyisaliwakazi, bayizalele amadodana, bese kuthi indodana eyizibulo ibe ngeyalowo oyisaliwakazi,
kuyothi mhla ehlukanisela amadodana akhe ifa analo, ngeke akwazi ukwenza indodana yentandokazi ibe yizibulo phezu kwendodana yesaliwakazi, okuyiyona eyizibulo.
Kodwa uyokuvuma obala ukuthi indodana yesaliwakazi yiyo eyizibulo ngokuyinika isabelo esiphindiweyo sakho konke anakho, ngokuba yiyona engukuqala kwamandla akhe; ilungelo lobuzibulo lingelayo.”
“Uma umuntu enendodana enenkani, ehluphayo, engalilaleli izwi likayise noma elikanina, engalaleli noma beyiyala,
uyise nonina bayoyibamba, bayiyise kumalunga omuzi wakubo nasesangweni lakubo.
Bathi kumalunga omuzi: ‘Le ndodana yethu inenkani, iyahlupha, ayilaleli izwi lethu; iyisiminzi nesidakwa.’
Onke amadoda omuzi wakubo ayoyikhanda ngamatshe ize ife, uyobususa kanjalo-ke ububi phakathi kwakho, wonke u-Israyeli uyozwa, esabe.”
“Uma umuntu onile efanelwe wukufa, uyobulawa, aphanyekwe emthini.
Isidumbu sakhe asiyukuhlala ubusuku bonke emthini, kodwa uyomngcwaba impela ngalolo lusuku, ukuze isiqalekiso sikaNkulunkulu sibe phezu kophanyekiweyo, ungalingcolisi izwe lakini uSimakade uNkulunkulu wakho akunika lona ukuba libe yifa lakho.”
“Awuyukuyiyekela inkabi yomfowenu noma imvu yakhe iduka, ushaye sengathi awuziboni, kodwa uyozibuyisela nokuzibuyisela kumfowenu.
Uma umfowenu engekho eduze nawe futhi ungamazi, uyoziyisa endlini yakho zibe kuwe, aze umfowenu azifune kuwe, bese uzibuyisela kuye.
Uyokwenza kanjalo ngembongolo yakhe, ngezingubo zakhe, nangazo zonke izinto zomfowenu ezimlahlekele, wena wazithola, awunakukubalekela lokho.
“Awuyukubona imbongolo yomfowenu noma inkabi yakhe iwile endleleni, bese wena ungenzi lutho; uyomsiza impela ukukuvusa.
“Owesifazane akanakugqoka izinto zabesilisa, nowesilisa makangayigqoki ingubo yowesifazane, ngokuba yilowo nalowo owenza lokho uyisinengiso kuSimakade uNkulunkulu wakho.”
“Uma uzithela esidlekeni senyoni endleleni, siphambi kwakho emithini noma siphansi, sinamaphuphu noma amaqanda, unina efukamele amaphuphu noma amaqanda, awuyukumthatha unina namaphuphu.
Kepha uyomyeka unina ukuba asuke, bese wena uthatha amaphuphu ukuze kube kuhle kuwe, zande izinsuku zakho.
“Lapho wakha indlu entsha, uyokwenza umpheme ophahleni lwayo ukuze ungazethwesi icala legazi uma umuntu ewa lapho.
“Awuyukutshala esivinini sakho izinhlobo ezimbili ezingafani zembewu, funa imbewu oyitshalile nesivuno sesivini sakho kube ngcwele.
“Awuyukulima ngenkabi iboshelwe nembongolo.
“Awuyukugqoka ingubo enezinhlobonhlobo zezintanjana, uboya bezimvu obuhlanganiswe nelineni.
“Uyozenzela izinsephe emachosheni amane esembatho sakho osembathayo.”
“Uma indoda ithatha intombi iyigane, ilale nayo, bese iyayizonda,
iyisole ngezinto eziyihlazo, ihlambalaze igama layo, ithi: ‘Ngamthatha lo wesifazane; kwathi ngisondela kuye, ngathola ukuthi akaseyiyo intombi,’
uyise nonina bentombi bayoyithatha intombi, balethe ubufakazi bokuthi ibiyintombi nto, phambi kwamalunga omuzi esangweni.
Uyise wentombi uyothi kumalunga: ‘Ngaganisela lo muntu indodakazi yami ukuba ibe ngumkakhe, manje useyayala;
useyisola ngezinto eziyihlazo, uthi: “Angiyitholanga indodakazi yenu iyintombi,” ngakho nabu ubufakazi bokuthi indodakazi yami ibiyintombi.’ Bayokwendlala ingubo phambi kwamalunga omuzi.
Amalunga omuzi ayoyithatha indoda, ayijezise,
ayihlawulise amashekeli esiliva ayikhulu, awanike uyise wentombi, ngokuba ukhulume kabi ngentombi yakwa-Israyeli. Iyakuba ngumkakhe; akayukuyilahla, zonke izinsuku zokuphila kwakhe.
“Nokho uma lokho kuyiqiniso, bungatholakalanga ubufakazi bokuthi ibiseyintombi,
bayoyikhiphela ngasemnyango wendlu kayise intombi, amadoda omuzi ayikhande ngamatshe ize ife, ngokuba yenze ihlazo kwa-Israyeli, yafeba, yahlaza indlu kayise. Uyobukhipha kanjalo ububi phakathi kwakho.
“Uma kutholakala indoda ilele nowesifazane ogane enye indoda, bayobulawa bobabili, indoda ebilele nowesifazane uqobo ukuze kususwe ububi kwa-Israyeli.
“Uma kukhona intombazana eyintombi, nokho esiyingoduso yendoda, bese umuntu eyithola emzini, alale nayo,
bobabili niyobakhiphela ngasesangweni lalowo muzi, nibakhande ngamatshe baze bafe, intombi, ngokuba ayikhalanga emzini yafuna usizo, nendoda, ngokuba imonile umfazi womakhelwane wayo. Uyobukhipha kanjalo ububi phakathi kwakho.
“Uma indoda ithola endle intombi eyingoduso, bese iyibamba, ilale nayo, kuyokufa kuphela indoda elale nayo.
Ungayenzi lutho intombi, ngokuba ayinasono esifanele ukuba ife, lokhu leyo ndaba ifana nokuthi umuntu avukele umakhelwane wakhe, ambulale,
ngoba indoda iyifumane endle; noma intombi eyingoduso ikhalile, kodwa bekungekho muntu obengayihlenga.
“Uma indoda ithola intombi engesiyo ingoduso, iyibambe, ilale nayo, bese bebanjwa oqotsheni,
indoda ebilale nentombi iyonika uyise wentombi amashekeli esiliva angama-50, bese iba ngumkayo, ngokuba iyonile. Ayiyukuyilahla, zonke izinsuku zokuphila kwayo.
“Umuntu akakwazi ukuthatha umkayise, ambule ingubo kayise.”
“Olimele emasendeni noma onqunywe umphambili akanakungena ebandleni likaSimakade.
“Umntwana wesihlahla akanakungena ebandleni likaSimakade, yebo, ngisho isizukulwane sakhe asiyukungena ebandleni likaSimakade kuze kube sesizukulwaneni seshumi.
“Owakwa-Amoni nowakwaMowabi abayukungena ebandleni likaSimakade, yebo, akukho namunye kubo oyakungena ebandleni likaSimakade kuze kube sesizukulwaneni seshumi, kuze kube phakade.
Ngokuba abanihlangabezanga ngesinkwa nangamanzi endleleni lapho niphuma eGibhithe, nokuthi baqasha uBhileyamu, indodana kaBheyori wasePhethori e-Aramu Naharayimi, ukuba amelane nawe, akuqalekise.
Nokho uSimakade uNkulunkulu wakho akamlalelanga uBhileyamu, kodwa uSimakade uNkulunkulu wakho waphendula isiqalekiso saba yisibusiso kuwe, ngokuba uSimakade uNkulunkulu wakho wakuthanda.
Awuyukufuna ukuthula kwabo nempumelelo yabo zonke izinsuku zokuphila kwakho kuze kube phakade.
“Unganengwa ngowakwa-Edomi, ngokuba ungumfowenu; awuyukunengwa ngowaseGibhithe, ngokuba wawungumfokazi ezweni lakubo.
Abantwana besizukulwane sesithathu abayobazala, bayongena ebandleni likaSimakade.”
“Uma uphuma enkanjini uyokulwa nezitha zakho, ubozigcina, ungakwenzi okubi.
Uma kukhona phakathi kwenu umuntu ongahlambulukile ngenxa yokumehlele ebusuku, uyophumela ngaphandle kwenkambu, angangeni phakathi kwayo,
kodwa kusihlwa uyogeza ngamanzi, lapho selishonile ilanga, uyongena enkanjini.
“Makube khona indawo yokuzikhulula ngaphandle kwenkambu, uyophumela lapho ukuyozikhulula.
Uyophatha isimbo ezimpahleni zakho, ukuze kuthi lapho uhlala phansi uzikhulula, umbe ngaso, bese ukugqiba lokho okuphume kuwe,
ngokuba uSimakade uNkulunkulu wakho uyahamba ehla enyuka phakathi kwenkambu ukukuhlenga, futhi izitha zakho uzinikele kuwe. Ngalokho-ke inkambu yakho liyokuba ngcwele ukuze angaboni into engcolileyo phakathi kwenu, bese ekufulathela.”
“Ungasinikeli kumniniso isigqila esibalekile seza kuwe.
Siyeke sihlale ngaphakathi kwakho endaweni esiyoyikhetha phakathi kweminye imizi yakho, lapho sithanda khona; ungasicindezeli.
“Makungabi bikho sifebe sethempeli emadodakazini nasemadodaneni akwa-Israyeli.
Ungayilethi inkokhelo yesifebe nemali yenja endlini kaSimakade uNkulunkulu wakho ukuba ufeze isithembiso, ngokuba kokubili kuyisinengiso kuSimakade uNkulunkulu wakho.
“Awuyukumtsheleka umfowenu bese ufuna inzalo yalokho, kungaba yinzalo yemali, inzalo yokudla, neyanoma yini umuntu ayikhokhela inzalo.
Umfokazi ungamtsheleka bese ufuna inzalo, kodwa umfowenu awuyukumtsheleka bese ufuna inzalo ukuze uSimakade uNkulunkulu wakho akubusise kukho konke obeka kukho isandla sakho ezweni ongena kulo, ukulidla.
“Uma wenza isifungo kuSimakade uNkulunkulu wakho, ungalibali ukusifeza, ngokuba uSimakade uNkulunkulu wakho ulindele ukuba usifeze impela, ukungasifezi kuyakuba yisono kuwe.
Kepha uma ungenzi sifungo, akuyukuba yisono kuwe.
Amazwi omlomo wakho uyakuwagcina, uyoqikelela ukuba wenze njengalokhu wethembisile kuSimakade uNkulunkulu wakho, isithembiso osenze ukhululekile futhi ungaphoqiwe, wasiphumisela ngomlomo wakho.
“Uma ungena esivinini sikamakhelwane wakho, uyakudla izithelo zomvini ngokuthanda kwakho, uzanelise, kepha ungazifaki esitsheni sakho.
“Uma ungena ezinhlangeni zokusanhlamvu kwamakhelwane wakho, uyakukha izikhwebu ngesandla sakho, kodwa awuyukulisebenzisa isikela ezinhlangeni zokusanhlamvu kwamakhelwane wakho.”
“Lapho umuntu ethatha umfazi, amgane, kodwa angabe esamthokozisa ngoba ethole kuye okuthile okwenyanyekayo, uyombhalela incwadi yesehlukaniso, amnike yona esandleni sakhe, bese emkhipha endlini yakhe.
Uma esephumile endlini yakhe, angahamba-ke abe ngowenye indoda.
Uma indoda yesibili ingasamthandi, iyombhalela incwadi yesehlukaniso, imnike yona esandleni, bese imkhipha endlini yayo, noma le ndoda yesibili ebimthathile waba ngumkayo ingafa,
indoda yakhe yokuqala eyamxosha ayikwazi ukubuyela kuye imthathe futhi abe ngumkayo, ngokuba usengcolisekile ngale ndlela, lokho kuyisinengiso phambi kukaSimakade. Awuyukwenza ukuba izwe uSimakade uNkulunkulu wakho akunika lona ukuba libe yifa lakho, libe necala.
“Uma umuntu esanda kuthatha umfazi, akayukuphuma aye empini, futhi akayukunikwa noma yimuphi umsebenzi; uyohlala ekhaya ekhululekile unyaka, athokozise umkakhe amthathileyo.”
“Akuyukuba bikho muntu oyakuthatha itshe lokugaya noma imbokodwe kube yisibambiso, ngokuba uyobe ethathe konke okuphilwa ngakho, kwaba yisibambiso.”
“Uma umuntu ebanjwa eduna omunye wabafowabo babantu bakwa-Israyeli, amphathe njengesigqila, noma athengise ngaye, lowo mduni uyokufa, ngaleyo ndlela uyobukhipha kanjalo ububi phakathi kwakho.
“Qaphela mayelana nesifo sochoko, uqaphelisise impela, wenze konke njengalokhu abaphristi abangabaLevi bezokufundisa. Uqaphele ukuba wenze njengalokhu ngibayalile.
Khumbula lokho uSimakade uNkulunkulu wakho akwenza kuMiriyamu endleleni lapho niphuma eGibhithe.
“Uma utsheleka umakhelwane wakho utho, awuyukungena endlini yakhe ukuyothatha utho lube yisibambiso sakhe.
Uyokuma ngaphandle, bese umuntu omtshelekayo eletha kuwe isibambiso.
Uma engumuntu ompofu, ungalali nalokho okuyisibambiso sakhe,
kepha uyakukubuyisela impela kuye okuyisibambiso ekushoneni kwelanga, ukuze alale ngengubo yakhe, akubusise. Lokho kuyokuba ukulunga kuwe phambi kukaSimakade uNkulunkulu wakho.
“Awuyukuyicindezela inceku eqashiweyo, empofu nentulayo, noma ngabe ingumfowenu noma ingumfokazi osezweni lakini emzini wakho.
Uyoyikhokhela imali yayo ngosuku lwayo, lingaze lishone ilanga ungakwenzile lokho, ngokuba impofu, futhi ikhathazekile ngayo, funa ikhale kuSimakade ngenxa yakho, lokho kube yisono kuwe.
“Oyise abayukubulawa ngenxa yamadodana, namadodana awayukubulawa ngenxa yawoyise; yilowo nalowo uyobulawa ngenxa yesono sakhe.
“Awuyukuhlanekezela ubulungiswa lapho ubhekene nomfokazi noma intandane, futhi ungayithathi ingubo yomfelokazi ibe yisibambiso,
kepha uyokhumbula ukuthi wawuyisigqila eGibhithe nokuthi uSimakade uNkulunkulu wakho wakuhlenga lapho; ngalokho ngiyakuyala ukuba wenze lokhu.
“Uma uvuna isivuno sakho ensimini, bese ukhohlwa yisithungu ensimini yakho, ungabuyeli ukuyosilanda, kodwa masibe ngesomfokazi, intandane, nomfelokazi ukuze uSimakade uNkulunkulu wakho akubusise kuyo yonke imisebenzi yezandla zakho.
Lapho ugxoba umnqumo wakho, ungabuyeli ugxobe amagatsha ngokwesibili, kepha lokho makube ngokomfokazi, intandane, nomfelokazi.
Uma uvuna okwesivini sakho, awuyukukhothoza futhi, kodwa lokho makube ngokomfokazi, intandane, nomfelokazi.
Uyokhumbula ukuthi wawuyisigqila eGibhithe, ngalokho ngiyakuyala ukuba wenze lokhu.”
“Uma kukhona ukuxabana phakathi kwabantu, bese beya esigcawini sokwehlulela, kuthethwe icala labo, liyomthetha icala olungileyo, limlahle onecala.
Uma onecala kufanele ukuba ashaywe, umehluleli uyomlalisa phansi, ashaywe ngomunye phambi kwakhe. Ubuningi bemivimbo buyoba ngangokwecala lakhe.
Angamshaya imivimbo engama-40, angedluli lapho, funa imivimbo ashaywe yona ibe miningi kakhulu, bese umfowenu uyahlazeka emehlweni akho.
“Ungayifaki inkabi isimfonyo, uma ibhula.”
“Uma abozalo behlala ndawonye, omunye wabo efa engenandodana, umfazi wofileyo akayukugana umfokazi ongaphandle, kodwa umfowabo wendoda yakhe uyakumngena, amthathe abe ngumkakhe, aphelelise wonke amalungelo endoda kuye.
Kuyothi izibulo alizalayo lime egameni lomfowabo ofileyo ukuze igama lakhe lingesulwa kwa-Israyeli.
“Uma indoda ingathandi ukumthatha umkamfowabo, umkamfowabo uyakukhuphukela kumalunga esangweni, athi: ‘Umfowabo wendoda yami uyala ukuvusela umfowabo umuzi kwa-Israyeli; akathandi ukungingena.’
Amalunga omuzi wakubo ayombiza, akhulume naye; uma emi emazwini akhe, ethi: ‘Angithandi ukumthatha,’
umkamfowabo uyosondela kuye phambi kwamalunga, akhumule isicathulo onyaweni lwakhe, amkhafulele ebusweni bakhe, athi kuye: ‘Makwenziwe kanje endodeni engayakhi indlu kamfowabo.’
Igama lakhe liyakuthiwa kwa-Israyeli ‘Indlu yosicathulo sikhunyuliwe.’
“Uma amadoda amabili elwa, bese umfazi wenye esondela ukuyokhulula indoda yakhe esandleni saleyo eyishayayo, elule isandla sakhe, ayibambe ngomphambili,
uyosinquma isandla sakhe, ungakhombisi sihe kuye.”
“Makungabi bikho esikhwameni sakho izisindo ezehlukeneyo, esikhulu nesincane.
Makungabi bikho endlini yakho izilinganiso ezehlukeneyo, esikhulu nesincane.
Uyokuba nesikali sesisindo esiyisona nesifaneleyo, futhi ube nesilinganiso seqiniso nesifaneleyo, ukuze izinsuku zakho zibe zinde ezweni uSimakade uNkulunkulu wakho akunika lona.
Ngokuba bonke abenza kanjalo, bonke abenza ukungalungi, bayisinengiso kuSimakade uNkulunkulu wakho.”
“Khumbula lokho akwenzayo kuwe u-Amaleki endleleni, lapho niphuma eGibhithe,
ukuthi wakuhlangabeza endleleni, wakuhlasela kanjani ngasemuva, ebulala bonke ababebuthakathaka bekhathele, betotoba emva kwakho; akazange amesabe uSimakade.
Kuyothi lapho uSimakade uNkulunkulu wakho esekuphumuzile kuzo zonke izitha zakho ezikuzungezile ezweni uSimakade uNkulunkulu wakho akunika lona ukuba ulidle, libe yifa lakho, bese ukuqeda nya ukukhunjulwa kwama-Amaleki phansi kwezulu. Ungakhohlwa yilokho.”
“Kuyokuthi lapho usufikile ezweni uSimakade uNkulunkulu wakho akunika lona ukuba, ulidle, wakhe kulo, libe yifa lakho.
Uyothatha ulibo lwezithelo zonke zomhlabathi oyoluvuna ezweni uSimakade uNkulunkulu wakho akunika lona, ulufake eqomeni, uye endaweni uSimakade uNkulunkulu wakho ayoyikhetha ukuba igama lakhe lihlale kuyo.
Uyoya kumphristi oyobe elapho ngalezo zinsuku, uthi kuye: ‘Ngiyaqinisa namuhla kuSimakade uNkulunkulu wakho ukuthi sengifikile ezweni uSimakade afunga kokhokho ukusinika lona.’
Umphristi uyothatha iqoma esandleni sakho, alibeke phansi, phambi kwe-althare likaSimakade uNkulunkulu wakho.
Wena uyophendula phambi kukaSimakade uNkulunkulu wakho, uthi: ‘Ukhokho wami wayengumAramu owayezulazula, wehlela eGibhithe, wagogobala khona nabantu abayingcosana; waba yisizwe esikhulu khona, esinamandla nesiningi.
AbaseGibhithe basiphatha kabi, basihlupha, basisebenzisa kanzima kakhulu.
Sakhala kuSimakade uNkulunkulu wokhokho bethu, uSimakade walizwa izwi lethu, wakubona ukuhlupheka kwethu, umshikashika wethu, nokucindezelwa kwethu.
USimakade wasikhipha eGibhithe ngesandla esinamandla, ngengalo eyeluliweyo, ngezenzo ezesabekayo nezinkulu, ngezibonakaliso nangezimangaliso.
Wasiletha kule ndawo, wasinika leli lizwe, izwe elichichima ubisi noju.
Manje-ke, bheka, ngilethe ulibo lwezithelo zomhlaba onginike wona, Wena Simakade,’ bese ulubeka phansi, phambi kukaSimakade uNkulunkulu wakho, ukhuleke phambi kukaSimakade uNkulunkulu wakho,
uyothokoza ngakho konke okuhle uSimakade uNkulunkulu wakho akunike khona, wena nendlu yakho, wena nomLevi, nomfokazi ophakathi kwenu.”
“Kuyothi lapho usuqedile ukuthatha konke okweshumi kwezithelo zakho, ngonyaka wesithathu, okungunyaka wokweshumi, usumnikile, wadla, wasutha umLevi, umfokazi, intandane, nomfelokazi ohlala nawe emzini wakho,
uyothi phambi kukaSimakade uNkulunkulu wakho: ‘Ngikhiphile izinto ezingcwele endlini yami, ngazinika umLevi, umfokazi, intandane, nomfelokazi; njengoba ungiyalile ngemiyalo yonke ongiyale ngayo; angiweqanga namunye wemiyalo yakho, futhi angiyikhohlwanga.
Angikudlanga okweshumi ekulileni kwami, angisusanga lutho kukho ngingcolile, anginikelanga ngakho kofileyo; ngilalele izwi likaSimakade uNkulunkulu wami, ngikwenze konke njengalokhu ungiyalile.
Bheka phansi usendaweni yobungcwele bakho emazulwini, ubusise abantu bakho u-Israyeli nomhlaba osinike wona njengokufunga kwakho kokhokho, izwe elichichima ubisi noju.’
“Namuhla uSimakade uNkulunkulu wakho ukuyala ukuba ugcine lezi zimiso nezehlulelo; uyoqikelela ukuba uzigcine, uzenze ngayo yonke inhliziyo yakho.
USimakade namuhla umnikile isiqiniseko sokuthi uyokuba nguNkulunkulu wakho, uyohamba ezindleleni zakhe, ugcine izimiso zakhe, imiyalo yakhe, nezehlulelo zakhe; ulalele izwi lakhe.
USimakade unikezile isiqiniseko namuhla sokuthi wena uyokuba yisizwe esiyifa lakhe njengokwesithembiso sakhe, ugcine yonke imiyalo yakhe,
ukuze akuphakamise phezu kwazo zonke izizwe azenzileyo ngokubongwa, ngegama, nangodumo, ube yisizwe esingcwele kuSimakade uNkulunkulu wakho, njengokusho kwakhe.”
UMose namalunga akwa-Israyeli bayala abantu, bathi: “Gcinani yonke imiyalo esiniyala ngayo namuhla.
Kuyothi mhla niwela iJordani niya ezweni uSimakade uNkulunkulu wakho akunika lona, uyozimisela amatshe amakhulu, uwahuqe ngomcako,
ulobe kuwo wonke amazwi alo mthetho, uma usuwelile ukuba ungene ezweni uSimakade uNkulunkulu wakho akunika lona, izwe elichichima ubisi noju njengoba uSimakade uNkulunkulu wokhokho benu ekhulumile kuwe.
Kuyothi lapho seniliwelile iJordani, nimise lawa matshe enginiyala ngawo namuhla entabeni i-Ebhali, uwahuqe ngomcako.
Uyomakhela lapho uSimakade uNkulunkulu wakho i-althare, i-althare lamatshe, awuyukuwabaza ngento eyinsimbi.
Uyokwakha i-althare likaSimakade uNkulunkulu wakho ngamatshe apheleleyo, unikele kulo ngeminikelo yokushiswa kuSimakade uNkulunkulu wakho.
Uyonikela iminikelo yokuthula, uyidlele khona lapho, wename phambi kukaSimakade uNkulunkulu wakho.
Uyakuloba ematsheni wonke amazwi alo mthetho, uwaqophisise kahle.”
UMose nabaphristi abangabaLevi bakhuluma kuyena wonke u-Israyeli, bathi: “Thula, ulalele, Israyeli: namuhla sewuyisizwe sikaSimakade uNkulunkulu wakho.
Ngalokho uyolalela izwi likaSimakade uNkulunkulu wakho, ugcine imiyalo yakhe nezimiso zakhe engikuyala ngakho namuhla.”
UMose wayala abantu ngalolo lusuku, wathi:
“Yilaba abazoma entabeni iGerizimu, babusise abantu ngesikhathi seniliwelile iJordani: uSimeyoni, uLevi, uJuda, u-Isakhare, uJosefa, noBhenjamini.
Nampa abayokuma entabeni i-Ebhali ukuba baqalekise: uRubeni, uGadi, u-Asheri, uZebuloni, uDani, noNafethali.
“AbaLevi bayophendula ngezwi elikhulu, bathi kubo bonke abantu bakwa-Israyeli:
“ ‘Makaqalekiswe umuntu owenza isithombe esibaziweyo nesibunjiweyo, isinengiso kuSimakade, umsebenzi wezandla zengcweti, asimise esithe.’ “Bonke abantu bayothi: ‘Amen.’
“ ‘Makaqalekiswe owedelela uyise nonina.’ “Bonke abantu bayothi: ‘Amen.’
“ ‘Makaqalekiswe ogudluza isikhonkwane sikamakhelwane wakhe.’ “Bonke abantu bayothi: ‘Amen.’
“ ‘Makaqalekiswe owedukisa impumputhe endleleni.’ “Bonke abantu bayothi: ‘Amen.’
“ ‘Makaqalekiswe ohlanekezela isehlulelo kongumfokazi, intandane, nongumfelokazi.’ “Bonke abantu bayothi: ‘Amen.’
“ ‘Makaqalekiswe olala nomkayise, ngokuba wambulile isidwaba sikayise.’ “Bonke abantu bayothi: ‘Amen.’
“ ‘Makaqalekiswe olala nesilwane.’ “Bonke abantu bayothi: ‘Amen.’
“ ‘Makaqalekiswe olala nodadewabo, indodakazi kayise noma indodakazi kanina.’ “Bonke abantu bayothi: ‘Amen.’
“ ‘Makaqalekiswe olala nomkhwekazi wakhe.’ “Bonke abantu bayothi: ‘Amen.’
“ ‘Makaqalekiswe obulalela umakhelwane wakhe esithe.’ “Bonke abantu bayothi: ‘Amen.’
“ ‘Makaqalekiswe owemukela ukufunjathiswa ukuze abulale ongenacala, achithe igazi lakhe.’ “Bonke abantu bayothi: ‘Amen.’
“ ‘Makaqalekiswe ongawagcini amazwi alo mthetho, ukuba awenze.’ “Bonke abantu bayothi: ‘Amen.’ ”
“Kuyothi uma ulalela nokulalela izwi likaSimakade uNkulunkulu wakho, uqikelele ukugcina yonke imiyalo yakhe engikuyala ngayo namuhla. USimakade uNkulunkulu wakho uyokuphakamisa phezu kwazo zonke izizwe zomhlaba.
Zonke lezi zibusiso ziyokwehlela kuwe, kube ngezakho, uma ulalela izwi likaSimakade uNkulunkulu wakho.
“Uyakubusiswa emzini, ubusiswe nasensimini.
“Siyakubusiswa isithelo sesibeletho sakho, nesomhlaba wakho, nesemfuyo yakho, kwande amankonyane ezinkomo zakho namazinyane ezimvu zakho.
“Kuyakubusiswa iqoma lakho, nomkhombe wakho wokuxovela isinkwa.
“Uyakubusiswa ekungeneni kwakho, ubusiswe nasekuphumeni kwakho.
“USimakade uyozenza izitha ezikuvukelayo ukuba zehlulwe phambi kwakho, ziyakuza kuwe zivela ngasendaweni eyodwa, kodwa ziyakubaleka ngezindlela eziyisikhombisa.
“USimakade uyakuyala isibusiso sibe phezu kwakho, ezinqolobaneni zakho nakukho konke okwenzayo, uyakukubusisa ezweni uSimakade uNkulunkulu wakho akunika lona.
“USimakade uyakukumisa ube yisizwe esingcwele kuye njengoba afunga kuwe, uma ugcina imiyalo kaSimakade uNkulunkulu wakho, uhamba ezindleleni zakhe.
Bonke abantu bomhlaba bayakubona ukuthi ubizwe ngegama likaSimakade, bakwesabe.
USimakade uyakukwandisela okuhle: isithelo sesibeletho sakho, esemfuyo yakho, nesomhlabathi wakho, ezweni uSimakade afunga kokhokho bakho ukukunika lona.
“USimakade uyakukuvulela indlu yakhe yengcebo, izulu, anise imvula ezweni lakho ngesikhathi esifaneleyo, abusise wonke umsebenzi wesandla sakho. Uyokwetsheleka izizwe eziningi, kodwa ungatsheleki lutho kuzo.
USimakade uyakukwenza ube yinhloko, ungabi ngumsila; uyoba phezulu kuphela, ungabi phansi, uma ulalela imiyalo kaSimakade uNkulunkulu wakho engikuyala ngayo namuhla futhi uyigcine, uyenze.
Ungaphambuki kuwo wonke amazwi engikuyala ngawo namuhla, uye ngakwesokunene noma ngakwesokhohlo, ulandele abanye onkulunkulu, ubakhonze.
“Kuyothi uma ungalaleli izwi likaSimakade uNkulunkulu wakho ukuba uqikelele ukugcina yonke imiyalo yakhe nezimiso zakhe engikuyala ngakho namuhla, zonke lezi ziqalekiso ziyokwehlela, zikusibekele.
“Uyakuqalekiswa emzini, uqalekiswe nasensimini.
“Iqoma lakho liyakuqalekiswa, kuqalekiswe nomkhombe wakho wokuxovela isinkwa.
“Isithelo sesibeletho sakho, isithelo somhlabathi wakho, amankonyane ezinkomo zakho, namazinyane ezimvu zakho, kuyakuqalekiswa.
“Uyakuqalekiswa ekungeneni kwakho, uqalekiswe nasekuphumeni kwakho.
“USimakade uyakwehlisela kuwe isiqalekiso, ukudideka nokusolwa, kukho konke oyokwenza, uze ubhujiswe, ushabalale ngokushesha, ngenxa yobubi bezenzo zakho, ngokuba ungishiyile.
USimakade uyakunamathelisa kuwe isifo, aze akubhubhise ezweni ongena kulo ukulidla.
USimakade uyokushaya ngalezi zifo: isifuba, umkhuhlane, ukushisa komzimba, imfiva, ukushisa okukhulu, isikhutha kanye nenkemba; kuyokuxosha uze ubhubhe uphele.
Izulu lakho phezu kwekhanda lakho liyakuba yithusi, umhlaba ophansi kwakho ube yinsimbi.
USimakade uyoyenza imvula yezwe lakini ibe ngumsizi nothuli, uthuli oluvela ezulwini, lwehlele phezu kwakho, uze ubhujiswe.
“USimakade uyokwenza izitha zakho zikunqobe, uyakuzihlasela ngandlelanye; ubaleke ngezindlela eziyisikhombisa. Uyoba yinto eyesabisayo, kuyo yonke imibuso yomhlaba.
Isidumbu sakho siyakuba ngukudla kwazo zonke izinyoni zezulu nokwezilwane zomhlaba; akuyukuba bikho oyoziphazamisa.
USimakade uyokushaya ngamathumba aseGibhithe, ngamaqhubu, ngomuna, nangotwayi, okungelapheki.
USimakade uyokushaya ngokuhlanya, ngobumpumputhe, nangokudideka komqondo.
Uyophuphutheka emini njengempumputhe iphuphutheka ebumnyameni. Awuyukuphumelela ezindleleni zakho, uyakucindezelwa kuphela, uphangwe; akuyukuba bikho muntu oyokuhlenga.
“Uyakuthembisana umendo nowesifazane, omunye amdlwengule alale naye; uyakukwakha indlu, ungahlali kuyo; uyakutshala isivini, ungazikhi izithelo zaso.
Inkabi yakho iyakuhlatshwa uzibonela ngawakho amehlo, ungayidli; imbongolo yakho iyakuhlwithwa ebusweni bakho, ingabuyiselwa kuwe; izimvu zakho ziyakunikwa izitha zakho, akuyukuba bikho oyakukusindisa.
Amadodana akho namadodakazi akho ayakunikwa ezinye izizwe, ubuka ngamehlo akho, uyofisa ukuwasiza usuku lonke, kodwa isandla sakho singabi namandla okwenza utho.
Izithelo zomhlabathi wakho nawo wonke umphumela wokusebenza kwakho, kuyodliwa yisizwe ongasaziyo, wena ucindezelwe kuphela, uchotshozwe nsuku zonke.
Uyakusanganiswa yilokho oyokubona ngamehlo akho.
USimakade uyokushaya ngamathumba amabi, ongenakuphulukiswa kuwo, kusukela emadolweni akho nasemilenzeni, ematheni onyawo lwakho kuze kube sokhakhayini lwekhanda lakho.
“USimakade uyokuyisa, wena nenkosi oyibeke phezu kwakho, esizweni wena nokhokho bakho eningasazi, niyokhonza lapho abanye onkulunkulu bokhuni nabamatshe.
Uyakuba yinto esabisayo, nesiga, nombhinqo phakathi kwezizwe zonke lapho uSimakade eyokunixoshela khona.
“Uyophuma nembewu eningi, uye ensimini, uvune okuyingcosana, ngokuba kuyodliwa yisikhonyane.
Uyotshala izivini, usebenze, kodwa awuyukuliphuza iwayini noma ubuthe isivuno sazo, ngokuba siyodliwa ngumswenya.
Uyakuba neminqumo ezifundeni zakho zonke, kodwa awuyukuzigcoba ngamafutha, ngokuba izithelo zeminqumo yakho ziyakuvuthuluka.
Uyakuzala amadodana namadodakazi, kodwa awayukuba ngawakho, ngokuba ayakuthunjwa.
Yonke imithi yakho nezithelo zomhlabathi wakho kuyodliwa yisikhonyane.
“Umfokazi ohlala phakathi kwenu uyodlondlobala kunawe, wena uye ngokuya wehla.
Uyakukuboleka wena, wena ungakwazi ukumboleka; yena uyakuba yinhloko, wena ube ngumsila.
“Zonke lezi ziqalekiso ziyokwehlela kuwe, zikulandele, zikukhungathe, uze ubhujiswe, ngokuba awulalelanga izwi likaSimakade uNkulunkulu wakho, awuyigcinanga imiyalo yakhe nezimiso zakhe akuyala ngakho.
Ziyokwehlela phezu kwakho nasozalweni lwakho zibe yisibonakaliso nesimangaliso kuze kube phakade,
ngokuba awumkhonzanga uSimakade uNkulunkulu wakho ngokujabula nangokwenama kwenhliziyo, ngenxa yobuningi bezinto.
Uyozikhonza izitha zakho uSimakade ayozithumela kuwe ngokulamba, ngokoma, ngobunqunu, nangokweswela izinto zonke, uyobeka ijoka lensimbi entanyeni yakho, aze akubhubhise.
“USimakade uyothumela kuwe isizwe esivela kude ekugcineni komhlaba, esihlwitha njengokhozi. Kuyoba yisizwe ongayukuluqonda ulimi lwaso,
isizwe esibuso baso bugcwele ulunya, esingenandaba nomuntu omdala, nesingenaluzwelo komusha.
Siyokudla isithelo semfuyo yakho, nesomhlabathi wakho, uze ubhujiswe, asiyukushiya okusanhlamvu, iwayini elisha, amafutha amasha, amankonyane, amazinyane ezimvu zakho, size sikushaye sikubhuqe.
Siyakukuvimbezela kuwo wonke amasango akho, zize ziwe izingange zakho ozethembayo ezweni lakho lonke, siyakukuvimbezela kuwo wonke amasango akho ezweni lakho lonke uSimakade uNkulunkulu wakho akunike lona.
“Uyakudla isithelo sesibeletho sakho, inyama yamadodana akho neyamadodakazi akho, uSimakade uNkulunkulu wakho akunike wona ekuvinjezelweni nasekuhlaselweni, izitha zakho eziyakukuhlasela ngakho.
Umuntu onokulunga phakathi kwenu, iso lakhe liyakuba libi kumfowabo, kumkakhe amthandayo, nakuyo insali yabantwana bakhe.
Akayukunika namunye inyama yabantwana bakhe ayobe eyidla, ngokuba kungekho naye okumsalele ekuvinjezelweni nasekuxinekeni eziyakukuxina ngakho izitha zakho kuwo wonke amasango akho.
Owesifazane ontekenteke, ozwelayo phakathi kwenu, othambe ngendlela yokuthi akakaze azame ngisho ukubeka amathe onyawo lwakhe emhlabathini, ngenxa yokuthamba nokutetema, uyakuyikluluza indoda yakhe ayithandayo, nendodana yakhe, nendodakazi yakhe,
umzanyana ophuma phakathi kwemilenze yakhe, nabantwana bakhe ayokubazala, ngokuba uyakubadla ngasese ngenxa yokuswela kwakhe lapho evinjezelwe, exinwe yizitha zakhe kuwo wonke amasango akho.
“Uma ungaqapheli ukuwenza wonke amazwi alo mthetho alotshwe kule ncwadi ukuba ulesabe igama lakhe elidumisekayo nelesabekayo elithi USIMAKADE UNKULUNKULU WAKHO,
uSimakade uyakwenza ubhubhane lwakho ukuba lumangalise, nobhubhane lozalo lwakho, ubhubhane olukhulu oluhlala isikhathi eside nesifo esinzima esihlala isikhathi eside.
Uyobuyisela kuwe zonke izifo zaseGibhithe owawuzesaba, zinamathele kuwe.
Konke ukugula nalo lonke ubhubhane okungalotshiwe encwadini yalo mthetho, lokho uSimakade uyakukuletha phezu kwakho, uze ubhujiswe.
Noma nanibaningi ngangezinkanyezi zezulu, niyakushiywa niyingcosana, ngokuba awulalelanga izwi likaSimakade uNkulunkulu wakho.
Kuyothi njengalokhu uSimakade wayejabula ngani ukuba anenzele okuhle nokunenza nande, kanjalo uSimakade uyojabula ngani lapho esenibhubhisa, nishatshalaliswe, nidwengulwe ezweni eningena kulo ukuba nilidle.
“USimakade uyakukuhlakazela ezizweni zonke, kusukela kolunye uhlangothi lomhlaba kuze kufike kolunye, uyokhonza lapho abanye onkulunkulu bemithi namatshe ongabaziyo, wena nokhokho bakho.
Awuyukukuthola ukuphumula phakathi kwalezo zizwe, akuyukuba bikho ukuphumula ematheni onyawo lwakho, kodwa uSimakade uyokunika inhliziyo egubhazelayo, namehlo anqundekayo, nokudangala komphefumulo.
Uyohlalela ovalweni wesabe ubusuku nemini, ungabe usaba nethemba ngokuphila kwakho.
Ekuseni uyothi: ‘Sengathi ngabe sekukusihlwa,’ nakusihlwa uthi: ‘Sengathi ngabe sekusile,’ ngenxa yengebhe eyakuba senhliziyweni yakho, nangenxa yalokho okubonwa ngamehlo akho.
USimakade uyakukubuyisela eGibhithe ngemikhumbi ngendlela engasho ngayo kuwe, ngathi: ‘Awusayukuphinda uyibone futhi.’ Lapho niyakuzithengisa ezitheni zenu nibe yizigqila nezigqilakazi; ningathengwa muntu.”
Nanka amazwi esivumelwano uSimakade amyala ngawo uMose ukuba asenze nabantu bakwa-Israyeli kwaMowabi ngaphandle kwaleso asenza nabo eHorebhe.
UMose wababiza bonke abakwa-Israyeli, wathi kubo: “Nikubonile konke uSimakade akwenza eGibhithe nibuka, kuFaro nakuzo zonke izinceku zakhe, nasezweni lakhe lonke:
izinhlupheko ezinkulu azibonayo amehlo akho, izibonakaliso nalezo zimangaliso ezinkulu.
Kepha uSimakade akaninikanga inhliziyo yokuba nazi, namehlo okuba nibone, nezindlebe zokuba nizwe kuze kube yinamhlanje.
Nganihola iminyaka engama-40 ehlane; izingubo zenu aziguganga emizimbeni yenu, nesicathulo asiguganga onyaweni lwenu.
Anidlanga sinkwa, aniphuzanga wayini noma uphuzo olunamandla, ukuze nazi ukuthi nginguSimakade uNkulunkulu wenu.
“Ekufikeni kwenu kule ndawo uSihoni, inkosi yaseHeshibhoni no-Ogi, inkosi yaseBhashani, baphuma bazolwa nathi, kodwa sabanqoba.
Sadla izwe labo, salabela abakwaRubeni, nabakwaGadi, nengxenye yesizwana sakwaManase, laba yifa labo.
“Ngalokho gcinani amazwi alesi sivumelwano, niwenze ukuze niphumelele kukho konke enikwenzayo.
“Namuhla nimi nonke phambi kukaSimakade uNkulunkulu wenu: izinhloko zenu, izizwana zenu, amalunga enu, izinduna zenu, bonke abantu bakwa-Israyeli,
izingane zenu, omkenu, nomfokazi ophakathi kwezinkambu zakho, kusukela kogawula izinkuni kuya kulowo okha amanzi,
ukuba ungene esivumelwaneni sikaSimakade uNkulunkulu wakho, nasesifungweni sakhe asenza nawe namuhla uSimakade uNkulunkulu wakho,
ukuze azimisele wena namuhla ube yisizwe sakhe, naye abe nguNkulunkulu wakho, njengalokhu asho kuwe, nanjengalokhu afunga kokhokho bakho, u-Abhrahama, u-Isaka, noJakobe.
Angenzi lesi sivumelwano nalesi sifungo nani kuphela,
ngisho nalowo omi nathi lapha namuhla phambi kukaSimakade uNkulunkulu wethu, nalowo ongenathi namuhla
ngokuba nina niyazi ukuthi sahlala eGibhithe nokuthi sadlula phakathi kwezizwe enadabula kuzo,
nizibonile izinengiso zazo, nezithombe zazo, zemithi, amatshe, isiliva, negolide, okwakuphakathi kwazo
funa kube khona phakathi kwenu indoda, noma umfazi, noma umndeni, noma isizwe esinhliziyo yaso ifulathela uSimakade uNkulunkulu wethu namuhla ukuyokhonza onkulunkulu balezo zizwe, bese kuba khona phakathi kwenu impande ethela inhlungunyembe nokubabayo,
kuze kuthi, lapho ezwa amazwi alesi sifungo, azibusise enhliziyweni yakhe ngokuthi: ‘Ngiyakuba nokuthula, noma ngihamba ngenkani yenhliziyo yami,’ ukuze kuqedwe okuswakemeyo nokomileyo,
uSimakade angamthetheleli, kodwa intukuthelo kaSimakade nesikhwele sakhe kumvuthele lowo muntu, kuze kuthi zonke iziqalekiso ezilotshwe kule ncwadi zibe phezu kwakhe, uSimakade alesule igama lakhe phansi kwezulu.
USimakade uyakumehlukanisela ububi kuzo zonke izizwe zakwa-Israyeli njengazo zonke izivumelwano ezilotshwe kule ncwadi yomthetho.
“Isizukulwane senu, abantwana benu eniyobazala, nomfokazi oyakuphuma ezweni elikude bayakubona izinhlupheko zaleso sizwe, nobhubhane uSimakade alithele ngalo,
lonke izwe lakhona lishiswe ngesibabule nosawoti, akunakutshalwa kulo, akukhuli lutho kulo, akumili lutho oluluhlaza, linjengokubhujiswa kweSodoma neGomora neZebhoyimi okwabhujiswa nguSimakade ngentukuthelo yakhe nangolaka lwakhe.
Yebo, zonke izizwe ziyothi: ‘USimakade wenzeleni kanje kuleli lizwe na? Kungani ukuvutha kwalolu laka kukukhulu kangaka na?’
“Kuyothiwa ngalokho: ‘Ngokuba basishiya isivumelwano sikaSimakade uNkulunkulu wokhokho babo asenza nabo mhla ebakhipha eGibhithe,
bahamba bayokhonza abanye onkulunkulu, bakhuleka kubo, onkulunkulu ababengabazi, futhi abangahlukaniselwanga bona,
ngalokho intukuthelo kaSimakade yalivuthela lelo lizwe ukuba alehlisele zonke iziqalekiso ezilotshwe kule ncwadi.
USimakade wabadwengula ezweni lakubo ngolaka, ngokufutheka, nangentukuthelo enkulu, wabaphonsa ngaphandle kwelinye izwe, njenganamuhla.’
“Izimfihlakalo zingezikaSimakade uNkulunkulu wethu, kodwa okwambuliweyo kungokwethu nozalo lwethu kuze kube phakade ukuba siwenze wonke amazwi alo mthetho.”
“Kuyothi lapho zonke lezi zinto, izibusiso neziqalekiso engizibeke phambi kwakho, uzindle ngazo enhliziyweni yakho phakathi kwezizwe lapho uSimakade uNkulunkulu wakho ayokudingisela khona,
bese uphendukela kuSimakade uNkulunkulu wakho, ngenhliziyo yakho yonke nangawo wonke umphefumulo wakho, ulalela izwi lakhe njengakho konke engikuyala ngakho namuhla, wena nabantwana bakho,
khona uSimakade uNkulunkulu wakho uyakuguqula ukuthunjwa kwakho, akuhawukele, uyakubuya, akuqoqe ezizweni zonke, lapho uSimakade uNkulunkulu wakho ayekuhlakazele khona.
Uma ekhona oxoshelwe nasekugcineni kwezulu, uSimakade uNkulunkulu wakho uyakukuqoqa, akulande lapho.
USimakade uNkulunkulu wakho uyakukubuyisela ezweni okhokho bakho abalidlayo, nawe uyakulidla. Uyokwenzela okuhle, akwandise ngaphezu kokhokho bakho.
USimakade uNkulunkulu wakho uyakusoka inhliziyo yakho nenhliziyo yozalo lwakho, ukuze umthande uSimakade uNkulunkulu wakho ngenhliziyo yakho yonke nangawo wonke umphefumulo wakho, ukuze uphile.
USimakade uNkulunkulu wakho uyakubeka zonke lezi ziqalekiso phezu kwezitha zakho naphezu kwabakuzondayo nabakuhlukumezile.
Uyakuphenduka, ulalele izwi likaSimakade, uyenze yonke imiyalo yakhe engikuyala ngayo namuhla.
USimakade uNkulunkulu wakho uyokwenza uphumelele kuyo yonke imisebenzi oyenzayo, isithelo sesibeletho sakho, esemfuyo yakho, nesomhlabathi wakho, kube kuhle, ngokuba uSimakade uyobuye athokoze ukuba anichumise njengokuba athokoza ekuchumiseni okhokho bakho,
uma nje ulalela izwi likaSimakade uNkulunkulu wakho, ugcina imiyalo nezimiso zakhe ezilotshwe kule ncwadi yomthetho, uphendukela kuSimakade uNkulunkulu wakho ngayo yonke inhliziyo yakho nangawo wonke umphefumulo wakho.
“Ngokuba lo myalo engikuyala ngawo namuhla awulukhuni kuwe, awukude.
Awukho ezulwini ukuba ungathi: ‘Ngubani oyakukhuphuka ngenxa yethu aye ezulwini, asilandele wona, ukuze siwuzwe, siwenze, na?’
Futhi awuphesheya kolwandle ukuba ungathi: ‘Ngubani oyakusiwelela aye phesheya kolwandle, asilandele wona, ukuze siwuzwe, siwenze, na?’
Kodwa, izwi liseduze kakhulu nawe, lisemlonyeni wakho nasenhliziyweni yakho ukuba ulenze.
“Bheka, ngibeka namuhla phambi kwakho, ukuphila nenqubekela phambili, ukufa nokubi,
engikuyala ngakho namuhla ukuba umthande uSimakade uNkulunkulu wakho, uhambe ezindleleni zakhe, ugcine imiyalo yakhe, izimiso zakhe, nezehlulelo zakhe, ukuze uphile, wande, uSimakade uNkulunkulu wakho akubusise ezweni ongena kulo, ukulidla.
“Kepha uma uyifulathelisa inhliziyo yakho ungalaleli; uyengeke ukuba ukhuleke kwabanye onkulunkulu, ubakhonze,
ngiyaqinisa kini namuhla ukuthi niyakubhubha nokubhubha; izinsuku zenu aniyukuzandisa ezweni eniwela iJordani ukuba ningene kulo, nilidle.
“Ngibiza izulu nomhlaba ukuba kube ngofakazi ngani namuhla ukuthi ngibeke phambi kwenu ukuphila nokufa, isibusiso nesiqalekiso; ngalokho khethani ukuphila ukuze niphile, wena nenzalo yakho,
umthande uSimakade uNkulunkulu wakho, ulalele izwi lakhe, unamathele kuye, ngokuba lokho kungukuphila kuwe nobude bezinsuku zakho, uyohlala ezweni uSimakade afunga kokhokho bakho, u-Abhrahama, u-Isaka, noJakobe, ukuthi uyakubanika lona.”
UMose waya wakhuluma lawa mazwi kubo bonke abakwa-Israyeli,
wathi kubo: “Namuhla ngineminyaka eyi-120 angisakwazi kuphuma nakungena; uSimakade uthe kimi: ‘Awuyukuliwela leli Jordani.’
Kepha uSimakade uNkulunkulu wakho uyakuwela phambi kwakho, abhubhise lezi zizwe ubuka, uzidle; uJoshuwa uyowela phambi kwakho njengalokhu uSimakade eshilo.
USimakade uyokwenza kuzo njengalokhu enza kuSihoni no-Ogi, amakhosi ama-Amori awabhubhisayo, kanjalo nasezweni lawo.
USimakade uyozinikela kini, nenze kuzo ngokwemiyalo yonke enginiyale ngayo.
Qinani, nime isibindi, ningesabi, ningashaywa luvalo ngabo, ngokuba uSimakade uNkulunkulu wakho nguyena ohamba nawe; akayukukulahla, akayukukushiya.”
UMose wambiza uJoshuwa, bebuka bonke abantu bakwa-Israyeli, wathi kuye: “Qina, ume isibindi, ngokuba uyakuhamba nalaba bantu uye ezweni uSimakade afunga kokhokho babo ukubanika lona. Nguwena oyakwenza ukuba balidle ifa lalo.
USimakade nguye ohamba phambi kwakho; uyakuba nawe; akayukukulahla, akushiye; ungesabi, ungashaywa luvalo.”
UMose waloba lo mthetho, wawunika abaphristi, amadodana kaLevi ayethwala umphongolo wesivumelwano sikaSimakade, nawo wonke amalunga akwa-Israyeli.
UMose wawayala wathi: “Ekupheleni konyaka wesikhombisa, njalo ngesikhathi esinqunyiweyo sonyaka woyekelelo ngomkhosi wamadokodo,
lapho wonke u-Israyeli eze ukubonakala phambi kukaSimakade uNkulunkulu wakho endaweni Yena ayoyikhetha, uyofunda lo mthetho phambi kuka-Israyeli wonke elalele.
Qoqa abantu: abesilisa, abesifazane, abantwana, nomfokazi osemzini wakho ukuze bezwe, bafunde, bamesabe uSimakade uNkulunkulu wakho, baqikelele ukwenza wonke amazwi alo mthetho,
nokuthi abantwana babo abangawaziyo bawuzwe, bafunde ukumesaba uSimakade uNkulunkulu wenu ngazo zonke izinsuku nihleli ezweni eniwela iJordani ukuba nilidle.”
USimakade wathi kuMose: “Bheka, izinsuku zakho zokuba ufe sezisondele, biza uJoshuwa, ningene ethendeni lokuhlangana ukuze ngimyale.” UMose noJoshuwa bahamba, bema ethendeni lokuhlangana.
USimakade wabonakala ethendeni esensikeni yefu, insika yefu yema ngasemnyango wethende.
USimakade wathi kuMose: “Bheka, usuzoyolala noyihlomkhulu; laba bantu bayakusuka, bayophinga nonkulunkulu babezizwe abasezweni abaya kulo ukuba bahlale phakathi kwabo, bayakungishiya, basaphule isivumelwano engisenze nabo.
Intukuthelo yami iyakubavuthela ngalolo lusuku, ngiyakubashiya, ngibafulathele; bayakudliwa, behlelwe yizinhlekelele nezinhlupheko eziningi, baze bathi ngalolo lusuku: ‘Lezi zinhlupheko azisehlelanga yini ngoba uNkulunkulu wethu engekho phakathi kwethu na?’
Mina ngiyobafulathela impela ngalolo lusuku ngenxa yabo bonke ububi ababenzileyo, lokhu bephendukele kwabanye onkulunkulu.
“Ngalokho, zilobeleni leli hubo, nilifundise abantu bakwa-Israyeli, libekeni emilonyeni yabo ukuze leli culo libe kimi ngubufakazi kubantu bakwa-Israyeli.
Ngokuba lapho sengibangenisile ezweni engafunga kokhokho babo, izwe elichichima ubisi noju, bayodla, basuthe, bakhuluphale, bese bephendukela kwabanye onkulunkulu, babakhonze, bangedelele, basephule isivumelwano sami.
Kuyothi lapho sebehlelwe yizinhlekelele nezinhlupheko eziningi, leli hubo liyoba ngufakazi omelene nabo, ngokuba aliyukukhohlakala emilonyeni yozalo lwabo, lokhu ngiyayazi imicabango yabo abayicabangayo namhlanje, ngaphambi kokuba ngibangenise ezweni engafunga ngalo kubo.”
UMose waliloba lelo hubo ngalolo lusuku, wabafundisa lona abantu bakwa-Israyeli.
Wamgunyaza uJoshuwa, indodana kaNuni, wathi: “Qina, ume isibindi, ngokuba nguwe ozongenisa abantu bakwa-Israyeli ezweni engafunga ngalo kubo; Mina ngizokuba nawe.”
Kwathi lapho uMose eseqedile ukuloba wonke amazwi alo mthetho encwadini,
uMose wayeseyala abaLevi abathwala umphongolo wesivumelwano sikaSimakade, wathi:
“Thathani le ncwadi yomthetho, niyibeke ngaseceleni komphongolo wesivumelwano sikaSimakade uNkulunkulu wenu, ihlale khona, ibe ngubufakazi, imelane nani.
Mina ngiyakwazi ukuhlubuka kwakho nokuba nguntamo lukhuni kwakho. Bheka nje, ngisekhona nani namuhla seniyamhlubuka uSimakade; pho kuyoba kukhulu kangakanani sengifile, na?
Ngiqoqele wonke amalunga ezizwaneni zenu nezinduna zenu ukuze ngikhulume kuwo lawa mazwi, elalele, ngibiza izulu nomhlaba kube ngufakazi.
Ngiyazi ukuthi uma sengifile niyokona nokona, niphambuke endleleni enginiyale ngayo. Ngezinsuku ezizayo niyokwehlelwa ngububi, ngokuba niyokwenza okubi emehlweni kaSimakade, nimthukuthelise ngemisebenzi yezandla zenu.”
UMose wakhuluma wonke amazwi ehubo ibandla lonke lakwa-Israyeli lilalele.
“Lalelani nina mazulu, ngiyakhuluma; umhlaba mawuzwe amazwi omlomo wami.
Isifundiso sami masehle njengemvula, inkulumo yami iconse njengamazolo, njengomkhizo otshanini, nanjengezihlambi ohlazeni,
ngokuba ngiyomemezela igama likaSimakade: ngimnike udumo uNkulunkulu wethu.
“Uyidwala, umsebenzi wakhe uphelele, zonke izindlela zakhe zingukulunga; unguNkulunkulu wokwethembeka ongenakonakala; ulungile, uqotho Yena.
“Bonile kuye; abaseyibo abantwana bakhe, ngenxa yesici sabo; bayisizukulwane esiphambeneyo nesiyisigwegwe.
Ngabe nimbonga kanjalo uSimakade, na? Nina bantu abayiziwula nabangahlakaniphile, akasiye yini uyihlo anidalwanga nguye wanenza, wanimisa, na?
“Khumbula izinsuku zasendulo, ubheke iminyaka yezizukulwane ngezizukulwane; buza kuyihlo, uyakukulandisa, nezingwevu zizokutshela.
OPhezukonke lapho abela izizwe ifa lazo, lapho ehlukanisela abantwana babantu, wamisa imingcele yezizwe ngokwenani labantu bakwa-Israyeli.
Ngokuba isabelo sikaSimakade singabantu bakhe. UJakobe uyisifunda sefa lakhe.
“Wamthola ezweni eliyihlane, nasoqwathuleni lomkhulungwane kwahlongasibi, wamzungeza, wamnakekela, wamgcina njengenhlamvu yeso lakhe.
Njengokhozi lunyakazisa isidleke salo, lubhakuza phezu kwamaphuphu alo, welula amaphiko akhe, wabathatha, wabathwala ngamaphikho akhe.
NguSimakade kuphela owamqondisa, akukho nkulunkulu wabezizwe onaye.
“Wamkhweza ezindaweni eziphakemeyo zomhlaba, wadla izithelo zamasimu, wammuncisa uju edwaleni, namafutha eweni lensengetsha.
Wadla izaqheqhe zemihlambi, ubisi lwezimvu, amafutha amawundlu, izinqama zohlobo lwaseBhashani, izimbuzi, namanoni kakolo wekhethelo; waphuza iwayini livela egazini lamagilebhisi.
“UJeshuruni wakhuluphala, wayesekhahlela; usekhuluphele, uzimukile, futhi uchachambile. Wamshiya uNkulunkulu owamenza, waledelela iDwala lensindiso yakhe.
Bamenza waba nesikhwele ngonkulunkulu babezizwe, bamthukuthelisa ngezinengiso.
“Bahlabela amadimoni angeyena uNkulunkulu, nonkulunkulu abangazange babazi, onkulunkulu abasha, abasanda kuhlangabezana nabo, nababengaziwa ngokhokho babo.
Walikhohlwa iDwala elakuzalayo, wamkhohlwa uNkulunkulu owakudalayo.
“USimakade wakubona lokho, wanengwa ngukuchukuluzwa ngamadodana namadodakazi akhe.
Wathi: ‘Ngizobufihla ubuso bami kubo, ngibone ukuthi sizoba yini isiphetho sabo; ngokuba bayisizukulwane esiphambeneyo, nabantwana okungekho ukwethembeka kubo.
Bangenze nganesikhwele ngokungesiye uNkulunkulu, bangithukuthelisa ngokuyize kwabo; ngiyobenza babe nesikhwele ngabangesiso isizwe, ngibathukuthelise ngesizwe esiyisiwula.
Ngokuba umlilo uphenjwe yintukuthelo yami; uyabhebhetheka kuze kube sendaweni yabafileyo engaphansi, uyaqothula umhlaba nezithelo zawo, wokhela nezisekelo zezintaba.
“ ‘Ngiyonqwabelisa izinhlekelele phezu kwabo ngibacibe ngemicibisholo yami:
bayakuphela amandla yindlala, baqedwe wubhubhane, baqothulwe yisifo esibi, ngibathumele ngezinzawula zezilwane zasendle ezinesihlungu nezihuquzela othulini, zibalume.
Emigwaqweni inkemba iyodla lubi, emakamelweni kubhoke uvalo: ezinsizweni nasezintombini, koncelayo nasempungeni.
Ngathi: “Ngizobavithiza babe yizicucu ngiqede ukukhunjulwa kwabo kubantu,”
kungenjalo, ngesaba ukuchukuluzwa yisitha, funa abamelene nabo baqonde, bathi: “Izandla zethu eziphakamile, akusiye uSimakade owenze konke lokhu.” ’ ”
“Bayisizwe esingenangqondo, akukho ukuqonda kubo.
Uma bebehlakaniphile bebeyakukuqonda lokhu, baqonde nesiphetho sabo.
Oyedwa angayixosha kanjani inkulungwane, ababili bahubhe izinkulungwane ezilishumi, uma idwala labo belingathengisanga ngabo, uSimakade ebengabanikelanga, na?
Impela idwala labo alifani neDwala lethu; nezitha zethu ziyakuvuma lokho.
Umvini wabo ungumvini waseSodoma ovela emasimini aseGomora; izithelo zawo ziwubuthi, amahlukuzo awo amuncu.
Iwayini labo liyisihlungu sezinyoka, lingubuthi bemfezi.
Lokho akugciniwe yini kimi, kwavalelwa ezinqolobaneni zami, na?
Impindiselo ingeyami, nokunxephezela kungokwami, lapho unyawo lwabo lushelelela okwesikhashana, ngokuba usuku lwabo lwenhlekelele selusondele, izinto abalungiselelwe zona uyozenza zifike ngokushesha kubo.
“USimakade uyobehlulela abantu bakhe, abe nesihawu ezincekwini zakhe, lapho ebona ukuthi amandla abo aphelile, akusekho oboshiweyo nokhululekileyo.
Uyakuthi: ‘Baphi onkulunkulu babo, nedwala ababephephela kulo,
ababedla amanoni emihlatshelo yabo, bephuza iwayini lomnikelo wabo wokuphuzwayo, na? Mabanisize, mababe yisiphephelo senu.
“ ‘Bonani manje ukuthi Mina, yebo, Mina Nginguye, akekho unkulunkulu ngaphandle kwami; Mina ngiyabulala, ngibuye ngiphilise, ngilimaze, futhi ngipholise; akekho ongabahlenga esandleni sami.
Ngiphakamisela isandla sami ezulwini, ngithi: Mina ngiyakuphila kuze kube phakade.
Uma ngilola inkemba yami ebengezelayo, isandla sami sibambelele ekwehluleleni, ngiyophenduka ngiphindisele kwabamelene nami, ngiphindisele kwabangizondayo.’ ”
“Imicibisholo yami ngiyoyidakisa ngegazi, inkemba yami idle abantu, ngegazi lababuleweyo nabathunjiweyo, kuqala enhlokweni yabaholi bezitha.
Memezani ngokuthokoza bantu bakhe, nina zizwe, ngokuba uyakuliphindiselela igazi lezinceku zakhe, aziphindiselele kwabamelene naye, ahlambulule izwe lakhe nabantu bakhe.”
UMose noJoshuwa, indodana kaNuni, wafika wakhuluma wonke amazwi aleli hubo kubantu bonke belalele.
UMose eseqedile ukukhuluma wonke lawa mazwi kubo bonke abakwa-Israyeli,
wathi kubo: “Agcineni enhliziyweni yenu wonke lawa mazwi enginixwayisa ngawo namuhla, niyale ngawo abantwana benu, ukuze baqikelele ukuwenza wonke amazwi alo mthetho.
Ngokuba leli lizwi alisiwo amampunge nje kini, lingukuphila kwenu; ngalawa mazwi niyokwandisa izinsuku zenu ezweni eniwela iJordani, ukuba nilidle.”
USimakade wakhuluma kuMose ngokubaluleka kwalolu lusuku, wathi:
“Khuphukela entabeni i-Abharimi, okuyintaba iNebho kwaMowabi, eqondene neJerikho, ulibuke iKhanani engizakubanika lona abantu bakwa-Israyeli, ukuba libe yifa labo.
Uyofela kuleyo ntaba okhuphukela kuyo, ubuyele kwabakini, njengoba no-Aroni, umfowenu, afela entabeni iHori, wabuyela kwabakubo,
ngokuba naphambuka phambi kwabantu bakwa-Israyeli namelana nami ngasemanzini eMeribha eKadeshi, ehlane iZini, lokhu ningangingcwelisanga phambi kwabakwa-Israyeli.
Uyakulibona izwe phambi kwakho, kodwa awuyukungena kulo, izwe engibanika lona abantu bakwa-Israyeli.”
Nasi isibusiso uMose, umuntu kaNkulunkulu, abusisa ngaso abantu bakwa-Israyeli, engakafi;
wathi: “USimakade weza evela eSinayi, wabakhanyisela evela eSeyiri, wakhazimula entabeni iPharanu. Weza nezigidi zabangcwele; ebaphathele umthetho ovuthayo esandleni sakhe sokunene.
Yebo, uyazithanda izizwe, bonke abangcwele bakhe basesandleni sakho; baholelwe ngasezinyaweni zakho, bayakwemukela okwamazwi akho.
UMose wasinika umthetho, waba yifa lenhlangano kaJakobe.
USimakade waba yinkosi eJeshuruni, ngesikhathi izinhloko zabantu ziqoqana ndawonye, nezizwana zakwa-Israyeli zabuthanela ndawonye.
“Sengathi uRubeni angaphila, angafi; amadodana akhe ande kakhulu.
“Washo lokhu ngoJuda: ‘Yizwa, Simakade, yizwa izwi likaJuda, umlethe kwabakubo; izandla zakho zimlwele, umsize kwabamelene naye.’
“NgoLevi wathi: ‘IThumimi lakho ne-Urimi lakho makuye kothembekileyo wakho, owamvivinya eMasa, owaphikisana naye ngasemanzini eMeribha,’
owathi ngoyise nonina: ‘Angibabonanga,’ wangabanaka abafowabo, akaze abanakekela abantwana bakhe. Ngokuba baligcina izwi lakho, basigcina isivumelwano sakho.
Bafundisa uJakobe izehlulelo zakho, no-Israyeli umthetho wakho; babeka impepho phambi kwamakhala akho, nomnikelo oshiswa wonke e-althare lakho.
Busisa, Simakade, amandla akhe, uyamukele nemisebenzi yezandla zakhe. Labo abamvukelayo bafihlize izinkalo zabo, nezalabo abamzondayo, ukuze bangaphindi bavuke.
“NgoBhenjamini wathi: ‘Othandiweyo kaSimakade uyakuhlala elondwa nguye; uyamsibekela usuku lonke, ahlale phakathi kwamahlombe akhe.’
“NgoJosefa wathi: ‘Izwe lakhe malibusiswe nguSimakade ngamagugu asezulwini, ngamazolo, ngotwa olwenabileyo phansi,
ngamagugu ezithelo zelanga, ngamagugu esivuno senyanga,
ngezinto ezinqabileyo zezintaba zasemandulo, ngamagugu amagquma angunaphakade,
ngamagugu omhlaba nokugcwala kwawo, nangentando enhle yowabonakala esihlahleni; isibusiso masehlele ekhanda likaJosefa nasemqheleni wekhanda lalowo owehlukaniswa nabafowabo.
Izibulo lenkunzi yakhe, udumo lwakhe, nezimpondo zenyathi ziyizimpondo zakhe; ngazo uyakuqhubukusha izizwe zonke ekugcineni komhlaba; zinjalo izigidi zakwa-Efrayimi, zinjalo izinkulungwane zakwaManase.’
“NgoZebuloni wathi: ‘Yenama, Zebuloni, ekuphumeni kwakho, nawe Isakhare, emathendeni akho.
Bayobizela izizwe entabeni, lapho bayonikela imihlatshelo yokulunga, ngokuba bayoncela inala yezilwandle, nengcebo yesihlabathi efihliweyo.’
“NgoGadi wathi: ‘Makabusiswe owandisa uGadi: uhlezi njengengonyama, udwengula ingalo nomqhele okhakhayini.
Wazikhethela isabelo sekhethelo, ngokuba sasigodlwe lapho isabelo somehluleli; wahamba nabaholi babantu, wafeza ubulungiswa bukaSimakade nezehlulelo zakhe ngo-Israyeli.’
“NgoDani wathi: ‘UDani uyibhongo lengonyama, elitshakadulayo, liphuma eBhashani.’
“NgoNafethali wathi: ‘Nafethali, ugcwele umusa, ugcwele isibusiso sikaSimakade: uyakudla intshonalanga neningizimu.’
“Ngo-Asheri wathi: ‘Ubusisiwe u-Asheri ngaphezu kwabafowabo, makafumane umusa kubafowabo, unyawo lwakhe alucwilise emafutheni.
Imigoqo yakho ingeyensimbi nethusi, njengoba zinjalo izinsuku zakho; ayoba njalo namandla akho.’
“Akekho ofana noNkulunkulu, Jeshuruni, ogibela amazulu ukuzokusiza, namafu ngobukhosi bakhe.
UNkulunkulu wasemandulo uyisiphephelo nangaphansi zikhona izingalo ezingunaphakade; wazixosha izitha phambi kwakho wathi: ‘Bhubhisa.’
U-Israyeli uhleli ngokuvikeleka; umthombo kaJakobe wehlukene wodwa ezweni lokusanhlamvu nelewayini; lapho amazulu akhe econsa amazolo.
Ubusisiwe wena Israyeli; ngubani ofana nawe, isizwe esisindiswe nguSimakade oyisihlangu nosizo lwakho, oyinkemba yakho yokunqoba. Izitha zakho ziyokhwantshabala, wena unyathele ezindaweni zazo eziphakemeyo.”
UMose wakhuphuka emathafeni kwaMowabi, wenyukela entabeni iNebho, esicongweni iPhisiga esiqondene neJerikho. USimakade wamkhombisa lonke izwe lakwaGileyadi kuze kufike kwaDani,
lonke elakwaNafethali, elakwa-Efrayimi, elakwaManase, nalo lonke elakwaJuda kuze kufike olwandle entshonalanga.
Wamtshengisa iNegevu nethafa lesigodi iJerikho umuzi wamasundu kuze kufike eZowari.
USimakade wathi kuye: “Nanto-ke izwe engafunga ngalo ku-Abhrahama, u-Isaka noJakobe, ngathi: ‘Ngiyakulinika uzalo lwakho; ngikuvumele walibona ngamehlo akho, kodwa awuyukuwelela kulo.’ ”
UMose inceku kaSimakade wafela khona lapho kwaMowabi, njengezwi likaSimakade.
Wamngcwaba esigodini kwaMowabi, maqondena neBhethi Pheyori kodwa akukho muntu olaziyo ithuna lakhe kuze kube namhlanje.
UMose wafa eseneminyaka eyi-120, kodwa iso lakhe lalingakafiphali namandla akhe engakanciphi.
Abantu bakwa-Israyeli bamlilela uMose besemathafeni kwaMowabi. Bamkhalela izinsuku ezingama-30, sase siphela isikhathi sokulilela uMose.
UJoshuwa, indodana kaNuni, wayegcwele umoya nokuhlakanipha, ngokuba uMose wayebeke izandla kuye; abantu bakwa-Israyeli bamlalela, benza njengalokhu uSimakade ayemyalile uMose.
Akuzange kuphinde kuvele umphrofethi kwa-Israyeli owayefana noMose, owayazana noSimakade ubuso nobuso.
Akekho owayengalinganiswa naye ngazo zonke izibonakaliso nezimangaliso uSimakade amthumela ukuba azenze eGibhithe, kuFaro, kuzo zonke izinceku zakhe, nasezweni lakhe lonke,
nangazo zonke izenzo zamandla, nezinto ezesabekayo uMose azenza phambi kwabo bonke abakwa-Israyeli bebuka.
Emveni kokufa kukaMose, inceku kaSimakade, uSimakade wakhuluma kuJoshuwa, indodana kaNuni inceku kaMose, wathi:
“Inceku yami uMose ifile, ngakho-ke suka uwele iJordani, wena nabo bonke laba bantu, ningene ezweni engizakubabela lona abantu bakwa-Israyeli.
Yonke indawo lapho nibeke khona unyawo lwenu, leyo ndawo ngiyakuninika yona njengalokhu ngishilo kuMose.
Kusukela eLebhanoni kuze kube semfuleni omkhulu, umfula iYufrathe, lonke izwe lamaHithi kuze kuyofinyelela olwandle entshonalanga, kuyakuba yizwe lenu.
Akuyukuba bikho muntu oyoma phambi kwakho, zonke izinsuku zokuphila kwakho; njengoba nganginaye uMose, ngiyakuba nawe kanjalo, angiyukukuyeka, futhi angiyukukushiya.
Qina, ume isibindi, ngokuba nguwena oyokwenza laba bantu badle izwe engafunga koyisemkhulu ukubanika lona.
Qina kuphela, ube nesibindi kakhulu, uqaphele ukwenza njengokomthetho wonke inceku yami uMose akuyala ngawo. Ungachezuki nakancane kuwo, uye ngakwesokunene noma ngakwesokhohlo, ukuze ube nempumelelo noma kuphi lapho uya khona.
Le ncwadi yomthetho ayiyukusuka emlonyeni wakho; uyakuzindla ngayo imini nobusuku, ukuze uqikelele ukwenza njengakho konke okulotshwe kuyo. Ngokwenzenjalo uyokwenza indlela yakho ichume, ube nenqubekelaphambili.
Ngiyakuyala manje: qina, ume isibindi; ungesabi, ungadikibali, ngokuba uSimakade uNkulunkulu wakho unawe noma kuphi lapho uya khona.”
UJoshuwa wayeseyala izinduna zabantu, ethi:
“Dabulani enkanjini, niyale abantu ukuba balungise umphako, ngokuba ezinsukwini ezintathu nizowela iJordani, ukuba ningene, nidle izwe uSimakade aninika lona ukuba libe ngelenu.”
UJoshuwa wayesekhuluma nabakwaRubeni nabakwaGadi nengxenye yesizwana sakwaManase, wathi:
“Khumbulani izwi uMose, inceku kaNkulunkulu, aniyala ngalo, ethi: ‘USimakade uNkulunkulu wenu uzakunabela indawo yokuphumula, futhi uyakuninika leli lizwe.’
Omkenu nabantwana benu nemfuyo yenu kuyakusala ezweni uMose aninika lona, elingaphesheya kweJordani. Kepha nina niyakuwela nihlomile phambi kwabafowenu, nonke nina maqhawe anamandla niyakubasiza,
aze uSimakade abaphe ukuphumula abafowenu kanye nani, nabo balidle izwe uSimakade uNkulunkulu wenu abanika lona. Niyobuyela ezweni lenu nilidle, izwe uMose, inceku kaSimakade, aninika lona phesheya kweJordani ngasempumalanga.”
Bamphendula uJoshuwa bathi: “Konke lokho osiyale ngakho sizokwenza, futhi noma kuphi lapho usithuma khona siyakuya.
Njengoba samlalela uMose ezintweni zonke, nawe siyakukuhlonipha. Kuphela nje, sengathi uSimakade uNkulunkulu wakho angaba nawe njengalokhu ayenoMose.
Noma ngubani omelana neziyalo zakho, angawahloniphi amazwi akho, lokho oyala ngakho, uyakuyiswa kwagoqanyawo. Wena nje qina ume isibindi.”
UJoshuwa, indodana kaNuni, wayesethumela izinhloli ezimbili isinyenyela, zisuka eShithimu, wathi kuzo: “Hambani nisihlolele izwe, ikakhulu iJerikho.” Zahamba, zafike zangenisa endlini yesifebe esibizo laso nguRahabi, zalala khona.
Inkosi yaseJerikho yabikelwa ukuthi: “Abanye bakwa-Israyeli bafikile kusihlwa ukuzohlola izwe.”
Inkosi yaseJerikho yayisithumela umyalezo kuRahabi, yathi: “Khipha lawo madoda afikele kwakho, angena endlini yakho, ngokuba eze ukuzohlola lonke izwe.”
Kepha owesifazane wawathatha lawo madoda amabili wawafihla. Wayesethi: “Yebo, impela lawo madoda afikile kimi, kodwa angiwazanga ukuthi avelaphi.
Kuthe kusihlwa sekuzovalwa isango, asuka ahamba. Angazi ukuthi aphume alibhekisaphi. Phuthumani niwalandele, ngokuba ningase niwafice.”
Kodwa ngaleso sikhathi wayesezikhuphulele phezulu ophahleni lwendlu yakhe, wazifihla phansi kwenyanda yekhwani ayeyibeke lapho.
Amadoda azilandela ngendlela elibangise eJordani aze ayofinyelela emazibukweni alo. Athi ukuba aphume amadoda ayezilandela, lavalwa isango.
Zingakalali izinhloli, uRahabi wakhuphukela kuzo ophahleni;
wathi kuzo: “Ngiyazi ukuthi uSimakade uNkulunkulu uninikile leli lizwe nokuthi sonke sigcwele ingebhe ngenxa yenu, nokuthi zonke izakhamuzi zaleli lizwe zinesaba okokufa.
Ngokuba sizwile ukuthi uSimakade wawomisa kanjani amanzi oLwandle Lomhlanga phambi kwenu lapho niphuma eGibhithe, nalokho enakwenza emakhosini amabili ama-Amori ayengaphesheya kweJordani, kuSihoni no-Ogi enababhubhisa bashabalala.
Sithe ukuba sizwe ngalokho izinhliziyo zangenwa yingebhe, kwangaba bikho muntu onesibindi sokuma phambi kwenu, ngokuba uSimakade uNkulunkulu wenu, unguNkulunkulu ezulwini phezulu nasemhlabeni phansi.
Manje-ke lokhu nginiphathe kahle, fungani kimi ngoSimakade ukuthi nani niyakubenzela umusa abendlu kababa; nginikeni uphawu oluzakuba yisiqiniseko sokuthi nizokwethembeka,
nokuthi niyomsindisa ubaba, umama, abafowethu, odadewethu nakho konke okungokwabo, nisikhulule ekufeni.”
Amadoda athi kuye: “Singanifela nokunifela. Uma ningaludaluli lolu daba lwethu, siyakuniphatha ngomusa nangokwethembeka lapho uSimakade esesinika izwe.”
URahabi wayesewehlisa ngentambo aphuma ngefasitela, ngoba indlu ayehlala kuyo yayiyingxenye yodonga lomuzi, yena ehlala ngaphakathi kodonga.
Wathi kuwo: “Hambani nilibhekise kwelezintaba, ukuze abanixoshayo banganitholi. Cashani lapho izinsuku ezintathu baze babuye abanixoshayo, bese niqhubeka nohambo lwenu.”
Amadoda athi kuye: “Asiyukubophezeleka kulesi sifungo osenzise sona,
uma kuyothi lapho sihlasela izwe, sithole ungayibophelanga le ntambo ebomvu efasiteleni owasikhipha ngalo, futhi ungaqoqelanga endlini yakho uyihlo nonyoko nabafowenu nabo bonke abendlu kayihlo.
Uma kukhona ophumela ngaphandle kweminyango yendlu yakho abe semgwaqweni, kuyoba yicala lakhe uma efa, thina asiyukuba nacala, kodwa uma kukhona othinta noma yimuphi kulabo abanawe endlini, icala lokufa kwabo liyothwalwa yithi.
Kodwa uma uluxoxa lolu daba lwethu, thina siyobe sesikhululekile kulesi sifungo osifungise sona.”
Wathi: “Makube njengoba nisho.” Wayesewakhulula aqhubeka nohambo lwawo. Yena wabophela intambo ebomvu efasiteleni.
Ahamba abheka kwelezintaba, ahlala lapho izinsuku ezintathu baze babuya labo ababewaxosha. Ababewaxosha bawafuna kuyo yonke indawo ngasendleleni, kodwa abawafumananga.
Lawo madoda amabili ehla kwelezintaba, awela afika kuJoshuwa, indodana kaNuni, amtshela konke okuwehleleyo.
Athi kuJoshuwa: “Ngempela, uSimakade ulinikele lonke izwe ezandleni zethu; ngaphezu kwalokho zonke izakhamuzi zezwe ziyagedezela wuvalo lokusesaba.”
Ngovivi ngakusasa, uJoshuwa wavuka wakhukhula nabo bonke abakwa-Israyeli, esuka eShithimu, baze bayofika emfuleni iJordani. Bakanisa lapho ngaphambi kokuba bawele.
Sekwedlule izinsuku ezintathu, izinduna zadabula enkanjini,
zayala abantu zithi: “Nxa nibona umphongolo wesivumelwano sikaSimakade uNkulunkulu wenu uthwelwe ngabaphristi abangabaLevi, niyakusuka endaweni yenu. Wulandeleni,
ukuze niyazi indlela enimele ukuhamba ngayo, ngokuba anikaze nidlule kule ndawo ngaphambilini, nokho kufanele kube nesikhala phakathi kwenu nawo, ibanga elingaba yizi-2 000 zamakhubhithi; ningasondeli neze eduze kwawo.”
UJoshuwa wayesethi kubantu: “Zingcweliseni, ngokuba kusasa uSimakade uzokwenza izimangaliso phakathi kwenu.”
Kubaphristi, uJoshuwa wathi: “Thathani umphongolo wesivumelwano nidlule phambi kwabantu.” Ngakho-ke bawuthatha umphongolo wesivumelwano base behamba phambi kwabantu.
USimakade wathi kuJoshuwa: “Namuhla ngizakuqala ukukuphakamisa emehlweni abo bonke abakwa-Israyeli, ukuze bazi ukuthi ngiyoba nawe njengoba nganginaye uMose.
Nguwe oyakuyala abaphristi abathwele umphongolo wesivumelwano, uthi: ‘Nxa senifikile osebeni lomfula iJordani, niyokuma ninganyakazi.’ ”
UJoshuwa wayesethi kubantu bakwa-Israyeli: “Sondelani nizwe amazwi kaSimakade uNkulunkulu wenu.”
UJoshuwa wayesethi: “Niyokwazi ngalokhu ukuthi uNkulunkulu ophilayo uphakathi kwenu, ongayikwehluleka ukuxosha phambi kwenu amaKhanani, amaHithi, amaHivi, amaPherizi, amaGirigashi, ama-Amori, namaJebusi.
Bhekani, umphongolo wesivumelwano seNkosi yomhlaba wonke uzokwedlula phambi kwenu eJordani.
Ngakho-ke khethani amadoda ali-12 kuzo zonke izizwana zakwa-Israyeli, abe munye kuleso naleso sizwe.
Kuyothi lapho amathe ezinyawo zabaphristi abathwele umphongolo kaSimakade, iNkosi yomhlaba wonke, ethinta amanzi eJordani, amanzi eJordani ageleza evela enhla ayokuma, ayokuma abe yintaba.”
Kwathi lapho abantu besuka emathendeni abo ukuba bawele iJordani, abaphristi abathwele umphongolo wesivumelwano babephambi kwabo.
Lapho abathwele umphongolo befika eJordani, nezinyawo zabaphristi sezithinte amanzi osebeni lomfula iJordani ogola izintethe ngaso sonke isikhathi sokuvuna,
amanzi anqamuka ukugeleza, aba yintaba aze ayofinyelela ngase-Adamu, eliseduze neZarethani. Kwathi amanzi agelezela olwandle i-Araba, uLwandle Lukasawoti nawo anqamuka, abantu bawela umfula maqondana neJerikho.
Abaphristi ababethwele umphongolo wesivumelwano sikaSimakade bama bangathi nyaka emhlabathini owomile phakathi kweJordani, saze sawela sonke isizwe sakwa-Israyeli, sihamba emhlabathini owomileyo.
Lapho isizwe sonke sesiliwelile iJordani, uSimakade wakhuluma kuJoshuwa wathi:
“Ziqokeleni amadoda ali-12 phakathi kwabantu, uqoke indoda ibe yinye kuleso naleso sizwe.
Uwayale ukuba ngayinye ithathe itshe phakathi nomfula lapho kumi khona izinyawo zabaphristi, athathe amatshe ali-12. Niyakuwathatha niwele nawo, niwabeke endaweni lapho niyophumula khona, lapho niyolala khona ngalobo busuku.”
UJoshuwa wayesebiza lawo madoda ali-12 ayeqokwe phakathi kwabantu bakwa-Israyeli, indoda eyodwa isizwe ngesizwe.
UJoshuwa wathi kuwo: “Welani phambi komphongolo wesivumelwano sikaSimakade uNkulunkulu wenu, phakathi komfula iJordani, kuthi indoda ngayinye ngokwenani lezizwe ithathe itshe iletshathe ehlombe njengokwezizwe zakwa-Israyeli,
abe wuphawu phakathi kwenu, ukuze kuthi lapho zinibuza izingane zenu ngesikhathi esizayo, zithi: ‘Ayini lawa matshe kini na?’
nithi kuzo: ‘Amanzi omfula iJordani anqamuka phambi komphongolo wesivumelwano sikaSimakade lapho kuwela umphongolo eJordani; lawa matshe ayisikhumbuzo kubantu bakwa-Israyeli kuze kube phakade.’ ”
Abantu bakwa-Israyeli benza njengoba uJoshuwa wayebayalile; bathatha amatshe ali-12 phakathi neJordani njengalokhu uSimakade ayeshilo kuJoshuwa, njengokwezizwe zakwa-Israyeli; bawathwala bawela nawo, baya endaweni lapho babezolala khona, base bewabeka phansi lapho.
UJoshuwa wamisa amanye amatshe ali-12 phakathi nomfula iJordani, endaweni lapho izinyawo zabaphristi ababethwele umphongolo wesivumelwano zazimi khona. Asekhona lapho kuze kube namuhla.
Abaphristi ababethwele umphongolo bama phakathi eJordani, kwaze kwaphela konke lokho uSimakade ayeyale uJoshuwa ukuba akusho kubantu, njengakho konke uMose ayemyale ngakho uJoshuwa. Abantu bawela ngokushesha.
Lapho bonke abantu sebeqedile ukuwela, abaphristi bawela nomphongolo kaNkulunkulu abantu bebuka.
Abozalo lukaRubeni nolukaGadi nengxenye yesizwana sakwaManase bawela umfula behlomile phambi kwabantu bakwa-Israyeli, njengalokhu uMose ayebayalile.
Kwawela phambi kukaSimakade amadoda ayizi-40 000 ayehlome ephelele alibangisa emathafeni eJerikho ukuyolwa.
Ngalolo lusuku uSimakade wamphakamisa uJoshuwa emehlweni abo bonke abantu bakwa-Israyeli; bamesaba njengoba babesaba uMose izinsuku zonke zokuphila kwakhe.
USimakade wathi kuJoshuwa:
“Yala abaphristi abathwele umphongolo wesivumelwano ukuba bakhuphuke baphume eJordani.”
Ngakho-ke uJoshuwa wabayala abaphristi, wathi: “Khuphukani niphume eJordani.”
Lapho abaphristi ababethwele umphongolo wesivumelwano sikaSimakade bephuma phakathi nomfula iJordani, amathe ezinyawo zabo esethinte emhlabathini owomileyo, amanzi eJordani abuyela endaweni yawo, umfula wagola izintethe njengakuqala.
Abantu baliwela iJordani ngolweshumi enyangeni yokuqala, base bekanisa eGiligali empumalanga yomngcele eJerikho.
Lawo matshe ali-12 ababewathathe eJordani, uJoshuwa wawamisa eGiligali,
ethi kwabakwa-Israyeli: “Boyise, lapho abantwana benu benibuza ngesikhathi esizayo, bethi: ‘Achazani lawa matshe na?’
anobaphendula nibatshele ukuthi: ‘U-Israyeli wawela iJordani ehamba emhlabathini owomileyo,
ngokuba uSimakade uNkulunkulu wenu wayewomisile amanzi eJordani phambi kwethu saze sawela sonke, njengalokhu ayenzile kulo uLwandle Lomhlanga alomisa phambi kwethu saze sawela sonke,’
ukuze bonke abantu emhlabeni bazi ukuthi isandla sikaSimakade sinamandla, nokuba bamesabe uSimakade uNkulunkulu zonke izinsuku.”
Kwathi lapho wonke amakhosi ama-Amori ayengaphesheya kweJordani ngasentshonalanga, nawo wonke amakhosi amaKhanani ayegudle ulwandle, ezwa ukuthi uSimakade womise amanzi eJordani baze bawela bonke abantu bakwa-Israyeli, angenwa ngamanzi emadolweni, aphelelwa yisibindi ngenxa yabantu bakwa-Israyeli.
Ngaleso sikhathi uSimakade wathi kuJoshuwa: “Yenza imimese ngetshe lensengetsha bese usoka abantu bakwa-Israyeli okwesibili.”
Ngakho-ke uJoshuwa wazenzela imimese ngetshe lensengetsha, wasoka abantu bakwa-Israyeli eGqumeni Lamajwabu.
Kwakuyilesi isizathu sokuba uJoshuwa abasoke: bonke abesilisa kubantu abaphuma eGibhithe, nawo wonke amabutho, babefele endleleni ehlane emveni kokuphuma kwabo eGibhithe.
Nakuba bonke ababephume eGibhithe babesokiwe, bonke abazalelwa endleleni kudatshulwa ehlane emveni kokuphuma eGibhithe, babengasokiwe.
Ngokuba abantu bakwa-Israyeli bahamba iminyaka engama-40 ehlane, saze saphela isizwe namadoda empi ababephume eGibhithe, abangalalelanga izwi likaSimakade, afunga ngalo kubo ukuthi abasoze balibone izwe ayethembise ukulinika oyisemkhulu, izwe elichichima ubisi noju.
Waphakamisa abantwana babo esikhundleni sabo, uJoshuwa wabasoka ngokuba babengasokwanga endleleni;
kwathi sebesokiwe bonke, bahlala lapho, baze baphola.
USimakade wathi kuJoshuwa: “Namuhla ngilisusile kini ihlazo laseGibhithe.” Yingakho leyo ndawo ibizwa ngokuthi yiGiligali, kuze kube namuhla.
Ngesikhathi abantu bakwa-Israyeli besakanise eGiligali bagubha uMkhosi wePhasika esigodini iJerikho, kusihlwa ngosuku lwe-14 lwenyanga yokuqala.
Ngosuku olulandela umkhosi wePhasika, nangalo lolo lusuku, badla umkhiqizo weKhanani, isinkwa esingenamvubelo nokusanhlamvu okugazingiwe.
Yanqamuka imana ngosuku abaqala ngalo ukudla umkhiqizo weKhanani, abantu bakwa-Israyeli ababange besaba nayo imana, badla izithelo zeKhanani ngalowo nyaka.
Kuthe uJoshuwa eseseduze kwaseJerikho, wathi ebheka, wabona indoda imi phambi kwakhe, iphethe inkemba esandleni. UJoshuwa waya kuyo, wathi: “Ungomunye wethu noma ungomunye wezitha zethu, na?”
Yaphendula yathi: “Angisiye omunye walokho kokubili, kodwa ngingumkhuzi wempi kaSimakade, sengifikile ngizonisiza.” UJoshuwa wakhothama wathi mbo ngobuso emhlabathini, eyihlonipha, kodwa wathi kuyo: “Nkosi, uyiyala inceku yakho ukuba yenzeni na?”
Umkhuzi wempi kaSimakade wathi kuJoshuwa: “Khumula izimbadada zakho ezinyaweni ngokuba indawo omi kuyo ingcwele.” UJoshuwa wenza kanjalo.
Amasango eJerikho ayevaliwe ngaphakathi nangaphandle ngenxa yabantu bakwa-Israyeli; kwakungaphumi futhi kungangeni muntu.
USimakade wathi kuJoshuwa: “Bheka, ngilinikele kuwe iJerikho, lona kanye nenkosi yalo namaqhawe alo anamandla.
Niyakuhamba niwuzungeze kanye umuzi. Uyakukwenza lokhu izinsuku eziyisithupha,
nabaphristi abayisikhombisa bephethe amacilongo ayisikhombisa ezimpondo zezinqama, behamba phambi komphongolo wesivumelwano. Ngosuku lwesikhombisa uyakuwuzungeza umuzi kuze kube kasikhombisa, abaphristi bebetha amacilongo.
Kuyothi lapho beshaya uphondo lwenqama isikhathi eside, lapho nje nikuzwa ukukhala kwecilongo, bonke abantu bayakumemeza ngesaho esikhulu, udonga lomuzi luyakudilika bese bonke abantu begasela phakathi.”
Ngakho-ke uJoshuwa, indodana kaNuni, wabiza abaphristi, wathi kubo: “Thathani umphongolo wesivumelwano bese abaphristi abayisikhombisa baphathe amacilongo ayisikhombisa ezimpondo zezinqama phambi komphongolo kaSimakade.”
Wathi kubantu: “Phikelelani phambili, niwuzungeze umuzi; amadoda ahlomile mawedlule phambi komphongolo kaSimakade.”
Njengoba uJoshuwa ayebayalile abantu, abaphristi abayisikhombisa bephethe amacilongo ayisikhombisa ezimpondo zezinqama bahamba phambi kukaSimakade befutha amacilongo abo, nomphongolo wesivumelwano sikaSimakade ulandela ngemuva kwabo.
Amadoda ahlomile ahamba phambi kwabaphristi ababeshaya amacilongo. Amanye ahamba ngemuva elandela umphongolo, abashaya amacilongo bawashaya kabaze baphumula.
UJoshuwa wabayala abantu, wathi: “Aniyukukhuza saga, aniyukumemeza, futhi aniyukusho lutho kuze kube lusuku engiyonitshela ngalo ukuba nikhuze isaga. Lapho-ke niyakumemeza nikhamuluke.”
Umphongolo kaSimakade wazungeza umuzi, wawuzungeza kanye, base bebuyela enkanjini yabo, balala lobo busuku lapho babekanise khona.
UJoshuwa wavuka ekuseni kakhulu, abaphristi bathatha umphongolo kaSimakade.
Abaphristi abayisikhombisa ababephethe amacilongo ezimpondo zezinqama ayisikhombisa, bedlula phambi komphongolo kaSimakade beshaya amacilongo. Amadoda ahlomile ahamba phambi kwabo, amanye alandela umphongolo kaSimakade, kwathi abashaya amacilongo bawashaya bengaphumuli.
Ngosuku lwesibili bahamba bawuzungeza umuzi kanye, base bebuyela enkanjini. Bakwenza lokho izinsuku eziyisithupha.
Ngosuku lwesikhombisa bavuka ekuseni kusempondozankomo bahamba bawuzungeza umuzi ngendlela efanayo, kwaze kwaba kasikhombisa. Kwakungalolo lusuku kuphela lapho bahamba bawuzungeza kasikhombisa umuzi.
Lapho sekungokwesikhombisa, abaphristi sebewashayile amacilongo, uJoshuwa wathi kubantu: “Memezani kakhulu, ngokuba uSimakade uwunikele kini lo muzi.
Umuzi nakho konke okukuwo kuyakunikelwa kuSimakade, ubhujiswe, nguRahabi isifebe kuphela nabo bonke abanaye endlini yakhe abayosinda, ngokuba wathukusa izinhloli zethu esasizithumele.
Nize ningazithinti izinto ezimiselwe ukucekelwa phansi, nize ningazinxaneli nithathe zonke izinto ezimiselwe ukubhujiswa bese nenza inkambu ka-Israyeli into yokubhujiswa, nilethe ukuhlupheka phezu kwayo.
Kepha lonke isiliva, igolide, izitsha zethusi nezensimbi kungcwele kuSimakade, kuyakuyiswa endlini yengcebo kaSimakade.”
Abantu bamemeza kakhulu, kwakhala amacilongo. Kwathi ukuba abantu bezwe ukukhala kwamacilongo, bamemeza kakhulu, lwawa udonga, ngakho-ke abantu bawuthelekela, bawudla umuzi.
Baphokophelela ukubhubhisa ngenkemba konke okwakulowo muzi, abesilisa nabesifazane, abancane nabadala, izinkomo nezimvu, nezimbongolo.
UJoshuwa wathi kulawo madoda amabili ayekade ehlole izwe: “Ngenani endlini yesifebe, nimkhiphe owesifazane kuyo nabo bonke abakwabo, njengalokhu nafunga kuye.”
Izinsizwa ezazikade ziyizinhloli zangena zamkhipha uRahabi, noyise, nonina, nabafowabo, nabo bonke ayenabo. Zawukhipha wonke umndeni wakhe, zababeka ngaphandle kwenkambu yakwa-Israyeli.
Bawushisa ngomlilo wonke umuzi, nakho konke okwakukuwo, ngaphandle kwesiliva negolide nezimpahla zethusi nezensimbi okwafakwa endlini yengcebo kaSimakade.
UJoshuwa wamsindisa uRahabi, isifebe, nabendlu kayise, nabo bonke ayenabo. Selokhu bahlala kwa-Israyeli kuze kube namuhla ngokuba wafihla izithunywa uJoshuwa ayezithume ukuyohlola iJerikho.
Ngaleso sikhathi uJoshuwa wenza lesi sifungo wathi: “Makaqalekiswe phambi kukaSimakade lowo oyozama ukwakha lo muzi iJerikho. Obeka isisekelo salo uyakulahlekelwa yizibulo lakhe, ovuselela amasango alo uyakulahlekelwa yindodana yokugcina.”
USimakade wayenaye uJoshuwa, udumo lwakhe lwagcwala ezweni lonke.
Kepha abantu bakwa-Israyeli abethembekanga mayelana nezinto ezaziqalekisiwe. U-Akhani, indodana kaKharimi kaZabidi kaZera wesizwana sakwaJuda, wathatha ezinye zezinto ezaziqalekisiwe; ngakho-ke ulaka lukaSimakade lwavuthela bonke abantu bakwa-Israyeli.
UJoshuwa wathumela amadoda esuka eJerikho eya e-Ayi, umuzi owawuseduzane neBhethi Aveni ngasempumalanga yeBhethele, wathi kuwo: “Khuphukani niyohlola izwe.” Amadoda ahamba, awuhlola umuzi i-Ayi.
Abuyela kuJoshuwa, athi kuye: “Akudingekile ukuba kungakhuphuka yonke impi; akuhambe amadoda ayizi-2 000 noma ayizi-3 000 awuhlasele umuzi i-Ayi. Ngokuba ingumuzi omncane, makungakhuphuki wonke umuntu, kodwa abayingcosana.”
Kwakhuphukela lapho amabutho ayizi-3 000, kepha babalekela amabutho ase-Ayi.
Amadoda ase-Ayi abulala amabutho angama-36 empi yakwa-Israyeli, ayixosha eyisusa ngasesangweni yaze yayofika eShebharimi, ababulala emthambekeni. Izinhliziyo zabantu zadikibala, zaphelelwa ngamandla.
UJoshuwa wayeseklebhula izingubo zakhe, wathi mbo ngobuso emhlabathini phambi komphongolo kaSimakade kwaze kwaba kusihlwa, yena namalunga akwa-Israyeli bazithela ngothuli emakhanda.
UJoshuwa wathi: “Maye, Simakade Nkulunkulu! Ubawezeleni laba bantu iJordani, ukuzosinikela esandleni sama-Amori ukuba asibhubhise, na? Bekungcono ukuba sivele sahlala khona phesheya kweJordani!
Hawu, Nkosi! Sengizothini njengoba u-Israyeli efulathele wehlulwa yizitha zakhe, na?
AmaKhanani nabo bonke abakhileyo kuleli lizwe bazokuzwa ngalokhu bese beyasizungeza, balishabalalise igama lethu emhlabeni. Uyakulenzelani-ke igama lakho elikhulu kangaka, na?”
USimakade wathi kuJoshuwa: “Sukuma! Uweleni ngobuso emhlabathini, na?
U-Israyeli wonile, usephulile isivumelwano engimmisele sona. Bathathile izinto eziqalekisiweyo, bebile, benza inkohlakalo, bazithathile lezo zinto bazihlanganisa nempahla yabo.
Ngakho-ke u-Israyeli akakwazi ukumelana nezitha zakhe; uyakuzifulathela izitha zakhe ngokuba usezenze into efanele ukubhujiswa. Angisezukuba nani ngaphandle kokuba nizishabalalise lezi zinto eziqalekisiwe eziphakathi kwenu.
“Ngakho-ke suka ungcwelise abantu, uthi kubo: ‘Zingcweliseleni usuku lwakusasa, ngokuba usho kanje uSimakade uNkulunkulu ka-Israyeli: kunezinto eziqalekisiweyo phakathi kwenu, Israyeli aniyukuma phambi kwezitha zenu nize nikhiphe phakathi kwenu izinto eziqalekisiweyo.
“ ‘Ngakho-ke kusasa niyakusondela ngezizwana zenu. Isizwana uSimakade ayakusikhetha, siyosondela ngokwemindeni yaso, umndeni awuthathayo usondele ngezindlu zawo, kuthi indlu ayithathayo uSimakade, kusondele umuntu ngamunye.
Kuyothi umuntu oyotholakala enokuqalekisiweyo, ashiswe ngomlilo nakho konke anakho, ngokuba esephulile isivumelwano sikaSimakade, nangokuba enze into embi kakhulu kwa-Israyeli.’ ”
Ngakho-ke uJoshuwa wavuka ekuseni kakhulu, wasondeza abantu bakwa-Israyeli ngokwezizwana zabo. Kwakhethwa isizwe sakwaJuda.
Wasisondeza isizwana sakwaJuda, kwasondezwa umungu ngamunye emndenini wabakwaZera, kwase kuqokwa uZabhidi.
Wayesesondeza abendlu yakhe ngamunye ngamunye, kwathi u-Akhani, indodana kaKharimi kaZabhidi kaZera, wesizwana sakwaJuda, wakhethwa.
UJoshuwa wathi ku-Akhani: “Ndodana yami, mnikeze udumo uSimakade uNkulunkulu ka-Israyeli, uvume kuye isono sakho. Ngitshele manje ukuthi wenzeni; ungangifihleli lutho.”
U-Akhani wamphendula uJoshuwa, wathi: “Kuliqiniso, yimi engonile kuSimakade uNkulunkulu ka-Israyeli. Nakhu engikwenzileyo:
lapho ngibona phakathi kwempango ingubo enhle eShinari, isiliva elingama-200 amashekeli, nesigaxa segolide esisisindo salo singamashekeli angama-50, ngakunxanela, ngase ngiyakuthatha. Manje ngikumbele ngakufihla phakathi ethendeni lami, isiliva lona liphansi kwakho konke.”
Ngakho-ke uJoshuwa wathumela izithunywa, zagijima zaya ethendeni lika-Akhani, zakufica lapho kufihliwe ethendeni lakhe, isiliva liphansi kwakho.
Zakukhipha ethendeni zakuletha kuJoshuwa nabo bonke abantu bakwa-Israyeli, bakwendlala phambi kukaSimakade.
UJoshuwa nabo bonke abantu bakwa-Israyeli ababenaye bamthatha u-Akhani, indodana kaZera, nesiliva, nengubo, nesigaxa segolide, namadodana namadodakazi akhe, nezinkabi zakhe nezimbongolo nezimvu nethende lakhe, nakho konke okwakungokwakhe, bakukhuphulela esigodini i-Akhori.
UJoshuwa wathi: “Wenzeleni ukuba usilethele inhlupheko, na? USimakade uzakukulethela inhlekelele nawe namuhla.” Bonke abantu bakwa-Israyeli bamkhanda ngamatshe waze wafa, babashisa ngomlilo, babakhanda ngamatshe.
Bamisa phezu kwakhe inqwaba yamatshe, esekhona nanamuhla. USimakade wayesephenduka olakeni lwakhe oluvuthayo. Ngakho-ke igama laleyo ndawo labizwa ngokuthi yisigodi i-Akhori.
USimakade wathi kuJoshuwa: “Ungesabi, ungabi naluvalo; thatha wonke amabutho, nikhuphukele e-Ayi; bheka, ngiyinikele esandleni sakho inkosi yase-Ayi nabantu bayo, nomuzi wayo nezwe layo.
Uyakwenza e-Ayi nasenkosini yakhona lokho okwenzile eJerikho nasenkosini yakhona; impango yalo kuphela nemfuyo yalo eniyakuzithathela khona. Gwacani ngemuva komuzi.”
UJoshuwa nawo wonke amabutho bagasela e-Ayi. UJoshuwa wakhetha amabutho ayizi-30 000 wawathumela ebusuku,
ewayalile, wathi: “Niyakugwaca ngemuva komuzi, ningayi kude nawo, kodwa nihlale nonke niqaphile.
Mina nabo bonke abantu abanami siyakusondela emzini; kuyothi lapho bephuma besihlasela, sicele empunzini njengakuqala.
Bayakuphuma basixoshe, nathi siyakubayenga baphume emzini, ngokuba bayakuthi: ‘Bayabaleka phambi kwethu njengakuqala.’ “Ngesikhathi sibaleka phambi kwabo,
niyakuvuka niwuthelekele umuzi, niwudle, ngokuba uSimakade uNkulunkulu wenu uzowunikela ezandleni zenu.
Lapho seniwudlile umuzi, niyakuwuthungela ngomlilo, nenze njengalokhu uSimakade eniyalile. Bhekani, senginiyalile.”
UJoshuwa wabathuma baya kuleyo ndawo ababezogwaca kuyo, bazifihla phakathi kweBhetheli ne-Ayi, ngasentshonalanga e-Ayi. Ngalobo busuku uJoshuwa walala phakathi kwabantu.
UJoshuwa wavuka ekuseni wahlela abantu, base beyakhuphuka phambi kwabantu, yena namalunga akwa-Israyeli, baya e-Ayi.
Wonke amabutho ayenaye akhuphuka, asondela phambi komuzi, ayesekanisa ngasenyakatho e-Ayi, kukhona umfula obehlukanise nomuzi i-Ayi.
Wakhetha amabutho ayizi-5 000 wawabeka phakathi kweBhetheli ne-Ayi, entshonalanga e-Ayi.
Bawahlela amabutho, ingxenye enkulu yawo yayingasenyakatho, ingxenye eyayingemuva ingasentshonalanga yomuzi. UJoshuwa walala esigodini ngalobo busuku.
Lapho inkosi yase-Ayi ikubona lokho, yaphuma ngokushesha ekuseni, yona nabantu bayo, izakhamuzi zomuzi i-Ayi, baya endaweni ebhekene ne-Araba lapho impi yayibambene khona neyakwa-Israyeli, kodwa yayingazi ukuthi kukhona abayilalele unyendle emva komuzi.
UJoshuwa nayo yonke impi yakwa-Israyeli, bashaya sengathi bayehlulwa, base beyabaleka ngendlela eqonde ogwadule.
Ngakho-ke bonke abantu ababesemzini babizelwa ndawonye ukuba babaxoshe. Besaxosha uJoshuwa baya ngokuya bededa emzini.
Akusalanga namunye e-Ayi noma eBhethele lapho bephumela ukuyoxosha abakwa-Israyeli, bawashiya amasango ethe gengelezi.
USimakade wathi kuJoshuwa: “Yelulela ngase-Ayi umkhonto osesandleni sakho, ngokuba ngiyakulinikela esandleni sakho.” UJoshuwa welulela ngasemzini umkhonto owawusesandleni sakhe.
Wathi ukuba aselule isandla sakhe, ababebalalele unyendle bathi vumbu lapho babegwace khona, banikela emzini. Bangena emzini, bawudla, ngokushesha bawuthungela ngomlilo.
Lapho amadoda ase-Ayi ebheka emuva akhangwa yisikhatha sentuthu sibheke esibhakabhakeni, kusha umuzi. Aphelelwa ngamandla, awaze azi ukuthi abalekele ngaphi, ngokuba abakwa-Israyeli ababebalekele ehlane babaphendukela abase-Ayi ababebaxosha.
Kuthe lapho uJoshuwa nawo wonke u-Israyeli bebona ukuthi umuzi udliwe ngababewuhlasela, nokuthi isikhatha sentuthu yomuzi sasenyukela phezulu, baphenduka babulala amabutho ase-Ayi.
Abanye baphuma emzini babhekana nabo. Ngaleyo ndlela abakwa-Israyeli babavimbezela nxazonke bababulala, akwaze kwasinda muntu.
Abayibulalanga nokho inkosi yase-Ayi, kodwa bayithumba bayiletha kuJoshuwa.
U-Israyeli eseqedile ukubulala zonke izakhamuzi zase-Ayi ehlane elalivulekile lapho babebaxoshele khona, nalapho bonke ngothi lwabo sebebulewe ngenkemba, bonke abakwa-Israyeli baphindela e-Ayi, balihlasela balibhubhisa ngenkemba.
Inani lalabo abawa ngenkemba ngalolo lusuku, abesilisa nabesifazane kwakuyizi-12 000, zonke izakhamuzi zakhona.
UJoshuwa akasifinyezanga isandla sakhe, wayelokhu eselulile siphethe inkemba, waze wazibhubhisa zonke izakhamuzi zase-Ayi.
U-Israyeli waphanga imfuyo nempahla kuphela, njengokuba uSimakade ayemyalile uJoshuwa.
Ngakho-ke uJoshuwa walishisa i-Ayi, walishiya liyindunduma yencithakalo kuze kube namuhla.
Inkosi yase-Ayi wayilengisa emthini kwaze kwaba kusihlwa. Ngokushona kwelanga uJoshuwa wayala ukuba basehlise isidumbu sayo emthini, basitshinge esangweni lomuzi, base bebeka inqwaba enkulu yamatshe phezu kwaso, esekhona nanamuhla.
UJoshuwa wakhela uSimakade uNkulunkulu ka-Israyeli i-althare entabeni i-Ebhali,
walenza lanjengalokhu uMose inceku kaSimakade ayemyalile u-Israyeli, nanjengalokhu kulotshwe encwadini yomthetho kaMose, ukuthi: i-althare kumele lenziwe ngamatshe angabaziwe, okungakaze kusetshenziswe thuluzi kuwo. Base benikela iminikelo yokushiswa kuSimakade, banikela neminikelo yokuthula.
Bekuleyo ndawo uJoshuwa wabhala ifuzela lomthetho ayewubhalile uMose phambi kwabo bonke abantu bakwa-Israyeli.
Bonke abakwa-Israyeli, abaholi, izinduna nabehluleli babo, abafokazi naboselwa, bama ngapha nangapha komphongolo wesivumelwano sikaSimakade phambi kwabaphristi babaLevi ababethwele umphongolo. Enye ingxenye yabantu yayiphambi kwentaba iGerizimu, enye ingxenye iphambi kwentaba i-Ebhali, njengokuba uMose, inceku kaSimakade, ayebayalile ukuze babusise abantu bakwa-Israyeli njengasezikhathini ezedlule.
Emveni kwalokho, uJoshuwa wafunda wonke amazwi omthetho, izibusiso neziqalekiso, njengakho konke okwakubhalwe encwadini yoMthetho.
UJoshuwa alikho nalinye izwi angalifundanga phambi kwebandla lakwa-Israyeli, kukho konke uMose ayeyale ngakho; wabafundela bonke abesifazane, abantwana nabafokazi ababehlala phakathi kwabo.
Kwathi ukuba wonke amakhosi ayengaphesheya kweJordani kwelezintaba, nalawo ayesemathafeni agudle ugu loLwande Olukhulu kuya ngaseLebhanoni: amaHithi, ama-Amori, amaKhanani, amaPherizi, amaHivi namaJebusi, ezwe ngalokhu,
ahlangana ndawonye aba yimbumba efuna ukuhlasela uJoshuwa no-Israyeli.
Kepha izakhamuzi zaseGibheyoni lapho zizwa ngalokho uJoshuwa ayekwenze kulo iJerikho ne-Ayi,
nazo zenza ubuqili. Zahamba zayozihlinzeka ngemiphako, zase zithatha amasaka agugile zawabeka phezu kwezimbongolo zazo, nezimvaba ezigugile nezidabukileyo ezase zichitshiyelwe.
Zafaka izimbadada ezindala ezinyaweni zazo, zagqoka izingubo ezigugile, zathatha umphako wezinkwa ezomile, eziyimvuthu.
Zaya kuJoshuwa enkanjini eGiligali, zathi kuye nabakwa-Israyeli: “Sivela ezweni elikude, ngakho-ke yenzani isivumelwano nathi.”
Kepha abakwa-Israyeli bathi kumaHivi: “Mhlawumbe nje nihlala phakathi kwethu; singasenza kanjani-ke isivumelwano nani, na?”
Zathi kuJoshuwa: “Siyizinceku zakho.” Kepha uJoshuwa wathi kuzo: “Ningobani, futhi nivelaphi?”
Zathi kuye: “Izinceku zakho zivela ezweni elikude kakhulu ngenxa yegama likaSimakade uNkulunkulu wenu, ngokuba sizwile ngaye nangakho konke akwenza eGibhithe,
nasemakhosini amabili ama-Amori ayengaphesheya kweJordani, uSihoni inkosi yaseHeshibhoni no-Ogi inkosi yaseBhashani, owayehlala e-Ashitharothi.
Ngakho-ke abaholi bethu nazo zonke izakhamuzi zezwe lakithi, zathi kithi: ‘Thathani umphako, nihambe nihlangane nabo nithi kubo: “Siyizinceku zenu, manje wozani nenze nathi isivumelwano.” ’
“Nasi isinkwa sethu, sasisashisa lapho sisithatha ezindlini zethu ukuba sibe ngukudla kwethu endleleni, ngosuku esalifulathela ngalo elakithi lapho siza kini. Bhekani manje, somile futhi sesize savuthuluka.
Niyabona-ke, nezimvaba zethu zewayini zazizintsha lapho sizigcwalisa, kodwa sezidabukile; izingubo nezimbadada zethu sekuvuthukela emizimbeni yethu ngenxa yobude bendlela.”
Amadoda akwa-Israyeli athatha emphakweni wazo engazange alizwe ilaka likaSimakade.
UJoshuwa wenza nazo isivumelwano sokuthula, eziqinisekisa ukuthi aziyukufa. Abaholi bebandla lakwa-Israyeli bafunga nabo ukuthi abayukuzibulala.
Emveni kwezinsuku ezintathu besenzile isivumelwano nazo, bezwa ukuthi zingomakhelwane babo nokuthi zihlala phakathi kwabo.
Abantu bakwa-Israyeli basuka bagasela kuzo, bafika emizini yazo ngosuku lwesithathu. Imizi yazo kwakuyiGibheyoni, iKhefira, iBhiyerothi neKiriyathi Jeharimi.
Kepha abakwa-Israyeli abazange bazihlasele, ngoba abaholi babo babefungile ngoSimakade uNkulunkulu ka-Israyeli. Ibandla lonke lakwa-Israyeli lakhononda ngabaholi balo.
Abaholi bathi kulo lonke ibandla: “Sifungile kubo ngoSimakade uNkulunkulu ka-Israyeli, ngakho-ke asikwazi manje ukuba singabalimaza.
Yilokhu esizokwenza kubo: sizobayeka baphile ukuze singehlelwa wulaka ngenxa yesifungo esisenze kubo.”
Abaholi babo bathi kubo: “Masibayeke baphile, ukuze basithezele izinkuni, futhi bakhele lonke ibandla lakwa-Israyeli amanzi, njengokuba abaholi benqumile ngabo.”
UJoshuwa wababiza, wathi kubo: “Nisikhohliseleni nithi: ‘Sihlala kude nani,’ nibe nihlala phakathi kwethu, na?
Ngakho-ke niqalekisiwe, abanye benu bayohlala beyizigqila, abathezi bezinkuni nabakhela indlu kaNkulunkulu wami amanzi.”
Bamphendula uJoshuwa, bathi: “Lokho kwenziwe ngukuthi izinceku zakho zezwa ngokweqiniso ukuthi uSimakade uNkulunkulu wenu wayiyala inceku yakhe uMose ukuba ininike izwe, nokuba ibhubhise zonke izakhamuzi zezwe eziphambi kwenu. Besinovalo olukhulu lokuthi nizosibulala, yingakho senze le nto.
Kepha manje sesisezandleni zenu, yenza ngathi lokho obona kufanele ukuba ukwenze kithi.”
UJoshuwa wenza lokhu kubo: wabakhulula esandleni sabakwa-Israyeli, abaze bababulala.
Kodwa kusukela ngalolo lusuku uJoshuwa wabenza abathezi bezinkuni nabakhela ibandla lonke ne-althare likaSimakade amanzi. Lona ngumsebenzi abasaqhubeka ukuwenza nanamhlanje endaweni aziqokele yona uNkulunkulu.
Lapho u-Adoni Zedeki, inkosi yaseJerusalema, esezwile ukuthi uJoshuwa uyidle kanjani i-Ayi, wayishaya wayiqothula, wenza kuyo i-Ayi nenkosi yayo njengalokhu ayenzile kulo iJerikho nenkosi yalo, nokuthi izakhamuzi zaseGibheyoni zasenza kanjani isivumelwano sokuthula no-Israyeli, zahlala phakathi kwakhe;
wesaba kakhulu, ngokuba iGibheyoni yayingumuzi omkhulu njengomunye wemizi yamakhosi nokuthi futhi inkulu kune-Ayi, namadoda wonke akhona angamaqhawe.
Ngakho-ke u-Adoni Zedeki, inkosi yaseJerusalema, wathumela kuHohamu inkosi yaseHebhroni, nakuPhiramu inkosi yaseJarimuthi, nakuJafiya inkosi yaseLakhishi, nakuDebhiri inkosi yase-Egiloni, wathi:
“Khuphukani, nizongisiza, silihlasele iGibheyoni, ngokuba lenze isivumelwano sokuthula noJoshuwa nabantu bakwa-Israyeli.”
Ngalokho amakhosi ayisihlanu ama-Amori: inkosi yaseJerusalema, inkosi yaseHebhroni, inkosi yaseJarimuthi, inkosi yaseLakhishi, nenkosi yase-Egiloni, ahlanganisa amabutho awo, akhuphuka nayo yonke impi yawo, akanisa malungana neGibheyoni, alwa nalo.
AbaseGibheyoni bathumela kuJoshuwa enkanjini eGiligali, bathi: “Ungaziyekeleli izinceku zakho; woza kithi ngokushesha usisindise, usisize, ngokuba wonke amakhosi ama-Amori akhe kwelezintaba ayasihlanganyela.”
UJoshuwa wayesekhuphuka esuka eGiligali, nawo wonke amabutho anamandla.
USimakade wathi kuJoshuwa: “Ungabesabi, ngokuba ngibanikele esandleni sakho; akukho namunye kubo oyakuma phambi kwakho.”
UJoshuwa wabathelekela bengazelele; kwazise wayehambe ubusuku bonke esuka eGiligali.
USimakade wabathela ngokudideka phambi kuka-Israyeli, owacekela phansi abaningi eGibheyoni, wabaxosha ngendlela ekhuphukela eBhethi Horoni, wabacekela phansi ngenkemba kwaze kwaba se-Azeka naseMakheda.
Besabaleka phambi kuka-Israyeli besuka emehlelweni eBhethi Horoni, uSimakade wehlisela phezu kwabo amatshe amakhulu evela ezulwini, baze bayofika e-Azeka, bafa. Babebaningi kakhulu ababulawa yisichotho kunalabo ababulawa ngu-Israyeli ngenkemba.
Ngosuku uSimakade anikela ngalo ama-Amori ku-Israyeli, uJoshuwa wakhuluma noSimakade ephambi kwabantu bakwa-Israyeli wathi: “Langa, yima nse eGibheyoni, nawe nyanga, esigodini i-Ayijaloni.”
Lase lima ilanga, nenyanga yema, abantu baze baziphindiselela ezitheni zabo. Akulotshiwe yini lokho encwadini yolungileyo, na? Ilanga lema phakathi nomkhathi, alisheshanga ukushona kwangathi wusuku lonke.
Aluzange lube khona usuku olunjengalolo ngaphambi kwalo noma ngasemuva kwalo, lapho uSimakade alalela khona izwi lomuntu; wamlwela u-Israyeli.
UJoshuwa nabo bonke abakwa-Israyeli ababenaye babuyela enkanjini eGiligali.
Lawo makhosi ayisihlanu abaleka, ayocasha emgedeni eMakheda.
Kwabikwa kuJoshuwa ukuthi: “Lawo makhosi ayisihlanu afunyaniswe ecashe emgedeni eMakheda.”
UJoshuwa wathi: “Gingqelani amatshe amakhulu emlonyeni womgede, nimise amadoda ngakuwo, awulinde,
kepha nina ningami lapho; zixosheni izitha zenu, nizihlasele ngasemuva, ningazivumeli ukuba zingene emizini yazo, ngokuba uSimakade uNkulunkulu wenu uzinikele esandleni senu.”
Kwathi lapho uJoshuwa nabantu bakwa-Israyeli sebecekele phansi abaningi kakhulu baze babaqeda, insali yangena emizini ebiyelweyo.
Bonke abantu babuyela kuJoshuwa enkanjini eMakheda bephephile, akubanga bikho owake wakhuluma okubi ngo-Israyeli.
Wayesethi uJoshuwa: “Vulani umlomo womgede, niwalethe kimi lawo makhosi ayisihlanu asemgedeni.”
Benza kanjalo-ke; bawakhipha, bawaletha kuye lawo makhosi amahlanu ayesemgedeni: inkosi yaseJerusalema, inkosi yaseHebhroni, inkosi yaseJarimuthi, inkosi yaseLakhishi, nenkosi yase-Egiloni.
Lapho bewaletha lawo makhosi kuJoshuwa, uJoshuwa wabiza wonke amadoda akwa-Israyeli wathi ezinduneni zamabutho ezazihambe naye: “Sondelani, nibeke izinyawo zenu ezintanyeni zalawa makhosi.” Zasondela-ke, zabeka izinyawo zazo ezintanyeni zawo.
UJoshuwa wathi kuzo: “Ningesabi, ningabi naluvalo; qinani, nime isibindi, ngokuba uSimakade uyakwenza kanjalo kuzo zonke izitha zenu enilwa nazo.”
Emveni kwalokho uJoshuwa wawagenca, wawabulala, wawaphanyeka ezihlahleni eziyisihlanu, alenga emithini kwaze kwahlwa.
Ekushoneni kwelanga uJoshuwa wayala, base beyawehlisa emithini, bawaphonsa emgedeni lapho ayekade ecashe khona, babeka amatshe amakhulu emlonyeni womgede; asekhona nanamuhla.
UJoshuwa wadla iMakheda ngalolo lusuku, walichitha ngenkemba nenkosi yalo, waqothula bonke abantu ababekulo, akashiyanga namunye. Wenza enkosini yaseMakheda njengoba ayenzile enkosini yaseJerikho.
UJoshuwa wasuka eMakheda nabo bonke abakwa-Israyeli, baya eLibhina, balwa nalo.
USimakade wayinikela nayo nenkosi yayo esandleni sabakwa-Israyeli, wayichitha ngenkemba nabo bonke abantu ababekuyo, akashiyanga namunye. Wenza enkosini yaseMakheda njengoba ayenzile enkosini yaseJerikho.
UJoshuwa wasuka eLibhina nabo bonke abakwa-Israyeli, baya eLakhishi, wakanisa malungana nayo, walwa nayo.
USimakade wayinikela iLakhishi esandleni sabakwa-Israyeli, balidla ngosuku lwesibili, balichitha ngenkemba nabo bonke abantu ababekulo njengoba babenzile eLibhina.
Kwase kukhuphuka uHoramu, inkosi yaseGezeri, ukuzosiza iLakhishi, kepha uJoshuwa wayibulala nabantu bayo, akashiyanga namunye kubo.
UJoshuwa wasuka eLakhishi, nabo bonke abakwa-Israyeli, baya e-Egiloni; bakanisa maqondana nalo, balwa nalo.
Balidla ngalolo lusuku, balichitha ngenkemba; nabo bonke abantu ababekulo, njengalokhu babenzile eLakhishi.
UJoshuwa wakhuphukela e-Egiloni nabo bonke abakwa-Israyeli, baya eHebhroni, balwa nalo.
Balidla, balichitha ngenkemba, inkosi nayo yonke imizi yalo, nabo bonke abantu ababekulo; akashiyanga namunye, njengalokhu ayenzile e-Egiloni.
UJoshuwa wabuyela nabo bonke abakwa-Israyeli eDebhiri, balihlasela;
walidla nenkosi yalo nayo yonke imizi yalo, balichitha ngenkemba, baqothula bonke abantu ababekulo, akashiyanga namunye; njengalokhu ayenzile eHebhroni, naseDebhiri nakuyo inkosi yalo, naseLibhina nakuyo inkosi yalo.
UJoshuwa walinqoba lonke izwe lezintaba, iNegevu, amathafa, imithambeka, namakhosi wonke alo; akashiyanga nayinye. Wakuqothula konke okuphefumulayo njengokuyala kukaSimakade uNkulunkulu ka-Israyeli.
UJoshuwa wabanqoba kusukela eKadeshi Bharineya kuze kufike eGaza, nalo lonke iGosheni kuze kufike eGibheyoni.
UJoshuwa wawanqoba wonke lawo makhosi namazwe awo ngasikhathi sinye, ngokuba uSimakade uNkulunkulu ka-Israyeli wamlwela u-Israyeli.
UJoshuwa wabuyela enkanjini eGiligali, nabo bonke abakwa-Israyeli ababenaye.
Ngesikhathi uJabhini, inkosi yaseHazori, ezwa ngalokhu, wathumela kuJobabhi inkosi yaseMadoni, nasenkosini yaseShimironi, nasenkosini yase-Akhishafu,
nasemakhosini asenyakatho kwelezintaba, nase-Araba eningizimu eKhinerethi, nasemathafeni, nasezintabeni eDori entshonalanga,
nakumaKhanani empumalanga, nasentshonalanga, nakuma-Amori, amaHithi, amaPherizi, amaJebusi kwelezintaba, nakumaHivi phansi kweHermoni eMizpha.
Aphuma wonke namabutho awo, impikazi eyayingangesihlabathi solwandle, inamahhashi amaningi kakhulu, nezinqola zempi.
Wonke lawo makhosi ayihlanganisa impi yawo, eza, akanisa ndawonye ngasemanzini eMerome, ukuba alwe no-Israyeli.
USimakade wathi kuJoshuwa: “Ungabesabi, ngokuba kusasa ngalesi sikhathi ngizobanikela bonke kuwe bebulewe, phambi kuka-Israyeli; wena uzonquma amahhashi abo imisipha, izinqola zabo uzishise ngomlilo.”
Wayesefika uJoshuwa nawo wonke amabutho, abahlasela bengazelele ngasemanzini eMerone, babathelekela.
USimakade wabanikela esandleni sabakwa-Israyeli, babathela othulini, babahubha kwaze kwaba seSidoni Elikhulu, naseMisirefothi Mayimi, nasesigodini eMizpha ngasempumalanga, bababulala, akwaze kwasala namunye.
UJoshuwa wenza kubo njengalokhu uSimakade ayemyalile: wanquma amahhashi abo imisipha, washisa nezinqola zabo ngomlilo.
UJoshuwa wabuya ngaleso sikhathi, wadla iHazori, wabulala inkosi yalo ngenkemba, ngokuba iHazori kuqala laliyinhloko yayo yonke leyo mibuso.
Bababulala ngenkemba bonke ababekulo, baliqothula, akwaze kwasala noyedwa ophefumulayo; walishisa iHazori ngomlilo.
UJoshuwa wayidla yonke imizi yalawo makhosi nawo wonke amakhosi ayo, wakuchitha ngenkemba, wakuqothula njengokuyala kukaMose inceku kaSimakade.
Kepha imizi eyayakhiwe emagqumeni, u-Israyeli akashisanga namunye kuyo ngaphandle kweHazori kuphela, uJoshuwa alishisa.
Yonke impango yaleyo mizi nezinkomo, abantu bakwa-Israyeli bazithathela khona; kodwa bababulala ngenkemba bonke abantu baze babaqothula; akwaze kwasala noyedwa ophefumulayo.
Njengalokhu uSimakade ayemyalile uMose inceku yakhe, kanjalo noMose wayala uJoshuwa; noJoshuwa wenza kanjalo; akashiyanga nakunye kukho konke uSimakade ayemyale ngakho uMose.
UJoshuwa walidla lonke lelo lizwe: elezintaba, nayo yonke iNegevu, nalo lonke iGosheni, amathafa, i-Araba, nelezintaba kwa-Israyeli, namathafa alo,
kusukela entabeni iHalakhi, ekhuphukela ngaseSeyiri kuze kuyofika eBhali Gadi esigodini iLebhanoni phansi kwentaba iHermoni. Wawaqumba phansi wonke amakhosi awo, wawabulala ngenkemba.
UJoshuwa walwa isikhathi eside nawo wonke lawo makhosi.
Akukho muzi namunye owenza isivumelwano sokuthula nabantu bakwa-Israyeli, ngaphandle kwamaHivi ayeyizakhamuzi zaseGibheyoni; yonke yanqotshwa empini.
Ngokuba kwakungukwenza kukaSimakade ukuba izinhliziyo zabo zibe lukhuluni, ukuze bazokulwa no-Israyeli abehlule abaqothule, angabi namusa kubo, kodwa ashaye icole, njengalokhu uSimakade ayemyalile uMose.
Ngaleso sikhathi uJoshuwa wafika wawaqotha ama-Anaki, kusuka kwelezintaba eHebhroni, eDebhiri, e-Anabhi, kulo lonke elezintaba kwaJuda, nakulo lonke elezintaba kwa-Israyeli, uJoshuwa wawaqothula wonke nemizi yawo.
Akusalanga noyedwa kuma-Anaki ezweni labakwa-Israyeli; kwasala kuphela ingxenye eGaza, eGathi, nase-Ashidodi.
Ngakho-ke uJoshuwa walidla lonke izwe njengakho konke uSimakade ayekushilo kuMose; uJoshuwa walinika u-Israyeli laba yifa lakhe, wamabela ngokwezizwe zakhe. Izwe laphumula ekulweni.
Nanka amakhosi ezwe u-Israyeli awanqoba, amazwe awo ahlala kuwo kusukela ngaphesheya kweJordani kuya empumalanga, kusukela esigodini i-Arinoni kuya entabeni iHermoni, nalo lonke i-Araba ngasempumalanga:
inkosi uSihoni wama-Amori owayehlala eHeshibhoni, ebusa kusukela e-Aroweri elisonqenqemeni lwesigodi i-Arinoni, naphakathi nesigodi, kuze kufike emfuleni iJabhoki, umngcele wama-Amoni okungukuthi yingxenye kwaGileyadi,
ne-Araba kuya olwandle iKhinerethi, kuya oLwandle i-Araba, nasoLwandle Lukasawoti ngasempumalanga, endleleni eya eBhethi Jeshimothi eningizimu phansi kwemithambeka iPhisiga,
nenkosi u-Ogi waseBhashani, owayengomunye wamaRefa okugcina owahlala e-Ashitharothi nase-Edreyi,
ebusa phezu kwentaba iHermoni, eSalekha, nakulo lonke iBhashani kuze kufike emngceleni wamaGeshuri nowaMahakhathi, nengxenye kwaGileyadi kuya emngceleni kaSihoni inkosi yaseHeshibhoni.
UMose, inceku kaSimakade, nabakwa-Israyeli babanqoba; uMose, inceku kaSimakade, walinikeza izwe abakwaRubeni, nabakwaGadi, nengxenye yesizwe sakwaManase, laba yifa labo.
Lawa ngamakhosi ezwe anqotshwa nguJoshuwa nabakwa-Israyeli entshonalanga yeJordani, kusuka eBhali Gadi esigodini iLebhanoni kuya entabeni iHalakhi ekuphakama kwayo kubheke eSeyiri, uJoshuwa wanikeza izizwana zakwa-Israyeli izwe labo laba yifa lazo njengokwabelwa kwazo,
elisezintabeni, emathafeni, elise-Araba, elemithambeka, elisehlane, naseNegevu, izwe lamaHithi, elama-Amori, elamaKhanani, elamaPherizi, elamaHivi, nelamaJebusi:
inkosi yaseJerikho: iyodwa; inkosi yase-Ayi eliseduze kweBhethele: iyodwa;
inkosi yaseJerusalema: iyodwa; inkosi yaseHebhroni: iyodwa;
inkosi yaseJarimuthi: iyodwa; inkosi yaseLakhishi: iyodwa;
inkosi yase-Egiloni: iyodwa; inkosi yaseGezeri: iyodwa;
inkosi yaseDebhiri: iyodwa; inkosi yaseGederi: iyodwa;
inkosi yaseHorma: iyodwa; inkosi yase-Aradi: iyodwa;
inkosi yaseLibhina: iyodwa; inkosi yase-Adulamu: iyodwa;
inkosi yaseMakheda: iyodwa; inkosi yaseBhethele: iyodwa;
inkosi yaseThaphuwa: iyodwa; inkosi yaseHeferi: iyodwa;
inkosi yase-Afekhi: iyodwa; inkosi yaseLasharoni: iyodwa;
inkosi yaseMadoni: iyodwa; inkosi yaseHazori: iyodwa;
inkosi yaseShimroni Meroni: iyodwa; inkosi yase-Akhishafi: iyodwa;
inkosi yaseThanakhi: iyodwa; inkosi yaseMegido: iyodwa;
inkosi yaseKedeshi: iyodwa; inkosi yaseJokhineyami eKharmeli: iyodwa;
inkosi yaseDori egqumeni laseDori: iyodwa; inkosi yaseGoyimi eseGalile: iyodwa;
nenkosi yaseThiriza: iyodwa; esewonke amakhosi ayengama-31.
UJoshuwa wayesemdala, eseneminyaka eminingi; uSimakade wathi kuye: “Usukhulile, neminyaka yakho isihambile, liseliningi izwe okusafanele ukuba lidliwe.
“Nanti izwe elisasele: zonke izifunda zamaFilisti nalezo zamaGeshuri,
kusuka eShihori elisempumalanga yeGibhithe kuya enyakatho emngceleni we-Ekhroni, elaziwa ngokuthi yiKhanani; kunababusi abayisihlanu bamaFilisti, abaseGaza, e-Ashidodi, e-Ashikeloni, e-Githi, nase-Ekhroni, nalabo base-Avimu ngasenyakatho,
lonke izwe lamaKhanani, neMehara yamaSidoni kuye kufike e-Afekhi nasemngceleni wama-Amori,
nezwe lamaGebhali nalo lonke iLebhanoni kuya empumalanga, kusuka eBhali Gadi phansi kwentaba iHermoni kuya eLebo Hamathi,
zonke izakhamuzi zakwelezintaba, kusuka eLebhanoni kuya eMishirefothi Mayimi, nawo wonke amaSidoni. Mina luqobo ngizobaxosha phambi kuka-Israyeli; izwe ngilabele u-Israyeli kuphela, libe yifa lakhe njengalokhu ngikuyalile.
Ngalokho-ke lehlukanise leli lizwe libe yifa lezizwana eziyisishiyagalolunye nengxenye yesizwana sakwaManase.”
Enye ingxenye yesizwana sakwaManase, nabakwaRubeni nabakwaGadi basemukela isabelo sefa labo abasinikwa nguMose ngaphesheya kweJordani ngasempumalanga, njengalokhu uMose, inceku kaSimakade, yababela lona:
kusuka e-Aroweri elingasekupheleni kwesigodi i-Arinoni, nemizi ephakathi nesigodi, nethafa kusuka eMedeba kuya eDibhoni;
nayo yonke imizi yenkosi uSihoni wama-Amori owayebusa eHeshiboni, kuze kuyofika emngceleni wama-Amoni,
neGileyadi nesifunda samaGeshuri, namaMahakhathi, nayo yonke intaba iHermoni, nalo lonke iBhashani kuya eSalekha,
wonke umbuso ka-Ogi eBhashani, owayebusa e-Ashitharothi nase-Edreyi; nguyena kuphela owayesasele kumaRefa; bonke laba uMose wabanqoba, wabaxosha.
Nokho u-Israyeli akazange awaxoshe amaGeshuri namaMahakhathi, kodwa amaGeshuri namaMahakhathi ahlala phakathi kwabakwa-Israyeli kuze kube yinamuhla.
Yisizwana sakwaLevi kuphela uMose angasabelanga ifa, ngoba iminikelo yomlilo eya kuSimakade uNkulunkulu ka-Israyeli yiyo eyifa labo njengoba asho kubo.
UMose wanika isizwana sakwaRubeni ifa laso ngokwezindlu zaso.
Indawo yabo yayisuka e-Aroweri ngasekupheleni kwesigodi i-Arinoni, nemizi ephakathi nesigodi, nawo wonke amathafa ngaseMedeba,
neHeshibhoni, nayo yonke imizi yalo esethafeni; iDibhoni, iBhamothi Bhali, iBhethi Bhali Mehoni,
iJahazi, iKhedemothi, iMefahathi,
iKiriyathayimi, iSibhima, iZerethi Shahari egqumeni lesigodi,
iBhethi Pheyori, imithambeka iPhisiga, neBhethi Jeshimothi,
okungukuthi yonke imizi esethafeni, nawo wonke umbuso kaShihoni inkosi yama-Amori, owayebusa eHeshibhoni, owanqotshwa nguMose nababusi bakwaMidiyani: u-Evi, uRekhemi, uZuri, uHure noRebha izikhulu zikaShihoni ezazakhe kulelo lizwe.
Phakathi kwalabo u-Israyeli ababulala ngenkemba kwakungoBhileyamu, indodana kaBheyori owayengumbhuli.
Umngcele wabakwaRubeni kwakuyiJordani nosebe lwalo. Leli kwakuyifa lozalo lukaRubeni ngokwemindeni yabo, imizi nemizana yabo.
UMose wanika isizwana sakwaGadi ifa, ngokwemindeni yaso:
indawo yabo kwawuyiJazeri, nayo yonke imizi yakwaGileyadi, nengxenye yezwe lakwa-Amoni kuya e-Aroweri, elingaphambi kweRaba,
kubuye kusuke eHeshibhoni kuye eRamathi Mizpha neBhethonimi, kusuke eMahanayimi kuya esifundeni saseDebhiri,
nesigodi saseBhethi Haramu, iBhethi Nimra, iSukhothi neZafoni, nawo wonke umbuso wenkosi uSihoni waseHeshibhoni, iJordani nosebe lwayo, kuze kuyofika ezansi nolwandle iKhinerethi, empumalanga ngaphesheya kweJordani.
Leli kwakuyifa lozalo lukaGadi ngokwemindeni yabo, imizi nezifunda zabo.
UMose wanika ingxenye yesizwana sakwaManase ifa laso; labelwa abozalo lukaManase ngokwemindeni yabo.
Indawo yabo yayisuka eMahanayimi, idabule kulona lonke iBhashani, wonke umbuso wenkosi u-Ogi waseBhashani, nemizi yonke eJayiri, eyayiseBhashani, okuyimizi engama-60,
nengxenye kwaGileyadi, i-Ashitharothi, ne-Edireyi, imizi yasembusweni ka-Ogi eBhashani; yonke leyo yabelwa abozalo lukaMakhiri, indodana kaManase ngokwemindeni yabo, ingxenye yabozalo lukaMakhiri.
Leli yifa uMose alaba emathafeni akwaMowabi ngaphesheya kweJordani, empumalanga neJerikho.
Kepha kwabesizwana sakwaLevi, uMose akabanikanga sabelo esiyifa labo; uSimakade uNkulunkulu ka-Israyeli uyisabelo sabo, njengoba ayeshilo kubo.
Lawa ngamafa u-Israyeli awathola eKhanani, u-Eleyazare umphristi, noJoshuwa indodana kaNuni, nezinhloko zemindeni yoyise bezizwana zakwa-Israyeli abababela wona.
Ifa labo lehlukaniswa ngonkatho, njengalokhu uSimakade ayemyalile uMose maqondana nezizwana eziyisishiyagalolunye nengxenye.
Ngokuba uMose wayenike isabelo sezwe ezizweni ezimbili nengxenye ngaphesheya kweJordani, kodwa abaLevi akazange abanike sabelo.
Ngokuba abozalo lukaJosefa babeyizizwana ezimbili, esakwaManase nesakwa-Efrayimi, akukho sabelo sezwe esasinikwe abaLevi, ngaphandle kwemizi ababehlala kuyo, namadlelo emfuyo nemihlambi yabo.
Abakwa-Israyeli benza njengoba uSimakade ayemyalile uMose; balehlukanisa izwe.
AbakwaJuda beza kuJoshuwa eGiligali; uKhalebhu, indodana kaJefune umKhenizi, wathi kuye: “Uyakwazi uSimakade akusho ngami nawe kuMose, umuntu kaNkulunkulu, eKadeshi Bharineya.
Ngangineminyaka engama-40 ngesikhathi uMose, inceku kaSimakade, engithuma eKadeshi Bharineya ukuba ngiyohlola izwe; ngambuyela nombiko oqotho.
Kodwa abafowethu engangikhuphuke nabo baba nombiko oqeda abantu amandla. Kepha mina ngamlandela uSimakade uNkulunkulu ngenhliziyo epheleleyo.
UMose wafunga ngalolo lusuku, wathi: ‘Impela izwe lapho unyawo lwakho lunyathele khona liyokuba yifa lakho nabantwana bakho kuze kube phakade, ngokuba umlandele ngenhliziyo epheleleyo uSimakade uNkulunkulu wami.’
“Manje, uSimakade ungivumele ngaphila njengalokhu ayeshilo, yonke le minyaka engama-45 kusukela ngesikhathi uSimakade akhuluma ngaso leli lizwi kuMose, ngesikhathi u-Israyeli esehamba edabula ehlane; manje ngisekhona nanamuhla, sengineminyaka engama-85.
Ngisenamandla nanamuhla nanjengamhla uMose engithuma, namanje amandla ami asafana nawangaleso sikhathi, ngisengaphuma ngiyokulwa, ngiphinde ngibuye.
Ngakho-ke manje nginike leli lezintaba uSimakade akhuluma ngalo ngalolo lusuku, ngokuba nezwa ngalolo lusuku ukuthi ama-Anaki ayelapho nemizi emikhulu ebiyelweyo; mhlawumbe uSimakade uyakuba nami, ngiwaxoshe njengokusho kukaSimakade.”
UJoshuwa wambusisa, iHebhroni walinika uKhalebhu, indodana kaJefune, laba yifa lakhe.
IHebhroni laba yifa likaKhalebhu, indodana kaJefune umKhenizi, kuze kube namuhla, ngokuba wamlandela ngenhliziyo epheleleyo uSimakade uNkulunkulu ka-Israyeli.
Igama leHebhroni kuqala kwakuyiKiriyathi Arbha; lo Arbha wayengumuntu omkhulu phakathi kwama-Anaki. Izwe laphumula ekulweni.
Isabelo sesizwana sabozalo lukaJuda ngokwemindeni yabo sasifinyelela ngaseningizimu emngceleni kwa-Edomi, kuyofika ehlane iZini ekupheleni kweningizimu.
Umngcele wabo ngaseningizimu wawuhamba usuka ekugcineni koLwandle Lukasawoti, kusukela ngasechwebeni elibheke ngaseningizimu;
uqhubekela ngaseningizimu yommango i-Akhrabhimi, udlulele eZini, ukhuphukele eningizimu eKadeshi Bharineya, wedlule ngaseHezironi, wenyukele e-Adari, ujike uye eKharakha,
udlulele e-Azimoni, uye emfuleni eGibhithe; uze ugcine olwandle. Lona kuyakuba ngumngcele wenu wangaseningizimu.
Umngcele wangasempumalanga wuLwandle Lukasawoti kuze kube semngceleni weJordani. Umngcele kusukela echwebeni elingasenyakatho kuze kube ngasekupheleni kolwandle, kusukela eJordani,
umngcele wenyukela eBhethi Hogila, wedlule ngasenyakatho eBhethi Araba; uqhubeke njalo uze uye emngceleni wamadodana kaRubeni etsheni likaBhohanu,
wedlulele eDebhiri kusuka esigodini i-Akhori, uqhubeke ngasenyakatho, uphenduke ubheke eGiligali elibhekene nommango e-Adumimi ngaseningizimu yesigodi, umngcele, bese wedlula uya emanzini e-Eni Shemeshi; uze uyophela e-Eni Rogeli,
bese ukhuphuka esigodini samadodana kaHinomu ekwehleni okungaseningizimu yamaJebhusi, okuyiJerusalema, nomngcele okhuphukela phezulu entabeni ebhekene nesigodi iHinomu, entshonalanga engasekugcineni, enyakatho yesigodi iRefa,
bese uqhubeka usuka esiqongweni sentaba uya emthonjeni wamanzi eNefithowa, usuke lapho uze uyofika emizini esentabeni i-Efroni, umngcele usuke ujike uye eBhahala eKiriyathi Jeharimi,
bese uzungeza ngasentshonalanga eBhahala uye entabeni iSeyiri, wedlule ngasenyakatho yomthambeka wentaba iJeharimi okuyiKhesaloni, wehlele eBheth Shemeshi, wedlulele eThimina;
umngcele wedlule emthambekeni wegquma elisenyakatho ye-Ekhroni, bese ujikela eShikheroni wedlule entabeni iBhahala, udlulele eJabhineyeli uze uyogcina olwandle.
Umngcele ngasentshonalanga kwakuwuLwandle Olukhulu nogu lwalo. Lona-ke ngumngcele owawuzungeze abozalo lukaJuda ngokwemindeni yabo.
Wamnika uKhalebhu indodana kaJefune isabelo phakathi kwabozalo lukaJuda njengoba uSimakade ayemyalile uJoshuwa, umuzi ka-Arbha uyise ka-Anaki iHebhroni.
UKhalebhu waxosha kuwo amadodana amathathu ka-Anaki: uSheshayi, u-Ahimani noThalimayi, ababeyizizukulwane zika-Anaki.
Wasuka lapho wahlasela izakhamuzi zaseDebhiri; kuqala igama leDebhiri kwakuyiKiriyathi Seferi.
UKhalebhu wathi: “Oyonqoba iKiriyathi Seferi, alidle, ngiyomganisela indodakazi yami, u-Akhisa, ibe ngumkakhe.”
U-Otheniyeli, indodana kaKhenazi umfowabo kaKhalebhu, walinqoba, wayesemganisela indodakazi yakhe u-Akhisa, waba ngumkakhe.
Lapho efika kuye, wamcela ukuba acele insimu kuyise. Lapho ehla embongolweni yakhe, uKhalebhu wathi kuye: “Ufunani, na?”
Wathi kuye: “Ngiphe isipho, njengoba ungibeke eNegevu, ungiphe futhi imithombo yamanzi.” UKhalebhu wayesemnika imithombo engasenhla nengasezansi.
Leli yifa lesizwana sabozalo lukaJuda ngokwemindeni yabo.
Imizi eyayingeyabozalo lukaJuda ngasekupheleni eningizimu kuya emngceleni kwa-Edomi kwakuyilena: yiKhabhizeyeli, i-Edere, iJaguri,
iKhina, iDimona, i-Adada,
iKedeshi, iHazori, i-Ithinani,
iZifi, iTheleme, iBhehalothi,
iHazori Hadatha, iKheriyothe Hezironi eliyiHazori,
i-Amamu, iShema, iMolada,
iHazari Gada, iHeshimoni, iBhethi Phelethi,
iHazari Shuwali, iBheri Sheba, iBhiziyothiya,
iBhalala, i-Iyimi, i-Ezeme,
i-Elitholadi, iKhesili, iHorma,
iZikilagi, iMadimana, iSanisana,
iLebhawothi, iShilihimi, i-Ayini neRimoni; isiyonke imizi ingama-29 nemizana yayo.
Emathafeni: i-Eshithawoli, iZora, i-Ashina,
iZanowa, i-Eni Ganimi, iThaphuwa, i-Enamu,
iJarimuthi, i-Adulamu, iSoko, i-Azeka,
iShaharayimi, i-Adithayimi, iGedera, iGederothayimi; isiyonke imizi ili-14 nemizana yayo.
IZenani, iHadasha, iMigidali Gadi,
iDilani, iMizpha, iJokhitheyeli,
iLakhishi, iBhozikhathi, i-Egiloni,
iKhabhoni, iLahimamu, iKhithilishi,
iGederothi, iBhethi Dagoni, iNahama, iMakheda; isiyonke imizi ili-16 nemizana yayo.
ILibhina, i-Ethere, i-Ashani,
iJifitha, i-Ashina, iNezibhe,
iKheyila, i-Akhizibhi, neMaresha; isiyonke imizi iyisishiyagalolunye nemizana yayo.
I-Ekhroni nemizi yalo nemizana yalo;
kusukela e-Ekhroni kuze kufike olwandle, yonke eyayiseceleni kwe-Ashidodi nemizana yayo.
I-Ashidodi nemizi nemizana yalo; iGaza nemizi yalo kuze kufike emfuleni eGibhithe, nasoLwandle Olukhulu nogu lwalo.
Ezintabeni: iShamiri, iJathiri, iSoko,
iDana, iKiriyathi Sana eliyiDebhiri,
i-Anabhi, i-Eshithemo, i-Animi,
iGosheni, iHoloni, neGilo; isiyonke imizi ili-11 nemizana yayo.
I-Arabhu, iDuma, i-Eshani,
iJanimi, iBhethi Thaphuwa, i-Afeka,
iHumitha, iKiriyathi Arbha eliyiHebhroni, neZiyori; isiyonke imizi iyisishiyagalolunye nemizana yayo.
IMahoni, iKharmeli, iZifi, iJutha,
iJizreyeli, iJokhideyamu, iZanowa,
iKhayini, iGibheya, neThimina; isiyonke imizi iyishumi nemizana yayo.
IHalihuli, iBhethi Zuri, iGedori,
iMaharathi, iBhethi Anothi, i-Elithekhoni; isiyonke imizi iyisithupha nemizana yayo.
IKiriyathi Bhali eliyiKiriyathi Jeharimi, neRaba; kuyimizi emibili nemizana yayo.
Ehlane: iBhethi Araba, iMidini, iSekhakha,
iNibhishani, uMuzi kaSawoti, ne-Eni Gedi; isiyonke imizi iyisithupha nemizana yayo.
Abozalo lukaJuda abakwazanga ukuwaxosha amaJebhusi ayehlala eJerusalema, asahlala nabo kuze kube namuhla.
Isabelo sabozalo lukaJosefa sasisuka eJordani ngaseJerikho empumalanga yamanzi eJerikho, kuya ehlane, sikhuphuke kusuka eJerikho kuye kwelezintaba kuze kufike eBhethele,
bese sisuka eBhethele kuya eLuzi, sidabule ngase-Atharothi, isifunda sama-Arikithe;
siqhubekele ezansi ngasentshonalanga esifundeni samaJafelethi, size siyofika endaweni esezansi eBhethi Horoni bese siya eGezeri; size sigcine olwandle.
Abozalo lukaJosefa, nabolukaManase no-Efrayimi, basithola isabelo sabo.
Indawo yabozalo luka-Efrayimi ngokwemindeni yabo yama kanje: umngcele wesabelo sabo ngasempumalanga kwakuyi-Atharothi Adari kuze kuyofika enhla neBhethi Horoni,
umngcele wawusuka lapho uye olwandle, ngasenyakatho eMikhemethathi, empumalanga umngcele ujika ubheke eThawanathi Shilo, wedlule ngaphesheya kwalo ngasempumalanga uye eJanowa,
bese wehla usuka eJanowa uye e-Atharothi naseNahara, ugudle iJerikho ugcine ngeJordani.
Ukusuka eThaphuwa umngcele wawubheka ngasentshonalanga uze ufinyelele esigodini iKhana ugcine olwandle. Sasimi kanjalo-ke isabelo sesizwana sozalo luka-Efrayimi ngokwemindeni yaso,
nemizi eyehlukaniselwa abozalo luka-Efrayimi esabelweni sabozalo lukaManase, yonke leyo mizi nemizana yayo.
Nokho-ke abakwazanga ukuwaxosha amaKhanani ayehlala eGezeri; ngakho-ke asahlala phakathi kwabakwa-Efrayimi kuze kube yinamuhla, kodwa bawenza izinceku zokubasebenzela.
Isizwana sakwaManase sabelwa naso, ngokuba wayeyizibulo likaJosefa. UMakhiri izibulo likaManase, uyise kaGileyadi wanikwa iGileyadi neBhashani, ngokuba wayeyiqhawe.
Abozalo lukaManase bonke banikwa isabelo sabo ngokwemindeni yabo: abozalo luka-Abhiyezeri, abolukaHelekhi, aboluka-Asiriyeli, abolukaShekhemu, abolukaHeferi, nabolukaShemida; bonke laba babengabozalo lukaManase indodana kaJosefa; ngokwemindeni yabo.
Kepha uZelofehadi kaHeferi kaGileyadi kaMakhiri kaManase wayengenamadodana, kungamadodakazi odwa. Nanka amagama amadodakazi akhe: uMahela, uNowa, uHogila, uMilikha noThirisa.
Eza phambi komphristi u-Eleyazare noJoshuwa indodana kaNuni, nabaholi bakwa-Israyeli, athi: “USimakade wayala uMose ukuba asinike isabelo sethu kanye nesabafowethu.” Ngakho-ke ngokomyalo kaSimakade wawanika isabelo sawo phakathi kwabafowabo ababezalwa ndoda yinye.
Lokho kwenza ukuba abakwaManase bathole izabelo ezilishumi ngaphandle kweGileyadi neBhashani ngaphesheya kweJordani,
ngokuba amadodakazi kaManase nawo athola ifa phakathi kwamadodana akhe; iGileyadi labelwa bonke abozalo lukaManase.
Indawo yabakwaManase yayisuka e-Asheri iye eMikhemetha engaphambi kweShekhemi; bese umngcele uqhubeka ngaseningizimu uye kwababakhe e-Eni Thaphuwa.
IThaphuwa kwakungelakwaManase, kodwa umuzi iThaphuwa osemngceleni wakwaManase wawungowozalo luka-Efrayimi.
Umngcele uyedlula uye phansi esigodini iKhana. Leyo mizi engaseningizimu yesigodi, phakathi kwemizi yakwaManase, yayingeyakwa-Efrayimi. Umngcele wakwaManase uqhubeka wedlule ngasenyakatho yesigodi uze uyogcina olwandle.
Ngaseningizimu ngelika-Efrayimi, elingasenyakatho kwaManase, umngcele walo kungulwandle. Ngasenyakatho ufinyelela e-Asheri, kuthi ngasempumalanga ufinyelele e-Isakhare.
Phakathi kwelakwa-Isakhari nakwa-Asheri uManase wabelwa iBhethi Sheyani nemizana yalo, iJibheleyami nemizana yalo, izakhamuzi zaseDori nemizana yalo, ezase-Eni Dori nemizana yalo, ezaseThahanakhi nemizana yalo, nezaseMegido nemizana yalo, elesithathu yiNafathi.
Nokho abozalo lukaManase abakwazanga ukuyinqoba leyo mizi ibe yifa labo; amaKhanani aqhubeka nokuhlala kulelo lizwe.
Kodwa lapho u-Israyeli esenamandla wawenza izigqila amaKhanani, akaze awaxosha ngokupheleleyo ezweni.
Isizwana sabozalo lukaJosefa sakhuluma noJoshuwa, sathi: “Usinikeleni isabelo sasinye nengxenye eyodwa kuphela, ukuba kube yifa lethu, njengoba singabantu abaningi, futhi uSimakade eqhubeka nokusibusisa na?”
UJoshuwa wathi kubo: “Uma ningabantu abaningi, khuphukelani ehlathini nizicabele indawo ezweni lamaPherizi namaRefa, ngokuba elezintaba kwa-Efrayimi lincane kakhulu kini.”
Abozalo lukaJosefa bathi: “Elezintaba alisanele, kodwa wonke amaKhanani ahlala emathafeni anezinqola zensimbi, lawo aseBhethi Sheyani nemizana yalo, nalawo asesigodini iJizreyeli.”
UJoshuwa wathi kubo abendlu kaJosefa nabaka-Efrayimi noManase: “Uyisizwe esikhulu impela, futhi unamandla amakhulu, awuyukunikwa isabelo esisodwa,
kodwa elezintaba kuzoba ngelakho, ngokuba nakuba liyihlathi nizolicaba libe yifa lenu namaphethelo alo, ngokuba nizowaxosha amaKhanani, ngisho enezinqola zensimbi, futhi enamandla.”
Inhlangano yonke yakwa-Israyeli yayisihlangana eShilo, yamisa lapho ithende lokuhlangana. Izwe lanqotshwa phambi kwayo.
Kwakusasele izizwe eziyisikhombisa phakathi kuka-Israyeli ezazingakasitholi isabelo sazo.
Ngakho-ke uJoshuwa wathi kubantu bakwa-Israyeli: “Niyakudembesela kuze kube nini ningaphumi nidle izwe uSimakade uNkulunkulu wokhokho benu aninika lona na?
Khethani amadoda ngamathathu kuleso naleso sizwana. Ngizowathuma aphume ahambe kulona lonke izwe, alobe ngalo alichaze asho ukuthi lifa lini elingabelwa leso naleso sizwana, bese ebuyela kimi.
Ayakulehlukanisa izingxenye eziyisikhombisa: uJuda aqhubeke ahlale endaweni yakhe eseningizimu, indlu kaJosefa endaweni yayo enyakatho.
Anoloba nilichaze izwe nilehlukanise kasikhombisa, bese niletha incazelo kimi, nginenzele unkatho phambi kukaSimakade uNkulunkulu wethu.
AbaLevi abanasabelo phakathi kwenu, ngokuba ubuphristi bukaSimakade buyifa labo. UGadi noRubeni nengxenye yesizwna sakwaManase sebesitholile isabelo sabo ngaphesheya kweJordani empumalanga, uMose inceku kaSimakade abanika sona.”
Amadoda eyesengena indlela; uJoshuwa wabayala labo ababezoloba bachaze ngezwe, wathi: “Hambani kulo lonke izwe nilobe nichaze ngomumo wezwe, bese nibuya nize kimi; ngizonenzela unkatho phambi kukaSimakade eShilo.”
Ngakho-ke amadoda ahamba, adabula ezweni, aloba encwadini achaza ngomumo walo imizi ngemizi, izabelo eziyisikhombisa; ayesebuyela kuJoshuwa enkanjini eShilo.
UJoshuwa eseShilo wabenzela unkatho phambi kukaSimakade, wababela izwe abakwa-Israyeli kwayilowo nalowo waba nesabelo sakhe.
Benza unkatho ngesizwana sabozalo lukaBhenjamini nemindeni yaso; banikezwa indawo eyayiphakathi kwabozalo lukaJuda nabolukaJosefa.
Umngcele wabo ngasenyakatho wawusuka eJordani, wenyuke eceleni kweJerikho ngasenyakatho, ukhuphukele kwelezintaba entshonalanga, uze uyogcina ehlane iBhethi Aveni.
Kusuka lapho umngcele wedlula ngaseningizimu ngendlela eya eLuze, eceleni kweLuze eliyiBhethele, wehlele e-Atharothi Adari entabeni esezansi ngaseningizimu yeBhethi Horoni.
Umngcele bese ubheka kwenye ingxenye, ujike ubheke ngasentshonalanga-ningizimu; kusuka entabeni ebhekene neBhethi Horoni eningizimu uphele eKiriyathi Bhali eliyiKiriyathi Jeharimi engumuzi wabantu bakwaJuda. Lolu wuhlangothi olungasentshonalanga.
Umngcele ongaseningizimu uqala ekupheleni kweKiriyathi Jeharimi, umngcele uqhubeke uye e-Efroni emthonjeni wamanzi aseNefithowa,
wehle ubheke emngceleni wentaba ebhekene nesigodi sendodana kaHinomi, esingasenyakatho ekugcineni nesigodi iRefayimu; wehlele esigodini sikaHinomu, esiseningizimu nomthambeka wamaJebusi, wehle njalo uze uyofika e-Eni Rogeli,
bese uyajika ubheke enyakatho uqonde e-Eni Shemeshi, kusuka lapho uye eGelilothi elibhekene nommango e-Adumimi, wehlele etsheni likaBhohanu indodana kaRubeni;
udlule ubheke enyakatho emthambekeni eBhethi Araba wehle uze ufinyelele e-Araba.
Wedlulela ngasenyakatho yomthambeka waseBhethi Hogila, uze uphelele echwebeni loLwandle Lukasawoti, ekugcineni ngaseningizimu yeJordani. Yilowo-ke umngcele wangaseningizimu.
IJordani ingumngcele ongasempumalanga. Lesi yisabelo sabozalo lukaBhenjamini ngokwemindeni yabo. Uzungeza kusukela emngceleni kuya komunye.
Imizi yesizwana sabozalo lukaBhenjamini ngokwemindeni yaso kwakuyiJerikho, iBhethi Hogila, i-Emekhi Kezizi,
iBhethi Araba, iZemarayimi, iBhethele,
i-Avimi, iPhara, i-Ofira,
iKhefari Amoni, i-Ofini, neGebha. Kuyimizi eli-12 nemizana yaso.
IGibheyoni, iRama, iBherothi,
iMizpha, iKhefira, iMosa,
iRekhemi, i-Iripheyeli, iTharala,
iZela, i-Hahelefi, iJebusi okuyiJerusalema, iGibheya, neKiriyathi, kuyimizi eli-14 nemizana yayo. Lesi kwakuyisabelo sabozalo lukaBhenjamini ngokwemindeni yabo.
Unkatho lwesibili lwadla uSimeyoni. Isizwana sabozalo lukaSimeyoni ngemindeni yaso ifa laso laliphakathi kwefa labozalo lukaJuda.
Ifa laso kwaba yiBheri Sheba, iShebha, iMolada,
iHazari Shuwali, iBhala, i-Ezeme,
i-Elitholadi, iBhethuli, iHorma,
iZikilagi, iBhethi Marikabhothi, iHazari Susa,
iBhethi Lebhawothi, neSharuheni. Isiyonke kuyimizi eli-13 nemizana yayo.
I-Ayini, iRimoni, i-Ethere, ne-Ashani, kuyimizi emine nemizana yayo,
nayo yonke imizana eyayizungeze le mizi kuze kuyofika eBhalathi Bheri, iRama eningizimu. Lokho kwakuyifa lesizwe sakwaSimeyoni ngokwemindeni yaso.
Ifa labozalo lukaSimeyoni laliyingxenye yendawo yabozalo lukaJuda, ngokuba ingxenye yabozalo lukaJuda yayinkulu kunaso, ngalokho-ke abozalo lukaSimeyoni bathola ifa labo phakathi kwelabakwaJuda.
Unkatho lwesithathu lwadla abozalo lukaZebuloni ngokwemindeni yabo. Umngcele wesabelo sabo wawufinyelela eSaridi;
wenyukele ngasentshonalanga kuze kube seMarala, eDabheshethi, nasemfuleni ongasempumalanga eJokhineyamu,
ujike eSaridi, ubheke ngasempumalanga lapho kuphuma khona ilanga, uze uyofika emngceleni eKhisilothi Thabhori, usuke lapho ubheke eDabherathi, bese wenyukela eJafiya;
usuke lapho wedlule ngasempumalanga yeGathi Heferi, uye e-Ethi Khazini, uqhubekele eRimoni, ujikele eNeya.
Ngasenyakatho, umngcele uyajika ubheke eHanathoni uze uyophelela esigodini i-Ifita Eli;
naseKhatha, eNahalali, eShimroni, eJidala, naseBhethlehema, leyo mizi ili-12 nemizana yayo.
Yileso-ke isabelo sabozalo lukaZebuloni ngokwemindeni yabo, leyo mizi nemizana yayo.
Unkatho lwesine lwadla u-Isakhare, abozalo luka-Isakhare ngemindeni yabo.
Indawo yabo kwakuyiJizreyeli, iKhesulothi, iShunemi,
iHafarayimi, iShiyoni, i-Anaharathi,
iRabhithi, iKhishiyoni, i-Ebhezi,
iRemethi, i-Eni Ganimi, i-Eni Hada, iBhethi Phazezi;
umngcele wabo uze ufinyelele eThabhori, eShahazuma, naseBhethi Shemeshi; uze uphele eJordani, imizi eli-16 nemizana yayo.
Yileso-ke isabelo sesizwe sabozalo luka-Isakhare ngemindeni yabo, le mizi nemizana yayo.
Unkatho lwesihlanu lwadla abozalo luka-Asheri ngemindeni yabo.
Umngcele wabo kwakuyiHelikhathi, iHali, iBhetheni, i-Akhishafu,
i-Alamelekhi, i-Amadi, neMishali; ngasentshonalanga uze ufinyelele eKharimeli naseShihori Libhinathi;
ujike ubheke empumalanga uye eBhethi Dagoni, uze ufike kwaZebuloni nasesigodini i-Ifitha Eli enyakatho ukuya eBhethi Emekhi naseNeyiyeli, uqhubeke ngasenyakatho ubheke eKhabhuli;
e-Ebhironi, eRehobhi, eHamoni, eKhana, uze uyofika eSidoni Elikhulu,
bese umngcele ujika uya eRama, uze uyofinyelela emzini obiyelweyo eThire; umngcele bese ujika uye eHosa, uze uyophela olwandle e-Akhizibhi;
e-Uma, e-Afekhi, naseRehobhi, imizi enga-20 nemizana yayo.
Yileso-ke isabelo sesizwana sabozalo luka-Asheri ngemindeni yaso, nemizi nemizana yayo.
Unkatho lwesithupha lwadla abozalo lukaNafethali ngemindeni yabo.
Umngcele wabo wawusuka eHelefi kulo i-okhi eZahananimi, e-Adamu Nekhebhi, naseJabhineyeli, uze uyofika eLakhumi; uphele eJordani,
bese uyajika umngcele ubheke ngasentshonalanga e-Azinothi Thabhori; udlule lapho uye eHukhokhi, uze uyofika kwaZebuloni ngaseningizimu, nakwa-Asheri ngasentshonalanga, nakwaJuda ngaseJordani ngasempumalanga.
Imizi ebiyelwe kwakuyiZidimi, iZeri, iHamathi, iRakhathi, iKhinerethi,
i-Adama, iRama, iHazori,
iKedeshi, i-Edireyi, i-Eni Hazori,
iJireyoni, iMigidaliyeli, iHoremi, iBhethi Anathi, iBhethi Shemeshi, nemizi eli-19 nemizana yayo.
Yileso-ke isabelo sesizwana sabozalo lukaNafethali ngemindeni yaso, imizi nemizana yayo.
Unkatho lwesikhombisa lwadla isizwana sabozalo lukaDani ngemindeni yaso.
Indawo eyayiyifa laso kwakuyiZora, i-Eshithawoli, i-Iri Shemeshi,
iShahalabhini, i-Ajaloni, iJithila,
i-Eloni, iThimna, i-Ekhroni,
i-Elithekhe, iGibhethoni, iBhalathi,
iJehudi, iBhene Bherakhi, iGathi Rimoni,
iMe Jarikhoni, iRakhoni esemngceleni obhekene neJopha.
Kwathi ukuba abozalo lukaDani balahlekelwe ngumngcele wabo, bakhuphuka balwa neLeshemu, balidla, balibhubhisa ngenkemba, balithatha, bakha kulo, base belibiza iLeshemu ngokuthi yiDani, beliqamba ngegama likaDani uyise.
Yileso-ke isabelo sesizwana sabozalo lukaDani ngemindeni yaso, imizi nemizana yayo.
Sebeqedile ukwaba izwe ngokwezizwe, nangokwemingcele yalo, abakwa-Israyeli banika uJoshuwa, indodana kaNuni, ifa lakhe phakathi kwabo.
Ngokomyalo kaSimakade bamnika umuzi ayewucelile, iThiminathi Sera kwelezintaba kwa-Efrayimi; wawakha kabusha umuzi, wahlala kuwo.
Yilawo-ke amafa abiwa ngonkatho ngu-Eleyazare, umphristi, uJoshuwa, indodana kaNuni nezinhloko zoyise bezizwana zabantu bakwa-Israyeli eShilo, phambi kukaSimakade, emnyango wethende lokuhlangana. Ngakho-ke baqeda ukwehlukanisa izwe.
USimakade wakhuluma kuJoshuwa, wathi:
“Yisho kubantu bakwa-Israyeli, uthi: ‘Misani imizi yokuphephela engakhuluma ngayo kini ngoMose
ukuze lowo obulala umuntu ngephutha engahlosile abalekele kuyo; iyokuba kini yindawo yokuphephela kumphindiseli wegazi.
Umbulali uyakubalekela komunye wayo afike ame esikhaleni sesango lomuzi, achazele amalunga alowo muzi indaba yakhe, bese emthatha amngenise emzini, amnike indawo ahlale phakathi kwawo.
Uma umphindiseli wegazi emlandela, ngeke neze amnikele kuye umbulali, ngokuba wambulala umakhelwane wakhe ngephutha, kwakungekho nzondo phakathi kwabo ngaphambilini.
Umbulali uyohlala kulowo muzi kuze kuthethwe icala lakhe ebandla, kuze kufe umphristi omkhulu wangaleso sikhathi, ngaphambi kokuba umbulali abuyele ekhaya, emzini ayebaleke kuwo.’ ”
Behlukanisa iKadeshi eGalile ezintabeni kwaNafethali, iShekhemi ezintabeni kwa-Efrayimi, iKiriyathi Arbha eliyiHebhroni ezintabeni kwaJuda.
Phesheya kweJordani ngasempumalanga yeJerikho, behlukanisa iBhezeri esehlane lethafa lesizwana sakwaRubeni, iRamothi kwaGileyadi esizwaneni sakwaGadi, neGolamu eBhashani esizwaneni sakwaManase.
Lena kwakuyimizi eyehlukaniselwa bonke abantu bakwa-Israyeli nabafokazi ababegogobele phakathi kwabo, ukuze yilowo nalowo obulele umuntu ngephutha abalekele khona, angabulawa ngumphindiseli wegazi, aze ame phambi kwebandla kuthethwe icala lakhe.
Kwase kusondela izinhloko zemindeni yabaLevi ku-Eleyazare, umphristi benoJoshuwa, indodana kaNuni, nezinhloko zemindeni yezizwana zakwa-Israyeli;
zakhuluma kubo eShilo eKhanani, zathi: “USimakade wayala ngoMose ukuba sinikwe imizi esizohlala kuyo namadlelo emfuyo yethu.”
Ngakho-ke ngokomyalo kaSimakade abakwa-Israyeli banika abaLevi le mizi elandelayo namadlelo ayo, kwaba yifa labo.
Unkatho lwadla imindeni yamaKhohathi. Ngakho-ke abaLevi abengabozalo luka-Aroni, umphristi, bathola ngonkatho imizi eli-13 esizwaneni sakwaJuda, esakwaSimeyoni, nesakwaBhenjamini.
Basalayo bozalo lukaKhohathi bathola ngonkatho imizi elishumi emindenini yesizwana sakwa-Efrayimi, nesakwaDani, nasengxenyeni yesizwana sakwaManase.
Abozalo lukaGerishoni bathola imizi eli-13 emindenini yesizwana sakwa-Isakhare, esakwa-Asheri, esakwaNafethali nasengxenyeni yesizwana sakwaManase, eBhashani.
Abozalo lukaMerari, ngokwemindeni yabo, bathola imizi eli-12 esizwaneni sakwaRubeni, esakwaGadi, nesakwaZebuloni.
Abakwa-Israyeli bababela abaLevi ngonkatho leyo mizi namadlelo ayo; njengalokhu uSimakade ayemyalile uMose.
Esizwaneni sabozalo lukaJuda nabolukaSimeyoni abaLevi bathola le mizi elandelayo ebizwe ngamagama,
yaba ngeyabozalo luka-Aroni, bemindeni yamaKhohathi ayengabaLevi, selokhu bakhonjwa wunkatho lokuqala.
Bawanika iKiriyathi Arbha okuyiHebhroni, umuzi kayise ka-Anaki, ezintabeni kwaJuda namadlelo awo nxazonke zawo.
Kodwa amasimu omuzi nemizana yawo bakunika uKhalebhu indodana kaJefune kwaba yifa lakhe.
IHebhroni umuzi wokuphephela umbulali namadlelo alo, iLibhina namadlelo alo, bakunika abozalo luka-Aroni umphristi,
iJathiri namadlelo alo, i-Eshithemowa namadlelo alo,
iHoloni namadlelo alo, iDebhiri namadlelo alo,
i-Ayini namadlelo alo, iJutha namadlelo alo, neBhethi Shemeshi namadlelo alo, imizi eyisishiyagalolunye ivela kulezi zizwana ezimbili.
Esizwaneni sakwaBhenjamini bathola: iGibheyoni namadlelo alo, iGebha namadlelo alo,
i-Anathothi namadlelo alo, ne-Alimoni namadlelo alo, imizi emine.
Imizi yabozalo luka-Aroni, abaphristi, yayili-13 namadlelo ayo.
Yonke eminye imindeni yobozalo lukaKhohathi abaLevi abasalayo ozalweni lukaKhohathi, banikwa ngonkatho imizi esizwaneni sakwa-Efrayimi.
Banikwa iShekhemi namadlelo alo, kwelezintaba kwa-Efrayimi, umuzi wokuphephela umbulali, iGezeri namadlelo alo,
iKhibhizayimi namadlelo alo, neBhethi Horoni namadlelo alo, imizi emine.
Esizwaneni sakwaDani: i-Elitheke namadlelo alo, iGibhethoni namadlelo alo,
i-Ajaloni namadlelo alo, iGathi Rimoni namadlelo alo, imizi emine.
Engxenyeni yesizwana sakwaManase bathola: iThanakhi namadlelo alo, neGathi Rimoni namadlelo alo, imizi emibili.
Imizi yemindeni yobozalo lukaKhohathi ababesasele yayilishumi isiyonke namadlelo ayo.
Abozalo lukaGerishoni, omunye wemindeni yabaLevi, banikwa engxenyeni yesizwana sakwaManase, iGolanu eBhashani namadlelo alo, umuzi wokuphephela umbulali, neBheyeshithera namadlelo alo, imizi emibili.
Esizwaneni sakwa-Isakhare bathola: iKhishiyoni namadlelo alo, iDabherathi namadlelo alo,
iJarimuthi namadlelo alo, ne-Eni Ganimi namadlelo alo, imizi emine.
Esizwaneni sakwa-Asheri bathola: iMishali namadlelo alo, i-Abhidoni namadlelo alo,
iHelikhathi namadlelo alo, neRehobhe namadlelo alo, imizi emine.
Esizwaneni sakwaNafethali bathola: iKedeshi eGalile namadlelo alo, umuzi wokuphephela umbulali, iHamothi Dori namadlelo alo, neKharithani namadlelo alo, imizi emithathu.
Yonke imizi yamaGereshoni ngemindeni yawo namadlelo ayo yayili-13.
Kulabo baLevi ababesasele, ozalweni lukaMerari yanikezelwa esizwaneni sakwaZebuloni: iJokineyamu namadlelo alo, iKharitha namadlelo alo,
iDimina namadlelo alo, neNahalali namadlelo alo, imizi emine.
Esizwaneni sakwaRubeni bathola: iBhezeri namadlelo alo, iJahazi namadlelo alo,
iKhedemothi namadlelo alo, neMefahathi namadlelo alo, imizi emine.
Esizwaneni sakwaGadi bathola: iRamothi kwaGileyadi namadlelo alo, umuzi wokuphephela umbulali, iMahanayimi namadlelo alo,
iHeshibhoni namadlelo alo, neJazeri namadlelo alo, imizi emine isiyonke.
Maqondana nemizi yozalo lwamaMerari ayesasele, imindeni yabaLevi, yona yabelwa imizi eli-12 isiyonke.
Isiyonke imizi yabaLevi eyayiphakathi kwesabelo sabakwa-Israyeli yayingama-48 namadlelo ayo.
Umuzi ngamunye waleyo mizi wawuzungezwe ngamadlelo awo, wonke ayenjalo.
USimakade wamnika kanjalo u-Israyeli lonke izwe ayefunge kokhokho bakhe ukuthi uzobanika lona; sebelidlile laba yisabelo sabo, bahlala kulo.
USimakade wayesebapha ukuthula nhlangothi zonke njengalokhu ayefungile kokhokho babo; akukho nasinye ezitheni zabo esama phambi kwabo, ngokuba uSimakade wayezinikele zonke izitha zabo ezandleni zabo.
Akukho nasinye kulezo zithembiso ezinhle uSimakade ayezethembise indlu ka-Israyeli esingafezekanga; zonke zafezeka.
UJoshuwa wayesebiza abakwaRubeni, nabakwaGadi, nengxenye yesizwana sakwaManase,
wathi kubo: “Nikugcinile konke uMose inceku kaSimakade aniyala ngakho, futhi nangilalela kukho konke enganiyala ngakho;
anibalahlanga abafowenu ngazo zonke lezi zinsuku kuze kube namuhla, kodwa nikuqikelele ukugcina konke uSimakade uNkulunkulu wenu aniyale ngakho.
Manje uSimakade uNkulunkulu wenu usebanike ukuthula abafowenu njengoba ayebathembisile; ngakho-ke buyelani emuva emathendeni enu ezweni eliyisabelo senu, izwe uMose inceku kaSimakade aninika lona ngaphesheya kweJordani.
Qaphelani ukuba nigcine imiyalo nomthetho aniyala ngakho uMose, inceku kaSimakade, ukuba nimthande uSimakade uNkulunkulu wenu, nihambe kuzo zonke izindlela zakhe, nigcine imiyalo yakhe, ninamathele kuye, nimkhonze ngayo yonke inhliziyo yenu nangawo wonke umphefumulo wenu.”
UJoshuwa wayesebabusisa, wabakhulula ukuba bahambe, bahamba babuyela emathendeni abo.
Enye ingxenye yesizwana sakwaManase, uMose wayeyabele isabelo sayo eBhashani, kodwa enye ingxenye uJoshuwa wayabela phakathi kwabafowabo izwe elisentshonalanga, phesheya kweJordani. Ngesikhathi ebabuyisela emathendeni abo, wababusisa,
wathi kubo: “Buyelani emathendeni enu nengcebo eningi, nemfuyo eningi, nesiliva, igolide, ithusi, insimbi, nezimpahla eziningi, nabelane nabafowenu impango eniyithathe ezitheni zenu.”
Ngakho-ke abozalo lukaRubeni nabolukaGadi nengxenye yesizwana sakwaManase babuyela emakhaya, behlukana nabanye bakwa-Israyeli eShilo, eKhanani, ukuba babuyele kwaGileyadi, ezweni labo ababelidle laba yisabelo sabo njengokuyala kukaSimakade ngoMose.
Kwathi lapho befika emngceleni eJordani, eKhanani, abozalo lukaRubeni, abolukaGadi, nengxenye yesizwana sakwaManase bakha i-althare elikhulu kakhulu.
Abakwa-Israyeli bezwa ukuthi abakwaRubeni, abakwaGadi, nengxenye yesizwana sakwaManase bakhe i-althare malungana neKhanani ezifundeni ezingaseJordani, ohlangothini lwabakwa-Israyeli.
Kuthe ukuba abakwa-Israyeli bakuzwe lokho, yonke inhlangano yabakwa-Israyeli yabuthana eShilo ukuze balwe nabo.
Abakwa-Israyeli bathumela uFinehasi, indodana ka-Eleyazare umphristi, kwabozalo lukaRubeni, olukaGadi, nengxenye yesizwana sakwaManase kwaGileyadi.
UFinehasi wayehambisana nezikhulu ezilishumi, kuyisikhulu ngendlu kayise kuzona zonke izizwana zakwa-Israyeli, kuyileso naleso simele indlu kayise phakathi kwemindeni yakwa-Israyeli.
Bafika ozalweni lukaRubeni nolukaGadi nasengxenyeni yesizwana sakwaManase kwaGileyadi, bathi kubo:
“Isho kanje inhlangano yonke kaSimakade: ‘Siphambeko sini lesi enisenze kuNkulunkulu ka-Israyeli ukuba nimjikele namuhla ngokungabe nisamlandela uSimakade ngokuzakhela i-althare, na? Ningamhlubuka kanjani uSimakade namuhla, na?
Asonanga yini ngokwanele ePheyori, okuze kube manje asikazihlambululi kubo, okwathi ngenxa yabo, yonke inhlangano kaSimakade yehlelwa wubhubhane,
ukuba namuhla nimhlubuke ningabe nisamlandela uSimakade, na? Uma nimhlubuka namuhla uSimakade, uzoyithukuthelela yonke inhlangano ka-Israyeli kusasa.
Kepha uma izwe lenu lingcolile, welelani ezweni eliyifa likaSimakade, lapho kukhona ithabanakeli likaSimakade, nibe nefa phakathi kwethu; ningamhlubuki uSimakade uNkulunkulu wethu, futhi ningasihlubuki nathi ngokuzakhela i-althare, kunalelo likaSimakade uNkulunkulu wethu.
U-Akhani, indodana kaZera, akenzanga yini isiphambeko ngokuqalekisiweyo, kwathi yonke inhlangano yakwa-Israyeli yehlelwa yintukuthelo, na? Akazange abhubhe yedwa ngenxa yesiphambeko sakhe.’ ”
Abozalo lukaRubeni, nabolukaGadi, nengxenye yesizwana sakwaManase baziphendulela kanje kuzo izinhloko zemindeni yakwa-Israyeli, bathi:
“Simakade, Nkulunkulu wonkulunkulu! USimakade, uNkulunkulu wonkulunkulu uyazi, no-Israyeli makazi! Uma kungukuhlubuka noma kungukwephula ukholo kuSimakade, ningasiyekeli sisinde namuhla,
ngokuzakhela i-althare ukuze sihlubuke ekulandeleni uSimakade; noma uma lokhu sikwenze ukuze sinikele kulo iminikelo yokushiswa noma yokusanhlamvu noma yobudlelwane, uSimakade uqobo makaziphindiselele.
Qha, silakhe ngokwesaba ukuthi esikhathini esizayo abantwana benu bayothi kwabethu: ‘Ninamsebenzi muni noSimakade uNkulunkulu ka-Israyeli, na?
Ngokuba uSimakade ulenzile iJordani laba ngumngcele phakathi kwethu nani, nina bakwaRubeni nabakwaGadi; aninasabelo kuSimakade.’ Izingane zenu zingenza abantwana bethu bayeke ukukhonza uSimakade.
“Ngakho-ke sithe: ‘Manje masakhe i-althare, lingabi ngelomnikelo wokushiswa noma elomhlatshelo,’
kodwa libe ngubufakazi phakathi kwethu nani, naphakathi kwezizukulwane emva kwethu, ukuthi siyayenza inkonzo kaSimakade phambi kwakhe ngeminikelo yethu yokushiswa, ngemihlatshelo, nangeminikelo yobudlelwane, ukuze abantwana benu bangaze bathi kwabethu ngesikhathi esizayo: ‘Aninasabelo kuSimakade.’
“Sathi-ke: ‘Uma kungase kushiwo lokhu kithi nasezizukulwaneni zethu ngomuso, siyokuthi: “Bhekani lo mfanekiso we-althare likaSimakade abalenza okhokho bethu, bengalenzeli iminikelo yokushiswa nemihlatshelo, kodwa ukuze libe ngubufakazi phakathi kwethu nani.” ’
“Makube kude nathi ukuhlubuka uSimakade sichezuke namuhla ekulandeleni uSimakade ngokwakha i-althare lomnikelo wokushiswa nowokusanhlamvu noma umhlatshelo, kunalelo althare likaSimakade uNkulunkulu wethu eliphambi kwethabanakeli lakhe.”
Lapho uFinehasi umphristi, izikhulu zenhlangano, nezinhloko zemindeni yakwa-Israyeli ababenaye bezwa lawo mazwi akhulunywa ngabozalo lukaRubeni, olukaGadi, nolukaManase, beneliseka.
Umphristi uFinehasi, indodana ka-Eleyazare, wathi kwabakwaRubeni nabakwaGadi nabakwaManase: “Namuhla sesiyazi ukuthi uSimakade uphakathi kwethu, ngokuba anisenzanga lesi siphambeko kuSimakade; namuhla nibasindisile abakwa-Israyeli esandleni sikaSimakade.”
Umphristi uFinehasi, indodana ka-Eleyazare, nezikhulu babuyela emuva besuka kwaRubeni nakwaGadi kwaGileyadi eKhanani, babuyela kwa-Israyeli nezwi abaliphathisiwe.
Umbiko wabathokozisa abakwa-Israyeli, base bembonga uNkulunkulu, ababe besayiphatha eyokukhuphuka babahlasele ukuze babhubhise izwe abahlala kulo abozalo lukaRubeni nabolukaGadi.
AbakwaRubeni nabakwaGadi balibiza lelo althare ngokuthi: “Ngubufakazi,” ngokuba bathi: “Lingubufakazi phakathi kwethu bokuthi uSimakade unguNkulunkulu.”
Sekwedlule izinsuku eziningi, uSimakade esenike u-Israyeli ukuthula ezitheni zakhe nxazonke, noJoshuwa esemdala, iminyaka isihambile,
uJoshuwa wabiza bonke abakwa-Israyeli, amalunga akhona, izinhloko, abehluleli, nezikhulu, wathi kubo: “Manje sengimdala, neminyaka yami isiminingi,
futhi nikubonile konke uSimakade uNkulunkulu wenu akwenza kuzo zonke lezi zizwe ngenxa yenu, ngokuba nguSimakade uNkulunkulu wenu owanilwela.
Bhekani, nginabele njengefa lezizwana zenu, zonke izizwe ezisasele, nazo zonke izizwe engazibhubhisa, kusukela eJordani kuze kufike oLwandle Olukhulu entshonalanga.
USimakade uNkulunkulu wenu uyakuzixosha, azidungule phambi kwenu; niyakulidla izwe lazo, njengalokhu uSimakade uNkulunkulu wenu ethembisile kini.
“Ngakho-ke qinani kakhulu ukuze nigcine futhi nenze konke okulotshwe encwadini yomthetho kaMose, ukuba ningachezukeli kwesokunene noma kwesokhohlo,
ukuze ningahlangani nalezi zizwe ezisele phakathi kwenu, noma nibize amagama onkulunkulu bazo, nifunge ngabo, nibakhonze, noma nibakhothamele,
kodwa nibambelele niqine kuSimakade uNkulunkulu wenu njengoba nenzile kuze kube namuhla.
Ngokuba uSimakade uzixoshile phambi kwenu izizwe ezinkulu nezinamandla; nina-ke akukho muntu okwazile ukumelana nani kuze kube namuhla.
Oyedwa kini uxoshe inkulungwane, ngokuba nguSimakade uNkulunkulu wenu onilwelayo njengalokhu ayekhulume kini.
Qaphelani ukuba nimthande uSimakade uNkulunkulu wenu.
“Ngokuba uma nihlehlela emuva, ninamathele kuleyo nsali yalezi zizwe ephakathi kwenu, niganiselane nazo, nize niganwe ngabesifazane bazo nazo ziganwe ngabenu,
yazini impela ukuthi uSimakade uNkulunkulu wenu akayukuqhubeka axoshe lezi zizwe phambi kwenu, kodwa ziyoba wugibe nonoxhaka kini, nenkalivasi ezinhlangothini zenu, nameva emehlweni enu, nize nibhubhe kuleli lizwe elihle uSimakade uNkulunkulu wenu aninike lona.
“Bhekani, namuhla sengizokufa; niyazi ezinhliziyweni nasemiphefumulweni yenu nonke ukuthi akukho nokukodwa okwaphuthayo kwangaphumelela kulokho uSimakade uNkulunkulu wenu akwethembisa mayelana nani; konke kwaphumelela, akukho nakunye okwaphutha.
Kodwa njengoba zonke izinto ezinhle uSimakade uNkulunkulu wenu anethembisa zona zigcwalisekile, kanjalo uSimakade uyonehlisela konke okubi, aze anibhubhise kuleli lizwe elihle uSimakade aniphe lona.
Uma nephula isivumelwano sikaSimakade uNkulunkulu wenu aniyala ngaso bese nihamba niyokhonza abanye onkulunkulu, nibakhothamele, ulaka lukaSimakade luyonivuthela, nibhubhe ngokushesha kuleli lizwe elihle aninike lona.”
UJoshuwa wayeseqoqa zonke izizwana zakwa-Israyeli eShekhemi, wabiza amalunga akwa-Israyeli, izinhloko, abehluleli, nezikhulu, bema phambi kukaNkulunkulu.
UJoshuwa wathi kubo bonke abantu: “Usho kanje uSimakade uNkulunkulu ka-Israyeli, uthi: ‘Emandulo okhokho benu, uThera namadodana akhe u-Abhrahama noNahori, babehlala ngaphesheya komfula, bekhonza abanye onkulunkulu.
Ngamthatha ukhokho wenu u-Abhrahama ngaphesheya komfula, ngamhola edabula lonke iKhanani, ngenza isizukulwane sakhe saba singi, ngamnika u-Isaka.
U-Isaka ngamnika uJakobe no-Esawu. Ngamnika u-Esawu elezintaba kuze kube seSeyiri ukuba alidle libe yifa lakhe, kodwa uJakobe nabantwana bakhe behlela eGibhithe.
“ ‘Ngathumela uMose no-Aroni, ngalihlupha iGibhithe ngalokho engakwenza phakathi kwalo; emveni kwalokho nganikhipha.
Lapho ngibakhipha okhokho benu eGibhithe, nafika olwandle; abaseGibhithe babaxosha okhokho benu ngezinqola nangamahhashi, baze bafika oLwandle Lomhlanga.
Lapho bekhala kuSimakade, waletha ubumnyama phakathi kwenu nabaseGibhithe. Wenza ulwandle ukuba lubuyele phezu kwabo lubagubuzele; nakubona engakwenza kwabaseGibhithe; emveni kwalokho nahlala ehlane izinsuku eziningi.
“ ‘Nganingenisa ezweni lama-Amori ahlala phesheya kweJordani, alwa nani; ngawanikela esandleni senu, nalidla izwe lawo; ngawabhubhisa phambi kwenu.
Inkosi uBhalaki, indodana kaZiphori wakwaMowabi, waphuma ukuyolwa no-Israyeli. Wathumela ukuyobiza uBhileyamu indodana kaBheyori ukuba aniqalekise,
kodwa angimlalelanga uBhileyamu; ngakho-ke wanibusisa, nganikhulula esandleni sakhe.
“ ‘Lapho niwela iJordani, nafika eJerikho; izakhamuzi zalo zalwa nani, kanjalo nama-Amori, amaPherizi, amaKhanani, amaHithi, amaGirigashi, amaHivi, namaJebusi, ngabanikela esandleni senu.
Ngathumela iminyovu phambi kwenu, eyaxosha phambi kwenu amakhosi amabili ama-Amori, kwakungengankemba yakho noma ngomnsalo wakho.
Nganinika izwe eningalikhandlekelanga nemizi eningayakhanga, nihlala kuyo; nidla izithelo zemivini nezeminqumo eningakutshalanga.’
“Manje mesabeni uSimakade, nimkhonze ngobuqotho nangeqiniso, nibasuse onkulunkulu ababekhonzwa ngokhokho besengaphesheya komfula naseGibhithe, nikhonze uSimakade.
Uma kukubi emehlweni enu ukukhonza uSimakade, khethani namuhla ukuthi ngubani eniyakumkhonza, noma ngonkulunkulu ababekhonzwa ngokhokho benu besengaphesheya komfula, noma ngonkulunkulu bama-Amori enihlala ezweni lawo, kepha mina nendlu yami siyakumkhonza uSimakade.”
Abantu baphendula bathi: “Makube kude nathi ukushiya uSimakade sikhonze abanye onkulunkulu,
ngokuba uSimakade uNkulunkulu wethu nguYena owasikhipha thina nokhokho bethu Gibhithe, endlini yobugqila, nowenza lezo zibonakaliso emehlweni ethu. Wasivikela endleleni yonke esahamba kuyo, naphakathi kwabo bonke abantu esedlula phakathi kwabo.
USimakade waxosha bonke abantu phambi kwethu, ama-Amori ayehlala ezweni; yingakho siyomkhonza uSimakade, ngokuba unguNkulunkulu wethu.”
UJoshuwa wathi kubantu: “Aninakumkhonza uSimakade, ngokuba unguNkulunkulu ongcwele. UnguNkulunkulu onomhawu, akayukuxolela iziphambeko zenu noma izono zenu.
Uma nimshiya uSimakade, nikhonze abanye onkulunkulu babezizwe, uyophenduka, anenzakalise, aniqothule esenenzele lokhu okuhle.”
Abantu bathi kuJoshuwa: “Qha, siyokumkhonza uSimakade.”
UJoshuwa wayesethi kubantu: “Nina ningofakazi uqobo bokuthi yinina enizikhethele uSimakade ukuba nimkhonze.” Bathi: “Singofakazi.”
Wathi kubo: “Ngakho-ke lahlani onkulunkulu babezizwe abaphakathi kwenu, niphendulele izinhliziyo zenu kuSimakade uNkulunkulu ka-Israyeli.”
Abantu bathi kuJoshuwa: “Siyomkhonza uSimakade uNkulunkulu wethu, silalele izwi lakhe.”
Ngakho-ke uJoshuwa wenza isivumelwano nabantu ngalolo lusuku, wabamisela izimiso nemithetho eShekemi.
UJoshuwa wawaloba lawa mazwi encwadini yomthetho kaNkulunkulu, wathatha itshe elikhulu, walimisa lapho phansi komu-okhi, endaweni engcwele kaSimakade.
UJoshuwa wathi kubo bonke abantu: “Bhekani, leli litshe liyokuba ngufakazi ngathi, ngokuba lizwile wonke amazwi kaSimakade awakhulume kithi; liyoba ngufakazi ngani, uma senimphika uNkulunkulu wenu.”
UJoshuwa wayesebadedela abantu, babuyela efeni labo.
Kwathi emveni kwazo zonke lezo zinto uJoshuwa, indodana kaNuni, inceku kaSimakade, wafa eseneminyaka eyi-110.
Bamngcwaba eThiminathi Sera eyifa lakhe, ekwelezintaba kwa-Efrayimi, enyakatho yentaba iGahashi.
U-Israyeli wamkhonza uSimakade ngazo zonke izinsuku zikaJoshuwa, nangezamalunga aphila izinsuku ezedlula ezikaJoshuwa, futhi ayekwazi konke uSimakade ayekwenzele u-Israyeli.
Amathambo kaJosefa ayekhushulwe ngabakwa-Israyeli eGibhithe, bawangcwaba eShekhemi esiqeshini somhlaba esasithengwe nguJakobe emadodaneni kaHamori, uyise kaShekemi, ngamakesita ayikhulu, saba yifa labantu bakwaJosefa.
U-Eleyazare indodana ka-Aroni wafa; bamngcwaba eGibheya umuzi kaFinehasi indodana yakhe, ayewunikiwe kwelezintaba kwa-Efrayimi.
Emveni kokufa kukaJoshuwa, abantu bakwa-Israyeli babuza kuSimakade, bathi: “Ngubani ozosihola siyokulwa namaKhanani, na?”
USimakade wathi: “NguJuda ozokwenyuka. Bheka, izwe ngilinikele esandleni sakhe.”
UJuda wathi kumfowabo uSimeyoni: “Yenyuka nami siye ezweni engilabelwe ukuze silwe namaKhanani, nami ngizohamba nawe ngiye ezweni owabelwe lona.” USimeyoni wayesehamba naye.
UJuda wenyuka. USimakade wanikela amaKhanani namaPherizi esandleni sakhe; babulala abantu abayizi-10 000 eBhezekhi.
Bazithela phezu kuka-Adoni Bhezekhi, eBhezekhi, balwa naye, bawabulala amaKhanani namaPherizi.
U-Adoni Bhezekhi wabaleka, kodwa bamhubha, bambamba, bamnquma izithupha noqukula.
U-Adoni Bhezekhi, wathi: “Amakhosi angama-70 anqunywe izithupha noqukula ayevame ukucosha imvuthuluka ewa etafuleni lami, njengoba ngenzile, ngalokho uNkulunkulu uphindisele kimi.” Bamletha eJerusalema, wafela khona.
Abantu bakwaJuda balwa neJerusalema, balidla, balibhubhisa ngenkemba, bawuthungela umuzi ngomlilo.
Emveni kwalokho abantu bakwaJuda behla bayokulwa namaKhanani ayehlala kwelezintaba eNingizimu, nasemathafeni.
UJuda walwa namaKhanani ayehlala eHebhroni, okwakuthiwa yiKiriyathi Arbha, babulala uSheshayi, u-Ahimani, noThalimayi.
Ukusuka lapho balwa nezakhamuzi zaseDebhiri okwakuthiwa yiKiriyathi Seferi.
UKhalebhu wathi: “Lowo oyonqoba, alidle iKiriyathi Seferi, ngiyomnika u-Akhisa indodakazi yami, abe ngumkakhe.”
Kwasuka u-Othiniyeli, indodana kaKhenazi, umnawabo kaKhalebhu, walidla; wayesemganisela indodakazi yakhe, u-Akhisa, yaba ngumkakhe.
Wathi lapho efika kuye, wamnxusa ukuba acele insimu kuyise. Lapho ehla embongolweni yakhe, uKhalebhu wathi kuye: “Ufunani, na?”
Wathi kuye: “Ngicela ungiphe isipho, njengoba ungibeke ezweni eningizimu, ngiphe futhi nemithombo yamanzi.” UKhalebhu wamnika imithombo esenhla nesezansi.
Abozalo loMkheni, umukhwe kaMose, bakhuphuka nabozalo lukaJuda bisuka emzini wamasundu baya ehlane lakwaJuda eNegevu ese-Aradi. Yena wahamba wayohlala nabantu.
UJuda wahamba noSimeyoni umfowabo, banqoba amaKhanani ayehlala eZefathi, balicekela phansi. Ngakho-ke umuzi wabizwa ngokuthi yiHorma.
UJuda wadla iGaza nezindawo zalo, i-Ashikeloni nezindawo zalo, ne-Ekhroni nezindawo zalo.
USimakade wayenoJuda, walinqoba elezintaba, kodwa akakwazanga ukuxosha izakhamuzi zasemathafeni, ngokuba zazinezinqola zensimbi.
IHebhroni lanikwa uKhalebhu njengalokhu uMose ayeshilo, waxosha kuyo amadodana amathathu ka-Anaki.
Kodwa abozalo lukaBhenjamini abawaxoshanga amaJebusi ayehlala eJerusalema, ngakho-ke amaJebusi asahlala eJerusalema phakathi kwabozalo lukaBhenjamini kuze kube namuhla.
Abendlu kaJosefa benyuka bahlasela iBhethele, uSimakade wayenabo.
Bathumela izinhloli eBhethele elalikade laziwa ngokuthi yiLuzi.
Lapho izinhloli zibona indoda eyayiphuma emzini, zathi kuyo: “Sikhombise indlela yokungena emzini, sizokuphatha kahle.”
Ngakho-ke yabakhombisa indlela yokungena emzini, bawubhubhisa umuzi ngenkemba, kodwa indoda nomndeni wayo wonke babadedela bahamba.
Indoda yahamba yaya ezweni lamaHithi, yakha umuzi yawuqamba ngokuthi yiLuzi, usabizwa ngalelo gama kuze kube namuhla.
UManase akazixoshanga izakhamuzi zaseBhethi Sheyani nemizana yalo, ezaseThahanakhi nemizana yalo, ezaseDori nemizana yalo, ezase-Ibheleyami nemizana yalo, nezaseMegido nemizana yalo, kodwa amaKhanani aqhubeka ahlala kulelo lizwe.
Kuthe u-Israyeli esenamandla, wawaphoqa amaKhanani ukuba amsebenzele, kodwa akawaxoshanga aphume aphele phakathi kwakhe.
No-Efrayimi akawaxoshanga amaKhanani ayehlala eGezeri, kodwa amaKhanani ahlala phakathi kwabo eGezeri.
UZebuloni akazixoshanga izakhamuzi zaseKhithroni, nezaseNahaloli, kodwa amaKhanani ahlala phakathi kwabo bawaphoqa ukuba abasebenzele.
U-Asheri akazixoshanga izakhamuzi zase-Akho, ezaseSidoni, ezase-Ahelabhi, ezase-Akhizibhi, ezaseHelibha, ezase-Afiki nezaseRehobhi,
kodwa abakwa-Asheri bahlala phakathi kwamaKhanani ayakhe kulelo lizwe, ngokuba abawaxoshanga.
UNafethali akazixoshanga izakhamuzi zaseBhethi Shemeshi, nezaseBhethi Anathi, kodwa wahlala phakathi kwamaKhanani ayakhe kulelo lizwe; izakhamuzi zaseBhethi Shemeshi, nezaseBhethi Anathi baziphoqelela ukuba zibasebenzele.
Ama-Amori acindezela isizwe sakwaDani ukuba sihlale kwelezintaba, awaze asivumela ukwehlela esigodini.
Ama-Amori aqhubeka ahlala entabeni iHeresi, e-Ayijaloni, naseShahalibhimi, kodwa abakwaJosefa bawacindezela kanzima ama-Amori, bawaphoqa ukuba abasebenzele.
Umngcele wama-Amori wawusuka wenyukele phezulu emsahweni e-Akhrabhimi, eSela, wenyuke.
Ingelosi kaSimakade yakhuphuka eGiligali, yaya eBhokhimi, yathi: “Nganikhipha eGibhithe, nganiletha ezweni engalethembisa okhokho benu, ngathi: ‘Angisoze ngasephula isivumelwano sami nani kuze kube phakade.
Nani-ke ningasenzi isivumelwano nezakhamuzi zakuleli lizwe. Bhidlizani ama-althare azo.’ Kepha aniwulalelanga umyalo wami. Bonani enikwenzileyo.
Ngakho-ke manje ngithi: angizukuzixosha phambi kwenu, kodwa zizomelana nani, onkulunkulu bazo bayoba wugibe kini.”
Ngesikhathi ingelosi kaSimakade ikhuluma lawo mazwi ku-Israyeli wonkana, abantu badazuluka, bakhala.
Bayibiza leyo ndawo ngokuthi yiBhokhimi, benza umhlatshelo kuSimakade kuleyo ndawo.
Kwathi ukuba uJoshuwa abakhulule abantu, abakwa-Israyeli babuyela efeni labo ezweni ababelwe lona.
Abantu bamkhonza uSimakade zonke izinsuku zikaJoshuwa, nangazo zonke izinsuku zezingwevu ezaphila kade kunoJoshuwa, ezaziwubonile wonke umsebenzi omkhulu uSimakade ayewenzele u-Israyeli.
UJoshuwa, indodana kaNuni, inceku kaSimakade, wafa eseneminyaka eyi-110.
Bamngcwaba emngceleni wefa lakhe eThimnathi Heresi, kwelezintaba kwa-Efrayimi, enyakatho yentaba iGahashi.
Sonke leso sizukulwane safa sabekwa nokhokho baso, kwakhula esinye isizukulwane emva kwabo, esasingamazi uSimakade nomsebenzi ayewenzele u-Israyeli.
Abakwa-Israyeli base benza okubi emehlweni kaSimakade, bakhonza oBhali;
bamshiya uSimakade uNkulunkulu wokhokho babo, owabakhipha eGibhithe, balandela abanye onkulunkulu, onkulunkulu babantu ababebazungezile, babakhothamela, baluchukuluza ulaka luSimakade.
Bamshiya uSimakade, bakhonza uBhali no-Ashitharothi.
Intukuthelo kaSimakade yamvuthela u-Israyeli, wayesebanikela kubaphangi, babaphanga, wabathengisa emandleni ezitha ezazibazungezile, ababe besakwazi ukumelana nazo.
Noma yinini lapho bephuma impi, isandla sikaSimakade sasimelana nabo ukubehlisela okubi, njengalokhu uSimakade ayebaxwayisile wafunga kubo, babekhathazekile kakhulu.
USimakade wabavusela abehluleli ababakhulula esandleni salabo ababebaphanga.
Nokho ababalalelanga abehluleli babo, ngokuba baphinga nabanye onkulunkulu, babakhothamela. Ngokushesha bachezuka endleleni abahamba kuyo oyisemkhulu, ababelalela imiyalo kaSimakade, abazange basilandele isibonelo sabo.
Noma yinini lapho uSimakade ebavusela abehluleli, uSimakade wayeba naye umehluleli, futhi wayebakhulula esandleni sezitha zabo ngazo zonke izinsuku zalowo mehluleli, ngokuba uSimakade wayeba nozwelo lapho sebebubula ngenxa yalabo ababebacindezele, bebahlupha.
Kepha noma yinini lapho umehluleli efa, babebuyela emuva baziphathe kabi ngokwedlulele kunoyisemkhulu, ngokulandela abanye onkulunkulu ukuba babakhonze, babakhothamele. Abayekanga namunye wemikhuba yabo, nezindlela zabo zenkani.
Intukuthelo kaSimakade yamvuthela u-Israyeli, wathi: “Ngenxa yokuba laba bantu basephulile isivumelwano sami engabayala ngaso okhokho babo, futhi abalalelanga izwi lami,
angiyukuphinde ngixoshe abantu phambi kwabo, noma yisiphi sesizwe kwezashiywa nguJoshuwa ekufeni kwakhe,
ukuze uSimakade amvivinye u-Israyeli, abone ukuthi uyakuqikelela yini noma qha ukuhamba ngezindlela zakhe njengoba benza okhokho babo.”
USimakade wazishiya lezo zizwe, akaze azixosha kanyekanye, futhi kazinikelanga esandleni sikaJoshuwa.
Nazi izizwe uSimakade azishiya ukuze avivinye ngazo bonke abakwa-Israyeli ababengenalwazi ngempi eKhanani,
ukuze lezo zizukulwane zabakwa-Israyeli ezilandelayo zikwazi ukulwa, kufundiswe lezo ezingakaze ziyazi impi phambilini.
Kwakuyilezi izizwe: amakhosi ayisihlanu amaFilisti, nawo wonke amaKhanani, amaSidoni, amaHivi ayehlala entabeni iLebhanoni, kusukela entabeni iBhali Hermoni kuze kube seHamathi.
Zazishiyelwe ukuvivinywa ngabakwa-Israyeli, ukuze kwazeke ukuthi bayoyilalela yini imiyalelo kaSimakade abayala ngayo okhokho babo ngoMose.
Ngakho-ke abantu bakwa-Israyeli bahlala phakathi kwamaKhanani, amaHithi, ama-Amori, amaPherizi, amaHivi, namaJebusi,
baganwa ngamadodakazi alezi zizwe, aba ngamakhosikazi abo, amadodana abo aganwa ngamadodakazi azo, base bekhonza onkulunkulu bazo.
Abantu bakwa-Israyeli benza okubi emehlweni kaSimakade, bakhohlwa nguSimakade uNkulunkulu wabo, bakhonza oBhali no-Ashera.
Ngakho-ke intukuthelo kaSimakade yamvuthela u-Israyeli, wamthengisa esandleni senkosi uKhushani Rishathayimi wase-Aramu Naharayimi, abakwa-Israyeli bamkhonza uKhushani Rishathayimi iminyaka eyisishiyagalombili.
Kodwa lapho abantu bakwa-Israyeli bekhala kuSimakade, wabavusela umkhululi abakwa-Israyeli, owabakhulula, u-Othiniyeli indodana kaKhenazi, umnawabo kaKhalebhu.
UMoya kaSimakade wehlela phezu kwakhe, wabehlulela abakwa-Israyeli; waphuma waya empini, uSimakade wayinikela esandleni sakhe inkosi uKhushani Rishathayimi yase-Aramu, wamehlula uKhushani Rishathayimi.
Izwe laba nokuthula iminyaka engama-40. U-Othiniyeli, indodana kaKhenazi, wafa.
Abantu bakwa-Israyeli babuye benza okubi emehlweni kaSimakade, uSimakade waqinisa u-Egiloni wakwaMowabi wamelana nabakwa-Israyeli, ngokuba babenzile okubi emehlweni kaSimakade.
U-Egiloni ehlangene nabakwa-Amoni nabase-Amaleki bamhlasela, bamehlula u-Israyeli, badla uMuzi Wamasundu.
Abantu bakwa-Israyeli bamkhonza u-Egiloni, inkosi yakwaMowabi, iminyaka eli-18.
Lapho abantu bakwa-Israyeli bekhala kuSimakade, uSimakade wabavusela omunye umkhululi, u-Ehudi indodana kaGera wakwaBhenjamini, owayeyinxele. Abakwa-Israyeli bathumela umnikelo enkosini u-Egiloni wakwaMowabi ngesandla sika-Ehudi.
U-Ehudi wazenzela inkemba ebukhali nhlangothi zombili, ubude bayo buyikhubhithi, wayibophela ethangeni lakhe lakwesokunene ngaphansi kwezingubo zakhe.
Wahambisa umnikelo ku-Egiloni, inkosi yakwaMowabi. U-Egiloni wayekhuluphele kakhulu.
U-Ehudi eseqedile ukwethula umnikelo ku-Egiloni, wabamukisa abantu ababethwele umnikelo.
Kepha yena waphenduka eduze nesithombe setshe esasiqoshwe eduze neGiligali, wabuyela emuva, wathi: “Nginombiko oyimfihlo engimele ngikutshele wona, nkosi.” Inkosi yathi: “Thulani.” Zonke izinceku zayo zaphuma lapho yayikhona.
U-Ehudi weza kuyo ngesikhathi ihleli yodwa ophahleni ekamelweni layo elipholile, wathi: “Nginomyalezo wakho ovela kuNkulunkulu.” Yayisisukuma esihlalweni sayo.
U-Ehudi wayeselula isandla sakhe sasekhohlo wahosha inkemba yakhe eyayisethangeni lakhe lesokunene, wamgwaza ngayo u-Egiloni esiswini;
inkemba yangena nesibambo sayo yaze yayophumela emhlane. Yambozeka emafutheni ngokuba u-Ehudi wayengazange ayikhiphe esiswini sika-Egiloni.
U-Ehudi waphumela emhubheni wavala iminyango yekamelo eliphezulu, wayihluthulela.
Esehambile u-Ehudi, izinceku zangena, lapho zithola ukuthi iminyango yekamelo eliphezulu ihluthulelwe, zathi: “Mhlawumbe inkosi iyazikhulula ekamelweni layo elipholile.”
Zalinda zaze zakhathala. Kwathi ukuba zibone ukuthi ayiyivuli iminyango yekamelo eliphezulu, zathatha isihluthulelo zavula. Bheka, zayithola inkosi yazo iwele phansi ifile.
U-Ehudi waphulukundlela ngesikhathi zisalindile, wedlula ezithombeni ezibaziweyo, wabalekela eSeyiri.
Kwathi ukuba afike lapho, washaya icilongo ekwelezintaba kwa-Efrayimi. Abantu bakwa-Israyeli behla naye kwelezintaba, ebahola.
Wathi kubo: “Ngilandeleni, ngokuba uSimakade uzinikele esandleni senu izitha zenu zakwaMowabi.” Behla bemlandela, bavimba emazibukweni omfula iJordani awelela kwaMowabi, abaze bavumela muntu ukuba awele kuwo.
Ngaleso sikhathi babulala abakwaMowabi abayizi-10 000 abanamandla, amadoda ayizidlakela, akuzange kuphunyuke namunye.
Kusukela ngalolo lusuku abakwaMowabi baba ngaphansi kwesandla sabakwa-Israyeli. Izwe laba nokuthula, iminyaka engama-80.
Emva kwakhe kwalandela uShamgari, indodana ka-Anathi, owabulala amaFilisti angama-600 ngomcijo wokuhlokoloza izinkomo. Naye futhi wamkhulula u-Israyeli.
Abantu bakwa-Israyeli baphinde benza okubi emehlweni kaSimakade, emva kokufa kuka-Ehudi.
Ngakho-ke uSimakade wabanikela esandleni sikaJabhini, inkosi yaseKhanani, owayebusa eHazori, umkhuzi wempi yakhe kwakunguSisera owayehlala eHaroshethi labezizwe.
Abantu bakwa-Israyeli base bekhala kuSimakade becela usizo, ngokuba uJabhini wayenezinqola zempi ezenziwe ngensimbi ezingama-900. Wayebacindezele, ebaphethe ngonya olukhulu abakwa-Israyeli, iminyaka engama-20.
Ngaleso sikhathi uDebhora umphrofethikazi, umkaLaphidothi, wayengumehluleli kwa-Israyeli.
Wayevame ukuhlala phansi kwesihlahla sesundu sikaDebhora, phakathi kweRama neBhethele kwelezintaba kwa-Efrayimi. Abantu bakwa-Israyeli babenyukela kuye ukuba abehlulele.
Wathumela eKedeshi kwaNafethali ukuba kubizwe uBharaki, indodana ka-Abhinowami, wathi kuye: “USimakade, uNkulunkulu ka-Israyeli, ukuyale wathi: ‘Hamba umise entabeni iThabori, uthathe amabutho ayizi-10 000 ozalweni lukaNafethali nolukaZebuloni uye nawo entabeni iThabhori.
Ngizokumyenga uSisera, umkhuzi wempi kaJabhini nezinqola zakhe zempi namabutho akhe, ukuba babhekane nawe ngasemfuleni iKhishoni, ngizakumnikela esandleni sakho.’ ”
UBharaki wathi kuye: “Uma uhamba nami, ngizokuya, kodwa uma ungahambi nami, ngeke ngihambe.”
UDebhora wathi: “Ngizohamba nawe, kodwa-ke indlela oyithathayo manje ayizukukunika udumo, ngokuba uSimakade uyomnikela uSisera esandleni sowesifazane.” UDebhora wasukuma, wahamba noBharaki, baya eKedeshi.
UBharaki wababizela eKedeshi abakwaZebuloni nabakwaNafethali; amabutho ayizi-10 000 amlandela noDebhora, akhuphuka naye.
UHebhere umKheni kodwa wayezehlukanisile namaKheni, ayeluzalo lukaHobhabhi, umukhwe kaMose, wamisa ithende lakhe ngasesihlahleni esikhulu eZananimi eliseduze neKedeshi.
Kwathi ukuba uSisera bamtshele ukuthi uBharaki, indodana ka-Abhinowami, wenyukele entabeni iThabhori,
uSisera waqoqa zonke izinqola zakhe zempi, izinqola zensimbi ezingama-900 nawo wonke amabutho ayenawo, basuka eHaroshethi labezizwe baya emfudlaneni iKhishoni.
UDebhora wathi kuBharaki: “Sukuma! Lolu lusuku uSimakade amnikele ngalo uSisera esandleni sakho. USimakade akahambanga yini phambi kwakho, na?” Ngakho-ke uBharaki wehla entabeni iThabhori namabutho ayizi-10 000 emlandela.
USimakade wamehlula ngenkemba uSisera nazo zonke izinqola zakhe zempi namabutho akhe phambi kukaBharaki, uSisera wehla enqoleni yakhe, wabaleka ngezinyawo.
UBharaki waxosha amabutho agibele ezinqoleni nahamba ngezinyawo kwaze kwaba seHaroshethi labezizwe. Yonke impi kaSisera yafa ngenkemba, akwasala namunye.
USisera wabaleka ngezinyawo waze wayofika ethendeni likaJayeli, umkaHebhere umKheni, ngokuba kwakunokuthula phakathi kukaJabhini, inkosi yaseHazori, nabendlu kaHebhere umKheni.
UJayeli waphuma wamhlangabeza uSisera, wathi kuye: “Phambukela ngapha, nkosi yami, phambukela ngakimi, ungesabi.” Wayesephambukela kuye ethendeni, wayesemmboza ngengubo.
Wayesethi kuye: “Ngicela ungiphuzise amanzi amancane, ngokuba ngomile.” Wayesevula igabha lobisi, wamnika ukuba aphuze, wayesemmboza.
Wathi kuye: “Yima emnyango wethende, uma kufika noma ngubani ebuza, ethi: ‘Kukhona bani lapha, na?’ ubothi: ‘Akukho muntu.’ ”
Kodwa uJayeli, umkaHebhere, wathatha ngesandla sakhe isikhonkwane sethende nesando, wanyonyoba waya kuye esazunywe ngubuthongo, wasiphisela isikhonkwane enhlafunweni saze saphumela emhlabathini. Wayezunywe ngobukhulu ubuthongo, ekhathele. Wafa kanjalo-ke uSisera.
Wathi efika uBharaki exosha uSisera, uJayeli waphuma wayomhlangabeza, wathi kuye: “Woza ngizokukhombisa indoda oyifunayo.” Wayesengena ethendeni likaJayeli; wamfica uSisera edindilizile, efile, kunesikhonkwane enhlafunweni yakhe.
Ngalolo lusuku uNkulunkulu wamnqoba uJabhini, inkosi yamaKhanani, phambi kwabakwa-Israyeli.
Isandla sabantu bakwa-Israyeli saya ngokuqina phezu kukaJabhini, inkosi yaseKhanani, baze bambhubhisa nya uJabhini, inkosi yamaKhanani.
UDebhora noBharaki, indodana ka-Abhinowami, bacula ngalolo lusuku, bathi:
“Uma abaholi bakwa-Israyeli behamba phambili, nabantu bazinikela ngokukhululeka, makadunyiswe uSimakade!
“Lalelani makhosi, bekani indlebe zikhulu, ngizakumhubela uSimakade ngizakuhlabelela kuSimakade uNkulunkulu ka-Israyeli.
“Simakade lapho uphuma eSeyiri, uphuma esifundeni kwa-Edomi umhlaba wazamazama namazulu ayithulula, amafu athulula amanzi.
Izintaba zathuthumela phambi kukaSimakade waseSinayi, phambi kukaSimakade uNkulunkulu ka-Israyeli.
“Ezinsukwini zikaShamgari, indodana ka-Anathi, ezinsukwini zikaJayeli, abantu bayibalekela imigwaqo emikhulu, abahamba ngalezo ndlela bahamba ngezindlela ezimazombezombe.
Imizi yakwa-Israyeli yama ingenamuntu, Debhora, kwaze kwafika wena, wafika njengonina ku-Israyeli.
Bakhetha onkulunkulu abasha, kwase kuba khona impi emasangweni. Phakathi kwezinkulungwane ezingamashumi amane kwa-Israyeli, ukhona yini owake waphatha isihlangu nomkhonto, na?
Inhliziyo yami ikubaholi bakwa-Israyeli abazinikele phakathi kwabantu. Dumisani uSimakade!
“Khulumani ngakho, nina enigibela izimbongolo ezimhlophe, nina enihlala emacansini ezinjinga, nani enedlula ngendlela.
Lalelani umsindo wabaculi besemithonjeni yamanzi, lapho bephinda ukunqoba kuka-Simakade, ukunqoba kwezihlupheki kwa-Israyeli. Abantu bakaSimakade behlela emasangweni.
“ ‘Vuka, vuka, we Debhora! Vuka, vuka uhube ihubo. Vuka, we Bharaki, hola abathunjwa bakho, ndodana ka-Abhinowami.’
“Kwase kwehla insali yesikhulu, abantu bakaSimakade bahamba behla ukubhekana nonamandla.
Kusukela kwa-Efrayimi baphumela esigodini, kulandela wena Bhenjamini nabafowenu, kusukela eMakhiri, bahamba abakhuzi bempi behla kusukela kwaZebuloni, kwehla abaphethe induku yomkhuzi wempi.
Izikhulu zakwa-Isakhare zeza noDebhora, no-Isakhare wethembeka kuBharaki; baphuthuma esigodini besezithendeni zakhe. Phakathi kwabomndeni kaRubeni kwaba nokuzihlola okukhulu ezinhliziyweni.
Wahlalelani esihulugwini ukuze uzwe ukukhala kwemihlambi na? Phakathi kwabomndeni wakwaRubeni kwakukhona okukhulu ukuzihlola ezinhliziyweni.
UGileyadi wahlala phesheya kweJordani; noDani walibalelani ngasemikhunjini, na? U-Ashera wahlala akanyakaza ogwini lolwandle, wahlala ngasethekwini lalo.
UZebuloni yisizwe samadelakufa, noNafethali ngokunjalo, ezindaweni eziphakemeyo zezwe.
“Amakhosi afika, alwa; alwa namakhosi aseKhanani, eThahanakhi, ngasemanzini eMegido; awatholanga mpango yesiliva.
Izinkanyezi zalwa ezulwini, emizileni yazo zalwa noSisera.
Umfudlana iKhishoni wabakhukhula, umfudlana odla izindwani, umfudlana iKhishoni. Nyathela, mphefumulo wami, nyathela ngamandla.
Kwezwakala umsindo wezinselo zamahhashi zigabadula, zigabadula izinjomane ezinamandla.
‘Qalekisani iMerozi,’ kusho ingelosi kaSimakade; ‘ziqalekiseni kabi izakhamuzi zalo, ngoba azizanga ukuzosiza uSimakade, ukuzosiza uSimakade elwa nesiqhwaga.’
“Ungobusisiwe kwabesifazane, Jayeli mkaHebhere umKheni, ungobusisiwe kwabesifazane abahlala emathendeni.
Wacela amanzi, wamnika ubisi, wamlethela izangqondo ngomcengezi ofanele amakhosi.
Wabeka isandla sakhe esikhonkwaneni sethende nesokudla sakhe esandweni sezisebenzi; wamgqema ingozi uSisera wamfihliza ikhanda, wamgqobhoza, wambhoboza esikhaleni sendlebe.
Wawa, wadindiliza, wawa ngasezinyaweni zakhe, wawela lapho, wafa.
“Walunguza efasiteleni unina kaSisera, wakhala ngemuva kwekhethini, ethi: ‘Ilibaleleni inqola yakhe ukubuya, na? Uphi umsindo wezinqola zakhe, na?’
Abesifazane bakhe abahlakaniphileyo bayaphendula, wawuphendula yena uqobo umbuzo:
‘Bayitholile, futhi ababelani impango, na? Intombi, yebo, izintombi ezimbili endodeni; impango yezinto ezidayiwe kuSisera, impango yezinto ezidayiwe zahlotshiswa, iziqephu ezimbili zomsebenzi oyimpango odayiwe wahlotshiswa, ongowentamo yami.’
“Simakade, sengathi zingabhubha zonke izitha zakho! Kodwa abakuthandayo mabafane nelanga liphuma ngamandla alo.” Izwe lalinokuthula iminyaka engama-40.
Abantu bakwa-Israyeli benza okubi emehlweni kaSimakade, uSimakade wabanikela esandleni sabakwaMidiyani iminyaka eyisikhombisa.
Isandla sabakwaMidiyani sabehlula abantu bakwa-Israyeli, ngenxa yabakwaMidiyani, abakwa-Israyeli bazakhela izindawo zokucasha ezintabeni, emigedeni, nasezinqabeni.
Ngokuba njalo lapho abakwa-Israyeli sebelimile, abakwaMidiyani nama-Amaleki nezinye izizwe zasempumalanga babekhuphuka, babahlasele.
Babekanisa eduzane nakwa-Israyeli baqothule isivuno sezwe kuze kuyofika komakhelwane eGaza, bangabashiyeli kudla kwa-Israyeli, wena zimvu, zinkabi, nazimbongolo.
Ngokuba babekhuphuka nemfuyo yabo namathende abo, kube sengathi zinkumbi zesikhonyane; amadoda akhona, namakameli kwakukuningi kakhulu kungabaleki; babetheleka ezweni ukuba balibhubhise.
Ngakho-ke abakwa-Israyeli babengenalutho ngenxa yabakwaMidiyani, base bekhala abantu bakwa-Israyeli kuSimakade, bacela usizo.
Lapho abakwa-Israyeli bekhala kuSimakade ngenxa yabakwaMidiyani,
uSimakade wathumela umphrofethi kwabakwa-Israyeli, wathi kubo: “Usho kanje uSimakade, uNkulunkulu ka-Israyeli: ‘Nganikhuphula eGibhithe, nganikhipha endlini yobugqila;
nganikhulula esandleni sabaseGibhithe, nasesandleni sabo bonke ababenicindezela, ngabaxosha phambi kwenu, nganinika izwe labo;
ngathi kini: “NginguSimakade uNkulunkulu wenu, aniyukukhonza onkulunkulu bama-Amori enihlala ezweni lawo,” kodwa anilalelanga izwi lami.’ ”
Ingelosi kaSimakade yafika e-Ofira yahlala phansi komu-okhi, owawungokaJowashi umAbhiyezeri, ngesikhathi indodana yakhe, uGideyoni, ibhula ukolo esikhamweni sewayini, ukuze iwufihlele abakwaMidiyani.
Ingelosi kaSimakade yabonakala kuye, yathi: “USimakade unawe, qhawe elinamandla.”
UGideyoni wathi kuyo: “Kodwa mnumzane, uma uSimakade enathi, kungani kwenzeke konke lokhu kithi, na? Ziphi zonke izenzo zakhe ezimangalisayo, okhokho bethu abasixoxela ngazo, bethi: ‘Akazange yini uSimakade asikhuphule eGibhithe, na?’ Kepha manje uSimakade usilahlile, wasinikela esandleni sabakwaMidiyani.”
USimakade waphendukela kuye, wathi: “Hamba ngalawa mandla akho, ukhulule u-Israyeli esandleni sabakwaMidiyani; angikuthumanga yini, na?”
Waphendula wathi: “Kodwa Nkosi, ngingamkhulula kanjani u-Israyeli, na? Umndeni wakithi ungomncinyane kwaManase, nami ngingomncane endlini kababa.”
USimakade wathi kuye: “Ngizokuba nawe, uyakubabulala abakwaMidiyani kungathi ubulala umuntu oyedwa.”
Wayesethi kuye: “Uma ngifumene umusa emehlweni akho, ngikhombise isibonakaliso sokuthi nguwena okhuluma nami.
Ungasuki lapha ngize ngibuye kuwe, ngikulethele isipho sami, ngisibeke phambi kwakho.” Wayesethi: “Ngizohlala uze ubuye.”
UGideyoni wangena endlini yakhe, wahlaba izinyane lembuzi, wenza namaqebelengwane angenamvubelo nge-efa lempuphu; inyama wayifaka equthwini, umhluzi wawuthela ekhanzini, wakuletha kuye phansi kwesihlahla somu-okhi.
Ingelosi kaNkulunkulu yathi kuye: “Thatha inyama namaqebelengwane angenamvubelo ukubeke kuleli dwala, uthulule umhluzi.” Wenza kanjalo.
Ingelosi kaSimakade yayisithinta inyama namaqebelengwane angenamvubelo ngesihloko senduku eyayisesandleni sayo; kwaphuma umlilo edwaleni, wadla inyama namaqebelengwane angenamvubelo; ingelosi kaSimakade yayisinyamalala emehlweni akhe.
Kwamkhanyela uGideyoni ukuthi bekuyingelosi kaSimakade; wayesethi uGideyoni: “Maye, Nkosi Simakade! Ngokuba ngibonile ingelosi kaSimakade ubuso nobuso.”
Kepha uSimakade wathi kuye: “Ukuthula makube kuwe; ungesabi, awuzukufa.”
UGideyoni wamakhela uSimakade i-althare lapho, waliqamba wathi: uSimakade Ungukuthula. Kuze kube namuhla lisekhona lapho e-Ofira lama-Abhiyezeri.
Ngalobo busuku uSimakade wathi kuye: “Thatha inkunzi kayihlo, eyesibili eneminyaka eyisikhombisa, ubhidlize i-althare likaBhali elingelikayihlo, ugawule nensika engcwele eseduze kwalo,
bese wakha i-althare likaSimakade uNkulunkulu wakho phezu kwaleyo nqaba elapho ngokuhlelekileyo, uthathe inkunzi yesibili, uyinikele njengomnikelo wokushiswa phezu kwezinkuni zensika engcwele ozakuyigawula.”
UGideyoni wathatha izinceku zakhe ezilishumi, wenza njengalokhu uSimakade emtshelile, kodwa ngenxa yokuba wayesaba abomndeni wakubo nabantu bomuzi, kakwenzanga lokhu emini, kodwa ebusuku.
Lapho bevuka ngakusasa ekuseni abantu bomuzi, i-althare likaBhali libhidliziwe, nensika engcwele eseduze kwalo igawuliwe, nenkunzi yesibili inikelwe phezu kwe-althare elalakhiwe.
Babuzana bodwa, bathi: “Ngubani owenze lokhu, na?” Emveni kokufuna bebuzisisa, batshelwa ukuthi: “NguGideyoni, indodana kaJowashi, owenze lokhu.”
Abantu balowo muzi bathi kuJowashi: “Ikhiphele phandle indodana yakho, ukuze ife, ngokuba ibhidlize i-althare likaBhali, yagawula nensika engcwele ebiseduze kwalo.”
Kodwa uJowashi wathi kubo bonke ababemi bebhekene naye: “Niyakulwela uBhali, na? Nizama ukumsindisa, na? Oyakumlwela uBhali makabulawe ekuseni. Uma engunkulunkulu makazilwele yena, ngoba yi-althare lakhe elibhidliziwe.”
Kusukela ngalolo lusuku uGideyoni wabizwa ngokuthi nguJerubhali, okungukuthi: “UBhali makalwe naye,” ngoba nguye owabhidliza i-althare lakhe.
Kwase kubuthana bonke abakwaMidiyani, abase-Amaleki, nabantu basempumalanga, bawela iJordani, bakanisa esigodini iJizreyeli.
UMoya kaSimakade wehlela kuGideyoni, washaya icilongo, ama-Abhiyezeri abuthana, amlandela.
Wathuma izigijimi kulo lonke elakwaManase, nabo babuthana, bamlandela. Wabuye wathuma ezinye izigijimi kwa-Asheri, kwaZebuloni nakwaNafethali, bakhuphuka ukuyohlangana nabo.
UGideyoni wayesethi kuNkulunkulu: “Ukuze ngibone ukuthi uyakumkhulula yini u-Israyeli ngesandla sami njengoba ushilo;
ngizobeka uboya esibuyeni, uma kulale amazolo phezu kwabo kuphela, kodwa komile emhlabathini, ngizokwazi ukuthi uzomkhulula u-Israyeli ngesandla sami, njengoba ushilo.”
Nebala kwaba njalo. Ngesikhathi evuka ekuseni ngakusasa, wabukhama uboya, kwaphuma oboyeni amazolo ayengagcwala umcengezi wamanzi.
UGideyoni wayesethi kuNkulunkulu: “Ungaluvumeli ulaka lwakho lungivuthele, ake ngikhulume futhi; ngiyakucela, ake ngilinge futhi ngoboya kube kanye; makube nguboya kuphela obomileyo, emhlabathini wonke kube khona amazolo.”
UNkulunkulu wenza kanjalo ngalobo busuku. Uboya babomile, kukhona amazolo emhlabathini wonke.
UJerubhali okunguGideyoni, nawo wonke amabutho ayehamba naye, bavuka ekuseni bayokanisa ngasemthonjeni kaHarodi. Inkambu yabakwaMidiyani yayingasenyakatho kwabo, phansi kwegquma iMore, esigodini.
USimakade wathi kuGideyoni: “Amabutho anawe maningi kakhulu ukuba nginikele abakwaMidiyani esandleni sawo, funa u-Israyeli athathe udumo kungabi ngolwami, ethi: ‘Isandla sami singisindisile.’
Manje memezela lokhu emabuthweni, uthi: ‘Owesabayo, ethuthumela, makabuyele emuva, makasuke entabeni kwaGileyadi.’ ” Kwabuyela emuva abayizi-20 000, kwasala abayizi-10 000.
USimakade wathi kuGideyoni: “Abantu basebaningi kakhulu, yehla nabo uye emanzini, ngizokuvivinyela bona lapho. Uma ngithi: ‘Lona uzohamba nawe,’ uzohamba nawe; uma ngithi: ‘Lona akazukuhamba nawe,’ akayukuhamba.”
Wehlela ngasemanzini namabutho; uSimakade wathi kuGideyoni: “Bonke labo abaxhapha amanzi ngolimi njengokuxhapha kwenja, bamise nganhlanye; nabo bonke labo abaguqa ngamadolo ukuba baphuze bebeka izandla emilonyeni yabo, nabo bamise nganhlanye.”
Inani lalabo abawaxhaphayo, bebeke izandla emilonyeni yabo, kwakungamadoda angama-300, kepha bonke abanye baguqa phansi ngamadolo ukuba baphuze amanzi.
USimakade wayesethi kuGideyoni: “Ngalawo madoda angama-300 axhaphe amanzi, ngizokunikhulula, nginikele abakwaMidiyani esandleni sakho. Bonke abanye mababuyele emakhaya abo.”
Abantu baphatha umphako namacilongo abo ngezandla, bonke abanye bakwa-Israyeli wababuyisela emathendeni abo, wasala nalawo madoda angama-300. Inkambu yakwaMidiyani yayingezansi kwakhe, esigodini.
Ngalobo busuku uSimakade wathi kuye: “Vuka wehlele enkanjini, ngokuba ngiyinikele esandleni sakho.
Kepha uma wesaba ukuyihlasela, yehlela enkanjini nenceku yakho uPhura,
uyokuzwa abakushoyo, emveni kwalokho uyakuqina idolo, wehlele enkanjini.” Wahamba noPhura, inceku yakhe, waya emaphethelweni alabo abahlomile ababesenkanjini.
AbakwaMidiyani nabase-Amaleki, nabo bonke abasempumalanga babelele esigodini bebaningi njengesikhonyane; namakameli abo engenakubalwa njengesihlabathi solwandle.
Ngesikhathi efika uGideyoni, enye yamadoda yayixoxela umngani wayo iphupho layo, ithi: “Ngibe nephupho; ngiphuphe iqebelengwane lesinkwa esiyindilinga sebhali ligingqikela enkanjini yakwaMidiyani. Lifike lashaya ithende lawa, lagumbuqela, lapatalala.”
Umngani wayo waphendula wathi: “Lokhu akusho lutho ngaphandle kokuthi inkemba kaGideyoni, indodana kaJowashi, indoda yakwa-Israyeli, uNkulunkulu unikele esandleni sayo uMidiyani nempi yakhe yonke.”
Lapho uGideyoni elizwa iphupho nencazelo yalo, wakhuleka, wayesebuyela enkanjini yakwa-Israyeli, wafike wathi: “Vukani, ngokuba uSimakade uyinikele esandleni senu impi yakwaMidiyani.”
Emveni kokuba amadoda angama-300 esewehlukanise amaviyo amathathu, wawanikeza amacilongo ezandleni zawo, nezitsha ezingenalutho nezihlonti phakathi ezitsheni.
Wathi kuwo: “Bhekani mina, nenze njengami uma ngifika emaphethelweni enkambu, nenze njengoba ngenza.
Lapho ngishaya icilongo nabo bonke abakanye nami, nani niyoshaya amacilongo nizungeze yonke inkambu, nimemeze, nithi: ‘EkaSimakade nekaGideyoni!’ ”
UGideyoni nabayikhulu ababehamba naye bafika emaphethelweni enkambu yakwaMidiyani ngokuqala komlindo ophakathi, lapho abaqaphi bephuma kungena abanye; babetha amacilongo baphihliza izitsha ezazisezandleni zabo.
Omathathu amaqembu abetha amacilongo, abulala izitsha ayeziphethe, ephethe izihlonti ngezandla zawo zokudla, ashaya amacilongo amemeza, athi: “Inkemba kaSimakade nekaGideyoni!”
Wonke amadoda ama, yileyo naleyo endaweni yayo ezungeze inkambu, wonke amadoda ayesenkanjini akhala, abaleka, acela empunzini.
Ngesikhathi eshaya amacilongo angama-300, uSimakade wenza ukuba izitha zibulalane zodwa, yonke impi yesitha; impi yabaleka yaze yayofika eBhethi Shitha ngaseZerera, nasemngceleni wase-Abhela Mehola ngaseThabhathi.
Kwabizwa wonke amadoda akwa-Israyeli, kwaNafethali nakwa-Asheri nakulo lonke elakwaManase, abaxosha abakwaMidiyani.
UGideyoni wathumela izigijimi kulo lonke elisezintabeni kwa-Efrayimi, wathi: “Yehlani nilwe nabakwaMidiyani, nithathe imithombo kuze kuyofika eBhethi Bhara naseJordani.” Wonke amadoda akwa-Efrayimi abizwa, athatha imithombo yamanzi kwaze kwayofika eBhethi Bhara naseJordani.
Abamba abakhuzi bempi bakwaMidiyani ababili, u-Orebhi noZebhi, u-Orebhi bambulalela edwaleni lika-Orebhi, uZebhi bambulalela esikhamweni sewayini sikaZebhi, ngesikhathi bexosha abakwaMidiyani. Baletha amakhanda o-Orebhi noZehebhi kuGideyoni, phesheya kweJordani.
Abakwa-Efrayimi base bethi kuGideyoni: “Ukwenzeleni lokhu kithi, ukuba ungasibizi uma uyolwa nabakwaMidiyani, na?” Bamthethisa kakhulu.
Wathi kubo: “Ngenzeni mina manje okungaqhathaniswa nokwenziwe yini, na? Ngabe ukuvunwa kwamagilebhisi kwakwa-Efrayimi akungcono yini kunewayini elisha lakwa-Abhiyezeri, na?
UNkulunkulu unikele esandleni senu abakhuzi bempi yakwaMidiyani, u-Orebhi noZebhi; yini engiyenzile engaqhathaniswa nenikwenzile, na?” Lapho esho lokhu, ulaka lwabo lwabohla.
UGideyoni wafika eJordani waliwela namadoda angama-300 ayehamba nawo, bekhathele futhi befile yindlala.
Wayesethi kubantu baseSukhothi: “Ngiyanicela, ake ninike laba abangilandelayo izinkwa, ngokuba bakhathele, futhi ngisalandela uZebha noZalimuna, amakhosi akwaMidiyani.”
Kodwa izikhulu zaseSukhothi zathi: “Ngabe senibabambile yini oZebha noZalima ukuthi sesiyinganika impi yakho izinkwa, na?”
UGideyoni waziphendula wathi: “Kulungile-ke, uma uSimakade esebanikele esandleni sami oZebha noZalimuna, ngiyakuhlebhula inyama yenu emeveni nasemakhakhasini asehlane.”
Wenyuka lapho waya ePhenuweli, nakubo wabacela okufanayo, abantu basePhenuweli bamphendula njengabantu baseSukhothi.
Wayesethi kubantu basePhenuweli: “Uma sengibuya nginqobile ngiyakuwubhidliza lo mbhoshongo.”
Ngaleso sikhathi uZebha noZalimuna babeseKharikhori nebutho labo, elalingamadoda ayizi-15 000, ayesale empini yabantu basempumalanga, ngoba kwakufe ngenkemba amadoda ayizi-120 000 ayehlome ngenkemba.
UGideyoni wakhuphuka ngomzila walabo ababehlala emathendeni ngasempumalanga kwaseNobha, naseJogibheha, wayihlasela impi ngoba yayingazelele.
UZebha noZalimuna babaleka, kodwa wabahubha, wawabamba lawo makhosi amabili akwaMidiyani, amabutho wonke angenwa yingebhe.
Lapho uGideyoni, indodana kaJowashi, ebuya empini ngendlela enyukelayo eHereshi,
wabamba insizwa yaseSukhothi wayibuza; yamtshela ukuthi zingobani izikhulu namalunga baseSukhothi, nokuthi bangabantu abangama-77.
Wafika kubantu baseSukhothi, wathi kubo: “Nampa oZebha, noZalimuna enangichukuluza ngabo, nithi: ‘Usubathumbile yini oZebha noZalimuna, ukuba singanika amabutho akho akhathele izinkwa, na?’ ”
Wabamba amalunga omuzi, wathatha ameva asehlane, nogagane, wanenebula abantu baseSukhothi.
Wabhidliza umbhoshongo ePhenuweli, wabulala amadoda omuzi.
Wathi kuZebha noZalimuna: “Nithini ngamadoda enawabulala eThabhori, na?” Baphendula bathi: “Lawo madoda ayefana nawe, wonke ayefana namadodana enkosi.”
UGideyoni wathi: “Ayengabafowethu, sizalwa mfazi munye nawo. Ngiyafunga ngithi ukuba nawasindisa, nami bengingeke nginibulale.”
Wayesethi kuJetheri izibulo lakhe: “Hamba ubabulale.” Kepha indodana ayizange iyihoshe inkemba yayo, ngoba yayesaba, kwazise yayisengumfana.
UZebha noZalimuna bathi: “Woza usibulale, ngokuba njengoba injalo indoda, anjalo namandla ayo.” Ngakho-ke uGideyoni wasondela wababulala, wathatha imihlobiso eyayisezintanyeni zamakameli abo.
Abakwa-Israyeli bathi kuGideyoni: “Sibuse, wena nendodana yakho nomzukulu wakho, ngokuba usikhululile esandleni sabakwaMidiyani.”
UGideyoni wathi kubo: “Angizukunibusa, nendodana yami ayizukunibusa; nguSimakade ozonibusa.”
Wayesethi uGideyoni kubo: “Ngiyacela kini, makube yilowo nalowo anginike icici kulawo eniwaphangile.” Isitha besinamacici egolide ngokuba bekungesakwa-Ishmayeli.
Bathi: “Sizokunika wona ngokukhululeka.” Ngakho-ke bendlala ingubo, kwayilowo nalowo waphonsa icici ayelithathe njengempango.
Isisindo samacici egolide ayewacelile saba yi-1 700 amashekeli egolide, ngaphandle kwemihlobiso enhlobonhlobo nezingubo ezibukhwebezane ezazembathwa ngamakhosi akwaMidiyani, nemigexo eyayisezintanyeni zamakameli abo.
UGideyoni wenza ingubo yamahlombe, wayibeka emzini wakhe e-Ofira, bonke abakwa-Israyeli baphinga nayo lapho, yaba wugibe kuGideyoni nabomndeni wakhe.
AbakwaMidiyani bathotshiswa phansi kwabakwa-Israyeli, abaphindanga babavukela. Izwe laba nokuthula iminyaka engama-40 ngezinsuku zikaGideyoni.
UJerubhali, indodana kaJowashi, wahamba wayohlala endlini yakhe.
UGideyoni wayenamadodana angama-70 ayephume okhalo lwakhe, ngokuba wayenabafazi abaningi.
Isancinza sakhe esasiseShekhemi samzalela naso indodana, wayiqamba ngokuthi ngu-Abhimelekhi.
UGideyoni, indodana kaJowashi, wafa esekhulile, wangcwatshwa ethuneni likayise uJowashi e-Ofira kwa-Abhiyezeri.
Kwathi ukuba uGideyoni afe, abakwa-Israyeli babuye baphinga noBhali, benza uBhali Bherithi waba ngunkulunkulu wabo.
Abakwa-Israyeli abamkhumbulanga uSimakade uNkulunkulu wabo, owayebakhulule esandleni sazo zonke izitha zabo ezazibazungeze nxazonke.
Abakhombisanga ukwethembeka endlini kaJerubhali, okunguGideyoni, ngakho konke okuhle ayekwenzele u-Israyeli.
U-Abhimelekhi, indodana kaJerubhali, waya eShekhemi ezihlotsheni zikanina nakubo bonke abomndeni wasekhayakonina, wathi:
“Shonini kuzwa zonke izikhulu zaseShekhemi, ukuthi: ‘Yikuphi okungcono kini, ukuba nibuswe yiwo wonke amadodana kaJerubhali angama-70 noma nibuswe ngumuntu oyedwa, na?’ Khumbulani futhi ukuthi mina ngiyithambo lenu nenyama yenu.”
Omalume bakhe base bekhuluma wonke lawo mazwi egameni lakhe, kuzwa zonke izikhulu zaseShekhemi; izinhliziyo zazo zathanda ukulandela u-Abhimelekhi, ngokuba zathi: “Ungumfowethu.”
Zamnika izinhlamvu zesiliva ezingama-70 ezazizithathe ethempelini likaBhali Bherethi; u-Abhimelekhi aqasha ngazo iziduphunga nezixhwanguxhwangu zamadoda, ukuba zimlandele.
Waya endlini kayise e-Ofira, wabulala abafowabo, amadodana kaJerubhali angama-70 etsheni elilodwa, kwasala uJothamu, uthunjana kaJerubhali, ngokuba wacasha.
Zonke izakhamuzi zaseShekhemi nalo lonke iBhethi Milo zahlangana ngasensikeni yomu-okhi eShekhemi, zahamba zambeka u-Abhimelekhi, waba yinkosi.
Lapho uJothamu etshelwa ngalokho, wahamba wayoma esicongweni sentaba iGerizimu, wakhala, wamemeza kakhulu, wathi kuzo: “Ngilaleleni, nina zakhamuzi zaseShekhemi, ukuze uNkulunkulu anilalele nani.
“Imithi yake yahamba yayozibekela inkosi ezoyibusa. Ngakho-ke yathi esihlahleni somnqumo: ‘Busa! Busa! Phezu kwethu.’
“Isihlahla somnqumo sathi: ‘Ngiyeke ukukhiqiza amafutha ami acebile okuhlonishwa ngawo onkulunkulu nabantu, ngihambe ngiyobusa phezu kwemithi, na?’
“Imithi yathi emkhiwaneni: ‘Woza wena, ubuse phezu kwethu.’
“Umkhiwane waphendula, wathi: ‘Ngiyeke yini ukukhiqiza izithelo zami ezimnandi nezinambitheka kamtoti, ngihambe ngiyobusa phezu kwemithi, na?’
“Imithi yase ithi emvinini: ‘Woza wena, ubuse phezu kwethu.’
“Umvini waphendula wathi: ‘Ngiyeke yini ukukhiqiza iwayini elithokozisa onkulunkulu nabantu, ngihambe ngiyobusa phezu kwemithi, na?’
“Ngakho-ke yonke imithi yathi ejikijolweni: ‘Woza wena, ubuse phezu kwethu.’
“Isihlahla sejikijolo saphendula sathi: ‘Uma ningibeka ngibe yinkosi yenu, wozani nizokhosela phansi komthunzi wami, uma kungenjalo, makuvele umlilo ejikijolweni, uqothule imisedari eLebhanoni.’
“Ngakho-ke uma nikwenze lokhu ngezinhliziyo ezinhle, nangokuhlonipha, lapho nibeka u-Abhimeleki abe yinkosi, futhi namphatha kahle uJerubhali nabendlu yakhe, nenza kuye njengoba kufanele ngenxa yezenzo zakhe,
ngokuba ubaba wanilwela, wabeka impilo yakhe ebucayini, wanikhulula esandleni sabakwaMidiyani,
kodwa namhlanje niyivukele indlu kababa, nabulala amadodana akhe, angama-70 etsheni elilodwa, nabeka u-Abhimelekhi, indodana yowesifazane oyisigqila, ukuba abe yinkosi phezu kwezakhamuzi eShekhemi, ngoba nje eyisihlobo senu,
uma ngithi nenze okuhle ngokuhlonipha uJerubhali nabendlu yakhe namhlanje, ngakho-ke jabulani ngo-Abhimelekhi, naye ajabule ngani,
kodwa uma kungenjalo, makuphume umlilo ku-Abhimelekhi, uqothule zonke izakhamuzi zaseShekhemi naseBhethi Milo, kuphume umlilo ezakhamuzini zaseShekhemi naseBhethi Milo ubhubhise u-Abhimelekhi.”
UJothamu wayesebaleka, waya eBheyeri, wahlala khona ngoba esaba umfowabo u-Abhimelekhi.
U-Abhimelekhi wabusa u-Israyeli iminyaka emithathu.
UNkulunkulu wathumela umoya omubi phakathi kuka-Abhimelekhi nezakhamuzi zaseShekhemi, zamphatha ngonya u-Abhimelekhi.
Lokho kwenzeka ukuze kuphindiseleke unya alwenza emadodaneni kaJerubhali angama-70, nokuba igazi lawo libe phezu komfowabo u-Abhimelekhi, owawabulalayo, naphezu kwezakhamuzi zaseShekhemi ezenza abe namandla okubulala abafowabo.
Ngenxa yobutha kuye, izikhulu zaseShekhemi zabeka ezicongweni zezintaba abantu ukuba bamlalele unyendle. Bagebenga bonke ababedlula ngaleyo ndlela; kwabikwa lokho ku-Abhimelekhi.
Kwathi lapho uGali, indodana ka-Ebhedi, ethuthela eShekhemi nezihlobo zakhe, izakhamuzi zaseShekhemi zethembela kuye.
Zaya emasimini, zabutha amagilebhisi ezivinini zazo, zawagxoba, zagubha umkhosi. Zaya ethempelini likankulunkulu wazo, zadla, zaphuza, zahlekisa ngo-Abhimelekhi.
UGali, indodana ka-Ebhedi, wabuza wathi: “Ungubani u-Abhimelekhi, futhi singobani thina baseShekhemi ukuba singakhonza yena, na? Ayikaze yini indodana kaJerubhali noZebhuli, induna yakhe, bakhonze emadodaneni kaHarmori uyise kaShekhemi, na? Pho thina simkhonzelani, na?
Uma nje laba bantu bebephethwe yimi, bengizomsusa u-Abhimelekhi, ngithi kuye: ‘Yandisa impi yakho, uphume silwe.’ ”
Lapho uZebhuli, umbusi womuzi, ezwa amazwi kaGali, indodana ka-Ebhedi, wathukuthela wabila.
Wathumela izigijimi ku-Abhimelekhi e-Aruma, wathi kuye: “Uyabona-ke, uGali indodana ka-Ebhedi nezihlobo zakhe bafike eShekhemi, bakuphehlela udweshu emzini.
Ngakho-ke hambani ebusuku, wena namabutho anawe niyocutha endle.
Kuyothi ekuseni, lapho kuphuma ilanga, nivuke niphuthume emzini lapho yena namabutho ahambisana nawo bephuma beyokulwa nawe, ubenzakalise ngendlela obona ngayo.”
U-Abhimelekhi nawo wonke amabutho ayenawo bavuka ebusuku, bayolindela ukuhlasela iShekhemi, bazihlela amaviyo amane.
Lapho uGali, indodana ka-Ebhedi, ephuma, wama esikhaleni sesango lomuzi, u-Abhimelekhi namabutho akhe basuka lapho babecashe khona, bamthelekela.
Ngesikhathi uGali ebabona, wathi kuZebhuli: “Bheka, kunabantu abehla ezicongweni zezintaba.” UZebhuli wathi kuye: “Amathunzi ezintaba abukeka njengabantu kuwe.”
UGali wakhuluma futhi, wathi: “Uyabona, kunabantu abehla enkabeni yezwe, elinye iviyo liqhamuka ngendlela yomu-okhi okuhlolelwa kuwo.”
UZebhuli wathi kuye: “Kuphi ukuziqhayisa kwakho manje, wena obuthi: ‘Ungubani u-Abhimelekhi ukuba simkhonze, na?’ Akuwona yini lawa amabutho obuwathatha kalula, na? Phuma manje, ulwe nawo.”
Ngakho-ke uGali waphuma wahola izakhamuzi zaseShekhemi, balwa no-Abhimelekhi.
U-Abhimelekhi wamxosha, wabaleka phambi kwakhe. Abaningi bawa belimele kwaze kwaba sekungeneni esangweni lomuzi.
U-Abhimelekhi wahlala e-Aruma, uZebhuli wamxosha uGali nezihlobo zakhe, ukuze bangaphinde bahlale eShekhemi.
Ngakusasa abantu baya endle. Lapho bembikela u-Abhimelekhi,
wathatha amabutho akhe wawehlukanisa amaviyo amathathu, walala unyendle endle. Kwathi lapho ebona abantu bephuma emzini, wavuka walwa nabo, wababulala.
U-Abhimelekhi neviyo elalinaye baphuthuma, bama esikhaleni sesango lomuzi, ngesikhathi amaviyo amabili ephuthume ukubulala bonke ababesendle.
U-Abhimelekhi walwa nomuzi lonke lolo lusuku; wawudla umuzi, wabulala abantu ababekuwo, wawushisa umuzi, wawufaza ngosawoti.
Kwathi ukuba zizwe ngalokho izakhamuzi zombhoshongo eShekhemi, zangena enqabeni yethempeli lika-Eli Bherethi.
U-Abhimelekhi watshelwa ukuthi zonke izakhamuzi zombhoshongo eShekhemi zibuthene ndawonye,
ngakho-ke wenyukela entabeni iZalimoni, yena nawo wonke amabutho ayehamba nawo. U-Abhimelekhi wathatha imbazo ngesandla sakhe, wagawula igatsha, waliphakamisa walibeka ehlombe lakhe. Wayesethi emabuthweni ayenaye: “Lokho eningibone ngikwenza, kwenzeni ngokushesha, njengami.”
Kwaba yilelo nalelo butho lagawula igatsha, balandela u-Abhimelekhi, bawabeka enqabeni, base beyithungela ngomlilo ngaphezu kwabo; bafa bonke abantu basembhoshongweni eShekhemi, amadoda abalelwa enkulungwaneni nabesifazane.
U-Abhimelekhi waya eThebhezi, wakanisa malungana neThebhezi, walidla.
Kodwa kwakukhona umbhoshongo oqinile phakathi emzini, bonke abesilisa nabesifazane nazo zonke izakhamuzi zomuzi babalekela kuwo, bazivalela phakathi, base bekhuphukela ophahleni lombhoshongo.
U-Abhimelekhi wafika embhoshongweni, walwa nawo, wasondela emnyango wombhoshongo ukuze awushise.
Kepha owesifazane othile wawisela itshe ekhanda lika-Abhimelekhi, lamphohloza ikhanda.
Masinyane wabiza insizwa eyayiwudibi lwakhe, wathi kuyo: “Hosha inkemba yakho, ungibulale ukuze abantu bangathi ngami: ‘Wabulawa ngowesifazane.’ ” Insizwa yamgwaza wafa.
Kwathi ukuba abakwa-Israyeli babone ukuthi ufile u-Abhimelekhi, babuyela emakhaya.
UNkulunkulu waphindisela kanjalo ku-Abhimelekhi ngobubi ayebenze kuyise, ngokubulala abafowabo abangama-70.
UNkulunkulu wabuye wenza nobubi babantu baseShekhemi ukuba behlele phezu kwabo, baphinde behlelwa nayisiqalekiso uJothamu, indodana kaJerubhali, ayesikhulume kubo.
Emva kuka-Abhimelekhi kwavela uThola, indodana kaPhuwa kaDodo, umuntu wakwa-Isakhare ukuba akhulule u-Israyeli, owayehlala eShamiri kwelezintaba kwa-Efrayimi.
Wehlulela u-Israyeli iminyaka engama-23. Wayesefa, wangcwatshwa eShamiri.
Emva kwakhe kwalandela uJayiri, umGileyadi, wehlulela u-Israyeli iminyaka engama-22.
Wayenamadodana angama-30 ayegibela izimbongolo ezingama-30, enemizi engama-30 kwaGileyadi elibizwa ngokuthi yiHavothi Jayiri kuze kube namuhla.
UJayiri wafa, wangcwatshwa eKhamoni.
Abakwa-Israyeli babuye benza okubi emehlweni kaSimakade, bakhonza oBhali no-Ashitharothi, onkulunkulu bama-Aramu, nonkulunkulu bamaSidoni, nonkulunkulu bakwaMowabi, nonkulunkulu bama-Amoni, nonkulunkulu bamaFilisti. Bamshiya kanjalo uSimakade, ababe besamkhonza.
Ngakho-ke ulaka lukaSimakade lwamvuthela u-Israyeli, wabanikela esandleni samaFilisti, nasesandleni sabakwa-Amoni,
babahlukumeza, babacindezela abantu bakwa-Israyeli ngalowo nyaka. Kwaphela iminyaka eli-18 bebacindezele bonke abantu bakwa-Israyeli ababehlala phesheya kweJordani, ezweni lama-Amori, kwaGileyadi.
Abakwa-Amoni bawela iJordani ukuyolwa noJuda, noBhenjamini, nabendlu ka-Efrayimi, u-Israyeli wakhathazeka kakhulu.
Abakwa-Israyeli base bekhala kuSimakade, bathi: “Sonile kuwe, ngokuba simshiyile uNkulunkulu wethu, sayokhonza oBhali.”
USimakade wathi kubantu bakwa-Israyeli: “Anginihlenganga yini kwabaseGibhithe, nabakwa-Amori, nabakwa-Amoni, nakumaFilisti, na?
AmaSidoni, ama-Amaleki, nabakwaMahoni banicindezela, nakhala kimi, nganikhulula esandleni sabo.
Nokho ningishiyile, nayokhonza abanye onkulunkulu, ngakho-ke angisayukubuye nginikhulule.
Hambani niyokhala konkulunkulu enizikhethele bona; mabanikhulule ngezikhathi zobunzima benu.”
Abakwa-Israyeli bathi kuSimakade: “Sonile; yenza kithi noma yini obona ukuthi kufanele uyenze, kodwa sikhulule namhlanje.”
Base besusa onkulunkulu babezizwe ababephakathi kwabo, bakhonza uSimakade; akakwazanga ukukubekezelela ukubona u-Israyeli ehlupheka.
Kwase kubizwa abakwa-Amoni ukuba bahlome, bakanise kwaGileyadi; abakwa-Israyeli bahlangana, bakanisa eMizpha.
Abakhuzi bempi yakwaGileyadi bathi omunye komunye: “Ngubani ozoqala impi nabakwa-Amoni, na? Uyokuba yinhloko phezu kwazo zonke izakhamuzi zakwaGileyadi.”
UJeftha wakwaGileyadi owayeyindodana yesifebe, wayeyiqhawe elinamandla. Uyise kwakunguGileyadi.
UmkaGileyadi wamzalela naye amadodana. Kuthe lapho amadodana omkakhe ekhula, amxosha, ethi kuye: “Awunakuthola lutho oluyifa endlini kababa, ngokuba uyindodana yomunye umfazi.”
UJeftha wayesebaleka kubafowabo, wahlala eThobi. UJeftha wazungezwa yizephulamthetho ayephuma ahlasele nazo.
Emveni kwesikhathi, abakwa-Amoni balwa nabakwa-Israyeli.
Kwathi lapho abakwa-Amoni belwa nabakwa-Israyeli, amalunga akwaGileyadi ahamba ukuyolanda uJeftha eThobi.
Athi kuJeftha: “Buya uzoba ngumkhuzi wempi yethu, ukuze silwe nabakwa-Amoni.”
Kodwa uJeftha wathi kumalunga akwaGileyadi: “Anisibo yini labo abangala, bangixosha endlini kababa, na? Pho nilethwa yini kimi uma senisenkathazweni, na?”
Amalunga akwaGileyadi athi kuye: “Noma kunjalo, sesibuyele kuwe manje ukuze uhambe nathi uyokulwa nabakwa-Amoni, ube yinhloko phezu kwethu naphezu kwazo zonke izakhamuzi zakwaGileyadi.”
UJeftha wathi kumalunga akwaGileyadi: “Uma ningibuyisela ekhaya ukuba ngilwe nabakwa-Amoni uSimakade abanikele kimi, ngiyokuba yinhloko yenu.”
Amalunga akwaGileyadi athi kuye: “USimakade uyokuba ngufakazi phakathi kwethu, impela sizokwenza njengalokhu usho.”
UJeftha wahamba namalunga akwaGileyadi, abantu bamenza inhloko yabo, nomkhuzi wempi yabo, uJeftha wawakhuluma wonke lawo mazwi akhe phambi kukaSimakade, eMizpha.
UJeftha wayesethumela izithunywa enkosini yakwa-Amoni, wathi kuyo: “Yini lena ekhona phakathi kwethu, uze ufike uzolwa nezwe lami, na?”
Inkosi yabakwa-Amoni yaphendula izithunywa zikaJeftha, yathi: “Kungenxa yokuba ngesikhathi u-Israyeli ephuma eGibhithe wathatha izwe lami, kusukela e-Arinoni kuye eJabhoki kuze kube seJordani; ngakho-ke manje libuyise ngokuthula.”
UJeftha waphinda wathumela izithunywa enkosini yabakwa-Amoni,
wathi kuyo: “Yilokhu okushiwo nguJeftha, uthi abakwa-Israyeli abazange balithathe izwe lakwaMowabi nelabakwa-Amoni,
kodwa lapho benyuka bevela eGibhithe, abakwa-Israyeli badabula ihlane baya oLwandle Lomhlanga, baze bafika eKadeshi.
Abakwa-Israyeli bathumela izithunywa enkosini yakwa-Edomi, bathi: ‘Sicela usivumele sidabule ezweni lakho,’ kodwa inkosi yakwa-Edomi ayifunanga ukubalalela. Babuye bathumela nasenkosini yakwaMowabi, kodwa nayo yenqaba, ngakho-ke abakwa-Israyeli bahlala eKadeshi.
“Base behamba ehlane, bazungeza izwe lakwa-Edomi nelakwaMowabi, baze bafinyelela empumalanga yezwe lakwaMowabi, bakanisa ngakolunye uhlangothi e-Arinoni. Kabangenanga endaweni yabakwaMowabi, ngokuba i-Arinoni yayingumngcele kwaMowabi.
“Abakwa-Israyeli bathumela izithunywa enkosini yama-Amori, uSihoni, inkosi yaseHeshibhoni, u-Israyeli wathi kuyo: ‘Sivumele sidabule ezweni lakho, sidlulele kwelethu.’
Kodwa uSihoni akazange abethembe abakwa-Israyeli ukuba bangadabula endaweni yakhe, ngakho-ke uSihoni waqoqa bonke abantu bakhe, wakanisa eJahazi, walwa no-Israyeli.
“USimakade uNkulunkulu ka-Israyeli wamnikela uSihoni nabo bonke abantu bakhe esandleni sabakwa-Israyeli, bamnqoba, abakwa-Israyeli base belidla lonke izwe lama-Amori ayehlala lapho.
Balidla lonke izwe lama-Amori, kusukela e-Arinoni kuye eJabhoki, nasehlane kuze kube seJordani.
“Ngakho-ke manje, uSimakade uNkulunkulu ka-Israyeli uwanqobile ama-Amori ukuze kuzuze abantu bakhe bakwa-Israyeli. Ngabe usophe ukudla izwe labo, na?
Aneneliswa yini yizwe unkulunkulu wenu uKhemoshi aninike lona laba yifa lenu, na? Thina asifanele yini ukudla lonke izwe uSimakade uNkulunkulu wethu asinqobele lona ukuba libe yifa lethu, na?
Pho wena ungcono yini kunenkosi uBhalaki, indodana kaZiphori wakwaMowabi, na? Wake wabanga yini nabakwa-Israyeli, noma waya empini nabo, na?
Ngesikhathi abakwa-Israyeli besahlala eHeshibhoni nasemizaneni yalo, nase-Aroweri nemizana yalo, nakuyo yonke imizi emaqondana ne-Arinoni, iminyaka engama-300, awuyithathanga ngani ngaleso sikhathi, na?
Akuyimi engonileyo kuwe, kodwa nguwe owenza okubi kimi ngokulwa nami. Sengathi uSimakade ongumehluleli anganquma namuhla phakathi kwabakwa-Israyeli nabakwa-Amoni.”
Nokho inkosi yakwa-Amoni ayizange iwashaye mkhuba amazwi uJeftha ayewathumele kuyo.
UMoya kaSimakade wehlela phezu kukaJeftha, wadabula kwaGileyadi nakwaManase. Wedlulela eMizpha kwaGileyadi, wasuka eMizpha kwaGileyadi waya kubantu bakwa-Amoni.
UJeftha wenza isifungo kuSimakade, wathi: “Uma uyakunikela abakwa-Amoni esandleni sami,
kuyothi noma yini eyophuma emnyango wendlu yami izongihlangabeza, lapho ngibuya ngokuthula kubantu bakwa-Amoni, kube ngokukaSimakade, nginikele ngakho kube ngumnikelo wokushiswa.”
UJeftha wayesedlulela kubantu bakwa-Amoni ukuba alwe nabo; uSimakade wabanikela esandleni sakhe.
Wababulala kusukela e-Aroweri kuye kuyofika eMinithi, imizi engama-20, nase-Abhela Kheramimi. Abakwa-Amoni banqotshwa ngabakwa-Israyeli.
UJeftha wabuyela ekhaya eMizpha; mamo, nakho-ke sekuphuma indodakazi yakhe imhlangabeza, iza nezigubhu isina; kwakuyiyona yodwa ingane ayenayo; wayengenandodana nandodakazi ngaphandle kwayo.
Lapho eyibona, waklebhula izingubo zakhe, wathi: “Hawu, ndodakazi yami, waze wangilaya, wangibangela ukuhlupheka okukhulu. Phela ngivule umlomo wami ngakhuluma kuSimakade, manje angisakwazi ukusihoxisa isifungo sami.”
Yathi kuye: “Baba, uma ukhulumile kuSimakade, yenza kimi njengalokhu ufungile, lokhu uSimakade ukuphindiselele ezitheni zakho, abantu bakwa-Amoni.”
Yayisithi kuyise: “Mangenzelwe lokhu: ngiyeke izinyanga ezimbili ngihambe, ngehlele ezintabeni, ukuze ngililele ubuntombi bami, mina nabangani bami.”
Uyise wathi kuyo: “Hamba.” Wayihambisa izinyanga ezimbili; yahamba nabangani bayo, yalilela ubuntombi bayo ezintabeni.
Ekupheleni kwezinyanga ezimbili, yabuyela kuyise, owenza kuyo njengokwesifungo sakhe ayesenzile; yayingakaze ilale nandoda. Kwabe sekuvela isimiso kwa-Israyeli sokuba,
yonke iminyaka, amadodakazi akwa-Israyeli ahambe ayolilela indodakazi kaJeftha wakwaGileyadi izinsuku ezine.
Amadoda akwa-Efrayimi abizwa ukuba ahlome, ase ewelela eZafoni, athi kuJeftha: “Uweleleni wayokulwa nabakwa-Amoni, wangasibiza thina ukuba sihambe nawe, na? Sizoyithungela ngomlilo indlu yakho, iwele phezu kwakho.”
UJeftha wathi kubo: “Mina nabantu bakithi sasilwa nabakwa-Amoni ababesicindezele kakhulu, kodwa lapho nginibiza anizange ningikhulule esandleni sabo.
Lapho ngibona ukuthi aningihlenganga, ngabeka impilo yami engcupheni, ngawela ngayolwa nabakwa-Amoni, uSimakade wabanikela esandleni sami. Yini-ke enenze manje nikhuphukele kimi namuhla, ukuzokulwa nami, na?”
UJeftha wayeseqoqa wonke amadoda akwaGileyadi, walwa nabakwa-Efrayimi; amadoda akwaGileyadi abehlula abakwa-Efrayimi, ngokuba bathi: “Ningabakhoselayo bakwa-Efrayimi nina bakwaGileyadi, niphume phakathi kwabakwa-Efrayimi nabakwaManase.”
AbakwaGileyadi badla amazibuko eJordani phambi kwabakwa-Efrayimi. Kwakuthi okhoselayo wakwa-Efrayimi uma ethi: “Mangiwele,” abantu abakwaGileyadi bathi: “Ungowakwa-Efrayimi, na?” Uma ethi: “Qha,”
bese bethi kuye: yithi: “Shibholethi,” uma ethi: “Sibholethi,” ngoba engakwazi ukulibiza ngokufanele leli gama, bambambe, bambulalele emazibukweni eJordani. Kwafa ngaleso sikhathi abakwa-Efrayimi abayizi-42 000.
UJeftha wehlulela u-Israyeli iminyaka eyisithupha. UJeftha, umGileyadi, wayesefa wangcwatshwa emzini kwaGileyadi.
Emva kukaJeftha kwalandela u-Ibizani waseBhethlehema ukwehlulela u-Israyeli.
Wayenamadodana angama-30. Amadodakazi angama-30 wawaganisa ngaphandle kwesizwe sakhe, wathathela amadodana akhe izintombi ezingama-30 ngaphandle kwesizwe sakhe. Wehlulela u-Israyeli iminyaka eyisikhombisa.
U-Ibizani wafa, wangcwatshwa eBhethlehema.
Emva kuka-Ibizani, u-Eloni umZebuloni, waba ngumehluleli kwa-Israyeli, wehlulela u-Israyeli iminyaka elishumi.
U-Eloni umZebuloni wafa, wangcwatshwa e-Ayijaloni, lakwaZebuloni.
Emva kuka-Eloni, u-Abhidoni, indodana kaHileli umPhirathoni, wehlulela u-Israyeli.
Wayenamadodana angama-40, nabazukulu abangama-30 ababegibela izimbongolo ezingama-70; wehlulela u-Israyeli iminyaka eyisishiyagalombili.
U-Abhidoni, indodana kaHileli umPhirathoni, wafa, wangcwatshwa ePhirathoni, ezweni lakwa-Efrayimi kwelezintaba lama-Amaleki.
Abakwa-Israyeli babuye benza okubi emehlweni kaSimakade; uSimakade wabanikela esandleni samaFilisti iminyaka engama-40.
Kwakukhona indoda ethile eZora, yomndeni wakwaDani, igama layo kunguManowa. Umkayo wayeyinyumba, engenabantwana.
Ingelosi kaSimakade yabonakala kowesifazane, yathi kuye: “Nanxa uyinyumba, ungakaze uzale bantwana, uzakukhulelwa, uzale indodana.
Qaphela ukuthi ungaliphuzi iwayini nophuzo olunamandla, futhi ungadli lutho olungcolileyo,
ngoba uzakukhulelwa, uzale indodana: awuyukuliphuca ikhanda layo, ngokuba umfana uzokuba ngumnaziri kaNkulunkulu kwasesibelethweni; nguye oyakuqala ukukhulula u-Israyeli esandleni samaFilisti.”
Owesifazane wahamba wabikela umyeni wakhe, wathi: “Kufike kimi umuntu kaNkulunkulu, isimo sakhe sifana nesengelosi kaNkulunkulu, esabeka kakhulu. Angimbuzanga ukuthi uvelaphi, futhi akangitshelanga igama lakhe,
kodwa uthe kimi: ‘Uzakukhulelwa, uzale indodana. Ngakho-ke ungaphuzi wayini nophuzo olunamandla, futhi ungadli lutho olungcolileyo, ngokuba umfana uzokuba ngumnaziri kaNkulunkulu kwasesibelethweni kuze kube sosukwini lokufa kwakhe.’ ”
UManowa wayesekhuleka kuSimakade, wathi: “Nkosi, ngiyakunxusa, makuthi umuntu kaNkulunkulu obumthumile abuye eze kithi asifundise ukuthi siyakwenzenjani maqondana nomfana ozakuzalwa.”
UNkulunkulu wamlalela uManowa, ingelosi kaNkulunkulu yabuyela kowesifazane ehleli ensimini, kodwa umyeni wakhe wayengekho lapho.
Owesifazane wagijima ngokushesha watshela indoda yakhe, wathi: “Umuntu owabonakala kimi ngaleliya langa ubonakele futhi kimi.”
UManowa wasukuma walandela umkakhe, wafika kulowo muntu, wathi kuye: “Ngabe uyilowo muntu owakhuluma kulo wesifazane, na?” Wathi: “Yebo, nginguye.”
Wayesethi uManowa: “Nxa sekwenzekile owakukhulumayo, iyakuba yini indlela yomntwana, uyakwenzani, na?”
Ingelosi kaSimakade yathi kuManowa: “Owesifazane makakulalele konke engimtshele khona.
Akayukudla lutho oluvela esithelweni somvini, akayukuphuza wayini noma uphuzo olunamandla, futhi akayukukudla okungcolileyo. Makakugcine konke engimyale ngakho.”
UManowa wathi engelosini kaSimakade: “Ake usivumele sikulibazise, sikuhlabele izinyane lembuzi.”
Ingelosi kaSimakade yathi kuManowa: “Uma ungilibazisa, angiyukukudla ukudla kwakho, kodwa uma ufuna ukulungisa umhlatshelo wokushiswa, uyakuwunikela kuSimakade.” Kwakungoba uManowa wayengazi ukuthi lona uyingelosi kaSimakade.
UManowa wayesethi engelosini kaSimakade: “Ngubani igama lakho, ukuze sikuhloniphe lapho amazwi akho esefezekile?”
Kepha ingelosi kaSimakade yathi kuye: “Ulibuzelani igama lami, na? Liyisimangaliso!”
UManowa wayesethatha izinyane lembuzi nomnikelo wokusanhlamvu, wakunikela kuSimakade phezu kwedwala, kuye owenza izimangaliso.
Kwathi lapho ilangabi lenyukela ezulwini, lisuka e-althare, ingelosi kaSimakade yenyuka ngalo, uManowa nomkakhe bebukela, base bethi mbo ngobuso emhlabathini.
Ingelosi kaSimakade ayiphindanga yabonakala futhi kuManowa nomkakhe. UManowa wayeseqonda ukuthi bekuyingelosi kaSimakade.
UManowa wathi kumkakhe: “Impela sizokufa ngokuba sibone uNkulunkulu.”
Kepha umkakhe wathi kuye: “Ukuba uSimakade ubeqonde ukusibulala, ubengeke awemukele umnikelo wokushiswa nowokusanhlamvu ophuma ezandleni zethu, noma asikhombise konke lokhu, futhi ubengeke asitshele izinto ezifana nalezi.”
Owesifazane wazala indodana, wayiqamba igama wathi nguSamsoni. Umfana wakhula, uSimakade wambusisa.
UMoya kaSimakade waqala ukumsebenzisa ngesikhathi eseMahane Dani, phakathi kweZora ne-Eshithawoli.
USamsoni wehlela eThimna, eselapho wabona enye yamadodakazi amaFilisti.
Wayesenyuka, wabikela uyise nonina, wathi: “Ngibone owesifazane womFilisti eThimna; ngithatheleni yena abe ngumkami.”
Abazali bakhe bathi kuye: “Akukho ntombi yini phakathi kwezihlobo zakho noma phakathi kwabantu bakithi bonke, ukuba usungahamba uyothatha umfazi kumaFilisti angasokile, na?” Kodwa uSamsoni wathi kuyise: “Ngithathele yena, ngoba ngiyamthanda.”
Uyise nonina babengazi ukuthi lokhu kuvela kuSimakade, ngokuba wayefuna ithuba lokuthi alwe namaFilisti. Ngaleso sikhathi amaFilisti ayebusa phezu kuka-Israyeli.
USamsoni wayesehla noyise nonina, baya eThimna. Lapho befika esivinini eThimna, kwaqhamuka masinyane ibhongo lengonyama, leza kuye libhodla.
UMoya kaSimakade wehlela kuye ngamandla, walidwengula ngezandla zakhe kwangathi udwengula izinyane lembuzi. Wayengaphethe lutho esandleni sakhe, kodwa akabatshelanga oyise nonina lokho ayekwenzile.
Wayesehla, wakhuluma nowesifazane, wamgculisa lowo owesifazane uSamsoni.
Emveni kwesikhathi wabuyela khona ukuze aganwe nguye. Waphambuka ukuyobheka isidumbu sengonyama. Bheka, kwakunequlu lezinyosi noju esidunjini sengonyama.
Wazitapa ngezandla zakhe, waqhubeka ehamba edla. Lapho efika kuyise nonina, wabanika nabo badla, kodwa akabatshelanga ukuthi uju wayelutape esidunjini sengonyama.
Uyise wehla, waya kowesifazane, uSamsoni wenza idili lapho njengokuba izinsizwa zazijwayele ukwenza.
Lapho abantu bembona, baletha kuye izinsizwa ezingama-30 ukuba zizomzimazisa.
USamsoni wathi kuzo: “Ake ngininike imfumbe, ngibone ukuthi ningangichazela yini yona ngezinsuku eziyisikhombisa zedili. Uma nikwazile ngizoninika izingubo zelineni ezingama-30 nezingubo zokuphendulela ezingama-30.
Kepha uma nehluleka ukungichazela yona, niyonginika izingubo zelineni ezingama-30 nezingubo zokuphendulela ezingama-30.” Zathi kuye: “Sitshele imfumbe yakho sifuna ukuyizwa.”
Wayesethi kuzo: “Kodlayo kwaphuma ukudla, konamandla kwavela okumnandi.” Ezinsukwini ezintathu azikwazanga ukuyichaza imfumbe leyo.
Ngosuku lwesikhombisa zathi kumkaSamsoni: “Mnxenxe umyeni wakho ukuba asichazele imfumbe, kungenjalo sizokushisa ngomlilo wena nendlu kayihlo. Ngabe usimemele lapha ukuba nizosiphundla sibe mpofu, akunjalo na?”
Ngalokho-ke umkaSamsoni wakhala phambi kwakhe, wathi: “Uyangizonda, awungithandi neze. Ubuze abantu bakithi imfumbe, kodwa awukaze ungichazele mina.” USamsoni wamphendula wathi: “Bheka, angikaze ngimtshele ubaba noma umama imbala. Pho ngiyakukutshela kanjani wena, na?”
Wakhala phambi kwakhe kwaze kwaphela izinsuku eziyisikhombisa zedili labo, kodwa ngenxa yokuba wayelokhu embelesele, ngosuku lwesikhombisa uSamsoni wamtshela. Wayesebachazela abakubo imfumbe.
Amadoda omuzi athi kuye ngosuku lwesikhombisa, lingakashoni ilanga: “Yini emnandi kunoju na? Yini enamandla kunebhubesi na?” Wayesethi kuwo: “Ukuba anilimanga ngesithole sami, ngabe aniyitholanga incazelo yemfumbe yami.”
UMoya kaSimakade wehlela phezu kwakhe ngamandla, uSamsoni wayesehlela e-Ashikeloni. Wabulala amadoda angama-30, wawaphanga. Labo ababechaze imfumbe wabanika izingubo zokuphendulela. Wabuyela endlini kayise ethukuthele kakhulu.
UmkaSamsoni waganiselwa umngani owayekade engumkhaphi kaSamsoni.
Sekwedlule isikhathi, ngesikhathi sokuvunwa kukakolo, uSamsoni wahamba wayovakashela umkakhe, ephethe izinyane lembuzi, wathi: “Ngivumele ngingene ekamelweni lomkami.” Kodwa umukhwe wakhe akamvumelanga ukuba angene.
Umukhwe wakhe wathi kuye: “Ngangiqinisekile ukuthi usumlahlile, ngase ngimnika umngani wakho. Udadewabo omncane akamuhle yini kunaye, na? Yini ungathathi yena esikhundleni sakhe, na?”
USamsoni wathi kubo: “Ngalesi sikhathi, uma ngenza okubi kumaFilisti, angizukuba nacala.”
USamsoni wahamba wabamba izimpungushe ezingama-300, wathatha izihlonti, wayesenza ukuba izimpungushe zilinganisane ngemisila, wabophela izihlonti phakathi kwemisila yazo.
Esezithungele izihlonti, wazidedela izimpungushe ukuba zingene phakathi kukakolo wamaFilisti ungakavunwa. Washisa izithungo nezinhlanga zikakolo, izivini nezihlahla zeminqumo.
AmaFilisti ayesebuza ethi: “Kwenziwe ngubani lokhu, na?” Baphendula bathi: “NguSamsoni, umkhwenyana womThimna, ngenxa yokuba umukhwe wakhe uthathe umkaSamsoni wamnika umngani kaSamsoni.” AmaFilisti enyuka, amshisa yena noyise.
USamsoni wathi kuwo: “Uma kuyilokhu enikwenzayo, ngiyafunga ukuthi anginakuphumula ngize ngiziphindiselele kini.”
Wawahlasela ngonya olwesabekayo, wabulala amaningi; wayesehamba wayohlala emfantwini wedwala e-Ethamu.
AmaFilisti abe esenyuka ayokanisa kwaJuda, asatshalaliswa eLehi.
Amadoda akwaJuda athi: “Nenyukeleni ukuzolwa nathi, na?” Aphendula amaFilisti, athi: “Senyukele ukuba sizobopha uSamsoni, ukuze senze kuye njengalokhu enzile kithi.”
Kwase kwehla amadoda akwaJuda ayizi-3 000 aya emfantwini wedwala e-Ethamu, athi kuSamsoni: “Awazi yini ukuthi amaFilisti angababusi bethu, na? Pho yini lena oyenzile kithi, na?” Waphendula wathi: “Ngenze kubo njengalokhu benzile kimi.”
Athi kuye: “Sehlele ukuba sizokubopha, ukuze sikunikele esandleni samaFilisti.” USamsoni waphendula wathi: “Fungani kimi ukuthi nina uqobo anizukungihlasela.”
Athi kuye: “Qha, sizokubopha nje kuphela, bese sikunikela esandleni sawo, asizukukubulala thina.” Ambopha ngezintambo ezimbili ezintsha, amkhipha edwaleni.
Lapho efika eLehi, amaFilisti eza ukuzomhlangabeza ememeza; uMoya kaSimakade wehlela kuye, izintambo ezazisezingalweni zakhe zancibilikisa okwefilakisi lishiswa ngumlilo, izibopho ezazisezandleni zakhe zancibilika zasuka ezandleni zakhe.
Wathola umhlathi osemusha wembongolo, wawuthatha, wabulala ngawo amadoda ayinkulungwane.
USamsoni wathi: “Ngomhlathi wembongolo, yebo, ngomhlathi wembongolo, ngibulele amadoda ayinkulungwane.”
Eseqedile ukukhuluma, wawulahla umhlathi wembongolo, leyo ndawo yabizwa ngokuthi yiRamathi Lehi.
Ngaleso sikhathi wayesomile kakhulu, wakhala kuSimakade wathi: “Wenze lokhu kukhululwa okukhulu ngesandla senceku yakho. Sengizakufa yini ukoma bese ngiwela ezandleni zabangasokile, na?”
UNkulunkulu wavula umgodi eLehi, kwaphuma amanzi kuwo. Esephuzile abuya amandla akhe, wavuseleleka. Ngakho-ke leyo ndawo yabizwa ngokuthi yi-Eni Hakhore, isekhona eLehi kuze kube namuhla.
Wehlulela u-Israyeli ngezinsuku zamaFilisti iminyaka engama-20.
Ngelinye ilanga uSamsoni waya eGaza, lapho wabona isifebe, walala naso.
AbaseGaza batshelwa ukuthi: “USamsoni ufikile lapha.” Bayizungeza indawo, bamlalela unyendle ubusuku bonke, esangweni lomuzi. Bathula ubusuku bonke, bethi: “Masilinde kuze kube nokukhanya kokusa, bese siyambulala.”
USamsoni walala kwaze kwaba phakathi kwamabili, wavuka phakathi kobusuku wabamba iminyango yesango lomuzi nezinsika zalo zombili, wakubhoncula nomgoqo, wakuthwala emahlombe akhe, wenyukela nakho esicongweni sentaba eyayiphambi kweHebhroni.
Emveni kwalokho wathanda owesifazane wasesigodini iSoreki, igama lakhe kunguDelila.
Amakhosi amaFilisti akhuphukela kuye, athi: “Yenga uSamsoni, uthole ukuthi yini amandla akhe emakhulu kangaka, nokuthi singamehlula kanjani ukuze simbophe, simnqobe; siyakukunika ngamunye izinhlamvu zesiliva eziyi-1 100.”
UDelila wathi kuSamsoni: “Ake ungitshele ukuthi yini ekwenza ube namandla amakhulu kangaka, nokuthi ungaboshwa kanjani ukuze unqotshwe, na?”
USamsoni wathi kuye: “Uma bengangibopha ngezintambo ezintsha eziyisikhombisa ezingakomiswa, ngiyakuba ntekenteke, ngifane nawo wonke umuntu.”
Amakhosi amaFilisti aletha kuye izintambo ezintsha eziyisikhombisa ezingakomiswa, wambopha ngazo.
Amadoda ayesophe ukumbulala ayesegumbini lakhe elingaphakathi, elinde khona, wayesethi kuye: “AmaFilisti aphezu kwakho, Samsoni!” Kepha wazigqabula kalula nje izintambo kwangathi umucu kahalibhoma lapho ushiswa ngumlilo. Ngakho-ke imfihlo yamandla akhe ayaziwanga.
UDelila wathi kuSamsoni: “Uhlekise ngami, wangitshela amanga; ngiyakuncenga ngitshele ukuthi ungaboshwa kanjani.”
Wathi kuye: “Uma bengibopha ngezintambo ezintsha ezingakaze zisetshenziswe, khona ngiyoba ntekenteke, ngifane nawo wonke umuntu.”
UDelila wayesethatha izintambo ezintsha wambopha ngazo, wayesethi kuye: “AmaFilisti aphezu kwakho, Samsoni.” Amadoda ayesophe ukumbulala ayesegumbini elingaphakathi. Wazigqabula izintambo ezingalweni zakhe kwangathi umucu kakotini.
UDelila wathi kuSamsoni: “Kuze kube manje usahlekisa ngami, futhi ungitshela amanga; ngitshele ukuthi ungaboshwa kanjani, na?” USamsoni wathi kuye: “Uma ungeluka amagoda ayisikhombisa ekhanda, uwahlanganisa nezintambo eziphothiwe, uwabethele esikhonkwaneni, ngizoba ntekenteke, ngifane nawo wonke umuntu.”
Wawabethela-ke ngesikhonkwane, wathi kuye: “AmaFilisti aphezu kwakho, Samsoni.” Wavuka ebuthongweni bakhe, wasingcothula isikhonkwane nezintambo ezelukiweyo neziphiciweyo.
UDelila wayesethi kuSamsoni: “Ungasho kanjani ukuthi uyangithanda, uma inhliziyo yakho ingenami, na? Usungikhohlise kwaze kwaba kathathu, awungitsheli ukuthi yini ekwenza ube namandla angaka.”
Ekugcineni, emva kokumcindezela ngamazwi usuku nosuku, embelesele, waze wacikeka kakhulu uSamsoni.
Ngakho-ke wayesemtshela yonke imfihlo yakhe, wathi kuye: “Ikhanda lami alikaze liphucwe ngensingo, ngokuba ngingumnaziri kaNkulunkulu kwasesibelethweni sikamame. Uma ngigundwa ayophela amandla ami, ngibe ntekenteke, ngifane nabo bonke abantu.”
UDelila ebona ukuthi umtshele yonke imfihlo yakhe, wathumela wayobiza amakhosi amaFilisti, wathi kuwo: “Khuphukani, ngokuba manje usengitshele yonke imfihlo yakhe.” Amakhosi amaFilisti enyuka eza kuye, ephethe isiliva ezandleni zawo.
Wamlalisa emathangeni akhe, wayesebiza indoda, wamphuca amagoda ayisikhombisa ayesekhanda lakhe. Waqala ukumhlupha, amandla akhe asuka kuye.
UDelila wayesethi: “AmaFilisti aphezu kwakho, Samsoni.” Lapho evuka ebuthongweni wathi: “Ngizophuma njengasesikhathini esedlule, ngizithintithe.” Wayengazi ukuthi uSimakade umshiyile.
AmaFilisti ambamba, amkhipha amehlo, amehlisela eGaza, ambopha ngamaketanga ethusi. Wagwedla isigayo ejele.
Izinwele ekhanda lakhe zaqala ukuhluma emveni kokuphucwa.
Amakhosi amaFilisti abuthanela ukuzokwenza umhlatshelo omkhulu kunkulunkulu wawo uDagoni, nokuba athokoze, ngokuba ayethi: “Unkulunkulu wethu unikele uSamsoni isitha sethu esandleni sethu.”
Lapho abantu bembona uSamsoni bamdumisa unkulunkulu wabo, bathi: “Unkulunkulu wethu unikele isitha sethu esandleni sethu, umchithi wezwe lakithi, nobulale abaningi bakithi.”
Kwathi lapho izinhliziyo zabo sezeneme, bathi: “Bizani uSamsoni ukuze asidlalele.” Bambiza-ke uSamsoni esejele, wadlala phambi kwabo, bambeka phakathi kwezinsika.
USamsoni wathi ebhungwini elalimhola ngesandla: “Ngivumele ngithinte izinsika ezeseke ithempeli ukuze ngincike kuzo.”
Indlu yayigcwele abesilisa nabesifazane, nawo wonke amakhosi amaFilisti, ophahleni kwakunabesilisa nabesifazane ababecishe babe yizi-3 000, ababebukela uSamsoni edlala.
USamsoni wanxusa uSimakade, wathi: “Nkosi Simakade, ngiyakucela, ngikhumbule, ngiqinise kube kanye, Nkulunkulu, ukuze ngiziphindisele kumaFilisti ngempindiselo eyodwa nje ngenxa yamehlo ami omabili.”
USamsoni wazibamba izinsika ezimbili eziphakathi, ezaziphase indlu, wencika kuzo, isandla sakhe sesokunene sikweyodwa insika nesokhohlo sikwenye.
USamsoni wathi: “Mangife namaFilisti.” Wazidudula ngamandla akhe wonke; indlu yawela phezu kwamakhosi, nabo bonke abantu ababekuyo. Ngakho-ke labo ababulala ngesikhathi sokufa kwakhe babebaningi kunalabo ababulala esaphila.
Kwase kwehla abafowabo, nabo bonke abendlu kayise, bamthatha, bakhuphuka naye, bamngcwaba phakathi kweZora ne-Eshithawoli, ethuneni likaManowa, uyise. Wayehlulele u-Israyeli iminyaka engama-20.
Kwakukhona umuntu kwelezintaba kwa-Efrayimi ogama lakhe kunguMikha.
Wathi kunina: “Izinhlamvu zesiliva eziyi-1 100 ezathathwa kuwe, waqalekisa ngenxa yazo, ngikuzwa; uyabona-ke, lelo siliva likimi, yimi engalithatha.” Unina wathi: “Sengathi indodana yami ingabusiswa nguSimakade!”
Wazibuyisela kunina izinhlamvu zakhe zesiliva eziyi-1 100; unina wathi: “Leli siliva elisesandleni sami ngiyalingcwelisa kuSimakade ukuze indodana yami yenze isithombe esibaziweyo nesibunjiweyo, ngakho-ke manje ngilibuyisela kuwe.”
Walibuyisela isiliva kunina, unina wathatha izinhlamvu zesiliva ezingama-200, wazinika umkhandisiliva, owenza ngazo isithombe esibaziweyo, nesibunjiweyo, sabekwa endlini kaMikha.
Leyo ndoda enguMikha yayinendlu enonkulunkulu, yenza ingubo yamahlombe netherafimi, yabeka enye yamadodana ayo ukuba ibe ngumphristi wayo.
Ngalezo zinsuku kwakungekho nkosi kwa-Israyeli; yilowo nalowo muntu wayenza lokho ayekubona kulungile emehlweni akhe.
Kwakukhona insizwa eBhethlehema kwaJuda, ingeyesizwana sakwaJuda. YayingumLevi, igogobele lapho.
Leyo ndoda yawushiya umuzi iBhethlehema kwaJuda, ukuba iyohlala lapho yayingathola khona indawo. Yahamba yaze yafika endlini kaMikha kwelezintaba kwa-Efrayimi.
UMikha wathi kuyo: “Uvelaphi, na?” Yaphendula yathi: “NgingumLevi waseBhethlehema kwaJuda, ngihamba ngicinga lapho ngingathola khona indawo.”
UMikha wayesethi kuyo: “Hlala nami, ube ngubaba nomphristi wami, ngizokunika izinhlamvu zesiliva ezilishumi ngonyaka, nesembatho, nokudla.” UmLevi wahlala.
UmLevi wavuma ukuhlala nalowo muntu, leyo nsizwa yaba kuye njengenye yamadodana akhe.
UMikha wambeka umLevi, leyo nsizwa yaba ngumphristi wakhe, yahlala emzini kaMikha.
UMikha wayesethi: “Manje sengiyazi ukuthi uSimakade uzongenzela okuhle, ngoba senginomLevi ongumphristi wami.”
Ngalezo zinsuku kwakungenankosi kwa-Israyeli. Ngaleyo mihla futhi isizwana sakwaDani sazifunela enye indawo yokuhlala, ngokuba kuze kube yileso sikhathi sasingabelwanga indawo phakathi kwezizwana zakwa-Israyeli.
Abozalo lukaDani bathumela amaqhawe amahlanu emele yonke imindeni yabo, kusukela eZora nase-Eshithawoli, ukuba ayohlola izwe, bathi kuwo: “Hambani nihlole izwe.” Lapho efika kwelezintaba kwa-Efrayimi, endlini kaMikha, ahlala lapho.
Esesendlini kaMikha ezwa izwi elijwayelekile lensizwa engumLevi, ayesephambukela kuyo, ayibuza athi: “Ngubani okulethe lapha? Wenzani kule ndawo? Ufunani lapha?”
Yathi kuwo: “UMikha ungenzele lokhu nalokhu, wangiqasha, futhi sengaba ngumphristi wakhe.”
Athi kuyo: “Ake usibuzele kuNkulunkulu ukuthi uhambo esiluthathile luzoba yimpumelelo yini, na?”
Umphristi wathi kuwo: “Hambani ngokuthula. Uhambo eniluthathile luphansi kweso likaSimakade.”
Amadoda amahlanu aqhubeka nohambo, kwathi lapho efika eLayishi, abona ukuthi abantu abalapho bahleli ngokuvikeleka, njengamaSidoniya, banokuthula, abaxwaye lutho, akukho lutho ezweni olwalungabajabhisa, futhi bacebile. Ngaphezu kwalokho babehlala kude namaSidoniya, futhi bengazihlanganise namuntu.
Lapho esefika kwabakubo eZora nase-Eshithawoli, bathi kuwo: “Mbiko muni enisiphathele wona, na?”
Athi: “Sukumani, senyuke, sibahlasele, ngokuba silibonile izwe ukuthi lihle kakhulu. Ningenqeni, ningahuduli izinyawo, kodwa ngenani nilidle.
Uma nihamba, niyofica abantu abangaxwaye lutho. Izwe libanzi, uNkulunkulu ulinikele esandleni senu; indawo lapho kungasweleke lutho lwasemhlabeni.”
Kwaphuma amadoda angama-600 esizwana sakwaDani, eZora nase-Eshithawoli, ehlome ngezikhali zokulwa.
Enyuka, akanisa eKiriyathi Jeharimi kwaJuda; ngalokho bayibiza leyo ndawo ngokuthi yiMahane Dani kuze kube yinamuhla; isentshonalanga yeKiriyathi Jeharimi.
Asuka lapho, aqhubekela kwelezintaba kwa-Efrayimi, aze afinyelela endlini kaMikha.
Amadoda ayisihlanu ayekade ezohlola iLayishi athi kubafowabo: “Niyazi nje ukuthi kulezi zindlu kukhona ingubo yamahlombe, netherafimi nesithombe esibaziweyo nesibunjiweyo, na? Cabangisisani ukuthi nizokwenzenjani.”
Baphambukela lapho, bafika endlini yensizwa yomLevi, endlini kaMikha, bayibuza impilo.
Amadoda angama-600 akwaDani ayehlome ngezikhali ema ekungeneni kwesango.
Lawo madoda ayisihlanu ayekade eyohlola izwe angena, athatha isithombe esibaziweyo, ingubo yamahlombe, itherafimi nesithombe esibunjiweyo. Umphristi wayemi ngasekungeneni kwesango namadoda angama-600 ayehlomile.
Lawo madoda afika endlini kaMikha athatha isithombe esibaziweyo, ingubo yamahlombe, itherafimi nesithombe esibunjiweyo, umphristi wathi kuwo: “Nenzani, na?”
Athi kuye: “Thula! Vala umlomo wakho ngesandla, uhambe nathi, ube ngubaba wethu nomphristi. Kuhle yini kuwe ukuba ngumphristi wendlu yomuntu oyedwa kunokuba ube ngumphristi wesizwana nomndeni kwa-Israyeli, na?”
Inhliziyo yomphristi yathokoza, wathatha ingubo yamahlombe, netherafimi, nesithombe esibaziweyo, wangena emshungwini wabantu.
Baphenduka bangena indlela, babeka phambili izingane, imfuyo, nempahla yabo.
Kuthe sebekude nendlu kaMikha, amadoda ayesezindlini eziseduze nekaMikha abuthana, abalandela, abafica abakwaDani.
Abamemeza abakwaDani, baphenduka, base bethi kuMikha: “Kwenzenjani, usilandelelani nalesi sixuku, na?”
Wathi: “Nithathe onkulunkulu bami engazenzela bona, nomphristi, nahamba, ngisele nani-ke mina? Pho ningibuzelani ukuthi: ‘Kwenzenjani, na?’ ”
AbakwaDani bathi kuye: “Izwi lakho malingezwakali kithi, funa amadoda abilelwa ngamakhanda akusoconge, ufe wena nabendlu yakho.”
Abozalo lukaDani babamba ababeze ngayo; uMikha ebona ukuthi banamandla kunaye, waphenduka, wabuyela endlini yakhe.
Bathatha okwakwenziwe nguMikha nomphristi wakhe, bafika eLayishi kubantu abanokuthula, belondekile, bababulala ngenkemba, bashisa nomuzi ngomlilo.
Kwakungekho owayengabakhulula ngokuba babekude neSidoni, futhi bengazihlanganisile nabanye abantu. Umuzi wawusesigodini iBhethi Rehobhi. Bawakha kabusha lowo muzi, bahlala kuwo.
Bawubiza ngokuthi kukwaDani, bawubiza ngegama likakhokho wabo uDani, owayezalwa ngu-Israyeli; umuzi owawubizwa phambilini ngokuthi yiLayishi.
AbakwaDani bazimisela isithombe esibaziweyo. UJonathani, indodana kaGerishomi, indodana kaManase namadodana akhe, babengabaphristi besizwana sakwaDani, kwaze kwaba lusuku izwe elathunjwa ngalo.
Bazimisela isithombe esibaziweyo esasenziwe nguMikha, ngaso sonke isikhathi indlu kaNkunkulu iseseShilo.
Ngalezo zinsuku, kwakungekho nkosi kwa-Israyeli. Kwasuka umLevi othile owayegogobele endaweni ekude kwelezintaba kwa-Efrayimi, wazithathela isancinza eBhethlehema kwaJuda.
Kepha isancinza safeba, samshiya, sabuyela endlini kayise eBhethlehema kwaJuda, sahlala lapho izinyanga ezine.
Umyeni waso wasuka, wasilandela ukuze akhulume naso, asibuyise. Wayehamba nenceku yakhe, nezimbongolo ezimbalwa; samngenisa endlini kayise, lapho umukhwe wakhe embona, wathokoza ukuhlangana naye.
Umukhwe wakhe, uyise wentombi, wambambezela, ngakho-ke wahlala izinsuku ezintathu; bedla, bephuza, behlala lapho.
Ngosuku lwesine bavuka kusempondozankomo ukuze umkhwenyana ahambe, kodwa uyise wentombi wathi kuye: “Misa insika ngocezu lwesinkwa, emveni kwalokho ningahamba.”
Lawo madoda amabili ahlala, adla, aphuza ndawonye, umukhwe wathi kumkhwenyana: “Ake uvume ukulala namuhla uthokozise inhliziyo yakho.”
Lapho indoda ivuka ngakusasa ukuba ihambe, umukhwe wayo waqhubeka eyincenga, yalala futhi lapho.
Ngosuku lwesihlanu yavuka ngovivi ukuze ihambe, umukhwe wayo wathi: “Ake uncenge inhliziyo yakho, nilinde lize lithambame.” Bahlala laze lathambama, omabili lawo madoda adla, aphuza.
Lapho indoda nesancinza sayo, nenceku yayo, besukuma ukuba bahambe, umukhwe wayo, uyise wentombi wathi kuyo: “Bheka, ilanga seliyashona, sekuzakuhwalala; ake nilale lapha ngalobu busuku. Uyabona ilanga seliyashona. Hlala lapha ukuba inhliziyo yakho ithokoze, nivuke ngovivi kusasa ningene indlela, nibuyele ekhaya.”
Indoda yenqaba ukuphinde ilale ngalobo busuku, yasukuma yahamba, yaze yafika maqondana neJebusi, okuyiJerusalema. Yayihamba nesancinza sayo nezimbongolo ezimbili eziboshelwe.
Sebeseduze neJebusi, ilanga lase lishonile; inceku yathi enkosini yayo: “Woza, ake siphambukele kulo muzi wamaJebusi, silale ubusuku kuwo.”
Kepha inkosi yayo yathi kuyo: “Asiyukuphambuka singenise emzini wabezizwe, okungesiwo owabakwa-Israyeli, kunalokho siyakuqhubeka siye eGibheya.”
Yayisithi encekwini yayo: “Woza, masizame ukufinyelela kwenye yalezi zindawo, ukuze silale eGibheya noma eRama.”
Base bedlula, baqhubeka nohambo lwabo, ilanga labashonela beseduze neGibheya kwaBhenjamini.
Baphambuka ukuba bangene, balale eGibheya. Wangena wayohlala esigcawini somuzi, kodwa abangeniswanga muntu ukuba balale.
Kusihlwa kwaqhamuka ikhehla livela emsebenzini walo ensimini. Lelo khehla lalidabuka kwelezintaba kwa-Efrayimi, kodwa lase ligogobele eGibheya. Abantu bakule ndawo kwakungabakwaBhenjamini.
Lapho leli khehla liphakamisa amehlo, labona isihambi sihleli esigcawini somuzi, lathi: “Uyaphi, futhi uvelaphi, na?”
Indoda yaphendula yathi: “Siyedlula, sivela eBhethlehema kwaJuda, siya endaweni ekude kwelezintaba kwa-Efrayimi, lapho ngingowakhona. Bengiye eBhethlehema kwaJuda, manje sengibuyela endlini kaSimakade. Akukho muntu ongingenisile kwakhe.
Sinabo utshani nefolishi lezimbongolo zethu; nginezinkwa newayini okungokwami nencekukazi yakho nensizwa nezinceku zakho. Asiswele lutho.”
Ikhehla lathi: “Ukuthula makube kuwe. Ngizokunakekela kukho konke okudingayo, kuphela nje ungalali lapha esigcawini ngalobu busuku.”
Lase limngenisa endlini yalo, lanika izimbongolo utshani, bageza izinyawo zabo, badla, baphuza.
Besazijabulisa, kwatheleka abantu bakulowo muzi, ababekhohlakele kakhulu, bazungeza indlu, baqala ukungqongqotha emnyango, bethi ekhehleni elingumninindlu: “Khiphela phandle umuntu ongenise endlini yakho ukuze silale naye.”
Ikhehla, umninindlu laphumela kubo, lathi: “Qha, bafowethu, ningabenzi lobu bubi obungaka. Njengoba le ndoda ingenise endlini yami, ningabenzi lobu buwula obuyihlazo.
Bhekani, nansi indodakazi yami, eyintombi, nesancinza sale ndoda, ngizakukhipha bona, nenze kubo noma yini eniyibona ilungile emehlweni enu, kodwa kule ndoda, aniyukubenza lobu buwula obuyihlazo.”
Kepha abantu abafunanga ukulilalela. Leyo ndoda yabamba isancinza sayo, yasikhiphela kubo phandle. Basidlwengula, basihlukumeza ubusuku bonke kwaze kwasa. Ekuthatheni kokusa basidedela sahamba.
Ekuseni ngovivi lona wesifazane wafike wawela ngasemnyango wendlu yalelo khehla, lapho inkosi yakhe yayikhona, kwaze kwasa.
Ekuseni inkosi yakhe yavuka, yavula iminyango yendlu, lapho iphuma ukuze ihambe; bheka, nasiya isancinza sayo siwile ngasemnyango wendlu, izandla zaso ziphezu kombundu.
Yathi kuso: “Vuka, sihambe,” kodwa kasiphendulanga. Yase isigibelisa embongolweni, yasuka, yaya endaweni yayo.
Lapho isifikile endlini yayo, yathatha ummese, yabamba isancinza sayo, yasiqoba izinqamu ezili-12, isitho ngesitho, yazithumela kuzo zonke izindawo zakwa-Israyeli.
Bonke abakubonayo lokhu bathi: “Lokhu kakukaze kwenzeke futhi akuzange kubonwe kusukela ngosuku abantu bakwa-Israyeli abakhuphuka ngalo eGibhithe kuze kube namhlanje. Zindlani ngakho, nelulekane, nibonisane ukuthi kwenziwenjani.”
Abantu bakwa-Israyeli baphuma kusukela kwaDani kuya eBheri Sheba, nakwaGileyadi, babuthana eMizpha kwaba ngathi ngumuntu munye, phambi kukaSimakade.
Abaholi babo bonke abantu, bazo zonke izizwana zakwa-Israyeli, babekhona emhlanganweni wabantu bakaNkulunkulu, amabutho ahamba ngezinyawo ephethe izikhali ayeyizi-400 000.
Abozalo lukaBhenjamini bezwa ukuthi abantu bakwa-Israyeli bakhuphukele eMizpha. Abantu bakwa-Israyeli bathi: “Sitshele, lobu bubi benzeke kanjani, na?”
UmLevi, umyeni wowesifazane owabulawa, waphendula wathi: “Ngafika eGibheya kwaBhenjamini, mina nesancinza sami, ukuba silale khona ngalobo busuku.
Izakhamuzi zaseGibheya zangivukela, zazungeza indlu ebusuku. Zaziqonde ukungibulala; zadlwengula isancinza sami saze safa.
Ngasithatha isancinza sami, ngasinquma izinqamu, ngazithumela ezifundeni zonke eziyifa lakwa-Israyeli, ngokuba izakhamuzi zenze ububi nobuwula obuyihlazo kwa-Israyeli.
Bhekani Israyeli, nonke ngothi lwenu, vezani uvo lwenu, nikhiphe iseluleko khona manje.”
Bonke abantu basukuma njengamuntu munye, bathi: “Sonke asiyukuphindela emathendeni ethu, akekho namunye ozakubuyela endlini yakhe.
Kepha manje yilokhu esizokwenza ngeGibheya: sizokwenza unkatho, sikhuphukele kulo silihlasele.
Siyothatha amadoda alishumi kwayikhulu kuzo zonke izizwana zakwa-Israyeli, nayikhulu kwayinkulungwane, nayinkulungwane kwalishumi lezinkulungwane, ukuba ahlinzeke amabutho ngokudla, azohamba ayophindisela eGibheya kwaBhenjamini ngalobu buwula obuyihlazo ababenzile kwa-Israyeli.”
Wonke amadoda akwa-Israyeli abuthana ukuze ahlasele umuzi, ehlangene eyimbumba.
Izizwana zakwa-Israyeli zathuma abantu kuso sonke isizwana sakwaBhenjamini, zathi: “Bubi buni lobu obenziwe phakathi kwenu, na?
Manje, lethani lezo zigilamkhuba eziseGibheya ukuze sizibulale, sisuse ububi kwa-Israyeli.” Kodwa abakwaBhenjamini abafunanga ukulalela abafowabo bakwa-Israyeli.
AbakwaBhenjamini babuthanela eGibheya bevela emizini, ukuze baphume bayolwa nabakwa-Israyeli.
AbakwaBhenjamini ababalwa ngalolo lusuku babengamadoda ayizi-26 000 ahlome ngenkemba, aphuma emizini yakhona, zingabaliwe izakhamuzi zaseGibheya. Amadoda abalwa, akhethwa ayengama-700.
Kuwona wonke lowo mbutho, kwakukhona amadoda angama-700 ayeqokiwe engamanxele wonke, ayekwazi ukunemba ngetshe, angageji.
Abakwa-Israyeli, ngaphandle kwabakwaBhenjamini, baba ngamadoda ayizi-400 000 ayehlome ngenkemba, wonke kungamaqhawe.
Abakwa-Israyeli baqhubeka, benyukela eBhethele, lapho babuza khona kuNkulunkulu, bathi: “Ngubani phakathi kwethu ozokhuphuka kuqala ukuba alwe nabakwaBhenjamini na?” USimakade wathi: “NguJuda ozokhuphuka kuqala.”
Abakwa-Israyeli bavuka ekuseni, bakanisa ngaseGibheya.
Abakwa-Israyeli baphuma ukuyolwa nabakwaBhenjamini, bama ngezinhla zabo, balwa nabo eGibheya.
AbakwaBhenjamini baphuma eGibheya, babulala ngalolo lusuku abakwa-Israyeli abayizi-22 000.
Abantu, amadoda akwa-Israyeli, baqunga isibindi, babuye bayihlela ngezinhla zayo impi lapho babeyihlele khona ngosuku lokuqala.
Abakwa-Israyeli bakhuphuka, bayokhala phambi kukaSimakade kwaze kwaba kusihlwa; babuza kuSimakade, bathi: “Siphinde yini sisondele kubafowethu bakwaBhenjamini siyolwa nabo, na?” USimakade wathi: “Khuphukani, nilwe nabo.”
Abakwa-Israyeli basondela kwabakwaBhenjamini ngosuku lwesibili.
AbakwaBhenjamini baphuma eGibheya ukuyolwa nabakwa-Israyeli ngosuku lwesibili, babulala abayizi-18 000 zamadoda akwa-Israyeli ayehlome ngenkemba.
Abakwa-Israyeli, yonke impi, babuyela eBhethele, bakhala, behleli lapho phambi kukaSimakade, bazila ukudla ngalolo lusuku kwaze kwaba kusihlwa. Base benikela phambi kukaSimakade ngemihlatshelo yokushiswa nangemihlatshelo yokuthula.
Abakwa-Israyeli babuza kuSimakade ngokuba umphongolo wesivumelwano sikaNkulunkulu wawulapho ngalezo zinsuku,
noFinehasi, indodana ka-Eleyazare ka-Aroni, wayemi phambi kwawo ngalezo zinsuku, bathi: “Siphinde yini siphume siyolwa nabafowethu bakwaBhenjamini noma siyeke, na?” USimakade waphendula wathi: “Khuphukani, ngokuba kusasa ngizobanikela esandleni senu.”
Abakwa-Israyeli babeka amadoda azungeza iGibheya, alilalela unyendle.
Abakwa-Israyeli base bekhuphuka bayolwa nabakwaBhenjamini ngosuku lwesithathu, bazihlela ngezinhla njengakuqala, balwa neGibheya.
Lapho abakwaBhenjamini bephuma ukuyokulwa nabakwa-Israyeli, yabaheha eyakwa-Israyeli ukuba baqhele emzini. AbakwaBhenjamini baqala ukubulala, nokulimaza amabutho, kwasala amadoda angama-30 akwa-Israyeli enkundleni, emigwaqweni, nasendleleni eqonde eBhethele naseGibheya.
AbakwaBhenjamini bathi: “Bayawa ngenkemba phambi kwethu njengakuqala.” Kodwa abakwa-Israyeli bona bathi: “Masihlehle, yikhona sizobandonsela kude nomuzi, baye emigwaqweni.”
Impi enkulu yakwa-Israyeli yasuka endaweni yayo, yazihlela ngezinhla zayo eBheli Thamari. Ababebalalele unyendle bavumbuka lapho babekhona eGebha.
Kweza malungana neGibheya amadoda ayizi-10 000 ayekhethwe kuwo wonke u-Israyeli. Impi yayinzima kakhulu, kodwa abakwaBhenjamini babengaboni ukuthi ingakanani inhlekelele eyayizobehlela.
USimakade wabanqoba abakwaBhenjamini phambi kuka-Israyeli. Abakwa-Israyeli babhubhisa amadoda akwaBhenjamini ayizi-25 100, wonke ayehlome ngenkemba.
AbakwaBhenjamini babona ukuthi sebenqotshiwe. Abakwa-Israyeli bona babavulela indlela yokubaleka abakwaBhenjamini, ngoba bethemba amabutho ababewabeke ukuba abalalele unyendle ngaseGibheya.
Amabutho ayebhacile, agijimela eGibheya ngokushesha, ayesewubhubhisa wonke umuzi ngenkemba.
Isivumelwano phakathi kwababebhacile nempi yakwa-Israyeli kwakungukuthi lapho bebona isikhatha sentuthu sivela emzini,
yonke impi enkulu yakwa-Israyeli iyophenduka ibuyele empini. Kodwa abakwaBhenjamini baqala ukubulala nokulimaza abakwa-Israyeli; kwathi sebebulele amadoda angama-30, bathi: “Impela banqotshiwe phambi kwethu njengasekuqaleni.”
Kepha lapho isikhatha sentuthu siqala ukukhuphuka sivela emzini, abakwaBhenjamini babheka emuva; bheka, isikhatha sentuthu sibheke esibhakabhakeni sivela kuwo wonke umuzi.
Impi enkulu yakwa-Israyeli yabe isiphenduka ihlasela. AbakwaBhenjamini bashaywa luvalo, ngokuba babona ukuthi inhlekelele isibehlele.
Ngakho-ke babaleka phambi kwabakwa-Israyeli, bemba bembulula belibhekise ngasehlane, kodwa impi yabafica labo ababevela ngasemzini, bababulala phakathi kwayo.
Babazungeza abakwaBhenjamini nxazonke, babahubha, bababhuqabhuqa ngenkemba kwaze kwaba maqondana neGibheya, ngasempumalanga.
Kwafa abayizi-18 000 bakwaBhenjamini, bonke kwakungamaqhawe anesibindi.
Lapho bephenduka bebalekela ehlane, edwaleni likaRimoni, kwacoboshiswa abayizi-5 000 emigwaqweni emikhulu. Baxoshwa kwaze kwaba seGidomi, kwabulawa izi-2 000 zabo.
AbakwaBhenjamini ababulawa ngalolo lusuku kwakungamadoda ayizi-25 000 ayehlome ngezinkemba, futhi wonke engamaqhawe.
Kepha angama-600 aphendukela ngasehlane, abalekela edwaleni likaRimoni, ahlala lapho izinyanga ezine.
Ngaleso sikhathi, abakwa-Israyeli baphindela emuva, babulala ngenkemba abakwaBhenjamini ababesemzini: abantu, izilwane, nakho konke okwakusele, ngisho nemizi eyayisele bayithungela ngomlilo.
Abakwa-Israyeli babefungile eMizpha, bathi: “Akukho namunye phakathi kwethu oyoganisela abakwaBhenjamini indodakazi yakhe.”
Abantu bafika eBhethele, bahlala lapho phambi kukaNkulunkulu kwaze kwaba kusihlwa, badazuluka, bakhala kalusizi.
Bathi: “Simakade, Nkulunkulu ka-Israyeli, kwenzeke kanjani ukuthi namuhla kube khona isizwana esisodwa kwa-Israyeli esingekho, na?”
Ngosuku olulandelayo, abantu bavuka ngovivi, bakha i-althare lapho, banikela imihlatshelo yokushiswa nemihlatshelo yokuthula.
Abakwa-Israyeli base bethi: “Yisiphi isizwana phakathi kwezizwana zonke zakwa-Israyeli esingakhuphukanga ukuzoba yingxenye yenhlangano kaSimakade, na?” Ngokuba kwenziwe isifungo esinqala ngalabo abangakhuphukelanga kuSimakade eMizpha, esithi: “Lowo uyakubulawa.”
Kepha abakwa-Israyeli babenozwelo ngabakwaBhenjamini, abafowabo, bathi: “Isizwana esisodwa sinqunyiwe, sakhishwa kwa-Israyeli namuhla.
Sizokwenzenjani ukuba abaseleyo bathole abafazi, njengoba sifungile kuSimakade ukuthi asizukubaganisela amadodakazi ethu abe ngomkabo, na?”
Base bethi: “Sikhona yini esinye isizwana phakathi kwezizwana zakwa-Israyeli esingakhuphukelanga kuSimakade eMizpha, na?” Kwatholakala ukuthi akukho namunye kwabaseJabheshi Gileyadi oweza enkanjini enhlanganweni.
Ngokuba ngesikhathi kubizwa amagama alabo ababekhona, kwakungekho namunye kwabaseJabheshi Gileyadi.
Ngakho-ke inhlangano yathumela amabutho ayizi-12 000 kubo, yawayala yathi: “Hambani nibulale ngenkemba izakhamuzi zaseJabheshi Gileyadi, ngisho abesifazane nezingane.
Yilokhu eniyokwenza: bonke abesilisa nabo bonke abesifazane asebeke balala nendoda niyakubabulala.”
Bafumana phakathi kwezakhamuzi zaseJabheshi Gileyadi izintombi ezimsulwa ezingama-400 ezingayazi indoda, beza nazo enkanjini eShilo, eKhanani.
Inhlangano yonke yathumela izwi kwabakwaBhenjamini ababesedwaleni likaRimoni, bamemezela ukuthula kubo.
AbakwaBhenjamini babuyela emuva ngaleso sikhathi; banikwa abesifazane ababesindiswe kwabesifazane baseJabheshi Gileyadi, kodwa babengabenele.
Abantu babenozwela ngabakwaBhenjamini, ngokuba uSimakade wayenze kwaba noqhekeko ezizwaneni zakwa-Israyeli.
Abaholi benhlangano bathi: “Sizokwenzenjani ukuze laba abaseleyo bathole abafazi, lokhu kungekho abesifazane abaseleyo kwaBhenjamini, na?”
Base bethi: “Kufanele kube khona izindlalifa zensali yakwaBhenjamini, ukuze kungabi bikho sizwana esishabalalayo kwa-Israyeli.
Nokho thina asikwazi ukubaganisela ngamadodakazi ethu abe ngomkabo.” Ngokuba abakwa-Israyeli babefungile, bathi: “Makaqalekiswe lowo oyakunika abakwaBhenjamini umfazi.”
Ngakho-ke bathi: “Niyabona-ke, kuzoba nomkhosi kaSimakade waminyaka yonke eShilo, elisenyakatho yeBhethele, ngasempumalanga yomgwaqo okhuphuka eBhethele uya eShekhemu, eningizimu yeLebhona.”
Babayala abakwaBhenjamini, bathi: “Hambani nicashe ezivinini,
niqaphe, lapho amadodakazi aseShilo ephuma ukuba azosina, anophuma ezivinini, kube yilowo azithwalele umfazi ezintombini zaseShilo, nibuyele kwaBhenjamini.
Uma befika oyise noma abafowabo bezokhononda kithi, siyothi kubo: ‘Yibani nomusa kubo, nibavumele bawathathe, ngokuba empini asiyitholelanga mfazi indoda ngayinye, kodwa nani anibanikanga amadodakazi enu, ngabe manje ninecala.’ ”
AbakwaBhenjamini benza kanjalo, kwayilowo nalowo wazithwalela umfazi, ezintombini ezazisina, base behamba, babuyela endaweni yabo, bayakha kabusha imizi yabo, bahlala kuyo.
Abakwa-Israyeli behlukana lapho ngaleso sikhathi, ngezizwana nangemindeni, basuka lapho babuyela ezindaweni zabo.
Ngalezo zinsuku kwakungekho nkosi kwa-Israyeli, bonke abantu babenza lokho ababekubona kukuhle emehlweni abo.
Ngezinsuku lapho kusaphethe abehluleli, kwaba khona indlala enkulu ezweni. Indoda ethile yaseBhethlehema kwaJuda nomkayo namadodana ayo amabili, basuka bayohlala kwaMowabi.
Igama laleyo ndoda kwakungu-Elimelekhi, umkayo kunguNawomi, amadodana ayo amabili kunguMahaloni noKhiliyoni; babengama-Efratha aseBhethlehema kwaJuda. Bafika kwaMowabi bahlala khona.
U-Elimelekhi, umyeni kaNawomi, wafela lapho; uNawomi wasala namadodana akhe amabili.
Lawo madodana azithathela abafazi kwabesifazane bakwaMowabi, owokuqala kwakungu-Orpha owesibili kunguRuthi; bahlala nabo iminyaka ebalelwa eshumini.
Bobabili oMahaloni noKhiliyoni bafa. UNawomi wayesefelwe ngumyeni wakhe namadodana akhe omabili.
Kuthe eselapho kwaMowabi, uNawomi wezwa ukuthi uSimakade ubahambele abantu bakhe wabapha ukudla, wayeselungiselela ukusuka lapho nomalokazana bakhe.
Wasuka endaweni ayehlala kuyo nomalokazana bakhe bobabili, bangena indlela bebuyela kwaJuda.
UNawomi wathi komalokazana bakhe ababili: “Hambani nibuyele emuva, yilowo nalowo abuyele endlini kanina; sengathi uSimakade anganenzela umusa, njengalokhu nani nenzile kubayeni benu, nakimi.
Sengathi uSimakade anganenza nifumane ukuphumula, yilowo nalowo emzini womyeni wakhe.” Wabe eseyabanga, base bedazuluka bekhala.
Bathi kuye: “Qha, sizohamba nawe sibuyele nawe kubantu bakini!”
UNawomi wabaphendula wathi: “Buyelani emuva madodakazi ami, nizohambelani nami, na? Asekhona yini amadodana ezibilini zami angaba ngabayeni benu, na?
Buyelani emuva madodakazi ami, hambani, ngokuba sengimdala ukuba ngisengagana ngibe nomyeni. Noma ngabe belikhona ithemba lokuba ngingathola indoda ngilale nayo namhlanje ebusuku bese ngiyakhulelwa ngizale amadodana,
beningawalinda yini akhule aze abe madala, na? Benizohlala ningagani ningabi nabayeni, na? Qha, madodakazi ami, owami umunyu mkhulu kakhulu kunowenu, ngokuba isandla sikaSimakade simelene nami.”
Baphinda badazuluka bakhala; u-Orpha wamanga uninazala, kodwa uRuthi wanamathela kuye.
UNawomi wathi kuye: “Uyabona ukuthi umnakwenu usephindele kwabakubo nakonkulunkulu bakhe, nawe mlandele ubuyele kwabakini.”
URuthi wathi: “Musa ukungincenga ukuba ngikushiye ngibuyele emuva, ngingahambi nawe, ngokuba lapho uya khona ngiyakuya khona nami, nalapho uhlala khona ngiyakuhlala khona nami. Abantu bakini bayakuba ngabakithi, noNkulunkulu wakho uyakuba nguNkulunkulu wami.
Lapho ufela khona, ngiyofela khona nami, ngingcwatshwe khona. USimakade akangiphe amandla kulesi sinqumo, angijezise ngokuphindiwe uma ngigudluka kuso; ngukufa kuphela okuyosehlukanisa.”
UNawomi wabona ukuthi uzimisele ukuhamba naye, akabe esaqhubeka nokukhuluma.
Bahamba-ke bobabili baze bayofika eBhethlehema. Kuthe sebefikile eBhethlehema, umuzi wonke wanyakaza ngokufika kwabo. Abantu base bethi: “Kungabe nguNawomi lona, na?”
Wabaphendula wathi: “Ningangibizi ngoNawomi; ngibizeni ngoMara, ngokuba uSomandla ungenzele okubi.
Ngahamba nginakho konke, kodwa uSimakade ungibuyise ngize. Pho ningibizelani ngoNawomi, lokhu uSimakade ufakazile wamelana nami, uSomandla wangenzela okubi, na?”
UNawomi nomalokazana wakwakhe uRuthi babuyela kwelakubo besuka kwaMowabi. Bafika eBhethlehema ngesikhathi kuqala ukuvunwa kwebhali.
UNawomi wayenesihlobo somyeni wakhe, u-Elimelekhi, esasicebe kakhulu, igama laso kunguBhowazi.
URuthi wakwaMowabi wathi kuNawomi: “Ngivumele ngihambe ngiye ensimini ukuze ngikhothoze emva kwalowo oyokuba nomusa kimi.” UNawomi wathi kuye: “Hamba ndodakazi yami.”
URuthi wayesehamba wafike wakhothoza ensimini lapho kwase kuvunwe khona. Kwenzeka nje wazithola esekhothoza esiqeshini sensimu kaBhowazi, owayengowomndeni ka-Elimelekhi.
Esekhona lapho, bheka kwafika uBhowazi evela eBhethlehema wathi kubavuni: “USimakade makabe nani.” Bamphendula bathi: “USimakade makakubusise.”
UBhowazi wayesebuza encekwini yakhe eyayiphethe abavuni wathi: “Ingekabani le ntombazane, na?”
Inceku yamphendula yathi: “Yintombazane yakwaMowabi ebuye noNawomi ezweni lakhona.
Ithe: ‘Ake ungivumele ngikhothoze ezithungweni emva kwabavuni.’ Selokhu ifike ekuseni kuze kube manje isaqhubeka, iyaqala ukuthi gozololo edlangaleni.”
UBhowazi wayesethi kuRuthi: “Lalela lapha ndodakazi yami. Ungayi ukuyokhothoza kwenye insimu, futhi ungasuki lapha; sondelana nezincekukazi zami.
Amehlo akho awanamathele ensimini eziyivunayo; ngibadonse ngendlebe abafana ukuthi bangakuthinti. Uma womile ubokuya ezitsheni uphuze lokho okukhiwe ngabafana.”
URuthi wakhothama wathi mbo ngobuso emhlabathini, wathi kuBhowazi: “Yini ukuba ube nomusa ongaka, uze unginakekele kangaka ngibe ngingowezizwe, na?”
UBhowazi wamphendula wathi: “Ngizwile ngakho konke okwenzele unyokozala emva kokufa komyeni wakho. Uze washiya uyihlo nonyoko nezwe owazalelwa kulo, weza kubantu ongakaze uhlale nabo phambilini.
Sengathi uSimakade uNkulunkulu ka-Israyeli oze ukuzokhosela phansi kwamaphiko akhe angakubusisa ngakho konke okwenzileyo, akuphe umvuzo opheleleyo.”
URuthi wayesethi: “Ungiphathe kahle mnumzane, wangiduduza ngokukhuluma kahle nami, nakuba ngingeyena omunye wezincekukazi zakho.”
Ngesikhathi sekudliwa uBhowazi wathi kuye: “Woza lapha uzokudla isinkwa, ugcobhoze ucezu lwakho ewayinini elitshodile.” Wahlala eduze kwabavuni, wamnika utshwele, wadla wasutha kwaze kwasala.
Wayesesukuma eyokhothoza. UBhowazi wayala izinceku zakhe wathi: “Mvumeleni akhothoze nasezithungweni, ningamthethisi.
Nimkhiphele nokunye ezithungweni, nimshiyele khona ukuze akhothoze, ningamthethisi.”
URuthi wakhothoza ensimini kwaze kwahlwa, wayesebhula lokho ayekukhothozile. Kwaba yibhali elinesisindo se-efa elilodwa.
Wakuthwala ayekukhothozile waya nakho ekhaya. Uninazala wakubona ayekukhothozile; uRuthi wakhipha lokho kudla okwakusale edla wakunika uninazala.
Uninazala wambuza wathi: “Ubukhothoza kuphi namuhla, na? Usebenze kuphi, na? Makabusiswe lowo okunakekele.” Wamtshela uninazala ukuthi ubesebenza kubani, wathi: “Namuhla bengisebenza kumuntu okuthiwa nguBhowazi.”
UNawomi wathi kumalokazana wakwakhe: “USimakade makambusise lowo muntu ongakaze ayeke ukubenzela umusa abaphilayo nabafileyo.” UNawomi wayeseqhubeka ethi kuRuthi: “Leyo ndoda iyisihlobo sethu esisondele; ingomunye wabahlengi bethu.”
URuthi wakwaMowabi wathi: “Impela ithe kimi: ‘Ubonamathela eduze kwezinceku zami kuze kuphele ukuvuna.’ ”
UNawomi wathi kumalokazana wakwakhe: “Kuhle ndodakazi yami, ubohamba nezincekukazi zakhe ukuze ungahlaselwa ngamadoda kwamanye amasimu.”
URuthi wanamathela ezincekukazini ezazivunela uBhowazi, wakhothoza kwaze kwaba sekugcineni kokuvunwa kwebhali nokolo; wayesehlala noninazala.
UNawomi, uninazala kaRuthi, wathi kuye: “Ndodakazi yami, ngingakufuneli yini umuzi ukuze konke kukuhambele kahle, na?
UBhowazi lona obusebenza nezincekukazi zakhe akayiso yini isihlobo sethu esisondele, na? Bheka, namuhla kusihlwa uyokwela ibhali esibuyeni.
Geza, uziqhole ngamakha, ugqoke kahle bese wehla uye esibuyeni. Ungaqale uziveze kuye engakaqedi ukudla nokuphuza.
Ubombheka ukuthi uzolala kuphi, bese uya lapho, ufike uphakamise ingubo ezinyaweni zakhe uzishutheke, yena-ke uyokutshela ukuthi wenzeni.”
URuthi waphendula wathi: “Konke lokho okushoyo ngizokwenza.”
Wayesehla waya esibuyeni, wafike wenza njengalokhu uninazala emyalile.
UBhowazi wadla, waphuza, wenama, wayesehla eyolala ngasekugcineni kwenqwaba yebhali. URuthi wanyonyoba wembula ingubo ezinyaweni zikaBhowazi, walala lapho.
Kuthe phakathi kwamabili uBhowazi waphaphama. Mamo! Nangu owesifazane elele ezinyaweni zakhe!
Wambuza wathi: “Ungubani wena, na?” Waphendula wathi: “NginguRuthi, incekukazi yakho. Ake welule ichopho lengubo yakho ungifukamele, ngokuba ungumhlengi.”
Waphendula wathi: “USimakade makakubusise, ndodakazi yami. Ekugcineni ukhombise ukwethembeka okukhulu kunasekuqaleni; awuzange ugijimele ezinsizweni ezicebile noma ezimpofu.
Manje ndodakazi yami, ungesabi, konke okucelayo ngizokwenzela khona. Ngokuba bonke abantu bakithi bayazi ukuthi ungowesifazane onesimilo.
Impela kuliqiniso ukuthi ngiyisihlobo sakho, kodwa kukhona omunye umhlengi oseduze kakhulu kunami.
Okwanamuhla kulobu busuku ungalala, kuzothi ekuseni ngikhulume naye. Uma engathandi ukukuhlenga kulungile, mina ngizokuhlenga. Ngiyakwethembisa phambi kukaSimakade; lala kuze kuse.”
URuthi walala lapho ngasezinyaweni zikaBhowazi kwaze kwasa, wavuka kusemnyama kungakabonakali lutho. UBhowazi wathi: “Angifuni kwazi muntu ukuthi kuke kwafika owesifazane lapha esibuyeni.”
UBhowazi wayesethi kuye: “Letha leli bhayi obulembethe, ulendlale lapha.” Ngempela uRuthi wenza kanjalo. UBhowazi wathela kulo ibhali elinesisindo esicishe sibe ngama-efa amabili, wamethwesa lona. URuthi wathwala leso sijumbana, wenyukela ekhaya naso.
Wathi uma efika ekhaya uninazala wambuza wathi: “Uhambe kanjani ndodakazi yami, na?” URuthi wamtshela konke okwakwenzekile nayekushilo uBhowazi.
Waqhubeka uRuthi wathi: “Uthe: ‘Awuzukubuyela emuva kunyokozala ungaphethe lutho,’ wayesengipha nanti ibhali elicishe libe ngama-efa amabili.”
UNawomi wayesethi: “Hlala nje ndodakazi yami ulinde, uze ubone ukuthi lolu daba luphetha kanjani. Nakanjani ngeke behle ubuthongo kuBhowazi engaluphethile lolu daba.”
UBhowazi wenyukela esangweni, wahlala khona; uyabona-ke, kwedlula umhlengi ayekade ekhulume ngaye, wayesethi kuye: “Ake uze ngapha, mnewethu, uhlale phansi.” Waya kuye, wahlala phansi.
UBhowazi wabiza amadoda alishumi angamalunga omuzi, wathi kuwo: “Hlalani phansi lapha.” Ayesenza kanjalo.
Wayesethi kumhlengi: “UNawomi usebuyile kwaMowabi, uthengisa ngesiqinti sendawo ebesingesika-Elimelekhi, umfowethu.
Ngibone ukuthi kungcono lolu daba ngikwazise lona phambi kwalawa malunga abantu bakithi, ukuze uma ufuna ukusithenga ukwenze lokho phambi kwawo. Kodwa uma ungathandi ungitshele ukuze ngazi ngoba akekho omunye ngaphandle kwakho ongasihlenga, mina ngingomncane.” Umnewabo wathi: “Kulungile, ngizosihlenga.”
UBhowazi wathi: “Mhla uthenga leyo ndawo kuNawomi uyobe usungena uRuthi wakwaMowabi, umkamufi ukuze umufi umvusele igama lakhe efeni lakhe.”
Umhlengi wathi: “Qha, uma kunjalo, ngeke ngiyithenge leyo ndawo funa ngone ifa lami. Zihlengele wena, mina ngeke ngikwazi ukuyihlenga.”
Kwa-Israyeli uma kuthengiselwana ngokusemthethweni bekuthi othengayo akhumule imbadada yakhe ayinike lona athenga kuye, lokho kube ngubufakazi.
Umhlengi wathi kuBhowazi: “Yithenge wena.” UBhowazi wakhumula imbadada yakhe.
Wathi kumalunga nakubo bonke abantu ababelapho: “Namhlanje ningofakazi bokuthi ngikuthenge konke okuka-Elimelekhi nalokho okwakungokukaKhiliyoni noMahaloni obekusesandleni sikaNawomi.
NoRuthi wakwaMowabi umkaMahaloni ngimngenile ukuba abe ngumkami, ngivuse igama likamufi nefa lakhe ukuze angacinywa ezincwadini zomuzi nasemndenini. Namuhla nonke ningofakazi.”
Bonke abantu ababelapho esangweni, namalunga, basho ngazwi linye bathi: “Singofakazi. Sengathi uSimakade angamenza lona wesifazane ozohlala endlini yakho abe njengoRaheli noLeya, bobabili abayakha indlu ka-Israyeli. Sengathi ungaba nempumelelo e-Efratha ube nodumo eBhethlehema.
Sengathi abantwana uSimakade azobapha le ntombazane bangenza indlu yakho ifane nekaPherezi ayivuselwa nguJuda ngokungena uThamari.”
UBhowazi wayesemthatha uRuthi, waba ngumkakhe. Walala naye, uSimakade wenza ukuba akhulelwe wazibula ngendodana.
Abesifazane bathi kuNawomi: “Makadunyiswe uSimakade namuhla ongazange akuncishe umhlengi. Ukuphe umzukulu oyigazi lakho. Sengathi igama lakhe lingadunyiswa kwa-Israyeli.
Uzovuselela ukuphila kwakho, akugcine ebudaleni bakho, ngokuba umalokazana wakwakho okuthandayo ukuzalele yena, ongcono kuwe ukwedlula amadodana ayisikhombisa.”
UNawomi wayesemthatha umntwana wambeka esifubeni sakhe; waba ngumzanyana wakhe.
Abesifazane abangomakhelwane bakaNawomi bamqamba igama bathi ngu-Obhedi, ngokuba bethi: “Le ngane izalelwe uNawomi, iyindodana yakhe.” Waba nguyise kaJese, uyise kaDavide.
Naba-ke abozalo lukaPherezi: uPherezi wazala uHezironi,
uHezironi wazala uRamu, uRamu wazala u-Aminadaba,
u-Aminadaba wazala uNaheshoni, uNaheshoni wazala uSalimoni,
uSalimoni wazala uBhowazi, uBhowazi wazala u-Obhedi,
u-Obhedi wazala uJese, uyise kaDavide.
Kwakukhona umuntu othile eRamathayimi Zofimu kwelezintaba kwa-Efrayimi, igama lakhe kungu-Elikhana, indodana kaJerohamu ka-Elihu kaTholu kaZufi, wakwa-Efrayimi.
Wayeganwe ngabafazi ababili, omunye kunguHana omunye kunguPhenina. UPhenina wayenabantwana, kodwa uHana wayengenabantwana.
Lowo muntu wayesuka emzini wakhe minyaka yonke akhuphukele ukuyokhonza nokuhlabela uSimakade Wamabandla eShilo. Bheka, lapho eShilo kwakuhlala amadodana amabili omphristi u-Eli, uHofini noFinehasi, nawo engabaphristi bakaSimakade.
Kwathi ngosuku u-Elikhana ahlaba ngalo, wanika uPhenina nawo wonke amadodana namadodakazi akhe izabelo zabo.
UHana wamnika amavenge aphindwe kabili, ngokuba wayemthanda uHana, nakuba uSimakade ayesivalile isibeletho sakhe.
Isitha sakhe sasimchukuluza ukuze simthukuthelise, ngokuba uSimakade wayesivalile isibeletho sakhe.
U-Elikhana wayenza kanjalo minyaka yonke, uma enyukele endlini kaSimakade. UPhenina wayemchukuluza njalo uHana, ngakho-ke wakhala, akaze adla lutho.
U-Elikhana umyeni wakhe, wathi kuHana: “Hana, ukhalelani na? Awudli ngani? Inhliziyo yakho idabukiswe yini na? Kanti angedluli yini kuwe amadodana alishumi na?”
UHana wasukuma lapho sebedlile, baphuza eShilo. U-Eli, umphristi, wayehleli esihlalweni sakhe ngasensikeni yomyango wethempeli likaSimakade.
Umphefumulo wakhe wawunomunyu kakhulu; wakhuleka kuSimakade, wakhala kabuhlungu.
Wenza isithembiso, wathi: “Simakade Wamabandla, impela uma ubheka, uyakubona ukuhlupheka kwencekukazi yakho. Ngikhumbule, ungayikhohlwa incekukazi yakho; yiphe incekukazi yakho umntwana womfana. Ngiyomnikela kuSimakade zonke izinsuku zokuhamba kwakhe. Akuyukuthinta nsingo ekhanda lakhe.”
Kwathi esaqhubeka nokukhuleka phambi kukaSimakade, u-Eli wawuqaphela umlomo wakhe.
UHana wayekhuluma ngenhliziyo engaphumiseli mazwi ngomlomo, kwakunyakaza izindebe zomlomo kuphela. Ekubona lokho u-Eli, wacabanga ukuthi udakiwe.
U-Eli wathi kuye: “Uyakudakwa kuze kube nini na? Susa iwayini lakho kuwe.”
UHana waphendula wathi: “Hhayi, nkosi, ngingowesifazane ohluphekileyo; angiphuzanga wayini naphuzo olunamandla, kodwa bengithulula umphefumulo wami phambi kukaSimakade.
Ungasho ukuthi incekukazi yakho ingowesifazane okhohlakele, ngokuba kungenxa yobuningi bosizi lwami nangokuchukuluzwa kwami, yingakho ngikhuluma kuze kube manje.”
Wayesephendula u-Eli wathi: “Hamba ngokuthula; uNkulunkulu ka-Israyeli makakunike okucelileyo kuye.”
Wathi: “Incekukazi yakho mayifumane umusa emehlweni akho.” Owesifazane wayesehamba, wadla, ubuso bakhe ababe busanyukubala.
Bavuka ekuseni kakhulu bakhuleka phambi kukaSimakade, base bebuyela emuva endlini yabo eRama. U-Elikhana walala nomkakhe, uSimakade wamkhumbula uHana.
Kwathi ngokuqhubeka kwesikhathi uHana wakhulelwa, wazibula ngendondana, wayiqamba igama wathi nguSamuweli, ethi: “Ngimcelile kuSimakade.”
Lowo muntu, u-Elikhana, waphinda wenyuka nendlu yakhe ukuyonikela kuSimakade umhlatshelo waminyaka yonke, nokuyofeza isithembiso sakhe.
Kodwa uHana akenyukanga, wathi kumyeni wakhe: “Angiyukwenyuka aze alunyulwe umntwana; khona ngizakumyisa ukuba abonakale phambi kukaSimakade, ahlale lapho njalo.”
U-Elikhana, umyeni wakhe, wathi kuye: “Yenza okuhle emehlweni akho; hlala uze umlumule; uSimakade makaqinise izwi lakhe kuphela.” Owesifazane wayesehlala, wayincelisa indodana yakhe waze wayilumula.
Eseyilumulile, wenyuka nayo, nezinkunzi ezintathu, i-efa lempuphu, nemvaba yewayini, wakuyisa endlini kaSimakade eShilo; umntwana wayesemncane.
Bahlaba inkunzi, base bemyisa umntwana ku-Eli.
Wathi: “Nkosi, ngifunga ngiyagomela phambi kwakho, nkosi yami, ngingowesifazane owayemi lapha phambi kwakho, ekhuleka kuSimakade.
Lo mntwana ngamkhulekela kuSimakade ukuba angiphe yena; uSimakade unginikile lokho engangikucele kuye;
ngakho-ke nami ngimnikela kuSimakade ukuba ngazo zonke izinsuku zokuphila kwakhe abe ngokaSimakade.” Wakhothama kuSimakade elapho.
UHana wakhuleka wathi: “Inhliziyo yami iyethaba kuSimakade, uSimakade ungiqinisile, manje nginempendulo ezitheni zami, ngiyathokoza, ngokuba ungikhululile.
“Akekho ongcwele njengoSimakade, akekho noyedwa ngaphandle kwakho; alikho idwala elinjengoNkulunkulu wethu.
Ningabe nisakhuluma ngokuziqhenya, futhi makungaphumi kuqhosha emlonyeni wenu, ngokuba uSimakade unguNkulunkulu owazi konke; izenzo zilinganiswa nguye.
“Iminsalo yamaqhawe yaphuliwe; abakhubekayo babhinciswa amandla.
Abebesuthi sebeyaziqashisa ukuze bathole ukudla; abebelambile sebeyekile ukulamba. Yebo, obeyinyumba uzele abayisikhombisa; onabantwana abaningi uyancunzeka.
“USimakade uyabulala, bese ephilisa; uyehlisela endaweni yabafileyo, bese enyusa.
USimakade wenza abampofu bacebe; uyathobisa, bese ephakamisa.
Uyamvusa ompofu othulini, uyayiphakamisa impabanga ezaleni, abahlalise nezikhulu, badle ifa lesihlalo sobukhosi, ngokuba izisekelo zomhlaba zingezikaSimakade; ubekile izwe phezu kwazo.
“Uyakugcina izinyawo zabathembekileyo bakhe, kodwa izikhohlakali ziyakubhujiswa ebumnyameni, ngokuba akukho muntu oyakuphumelela ngamandla akhe odwa.
Abamelana noSimakade bayakuphahlazwa; uyakuduma phezu kwabo esezulwini. USimakade uyakwehlulela amajukujuku omhlaba, aphe inkosi yakhe amandla, ogcotshiweyo wakhe amphakamise.”
U-Elikhana waphindela eRama, endlini yakhe. Umntwana wakhonza uSimakade phansi kweso lika-Eli.
Amadodana ka-Eli ayengabantu abakhohlakele; engamazi uSimakade.
Kwakungumthetho wabaphristi kubantu ukuba nxa umuntu enikela ngomhlatshelo, kufike inceku yomphristi inyama isabila, iphethe imfologo ngesandla,
ihlabe ngayo emcengezini, noma esocweni, noma ebhodweni, noma ekhanzini; konke ekukhiphayo imfologo, umphristi akuthathe kube ngokwakhe. Benza kanjalo eShilo kubo bonke abakwa-Israyeli ababefika khona.
Kwakuthi engakashiswa amanoni, kufike inceku yomphristi ithi kumuntu owenza umhlatshelo: “Letha inyama eyokoselwa umphristi, ngokuba akazukuyithatha kuwe inyama ephekiweyo, kodwa eluhlaza.”
Uma lowo muntu ethe kuyo: “Impela mabashise kuqala amanoni, andukuba uthathe inyama ngokuthanda kwakho,” yathi: “Hhayi, ilethe manje, uma ungayilethi ngizozithathela ngenkani.”
Isono sezinsizwa sasisikhulu kakhulu phambi kukaSimakade, ngoba bawedelela umnikelo kaSimakade.
USamuweli wakhonza uSimakade kusukela esemncane. Wayegqoka ingubo yamahlombe eyenziwe ngelineni.
Unina wayemenzela ijazi minyaka yonke, kuthi lapho enyuka nomyeni wakhe ukuyokwenza umhlatshelo waminyaka yonke, amphathele lona.
U-Eli wabusisa u-Elikhana nomkakhe, wathi: “USimakade makakunike uzalo ngalo wesifazane ngenxa yesipho enanikela ngaso kuSimakade.” Base bebuyela ekhaya.
USimakade wamhambela uHana, wakhulelwa wazala amadodana amathathu namadodakazi amabili. Umntwana uSamuweli wakhula phambi kukaSimakade.
U-Eli wayesemdala kakhulu, wezwa ngakho konke amadodana akhe ayekwenza kwa-Israyeli, nokuthi ayelala nabesifazane ababekhonza ngasemnyango wethende lokuhlangana.
Wathi kuwo: “Nizenzeleni izinto ezinjalo na? Ngokuba ngiyezwa ngemisebenzi yenu emibi kubo bonke laba bantu.
Qha, madodana ami, akusiwo umbiko omuhle engiwuzwa ukhulunywa ngabantu bakaSimakade ngani.
Uma umuntu ona kumuntu, uNkulunkulu uyakumehlulela, kodwa uma umuntu ona kuSimakade, ngubani oyakumnxusela na?” Kepha awalalelanga izwi likayise ngokuba uSimakade wayefuna ukuwabulala.
Umntwana uSamuweli waqhubeka wakhula, waba muhle kuSimakade nakubantu.
Kwafika umuntu kaNkulunkulu ku-Eli, wathi kuye: “Usho kanje uSimakade, uthi: ‘Angithi ngazibonakalisa kuyo indlu kayihlo, beseseGibhithe endlini kaFaro.
Ngamkhetha kuzo zonke izizwana zakwa-Israyeli ukuba abe ngumphristi wami, anikele e-althare lami, ashise impepho kulo, embathe ingubo yamahlombe phambi kwami, ngayinika indlu kayihlo yonke iminikelo yomlilo yabantu bakwa-Israyeli.
Kungani niwedelela umhlatshelo wami nomnikelo wami engiyale ngakho endlini yami, uhloniphe amadodana akho kunami, nizikhuluphalise ngeminikelo emihle yakwa-Israyeli, yabantu bami na?’
“Ngakho-ke uSimakade uNkulunkulu wakho, uthi: ‘Impela ngasho ukuthi indlu yakho nekayihlo ziyongena ziphume ebukhoneni bami kuze kube phakade.
Uyabona-ke, ziyeza izinsuku engiyakunquma ngazo amandla akho namandla endlu kayihlo ukuze kungabi bikho ngwevu endlini yakho,
futhi uyakukubona ukuhlupheka kwendlu yami. Nakuba konke okuhle kuyakwenzelwa u-Israyeli, kodwa akuyukuba bikho ngwevu endlini yakho, kuze kube phakade.
Kepha umuntu engingayukumsusa e-althare lami phambi kwakho, yilowo oyoletha izinyembezi aze afiphazeke amehlo akho, noyogcwalisa umphefumulo wakho ngosizi. Bonke abendlu yakho bayakufa sebengamadoda.
“ ‘Lokhu kuyakuba yisiboniso kuwe esiyakwehlela amadodana akho amabili, uHofini noFinehasi; ngalusuku lunye, bayakufa bobabili.
Ngiyakuzivusela umphristi othembekileyo oyokwenza njengalokho okusenhliziyweni yami nasengqondweni yami; ngiyakumakhela indlu eqinileyo. Uyakuhamba phambi kogcotshiweyo wami kuze kube phakade.
Kuyakuthi bonke abasele endlini yakho, bafike bamkhothamele ngohlamvu lwesiliva nangeqebelengwane lesinkwa, bathi: “Ake ungibeke kwesinye sezikhundla zomphristi ukuze ngidle ucezu lwesinkwa.” ’ ”
Umntwana uSamuweli wayemkhonza uSimakade, phambi kuka-Eli. Izwi likaSimakade lalingavamile ngalezo zinsuku, nombono wawuyivelakancane.
Kwathi ngolunye usuku u-Eli elele endaweni yakhe namehlo akhe eseqala ukufiphala engasaboni kahle,
isibani sikaNkulunkulu singakacinywa, uSamuweli elele ethempelini likaSimakade lapho kwakukhona umphongolo kaNkulunkulu,
uSimakade wambiza uSamuweli; wathi yena: “Ngilapha.”
Wagijima waya ku-Eli, wathi: “Ngilapha, njengoba ungibizile.” U-Eli wathi: “Angikubizanga; buyela emuva uyolala.” USamuweli wahamba, wayolala.
USimakade wabuye wambiza futhi uSamuweli. USamuweli wavuka waya ku-Eli, wathi: “Ngilapha njengoba ungibizile.” U-Eli wathi: “Angikubizanga, ndodana yami, phindela emuva uyolala.”
USamuweli wayengakamazi uSimakade, nezwi likaSimakade lalingakembuleki kuye.
USimakade wabuye wambiza uSamuweli okwesithathu. USamuweli wavuka waya ku-Eli, wathi: “Ngilapha, njengoba ungibizile.” U-Eli wayeseqonda ukuthi nguSimakade obiza umntwana.
U-Eli wathi kuSamuweli: “Hamba uyolala, kuyothi uma ekubiza, uthi: ‘Khuluma, Simakade, ngokuba inceku yakho ilalele.’ ” Wayesehamba uSamuweli, wayolala endaweni yakhe.
USimakade wafika wema, wambiza njengalokhu ebenzile ngesikhathi esiphambili: “Samuweli, Samuweli!” USamuweli wathi: “Khuluma, ngokuba inceku yakho iyezwa.”
USimakade wathi kuSamuweli: “Bheka, ngizokwenza into kwa-Israyeli okuyothi bonke abezwa ngayo, ihlale inkeneza kuzona zombili izindlebe zabo.
Ngalolo lusuku ngiyakumehlisela u-Eli konke engamtshela ngakho mayelana nendlu yakhe, kusukela ekuqaleni kuze kube sekugcineni.
Ngimtshelile ukuthi ngizoyehlulela indlu yakhe kuze kube phakade, ngesiphambeko asaziyo; lokhu amadodana akhe azehlisele isiqalekiso, akaze awakhuza.
Ngakho-ke ngafunga mayelana nendlu ka-Eli ukuthi inkohlakalo yendlu ka-Eli ayisoze yahlangulwa ngomhlatshelo nangomnikelo kuze kube phakade.”
USamuweli walala kwaze kwasa, wavula iminyango yendlu kaSimakade. USamuweli wesaba ukumtshela u-Eli umbono.
U-Eli wayesembiza uSamuweli, wathi: “Samuweli, ndodana yami!” Wathi: “Ngilapha.”
U-Eli wathi: “Ukhulume izwi elithini kuwe na? Ungangifihleli lutho; uNkulunkulu makenze kanjalo kuwe, enezele futhi, uma ungifihlela izwi elilodwa lakho konke lokho akukhulume kuwe.”
USamuweli wamtshela konke, akamfihlelanga lutho. Wathi: “UnguSimakade; makenze okuhle emehlweni akhe.”
USamuweli wakhula, uSimakade wayenaye, wawafeza wonke amazwi kaSamuweli.
Wonke u-Israyeli kusukela kwaDani kuze kube seBheri Sheba wazi ukuthi uSamuweli uqinisiwe ukuba abe ngumphrofethi kaSimakade.
USimakade waqhubeka wabonakala eShilo, ngokuba wazembula kuSamuweli ngezwi likaSimakade.
Izwi likaSamuweli lafika kuwo wonke u-Israyeli. U-Israyeli waphuma wayolwa namaFilisti, wakanisa ngase-Ebheni Ezeri; amaFilisti akanisa e-Afeki.
AmaFilisti azihlela ukuze atholane phezulu no-Israyeli. Impi yabambana kwashunqa uthuli isikhathi eside. AmaFilisti amnqoba u-Israyeli, kwasala enkundleni abantu ababalelwa ezi-4 000.
Kwathi lapho abantu bengena enkanjini, amalunga akwa-Israyeli athi: “USimakade usibulaleleni namuhla phambi kwamaFilisti na? Masithathe umphongolo wesivumelwano sikaSimakade eShilo, ube ngakithi, sihambe nawo, usisindise esandleni sezitha zethu.”
Abantu base bethumela eShilo, bawuthatha lapho umphongolo wesivumelwano sikaSimakade Wamabandla owawuhlezi phezu kwamakherubhi. Amadodana ka-Eli omabili, uHofini noFinehasi, babelapho nomphongolo wesivumelwano sikaNkulunkulu.
Kwathi lapho umphongolo wesivumelwano sikaSimakade ufika enkanjini, u-Israyeli wonke wakhamuluka ngezwi elikhulu, kwaze kwazamazama umhlaba.
AmaFilisti ezwa umsindo wokukhamuluka, athi: “Usho ukuthini lowo msindo wokukhamuluka ongaka enkanjinii yamaHebheru na?” Aqonda ukuthi umphongolo kaSimakade ufikile enkanjini.
AmaFilisti esaba ngokuba, athi: “UNkulunkulu ufikile enkanjini.” Athi-ke: “Maye kithi, ngokuba akukaze kwenzeke okunjengalokhu phambilini.
Maye kithi! Ngubani oyosihlenga esandleni salaba onkulunkulu abanamandla na? Yibo labo nkulunkulu abashaya abaseGibhithe ngalo lonke ubhubhane ehlane.
Qinani nibe ngamadoda nina maFilisti ukuze ningabi yizigqila zamaHebheru, njengoba ebeyizigqila zenu. Yibani ngamadoda, nilwe!”
AmaFilisti alwa, u-Israyeli wanqotshwa, wabaleka, kwaba yilowo nalowo waqonda ethendeni lakhe. Kwaba ngukwehlulwa okukhulu kakhulu, kwasala enkundleni abakwa-Israyeli abayizi-30 000 abayimigundatshani.
Umphongolo kaNkulunkulu wathathwa, kwathi amadodana amabili ka-Eli, uHofini noFinehasi, abulawa.
Ngalolo lusuku umuntu othile wakwaBhenjamini waphulukundlela empini. Wagijima waya eShilo, izingubo zakhe ziklebhukile, enomhlabathi ekhanda lakhe.
Wafika; bheka, u-Eli wayehleli esihlalweni sakhe eceleni komgwaqo ebukela, ngokuba inhliziyo yakhe yayithuthumela ngenxa yomphongolo kaNkulunkulu. Kwathi ukuba lowo muntu angene emzini, wawubikela, kwasuka esinamathambo isililo kuwo wonke umuzi.
Kwathi lapho u-Eli ezwa umsindo wokukhala, wathi: “Ngowani lowo msindo wokumemeza na?” Lowo muntu washesha waya kuye, wamtshela.
U-Eli wayeseneminyaka engama-98, amehlo akhe esenqundekile, engasaboni kahle.
Lo muntu wathi ku-Eli: “Ngiyilowo osinde ngokulambisa empini namuhla.” U-Eli wathi: “Bekunjani ndodana yami?”
Owayelethe umbiko waphendula, wathi: “U-Israyeli ubalekile phambi kwamaFilisti futhi kubulawe abantu abaningi. Kufe namadodana akho omabili, uHofini noFinehasi, umphongolo kaNkulunkulu uthathiwe.”
Kwathi nje ukuba aphathe igama lomphongolo kaNkulunkulu, u-Eli wawa nyovane esihlalweni sakhe eceleni kwesango, waphuka intamo, wafa, kwazise wayesemdala futhi ekhuluphele. Wayemahlulele u-Israyeli iminyaka engama-40.
Umalokazana wakwakhe, umkaFinehasi, wayekhulelwe esezobeletha, kwathi ukuba ezwe umbiko wokuthi umphongolo kaNkulunkulu uthathiwe, nokuthi uyisezala nomyeni wakhe bafile, wakhonkobala, wafikelwa yimihelo, wabeletha.
Ngesikhathi sokufa kuka-Eli kwakunabesifazane ababemi ngakumkaFinehasi, bathi kuye: “Ungesabi, ngokuba uthole indodana.” Kodwa yena akakunakanga lokho, akaze aphendula.
Umntwana wamqamba wathi ngu-Ikhabhodi, ethi: “Inkazimulo isukile kwa-Israyeli,” ngokuba umphongolo kaNkulunkulu uthathiwe, nangenxa yokufa kukayisezala nomyeni wakhe.
Wathi: “Inkazimulo isukile kwa-Israyeli, ngokuba umphongolo kaNkulunkulu uthathiwe.”
AmaFilisti awuthatha umphongolo kaNkulunkulu, awususa e-Ebheni Ezeri, awuyisa e-Ashidodi.
AmaFilisti awuthatha umphongolo kaNkulunkulu, awungenisa endlini kaDagoni, awubeka eceleni kukaDagoni.
Kwathi bevuka abantu base-Ashidodi ekuseni ngakusasa; bheka, uDagoni wayewele phansi emhlabathini phambi komphongolo kaSimakade. Bamthatha uDagoni, bambuyisela endaweni yakhe.
Bavuka ngakusasa ekuseni; uyabona-ke, uDagoni wayewele phansi emhlabathini phambi komphongolo kaSimakade, ikhanda likaDagoni nezihlakala zombili zezandla zakhe zazinqamukile, zisembundwini, kwakusele isidikinyane kuphela.
Yingakho nje abaphristi bakaDagoni kuze kube namuhla, nabo bonke abangena endlini kaDagoni benganyatheli embundwini kaDagoni ose-Ashidodi.
Isandla sikaSimakade saba nzima phezu kwabase-Ashidodi, wabashaya, wababhubhisa ngamathumba, i-Ashidodi nezifunda zayo.
Abantu base-Ashidodi sebebona ukuthi kunjalo, bathi: “Umphongolo kaNkulunkulu ka-Israyeli awuyukuhlala kithi, ngokuba isandla sakhe sinzima phezu kwethu naphezu kukaDagoni, unkulunkulu wethu.”
Bathumela, baqoqa onke amakhosi amaFilisti, bathi: “Sizokwenzenjani ngomphongolo kaNkulunkulu ka-Israyeli na?” Athi: “Umphongolo kaNkulunkulu ka-Israyeli masiwuthuthele eGathi.” Bawuthuthela khona umphongolo kaNkulunkulu ka-Israyeli.
Kwathi ukuba bawuthuthele khona, isandla sikaSimakade saba phezu kwalowo muzi, kwaba khona ukudideka okukhulu, wabulala abantu bomuzi, abancane nabadala bamilwa ngamathumba.
Umphongolo kaNkulunkulu base bewuthuthela e-Ekhroni. Kwathi lapho ufika e-Ekhroni, abantu base-Ekhroni bakhala, bathi: “Balethe lapha lo mphongolo kaNkulunkulu ka-Israyeli ukuba asibulale thina nabantu bakithi.”
Bathumela, baqoqela ndawonye wonke amakhosi amaFilisti, bathi: “Wususeni umphongolo kaNkulunkulu ka-Israyeli, ubuyele endaweni yawo, ukuze ungasibulali thina nabantu bakithi,” ngokuba kwaba khona ukwesaba okukhulu emzini wonke, besaba ukufa. Bheka, isandla sikaNkulunkulu sasinzima kakhulu kubo.
Abantu abangafanga bashaywa ngamathumba; ukukhala komuzi kwenyukela ezulwini.
Umphongolo kaSimakade wahlala ezweni lamaFilisti izinyanga eziyisikhombisa.
AmaFilisti ababiza abaphristi nababhulayo, athi: “Sizokwenzenjani ngomphongolo kaSimakade na? Siboniseni; sizakuwubuyisela kanjani endaweni yawo na?”
Bathi: “Uma senizowuphindisela umphongolo kaNkulunkulu ka-Israyeli, ningawuphindiseli ungenalutho. Kodwa ubuyiseleni nomnikelo wecala, khona niyophiliswa; sekuyokwazeka-ke ukuthi kungani isandla sakhe singasuswa kini.”
Athi: “Uyokuba yini umnikelo wecala esiyakuwubuyisela kanye nawo na?” Bathi: “Amathumba ayisihlanu egolide namagundane ayisihlanu egolide ngokwenani lamakhosi amaFilisti, ngokuba kuyisifo esisodwa esihlasele bonke, ngisho namakhosi enu.
Niyokwenza imifanekiso yamathumba enu anihlasele nemifanekiso yamagundane enu ahlasele izwe, nimnike udumo uNkulunkulu ka-Israyeli, hleze asenze sibe lula isandla sakhe phezu kwenu, phezu konkulunkulu benu, naphezu kwezwe lakini.
Nizenzeleni lukhuni izinhliziyo zenu, njengoba kwenza abaseGibhithe noFaro, abazenza lukhuni izinhliziyo zabo na? Lapho esebashaye kanzima, ababavumelanga yini ukuba bahambe na?
“Manje thathani, nenze inqola entsha nezinkomazi ezimbili ezincelisayo okungakaze kuhlale joka kuzo; zibopheleni izinkomazi enqoleni, nibuyisele emuva amankonyane azo, niwabuyisele ekhaya.
Niyowuthatha umphongolo kaSimakade, niwubeke enqoleni, nifake ebhokisini eliseceleni kwawo impahla yegolide eniyiphindisela kuye, ibe ngumnikelo wecala, izinkomazi nizidedele zihambe.
Bhekani, uma zenyuka nawo ngendlela esemngceleni waseBhethi Shemeshi, yazini ukuthi nguNkulunkulu ka-Israyeli osehlisele lobo bubi obukhulu. Uma kungenzeki kanjalo, kuyobe sehlelwe yingozi nje.”
Abantu benza kanjalo, bathatha izinkomazi ezimbili ezincelisayo, bazibophela enqoleni, kwathi amankonyane azo bawavalela ekhaya.
Babeka umphongolo kaSimakade enqoleni nebhokisi lamagundane egolide nemifanekiso yegolide yamathumba abo.
Izinkomazi zangena indlela, zabheka ngaseBhethi Shemeshi, zihamba endleleni, zihamba zibhonsa, aziphambukelanga ngakwesokunene noma ngakwesokhohlo. Amakhosi amaFilisti azilandela aze afika emngceleni eBhethi Shemeshi.
AbaseBhethi Shemeshi babevuna ukolo esigodini, lapho bephakamisa amehlo, babona umphongolo, bathokoza nxa bewubona.
Inqola yeza ensimini kaJoshuwa waseBhethi Shemeshi, yafike yema lapho. Kwakukhona itshe elikhulu lapho, base beqhekeza izinkuni zenqola benza ngezinkomazi umnikelo wokushiswa kuSimakade.
AbaLevi bawehlisa umphongolo kaSimakade nebhokisi elaliseceleni kwawo, okwakukulo izinto ezenziwe ngegolide, base bewubeka phezu kwetshe elikhulu. Ngalolo lusuku abantu baseBhethi Shemeshi banikela ngeminikelo yokushiswa, benza nemihlatshelo kuSimakade.
Amakhosi amahlanu amaFilisti esekubonile lokho, abuyela e-Ekhroni ngalolo lusuku.
Lawa ngamathumba egolide abuyiswa ngamaFilisti aba ngumnikelo wecala kuSimakade: elinye lalingele-Ashidodi, elinye kungeleGaza, elinye kungele-Ashikeloni, elinye kungeleGathi nele-Ekhroni,
namagundane egolide ayeyinani lemizi yonke yamaFilisti eyayibuswa ngamakhosi ayisihlanu, imizi eyizinqaba ebiyelwe nemizana engabiyelwe. Itshe elikhulu lapho kwabekwa khona umphongolo kaSimakade, lingubufakazi ensimini kaJoshuwa waseBhethi Shemeshi, kuze kube namuhla.
Wabulala abantu baseBhethi Shemeshi ngokuba babebuke emphongolweni kaSimakade. Wabulala abangama-70 kubo emadodeni ayeyizi-50 000. Abantu balila ngoba uSimakade wabulala abantu abaningi kakhulu.
Abantu baseBhethi Shemeshi base bethi: “Ngubani ongama phambi kukaSimakade, uNkulunkulu ongcwele na? Uma umphongolo usuka lapha kithi uyakwenyukela kuphi na?”
Bathumela izithunywa ezakhamuzini zaseKiriyathi Jeharimi, bathi: “AmaFilisti awubuyisile umphongolo kaSimakade; yehlani, niwuthathe niwukhuphulele kini.”
Abantu baseKiriyathi Jeharimi bafika belethe umphongolo kaSimakade, bawungenisa endlini ka-Abhinadaba entabeni, bangcwelisa u-Eleyazare, indodana yakhe, ukuba anakekele umphongolo kaSimakade.
Kusukela osukwini umphongolo owahlala ngalo eKiriyathi Jeharimi, kwedlula isikhathi eside, iminyaka engama-20. Yonke indlu yakwa-Israyeli yakhala kuSimakade.
USamuweli wathi kuyo yonke indlu yakwa-Israyeli: “Uma nibuyela kuSimakade ngenhliziyo yenu yonke, susani phakathi kwenu onkulunkulu babezizwe no-Ashitharothi, nibhekise izinhliziyo zenu kuSimakade, nikhonze Yena yedwa; uzonihlenga esandleni samaFilisti.”
Abantu bakwa-Israyeli basusa oBhali no-Ashitharothi, bakhonza uSimakade kuphela.
USamuweli wathi: “Buthelani wonke u-Israyeli eMizpha, ukuze nginikhulekele kuSimakade.”
Ngakho-ke abakwa-Israyeli babuthana eMizpha. Bakha amanzi, bawathulula phambi kukaSimakade, bazila, bathi: “Sonile kuSimakade.” USamuweli wabehlulela abantu bakwa-Israyeli eMizpha.
Esezwile amaFilisti ukuthi abakwa-Israyeli babuthene eMizpha, amakhosi amaFilisti akhuphuka ukuyolwa no-Israyeli. Abantu bakwa-Israyeli bezwa, bagcwala ukwesaba phambi kwamaFilisti.
Abantu bakwa-Israyeli bathi kuSamuweli: “Ungayeki ukusikhalela kuSimakade uNkulunkulu wethu ukuba asisindise esandleni samaFilisti.”
USamuweli wathatha iwundlu elisancelayo, wanikela ngalo laba ngumnikelo wokushiswa wonke kuSimakade; uSamuweli wamkhulekela u-Israyeli kuSimakade, uSimakade wamphendula.
Kwathi uSamuweli esenza umnikelo wokushiswa, asondela amaFilisti ukuzolwa no-Israyeli. USimakade waduma ngezwi elikhulu ngalolo lusuku wamelana namaFilisti, wawafaka ukudideka, anqotshwa kanjalo ngu-Israyeli.
Amadoda akwa-Israyeli aphuma eMizpha awaxosha amaFilisti, awabulala kwaze kwaba seBhethi Khari.
USamuweli wathatha itshe, walimisa phakathi kweMizpha neSheni. Waliqamba wathi yi-Ebheni Ezeri, ethi: “USimakade usisizile kwaze kwaba lapha.”
AmaFilisti ehlulwa; awaphindanga angena emingceleni yakwa-Israyeli ngezinsuku zonke zikaSamuweli.
Yonke imizi amaFilisti ayeyidlile ku-Israyeli, yabuyela kuye, kusukela e-Ekhroni kuze kube seGathi. U-Israyeli wazithola zonke izifunda zakhe ezazithathwe ngamaFilisti. Kwaba nokuthula phakathi kuka-Israyeli nama-Amori.
USamuweli wehlulela u-Israyeli zonke izinsuku zokuphila kwakhe.
Wayezungeza njalo minyaka yonke aye eBhetheli, eGiligali, naseMizpha; wamehlulela u-Israyeli kuzo zonke lezo zindawo.
USamuweli wayebuyela eRama ngoba indlu yakhe yayilapho, wamehlulela u-Israyeli ekhona, wamakhela lapho uSimakade i-althare.
Kwathi lapho uSamuweli esemdala, wabeka amadodana akhe ukuba abe ngabehluleli kwa-Israyeli.
Igama lezibulo lakhe kwakunguJoweli, igama leyesibili kungu-Abhiya; babengabehluleli eBheri Sheba.
Amadodana akhe awahambanga ngezindlela zakhe, aphambukela enzuzweni embi, agwazelwa, ahlanekezela ubulungiswa.
Kwase kubuthana wonke amalunga akwa-Israyeli, aya kuSamuweli eRama,
athi kuye: “Bheka, usumdala manje, amadodana akho awahambi ezindleleni zakho; sibekele inkosi ukuba isehlulele njengezizwe zonke.”
Kodwa lokho kwaba kubi emehlweni kaSamuweli, lapho ethi: “Sinike inkosi ukuba isehlulele.” USamuweli wayesekhuleka kuSimakade.
USimakade wathi kuSamuweli: “Lalela izwi labantu kukho konke abakusho kuwe, ngokuba akuwena abakulahlayo, kodwa balahle Mina, ukuba ngingabe ngisaba yinkosi phezu kwabo.
Kunjengayo yonke imisebenzi abayenzayo, kusukela ngosuku engabakhuphula ngalo eGibhithe kuze kube namuhla, bangilahla bayokhonza abanye onkulunkulu, ngakho-ke benza kanjalo nakuwe.
Manje lalela abakushoyo, kodwa-ke uze ubexwayise impela, ubatshele ngendlela inkosi eyakubusa ngayo phezu kwabo.”
USamuweli wabatshela abantu ababecele kuye inkosi wonke amazwi kaSimakade.
Wathi: “Nansi indlela inkosi eyonibusa ngayo: izothatha amadodana enu, izibekele wona ezinqoleni zayo nasemahhashini ayo, agijime phambi kwezinqola zayo;
iyakuzibekela wona abe yizinduna zezinkulungwane nezinduna zama-50, alime umhlabathi wayo, avune isivuno sayo, enze izikhali zayo zempi nempahla yezinqola zayo.
Iyakuthatha amadodakazi enu abe ngabathaki bamakha, nabapheki, nababhakizinkwa.
Iyakuthatha amasimu enu, izivini zenu neminqumo yenu emihle, iyakukuthatha ikunike izinceku zayo.
Iyakuthatha okweshumi kwembewu yenu nokwesivini senu, ikunike izinduna zayo nezinceku zayo.
Iyakuthatha izinceku zenu, izincekukazi zenu, izinsizwa zenu ezinhle, nezimbongolo zenu, yenze ngazo imisebenzi yayo.
Iyakuthatha okweshumi kwezimvu zenu, nina nibe yizinceku zayo.
Ngalolo lusuku niyakukhala ngenxa yenkosi yenu enizikhethele yona, kodwa uSimakade akayukuniphendula ngalolo lusuku.”
Kepha abantu bala baphetha ukulalela izwi likaSamuweli, bathi: “Qha, sifuna ukuba kube khona inkosi isibuse,
ukuze nathi sifane nezizwe zonke, inkosi yethu isehlulele, kube yiyo esiholayo lapho siphuma impi, ilwe izimpi zethu.”
USamuweli wawezwa wonke amazwi abantu, wawalandisa uSimakade.
USimakade wathi kuSamuweli: “Lalela izwi labo, ubanike inkosi, ibuse phezu kwabo.” USamuweli wathi kubantu bakwa-Israyeli: “Hambani, kube yilowo nalowo aye emzini wakubo.”
Kwakukhona umuntu kwaBhenjamini ogama lakhe kunguKishi, indodana ka-Abhiyeli kaZerori kaBhekhorathi ka-Afiya, indodana yowakwaBhenjamini, iqhawe elinamandla.
Wayenendodana igama layo kunguSawule, insizwa enhle; kwakungekho muntu omuhle kunaye phakathi kwabantu bakwa-Israyeli. Kusukela emahlombe akhe kuya phezulu wayemude kunabo bonke abantu.
Izimbongolo zikaKishi, uyise kaSawule, zalahleka. UKishi wathi kuSawule, indodana yakhe: “Thatha enye yezinceku uvuke nihambe niyofuna izimbongolo.”
Wadabula kwelezintaba kwa-Efrayimi, wadabula eShalisha, kodwa abazifumananga, base bedabula eShahalimi; nalapho zazingekho. Wadabula kwaBhenjamini, kepha kabazitholanga.
Kwathi lapho befika eZufi, uSawule wathi encekwini yakhe eyayihamba naye: “Woza, siphindele emuva, funa ubaba ayeke ukukhathazeka ngezimbongolo, bese ekhathazeka ngathi.”
Yathi kuye: “Bheka, kukhona umuntu kaNkulunkulu kulo muzi, umuntu ohloniphekile; konke akukhulumayo kuyakwenzeka impela. Masiye khona, mhlawumbe angasitshela indlela esihamba ngayo.”
USawule wayesethi encekwini yakhe: “Uma siya lapho, siyakumnikani lowo muntu na? Isinkwa siphelile emigodleni yethu, akusekho sipho esingasiyisa kulowo muntu kaNkulunkulu; sisenani na?”
Inceku yabuye yamphendula uSawule, yathi: “Uyabona-ke, ngiphethe esandleni sami okwesine kweshekeli lesiliva; lokhu ngiyakumnika khona lowo muntu kaNkulunkulu ukuba asitshele mayelana nendlela yethu.”
Inceku yathi, kudala kwa-Israyeli noma ngubani owayeya ukuyobuza kuNkulunkulu, wayethi: “Woza siye kumboni.” Ngokuba lowo okuthiwa ngumphrofethi manje kuqala wayebizwa ngomboni.
USawule wayesethi encekwini yakhe: “Lihle izwi lakho, woza sihambe.” Baya emzini lapho kwakukhona umuntu kaNkulunkulu.
Besakhuphuka ummango bephikelele emzini bahlangana namantombazane eyokukha amanzi, bathi kuwo: “Ukhona yini umboni na?”
Abaphendula athi: “Ukhona, bhekani nangu phambi kwenu. Nokho sheshani ngokuba ufike namuhla emzini, ngoba abantu benomhlatshelo namuhla endaweni ephakemeyo.
Lapho ningena nje emzini niyomfumana, engakenyukeli endaweni ephakemeyo ukuyokudla; ngokuba nabantu abayukudla engakafiki, ngoba nguye obusisa umhlatshelo andukuba abamenyiweyo badle. Khuphukani khona manje, nizomthola ngalesi sikhathi.”
Benyukela emzini; kuthe besangena khona, uSamuweli wazithela kubo, lapho ephuma enyukela endaweni ephakemeyo.
USimakade wayemambulele ngayizolo uSamuweli, engakafiki uSawule, wathi:
“Kusasa ngalesi sikhathi ngizothumela kuwe umuntu wakwaBhenjamini; uyakumgcoba abe ngumholi wabantu bami u-Israyeli. Uyobasindisa abantu bami esandleni samaFilisti, ngokuba ngibabonile abantu bami, nokukhala kwabo sekufinyelele kimi.”
USamuweli esembonile uSawule, uSimakade wathi kuye: “Nangu-ke umuntu engikhulume ngaye kuwe, ngathi: ‘Lo uyakubusa abantu bami.’ ”
USawule wayesesondela kuSamuweli esangweni, wathi: “Ake ungitshele ukuthi iphi indlu yomboni.”
USamuweli wamphendula uSawule, wathi: “Yimi engingumboni; khuphuka phambi kwami, uye endaweni ephakemeyo, ngokuba niyakudla nami namuhla; ekuseni ngiyakukudedela uhambe, ngikutshele konke okusenhliziyweni yakho.
Mayelana nezimbongolo zakho ezilahlekile ezinsukwini ezintathu ezedlule, ungabe usayibeka inhliziyo yakho kuzo, ngokuba sezitholakele. Ngokuba libekwe kubani kanti ithemba lika-Israyeli, uma kungekuwe nakubo bonke abendlu kayihlo na?”
USawule waphendula wathi: “Angisiye yini owakwaBhenjamini, isizwana esincane ezizwaneni zakwa-Israyeli na? Umndeni wami awumncane yini kuyo yonke imindeni yezizwana zakwaBhenjamini na? Ukhulumelani kimi ngale ndlela na?”
USamuweli wathatha uSawule nenceku yakhe wangena nabo endlini yokudlela, wabahlalisa endaweni ephambili, phakathi kwababemenyiwe; kwakungamadoda angama-30.
USamuweli wathi kumpheki: “Letha isabelo engakunika sona engasho kuwe ngaso ukuthi: ngigcinele sona.”
Umpheki waphakamisa umlenze nokwakuphezu kwawo, wawubeka phambi kukaSawule. USamuweli wathi: “Nakhu ohlinzekwe ngakho. Kubeke phambi kwakho, udle, ngokuba kugcinelwe wena kuze kufike lesi sikhathi, njengalokhu ngithe ngimeme abantu.” USawule wayesedla noSamuweli ngalolo lusuku.
Sebehlile endaweni ephakemeyo, bangena emzini. USamuweli waxoxa noSawule besophahleni lwendlu.
Bavuka ekuseni kuseluvindi, uSamuweli wambiza uSawule ophahleni lwendlu, wathi kuye: “Vuka khona ngizokumukisa.” Wavuka-ke uSawule. Baphuma bobabili baya phandle, uSamuweli noSawule.
Kwathi besehlela ngasemaphethelweni omuzi, uSamuweli wathi kuSawule: “Tshela inceku yakho ukuba yedlule ihambe phambi kwethu.” Yase yedlula. “Yima wena ukuze ngikutshele izwi elikhulunywe nguNkulunkulu.”
USamuweli wayesethatha umfuma wamafutha wawuthela ekhanda likaSawule wayesemanga, wathi kuye: “USimakade akakugcobile yini ukuba ube ngumbusi wefa lakhe na?
Uma ususukile lapha kimi namuhla, uzohlangana nabantu ababili ngasethuneni likaRaheli, emngceleni wakwaBhenjamini eZeliza. Bayakuthi kuwe: ‘Izimbongolo owawuphume ukuyozifuna sezitholakele. Manje uyihlo akasakhathazekile ngezimbongolo, usekhathazeke ngani, uthi: “Ngiyakwenzenjani ngomntanami, na?” ’
“Nxa usuka kubo uyakuqhubeka uze ufike esihlahleni somu-okhi eThabhori, lapho uyakuhlangana nabantu abathathu bekhuphukela kuNkulunkulu eBhethele. Omunye uyobe ephethe amazinyane amathathu ezimbuzi, omunye ephethe izinkwa ezintathu, omunye ephethe imvaba yewayini.
Bayokubingelela, bakunike izinkwa ezimbili oyakuzamukela ezandleni zabo.
“Emveni kwalokho uyakufika entabeni kaNkulunkulu; ikhanda lempi yamaFilisti lilapho. Kuyakuthi uma usufikile kulowo muzi, uyohlangana neviyo labaphrofethi behla endaweni ephakemeyo, kunogubhu, isigubhu, igekle, nehabhu phambi kwabo, bephrofetha.
UMoya kaSimakade uyokwehlela phezu kwakho, uphrofethe kanye nabo, uphenduke omunye umuntu.
Kuyakuthi lapho zonke lezo zinto usuzibonile, uyokwenza konke isandla sakho esikufumanayo, ngokuba uNkulunkulu unawe.
“Uyohamba phambi kwami uye eGiligali, bheka ngizokuza kuwe ukuze nginikele ngeminikelo yokushiswa, ngihlabe imihlatshelo yokuthula. Uyohlala izinsuku eziyisikhombisa, ngize ngifike lapho ukhona, ngikutshele oyakukwenza.”
Kwathi lapho esuka kuSamuweli, uNkulunkulu waguqula inhliziyo yakhe yaba ngenye; zonke lezo zibonakaliso zehlela phezu kwakhe ngalolo lusuku.
Kuthe ukuba bafike entabeni, kweza iviyo labaphrofethi ukuzohlangana naye; uMoya kaNkulunkulu wehlela phezu kwakhe, waphrofetha ephakathi kwabo.
Kwathi lapho bonke abebekade bemazi kuqala bebona ukuthi uphrofetha nabaphrofethi, bakhuluma bodwa omunye ethi komunye: “Yini le eyenzeke endodaneni kaKishi na? Ngabe nguSawule ngempela lo ophakathi kwabaphrofethi na?”
Umuntu wakhona waphendula, wathi: “Ngubani uyise na?” Lokho kwaba yisaga sokuthi: “Ngabe nguSawule lo ophakathi kwabaphrofethi na?”
Eseqedile ukuphrofetha, waya endaweni ephakemeyo.
Uyisekazi kaSawule wathi kuye nasencekwini yakhe: “Beniye ngaphi na?” Wathi: “Besiyofuna izimbongolo; lapho sibona ukuthi asizitholi, sase siya kuSamuweli.”
Uyisekazi kaSawule wathi: “Ake ningitshele ukuthi utheni kini uSamuweli.”
USawule wathi kuyisekazi: “Usitshelile impela ukuthi izimbongolo zitholakele.” Kepha akamtshelanga indaba yobukhosi akhuluma ngayo uSamuweli kuye.
USamuweli wabiza imbizo yabantu ukuba baye kuSimakade eMizpha.
Wathi kubantu bakwa-Israyeli: “Usho kanje uSimakade uNkulunkulu ka-Israyeli, uthi: ‘U-Israyeli ngamkhuphula eGibhithe, ngamhlenga esandleni sabaseGibhithe, nasesandleni sayo yonke imibuso eyayimcindezela.’
Kodwa nina namhlanje nimlahlile uNkulunkulu wenu, owanisindisa ezingozini zonke, nasezinsizini, nithe kuye: ‘Beka inkosi phezu kwethu, isibuse.’ “Ngakho-ke manje, yimani phambi kukaSimakade ngokwezizwana zenu nangemindeni yenu.”
USamuweli wayesezisondeza zonke izizwana zakwa-Israyeli, kwathi isizwana sakwaBhenjamini sadliwa wunkatho.
Wayesesondeza isizwana sakwaBhenjamini ngemindeni yaso, kwenziwa unkatho, lwadla umndeni wakwaMathri; lwadla noSawule, indodana kaKishi. Kepha kwathi lapho bemfuna, akafunyanwanga.
Babuye babuza kuSimakade ukuthi: “Usazofika yini lowo muntu na?” USimakade waphendula wathi: “Bheka, ukhona, ucashe empahleni.”
Bagijima, bamlanda lapho. Wema phakathi kwabantu; wayemude kunabo bonke abantu kusukela emahlombe kuya phezulu.
USamuweli wathi kubo bonke abantu: “Niyambona lowo uSimakade amkhethileyo, ukuthi akekho onjengaye phakathi kwabantu bonke na?” Bonke abantu bakhamuluka bathi: “Mayime njalo inkosi!”
USamuweli wayesebatshela abantu ngamalungelo ombuso, wawaloba encwadini, wayibeka phambi kukaSimakade. USamuweli wayidedela inhlangano yahlakazeka, kwayilowo nalowo muntu wabuyela ekhaya.
USawule naye waya ekhaya eGibheya; amaqhawe ayethintwe nguNkulunkulu ezinhliziyweni zawo ahamba naye.
Kepha abantu abakhohlakele, bathi: “Uyakusisindisa kanjani lona na?” Bambukela phansi, abaze bamnika sipho, kodwa wazithulela nje.
UNahashi wakwa-Amoni wenyuka, wakanisa eJabheshi Gileyadi. Bonke abantu baseJabheshi bathi kuNahashi: “Masenze isivumelwano, thina sizokukhonza.”
UNahashi wakwa-Amoni wathi kubo: “Ngizosenza nani isivumelwano ngokuba nonke nikhiphe amehlo enu akwesokudla, lokho ngiyakukubeka kube yihlazo kuwo wonke u-Israyeli.”
Amalunga aseJabeshi athi kuye: “Ake usiyeke izinsuku eziyisikhombisa, ukuze sithumele izithunywa kuyo yonke imingcele yakwa-Israyeli; uma kungekho ozosihlenga, siyozinikela kuwe.”
Izithunywa zafika eGibheya likaSawule, zakhuluma lawo mazwi kubo bonke abantu. Bonke abantu badazuluka, bakhala.
Bheka, kwaqhamuka uSawule eqhuba izinkomo, evela ensimini. USawule wathi: “Bakhalelani kangaka abantu na?” Base bemlandisa ngokwakushiwo ngabantu baseJabheshi.
Esekuzwile lokho uSawule, uMoya kaNkulunkulu wehlela phezu kukaSawule; wathukuthela wagana unwabu.
Wathatha izinkabi ezimbili, wazihlahlela, wathumela izithunywa nazo kuyo yonke imingcele yakwa-Israyeli, wathi: “Ongezukuphuma alandele uSawule noSamuweli kuzokwenzeka kanje ezinkabini zakhe.” Ingebhe ngoSimakade yehlela phezu kwabantu, baphuma kwangathi bamuntu munye.
Wabahlela eBhezeki; abakwa-Israyeli babeyizi-300 000; abakwaJuda beyizi-30 000.
Bathi ezithunyweni ezazifike kubo: “Niyothi kubantu baseJabheshi Gileyadi: ‘Kusasa lapho ilanga libalele, niyakukhululwa.’ ” Izithunywa zafika zabatshela abantu baseJabheshi; bathokoza.
Abantu baseJabheshi bathi: “Kusasa sizozinikela kini, nenze kithi konke okuyakuba kuhle emehlweni enu.”
Ngakusasa uSawule wabahlela abantu wabamisa izigaba ezintathu. Bangena enkanjini yakwa-Amoni ekuthatheni kokusa, babulala abakwa-Amoni laze laphakama ilanga. Abasalayo basakazeka bagcwala iziganga, akusalanga kubo ababili bendawonye.
Abantu bathi kuSamuweli: “Ngubani othe uSawule uzobusa phezu kwethu, na? Baletheni lapha labo bantu sibabulale.”
USawule wathi: “Namuhla makungabulawa muntu ngoba namuhla uSimakade nguye osindise u-Israyeli.”
USamuweli wayesethi kubantu: “Wozani, masihambe siye eGiligali sifike simise umbuso khona.”
Bonke abantu baya eGiligali, bafika bambeka khona eGiligali uSawule, waba yinkosi phambi kukaSimakade. Bahlaba lapho imihlatshelo neminikelo yokuthula phambi kukaSimakade. USawule nabo bonke abantu bakwa-Israyeli bathokoza kakhulu lapho.
USamuweli wathi ku-Israyeli wonkana: “Niyabona-ke, ngililalele izwi lenu kukho konke enikushilo kimi; ngibeke inkosi ukuba inibuse.
Manje bhekani, inkosi sekuyiyo ehamba phambi kwenu; mina sengimdala, ngiyimpunga. Nanka amadodana ami anani; selokhu ngahamba phambi kwenu, kusukela ebusheni bami kuze kube namuhla.
Bhekani, ngilapha: fakazani ngami phambi kukaSimakade naphambi kogcotshiweyo wakhe, ukuthi ngake ngathatha inkabi kabani, noma imbongolo kabani, ngubani engimqolile, ngicindezele bani futhi ngemukele ukufunjathiswa okuvela esandleni sikabani ukuze amehlo ami avalwe yikho na? Lokho ngiyakukubuyisela kini.”
Bathi: “Awusiqolanga, awusicindezelanga, awemukelanga lutho esandleni samuntu.”
Wayesethi kubo: “USimakade ungufakazi ngani, nogcotshiweyo wakhe ungufakazi namuhla ukuthi anifumananga lutho esandleni sami.” Bathi: “Ungufakazi.”
USamuweli wathi kubantu: “NguSimakade owabeka uMose no-Aroni, nowakhuphula okhokho benu eGibhithe.
Manje-ke yimani ukuze siphendulane phambi kukaSimakade ngezenzo zonke ezilungileyo uSimakade azenza kini nakokhokho benu.
“Lapho uJakobe esefikile eGibhithe, okhokho benu bakhala kuSimakade. USimakade wathuma uMose no-Aroni, babakhipha okhokho benu eGibhithe, wabahlalisa kule ndawo.
“Sebelapho bakhohlwa nguSimakade uNkulunkulu wabo. Wayesethengisa ngabo esandleni sikaSisera, induna yempi eHazori, esandleni samaFilisti, nasesandleni senkosi yakwaMowabi; balwa nabo.
Bakhala kuSimakade, bathi: ‘Sonile, samshiya uSimakade, sakhonza uBhali no-Ashitharothi, kodwa manje sihlenge esandleni sezitha zethu, siyakukukhonza.’
USimakade wayesethumela uJerubhali, uBhedani, uJeftha, noSamuweli, wanihlenga esandleni sezitha zenu ezazinizungeze nhlangothi zonke, nahlala ngokuvikeleka.
“Kuthe lapho nibona uNahashi, inkosi yabakwa-Amoni, eza ukuzonihlasela, nathi kimi: ‘Qha, kepha nathi masibuswe yinkosi,’ naphezu kokuba uSimakade uNkulunkulu wenu eyinkosi yenu.
Manje nansi-ke inkosi eniyikhethileyo neniyicelileyo; niyabona-ke, uSimakade unibekele inkosi ukuba inibuse.
Uma nimesaba uSimakade nimkhonza, nilalela izwi lakhe, ningahlubuki esiyalezweni somlomo kaSimakade, nina nenkosi yenu enibusayo, nilandela uSimakade uNkulunkulu wenu, nenza kahle.
Kepha uma ningalaleli izwi likaSimakade, nihlubuka esiyalezweni sikaSimakade, isandla sikaSimakade siyakumelana nani, njengalokhu samelana nokhokho benu.
“Ngalokho-ke yimani, nibone lesi simangaliso esikhulu uSimakade azosenza phambi kwamehlo enu.
Angithi namuhla yisikhathi sokuvuna ukolo na? Ngizokhuleka kuSimakade ukuba alethe ukuduma nemvula, ukuze nazi, nibone ukuthi bukhulu kangakanani ububi enibenzile emehlweni kaSimakade ngokucela inkosi.”
Ngalolo lusuku uSamuweli wathandaza kuSimakade, uSimakade waletha ukuduma nemvula; bonke abantu besaba kakhulu uSimakade noSamuweli.
Bonke abantu bathi kuSamuweli: “Zikhulekele izinceku zakho kuSimakade uNkulunkulu wakho ukuze singafi, ngokuba senezele phezu kwabo bonke ububi bethu ngokuzicelela inkosi.”
USamuweli wathi kubantu: “Ningesabi nakuba nikwenzile konke lokho okubi, ningaphambuki ekumlandeleni uSimakade, kodwa mkhonzeni uSimakade ngayo yonke inhliziyo yenu.
Yebo, ningaphambuki nilandele izinto eziyize ezingenakunisiza nezingeke zanikhulula, ngokuba ziyize.
USimakade akayukubashiya abantu bakhe ngenxa yegama lakhe elikhulu, lokhu kwaba kuhle kuSimakade ukuba azenzele nina nibe ngabantu bakhe.
Yebo, mangingakwenzi mina ukuba ngone kuSimakade ngiyeke ukunikhulula; ngiyakunifundisa indlela enhle nelungileyo.
Yesabani uSimakade Yena yedwa, nimkhonze ngeqiniso, ngenhliziyo yenu yonke, nikhumbule izinto ezinkulu anenzele zona.
Kodwa uma nenza okubi niyobhubha nenkosi yenu.”
USawule wayesekhulakhulile ngesikhathi eqala ukubusa. Esebuse iminyaka emibili kwa-Israyeli,
waqoka abantu abayizi-3 000 kwa-Israyeli. Abayizi-2 000 baba noSawule eMikhimashi nasentabeni eBhethele, inkulungwane yaba noJonathani eGibheya kwaBhenjamini. Abanye abantu wabaphindisela emuva, kwaba yilowo nalowo waya ethendeni lakhe.
UJonathani wabhubhisa ibutho lamaFilisti elalikanise eGebha, amaFilisti ezwa ngalokho. USawule wabetha icilongo ezweni lonke, wathi: “AmaHebheru mawezwe!”
U-Israyeli wonke wezwa ukuthi uSawule ubhubhise impi yamaFilisti nokuthi u-Israyeli uyanengeka kuwo amaFilisti. Abantu baqoqana ukuba balandele uSawule, baye eGiligali.
AmaFilisti abuthanela ukulwa no-Israyeli: izinqola eziyizi-30 000, abamahhashi abayizi-6 000, nabantu ababebaningi ngangesihlabathi ogwini lolwandle, benyuka bakanisa eMikhimashi empumalanga eBhethi Aveni.
Kwathi lapho abantu bakwa-Israyeli bebona ukuthi basenkathazweni ngenxa yengcindezelo enkulu ababekuyo, abantu bacasha emigedeni, emahlozini, emaweni, ezinqabeni, nakuyo imithombokwakhiwa.
AmaHebheru awela iJordani, aya kwaGadi nakwaGileyadi. USawule wayeseseGiligali, bonke abantu bamlandela bethuthumela.
USawule wahlala izinsuku eziyisikhombisa, okuyisikhathi uSamuweli ayemnqumele sona, kodwa uSamuweli akafikanga eGiligali. Abantu base beqala ukuhlakazeka bemshiya uSawule.
USawule wayesethi: “Lethani kimi umnikelo wokushiswa neminikelo yokuthula.” Wanikela ngomnikelo wokushiswa.
Kwathi eseqedile ukunikela ngomnikelo wokushiswa; waqhamuka uSamuweli. USawule waphuma wayomhlangabeza, wambingelela.
USamuweli wambuza, wathi: “Wenzeni na?” USawule wathi: “Kuthe ukuba ngibone ukuthi abantu sebeyahlakazeka, bayangishiya, nokuthi nawe awufiki ngesikhathi obusinqumile, namaFilisti abuthene eMikhimashi,
ngathi: ‘Manje amaFilisti azokwehlela kimi angihlasele eGiligali ngingakakhuleki,’ ngase ngiziphoqa, nganikela ngomnikelo wokushiswa.”
USamuweli wathi kuSawule: “Wenze ubuwula, awuwugcinanga umyalo kaSimakade uNkulunkulu wakho akuyale ngawo. USimakade ubezowuqinisa umbuso wakho kwa-Israyeli kuze kube phakade,
kodwa manje umbuso wakho awusezukuqhubeka. USimakade uzifunele umuntu oqokwe yinhliziyo yakhe. USimakade ummisile ukuba abe ngumholi wabantu bakhe, ngokuba awukugcinanga lokho uSimakade akuyala ngakho.”
USamuweli wayesesuka wakhuphuka eGiligali, waya eGibheya kwaBhenjamini. USawule wabala abantu ababesasele naye, babecishe babe ngama-600.
USawule noJonathani, indodana yakhe, nabantu ababe naye bahlala eGebha kwaBhenjamini; amaFilisti akanisa eMikhimashi.
Amabutho amaFilisti aphuma enkanjini ngezigaba ezintathu; esokuqala sahamba ngendlela eya e-Ofira eShuhali;
esinye isigaba sahamba ngendlela eya eBhethi Horoni; esinye isigaba sahamba ngendlela eya emngceleni obheke esigodini eZebhoyimi ngasehlane.
Wayengekho umkhandinsimbi kulo lonke izwe kwa-Israyeli, ngokuba amaFilisti athi: “Funa amaHebheru azakhele izinkemba nemikhonto.”
Bonke abakwa-Israyeli behlela kuwo amaFilisti ukuze kube yilowo nalowo alole ummese wakhe, igejazembe, imbazo nesikela lakhe.
Imali ababeyikhokhela ukulola igejazembe noma imfologo kwakuyizingxenye ezimbili kwezintathu zeshekeli, kuthi imbazo nezincijo zokuhlokoloza izinkomo kube yingxenye eyodwa kwezintathu zeshekeli.
Kwathi ngosuku impi eyayibambene ngalo, akwaba bikho muntu kwabakwa-Israyeli ophethe inkemba noma umkhonto esandleni kulabo ababenoSawule noJonathani, ngaphandle kukaSawule noJonathani, indodana yakhe.
Ibutho lamaFilisti laphuma, laya ngasentubeni eMikhimashi.
Langa limbe uJonathani, indodana kaSawule, wathi odibini lwakhe: “Woza siwele, siye ebuthweni lamaFilisti elingaphesheya.” Kepha akamazisanga uyise ngalokho.
USawule wahlala emaphethelweni eGibheya, phansi kwesihlahla samahananadi eMigroni. Wayenabantu abangama-600 ababenaye lapho.
U-Ahiya, indodana ka-Ahithubi, umfowabo ka-Ikhabhodi kaFinehasi ka-Eli, umphristi kaSimakade eShilo, wayembethe ingubo yamahlombe. Abantu babengazi ukuthi uJonathani uhambile.
Phakathi kwezikhala uJonathani ayefuna ukucusha kuzo aye ngaphesheya, agasele ibutho lamaFilisti, kwakunogedla lwesiwa ngapha nangapha. Igama lesinye kwakuthiwa yiBhozezi, esinye kuthiwa yiSene.
Olunye ugedla lwesiwa lwalugebele ngasenyakatho, phambi kweMikhimashi, olunye ngaseningizimu, phambi kweGebha.
UJonathani wathi odibini lwakhe: “Woza siwelele ngaphesheya, siye ebuthweni labangasokile, mhlawumbe uSimakade uzosisiza, ngokuba akukho okungamthiya ukuba asindise, kungaba ngabaningi noma ngabayingcosana.”
Udibi lwathi kuye: “Yenza konke okusenhliziyweni yakho: hamba; nginawe ngenhliziyo epheleleyo.”
UJonathani wayesethi kuye: “Uyabona-ke, siyakuwela, siye kulabo bantu, siziveze kubo.
Uma bethi kithi: ‘Hlalani size sifike kini,’ siyakuma endaweni yethu, singenyukeli kubo.
Kepha uma bethi: ‘Yenyukelani kithi,’ siyakwenyuka, ngokuba uSimakade uyakubanikela esandleni sethu; lokho kuyakuba yisibonakaliso kithi.”
Baziveza bobabili kulo ibutho lamaFilisti. AmaFilisti ayesethi: “Bhekani, amaHebheru ayaphuma emigodini acashe kuyo.”
Abantu ababesebuthweni lamaFilisti babamemeza uJonathani nodibi lwakhe, bathi: “Khuphukelani lapha kithi, sizonitshela okuthile.” UJonathani wayesethi odibini lwakhe: “Khuphuka ungilandele, ngokuba uSimakade ubanikele esandleni sakwa-Israyeli.”
UJonathani wakhuphuka ekhasa ngezandla nezinyawo, nodibi lwakhe lumlandela. Abantu bawa phambi kukaJonathani, udibi lwakhe olwalumlandela lwabacoboshisa.
Kuleso sehlakalo sokuqala sokubulawa kwabantu uJonathani nodibi lwakhe babulala abantu abangama-20 ebangeni elingathi liyingxenye ye-ekha lensimu.
Kwaba khona ukuthuthumela enkanjini, endle, nakubo bonke abantu. Ibutho nabaphangi bathuthumela, umhlaba wazamazama, kwaba ngukuthuthumela okukhulu.
Abaqaphi bakaSawule eGibheya kwaBhenjamini babona isixuku sihlakazeka, siya ngapha nangalaphaya.
USawule wayesethi kubantu ababenaye: “Balani manje, nibone ukuthi ngubani ongekho phakathi kwethu.” Babala; bheka, uJonathani nodibi lwakhe babengekho.
USawule wathi ku-Ahiya: “Letha umphongolo kaNkulunkulu.” Ngokuba umphongolo kaNkulunkulu ngaleso sikhathi wawukwabakwa-Israyeli.
Kwathi uSawule esakhuluma kumphristi, umsindo owawusenkanjini yamaFilisti waqhubeka, wanda kakhulu. USawule wathi kumphristi: “Susa isandla sakho.”
USawule wabiza bonke abantu ababenaye, bahamba baya ukuyolwa. Kwaba yilowo nalowo wasingena ngenkemba isitha, yatholana phezulu kwashunqa uthuli.
Nalawo maHebheru ayekade eseqembukele kumaFilisti nawo akhuphukela enkanjini ayizungeza nxazonke, ayeseba nabakwa-Israyeli ababenoSawule noJonathani.
Bonke abakwa-Israyeli ababecashe kwelezintaba kwa-Efrayimi bezwa ukuthi amaFilisti abalekile, nabo bawaxosha ngempi.
USimakade wamsindisa u-Israyeli ngalolo lusuku. Impi yalwa yaze yedlulela eBhethi Aveni.
Abantu bakwa-Israyeli babecindezelekile ngalolo lusuku, ngokuba uSawule wayebafungisile abantu, wathi: “Makaqalekiswe umuntu oyodla ukudla kungakahlwi, ngingakaziphindiseli ezitheni zami.” Akukho muntu owadla ukudla.
Bonke abantu bangena ehlathini; kwakukhona uju phansi.
Beselapho ehlathini, bheka, kwakuconsa uju, kodwa akubanga bikho noyedwa owaludla, ngokuba bonke babesaba isifungo.
UJonathani wayengasizwanga isifungo uyise asenzisa abantu. Wayeselula isihloko senduku yakhe ayeyiphethe, wayicwilisa ojwini, walukhotha; ayeseqabuka amehlo akhe.
Omunye kubantu wathi: “Uyihlo ubafungisile nokubafungisa abantu, wathi: ‘Makaqalekiswe umuntu ozokudla ukudla namuhla.’ Abantu base bephelelwe ngamandla.”
UJonathani wayesethi: “Ubaba ulihluphile izwe. Ake nibheke ukuthi amehlo ami aseqabuke kanjani ngenxa yokukhotha nje leli consana loju.
Kakhulu kangakanani-ke ukuba abantu bebeyidlile impango yezitha abayitholile, ngabe ababulalanga yini amaFilisti amaningi kakhulu na?”
Ngalo lolo suku babulala amaFilisti kusukela eMikhimashi kuze kube se-Ajaloni. Abantu baphelelwa ngamandla ngokwedlulele.
Bayithelekela impango: bathatha izimvu, izinkabi namankonyane, bakuhlaba, bakudla kusenegazi.
Abanye base bembikela uSawule, bathi: “Uyabona-ke, abantu sebonile kuSimakade badla okunegazi.” Wathi uSawule: “Nenze kabi, ngakho-ke namuhla gingqelani kimi itshe elikhulu.”
USawule wathi: “Hlakazekani phakathi kwabantu, nibatshele bonke, nithi: ‘Akube yilowo nalowo alethe kimi inkabi yakhe, omunye imvu yakhe, nikuhlabe lapha kule ndawo, nikudle, ningabe nisona kuSimakade ngokudla okunegazi.’ ” Abantu baletha, kwaba yilowo nalowo inkabi yakhe, bakuhlaba bona mathupha lapho.
USawule wamakhela uSimakade i-althare; lelo kwaba yi-althare lokuqala alakhela uSimakade.
USawule wathi: “Masehle, silandele amaFilisti ebusuku, siwaphange kuze kuse, singashiyi noyedwa kuwo.” Bathi: “Yenza konke okuhle okubona kufanele.” Umphristi wayesethi: “Masisondele lapha kuNkulunkulu.”
USawule wabuza kuNkulunkulu wathi: “Ngehle yini ngilandele amaFilisti, na? Uyakuwanikela yini esandleni sabakwa-Israyeli na?” Kepha akamphendulanga ngalolo lusuku.
USawule wathi: “Sondelani lapha nina nonke zinhloko zabantu, nina enaziyo nenibonile ukuthi senzeke kanjani lesi sono sanamuhla.
Kuphila kukaSimakade osindisa u-Israyeli, ngisho noma ngabe senziwe nguJonathani indodana yami, uyakufa nokufa.” Kepha akekho noyedwa owamphendula.
Wayesethi ku-Israyeli wonke: “Buyelani nganhlanye nina, mina noJonathani, indodana yami, siyakuya ngakolunye uhlangothi.” Abantu bathi kuSawule: “Yenza okuhle okubona kufanele.”
USawule wayesethi kuSimakade uNkulunkulu ka-Israyeli: “Malivele iqiniso.” UJonathani noSawule badliwa wunkatho; abantu basinda.
USawule wathi: “Yenzani unkatho phakathi kwami noJonathani, indodana yami.” UJonathani wadliwa wunkatho.
USawule wayesethi kuJonathani: “Ngitshele okwenzileyo.” UJonathani wamtshela wathi: “Impela nginambithe iconsana loju ngesihloko senduku ebisesandleni sami. Sengizakufa.”
USawule wathi: “Makenze kanjalo uNkulunkulu, enezele futhi, ngokuba uyakufa nokufa, Jonathani!”
Abantu bathi kuSawule: “Uyakufa yini uJonathani osilethele lokhu kusindiswa okukhulu kwa-Israyeli na? Siyafunga siyagomela phambi kukaSimakade, makungenzeki lokho; akuyukuwela phansi nolulodwa unwele lwekhanda lakhe, ngokuba usebenze noNkulunkulu namuhla.” Abantu bamhlenga uJonathani, akabulawanga.
USawule wayesebuya, wakhuphuka, akabe esawalandela amaFilisti; wona aya endaweni yawo.
Lapho uSawule esewuthathile umbuso kwa-Israyeli walwa nazo zonke izitha zakhe ezazimzungeze nxazonke: abakwaMowabi, abakwa-Amoni, abakwa-Edomi, amakhosi aseZobha namaFilisti; noma kuphi lapho ayeya khona wayefike avale ngehlahla.
Walwa ngesibindi, wanqoba ama-Amaleki, wamhlenga u-Israyeli esandleni sabaphangi.
Nanka amagama amadodana kaSawule: nguJonathani, u-Ishivi, noMalikhi Shuwa. Amadodakazi akhe, igama leyokuqala nguMerabi, encane nguMikhali.
Igama lomkaSawule ngu-Ahinohama, indodakazi ka-Ahimazi. Umkhuzi wempi yakhe kungu-Abhineri, indodana kaNeri uyisekazi kaSawule.
UKishi, uyise kaSawule noNeri, uyise ka-Abhineri, babengamadodana ka-Abhiyeli.
Ngazo zonke izinsuku zikaSawule, kwakukhona ukulwa okunzima namaFilisti. Kwakuthi lapho uSawule ebona iqhawe nendoda enamandla azithathele bona.
USamuweli wathi kuSawule: “USimakade wangithuma ukuba ngikugcobe ube yinkosi, ubuse abantu bakhe u-Israyeli. Ngakho-ke ake ulalele amazwi kaSimakade.
Usho kanje uSimakade Wamabandla, uthi: ‘Ngiyakuwajezisa ama-Amaleki ngalokho akwenza ku-Israyeli, amelana naye ngesikhathi esendleleni ephuma eGibhithe.
Manje hamba, unqobe u-Amaleki, ushaye icole kukho konke okungokwakhe, ungamhawukeli, kodwa uqothe imbokodo nesisekelo kwabesilisa, abesifazane, izingane, nabantwana abasancela, izinkabi, izimvu, amakameli nezimbongolo.’ ”
USawule wabiza abantu wababuthela eThelayimi; babeyizi-200 000 zemigundatshani nezi-10 000 zabantu bakwaJuda.
USawule wafika emzini wama-Amaleki, wawacuthela esigodini.
USawule wathi kumaKheni: “Hambani, phumani, nisuke phakathi kwama-Amaleki, funa nginibhubhise nawo. Nina nabaphatha kahle abakwa-Israyeli ekukhuphukeni kwabo eGibhithe.” AmaKheni aphuma phakathi kwama-Amaleki.
USawule wawanqoba ama-Amaleki kusukela eHavila kuya ngaseShuri elingaphambi kweGibhithe.
Wambamba ephila u-Agagi inkosi yama-Amaleki, waqotha ngenkemba imbokodo nesisekelo.
Kodwa uSawule nabantu abambulalanga u-Agagi kanye nempahla yekhethelo; izimvu, izinkabi, amawundlu nakho konke okuhle. Konke okudelelekileyo nokondileyo bakubhubhisa.
Lase lifika izwi likaSimakade kuSamuweli, lathi:
“Ngiyazisola ukuthi ngimbekeleni uSawule waba yinkosi, ngokuba uyekile ukungilandela, akaze awafeza amazwi ami.” USamuweli wathukuthela, wakhala kuSimakade ubusuku bonke.
USamuweli wavuka ekuseni wayohlangabeza uSawule. USamuweli wabikelwa ukuthi: “USawule ufike eKharmeli, wazimisela insika, wasuka wedlula wehlela eGiligali.”
USamuweli wafika kuSawule. USawule wathi kuye: “Mawubusiswe nguSimakade; ngilifezile izwi likaSimakade.”
USamuweli wayesethi: “Pho kuchazani lokhu kukhala kwezimvu ezindlebeni zami, nokukhala kwezinkomo engikuzwayo na?”
USawule wathi: “Babuye nazo kuma-Amaleki, abantu baziyekile izimvu nezinkomo ezinhle ukuze bakuhlabele uSimakade uNkulunkulu wakho; ezinye siziqede nya.”
USamuweli wayesethi kuSawule: “Lalela ngikutshele lokhu uSimakade angitshele khona kulobu busuku.” Wathi kuye: “Khuluma.”
USamuweli wathi: “Nakuba wawuzibona ungomncane, kodwa awenziwanga yini waba yinhloko yezizwana zakwa-Israyeli na? USimakade wakugcoba waba yinkosi phezu kuka-Israyeli.
USimakade wakuthuma wakuyala, wathi: ‘Hamba uyobhubhisa izoni, ama-Amaleki, ulwe nawo uze uwaqede nya.’
Awulalelanga ngani izwi likaSimakade? Kungani uphuthume wathatha impango, wenza okubi emehlweni kaSimakade na?”
USawule wathi kuSamuweli: “Ngililalele izwi likaSimakade, ngiluthathile uhambo abengithume lona uSimakade. Ngilethe u-Agagi, inkosi yama-Ameleki, ngawabhubhisa wonke ama-Amaleki.
Kepha abantu bathatha empangweni izimvu, nezinkomo, okuhle kokuqalekisiweyo, khona bezohlabela uSimakade uNkulunkulu wabo eGiligali.”
USamuweli wathi: “USimakade uyayenamela yini iminikelo yokushiswa nemihlatshelo, njengalokhu enamele ukulalelwa kwezwi likaSimakade na? Bheka, ukulalela kuhle kunomhlatshelo, nokuqaphela kuhle kunamanoni ezinqama.
Ngokuba ukwambuka kunjengesono sokubhula, nenkani ifana nobubi nokukhonza izithombe. Ngokuba ulilahlile izwi likaSimakade, naye ukulahlile, awusezukuba yinkosi.”
USawule wayesethi kuSamuweli: “Ngonile, ngeqa umthetho kaSimakade namazwi akho, ngesaba abantu, ngalalela izwi labo.
Ngakho-ke ake uthethelele isono sami, uhambe nami ukuba ngikhuleke kuSimakade.”
USamuweli wathi kuSawule: “Angiyukuhamba nawe, ngokuba uledelele izwi likaSimakade, noSimakade ukulahlile, awuseyukuba yinkosi ebusa u-Israyeli.”
Kwathi lapho uSamuweli ephenduka ukuze ahambe, uSawule wabamba umphetho wengubo yakhe, yaklebhuka.
USamuweli wathi kuye: “USimakade uwuklebhulile umbuso ka-Israyeli kuwe namuhla, wawunika umakhelwane wakho ongcono kunawe.
Ngaphezu kwalokho oyiNkazimulo ka-Israyeli akawaqambi amanga, ngokuba akasiye umuntu ukuba azisole.”
Wayesethi uSawule: “Impela ngonile, kodwa ake ungituse manje phambi kwamalunga abantu bami naphambi kuka-Israyeli, ubuye nami ukuba ngikhuleke kuSimakade uNkulunkulu wakho.”
USamuweli wabuyela emuva, walandela uSawule; uSawule wakhuleka kuSimakade.
USamuweli wayesethi: “Mletheni kimi u-Agagi, inkosi yama-Amaleki.” U-Agagi wafika kuye eboshiwe. U-Agagi wathi: “Impela umunyu wokufa usudlulile.”
USamuweli wathi: “Njengalokhu inkemba yakho ibaphucile abesifazane abantwana, kanjalo unyoko uyakwaphucwa abantwana njengabanye.” USamuweli wayesemhlahlela u-Agagi phambi kukaSimakade, eGiligali.
USamuweli waya eRama, kepha uSawule wakhuphukela emzini wakhe eGibheya likaSawule.
USamuweli akaphindanga wambona uSawule waze wafa. Kepha uSamuweli wamkhalela uSawule; uSimakade wazisola ukuthi wayembekile uSawule waba yinkosi, wabusa u-Israyeli.
USimakade wathi kuSamuweli: “Uyakumkhalela kuze kube nina uSawule na? Ngimlahlile, ngeke esaba yinkosi phezu kuka-Israyeli. Gcwalisa uphondo lwakho ngamafutha, uhambe; ngikuthuma kuJese waseBhethlehema, ngokuba ngizibonele inkosi phakathi kwamadodana akhe.”
Wathi uSamuweli: “Ngingahamba kanjani? USawule uzozwa, bese engibulala.” USimakade wathi: “Thatha isithole emhlanjini, uthi: ‘Ngize ukuzohlabela uSimakade.’
Umeme uJese eze emhlatshelweni; Mina ngiyokwazisa ukuthi kufanele wenzeni. Uyongigcobela lowo engiyakumusho kuwe.”
USamuweli wenza lokho akutshelwa nguSimakade, waya eBhethlehema. Amalunga omuzi amhlangabeza ethuthumela, athi: “Ngabe uze ngokuthula na?”
Wathi: “Yebo, ngize ngokuthula. Ngizohlabela uSimakade; zingcweliseni nihlanganyele nami emhlatshelweni.” Wamngcwelisa uJese namadodana akhe, wabamema emhlatshelweni.
Kwathi sebefikile, wabona u-Eliyabe, wathi: “Impela ogcotshiweyo kaSimakade uphambi kwakhe.”
Kepha uSimakade wathi kuSamuweli: “Ungabheki isigubo sakhe nobude bakhe, ngokuba ngimalile, lokhu uSimakade engabuki njengomuntu; umuntu ubheka okusemehlweni, kodwa uSimakade ubheka okusenhliziyweni.”
UJese wayesebiza u-Abhinadaba, wamdlulisa phambi kukaSamuweli. Wathi: “Nalo uSimakade akamkhethanga.”
UJese wayesedlulisa uShama. Wathi: “Nalo uSimakade akamkhethanga.”
UJese wadlulisa ayisikhombisa kumadodana akhe phambi kukaSamuweli. USamuweli wathi kuJese: “USimakade akawakhethanga nalawa.”
USamuweli wathi kuJese: “Sebephelile yini abafana?” Wathi: “Kusasele omncane; waluse izimvu.” USamuweli wathi kuJese: “Thumela umlande, ngokuba asiyi ndawo engakafiki lapha.”
Wathumela, wamlanda, wamngenisa. Wayebomvana, enamehlo amahle, ebukeka kahle. USimakade wathi: “Phakama umgcobe ngokuba nguye lona.”
USamuweli wayesethatha uphondo lwamafutha, wamgcoba phakathi kwabafowabo; uMoya kaSimakade wehlela ngamandla phezu kukaDavide, kusukela ngalolo lusuku kuya phambili. Wayesesuka uSamuweli, waya eRama.
UMoya kaSimakade wamshiya uSawule, wayesengenwa ngumoya omubi owawuvela kuSimakade.
Izinceku zikaSawule zathi kuye: “Bheka, umoya omubi ovela kuNkulunkulu uyakuhlupha.
Mayisho inkosi yethu ukuba izinceku eziphambi kwakho zifune umuntu owazi ukubetha ihabhu; kuyothi lapho ufikelwa ngumoya omubi ovela kuNkulunkulu, akushayele ihabhu, ube ngcono.”
USawule wayesethi kuzo izinceku zakhe: “Ngifuneleni umuntu owazi ukubetha kahle, nimlethe kimi.”
Kwaphendula enye yezinsizwa, yathi: “Ngiyibonile mina indodana kaJese waseBhethlehema, ekwaziyo ukubetha ihabhu; iyiqhawe elinamandla, indoda yempi, iliciko lokukhuluma, iyabukeka; uSimakade unayo.”
USawule wayesethumela izithunywa kuJese, wathi: “Mthumele kimi uDavide, indodana yakho esezimvini.”
UJese wathatha imbongolo wayethwesa isinkwa, imvaba yewayini nezinyane lembuzi, wakuthumela kuSawule, ekuphathise uDavide.
UDavide wafika kuSawule, wema phambi kwakhe, wamthanda kakhulu; wamenza udibi lwakhe.
USawule wathumela kuJese, wathi: “Mvumele uDavide abe yisikhonzi sami, ngokuba ufumene umusa emehlweni ami.”
Kwakuthi nxa umoya ovela kuNkulunkulu umehlela uSawule, uDavide athathe ihabhu, alishaye ngesandla sakhe; akhululeke uSawule, abe ngcono, umoya omubi usuke kuye.
AmaFilisti ahlanganisa amabutho awo ukuba ayokulwa; abuthana eSoko kwaJuda, akanisa phakathi kweSoko ne-Azekha, e-Efesi Damimi.
USawule no-Israyeli babuthana, bakanisa esigodini i-Ela, impi bayihlela ngezigaba zayo ukuze ibhekane neyamaFilisti.
AmaFilisti ayemi kwenye intaba, no-Israyeli emi kwenye, kukhona isigodi phakathi kwabo.
Kwaphuma enkanjini yamaFilisti iqhawe elikhulu, igama lalo kunguGoliyathi waseGathi. Ubude bakhe babungamakhubhithi ayisithupha nesandla.
Wayefake isigqokosivikeli sethusi ekhanda, egqoke ibhantshi lensimbi. Isisindo sebhantshi sasingamashekeli ethusi ayizi-5 000.
Wayenezivikelo zethusi emilenzeni, nengcula yethusi phakathi kwamahlombe.
Uthi lomkhonto wakhe lwalunjengogongolo lomaluki; isihloko somkhonto sasingamashekeli ensimbi angama-600. Phambi kwakhe kwakuhamba ophethe isihlangu.
Wema, wamemeza ezinhleni zakwa-Israyeli, wathi: “Niphumeleni na? Niphumele ukuhlela impi? Mina ngingumFilisti nina niyizinceku zikaSawule. Ziqokeleni umuntu, ehle eze kimi.
Uma enamandla okulwa nami, angibulale, siyakuba yizigqila zenu, kodwa uma ngimehlula, ngimbulale, niyakuba yizigqila zethu, nisikhonze.”
UmFilisti wathi: “Ngiyazedelela namuhla izinhla zakwa-Israyeli; nginikeni umuntu, silwe naye.”
Lapho uSawule naye wonke u-Israyeli bezwa lawo mazwi omFilisti, bashaywa luvalo, besaba kakhulu.
UDavide wayeyindodana yomEfrathi waseBhethlehema Juda, ogama lakhe kunguJese. UJese wayenamadodana ayisishiyagalombili; wayesengumuntu omdala ngesikhathi sikaSawule.
Amadodana kaJese amathathu, u-Eliyabe izibulo, u-Abhinadaba, noShama aphuma alandela uSawule aya empini.
UDavide wayengomncane wamadodana amathathu amadala ayelandele uSawule.
UDavide wasuka kuSawule, wabuyela ekwaluseni izimvu zikayise eBhethlehema.
Njalo ekuseni nakusihlwa umFilisti wayephuma, ame, kwaze kwaba yizinsuku ezingama-40.
UJese wathi kuDavide, indodana yakhe: “Ake uthathele abafowenu i-efa lotshwele nalezi zinkwa ezilishumi, uphuthume ubahambisele enkanjini yabo.
Uphathele induna yenkulungwane lawa makhekheba kashizi. Ubheke ukuthi basaphila kahle yini abafowenu, ungibuyele nobufakazi.”
USawule nabo bonke abakwa-Israyeli babesesigodini i-Ela, belwa namaFilisti.
UDavide wavuka ekuseni ngovivi, washiya izimvu kumlindi, wathatha ayekuthunyiwe, wangena indlela, njengalokhu uJese emyalile. Wafika enqabeni ngesikhathi impi iphuma ukuyozihlela, kusakhuzwa iziqubulo.
U-Israyeli namaFilisti bayihlela impi yabo ukuze batholane phezulu.
UDavide wayishiya impahla yakhe kumlindi wempahla, wagijimela empini, wabingelela abafowabo wababuza impilo.
Kepha esakhuluma nabo; bheka, kwenyuka isikhondlakhondla somFilisti waseGathi, uGoliyathi igama laso, saphuma ezinhleni zamaFilisti, saphinda wona lawo mazwi; uDavide wawezwa.
Bonke abantu bakwa-Israyeli kwathi ukuba bambone lowo muntu babaleka, ngoba babesaba kakhulu.
Bonke abantu bakwa-Israyeli bathi: “Nimbonile lowo muntu owenyukile na? Ngokuba wenyukele ukweyisa u-Israyeli; kuyakuthi umuntu ombulalayo, inkosi imcebise ngengcebo enkulu, imnike indodakazi yayo, iyenze indlu kayise ibe ngekhululekile kwa-Israyeli.”
UDavide wakhuluma kubantu ababemi naye, wathi: “Uyokwenzelwani umuntu oyobulala lowo mFilisti, asuse ihlazo kwa-Israyeli na? Ungubani nje lowo mFilisti ongasokile ukuba ayeyise kanje impi kaNkulunkulu ophilayo?”
Abantu bamphendula bamtshela lona lelo lizwi, bathi: “Kuyakwenziwa kanjalo-ke kumuntu oyakumbulala.”
U-Eliyabe, umfowabo omdala, wezwa lapho ekhuluma kubantu; intukuthelo ka-Eliyabe yamvuthela uDavide, wathi: “Wehleleni na? Uzishiye nobani leziya zimvu ezingengakanani ehlane? Ngiyakwazi ukuziphakamisa kwakho nobubi benhliziyo yakho, wehlile ukuba uzobona impi.”
Kepha uDavide wathi: “Ngenzeni na? Bengizibuzela nje.”
Wamfulathela, wabheka ngakomunye, wakhuluma lona lelo lizwi; abantu bamphendula njengakuqala.
Esezwakele amazwi akhulunywe nguDavide, abikwa kuSawule, wayesembiza.
UDavide wayesethi kuSawule: “Izinhliziyo zabantu mazingadangaliswa yilowo muntu. Inceku yakho izohamba ilwe nalowo mFilisti.”
USawule wathi kuDavide: “Awunawo amandla okuphuma uyolwa nalowo mFilisti, ngokuba wena usengumfana nje; yena uyindoda yempi kusukela ebusheni bakhe.”
UDavide wathi kuSawule: “Inceku yakho yayaluse izimvu zikayise lapho kufika ingonyama nebhere kuthatha imvu emhlambini.
Ngaphuma ngakulandela, ngakubulala, ngayihlenga imvu emlonyeni wakho. Kuthe lapho kungivukela ngakubamba ngedevu ngakushaya phansi, ngakubulala.
Inceku yakho yehlula ingonyama nebhele, nalo mFilisti ongasokile uyakuba njengenye yalokho, ngokuba weyise impi kaNkulunkulu ophilayo.”
UDavide wathi: “USimakade owangophula ozisheni lwengonyama nasozisheni lwebhele, uzakungisindisa nasesandleni salo mFilisti.” USawule wathi kuDavide: “Hamba, uSimakade uzokuba nawe.”
USawule wamgqokisa uDavide izingubo zakhe zempi, wamethwesa isigqoko sethusi ekhanda, wamembathisa nebhantshi lensimbi.
Wambhincisa uDavide inkemba yakhe phezu kwezingubo ayemgqokise zona, wazama ukuhamba ngokuba wayengazejwayele. UDavide wathi kuSawule: “Angikwazi ukuhamba nalezi zinto; angikazejwayeli.” UDavide wayesezikhumula.
Wathatha induku yakhe wayiphatha ngesandla, wazikhethela amatshe ayisihlanu abushelelezi emfundlaneni, wawafaka esikhwameni somelusi, waphatha nendwayimane yakhe ngesandla. Wasondela kumFilisti.
Weza umFilisti, wafika wasondela kuDavide; umuntu owayephethe isihlangu wayehamba phambi kwakhe.
UmFilisti wabuka, wambona uDavide, wameyisa, ngokuba wayengumfana nje, ebomvana, ebukeka.
UmFilisti wathi kuDavide: “Ngiyinja yini ukuba uze kimi uphethe izinduku na?” UmFilisti wamthuka uDavide ngonkulunkulu bakhe.
UmFilisti wathi kuDavide: “Woza kimi, nginike izinyoni zezulu nezilwane zasendle inyama yakho.”
UDavide wayesethi kumFilisti: “Wena uza kimi nenkemba, umkhonto nengcula, kodwa mina ngiza kuwe ngegama likaSimakade Wamabandla, uNkulunkulu wempi ka-Israyeli oyeyisileyo.
Namuhla uSimakade uzokunikela esandleni sami. Ngizokubulala, ngikunqume ikhanda. Khona namuhla izidumbu zempi yamaFilisti ngizozinika izinyoni zezulu nezilwane zomhlaba, ukuze umhlaba wazi ukuthi ukhona uNkulunkulu kwa-Israyeli.
Yonke le nhlangano iyokwazi ukuthi uSimakade akasindisi ngenkemba nangomkhonto, ngokuba impi ingekaSimakade; uyakuninikela esandleni sethu.”
Kwathi lapho esuka umFilisti weza wasondela ukuyohlangabezana noDavide, uDavide washesha wagijimela ngasempini ukuyohlangana nomFilisti.
UDavide wafaka isandla sakhe esikhwameni sakhe, wakhipha khona itshe, walidwiza, wamshaya umFilisti ebunzini, itshe lashona ebunzini, wawela phansi ngobuso.
UDavide wamehlula umFilisti ngendwayimana nangetshe, wamshaya umFilisti, wambulala, kodwa kwakungekho nkemba esandleni sikaDavide.
Wayesegijima uDavide, wema phezu komFilisti, wathatha inkemba yakhe, wayihosha emgodleni wayo, wambulala, wamnquma ikhanda ngayo. Lapho amaFilisti ebona ukuthi iqhawe lawo lifile, acela empunzini.
Abantu bakwa-Israyeli nabakwaJuda basuka bakhamuluka, bawaxosha amaFilisti kwaze kwaba seGathi nasemasangweni e-Ekhroni. Abalimeleyo bamaFilisti bawa ngasendleleni eya eShaharayimi, kwaze kwaba seGathi nase-Ekhroni.
Abantu bakwa-Israyeli babuya ekuxosheni amaFilisti, baphanga inkambu yawo.
UDavide wathatha ikhanda lomFilisti, waliyisa eJerusalema, kodwa izikhali zakhe wazifaka ethendeni lakhe.
Ngesikhathi uSawule embona uDavide ephumela ukuyohlangabezana nomFilisti, wathi ku-Abhineri, umkhuzi wempi: “Abhineri, uyindodana kabani lo mfana?” U-Abhineri wathi: “Ngifunga ngiyagomela, angimazi.”
Yayisithi inkosi: “Hamba uyoyibuza ukuthi iyindodana kabani le nsizwa.”
UDavide esebuya ukuyobulala umFilisti, u-Abhineri wamthatha wamyisa phambi kukaSawule, uDavide wayephethe ikhanda lomFilisti ngesandla.
USawule wathi kuye: “Uyindodana kabani wena mfana?” UDavide wamphendula wathi: “Ngiyindodana yenceku yakho uJese waseBhethlehema.”
Kwathi eseqedile ukukhuluma noSawule, inhliziyo kaJonathani yanamathela enhliziyweni kaDavide. UJonathani wamthanda njengoba ezithanda yena.
USawule wamthatha ngalolo suku uDavide, akabe esamvumela ukuba abuyele endlini kayise.
UJonathani noDavide benza isivumelwano, ngokuba uJonathani wamthanda njengoba ezithanda yena.
UJonathani wakhumula ingubo ayeyigqokile, wayinika uDavide, nezinye izembatho zakhe, inkemba yakhe, umnsalo wakhe nebhande lakhe.
UDavide wayeya noma kuphi lapho uSawule ayemthuma khona, wayehlabana. USawule wambeka ukuba aphathe amabutho. UDavide wayemuhle emehlweni abantu bonke nasemehlweni ezinceku zikaSawule.
Kwathi lapho befika, uDavide esebuya ekubulaleni umFilisti, abesifazane baphuma emizini yonke kwa-Israyeli, behlabelela besina, beyohlangabeza uSawule, inkosi, ngezigubhu, nangokhehlegume, bethokoza.
Abesifazane bahlabelela bedlalisela, bethi: “USawule ubulele izinkulungwane zakhe, kodwa uDavide izinkulungwane zakhe ezilishumi.”
USawule wathukuthela kakhulu, laba libi lelo lizwi emehlweni akhe, wathi: “Banike uDavide izinkulungwane ezilishumi, kodwa mina banginike izinkulungwane nje; osekumsalele ngumbuso kuphela.”
USawule wamqaphelisisa uDavide kusukela kulolo lusuku.
Kwathi ngangomuso umoya omubi owawuvela kuNkulunkulu wehlela kuSawule, waphrofetha ephakathi endlini. UDavide wayeshaya ihabhu ngesandla sakhe izinsuku ngezinsuku. USawule wayephatha umkhonto ngesandla sakhe.
USawule waciba umkhonto, wathi: “Ngiyakumphisela odongeni uDavide.” Kepha uDavide wagwija kwaze kwaba kabili phambi kwakhe.
USawule wamesaba uDavide, ngoba uSimakade wayenaye, kodwa esesukile kuye.
USawule wamqhelisa kuye, wayesembeka ukuba abe ngumkhuzi wempi yakhe yenkulungwane; ehola abantu, ephuma engena nabo.
UDavide waba nempumelelo kuzo zonke izindlela zakhe; uSimakade wayenaye.
USawule ebona ukuthi uDavide unempumelelo, wamesaba.
Kepha wonke u-Israyeli noJuda bamthanda uDavide, ngokuba wayebahola, engena ephuma nabo.
USawule wathi kuDavide: “Bheka, indodakazi yami endala, uMerabi, ngizokuganisela yona, ibe ngumkakho. Wena yiba yiqhawe lami nje kuphela, ulwe izimpi zikaSimakade.” Ngokuba uSawule wathi: “Makungabi yisandla sami esimenzakalisayo, kodwa makube yisandla samaFilisti.”
UDavide wathi kuSawule: “Ngingubani nje mina, kuyini ukuphila kwami, nomndeni kababa uyini kwa-Israyeli ukuba ngingaba ngumkhwenyana wenkosi, na?”
Kwathi lapho kufika isikhathi sokuthi uMerabi, indodakazi kaSawule, agane uDavide, uSawule uyise, wamganisela u-Adriyeli waseMehola, waba ngumkakhe.
UMikhali, indodakazi kaSawule, wayemthanda uDavide. Abantu bamtshela uSawule, kwaba kuhle lokho kuye wavumelana nakho.
Wayesethi uSawule: “Ngiyakumganisela yena abe lugibe kuye, ukuze isandla samaFilisti simenzakalise.” Ngalokho uSawule wathi kuDavide: “Uyakuba ngumkhwenyana ngokwesibili namuhla.”
USawule wayaleza ezincekwini zakhe, wathi: “Khulumani noDavide ngasese, nithi: ‘Uyabona, inkosi yenamile ngawe, nazo zonke izinceku zayo ziyakuthanda, ngakho-ke yiba ngumkhwenyana wenkosi.’ ”
Izinceku zikaSawule zakhuluma lawo mazwi ezindlebeni zikaDavide. UDavide wathi: “Kuyinto elula yini emehlweni enu ukuba ngumkhwenyana wenkosi, lokhu ngingumuntu ompofu nodelelekileyo na?”
Izinceku zikaSawule zamtshela, zathi: “Ukhulume kanjalo-ke uDavide.”
USawule wathi: “Niyakusho kanje kuDavide, nithi: ‘Inkosi ayifuni lobolo, ifuna kuphela amajwabu ayikhulu amaFilisti ukuba kuphindiselwe ezitheni zenkosi.’ ” USawule wayecabanga ukuthi uDavide uzobulawa ngamaFilisti.
Izinceku zakhe zambikela uDavide lawo mazwi, kwaba kuhle emehlweni kaDavide ukuba abe ngumkhwenyana wenkosi, kepha izinsuku zazingakapheleli.
UDavide nabantu bakhe basuka baya kumaFilisti, babulala angama-200. UDavide waletha amajwabu awo; bawayisa enkosini ephelele ukuba abe ngumkhwenyana wenkosi. USawule wayesemganisela uMikhali, indodakazi yakhe, waba ngumkakhe.
USawule wakubona lokho, wazi ukuthi uSimakade unoDavide. UMikhali, indodakazi kaSawule, wamthanda uDavide.
Kwakhula kakhulu kuSawule ukumesaba uDavide. USawule wayeyisitha sikaDavide sonke isikhathi.
Kwakuthi njalo lapho kuhlasela abakhuzi bempi yamaFilisti, uDavide wayehlabana ngokudlulele kunazo zonke izinceku zikaSawule; igama lakhe laduma kakhulu.
USawule wakhuluma noJonathani, indodana yakhe, nazo zonke izinceku zakhe ngetulo lokubulala uDavide. Kepha uJonathani wayemthanda kakhulu uDavide.
UJonathani wamtshela uDavide, wathi: “USawule, ubaba, ufuna ukukubulala, ngakho-ke kusasa qaphela, uhlale esithe, ubhace.
Mina ngizophuma ngime ngakubaba endle lapho ubhace khona, ngizokhuluma ngawe kubaba; uma ngibona okuthile ngizokutshela.”
UJonathani wakhuluma kahle ngoDavide kuyise uSawule, wathi kuye: “Inkosi mayingenzi okubi encekwini yayo uDavide, ngoba ayonanga lutho kuwe. Imisebenzi yayo ekwenzele yona mihle kakhulu.
Ibeke impilo yayo engcupheni ngesikhathi ibulala umFilisti, uSimakade wabalethela ukunqoba okukhulu bonke abakwa-Israyeli. Uzibonele nawe, wajabula, pho kungani-ke usufuna ukona umuntu ongenacala, ubulale uDavide ngaphandle kwesizathu na?”
USawule wamlalela uJonathani, wayesefunga ethi: “Ngifunga ngiyagomela phambi kukaSimakade, akayukubulawa.”
UJonathani wambiza uDavide wamtshela konke okwakushiwo nguyise. UJonathani waletha uDavide kuSawule, wamsebenzela njengakuqala.
Kwaphinde kwaqubuka impi, uDavide waphuma wayokulwa namaFilisti, wabulala amaningi; asindayo acela empunzini.
Umoya omubi owawuvela kuSimakade wehlela kuSawule ehlezi endlini yakhe, ephethe umkhonto ngesandla; uDavide wayebetha ihabhu ngesandla.
USawule wazama ukuphisela uDavide ngomkhonto odongeni, kodwa waphunyula kuSawule, umkhonto waphaphalaza wagwaza udonga. UDavide wayesebaleka, waphunyuka kanjalo-ke ngalobo busuku.
USawule wathumela izithunywa endlini kaDavide ukuba zimqaphe, bese zimbulala ekuseni. UMikhali, umkakhe, wambikela uDavide, wathi: “Uma ungayihlengi impilo yakho ngalobu busuku, uzobulawa kusasa.”
UMikhali wamehlisa uDavide ngefasitela. UDavide wahamba, wabaleka, waphunyuka kanjalo-ke.
UMikhali wathatha itherafimi, walibeka embhedeni, wabeka isicamelo soboya bezimbuzi ngasekhanda lalo, walembesa ngezingubo.
Kwathi lapho uSawule esethumela izithunywa ukuba ziyolanda uDavide, uMikhali wathi: “Uyagula.”
USawule wathumela izithunywa ukuba ziyombona uDavide, wathi: “Mkhuphuleni nimlethe lapha kimi ngombhede ukuze ngimbulale.”
Izithunywa zafika; bheka, kwakunetherafimi embhedeni nesicamelo soboya bezimbuzi singasekhanda lalo.
USawule wathi kuMikhali: “Ungikhohliseleni kanje, uvumele isitha sami ukuba sihambe, siphunyuke na?” UMikhali wamphendula uSawule, wathi: “UDavide uthe kimi: ‘Ngivumele ngihambe; kungani ngizoze ngikubulale na?’ ”
UDavide wabaleka, waphunyuka, waya kuSamuweli eRama. Wambikela konke uSawule ayekwenze kuye. Yena noSamuweli bahamba bayohlala eNayothi.
Kwabikwa kuSawule, kwathiwa: “Bheka, uDavide useNayothi, eRama.”
USawule wathuma izithunywa ukuba ziyolanda uDavide. Kwathi lapho zibona iviyo labaphrofethi bephrofetha, kumi uSamuweli engumholi wabo, uMoya kaNkulunkulu wehlela ezithunyweni zikaSawule, nazo zaphrofetha.
Lokho kwabikelwa uSawule, wabuye wathumela ezinye izithunywa; nazo zaphrofetha. USawule waphinda futhi wathumela ezinye izithunywa ngokwesithathu; nazo zaphrofetha.
USawule wayeseya eRama, wafika emthonjeni eSeku, wabuza wathi: “Ukuphi uSamuweli noDavide na?” Kwathiwa: “BaseNayothi eRama.”
Wayeseya khona eNayothi eRama, uMoya kaNkulunkulu wehlela naphezu kwakhe, wayehamba ephrofetha, waze wayofika eNayothi, eRama.
USawule wakhumula izingubo zakhe, waphrofetha phambi kukaSamuweli. Walala phansi enqunu lonke lolo lusuku nabo bonke lobo busuku. Yingakho abantu bathi: “Kanti noSawule uphakathi kwabaphrofethi na?”
UDavide wabaleka eNayothi eRama, waya kuJonathani, wathi kuye: “Ngenzeni na? Liyini icala lami? Siyini isono sami phambi kukayihlo ukuba afune ukuphila kwami na?”
Wathi kuye: “Qha, ngeke kwenzeke lokho; awuyukufa. Ubaba akukho akwenza engangitshelanga khona, noma ngabe kukhulu noma ngabe kuncane; pho kungani ukuba ubaba angifihlele lokho na? Akusoze kwenzeka.”
UDavide wabuye wafunga, wathi: “Uyihlo wazi kahle ukuthi ngifumene umusa emehlweni akho; uthe: ‘UJonathani makangazi ngalokhu, funa abe nosizi.’ Kepha ngifunga ngiyagomela phambi kukaSimakade naphambi kwakho, sinye vo isinyathelo phakathi kwami nokufa.”
UJonathani wayesethi kuDavide: “Noma yini inhliziyo yakho ekufunayo, ngiyokwenzela khona.”
UDavide wathi kuJonathani: “Uyabona-ke, kusasa izakwethwasa inyanga; impela kufanele ngihlale nenkosi esidlweni, kepha ngivumele ukuba ngihambe, ngiyocasha endle kuze kube wusuku lwesithathu kusihlwa.
Uma uyihlo ebona ukuthi angikho, ubothi: ‘UDavide ucelile impela ukuba aphuthume eBhethlehema emzini wakubo, ngokuba ngalesi sikhathi kwenziwa umhlatshelo waminyaka yonke owenzelwa wonke umndeni wakubo.’
Uma uyihlo ethi: ‘Kulungile,’ inceku yakho iyobe iphephile, kodwa uma ethukuthela ebila, uyokwazi ukuthi usophe ukuyenzakalisa.
Ngakho-ke yenzele isihawu inceku yakho, lokhu wenzile nayo isivumelwano sikaSimakade. Uma nginecala, ngibulale wena, uzongiyiselani kuyihlo na?”
UJonathani wathi: “Ungakucabangi nakukucabanga lokho, ngoba uma kukhona nokuncane nje okubi engazi ukuthi kuhlongozwa ngubaba ngawe, bengingeke yini ngikutshele ngakho na?”
UDavide wayesethi kuJonathani: “Ngubani oyakungitshela, uma mhlawumbe uyihlo ekuphendule kabi na?”
UJonathani wathi kuDavide: “Woza siye endle.” Baphuma bobabili, baya endle.
UJonathani wathi kuDavide: “Ngiyethembisa ngoSimakade uNkulunkulu ka-Israyeli, ukuthi nxa ngimbuza ubaba ngalesi sikhathi kusasa noma ngomhlomunye, uma ekhuluma okuhle ngawe Davide, ngiyakuthumela kuwe ngikwazise.
USimakade makenze kanjalo kuJonathani, kuphindwe futhi uma ubaba ehlose ukukwenza okubi ngingakwazisi lokho, bese ngikuvumela ubaleke ukuze uphephe. USimakade makabe nawe, njengalokhu ayenobaba.
Uma ngisaphila ngikhombise isihawu sikaSimakade, kodwa uma ngifa,
ungayeki ukwenzela abendlu yami ububele, ngisho noma uSimakade eseziqothule zonke izitha zikaDavide emhlabeni.”
UJonathani wayesenza isivumelwano nabendlu kaDavide, wathi: “Sengathi uSimakade angaziqeda nya izitha zikaDavide.”
UJonathani waphinda wamfungisa mayelana nokumthanda kwakhe, ngokuba wayemthanda njengoba ezithanda yena.
UJonathani wayesethi kuye: “Kusasa ngukwethwasa kwenyanga; uyobonakala ukuthi awukho, isihlalo sakho sizohlala singenamuntu.
Kuyothi ngosuku lwesithathu, bese wehla masinyane, uye kuleyo ndawo owawucashe kuyo ngosuku lwesigameko leso; uhlale ngasetsheni e-Ezeli.
Ngiyociba imicibisholo emithathu ngaseceleni kwalo, kube sengathi ngiciba inkololo.
Uyabona, ngiyothumela umfana, ngithi kuye: ‘Hamba ucinge imicibisholo.’ Uma ngithi kumfana: ‘Bheka, inganeno kwakho, yithathe,’ ubokuza ngokuba uyobe uphephile, kungekho ngozi; ngifunga ngiyagomela phambi kukaSimakade.
Kepha uma ngithi kumfana: ‘Bheka, imicibisholo ingale kwakho,’ hamba, ngokuba uSimakade ukuhambisile.
Mayelana nodaba esilukhulumile, uyabona-ke, uSimakade uphakathi kwami nawe kuze kube phakade.”
UDavide waphuthuma wayocasha endle. Kwakungukwethwasa kwenyanga. Inkosi yahlala phansi ukuze idle.
Inkosi yahlala esihlalweni sayo njengakwezinye izikhathi, isihlalo esingasodongeni; uJonathani wema, u-Abhineri wahlala ngaseceleni kukaSawule, kodwa indawo kaDavide yayingenamuntu.
Ngalolo lusuku uSawule akashongo lutho, ngokuba wacabanga, wathi: “Hleze kukhona okuthile okumehlele; akahlambulukile, impela akahlambulukile.”
Kwathi ngosuku olulandelayo lokwethwasa kwenyanga, indawo kaDavide isalokhu ingenamuntu, uSawule wathi kuJonathani, indodana yakhe: “Kungani indodana kaJese ingafikanga esidlweni izolo nanamuhla na?”
UJonathani wamphendula uSawule, wathi: “UDavide wangicela impela ukuba aye eBhethlehema,
wathi: ‘Ngivumele ukuba ngihambe, ngokuba umndeni wakithi unomhlatshelo emzini; umfowethu ungiyalile ukuba ngibe khona. Manje-ke uma ngifumene umusa emehlweni akho, vuma ngihambe ngiyobona abafowethu.’ Yingakho-ke engafikanga etafuleni lenkosi.”
Intukuthelo kaSawule yayisimvuthela uJonathani, wathi kuye: “Wena, ndodana yowesifazane owonakele noyisihlubuki! Uthi angazi ukuthi wena ukhethe indodana kaJese kunoyihlo, nehlazo lakho nehlazo lobunqunu bukanyoko na?
Ngokuba ngazo zonke izinsuku indodana kaJese isaphila emhlabeni awuyukuzinza wena nombuso wakho. Ngalokho thumela umlande eze kimi, ngoba kufanele ukuba afe.”
UJonathani wamphendula uSawule uyise, wathi kuye: “Uyobulawelwani? Wenzeni na?”
USawule wamciba ngomkhonto efuna ukumgwaza ngawo; uJonathani wase azi ukuthi uyise uhlose ukubulala uDavide.
UJonathani wasuka etafuleni ethukuthele; akadlanga kudla ngosuku lwesibili lwenyanga, ngokuba wayenosizi ngenxa kaDavide, kwazise uyise wayemhlazisile.
Kwathi ngakusasa ekuseni uJonathani waphuma, waya endle ngesikhathi ababenqumelene sona noDavide; wayehamba nomfana omncane.
Wathi kumfana wakhe: “Gijima, ufune imicibisholo engiyicibileyo.” Esagijima umfana, uJonathani waciba umcibisholo phambi kwakhe.
Esefikile umfana lapho umcibisholo wawucitshelwe khona nguJonathani, uJonathani wamemeza engasemuva komfana, wathi: “Umcibisholo awungaphambi kwakho na?”
Waqhubeka uJonathani wamemeza engasemuva komfana, ethi: “Shesha, uphuthume, ungemi.” Umfana kaJonathani wayiqoqa imicibisholo, weza nayo kumniniwakhe.
Umfana wayengazi lutho, leyo ndaba yayaziwa kuphela nguJonathani noDavide.
UJonathani wanika umfana wakhe izikhali zakhe, wathi kuye: “Hamba, uziyise emzini.”
Esehambile umfana, uDavide wavuka ngaseningizimu, wawa phansi ngobuso bakhe, wakhothama kathathu; bangana, bakhala, yilowo nalowo ekhalela umngani wakhe, uDavide wakhala kakhulu.
UJonathani wathi kuDavide: “Hamba kahle, lokhu sobabili sifunge igama likaSimakade, sathi: ‘USimakade uzokuba phakathi kwami nawe naphakathi kozalo lwami nozalo lwakho kuze kube phakade.’ ” Wayesesukuma uDavide, wahamba, uJonathani wangena emzini.
UDavide wayeseya eNobhi ku-Ahimelekhi, umphristi. U-Ahimelekhi wamhlangabeza uDavide ethuthumela, wathi kuye: “Kungani uhamba wedwa, ungakhashwa muntu na?”
UDavide wathi ku-Ahimelekhi, umphristi: “Inkosi ingithume udaba olubucayi, yangidonsa ngendlebe yathi: ‘Makungabi bikho muntu ozwa ngalolu daba engikuthume lona.’ Izinsizwa zami zingilinde ndawana thizeni.
Ngakho-ke yini onayo lapho? Nginike izinkwa eziyisihlanu noma yini nje ekhona.”
Umphristi wamphendula uDavide, wathi: “Asikho isinkwa esijwayelekile enginaso, kodwa kukhona isinkwa esingcwele, izinsizwa zingasidla kuphela uma zizigcinile esifazaneni.”
UDavide wamphendula umphristi, wathi: “Impela abesifazane abavunyelwe ukuza kithi kulezi zinsuku; izitsha zezinsizwa zazingcwele lapho ngiphuma nazo; noma lolu kuluhambo olungengcwele, izitsha zazo zisengcwele nanamuhla.”
Umphristi wayesemnika isinkwa esingcwele, kwazise sasingekho esinye isinkwa lapho, kuphela esoBukhona esasisuswe phambi kukaSimakade ngesikhathi kubekwa esisha esishisayo.
Ngalolo lusuku kwakukhona umuntu owayengomunye wezinceku zikaSawule, owayehlaliswe phambi kukaSimakade ukuze afeze okuthile, igama lakhe kunguDowegi wakwa-Edomi, eyinduna yabelusi bakaSawule.
UDavide wayesebuza u-Ahimelekhi, ethi: “Akukho mkhonto noma inkemba lapha na? Angifikanga nenkemba yami noma izikhali zami, ngoba udaba lwenkosi luyaphuthuma.”
Wayesethi umphristi: “Kukhona inkemba kaGoliyathi, umFilisti, owambulala esigodini i-Ela. Ilapho, isongwe ngendwangu emuva kwengubo yamahlombe. Uma uthanda ukuyithatha, yithathe, ngokuba ayikho enye ngaphandle kwaleyo.” UDavide wathi: “Ayikho efana naleyo, nginike yona.”
UDavide wasuka, wabaleka ngalolo lusuku ngenxa yokwesaba uSawule. Waya ku-Akhishi, inkosi yaseGathi.
Izinceku zika-Akhishi zathi kuye: “Lo akusiye yini uDavide, inkosi yezwe na? Kanti akusiye yini ababecula ngaye, besina, bethi: “ ‘USawule ubulale izinkulungwane zakhe, kodwa uDavide izinkulungwane zakhe zilishumi,’ na?”
UDavide wawagcina lawo mazwi enhliziyweni yakhe, futhi wayesemesaba kakhulu u-Akhishi, inkosi yaseGathi.
Ngakho-ke wayiguqula indlela aziphethe ngayo phambi kwabo, wenza sengathi ingqondo yakhe iphambene ngesikhathi ephambi kwabo. Wadweba ezivalweni zamasango, wagxiza amathe, ehla ngesilevu.
U-Akhishi wayesethi ezincekwini zakhe: “Bhekani, niyabona ukuthi lo muntu uyahlanya; pho nimletheleni kimi na?
Ngiswele izinhlanya yini ukuba ningaletha lo muntu azozenza uhlanya phambi kwami? Angangena yini endlini yami lo onjena?”
UDavide wasuka lapho, wabalekela emgedeni e-Adulamu. Abafowabo nabo bonke abendlu kayise bekuzwa lokho, behlela khona, baya kuye.
Kwaqoqana bonke abahluphekayo, abanezikweletu, nabo bonke abadabukile enhliziyweni, yena waba yinduna ebaphethe. Babebalelwa cishe ema-400.
UDavide wasuka lapho, waya eMizpha, kwaMowabi, wathi enkosini yakwaMowabi: “Ngicela ukuba ungikhoselisele ubaba nomama, ngize ngazi ukuthi uNkulunkulu uyakungenzelani.”
Wabayisa enkosini yakwaMowabi, bahlala nayo zonke izinsuku uDavide esenqabeni.
Umphrofethi uGadi wathi kuDavide: “Ungaqhubeki uhlale enqabeni, kodwa hamba uye kwaJuda.” Wasuka uDavide, wahamba waze wayofika ehlathini eHerethi.
USawule wezwa ukuthi uDavide nabantu ayekanye nabo babebonakele. USawule wayeseGibheya, ehleli phansi kwesihlahla somthamariske egqumeni, ephethe umkhonto esandleni, izinceku zakhe zonke zazimi naye.
USawule wathi ezincekwini zakhe ezazimile: “Lalelani lapha nina bakwaBhenjamini; indodana kaJese yiyo yini ezoninika nonke amasimu nezivini, inenze nonke nibe yizinduna zezinkulungwane nezinduna zamakhulu na?
Nina nonke ningenzele ugobe, akwaze kwaba bikho ongiluma indlebe ukuthi indodana yami yenza isivumelwano nendodana kaJese. Akubanga bikho kini ongidabukelayo nongitshelayo ukuthi indodana yami ingivusele inceku yami ukuba ingilalele unyendle njengoba yenza namuhla.”
UDowegi wakwa-Edomi owayemi nezinceku zikaSawule waphendula, wathi: “Ngayibona indodana kaJese ifika eNobhi ku-Ahimelekhi, indodana ka-Ahithubi.
Wayibuzela kuSimakade, wayinika umphako nenkemba kaGoliyathi, umFilisti.”
Inkosi yayisithumela ukuba kuyobizwa u-Ahimelekhi, umphristi, indodana ka-Ahithubi, nendlu yonke kayise, abaphristi ababeseNobhi; bonke beza enkosini.
USawule wathi: “Lalela, wena ndodana ka-Ahithubi.” Waphendula wathi: “Ngilapha, nkosi yami.”
USawule wathi kuye: “Ningenzeleleni ugobe wena nendodana kaJese lapho uyinika isinkwa, nenkemba, wayibuzela kuNkulunkulu ukuba imelane nami, ingilalele unyendle njenganamuhla na?”
U-Ahimelekhi wayiphendula inkosi, wathi: “Ngubani kuzo zonke izinceku zakho othembeke njengoDavide, umkhwenyana wenkosi, nenduna yabaqaphi bakho, nodumileyo endlini yakho na?
Ngiqale namuhla yini ukumbuzela kuSimakade na? Qha, akunjalo; inkosi mayingabeki cala encekwini yayo, nakuyo yonke indlu kababa, ngokuba inceku yakho ibingazi lutho mpela ngalokhu.”
Inkosi yayisithi: “Impela uzakufa nokufa wena Ahimelekhi, nayo yonke indlu kayihlo.”
Inkosi yathi ezigijimini ezazimi ngakuyo: “Phendukani, nibulale abaphristi bakaSimakade, ngokuba nabo bahlangene noDavide, bathe bazi ukuthi uyabaleka, kodwa abaze bangitshela.” Kepha izinceku zenkosi azivumanga ukwelula isandla sazo zibulale abaphristi bakaSimakade.
Inkosi yathi kuDowegi: “Phenduka nawe, ubabulale abaphristi.” UDowegi wakwa-Edomi waphenduka, wababulala abaphristi ababalelwa ema-85, ababembethe ingubo yamahlombe, ngalolo lusuku.
INobhi, umuzi wabaphristi wawubhubhisa ngenkemba, abesilisa nabesifazane, izingane nabancelayo, izinkabi, izimbongolo nezimvu, wakubhubhisa ngenkemba.
Kwaphunyuka indodana eyodwa ka-Ahimelekhi, indodana ka-Ahithubi ogama layo ngu-Abhiyathara, yabaleka, yalandela uDavide.
U-Abhiyathara wambikela uDavide ukuthi uSawule ubulale abaphristi bakaSimakade.
UDavide wathi ku-Abhiyathara: “Ngazi ngalolo lusuku mhla uDowegi wakwa-Edomi elapho ukuthi impela uyakumtshela uSawule; yimi imbangela yokufa kwabo bonke abendlu kayihlo.
Hlala nami, ungesabi, ngokuba ofuna ukuphila kwami nokwakho uyakufuna, kodwa uzovikeleka lapha kimi.”
Abantu bambikela uDavide, bathi: “Bheka, amaFilisti alwa neKheyila, aphanga izibuya.”
UDavide wabuza kuSimakade, wathi: “Ngihambe yini ngiyowabulala lawo maFilisti na?” USimakade wathi kuDavide: “Hamba uwabulale amaFilisti, usindise iKheyila.”
Abantu bakaDavide bathi kuye: “Uyabona-ke, siyesaba lapha kwaJuda; kangakanani-ke uma sesiya eKheyila, silwe namabutho amaFilisti na?”
UDavide waphinda wabuza kuSimakade. USimakade wamphendula wathi: “Suka wehlele eKheyila, ngokuba amaFilisti ngizowanikela esandleni sakho.”
UDavide namabutho akhe baya eKheyila, balwa namaFilisti, badla izinkomo zawo, bawashaya bawaqothula. Wayesezihlenga uDavide izakhamuzi zaseKheyila.
Ngesikhathi u-Abhiyathara, indodana ka-Ahimelekhi, ebaleka eya kuDavide eKheyila, wehla ephethe ingubo yamahlombe ngesandla sakhe.
Kwabikwa kuSawule ukuthi uDavide ufikile eKheyila. Wayesethi uSawule: “UNkulunkulu umkhaphele esandleni sami, ngokuba uzivalele ngokungena emzini onamasango nemigoqo.”
USawule wabiza abantu bonke ukuba baye empini, behlele eKheyila, bavimbezele uDavide nabantu bakhe.
UDavide wayazi ukuthi uSawule uceba okubi ngaye; wathi ku-Abhiyathara, umphristi: “Letha ingubo yamahlombe.”
Wayesethi uDavide: “Simakade, Nkulunkulu ka-Israyeli, inceku yakho izwile ngokweqiniso ukuthi uSawule ufuna ukuza eKheyila azobhubhisa umuzi ngenxa yami.
Abantu baseKheyila bayakunikela yini ngami esandleni sakhe na? USawule uyakwehla yini njengalokhu inceku yakho izwile na? Simakade Nkulunkulu ka-Israyeli, ake uyitshele inceku yakho.” Wathi uSimakade: “Uyakwehla.”
Wayesethi uDavide: “Abantu baseKheyila bayakungikhaphela yini mina nabantu bami esandleni sikaSawule na?” Wathi uSimakade: “Bayakukukhaphela.”
Wayesesuka uDavide nabantu bakhe kungathi abangama-600, baphuma eKheyila, basabalala. Kwabikwa kuSawule ukuthi uDavide ubalekile eKheyila; wayeseyeka ukuya lapho.
UDavide wahlala ehlane ezinqabeni, wahlala kwelezintaba ehlane iZifi. USawule wamfuna zonke izinsuku, kodwa uNkulunkulu akamnikelanga esandleni sakhe.
UDavide wabona ukuthi uSawule uphumele ukumbulala; uDavide wayesehlane eZifi eHoreshi.
Kwasuka uJonathani, indodana kaSawule, waya kuDavide eHoreshi, wamqunga isibindi ngenxa kaNkulunkulu.
Wathi kuye: “Ungesabi, ngokuba isandla sikaSawule, ubaba, asiyukukufumana. Wena uyakubusa phezu kuka-Israyeli, mina ngiyoba ngowesibili embusweni; noSawule ubaba uyakwazi lokho.”
Bobabili benza isivumelwano phambi kukaSimakade. UDavide wahlala eHoreshi, uJonathani waya endlini yakhe.
Kwase kwenyuka abaseZifi, baya kuSawule eGibheya, bathi: “UDavide akacashile yini phakathi kwethu ezinqabeni eHoreshi egqumeni iHakhila, eliseningizimu yeJeshimoni na?
Manje nkosi, uma ufuna ukwehla, ungehla, thina sizomkhaphela esandleni senkosi.”
USawule wathi: “USimakade makanibusise, ngoba ningizwele.
Ake nihambe, niqinisekise impela, nazi, futhi nibone ukuthi ukuphi nokuthi ngubani ombone lapho, ngokuba ngizwile ukuthi wenza izinto ngobuhlakani obumangalisayo.
Hlolani, nizazi zonke izindawo lapho ecasha khona, bese nibuya nize kimi nodaba olunesiqiniseko. Mina ngizohamba nani, uma esezweni, ngiyomfuna phakathi kwezinkulungwane zabakwaJuda.”
Base besuka, bahamba phambi kukaSawule baya eZifi, kodwa uDavide nabantu bakhe babesehlane eMahoni e-Araba, eningizimu yehlane.
USawule nabantu bakhe baphuma bayomfuna uDavide. UDavide wabikelwa ngalokho, wayesehlela edwaleni, wahlala ehlane eMahoni. USawule wakuzwa lokho, wamlandela uDavide ehlane eMahoni.
USawule wahamba ngapha kwentaba, uDavide nabantu bakhe bahamba ngale kwentaba. UDavide washesha wambalekela uSawule, ngokuba uSawule nabantu bakhe bamhaqa uDavide nabantu bakhe ukuze bababambe.
Kwafika isithunywa kuSawule, sathi: “Phuthuma uze, ngokuba amaFilisti alihlasele izwe.”
USawule wanqandeka ekulandeleni uDavide, wahamba wayokulwa namaFilisti. Yingakho leyo ndawo yabizwa ngokuthi yiSela Hamalekothi.
UDavide wasuka lapho wakhuphuka wayohlala ezinqabeni e-Eni Gedi.
Kwathi lapho uSawule esebuyile ukuxosha amaFilisti, kwabikwa kuye ukuthi: “Bheka, uDavide usehlane e-Eni Gedi.”
USawule wathatha abantu abayizi-3 000 ababekhethwe phakathi kwawo wonke u-Israyeli, wahamba nabo, bayofuna uDavide nabantu bakhe emaDwaleni amaGogo.
Wafika ezibayeni zezimvu ezaziseceleni kwendlela, kwakukhona umgede lapho; uSawule waphambukela khona ukuba ayozembesa izinyawo. UDavide nabantu bakhe babehlezi emuva phakathi emgedeni.
Abantu bakaDavide bathi kuye: “Bheka, nantu usuku uSimakade akhuluma ngalo kuwe, ethi: ‘Uyabona-ke, ngiyakunikela isitha sakho esandleni sakho, wenze okubona kukuhle kuwe.’ ” Wayesesuka uDavide, wasika ngasese umphetho wengubo kaSawule.
Emveni kwalokho uDavide wazisola enhliziyweni yakhe, ngoba wayesike umphetho wengubo kaSawule.
Wayesethi kubantu bakhe: “Akufanele neze, Simakade ukuba ngenze into enjengale enkosini yami, ogcotshiweyo kaSimakade, ngimbulale, ngokuba ungogcotshiweyo kaSimakade.”
UDavide wabathiya abantu bakhe ngalawo mazwi, akaze abavumela ukuba bamvukele uSawule. USawule wasuka emgedeni, waqhubeka nohambo.
UDavide naye wasuka kamuva, waphuma emgedeni, wammemeza uSawule, wathi: “Nkosi yami, nkosi!” USawule wabheka emuva, uDavide wakhothama wathi mbo ngobuso, wakhuleka.
UDavide wayesethi kuSawule: “Uwalaleleleni amazwi abekhulunywa ngabantu abathi: ‘Bheka, uDavide ufuna ukukulimaza’?
Uyabona-ke, namuhla uzibonele ngawakho amehlo ukuthi uSimakade ubekunikele esandleni sami emgedeni. Abanye bathe mangikubulale, kepha ngakuhawukela, ngathi: ‘Angisoze ngiyibulale inkosi yami, ngokuba ingogcotshiweyo kaSimakade.’
Futhi-ke baba, awubheke nanku umphetho wengubo yakho esandleni sami ngokuba ngiwusikile, angikubulalanga. Yazi, ubone ukuthi akukho nhloso embi kimi ngawe; angikonanga ngalutho, kodwa nguwe ozingela impilo yami ukuze ungibulale.
USimakade makehlulele phakathi kwami nawe; uSimakade angiphindiselele kuwe, kodwa isandla sami asiyukuba phezu kwakho.
Kunjengesaga sasendulo esithi: ‘Kwababi kuvela ububi,’ yingakho-ke nje isandla sami singeke sikubulale.
“Inkosi yakwa-Israyeli iphumele ukulandela bani na? Uxosha bani? Ukuhubha inja efileyo, intwakumba eyodwa nje.
USimakade makabe ngumehluleli, ehlulele phakathi kwami nawe, abheke, angimele, angikhulule esandleni sakho.”
Kwathi uDavide eseqedile ukukhuluma lawo mazwi kuSawule, uSawule wathi: “Ngabe yizwi lakho leli, ndodana yami, Davide, na?” USawule wadazuluka, wakhala.
Wayesethi kuDavide: “Ulungile kunami, ngokuba wena ungiphindisele ngokuhle, kepha mina ngikuphindisele ngokubi.
Namuhla ukuveze obala ukuthi ungenzele okuhle kanjani, ngokuba uSimakade unginikele esandleni sakho, kodwa wena awungibulalanga.
Ngubani owake wathi esesifumene isitha sakhe, wasiyeka sahamba siphephile na? USimakade makakuphindisele ngokuhle ngalokhu okwenze kimi namuhla.
Ngakho-ke bheka, ngiyazi, ngiqinisekile ukuthi uyakuba yinkosi, nokuthi umbuso ka-Israyeli uyakuqiniswa esandleni sakho.
Ngakho-ke funga kimi ngoSimakade ukuthi awuyukulubhubhisa uzalo lwami, futhi awuyukulesula igama lami endlini kababa.”
UDavide wafunga kuSawule. USawule wayesehamba, kodwa uDavide nabantu bakhe bakhuphukela enqabeni.
USamuweli wafa; u-Israyeli wonke wahlangana, wamlilela, wawusummbela ngasendlini yakhe eRama. UDavide wayesesuka, ehlela ehlane ePharanu.
Kwakukhona umuntu eMahoni owayenemfuyo eKharmeli. Lowo muntu wayecebe kakhulu, enezimvu eziyizi-3 000 nezimbuzi eziyi-1 000. Izimvu zakhe wayezigundela eKharmeli.
Igama lalowo muntu kwakunguNabali, umkakhe kungu-Abhigayili, engowesifazane okhaliphile, futhi emuhle, kodwa indoda yakhe yayilukhuni, inenkohlakalo emisebenzini yayo; yayingeyomndeni kaKhalebhu.
UDavide esesehlane wezwa ukuthi uNabali ugunda izimvu zakhe.
UDavide wathumela izinsizwa ezilishumi, wathi kuzo: “Khuphukelani eKharmeli, niye kuNabali, nifike ningikhonzele kuye,
nithi kumfowethu: ‘Ukuthula makube kuwe, ukuthula makube sendlini yakho, ukuthula makube kukho konke onakho.
“ ‘Manje ngizwile ukuthi unabagundi bakho lapho. Abelusi bakho bebenathi, asibalimazanga, abalahlekelwanga yilutho ngazo zonke izinsuku beseKharmeli.
Buza izinsizwa zakho, zizokutshela; ngakho-ke izinsizwa zami mazifumane umusa emehlweni akho, ngokuba sifike ngosuku oluhle. Ake uziphe izinceku zakho nendodana yakho uDavide, noma yini onayo.’ ”
Izinsizwa zikaDavide zahamba, zawasho kuNabali wonke lawo mazwi njengoba enjalo egameni likaDavide, zase zilinda.
UNabali waziphendula izinceku zikaDavide, wathi: “Ngubani uDavide na? Ngubani indodana kaJese? Namuhla kukhona izinceku eziningi ezeqa emakhosini azo.
Ngisithathe yini isinkwa sami, namanzi ami, nenyama engikuhlabele abagundi bami, ngikuphe abantu engingabazi ukuthi bavelaphi na?”
Izinsizwa zikaDavide zaphenduka kuleyo ndlela ezaziyithathile zabuyela emuva, zabika kuye wonke lawo mazwi.
UDavide wathi kubantu bakhe: “Bhincani, kube yilowo nalowo inkemba yakhe.” Zabhinca-ke, kwaba yilowo nalowo inkemba yakhe; naye uDavide wabhinca inkemba yakhe. Kwakhuphuka abantu kungathi abangama-400 belandela uDavide, kwathi abangama-200 basala nempahla.
Enye yezinsizwa yamtshela umkaNabali u-Abhigayili, yathi: “Bheka, uDavide uthumele izithunywa zisuka ehlane ukuzobingelela inkosi yethu, kepha yona yazithukuthelela.
Labo bantu basiphatha kahle, asilimalanga, asilahlekelwanga yilutho zonke izinsuku sihambisana nabo sisendle;
babe lugange kithi ubusuku nemini, sonke isikhathi sinabo salusa izimvu.
Ngakho yazi-ke, ubone ukuthi uzokwenzenjani, ngokuba ububi buyayinyonyobela inkosi yethu nendlu yayo yonke, kwazise ingumuntu ongazihloniphi ukuba umuntu angakhuluma nayo.”
U-Abhigayili waphangisa, wathatha izinkwa ezingama-200, izimvaba ezimbili zewayini, nezimvu eziyisihlanu ezilungisiweyo, amaseya ayisihlanu otshwele, izigaxa eziyikhulu zezithelo zomvini ezomileyo, nezigaxa ezingama-200 zamakhiwane, wakukhweza ezimbongolweni.
Wathi ezincekwini zakhe: “Hambani phambi kwami; ngiyanilandela.” Kepha akayitshelanga lutho indoda yakhe, uNabali.
Kwathi esagibele embongolweni, ehla endaweni esithekileyo esentabeni; kwase kwehlela kuye uDavide nabantu bakhe ukuba bahlangane naye, nembala wahlangana nabo.
UDavide wayethe: “Impela konke kuyize ukuthi mina ngakuvikela konke lo muntu anakho, manje usengibonga ngokwenza into embi kanje kimi.
UNkulunkulu makenze kanjalo kuzo zonke izitha zikaDavide, anezelele kulokho, uma ekuseni ngakusasa ngizoshiya noma oyedwa wesilisa ongowakhe.”
Lapho u-Abhigayili embona uDavide, washesha wehla embongolweni yakhe, wakhothama wathi mbo ngobuso phambi kukaDavide.
Wayewele ngasezinyaweni zikaDavide, wayesethi: “Sale usulethwesa mina lelo cala nkosi yami, ngicela uyivumele incekukazi yakho ikhulume nawe, uyilalele ukuthi ithini incekukazi yakho.
Inkosi yami mayingabeki inhliziyo yayo kulo muntu okhohlakele, uNabali, ufuze igama lakhe, unjalo nje yena; nguNabali igama lakhe, uyisiwula. Kepha mina ncekukazi yakho angizibonanga izinsizwa zenkosi yami eyayizithumile.
“Nkosi yami, ngiyafunga ngoSimakade, nangempilo yakho uqobo, njengoba uSimakade ekuvimbele ukuba ube necala legazi nokuba uziphindiselele ngesandla sakho; mazibe njengoNabali izitha zakho nalabo abafuna ukubulala inkosi yami.
Manje-ke lesi sipho esilethwa yincekukazi yakho enkosini yami, masinikwe izinsizwa ezilandela inkosi yami.
Thethelela, ngiyakucela, icala lencekukazi yakho, ngokuba uSimakade uyakuyenzela nokuyenzela inkosi yami indlu eqinileyo impela, lokhu inkosi yami ilwa izimpi zikaSimakade; ububi abuyukufunyanwa kuwe zonke izinsuku zakho.
Noma kusukuma umuntu ukuba akuxoshe efuna impilo yakho, umphefumulo wenkosi yami uyobe uboshiwe emshuqulwini wabaphilayo kuSimakade uNkulunkulu wakho. Imiphefumulo yezitha zakho uyakuyijikijela kungathi iphakathi kwendwayimana.
Kuyothi lapho uSimakade esekwenzile konke okuhle enkosini yami njengoba ekhulumile ngawe, akumise ube ngumbusi kwa-Israyeli.
Lokhu akuyukuba yisikhubekiso kuwe, kungabi nesazela enhliziyweni yenkosi yami ukuthi uchithe igazi ngeze nokuthi inkosi yami iziphindiselele. Kuyothi lapho uSimakade eseyenzele inkosi yami okuhle, iyikhumbule incekukazi yakho.”
UDavide wayesethi ku-Abhigayili: “Makadunyiswe uSimakade uNkulunkulu ka-Israyeli okuthume namuhla ukuba ungihlangabeze.
Makubusiswe ukuhlakanipha kwakho, ubusiswe nawe ongivimbele namuhla ukungena ecaleni legazi nokuziphindiselela ngesandla sami.
Impela ngifunga ngiyagomela phambi kukaSimakade uNkulunkulu ka-Israyeli ongivimbile ukuba ngingakulimazi, uma bewungazange usheshe uze ukuzongihlangabeza, impela ngabe akusalanga nakunye okukaNabali okwesilisa okungokwakhe, ekuseni kusasa.”
UDavide wemukela esandleni sika-Abhigayili lokho ayemlethele khona; wayesethi kuye: “Buyela endlini, uphephile, ngikuzwile okushoyo, ngiyasemukela isicelo sakho.”
U-Abhigayili wabuyela kuNabali; wafica enesiphihli sedili endlini yakhe, kungathi yidili lenkosi. Inhliziyo kaNabali yayithakasile ithe cosololo, ephuze kakhulu. U-Abhigayili akamtshelanga lutho oluncane nolukhulu kwaze kwaba sekuseni.
Ekuseni, selidamukile iwayini kuNabali, umkakhe wamtshela ngalezo zinto, inhliziyo yakhe yaphelelwa ngamandla, waba njengetshe.
Kwathi emveni kwezinsuku ezilishumi uSimakade wamshaya uNabali, wafa.
UDavide wezwa ukuthi uNabali ufile, wathi: “Makadunyiswe uSimakade omele indaba yehlazo lami lapho uNabali engihlazisa, ovimbele inceku yakhe ebubini, wabuyisela ububi bukaNabali kuye.” UDavide wathumela wakhuluma no-Abhigayili ukuba amthathe abe ngumkakhe.
Izinceku zikaDavide sezifikile ku-Abhigayili eKharmeli, zakhuluma naye, zathi: “UDavide usithume kuwe ukuba akuthathe, ube ngumkakhe.”
Wasukuma, wakhothama, ubuso bakhe bubheke phansi, wathi: “Bheka, incekukazi yakho mayibe yisigqila esigeza izinyawo zezinceku zenkosi yami.”
U-Abhigayili washesha wasuka, wagibela embongolweni kanye nezintombi zakhe eziyisihlanu ezazihamba naye; walandela izithunywa zikaDavide, waba ngumkakhe.
UDavide wathatha no-Ahinohama waseJizreyeli; baba ngomkakhe bobabili.
USawule wayesemganisile uMikhali indodakazi yakhe, wamganisela uPhalithi, indodana kaLayishi, waseGalimi.
Abantu baseZifi baya kuSawule eGibheya, bathi: “UDavide akacashile yini entabeni iHakhila engaphambi kweJeshimoni, na?”
USawule wasuka wehlela ehlane eZifi ukuyofuna uDavide ehlane, ehamba nabantu abakhethiweyo bakwa-Israyeli abayizi-3 000.
USawule wakanisa entabeni iHakhila engaphambi kwehlane, ngasendleleni. UDavide wahlala ehlane, nokho wabona ukuthi uSawule uyamlandela lapho ehlane.
UDavide wathumela izinhloli, ukuze aqinisekise ukuthi nguSawule zinqotho ofikile.
UDavide wasuka, waya lapho kwakukanise khona uSawule; wayibona indawo lapho uSawule ayehleli khona no-Abhineri, indodana kaNeri, umkhuziwempi yakhe. USawule wayelele enkanjini, abantu bemngunge nxazonke.
UDavide wakhuluma ku-Ahimelekhi, umHethi, naku-Abhishayi, indodana kaZeruya, umfowabo kaJowabe, wathi: “Ngubani ozokwehla nami siye kuSawule enkanjini na?” U-Abhishayi wathi: “Ngizokwehla nawe.”
UDavide no-Abhishayi baya kubantu ebusuku. Bheka, uSawule wayelele zwi enkanjini, umkhonto wakhe ugxunyekwe emhlabathini ngasekhanda lakhe. U-Abhineri nabantu bakaSawule babelele bemzungeze nxazonke.
U-Abhishayi wathi kuDavide: “UNkulunkulu usinikele esandleni sakho isitha sakho namuhla, ngakho-ke mangimbhokode kanye ngomkhonto ngimhlanganise nomhlabathi, ngingamphindi.”
UDavide wathi ku-Abhishayi: “Ungambulali, ngokuba ngubani ongelula isandla sakhe amelane nogcotshiweyo kaSimakade, angabi nacala na?”
UDavide wathi: “Ngifunga ngiyagomela, uSimakade uyakumshaya, noma afikelwe wusuku lokufa, ehlele empini, abhubhe.
Mawungabi bikho nhlobo kimi lowo mcabango wokuba uSimakade angivumele ukuba ngelule isandla ngimelane nogcotshiweyo kaSimakade. Wena thatha umkhonto ongasekhanda lakhe nesigubhu samanzi, sihambe.”
UDavide wayesewuthatha umkhonto nesigubhu samanzi ngasekhanda likaSawule, bahamba. Ababonwanga muntu, akekho owayazi ngalokho, futhi akuvukanga muntu, ngokuba bonke babezunywe ngubuthongo obunzulu obabuvela kuSimakade.
UDavide wayesewelela ngaphesheya, wema esicongweni sentaba ekude, washiya isikhala esikhulu phakathi kwabo.
UDavide wamemeza abantu no-Abhineri, indodana kaNeri, wathi kubo: “Abhineri, awusabeli ngani na?” U-Abhineri waphendula wathi: “Ungubani wena omemeza inkosi na?”
UDavide wambuza u-Abhineri wathi: “Kanti wena awusiye yini umuntu, ukhona yini onjengawe kwa-Israyeli na? Awuyiqaphanga ngani inkosi yakho, inkosi uSawule na? Kufike omunye wabantu ukuzobulala inkosi yakho, inkosi uSawule.
Lokhu okwenzileyo akukuhle. Ngifunga ngiyagomela, nimelwe wukufa, ngokuba anizange niyiqaphe inkosi yenu, ogcotshiweyo kaSimakade. Manje bhekani-ke ukuthi uphi umkhonto wenkosi nesigubhu samanzi esasingasekhanda layo.”
USawule walazi izwi ukuthi ngelikaDavide, wathi: “Yizwi lakho lelo, ndodana yami Davide na?” UDavide wathi: “Yizwi lami, nkosi yami, nkosi.”
UDavide wathi: “Inkosi yami iyihubhelani inceku yayo na? Ngenzeni na? Bubi buni lobu engibenzile na?
Ngakho-ke inkosi yami, inkosi uSawule, mayizwe amazwi enceku yayo. Uma kunguSimakade okwenza ukuba umelane nami, makawamukele umnikelo, kodwa uma kungabantwana babantu, mabaqalekiswe phambi kukaSimakade, ngokuba bangixoshile namuhla ukuba ngingabi nenhlanganyelo efeni likaSimakade, bethi: ‘Hamba ukhonze abanye onkulunkulu.’
Ngalokho igazi lami malingaweli emhlabathini ngikude noSimakade, ngokuba inkosi yakwa-Israyeli iphumele ukufuna intwakumba eyodwa, njengalokhu umuntu ezingela intendele ezintabeni.”
USawule wathi: “Ngonile; buya, ndodana yami, Davide, ngokuba angizukukulimaza futhi, njengoba ukuphila kwami kube yigugu emehlweni akho namuhla; ngenzise okwesiwula, ngidukile kakhulu.”
UDavide waphendula wathi: “Bheka, umkhonto, nkosi! Makuwele enye yezinsizwa, iwulande.
USimakade uyakuphindisela, kube yilowo nalowo ngokulunga kwakhe nangokwethembeka kwakhe, lokhu uSimakade ekunikele esandleni sami namuhla, angivumanga ukwelula isandla sami ngibulale ogcotshiweyo kaSimakade.
Futhi bheka, njengoba ukuphila kwakho kube kukhulu emehlweni ami namuhla, ukuphila kwami makube kukhulu emehlweni kaSimakade; makangisindise ekuhluphekeni konke.”
USawule wathi kuDavide: “Mawubusiswe wena ndodana yami, Davide; uyakwenza izinto ezinkulu, uphumelele kahle.” Wayesebamba indlela yakhe uDavide, noSawule wabamba abeze ngayo, wabuyela endaweni yakhe.
UDavide wathi enhliziyweni yakhe: “Ngelinye ilanga uSawule uzongibulala. Akukho engingakwenza, kungcono ngibaleke, ngiye ezweni lamaFilisti. USawule uzoyeka ukungifuna esifundeni sonke sakwa-Israyeli, bese ngiphunyuka kanjalo esandleni sakhe.”
Wayesesuka uDavide, wawela, yena nabantu abangama-600 ayehamba nabo, waya ku-Akhishi, indodana kaMahokhi, inkosi yaseGathi.
UDavide wahlala no-Akhishi eGathi, yena nabantu bakhe, kwaba yilowo nalowo nabendlu yakhe, uDavide nomkakhe ababili, u-Ahinohama waseJizreyeli no-Abhigayili waseKharimeli, umkaNabali.
Kwabikwa kuSawule ukuthi uDavide ubalekele eGathi; akabe esamfuna futhi.
UDavide wathi ku-Akhishi: “Uma ngifumene umusa emehlweni akho, mabanginike indawo komunye wemizi ukuba ngihlale khona, ngokuba inceku yakho izakuhlalelani nawe emzini wenkosi na?”
U-Akhishi wamnika iZikilagi ngalolo lusuku, ngalokho-ke iZikilagi lingelamakhosi akwaJuda kuze kube namuhla.
UDavide wahlala unyaka nezinyanga ezine ezweni lamaFilisti.
UDavide nabantu bakhe bakhuphuka, bayohlasela amaGeshuri, amaGirizi, nama-Amaleki, ababehlala eTheleme ngendlela eya eShuri kuya eGibhithe.
UDavide walibhubhisa izwe, akaze ashiya muntu ophilayo, owesilisa nowesifazene, wathatha izimvu, izinkabi, izimbongolo, amakameli nezingubo, waya ku-Akhishi.
U-Akhishi wambuza, wathi: “Benihlasele kuphi namuhla na?” UDavide waphendula wathi: “Siye eningizimu kwaJuda, eningizimu kwaJerameli, naseningizimu yelamaKheni.”
UDavide akashiyanga owesilisa nowesifazane ephila ukuze abayise eGathi, ngoba wathi: “Hleze basicebe, bathi: ‘UDavide wenze lokhu nalokhu. UDavide wenza kanjalo zonke izinsuku ehleli ezweni lamaFilisti.’ ”
U-Akhishi wakholwa ngokwakushiwo nguDavide, wathi: “Wenze ukuba abacasukele impela abantu bakubo, abakwa-Israyeli, uzokuba yinceku yami njalo.”
Kwathi ngalezo zinsuku amaFilisti aqoqa amabutho awo ukuba aphume ayokulwa no-Israyeli. U-Akhishi wathi kuDavide: “Yazi ngokweqiniso ukuthi uzophuma impi nami, wena nabantu bakho.”
UDavide wathi ku-Akhishi: “Kunjalo, yikhona uyokwazi ukuthi inceku yakho iyakwenzani.” U-Akhishi wathi kuDavide: “Ngakho-ke ngizokubeka ube ngumqaphi njalo.”
USamuweli wafa; wonke u-Israyeli wamkhalela, wamngcwaba emzini wakhe, eRama. USawule wayebaxoshile ezweni bonke abantu abanamadlozi nabathakathi phakathi kwesizwe.
AmaFilisti abuthana, eza, akanisa eShunemi, noSawule waqoqa wonke u-Israyeli, wakanisa eGilibhowa.
USawule ebona impi yamaFilisti, wesaba, inhliziyo yakhe yathuthumela kakhulu.
USawule wabuza kuSimakade, kodwa uSimakade akamphendulanga ngamaphupho, nge-Urimi noma nangabaphrofethi.
Wayesethi uSawule ezincekwini zakhe: “Ngifuneleni owesifazane onedlozi ukuze ngiye kuye, ngiyobuza.” Izinceku zakhe zathi kuye: “Bheka, kukhona owesifazane onedlozi e-Eni Dori.”
USawule wazifihla, wembatha ezinye izingubo, wahamba nabantu bakhe ababili, bafika kowesifazane ebusuku, wathi: “Ake ungibhulele ngedlozi, ungenyusele lowo engiyakumusho kuwe.”
Owesifazane wathi: “Uyabona-ke, wazi kahle ukuthi uSawule wenzeni, ubabhubhisile ezweni abanamadlozi nabathakathi; manje kungani ungibekela ugibe ukuze ungibulale na?”
USawule wafunga wagomela kowesifazane, wathi: “Ngifunga ngiyagomela phambi kukaSimakade, awuyukwethweswa cala ngalokho.”
Wayesebuza owesifazane, ethi: “Ufuna ngikwenyusele bani na?” Wathi: “Ngenyusele uSamuweli.”
Lapho owesifazane embona uSamuweli, wamemeza ngezwi elikhulu; owesifazane wakhuluma noSawule, wathi: “Ungikhohliseleni na? Ngokuba unguSawule.”
Inkosi yayisithi kuye: “Ungesabi; ubonani na?” Owesifazane wathi kuSawule: “Ngibona unkulunkulu ephuma emhlabathini.”
Wathi kuye: “Unesimo esinjani, na?” Wathi: “Kukhuphuka ixhegu limbozwe ngengubo.” USawule wazi ukuthi nguSamuweli, wakhothama wathi mbo ngobuso emhlabathini.
USamuweli wathi kuSawule: “Ungiphazamiselani ngokuthi ungenyuse na?” USawule waphendula wathi: “Ngihlupheke kakhulu, ngoba amaFilisti alwa nami; uNkulunkulu ungishiyile, akasangiphenduli ngabaphrofethi noma ngamaphupho, yingakho ngikubizile ukuze ungazise ukuthi kumele ngenzenjani.”
USamuweli wathi: “Pho ubuzelani kimi, njengoba uSimakade esekuphendukele, waba yisitha sakho na?
USimakade ukwenzile lokho, njengoba akhuluma ngami: uSimakade uwususile umbuso kuwe, wawunika umakhelwane wakho, uDavide.
Ngokuba awulalelanga izwi likaSimakade, awuthululelanga ulaka lwakhe oluvuthayo phezu kwama-Amaleki, yingakho-ke uSimakade enze lokhu kuwe namuhla.
USimakade uzonikela u-Israyeli nawe esandleni samaFilisti. Kusasa wena namadodana akho, nizokuba nami; uSimakade uzokunikela nempi yabakwa-Israyeli esandleni samaFilisti.”
Ngokuphazima kweso, uSawule wayesewa walala cu emhlabathini, wesaba kakhulu ngenxa yamazwi ayeshiwo nguSamuweli. Akabanga namandla, ngoba wayengakaze akuthi mbibi ukudla lonke lolo lusuku nobusuku bonke.
Owesifazane waya kuSawule, wambona ukuthi wesaba kakhulu, wayesethi kuye: “Bheka, incekukazi yakho ililalele izwi lakho, ngibekile impilo yami engcupheni; ngawalalela amazwi akho owakhulume kimi.
Manje-ke ake ulalele izwi lencekukazi yakho; mangibeke ucezu lwesinkwa phambi kwakho; yidla ukuze uthole amandla bese uqhubeka nendlela yakho.”
Kepha uSawule wenqaba wathi: “Angiyukudla.” Nokho izinceku zakhe nowesifazane bamnxenxa, wayeselalela izwi labo. Wasukuma emhlabathini, wahlala embhedeni.
Owesifazane wayenethole elikhuluphalisiweyo endlini yakhe, washesha walihlaba; wathatha impuphu wayixova, wenza isinkwa esingenamvubelo,
wakuletha phambi kukaSawule naphambi kwezinceku zakhe, badla. Base besuka bengena indlela ngalobo busuku.
AmaFilisti aqoqela wonke amabutho awo e-Afeki; u-Israyeli wayekanise ngasemthonjeni oseJizreyeli.
Amakhosi amaFilisti adlula ngamakhulu nangezinkulungwane; uDavide nabantu bakhe babengabokugcina ukudlula no-Akhishi.
Base bethi abakhuzi bempi yamaFilisti: “Afunani lawa maHebheru lapha na?” U-Akhishi wathi kubo abakhuzi bempi yamaFilisti: “Akusiye yini uDavide, inceku kaSawule, inkosi yakwa-Israyeli, okade enami kulezi zinsuku nakule minyaka na? Angifumananga lutho kuye selokhu ahlubuka weza kimi kuze kube namuhla.”
Abakhuzi bempi yamaFilisti bamthukuthelela, bathi kuye: “Mbuyisele emuva lowo muntu, makabuyele endaweni yakhe ombeke kuyo, angehli nathi aye empini, funa abe yisitha sethu empini. Yini lo angazincengela ngayo enkosini yakhe uma engezincengele ngamakhanda alawo madoda na?
“Lo akusiye yini uDavide ababehlabelela ngaye, besina bethi: “ ‘USawule ubulele izinkulungwane zakhe, kodwa uDavide izinkulungwane zakhe ezilishumi,’ na?”
U-Akhishi wambiza uDavide, wathi kuye: “Ngifunga ngiyagomela phambi kukaSimakade, wena uqotho; ngikubone kukuhle emehlweni ami ukuba uphume futhi ubuye nami empini, ngokuba angifumananga bubi kuwe kusukela ngosuku owafika ngalo kimi kuze kube namuhla, kodwa amakhosi awakuboni kukuhle ukuba uhambe nathi.
Ngakho-ke buyela emuva, uhambe ngokuthula, ungakwenzi okubi phambi kwamakhosi amaFilisti.”
UDavide wathi ku-Akhishi: “Kepha ngenzeni na? Utholeni encekwini yakho, kusukela osukwini engafika ngalo kuwe kuze kube namuhla, ukuba ngingaphumi ukuyokulwa nezitha zenkosi yami, inkosi na?”
U-Akhishi waphendula, wathi kuDavide: “Ngiyazi ukuthi umuhle emehlweni ami, ufana nengelosi kaNkulunkulu, nokho abakhuzi bempi yamaFilisti bathe: ‘Akayukukhuphuka nathi, aye empini.’
Ngakho-ke vuka ngovivi kusasa, wena nezinceku zenkosi yakho ezifike nawe. Sukani ekuseni kakhulu lapho sekuqala ukukhanya, nihambe.”
UDavide nabantu bakhe bavuka ekuseni ngovivi ukuze babuyele ezweni lamaFilisti. AmaFilisti enyukela eJizreyeli.
Kwathi ngosuku lwesithathu lapho uDavide nabantu bakhe befika eZikilagi, bathola ukuthi ama-Amaleki ayehlasele eNegevu naseZikilagi, alinqoba, alishisa ngomlilo.
Ayethumbe nabesifazane ababelapho, kusukela kwabancane kuya kwabadala, awaze abulala muntu, abaqhuba, ahamba nabo.
Lapho uDavide nabantu bakhe befika emzini, bheka, wawushiswe ngomlilo; omkabo, amadodana abo, namadodakazi abo bethunjiwe.
UDavide nabantu ababenaye badazuluka, bakhala, baze baphelelwa ngamandla okulila.
Bobabili omkaDavide, u-Ahinohama waseJizreyeli no-Abhigayili, umkaNabali waseKharimeli, babethunjiwe.
UDavide wayekhathazekile kakhulu, ngoba abantu base bebhunga ngokumkhanda ngamatshe, lokhu izinhliziyo zabo bonke abantu zazinomunyu, ngenxa yamadodana namadodakazi abo. Kepha uDavide wathola amandla kuSimakade uNkulunkulu wakhe.
UDavide wathi ku-Abhiyathara, umphristi, indodana ka-Ahimeleki: “Ake ulethe kimi ingubo yamahlombe.” U-Abhiyathara wayiletha ingubo yamahlombe kuDavide.
UDavide wabuza kuSimakade, wathi: “Ngilixoshe yini lelo viyo na? Ngiyakulifica yini na?” Wamphendula wathi: “Lixoshe, uyakulifica impela, bese ubakhulula bonke.”
UDavide wahamba nabantu abangama-600 ababenaye, waze wafika emfudlaneni iBhesori, lapho kwakukhona insali.
UDavide waqhubeka nokuwaxosha ama-Amaleki yena nabantu abangama-400, kodwa abangama-200 basala ngemuva, ngoba babekhathele ukuba bangawela umfudlana iBhesori.
Bafumana umuntu waseGibhithe endle, bamthatha bamyisa kuDavide. Bamnika isinkwa, wadla, bamnika namanzi, waphuza.
Bamnika ucezu lwesigaxa samakhiwane, nezigaxa ezimbili zamagilebhisi omisiwe, wadla, ayesebuyela kuye amandla akhe, lokhu wayengakaze adle sinkwa noma aphuze manzi izinsuku ezintathu nobusuku obuthathu.
UDavide wathi kuye: “Ungokabani na? Uvelaphi?” Wathi: “Ngiyinsizwa yaseGibhithe, inceku yomAmaleki, kodwa inkosi yami yangishiya, ngokuba ngase nginezinsuku ezintathu ngigula.
Sasihlasele ngaseNegevu eKherethi, nakwaJuda, naseningizimu kaKhalebhu, salishisa ngomlilo iZikilagi, langqongqa.”
UDavide wathi kuyo: “Ungangehlisela kulelo viyo labahlaseli?” Yathi: “Uma ufunga kimi phambi kukaNkulunkulu ukuthi awuyukungibulala noma ungibuyisele enkosini yami; ngizokwehlisela kulabo bahlaseli.”
Yayisimehlisela kubo. Bheka, babehlakazeke indawo yonke; bedla, bephuza, besina ngenxa yempango ababeyidle ezweni lamaFilisti nakwaJuda.
UDavide wababulala kusukela ekushoneni kwelanga kwaze kwahlwa ngakusasa, akuphunyukanga muntu kubo ngaphandle kwezinsizwa ezingama-400 ezagibela amakameli, zabaleka.
UDavide wakukhulula kanjalo konke okwakuthathwe ngama-Amaleki, wabakhulula nomkakhe bobabili.
Akukho namunye owasilela, omncane noma omkhulu, amadodana namadodakazi, impango noma okunye nje ababezithathele khona. UDavide wakubuyisa konke.
UDavide waphanga zonke izimvu nezinkomo. Abantu bakuqhuba phambili, enye imfuyo yalandela ngemuva, babehamba bethi: “Le yimpango kaDavide.”
UDavide wafika kulabo abangama-200 abangakwazanga ukumlandela ngenxa yokukhathala, wayebashiye ngasemfudlaneni iBhesori; baphuma bayohlangabeza uDavide nabantu ababenaye. UDavide wasondela kubo, wababingelela.
Izikhohlakali nabangenamsebenzi walutho kulabo bantu ababehambe noDavide, bathi: “Ngenxa yokuba bengahambanga nathi, asiyukubanika lutho empangweni esiyikhululile, kuphela ukuba bathathe abafazi babo nezingane zabo bahambe.”
Wayesethi uDavide: “Aniyukwenza kanjalo, bafowethu, ngalokho esikuphiwe nguSimakade osilondolozile, walinikela esandleni sethu iviyo elasihlasela.
Ngubani oyakunilalela kule ndaba na? Ngokuba njengesabelo salowo owehlele empini siyakuba njalo nesabelo salowo owasala nempahla; bayakwabelwa ngokulinganayo.”
Kwenzeka kanjalo kusukela ngalolo lusuku kuqhubeka, wakwenza lokho kwaba yisimiso nomthetho kwa-Israyeli kuze kube namuhla.
UDavide esefikile eZikilagi, wathumela enye impango kumalunga akwaJuda nakubangani bakhe, wathi: “Bhekani, nasi isipho senu esiyimpango ethathwe ezitheni zikaSimakade.”
Wabathumelela abaseBhethele, abaseRamothi eNegevu, abaseJathiri,
abase-Aroweri, abaseSifimothi, abase-Eshithemowa,
abaseRakhali, abasemizini yamaJerameli, abasemizini yamaKheni,
abaseHorma, abaseBhori Ashani, abase-Athakhi,
abaseHebhroni, nabasezindaweni zonke lapho uDavide luqobo nabantu bakhe babejwayele ukuhambela khona.
AmaFilisti alwa no-Israyeli. Abantu bakwa-Israyeli babaleka phambi kwamaFilisti, abanye babo bawa, basala enkundleni, entabeni iGilibhowa.
AmaFilisti amhubha uSawule namadodana akhe. AmaFilisti abulala uJonathani, u-Abhinadaba, noMalikhi Shuwa, amadodana kaSawule.
Impi yaba nzima kakhulu kuSawule; abacibayo bamfica esebuhlungwini obukhulu ngenxa yokugwazwa ngumcibisholo.
USawule wathi odibini lwakhe: “Hosha inkemba yakho, ungigwaze ngayo, funa abangasokile bafike bangigwaze, bangijivaze.” Kepha udibi lwakhe lwenqaba, ngoba lwesaba kakhulu. USawule wayesethatha inkemba yakhe, waziphonsa phezu kwayo.
Kwathi lungabona udibi lwakhe ukuthi uSawule usefile, nalo lwaziphonsa phezu kwenkemba yalo, lwafa kanye naye.
USawule wafa namadodana akhe omathathu, nodibi lwakhe, nabo bonke abantu bakhe ngalolo lusuku.
Kwathi ukuba abantu bakwa-Israyeli ababephesheya kwesigodi nalabo ababengaphesheya kweJordani, babone ukuthi abantu bakwa-Israyeli bayabaleka, nokuthi uSawule namadodana akhe bafile, bashiya imizi yabo, babaleka. AmaFilisti afika, ahlala kuyo.
Kwathi ngakusasa, amaFilisti abuya ukuyophanga ababebulewe, afumana uSawule namadodana akhe omathathu befele entabeni iGilibhowa.
Amnquma ikhanda, athatha izikhali zakhe, athumela ezweni lamaFilisti ukumemezela yonke indawo endlini yezithombe zawo nakubantu.
Abeka izikhali zikaSawule endlini ka-Ashitharothi, isidumbu sakhe asibethela ogangeni eBhethi Shani.
Kwathi ukuba izakhamuzi zaseJabheshi Gileyadi zizwe ngokwenziwe ngamaFilisti kuSawule,
kwasuka wonke amadoda anamandla, ahamba ubusuku bonke, asithatha isidumbu sikaSawule nezidumbu zamadodana akhe ogangeni eBhethi Shani, ahamba nazo, afika eJabeshi azishisela khona.
Athatha amathambo abo awambela phansi komthamariske, eJabeshi. Azila ukudla izinsuku eziyisikhombisa.
Kwathi emva kokufa kukaSawule, uDavide esebuyile ekubulaleni ama-Amaleki, wahlala izinsuku ezimbili eZikilagi.
Kwathi ngosuku lwesithathu, kwafika indoda iphuma enkanjini kaSawule, igqoke izingubo ezidabukile, inothuli ekhanda. Yathi lapho ifika kuDavide yawela emhlabathini, yakhothama yathi mbo ngobuso.
UDavide wathi kuyo: “Uvela kuphi na?” Yathi kuye: “Ngiphunyuke enkanjini yakwa-Israyeli.”
UDavide wathi kuyo: “Bekuhamba kanjani? Ake ungitshele.” Yaphendula yathi: “Abantu babalekile empini, futhi abaningi bafile; uSawule noJonathani, indodana yakhe, nabo bafile.”
UDavide wathi kuleyo nsizwa eyayimbikela: “Wazi kanjani ukuthi uSawule nendodana yakhe bafile na?”
Insizwa eyambikelayo yathi: “Ngithe ngisentabeni iGilibhowa, ngaleso sikhathi uSawule wancika emkhontweni, ngokuba izinqola nabamahhashi babemxine kakhulu.
Waphenduka wabheka emuva wangibona, wangibiza. Ngaphendula ngathi: ‘Ngilapha.’
“Wathi kimi: ‘Ungubani na?’ “Ngathi kuye: ‘NgingumAmaleki.’
“Wathi kimi: ‘Ake ume ngakimi, ungibulale, ngokuba ngiphethwe yisiyezi, nakuba ngisaphila.’
“Ngase ngima ngakuye, ngambulala, ngokuba ngangazi ukuthi ngeke esaphila uma esewile, ngawuthatha umqhele owawusekhanda lakhe, nesongo elalisengalweni yakhe, ngase ngikuletha lapha enkosini yami.”
UDavide wabamba izingubo zakhe waziklebhula, enza kanjalo namadoda wonke ayenaye.
Balila, bakhala, bazila kwaze kwahlwa ngenxa kaSawule noJonathani, indodana yakhe, nabantu bakaSimakade, nendlu ka-Israyeli, ngokuba babebulewe ngenkemba.
UDavide wathi ensizweni eyambikelayo: “Ungowaphi, na?” Yamphendula yathi: “Ngiyindodana yomuntu ogogobele nje, umAmaleki.”
UDavide wathi kuyo: “Yini ekwenze ungesabi ukuphakamisa isandla sakho ubulale ogcotshiweyo kaSimakade na?”
UDavide wabiza enye yezinsizwa, wathi: “Sondela, khwela phezu kwakhe.” Yayishaya yaze yafa.
UDavide wathi kuyo: “Igazi lakho malibe phezu kwekhanda lakho, ngokuba umlomo wakho ufakazile ngawe, lapho uthi: ‘Ngibulele ogcotshiweyo kaSimakade.’ ”
UDavide wamlilela uSawule noJonathani, indodana yakhe, ngaleli culo.
Wayaleza ukuba iCulo Lomnsalo lifundiswe abakwaJuda; libhalwe eNcwadini kaJashari. Wathi:
“Udumo lwakho, Israyeli, lubulewe ezindaweni eziphakemeyo. Yeka ukuwa kwamaqhawe!
“Ningakusho eGathi, ningakumemezeli emigwaqweni e-Ashikeloni, funa amadodakazi amaFilisti ajabule, namadodakazi abangasokile athokoze.
“Nina zintaba iGilibhowa, makungabi bikho mazolo namvula phezu kwenu, nasemasimini avundileyo, ngokuba kwangcoliswa lapho isihlangu samaqhawe, isihlangu sikaSawule singagcotshwanga ngamafutha.
Egazini lababuleweyo nasemanonini amaqhawe umnsalo kaJonathani awubuyelanga emuva ulambatha, nenkemba kaSawule yadla abaningi.
“USawule noJonathani babethandeka, beyigugu; ekuphileni nasekufeni kwabo kabehlukaniswanga; babenejubane kunezinkozi, benamandla kunezingonyama.
“Nina madodakazi akwa-Israyeli, mkhaleleni uSawule owanigqokisa ngokubomvu, wahlobisa izembatho zenu ngemihlobiso yegolide.
“Yeka ukuwa kwamaqhawe empini! UJonathani ubulewe ezindaweni zakho eziphakemeyo.
“Ngidabukile ngawe mfowethu, Jonathani; wawuyigugu elikhulu kimi; lwaluyisimangaliso kimi uthando lwakho, ludlula uthando lwabesifazane.
“Yeka ukuwa kwamaqhawe, nokuphela kwezikhali zokulwa!”
Kwathi emveni kwalokho uDavide wabuza kuSimakade, wathi: “Ngingenyukela yini komunye wemizi yakwaJuda na?” USimakade wathi: “Yenyuka.” UDavide wathi: “Ngenyukele kumuphi na?” Yena wathi: “EHebhroni.”
UDavide wenyuka lapho namakhosikazi akhe omabili, u-Ahinohama waseJizreyeli no-Abhigayili waseKharimeli, umkaNabali.
UDavide wenyuka namadoda ayenaye, kwaba yileyo naleyo nabomndeni wayo; bahlala emizaneni eHebhroni.
Abantu bakwaJuda bafika, bamgcoba khona lapho uDavide ukuba abe yinkosi yendlu yakwaJuda. Base bembikela bethi: “Ngabantu baseJabheshi Gileyadi abangcwabe uSawule.”
UDavide wayesethumela izithunywa kubantu baseJabheshi Gileyadi, wathi kubo: “USimakade makanibusise, ngokuba nikhombise isihawu enkosini yenu uSawule, nayingcwaba.
Manje sengathi uSimakade anganenzela isihawu nokwethembeka, nami ngizonenzela okuhle ngenxa yalokhu enikwenzileyo.
Manje-ke maziqine izandla zenu, nime isibindi, ngokuba uSawule, inkosi yenu, usekhotheme. Indlu yakwaJuda ingigcobile ukuba ngibe yinkosi yayo.”
U-Abhineri, indodana kaNeri, umkhuzi wempi kaSawule wayesethathe u-Ishi Bhoshethi, indodana kaSawule, waya naye eMahanayimi,
wambeka waba yinkosi, wabusa abakwaGileyadi, ama-Ashurimi, abaseJizreyeli, abakwa-Efrayimi abakwaBhenjamini, wabusa no-Israyeli wonke.
U-Ishi Bhoshethi, indodana kaSawule, wayeseneminyaka engama-40 ngesikhathi eqala ukubusa kwa-Israyeli; wabusa iminyaka emibili. Kepha indlu yakwaJuda yayilandela uDavide.
Isikhathi uDavide abusa ngaso eHebhroni endlini yakwaJuda sasiyiminyaka eyisikhombisa nezinyanga eziyisithupha.
U-Abhineri, indodana kaNeri, nezinceku zika-Ishi Bhoshethi, indodana kaSawule, basuka eMahanayimi, baya eGibheyoni.
UJowabe, indodana kaZeruya nezinceku zikaDavide, baphuma, bahlangana nabo ngasechibini eGibheyoni. Bahlala phansi, abanye ngakulolu hlangothi lwechibi, abanye bahlala ngakolunye.
U-Abhineri wathi kuJowabe: “Ake zisukume izinsizwa, zizwane amandla phambi kwethu.” UJowabe wathi: “Mazisukume.”
Zase zisukuma zaphumela eshashalazini, zabalwa zaze zaba li-12 ohlangothini luka-Ishi Bhoshethi, indodana kaSawule wakwaBhenjamini, zaba li-12 ezincekwini zikaDavide.
Zabambana ngezihluthu, yileyo naleyo yagwaza enye ohlangothini, zawa kanyekanye. Yingakho leyo ndawo ibizwa ngokuthi yiHelikhathi Hazurimi, iseGibheyoni.
Impi yayinzima kakhulu ngalolo lusuku; u-Abhineri namadoda akwa-Israyeli behlulwa yizinceku zikaDavide.
Kwakukhona lapho amadodana amathathu kaZeruya, uJowabe, u-Abhishayi no-Asaheli. U-Asaheli wayewunyazi egijimisa okwensephe endle.
U-Asaheli wamhubha u-Abhineri, akaze achezukela kwesokunene noma kwesokhohlo ekumlandeleni.
U-Abhineri waqalaza emuva, wayesethi: “Ngabe nguwe, Asaheli na?” Wamphendula wathi: “Yebo, yimina.”
U-Abhineri wathi kuye: “Chezuka uye ngakwesokudla noma ngakwesokunxele, uthathe enye yezinsizwa, uzithathele kuyo impango.” Kepha u-Asaheli akazange achezuke, waqhubeka wamhubha.
U-Abhineri wabuye wathi ku-Asaheli: “Chezuka ungabe usangihubha; yini ufune ukuba ngikucekele phansi na? Ngiyombhekelwa ngubani umfowethu uJowabe na?”
Kepha wenqaba ukuchezuka. U-Abhineri wamgwaza esiswini ngesidunu somkhonto, umkhonto waze wayophumela ngemuva. Wawela lapho, wafa. Bonke abafika endaweni lapho u-Asaheli ayewele khona, wafa, babema bathule du!
U-Jowabe no-Abhishayi bamhubha u-Abhineri. Bafinyelela entabeni i-Ama, eyayimaqondana neGiya, ngendlela ebheke ehlane iGibheyoni, lapho ilanga seliyozilahla kunina.
Abantu bakwaBhenjamini babuthana emva kuka-Abhineri, baba liviyo elilodwa; bama esiqongweni segquma elithile.
U-Abhineri wayesememeza uJowabe, wathi: “Inkemba iyakubhubhisa njalo njalo yini na? Awazi yini ukuthi kuyakuba khona umunyu ekugcineni? Kuyoze kube nini ngaphambi kokuba ubayale abantu ukuba babuye ekuhubheni abafowabo na?”
UJowabe wathi: “Ngifunga ngiyagomela phambi kukaSimakade, ukuba ubungakhulumanga, abantu bonke bebeyobe sebekuyekile kusasa ukuhubha abafowabo.”
UJowabe wayesebetha icilongo; bonke abantu bama, ababe besabahubha abakwa-Israyeli, futhi ababange besalwa.
U-Abhineri nabantu bakhe bahamba ubusuku bonke, badabula e-Araba, bawela iJordani, basidabula sonke isifunda iBhithroni, baze bayofinyelela eMahanayimi.
UJowabe wabuya ekuhubheni u-Abhineri. Wayesebahlanganisa bonke abantu, kodwa kwabonakala ukuthi zili-19 izinceku zikaDavide ezafayo, ezingatholakalanga no-Asaheli.
Kepha izinceku zikaDavide zazibulele abakwaBhenjamini nabakwa-Abhineri abangama-360.
Bamthatha u-Asaheli, bamngcwaba elibeni likayise eBhethlehema. UJowabe namadoda ayenawo base behamba ubusuku bonke, kwathi kuqambe kusa babe sebeseHebhroni.
Kwaba khona ukulwa isikhathi eside phakathi kwendlu kaDavide nendlu kaSawule. UDavide wadlondlobala ngamandla, kodwa indlu kaSawule yaya ngokuya iba ntekenteke.
UDavide ngesikhathi eseHebhroni, omkakhe bamzalela amadodana; izibulo lakhe kwakungu-Amnoni, ezalwa ngu-Ahinohama waseJizreyeli.
Eyesebili kwaba nguKhileyabhi ku-Abhigayili, umkaNabali waseKharimeli. Eyesithathu kwaba ngu-Absalomu, indodana kaMahakha, indodakazi kaThalimayi, inkosi yaseGeshuri.
Eyesine kwaba ngu-Adoniya, indodana kaHagithi; eyesihlanu kwaba nguShefathiya, indodana ka-Abhithali.
Eyesithupha kwaba ngu-Ireyamu, ezalwa ngu-Egila, umkaDavide. Wonke lawo madodana kaDavide azalelwa eHebhroni.
Ngesikhathi kusekhona ukulwa phakathi kwendlu kaSawule nendlu kaDavide, u-Abhineri wayekhulisa amandla akhe endlini kaSawule.
USawule wayenesancinza, igama laso kunguRizpha, indodakazi ka-Ayiya. U-Ishi Bhoshethi wathi ku-Abhineri: “Usingeneleni isancinza sikababa na?”
Lawo mazwi ka-Ishi Bhoshethi amthukuthelisa kakhulu u-Abhineri, wayesethi: “Kanti mina ngiyikhanda lenja kuJuda yini na? Kuze kube namuhla, ngisalokhu ngikhombisa ukwethembeka kwabendlu kayihlo uSawule, kubafowabo nakubangani bakhe, angikaze ngikunikele esandleni sikaDavide. Manje usungibeka icala ngalo wesifazane!
UNkulunkulu makenze kanjalo ku-Abhineri, enezele futhi, uma ngingenzi kuDavide njengalokhu uSimakade efungile kuye,
ukuba kuthathwe umbuso endlini kaSawule, kumiswe isihlalo sobukhosi sikaDavide, phezu kuka-Israyeli naphezu kukaJuda, kusukela kwaDani kuze kufike eBheri Sheba.”
U-Ishi Bhoshethi akazange amphendule futhi u-Abhineri nangelilodwa izwi, ngoba wayemesaba.
U-Abhineri wathumela izithunywa esikhundleni sakhe kuDavide, zayothi kuye: “Ngelikabani leli lizwe na? Yenza isivumelwano nami; bheka, isandla sami siyakuba nawe ukuba ngimlethe kuwe wonke u-Israyeli.”
Wathi: “Kulungile, ngizokwenza isivumelwano nawe, kodwa kunento eyodwa nje engiyifuna kuwe: ukuba ungalokothi uvele phambi kwami uma ungalethi uMikhali, indodakazi kaSawule, ngesikhathi uzongibona.”
UDavide wathumela izithunywa ku-Ishi Bhoshethi, indodana kaSawule, wathi: “Nginike umkami uMikhali, engamkhokhela ngamajwabu amaFilisti ayikhulu.”
U-Ishi Bhoshethi wathumela ukuba ayolandwa kumyeni wakhe uPhalithiyeli, indodana kaLayishi.
Umyeni wakhe wahamba naye, ekhala emlandela, waze wayofika eBhahurimi. U-Abhineri wayesethi kuye: “Hamba, phindela ekhaya!” Wenza kanjalo, wabuyela emuva.
U-Abhineri wakhuluma namalunga akwa-Israyeli, wathi: “Ngesikhathi esidlulileyo benifuna ukuba uDavide abe yinkosi yenu, anibuse.
Manje-ke yenzani lokho, ngokuba uSimakade ukhulumile kuDavide, wathi: ‘Ngenceku yami uDavide, ngiyobasindisa abantu bami, u-Israyeli, emandleni amaFilisti nakuzo zonke izitha zabo.’ ”
U-Abhineri wakhuluma futhi nabakwaBhenjamini; wayesuka eyotshela uDavide eHebhroni ngakho konke okuhle u-Israyeli nabo bonke abendlu yakwaBhenjamini ababezimisele ukukwenza.
U-Abhineri wafika kuDavide eHebhroni namadoda angama-20. UDavide wamenzela idili u-Abhineri namadoda ayenawo.
U-Abhineri wathi kuDavide: “Mangihambe ngiyoqoqa wonke u-Israyeli eze enkosini yami, inkosi, ukuze enze isivumelwano nawe, ubuse phezu kwakho konke njengalokhu kufisa inhliziyo yakho.” UDavide wamkhulula u-Abhineri, wahamba ngokuthula.
Khona lapho, kwafika izinceku zikaDavide noJowabe zibuya kohlasela, ziphethe impango eningi. U-Abhineri wayesesukile kuDavide eHebhroni, kwazise wayesemhambise ngokuthula.
Esefikile uJowabe nawo wonke amabutho ayehambe nawo, bamtshela uJowabe, bathi: “U-Abhineri, indodana kaNeri, ubeze enkosini, inkosi imdedele, wahamba ngokuthula.”
UJowabe waya enkosini wathi kuyo: “Ukwenzeleni lokhu na? Bheka, u-Abhineri ubefikile kuwe; umyekeleni wahamba ngokuthula na?
Uyazi ukuthi u-Abhineri, indodana kaNeri, ubeze ukuzokukhohlisa, nokwazi ukuphuma nokungena kwakho, nokuthi akwazi konke okwenzayo.”
UJowabe, esephumile phambi kukaDavide, wathumela izithunywa emva kuka-Abhineri, zambuyisa esengasemthonjeni eSira, kodwa uDavide wayengazi ngalokho.
U-Abhineri esebuyele eHebhroni, uJowabe wambizela eceleni ngasesangweni ukuze akhulume naye ngasese. Wamgwaza esiswini wafela lapho, ngenxa yegazi lika-Asaheli umfowabo.
Kwathi kamuva uDavide wakuzwa lokho, wathi: “Mina nombuso wami asinacala kuSimakade kuze kube phakade ngegazi lika-Abhineri, indodana kaNeri.
Igazi lakhe malibe phezu kwekhanda likaJowabe nakubo bonke abendlu kayise: makungahlali kungekho endlini yakhe ocucuzayo, onochoko, ozimelelayo ngodondolo, ofa ngenkemba, noswela isinkwa.”
UJowabe no-Abhishayi, umfowabo, bambulala u-Abhineri, ngoba wayebulele umfowabo, u-Asaheli, empini eGibheyoni.
UDavide wathi kuJowabe nakubantu bonke ababenaye: “Klebhulani izingubo zenu, nibhince indwangu eyisaka, nilile phambi kuka-Abhineri.” Inkosi uDavide yalandela uhlaka.
U-Abhineri wangcwatshwa eHebhroni. Inkosi yadazuluka, yakhala ngasethuneni lika-Abhineri, nabantu bonke bakhala.
Inkosi yamlilela u-Abhineri, yathi: “U-Abhineri ubengafa njengokufa kwesiwula na?
Izandla zakho bezingaboshiwe, izinyawo zakho zingafakwanga maketanga, uwe njengomuntu owa phambi kwezikhohlakali.” Bonke abantu baphinda bamkhalela.
Abantu bonke bafika bamncenga uDavide ukuba adle isinkwa kusesemini, kodwa uDavide wafunga wathi: “Makenze kanjalo kimi uNkulunkulu, enezele futhi, uma ngidla isinkwa noma okunye lingakashoni ilanga.”
Bonke abantu bakubona lokho, kwaba kuhle emehlweni abo, konke eyakwenzayo inkosi kwathandeka kubo bonke abantu.
Ngalolo lusuku bonke abantu nawo wonke u-Israyeli bakuqonda ukuthi inkosi yayingenasandla ekubulaweni kuka-Abhineri, indodana kaNeri.
Inkosi yathi ezincekwini zayo: “Anazi yini ukuthi kufe umholi nomuntu omkhulu kwa-Israyeli namuhla na?
Nami ngibuthakathaka namuhla nakuba ngigcotshiwe ukuba ngibe yinkosi; laba bantu, amadodana kaZeruya, abalawuleki; uSimakade makaphindisele kulowo owenza okubi njengokwenza kwakhe okubi.”
Indodana kaSawule isizwile ukuthi u-Abhineri ufile eHebhroni, yadangala kakhulu, no-Israyeli wonkana wakhathazeka.
Indodana kaSawule yayinezinduna ezimbili zabahlaseli: enye kwakunguBhahana enye kunguRekhabhi. Babengamadodana kaRimoni waseBherothi, wozalo lukaBhenjamini ngokuba iBherothi indawo eyanikwa uBhenjamini.
Abantu baseBherothi babalekela eGithayimi, bagogobala khona kuze kube namuhla.
UJonathani, indodana kaSawule, yayinendodana elunyonga. Yayineminyaka emihlanu lapho kuzwakala izindaba ngoSawule noJonathani zivela eJizreyeli, ngakho-ke umzanyana wayo wayithatha, wabaleka nayo. Ngesikhathi ephuthuma ebaleka, yawa, yaba lunyonga. Igama layo kwakunguMefibhoshethi.
Amadodana kaRimoni waseBherothi, uRekhabhi noBhahana ahamba, afika endlini ka-Ishi Bhoshethi emini sekushisa ilanga; wayecambalele embhedeni wakhe emini.
Bangena endlini kungathi bazolanda ukolo, base bemgwaza esiswini; uRekhabhi noBhahana, babaleka.
Babengene endlini ka-Ishi Bhoshethi esazilalele embhedeni ekamelweni lakhe, bamgwaza, bambulala, bamnquma ikhanda, balithatha bahamba nalo ubusuku bonke ngendlela ese-Araba.
Ikhanda lika-Ishi Bhoshethi baliyisa kuDavide eHebhroni, bathi enkosini: “Nanti ikhanda lesitha sakho u-Ishi Bhoshethi, indodana kaSawule, owayefuna ukuphila kwakho, kodwa uSimakade ukuphindiselele namuhla nkosi yami, nkosi, kuSawule nakulo uzalo lwakhe.”
UDavide wabaphendula oRekhabhi noBhahana, umfowabo, amadodana kaRimoni waseBherothi, wathi kubo: “Ngifunga ngiyagomela phambi kukaSimakade owuhlengile umphefumulo wami kulo lonke usizi.
Umuntu owangitshela ukuthi: ‘Bheka, uSawule ufile,’ ecabanga ukuthi ungilethele izindaba ezinhle, ngambamba, ngambulala eZikilagi, ecabanga ukuthi ngizomnika umvuzo ngezindaba ayezilethile.
Kakhulu kangakanani lapho abantu ababi bebulele umuntu olungileyo, ezilalele embhedeni wakhe, endlini yakhe; igazi lakhe angiyukulibiza yini kini, nginishabalalise emhlabeni na?”
UDavide wayeseyala izinsizwa zakhe, zababulala, zabanquma izandla nezinyawo, zabaphanyeka eceleni kwechibi eHebhroni. Kepha balithatha ikhanda lika-Ishi Bhoshethi, balimbela ethuneni lika-Abhineri eHebhroni.
Zonke izizwe zakwa-Israyeli zeza kuDavide eHebhroni, zathi kuye: “Uyabona, thina siyithambo lakho nenyama yakho.
Ngesikhathi esedlule, sisabuswa yinkosi uSawule, nguwe owawuhola u-Israyeli ephuma noma ebuya empini. USimakade wathi kuwe: ‘Wena uyokwelusa abantu bami, u-Israyeli, uyokuba ngumbusi phezu kuka-Israyeli.’ ”
Kwase kufika wonke amalunga akwa-Israyeli enkosini uDavide eHebhroni. Inkosi uDavide yenza nawo isivumelwano eHebhroni phambi kukaSimakade, ayesemgcoba ukuba abe yinkosi kwa-Israyeli.
UDavide waqala ukubusa eseneminyaka engama-39; wabusa iminyaka engama-40.
Wabusa uJuda eHebhroni iminyaka eyisikhombisa nezinyanga eziyisithupha. Wabusa u-Israyeli noJuda wonke iminyaka engama-33 eJerusalema.
Inkosi nabantu bayo baya eJerusalema bayokulwa namaJebusi ayakhe kulelo lizwe. AmaJebusi athi kuDavide: “Ngeke ungene lapha; uyakuxoshwa yizimpumputhe nezinyonga.” Ayethi: “UDavide ngeke angene lapha.”
UDavide nokho wayidla inqaba iZiyoni, eseyingumuzi kaDavide manje.
UDavide wathi ngalolo lusuku: “Noma ngubani obulala amaJebusi, makasuke emseleni wamanzi ahlasele izinyonga nezimpumputhe, labo abazonda uDavide, naye futhi abazondayo. Ngalokho kuyothiwa: ‘Izimpumputhe nezinyonga aziyukungena endlini.’ ”
UDavide wahlala enqabeni, wayibiza ngokuthi umuzi kaDavide. UDavide wakha nxazonke, kusukela eMilo kuya ngaphakathi.
UDavide waya ngokuya edlondlobala, ngoba uSimakade uNkulunkulu Wamabandla wayenaye.
UHiramu, inkosi yaseThire, wathumela izithunywa kuDavide, nemisedari, nababazi bemithi, nabakhi; bamakhela uDavide isigodlo.
UDavide wakuqonda ukuthi uSimakade wayemmisile impela ukuba abe yinkosi kwa-Israyeli nokuthi uwuphakamisile umbuso wakhe ngenxa yabantu bakhe, u-Israyeli.
UDavide wabuye wazithathela ezinye izancinza nabafazi eJerusalema, ngesikhathi esefikile khona evela eHebhroni. Bamzalela uDavide amadodana namadodakazi.
Nanka amagama alabo abazalelwa eJerusalema: uShamuwa, uShobhabhi, uNathani, uSolomoni,
uJibhari, u-Elishuwa, uNefegi, uJathiya,
u-Elishama, u-Eliyada no-Elifelethi.
AmaFilisti ezwa ukuthi uDavide ugcotshiwe waba yinkosi kwa-Israyeli, enyuka wonke ayomfuna. UDavide wezwa ngalokho, wayesehlela enqabeni.
AmaFilisti afika lapho, ayeseviva eSigodini samaRefa.
UDavide wabuza kuSimakade, wathi: “Ngenyuke yini ngihlasele amaFilisti na? Uzowanikela yini esandleni sami?” USimakade wathi kuDavide: “Yenyuka, ngokuba ngizowanikela impela amaFilisti esandleni sakho.”
UDavide wawahlasela eBhali Pherazimi, wawanqoba khona lapho amaFilisti. UDavide wayesethi: “USimakade uzithelekele izitha zami ngibuka, njengokufohla kwamanzi.” Ngakho-ke wayibiza leyo ndawo ngokuthi yiBhali Pherazimi.
AmaFilisti ashiya izithombe zawo lapho; uDavide nabantu bakhe bazithatha, bahamba nazo.
AmaFilisti abuye enyuka futhi, afika aviva esigodini samaRefa.
UDavide wabuza kuSimakade, Yena wathi: “Ungenyuki, gega ngemuva kwawo, uwathelekele maqondana nezihlahla zebhalisamu.
Uyakuthi lapho uzwa umsindo wokuhamba ezihlokweni zezihlahla zebhalisamu, uphangise, ngokuba uSimakade uyobe ephumile, engaphambi kwakho, ukubhubhisa impi yamaFilisti.”
UDavide wenza njengalokhu uSimakade ayemyalile, wawabhubhisa amaFilisti kusukela eGebha kuze kuyofika eGezeri.
UDavide waphinde wabaqoqa bonke abakhethiweyo bakwa-Israyeli, ababa yizi-30 000.
UDavide wasuka wahamba nabo bonke abantu ayenabo, besuka eBhali Juda, ukuyolinda umphongolo kaNkulunkulu obizwa ngeGama, igama likaSimakade Wamabandla ohlala phezu kwamakherubhi.
Bawukhweza enqoleni entsha umphongolo kaNkulunkulu, bawususa endlini ka-Abhinadaba eyayiseGibheya. U-Uza no-Ahiyo, amadodana ka-Abhinadaba, yibona ababeshayela leyo nqola entsha.
Bayikhipha endlini ka-Abhinadaba eGibheya nomphongolo kaNkulunkulu; u-Ahiyo wayehamba phambi komphongolo.
UDavide nendlu yonke yakwa-Israyeli bathokoza phambi kukaSimakade bebetha izinhlobonhlobo zokhehlegume, ezomsayiphuresi, amahabhu, izingubhu, izigubhu, ubuxhaka namasimbali.
Lapho befika esibuyeni sikaNakhoni, u-Uza welulela isandla emphongolweni kaNkulunkulu, wawubamba, ngokuba izinkabi zashelela.
Intukuthelo kaSimakade yamvuthela u-Uza, uNkulunkulu wamshaya khona lapho ngenxa yesiphosiso sakhe; wafela ngasemphongolweni kaNkulunkulu.
UDavide wathukuthela ngenxa yokuthi uSimakade wayehlasele u-Uza, wayiqamba leyo ndawo ngokuthi iPheresi Uza, kuze kube namuhla.
Ngalolo lusuku, uDavide wamesaba uSimakade, wayesethi: “Umphongolo kaSimakade uyakuza kanjani kimi na?”
Ngakho-ke uDavide akavumanga ukuba umphongolo kaSimakade ulethwe kuye, emzini kaDavide, kodwa wawuchezukisa umphongolo kaSimakade, wawuyisa endlini ka-Obhede Edomi, umGithi.
Umphongolo kaSimakade wahlala endlini ka-Obhede Edomi, umGithi, izinyanga ezintathu; uSimakade wambusisa u-Obhede Edomi nendlu yakhe yonke.
Inkosi uDavide yabikelwa ukuthi uSimakade uyibusisile indlu ka-Obhede Edomi nakho konke okwakhe ngenxa yomphongolo kaNkulunkulu. UDavide wahamba wawunyusa umphongolo kaNkulunkulu endlini ka-Obhede Edomi, wawuyisa emzini kaDavide, ethokozile.
Kwakuthi uma ababethwele umphongolo kaSimakade sebehambe amanyathelo ayisithupha, bese ehlaba inkabi nethole elikhuluphalisiweyo.
UDavide wasina ngamandla akhe wonke phambi kukaSimakade, ebhince ingubo yamahlombe yelineni elimhlophe.
UDavide, nayo yonke indlu yakwa-Israyeli, bawenyusa kanjalo-ke umphongolo kaSimakade, ngokukhamuluka nangokukhala kwecilongo.
Kwathi lapho umphongolo kaSimakade ungena nje emzini kaDavide, uMikhali, indodakazi kaSawule, walunguza efasiteleni, wabona inkosi uDavide itshekula, isina phambi kukaSimakade; wayedelela enhliziyweni yakhe.
Bawungenisa umphongolo kaSimakade, bawubeka endaweni yawo, phakathi nethende uDavide ayelimisele wona. UDavide wanikela ngeminikelo yokushiswa nangeminikelo yokuthula, phambi kukaSimakade.
UDavide eseqedile ukunikela ngomnikelo wokushiswa nangeminikelo yokuthula, wabusisa abantu egameni likaSimakade Wamabandla.
Wababela bonke abantu, sonke isixuku sabakwa-Israyeli, abesilisa nabesifazane, kwaba yilowo nalowo isinkwa, ikhekhe lengqayisundu, nekhekhe elinamagilebhisi omisiwe. Wayesehamba, abantu bonke babuyela, yilowo nalowo, ekhaya lakhe.
UDavide wabuya wayobusisa abendlu yakhe. UMikhali, indodakazi kaSawule, waphuma wayohlangabeza uDavide, wathi: “Inkosi ka-Israyeli izenze inhlekisa namuhla, yazehlisa isithunzi phambi kwezincekukazi nezinceku zayo njengomuntu ongelutho.”
Wayesethi uDavide kuMikhali: “Ngisine phambi kukaSimakade owangikhetha ukuba ngibe yinkosi kunoyihlo nabo bonke abendlu yakhe, wangibeka ukuba ngibe ngumbusi wabantu bakaSimakade kwa-Israyeli, yebo, ngisinile phambi kukaSimakade.
Ngiyokwedeleleka, kodwa okukhulu ngiyakuzithoba emehlweni ami, kepha izincekukazi okhulume ngazo ziyongihlonipha.”
UMikhali, indodakazi kaSawule, akazalanga mntwana kwaze kwaba lusuku lokufa kwakhe.
Kwathi lapho inkosi isihleli esigodlweni sayo, uSimakade eseyiphumuzile kuzo zonke izitha zayo ezaziyizungezile,
inkosi yathi kuNathani, umphrofethi: “Bheka, mina ngihlala esigodlweni esakhiwe ngemisedari, kodwa umphongolo kaNkulunkulu uhlala phakathi kwamakhethini, ethendeni.”
UNathani wathi enkosini: “Hamba wenze konke okusenhliziyweni yakho, ngokuba uSimakade unawe.”
Kepha kwathi ngalobo busuku izwi likaSimakade lafika kuNathani, lathi:
“Hamba utshele inceku yami, uDavide, uthi: ‘Usho kanje uSimakade, uthi: “Uyakungakhela yini indlu ukuba ngihlale kuyo na?
Ngokuba angikaze ngihlale endlini kusukela ngosuku engakhuphula ngalo abantu bakwa-Israyeli eGibhithe kuze kube namuhla. Bengihamba ngehla ngenyuka nani ngisethendeni nasethabanakelini.
Ezindaweni zonke engihambe kuzo nakubo bonke abantu bakwa-Israyeli ngake ngalikhipha yini izwi kunoma yisiphi isizwana sakwa-Israyeli engasiyala ukuba seluse abantu bami u-Israyeli ngathi: aningakhelanga ngani indlu yemisedari na?” ’
“Ngalokho uyakusho kanje encekwini yami, uDavide, uthi: ‘Usho kanje uSimakade Wamabandla, uthi: “Mina ngakuthatha edlelweni, ekweluseni izimvu, ukuba ube ngumbusi wabantu bami kwa-Israyeli.
Nganginawe nomaphi lapho wawuya khona, ngazibhubhisa zonke izitha zakho phambi kwakho, ngakwenzela igama elidumileyo njengegama labantu ababalulekile emhlabeni.
Ngiyakumisela abantu bami u-Israyeli indawo, ngibatshale bahlale kuyo, bangabe besanyakaziswa, nabantu ababi abasayukubahlupha njengakuqala,
kusukela osukwini engabeka ngalo abehluleli ukuba babuse abantu bami u-Israyeli, ngiyokuphumuza ezitheni zakho zonke. USimakade uyakutshela ukuthi, Yena uqobo, uyakukwenzela wena indlu.
Kuyothi lapho izinsuku zakho seziphelile, usulele nokhokho bakho, bese ngibeka owozalo lwakho oyakuphuma ezibilini zakho, ngiyakuwuqinisa umbuso wakhe.
Nguye oyakukwakhela iGama lami indlu; ngiyakusiqinisa isihlalo sombuso wakhe kuze kube phakade.
Mina ngiyakuba nguyise, yena abe yindodana yami; okuyakuthi uma enza isono, ngimjezise ngenduku yabantu nangemivimbo yabantwana babantu.
Kepha umusa wami awuyukusuka kuye, njengoba ngawususa kuSawule engamsusa ngaphambi kwakho.
Indlu yakho nombuso wakho kuyakuqiniswa njalo phambi kwakho; isihlalo sakho sobukhosi simiswe, kuze kube phakade.” ’ ”
UNathani wawakhuluma kuDavide wonke lawo mazwi nakho konke lokho akubonile.
Inkosi uDavide yangena ethendeni, yahlala phambi kukaSimakade, yathi: “Ngingubani mina, Nkosi Simakade, nendlu yami iyini, ukuba ungaze ungihole kuze kube lapha na?
Lokho kwakuyinto encane nje nokho emehlweni akho, Nkosi Simakade, kepha ukhulumile nangendlu yenceku yakho isekude, ngabe iyona ndlela le, Nkosi Simakade, ophatha ngayo abantu na?
“UDavide angabuye athini kuwe na? Wena uyayazi inceku yakho, Nkosi Simakade.
Ngenxa yezwi lakho nangokufisa kwenhliziyo yakho ukwenzile konke lokhu okukhulu, wakwazisa inceku yakho.
“Ngakho-ke umkhulu, Nkosi Simakade, ngokuba akekho onjengawe, akukho Nkulunkulu ngaphandle kwakho kukho konke esikuzwile ngezindlebe zethu.
Yisiphi isizwe esisodwa nje emhlabeni esinjengabantu bakho, u-Israyeli, uNkulunkulu ayakuzihlengela sona ukuba sibe ngabantu bakhe, azenzele igama, anenzele nina izinto ezinkulu, alenzele izwe lakini izinto ezesabekayo phambi kwabantu bakho, owazihlengela bona eGibhithe ezizweni nakonkulunkulu bazo na?
Wazimisela abantu bakho, u-Israyeli, ukuba babe ngabantu bakho kuze kube phakade, Wena Simakade ube nguNkulunkulu wabo.
“Manje, Simakade Nkulunkulu, izwi olikhulume ngenceku yakho nangendlu yayo limise, kuze kube phakade, wenze njengalokhu ukhulumile.
Malibe likhulu igama lakho kuze kube phakade, ukuze kuthiwe: ‘USimakade Wamabandla unguNkulunkulu ka-Israyeli,’ indlu yenceku yakho, uDavide, izinze phambi kwakho.
“Ngokuba Wena Simakade Wamabandla, Nkulunkulu ka-Israyeli, ukwembulile endlebeni yenceku yakho ukuthi: ‘Ngiyakukwakhela indlu,’ ngalokho-ke inceku yakho ithole isibindi sokukhuleka lo mkhuleko kuwe.
Manje, Nkosi Simakade, Wena unguNkulunkulu, namazwi akho aliqiniso, ukhulumile encekwini yakho lokho okuhle.
Manje-ke vuma ukubusisa indlu yenceku yakho ukuze ibe phambi kwakho kuze kube phakade, ngokuba Wena Nkosi Simakade, ukhulumile ngesibusiso sakho, iyakubusiswa indlu yenceku yakho, kuze kube phakade.”
Kwathi emveni kwalokho, uDavide wawashaya amaFilisti, wawanqoba, wadla ingxenye yenhlokomuzi yawo.
Wabanqoba nabakwaMowabi, wabalinganisa ngentambo, wabalalisa phansi emhlabathini. Bonke abalinganiswa kabili ngobude bentambo babulawa, kwathi labo abalinganiswa kanye ngobude bayo bayekwa baphila. AbakwaMowabi baba yizinceku zikaDavide, bathela intela.
UDavide wamnqoba uHadadezeri, indodana kaRehobhe, inkosi yaseZobha, ngesikhathi ephumele ukuyobuyisa umbuso wakhe ngasemfuleni iYufrathe.
UDavide wathumba abamahhashi abayi-1 700, nemigundatshani eyizi-20 000; uDavide wanquma imisipha yawo wonke amahhashi ayedonsa izinqola, washiya kuphela ayikhulu.
Ama-Aramu aseDamaseku afika ukuzosiza uHadadezeri, inkosi yaseZobha. UDavide wabulala ama-Aramu ayizi-22 000.
UDavide wamisa amabutho akhe e-Aramu eDamaseku. Ama-Aramu aphenduka izinceku zikaDavide, athela kuye intela. USimakade wamhlenga uDavide noma kuphi lapho ayeya khona.
UDavide wathatha izihlangu zegolide ezazingezezinceku zikaHadadezeri, waziletha eJerusalema.
Inkosi uDavide yathatha ithusi eliningi kakhulu emizini kaHadadezeri, iBhetha neBherothayi.
UThoyi, inkosi yaseHamathi, wezwa ukuthi uDavide uyinqobile yonke impi kaHadadezeri,
uThoyi wathumela uJoramu, indodana yakhe, enkosini uDavide ukuba ayombingelela futhi ambusise, ngenxa yokuba wayelwe noHadadezeri, wamnqoba. UHadadezeri wayevamise ukulwa noThoyi. UJoramu wayephethe izinto ezenziwe ngesiliva, ngegolide, nangethusi.
Nalezo, inkosi uDavide yazehlukanisela uSimakade nesiliva negolide eyayilehlukanisile livela ezizweni zonke eyayizinqobile:
e-Aramu, kwaMowabi, kubantu bakwa-Amoni, kumaFilisti, kuma-Amaleki, nasempangweni kaHadadezeri, indodana kaRehobhe, inkosi yaseZobha.
UDavide wayesezenzele igama ekubuyeni kwakhe, wayesebulele ama-Aramu ayizi-18 000 eSigodini Sikasawoti.
Wamisa amabutho akhe kulo lonke elakwa-Edomi; bonke abakwa-Edomi baba yizinceku zikaDavide. USimakade wamhlenga uDavide noma kuphi lapho ayeya khona.
UDavide wabusa wonke u-Israyeli, wenzela bonke abantu bakhe ubulungiswa nokulungileyo.
UJowabe, indodana kaZeruya, wayengumkhuzi wempi; uJehoshafathi, indodana ka-Ahiludi, engumabhalane;
uZadoki, indodana ka-Ahithubi no-Ahimelekhi, indodana ka-Abhiyathara, bengabaphristi; uSeraya engumbhali;
uBhenaya, indodana kaJehoyada, engamele amaKherethi namaPhelethi; amadodana kaDavide engabaphristi.
UDavide wathi: “Usekhona yini osele endlini kaSawule ukuba ngimenzele umusa ngenxa kaJonathani na?”
Kwakukhona endlini kaSawule inceku egama layo linguZiba; bambiza ukuba aye kuDavide. Inkosi yathi kuye: “UnguZiba yini na?” Wathi: “Inceku yakho inguye.”
Inkosi yayisithi: “Akusekho noyedwa yini endlini kaSawule engingamenzela umusa kaNkulunkulu na?” UZiba wathi enkosini: “Ikhona indodana kaJonathani ekhubazekile ezinyaweni.”
Yathi inkosi kuye: “Ikuphi?” UZiba wathi enkosini: “Isendlini kaMakhiri, indodana ka-Amiyeli, eLo Debhari.”
Inkosi uDavide yathumela ukuba alandwe endlini kaMakhiri, indodana ka-Amiyeli, waseLo Debhari.
UMefibhoshethi, indodana kaJonathani kaSawule, wafika kuDavide, wakhothama wathi mbo ngobuso. UDavide wathi: “Mefibhoshethi.” Wathi: “Inceku yakho ilapha.”
UDavide wayesethi kuye: “Ungesabi, ngokuba ngiyakukwenzela impela umusa ngenxa kaJonathani, uyihlo; ngizokubuyisela lonke izwe likamkhulu wakho, uSawule; uyakudla njalo etafuleni lami.”
UMefibhoshethi wakhothama, wathi: “Ibe iyini nje inceku yakho ukuba ungaze uzikhathaze ngenja efileyo enjengami na?”
Inkosi yayisibiza uZiba, inceku kaSawule, yathi kuye: “Konke okwakungokukaSawule nakuyo yonke indlu yakhe ngikunike umzukulu wenkosi yakho.
Uyakumlimela umhlabathi, wena namadodana akho nezinceku zakho, uvune ukuze indodana yenkosi yakho ibe nokudla, kodwa uMefibhoshethi, indodana yenkosi yakho, uyakudla njalo etafuleni lami.” UZiba wayenamadodana ali-15 nezinceku ezingama-20.
UZiba wathi enkosini: “Ngizokwenza njengakho konke inkosi yami, inkosi, eyale ngakho inceku yayo.” UMefibhoshethi uyakudla etafuleni lenkosi njengenye yamadodana enkosi.
UMefibhoshethi wayenendodana encane, igama layo kunguMikha. Bonke ababehlala endlini kaZiba babeyizinceku zikaMefibhoshethi.
UMefibhoshethi wayesehlala eJerusalema, edla njalo etafuleni lenkosi; wayenezinyawo ezikhubazekile.
Kwathi emveni kwalokho inkosi yabakwa-Amoni yafa, uHanuni, indodana yakhe, waba yinkosi esikhundleni sayo.
UDavide wathi: “Ngiyakumenzela umusa uHanuni, indodana kaNahashi, njengoba uyise angenzela ububele.” UDavide wathumela izinceku zakhe ukuba ziyomduduza ngoyise. Izinceku zikaDavide zafika kwa-Amoni.
Kepha abaholi babantu bakwa-Amoni bathi kuHanuni, inkosi yabo: “Uma ubheka, ucabanga ukuthi uDavide uthumele abazokududuza ngoba ehlonipha uyihlo na? Akungakho yini ukuba izinceku zakhe zizohlola umuzi, bese ziwubhubhisa na?”
UHanuni wazibamba izinceku zikaDavide, wazigunda ingxenye yezilevu zazo, wahhephuna izingubo zazo kwaze kwaba sezinqeni, wayesezikhomba indlela.
Kwathi lapho bembikela uDavide ngalokho, wathumela ukuba zihlangatshezwe, ngokuba lawo madoda ayehliswe isithunzi kakhulu. Yathi inkosi: “Hlalani eJerikho, zize zihlume izilevu zenu, bese nibuya.”
Abakwa-Amoni babona ukuthi bazenze isinengiso kuDavide, base bethumela, baqasha ama-Aramu aseBhethi Rehobhe nama-Aramu aseZobha, imigundatshani eyizi-20 000, nenkosi yaseMahakha nabantu bayo abayinkulungwane, namadoda aseThobhi ayizi-12 000.
UDavide esekuzwile lokho wathumela uJowabe nawo wonke amabutho ayengamaqhawe.
Abakwa-Amoni baphuma, bahlela impi esikhaleni sesango; ama-Aramu aseZobha naseRehobhe, namadoda aseThobhi, nawaseMahakha babebodwa endle.
UJowabe wabona ukuthi izimpondo zempi zimzungeze nxazonke, wakhetha amabutho kuwo wonke ayekhethwe kwa-Israyeli, wawathuma ukuba ayokulwa nama-Aramu.
Amabutho aseleyo wawashiya esandleni sika-Abhishayi, umfowabo, wawathuma ukuba ayokulwa nabakwa-Amoni.
UJowabe wathi ku-Abhishayi: “Uma ama-Aramu enamandla kunami, uyoza uzongisiza, kanjalo uma abakwa-Amoni benamandla kunawe, ngizofika ngizokusiza.
Qina, masisebenzise amandla ethu ngenxa yabantu bakithi nangenxa yemizi kaNkulunkulu wethu; uSimakade makenze okuhle emehlweni akhe.”
UJowabe nabantu ababenaye basondela ukuba balwe nama-Aramu, kodwa abaleka.
Lapho abakwa-Amoni bebona ukuthi ama-Aramu abalekile, nabo babaleka phambi kuka-Abhishayi, bangena emzini. UJowabe wabuya kwa-Amoni, waya eJerusalema.
Abase-Aramu lapho bebona ukuthi banqotshiwe ngu-Israyeli, babuthana ndawonye.
UHadadezeri wayesethumela, wawabiza ama-Aramu ayengaphesheya komfula; afika eHelamu eholwa nguShobhakhi, umkhuzi wempi kaHadadezeri.
Kwathi uDavide angabikelwa ngalokho, wayeseqoqa wonke u-Israyeli, wawela iJordani, waya eHelamu. Ama-Aramu athumela impi ukuze abhekane noDavide, alwe naye.
Ama-Aramu abaleka phambi kukaDavide, wabulala ama-Aramu angama-700 ayegibele izinqola zempi, nabamahhashi abayizi-40 000. UShobhakhi, umkhuzi wempi yawo, bamshaya, wafela khona lapho.
Wonke amakhosi ayeyizinceku zikaHadadezeri, lapho ebona ukuthi u-Israyeli uwanqobile, enza isivumelwano soxolo no-Israyeli, akhonza phansi kuka-Israyeli. Ama-Aramu esaba ukubuye abasize futhi abantu bakwa-Amoni.
Kwathi sekwedlule unyaka, ngesikhathi amakhosi aphuma ngaso ukuyohlasela izitha zawo, uDavide wathumela uJowabe nezinceku zakhe no-Israyeli wonke, ukuba bayoshaya babhuqe kubantu bakwa-Amoni. Balivimbezela iRabha, nokho uDavide wayeseJerusalema ngaleso sikhathi.
Kwakungesikhathi sakusihlwa lapho uDavide evuka embhedeni, wayesehamba ophahleni lwesigodlo sakhe. Wabona owesifazane egeza, lo wesifazane wayemuhle ngokwedlulele, ebukeka kahle.
UDavide wathumela, wabuza ngalo wesifazane, wathi: “Lo akusiye yini uBhathisheba, indodakazi ka-Eliyamu ongumka-Uriya, umHithi na?”
UDavide wathumela izithunywa ukuba zimlande, wafika kuye, walala naye, ngokuba wayesehlambulukile ekungcoleni kwakhe, wayesebuyela ekhaya.
Owesifazane wakhulelwa, wathumela ukuba kuyobikelwa uDavide, wathi: “Ngikhulelwe.”
UDavide wayesethumela kuJowabe, ethi: “Thumela kimi u-Uriya, umHithi.” UJowabe wamthumela u-Uriya kuDavide.
U-Uriya wafika kuye, uDavide wayesebuza ukuthi unjani uJowabe, nokuthi impi ihamba kanjani.
UDavide wathi ku-Uriya: “Yehla uye endlini yakho, ugeze izinyawo zakho.” U-Uriya waphuma esigodlweni senkosi, inkosi yamthumelela isipho.
Kepha u-Uriya walala ngasemnyango wendlu yenkosi kanye nazo zonke izinceku zenkosi yakhe, akehlelanga endlini yakhe.
UDavide esebikelwe ukuthi u-Uriya akehlelanga endlini yakhe, uDavide wathi ku-Uriya: “Awuhambanga yini indlela ende na? Pho, kungani ungehlelanga endlini yakho?”
U-Uriya wathi kuDavide: “Umphongolo, u-Israyeli, noJuda bahlezi emadokodweni. Inkosi yami, uJowabe nezinceku zenkosi yami, bakanise endle. Pho mina ngingangena kanjani endlini yami, ngidle, ngiphuze, ngilale nomkami na? Ngifunga ngiyagomela phambi kwakho, angisoze ngakwenza lokho.”
UDavide wathi ku-Uriya: “Hlala lapha namuhla nangomuso, ngizokuphindisela emuva.” U-Uriya wahlala eJerusalema ngalolo lusuku nangomuso.
UDavide wambiza futhi, wadla phambi kwakhe, waphuza waze wadakwa, waphuma ebusuku wayolala embhedeni wakhe kanye nezinceku zenkosi, akazange ehlele endlini yakhe.
Kwathi ekuseni uDavide walobela uJowabe incwadi, wayiphathisa u-Uriya.
Encwadini wayebhale wathi: “Mmiseni u-Uriya phambili, lapho impi ishisa khona, bese niyahlehla ukuze abulawe, afe.”
Ngesikhathi uJowabe esewuvimbezela umuzi, wammisa u-Uriya endaweni lapho ayazi ukuthi kunamadoda anamandla.
Amadoda akulowo muzi aphuma ukuzolwa noJowabe. Kwafa abantu abathile ezincekwini zikaDavide; kwafa no-Uriya, umHithi.
UJowabe wathumela, wambikela konke uDavide ngempi.
Wayala isithunywa, wathi kuso: “Lapho usuqedile ukubikela inkosi ngezindaba zonke zempi,
kuyothi lapho kuvuka ulaka, ithi kuwe: ‘Nisondeleleni kangako emzini ngesikhathi niwuhlasela na? Beningazi yini ukuthi bazoniciba besongangeni?
Ngubani owabulala u-Abimelekhi, indodana kaJerubheshethi na? Akubanga yini ngowesifazane owagingqela kuye itshe lokusila esogangeni, wafela eThebezi na? Nisondeleleni ogangeni, na?’ “Uyokuthi: ‘Inceku yakho u-Uriya umHithi, nayo ifile.’ ”
Isithunywa sahamba, safika sambikela uDavide konke uJowabe ayesithume khona.
Isithunywa sathi kuDavide: “Amadoda ayesehlula, aphumela kithi, kepha sawaficezela kwaze kwaba sesikhaleni sesango.
Ababeciba ngemicibisholo besogangeni, baziciba izinceku zakho; ezinye zezinceku zenkosi zifile, nenceku yakho u-Uriya, umHithi nayo ifile.”
UDavide wayesethi esithunyweni: “Ubofike uthi kuJowabe: ‘Le nto mayingabi ngembi emehlweni akho, ngokuba inkemba idla omunye njengoba yenza nakomunye; qinisa impi yakho ngasemzini, uwubhubhise,’ bese umqunga isibindi uJowabe.”
Umka-Uriya wezwa ukuthi u-Uriya indoda yakhe ufile. Wamlilela umyeni wakhe.
Sesiphelile isikhathi sokulila, uDavide wathumela, wayomlanda, wamngenisa esigodlweni sakhe, wamenza umkakhe; wamzalela indodana. Kepha lokho okwenziwa nguDavide kwaba kubi emehlweni kaSimakade.
USimakade wayesethuma uNathani kuDavide. Wafika kuye wathi: “Kwakukhona amadoda amabili emzini munye, enye icebile, enye impofu.
Ecebileyo yayinezimvu nezinkomo eziningi kakhulu,
kepha empofu yayingenalutho, inexhukazana elilodwa eliselincane nje kuphela, eyayilithengile, yalondla. Lakhulela kuyo nakubantwana bayo; ladla ucezu lwayo, laphuza esitsheni sayo, lalala esifubeni sayo; lalinjengendodakazi kuyo.
“Kwafika isihambi endodeni ecebileyo, yayeka ukuthatha ezimvini nasezinkomeni zayo ukulungisela leso sihambi esasiyivakashele, kepha yathatha ixhukazana lendoda empofu, yalilungisela isihambi.”
UDavide wathukuthela kakhulu ngenxa yalowo muntu, wathi kuNathani: “Ngifunga ngiyagomela kuSimakade, umuntu owenze lokho umelwe wukufa.
Ixhukazana uyakulibuyisela seliphindwe kane ngenxa yokuba enze lokho, futhi engabanga nasihawu.”
UNathani wathi kuDavide: “Nguwe kanye lowo muntu. Usho kanje uSimakade uNkulunkulu ka-Israyeli, uthi kuwe: ‘Ngakugcoba waba yinkosi ka-Israyeli, ngakusindisa esandleni sikaSawule.
Ngakunika indlu yenkosi yakho, nabafazi bayo wacamela kubo, ngakunika indlu yakwa-Israyeli neyakwaJuda. Uma lokho kukuncane bengiyakukwenezela ngokunye okuningi.
Kungani wedelele izwi likaSimakade, wenza okubi emehlweni akhe na? Ubulele ngenkemba u-Uriya, umHithi, wathatha umkakhe wamenza umkakho. Wambulala ngenkemba yabakwa-Amoni,
ngakho-ke inkemba ayiyukusuka endlini yakho kuze kube phakade, ngokuba ungedelele, wathatha umka-Uriya, umHithi, waba ngumkakho.’
“Usho kanje uSimakade uthi: ‘Bheka, ngiyokuvusela ubutha endlini yakho, ngithathe abafazi bakho ubuka, ngibanike umakhelwane wakho, alale nabo emini kwabha.
Wena wakwenza lokhu ekusithekeni, kodwa Mina ngizokwenza lokhu phambi kuka-Israyeli wonke emini kwabha!’ ”
UDavide wathi kuNathani: “Ngonile kuSimakade.” UNathani wathi kuDavide: “USimakade usisusile isono sakho, awuyukufa.
Noma kunjalo-ke, ngenxa yaleso senzo wenze ukuba izitha zikaSimakade zimhlambalaze, ngakho umntwana ozozalwa uzokufa.”
UNathani wayesebuyela emzini wakhe. USimakade wamshaya ngesifo umntwana umka-Uriya amzalela uDavide; umntwana wagula kakhulu.
UDavide wamncenga uNkulunkulu ukuba asindise umntwana. UDavide wazila ukudla, wangena, walala emhlabathini ubusuku bonke.
Amalunga endlu yakhe asuka aya kuye ukuze amvuse emhlabathini. Akavumanga, futhi akadlanga nawo ukudla.
Kwathi ngosuku lwesikhombisa umntwana wafa. Izinceku zikaDavide zesaba ukumtshela ukuthi umntwana ufile, ngokuba zathi: “Bhekani, ngesikhathi umntwana esaphila sakhuluma naye, kodwa akasilalelanga. Pho sizomtshela kanjani ukuthi umntwana usefile? Angase azilimaze.”
UDavide wabona izinceku zakhe zihlebelana, waqonda ukuthi umntwana akasekho. Wathi ezincekwini zakhe: “Usefile yini umntwana na?” Zathi kuye: “Yebo, ufile.”
UDavide wayesesukuma emhlabathini, wageza, wazigcoba, waphendulela izingubo zakhe, wangena endlini kaSimakade wakhothama, wakhuleka. Wayeseya endlini yakhe wacela ukudla, bakubeka phambi kwakhe, wadla.
Izinceku zakhe zathi kuye: “Yini le oyenzileyo ngenxa yomntwana na? Umntwana esaphila uzile ukudla, wakhala, lapho esefile, wasukuma wadla ukudla.”
Wathi kuzo: “Ngesikhathi umntwana esaphila ngazila ukudla, ngakhala, ngicabanga ukuthi ngubani owaziyo hleze uSimakade abe nomusa kimi aphile umntwana.
Manje usefile; ngisazozilelani na? Ngingambuyisa yini? Ngiyakuya kuye, kepha yena akayukubuyela kimi.”
UDavide wamduduza uBhathisheba, umkakhe; waya kuye, walala naye, wazala indodana, wayiqamba igama wathi nguSolomoni. USimakade wamthanda uSolomoni.
Wathumela ngomphrofethi uNathani, wamqamba igama wathi nguJedidiya ngenxa kaSimakade.
UJowabe wahlasela iRabha labakwa-Amoni, wadla umuzi wasebukhosini.
UJowabe wathumela izithunywa kuDavide, wathi kuye: “Ngihlasele iRabha, ngawudla uMuzi Wamanzi.
Ngakho-ke qoqa abantu abasele lapho, ukanise ngakuwo, uwudle, funa uthathwe yimi bese ubizwa ngegama lami.”
UDavide wabaqoqa bonke abantu, waya eRabha, walwa nalo, walidla.
Wathatha umqhele wenkosi yabo ekhanda layo; isisindo sawo sasiyithalenta legolide, itshe eliyigugu likuwo; wabekwa ekhanda likaDavide; waphanga impango eningi kakhulu kulowo muzi.
Abantu ababekuwo wabakhipha, wababulala ngamasaha, ngezibhulo zensimbi, nangamazembe ensimbi, abanye wabasebenzisa ukubumba izitini. Lokho wakwenza kuyo yonke imizi yakwa-Amoni. UDavide, nabo bonke abantu, babuyela eJerusalema.
U-Absalomu, indodana kaDavide, wayenodadewabo omuhle, ogama lakhe kunguThamari; u-Amnoni, indodana kaDavide, wayemthanda.
Lokho kwamhlupha waze wagula ngenxa kadadewabo, uThamari, owayeyintombi, ngakho-ke kwakulukhuni ku-Amnoni ukuba angenza utho kuye.
U-Amnoni wayenomngani, ogama lakhe kunguJonadaba, indodana ka-Shimeya, umfowabo kaDavide. UJonadaba wayengumuntu onobuqili obukhulu.
Wathi kuye: “Yini ekwenza uzace kangaka usuku nosuku, ndodana yenkosi na? Ungengitshele lokho na?” U-Amnoni wathi kuye: “NguThamari, udadewabo ka-Absalomu, umfowethu; ngiyamthanda.”
UJonadaba wathi kuye: “Lala embhedeni wakho, uzishaye ogulayo, kuyothi lapho uyihlo efika ukuzokuhlola, uthi kuye: ‘Ake uvumele uThamari, udadewethu, kube nguye ozongenzela ukudla, akwenze phambi kwami ngimbuka, ukuze ngimbone, ngidle engifunza.’ ”
Wayeselala phansi u-Amnoni, wazishaya ogulayo. Isifikile inkosi ukuzombona, u-Amnoni wathi enkosini: “Ake kuze uThamari, udadewethu, enze amaqebelengwane amabili phambi kwami bese engifunza.”
UDavide wayesethumela lapho kwakuhlala khona uThamari, wathi: “Hamba uye endlini yomnewenu u-Amnoni, ufike umlungisele ukudla.”
Wayesehamba uThamari, waya endlini ka-Amnoni, umnewabo; wayelele phansi. Wathatha inhlama wayixova wenza amaqebelengwane, wawapheka embuka u-Amnoni.
Wathatha ibhodwe wawathulula ebuka, kodwa u-Amnoni wenqaba ukudla. Wathi: “Khipha bonke abantu.” Baphuma bonke abantu lapho.
U-Amnoni wayesethi kuThamari: “Letha ukudla lapha kimi ekamelweni lami khona uzongifunza.” UThamari wawathatha amaqebelengwane ayewenzile, wawaletha ku-Amnoni, umfowabo, ekamelweni.
Kwathi lapho ethi uyawaletha ukuba adle, wambamba, wathi kuye: “Woza ulale nami, dadewethu.”
UThamari wathi kuye: “Qha, mnewethu, ungangiphoqi; akwenziwa lokhu kwa-Israyeli. Ungalokothi wenze lobu buwula.
Mina-ke ngiyoshona kuphi nalelo hlazo na? Nawe usuyofana neziwula zakwa-Israyeli. Ngakho-ke ake ukhulume nenkosi, ngeke ikwenqabele ukuba ungithathe.”
Akavumanga ukulalela izwi lakhe. Ngenxa yokuthi wayenamandla kunaye, wamphoqa, walala naye.
U-Amnoni esekwenzile lokho wamzonda uThamari ngenzondo eyedlula uthando ayenalo ngaye phambilini. U-Amnoni wayesethi kuThamari: “Vuka uhambe.”
Yena wathi kuye: “Lobu bubi bokungixosha bukhulu kunalokhu okunye okwenze kimi.” Kepha u-Amnoni akavumanga ukumlalela.
Wayesebiza inceku yakhe eyayimsebenzela, wathi: “Mkhiphele phandle lo wesifazane, umsuse lapha kimi, bese ukhiya umnyango uma esephumile.”
UThamari wayegqoke ingubo ende, enemikhono emide, ngokuba amadodakazi enkosi ayeyizintombi ayengqoka kanjalo. Leyo nceku yamkhiphela phandle, yayisihluthulela umyango ngesikhiye lapho esephumile.
UThamari wayesezithela ngomlotha ekhanda, wayiklebhula ingubo yakhe enemibala ayeyigqokile, wathwala izandla ekhanda, wahamba elokhu ekhala.
U-Absalomu umnewabo wathi kuye: “Ubenawe yini umnewenu, u-Amnoni na? Thula, dadewethu; ungumnewenu, ungayibeki inhliziyo yakho kule nto.” UThamari wahlala eyisikhwebu endlini ka-Absalomu, umnewabo.
Kwathi ukuba inkosi uDavide izwe ngakho konke lokhu, yathukuthela kakhulu.
U-Absalomu akazange akhulume lutho olubi noma oluhle ku-Amnoni, kodwa u-Absalomu wamzonda u-Amnoni, ngokuba wayemphoqile udadewabo, uThamari.
Kwathi sekwedlule iminyaka emibili yonke, abagundi bezimvu baka-Absalomu babeseBhali Hazori eliseduzane nakwa-Efrayimi, u-Absalomu wamema wonke amadodana enkosi.
U-Absalomu waya enkosini wafike wathi: “Inceku yakho inabagundi, iyacela ukuba nenkosi ize nezinceku zayo.”
Inkosi yathi ku-Absalomu: “Qha, ndodana yami, masingahambi sonke, funa sibe ngumthwalo kuwe.” Wayincenga, kodwa ayivumanga ukuhamba naye, nokho yambusisa.
U-Absalomu wayesethi: “Uma kunjalo, u-Amnoni, umfowethu, makahambe nathi.”
U-Absalomu wayinxenxa, yaze yavuma, yamthumela u-Amnoni nawo wonke amadodana enkosi.
U-Absalomu wayala izinceku zakhe, wathi: “Niyabona-ke, kuyothi lapho selimngene iwayini u-Amnoni, ngiyothi kini: ‘Bulalani u-Amnoni,’ nimbulale, ningesabi, ngokuba niyobe niyalwe yimi ukwenza kanjalo. Yimani isibindi, nibe ngamaqhawe.”
Izinceku zika-Absalomu zenza ku-Amnoni njengokuba ayeziyalile u-Absalomu. Asukuma wonke amadodana enkosi, kwayileyo naleyo yagibela umnyuzi wayo, abaleka.
Kwathi esesendleleni, kwafika izwi kuDavide, lathi: “U-Absalomu uwabulele wonke amadodana enkosi, akusalanga nayinye.”
Inkosi yayisisuka, yaklebhula izingubo zayo, yalala emhlabathini, zonke izinceku zayo zema lapho, izingubo zazo ziklebhukile.
UJonadaba, indodana kaShimeya, umfowabo kaDavide, waphendula, wathi: “Inkosi yami mayingathathi zonke izinsizwa, amadodana enkosi abulewe, ngoba ngu-Amnoni kuphela ofileyo. Lokhu kwakuyinhloso ka-Absalomu kusukela ngosuku u-Amnoni aphoqa ngalo udadewabo, uThamari.
Ngakho inkosi yami, inkosi, mayingakubeki enhliziyweni yayo ukuthi wonke amadodana enkosi afile, ngu-Amnoni kuphela ofile.”
U-Absalomu wabaleka. Insizwa eyayiqaphile yaphakamisa amehlo ayo, yabona iqulu labantu liza ngendlela ehamba emva kwentaba.
UJonadaba wathi enkosini: “Bheka, amadodana enkosi asefikile njengoba ishilo inceku yakho.”
Kwathi lapho eqeda nje ukukhuluma, kwafika amadodana enkosi; adazuluka, akhala, inkosi nazo zonke izinceku zayo bakhala kakhulu.
U-Absalomu wabaleka waya kuThalimayi, indodana ka-Amihudi, inkosi yaseGeshuri. UDavide wayililela indodana yakhe zinsuku zonke.
U-Absalomu wabaleka, waya eGeshuri, wahlala khona iminyaka emithathu.
Inhliziyo yenkosi uDavide yalangazelela ukubona u-Absalomu, lokhu yayisize yaduduzeka ibona ukuthi impela u-Amnoni ufile.
UJowabe, indodana kaZeruya, wabona ukuthi inhliziyo yenkosi iku-Absalomu.
UJowabe wayesethumela eThekhowa, walanda khona owesifazane ohlakaniphileyo, wathi kuye: “Ake uzishaye olilayo, ugqoke inzilo, ungazigcobi ngamafutha, ube njengowesifazane oselile izinsuku eziningi elilela ofileyo,
bese uya enkosini, ufike ukhulume kuyo kanje...” UJowabe wamfunza amazwi okwakumele awakhulume.
Owesifazane waseThekhowa wafika phambi kwenkosi, wakhothama wathi mbo ngobuso emhlabathini, wayesethi: “Siza, nkosi.”
Inkosi yathi kuye: “Ukhathazwe yini na?” Wathi: “Maye, ngingumfelokazi! Indoda yami seyafa.
Incekukazi yakho yayinamadodana amabili; alwa odwa endle kungekho ongawalamula, kepha enye yashaya enye, yayibulala.
Manje umndeni wonke usuvukele incekukazi yakho; uthi: ‘Letha lowo owabulala umfowabo ukuba simbulale naye ngenxa yomphefumulo womfowabo, siyakuyibhubhisa indlalifa.’ Bayakulicima kanjalo-ke ilahle lami eliseleyo, bangabe besayishiyela indoda yami igama nensali ebusweni bomhlaba.”
Inkosi yayisithi kowesifazane: “Phindela endlini yakho; ngizothumela umyalezo mayelana nawe.”
Owesifazane waseThekhowa wathi enkosini: “Nkosi yami, nkosi, icala malibe phezu kwami naphezu kwendlu kababa, inkosi nesihlalo sayo sobukhosi kube msulwa.”
Yathi inkosi: “Oyosho utho kuwe, mlethe kimi; akayukuphinda akuthinte.”
Wayesethi yena: “Inkosi ake ikhumbule uSimakade uNkulunkulu wayo ukuba umphindiseli wegazi angaqhubeki nokubulala, nokuthi bangayibulali indodana yami.” Yathi: “Ngifunga ngiyagomela phambi kukaSimakade, akukho nolulodwa unwele lwendodana yakho oluyakuwela phansi.”
Wayesethi owesifazane: “Ake incekukazi yakho ikhulume izwi enkosini yami, inkosi.” Yathi: “Khuluma.”
Wathi-ke owesifazane: “Pho wena ukwenzeleni okunjalo kubantu bakaNkulunkulu na? Ngokukhuluma leli lizwi inkosi izibeka icala yona, ngokuba inkosi ingambuyisi oxoshiweyo wayo.
Ngokuba simelwe ukufa, sinjengamanzi achithwa emhlabathini, angenakubuye aqoqwe. UNkulunkulu akakususi ukuphila, kepha uqamba amasu ukuba oxoshiweyo angabi ngumxoshwa kuye.
“Manje-ke ngize lapha ukukhuluma leli lizwi enkosini yami, inkosi, ngenxa yokuthi abantu bangesabisile; incekukazi yakho yayisithi: ‘Mangikhulume enkosini; mhlawumbe inkosi iyakukwenza lokho okushiwo yincekukazi yayo.
Inkosi iyokuzwa, iyihlenge incekukazi yayo esandleni somuntu ofuna ukubhubhisa mina nendodana yami efeni, uNkulunkulu asabele lona.’
“Yayisithi incekukazi yakho: ‘Izwi lenkosi yami, inkosi, malibe ngelokuthula, ngokuba inkosi yami, inkosi, injengengelosi kaNkulunkulu ukuba ilalele okuhle nokubi; uSimakade uNkulunkulu wakho makabe nawe.’ ”
Yayisiphendula inkosi, yathi kowesifazane: “Ake ungangifihleli lutho kulokhu engizokubuza khona.” Wathi owesifazane: “Mayikhulume inkosi yami, inkosi.”
Yathi-ke inkosi: “Ngabe isandla sikaJowabe asinawe kukho konke lokhu na?” Owesifazane waphendula, wathi: “Ngifunga ngiyagomela kuwe, nkosi yami, nkosi, akukho muntu ongaphikisana nakho konke okukhulunywe yinkosi yami, inkosi. Inceku yakho, uJowabe, yangiyaleza, yangifunza wonke lawa mazwi.
UJowabe, inceku yakho, lokho ukwenzile ukuba aguqule isimo sezinto; inkosi yami ihlakaniphile njengokuhlakanipha kwengelosi kaNkulunkulu, ukwazi konke okusemhlabeni.”
Inkosi yayisithi kuJowabe: “Bheka-ke, ngizokwenza lokho. Hamba ulande umfana, u-Absalomu.”
UJowabe wakhothama wathi mbo ngobuso emhlabathini, wayithopha inkosi, wayesethi: “Namuhla inceku yakho iyazi ukuthi ifumene umusa emehlweni akho, nkosi yami, nkosi, lokhu inkosi ilenzile izwi lenceku yayo.”
Wayesesuka uJowabe wahamba, waya eGeshuri, wambuyisa u-Absalomu eJerusalema.
Inkosi yathi: “Makaye endlini yakhe, akayukububona ubuso bami.” Wayeseya u-Absalomu endlini yakhe, akabubona ubuso benkosi.
Kulo lonke elakwa-Israyeli kwakungekho muntu owayebatshazwa ngobuhle njengo-Absalomu. Wayengenasici, kusukela ematheni onyawo kuya okhakhayini.
Njalo ekupheleni konyaka wayeliphuca ikhanda lakhe lapho izinwele sezimsinda. Lapho ezilinganisa izinwele zakhe, zaziba ngamashekeli angama-200 ngokwesilinganiso esisemthethweni.
U-Absalomu wazala amadodana amathathu nendodakazi eyodwa, ayiqamba ngokuthi nguThamari; yayingowesifazane omuhle kakhulu.
U-Absalomu wahlala eJerusalema iminyaka emibili, engakaze abubone ubuso benkosi.
U-Absalomu wathumela kuJowabe ukuze amthume enkosini, kodwa uJowabe akavumanga ukuza kuye; waphinda wathumela okwesibili, kepha akavumanga ukuza.
Wayesethi ezincekwini zakhe: “Niyabona-ke, insimu kaJowabe iseduze neyami, unebhali khona; hambani niyithungele ngomlilo.” Izinceku zika-Absalomu zayithungela-ke ngomlilo insimu.
Wayesesuka uJowabe, waya ku-Absalomu endlini yakhe, wathi kuye: “Kungani izinceku zakho zithungele ngomlilo insimu yami na?”
U-Absalomu wathi kuJowabe: “Ngithumele kuwe, ngathi: ‘Woza lapha ukuze ngikuthume enkosini, uyothi kuyo: “Ngibuyiselweni eGeshuri na? Ngabe kungcono kimi ukuba bengisekhona lapho.” ’ “Ngakho-ke ngicela ukubona ubuso benkosi; uma nginecala, mayingibulale.”
UJowabe waya enkosini, wayibikela. Inkosi yambiza u-Absalomu, weza kuyo, wakhothama phambi kwayo wathi mbo ngobuso emhlabathini; inkosi yamanga u-Absalomu.
Kwathi emveni kwalokho u-Absalomu wazakhela inqola yempi, wazitholela amahhashi, namadoda angama-50 ayezogijima phambi kwakhe.
U-Absalomu wayevuka ekuseni, ame eceleni kwendlela eya esangweni. Kwakuthi uma kwedlula umuntu onecala eya enkosini ukuze linqunywe, u-Absalomu ambize, athi kuye: “Uvela kumuphi umuzi na?” Umuntu aphendule athi: “Inceku yakho ingowesinye sezizwana zakwa-Israyeli.”
U-Absalomu bese ethi kuye: “Uyabona, indaba yakho inhle, iqondile, kodwa akukho muntu obekwe yinkosi ukuba akulalele.”
U-Absalomu wabuye wathi: “Sengathi bengingabekwa ngibe ngumehluleli ezweni, ukuze wonke umuntu onecala nesikhalo esithile, eze kimi ngimehlulele; ngimenzele ubulungiswa.”
Kwakuthi lapho kusondela noma ngubani ukuzomkhothamela, wayelula isandla sakhe, ambambe, amange.
U-Absalomu wayenza kanjalo kubo bonke abakwa-Israyeli ababeza enkosini ngamacala. U-Absalomu wazeba kanjalo-ke izinhliziyo zabantu bakwa-Israyeli.
Ekupheleni kweminyaka engama-40, u-Absalomu wathi enkosini: “Ngiyacela ukuba ngiye eHebhroni ngiyofeza isithembiso engasenza kuSimakade.
Inceku yakho, ngesikhathi isahleli eGeshuri e-Aramu, yenza isithembiso, yathi: ‘Uma impela uSimakade engangibuyisela eJerusalema, ngiyakumkhonza uSimakade.’ ”
Inkosi yathi kuye: “Hamba ngokuthula.” Wayesesuka, wahamba waya eHebhroni.
U-Absalomu wathuma izinhloli kuzo zonke izizwe zakwa-Israyeli ukuba ziyothi: “Ngesikhathi nizwa ukukhala kwecilongo anothi: ‘U-Absalomu uyinkosi eHebhroni.’ ”
U-Absalomu wahamba namadoda angama-200 ayemenyiwe evela eJerusalema; ayehamba emsulwa engazi lutho.
U-Absalomu wathumela ku-Ahithofeli, umGiloni, umeluleki kaDavide owayevela emzini iGilo, lapho esanikela ngemihlatshelo. Lwaqina-ke uzungu, futhi banda nabantu ngasohlangothini luka-Absalomu.
Kwafika othile kuDavide wambikela, wathi: “Izinhliziyo zabantu bakwa-Israyeli zilandela u-Absalomu.”
UDavide wayesethi ezincekwini zakhe zonke ezazinaye eJerusalema: “Sukani, masibalekeni, ngokuba uma singenzi kanjalo, akukho namunye ozophunyuka ku-Absalomu. Sheshisani sihambe, funa asificezele, asenzakalise, awubhubhise nalo muzi ngenkemba.”
Izinceku zenkosi zathi enkosini: “Noma yini eyikhethayo inkosi yethu, inkosi, izinceku zakho zimi ngomumo ukuyenza.”
Yayisiphuma inkosi, bonke abendlu bayo beyilandela. Inkosi yashiya abesifazane abayizancinza abalishumi ukuba banakekele isigodlo.
Yaphuma-ke inkosi, bonke abantu beyilandela; bama ngasendlini yokugcina.
Zonke izinceku zadlula eceleni kwakhe nawo wonke amaKherethi, nawo wonke amaPhelethi, nawo wonke amaGithi, abantu abangama-600, ababeyilandela besuka eGathi, bedlula phambi kwenkosi.
Inkosi yayisithi ku-Ithayi, umGithi: “Wena-ke uhambelani nathi na? Phindela emuva, uhlale nenkosi, ngokuba wena ungumfokazi nodingisiwe kwelakini.
Usanda kufika nje, manje usufuna ngikuzulazulise nathi na? Mina ngisaya lapho ngiya khona. Phindela emuva wena, ubuyele nabafowenu; umusa neqiniso kube nawe.”
U-Ithayi wayiphendula inkosi, wathi: “Ngifunga ngiyagomela phambi kukaSimakade naphambi kwakho nkosi yami, inkosi, lapho inkosi yami, inkosi, iya khona, kungaba sekufeni noma ekuphileni, inceku yakho nayo iyakuba lapho.”
UDavide wathi ku-Ithayi: “Woza, uwele.” U-Ithayi, umGithi, wawela nabo bonke abantu bakubo nazo zonke izingane ezazinaye.
Izwe lonke lakhala ngezwi elikhulu. Abantu bonke bawela, nenkosi nayo yawela umfudlana iKidroni; abantu bonke bawela ngendlela yasogwadule.
Kwenyuka u-Abhiyathara noZadoki nabo bonke abaLevi, bethwele umphongolo wesivumelwano sikaNkulunkulu; bawubeka phansi umphongolo wesivumelwano baze bedlula bonke abantu ababephuma emzini.
Inkosi yathi kuZadoki: “Ubuyisele emzini umphongolo kaNkulunkulu. Uma ngifumana umusa emehlweni kaSimakade, uzokungibuyisa, angibonise wona nendlu yawo,
kodwa uma ethi: ‘Angithokozi ngawe;’ bheka, ngilapha; makenze kimi lokho akubona kufanele.”
Inkosi yathi kuZadoki, umphristi: “Wena ungumboni yini na? Buyela emzini ngokuthula, wena namadodana amabili, u-Ahimahazi, indodana yakho noJonathani, indodana ka-Abhiyathara.
Mina-ke, ngizothi ukuzindela ngasemazibukweni ehlane, kuze kufike izwi elivela kini lokungibikela.”
UZadoki no-Abhiyathara bawubuyisela eJerusalema umphongolo kaNkulunkulu, bahlala khona.
UDavide wenyuka ngommango weNtaba Yemihlwathi, wenyuka ekhala, egubuzele ikhanda, engafake zicathulo. Bonke abantu ababenaye bagubuzela, yilowo nalowo ikhanda lakhe, benyuka bekhala.
Kwabikwa kuDavide ukuthi: “U-Ahithofeli uphakathi kwabozungu luka-Absalomu.” Wayesethi uDavide: “Simakade, ake uwenze inhlekisa amasu ka-Ahithofeli.”
Uthe ukuba adundubale afinyelele esiqongweni lapho kukhulekwa khona kuNkulunkulu, wahlangatshezwa nguHushayi, umArikhi, egqoke ibhantshi eliklebhukile, enomhlabathi ekhanda.
UDavide wathi kuye: “Uma uhamba nami, uzokuba ngumthwalo kimi,
kodwa uma ubuyela emzini ufike uthi ku-Absalomu: ‘Sengizokuba yinceku yakho manje njengoba bengiyinceku kayihlo, manje sengizoba ngeyakho,’ ngokwenza lokho nje uyokwazi ukungibhuntshisela amasu ka-Ahithofeli.
Abaphristi, uZadoki no-Abhiyathara, bayoba nawe lapho. Kuyothi konke okuzwayo esigodlweni senkosi ukutshele uZadoki no-Abhiyathara.
Amadodana abo amabili, u-Ahimahazi, indodana kaZadoki noJonathani, indodana ka-Abhiyathara anabo, uyothumela ngabo konke oyobe ukuzwile.”
UHushayi, umngani kaDavide, wangena emzini ngesikhathi u-Absalomu engena eJerusalema.
Kwathi uDavide esedlule ibangana nje esicongweni sentaba, wahlangatshezwa nguZiba, inceku kaMefibhoshethi, nezimbongolo ezimbili ezaziboshelwe, zithwele izinkwa ezingama-200, izigaxa eziyikhulu zamagilebhisi omisiwe, izigaxa eziyikhulu zezithelo zasehlobo, nemvaba yewayini.
Inkosi yathi kuZiba: “Ziyini lezi zinto na?” UZiba wathi: “Izimbongolo ngezokugibelisa abendlu yenkosi. Izinkwa nezithelo ngezokudliwa, kuthi iwayini liphuzwe yilabo asebeyethiswe ukuba sehlane.”
Inkosi yayisithi: “Iphi indodana yenkosi yakho?” UZiba wathi enkosini: “Ihleli eJerusalema ngokuba yathi: ‘Namuhla indlu ka-Israyeli izowubuyisela kimi umbuso kababa.’ ”
Inkosi yathi kuZiba: “Uyabona-ke, konke obekungokukaMefibhoshethi sekungokwakho.” UZiba wayesethi: “Ngiyakhuleka ukuba ngifumane umusa emehlweni akho, nkosi yami, nkosi.”
Kwathi lapho inkosi uDavide ifika eBhahurimi, kwaphuma omunye wabomndeni wendlu yenkosi uSawule, igama lakhe kunguShimeyi, indodana kaGera; wayehla enyuka ethuka inkosi.
Wamjikijela ngamatshe uDavide nezinceku zakhe zonke, nabo bonke abantu eyayihamba nabo inkosi, wonke amaqhawe ayemhaqile ngakwesokunene nangakwesokhohlo sakhe.
UShimeyi wathi lapho ethuka uDavide: “Suka, suka wena muntu wegazi, muntu ongelutho!
USimakade ubuyisele phezu kwakho lonke igazi lendlu kaSawule okade ubusa esikhundleni sakhe. USimakade uwunikele umbuso esandleni sendodana yakho u-Absalomu. Nakhu lapha ukhona, ubhajwe ebubini bakho, ngokuba ungumuntu wegazi.”
U-Abhishayi, indodana kaZeruya, wayesethi enkosini: “Le nja efileyo iyithukelani inkosi yami, inkosi, na? Mangiye kuyo ngiyinqume ikhanda.”
Yathi inkosi: “Ngihlangene ngani mina nani, madodana kaZeruya? Uma engithuka, ngoba kusho uSimakade kuye wathi: ‘Thuka uDavide,’ ngubani ongathi: ‘Ukwenzeleni lokho na?’ ”
UDavide wayesethi ku-Abhishayi nakuzo zonke izinceku zakhe: “Bhekani, indodana yami eyaphuma ezibilini zami ifuna ukuphila kwami; kakhulu kangakanani-ke lo mBhenjamini na? Myekeni, athuke, ngokuba nguSimakade omthumile.
Mhlawumbe uSimakade uzolubona usizi lwami, angibuyisele okuhle ngokungithuka kwakhe namuhla.”
UDavide nabantu bakhe baqhubeka nendlela; uShimeyi wagudla intaba elinganisene nabo, ehamba ebathuka, ebajikijela ngamatshe, futhi ebathela ngomhlabathi.
Inkosi, nabo bonke abantu eyayihamba nabo, bafika eJordani bekhathele; yafike yathi gozololo lapho, yahlumeleleka.
U-Absalomu nabo bonke abantu, amadoda akwa-Israyeli, bafika eJerusalema, u-Ahithofeli wayenabo.
Kwathi nje lapho uHushayi, umArikhi, umngani kaDavide, efika ku-Absalomu, wathi kuye: “Mana njalo, nkosi; mana njalo, nkosi.”
U-Absalomu wayesethi kuHushayi: “Lokhu kungukwethembeka kwakho kumngani wakho, na? Awuhambanga ngani nomngani wakho, na?”
Wayesethi uHushayi ku-Absalomu: “Qha, lowo okhethwe nguSimakade, nayilaba bantu, abantu bonke bakwa-Israyeli ngiyakuba ngowakhe, ngihlale naye.
Ngiyakukhonza bani uma ngingekhonze indodana yakhe, na? Njengalokhu ngamsebenzela uyihlo, ngizokwenza kanjalo nakuwe.”
Wayesethi u-Absalomu ku-Ahithofeli: “Sinike iseluleko sakho, senzenjani, na?”
Wathi-ke u-Ahithofeli ku-Absalomu: “Hamba ulale nezancinza zikayihlo, lezo azishiyile ukuba zinakekele isigodlo; u-Israyeli wonke uyakuzwa ukuthi unengwa kangakanani nguyihlo, bese ziyaqina izandla zabo bonke abanawe.”
U-Absalomu bammisela ithende ophahleni lwendlu. U-Absalomu walala nazo zonke izancinza zikayise phambi kuka-Israyeli wonke.
Konke u-Ahithofeli ayeluleka ngakho kulezo zinsuku, kwakungathi kubuzwe kuNkulunkulu, ngakho-ke iseluleko sika-Ahithofeli sasihlonishwa nguDavide, kanjalo no-Absalomu.
U-Ahithofeli wathi ku-Absalomu: “Ake ngiqoke amadoda ayizi-12 000, ngizosuka ngimlandele uDavide ngabo bona lobu busuku.
Ngizomfica ekhathele, nezandla zakhe zingenamandla, ngizomthelekela, abantu bonke abanaye babaleke, bese ngibulala inkosi, yona nje kuphela.
Ngiyakubabuyisa kuwe bonke abantu. Uma ubulala oyedwa nje lo omfunayo, bonke abantu bayakuba nokuthula.”
Leli lizwi lamjabulisa u-Absalomu nawo wonke amalunga akwa-Israyeli.
Wayesethi u-Absalomu: “Mawumbize noHushayi, umArikhi, sizwe ukuthi yena uthini.”
UHushayi wafika ku-Absalomu, u-Absalomu wathi kuye: “U-Ahithofeli ukhulume lokhu, senze njengokusho kwakhe na? Uma kungenjalo, sitshele-ke ukuthi wena uthini.”
UHushayi wathi ku-Absalomu: “Iseluleko akweluleke ngaso ngalesi sikhathi u-Ahithofeli, asisihle neze.”
UHushayi wabuye wathi: “Uyazi ukuthi uyihlo nabantu bakhe bangamaqhawe, nokuthi bacasukile ezinhliziyweni, bafana nebhele elephucwe amazinyane alo ehlane. Uyihlo uyindoda yempi, akasoze alala lapho kulele khona abantu.
Bheka, manje ucashe emgodini noma kwenye indawo. Kuyothi lapho amabutho ethu eqala ukubathelekela, umuntu oyokuzwa uyothi: ‘Abantu abalandela u-Absalomu babulewe.’
Ngisho nonesibindi, onenhliziyo enjengeyengonyama, uyophelelwa ngamandla ngenxa yokwesaba, ngokuba wonke u-Israyeli uyazi ukuthi uyihlo uyiqhawe, nabantu ahamba nabo bangamaqhawe anamandla.
“Nasi iseluleko sami sokuthi u-Israyeli wonke makaqoqelwe kuwe kusukela kwaDani kuze kufike eBheri Sheba, ube mningi ngangesihlabathi sasolwandle ngobuningi, bese umhola wena uye naye empini.
Siyakumhlasela noma kuphi lapho siyomfica khona, simthelekele kuhle kwamazolo ehlela emhlabathini; akanakuphunyuka, yena nabo bonke abanaye.
Uma ebalekela emzini, wonke u-Israyeli uyakuphonsa izintambo kulowo muzi, siwuhudulele emfuleni, kungabe kusafunyanwa khona netshe nje elilodwa.”
U-Absalomu nabantu bonke bakwa-Israyeli bathi: “Iseluleko sikaHushayi, umArikhi, singcono kuneseluleko sika-Ahithofeli.” Ngokuba uSimakade wayenqumile ukuba kubhuntshe iseluleko esihle sika-Ahithofeli, ukuze uSimakade amehlisele okubi u-Absalomu.
UHushayi wayesethi kuZadoki no-Abhiyathara, abaphristi: “U-Ahithofeli umeluleke kanje kanje u-Absalomu namalunga akwa-Israyeli. Mina ngabeluleka kanje nakanje.
Ngakho-ke phuthumani nithumele kuDavide, nimbikele nithi: ‘Ungahlali ngasemazibukweni ehlane ngalobu busuku; wela nokuwela, funa inkosi ibhujiswe nabo bonke abantu abanayo lapho.’ ”
UJonathani no-Ahimahasi babehlala e-Eni Rogeli; incekukazi yayivame ukuya ibatshele, bese bona bewedlulisela umbiko enkosini uDavide, babekwenza lokhu ngendlela yokuba bangabonwa muntu behamba beya emzini.
Kepha mfana mumbe wababona, wayeseyobotha ku-Absalomu, base beshesha, bahamba bobabili, bafika endlini yomuntu waseBhahurimi owayenomthombo egcekeni lakhe; behlela khona.
Owesifazane wathatha isivalo, wasibeka phezu komlomo womthombo, weneka umgqakazo kuso; kwakungazi muntu ngalokho.
Izinceku zika-Absalomu zafika kowesifazane endlini, zathi: “Baphi o-Ahimahasi noJonathani na?” Owesifazane waphendula wathi kuzo: “Bawele umfudlana.” Lapho sezibathungathe zancama, zasuka zabuyela eJerusalema.
Kwathi sezihambile, baphuma emthonjeni, bahamba bayoyibikela inkosi uDavide, bathi: “Sukani, niwele umfula ngokushesha, ngokuba u-Ahithofeli weluleke kanje ngani.”
UDavide, nabo bonke abantu ababe naye, basuka bawela iJordani. Kwathi kusa, kwabe kungekho namunye owayesasele engaliwelanga iJordani.
Kuthe lapho u-Ahithofeli ebona ukuthi iseluleko sakhe asilandelwanga, wabophela imbongolo yakhe, wasuka, wabuyela ekhaya, emzini wakhe. Wafika khona wahlela izindaba zomuzi wakhe, wayesezilengisa, wafa, wangcwatshwa ethuneni likayise.
UDavide wahamba waze wafika eMahanayimi, kodwa u-Absalomu nabo bonke abantu bakwa-Israyeli bawela iJordani.
U-Absalomu wabeka u-Amasa ukuba ahole impi esikhundleni sikaJowabe. U-Amasa kwakuyindodana yendoda yakwa-Israyeli okuthiwa ngu-Ithira, owayengene u-Abhigayili, indodakazi kaNahashi, udadewabo kaZeruya, unina kaJowabe.
Abakwa-Israyeli no-Absalomu bakanisa kwaGileyadi.
Kwathi ukuba uDavide afike eMahanayimi; uShobi, indodana kaNahashi waseRabha kwa-Amoni, uMakhiri, indodana ka-Amiyeli waseLo Debhari, noBharizilayi, umGileyadi, waseRogelimi,
bamlethela amacansi, imicengezi, izitsha zebumba, ubhontshisi, ukolo, ibhali, impuphu, utshwele, imbumba, inhlosa,
uju, izaqheqhe, izimvu, noshizi, bakuletha kuDavide nakubantu ababenaye ukuze badle, ngokuba bathi: “Abantu balambile, bakhathele, futhi bomile ehlane.”
UDavide wababala abantu ababenaye, wayesebabekela izinduna zezinkulungwane nezinduna zamakhulu.
UDavide wabehlukanisa amaqembu amathathu: elokuqala laliphethwe nguJowabe, elesibili liholwa ngu-Abhishayi, indodana kaZeruya, umfowabo kaJowabe, elokugcina liphethwe ngu-Ithayi, umGithi. Inkosi yathi kubantu: “Nami impela ngizophuma nani.”
Kepha abantu bathi: “Ngeke uphume nathi, ngokuba uma sibaleka abayukusilandela kangako, noma kungafa ingxenye yethu, abayukuyikhathalela. Kodwa wena ufana nezinkulungwane ezilishumi zethu kubo, ngakho-ke kungcono usisize usemzini.”
Inkosi yayisithi kubo: “Ngizokwenza lokho enikubona kufanele.” Ngakho-ke inkosi yema ngaseceleni kwesango, wonke amabutho aphuma ngamakhulu nangezinkulungwane.
Inkosi yayaleza uJowabe, u-Abhishayi no-Ithayi, yathi: “Anoyiphatha kahle insizwa ngenxa yami; ngisho u-Absalomu.” Bonke abantu bezwa lapho inkosi iyaleza zonke izinduna ngo-Absalomu.
Base bephumela endle, bayolwa no-Israyeli. Balwela ehlathini kwa-Efrayimi.
Abantu bakwa-Israyeli behlulwa yizinceku zikaDavide. Kwabulawa abantu abaningi kakhulu ngalolo lusuku; abayizi-20 000.
Amabutho empi ahlakazeka agcwala iziganga, ihlathi lawaqeda amaningi, kunalawo adliwa yinkemba ngalolo lusuku.
U-Absalomu wethuka ehlangana nezinceku zikaDavide. U-Absalomu wayegibele umnyuzi. Umnyuzi wangena phansi kwehlozi elicinene lamagatsha omu-okhi, u-Absalomu wagaxela ngezinwele kuwo, walenga emoyeni, umnyuzi abewugibele wedlula, wamshiya kanjalo.
Umuntu othile wakubona lokho, watshela uJowabe, wathi kuye: “Bheka, ngibone u-Absalomu elenga emu-okhini.”
UJowabe wathi kumuntu ombikeleyo: “Umbone ngempela? Pho awumjuqanga ngani khona lapho, awele phansi na? Ngabe ngikunike izinhlamvu zesiliva ezilishumi nebhande.”
Lowo muntu wathi kuJowabe: “Noma ngabe bengizokhokhelwa izinhlamvu zesiliva eziyinkulungwane esandleni sami, nokho bengingeke ngibeke isandla sami endodaneni yenkosi, ngokuba sizwile ngezindlebe zethu inkosi ikuyala wena no-Abhishayi no-Ithayi, ithi: ‘Yilondeni insizwa u-Absalomu.’
Nokho-ke, ukuba ngenze ukungethembeki, ngambulala, inkosi ibizozwa ngalokho, njengoba kungekho nto inkosi eyifihlelwayo; nawe uqobo ubuyomelana nami.”
UJowabe wayesethi: “Anginakulibala ngenxa yakho.” Wathatha imikhonto emithathu ngesandla sakhe, wambhokoda u-Absalomu enhliziyweni, esaphila ephakathi kwe-okhi.
Izinsizwa ezilishumi ezaziphethe izikhali zikaJowabe zamzungeza, zamgwaza u-Absalomu, zambulala.
UJowabe wayesebetha icilongo, abantu babuya ekuxosheni u-Israyeli, ngokuba uJowabe wababamba abantu.
Bamthatha u-Absalomu, bamlahla emgodini omkhulu ehlathini, babeka phezu kwakhe inqwaba yamatshe enkulu kakhulu; bonke abakwa-Israyeli, yilowo nalowo, wabalekela ethendeni lakhe.
U-Absalomu esaphila wayethathe insika, wazimisela yona eSigodini seNkosi, ngokuba wathi: “Anginandodana ezovusa igama lami.” Wayiqamba insika ngegama lakhe; isabizwa ngokuthi yisikhumbuzo sika-Absalomu, kuze kube namuhla.
U-Ahimahazi, indodana kaZadoki, wayesethi: “Ake ngigijime, ngiyobikela inkosi ukuthi uSimakade uyiphindiselele ezitheni zayo.”
UJowabe wathi kuye: “Akuzukuba nguwe obika udaba namuhla, kepha uyakubika izindaba ngolunye usuku; namuhla awuzukubika lutho, ngokuba indodana yenkosi ifile.”
Wayesethi uJowabe kumKhushe: “Hamba, uyibikele inkosi ngokubonileyo.” UmKhushe wamkhothamela uJowabe, wayesegijima.
U-Ahimahazi, indodana kaZadoki, wabuye wathi kuJowabe: “Noma kungenzekani, ake ngigijime nami ngimlandele umKhushe.” Kepha uJowabe wathi: “Uzogijimelani wena, ndodana yami, lokhu kungekho mvuzo ozowuthola ngombiko na?”
Wathi: “Noma kungenzekani, ngizogijima.” Wathi kuye: “Gijima.” Wayesegijima u-Ahimahazi ngendlela esethafeni, wamdlula umKhushe.
UDavide wayehlezi phakathi kwamasango, elingaphakathi nelingaphandle; umlindi wakhuphukela ophahleni lwesango ngasogangeni lomuzi, waphakamisa amehlo akhe, wabona umuntu egijima yedwa.
Umlindi wamemeza, wayibikela inkosi. Yathi inkosi: “Uma eyedwa, ulethe umbiko.” Wayelokhu esondela njalo.
Umlindi wabona nomunye umuntu egijima; umlindi wayesebiza umlindisango, wathi: “Bheka, nangu omunye umuntu ogijima yedwa.” Inkosi yathi: “Naye lona ulethe umbiko.”
Umlindi wayesethi: “Ngibona kungathi ukugijima kowokuqala kunjengokugijima kuka-Ahimahasi, indodana kaZadoki.” Inkosi yathi: “Ngumuntu olungileyo lowo; ulethe umbiko omuhle.”
Wayesememeza u-Ahimahazi, wathi enkosini: “Bayede!” Wakhothama phambi kwenkosi, ebhekise phansi ubuso bakhe, wathi: “Makabongwe uSimakade uNkulunkulu wakho, onikele abantu abebefuna ukubulala inkosi yami.”
Inkosi yathi: “Kuhamba kahle yini ngensizwa u-Absalomu na?” U-Ahimahazi wathi: “Ngabona isixuku sabantu, lapho uJowabe inceku yenkosi ethuma mina inceku yakho, kodwa angazanga ukuthi kwenzekani.”
Inkosi yathi: “Gudluka, ume lapho.” Wagudluka, wema.
Bheka, kwase kufika umKhushe, wathi: “Ngilethe izindaba ezinhle enkosini, inkosi yami. USimakade ukuphindiselele namuhla kubo bonke abakuvukelayo.”
Inkosi yathi kumKhushe: “Kuhamba kahle yini ngensizwa u-Absalomu,na?” UmKhushe wathi: “Izitha zenkosi yami, inkosi, nabo bonke abayivukelayo mababe njengaleyo nsizwa.”
Yayisidabuka kakhulu inkosi, yakhuphukela ekamelweni elingaphezu kwesango, yakhala; isahamba yathi: “Hawu ngendodana yami, u-Absalomu, ndodana yami, ndodana yami Absalomu! Sengathi ngabe kufe mina esikhundleni sakho, Absalomu, ndodana yami, ndodana yami!”
Kwabikelwa uJowabe ukuthi: “Bheka, inkosi iyakhala, ililela u-Absalomu.”
Ukunqoba ngalolo lusuku kwaphenduka isililo kubo bonke abantu, ngokuba abantu bezwa kuthiwa ngalolo lusuku: “Inkosi idabukile ngenxa yendodana yayo.”
Abantu bangena benyenya emzini ngalolo lusuku kungathi banamahloni, ngoba bebalekela impi.
Inkosi yamboza ubuso, yakhala ngezwi elikhulu, yathi: “Hawu, ngendodana yami, u-Absalomu, Absalomu, ndodana yami, ndodana yami!”
UJowabe wangena endlini yenkosi, wathi kuyo: “Namuhla uzidumazile izinhliziyo zazo zonke izinceku zakho ezisindise ukuphila kwakho ngalolu lusuku, nokuphila kwamadodana namadodakazi akho, abafazi bakho nezancinza zakho,
ngokuba uthande abakuzondayo, wazonda abakuthandayo. Ukwenze kwacaca namuhla ukuthi izikhulu nezinceku azilutho kuwe. Lokhu ngiyabona namuhla ukuthi ukuba u-Absalomu ubephilile, thina sonke safa namuhla, ngabe kulungile emehlweni akho.
Ngakho-ke sukuma, uphume manje uyokhuluma kahle ezincekwini zakho, ngokuba ngifunga ngiyagomela phambi kukaSimakade ngithi, uma ungaphumi, akukho muntu ozosala ngakuwe ngalobu busuku. Lokhu kuzokuba kubi kuwe, kwedlule konke okubi osekwake kwakwehlela kusukela ebusheni bakho kuze kube namuhla.”
Inkosi yayisisuka-ke, yahlala esangweni. Bonke abantu bezwa kuthiwa: “Ake nibheke, inkosi ihleli esangweni.” Bonke abantu beza enkosini, kepha abakwa-Israyeli base bebalekile, yilowo nalowo ebalekele ethendeni lakhe.
Bonke abantu phakathi kwazo zonke izizwana zakwa-Israyeli babephikisana, bethi: “Inkosi yasisindisa esandleni sezitha zethu, yasikhulula esandleni samaFilisti, manje ibalekile ezweni, ibalekela u-Absalomu.
U-Absalomu esamgcoba ukuba asibuse ufele empini, ngakho-ke kungani nithule ningayibuyisi inkosi na?”
Inkosi uDavide yathumela kuZadoki no-Abhiyathara, abaphristi, yathi: “Khulumani kumalunga akwaJuda, nithi: ‘Kungani ukuba nibe ngabokugcina ukubuyisela inkosi esigodlweni sayo, lokhu konke okushiwo ngu-Israyeli sekufinyelele enkosini nasendlini yayo na?
Ningabafowethu nina, ithambo nenyama yami, pho-ke kungani ukuba nibe ngabokugcina ukubuyisa inkosi na?’
“Niyakuthi ku-Amasa: ‘Awusilo yini wena ithambo lami nenyama yami na? UNkulunkulu makenze kimi noma yini, uma wena kusukela manje, ungeke ube ngumkhuzi wempi yami esikhundleni sikaJowabe.’ ”
U-Amasa waziguqula izinhliziyo zabo bonke abantu bakwaJuda, baba muntu munye, base bethumela enkosini, bethi: “Buya wena, nazo zonke izinceku zakho.”
Inkosi yayisibuya, yafika eJordani, uJuda wafika eGiligali ukuzohlangabeza inkosi, nokuba ayiwelise iJordani.
UShimeyi, indodana kaGera, umBhenjamini waseBhahurimi, washesha wehla namadoda akwaJuda ukuyohlangabeza inkosi.
Weza nabantu abayinkulungwane bakwaBhenjamini, uZiba, inceku yendlu kaSawule, amadodana akhe ali-15, nezinceku zakhe ezingama-20, bashesha bafika eJordani phambi kwenkosi.
Kwawela isikebhe sokuweza abendlu yenkosi, okuyisenzo esaba sihle emehlweni ayo. UShimeyi, indodana kaGera, wakhothama wathi mbo phansi ngobuso phambi kwenkosi, ngesikhathi iwela iJordani.
Wathi enkosini: “Inkosi yami mayingangibeki icala, futhi ingakukhumbuli okubi okwenziwa yinceku yakho ngosuku inkosi yami, inkosi, iphuma eJerusalema, sengathi inkosi ingekubeke enhliziyweni yayo.
Ngokuba inceku yakho iyazi ukuthi yonile; uyabona-ke, namuhla ngifikile, ngingowokuqala kubo bonke abendlu kaJosefa, ukwehla ngizohlangabeza inkosi yami, inkosi.”
U-Abhishayi, indodana kaZeruya, waphendula, wathi: “UShimeyi akayukubulawa yini ngalokho, njengoba wathuka ogcotshiweyo kaSimakade na?”
UDavide wathi: “Ngizokwenzenjani ngani madodana kaZeruya, njengoba namuhla nimelane nami na? Kufanele yini ukuba namuhla kube khona obulawayo kwa-Israyeli na? Kanti angazi yini ukuthi namuhla ngiyinkosi kwa-Israyeli, na?”
Inkosi yayisithi kuShimeyi: “Awuyukufa.” Inkosi yafunga kuye.
UMefibhoshethi indodana kaSawule, wehla naye wayohlangabeza inkosi; wayengazigezanga izinyawo zakhe, engasigundile isilevu sakhe, noma ahlanze izingubo zakhe, kusukela ngosuku inkosi eyahamba ngalo kwaze kwaba lusuku eyabuya ngalo ngokuthula.
Kwathi esefike eJerusalema ukuzohlangabeza inkosi, inkosi yathi kuye: “Awuhambanga ngani nami, Mefibhoshethi?”
Wathi: “Nkosi yami, nkosi, inceku yami yangikhohlisa, ngokuba inceku yakho yathi kuyo: ‘Ngibophelele imbongolo, ukuze ngiyigibele, ngihambe nenkosi, ngokuba ngilunyonga.’
“Iyihlebile inceku yakho enkosini yami, inkosi, kepha inkosi yami, inkosi, ifana nesithunywa sikaNkulunkulu, ngakho-ke yenza okuhle emehlweni akho.
Ngokuba bonke abendlu kababa kwakufanele ukuba bafe, kodwa inkosi yami yayibeka inceku yayo nalabo abadla etafuleni layo. Ngisenalungelo lini ukuba ngingabuye ngikhale enkosini na?”
Inkosi yathi kuye: “Usakhulumelani ngezindaba zakho na? Ngithi, wena noZiba nizohlukaniselana izwe.”
Wayesethi uMefibhoshethi enkosini: “Makathathe konke, njengoba inkosi yami, inkosi, isibuyele esigodlweni sayo ngokuthula.”
UBharizilayi wakwaGileyadi wehla esuka eRogelimi; wawela nenkosi, wayiwelisa iJordani.
UBharizilayi wayesemdala kakhulu, eneminyaka engama-80. Nguye owabe ondla inkosi ngesikhathi isahleli eMahanayimi, ngokuba wayengumuntu onothileyo.
Inkosi yathi kuBharizilayi: “Wela nami, ngizokondla nami eJerusalema.”
Wayesethi uBharizilayi enkosini: “Zingaki izinsuku zeminyaka yokuphila kwami ukuba ngingenyukela eJerusalema nenkosi na?
Namuhla ngineminyaka engama-80; ngisakwazi yini ukwehlukanisa okuhle nokubi na? Inceku yakho isengakuzwa nje ekudlayo nekuphuzayo? Kepha ngingabe ngisalizwa yini izwi lamadoda ahlabelelayo nabesifazane abahlabelelayo na? Kungani inceku yakho izoba ngumthwalo enkosini yami, inkosi na?
Inceku yakho isingahamba ibangana nje ukuweza inkosi. Pho kungani inkosi ifuna ukungiklomelisa ngomklomelo ongaka na?
Ivumele inceku yakho iphindele emuva ukuze ifele emzini wayo, eduze kwethuna likayise nelikanina. Kepha bheka, nansi inceku yakho, uKhimihamu, mayiwele nenkosi yami, inkosi, uyenzele okuhle emehlweni akho.”
Inkosi yathi: “UKhimihamu uyakuwela nami, ngiyakumenzela okuhle emehlweni akho; konke okufisayo ngiyakumenzela khona.”
Bonke abantu bawela iJordani, nenkosi yawela. Inkosi yamanga uBharizilayi, yambusisa; wayesebuyela ekhaya.
Yayisiwela inkosi, yaya eGiligali, noKhimihamu wawela nayo; bonke abantu bakwaJuda bayiwelisa inkosi kanye nengxenye yabakwa-Israyeli.
Bheka, kwase kuza bonke abantu bakwa-Israyeli enkosini, bathi kuyo: “Kungani abafowethu bakwaJuda beyebile inkosi, bayiweza iJordani nabo bonke abendlu yayo, nabo bonke abantu bakaDavide ababenayo na?”
Wonke amadoda akwaJuda abaphendula abantu bakwa-Israyeli, athi: “Ngokuba inkosi iyisihlobo sethu segazi kungani ukuba nithukuthele ngale nto na? Sidleni engeyenkosi? Kukhona yini esixoshise ngakho?”
Abantu bakwa-Israyeli baphendula abakwaJuda, bathi: “Thina sinezabelo ezilishumi ngaphezu kwezenu enkosini, ngisho nakuDavide. Pho nisedeleleleni na? Aliphumanga kithi kuqala yini izwi lokuthi makubuyiswe inkosi na?” Kepha amazwi abakwaJuda ayenzima kunamazwi abakwa-Israyeli.
Kwakukhona umuntu ongalungile, ogama lakhe kunguSheba, indodana kaBhikhiri, umBhenjamini. Wasuka wabetha icilongo, wathi: “Asinasabelo kuDavide, asinafa endodaneni kaJese; hambani nonke niye emathendeni enu, Israyeli.”
Bonke abantu bakwa-Israyeli benyuka, ababe besamlandela uDavide, base belandela uSheba, indodana kaBhikhiri. Abantu bakwaJuda babambelela enkosini yabo kusukela eJordani kuze kufike eJerusalema.
UDavide wafika esigodlweni sakhe eJerusalema; inkosi yathatha abesifazane abalishumi, abayizancinza zayo, eyayibashiyile ukuba banakekele isigodlo, yababeka endlini yokulindela, yabapha ukudla, kepha ayilalanga nabo. Bavalelwa kwaze kwaba lusuku lokufa kwabo, behlezi njengabafelokazi.
Inkosi yayisithi ku-Amasa: “Hamba uyongiqoqela abantu bakwaJuda ngezinsuku ezintathu, ube khona nawe lapho.”
U-Amasa wahamba wamqoqa uJuda, kodwa wathatha isikhathi eside kunaleso ayesinqunyelwe.
Wayesethi uDavide ku-Abhishayi: “USheba, indodana kaBhikhiri, izokwenza kithi umonakalo omkhulu kunalowo ka-Absalomu. Thatha izinceku zenkosi yakho, umxoshe, funa aze azitholele imizi ebiyelweyo, aphele emehlweni.”
Walandelwa ngamadoda kaJowabe, amaKherethi, amaPhelethi nawo wonke amaqhawe. Baphuma eJerusalema ukuba bamxoshe uSheba, indodana kaBhikhiri.
Kwathi sebeseduze netshe elikhulu eliseGibheyoni, u-Amasa weza ukuzobahlangabeza. UJowabe wayegqoke isembatho sakhe sempi, ayehlale esigqoka. Kuboshelwe kuso ibhande elinenkemba emgodleni wayo, elibhince okhalo. Ngesikhathi eza phambili, inkemba yawa.
UJowabe wayesethi ku-Amasa: “Unjani mfowethu?” UJowabe wabamba u-Amasa isilevu, ngesandla sakhe sokunene, wamanga.
U-Amasa akayinakanga inkemba eyayiphethwe nguJowabe ngesandla. UJowabe wamgwaza kanye ngayo esiswini, izibilini zakhe zachithekela emhlabathini, wafa ujuqu. Akamphindanga. UJowabe no-Abhishayi, umfowabo, baqhubeka bexosha uSheba, indodana kaBhikhiri.
Enye yezinsizwa zikaJowabe yaphuma yama ngaku-Amasa, yathi: “Noma ngubani othanda uJowabe nongokaDavide, makalandele uJowabe.”
U-Amasa wadindiliza egazini lakhe phakathi nendlela. Kuthe lapho lowo muntu ebona ukuthi bonke abantu bafike beme ngaku-Amasa, wayesemgudlula endleleni. Wamyisa ensimini, waphonsa ingubo phezu kwakhe, ngoba wayebabona abantu belokhu bedlula ngakuye bema.
Esesusiwe u-Amasa endleleni, abantu bonke basuka balandela uJowabe, baxosha uSheba, indodana kaBhikhiri.
USheba wadabula ezizwaneni zonke zakwa-Israyeli, waze wayofika e-Abhela, eBhethi Mahakha, nakuwo wonke amaBheri, nakhona babuthana bamhubha.
Impi kaJowabe yafika yavimbezela i-Abheli eBhethi Mahakha. Benza indunduma ngasodongeni, ababezohlasela umuzi bekuyo. Ibutho likaJowabe lashaya ugange ukuze luwe.
Kwase kumemeza owesifazane ohlakaniphileyo emzini, wathi: “Lalelani! Lalelani! Yishoni kuJowabe nithi: ‘Sondela lapho ukuba ngikhulume nawe.’ ”
Wasondela kuye; wayesethi owesifazane kuye: “UnguJowabe wena?” Waphendula wathi: “Nginguye.” Owesifazane wayesethi: “Ake ulalele amazwi encekukazi yakho.” Wayesethi: “Ngilalele.”
Wayesethi owesifazane: “Emandulo babevame ukuthi: ‘Kuyakubuzwa nokubuzwa e-Abhela.’ Bese beyiqeda indaba.
Mina ngingowokuthula nothembekile kwa-Israyeli. Kungani ufuna ukubhubhisa umuzi ongunina ka-Israyeli na? Yini ufune ukudla ifa likaSimakade na?”
UJowabe waphendula, wathi: “Makungenzeki, angingabi naso nesifiso sokuba ngidle noma ngibhubhise.
Akusiyo inhloso yami leyo. Kepha indoda yakwelezintaba kwa-Efrayimi, egama layo nguSheba, indodana kaBhikhiri, ivukele inkosi uDavide; nginikeni yona kuphela ukuze ngihambe ngiwushiye umuzi.” Owesifazane wathi kuJowabe: “Uyabona-ke, ikhanda lakhe lizophonswa kuwe ngaphandle kogange.”
Owesifazane waya kubantu, wabatshela ngecebo lakhe eliphusile, nempela balinquma ikhanda likaSheba, indodana kaBhikhiri, baliphonsa ngaphandle kuJowabe. UJowabe wayesebetha icilongo, abantu bahlakazeka bawushiya umuzi, babuyela emathendeni abo. UJowabe waphindela enkosini eJerusalema.
UJowabe wayesengumkhuzi wayo yonke impi yakwa-Israyeli. UBhenaya, indodana kaJehoyada, wayengamele amaKherethi namaPhelethi.
U-Adoramu engumgcinimafa, uJehoshafathi, indodana ka-Ahiludi, engumabhalane.
USheva engunobhala, uZadoki no-Abhiyathara bengabaphristi.
U-Ira umJayiri engumphristi kaDavide.
Kwaba khona indlala, ezinsukwini zikaDavide, iminyaka emithathu ilandelana. UDavide wafuna ubuso bukaSimakade. USimakade wathi: “Lokhu kungenxa kaSawule nendlu yakhe abachitha igazi, ngokuba babulala abaseGibheyoni.”
Inkosi yayisibiza abaseGibheyoni yakhuluma nabo. AbaseGibheyoni babengesibo abantu bakwa-Israyeli, babeyinsali yama-Amori. Nokho abakwa-Israyeli babenze isifungo kubo, kodwa uSawule wayefuna ukubabulala ngenxa yentshisekelo yakhe ngabakwa-Israyeli nabakwaJuda.
UDavide wathi kwabaseGibheyoni: “Yini enginganenzela yona, futhi ngingenza kanjani ukuba sithelelane amanzi ukuze nilibusise ifa likaSimakade na?”
AbaseGibheyoni bathi kuye: “Lokhu akuphathelene nasiliva nagolide noma noSawule nendlu yakhe, futhi akuhlangene nakubulala muntu kwa-Israyeli.” Wathi kubo: “Noma yini eniyishoyo, ngiyonenzela yona.”
Bathi enkosini: “Umuntu owasibulalayo, owenza icebo ngathi wayefuna siqothulwe phakathi kwemingcele yakwa-Israyeli.
Masinikwe yena nabantu abayisikhombisa bozalo lwakhe, sizobaphanyeka phambi kukaSimakade eGibheya likaSawule, okhethiweyo kaSimakade.” Inkosi yathi: “Ngizoninika bona.”
Inkosi nokho yamshiya uMefibhoshethi, indodana kaJonathani kaSawule, ngenxa yesifungo kuSimakade abasenza esasiphakathi kwabo, phakathi kukaDavide noJonathani, indodana kaSawule.
Inkosi yathatha amadodana amabili kaRizpha, indodakazi ka-Aya, ayewazalele uSawule: u-Arimoni, noMefibhoshethi namadodana amahlanu kaMikhali, indodakazi kaSawule, ayewazalele u-Adriyeli, indodana kaBharizilayi, umMeholathi.
Wabanikela kwabaseGibheyoni, babaphanyeka entabeni phambi kukaSimakade; labo abayisikhombisa bafa kanyekanye. Babulawa ngesikhathi sokuvuna, ngezinsuku zokuqala, kusaqalwa ukuvunwa kwebhali.
URizpha, indodakazi ka-Aya, wathatha indwangu eyisaka, wazendlalela yona edwaleni, kusukela ekuqaleni kokuvuna kwaze kwana izulu labanetha. Akazange avumele izinyoni zezulu ukuba zihlale phezu kwabo emini nezilwane zasendle ebusuku.
UDavide walandiswa ngalokho ukuthi uRizpha, indodakazi ka-Aya, isancinza sikaSawule, wenzeni.
UDavide wawalanda amathambo kaSawule namathambo kaJonathani, indodana yakhe, kubantu baseJabeshi Gileyadi, ababewebe esigcawini eBhethi Shani, lapho babephanyekwe khona, mhla amaFilisti ebulala uSawule eGilibhowa.
Wenyuka lapho namathambo kaSawule nakaJonathani indodana yakhe, base bewaqoqa namathambo alabo ababephanyekiwe.
Bawambela amathambo kaSawule noJonathani, indodana yakhe, kwaBhenjamini, eZela, ethuneni likaKishi, uyise. Benza konke inkosi eyayibayale ngakho. Emveni kwalokho uNkulunkulu wayizwa imikhuleko ngenxa yezwe.
Kwabuye kwaba khona ukulwa phakathi kwamaFilisti no-Israyeli. UDavide nezinceku zakhe behla, balwa namaFilisti. UDavide waphelelwa ngamandla.
U-Ishibhi Bhenobhi, omunye wamaRefa, osisindo somkhonto wakhe sasingamashekeli ethusi angama-300, futhi ebhince inkemba entsha, wathi, uzakumbulala uDavide.
Kepha u-Abhishayi, indodana kaZeruya, wamsiza, wamshaya umFilisti, wambulala. Ngenxa yalokho abantu bakaDavide bafunga phambi kwakhe, bathi: “Awusayukubuye uphume impi nathi, ukuze ungasicimi isibani sakwa-Israyeli.”
Emveni kokuba sekwenzekile lokho, kwaba khona ukulwa namaFilisti eGobhi. Lapho uSibhekhayi, umHushathi, wabulala uSafi, omunye wamadodana amaRefa.
Kwaphinde kwaqubuka enye futhi impi namaFilisti eGobhi. U-Elihanani, indodana kaJahari Oregimi waseBhethlehema, wabulala uGoliyathi, umGithi, othi lomkhonto wakhe lwalungangogongolo lomaluki.
Kwabuye futhi kwaba khona impi eGathi, kwakukhona lapho umuntu owayengumdondoshiya, owayeneminwe eyisithupha esandleni ngasinye, enezinzwani eziyisithupha onyaweni ngalunye, kungama-24 kukonke; naye wayezalwa yiRefa.
Wameyisa u-Israyeli, ngakho-ke uJonathani, indodana kaShimeyi, umfowabo kaDavide, wambulala.
Bobane labo babezalwa ngamaRefa eGathi, kodwa bawa ngesandla sikaDavide nangesandla sezinceku zakhe.
UDavide washo amazwi aleli hubo kuSimakade, ngosuku uSimakade amsindisa ngalo esandleni sazo zonke izitha zakhe nasesandleni sikaSawule imbala,
wathi: “USimakade uyidwala lami, nenqaba yami, nomkhululi wami.
UNkulunkulu uyidwala lami engiphephela kulo, isihlangu sami, nophondo lwensindiso yami, inqaba yami ephephileyo nesiphephelo sami; msindisi wami, uyangisindisa ebudloveni.
Ngimemeza uSimakade ofanele ukudunyiswa, ngisindiswe ezitheni zami.
“Amagagasi okufa angihaqa; izikhukhula zobubi zangisibekela.
Izintambo zendawo yabafileyo zangizungeza, izihibe zokufa, zangehlela.
Ekuhluphekeni kwami ngambiza uSimakade, ngambiza uNkulunkulu wami; walizwa izwi lami esethempelini lakhe. Ukukhala kwami kwafinyelela ezindlebeni zakhe.
“Umhlaba wawusuzamazama, wandindizela; izisekelo zezulu zathuthumela, zaqhaqhazela, ngokuba ethukuthele.
Kwaphuma intuthu emakhaleni akhe, nomlilo oqothulayo emlonyeni wakhe, namalahle avuthayo kuye.
Wadabula amazulu, wehla; isigayegaye sobumnyama sasiphansi kwezinyawo zakhe.
Wakhwela phezu kwekherubhi, wandiza; wabonwa emaphikweni omoya.
Wenza ubumnyama bube ngamadokodo amphahlayo, amanzi aqoqane, amafu abe nzima yimvula.
Ekukhazimuleni okuphambi kwakhe kwavutha amalahle omlilo.
USimakade waduma ezulwini; Ophezukonke walizwakalisa izwi lakhe.
Wathuma imicibisholo, wabangquzula, yebo, ngonyazi wabadidizelisa.
Kwembulwa izisekelo zolwandle, nezisekelo zomhlaba zabonakaliswa ngenxa yokuthetha kukaSimakade, nokufutha kwamakhala akhe.
Waselula isandla sakhe ephezulu, wangibamba; wangikhipha emanzini amaningi.
Wangisindisa esitheni sami esinamandla nakubo abangizondayo, ngokuba babenamandla amakhulu kunami.
Bangihlasela ngosuku engehlelwa ngalo yinhlekelele, kodwa uSimakade waba yinsika yami.
Wangikhiphela endaweni ebanzi: wangikhulula, ngokuba ethokoza ngami.
“USimakade ungivuzile ngokulunga kwami, wangibuyisela njengobumsulwa bezandla zami.
Ngizigcinile izindlela zikaSimakade; angikwenzanga okubi ngokufulathela uNkulunkulu wami.
Imithetho yakhe yayiphambi kwami, nezimiso zakhe angichezukanga kuzo.
Ngangimsulwa kuye; ngazigcina, angenza okubi.
USimakade wangivuza ngangokulunga kwami, nanjengokuhlanzeka kwami phambi kwamehlo akhe.
“Kothembekileyo, uzibonakalisa ethembekile; kumuntu oqotho, uziveza eqotho.
Kohlanzekileyo, uzibonakalisa ehlanzekile; koyisigwegwe, azibonakalise enenkani.
Uyabasindisa abantu abathobekileyo, kodwa amehlo akho akulabo abaqhoshayo ukuze ubathobise.
Wena Simakade uyisibani sami; uSimakade uyabuguqula ubumnyama bami bube ngukukhanya.
Ngawe ngingahlasela impi; ngoNkulunkulu wami ngingeqa ugange.
Indlela kaNkulunkulu iphelele; izwi likaSimakade lihlanzekile; Yena uyisihlangu sabo bonke abaphephela kuye.
“Ngubani onguNkulunkulu ngaphandle kukaSimakade, ngubani oyidwala ngaphandle kukaNkulunkulu wethu na?
UNkulunkulu uyangibhincisa amandla; indlela yami uyenza iqonde.
Yena wenza izinyawo zami zibe njengezendlunzelakazi, angimise ezindaweni eziphakemeyo.
Ufundisa izandla zami ukulwa, ukuze izingalo zami zinsale umnsalo wethusi.
Wena unginikile isihlangu sensindiso yakho; ukungilalela kwakho, kungikhulise kakhulu.
Wandise izinyathelo zami, ukuze amaqakala ami angaxegi.
“Ngazixosha izitha zami, ngazibhubhisa; angibuyanga ngingakaziqedi nya.
Ngaziqeda, ngaziphahlaza, zaze zehluleka ukuvuka; zawa phansi kwezinyawo zami.
Wangibhincisa amandla okulwa; ababengivukele wabathobisa phansi kwami.
Wangifulathelisela izitha zami, nabangizondayo ngabaqothula.
Bakhala, kepha akubanga bikho obasindisayo, bakhala nakuSimakade, kodwa akabaphendulanga.
Ngabashaya ngabacolisisa njengothuli lomhlabathi; ngabadovadova njengodaka emgwaqweni.
“Wangikhulula ekulweni kwabantu; wangilonda ngaba yinhloko yabezizwe; abantu engingabaziyo bayakungikhonza.
Abafokazi bazithoba phansi kwami; banele bezwa nje ngami, bangihlonipha.
Abafokazi badangala, baphuma ezinqabeni zabo bethuthumela.
“USimakade uyaphila malidunyiswe idwala lami. Makaphakanyiswe uNkulunkulu, idwala lensindiso yami.
UNkulunkulu onginika impindiselo, othobise izizwe phansi kwami.
Ungikhiphe ezitheni zami, wangiphakamisela phezu kwabangivukelayo, wangihlenga kumuntu oyisidlova.
Ngakho-ke ngizokubonga Simakade phakathi kwabezizwe, ngilihubele igama lakho.
Uyenza insindiso ibe nkulu kakhulu enkosini; umenzele umusa uDavide, ogcotshiweyo wakho, nabozalo lwakhe, kuze kube phakade.”
Lawa ngamazwi kaDavide okugcina. “Amazwi okugcina kaDavide, indodana kaJese, umuntu owaphakanyiswa nguNkulunkulu, ogcotshiweyo kaNkulunkulu ka-Jakobe, nomhlabeleli wezingoma ezimnandi kwa-Israyeli, uthi:
“UMoya kaNkulunkulu wakhuluma ngami; izwi lakhe lalisolimini lwami.
UNkulunkulu ka-Israyeli ukhulumile, iDwala lika-Israyeli lathi kimi: ‘Obusa abantu ngokulunga, abuse ngokwesaba uNkulunkulu,
unjengokukhanya ekuseni, njengelanga liphuma, isibhakabhaka sicwathile, ucwazimula njengotshani emhlabathini emuva kwezimvula.’
“Indlu yami ayinjalo yini kuNkulunkulu na? Ngokuba wenze nami isivumelwano saphakade; zonke izinto wazihlela, wazivikela. Yonke insindiso yami nokwenama kwami, uyakukuhlumisa.
Kepha bonke abangenamsebenzi walutho bayakuba njengameva alahliweyo, ngokuba angephathwe ngesandla.
Kepha umuntu oyowathinta, uyohlonyiswa ngensimbi noma ngothi lomkhonto, aze ashiswe ngomlilo angqongqe khona lapho.”
Nanka amagama amaqhawe kaDavide: uJoshebhi Bhashebhethi waseThakhemoni, owayeyinhloko yabathathu. Nguye owaphakamisa umkhonto wakhe, wabulala abantu abangama-800 ngasikhathi sinye.
Wayelandelwa ngu-Eleyazare, indodana kaDodo, indodana ka-Ahowahi. Wayengomunye wamaqhawe amathathu ayenoDavide mhlazana edelela amaFilisti ayeqoqene lapho ukuze alwe no-Israyeli, kodwa abakwa-Israyeli base behambile.
Wasuka wabulala amaFilisti kwaze kwakhathala isandla sakhe, sanamathela enkembeni. USimakade wabapha ukunqoba okukhulu ngalolo lusuku. Abantu babuya, beza kuye, ukuze babuthe impango kuphela.
Wayelandelwa nguShema, indodana ka-Age, umHarori. AmaFilisti ayebuthene eLehi, kukhona isiqinti sezwe lapho, sigcwele imbumba. AmaFilisti abaxosha abantu, babaleka phambi kwawo,
kodwa yena wema phakathi nesiqinti, wasivikela, wawabulala amaFilisti; uSimakade wamnika okukhulu ukunqoba.
Kwase kwehla abathathu kwabangama-30, abayizinhloko, bafika kuDavide esemgedeni e-Adulamu ngesikhathi sokuvuna. Impi yamaFilisti yayikanise esigodini samaRefa.
UDavide ngaleso sikhathi wayesenqabeni, ibutho lamaFilisti liseBhethlehema.
UDavide womela amanzi, wayesethi: “Ngubani ozakunginika amanzi asemthonjeni eBhethlehema ongasesangweni, ngiphuze na?”
Lawo maqhawe amathathu afohla, angena enkanjini yamaFilisti, akha amanzi emthonjeni eBhethlehema ongasesangweni. Awathatha awaletha kuDavide, kodwa akavumanga ukuwaphuza; wawathululela uSimakade.
Wathi: “Angizimisele neze, Simakade, ukuba ngenze lokhu; ngingaliphuza kanjani igazi lalaba bantu ababeke impilo yabo engcupheni?” Akavumanga ukuwaphuza. Yilezo-ke izinto ezenziwa yilawo maqhawe amathathu.
U-Abhishayi, umfowabo kaJowabe, indodana kaZeruya, wayeyinhloko yalabo abangama-30. Wagwaza ngomkhonto wakhe abangama-300, wababulala, wazenzela igama phakathi kwalabo abathathu.
Nguye owanconywa kakhulu phakathi kwabangama-30, futhi waba yisikhulu sabo, akafinyelelanga nokho kwabathathu bokuqala.
UBhenaya, indodana kaJehoyada, wayeyindoda eyiqhawe elinamandla, elenza imisebenzi emikhulu. WayengowaseKhabizeyeli; wabulala amaqhawe amabili akwaMowabi, waphinde wehla, wabulala ingonyama emgodini ngosuku likhithikile.
Wabulala nowaseGibhithe owayemuhle. Lowo waseGibhithe wayephethe umkhonto esandleni sakhe, kodwa uBhenaya wabhekana naye ephethe induku nje. Wawuhlwitha umkhonto esandleni somGibhithe, wambulala ngawo umkhonto wakhe.
UBhenaya, indodana kaJehoyada, wenza lezo zinto, wazenzela igama phakathi kwabathathu.
Wayehlonipheke kakhulu phakathi kwabangama-30, kodwa akafikanga kulaba abathathu ngokuhlonishwa. UDavide wambeka ukuba engamele abaqaphi bakhe.
Phakathi kwabangama-30 kwakungu-Asaheli, umfowabo kaJowabe, u-Elihanani, indodana kaDodo waseBhethlehema,
uShama wakwaHarodi, u-Elika wakwaHarodi,
uHelezi wasePhalithi, u-Ira, indodana ka-Ikeshi waseThekowa,
u-Abhiyezeri wase-Anathothi, uMebhunayi, umHushathi,
uZalimoni, umAhohi, uMaharayi waseNethofa,
uHelevi, indodana kaBhahana waseNethofa, u-Ithayi, indodana kaRibhayi waseGibheya labakwaBhenjamini,
uBhenaya wasePhirathoni, uHidayi wangasemifudlaneni yakwaGahashi,
u-Abhi Alibhoni umAraba, u-Azimavethi waseBharihumi,
u-Eliyaba waseShahalibhoni, uBhene Jasheni, uJonathani,
uShama waseHarari, u-Ahiyamu, indodana kaSharari wase-Arari,
u-Elifelethi, indodana ka-Ahashibhayi, indodana yomMahakha, u-Eliyamu, indodana ka-Ahithofeli waseGilo,
uHezerayi waseKharimeli, uPhaharayi wase-Arabhi,
u-Igali, indodana kaNathani waseZobha, uBhani wakwaGadi,
uZeleki wakwa-Amoni, uNaharayi waseBherothi, izindibi zezikhali zikaJowabe, indodana kaZeruya,
u-Ira waseJetheri, uGarebhi waseJetheri,
no-Uriya umHithi. Sebebonke babengama-37.
Intukuthelo kaSimakade yabuye yamvuthela u-Israyeli. Wamvusa uDavide ukuba amelane naye, ngokuthi kuye: “Hamba ubale u-Israyeli noJuda.”
Inkosi yathi kuJowabe, umkhuzi wempi, owayenaye: “Hamba uye kuzo zonke izizwe zakwa-Israyeli kusukela kwaDani kuze kufike eBheri Sheba; nibale abantu ukuze ngazi ukuthi bangaki.”
UJowabe wathi enkosini: “USimakade uNkulunkulu wakho angenezela kubantu kuphindwe kayikhulu phezu kwalokhu abayikho, ikubone lokho ngamehlo inkosi yami, inkosi, isakwazi ukubona. Kodwa kungani inkosi yami, inkosi ifuna ukwenza lokhu na?”
Nokho-ke inkosi yayikhulume yaqokothisa kuJowabe, umkhuzi wempi, ngakho-ke laphumelela izwi layo. UJowabe nezikhulu zempi baphuma phambi kwenkosi, bahamba bayobala abantu bakwa-Israyeli.
Bawela iJordani, bakanisa e-Aroweri ngakwesokunene somuzi ophakathi nomhosha wakwaGadi, ngaseJazeri.
Bafika kwaGileyadi, naseThahethimi Hodeshi, bedlulela kwaDani Jahani. Basuka lapho baya naseSidoni,
baze bayofika enqabeni eseThire, nakuyo yonke imizi yamaHivi namaKhanani. Baphuma lapho balibangisa ngaseningizimu yakwaJuda, eBheri Sheba.
Sebelihambe lonke izwe, baze bafika eJerusalema sekuphele izinyanga eziyisishiyagalolunye nezinsuku ezingama-20.
UJowabe walethula enkosini inani nomumo wabantu ababebaliwe: kwa-Israyeli kwakunamadoda ayizi-800 000 anamandla ayehlome ngenkemba. KwaJuda kunamadoda ayizi-500 000.
UDavide wahlabeka enhliziyweni emveni kokuba esebabalile abantu, wathi kuSimakade: “Ngonile kakhulu ngalokhu engikwenzileyo. Kepha manje, Simakade, siza uthethelele isiphambeko esenziwe yinceku yakho, ngokuba yenze ubuwula obukhulu.”
Lapho uDavide evuka ekuseni, kwafika izwi likaSimakade kumphrofethi uGadi, umboni kaDavide, lathi:
“Hamba ukhulume kuDavide, uthi: ‘Usho kanje uSimakade, uthi: “Ngikubekela izinto ezintathu, khetha ibe yinye phakathi kwazo, ukuba ngikwenzele yona.” ’ ”
UGadi wafika kuDavide wambikela, wathi kuye: “Izofika yini kuwe: iminyaka eyisikhombisa yendlala ezweni lakini, noma izinyanga ezintathu ubaleka ezitheni eziyobe zilokhu zikuxoshile, noma izinsuku ezintathu zobhubhane ezweni lakini na? Manje-ke, cabangisisisa, unqume ukuthi mpendulo yini engizokuyibuyisela kongithumileyo.”
UDavide wayesethi kuGadi: “Nginosizi kakhulu; kungcono siwele esandleni sikaSimakade, ngokuba umusa wakhe mkhulu. Kepha mangingaweli neze esandleni somuntu.”
USimakade wayesethumela ubhubhane kwa-Israyeli kusukela ekuseni kwaze kwaba yisikhathi esinqunyiweyo. Kwafa abantu abayizi-70 000 kusukela kwaDani kuze kufike eBheri Sheba.
Lapho ingelosi yelula isandla sayo ukuba ibhubhise iJerusalema, uSimakade wazisola ngalobo bubi, wayimisa ingelosi eyayibhubhisa abantu, wathi: “Sekwanele.” Ingelosi kaSimakade yayisesibuyeni sika-Arawuna, umJebusi.
Lapho uDavide eyibona ingelosi eyayibulala abantu, wathi kuSimakade: “Bheka, yimi engonile, ngenza okubi, kodwa lezi zimvu zenzeni na? Isandla sakho masibe phezu kwami naphezu kwendlu kababa.”
UGadi wafika kuDavide ngalolo lusuku, wathi: “Yenyuka wakhele uSimakade i-althare esibuyeni sika-Arawuna umJebusi.”
UDavide wenyuka njengokusho kukaGadi nanjengokuyala kukaSimakade.
U-Arawuna walunguza, wabona inkosi nezinceku zayo beza kuye; waphuma, wayikhothamela inkosi, wayesethi mbo ngobuso emhlabathini.
Wathi u-Arawuna: “Kungani ukuba inkosi yami, inkosi, ize encekwini yayo na?” UDavide wathi: “Ngize ukuzothenga kuwe isibuya, khona ngizokwakhela uSimakade i-althare, ukuze lolu bhubhane lunqamuke kubantu.”
U-Arawuna wayesethi kuDavide: “Inkosi yami, inkosi, mayisithathe, inikele ngalokho ekubona kukuhle emehlweni ayo. Bheka, nazi izinkabi zomnikelo wokushiswa, izibhulo, namajoka ezinkabi kungaba yizinkuni.
Konke nkosi, u-Arawuna ukunika inkosi.” U-Arawuna wabuye wathi enkosini: “USimakade uNkulunkulu wakho makakwamukele.”
Inkosi yathi ku-Arawuna: “Qha, kumele ngikuthenge nokukuthenga, ngikukhokhele inani elithile. Angiyukunikela kuSimakade uNkulunkulu wami ngeminikelo yokushiswa engeyesihle.” UDavide wayesethenga isibuya nezinkabi ngamashekeli esiliva angama-50.
UDavide wamakhela lapho uSimakade i-althare, wanikela ngeminikelo yokushiswa nangeminikelo yokuthula. USimakade wakuzwa ukunxusa kwakhe, enxusela izwe, ubhubhane lwanqamuka kwa-Israyeli.
Inkosi uDavide yayisikhulile, neminyaka yayo isiminingi impela. Bayembesa ngezingubo, kepha kwanhlanga zimuka nomoya; ayifudumalanga.
Izinceku zathi kuyo: “Inkosi yami, inkosi, ayifunelwe intombi esencane inakekele inkosi, iyibheke, ilale esifubeni sayo, ukuze inkosi yami, inkosi, ifudumale.”
Zase zifuna intombi enhle kuyo yonke indawo kwa-Israyeli, zathola u-Abhishagi waseShunemi, zamletha enkosini.
Intombi yayiyinhle kakhulu, yayinakekela inkosi; yayisebenzela, kodwa inkosi ayilalanga nayo.
U-Adoniya, indodana kaHagithi, wayeziphakamisa, ethi: “Yimi engizokuba yinkosi.” U-Adoniya wazilungiselela inqola yempi nabamahhashi, nabantu abangama-50 ukuba bagijime phambi kwakhe.
Uyise wayengakaze amkhuze nakanye, athi: “Ukwenzeleni lokhu na?” U-Adoniya wayemuhle kakhulu, elama u-Absalomu.
Abantu ababemlandela, bemsiza futhi ecebisana nabo u-Adoniya, kwakunguJowabe, indodana kaZeruya no-Abhiyathara, umphristi.
Kepha uZadoki umphristi, uBhenaya indodana kaJehoyada, uNathani umphrofethi, uShimeyi, uReyi namaqhawe kaDavide abamlandelanga u-Adoniya.
U-Adoniya wahlaba izimvu, izinkabi namathole akhuluphalisiweyo ngasetsheni eZohelethi, eceleni kwe-Eni Rogeli. Wamema bonke abafowabo, amadodana enkosi, abantu bonke bakwaJuda, izinceku zenkosi,
kodwa uNathani, umphrofethi, uBhenaya, amaqhawe, noSolomoni, umfowabo, akazange abameme.
UNathani wathi kuBhathi Sheba, unina kaSolomoni: “Awuzwanga yini ukuthi u-Adoniya, indodana kaHagithi, useyinkosi, inkosi uDavide ingakwazi lokho na?
Ngakho-ke woza ngikweluleke ukuze usindise impilo yakho neyendodana yakho, uSolomoni.
Hamba uye enkosini uDavide, uthi kuyo: ‘Wena nkosi yami, awuzange yini ufunge encekukazini yakho, uthi: “USolomoni, indodana yakho, uyokuba yinkosi emva kwami, ahlale esihlalweni sami sobukhosi,” na? Pho kungani u-Adoniya eseyinkosi na?’
Kuyothi usakhuluma nenkosi nami ngifike emva kwakho, ngiwafakazele amazwi akho.”
UBhathi Sheba waya enkosini, wangena ekamelweni eyayikulo; inkosi yayisikhule kakhulu. U-Abhishagi waseShunemi wayeyinakekela inkosi.
UBhathi Sheba wakhothama, wakhuleka enkosini. Inkosi yathi kuye: “Ungibabele ngani na?”
Wathi kuyo: “Nkosi yami, wafunga uSimakade uNkulunkulu wakho encekukazini yakho, wathi: ‘USolomoni, indodana yakho, uyakuba yinkosi emva kwami, ahlale esihlalweni sami sobukhosi.’
Bheka, manje, u-Adoniya useyinkosi, wena nkosi yami, nkosi, ungakwazi lokho.
Uhlabe izinkabi, amathole akhuluphalisiweyo, nezimvu okuningi, wamema wonke amadodana enkosi, u-Abhiyathara umphristi, uJowabe umkhuzi wempi, kodwa uSolomoni, inceku yakho, akazange ammeme.
Amehlo abo bonke abakwa-Israyeli abheke wena, nkosi yami, nkosi, ukuze batshelwe nguwe ukuthi ngubani ozohlala esihlalweni sobukhosi senkosi yami, emva kwayo.
Funa kuthi lapho inkosi yami, inkosi, isilele koyisemkhulu, mina nendodana yami, uSolomoni, kuthiwe sinecala.”
Kuthe esakhuluma nenkosi, kwafika uNathani, umphrofethi.
Bayibikela inkosi, bathi: “Bheka, sekufike umphrofethi, uNathani.” Wangena enkosini, wayesekhothama wathi mbo ngobuso phambi kwayo.
UNathani wathi: “Nkosi yami, nkosi, ushilo yini ukuthi: ‘U-Adoniya uzokuba yinkosi emuva kwami, ahlale esihlalweni sami sobukhosi’ na?
Phela wehlile namuhla ukuba ahlabe izinkabi, amathole akhuluphalisiweyo, nezimvu eziningi; umeme onke amadodana enkosi, abakhuzi bempi, no-Abhiyathara umphristi; bheka, bayadla, bayaphuza phambi kwakhe, bathi: ‘Mana njalo, nkosi Adoniya.’
“Kepha mina, mina nceku yakho, uZadoki umphristi, uBhenaya, indodana kaJehoyada kanye noSolomoni, inceku yakho, akasimemenga.
Ngabe le nto yenziwe yinkosi yami, inkosi, ayazazisa izinceku zayo ukuthi ngubani ozohlala esihlalweni sobukhosi senkosi yami, inkosi, emva kwayo na?”
Inkosi uDavide yayisiphendula, ithi: “Ngibizele uBhathi Sheba.” UBhathi Sheba weza enkosini, wema phambi kwayo.
Inkosi yafunga yathi: “Ngifunga ngiyagomela phambi kukaSimakade ohlenge umphefumulo wami kukho konke ukuhlupheka kwami,
njengoba ngafunga kuwe ngoSimakade uNkulunkulu ka-Israyeli, ngathi uSolomoni, indodana yakho, uyokuba yinkosi emva kwami; uyakuhlala esihlalweni sami sobukhosi esikhundleni sami, ngenza kanjalo namuhla.”
UBhathi Sheba wayesekhothama wathi mbo ngobuso bakhe phansi, wakhuleka enkosini, wathi: “Mana njalo, nkosi yami, nkosi Davide.”
Inkosi uDavide yayisithi: “Ngibizele uZadoki umphristi, uNathani umphrofethi, noBhenaya, indodana kaJehoyada.” Base beza phambi kwenkosi.
Inkosi yathi kubo: “Thathani izinceku zenkosi yenu nigibelise uSolomoni, indodana yami, umnyuzi wami, nimehlisele eGihoni.
UZadoki, umphristi noNathani, umphrofethi bayakumgcoba lapho uSolomoni ukuba abe yinkosi kwa-Israyeli, bese nibetha amacilongo, nithi: ‘Mana njalo, nkosi Solomoni.’
“Bese nimlandela, nenyuke emva kwakhe aze afike ahlale esihlalweni sami sobukhosi, ngokuba nguye engimkhombe ukuba abe yinkosi phezu kuka-Israyeli noJuda.”
UBhenaya, indodana kaJehoyada, wayiphendula inkosi, wathi: “Makube njalo; uSimakade uNkulunkulu wenkosi yami, inkosi, makasho njalo naye.
Njengalokhu uSimakade ubenayo inkosi yami, inkosi, sengathi angaba naye uSolomoni, asenze isihlalo sakhe sobukhosi sibe sikhulu kunesihlalo sobukhosi senkosi yami, inkosi uDavide.”
UZadoki umphristi, uNathani umphrofethi, uBhenaya, indodana kaJehoyada, amaKherethi namaPhelethi behla, bamgibelisa uSolomoni emnyuzini wenkosi uDavide, bamyisa eGihoni.
UZadoki, umphristi, wathatha uphondo lwamafutha ethendeni, wamgcoba uSolomoni. Babetha amacilongo, bonke abantu bathi: “Mana njalo, nkosi Solomoni.”
Bonke abantu benyuka belandela uSolomoni bebetha amacilongo. Bathokoza ngokuthokoza okukhulu, kwaze kwangathi kuqhekezeka umhlaba ngenxa yomsindo wabo.
U-Adoniya nabo bonke ayebamemile bawuzwa umsindo lapho nje beqeda ukudla. UJowabe ezwa ukukhala kwecilongo, wathi: “Ungowani lo msindo wokuxokozela emzini na?”
Esakhuluma nje, nakho-ke sekufika uJonathani, indodana ka-Abhiyathara, umphristi. U-Adoniya wathi: “Ngena ngokuba wena uyindoda elungile, uphethe izindaba ezinhle.”
UJonathani waphendula wathi ku-Adoniya: “Qha, nkosi yethu, inkosi uDavide imbekile uSolomoni inkosi.
Inkosi ithumele noZadoki umphristi, uNathani umphrofethi, uBhenaya, indodana kaJehoyada, amaKherethi namaPhelethi, bamgibelisa emnyuzini wenkosi.
UZadoki, umphristi noNathani, umphrofethi bamgcobile eGihoni ukuba abe yinkosi. Manje sebenyukele khona bejabula, lo msindo omkhulu emzini yiwo eniwuzwileyo.
Kumanje nje, uSolomoni usehleli esihlalweni sobukhosi sombuso.
Nezinceku zenkosi zifikile ukuzoyihalalisela inkosi yethu, inkosi uDavide, zithi: ‘UNkulunkulu wakho makalenze libe lihle igama likaSolomoni ukwedlula elakho. Isihlalo sakhe sobukhosi sibe sikhulu kunesihlalo sakho sobukhosi; inkosi yakhothamisa ikhanda embhedeni wayo.’
“Yayisithi: ‘Makadunyiswe uSimakade uNkulunkulu ka-Israyeli ommisile namuhla ozohlala esihlalweni sami sobukhosi, ngisabona ngamehlo ami.’ ”
Bonke abebekade bemenywe ngu-Adoniya besaba, basuka bonke bahamba, kwaba yilowo nalowo wabamba abeze ngayo.
U-Adoniya, ngenxa yokwesaba uSolomoni, wasuka, wahamba, wayobamba izimpondo ze-althare.
Kwase kubikwa kuSolomoni kuthiwa: “Bheka, u-Adoniya uyayesaba inkosi uSolomoni, ngalokho usebambe izimpondo ze-althare, ethi: ‘Inkosi uSolomoni mayifunge namuhla ukuthi ayiyukuyibulala inceku yayo ngenkemba.’ ”
USolomoni wathi: “Uma ezokuba yindoda elungileyo, akukho nolulodwa unwele lwakhe oluyowela emhlabathini, kodwa uma kutholakala kuye okubi, uyokufa.”
Inkosi uSolomoni yayisithumela ukuba bamehlise e-althare. Wafika wakhuleka enkosini uSolomoni. USolomoni wathi kuye: “Hamba uye endlini yakho.”
Lapho sezisondela izinsuku zokufa kukaDavide, wayiyala indodana yakhe, uSolomoni, wathi:
“Mina sengizohamba indlela ehanjwa yibo bonke abaphilayo, ngakho-ke wena qina, ube yindoda.
Gcina isiyalezo akuyala ngaso uSimakade uNkulunkulu wakho, uhambe ezindleleni zakhe. Gcina izimiso zakhe, imithetho yakhe, imiyalo yakhe nobufakazi bakhe, njengalokhu kubhalwe emthethweni kaMose, ukuze uphumelele kukho konke oyokwenza nakulokho oyophendukela kukho.
Ngalokho uSimakade uyakuqinisa izwi lakhe alikhuluma maqondana nami, lapho ethi: ‘Uma abozalo lwakho beyoqaphela indlela yabo, bahambe ngobuqotho phambi kwami ngenhliziyo yabo yonke nangawo wonke umphefumulo wabo, akuyukusweleka muntu kubo oyohlala esihlalweni sobukhosi sika-Israyeli.’
“Phezu kwalokho, uyazi ukuthi uJowabe, indodana kaZeruya, wenzani kimi, nokuthi wabaphatha kanjani abakhuzi ababili bempi ka-Israyeli; u-Abhineri, indodana kaNeri, no-Amasa, indodana kaJetheri, ababulalayo, wachitha igazi ngokulwa ngesikhathi sokuthula. Wabheca igazi lokulwa ebhandeni lakhe elalisokhalo, nasezicathulweni zakhe ezazisezinyaweni zakhe.
Uyokwenza njengokuhlakanipha kwakho, ungavumi ukuba aze abe mpunga, aye endaweni yabafileyo ngokuthula.
“Kepha ube nomusa kumadodana kaBharizilayi wakwaGileyadi, abe phakathi kwabadla ngasefatuleni lakho, ngokuba enza kanjalo kimi, mhlazana ngibalekela u-Absalomu, umfowenu.
“Bheka, ungakuwe uShimeyi, indodana kaGera wakwaBhenjamini waseBhahurimi, owangithuka ngendlela ebuhlungu mhla ngiya eMahanayimi. Kepha wehla wangihlangabeza ngaseJordani, ngase ngifunga kuye phamabi kukaSimakade, ngathi: ‘Angiyukukubulala ngenkemba.’
“Ngakho-ke ungamyeki engajezile, wena ungumuntu ohlakaniphileyo, uyokwazi okufanele ukwenze kuye ukuze uyehlisele impunga endaweni yabafileyo inegazi.”
UDavide wayeselaliswa kokhokho bakhe, wambelwa emzini kaDavide.
Izinsuku uDavide abusa ngazo kwa-Israyeli zaziyiminyaka engama-40; iminyaka eyisikhombisa wabusa eHebhroni, kwathi engama-33 wabusa eJerusalema.
USolomoni wahlala esihlalweni sobukhosi sikaDavide, uyise; umbuso wakhe waqiniswa kakhulu.
Kwase kufika u-Adoniya, indodana kaHagithi, kuBhathi Sheba, unina kaSolomoni, uBhathi Sheba wathi: “Ngabe uze ngokuthula na?” Waphendula wathi u-Adoniya: “Yebo, ngize ngokuthula.”
Wayesethi: “Nginodaba engize ngalo kuwe.” Wathi: “Khuluma.”
Wathi u-Adoniya: “Uyazi wena ukuthi umbuso wawungowami, nokuthi wonke u-Israyeli wayebheke ukuba kubuse mina. Nokho-ke izinto zaguquka, umbuso wase ubuyela kumfowethu, uSolomoni, ngokuba yena wayeqokwe nguSimakade.
Manje-ke ngicela into eyodwa vo kuwe; ungangifulatheli.” Wathi kuye: “Khuluma.”
Wathi: “Ake ukhulume enkosini uSolomoni, ngokuba akasoze akufulathele wena, ukuba anginike u-Abhishagi waseShunemi abe ngumkami.”
UBhathi Sheba wathi: “Kulungile, ngizokukhulumela enkosini.”
UBhathi Sheba waya enkosini uSolomoni ukuze akhulumele u-Adoniya. Inkosi yasukuma yamhlangabeza, yamkhothamela, yase ihlala esihlalweni sayo, yase ibekela unina wenkosi isihlalo, wahlala ngakwesokunene sayo.
Wayesethi kuyo: “Nginesicelo esisodwa nje esincane kuwe, uze ungangifulatheli.” Inkosi yathi kuye: “Cela mame, angiyukukufulathela.”
Wathi-ke: “U-Abhishagi waseShunemi makanikwe u-Adoniya, umfowenu, abe ngumkakhe.”
Inkosi uSolomoni yaphendula, yathi kunina: “Umcelelelani u-Adoniya u-Abhishagi waseShunemi na? Kungani ungamceleli nombuso, ngokuba ungufowethu? Yebo, wenze kanjalo naku-Abhiyathara, umphristi noJowabe, indodana kaZeruya.”
Inkosi uSolomoni yayisifunga kuSimakade, yathi: “UNkulunkulu makenze kanjalo kimi, enezele futhi uma u-Adoniya engalikhulumanga leli lizwi, wabeka ukuphila kwakhe engcupheni yokufa.
Ngakho ngifunga ngiyagomela kuSimakade ongimisile, wangibeka esihlalweni sobukhosi sikaDavide, ubaba, waze wangenza ngayindlu njengokusho kwakhe, namuhla uzobulawa u-Adoniya.”
Inkosi uSolomoni yayisithumela uBhenaya, indodana kaJehoyada, ukuba imhlasele imbulale; wafa kanjalo-ke.
Inkosi yathi ku-Abhiyathara, umphristi: “Hamba uye e-Anathothi emasimini akho, ngokuba ufanelwe wukufa, kodwa angizukukubulala namuhla, ngokuba wawuthwala umphongolo weNkosi uSimakade phambi kukaDavide, ubaba. Nawe wahlushwa yizona zonke izinhlupheko ezehlela ubaba.”
USolomoni wayesemxosha u-Abhiyathara, akabe esaba ngumphristi kaSimakade, ukuze afeze izwi likaSimakade alisho ngendlu ka-Eli eShilo.
Kuthe lapho ufika lo mbiko kuJowabe, ngokuba uJowabe wayelandele u-Adoniya nakuba ayengamlandelanga u-Absalomu, wabaleka waya ethendeni likaSimakade, wafika wabamba izimpondo ze-althare.
Inkosi uSolomoni yabikelwa ukuthi: “UJowabe ubalekele ethendeni likaSimakade, bheka, ungase-althare.” USolomoni wathumela uBhenaya, indodana kaJehoyada, wathi kuyo: “Hamba umsukele, umbulale.”
UBhenaya waya ethendeni likaSimakade, wathi kuJowabe: “Isho kanje inkosi, ithi: ‘Phuma.’ ” Wathi: “Qha, ngizofela lapha.” UBhenaya wabuyisela enkosini izwi, wathi: “UJowabe ungiphendule kanjalo.”
Inkosi yathi kuye: “Yenza njengalokhu eshilo; mthelekele umbulale, ummbele, ukuze ususe kimi nasendlini kababa igazi elachithwa ngeze nguJowabe.
USimakade uzophindisela phezu kwakhe igazi lamadoda amabili alungileyo namahle kunaye awabulala ngenkemba, ubaba uDavide engazi ngalokho: u-Abhineri, indodana kaNeri, umkhuzi wempi yakwa-Israyeli, no-Amasa, indodana kaJetheri, umkhuzi wempi yakwaJuda.
Igazi labo liyakubuyela ekhanda likaJowabe nasekhanda lozalo lwakhe kuze kube phakade, kepha kuDavide, nasozalweni lwakhe, nakuyo indlu yakhe, nakuso isihlalo sakhe sobukhosi kuyakuba ngukuthula kuze kube phakade, kuvela kuSimakade.”
UBhenaya, indodana kaJehoyada, wenyuka wamthelekela, wambulala, wembelwa endlini yakhe ehlane.
Inkosi yambeka uBhenaya, indodana kaJehoyada, waba ngumkhuzi wempi esikhundleni sikaJowabe. UZadoki, umphristi, inkosi yambeka waba ngumphristi esikhundleni sika-Abhiyathara.
Inkosi yathumela, yabiza uShimeyi, yathi kuye: “Zakhele indlu eJerusalema, uhlale khona, ungaphumi lapho, ungayi ndawo.
Ngokuba mhla uphuma, uwela umfudlana iKidroni, yazisisa ukuthi uyakufa nokufa; igazi lakho liyakuba sekhanda lakho.”
Wayesethi uShimeyi enkosini: “Lokhu okushilo kulungile, inceku yakho izokwenza njengokusho kwenkosi yami, inkosi.” UShimeyi wahlala eJerusalema izinsuku eziningi.
Kwathi ngasekupheleni kweminyaka emithathu, izinceku ezimbili zikaShimeyi zabaleka, zaya ku-Akhishi, indodana kaMahakha, inkosi yaseGathi. UShimeyi watshelwa kwathiwa: “Bheka, izinceku zakho ziseGathi.”
Wayesesuka uShimeyi, wabophela imbongolo yakhe, waya eGathi ku-Akhishi ukuba afune izinceku zakhe; wahamba uShimeyi, wazibuyisa izinceku zakhe eGathi.
USolomoni wabikelwa ukuthi uShimeyi usukile eJerusalema waya eGathi, kodwa usebuyile.
Inkosi yathumela, yambiza uShimeyi, yathi kuye: “Angikufungisanga yini kuSimakade ngabuye ngakuxwayisa ngathi: ‘Mhla uphuma uya noma kuphi, wazi kahle ukuthi uyobe usuzimbele igodi na?’ Wena wathi kimi: ‘Lokho okushilo kuhle.’
“Pho awusigcinanga ngani isifungo owasenza kuSimakade nomyalo engakuyala ngawo na?”
Inkosi yabuye yathi kuShimeyi: “Wena ukwazi kahle konke okubi okusenhliziyweni yakho owakwenza kuDavide, ubaba, ngakho-ke uSimakade uyakuphindisela ububi bakho phezu kwakho.
Inkosi uSolomoni izobusiswa, nesihlalo sobukhosi sikaDavide siqiniswe phambi kukaSimakade kuze kube phakade.”
Inkosi yayisiyala uBhenaya, indodana kaJehoyada, waphuma wamthelekela; wambulala. Umbuso waqiniswa esandleni sikaSolomoni.
USolomoni noFaro, inkosi yaseGibhithe, bakha ubuhlobo ngokuganiselana. USolomoni wayithatha indodakazi kaFaro, wayingenisa emzini kaDavide, waze waqeda ukwakha isigodlo sakhe, nendlu kaSimakade, nokwakha ugange oluzungeze iJerusalema nxazonke.
Abantu babenza imihlatshelo ezindaweni eziphakemeyo, ngoba yayingakabi bikho indlu eyakhelwe igama likaSimakade, kwaze kwaba yilezo zinsuku.
USolomoni wamthanda uSimakade, wahamba ngokwezimiso zikaDavide, uyise, kodwa naye wayehlaba, eshisa impepho ezindaweni eziphakemeyo.
Inkosi uSolomoni yaya eGibheyoni ukuyokwenza umhlatshelo khona, ngokuba kwakuyiyona ndawo ephakemeyo, enkulu. USolomoni wanikela ngeminikelo yokushiswa eyinkulungwane kulelo althare.
EseGibheyoni uSimakade wabonakala kuye ngephupho ebusuku, uNkulunkulu wathi kuye: “Cela lokho othanda ukuba ngikuphe khona.”
USolomoni wathi: “Ukhombise umusa omkhulu encekwini yakho uDavide, ubaba, ngoba wahamba phambi kwakho ngokwethembeka, ngokulunga nangobuqotho benhliziyo kuwe, wamgcinela lowo musa omkhulu, wamnika indodana ukuba ihlale esihlalweni sakhe sobukhosi njengalokhu kwenzeka namuhla.
“Manje-ke, Simakade Nkulunkulu wami, uyibekile inceku yakho ukuba ibe yinkosi esikhundleni sikababa uDavide, noma ngisengumntwana nje. Angikakwazi ukungena nokuphuma.
Inceku yakho uyibeke phakathi kwesizwe sakho osikhethileyo, isizwe esikhulu esingenakubalwa, nobuningi baso obungenakuqondwa.
Ngakho-ke yiphe inceku yakho inhliziyo elalelayo ukuze ikwazi ukubusa abantu bakho, ikwazi ukwehlukanisa phakathi kokuhle nokubi, ngokuba ngubani ongabusa lesi sizwe sakho esikhulu kangaka na?”
Lokhu kwaba kuhle emehlweni eNkosi uSimakade, ukuthi uSolomoni acele leyo nto.
UNkulunkulu wathi kuye: “Ngokuba ucele lokho, awuzange uzicelele impilo ende, noma ingcebo, noma ucele ukuba kufe izitha zakho, kodwa ucele ukuqonda lapho wehlulela;
uyabona-ke, ngenzile njengokwezwi lakho. Ngikunika inhliziyo enokuhlakanipha nokuqonda; okungazange kube khona namunye owake wafana nawe phambilini, futhi okungayikuba bikho oyovela emva kwakho.
Ngizokunika nongazange ukucele; ingcebo nodumo. Akukho nayinye phakathi kwamakhosi eyolinganiswa nawe, izinsuku zonke zokuphila kwakho.
Uma nje uyohamba ngezindlela zami, ugcine izimiso zami nemithetho yami, njengalokhu ahamba uyihlo uDavide, ngiyokwandisa izinsuku zokuphila kwakho.”
USolomoni wayesephaphama; lokho kwakuyiphupho; wasuka lapho wabuyela eJerusalema. Wafike wema phambi komphongolo wesivumelwano sikaSimakade, wanikela ngeminikelo yokushiswa, nangeminikelo yokuthula, wenzela izinceku zakhe zonke idili.
Kwase kufika enkosini abesifazane ababili ababexegelwa yisimilo, bema phambi kwenkosi.
Omunye wabo wathi: “Bayede, nkosi, mina nalo wesifazane sihlala endlini eyodwa. Ngibelethe nginaye endlini.
Kuthe ngosuku lwesithathu ngibelethile, lo wesifazane naye wabeletha; besindawonye, kungekho omunye obenathi endlini; bekuyithi nje sobabili kuphela.
“Umfana walo wesifazane ufe ebusuku, ngokuba ulale phezu kwakhe.
Uvuke phakathi kwamabili wathatha umfana wami eceleni kwami, incekukazi yakho isalele. Ube esembeka esifubeni sakhe, wabeka umfana wakhe ofileyo esifubeni sami.
Lapho ngivuka ekuseni ukuze ngincelise umfana wami, ngithole ukuthi ubesefile. Kepha kuthe sekusile lapho sengimbhekisisa ngabona ukuthi akusiye umfana wami engimzeleyo.”
Omunye wesifazane wayesethi: “Qha, lo mfana ophilayo ngowami, ofileyo ngumfana wakho.” Kepha yena wathi: “Qhabo bo, ofileyo ngumfana wakho, ophilayo ngumfana wami.” Baphikisana kanjalo phambi kwenkosi.
Inkosi yayisithi: “Omunye uthi: ‘Ngowami lo mfana ophilayo, ngowakho umfana ofileyo;’ omunye uthi: ‘Qhabo bo, ngumfana wakho ofileyo, ngumfana wami ophilayo.’ ”
Yathi-ke inkosi: “Ngiletheleni inkemba.” Base beyiletha inkemba enkosini.
Inkosi yayisithi: “Mklayeni phakathi umntwana ophilayo, ninike omunye ingxenye, nomunye ingxenye.”
Owesifazane okungowakhe umntwana ophilayo wakhuluma enkosini, ngenxa yokuthi kwavuka izinseka ngomntwana wakhe, wathi: “Ngixolele, nkosi yami, mnike yena umntwana ophilayo, ungalokothi umbulale,” kepha lo omunye, wathi: “Makangatholwa muntu phakathi kwami nawe; makaklaywe.”
Inkosi yayisithatha, ithi: “Umntwana ophilayo mnikeni lona othe ningamklayi, ngokuba nguyena ongunina wakhe.”
U-Israyeli wonke wezwa ngaleso sehlulelo esasenziwe yinkosi, wayesaba inkosi ngokuba wabona ukuthi ukuhlakanipha kukaNkulunkulu kwakunayo ekwehluleleni kwayo.
Inkosi uSolomoni yabusa u-Israyeli wonke.
Nanka amagama ezikhulu zayo: u-Azariya, indodana kaZadoki, owayengumphristi;
u-Elihorefi no-Ahiya, amadodana kaShisha, ababengababhali; uJehoshafathi, indodana ka-Ahiludi, owayengumabhalane;
uBhenaya, indodana kaJehoyada, owayengumkhuzi wempi; uZadoki no-Abhiyathara ababengabaphristi;
u-Azariya, indodana kaNathani, owayengamele zonke izikhulu; uZabudi, indodana kaNathathi, owayengumphristi nomngani wenkosi
u-Ahishari wayephethe isigodlo; u-Adoniramu, indodana ka-Abhida, owayephethe izisebenzi ezaziphoqiwe.
USolomoni wayenezinduna ezili-12, phezu kwabo bonke abakwa-Israyeli, ezazilethela inkosi nabendlu yayo ukudla; yileyo naleyo yayiletha ukudla inyanga eyodwa ngonyaka.
Nanka amagama azo: uBheni Huri kwelezintaba kwa-Efrayimi;
uBheni Dekeri eMakhasi, eShahalabimi, eBhethi Shemeshi, nase-Eloni Bhethi Hanani;
uBheni Hesedi e-Arubhothi, okwakungelakhe iSoko nalo lonke iHeferi;
uBheni Abhinadaba kulo lonke iNafathi Dori; uThafati, indodakazi kaSolomoni, wayengumkakhe;
uBhahana, indodana ka-Ahiludi eThahanaki, eMegido, nakulo lonke iBhethi Sheyani elingaseceleni kweZarethani, ngezansi kwaseJizreyeli, kusukela eBhethi Sheyani kuze kube se-Abhela Mehola nangaphesheya kweJokimeyamu;
uBheni Gebheri eRamothi Gileyadi, okwakungeyakhe imizi kaJayire, indodana kaManase ekwaGileyadi, ne-Arigobi eliseBhashani, imizi engama-60 enezingange nemigoqo yethusi;
u-Ahinadaba, indodana ka-Ido eMahanayimi,
u-Ahimahazi kwaNafetali, yena owathatha uBhasemathi, indodakazi kaSolomoni, abe ngumkakhe,
uBhahana, indodana kaHushayi kwa-Asheri nase-Alothi;
uJehoshafathi, indodana kaPharuwa kwa-Isakhare;
uShimeyi, indodana ka-Ela kwaBhenjamini,
noGebheri, indodana ka-Uri kwaGileyadi, izwe likaSihoni, inkosi yama-Amori no-Ogi, inkosi yaseBhashani, ngokuba kwakuyinduna eyodwa kulelo lizwe.
OJuda no-Israyeli babebaningi ngangesihlabathi solwandle, bedla, bephuza, bejabula.
USolomoni wabusa phezu kwemibuso yonke, kusukela emfuleni kuze kube sezweni lamaFilisti nasemngceleni eGibhithe; bathela intela, bamkhonza uSolomoni zonke izinsuku zokuhamba kwakhe.
Ukudla kukaSolomoni, ngosuku olulodwa, kwakungamakhora angama-30 empuphu ecolisekileyo, amakhora angama-60 empuphu,
izinkabi ezilishumi ezikhuluphalisiweyo, izinkabi ezingama-20 zasemadlelweni, izimvu eziyikhulu ngaphandle kwezindluzele, amanxala, izinsephe, nezinkukhu ezikhuluphalisiweyo.
Wabusa ezweni lonke, ngaphesheya komfula kusukela eThifisa kuze kube seGaza, phezu kwawo wonke amakhosi ngaphesheya komfula; wayenokuthula nxazonke zakhe.
OJuda no-Israyeli bahlala belondekile, kwaba yilowo nalowo phansi komvini wakhe nomkhiwane wakhe, kusukela kwaDani kuze kube seBheri Sheba, zonke izinsuku zikaSolomoni.
USolomoni wayenezipani ezingama-40 000 zamahhashi ezinqola zakhe nabasebenzisa amahhashi abayizi-12 000.
Lezi zinduna zaziyilethela ukudla inkosi uSolomoni, nabo bonke abasondela etafuleni lenkosi uSolomoni, yileyo naleyo ngenyanga yayo; kwakungasweleki lutho.
Zaletha nebhali, nefoliji lamahhashi, namahhashi anejubane lapho zazikhona, kwaba yileyo naleyo njengokunqunyelwe yona.
UNkulunkulu wamnika uSolomoni ukuhlakanipha nokuqonda okukhulu kakhulu, nengqondo esabalele okwesihlabathi esisogwini lolwandle.
Ukuhlakanipha kukaSolomoni kwakukukhulu kwedlula ukuhlakanipha kwabantu bonke basempumalanga nakho konke ukuhlakanipha kwaseGibhithe.
Wayehlakaniphe kunabo bonke abantu: kuno-Ethani umEzra, uHemani, uKalikoli, uDarda, amadodana kaMaholi, negama lakhe lalisezizweni zonke, nxazonke.
Waqamba izaga eziyizi-3 000; amaculo akhe ayeyi-1 005.
Wacwaninga ngezihlahla, kusukela kuwo umsedari oseLebhanoni kuze kube kulo ihisophi elimila odongeni; wacwaninga ngezinkomo, ngezinyoni, ngezilwanyana ezinwabuzelayo nangezinhlanzi.
Kwafika abantu bevela ezizweni zonke ukuzozwa ukuhlakanipha kukaSolomoni, babevela kuwo wonke amakhosi omhlaba ayezwile ngokuhlakanipha kwakhe.
UHiramu, inkosi yaseThire, wathuma izinceku zakhe kuSolomoni, ngokuba wayesezwile ukuthi ugcotshiwe ukuba abe yinkosi esikhundleni sikayise. UHiramu wayengumngani kaDavide zonke izinsuku zakhe.
USolomoni wathumela kuHiramu, wathi:
“Wena uyazi ukuthi uDavide, ubaba, akakwazanga ukwakhela igama likaSimakade uNkulunkulu wakhe indlu, ngenxa yezimpi ezazimzungezile; uSimakade waze wabeka izitha phansi kwamathe ezinyawo zakhe.
Kepha manje uSimakade uNkulunkulu wami unginike ukuphumula nhlangothi zonke; akekho omelana nami, akukho ngozi.
Ngicabanga ukwakhela igama likaSimakade uNkulunkulu wami indlu, njengalokhu uSimakade asho kuDavide ubaba, wathi: ‘Indodana yakho, engiyakuyibeka esihlalweni sakho sobukhosi esikhundleni sakho, yiyona eyakwakhela igama lami indlu.’
“Ngakho-ke ake uyaleze ukuba bangigawulele imisedari eLebhanoni, izinceku zami zibe nezakho. Ngiyakukunika inkokhelo yezinceku zakho ngendlela oyobiza ngayo, ngokuba wena uyazi ukuthi akukho muntu kithi ongagawula imithi njengamaSidoni.”
Kwathi uHiramu esewezwile amazwi kaSolomoni, wathokoza kakhulu, wathi: “Makadunyiswe uSimakade namuhla, ophe uDavide indodana ehlakaniphileyo ukubusa phezu kwalaba bantu abakhulu.”
UHiramu wayesethumela kuSolomoni, wathi: “Ngizwile lokho okuthumele kimi; mina ngiyakwenza konke okufunayo ngemisedari nangemisayiphuresi.
Izinceku zami ziyakuyehlisa eLebhanoni, ziyiyise olwandle, mina ngiyenze ibe yizihlenga ezihamba olwandle, ziye endaweni oyakungiyalela yona, zihlakazwe lapho. Wena uyakuzithwala lapho, ufeze engikufunayo ngokuba uphe abendlu yami ukudla.”
UHiramu wayesenika uSolomoni imisedari nemisayiphuresi njengalokho ayekufunile.
USolomoni wamnika uHiramu amakhora ayizi-20 000 kakolo, ukudla kwabendlu yakhe, namakhora angama-20 amafutha akhanyiweyo. USolomoni wamnika kanjalo uHiramu iminyaka ngeminyaka.
USimakade wamnika ukuhlakanipha uSolomoni njengokuba ayeshilo kuye. Kwakukhona ukuthula phakathi kukaHiramu noSolomoni; benza isivumelwano bobabili.
Inkosi uSolomoni yafuna izisebenzi kubo bonke abakwa-Israyeli; izisebenzi zaba yizi-30 000.
Yathumela izisebenzi eziyizi-10 000 ngenyanga, eLebhanoni, zidedelana; zaziba seLebhanoni inyanga, zibe sekhaya izinyanga ezimbili. U-Adoniramu nguye owayephethe izisebenzi.
USolomoni wayenabathwala imithwalo abayizi-70 000, nababazi bamatshe ezintabeni abayizi-80 000,
ngaphandle kwezinduna ezinkulu zikaSolomoni ezaziphethe umsebenzi, eziyizi-3 300 ezazengamele abantu ababesebenza.
Inkosi yayalela ukuba baqophe amatshe amakhulu, amatshe anenani elikhulu, ukuba babeke isisekelo sendlu ngamatshe abaziweyo.
Abakhi bakaSolomoni nabakhi bakaHiramu nabaseGebhali bawabaza, balungisa imithi namatshe ukuba kwakhiwe indlu.
Kwathi ngonyaka wama-480 emveni kokuphuma kwaba-Israyeli eGibhithe, ngonyaka wesine wokubusa kukaSolomoni phezu kwabakwa-Israyeli, ngenyanga kaZivi eyinyanga yesibili, waqala ukwakha indlu kaSimakade.
Indlu, inkosi uSolomoni eyayakhela uSimakade, ubude bayo babungamakhubhithi angama-60, nobubanzi bayo bungamakhubhithi angama-20, nokuphakama kwayo kwakungamakhubhithi angama-30.
Umphemegumbi ngaphambili wendlu yethempeli wawungamakhubhithi angama-20 ubude bawo maqondana nobubanzi bendlu; ububanzi bawo babungamakhubhithi alishumi ngaphambi kwendlu.
Wenzela indlu amafasitela anamakhethini angenakususwa.
Ngasodongeni lwendlu wakha izimpondo nxazonke, ngasezindongeni zendlu nxazonke, ethempelini nasegumbini; wenza amakamelo asezinhlangothini nxazonke;
uphondo lwangaphansi lwalungamakhubhithi ayisihlanu ububanzi balo, noluphakathi lwalungamakhubhithi ayisithupha ububanzi balo, nolwesithathu lwalungamakhubhithi ayisikhombisa ububanzi balo; ngokuba ngaphandle wenza uqaqa endlini nxazonke, ukuze imishayo ingangeni ezindongeni zendlu.
Indlu, isakhiwa, yakhiwa ngamatshe alungiswa enkwalini; akuzwakalanga sando, zembe, piki, nanto yensimbi, isakhiwa.
Umnyango wekamelo lohlangothi olungaphakathi wawuseceleni kwesokunene sendlu; kwakukhushukwa ngezikhwelo ezimazombezombe ukuya ophondweni olungaphakathi, kuphunywe kolungaphakathi kuyiwe kolwesithathu.
Wayakha kanjalo-ke indlu, wayiqeda, wayifulela indlu ngemishayo nangamapulangwe emisedari.
Wakha izimpondo zangasendlini yonke, yilolo nalolo lwaba ngamakhubhithi ayisihlanu ukuphakama kwalo; zanamathela endlini ngemithi yemisedari.
Izwi likaSimakade lafika kuSolomoni, lathi:
“Kumi kanje maqondana nale ndlu oyakhayo: uma uyakuhamba ngezimiso zami, wenze izehlulelo zami, ugcine yonke imiyalo yami ukuba uhambe ngayo, ngiyakufeza kuwe izwi engalikhuluma kuDavide uyihlo:
ngiyakuhlala phakathi kwabakwa-Israyeli, angiyukubashiya abantu bami, u-Israyeli.”
USolomoni wayakha-ke indlu, wayiqeda.
Wakha izindonga zendlu ngamapulangwe emisedari ngaphakathi; kusukela phansi endlini kuze kufike emishayweni yophahla, wemboza ngamapulangwe ngaphakathi, wendlala phansi endlini amapulangwe emisayiphuresi.
Wakha futhi amakhubhithi angama-20 ngamapulangwe emisedari ngaseceleni lendlu langasemuva, kusukela phansi kuze kufike emishayweni, wazakhela phakathi okwaba yigumbi, okuyindawo engcwelengcwele.
Indlu yangaphambili yethempeli yayiyingamakhubhithi angama-40.
Kwakungumsedari ngaphakathi endlini, kubaziwe kwaba ngumfanekiso wezintangazane nezimbali eziqhakazileyo; konke kwakungumsedari, akubonakalanga tshe khona.
Walungisa igumbi eliphakathi endlini ukuba kubekwe khona umphongolo wesivumelwano sikaSimakade.
Phambi kwegumbi kwakungamakhubhithi angama-20 ubude, namakhubhithi angama-20 ngobubanzi, namakhubhithi angama-20 ngokuphakama; wakunameka ngegolide elicwengekileyo, walembesa i-althare ngemisedari.
USolomoni wayinameka indlu phakathi ngegolide elicwengekileyo, walivalela igumbi ngamaketanga egolide; walinameka nalo ngegolide.
Wanameka-ke, yonke indlu ngegolide, yaze yaphelela indlu yonke; ne-althare lonke elalisegumbini walinameka ngegolide.
Egumbini eliphakathi wenza amakherubhi amabili ngomnqumo, yilelo nalelo lingamakhubhithi alishumi ukuphakama kwalo.
Elinye iphiko lekherubhi lalingamakhubhithi ayisihlanu, nelinye iphiko lekherubhi lingamakhubhithi ayisihlanu; kusukela esihlokweni selinye iphiko kuze kufike esihlokweni selinye, kwakungamakhubhithi alishumi.
Elinye ikherubhi lalingamakhubhithi alishumi nalo; amakherubhi omabili ayeyisilinganiso sinye nesimo sinye.
Ukuphakama kwelinye ikherubhi kwakungamakhubhithi alishumi, nelinye ikherubhi lalinjalo.
Wawabeka amakherubhi phakathi nendlu engaphakathi; amakherubhi awelula amaphiko, iphiko lelinye lathinta odongeni, nephiko lelinye ikherubhi lathinta odongeni olunye; amaphiko awo athintana phakathi nendlu.
Wawanameka ngegolide amakherubhi.
Wafekethisa zonke izindonga zendlu nxazonke ngezithombe zamakherubhi ezibaziweyo, ngamasundu, nangezimbali eziqhakazileyo, ngaphakathi nangaphandle.
Naphansi endlini wanameka ngegolide, ngaphakathi nangaphandle.
Wenzela umnyango wegumbi izivalo zomnqumo; ikhothamo nezinsika zomnyango kwakuyizinhlangothi eziyisihlanu.
Wenza-ke izivalo ezimbili ngomnqumo, wazifekethisa ngamakherubhi abaziweyo, ngamasundu, nangezimbali eziqhakazileyo, wazinameka ngegolide, wembesa amakherubhi namasundu ngegolide.
Wenzela futhi umnyango wethempeli izinsika zomnyango ngomnqumo, ziyizinhlangothi ezine,
nezicabha ezimbili zingezomsayiphuresi; izingxenye zombili zaleso naleso sicabha zazifongqeka.
Wazifekethisa ngamakherubhi, ngamasundu, nangezimbali eziqhakazileyo, wanameka ngegolide kukho konke okubaziweyo.
Wakha igceke elingaphakathi ngezinhla ezintathu zamatshe abaziweyo, nohla lwemishayo yemisedari.
Ngonyaka wesine isisekelo sendlu kaSimakade sase sibekiwe ngenyanga kaZivi.
Ngonyaka we-11, ngenyanga kaBhuli eyinyanga yesishiyagalombili, indlu yase iqediwe ukwakhiwa ngokohlelo okwakumele yakhiwe ngalo. USolomoni wayakha iminyaka eyisikhombisa.
USolomoni wasakha isigodlo sakhe wasiqeda ngeminyaka eli-13.
Wayesakha indlu eyabizwa ngokuthi yiNdlu Yehlathi LaseLebhanoni: ubude bayo babungamakhubhithi ayikhulu, ububanzi bungamakhubhithi angama-50, ukuphakama kungamakhubhithi angama-30, phezu kwezinhla ezine zezinsika zemisedari, kunemishayo yemisedari phezu kwezinsika.
Yayifulelwe ngemisedari phezu kwemishayo engama-45 eyayiphezu kwezinsika ezili-15, umugqa ngamunye.
Kwakunezinsika namafasitela emigqeni yomithathu ebhekene, yilowo nalowo mugqa.
Yonke iminyango nezinsika kwakuyizinhlangothi ezine ngemishayo; ingaphambili lefasitela libhekene nelinye emigqeni yomithathu.
Wakha indlu yezinsika: ubude bayo babungamakhubhithi angama-50, ububanzi bungamakhubhithi angama-30; yayinomphemegumbi nezinsika phambi kwayo.
Wakha indlu yesihlalo sobukhosi, lapho ayezokhiphela khona izahlulelo. Indlu yokwehlulela yayimbozwe ngemisedari, kusukela phansi kuze kushaye phezulu.
Isigodlo sakhe lapho ayezohlala khona, kwelinye igceke ngaphakathi komphemegumbi, sasakhiwe ngendlela efanayo. Isigodlo uSolomoni asakhela indodakazi kaFaro eyayimganile, sasakhiwe njengalowo mphemegumbi.
Konke lokho kwakwakhiwe ngamatshe enani elikhulu, ayebazwe ngokwezilinganiso, asahwa ngamasaha, ngaphakathi nangaphandle, kusukela esisekelweni kuya ophahleni, nangaphandle kuze kuyofika egcekeni elikhulu.
Ngisho nesisekelo imbala, sasakhiwe ngamatshe enani elikhulu, amatshe amakhulu angamakhubhithi alishumi, namatshe angamakhubhithi ayisishiyagalombili.
Naphezulu kwakunamatshe enani elikhulu, amatshe abaziweyo ngokwezilinganiso kanye nemisedari.
Igceke elikhulu lalizungezwe yimigqa emithathu yamatshe abaziweyo, nomugqa wemishayo yomsedari, njengalokhu kwakwenziwe egcekeni lendlu kaSimakade elingaphakathi nasemphemenigumbi wendlu.
Inkosi uSolomoni yathumela ukuba kulandwe uHiramu eThire.
Wayeyindodana yomfelokazi wesizwana sakwaNafethali, uyise engowaseThire, indoda eyayisebenza ithusi, ihlakaniphile, inokuqonda, futhi inobungcweti bokwenza noma yimuphi umsebenzi wethusi. UHiramu wafika enkosini uSolomoni, wayenzela wonke umsebenzi wayo.
Wakhanda izinsika zethusi ezimbili, yileyo naleyo ingamakhubhithi ali-18 ubude, zithandelwe ngomucu ongamakhubhithi ali-12.
Wenza izihlalo ezimbili ngethusi elibunjiweyo, wazibeka phezu kwezinsika; ubude besihlalo ngasinye babungamakhubhithi ayisihlanu, zilingana ncimishi.
Ezihlokweni ezaziphezu kwezinsika kwakukhona imihlobiso yamanetha ayimigqa, enezinsephe ezaziphicelwe kuwo njengamaketanga; kuyisikhombisa kuleso naleso sihloko.
Wenza amahananadi aba yimigqa emibili nxazonke, kuyilelo nalelo netha ukwemboza izihloko ezaziphezu kwezinsika. Wenza ngokufanayo nakweyesibili insika.
Izihloko ezaziphezu kwezinsika ezisemphemenigumbi zazenziwe zafana nezeminduze, kungamakhubhithi amane.
Phezu kwezihloko zezinsika zombili ezaziseduze neqhubu elaliseceleni kwenetha, kwakukhona amahananadi angama-200 eyimigqa macala wonke, phezu kwaleso naleso sihloko.
Wazimisa izinsika zomphemegumbi wethempeli, insika yangakwesokunene wayiqamba ngokuthi uJakini. Insika yangakwesokhohlo ayimisayo wayibiza ngokuthi uBhowazi.
Ezihlokweni zezinsika kwakukhona okwenziwe kwafaniswa neminduze; waphela kanjalo umsebenzi wokwenziwa kwezinsika.
Wenza ulwandle olubunjiweyo; lwalungamakhubhithi alishumi kusukela komunye umphetho kuze kufike komunye, luyindilinga. Ukuphakama kwalo kwakungamakhubhithi ayisihlanu, luzungezwe nxazonke yintambo yokulinganisa engamakhubhithi angama-30.
Phansi komphetho, nxazonke, lwaluzungezwe ngamapulangwe, yileyo naleyo ntambo ingamakhubhithi alishumi, zizungeze ulwandle. Kwakunemigqa emibili yamapulangwe eyayibunjwe ngesikhathi lubunjwa.
Lwalumi phezu kwezinkabi ezili-12, ezintathu zibheke ngasenyakatho, ezinye ezintathu zibheke ngasentshonalanga, ezinye izintathu zibheke ngaseningizimu, ezinye ezintathu zibheke ngasempumalanga; ulwandle lwalumiswe phezu kwazo, zonke zifulathelene.
Uhlonze lwalo lwalubanzi ngangesandla, umphetho walo unjengodini lwendebe, lunjengembali yomduze, lulingana namabhathi ayizi-2 000.
Wakha izinqe zethusi ezilishumi: ubude besinqe ngasinye bungamakhubhithi amane, ububanzi baso bungamakhubhithi amane, ukuphakama kungamakhubhithi amathathu.
Lena yiyona ndlela izinqe ezazakhiwe ngayo: zazinemiphetho, nemiphetho eyayiphakathi kwezinsika.
Emiphethweni eyayibekwe ezinsikeni kwakukhona phakathi kwezinsika izingonyama, izinkabi namakherubhi; kwakunjalo ezinsikeni, phezulu naphansi, kunezingonyama, izinkabi, nemigexo yezimbali elengayo.
Yileso naleso sinqe sasinamasondo amane ethusi, nemiphini yamasondo yethusi; nezinyawo ezine ezazinezindawo zokusekela umthwalo; lezi zindawo zokusekela zaziphansi komcengezi onemigexo yezimbali, ebhekene nawo wonke.
Umlomo waso uphakathi kwesihloko, ukuphakama kwawo kuyikhubhithi elilodwa. Umlomo wawo wawuyindilinga, ufana nesinqe, uyikhubhithi nengxenye. Emlonyeni kwakukhona okubaziweyo. Imiphetho yawo iyizinhlangothi ezine, zingeyiyo indilinga.
Lawo masondo amane ayephansi kwemiphetho; imiphini yamasondo yayisesinqeni; ukuphakama kwesondo kwakuyikhubhithi nengxenye.
Amasondo ayenziwe njengesondo lenqola yempi; imiphini yamasondo, amabhande awo, izipokwe zawo, namanamfu awo, kwakubunjiwe konke.
Kwakukhona izindawo zokuwuthwala emagumbini omane aleso naleso sinqe, izingalo zokuwuthwala zihlangene nesinqe.
Phezu kwesinqe kwakukhona okuyisiyingelezi, nxazonke; ukuphakama kwakho kwakuyingxenye yengalo, okokuwusekela nemiphetho yakho kuhlangene nakho.
Kulezo zindawo ezingezokuwuthwala nasemiphethweni kwakuqoshwe amakherubhi, izingonyama, namasundu lapho kwakunendawo khona, kukhona nemigexo yezimbali nxazonke.
Wazenza kanjalo zonke izinqe ezilishumi; zonke zabunjwa ngendlela efanayo, zinesilinganiso esifanayo, nesimo esifanayo.
Wenza imicengezi yethusi elishumi; umcengezi ngamunye wawulingene namabhathi angama-40; yilowo nalowo mcengezi wawungamakhubhithi amane, naphezu kwezinqe ezilishumi ngazinye, kwakukhona umcengezi owodwa.
Wazibeka izinqe eziyisihlanu eceleni ngakwesokunene sendlu, neziyisihlanu eceleni ngakwesokhohlo sendlu; wabeka ulwandle eceleni ngakwesokunene sendlu ngasempumalanga yangaseningizimu.
UHiramu wenza leyo micengezi, amafosholo, nezitsha. UHiramu waqeda ukwenza wonke umsebenzi ayewenzela inkosi uSolomoni endlini kaSimakade:
izinsika ezimbili, imicengezi emibili ezihloko ezaziphezu kwezinsika, amanetha amabili okwembesa imicengezi eyayisezinhlokweni ezimbili ezazisezihlokweni phezu kwezinsika,
amahananadi angama-400, amanetha amabili, imigqa emibili yamahananadi kulelo nalelo netha, okwembesa izihloko zombili ezaziyimicengezi ezaziphezu kwezinsika,
izinqe ezilishumi, imicengezi elishumi ezinqeni,
ulwandle olulodwa, izinkabi ezili-12 phansi kolwandle,
amabhodwe, amafosholo, nezitsha. Zonke lezi zinto uHiramu azenzela inkosi uSolomoni endlini kaSimakade, zazenziwe ngethusi elicwebezelisiweyo.
Inkosi yazibumba esigodini eJordani emhlabathini webumba, phakathi kweSukhothi neZarethani.
USolomoni waziyeka zonke izinto zingalinganiswanga ngenxa yobuningi bazo obukhulu kakhulu; nesisindo sethusi okwakungekho okokusikala.
USolomoni wezenza zonke izinto ezazisendlini kaSimakade: i-althare legolide, itafula legolide okwakukhona kulo izinkwa zobukhona,
izinti zezibani zegolide elicwengekileyo eziyisihlanu ngakwesokunene neziyisihlanu ngakwesokhohlo, phambi kwegumbi eliphakathi, izimbali, izibani, izindlawu, konke wakwenza ngegolide,
izindebe, izizenze, izitsha, izinkezo, imicengezi yomlilo, igolide elicwengekileyo, izingibe zegolide zezivalo zendlu engaphakathi, izicabha zendawo engcwelengcwele, nezicabha zendlu yethempeli, konke wakwenza ngegolide.
Sewuphelile wonke umsebenzi inkosi uSolomoni eyawenza endlini kaSimakade, uSolomoni wangenisa izinto ezingcwele zikayise uDavide, isiliva, igolide nezitsha, wakubeka engcebeni yendlu kaSimakade.
USolomoni wayeseqoqa amalunga akwa-Israyeli nezinhloko zezizwana, abaholi boyise babantu bakwa-Israyeli babuthana enkosini uSolomoni eJerusalema, ukuze bakhuphule umphongolo wesivumelwano sikaSimakade emzini kaDavide iZiyoni.
Wonke amadoda akwa-Israyeli abuthana enkosini uSolomoni ngomkhosi ka-Ethanimi ngenyanga yesikhombisa.
Esefikile wonke amalunga akwa-Israyeli, abaphristi bawuphakamisa umphongolo.
Bawukhuphula umphongolo kaSimakade, nethende lokuhlangana, nazo zonke izinto ezingcwele ezazisethendeni, abaphristi nabaLevi bawukhuphula.
Inkosi uSolomoni nayo yonke inhlangano yakwa-Israyeli eyayihlangene lapho nayo phambi komphongolo, bahlaba izimvu nezinkomo ezingenakubalwa ngenxa yobuningi bazo.
Abaphristi bawungenisa umphongolo wesivumelwano sikaSimakade endaweni yawo egumbini lendlu eliphakathi; endaweni engcwelengcwele, phansi kwamaphiko amakherubhi.
Amakherubhi ayelulele amaphiko awo phezu kwendawo yomphongolo, awusibekela umphongolo nezingongolo zawo ngaphezulu.
Izingongolo zazizinde kangangokuthi izihloko zazo zazibonakala endaweni engcwele, phambi kwegumbi elingaphakathi, kodwa zazingabonakali ngaphandle; zisekhona lapho kuze kube yinamuhla.
Kwakungekho lutho emphongolweni, kuphela izibhebhe ezimbili zamatshe ezazibekwe khona nguMose eHorebhe, lapho uSimakade enza khona isivumelwano nabantu bakwa-Israyeli ekuphumeni kwabo eGibhithe.
Kwathi lapho abaphristi sebephumile endaweni engcwele, ifu lagcwalisa indlu kaSimakade,
abaphristi abakwazanga ukuqhubeka nokukhonza ngenxa yefu, ngokuba inkazimulo kaSimakade yayigcwalisa indlu yakhe.
USolomoni wayesekhuluma, ethi: “USimakade ushilo ukuthi uyakuhlala esigayegayeni.
Ngikwakhele nokukwakhela indlu yokuhlala, indawo oyakuhlala kuyo kuze kube phakade.”
Inkosi yayisiphenduka, yalibusisa lonke ibandla lakwa-Israyeli, lonke ibandla lakwa-Israyeli, lalimi.
Yathi: “Makabongwe uSimakade uNkulunkulu ka-Israyeli, owakhuluma ngomlomo wakhe kuDavide, ubaba, ukufezile lokhu ngesandla sakhe, ethi:
‘Kusukela ngosuku engakhipha ngalo abantu bami u-Israyeli eGibhithe, angikhethanga muzi ezizwaneni zonke zakwa-Israyeli ukwakha indlu ukuba igama lami libe khona lapho, kepha ngamkhetha uDavide ukuba abuse abantu bami u-Israyeli.’
“Kwakusenhliziyweni kaDavide, ubaba, ukwakhela igama likaSimakade uNkulunkulu ka-Israyeli indlu.
Kepha uSimakade wathi kuDavide, ubaba: ‘Njengokuba kusenhliziyweni yakho ukwakhela igama lami indlu, wenza kahle, ngokuba kusenhliziyweni yakho lokho;
ngaphandle kokuthi awuyukuyakha indlu, kodwa indodana yakho eyakuphuma okhalo lwakho yiyona eyakukwakhela igama lami indlu.’
“USimakade uliqinisile izwi alikhulumayo, ngokuba mina ngingenile esikhundleni sikaDavide, ubaba, ngihlezi esihlalweni sobukhosi sakwa-Israyeli njengokusho kukaSimakade, ngilakhele indlu igama likaSimakade uNkulunkulu ka-Israyeli.
Ngimisile lapho indawo yomphongolo okukuwo isivumelwano sikaSimakade asenza nokhokho lapho ebakhipha eGibhithe.”
USolomoni wema phambi kwe-althare likaSimakade, phambi kwalo lonke ibandla lakwa-Israyeli, welulela izandla zakhe ngasezulwini,
wathi: “Simakade Nkulunkulu ka-Israyeli, akekho unkulunkulu onjengawe phezulu ezulwini nasemhlabeni phansi, ogcina isivumelwano nomusa nezinceku zakho ezihamba phambi kwakho ngayo yonke inhliziyo yazo,
okufezile encekwini yakho uDavide, ubaba, lokho owakusho kuyo; yebo, lokho owakukhuluma ngomlomo wakho ukufezile ngesandla sakho njengokuba kunjalo namuhla.
“Ngakho-ke Simakade Nkulunkulu ka-Israyeli, kufeze encekwini yakho uDavide, ubaba, lokho owakusho kuyo wathi: ‘Akunakwenzeka ukuba kungabi bikho muntu phambi kwami ovela kuwe oyakuhlala esihlalweni sobukhosi sakwa-Israyeli, kuphela nje uma abozalo lwakho beyoqaphela indlela yabo ukuba bahambe phambi kwami, njengalokhu wena wenzile phambi kwami.’
Ngakho-ke Nkulunkulu ka-Israyeli, maliqiniswe izwi lakho owalisho encekwini yakho uDavide, ubaba.
“Kepha uNkulunkulu uyakuhlala ngempela yini emhlabeni na? Ngisho izulu nezulu lamazulu alinakukumumatha; pho ibiyini-ke le ndlu encane engiyakhileyo na?
Mawulalele umkhuleko wenceku yakho nokunxusa kwayo, Simakade Nkulunkulu wami, kuzwe ukukhala nokukhuleka inceku yakho ekukhuleka phambi kwakho namuhla,
ukuba amehlo akho ayibheke le ndlu ubusuku nemini, indawo owathi ngayo: ‘Igama lami liyakuba khona lapho,’ ukuze ulalele umkhuleko inceku yakho eyakuwukhuleka ibhekene nale ndawo.
Ukulalele ukunxusa kwenceku yakho nokwabantu bakho u-Israyeli abayakukukhuleka bekule ndawo, kuzwe usendaweni yakho ohlala kuyo ezulwini, nalapho usuzwile, uthethelele.
“Uma umuntu ona umakhelwane wakhe, athweswe isifungo, bese efunga phambi kwe-althare lakho kule ndlu,
mawuzwe Wena usezulwini, wenze, wehlulele izinceku zakho, kulahlwe ngecala omubi, ubeke indlela yakhe phezu kwekhanda lakhe, ukhulule olungileyo, umnike njengokulunga kwakhe.
“Lapho abantu bakho u-Israyeli benqotshwa yisitha, ngenxa yokuba bonile kuwe, kepha bese bebuya bephindela kuwe, balivume igama lakho, bakhuleke, becela umusa kuwe bekule ndlu,
mawuzwe Wena usezulwini, uthethelele isono sabantu bakho u-Israyeli, ubabuyisele ezweni owalinika okhokho babo.
“Lapho izulu livaliwe, kungekho mvula, ngokuba bonile kuwe, kepha bese bekhuleka bekule ndawo, badumise iGama lakho, baphenduke esonweni sabo, abashaywe ngenxa yaso,
mawuzwe Wena usezulwini, uthethelele isono sezinceku zakho nesabantu bakho u-Israyeli, lapho ubafundisa indlela enhle abayakuhamba ngayo, uthumele imvula ezweni lakho obanike lona abantu bakho ukuba libe yifa labo.
“Uma kukhona indlala ezweni, ubhubhane, ukuhwamuka, isikhutha, isikhonyane, umswenya, noma isitha sabo sibavimbezela ezweni emasangweni abo, noma ngabe iyiphi inhlupheko nobhubhane,
bese kuzwakala nanoma yimuphi umkhuleko, nanoma yikuphi ukunxusa, okuvela kunoma yimuphi umuntu, nakubo bonke abantu bakho, u-Israyeli, ngamunye azi inhlupheko yenhliziyo yakhe, elulele izandla zakhe kule ndlu,
mawuzwe Wena usezulwini, indawo yakho ohlala kuyo, uyakuthethelela, wenze, unike yilowo nalowo njengezindlela zakhe, ngokuba nguwe wedwa owazi okusenhliziyweni yalowo nalowo muntu,
ukuze bakwesabe zonke izinsuku zokuphila kwabo ezweni owalinika okhokho babo.
“Futhi owezizwe ongesiye owabantu bakho, u-Israyeli, lapho evela ezweni elikude ngenxa yegama lakho,
ngokuba bayakuzwa ngegama lakho elikhulu, nangesandla sakho esinamandla, nangengalo yakho eyeluliweyo, bese eza akhuleke kule ndlu,
mawuzwe Wena usezulwini, indawo yakho ohlala kuyo, wenze njengakho konke owezizwe akucelile kuwe, ukuze bonke abantu bomhlaba balazi igama lakho, bakwesabe Wena njengabantu bakho, u-Israyeli, baze bazi ukuthi igama lakho libiziwe phezu kwale ndlu engiyakhileyo.
“Uma abantu bakho bephuma impi, beyolwa nesitha sabo ngendlela obathuma ngayo, bese bekhuleka kuSimakade, bebheke kulo muzi owukhethileyo nakule ndlu engiyakhele igama lakho,
mawuzwe Wena usezulwini umkhuleko wabo nokunxusa kwabo, ubenzele ubulungiswa.
“Uma bona kuwe ngokuba akukho muntu ongoniyo, bese ubathukuthelela, ubanikele esitheni, bathunjwe, bayiswe ezweni lesitha esibathumbileyo, elikude noma eliseduze,
kepha bese ubuya umqondo wabo besezweni abathunjelwe kulo, baphenduke, bakunxuse besezweni lababathumbileyo bathi: ‘Sonile, senze okungalungile, senze okubi;’
uma bephendukela kuwe ngenhliziyo yabo yonke nangawo wonke umphefumulo wabo besezweni lezitha zabo ezibathumbileyo, bakhuleke kuwe bebheke ezweni lakubo owalinika okhokho babo, umuzi owukhethileyo, nendlu engiyakhele igama lakho,
mawuzwe Wena usezulwini, indawo yakho yokuhlala, umkhuleko wabo nokunxusa kwabo, ubenzele ubulungiswa,
uthethelele abantu bakho abonile kuwe, nazo zonke iziphambeko zabo abaphambuke kuwe ngazo, ubenzele ukuba bathole isihe phambi kwababathumbileyo, babaphathe ngesihe,
ngokuba bangabantu bakho nefa lakho owalikhipha eGibhithe nasesithandweni somlilo wensimbi.
Amehlo akho mawavulekele ukunxusa kwenceku yakho nokunxusa kwabantu bakho, u-Israyeli, ubezwe kukho konke abakhala ngakho kuwe.
Ngokuba Wena wazehlukanisela bona phakathi kwazo zonke izizwe zomhlaba, ukuba babe yifa lakho, njengalokho wawukhulumile ngesandla sikaMose, inceku yakho, ngesikhathi ukhipha okhokho bethu eGibhithe, Nkosi Simakade.”
Kwathi uSolomoni eseqedile ukukhuleka wonke lo mkhuleko nokunxusa kuSimakade, wasuka phambi kwe-althare likaSimakade ekuguqeni ngamadolo akhe, izandla zakhe zelulelwe ngasezulwini.
Wema, walibusisa lonke ibandla lakwa-Israyeli ngezwi elikhulu, wathi:
“Makabongwe uSimakade onike abantu bakhe, u-Israyeli, ukuphumula njengakho konke akushilo; akukho nelilodwa izwi elehlulekile kuwo wonke amazwi akhe amahle awakhuluma ngesandla sikaMose, inceku yakhe.
USimakade uNkulunkulu wethu makabe nathi njengalokhu ayenokhokho bethu; makangasishiyi, angasilahli,
ukuze adonsele izinhliziyo zethu kuye ukuba sihambe ngezindlela zakhe zonke, sigcine imiyalo yakhe, izimiso zakhe, nezehlulelo zakhe ayala ngakho okhokho bethu.
Sengathi amazwi ami enginxusa ngawo phambi kukaSimakade angaba seduze noSimakade uNkulunkulu wethu imini nobusuku ukuba enzele inceku yakhe nabantu bakhe, u-Israyeli, ubulungiswa, njengokwezidingo zemihla ngemihla,
ukuze bonke abantu bomhlaba bazi ukuthi uSimakade nguye onguNkulunkulu; akekho omunye.
Inhliziyo yenu mayibe kuSimakade uNkulunkulu wethu ngokupheleleyo, nihambe ngezimiso zakhe, nigcine imiyalo yakhe njenganamuhla.”
Inkosi naye wonke u-Israyeli, ekanye nayo, banikela ngomhlatshelo phambi kukaSimakade.
USolomoni wanikela ngomhlatshelo weminikelo yokuthula, awunikela kuSimakade, izinkunzi eziyizi-22 000, nezimvu eziyizi-120 000. Inkosi nabo bonke abakwa-Israyeli bayibusisa indlu kaSimakade.
Ngalona lolo suku inkosi yangcwelisa ingaphakathi legceke elalingaphambi kwendlu kaSimakade, yanikela lapho ngomnikelo wokushiswa, ngomnikelo wempuphu, nangamanoni eminikelo yokuthula, lokhu i-althare lethusi elaliphambi kukaSimakade lalilincane ukuba liwamukele umnikelo wokushiswa, nomnikelo wempuphu, namanoni eminikelo yokuthula.
USolomoni wawugubha-ke umkhosi ngaleso sikhathi naye wonke u-Israyeli enaye, ibandla elikhulu, kusukela eLebho Hamathi kuze kube semfuleni eGibhithe, ngaphambi kukaSimakade uNkulunkulu wethu, izinsuku eziyisikhombisa nezinsuku eziyisikhombisa, okungukuthi izinsuku ezili-14.
Ngosuku lwesishiyagalombili wabamukisa abantu, bayibusisa inkosi, babuyela emathendeni abo bejabula, bethokoza ngakho konke okuhle uSimakade akwenzile kuDavide, inceku yakhe, naku-Israyeli, abantu bakhe.
Kwathi uSolomoni eseqedile ukwakha indlu kaSimakade nesigodlo senkosi, nakho konke ayefisile ukukwenza,
uSimakade wabonakala kuye ngokwesibili, njengokuba wayekade ebonakale kuye eGibheyoni.
USimakade wathi kuye: “Ngiwuzwile umkhuleko wakho nokunxusa onxuse ngakho phambi kwami. Ngiyibusisile le ndlu oyakhileyo ukuba ngibeke igama lami kuyo kuze kube phakade. Amehlo ami nenhliziyo yami kuyakuhlala kuyo zonke izinsuku.
“Wena, uma nje uyakuhamba phambi kwami njengalokhu kuhambe uDavide, uyihlo, ngenhliziyo engenacala nangobuqotho, wenze konke engikuyale ngakho, ugcine izimiso zami nezehlulelo zami,
ngiyakusimisa isihlalo sobukhosi sombuso wakho kwa-Israyeli kuze kube phakade, njengoba ngakhuluma kuDavide, uyihlo, ngathi: ‘Akunakwenzeka kungabi bikho muntu ovela kuwe esihlalweni sobukhosi sakwa-Israyeli.’
“Kepha uma nina nabantwana benu ningihlamuka, ningayigcini imiyalo yami nezimiso zami engikumise phambi kwenu, nisuke nikhonze abanye onkulunkulu, nikhuleke kubo,
ngiyakumnquma u-Israyeli ezweni engimnike lona, nale ndlu engiyingcwelisele iGama lami ngiyoyichitha phambi kwami, u-Israyeli aphenduke isaga nembuqo phakathi kwabo bonke abantu.
Nakuba le ndlu iphakeme kangaka, kodwa bonke abayodlula ngakuyo bayomangala, banximfe, bathi: ‘USimakade wenzeleni okunje kuleli lizwe nakule ndlu na?’
“Bayophendula bathi: ‘Kungenxa yokuba bamshiya uSimakade uNkulunkulu wabo owakhipha okhokho babo eGibhithe, base benamathela kwabanye onkulunkulu, bakhuleka kubo, babakhonza, ngakho-ke uSimakade wehlisele le nhlekelele phezu kwabo.’ ”
Kwathi sekuphele iminyaka engama-20 uSolomoni akhe ngayo zombili izindlu: indlu kaSimakade nesigodlo senkosi,
uHiramu, inkosi yaseThire, owayesize uSolomoni ngemisedari, ngemisayiphuresi, ngegolide nangakho konke ayekufisa, inkosi uSolomoni yamnika uHiramu imizi engama-20 eGalile.
UHiramu wasuka eThire ukuyobona imizi uSolomoni ayemnike yona, kodwa ayizange imgculise.
Wathi: “Mfowethu, iyini le mizi onginike yona na?” Wayibiza ngeKhabhuli kuze kube yinamuhla.
UHiramu wayesethumela enkosini amathalenta ayi-120 egolide.
Nansi-ke indaba emaqondana nezisebenzi ezabizwa yinkosi uSolomoni ukuzokwakha indlu kaSimakade, isigodlo sayo, iMilo, ugange eJerusalema, iHazori, iMegido neGezeri.
UFaro, inkosi yaseGibhithe, wayenyukile walidla iGezeri, walishisa ngomlilo, wabulala amaKhanani ayehleli emzini, wayeselinika umkaSolomoni indodakazi yakhe, laba yisipho sayo.
USolomoni walakha kabusha iGezeri, iBhethi Horoni eZansi,
iBhalathi, iThamari elalisehlane lalelo lizwe,
nayo yonke imizi eyayiyizinqolobane zikaSolomoni, imizi yezinqola zakhe zempi, imizi yabamahhashi akhe, nakho konke uSolomoni ayefisa ukukwakha eJerusalema, eLebhanoni nakulo lonke izwe ayebusa kulo.
Bonke abantu abayinsali yama-Amori, amaHithi, amaPherizi, amaHivi namaJebusi, ababengesibo abantu bakwa-Israyeli,
nabantwana babo, ababesele ezweni, abakwa-Israyeli abangakwazanga ukubaqeda nya, uSolomoni wabenza izisebenzi eziyizigqila kuze kube yinamuhla.
Kepha kwabakwa-Israyeli uSolomoni akenzanga namunye waba yisigqila, ngokuba bona babengamabutho, izinceku zakhe, izikhulu zakhe, abakhuzi bempi, abaphathi bezinqola zakhe nabamahhashi bakhe.
Bona babeyizinduna ezinkulu ezazengamele umsebenzi kaSolomoni ezazingama-550, ziphethe abantu ababesebenza.
Indodakazi kaFaro kuphela eyasuka emzini kaDavide yaya endlini yayo, inkosi eyayiyakhele yona; wayakha futhi neMilo.
USolomoni wayenikela kathathu ngonyaka ngeminikelo yokushiswa nangeminikelo yokuthula e-althare ayelakhele uSimakade, eshisa impepho kanye neminikelo phambi kukaSimakade. Wayeseqedile ukwakha indlu.
Inkosi uSolomoni yakha imikhumbi e-Eziyoni Gebheri eseceleni kwase-Elathi ogwini loLwandle Lomhlanga kwa-Edomi.
UHiramu wathumela ngaleyo mikhumbi izinceku zakhe, ezazingamatilosi ayelwazi ulwandle, kanye nezinceku zikaSolomoni.
Zaya e-Ofiri, zalanda lapho igolide elingamathalenta angama-420, zaliletha enkosini uSolomoni.
Kwathi ukuba indlovukazi yaseShebha izwe imibiko ngodumo lukaSolomoni ngenxa yegama likaSimakade, yafika ukuzomvivinya ngemibuzo elukhuni.
Yafika eJerusalema iphelekezelwa yihele elikhulu, namakameli ethwele amakha, igolide eliningi, namatshe aligugu. Yathi ukuba ifike kuSolomoni yakhuluma naye konke okwakusenhliziyweni yayo.
USolomoni wayazisa konke eyayikubuza. Kwakungekho lutho olufihlakele enkosini engayitshelanga khona.
Indlovukazi yaseShebha yabubona bonke ubuhlakani bukaSolomoni, nesigodlo ayesakhile,
ukudla okwakusetafuleni lakhe, indlela izinceku zakhe ezazihlala ngayo, ukuma kwezikhonzi zakhe, izembatho zazo, abaphathizitsha bakhe, umnikelo wakhe wokushiswa ayewunikela endlini kaSimakade, yabamba ongezansi.
Yathi enkosini: “Impela akuliqiniso konke engakuzwa ngawe ngisesezweni lakithi, ngamazwi akho nangokuhlakanipha kwakho.
Kepha angizange ngikholwe, yikho ngize ngafika lapha, ngazibonela ngamehlo ami; empeleni engakuzwayo akusiyo ngisho ingxenye, kodwa wena wenezele ngokuhlakanipha nangobuhle kulokho engakuzwayo.
Babusisiwe abantu bakho, zibusisiwe lezi zinceku zakho ezima njalo phambi kwakho, zizwa ukuhlakanipha kwakho.
Makabongwe uSimakade uNkulunkulu wakho okwenamele wakubeka esihlalweni sobukhosi sakwa-Israyeli, ngokuba uSimakade wamthanda u-Israyeli kuze kube phakade, ngalokho wakubeka ukuba ube yinkosi ukuze wenze ukwehlulela nokulunga.”
Yanika inkosi amatalenta ayi-120 egolide, amakha amaningi kakhulu, namatshe ayigugu; akuzange kuphinde kufike amakha amaningi kangaka njengalawo indlovukazi yaseShebha eyawapha inkosi uSolomoni.
Kanjalo nemikhumbi kaHiramu eyayithwala igolide livela e-Ofiri, yaletha futhi imi-alimugi namatshe ayigugu kuvela e-Ofiri.
Inkosi yenza ngemithi ye-alimugi izinsika zendlu kaSimakade nezesigodlo senkosi, amahabhu nemitshingo yabahlabelelayo. Akukaze kuphinde kulethwe imi-alimugi eminingi kangaka, futhi ayikaze ibonwe kuze kube yinamuhla.
Inkosi uSolomoni yanika indlovukazi yaseShebha konke eyayikufuna neyakucelayo, ngaphandle kwalokho uSolomoni ayeyinike khona ngokuphana kwenkosi. Yayisihamba, yabuyela ezweni lakubo, yona nezinceku zayo.
Isisindo segolide elalilethwa kuSolomoni minyaka yonke sasingamathalenta egolide angama-666,
ngaphandle kwalokho okwakuvela kubahwebi, enzuzweni yabathengisi, emakhosini ase-Arabhiya nakubabusi bezwe.
Inkosi uSolomoni yenza izihlangu zegolide elicangcathiweyo ezingama-200, kwaba ngamashekeli egolide elicangcathiweyo angama-600 esihlangwini ngasinye,
amahawu egolide elicangcathiweyo angama-300, amamina amathathu egolide ehawini ngalinye; inkosi yawabeka eNdlini Yehlathi eLebhanoni.
Inkosi yenza nesihlalo sobukhosi esikhulu ngezimpondo zendlovu, yasinameka ngegolide elicolisekileyo.
Isihlalo sobukhosi sasinezikhwelo eziyisithupha, isihloko saso siyisiyingelezi ngasemuva; kwakukhona imikhono ngapha nangapha kwendawo yokuhlala, kumi izingonyama ezimbili ngaseceleni kwemikhono.
Kwakumi izingonyama ezili-12 ngapha nangapha kwezikhwelo eziyisithupha. Okunjengalokho akuzange kwenziwe kunoma yimuphi omunye umbuso.
Zonke izitsha zokuphuza zenkosi uSolomoni zazingezegolide, zonke izitsha zendlu yeHlathi leLebhanoni nazo zazingezegolide, zingekho ezenziwe ngesiliva, ngoba lona lalingabalulekile ngesikhathi sikaSolomoni.
Imikhumbi yenkosi eyayiseTharishishi yayisolwandle nemikhumbi kaHiramu, ngakho-ke kwakuthi kanye eminyakeni emithathu, ifike imikhumbi yaseTharishishi ilethe igolide, isiliva, izimpondo zendlovu, izimfene, nezimpigogo.
Inkosi uSolomoni yaba nkulu kunawo wonke amakhosi omhlaba, ngengcebo nangokuhlakanipha.
Wonke umhlaba wawufuna ukumbona uSolomoni ukuze uzwe ngokuhlakanipha kwakhe, uNkulunkulu akubeke enhliziyweni yakhe.
Baletha, kwaba yilowo nalowo, isipho sakhe: izitsha zesiliva, izitsha zegolide, izingubo, izikhali, amakha, amahhashi, neminyuzi, lokhu bekwenza minyaka yonke.
USolomoni waqoqa izinqola nabamahhashi; wayenezinqola eziyi-1 400 nabamahhashi abayizi-12 000, wakubeka emizini yezinqola nasenkosini eJerusalema.
Inkosi yenza ukuba isiliva lejwayeleke eJerusalema njengamatshe nemisedari, eyayenza yaba njengemithombe esigodini ngobuningi.
Amahhashi uSolomoni ayenawo ayevela eGibhithe naseKuwe; abahwebi benkosi babewathenge ngemali eKuwe.
Bathenga inqola eGibhithe, bayikhuphula ngamashekeli esiliva angama-600, nehhashi ngamashekeli ayi-150; bakuthengisa kanjalo nabo kuwo wonke amakhosi amaHithi namakhosi ase-Aramu.
Inkosi uSolomoni yathanda abesifazane bezizwe abaningi nendodakazi kaFaro, abesifazane bakwaMowabi, bakwa-Amoni, bakwa-Edomi, bamaSidoni nabamaHithi.
Babevela ezizweni ayeshilo ngazo uSimakade kubantu bakwa-Israyeli, wathi: “Ningahambi phakathi kwabo, nabo bangahambi phakathi kwenu, ngokuba bayakuziphambukisa impela izinhliziyo zenu, bese zilandela onkulunkulu babo.” Kepha uSolomoni wanamathela kubo, wabathanda.
USolomoni wayenabafazi abangamadodakazi amakhosi abangama-700, nezancinza ezingama-300. Amakhosikazi akhe ayiphambukisa inhliziyo yakhe.
Kuthe esemdala uSolomoni, bayiphambukisa omkakhe inhliziyo yakhe walandela abanye onkulunkulu; inhliziyo yakhe ayibange isanamathela kuSimakade uNkulunkulu wakhe ngokupheleleyo njengenhliziyo kayise uDavide.
USolomoni walandela u-Ashitharothi, unkulunkulukazi wamaSidoni noMilikhomu, isinengiso sabakwa-Amoni.
USolomoni wenza okubi phambi kukaSimakade; akamlandelanga uSimakade ngokupheleleyo njengoyise uDavide.
USolomoni wakhela uKhemoshi isinengiso sabakwaMowabi, noMolokhi isinengiso sabakwa-Amoni indawo ephakemeyo entabeni eyayiphambi kweJerusalema.
Wawenzela kanjalo wonke amakhosikazi akhe ezizwe ayeshisa impepho, ahlabele onkulunkulu bawo.
USimakade wamthukuthelela uSolomoni, ngokuba inhliziyo yakhe yayisiphambukile kuSimakade uNkulunkulu ka-Israyeli owayebonakale kabili kuye,
wamyala ngalokho ukuthi angalokothi alandele abanye onkulunkulu, nokho akazange akugcine lokho uSimakade ayemyale ngakho.
USimakade wathi kuSolomoni: “Njengoba wena wenze lokhu, awaze wasigcina isivumelwano sami nezimiso zami engakuyala ngakho, umbuso ngizowuhlwitha nokuwuhlwitha kuwe, bese ngiwunika inceku yakho.
Kepha lokhu angiyukukwenza emihleni yakho ngenxa kaDavide, uyihlo, kodwa ngizowuhlwitha esandleni sendodana yakho.
Nokho angiyukuwuhlwitha wonke umbuso kuyo, kodwa ngiyoyinika indodana yakho isizwe sibe sinye ngenxa kaDavide, inceku yami, nangenxa yeJerusalema engilikhethileyo.”
USimakade wavusa ozomelana noSolomoni, uHadadi wakwa-Edomi; owayengowendlu yenkosi yakwa-Edomi.
Kwathi uDavide ekwa-Edomi, uJowabe induna yempi, wenyuka wayongcwaba ababebulewe; wayebulele izindimbane zabesilisa bakwa-Edomi.
UJowabe naye wonke u-Israyeli bahlala lapho izinyanga eziyisithupha, waze wababulala bonke abesilisa kwa-Edomi.
UHadadi wayeselibhobhodleyana, abathile ababeyizinceku zikayise babaleka naye, baya eGibhithe.
Basuka kwaMidiyani, baya ePharanu; bathatha amadoda ePharanu baya nawo eGibhithe kuFaro, inkosi yakhona. UFaro wamnika indlu, nesabelo sokudla nezwe.
UHadadi wafumana umusa omkhulu kuFaro, waze wamganisela umlamu wakhe, udadewabo kaThahiphenesi, inkosikazi yakhe.
UDadewabo kaThahiphenesi wazalela uHadadi uGenubhathi, indodana yakhe. UThahiphenesi wamlumula uGenubhathi, wayesemhlalisa namadodana kaFaro esigodlweni sikaFaro.
UHadadi eseGibhithe, wezwa ukuthi uDavide usekhotheme nokuthi uJowabe induna yempi ufile, wayesethi kuFaro: “Ngivumele ukuba ngihambe, ngibuyele ezweni lakithi.”
UFaro wathi kuye: “Kukhona yini okuswele njengoba ulapha kimi ukuba ungaze ufune ukubuyela ezweni lakini na?” Wathi: “Angeswele lutho, kodwa ngivumele impela ukuba ngihambe.”
UNkulunkulu wabuye wavusa omunye ozomelana noSolomoni, uRezoni, indodana ka-Eliyada, owayebalekele inkosi yakhe uHadadezeri, inkosi yaseZobha.
Ngesikhathi uDavide ebabulala, waziqoqela abantu, wayeseba yinduna yeviyo; baya eDamaseku, bahlala khona, babusa eDamaseku.
URezoni wamelana no-Israyeli zonke izinsuku zokuphila zikaSolomoni, ngaphezu kobubi ayebenza uHadadi, wayenengwa kakhulu ngu-Israyeli, wabusa e-Aramu.
UJerobhowamu, indodana kaNebhathi wakwa-Efrayimi waseZereda, unina okwakunguZeruya umfelokazi, incekukazi kaSolomoni, wamelana nenkosi.
Isizathu esamenza wamelana nenkosi yilesi: kwathi lapho uSolomoni akha iMilo, wavala isikhala emzini kayise uDavide.
USolomoni wayibona le ndoda, uJerobhowamu, ukuthi iyiqhawe elinamandla, futhi iwukhuthalele umsebenzi wayo, wayeseyibeka ukuba yengamele wonke umsebenzi wendlu kaJosefa.
Kwathi ngaleso sikhathi lapho uJerobhowamu ephumile eJerusalema, umphrofethi u-Ahiya waseShilo wahlangana naye endleleni, wayembethe ingubo entsha, bobabili bebodwa lapho endle.
U-Ahiya wayibamba ingubo entsha ayeyembethe wayiklebhula imidweshu eli-12.
Wathi kuJerobhowamu: “Zithathele imidweshu ibe lishumi, ngokuba usho kanje uSimakade uNkulunkulu ka-Israyeli, uthi: ‘Bheka, ngizowuhlwitha umbuso esandleni sikaSolomoni, nginike wena izizwana ezilishumi.
Yena uyokuba nesizwe esisodwa ngenxa yenceku yami, uDavide, nangenxa yeJerusalema, umuzi engiwukhethe kuzona zonke izizwe zakwa-Israyeli,
ngoba bangishiyile, bayokhuleka ku-Ashitharothi unkulunkulu wamaSidoni, uKhemoshi, unkulunkulu wabakwaMowabi, nakuMilikhomu, unkulunkulu wabakwa-Amoni, abahambanga ngezindlela zami, ukuba benze okuhle emehlweni ami, abazilandela izimiso zami, nezehlulelo zami njengoDavide, uyise.
“ ‘Kepha angiyukuwususa wonke umbuso esandleni sakhe; ngiyomenza umbusi zonke izinsuku zokuphila kwakhe ngenxa kaDavide, inceku yami, engamkhetha, yena wayigcina imiyalo yami nezimiso zami.
Kodwa ngiyakuwuthatha umbuso esandleni sendodana yakhe, ngiwunike wena; izizwana ezilishumi.
Indodana yakhe ngiyakuyinika isizwe sibe sinye vo ukuze uDavide, inceku yami, abe nesibani izinsuku zonke phambi kwami eJerusalema, umuzi engiwukhethe ukuba ngibeke iGama lami kuwo.
Wena ngiyokwenza ubuse phezu kwakho konke inhliziyo yakho ekufisayo, ube yinkosi phezu kuka-Israyeli.
Kuyokuthi uma ulalela konke engiyokukuyala ngakho, uhambe ngezindlela zami, wenze okulungile emehlweni ami, ugcine izimiso nemiyalo yami njengalokhu kwenza uDavide, inceku yami, ngiyokuba nawe, ngikwakhele indlu eqinile njengoba ngakhela uDavide, ngikunike u-Israyeli.
Ngenxa yalokho, ngiyakuthobisa uzalo lukaDavide, kodwa akuyukuba njalonjalo.’ ”
USolomoni wazama ukumbulala uJerobhowamu. UJerobhowamu wasuka wabalekela eGibhithe kuShishakhi, inkosi yakhona, wahlala lapho kwaze kwakhothama uSolomoni.
Ezinye izindaba zikaSolomoni, nakho konke akwenzayo, nokuhlakanipha kwakhe, akulotshiwe yini encwadini yezindaba zikaSolomoni na?
USolomoni wabusa eseJerusalema phezu kuka-Israyeli wonke, iminyaka engama-40.
USolomoni wakhothama, walaliswa kokhokho bakhe, wambelwa emzini kaDavide, uyise. URehobhowamu, indodana yakhe, waba yinkosi esikhundleni sakhe.
URehobhowamu waya eShekhemi, lapho wonke u-Israyeli ayebuthene khona ukuba ambeke inkosi.
Kwathi lapho uJerobhowamu, indodana kaNebhathi, ekuzwa lokho, kwazise wayeseseGibhithe lapho ayebalekele khona, ebalekela inkosi uSolomoni, wayohlala eGibhithe.
Bathumela bayombiza uJerobhowamu nebandla lonke lakwa-Israyeli, beza bakhuluma noRehobhowamu, bathi:
“Uyihlo wenza ijoka lethu laba nzima, manje siyakucela ukuba wena uwenze lula umsebenzi olukhuni uyihlo ayesethwese wona, nejoka lakhe elinzima ayelibeke phezu kwethu, siyokukhonza uma wenze kanjalo.”
Wathi kubo: “Hambani, kuthi emva kwezinsuku ezintathu nibuye nize kimi.” Basuka-ke abantu.
Inkosi uRehobhowamu yacela iseluleko ezingwevini ezazikade zeluleka uSolomoni, uyise, esaphila, yathi: “Nina ningeluleka ukuba ngibuyisele impendulo ethini kulaba bantu na?”
Zakhuluma kuye, zathi: “Uma namuhla uzokuba yinceku yalaba bantu, ubakhonze, ukhulume amazwi amahle lapho ubaphendula, bayokuba yizinceku zakho, zonke izinsuku zabo.”
Kepha akasishayanga mkhuba iseluleko sezingwevu ezazimeluleke ngaso, wayesecela iseluleko ezinsizweni ezaziyintanga yakhe.
Wathi kuzo: “Nina ningeluleka ukuba ngibaphendule ngithini laba bantu abakhulume kimi, bathi: ‘Yenza lula ijoka uyihlo alibeka phezu kwethu’ na?”
Izinsizwa ezaziyintanga yakhe zathi kuye: “Uyothi kulaba bantu abakhulume kuwe, bathi: ‘Uyihlo walenza laba nzima ijoka lethu, kepha wena lenze libe lula kithina,’ uyokhuluma kanje kubo: ‘Ucikicane wami mkhulu kunokhalo lukababa.
Ubaba wanethwesa ijoka elinzima, mina-ke ngizothasisela ejokeni lenu. Ubaba wanishaya ngeziswebhu, kodwa mina ngizonishaya ngofezela.’ ”
UJerobhowami nabo bonke abantu, bafika kuRehobhowamu ngosuku lwesithathu njengalokhu yayishilo inkosi, yathi: “Buyani kimi ngosuku lwesithathu.”
Inkosi yabaphendula kanzima abantu, yasishaya indiva iseluleko amalunga ayeyeluleke ngaso.
Yakhuluma kubo njengokwelulekwa yizinsizwa, yathi: “Ubaba wayenethwese ijoka elinzima, mina-ke ngizothasisela ejokeni lenu; ubaba wanishaya ngeziswebhu, mina ngizonishaya ngofezela.”
Inkosi ayibalalelanga abantu ngokuba lokho kwakuvela kuSimakade, ukuze kufezeke izwi uSimakade alikhuluma ngomlomo ka-Ahiya waseShilo kuJerobhowamu, indodana kaNebhathi.
Wonke u-Israyeli lapho ebona ukuthi inkosi ayibalalelanga, abantu bayiphendula inkosi, bathi: “Sinasabelo sini kuDavide na? Asinafa endodaneni kaJese. Israyeli, buyela emathendeni akho, zibhekele indlu yakho manje, Davide.” U-Israyeli wabuyela emathendeni akhe.
Kepha uRehobhowamu wabusa phezu kwabo bonke abantu bakwa-Israyeli ababakhe emizini yakwaJuda.
Inkosi uRehobhowamu yathuma u-Adoramu owayengamele izisebenzi ezaziphoqiwe. Kepha u-Israyeli wonke wamkhanda ngamatshe, wafa. Inkosi uRehobhowamu yashesha yagibela enqoleni yayo yabalekela eJerusalema.
U-Israyeli wayihlubuka indlu kaDavide kuze kube yinamuhla.
Kwathi lapho u-Israyeli wonke esezwile ukuthi uJerobhowamu ubuyile, bathumela bambizela enhlanganweni, base bembeka inkosi phezu kuka-Israyeli wonke. Kwakungekho muntu omunye owalandela indlu kaDavide, ngaphandle kwesizwana sakwaJuda kuphela.
URehobhowamu, esefikile eJerusalema, waqoqa yonke indlu yakwaJuda nesizwe sakwaBhenjamini, abantu abakhethiweyo abayizi-180 000 zamabutho, ukuze balwe nendlu yakwa-Israyeli, umbuso bawubuyisele kuye uRehobhowamu, indodana kaSolomoni.
Kwase kufika izwi likaNkulunkulu kuShemaya, umuntu kaNkulunkulu, lathi:
“Yisho kuRehobhowamu, indodana kaSolomoni, inkosi yakwaJuda, nayo yonke indlu yakwaJuda neyakwaBhenjamini nabantu bonke, uthi:
‘Usho kanje uSimakade, uthi: ningakhuphuki ukuyolwa nabafowenu abantu bakwa-Israyeli; phindelani emuva, kube yilowo nalowo endlini yakhe, ngokuba lokhu kuvela kimi.’ ” Balilalela izwi likaSimakade, baphindela emuva njengokusho kwakhe.
UJerobhowamu wakha iShekhemu ezintabeni kwa-Efrayimi, wahlala kulo; wedlula lapho wayokwakha nePhenuweli.
UJerobhowamu wathi enhliziyweni yakhe: “Manje umbuso ungahle ubuyele endlini kaDavide.
Uma laba bantu beqhubeka benyuka beyonikela imihlatshelo endlini kaSimakade eJerusalema, inhliziyo yalaba bantu ingahle iphindele enkosini yabo, uRehobhowamu, inkosi yakwaJuda, bangibulale mina, babuyele kuRehobhowamu, inkosi yakwaJuda.”
Inkosi yathola iseluleko, yenza amathole amabili egolide, yathi kwabakwa-Israyeli: “Sekwanele manje ukuba nilokhu nikhuphukela eJerusalema; manje nampa onkulunkulu bakho, Israyeli, abakukhuphula eGibhithe.”
Walibeka elinye eBhethele, elinye walibeka kwaDani.
Leyo nto yaba yisono. Abantu baya phambi kwelikwaDani.
Wakha izindlu ezindaweni eziphakemeyo, wabeka abaphristi ngangokomumo wabantu noma babengesiwo amadodana kaLevi.
UJerobhowamu wamisa umkhosi ngenyanga yesishiyagalombili, ngosuku lwe-15, wagubha umkhosi njengalokhu kwakwenza abakwaJuda, wanikela e-althare, wenza nakanjalo eBhethele ukuba ahlabele amathole ayewenzile. Wabeka eBhethele abaphristi ezindaweni eziphakemeyo ayezenzile.
Wanikela e-althare ayelenzile eBhethele, ngosuku lwe-15, ngenyanga yesishiyagalombili, okuyinyanga ayeyinqume yena; wenzela abantu bakwa-Israyeli umkhosi, wenyukela e-althare, washisa impepho.
Kwavela ngaleso sikhathi kwaJuda umuntu kaNkulunkulu, ethunywe nguSimakade, waya eBhethele. UJerobhowamu wayemi e-althare ukuba ashise impepho.
Wakhuluma kulelo althare ngezwi likaSimakade, wathi: “Althare, althare, usho kanje uSimakade kuwe, uthi: ‘Kuzozalwa umntwana endlini kaDavide, igama lakhe nguJosiya. Uyonikela phezu kwakho ngabaphristi basezindaweni eziphakemeyo abashisa impepho phezu kwakho, bashise namathambo abantu phezu kwakho.’ ”
Wabanika isibonakaliso ngalolo lusuku, wathi: “Nasi isibonakaliso uSimakade asishoyo, uthi: i-athare liyakudatshulwa, kuthi umlotha ophezu kwalo uchithwe.”
Kwathi ukuba inkosi ikuzwe lokho okwashiwo ngumuntu kaNkulunkulu nge-althare eBhethele, uJerobhowamu waphakamisa isandla sakhe ese-althare, wathi: “Mbambeni.” Kepha isandla asiphakamisayo sashwabana akabe esakwazi ukusifinyeza.
I-althare ladabuka, umlotha owawukulo wachitheka njengokwesibonakaliso esasishiwo yilowo muntu kaNkulunkulu ngezwi likaSimakade.
Inkosi yayisithi kulowo muntu kaNkulunkulu: “Ake unginxusele kuSimakade uNkulunkulu wakho, ungikhulekele ukuba isandla sami siphile.” Umuntu kaNkulunkulu wayinxusela inkosi kuSimakade, saphila isandla sayo, saba njengakuqala.
Inkosi yayisithi kulowo muntu kaNkulunkulu: “Woza siye ekhaya, uzihlumelele, ngizakukupha nesipho.”
Kepha lowo muntu kaNkulunkulu wathi enkosini: “Noma unganginika ingxenye yendlu yakho, angisoze ngaya lapho nawe, futhi angiyukudla sinkwa noma ngiphuze amanzi kule ndawo.
Ngayalwa kanjalo yizwi likaSimakade, lathi: ‘Awuyukudla sinkwa, awuyukuphuza manzi, futhi awuyukubuya ngendlela obuhambe ngayo.’ ”
Waphindela emuva ngenye indlela, akahambanga ngendlela ayeze ngayo eBhethele.
EBhethele kwakuhlala umphrofethi owayesemdala. Kwafika kuye indodana yakhe, yamlandisa yonke imisebenzi lowo muntu kaNkulunkulu ayeyenze ngalolo lusuku eBhethele, ngisho namazwi ayewasho enkosini. Uyise esezwile ngalokho,
wathi kuwo: “Uhambe ngayiphi indlela?” Amadodana ayebonile ukuthi uthathe yiphi indlela lowo muntu kaNkulunkulu owayevela kwaJuda.
Wayesethi emadodaneni akhe: “Ngibopheleleni imbongolo.” Ayesembophelela yona, wayigibela.
Wamlandela lowo muntu kaNkulunkulu, wamthola ehleli phansi komu-okhi, wayesethi kuye: “Wena ungumuntu kaNkulunkulu owavela kwaJuda yini na?” Wathi: “Nginguye.”
Wayesethi kuye: “Asihambe siye ekhaya, uthole ukudla.”
Kepha wathi: “Anginakuphindela emuva nawe, anginakungena nawe kwakho, futhi angiyukudla sinkwa noma ngiphuze amanzi nawe kule ndawo,
ngokuba uSimakade wathi kimi ngezwi lakhe: ‘Awuyukudla sinkwa, awuyukuphuza manzi lapho, futhi awuyukubuya ngendlela obuhambe ngayo.’ ”
Umphrofethi wayesethi kuye: “Nami ngingumphrofethi njengawe, kodwa kukhulume ingelosi kaNkulunkulu, yathi: ‘Mbuyise nawe, eze endlini yakho ukuze athole isinkwa, aphuze namanzi.’ ” Kepha umphrofethi wayeqamba amanga.
Lowo muntu kaNkulunkulu wabuya nalowo mphrofethi, wafika endlini yakhe wadla isinkwa, waphuza namanzi.
Kwathi besahlezi etafuleni, kwafika izwi likaSimakade kumphrofethi owambuyisa;
wamemeza kulowo muntu kaNkulunkulu owayevele kwaJuda, wathi: “Usho kanje uSimakade, uthi: ‘Njengoba ungalalelanga izwi likaSimakade, ungawugcinanga umyalo uSimakade uNkulunkulu wakho akuyala ngawo,
kodwa ubuyele emuva, wadla isinkwa, waphuza amanzi endaweni akhuluma ngayo kuwe ukuba ungadli sinkwa, ungaphuzi manzi, isidumbu sakho asiyukungeniswa ethuneni lokhokho bakho.’ ”
Kwathi eseqedile ukudla isinkwa nokuphuza, lowo mphrofethi owayembuyisile wambophelela imbongolo wagoduka.
Esesendleleni ibhubesi lahlangana naye, lambulala, isidumbu sakhe satshingwa endleleni, imbongolo yakhe yema eduze kwaso, kanjalo nebhubesi lama eceleni kwaso.
Bheka, abantu ababedlula bebona isidumbu sidindilize endleleni, kumi ibhubesi eceleni kwaso, bafike bakhuluma ngakho lokhu emzini ayehlala kuwo lowo mphrofethi omdala.
Kwathi angakuzwa lokho umphrofethi owayembuyise endleleni, wathi: “Lowo ngumuntu kaNkulunkulu ongazange alalele izwi likaSimakade, yingakho uSimakade emnikele engonyameni yamdwengula, yambulala njengalokhu uSimakade eshilo kuye.”
Wayesethi emadodaneni akhe: “Ngibopheleleni imbongolo.” Ayibophela.
Wahamba wasifica isidumbu sidindilize endleleni, kumi imbongolo nengonyama eceleni kwaso. Ingonyama yayingasidlanga isidumbu, futhi ayiyidwengulanga nembongolo.
Umphrofethi wasithatha isidumbu somuntu kaNkulunkulu wasikhweza embongolweni, wabuya naso, wasiyisa emzini womphrofethi omdala, ukuze amlilele, futhi amngcwabe.
Wasibeka isidumbu ethuneni lakhe, bamlilela, bathi: “Maye, mfowethu!”
Kwathi esemngcwabile, wathi kumadodana akhe: “Lapho sengifile ningingcwabe ethuneni okungcwatshwe kulo umuntu kaNkulunkulu, amathambo ami niwabeke eceleni kwawakhe.
Ngokuba izwi alimemezelayo ngokusho kukaSimakade kulo i-althare eBhethele nakuzo zonke izindlu zezindawo eziphakemeyo ezisemizini eSamariya, impela liyokwenzeka.”
Emveni kwalokho uJerobhowamu akaphendukanga endleleni yakhe embi, kodwa waqhubeka wabeka abaphristi ezindaweni eziphakemeyo ngangomumo wabantu. Noma ngubani owayethanda, wayehlukaniselwa ukuba abe ngumphristi wendawo ephakemeyo.
Le nto yaba yisono kuyo indlu kaJerobhowamu kangangokuthi yabhujiswa, yachithwa ebusweni bomhlaba.
Ngaleso sikhathi u-Abhiya, indodana kaJerobhowamu, wagula.
UJerobhowamu wathi kumkakhe: “Ake usukume, uzifihle, ukuze ungabonakali ukuthi ungumkami; hamba uye eShilo; lapho kunomphrofethi u-Ahiya owangitshela ukuthi ngizokuba yinkosi phezu kwalaba bantu.
Phatha ngesandla izinkwa ezilishumi, imiqathane nophiso lwezinyosi, uye nakho kuye. Uyakukutshela ukuthi kuzokwenzekani kumntwana.”
UmkaJerobhowamu wenza kanjalo. Wasuka waya eShilo, waze wayofika endlini ka-Ahiya. U-Ahiya akabonanga ngoba amehlo akhe ayesefiphazekile, engasabonisisi kahle, ngokuba wayesemdala.
USimakade wayeshilo ku-Ahiya, wathi: “UmkaJerobhowamu uyeza kuwe ukuzothola izwi mayelana nendodana yakhe egulayo. Uyokhuluma kuye kanje nakanje, ngoba uyofika azishaye omunye umuntu.”
Kwathi lapho u-Ahiya ezwa izigi zezinyawo zakhe engena emnyango, wathi: “Ngena mkaJerobhowamu; uzishayelani sengathi ungomunye umuntu? Mina ngithunywe kuwe udaba olulukhuni.
Usho kanje uSimakade uNkukulunkulu ka-Israyeli, uthi: ‘Hamba utshele uJerobhowamu ukuthi: ngakuphakamisa phakathi kwabantu ngakubeka waba yinkosi phezu kwabantu bami, u-Israyeli,
ngahlukanisa umbuso endlini kaDavide, ngawunika wena, kodwa awubanga njengenceku yami uDavide, owagcina imiyalo yami, wangilandela ngayo yonke inhliziyo yakhe, wenza okulungile emehlweni ami.
Kunalokho wenze okubi ukwedlula bonke abakwendulela; uhambile wayozenzela onkulunkulu, nezinye izithombe ezibunjiweyo, wavusa ulaka lwami, wangitshinga nyovane.
Ngakho-ke ngizokwehlisela indlu kaJerobhowamu okubi, ngibhubhise kuJerobhowamu bonke abesilisa kwa-Israyeli, abancane nabadala; indlu kaJerobhowamu ngiyikhukhulise okobulongwe, ize iphele nya.
Owomndeni kaJerobhowamu ofela emzini, uyodliwa yizinja, lowo ofela endle, adliwe yizinyoni zezulu, ngokuba uSimakade ukhulumile.’
“Ngakho-ke suka uye endlini yakho; uyothi lapho unyathela nje ngezinyawo zakho emzini, umntwana afe.
U-Israyeli wonke uyomlilela, ammbele, ngokuba nguye kuphela owomndeni kaJerobhowamu oyongcwatshwa ethuneni, lokhu uSimakade uNkulunkulu ka-Israyeli efumene okuhle kuye, endlini kaJerobhowamu.
“USimakade uyakuzivusela inkosi phezu kuka-Israyeli eyakubhubhisa indlu kaJerobhowamu ngalolo lusuku, namanje.
USimakade uyakumshaya u-Israyeli njengomhlanga untengantenga emanzini, amsiphule kuleli lizwe elihle alinika okhokho bakhe, abahlakazele phesheya komfula, ngoba benzele o-Ashera babo izingongolo, bamthukuthelisa uSimakade.
Uyakumlahla u-Israyeli ngenxa yezono zikaJerobhowamu one ngazo, futhi wonisa ngazo u-Israyeli.”
UmkaJerobhowamu wasuka wahamba waze wayofika eThirisa, kuthe lapho engasembundwini wendlu, umntwana wafa.
U-Israyeli wonke wamngcwaba, wamlilela njengokuba uSimakade eshilo ngomlomo wenceku yakhe, u-Ahiya umphrofethi.
Ezinye izindaba zikaJerobhowamu, ukuthi walwa kanjani nokuthi wabusa kanjani, zilotshiwe encwadini yezindaba zemihla ngemihla yamakhosi akwa-Israyeli.
Isikhathi sokubusa kukaJerobhowamu kwaba yiminyaka engama-22; wayesekhothama, walaliswa kokhokho bakhe, kwase kubusa uNadabi, indodana yakhe, esikhundleni sakhe.
URehobhowamu, indodana kaSolomoni, wabusa kwaJuda. URehobhowamu wayeneminyaka engama-40 eqala ukubusa. Wabusa iminyaka eli-17 eJerusalema, umuzi uSimakade ayewukhethe phakathi kwazo zonke izizwana zakwa-Israyeli, ukuba abeke kuwo iGama lakhe. Igama likanina kwakunguNahama, wakwa-Amoni.
UJuda wenza okubi phambi kukaSimakade, wamenza waba nesikhwele ngaphezu kwakho konke okwakwenziwe ngokhokho babo, ngezono ababezenzile.
Nabo bazakhela izindawo eziphakemeyo, izinsika, no-Ashera emagqumeni wonke aphakemeyo naphansi kwemithi yonke eluhlaza.
Kwaba khona nezifebe zesilisa zethempeli kulelo lizwe, abantu benza okufana nakho konke okunengisayo kwabezizwe, uSimakade abaxosha phambi kwabakwa-Israyeli.
Kwathi ngonyaka wesihlanu wokubusa kwenkosi uRehobhowamu, kwenyuka uShishaki, inkosi yaseGibhithe, wazolwa neJerusalema.
UShishaki wadla ingcebo yendlu kaSimakade nengcebo yesigodlo senkosi, washaqa konke, ngisho nezihlangu zonke zegolide ezazenziwe nguSolomoni.
Inkosi uRehobhowamu yenza izihlangu zethusi esikhundleni sazo, yazinika izinduna zabaqaphi ababeqapha umnyango wenkosi.
Kwakuthi njalo uma inkosi ingena endlini kaSimakade, izigijimi zizithwale, zizibuyisele ekamelweni labaqaphi.
Ezinye izindaba zikaRehobhowamu, nakho konke akwenzayo, akulotshiwe yini encwadini yezindaba zemihla ngemihla yamakhosi akwa-Israyeli na?
Kwakukhona ukulwa njalo phakathi kukaRehobhowamu noJerobhowamu.
URehobhowamu walaliswa nokhokho bakhe, wembelwa emzini kaDavide. Igama likanina kwakunguNahama wakwa-Amoni. U-Abhiyamu, indodana yakhe, waba yinkosi esikhundleni sakhe.
Ngonyaka we-18 wokubusa kwenkosi uJerobhowamu, indodana kaNebhathi, u-Abhiyamu waba yinkosi kwaJuda.
Wabusa iminyaka emithathu eJerusalema. Igama likanina kwakunguMahakha, indodakazi ka-Absalomu.
Wenza zonke izono ezazenziwe nguyise ngaphambi kwakhe. Inhliziyo yakhe yayingekho kuSimakade uNkulunkulu wakhe ngokupheleleyo njengenhliziyo kaDavide, ukhokho wakhe.
Nokho ngenxa kaDavide, uSimakade uNkulunkulu wakhe wamnika isibani eJerusalema ngokuphakamisa indodana yakhe emva kwakhe, nangokuqinisa iJerusalema.
Lokhu wakwenza ngokuba uDavide weyenze okulungile emehlweni kaSimakade; akaphambukanga kukho konke ayemyale ngakho zonke izinsuku zokuphila kwakhe, ngaphandle nje kodaba luka-Uriya, umHithi.
Kwakukhona ukulwa phakathi kukaRehobhowamu noJerobhowamu zonke izinsuku zokuphila kwakhe.
Ezinye izindaba zika-Abhiyamu nakho konke akwenzayo, kulotshiwe encwadini yezindaba zemihla ngemihla yamakhosi akwaJuda. Kwakukhona ukulwa phakathi kuka-Abhiyamu noJerobhowamu.
U-Abhiyamu walaliswa kokhokho bakhe; bammbela kwabakubo emzini kaDavide; u-Asa, indodana yakhe, waba yinkosi esikhundleni sakhe.
Ngonyaka wama-20 uJerobhowamu eyinkosi yakwa-Israyeli, u-Asa waba yinkosi yakwaJuda.
Wabusa iminyaka engama-41 eJerusalema; igama likanina kwakunguMahakha, indodakazi ka-Absalomu.
U-Asa wenza okulungile emehlweni kaSimakade njengoDavide, ukhokho wakhe.
Waxosha izifebe zesilisa zethempeli ezweni, wasusa zonke izithombe ababezenzile okhokho bakhe.
Wamehlisa uMahakha, unina, ekubeni yindlovukazi, ngokuba wayenzele u-Ashera isithombe esinengekayo. U-Asa wasinquma isithombe sakhe, wasishisa ngasemfudlaneni iKidroni.
Kepha izindawo eziphakemeyo azisuswanga; nokho inhliziyo ka-Asa yayikuSimakade ngokupheleleyo zonke izinsuku zakhe.
Wazingenisa endlini kaSimakade izinto ezingcwele zikayise nezakhe ezingcwele: isiliva, igolide, nezitsha.
Kwakukhona ukulwa phakathi kuka-Asa noBhahasha, inkosi yakwa-Israyeli, zonke izinsuku zabo.
UBhahasha, inkosi yakwa-Israyeli, wenyuka wayohlasela uJuda, wakha iRama, ukuze angavumeli muntu oya novela ku-Asa, inkosi yakwaJuda.
U-Asa wathatha lonke isiliva negolide elalisele engcebeni yendlu kaSimakade nengcebo yesigodlo senkosi, wakunika izinceku zakhe, wayesezithumela kuBheni Hadadi, indodana kaThabhirimoni kaHeziyoni, inkosi yase-Aramu, owayehlala eDamaseku, wathi:
“Kukhona isivumelwano phakathi kwami nawe naphakathi kukababa noyihlo. Ngithumela kuwe isipho sesiliva nesegolide; hamba waphule isivumelwano sakho noBhahasha, inkosi yakwa-Israyeli, ukuze ahlukane nami.”
UBheni Hadadi wayilalela inkosi u-Asa, wathumela abakhuzi bempi yakhe ukuba bayohlasela imizi yakwa-Israyeli. Wanqoba i-Ijoni, iDani, i-Abhela Bhethi Mahakha, lonke iKhinerothi, nalo lonke izwe lakwaNafethali.
Kwathi lapho uBhahasha ezwa lokho, wayeka ukwakha iRama, wahlala eThirisa.
Inkosi u-Asa yase yenza isimemezelo kuwo wonke uJuda; akekho owayenokuzilandulela;, bawasusa amatshe ayeseRama nezingodo ezazilapho uBhahasha ayakhe ngakho. Inkosi u-Asa yakha ngalokho iGebha kwaBhenjamini neMizpha.
Zonke ezinye izindaba zika-Asa, konke aphumelela kukho, konke akwenza, nemizi ayakhayo, akulotshiwe yini encwadini yezindaba zemihla ngemihla yamakhosi akwaJuda na? Ngesikhathi esemdala wayenesifo sezinyawo.
U-Asa walaliswa kokhokho bakhe, wambelwa nokhokho bakhe emzini kaDavide, ukhokho wakhe; uJehoshafathi, indodana yakhe, waba yinkosi esikhundleni sakhe.
UNadabi, indodana kaJerobhowamu, waba yinkosi phezu kuka-Israyeli ngonyaka wesibili wokubusa kuka-Asa, inkosi yakwaJuda; wabusa kwa-Israyeli iminyaka emibili.
Wenza okubi emehlweni kaSimakade, wahamba endleleni kayise nasesonweni sakhe onisa ngaso u-Israyeli.
UBhahasha, indodana ka-Ahiya wendlu ka-Isakhare, wamenzela ugobe; wamnqoba eGibhethoni lamaFilisti, ngokuba uNadabi nawo wonke u-Israyeli babelivimbezele iGibhethoni.
Ngonyaka wesithathu wokubusa kuka-Asa, inkosi yakwaJuda, uBhahasha wambulala, wabusa esikhundleni sakhe.
Kwathi lapho eseyinkosi, wabulala bonke abendlu kaJerobhowamu; kamshiyelanga noyedwa ophilayo, wayiqothula nya, njengokusho kwezwi likaSimakade alisho ngomlomo wenceku yakhe u-Ahiya waseShilo,
ngenxa yezono zikaJerobhowamu ayezenzile, onisa ngazo u-Israyeli, wachukuluza ngazo ulaka lukaSimakade uNkulunkulu ka-Israyeli.
Ezinye izindaba zikaNadabi, nakho konke akwenzayo, akulotshiwe yini encwadini yezindaba zemihla ngemihla yamakhosi akwa-Israyeli na?
Kwakukhona ukulwa phakathi kuka-Asa noBhahasha, inkosi yakwa-Israyeli, zonke izinsuku zabo.
Ngonyaka wesithathu wokubusa kuka-Asa, inkosi yakwaJuda, uBhahasha, indodana ka-Ahiya, waqala ukubusa u-Israyeli wonke eThirisa, wabusa iminyaka engama-24.
Wenza okubi emehlweni kaSimakade, wahamba endleleni kaJerobhowamu nasesonweni sakhe onisa ngaso u-Israyeli.
Izwi likaSimakade lafika kuJehu, indodana kaHanani, limelene noBhahasha, lathi:
“Njengoba ngakuphakamisa othulini, ngakwenza umbusi wabantu bami u-Israyeli, kepha uhambe endleleni kaJerobhowamu, wenza abantu bami u-Israyeli ukuba bone, bangichukuluze, bavuse ulaka lwami ngenxa yezono zabo;
ngizakumkhukhula uBhahasha nabendlu yakhe, indlu yakhe ngizoyenza ifane nendlu kaJerobhowamu, indodana kaNebhathi.
Noma ngubani ofayo emzini wendlu kaBhahasha, uyodliwa yizinja, nalowo ongowendlu yakhe oyofela endle, uyodliwa yizinyoni zezulu.”
Ezinye izindaba zikaBhahasha, nakwenzayo, nempumelelo yakhe, akulotshiwe yini encwadini yezindaba zemihla ngemihla yamakhosi akwa-Israyeli na?
UBhahasha walaliswa kokhokho bakhe, wembelwa eThiriza; u-Ela, indodana yakhe, waba yinkosi esikhundleni sakhe.
Izwi likaSimakade lafika ngoJehu, indodana kaHanani umphrofethi, mayelana noBhahasha nendlu yakhe, ngenxa yabo bonke ububi ayebenze phambi kukaSimakade ukuthi wamcunula ngomsebenzi wezandla zakhe, waba njengendlu kaJerobhowamu ayiqothula.
Ngonyaka wama-26 wokubusa kuka-Asa, inkosi yakwaJuda, u-Ela, indodana kaBhahasha, waba yinkosi kwa-Israyeli eThiriza; wabusa iminyaka emibili.
UZimri, umkhuzi wengxenye yempi yezinqola zakhe, wamenzela ugobe. Ngesikhathi eseThiriza ezigcingca ngotshwala endlini ka-Ariza, owayengamele isigodlo sakhona,
ngonyaka wama-27 wokubusa kuka-Asa, inkosi yakwaJuda, uZimri wafika, wamthela phansi ngenkemba, wambulala, kwaba nguye inkosi esikhundleni sakhe.
Kwathi nje ukuba abe yinkosi, lapho ethatha isihlalo sobukhosi, wabulala bonke abendlu kaBhahasha. Akazange ashiye namunye owesilisa womndeni wakhe, noma isihlobo sakhe, noma umngani wakhe.
UZimri wayishaya wayibhuqa yonke indlu kaBhahasha njengokwezwi uSimakade ayelikhulume kuBhahasha ngomlomo kaJehu umphrofethi,
ngenxa yezono zonke zikaBhahasha nezendodana yakhe, u-Ela, ababezenza abonisa ngazo u-Israyeli, bachukuluza uSimakade uNkulunkulu ka-Israyeli ngezithombe zabo ezibaziweyo.
Ezinye izindaba zika-Ela, nakho konke akwenzayo, akulotshiwe yini encwadini yezindaba zemihla ngemihla zamakhosi akwa-Israyeli na?
Ngonyaka wama-27 wokubusa kuka-Asa, inkosi yakwaJuda, uZimri wabusa izinsuku eziyisikhombisa eThiriza, abantu bakanisa ngaseGibhethoni lamaFilisti.
Abantu ababekanise lapho bezwa kuthiwa: “UZimri wakhe itulo, wabulala inkosi,” ngakho-ke wonke u-Israyeli wabeka u-Omri, umkhuzi wempi, ukuba abe yinkosi kwa-Israyeli ngalolo lusuku, enkanjini.
U-Omri nawo wonke u-Israyeli bakhuphuka eGibhethoni, balivimbezela iThiriza.
Kwathi ukuba uZimri abone ukuthi umuzi usudliwe, wayesengena enqabeni yesigodlo senkosi, wasithungela ngomlilo isigodlo senkosi engaphakathi, wafela lapho,
ngenxa yezono zakhe ayone ngazo ngokwenza okubi phambi kukaSimakade, nangokuhamba endleleni kaJerobhowamu nasesonweni sakhe ayesenzile sokonisa u-Israyeli.
Ezinye izindaba zikaZimri nogobe alwenzayo, akulotshiwe yini encwadini yezindaba zemihla ngemihla zamakhosi akwa-Israyeli na?
Abantu bakwa-Israyeli baqembukelana, baba yizingxenye ezimbili. Enye ingxenye yabantu yalandela uThibhini, indodana kaGinathi, ukuze bambeke abe yinkosi. Enye ingxenye yalandela u-Omri.
Kepha abantu ababelandela u-Omri babehlula abakaThibhini, indodana kaGinathi; uThibhini wafa, u-Omri wayeseba yinkosi.
Ngonyaka wama-31 wokubusa kwenkosi u-Asa kwaJuda, u-Omri waba yinkosi phezu kuka-Israyeli; wabusa iminyaka eli-12, eyisithupha wayibusa eseThiriza.
Wathenga intaba iSamariya kuShemere, ngamathalenta amabili esiliva. Wakha entabeni, waqamba igama lomuzi wakhe ayewakhile ngokuthi yiSamariya.
Kepha u-Omri wenza okubi phambi kukaSimakade, wenza okubi ukwedlula bonke ababephambi kwakhe.
Wahamba ezindleleni zonke zikaJerobhowamu, indodana kaNebhathi, nasezonweni zakhe onisa ngazo u-Israyeli, bachukuluza uSimakade uNkulunkulu ka-Israyeli ngezithombe zabo.
Ezinye izindaba zika-Omri azenzayo namandla awabonakalisayo, akulotshiwe yini encwadini yezindaba zemihla ngemihla yamakhosi akwa-Israyeli na?
U-Omri walaliswa kokhokho bakhe, wambelwa eSamariya; u-Ahabi, indodana yakhe, waba yinkosi esikhundleni sakhe.
U-Ahabi, indodana ka-Omri, waqala ukubusa kwa-Israyeli ngonyaka wama-38 wokubusa kuka-Asa, inkosi yakwaJuda. U-Ahabi, indodana ka-Omri wabusa phezu kuka-Israyeli iminyaka engama-22.
U-Ahabi, indodana ka-Omri, naye wenza okubi phambi kukaSimakade ukwedlula bonke abamendulelayo.
Kwathi uma ebona kulula kuye ukulandela izono ezazenziwa nguJerobhowamu, indodana kaNebhathi, wathatha uJezebheli, indodakazi ka-Ethibhali, inkosi yaseSidoni, waba ngumkakhe. Wahamba wayokhonza uBhali, wakhuleka kuye.
Wamisela uBhali i-althare endlini kaBhali ayeyakhe eSamariya.
U-Ahabi wenza u-Ashera, wenezela ekoneni kwakhe, wamcunula uSimakade uNkulunkulu ka-Israyeli ukuwedlula wonke amakhosi akwa-Israyeli abusa ngaphambi kwakhe.
Ezinsukwini zakhe, uHiyeli waseBhethele wabuye walakha kabusha iJerikho. Wabeka isisekelo salo ngokulahlekelwa ngu-Abhiramu, izibulo lakhe, amasango alo wawamisa ngokulahlekelwa nguthunjana wakhe, uSegubhi, njengalokhu uSimakade ayekhulumile ngomlomo kaJoshuwa, indodana kaNuni.
U-Eliya, umThishibhi owayengomunye wababegogobele kwaGileyadi, wathi ku-Ahabi: “Ngifunga ngiyagomela phambi kukaNkulunkulu ka-Israyeli engimi phambi kwakhe, akuyukuba khona mazolo namvula kule minyaka, kuze kusho mina.”
Izwi likaSimakade lafika kuye, lathi:
“Suka lapha, uhambe ubheke ngasempumalanga, ufike ucashe ngasemfudlaneni iKherithi, ophambi kweJordani.
Uyophuza emfudlaneni, Mina ngiyale amagwababa ukuba akondle lapho.”
Wahamba, wenza njengalokhu izwi likaSimakade limyalile; wahamba wahlala ngasemfudlaneni iKherithi ophambi kweJordani.
Amagwababa amlethela isinkwa nenyama ekuseni, nesinkwa nenyama kusihlwa, waphuza emfudlaneni.
Kwathi ngokuhamba kwezinsuku, umfudlana washa, ngokuba kwakungekho mvula ezweni.
Izwi likaSimakade lafika kuye, lathi:
“Suka uye eZarefathi eseSidoni, uhlale khona. Sengiyale owesifazane ongumfelokazi lapho ukuba akondle.”
Wasuka waya eZarefathi; wafika esangweni lomuzi, bheka, nango owesifazane ongumfelokazi etheza izinkuni zokubasa. Wambiza wathi kuye: “Ake ungilethele amanzana esitsheni, ngiphuze.”
Esasuka nje eyowalanda, wambiza futhi, wathi: “Ake ungiphathele nocezu lwesinkwa.”
Kepha wathi: “Ngifunga ngiyagomela phambi kukaSimakade uNkulunkulu wakho, anginalo iqebelengwane, okukhona nje inkeshezana yempuphu esembizeni, nengcosana yamafutha ophisweni. Uyabona-ke, sengizitholele izinkuni ezimbili ukuze ngihambe ngizilungiselele khona nendodana yami ukuba sidle, sife.”
Wayesethi u-Eliya kuye: “Ungesabi; hamba wenze njengokusho kwakho, kodwa yenzela mina kuqala iqebelengwane elincane, ulilethe kimi, andukuba uzilungiselele wena nendodana yakho.
Ngokuba usho kanje uSimakade uNkulunkulu ka-Israyeli, uthi: ‘Imbiza yempuphu ayiyukuphela, nophiso lwamafutha aluyukuswela, kuze kufike lolo lusuku uSimakade ayokunisa ngalo imvula emhlabeni.’ ”
Wayesehamba, wenza njengokusho kuka-Eliya: kwadla yena, u-Eliya, nabendlu yakhe izinsuku eziningi.
Imbiza yempuphu ayiphelanga, nophiso lwamafutha aluswelanga njengokusho kwezwi likaSimakade ayelikhulume ngomlomo ka-Eliya.
Kwathi emveni kwalokho, indodana yalowo mfelokazi, umninindlu, yagula. Ukugula kwayo kwaba nzima kangangokuthi yayingasakwazi ukuphefumula.
Wayesethi ku-Eliya: “Kodwa ngikone ngani wena muntu kaNkulunkulu? Uze lapha ukuba uzongikhumbuza isono sami nokuba kufe indodana yami na?”
Kepha u-Eliya wathi kuye: “Nginike indodana yakho.” Wayithatha esifubeni sakhe, wakhuphukela nayo ekamelweni eliphezulu, lapho ayehlala khona, wayibeka embhedeni wakhe.
Wayesekhala kuSimakade, ethi: “Simakade Nkulunkulu wami, kungani wehlisele lo mfelokazi engigogobele kwakhe okubi okungaka uze ubulale indodana yakhe na?”
Wazelula phezu komntwana kathathu, wakhala kuSimakade, wathi: “Simakade Nkulunkulu wami, umphefumulo walo mntwana mawubuyele kuye.”
USimakade walizwa izwi lika-Eliya; umphefumulo womntwana wabuyela kuye, waphila.
U-Eliya wayesemthatha umntwana, wamehlisa ekamelweni eliphezulu, wamngenisa endlini, wamnika unina; wathi: “Bheka, indodana yakho isiyaphila.”
Owesifazane wathi ku-Eliya: “Manje sengiyazi ukuthi wena ungumuntu kaNkulunkulu nokuthi izwi likaSimakade elisemlonyeni wakho, liyiqiniso.”
Kwathi emveni kwezinsuku eziningi, izwi likaSimakade lafika ku-Eliya ngonyaka wesithathu, lathi: “Hamba uzibonakalise ku-Ahabi; ngiyakunisa imvula emhlabeni.”
Wayesehamba u-Eliya wayozibonakalisa ku-Ahabi. Indlala yayibhokile eSamariya.
U-Ahabi wabiza u-Obhadiya owayengamele isigodlo sakhe. U-Obhadiya wayemesaba kakhulu uNkulunkulu,
ngokuba kwathi lapho uJezebheli ebulala abaphrofethi bakaSimakade, u-Obhadiya wabathatha abaphrofethi abayikhulu, wabafihla ngama-50 emgedeni ngamunye, wabondla ngesinkwa nangamanzi.
U-Ahabi wathi ku-Obhadiya: “Hamba ezweni, uye emithonjaneni yonke yamanzi nasemifudlaneni yonke; mhlawumbe singabufumana utshani, sisindise amahhashi neminyuzi, izilwane zingabhubhi.”
Base behlukaniselana izwe ukuba badabule kulo: u-Ahabi wahamba ngenye indlela eyedwa, no-Obhadiya wahamba ngenye indlela yedwa.
U-Obhadiya esesendleleni, wahlangana no-Eliya, wanele wambona, wawa ngobuso, wathi: “Ngabe wena uyinkosi yami u-Eliya na?”
Wathi kuye: “Yebo; hamba ubikele inkosi yakho, uthi: ‘Nangu u-Eliya.’ ”
Wayesethi kuye: “Ngoneni ukuba unikele inceku yakho esandleni sika-Ahabi, ukuze angibulale na?
Ngifunga phambi kukaSimakade uNkulunkulu wakho, akukho sizwe nambuso lapho inkosi yami ingathumelanga khona ukuba ufunwe, nanxa bethi awukho lapho, yayithi umbuso nesizwe abafunge ukuthi abakufumananga.
Manje usuthi wena: ‘Hamba ubikele inkosi yakho, uthi: nangu u-Eliya.’
“Kuyakuthi sengikushiyile, uMoya kaSimakade ukuthathe ukuyise lapho ngingazi khona, lapho sengifika ngimbikela u-Ahabi, bese engakufumani, uyakungibulala, kepha mina, nceku yakho, ngiyamesaba uSimakade kwasebusheni bami.
Inkosi yami ayitshelwanga yini lokho engakwenzayo lapho uJezebheli ebulala abaphrofethi bakaSimakade, ukuthi ngabafihla abantu abayikhulu kubaphrofethi bakaSimakade, ngama-50 emgedeni, ngabondla ngesinkwa nangamanzi na?
Usuthi manje: ‘Hamba ubikele inkosi yakho, uthi: nangu u-Eliya,’ bese ingibulala.”
Kepha u-Eliya wathi: “Ngifunga phambi kukaSimakade Wamabandla engimi phambi kwakhe namuhla, ngizakuzibonakalisa kuye.”
U-Obhadiya wayesehamba wayohlangabeza u-Ahabi, wambikela lokho; wayesehamba u-Ahabi wayohlangabeza u-Eliya.
Kwathi u-Ahabi ebona u-Eliya, u-Ahabi wathi kuye: “Ngabe nguwe yini lo, mhluphi ka-Israyeli na?”
Kepha wathi: “Mina angimhluphanga u-Israyeli, kodwa nguwe nendlu kayihlo, ngokuba niyilahlile imiyalo kaSimakade, nalandela oBhali.
Ngalokho-ke thumela, uqoqele kimi wonke u-Israyeli entabeni iKharmeli, nabaphrofethi bakaBhali abangama-450, nabaphrofethi baka-Ashera abangama-400, abadla etafuleni likaJezebheli.”
U-Ahabi wayesethumela kubo bonke abantu bakwa-Israyeli, wabaqoqela nabaphrofethi entabeni iKharmeli.
U-Eliya wasondela kubo bonke abantu, wathi: “Kuyoze kube nini ninqikaza phakathi kwezinhlangothi ezimbili na? Uma uSimakade enguNkulunkulu, mlandeleni Yena, kodwa uma kunguBhali, landelani yena.” Kepha abantu kabamphendulanga ngazwi.
Wayesethi u-Eliya kubantu: “Yimi ngedwa oseleyo engumphrofethi kaSimakade, kodwa abaphrofethi bakaBhali bangabantu abangama-450.
Mabasinike izinkunzi ezimbili, bazikhethele inkunzi ibe yodwa, bayihlahlele, bayibeke phezu kwezinkuni, bangawokheli umlilo, nami ngiyakulungisa enye inkunzi, ngiyibeke phezu kwezinkuni, nami angiyukuwokhela umlilo.
Bizani igama likankulunkulu wenu, nami ngizobiza igama likaSimakade; kuyothi uNkulunkulu ophendula ngomlilo kube nguye onguNkulunkulu.” Bonke abantu bathi: “Lihle leli lizwi.”
U-Eliya wayesethi kubaphrofethi bakaBhali: “Zikhetheleni inkunzi, niyilungise kuqala, ngokuba nibaningi, nibize igama likankulunkulu wenu, nokho ningawokheli umlilo.”
Bayithatha inkunzi abayinikwayo, bayilungisa. Balibiza igama likaBhali kusukela ekuseni kwaze kwaba semini, bethi: “Bhali, siphendule,” kepha akubanga khona zwi, nophendulayo wayengekho. Bagida ngase-althare ayelakhile.
Kwathi emini u-Eliya wabachomela, ethi: “Memezani ngezwi elikhulu; noma engunkulunkulu, mhlawumbe uyazindla, noma uthathe uhambo, noma ulele, udinga ukuvuswa.”
Bamemeza ngezwi elikhulu, bazisika ngemimese nangemikhonto ngokomthetho wabo, kwaze kwatshaza igazi kubo.
Kwathi lapho isidlulile imini, baphrofetha kwaze kwanikelwa ngomnikelo wempuphu, kepha akubanga khona zwi, nophendulayo, nonakekelayo.
U-Eliya wayesethi kubantu bonke: “Sondelani kimi.” Bonke abantu basondela kuye. Wayeselungisa i-althare likaSimakade elalidiliziwe.
U-Eliya wathatha amatshe ali-12 njengomumo wezizwana zamadodana kaJakobe, okwakufike kuye izwi likaSimakade, lathi: “Igama lakho lizakuba ngu-Israyeli.”
Walakha i-althare ngamatshe egameni likaSimakade, wayesenza umsele ngase-althare nxazonke, olingene namaseya amabili embewu.
Wahlela izinkuni, wayihlahlela inkunzi, wayibeka phezu kwezinkuni.
Wayesethi: “Gcwalisani izimbiza ezine ngamanzi, niwathele emnikelweni wokushiswa naphezu kwezinkuni.” Wathi: “Kwenzeni ngokwesibili.” Bakwenza. Wayesethi: “Kwenzeni nangokwesithathu.” Baphinda ngokwesithathu.
Amanzi agobhoza ngase-althare, nxazonke; wawugcwalisa nomsele ngamanzi.
Kwathi ngesikhathi sokunikela, u-Eliya umphrofethi wasondela, wathi: “Simakade Nkulunkulu ka-Abhrahama noka-Isaka noka-Israyeli, namhlanje makwazeke ukuthi Wena unguNkulunkulu kwa-Israyeli, nokuthi mina ngiyinceku yakho, nokuthi ngikwenzile konke lokhu ngezwi lakho.
Ngiphendule, Simakade, ngiphendule ukuze laba bantu bazi ukuthi Wena, Simakade unguNkulunkulu, nokuthi uguqukisela kuwe izinhliziyo zabo.”
Umlilo kaSimakade wehla, wawuqeda umnikelo wokushiswa, nezinkuni, namatshe, nothuli, waze wakhotha namanzi ayesemseleni.
Abantu bonke bakubona lokho bawa ngobuso, bathi: “USimakade nguye onguNkulunkulu; uSimakade nguye onguNkulunkulu.”
U-Eliya wathi kubo: “Bambani abaphrofethi bakaBhali, kungabaleki noyedwa kubo.” Bababamba, u-Eliya wabehlisela emfudlaneni iKishoni, wababulalela lapho.
U-Eliya wathi ku-Ahabi: “Khuphuka, udle, uphuze, ngokuba kukhona umdumo wemvula enkulu.”
Wayesekhuphuka u-Ahabi ukuba adle, aphuze. U-Eliya wakhuphukela esiqongweni eKharmeli, wakhothamela phansi, wafaka ubuso bakhe phakathi kwamadolo akhe.
Wathi encekwini yakhe: “Khuphuka, ubheke ngasolwandle.” Yakhuphuka, yabheka, yathi: “Akukho lutho.” Wayesethi: “Phinda kasikhombisa.”
Kwathi ngokwesikhombisa yathi: “Bheka, kukhuphuka ifu elincane olwandle, lingangesandla somuntu.” Wayesethi: “Khuphuka, umtshele u-Ahabi uthi: ‘Bophela, wehle, funa uvinjezelwe yimvula.’ ”
Kwathi ngesikhashana nje izulu laguqubala, kwaba nomoya, lana imvula enkulu. U-Ahabi wakhwela inqola, waya eJizreyeli.
Isandla sikaSimakade sasiku-Eliya; wabopha ukhalo lwakhe, wabaleka phambi kuka-Ahabi, waze wayofika ekungeneni kwaseJizreyeli.
U-Ahabi wambikela uJezebheli konke okwakwenziwe ngu-Eliya, nokuthi ubulele bonke abaphrofethi ngenkemba.
UJezebheli wayesethumela isithunywa ku-Eliya, ethi: “Sengathi onkulunkulu bami bangenza kanjalo kimi, futhi benezele, uma nje ngalesi sikhathi kusasa ngingakwenzi wena ube njengomunye wabo.”
Esekuzwile lokho u-Eliya, wasuka wahamba ukuze asindise impilo yakhe, waya eBheri Sheba kwaJuda, wayishiya khona inceku yakhe.
Yena wahamba uhambo losuku ehlane, waze wayohlala phansi kwesihlahla sonwele. Enhliziyweni yakhe wafisa ukufa, wathi: “Sekwanele manje, Simakade! Sale usuwuthatha umphefumulo wami, ngokuba angilungile kunokhokho bami.”
Wabeka uhlangothi phansi walala ubuthongo phansi konwele; wezwa ingelosi imthinta, yathi kuye: “Vuka udle.”
Wayesevuka; bheka, nanto iqebelengwane ngasekhanda lakhe, elalenziwe ematsheni ashisayo, nophiso lwamanzi. Wadla, waphuza; wabuye walala phansi.
Ingelosi kaSimakade yabuya okwesibili, yamthinta, yathi kuye: “Vuka udle, ngokuba indlela yakho inde.”
Wavuka, wadla waphuza, wahamba ngamandla alokho kudla izinsuku ezingama-40 nobusuku obungama-40, waya entabeni kaNkulunkulu, iHorebhe.
Wangena lapho emgedeni, walala khona. Kwase kufika izwi likaSimakade, lathi kuye: “Eliya, wenzani lapha na?”
Wathi: “Ngishisekele nokushisekela uSimakade uNkulunkulu Wamabandla, ngokuba abantu bakwa-Israyeli basilahlile isivumelwano sakho, badilize ama-althare akho, babulala abaphrofethi bakho ngenkemba; sekusele mina ngedwa, sebefuna umphefumulo wami ukuba bawususe.”
Wathi: “Phuma, ume entabeni phambi kukaSimakade.” USimakade wedlula, umoya omkhulu onamandla wadabula izintaba, waphahlaza amadwala phambi kukaSimakade, kodwa uSimakade wayengekho emoyeni. Emva komoya kwazamazama umhlaba, kodwa wayengekho uSimakade ekuzamazameni komhlaba.
Emva kokuzamazama komhlaba, kwaba khona umlilo, kodwa wayengekho uSimakade emlilweni. Emva komlilo, kwaba nezwi elincane elihlebezayo.
Kwathi lapho u-Eliya elizwa wagubuzela ubuso bakhe ngengubo yakhe, waphuma, wema ekungeneni komgede. Kwase kufika kuye izwi, lathi: “Eliya, wenzani lapha na?”
Wathi: “Ngishisekele nokushisekela uSimakade uNkulunkulu Wamabandla, ngokuba abantu bakwa-Israyeli basilahlile isivumelwano sakho, badilize ama-althare akho, babulala abaphrofethi bakho ngenkemba, kusele mina ngedwa; sebefuna umphefumulo wami ukuba bawususe.”
USimakade wayesethi kuye: “Hamba, ubuyele ngendlela oze ngayo, uye ehlane eDamaseku; lapho usufikile khona uyakugcoba uHazayeli abe yinkosi yase-Aramu.
Ugcobe futhi noJehu, indodana kaNimishi, abe yinkosi kwa-Israyeli, bese ugcoba no-Elisha, indodana kaShafathi wase-Abhela Mehola, abe ngumphrofethi esikhundleni sakho.
Kuyokuthi obalekela inkemba kaHazayeli, abulawe nguJehu, obalekela inkemba kaJehu, abulawe ngu-Elisha.
Ngiyakushiya kwa-Israyeli abayizi-7 000, bonke abamadolo abo engazange aguqe kuBhali nemilomo yabo yonke engazange imange.”
Wasuka lapho, wafumana u-Elisha, indodana kaShafathi, elima ngezinkabi ezingamabhangqa ali-12, eziqhuba, yena esebhangqeni le-12. U-Eliya wedlulela kuye, wayesemphonsela ingubo yakhe.
U-Elisha wazishiya izinkabi, wagijima elandela u-Eliya, wathi: “Ake ngange ubaba nomame, bese ngikulandela.” Wathi kuye: “Hamba, ubuyele emuva, ngokuba ngenzeni kuwe na?”
U-Elisha wabuyela emuva, wathatha izinkabi ezimbili, wazihlaba, wapheka inyama yazo ngamajoka ezinkabi. Wanika abantu, badla. Wayesesuka walandela u-Eliya, waba yisikhonzi sakhe.
UBheni Hadadi, inkosi yase-Aramu, wabutha impi yakhe yonke; amakhosi angama-32 ayenaye, amahhashi nezinqola zempi; wenyukela eSamariya, walivimbezela, walwa nalo.
Wathumela izithunywa ku-Ahabi, inkosi yakwa-Israyeli, emzini.
Wathi kuye: “Usho kanje uBheni Hadadi, uthi: ‘Isiliva negolide lakho kungokwami, amakhosikazi nabantwana bakho abahle bangabami.’ ”
Inkosi yakwa-Israyeli yaphendula, yathi: “Kunjengoba usho, nkosi yami, nkosi. Mina ngingowakho nakho konke enginakho.”
Izithunywa zabuya, zathi: “Usho kanje uBheni Hadadi, uthi: ‘Ngithumele kuwe, ngathi: nginike isiliva lakho negolide lakho, namakhosikazi akho, nabantwana bakho,
kuyakuthi kusasa, ngalesi sikhathi, ngithumele izinceku zami, zipeketule esigodlweni sakho nasezindlini zezinceku zakho; kuyothi konke okuhle kuwe, zikuthathe, zikwephuce khona.’ ”
Inkosi yakwa-Israyeli yayisibiza wonke amalunga ezwe, yathi: “Ngicela nazi, nibone ukuthi lo muntu ufuna ukwenza okubi. Uthumele kimi efuna amakhosikazi ami, abantwana bami, isiliva lami negolide lami; angizange ngenqabe nakho.”
Onke amalunga nabantu bonke, bathi kuye: “Ungalokothi umlalele, futhi ungavumi.”
Inkosi yathi ezithunyweni zikaBheni Hadadi: “Yitsheleni inkosi yami, inkosi, nithi: ‘Konke owakuthumela ngezinceku zakho encekwini yakho kuqala, ngizokwenza, kodwa le nto angikwazi ukuyenza.’ ” Izithunywa zaphindela emuva nalelo lizwi.
UBheni Hadadi wathumela kuyo, wathi: “Onkulunkulu mabenze kanjalo kimi, benezele futhi, uma uthuli lweSamariya lungeke lugcwale isandla kulowo nalowo muntu ongilandelayo.”
Inkosi yakwa-Israyeli yaphendula, yathi: “Mtsheleni nithi: ‘Obhinca izikhali makangazigabisi njengalowo ozikhumulayo.’ ”
Kwathi ukuba ezwe leli lizwi, ephuza namakhosi emadokodweni awo, wathi ezincekwini zakhe: “Mayiphume ihlasele!” Yayisiphuma-ke impi, yayolwa nomuzi.
Bheka, kwasondela umphrofethi ku-Ahabi, inkosi yakwa-Israyeli, wathi: “Usho kanje uSimakade, uthi: ‘Uyasibona sonke lesi sixuku esikhulu? Ngizosinikela esandleni sakho namuhla, ukuze wazi ukuthi Mina nginguSimakade.’ ”
Wayesethi u-Ahabi: “Ngobani abazokwenza lokho na?” Wathi; “Usho kanje uSimakade, uthi: ‘Yizinsizwa zezikhulu zezifunda.’ ” Wayesethi: “Ngubani ozoqala impi?” Wathi: “Nguwe.”
Wayesehlanganisa izinsizwa zezikhulu zezifunda; zazingama-232. Emva kwazo wahlanganisa abantu bonke; abakwa-Israyeli babeyizi-7 000.
Baphuma emini. UBheni Hadadi wayezigcingca ngotshwala emadokodweni, ekanye namakhosi angama-32 ayemsiza.
Izinsizwa zezikhulu zezifunda zaphuma kuqala. UBheni Hadadi wathumela, bambikela ukuthi kuphume amadoda eSamariya.
Wathi: “Uma bephumele ukuthula, babambeni bephila, noma bephumele ukulwa, babambeni bephila.”
Izinsizwa zezikhulu zezifunda zaphuma-ke emzini nempi eyayizilandela.
Kwaba yilowo nalowo wabulala owakhe umuntu. Ama-Aramu abaleka, u-Israyeli wawahubha, kodwa uBheni Hadadi, inkosi yama-Aramu, waphunyuka egibele ihhashi ekanye nabamahhashi bakhe.
Inkosi yakwa-Israyeli yaphuma, yabhubhisa amahhashi nezinqola zempi, yabulala ama-Aramu amaningi kakhulu.
Umphrofethi wasondela enkosini yakwa-Israyeli, wathi kuyo: “Hamba, uziqinise, uqaphele, ubone ukuthi uzokwenzani, ngoba emva konyaka inkosi yama-Aramu izobuya, izokulwa nawe.”
Izinceku zenkosi yama-Aramu zathi kuyo: “Unkulunkulu wabo ungunkulunkulu wezintaba, ngalokho babenamandla kunathi, kepha masilwe nabo ethafeni, siyakuba namandla kunabo, sibehlule.
Yenza lokhu futhi: susa wonke amakhosi, yileyo naleyo endaweni yayo, ubeke ababusi ezikhundleni zawo.
Uzihlanganisele impi yakho ibe njengaleyo eyakulahlekela, ihhashi ngehhashi, inqola ngenqola; masilwe nabo ethafeni, siyoba namandla kunabo.” Walilalela izwi labo, wenza kanjalo.
Kwathi emva konyaka, uBheni Hadadi wahlanganisa ama-Aramu, wayesenyukela e-Afeki ukuyolwa no-Israyeli.
Abakwa-Israyeli bahlanganiswa nabo, baphiwa ukudla, base behamba ukuyobhekana nabo. Abakwa-Israyeli bakanisa phambi kweyesitha, babefana nemihlanjana emibili yamazinyane ezimbuzi, kodwa ama-Aramu ayegcwalise izwe.
Umuntu kaNkulunkulu wayesesondela enkosini yakwa-Israyeli, wathi kuyo: “Usho kanje uSimakade, uthi: ‘Ngenxa yokuba ama-Aramu athe uSimakade unguNkulunkulu wezintaba, akasiye uNkulunkulu wezigodi, ngizosinikela sonke lesi sixuku esikhulu esandleni sakho, ukuze nazi ukuthi nginguSimakade.’ ”
Bakanisa babhekana izinsuku eziyikhombisa. Kwathi ngosuku lwesikhombisa yatholana phezulu. Abakwa-Israyeli babulala ama-Aramu ayimigundatshani ayizi-100 000 ngalusuku lunye.
Insali yabalekela emzini e-Afeki; ugange lwawela phezu kwamadoda ayizi-27 000 ayesele. UBheni Hadadi wabalekela emzini, ukuyobhaca.
Izinceku zakhe zathi kuye: “Sizwile ukuthi amakhosi endlu yakwa-Israyeli angamakhosi anomusa; ake sibhince indwangu eyisaka okhalo lwethu nezintambo emakhanda ethu, siphume siye enkosini yakwa-Israyeli; mhlawumbe iyakusindisa ukuphila kwakho.”
Zase zibhinca indwangu eyisaka okhalo lwazo, zafaka nezintambo emakhanda azo, zaya enkosini yakwa-Israyeli, zathi: “Ithi inceku yakho, uBheni Hadadi: ‘Ngicela ungiyeke, ngiphile.’ ” Yayisithi: “Usekhona yini? Ungumfowethu yena.”
Amadoda ayekuqaphele lokho kukhuluma, ashesha ukukufakazela akushilo, athi: “Impela ungumfowenu uBheni Hadadi.” Wathi: “Hambani, nimlande.” UBheni Hadadi wayesephuma, weza kuye, wamgibelisa enqoleni yakhe.
UBheni Hadadi wathi kuye: “Imizi eyadliwa ngubaba kuyihlo ngizoyibuyisa, uyakuzenzela imigwaqo eDamaseku njengalokhu ubaba enza eSamariya.” U-Ahabi wathi: “Ngenxa yalesi sivumelwano ngizokuvumela ukuba uhambe.” Base benza isivumelwano, wayesemvumela ukuba ahambe.
Umuntu othile owayengomunye wamadodana abaphrofethi, wathi kumngani wakhe ngezwi likaSimakade: “Ake ungishaye.” Kepha lowo muntu wenqaba ukumshaya.
Wayesethi kuye: “Njengoba ungalalelanga izwi likaSimakade, uzokuthi uma nje usuka lapha kimi, ubulawe yibhubesi.” Nempela wanele ukusuka nje kuye, wahlangana nebhubesi lambhozomela, lambulala.
Omunye umuntu wamthola, wathi kuye: “Ake ungishaye.” Lowo muntu wamshaya, wamshaya wamlimaza.
Umphrofethi wayesesuka, wayolinda inkosi endleleni, wazifihla ngeqhele emehlweni akhe.
Kwathi lapho inkosi idlula, wayimemeza, wathi: “Inceku yakho yaphuma yaya phakathi kwempi; kweza umuntu waletha kimi omunye, wathi: ‘Linda lo muntu; uma elahleka, ukuphila kwakho kuyakuba sesikhundleni sokuphila kwakhe, noma uyakukhokha ithalente lesiliva.’
Inceku yakho isaxakekile ndaweni thizeni, wanyamalala.” Yayisithi kuye inkosi yakwa-Israyeli: “Wehlulelwe kanjalo-ke, njengalokhu unqumile.”
Wayeseshesha walisusa iqhele emehlweni akhe, yayisimbona inkosi yakwa-Israyeli ukuthi ungomunye wabaphrofethi.
Wathi kuyo: “Usho kanje uSimakade, uthi: ‘Ngenxa yokuthi umyekile waphunyuka esandleni sakho umuntu ebengizombhubhisa, ukuphila kwakho kuyakuba sesikhundleni sokuphila kwakhe, nabantu bakho esikhundleni sabantu bakhe.’ ”
Inkosi yakwa-Israyeli yaphindela esigodlweni sayo ihluneme futhi ithukuthele, yase iya eSamariya.
Sekwedlule konke lokho, uNabothi waseJizreyeli wayenesivini esasiseceleni kwesigodlo senkosi u-Ahabi, inkosi yaseSamariya.
U-Ahabi wakhuluma kuNabothi, wathi: “Nginike isivini sakho ukuze sibe yisivande sami semifino, ngoba siseduze nesigodlo sami. Ngizokunika esikhundleni saso isivini esihle kunaso, kodwa uma uthanda ngingakunika isiliva libe yinkokhelo yaso.”
UNabothi wayesethi ku-Ahabi: “Anginakukwenza lokho, ngenxa kaSimakade, ukuba ngikunike ifa lokhokho bami.”
U-Ahabi waya esigodlweni sakhe ehluneme futhi ethukuthele ngenxa yezwi uNabothi waseJizreyeli ayelikhulume kuye, lokuthi: “Angiyukukunika ifa lokhokho bami.” Walala embhedeni, wabheka eceleni, akaze adla lutho.
Kwase kufika uJezebheli, umkakhe, wakhuluma naye, wathi: “Uhlunameleni umoya wakho uze ungadli lutho na?”
Wathi kuye: “Ngikhulume noNabothi waseJizreyeli, ngathi kuye: ‘Nginike isivini sakho ngikukhokhele ngesiliva; uma uthanda-ke ngiyakukunika esinye isivini esikhundleni saso,’ kepha wathi: ‘Angiyukukunika isivini sami.’ ”
UJezebheli, umkakhe, wathi kuye: “Akunguwe yini obusa kwa-Israyeli na? Vuka udle, inhliziyo yakho ithokoze. Ngizokunika isivini sikaNabothi waseJizreyeli.”
UJezebheli wayeseloba izincwadi egameni lika-Ahabi, wazinamathelisa ngophawu lwakhe, wazithumela kumalunga, ezikhulwini ezazisemzini, ababakhe noNabothi.
Waloba ezincwadini ukuthi: “Memezelani ukuzila ukudla, nimbeke uNabothi endaweni emqoka kuneyabanye abantu,
nibeke amadoda amabili, abantu ababi, phambi kwakhe, afakaze ngaye ngokuthi: ‘Uthukile uNkulunkulu nenkosi,’ bese nimkhiphela phandle, nimkhande ngamatshe, afe.”
Abantu bakulowo muzi, amalunga nezikhulu ababehlala emzini, benza njengalokhu uJezebheli ayebathumelele, nanjengokwakulotshwe ezincwadini ayezithumele kubo.
Amemezela ukuzila ukudla, ambeka uNabothi endaweni emqoka kuneyabanye abantu.
Amadoda amabili, abantu ababi, angena, ahlala phambi kwakhe; afakaza ngaye lawo madoda amabi, athi: “UNabothi uthukile uNkulunkulu nenkosi.” Base bemkhiphela ngaphandle komuzi, bamkhanda ngamatshe, wafa.
Base bethumela kuJezebheli, bethi: “UNabothi ukhandwe ngamatshe, wafa.”
Kwathi ukuba uJezebheli ezwe ukuthi uNabothi ukhandwe ngamatshe wafa, wathi ku-Ahabi: “Suka udle isivini sikaNabothi waseJizreyeli, enqaba ukukunika sona ngesiliva, ngokuba uNabothi ufile.”
Kwathi u-Ahabi esezwile ukuthi uNabothi ufile, u-Ahabi wasuka wehlela esivinini sikaNabothi waseJizreyeli, ukuba asidle.
Izwi likaSimakade lafika ku-Eliya, umThishibhi, lathi:
“Suka wehle, uhlangabeze u-Ahabi, inkosi yakwa-Israyeli, oseSamariya; wehlile, usesivinini sikaNabothi, ukuba asidle.
Uyakuthi kuye: ‘Usho kanje uSimakade, uthi: ubulele, wadla isivini, na?’ Bese ukhuluma kuye, uthi: ‘Usho kanje uSimakade, uthi: endaweni lapho izinja zaxhapha khona igazi likaNabothi, izinja ziyakuxhapha negazi lakho, yebo, elakho.’ ”
U-Ahabi wayesethi ku-Eliya: “Ungitholile wena sitha sami na?” Wathi: “Ngikutholile, ngenxa yokuba nguwena ozithengisile, wenza okubi emehlweni kaSimakade.
‘Uyabona-ke, ngizokwehlisela okubi, ngikukhukhule, ngibhubhise bonke abesilisa baka-Ahabi, omncane nomkhulu kwa-Israyeli.
Indlu yakho ngiyakuyenza ibe njengendlu kaJerobhowamu, indodana kaNebhathi, nanjengendlu kaBhahasha, indodana ka-Ahiya, ngenxa yokuchukuluza ochukuluze ngakho ulaka lwami, wenza ukuba u-Israyeli one.’
“USimakade wathi nangoJezebheli: ‘Izinja ziyomudla uJezebheli ngasogangeni eJizreyeli.’
“Owakwa-Ahabi ofela emzini, uyodliwa yizinja, nofela endle, uyodliwa yizinyoni zezulu.”
Kepha-ke akubanga bikho omunye owafana no-Ahabi owazithengisa, wenza okubi phambi kukaSimakade, edudwa nguJezebheli, umkakhe.
Wenza okuningi okunengisayo ngokulandela izithombe nangakho konke okwakwenziwa ngama-Amori, uSimakade ayewaxoshile ngaphambi kwabantu bakwa-Israyeli.
Kwathi ukuba u-Ahabi ezwe lawo mazwi, waklebhula izingubo zakhe, wembatha indwangu eyisaka, wazila, walala endwangwini eyisaka, wazulazula ehamba enjengolahliweyo.
Izwi likaSimakade lafika ku-Eliya waseThishibhi, lathi:
“Ubonile yini ukuthi u-Ahabi uzithobile phambi kwami, na? Ngenxa yokuba ezithobile phambi kwami, okubi angiyukukwehlisa emihleni yakhe, kodwa ngiyokwehlisa emihleni yendodana yakhe.”
Kwaba yiminyaka emithathu kungekho ukulwa phakathi kwe-Aramu no-Israyeli.
Kwathi ngonyaka wesithathu, uJehoshafathi inkosi yakwaJuda, wehlela enkosini yakwa-Israyeli.
Inkosi yakwa-Israyeli yathi ezincekwini zayo: “Niyazi nje ukuthi iRamothi Gileyadi lingelethu, na? Kepha asenzi lutho ukuba silithathe esandleni senkosi yase-Aramu.”
Yathi kuJehoshafathi: “Uzohamba yini nami ukuyolwa neRamothi Gileyadi na?” UJehoshafathi wathi enkosini yakwa-Israyeli: “Mina ngifana nawe, abantu bami banjengabantu bakho, namahhashi ami anjengamahhashi akho.”
UJehoshafathi nokho wathi enkosini yakwa-Israyeli: “Ake ubuze namuhla izwi likaSimakade.”
Inkosi yakwa-Israyeli yayisiqoqa abaphrofethi abathi ababe ngama-400, yathi kubo: “Ngihambe yini ngiyokulwa neRamothi Gileyadi, noma ngiliyeke na?” Bathi: “Yenyuka, ngokuba uSimakade uyakulinikela esandleni senkosi.”
Kepha uJehoshafathi wathi: “Akekho yini umphrofethi kaSimakade lapha ukuba sibuze kuye na?”
Inkosi yakwa-Israyeli yathi kuJehoshafathi: “Kusekhona umuntu oyedwa esingabuza kuSimakade ngaye kodwa ngiyamzonda ngokuba akaphrofethi okuhle ngami kodwa okubi; nguMikhaya, indodana kaJimila.” UJehoshafathi wathi: “Inkosi mayingakusho lokho.”
Inkosi yakwa-Israyeli yayisibiza induna, yathi kuyo: “Landa masinyane uMikhaya, indodana kaJimila.”
Inkosi yakwa-Israyeli noJehoshafathi, inkosi yakwaJuda, babehleli, kuyilowo nalowo esihlalweni sakhe sobukhosi. Babembethe izembatho zabo, besesibuyeni ngasesangweni eSamariya. Bonke abaphrofethi babephrofetha phambi kwabo.
UZedekiya, indodana kaKhenahana, wazenzela izimpondo zensimbi, wathi: “Usho kanje uSimakade, uthi: ‘Ngalezi zimpondo uyakuqhubukusha ama-Aramu, uze uwabhubhise.’ ”
Bonke abaphrofethi babephrofetha kanje, bethi: “Yenyukela eRamothi Gileyadi, ube nempumelelo, ngokuba uSimakade uzolinikela esandleni senkosi.”
Isithunywa esasithunywe ukuyolanda uMikhaya, sathi kuye: “Bheka, bonke abaphrofethi baphrofethe kahle, basho ngazwi linye enkosini; ngakho-ke nawe izwi lakho malibe njengezwi lomunye wabo, ukhulume okuhle.”
Kepha uMikhaya wathi: “Ngiyafunga phambi kuSimakade, lokhu uSimakade akushoyo kimi, yikhona engizokukhuluma.”
Esefikile enkosini, inkosi yathi kuye: “Mikhaya, sihambe yini ukuyolwa neRamothi Gileyadi, noma siliyeke na?” Wathi kuyo: “Yenyuka, ube nempumelelo. USimakade uyakulinikela esandleni senkosi.”
Yayisithi kuye inkosi: “Kuyoze kube kangaki ngikufungisa ukuba ungakhulumi lutho kimi ngaphandle kweqiniso egameni likaSimakade na?”
Wayesethi: “Ngabona wonke u-Israyeli ehlakazekile ezintabeni njengezimvu ezingenamelusi. USimakade wayesethi: ‘Laba abasenankosi. Mababuyele, kube yilowo nalowo endlini yakhe ngokuthula.’ ”
Yayisithi inkosi yakwa-Israyeli kuJehoshafathi: “Angishongo yini kuwe ukuthi akaphrofethi okuhle ngami, kodwa okubi kuphela na?”
UMikhaya wathi: “Ngakho-ke yizwa izwi likaSimakade: ngambona uSimakade ehleli esihlalweni sakhe sobukhosi; nebandla lonke lasezulwini limi ngakuye, kwesokunene nangakwesokhohlo sakhe.
USimakade, wathi: ‘Ngubani oyakuyenga u-Ahabi ukuba enyuke afele eRamothi Gileyadi na?’ “Omunye washo komunye.
Kwase kuvela umoya, wema phambi kukaSimakade, wathi: ‘Mina ngizomyenga.’ “USimakade wathi kuwo umoya: ‘Kanjani na?’
“Wathi: ‘Ngizophuma ngibe ngumoya wamanga emilonyeni yabo bonke abaphrofethi bakhe.’ “Wayesethi: ‘Uyakumyenga, futhi umehlule. Hamba wenze kanjalo.’
“Ngakho-ke uSimakade ubeke umoya wamanga emilonyeni yabo bonke abaphrofethi bakho; uSimakade ukhulume okubi kodwa ngawe.”
UZedekiya, indodana kaKhenahara, wasondela, wamshaya uMikhaya esihlathini, wathi: “UMoya kaSimakade wasuka nini kimi ukuba akhulume kuwe na?”
Wathi uMikhaya: “Bheka, uyakukubona lokho ngosuku oyongena uphuma ngalo emakamelweni ngamakamelo, ucasha.”
Inkosi yakwa-Israyeli yathi: “Mthathe uMikhaya, umbuyisele ku-Amoni, umbusi womuzi, nakuJowashi, indodana yenkosi,
uyakuthi kubo: ‘Isho kanje inkosi, ithi: fakani lo ejele, nimuphe isinkwa sokuhlupheka namanzi okuhlupheka, ngize ngibuye ngiphephile.’ ”
Wayesethi uMikhaya: “Uma uyobuya ngempela uphephile, uyakube engakhulumanga ngami uSimakade.” Wathi futhi: “Yizwani nina bantu bonke.”
Inkosi yakwa-Israyeli noJehoshafathi, inkosi yakwaJuda, base benyukela eRamothi Gileyadi.
Inkosi yakwa-Israyeli yathi kuJehoshafathi: “Mina ngizozifihla uma sekuliwa, kepha wena ubokwembatha izembatho zakho.” Inkosi yakwa-Israyeli yayisizifihla, yahamba yayolwa.
Inkosi yase-Aramu yayizidonse ngendlebe izinduna zayo ezingama-32, yathi: “Ningalwi namuntu noma ngomncane noma ngomdala, kodwa nenkosi yakwa-Israyeli kuphela.”
Kwathi lapho izinduna zezinqola sezimbonile uJehoshafathi, zathi: “Impela lo yinkosi yakwa-Israyeli.” Zaphambuka zalwa nayo, kodwa uJehoshafathi wamemeza.
Kwathi sezibonile izinduna zezinqola ukuthi akasiyo inkosi yakwa-Israyeli, zabuya ekumlandeleni.
Kepha umuntu othile wansala umnsalo wakhe ngokungazelele nje, wayihlaba inkosi yakwa-Israyeli lapho kuhlangana khona ibhantshi lensimbi eliyisivikelo sayo, yathi kumshayeli wenqola yayo: “Phenduka, ungikhiphe empini, ngokuba sengilinyaziwe.”
Impi yashisa ngalolo lusuku. Inkosi bayibeka enqoleni yayo maqondana ne-Aramu, kwathi kusihlwa yakhothama. Igazi elaphuma enxebeni layo lagobhozela phansi enqoleni.
Selishonile ilanga, kwedluliswa enkanjini isimemezelo sokuthi: “Yilowo nalowo makabuyele emzini wakubo, ezweni lakubo.”
Yakhothama-ke inkosi, yase iyiswa eSamariya; bayimbela eSamariya.
Sebeyihlanza inqola echibini eSamariya, kwaba njengalokhu uSimakade ayeshilo ukuthi izinja ziyakuxhapha igazi lakhe, nezifebe zigeze ngalo.
Ezinye izindaba zika-Ahabi, konke akwenzayo, indlu yezimpondo zendlovu ayakhayo, nayo yonke imizi ayakhayo, akulotshiwe yini encwadini yezindaba zemihla ngemihla yamakhosi akwa-Israyeli na?
U-Ahabi walaliswa kokhokho bakhe; u-Ahaziya, indodana yakhe, waba yinkosi esikhundleni sakhe.
UJehoshafathi, indodana ka-Asa, waba yinkosi kwaJuda ngonyaka wesine wokubusa kuka-Ahabi, inkosi yakwa-Israyeli.
UJehoshafathi waqala ukubusa eneminyaka engama-35; wabusa iminyaka engama-25 eJerusalema. Igama likanina kwakungu-Azubha, indodakazi kaShilekhi.
Wahamba ngezindlela zonke zika-Asa, uyise, kaphambukanga kuzo, wenza okulungile emehlweni kaSimakade. Kepha izindawo eziphakemeyo azisuswanga; abantu babesanikela, beshisa impepho ezindaweni eziphakemeyo.
UJehoshafathi wadala ukuthula nenkosi yakwa-Israyeli.
Ezinye izindaba zikaJehoshafathi, amandla awabonakalisa, nokulwa kwakhe, akulotshiwe yini encwadini yezindaba zemihla ngemihla yamakhosi akwaJuda na?
Insali yomkhuba wobufebe basethempelini, eyayisele emihleni kayise, u-Asa wayibhubhisa ezweni.
Kwakungekho nkosi kwa-Edomi; kwakubusa ibambela.
UJehoshafathi walungisa imikhumbi yaseTharishishi ukuba iye e-Ofiri ukuyolanda igolide, kodwa ayihambanga, ngokuba imikhumbi yephukela e-Eziyoni Gebheri.
U-Ahaziya, indodana ka-Ahabi, wathi kuJehoshafathi: “Izinceku zami mazihambe nezinceku zakho ngemikhumbi.” Kepha uJehoshafathi akavumanga.
UJehoshafathi walaliswa kokhokho bakhe, wembelwa kokhokho emzini kaDavide, ukhokho wakhe; uJehoramu, indodana yakhe, waba yinkosi esikhundleni sakhe.
U-Ahaziya, indodana ka-Ahabi, waqala ukubusa kwa-Israyeli eSamariya ngonyaka we-17 wokubusa kukaJehoshafathi, inkosi yakwaJuda, wabusa iminyaka emibili kwa-Israyeli.
Wenza okubi phambi kukaSimakade, wahamba ngendlela kayise, ngekanina, nangekaJerobhowamu, indodana kaNebhathi, onisa ngayo u-Israyeli.
Wakhonza uBhali, wakhuleka kuye, wamcunula uSimakade uNkulunkulu ka-Israyeli, njengakho konke ayekwenzile uyise.
Emva kokufa kuka-Ahabi, uMowabi wamvukela u-Israyeli.
U-Ahaziya waphuma ngefasitela lekamelo lakhe eliphezulu elaliseSamariya wawa, wagula. Wathumela izithunywa, wathi kuzo: “Hambani niyongihlolela kuBhali Zebhubhi, unkulunkulu wase-Ekhroni, ukuthi ngizolulama yini kulokhu kugula.”
Kepha ingelosi kaSimakade yathi ku-Eliya waseThishibhi: “Suka, wenyuke uhlangabeze izithunywa zenkosi yaseSamariya, uthi kuzo: ‘Kungenxa yokuba kungekho Nkulunkulu yini kwa-Israyeli ukuba nihambe niyohlola kuBhali Zebhubhi, unkulunkulu wase-Ekhroni na?’ ”
Ngakho-ke usho kanje uSimakade, uthi: “Umbhede olele kuwo awuyukwehla kuwo; impela uzokufa.” U-Eliya wayesesuka.
Izithunywa zaphindela enkosini, yathi kuzo: “Nibuyeleni na?”
Zaphendula zathi: “Sihlangane nendoda ethe kithi: ‘Hambani, niphindele enkosini enithumileyo, nithi kuyo: “Usho kanje uSimakade, uthi: kungenxa yokuba kungekho Nkulunkulu yini kwa-Israyeli ukuba nihambe niyohlola kuBhali Zebhubhi, unkulunkulu wase-Ekhroni na? Ngalokho umbhede olele kuwo awuyukwehla kuwo, impela uyakufa.” ’ ”
Inkosi yathi kuzo: “Ibinjani leyo ndoda ekhuphuke yanihlangabeza, yakhuluma kini lawo mazwi?”
Zayiphendula zathi: “Yindoda ebiphuphuzela uboya, ibhince ibhande lesikhumba okhalo lwayo.” Yayisithi: “Bekungu-Eliya waseThishibhi.”
Inkosi yathumela induna yabangama-50 inamadoda angama-50. Yenyukela ku-Eliya; wayehleli esiqongweni sentaba, yathi kuye: “Muntu kaNkulunkulu, inkosi ithi kuwe: ‘Yehla.’ ”
Kepha u-Eliya wayiphendula induna yabangama-50, wathi: “Uma ngiyindoda kaNkulunkulu, makwehle umlilo ezulwini uniqothule, wena nalaba abangama-50.” Umlilo wehla uvela ezulwini wayiqothula nabangama-50 eyayinabo.
Inkosi yabuye yathumela kuye enye induna yabangama-50 namabutho angama-50. Yafike yathi kuye: “Muntu kaNkulunkulu, ithi inkosi kuwe: ‘Yehla ngokushesha.’ ”
Kepha wabaphendula wathi: “Uma ngiyindoda kaNkulunkulu, makwehle umlilo ezulwini uniqothule, wena nalaba abangama-50.” Umlilo kaNkulunkulu wehla ezulwini wayiqothula nabangama-50 eyayinabo.
Yabuye yathumela induna yesithathu yabangama-50 inama-50 ayo. Yakhuphuka leyo nduna yesithathu, yafike yaguqa phambi kuka-Eliya, yamncenga, yathi: “Muntu kaNkulunkulu ngiyakunxusa, ukuphila kwami nokwalezi zinceku zakho ezingama-50 makube yigugu emehlweni akho.
Bheka, kwehle umlilo uvela ezulwini, waqothula izinduna ezimbili zokuqala zabangama-50, kodwa manje ngiyakunxusa, impilo yami mayibe yigugu emehlweni akho.”
Ingelosi kaSimakade yathi ku-Eliya: “Yehla nayo, ungayesabi.” U-Eliya wasukuma, wehla nayo, waya enkosini.
Wathi kuyo: “Usho kanje uSimakade: ‘Lokhu uthumele izithunywa ukuyohlola kuBhali Zebhubhi, unkulunkulu wase-Ekhroni, yingoba kungekho Nkulunkulu yini kwa-Israyeli ukuba ubuze izwi lakhe na? Ngakho-ke, umbhede olele kuwo ngeke usehla kuwo, kodwa uzokufa nokufa.’ ”
Yafa njengokwezwi likaNkulunkulu alikhuluma ngo-Eliya. UJehoramu waba yinkosi esikhundleni sakhe ngonyaka wesibili wokubusa kukaJehoshafathi, inkosi yakwaJuda, ngoba u-Ahaziya wayengenandodana.
Ezinye izindaba zika-Ahaziya azenzayo, azilotshiwe yini encwadini yezindaba zemihla ngemihla yamakhosi akwa-Israyeli na?
Kwathi lapho uSimakade esezomthatha u-Eliya amenyusele ezulwini ngesishingishane, u-Eliya no-Elisha basuka eGiligali.
U-Eliya wathi ku-Elisha: “Ake uhlale lapha, ngokuba uSimakade ungithumele eBhethele.” Kepha u-Elisha wathi: “Ngifunga ngiyagomela phambi kukaSimakade, naphambi kwakho, angisoze ngisuke kuwe.” Base behlela eBhethele.
Amadodana abaphrofethi ayeseBhethele aphuma aya ku-Elisha, athi kuye: “Uyazi yini ukuthi namuhla uSimakade uzoyithatha inkosi yakho na?” Wathi: “Yebo, ngiyazi; thulani.”
U-Eliya wathi kuye: “Elisha, ake usale lapha, ngokuba uSimakade ungithume eJerikho.” Kepha yena wathi: “Ngifunga ngiyagomela phambi kukaSimakade naphambi kwakho, angisoze ngakushiya.” Base beya eJerikho.
Amadodana abaphrofethi ayeseJerikho asondela ku-Elisha, athi kuye: “Uyazi yini ukuthi namuhla uSimakade uzoyithatha inkosi yakho na?” Wathi: “Yebo, ngiyazi; thulani.”
U-Eliya wathi ku-Elisha: “Ake usale lapha, ngokuba uSimakade ungithume eJordani.” Kepha yena wathi: “Ngifunga ngiyagomela phambi kukaSimakade naphambi kwakho, angisoze ngakushiya.” Base behamba bobabili.
Abantu abangama-50, amadodana abaphrofethi bahamba bema buqamama maqondana nabo, bona bobabili bama ngaseJordani.
U-Eliya wathatha isembatho sakhe, wasisonga, washaya amanzi, ehlukana ngapha nangapha, bawela iJordani bobabili, behamba emhlabathini owomileyo.
Kwathi besawela iJordani, u-Eliya wathi ku-Elisha: “Cela ukuthi ufisa ngikwenzeleni ngaphambi kokuba ngisuswe kuwe.” U-Elisha wathi: “Umoya wakho mawuphindwe kabili kimi.”
Wathi: “Ucele into elukhuni, nokho-ke uma ungibona lapho ngisuswa kuwe, kuyokwenzeka kanjalo kuwe, kodwa uma ungangibonanga, akuyukuba kanjalo.”
Kwathi besalokhu behamba bexoxa, bheka, kwaqhamuka inqola yomlilo namahhashi omlilo, abehlukanisa, u-Eliya wenyukela ezulwini ngesivunguvungu.
U-Elisha wakubona lokho, wamemeza, wathi: “Baba, baba, inqola yempi ka-Israyeli nabamahhashi bakhe!” Akabange esambona futhi; wabamba izingubo zakhe waziklebhula kabili.
Wacosha isembatho sika-Eliya esasiwe kuye, waphindela emuva, wema osebeni lweJordani.
Wasithatha isembatho sika-Eliya, esasiwe kuye, washaya ngaso amanzi, wathi: “Uphi uSimakade, uNkulunkulu ka-Eliya na?” Esewashayile amanzi, ahlukana ngapha nangapha, u-Elisha wawela.
Amadodana abaphrofethi ayeseJerikho, ebuqamama, ambona, athi: “Umoya ka-Eliya wehlele phezu kuka-Elisha.” Asuka ayomhlangabeza, akhothama athi mbo emhlabathini phambi kwakhe.
Athi kuye: “Bheka, phakathi kwethu izinceku zakho kunamadoda angama-50 anamandla. Mawahambe ayofuna inkosi yakho, hleze uMoya kaSimakade uyikhuphulile, wayilahla entabeni thizeni noma esigodini.” Kepha wathi: “Ningawathumi.”
Amncengisisa waze waba namahloni, wayesethi: “Athumeni.” Ayesethuma abantu abangama-50, bamfuna izinsuku ezintathu, kodwa abamtholanga.
Abuyela kuye, amfica eselokhu eseJerikho, wayesethi kuwo: “Angishongo yini ukuthi ningahambi na?”
Abantu ababehlala emzini bathi ku-Elisha: “Uyabona, umuzi usendaweni enhle, njengokuba nenkosi izibonela nje, kodwa amanzi mabi, nezwe alinakudla.”
U-Elisha wathi: “Lethani kimi isitsha esisha, nifake usawoti kuso.” Basiletha kuye.
Waphuma waya emthonjeni wamanzi, waphonsa kuwo usawoti, wathi: “Usho kanje uSimakade: ‘Ngiwelaphile lawa manzi, akuseyukuba bikho kufa kuwo, nakuphunza, nakuphuphuma kwezisu.’ ”
Amanzi elapheka kusukela ngaleso sikhathi kuze kube yinamuhla, njengalokhu asho u-Elisha.
Wasuka lapho wenyukela eBhethele. Esendleleni, kwaphuma abafana emzini, bamgcona, bathi: “Yenyuka mpandla ndini! Yenyuka mpandla ndini!”
Waphenduka, wababona, wabaqalekisa egameni likaSimakade, kwase kuphuma ehlathini amabhere ezinsikazi amabili abadwengula labo bafana ababengama-42.
Wasuka lapho, waya entabeni iKharmeli, wayesebuyela eSamariya.
Ngonyaka we-18 wokubusa kukaJehoshafathi, inkosi yakwaJuda, uJehoramu, indodana ka-Ahabi, waba yinkosi kwa-Israyeli eSamariya. Wabusa iminyaka eli-12.
Wenza okubi emehlweni kaSimakade, nokho akafananga noyise nonina, wayisusa insika kaBhali ayeyenzile uyise.
Nokho wanamathela esonweni sikaJerobhowamu, indodana kaNebhathi, onisa ngaso u-Israyeli; akasukanga kuso.
UMesha, inkosi yakwaMowabi, wayengumfuyi wezimvu, wathela enkosini yakwa-Israyeli ngoboya bamawundlu ayizi-100 000 nobezinqama eziyizi-100 000.
Kwathi ukuba ikhothame inkosi u-Ahabi, inkosi yakwaMowabi yayivukela inkosi yakwa-Israyeli.
Inkosi uJehoramu yahlanganisa wonke u-Israyeli ngalolo lusuku, yaphuma eSamariya.
Yathumela kuJehoshafathi, inkosi yakwaJuda, yathi: “Inkosi yakwaMowabi ingivukele, ungahamba yini nami siyokulwa nabakwaMowabi na?” Wathi: “Ngizakwenyuka, njengoba nami ngiyafana nawe, nabantu bami banjengabantu bakho, namahhashi ami anjengamahhashi akho.”
Wathi futhi: “Siyakwenyuka ngayiphi indlela?” Yathi: “Ngendlela yasehlane kwa-Edomi.”
Inkosi yakwa-Israyeli, eyakwaJuda, neyakwa-Edomi, asuka ahamba ngendlela ethathelayo eyawathatha izinsuku eziyisikhombisa. Kwakungekho manzi amabutho nawemfuyo ababehamba nakho.
Inkosi yakwa-Israyeli yayisithi: “Maye, uSimakade uqoqe lawa makhosi amathathu ukuze awanikele esandleni sabakwaMowabi!”
UJehoshafathi wayesethi: “Akekho yini umphrofethi kaSimakade ukuze sibuze kuye ukuthi uthini uSimakade na?” Enye yezinceku zenkosi yakwa-Israyeli yaphendula, yathi: “Ukhona u-Elisha, indodana kaShafathi, okunguye owayegeza izandla zika-Eliya.”
UJehoshafathi wathi: “Izwi likaSimakade likuye.” Inkosi yakwa-Israyeli, uJehoshafathi, nenkosi yakwa-Edomi behlela kuye.
Kepha u-Elisha wathi enkosini yakwa-Israyeli: “Nginandabani nawe mina? Hamba uye kubaphrofethi bakayihlo nakubaphrofethi bakanyoko.” Kepha inkosi yakwa-Israyeli yathi kuye: “Hhayi, ngokuba uSimakade uqoqe amakhosi amathathu ukuba awanikele esandleni sabakwaMowabi.”
U-Elisha wayesethi: “Ngifunga ngiyagomela phambi kukaSimakade Wamabandla engima phambi kwakhe, ukuba bekungengenxa yokuba ngihlonipha uJehoshafathi, inkosi yakwaJuda, bengingeke ngakubheka nokukubheka.
Manje-ke ngibizeleni umshayi wogubhu eze lapha.” Kuthe lapho eselubetha nje ugubhu, isandla sikaSimakade saba kuye.
Wayesethi: “Usho kanje uSimakade, uthi: ‘Lo mfula wenze ube migodigodi.’
Ngokuba uSimakade uthi: ‘Aniyukubona moya, aniyukubona mvula, kodwa lo mfula uyakugcwala amanzi; niyakuphuza nina, nemfuyo yenu.’
“Lokho kulula phambi kukaSimakade, uyakubanikela esandleni senu abakwaMowabi.
Niyakuyibhubhisa yonke imizi ebiyelweyo, yonke imizi yekhethelo. Niyakugawula yonke imithi emihle, nivimbe yonke imithombo yamanzi, zonke iziqinti zomhlaba wakhona nizenze incithakalo ngamatshe.”
Kwathi ekuseni ngesikhathi sokunikela umnikelo wempuphu, kwafika amanzi evela ngakwa-Edomi, izwe lonke lagcwala amanzi.
Bonke abakwaMowabi bezwa ukuthi amakhosi enyukile ukuzokulwa nabo, kwase kubizwa bonke ababekwazi ukulwa, kusukela kwabancane kuya kwabadala, base bema belungela ukulwa emngceleni.
Kwathi bevuka ekuseni, ilanga lase liphumile, likhanya phezu kwamanzi, kwathi lapho abakwaMowabi bebona amanzi ayeqondene nabo ebomvu njengegazi,
bathi: “Impela, leli yigazi. Lawa makhosi alwe odwa abulalana, yileyo umakhelwane wayo; Mowabi, phuthumani impango!”
Kwathi lapho sebefikile enkanjini yakwa-Israyeli, abakwa-Israyeli basuka bashaya abakwaMowabi, babaleka abakwaMowabi. U-Israyeli wangena ezweni labo, wababhubhisa abakwaMowabi.
Babhubhisa imizi, iziqinti zomhlaba zonke ezinhle, kwaba yilowo nalowo wajikijela itshe lakhe, zaze zagcwala. Bavimba yonke imithombo yamanzi, bagawula yonke imithi emihle, kwaze kwasala kuphela amatshe aseKhiri Hareshethi. Kepha ababephethe izindwayimane balizungeza, balibhubhisa.
Yathi ukuba ibone inkosi yakwaMowabi ukuthi impi inamandla amakhulu kuneyayo, yaqoqa amabutho angama-700 ahosha inkemba, azama ukujikijela ngayo inkosi yakwa-Edomi, kodwa ehluleka.
Inkosi yathatha izibulo layo okuyilona elalizobusa esikhundleni sayo, yanikela ngalo ukuba libe ngumnikelo wokushiswa phezu kogange. Leso senzo sabacunula kakhulu abakwa-Israyeli, basuka lapho babuyela ezweni lakubo.
Owesifazane othile owayegane omunye wamadodana abaphrofethi, waya ku-Elisha wakhala, wathi: “Inceku yakho, indoda yami, ifile, uyazi ukuthi inceku yakho yayimesaba uSimakade. Kufike umtshelekisi, ufuna ukuzithathela abafana bami ababili ukuze babe yizigqila.”
U-Elisha wathi kuye: “Pho ngikwenzeleni mina? Ngitshele, unani endlini?” Wathi: “Incekukazi yakho ayinalutho endlini ngaphandle komfuma wamafutha.”
Wayesethi: “Hamba uyotsheleka izitsha ezingenalutho kubo bonke omakhelwane bakho, zibe ziningi.
Ngena, uzivalele wena namadodana akho, uthele kuzo zonke lezo zitsha, uzibeke eceleni esezigcwele.”
Wasuka kuye, wazivalela yena namadodana akhe; wona aletha kuye, yena wathela.
Kwathi lapho izitsha sezigcwele, wathi endodaneni yakhe: “Sondeza kimi nesinye isitsha.” Kepha yathi kuye: “Akusekho sitsha.” Amafutha anqamuka-ke.
Weza, wabikela umuntu kaNkulunkulu. Yena wathi: “Hamba uthengise ngamafutha, ukhokhe isikweletu sakho, wena namadodana akho niphile ngaseleyo.”
Kwathi ngelinye ilanga u-Elisha wadlula eya eShunemi lapho kwakukhona owesifazane ocebileyo. Owesifazane wamncenga ukuba adle isinkwa. Kwakuthi njalo uma edlula aphambukele khona ukuba adle.
Wathi endodeni yakhe: “Uyabona-ke, manje sengiyazi ukuthi ungumuntu ongcwele kaNkulunkulu, lo odlula lapha kithi njalo.
Ake sixhume odongeni ikamelo eliphezulu, sibeke khona umbhede, itafula, isihlalo, nothi lwesibani; kuyakuthi lapho efika kithi, aphambukele khona.”
Kwathi ngelinye ilanga wafika lapho, waphambukela ekamelweni eliphezulu, walala khona.
Wathi kuGehazi, inceku yakhe: “Biza lo mShunemikazi,” wambiza, wema phambi kwakhe.
Wathi kuye: “Ake usho kuye uthi: ‘Bheka, usinakekele ngakho konke lokhu kunakekela; yini ongenzelwa yona na? Uthanda ukukhulunyelwa enkosini noma kumkhuzi wempi na?’ ” Wathi: “Ngihlezi phakathi kwabantu bakithi.”
Wayesethi: “Yini angenzelwa yona?” UGehazi wathi: “Impela akanandodana, nendoda yakhe isindala.”
Wayesethi: “Mbize.” Wambiza; wema ngasemnyango.
Wathi: “Ngalesi sikhathi ngonyaka ozayo, uyakugona indodana.” Wathi: “Hhayi, nkosi yami, muntu kaNkulunkulu, ungaqambi amanga encekukazini yakho.”
Kepha owesifazane wakhulelwa, wazala indodana ngaleso sikhathi ngonyaka olandelayo njengoba u-Elisha ayeshilo kuye.
Kwathi umfana esekhulile, waphuma ngelinye ilanga, waya kuyise kubavuni.
Wathi kuyise: “Ngafa yikhanda! Ngafa yikhanda!” Wayesethi encekwini yakhe: “Myise kunina.”
Yamthatha, yamyisa kunina; wahlala emathangeni akhe kwaze kwaba semini, wafa.
Wakhuphuka, wambeka embhedeni womuntu kaNkulunkulu, wamvalela, wayesephuma.
Wabiza indoda yakhe, wathi: “Ake ungithumele enye yezinceku nenye yezimbongolo ukuba ngiphuthume kumuntu kaNkulunkulu, bese ngibuya.”
Kepha wathi: “Uyelani kuye namuhla na? Akusilo usuku lokwethwasa kwenyanga, akusilo isabatha.” Wathi: “Cha, kulungile.”
Wayesebophela imbongolo, wathi encekwini yakhe: “Yihole, uhambe njalo, ungami uma ngingakasho.”
Wayesehamba-ke, wafika kumuntu kaNkulunkulu entabeni iKharmeli. Kwathi lapho umuntu kaNkulunkulu embona phambi kwakhe, wathi kuGehazi, inceku yakhe: “Bheka, nanguya umShunemikazi;
ake ugijime, umhlangabeze, uthi kuye: ‘Usahleli kahle yini na? Indoda yakho isahleli kahle? Umntanakho usahleli kahle?’ ” Wathi: “Sisahleli kahle.”
Wafika kumuntu kaNkulunkulu entabeni, wabamba izinyawo zakhe. UGehazi wasondela ukuba amxoshe, kodwa umuntu kaNkulunkulu wathi: “Myeke, ngokuba inhliziyo yakhe inomunyu; uSimakade ungifihlele lokho, akangitshelanga.”
Wayesethi: “Ngake ngacela yini indodana enkosini yami na? Angishongo yini ukuthi: ‘Ungangikhohlisi,’ na?”
Wathi kuGehazi: “Bopha ukhalo lwakho, uthathe udondolo lwami ngesandla sakho, uhambe; uma uhlangana nomuntu, ungambingeleli; uma umuntu ekubingelela, ungamphenduli, uyobeka udondolo lwami ebusweni bomntwana.”
Unina womntwana wathi: “Ngifunga ngiyagomela phambi kukaSimakade naphambi kwakho, angiyukukushiya.” Wayesesuka wamlandela.
UGehazi wabendulela, wabeka udondolo ebusweni bomntwana; akubanga bikho lizwi nakuphila. Ngalokho-ke wabuya wayomhlangabeza, wambikela wathi: “Umntwana akavukanga.”
U-Elisha esefikile endlini, bheka, umntwana wayefile elaliswe embhedeni wakhe.
Wangena, wabavalela bobabili isicabha, wakhuleka kuSimakade.
Wakhuphuka, walala phezu komntwana, wabeka umlomo wakhe phezu komlomo wakhe, namehlo akhe phezu kwamehlo akhe, nezandla zakhe phezu kwezandla zakhe; lapho esekhothama phezu kwakhe, inyama yomntwana yaqala ukufudumala.
Wayesebuya, wahamba ehla enyuka khona endlini; wakhuphuka, wakhothama phezu kwakhe; umntwana wathimula kwaze kwaba kasikhombisa; wayesevula amehlo akhe.
Wabiza uGehazi, wathi: “Mbize lo mShunemikazi.” Wambiza. Kuthe esefikile kuye, wathi: “Thatha indodana yakho.”
Weza kuye, wawa ngasezinyaweni zakhe, wakhothama phansi; wayithatha indodana yakhe, waphuma.
U-Elisha wabuyela eGiligali; kwakukhona indlala kulelo lizwe. Amadodana abaphrofethi ayehleli phambi kwakhe. Wathi encekwini yakhe: “Bheka ibhodwe elikhulu, uphekele amadodana abaphrofethi ukudla.”
Kwaphuma omunye waya endle eyokukha imifino, wathola intandela yasendle, wabutha kuyo izintangazane, wazigcwalisa ingubo yakhe; wafika, waziklabelela ebhodweni lokudla, ngokuba babengazazi.
Base bephakela abantu ukuze badle. Kwathi besakudla lokho kudla, bakhala bathi: “We muntu kaNkulunkulu, kukhona ukufa ebhodweni.” Babengasenakukudla.
Kepha wathi: “Lethani impuphu.” Wayithela ebhodweni, wathi: “Phakela abantu ukuba badle.” Kwakungasekho okubi ebhodweni.
Kwafika umuntu waseBhali Shalisha elethele umuntu kaNkulunkulu ukudla kolibo lokuqala, izinkwa zebhali ezingama-20 nezikhwebu ezintsha zamabele emgodleni wakhe. Wathi: “Banike abantu ukuba badle.”
Kepha isikhonzi sakhe sathi: “Uthini? Ngibeke lokhu phambi kwabantu abayikhulu na?” Wathi: “Banike abantu ukuba badle, ngokuba usho kanje uSimakade, uthi: ‘Bayakudla, kusale.’ ”
Sase sikubeka phambi kwabo; badla, kwasala njengokusho kukaSimakade.
UNahamani, umkhuzi wempi yenkosi yase-Aramu, wayengumuntu omkhulu phambi kwenkosi yakhe, otusekayo, ngokuba uSimakade wayenze ukuba i-Aramu linqobe ngaye, futhi wayeyiqhawe elinamandla, kodwa wayenochoko.
Ama-Aramu ayephume ngamaviyo ukuyophanga, abuya kwa-Israyeli nentombazana encane eyayiyincekukazi yomkaNahamani.
Yathi enkosikazini yayo: “Sengathi inkosi yami ingaya phambi komphrofethi oseSamariya, khona eyakuyiphilisa ochokweni lwayo.”
Yangena, yatshela inkosi yayo yathi: “Intombazana yakwa-Israyeli yasho ukuthi nokuthi.”
Inkosi yase-Aramu yayisithi: “Hamba uye khona; ngizakuthumela incwadi enkosini yakwa-Israyeli.” Wahamba, wathatha amathalenta esiliva alishumi nezinhlamvu zegolide eziyizi-6 000, nezingubo ezilishumi zokuphendulela.
Waletha incwadi enkosini yakwa-Israyeli, ethi: “Manje, lapho le ncwadi ifika kuwe, yazi ukuthi ngithumele kuwe uNahamani, inceku yami, ukuba umphilise ochokweni lwakhe.”
Kwathi inkosi yakwa-Israyeli isiyifundile incwadi, yaklebhula izingubo zayo, yathi: “Mina nginguNkulunkulu yini ukuba ngibulale, ngiphilise, ukuze lo athumele kimi umuntu ukuba ngimphilise ochokweni lwakhe na? Ake niqonde, nibone ukuthi ufuna ithuba lokulwa nami.”
Kwathi ukuba u-Elisha, umuntu kaNkulunkulu, ezwe ukuthi inkosi yakwa-Israyeli iziklebhulile izingubo zayo, wathumela enkosini, wathi: “Uziklebhuleleni izingubo zakho na? Makeze kimi, yikhona ezokwazi ukuthi kukhona umphrofethi kwa-Israyeli.”
Wayesefika uNahamani namahhashi akhe nezinqola zakhe, wema ngasemnyango wendlu ka-Elisha.
U-Elisha wathumela isithunywa kuye, wathi: “Hamba ugeze kasikhombisa eJordani; inyama yakho izobuyela esimweni sayo, uhlambuluke.”
Kepha uNahamani wathukuthela, wahamba, wathi: “Mina bengithi impela uzophuma eze kimi, ame abize igama likaSimakade, uNkulunkulu wakhe, aphunge ngesandla sakhe phezu kwaleyo ndawo, aphulukise onochoko.
I-Abhana neFariphari, imifula eseDamaseku, ayingcono yini kunawo wonke amanzi akwa-Israyeli na? Bengingegeze yini kuyo, ngihlambuluke na?” Wayesephenduka, wahamba ethukuthele.
Kepha izinceku zasondela, zakhuluma kuye, zathi: “Baba, ukuba umphrofethi ubekhulume kuwe into enkulu, ngabe ungayenzanga yini na? Kakhulu kangakanani-ke, uma ethi kuwe: ‘Geza, uhlambuluke’ na?”
Wayesehla, wazicwilisa kasikhombisa eJordani njengokusho komuntu kaNkulunkulu; inyama yakhe yabuya yaba njengenyama yomntwana omncane, wahlambuluka.
Wayesebuyela kumuntu kaNkulunkulu, yena nabantu bakhe bonke, weza, wema phambi kwakhe, wathi: “Uyabona-ke, sengiyazi ukuthi akekho uNkulunkulu emhlabeni wonke, kodwa kwa-Israyeli kuphela, ngakho-ke ake wamukele isipho encekwini yakho.”
Kepha, wathi: “Ngifunga ngiyagomela phambi kukaSimakade, angiyukwamukela lutho.” Wamncenga ukuba asamukele, kodwa wenqaba.
Wayesethi uNahamani: “Uma kungenjalo, inceku yakho mayinikwe umthwalo weminyuzi emibili womhlabathi, ngokuba inceku yakho ayisayukunikela ngomnikelo wokushiswa nomhlatshelo kwabanye onkulunkulu, kodwa kuSimakade kuphela.
Kulokhu uSimakade makayithethelele inceku yakho lapho inkosi yami ingena endlini kaRimoni ukuyokhuleka khona, yencike esandleni sami, nami ngiguqe endlini kaRimoni; lapho ngiguqa endlini kaRimoni, uSimakade makayithethelele inceku yakho kulokho.”
Wathi kuye: “Hamba ngokuthula.” Wahamba, wasuka kuye ibangana.
Kepha uGehazi, inceku ka-Elisha, umuntu kaNkulunkulu, wathi: “Bheka, inkosi yami imyekile uNahamani, lo wase-Aramu, ngokungemukeli ezandleni zakhe akulethayo; ngifunga ngiyagomela kuSimakade, ngiyakugijima, ngimlandele, ngithathe noma yini kuye.”
UGehazi wamlandela uNahamani. UNahamani wambona umuntu owayegijima emva kwakhe, wehlika enqoleni wamhlangabeza, wathi: “Nisahlezi kahle yini na?”
Wathi: “Sisahlezi kahle. Inkosi yami ingithumile, ukuba ngithi: ‘Manje kufike kimi izinsizwa ezimbili zivela kwelezintaba kwa-Efrayimi, emadodaneni abaphrofethi; ake uzinike ithalenta lesiliva nezingubo ezimbili zokuphendulela.’ ”
UNahamani wathi: “Vuma ukwamukela amathalenta amabili.” Wamncenga, wabopha amathalenta amabili esiliva emigodleni emibili nezingubo ezimbili zokuphendulela, wakunika izinceku zakhe ezimbili; zakuthwala phambi kwakhe.
Esefikile egqumeni wakuthatha esandleni sazo, wakubeka endlini, wabavumela abantu ukuba basuke, bahambe.
Kepha yena wangena, wema phambi kwenkosi yakhe. U-Elisha wathi kuye: “Uvelaphi, Gehazi?” Wathi: “Inceku yakho ayiyanga ndawo.”
Wayesethi: “Inhliziyo yami ibingenawe yini lapho lowo muntu ephenduka enqoleni yakhe ukukuhlangabeza na? Yiso yini isikhathi sokwamukela izingubo, iminqumo, izivini, izimvu, izinkomo, izinceku, nezincekukazi na?
Uchoko lukaNahamani luyakunamathela kuwe nasozalweni lwakho kuze kube phakade.” Wayesephuma phambi kwakhe enochoko, esemhlophe njengeqhwa.
Amadodana abaphrofethi athi ku-Elisha: “Bheka phambi kwakho indawo esihlala kuyo; sesiminyene.
Masihambe siye eJordani, sithathe khona, kube yilowo nalowo, umshayo ube munye, sizakhele lapho indawo esizohlala kuyo.” Wathi: “Hambani.”
Kepha omunye wathi: “Vuma ukuhamba nezinceku zakho.” Wathi: “Ngiyakuhamba.”
Wayesehamba nabo. Bafika eJordani bagawula imithi.
Kwathi lapho omunye esegawula umshayo, insimbi yawela emanzini; wakhala wathi: “Maye, nkosi yami! Ibitshelekiwe!”
Umuntu kaNkulunkulu wathi: “Iwele kuphi na?” Wamkhombisa indawo. Wayesenquma uthi, waluphonsa lapho, insimbi yantanta.
Wayesethi: “Yikhuphule.” Welula isandla sakhe, wayithatha.
Inkosi yase-Aramu yayisalokhu ilwa no-Israyeli; yelulekana nezinceku zayo, yathi: “Ngizakukanisa ndaweni thizeni.”
Umuntu kaNkulunkulu wathumela enkosini yakwa-Israyeli, wathi: “Qaphela ukuba ungadluli kuleyo ndawo, ngoba abase-Aramu behlele khona.”
Inkosi yakwa-Israyeli yayisithuma umuntu kaNkulunkulu kuleyo ndawo ayishoyo, wayixwayisa, yaqaphela kungekanye, kungekabili.
Inhliziyo yenkosi yase-Aramu yagcwala intukuthelo ngalolu daba, yabiza izinceku zayo, yathi kuzo: “Ningangitshela yini ukuthi ngobani phakathi kwethu abangasenkosini yakwa-Israyeli na?”
Enye yezinceku zayo yathi: “Hhayi, nkosi yami, nkosi, kodwa u-Elisha, umphrofethi wakwa-Israyeli, oyitshelayo inkosi yakwa-Israyeli amazwi owakhuluma ekamelweni lakho lokulala.”
Yayisithi: “Hamba ubone ukuthi ukuphi ukuze ngithumele ngimbambe.” Yatshelwa ukuthi: “Uyabona-ke, useDothani.”
Yathumela khona amahhashi, izinqola, nempi enkulu; bafika ebusuku, bazungeza umuzi nxazonke.
Inceku yomuntu kaNkulunkulu yavuka ekuseni, yaphuma; bheka, impi enamahhashi nezinqola yayiwuzungezile umuzi. Inceku yakhe yathi kuye: “Maye, nkosi! Siyakwenzenjani na?”
Wathi: “Ungesabi, ngokuba abanathi baningi kunabanabo.”
U-Elisha wakhuleka, wathi: “Simakade, ake uvule amehlo ayo ukuba ibone.” USimakade wawavula-ke amehlo aleyo nceku, yabona; bheka, intaba yayigcwele amahhashi nezinqola zomlilo zika-Elisha nxazonke.
Behlela kuye, u-Elisha wakhuleka kuSimakade, wathi: “Mawusishaye ngobumpumputhe lesi sizwe.” Wasishaya ngobumpumputhe njengokwezwi lika-Elisha.
Wayesethi u-Elisha kubo: “Le akusiyo indlela, nalo akusiwona umuzi; ngilandeleni, nginiyise kumuntu enimfunayo.” Wabayisa eSamariya.
Kwathi ukuba bafike eSamariya, u-Elisha wathi: “Simakade, vula amehlo alaba bantu ukuba babone.” USimakade wawavula amehlo abo, babona; base bephakathi eSamariya.
Inkosi yakwa-Israyeli isibabonile, yathi ku-Elisha: “Baba, ngibabulale yini? Ngibabulale na?”
Kepha wathi: “Ungababulali; ngabe ubathumbe ngenkemba yakho nangomnsalo wakho laba ofuna ukubabulala na? Beka isinkwa namanzi phambi kwabo ukuba badle, baphuze, babuyele enkosini yabo.”
Yayisibalungisela idili, idili elikhulu; badla, baphuza; yabavumela ukuba bahambe baye enkosini yabo. Amaviyo okuphanga ama-Aramu awaphindanga angena kwa-Israyeli.
Kwathi emveni kwalokho uBheni Hadadi, inkosi yase-Aramu, waqoqa yonke impi yakhe, wenyuka, wavimbezela iSamariya.
Kwaba khona indlala enkulu eSamariya. Balivimbezela, ikhanda lembongolo laze lathengiswa ngezinhlamvu zesiliva ezingama-80, nokwesine kwesigaxa somswani wejuba ngezinhlamvu zesiliva eziyisihlanu.
Kwathi lapho inkosi yakwa-Israyeli izihambela nje phezu kogange, kwamemeza owesifazane kuyo, wathi: “Siza, nkosi yami, nkosi.”
Kepha yathi: “Uma uSimakade engakusizi, mina ngingalutholaphi usizo na? Esibuyeni noma esikhamweni sewayini?”
Yayisithi inkosi kuye: “Siyini isikhalo sakho na?” Wathi: “Lo wesifazane wathi kimi: ‘Sinike indodana yakho ukuba siyidle namuhla, eyami indodana siyakuyidla kusasa.’
“Ngakho-ke sayipheka indodana yami, sayidla; ngase ngithi kuye ngosuku olulandelayo: ‘Sinike indodana yakho ukuba siyidle;’ wayeyifihlile indodana yakhe.”
Kwathi inkosi isizwile amazwi alowo wesifazane, yaklebhula izingubo zayo isahamba phezu kogange; abantu bayibona; yayembethe indwangu eyisaka ngaphansi kwezembatho emzimbeni wayo.
Yathi: “UNkulunkulu makenze kanjalo, enezele futhi, uma ikhanda lika-Elisha, indodana kaShafathi, liyakube lisekuye namuhla.”
Yayisithumela isithunywa phambi kwayo; u-Elisha wayehleli endlini yakhe, namalunga ehleli naye; kepha singakafiki kuye isithunywa, wathi emalungeni: “Niyabona yini ukuthi le ndodana yombulali ithumele ukuze kunqunywe ikhanda lami na? Bhekani, kuyokuthi lapho sifika isithunywa nivale umnyango nisicindezele ngawo. Kanti izigi zenkosi yaso azikho yini emva kwaso na?”
Esakhuluma nawo, inkosi yehlela kuye, yathi: “Uyabona-ke, lobu bubi buvela kuSimakade. Pho kungani kusamele ngimlinde uSimakade na?”
Wayesethi u-Elisha: “Zwanini izwi likaSimakade; usho kanje uSimakade, uthi: ‘Kusasa ngalesi sikhathi, iseya lempuphu ecolekileyo liyakuthengiswa ngeshekeli, namaseya amabili ebhali, ngeshekeli, esangweni eSamariya.’ ”
Induna yenkosi eyayiyisethenjwa yamphendula umuntu kaNkulunkulu, yathi: “Uma uSimakade enza amafasitela ezulwini, lokhu kungenzeka kanjani na?” Wathi: “Uyakukubona ngamehlo akho, kodwa ungakudli.”
Kwakukhona esikhaleni sesango abantu abane abanochoko; bathi omunye komunye: “Sihlaleleni lapha sizoze sife na?
Uma sithi: ‘Siyakungena emzini,’ kunendlala emzini, siyakufela khona; uma sihlala lapha, siyakufa futhi. Ngalokho masihambe siye enkanjini yabase-Aramu; uma besiyeka, siyakuphila; uma besibulala, siyakufa.”
Basuka kuhwalala, baya enkanjini yabase-Aramu; sebefike emaphethelweni enkambu yabase-Aramu, bafica kungekho muntu lapho.
INkosi yenza ukuba impi yabase-Aramu izwe umsindo wezinqola, umsindo wamahhashi, nomsindo wempi enkulu baze bakhuluma bodwa, bathi: “Uyabona, inkosi yakwa-Israyeli iqashe amakhosi amaHithi namakhosi aseGibhithe ukuba eze kithi.”
Basuka babaleka kuhwalala, bashiya amathende abo, amahhashi abo, izimbongolo zabo, nenkambu injengalokhu injalo, babaleka ukuze basinde.
Kwathi labo abanochoko sebefikile emaphethelweni enkambu, bangena kwelinye ithende, badla, baphuza, bathatha lapho isiliva, igolide, nezingubo, bayokufihla; babuya, bangena kwelinye ithende, bathatha nalapho, base beyokuthukusa.
Base bethi omunye komunye: “Asenzi kahle. Lolu lusuku lwanamuhla wusuku lwezindaba ezinhle, kodwa sithule nje silinde ukuba kuze kube sekuseni, siyakuthola isijeziso ngalokho, masihambe, sitshele indlu yenkosi.”
Bahamba, babiza abalindisango bomuzi, babatshela, bathi: “Sihambile saya enkanjini yabase-Aramu; bekukhala ibhungane, kungekho muntu, kungekho ngisho umsindo wodwa lo, kuphela amahhashi, nezimbongolo okuboshiweyo, namathende enjengalokhu enjalo.”
Abalindisango bamemeza, babikela indlu yenkosi ngaphakathi.
Inkosi yavuka ebusuku, yathi ezincekwini zayo: “Ake nginitshele ngalokhu ukuthi abase-Aramu basilungisele lugibe luni. Bayazi ukuthi silambile, ngakho-ke baphumile enkanjini ukuba bacashe, bethi: ‘Bazophuma emzini, sibabambe, bese singena kuwona umuzi.’ ”
Enye yezinceku zayo yaphendula yathi: “Makuthathwe amahhashi ayisihlanu kwasele lapho; isimo sawo siyafana nesixuku sonke sabakwa-Israyeli esisele lapha, nanjengesixuku sonke sakwa-Israyeli esesiphelile; masithumele ukuze sibone.”
Bathatha izinqola ezimbili namahhashi; inkosi yathumela emva kwempi yabase-Aramu, yathi: “Hambani niyohlola.”
Bawalandela baze bayofika eJordani; bheka, yonke indlela yayigcwele izingubo nezimpahla ama-Aramu ayezilahlile lapho ebaleka. Izithunywa zabuya, zayitshela inkosi.
Abantu baphuma, baphanga inkambu yabase-Aramu. Iseya lempuphu ecolekileyo lathengiswa ngeshekeli, namaseya amabili ebhali, ngeshekeli, njengokusho kukaSimakade.
Inkosi yabeka esangweni induna eyisethenjwa sayo. Abantu bayinyathela esangweni, yafa njengokusho komuntu kaNkulunkulu owayekhulume ngesikhathi inkosi yehlile yeza kuye.
Kwathi lapho umuntu kaNkulunkulu ekhuluma enkosini, wathi: “Kuyakuba ngamaseya amabili ebhali, ngeshekeli, neseya lempuphu ecolekileyo ngeshekeli, ngalesi sikhathi kusasa esangweni eSamariya.”
Induna yamphendula umuntu kaNkulunkulu, yathi: “Uyabona, noma ngabe uSimakade ubengenza amafasitela ezulwini, le nto ingenzeka njengaleli lizwi na?” Wathi: “Wena uyakukubona ngamehlo akho, kodwa awuyukukudla.”
Kwenzeka kanjalo kuyo: abantu bayinyathela esangweni, yafa.
U-Elisha wayekhulume kowesifazane ayevuse indodana yakhe yaphila, wathi: “Suka uhambe nabendlu yakini, uyohlala lapho ungahlala khona, ngokuba uSimakade ubikezele ukuthi kuzokuba nendlala ezohlasela izwe iminyaka eyisikhombisa.”
Owesifazane wasuka, wenza njengezwi lomuntu kaNkulunkulu, wahamba nabendlu yakhe, wayogogobala ezweni lamaFilisti iminyaka eyisikhombisa.
Kwathi isiphelile iminyaka eyisikhombisa, owesifazane wabuya ezweni lamaFilisti. Wahamba wayozikhalela, ecela usizo enkosini ngendlu yakhe nangezwe lakhe.
Inkosi yakhuluma noGehazi, inceku yomuntu kaNkulunkulu, yathi: “Ake ungilandise ngazo zonke izinto ezinkulu azenzileyo u-Elisha.”
Esayilandisa inkosi ukuthi wavusa ofileyo, owesifazane, ondodana yakhe ayeyivusile, wakhala ecela usizo enkosini ngendlu yakhe nangezwe lakhe. Wayesethi uGehazi: “Nkosi yami, nkosi, nguye lo wesifazane; yiyo le indodana yakhe u-Elisha ayivusayo yaphila.”
Inkosi yambuza owesifazane, wayilandisa. Inkosi yayisiqoka induna, yathi kuyo: “Buyisela konke okwakungokwalo wesifazane, zonke izithelo zensimu kusukela ngosuku alishiya ngalo leli lizwe kuze kube namuhla.”
U-Elisha waya eDamaseku ngesikhathi uBheni Hadadi, inkosi yase-Aramu idunguzela; yabikelwa ukuthi: “Umuntu kaNkulunkulu ufikile lapha.”
Inkosi yayisithi kuHazayeli: “Thatha isipho, uhambe uyomhlangabeza umuntu kaNkulunkulu. Ubuze kuSimakade uthi: ‘Ngizosinda yini kulesi sifo na?’ ”
UHazayeli wayesehamba wayomhlangabeza, wathatha izipho nazo zonke izinto ezinhle eDamaseku; imithwalo yamakameli angama-40. Wafika wema phambi kuka-Elisha, wathi kuye: “Indodana yakho uBheni Hadadi, inkosi yase-Aramu, ingithume kuwe, yathi: ‘Ngabe ngizosinda yini kulesi sifo na?’ ”
U-Elisha, wathi kuye: “Hamba uthi kuye: ‘Uyakusinda nokusinda, kodwa uSimakade ungibonisile ukuthi uyakufa nokufa.’ ”
Wamgqolozela uHazayeli, waze waba namahloni. Umuntu kaNkulunkulu wayeseqhumuka wakhala.
UHazayeli wathi: “Ngabe inkosi yami ikhalelani na?” Yathi: “Kungenxa yokuthi ngiyakwazi ozokwenza kubantu bakwa-Israyeli; uyakubalimaza, uthungele ngomlilo izinqaba zabo, ubulale ngenkemba izinsizwa zabo, uphahlaze izingane zabo, uqhaqhe abesifazane bakhona abazethwele.”
UHazayeli wathi: “Kodwa ibiyini inceku yakho, iyinja nje; ingakwenza kanjani lokhu okukhulu kangaka na?” Wathi u-Elisha: “USimakade ungibonisile ukuthi uzokuba yinkosi e-Aramu.”
Wayesesuka ku-Elisha, wabuyela enkosini yakhe, yathi kuye: “Utheni kuwe u-Elisha na?” Wathi: “Uthe, wena uyakusinda nokusinda.”
Kwathi ngakusasa wathatha indwangu yokwemboza, wayicwilisa emanzini, wamboza ubuso benkosi yaze yafa. UHazayeli waba yinkosi esikhundleni sayo.
Ngonyaka wesihlanu wokubusa kukaJoramu, indodana ka-Ahabi, inkosi yakwa-Israyeli, uJehoramu, indodana kaJehoshafathi, waba yinkosi kwaJuda.
Wayeneminyaka engama-32 ngesikhathi eqala ukubusa, wabusa iminyaka eyisishiyagalombili eJerusalema.
Wahamba ngendlela yamakhosi akwa-Israyeli, njengalokhu kwenza indlu ka-Ahabi, kwazise wayeganwe yindodakazi yakhe u-Ahabi. Wenza okubi emehlweni kaSimakade.
USimakade wayengathandi ukumbhubhisa uJuda ngenxa kaDavide, inceku yakhe, nanjengokuba ayeshilo kuye ukuthi uyakumnika yena nezizukulwane zakhe isibani izinsuku zonke.
Emihleni yakhe abakwa-Edomi bahlubuka phansi kwesandla sakwaJuda, bazibekela inkosi.
UJoramu wawelela eSayiri nazo zonke izinqola zakhe. Waphuma ebusuku, wabhubhisa abakwa-Edomi ababemzungeze nhlangothi zonke, nezinduna zezinqola. Kepha abantu babalekela emathendeni abo.
Abakwa-Edomi base behlubuka-ke phansi kwesandla sakwaJuda kuze kube namuhla. Kwahlubuka futhi neLibhina ngaso leso sikhathi.
Ezinye izindaba zikaJoramu, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
UJoramu wayeselaliswa kokhokho bakhe, wembelwa koyisemkhulu emzini kaDavide; u-Ahaziya, indodana yakhe, waba yinkosi esikhundleni sakhe.
Ngonyaka we-12 wokubusa kukaJoramu, indodana ka-Ahabi, inkosi yakwa-Israyeli, u-Ahaziya, indodana kaJehoramu, waba yinkosi kwaJuda.
Wayeneminyaka engama-22 ngesikhathi eba yinkosi, wabusa unyaka eJerusalema. Igama likanina kwakungu-Athaliya, indodakazi ka-Omri, inkosi yakwa-Israyeli.
Wahamba ngendlela yendlu ka-Ahabi, wenza okubi emehlweni kaSimakade njengendlu ka-Ahabi; wayengumkhwenyana wendlu ka-Ahabi.
Wahamba noJoramu, indodana ka-Ahabi, bayokulwa noHazayeli, inkosi yase-Aramu, eRamothi Gileyadi. Abase-Aramu bamlimaza uJoramu.
Inkosi uJoramu yabuyela eJizreyeli ukuze kuphole amanxeba eyayiwathole empini yaseRama nabase-Aramu, ngesikhathi belwa noHazayeli, inkosi yabo. U-Ahaziya, indodana kaJehoramu, inkosi yakwaJuda, wehla ukuyobona uJoramu, indodana ka-Ahabi, eJizreyeli, ngokuba wayelimele.
U-Elisha, umphrofethi, wabiza enye yamadodana abaphrofethi, wathi kuyo: “Bhinca ingubo yakho okhalo, uthathe lo mfuma wamafutha ngesandla, uye eRamothi Gileyadi.
Uyothi ungafika khona, ufune uJehu, indodana kaJehoshafathi kaNimishi. Uyongena, umsukumise phakathi kwabafowabo, umyise ekamelweni elingaphakathi.
Uyothatha umfuma wamafutha, uwathele ekhanda lakhe, uthi kuye: ‘Usho kanje uSimakade, uthi: “Ngiyakugcoba ukuba ube yinkosi kwa-Israyeli.” ’ “Bese uvula umnyango, qede ubaleke, ungalibali.”
Leyo nsizwa eyayingumphrofethi, yahamba yalibangisa eRamothi Gileyadi.
Yafika khona yafica abakhuzi bempi behleli, yayisithi: “Ake silumane indlebe nawe, nduna.” UJehu wathi: “Usho bani phakathi kwethu na?” Yathi: “Ngisho kuwe, nduna.”
Wasukuma, wangena endlini, yayisimthela ngamafutha ekhanda, yathi kuye: “Usho kanje uSimakade uNkulunkulu ka-Israyeli, uthi: ‘Ngiyakugcoba ukuba ube yinkosi yabantu bakaSimakade, u-Israyeli.
Uyakuyibhubhisa indlu ka-Ahabi, inkosi yakho, ukuze ngiphindiselele igazi lezinceku zami, abaphrofethi, negazi lezinceku zonke zikaSimakade elachithwa yisandla sikaJezebheli.
Yonke indlu ka-Ahabi iyakubhujiswa; ngiyoqothula wonke owesilisa ka-Ahabi kusukela komncane kuya komdala.
Ngiyoyenza indlu ka-Ahabi ifane nendlu kaJerobhowamu, indodana kaNebhathi, nanjengendlu kaBhahasha, indodana ka-Ahiya.
Izinja ziyakumudla uJezebheli esifundeni eJizreyeli. Akukho muntu oyakummbela.’ ” Yayisivula umnyango, yabaleka.
UJehu waphumela phandle ezincekwini zenkosi yakhe. Enye yazo, yathi kuye: “Ngabe konke kusalungile yini na? Beluzofunani lolu hlanya na?” Wathi kuzo: “Niyamazi nina lowo muntu nakushilo.”
Kepha, zathi: “Ngamanga lawo; ake usitshele.” Wayesethi kuzo: “Usho lokhu nalokhu kimi, ethi: ‘Usho kanje uSimakade uthi: ngiyakugcoba ukuba ube yinkosi kwa-Israyeli.’ ”
Ngokushesha, zathatha kwaba yileyo naleyo ingubo yayo, zazibeka phansi kwakhe esikhwelweni, zase zibetha icilongo, zathi: “UJehu uyinkosi.”
UJehu, indodana kaJehofathathi, wamakhela uzungu uJoramu. UJoramu wayesalokhu elinde eRamothi Gileyadi kanye nawo wonke u-Israyeli, ngenxa kaHazayeli, inkosi yase-Aramu.
Inkosi uJoramu yayibuyile eJizreyeli ukuze yelashwe amanxeba ayo eyayiwalinyazwe ngama-Aramu ngesikhathi belwa noHazayeli inkosi yakhona. UJehu wathi: “Uma lokhu kuvela kini, makungabaleki muntu aphume emzini, ukuze ayobika eJizreyeli.”
UJehu wagibela enqoleni, walibangisa eJizreyeli, ngoba uJoramu wayelele lapho. U-Ahaziya, inkosi yakwaJuda, wayehlele khona ukuyobona uJoramu.
Umlindi owayemi embhoshongweni eJizreyeli wabona iviyo likaJehu liza, wayesethi: “Ngibona iviyo liza.” UJoramu wathi: “Thumela ogibele ihhashi abahlangabeze, ababuze, athi: ‘Nize ngokuthula yini na?’ ”
Owayegibele ihhashi wabahlangabeza, wathi kubo: “Isho kanje inkosi, ithi: ‘Nize ngokuthula yini na?’ ” UJehu wathi: “Unandabani nokuthula wena na? Qhela phambi kwami, ubuyele emva kwami.” Umlindi wabuye wabika, wathi: “Isithunywa sesifikile kubo, kodwa asibuyile.”
Wayesethumela owesibili egibele ihhashi, waya kubo, wathi: “Isho kanje inkosi, ithi: ‘Nize ngokuthula yini na?’ ” UJehu wathi: “Unandabani nokuthula wena na? Qhela phambi kwami, ubuyele emva kwami.”
Umlindi wabika, wathi: “Sesifikile naleso kubo, kepha naso asibuyile. Ukushayela kwaso kufana nokushayela kukaJehu oqhuba sengathi luhlanya.”
UJehoramu wayesethi: “Bophelani.” Base beyibophela-ke inqola yakhe. UJehoramu, inkosi yakwa-Israyeli, no-Ahaziya, inkosi yakwaJuda, baphuma bayomhlangabeza uJehu, kuyilowo nalowo egibele enqoleni yakhe. Bamfica esiqeshini sezwe likaNabothi waseJizreyeli.
Kwathi ukuba uJoramu ambone uJehu, wayesethi: “Uze ngokuthula yini, Jehu na?” Wathi: “Ukuthula kwani, kusekuningi kangaka ukufeba nokulumba kukanyoko uJezebheli?”
UJehoramu waphenduka wacela empunzini, wamemeza u-Ahaziya, wathi: “Wugobe, Ahaziya!”
UJehu wayesensala umnsalo, waciba uJehoramu, umcibisholo wangena phakathi kwamahlombe akhe, waze wayophumela enhliziyweni yakhe, wawela phansi enqoleni yakhe.
UJehu wathi kuBhidikhari, induna yakhe: “Mthathe, umphonse esiqintini sezwe likaNabothi waseJizreyeli. Khumbula ukuthi ngesikhathi mina nawe sigibele silandela u-Ahabi, uyise, uSimakade walusho lolu daba ngaye,
wathi: ‘Ngenxa yegazi likaNabothi, negazi lamadodana akhe engilibonile izolo,’ kusho uSimakade, ‘ngiyakuphindisela kuwe kulesi siqinti sezwe,’ kusho uSimakade. Ngalokho-ke, mthathe umdinsile kulesi siqinti sezwe njengokusho kwezwi likaSimakade.”
U-Ahaziya, inkosi yakwaJuda, esekubonile lokho, wabaleka ngendlela eseBhethi Hagani, nokho uJehu wamhlala ezithendeni, wathi: “Mbulaleleni naye enqoleni yakhe.” Bambulala enqoleni yakhe emmangweni eGuri ongaseJibhileyamu. Wabalekela eMegido, wafela lapho.
Izinceku zakhe zamyisa ngenqola eJerusalema, zammbela ethuneni lakhe nokhokho bakhe, emzini kaDavide.
Ngonyaka we-11 wokubusa kukaJoramu, indodana ka-Ahabi, u-Ahaziya waba yinkosi kwaJuda.
UJehu waya eJizreyeli, uJezebheli wezwa ngalokho, wayesegqaba amehlo akhe, wazihlobisa ikhanda, walunguza ngefasitela.
UJehu esengena esangweni wathi: “Kusahleziwe kahle yini, wena Zimri, mbulali wenkosi yakho na?”
Waphakamisa ubuso bakhe, wabheka ngasefasiteleni, wathi: “Ngubani ongakimi? Ngubani na?” Kwase kulunguza izinduna ezimbili noma ezintathu.
Wayesethi kuzo: “Mphonseni phansi.” Zamphonsa, igazi lakhe lasaphazekela odongeni nasemahhashini. Wamfihliza ngezinyawo zakhe.
Wangena, wadla, waphuza, wayesethi: “Mbhekeni lo mqalekiswakazi, nimmbele, ngoba uyindodakazi yenkosi.”
Bahamba bayombheka ukuze bammbele, nokho abatholanga lutho ngaphandle kwekhanda, izinyawo, nezintende zezandla.
Babuyela kuye bambikela. Wathi: “Yizwi likaSimakade alikhuluma ngomlomo wenceku yakhe u-Eliya waseThishibhi, ethi: esiqeshini sezwe eJizreyeli izinja ziyokudla inyama kaJezebheli.
Isidumbu sikaJezebheli siyokuba njengomquba phezu komhlabathi, esiqintini sezwe eJizreyeli, ukuze kungabi bikho muntu oyakuthi: ‘Nangu uJezebheli.’ ”
U-Ahabi wayenamadodana angama-70 eSamariya. UJehu wabhala izincwadi, wazithumela eSamariya ezikhulwini zaseJizreyeli, kumalunga, nakubaqaphi bakwa-Ahabi, wathi:
“Manje njengoba le ncwadi ifika kini, amadodana enkosi yenu enani, izinqola zempi, amahhashi, umuzi obiyelweyo, nezikhali,
niyozibonela ukuthi yiyiphi enhle nefaneleyo emadodaneni enkosi yenu, bese niyibeka esihlalweni sobukhosi sikayise, nilwele indlu yenkosi yenu.”
Kepha besaba kakhulu, bathi: “Amakhosi amabili awakwazanga ukumelana naye, pho thina singobani ukuba singema endleleni yakhe na?”
Owengamele isigodlo, nomphathi womuzi namalunga nabaqaphi bathumela kuJehu, bathi: “Thina siyizinceku zakho, konke ositshela khona siyakukwenza; asiyukubeka muntu abe yinkosi; yenza okubona kukuhle emehlweni akho.”
Waphinda futhi wababhalela incwadi yesibili, ethi kubo: “Uma-ke ningakimi, futhi nilalela izwi lami, thathani amakhanda awo wonke amadodana enkosi yenu niwalethe lapha kimi eJizreyeli, kusasa ngalesi sikhathi.” Amadodana enkosi ayengama-70 ayehlala ezikhulwini zomuzi, ziwakhulisa.
Kwathi ukuba bayithole incwadi, bawathatha wonke amadodana enkosi, bawabulala, abantu abangama-70, bafaka amakhanda awo emaqomeni, bawathumela kuJehu eJizreyeli.
Kwase kufika isithunywa sathi kuye: “Sebewalethile amakhanda amadodana enkosi.” Wathi: “Abekeni abe yizinqwaba ezimbili ngasesikhaleni sesango kuze kube sekuseni.”
Kwathi ekuseni waphuma, wema, wathi kubantu bonke: “Nina nilungile; bhekani, mina ngenzele inkosi yami ugobe, ngayibulala, kodwa ngubani obulele bonke laba na?
Yazini manje ukuthi akuyukuwela phansi nelilodwa lezwi likaSimakade, alikhulumayo uSimakade ngendlu ka-Ahabi; uSimakade ukwenzile lokho akukhulumayo ngomlomo wenceku yakhe, u-Eliya.”
UJehu wababulala bonke ababesasele bendlu ka-Ahabi eJizreyeli, zonke izikhulu zakhe, abazana naye, nabaphristi bakhe, akwaze kwasala noyedwa kubo.
Wayesesuka, wahamba waya eSamariya; kwathi esendlini yokugunda yabelusi endleleni,
uJehu wafumana abafowabo baka-Ahaziya, inkosi yakwaJuda, wathi: “Nina ningobani na?” Bathi: “Singabafowabo baka-Ahaziya; sehla ukuyobingelela abantwana benkosi nabantwana bendlovukazi.”
Wathi: “Babambeni bephila.” Bababamba bephila, bababulala ngasemgodini wendlu yokugunda, abantu abangama-42, abaze bashiya muntu kubo.
Wasuka lapho wafumana uJehonadaba, indodana kaRekhabhi ezomhlangabeza; wayesembingelela, wathi kuye: “Ngabe kulungile yini enhliziyweni yakho njengoba kunjalo kweyami na?” UJehonadaba wathi: “Yebo.” UJehu wayesethi: “Uma-ke kunjalo, letha isandla sakho.” Waselula isandla sakhe, wayesemgibelisa enqoleni yakhe.
Wayesethi uJehu: “Hamba nami ukuze ubone indlela engimshisekelela ngayo uSimakade.” Base bemgibelisa enqoleni yakhe.
Esefike eSamariya, wababulala bonke abendlu ka-Ahabi ababesasele lapho, waze wabaqeda nya njengezwi likaSimakade alikhuluma ku-Eliya.
UJehu wabaqoqa bonke abantu, wathi kubo: “U-Ahabi wamkhonza kancane uBhali, kodwa uJehu uyakumkhonza kakhulu.
Ngakho-ke, ngibizeleni bonke abaphrofethi bakaBhali, zonke izinceku zakhe, nabo bonke abaphristi bakhe, kungasali namunye, ngokuba nginomhlatshelo omkhulu kaBhali; bonke abangekho lapha abayukuphila.” Kepha uJehu wenza lokhu ngobuqili ukuze abhubhise izinceku zikaBhali.
Wayesethi uJehu: “Mahlukaniseleni uBhali umhlangano womkhosi.” Bawumemezela-ke.
UJehu wathumela ku-Israyeli wonke; zonke izinceku zikaBhali zafika, akwaze kwaba bikho muntu ongafikanga. Zangena endlini kaBhali, indlu kaBhali yagcwala yathi nswi, kungekho ngisho nendawo yokufaka unyawo.
Wathi kumphathi wekamelo lezembatho: “Khiphela zonke izinceku zikaBhali izembatho.” Wazikhiphela-ke izembatho.
UJehu noJehonadaba, indodana kaRekhabhi, bangena endlini kaBhali; wathi ezincekwini zikaBhali: “Cingani, nibone, funa kube khona lapho oyedwa wezinceku zikaSimakade, kodwa makube yizinceku zikaBhali kuphela ezilapho.”
Bangena bezonikela ngemihlatshelo nangeminikelo yokushiswa. UJehu wayemise ngaphandle amadoda angama-80, wathi: “Uma kuphunyuka omunye walaba bantu engibaletha ezandleni zenu, kuyakuba ngukuphila ngokuphila.”
Kwathi lapho eqeda ukunikela ngomnikelo wokushiswa, uJehu wathi kubalindi nasezinduneni: “Hambani nibabulale, kungaphunyuki ngisho noyedwa.” Bababulala ngenkemba. Abalindi nezinduna babantshinga phandle, bangena ekamelweni eliphakathi lendlu kaBhali.
Bakhipha izinsika ezazisendlini kaBhali, bazishisa.
Babhidliza insika engcwele kaBhali, badiliza indlu kaBhali, bayenza yaba yindlu yendle, kuze kube namuhla.
UJehu wamchitha-ke uBhali kwa-Israyeli.
Kepha akasukanga ekulandeleni izono zikaJerobhowamu, indodana kaNebhathi, onisa ngazo u-Israyeli, namathole egolide ayeseBhethele nakwaDani awasuswanga.
USimakade wathi kuJehu: “Ngenxa yokuba wenze kahle ngokufeza okulungile emehlweni ami, futhi wenza endlini ka-Ahabi njengakho konke okwakusenhliziyweni yami, uzalo lwakho lwezizukulwane ezine luyakuhlala esihlalweni sobukhosi sika-Israyeli.”
Kepha uJehu akakuqaphelanga ukuhamba emthethweni kaSimakade uNkulunkulu ka-Israyeli ngayo yonke inhliziyo yakhe, futhi akayekanga ukwenza izono ezazenziwa nguJerobhowamu onisa ngazo u-Israyeli.
Ngalezo zinsuku uSimakade waqala ukunciphisa elakwa-Israyeli. UHazayeli walinqoba lonke izwe lakwa-Israyeli,
kusukela eJordani ngasempumalanga, lonke izwe lakwaGileyadi, lakwaGadi, lakwaRubeni, nalakwaManase, kusukela e-Aroweri elingasemfuleni i-Arinoni, kwaGileyadi naseBhashani.
Ezinye izindaba zikaJehu, nakho konke akwenzayo, nawo wonke amandla akhe, akulotshiwe yini encwadini yezindaba zemihla ngemihla yamakhosi akwa-Israyeli na?
UJehu walaliswa nokhokho bakhe, bammbela kwabakubo eSamariya. UJehowahazi, indodana yakhe, waba yinkosi esikhundleni sakhe.
Isikhathi uJehu abusa ngaso kwa-Israyeli, eSamariya, kwaba yiminyaka engama-28.
Kwathi ukuba u-Athaliya, unina ka-Ahaziya, abone ukuthi indodana yakhe ifile, waqala ukubhubhisa bonke abasebukhosini.
Kepha uJehoshebha, indodakazi yenkosi uJoramu, udadewabo ka-Ahaziya, wathatha uJowashi, indodana ka-Ahaziya. Wameba phakathi kwamadodana enkosi ayezobulawa, wamfihla nomzanyana wakhe ekamelweni. Wamfihla kanjalo ku-Athaliya ukuze angabulawa.
UJowashi wahlala efihlwe lapho endlini kaSimakade iminyaka eyisithupha, ngesikhathi izwe libuswa ngu-Athaliya.
Ngonyaka wesikhombisa, uJehoyada wathumela walanda izinduna zamakhulu zamaKharithe nezabalindi, wazingenisa kuye endlini kaSimakade. Wenza isivumelwano nazo, wazifungisa zisendlini kaSimakade, wayesezibonisa indodana yenkosi.
Waziyala wathi: “Nansi into okumele niyenze: ingxenye eyodwa kokuthathu yenu engena ngesabatha iyakuba ngabalindi bendlu yenkosi,
enye ingxenye yokuthathu yenu ibe sesangweni eZuri, enye ingxenye yokuthathu yenu ibe sesangweni emva kwabalindi, niyilinde nokuyilinda indlu ngokudedelana.
Amaviyo enu amabili abo bonke labo abaphuma ngesabatha, ayakulinda indlu kaSimakade enkosini.
Niyakuyizungeza inkosi nxazonke, yilowo nalowo ephethe izikhali zakhe ngesandla. Oyongena phakathi kwezinhla uyakubulawa; yibani nenkosi lapho iphuma nalapho ingena.”
Izinduna zamakhulu zenza njengalokhu uJehoyada, umphristi, eziyalile. Kwaba yileyo naleyo yathatha amabutho ayo abezongena ngesabatha nalawo ayezophuma ngalo, zeza nawo kuJehoyada, umphristi.
Umphristi wanika izinduna zamakhulu imikhonto namahawu okwakungokwenkosi uDavide, okwakusendlini kaSimakade.
Abalindi bema, bayingunga inkosi, kuyilowo nalowo ephethe izikhali zakhe ngesandla; kusukela ohlangothini lwakwesokunene lwendlu kuze kube kolwakwesokhohlo lwayo, nxazonke ze-althare, nendlu.
UJehoyada wayeseyikhipha indodana yenkosi, wayethwesa umqhele, wayinika ubufakazi, base beyibeka ukuba ibe yinkosi, bayigcoba, bashaya ihlombe behalalisa, bethi: “Mana njalo, nkosi!”
U-Athaliya wezwa umsindo wabalindi nowabantu, wayeseya kubantu endlini kaSimakade,
wabona inkosi imi ngasensikeni njengokusho komthetho. Izikhulu nabamacilongo babengakuyo, bonke abantu bahlala ezweni bethokozile, beshaya amacilongo. U-Athaliya waklebhula izingubo zakhe, wamemeza, wathi: “Wugobe! Wugobe!”
UJehoyada, umphristi, wayala izinduna zamakhulu nezikhulu ezaziphethe impi, wathi kuzo: “Mkhipheleni phandle kwendlu, nimfake phakathi kwezinhla. Omlandelayo nimbulale ngenkemba. Umphristi wathi: ‘Makangabulawelwa endlini kaSimakade.’ ”
Bamdedela nxazombili, wayesehamba ngendlela okungena ngayo amahhashi endlini yenkosi; wabulawelwa lapho.
UJehoyada wenza isivumelwano phakathi kukaSimakade nenkosi nabantu, sokuba ngabantu bakaSimakade. Wenza futhi isivumelwano phakathi kwenkosi nabantu.
Bonke abantu abahlala ezweni baya endlini kaBhali, bayibhidliza, ama-althare ayo nezithombe zayo bakuphahlaza kwaba yizicucu, babulala uMathani, umphristi kaBhali, phambi kwama-althare. Umphristi wabeka abalindi endlini kaSimakade.
Wayeseqoqa izinduna zamakhulu, amaKharithe, abalindi, nabo bonke abantu bezwe, bayithatha inkosi bayehlisa isuka endlini yesango labalindi esigodlweni, ngendlela yesango labalindi. Yafike yahlala esihlalweni sobukhosi.
Abantu bonke bezwe bathokoza kakhulu, umuzi waba nokuthula. U-Athaliya babembulele ngenkemba esigodlweni.
UJehowashi wayeneminyaka eyisikhombisa ngesikhathi eqala ukubusa.
Ngonyaka wesikhombisa kaJehu, uJehowashi waba yinkosi; wabusa eJerusalema iminyaka engama-40. Igama likanina kwakunguSibhiya waseBheri Sheba.
UJehowashi wenza okulungile emehlweni kaSimakade izinsuku zonke zakhe, ngesikhathi uJehoyada umphristi emyala.
Kepha-ke akazisusanga izindawo eziphakemeyo; abantu babesalokhu behlaba, beshisa nempepho kuzo.
UJehowashi wathi kubaphristi: “Lonke isiliva lezinto ezingcwele elilethwa endlini kaSimakade, imali eyamukelwayo, imali yilowo nalowo muntu anqunyelwe yona, yonke imali umuntu ayinikela ngokwenhliziyo yakhe endlini kaSimakade,
makuthathwe ngabaphristi. Makube yilowo nalowo akuthathe kumakhelwane wakhe, yikho abazolungisa ngakho izimfa zendlu, kuyo yonke indawo lapho kutholakala khona ufa.”
Kodwa nangonyaka wama-23 wokubusa kwenkosi uJehowashi, abaphristi babengakazilungisi izimfa zendlu.
Inkosi uJehowashi yabiza uJehoyada, umphristi, nabanye abaphristi, yathi kubo: “Kungani kuze kube manje izimfa zendlu zingalungisiwe na? Ngakho-ke ningabe nisayithatha imali kwabasondelene nani, kodwa niyinikelele izimfa zendlu.”
Abaphristi bavuma ukuthi abasezukuyithatha imali evela kubantu, futhi abasezukuzilungisa izimfa endlini.
UJehoyada, umphristi, wathatha ibhokisi, wabhoboza imbobo esivalweni salo, walibeka ngase-althare ngakwesokunene ukuze lapho umuntu engena endlini kaSimakade, abaphristi abalinda umbundu bayifake khona yonke imali eyayilethwa endlini kaSimakade.
Kwathi ukuba babone ukuthi seyiyiningi imali ebhokisini, kwase kwenyuka umbhali wenkosi nomphristi omkhulu, bayibopha base beyibala imali eyayitholakele endlini kaSimakade.
Imali ababeyilinganisile bayinika abasebenza ukuqapha indlu kaSimakade, bona base beholela ngayo ababesebenza lapho, babuye bakhokhela ababazi nabakhi ababesebenza khona.
Baholela ababakha ngamatshe, ababebaza amatshe, nokuba kuthengwe izigxobo namatshe abaziweyo ukuze kulungiswe izimfa endlini kaSimakade, nakho konke okwathengwa ukuba kulungiswe ngakho indlu.
Imali eyayilethwe endlini kaSimakade ayisetshenziselwanga ukwenza izindebe zesiliva, izizenze, izitsha, amacilongo, zonke izinto zegolide nezinto zesiliva,
ngokuba yanikwa ababesebenza, kwalungiswa ngayo indlu kaSimakade.
Ababengamele ukusetshenziswa kwemali lokho babekwenza ngokwethembeka; abazange bachaze kubantu ukuthi imali bayisebenzisa kanjani ukuholela abasebenzayo.
Imali yeminikelo yamacala neyeminikelo yezono, yayingeniswa endlini kaSimakade ngokuba yayingeyabaphristi.
Kwase kusuka uHazayeli, inkosi yase-Aramu, walwa neGathi, walinqoba. UHazayeli wayesebhekisa amabombo eJerusalema.
UJehowashi, inkosi yakwaJuda, wathatha zonke izinto ezingcwele ezazingcweliswe nguJehoshafathi, uJehoramu no-Ahaziya, okhokho bakhe ababengamakhosi akwaJuda, nazo zonke izinto zakhe ezingcwele nalo lonke igolide elatholakala engcebeni yendlu kaSimakade nasesigodlweni, wakuthumela kuHazayeli, inkosi yase-Aramu. UHazayeli wayesesuka eJerusalema.
Ezinye izindaba zikaJowashi, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
Izinceku zakhe zenza ugobe, zambulala uJowashi esendlini eMilo, uma wehla ubheke eSila.
Wabulawa yizinceku zakhe uJozakhari, indodana kaShimeyathi, noJehozabhadi, indodana kaShomeri, wembelwa nokhokho bakhe emzini kaDavide. U-Amaziya, indodana yakhe, waba yinkosi esikhundleni sakhe.
Ngonyaka wama-23 wokubusa kukaJowashi, indodana ka-Ahaziya, inkosi yakwaJuda, uJehowahazi, indodana kaJehu, waba yinkosi kwa-Israyeli, wabusa eSamariya iminyaka eli-17.
Wenza okubi phambi kukaSimakade, wenza izono ezenziwa nguJerobhowamu, indodana kaNebhathi, onisa ngazo u-Israyeli; akachezukanga kuzo.
Intukuthelo kaSimakade yamvuthela u-Israyeli, wayesemnikela esandleni sikaHazayeli, inkosi yase-Aramu, nasesandleni sikaBheni Hadadi, indodana yakhe, sonke leso sikhathi.
UJehowahazi wamnxusa uSimakade, uSimakade wamuzwa. USimakade wabona ingcindezelo inkosi yase-Aramu eyayicindezele ngayo u-Israyeli.
USimakade wanika u-Israyeli umkhululi; base bekhululeka phansi kwesandla sama-Aramu, abantu bakwa-Israyeli bahlala emathendeni abo njengakuqala.
Nokho abaphendukanga ezonweni zendlu kaJerobhowamu onisa ngazo u-Israyeli; bahamba ngazo, u-Ashera abaze bamsusa eSamariya.
Akashiyanga muntu kuJehowahazi, kuphela impi eyayingevile kwabamahhashi abangama-50, izinqola zempi ezilishumi namabutho ahamba ngezinyawo ayizi-10 000, ngokuba inkosi yase-Aramu yayibaqothe bafana nothuli esibhulweni.
Ezinye izindaba zikaJehowahazi, nakho konke akwenzayo, namandla akhe, akulotshiwe yini encwadini yezindaba zemihla ngemihla yamakhosi akwa-Israyeli na?
UJehowahazi walaliswa kokhokho bakhe, wembelwa kwabakubo eSamariya, uJowashi waba yinkosi esikhundleni sakhe.
Ngonyaka wama-37 wokubusa kukaJowashi, inkosi yakwaJuda, uJehowashi, indodana kaJehowahazi, waba yinkosi kwa-Israyeli eSamariya; wabusa iminyaka eli-16.
Wenza okubi emehlweni kaSimakade, akachezukanga kuzo zonke izono zikaJerobhowamu, indodana kaNebhathi, onisa ngazo u-Israyeli, wahamba kuzo.
Ezinye izindaba zikaJowashi, nakho konke akwenzayo, namandla akhe alwa ngawo no-Amaziya, inkosi yakwaJuda, akulotshiwe yini encwadini yezindaba zemihla ngemihla yamakhosi akwa-Israyeli na?
UJowashi walaliswa kokhokho bakhe; uJerobhowamu wahlala esihlalweni sakhe sobukhosi; uJowashi wembelwa eSamariya namakhosi akwa-Israyeli.
U-Elisha wagula ngesifo esagcina simthathile. UJowashi, inkosi yakwa-Israyeli, wehla waya kuye, wakhala kakhulu, wathi: “Baba, Baba, inqola ka-Israyeli nabamahhashi bakhe!”
U-Elisha wathi kuye: “Thatha umnsalo nemicibisholo.” Wayesekuthatha-ke.
U-Elisha wathi enkosini yakwa-Israyeli: “Beka-ke isandla sakho emnsalweni.” Wenza kanjalo, wawubamba ngesandla sakhe. U-Elisha wayesebeka isandla sakhe phezu kwezandla zenkosi.
Wathi kuyo: “Vula ifasitela elingasempumalanga.” Yalivula. U-Elisha wathi: “Ciba,” yayisiwuciba. Wayesethi u-Elisha kuyo: “Lo ngumcibisholo kaSimakade wokunqoba, ngumcibisholo ozonenza ninqobe kuma-Aramu, ngokuba uyakuwabulala ama-Aramu, uwaqede e-Afeki.”
Wayesethi: “Thatha imicibisholo.” Yayithatha-ke. Wathi enkosini yakwa-Israyeli: “Shaya emhlabathini.” Yashaya kathathu, yayeka.
Umuntu kaNkulunkulu wayithukuthelela inkosi, wathi: “Ukuba ubushaye kahlanu noma kayisithupha, i-Aramu ubuzolehlula uliqede nya, kodwa manje uyakulehlula kathathu kuphela.”
U-Elisha wafa, bammbela. Kwakuthi ngokwethwasa konyaka, izwe lihlaselwe ngamaviyo akwaMowabi.
Kwathi-ke besambela umuntu othile; bheka, babona iviyo liza; bamlahla lowo muntu ethuneni lika-Elisha. Kwathi lapho isidumbu sakhe sithinta amathambo ka-Elisha, waphila, wema ngezinyawo zakhe.
Kepha uHazayeli, inkosi yase-Aramu, yayimcindezele u-Israyeli zonke izinsuku zikaJehowahazi.
USimakade wayenomusa kubo; wayenesihe kubo, waphendukela kubo ngenxa yesivumelwano sakhe no-Abhrahama, no-Isaka noJakobe, akathandanga ukubabhubhisa, futhi akabalahlanga ebusweni bakhe.
UHazayeli, inkosi yase-Aramu, wafa; uBheni Hadadi, indodana yakhe, waba yinkosi esikhundleni sakhe.
UJehowashi, indodana kaJehowahazi, wamephuca uBheni Hadadi, indodana kaHazayeli, leyo mizi ayekade eyidle empini kusabusa uyise, uJehowahazi. UJowashi wamehlula kwaze kwaba kathathu, wayibuyisa imizi yakwa-Israyeli.
Ngonyaka wesibili wokubusa kukaJowashi, indodana kaJehowahazi, kwa-Israyeli, u-Amaziya, indodana kaJowashi, inkosi yakwaJuda, waba yinkosi.
Wayeneminyaka engama-25 ngesikhathi eqala ukubusa, wabusa iminyaka engama-29 eJerusalema. Igama likanina kwakunguJehoyadini waseJerusalema.
Wenza okuhle emehlweni kaSimakade, nokho akazange afane nokhokho wakhe uDavide. Kukho konke ukwenza kwakhe, wenza njengalokho kwenza uyise uJowashi.
Akazibhidlizanga izindawo eziphakemeyo abantu ababenikela benze imihlatshelo kuzo.
Kwathi lapho umbuso usuzinzile esandleni sakhe, wabulala izinceku ezazibulale uyise, inkosi.
Kepha akawabulalanga amadodana ababulali, njengalokhu kulotshiwe encwadini yomthetho kaMose; ngokomyalo kaSimakade, othi: “Abazali abayukubulawa ngenxa yabantwana, nabantwana abayukubulawa ngenxa yabazali, kodwa yilowo nalowo uyobulawelwa izono zakhe.”
Wabulala izi-10 000 zabakwa-Edomi eSigodini Sikasawoti, wadla iSela; wayeseliqamba kabusha ethi yiJokitheyeli, okuyigama lalo kuze kube namuhla.
U-Amaziya wathumela izithunywa kuJehowashi, indodana kaJehowahazi kaJehu, inkosi yakwa-Israyeli, wathi: “Woza sibukane mahlanze.”
UJehowashi, inkosi yakwa-Israyeli, yathumela ku-Amaziya, inkosi yakwaJuda, ithi: “Isihlahla somkhaya eLebhanoni sathumela kwesomsedari naso esiseLebhanoni, sathi kuso: ‘Ganisela indodana yami, indodakazi yakho, ibe ngumkayo.’ “Kwase kwedlula isilwane sasendle eLebhanoni, sasifihliza isihlahla somkhaya.
Umnqobile impela u-Edomi; inhliziyo yakho isiqhoshile; dumiseka ngalokho, uhlale ekhaya. Kungani ufuna uthuthuva, bese uwa, wena noJuda wonkana na?”
Kepha u-Amaziya akalalelanga. UJehowashi, inkosi yakwa-Israyeli, wenyuka, base betholana phezulu no-Amaziya, inkosi yakwaJuda, eBhethi Shemeshi lakwaJuda.
UJuda wanqotshwa ngu-Israyeli; babaleka, kwaba yilowo nalowo waya ethendeni lakhe.
UJehowashi, inkosi yakwa-Israyeli, yambamba u-Amaziya, inkosi yakwaJuda, indodana kaJehowashi ka-Ahaziya, eBhethi Shemeshi. UJehowashi weza eJerusalema, wabhidliza ugange lwakhona kusukela esangweni kwa-Efrayimi kuze kube sesangweni iGumbi; kwaba yisikhala esingamakhubhithi angama-400.
Waphanga lonke igolide, isiliva, nazo zonke izitsha azithola endlini kaSimakade nasengcebeni yesigodlo senkosi kanye nababeyisibambiso, wayesebuyela eSamariya.
Ezinye izindaba zikaJehowashi azenzayo, amandla akhe, impi yakhe no-Amasiya inkosi yakwaJuda, akulotshiwe yini encwadini yezindaba zemihla ngemihla yamakhosi akwa-Israyeli na?
UJehowashi walaliswa kokhokho bakhe, wembelwa eSamariya namakhosi akwa-Israyeli; uJerobhowamu, indodana yakhe, waba yinkosi esikhundleni sakhe.
U-Amaziya, indodana kaJowashi, inkosi yakwaJuda, waphila iminyaka eli-15 emva kokukhothama kukaJehowashi, inkosi yakwa-Israyeli.
Ezinye izindaba zika-Amaziya azilotshiwe yini encwadini yezindaba zemihla ngemihla yamakhosi akwaJuda na?
Abantu bamakhela uzungu eJerusalema, wayesebalekela eLakhishi, kodwa bathumela eLakhishi emva kwakhe, bambulalela khona.
Bamthwala ngamahhashi, wembelwa kokhokho bakhe, eJerusalema emzini kaDavide.
Bonke abantu bakwaJuda bathatha u-Azariya owayeneminyaka eli-16, bambeka waba yinkosi esikhundleni sikayise, u-Amaziya.
Wakha kabusha i-Elathi, wayeselibuyisela kuJuda emva kokuba inkosi isingcwatshwe kokhokho bayo.
Ngonyaka we-15 wokubusa kuka-Amaziya, indodana kaJowashi, inkosi yakwaJuda, uJerobhowamu, indodana kaJowashi, inkosi yakwa-Israyeli, waba yinkosi kwa-Israyeli eSamariya; wabusa iminyaka engama-41.
Wenza okubi emehlweni kaSimakade, akazange asuke nakwesisodwa sezono zikaJerobhowamu, indodana kaNebhathi, onisa ngazo u-Israyeli.
Wabuyisela umngcele wakwa-Israyeli kusuka eLibho Hamathi kuze kube solwandle i-Araba, njengokusho kwezwi likaSimakade uNkulunkulu ka-Israyeli alikhuluma ngomlomo wenceku yakhe, uJona, indodana ka-Amithayi, umphrofethi waseGathi Heferi.
USimakade wakubona ukuhlupheka kuka-Israyeli, kwamunyu kakhulu, abancane nabakhulu baphela amandla; kwakungekho ongamsiza u-Israyeli.
USimakade wayengashongo yini ukuthi uyakwesula igama lika-Israyeli phansi kwezulu, kodwa wabasindisa ngesandla sikaJerobhowamu, indodana kaJowashi na?
Ezinye izindaba zikaJerobhowamu, nakho konke akwenzayo, namandla akhe, nokulwa kwakhe, nokubuyisela kwakhe ku-Israyeli iDamaseku neHamathi elalingelakwaJuda, akulotshiwe yini encwadini yezindaba zemihla ngemihla yamakhosi akwa-Israyeli na?
UJerobhowamu walaliswa kokhokho bakhe, amakhosi abakwa-Israyeli; uZakhariya waba yinkosi esikhundleni sakhe.
Kwathi ngonyaka wama-27 wokubusa kukaJerobhowamu, inkosi ka-Israyeli, u-Azariya, indodana ka-Amaziya, inkosi yakwaJuda, waba yinkosi kwaJuda.
Wayeneminyaka eli-16 ngesikhathi eqala ukubusa. Wabusa iminyaka engama-52 eJerusalema. Igama likanina kwakunguJekholiya waseJerusalema.
Wenza okulungile emehlweni kaSimakade njengalokhu kwenza uyise, u-Amaziya.
Kepha izindawo eziphakemeyo azisuswanga, abantu babesalokhu behlaba khona, beshisa impepho kuzo.
USimakade wayishaya ngesifo sochoko inkosi kwaze kwaba sekukhothameni kwayo; yayihlala endlini eqhelile kwezinye. UJothamu, indodana yenkosi, wayengamele umuzi, ehlulela abantu bezwe.
Ezinye izindaba zika-Azariya, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
U-Azariya walaliswa kokhokho bakhe, bammbela kokhokho bakhe emzini kaDavide. UJothamu, indodana ka-Azariya, waba yinkosi esikhundleni sakhe.
Ngonyaka wama-38 wokubusa kuka-Azariya, inkosi kwaJuda, uZakhariya, indodana kaJerobhowamu, waba yinkosi kwa-Israyeli, eSamariya, izinyanga eziyisithupha.
Wenza okubi emehlweni kaSimakade njengoba kwenza okhokho bakhe, akachezukanga ekwenzeni izono ezazenziwa nguJerobhowamu, indodana kaNebhathi, onisa ngazo u-Israyeli.
UShalumi, indodana kaJabheshi, wamakhela uzungu wambulala phambi kwabantu, wayeseba yinkosi esikhundleni sakhe.
Ezinye izindaba zikaZakariya azilotshiwe yini encwadini yezindaba zemihla ngemihla yamakhosi akwa-Israyeli na?
Yilelo izwi likaSimakade alikhuluma kuJehu, wathi: “Amadodana akho, kuze kube sesizukulwaneni sesine, ayakuhlala esihlalweni sakwa-Israyeli.” Kwaba kanjalo.
UShalumi, indodana kaJabheshi, waba yinkosi ngonyaka wama-39 wokubusa kuka-Uziya, inkosi yakwaJuda, wabusa inyanga yaba yinye vo, eSamariya.
UMenahemu, indodana kaGadi, wenyukela eThiriza; wafika eSamariya wabulala uShalumi, indodana kaJabheshi, wayesebusa esikhundleni sakhe.
Ezinye izindaba zikaShalumi, nogobe lwakhe alwenzayo kulotshiwe ngazo encwadini yezindaba zemihla ngemihla yamakhosi akwa-Israyeli.
Ngaleso sikhathi, uMenahemu wabhubhisa iThifisa nakho konke okwakukulo, izifunda zalo kusuka eThiriza, ngokuba abazange bamvumele. Walibhubhisa, waqhaqha bonke abesifazane ababekhulelwe.
Ngonyaka wama-39 wokubusa kuka-Azariya, inkosi kwaJuda, uMenahemu, indodana kaGadi, waba yinkosi kwa-Israyeli, wabusa iminyaka elishumi eSamariya.
Wenza okubi emehlweni kaSimakade, akachezukanga, zonke izinsuku zakhe, ezonweni zikaJerobhowamu, indodana kaNebhathi, onisa ngazo u-Israyeli.
Kwase kufika uPhuli, inkosi yase-Asiriya, ukuzohlasela izwe. UMenahemu wamnika uPhuli amathalenta ayinkulungwane esiliva, ukuze amsize ukuqinisa umbuso esandleni sakhe.
UMenahemu wakhokhisa u-Israyeli nabo bonke abantu ababecebile, imali, umuntu ngamunye wayekhipha amashekeli angama-50 ukuze awanike inkosi yase-Asiriya. Inkosi yase-Asiriya yayisibuyela kwelakubo, ayabe isahlala ezweni.
Ezinye izindaba zikaMenahemu, nakho konke akwenzayo, akulotshiwe yini encwadini yezindaba zemihla ngemihla yamakhosi akwa-Israyeli na?
UMenahemu walaliswa kokhokho bakhe; uPhekhaya, indodana yakhe, waba yinkosi esikhundleni sakhe.
Ngonyaka wama-50 wokubusa kuka-Azariya, inkosi yakwaJuda, uPhekhaya, indodana kaMenahemu, waba yinkosi kwa-Israyeli, eSamariya; wabusa iminyaka emibili.
Wenza okubi emehlweni kaSimakade, akachezukanga ezonweni zikaJerobhowamu, indodana kaNebhathi, onisa ngazo u-Israyeli.
UPheka, indodana kaRemaliya, umkhuzi wempi yakhe, wamakhela uzungu ekanye nabangama-50 bakwaGileyadi. Bambulala eSamariya esenqabeni yesigodlo no-Arigobhi no-Ariye, waba yinkosi esikhundleni sakhe.
Ezinye izindaba zikaPhekhaya nakho konke akwenzayo, kulotshiwe encwadini yezindaba zemihla ngemihla yamakhosi akwa-Israyeli.
Ngonyaka wama-52 wokubusa kuka-Azariya, inkosi yakwaJuda, uPheka, indodana kaRemaliya, waba yinkosi kwa-Israyeli, wabusa iminyaka engama-20 eSamariya.
Wenza okubi emehlweni kaSimakade, akachezukanga ezonweni zikaJerobhowamu, indodana kaNebhathi, onisa ngazo u-Israyeli.
Ngezinsuku zenkosi uPheka kwa-Israyeli, uThigilathi Phileseri, inkosi yase-Asiriya, wahlasela, wadla i-Ijoni, i-Abhela Bhethi Mahakha, iJanowa, iKedeshi, iHazori, iGileyadi, iGalile nalo lonke izwe lakwaNafethali, wabathumba, wabayisa e-Asiriya.
UHosheya, indodana ka-Ela, wamakhela uzungu uPheka, indodana kaRemaliya, wamhlasela, wambulala, wayeseba yinkosi esikhundleni sakhe; kwakungunyaka wama-20 wokubusa kukaJothamu, indodana ka-Uziya.
Ezinye izindaba zikaPheka nakho konke akwenzayo, kulotshiwe encwadini yezindaba zemihla ngemihla yamakhosi akwa-Israyeli.
Ngonyaka wesibili wokubusa kukaPheka, indodana kaRemaliya, inkosi yakwa-Israyeli, uJothamu, indodana ka-Uziya, waba yinkosi yakwaJuda.
Wayeneminyaka engama-25 ngesikhathi eqala ukubusa, wabusa iminyaka eli-16 eJerusalema. Igama likanina kwakunguJerusha, indodakazi kaZadoki.
Wenza okulungileyo emehlweni kaSimakade, wenza njengakho konke ayekwenzile uyise u-Uziya.
Nokho izindawo eziphakemeyo azisuswanga; abantu babesahlaba, beshisa impepho ezindaweni eziphakemeyo. Wakha isango elingenhla endlini kaSimakade.
Ezinye izindaba zikaJothamu, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
Ngalezo zinsuku uSimakade wathumela kwaJuda, uRezini, inkosi yase-Aramu, noPheka, indodana kaRemaliya.
UJothamu walalaliswa kokhokho bakhe, wembelwa kokhokho bakhe emzini kaDavide. U-Ahazi, indodana yakhe, waba yinkosi esikhundleni sakhe.
Ngonyaka we-17 wokubusa kukaPheka, indodana kaRemaliya, u-Ahazi, indodana kaJothamu, waba yinkosi kwaJuda.
Wayeneminyaka engama-20, ngesikhathi eqala ukubusa. Wabusa iminyaka eli-16 eJerusalema. Akakwenzanga okulungile phambi kukaSimakade, uNkulunkulu wakhe, njengoDavide, ukhokho wakhe.
Kepha wahamba ngendlela yamakhosi akwa-Israyeli, waze wadabulisa nendodana yakhe emlilweni, njengezinengiso zabezizwe uSimakade abaxosha phambi kwabantu bakwa-Israyeli.
Wahlaba, washisa nempepho ezindaweni eziphakemeyo, emagqumeni naphansi kwazo zonke izihlahla eziluhlaza.
Ngaso leso sikhathi kwakhuphuka uRezini, inkosi yase-Aramu, noPheka, indodana kaRemaliya, inkosi yakwa-Israyeli, bahlasela iJerusalema. Bamvimbezela u-Ahazi, kodwa abakwazanga ukumnqoba.
Ngaleso sikhathi uRezini, inkosi yase-Aramu, wabuyisela i-Elathi e-Aramu, wabaxosha abaJuda e-Elathi, kwase kufika ama-Aramu nabakwa-Edomi bahlala kulo kuze kube namuhla.
U-Ahazi wathumela izithunywa kuThigilathi Phileseri, inkosi yase-Asiriya, wathi: “Mina ngiyinceku yakho nendodana yakho; khuphuka ungisindise esandleni senkosi yase-Aramu, nasesandleni senkosi yakwa-Israyeli, abangivukele.”
U-Ahazi wathatha isiliva negolide alithola endlini kaSimakade nasengcebeni yesigodlo, walithumela enkosini yase-Asiriya, laba yisipho sayo.
Inkosi yase-Asiriya yamlalela; yakhuphuka yayohlasela iDamaseku, yalidla, yathumba abantu bakhona, yabasa eKhiri, yambulala uRezini.
Inkosi u-Ahazi yaya eDamaseku yayohlangabeza uThigilathi Phileseri, inkosi yase-Asiriya, yabona i-althare elaliseDamaseku. Inkosi u-Ahazi yathumela ku-Uriya, umphristi, imtshela nge-althare, isimo salo, nokuthi injani indlela elenziwe ngayo, nakho konke okwakukulo.
U-Uriya, umphristi, walakha i-althare njengokwemiyalelo yenkosi u-Ahazi eyayimthumelele yona iseDamaseku, yaze yabuya inkosi u-Ahazi eDamaseku.
Inkosi isibuyile eDamaseku, yalibona i-althare, yasondela kulo, yanikela kulo.
Yashisa umnikelo wayo wokushiswa, nomnikelo wayo wempuphu, yathulula umnikelo wayo wokuphuzwayo, yafafaza igazi leminikelo yokuthula e-althare.
Kepha i-althare lethusi elaliphambi kukaSimakade, yalisusa phambi kwendlu naphakathi kwe-althare nendlu kaSimakade, yalibeka ohlangothini olungasenyakatho lwe-althare layo.
Inkosi u-Ahazi yamyala u-Uriya, umphristi, yathi: “E-althare elikhulu shisa umnikelo wokushiswa wasekuseni, umnikelo wokusanhlamvu wakusihlwa, umnikelo wokushiswa wenkosi, nomnikelo wayo wokusanhlamvu nomnikelo wokushiswa wabo bonke abantu abasezweni: umnikelo wabo wokusanhlamvu, neminikelo yabo yokuphuzwayo. Ulifafaze ngalo lonke igazi lomnikelo wokushiswa, nalo lonke igazi lomhlatshelo, kodwa i-althare lethusi lizokuba ngelami, ukubuza izinto kulo.”
U-Uriya, umphristi, wenza konke njengokuyala kwenkosi u-Ahazi.
Inkosi yazinquma izisekelo zezinqe, yawususa umcengezi wokugezela, ulwandle olwaluphezu kwezinkabi zethusi yalwehlisa, yalubeka endaweni eyayigandaywe ngamatshe.
Indlela esibekelweyo yesabatha eyayakhiwe ngaphakathi esigodlweni, nendlela yangaphandle inkosi eyayingena ngayo, yakususa endlini kaSimakade; ngenxa yenkosi yase-Asiriya.
Ezinye izindaba zika-Ahazi azenzayo, azilotshiwe yini encwadini yezindaba zemihla ngemihla yamakhosi akwaJuda na?
U-Ahazi walalaliswa kokhokho bakhe, wembelwa kokhokho bakhe emzini kaDavide. UHezekiya, indodana yakhe, waba yinkosi esikhundleni sakhe.
Ngonyaka we-12 wokubusa kuka-Ahazi inkosi yakwaJuda, uHosheya, indodana ka-Ela, waba yinkosi kwa-Israyeli; wabusa iminyaka eyisishiyagalolunye.
Wenza okubi emehlweni kaSimakade, noma yena engafananga namakhosi akwa-Israyeli ayemendulele.
UShalimenazeri, inkosi yase-Asiriya, wenyuka ukuba amhlasele. UHosheya waba yisikhonzi sakhe, wathumela kuye intela.
Inkosi yase-Asiriya yezwa ngozungu uHosheya ayeselwakhele yona, ngokuba wayethumele izithunywa kuSo, inkosi yaseGibhithe, futhi engayilethanga intela enkosini yase-Asiriya, ayeyithela minyaka yonke, ngakho-ke inkosi yase-Asiriya yambopha, yamvalela ejele.
Inkosi yase-Asiriya yenyuka yadabula izwe lonke, yenyukela naseSamariya, yalivimbezela iminyaka emithathu.
Ngonyaka wesishiyagalolunye wokubusa kukaHosheya, inkosi yase-Asiriya, yalinqoba iSamariya, yathumba u-Israyeli, yamyisa e-Asiriya, yambeka eHala, eHabhori ngasemfuleni iGozani nasemizini yamaMede.
Kwaba kanjalo kubantu bakwa-Israyeli, ngokuba babonile kuSimakade uNkulunkulu wabo owayebakhuphule eGibhithe, phansi kwesandla sikaFaro, inkosi yakhona, besaba abanye onkulunkulu.
Base behamba ngezimiso zabezizwe uSimakade ayebaxoshile phambi kwabantu bakwa-Israyeli, nangezimiso zamakhosi akwa-Israyeli azimisayo.
Abakwa-Israyeli babenza ngasese izinto ezingalungile phambi kukaSimakade uNkulunkulu wabo; bazakhela izindawo eziphakemeyo emizini yabo yonke, kusukela embhoshongweni wabalindi, kuze kube semizini ebiyelweyo.
Bazigxumekela izinsika zo-Ashera emagqumeni wonke aphakemeyo, naphansi kwazo zonke izihlahla eziluhlaza.
Bashisa impepho ezindaweni zonke eziphakemeyo njengalokhu kwakwenza abezizwe uSimakade ayebaxoshile phambi kwabo. Benza izinto ezimbi, baluchukuluza ulaka lukaSimakade.
Bakhonza izithombe uSimakade ayebatshelile ngazo, wathi: “Aniyukuyenza into enjalo.”
Nokho uSimakade wayemxwayisile u-Israyeli noJuda ngomlomo wabo bonke abaphrofethi nababoni, wathi: “Phendukani ezindleleni zenu ezimbi, nigcine imiyalo yami nezimiso zami, nenze wonke umthetho engabayala ngawo okhokho benu, nengawuthumela kini ngomlomo wezinceku zami, abaphrofethi.”
Kepha abamlalelanga, benza lukhuni izinhliziyo zabo, njengokhokho babo abangazange bamethembe uSimakade uNkulunkulu wabo.
Badelela izimiso zakhe, isivumelwano sakhe asenza nokhokho babo nezexwayiso ayebaxwayisa ngazo, balandela okuyize. Benza okuyize, baba yize njengezizwe abazilandelayo ezazibazungezile, uSimakade ayebayale ukuba bangenzi njengazo.
Bayishiya yonke imiyalo kaSimakade uNkulunkulu wabo, bazenzela izithombe ezibunjiweyo, amathole amabili, benza nezigxobo zika-Ashera, bakhuleka kulo lonke ibandla lasezulwini, bakhonza uBhali.
Badabulisa amadodana namadodakazi abo emlilweni, babhula, benza imilingo, bazithengisela ukwenza okubi emehlweni kaSimakade, ukuchukuluza ulaka lwakhe.
Yingakho nje uSimakade wamthukuthelela kakhulu u-Israyeli, wamsusa phambi kwakhe, akwaze kwasala muntu, ngaphandle kwesizwe sakwaJuda kuphela.
UJuda naye akayigcinanga imiyalo kaSimakade uNkulunkulu wakhe, kunalokho wahamba njengalokhu kwenza u-Israyeli.
USimakade wabafulathela bonke abozalo luka-Israyeli, wabahlupha, wabanikela esandleni sabaphangi, waze wabalahla ebusweni bakhe.
USimakade wehlukanisa u-Israyeli nendlu kaDavide. UJerobhowamu, indodana kaNebhathi, bambeka waba yinkosi, nokho wahlubukisa u-Israyeli, akabe esalandela uSimakade, wamonisa ngesono esikhulu.
Abantu bakwa-Israyeli benza zonke izono zikaJerobhowamu, abaze basuka kuzo.
USimakade waze wamsusa u-Israyeli ebusweni bakhe, njangalokhu ayeshilo ngomlomo wabaphrofethi bakhe. U-Israyeli waya ekuthunjweni, e-Asiriya, wasuka kwelakubo kuze kube namuhla.
Inkosi yase-Asiriya yalanda abantu eBhabhele, eKhutha, e-Ava, eHamathi, naseSafarivayimi, yabahlalisa emizini eSamariya endaweni yabakwa-Israyeli, balidla iSamariya, bahlala emizini yakhona.
Kwathi beqala nje ukuhlala lapho, abaze bamesaba uSimakade, ngakho-ke uSimakade wathumela phakathi kwabo amabhubesi, abulala abanye babo.
Base bethi enkosini yase-Asiriya: “Abezizwe obathumbile wabahlalisa emizini eSamariya, abawazi umthetho kankulunkulu wezwe, yingakho ebathumelele amabhubesi; uyabona-ke, ayababulala, ngoba abawazi umthetho kankulunkulu wezwe.”
Inkosi yase-Asiriya yayisiyala, ithi: “Thathani omunye wabaphristi abathunjiweyo, ahambe ayohlala eSamariya, ukuze abafundise umthetho kankulunkulu wezwe.”
Omunye wabaphristi ababethunjwe eSamariya, wabuya, wahlala eBhethele, wabafundisa ukumesaba uSimakade.
Kepha zonke izizwe zazenzela onkulunkulu bazo, zababeka ezindlini ezindaweni eziphakemeyo ezazenziwe ngamaSamariya, kwaba yileso naleso sizwe, emizini esasihlezi kuyo.
Abantu baseBhabhele benza uSukhothi Bhenothi, abaseKhutha benza uNerigali, abaseHamathi benza u-Ashima,
ama-Avi enza uNibhihazi noTharithaki, amaSefarivayimi ashisa abantwana bawo emlilweni ka-Adirameleki no-Anameleki, okwakungonkulunkulu baseSefarivayimi.
Nokho babemkhonza noSimakade, nakuba babezenzela abaphristi phakathi kwabo, babesezindaweni eziphakemeyo ababehlabela kuzo, ezindlini eziphakemeyo ababezakhile.
Bamesaba uSimakade, baqhubeka nokukhonza onkulunkulu babo njengomthetho wezizwe ababethunjwe phakathi kwazo.
Kuze kube namuhla basenza imikhuba yabo yakuqala. Abamesabi uSimakade, abazilandeli izimiso zakhe, izehlulelo, imithetho, nemiyalelo uSimakade ayala ngakho abantwana bakaJakobe, amqamba igama wathi ngu-Israyeli.
USimakade wayenze no-Israyeli isivumelwano, wabayala, wathi: “Aniyukwesaba abanye onkulunkulu, aniyukubakhothamela, aniyukubakhonza, aniyukubahlabela.
Kepha uSimakade owanikhuphula eGibhithe ngamandla amakhulu, nangengalo enamandla, niyokwesaba Yena kuphela, nimkhothamele, nimhlabele.
Niyogcina zonke izimiso, izehlulelo, umthetho, nemiyalo anilobela khona, futhi niyoqikelela ukuba nikwenze. Ningabesabi abanye onkulunkulu.
Ningasikhohlwa isivumelwano engasenza nani, ningabesabi abanye onkulunkulu.
Kepha niyokwesaba uSimakade uNkulunkulu wenu, Yena uyakunisindisa esandleni sazo zonke izitha zenu.”
Kepha abazange balalele, baqhubeka benza njengokwemithetho yabo yakuqala.
Lezi zizwe zesaba uSimakade, kodwa zakhonza izithombe zazo ezibaziweyo, kanjalo nabantwana bazo, nabantwana babantwana bazo; njengalokhu benzile oyise, zenza kanjalo nazo kuze kube namuhla.
Kwathi ngonyaka wesithathu wokubusa kukaHosheya, indodana ka-Ela, inkosi yakwa-Israyeli, uHezekiya, indodana ka-Ahazi, inkosi yakwaJuda, waba yinkosi.
Wayeneminyaka engama-25 lapho eba yinkosi. Wabusa eJerusalema iminyaka engama-29. Igama likanina kwakungu-Abhi, indodakazi kaZakhariya.
Wenza okulungile emehlweni kaSimakade njengakho konke akwenzayo uDavide, ukhokho wakhe.
Wasusa izindawo eziphakemeyo, wadiliza izinsika, wanquma o-Ashera, wachitha inyoka yethusi eyayenziwe nguMose, ngokuba abakwa-Israyeli, kuze kube yileso sikhathi, babesashisa impepho kuyo; yayisibizwa ngokuthi nguNehushithani.
Wamethemba uSimakade uNkulunkulu ka-Israyeli, akubanga bikho onjengaye emva kwakhe, phakathi kwawo wonke amakhosi akwaJuda, nakulawo ayengaphambi kwakhe.
Wabambelela kuSimakade akaze achezuka ekumlandeleni, wagcina imiyalo uSimakade ayeyale ngayo uMose.
USimakade waba naye noma kuphi lapho ayeya khona, wachuma, wayihlubuka inkosi yase-Asiriya, akabe esayikhonza.
Wabhubhisa amaFilisti kwaze kwayofika eGaza nezifunda zayo, kusukela embhoshongweni wabalindi kuze kube semizini ebiyelweyo.
Kwathi ngonyaka wesine, uHezekiya, inkosi ebusa kwaJuda, okwakungunyaka wesikhombisa wokubusa kukaHosheya, indodana ka-Ela, inkosi yakwa-Israyeli, uShalimaneseri, inkosi yase-Asiriya wakhuphuka, walivimbezela iSamariya.
Ngasekupheleni kweminyaka emithathu walinqoba iSamariya; kwakungunyaka wesithupha uHezekiya ebusa kwaJuda, kungunyaka wesishiyagalolunye uHosheya ebusa kwa-Israyeli.
Inkosi yase-Asiriya yathumba abakwa-Israyeli yabayisa e-Asiriya, yababeka eHala naseHabhori, ngasemfuleni iGozani nasemizini yamaMede,
ngokuba abalalelanga izwi likaSimakade uNkulunkulu wabo, kepha beqa isivumelwano sakhe; nakho konke ayeyale ngakho uMose, inceku kaSimakade, kabavumanga ukukulalela nokukwenza.
Ngonyaka we-14 wokubusa kukaHezekiya, inkosi, uSaneheribhi, inkosi yase-Asiriya, wakhuphuka, wahlasela yonke imizi yakwaJuda ebiyelweyo, wayidla.
UHezekiya, inkosi yakwaJuda, wathumela enkosini yase-Asiriya eLakhishi, wathi: “Ngonile kuwe, kodwa phindela emuva; noma yini oyibeka kimi, ngiyakuyenza.” Inkosi yase-Asiriya yamnqumela ukuba inkosi uHezekiya athele kuyo amathalenta esiliva angama-300 nawegolide angama-30.
UHezekiya wayinika lonke isiliva elalisendlini kaSimakade nelalisengcebeni yesigodlo senkosi.
Ngaleso sikhathi, uHezekiya wanquma izivalo zethempeli likaSimakade nezinsika okwakunamekwe nguHezekiya, inkosi yakwaJuda, wakunika inkosi yase-Asiriya.
Inkosi yase-Asiriya yathumela abakhuzi bempi abakhulu, uRabi Sarisi, noRabi Shake ukuba basuke eLakhishi baye enkosini uHezikiya eJerusalema, benempi enkulu. Bakhuphuka, bafika eJerusalema. Bakhuphuka bafike bema ngasemseleni wechibi elisenhla elingasendleleni yeNsimu yoMhlanzi.
Bayibiza inkosi, kwase kuphuma u-Eliyakimi, indodana kaHilikiya, owayengamele isigodlo, uShebhina, umbhali, noJowa, indodana ka-Asafa, umqophi.
Wathi kubo uRabi Shake: “Ake nisho kuHezekiya, nithi: ‘Isho kanje inkosi enkulu, inkosi yase-Asiriya, ithi: uthembelephi, yini le ekwenza ube nesibindi na?
Ngabe ucabanga ukuthi ukukhuluma amazwi ngomlomo kungamasu namandla okulwa na? Pho wethemba bani, ngoba ungihlubukile na?
Manje wena wethemba udondolo lwalo mhlanga ofecekileyo oyiGibhithe, okuthi uma umuntu ezimelela ngalo, lumhlabe esandleni sakhe, lusigwaze; unjalo-ke uFaro, inkosi yaseGibhithe, kubo bonke abamethembayo.
Kepha uma nithi kimi: “Siyamethemba uSimakade uNkulunkulu wethu;” akusiye yini ozindawo zakhe eziphakemeyo nama-althare akhe uHezekiya akususile, wathi kuJuda nakulo iJerusalema: “Niyakukhuleka phambi kwaleli althare eJerusalema na?”
“ ‘Ngakho-ke ake uvumelane nenkosi yami, inkosi yase-Asiriya, mangikunike amahhashi ayizi-2 000, uma ungabeka abagibeli kuwo.
Pho ungayibuyisela kanjani emuva induna eyodwa ezincekwini ezincane zenkosi yami, ube wethembele eGibhithe ukuthola khona izinqola zempi nabamahhashi na?
Manje ucabanga ukuthi ngikhuphuke yini ngaphandle kukaSimakade, ukuza kuleyo ndawo ukuze ngiyibhubhise na? USimakade wathi kimi: “Khuphukela kuleli lizwe ulibhubhise.” ’ ”
U-Eliyakimi, indodana kaHilikiya, uShebhina, noJowa, bathi kuRabi Shake: “Ake ukhulume nezinceku zakho ngesi-Aramu, ngokuba siyasizwa, ungakhulumi nathi ngolimi lwabaJuda, funa kuzwe abantu abasogangeni.”
Kepha uRabi Shake wathi kubo: “Ngabe inkosi yami ingithumile yini enkosini yakho nakini ukuzokhuluma lawa mazwi, hhayi nakwabanye abantu abahlezi ogangeni ukuba badle indle yabo, baphuze umchamo wabo kanye nani na?”
URabi Shake wayesema, wamemeza ngezwi elikhulu, ngolimi lwesiJuda, wakhuluma wathi: “Yizwani amazwi enkosi enkulu, inkosi yase-Asiriya.
Isho kanje inkosi, ithi: ‘Maningakhohliswa nguHezekiya, ngokuba akayukuba namandla okunophula esandleni sami,
futhi uHezekiya makanganenzi nethembe uSimakade, nithi: “USimakade uyakusophula nokusophula, nalo muzi awuyukunikelwa esandleni senkosi yase-Asiriya.” ’
“Ningamlaleli uHezekiya, ngokuba isho kanje inkosi yase-Asiriya, ithi: ‘Yakhani ukuthula nami, niphumele ngaphandle kimi, nidle, yilowo nalowo emvinini wakhe, yilowo nalowo emkhiwaneni wakhe, niphuze, yilowo nalowo amanzi omthombo wakhe,
ngize ngifike, nginiyise ezweni elinjengezwe lakini, izwe lokusanhlamvu nelewayini, izwe lesinkwa nelezivini, izwe leminqumo, lamafutha amasha neloju, ukuba niphile, ningafi.’ “Futhi ningamlaleli uHezekiya, lapho enidukisa ethi: ‘USimakade uzosisindisa.’
“Ngabe abanye onkulunkulu bezinye izizwe bake bawasindisa nokuwasindisa yini amazwe abo esandleni senkosi yase-Asiriya na?
Baphi onkulunkulu baseHamathi nase-Ariphadi na? Baphi onkulunkulu baseSefarivayimi, nabaseHena, nabase-Iva na? Balophulile yini iSamariya esandleni sami na?
Ngobani phakathi konkulunkulu bamazwe abake bophula izwe labo esandleni sami, ukuba nicabange ukuthi uSimakade angalophula iJerusalema esandleni sami na?”
Kepha abantu bathula, abamphendulanga ngazwi, ngokuba umyalo wenkosi wathi: “Ningamphenduli.”
U-Eliyakimi, indodana kaHilikiya owayengamele isigodlo, uShebhina, umbhali, noJowa, indodana ka-Asafa, umqophi, babuyela kuHezekiya izingubo zabo beziklebhulile, bamlandisa amazwi ayekhulunywe nguRabi Shake.
Kwathi ukuba inkosi uHezekiya izwe lokho, yaklebhula izingubo zayo, yembatha indwangu eyisaka, yangena endlini kaSimakade.
Yathumela u-Eliyakimi owayengamele isigodlo, noShebhina, umbhali, namalunga wonke, begqoke indwangu eyisaka, baya ku-Izaya, umphrofethi, indodana ka-Amose.
Bathi kuye: “Usho kanje uHezekiya, uthi: ‘Lolu lusuku losizi, nolokusolwa nolokwedelelwa, ngokuba abantwana sebekulungele ukuzalwa, kodwa awekho amandla okubazala.
Mhlawumbe uSimakade uNkulunkulu wakho uwezwile wonke amazwi kaRabi Shake othunywe yinkosi yakhe, inkosi yase-Asiriya, ukuzokwedelela ngawo uNkulunkulu ophilayo. USimakade uNkulunkulu wakho athi angawezwa, awasole lawo mazwi, bese kuthi ngenxa yensali, awuzwe umkhuleko wakho.’ ”
Izinceku zenkosi uHezekiya zafika ku-Izaya.
U-Izaya wathi kuzo: “Niyakusho kanje enkosini yenu, nithi: ‘Usho kanje uSimakade, uthi: “Ungawesabi amazwi owezwileyo, izinceku zenkosi yase-Asiriya ezingithuke ngawo.
Bheka, ngizothumela kuye umoya, uyakuzwa umbiko, bese ebuyela ezweni lakubo, ngimwise khona ngenkemba.” ’ ”
URabi Shake waphindela emuva, emveni kokuba ezwe ukuthi inkosi isukile eLakhishi, wayifumana inkosi yase-Asiriya ilwa neLibhina.
Esezwile ngoThirahaka, inkosi yaseKhushe, kuthiwa: “Bheka, iphumile ukuba izokulwa nawe, wabuyela emuva, wathumela izithunywa kuHezekiya, ethi:
‘Niyokuthi kuHezekiya, inkosi yakwaJuda: “Ungavumi uNkulunkulu wakho omethembayo akukhohlise ngokuthi iJerusalema aliyukunikelwa esandleni senkosi yase-Asiriya.”
“ ‘Uyabona-ke, uzizwele nawe okwenziwe ngamakhosi ase-Asiriya kuwo wonke amazwe, awabhubhisa. Pho wena uyakusinda na?
Onkulunkulu balezo zizwe ezabhujiswa ngokhokho bami, iGozani, iHarana, iRezefi, abase-Edene, nabaseThelasari, bakwazi yini ukuzisindisa na?
Iphi inkosi yaseHamathi, eyase-Ariphadi, eyomuzi iSafarivayimi, eHena, nase-Iva na?’ ”
UHezekiya wayamukela incwadi eyayilethwe yizithunywa, wayifunda. UHezekiya wayesekhuphukela endlini kaSimakade, wafike wayeneka phambi kukaSimakade.
UHezekiya wakhuleka phambi kukaSimakade, wathi: “Simakade Nkulunkulu ka-Israyeli ohleli phezu kwamakherubhi, Wena wedwa unguNkulunkulu, nguwe wedwa owenze izulu nomhlaba.
Simakade, beka indlebe yakho ulalele; vula amehlo akho, Simakade, ubone, uzwe amazwi kaSaneheribhi awathumele ukweyisa ngawo uNkulunkulu ophilayo.
“Kuliqiniso impela Simakade ukuthi amakhosi ase-Asiriya azibhubhisile izizwe, namazwe azo,
aphonsa onkulunkulu bawo emlilweni, ngokuba babengeyibo onkulunkulu, babe ngumsebenzi wezandla zabantu nje, imithi, namatshe, yingakho ebabhubhisile.
Manje, Simakade Nkulunkulu wethu, ake usisindise esandleni sakhe, ukuze yonke imibuso yomhlaba yazi ukuthi Wena, Simakade, unguNkulunkulu, Wena wedwa.”
U-Izaya, indodana ka-Amose, wathumela kuHezekiya, wathi: “Usho kanje uSimakade uNkulunkulu ka-Israyeli, uthi: ‘Lokho obukukhulekela kimi ngoSaneheribhi, inkosi yase-Asiriya, ngikuzwile.’
“Nanti izwi uSimakade alikhulumile ngaye, uthi: “ ‘Ikwedelele, yakuhleka usulu intombi; indodakazi yaseZiyoni, ikunikinele ikhanda indodakazi yaseJerusalema.
Weyise bani, wathuka bani na? Uliphakamisele bani izwi, uwabhekisele bani amehlo akho phezulu na? Ongcwele ka-Israyeli!
Ngesandla sezithunywa zakho, uyijivazile iNkosi, wathi: “Ngobuningi bezinqola zami, ngikhuphukele phezulu ezintabeni, phakathi kweLebhanoni, ngigawula imisedari yalo emide, nemisayiphuresi yalo ekhethekileyo, ngingene endaweni yalo esekugcineni nasehlathini lalo eliminyeneyo.
Ngemba, ngaphuza amanzi angaziwayo; ngomisa ngamathe onyawo lwami, yonke imifula eGibhithe.”
“ ‘Awuzwanga yini kwakudala ukuthi ngakuhlela kwasemandulo na? Ngakunquma; manje sengikufikisile ukuba ubhubhise imizi ebiyelweyo, ibe yizinqwaba.
Abakhe kuyo babe namandla amancane, besaba, bajabha; baba njengotshani basendle, nembali notshani obuluhlaza, nokuluhlaza ophahleni lwezindlu, nokusanhlamvu okuhamukile kungakakhuli.
“ ‘Kepha ukusukuma kwakho, nokuhlala kwakho, ukuphuma nokungena kwakho, ngiyakwazi, nokungithukuthelela kwakho.
Ngenxa yokuba ungithukuthelele, nokuzidla kwakho kwenyukele ezindlebeni zami, ngiyakubeka ingwegwe yami emakhaleni akho, netomu lami emlonyeni wakho, ngiyakukubuyisela endleleni oweza ngayo.’
“Lokhu kuyakuba yisibonakaliso kuwe: niyakudla ngalo nyaka okuzikhulelayo, nangonyaka wesibili isihlabane, nangonyaka wesithathu hlwanyelani, nivune, nitshale izivini, nidle izithelo zazo.
Abasindileyo bendlu yakwaJuda, abaseleyo bayakubuye bagxile phansi, bathele izithelo phezulu.
Ngokuba kuyakuphuma eJerusalema insali, nasentabeni iZiyoni abayakusinda; ukushisekela kukaSimakade kuyakufeza lokho.
“Ngalokho usho kanje uSimakade enkosini yase-Asiriya, uthi: “ ‘Ayiyukungena kulo muzi, ayiyukucibishela mcibisholo khona; ayiyukubhekisa kuwo isihlangu, ayiyukunqwabela iduli kuwo.
Ngendlela eyafika ngayo, iyakubuyela ngayo; ayiyukungena kulo muzi, kusho uSimakade.
Ngiyakuwuvikela lo muzi, ngiwusindise ngenxa yami, nangenxa yenceku yami, uDavide.’ ”
Kwathi ngalobo busuku, kwaphuma ingelosi kaSimakade, yabulala enkanjini yabase-Asiriya abayizi-185 000; sebevuka ekuseni, bheka, kwakuyizidumbu zodwa.
Wayesesuka uSaneheribi, inkosi yase-Asiriya, wahamba, wabuya, wahlala eNinive.
Kwathi ekhuleka endlini kaNisiroki, unkulunkulu wakhe, u-Adirameleki noSarezeri, amadodana akhe, ambulala ngenkemba, abalekela e-Ararathi. U-Esari Hadoni, indodana yakhe, waba yinkosi esikhundleni sakhe.
Ngalezo zinsuku uHezekiya wagula; kwakwembulwa kwembeswa. Kwafika kuye u-Izaya, umphrofethi, indodana ka-Amose, wathi kuye: “Usho kanje uSimakade, uthi: ‘Yaleza endlini yakho, ngokuba awuyukusinda, uyakufa nokufa.’ ”
Waphendula ubuso bakhe, wabheka ngasodongeni, wakhuleka kuSimakade, wathi:
“Simakade, ngiyakuncenga, ake ukhumbule ukuthi ngihambile phambi kwakho ngeqiniso, nangenhliziyo epheleleyo, ngenza okuhle phambi kwakho.” UHezekiya wadazuluka wakhala kakhulu.
Kwathi u-Izaya engakaphumi emzini egcekeni elingaphakathi, izwi likaSimakade lafika kuye, lathi:
“Buyela kuHezekiya umbusi wabantu bami, uthi kuye: ‘Usho kanje uSimakade uNkulunkulu kaDavide, ukhokho wakho, uthi: “Ngiwuzwile umkhuleko wakho, ngizibonile izinyembezi zakho; ngizokuphilisa, bese ngosuku lwesithathu ukhuphukela endlini kaSimakade.
Ngizokwengeza ezinsukwini zakho iminyaka eli-15, ngikusindise, wena nalo muzi, esandleni senkosi yase-Asiriya. Ngiyakuwuvikela lo muzi, ngenxa yami nangenxa yenceku yami, uDavide.” ’ ”
U-Izaya wathi: “Lethani isigaxa samakhiwane.” Basilanda-ke, base besibeka ethumbeni, wasinda.
UHezekiya wayesethi ku-Izaya: “Siyakuba yini isibonakaliso esizongitshengisa ukuthi uSimakade impela uzongiphilisa, nokuthi ngiyokhuphukela endlini kaSimakade ngosuku lwesithathu na?”
U-Izaya wathi: “Nasi-ke isibonakaliso sakho esivela kuSimakade: uSimakade uzokwenza lokho akushilo. Isithunzi siyakuya phambili izinyathelo, noma sihlehle izinyathelo ezilishumi.”
UHezekiya wathi: “Kulula ukuba isithunzi seluleke izinyathelo ezilishumi, cha, isithunzi kungcono ukuba sihlehle izinyathelo ezilishumi.”
Umphrofethi u-Izaya wakhala kuSimakade, uSimakade wasihlehlisa izinyathelo ezilishumi esabe sesedlule ngazo ezinyathelweni zika-Ahazi.
Ngaleso sikhathi kwasuka uMerodaki Bhaladari, indodana kaBhaladani, inkosi yaseBhabhele, wathumela kuHezekiya izincwadi nesipho, ngokuba wayezwile ukuthi kade ebambekile.
UHezekiya wabalalela, wababonisa yonke indlu yengcebo yakhe, isiliva, igolide, amakha, amafutha amahle, indlu yezikhali zakhe, nakho konke okwakutholakala engcebeni yakhe. Akukho lutho olwalusesigodlweni sakhe nasembusweni wakhe wonke angazange abakhombise lona.
Kwase kufika umphrofethi u-Izaya enkosini uHezekiya, wathi kuye: “Bebezothini labo bantu, futhi bebevela kuphi na?” UHezekiya wathi: “Bavela ezweni elikude, eBhabhele.”
Wayesethi: “Ubakhombiseni esigodlweni sakho?” UHezekiya wathi: “Ngibakhombise konke okusesigodlweni sami; akukho lutho engcebeni yami engingabakhombisanga lona.”
U-Izaya wathi kuHezekiya: “Yizwa izwi likaSimakade:
nakanjani izinsuku ziyeza, lapho konke okusendlini yakho nalokho okhokho bakho abakubekelela khona kuze kube namuhla, kuyakuthathwa, kuyiswe eBhabhele; akuyukusala lutho, kusho uSimakade.
Amanye amadodana akho owazalayo ayothunjwa, abe ngabathenwa esigodlweni senkosi yaseBhabhele.”
UHezekiya wayesethi ku-Izaya: “Izwi likaSimakade alikhulume kimi, lingifanele.” Ngokuba ngokucabanga kwakhe wayethi: “Pho kunani uma kuzokuba nokuthula nokuvikeleka ngezinsuku zami na?”
Ezinye izindaba zikaHezekiya, nawo wonke amandla akhe, nokwenza kwakhe ichibi nomsele, nokungenisa kwakhe amanzi emzini, akulotshiwe yini encwadini yezindaba zemihla ngemihla yamakhosi akwaJuda na?
UHezekiya walaliswa kokhokho bakhe, uManase, indodana yakhe, waba yinkosi esikhundleni sakhe.
UManase wayeneminyaka eli-12 eqala ukubusa, wabusa iminyaka engama-55 eJerusalema. Igama likanina kwakunguHefizibha.
Wenza okubi emehlweni kaSimakade, njengezinengiso ezazenziwa ngabezizwe uSimakade abaxosha phambi kwabantu bakwa-Israyeli.
Wabuye wazakha izindawo eziphakemeyo ezazibhidlizwe nguyise uHezekiya, wamisela uBhali i-althare, wagxumeka izigxobo zika-Ashera njengoba kwakwenze u-Ahabi, inkosi yakwa-Israyeli, wakhuleka kulona lonke ibandla lasezulwini, walikhonza.
Wakha ama-althare endlini kaSimakade, uSimakade ayethe ngayo: “EJerusalema, ngizobeka khona igama lami.”
Wakhela lonke ibandla lasezulwini ama-althare emagcekeni amabili endlu kaSimakade.
Wadabulisa indodana yakhe emlilweni, wahlola imihlola, wabhula, wavumela abanamadlozi nabathakathi. Wenza okubi okuningi phambi kukaSimakade, wachukuluza ulaka lwakhe.
Wabeka isithombe esibaziweyo sika-Ashera ayesenzile endlini uSimakade ayekhulume ngayo kuDavide noSolomoni indodana yakhe, wathi: “Kule ndlu naseJerusalema engilikhethile ezizwaneni zonke zakwa-Israyeli ukuba ngibeke khona iGama lami, kuze kube phakade.
Angiseyukuzenza izinyawo zika-Israyeli zizulazule, zisuke ezweni engalinika okhokho babo, kuphela nje uma beqikelela ukugcina futhi benze njengakho konke engibayale ngakho, nanjengawo wonke umthetho eyabayala ngawo inceku yami, uMose.”
Kepha abalalelanga; uManase wabaphambukisa, benza okubi ukwedlula abezizwe uSimakade ababhubhisa phambi kwabo, abantu bakwa-Israyeli.
USimakade wakhuluma ngezinceku zakhe, abaphrofethi, wathi:
“Ngenxa yokuba uManase, inkosi yakwaJuda, wenze lezi zinengiso, wenza okubi ukwedlula konke okwakwenziwe ngama-Amori ayephambi kwakhe, wonisa uJuda ngezithombe zakhe.
Ngakho-ke usho kanje uSimakade uNkulunkulu ka-Israyeli, uthi: ‘Ngizokwehlisa okubi phezu kweJerusalema naphezu kukaJuda, okuyothi abezwa ngakho, kuhlale kunkeneneza njalo ezindlebeni zabo.
Ngizakwelula phezu kweJerusalema umucu wokulinganisa waseSamariya, nomthofu wokumisa indlu ka-Ahabi; ngiyakulesula iJerusalema njengomuntu esula isitsha, uyasesula aphinde asibhekise phansi.
Ngiyakuyilahla insali yefa lami, ngiyinikele esandleni sezitha zayo, iyokuba yimpango nento ebanjiweyo yazo zonke izitha zayo,
ngokuba yenze okubi emehlweni ami, iluchukuluzile ulaka lwami kusukela ngosuku okhokho bayo abaphuma ngalo eGibhithe, kuze kube namuhla.’ ”
UManase futhi wachitha kakhulu igazi elingenacala waze wagcwalisa iJerusalema kusukela kulolu hlangothi kuya kolunye, ngaphandle kwesono sakhe onisa ngaso uJuda ngokwenza okubi emehlweni kaSimakade.
Ezinye izindaba zikaManase, nakho konke akwenzayo, nesono sakhe ona ngaso, akulotshiwe yini encwadini yezindaba zemihla ngemihla zamakhosi akwaJuda na?
UManase walaliswa kokhokho bakhe, wembelwa ensimini esigodlweni sakhe, insimu ka-Uza. U-Amoni, indodana yakhe, waba yinkosi esikhundleni sakhe.
U-Amoni wayeneminyaka engama-22 ngesikhathi eba yinkosi, wabusa iminyaka emibili eJerusalema. Igama likanina kwakunguMeshulemethi, indodakazi kaHaruzi waseJothiba.
Wenza okubi emehlweni kaSimakade njengalokhu kwakwenze uyise uManase.
Wahamba ngazo zonke izindlela uyise ahamba ngazo, wakhonza izithombe azikhonzayo uyise, wakhuleka kuzo.
Wamshiya uSimakade uNkulunkulu wokhokho bakhe, akaze ahamba endleleni kaSimakade.
Izinceku zika-Amoni zamakhela uzungu; zayibulala inkosi endlini yayo.
Kepha abantu bezwe bababulala bonke ababenzele inkosi u-Amoni ugobe, babeka uJosiya, indodana yakhe, waba yinkosi esikhundleni sakhe.
Ezinye izindaba zika-Amoni azenzayo azilotshiwe yini encwadini yezindaba zemihla ngemihla zamakhosi akwaJuda na?
Wembelwa ethuneni lakhe ensimini ka-Uza; uJosiya, indodana yakhe, waba yinkosi esikhundleni sakhe.
UJosiya wayeneminyaka eyisishiyagalombili ngesikhathi eba yinkosi, wabusa iminyaka engama-31 eJerusalema. Igama likanina kwakunguJedida, indodakazi ka-Adayiya waseBhozikhathi.
Wenza okulungile emehlweni kaSimakade, wahamba ngayo yonke indlela uDavide, ukhokho wakhe, ayehambe ngayo, kachezukelanga ngakwesokunene nangakwesokhohlo.
Kwathi ngonyaka we-18 wokubusa kwenkosi uJosiya, inkosi uJosiya yathumela uShafani, indodana ka-Azaliya kaMeshulamu, umbhali, endlini kaSimakade, wathi:
“Yenyukela kuHilikiya, umphristi omkhulu, uthi makabale imali yonke esendlini kaSimakade eqoqwe ngabalindiminyango kubantu,
mayinikwe izisebenzi ezimiselwe ukwenza umsebenzi endlini kaSimakade; mayinikwe izisebenzi ezisendlini kaSimakade ukuze zilungise izimfa endlini kaSimakade,
ababazi, abakhi, abakha ngamatshe, ukuze bathenge imithi namatshe abaziweyo kokulungisa indlu.
Nokho akuyukubuzwa midanti ngokusebenzisa kwabo imali ababeyamukele, ngokuba umsebenzi wabo babewenza ngokwethembeka.”
UHilikiya, umphristi omkhulu, wathi kuShafani, umbhali: “Bheka, ngithole incwadi yomthetho endlini kaSimakade.” UHilikiya wayinika uShafani leyo ncwadi, ukuba ayifunde.
UShafani, umbhali, waya enkosini, wafike wayethulela umbiko othi: “Izinceku zakho ziyithululile imali eyatholakala endlini, zayinika izisebenzi ezimiselwe ukwenza umsebenzi endlini kaSimakade.”
UShafani, umbhali, wabika enkosini, ukuthi: “UHilikiya, umphristi, unginike incwadi.” UShafani wayeseyifunda phambi kwenkosi.
Kwathi lapho inkosi iwezwa amazwi ayesencwadini yomthetho, yaklebhula izingubo zayo.
Inkosi yayala uHilikiya, umphristi, u-Ahikamu, indodana kaShafani, u-Akhibhori, indodana kaMikhaya, uShafani, umbhali no-Asaya, inceku yenkosi, yathi kubo:
“Hambani ningibuzele kuSimakade, mina nabantu naye wonke uJuda, maqondana namazwi ale ncwadi etholakeleyo, ngokuba inkulu intukuthelo kaSimakade esivuthelayo. Okhokho bethu abawalalelanga amazwi ale ncwadi, ukuze benze njengakho konke okulotshwe ngathi kuyo.”
UHilikiya umphristi, u-Ahikamu, u-Akhibhori, uShafani, no-Asaya baya kuHulda umphrofethikazi, umkaShalumi, indodana kaThikiva kaHarihasi, umgcinizingubo, owayehlala eJerusalema engxenyeni yesibili, bakhuluma naye.
Wathi kubo: “Usho kanje uSimakade uNkulunkulu ka-Israyeli, uthi: ‘Yishoni kumuntu onithumele kimi nithi:
usho kanje uSimakade uthi: ngiyokwehlisela okubi kule ndawo naphezu kwabakhe kuyo, njengokusho kwawo wonke amazwi encwadi eyifundile inkosi yakwaJuda,
ngokuba bangishiyile, bashisela abanye onkulunkulu impepho, bachukuluza ulaka lwami ngawo wonke umsebenzi wezandla zabo. Intukuthelo yami iyakuyivuthela le ndawo, futhi ayiyukucinywa.’
Kepha enkosini yakwaJuda enithumileyo ukuba nibuze kuSimakade, niyothi kuyo: ‘Usho kanje uSimakade uNkulunkulu ka-Israyeli, uthi: amazwi owezwileyo,
ngenxa yokuba inhliziyo yakho ithambile, wazithoba phambi kukaSimakade, ngesikhathi uwezwa, lokho engakukhuluma kule ndawo nakwabakhileyo kuyo, ukuthi kuyakuba yincithakalo nesiqalekiso, wawusuklebhula izingubo zakho, wakhala phambi kwami, nami ngikuzwile, kusho uSimakade.
Ngakho-ke ngiyokubuthela kokhokho bakho, ubuthelwe edlinzeni lakho ngokuthula, amehlo akho awayukukubona konke okubi engiyakukwehlisela phezu kwale ndawo.’ ” Base bebuyisela enkosini lelo lizwi.
Inkosi uJosiya yathumela ukuba kubizwe amalunga wonke akwaJuda nawaseJerusalema.
Inkosi yenyukela endlini kaSimakade, bonke abantu bakwaJuda, nababakhe eJerusalema bekanye nayo, nabaphristi nabaphrofethi, yebo, bonke abantu, abancane nabadala, yafunda wonke amazwi encwadi yesivumelwano eyayitholakele endlini kaSimakade, bonke abantu bezwa.
Inkosi yema ngasensikeni, yenza isivumelwano phambi kukaSimakade ukuthi izomlandela, igcine imiyalo yakhe, ubufakazi bakhe, nezimiso zakhe ngenhliziyo yayo yonke, nangomphefumulo wayo wonke, nokuthi iyogcina wonke amazwi alesi sivumelwano esibhalwe kule ncwadi. Bonke abantu basamukela isivumelwano.
Inkosi yayala uHilikiya umphristi omkhulu, nabaphristi besigaba sesibili, abalindimnyango, ukuba bakhiphe ethempelini likaSimakade zonke izinto ezazenzelwe uBhali no-Ashera, nebandla lonke lasezulwini. Yazishisa ngaphandle kweJerusalema, emasimini aseKidroni, umlotha wakho wayiswa eBhethele.
Yabulala abaphristi bezithombe, amakhosi akwaJuda ayebaqokile ukuba bashise impepho ezindaweni eziphakemeyo emizini yakwaJuda, nxazonke zeJerusalema, kanye nalabo ababeshisa impepho kuBhali, kulo ilanga, inyanga, izinkanyezi nalo lonke ibandla lasezulwini.
Yamkhiphela ngaphandle kweJerusalema u-Ashera, endlini kaSimakade, yamshisa emfudlaneni iKidroni, yamgaya waba luthuli, yalahla umlotha wakhe emangcwabeni amadodana abantu.
Yadiliza izindlu zezifebe zesilisa ezazisendlini kaSimakade, lapho abesifazane babelukela khona amathende ka-Ashera.
Yabakhipha bonke abaphristi emizini yakwaJuda, yazingcolisa izindawo eziphakemeyo, lapho labo baphristi babeshisela khona impepho, kusukela eGebha kuze kube seBheri Sheba. Yazidiliza izindawo eziphakemeyo emasangweni asesikhaleni sesango likaJoshuwa, umphathimuzi, ezazingakwesokhohlo somuntu ngasesangweni lomuzi.
Abaphristi basezindaweni eziphakemeyo babengenyukeli e-althare likaSimakade eJerusalema, kodwa badla isinkwa esingenamvubelo phakathi kwabafowabo.
Yangcolisa iThofethi esigodini sabantwana bakwaHinomu ukuze kungabe kusaba bikho odabulisa indodana noma indodakazi yakhe emlilweni kaMolokhi.
Yasusa namahhashi amakhosi akwaJuda ayenikele ngawo kulo ilanga, ngasendleleni yokungena endlini kaSimakade, ngasekamelweni likaNathani Meleki, induna eyayisePhariwarimi, yashisa izinqola zelanga ngomlilo.
Ama-althare ayesophahleni lwekamelo eliphezulu lika-Ahazi, elalakhiwe ngamakhosi akwaJuda, nama-althare ayenziwe nguManase emagcekeni omabili endlu kaSimakade, inkosi yawadiliza, yasuka yagijima, yalahla umlotha emfudlaneni iKidroni.
Inkosi yangcolisa izindawo eziphakemeyo ezaziphambi kweJerusalema, ngakwesokunene sentaba Yokonakala, inkosi uSolomoni yakwa-Israyeli eyayizakhele u-Ashitharothi isinengiso samaSidoni, noKhemoshi isinengiso sabakwaMowabi noMilikhomu isinengiso sabakwa-Amoni.
Yaphahlaza izinsika, yanquma o-Ashera, yagcwalisa izindawo zabo ngamathambo abantu.
I-althare elaliseBhethele, nendawo ephakemeyo eyenziwa nguJerobhowamu, indodana kaNebhathi, owonisa u-Israyeli, nalelo althare nendawo ephakemeyo yakudiliza, yayishisa indawo ephakemeyo, yayiqothisisa yaba ngumlotha, yashisa no-Ashera.
UJosiya waphenduka wabona amathuna ayelapho entabeni; wathumela, wawakhipha amathambo emathuneni, wawashisa e-althare, walingcolisa njengokusho kwezwi likaSimakade elamenyezelwa ngumuntu kaNkulunkulu owayememezela lezi zinto.
Wayesethi: “Yisikhumbuzo sani lesi engisibonayo na?” Abantu bomuzi bathi kuye: “Yithuna lomuntu kaNkulunkulu owayevela kwaJuda, owamemezela lezi zindaba osuzenzile nge-althare laseBhethele.”
Wathi: “Myekeni; mawanganyakaziswa muntu amathambo akhe.” Base bewayeka amathambo akhe nalawo omphrofethi owayevela eSamariya.
UJosiya wazisusa nazo zonke izindlu zezindawo eziphakemeyo ezazisemizini eSamariya, lezo ezazakhiwe ngamakhosi akwa-Israyeli amcunula ngazo uSimakade, wenza kuzo njengoba ayenze eBhethele.
Wabulala bonke abaphristi basezindaweni eziphakemeyo lapho kwakunama-althare khona, washisa amathambo abantu phezu kwawo, wayesebuyela eJerusalema.
Inkosi yayisiyala bonke abantu, yathi: “Yenzelani uSimakade uNkulunkulu wenu iphasika njengalokhu kulotshiwe kule ncwadi yesivumelwano.”
Lalingakaze ligcinwe iphasika kusukela emihleni yabehluleli ababehlulela u-Israyeli, nasemihleni yawo wonke amakhosi akwa-Israyeli nawakwaJuda.
Kwathi ngonyaka we-18 wokubusa kwenkosi uJosiya, lagcinwa leli phasika kuSimakade eJerusalema.
Abanamadlozi, abathakathi, amatherafi, izithombe nazo zonke izinengiso ezazibonakala kwaJuda naseJerusalema, uJosiya wakususa ukuze afeze amazwi omthetho alotshwe encwadini uHilikiya, umphristi, ayeyithole endlini kaSimakade.
Kwakungakaze kube khona nkosi enjengaye ngaphambi kwakhe, eyaphendukela kuSimakade ngayo yonke inhliziyo yayo, nangawo wonke umphefumulo wayo, nangawo wonke amandla ayo nanjengakho konke okwakushiwo ngumthetho kaMose, ngisho nangasemva kwakhe akuvelanga enjengaye.
Nokho uSimakade akaphendukanga entukuthelweni enkulu ayemthukuthelele ngayo uJuda, nangokuchukuluza uManase achukuluza ulaka lwakhe ngakho.
USimakade wathi: “Naye uJuda ngiyakumsusa ebusweni bami njengoba ngenzile ku-Israyeli, lo muzi engawukhethayo, iJerusalema, nendlu engathi ngayo iGama lami liyakuba lapho, ngizakuwulahla.”
Ezinye izindaba zikaJosiya, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
Emihleni yokubusa kukaJosiya uFaro Nekho, inkosi yaseGibhithe, yakhuphukela enkosini yase-Asiriya ngasemfuleni iYufrathe. Inkosi uJosiya yakhuphuka ukuyoyihlangabeza; kwaba ukuyibona nje, yayibulala eMegido.
Izinceku zikaJosiya zasithatha ngenqola isidumbu sakhe eMegido, zasibuyisela eJerusalema, zasimbela edlinzeni layo. Abantu bezwe base bethatha uJehowahazi, indodana kaJosiya, bamgcoba, bambeka waba yinkosi esikhundleni sikayise.
UJehowahazi wayeneminyaka engama-23 lapho eba yinkosi, wabusa izinyanga ezintathu eJerusalema. Igama likanina kwakunguHamuthali, indodakazi kaJeremiya waseLibhina.
Wenza okubi emehlweni kaSimakade, njengakho konke okwenziwe ngokhokho bakhe.
UFaro Nekho wamvimbezela eRibhila eHamathi, ukuze angabe esabusa eJerusalema; izwe walithelisa intela engamathalenta esiliva ayikhulu nethalenta legolide.
UFaro Nekho wabeka u-Eliyakimi, enye indodana kaJosiya, waba yinkosi esikhundleni sikayise. Wamguqula igama kwaba nguJehoyakimi. Wamsusa uJehowahazi eRibhila wamyisa eGibhithe, waze wakhothamela khona.
UJehoyakimi wanika uFaro isiliva negolide; wathelisa izwe ukuze anike uFaro imali njengokusho kwakhe. Wakhiphisa abantu ababehlala ezweni isiliva negolide, ukuze akunike uFaro Nekho.
UJehoyakimi wayeneminyaka engama-25 lapho eba yinkosi, wabusa iminyaka eli-11 eJerusalema. Igama likanina kwakunguZebhida, indodakazi kaPhedaya waseRuma.
Wenza okubi emehlweni kaSimakade njengakho konke okwenziwa okhokho bakhe.
Emihleni yakhe kwenyuka uNebukhadinezari, inkosi yaseBhabhele; uJehoyakimi wayeyinceku yakhe, ekhonze kuye iminyaka emithathu, wabuye wamhlubuka.
USimakade wathumela kuye amaviyo amaKhaledi, awama-Aramu, awakwaMowabi nawakwa-Amoni, wawathumela ukuba ambhubhise uJuda njengezwi likaSimakade alikhuluma ngomlomo wezinceku zakhe, abaphrofethi.
Kwenzeka ngokweqiniso kwaJuda lokho uSimakade ayekukhulumile ukuze abasuse ebusweni bakhe ngenxa yezono zikaManase, nakho konke ayekwenzile,
nangenxa yegazi elingenacala ayelichithile, wagcwalisa iJerusalema ngalo, lokho uSimakade akazange avume ukukuthethelela.
Ezinye izindaba zikaJehoyakimi, nakho konke akwenzayo, akulotshiwe yini encwadini yezindaba zemihla ngemihla yamakhosi akwaJuda na?
UJehoyakimi walaliswa kokhokho bakhe, uJehoyakini, indodana yakhe, waba yinkosi esikhundleni sakhe.
Inkosi yaseGibhithe ayibuyanga futhi yaphuma ezweni lakubo, ngoba inkosi yaseBhabhele yayithathe konke okwenkosi yaseGibhithe, kusukela emfuleni eGibhithe kuze kuyofika eYufrathe.
UJehoyakini wayeneminyaka eli-18 ngesikhathi eba yinkosi, wabusa izinyanga ezintathu eJerusalema. Igama likanina kwakunguNehushitha, indodakazi ka-Elinathani waseJerusalema.
Wenza okubi emehlweni kaSimakade njengakho konke okwenziwa ngokhokho bakhe.
Ngaleso sikhathi izinceku zikaNebukhadinezari, inkosi yaseBhabhele, zakhuphukela eJerusalema, zawuvimbezela umuzi.
UNebukhadinezari, inkosi yaseBhabhele, wafika emzini owawuvinjezelwe yizinceku zakhe.
Inkosi uJehoyakini wakwaJuda wazinikela enkosini yaseBhabhele, yena, unina, izinceku zakhe, izikhulu zakhe nezikhulu esigodlweni sakhe. Inkosi yaseBhabhele yamthatha ngonyaka wesishiyagalombili wokubusa kwakhe.
Yakhipha yonke ingcebo yendlu kaSimakade, ingcebo yasesigodlweni senkosi, yaphihliza zonke izinto zegolide inkosi uSolomoni wakwa-Israyeli ayezenzele ithempeli likaSimakade njengoba uSimakade ayeshilo.
Yathumba lonke iJerusalema, zonke izikhulu, wonke amaqhawe anamandla, abathunjwa abayizi-10 000, izingcweti nabakhandi, ayishiyanga muntu, ngaphandle kwalabo bezwe ababedla imbuya ngothi.
Yathumba uJehoyakini, yamyisa eBhabhele, indlovukazi unina wenkosi, amakhosikazi enkosi, izinduna zayo, nezikhulu zezwe, bonke yabathumba besuka eJerusalema yabayisa eBhabhele.
Wonke amadoda anamandla ayizi-7 000, izinyanga, abakhandi, izinkulungwane zamaqhawe ayezilungiselele ukulwa; bonke inkosi yaseBhabhele yabathumba yabayisa eBhabhele.
Inkosi yaseBhabhele yabeka uMathaniya, uyisekazi, waba yinkosi esikhundleni sakhe, yaliguqula igama lakhe waba nguZedekiya.
UZedekiya wayeneminyaka engama-21 ngesikhathi eba yinkosi. Wabusa eJerusalema iminyaka eli-11. Igama likanina kwakunguHamithali, indodakazi kaJeremiya waseLibhina.
Wenza okubi emehlweni kaSimakade, njengakho konke okwenziwa nguJehoyakimi.
Lokho kwenzeka eJerusalema kwaJuda ngenxa yentukuthelo kaSimakade, waze wabalahla ebusweni bakhe. UZedekiya wayihlubuka inkosi yaseBhabhele.
Kwathi ngonyaka wesishiyagalolunye wokubusa kukaZedekiya, ngenyanga yeshumi, ngolweshumi lwayo, kwafika uNebukhadinezari, inkosi yaseBhabhele, eJerusalema nayo yonke impi yakhe. Bakanisa maqondana nalo; bakha khona udonga lokuvimbezela, nxazonke.
Umuzi bawuvimbezela kwaze kwaba ngunyaka we-11 wokubusa kukaZedekiya, inkosi.
Ngosuku lwesishiyagalolunye yayibhokile indlala emzini, kwakungekho kudla kubantu bezwe.
Wonke amabutho awufohla umuzi ngalobo busuku, abaleka ngendlela yesango elaliphakathi kwezingange zombili ezazingasensimini yenkosi. AmaKhaledi ayewuzungeze nxazonke umuzi, amabutho ahamba ngendlela ese-Araba.
Impi yamaKhaledi yayixosha inkosi, yayifica emathafeni eJerikho, yonke impi yayo yahlakazeka, yayishiya.
Ayibamba inkosi ayiletha enkosini yaseBhabhele, eRibhila, ayehlulela.
Amadodana kaZedekiya abulawa phambi kwakhe, uZedekiya amkhipha amehlo, ambopha ngamaketanga, amyisa eBhabhele.
Ngenyanga yesihlanu, ngosuku lwesikhombisa lwayo, okwakungunyaka we-19 wenkosi uNebukhadinezari, inkosi yaseBhabhele, kwafika eJerusalema uNebuzaradani, induna yabalindi, inceku yenkosi yaseBhabhele.
Washisa ngomlilo indlu kaSimakade nesigodlo senkosi, nazo zonke izindlu ezinkulu, wazishisa ngomlilo.
Induna yabalindi, nayo yonke impi yamaKhaledi eyayinayo, yadiliza izingange eJerusalema, nxazonke.
Abanye abantu abasala emzini, nalabo abahlubukayo, bahlubukela ngasohlangothini lwenkosi yaseBhabhele, nesixuku esiseleyo, uNebuzaradani, induna yabalindi, wabathumba bonke.
Kepha ababempofu balelo lizwe, induna yabalindi yabashiya ukuba banakekele izivini namasimu.
Izinsika zethusi ezazisendlini kaSimakade, izinqe zolwandle lwethusi okwakusendlini kaSimakade, akuhlephula amaKhaledi, alithwala ithusi aya nalo eBhabhele.
Amabhodwe, izimfologo, izizenze, izinkezo, nezitsha zethusi, ababekhonza ngakho, akuthatha.
Imicengezi yomlilo, izitsha zegolide lodwa, nezesiliva lodwa, nalokho induna yabalindi yakuthatha.
Izinsika zombili, nolwandle olwalulunye nje, nezinqe uSolomoni ayekwenzele indlu kaSimakade, isisindo sethusi okwakwenziwe ngalo zonke lezi zinto sasingenakulinganiswa.
Ukuphakama kwensika eyodwa kwakungamakhubhithi ali-18; phezu kwayo kwakukhona isihloko sethusi; ukuphakama kwesihloko esisodwa kwakungamakhubhithi amathathu. Kwakukhona nenetha namahananadi phezu kwesihloko, nxazonke, konke kwakungokwethusi; kwakunjalo nasensikeni yesibili enetheni.
Induna yabalindi yathumba uZeraya, umphristi omkhulu, uZefaniya, umphristi wesibili, abalindimnyango abathathu,
yathumba emzini induna eyayibekwe ukwengamela amabutho, abantu abayisihlanu ababesondelene nenkosi abatholwa emzini, umbhali womkhuzi wempi eyayibala abantu ezweni, kwatholakala ezweni abantu abangama-60 ababehlala emzini.
UNebuzaradani, induna yabalindi, yabathumba yabayisa enkosini yaseBhabhele, eRibhila.
Inkosi yaseBhabhele yabashaya, yababulalela khona eRibhila, eHamathi. UJuda waya ekuthunjweni esuswa ezweni lakubo.
UNebukhadinezari, inkosi yaseBhabhele, wabeka uGedaliya, indodana ka-Ahikamu kaShafani, ukuba abe ngumbusi phezu kwensali yakwaJuda ayeyishiyile ezweni.
Zonke izinduna zempi nabantu bezwa ukuthi inkosi yaseBhabhele ibeke uGedaliya waba ngumbusi ezweni, zase ziya kuGedaliya eMizipha: u-Ishmayeli, indodana kaNethaniya, noJohanani, indodana kaKhareya, noZeraya, indodana kaThanihumethi waseNethofa, noJahazaniya, indodana yomMahakha, nabantu babo.
UGedaliya wafunga kubo nakubantu babo, wathi: “Ningazesabi izinceku zamaKhaledi; hlalani ezweni, nikhonze enkosini yaseBhabhele ukuze kunihambele kahle.”
Kwathi ngenyanga yesikhombisa kwafika u-Ishmayeli, indodana kaNethaniya ka-Elishama ongowozalo lwasebukhosini, ehamba namadoda alishumi, wafika washaya uGedaliya waze wafa kanye nabaJuda namaKhaledi ayenabo eMizpha.
Bonke abantu, abancane, nabadala, nabakhuzi bempi basuka babalekela eGibhithe, ngokuba babesaba amaKhaledi.
Kwathi ngonyaka wama-37 athunjwa uJehoyakini, inkosi yakwaJuda, ngenyanga ye-12, ngosuku lwama-27 lwayo, u-Evili Merodaki, inkosi yaseBhabhele, ngonyaka wakhe wokuqala eyinkosi, wamkhulula ejele uJehoyakini, inkosi yakwaJuda.
Wakhuluma kahle naye, wabeka isihlalo sakhe saba phezu kwezihlalo zamakhosi ayenaye eBhabhele.
Wamkhumula izingubo ayezigqoka ejele, wadla naye njalo, zonke izinsuku zokuphila kwakhe.
Isabelo sakhe ayesiphiwa yinkosi, sasiyisabelo esimiyo semihla ngemihla, zonke izinsuku zokuphila kwakhe.
U-Adamu, uSethi, u-Enoshe,
uKhenani, uMahalalele, uJarede,
u-Enokhi, uMethushela, uLameka,
uNowa, uShemi, uHamu, noJafethi.
Amadodana kaJafethi: nguGomere, uMagoge, uMadayi, uJavani, uThubhali, uMesheke noTirase.
Amadodana kaGomere: ngu-Ashikhenaze, uDifathe noThogarma.
Amadodana kaJavani: ngu-Elisha, uTharishishi, uKhithimi noRodanimi.
Amadodana kaHamu: nguKhushe, uMizirayimi, uPhuthi noKhanani.
Amadodana kaKhushe: nguZebha, uHavila, uSabhitha, uRama noSabhitheka. Amadodana kaRama: nguSheba noDedani.
UKhushe wazala uNimrode; yena waqala ukuba ngonamandla emhlabeni.
UMizirayimi wazala amaLudi, ama-Anami, amaLehabhi, amaNafethuhi,
amaPhathrusi, amaKhasuluhi, lapho kwavela khona amaFilisti, namaKhafithori.
UKhanani wazibula ngoSidoni, kwalandela uHethi,
amaJebusi, ama-Amori, amaGirigashi,
amaHivi, ama-Arikhi, amaSini,
ama-Arivadi, amaSemari, namaHamathi.
Amadodana kaShemi: ngu-Elamu, u-Ashuri, u-Ariphakishade, uLude, u-Aramu, u-Uze, uHule, uGetheri noMeshekhe.
U-Ariphakishade wazala uShela; uShela wazala u-Ebhere.
U-Ebhere wazala amadodana amabili: igama lenye kwakunguPhelege, ngokuba emihleni yayo izwe ladatshulwa. Igama lomfowabo kwakunguJokothane.
UJokhothane wazala u-Alimodade, uShelefe, uHasaramavethe, uJera,
uHadoramu, u-Uzali, uDikila,
u-Ebhali, u-Abhimayele, uShebha,
u-Ofiri, uHavila, uJobhabhi; bonke laba babengamadodana kaJokothane;
uShemi, u-Ariphakishade, uShela,
u-Ebhere, uPhelege, uRehu,
uZerugi, uNahori, uThera,
u-Abhrama ongu-Abhrahama.
Amadodana ka-Abhrahama: u-Isaka no-Ishmayeli.
Lezi yizizukulwane zabo: izibulo lika-Ishmayeli uNebhayothi, uKhedari, u-Adibheli, uMibhishamu,
uMishima, uDuma, uMasa, uHadadi, uThema,
uJethuru, uNafishi, noKhedema. Laba babengamadodana ka-Ishmayeli.
Amadodana kaKhethura, isancinza sika-Abhrahama: uZimrani, uJokishani, uMedani, uMidiyani, u-Ishibhaki, uShuwa. Amadodana kaJokishani: uSheba noDedani.
Amadodana kaMidiyani: u-Efa, u-Eferi, uHanokhi, u-Abhida, u-Elidaha. Bonke laba babengamadodana kaKhethura.
U-Abhrahama wazala u-Isaka. Amadodana ka-Isaka: u-Esawu no-Israyeli.
Amadodana ka-Esawu: u-Elifazi, uRehuweli, uJewushe, uJalamu, noKora.
Amadodana ka-Elifazi: uThemani, u-Omari, uZefi, uGathamu, uKenazi, uThimna no-Amaleki.
Amadodana kaRehuweli: uNahathi, uZera, uShama noMiza.
Amadodana kaSeyiri: uLothani, uShobhali, uZibheyoni, u-Ana, uDishoni, u-Ezeri noDishani.
Amadodana kaLothani: uHori, noHomamu; udadewabo kaLothani kwakunguThimna.
Amadodana kaShobhali: u-Aliyani, uManahathi, u-Ebhali, uShefi no-Onamu. Amadodana kaZibheyoni: u-Aya, no-Ana.
Indodana ka-Ana: uDishoni. Amadodana kaDishoni: uHamrani, u-Eshibhani, uJithrani noKherani.
Amadodana ka-Ezeri: uBhilihani, uZahawana noJahakhani. Amadodana kaDishani: u-Uze no-Arana.
Lawa ngamakhosi abusa kwa-Edomi, kungakabi bikho nkosi eyayibusa abantu bakwa-Israyeli: uBhela, indodana kaBheyori. Igama lomuzi wakhe kwakuseDinihaba.
UBhela wakhothama; kwabekwa uJobhabhi, indodana kaZera waseBhozira, esikhundleni sakhe.
UJobhabhi wakhothama; uHushamu wakwaThemani wabusa esikhundleni sakhe.
UHushamu wakhothama; esikhundleni sakhe kwabusa uHadadi, indodana kaBhedadi, owanqoba abakwaMidiyani esifundeni kwaMowabi. Igama lomuzi wakhe kwakuyi-Avithi.
UHadadi wakhothama; kwabusa uSamla waseMazireka, esikhundleni sakhe.
USamla wakhothama, kwabusa uShawule waseRehobhothi ngasemfuleni, esikhundleni sakhe.
UShawule wakhothama; kwabusa uBali Hanani, indodana ka-Akhibhori, esikhundleni sakhe.
UBhali Hanani wakhothama; kwabusa uHadadi, esikhundleni sakhe. Igama lomuzi wakhe kwakuyiPhayi. Igama lomkakhe kunguMehethabheli, indodakazi kaMathiredi, indodakazi kaMezahabhi.
UHadadi naye wafa. Nanka amagama ezikhulu zakwa-Edomi: uThimna, u-Aliya, uJethethi,
u-Oholibhama, u-Ela, uPhinoni,
uKhenazi, uThemani, uMibhizari,
uMagidiyeli no-Iramu. Yilezo-ke izikhulu zakwa-Edomi.
Nanka amadodana ka-Israyeli: uRubeni, uSimeyoni, uLevi, uJuda, u-Isakhare, uZebuloni,
uDani, uJosefa, uBhenjamini, uNafethali, uGadi no-Asheri.
Amadodana kaJuda: u-Eri, u-Onani noShela, laba bobathathu wabazala kumKhananikazi, uBhathi Shuwa. U-Eri, izibulo likaJuda, wenza okubi phambi kukaSimakade; uSimakade wambulala.
UThamari, umalokazana wakwakhe, wamzalela uPherezi, noZera. Esewonke amadodana kaJuda ayeyisihlanu.
Amadodana kaPherezi: uHezironi noHamule.
Amadodana kaZera: uZimri, u-Ethani, uHemani, uKhalikholi noDara; esewonke ayeyisihlanu.
Amadodana kaKharmi: u-Akhari, umhluphi ka-Israyeli, owenza isiphambeko ngokuqalekisiweyo.
Indodana ka-Ethani: u-Azariya.
Amadodana kaHezironi awazalelwayo: uJerameli, uRamu noKhelubhayi.
URamu wazala u-Aminadaba; u-Aminadaba wazala uNaheshoni, isikhulu sabakwaJuda;
uNaheshoni wazala uSalima; uSalima wazala uBhowazi;
uBhowazi wazala u-Obhede; u-Obhede wazala uJese.
UJese wazibula ngo-Eliyabe, owesibili kwaba ngu-Abhinadaba, owesithathu kwaba nguShimeya,
owesine kwaba nguNethaneli, owesihlanu kwaba nguRadayi,
owesithupha kwaba ngu-Osemi, owesikhombisa kwaba nguDavide;
odadewabo: kwakunguZeruya no-Abhigayili. Amadodana kaZeruya: u-Abhishayi, uJowabe no-Asaheli, ayemathathu.
U-Abhigayili wazala u-Amasa. Uyise ka-Amasa kwakunguJetheri, umIshmayeli.
UKhalebhi, indodana kaHezironi, wazala ku-Azuba, umkakhe, nakuJeriyothi; nanka amadodana akhe: uJesheri, uShobhabhi no-Aridoni.
Esefile u-Azuba; uKhalebhu wathatha u-Efrathi, wamzalela uHure.
UHure wazala u-Uri; u-Uri wazala uBhezaleli.
Kwathi sekwedlule isikhathi, uHezironi wangena indodakazi kaMakhiri, uyise kaGileyadi. Wamthatha eseneminyaka engama-60, wamzalela uSegubhi.
USegubhi wazala uJayire, owayenemizi engama-23 kwaGileyadi.
UGeshuri no-Aramu bathatha imizana kaJayiremi, iKenathi nemizana yalo, imizi engama-60. Bonke laba babengamadodana kaMakhiri, uyise kaGileyadi.
Emva kokufa kukaHezironi eKhalebhu Efratha, u-Abhiya, umkaHezironi, wamzalela u-Ashuri uyise kaThekhowa.
Amadodana kaJerameli, izibulo likaHezironi, kwakunguRamu izibulo, elanywe ngoBhuna, u-Oreni, u-Osemi no-Ahiya.
UJerameli wayenomunye umfazi, igama lakhe kungu-Athara; engunina ka-Onamu.
Amadodana kaRamu, izibulo likaJerameli, kwakunguMahazi, uJamini no-Ekheri.
Amadodana ka-Onamu kwakunguShamayi noJada. Amadodana kaShamayi: kwakunguNadabi no-Abhishuri.
Igama lomka Abhishuri kwakungu-Abhihayili, wamzalela u-Ahibhani noMolidi.
Amadodana kaNadabi: uSeledi no-Aphayimi; uSeledi wafa engenantwana.
Indodana ka-Aphayimi: kwakungu-Ishi. Indodana ka-Ishi: kwakunguSheshani. Indodana kaSheshani: kwakungu-Ahilayi.
Amadodana kaJada, umfowabo kaShamayi: kwakunguJetheri noJonathani; uJetheri wafa engenamntwana.
Amadodana kaJonathani: kwakunguPhelethi noZaza. Laba babengamadodana kaJerameli.
USheshani wayengenamadodana, enamadodakazi wodwa. USheshani wayenenceku eyayivela eGibhithe, igama layo kunguJariha.
USheshani waganisela uJariha, inceku yakhe, indodakazi yakhe, ukuba ibe ngumkakhe; wamzalela u-Athayi.
U-Athayi wazala uNathani; uNathani wazala uZabhadi.
UZabhadi wazala u-Efilali; u-Efilali wazala u-Obhede.
U-Obhede wazala uJehu; uJehu wazala u-Azariya.
U-Azariya wazala uHelezi; uHelezi wazala u-Eleyasa.
U-Eleyasa wazala uSisamayi; uSisamayi wazala uShalumi,
uShalumi wazala uJekhamiya; uJekhamiya wazala u-Elishama.
Amadodana kaKhalebhu, umfowabo kaJerameli: kwakunguMesha izibulo lakhe, owayenguyise kaZifi, namadodana kaMaresha, uyise kaHebhroni.
Amadodana kaHebhroni: kwakunguKhora, uThaphuwa, uRekemi noShema.
UShema wazala uRahamu, uyise kaJorikeyamu; uRekemi wazala uShamayi.
Indodana kaShamayi: kwakunguMahoni; uMahoni wayenguyise kaBhethi Zuri.
U-Efa, isancinza sikaKhalebhu, wazala uHarana, uMoza, noGazezi; uHarana wazala uGazezi.
Amadodana kaJadayi: kwakunguRegemi, uJothamu, uGeshani, uPhelethi, u-Efa noShahafi.
UMahakha, isancinza sikaKhalebhu, wazala uShebheri noThirihana.
Wazala noShahafi, uyise kaMadimana, uSheva, uyise kaMakhibhena, noyise kaGibheya. Indodakazi kaKhalebhu kwakungu-Akhisa.
Nampa ababengabozalo lukaKhalebhu: amadodana kaHure, izibulo lika-Efratha: kwakunguShobhali, uyise kaKiriyathi Jeharimi,
uSalima uyise kaBhethlehema, noHarefi uyise kaBhethi Gaderi.
UShobhali, uyise kaKiriyathi Jeharimi, wayenalawa madodana: oHarowe nengxenye kaMenuhothi.
Imindeni kaKiriyathi Jeharimi kwakungamaJetheri, amaPhuthi, amaShumathi namaMishirayithi; kubo kwavela amaZorathi nama-Eshithawoli.
Amadodana kaSalima: kwakunguBhethlehema, uNethofa, u-Atharothi Bhethi Jowabe, nengxenye yamaManahathi, amaZori.
Imindeni yababhali ababehlala eJabhezi: ngamaThirathi, amaShimeyathi namaSukhathi. Laba babengamaKheni ayevela kuHamathi, uyise wendlu kaRekhabhi.
Nanka amagama amadodana kaDavide abamzalela wona eHebhroni: izibulo u-Amnoni ku-Ahinohama, umHizireyelikazi; owesibili nguDaniyeli, ku-Abhigayili, umKharmelikazi;
owesithathu ngu-Absalomu, indodana kaMahakha, indodakazi kaThalimayi, inkosi yaseGeshuri; owesine ngu-Adoniya, indodana kaHagithi;
owesihlanu nguShefathiya ku-Abhithali; owesithupha ngu-Ithereyamu ku-Egila, umkakhe.
Wazalelwa ayisithupha eHebhroni; wabusa khona iminyaka eyisikhombisa nezinyanga eziyisithupha; eJerusalema wabusa iminyaka engama-33.
Nanka-ke amadodana abamzalela wona eJerusalema: uShimeya, uShobhabhi, uNathani noSolomoni, ayemane, kuBhathi Shuwa, indodakazi ka-Amiyeli wazala:
uJibhari, u-Elishama, u-Elifelethi,
uNoga, uNefegi, uJafiya,
u-Elishama, u-Eliyada no-Elifeleti, ayeyisishiyagalolunye.
Wonke lawo kwakungamadodana kaDavide, ngaphandle kwalawo ayezalwa yizancinza. Udadewabo kwakunguThamari.
Indodana kaSolomoni kwakunguRehobhowamu, yena wazala u-Abhiya. U-Abhiya wazala u-Asa; u-Asa wazala uJehoshafathi.
UJehoshafathi wazala uJoramu; yena wazala u-Ahaziya; yena wazala uJowashi.
UJowashi wazala u-Amaziya; yena wazala u-Azariya; yena wazala uJothamu.
UJothamu wazala u-Ahazi; yena wazala uHezekiya; yena wazala uManase.
UManase wazala u-Amoni; yena wazala uJosiya.
UJosiya wazala amadodana amane: izibulo nguJohanani, eyesibili nguJehoyakimi, eyesithathu nguZedekiya, eyesine nguShalumi.
Amadodana kaJehoyakimi: uJekhoniya, indodana yakhe, noZedekiya, indodana yakhe.
Amadodana kaJekhoniya umthunjwa: kwakunguSheyalitiyeli,
uMalikhiramu, uPhedaya, uShenazari, uJekamiya, uHoshama noNedabiya.
Amadodana kaPhedaya: kwakunguZerubhabhele noShimeyi. Amadodana kaZerubhabhele: kwakunguMeshulamu noHananiya nodadewabo uShelomithi,
uHashubha, u-Oheli, uBherekhiya, uHasadiya noJushabhi Hesedi, eyisihlanu esewonke.
Amadodana kaHananiya: kwakunguPhelathiya, uJeshaya, amadodana kaRefaya, amadodana ka-Arinani, amadodana ka-Obhadiya, namadodana kaShekhaniya.
Indodana kaShekhaniya: kwakunguShemaya; amadodana kaShemaya: kwakunguHathushi, u-Igali, uBhariya, uNehariya noShafathi, eyisithupha esewonke.
Amadodana kaNehariya: kwakungu-Eliyohenayi, uHezekiya no-Azirikamu, emathathu esewonke.
Amadodana ka-Eliyohenayi: kwakunguHodaviya, u-Eliyashibhi, uPhelaya, u-Akubhi, uJohanani, uDelaya no-Anani, eyisikhombisa esewonke.
Amadodana kaJuda: kwakunguPherezi, uHezironi, uKharmi, uHure, noShobhali.
URewaya, indodana kaShobhali, wazala uJahathi; uJahathi wazala u-Ahumayi noLahadi. Laba babengabemindeni yamaZorathi.
Nampa abazalwa ngu-Ethami: nguJizreyeli, u-Ishima, u-Idibhashi, udadewabo kunguHaseleliphoni,
uPhenuweli, wayenguyise kaGedori, u-Ezeri kunguyise kaHusha. Yilabo-ke ababengabakaHure, izibulo lika-Efratha, uyise kaBhethlehema.
U-Ashuri, uyise kaThekhowa, wayenabafazi ababili, uHela noNahara.
UNahara wamzalela u-Ahuzamu, uHeferi, uThemeni noHawahashithari. Yilabo ababengamadodana kaNahara.
Amadodana kaHela: kwakunguZerethi, uJizihari no-Ethinani.
UKozi wazala u-Anubhi, uZobeba, nemindeni ka-Ahariheli, indodana kaHarumu.
UJabhezi wayetuseka kunabafowabo. Unina wamqamba igama wathi: “NguJabhezi,” ngoba wathi: “Ngokuba ngamzala ngobuhlungu.”
UJabhezi wakhuleka kuNkulunkulu ka-Israyeli, wathi: “Sengathi ungangibusisa nokungibusisa, wandise umngcele wami, isandla sakho sibe nami, ungivikele ebubini, ngingehlelwa wubuhlungu.” UNkulunkulu wamnika akucelayo.
UKhelubhi, umfowabo kaShubha, wazala uMehiri owayenguyise ka-Eshithoni.
U-Eshithoni wazala uBhebhi Rafa, uPhaseya, noThehina, uyise ka-Iri Nahashi. Yilabo-ke ababengamadodana kaRekha.
Amadodana kaKenazi: kwakungu-Otheniyeli noSeraya; indodana ka-Otheniyeli: kunguHathathi.
UMehonothayi wazala u-Ofira. UZeraya wazala uJowabe, uyise wesigodi sabakhandi, ngokuba babengabakhandi.
Amadodana kaKhalebhu, indodana kaJefune: kwakungu-Iru, u-Ela, noNahamu, namadodana ka-Ela, noKenazi.
Amadodana kaJehaleli: kwakunguZifi, uZifa, uThiriya no-Asareli.
Amadodana ka-Ezra: kwakunguJetheri, uMeredi, u-Eferi, noJaloni; wazala uMiriyamu, uShamayi no-Ishibha, uyise ka-Eshithemowa.
Umkakhe owayengumJudakazi wazala uJeredi, uyise kaGedori, uHebhere, uyise kaSokho, noJekuthiyeli, uyise kaZanowa. Abanye babengamadodana kaBhithiya, indodakazi kaFaro, eyathathwa nguMeredi.
Amadodana omkaHodiya, udadewabo kaNahamu, ayenguyise kaKeyila, umGarimi, no-Eshithemowa, umMahakha.
Amadodana kaShimoni: kwakungu-Amnoni, uRina, uBheni Hanani noThiloni. Amadodana ka-Ishi: kwakunguZohethi noBheni Zohethi.
Amadodana kaShela, indodana kaJuda: kwakungu-Eri, uyise kaLekha, uLahada, uyise kaMaresha, nemindeni yendlu yabaluka ilineni elicolekileyo, bendlu ka-Ashibheya,
uJokimi, nabantu baseKhozebha, uJowashi, uSarafi, ababebusa kwaMowabi, noJashubhi Lehemi. Kepha lezi zindaba ngezasemandulo.
Labo babengababumbi nabakhileyo eNethayimi naseGedera; bahlala khona nenkosi, benza umsebenzi wayo.
Amadodana kaSimeyoni: kwakunguNemuweli, uJamini, uJaribi, uZera noShawule,
uShalumi indodana yakhe, uMibhisamu indodana yakhe noMishima, indodana yakhe.
Amadodana kaMishima: kwakunguHamuweli, uZakhuri noShimeyi.
UShimeyi wayenamadodana ali-16, namadodakazi ayisithupha, kodwa abafowabo babengenabantwana abaningi, nomndeni wabo awandanga njengabakwaJuda.
Bahlala eBheri Sheba, eMolada, eHazari Shuwali,
eBhiliha, e-Ezemi, eTholadi,
eBhethuweli, eHorma, eZikilagi,
eBhethi Marikhabhothi, eHazari Susimi, eBhethi Bhiri, naseShaharayimi. Yileyo-ke okwakuyimizi yabo, kwaze kwabusa uDavide.
Imizana yabo: i-Ethamu, i-Ayini, iRimoni, iThokheni ne-Ashani, kuyimizi eyisihlanu,
nayo yonke imizana eyayiyizungezile, kwaze kwaba seBhali. Lezo kwakuyizindawo zabo, bebhalwe ngezizukulwane zabo.
UMeshobhabhi, uJamilekhi, uJosha, indodana ka-Amasiya,
uJoweli, uJehu kaJoshibhiya kaSeraya ka-Asiyeli,
u-Eliyohenayi, uJahakhoba, uJeshohaya, u-Asaya, u-Adiyeli, uJesimiyeli, uBhenaya,
noZiza kaShifi ka-Aloni kaJedaya kaShimri kaShemaya.
Bonke laba ababizwe ngamagama ngenhla babengabaholi emindenini yabo. Izindlu zokhokho babo zanda kakhulu.
Baya ngasekungeneni eGedori, ngasohlangothini lwasempumalanga lwesigodi, bayofunela izimvu zabo idlelo.
Bathola idlelo elivundileyo nelihle; izwe lalibanzi nxazombili, lizolile, linokuthula, ngokuba ababehlala khona kuqala ngabakwaHamu.
Labo bafika ngezinsuku zikaHezekiya, inkosi yakwaJuda, babhubhisa amathende abo nawamaMehuni atholakala lapho, babaqothula kuze kube namuhla, base behlala endaweni yabo, ngokuba bathola idlelo lemfuyo yabo lapho.
Abanye babo ababengabozalo lukaSimeyoni babengama-500, baya entabeni iSeyiri beholwa nguPhelathiya, uNehariya, uRefaya no-Uziyeli, indodana ka-Ishi.
Bayibhubhisa insali yama-Amaleki eyayiphunyukile, basahlala lapho kuze kube namuhhla.
Amadodana kaRubeni, izibulo lika-Israyeli. Wayeyizibulo, kodwa ngenxa yokuba wangcolisa umbhede kayise, ubuzibulo bakhe banikwa amadodana kaJosefa, indodana ka-Israyeli, futhi akabhalwangwa nasezizukulwaneni njengezibulo.
Noma uJuda wayenamandla kunabafowabo, kwavela kuye umbusi, ubuzibulo nokho babungobukaJosefa.
Amadodana kaRubeni, izibulo lika-Israyeli: kwakunguHanokhi, uPhalu, uHezironi noKharmi.
Amadodana kaJoweli: kwakunguShemaya, uGogi, uShimeyi,
uMikha, uRewaya, uBhali,
noBhera, owathunjwa nguThiligathi Phileneseri, inkosi yase-Asiriya; wayengumholi wakwaRubeni.
Abafowabo nabo babebhalwe ngemindeni yabo, nangezizukulwane zabo: uJehiyeli, inhloko noZakhariya,
uBhela ka-Azazi kaShema kaJoweli, owayehlala e-Aroweri kwaze kwaba seNebho, noBhali Mehoni.
Wakha ngasempumalanga kwaze kwaba sekuqaleni kwehlane elisuka emfuleni iYufrathe, ngokuba imfuyo yabo yanda kwaGileyadi.
Emihleni kaSawule bahlasela amaHagiri, bawanqoba, base behlala emathendeni awo ngasempumalanga yalo lonke elakwaGileyadi.
Amadodana kaGadi ahlala maqondana nabo eBhashani, kwaze kwaba seSaleka.
Izinhloko kwakunguJoweli, owesibili kunguShafamu, kulandele uJahanayi noShafani.
Abafowabo babemi kanje ngokwezindlu zoyise: kwakunguMikhayeli, uMeshulamu, uShebha, uJorayi, uJakhani, uZiya no-Ebhere, beyisikhombisa sebebonke.
Laba babengamadodana ka-Abhihayili kaHuri kaJarowa kaGileyadi kaMikhayeli kaJeshishayi kaJahido kaBhuzi.
U-Ahi ka-Abhidiyeli kaGuni wayeyinhloko yezindlu zokhokho babo.
Bahlala kwaGileyadi eBhashani nasemizaneni yalo, nasemadlelweni wonke eSharoni, kwaze kwaba semingceleni yawo.
Bonke laba babhalwa ngezizukulwane zabo emihleni kaJothamu, inkosi yakwaJuda, nasemihleni kaJerobhowamu, inkosi yakwa-Israyeli.
Amadodana kaRubeni, nabakwaGadi, nengxenye yesizwana sakwaManase, kwakungamadoda anamandla, aphatha ihawu nenkemba, ansale umnsalo futhi eqeqeshelwe ukulwa, ayeyizi-44 760 aya empini,
ahlasela amaHagiri, noJethuri, noNafishi noNodabhi.
Ngesikhathi ethola usizo lokulwa nabo, amaHagiri anikelwa ezandleni zawo nabo bonke ababenawo, ngokuba akhala kuNkulunkulu empini, amncenga, ngoba ayemethemba.
Adla izinkomo zabo, amakamela ayizi-50 000, izimvu eziyizi-250 000, izimbongolo eziyizi-2 000, nabantu abayizi-100 000.
Kwawa abaningi bebulewe, ngoba impi yayingekaNkulunkulu. Ahlala endaweni yabo aze athunjwa.
Abantu ababeyingxenye yesizwana sakwaManase bahlala kulelo lizwe, kusukela eBhashani kuze kube seBhali Hermoni, eSeniri, nasentabeni iHermoni.
Nazi izinhloko zezindlu zokhokho babo: ngu-Eferi, u-Ishi, u-Eliyeli, u-Aziriyeli, uJeremiya, uHodaviya noJahidiyeli; babengamaqhawe anamandla, amadoda anegama futhi eyizinhloko zezindlu zokhokho babo.
Kepha baphambuka kuNkulunkulu wokhokho babo, balandela onkulunkulu babantu balelo lizwe, baphinga, uNkulunkulu ababhubhisa phambi kwabo.
UNkulunkulu ka-Israyeli wavusa umoya kaPhuli, inkosi yase-Asiriya, nomoya kaThiligathi Philineseri, inkosi yase-Asiriya, babathumba abakwaRubeni, abakwaGadi, nengxenye yesizwana sakwaManase, babayisa eHala, eHabhori, eHara, nasemfuleni iGozani, kuze kube namuhla.
Amadodana kaLevi: uGereshoni, uKohathi, noMerari.
Amadodana kaKohathi: u-Amramu, uJizihari, uHebhroni no-Uziyeli.
Amadodana ka-Amramu: u-Aroni, uMose, noMiriyamu. Amadodana ka-Aroni: uNadabi, u-Abhihu, u-Eleyazare no-Ithamari.
U-Eleyazare wazala uFinehasi; uFinehasi wazala u-Abhishuwa;
u-Abhishuwa wazala uBhuki; uBhuki wazala u-Uzi;
u-Uzi wazala uZeraya; uZeraya wazala uMerayothi;
uMerayothi wazala u-Amariya; u-Amariya wazala u-Ahithubi;
u-Ahithubi wazala uZadoki; uZadoki wazala u-Ahimahazi;
u-Ahimahazi wazala u-Azariya; u-Azariya wazala uJohanani;
uJohanani wazala u-Azariya; nguye owayengumphristi endlini eyakhiwa nguSolomoni eJerusalema.
U-Azariya wazala u-Amariya; u-Amariya wazala u-Ahithubi.
U-Ahithubi wazala uZadoki; uZadoki wazala uShalumi;
uShalumi wazala uHilikiya; uHilikiya wazala u-Azariya;
u-Azariya wazala uSeraya; uSeraya wazala uJehozadaki,
kodwa uJehozadaki wahamba ngesikhathi uSimakade ethumba uJuda neJerusalema ngesandla sikaNebukhadinezari.
Amadodana kaLevi: kwakunguGereshomu, uKhohathi noMerari.
Nanka amagama amadodana kaGereshomu: nguLibhini noShimeyi.
Amadodana kaKhohathi: ngu-Amramu, uJizihari, uHebhroni no-Uziyeli.
Amadodana kaMerari: nguMaheli noMushi. Nansi imindeni yabaLevi ngokokhokho babo:
kwaGereshomu: kwakunguLibhini, uJahathi, uZima,
uJowa, u-Ido, uZera noJewatherayi.
Amadodana kaKhohathi: kwakungu-Aminadaba, uKhora, u-Asiri,
u-Elikhana, u-Ebhiyasafa, u-Asiri,
uThathi, u-Uriyeli, u-Uziya, uShawule.
Amadodana ka-Elikhana: kwakungu-Amasayi no-Ahimothi,
u-Elikhana, uZofayi, uNahathi,
u-Eliyabe, uJerohamu no-Elikhana.
Amadodana kaSamuweli: izibulo kwakunguJoweli, eyesibili kungu-Abhiya.
Amadodana kaMerari: kwakunguMaheli, uLibhini, uShimeyi, u-Uza,
uShimeya, uHagiya no-Asaya.
Nampa abantu uDavide ababeka ukuba bahole ukuhlabelela endlini kaSimakade, ngesikhathi umphongolo usubekwe khona.
Babekhonza ngokuhlabelela phambi kwethabanakeli lethende lokuhlangana, waze uSolomoni wakha indlu kaSimakade eJerusalema. Babambelela njengokwenqubo yomsebenzi wabo.
Yilaba ababema namadodana abo: kumadodana amaKhohathi: nguHemani, umhlabeleli, kaJoweli, kaSamuweli,
ka-Elikhana, kaJerohamu, ka-Eliyeli, kaThowa,
kaZufi, ka-Elikhana, kaMahathi, ka-Amasayi,
ka-Elikhana, kaJoweli, ka-Azariya, kaZefaniya,
kaThathi, ka-Asiri, ka-Ebhiyasafa, kaKhora,
kaJizihari, kaKhohathi, kaLevi, ka-Israyeli.
Umfowabo u-Asafa wayemi ngakwesokunene sakhe; u-Asafa, kaBherekhiya, kaShimeya,
kaMikhayeli, kaBhahaseya, kaNalikhiya,
ka-Ethini, kaZera, ka-Adaya,
ka-Ethani, kaZima, kaShimeyi,
kaJahathi, kaGereshomu, kaLevi.
Amadodana kaMerari, abafowabo ababema ngakwesokunene: kungu-Ethani, kaKhishi, ka-Abhidi, kaMalukhi,
kaHashabhiya, ka-Amaziya, kaHilikhiya,
ka-Amizi, kaBhani, kaShemeri,
kaMaheli, kaMushi, kaMerari, kaLevi.
Abafowabo abaLevi banikwa inkonzo yonke yethabanakeli lendlu kaNkulunkulu.
U-Aroni namadodana akhe babeshiya iminikelo e-althare leminikelo yokushiswa nase-althare lempepho, benza wonke umsebenzi endaweni engcwelengcwele, benzela u-Israyeli ukubuyisana njengakho konke ayale ngakho uMose, inceku kaNkulunkulu.
Nanka amadodana ka-Aroni: ngu-Eleyazare, uFinehasi, u-Abhishuwa,
uBhuki, u-Uzi, uZeraya,
uMerayothi, u-Amariya, u-Ahithubi,
uZadoki no-Ahimahazi.
Nazi izindawo zawo zokuhlala, izinkambu zawo emingceleni yawo: amadodana ka-Aroni awomndeni kaKhohathi, ngokuba yiwo adliwa wunkatho kuqala.
Wona anikwa iHebhroni, kwaJuda namadlelo alizungezileyo.
Kepha amasimu omuzi nemizana yawo bakunika uKhalebhu, indodana kaJefune.
Abozalo luka-Aroni balunika imizi yokuphephela: iHebhroni, neLibhina namadlelo ayo, iJathiri, ne-Eshithemowa namadlelo ayo,
iHileni namadlelo alo, iDebhiri namadlelo alo,
i-Ashani namadlelo alo, iBhethi Shemeshi namadlelo alo.
Esizwaneni sakwaBhenjamini bawanika iGebha namadlelo alo, i-Alemethi namadlelo alo, ne-Anathothi namadlelo alo. Isiyonke imizi yawo ngokwemindeni yawo yayiyimizi eli-13.
Abozalo lukaKhohathi ababesele banikwa ngonkatho imizi elishumi emndenini, engxenyeni yesizwana sakwaManase, emindenini yakhona ngokwemindeni yawo.
Abozalo lukaGereshomu, ngemindeni yabo, anikwa esizwaneni sakwa-Isakhare, nesakwa-Asheri, nesakwaNafethali, nasengxenyeni yesizwana sakwaManase, eBhashani, kwaba yimizi eli-13.
Abozalo lukaMerari banikwa ngonkatho ngokwemindeni yabo esizwaneni sakwaRubeni, nakwesakwaGadi, nakwesakwaZebuloni, kwaba yimizi eli-12.
Abakwa-Israyeli banika abaLevi leyo mizi namadlelo ayo.
Leyo mizi ebizwe ngamagama banikwa yona ngonkatho esizwaneni sakwaJuda, nakwesakwaSimeyoni, nakwesakwaBhenjamini.
Eminye imindeni yabozalo lukaKhohathi yayinemizi emingceleni yesizwana sakwa-Efrayimi.
Bayinika imizi yokuphephela: iShekhemi, ezintabeni kwa-Efrayimi, namadlelo alo, iGezeri namadlelo alo,
iJokhimeyamu namadlelo alo, iBhethi Horoni namadlelo alo,
i-Ajaloni namadlelo alo, iGathi Rimoni namadlelo alo,
nasengxenyeni yesizwana sakwaManase, i-Anere namadlelo alo, neBhileyamu namadlelo alo, kwaba ngokomndeni owawusele wozalo lukaKhohathi.
Abozalo lukaGereshomu banikwa emndenini wengxenye yesizwana sakwaManase iGolanu, iBhashani namadlelo alo, i-Ashitharothi namadlelo alo;
nasesizwaneni sakwa-Isakhare, iKedeshi namadlelo alo, iDabherathi namadlelo alo,
iRamothi namadlelo alo, i-Anemi namadlelo alo;
nasesizwaneni sakwa-Asheri: iMashali namadlelo alo, i-Abhidoni namadlelo alo,
iHukhokhi namadlelo alo, iRehobe namadlelo alo;
nasesizwaneni sakwaNafethali, iKedeshi, eGalile, namadlelo alo, iHamoni namadlelo alo, iKiriyathayimi namadlelo alo.
Kwathi abozalo lukaMerari abebesele banikwa esizwaneni sakwaZebuloni: iRimono namadlelo alo, iGabhori namadlelo alo,
phesheya kweJordani ngaseJeriko, empumalanga neJordani, esizwaneni sakwaRubeni, banikwa iBhezeri, ehlane, namadlelo alo, iJahaza namadlelo alo,
iKedemothi namadlelo alo, neMefahathi namadlelo alo;
nasesizwaneni sakwaGadi, banikwa iRamothi, kwaGileyadi, namadlelo alo, iMahanayimi namadlelo alo,
iHeshibhoni namadlelo alo, neJazeri namadlelo alo.
Amadodana ka-Isakhare: kwakunguThola, uPhuwa, uJashubhi noShimroni; esewonke ayemane.
Amadodana kaThola: kwakungu-Uzi, uRefaya, uJeriyeli, uJahemayi, u-Ibhisamu, noShemuweli. Babeyizinhloko zezindlu zokhokho babo, abakwaThola, bengamaqhawe anamandla ngezizukulwane zabo. Ubuningi babo ngesikhathi sikaDavide babeyizi-22 600.
Indodana ka-Uzi: kunguJizirahiya. Amadodana kaJizirahiya: kwakunguMikhayeli, u-Obhadiya, uJoweli noJishiya; eyisihlanu esewonke futhi wonke eyizinhloko.
Kuwo kwakukhona amabutho ngamaviyo awo, ezizukulwaneni zezindlu zokhokho bawo. Kwakungamabutho ayizi-36 000, ngokuba babenabafazi abaningi namadodana amaningi.
Abakwa-Isakhare ngokwemindeni babeyizi-87 000, bengamaqhawe, futhi bonke bebhalwe ngezizukulwane zabo.
Amadodana kaBhenjamini: kwakunguBhela, uBhekheri noJediyayeli; emathuthu esewonke.
Amadodana kaBhela: kwakungu-Eshibhoni, u-Uzi, u-Uziyeli, uJeremothi, no-Iri, eyisihlanu esewonke. Ayeyizinhloko zezindlu zawoyise, engamaqhawe anamandla, ayeyizi-22 034, wonke ebhalwe ngokwezizukulwane zawo.
Amadodana kaBhekheri: kwakunguZemira, uJowashi, u-Eliyezeri, u-Eliyohenayi, u-Omri, uJeremothi, u-Abhiya, u-Anathothi no-Alemethi. Bonke laba abangenhla kwakungamadodana kaBhekheri.
Abhalwa ngokwezizukulwane zawo, eyizinhloko zezindlu zokhokho bawo, engamaqhawe anamandla, eyizi-20 200.
Indodana kaJediyayeli: kwakunguBhilihani. Amadodana kaBhilihani: kunguJewushe, uBhenjamini, u-Ehudi, uKhenahana, uZethani, uTharishishi no-Ahishahari.
Bonke laba babengamadodana kaJediyayeli, beyizinhloko zezindlu zawoyise, bengamaqhawe anamandla, beyizi-17 000 abase bekulungele ukuphuma impi.
Amadodana ka-Iri: kwakunguShuphimi noHuphimi. UHushimi eyindodana ka-Aheri.
Amadodana kaNafethali: kwakunguJaziyeli, uGuni, uJezeri noShalumi, amadodana kaBhiliha.
Amadodana kaManase: kwakungu-Asiriyeli ayemzalelwe isancinza sakhe, umAramukazi, sazala noMakhiri uyise kaGileyadi.
UMakhiri wathathela uHuphimi noShuphimi abafazi, udadewabo kwakunguMahakha. Igama lowesibili kwakunguZelofehadi. UZelofehadi wayenamadodakazi wodwa.
UMahakha, umkaMakhiri, wazala indodana, wayiqamba igama wathi nguPhereshi; igama lomfowabo kunguShereshi; amadodana akhe kungu-Ulamu noRakhemi.
Indodana ka-Ulamu: kunguBhedani. Labo babengabozalo lukaGileyadi kaMakhiri kaManase.
Udadewabo, uHamolekhethi, wazala u-Ishihodi, u-Abhiyezeri noMahela.
Amadodana kaShemida: kwakungu-Ahiyani, uShekhemi, uLikhihi no-Aniyamu.
Abozalo luka-Efrayimi: kwakunguShuthela, uBheredi, uThahathi, u-Eleyada uThahathi,
uZabhadi, uShuthela, u-Ezeri no-Eleyadi, babulawa ngabantu baseGathi ababezelwe kulelo lizwe, ngokuba behla ukuzothatha imfuyo yabo.
U-Efrayimi uyise walila izinsuku eziningi; abafowabo beza bamduduza.
Walala nomkakhe, wakhulelwa, wazala indodana, wayiqamba igama wathi nguBheriya, ngokuba wathi indlu yakhe beyehlelwe yinhlekelele.
Indodakazi yakhe kwakunguSheyera owakha iBhethi Horoni eZansi naseNhla, ne-Uzeni Sheyera.
Indodana yakhe kwakunguRefa, uThela, uThahani,
uLadani, u-Amihudi, u-Elishama,
uNuni, noJoshuwa.
Ifa labo nezindawo zabo zokuhlala kwakuyiBhethele nemizana yalo, ngasempumalanga kuyiNaharani, ngasentshonalanga kuyiGezeri nemizana yalo, iShekemi nemizana yalo, kwaze kwaba se-Aya nemizana yalo;
ngasemingceleni yabakwaManase kuyiBhethi Sheyani nemizana yalo, iThahanakhi nemizana yalo, iMegido nemizana yalo, neDori nemizana yalo. Kuleyo ndawo kwahlala abakwaJosefa, indodana ka-Israyeli.
Amadodana ka-Asheri: kwakunguJimna, u-Ishiva, u-Ishivi, uBheriya, nodadewabo uSera.
Amadodana kaBheriya: kunguHebhere, noMalikhiyeli owayenguyise kaBhirizayithi.
UHebhere wazala uJafelethi, uShomeri, uHothamu, noShuwa, udadewabo.
Amadodana kaJafelethi: kwakunguPhasakhi, uBhimihali, no-Ashivathi. Laba kwakungamadodana kaJafelethi.
Amadodana kaShemeri: kwakungu-Ahi, uRohiga, uJehuba no-Aramu.
Amadodana kaHelemi, umfowabo: kunguZofa, uJimna, uSheleshi no-Amali.
Amadodana kaZofa: kwakunguShuwa, uHarineferi, uShuhali, uBheri no-Imra,
uBhezeri, uHodi, uShama, uShilisha, u-Ithrani noBheyera.
Amadodana kaJetheri: kwakunguJefune, uPhisipha no-Ara.
Amadodana ka-Ula: kungu-Ara, uHaniyeli noRiziya.
Bonke laba babengabozalo luka-Asheri, izinhloko zezindlu zokhokho, amaqhawe akhethekileyo anamandla, izinhloko zabaholi. Inani labo sebebonke elibhalwe ngezizukulwane zabo ukuba balwe empini, kwakungamabutho ayizi-26 000.
UBhenjamini wazibula ngoBhela, welanywa ngu-Ashibheli, owesithathu kwaba ngu-Ahara,
owesine kwaba nguNoha, owesihlanu kwaba nguRafa.
Amadodana kaBhela: kwakungu-Adari, uGera, u-Abhihudi,
u-Abhishuwa, uNahamani, u-Ahowa,
uGera, uShefufani noHuramu.
Nanka amadodana ka-Ehudi, izinhloko zezindlu zawoyise zezakhamuzi zaseGebha, ezathunjelwa eManahathi,
zayiswa ekuthunjweni: nguNahamani, u-Ahiya, uGera owayezala u-Uza no-Ahihudi.
UShaharayimi wazala abantwana kwaMowabi, esebahambisile omkakhe uHushimi noBhahara.
Wazala amadodana kuHodeshi, umkakhe; kwakunguJobhabhi, uSibiya, uMesha, uMalikhamu,
uJewuze, uShakhiya, noMirima. Laba kwakungamadodana akhe, izinhloko zezindlu zawoyise.
Wazala kuHushimi u-Abhithubhi no-Eliphahali.
Amadodana ka-Eliphahali: kwakungu-Ebhere, uMishamu, noShemedi; yiwona akha i-Ono, neLodi, nemizana yakhona;
uBheriya, noShema babeyizinhloko zezindlu zawoyise, zezakhamuzi zase-Ajaloni, ezaxosha ababakhe eGathi.
U-Ahiyo, uShashakhi, uJeremothi,
uZebadiya, u-Aradi, u-Edere,
uMikhayeli, uJishipha, uJoha, kwakungamadodana kaBheriya.
UZebadiya, uMeshulamu, uHiziki, uHebhere,
u-Ishmerayi, uJiziliya, uJobhabhi, kwakungamadodana ka-Eliphahali.
UJakimi, uZikhiri, uZabhidi,
u-Eliyenayi, uZilethayi, u-Eliyeli,
u-Adaya, uBheraya, uShimrathi, kungamadodana kaShimeyi.
UJishiphani, u-Ebhere, u-Eliyeli,
u-Abhidoni, uZikhiri, uHanani,
uHananiya, u-Elamu, u-Anithothiya,
u-Ifideya, uPhenuweli, kwakungamadodana kaShashaki.
UShamusherayi, uShehariya, u-Athaliya,
uJahareshiya, u-Eliya, noZikhiri, kungamadodana kaJerohamu.
Laba babeyizinhloko zezindlu zawoyise, beyizinhloko ngokwezizukulwane zabo; babehlala eJerusalema.
EGibheyoni kwakuhlala uyise kaGibheyoni, igama lomkakhe kunguMahakha.
Izibulo lakhe kwakungu-Abhidoni elanywe uZuri, uKhishi, uBhali, uNadabhi,
uGedori, u-Ahiyo noZekheri.
UMakhilothi wazala uShimeya. Nabo bahlala nabafowabo eJerusalema.
UNeri wazala uKishi; uKishi wazala uSawule; uSawule wazala uJonathani, uMalikhi Shuwa, u-Abhinadaba no-Eshi Bhali.
Indodana kaJonathani kwakunguMeribhi Bhali. UMeribhi Bhali wazala uMikha.
Amadodana kaMikha: kwakunguPhithoni, uMelekhi, uThareya no-Ahazi.
U-Ahazi wazala uJehohada; uJehohada wazala u-Alemethi, u-Azimavethi, uZimri; uZimri wazala uMosa;
uMosa wazala uBhineya, uRafa, u-Eleyasa, u-Azeli.
U-Azeli wayenamadodana ayisithupha, nanka amagama awo: kwakungu-Azirikamu, uBhokheru, u-Ishmayeli, uShehariya, u-Obhadiya noHanani. Bonke laba kwakungamadodana ka-Azeli.
Amadodana ka-Esheki umfowabo: izibulo kwakungu-Ulamu, owesibili kunguJewushe, owesithathu kungu-Elifelethi.
Amadodana ka-Ulamu ayengamaqhawe anamandla, ansala umnsalo; ayenamadodana amaningi, namadodana amadodana amaningi, eyi-150. Laba babengabozalo lukaBhenjamini.
U-Israyeli wonke wabhalwa ngezizukulwane zakhe encwadini yamakhosi akwa-Israyeli. UJuda wathunjelwa eBhabhele ngenxa yeziphambeko zakhe.
Abahlala kuqala emizini eyifa labo kwakungu-Israyeli, abaphristi, abaLevi namaNethini.
EJerusalema kwakuhlala abakwaJuda, abakwaBhenjamini, nabakwa-Efrayimi, noManase:
u-Uthayi ka-Amihudi ka-Omri ka-Imri kaBhani, kwabozalo lukaPherezi kaJuda.
KumaShiloni: kwakungu-Asaya, izibulo, namadodana akhe.
Kumadodana kaZera: kunguJehuweli nabafowabo, bengama-690.
Kumadodana kaBhenjamini: kwakunguSalu kaMeshulamu kaHodaviya kaHasenuwa,
u-Ibhineya, indodana kaJerohamu, u-Ela ka-Uzi kaMikhiri, uMeshulamu kaShefathiya kaRehuweli kaJibhiniya,
nabafowabo, ngezizukulwane zabo, bengama-956. Bonke laba bantu babeyizinhloko zezindlu zoyise, ngokokhokho babo.
Kubaphristi: kwakunguJedaya, uJehoyaribi, uJakhini,
u-Azariya kaHilikiya, kaMeshulamu, kaZadoki, kaMerayothi, ka-Ahithubi, umphathi wendlu kaNkulunkulu.
No-Adaya kaJerohamu, kaPhashuri, kaMalikhiya, uMahasayi ka-Adiyeli, kaJahizera, kaMeshulamu, kaMeshilemithi, ka-Imeri,
nabafowabo, beyizinhloko zezindlu zokhokho babo, beyi-1 760, amadoda ahlakaniphile emsebenzini wenkonzo endlini kaNkulunkulu.
KubaLevi: kwakunguShemaya kaHashubhi, ka-Azirikamu, kaHashabhiya, kwabozalo lukaMerari.
KunguBhakibhakari, uHereshi, uGalali, uMathaniya kaMikha, kaZikhiri, ka-Asafa,
u-Obhadiya kaShemaya, kaGalali, kaJeduthuni, uBherekhiya ka-Asa, ka-Elikhana owayehlala emizaneni yamaNethofa.
Abalindisango kwakunguShalumi, u-Akubhi, uThalimoni, u-Ahimani, nabafowabo; uShalumi wayeyinhloko.
Kwaze kwaba yileso sikhathi bengabalindi besango lenkosi ngasempumalanga; babengabalindisango benkambu yabozalo lukaLevi.
UShalumi kaKhore, ka-Ebhiyasafa, kaKhora, nabafowabo bendlu kayise, amaKhorahi; babephethe umsebenzi wenkonzo, bengabalindi bompheme wethabanakeli. Okhokho babo babengabalindisango benkambu kaSimakade.
UFinehasi, indodana ka-Eleyazare owayebengamele ngesikhathi esidlulileyo, uSimakade wayenaye.
UZakhariya, indodana kaMeshelemiya wayengumlindisango ethendeni lokuhlangana.
Bonke ababekhethwe ukuba babe ngabalindisango babengama-212. Babhalwa ngezizukulwane zabo emizaneni yabo. UDavide noSamuweli, umboni, bababeka ezikhundleni zabo.
Bona nabozalo lwabo babephethe amasango endlu kaSimakade, indlu yethende, beyiqapha.
Kwakukhona abalindisango ezinhlangothini zozine: ngasempumalanga, entshonalanga, enyakatho, nangaseningizimu.
Abafowabo emizaneni yabo babengena njalo emveni kwezinsuku eziyisikhombisa, izikhathi ngezikhathi, ukuba babe nabo.
Abalindi abane abakhulu ababengabaLevi babesesikhundleni njalo, bengamele amakamelo nengcebo endlini kaNkulunkulu.
Ebusuku babehlala beyizungeza indlu kaNkulunkulu, ngokuba yibona okwakumele bayiqaphe, bayivule futhi ekuseni, imihla ngemihla.
Abanye babengamele izitsha zenkonzo, ngokuba zazibalwa zingeniswa, zibalwe zikhishwa.
Abanye babo babebheka impahla, izitsha zonke zendlu engcwele: impuphu, iwayini, amafutha, inhlaka namakha.
Abanye bamadodana abaphristi babegxoba amakha abe ngamafutha.
UMathithiya, omunye wabaLevi, owayeyizibulo likaShalumi, umKhorahi, wayenesikhundla sokubheka ukwenziwa kwamakhekhe ayizicaba okuthiwa amaweyifa emabhodweni.
Abanye abafowabo bamadodana amaKhohathi babengamele izinkwa zokubukwa ukuba bazilungise ngawo wonke amasabatha.
Abanye abahlabeleli babeyizinhloko zezindlu zoyise zabaLevi, besemakamelweni, bekhululiwe kweminye imisebenzi, ngokuba babesemsebenzini imini nobusuku.
Labo babeyizinhloko zezindlu zawoyise babaLevi, izinhloko ezizukulwaneni zabo, babehlala eJerusalema.
EGibheyoni kwakuhlala uyise kaGibheyoni, uJehiyeli; igama lomkakhe kunguMahakha,
Izibulo lakhe kwakungu-Abhidoni elanywe uZuri, uKhishi, uBhali, uNeri, uNadabi,
uGedori, u-Ahiyo, uZakhariya, noMikhilothi.
UMakhilothi wazala uShimeyamu. Wahlala nabafowabo eJerusalema.
UNeri wazala uKishi; uKishi wazala uSawule; uSawule wazala uJonathani, uMalikhi Shuwa, u-Abhinadaba, no-Eshi Bhali.
Indodana kaJonathani kwakunguMeribhi Bhali. UMeribhi Bhali wazala uMikha.
Amadodana kaMikha: kwakunguPhithoni, uMelekhi, uThareya no-Ahazi.
U-Ahazi wazala uJara; uJara wazala u-Alemethi, u-Azimavethi, uZimri; uZimri wazala uMosa;
uMosa wazala uBhineya, uRefaya, u-Eleyasa, u-Azeli.
U-Azeli wayenamadodana ayisithupha, nanka amagama awo: kwakungu-Azirikamu, uBhokheru, u-Ishmayeli, uShehariya, u-Obhadiya noHanani. Bonke laba kwakungamadodana ka-Azeli.
AmaFilisti alwa no-Israyeli. Abantu bakwa-Israyeli babaleka bexoshwa ngamaFilisti, abanye bawa begwaziwe entabeni iGilibhowa.
AmaFilisti amxosha uSawule namadodana akhe, abulala uJonathani, u-Abhinadaba, namaMalikhi Shuwa, amadodana kaSawule.
Impi yaba nzima kuSawule, abacibayo bamfica esezinhlungwini ezinkulu ngenxa yababemcibile.
USawule wathi odibini lwakhe: “Hosha inkemba yakho, ungigwaze ngayo, funa labo abangasokile bafike bangihlukumeze.” Kepha aluvumanga udibi lwakhe, ngokuba lwalwesaba kakhulu. Ngalokho uSawule wathatha inkemba, wawela phezu kwayo.
Udibi lwakhe selubonile ukuthi uSawule ufile, lwawela phezu kwenkemba yalo, nalo lwafa.
Wafa-ke uSawule namadodana akhe amathathu, nendlu yakhe; bonke bafa kanyekanye.
Kwathi lapho bonke abantu bakwa-Israyeli ababesesigodini bebona ukuthi abanye bayabaleka, nokuthi uSawule namadodana akhe bafile, bashiya imizi yabo, babaleka. AmaFilisti afika ahlala kuyo.
Kwathi ngakusasa amaFilisti afika ezophanga ababuleweyo, amthola uSawule namadodana akhe befile entabeni iGilibhowa.
Amphanga, athatha ikhanda lakhe nezikhali zakhe. Athumela ezweni lonke lamaFilisti ukuba kuyomenyezelwa izindaba ezinhle ezithombeni zawo nakubantu.
Azibeka izikhali zakhe endlini yonkulunkulu bawo, achoma ikhanda lakhe endlini kaDagoni.
Sebezwile bonke abaseJabheshi Gileyadi ngakho konke okwenziwe ngamaFilisti kuSawule,
asuka wonke amadoda anamandla ayothatha isidumbu sikaSawule nezamadodana akhe, aziletha eJabheshi. Amathambo abo awambela phansi kwe-okhi eJabheshi, azila ukudla izinsuku eziyikhombisa.
USawule wakhothama kanjalo-ke, ngenxa yesiphambeko sakhe asenza kuSimakade, akaze aligcina izwi likaSimakade, nangokuba aya kobhula konedlozi, wabuza kuye,
engabuzanga kuSimakade. Ngakho-ke wambulala, umbuso wawubuyisela kuDavide, indodana kaJese.
U-Israyeli wonke wabuthana kuDavide eHebhroni, wathi: “Thina phela siyithambo lakho nenyama yakho.
Nangesikhathi esedlule, kusabusa uSawule, nguwe owawuhola impi ka-Israyeli, uphume nayo ubuye ungene nayo. USimakade uNkulunkulu wakho wathi kuwe: ‘Wena uyakwalusa abantu bami, u-Israyeli; wena uzakuba ngumbusi wabantu bami, u-Israyeli.’ ”
Wonke amalunga akwa-Israyeli eza enkosini eHebhroni. UDavide wenza nawo isivumelwano eHebhroni, phambi kukaSimakade. Amgcoba uDavide waba yinkosi kwa-Israyeli, njengokusho kwezwi likaSimakade ngomlomo kaSamuweli.
UDavide no-Israyeli wonke baya eJerusalema eliyiJebusi, lapho kwakuhlala khona izakhamuzi zakulelo lizwe, amaJebusi.
Abakhileyo eJebusi bathi kuDavide: “Awusoze wangena lapha.” UDavide nokho wayinqoba inqaba iZiyoni, wayidla yaba ngumuzi wakhe.
UDavide wathi: “Lowo muntu oyohlabana kuqala, abulale umJebusi, nguye ozokuba yinhloko nenduna.” UJowabe, indodana kaZeruya, wenyuka kuqala, wawudla umhlanganiso, wabe eseba yinhloko.
UDavide wahlala enqabeni, ngakho-ke bayibiza ngokuthi umuzi kaDavide.
Wakha umuzi, wayizungeza kusuka eMilo kuya kuzo zonke izindawo. UJowabe wavusa okwakusasele komuzi.
UDavide waqhubeka njalo wakhula, ngokuba uSimakade Wamabandla wayenaye.
Yilezi izinhloko zamaqhawe kaDavide ayenazo, ezamsekela ngamandla embusweni wakhe kanye no-Israyeli wonkana, zambeka waba yinkosi njengokwezwi likaSimakade ngo-Israyeli.
Nanti-ke inani lamaqhawe kaDavide: kwakunguJashobhehamu, indodana yomHakhimoni, inhloko yezinduna ezingama-30; wagwaza wabulala abangama-300 ngomkhonto wakhe, ngasikhathi sinye.
Wayelandelwa ngu-Eleyazare, indodana kaDodo, umAhohi, owayengomunye wamaqhawe amathathu.
Wayekanye noDavide ePhasi Damimi, ngesikhathi kubuthana amaFilisti lapho ukuyokulwa nabo. Kwakukhona isiqinti sezwe esasigcwele ibhali. Abantu babebalekile phambi kwamaFilisti.
Bama phakathi nesiqinti sezwe, basivikela, bawabulala amaFilisti. USimakade wabasindisa ngokusindisa okukhulu.
Kwathi ngesikhathi amabutho amaFilisti ekanise eSigodini samaRefa, kwehla abathathu kwabayizinhloko ezingama-30, baya etsheni kuDavide, emgedeni wase-Adulamu.
UDavide wayesenqabeni, impi yamaFilisti yayikanise ngaseBhethlehema.
UDavide wayomile, omele amanzi, wathi: “Ngubani ozakunginika amanzi asemthonjeni eBhethlehema ongasesangweni, ngiphuze na?”
Lawo maqhawe amathathu afohla, angena enkanjini yamaFilisti, akha amanzi emthonjeni eBhethlehema ongasesangweni. Awathatha awaletha kuDavide, kepha akavumanga ukuwaphuza; wawathululela uSimakade.
Wathi: “Makube kude nami, Simakade, ukuba ngenze lokhu; ngingaliphuza yini igazi lalaba bantu ababeke impilo yabo engcupheni?” Akavumanga ukuwaphuza. Yilezi-ke izinto ezenziwa yilawo maqhawe amathathu.
U-Abhishayi, umfowabo kaJowabe, wayeyinhloko yalaba abangama-30. Wagwaza ngomkhonto wakhe abangama-300, wababulala, wazenzela igama phakathi kwalabo abathathu.
Nguye owanconywa kakhulu phakathi kwabangama-30, futhi waba ngumkhuzi wempi yabo, akafinyelelanga nokho kwabathathu bokuqala.
UBhenaya, indodana kaJehoyada, wayeyindoda eyiqhawe elinamandla, elenza imisebenzi emikhulu. WayengowaseKhabizeyeli, wabulala amaqhawe amabili, u-Ariyeli wakwaMowabi, waphinde wehla, wabulala ingonyama emgodini, ngosuku kukhithike iqhwa.
Wabulala nowaseGibhithe owayebukeka. Lona waseGibhithe wayephethe umkhonto esandleni sakhe, kodwa uBhenaya wabhekana naye ephethe induku nje. Wawuhlwitha umkhonto esandleni somGibhithe, wambulala ngawo umkhonto wakhe.
UBhenaya, indodana kaJehoyada, wenza lezi zinto, wazenzela igama phakathi kwabathathu.
Wayehlonipheke kakhulu phakathi kwabangama-30, kodwa akafikanga kulaba abathathu ngokuhlonishwa. UDavide wambeka ukuba engamele abaqaphi bakhe.
Phakathi kwalawo maqhawe anamandla kwakungo-Asaheli, umfowabo kaJowabe, u-Elihanani indodana kaDodo waseBhethlehema,
uShamothi wakwaHarori, uHelezi wasePheloni,
u-Ira, indodana ka-Ikeshi waseThekowa, u-Abhiyezeri wase-Anathothi,
uSibhekayi umHushathi, u-Ilayi umAhohi,
uMaharayi waseNethofa, uHeledi, indodana kaBhahana waseNethofa,
u-Ithayi, indodana kaRibhayi waseGibheya labozalo lukaBhenjamini, uBhenaya wasePhirathoni,
uHurayi wangasemifudlaneni kwaGahashi, u-Abhiyeli umAraba,
u-Azimavethi waseBharihumi, u-Eliyaba waseShahalibhoni,
amadodana kaHashemi waseGizoni, uJonathani, indodana kaShage waseHarari,
u-Ahiyamu, indodana kaShakhari wase-Arari, u-Elifali, indodana ka-Uri,
uHeferi waseMekheri, u-Ahiya wasePheloni,
uHeziro waseKharimeli, uNaharayi, indodana ka-Ezibhayi,
uJoweli, umfowabo kaNathani, uMibhihari, indodana kaHagiri,
uZeleki wakwa-Amoni, uNaharayi waseBherothi, udibi lukaJowabe, indodana kaZeruya,
u-Ira waseJetheri,
u-Uriya umHithi, uZabadi, indodana ka-Ahilayi,
u-Adina, indodana kaShiza wakwaRubeni, inhloko yakwaRubeni, enabangama-30,
uHanani, indodana kaMahakha, uJeshoshafathi umMitheni,
u-Uziya wase-Ashitharothi, uShama noJehiyeli, amadodana kaHothamu wase-Aroweri,
uJediyayeli, indodana kaShimri, uJoha, umfowabo umThizi,
u-Eliyeli umMahavi, uJeribhayi noJoshaviya, amadodana ka-Elinahama, u-Ithima wakwaMowabi,
u-Eliyeli, u-Obhede, noJahashiyeli umMezobha.
Nanka amagama alabo abafika kuDavide ngesikhathi esagogobele eZikilagi, ngenxa kaSawule, indodana kaKhishi; ababephakathi kwamaqhawe ayelekelela empini.
Babehlome ngeminsalo, bengamakhabe, bekwazi ukuciba nokuphonsa amatshe ngesokhohlo nangesokunene. Babengabafowabo bakaSawule, bevela kwaBhenjamini, okwakuyilaba:
inhloko kwakungu-Ahiyezeri noJowashi, ababengamadodana kaShemaha waseGibheya; uJeziyeli noPhelethi, amadodana ka-Azimavethi; uBherakha, uJehu wase-Anathothi;
u-Ishmaya waseGibheyoni, iqhawe elalingomunye wabangama-30, engamele abangama-30; uJeremiya, uJahaziyeli, uJohanani, noJozabhadi waseGedera;
u-Eluzayi, uJerimothi, uBhehaliya, uShemariya, uShefathiya umHarufi;
u-Elikhana, uJishiya, u-Azareli, uJohezeri, uJashobhehamu, amaKhora;
uJowela noZebadiya, amadodana kaJerohamu waseGedori.
KwabakwaGadi, abanye bazehlukanisa baya kuDavide enqabeni ehlane, amaqhawe anamandla, amabutho azilungiselele ukulwa, abakwazi ukuphatha isihlangu nomkhonto, ababuso babo bufana nobuso bezingonyama, abanejubane njengezinsephe ezintabeni:
u-Ezeri inhloko, owesibili u-Obhadiya, owesithathu u-Eliyabe,
owesine uMishimana, owesihlanu uJeremiya,
owesithupha u-Athayi, owesikhombisa u-Eliyeli,
oweshiyagalombili uJohanani, owesishiyagalolunye u-Elizabhadi,
oweshumi uJeremiya, owe-11 uMakhibhanayi.
Laba kwakungabozalo lukaGadi ababeyizinhloko zempi: omncinyane kubo wayelingana nekhulu, omkhulu elingana nenkulungwane.
Yibo labo abawela iJordani ngenyanga yokuqala, lapho ligcwele lidla izindwani, ugu lonke lwalo luphuphuma amanzi. Yibo abaxosha bonke ababesezigodini, ngasempumalanga nangasentshonalanga.
Abanye bozalo lukaBhenjamini nabakwaJuda bafika kuDavide esenqabeni.
UDavide waphuma wayobahlangabeza, wathi kubo: “Uma nize lapha kimi ngokuthula, nizongisiza, sizobambisana, kodwa uma nizongiyengela ezitheni zami, uNkulunkulu wokhokho bethu makakubone lokho, abe nguMehluleli.”
Kwase kwehla umoya phezu kuka-Amasayi, owayeyinhloko yabangama-30, wathi: “Singabakho thina, Davide, sinawe, wena ndodana kaJese; ukuthula, ukuthula makube nawe, ukuthula makube nabakusizayo, ngokuba uNkulunkulu wakho ukusizile.” Wayesebamukela uDavide, wabenza izinhloko zeviyo.
Kwafika ingxenye yabakwaManase kuDavide, ngesikhathi izolekelela amaFilisti ukulwa noSawule, kodwa abawalekelelanga ngokuba abaholi bamaFilisti babonisana, bamkhomba indlela bethi: “Lo uyakuhlubukela enkosini yakhe uSawule, adayise ngathi, asibulale.”
Ngesikhathi eya eZikilagi, abakwaManase abaqembuka beza kuye yilaba: u-Adina, uJozabhadi, uJediyayeli, uMikhayeli, uJozabhadi, u-Elihu, uZilethayi, nezinhloko zezinkulungwane zabakwaManase.
Bamsiza uDavide ekulweni namabutho ayemhlasela, ngokuba bonke babengamaqhawe anamandla, bengabakhuzi bempi.
Imihla ngemihla, kwakufika abazomsiza uDavide, kwaze kwaba yimpi enkulu enjengekaNkulunkulu.
Nanti inani lezinhloko ezazihlomile ezeza kuDavide eHebhroni, ukuba ziguqulele kuye umbuso kaSawule njengokusho kwezwi likaSimakade.
Kwabozalo lukaJuda ababephethe izihlangu nemikhonto, behlomele ukulwa babeyizi-6 800.
Kwabozalo lukaSimeyoni, amaqhawe anamandla empini babeyizi-7 100.
Kwabozalo lukaLevi babeyizi-4 600.
UJehoyada wayengumholi wakwa-Aroni enezi-3 700,
noZadoki, insizwa eyiqhawe elinamandla, nabakhuzi bempi abangama-22 ababevela endlini kayise.
Kwabozalo lukaBhenjamini, abafowabo bakaSawule, kwakuyizi-3 000, ngokuba kuze kube namuhla iningi labo lisathembekile endlini kaSawule.
Kwabozalo kuka-Efrayimi kwakuyizi-20 800, amaqhawe anamandla, amadoda ayenegama ezindlini zokhokho bawo.
Engxenyeni yesizwana sakwaManase kwakuyizi-18 000 ezazibizwe ngamagama ukuba zifike zizobeka uDavide, abe yinkosi.
Kwabozalo luka-Isakhare, labo ababeqonda ngezikhathi ukuba bazi okufanele kwenziwe ngu-Israyeli; izinhloko zabo ezazingama-200; bonke abafowabo balalela izwi labo.
KwaZebuloni kwaphuma abayizi-50 000 ababekulungele ukuya empini, behlome ngazo zonke izikhali zokulwa futhi bekulungele ukusiza uDavide, benhliziyonye.
KwabakwaNafethali kwaba ngabakhuzi bempi abayinkulungwane, benababephethe izihlangu nemikhonto abayizi-37 000.
KwabakwaDani, ababekulungele ukuya empini, babeyizi-28 600.
Kwabakwa-Asheri, ababevuthiwe bengaphuma baye empini, babeyizi-40 000.
Ngaphesheya kweJordani, kwabakwaRubeni nabakwaGadi nengxenye yesizwana sakwaManase, babeyizi-120 000 ababehlome ngezikhali zonke zokulwa empini.
Wonke lawa mabutho ayehlelwe ngendlela yokulwa, afika eHebhroni ngenhloso eyodwa, yokuzobeka uDavide ukuba abe yinkosi kwa-Israyeli, nabo bonke abaseleyo bakwa-Israyeli babenhliziyonye ukubeka uDavide abe yinkosi.
Bahlala lapho noDavide izinsuku ezintathu, bedla, bephuza, ngokuba abafowabo babebalungisele.
Nabakhelene nabo, kusukela kwa-Isakhare, kwaZebuloni, nakwaNafethali, baletha isinkwa ngezimbongolo, ngamakameli, ngeminyuzi, nangezinkabi. Baletha ukudla okusanhlamvu, izigaxa zamakhiwane, izigaxa zamareyizini, iwayini namafutha, izinkabi nezimvu eziningi, ngokuba kwakunokuthokoza okukhulu kwa-Israyeli.
UDavide wahlanganisa amakhanda nabakhuzi bempi bezinkulungwane nabamakhulu, nabaholi bonke.
UDavide wayesethi kulo lonke ibandla lakwa-Israyeli: “Uma kukuhle kini, futhi kuvela kuSimakade uNkulunkulu wethu, masiphume ngandlela zonke sithumele kubafowethu abasele ezweni lonke kwa-Israyeli, nabaphristi nabaLevi emizini yabo enamadlelo, ukuba babuthane beze lapha kithi.
Masihambe siyowulanda siwubuyisele kithi umphongolo kaNkulunkulu wethu, ngokuba asizange siwufune ngezinsuku zikaSawule.”
Ibandla lonke lathi makwenziwe kanjalo, ngokuba lokho kwakuthokozisa kubo bonke abantu.
UDavide wambuthela ndawonye wonke u-Israyeli, kusukela eShihori eGibhithe, eLebo, kuze kube seHamathi, ukuba kuyolandwa umphongolo kaNkulunkulu eKiriyathi Jeharimi.
UDavide wakhuphuka kanye no-Israyeli wonke, baya eBhahala, okungukuthi eKiriyathi Jeharimi kwaJuda, ukuze bakhuphule lapho umphongolo kaNkulunkulu uSimakade ohleli phezu kwamakherubhi, obizwa ngegama lakhe.
Bawukhipha umphongolo kaNkulunkulu endlini ka-Abhinadaba, bawukhweza enqoleni entsha eyayishayelwa ngu-Uza no-Ahiyo.
UDavide naye wonke u-Israyeli babethokoza phambi kukaNkulunkulu ngamandla abo wonke, behuba amahubo ngamahabhu, ngezingubhu, ngezigubhu, ngamasimbali nangamacilongo.
Lapho befika esibuyeni sikaKhidoni, izinkabi zashelela, u-Uza wayeselula isandla sakhe ukuba abambe umphongolo.
Intukuthelo kaSimakade yamvuthela u-Uza, wamshaya, ngokuba wayelulele isandla emphongolweni. Wafela khona lapho phambi kukaNkulunkulu.
UDavide wathukuthela ngokuba uSimakade ehlasele u-Uza. Wayibiza leyo ndawo ngokuthi yiPherezi Uza, kuze kube namuhla.
UDavide wamesaba uNkulunkulu ngalolo lusuku, wathi: “Pho ngingawungenisa kanjani kwami umphongolo kaNkulunkulu na?”
UDavide akabange esawuyisa emzini wakhe umphongolo, kodwa wachezuka, wawuyisa endlini ka-Obhedi Edomi, umGithi.
Umphongolo kaNkulunkulu wahlala izinyanga ezintathu nabendlu ka-Obhede Edomi, endlini yakhe. USimakade wayibusisa indlu ka-Obhede Edomi nakho konke ayenakho.
Inkosi yaseThire, uHiramu, yathumela izithunywa kuDavide, imisedari, abakhi nababazi ukuba bayomakhela indlu.
UDavide waqonda ukuthi uSimakade wayembekile impela ukuba abe yinkosi kwa-Israyeli, ngokuba umbuso wakhe waphakanyiselwa phezulu ngenxa yabantu bakhe u-Israyeli.
UDavide eseseJerusalema wabuye wathatha abanye abafazi, wazala amanye amadodana namadodakazi.
Nanka amagama abantwana abazala eJerusalema: uShamuwa, uShobhabhi, uNathani, uSolomoni,
uJibhari, u-Elishuwa, u-Eliphelethi,
uNoga, uNefegi, uJafiya,
u-Elishama, uBheyeliyada no-Elifeleti.
Kwathi esezwile amaFilisti ukuthi uDavide ubekiwe ukuba abe yinkosi ka-Israyeli, akhuphuka ayomfuna; kuthe lapho uDavide ekuzwa lokho waphuma, wawahlasela.
AmaFilisti esegasele esigodini samaRefa,
uDavide wabuza kuNkulunkulu, wathi: “Ngenyuke yini ukuyohlasela amaFilisti na? Uyakuwanikela yini esandleni sami?” USimakade wathi kuye: “Khuphuka, ngokuba ngiyakuwanikela esandleni sakho.”
Base bekhuphuka eBhali Pherazimu, uDavide wawabhubhisa. UDavide wathi: “UNkulunkulu uthelekele izitha zami ngesandla sami njengamanzi ebhodloza avinjwe ngakho.” Yingakho-ke leyo ndawo bayiqamba bathi iBhali Pherazimu.
AmaFilisti abashiya lapho onkulunkulu bawo, uDavide wathi mababashise ngomlilo.
AmaFilisti abuye asigasela isigodi.
UDavide wabuye wabuza kuNkulunkulu, uNkulunkulu wathi kuye: “Ungenyuki uwalandele, kunalokho aqhamukele maqondana namajikijolo.
Kuyothi lapho sewuzwa umsindo wokuhamba ezihlokweni zamajikijolo, uphume impi, ngokuba uNkulunkulu uphumile ngaphambi kwakho ukubhubhisa amabutho amaFilisti.”
UDavide wenza njengokuba uNkulunkulu ayemyalile, bawabhubhisa amabutho amaFilisti, kusukela eGibheyoni kuze kube seGezeri.
Igama likaDavide laphumela emazweni wonke; uSimakade wehlisela izizwe zonke ingebhe ngaye.
UDavide wakha izindlu emzini wakhe, walungisela umphongolo kaNkulunkulu indawo, wawumisela ithende.
UDavide wayesethi: “Umphongolo kaNkulunkulu mawungathwalwa muntu, kuphela abaLevi, ngokuba yibo abaqokwe nguSimakade ukuthwala umphongolo kaSimakade, nokumkhonza kuze kube phakade.”
UDavide waqoqela ndawonye eJerusalema wonke u-Israyeli ukuba kukhushulwe umphongolo kaSimakade uyiswe endaweni awulungiselele yona.
UDavide waqoqa amadodana ka-Aroni nabaLevi.
Ozalweni lukaKhohathi: u-Uriyeli umholi, nabafowabo, beyi-120;
ozalweni lukaMerari: u-Asaya umholi, nabafowabo, bengama-220;
ozalweni lukaGereshomu: uJoweli umholi, nabafowabo, beyi-130;
ozalweni luka-Elizafani: uShemaya umholi, nabafowabo, bengama-200;
ozalweni lukaHebhroni: u-Eliyeli umholi, nabafowabo, bengama-80;
ozalweni luka-Uziyeli: u-Aminadaba umholi, nabafowabo, beyi-112.
UDavide wabiza uZadoki, u-Abhiyathara, abaphristi, abaLevi, u-Uriyeli, u-Asaya, uJoweli, uShemaya, u-Eliyeli no-Aminadaba.
Wathi kubo: “Nina niyizinhloko zezindlu zoyise babaLevi, zingcweliseni, nina nabafowenu, ukuba nikhuphule umphongolo kaSimakade uNkulunkulu ka-Israyeli, niwuyise endaweni engiwulungisele yona.
Ngenxa yokuba aniwuthwalanga ngesikhathi esedlule, uSimakade uNkulunkulu wethu wasithelekela, ngokuba asimfunanga njengokwesimiso.”
Abaphristi nabaLevi base bezingcwelisa ukuze bakhuphule umphongolo kaSimakade uNkulunkulu ka-Israyeli.
Abozalo lwabaLevi bawuthwala ngezingongolo emahlombe umphongolo kaNkulunkulu, njengokuyala kukaMose, ngezwi likaSimakade.
UDavide watshela abaholi babaLevi ukuba babeke abafowabo, abahlabeleli bashaye izinsimbi ezishaywayo, izingubhu, amahabhu, amasimbali, bakushaye, bamemeze ngokuthokoza.
AbaLevi base bebeka uHemani, indodana kaJoweli, nakubafowabo babeka u-Asafa, indodana kaBherekhiya, nasemadodaneni kaMerari, abafowabo, u-Ethani, indodana kaKhushaya.
Babekanye nabafowabo besigaba sesibili: uZakhariya, uBheni, uJahaziyeli, uShemiramothi, uJehiyeli, u-Uni, u-Eliyabe, uBhenaya, uMahaseya, uMathithiya, u-Elifelehu, uMikhineya, u-Obhede Edomi, noJehiyeli, abalindisango.
Abahlabeleli: uHemani, u-Asafa, no-Ethani ukuba bakhalise amasimbali ethusi.
UZakhariya, u-Aziyeli, uShemiramothi, uJehiyeli, u-Uni, u-Eliyabe, uMahaseya, noBhenaya bashaye izingubhu ezilungiselwe i-Alamothi.
UMathithiya, u-Elifelehu, uMikhineya, u-Obhede Edomi, uJehiyeli, no-Azaziya, babephethe amahabhu alungiselwe iSheminithi ukuba bahole.
UKhenaniya, umholi wabaLevi, wayengamele umsebenzi wokuthwala, efundisa ukuthwala ngokuba wayekwazi.
UBherekhiya no-Elikhana babengabalindisango bomphongolo.
UShebhaniya, uJehoshafathi, uNethaneli, u-Amasayi, uZakhariya, uBhenaya, u-Eliyezeri, abaphristi, babeshaya amacilongo phambi komphongolo kaNkulunkulu. U-Obhede Edomi noJehiya bona babengabalindisango bomphongolo.
KwakunguDavide, namalunga akwa-Israyeli, nezinduna zezinkulungwane abahamba bethokoza bayokhuphula umphongolo wesivumelwano sikaSimakade endlini ka-Obhede Edomi.
Kwathi lapho uNkulunkulu esebasizile abaLevi, abathwali bomphongolo wesivumelwano sikaSimakade, base benikela ngezinkunzi eziyisikhombisa nezinqama eziyisikhombisa.
UDavide wayembethe ingubo yelineni elicolekileyo, njengabo bonke abaLevi ababethwele umphongolo, nabahlabeleli, noKhenaniya umholi wabahlabeleli. UDavide wayenengubo yamahlombe yelineni.
Wonke u-Israyeli wawukhuphula kanjalo-ke umphongolo wesivumelwano sikaSimakade; ngokukhamuluka nangomsindo womtshingo, amacilongo, amasimbali, ebetha izingubhu namahabhu.
Kwathi lapho umphongolo wesivumelwano sikaSimakade usungeniswa emzini kaDavide, uMikhali, indodakazi kaSawule, walunguza ngefasitela, wabona inkosi uDavide isina, igida; wayedelela enhliziyweni yakhe.
Bawungenisa umphongolo kaNkulunkulu, bawubeka phakathi nethende uDavide ayelimisele wona. Base benikela ngeminikelo yokushiswa nangeminikelo yokuthula phambi kukaNkulunkulu.
Eseqedile uDavide ukunikela ngomnikelo wokushiswa nangeminikelo yokuthula, wabusisa abantu egameni likaSimakade.
Wabela bonke abantu bakwa-Israyeli, abesilisa nabesifazane, yilowo nalowo isinkwa, isigaxa sengqansundu, nekhekhe elinamagilebhisi omisiwe.
Wamisa phambi komphongolo kaSimakade abanye babaLevi ukuba bakhonze, benze isikhumbuzo, babonge futhi bamdumise uSimakade uNkulunkulu ka-Israyeli.
U-Asafa nguye owayengamele nesigaba sakhe sesibili, uZakhariya, uJeyiyeli, uShemiramothi, uJehiyeli, uMathithiya, u-Eliyabe, uBhenaya, u-Obhede Edomi noJeyiyeli, bephethe izingubhu namahabhu, u-Asafa ephethe amasimbali, ewashaya.
UBhenaya noJahaziyeli, abaphristi, bephethe amacilongo, bema njalo phambi komphongolo wesivumelwano sikaNkulunkulu.
Ngalolo lusuku uDavide waqala ukuhlela ukuba uSimakade abongwe, kuhola u-Asafa nabafowabo.
Bongani uSimakade, nibize igama lakhe, nizazise kubantu izenzo zakhe.
Mhlabeleleni, nimhubele, nikhulume ngazo zonke izimangaliso zakhe.
Gabani ngegama lakhe elingcwele; mazithokoze izinhliziyo zabafuna uSimakade.
Mfuneni uSimakade namandla akhe, nibufunisise njalo ubuso bakhe.
Khumbulani izimangaliso zakhe azenzileyo, izibonakaliso zakhe, nezehlulelo zomlomo wakhe,
nina nzalo ka-Israyeli, inceku yakhe, nina bantwana bakaJakobe, abakhethiweyo bakhe.
Yena unguSimakade uNkulunkulu wethu; izehlulelo zakhe zisemhlabeni wonke.
Khumbulani isivumelwano sakhe kuze kube phakade, izwi ayala ngalo izizukulwane eziyinkulungwane,
isivumelwano asenza no-Abhrahama, nesifungo sakhe ku-Isaka;
wasiqinisa kuJakobe, saba ngumthetho, naku-Israyeli, saba yisivumelwano esiphakade,
ethi: “Ngizakukunika iKhanani libe yisabelo sefa lenu,
lapho naniseyingcosana ngesibalo, yebo, naniseyingcosana, futhi niyizihambi kulo.”
Bazulazula ezizweni ngezizwe, besuka kulo mbuso, beya kwabanye abantu.
Akavumelanga muntu ukubacindezela, wajezisa amakhosi ngenxa yabo,
ethi: “Ningabathinti abagcotshiweyo bami, ningabalimazi abaphrofethi bami.”
Hlabelela kuSimakade mhlaba wonke, memezela izimangaliso zakhe usuku nosuku.
Landani ngenkazimulo yakhe phakathi kwabezizwe, izimangaliso zakhe phakathi kwabantu bonke.
Ngokuba mkhulu uSimakade, ufanele ukudunyiswa kakhulu; uyesabeka ngaphezu kwabo bonke onkulunkulu.
Bonke onkulunkulu babezizwe bayizithombe ezingenamsebenzi, kepha uSimakade walenza izulu.
Udumo nobukhosi kusebusweni bakhe; amandla nokuthokoza kusendaweni yakhe.
Mnikeni uSimakade nina mindeni yabantu, mnikeni uSimakade udumo namandla.
Mnikeni uSimakade udumo lwegama lakhe, nilethe umnikelo, nize phambi kwakhe, nikhuleke kuSimakade nihlobe ngobungcwele.
Thuthumela phambi kwakhe, mhlaba wonke; izwe limisiwe, alinakunyakaziswa.
Malijabule izulu, uthokoze umhlaba; makuthiwe ezizweni: “USimakade uyinkosi.”
Maluhlokome ulwandle nokugcwala kwalo, kwename amasimu nakho konke okukuwo.
Khona imithi yehlathi iyakukhamuluka ngokujabula phambi kukaSimakade, ngokuba uyeza uzokwehlulela umhlaba.
Bongani uSimakade, ngokuba muhle, ngokuba umusa wakhe umi phakade.
Yishoni nithi: “Sisindise Nkulunkulu wensindiso yethu, usiqoqe, usihlenge kwabezizwe, ukuze sidumise igama lakho elingcwele, sithokoze ekukudumiseni.”
Makabongwe uSimakade uNkulunkulu ka-Israyeli, kusukela phakade kuze kube phakade. Bonke abantu bathi: “Amen,” bamdumisa uSimakade.
UDavide wayeseshiya u-Asafa nabafowabo phambi komphongolo wesivumelwano sikaSimakade ukuba bakhonze njalo phambi komphongolo, ngokwenza imisebenzi yemihla ngemihla.
Washiya u-Obhede Edomi, indodana kaJeduthuni, nabafowabo abangama-68 noHosa ukuba babe ngabalindisango.
Washiya uZadoki, umphristi, nabafowabo, abaphristi, phambi kwethabanakeli likaSimakade, endaweni ephakemeyo eyayiseGibheyoni,
ukuba banikele njalo kuSimakade ngeminikelo yokushiswa, phezu kwe-althare lomnikelo wokushiswa, ekuseni nakusihlwa njengalokhu konke kulotshwe emthethweni kaSimakade ayala ngawo u-Israyeli.
UHemani noJeduthumi nabo bonke abaseleyo ababekhethiwe babizwa ngamagama ukuba bambonge uSimakade, ngokuba umusa wakhe umi phakade.
UHemani noJeduthumi babephethe amacilongo namasimbali okushaywa, nezinye izinsimbi zokubethwa kudunyiswa uNkulunkulu. Amadodana kaJeduthumi aqokwa amiswa ngasesangweni.
Bonke abantu bahamba, yilowo nalowo waya endlini yakhe. UDavide wabuya wazobusisa abendlu yakhe.
Kwathi lapho uDavide esehleli esigodlweni sakhe, wathi kuNathani, umphrofethi: “Bheka, mina ngihlala esigodlweni semisedari, kodwa umphongolo wesivumelwano sikaSimakade uphansi kwamakhethini.”
UNathani wathi kuDavide: “Yenza konke okusenhliziyweni yakho, ngokuba uNkulunkulu unawe.”
Kwathi ngalobo busuku izwi likaNkulunkulu lafika kuNathani, lathi:
“Hamba uyotshela uDavide, inceku yami, uthi: ‘Usho kanje uSimakade, uthi: “Wena awuyukungakhela indlu ukuba ngihlale kuyo,
ngokuba angikaze ngihlale endlini kusukela ngosuku engakhuphula ngalo u-Israyeli kuze kube namuhla, kodwa bengisemathendeni ngamathende, nasemathabanakelini.
Ezindaweni zonke engihambe kuzo naye wonke u-Israyeli ngake ngalikhipha yini izwi nakoyedwa wabehluleli bakwa-Israyeli engangibayale ukuba beluse abantu bami, ngathi: Aningakhele ngani indlu yemisedari na?” ’ ”
“Ngakho-ke uyakusho kanje kuDavide inceku yami, uthi: ‘Usho kanje uSimakade Wamabandla, uthi: “Mina ngakuthatha edlelweni, ekweluseni izimvu, ukuba ube ngumbusi wabantu bami u-Israyeli.
Nganginawe noma kuphi lapho wawuya khona, ngazibhubhisa zonke izitha zakho phambi kwakho. Ngiyakwenza igama lakho libe njengamagama abakhulu abasemhlabeni.
Ngiyakubamisela indawo abantu bami, u-Israyeli, ngibatshale ukuba bahlale endaweni yabo, bangaphinde bakhathazwe nakukhathazwa ngababi bababhubhise njengakuqala,
kusukela emihleni engamisa ngayo abehluleli ukuba babuse abantu bami u-Israyeli, ngiyakuzinqoba zonke izitha zakho. Ngiyakutshela futhi ukuthi uSimakade uyakukwakhela indlu yakho.
Kuyothi lapho izinsuku zakho seziphelele ukuba uye koyihlomkhulu, ngimise abozalo lwakho omunye zalweni lwakho, ngiwuqinise umbuso wakhe.
Nguye oyakungakhela indlu, ngiyakusiqinisa isihlalo sakhe sobukhosi, kuze kube phakade.
Mina ngiyakuba nguyise kuye, yena abe yindodana kimi; angiyukuwususa umusa wami kuye, njengalokho ngawususa kulowo owayengaphambi kwakho.
Ngiyakumbeka endlini yami nasembusweni wami, kuze kube phakade; isihlalo sakhe sobukhosi siqiniswe, kuze kube phakade.” ’ ”
UNathani wakhuluma kuDavide njengawo wonke lawa mazwi nanjengawo wonke lo mbono.
Inkosi uDavide yahamba yahlala phambi kukaSimakade, yathi: “Ngingubani Simakade Nkulunkulu, nendlu yami iyini ukuba ungithwale kuze kube lapha na?
Nalokho kwakuyinto encane emehlweni akho, Nkulunkulu; ukhulumile nangendlu yenceku yakho isekude, wangibuka kungathi ngingumuntu ophakemeyo, Simakade Nkulunkulu.
“UDavide angenezela ngokuthini kuwe ngodumo inceku yakho elwenzelweyo na? Wena uyayazi inceku yakho.
Simakade, ngenxa yenceku yakho nanjengokwenhliziyo yakho, wenzile konke lokhu okukhulu ukuba kwaziswe bonke lobu bukhulu.
“Simakade, akekho onjengawe, akekho uNkulunkulu ngaphandle kwakho, kukho konke esikuzwileyo ngezindlebe zethu.
Ngubani onjengabantu bakho, u-Israyeli, isizwe esisodwa emhlabeni, uNkulunkulu azihlengela sona ukuba sibe ngabantu bakhe, wazenzela igama ngezinto ezinkulu nezesabekayo ngokuxosha abezizwe phambi kwabantu bakho owabahlenga eGibhithe na?
Wabenza abantu bakho, u-Israyeli, baba ngabantu bakho kuze kube phakade, Wena Simakade waba nguNkulunkulu wabo.
“Manje Simakade, izwi olikhulume ngenceku yakho nangendlu yayo, maliqiniswe kuze kube phakade, futhi yenza njengalokhu ushilo.
Maliqiniswe libe likhulu igama lakho kuze kube phakade, ukuze kuthiwe: ‘USimakade Wamabandla unguNkulunkulu ka-Israyeli, yebo, uNkulunkulu ka-Israyeli,’ nendlu kaDavide, inceku yakho, iqinisiwe phambi kwakho.
“Wena Nkulunkulu wami ukwambulile endlebeni yenceku yakho ukuthi uyakuyakhela indlu, ngakho-ke inceku yakho ize ukuba izokhuleka phambi kwakho.
Manje Simakade, unguNkulunkulu, ukhulume okuhle encekwini yakho,
ake uvume ukubusisa indlu yenceku yakho, ukuba ibe phambi kwakho kuze kube phakade, ngokuba okubusisile Wena Simakade, kubusisekile kuze kube phakade.”
Kwathi emveni kwalokho, uDavide wahlasela amaFilisti, wawanqoba, wayidla iGathi nemizana yalo esandleni samaFilisti.
Wamnqoba uMowabi; abakwaMowabi baba yizinceku zikaDavide, bathela intela kuye.
UDavide wahlasela uHadadezeri, inkosi yaseZobha, ngaseHamathi, ngesikhathi ephumile ukuyoqinisa umbuso wakhe ngasemfuleni iYufrathe.
UDavide wathatha kuye izinqola eziyinkulungwane, abamahhashi abayizi-7 000 nemigundatshani eyizi-20 000. UDavide wanquma imisipha yamahhashi ayedonsa izinqola, washiya kuphela awezinqola eziyikhulu.
Kwase kufika ama-Aramu aseDamaseku ezosiza uHadarezeri, inkosi yaseZobha, uDavide wabulala abantu bakhona abayizi-22 000.
UDavide wamisa amabutho e-Aramu eDamaseku. Ama-Aramu aba yizinceku zikaDavide, athela intela kuye. USimakade wamenza ukuba uDavide anqobe noma kuphi lapho eya khona.
UDavide wathatha izihlangu zegolide ezazisezincekwini zikaHadadezeri, waziletha eJerusalema.
UDavide wathatha ithusi eliningi kakhulu eThibhahathi naseKhuni, imizi kaHadadezeri, uSolomoni enza ngalo ulwandle lwethusi nezinsika nezitsha zethusi.
Kwathi ukuba uThowu, inkosi yaseHamathi, ezwe ukuthi uDavide uyibhubhisile yonke impi kaHadadezeri, inkosi yaseZobha,
wathumela uHadoramu, indodana yakhe, enkosini uDavide ukuyocela ukuba babe nesivumelwano sokuthula nokuyibusisa, ngokuba yayilwile noHadadezeri, yamnqoba, ngokuba uHadadezeri wayevame ukulwa noThowu. Wamphathisa izinhlobo zonke zezitsha zegolide nezesiliva nezethusi.
Inkosi uDavide wazingcwelisa nalezi zitsha kuSimakade, nesiliva negolide ayekudle ezizweni zonke zakwa-Edomi, kwaMowabi, nakubantu bakwa-Amoni, nakumaFilisti nakuma-Amaleki.
U-Abhishayi, indodana kaZeruya, wabulala abakwa-Edomi abayizi-18 000 eSigodini Sikasawoti.
Wamisa amabutho kwa-Edomi; bonke abakwa-Edomi baba yizinceku zikaDavide. USimakade wenza uDavide ukuba anqobe noma kuphi lapho ayeya khona.
UDavide wabusa phezu kwawo wonke u-Israyeli, wenza ubulungiswa nokulunga kubo bonke abantu bakhe.
UJowabe, indodana kaZeruya, wayephethe impi uJehoshafathi, indodana ka-Ahiludi, engumabhalane.
UZadoki, indodana ka-Ahithubi, no-Abhimeleki, indodana ka-Abhiyathara, babengabaphristi, uShawusha engumbhali.
UBhenaya, indodana kaJehoyada, wayengamele amaKherethi namaPhelethi; amadodana kaDavide ayesondele, engawokuqala ngasenkosini.
Kwathi emveni kwalokho uNahashi, inkosi yakwa-Amoni, wakhothama, indodana yakhe yabusa esikhundleni sakhe.
UDavide wathi: “Ngiyakumenzela umusa uHanuni, indodana kaNahashi, ngokuba uyise wangenzela umusa.” UDavide wayesethumela izithunywa ukuba ziyomduduza ngokulahlekelwa nguyise. Izinceku zikaDavide zafika kwa-Amoni kuHanuni, zamduduza.
Kepha izikhulu zakwa-Amoni zathi kuHanuni: “Ngabe ucabanga ukuthi uDavide uthumele abazokududuza, ngokuba ehlonipha uyihlo na? Akazithumelanga yini izinceku zakhe ukuba zizohlola izwe nokuba ziwuqumbe phansi umbuso wakho na?”
UHanuni wayesezibamba izinceku zikaDavide, waziphuca amakhanda nezilevu, wasika izingubo zazo kwaze kwaba sezinqeni, wayesezikhomba indlela.
Bahamba bamazisa uDavide ngalawo madoda. Wayesethumela ukuba ahlangatshezwe, ngokuba ayenamahloni kakhulu. Yathi inkosi: “Hlalani eJerikho zize zihlume izilevu zenu, bese niyabuya-ke.”
Abantu bakwa-Amoni babona ukuthi bazithele ngesigcwagcwa kuDavide. UHanuni nabakwa-Amoni bathumela amathalenta esiliva ayinkulungwane ukuba baqashe izinqola nabamahhashi e-Aramu Naharayimi, e-Aramu Mahakha, naseZobha.
Baqasha izinqola eziyizi-32 000, nenkosi yaseMahakha nabantu bayo beza bakanisa phambi kweMedebha. Abakwa-Amoni babuthana bephuma emizini yabo; beza ukuzokulwa.
UDavide wezwa ngalokho, wathumela uJowabe nayo yonke impi namabutho angamaqhawe.
Abakwa-Amoni baphuma bayihlela impi yabo belungela ukulwa ngasesangweni lomuzi, kepha amakhosi ayefikile ayewodwa endle.
UJowabe esebona ukuthi impi ingaphambili nangasemva kwakhe, wakhetha amadoda kwabakhethekileyo bonke bakwa-Israyeli, wawahlela ukuze alwe nama-Aramu.
Abantu abaseleyo wabashiya esandleni sika-Abhishayi, umfowabo, bazihlela ukuba balwe nabakwa-Amoni.
Wathi: “Uma ama-Aramu eba namandla kunami, uyakuza ungihlenge, kodwa uma abakwa-Amoni beba namandla kunawe, ngizoza ngikophule.
Qinani, masibe nesibindi ngenxa yabantu bakithi nangenxa yemizi kaNkulunkulu wethu; uSimakade makenze okuhle akubona kufanele.”
UJowabe namabutho ayenaye basondela kuma-Aramu ukuba balwe nawo, kodwa wona acela empunzini.
Abakwa-Amoni babona ukuthi ama-Aramu acele empunzini, nabo babaleka phambi kuka-Abhishayi, umfowabo waya emzini. UJowabe waya eJerusalema.
Ama-Aramu esebonile ukuthi anqotshiwe ngu-Israyeli, athuma izithunywa, akhipha ama-Aramu ayengaphesheya komfula noShofakhi, umkhuzi wempi kaHadadezeri, phambi kwawo.
UDavide wabikelwa ngalokho, wayeseqoqa wonke u-Israyeli, bawela iJordani, bafika kuwo; wase eyihlela impi, walwa nawo.
Ama-Aramu abaleka phambi kuka-Israyeli. UDavide wabulala ama-Aramu ayizi-7 000 ayegibele ezinqoleni, nemigundatshani eyizi-40 000, wabulala noShofaki, umkhuzi wempi.
Izinceku zikaHadadezeri zabona ukuthi zehluliwe ngu-Israyeli, zenza ukuthula noDavide, zamkhonza. Ama-Aramu awaphindanga afuna ukusiza abakwa-Amoni.
Kwathi sekwedlule unyaka, ngesikhathi amakhosi aphuma ahlasele ngaso, uJowabe wahola amaqhawe empi, wabhubhisa izwe labakwa-Amoni. Wahamba wavimbezela iRabha, kodwa uDavide wayesele eJerusalema. UJowabe wahlasela iRabha, walinqoba.
UDavide wathatha umqhele wenkosi yabo ekhanda layo, wathola ukuthi isisindo sawo sasiyithalenta legolide; wawunetshe eliyigugu; wabekwa ekhanda likaDavide. Wathatha emzini impango eningi kakhulu.
UDavide wakhipha abantu ababekuyo yonke imizi yabakwa-Amoni, wabanquma ngamasaha, ngezibhuqo zensimbi, nangamazembe.
Kwathi emveni kwaleso sehlakalo kwaqubuka impi phakathi kuka-Israyeli namaFilisti eGezeri. USibhekhayi, umHushathi, wabulala uSiphayi, enye yamadodana amaRefa; anqotshwa amaFilisti.
Kwaphinda kwaqubuka enye impi namaFilisti. U-Elihanani, indodana kaJayire, wabulala uLahimi, umfowabo kaGoliyathi, umGithi; uthi lomkhonto ayewuphatha lwalungangogongolo lomaluki.
Kwaphinda futhi kwaba nempi eGathi, lapho kwakukhona umuntu owayemude kakhulu; eneminwe eyisithupha esandleni ngasinye, kanjalo nasezinyaweni enezinzwani eziyisithupha unyawo ngalunye, sekukonke kungama-24. Naye wayezalwa ngamaRefa.
Wamedelela u-Israyeli; ngakho-ke uJonathani, indodana kaShimeya, umfowabo kaDavide, wambulala.
Yibo laba ababeyizizukulwane zamaRefa eGathi, ababulawa nguDavide, nezinceku zakhe.
USathane wamelana no-Israyeli, wamyenga uDavide ukuba abale u-Israyeli.
UDavide wathi kuJowabe nakubaholi babantu: “Hambani nibale u-Israyeli kusukela eBheri Sheba kuze kube kwaDani, nilethe inani labo kimi ukuze ngazi ukuthi ungakanani.”
UJowabe wathi: “USimakade makenezelele kubantu bakhe kuphindwe kayikhulu. Nkosi yami, nkosi, kanti abasizo yini izinceku zenkosi yami bonke na? Inkosi yami ifunelani ukwenza lokhu na? Kungani ifuna ukuba yimbangela yecala ku-Israyeli na?”
Izwi lenkosi nokho lamehlula uJowabe. UJowabe waphuma walihamba lonke elakwa-Israyeli waze wayofika eJerusalema.
UJowabe wamnika uDavide inani labantu ababebaliwe. Esewonke u-Israyeli wayeyisi-1 100 000 ababengaphuma baye empini, uJuda yena eyizi-470 000.
AbaLevi nabakwaBhenjamini abazange babalwe, ngokuba uJowabe wayecunulwe yizwi elalikhishwe yinkosi.
Lokhu kwakukubi phambi kukaNkulunkulu, ngalokho-ke wamjezisa u-Israyeli.
UDavide wayesethi kuNkulunkulu: “Ngonile kakhulu ngale nto engiyenzileyo. Manje Simakade, ake uthethelele inceku yakho icala elenzileyo, ngokuba ngenzile ubuwula obukhulu.”
USimakade wayesekhuluma kuGadi, umboni kaDavide, ethi:
“Hamba uyokhuluma noDavide, uthi: ‘Usho kanje uSimakade, uthi: “Nginezinto ezintathu engizibeka phambi kwakho; khetha ibe yinye kuzo ukuba ngikwenzele yona.” ’ ”
UGadi wafika kuDavide, wathi kuye: “Usho kanje uSimakade, uthi:
‘Zikhethele noma kube yiminyaka emithathu yendlala, noma izinyanga ezintathu unqotshwa yizitha zakho ngenkemba yazo, noma izinsuku ezintathu zenkemba kaSimakade nobhubhane ezweni, ingelosi kaSimakade ibhubhisa kulo lonke elakwa-Israyeli. Manje-ke qoka, lizwi lini engiyakulibuyisela kongithumileyo na?’ ”
UDavide wathi kuGadi: “Ngidabuka kakhulu; kungcono mangiwele esandleni sikaSimakade, ngokuba umusa wakhe mkhulu kakhulu, kunokuba ngiwele esandleni somuntu.”
USimakade wathumela ubhubhane kwa-Israyeli, kwafa abantu abayizi-70 000 kwa-Israyeli.
UNkulunkulu wathumela ingelosi eJerusalema ukuba ilibhubhise. Kwathi lapho isabhubhisa uSimakade wabuka, wazisola ngale nhlekelele, wathi engelosini eyayibhubhisa: “Sekwanele manje, finyeza isandla sakho.” Ingelosi kaSimakade yayimi ngasesibuyeni sika-Orinani, umJebusi.
UDavide waphakamisa amehlo akhe wayibona ingelosi kaSimakade imi emkhathini womhlaba nezulu, ikhokhe inkemba esandleni sayo iyelulele phezu kweJerusalema. UDavide namalunga babembethe ingubo yesaka base bekhothama bathi mbo ngobuso.
UDavide wathi kuNkulunkulu: “Akumina yini owayaleza ukuba kubalwe abantu na? Yimi engonileyo, ngenze okubi kakhulu, kodwa lezi zimvu zenzeni na? Isandla sakho, Simakade Nkulunkulu wami, masijezise mina nendlu kababa, hhayi laba bantu bakho obashaya ngobhubhane.”
Ingelosi kaSimakade yamyala uGadi ukuba ayotshela uDavide ukuthi makakhuphuke, amisele uSimakade i-althare esibuyeni sika-Orinani, umJebusi.
UDavide wakhuphuka njengalokhu eshilo uGadi ekhuluma egameni likaSimakade.
U-Orinani waphenduka wayibona ingelosi; amadodana akhe amane acasha, u-Orinani wayebhula ukolo.
UDavide wafika ku-Orinani, u-Orinani wabheka, wabona uDavide, waphuma esibuyeni, wakhothama kuDavide, ubuso bakhe bubheke phansi.
UDavide wathi ku-Orinani: “Nginike le ndawo eyisibuya ukuba ngakhele kuyo uSimakade i-althare; ngizoyikhokhela imali epheleleyo ukuze lolu bhubhane lunqamuke kubantu.”
U-Orinani wathi kuDavide: “Zithathele yona; inkosi yami, inkosi, mayenze lokho okuhle emehlweni ayo. Bheka, ngiyakukunika izinkabi zibe ngezeminikelo yokushiswa, izibhulo zibe yizinkuni, nokolo ube ngumnikelo wokusanhlamvu; ngikunika konke lokho.”
Inkosi uDavide yathi ku-Orinani: “Qha, ngiyakukukhokhela konke imali epheleleyo, ngokuba angizukumthathela uSimakade okungokwakho, noma nginikele umnikelo wokushiswa ongabizanga lutho.”
UDavide wamkhokhela u-Orinani ngaleyo ndawo amashekeli egolide angama-600 ngokwesisindo.
UDavide wamakhela lapho uSimakade i-althare, wanikela ngeminikelo yokushiswa nangeminikelo yokuthula, wakhuleka kuSimakade. USimakade esezulwini waphendula ngomlilo e-althare leminikelo wokushiswa.
USimakade wakhuluma engelosini; yayisiyibuyisela inkemba yayo emgodleni wayo.
Ngaleso sikhathi lapho uDavide esebonile ukuthi uSimakade umphendulile esibuyeni sika-Orinani umJebusi, wenza umhlatshelo khona lapho.
Ngokuba ithabanakeli likaSimakade ayelenzile uMose ehlane, ne-althare lomnikelo wokushiswa kwakusendaweni ephakemeyo eGibheyoni ngaleso sikhathi,
uDavide akakwazanga ukuya phambi kwalo ukuba abuze kuNkulunkulu, ngokuba wayesaba inkemba yengelosi kaSimakade.
UDavide wayesethi: “Le yindlu kaSimakade uNkulunkulu, leli yi-althare lomnikelo wokushiswa ka-Israyeli.”
UDavide wayala ukuba kuqoqwe bonke abafokazi ababekwa-Israyeli, wabeka ababazi bamatshe ukuba babaze amatshe axhoziweyo, ukuze kwakhiwe indlu kaNkulunkulu.
UDavide waqokelela nensimbi eningi yokwenza izipikili zeminyango nezamasango nezokuhlanganisa ithusi eliningi elisisindo salo singenakulinganiswa,
nemisedari engenakubalwa, ngokuba abaseSidoni nabaseThire babemlethele imisedari eminingi uDavide.
UDavide wathi: “USolomoni, indodana yami, usengumfana, akakaqini ukuba angakhela uSimakade indlu, ngokuba indlu okumele yakhelwe uSimakade kumele ibe yinhle kakhulu, ibatshazwe, ibe negama nodumo emazweni wonke; ngakho-ke ngizakuqala mina ukuyilungiselela.” UDavide wayilungiselela kakhulu engakafi.
Wayesebiza uSolomoni, indodana yakhe, wamyala ukuba akhele uSimakade indlu.
UDavide wathi kuSolomoni, indodana yakhe: “Bekusenhliziyweni yami ukuba ngakhe indlu, ngiyakhela igama likaSimakade uNkulunkulu wami.
Kepha izwi likaSimakade lathi kimi: ‘Uchithe igazi eliningi, waphaka izimpi eziningi, ngalokho awuyukulakhela igama lami indlu, ngokuba liningi igazi olichithe emhlabathini phambi kwami.
Bheka, uzozalelwa indodana eyakuba ngumuntu wokuthula. Ngiyakumnika ukuthula ezitheni zakhe nxazonke, ngokuba igama lakhe uyakuba nguSolomoni, ngiyakunika u-Israyeli ukuthula noxolo ngezinsuku zakhe.
Uyakulakhela igama lami indlu; uyakuba yindodana yami, Mina ngibe nguyise. Isihlalo sakhe sobukhosi sombuso wakhe kwa-Israyeli ngiyosimisa kuze kube phakade.’
“Manje-ke, ndodana yami, uSimakade makabe nawe, ube nempumelelo, umakhele indlu kaSimakade uNkulunkulu wakho njengolokhu akhuluma kuwe.
Kuphela nje, sengathi uSimakade angakupha ukuhlakanipha nokuqonda, akuyale ngo-Israyeli ukuba ugcine umthetho kaSimakade uNkulunkulu wakho.
Khona uyakuphumelela, uma ugcina izimiso nezehlulelo uSimakade ayala ngazo uMose ngo-Israyeli. Qina, ume isibindi, ungesabi, ungabi naluvalo.
“Uyabona, ekuhluphekeni kwami, ngiyilungiselele indlu kaSimakade: amathalenta egolide ayizi-100 000, amathalenta esiliva ayizi-100 000, ithusi nensimbi okungenakulinganiswa ngenxa yobuningi bakho; ngilungise nemithi namatshe, wena-ke usuyokwenezela kukho.
Kukhona kuwe izisebenzi eziningi, ababazi, izisebenzi zamatshe nezemithi, nabo bonke abayizingcweti emisebenzini yonke:
eyegolide, eyesiliva, eyethusi, neyensimbi, okungenakubalwa; suka usebenze; uSimakade abe nawe.”
UDavide wayala zonke izikhulu zakwa-Israyeli ukuba zimelekelele uSolomoni, wathi:
“USimakade uNkulunkulu wenu akanani na? Akaninikanga yini ukuphumula nxazonke na? Unikele kini izakhamuzi zakuleli lizwe, walinqoba leli lizwe phambi kukaSimakade naphambi kwabantu bakhe.
Ngakho-ke nikelani inhliziyo yenu nomphefumulo wenu, nifune uSimakade uNkulunkulu wenu. Sukani nakhe indawo engcwele kaSimakade uNkulunkulu, ukuze kungeniswe umphongolo wesivumelwano sikaSimakade, nezinto ezingcwele zikaNkulunkulu kuleyo ndlu eyokwakhelwa igama likaSimakade.”
UDavide wayesemdala esenelisiwe yizinsuku; wambeka uSolomoni, indodana yakhe, ukuba abe yinkosi kwa-Israyeli.
Waqoqa bonke abaholi bakwa-Israyeli, abaphristi nabaLevi.
AbaLevi babalwa kusukela kwabaneminyaka engama-30 kuya phezulu. Inani labo laliyizi-38 000.
Abayizi-24 000 kulaba yibona abayongamela umsebenzi wendlu kaSimakade. Abayizi-6 000 babe yizikhulu nabehluleli.
Abayizi-4 000 bayoba ngabalindisango, kuthi abayizi-4 000 badumise uSimakade ngezinto engazenzela ukudumisa.
UDavide wabehlukanisa ngezigaba zabo njengamadodana kaLevi: uGereshoni, uKhohathi noMerari.
KwabakaGereshoni: nguLadani noShimeyi.
Amadodana kaLadani: nguJehiyeli, inhloko, uZethamu noJoweli, emathathu.
Amadodana kaShimeyi: nguShelomothi, uHaziyeli noHarana, emathathu. Labo babeyizinhloko zoyise kwaLadani.
Amadodana kaShimeyi: uJahathi, uZina, uJewushe noBheriya. Labo bobane kwakungamadodana kaShimeyi.
UJahathi wayeyinhloko, owesibili kunguZina, kodwa uJewushe noBheriya babengenawo amadodana amaningi, ngakho-ke bahlanganiswa baba yindlu eyodwa.
Amadodana kaKhohathi: ngu-Amramu, uJizihari, uHebhroni no-Uziyeli, bebane.
Amadodana ka-Amramu: ngu-Aroni noMose. U-Aroni wahlukaniswa wangcweliselwa izinto ezingcwelengcwele, yena namadodana akhe, kuze kube phakade, ukuba ashise impepho phambi kukaSimakade, amkhonze, nokuba abusise egameni likaSimakade, kuze kube phakade.
UMose, umuntu kaNkulunkulu, amadodana akhe abizwa ngesizwana sakwaLevi.
Amadodana kaMose, nguGereshomu no-Eliyezeri.
Amadodana kaGereshomu, nguShebuweli owayeyinhloko.
Amadodana ka-Eliyezeri: nguRehabhiya, inhloko. U-Eliyezeri wayengenawo amanye amadodana, kodwa amadodana kaRehabhiya ayemaningi kakhulu.
Amadodana kaJizihari: nguShelomithi, inhloko.
Amadodana kaHebhroni: nguJeriya, inhloko, owesibili u-Amariya, owesithathu uJahaziyeli, owesine nguJekhameyamu.
Amadodana ka-Uziyeli: nguMikha, inhloko, owesibili nguJishiya.
Amadodana kaMerari: nguMaheli noMushi. Amadodana kaMaheli: ngu-Eleyazare noKhishi.
U-Eleyazare wafa enganandodana, enamadodakazi wodwa; athathwa ngabafowabo amadodana kaKhishi.
Amadodana kaMushi: nguMaheli, u-Edere noJeremoti, bebathathu.
Yilabo-ke okwakungabozalo lukaLevi ngokwezindlu zokhokho babo, izinhloko zoyise, bebalwa ngamanani abo, ngamagama abo nangezinhloko zabo. Yibona ababenza umsebenzi wokukhonza endlini kaSimakade, kusukela kwabaneminyaka engama-20 kuya phezulu.
UDavide wathi: “USimakade uNkulunkulu ka-Israyeli unikile abantu bakhe ukuphumula, uhleli eJerusalema, kuze kube phakade.
AbaLevi bayakuthwala ithabanakeli nazo zonke izinto zalo zenkonzo.”
Njengokwezwi lokugcina likaDavide, leli yinani labozalo lukaLevi, kusukela kwabaneminyaka engama-20 kuya phezulu.
Umsebenzi wabo kwakungukusiza abozalo luka-Aroni emsebenzini wendlu kaSimakade, emagcekeni, emakamelweni, ukuhlambulula zonke izinto ezingcwele, nokwenza umsebenzi wokukhonza endlini kaNkulunkulu,
ukusiza futhi nangezinkwa zokubukwa, impuphu ecolisekileyo yomnikelo wempuphu, amaqebelengwane angenamvubelo, okuphekwe ngamabhodwe, okuxutshanisiweyo, neyazo zonke izilinganiso nobukhulu;
ukuma njalo ekuseni ukuba babe ngabadumisa uSimakade, kanjalo nakusihlwa;
ukunikela njalo kuSimakade, ngayo yonke iminikelo yokushiswa, ngamasabatha, ngokwethwasa kwenyanga, nangemikhosi emisiweyo, njengokubalula komthetho wabo phambi kukaSimakade.
Bayakugcina umsebenzi wethende lokuhlangana, nezimfanelo zendawo engcwele, nezimfanelo zabozalo luka-Aroni, abafowabo, ekukhonzeni endlini kaSimakade.
Nazi izigaba ozalweni luka-Aroni. Amadodana ka-Aroni: nguNadabi, u-Abhihu, u-Eleyazare no-Ithamari.
UNadabi no-Abhihu bafa kuqala kunoyise, bengenabantwana. U-Eleyazare no-Ithamari bakhonza bengabaphristi.
UDavide, uZadoki, omunye wozalo luka-Eleyazare, no-Ahimeleki, wozalo luka-Ithamari, babehlukanisa ngezigaba zabo, ngokomsebenzi wabo.
Ozalweni luka-Eleyazare kwatholakala amadoda amaningi ayizinhloko kunasozalweni luka-Ithamari. Ahlukaniswa kanje: ozalweni luka-Eleyazare kwakukhona abali-16 ababeyizinhloko zezindlu zokhokho, nasozalweni luka-Ithamari kwatholakala abayisishiyagalombili ngokwezindlu zokhokho.
Bahlukaniswa ngokonkatho, ngokuba phakathi kwabo kwakukhona izikhulu zendlu engcwele nezikhulu zikaNkulunkulu ozalweni luka-Eleyazare noluka-Ithamari.
UShemaya, indodana kaNethaneli, umbhali ongumLevi, waloba phambi kwenkosi, nezikhulu, naphambi kukaZadoki, umphristi, no-Ahimeleki, indodana ka-Abhiyathara, nezinhloko zoyise, abaphristi nabaLevi. Enye indlu yoyise yayivela ku-Eleyazare, enye ivela endlini ka-Ithamari.
Unkatho lokuqala lwadla uJehoyaribi, olwesibili uJedaya,
olwesithathu uHarimi, olwesine uSehorimi,
olwesihlanu uMalikhiya, olwesithupha uMijamini,
olwesikhombisa uHakhosi, olwesishiyagalombili u-Abhiya,
olwesishiyagalolunye uJeshuwa, olweshumi uShekhaniya,
olwe-11 u-Eliyashibhi, olwe-12 uJakhimi,
olwe-13 uHupha, olwe-14 uJeshebheyabe,
olwe-15 uBhiliga, olwe-16 u-Imeri,
olwe-17 uHeziri, olwe-18 uHaphizezi,
olwe-19 uPhethahiya, olwama-20 uJehezekeli,
olwama-21 uJakini, olwama-22 uGamuli,
olwama-23 uDelaya, nolwama-24 uMahaziya.
Lezi kwakuyizigaba zabo ngokomsebenzi wabo, ukuba bangene endlini kaSimakade ngokomthetho ababewunikwe ngesandla sika-Aroni, uyise, njengalokho uSimakade uNkulunkulu ka-Israyeli ayemyalile.
Abaseleyo emadodaneni kaLevi kwakuyilaba: emadodaneni ka-Amramu nguShubhayeli; emadodaneni kaShubhayeli nguJehedeya.
KuRehabhiya: emadodaneni kaRehabhiya: nguJishiya, inhloko.
KumaJizihari: nguShelomothi; emadodaneni kaShelomothi: nguJahathi.
Amadodana kaHebhroni: nguJeriya, inhloko, owesibili ngu-Amariya, owesithathu nguJahaziyeli, owesine nguJekhameyamu.
Indodana ka-Uziyeli: nguMikha; indodana kaMikha nguShamiri.
Umfowabo kaMikha nguJishiya. Indodana kaJishiya nguZakhariya.
Amadodana kaMerari: nguMaheli, noMushi; indodana kaJahaziya nguBheno.
Amadodana kaMerari: nguJahaziya, uBheno, uShohamu, uZakhuri no-Ibhiri.
KuMaheli: ngu-Eleyazare, ongabanga namntwana.
KuKhishi: indodana kaKhishi nguJerameli.
Amadodana kaMushi: nguMaheli, u-Edere noJerimothi. Yilaba-ke ababengamadodana abaLevi ngezindlu zokhokho babo.
Nalaba benza unkatho njengabafowabo, amadodana ka-Aroni phambi kukaDavide, inkosi, uZadoki, u-Ahimeleki, nezinhloko zawoyise, abaphristi nabaLevi; omkhulu kubo kanjalo nomfowabo omncane.
UDavide nabakhuzi bempi behlukanisela umsebenzi amanye amadodana ka-Asafa, nakaHemani nakaJeduthuni; ayezophrofetha ngamahabhu, ngezingubhu, nangamasimbali. Abantu ababezokwenza umsebenzi wenkonzo babeyileli nani, bemi kanje:
emadodaneni ka-Asafa: nguZakhuri, uJosefa, uNethaniya no-Asharela, amadodana ka-Asafa, ephethwe ngu-Asafa owayephrofetha ngokulawulwa yinkosi.
KuJeduthuni: amadodana akhe: nguGedaliya, uZeri, uJeshaya, uShimeyi, uHashabhiya noMathithiya, esewonke eyisithupha, ephethwe nguyise uJeduthuni owayephrofetha ngohabhu, ngokubonga nangokudumisa uSimakade.
KuHemani: amadodana kaHemani: nguBhukiya, uMathaniya, u-Uziyeli, uShebhuweli, uJerimothi, uHananiya, uHanani, u-Eliyatha, uGidalithi, uRomamithi Ezeri, uJoshibhekasha, uMalothi, uHothiri noMahaziyothi.
Bonke labo kwakungamadodana kaHemani, isiboni senkosi ngokwezwi likaNkulunkulu, ukuze siphakamise uphondo lwayo. UNkulunkulu wamupha uHemani amadodana ali-14, namadodakazi amathathu.
Bonke laba babephethwe nguyise ekuhlabeleleni endlini kaSimakade ngamasimbali, ngezingubhu nangamahabhu ekukhonzeni endlini kaNkulunkulu. U-Asafa, uJeduthuni noHemani babephethwe yinkosi.
Inani labo bonke sebehlangene nabafowabo ababefundiswe ukuhlabelelela uSimakade, nababeyizazi babengama-288.
Benza unkatho ngemisebenzi yabo kusukela komncane njengokomdala, isazi nomfundi.
Unkatho lokuqala lwadla uJosefa ka-Asafa, olwesibili uGedaliya, yena ekanye nabafowabo namadodana akhe, sebebonke beli-12.
Olwesithathu lwadla uZakhuri, amadodana akhe nabafowabo, beli-12,
olwesine lwadla uJiziri, amadodana akhe nabafowabo, beli-12.
Olwesihlanu lwadla uNethaniya, amadodana akhe nabafowabo, beli-12.
Olwesithupha lwadla uBhukiya, amadodana akhe nabafowabo, beli-12.
Olwesikhombisa lwadla uJesharela, amadodana akhe nabafowabo, beli-12.
Olwesishiyagalombili lwadla uJeshaya, amadodana akhe nabafowabo, beli-12.
Olwesishiyagalolunye lwadla uMathaniya, amadodana akhe nabafowabo, beli-12.
Olweshumi lwadla uShimeya, amadodana akhe nabafowabo, beli-12.
Olweshumi nanye lwadla u-Azareli, amadodana akhe nabafowabo, beli-12.
Olwe-12 lwadla uHashabhiya, amadodana akhe nabafowabo, beli-12.
Olwe-13 lwadla uShubhayeli, amadodana akhe nabafowabo, beli-12.
Olwe-14 lwadla uMathithiya, amadodana akhe nabafowabo, beli-12.
Olwe-15 lwadla uJeremothi, amadodana akhe nabafowabo, beli-12.
Olwe-16 lwadla uHananiya, amadodana akhe nabafowabo, beli-12.
Olwe-17 lwadla uJoshibhekaya, amadodana akhe nabafowabo, beli-12.
Olwe-18 lwadla uHanani, amadodana akhe nabafowabo, beli-12.
Olwe-19 lwadla uMalothi, amadodana akhe nabafowabo, beli-12.
Olwama-20 lwadla u-Eliyatha, amadodana akhe nabafowabo, beli-12.
Olwama-21 lwadla uHothiri, amadodana akhe nabafowabo, beli-12.
Olwama-22 lwadla uGidalithi, amadodana akhe nabafowabo, beli-12.
Olwama-23 lwadla uMahaziyothi, amadodana akhe nabafowabo, beli-12.
Olwama-24 lwadla uRomamithi Ezeri, amadodana akhe nabafowabo, beli-12.
Nazi izigaba zabalindimasango: kumaKhorahi: nguMeshelemiya, indodana kaKhore emadodaneni ka-Asafa.
UMeshelemiya wayenalawa madodana: izibulo kunguZakhariya, eyesibili uJediyayeli, eyesithathu uZabhadiya, eyesine uJathiniyeli,
eyesihlanu u-Elamu, eyesithupha uJehohanani, eyesikhombisa kungu-Eliyohenayi.
U-Obhede Edomi wayenalawa madodana: izibulo kunguShemaya, eyesibili uJehozabhadi, eyesithathu uJowa, eyesine uSakhari, eyesihlanu uNethaneli,
eyesithupha u-Amiyeli, eyesikhombisa u-Isakhare, eyesishiyagalombili uPhewulethayi; uNkulunkulu wayembusisile impela.
Naye uShemaya wayenamadodana ayebusa indlu kayise, ngokuba ayengamaqhawe anamandla.
Amadodana kaShemaya: kungu-Othini, uRefayeli, u-Obhedi, u-Elizabhadi nabafowabo ababengamaqhawe anamandla, u-Elihu noSemakhiya.
Bonke labo kwakungabozalo luka-Obhede Edomi, bona, namadodana abo, nabafowabo, amadoda aqinileyo anamandla enkonzweni, babengama-62.
UMeshelemiya wayenamadodana nabafowabo, amadoda anamandla, eli-18.
UHosa owayengomunye wobozalo lukaMerari wayenamadodana: uShimiri wayeyinhloko nakuba engesilo izibulo, nguyise owambeka waba yinhloko.
Owesibili kwakunguHilikiya, owesithathu uThebhaliya, owesine kunguZakhariya; sebebonke, amadodana nabafowabo bakaHosa babeli-13.
Lezo zigaba zabalindimasango, izinhloko zabantu, zaba negunya ukukhonza endlini kaSimakade njengabafowabo.
Bashaya unkatho isango ngesango naphakathi komncane njengakomdala, ngokwezindlu zawoyise.
Unkatho lwasempumalanga lwadla uShelemiya. Base benza unkatho ngendodana yakhe, uZakhariya, owayengumeluleki owayehlakaniphile, wadliwa wunkatho lwasenyakatho.
Olwaseningizimu lwadla u-Obhede Edomi namadodana akhe, ukuba baqaphe inqolobane.
Olwasentshonalanga lwadla uShuphimi noHosa, ukuba babe ngabalindi abalinda ngasesangweni eShalekethi, ngendlela eyenyukayo.
Ngasempumalanga kwakunabaLevi abayisithupha, ngasenyakatho bebane ngosuku, ngaseningizimu bebane ngosuku nasenqolobaneni bebane.
Kwakukhona abane ngasentshonalanga endleleni, ePharibhari, kuthi ePharibhari uqobo kube nababili.
Lezo zigaba yizona ezabalindi ababevela ozalweni lukaKhorahi nakolukaMerari.
KubaLevi, u-Ahiya wayephethe ingcebo yendlu kaNkulunkulu nengcebo yezinto ezingcwele.
Amadodana kaLadani, ozalo lwamaGereshoni akwaLadani, izinhloko zoyise zakwaLadani umGereshoni, amaJehiyeli,
amadodana amaJehiyeli, uZethamu noJoweli umfowabo, ayengamele ingcebo endlini kaSimakade.
Kuma-Amramu, kumaJizihari, kumaHebhroni nakuma-Uziyeli;
uShebhuweli, indodana kaGereshomu kaMose, wayengumphathisikhwama.
Abafowabo ku-Eliyazeri: kwakunguRehabhiya, indodana yakhe, uJeshaya, uJoramu, uZikhiri noShelomothi.
UShelomothi nabafowabo babengamele yonke ingcebo yezinto ezingcwele ezazingcweliswe yinkosi uDavide, izinhloko zoyise, abakhuzi bempi bezinkulungwane, abakhuzi bempi bamakhulu nabakhuzi bempi.
Yibona ababengcwelisa okutholakale empini nasempangweni ukuba kulungiswe indlu kaSimakade,
nakho konke uSamuweli umboni, uSawule indodana kaKhishi, u-Abhineri indodana kaNeri noJowabe indodana kaZeruya ababekungcwelisile; lokho okwakungcweliswe ngabantu abehlukene, konke kwaphathwa nguShelomothi nabafowabo.
KumaJizihari, uKhenaniya namadodana akhe babephethe umsebenzi ongaphandle kwa-Israyeli, beyizikhulu nabehluleli.
KumaHebhroni, uHashabhiya nabafowabo, bengamaqhawe anamandla ayi-1 700, futhi bengababonisi kwa-Israyeli, phesheya kweJordani entshonalanga. Bengababonisi emsebenzini wonke kaSimakade nasezinkonzweni zenkosi.
KumaHebhroni, nguJeriya owayeyinhloko yezizukulwane ngokwezindlu zoyise. Ngonyaka wama-40 wokubusa kukaDavide kwafunwa, kwatholakala phakathi kwabo amaqhawe anamandla eJazeri kwaGileyadi.
Abafowabo, amaqhawe anamandla, babeyizi-2 700, izinhloko zoyise ezenziwa ababonisi abaphethe kwaRubeni, kwaGadi, nasengxenyeni yesizwana sakwaManase. Babephethe ezindabeni zonke zikaNkulunkulu, nasezindabeni zenkosi.
Nanti inani labantu bakwa-Israyeli ngokwezinhloko zezindlu zoyise, abakhuzi bempi bezinkulungwane nabezamakhulu, izikhulu zabo ezazikhonza inkosi kukho konke ngokwezigaba, ezazingena ziphuma inyanga nenyanga, ezinyangeni zonke zonyaka. Babekhona kuleso naleso sigaba, bekhonza, sebebonke beyizi-24 000.
UJashobhehamu, indodana kaZabhidiyeli, wayengamele isigaba sokuqala esasingena ngenyanga yokuqala. Esigabeni sakhe kwakukhona abayizi-24 000.
Owayengomunye wozalo lukaPherezi, esiyisikhulu sabo bonke abakhuzi bempi ngenyanga yokuqala.
Owayephethe isigaba sesibili kwakunguDadayi, umAhohi; singena ngenyanga yesibili isigaba sakhe. Esigabeni sakhe kwakukhona umbusi, uMikhilothi, beyizi-24 000.
Induna yempi yesithathu eyayingena ngenyanga yesithathu kwakunguBhenaya, indodana kaJehoyada, umphristi. Wayeyinhloko; esigabeni sakhe kukhona abayizi-24 000.
Nguye lowo Bhenaya owayeyiqhawe phakathi kwabangama-30, nowayengamele. Esigabeni sakhe kwakuno-Amizabhadi, indodana yakhe.
Owayengamele isigaba sesine esasingena ngenyanga yesine kwakungu-Asaheli, umfowabo kaJowabe, elekelelana nendodana yakhe, uZebadiya. Esigabeni sakhe kwakukhona abayizi-24 000.
Ngenyanga yesihlanu kwakunguShamhuthi, umJizirahi, owayengamele; esigabeni sakhe kwakukhona abayizi-24 000.
U-Ira, indodana ka-Ikheshi waseThekhowa, wayephethe ababengena ngenyanga yesithupha; esigabeni sakhe kwakukhona abayizi-24 000.
UHelezi, umPheloni, nguyena owayengamele ababengena ngenyanga yesikhombisa, wayevela kwa-Efrayimi; esigabeni sakhe kwakukhona abayizi-24 000.
USibhekhayi, umHushathi kwabakwaZera, nguye owayengamele ababengena ngenyanga yesishiyagalombili; esigabeni sakhe kwakukhona abayizi-24 000.
U-Abhiyezeri, umAnathothi wakwaBhenjamini, wayengamele abangena ngenyanga yesishiyagalolunye; esigabeni sakhe kukhona abayizi-24 000.
UMaharayi waseNethofa kwabakwaZera, wayengamele ababengena ngenyanga yeshumi; esigabeni sakhe kukhona abayizi-24 000.
UBhenaya, umPhirathoni wakwa-Efrayimi, wayephethe ababengena ngenyanga yeshumi nanye; esigabeni sakhe kukhona abayizi-24 000.
UHelidayi waseNethofa, ozalwa ngu-Otheniyeli, wayengamele abangena ngenyanga ye-12; esigabeni sakhe kukhona abayizi-24 000.
Ababemele izizwana zakwa-Israyeli kwakuyilaba: kwesakwaRubeni, umbusi kwakungu-Eliyazeri, indodana kaZikhiri. KwesakwaSimeyoni kunguShefathiya, indodana kaMahakha.
KubaLevi kunguHashabhiya, indodana kaKhemuweli. Ku-Aroni kunguZadoki.
KuJuda kungu-Elihu, umfowabo kaDavide. Ku-Isakhare kungu-Omri, indodana kaMikhayeli.
KwaZebuloni kungu-Ishimaya, indodana ka-Obhadiya; kwaNafethali kunguJeremothi indodana ka-Aziriyeli.
Kwabakwa-Efrayimi kunguHosheya, indodana ka-Azaziya; engxenyeni yesizwana sakwaManase kunguJoweli, indodana kaPhedaya.
Engxenyeni kaManase kwaGileyadi kungu-Ido, indodana kaZakhariya; kwabakwaBhenjamini kunguJahasiyeli, indodana ka-Abhineri;
kwabakwaDani kungu-Azareli, indodana kaJerohamu. Yilabo ababengabakhuzi bempi ezizwaneni zakwa-Israyeli.
UDavide akazange alibale inani lalabo ababeneminyaka engama-20 nabancane kunalokho, ngokuba uSimakade wayeshilo ukuthi uyomandisa u-Israyeli abe ngangezinkanyezi zezulu.
UJowabe, indodana kaZeruya, waqala ukubala abantu, kodwa akazange aqede ngenxa yolaka olwaqubuka phezu kuka-Israyeli, inani labantu alizange lifakwe encwadini yezindaba zemihla ngemihla yenkosi uDavide.
U-Azimavethi, indodana ka-Adiyeli, wayephethe ingcebo yenkosi. UJonathani, indodana ka-Uziya, engamele izinto zasemasimini, emzini, emizaneni nasezinqabeni.
U-Eziri, indodana kaKhelubi, wayephethe abebenza umsebenzi wasendle, belima umhlabathi.
UShimeyi waseRama wayephethe izivini; uZabhidi ephethe iwayini eligciniweyo elithathwe ezivinini.
UBhali Hanani, umGederi, wayephethe iminqumo nemikhiwane okwakusehlanzeni; uJowabe ephethe izigcinamafutha.
Imihlambi eyayiklaba eSharoni yayiphethwe nguShithirayi, umSharoni; kuthi imihlambi eyayisezigodini iphathwe nguShafathi, indodana ka-Adilayi.
U-Obhili wakwa-Ishmayeli wayephethe amakameli; uJehedeya, umMeronothi, ephethe izimbongolo.
UJazizi, umHagiri, wayephethe izimvu. Bonke laba babeyizinduna zemfuyo yenkosi uDavide.
UJonathani, umfowabo kayise kaDavide, wayengumeluleki engumuntu ohlakaniphileyo, futhi engumbhali. UJehiyeli, indodana kaHakhimoni, wayehlala namadodana enkosi.
U-Ahithofeli wayengumeluleki wenkosi. UHushayi, umArikhi, engumngani wenkosi,
owayelandela u-Ahithofeli kwakunguJehoyada, indodana kaBhenaya no-Abhiyathara. UJowabe wayengumkhuzi wempi yenkosi.
UDavide wayeseqoqa zonke izikhulu zakwa-Israyeli, abaholi bezizwana, izinduna zezigaba ezazikhonza inkosi, abakhuzi bempi bezinkulungwane nabezamakhulu, izinduna zayo yonke imfuyo yenkosi neyamadodana ayo, izinduna zasendlunkulu, amaqhawe, nawo wonke amadoda anamandla eJerusalema.
UDavide, inkosi, wasukuma wama ngezinyawo, wathi: “Ngilaleleni bafowethu, nani bantu bami: bekusenhliziyweni yami ukuba ngakhele umphongolo wesivumelwano sikaSimakade indlu yokuphumula, neyisenabelo sezinyawo zikaNkulunkulu wethu; ngiwenzile amalungiselelo okuba ngakhe.
Kepha uNkulunkulu wathi kimi: ‘Awuyukulakhela igama lami indlu, ngokuba wena uyindoda yempi, uchithe igazi.’
“Nakuba kunjalo, uSimakade uNkulunkulu ka-Israyeli wangiqoka endlini yonke kababa ukuba ngibe yinkosi kwa-Israyeli kuze kube phakade. Ngokuba ukhethe uJuda ukuba abe ngumbusi, endlini kaJuda, indlu kababa, emadodaneni kababa, wangithanda mina ukuba angibeke ngibe yinkosi yawo wonke u-Israyeli.
Emadodaneni ami wonke, ngokuba uSimakade ungiphile amadodana amaningi, ukhethe uSolomoni, indodana yami, ukuba ahlale esihlalweni sobukhosi sombuso kaSimakade kwa-Israyeli.
Wathi kimi: ‘USolomoni, indodana yakho, nguye oyakwakha indlu yami namagceke ami, ngokuba ngimkhethile ukuba abe yindodana yami, mina ngibe nguyise.
Ngiyakuwumisa umbuso wakhe kuze kube phakade, uma eqinisela ukugcina imiyalo yami nezahlulelo zami njenganamuhla.’
“Ngakho-ke phambi kwabo bonke abakwa-Israyeli, ibandla likaSimakade, nasezindlebeni zikaNkulunkulu wethu, bonani nifune yonke imiyalo kaSimakade uNkulunkulu wenu ukuze nilidle leli lizwe elihle, nize nilishiye, libe yifa labantwana benu ingunaphakade.
“Wena Solomoni, ndodana yami, mazi uNkulunkulu kayihlo, umkhonze ngenhliziyo epheleleyo nangomphefumulo ovumayo, ngokuba uSimakade uhlola zonke izinhliziyo, uqonda zonke izizindlo zemicabango. Uma umfuna, uyakufunyanwa nguye, kodwa uma umshiya uyakukulahla kuze kube phakade.
Bheka manje, qina ukwenze lokhu, ngokuba uSimakade ukukhethile ukuba wakhe indlu, ibe yindlu engcwele.”
UDavide wanika uSolomoni umfanekiso wompheme, izindlu zethempeli, ingcebo yalo, amakamelo alo aphezulu nangaphakathi kwayo, indlu yesihlalo somusa,
umfanekiso wakho konke ayenakho emicabangweni yakhe ngamagceke endlu kaSimakade, amakamelo nxazonke, ingcebo yendlu kaNkulunkulu, nengcebo yezinto ezingcwele,
izigaba zabaphristi nezabaLevi, wonke umsebenzi wokukhonza endlini kaSimakade, zonke izitsha zenkonzo endlini kaSimakade,
igolide, ngokwesilinganiso segolide sezinto zegolide zezinkonzo ngezinkonzo, izinto zonke zesiliva isisindo sazo, nazo zonke izinto zezinkonzo ngezinkonzo.
Isisindo sezinti zezibani zegolide nezibani zazo zegolide, isisindo salolo nalolo luthi lwesibani nezibani zalo, izinti zesiliva, isisindo sothi nezibani zalo njengomsebenzi walolo nalolo luthi.
Isisindo segolide lamatafula ezinkwa zokubukwa, amatafula ngamatafula, isiliva lamatafula esiliva.
Izingwegwe zenyama, izinkamba, izitsha zegolide elicwengekileyo, zonke izindebe zegolide, isisindo saleso naleso sitsha.
I-althare lempepho lingelegolide elicwengekileyo isisindo salo, umfanekiso wenqola, amakherubhi egolide ayelule amaphiko awo, asibekela umphongolo wesivumelwano sikaSimakade.
UDavide washo wathi: “Konke lokho ngikubhalile ngiqondiswa nguSimakade, yebo, wonke umsebenzi walo mfanekiso.”
UDavide wayesethi kuSolomoni, indodana yakhe: “Qina, ume isibindi, wenze lokhu. Ungesabi, ungabi naluvalo, ngokuba uSimakade uNkulunkulu, yebo, uNkulunkulu wami, unawe. Akayukukuyeka, akayukukushiya, uze uphele wonke umsebenzi wokwakha le ndlu kaSimakade.
Bheka, nazi izigaba zabaphristi nabaLevi zazo zonke izinkonzo zendlu kaNkulunkulu. Emsebenzini wonke uyothola abantu abazinikele ngenhliziyo nabayizingcweti emisebenzini yonke. Izikhulu nabantu bonke bayakukulalela konke okushoyo.”
Inkosi uDavide yathi kulo lonke ibandla: “USolomoni, indodana yami, nguye yedwa okhethwe nguNkulunkulu, usengumfana, akakaqini ukhakhayi, nomsebenzi mkhulu, ngokuba ithempeli alisilo elomuntu, kepha ngelikaSimakade uNkulunkulu.
Sengiyilungisele indlu kaNkulunkulu wami ngamandla ami wonke, igolide lokwegolide, isiliva lokwesiliva, ithusi lokwethusi, insimbi yokwensimbi, imithi yokwemithi, amatshe amashohamu nawokufakwa, amatshe ahlobisayo nanemibala eyehlukeneyo, izinhlobo zonke zamatshe ayigugu, namatshe amhlophe amaningi.
Futhi njengokuba ngiyayithanda indlu kaNkulunkulu wami, nginengcebo yegolide nesiliva, ngiyakunikela endlini kaNkulunkulu wami, phezu kwakho konke engikulungisele indlu engcwele,
amathalenta egolide ayizi-3 000, igolide lase-Ofiri, amathalenta ayizi-7 000 esiliva elicwengekileyo ukunameka ngalo izindonga zezindlu,
igolide lokwegolide, nesiliva lokwesiliva, yebo, kuwo wonke umsebenzi wezandla zezingcweti. Ngubani pho othokozela namuhla ukuzehlukanisela uSimakade na?”
Zase zinikela izikhulu zawoyise, abaholi bezizwana zakwa-Israyeli, abakhuzi bempi bezinkulungwane nabezamakhulu nezinduna zomsebenzi wenkosi.
Banikelela umsebenzi wendlu kaNkulunkulu ngalokhu: amathalenta egolide ayizi-5 000, amadarike ayizi-10 000, amathalenta esiliva ayizi-10 000, amathalenta ethusi ayizi-18 000, namathalenta ensimbi ayizi-100 000.
Ababenamatshe bawanikela engcebeni yendlu kaSimakade, phansi kwesandla sikaJehiyeli, umGereshoni.
Abantu bajabula ngokunikela kwabo ngenhliziyo, ngokuba banikela ngenhliziyo epheleleyo kuSimakade; naye uDavide, inkosi, wajabula ngokujabula okukhulu.
UDavide wayesemdumisa uSimakade phambi kwebandla lonke, wathi: “Mawubongwe Simakade Nkulunkulu ka-Israyeli, ubaba, kuze kube phakade.
Simakade, bungobakho ubukhulu, namandla, nodumo, nenkazimulo, nobukhosi, ngokuba konke okusezulwini nokusemhlabeni kungokwakho. Ungowakho umbuso, Simakade. Wena uphakeme, uyinhloko phezu kwakho konke.
Ingcebo nenkazimulo kuvela kuwe, Wena uyabusa phezu kwakho konke. Esandleni sakho kukhona amandla nezikhwepha, ukukhulisa nokunika bonke amandla.
Ngalokho-ke, Nkulunkulu wethu, siyakubonga, siyalidumisa igama lakho elitusekayo.
“Ngokuba ngingubani mina, nabantu bami bayini ukuba sibe namandla okunikela kangaka na? Ngokuba konke kuvela kuwe, thina-ke sikunika okuvela esandleni sakho.
Ngokuba singabafokazi phambi kwakho, nezihambi njengabo bonke okhokho bethu; izinsuku zethu emhlabeni zinjengethunzi, nethemba alikho.
Simakade Nkulunkulu wethu, zonke lezi zinto esizilungisele ukwakhela igama lakho elingcwele indlu, zivela esandleni sakho, zonke zingezakho.
Nkulunkulu wami, ngiyazi ukuthi uhlola inhliziyo, uthanda ubuqotho. Mina-ke ngobuqotho benhliziyo yami nginikele ngokuthokoza zonke lezi zinto, manje sengibonile abantu bakho abakhona lapha benikela kuwe ngokukhululeka nangokuthokoza.
Simakade, Nkulunkulu ka-Abhrahama noka-Isaka noka-Israyeli, okhokho bethu, gcina lokhu njalo ezizindlweni zemicabango yenhliziyo yabantu bakho, uqondise inhliziyo yabo kuwe,
unike uSolomoni, indodana yami, inhliziyo epheleleyo ukuba agcine imiyalo yakho, ubufakazi bakho, izimiso zakho, nokwenza konke lokhu, nokwakha ithempeli engililungisileyo.”
UDavide wathi kulo lonke ibandla: “Ake nibonge uSimakade uNkulunkulu wenu.” Lonke ibandla lambonga uSimakade uNkulunkulu wokhokho babo, lakhothama, lakhuleka kuSimakade nasenkosini.
Ngakusasa bamhlabela uSimakade imihlatshelo, banikela ngeminikelo yokushiswa kuSimakade: izinkunzi eziyinkulungwane, izinqama eziyinkulungwane, amawundlu ayinkulungwane neminikelo yakho yokuphuzwayo, nemihlatshelo eminingi evela ku-Israyeli wonke.
Badla, baphuza phambi kukaSimakade ngalolo lusuku, bathokoza kakhulu. USolomoni, indodana kaDavide, baphinda okwesibili bambeka, bamgcobela uSimakade ukuba abe ngumbusi, uZadoki abe ngumphristi.
USolomoni wahlala esihlalweni sobukhosi sikaSimakade waba yinkosi esikhundleni sikaDavide, uyise, waba nempumelelo; wonke u-Israyeli wamlalela.
Zonke izikhulu, amaqhawe, nawo wonke amadodana enkosi uDavide bazithoba phansi kwenkosi uSolomoni.
USimakade wamenza waba mkhulu uSolomoni phambi kwabo bonke abakwa-Israyeli, wamnika udumo lobukhosi olungakaze lube khona nakuyiphi inkosi yakwa-Israyeli eyamendulelayo.
UDavide, indodana kaJese, wabusa u-Israyeli wonke.
Wambusa u-Israyeli iminyaka engama-40; iminyaka eyisikhombisa wabusa eseHebhroni, engama-33 wayibusa eseJerusalema.
Wafa esemdala, esenelisiwe yizinsuku nengcebo nodumo; uSolomoni, indodana yakhe, wabusa esikhundleni sakhe.
Izinto ezenziwa nguDavide ekuqaleni nasekugcineni, zonke zilotshiwe encwadini yezindaba zikaSamuweli umboni, encwadini yezindaba zikaNathani umphrofethi, nasencwadini yezindaba zikaGadi umboni.
Zonke izindaba ngokubusa kwakhe, amandla akhe, izehlo ezamehlelayo, yena no-Israyeli, nayo yonke imibuso namazwe.
USolomoni, indodana kaDavide, waziqinisa embusweni wakhe. USimakade uNkulunkulu wakhe, wayenaye, wamenza waba mkhulu, wadlondlobala.
USolomoni wakhuluma kuye wonke u-Israyeli, kubakhuzi bempi bezinkulungwane nabezamakhulu, kubehluleli, kubo bonke abaholi bakwa-Israyeli, nasezinhlokweni zoyise.
USolomoni wahamba nebandla lonke elalinaye, baya endaweni ephakemeyo eGibheyoni, ngokuba lalilapho ithende lokuhlangana likaNkulunkulu elalenziwe ehlane nguMose, inceku kaSimakade.
Kepha umphongolo kaNkulunkulu ayewukhuphulile uDavide eKiriyathi Jeharimi, wayiswa ethendeni uDavide ayelimisele wona, eJerusalema.
I-althare lethusi elalenziwe nguBhezaleli, indodana ka-Uri kaHure, nalo wayelibeke phambi kwethabanakeli likaSimakade. USolomoni nebandla baya kulo ukuyobuza kuSimakade.
USolomoni wakhuphuka waya e-althare lethusi elaliphambi kukaSimakade, lisethendeni lokuhlangana, wanikela kulo ngeminikelo yokushiswa eyinkulungwane.
Ngalobo busuku uNkulunkulu wabonakala kuSolomoni, wathi kuye: “Cela lokho othanda ukuba ngikuphe khona.”
USolomoni wathi kuNkulunkulu: “Ubaba uDavide umenzele umusa omkhulu, nami ungibeke inkosi esikhundleni sakhe.
Manje Simakade Nkulunkulu, izwi lakho owalisho kuDavide ubaba maliqiniswe, ngokuba ungibekile inkosi phezu kwabantu abaningi ngangothuli lomhlabathi.
Manje ngiphe ukuhlakanipha nokwazi ukuze ngihole laba bantu, ngokuba ngubani ongehlulela laba bantu bakho abaningi kangaka na?”
UNkulunkulu wayesethi kuSolomoni: “Ngenxa yokuthi lokhu kuvela enhliziyweni yakho ukuba ungaceli ingcebo, imfuyo, nodumo, nokuba abakuzondayo bafe, futhi ungacelanga ukuphila isikhathi eside, kodwa ucele ukuhlakanipha nokwazi ukuze wehlulele abantu bami engikubeke ukuba ube yinkosi yabo;
ngiyakukunika ukuhlakanipha nokwazi; ngiyakukunika nengcebo, imfuyo, nodumo angazange abe nakho amakhosi akwandulelayo, nalawo ayokulandela awayukuba nakho.”
USolomoni wabuya endaweni ephakemeyo eGibheyoni, ethendeni lokuhlangana, waya eJerusalema, wabusa u-Israyeli.
USolomoni waqoqa izinqola nabamahhashi, waba nezinqola eziyi-1 400, nabamahhashi abayizi-12 000, wakubeka emizini yezinqola naseJerusalema, lapho ayehlala khona.
Inkosi yenza isiliva negolide kwaba yinsada eJerusalema njengamatshe, imisedari yayenza yaba njengemithombe esigodini ngobuningi.
Amahhashi kaSolomoni ayevela eGibhithe naseKhuwe. Labo ababehwebela inkosi babewathenga eKhuwe.
Bathenga eGibhithe inqola, bayidayisa ngamashekeli esiliva angama-600, ihhashi lilinye libiza amashekeli ayi-150. Bathengisela wonke amakhosi amaHithi namakhosi ama-Aramu ngaleyo ndlela.
USolomoni wakhipha umyalo wokuba kwakhelwe igama likaSimakade indlu nesigodlo sombuso wakhe.
USolomoni wabala izisebenzi eziyizi-70 000, ababazi bamatshe abayizi-80 000 kwelezintaba, nezinduna eziyizi-3 600 ukuba zibengamele.
USolomoni wathumela kuHuramu, inkosi yaseThire, wathi: “Njengalokho wenza kuDavide, ubaba, wathumela kuye imisedari, ukuba akhe indlu, ahlale kuyo, yenza kanjalo-ke nakimi.
Ngizokwakhela igama likaSimakade uNkulunkulu wami indlu, ukuba ngimngcwelisele yona, ngishise phambi kwakhe impepho enuka kahle, njalo kubekwe izinkwa zokubukwa, kunikelwe ngeminikelo yokushiswa ekuseni nakusihlwa ngamasabatha, ngokwethwasa kwenyanga, nangemikhosi emisiweyo kaSimakade uNkulunkulu wethu. Lokhu kungumthetho kwa-Israyeli kuze kube phakade.
“Indlu engiyakuyakha iyakuba nkulu, ngokuba mkhulu uNkulunkulu wethu phezu kwabo bonke onkulunkulu.
Kepha ngubani onamandla okumakhela indlu, lokhu izulu nezulu lamazulu lingemanele na? Pho ngingubani mina ukuba ngingamakhela indlu, ukuze kushiswe impepho phambi kwakhe na?
“Ngakho-ke ake uthumele kimi umuntu oyingcweti, osebenza ngegolide, ngesiliva, ngethusi, ngensimbi, ngokubukhwebezane, ngokubomvu, nangokuluhlaza; oyingcweti yokuqopha yonke imiqopho, azosebenza nezingcweti ezinami kwaJuda naseJerusalema, ezabekwa nguDavide ubaba.
“Ngithumelele futhi imisedari, imisayiphuresi, nemi-alimugi evela eLebhanoni, ngokuba ngiyazi ukuthi izinceku zakho ziyakwazi ukugawula imithi eLebhanoni. Izinceku zami ziyosebenza nezinceku zakho,
ukungilungisela imithi eminingi, ngoba indlu engiyakuyakha iyakuba nkulu ngokumangalisayo.
Bheka, ngiyakunika izinceku zakho ezigawula imithi, amakhora kakolo ayizi-20 000, amakhora ebhali ayizi-20 000, amabhati ewayini ayizi-20 000, namabhati ayizi-20 000 amafutha.”
UHuramu, inkosi yaseThire, waloba wayesethumela kuSolomoni, wathi: “USimakade uyabathanda abantu bakhe; ukubeke waba yinkosi phezu kwabo.”
UHuramu wabuye wathi: “Makabongwe uSimakade uNkulunkulu ka-Israyeli owenza izulu nomhlaba, nowanika uDavide, inkosi, indodana ehlakaniphileyo, enolwazi nokuqonda, ezokwakhela uSimakade indlu nesigodlo sasebukhosini.
“Manje ngikuthumelela umuntu ohlakaniphileyo nonolwazi, uHuramu Abhi,
uyindodana yowesifazane wamadodakazi akwaDani; uyise wayengumuntu waseThire, owayekwazi ukusebenza ngegolide, ngesiliva, ngethusi, ngensimbi, ngamatshe, ngemithi, ngokubukhwebezane, ngokuluhlaza, ngelineni elicolekileyo, nangokubomvu, nokuqopha yonke imiqopho, nokuqamba yonke imisebenzi yobungcweti. Mnike izingcweti zakho nezingcweti zenkosi yami uDavide, uyihlo.
“Ngakho-ke ukolo, ibhali, amafutha, newayini inkosi yami ekhulume ngakho, mayikuthumele kuzo izinceku zayo.
Thina sizogawula imithi eLebhanoni njengalokhu uyidinga, siyithumele kuwe eJopha ngolwandle ngezihlenga, wena uyikhuphulele eJerusalema.”
USolomoni wabala bonke abezizwe ababesezweni kwa-Israyeli, ngendlela uDavide uyise ayebabale ngayo phambilini. Wathola ukuthi bayizi-153 600.
Wabeka kubo abayizi-70 000 ukuba bathwale imithwalo, abayizi-80 000 ukuba babe ngababazi bamatshe ezintabeni, nabayizi-3 600 ukuba bengamele abantu abasebenzayo.
USolomoni waqala ukwakha indlu kaSimakade eJerusalema, entabeni iMoriya, lapho uSimakade abonakala khona kuyise uDavide, endaweni uDavide ayeyilungisile, esibuyeni sika-Orinani, umJebusi.
Waqala ukwakha ngolwesibili lwenyanga yesibili, ngonyaka wesine wokubusa kwakhe.
Nasi-ke isisekelo esabekwa nguSolomoni ukuba kwakhiwe indlu kaNkulunkulu: ubude ngokulinganisa ngamakhubhithi akuqala kwakungamakhubhithi angama-60, ububanzi bungamakhubhithi angama-20.
Ubude nobubanzi bomphemegumbi owawuphambi kwendlu babungamakhubhithi angama-20, ukuphakama kungamakhubhithi ayi-120; wawuhuqa ngaphakathi ngegolide elicwengekileyo.
Indlu enkulu wayigcaya ngaphakathi ngemisayiphuresi; wayicaka ngegolide elicolisekileyo, waqopha imifanekiso yamasundu namaketanga kulo.
Indlu wayihlobisa ngamatshe ayigugu nangegolide elalivela ePharivayimi.
Wahuqa indlu, imishayo, imibundu, izindonga zayo, neminyango yayo ngegolide, waqopha amakherubhi ezindongeni.
Wakha indawo engcwelengcwele: ubude bayo bulingana nobubanzi bendlu, ingamakhubhithi angama-20, nobubanzi bungamakhubhithi angama-20. Wayicaka ngegolide elicolisekileyo elingamathalenta angama-600.
Isisindo sezipikili sasingamashekeli egolide angama-50.
Endlini engcwelengcwele wakha amakherubhi amabili aqoshiweyo, wawacaka ngegolide.
Ubude bamaphiko amakherubhi babungamakhubhithi angama-20, iphiko ngalinye lingamakhubhithi ayisihlanu, lithinte odongeni lwendlu. Elinye iphiko elalingamakhubhithi ayisihlanu, lalithinte kwelinye iphiko lelinye ikherubhi.
Iphiko lelinye ikherubhi elalingamakhubhithi ayisihlanu, lathinta odongeni lwendlu; elinye iphiko nalo elalingamakhubhithi ayisihlanu, lalithinte ephikweni lelinye ikherubhi.
Amaphiko ala makherubhi ayeluleke ngamakhubhithi angama-20, emi ngezinyawo zawo, ubuso bawo bubheke endlini.
Wenza isihenqo ngokuluhlaza, ngokububende, ngokubomvu nangelineni elicolekileyo, wabeka amakherubhi kuso.
Ngaphambi kwendlu, wamisa izinsika ezimbili ezingamakhubhithi angama-30 ubude, kunesihloko esasiphezu kwaleyo naleyo nsika, esasingamakhubhithi ayisihlanu.
Wenza amaketanga egumbini, wawabeka ezihlokweni zezinsika, wenza amahananadi ayikhulu wawabeka emaketangweni.
Wamisa izinsika phambi kwethempeli, enye ngakwesokunene nenye ngakwesokhohlo. Eyangakwesokunene wayiqamba igama wathi uJakhini, eyangakwesokhohlo wathi uBhowazi.
Wakha i-althare lethusi: ubude balo bungamakhubhithi angama-20, ububanzi balo bungamakhubhithi angama-20, nokuphakama kwalo kungamakhubhithi alishumi.
Wenza nolwandle olubunjiweyo: kusukela kulolu dini kuya kolunye udini luyisiyingilizi; lungamakhubhithi alishumi, ukuphakama kwalo kungamakhubhithi ayisihlanu. Lalizungezwe ngomucu ongamakhubhithi angama-30.
Phansi kwalo kwakunokufana nezintangazane kuluzungezile, kungamakhubhithi alishumi, nxazonke. Izintangazane zazisezinhleni zombili zolwandle, zibunjelwe kulo.
Lwalumi phezu kwezinkabi ezilishumi nambili, ezintathu zibheke ngasenyakatho, ezintathu zibheke ngasentshonalanga, ezintathu zibheke ngaseningizimu, ezintathu zibheke ngasempumalanga; ulwandle lwalumiswe phezu kwazo, zonke zifulathelene.
Uhlonze lwalo lwalungangobubanzi besandla; udini lwalo lwalwenziwe njengodini lwendebe, lunjengembali yomnduze; lumumatha okulingene namabhati ayizi-3 000.
Wakha imicengezi elishumi, eyisihlanu wayibeka ngakwesokunene, neminye eyisihlanu ngakwesokhohlo ukuze kuhlanjelwe kuyo. Bagezele kuyo okweminikelo yokushiswa, kodwa ulwandle lwaluhlambela abaphristi kuphela.
Wenza izinti zezibani zegolide njengomthetho wazo, wazibeka ethempelini, eziyisihlanu ngakwesokunene, neziyisihlanu ngakwesokhohlo.
Wenza amatafula alishumi, wawabeka ethempelini, ayisihlanu ngakwesokunene, nayisihlanu ngakwesokhohlo. Wenza nezitsha zegolide eziyikhulu.
Wenza igceke labaphristi, igceke elikhulu, iminyango yegceke, nezivalo zayo wazemboza ngethusi.
Ulwandle walubeka kwesokunene empumalanga yangaseningizimu yendlu.
UHuramu wenza amabhodwe, amafosholo, nezitsha. UHuramu wawuqeda umsebenzi ayewenzela inkosi uSolomoni endlini kaNkulunkulu:
izinsika ezimbili, izihloko ezimbili ezinjengezinkamba ezaziphezu kwezinsika, amanetha amabili okwemboza lezo zihloko ezimbili ezinjengezinkamba, ezaziphezu kwezinsika,
amahananadi angama-400 awo womabili amanethi, izinhla ezimbili zamahananadi kulelo nalelo netha, ukuze emboze izihloko zombili ezinjengezinkamba eziphezu kwezinsika.
Wenza imilenze, wenza nemicengezi emilenzeni,
wakha ulwandle olulodwa, nezinkabi ezili-12 phansi kwalo.
Wenza amabhodwe, amafosholo, izingwegwe zenyama, nazo zonke izimpahla uHuramu Abhi akwenzela inkosi uSolomoni ngethusi elikhazimulayo, kwaba ngokwendlu kaSimakade.
Inkosi yayikwenzela esigodini eJordani, emhlabathini oyibumba ophakathi kweSukhothi neZereda.
USolomoni wenza yonke leyo mpahla eyayiningi kakhulu kangangoba isisindo sethusi sasingenakulinganiswa.
USolomoni wenza yonke impahla eyayisendlini kaNkulunkulu: i-althare legolide, amatafula okwakukhona kuwo izinkwa zobukhona,
izinti zezibani nezibani zazo ukuze zivuthe njengokubalula komthetho, phambi kwegumbi elingaphakathi, kwenziwe ngegolide elicwengekileyo.
Izimbali zezibani, nezindlawu kwenziwe ngegolide, igolide elicwengekileyo.
Izizenze, izitsha, izinkezo nemicengezi yomlilo kwenziwe ngegolide elicwengekileyo. Iminyango yendlu, izivalo zayo ezingaphakathi endaweni engcwelengcwele, nezivalo zendlu yethempeli kwakuligolide.
Wonke umsebenzi uSolomoni ayewenza endlini kaSimakade waphothulwa. USolomoni wayesengenisa zonke izinto ezingcwele zikaDavide, uyise; igolide, isiliva nazo zonke izitsha, wakubeka engcebeni yendlu kaNkulunkulu.
USolomoni wayeseqoqa amalunga akwa-Israyeli, zonke izinhloko zezizwana, abaholi bawoyise babantu bakwa-Israyeli eJerusalema ukuba bakhuphule umphongolo wesivumelwano sikaSimakade, bewususa emzini kaDavide iZiyoni.
Wonke amadoda akwa-Israyeli ahlangana enkosini, emkhosini owawungenyanga yesikhombisa.
Esefikile wonke amalunga akwa-Israyeli, abaLevi bawuphakamisa umphongolo.
Bawukhuphula umphongolo, nethende lokuhlangana nazo zonke izinto ezingcwele ezazisethendeni; kwakhushulwa ngabaphristi nabaLevi.
Inkosi uSolomoni, nayo yonke inhlangano yakwa-Israyeli eyayihlangene nayo lapho phambi komphongolo, bahlaba izimvu nezinkabi ezingenakubalwa ngenxa yobuningi bazo.
Abaphristi bawungenisa umphongolo wesivumelwano sikaSimakade endaweni yawo, egumbini elingaphakathi lendlu, indawo engcwelengcwele, phansi kwamaphiko amakherubhi.
Amakherubhi ayelule amaphiko awo phezu kwendawo yomphongolo; amakherubhi awusibekela umphongolo nezingongolo zawo.
Izingongolo zazizinde kangangokuba izihloko zazo zazibonakala endaweni engcwele, phambi kwegumbi elingcwele elingaphakathi, nokho zazingaveli ngaphandle kwalo. Umphongolo uselapho kuze kube namuhla.
Umphongolo wawungenalutho, ngaphandle kwezibhebhe zamatshe ezimbili ezazibekwe khona nguMose eHorebhe, ngesikhathi uSimakade enza isivumelwano nabantu bakwa-Israyeli, ekuphumeni kwabo eGibhithe.
Kwathi lapho abaphristi sebephumile endaweni engcwele, ngokuba bonke abaphristi ababelapho babezingcwelisile, kungabhekwanga izigaba zabo,
bonke abahlabelelayo abangabaLevi; u-Asafa, uHemani, uJeduthumi namadodana abo, nabafowabo, bembethe ilineni elicolekileyo, bephethe amasimbali, izingubhu namahabhu babemi ngasempumalanga ye-althare. Kwakumi kanye nabo abaphristi abayi-120, beshaya amacilongo.
Kwakungumsebenzi walabo ababephethe amacilongo nabahlabeleli ukuba bezwakalise kanyekanye, ngazwi linye, indumiso nokubonga kuSimakade. Ngesikhathi bezwakalisa indumiso ngamacilongo, amasimbali, nangazo zonke izinto zokudumisa, babedumisa uSimakade ngokuba emuhle, umusa wakhe umi phakade; indlu yagcwaliswa yifu, indlu kaSimakade.
Abaphristi abakwazanga ukuba ngaphakathi ukuze bakhonze, ngenxa yefu, ngokuba inkazimulo kaSimakade yagcwalisa indlu kaNkulunkulu.
Khona uSolomoni wakhuluma, wathi: “USimakade ushilo ukuthi uyakuhlala esigayegayeni.
Kepha mina ngikwakhele indlu yokuphakama kwakho, indawo oyakuhlala kuyo kuze kube phakade.”
Inkosi yayisiphenduka, yabusisa lonke ibandla lakwa-Israyeli, lonke ibandla lakwa-Israyeli lalimi.
Yathi: “Makabongwe uSimakade uNkulunkulu ka-Israyeli owakhuluma ngomlomo wakhe kuDavide, ubaba, ukugcwalisile ngesandla sakhe, ethi:
‘Kusukela osukwini engakhipha ngalo abantu bami u-Israyeli eGibhithe angikhethanga muzi ezizwaneni zonke zakwa-Israyeli ukwakha indlu ukuba igama lami libe khona lapho, futhi angikhethanga muntu ukuba abe ngumbusi wabantu bami u-Israyeli,
kodwa ngilikhethile iJerusalema ukuba igama lami libe lapho, ngimkhethile noDavide ukuba abe phezu kwabantu bami, u-Israyeli.’
“Kwakusenhliziyweni kaDavide, ubaba, ukwakhela igama likaSimakade uNkulunkulu ka-Israyeli indlu,
kepha uSimakade wathi kuDavide, ubaba: ‘Njengokuba kwakusenhliziyweni yakho ukwakhela igama lami indlu, wenza kahle, ngokuba kwakusenhliziyweni yakho lokho.
Kepha wena awuyukuyakha indlu, kodwa indodana yakho eyakuphuma okhalo lwakho, yiyo eyokwakhela igama lami indlu.’
“USimakade uliqinisile izwi alikhulumayo, ngokuba ngingenile esikhundleni sikaDavide, ubaba, ngihlezi esihlalweni sobukhosi sakwa-Israyeli njengokusho kukaSimakade, ngilakhele igama likaSimakade uNkulunkulu ka-Israyeli indlu.
Ngiwubekile lapho umphongolo okukuwo isivumelwano sikaSimakade asenza nabantu bakwa-Israyeli.”
USolomoni wema phambi kwe-althare likaSimakade, phambi kwalo lonke ibandla lakwa-Israyeli, welula izandla zakhe.
USolomoni wayakhe ibhesituli lethusi, walibeka phakathi negceke: ubude balo bungamakhubhithi ayisihlanu, ububanzi bona bungamakhubhithi amathathu. Wema kulo, waguqa ngamadolo phambi kwalo lonke ibandla lakwa-Israyeli. Welulela izandla zakhe ngasezulwini,
wathi: “Simakade Nkulunkulu ka-Israyeli, akekho uNkulunkulu emazulwini nasemhlabeni onjengawe; Wena ogcina isivumelwano nomusa nezinceku zakho ezihamba phambi kwakho, ngayo yonke inhliziyo yazo,
ogcine nenceku yakho uDavide, ubaba, lokho owakusho kuyo, yebo, owakukhuluma ngomlomo wakho ukufezile ngesandla sakho namuhla.
“Manje Simakade Nkulunkulu ka-Israyeli, gcina nenceku yakho uDavide, ubaba, lokho owakukhuluma kuyo uthi: ‘Akuyukwesweleka muntu kuwe, phambi kwami, oyohlala esihlalweni sobukhosi sakwa-Israyeli. Uma nje abozalo lwakho beqaphela indlela yabo, ukuba bahambe emthethweni wami, njengalokhu wena uhambile phambi kwami.’
“Ngakho-ke Simakade Nkulunkulu ka-Israyeli, maliqiniswe izwi lakho owalikhuluma encekwini yakho, uDavide.
“Ngabe uNkulunkulu uyakuhlala impela nabantu emhlabeni na? Izulu namazulu amazulu angekwanele; pho kakhulu kangakanani le ndlu engiyakhileyo na?
Wubheke umkhuleko wenceku yakho nokunxusa kwayo, Simakade Nkulunkulu wami, uzwe ukukhala kokunxusa nomkhuleko inceku yakho ekukhuleka phambi kwakho.
Amehlo akho mawayibheke le ndlu ubusuku nemini, indawo owakhuluma ngayo ukuthi uyakubeka khona igama lakho, uze ulalele umkhuleko inceku yakho eyakuwukhuleka kule ndawo.
Kulalele ukunxusa kwenceku yakho nokwabantu bakho, u-Israyeli, abayakukhuleka kule ndawo, uzwe usendaweni yakho yokuhlala ezulwini, nalapho usuzwile, uthethelele.
“Uma umuntu ona omunye, kufuneka ukuba enze isifungo, bese eza ezofunga phambi kwe-althare lakho kule ndlu,
mawuzwe usezulwini, uthathe izinyathelo, wehlulele izinceku zakho, owonileyo alahlwe yicala, ajeze ngobubi bakhe, kuthi olungileyo limthethe, azuze ngangokulunga kwakhe.
“Uma abantu bakho, u-Israyeli, benqotshwa yisitha ngenxa yokuba bonile kuwe, bese bephenduka bebuyela kuwe, bavume igama lakho, bakhuleke, banxuse kuwe bekule ndlu,
mawuzwe wena usezulwini, uthethelele isono sabantu bakho, u-Israyeli, ubabuyisele ezweni owalinika bona nokhokho babo.
“Lapho izulu livaliwe, kungekho mvula, ngenxa yokuba bonile kuwe, bese bekhuleka bebheke kule ndawo, bavume igama lakho, baphenduke esonweni sabo, ngoba uyabajezisa,
mawuzwe Wena usezulwini, uthethelele isono sezinceku zakho nesabantu bakho, u-Israyeli. Uyakubaqondisa endleleni enhle abayakuhamba ngayo, uthumele imvula ezweni lakho owabanika lona abantu bakho ukuba libe yifa labo.
“Uma kuba khona indlala ezweni, noma imbo, noma ukuhwamuka, nesikhutha, isikhonyane, umswenya noma izitha zabo zibavimbezela ezweni lemizi yabo, noma inhlupheko yahlobo luni nasifo sini,
bese kuzwakala noma ngabe luhlobo luni lomkhuleko noma ukunxusa okuyokwenziwa noma ngubani noma yibo bonke abantu bakho, u-Israyeli, abayokwazi ukubeka inhlupheko noma usizi lwabo kuwe, kube yilowo nalowo elulele izandla zakhe kule ndlu,
mawuzwe Wena usezulwini, indawo yakho yokuhlala, uthethelele, kube yilowo nalowo umuphe ngokwezindlela zakhe zonke. Nguwe owazi inhliziyo yakhe ngokuba nguwe kuphela owazi izinhliziyo zabantwana babantu.
Ngakho-ke mabakwesabe, bahambe ngezindlela zakho zonke izinsuku zokuphila kwabo ezweni owalinika okhokho bethu.
“Kuyakuthi uma owezizwe ongesiye owabantu bakho u-Israyeli, evela ezweni elikude, ngenxa yegama lakho elikhulu nesandla sakho esinamandla nengalo yakho eyeluliweyo, afike akhuleke kule ndlu,
mawuzwe Wena usezulwini, indawo yakho yokuhlala, wenze njengakho konke ukukhala owezizwe akhala ngakho kuwe, ukuze bonke abantu bomhlaba balazi iGama lakho, bakwesabe Wena njengabantu bakho, u-Israyeli, nokuba bazi futhi ukuthi le ndlu engiyakhileyo ibizwe ngeGama lakho.
“Uma abantu bakho bephuma impi ukuyokulwa nezitha zabo ngendlela obathuma ngayo, bese bekhuleka kuwe bebheke kulo muzi owukhethileyo nale ndlu engiyakhele iGama lakho,
mawuzwe Wena usezulwini umkhuleko wabo nokunxusa kwabo, uyimele indaba yabo.
“Uma bona kuwe, ngoba akukho muntu ongoni, bese ubathukuthelela, ubanikele esitheni, sibathumbe sibayise ezweni laso, elikude noma eliseduze,
bese becabanga belapho ezweni abathunjelwe kulo, baphenduke, banxuse kuwe besezweni lokuthunjwa kwabo, bathi: ‘Sonile, senze okuphambeneyo, saziphatha kabi.’
“Uma bephendukela kuwe ngayo yonke inhliziyo yabo, nangawo wonke umphefumulo wabo besezweni abathunjelwe kulo, bakhuleke kuwe bebheke ngasezweni lakubo owalinika okhokho babo, nomuzi owukhethileyo, nendlu engiyakhele igama lakho,
mawuzwe umkhuleko wabo nokunxusa kwabo usezulwini, indawo yakho yokuhlala, uyimele indaba yabo, ubathethelele abantu bakho abonileyo kuwe.
“Ngakho-ke Nkulunkulu wami, amehlo akho mawabheke, nezindlebe zakho zilalele umkhuleko owenziwa kule ndawo.
“Manje, sukuma Simakade Nkulunkulu, uze endaweni yakho yokuphumula Wena nomphongolo wakho wamandla. Abaphristi bakho Simakade Nkulunkulu, abaphristi bakho mabembathiswe insindiso, nabathembekile bakho bathokoze ngokuhle.
Simakade Nkulunkulu, ungamfulatheli ogcotshiweyo wakho. Khumbula umusa wakho kuDavide inceku yakho.”
Kwathi lapho uSolomoni eseqedile ukukhuleka, kwehla umlilo ezulwini, wadla umnikelo wokushiswa nemihlatshelo; inkazimulo kaSimakade yagcwalisa indlu.
Abaphristi abakwazanga ukungena endlini kaSimakade, ngokuba inkazimulo kaSimakade yayiyigcwalisile indlu kaSimakade.
Ngesikhathi abantu bakwa-Israyeli bebona ukwehla komlilo, nenkazimulo kaSimakade iphezu kwendlu, bakhothama bathi mbo ngobuso emhlabathini, phezu kwendawo eyayigandayiwe, bakhuleka, bambonga uSimakade, ngokuba muhle nangokuba umusa wakhe umi phakade.
Inkosi nabo bonke abantu banikela ngomhlatshelo phambi kukaSimakade.
Inkosi uSolomoni yanikela ngomhlatshelo wezinkunzi eziyizi-22 000, nezimvu eziyizi-120 000. Inkosi nabo bonke abakwa-Israyeli, bayibusisa kanjalo-ke indlu kaNkulunkulu.
Abaphristi nabaLevi bema ngokwezikhundla zabo, bephethe izinto ezishaywayo ezazenziwe nguDavide, inkosi, ukuba babonge uSimakade, ngokuba umusa wakhe umi phakade, ngesikhathi uDavide edumisa ngezandla zabo; abaphristi babeshaya amacilongo phambi kwabo, wonke u-Israyeli wayemile.
USolomoni wangcwelisa ingaphakathi legceke elaliphambi kwendlu kaSimakade, wanikela lapho ngeminikelo yokushiswa namanoni eminikelo yokuthula, ngokuba i-althare lethusi ayelenzile uSolomoni lalingeke lanele ukwenzela umnikelo wokushiswa, owokusanhlamvu namanoni.
Ngaleso sikhathi uSolomoni wagubha umkhosi izinsuku eziyisikhombisa, wonke u-Israyeli enaye, eyibandla elikhulu kakhulu, kusukela eLebo Hamathi kuze kube semfuleni eGibhithe.
Kwathi ngosuku lwesishiyagalombili benza umhlangano ozothileyo ngokuba begcinile ukubusiswa kwe-althare izinsuku eziyisikhombisa nomkhosi izinsuku eziyisikhombisa.
Ngosuku lwama-23 lwenyanga yesikhombisa, uSolomoni wabamukisa abantu ukuba baphindele emathendeni abo. Babethokoza benezinhliziyo ezenamileyo ngobuhle uSimakade ayebenzele uDavide, uSolomoni no-Israyeli abantu bakhe.
USolomoni waqeda ukwakha indlu kaSimakade nesigodlo senkosi; konke ayekufisa enhliziyweni yakhe ukuba akwenze endlini kaSimakade nasesigodlweni sakhe, waphumelela ukukwenza.
USimakade wabonakala kuSolomoni ebusuku, wathi kuye: “Ngiwuzwile umkhuleko wakho, ngiyikhethile le ndawo ukuba ibe ngeyami, ibe yindlu yomhlatshelo.
“Uma ngivala izulu, imvula ingani, noma ngiyala isikhonyane ukuba sidle okusezweni, noma ngithumela ubhubhane kubantu bami,
bazithobe abantu bami ababizwa ngegama lami, bakhuleke, bafune ubuso bami, baphenduke ezindleleni zabo ezimbi, ngiyakuzwa ngisezulwini, ngithethelele isono sabo, ngiphilise izwe labo.
Manje amehlo ami ayakuvuleka, izindlebe zami zilalele umkhuleko owenziwa kule ndawo.
Le ndlu ngiyiqokile ngayingcwelisa ukuba igama lami libe kuyo kuze kube phakade. Amehlo ami nenhliziyo yami kuyakuba kuyo njalo.
“Wena-ke, uma uyakuhamba phambi kwami njengoba kuhambe uDavide, uyihlo, ukwenze konke engikuyale ngakho, ugcine izimiso nezehlulelo zami,
ngiyakusimisa isihlalo sobukhosi sombuso wakho njengoba ngenza kuDavide, uyihlo, ngathi: ‘Akuseyukwesweleka umuntu ovela kuwe ukuba abe ngumbusi kwa-Israyeli.’
“Kepha uma ningifulathela, nilahle izimiso zami nemiyalo yami engikubeke phambi kwenu, nihambe niyokhonza abanye onkulunkulu, nikhuleke kubo,
ngiyakubasiphula ezweni lami engibanike lona, nale ndlu engiyingcwelisele igama lami ngiyakuyilahla, isuke phambi kwami, ngiyenze isaga nesifengqo phakathi kwabantu bonke.
Le ndlu ephakeme kangaka, kuyothi bonke abedlula ngakuyo bakhexe imilomo, bathi: ‘Kungani uSimakade enze kanje kuleli lizwe nakule ndlu na?’
“Bayakuphendula, bathi: ‘Kungokuba bamshiya uSimakade uNkulunkulu wokhokho babo owabakhipha eGibhithe, babambelela kwabanye onkulunkulu, bakhuleka kubo, babakhonza, ngakho-ke ubehlisele konke lokhu okubi.’ ”
Kwathi ekupheleni kweminyaka engama-20, uSolomoni eyakhile indlu kaSimakade nesigodlo sakhe,
uSolomoni wakha kabusha imizi ayeyinikwe nguHuramu, wayesehlalisa kuyo abantu bakwa-Israyeli.
USolomoni wahlasela iHamathi Zobha, walinqoba.
Wakha iThadimori ehlane, kwathi eHamathi wakha imizi eyizinqolobane.
Wakha iBhethi Horoni engenhla, neBhethi Horoni engezansi, imizi ebiyelweyo enezingange, amasango, nemigoqo.
Wakha neBhalathi, nayo yonke imizi eyizinqolobane. Yonke imizi yezinqola, imizi yabamahhashi, kwakungekaSolomoni, nakho konke ayefisa ukukwakha eJerusalema, eLebhanoni nakulo lonke izwe ayelibusa.
Bonke abantu ababeyinsali yamaHithi, ama-Amori, amaPherizi, amaHivi namaJebusi, ababengesibo abozalo lwabaka-Israyeli,
abozalo lwabo ababesele ezweni, ababengababhubhisanga abantu bakwa-Israyeli, uSolomoni wabenza izigqila kuze kube namuhla.
Kepha uSolomoni akabenzanga abantu bakwa-Israyeli izigqila ezenza umsebenzi wakhe, kodwa babengamabutho, bengabakhuzi bempi beyizikhulu zakhe, nezinduna zezinqola zakhe.
Labo ababeyizikhulu ezinkulu zenkosi uSolomoni babengama-250, bephethe abantu.
USolomoni wakhuphula indodakazi kaFaro emzini kaDavide, wayiyisa endlini ayakhela yona, ngokuba wathi: “Umkami akanakuhlala endlini kaDavide, inkosi yakwa-Israyeli, ngokuba ingcwele, kulapho kwafikela khona umphongolo kaSimakade.”
USolomoni wanikela lapho ngeminikelo yokushiswa kuSimakade, e-althare likaSimakade ayelakhe phambi kompheme,
njengalokhu kufanele, imihla ngemihla. Wayenikela njengokomyalo kaMose, ngamasabatha, ngokwethwasa kwenyanga, nangemikhosi emisiweyo. Wayenikela kathathu ngonyaka: ngomkhosi wesinkwa esingenamvubelo, ngomkhosi wamasonto, nangomkhosi wamadokodo.
Njengokomthetho kayise uDavide, abaphristi wabamisa ngokwezigaba zabo enkonzweni, nabaLevi ezikhundleni zabo, ukuba badumise, bakhonze phambi kwabaphristi njengemfanelo imihla ngemihla. Abalindimasango nabo wabamisa ngezigaba zabo emasangweni; kulelo nakulelo sango, ngokuba uDavide, umuntu kaNkulunkulu, wayeyale ukuba kube kanjalo.
Kabazange baphambuke emiyalweni yenkosi, kubaphristi nakubaLevi, nakokuphathelene nengcebo.
Wonke umsebenzi kaSolomoni wahlelwa kusukela osukwini okwabekwa ngalo isisekelo sendlu kaSimakade kwaze kwaba sekupheleni kwendlu kaSimakade.
USolomoni wayesesuka waya eZiyoni Gebheri nase-Elathi, ogwini lolwandle, kwa-Edomi.
UHuramu wathumela kuye ngezinceku zakhe imikhumbi nezinceku ezazilujwayele ulwandle. Zahlangana nezinceku zikaSolomoni, zaya e-Ofiri, zalanda khona amathalenta angama-450 egolide, zawayisa enkosini uSolomoni.
Kwathi indlovukazi yaseShebha seyizwile ngodumo lukaSolomoni, yasuka yaya eJerusalema ukuba iyovivinya uSolomoni ngezimfumbe. Yayinehele elikhulu kakhulu, amakameli ayethwele amakha, igolide eliningi, namatshe ayigugu. Yafika kuSolomoni yakhuluma naye ngakho konke okusenhliziyweni yayo.
USolomoni wayiphendula kukho konke eyambuza khona, akukho lutho olufihlakeleyo uSolomoni angakwazanga ukuyichachisela khona.
Indlovukazi yaseShebha isibonile ukuhlakanipha kukaSolomoni, nendlu ayeyakhile,
ukudla okusetafuleni lakhe, indlela izinceku zakhe ezazihlala ngayo, nezazima ngayo, izembatho zazo, abaphathizitsha nezembatho zabo, negumbi lakhe eliphezulu endlini kaSimakade, ayibange isaba nalutho olunye engalusho.
Yathi enkosini: “Konke engikuzwe ngawe ezweni lakithi kuliqiniso, mayelana namazwi akho nangokuhlakanipha kwakho.
Kepha angikholwanga ngamazwi abo, ngaze ngafika, ngazibonela ngamehlo ami; angitshelwanga ngisho ingxenye yobukhulu bokuhlakanipha kwakho.
Babusisiwe abantu bakho, zibusisiwe lezi zinceku zakho ezihlala zimi njalo phambi kwakho, zizwa ukuhlakanipha kwakho.
Makabongwe uSimakade uNkulunkulu wakho okwaba kuhle kuye ukuba akubeke esihlalweni sakhe sobukhosi, ube yinkosi kuSimakade uNkulunkulu wakho. Ngokuba uNkulunkulu wakho uyamthanda u-Israyeli futhi uyathanda ukummisa kuze kube phakade, yingakho ekubeke waba yinkosi phezu kwakhe, ukuba wenze ubulungiswa nokulunga.”
Indlovukazi yaseShebha yanika inkosi amathalenta egolide ayi-120, amakha amaningi kakhulu, namatshe ayigugu; akukho omunye owake wanika inkosi uSolomoni amakha amaningi njengalawo awaphiwa yindlovukazi yaseShebha.
Izinceku zikaHuramu nezinceku zikaSolomoni ezabuya negolide e-Ofiri, zaletha imi-alimugi namatshe ayigugu.
Inkosi yakha izikhwelo zendlu kaSimakade nezesigodlo ngemi-alimugi, yakha amahabhu, nezingubhu zabahlabeleli okungakaze kubonwe okunjengakho phambilini kwaJuda.
Inkosi uSolomoni yanika indlovukazi yaseShebha konke ekufunayo neyakucelayo, ngaphandle kwalokho eyayikulethe enkosini. Yasuka yabuyela ezweni layo nezinceku zayo.
Isisindo segolide elalilethwa kuSolomoni minyaka yonke lalingamathalenta angama-666 egolide,
ngaphandle kwalelo elalifika nabahwebi nabathengisi, nawo wonke amakhosi ase-Arabhiya, nababusi bezwe ababeletha igolide nesiliva kuSolomoni.
Inkosi uSolomoni yenza izihlangu zegolide elicangcathiweyo ezingama-200, isihlangu ngasinye singamashekeli egolide elicangcathiweyo angama-600.
Yakhanda futhi nezihlangu zegolide elicangcathiweyo ezingama-300; isihlangu ngasinye singamashekeli egolide elicangcathiweyo angama-300; inkosi yazibeka eNdlini Yehlathi eLebhanoni.
Inkosi yenza isihlalo sobukhosi esikhulu ngezimpondo zendlovu, yasicaka ngegolide elicwengekileyo.
Isihlalo sobukhosi sasinezikhwelo eziyisithupha, sinesenabelo segolide esasinamatheliswe esihlalweni sobukhosi, nemikhono ngalapha nangalapha kwendawo yokuhlala, kumi izingonyama ezimbili eceleni kwemikhono.
Kwakumi izingonyama ezili-12 ngalapha nangalapha kwezikhwelo eziyisithupha. Akukho okunjengalokhu okwake kwenziwa kweminye imibuso.
Zonke izitsha zokuphuza zenkosi uSolomoni zaziyigolide, nazo zonke izitsha ezaziseHlathini eLebhanoni zaziyigolide elicwengekileyo; isiliva lalingento etheni emihleni kaSolomoni.
Inkosi uSolomoni yathumela imikhumbi yayo eTharishishi kanye nezinceku zikaHuramu. Kwakuthi kanye emuva kweminyaka emithathu, ifike imikhumbi yaseTharishishi ithwele igolide, isiliva, izimpondo zendlovu, izimfene, namapigogo.
Inkosi uSolomoni yaba nkulu kunawo onke amakhosi omhlaba ngengcebo nangokuhlakanipha.
Wonke amakhosi omhlaba ayefuna ukumbona uSolomoni ubuso nobuso, ukuzwa ngokuhlakanipha kwakhe, uNkulunkulu ayekubeke enhliziyweni kaSolomoni.
Yileyo naleyo yayimlethela isipho: izitsha zesiliva, izitsha zegolide, izingubo, izikhali, amakha, amahhashi neminyuzi, ekwenza lokhu iminyaka ngeminyaka.
USolomoni wayenamabhanqa ayizi-4 000 amahhashi nezinqola, abamahhashi abayizi-12 000, wababeka emizini yezinqola nasenkosini eJerusalema.
Wabusa phezu kwawo wonke amakhosi, kusukela emfuleni kuze kube sezweni lamaFilisti nasemngceleni waseGibhithe.
Inkosi yenza ukuba isiliva lixhaphake njengamatshe eJerusalema, nemisedari yayenza yaba miningi njengemithombe ehlanzeni.
USolomoni bamlethela amahhashi evela eGibhithe nasemazweni onke.
Ezinye izindaba zikaSolomoni, ezakuqala nezakamuva, azilotshiwe yini ezindabeni zikaNathani umphrofethi, nasesiphrofethweni sika-Ahaya waseShilo, nasemibonweni ka-Ido umboni ngoJerobhowamu indodana kaNebhathi na?
USolomoni wabusa eJerusalema phezu kuka-Israyeli wonke iminyaka engama-40.
USolomoni wayesekhothama, bamngcwaba kokhokho bakhe, emzini kaDavide uyise. URehobhowamu, indodana yakhe, waba yinkosi esikhundleni sakhe.
URehobhowamu waya eShekemi, ngokuba wonke u-Israyeli wayeye lapho eShekemi ukuba ambeke, abe yinkosi.
Kwathi ukuba uJerobhowamu, indodana kaNebhathi owayebalekele eGibhithe ngenxa yokwesaba inkosi uSolomoni, akuzwe lokho, wabuya eGibhithe.
Bathumela bambiza, uJerobhowamu naye wonke u-Israyeli beza kuRehobhowamu, bakhuluma naye, bathi:
“Uyihlo wenza ijoka lethu laba nzima, manje siyakucela ukuba wena uwenze lula umsebenzi olukhuni uyihlo ayesethwese wona, nejoka lakhe elinzima ayelibeke phezu kwethu, siyokukhonza uma wenze kanjalo.”
Wathi kubo: “Hambani kuthi emva kwezinsuku ezintathu nibuye nize kimi.” Basuka-ke abantu.
Inkosi uRehobhowamu yacela iseluleko ezingwevini ezazikade zeluleka uSolomoni, uyise, esaphila, yathi: “Nina ningeluleka ukuba ngibuyisele impendulo ethini kulaba bantu na?”
Zakhuluma kuye, zathi: “Uma namuhla uzokuba yinceku yalaba bantu, ubakhonze, ukhulume amazwi amahle lapho ubaphendula, bayokuba yizinceku zakho zonke izinsuku zabo.”
Kepha akasishayanga mkhuba iseluleko sezingwevu ezazimeluleke ngaso, wayesecela iseluleko ezinsizweni ezaziyintanga yakhe, ezaziwa zivuka naye.
Wathi kuzo: “Nina ningeluleka ukuba ngibuyisele mpenduloni kulaba bantu abakhulume kimi ngokuthi: ‘Yenza lula ijoka uyihlo alibeka phezu kwethu,’ na?”
Izinsizwa ezingontanga yakhe zathi kuye: “Uyothi kulaba bantu abakhulume kuwe, bathi: ‘Uyihlo walenza laba nzima ijoka lethu, kepha wena lenze libe lula kithina,’ uyokhuluma kanje kubo: ‘Ucikicane wami mkhulu kunokhalo lukababa.
Ubaba wanethwesa ijoka elinzima, mina-ke ngizothasisela ejokeni lenu. Ubaba wanishaya ngeziswebhu, kodwa mina ngizonishaya ngofezela.’ ”
UJerobhowami nabo bonke abantu bafika kuRehobhowamu ngosuku lwesithathu, njengalokhu yayishilo inkosi, yathi: “Buyani kimi ngosuku lwesithathu.”
Inkosi yabaphendula kanzima abantu, yasishaya indiva iseluleko izingwevu ezazimeluleke ngaso.
Yakhuluma kubo njengokwelulekwa yizinsizwa, yathi: “Ubaba wayenethwese ijoka elinzima, mina-ke ngizothasisela ejokeni lenu; ubaba wanishaya ngeziswebhu, mina ngizonishaya ngofezela.”
Inkosi ayibalalelanga abantu, ngokuba lokho kwakuvela kuSimakade, ukuze uSimakade agcwalise izwi alikhuluma ngomlomo ka-Ahiya waseShilo kuJerobhowamu, indodana kaNebhathi.
Wonke u-Israyeli lapho ebona ukuthi inkosi ayibalalelanga, abantu bayiphendula inkosi, bathi: “Sinasabelo sini kuDavide na? Asinafa endodaneni kaJese. Israyeli, buyela emathendeni akho, zibhekele indlu yakho manje, Davide.” U-Israyeli wabuyela emathendeni akhe.
Kepha uRehobhowamu wabusa phezu kwabo bonke abantu bakwa-Israyeli ababakhe emizini yakwaJuda.
Inkosi uRehobhowamu yathuma u-Adoramu owayengamele izisebenzi ku-Israyeli. Kepha u-Israyeli wonke wamkhanda ngamatshe, wafa. Inkosi uRehobhowamu yashesha yagibela enqoleni yayo, yabaleka eJerusalema.
U-Israyeli wayihlubuka indlu kaDavide kuze kube yinamuhla.
URehobhowamu esefikile eJerusalema, waqoqa yonke indlu yakwaJuda nesizwana sakwaBhenjamini, abantu abakhethiweyo abayizi-180 000, amabutho, ukuze balwe nendlu yakwa-Israyeli, umbuso bawubuyisele kuye uRehobhowamu, indodana kaSolomoni.
Kwase kufika izwi likaNkulunkulu kuShemaya, umuntu kaNkulunkulu, lathi:
“Yisho kuRehobhowamu, indodana kaSolomoni, inkosi yakwaJuda, nayo yonke indlu yakwa-Israyeli ekwaJuda neyakwaBhenjamini, uthi:
‘Usho kanje uSimakade, uthi: ningakhuphuki ukuyolwa nabafowenu, abantu bakwa-Israyeli; phindelani, kube yilowo nalowo endlini yakhe, ngokuba lokhu kuvela kimi.’ ” Balilalela izwi likaSimakade, baphindela emuva, kabamhlasela uJerobhowamu.
URehobhowamu wahlala eJerusalema, wakha imizi eyizinqaba kwaJuda.
Wakha iBhethlehema, i-Ethamu, iThekhowa,
iBhethi Zuri, iSoko, i-Adulamu,
iGathi, iMaresha, iZifi,
i-Adorayimi, iLakhishi, i-Azekha,
iZora, i-Ajaloni, neHebhroni; leyo mizi ebiyelweyo yayikwaJuda nakwaBhenjamini.
Izinqaba waziqinisa, kuzo wabeka abakhuzi bempi, wagcina ukudla, amafutha, newayini kuzo.
Kuyo yonke imizi, wabeka izihlangu nemikhonto emzini ngamunye, wayiqinisa kakhulu impela. ElakwaJuda nelakwaBhenjamini kwakungokwakhe.
Abaphristi nabaLevi ababekulo lonke elakwa-Israyeli bazihlanganisa noRehobhowamu, bevela kuzo zonke izifundazwe.
AbaLevi bashiya amadlelo abo nefa labo, baya kwaJuda naseJerusalema, ngokuba uJerobhowamu namadodana akhe bawenqabela ukuba abe ngabaphristi bakaSimakade.
Wazimisela abaphristi bezindawo eziphakemeyo, abezimbuzi nabamathole ayewabumbile.
Emva kokuhamba kwabo, kwalandela ababevela kuzo zonke izizwana zakwa-Israyeli, ababenhliziyo ziphokophelele ukufuna uSimakade uNkulunkulu ka-Israyeli, baya eJerusalema ukuyohlabela uSimakade uNkulunkulu wokhokho babo.
Base bewuqinisa-ke umbuso wakwaJuda, benza uRehobhowamu, indodana kaSolomoni, waba namandla iminyaka emithathu, ngokuba bahamba iminyaka emithathu endleleni kaDavide noSolomoni.
URehobhowamu waganwa nguMahalathi, indodakazi kaJerimothi, indodana kaDavide neka-Abhihayili, indodakazi ka-Eliyabe, indodana kaJese.
Wamzalela lawa madodana: uJewushe, uShemiya noZahamu.
Emva kwakhe, wathatha uMahakha, indodakazi ka-Absalomu. Yona yamzalela: u-Abhiya, u-Athayi, u-Uza, noShelomithi.
URehobhowamu wamthanda uMahakha, indodakazi ka-Absalomu, ukwedlula bonke abafazi bakhe nezanciza zakhe; wayeganwe ngabafazi abali-18 nezancinza ezingama-60. Wazala amadodana angama-28, namadodakazi angama-60.
URehobhowamu wabeka u-Abhiya, indodana kaMahakha, waba yinhloko nombusi phakathi kwabafowabo, kwazise wayehlose ukumbeka abe yinkosi.
Wenza ukuhlakanipha, amadodana akhe wawehlukanisa, ahlala emazweni wonke akwaJuda nakwaBhenjamini, nasemizini yonke ebiyelweyo; wawanika ukudla okuningi, wawatholela nabafazi abaningi.
Kwathi lapho umbuso kaRehobhowamu ususimeme waqina impela, wawushiya umthetho kaSimakade, no-Israyeli wonke wenza njengaye.
Kuthe ngonyaka wesihlanu wokubusa kwenkosi uRehobhowamu, kwakhuphukela eJerusalema uShishaki, inkosi yaseGibhithe, ngokuba babephambukile kuSimakade.
UShishaki wayenezinqola eziyi-1 200, abamahhashi abayizi-60 000, nokhumbintethe lwabantu abaphuma naye eGibhithe: amaLubhi, amaSuki, namaKhushe.
Wayidla imizi yakwaJuda ebiyelweyo, waze wafika naseJerusalema.
UShemaya umphrofethi wafika kuRehobhowamu nakubaholi bonke bakwaJuda abebuthene eJerusalema, ngenxa kaShishaki, wathi kubo: “Usho kanje uSimakade uthi: ‘Nina ningifulathele Mina, ngakho-ke nami nginilahlele esandleni sikaShishaki.’ ”
Base bezithoba abaholi bakwa-Israyeli nenkosi, bathi: “USimakade ulungile.”
Ngesikhathi uSimakade ebona ukuthi bayazithoba, wathumela izwi kuShemaya, wathi: “Bazithobile; angiyukubabhubhisa, kodwa ngizokubakhulula emveni kwesikhashana, nentukuthelo yami ayiyukwehlela iJerusalema ngesandla sikaShishaki.
Nokho bazokuba yizinceku zakhe ukuze bazi umsebenzi wami nomsebenzi wemibuso yezizwe.”
UShishaki, inkosi yaseGibhite, wakhuphukela eJerusalema, wathatha ingcebo yendlu kaSimakade nengcebo yasesigodlweni senkosi. Wathatha konke, wathatha nezihlangu zegolide ezazenziwe nguSolomoni.
Inkosi uRehobhowamu yenza izihlangu zethusi esikhundleni sazo, yazinikela ezandleni zezinduna zabalindi abaqapha umnyango wesigodlo senkosi.
Kwakuthi njalo lapho inkosi ingena endlini kaSimakade abalindi bayikhaphe beziphethe, bese kuthi kamuva bazibuyisele endlini yabalindi.
Ngenkathi uRehobhowamu ezithoba, intukuthelo kaSimakade yasuka kuye, ayibange isambhubhisa nya; kwakusekhona okuhle kwaJuda.
Inkosi uRehobhowamu yaziqinisa eJerusalema. Yaqala ukubusa ineminyaka engama-41; yabusa iminyaka eli-17 eJerusalema, umuzi uSimakade ayewukhethe phakathi kwazo zonke izizwe zakwa-Israyeli ukuba abeke kuwo igama lakhe. Igama likanina kwakunguNahama, umAmonikazi.
Wenza okubi, akaze ayibhekisa inhliziyo yakhe ekufuneni uSimakade.
Izindaba zikaRehobhowamu, ezakuqala nezokugcina, azilotshiwe yini ezindabeni zikaShemaya umphrofethi, nezika-Ido umboni, ngokwezizukulwane, nezimpi zikaRehobhowamu noJerobhowamu zonke izinsuku zabo na?
URehobhowamu walaliswa kokhokho bakhe, wembelwa emzini kaDavide. U-Abhiya, indodana yakhe, waba yinkosi esikhundleni sakhe.
Kwathi ngonyaka we-18 wokubusa kukaJerobhowamu, u-Abhiya waba yinkosi kwaJuda.
Wabusa eJerusalema iminyaka emithathu. Igama likanina kwakunguMikhaya, indodakazi ka-Uriyeli waseGibheya. Kwakukhona ukulwa phakathi kuka-Abhiya noJerobhowamu.
U-Abhiya waphuma ukuyokulwa enempi yamaqhawe anamandla empini, amadoda akhethiweyo ayizi-400 000. UJerobhowamu yena wehla ukuyokulwa naye, enamadoda akhethiweyo ayizi-800 000, angamaqhawe anamandla.
U-Abhiya wema entabeni iZemarayimi ekwelezintaba kwa-Efrayimi, wathi: “Ake ungilalele Jerobhowamu no-Israyeli wonkana.
Anazi yini ukuthi uSimakade uNkulunkulu ka-Israyeli wanika uDavide namadodana akhe umbuso kwa-Israyeli, kuze kube phakade, ngesivumelwano sikaSawoti na?
Kepha kwasuka uJerobhowamu, indodana kaNebhathi, inceku kaSolomoni, indodana kaDavide, wavukela inkosi yakhe, wayihlubuka.
Kwabuthana kuye wonke amayiyane, nabantu abakhohlakele baba namandla kunoRehobhowamu, indodana kaSolomoni. URehobhowamu wayesemusha, engakaqini ukhakhayi, akakwazanga ukumelana nabo.
“Manje nicabanga ukuthi nizokwazi ukumelana nobukhosi bukaSimakade obusesandleni samadodana kaDavide, wena nalesi sixuku esikhulu kangaka, futhi kunamathole egolide enenzelwa wona nguJerobhowamu ukuba abe ngonkulunkulu benu.
Anixoshanga yini abaphristi bakaSimakade, amadodana ka-Aroni nabaLevi, nazimisela abaphristi njengabantu bezizwe na? Noma ngubani ofika efuna ukwehlukaniselwa leyo nkonzo, ephethe iduna nezinqama eziyisikhombisa, uba ngumphristi walokho okungesibo onkulunkulu.
“Kepha thina, uSimakade unguNkulunkulu wethu, asimfulathelanga, sinabaphristi abamkhonzayo uSimakade emisebenzini yabo, abozalo luka-Aroni nolukaLevi.
Njalo ekuseni nakusihlwa bashisela uSimakade iminikelo yokushiswa nempepho enephunga elimnandi, bahlela isinkwa sokubukwa etafuleni elihlanzekileyo, bokhele uthi lwezibani lwegolide nezibani zalo njalo kusihlwa, ngokuba thina sisawugcina umyalo kaSimakade uNkulunkulu wethu, kodwa nina nimshiyile.
Bhekani, uNkulunkulu unathi, uyasihola, nabaphristi bakhe baphethe amacilongo empi ukuze bahlabe umkhosi ngenxa yenu. Bantu bakwa-Israyeli, ningalwi noSimakade uNkulunkulu wokhokho benu, ngokuba aniyukuphumelela.”
UJerobhowamu wayebalalele unyendle wabazungeza, ukuze aqhamuke ngemuva nangaphambili kukaJuda.
Lapho abakwaJuda bebheka emuva; bheka, kwakukhona amabutho phambi kwabo nasemuva kwabo. Bakhala kuSimakade, abaphristi bashaya amacilongo.
Abantu bakwaJuda base benza isaho, bekhuza iziqubulo zempi, kwathi lapho abakwaJuda bekhamuluka, uNkulunkulu washaya uJerobhowamu no-Israyeli wonke phambi kuka-Abhiya noJuda.
Abakwa-Israyeli babaleka phambi kwabaJuda; uNkulunkulu wabanikela esandleni sabo.
U-Abhiya namabutho akhe bababhubhisa, bebulala abakhulu nabancane kwa-Israyeli. Kwafa amabutho akhethiweyo ayizi-500 000.
Abakwa-Israyeli bathotshiswa ngaleso sikhathi, kodwa abakwaJuda banqoba, ngokuba babencike kuSimakade uNkulunkulu wokhokho babo.
U-Abhiya wamhubha uJerobhowamu, wadla imizi elandelayo: iBhethele nemizana yalo, iJeshana nemizana yalo, ne-Efroni nemizana yalo.
UJerobhowamu akaphindanga waba namandla emihleni ka-Abhiya. USimakade wamshaya wafa.
U-Abhiya waziqinisa waba namandla, wathatha abafazi abali-14, wazala amadodana angama-22 namadodakazi ali-16.
Ezinye izindaba zika-Abhiya, izindlela zakhe, namazwi akhe, kulotshiwe esichasiselweni somphrofethi u-Ido.
U-Abhiya wayeselaliswa kokhokho bakhe, bammbela emzini kaDavide. U-Asa, indodana yakhe waba yinkosi esikhundleni sakhe. Emihleni yakhe izwe laba nokuthula iminyaka elishumi.
U-Asa wenza okuhle nokulungileyo phambi kukaSimakade uNkulunkulu wakhe.
Wasusa ama-althare abezizwe ezindaweni eziphakemeyo, wabhidliza izinsika, wagawula nezingongolo zo-Ashera,
watshela uJuda ukuba afune uSimakade uNkulunkulu wokhokho babo, agcine umthetho nemiyalo.
Wasusa kuyo yonke imizi yakwaJuda izindawo eziphakemeyo, nama-althare empepho; umbuso wazola phambi kwakhe.
Wakha imizi ebiyelweyo kwaJuda, izwe laba nokuthula; kwakungekho ukulwa kuleyo minyaka ngokuba uSimakade wayemnike ukuthula.
Wathi kubaJuda: “Masakhe le mizi, siyibiyele ngogange, kube nemibhoshongo, izivalo nemigoqo. Izwe kusengelethu, ngokuba simfunile uSimakade uNkulunkulu wethu; simfunile, Yena wasiphumuza nxazonke.” Base beyakha-ke baphumelela.
U-Asa wayenamabutho ayizi-300 000, aphatha izihlangu nemikhonto, ayevela kwaJuda, nalawo ayevela kwaBhenjamini eyizi-280 000, ayephatha amahawu, nansala ngeminsalo. Wonke lawo mabutho ayengamaqhawe anamandla.
UZera, umKhushe, waphuma namabutho ayizi-100 000 nezinqola eziyizi-3 000 ukuba azolwa naye, wafika eMaresha.
U-Asa waphuma ukuba abhekane naye, wawahlela amabutho akhe esigodini eZefatha, ngaseMaresha.
U-Asa wakhala kuSimakade uNkulunkulu wakhe, wathi: “Simakade, akekho ngaphandle kwakho ongasiza nongenamandla phakathi kwabaningi. Sisize, Simakade Nkulunkulu wethu, ngokuba sethembele kuwe, siphumile egameni lakho ukuzobhekana nalolu quqaba. Simakade, Wena unguNkulunkulu wethu, mawungahlulwa muntu.”
USimakade wawashaya amaKhushe phambi kuka-Asa noJuda; amaKhushe abaleka.
U-Asa nabantu ababenaye, bawaxosha amaKhushe aze afika eGerari, afa wonke amabutho, akwaze kwasala namunye ophilayo, ngokuba abhujiswa phambi kukaSimakade nempi yakhe. Babuyela emuva nempango eningi kakhulu.
Bayibhubhisa yonke imizi ezungeze iGerari, ngokuba behlelwa wuvalo olwaluvela kuSimakade. AbakwaJuda baphanga yonke imizi ngokuba kwakunempango eningi kuyo.
Bacekela phansi amathende emfuyo, bathatha izimvu eziningi namakameli, babuyela eJerusalema.
UMoya kaNkulunkulu wehlela ku-Azariya, indodana ka-Odedi;
u-Azariya waphuma waya ku-Asa, wathi kuye: “Ngilaleleni, wena Asa noJuda wonke, noBhenjamini; uSimakade unani, uma ninaye, uma nimfuna niyakumfumana, kodwa uma nimshiya, naye uyakunishiya.
Kwase kuyisikhathi eside u-Israyeli engenaye uNkulunkulu weqiniso, kungekho namphristi ofundisayo, kungekho namthetho.
Kepha lapho ehluphekile wayephendukela kuSimakade uNkulunkulu ka-Israyeli, amfune, amfumane.
Ngalezo zikhathi kwakungekho ukuthula nokuphepha kophumayo noma kongenayo, ngokuba kwakukuningi okuphazamisa izakhamuzi zezwe.
Isizwe sasicoboshiswa ngesinye isizwe, nomuzi ngomunye umuzi, ngokuba uNkulunkulu wabahlupha ngezinhlupho eziningi.
Kepha nina yibani namandla, zingadangali izandla zenu, ngokuba umsebenzi wenu uyakuba nomvuzo.”
Kwathi ukuba u-Asa awezwe lawo mazwi nesiphrofetho sika-Odedi umphrofethi, waqina idolo, wazisusa izinengiso ezweni lonke kwaJuda nakwaBhenjamini, nasemizini yonke ayeyidle kwelezintaba kwa-Efrayimi, wavusa i-althare likaSimakade elaliphambi kompheme kaSimakade.
Waqoqa wonke uJuda noBhenjamini, nababegogobele nabo bevela kwa-Efrayimi, kwaManase, kwaSimeyoni, ngokuba uquqaba oluningi lwaluhlubukele kuye, luvela kwa-Israyeli, ngesikhathi selubona ukuthi uSimakade uNkulunkulu wakhe unaye.
Kwathi ngenyanga yesithathu, ngonyaka we-15 wokubusa kuka-Asa, babuthana eJerusalema.
Ngalolo lusuku bahlabela uSimakade okunye kwempango ababeyidlile; izinkabi ezingama-700 nezimvu eziyizi-7 000.
Benza isivumelwano sokumfuna uSimakade uNkulunkulu wokhokho babo ngayo yonke inhliziyo yabo, nangawo wonke umphefumulo wabo.
Bavumelana nangokuthi bonke abangayukumfuna uSimakade uNkulunkulu ka-Israyeli bayobulawa; noma ngabe bancane noma badala, owesilisa noma owesifazane.
Bafunga phambi kukaSimakade ngezwi elikhulu, bakhamuluka ngamacilongo nangemitshingo.
Wonke uJuda wathokoza ngesifungo ababesenzile, ngokuba babefungile ngenhliziyo yabo yonke, bamfuna ngentando yabo yonke, bamfumana. USimakade wabanika ukuthula nxazonke.
U-Asa wamsusa unina uMahakha ukuba abe yindlovukazi, ngokuba wayenzele u-Ashera isithombe esinengekayo. U-Asa wasigenca leso sithombe, wasiqotha sacoliseka, wasishisa ngasemfudlaneni iKidroni.
Kepha izindawo eziphakemeyo akazisusanga kwa-Israyeli, nakuba inhliziyo ka-Asa yayiphelele zonke izinsuku zokuphila kwakhe.
Wabuyisa endlini kaNkulunkulu izinto ezingcwele zikayise nezinto zakhe ezingcwele; isiliva, igolide, nezitsha.
Akuzange kube khona impi, kwaze kwaba ngunyaka wama-35 wokubusa kuka-Asa.
Kwathi ngonyaka wama-36 wokubusa kuka-Asa, uBhahasha, inkosi yakwa-Israyeli, wakhuphuka wayohlasela uJuda. Wakha iRama ukuze angavumeli muntu ukuba aphume noma angene ku-Asa, inkosi yakwaJuda.
U-Asa wakhipha isiliva negolide engcebeni yendlu kaSimakade neyasesigodlweni senkosi, wakuthumela kuBheni Hadadi, inkosi yase-Aramu owayehlala eDamaseku, wathi:
“Makube khona isivumelwano phakathi kwami nawe, njengoba sasikhona naphakathi kukababa noyihlo, phela sengithumele isiliva negolide; hamba wephule isivumelwano sakho noBhahasha, inkosi yakwa-Israyeli, ukuze asuke kimi.”
UBheni Hadadi wayilalela inkosi u-Asa, wathumela abakhuzi bempi yakhe, bahlasela imizi yakwa-Israyeli. Banqoba i-Ijoni, iDani, i-Abhela Mayimi, nayo yonke imizi yakwaNafethali, eyayiyizinqolobane.
Kwathi ukuba uBhahasha akuzwe lokho, wayeka ukwakha iRama, wawumisa umsebenzi wakhe.
Kepha u-Asa, inkosi, noJuda wonke, bahamba bathatha amatshe eRama nemithi uBhahasha ayakhe ngakho. Wakha ngakho iGebha neMizpha.
Ngaleso sikhathi kwafika uHanani, umboni ku-Asa, inkosi yakwaJuda, wathi kuye: “Ngenxa yokuba manje uthembele enkosini yase-Aramu, awuthembelanga kuSimakade uNkulunkulu wakho, ngakho-ke impi yenkosi yase-Aramu iphunyukile esandleni sakho.
AmaKhushe namaLubi ayengesiyo yini impi enkulu, enezinqola nabamahhashi abaningi kakhulu na? Kepha ngenxa yokuba wawuthembele kuSimakade, Yena wayinikela esandleni sakho.
Amehlo kaSimakade abona emhlabeni wonke ukuqinisa labo abanhliziyo yabo iphelele kuye. Wenze ubuwula kule nto, ngokuba kusukela manje sekuzohlala kunokulwa.”
U-Asa wamthukuthelela umboni, wayesemfaka ejele, ngokuba wathukuthela ngenxa yale nto umboni ayemtshele yona. U-Asa wabacindezela abanye abantu ngaleso sikhathi.
Bheka, izindaba zika-Asa, ezakuqala nezakamuva, zilotshiwe encwadini yamakhosi akwaJuda nakwa-Israyeli.
Kwathi ngonyaka wama-39 wokubusa kwakhe u-Asa, wahlaselwa yisifo ezinyaweni zakhe; isifo esasimphethe sasinzima kakhulu, kodwa akamfunanga uSimakade ngenxa yaso; waya ezinyangeni.
U-Asa walaliswa kokhokho bakhe, wayekhothame ngonyaka wama-41 wokubusa kwakhe.
Bamngcwaba ethuneni lakhe ayeziqophele lona emzini kaDavide. Bambeka endaweni yokulala egcwele iphunga elimnandi namakha anhlobonhlobo ayexutshwe alungiswa ngokwenza komthaki. Bashisa impepho eningi kakhulu.
UJehoshafathi, indodana yakhe, waba yinkosi esikhundleni sakhe, waziqinisa ukuba alwe no-Israyeli.
Wakanisa impi kuyo yonke imizi yakwaJuda ebiyelweyo, wabeka amabutho kwaJuda nasemizini yakwa-Efrayimi eyayinqotshwe nguyise u-Asa.
USimakade wayenaye uJehoshafathi, ngokuba wahamba ngezindlela zakuqala zikakhokho wakhe uDavide, akazange afune oBhali,
kepha wamfuna uNkulunkulu kayise, wahamba emthethweni wakhe, akaze alingisa okwenziwa ngu-Israyeli.
Ngakho-ke uSimakade wawusimamisa umbuso esandleni sakhe, wonke uJuda wathela intela kuJehoshafathi; waba nodumo olukhulu nengcebo eningi.
Inhliziyo yakhe yashisekela izindlela zikaSimakade, wazisusa izindawo eziphakemeyo, no-Ashera kwaJuda.
Ngonyaka wesithathu wokubusa kwakhe, wathumela izikhulu zakhe uBheni Hayili, u-Obhadiya, uZakhariya, uNethaneli noMikhaya ukuba ziyofundisa emizini yakwaJuda,
zinabaLevi: uShemaya, uNethaniya, uZebadiya, u-Asaheli, uShemiramothi, uJehonathani, u-Adoniya, uThobiya noThobi Adoniya. Ababenalaba baLevi kwakungo-Elishama noJehoramu, abaphristi.
Bafundisa kwaJuda bephethe incwadi yomthetho kaSimakade, bajikeleza kuyo yonke imizi yakwaJuda, befundisa abantu.
Yonke imibuso yamazwe azungeze elakwaJuda jikelele yehlelwa yingebhe ngoSimakade, ayizange ilwe noJehoshafathi.
Abanye bamaFilisti baletha izipho kuJehoshafathi, nesiliva elaliyintela. Nabase-Arabhiya baletha kuye imihlambi, izinqama eziyizi-7 700, nezimpongo eziyizi-7 700.
UJehoshafathi waya ngokuya edlondlobala; wakha izinqaba nemizi eyizinqolobane kwaJuda.
Wayenokuningi emizini yakwaJuda, amadoda empi, namaqhawe anamandla, eJerusalema.
Babemi kanje ngokwezindlu zoyise: kwaJuda, abakhuzi bempi bezinkulungwane: u-Adina umkhuzi wempi, enamaqhawe anamandla ayizi-300 000.
Emva kwakhe kunguJehohanani umkhuzi wempi, enezi-280 000.
Wayelandelwa ngu-Amasiya, indodana kaZikhiri, owazinikela ngenhliziyo epheleleyo kuSimakade, enamaqhawe anamandla ayizi-200 000.
KwaBhenjamini, kungu-Eliyada, iqhawe elinamandla, enabahlome ngeminsalo nangezihlangu abayizi-200 000.
Emva kwakhe kunguJehozabhadi, enamabutho ahlomele ukulwa ayizi-180 000.
Yilaba-ke ababekhonza inkosi, ngaphandle kwalabo inkosi eyayibabeke emizini ebiyelweyo eyayikulo lonke elakwaJuda.
UJehoshafathi wayenengcebo nodumo olukhulu, waba nobuhlobo no-Ahabi ngokuganiselana.
Ngasekugcineni kweminyaka ethile, wehlela eSamariya ku-Ahabi. U-Ahabi wamhlabisa, yena nabantu ababenaye, izimvu nezinkabi eziningi, wamncenga ukuba akhuphuke ahlasele iRamothi Gileyadi.
U-Ahabi, inkosi yakwa-Israyeli, wathi kuJehoshafathi, inkosi yakwaJuda: “Uyakuhamba nami yini, siye eRamothi Gileyadi na?” Wathi kuye: “Mina nginjengawe, nabantu bami banjengabantu bakho; siyakuba nawe empini.”
UJehoshafathi wathi enkosini yakwa-Israyeli: “Ake ubuze namhlanje izwi likaSimakade.”
Inkosi yakwa-Israyeli yaqoqa abaphrofethi, amadoda angama-400, yathi kubo: “Sihambe yini siyokulwa neRamothi Gileyadi, noma ngiyeke na?” Bathi: “Khuphuka, ngokuba uNkulunkulu uyakulinikela esandleni senkosi.”
Kepha uJehoshafathi wathi: “Akusekho mphrofethi kaSimakade lapha, ukuba sibuze kuye na?”
Inkosi yakwa-Israyeli yathi kuJehoshafathi: “Kukhona umuntu oyedwa vo esingabuza ngaye kuSimakade, kodwa ngiyamzonda, akaphrofethi lutho oluhle ngami, kepha okubi njalo. NguMikhaya, indodana kaJimila.” UJehoshafathi wathi enkosini: “Inkosi mayingasho kanjalo.”
Inkosi yakwa-Israyeli yayisibiza enye yezinduna, yathi: “Phuthuma ulande uMikhaya, indodana kaJimila.”
Inkosi yakwa-Israyeli noJehoshafathi inkosi yakwaJuda babehleli, yilowo nalowo esihlalweni sakhe sobukhosi. Babembethe izembatho zabo, behleli esibuyeni esisesikhaleni sesango eSamariya. Bonke abaphrofethi babephrofetha phambi kwabo.
UZedekiya, indodana kaKhenahana, wayezenzele izimpondo zensimbi, wathi: “Usho kanje uSimakade, uthi: ‘Ngalezi zimpondo uyakuwagwaza ama-Aramu uwabhubhise aze aphele nya.’ ”
Bonke abaphrofethi baphrofetha kanjalo bethi: “Khuphukela eRamothi Gileyadi, unqobe, ngokuba uSimakade uyakulinikela esandleni senkosi.”
Isithunywa esasiyobiza uMikhaya sakhuluma naye, sathi: “Bonke abaphrofethi bakhulume ngazwi linye baphrofetha okuhle enkosini, sengathi izwi lakho lingaba linye nelabo, ukhulume okuhle.”
Kepha uMikhaya wathi: “Ngifunga ngiyagomela phambi kukaSimakade, akushoyo uNkulunkulu wami yikhona engizakukukhuluma.”
Esefikile enkosini, inkosi yathi kuye: “Mikhaya, sihambe yini ukuyokulwa neRamothi Gileyadi, noma ngiliyeke na?” Wathi: “Khuphukani, nibe nempumelelo; bayakunikelwa esandleni senu.”
Inkosi yayisithi kuye: “Ngiyakukufungisa kuze kube kangaki ukuba ungakhulumi lutho kimi ngaphandle kweqiniso egameni likaSimakade na?”
Wayesethi: “Ngabona wonke u-Israyeli ehlakazekile ezintabeni njengezimvu ezingenamelusi. USimakade wathi: ‘Laba abasenawo amakhosi, mabaphindele emuva ngokuthula, kube yilowo nalowo endlini yakhe.’ ”
Inkosi yakwa-Israyeli yayisithi kuJehoshafathi: “Angishongo-ke kuwe ukuthi akaphrofethi lutho oluhle ngami; okubi kuphela na?”
UMikhaya wathi: “Ngakho-ke yizwani izwi likaSimakade: ngambona uSimakade ehleli esihlalweni sakhe sobukhosi, ibandla lonke lasezulwini limi ngakwesokunene nangakwesokhohlo sakhe.
USimakade wathi: ‘Ngubani oyakuyenga u-Ahabi, inkosi yakwa-Israyeli, ukuba ikhuphuke ifele eRamothi Gileyadi na?’ “Omunye washo lokhu nomunye washo lokhuya.
“Kwase kuvela umoya, wema phambi kukaSimakade wathi: ‘Mina ngiyakumyenga.’ “USimakade wathi kuye: ‘Kanjani na?’
“Wathi: ‘Ngiyakuphuma ngibe ngumoya wamanga emilonyeni yabaphrofethi bakhe bonke.’ “Wathi: ‘Uyakumyenga, futhi umehlule, ngakho hamba wenze kanjalo.’
“Ngakho-ke uSimakade ufake umoya wamanga emilonyeni yalaba baphrofethi bakho. NguSimakade okhulume okubi ngawe.”
UZedekiya, indodana kaKhenahama, wasondela wamshaya esihlathini uMikhaya, wathi: “UMoya kaSimakade wasuka nini kimi ukuba akhulume kuwe na?”
Wathi uMikhaya: “Uyakukubona lokho ngosuku oyongena uphuma ngalo emakamelweni ngamakamelo, ucasha.”
Inkosi yakwa-Israyeli yathi: “Mthatheni uMikhaya, nimbuyisele ku-Amoni, umbusi womuzi, nakuJowashi, indodana yenkosi,
uyakuthi kubo: ‘Isho kanje inkosi, ithi: “Fakani lona ejele, nimuphe isinkwa sokuhlupheka namanzi okuhlupheka, ngize ngibuye ngiphephile.” ’ ”
Wayesethi uMikhaya: “Uma uyobuya ngempela uphephile, uyakube engakhulumanga ngami uSimakade.” Wathi futhi: “Yizwani nina bantu bonke.”
Inkosi yakwa-Israyeli noJehoshafathi, inkosi yakwaJuda, base benyukela eRamathi Gileyadi.
Inkosi yakwa-Israyeli yathi kuJehoshafathi: “Mina ngizozifihla ngiye ngilwe, kepha wena yembatha izembatho zakho.” Inkosi yakwa-Israyeli yayisizifihla, yahamba yayokulwa.
Inkosi yase-Aramu yayizidonse ngendlebe izinduna zezinqola zayo, yathi: “Ningalwi namuntu noma ngomncane noma ngomdala, kodwa nenkosi yakwa-Israyeli kuphela.”
Kwathi lapho izinduna zezinqola zimbona uJehoshafathi, zathi: “Lo yinkosi yakwa-Israyeli.” Zaphambuka ukuba zilwe nayo, kepha uJehoshafathi wamemeza, uSimakade wamsiza. UNkulunkulu wabasusa kuye.
Kwathi izinduna zezinqola sezibonile ukuthi akasiyo inkosi yakwa-Israyeli, zabuya ekumlandeleni.
Kepha umuntu othile wansala umnsalo wakhe ngokungazelele nje, wayihlaba inkosi yakwa-Israyeli lapho kuhlangana khona ibhantshi lensimbi eliyisivikelo sayo, yathi kumshayeli wenqola yayo: “Phenduka ungikhiphe empini, ngokuba sengilinyaziwe.”
Impi yashisa ngalolo lusuku. Inkosi bayibeka enqoleni yayo maqondana ne-Aramu, kwaze kwaba kusihlwa, yakhothama ngesikhathi sokushona kwelanga.
UJehoshafathi, inkosi yakwaJuda, waphindela emuva esigodlweni sakhe eJerusalema, ephephile.
UJehu, indodana kaHanani, umboni, waphuma wayomhlangabeza, wafike wathi enkosini uJehoshafathi: “Kungani usiza ababi, uthanda abazonda uSimakade na? Ngakho-ke intukuthelo kaSimakade izokwehlela phezu kwakho.
Nokho kufunyaniswe kuwe izinto ezinhle. Ubasusile o-Ashera ezweni, wabhekisa inhliziyo yakho ukuba ifune uNkulunkulu.”
UJehoshafathi wahlala eJerusalema, kodwa kamuva wabuye waphuma wahamba phakathi kwabantu, kusukela eBheri Sheba kuya kwelezintaba kwa-Efrayimi; wababuyisela abantu kuSimakade uNkulunkulu wokhokho babo.
Wabeka abehluleli ezweni nasemizini yonke yakwaJuda ebiyelweyo, imizi ngemizi.
Wathi kubehluleli: “Kubhekisiseni enikwenzayo, ngokuba anihluleleli abantu, kodwa uNkulunkulu onani ekwehluleleni.
Ngakho-ke hlalani nimesaba uSimakade, niqaphele enikwenzayo, ngokuba akukho ukungalungi kuSimakade uNkulunkulu wethu, akakhethi buso bamuntu futhi akafunjathiswa.”
NaseJerusalema, uJehoshafathi wabeka abanye babaLevi nabaphristi, nezinye zezinhloko zoyise bakwa-Israyeli ukuze behlulele egameni likaSimakade, bathethe amacala. Babuyela eJerusalema.
Wabayala wathi: “Niyokwenza kanjalo, nimesabe uSimakade ngeqiniso nangenhliziyo epheleleyo.
Wonke amacala afika kini evela kubafowenu abahlala emizini yabo phakathi kwegazi negazi, noma phakathi komthetho nomyalo, noma phakathi kwezimiso nezehlulelo, niyakubaxwayisa ngawo ukuba bangabi nacala kuSikamade, nehlelwe yintukuthelo nina nabafowenu. Niyokwenza kanjalo, ningabi nacala.
“Bheka, u-Amariya, umphristi, nguye onengamele nazo zonke izindaba zikaSimakade. UZebadiya, indodana ka-Ishmayeli, umholi wendlu yakwaJuda, uyokwengamela zonke izindaba eziqondene nenkosi. AbaLevi bayakuba yizikhulu eziniholayo. Yenzani ngesibindi, uSimakade uyakuba nabalungileyo.”
Kwathi emveni kwalokho kwafika abakwaMowabi nabakwa-Amoni nabanye bakwaMehuni bezokulwa noJehoshafathi.
Kweza abanye bamazisa ngalokho uJehoshafathi, bathi: “Kuza isixuku esikhulu esivela phesheya kolwandle, e-Aramu; manje sesingaseHazezoni Thamari eliyi-Eni Gedi.”
UJehoshafathi wesaba, wayesezinikela, wafuna uSimakade, wamemezela ukuzila ukudla kulo lonke elakwaJuda.
UJuda wabuthana ukuba acele usizo kuSimakade. Baphuma kuyo yonke imizi yakwaJuda ukuzofuna uSimakade.
UJehoshafathi wema ebandleni lakwaJuda nelaseJerusalema endlini kaSimakade, phambi kwegceke elisha,
wathi: “Simakade, Nkulunkulu wokhokho bethu, kanti Wena awusiye yini uNkulunkulu ezulwini, nombusi wemibuso yonke yezizwe na? Esandleni sakho kukhona amandla negunya, akekho ongamelana nawe.
Wena Nkulunkulu wethu awuxoshanga yini phambi kwabantu bakho, u-Israyeli, ababakhe kuleli lizwe, walinika abozalo luka-Abhrahama, umngani wakho, kuze kube phakade na?
Bahlala kulo, bakwakhela kulo indlu engcwele ukuba ibe ngeyegama lakho, bethi:
‘Uma sehlelwa ngokubi, inkemba, ukwehlulelwa, ubhubhane, nendlala, siyakuma phambi kwale ndlu naphambi kwakho, ngokuba igama lakho likule ndlu; sikhale kuwe ekuhluphekeni kwethu, Wena uyakusizwa usisindise.’
“Ngakho-ke ake ubheke, abakwa-Amoni, abakwaMowabi nabasentabeni iSeyiri, ongamvumelanga u-Israyeli ukuba ababhubhise ngesikhathi ephuma eGibhithe, kunalokho wabachezukela, akaze ababhubhisa.
Bheka-ke ukuthi basivuza kanjani, bezile ukuzosixosha efeni lakho owasinika lona ukuba silidle.
Nkulunkulu wethu, awuyukubehlulela yini na? Ngokuba thina asinawo amandla okubhekana nalesi sixuku esikhulu kangaka esizayo. Futhi asazi ukuthi sizokwenzenjani, kodwa amehlo ethu abheke kuwe.”
UJuda wonke wayemi phambi kukaSimakade kanye nezingane zabo, omkabo nabantwana babo.
UMoya kaSimakade wafika kuJahaziyeli kaZakhariya kaBhenaya kaJehiyeli kaMathaniya, umLevi, omunye wozalo luka-Asafa, ephakathi kwebandla,
wathi: “Yizwani nina nonke bakwaJuda, zakhamuzi zaseJerusalema, nawe nkosi Jehoshafathi: usho kanje kini uSimakade, uthi: ‘Ningesabi, ningapheli amandla ngenxa yalesi sixuku esikhulu, ngokuba impi ayisiyo eyenu, ingekaNkulunkulu.
Kusasa yehlelani kubo; bayobe bekhuphuka ngommango waseZizi; niyakubafumana ekugcineni kwesigodi, phambi kwehlane eJeruweli.
Akusikho okwenu ukulwa kule mpi; zihleleni, nime, nibone ukunqoba kukaSimakade, nina Juda neJerusalema; ningesabi, ningapheli amandla; phumelani kubo kusasa, ngokuba uSimakade uzakuba nani.’ ”
UJehoshafathi wayesekhothama, wathi mbo ngobuso emhlabathini. UJuda wonke nezakhamuzi zaseJerusalema bakhothama phambi kukaSimakade, bakhuleka kuSimakade.
AbaLevi, abozalo lwamaKhohathi nolwamaKhorahi, basukuma badumisa uSimakade uNkulunkulu ka-Israyeli ngezwi elikhulu kakhulu.
Bavuka ekuseni, baphuma baya ehlane eThekhowa. Ngesikhathi bephuma, uJehoshafathi wasukuma, wathi: “Ngilaleleni, Juda nani zakhamuzi zaseJerusalema! Methembeni uSimakade uNkulunkulu wenu, niyakuqiniswa. Bethembeni abaphrofethi bakhe, niyakuphumelela.”
Eselulekene nabantu, wabeka abayakuhlabelela kuSimakade bevunule ngobungcwele, behamba phambi kwamabutho, bethi: “Bongani uSimakade, ngokuba umusa wakhe umi phakade.”
Kwathi ukuba baqale ukuhalalisa nokudumisa, uSimakade wababekela abazobalalela unyendle abakwa-Amoni, abakwa-Mowabi, nabasentabeni iSeyiri ababephumele ukumelana noJuda, banqotshwa bonke.
Abakwa-Amoni nabakwaMowabi bamelana nezakhamuzi zasentabeni iSeyiri, bababhubhisa baphela nya. Kwathi sebeziqothule nya zonke izakhamuzi zaseSeyiri, base bephenduka babulalana bodwa.
UJuda efika embonisweni ehlane, waphenduka wabuka ngalapho kwakunesixuku khona; bheka, kwakulele izigingqane zezidumbu zidindilize phansi, kungekho noyedwa ophunyukile.
UJehoshafathi namabutho akhe kwathi lapho befika ukuba babuthe impango kubo, bafumanisa kubo ingcebo eningi kakhulu abangakwazanga ukuyithwala.
Ngosuku lwesine babuthana esiGodini iBherakha, bambonga lapho uSimakade. Igama laleyo ndawo labizwa ngokuthi yisigodi iBherakha, kuze kube namuhla.
UJehoshafathi wabahola bonke abantu bakwaJuda nabaseJerusalema babuyela eJerusalema ngentokozo, ngokuba uSimakade wayebathokozisile ngokwehlula izitha zabo.
Bafika eJerusalema bephethe izingubhu, amahabhu, namacilongo, bangena endlini kaSimakade.
Uvalo ngoNkulunkulu lwehlela yonke imibuso yamazwe lapho bezwa ukuthi uSimakade wayelwe nezitha zika-Israyeli.
Umbuso kaJehoshafathi waba nokuthula ngenxa yokuthi uNkulunkulu wakhe wayemnike ukuphumula nxazonke.
UJehoshafathi wabusa kwaJuda; wayeneminyaka engama-35 lapho eqala ukubusa. Wabusa iminyaka engama-25 eJerusalema. Igama likanina kwakungu-Azubha, indodakazi kaShilekhi.
Wahamba ngendlela ka-Asa, uyise, kaphambukanga kuyo, wenza okulungile phambi kukaSimakade.
Kepha-ke azisuswanga izindawo eziphakemeyo, futhi nabantu kabazibhekisanga izinhliziyo zabo kuNkulunkulu wokhokho babo.
Ezinye izindaba zikaJehoshafathi, ezakuqala nezakamuva; bheka, zilotshiwe ezindabeni zikaJehu, indodana kaHanani, ezifakwe encwadini yamakhosi akwa-Israyeli.
Emveni kwalokho uJehoshafathi, inkosi yakwaJuda, wenza isivumelwano no-Ahaziya, inkosi yakwa-Israyeli; yena wenza okubi impela.
Wazihlanganisa nayo ukuze bakhe imikhumbi yokuya eTharishishi; babeyakhela e-Eziyoni Gebheri.
U-Eliyezeri, indodana kaDodavahu waseMeresha, waphrofetha ngoJehoshafathi, wathi: “Ngenxa yokuba uzihlanganise no-Ahaziya, uSimakade uyakuyidiliza imisebenzi yakho.” Leyo mikhumbi yephuka, ayikwazanga ukuya eTharishishi.
UJehoshafathi walaliswa kokho bakhe, wembelwa kokhokho bakhe emzini kaDavide. UJehorama, indodana yakhe, waba yinkosi esikhundleni sakhe.
UJehoshafathi wayenabafowabo namadodana. Amadodana akhe kwakungu-Azariya, uJehiyeli, uZakhariya, u-Azariyahu, uMikhayeli noShefathiya; wonke lawa kwakungamadodana enkosi yakwa-Israyeli, uJehoshafathi.
Uyise uJehoshafathi wayebaphe izipho ezinkulu zesiliva, zegolide, nezinto ezinhle kakhulu nemizi ebiyelweyo kwaJuda, kodwa umbuso wawunika uJehoramu ngoba wayeyizibulo.
UJehoramu esemile embusweni kayise waziqinisa impela, wabe esebulala bonke abafowabo ngenkemba, nabathile ababengabaholi kwa-Israyeli.
UJehoramu wayeneminyaka engama-32 ngesikhathi eqala ukubusa, wabusa iminyaka eyisishiyagalombili eJerusalema.
Wahamba endleleni yamakhosi akwa-Israyeli njengoba kwenza abendlu ka-Ahabi, kwazise wayeganwe yindodakazi ka-Ahabi. Wenza okubi emehlweni kaSimakade.
Kepha uSimakade akathandanga ukuyibhubhisa indlu kaDavide ngenxa yesivumelwano ayesenze noDavide, wayethe uyakumnika yena nozalo lwakhe isibani, izinsuku zonke.
Emihleni yakhe abakwa-Edomi bahlubuka phansi kwesandla sikaJuda, bazibekela eyabo inkosi.
UJehoramu wayesewela nezinduna zakhe zonke, nezinqola zakhe zonke, wavuka ebusuku, wababhubhisa abakwa-Edomi ababemzungezile nezinduna zezinqola.
U-Edomi wahlubuka phansi kwesandla sabakwaJuda, kuze kube namuhla. Kwase kusuka neLibhina lahlubuka ngaso leso sikhathi, ngokuba wayemshiyile uSimakade uNkulunkulu wokhokho bakhe.
UJehoramu wabuye wenza izindawo eziphakemeyo ezintabeni zakwaJuda, waholela ukuba abakhileyo eJerusalema baphinge, wayenga uJuda.
Umphrofethi u-Eliya wamthumelela incwadi, ethi: “Usho kanje uSimakade uNkulunkulu kaDavide ukhokho wakho, uthi: ‘Ngenxa yokuba awuhambanga ngezindlela zikaJehoshafathi, uyihlo, nangezindlela zika-Asa, inkosi yakwaJuda,
kodwa uhambe ngendlela yamakhosi akwa-Israyeli, waholela uJuda nabakhileyo eJerusalema ekuphingeni, njengalokhu kwenza indlu ka-Ahabi, wabuye wabulala abafowenu bendlu kayihlo ababebahle kunawe;
ngakho-ke uSimakade uzoshaya ngokushaya okukhulu abantu bakho, amadodana akho, omkakho nayo yonke impahla yakho.
Wena uyakwehlelwa yisifo esikhulu, isifo esisezibilini; uyakugula zize izibilini zakho ziphumele ngaphandle usuku nosuku, uze ufe.’ ”
USimakade wavusela uJehoramu umoya kumaFilisti, nakwabase-Arabhiya ababengamaKhushe;
bonke bakhuphuka bayokulwa noJuda, babhodloza bangena khona, bathumba yonke impahla etholakala esigodlweni senkosi, amadodana ayo, nobomkayo, akwasala ndodana kuye, ngaphandle nje kukaJehowahazi owayengomncane emadodaneni akhe.
Sekwedlule konke lokho, uSimakade washaya uJehoramu ezibilinini, ngesifo esasingenakwelashwa.
Kwathi ngokuhamba kwesikhathi sekuzophela iminyaka emibili, zaqala ukuphuma izibilini zakhe, ngenxa yaleso sifo, wafa ngobukhulu ubuhlungu. Kepha abantu bakhe abazange bamshisele lutho lapho esekhotheme, njengoba babekade beshisela okhokho bakhe.
Waqala ukubusa eneminyaka engama-32, wabusa iminyaka eyisishiyagalombili eJerusalema. Wangcwatshwa engazange akhalelwe muntu. Bamngcwaba emzini kaDavide, kodwa hhayi emadlinzeni amakhosi.
Izakhamuzi zaseJerusalema zambeka u-Ahaziya, indodana kaJehoramu encane, waba yinkosi esikhundleni sakhe, ngokuba iviyo labaphangi elafika enkanjini nabase-Arabhiya, babebabulele bonke abafowabo abadala. U-Ahaziya, indodana kaJehoramu, waba yinkosi yakwaJuda.
U-Ahaziya wayeneminyaka engama-42 ngesikhathi eqala ukubusa, wabusa eJerusalema unyaka owodwa. Igama likanina kwakungu-Athaliya, indodakazi ka-Omri.
Naye wahamba ezindleleni zendlu ka-Ahabi elulekwa ngunina ukuba enze okubi.
Wenza okubi phambi kukaSimakade njengendlu ka-Ahabi, ngokuba yibona ababemeluleka emveni kokukhothama kukayise, okwaba yimbangela yokubhujiswa kwakhe.
Elulekwa yibo, wahamba noJehoramu, indodana ka-Ahabi, inkosi yakwa-Israyeli, ukuyokulwa noHazayeli, inkosi yase-Aramu eRamothi Gileyadi; ama-Aramu amlimaza uJoramu.
Waphindela eJizreyeli ukuyokwelashwa amanxeba awathola eRama ngesikhathi elwa noHazayeli, inkosi yase-Aramu. U-Azariya, indodana kaJehoramu, inkosi yakwaJuda, wehla wayombona uJehoramu, indodana ka-Ahabi, eJizreyeli, ngoba wayegula.
Ukubhubha kuka-Ahaziya kwakuvela kuNkulunkulu, ngokuya kukaJoramu, eyombona. Ngesikhathi efika lapho waphuma noJehoramu ukuyobona uJehu, indodana kaNimishi, owayegcotshwe nguSimakade ukuba ashabalalise indlu ka-Ahabi.
Kwathi lapho uJehu ehlulela abendlu ka-Ahabi, wafumana izikhulu zakwaJuda namadodana abafowabo baka-Ahaziya ababekhonza u-Ahaziya; nabo wababulala.
Wamfuna u-Ahaziya, wamthola ebanjiwe ngokuba wayecashe eSamariya, bamyisa kuJehu; bambulala, bamngcwaba ngokuba bathi: “Lo uyindodana kaJehoshafathi, owamfuna uSimakade ngenhliziyo yakhe yonke.” Indlu ka-Ahaziya yayingasenamuntu ongagcina umbuso.
Kwathi ukuba u-Athaliya, unina ka-Ahaziya, abone ukuthi indodana yakhe ifile, wasuka wabulala bonke abozalo lwasebukhosini bendlu yakwaJuda.
UJehoshabheyathi, indodakazi yenkosi, yathatha uJowashi, indodana ka-Ahaziya, yameba emadodaneni enkosi ayebulawa, yamfihla ekamelweni lokulala, yena nomzanyana wakhe. UJehoshabheyathi, indodakazi yenkosi uJehoramu, umkaJehoyada, umphristi, wayengudadewabo ka-Ahaziya, wamfihla, akaze akwazi u-Athaliya ukumbulala.
Wahlala nabo ebhacile endlini kaNkulunkulu iminyaka eyisithupha; ngesikhathi u-Athaliya ebusa ezweni.
Ngonyaka wesikhombisa uJehoyada waqunga isibindi, wathatha abakhuzi bempi bamakhulu, u-Azariya indodana kaJerohamu, u-Ishmayeli indodana kaJehohanani, u-Azariya indodana ka-Obhede, uMahaseya indodana ka-Adaya, no-Elishafathi indodana kaZikhiri, wenza isivumelwano nabo.
Balizungeza lonke elakwaJuda, baqoqa abaLevi emizini yonke yakwaJuda, nezinhloko zezindlu zoyise zakwa-Israyeli, beza eJerusalema.
Lonke ibandla lenza isivumelwano nenkosi endlini kaNkulunkulu; uJehoyada wathi kubo: “Bhekani, nansi indodana yenkosi, iyakubusa njengokusho kukaSimakade ngamadodana kaDavide.
Nakhu-ke okumele nikwenze: ingxenye eyodwa yokuthathu yalabo abangena ngesabatha, abangabaphristi, nabaLevi, iyakuba ngabalindimasango.
Ingxenye yokuthathu elandelayo, iyokuba sesigodlweni senkosi; ingxenye yokugcina yokuthathu ibe sesangweni Lesisekelo, bonke abantu bayoba semagcekeni endlu kaSimakade.
Makungangeni muntu endlini kaSimakade ngaphandle kwabaphristi nabaLevi okuyibona abakhonzayo; bona bayakungena ngokuba bangcwele, kepha bonke abantu bayakugcina izimfanelo zikaSimakade.
AbaLevi bayakuyizungeza inkosi, yilowo nalowo ephethe izikhali zakhe esandleni, oyongena endlini uyobulawa; niyoba nenkosi ekungeneni nasekuphumeni kwayo.”
AbaLevi noJuda wonke benza njengakho konke uJehoyada, umphristi, ayebayalile; yilowo nalowo wathatha abantu bakhe ababengena ngesabatha, nalabo ababephuma ngesabatha, ngokuba uJehoyada, umphristi, akazihambisanga izigaba.
UJehoyada, umphristi, wanika abakhuzi bempi bamakhulu imikhonto, amahawu, nezihlangu okwakungezenkosi uDavide, ezazihlala endlini kaNkulunkulu.
Wamisa abantu bonke yilowo nalowo ephethe isikhali sakhe esandleni sakhe, kusukela ohlangothini lwesokunene lwendlu, kuze kube sohlangothini lwesokhohlo lwendlu, ngase-althare nanxazonke zendlu okwakukuyo inkosi.
Bayiletha indodana yenkosi base bebeka umqhele, bayinika ubufakazi, bayibeka yaba yinkosi. UJehoyada namadodana akhe bayigcoba, bathi: “Mana njalo, nkosi.”
U-Athaliya wawuzwa umsindo wabantu ababegijima bedumisa inkosi, wanikela khona kubantu, endlini kaSimakade.
Wabheka, wayibona inkosi imi ngasensikeni yayo ngasekungeneni. Izikhulu nabamacilongo babenenkosi; bonke abantu bezwe bathokoza, bashaya amacilongo, abahlabelelayo babebetha izinto zokucula, behola indumiso. U-Athaliya wayeseklebhula izingubo zakhe, wathi: “Ukuvukela umbuso! Ukuvukela umbuso!”
UJehoyada, umphristi, wayesethumela abakhuzi bempi bamakhulu ebabephethe amabutho, wathi kubo: “Mkhipheni, nimlethe phakathi kwezinhla zamabutho, omlandelayo nimbulale ngenkemba,” ngokuba umphristi wayeshilo wathi: “Ningambulaleli endlini kaSimakade.”
Base bembamba ngezandla baya naye ekungeneni kwesango lamahhashi, endlini yenkosi; bambulala khona.
UJehoyada wenza isivumelwano phakathi kwakhe nabantu bonke nenkosi ukuba babe ngabantu bakaSimakade.
Bonke abantu baya endlini kaBhali, bayibhidliza, baphihliza ama-althare ayo nezithombe zayo. UMathani, umphristi kaBhali, bambulalela phambi kwama-althare.
UJehoyada wabeka abaphristi nabaLevi ukuba bagade indlu kaSimakade. UDavide wayebehlukanisele indlu kaSimakade ukuba banikele ngeminikelo yokushiswa kuSimakade, njengalokhu kulotshiwe emthethweni kaMose; bakwenze ngentokozo nangokuhuba, njengalokhu uDavide ayehlelile.
Wabeka abalindimasango emasangweni endlu kaSimakade, ukuze kungangeni ongcolile noma ngabe ungcoliswe yini.
Wathatha abakhuzi bempi bamakhulu, izikhulu, nababusi phakathi kwabantu, bonke abantu bezwe bayikhipha inkosi endlini kaSimakade, bangena ngesango elingenhla esigodlweni senkosi, base beyibeka esihlalweni sobukhosi sombuso.
Bonke abantu bezwe bathokoza, umuzi waba nokuthula, ngokuba u-Athaliya babembulele ngenkemba.
UJowashi wayeneminyaka eyisikhombisa ngesikhathi eba yinkosi, wabusa iminyaka engama-40 eJerusalema. Igama likanina kwakunguSibhiya waseBheri Sheba.
UJowashi wenza okulungile phambi kukaSimakade ngazo zonke izinsuku zokuphila kukaJehoyada, umphristi.
UJehoyada wamthathela abafazi ababili; wazala amadodana namadodakazi.
Kwathi emveni kwalokho, kwaba senhliziyweni kaJowashi ukuvuselela indlu kaSimakade.
Waqoqa abaphristi nabaLevi, wathi kubo: “Phumani niye emizini yakwaJuda; niqoqe imali yokulungisa indlu kaNkulunkulu wenu ku-Israyeli wonke, lokho nikwenze unyaka nonyaka: lusukumeleni ngokushesha lolu daba.” Kepha abaLevi abalusukumelanga ngokushesha lolo daba.
Inkosi yayisibiza uJehoyada, inhloko, yathi kuye: “Kungani ungajubanga abaLevi ukuba balethe kwaJuda naseJerusalema intela eyamiswa nguMose, inceku kaSimakade, ebandleni lika-Israyeli, ibe ngeyethende lobufakazi na?”
Amadodana ka-Athaliya alowo wesifazane okhohlakele, ayefohle angena endlini kaNkulunkulu, futhi asebenzisa zonke izinto ezingcwele zendlu kaSimakade, ezisebenzisela uBhali.
Inkosi yabayala ukuba benze umphongolo, bawubeke ngaphandle ngasesangweni lendlu kaSimakade.
Kwase kumenyezelwa kwaJuda naseJerusalema ukuba balethe kuSimakade intela uMose, inceku kaNkulunkulu, ayeyale u-Israyeli ukuba ayikhokhe esesehlane.
Zonke izikhulu nabo bonke abantu bathokoza, bayiletha, bayiphonsa emphongolweni, baze baqeda.
Ngesikhathi umphongolo ulethwa ngabaLevi ezinduneni zenkosi, zazithi uma zibona ukuthi isiningi imali, umbhali wenkosi nenduna yomphristi omkhulu, bayithulule imali emphongolweni, wona bawubuyisele endaweni yawo. Benza kanjalo imihla ngemihla, baqoqa imali eningi.
Inkosi noJehoyada banika labo ababenza umsebenzi wokulungisa indlu kaSimakade, imali, baqasha abakhi nababazi ukuba bavuselele indlu kaSimakade, nabasebenza ngensimbi nethusi ukuba baqinise indlu kaSimakade.
Izisebenzi zasebenza, kwathi umsebenzi wokulungiswa kwayo waqhubeka ezandleni zazo. Zayilungisa indlu kaNkulunkulu yaba sesimeni sayo, zayiqinisa.
Zathi ukuba ziyiqede, zabuyisela enkosini nakuJehoyada yonke imali eyayisele. Kwenziwa ngayo izitsha zendlu kaSimakade, izitsha zokukhonzela nezokunikelela, izinkezo, nezinye izitsha zegolide nezesiliva. Base benikela ngeminikelo yokushiswa endlini kaSimakade, ngazo zonke izinsuku esaphila uJehoyada.
UJehoyada wakhula waze wamdala, wafa esenelisiwe yizinsuku aziphilile; wayeneminyaka eyi-130 ngesikhathi efa.
Bamngcwaba emzini kaDavide namakhosi, ngokuba wayenze okuhle kwa-Israyeli, nakuNkulunkulu, nasendlini yakhe.
Emveni kokufa kukaJehoyada, kwafika abaholi bakwaJuda, bakhuleka enkosini; inkosi yase iyabalalela.
Bayishiya indlu kaSimakade uNkulunkulu wokhokho babo, bakhonza o-Ashera nezithombe; intukuthelo kaSimakade yehlela uJuda neJerusalema ngenxa yalokho.
USimakade wathumela abaphrofethi phakathi kwabo ukuba bababuyisele kuye, babaxwayisa, kodwa abazange balalele.
UMoya kaNkulunkulu wasibekela uZakhariya, indodana kaJehoyada, umphristi, wema ngaphezu kwabantu, wathi kubo: “Usho kanje uNkulunkulu uthi: ‘Niyeqelani imiyalo kaSimakade, ukuze ningabi nampumelelo na? Ngokuba nimshiyile uSimakade, naye unishiyile.’ ”
Bamenzela ugobe, bamkhanda ngamatshe, beyalelwa yinkosi, egcekeni lendlu kaSimakade.
Inkosi uJowashi ayikhumbulanga ukwethembeka ayenakho kuye uJehoyada uyise ngesikhathi ibulala indodana yakhe. Lapho isifa yathi: “USimakade makakubone lokhu, aphindisele.”
Kwathi ngasekupheleni konyaka impi yase-Aramu yakhuphukela kuye, yafika kwaJuda naseJerusalema, yabhubhisa bonke abaholi babantu, yathumela yonke impango eyayiyiphange kubantu enkosini yaseDamaseku.
Nakuba impi yase-Aramu yayize neviyo elincane, uSimakade wanikela esandleni sayo impi enkulu kakhulu, ngokuba uJuda neJerusalema babemshiyile uSimakade uNkulunkulu wokhokho babo. UJowashi bamehlulela.
Ngesikhathi sebesuka kuye, bamshiya ngoba wayegula kakhulu, izinceku zakhe zamakhela uzungu, ngenxa yegazi lamadodana kaJehoyada umphristi, zambulalela embhedeni wakhe. Wafa, zamngcwaba emzini kaDavide, kodwa azimngcwabanga emadlinzeni amakhosi.
Nampa labo abamakhela uzungu: uZabhadi, indodana kaShimeyathi umAmonikazi; noJehozabhadi, indodana kaShimrithi wakwaMowabi.
Indaba ngamadodana akhe, nangobukhulu bemithwalo phezu kwakhe, nangokuvuswa kwendlu kaNkulunkulu, bheka, kulotshiwe emlandweni wencwadi yamakhosi. U-Amaziya, indodana yakhe, waba yinkosi esikhundleni sakhe.
U-Amaziya wayeneminyaka engama-25 ngesikhathi eba yinkosi, wabusa iminyaka engama-29 eJerusalema. Igama likanina kwakunguJehohadani waseJerusalema.
Wenza okulungileyo phambi kukaSimakade, nokho engakwenzi ngenhliziyo epheleleyo.
Kwathi lapho umbuso wakhe ususimeme, wazibulala izinceku zakhe ezazibulale inkosi, uyise.
Kepha akababulalanga abantwana bazo, kodwa wenza njengokulotshiweyo emthethweni, encwadini kaMose njengokuyala kukaSimakade, ethi: “Oyise abayukubulawa ngenxa yabantwana, nabantwana abayukubulawa ngenxa yoyise, kodwa yilowo nalowo uyakufa ngesakhe isono.”
U-Amaziya waqoqa uJuda, wammisa ngokwezindlu zawoyise phansi kwabakhuzi bempi bezinkulungwane nabakhuzi bempi bamakhulu. UJuda wonke noBhenjamini wababala, kusukela kwabaneminyaka engama-20 kuya phezulu, wathola ukuthi bayizi-300 000 abakhethekileyo asebengaphuma impi, nabangaphatha umkhonto nesihlangu.
Waqasha kwa-Israyeli amaqhawe anamandla ayizi-100 000, ngamathalenta ayikhulu esiliva.
Kwafika umuntu kaNkulunkulu, wathi kuye: “Nkosi, ungahambi nempi yakwa-Israyeli, ngokuba uSimakade akanaye u-Israyeli nabo bonke abantwana bakwa-Efrayimi.
Kepha uma uphuma nabo ngokuba uthi wenzela ukuba iqine impi yakho, uNkulunkulu uyakukuqumba phansi phambi kwezitha zakho, ngokuba uNkulunkulu unamandla okuqumba phansi nokusiza.”
U-Amaziya wayesethi kulowo muntu kaNkulunkulu: “Pho manje sizokwenzenjani ngamathalenta ayikhulu engikhokhele ngawo impi yakwa-Israyeli na?” Umuntu kaNkulunkulu wathi: “USimakade unamandla okukunika okuningi kunalokho.”
U-Amaziya wawahlakaza amabutho ayefike kuye evela kwa-Efrayimi ukuba abuyele ezindaweni zawo, kepha lokho kwenza amthukuthelele kakhulu uJuda, abuyela ezindaweni zawo ethukuthele kakhulu.
U-Amaziya waqunga isibindi, wahola abantu bakhe waya eSigodini Sikasawoti, wabulala abantu baseSeyiri abayizi-10 000.
Abantu bakwaJuda bathumba abaseSeyiri abayizi-10 000 babayisa esiqongweni sewa bephila, babaphonsa phansi eweni, baphihlizeka bonke.
Kepha amabutho u-Amaziya ayewaphindisele emuva, angaphumanga nawo ukuya empini, ahlasela imizi yakwaJuda kusukela eSamariya kuze kube seBhethi Horoni; abulala kuyo izi-3 000, athatha impango eningi.
Kwathi u-Amaziya esebuyile ekubulaleni abakwa-Edomi, waletha onkulunkulu babantu baseSeyiri, wabamisa baba ngonkulunkulu bakhe, wakhothama phambi kwabo, wabashisela impepho.
Intukuthelo kaSimakade yamvuthela u-Amaziya, wathumela kuye umphrofethi, wathi kuye: “Ubafuneleni onkulunkulu babantu abangasindisanga abantu babo esandleni sakho na?”
Kwathi esakhuluma naye, wathi kuye: “Ngabe sikubeke umeluleki wenkosi na? Yeka, ufunelani ukubulawa na?” Umphrofethi wayeka, wayesethi: “Ngiyazi ukuthi uNkulunkulu unqume ukukubhubhisa ngokuba wenze lokho, awusilalelanga iseluleko sami.”
U-Amaziya, inkosi yakwaJuda, eselulekiwe wathumela kuJowashi indodana kaJehowahazi kaJehu, inkosi yakwa-Israyeli, wathi: “Woza sibonane ubuso nobuso.”
UJowashi, inkosi yakwa-Israyeli, wathumela ku-Amaziya inkosi yakwaJuda, wathi: “Bheka, isihlahla somkhanya saseLebhanoni, sathumela emsedarini owawuseLebhanoni, sathi: ‘Ganisa indodakazi yakho ibe ngumfazi wendodana yami.’ “Kodwa kwedlula isilwane sasendle esasiseLebhanoni, sasinyathela isihlahla somkhanya.
Umtshele uthi: ‘Bheka, ubhubhisile u-Edomi, manje inhliziyo yakho iqhoshile, ufuna ukubonakalisa udumo lwakho. Manje kungcono uhlale endlini yakho; kungani uhlokoloza inyoka isemgodini, ufuna ukuwa wena noJuda kanyekanye na?’ ”
Kepha u-Amaziya akalalelanga, ngokuba lokho kwakuhloswe nguNkulunkulu ukuba abanikele esandleni sezitha zabo, ngokuba babefune onkulunkulu bakwa-Edomi.
UJowashi, inkosi yakwa-Israyeli, wayesekhuphuka, babhekana ubuso nobuso no-Amaziya, inkosi yakwaJuda, eBhethi Shemethi kwaJuda.
UJuda wehlulwa ngu-Israyeli; uJuda wabaleka, kwaba yilowo nalowo waya ethendeni lakhe.
UJowashi, inkosi yakwa-Israyeli, wambamba u-Amaziya, inkosi yakwaJuda, indodana kaJowashi kaJehowahazi eBhethi Shemeshi, wamyisa eJerusalema. Wabhidliza ugange eJerusalema kusukela esangweni i-Efrayimi kuze kube sesangweni iGumbi, amakhubhithi angama-400.
Wathatha lonke igolide, isiliva, zonke izitsha ezazisendlini kaSimakade no-Obhedi Edomi, ingcebo yasesigodlweni senkosi nabantu ababa yisibambiso, wayesebuyela eSamariya.
U-Amaziya, indodana kaJowashi, inkosi yakwaJuda, waphila iminyaka eli-15 emva kokufa kukaJowashi, indodana kaJehowahazi, inkosi yakwa-Israyeli.
Ezinye izindaba zika-Amaziya, ezakuqala nezakamuva, bheka, azilotshiwe yini encwadini yamakhosi akwaJuda nawakwa-Israyeli na?
Kusukela esikhathini u-Amaziya aphambuka ngaso ekulandeleni uSimakade bamenzela ugobe eJerusalema; wabalekela eLakhishi, kepha bathumela eLakhishi, bambulalela khona.
Bamthwala ngamahhashi, bamngcwaba kokhokho bakhe emzini wakwaJuda.
Bonke abantu bakwaJuda bathatha u-Uziya owayeneminyaka eli-16, bambeka inkosi esikhundleni sikayise u-Amaziya.
Esekhotheme uyise, u-Uziya wakha i-Elathi walibuyisela kwaJuda.
U-Uziya wayeneminyaka eli-16 ngesikhathi eba yinkosi, wabusa iminyaka engama-52 eJerusalema. Igama likanina kwakunguJekhiliya waseJeruselama.
Wenza okuhle phambi kukaSimakade, njengakho konke u-Amaziya uyise ayekwenzile.
Wayelokhu efune uNkulunkulu ngesikhathi sikaZakhariya owamfundisa ukwesaba uNkulunkulu. Ngemihla ayemfuna ngayo uSimakade, uNkulunkulu wambusisa kakhulu.
Waphuma wayokulwa namaFilisti, wadiliza ugange eGathi, ugange eJabhine, nogange e-Ashidodi, wakha imizi e-Ashidodi naphakathi kwamaFilisti.
UNkulunkulu wamsiza kumaFilisti, nakwabase-Arabhiya ababehlala eGuri Bhari nakumaMehuni.
Abakwa-Amoni bathela intela ku-Uziya. Igama lakhe laduma laze layofika eGibhithe, ngokuba wakhombisa ukudlondlobala ngamandla.
U-Uziya wakha imibhoshongo eJerusalema ngasesangweni leGumbi, nangasesangweni leSigodi nangaseNqutshini.
Wakha imibhoshongo ehlane, wemba imithombo yamanzi eminingi, ngokuba wayenemfuyo eningi ehlanzeni nasethafeni; wayenabalimi nabaphathi bezivini ezintabeni naseKharmeli, ngoba wayengothanda umhlabathi.
U-Uziya wayenamabutho ayephuma ukuyokulwa izimpi ngamaviyo njengokudidiyelwa kwawo nguJehiyeli, umbhali, uMahaseya, umbusi, benganyelwe nguHananiya, enye yezinduna zenkosi.
Inani lazo zonke izinhloko zoyise, amaqhawe anamandla, kwakuyizi-2 600.
Zaziphethe amabutho anamandla ayizi-307 500, ayelwa ngokuzinikela okukhulu ukuba asize inkosi ezitheni.
U-Uziya wawalungisela wonke amabutho akhe izihlangu, imikhonto, izigqoko, amabhantshi, iminsalo namatshe ezindwayimane.
EJerusalema wakha imishini yempi eyasungulwa ngokuhlakanipha, wayibeka phezu kwemibhoshongo nasezingosini ezithile, ukuze kuphonswe ngayo imicibisholo namatshe amakhulu. Igama lakhe laduma kude naseduze ngokuba wasizwa ngokumangalisayo waze waba namandla amakhulu.
Kepha lapho esenamandla, inhliziyo yakhe yaqala ukuzikhukhumeza, waze waziphatha kabi, akethembeka kuSimakade uNkulunkulu, wangena ethempelini likaSimakade washisa impepho e-althare lempepho.
U-Azariya, umphristi, nabaphristi bakaSimakade abangama-50 ababenaye, amadoda anamandla, bangena nabo bamlandela.
Bamelana nenkosi u-Uziya, bathi kuyo: “Awufanele ngokwakho, Uziya, ukushisela uSimakade impepho; lokho kungokwabaphristi, abangamadodana ka-Aroni, abangcweliselwe ukushisa impepho. Phuma endaweni engcwele, ngokuba wenze okubi; awuyukufumana ludumo oluvela kuSimakade uNkulunkulu.”
U-Uziya wathukuthela. Ngesikhathi ethukuthelela abaphristi, wayephethe isitsha sempepho esandleni sakhe ukuze ashise impepho, ngakho-ke kwavela uchoko ebunzini lakhe, phambi kwabaphristi, endlini kaSimakade, eceleni kwe-althare lempepho.
U-Azariya, umphristi omkhulu, nabo bonke abanye abaphristi bambuka; bheka, wayenochoko ebunzini lakhe. Bamkhipha lapho ngokushesha; naye uqobo washesha waphuma, ngokuba wabona ukuthi uSimakade umshayile.
U-Uziya, inkosi, waba nochoko waze waficwa lusuku lokufa kwakhe. Wayehlala endlini eyehlukanisiwe kwezinye, ngokuba enochoko. Wanqatshelwa ukuba angene endlini kaSimakade, ngokuba wayenochoko. UJothamu, indodana yakhe, wengamela indlu yenkosi, futhi wehlulela abantu bezwe.
Ezinye izindaba zika-Uziya, ezakuqala nezakamuva, zilotshiwe ngu-Izaya umphrofethi, indodana ka-Amose.
U-Uziya wayeselaliswa nokhokho bakhe; bammbela kokhokho bakhe eduze kwensimu yamadlinza amakhosi, ngokuba bathi: “Ungonochoko.” UJothamu, indodana yakhe, waba yinkosi esikhundleni sakhe.
UJothamu wayeneminyaka engama-25 ngesikhathi eba yinkosi. Wabusa iminyaka eli-16 eJerusalema. Igama likanina kwakunguJerusha, indodakazi kaZadoki.
Wenza okulungileyo phambi kukaSimakade njengalokho konke ayekwenzile uyise, u-Uziya, kodwa akazange angene ethempelini likaSimakade. Abantu baqhubeka ukwenza okungalungile.
Wakha isango elingenhla lendlu kaSimakade; wakha okuningi ogangeni e-Ofeli.
Wakha imizi kwelezintaba kwaJuda; wakha emahlathini izinqaba nemibhoshongo.
Walwa nenkosi yabantu bakwa-Amoni, wabehlula. Ngawo lowo nyaka abakwa-Amoni bamnika amathalenta esiliva ayikhulu, amakhora kakolo ayizi-10 000, nawebhali ayizi-10 000. Nangonyaka wesibili nangowesithathu abakwa-Amoni babuye bakuyisa kuye lokhu.
UJothamu waba namandla, ngokuba walungisa izindlela zakhe phambi kukaSimakade uNkulunkulu wakhe.
Ezinye izindaba zikaJothamu, nazo zonke izimpi zakhe, nezindlela zakhe, bheka, kulotshiwe encwadini yamakhosi akwa-Israyeli nawakwaJuda.
Wayeneminyaka engama-25 lapho eqala ukubusa, wabusa iminyaka eli-16 eJerusalema.
UJothamu walaliswa kokhokho bakhe, bammbela emzini kaDavide. U-Ahazi waba yinkosi esikhundleni sakhe.
U-Ahazi wayeneminyaka engama-20 ngesikhathi eba yinkosi, wabusa iminyaka eli-16 eJerusalema. Akazange enze okuhle phambi kukaSimakade, njengoDavide ukhokho wakhe,
kodwa wahamba ngezindlela zamakhosi akwa-Israyeli, wenzela oBhali izithombe ezibunjiweyo.
Washisa impepho esigodini sendodana kaHinomu, washisa amadodana akhe emlilweni njengezinengiso zabezizwe uSimakade abaxosha phambi kwabakwa-Israyeli.
Wahlaba, washisa impepho ezindaweni eziphakemeyo, emagqumeni naphansi kwazo zonke izihlahla eziluhlaza.
USimakade uNkulunkulu wakhe wayesemnikela esandleni senkosi yase-Aramu, bamshaya, bathumba kuye isixuku esikhulu sabathunjwa, babayisa eDamaseku. Naye wanikelwa esandleni senkosi yakwa-Israyeli eyamshaya ngokushaya okukhulu.
UPheka, indodana kaRemaliya, wabulala izinkulungwane eziyizi-120 000 kwaJuda ngasuku lunye, bonke babengamadoda anamandla, ngokuba bamshiya uSimakade uNkulunkulu wokhokho babo.
UZikhiri, iqhawe lakwa-Efrayimi, wabulala uMahaseya, indodana yenkosi, u-Azrikamu, umengameli wendlu, no-Elikhana owayelama inkosi.
Abakwa-Israyeli bathumba abafowabo abayizi-200 000, abesifazane, amadodana namadodakazi, babaphanga impango eningi, babayisa eSamariya.
Kwakukhona umphrofethi kaSimakade ogama lakhe kwakungu-Odedi. Waphuma wahlangabeza impi eyase ibuyela eSamariya, wathi kuyo: “Bhekani, uSimakade uNkulunkulu wokhokho benu ubemthukuthelele uJuda, ngakho-ke wamnikela esandleni senu; nina nibabulele ngentukuthelo eze yafinyelela ezulwini.
Manje nihlose ukucindezela abakwaJuda, nabaseJerusalema nibenze izigqila nezigqilakazi zenu. Kepha aniyukuba necala yini kuSimakade uNkulunkulu wenu ngalokho na?
Ngakho-ke ngilaleleni, nibuyisele emuva abafowenu enibathumbileyo, ngokuba ulaka oluvuthayo lukaSimakade luphezu kwenu.”
Kwase kusukuma izinhloko zabakwa-Efrayimi, u-Azariya indodana kaJohanani, uBherekhiya indodana kaMeshilemothi, uJekhizikiya indodana kaShalumi, no-Amasa indodana kaHadilayi, bamelana nalabo ababebuya empini,
bathi kubo: “Ningabangenisi abathunjwa lapho, ngokuba nisikhongela icala kuSimakade. Ngabe nifuna ukwenezelela esonweni nasecaleni lethu na? Ngokuba lukhulu ulaka oluvuthayo phezu kuka-Israyeli.”
Abahlomileyo babashiya abathunjwa nempango phambi kwezikhulu nebandla lonke.
Amadoda aqokiweyo abizwa ngamagama, asukuma, abathatha abathunjwa nabo bonke ababehlutshulwe behamba ze, abembathisa ngezimpahla ezaziyimpango, abafaka izicathulo, abapha ukudla, abaphuzisa, abagcoba, abakhweza ezimbongolweni bonke ababebuthakathaka, abayisa kubafowabo eJerikho, umuzi wamasundu; ayesebuyela eSamariya.
Ngaleso sikhathi inkosi u-Ahazi wathumela emakhosini ase-Asiriya ukuba azomsiza,
ngokuba phezu kwakho konke kwafika nabakwa-Edomi bashaya uJuda, bathumba abaningi.
NamaFilisti ayefikile ahlasela imizi yasehlanzeni neNegevu kwelakwaJuda, adla iBhethi Shemeshi, i-Ajaloni, iGederothi, iSoko nemizana yalo; ahlala khona.
USimakade wayemthobisile uJuda ngenxa ka-Ahazi, inkosi yakwa-Israyeli, ngoba engamnakanga uJuda futhi akethembeka kuSimakade.
Kwafika uThiligathi Phileseri, inkosi yase-Asiriya, yamhlupha, ayizange imqinise.
U-Ahazi waphanga indlu kaSimakade, isigodlo senkosi, nezindlu zezikhulu, wanika inkosi yase-Asiriya leyo mpango, kodwa lokho akumsizanga ngalutho.
Ngesikhathi sokuhlushwa kwakhe, inkosi u-Ahazi yaqhubeka yenza okubi kuSimakade.
Yahlabela onkulunkulu baseDamaseku ababeyishayile, yathi: “Ngokuba onkulunkulu bamakhosi ase-Aramu bayawasiza, ngakho-ke ngiyakuhlabela bona, bayakungisiza nami.” Kepha bamlethela ukuba aqunjwe phansi, kanjalo no-Israyeli wonke.
U-Ahazi waqoqa zonke izinto zendlu kaNkulunkulu wazinqamula, wavala iminyango yendlu kaSimakade, wazenzela ama-althare kuwo wonke amagumbi eJerusalema.
Kuyo yonke imizi yakwaJuda, wenza kulowo nalowo muzi izindawo eziphakemeyo zokushisela abanye onkulunkulu impepho, ngalokho wamcunula uSimakade uNkulunkulu wokhokho bakhe.
Ezinye izindaba zakhe nazo zonke izindlela zakhe, ezakuqala nezakamuva; bheka, zilotshiwe encwadini yamakhosi akwaJuda nawakwa-Israyeli.
U-Ahazi walaliswa kokhokho bakhe, bammbela emzini iJerusalema, ngokuba abamyisanga emadlinzeni amakhosi akwa-Israyeli. UHezekiya, indodana yakhe, waba yinkosi esikhundleni sakhe.
UHezekiya waba yinkosi eneminyaka engama-25, wabusa iminyaka engama-29 eJerusalema. Igama likanina kwakungu-Abhiya, indodakazi kaZakhariya.
Wenza okulungileyo phambi kukaSimakade njengakho konke okwakwenziwe nguDavide, ukhokho wakhe.
Ngonyaka wokuqala wokubusa kwakhe, ngenyanga yokuqala, wavula iminyango yendlu kaSimakade, wayilungisa.
Wangenisa abaphristi nabaLevi, wabaqoqela esigcawini ngasempumalanga,
wathi kubo: “Ngilaleleni, nina baLevi. Manje, zingcweliseni, ningcwelise nendlu kaSimakade uNkulunkulu wokhokho benu, nisuse ukungcola endaweni engcwele.
Obaba baphambukile, benza okubi phambi kukaSimakade uNkulunkulu wethu, bamshiya, bayifulathela indlu kaSimakade, bamhlubuka.
Bavala nezivalo zompheme, bacima izibani, abayishisanga impepho, abanikelanga ngeminikelo yokushiswa endaweni engcwele kuNkulunkulu ka-Israyeli.
Ngakho-ke intukuthelo kaSimakade yehlele phezu kukaJuda neJerusalema, wabenza into esabekayo, eyesabisayo nenximfelwayo, njengalokhu nibona ngamehlo enu.
Bhekani, obaba bawile ngenkemba, amadodana ethu namadodakazi ethu nawomkethu basekuthunjweni ngenxa yalokho.
Manje kusenhliziyweni yami ukuba ngenze isivumelwano noSimakade uNkulunkulu ka-Israyeli ukuze ulaka lwakhe lusuke kithi.
Madodana ami, ningabi ngabanganaki, ngokuba nina uSimakade unikhethile ukuba nime phambi kwakhe, nimkhonze, nibe yizikhonzi zakhe, nishise impepho.”
AbaLevi base besukuma: uMahathi, indodana ka-Amasayi, noJoweli, indodana ka-Azariya, wozalo lwamaKhohathi. Kwabozalo lukaMerari: kwakunguKhishi, indodana ka-Abhidi no-Azariya, indodana kaJahaleli. Kwabozalo lukaGereshoni: kwakunguJowa, indodana kaZima no-Edene, indodana kaJowa.
Kwabozalo luka-Elizafani: kwakunguShimri noJehiyeli; kwabozalo luka-Asafa: kwakunguZakhariya noMathaniya.
Kwabozalo lukaHemani: kwakunguJehiyeli noShimeyi; kwabozalo lukaJeduthuni: kwakunguShemaya no-Uziyeli.
Baqoqa abafowabo, bazingcwelisa, bangena endlini kaSimakade njengesiyalezo senkosi ngamazwi kaSimakade, ukuba bayihlambulule indlu kaSimakade.
Abaphristi bangena ngaphakathi endlini kaSimakade ukuba bayihlambulule, kwathi konke ukungcola abakuthola ethempelini likaSimakade bakukhiphela egcekeni lendlu kaSimakade. AbaLevi bakuthatha bakukhiphela ngaphandle, bakuyisa emfudlaneni iKidroni.
Baqala ukungcwelisa indlu kaSimakade ngosuku lokuqala, ngenyanga yokuqala, kwathi ngosuku lwesishiyagalombili kuleyo nyanga, bafinyelela emphemeni kaSimakade. Bayingcwelisa indlu kaSimakade izinsuku eziyisishiyagalombili; kwathi ngosuku lwe-16 lwenyanga yokuqala, bawuphothula wonke umsebenzi.
Basuka bangena phakathi ukuyokhuluma nenkosi uHezekiya, bathi: “Siyihlambulule yonke indlu kaSimakade, i-althare leminikelo yokushiswa, zonke izinto zayo, netafula lezinkwa zokubukwa.
Zonke izinto inkosi u-Ahazi eyazilahla ekuphambukeni kwayo isabusa, sizilungisile, sazingcwelisa; bheka, seziphambi kwe-althare likaSimakade.”
UHezekiya, inkosi, wavuka ekuseni waqoqa izinduna zomuzi, bakhuphukela endlini kaSimakade.
Baletha izinkunzi eziyisikhombisa, izinqama eziyisikhombisa, amawundlu ayisikhombisa, nezimpongo eziyisikhombisa, kwaba ngumnikelo wokona kombuso, kwendlu engcwele nangoJuda. Wayaleza ukuba abaphristi abangamadodana ka-Aroni banikele ngakho e-althare likaSimakade.
Bazihlaba izinkunzi, abaphristi bamukela igazi, balifafaza e-althare. Bahlaba izinqama, bafafaza ngegazi lazo e-althare, bahlaba namawundlu, igazi lawo balifafaza e-althare.
Base besondeza izimpongo zomnikelo wesono phambi kwenkosi nebandla, babeka izandla zabo phezu kwazo;
abaphristi bazihlaba, benza ngegazi lazo umnikelo wesono e-althare, ukuze benzele wonke u-Israyeli ukubuyisana. Inkosi yayiyalezile ukuba umnikelo wokushiswa nomnikelo wesono ube ngoka-Israyeli wonke.
Wamisa abaLevi endlini kaSimakade bephethe amasimbali, izingubhu namahabhu njengalokhu uDavide noGadi, umboni wenkosi, noNathani umphrofethi, babeyalezile, ngokuba isiyalezo sasivela kuSimakade ngomlomo wabaphrofethi bakhe.
AbaLevi bema bephethe izinsimbi zokucula zikaDavide, nabaphristi ababephethe amacilongo.
UHezekiya wayala ukuba kunikelwe ngomnikelo wokushiswa e-althare. Ngesikhathi kuqalwa ukunikela ngomnikelo wokushiswa, kwaqala nesihlabelelo sikaSimakade, amacilongo nezinye izinsimbi zokubethwa zikaDavide, inkosi yakwa-Israyeli.
Lonke ibandla lakhuleka, abahlabeleli bahlabelela, abamacilongo bawabetha; konke kwaqhubeka waze waphela umnikelo wokushiswa.
Kwathi sebeqedile ukunikela, inkosi nabo bonke ababenayo bakhothama, bakhuleka.
UHezekiya, inkosi, nezikhulu bayala abaLevi ukuba badumise uSimakade ngamazwi kaDavide nangaka-Asafa, umboni. Badumisa ngokuthokoza, bakhothamisa amakhanda abo, bakhuleka.
UHezekiya wayesethatha ethi: “Senizehlukanisele uSimakade. Sondelani, nilethe imihlatshelo neminikelo yokubonga endlini kaSimakade.” Ibandla laletha imihlatshelo neminikelo yokubonga; bonke abaqhutshwa yinhliziyo evumayo baletha iminikelo yokushiswa.
Inani leminikelo yokushiswa elalethwa yibandla laliyizinkunzi ezingama-70, izinqama eziyi-100, namawundlu angama-200. Konke lokho kwaba ngokomnikelo wokushiswa kuSimakade.
Okungcwelisiwe kwaba yizinkabi ezingama-600, nezimvu eziyizi-3 000.
Ngenxa yokuthi abaphristi babeyingcosana, babengenakuwumela bodwa umsebenzi wokuhlinza yonke iminikelo yokushiswa, basizwa ngabafowabo, abaLevi, waze waphela umsebenzi, baze abaphristi bazingcwelisa ngokuba abaLevi babelungile ukuba bazingcwelise kunabaphristi.
Ngaphezu kwenani eliphezulu leminikelo yokushiswa, kwakukhona namanoni eminikelo yokuthula neminikelo yokuphuzwayo yeminikelo yokushiswa. Yavuselelwa kanjalo-ke inkonzo yendlu kaSimakade.
UHezekiya nabantu bonke bathokoza ngenxa yalokho uNkulunkulu ayebalungiselele khona abantu, ngokuba lokho kwenzeka kungalindelwanga muntu.
UHezekiya wathumela ku-Israyeli wonke noJuda, walobela u-Efrayimi noManase izincwadi ukuba beze endlini kaSimakade eJerusalema, ukuba bazogcina iphasika likaSimakade uNkulunkulu ka-Israyeli.
Inkosi yayelulekene nezikhulu zayo nebandla lonke laseJerusalema ukuba bagcine iphasika ngenyanga yesibili,
ngokuba babengakwazanga ukulenza ngaleso sikhathi, ngokuba abaphristi babengazingcwelisanga ngokwaneleyo futhi nabantu babengaqoqene eJerusalema.
Lokho kwakulungile phambi kwenkosi nasebandleni lonke.
Bakhipha izwi lokuba kuthunyelwe umyalezo ku-Israyeli wonke, kusukela eBheri Sheba kuze kube kwaDani, ukuba beze, bazogcina iphasika likaSimakade uNkulunkulu ka-Israyeli eJerusalema, ngokuba babengaligcinanga ngobuningi babo ebandleni, njengokuba kulotshiwe.
Izigijimi zaphuma nezincwadi eziphuma esandleni senkosi nasezikhulwini zayo, zaya kuye wonke u-Israyeli noJuda njengokwesiyalezo senkosi esithi: “Nina bakwa-Israyeli, buyelani kuSimakade uNkulunkulu ka-Abhrahama, noka-Isaka noka-Israyeli ukuze naye abuyele ensalini yenu ephunyuke esandleni samakhosi ase-Asiriya.
Ningafani nokhokho benu nabafowenu abenza okungalungile kuSimakade uNkulunkulu wokhokho babo, waze wabenza into eyesabisayo, njengalokhu nibona.
Manje ningabi ngontamolukhuni njengawoyihlomkhulu, kodwa mnikeni uSimakade isandla senu, ningene endaweni yakhe engcwele, ayingcwelisa kuze kube phakade, nimkhonze uSimakade uNkulunkulu wenu ukuze ulaka lwakhe oluvuthayo lusuke kini.
Uma nibuyela kuSimakade, abafowenu nabantwana benu bayofumana umusa kwababathumbayo babuyele kuleli lizwe, ngoba uSimakade uNkulunkulu wenu ulungile, unomusa; akayukunifulathela, uma nibuyela kuye.”
Izigijimi zangena kuyo yonke imizi kwa-Efrayimi, kwaManase, nakwaZebuloni, kodwa babezihleka usulu, beziklolodela.
Kepha abantu bakwa-Asheri, abakwaManase, nabakwaZebuloni bazithoba, beza eJerusalema.
Isandla sikaNkulunkulu sasikuJuda ukubenza babe nhliziyonye ukuze bagcine isiyalezo senkosi nesezikhulu ngezwi likaSimakade.
Abantu abaningi babuthana eJerusalema ukuba bagcine umkhosi wesinkwa esingenamvubelo ngenyanga yesibili; kwakuyibandla elikhulu kakhulu.
Bawasusa wonke amanye ama-althare ayeseJerusalema, nawo wonke ama-althare empepho bawasusa, bawaphonsa emfudlaneni iKidroni.
Kwathi ngosuku lwe-14, ngenyanga yesibili, base belihlaba iphasika. Abaphristi nabaLevi babenamahloni, bazingcwelisa, base beletha iminikelo yokushiswa endlini kaSimakade.
Bema ezindaweni zabo ngokohlelo lwabo, ngokomthetho kaMose, umuntu kaNkulunkulu. Abaphristi bafafaza ngegazi elaliphethwe ngabaLevi ngezandla.
Ngenxa yokuba babebaningi ebandleni ababengazingcwelisanga, ngakho-ke abaLevi bengamela ukuhlatshwa kwamaphasika abo bonke ababengahlambulukile, ukuze bawangcwelisele uSimakade.
Ingxenye enkulu yabantu eyayivela kwa-Efrayimi, kwaManase, kwa-Isakhare nakwaZebuloni, yayingazihlambululanga, balidla iphasika ngokungalotshiwe, ngokuba uHezekiya wayebakhulekele, wathi: “USimakade omuhle makathethelele,
bonke abazinhliziyo zabo bezibhekise ekufuneni uNkulunkulu uSimakade, uNkulunkulu wokhokho babo, nakuba kungenziwanga ngokuhambisana nemithetho yokuhlanjululwa kwendlu engcwele.”
USimakade wamuzwa uHezekiya, wabaphilisa abantu.
Abakwa-Israyeli ababekhona eJerusalema bawugubha umkhosi wesinkwa esingenamvubelo izinsuku eziyisikhombisa ngokukhulu ukuthokoza; abaLevi nabaphristi babemdumisa uSimakade imihla ngemihla ngezinto ezikhaliswayo, ezizwakalayo kuSimakade.
UHezekiya wakhuluma kahle kubo bonke abaLevi ababebonakalisa ukuthi bayayiqonda inkonzo kaSimakade. Badla-ke iminikelo yomkhosi izinsuku eziyisikhombisa, benikela ngemihlatshelo yeminikelo yokuthula, bembonga uSimakade uNkulunkulu wokhokho babo.
Lonke ibandla lase livumelana ukugubha ezinye izinsuku eziyisikhombisa; bazigubha-ke ezinye izinsuku eziyisikhombisa ngokuthokoza.
UHezekiya, inkosi yakwaJuda, wayekhiphele ibandla izinkunzi eziyinkulungwane nezimvu eziyizi-7 000 ukuba kube yiminikelo, izikhulu zakhipha izinkunzi eziyinkulungwane nezimvu eziyizi-10 000; abaphristi bazingcwelisa ngobuningi bazo.
Lonke ibandla lakwaJuda, abaphristi nabaLevi, nalo lonke ibandla elalivela kwa-Israyeli, nabafokazi ababephuma kwa-Israyeli behlala kwaJuda, bathokoza.
Kwakukhona ukuthokoza okukhulu eJerusalema, ngokuba kusukela ngesikhathi sikaSolomoni, indodana kaDavide, inkosi yakwa-Israyeli, akukaze kube khona ukujabula okunjalo eJerusalema.
Kwase kusukuma abaphristi nabaLevi babusisa abantu; izwi labo lezwakala, nomkhuleko wabo wafika endaweni kaSimakade engcwele, ezulwini.
Kwathi ukuba kuphele konke lokhu, u-Israyeli wonke owayelapho waphuma waya emizini yakwaJuda, waphihliza izinsika, wagawula o-Ashera, wadiliza izindawo eziphakemeyo nama-althare wonke kwaJuda, kwaBhenjamini, kwa-Efrayimi nakwaManase, waze wakuqeda konke. Base bonke abantu bakwa-Israyeli bephindela emuva, kwaba yilowo nalowo efeni lakhe, emizini yakubo.
UHezekiya wabeka abaphristi nabaLevi ngezigaba zabo, kwaba yilowo nalowo ngokomsebenzi wakhe, njengabaphristi nabaLevi beminikelo yokushiswa neyokuthula, ukuba bakhonze, babonge, badumise emasangweni enkambu kaSimakade.
Isabelo senkosi emfuyweni yayo kwakuba ngesokwenza iminikelo yokushiswa, eyasekuseni neyakusihlwa, iminikelo yokushiswa yamasabatha, eyokwethwasa kwenyanga neyemikhosi emisiweyo, njengokulotshiweyo emthethweni kaSimakade.
Watshela abantu abayizakhamuzi zaseJerusalema ukuba banikele ingxenye yabaphristi neyabaLevi, ukuze babambelele baqine emthethweni kaSimakade.
Lathi ukuba leli lizwi lisabalale, abantu bakwa-Israyeli banikela kakhulu ngolibo lokusanhlamvu, olwewayini, olwamafutha, oloju, nolwazo zonke izithelo zamasimu nokweshumi kwakho konke, bakuletha okweshumi kwakho konke lokhu.
Abantu bakwa-Israyeli nabakwaJuda ababehlala emizini yakwaJuda, baletha nabo okweshumi kwezinkabi nezimvu, nokweshumi kwezinto ezingcwele ezazingcweliselwe uSimakade uNkulunkulu wabo, bakubeka kwaba yizinqwaba ngezinqwaba.
Ngenyanga yesithathu, baqala ukubeka izinqwaba, kwathi ngenyanga yesikhombisa, baqeda.
Lapho uHezekiya nezikhulu beza, babona izinqwaba, bambonga uSimakade nabantu bakhe u-Israyeli.
UHezekiya wabuza kubaphristi nakubaLevi ngezinqwaba.
Kwaphendula u-Azariya, umphristi omkhulu, wendlu kaZadoki, wathi: “Kusukela ngesikhathi okuqalwe ngaso ukuletha iminikelo endlini kaSimakade, sidle sasutha, futhi sinokuningi kunesikudingayo, ngokuba uSimakade ubabusisile abantu bakhe; yingakho sinalokhu okuningi kangaka okuseleyo.”
UHezekiya wayaleza ukuba kulungiswe amakamelo endlini kaSimakade, base beyawalungisa.
Baletha iminikelo yokweshumi nezinto ezingcwele ngokwethembeka, owayebengamele kwakunguKhonaniya, umLevi, uShimeyi, umfowabo, engomesekeleyo.
UJehiyeli, u-Azaziya, uNahathi, u-Asaheli, uJerimothi, uJozabhadi, u-Eleyeli, uJisimakhiya, uMahathi noBhenaya babengamele ngasohlangothini lukaKhonaniya, uShimeyi, umfowabo, wayekhethwe nguHezekiya, inkosi, no-Azariya owayengumphathi wendlu kaNkulunkulu.
UKhore, indodana kaJimina umLevi, umlindi wesango elalisempumalanga, wayengamele iminikelo kaNkulunkulu yesihle, ukuze ayabe iminikelo kaSimakade neyezinto ezingcwelengcwele.
Phansi kwakhe kwakukhona u-Edene, uMiniyamini, uJeshuwa, uShemaya, u-Amariya, noShekhaniya emizini yabaphristi abayaba iminikelo ngokwethembeka kubafowabo, ngokwezigaba zabo, abadala nabancane.
Ngaphandle kokulotshiwe kwabesilisa ngokwezizukulwane zabo, bababela kusukela kowesilisa oneminyaka emithathu kuya phezulu, nabo bonke ababengena endlini kaSimakade, ngokwemisebenzi yabo, ngokwehlukana kwayo, nangokwezigaba zabo.
Ukubalwa kwabaphristi kwakuya ngokwezindlu zoyise; abaLevi babebhalwa kusukela kwabaneminyaka engama-20 kuya phezulu, ngokwemisebenzi yabo nezigaba zabo.
Abaphristi babalwa ngokwezizukulwane zabo nezingane zabo, omkabo, amadodana namadodakazi abo nesixuku sonke, ngokuba bazingcwelisa ngokwethembeka.
Ozalweni luka-Aroni, abaphristi, ababesemasimini angamadlelo emizi yabo, kwaqokwa amadoda emizini yonke, abizwa ngamagama ayezokwaba izabelo kubo bonke abesilisa phakathi kwabaphristi ababebhalwe ngokozalo lwabo, phakathi kwabaLevi.
UHezekiya wenza kanjalo kulo lonke elakwaJuda; wenza okuhle, nokulungile, nokuqotho phambi kukaSimakade uNkulunkulu wakhe.
Kuyo yonke imisebenzi ayiqalayo uHezekiya eyenzela indlu kaNkulunkulu, umthetho nemiyalo, ukuze afune uNkulunkulu wakhe ngenhliziyo yakhe yonke, waphumelela.
Emveni kwalezo zinto nesibonelo sokuthembeka kwafika uSenaheribhi, inkosi yase-Asiriya, wangena kwaJuda, wakanisa maqondana nemizi ebiyelweyo, wathi uzongena kuyo ngendlovuyangena.
Kwathi lapho uHezekiya ebona ukuthi uSenaheribhi uthelekile, nokuthi uqonde ukulwa neJerusalema,
welulekana nezikhulu zakhe namaqhawe akhe ukuba bavimbe amanzi emithonjeni eyayingaphandle komuzi; nempela bamsiza.
Kwabuthana abantu abaningi, bayivimba yonke imithombo nomfudlana owawugobhoza phakathi nezwe, bathi: “Kungenzeka kanjani ukuba kufike amakhosi ase-Asiriya bese ethola amanzi amaningi na?”
UHezekiya waziqinisa, wakha lonke ugange lomuzi olwaludiliziwe, wamisa imibhoshongo phezu kwalo; wakha nolunye ugange ngaphandle. Waqinisa iMilo emzini kaDavide, wenza izikhali nezihlangu okuningi.
Wabeka izinduna zempi phezu kwabantu, wabiza imbizo esigcawini ngasesangweni lomuzi, wakhuluma kahle kubo, wathi:
“Qinani, nime isibindi, ningesabi, ningadangali ngenxa yenkosi yase-Asiriya nangenxa yesixuku ehamba naso, ngokuba mkhulu onathi kunalowo onaye.
Ngamandla omuntu nje anaye, kodwa uSimakade uNkulunkulu wethu unathi ukuba asisize, alwe izimpi zethu.” Abantu bencika emazwini kaHezekiya, inkosi yakwaJuda.
Emveni kwalokho lapho uSenaheribhi, inkosi yase-Asiriya, esevimbezele iLakhishi ngamabutho akhe wonke, wathumela izinceku zakhe eJerusalema kuHezekiya, inkosi yakwaJuda, nakuwo wonke uJuda owayeseJerusalema, nomyalezo othi:
“Usho kanje uSenaheribhi, inkosi yase-Asiriya, uthi: nethembelephi, njengokuba nihlala nivinjezelwe eJerusalema na?
UHezekiya akaniyengi yini ukuba aninikele, nife yindlala nokoma, ethi: ‘USimakade uNkulunkulu wethu uyakusisindisa esandleni senkosi yase-Asiriya na?’
“Yena lowo Hezekiya akasusanga yini izindawo eziphakemeyo nama-althare akhe, wayala uJuda neJerusalema, wathi: ‘Niyakukhuleka phambi kwe-althare linye, nishise impepho kulo na?’
“Anazi yini ukuthi mina nobaba senzani kubo bonke abantu bamazwe na? Onkulunkulu babo baba nawo yini amandla okusindisa izizwe namazwe azo esandleni sami?
Ngubani phakathi kwabo bonke onkulunkulu balezi zizwe ezabhujiswa ngobaba owayenamandla okusindisa abantu bakhe esandleni sami, okwenza nicabange ukuthi uNkulunkulu wenu nina uzonisindisa esandleni sami na?
Ngakho-ke ningamvumeli uHezekiya anikhohlise, aniyenge ngale ndlela; ningakholwa nguye, ngokuba akuzange kube khona nkulunkulu kunoma yisiphi isizwe nombuso owaba namandla okusindisa abantu bakhe esandleni sami, nasesandleni sobaba. Nina-ke nicabanga ukuthi owenu uNkulunkulu anganisindisa esandleni sami na?”
Izinceku zakhe zakhuluma okunye okuphambene noSimakade uNkulunkulu, nenceku yakhe, uHezekiya.
Wayelobe izincwadi zokweyisa uSimakade uNkulunkulu ka-Israyeli, nangoHezekiya, ethi: “Njengalokhu onkulunkulu bezizwe namazwe bengabasindisanga abantu babo esandleni sami, kanjalo noNkulunkulu kaHezekiya akayukubasindisa abantu bakhe esandleni sami.”
Bamemeza ngezwi elikhulu ngolimi lwabaJuda, kubantu baseJerusalema ababesogangeni ukuba babethuse, babesabise, ukuze bawuthathe umuzi.
Bakhuluma ngoNkulunkulu waseJerusalema njengonkulunkulu babantu bomhlaba abangumsebenzi wezandla zabantu.
UHezekiya inkosi, no-Izaya umphrofethi, indodana ka-Amose, bakhuleka ngenxa yalokhu, bakhala bebhekise ezulwini.
USimakade wathumela ingelosi eyabhubhisa wonke amaqhawe anamandla, nabaholi, nezinduna enkanjini yenkosi yase-Asiriya. Yabuyela ezweni layo ijabhile. Isingenile endlini kankulunkulu wayo, abozalo lwayo bayibulala ngenkemba khona lapho.
USimakade wamsindisa kanjalo uHezekiya nezakhamuzi zaseJerusalema esandleni sikaSenaheribhi, inkosi yase-Asiriya, nasesandleni sabo bonke abanye, wabahola nxazonke.
Abaningi baletha iminikelo kuSimakade eJerusalema namagugu kuHezekiya inkosi yakwaJuda, waba nodumo kubo bonke abezizwe ngaleso sikhathi.
Ngalezo zinsuku uHezekiya wagula wabangwa nezibi. Wayesekhuleka kuSimakade; uSimakade wakhuluma kuye, wamnika isibonakaliso.
UHezekiya akenzanga okuhle njengoba ayenzelwe okuhle, waphakama enhliziyweni yakhe, ngakho-ke ulaka lukaSimakade lwaba phezu kwakhe nakuJuda neJerusalema.
UHezekiya wayithobisa inhliziyo yakhe eyayisikhukhumele, yena nezakhamuzi zaseJerusalema, ngakho-ke ulaka lukaSimakade alwehlelanga kubo emihleni kaHezekiya.
UHezekiya wayecebile futhi enodumo olukhulu, wazakhela izindlu zesiliva, ezegolide, ezamatshe ayigugu, ezamakha, ezezihlangu nezazo zonke izinto ezinxanelekayo.
Wakha nezinqolobane zokusanhlamvu, ezewayini elisha, ezamafutha, izibaya zezinhlobo zonke zezilwane, nezindawo zezimvu.
Wazakhela imizi, waba nemfuyo, izimvu nezinkomo eziningi, ngokuba uNkulunkulu wayemnike impahla eningi kakhulu.
UHezekiya wavimba umthombo ongenhla wamanzi eGihoni, wawaqondisa entshonalanga yomuzi kaDavide. UHezekiya waphumelela kuyo yonke imisebenzi yakhe ayeyenza.
Kanjalo maqondana nezithunywa zezikhulu zaseBhabhele ezathumela kuye ukuyobuza ngesibonakaliso esenzeka ezweni, uNkulunkulu wamshiya emvivinya, ukuze azi konke okusenhliziyweni yakhe.
Ezinye izindaba zikaHezekiya nezenzo zakhe ezinhle; bheka, zilotshiwe embonweni ka-Izaya umphrofethi, indodana ka-Amose, encwadini yamakhosi akwaJuda nawakwa-Israyeli.
UHezekiya wayesekhothama, bamngcwaba emmangweni wamadlinza ozalo lukaDavide, wonke uJuda nezakhamuzi zaseJerusalema bamhlonipha emngcwabeni wakhe. UManase, indodana yakhe, waba yinkosi esikhundleni sakhe.
UManase wayeneminyaka eli-12 ngesikhathi eba yinkosi, wabusa iminyaka engama-55 eJerusalema.
Wenza okubi phambi kukaSimakade njengokwezinengiso zabezizwe, uSimakade ayebaxoshile phambi kwabantu bakwa-Israyeli.
Wabuye wakha izindawo eziphakemeyo uyise uHezekiya ayezidilizile, wamisela uBhali ama-althare, wenza o-Ashera, wakhuleka kulo lonke ibandla lasezulwini, walikhonza.
Wakha ama-althare endlini kaSimakade, uSimakade ayekhulumile ngayo, wathi: “Igama lami liyakuba khona eJerusalema kuze kube phakade.”
Emagcekeni omabili endlu kaSimakade, wakhela lonke ibandla lasezulwini ama-althare.
Wawadabulisa amadodana akhe emlilweni esigodini sendodana kaHinomu, wahlola imihlola, wenza imilingo, wenza amalumbo wabuye wavumela abanamadlozi nabathakathi, wenza nokunye okubi okuningi phambi kukaSimakade, waze wachukuluza ulaka lukaSimakade.
Wabeka umfanekiso wesithombe esibaziweyo ayewenzile endlini kaNkulunkulu, uNkulunkulu ayethe ngayo kuDavide nakuSolomoni, indodana yakhe: “Kule ndlu naseJerusalema engilikhethe phakathi kwezizwe zonke zakwa-Israyeli, ngiyakubeka iGama lami kuze kube phakade.
Futhi angiyukulususa unyawo luka-Israyeli, angiyukulususa ezweni engalimisela okhokho benu, uma nje beyakukugcina benze konke engibayale ngakho, wonke umthetho, izimiso, izehlulelo engabanika khona ngomlomo kaMose.”
UManase wamdukisa uJuda nezakhamuzi zaseJerusalema, benza okubi kunabezizwe uSimakade ababhubhisa phambi kwabantu bakwa-Israyeli.
USimakade wakhuluma kuManase nakubantu bakhe, kodwa kabalalelanga.
USimakade wabehlisela abakhuzi bempi yenkosi yase-Asiriya. Zambamba uManase, zambopha ngamaketango nangozankosi, zamyisa eBhabhele.
Esekuhluphekeni, wanxusa uSimakade uNkulunkulu wakhe, wazithoba kakhulu phambi kukaNkulunkulu wokhokho bakhe.
Wakhuleka kuye, wamncenga; wakuzwa ukunxusa kwakhe, wambuyisela futhi eJerusalema embusweni wakhe. UManase wayesazi ukuthi uSimakade nguye onguNkulunkulu.
Emveni kwalokho wakha ugange olwalungaphandle komuzi kaDavide entshonalanga yeGihoni, esigodini kwaze kwaba sekungeneni esangweni Lezinhlanzi. I-Ofeli walibiyela waliphakamisa kakhulu, wabeka izinduna zempi ezinamandla kuyo yonke imizi yakwaJuda ebiyelweyo.
Wasusa onkulunkulu babezizwe nesithombe endlini kaSimakade. Wabhidliza wonke ama-althare ayewakhe entabeni yendlu kaSimakade naseJerusalema, wakulahla konke ngaphandle komuzi.
Wakha i-althare likaSimakade, phezu kwalo wanikela ngemihlatshelo yeminikelo yokuthula neyokubonga, wayesetshela uJuda ukuba amkhonze uSimakade uNkulunkulu ka-Israyeli.
Nokho abantu babesahlaba, benza imihlatshelo ezindaweni eziphakemeyo, kodwa base beyenzela uSimakade uNkulunkulu wabo kuphela.
Ezinye izindaba zikaManase, nomkhuleko wakhe kuNkulunkulu wakhe, namazwi ababoni ababewakhuluma kuye egameni likaSimakade uNkulunkulu ka-Israyeli; bheka, kulotshiwe ezindabeni zamakhosi akwa-Israyeli.
Umkhuleko wakhe nokunxusa kwakhe uNkulunkulu, zonke izono zakhe, konke ukungethembeki kwakhe nezindawo eziphakemeyo azakha, wamisa o-Ashera nezithombe ezibaziweyo, ngesikhathi engakazithobi; bheka, konke lokho kulotshwe ezindabeni zikaHozayi.
UManase wayeselaliswa kokhokho bakhe, bammbela endlini yakhe. U-Amoni, indodana yakhe, waba yinkosi esikhundeni sakhe.
U-Amoni wayeneminyaka engama-22 ngesikhathi eba yinkosi, wabusa iminyaka emibili eJerusalema.
Wenza okubi phambi kukaSimakade, njengalokhu uyise uManase ayenzile. U-Amoni wahlabela zonke izithombe ezibaziweyo ayezenzile uManase, uyise, wazikhonza.
Akazithobanga phambi kukaSimakade njengoba kwazithoba uManase, uyise, kodwa yena u-Amoni wenza okubi okuningi.
Izinceku zakhe zamakhela uzungu, zambulala endlini yakhe.
Abantu bezwe nokho bababulala bonke labo ababenzele inkosi ugobe, base beyingcwaba inkosi abantu bezwe. Abantu bezwe bamenza uJosiya, indodana yakhe, inkosi esikhundleni sakhe.
UJosiya wayeneminyaka eyisishiyagalombili ngesikhathi eba yinkosi, wabusa iminyaka engama-31 eJerusalema.
Wenza okulungileyo phambi kukaSimakade, wahamba ngezindlela zikaDavide ukhokho wakhe, kachezukelanga ngakwesokunene noma ngakwesokhohlo.
Ngonyaka wesishiyagalombili wokubusa kwakhe esengumfana, waqala ukufuna uNkulunkulu kaDavide, ukhokho wakhe. Kwathi ngonyaka we-12, waqala ukuhlambulula uJuda neJerusalema, wasusa izindawo eziphakemeyo, o-Ashera, izithombe ezibaziweyo, nezithombe ezibunjiweyo.
Badiliza ama-althare oBhali phambi kwakhe, ama-althare empepho ayephezu kwawo, wagawula o-Ashera, izithombe ezibaziweyo nezithombe ezibunjiweyo wakucolisisa, wakuvuvuzela phezu kwamathuna ababekade benikela kukho.
Washisa amathambo abaphristi ema-althare abo, wamhlambulula uJuda neJerusalema.
Waguduza ecinga emizini yakwaManase, kwa-Efrayimi, kwaSimeyoni kuze kuyofika kwaNafethali, nasezindlini zabo nxazonke.
Wawadiliza ama-althare, wagenca o-Ashera nezithombe ezibaziweyo, wakuqotha kwaze kwawuthuli. Wonke ama-althare empepho ezweni lonke kwa-Israyeli wawanquma, wayesebuyela eJerusalema.
Ngonyaka we-18 wokubusa kwakhe esehlambulule izwe nendlu, wathuma uShafani, indodana ka-Asaliya, uMahaseya isikhulu somuzi, noJowa indodana kaJowakhazi, umabhalane, ukuba balungise indlu kaSimakade uNkulunkulu wakhe.
Baya kuHilikiya, umphristi omkhulu, bayisa imali eyayikade ilethwe endlini kaNkulunkulu, eyayiqoqwe ngabaLevi, abalindimasango, esizwaneni sakwaManase, nesakwa-Efrayimi nakuyo yonke insali ka-Israyeli nakuJuda wonke, nabakwaBhenjamini nakuzo zonke izakhamuzi zaseJerusalema.
Bayinika labo ababeqokelwe ukubheka umsebenzi endlini kaSimakade. Bona bayinika abasebenza umsebenzi wokulungisa indlu kaSimakade.
Banika ababazi nabakhi ukuba bathenge amatshe abaziweyo nezingodo zokuhlanganisa benze imishayo yezindlu ezazibhujiswe ngamakhosi akwaJuda.
Amadoda awenza ngokwethembeka umsebenzi wawo, ababewengamele kwakunguJahathi, no-Obhadiya abaLevi kwabozalo lukaMerari, bekanye noZakhariya noMeshulamu kwabozalo lwamaKhohathi, nabo bonke abaLevi ababengamaciko okucula ngezinsimbi zokucula.
AbaLevi babengamele bonke ababethwala imithwalo, benza umsebenzi wezinkonzo ngezinkonzo. Abanye babaLevi babengababhali, beyizinduna nabalindimasango.
Besakhipha imali eyayilethwe endlini kaSimakade, uHilikiya, umphristi, wafumana incwadi yomthetho kaSimakade eyayilotshwe nguMose.
UHilikiya wathatha wathi kuShafani, umbhali: “Ngifumene incwadi yomthetho endlini kaSimakade.” UHilikiya wayinika uShafani incwadi.
UShafani wayiyisa incwadi enkosini, wayethulela nombiko othi: “Konke okwanikelwa ezandleni zezinceku zakho ziyakukwenza.
Ziyithululile imali eyafunyanwa endlini kaSimakade, zayidlulisela ezandleni zabengameli nasezandleni zezisebenzi.”
UShafani, umbhali, wayibikela inkosi, wathi: “UHilikiya, umphristi, unginike incwadi.” UShafani wayeseyifundela inkosi.
Kwathi lapho inkosi isiwezwile amazwi omthetho, yaklebhula izingubo zayo.
Inkosi yayala uHilikiya, u-Ahikamu indodana kaShafani, u-Abhidoni indodana kaMikha, uShafani umbhali, no-Asaya inceku yenkosi, yathi:
“Hambani ningibuzele kuSimakade, mina nensali ka-Israyeli noJuda ngamazwi akule ncwadi efunyenweyo, ngokuba inkulu intukuthelo kaSimakade ethululelwe phezu kwethu; okhokho bethu abazange baligcine izwi likaSimakade, benza njengalokho okulotshiwe kule ncwadi.”
UHilikiya nalabo ababethunywe yinkosi baya kuHulda umphrofethikazi, umkaShalumi, indodana kaThokathi kaHazira, umgcinizingubo. Wayehlala eJerusalema engxenyeni yesibili; bakhuluma naye kanjalo.
Wathi kubo: “Usho kanje uSimakade uNkulunkulu ka-Israyeli uthi: yishoni kulowo muntu onithume kimi, nithi:
‘Usho kanje uSimakade, uthi: bhekani, ngizokwehlisela okubi phezu kwale ndawo naphezu kwezakhamuzi, zonke iziqalekiso ezilotshwe encwadini efundwe phambi kwenkosi yakwaJuda,
ngokuba bangihlubukile, bayoshisela abanye onkulunkulu impepho, bachukuluza ulaka lwami ngayo yonke imisebenzi yezandla zabo. Intukuthelo yami ezakuthululelwa kule ndawo ayiyukucinywa.’
“Kepha enkosini yakwaJuda enithumele ukuba nizobuza kuSimakade niyakusho kuyo kanje, nithi: ‘Usho kanje uSimakade uNkulunkulu ka-Israyeli, mayelana namazwi owezwile,
ngenxa yokuba inhliziyo yakho ibe nokuzisola, wazithoba phambi kukaNkulunkulu lapho uzwa amazwi akhe ngale ndawo, nangezakhamuzi zayo, yebo, wazithoba phambi kwami, waklebhula izingubo zakho, wakhala phambi kwami, mina ngikuzwile, kusho uSimakade.
Bheka, ngiyakukubuthela kokhokho bakho, uyakubuthelwa ethuneni lakho ngokuthula, amehlo akho awayukububona bonke ububi engiyakubehlisela phezu kwale ndawo naphezu kwabakhe kuyo.’ ” Baphindisela leli lizwi enkosini.
Inkosi yathumela, yaqoqa wonke amalunga akwaJuda naseJerusalema.
Inkosi yakhuphukela endlini kaSimakade nabo bonke abantu bakwaJuda, nezakhamuzi zaseJerusalema, abaphristi, abaLevi, nabantu bonke, abadala nabancane, wafunda belalele ngezindlebe zabo wonke amazwi encwadi yesivumelwano eyayitholakale endlini kaSimakade.
Inkosi yema endaweni yayo, yenza isivumelwano phambi kukaSimakade, sokuthi izomlandela uSimakade, igcine imiyalo yakhe, ubufakazi bakhe, nezimiso zakhe ngenhliziyo yayo yonke, nangomphefumulo wayo wonke, futhi iyakuwagcina amazwi esivumelwano ayelotshwe kule ncwadi.
Yenza bonke abafunyanwa eJerusalema nakwaBhenjamini ukuba bame. Izakhamuzi zaseJerusalema zenza njengokwesivumelwano sikaNkulunkulu, uNkulunkulu wokhokho babo.
UJosiya wasusa zonke izinengiso ezazisemazweni wonke akwa-Israyeli, ezazingezabantu bakwa-Israyeli, wenza ukuba bonke abafunyanwa kwa-Israyeli, bamkhonze uSimakade uNkulunkulu wabo. Ngazo zonke izinsuku zakhe, abantu abachezukanga ekumlandeleni uSimakade uNkulunkulu wokhokho babo.
UJosiya waligcina iphasika likaSimakade eJerusalema. Balihlaba iphasika ngosuku lwe-14, ngenyanga yokuqala.
Wabeka abaphristi ezikhundleni zabo, wabagqugquzela emsebenzini wendlu kaSimakade.
Wathi kubaLevi ababefundisa wonke u-Israyeli, futhi ababengcwele kuSimakade: “Bekani umphongolo ongcwele endlini eyakhiwa nguSolomoni, indodana kaDavide, inkosi yakwa-Israyeli. Akuseyukuba bikho mthwalo phezu kwamahlombe enu, manje mkhonzeni uSimakade uNkulunkulu wenu nabantu bakhe, u-Israyeli.
Zilungiseni ngokwezindlu zokhokho nangokwezigaba zenu, njengokubhala kukaDavide, inkosi yakwa-Israyeli, nanjengokubhala kukaSolomoni, indodana yakhe,
nime endaweni engcwele ngokwezigaba zezindlu zokhokho babafowenu, abantu besizwe, kube khona abaLevi kuleso naleso sigaba sendlu yokhokho.
Lihlabeni iphasika, nizingcwelise, nilungise abafowenu ukuba benze njengokwezwi likaSimakade njengoba kulobe uMose.”
UJosiya wanika abantu besizwe bonke ababekhona, imihlambi yamawundlu namazinyane ezimbuzi, konke kwaba yiminikelo yephasika, sekukonke kwakuyizi-30 000, nezinkunzi eziyizi-3 000 okwakuthathwe empahleni yenkosi.
Izikhulu zakhe zanika abantu, abaphristi nabaLevi iminikelo yesihle. UHilikiya, uZakhariya, noJiheyeli abaphathi bendlu kaNkulunkulu banika abaphristi amawundlu ayizi-2 600, nezinkabi ezingama-300, ukuba benze iminikelo yephasika.
UKhonaniya, uShemaya, uNethaneli nabafowabo, uHashabhiya, uJehiyeli, noJozabhadi abaholi babaLevi, banika abaLevi amawundlu ayizi-5 000 nezinkabi ezingama-500, kwaba ngokweminikelo yephasika.
Yalungiswa-ke inkonzo: abaphristi bema ezindaweni zabo, nabaLevi bema ngezigaba zabo njengesiyalezo senkosi.
Balihlaba iphasika abaphristi ngezandla zabo, bafafaza igazi, abaLevi balihlinza.
Babeka eceleni iminikelo yokushiswa ukuze yabelwe abantu besizwe ngokwamaqembu nangokwezindlu zokhokho ukuze bakunikele kuSimakade, njengalokhu kulotshwe encwadini kaMose. Benza kanjalo nasezinkabini.
Balosa iphasika emlilweni njengokomthetho, neminikelo engcwele bayibilisa emabhodweni, ezisefeni nasemapanini, bashesha bayinika bonke abantu besizwe.
Kamuva bazilungisela bona nabaphristi, ngokuba abaphristi abangamadodana ka-Aroni babelokhu benikela iminikelo namanoni kwaze kwaba sebusuku, yingakho-ke abaLevi bazilungisela bona nabaphristi abangamadodana ka-Aroni.
Abahlabeleli, amadodana ka-Asafa, babesendaweni yabo njengokomyalo kaDavide, u-Asafa, uHemani noJeduthuni, umboni wenkosi; abalindimasango babengasesangweni; sasingekho isidingo sokuba basuke emsebenzini wabo, ngokuba abafowabo, abaLevi, babebalungisele.
Ngakho-ke yonke inkonzo kaSimakade yalungiswa ngalolo lusuku ukuba kugcinwe iphasika, kunikelwe ngeminikelo yokushiswa e-althare likaSimakade njengalokhu kwakuyaleze inkosi uJosiya.
Abakwa-Israyeli ababekhona lapha baligcina iphasika ngaleso sikhathi nomkhosi wesinkwa esingenamvubelo, izinsuku eziyisikhombisa.
Kwakungakaze kwenziwe iphasika elinjengalelo, kusukela emihleni kaSamuweli, umphrofethi, kwa-Israyeli. Wonke amakhosi akwa-Israyeli ayengakaze aligcine iphasika elinjengalelo elenziwa nguJosiya, nabaphristi, abaLevi, uJuda wonke, no-Israyeli wonke bendawonye, nazo zonke izakhamuzi zaseJerusalema.
Leli phasika lagcinwa ngonyaka we-18 wokubusa kukaJosiya.
Sekwedlule konke lokhu, uJosiya eselilungisile ithempeli, kwakhuphuka uNekho, inkosi yaseGibhithe, ukuba ayokulwa neKharikhemishi ngaseYufrathe; uJosiya waphuma ukuyomhlangabeza.
Kepha wathumela izithunywa kuJosiya, wathi: “Nginandabani nawe nkosi yakwaJuda na? Angize khona ukuba ngizokulwa nawe, kepha ngixabene nendlu engilwa nayo. UNkulunkulu ungitshele ukuba ngisheshe, mgweme uNkulunkulu onami ukuze angakubhubhisi.”
Kepha uJosiya akaphendukanga, kunalokho wazifihla ukuze alwe naye, akawalalelanga amazwi kaNekho ayevela emlonyeni kaNkulunkulu, wahamba wayokulwa esigodini saseMegido.
Abacibayo bayinemba inkosi, inkosi yathi ezincekwini zayo: “Ngikhipheni ngokuba ngilimele kakhulu.”
Izinceku zayo zayikhipha enqoleni, zayigibelisa enqoleni yayo yesibili, zayiyisa eJerusalema. Yakhothama, yangcwatshwa emadlinzeni okhokho bayo. UJuda wonke neJerusalema bamlilela uJosiya.
UJeremiya wamlilela uJosiya. Bonke abahlabeleli besilisa nabesifazane bayakhuluma ngoJosiya ekulileni kwabo kuze kube namuhla. Bakwenza kwaba yisimiso kwa-Israyeli; bheka, kulotshiwe ezililweni.
Ezinye izindaba zikaJosiya, izenzo zakhe ezilungileyo njengokulotshiweyo emthethweni kaSimakade,
izindaba zakhe, ezakuqala nezokugcina; bheka, zilotshiwe encwadini yamakhosi akwa-Israyeli nakwaJuda.
Abantu bezwe bathatha uJehowahazi indodana kaJosiya, bambeka inkosi eJerusalema esikhundleni sikayise.
UJehowahazi wayeneminyaka engama-23 ngesikhathi eba yinkosi, wabusa izinyanga ezintathu eJerusalema.
Inkosi yaseGibhithe yamsusa eJeruselema, izwe yalikhokhisa intela engamathalenta esiliva ayikhulu nethalenta legolide.
Inkosi yaseGibhithe yabeka u-Eliyakimi, umfowabo, waba yinkosi kwaJuda naseJerusalema, yaliguqula igama lakhe laba nguJehoyakimi. UNekho wamthatha uJehowahazi, umfowabo, wamyisa eGibhithe.
UJehoyakimi wayeneminyaka engama-25 ngesikhathi eba yinkosi, wabusa iminyaka eli-11 eJerusalema. Wenza okubi emehlweni kaSimakade uNkulunkulu wakhe.
Kwase kukhuphuka uNebukhadinezari, inkosi yaseBhabhele, wambopha ngamaketango, wamyisa eBhabhele.
UNebukhadinezari wayisa ezinye izitsha zendlu kaSimakade eBhabhele, wazibeka esigodlweni sakhe eBhabhele.
Ezinye izindaba zikaJehoyakimi, nezinengiso azenzayo, nokunye okwafumaniseka kuye; bheka, kulotshwe encwadini yamakhosi akwa-Israyeli nakwaJuda; uJehoyakini, indodana yakhe, waba yinkosi esikhundleni sakhe.
UJehoyakini wayeneminyaka eyisishiyagalombili ngesikhathi eba yinkosi, wabusa izinyanga ezintathu nezinsuku ezilishumi eJerusalema. Wenza okubi phambi kukaSimakade.
Kwathi ekuqaleni konyaka inkosi uNebukhadinezari yathumela ukuba kulethwe inkosi eBhabhele, nezitsha ezinhle zendlu kaSimakade. Yabe isibeka uZedekiya, umfowabo, ukuba abe yinkosi kwaJuda naseJerusalema.
UZedekiya wayeneminyaka engama-21 ngesikhathi eba yinkosi, wabusa iminyaka eli-11 eJerusalema.
Wenza okubi phambi kukaSimakade uNkulunkulu wakhe. Akazithobanga phambi kukaJeremiya, umphrofethi owayengumlomo kaSimakade.
Wayihlubuka futhi nenkosi uNebukhadinezari eyayimfungisile ngoSimakade, wayenza lukhuni intamo yakhe, nenhliziyo yakhe wayenza lukhuni, akaze aphendukela kuSimakade uNkulunkulu ka-Israyeli.
Zonke izikhulu zabaphristi nabantu baphambuka kakhulu, benza okungalungile, balandela zonke izinengiso zabezizwe, bayingcolisa indlu kaSimakade ayeyingcwelise eJerusalema.
USimakade uNkulunkulu wokhokho babo wathumela izithunywa zakhe ephindelela, ngokuba wayenozwelo ngabantu bakhe nangendawo ahlala kuyo.
Kepha bazidelela izithunywa zikaNkulunkulu ngokuwabukela phansi amazwi akhe, nangokubhuqa abaphrofethi bakhe, yaze yaba nkulu intukuthelo kaSimakade ngabantu bakhe, kwesweleka ikhambi lokuyelapha.
Ngakho-ke wabehlisela inkosi yamaKhaledi, yabulala izinsizwa zakhona ngenkemba endlini yabo engcwele. Ayibanga naluzwelo ensizweni, entombini, kwabadala, nasemidodovini; wabanikela bonke esandleni sayo.
Zonke izitsha zendlu kaNkulunkulu, ezinkulu nezincane, ingcebo yendlu kaSimakade nengcebo yenkosi neyezikhulu zayo, konke yakuyisa eBhabhele.
Bayishisa indlu kaNkulunkulu, baludiliza ugange eJerusalema, bazishisa zonke izigodlo ngomlilo, babhubhisa zonke izitsha zakhona ezinxanelekayo.
Abasele enkembeni yabathumba yabayisa eBhabhele, baba yizinceku zayo nezamadodana ayo, kwaze kwabusa umbuso wamaPheresiya,
ukuba ligcwaliseke izwi likaSimakade ngomlomo kaJeremiya, ukuze izwe laneliseke ngamasabatha alo. Ngazo zonke izikhathi, liyakuba yincithakalo liphumule kuze kuphele iminyaka engama-70.
Ngonyaka wokuqala wokubusa kukaKhoresi, inkosi yasePheresiya, ukuze kufezeke izwi likaSimakade alikhuluma ngomlomo kaJeremiya, uSimakade wavusa umoya kaKhoresi, inkosi yasePheresiya, ukuba imemezele embusweni wayo wonke, futhi kulotshwe ukuthi:
“Usho kanje uKhoresi, inkosi yasePheresiya, uthi: ‘USimakade uNkulunkulu wezulu unginike yonke imibuso yomhlaba, ungiqokile ukuba ngimakhele indlu eJerusalema elikwaJuda. Noma ngubani ophakathi kwenu wabantu bakhe, uSimakade uNkulunkulu makabe naye, akhuphuke.’ ”
Ngonyaka wokuqala kaKhoresi, inkosi yasePheresiya, ukuze kugcwaliseke izwi likaSimakade alikhuluma ngoJeremiya, uSimakade wavusa umoya kaKhoresi, inkosi yasePheresiya, yase ishaya umthetho kuwo wonke umbuso wayo, yakhipha isimemezelo esibhaliweyo, esasithi:
“Nakhu okushiwo nguKhoresi, inkosi yasePheresiya, uthi: “ ‘USimakade uNkulunkulu wasezulwini unginike yonke imibuso yomhlaba, wangiqoka ukuba ngimakhele indlu eJerusalema, kwaJuda.
Noma ngubani phakathi kwabo bonke abangabantu bakhe, sengathi uNkulunkulu wakhe angaba naye, makakhuphukele eJerusalema, kwaJuda, ayokwakha kabusha indlu kaSimakade uNkulunkulu ka-Israyeli, unguNkulunkulu oseJerusulema.
Yonke insali esezindaweni zonke lapho igogobele khona, noma ngabe ihleli kuphi, kufanele ilekelelwe ngabendawo yakubo, bayinike isiliva, igolide, izimpahla, imfuyo neminikelo yesihle yendlu kaNkulunkulu eJerusalema.’ ”
Kwase kuthi izinhloko zemindeni yakwaJuda nezakwaBhenjamini, abaphristi nabaLevi, nabo bonke izinhliziyo zabo uNkulunkulu azithinta, balungiselela ukuhamba beyokwakha indlu kaNkulunkulu eJerusalema.
Omakhelwane babo babasiza ngezinto zesiliva nezegolide nangezinye izinto, nemfuyo nezinto eziyigugu, ngale nje komnikelo wesihle ababewunikelela ithempeli.
Inkosi uKhoresi yazikhipha yona mathupha izitsha zasendlini kaSimakade ezazithathwe nguNebukhadinezari eJerusalema, wazibeka ethempelini lonkulunkulu bakhe.
Inkosi uKhoresi yasePheresiya lezo zinto wazinika uMithiredathi, umphathisikhwama, ukuba azibale, azinike uSheshibhazari, umbusi wakwaJuda.
Nantu uhla lwazo: imicengezi yegolide yeminikelo engama-30, imicengezi yesiliva yeminikelo eyinkulungwane nemimese engama-29,
imicengezi emincane yegolide engama-30, imicengezi emincane yesiliva engama-410 nezinye izitsha eziyinkulungwane.
Sezizonke izitsha uSheshibhazari nabanye abathunjwa ababephuma eBhabhele beya eJerusalema abazithatha, zaziyi-5 400 zegolide, nesiliva, nezinye izinto.
Nampa abantu bezwe abakhuphuka ekuthunjweni ababethunjwe nguNebukhadinezari, inkosi yaseBhabhele, ababuyela eJerusalema nakwaJuda, yilowo nalowo waya emzini wakubo,
bafika noZerubhabhele, uJeshuwa, uNehemiya, uSeraya, uRehelaya, uMoridekhayi, uBhilishani, uMisiphari, uBhigivayi, uRehumi noBhahana. Inani lamadoda akwa-Israyeli lalimi kanje:
abozalo lukaPharoshi babeyizi-2 172,
abolukaShefathiya babeyizi-2 372,
aboluka-Ara babengama-775,
abolukaPhahathi Mowabi, bamadodana kaJeshuwa noJowabe, babeyizi-2 812,
aboluka-Elamu beyi-1 254,
abolukaZathu, bengama-945,
abolukaZakhayi bengama-760,
abolukaBhani bengama-642,
abolukaBhebayi bengama-623,
aboluka-Azigadi beyi-1 222,
aboluka-Adonikhamu bengama-666,
abolukaBhigivayi beyizi-2 056,
aboluka-Adini bengama-454,
aboluka-Atheri kaHezekiya bengama-98,
abolukaBhezayi bengama-323,
abolukaJora beyi-112,
abolukaHashumi bengama-223,
abolukaGibhari bengama-95,
abozalo lwaseBhethlehema babeyi-123,
amadoda aseNethofa ayengama-56,
amadoda ase-Anathothi ayeyi-128,
abozalo lukalwase-Azimavethi babengama-42,
abaseKiriyathi Arimi, eKhefira, eBheyerothi bengama-743,
abaseRama naseGebha bengama-621,
amadoda aseMikhimashi ayeyi-122,
amadoda aseBhethele nase-Ayi engama-223,
abozalo lwaseNebho babengama-52,
abaseMagibhishi beyi-156,
abozalo luka-Elamu omunye babeyi-1 254,
abolukaHarimi bengama-320,
abozalo lwaseLodi, eHadidi, nase-Ono babengama-725,
abozalo lwaseJerikho bengama-345,
abozalo lwaseSenawa babeyizi-3 630.
Abaphristi: abozalo lukaJedaya, bendlu kaJeshuwa, babengama-973;
abozalo luka-Imeri babeyi-1 052;
abozalo lukaPhashuri babeyi-1 247;
abozalo lukaHarimi babeyi-1 017.
Abozalo lwabaLevi: olukaJeshuwa noKhadimiyeli, amadodana kaHodaviya, babengama-74.
Abahlabeleli bozalo luka-Asafa babeyi-128;
abozalo lwabalindisango bozalo lukaShalumi, luka-Atheri, lukaThalimoni, luka-Akubhi, lukaHathitha nolukaShobhayi, bonke babeyi-139.
Izisebenzi zasethempelini yilezi: abozalo lukaZiha, lukaHasufa, lukaThabhawothi,
lukaKerosi, lukaSiyaha, lukaPhadoni,
lukaLebhana, lukaHagabha, luka-Akubhi,
lukaHagabhi, lukaShamulayi, lukaHanani,
lukaGideli, lukaGahari, lukaRewaya,
lukaRezini, lukaNekhoda, lukaGazamu,
luka-Uza, lukaPhaseya, lukaBhesayi,
luka-Asina, lukaMehuni, lukaNefisimi,
lukaBhakhibhukhi, lukaHakhufa, lukaHarihuri,
lukaBhaziluthi, lukaMehida, lukaHarisha,
lukaBharikosi, lukaSisera, lukaThema,
lukaNeziya nozalo lukaHathifa.
Abozalo lwezinceku zikaSolomoni yilaba: ababozalo lukaSothayi, lukaHasoferethi, lukaPheruda,
lukaJahala, lukaDarikoni, lukaGideli,
lukaShefathiya, lukaHathili, lukaPhokherethi Hazebhayimi nabozalo luka-Ami.
Zonke izisebenzi zasethempelini nabozalo lwezinceku zikaSolomoni babengama-392.
Nampa ababuya bevela eTheli Mela, eTheli Harisha, eKherubhi, e-Adani, nase-Imeri, kepha abakwazanga ukusho ukuthi bangabaziphi izindlu zoyise uma babedabuka kwa-Israyeli:
abozalo lukaDelaya, lukaThobiya nolukaNekoda, bebengama-652.
Abozalo lwabaphristi: kwakungabozalo lukaHabhaya, lukaHakozi nolukaBharizilayi, owathatha umfazi emadodakazini kaBharizilayi wakwaGileyadi, wabizwa ngegama lawo.
Laba bazifuna ohleni lwabaphristi olubhaliwe, kepha abafunyanwanga; ngalokho bakhishwa ebuphristini, kwathiwa bangcolile.
Umbusi wabatshela ukuthi bangakudli okungcwelengcwele, kuze kuvele umphristi one-Urimi neThumimi.
Lonke ibandla selihlangene laliyizi-42 360,
ngaphandle kwezinceku zabo nezincekukazi zabo ezaziyi-7 337; babenabahlabeleli besilisa nabesifazane abangama-200.
Amahhashi abo ayengama-736; iminyuzi yabo yayingama-245;
amakameli abo ayengama-435; izimbongolo zazingama-672.
Kuthe ukuba bafike endlini kaSimakade eJerusalema, abanye bezinhloko zoyise banikela ngeminikelo yesihle ukuze kwakhiwe indlu kaSimakade esizeni sayo.
Banikela ebhokisini lomnikelo ngokwamandla abo: sekukonke okwaqoqwa lapho kwaba ngamadalike egolide angama-61 000, namamane esiliva ayizi-5 000 nezingubo zabaphristi eziyikhulu.
Abaphristi, abaLevi, abanye abantu, abahlabeleli, abalindisango nabantu ababesebenza ethempelini bahlala emizini yakubo. Wonke u-Israyeli wahlala emizini yakubo.
Ekuqaleni kwenyanga yesikhombisa, abantu bakwa-Israyeli sebesemizini, bahlangana bonke ngothi lwabo eJerusalema.
UJeshuwa, indodana kaJozadaki, nabanye abaphristi noZerubhabhele, indodana kaSheyalitiyeli, nabafowabo, balakha kabusha i-althare likaNkulunkulu ka-Israyeli ukuze kunikelwe phezu kwalo iminikelo yokushiswa, njengoba kulotshiwe emthethweni kaMose, umuntu kaNkulunkulu.
Noma izizwe ezazibazungezile zazibesabisa, balakha kabusha i-althare phezu kwezisekelo zalo, base benikela phezu kwalo kuSimakade iminikelo yokushiswa, iminikelo yokushiswa yasekuseni neyakusihlwa.
Bagubha umkhosi wamadokodo, njengokomthetho, banikela ngeminikelo yokushiswa usuku nosuku, ngokwenani elinqunyelwe usuku nosuku, njengoba kulotshiwe.
Emveni kwalokho baletha iminikelo yokushiswa ejwayelekile, eyokwethwasa kwenyanga, eyayo yonke imikhosi emisiweyo kaSimakade neminikelo yesihle eyayinikelwa ngabantu kuSimakade.
Ngosuku lokuqala, ngenyanga yesikhombisa, baqala ukunikela iminikelo yokushiswa kuSimakade, nanxa isisekelo sethempeli lakhe sasingakabekwa.
Abantu bakhokhela ababazi bamatshe, nababazi bokhuni, nabakhi imali; banika amaSidoni nabaseThire ukudla, okuphuzwayo namafutha ukuze balande imisedari eLebhanoni, bayilethe olwandle eJopha, ngokwemvume kaKhoresi, inkosi yasePheresiya.
Ngenyanga yesibili, ngonyaka wesibili bebuyele endlini kaNkulunkulu eJerusalema, uZerubhabhele, indodana kaSheyalitiyeli noJeshuwa, indodana kaJozadakhi, nabo bonke abafowabo nabaphristi nabaLevi nabo bonke ababeseJerusalema bebuya ekuthunjweni, bawuqala umsebenzi. Baqoka abaLevi, ababeneminyaka engaphezu kwama-25 ukuba bengamele izisebenzi ezazisebenza endlini kaSimakade.
UJeshuwa namadodana akhe, nabafowabo, noKhadimiyeli namadodana akhe, uBhinuyi noHodaviya namadodana kaHenadadi, umLevi, amadodana abo nabafowabo bonke bengamela izisebenzi zasendlini kaNkulunkulu.
Lapho abakhi bebeka isisekelo sethempeli likaSimakade, abaphristi bagqoka izingubo zabo zobuphristi, baphatha amacilongo. AbaLevi ababengamadodana ka-Asafa bathatha amasimbali, bahlabelela bedumisa uSimakade njengesimiso sikaDavide, inkosi yakwa-Israyeli.
Babemdumisa uSimakade, bembonga ngamaculo, becula bethi: “Ngokuba uSimakade muhle, umusa wakhe umi phakade ku-Israyeli.” Bonke abantu bakhamuluka, bamemeza kakhulu ngentokozo, bedumisa uSimakade lapho bebona kubekwa isisekelo sendlu yakhe.
Abaningi babaphristi, abaLevi, izinhloko zemindeni nabantu abadala ababeyibonile indlu yokuqala, bakhala ngezwi elikhulu lapho bezibonela ngawabo kubekwa isisekelo saleyo ndlu; abaningi babememeza ngentokozo.
Umsindo wawumkhulu kangangokuthi wawuzwakala ukude, kodwa umuntu wayengekwazi ukwehlukanisa noma ungowokujabula noma ungowokukhala.
Kwathi ukuba izitha zamadoda akwaJuda nawakwaBhenjamini zizwe ukuthi labo ababebuye ekuthunjweni sebelakha kabusha ithempeli likaSimakade uNkulunkulu ka-Israyeli,
zaya kuZerubhabhele nasezinhlokweni zemindeni, zathi kubo: “Masinisize nathi ekwakheni, ngokuba sikhonza uNkulunkulu njengani; besilokhu sethula imihlatshelo kuye kusukela ngezinsuku zika-Esari Hadoni, inkosi yase-Asiriya, okunguyena owasiletha lapha.”
Kepha uZerubhabhele noJeshuwa nabanye ababeyizinhloko zemindeni yakwa-Israyeli babaphendula bathi: “Aninalo ilungelo lokusisiza ekwakheni indlu kaNkulunkulu wethu; yithina ngokwethu esizomakhela uSimakade uNkulunkulu ka-Israyeli; nguKhoresi, inkosi yasePheresiya, osiyale ukuba senze kanjalo.”
Abantu bendawo bazama ukubadikibalisa abantu bakwaJuda ababebuye ekuthunjweni, ukuze bayeke ukwakha indu.
Zafumbathisa izikhulu ukuba zimelane nesu labo ngesikhathi sokubusa kukaKhoresi, inkosi yasePheresiya, kwaze kwaba ngesokubusa kukaDariyu, inkosi yasePheresiya.
Ngesikhathi sokubusa kuka-Ahasheveroshi, esaqala nje ukubusa, izitha zabhala incwadi zimangalela izakhamuzi zakwaJuda naseJerusalema.
Sekubusa u-Arithahishashitha, inkosi yasePheresiya, uBhishilamu, uMithiredathi, uThabeheli nabo bonke ababebambisene nabo babhalela u-Arithahishashitha, inkosi yasePheresiya, incwadi ngesi-Aramayikhi, bayihumusha.
URehumi, umbusi noShimishayi, unobhala, babhala incwadi emelana neJerusalema, bayiqondisa enkosini u-Arithahishashitha, ithi:
URehumi umbusi, umShimshayi unobhala, nabanye, nabo bonke abangani babo, abehluleli nazo zonke izikhulu ezidabuka e-Erekhi, eBhabhele naseShushani ezweni lama-Elamu,
nazo zonke izizwe ezathunjwa ngu-Osinaphari omkhulu nonamandla wazihlalisa emzini eSamariya nakwezinye izindawo, esifundazweni entshonalanga yeYufrathe.
Leli yifuzela lencwadi abayithumela ku-Arithahishashitha, inkosi: “Le ncwadi ivela ezincekwini zakho, amadoda asentshonalanga yeYufrathe.
“Sifuna ukuyazisa inkosi ukuthi abaJuda abavela ezindaweni zakho sebefike eJerusalema bawakha kabusha umuzi ohlubukayo nomubi. Sebeqedile ukwakha kabusha izingange, nokuvuselela izisekelo.
“Manje makwazeke enkosini ukuthi uma lo muzi nezingange zawo kwakhiwa kabusha kuphele, abantu bazoyeka ukukhokha intela, imali yendlela, nentela yasebukhosini izokwehla.
Manje, ngoba thina sikukhonze ngempela nkosi, asifuni le nto yenzeke, asifuni ukubona inkosi idelelwa; ngakho-ke sithumele ukuzokwazisa inkosi ngalokhu,
ukuze kuphenywe emiqulwini yemilando yokhokho bakho. Uyokuthola kuyo ukuthi lo muzi bewuhlale uwuhlupho, uvukela umbuso, nokuthi kusukela emandulo amakhosi nababusi bezifunda bewubahlalisa lubhojozi. Abantu bakhona bavele bangamambuka, yingakho nje umuzi wabhujiswa.
Makwazeke enkosini ukuthi uma lo muzi nezingange zawo kwakhiwa kabusha kuphele, ngeke usathola sabelo esifundeni esingaphesheya komfula.”
Inkosi yathumela le mpendulo: “KuRehumi, umbusi waseShimishayi, nonobhala nabangani babo abahlala eSamariya, nabo bonke abasentshonalanga yeYufrathe, ngiyanibingelela.
“Incwadi enisithumelele yona ihunyushiwe ngafundelwa yona.
Ngiyale ukuba lolu daba lusukunyelwe phezulu, nempela kwatholakala ukuthi kusukela emandulo lo muzi ubuvukela amakhosi, futhi ugcwele abahlubuki nabaphehli bodweshu.
Kakade kwakubusa amakhosi anamandla eJerusalema, ebusa sonke isifundazwe sasentshonalanga yeYufrathe, eqoqa intela nemali yendlela.
Ngakho-ke khipha umyalo wokuba labo bantu bayeke ukwakha kabusha umuzi, ngize ngishaye umthetho.
Qaphelani, ningasichithi isikhathi, funa balimaze umbuso wami! Kungani kuzoyekelelwa umonakalo ukhule, ulimaze amakhosi na?”
Kwathi ukuba ifuzela lencwadi yenkosi u-Arithahishashitha lifundwe lonke phambi kukaRehumi, noShimishayi umbhali, nabangani babo, baphuthuma baya eJerusalema bayophoqa abaJuda ukuba bayeke ukwakha kabusha umuzi.
Umsebenzi endlini kaNkulunkulu eJerusalema wawusumile; kwakungasenziwa lutho, kwaze kwaba ngunyaka wesibili wokubusa kukaDariyu, inkosi yasePheresiya.
Abaphrofethi, uHagayi noZakhariya, indodana ka-Ido, baphrofetha kubaJuda ababehlala kwaJuda naseJerusalema egameni likaNkulunkulu ka-Israyeli owayebabusa.
Emveni kwalokho uZerubhabhele, indodana kaSheyalitiyeli noJeshuwa, indodana kaJozadakhi, baqala ukwakha kabusha indlu kaNkulunkulu eJerusalema, besizwa ngabaphrofethi.
Ngaso leso sikhathi uThathenayi, umbusi wasentshonalanga yeYufrathe noShethari Bhozenayi, nabangani babo bakhuluma nabo, bathi: “Ngubani onigunyaze ukwakha le ndlu, nokuqeda lesi sakhiwo na?”
Babuza bathi: “Ngobani amagama amadoda akhe lesi sakhiwo na?”
Kepha uNkulunkulu wabo wayenabo, ngakho-ke izikhulu zakwaJuda zanquma ukungawumisi umsebenzi zize zibhalele uDariyu, zithole kuye impendulo.
Nanti ifuzela lencwadi uThathenayi, umbusi wasentshonalanga yeYufrathe, noShethari Bhozenayi, nabangani babo ababesesifundazweni esasisentshonalanga yeYufrathe, abayithumela kuDariyu, inkosi.
Bayithumelela umbiko owawubhalwe kanje: “KuDariyu, inkosi, makube ngukuthula konke!
“Makwazeke enkosini ukuthi siyile esifundazweni kwaJuda, endlini kaNkulunkulu omkhulu eyakhiwe ngamatshe amakhulu, kwafakwa namapulangwe ezindongeni. Lowo msebenzi uqhubeka ngesineke, bayaphumelela ukuwenza.
“Sase sikhuluma nalezo zikhulu, sababuza sathi: ‘Ngubani onigunyaze ukwakha le ndlu, nokuqeda lesi sakhiwo na?’
Sibuye sazibuza namagama azo, sawabhala, ukuze sikwazise ukuthi bangobani abaholi balo msebenzi.
“Nansi impendulo eziphendula ngayo: ‘Siyizikhonzi zikaNkulunkulu wasezulwini nasemhlabeni, sakha kabusha indlu eyayakhiwe eminyakeni eminingi eyedlule, inkosi yakwa-Israyeli enamandla eyayiyakhe yayiqeda.
Kepha okhokho bethu bamthukuthelisa uNkulunkulu wasezulwini, wayesevumela inkosi yaseBhabhele, uNebukhadinezari, inkosi yombuso wamaKhaledi, ukuba ibanqobe. Yabhubhisa le ndlu, abantu yabathumba yabasa eBhabhele.
“ ‘Kepha ngonyaka wokuqala wokubusa kwenkosi uKhoresi eBhabhele, yakhipha isimemezelo sokuthi le ndlu kaNkulunkulu kumele yakhiwe kabusha.
Yazibuyisela eJerusalema zonke izitsha zegolide nesiliva zasendlini kaNkulunkulu ezazithathwe nguNebukhadinezari ethempelini eJerusalema, wayozibeka ethempelini eBhabhele. UKhoresi wazikhipha lezo zitsha wazinika indoda egama layo linguSheshibhazari, wayeseyibeka ukuba ngumbusi kwaJuda.
Yathi kuye: “Thatha lezi zitsha, uhambe nazo, uzibeke ethempelini eJerusalema, indlu kaNkulunkulu yakhiwe kabusha esizeni sayo.”
“ ‘Ngakho-ke uSheshibhazari wafike wabeka izisekelo zendlu kaNkulunkulu eJerusalema; kusukela ngaleso sikhathi kuze kube manje isakhiwa, ayikaqedwa.’
“Manje uma kukuhle enkosini, vuma ukuba kuphenywe endlini yemiqulu yemilando yasebukhosini baseBhabhele ukuze kubonakale ukuthi ngempela inkosi uKhoresi yayiwushayile yini umthetho wokuthi akwakhiwe kabusha indlu kaNkulunkulu eJerusalema. Inkosi mayisazise ukuthi ihlose ukuba kwenziweni ngalolu daba.”
Inkosi uDariyu yashaya umthetho wokuthi akuphenywe emiqulwini esendlini yemilando egcinwe eBhabhele.
Kwatholakala umqulu e-Ekhibhathana, inhlokomuzi yesifundazwe eMediya, okwakulotshwe kuwo: Isikhumbuzo.
“Ngonyaka wokuqala wokubusa kwenkosi uKhoresi, yashaya umthetho othi: maqondana nendlu kaNkulunkulu eseJerusalema mayakhiwe kabusha, indawo lapho imihlatshelo yayinikelelwa khona neminikelo yokushiswa eyayilethwa khona, ubude bayo kumele bube ngamakhubhithi angama-60, nobubanzi bayo bube ngamakhubhithi angama-60.
Izindonga zibe imigqa emithathu yamatshe, omunye phezu komunye, bese zilandelwa ngowodwa wezingodo ezintsha. Izindleko mazikhishwe esikhwameni sengcebo yendlu yenkosi.
Izitsha zegolide nezesiliva zasendlini kaNkulunkulu ezazithathwe nguNebukhadinezari ethempelini eJerusalema wazisa eBhabhele, nazo kumele zibuyiselwe eJerusalema, yileso naleso endaweni yaso endlini kaNkulunkulu.”
“Manje kuwe Thathenayi, mbusi wasentshonalanga yeYufrathe, nakuwe Shethari Bhozenayi, nabangani benu abasesifundazweni esisentshonalanga yeYufrathe, qhelani lapho;
hlukanani nomsebenzi wendlu kaNkulunkulu; yekelani umbusi wabaJuda nezikhulu bayakhe kabusha indlu kaNkulunkulu esizeni sayo.
“Ngishaya umthetho maqondana nalezo zikhulu zabaJuda ezizokwakha kabusha le ndlu kaNkulunkulu, ngithi: izindleko zokukhokhela laba bantu mazikhokhwe ngokuphelele nsuku zonke, ziphume emalini yasebukhosini, etholakala ngentela evela esifundazweni entshonalanga yeYufrathe, ukuze lowo msebenzi ungami.
Noma yini abayidingayo: amaduna, izinqama, amawundlu abazokwenza ngakho iminikelo yokushiswa kuNkulunkulu wasezulwini, nokolo, usawoti, iwayini, namafutha, njengokusho kwabaphristi abaseJerusalema, mabanikwe lokho nsuku zonke, kungaphuthi,
ukuze banikele iminikelo emthokozisayo uNkulunkulu wasezulwini, bakhulekele ukuphila kwenkosi namadodana ayo.
“Ngiyaniyala ngithi: uma kukhona oyoguqula lo mthetho engiwushayile, kuyokhishwa ibhanuko emshayweni wendlu yakhe, ajojwe ngalo, umuzi wakhe ube ngumquba.
UNkulunkulu owenza ukuba igama lakhe lihlale lapho, sengathi angasusa esikhundleni noma yiyiphi inkosi nesizwe okuzama ukuguqula lokhu, noma ukubhubhisa le ndlu kaNkulunkulu eseJerusalema. Mina Dariyu, ngishaye lo mthetho; mawuhlonishwe ngokucophelela.”
UThathenayi, umbusi wesifunda esingasentshonalanga yeYufrathe, noShethari Bhozenayi nabangani babo, bakwenza ngokucophelela lokho inkosi uDariyu eyayibalayeze khona.
Izikhulu zakwaJuda zaqhubeka ngempumelelo ukwakha indlu, zigqugquzelwa ngukuphrofetha kukaHagayi noZekhariya, indodana ka-Ido. Zaqeda njengalokho zaziyalwe nguNkulunkulu wakwa-Israyeli ngomthetho owashaywa nguKhoresi, uDariyu, nenkosi u-Arithahishashitha, basePheresiya.
Zaqeda ukukwakha indlu ngosuku lwesithathu lwenyanga u-Adari, ngonyaka wesithupha wokubusa kwenkosi uDariyu.
Abantu bakwa-Israyeli, abaphristi, abaLevi nabo bonke abantu ababuye ekuthunjweni, bayehlukanisela uNkulunkulu indlu ngenkulu injabulo.
Lapho beyehlukanisa, benza umhlatshelo ngezinkunzi ezilikhulu, izimvu ezingama-200, namawundlu angama-400, nezimbuzi ezili-12 ezaba ngumnikelo wesono, ngayinye imele isizwana ngesizwana sakwa-Israyeli.
Babuye babeka abaphristi nabaLevi ngokwemikhakha yabo, ukuze baqhube inkonzo kaNkulunkulu eJerusalema, njengoba kulotshiwe encwadini kaMose.
Abantu ababebuya ekuthunjweni bagubha uMkhosi wePhasika ngosuku lwe-14, ngenyanga yokuqala,
ngokuba bonke abaphristi nabaLevi base bezihlambululile, bonke sebehlambulukile. Bahlabela iPhasika bonke ababebuya ekuthunjweni, nabaphristi, nabo luqobo.
Abantu bakwa-Israyeli ababebuye ekuthunjweni nabo bonke abase beyiyekile imikhuba yabezizwe bazinikela ekukhonzeni uSimakade uNkulunkulu ka-Israyeli, badla iPhasika.
Babuye bawugubha ngentokozo umkhosi wesinkwa esingenamvubelo izinsuku eziyisikhombisa, ngokuba uSimakade wayebathokozisile, waguqula inhliziyo yenkosi yase-Asiriya, yabeseka ukwakha kabusha indlu kaNkulunkulu ka-Israyeli.
Emveni kwalokho, ngesikhathi sokubusa kwenkosi u-Arithahishashitha ePheresiya, u-Ezra, indodana kaSeraya, ka-Azariya kaHilikiya,
kaShalumi, kaZadoki, ka-Ahithubi,
ka-Amariya, kaMerayothi,
kaZeraya, ka-Uzi, kaBhuki,
ka-Abhishuwa, kaFinehasi, ka-Eleyazari, ka-Aroni, umphristi omkhulu,
lowo Ezra wasuka eBhabhele waya eJerusalema. Wayengumbhali onekhono emthethweni kaMose ayewunikwe nguSimakade uNkulunkulu ka-Israyeli; inkosi yamnika konke akucelayo, ngokuba isandla sikaSimakade uNkulunkulu wakhe sasinaye.
U-Ezra waphuma eBhabhele ngonyaka wesikhombisa wokubusa kuka-Arithahishashitha, waya eJerusalema nabanye bakwa-Israyeli, abaphristi, abaLevi, abaculi, abalindisango nezisebenzi zasethempelini.
Bafika eJerusalema ngenyanga yesihlanu, ngonyaka wesikhombisa wokubusa kwenkosi.
Baphuma eBhabhele ngosuku lokuqala lwenyanga yokuqala, kwathi ngosuku lokuqala lwenyanga yesihlanu, bafika eJerusalema, ngokuba isandla somusa sikaNkulunkulu wakhe sasinaye,
ngokuba inhliziyo ka-Ezra yayigxile ekufundeni umthetho kaSimakade, nokuwenza, nokufundisa izimiso nemithetho kwa-Israyeli.
Leli yifuzela lencwadi inkosi u-Arithahishasitha alinika u-Ezra, umphristi, umbhali, owayengumbhali wemithetho nezimiso zikaSimakade ku-Israyeli, ethi:
“U-Arithahishasitha, inkosi yamakhosi ku-Ezra, umphristi nombhali womthetho kaNkulunkulu wezulu: ukuthula.
“Ngishaya umthetho othi: noma yimuphi umuntu wakwa-Israyeli, noma abaphristi bakhona, noma abaLevi abasembusweni wami abathanda ukuya eJerusalema, bangahamba nawe.
Ngokuba uthunywa yinkosi nabeluleki bayo abayisikhombisa, ukuba niyobheka ukuthi kuhamba kanjani kwaJuda naseJerusalema ngokomthetho kaNkulunkulu wenu osesandleni sakho,
nokuhambisa isiliva negolide inkosi nabeluleki bayo abalinikele ngesihle kuNkulunkulu ka-Israyeli, ondlu yakhe iseJerusalema;
nithathe nalo lonke isiliva negolide eniyokufumana esifundazweni sonke eBhabhele, neminikelo yesihle yabantu neyabaphristi, abayinikela ngesihle endlini kaNkulunkulu wabo eJerusalema.
Niyisebenzise ngokucophelela leyo mali, nithenge izinkunzi, izinqama, amawundlu, iminikelo yokusanhlamvu neminikelo yokuphuzwayo, nikunikele e-althare endlini kaNkulunkulu wenu eJerusalema.
“Wena nabafowenu, lokho enikubona kufanele ukuba nikwenze ngesiliva nangegolide elisalileyo, kwenzeni ngokwentando kaNkulunkulu wenu.
Izitsha ozinikiwe ukuba zisetshenziselwe inkonzo yendlu kaNkulunkulu wakho, uyakuzibuyisela kuNkulunkulu wakho eJerusalema.
Noma yini enye edingekayo endlini kaNkulunkulu wakho okufanele niyihlinzeke ngokwenu, ithatheni engcebeni yenkosi.
“Mina Arithashashitha, inkosi, ngiyala bonke abagcinimafa abasesifundanzweni entshonalanga yeYufrathe ukuba noma yini ayoyifuna kini u-Ezra, umphristi nombhali womthetho kaNkulunkulu wasezulwini, yenziwe ngokucophelela okukhulu,
kuze kufike ekhulwini lamathalenta esiliva, nekhulu lamakhora kakolo, amabhathi ayikhulu ewayini, amabhathi alikhulu amafutha, nosawoti ongenakubalwa.
Konke okuyalwe nguNkulunkulu wasezulwini makwenziwe ngesineke, kwenzelwa indlu kaNkulunkulu wasezulwini, funa intukuthelo kaNkulunkulu yehlele inkosi namadodana ayo.
Futhi siyanazisa ukuthi anivunyelwe ukukhokhisa intela abaphristi, abaLevi, abaculi, abalindisango, izisebenzi zasethempelini nezinye izisebenzi ezisebenza kule ndlu kaNkulunkulu.
“Wena-ke Ezra, makuthi ngokuhlakanipha uNkulunkulu akuphe khona, uqoke abehluleli nezimantshi abayokwehlulela bonke abantu bakini abasesifundazweni esisentshonalanga yeYufrathe; makube ngabantu abawaziyo umthetho kaNkulunkulu wenu, abangawaziyo kufanele bawufundiswe.
Bonke abangawulaleli umthetho kaNkulunkulu wakho nomthetho wenkosi, kumele bajeziswe ngokubafaneleyo, kungaba ngokufa noma ngokudingiswa, noma ngokudlelwa impahla noma ngokuboshwa.”
Makadunyiswe uSimakade, uNkulunkulu wokhokho bethu, obeke into enje enhliziyweni yenkosi, ukuba ihlobise indlu kaSimakade eJerusalema ngale ndlela,
ongenzele umusa phambi kwenkosi nabeluleki bayo, naphambi kwazo zonke izikhulu zenkosi ezingamaqhawe. Ngaba nesibindi ngoba isandla seNkosi uSimakade sasinami, ngaqoqa abaholi kwa-Israyeli ukuba benyuke nami.
Nantu uhla lwezinhloko zemindeni ezazisekuthunjweni eBhabhele, ezabuya no-Ezra eJerusalema ngesikhathi sokubusa kwenkosi u-Arithahishashitha:
Kwabozalo lukaFinehasi, nguGereshomu. Kwabozalo luka-Ithamari, nguDaniyeli. Kwabozalo lukaDavide, nguHathushi,
kaShekhaniya. Kwabozalo lukaPharoshi, nguZekhariya namadoda ayi-150 omndeni wakhe.
Kwabozalo lukaPhahathi Mowabi, ngu-Eliyehonayi kaZerahiya namadoda angama-200.
Kwabozalo lukaZathu, nguShekhaniya kaJahaziyeli namadoda angama-300.
Kwabozalo luka-Adini, ngu-Ebhedi kaJonathani namadoda angama-50.
Kwabozalo luka-Elamu, nguJeshaya ka-Athaliya namadoda angama-70.
Kwabozalo lukaShefathiya, nguZebadiya, indodana kaMikhayeli namadoda angama-80.
Kwabozalo lukaJowabe, ngu-Obhadiya, indodana kaJehiyeli namadoda angama-218.
Kwabozalo lukaShelomithi, indodana kaJosifiya namadoda ayi-160.
Kwabozalo lukaBhebayi, nguZekhariya, indodana kaBhebayi namadoda angama-28.
Kwabozalo luka-Azigadi, nguJohanani, indodana kaHakathani namadoda ayi-110.
Kwabozalo luka-Adonikamu, ngu-Elifelethi, uJehiyeli, noShemaya namadoda angama-60 afika kamuva.
Kwabozalo lukaBhigivayi, ngu-Uthayi, noZakhuri namadoda angama-70.
Ngabahlanganisa ndawonye ngasemfuleni oya e-Ahava, sagoba amadlangala lapho izinsuku ezintathu. Lapho ngibuzisisa abantu nabaphristi, ngafumana ukuthi babengekho abozalo lukaLevi.
Ngase ngithumela, ngabiza u-Eliyezeri, u-Ariyeli, uShemaya, u-Elinathani, uJaribi, u-Elinathani, uNathani, uZekhariya noMeshulamu ababengabaholi, uJohiyaribhi no-Elinathani ababengabafundisayo,
ngabathumela ku-Ido owayengumholi eKhasifiya, ngibatshela ukuthi bayothini ku-Ido nabangani bakhe, izisebenzi zasethempelini eKhasifiya, ukuba basithumelele abantu ababezosebenza endlini kaNkulunkulu.
Ngenxa yokuba isandla somusa sikaNkulunkulu wethu sasinathi, basithumelela uMahili, indoda enengqondo, wozalo lukaLevi ka-Israyeli noSherebhiya namadodana akhe nabafowabo abali-18;
noHashabhiya enoJeshaya, wozalo lukaMerari, nabafowabo namadodana abo angama-20;
ngaphezu kwama-220 ezisebenzi zasethempelini ezaziqokwe nguDavide nezikhulu zakhe ukuba belekelele abaLevi, ababizwe bonke ngamagama abo.
Ngase ngimemezela ukuzila ngasemfuleni i-Ahava nokuba sizithobe phambi kukaNkulunkulu wethu, sizicelele indlela enhle nephephile, thina nabantwana bethu, nayo yonke impahla yethu.
Nganginamahloni ukucela enkosini iviyo lamabutho, nagibele amahhashi, ukuze asivikele ezitheni endleleni, njengokuba sasiyitshelile inkosi ukuthi: “Isandla sikaNkulunkulu wethu siyabavikela abamfunayo, kodwa amandla akhe nentukuthelo yakhe kumelana nabo bonke abamhlubukayo.”
Ngakho-ke sazila, samnxusa uNkulunkulu wethu ngalokhu, wakuzwa ukunxusa kwethu.
Ngakho-ke ngaqoka abali-12 kubaholi babaphristi: uSherebhiya, uHashabhiya nabalishumi abayizihlobo zabo.
Ngabalinganisela isiliva, igolide, izitsha, neminikelo yendlu kaNkulunkulu wethu okwakunikelwe yinkosi, abeluleki bayo, izikhulu zayo, nakho konke okwakunikelwe ngabantu bakwa-Israyeli ababelapho;
nakhu engabanika khona: amathalenta esiliva angama-650, amathalenta ayizitsha zesiliva alikhulu, amathalenta egolide alikhulu,
izindebe zegolide ezingama-20 ezisisindo singamadarikhe ayinkulungwane, nezitsha ezimbili zethusi elicolisekileyo ezazizinhle njengegolide.
Ngathi kubo: “Ningcwele kuSimakade, nezitsha zingcwele, isiliva negolide liyiminikelo yesihle kuSimakade uNkulunkulu wokhokho benu.
Kuqapheleni, nikugcine nize nikulinganise phambi kwabaphristi abakhulu nabaLevi, nezinhloko zemindeni kwa-Israyeli eJerusalema, emakamelweni endlu kaSimakade.”
Abaphristi nabaLevi bathatha isiliva, igolide nezitsha, njengoba kwase kulinganisiwe, bakuyisa eJerusalema endlini kaNkulunkulu wethu.
Kwakulusuku lwe-12, ngenyanga yokuqala, ngesikhathi sisuka emfuleni i-Ahava silibhekise eJerusalema. UNkulunkulu wethu wayenathi, esivikela ezitheni ezazisihlasela nezazisilalela unyendle endleleni.
Sesifikile eJerusalema, sahlala izinsuku ezintathu.
Ngosuku lwesine sisendlini kaNkulunkulu wethu, kwakalwa isiliva, igolide nezitsha, kwase kwedluliselwa kumphristi uMeremothi, indodana ka-Uriya, owayeno-Eleyazare, indodana kaFinehasi nabaLevi, uJozabhadi kaJeshuwa noNowadiya kaBhinuyi.
Konke kwabalwa, kwakalwa, kwase kubhalwa phansi isisindo sakho.
Bonke labo ababuya ekuthunjweni banikela ngeminikelo yokushiswa kuNkulunkulu ka-Israyeli. Banikela ngezinkunzi ezili-12 ezazimele u-Israyeli wonkana, izinqama ezingama-96, namawundlu angama-77; banikela ngezimpongo ezili-12 zaba ngumnikelo wesono. Konke lokho kwaba ngumnikelo wokushiswa owanikelwa kuSimakade.
Bayethula kubabusi nezikhulu zesifundazwe esisentshonalanga yeYufrathe incwadi ababeyinikwe yinkosi, nabo beseka abantu nendlu kaNkulunkulu.
Sekwenziwe konke lokho, abaholi beza kimi, bathi: “Abantu bakwa-Israyeli, abaphristi, abaLevi abazehlukanisanga kubantu bezizwe nasemikhubeni yabo eyenyanyekayo, eyamaKhanani, amaHithi, amaPherizi, amaJebusi, ama-Amoni, abakwaMowabi, abaseGibhithe nama-Amori.
Ngokuba bazithathela amadodakazi azo aba ngabafazi babo, bathathela namadodana abo. Balungcolisile ulibo olungcwele ngokuzihlanganisa nabezizwe. Abaholi nezikhulu baba ngobhongoza ekwenzeni lokho kungethembeki.”
Ngikuzwa lokho, ngaklebhula ingubo yami nesembatho sami, ngazihluthula izinwele ekhanda nasesilevini, ngahlala phansi, ngimangele.
Kwase kubuthana bonke labo abathuthumela uma bezwa okwakushiwo nguNkulunkulu ka-Israyeli, ngenxa yokungethembi kwababebuye ekuthunjweni, bahlala nami kwaze kwaba yisikhathi somnikelo wakusihlwa.
Ngesikhathi somnikelo wakusihlwa, ngasukuma ekuzileni, izingubo zami nesembatho sami kuklebhukile, ngaguqa ngaphakamisela izandla zami kuSimakade uNkulunkulu wami,
ngathi: “Nkulunkulu wami, nginamahloni, ngihlazeke kakhulu, ngesaba ngisho ukubheka kuwe, Nkulunkulu wami, ngokuba izono zethu sezedlula amakhanda ethu, necala lethu selifinyelela emazulwini.
Kusukela emihleni yokhokho bethu kuze kube namuhla, sithe shi ezonweni, ngenxa yezono zethu, namakhosi ethu, nabaphristi, sinikelwe emakhosini ezinye izizwe, enkembeni, ekuthunjweni, ekuphangweni nasehlazweni elikhulu, njengoba kunje manje.
“Kepha manje uSimakade uNkulunkulu wethu usenzele umusa okwesikhashana, washiya insali, wasenza saba nesabelo endaweni yakhe engcwele ukuze akhanyise amehlo ethu, asinike ikhefu, asophule ebugqileni bethu.
Ngokuba siseyizigqila, uNkulunkulu wethu akasishiyanga ebugqileni bethu, kodwa usenzele ububele bakhe phambi kwamakhosi asePheresiya; asinika impilo entsha ukuze sakhe kabusha indlu kaNkulunkulu wethu, sakhe kabusha obekuyincithakalo, wasenzela ugange kwaJuda naseJerusalema.
“Kepha manje, Nkulunkulu wethu, sesizothini ngalokhu na? Phela siyilahlile imithetho yakho
owasiyala ngayo ngomlomo wezinceku zakho, abaphrofethi, uthi: ‘Izwe eningena kulo ukulidla lingcoliswe ngukungcola kwabantu bezizwe ngamanyala abo. Baligcwalise ngokungcola kusukela kulo mngcele kuya kuloya.
Ngakho-ke amadodakazi enu ningawaganiseli amadodana azo, namadodana enu ningawathatheli abafazi kumadodakazi azo, ningalokothi nifune ukuthula kwazo nempumelelo yazo, ukuze nibe namandla, futhi nidle okuhle kwezwe, nilishiyele abantwana benu libe yifa labo laphakade.’
“Emuva kokuba sezisehlele zonke lezo zinto ngenxa yezenzo zethu ezimbi, necala lethu elikhulu, kodwa Wena Nkulunkulu, awusijezisanga ngokufanele iziphambeko zethu, wabuye washiya insali efana nalena,
kambe singabuye siyephule yini imithetho yakho ngokuganana nabezizwe abenza amanyala anjengalawa na? Ubungayukusithukuthelela yini uze usibhubhise nya, kungasali nsali na?
Simakade Nkulunkulu ka-Israyeli, Wena ulungile, kodwa thina usiphunyukisile, sasala sayinsali njengoba kunje namuhla. Siphambi kwakho necala lethu, nakuba kungekho namunye ongama phambi kwakho ngenxa yalokho.”
Kwathi u-Ezra esakhuleka evuma izono, ekhala, ezilahle phansi phambi kwendlu kaNkulunkulu, isixuku esikhulu sabakwa-Israyeli sabuthana lapho, amadoda, abesifazane, nezingane, bonke babekhala kalusizi.
UShekhaniya, indodana kaJehiyeli, wozalo luka-Elamu, wathi ku-Ezra: “Asethembekanga kuNkulunkulu ngokuthi siganwe ngabesifazane bezizwe, kodwa noma kunjalo u-Israyeli usenalo ithemba.
Manje-ke masenze isivumelwano noNkulunkulu wethu sokubalahla bonke laba besifazane nezingane zabo, ngokwesiluleko senkosi yami nalabo abayesabayo imithetho kaNkulunkulu wethu; makwenziwe njengokumisiweyo emthethweni.
Vuka wenze okuthile, ngokuba lolu daba luqondene nawe; sinawe; qina, ukwenze lokhu.”
U-Ezra wasukuma, wafungisa abaholi babaphristi, abaLevi no-Israyeli wonkana ukuthi bayokwenza njengoba eshilo. Bafunga-ke.
U-Ezra wasuka phambi kwendlu kaNkulunkulu, waya endlini kaJehohanani, indodana ka-Eliyashibhi, wahlala lapho ubusuku bonke, engadli lutho, futhi engaphuzi lutho, ngokuba wayelila ngenxa yokungethembeki kwabantu ababebuye ekuthunjweni.
Bathumela isimemezelo kulo lonke elakwaJuda naseJerusalema, kubo bonke ababebuye ekuthunjweni, ukuba bahlangane eJerusalema,
nokuthi uma bengafinyelelanga emhlanganweni ngezinsuku ezintathu, bayokwephucwa yonke impahla yabo, badingiswe enhlanganweni yabathunjwa ngokwesinqumo sabaphethe nezikhulu.
Bonke abantu bakwaJuda nabakwaBhenjamini babuthana eJerusalema ezinsukwini ezintathu; kwakuyinyanga yesishiyagalolunye, ngolwama-20 lwenyanga. Bonke abantu bahlala phansi phambi kwendlu kaNkulunkulu, beqhaqhazela ngenxa yobucayi balolu daba, nangenxa yemvula enkulu.
U-Ezra, umphristi, wayesesukuma, wathi kubo: “Nonile, naganwa ngabesifazane bezizwe, ngaleyo ndlela nathasisela icala lika-Israyeli.
Ngakho-ke vumani izono zenu kuSimakade uNkulunkulu wokhokho benu, nenze intando yakhe; zehlukaniseni kubantu bezwe nakubafazi bezizwe.”
Inhlangano yonke yaphendula ngezwi elikhulu, yathi: “Siyavuma! Kufanele senze njengoba usho!
Kepha kunabantu abaningi lapha, futhi lina kakhulu, asikwazi ukuma phandle. Ngaphezu kwalokhu, lolu daba alusilo olosuku olulodwa noma ezimbili, ngokuba iningi lethu liyachaphazeleka kulolu daba.
Vumelani abaholi bethu kube yibona abazosimela kulolu daba, bamele inhlangano yonke. Makuthi bonke emizini yakithi abaganwe ngabesifazane bezizwe beze ngezikhathi ezimisiweyo, behambisana namalunga nabehluleli bemizi yonke, luze lusuke kithi ulaka lukaNkulunkulu maqondana nalolu daba.”
UJonathani, indodana ka-Asaheli noJahazeya, indodana kaThikhiva, bamelana nalesi sinqumo, besekwa ngoMeshulami noShabhethayi, abaLevi.
Ababuye ekuthunjweni benza kanjalo. U-Ezra umphristi waqoka amadoda, izinhloko zemindeni ngokwezindlu zokhokho bazo, yileyo naleyo ibizwe ngegama. Lawo madoda ahlangana ngosuku lokuqala, ngenyanga yeshumi, ukuze aphande kabanzi ngalolu daba.
Aluphothula lolo daba lwalawo madoda ayethathe abesifazane babezizwe, ngosuku lokuqala lwenyanga yokuqala.
Abafunyaniswa phakathi kwabozalo lwabaphristi ukuthi baganwe ngabesifazane babezizwe yilaba: kwabozalo lukaJeshuwa: indodana kaJozadaki, nakubafowabo, nguMahaseya, u-Eliyezeri, uJaribi noGedaliya.
Bavuma ukuthi bazobalahla abafazi babo; lokhu benecala, banikela ngenqama, yaba wumhlatshelo wezono zabo.
Kwabozalo luka-Imeri: nguHanani noZebhadiya.
Kwabozalo lukaHarimi: nguMahaseya, u-Elija, uShemaya, uJehiyeli no-Uziya.
Kwabozalo lukaPhashuri: ngu-Eliyohenayi, uMahaseya, u-Ishmayeli, uNethaneli, uJozabhadi no-Eleyasa.
KubaLevi: nguJozabhadi, uShimeyi, uKhelaya onguKhelitha, uPhethahiya, uJuda no-Eliyezeri.
Kubahlabeleli: ngu-Eliyashibhi. Kubalindisango: nguShalumi, uTheleme no-Uri.
Kwabanye bakwa-Israyeli: kwabozalo lukaPharoshi: nguRamiya, u-Iziya, uMalikhiya, uMijamini, u-Eleyazare, uMalikhiya noBhenaya.
Kwabozalo luka-Elamu: nguMathaniya, uZakhariya, uJehiyeli, u-Abhidi, uJeremothi no-Eliya.
Kwabozalo lukaZathu: ngu-Eliyohenayi, u-Eliyashibhi, uMathaniya, uJeremothi, uZabhadi no-Aziza.
Kwabozalo lukaBhebayi: nguJehohanani, uHananiya, uZabhayi no-Athilayi.
Kwabozalo lukaBhani: nguMeshulamu, uMalukhi, u-Adaya, uJashubhi, uSheyali noJeremothi.
Kwabozalo lukaPhahathi Mowabi: ngu-Adina, uKhelali, uBhenaya, uMahaseya, uMathaniya, uBhezaleli, uBhinuwi noManase.
Kwabozalo lukaHarimi: ngu-Eliyezeri, uJishiya, uMalikhiya, uShemaya, uShimeyoni,
uBhenjamini, uMalukhi noShemariya.
Kwabozalo lukaHashumi: nguMathenayi, uMathatha, uZabhadi, u-Elifelethi, uJeremayi, uManase noShimeyi.
Kwabozalo lukaBhani: nguMahadayi, u-Amramu, u-Uweli,
uBhenaya, uBhedeya, uKheluhi,
uVaniya, uMeremothi, u-Eliyashibhi,
uMathaniya, uMathenayi noJahasu.
Kwabozalo lukaBhinuwi: nguShimeyi,
uShelemiya, uNathani, u-Adaya,
uMakhenadebhayi, uShashayi, uSharayi,
u-Azareli, uShelemiya, uShemariya,
uShalumi, u-Amariya noJosefa.
Kwabozalo lukaNebho: nguJehiyeli, uMathithiya, uZabhadi, uSebhina, u-Ido, uJoweli noBhenaya.
Bonke labo babeganwe ngabesifazane babezizwe, base bebalahla bonke abesifazane bezizwe ababebaganile nabantwana babo.
Nanka amazwi kaNehemiya, indodana kaHakaliya. Ngenyanga uKhisilevi, ngonyaka wama-20, ngiseShushani inhlokomuzi,
uHanani, omunye wabafowethu, wafika evela kwaJuda, ehamba nesigejane samadoda. Ngababuza ngabaJuda ababesinde ekuthunjweni basala kwaJuda, nangesimo seJerusalema.
Baphendula bathi: “Abasala esifundazweni sakwaJuda, abaze bathunjwa, basenkathazweni enkulu nasehlazweni; izingange zeJerusalema zidilizelwe phansi, namasango alo ashiswe ngomlilo.”
Ngathi ukuba ngizwe lezo zindaba, ngahlala phansi, ngakhala, ngazila izinsuku eziningi, ngizile ukudla ngikhuleka kuNkulunkulu wezulu.
Ngathi: “Ngiyakunxusa Simakade, Nkulunkulu wezulu, Wena omkhulu nowesabekayo, ogcina isivumelwano nothando olungenambandela kulabo abakuthandayo, begcina imithetho yakho.
Beka indlebe yakho, ubheke ngamehlo akho, uzwe umkhuleko wenceku yakho ewukhuleka kuwe namuhla, imini nobusuku, ikhulekela izinceku zakho, abantu bakwa-Israyeli, ivuma izono zabakwa-Israyeli, esone ngazo kuwe. Mina nomndeni wami sonile.
Senze ububi kuwe, asaze sayigcina imithetho, izimiso, nemiyalo owakunika uMose, inceku yakho.
Khumbula owakusho kuMose lapho uthi: ‘Uma ningihlubuka ngizonihlakazela phakathi kwezizwe,
kodwa uma nibuyela kimi, nibuye nigcine imithetho yami, nenze enganiyala ngakho, ngiyoniqoqa lapho nikhona, nginibuyisele endaweni engayiqokela ukuba iGama lami lihlale kuyo, ngisho noma ngabe nisemikhawulweni yomhlaba.’
“Bayizinceku zakho nabantu bakho owabophula ngamandla akho amakhulu nangesandla sakho esinamandla.
Nkosi, ake ubeke indlebe yakho emthandazweni wenceku yakho nasemithandazweni yezinceku zakho ezikuthokozelayo ukudumisa iGama lakho. Iphumelelise inceku yakho namuhla, uyiphe umusa phambi kwalo muntu.” Ngaleso sikhathi ngangingumphathindebe wenkosi.
Ngenyanga uNisani, ngonyaka wama-20 wokubusa kwenkosi u-Arithahishashitha, iwayini liphambi kwenkosi, ngalithunga ngalinika inkosi. Ngangingakaze ngibe ngodangele phambi kwayo.
Inkosi yathi kimi: “Kungani ubuso bakho budangele wena ube ungaguli na? Lokhu kufanele kube ngukudangala okuvela enhliziyweni.” Ngesaba kakhulu.
Ngaphendula ngathi enkosini: “Mana njalo, nkosi! Kungenzeka kanjani ukuba ubuso bami bungadangali, lapho umuzi oyindawo yamathuna okhokho uyincithakalo, namasango awo eshiswe ngomlilo na?”
Inkosi yathi kimi: “Ukhala ngani na?” Ngase ngikhuleka kuNkulunkulu wezulu.
Ngathi enkosini: “Uma kukuhle emehlweni akho nkosi, nengikucelayo kwemukeleka kuwe, ngicela ukuba ungithumele kwaJuda, emzini wamathuna obabamkhulu, ukuba ngiyowakha kabusha.”
Inkosi yathi kimi, nendlovukazi ihlezi eduze kwayo: “Uyohamba isikhathi esingakanani, futhi ubuye nini na?” Kwayithokozisa inkosi, yase ingivumela, nganquma isikhathi engiyobuya ngaso.
Ngathi enkosini: “Uma kwemukelekile enkosini, manginikwe izincwadi engiyozethula kubabusi besifundazwe esisentshonalanga yomfula iYufrathe, ukuze banginike imvume yokudabula ngaphandle kwezihibe, ngize ngifike kwaJuda.
Ngacela nencwadi eya ku-Asafa, umqaphi wehlathi lenkosi, eyayimyala ukuba anginike izingodo zokwakha imishayo yamasango enqaba yethempeli, izingange zomuzi nezendlu engangizohlala kuyo.” Inkosi yanginika konke engakucelayo, ngokuba isandla esihle sikaNkulunkulu sasinami.
Inkosi yathumela izikhulu zempi nabagibele amahhashi ukuba bangiphelekezele. Ngafinyelela kubabusi besifundazwe esiseNtshonalanga yeYufrathe, ngabanika izincwadi ezazibhalwe yinkosi.
Kodwa lapho uSanibhalathi, umHoroni noThobiya, inceku yakwa-Amoni, bezwa ukuthi kufike umuntu ozosebenzela inhlalakahle ka-Israyeli, bacunuka kakhulu.
Ngafika eJerusalema ngahlala khona izinsuku ezintathu.
Ngavuka ebusuku, ngahamba namanye amadoda; angitshelanga muntu ngalokho uNkulunkulu wami ayekubeke enhliziyweni yami ukuba ngikwenzele iJerusalema. Angithathanga silwane ngaphandle kwaleso engangisigibele.
Ngaphuma ebusuku ngeSango Lesigodi, ngahamba ngaseningizimu yoMthombo KaDrago, ngaze ngayofika eSangweni Lomquba, ngazihlola izingange eJerusalema ezazibhidlizelwe phansi namasango alo ayeshiswe ngomlilo.
Ngaqhubekela eSangweni Lomthombo naseChibini Lenkosi, kodwa kwakungasekho ndlela yokuba isilwane engangigibele kuso siqhubeke.
Ngakhuphuka ngomhosha ebusuku, ngihlola ugange. Ngase ngibuyela emzini, ngangena ngeSango Lesigodi; ngabuya kanjalo-ke.
Akukho namunye ezikhulwini owayazi ukuthi bengiyephi nokuthi ngangenzani. Ngangingakabatsheli abaJuda, abaphristi, abaholi, izikhulu nabanye ababezokwenza umsebenzi.
Ngase ngithi kubo: “Niyayibona yini inkathazo esikuyo, ukuthi iJerusalema liyincithakalo, namasango alo ashisiwe na? Wozani, masakhe kabusha ugange ukuze singaphinde sibe yihlazo.”
Ngabatshela ukuthi isandla esihle sikaNkulunkulu wami sibe nami kanjani, nangamazwi inkosi eyayiwakhulume kimi. Bathi: “Masisukume sakhe.” Base bewuqala ngentshisekelo umsebenzi.
Kwathi lapho uSanibhalathi umHoroni, uThobiya inceku engumAmoni, noGeshemi umArabhu bekuzwa lokho, basihleka usulu besibhinqa, bethi: “Nenzani nje nempela na? Senivukela inkosi na?”
Ngabathumelela impendulo ethi: “UNkulunkulu wezulu uzosiphumelelisa, thina zinceku zakhe sizosukuma, siqale sakhe kabusha, kodwa nina aninasabelo, nalungelo, nanto eyisikhumbuzo eJerusalema.”
Kwasuka u-Eliyashibhi, umphristi omkhulu nabanye abaphristi, bakha kabusha iSango Lezimvu, balinikela, bamisa namasango ezindaweni zawo. Banikela ugange kusukela eMbhoshongweni Wekhulu kuze kube seMbhoshongweni KaHananeli.
Eduze kwakhe kwakwakha amadoda aseJerikho, kwathi ingxenye elandelayo yakhiwa nguZakhari, indodona ka-Imri.
ISango Lenhlanzi lakhiwa ngamadodana kaHasena. Afaka imishayo namasango ezindaweni zakho, afaka imigoqo nezihluthulelo.
Ingxenye elandelayo yalungiswa nguMeremothi, indodana ka-Uriya, umzukulu kaHakozi. Elandelayo yakhiwa nguMeshulami, indodana kaBherekhiya, umzukulu kaMeshezabheli. Ingxenye elandelayo yakhiwa nguZadoki, indodana kaBhahana.
Ingxenye elandelayo yakhiwa ngamadoda aseThekhowa, kodwa abaholi bakulowo muzi benqaba ukwenza umsebenzi ababewunikwe ngabaphathi babo.
ISango iJeshana lakhiwa nguJoyada, indodana kaPhaseya, noMeshulami, indodana kaBhesodeya. Bafaka imishayo namasango ezindaweni zakho, bafaka imigoqo nezihluthulelo.
Ingxenye elandelayo yakhiwa nguMelathiya waseGibheyoni, noJadoni waseMeronothi, kwathi ingxenye elandelayo yakhiwa ngamadoda akwaGibheyoni naseMizpha kwaze kwayofika lapho kuhlala khona umbusi wesifundazwe esisentshonalanga yeYufrathe.
Ingxenye elandelayo yakhiwa ngu-Uziyeli, indodana kaHarihaya, umkhandigolide. Elandelayo yayihamba ize iyofika oGangeni Olukhulu, yona yakhiwa kabusha nguHananiya, owayenza amakha.
Ingxenye elandelayo yakhiwa nguRefaya, indodana kaHuri, umbusi wengxenye yesifunda eJerusalema.
Ingxenye elandelayo yakhiwa nguJedaya, indodana kaHarumafi, kwazise yayiseduze nomuzi wakhe. Elandelayo yakhiwa nguHathushi, indodona kaHashabhineya.
Ingxenye elandelayo noMbhoshongo Wohhavini kwakhiwa nguMalikhija, indodana kaHarimi noHashubhi, indodana kaPhahathi Mowabi.
Ingxenye elandelayo yakhiwa nguShalumi, indodana kaHaloheshi, umbusi wenye ingxenye yesifunda eJerusalema. Amadodakazi akhe amsiza kulowo msebenzi.
ISango Lesigodi lakhiwa kabusha nguHanuni nezakhamuzi zomuzi iZanowa. Bamisa amasango ezindaweni zawo, bafaka imigoqo nezihluthulelo, bakha kabusha ugange olungamakhubhithi ayinkulungwane kuze kuyofika eSangweni Lomquba.
ISango Lomquba lakhiwa kabusha nguMalikhija, indodana kaRekhabhi, umbusi wesifunda eBhethi Hakhiheremi. Wamisa amasango ezindaweni zawo, wafaka imigoqo nezihluthulelo.
ISango Lomthombo lakhiwa kabusha nguShalumi, indodana kaKholihoze, umbusi wesifunda eMizpha. Walakha, walifulela, wamisa amasango ezindaweni zawo, wafaka imigoqo nezihluthulelo, wakha nogange echibini iShela ngasengadini yenkosi, kwaze kwaba sezikhwelweni ezehlela emzini kaDavide.
Ingxenye elandelayo yayize iyofika ngaphambi kwedlinza likaDavide, kuya echibini nendlu yamaqhawe, kwakhiwa nguNehemiya, indodana ka-Azibhuki, umbusi wengxenye yesifunda iBhethi Zuri.
Laba baLevi abalandelayo bakha kabusha izingxenye ezithile zogange: uRehumi, indodana kaBhani, wakha ingxenye elandelayo; uHashabhiya, umbusi wengxenye yesifunda iKheyila, wakha ingxenye elandelayo, enzela isifunda sakhe.
Ingxenye elandelayo yakhiwa nguBhavayi, indodana kaHenadadi, umbusi wenye ingxenye yesifunda iKheyila.
Ingxenye elandelayo ephambi kwendawo yezikhali kuze kuyofika endaweni lapho ugange lujika khona yakhiwa ngu-Ezeri, indodana kaJeshuwa, umbusi waseMizpha.
Ingxenye elandelayo kuze kuyofika esangweni lendlu yomphristi omkhulu, u-Eliyashibhi, yakhiwa nguBharukhi, indodana kaZabhayi.
Ingxenye elandelayo kuze kuyofika ekugcineni kwendlu ka-Eliyashibhi yakhiwa nguMeremothi, indodana ka-Uriya, indodana kaHakozi.
Emva kwakhe kwalungisa abaphristi namadoda asezindaweni ezazizungeze lapho.
Ingxenye elandelayo yakhiwa nguBhenjamini noHashubhi, kwazise yayiphambi kwemizi yabo. Ingxenye elandelayo yakhiwa ngu-Azariya, indodana kaMahaseya, indodana ka-Ananiya, kwazise yayiphambi komuzi wakhe.
Ingxenye elandelayo yakhiwa nguBhinuwi, indodana kaHenadadi, kusukela endlini ka-Azariya kuze kuyofika ejikeni logange.
UPhalali, indodana ka-Uzayi, wakha ingxenye elandelayo, kusukela ejikeni logange nombhoshongo wesigodlo esasingenhla eduze negceke labaqaphi. Emva kwakhe, uPhedayi, indodana kaPharoshi
nezisebenzi ezazihlala ethempelini e-Oferi, bakha kabusha ingxenye emalungana neSango Lamanzi, empumalanga yejika lombhoshongo. Lokhu kwakuseduze nengxenye yomuzi okwakuthiwa yi-Ofeli, lapho kwakuhlala khona amadoda ayesebenza ethempelini.
Ingxenye elandelayo esuka malungana nombhoshongo omkhulu oqaphe ithempeli kuze kuyofika eduze kodonga oluseduze ne-Ofeli, yakhiwa ngamadoda aseThekhowa. Lokho kwase kuyingxenye yawo yesibili.
Ngenhla kweSango Lehhashi, kwakha abaphristi, yilowo nalowo akha phambi komuzi wakhe.
Ingxenye elandelayo yakhiwa nguZadoki, indodana ka-Imeri, ngoba yayiphambi komuzi wakhe. Ingxenye elandelayo yakhiwa nguShemaya, indodana kaShekhaniya, umlindi wesango iMpumalanga.
Ingxenye elandelayo yakhiwa nguHananiya, indodana kaShelemiya noHanuni, indodana kaZalafi yesithupha. Ingxenye elandelayo yakhiwa nguMeshulamu, indodana kaBherekhiya, ngoba yayiphambi komuzi wakhe.
Ingxenye elandelayo yakhiwa nguMalikhija, umkhandigolide, kusukela endlini eyayisetshenziswa ngamadoda ayesebenza ethempelini nabahwebi, eyayingasesangweni iMifikhadi, eduze nendlu ephezu kogange, ejikeni elisenyakatho mpumalanga yalo.
Abakhandigolide, nabahwebi bakha ingxenye yokugcina, kusukela endlini esejikeni kuze kuyofika eSangweni Lezimvu.
Kwathi ukuba uSanibhalathi ezwe ukuthi sase silwakha kabusha ugange, wathukuthela wagana unwabu, wabhodla umlilo, wabaklolodela abaJuda.
Wakhuluma nabangani bakhe nempi eSamariya, wathi: “Benzani laba baJuda abantekentekana na? Ngabe bazokwakha kabusha izinto? Bazokwenza imihlatshelo na? Bazoyiqeda ngosuku na? Ngabe bazovuselela amatshe engqumbini yamabibi, bese beshisela phezu kwawo na?”
UThobiya, umAmoni, wema eduze kwakhe wakloloda, wathi: “Ngisho bengazakha kabusha lezi zingange, uma kukhwela impungushe phezu kwazo ziyomane ziziwele!”
Ngase ngikhuleka, ngithi: “Nkulunkulu wami, yizwa ukuthi basedelela kanjani, uyibuyisele kubo inhlamba yabo, ubanikele babe njengempango ezweni lokuthunjwa.
Ungabaxoleli izono zabo, necala labo ungalesuli phambi kwakho, ngokuba bakwedelele phambi kwabakhi.”
Saqhubeka nokwakha, saphumelela ukulwakha kabusha ugange lwaze lwaphakathi nendawo ubude, ngoba abantu babenomdlandla wokusebenza.
Lapho uSanibhalathi, uThobiya, ama-Arabhu, ama-Amoni nama-Ashidodi, bezwa ukuthi ugange eJerusalema luyakhuphuka nokuthi izimfa ziyavalwa, bathukuthela kakhulu,
base bakha uzungu lokuza kanyekanye bazolwa nalo iJerusalema, badale inxushunxushu.
Sakhuleka kuNkulunkulu wethu, sabeka abaqaphi ukulinda ubusuku nemini.
UJuda wathi: “Amandla abathwala imithwalo aphelile, maningi amabibi, asisakwazi ukuqhubeka sakhe kabusha ugange.”
Izitha zethu zathi: “Sizobazuma, sibathelekele bengazelele, sibabulale, ungabe usaqhubeka umsebenzi.”
AbaJuda ababakhelene nazo, bafika basixwayisa kaninginingi, bethi: “Zizofika zivela ezindaweni zonke ezihlala kuzo zizomelana nathi.”
Ngase ngimisa abantu ngokwemindeni yabo, ngezansi ezindaweni ezisemuva kogange nakwezisobala, benezinkemba, imikhonto neminsalo yabo.
Ngakubona lokho, ngaphakama, ngathi kubaholi nezikhulu nakubantu bonke: “Ningazesabi. Khumbulani iNkosi enamandla neyesabekayo, nilwele abafowenu, abantwana benu, omkenu nemizi yenu.”
Izitha zethu zezwa ukuthi sesizwile ngozungu lwazo, nokuthi uNkulunkulu uliphunzisile icebo lazo. Sonke sabuyela ogangeni, kwayilowo nalowo emsebenzini wakhe.
Kusukela ngalolo lusuku enye ingxenye yezinceku zami yakha, enye yaphatha imikhonto, amahawu, iminsalo nezivikelo zesifuba. Abaholi babeseka abendlu yakwaJuda,
ababakha kabusha ugange. Ababethwala imithwalo, bathwala imithwalo yabo ngesandla esisodwa ngesinye bephethe izikhali.
Bonke abakhayo babegaxe izinkemba ezinqulwini zabo, beqhubeka bakha. Indoda eyayihlaba umkhosi ngecilongo, yayiseduze kwami.
Ngathi kubaholi nezikhulu nakubantu: “Umsebenzi mkhulu, wendlalekile, thina siqhelelene kakhulu ogangeni.
Uma nizwa kuhlatshwa umkhosi ngecilongo, anobuthana ngakimi. UNkulunkulu wethu uzosilwela.”
Saqhubeka kanjalo nokusebenza, enye ingxenye ihlome ngemikhonto ilungele ukulwa, kusukela entathakusa kuze kuqhakaze izinkanyezi.
Ngaleso sikhathi ngabuye ngayala bonke abantu, ngathi: “Yilowo nalowo nenceku yakhe mabahlale phakathi eJerusalema ukuze basiqaphe ebusuku, basebenze emini.”
Mina-ke, abafowethu, izinceku zami namadoda ayengabaqaphi ayengilandela, asizange sizikhumule izimpahla zethu; yilowo nalowo wayephethe isikhali ngesandla sakhe.
Kwaba khona ukukhala kwabantu okukhulu, amadoda nomkabo bekhononda ngabafowabo abangabaJuda.
Ngokuba kwakukhona labo ababethi: “Thina namadodana ethu namadodakazi ethu sibaningi, masithole okusanhlamvu ukuze sidle, siphile.”
Kwakukhona futhi nabathi: “Sibambise ngamasimu ethu, ngezivini zethu, nangemizi yethu, ukuze sithole okusanhlamvu ngenxa yendlala.”
Abanye babethi: “Sibambise ngamasimu ethu nezivini zethu ukuze sithole imali yokukhokha intela enkosini.
Siyafana nabafowethu, nezingane zethu ziyafana nezabo, kodwa siphoqa amadodana ethu namadodakazi ethu ukuba abe yizigqila; asinamandla, amasimu ethu nezivini zethu manje sekungokwabanye.”
Ngathukuthela kakhulu lapho ngizwa izikhalo zabo namazwi abo.
Ngacabangisisa ngalolu daba, izikhulu nabaholi ngababeka icala, ngathi kubo: “Nina nonke nibakhokhisa inzalo abantu bakini.” Ngabiza ibandla elikhulu ukuba libhekane nabo.
Ngathi kulo: “Sisanda kubahlenga ngokusemandleni ethu abafowethu abangabaJuda, abebekade bethengiselwe ezinye izizwe; manje senidayisa ngabafowenu, sekufanele sibathenge kini na?” Bathula bathi du, ngoba bengenamazwi okuphendula.
Ngase ngithi: “Le nto eniyenzayo yimbi. Beningehambe yini ngokumesaba uNkulunkulu wethu ukuze nigweme ukuhlanjalazwa ngabezizwe, abayizitha zethu na?
Mina, abafowethu nezinceku zami, sabetsheleka imali nokusanhlamvu. Masikuyeke ukubiza inzalo.
Buyiselani kubo khona namhlanje amasimu abo, izivini zabo, izingadi zabo zeminqumo, izindlu zabo, inzalo yemali yabo, okusanhlamvu, iwayini namafutha ebenibaqola khona.”
Baphendula bathi: “Sizobabuyisela konke, futhi singafuni lutho kubo. Sizokwenza njengoba ushilo.” Ngase ngibiza abaphristi, ngabafungisa ukuba benze njengoba bethembisile.
Ngase ngithintitha umphetho wengubo yami, ngathi: “Sengathi uNkulunkulu angamvuthulula kanjalo noma ngubani ongeyukusigcina lesi sivumelwano; endlini nasempahleni, angamshiyeli lutho.” Yonke inhlangano yaphendula yathi: “Amen!” Yadumisa uSimakade. Yenza njengoba yayethembisile.
Kusukela ngosuku inkosi u-Arithahishashitha eyangibeka ngalo ngaba ngumbusi wabo ezweni lakwaJuda, ngonyaka wama-20 wokubusa kwayo, kuze kube ngunyaka wama-32, okuyiminyaka eli-12 isiyonke, mina nabafowethu asidlanga sabelo sombusi.
Ababusi engibalandelayo babethwesa abantu umthwalo onzima, befuna intela yokudla newayini, ngaphezu kwezinhlamvu ezingama-40 zesiliva abebevele bezikhokha. Ngisho nezinceku zabo zabacindezela abantu, kodwa mina angenzanga kanjalo, ngenxa yokwesaba uNkulunkulu.
Ngasebenza ngokuzikhandla emsebenzini wami wokwakha kabusha ugange, angizange ngizithengele nsimu. Zonke izinceku zami zazimatasatasa ekwakhiweni kabusha kogange.
Ngaphezu kwalokho ngangidla nabantu abayi-150, abaJuda nezikhulu, ngaphandle kwalabo abavela ezizweni esakhelene nazo.
Ngalolo nalolo suku kwakuhlatshwa inkabi nezimvu zekhethelo eziyisithupha, ngilungiselwe nezinkukhu. Kwakukhishwa iwayini eliningi, kanye ezinsukwini eziyishumi. Ngangazi ukuthi abantu bathwele umthwalo onzima kangakanani, ngakho-ke angizange ngisifune isabelo sombusi.
Nkulunkulu wami, ngikhumbule ngakho konke okuhle engikwenzele laba bantu.
Kwathi ukuba bezwe oSanibhalathi, uThobiya, uGeshemi umArabhu, nazo zonke izitha zethu ukuthi sengilwakhile ugange, futhi akusasele sikhala kulo, noma-ke ngaleso sikhathi ngangingakazifaki izicabha emasangweni,
uSanibhalathi noGeshemi bangithumelela umyalezo othi: “Woza sihlale phansi sidingide lolu daba komunye wemizana esethafeni e-Ono.” Kepha babehlose ukungenza isilo sengubo.
Ngathumela izigijimi kubo, ngathi: “Ngimatasatasa ngomsebenzi omkhulu, ngeke ngehle ngize lapho kini. Ngizowuyekelani umsebenzi engiwenzayo, ngehle ngize lapho kini na?”
Bangithumelela umyalezo ofanayo kwaze kwaba amahlandla amane, nami ngilokhu ngibabuyisela impendulo efanayo.
Ngehlandla lesihlanu, uSanibhalathi wangithumelela lowo myalezo ngenceku yakhe, kodwa kwakuyincwadi engavaliwe.
Kwakulotshwe kuyo ukuthi: “Kunamahlebezi ezizweni athi wena nabaJuda niceba ukuvukela inkosi, yingakho wakha kabusha ugange nje; ngokwalowo mbiko wena uzoba yinkosi yabo, noGashimu uyawafakazela lawo mahlebezi.
Usuqoke abaphrofethi eJerusalema abazommezela ngawe, bathi: ‘Kunenkosi kwaJuda!’ Lawo mahlebezi angahle afinyelele enkosini, ngakho-ke woza sizohlangana, sikhulume.”
Ngase ngithumela kuye, ngathi: “Lokho okushoyo akusilona iqiniso; nguwena nje ozakhele lezo zinto.”
Ngokuba bonke babefuna ukusethusa, bethi: “Bazodikibala bayeke ukusebenza.” Ngakhuleka ngathi: “Nkulunkulu, qinisa izandla zami.”
Ngelinye ilanga ngavakashela uShemaya, indodana kaDelaya owayezalwa nguMehethabheli. UShemaya wayengaphumi emzini wakhe. Waphrofetha wathi: “Masihlangane endlini kaNkulunkulu, ngaphakathi ethempelini, sihluthulele iminyango yalo, ngokuba bayeza ukuzokukubulala. Impela bazofika ngalobu busuku ukuzokukubulala.”
Ngamphendula ngathi: “Ngabe indoda enjengami nje ingabaleka yini na? Ngabe indoda efana nami ingangena yini ethempelini ukuze isindise impilo yayo na? Ngeke ngingene kulo.”
Ngabona ukuthi wayengathunywanga nguNkulunkulu, kodwa wayeqashwe nguThobiya noSanibhalathi ukuba asho leso siphrofetho ngami.
Babemqashe ngenhloso yokungesabisa ukuze ngenze isono ngokwenza kanjalo, bangigxibhe, bangithele ngehlazo.
“Nkulunkulu wami, khumbula okwenziwe nguThobiya noSanibhalathi, ungiphindiselele kubo nakumphrofethikazi uNowadiya, nakwabanye abaphrofethi abazama ukungesabisa.”
Umsebenzi wokwakhiwa kabusha kogange waphela mhla zingama-25 ngenyanga u-Eluli, wathatha izinsuku ezingama-52.
Kwathi lapho zonke izitha zethu zizwa ngalokho, nazo zonke izizwe esasakhelene nazo, zesaba kakhulu, zadikibala, ngokuba zabona ukuthi lowo msebenzi waphumelela ngosizo lukaNkulunkulu wethu.
Phezu kwalokho izikhulu zakwaJuda, ngalezo zinsuku, zazibhalelana noThobiya,
ngokuba abaJuda abaningi babenesibopho sesifungo ababesenze naye, ngoba wayeganwe yindodakazi kaShekhaniya, indodana ka-Ara, indodana yakhe, uJehohanani, iganwe yindodakazi kaMeshulami, indodana kaBherekhiya.
Phambi kwami, babehlale betusa izenzo zakhe ezinhle; bembikela ngakho konke engangikusho. UThobiya wayengithumelela izincwadi zokungesabisa.
Kwathi sekuphelile ukwakhiwa kogange lomuzi, kwafakwa namasango, kwamiswa abalindisango, abaculi nabaLevi,
umfowethu uHanani ngambeka ukuba engamele iJerusalema, noHananiya abe ngumengameli wenqaba, ngokuba uHananiya wayeyindoda ethembekile, emesabayo uNkulunkulu kunabaningi.
Ngathi kubo: “Amasango aseJerusalema mabangawavuli lize liphakame ilanga, kusihlwa basheshe bavale imigoqo nezicabha, ngesikhathi abaqaphi besaqaphile ezindaweni zabo. Ngabuye ngathi mabaqoke abaqaphi phakathi kwabantu abahlala eJerusalema, babamise ezindaweni ezithile, abantu behle benyuka bezungeza indawo eseduze nemizi yabo.”
IJerusalema lalingumuzi omkhulu, linendawo ebanzi, kodwa zaziyingcosana kakhulu izakhamuzi ezazihlala kulo; yayingeminingi imizi eyayakhiwe kabusha.
UNkulunkulu wangenza ngaba nevuso enhliziyweni yami, ngase ngimemela abantu embizweni yeziphathimandla nezikhulu nabantu, ukuba bazobhalisa ngokwemindeni yabo. Ngathola umlando wolibo lwalabo ababebuye kuqala. Nakhu engakutholayo:
Laba ngabantu besifundazwe ababebuye ekuthunjweni nguNebukhadinezari, inkosi yaseBhabhele, bebuyela eJerusalema nakwaJuda. Yilowo nalowo wabuyela emzini wakubo;
bebuya noZerubhabhele, uJeshuwa, uNehemiya, u-Azariya, uRahamiya, uNahamani, uMoridekhayi, uBhilishani, uMisipherethi, uBhigivayi, uNehumi noBhahana. Inani labantu bakwa-Israyeli yileli:
abozalo lukaPharoshi bayizi-2 172,
abolukaShefathiya bangama-372,
aboluka-Ara bangama-652,
abolukaPhahathi Mowabi ozalweni lukaJeshuwa noJowabe bayizi-2 818,
aboluka-Elami bayi-1 254,
abolukaZathu bangama-845,
abolukaZakhayi bangama-760,
abolukaBhinuyi bangama-648,
abolukaBhebayi bangama-628,
aboluka-Azigadi bayizi-2 322,
aboluka-Adonikamu bangama-667,
abolukaBhigivayi bayizi-2 067,
aboluka-Adini bangama-655,
aboluka-Atheri, wozalo lukaHezekiya, bangama-98,
abolukaHashumi bangama-328,
abolukaBhezayi bangama-324,
abolukaHarifi bayi-112,
abolukaGibheyoni bangama-95.
Amadoda aseBhethlehema naseNethofa ayeyi-188,
awase-Anathothi eyi-128,
awaseBhethi Azimavethi engama-42,
awaseKiriyathi Jeharimi, eKhefira naseBheherothi engama-743,
awaseRama naseGebha engama-621,
awaseMikhimashi eyi-122,
awaseBhethele nase-Ayi eyi-123,
amanye akwenye iNebho engama-52,
amanye akwenye i-Elami eyi-1 254,
awase-Arimi engama-320,
awaseJerikho engama-345,
awaseLodi, awaseHadidi nase-Ono engama-721,
awaseSenaya eyizi-3 930.
Abaphristi: abozalo lukaJedaya, ozalweni lukaJeshuwa, bengama-973,
aboluka-Imeri beyi-1 052,
abolukaPhashuri beyi-1 247,
abolukaHarimi beyi-1 017.
AbaLevi: abozalo lukaJeshuwa, ozalweni lukaKhadimiyeli, emndenini kaHodaviya, babengama-74.
Abaculi: abozalo luka-Asafa babengama-148.
Abalindisango: abozalo lukaShalumi, baka-Atheri, bakaThalimoni, baka-Akhubhi, bakaHathitha nabakaShobhayi babeyi-138.
Izisebenzi zasethempelini yilezi: abozalo lukaZiha, lukaHashufa, lukaThabhawothi,
lukaKerosi, lukaSiya, lukaPhadoni,
lukaLebana, lukaHagaba, lukaShalimayi,
lukaHanani, lukaGideli, lukaGahari,
lukaRewaya, lukaRezini, lukaNekoda,
lukaGazami, luka-Uza, lukaPhaseya,
lukaBhesayi, lukaMewunimi, lukaNefusimi,
lukaBhakibhuki, lukaHakufa, lukaHarihuri,
lukaBhaziluthi, lukaMehida, lukaHarisha,
lukaBharikosi, lukaSisera, lukaThema,
lukaNeziya nolukaHathifa.
Abozalo lwezinceku zikaSolomoni yilaba: abozalo lukaSothayi, lukaSoferethi, lukaPherida,
lukaJahala, lukaDarikoni, lukaGideli,
lukaShefathiya, lukaHathili, lukaPhokherethi Hazebhayimi noluka-Amoni.
Izisebenzi zasethempelini, abozalo lwezisebenzi zikaSolomoni, babengama-392.
Laba abalandelayo babevela eThelimela, eTheliharisha, eKherubhi, e-Adoni, nase-Imeri. Kodwa behluleka ukuveza isiqiniseko sokuthi bangabozalo lwakwa-Israyeli yini:
abozalo lukaDelaya, lukaThobiya nolukaNekoda babengama-642.
Ababevela kubaphristi yilaba: abozalo lukaHobhaya, lukaHakozi, nolukaBharizilayi owayeganwe yindodakazi kaBharizilayi umGileyadi, owayebizwa ngalelo gama.
Labo ababefuna imininingwane yemindeni yabo, kodwa abayitholanga, ngakho-ke abafakwanga ohleni lwabaphristi, bathathwa ngokuthi kabahlanzekile.
Ngakho-ke umbusi wabayala ukuba bangakudli ukudla okubusisiweyo, kuze kube nomphristi one-Urimi neThumimi.
Sebebonke babeyizi-42 360,
ngale kwezinceku zabo zesilisa eziyizi-7 337 nezesifazane; babenabaculi besilisa nabesifazane abangama-245.
Babenamahhashi angama-736, iminyuzi engama-245,
amakameli angama-435 nezimbongolo eziyizi-6 720.
Ezinye zezinhloko zemindeni zanikela esikhwameni sokwenza umsebenzi. Umbusi wanikela esikhwameni ngamadarike egolide ayinkulungwane, imicengezi engama-50, nezingubo zokugqoka zabaphristi ezingama-530.
Ezinye izinhloko zemindeni zanikela esikhwameni somsebenzi ngamadarike egolide ayizi-20 000 nawomina besiliva abayizi-2 200.
Sekukonke okwanikelwa ngabantu kwakungamadakire egolide ayizi-20 000, omina besiliva abayizi-2 000 nezingubo zabaphristi ezingama-67.
Abaphristi, abaLevi, abalindisango, abaculi, izisebenzi zasethempelini, abanye abantu no-Israyeli wonke bahlala emizini yakubo. Ngenyanga yesikhombisa, abantu base bezinzile emizini yakubo.
Abantu base behlangana, kwangathi bamuntu munye, egcekeni elaliphambi kweSango Lamanzi. Bamtshela u-Ezra, umbhali, ukuba alethe incwadi yomthetho kaMose, uSimakade awunika u-Israyeli.
Kwakulusuku lokuqala lwenyanga yesikhombisa. U-Ezra, umphristi, wayiletha incwadi yomthetho phambi kwebandla, abesilisa, nabesifazane nabo bonke ababezwa, baqonde.
Wafunda kuyo ebheke ngaseshashalazini elalingaphambi kweSango Lamanzi. Waqala entathakusa kwaze kwaba semini, phambi kwabesilisa nabesifazane nalabo abasebenokuqonda.
U-Ezra, umbhali, wayemi phezu kwebhesituli yokhuni, yenzelwe lowo msebenzi. Eceleni ngakwesokunene sakhe kwakumi uMathathiya, uShema, u-Anaya, u-Uriya, uHilikiya noMahaseya; ngakwesokhohlo sakhe kunguPhedaya, uMishayeli, uMalikhija, uHashumi, uHashibhadana, uZekhariya noMeshulami.
U-Ezra wema phezu kobamba, wayivula incwadi phambi kwabo bonke abantu bembuka, ngoba wayemi ngenhla kwabo. Kwathi lapho eyivula, bonke basukuma.
U-Ezra wamdumisa uSimakade uNkulunkulu, bonke abantu baphendula, bathi: “Amen! Amen,” bephakamise izandla zabo, bakhothama, bathi mbo ngobuso emhlabathini, bakhuleka kuNkulunkulu.
AbaLevi: uJeshuwa, uBhani, uSherebhiya, uJamini, u-Akhubhi, uShebhethayi, uHodiya, uMahaseya, uKhelitha, u-Azariya, uJozabhadi, uHanani noPhelaya, bachazela abantu umthetho; ngesikhathi abantu bemi endaweni yabo.
Bafunda encwadini yomthetho kaNkulunkulu, bawuhumusha ukuze abantu bawuqonde ukuthi uthini.
Abantu lapho bezwa amazwi omthetho, balila kodwa uNehemiya umbusi, no-Ezra umphristi nombhali, nabaLevi ababefundisa abantu bathi kubo: “Ningakhali, ningalili, ngokuba lolu lusuku lungcwele kuSimakade uNkulunkulu wenu.”
Wayesethi kubo: “Hambani nidle izibiliboco, niphuze newayini elimtoti, nabele nalabo abantulayo, ngokuba lolu lusuku olumiselwe uSimakade iNkosi yethu, ningabi lusizi, ngokuba intokozo eniyiphiwa nguSimakade iyinqaba yenu.”
NabaLevi babaqinisa idolo, bathi: “Yekani ukukhala, ningabe nisadabuka, ngokuba namuhla lusuku olungcwele.”
Bonke abantu bahamba bayokudla, baphuza, bapha abantulayo ukudla, bajabula kakhulu, ngokuba babekuzwile abakutshelwayo.
Ngosuku olulandelayo, zonke izinhloko zemindeni, abaphristi nabaLevi, beza ku-Ezra, umbhali, ukuze abafundise kabanzi amazwi omthetho.
Bafumanisa kulotshiwe emthethweni uSimakade ayeyale ngawo uMose ukuthi abantu bakwa-Israyeli kumele bahlale emadokodweni ngesikhathi somkhosi, ngenyanga yesikhombisa.
Kumele bamemezele eJerusalema nakuyo yonke eminye imizi, bathi: “Khuphukelani ezintabeni, nigawule amagatsha omnqumo nomnqumo wasendle, uthathawe, amasundu nezinye izihlahla, nakhe amadokodo njengokulotshiweyo.”
Abantu base bephuma beyogawula amagatsha, yilowo nalowo wazakhela idokodo ophahleni lwendlu yakhe, emagcekeni abo, emagcekeni endlu kaNkulunkulu, naseshashalazini elingaphambi kweSango Lamanzi, nelingaphambi kweSango Lika-Efrayimi.
Lonke ibandla lababekade bethunjiwe, lakha amadokodo, lahlala kuwo. Kwakungokokuqala kwenzeka kanje, kusukela ezinsukwini zikaJoshuwa, indodana kaNuni, kuze kube namuhla, abantu bakwa-Israyeli babengakaze benze kanjalo. Umkhosi bawugubha ngenjabulo enkulu.
Nsuku zonke, kusukela osukwini lokuqala lomkhosi kuze kube ngolokugcina, wayefunda encwadini yomthetho kaNkulunkulu. Bawugubha izinsuku eziyisikhombisa, kwathi ngosuku lwesishiyagalombili bahlangana, ukuze bawuvale ngesizotha umkhosi njengoba kubekwe emthethweni.
Kwathi ngosuku lwama-24, lwaleyo nyanga, abakwa-Israyeli bahlangana ngosuku lokuzila ukudla, bembatha indwangu eyisaka, bazithela ngenhlabathi.
Abozalo luka-Israyeli bazehlukanisa kubo bonke abezizwe, bama, bavuma izono zabo nobubi obenziwa ngokhokho babo.
Bama ezindaweni zabo, kwase kufundwa umthetho kaSimakade uNkulunkulu wabo, kwathatha ingxenye yosuku; ngenye ingxenye yosuku bavuma izono zabo, badumisa uSimakade uNkulunkulu wabo.
Kwase kuma endaweni ephakeme yabaLevi; uJeshuwa, uBhani, uKadimiyeli, uShabhaniya, uBhuni, uSherebhiya, uBhani noKhenani. Bamemeza ngezwi elikhulu kuSimakade uNkulunkulu wabo.
AbaLevi: uJeshuwa, uKadimiyeli, uBhani, uHashabhineya, uSherebhiya, uHodiya, uShebhaniya noPhethahiya, bama kwenye indawo ephakeme, bamemeza bathi: “Sukumani nidumise uSimakade uNkulunkulu wenu, kusukela phakade, kuze kube phakade.” “Malibongwe iGama lakho elidumisekayo neliphakeme phezu kwakho konke ukubonga nokudumisa.”
“Nguwe wedwa onguSimakade, nguwe owenza izulu, izulu lamazulu, nayo yonke imikhosi ekulo, umhlaba nakho konke okukuwo, nezilwandle nakho konke okukuzo, konke ukuphe ukuphila, imikhosi yasezulwini iyakukhothamela.”
“Wena unguSimakade, uNkulunkulu owakhetha u-Abhrama, wamsusa e-Uri lamaKhaledi, waguqula igama lakhe, waba ngu-Abhrahama.
Wayithola inhliziyo yakhe yethembekile kuwe, wenza isivumelwano naye, wethembisa ukwabela abozalo lwakhe izwe lamaKhanani, amaHithi, ama-Amori, amaPherizi, amaJebusi namaGirigashi, wakufeza owawukwethembisile ngokuba ulungile.”
“Wakubona ukuhlupheka kokhokho bethu eGibhithe nasoLwandle Lomhlanga, wakuzwa ukunxusa kwabo.
Wenza izibonakaliso nezimangaliso ezinkulu phambi kukaFaro nezinceku zakhe, nabo bonke abantu baseGibhithe, ngoba wawazi ukuthi babaphathe ngonya olunjani abantu bakho. Wazakhela igama elisamile kuze kube namuhla.
Ulwandle waludabula kabili ukuze bawele behamba emhlabathini owomileyo, kodwa ababehubha u-Israyeli wabaphonsa ekujuleni, bazika njengetshe emanzini anamandla.
Emini wawubahola ngensika yefu, ebusuku ngensika yomlilo eyayibakhanyisela endleleni ababehamba kuyo.”
“Wehlela entabeni iSinayi, wakhuluma nabo usezulwini. Wabanika izehlulelo ezilungileyo, imithetho eliqiniso, izimiso nemiyalelo emihle.
Wabazisa ngeSabatha lakho elingcwele, wabashayela imithetho, izimiso nemiyalelo ngenceku yakho uMose.
Lapho belambile, wabanika isinkwa esivela ezulwini, waqhumisa isiphethu edwaleni, ukuze baqede ukoma. Wabatshela ukuba bangene ezweni owawubethembise lona ngesifungo, ukuthi uyobanika lona.”
“Kepha bona nokhokho bethu benza ububi, baziphakamisa, baba nenkani, bayephula imiyalelo yakho.
Benqaba ukukulalela, abaze bazikhumbula izimangaliso owazenza phakathi kwabo, kepha baqinisa amakhanda, bazimisela ukubuyela ebugqileni. Kodwa Wena unguNkulunkulu othethelelayo; onomusa nesihe, uyephuza ukuthukuthela, ugcwele isihawu, ngakho-ke awuzange ubalahle,
ngisho lapho sebezibumbele umfanekiso wethole, bethi: ‘Lona nguNkulunkulu wethu, owasikhipha eGibhithe,’ nalapho benza amahlazo esabekayo.
“Nokho awubalahlanga ehlane, ngenxa yobubele bakho obukhulu. Emini insika yefu ayiyekanga ukubahola endleleni yabo, nasebusuku insika yomlilo yaqhubeka yabakhanyisela endleleni yabo.
Wabanika uMoya wakho omuhle, ukubafundisa. Awuzange ubancishe imana yakho, wabuye wabanika amanzi okucima ukoma.
Iminyaka engamashumi amane, wabanakekela ehlane; abantulanga lutho, izingubo zabo aziguganga, nezinyawo zabo azivuvukalanga.
“Wanikela kubo imibuso nezizwe, wandisa imingcele yabo. Badla izwe likaSihoni, inkosi yaseHeshibhoni nelika-Ogi, inkosi yaseBhashani.
Izizukulwane zabo wazandisa njengezinkanyezi esibhakabhakeni, waziletha ezweni owawulethembise okhokho bazo ukuthi ziyongena kulo, zilidle.
Izizukulwane zabo zangena kulo, zahlala. Labo ababehlala kulelo lizwe, wabenza bakhonza kuzo. AmaKhanani namakhosi awo nabanye abantu ababehlala ezweni, wabanikela kuzo ukuba zibaphathe ngokuthanda kwazo.
Banqoba imizi ebiyelweyo nezwe elivundileyo; badla izindlu ezigcwele yonke into enhle, imithombo embiweyo, izivini, amasimu emikhiwane nezithelo eziningi ezidliwayo. Badla, basutha, banonophala, bawuthokozela umusa wakho omkhulu.
“Kodwa abalalelanga, bakuhlubuka, bawufulathela umthetho wakho. Babulala abaphrofethi bakho, ababebagqugquzela ukuba babuyele kuwe; benza amahlazo enyanyekayo.
Wawusubanikela ezitheni zabo ukuba zibacindezele. Kepha lapho sebesenhluphekweni, bakhala kuwe, wabezwa usezulwini, ngesihawu sakho esikhulu, wabanika abakhululi ukubakhulula ezitheni zabo.
“Kepha kuthe sebehleli ngokuthula, babuye benza okubi emehlweni akho. Wawusubayekela ezitheni zabo ukuze zibabuse. Kwathi lapho sebekunxusa, wabezwa usezulwini, ngesihawu sakho wabakhulula futhi.
Wabexwayisa ukuba babuyele emthethweni wakho, kodwa baba nenkani, abaze bayilalela imiyalelo yakho nezehlulelo zakho. Bona bephula izimiso zakho, okuthi uma umuntu ezigcina aphile. Bakufulathela, baqinisa amakhanda, benqaba ukukulalela.
Wababekezelela iminyaka eminingi, wabexwayisa ngoMoya wakho, wakhuluma ngabaphrofethi bakho, kodwa abakugqizanga qakala lokho, ngakho-ke wabanikela kubantu abakhelene nabo.
Nokho ngomusa wakho omkhulu, awubabhubhisanga, futhi awubalahlanga, ngokuba unguNkulunkulu onesihawu nomusa.
“Ngakho-ke, Nkulunkulu wethu, Nkulunkulu omkhulu, onamandla nowesabekayo, uhlale usigcina njalo isivumelwano sakho somusa. Yonke le nkathazo esehlelayo mayingabi ncane ebusweni bakho, thina namakhosi ethu, nezikhulu zakithi, nabaphristi bakithi, nabaphrofethi, nawokhokho, nabo bonke abantu bakho, kusukela ezinsukwini zamakhosi ama-Asiriya kuze kube namuhla.
Nokho bewufanele ukusehlisela zonke lezo zinto; wenze okulungileyo, thina senza okubi.
Amakhosi ethu, abaholi bethu, abaphristi nokhokho abawugcinanga umthetho wakho; abayinakanga imiyalelo yakho nalapho ubaxwayisa.
Ngisho embusweni wabo, ebuhleni obukhulu obenzele bona, nasezweni elibanzi nelivundileyo obanike lona, abazange bakukhonze, abaphendukanga emisebenzini yabo emibi.
“Awubheke nje, siyizigqila namuhla, izigqila ezweni owalinika okhokho bethu ukuze badle izithelo zalo, nokunye okuhle elikukhiqizayo. Bheka-ke, sesiyizigqila manje.
Ngenxa yezono zethu, isivuno salo esikhulu sesidliwa ngamakhosi owabeke phezu kwethu. Abusa thina nemfuyo yethu ngokuthanda kwawo. Sisenhluphekweni enkulu.”
“Ngenxa yakho konke lokho, manje sesenza isivumelwano, sisibhala phansi, abaholi bethu, abaLevi bethu nabaphristi bethu bashaya isigxivizo.”
Abashaya isigxivizo kwaba yilaba: uNehemiya umbusi, indodana kaHakaliya, uZedekiya,
uSeraya, u-Azariya, uJeremiya,
uPhashuri, u-Amariya, uMalikhiya,
uHathushi, uShebhaniya, uMalukhi,
uHarimi, uMeremothi, u-Obhadiya,
uDaniyeli, uGinethoni, uBharukhi,
uMeshulamu, u-Abhiya, uMijamini,
uMahaziya, uBhiligayi noShemaya; laba babe ngabaphristi.
AbaLevi: uJeshuwa, indodana ka-Azaniya, noBhinuwi wamadodana kaHenadadi, noKhadimiyeli,
nabafowabo uShebhaniya, uHodiya, uKhelitha, uPhelaya, uHanani,
uMikha, uRehobhe, uHashabhiya,
uZakhuri, uSherebhiya, uShebhaniya,
uHodiya, uBhani noBheninu.
Izinhloko zabantu: uPharoshi, uPhahathi Mowabi, u-Elamu, uZathu, uBhani,
uBhuni, u-Azigadi, uBhebayi,
u-Adoniya, uBhigivayi, u-Adini,
u-Atheri, uHezekiya, u-Azuri,
uHodiya, uHashumi, uBhezayi,
uHarifi, u-Anathothi, uNobhayi,
uMagiphiyashi, uMeshulamu, uHeziri,
uMeshezabheli, uZadoki, uJaduwa,
uPhelathiya, uHanani, u-Anaya,
uHosheya, uHananiya, uHashubhi,
uHaloheshi, uPhiliha, uShobheki,
uRehumi, uHashabhina, uMahaseya,
u-Ahiya, uHanani, u-Anani,
uMalukhi, uHarimi noBhahana.
Abanye abangagagulwanga ngamagama, abaphristi, abaLevi, abalindisango, abaculi, izisebenzi zasethempelini, nabo bonke ababezehlukanisile nabezizwe, bazihlanganisa nomthetho kaNkulunkulu, nomkabo nabantwana babo, bonke ababenolwazi nokuqonda,
bahlanganyela nabafowabo nezikhulu zabo, benza isifungo esimbaxambili, sokuthi bazohamba ngomthetho kaNkulunkulu awunika uMose, inceku yakhe, nokuthi bazoyigcina yonke imiyalelo kaSimakade iNkosi yabo, nayo yonke imithetho nezimiso zakhe; uma besephula leso sifungo, siyophenduka isiqalekiso.
“Asiyukubaganisela abezizwe amadodakazi ethu, futhi ngeke siwathathele amadodana ethu abafazi kubo.
Uma abezizwe besilethela okuthengisayo noma yini okusanhlamvu ngesabatha, asiyukukuthenga ngesabatha noma ngaluphi usuku olungcwele, futhi asiyukuvuna ngonyaka wesikhombisa; sesule zonke izikweletu ngalowo nyaka.
“Siyazibophezela ukuthi njalo ngonyaka, siyonikela ingxenye yesithathu yeshekeli, ibe ngeyomsebenzi wendlu kaNkulunkulu wethu,
eyosetshenziselwa ukubhaka isinkwa esibekwa ethempelini, neminikelo yansuku zonke yokusanhlamvu neyokushiswa, neminikelo yangeSabatha, nemikhosi yokwethwasa kwenyanga, neminye imikhosi emisiweyo, neminikelo yesono eyenzelwa inhlawulo yezono zika-Israyeli, nawo wonke umsebenzi wasendlini kaNkulunkulu wethu.
“Thina baphristi, abaLevi, nabantu bonke, senze unkatho lokuthi minyaka yonke silethe umnikelo wezinkuni endlini kaNkulunkulu wethu, ngokwezindlu zokhokho, ngezikhathi ezinqunyiweyo, ukuze zibaswe phezu kwe-althare likaSimakade uNkulunkulu wethu, njengokulotshwe emthethweni.
Unyaka nonyaka, sizibophezela ukwethula izithelo zokuqala zesivuno somhlabathi wethu nesemithi yonke enhlobonhlobo endlini kaSimakade.
Siyoletha kubaphristi abakhonza endlini kaNkulunkulu wethu, amazibulo amadodana ethu, awemfuyo yethu, njengoba kulotshiwe emthethweni, amazibulo emihlambi yethu, nawezimvu zethu.
Siyoletha futhi kumphristi emagunjini endlu kaNkulunkulu wethu, inhlama eyenziwe ngokusanhlamvu kwesivuno sokuqala, nezithelo zayo yonke imithi, iwayini elisha namafutha amasha. Siyoletha futhi kubaLevi okweshumi komhlabathi wethu, ngokuba ngabaLevi abaqoqa okweshumi emizini yonke.
Abaphristi bozalo luka-Aroni kumele bahambe nabaLevi ngesikhathi beqoqa okweshumi, abaLevi bathathe okweshumi kulokho okweshumi okulethiwe, bakuyise endlini kaNkulunkulu, emagunjini endlu yengcebo.
Abakwa-Israyeli nabaLevi bayoletha okweshumi kokusanhlamvu, okwewayini namafutha omnqumo emagunjini lapho kugcinwe khona izitsha zendlu engcwele, nalapho kuhlala khona abaphristi, abalindisango nabaculi. Asiyukuyishiya indlu kaNkulunkulu wethu.”
Abaholi babantu bahlala eJerusalema; abantu abaseleyo benza unkatho, bakhetha oyedwa kwabalishumi ukuba ayohlala eJerusalema, umuzi ongcwele, nabayisishiyagalolunye emizini yakubo.
Abantu babusisa bonke abantu abazinikela ukuhlala eJerusalema.
Nazi izinhloko zezifundazwe ezazihlala eJerusalema, kodwa emizini yakwaJuda bonke babehlala ezindaweni zabo: abakwa-Israyeli, abaphristi, abaLevi, izisebenzi zasethempelini, nabozalo lwezinceku zikaSolomoni.
EJerusalema kwakuhlala abathile bakwaJuda nabakwaBhenjamini: ozalweni lukaJuda: ngu-Athaya ka-Uziya, kaZakhariya, ka-Amariya, kaShefathiya, kaMahalalele wozalo lukaPherezi;
noMahaseya kaBharukhi, kaKholi Hoze, kaHazaya, ka-Adaya, kaJoyaribhi, kaZakhariya, indodana yomShiloni.
Bonke abozalo lukaPherezi ababehlala eJerusalema kwakungamadoda anamandla angama-468.
Abozalo lukaBhenjamini: nguSalu kaMeshulamu, kaJohedi, kaPhedaya, kaKolaya, kaMahaseya, ka-Ithiyeli, kaJeshaya.
Emva kwakhe: nguGabhayi noSalayi, bengama-928.
UJoweli, indodana kaZikhiri, wayengumphathi wabo, uJuda, indodana kaHasenuwa, wayephethe ingxenye entsha yomuzi.
Kubaphristi: nguJedaya, indodana kaJoyaribhi, uJakhini,
noSeraya kaHilikiya, kaMeshulamu, kaZadoki, kaMerayothi, ka-Ahithubi, umphathi wendlu kaNkulunkulu;
nabafowabo abaqhubeka benza umsebenzi wasethempelini, bengamadoda angama-822, no-Adaya kaJerohamu, kaPhelaliya, ka-Amizi, kaZakhariya, kaPhashuri, kaMalikhiya;
nabafowabo ababeyizinhloko zemindeni, bengamadoda angama-242, no-Amashisayi ka-Azareli, ka-Ahizayi, kaMeshilemothi, ka-Imeri;
nabafowabo, amaqhawe anamandla ayeyi-128. Umphathi wabo omkhulu kwakunguZabhidiyeli, indodana kaHagedolimi.
KubaLevi: uShemaya kaHashubhi, ka-Azirikamu, kaHashabhiya, kaBhuni;
uShabhethayi noJozabhadi beyizinhloko zabaLevi ababephethe umsebenzi wangaphandle wendlu kaNkulunkulu,
noMathaniya kaMikha, kaZabhidi, ka-Asafa, induna yomkhuleko wokubonga, noBhakibhukiya, owesibili phakathi kwabafowabo, no-Abhida kaShamuwa kaGalali kaJeduthuni.
Bonke abaLevi abasemzini ongcwele babengama-284.
Abalindisango: ngu-Akubhi, uThalimoni, nabafowabo ababelinda ngasemasangweni, babeyi-172.
Abakwa-Israyeli abaseleyo, abaphristi nabaLevi, babekuyo yonke imizi yakwaJuda, yilowo endaweni eyifa lakhe.
Izisebenzi zasethempelini ezazihlala e-Ofeli, nguZiha noGishipha yibona ababeziphethe.
Umphathi wabaLevi eJerusalema kwakungu-Uzi kaBhani, kaHashabhiya, kaMathaniya, kaMikha wabozalo luka-Asafa, abaculi, ephethe umsebenzi wendlu kaNkulunkulu.
Abaculi babephethwe ngumyalelo wenkosi owawuqondisa abakwenzayo nsuku zonke.
UPhethahiya, indodana kaMeshezabheli, wabozalo lukaZera, indodana kaJuda, wayemele inkosi ezindabeni zonke eziphathelene nabantu.
Maqondana nemizana namasimu ayo, kwahlala abanye abantu bakwaJuda: eKiriyathi Arbha nasemizaneni yalo, eDibhoni nasemizaneni yalo, eJekabhizeyeli nasemizaneni yalo,
eJeshuwa, eMolada, eBhethi Phelethi,
eHazari Shuwali, eBheri Sheba nasemizaneni yalo,
eZikilagi, eMekhona nasemizaneni yalo,
e-Eni Rimoni, eZora, eJarimuthi,
eZanowa, e-Adulamu nasemizaneni yawo, eLakhishi namasimu alo, e-Azeka nasemizaneni yalo. Bamisa kusukela eBheri Sheba kuze kube sesigodini SikaHinomu.
Abozalo lukaBhenjamini, kusukela eGebha, bahlala eMikhimashi, e-Ayi, eBhethele nasemizaneni yalo,
e-Anathothi, eNobhi, e-Ananiya,
eHazori, eRama, eGithayimi,
eHadidi, eZebhoyimi, eNebhalathi,
eLodi nase-Ono, iSigodi Sababazi.
Elinye iqembu labaLevi bakwaJuda lahlala kwaBhenjamini.
Nampa abaphristi nabaLevi ababuya noZerubhabhele, indodana kaSheyalitiyeli noJeshuwa: uSeraya, uJeremiya, u-Ezra,
u-Amariya, uMalukhi, uHathushi,
uShekhaniya, uRehumi, uMeremothi,
u-Ido, uGinethoyi, u-Abhiya,
uMijamini, uMahadiya, uBhiliga,
uShemaya, uJoyaribi, uJedaya,
uSalu, u-Amoki, uHilikiya noJedaya. Labo babeyizinhloko zabaphristi nezabafowabo, emihleni kaJeshuwa.
AbaLevi: uJeshuwa, uBhinuwi, uKadimiyeli, uSherebhiya, uJuda, uMathaniya owayengamele amahubo okudumisa, nabangani bakhe,
uBhakibhukiya, u-Uno nabafowabo, bemaqondana nabo ngezigaba.
UJeshuwa wazala uJoyakimi; uJoyakimi wazala u-Eliyashibhi; u-Eliyashibhi wazala uJoyada;
uJoyada wazala uJonathani; uJonathani wazala uJaduwa.
Emihleni kaJoyakimi, izinhloko zoyise babaphristi kwakuyilezi: ekaSeraya: nguMeraya; ekaJeremiya: nguHananiya;
eka-Ezra: nguMeshulamu; eka-Amariya: nguJehohanani;
ekaMalukhi: nguJonathani; ekaShebhaniya: nguJosefa;
ekaHarimi: ngu-Adina; ekaMerayothi: nguHelekayi;
eka-Ido: nguZakhariya; ekaGinethoni: nguMeshulamu;
eka-Abhiya: nguZikhiri; ekaMiniyamini, ekaMohadiya: nguPhilithayi;
ekaBhiliga: nguShamuwa; ekaShemaya: nguJehonathani;
ekaJoyaribhi: nguMathenayi; ekaJedaya: ngu-Uzi;
ekaSalayi: nguKalayi; eka-Amoki: ngu-Ebhere;
ekaHilikiya: nguHashabhiya; ekaJedaya: nguNethaneli.
AbaLevi babhalwa emihleni ka-Eliyashibhi, noJoyada, noJohanani, noJaduwa; njengezinhloko zemindeni yoyise nabaphristi ekubuseni kukaDariyu, umPheresiya.
Abozalo lukaLevi izinhloko zoyise abalotshwa encwadini yezindaba zemihla ngemihla, kwaze kwaba sezinsukwini zikaJohanani indodana ka-Eliyashibhi.
Izinhloko zabaLevi nazi: uHashabhiya, uSherebhiya noJeshuwa, indodana kaKadimiyeli, nabafowabo bebhekene nabo bedumisa, bebonga njengemiyalo kaDavide, umuntu kaNkulunkulu, isigaba sibhekene nesigaba.
UMathaniya, uBhakibhukiya, u-Obhadiya, uMeshulamu, uThalimoni no-Akhubhi babengabalindisango, belinda izindlu zokubekelela ngasemasangweni.
Labo babekhona ezinsukwini zikaJoyakimi, indodana kaJeshuwa, kaJozadaki, nasezinsukwini zikaNehemiya umbusi, nomphristi u-Ezra, umbhali.
Ngomkhosi wokubusiswa kogange eJerusalema abaLevi bafunwa ezindaweni zabo zonke, ukuba bayiswe eJerusalema ukuyogubha umkhosi ngentokozo, ngokubonga, ngokuhlabelela, ngamasimbali, ngezigubhu nangamahabhu.
Amaqembu abaculi abuthana evela ethafeni elalizungeze iJerusalema, nasemizaneni yabaLevi,
naseBhethi Giligali, nasemasimini eGebha, nase-Azimavethi, ngokuba babezakhele imizana nxazonke zeJerusalema.
Abaphristi nabaLevi base bezihlambulula; bahlambulula nabantu, amasango nogange.
Ngase nginyusela phezu kogange abaholi bakwaJuda, ngabeka izigaba ezimbili ezinkulu ezazibonga, zahlaba ihele; esinye sahamba ngakwesokunene sogange, saya ngaseSangweni Lomquba;
emva kwaso kwahamba uHoshaya nengxenye yabaholi bakwaJuda,
u-Azariya, u-Ezra, uMeshulamu,
uJuda, uBhenjamini, uShemaya, uJeremiya
namadodana athile abaphristi ephethe amacilongo: uZakhariya kaJonathani, kaShemaya, kaMathaniya, kaMikhaya, kaZakhuri, ka-Asafa
nabafowabo uShemaya, u-Azareli, uMilalayi, uGilalayi, uMahayi, uNethaneli, uJuda noHanani, bephethe izinto zokubethwa zikaDavide, umuntu kaNkulunkulu; u-Ezra, umbhali, engaphambi kwabo.
NgaseSangweni Lomthombo, phambi kwabo, bakhuphuka ngezikhwelo zomuzi kaDavide, ezikhwelweni zogange, ngasenhla kwendlu kaDavide, kwaze kwaba seSangweni Lamanzi, empumalanga.
Esinye isigaba saya ngakwesokhohlo, mina ngasilandela nengxenye yabantu ogangeni, ngasenhla kombhoshongo wezithando, kwaze kwaba soGangeni Olubanzi,
nangenhla kweSango Lakwa-Efrayimi, naseSangweni Elidala, eSangweni Lenhlanzi, eMbhoshongweni KaHananeli, eMbhoshongweni KaHameya, naseMbhoshongweni Wekhulu, kwaze kwaba seSangweni Lezimvu; bema eSangweni Lejele.
Zase zima endlini kaNkulunkulu lezo zigaba zombili zababongayo, nami nezikhulu engangihamba nazo;
nabaphristi u-Eliyakimi, uMahaseya, uMiniyamini, uMikhaya, u-Eliyohenayi, uZakhariya, noHananiya, bephethe amacilongo,
noMahaseya, uShemaya, u-Eleyazare, u-Uzi, uJehohanani, uMalikhiya, u-Elamu, no-Ezeri. Abahlabeleli bahlabelela bebhidiswa ngumphathi wabo, uJizirahiya.
Banikela ngemihlatshelo emikhulu ngalolo lusuku, bathokoza, ngokuba uNkulunkulu wayebathokozise ngentokozo enkulu; abesifazane nabantwana bathokoza, kwezwakala kude ukuthokoza kweJerusalema.
Ngalolo lusuku kwaqokwa amadoda okuqapha amagumbi lapho kwakugcinwe khona izipho ethempelini; izithelo zokuqala, nokweshumi kwamabele, nokwezithelo, minyaka yonke. Lawo madoda ayehambele yonke imizi ukuyoqoqa umkhiqizo owawunikelelwa ukunakekela abaphristi nabaLevi, njengalokhu kubhaliwe emthethweni. Bonke abantu bakwaJuda babewuthokozela umsebenzi owenziwa ngabaphristi nabaLevi,
ngoba yibona ababenza isiko lokuhlanza abantu ngokwemithetho kaNkulunkulu wabo, njengoba kwakwenza abahlabeleli nabalindisango, ngokomyalo kaDavide noSolomoni, indodana yakhe.
Kusukela kudala, ngezinsuku zikaDavide no-Asafa, kwakunabaholi babaculi, behola amaculo okudumisa nokubonga uNkulunkulu,
ezinsukwini zikaZerubhabhele noNehemiya, wonke u-Israyeli wanikela ingxenye yansuku zonke ukubonelela abaculi nabalindisango. Bahlukanisa lokho okwakungokwabaLevi, nabaLevi bakuhlukanisela abozalo luka-Aroni.
Ngalolo lusuku abantu bafundelwa incwadi yomthetho kaMose, kwafika endaweni lapho okwakubhalwe khona ukuthi akukho muntu wakwa-Amoni noma wakwaMowabi okufanele avunyelwe nanini ukuba yingxenye yebandla labantu bakaNkulunkulu,
ngoba labo bantu benqaba ukunika abakwa-Israyeli ukudla namanzi, kunalokho baqasha uBhalamu ukuba abaqalekise, kodwa uNkulunkulu wethu waguqula isiqalekiso saba yisibusiso.
Kwathi abantu sebekuzwile okushiwo ngumthetho, babaxosha bonke abantu ababenokhokho abaxubileyo, bashiya abakwa-Israyeli boqobo.
Ngaphambi kwalokho, u-Eliyashibhi, umphristi owayengamele amagumbi endlu kaNkulunkulu wethu, eyisihlobo sikaThobiya,
walungisela uThobiya igumbi elikhulu lapho kwakubekwa khona umnikelo wokusanhlamvu, impepho, izitsha, okweshumi kokusanhlamvu, iwayini, amafutha, okwakunikwe ngokomthetho abaLevi, abaculi, abalindisango neminikelo yabaphristi.
Ngaleso sikhathi ngangingekho eJerusalema, ngokuba ngonyaka wama-32 wokubusa kuka-Arithahishashitha, ngabuyela kuye ngayombikela ngokwakwenzekile. Emuva kwesikhathi ngacela imvume enkosini,
ngase ngiphindela eJerusalema. Ngafika ngabona into embi eyenziwa ngu-Eliyashibhi, elungisela uThobiya igumbi emagcekeni endlu kaNkulunkulu.
Ngathukuthela kakhulu, ngazijikijela phandle izimpahla zikaThobiya ezazisendlini.
Ngase ngiyala abaphristi ukuba bahlanze lezo zindlu, babuyisele izitsha zasendlini, neminikelo yokusanhlamvu nempepho.
Ngabuye ngezwa nokuthi abanye abaLevi nabaculi ababesebenza ethempelini sebehambile bayosebenza emasimini abo, ngoba abantu base beyekile ukuba babanike isabelo sabo.
Ngabathethisa abaholi, ngathi kubo: “Yini eyenze ukuba nilahle indlu kaNkulunkulu na?” Ngawaqoqa lawo madoda, ngawabuyisela emsebenzini wawo ayewenza endlini kaNkulunkulu.
Bonke abantu bakwaJuda base beqala futhi ukunikela okweshumi kokusanhlamvu, iwayini elisha namafutha amasha, kwafakwa ezinqolobaneni.
Ngaqoka amanye amadoda ukuba abe ngabagcinimafa bezinqolobane: uShelemiya umphristi, uZadoki ungoti kwezomthetho noPhedaya umLevi. UHanani, indodana kaZakhuri indodana kaMathaniya, wayezoba ngumsizi wabo. Lawo madoda ngangiwethemba ukuthi ayezoba qotho lapho esehlukaniselana nabanye ayesebenza nabo.
Nkulunkulu wami, ngikhumbule kulokhu, ungakhohlwa ukwethembeka engikwenzile, ngikwenzela indlu yakho nomsebenzi owenziwa kuyo.
Ngalezo zinsuku ngabona abantu kwaJuda bekhama amagilebhisi ngeSabatha. Abanye babethwese izimbongolo zabo okusanhlamvu, iwayini, amagilebhisi, amakhiwane nezinye izinto, bekuyisa eJerusalema; ngabexwayisa ukuthi bangathengisi lutho ngeSabatha.
Kwakukhona futhi idlanzana labantu baseThire, ababehlala eJerusalema, bethengisa izinhlanzi nokunye, bekuthengisela abantu bakwaJuda emzini ngeSabatha.
Ngabathethisa abaholi bakwaJuda, ngathi kubo: “Nibenzelani lobu bubi bokungcolisa iSabatha na?
Akuyibo yini lobu bubi noyihlo ababenza, obalethela thina nalo muzi inhlekelele na? Manje nani niyaqhubeka nigovuza ulaka lukaNkulunkulu ukuba amelane no-Israyeli ngokuthi ningcolise iSabatha na?”
Manje sengishaya umthetho wokuthi amasango eJerusalema ahluthulelwe ngaphambi kokuqala kweSabatha, aze avulwe lapho sekwedlule iSabatha. Ngizobeka ezinye zezinceku zami emasangweni ukuze zibheke ukuthi akukho lutho olungeniswa emzini ngeSabatha.
Abahwebi nabathengisi nayo yonke impahla yabo babehlala ngaphandle kweJerusalema ebusuku, kanye noma kabili,
kodwa ngabenqabela, ngathi: “Yini eyenza nibe seceleni kogange ebusuku na? Uma niphinda nikwenza lokho ngizonibopha.” Kusukela ngalolo suku abaphindanga balala lapho ngasogangeni ebusuku.
Ngayala abaLevi ukuba bazingcwelise, kube yibo abaqapha emasangweni ebusuku ukuze kugcinwe usuku lweSabatha lungcwele. Ungikhumbule Nkulunkulu wami, ube nomusa kimi ngokuba mkhulu umusa wakho.
Ngalezo zinsuku, ngabona abanye abaJuda abasebeganwe ngabesifazane base-Ashidodi, kwa-Amoni nakwaMowabi.
Ingxenye yezingane zabo yayikhuluma ulimi lwase-Ashidodi kuphela, ingaluzwa ulimi lwakubo.
Ngawathethisa lawo madoda, ngawaqalekisa, amanye ngawashaya, ngawahluthula izinwele, ngathi awenze isifungo kuNkulunkulu: “Aniyukuwaganisela amadodana abo ngamadodakazi enu, futhi aniyukuwathathela amadodana enu, noma nizithathele nina abafazi emadodakazini abo.
USolomoni, inkosi yakwa-Israyeli, akonanga yini ngenxa yabesifazane na? Phakathi kwezizwe eziningi, ayikho inkosi eyayifana naye. Nanxa uNkulunkulu ayemthanda waze wambeka inkosi ka-Israyeli, wadukiswa ngamakhosikazi akhe abezizwe.
Nani senenza isono esifanayo; nihlubuka uNkulunkulu ngokuganwa ngabafazi babezizwe na?”
UJehoyada, indodana ka-Eliyashibhi, umphristi omkhulu, wavumela indodana yakhe ukuba iganwe yindodakazi kaSanibhalathi waseBhethi Horoni, ngakho-ke ngamxosha.
Nkulunkulu wami, ungawakhohlwa lawo madoda ukuthi abungcolise kanjani ubuphristi nesivumelwano sabaphristi nabaLevi.
Abaphristi nabaLevi ngabahlambulula kukho konke ukungcola kwabezizwe. Ngamisa futhi imisebenzi eyehlukene yabaphristi nabaLevi, yilowo nalowo enomsebenzi wakhe.
Ngabuye ngahlela ukulethwa kwezinkuni ngezikhathi ezimisiweyo, nokwethulwa kwesivuno sokuqala. Nkulunkulu wami, ngikhumbule ngokuhle engikwenzileyo.
Lokhu kwenzeka ngesikhathi sokubusa kwenkosi u-Ahasheveroshi; lona ngu-Ahasheveroshi owayebusa izifundazwe eziyi-127, kusukela eNdiya kuye eKhushe.
Inkosi u-Ahasheveroshi, ngaleso sikhathi, yayibusa ihlezi esihlalweni sayo esasisenhlokomuzi yayo, iShushani,
kwathi ngonyaka wesithathu wokubusa kwayo, yenzela zonke izikhulu zayo nezinceku zayo idili, abombutho wempi yasePheresiya naseMediya, izikhulu nababusi bezifundazwe, babelapho.
Izinsuku eziningi ezaba yi-180, yayibukisa ngomcebo wayo, nodumo lombuso wayo, nobukhazikhazi nangengcebo yobukhulu bayo.
Ekupheleni kwalezo zinsuku, inkosi yenzela bonke abantu ababelapho eShushani, inhlokomuzi yayo, idili, abantukazana nezikhulu; idili elathatha izinsuku eziyisikhombisa yalenzela egcekeni lengadi yesigodlo sayo.
Igceke lalihlotshiswe ngamakhethini kakotini amhlophe naluhlaza okwesibhakabhaka, kunemichilo yelineni elicolekileyo nebukhwebezane, kuboshelwe kokusandilinga kwesiliva ezikwedlaneni zemabuli. Izihlalo zokuphumula ezenziwe ngegolide nesiliva zibekwe egcekeni elaligandaywe ngemabuli emhlophe, amagwadle abomvu, amagobolondo ahlotshiswe ngaphakathi acwebezelayo, netshe eliyigugu eliluhlaza sasibhakabhaka.
Okuphuzwayo kwakuthungelwa ezindebeni zegolide ezahlukahlukene, iwayini laliliningi njengokufanele inkosi.
Okuphuzwayo kwakhishwa ngokomthetho, akekho owayephoqwa; ngokuba inkosi yayiyale zonke izikhulu zayo zasesigodlweni ukuba zenzele wonke umuntu ngokufisa kwakhe.
Indlovukazi uVashiti yabenzela idili abesifazane basesigodlweni senkosi u-Ahasheveroshi.
Ngosuku lwesikhombisa, inkosi seyeneme kakhulu ngenxa yewayini, yayala abathenwa ababengabasizi bayo, uMehumani, uBhizitha, uHaribhora, uBhigitha, u-Abigitha, uZethari noKarikhasi,
ukuba balethe indlovukazi uVashiti ifake umqhele wobundlovukazi. Indlovukazi yayingowesifazane omuhle, inkosi yayifuna ukubukisa ngobuhle bayo kubantu nasezikhulwini.
Kodwa indlovukazi uVashiti yenqaba ukuza njengoba kwakuyaleze inkosi kubathenwa. Lokho kwayenza inkosi yathukuthela kakhulu, yabhodla umlilo.
Kwakuwumkhuba wenkosi ukubuza maqondana nezinto eziphathelene nomthetho nokwehlulela, kubeluleki,
abaseduze nayo, uKarishena, uShetari, u-Adimatha, uTharishishi, uMeresi, uMarisena noMemukhani, okwakuyibona ababeyisiza, futhi beyizethenjwa zayo.
Yabuza yathi kubo: “Njengoba ngithumele abathenwa ukuba bayolanda indlovukazi uVashiti, kodwa ayiwugqizanga qakala umyalelo wami, ngabe uthini umthetho maqondana nalolo daba na?”
UMemukhani wayesethi phambi kwenkosi nezikhulu: “UVashiti akadelelanga nje inkosi kuphela, kodwa wedelele zonke izikhulu nabantu bonke abasezifundazweni zenkosi u-Ahasheveroshi.
Uma abesifazane bakuzo zonke izizwe bezwa ukuthi uVashiti uziphathe kanje, kuzobenza ukuthi bonke abesifazane bangabe besabahlonipha abayeni babo, ngoba inkosi imbizile, yena wenqaba ukuza kuyo.
Khona namuhla amakhosikazi ezikhulu zamaPheresiya namaMediya, uma ezwa ngokuziphatha kwendlovukazi, azomelana nezikhulu zenkosi, kube nendelelo nentukuthelo.
Uma kukuhle kuwe nkosi, mawukhiphe isimemezelo sasebukhosini, sibhalwe emthethweni ukuthi uVashiti uyamenqabela ukuba aphinde angene lapho inkosi ikhona, kube wumthetho wamaPheresiya namaMediya ongaguquki, bese inkosi ithatha enye indlovukazi engcono kunaye.
Uma abantu kuwo wonke umbuso wakithi, njengoba umkhulu kangaka, bezwa ngaleso simemezelo, bonke abesifazane, noma ngabe bangabantukazana noma yizikhulu, bayobahlonipha abayeni babo.”
Leso seluleko sikaMemukhani sayithokozisa inkosi nezikhulu zayo, inkosi yenza njengoba eyelulekile uMemukhani,
yathumela izincwadi kuzo zonke izifundazwe, kuleso naleso sifundazwe, ngokohlelo lokubhala lwakhona, nakulabo bantu ngolimi lwakubo, sigcizelela ukuthi: onke amadoda angomakhonya emizini yawo, nokuthi wulimi lwesizwe sakubo oluzokhulunywa kulelo khaya.
Emveni kwalezo zinto, selubohlile ulaka lwenkosi u-Ahasheveroshi, yakhumbula uVashiti nayekwenzile, nokuthi kwakhishwa simemezelo sini ngaye.
Izinsizwa ezazisiza inkosi zathi kuyo: “Inkosi mayifunelwe izintombi ezinhle.
Inkosi iqoke izikhulu kuzo zonke izifundazwe embusweni wayo, ukuba ziqoqe zonke izintombi ezibukekayo, zilethwe esigodlweni kuHegayi, umthenwa, okunguyena owengamele indlu yabesifazane, azinike izimonyo zazo.
Inkosi mayikhethe intombi eyoyithanda, ibe yindlovukazi esikhundleni sikaVashithi.” Sayithokozisa inkosi leso seluleko, yenza kanjalo.
Kwakukhona eShushani inhlokomuzi, uMoridekhayi umJuda, indodana kaJayiri, kaShimeyi, kaKhishi wakwaBhenjamini,
owayethunjwe eJerusalema nguNebukhadinezari, inkosi yaseBhabhele, ngesikhathi ithumba uJekhoniya, inkosi yakwaJuda.
Wayenomzala ogama lakhe lingu-Esteri, elesiHebheru kunguHadasa, owayemuhle futhi eme kahle. Uyise nonina babengasekho, ngakho-ke uMoridekhayi wamthatha wamkhulisa njengendodakazi yakhe.
Kwathi sesiphumile isimemezelo senkosi, kwalethwa izintombi eziningi ekomkhulu eShushani, ukuba zibhekwe nguHegayi; no-Esteri walethwa esigodlweni ukuba azobhekwa nguHegayi owayengamele indlu yabesifazane.
U-Esteri waba nogazi, wathandeka kuHegayi, futhi wafumana umusa kuye, washeshe wamnika okokuziqhola nesabelo sakhe sokudla kwekhethelo. Wamnika indawo enhle kakhulu esigodlweni, waqoka izintombi eziyisikhombisa ezikhethekile esigodlweni ukuba zimnakekele.
U-Esteri akatshelanga muntu ngezihlobo zakhe noma ngabakubo, ngoba wayemdonse ngendlebe uMoridekhayi ukuba angasho lutho.
Nsuku zonke uMoridekhayi wayezidlisa satshanyana ngasesangweni lendlu yabesifazane, ukuze ahogele ukuthi uqhuba kanjani u-Esteri, nokuthi yini ezokwenzeka kuye.
Ukucolwa kwabesifazane kwakuvamise ukuthatha isikhathi esingunyaka. Izinyanga eziyisithupha zokuqala, owesifazane wayegcotshwa ngamafutha emure, kuthi ngezilandelayo aqholwe ngamafutha ebhalisamu. Uma sekwenziwe lokho, intombi ngayinye yayithathwa ingeniswe enkosini u-Ahasheveroshi.
Uma isuka endlini yabesifazane iya esigodlweni, yayigqoka noma yini eyithandayo.
Yayiya lapho kusihlwa, kuthi ngakusasa ekuseni iyiswe kwenye indlu iyonakekelwa nguShawashigazi, umthenwa owayengamele izancinza zenkosi. Yayingeke iphinde ingene enkosini, ngaphandle kokuba inkosi iyithandile, yayibiza ngegama.
Laze lafika nethuba lika-Esteri indodakazi ka-Abhihayili, umfowabo kaMoridekhayi. UMoridekhayi wayemkhulise kwangathi yindodakazi yakhe. U-Esteri akazange acele lutho ngaphandle kwalokho uHegayi, umthenwa owayephethe, ayethe akakusebenzise. Bonke ababembona babethatheka ngubuhle bakhe.
Wasiwa enkosini u-Ahasheveroshi ngenyanga yeshumi, inyanga okuthiwa uThebhethi, ngonyaka wesikhombisa wokubusa kwayo.
Inkosi yamthanda kakhulu ukwedlula bonke abesifazane; wafumana umusa emehlweni ayo, yamphatha kahle ukuzedlula zonke izintombi. Yamethwesa umqhele wobukhosi yamenza indlovukazi esikhundleni sikaVashithi.
Inkosi yenzela zonke izikhulu zayo nezinceku zayo idili: “Idili lika-Esteri.” Lolo lusuku lwaba yiholide ezifundazweni, futhi yapha abantu izipho njengobuningi bengcebo yasebukhosini.
Lapho izintombi ziqoqwa okwesibili, uMoridekhayi wayehleli esangweni lenkosi.
U-Esteri wayengakaze atshele muntu ukuthi ungumJuda, nokuthi bangobani abomndeni wakubo, njengoba uMoridekhayi ayemyalile, ngoba wayengachezuki eziyalweni zikaMoridekhayi njengangesikhathi esahlala naye.
Ngelinye ilanga uMoridekhayi ehleli esangweni lesigodlo, uBhigithana noThereshi, abathenwa ababili ababeqapha isango lendlu yenkosi, babenokukhononda ngenkosi, ngakho-ke benza uzungu lokuyibulala.
Wayesesuka uMoridekhayi wayobikela indlovukazi u-Esteri, yona yabikela inkosi ngaleyo ndaba eyayiyitshelwe nguMoridekhayi.
Lwaphenywa lolo daba kwatholakala ukuthi luyiqiniso, ngakho-ke laba bathenwa ababili balengiswa esiphanyekweni. Le ndaba yabhalwa phansi emilandweni yenkosi phambi kwayo.
Emveni kwalezo zinto, inkosi u-Ahasheveroshi yaqokela esikhundleni esiphezulu uHamani, indodana kaHamedatha, umAgagi, yamenza umengameli wazo zonke izikhulu ezikanye naye.
Zonke izikhulu zenkosi ezazisesangweni layo zaziguqa, zikhothamele uHamani njengokusho kwenkosi. UMoridekhayi nokho akazange amguqele noma amkhothamele uHamani.
Izikhulu zenkosi ezazisesangweni zambuza uMoridekhayi, zathi: “Kungani weqa umyalo wenkosi na?”
Nanxa zazikhuluma naye nsuku zonke zimbuza, uMoridekhayi akazange azilalele. Zase zihamba zayotshela uHamani ukuze zizwe ukuthi uMoridekhayi uzoma yini emazwini akhe okuthi ungumJuda.
UHamani ebona ukuthi uMoridekhayi akamguqeli, futhi akamkhothameli, wacasuka kakhulu.
Wakubona kungenele ukuthi enzakalise uMoridekhayi kuphela, ngoba wayesezwile ukuthi ungumJuda, wenza icebo lokubulala bonke abaJuda, abantu bakubo kaMoridekhayi ababehlala embusweni ka-Ahasheveroshi.
Ngenyanga yokuqala, inyanga uNisani, ngonyaka we-12 wokubusa kuka-Ahasheveroshi, benza iPhure (unkatho) phambi kukaHamani, imihla ngemihla, nyanga zonke, ukuze abone ukuthi isu lakhe liyolunga, liphumelele ngayiphi inyanga nangaluphi usuku. Waqoka ukuba lokho kwenziwe ngenyanga ye-12, inyanga u-Adari.
UHamani wayesethi enkosini u-Ahasheveroshi: “Kukhona isizwe esithile esihlakazakele kuzo zonke izifundazwe zombuso wakho, sinemithetho eyehlukile kweyezizwe zonke. Siyishaya indiva imithetho yombuso wakho. Akulungile ukuba inkosi isiyeke siqhubeke.
Uma kukuhle enkosini, makulotshwe ukuba sibhujiswe, mina ngizokhokha amathalenta ayizi-10 000 esiliva kulabo abenza umsebenzi wenkosi, ukuze afakwe engcebeni yenkosi.”
Inkosi yase ikhipha indandatho yokusicilela emunweni wayo, yayinika uHamani, indodana kaHamedatha, umAgagi, isitha sabaJuda.
Yathi kuHamani: “Isiliva ngelakho nabantu, yenza ngakho njengoba ubona kufanele.”
Kuthe ngosuku lwe-13 ngenyanga yokuqala, kwabizwa bonke onobhala benkosi. UHamani wabayala ukuba babhale konke ayebatshela khona, bakuhumushele kuzo zonke izilimi, ezincwadini eziya kuzo zonke izifundazwe, bese bekuthumelela iziphathimandla zenkosi, nababusi, nabaholi babantu, nakuzo zonke izifundazwe; kwabhalwa egameni lenkosi u-Ahasheveroshi, kwasicilelwa ngendandatho yayo.
Lezo zincwadi zanikwa izigijimi, zathunyelwa kuzo zonke izifundazwe zenkosi. Umyalelo wawuthi kumele kubulawe bonke abaJuda, abancane nabadala, nezinsana nabesifazane, ngalusuku lunye okwakungolwe-13, ngenyanga ye-12, inyanga u-Adari, nempahla yabo ibe yimpango.
Kwakukhona nomyalo othi kumele kwenziwe nezinye izincwadi zaleso sinqumo, zisiwe kuzo zonke izifundazwe kube ngumthetho, ukuze bonke abantu bazi ngawo, bame ngomumo ngalolo lusuku.
Izigijimi zashesha njengoba zaziyalwe yinkosi; kwashaywa umthetho enhlokomuzi iShushani. Inkosi noHamani bahlala phansi baphuza, kodwa kwaba nokudideka okukhulu emzini iShushani.
Kwathi ukuba uMoridekhayi ezwe ngakho konke okwakwenzekile, waklebhula izingubo zakhe, wagqoka isaka, wazithela ngomlotha ekhanda, wazulazula emzini ekhala kakhulu nakalusizi.
Wahamba waya esangweni lesigodlo senkosi, ngokuba akekho owayevunyelwe ukungena ngalo egqoke indwangu eyisaka.
Kuzo zonke izifundazwe lapho kwafinyelela khona izwi lenkosi nomthetho wayo, kwaba nomsindo wokulila okukhulu kubaJuda; bazila ukudla, bakhala, balila, iningi labo lalala phansi ligqoke indwangu eyisaka, lazithela ngomlotha.
Izintombi eziyizisebenzi zika-Esteri nabathenwa bamazisa ngalokho, waphatheka kabi kakhulu, wamthumelela izingubo uMoridekhayi ukuze akhumule indwangu eyisaka, agqoke zona, kodwa wazenqaba.
U-Esteri wayesebiza uHathakhi, omunye wabathenwa basesigodlweni, inkosi eyayimqokele ukusebenzela indlovukazi, ukuba ayobuza kuMoridekhayi ukuthi kwenzenjani, nokuthi yini eyenza aziphathe ngalolo hlobo na?
UHathakhi waya kuMoridekhayi owayesesigcawini somuzi, phambi kwesango lesigodlo.
UMoridekhayi wamtshela konke okwakumehlele, nangesamba sesiliva uHamani ayethembise ukusikhokha esikhwameni senkosi ukuze kubhujiswe abaJuda.
UMoridekhayi wamnika ifuzela lesimemezelo esasibhalwe sakhishwa eShushani ukuba kubhujiswe abaJuda, ukuze alikhombise u-Esteri, bese emyala ukuthi aye enkosini ayonxusela abantu bakubo.
UHathakhi wahamba wayotshela u-Esteri lokho okwakushiwo nguMoridekhayi.
U-Esteri watshela uHathakhi umyalezo okwakufanele ukuba awuse kuMoridekhayi, othi:
“Zonke izikhulu zenkosi nalezo ezihlala ezifundazweni ziyazi ukuthi noma ngabe ngowesilisa noma ngowesifazane ongena egcekeni lenkosi elingaphakathi engabiziwe yiyo, ubhekana namthetho munye ofanayo wokuba abulawe, ngaphandle uma inkosi imkhombe ngentonga yayo yegolide, lowo angaphila. Kodwa mina ayingibizile inkosi kulezi zinsuku ezingama-30.”
Bambikela uMoridekhayi ngokwakushiwo ngu-Esteri.
Wayesebuyisela impendulo ngabo, ethi ku-Esteri: “Ungacabangi ukuthi ngoba wena usesigodlweni uzosinda kubo bonke abaJuda.
Uma uthula ngesikhathi esifana nalesi, usizo nokukhululwa kwabaJuda kuzovela ndawana thize, kodwa wena nabendlu kayihlo nizobhubha. Ngubani owaziyo? Mhlawumbe ungene embusweni waba yindlovukazi ngenxa yesikhathi esifana nalesi.”
U-Esteri wawuphendula umlayezo kaMoridekhayi, wathi:
“Hamba uqoqe bonke abaJuda abahlala eShushani; nizile ngenxa yami, ningadli, ningaphuzi kuze kuphele izinsuku ezintathu, imini nobusuku. Mina nezintombi ezingisebenzelayo sizozila njengani; ngiyobe sengiya-ke enkosini noma kungukwephula umthetho lokho. Uma ngibhubha, mangibhubhe.”
UMoridekhayi wahamba wenza konke lokho u-Esteri ayemyale ngakho.
Kwathi ngosuku lwesithathu, u-Esteri wagqoka ingubo yobundlovukazi, wema egcekeni lesigodlo senkosi elingaphakathi, eliqondene nendlu yenkosi. Inkosi yayihleli esihlalweni sayo sobukhosi, iqondene nesango elingenela esigodlweni.
Ithe ukuba inkosi ibone indlovukazi u-Esteri imi egcekeni, yaba nomusa kuyo. Yayikhomba ngentonga yegolide eyayiyiphethe ngesandla. U-Esteri waya kuyo, wathinta isihloko sentonga yobukhosi.
Inkosi yathi kuye: “Kwenzenjani, ndlovukazi Esteri na? Ukhala ngani? Noma yini oyicelayo, ngisho kungaba yingxenye yombuso, uyoyinikwa.”
U-Esteri wathi: “Uma kukuhle enkosini, mayize inkosi noHamani namuhla edilini engiyilungisele lona.”
Inkosi yathi: “Phuthumani nibize uHamani ukuze sikwazi ukwenza lokho okucelwe ngu-Esteri.” Inkosi noHamani base beya edilini elalilungiswe ngu-Esteri.
Besaphuza iwayini, inkosi yathi ku-Esteri: “Ucelani na? Uzoyenzelwa. Ukhala ngani? Ngisho ingxenye yombuso uyoyinikwa.”
U-Esteri wayesephendula wathi: “Nasi isicelo sami nengikunxusayo:
uma ngingathola umusa kuwe nkosi, ungenzele engikucelayo nengikunxusayo, makuthi inkosi noHamani beze kusasa edilini engizobe ngibalungisele lona, ngizobe sengenza njengokusho kwenkosi.”
UHamani waphuma esigodlweni ejabule, umoya wakhe uthe cosololo ngalolo lusuku, kodwa kuthe lapho ebona uMoridekhayi esangweni lesigodlo, engamsukumeli noma athuthumele lapho embona, wagcwala intukuthelo, ethukuthelela uMoridekhayi,
kodwa wazibamba, wahamba waqonda emzini wakhe, wathumela, waqoqa abangani bakhe nomkakhe uZereshi,
waqhosha ngomcebo wakhe omkhulu, namadodana amaningi, nezikhundla zonke inkosi embeke kuzo, nokuthi imenze wamkhulu phezu kwezikhulu nabaholi.
UHamani wathi: “Ngisho nendlovukazi u-Esteri ayimemanga muntu omunye edilini ngaphandle kwami nenkosi, nakusasa ngiyaphindela, mina nenkosi isimemile,
kodwa konke lokho akungenelisi uma nje ngisabona uMoridekhayi, umJuda, ehleli esangweni lesigodlo senkosi.”
Umkakhe uZereshi nabo bonke abangani bakhe bathi kuye: “Tshela abantu bagxumeke isigxobo sokuphanyeka esingamakhubhithi angama-50 ubude, bese ucela enkosini ekuseni ukuba kulengiswe kuso uMoridekhayi, uhambe nenkosi uyozitika ukhululekile.” Leso seluleko samthokozisa uHamani, wayesesenza isiphanyeko.
Ngalobo busuku inkosi yaqwasha, yase iyala ukuba kulethwe kuyo umqulu womlando okubhalwe kuwo izehlakalo zemihla ngemihla zombuso wayo, zafundwa phambi kwenkosi.
Kwatholakala lapho kwakulotshwe khona ukuthi uMoridekhayi wabaceba kanjani abathenwa ababili, ababengabaqaphi besango lenkosi uBhigithani noThereshi, ngozungu ababelwakhele inkosi u-Ahasheveroshi.
Inkosi yabuza yathi: “Wahlonishwa kanjani, futhi wanikwa mklomelo muni uMoridekhayi ngaleso senzo na?” Izinceku zenkosi ezazilapho ziyikhonza zaphendula, zathi: “Akenzelwanga lutho.”
Inkosi yayisibuza, yathi: “Ngubani osegcekeni?” UHamani wayesanda kungena egcekeni lesigodlo senkosi elingaphandle, ezokhuluma nenkosi ukuba kulengiswe uMoridekhayi esiphanyekweni ayemlungiselele sona.
Izinceku zenkosi zaphendula, zathi: “Bheka, nguHamani omi egcekeni.” Inkosi yathi kuzo: “Mngeniseni.”
UHamani wangena, inkosi yambuza, yathi: “Angenzelwani umuntu inkosi efuna ukumphakamisa na?” UHamani wacabanga ngaphakathi, wathi: “Ngubani omunye inkosi engafuna ukumphakamisa ngaphandle kwami?”
Wayeseyiphendula inkosi, ethi: “Umuntu inkosi efuna ukumphakamisa,
makulethwe ingubo yenkosi ekade iyembethe, nehhashi ebiligibele lifakwe umqhele wobukhosi ekhanda lalo, kumele agqokiswe ingubo egqokwa yinkosi, agitsheliswe ihhashi eligitshelwa yinkosi, lifakwe umqhele wobukhosi ekhanda lalo,
bese kuthi esinye sezikhulu zakho eziqavile, simgqokise ingubo lowo muntu inkosi efuna ukumdumisa, simgibelise ehhashini, simhole siye naye eshashalazini lomuzi. Uma sesifike lapho siyomemezela, sithi: ‘Kuyokwenziwa kanje kumuntu inkosi efuna ukumdumisa!’ ”
Inkosi yathi kuHamani: “Phuthuma uthathe ingubo nehhashi okhulume ngakho, ukwenze lokhu kuMoridekhayi, umJuda, ohlala esangweni lesigodlo senkosi. Ukwenze konke lokhu okushilo.”
UHamani wayesethatha ingubo nehhashi, wagqokisa uMoridekhayi, wamgibelisa ehhashini, wamusa esigcawini somuzi ehamba phambi kwakhe ememeza, ethi: “Bhekani, uyokwenzelwa lokhu umuntu inkosi ethanda ukumdumisa nokumklomelisa!”
UMoridekhayi wayesephindela esangweni lesigodlo, kodwa uHamani washesha waqonda emzini wakhe, ezemboze ubuso ngenxa yokuhlazeka.
Waxoxela umkakhe nabo bonke abangani bakhe ngento eyayimehlele. Labo bangani bakhe abahlakaniphile nomkakhe, bathi kuye: “Njengoba uMoridekhayi engumJuda, ukuwa kwakho sekuqalile. Ngeke ukwazi ukumelana naye ubuso nobuso, impela uzokuqumba phansi.”
Besakhuluma naye uHamani, kwafika abathenwa benkosi, bephuthuma ukuzomlanda uHamani ukuze aye edilini u-Esteri ayelilungisile.
Inkosi noHamani baya edilini lendlovukazi u-Esteri.
Ngosuku lwesibili edilini, besaphuza iwayini, inkosi yambuza okwesibili u-Esteri, yathi: “Ndlovukazi, Esteri, siyini isicelo sakho na? Uzosenzelwa. Ufunani-ke? Uyakunikwa noma kungaba yingxenye yombuso.”
Indlovukazi u-Esteri yaphendula, yathi: “Uma ngifumene umusa kuwe nkosi, futhi kukuhle kuwe, mangibuyiselwe ukuphila kwami nokwabantu bakithi, yileso isicelo sami, yilokho engikucelayo.
Ngokuba mina nabantu bakithi sithengisiwe, sizobulawa, sibhujiswe, siqedwe nya. Ukuba besithengisiwe sayoba yizigqila bengizozithulela, ngokuba leyo nkathazo ibingeke iyilimaze inkosi.”
Inkosi u-Ahasheveroshi yabuza indlovukazi u-Esteri, yathi: “Ngubani lowo? Uphi lowo muntu onesibindi sokwenza into enjengalena na?”
U-Esteri wathi: “Umuntu omelene nathi, isitha, yilo Hamani okhohlakeleyo.” Kwaphela nasozwaneni wuvalo kuHamani, phambi kwenkosi nendlovukazi.
Inkosi yasukuma yashiya idili, yaphuma ithukuthele ibila, yaya engadini yasesigodlweni. UHamani wasala encenga indlovukazi u-Esteri ukuba angabulawa.
Kuthe lapho inkosi ibuya engadini yasesigodlweni, ingena endlini yedili, yafica uHamani ewele embhedeni okwakucambalele kuwo u-Esteri, yathi: “Awunamahloni okubhudukeza indlovukazi phambi kwami, esigodlweni sami pho?” Ithe ingasho lawo mazwi inkosi, abathenwa baphuthuma bemboza ubuso bukaHamani.
UHaribhona omunye wabathenwa ababephambi kwenkosi, wathi: “Kunesigxobo sokuphanyeka eside uHamani asimisele ukuphanyeka kuso uMoridekhayi, indoda eyasindisa impilo yakho, nkosi; singamakhubhithi angama-50 ubude.” Inkosi yayaleza, yathi: “Mphanyekeni kuso!”
Base bemphanyeka esigxotsheni sokuphanyeka, uHamani ayekade esilungiselele uMoridekhayi. Yayisibohla intukuthelo enkosini.
Ngalolo lusuku inkosi u-Ahasheveroshi yanika u-Esteri, indlovukazi, indlu kaHamani, isitha sabaJuda. UMoridekhayi weza enkosini, ngokuba u-Esteri wayeseyitshelile ukuthi bahlobene kanjani.
Inkosi yathatha indandatho yayo yokusicilela, leyo eyayiyephuce uHamani, yayinika uMoridekhayi. U-Esteri waqoka uMoridekhayi ukuba engamele indlu kaHamani.
U-Esteri waphinda wakhuluma nenkosi, wakhothamela ezinyaweni zayo, wakhala, wayincenga ukuba ibuguqule kubantu bakubo ububi uHamani, umAgagi, ayebucebe ngabo.
Inkosi yamkhomba ngentonga yayo yegolide u-Esteri, wayesesukuma ema phambi kwayo,
wathi: “Uma kukuhle enkosini, ngifumene umusa kuyo, futhi uma kulungile phambi kwayo, ngicela ibhale umyalelo wokuhoxisa icebo likaHamani, indodana kaHamedatha, umAgagi, owabhala izincwadi zokuthi kubhujiswe abaJuda abahlala kuzo zonke izifundazwe zenkosi.
Ngingakumela kanjani ukubona ububi behlela abantu bakithi na? Ngingakumela kanjani ukuchithwa kwezihlobo zami na?”
Inkosi u-Ahasheveroshi yase ithi ku-Esteri noMoridekhayi, umJuda: “Bhekani, indlu kaHamani ngiyinike indlovukazi u-Esteri, uHamani walengiswa esiphanyekweni ngenxa yozungu alwakhela abaJuda,
kodwa umbhalo olotshwe egameni lenkosi wagxivizwa ngesigxivizo sasebukhosini, awusoze waguqulwa. Nokho-ke, nina nobabili ningababhalela abaJuda noma yini eniyifisayo; ningayibhala egameni lami, nifake isisicilelo sasebukhosini.”
Ngaleso sikhathi kwase kubizwa ababhali benkosi. Kwakuwusuku lwama-23, ngenyanga yesithathu ebizwa ngokuthi uShivani. Bayalwa ukuba babhale noma yini uMoridekhayi abayala ukuba bayibhalele abaJuda ababesembusweni ka-Ahasheveroshi, neziphathimandla, nababusi, nezikhulu ezazikuzo zonke izifundazwe eziyi-127, kusuka eNdiya kuya eKhushe. Izincwadi bazibhala ngolimi lwaleso naleso sizwe, ngokwehlukana kwazo, nangokubhala kwazo, nakubaJuda, ngokubhala kwabo nangolimi lwabo.
Lezo zincwadi bazibhala egameni lenkosi u-Ahasheveroshi; uMoridekhayi wazifaka isisicilelo sasebukhosini. Zathunyelwa ngezigijimi ezazigibele amahhashi anejubane, ayekhuliswe esitebeleni sasebukhosini.
Kulezo zincwadi kwakubhalwe ukuthi abaJuda, emizini yonke babevunyelwe ukuba bahlangane, bazivikele, babulale, babhubhise amabutho esifundazwe abahlaselayo, izingane nabesifazane, baphange nezimpahla zabo,
ngosuku olwaluqokelwe ukuba abaJuda ababehlala kuzo zonke izifundazwe zenkosi u-Ahasheveroshi, zili-13 ngenyanga ye-12, inyanga u-Adari.
Ifuzela lalowo mthetho lalizokhishwa, libe ngumthetho kuzo zonke izifundazwe, laziswe bonke abantu kuleso naleso sizwe, ukuze abaJuda bame ngomumo ngalolo lusuku, bazivikele ezitheni zabo.
Izigijimi zagibela amahhashi asebukhosini anejubane, zaphuma ngesivinini, ziqhutshwa ngumyalezo wenkosi. Lowo mthetho wawushaywe ngisho eShushani, inhlokomuzi.
Ngesikhathi uMoridekhayi ephuma esigodlweni wayegqoke ingubo yasebukhosini enokuluhlaza sasibhakabhaka nokumhlophe, umjiva welineni elicolekileyo elibukhwebezane, nomqhele omuhle ocwebezelayo wegolide. Kwachwaza umuzi waseShushani ngomsindo wenjabulo nentokozo.
KumaJuda kwakunokukhanya, nenjabulo, nentokozo, nokuhlonipheka.
Kulowo nalowo muzi, nakuleso sifundazwe, lapho izwi lenkosi nomthetho wayo kwase kufinyelele khona, kwaba nenjabulo nentokozo, abaJuda benedili, nosuku oluhle, bejabulile. Abantu abaningi bendawo baphenduka baba ngabaJuda, ngoba base bebesaba abaJuda.
Lwaze lwafika usuku lwamanqamu, mhla zilishumi nantathu ngenyanga u-Adari, olwalubhalwe esimemezelweni senkosi, usuku izitha zabaJuda ezazilumisele ukushaya icole ngalo kubaJuda, kanti kuzophenduka izikhuni, kube ngabaJuda abazobusa phezu kwazo.
Kuzo zonke izifundazwe zenkosi u-Ahasheveroshi, nakuyo yonke imizi lapho kwakuhlala khona abaJuda, abaJuda bahlangana ukuzobulala bonke ababekade befuna ukubabhubhisa. Akukho namunye owayezomelana nabaJuda, ngokuba zonke izizwe zase zibesaba kakhulu.
Bonke ababusi bezifundazwe, iziphathimandla, izikhulu, ababusi nabaphathi benkosi beseka abaJuda, ngokuba nabo base bengenwe ngukwesaba uMoridekhayi.
UMoridekhayi waba ngumuntu omkhulu esigodlweni, nodumo lwakhe lwanda kuzo zonke izifundazwe, waqhubeka njalo waba ngumuntu onamandla.
AbaJuda benza ababefisa ukukwenza ezitheni zabo. Bazihlasela ngenkemba, babulala noma ngubani ababefuna ukumbulala, bonke ababeyizitha zabo.
Enhlokomuzi iShushani, abaJuda babulala amadoda angama-500. Babulala namadodana alishumi kaHamani, indodana kaHamedatha, isitha sabaJuda:
uPharishandatha, uDalifoni, u-Ashiphatha,
uPhoratha, u-Adaliya, u-Aridathi,
uPharimashitaha, u-Arisayi, u-Aridayi noVayizatha.
Nokho awazange athathe mpango.
Ngalolo lusuku, umbiko ngenani lalabo ababebulewe enhlokomuzi iShushani, wethulelwa inkosi,
yayisithi endlovukazini u-Esteri: “Enhlokomuzi iShushani, abaJuda babulale amadoda angama-500, kuwo kunamadodana alishumi kaHamani. Kazi benzenjani kwezinye izifundazwe na? Yini-ke enye osayicela? Ngizokunika yona. Ucelani? Ngizokwenzela.”
U-Esteri waphendula, wathi: “Uma kukuhle enkosini mayigunyaze abaJuda abahlala eShushani, benze nakusasa njengokomthetho wanamuhla, amadodana kaHamani alishumi aphanyekwe ezigxotsheni zokuphanyeka.”
Inkosi yayaleza ukuba kwenziwe lokho; umthetho washaywa eShushani, amadodana alishumi kaHamani aphanyekwa ezigxotsheni zokuphanyeka.
AbaJuda bahlala eShushani, babuye bahlangana nangosuku lweshumi nane lwenyanga u-Adari, babulala amadoda angama-300 eShushani, kodwa abazange bathathe mpango.
AbaJuda ababehlala ezifundazweni zenkosi bahlangana, bazivikela, bakhululeka ezitheni zabo, babulala amadoda ayizi-75 000, kodwa abathatha mpango.
Zonke lezo zinto zenzeka mhla zilishumi nantathu, ngenyanga u-Adari, namhla zilishumi nane, babe sebephumula. Lolo suku balwenza lwaba wusuku lwedili nenjabulo.
Kepha abaJuda ababehlala eShushani bahlangana ngomhla zili-13, nangomhla zili-14, baphumula mhla zili-15, lolo suku balwenza usuku lwedili nentokozo.
Yingakho abaJuda abahlala emizaneni engaphandle kwemizi, nalabo abahlala emizaneni, umhla ziyishumi nane ngenyanga u-Adari kuwusuku lwentokozo nedili, neholide abaphana ngalo izipho zokudla.
UMoridekhayi waloba zonke lezo zinto phansi. Wababhalela izincwadi bonke abaJuda ababehlala kuzo zonke izifundazwe zenkosi u-Ahasheveroshi, ezikude neziseduze.
Wabayala ukuba usuku lwe-14 nolwe-15, lwenyanga u-Adari, bazigcine zibe yizinsuku zokugubha umkhosi minyaka yonke.
Ngalezo zinsuku, abaJuda bakhululwa ezitheni zabo, ngenyanga lapho usizi lwabo lwaphenduka injabulo, ukulila kwabo kwaba yintokozo. Kwakumele kube yizinsuku zedili nentokozo, izinsuku zokuphana izipho ezingukudla, nezipho eziya kwabampofu.
AbaJuda bakwemukela lokho abase bekuqalile nalokho uMoridekhayi ayebabhalele khona.
UHamani, indodana kaHamedatha, umAgagi oyisitha sabo bonke abaJuda, wenza unkatho okuthiwa “yiPhure” ehlose ngalo ukubenza okubi, nokubabhubhisa,
kodwa u-Esteri eseyitshelile inkosi ngaleyo ndaba, yathi akubhalwe izincwadi zokuguqula lelo lisu elibi likaHamani ayehlose ngalo ukucekela phansi abaJuda, lelo cebo laba yisijeziso esehlela yena namadodana akhe, baphanyekwa ezigxotsheni zokuphanyeka.
Yingakho lezo zinsuku zabizwa ngokuthi “yiPhurimi” kususelwa egameni elithi: “iPhure.” Ngenxa yezincwadi zikaMoridekhayi nangenxa yakho konke okwabehlela,
abaJuda bakwenza kwaba ngumthetho wabo, nezizukulwane zabo, nanoma ngubani osephenduke umJuda, ukuthi ngesikhathi esifaneleyo ngonyaka lezo zinsuku ezimbili zigcinwe njengokusho komyalelo kaMoridekhayi, kungaphuthi.
Lezo zinsuku kufanele zikhunjulwe futhi zigcinwe yizizukulwane ngezizukulwane kuyo yonke imindeni, izifundazwe nemizi. Izinsuku zePhurimi akumele zephulwe phakathi kwabaJuda, nokukhunjulwa kwazo kungapheli phakathi kwezizukulwane zabo.
Indlovukazi u-Esteri, indodakazi ka-Abhihayili, benoMoridekhayi babhala izincwadi, bayiqinisekisa iPhurimi ngamandla ababegunyazwe ngawo.
Izincwadi zathunyelwa kubona bonke abaJuda ababesezifundazweni eziyi-127 zombuso wenkosi u-Ahasheveroshi, bebafisela ukuthula nokuvikeleka,
futhi bagcine izinsuku zomkhosi wePhurimi ngesikhathi esifaneleyo, njengoba umJuda uMoridekhayi nendlovukazi u-Esteri bakuqinisekisa kubaJuda, njengalokhu bazibophezela nezizukulwane zabo maqondana nemithetho ephathelene nokuzila neyokulila.
Umyalo ka-Esteri wayiqinisekisa imithetho yePhurimi, yabhalwa phansi emqulwini.
Inkosi u-Ahasheveroshi yathelisa intela izwe nababeseziqhingini zolwandle.
Zonke izinto ezinkulu, nezimangalisayo azenzayo, nendaba yonke yokukhushulelwa kukaMoridekhayi esikhundleni esikhulu, kubhaliwe emilandweni yamakhosi amaMediya namaPheresiya.
UMoridekhayi, umJuda, wayengowesibili ngokwesikhundla embusweni wenkosi u-Ahasheveroshi, enamandla phakathi kwabaJuda, iningi labakubo limthanda, ngokuba wayesebenzela inhlalakahle yabantu bakubo, elwela ukuphatheka kahle kwazo zonke izizukulwane zabo.
Kwakukhona indoda e-Uzi egama layo kwakunguJobe; leyo ndoda yayingenasici; iqotho, imesaba uNkulunkulu, futhi ikugwema okubi.
Yayizele amadodana ayisikhombisa namadodakazi amathathu.
Yayinezimvu eziyizi-7 000 namakameli ayizi-3 000, nezinkabi ezingamabhangqa angama-500 nezimbongolo zezinsikazi ezingama-500 nezisebenzi eziningi kakhulu. Leyo ndoda yayiyisikhulu esiphezulu kunabo bonke abantu basempumalanga.
Amadodana ayo ayevame ukuhamba enze idili endlini yaleyo naleyo ndodana, ngosuku lwayo. Ayethumela, ameme odadewabo abathathu ukuze badle, baphuze ndawonye.
Kwakuthi lapho sezedlule izinsuku zedili, uJobe athumele awangcwelise. Wayevuka ekuseni, anikele ngeminikelo yokushiswa ngokwenani lawo, ethi: “Hleze izingane zami zonile, zamqalekisa uNkulunkulu ezinhliziyweni zazo.” Wenza kanjalo uJobe zonke izinsuku.
Langa limbe, amadodana kaNkulunkulu eza azibonakalisa phambi kukaSimakade, noSathane wafika waba mdibi munye nawo.
USimakade wathi kuSathane: “Uvelaphi na?” USathane wamphendula uSimakade, wathi: “Ngivela ekuzulazuleni emhlabeni, ngehla ngenyuka kuwo.”
USimakade wathi kuSathane: “Inhliziyo yakho isike yayiqaphela yini inceku yami uJobe na? Ngokuba akukho muntu namunye ofana naye emhlabeni, ongenasici, oqotho, owesaba uNkulunkulu nogwema okubi.”
USathane wamphendula uSimakade, wathi: “Ngabe uJobe umesaba uNkulunkulu kungenasizathu na?
Kanti awumbiyelanga yini nxazonke ngothango, yena nabomndeni wakhe, nakho konke anakho, wabusisa nomsebenzi wezandla zakhe na? Imfuyo yakhe iwuchibidolo ezweni.
Kepha-ke ake welule isandla sakho uthinte konke anakho, ubone ukuthi akazukukuqalekisa yini, ebusweni bakho.”
USimakade wathi kuSathane: “Kulungile-ke, konke anakho kusesandleni sakho, kodwa uze ungamthinti yena ngesandla sakho.” USathane wayesesuka ehamba ebukhoneni bukaSimakade.
Kwathi ngolunye usuku, lapho amadodana namadodakazi kaJobe edla, ephuza iwayini endlini yezibulo lakhe,
kwafika isigijimi kuJobe, sathi: “Izinkabi bezilima, izimbongolo ziklabe eduze nazo,
ngesikhathi kufika amaShebha akuthumba, abulala izinceku ngenkemba; yimina nje ngedwa engiphunyulile, ukuze ngizokubikela.”
Sisakhuluma, kwafika esinye, sathi: “Kwehle umlilo kaNkulunkulu uvela ezulwini, washisa izimvu nezinceku, wakuqothula; yimina nje ngedwa engiphunyulile, ukuze ngizokubikela.”
Sisakhuluma, kwafika esinye, sathi: “AmaKhaledi enze amaviyo amathathu, ahlasela, athumba amakameli, abulala izinceku ngenkemba; yimina nje ngedwa engiphunyulile, ukuze ngizokubikela.”
Sisakhuluma naleso kwafika esinye, sathi: “Amadodana namadodakazi akho abedla, ephuza iwayini endlini yendodana yakho endala,
kwase kufika esikhulu isishingishane sivela ngasehlane, sawashaya omane amagumbi endlu, yawela phezu kwabantwana, bafa ujuqu. Yimina nje ngedwa engiphunyulile, ukuze ngizokubikela.”
UJobe wayesesukuma, waklebhula isembatho sakhe, waphuca ikhanda lakhe, wawela emhlabathini, wakhuleka,
wathi: “Ngaphuma ngize esizalweni sikamame, futhi ngizobuyela khona ngize. USimakade usisile, uSimakade usethathile; malibongwe igama likaSimakade.”
Sekwenzekile konke lokhu uJobe akazange one, akamthelanga ngehlazo uNkulunkulu.
Ngelinye ilanga kwafika amadodana kaNkulunkulu, azibonakalisa phambi kukaSimakade; noSathane wafika wema kanye nawo phambi kukaSimakade.
USimakade wathi kuSathane: “Uvelaphi na?” USathane wamphendula uSimakade, wathi: “Ekuzulazuleni emhlabeni ngehla ngenyuka kuwo.”
Wayesethi uSimakade kuSathane: “Inhliziyo yakho iyiqaphele yini inceku yami uJobe na? Akekho onjengaye emhlabeni, umuntu ongenasici, oqotho, owesaba uNkulunkulu, ogwema okubi, osabambelele ebumsulweni bakhe noma ungibelesela ukuba ngimelane naye, ngimbhubhise engenacala.”
USathane wamphendula uSimakade, wathi: “Uma nje ungathinta inyama yakhe uyobona. Konke umuntu anakho angakunikela ukuze asindise ukuphila kwakhe.
Ake welule isandla sakho uthinte amathambo akhe nenyama yakhe, uzobona uyakukuthuka bukhoma.”
USimakade wayesethi kuSathane: “Kulungile-ke, ngimnikela esandleni sakho, kodwa ungalinge uthinte umphefumulo wakhe.”
USathane wayesemuka ebukhoneni bukaSimakade. Wamshaya uJobe ngamathumba amabi, kusukela ematheni onyawo kuze kube sokhakhayini.
UJobe wathatha udengezi ukuba azenwaye ngalo; wayehleli emlotheni.
Umkakhe wayesethi kuye: “Usabambelele yini ebumsulweni bakho na? Thuka uNkulunkulu, ufe.”
Kepha uJobe wathi kuye: “Ukhulumisa okowesifazane oyisiwula. Siyakwamukela okuhle kuphela yini kuNkulunkulu, asiyukwamukela yini nokubi na?” Kukho konke lokho uJobe akonanga ngomlomo wakhe.
Kwathi ukuba abangani abathathu bakaJobe bezwe ngakho konke okubi okwakumehlele, bafika njengokuvumelana kwabo ukuzomkhalela nokumduduza, yilowo nalowo esuka endaweni yakhe: u-Elifazi umThemani, uBhilidadi umShuhi, noZofari umNahama.
Kuthe besebuqamama baphakamisa amehlo abo, kodwa abambonanga ukuthi nguye; badazuluka bakhala, kwayilowo nalowo waklebhula ingubo yakhe, bazithela amakhanda ngothuli beluphonsa phezulu.
Bahlala naye emhlabathini izinsuku eziyisikhombisa nobusuku obuyisikhombisa, bengasho lutho kuye, ngokuba babona ukuthi wayesebuhlungwini obukhulu kakhulu.
Emveni kwalokho uJobe wakhuluma; waqalekisa usuku lwakhe.
UJobe wathi:
“Malubhubhe usuku engazalwa ngalo, nobusuku okwathiwa: ‘Ukhulelwe ingane yomfana.’
Lolo lusuku malube ngubumnyama, uNkulunkulu ephezulu makangalunaki, ukukhanya makungakhanyi kulo.
Ubumnyama nethunzi lokufa makunikwe lona, kuhlale ifu phezu kwalo, ubumnyama bosuku bulethuse.
Lobo busuku mabubanjwe yisigayegaye sobumnyama, bungathokozi phakathi kwezinsuku zonyaka, lungabalwa phakathi kwezinsuku zenyanga.
Yebo, lobo busuku mabube yinyumba, kungezwakali msindo wenjabulo kubo.
Mabaluqalekise labo abaqalekisa usuku, labo abalungele ukuvusa uLeviyathani.
Izinkanyezi zokuhwelela kobusuku maziphenduke ubumnyama, mabulindele ukukhanya kodwa kungabi bikho, mabungakuboni ukuntwela kokusa,
ngokuba abuzivalanga izivalo zesizalo sikamame, abuyifihlanga inkathazo emehlweni ami.
“Kungani ngingafelanga esiswini na? Angibhubhanga ngani lapho ngiphuma esizalweni na?
Amadolo angemukelelani, namabele ukuba ngincele na?
Ngokuba manje ngabe ngilele, ngithule, ngabe ngilele ubuthongo, ngiphumule
kanye namakhosi nabeluleki bomhlaba, labo abazakhela kabusha izindawo ezazicekelwe phansi,
noma kanye nezikhulu ezinegolide, ezazigcwalise izindlu zazo ngesiliva;
noma kungani ngingagcwatshwanga njengokuphuphumileyo nanjengombungu ongalibonanga ilanga?
Lapho izikhohlakali zingasakwazi ukuhlupha, nalapho abakhathele besekuphumuleni.
Lapho iziboshwa zicanasa khona ndawonye, nezwi labacindezelayo zingasalizwa.
Lapho abancane nabakhulu befana; isigqila sikhululekile kumniniso.
“Kungani ukukhanya kunikwa ososizini, nokuphila, kwabanomunyu emphefumulweni,
abalangazelela ukufa, kodwa kungafiki, abakufuna ukwedlula ingcebo ethukusiweyo,
abathokoza, bethabe, bajabule uma bethola ingcwaba?
Kungani ukukhanya kunikwa umuntu ongayiboni indlela yakhe, lowo uNkulunkulu ambiyele nxazonke na?
Ukugquma kimi sekufana nokudla, nokububula kwami kuphophoza njengamanzi.
Ngehlelwa yilokho engikwesabayo, nalokho enginovalo ngakho kuyangehlela.
Anginakuthula, anginaluxolo, anginakuphumula; inkathazo ingehlele.”
U-Elifazi umThemani, waphendula, wathi:
“Uma umuntu ezama ukukhuluma nawe, uzokhathazeka yini na? Ngubani ongazibamba angasho lutho na?
Yebo, ubafundisile abaningi, waqinisa izandla ezintekenteke.
Amazwi akho aphakamisa okhubekayo, aqinisa amadolo antekenteke naxegayo.
“Uma sekufike kuwe, awusenasineke. Uma sekuthinta wena uyadangala.
Ukwesaba kwakho uNkulunkulu akusilo yini ithemba lakho, nokwethembeka kwezindlela zakho, akusiso yini isisekelo sakho na?
Ake ukhumbule ukuthi ngubani owake wabhujiswa engenacala na? Babhujiswa kuphi abalungileyo na?
Ngibabonile abahlwanyela inkohlakalo, nabalima inkathazo, bavuna inhlupheko.
Ngokuphephetha kukaNkulunkulu bayabhubha, ngomoya wentukuthelo yakhe, bayashabalala.
Ukubhodla kwengonyama, nomsindo webhubesi, kuyathula, namazinyo amabhongo amabhubesi ayephuka.
Ibhubesi elinamandla liyafa ngenxa yokweswela impango, amawundlu ebhubesi ayahlakazeka.
“Izwi lafika isinyenyela kimi, indlebe yami yezwa ukunyenyeza kwalo.
Phakathi kwemicabango yemibono yasebusuku, lapho abantu sebehlelwe ngubuthongo obunzima,
ngafikelwa yingebhe nokuthuthumela okwaqhaqhazelisa wonke amathambo ami.
Kwedlula umoya ebusweni bami, waqubula uhlevane esikhumbeni sami.
Kwema kwathi phuhle, kodwa angikwazanga ukubona isimo sakho. Kwakumi okuthile phambi kwami, ngezwa ukunyenyeza nezwi, lithi:
‘Umuntu angalunga yini kunoNkulunkulu na? Umuntu uhlambulukile yini kunoMenzi wakhe na?
Bheka, akethembi ngisho izinceku zakhe, nezingelosi zakhe uzibeka icala.
Kakhulu kangakanani-ke labo abahlezi ezindlini zodaka, abasisekelo sabo sisothulini, abachotshozwa njengenundu na?
Kusukela ekuseni kuze kube kusihlwa bayagxotshwa, bayabhubha kuze kube phakade kungekho nonake utho ngabo.
Intambo yethende labo ayibhonculiwe yini kubo, futhi bafe bengenakho ukuhlakanipha na?’ ”
“Ake umemeze: ukhona yini okuphendulayo na? Yimuphi kwabangcwele oyakuphendukela kuye na?
Ngokuba isiwula sibulawa ngukukhathazeka, nesiduphunga sibhujiswa ngumhawu.
Ngisibonile isiwula sisimama siba nezimpande, ngase ngiqalekisa indlu yaso ngokuphazima kweso.
Abantwana baso abavikelekile impela, bayagandaywa esangweni, abanaye umhlengi.
Isivuno sabo sidliwa ngabalambileyo, basikhipha ngisho emeveni, nabanxaniwe balangazelela ingcebo yabo.
Usizi aluveli othulini, nenhlupheko ayiphumi emhlabathini.
Wonke umuntu uzalelwe ukuhlupheka, njengoba nezinhlansi ziqhasha zibheke phezulu.
“Kepha mina bengiyakumfuna uNkulunkulu, kuNkulunkulu bengiyakuyibeka indaba yami,
Yena owenza izinto ezinkulu, ezingaphenyekiyo, izimangaliso ezingenakubalwa,
Yena onisa imvula emhlabeni, athumele amanzi ebusweni bomhlaba,
ukuze aphakamise abaphansi, aphakamisele phezulu, endaweni ephephileyo, abakhalayo.
Ubhuntshisa amacebo abanobuqili, ukuze izandla zabo zingabi nampumelelo.
Ubamba abahlakaniphileyo ebuqilini babo, achithe ngokushesha iseluleko soyisigwegwe.
Bahlangabezana nobumnyama emini kwabha, baphuphutheke emini, kube sengathi kusebusuku.
Kepha abantulayo uyabasindisa enkembeni yemilomo yabo, nasesandleni sonamandla.
Ngakho-ke ompofu unethemba; ububi buvale umlomo wabo.
“Uyadela lowo muntu uNkulunkulu amsolayo, ngakho-ke ungakwedeleli ukuqondisa kukaSomandla.
Ngokuba uyalimaza, abuye abophe, uyashaya, kodwa izandla zakhe zibuye ziphilise.
Uyokuhlenga ezinhluphekweni eziyisithupha, yebo, nakweziyisikhombisa awuyukuthintwa wububi.
Endlaleni uyakukuhlenga, ungafi, akukhulule nasemandleni enkemba empini.
Uyakukufihla olimini oluhlabayo, awuyukwesaba ukubhubha lapho kufika.
Ukubhubha nendlala uyokuhleka usulu, ungazesabi nezilo zomhlaba.
Ngokuba unesivumelwano namatshe asendle, izilo zasendle zihlalisana ngokuthula nawe.
Uyokwazi ukuthi ithende lakho liphephile, lapho uhlola indlu yakho, uyothola ukuthi awulahlekelwe yilutho.
Uyokwazi ukuthi izizukulwane zakho ziyakuba ziningi, nabozalo lwakho babe njengotshani emhlabeni.
Uyokufa usumdala impela, njengesixha samabele esibhulweni, ngesikhathi sawo.
Bheka lokhu, sikuphenyisisile, kunjalo, kulalele, ukwazi wena luqobo.”
UJobe waphendula wathi:
“Sengathi usizi lwami nenhlekelele engehlele kungalinganiswa nokulinganiswa, nokubhujiswa kwami kubekwe esilinganisweni kanyekanye.
Ngokuba manje kuyasinda kwedlula isihlabathi solwandle, ngakho amazwi ami abengumbhedo nje.
Ngokuba imicibisholo kaSomandla ikimi, ubuthi bayo buphuzwa ngumoya wami, ukwesabisa kukaNkulunkulu kunami shaqa.
Imbongolo yasendle iyakhala yini inotshani na? Inkabi iyakhala yini inotshani na?
Okuduma kungadliwa yini ngaphandle kukasawoti na? Kuyahlwabusa yini okumhlophe kweqanda na?
Umphefumulo wami uyenqaba ukukuthinta, kungukudla okunengekayo kimi.
“Sengathi isicelo sami singezwakala, uNkulunkulu angiphe engikufisayo.
Sengathi uNkulunkulu angangiphihliza, avule isandla sakhe, angibhubhise.
Lokho bekuyoba yinduduzo kimi, bengiyojabuliswa yizinhlungu ezingapheliyo, ngokuba angiwagodlanga amazwi oNgcwele.
Ayini amandla ami ukuba ngingawethemba na? Siyini isiphetho sami ukuba ngingasibekezelela na?
Ngabe amandla ami angamandla amatshe na? Inyama yami iyithusi na?
Angikwazi ukuzisiza, usizo lwami lususiwe kimi.
“Ogodlela umngani wakhe odangele umusa, ulahla ukwesaba uSomandla.
Abafowethu bambuluzile njengomfudlana, nanjengemithonjana eshayo,
emnyama ngenxa yeqhwa, lapho ungqoqwane uzinqwabela kuyo.
Ngesikhathi sokufudumala, iyanyamalala, uma sekushisa iyasha, iphele endaweni yayo.
Abahamba ngezindlela zayo bayaphambuka, benyukela oqwathuleni, babhubhe.
Izindwendwe zabahwebi bakwaThema zabafuna, nemiqobo yezihambi zakwaShebha zibheke ngethemba.
Zadumala, ngoba zazinokuzethemba, lapho sezifike khona zadangala,
nani seninjalo-ke kimi; nibone okwethusayo, nesaba.
Ngasho yini kini, ngathi: ‘Ngipheni isipho empahleni yenu’ na?
noma: ‘Ngikhululeni esandleni sesitha, ningihlenge esandleni sezidlova’ na?
“Ngifundiseni, mina ngizothula du, ningichazele ukuthi ngone ngani.
Ukukhuluma okuqotho kunamandla kangakanani na? Kepha ukusolwa yinina kusiza ngani na?
Nicabanga ukuthi ningawasola amazwi, ngokungathi ukukhuluma kophelelwe yithemba, kungumoya nje na?
Nenza unkatho ngentandane, nithengisa ngomngani wenu.
Manje-ke, phendukani, ningibheke, ngokuba angisoze ngawaqamba amanga kini.
Ake niphenduke, kungabi bikho owenza ukungalungi. Phendukani, indaba yami ilungile.
Kukhona yini ukungalungi engikusho ngolimi lwami na? Ulwanga lwami alunakukwehlukanisa yini okubi na?”
“Umshikashika akusiwo yini owabantu emhlabeni, nemihla yabo ayinjengayo yini eyomqashwa na?
Njengesigqila silangazelela ithunzi, nosebenzayo elindele umholo wakhe,
kanjalo ngabelwe izinyanga zokungenanzuzo, ngamiselwa ubusuku benhlupheko.
Nxa ngilala ngithi: ‘Ngiyovuka nini na?’ Ubusuku bude, kuze kuse ngibinyabinyeka.
Umzimba wami wembozwe yizimpethu nothuli. Isikhumba sami siyaphola, sibuye sibhicike.
“Imihla yami iyashesha kunesaluko, iphela ingenathemba.
Khumbula ukuthi ukuphila kwami kungumoya, iso lami aliyukubuye likubone okuhle.
Iso elingibonayo alisayukungibona, amehlo akho esangibhekile, ngiyobe ngingasekho.
Njengokuba ifu linyamalala lingabe lisaba bikho, unjalo-ke owehlele endaweni yabafileyo, akasayukukhuphuka.
Akasayukubuyela endlini yakhe, indawo yakhe ayisayukumazi.
“Ngakho-ke nami angizukuwunqanda umlomo wami, ngizokhuluma nginobuhlungu emoyeni wami, ngikhononde ngomunyu emphefumulweni wami.
Ngilulwandle yini, noma inkanyamba yolwandle, uze ungibekele abalindi na?
Lapho ngithi: “Umbhede wami uzongiduduza, icansi lami lingithwalise ukukhononda kwami,
uyangesabisa ngamaphupho, ungethuse ngemibono,
ukuze umphefumulo wami uqoke ukuklinywa nokufa kunokuba ngibe kulo mzimba.
Ngiyakuzonda ukuphila kwami, angiyukuhlala njalo, ngiyeke, ngokuba imihla yami iyize.
Uyini umuntu ukuba umenze abe mkhulu, nokuba ubeke inhliziyo yakho kuye,
nokuba umhambele njalo ekuseni, umhlole imizuzu ngemizuzu na?
Kuyoze kube nini ungawasusi amehlo akho kimi na? Ngiyeke ngize ngigwinye isikhwehlela sami.
Uma ngona, ngenzani kuwe mlindi wabantu na? Ungimiseleni ngibe yinkololo yakho, ngize ngibe ngumthwalo nakimi na?
Awusithetheleli ngani isiphambeko sami, ususe isono sami na? Ngokuba manje ngiyakulala phansi othulini, uyakungifuna, kepha angiyukuba bikho.”
Wayesethatha uBhilidadi, umShuhi, wathi:
“Kuyoze kube nini ukhuluma lezi zinto, amazwi akho abe ngumoya onamandla, na?
Ngabe uNkulunkulu uyabuhlanekezela ubulungiswa, uSomandla aphendukezele ukulunga na?
Uma abantwana bakho bonile kuye, wabanikela emandleni eziphambeko zabo.
Kuyothi lapho umfuna uNkulunkulu, umnxusa uSomandla,
uma uhlambulukile, uqotho, Yena uyokubheka, akubuyisele endaweni yakho efaneleyo.
Nakuba ukuqala kwakho kwakungokuncane, nokho ikusasa lakho liyokhula kakhulu.
Ake ubuze manje ngezizukulwane ezakwandulelayo, uqaphele okwatholwa ngokhokho bazo,
ngoba thina singabayizolo nje, asinalwazi; izinsuku zethu emhlabeni ziyithunzi.
Bona abayukukufundisa yini, bakutshele, bakhiphe amazwi ezinhliziyweni zabo na?
Umhlanga ungahluma yini lapho kungenaxhaphozi khona na? Ibhuma lingamila yini kungekho amanzi na?
Uma liseluhlaza, lingakakhiwa, liyabuna phambi kwabo bonke utshani.
“Zinjalo-ke izindlela zabo bonke abakhohlwa nguNkulunkulu, ithemba longenabunkulunkulu liyakushabalala.
Ithemba lakhe liyakunqunywa, nesisekelo sakhe siyindlu yolwembu.
Uyakwencika endlini yakhe, kepha ayiyukuma; uma ebambelela kuyo, ayiyukuqina.
Yena uluhlaza phambi kwelanga; imixhantela yakhe iyenaba ensimini yakhe.
Izimpande zakhe ziyathandela enqwabeni yamatshe, zikhule phakathi kwamatshe.
Uma ebhujiswa endaweni yakhe, iyakumphika ithi: ‘Angikaze ngikubone.’
Bheka, lokho kuyindlela yakhe yokuthokoza. Kusazovela omunye othulini.
“Phela uNkulunkulu akayukumlahla ongenasici, akayukuzibamba izandla zabenza okubi,
aze agcwalise umlomo wakho ngokuhleka, nezindebe zakho ngenhlokomo yokwethaba.
Abakuzondayo bayothelwa ngehlazo; ithende lezikhohlakali alisayukuba bikho.”
UJobe wayesephendula ethi:
“Impela ngiyazi ukuthi kunjalo, kodwa umuntu angaba kanjani ngolungileyo phambi kukaNkulunkulu na?
Uma efuna ukuthetha icala naye, angemphendule nakwelilodwa kwayinkulungwane.
Uhlakaniphile ngenhliziyo, unamandla amakhulu, ngubani owake wamelana naye, waphumelela na?
Yena ogudluza izintaba, zingazi, Yena ozigumbuqela ngentukuthelo yakhe,
ozamazamisa umhlaba usuke endaweni yawo, kuthuthumele izinsika zawo,
oyala ilanga lingaphumi, avalele izinkanyezi,
oweneka izulu yedwa, ahambe phezu kwamaza olwandle,
owenza iNdonsa, iKhwezi, iSilimela, iSicelankobe noMthala oseningizimu,
owenza izinto ezinkulu ezingenakukhohlweka, yebo, izimangaliso ezingenakubalwa.
Bheka, uyedlula ngakimi, ngingaboni, uyedlula, kodwa ngingamuzwa.
Bheka, uyabamba, ngubani ongamkhalima na? Ngubani oyakusho kuye, athi: ‘Wenzani na?’
“UNkulunkulu akayukulunqanda ulaka lwakhe; bayakhothama abasizi bakaRahabi phansi kwakhe.
Pho mina ngingamphendula ngithini, ngingawathathaphi amazwi aqondene naye na?
Noma ngingenacala, angikwazi ukumphendula, kufanele ngicele umusa kumehluleli wami.
Uma bengimbizile wase engiphendula, angikholwa ukuthi ulilalele izwi lami.
Ngokuba uyangilimaza ngesiphepho, wandisa amanxeba ami ngaphandle kwesizathu.
Akangivumeli ukuba ngiphefumule, kepha ungigcwalisa ngomunyu.
Ukuba besizwana amandla, nguye onamandla. Ukuba bekungubulungiswa, ngubani ongambizela icala na?
Nakuba ngilungile, umlomo wami uyakungilahla, noma ngimsulwa, uyakungibeka icala.
Ngimsulwa, kodwa angizazi, ngiyakuzonda ukuphila kwami.
Ngakho-ke konke kuyafana, yingakho ngithi: ‘Ubhubhisa omsulwa nesikhohlakali.’
Uma kwehla inhlekelele ngokuzuma, uyakuhleka ukuphelelwa yithemba kwabangenacala.
Umhlaba unikelwe esandleni sezikhohlakali, uyabumboza ubuso babehluleli bawo, uma kungesiye, pho ngubani na?
“Izinsuku zami ziyashesha ukwedlula umgijimi, ziyabaleka zingakubonanga okuhle.
Zitshuza njengesikebhe somhlanga, nanjengokhozi luphuthuma ukudla kwalo.
Uma ngithi: ‘Ngizokhohlwa ngukukhononda, ngizoyeka ukunyukubala, ngithakase,’
nokho ngiyabesaba bonke ubuhlungu bami, ngiyazi awuyukungithatha njengongenacala.
Mina ngizolahlwa ngecala, pho kungani ngikhandlekela ize na?
Noma ngingageza ngamanzi eqhwa, ngihlanze izandla zami ngensipho,
nokho uyakungicwilisa emgodini, nginengwe yizingubo zami.
Ngokuba akasiye umuntu njengami ukuba bengingaqagulisana naye, nokuba ngibhekane naye esigcawini.
Akukho mlamuli phakathi kwethu, ongabeka isandla sakhe phezu kwethu sobabili, asilamule.
Makayisuse induku yakhe kimi, nengebhe yakhe ingangesabisi,
khona ngiyokhuluma ngingamesabi, ngoba angiyikho lokhu okucatshwangwa ngami.”
“Ngiyakuzonda ukuphila kwami, ngizokhononda ngokukhululeka, ngizokhuluma ebumunywini bomphefumulo wami.
Ngiyakuthi kuNkulunkulu: ‘Ungangilahli njengonecala, kodwa ngazise; kuyini ongiphikisa ngakho na?
Kuhle yini kuwe ukuba ucindezele, ulahle umsebenzi wezandla zakho, uphumelelise icebo lezikhohlakali na?
Unawo yini amehlo enyama na? Uyabona yini njengabantu na?
Imihla yakho injengemihla yomuntu na? Neminyaka yakho injengezinsuku zabantu na?
Kungani ungiphenya, ufunisisa ngesono sami,
noma wazi kahle ukuthi anginacala, futhi akekho ongangihlenga esandleni sakho na?
Izandla zakho zingibumbile, zangenza ngokupheleleyo nxazonke, nokho uyangibhubhisa.
Ake ukhumbule ukuthi nguwe owangibumba njengobumba, pho uyakungibuyisela othulini na?
Awungithululanga yini njengobisi, wangijiyisa njengoshizi na?
Awungembathisanga yini isikhumba nenyama, wangiphica ngamathambo nangemisipha na?
Ungiphe impilo, wangenzela umusa, ukunginakekela kwakho kuwulondile umoya wami.
Kepha lokhu ukufihlile enhliziyweni yakho, ngiyazi ukuthi lokhu ubukusophile:
uma ngona, uyangiqaphela, awuyukungithethelela isono sami.
Uma ngenzile okubi, maye kimi! Uma bengilungile, bengingayukuliphakamisa ikhanda lami, lokhu ngisuthi ihlazo, ngibona ukuhlupheka kwami.
Nokuba bengiziphakamisa, ubuyakungizingela njengengonyama, ubuye uzenze omangalisayo kimi.
Ubuyakuletha kimi ofakazi abasha, wandise intukuthelo yakho kimi, amaviyo ngamaviyo angithelekele.
“ ‘Wangivumelelani ukuba ngizalwe, ngiphume esibelethweni na? Ngangingafi ngani ngingakabonwa nangelilodwa iso na?
Kwakuyoba sengathi angikaze ngibe khona, ngiphume esibelethweni, ngiyiswe ethuneni.
Izinsuku zokuphila kwami aziyingcosana yini na? Ake ungiyeke, kengithole ukuthokoza kancane nje,
ngaphambi kokuba ngihambe, ngingaphinde ngibuye, ngiye ezweni lobumnyama nesigayegaye,
izwe lobumnyama nesiphithiphithi sobumnyama, lapho ukukhanya kufana nobumnyama.’ ”
Wayesethatha uZofari waseNahama, wathi:
“Ngabe awayukuphendulwa yini amazwi amaningi kangaka na? Iphoshophosho lingaxolelwa yini na?
Ukuqavitha kwakho kufanele kubathulise yini abantu na? Nalapho ukloloda, akekho yini ongakuthela ngehlazo na?
Ngokuba uthe: ‘Ukufundisa kwami kulungile; ngimsulwa emehlweni akho Nkulunkulu.’
Sengathi uNkulunkulu angakhuluma, akuvulele izindebe zakhe,
akwazise izimfihlakalo zokuhlakanipha kwakhe, ngokuba ukuhlakanipha kwakhe kubanzi, ukuze wazi ukuthi uNkulunkulu uzokwenza ukhohlwe yingxenye yecala lakho, ukuze kube kuhle kuwe.
“Ungayithola yini imfihlakalo kaNkulunkulu na? Ungawuthola yini umkhawulo kaSomandla na?
Kuphakeme kunezulu, ungenzani na? Kujulile kunendawo yabafileyo, ungazini ngakho na?
Isilinganiso sakho side kunomhlaba, sibanzi kunolwandle.
Uma edlula, avalele, abizele ekwehluleleni, ngubani ongamvimba na?
Ngokuba uyabazi abantu bamanga, lapho ebona inkohlakalo, akayukuyinaka yini na?
Uma umuntu ongahlakaniphile engaba ngohlakaniphileyo, nethole lembongolo yasendle lingazalwa lingumuntu.
“Uma uqondisa kahle inhliziyo yakho, welulela izandla zakho kuye,
uma udedisele kude inkohlakalo esesandleni sakho, ungakuhlalisi ukungalungi emathendeni akho,
impela uyakubuphakamisa ubuso bakho ungenamahloni, uyokuma uqine, ungenakwesaba.
Uyakukhohlwa ukuhlupheka kwakho, uyakukukhumbula njengamanzi adlulileyo.
Ukuphila kwakho kuyokhanya kunemini; nobumnyama buyofana nokusa nje.
Uyoba ngophephile, ngokuba likhona ithemba, uyovikeleka kahle, ulale phansi uphephile.
Uyakulala, kungabi bikho okuphazamisayo; abaningi bayakuzincengela kuwe.
Kepha amehlo ezikhohlakali ayakufiphala; ayiyukuba bikho nendawo yokuphephela; ithemba lazo liyakuba ngukuphuma komphefumulo.”
UJobe waphendula, wathi:
“Akuthandabuzwa ukuthi yini nodwa abantu, nokuhlakanipha kuyofa nani.
Kepha nami nginengqondo njengani, aningedluli ngalutho. Ngubani ongazazi izinto ezinjengalezi na?
Sengiyinhlekisa kumngani wami, mina ebengikhala kuNkulunkulu angiphendule; umuntu olungileyo nongenasici, useyisigcono.
Labo abahleli kahle bayibukela phansi ingozi, ilungiselelwe abanezinyawo ezishelelayo.
Amathende abaphangi anokuthula, abachukuluza uNkulunkulu balondekile, labo abaletha onkulunkulu babo ngezandla zabo.
Kepha ake ubuze izilwane, zizokufundisa, nezinyoni zezulu, ukuze zikutshele.
Khuluma kuwo umhlaba, ukuze ukufundise, nasezinhlanzini zolwandle ukuze zikulandise.
Ngubani phakathi kwabo bonke laba, ongazi ngakho konke lokho ukuthi isandla sikaSimakade sikwenzile lokhu na?
Esandleni sakhe kukhona imiphefumulo yakho konke okuphilayo, kanjalo nomoya wabo bonke abaphilayo.
Indlebe ayiwahloli yini amazwi, nolwanga alukunambithi yini ukudla na?
Ukuhlakanipha kutholakala ezimpungeni, nangobude bezinsuku kwabanokuqonda.
“Ukuhlakanipha namandla kukuye, amasu nokuqonda kungokwakhe.
Yena uma ebhidliza, akekho ongakha kabusha, uma evalela umuntu, akekho ongamvulela.
Uyawavimba amanzi, ashe, awathumele agumbuqele umhlaba.
Amandla nokuhlakanipha okungqokolo kungokwakhe, oduka endleleni nalowo omdukisayo bangabakhe.
Uyaphuca abeluleki ukuhlakanipha, enze abehluleli babe yiziwula.
Uthukulula izintambo zamakhosi, awabophe ngebhande ezinkalweni zawo.
Ugodukisa abaphristi bengenalutho, athele phansi othulini izikhulu.
Uyazithulisa izindebe zabathembekileyo, aphuce amalunga ukuqonda.
Uthela izikhulu ngehlazo, athukulule amabhande abanamandla.
Wembula izinto ezijulileyo ebumnyameni, aveze obala izinto ezisebumnyameni obukhulu.
Wenza izizwe zibe zinkulu, bese ezibhubhisa, ukhulisa izizwe, bese ezihlakaza.
Uphuca abaholi bezizwe zomhlaba ukuqonda, abahlwathizise lapho kungekho ndlela khona, ehlane, kwahlongasibi.
Baphuphutheka ebumnyameni bengenakukhanya, ubabhamazelisile njengezidakwa.”
“Bheka, iso lami likubone konke, nendlebe yami yezwa, yaqonda.
Enikwaziyo nami ngiyakwazi, aningedluli ngalutho.
Kepha ngizokhuluma kuSomandla, ngifisa ukuqagulisana noNkulunkulu.
Kepha nina ningababheci ngamanga, nonke niyizinyanga ezingathi shu.
Sengathi impela ningawuhlaba inhlali, lokho kuyoba ngukuhlakanipha kini.
Ake nilalele ukuqagulisana kwami, nizwe isikhalo sezindebe zami.
Niyokhuluma okubi yini ngoNkulunkulu, niyokhuluma inkohliso ngaye na?
Niyobuvuna yini ubuso bakhe, nimmele uNkulunkulu na?
Kuyakuba kuhle yini lapho eniphenya na? Ningamkhohlisa yini njengalokhu kukhohliswa umuntu na?
Impela uyakunisola uma niyokwenzelela ngasese.
Ubukhosi bakhe abuyukunethusa yini, nokwesabisa kwakhe kwehlele kini na?
Izikhumbuzo zenu ziyizaga zomlotha, nezivikelo zenu ziyizivikelo zobumba.
“Thulani, ukuze ngikhulume, noma ngabe ngehlelwa yini akusho lutho lokho.
Yingani ngibeka ukuphila kwami engcupheni, ngibeka impilo yami ezandleni zami na?
Uzongibulala, angisenathemba, ngizozivikela izindlela zami, ngilubeke udaba lwami phambi kwakhe.
Lokhu kuyakuba yinsindiso yami, ukuthi ongenaNkulunkulu akayukuza phambi kwakhe.
Lalelisisani amazwi ami, nengikushoyo kungene ezindlebeni zenu.
Bhekani-ke, sengizilungiselele ukwethula udaba lwami, futhi ngiyazi ukuthi icala lizongithetha.
Ngubani ozophikisana nami na? Ngokuba uma kunjalo ngizozithulela ngize ngife.
Zimbili kuphela izinto engicela ungenzele zona, ukuze ngingabucasheli ubuso bakho:
dedisela kude nami isandla sakho, ukwesabeka kwakho kungangethusi.
Khuluma, ngizophendula, noma mangikhulume, Wena ungiphendule.
Zingakanani iziphambeko zami nezono zami na? Ngazise izeqo zami nezono zami.
Ubufihleleni ubuso bakho, ushaye sengathi ngiyisitha sakho na?
Uzokwethusa iqabunga eliphephukayo, uxoshe inkunkuma eyomileyo na?
Ngokuba ubhala izinto ezibuhlungu ngami, ungijezisela iziphambeko zasebusheni bami.
Izinyawo zami uzichome ezingongolweni, waziqaphela zonke izindlela zami, wamisa umkhawulo ematheni ezinyawo zami.
Ngiyaphela njengobolayo, nanjengengubo edliwa ngubuvunya.”
“Umuntu ozelwe ngowesifazane imihla yakhe mifushane, igcwele inkathazo.
Uyaqhakaza njengembali, abuye abune, ubalekisa okwethunzi, akami ndawonye.
Ngabe ugxilisa amehlo akho konje, ungiyisa ekwehlulelweni kanye nawe na?
Ngubani ongaveza okuhlanzekile kokungcolile na? Akekho noyedwa.
Uma imihla yakhe inqunyiwe, nenani lezinsuku zakhe zikuwe, uwumisile umkhawulo wakhe, akasoze aweqa.
Bheka kude naye, uke umyeke, aze athokoze osukwini lwakhe, njengomqashwa.
“Ngokuba kukhona ithemba emthini: uma unqunywa, uyakubuye uhlume, nehlumela lawo aliyukuphela.
Noma impande yawo iguga emhlabathini, nesiqu sawo sifela othulini,
ngephunga lamanzi uyakuhluma, uveze amagatsha njengesithombo.
Kepha umuntu uyafa, abe buthakathaka, umuntu obhubhile uphi na?
Njengamanzi anyamalele olwandle, nomfula oshile waze woma,
kanjalo umuntu ulala phansi, angabe esavuka, lize lingabi bikho izulu abayukuvuka, abayukuphaphanyiswa ebuthongweni babo.
Sengathi ungangifihla endaweni yabafileyo, ungisithe kuze kudlule intukuthelo yakho, unginqumele isikhathi, ungikhumbule.
Uma umuntu efa, uyakubuye aphile yini na? Bengiyakulinda zonke izinsuku zomshikashika wami, kuze kufike ukuphunyuzwa kwami.
Uyakungibiza, ngisabele, uyakuwulangazelela umsebenzi wezandla zakho,
ngalokhu awuyukuzibala izinyathelo zami, awuyukusinaka isono sami.
Isiphambeko besiyakuvalelwa esikhwameni, bese usibekela ukona kwami.
“Kepha intaba iyawa, idilike, nedwala lisuswe endaweni yalo,
amanzi ayagudla amatshe, ukuphuphuma kwawo kukhukhula uthuli lomhlaba, nethemba lomuntu lishafiswe kanjalo.
Uyamehlula kuze kube phakade, ahambe, uyabuguqula ubuso bakhe, umhambise.
Amadodana akhe ayahlonishwa, engazi yena, ayehliswa, yena angakuboni lokho.
Umzimba wakhe kuphela ozwa ubuhlungu, umphefumulo wakhe umlilele wona kuphela.”
Kwase kuthatha u-Elifazi, umThemani, wathi:
“Ohlakaniphileyo uyakuphendula yini ngolwazi olungathi shu, agcwalise isisu ngomoya wasempumalanga na?
Aphikisane ngamazwi angasizi lutho nangezinkulumo ezingenalusizo na?
Kepha wena uyakuchitha ukwesaba, uqede ukuzindla phambi kukaNkulunkulu.
Ngokuba iziphambeko zakho zifundisa umlomo wakho; ukhetha ukukhuluma kwamaqili.
Ngumlomo wakho okulahla ngecala, yizindebe zakho uqobo, hhayi mina, ezifakaza okumelene nawe.
Ngabe ungumuntu wokuqala yini owazalwa na? Wabakhona zingakabi bikho nezintaba na?
Wakuzwa yini okwakhulunywa emkhandlwini kaNkulunkulu, wazigodlela wedwa ukuhlakanipha na?
Yini oyaziyo thina esingayaziyo na? Yini oyiqondayo thina esingayiqondiyo na?
Izimpunga, nabamnkantshubomvu abadala kunoyihlo bangakithi.
Incane yini kuwe induduzo kaNkulunkulu, nezwi elikhulunywa kahle kuwe na?
Kungani inhliziyo yakho ikumukisa na? Kungani amehlo akho egcwala intukuthelo,
bese ubhokela uNkulunkulu ngolaka, ukhulume amazwi anje ngomlomo wakho na?
Uyini umuntu ukuba angaba ngohlanzekileyo, nozelwe ngowesifazane ukuba abe ngolungileyo na?
Nabangcwele bakhe akabethembi, nezulu alihlanzekile emehlweni akhe,
kakhulu kangakanani onengekayo nowonakeleyo, umuntu ophuza ububi njengamanzi na?
“Ngizokutshela, ngilalele, ngizokulandisa engikubonileyo,
lokho okwakhulunywa yizihlakaniphi ezingakufihlanga kokhokho bazo,
izwe elanikwa zona kuphela, akukho mfokazi owadabula phakathi kwabo.
Umuntu oyisikhohlakali ubinyabinyeka ebuhlungwini imihla yonke, ngayo yonke iminyaka isidlova esibekelwe yona.
Ukunkeneneza okwesabisayo kusezindlebeni zakhe, uyothi esahlezi enethezekile, kutheleke umphangi.
Akethembi ukuthi uyobuya ebumnyameni, ulindelwe yinkemba.
Uhamba ezulazula, efuna ukudla, athi: kuphi na? Uyazi ukuthi usuku lobumnyama selusesandleni sakhe.
Ukuhlupheka nosizi kuyamethusa, kumkhungatha njengenkosi ezilungiselele ukuya empini,
ngokuba waphonsela uNkulunkulu inselelo, wazigabisa kuSomandla.
Wamelana naye ngeqholo, ethembele emahawini akhe aqinileyo,
ngokuba wasibekela ubuso bakhe ngamafutha akhe, wenza umvingqi okhalo lwakhe.
Wahlala emizini eyincithakalo, nasezindlini okungahlali muntu kuzo, ezimiselwe ukuba ngamanxiwa.
Akayukuceba, nengcebo yakhe ayiyukuhlala, nempahla yakhe ayiyukwanda ezweni.
Akayukusuka ebumnyameni, ilangabi liyakubunisa amagatsha akhe, apheshulwe ngukuphefumula komlomo wakhe.
Makangethembi okuyize, azikhohlise ngokuyize, ngokuba ize liyakuba ngumvuzo wakhe.
Kuyokwenzeka kungakabi yisikhathi, igatsha lakhe lingakakhuli libe luhlaza.
Uyakuvuthulula amagilebhisi akhe aluhlaza njengomvini, awohloze imbali yakhe njengomnqumo.
Ngokuba umshungu wabangenabunkulunkulu uyinyumba, nomlilo uqothula amathende athengwa ngokufunjathiswa.
Bakhulelwa inkathazo, bazale inkohlakalo, isisu sabo silungiselela inkohliso.”
UJobe waphendula, wathi:
“Ngizizwile izinto eziningi ezinjengalezi, nonke ningabaduduzi ababi.
Awukho yini umkhawulo emazwini ayize na? Ucunulwa yini ukuze ungiphendule na?
Nami bengingakhuluma njengani, ukuba benisesikhundleni sami, bengingayihlanganisa inkulumo, ngimelane nani, ngininikinele ikhanda.
Benginganikhuthaza ngomlomo, induduzo yezindebe zami idambise izinhlungu zenu.
“Uma ngikhuluma, ubuhlungu bami abuyukudanjiswa, nalapho ngithula, bungakanani obusukayo kimi na?
Nokho manje uNkulunkulu ungikhathazile, yonke indlu yami uyenze incithakalo.
Ungibambile, lokhu kungubufakazi, ukuzaca kwami kumile kungubufakazi phambi kwami.
Ulaka lwakhe luyadwengula, luyangisibekela, ungiququdela amazinyo, isitha sami singihlahlela amehlo.
Bangikhamisela imilomo, bengiklolodela, bangishaya esihlathini, bengigcona, bayangihlanganyela.
UNkulunkulu unginikele kubantu abonakeleyo, ungiphonse esandleni sezikhohlakali.
Ngangihlezi kahle, wangiphihliza, ungibambe ngentamo, wangiphahlaza, ungimise ngaba yinkololo yakhe.
Abacibishelayo bakhe bangihaqile, uqhekeze izinso ngokungenaluzwelo, inyongo yami uyichithe emhlabathini.
Ungishaya ephindelela, ungidumela njengeqhawe.
“Ngithungele indwangu eyisaka esikhumbeni sami; ngabeka amandla ami othulini.
Ubuso bami buklwele babomvu ngukukhala, kunobumnyama obukhulu ezinkopheni zami,
nakuba kungekho budlova ezandleni zami, nokukhuleka kwami kulungile.
Mhlaba, uze ungaligqibi igazi lami, ukukhala kwami makungayitholi indawo yokuphumula.
Ngisho manje, ufakazi wami usezulwini, ummeli wami usezindaweni eziphakemeyo.
Abangani bami bayangiklolodela, iso lami liphophoza izinyembezi kuNkulunkulu,
ukuze abeke udaba lomuntu kuNkulunkulu, njengomuntu ekhulumela umngani wakhe.
Ngokuba sekusele iminyaka embalwa, ngithathe indlela engingenakubuya kuyo.”
“Umoya wami wephukile, imihla yami iyaphela, sengibhekene negodi.
Impela kukhona abangiklolodelayo eduze kwami, neso lami lihleli ekungichukuluzeni kwabo.
Ake unginike isibambiso, ungimele, ngubani oyokwenza isivumelwano nami na?
Ngokuba uzivalile izingqondo zabo, ukuze zingaqondi, ngakho-ke awuyukubaphakamisa.
Okhaphela abangani bakhe ngenxa yesabelo; amehlo abantwana bakhe ayakufiphala.
Ungenze isiga ebantwini, nokhafulelwa ebusweni.
Iso lami lifiphele ngenxa yosizi, wonke amalungu ami anjengethunzi.
Abaqotho badumele ngalokhu, ukuthi ongenacala uvukela ongenabunkulunkulu.
Olungileyo uyobambelela endleleni yakhe, onezandla ezihlanzekileyo uyakukhula emandleni.
Kepha nina buyani manje ngothi lwenu, nokho angiyukumthola ohlakaniphileyo phakathi kwenu.
Izinsuku zami seziphelile, amasu ami asechithiwe, nezifiso zenhliziyo yami.
Ubusuku babenza imini, bathi: ‘Ukukhanya kuseduze nobumnyama.’
Uma ngithemba ukuthi indawo yabafileyo iyindlu yami, ngendlale ukhukho lwami ebumnyameni,
ngibize ingcwaba ngithi: ‘Ungubaba,’ nezimpethu: ‘Mame nodadewethu.’
Liphi pho ithemba lami na? Yebo, ithemba lami, ngubani oyakulibona na?
Ngabe liyokwehlela ezinsikeni zendawo yabafileyo, sehle kanyekanye, siyophumula othulini na?”
UBhilidadi umShuhi wayesethatha, ethi:
“Uyokuyeka nini lokhu kukhuluma na? Ake ucabangisise, bese siyakhuluma.
Kungani sithathwa njengezilwane, siyizithutha yini emehlweni akho na?
Wena ozidwengulayo ngenxa yolaka lwakho, umhlaba uyoshiywa yini ngenxa yakho, nedwala lisuswe endaweni yalo emhlabeni na?
Yebo, ukukhanya kwesikhohlakali kuyacishwa, nelangabi lomlilo waso aliyukukhanya.
Ukukhanya kuyafiphala ethendeni laso, nesibani saso siyacima phezu kwaso.
Izinyathelo zaso ezinamandla ziyafinyezwa, namasu aso asiqumbe phansi.
Ngokuba izinyawo zaso zibanjwe enethini, sihamba phezu komwowane.
Unoxhaka usibambe esithendeni, nogibe lwasibamba.
Sithukuselwe isihibe emhlabathini, nonoxhaka endleleni.
Ingebhe iyasethusa nxazonke, isezithendeni zaso.
Inhlupheko isilambele, nenhlekelele isilindele lapho sikhubeka.
Izingxenye zesikhumba saso ziyakudliwa, yebo, izibulo lokufa kuyawadla amalungu aso.
Siyakususwa ethendeni laso esilethembayo, siyiswe enkosini yengebhe.
Ethendeni laso kuyohlala okungesibo abaso, indawo yaso ichelwe ngesibabuli.
Kuyokoma izimpande zaso phansi, phezulu kubune amagatsha aso.
Kuyakuphela ukukhunjulwa kwaso emhlabeni, kungabi bikho okhumbula igama laso emigwaqweni.
Siyakuxoshwa ekukhanyeni, siyiswe ebumnyameni, sixoshwe emhlabeni.
Asiyukuba nabantwana noma abazukulu phakathi kwabakubo, noyosinda lapho sasihlala khona.
Abasentshonalanga bethuswa lusuku lwaso, nabasempumalanga bakhungathwa ngukwesaba.
Impela lezi yizindlu zowenza okubi, impela lena yindawo yongamazi uNkulunkulu.”
UJobe wayesephendula, ethi:
“Kuyoze kube nini nihlupha umphefumulo wami, ningihlifiza ngamazwi na?
Sekuze kwaba kalishumi ningingcofa, kodwa anizange nibe namahloni okuthi ningiphathe kabi.
Uma impela ngonile, ukona kwami kuhleli kimi.
Uma impela niyozikhukhumeza ngaphezu kwami, niphikisana nami ngehlazo lami,
yazini-ke ukuthi nguNkulunkulu owenze okubi kimi, wangigubuzela ngenetha lakhe.
Noma ngikhalile ngathi: ‘Indluzula!’ kepha angiphendulwanga, ngicele ukusizwa, kodwa abukho ubulungiswa.
Uyivalile indlela yami ukuze ngingedluli, wabeka ubumnyama ezindleleni zami.
Uluhlubulile udumo lwami kimi, wasusa umqhele ekhanda lami.
Ungidilizele phansi nxazonke, ngaphela nya, ithemba lami ulisiphule njengesihlahla.
Ungivuthele ngentukuthelo yakhe, wangithatha njengesitha sakhe.
Amabutho akhe atheleke kanyekanye, angizungeza ngemigoqo yokuhlasela, akanisa nxazonke zethende lami.
“Uqhelisele kude abafowethu, abazana nami bangihlubuka impela.
Izihlobo zami zingishiyile, nengazana nabo bangikhohliwe.
Abagogobele endlini yami nezincekukazi zami bangenza umfokazi, sengingowezizwe emehlweni abo.
Uma ngibiza inceku yami, ayisabeli, sekuyimina engiyincenga ngomlomo wami.
Umoya wami uyanuka kumkami, sebeyanengwa yimi, ngisho nabantwana esaphuma nabo siswini sinye kumame.
Sengedelelwa ngisho nayizingane, uma ngivuka, zikhuluma kabi ngami.
Abangani bami ebesingamathe nolimi nabo sebeyangenyanya, nalabo engibathandayo sebengifulathele.
Amathambo ami anamathela esikhumbeni sami nasenyameni yami, ngisinde ngokulambisa kuphela.
Ngihawukeleni, ngihawukeleni, nina bangani bami, ngokuba isandla sikaNkulunkulu singishayile.
Ningihluphelani njengalokhu noNkulunkulu enza na? Anisuthi yini yinyama yami na?
“Sengathi amazwi ami angalotshwa phansi! Sengathi amazwi ami abengaqoshwa emqulwini,
aqoshwe edwaleni ngosiba lwensimbi nomthofu, ukuze ahlale ingunaphakade!
Kepha mina ngiyazi ukuthi uMhlengi wami uyaphila, ekupheleni uyakuma othulini.
Lapho sesishabalele isikhumba sami, ngiyakumbona uNkulunkulu ngingokhululekile emzimbeni.
Ngiyakumbona mina uqobo lwami, amehlo ami ayakumbona, hhayi njengomfokazi, umphefumulo wami uqhilika injabulo uma ngicabanga ngalokho.
Uma nithi: ‘Siyakumhlupha kanjani!’ bese nithi: ‘Umongo wendaba ukuye,’
yesabeni nina uqobo inkemba, ngokuba ulaka lungolweziphambeko ezifanele inkemba, ukuze nazi ukuthi ukwehlulela kukhona.”
UZofari, umNahama, waphendula, wathi:
“Imicabango yami engihluphayo ingenza ngishe amashushu ngokukuphendula, ngenxa yokuba ngikhathazeke kakhulu.
Sengizizwile izinsolo zakho ezingithunazayo, kodwa manje umoya wami wokuqonda ungenza ngiphendule.
“Awazi yini lokhu ukuthi kusukela emandulo, lapho kubekwa abantu emhlabeni,
ukuthi ukujabula kwezikhohlakali kufushane, nokuthokoza kwabangenankulunkulu kungokomzuzwana nje na?
Noma ukuphakama kwakhe kungakhuphukela ezulwini, nekhanda lakhe lifinyelele emafini,
uyakubhubha kuze kube phakade, njengendle yakhe; abambonayo bayakuthi: ‘Ukuphi na?’
Uyakundiza njengephupho, angafunyanwa, axoshwe njengombono wasebusuku.
Iso elimbonile alisayukuphinde limbone, nendawo yakhe ayisayukumbona.
Abantwana bakhe bayonxephezela abampofu, izandla zabo ziwubuyisele kubo umcebo wakhe.
Amathambo akhe ayogcwala ugqozi lobusha, kodwa ayolala othulini kanye naye.
“Noma ububi bumnandi emlonyeni wakhe, ebufihla phansi kolimi lwakhe,
noma ebugodla engabushiyi, ebugcina emlonyeni wakhe,
nokho ukudla kwakhe kuyomphendukela esiswini, kube ngubuthi bezimfezi ezibilini zakhe.
Umcebo awugwinyile, uyobuye awuhlanze, nguNkulunkulu oyakuwukhipha esiswini sakhe.
Uncela isihlungu sezimfezi, abulawe wulimi lwenyoka.
Akayukuyibuka imifula nemifudlana egeleza uju nezaqheqhe.
Ubuyisa konke akukhandlekelayo, engakakugwinyi, akayukujabula ngempahla ayitholileyo.
Ngokuba ubacindezele, wabalahla abampofu, udle indlu angazange ayakhe.
“Ngokuba akakwazi ukuthula ngaphakathi kwakhe, kulokho akufisayo akuphumeleli lutho.
Akusalanga lutho angaludlanga, ngakho-ke impumelelo yakhe ayinakuma.
Kuyothi kusamhambela kahle, ehlelwe yizinhlupheko; izandla zabo bonke abahluphekayo ziyakuza kuye.
UNkulunkulu uyakugcwalisa isisu sakhe ngezinhlupheko, anise ukuvutha kwentukuthelo yakhe phezu kwakhe.
Uyakubalekela isikhali sensimbi, kodwa agwazwe ngumnsalo wethusi.
Uwubhoncula uphume ngasemhlane, awubone ubengezela igazi lakhe, maqede akhungathwe yingebhe.
Ubumnyama obupheleleyo buyakuba phezu komcebo wakhe wonke, umlilo ongavuthelwanga muntu uyakumqothula, okuseleyo ethendeni lakhe kushe kungqongqe.
Izulu liyoveza obala isiphambeko sakhe, umhlaba umelane naye.
Ifa lendlu yakhe liyoshabalala, linyamalale ngosuku lwentukuthelo kaNkulunkulu.
Lesi yisabelo somuntu okhohlakele, esivela kuNkulunkulu, nefa alimiselwe nguNkulunkulu.”
UJobe waphendula, wathi:
“Walaleleni ngokucophelela amazwi ami; lokhu makube yinduduzo evela kini.
Ngibekezeleleni, ngizakukhuluma, ningangiklolodela-ke lapho sengiqedile ukukhuluma.
“Ngabe ukukhononda kwami kungomuntu yini na? Kungani umphefumulo wami ungebekezele na?
Ngibhekeni, nishaqeke, nibambe ongezansi.
Uma ngikhumbula lokhu, ngiyaphazamiseka, ukwesaba kuhlasimulise umzimba wami.
Kungani izikhohlakali ziphila, zize zibe zindala, yebo, zidlondlobale zibe namandla na?
Abantwana bazo bekhula bamiswe phambi kwazo, nozalo lwazo, phambi kwamehlo azo.
Izindlu zazo zivikelekile, akukho ukwesaba kuzo; uswazi lukaNkulunkulu alukho phezu kwazo.
Inkunzi yazo iyakhwela, kayiphuthi; inkomazi yazo iyazala, kayiphunzi.
Zikhipha amankonyane azo njengomhlambi; abantwana bazo bayatshakadula.
Bahlabelela ngesigubhu nangehabhu, bathokoza ngomsindo womtshingo.
Ziphetha imihla yazo ngokuhle, zehlela endaweni yabafileyo ngokuthula.
Nokho zithe kuNkulunkulu: ‘Suka kithi, asifuni ukwazi izindlela zakho.
USomandla uyini ukuba simkhonze na? Siyakuzuzani uma sikhuleka kuye na?’
Bhekani, impumelelo yazo isezandleni zazo; izeluleko zezikhohlakali zikude nami.
“Kukangaki lapho isibani sezikhohlakali sicinywa khona, zehlelwe yinhlekelele, zabelwe isabelo ngentukuthelo yakhe na?
Zifana nezibi phambi komoya, namakhoba epheshulwa yisiphepho.
UNkulunkulu ukubekele abantwana bazo ukukhohlakala kwazo, kodwa makabuphindisele kuzo uqobo, ukuze zikwazi.
Mazikubone ukubhubha kwazo ngamehlo azo, ziphuze intukuthelo kaSomandla.
Zinandabani nabendlu yazo uma sezingasekho, lapho umumo wezinyanga zazo usunqunyiwe na?
Ukhona yini ongafundisa uNkulunkulu ukwazi, Yena owehlulela abaphakemeyo na?
“Omunye ufa esemi kahle kukho konke, ezinzile, enokuthula.
Umzimba wakhe unonophele, umnkantsha wamathambo akhe ucebile.
Omunye ufa enomphefumulo onomunyu, engakaze adle okuhle.
Bayolala phansi othulini kanyekanye, izimpethu zibemboze.
Bhekani, ngiyayazi imicabango yenu, namacebo enu enifuna ukungihlukumeza ngawo.
Nithi: ‘Iphi indlu yezikhulu, liphi ithende elihlala izikhohlakali na?’
Anibabuzanga yini abadlula ngendlela? Anibamukeli yini ubufakazi babo
bokuthi omubi uyokophulwa ngosuku lwenhlekelele, nokuthi bayaphunyuka ngosuku lwentukuthelo na?
Ngubani oyakumtshela kwezikabhoqo ngendlela yakhe na? Ngubani oyakuphindisela ngalokho akwenzileyo na?
Uyakuyiswa ethuneni, kube khona olinda elibeni.
Amagabade asesigodini ayakuba mnandi kuye; bonke abantu bayakumlandela njengokuba bengenakubalwa nababephambi kwakhe.
“Pho ningiduduzelani ngeze, lokhu ezimpendulweni zenu kusele inkohliso yodwa na?”
U-Elifazi umThemani wayesethatha, ethi:
“Umuntu angaba yini wusizo kuNkulunkulu na? Ohlakaniphe kakhulu angaba wusizo yini kuye na?
Kuyintokozo yini kuSomandla uma ulungile? Kunomvuzo yini kuye uma wenza izindlela zakho zibe msulwa na?
“Ngabe ukusola ngenxa yokumesaba kwakho yini, aze angene nawe ekwehlulelweni na?
Ububi bakho abubukhulu yini na? Izono zakho azinakuphela.
Ngokuba uthathe ngeze izibambiso kubafowenu, wahlubula abampofu izingubo zabo.
Awumphuzisanga amanzi okhatheleyo, awumnikanga ukudla olambileyo.
Umuntu onamandla, izwe lingelakhe; ohlonishwayo uhlala kulo.
Uxoshe abafelokazi bengenalutho, wafihliza izingalo zezintandane.
Ngakho-ke uzohaqwa yizingibe; wethuswe wuvalo oluzumayo.
Uyokwembozwa ngubumnyama, ukuze ungaboni, nesikhukhula samanzi siyakukusibekela.
“UNkulunkulu akekho yini phezulu ezulwini na? Bheka, izinkanyezi eziphakemeyo ukuthi ziphakeme kangakanani.
Uthi wena: ‘UNkulunkulu wazini na? Angehlulela yini engale kwesigayegaye na?
Amafu ayamsibekela ukuze angaboni; uhamba esiyingelezini sezulu.’
Uyakuyigcina yini indlela yasemandulo eyahanjwa yizikhohlakali na?
Yizo ezahlwithwa kungakabi yisikhathi, ezisisekelo sazo sathululwa njengomfula,
ezazithi kuNkulunkulu: ‘Suka kithi; uSomandla angenzani na?’
Kepha nguye owagcwalisa izindlu zazo ngokuhle. Amasu ezikhohlakali akude nami.
“Abalungileyo bayakukubona, bathokoze; abangenasici bayabaklolodela, bathi:
‘Impela ababemelene nathi sebebhujisiwe, nabakushiyileyo kuqothulwe ngumlilo.’
“Mawubuyisane noNkulunkulu, ukuze ube nokuthula; ngaleyo ndlela, okuhle kuyakufika kuwe.
Ake wemukele imfundiso ephuma emlonyeni wakhe, ubeke amazwi akhe enhliziyweni yakho.
Uma ubuyela kuSomandla, uyakusimamiswa, uma ususa ukungalungi ethendeni lakho,
ulahle igolide lakho othulini, nelase-Ofiri ulitshinge phakathi kwamatshe esigodini,
uSomandla uyakuba yigolide lakho nesiliva elikhazimulayo kuwe.
Ngalokho uyothokoza ngoSomandla, ubuso bakho ubuphakamisele kuNkulunkulu.
Uyakukhuleka kuye, akuzwe, wena ufeze izithembiso zakho.
Uyakunquma ukwenza okuthile, kwenzeke, ukukhanya kuyokhanya ezindleleni zakho.
Uma bekwehlisa isithunzi, uyakuthi: ‘Kungukuphakanyiswa!’ ngokuba uyamsindisa ozithobayo.
Umuntu ongemsulwa uyakumhlenga naye, uyakumhlenga ngobumsulwa bezandla zakho.”
Wayesephendula uJobe, wathi:
“Nanamuhla ukukhononda kwami kumunyu; isandla sami sinzima, nakuba ngibubula.
Sengathi ngabe ngiyazi ukuthi ngizomthola kuphi, ukuze ngifike endaweni yakhe.
Bengiyakulwethula udaba lwami phambi kwakhe, umlomo wami ngiwugcwalise ngamazwi empikiswano.
Bengiyakuwazi amazwi abeyokungiphendula ngawo, ngikuqonde abezokusho kimi.
Ubeyakuphikisana nami yini ngamandla akhe amakhulu na? Qha, ubeyongilalela.
Olungileyo ubengaphikisana naye, mina ngikhululwe kumehluleli wami ingunaphakade.
Kepha uma ngiya phambili, akekho lapho, uma ngiya emuva, angimboni
ngakwesokhohlo, lapho ezifihle khona, angimboni; ujikela ngakwesokunene, kepha angimboni.
“Ngokuba uyayazi indlela yami; esengivivinyile, ngiyakuphuma nginjengegolide.
Unyawo lwami lunamathele ezinyathelweni zakhe; ngiyigcinile indlela yakhe, angiphambukanga.
Angichezukanga emyalweni wezindebe zakhe; amazwi akhe ngiwagcinile esifubeni sami.
“Yena akaguquki, ngubani ongamguqula na? Wenza lokhu okufiswa ngumphefumulo wakhe.
Uyakukufeza lokho angiqokele khona; nokunye okuningi okusemqondweni wakhe.
Ngakho-ke ngiyamesaba nxa ngiphambi kwakhe, uma ngicabanga ngaye ngiba nengebhe ngaye.
UNkulunkulu uyidangalisile inhliziyo yami. uSomandla ungethusile,
Angibhujiswanga phambi kwesigayegaye, nakuba okumnyama kungisibekele.”
“Kungani ukuba izikhathi zokwehlulela zingagcinwa nguSomandla, futhi kungani labo abamaziyo bengaziboni lezo zinsuku zakhe na?
Abantu bagudluza izikhonkwane zemingcele, baphange imihlambi, bayiklabise.
Bathumba imbongolo yentandane, bathathe inkomo yomfelokazi ibe yisibambiso.
Basusa abantulayo emgwaqweni, bonke abampofu bomhlaba bayacasha ndawonye.
Bheka, njengezimbongolo ehlane, bayahamba beya emsebenzini wabo, bedabula ehlane, befunela abantwana babo ukudla.
Bayavuna ifoliji ensimini, bayakhothoza esivinini sesikhohlakali.
Balala nqunu ebusuku bengenangubo, abanakho okokwembatha emakhazeni.
Banethwe yimvula ezintabeni, babambelela edwaleni ngoba bengenayo indawo yokuphephela.
Intandane ihlwithwa ebeleni, nengane yompofu ithathwa ibe yisibambiso.
Bahamba nqunu bengenazembatho, bathwale izithungo, belambile.
Bakhama amafutha phakathi kwezingange, banyathela izikhamo zewayini, kepha bomile.
Kusukela emzini kububula abafayo, amaphimbo abalimele kakhulu ayakhala ecela usizo, kodwa uNkulunkulu akayinaki imithandazo yabo.
“Kukhona abamelene nokukhanya, abangazibandakanyi nezindlela zakho, abanganamatheli emikhondweni yakho.
Umbulali uvuka ngovivi, abulale ompofu nontulayo; ebusuku ufana nesela.
Iso lesiphingi lilindela ukuhlwa, lithi: ‘Akukho liso elisazakungibona,’ bese sizemboza ubuso.
Ngobumnyama bagqekeza imizi, emini bazivalele, abakwazi ukukhanya.
Ngokuba ubumnyama obukhulu kubo bonke labo bunjengokusa, lokhu bayakwazi ukwesabeka kwesigayegaye.
“Banejubane ebusweni bamanzi, izabelo zabo ziqalekisiwe emhlabeni, abasayukuphendukela endleleni yezivini.
Isomiso nokushisa kuyawomisa amanzi eqhwa; yenza kanjalo-ke nendawo yabafileyo kulabo abonileyo.
Isibeletho siyabakhohlwa, basobozelwe yizimpethu, abasayukukhunjulwa, ukungalungi kwephulwa njengesihlahla.
Balimaza oyinyumba, abakwenzi okuhle kumfelokazi.
UNkulunkulu uyazandisa izinsuku zokuphila kwamaqhawe ngamandla akhe, uyasukuma lapho kungasekho osenethemba lokuphila.
Umupha ukuvikeleka, ameseke; amehlo akhe asezindleleni zabo.
Bayaphakanyiswa okwesikhashana, babuye bashabalale; bayabuna, banqunywe njengamazimba.
“Uma kungenjalo ngubani ongakhombisa ukuthi ngingumqambimanga, awenze ize amazwi ami na?”
Kwase kuphendula uBhilidadi, umShuhi, wathi:
“Ukubusa nokwesabeka kukuye, nguye owenza ukuthula ezindaweni zakhe eziphakemeyo.
Ukhona yini ongabala amaviyo akhe na? Ngubani ukukhanya kwakhe okungamkhanyiseli na?
Pho umuntu angaba kanjani ngolungileyo kuNkulunkulu, nozelwe ngowesifazane, abe ngohlanzekileyo na?
Bheka, inyanga ayinankazimulo, nezinkanyezi azihlanzekile emehlweni akhe.
Kakhulu kangakanani umuntu oyimpethu nje, nendodana yomuntu eyisibungu na?”
UJobe waphendula, wathi:
“Umsize kanjani ongenamandla na? Wayisindisa kanjani ingalo engenamandla na?
Umeluleke kanjani ongahlakaniphile na? Wamnika izeluleko ezinhle kangakanani ongenakuqonda na?
Usizwe ngubani ukuba usho lawo mazwi? Uwafunzwe ngubani uze ukhulume kanjena na?
“Izithunzi ziyathuthumela phansi kwamanzi, nakho konke okuhlala kuwo.
Indawo yabafileyo inqunu phambi kwakhe, asikho isembozo sendawo yokubhubha.
Wendlala inyakatho phezu kweze, aphanyeke umhlaba ezeni.
Ubopha amanzi emafini akhe, ifu alidabuki phansi kwawo.
Usibekela ubuso besihlalo sakhe sobukhosi, aneke ifu lakhe phezu kwaso.
Udweba isiyingelezi phezu kwamanzi, sibe ngumngcele phakathi kokukhanya nobumnyama.
Izinsika zezulu ziyathuthumela, zethuswa ngukukhuza kwakhe.
Unyakazise ulwandle ngamandla akhe; ngokuqonda kwakhe wambhubhisa uRahabi.
Ngomoya wakhe amazulu ayakhazimuliswa; isandla sakhe sabhokoda inkanyamba eshwibekayo.
Bheka, lokho kuyisiphetho sezindlela zakhe, izwi elinyenyezayo esilizwayo ngaye, kodwa ukuduma kwamandla akhe ngubani ongakuqonda na?”
UJobe waphinde waziphendulela, wathi:
“Ngifunga ngiyagomela, uNkulunkulu ongephuce ubulungiswa bami, noSomandla owenze waba muncu umphefumulo wami;
inqobo nje uma ngisaphefumula, nomoya kaNkulunkulu usesemakhaleni ami,
izindebe zami aziyukuyikhuluma inkohlakalo, nolimi lwami aluyukuyikhipha inkohliso.
Makube kude nami ukuba nginivumele ukuthi nilungile, angiyukusuka ebuqothweni bami, ngize ngife.
Ngibambelele ekulungeni kwami, angisoze ngakuyeka, inhliziyo yami ayizenyezi nangolulodwa lwemihla yami.
“Isitha sami masifane nesikhohlakali, nomelene nami abe njengowenza okubi.
Liyini ithemba longenankulunkulu nxa enqunywa, lapho uNkulunkulu ethatha umphefumulo wakhe na?
UNkulunkulu uyakuzwa yini ukukhala kwakhe, lapho ehlelwa wusizi na?
Uyakuthokoza yini ngoSomandla, ambize uNkulunkulu ngezikhathi zonke na?
“Ngizakunifundisa ngesandla sikaNkulunkulu; okukuSomandla angiyukukufihla.
Bhekani, nina nonke nikubonile, kungani senenza okuyize na?
“Lokhu kuyisabelo somuntu oyisikhohlakali kuNkulunkulu, nefa lezidlova ezilabelwa nguSomandla.
Uma abantwana bakhe banda, bandela inkemba; nabozalo lwakhe abayukusutha ngukudla.
Abaseleyo bakhe bayobulawa wubhubhane, abafelokazi babo bangalili.
Noma angambondela isiliva njengothuli, anqwabele izembatho njengodaka,
uyakukwenza lokho, kodwa ziyokwembathwa ngolungileyo, ongenacala ehlukanise isiliva.
Indlu yakhe uyakhe njengenundu, njengedlangala elakhiwe ngumlindi.
Ulala eyisigwili, kodwa ngeke esakwenza lokho, uyothi evula amehlo akhe ube ungasekho umcebo.
Uvalo luyakumgabha njengesikhukhula, ebusuku, isishingishane simphephule.
Umoya wasempumalanga uyakumphephulela phezulu, umphephule asuke endaweni yakhe.
Uyakumphephula ungamhawukeli, athi galo yephuka ebalekela amandla awo.
Abantu bayoshaya izandla, bamklibhizele, bamnximfele, esendaweni yakhe.”
“Impela ikhona imayini yesiliva, nendawo okucwengwa kuyo igolide.
Insimbi imbiwa emhlabathini, netshe lincibilikiswe libe yithusi.
Abavukuzi bayabuqeda ubumnyama, bacingisise amatshe emajukujukwini nasesigayegayeni sobumnyama.
Bamba umgodi wemayini kude nalapho kuhlala khona abantu, lapho lungakaze lubhadwe muntu khona, behla bejikajika belenga kude nabantu.
Emhlabeni kuvela ukudla, kodwa phansi kwawo uyaphendulwa njengomlilo.
Amatshe awo ayindawo yamasafire; inothuli lwegolide.
Leyo ndlela ayaziwa yinqe, neso likaheshane alikaze liyibone.
Izilo ezinkulu azikaze zihambe ngayo, nebhubesi alikaze ledlule kuyo.
Welula isandla sakhe phezu kwetshe lensengetsha, agumbuqele izintaba, kusukela ezimpandeni zazo.
Uqhekeza imihohoba emadwaleni; iso lakhe likubona konke okuyigugu.
Uvimba imifula ingaconsi, akukhiphele ekukhanyeni okufihlakeleyo.
“Kepha kutholakalaphi ukuhlakanipha na? Ikuphi indawo yokuqonda na?
Umuntu akayazi intengo yakho, akutholakali ezweni labaphilayo.
Utwa luthi: ‘Akukho kimi;’ ulwandle luthi: ‘Akukho kimi.’
Akunakuzuzwa ngegolide, intengo yakho ayinakulinganiswa nesiliva.
Ayinakulinganiswa negolide lase-Ofiri, neshohamu eliyigugu nesafire.
Igolide nengilazi akunakulinganiswa nakho, akunakushintshaniswa ngezinto zegolide elicwengekileyo.
Akunakukhulunywa ngekhorali nangekhristalu, intengo yobuhlakani ingaphezu kweyamarubhi.
Ithophazi laseKhushe alinakuqhathaniswa nakho, kungelingane negolide elicwengekileyo.
“Kuvela kuphi ukuhlakanipha na? indawo yokuqonda ikuphi na?
Kusithekile emehlweni abo bonke abaphilayo, kufihliwe nasezinyonini zezulu.
Ukubhubha nokufa, kuthi: ‘Nathi ngezindlebe zethu sizwile amahemuhemu akho.’
UNkulunkulu uyayiqonda indlela yakho, uyayazi indawo yakho.
Ngokuba nguye owabeka imikhawulo yomhlaba, ubona konke okuphansi kwezulu.
Ngesikhathi enika umoya isisindo sawo, elinganisa amanzi ngezilinganiso zawo,
lapho enzela imvula isimiso, nonyazi lwezulu indlela,
khona wakubona, walanda ngakho, wakuhlela, wakuphenya.
Wathi kubantu: ‘Bhekani, ukwesaba iNkosi kungukuhlakanipha; ukusuka enkohlakalweni kungukuqonda.’ ”
UJobe wabuye waqhubeka nenkulumo yakhe, wathi:
“Sengathi ngabe nginjengasezinyangeni ezedlule, nanjengasezinsukwini lapho uNkulunkulu ayengiqaphile,
lapho isibani sakhe sasikhanya phezu kwekhanda lami, ngihamba ebumnyameni ngokukhanya kwakhe,
njengoba nganginjalo ezinsukwini zobunsizwa bami, lapho ubukhona bukaNkulunkulu babuphezu kwethende lami,
lapho uSomandla esenami, nabantwana bami besangizungezile,
lapho izinyathelo zami zazigezwa ezaqheqheni, nedwala elaliseduze kwami lalingithelela imifula yamafutha.
“Lapho ngiphuma ngiya esangweni lomuzi, nalapho ngihlala esihlalweni sami esigcawini,
izinsizwa zazingibona maqede zicashe, izimpunga zisukume zime,
izikhulu ziyeke ukukhuluma, zibeke izandla zazo emilonyeni,
izwi lezikhulu lalithuliswa, ulimi lwazo lunamathele olwangeni.
Indlebe engizwayo, yayithi ngibusisiwe, neso elingibonayo lingifakazela,
ngokuba ngakhulula abampofu abakhalayo, nezintandane ezingenamsizi.
Isibusiso sowayesezobhubha sasehlela kimi, ngayenza yahuba ngenjabulo inhliziyo yomfelokazi.
Ngembatha ukulunga, kwaba njengesembatho kimi, ubulungiswa kimi baba njengengubo nomqhele.
Ngaba ngamehlo abayizimpumputhe nezinyawo zabayizinyonga.
Ngaba nguyise wabantulayo, ngaluphenyisisa udaba lwalowo engingamaziyo.
Ngayifahlaza imihlathi yongalungile, ngahlwitha impango emazinyweni akhe.
“Ngase ngithi: ‘Ngizofela emzini wami; izinsuku zami ngizandise zibe ngangesihlabathi.
Impande yami iyokwenabela emanzini, kulale amazolo egatsheni lami ubusuku bonke;
udumo lwami luba lusha njalo, nomnsalo wami wenziwe musha esandleni sami.’
“Abantu bebengilalela, balinde, bathule cwaka, balalele iseluleko sami.
Uma sengikhulumile kwakungaphinde kukhulume muntu, amazwi ami ayeconsela phezu kwabo njengamazolo.
Babengilindela njengemvula, bakhamise imilomo yabo njengonxanele imvula yasentwasahlobo.
Ngabahleka bangakholwa, ukuchachamba kobuso bami abakuqedanga.
Ukuba ngangikhethe izindlela zabo, ngangizohlala ngingumholi, nginjengenkosi phakathi kwamabutho, njengoduduza abalilayo.”
“Manje sengihlekwa ngabancane kunami ngeminyaka, oyise engangingeke ngibabeke phakathi kwezinja ezelusa izimvu zami.
Ngingazuzani emandleni ezandla zabo, njengoba sebentekenteke na?
Bondile ngenxa yokweswela nangendlala, sebeququda okomileyo, nomhlabathi oliqwaqwasi,
bakha imifino ebabayo ehlozini, badle amagonsi.
Bayaxoshwa emphakathini, abantu bamemeza emva kwabo sengathi kusemva kwamasela.
Bahlala ezigodini ezesabekayo, emihumeni nasemaweni.
Babhonga phakathi kwezihlahla, babuthane phansi kwembabazane,
bangabantwana beziwula, abantwana babantu abangenagama, bayashaywa, baxoshwe ezweni.
“Manje sengiphenduke ingoma yabo yokubhinqa, impela sengiyisaga sabo.
Bayangenyanya, bamela kude nami, abayeki ukungikhafulela ngamathe.
Ngokuba uNkulunkulu ungishiye ngingavikelekile, wangithobisa, sebenza noma yini abayifisayo kimi.
Ngakwesokunene sami, kuvuke uquqaba lwangihlasela, lwangenza ngabaleka; lufuna ukungibhubhisa.
Luvimba endleleni yami ukuze luzuze ngokubhujiswa kwami, akukho namunye oluvimbayo.
Lungithelekela ngokungathi, kuvuleke isikhala esikhulu phakathi kwencithakalo.
Ngikhungethwe yingebhe; udumo lwami luxoshwa sengathi lupheshulwa ngumoya, impumelelo yami inyamalele njengefu.
“Manje umphefumulo wami uyalila ngaphakathi kwami, izinsuku zosizi zingibambile.
Ubusuku bugwaza amathambo ami awohloke kimi; nobuhlungu obungidlayo abupheli.
Ngamandla akhe amakhulu, ubambe ingubo yami, ungibambe ngentamo yesembatho sami.
Ungiphonse odakeni, sengifana nothuli nomlotha.
“Ngikhala kuwe, kodwa awungiphenduli, ngimi lapha, kepha awunginaki.
Usungiphendukele, waba nonya kimi; uyangihlukumeza ngamandla esandla sakho.
Ungiphakamisele emoyeni, wangikhweza kuwo, wangiphonsa le nale ngokuhlokoma kwesivunguvungu.
Ngiyazi ukuthi uzongiyisa ekufeni nasendlini okubuthanela kuyo bonke abaphilayo.
“Impela umuntu akayukumfulathela owentulayo lapho esekuhluphekeni, ekhala ecela usizo.
Angimkhalelanga yini ozinsuku zakhe zinzima na? Umphefumulo wami awubahawukelanga yini abampofu na?
Lapho ngilindele okuhle, kwafika okubi, ngalindela ukukhanya, kwafika ubumnyama.
Izibilini zami ziyaxhuxhuzela, azithuli; ngihlangabezana nezinsuku zosizi.
Sengize ngaba mnyama, kodwa ngingashiswa langa, ngimi ebandleni, ngikhala ngicela usizo.
Sengingumfowabo wamakhanka, nomngani wezintshe.
Isikhumba sami sesimnyama, siyaxebuka; amathambo ami ayavutha ngukushisa.
Ihabhu lami seliphenduke isililo, nomtshingo wami uyizwi labakhalayo.”
“Ngenza isivumelwano namehlo ami, ngingayibuka kanjani intombi ngokukhanuka na?
Kanti siyini isabelo ebesiyakuvela kuNkulunkulu kweliphezulu, nefa ebeliyakuphuma kuSomandla ekuphakameni na?
Inhlekelele ayehleli yini abangalungile, nengozi izikhohlakali na?
Ngabe akaziboni yini izindlela zami, azibale zonke izinyathelo zami na?
“Uma ngihambe ngokukhohlakala, nonyawo lwami lusheshile ukuya enkohlakalweni,
mangilinganiswe esilinganisweni esilungileyo, ukuze uNkulunkulu abuvume ubuqotho bami.
Uma izinyathelo zami zichezukile endleleni, nenhliziyo yami yahuhwa ngamehlo ami, uma kunamathele isisihla esandleni sami,
mangitshale, kudle omunye, impela mazisishulwe izithelo zami.
“Uma inhliziyo yami iyengwe ngowesifazane, ngacutha emnyango womakhelwane wami,
umkami makagayele omunye, kuguqe abanye phezu kwakhe.
Ngokuba lokho kuyichilo, necala elifanele ukujeziswa;
lokho kungumlilo oqothula kuze kube sekubhujisweni, uyosiphula yonke inzuzo yami.
“Uma ngingalumelanga udaba lwesigqila sami sesilisa noma sesifazane lapho sikhononda ngami,
ngiyokwenzenjani lapho uNkulunkulu esukuma na? Lapho engiphenya, ngiyophendula ngithini na?
Yena owangibumba esiswini, akusiye yini owabenza nabo na? Akamunye yini owasibumba esizalweni na?
“Uma ngigodlele ompofu lokho akufisayo, ngenza amehlo omfelokazi ukuba afiphale,
ngaludla ngedwa ucezu lwami lwesinkwa, ngayincisha intandane,
ngokuba kusukela ebusheni bami ngayikhusela intandane njengoyise, kwasesiswini sikamame ngingumholi wabafelokazi,
uma ngibona obhubhayo ngenxa yokweswela isembatho, noma ontulayo engenakho okokwembatha,
umzimba wakhe ungangithokozisi; engafudunyezwanga ngoboya bezimvu zami,
uma ngiphakamisele intandane isandla ngoba ngibona ukuthi nginabalandeli esangweni,
uma kunjalo ihlombe lami malihleshulwe esiphangeni, nengalo yami yephulwe enkothweni yayo.
Ngokuba ngiyayesaba inhlekelele eyehliswa nguNkulunkulu; anginakwenza lutho ngenxa yobukhulu bakhe.
“Uma igolide ngilenze ithemba lami, ngathi egolideni elicwengekile: ‘Ngethemba wena;’
uma ngathokoziswa ngukuba nengcebo enkulu nangukuthi isandla sami siyizuzile;
uma ngibone ukukhanya ukuthi kuyakhazimula, nokuthi inyanga ihamba icwazimula,
inhliziyo yami yayengeka esithe, ngaqabula isandla sami,
nalokho kuyisono esimele ukujeziswa, ngokuba bengizobe ngimphikile uNkulunkulu phezulu.
“Uma ngithokozile ngengozi eyehlele ongizondayo, ngatshakadula ngenxa yokuba ehlelwe ngokubi,
kodwa angiwuvumelanga umlomo wami ukuba wone ngokucela impilo yakhe ngokuyiqalekisa.
Uma abendlu yami bethi: ‘Ngubani ongathola umuntu ongasuthanga ngenyama etafuleni likaJobe na?’
Abafokazi abalalanga emgwaqweni, ngayivula iminyango yami,
uma ngisibekele iziphambeko zami njengo-Adamu, ngokufihla ububi bami esifubeni sami,
ngokuba ngesaba isixuku esikhulu, ngaba novalo lokwedelelwa ngabomndeni, ngaze ngathula, nokho angiphumanga emnyango.
Ngabe ukhona yini ongilaleleyo na? Nantu uphawu lwami, uSomandla makangiphendule. Sengathi ngabe nginencwadi yecala ayilobileyo omelana nami!
Impela, bengiyakuyithwala emahlombe ami, ngiyibophele kimi njengomqhele wami,
ngimlandise ngomumo wezinyathelo zami, ngisondele kuye njengenkosi.
“Uma umhlaba wami ukhonondile ngami, nemisele ekuwo yakhala kanyekanye;
uma izithelo zawo engizidlile ngingazikhokhelanga, ngayimbangela yokufa kwabanikazi bazo;
makumile ameva esikhundleni sikakolo, nokhula endaweni yebhali.” Aphela lapha amazwi kaJobe.
Lawo madoda amathathu ayeseyeka ukuphendulana noJobe ngoba wayengolungileyo emehlweni akhe.
U-Elihu, indodana kaBharakheli, umBhuzi, womndeni kaRamu, wathukuthela uJobe ngokuba wayezithethelela yena kunoNkulunkulu.
Wabathukuthelela nabangani bakaJobe abathathu, ngoba babengavelanga nampendulo, nakuba uJobe babemlahla ngecala.
U-Elihu wayelindile ukuba akhulume noJobe ngoba laba babebadala kunaye.
Kepha lapho ebona u-Elihu ukuthi akukho mpendulo evela emilonyeni yalawo madoda amathathu, wathukuthela.
U-Elihu, indodana kaBharakheli, umBhuzi wakhuluma, wathi: “Mina ngisemusha ngeminyaka, nina nibadala; yingakho bengikhathazekile, nginamahloni, ngesaba ukunitshela okusemqondweni wami.
Ngathi: ‘Makukhulume asebenezinsuku, abaneminyaka eminingi mabafundise ngokuhlakanipha.’
Nokho kumuntu kukhona umoya, ukuphefumula kukaSomandla kunikeza ukuqonda.
Akusibo abadala abahlakaniphileyo, nabaqonda okulungile.
“Ngakho-ke ngithi ngilaleleni, nami ngibeke olwami uvo.
Bhekani, ngiwalalele amazwi enu, ngabeka indlebe ekuqondeni kwenu, lapho niphumputha eniyakukusho.
Nginilalele ngesineke, bhekani, akukho noyedwa phakathi kwenu omthethisile uJobe, nowaphendulile amazwi akhe.
Maningasho ukuthi: ‘Sikutholile ukuhlakanipha, uNkulunkulu angamehlula, hhayi umuntu.’
Amazwi akhe akawaqondisanga kimi, angizukumphendula ngokushiwo yinina.
“Bakhungathekile, baphelelwe ngamazwi, akukho lutho abangalusho.
Nami ngibalinde yini, njengoba bengasho lutho na? Bamile laphaya, abasaphenduli.
Nami sengizophendula, ngibeke olwami uvo.
Ngiphuphuma amazwi ngaphakathi; umoya wami uyangiqhubezela.
Bhekani, isisu sami sifana newayini elingakavulwa, njengezimvaba zewayini ezintsha, zilungele ukuqhuma.
Mangikhulume ukuze ngikhululeke, mangivule izindebe zami, ukuze ngiphendule.
Mangingenzeleli muntu, noma ngincetheze kunoma ngubani,
ngokuba angikwazi ukuthopha; kungenjalo, uMenzi wami angangibhubhisa masinyane.”
“Kepha manje, Jobe, ake ungilalele, yizwa amazwi ami.
Ngivula umlomo wami, ulimi lwami luyakhuluma.
Amazwi ami aveza ubuqotho benhliziyo yami, lokho izindebe zami ezikwaziyo, zikukhuluma ngeqiniso.
UMoya kaNkulunkulu ungenzile, nokuphefumula kukaSomandla kunginika ukuphila.
Ngiphendule, uma ukwazi, hlela amazwi akho phambi kwami, ume ubhekane nami.
Bheka, phambi kukaNkulunkulu ngifana nawe nje, nami ngibunjwe ngodongwe.
Ungesabi ungangenwa ngamanzi emadololweni, nesandla sami asizukuba nzima phezu kwakho.
“Impela ukhulumile, ngizizwela ngezami izindlebe, ngawezwa amazwi owashilo.
Uthi: ‘Ngimsulwa, anginasiphambeko, ngilungile, akukho okubi kimi.
Uthole amathuba okumelana nami, ungishaya isitha sakhe.
Ufaka izinyawo zami ezingongolweni, aqaphe zonke izinyathelo zami.’
“Kulokhu awukhulumanga kahle. Ngizokuphendula, uNkulunkulu mkhulu kunomuntu.
Kungani uqagulisana naye, ngokuthi akaphenduli nelilodwa lamazwi ami.
Empeleni, uNkulunkulu ukhuluma ngendlela eyodwa, noma ezimbili, nokho umuntu akakunaki lokho.
Ephusheni nasembonweni ebusuku, lapho abantu belele ubuthongo obunzima, bethe zwi emibhedeni yabo,
khona uyazivula izindlebe zabantu, abethuse ngezexwayiso zakhe,
ukuze amphendule umuntu ezenzweni zakhe, ashabalalise ukuzidla kumuntu.
Umphefumulo wakhe awuphephise egodini, nokuphila kwakhe kungabhujiswa ngomkhonto.
Uyajeziswa ngobuhlungu esecansini lakhe, nangokunkenketha okungapheliyo emathanjeni akhe.
Inhliziyo yakhe iyanengwa ngukudla, nomphefumulo wakhe uyakwenyanya ukudla akade ekufisa.
Umzimba wakhe uyancunzeka, uphele emehlweni, amathambo akhe akade engabonakali ahlale obala.
Umphefumulo wakhe usondela egodini, nempilo yakhe, kubabulali.
“Uma bekungaba khona ingelosi, ummeli abe munye enkulungwaneni, obeyothi lo muntu ulungile,
uNkulunkulu abe nomusa kuye, athi: ‘Mhlenge angehleli egodini, ngisitholile isihlengo,’
isikhumba sakhe sibe njengesomntwana, abuyele emihleni yobusha bakhe,
khona uyakukhuleka kuNkulunkulu, Yena amamukele, eze kuye ngentokozo, uNkulunkulu ambuyiselele ukulunga kwakhe.
Lo muntu bese ebheka abantu, athi: ‘Ngonile, ngahlanekezela okulungileyo, kodwa akwenzekanga kimi njengokufanele.
Uwuhlengile umphefumulo wami, awaze wedlulela egodini; impilo yami izokubona ukukhanya.’
“Konke lokhu uNkulunkulu uyakwenza kumuntu kabili, yebo, nakathathu,
ukuze awubuyise umphefumulo wakhe egodini, akhanyiselwe ngokukhanya kokuphila.
Yizwa Jobe, ngilalele, thula, mina ngizakukhuluma.
Uma unamazwi, ngiphendule, khuluma, ngokuba ngifisa ukukuthethelela.
Uma ungenawo, ngilalele, thula, ngiyakukufundisa ukuhlakanipha.”
U-Elihu wayeseqhubeka ethi:
“Yizwani amazwi ami, nina zihlakaniphi, ningilalele nina enaziyo.
Ngokuba indlebe iyawahlunga amazwi, njengalokhu ulwanga lunambitha ukudla.
Masizikhethele thina okulungile, sikubone thina okuhle.
Ngokuba uJobe uthe: ‘Ngilungile, kodwa uNkulunkulu ungephuce ilungelo lami.
Noma ngiqinisile kepha ngithathwa njengonamanga, inxeba lami alipholi, nakuba ngingenzanga siphambeko.’
Ngumuphi umuntu onjengoJobe, ophuza ukungcofwa njengamanzi,
ohamba engumshungu nezikhohlakali, ahambe nababi na?
Ngokuba uthi: ‘Akunalusizo kumuntu ukuba azane noNkulunkulu.’
“Ngalokho ngizweni, nina bantu abanokuqonda, makube kude noNkulunkulu ukuba enze inkohlakalo, nakuSomandla ukuba enze okungalungile.
Ngokuba uyabuyisela kumuntu njengokwenza kwakhe, enze bazuze yilowo nalowo ngokwezindlela zakhe.
Impela uNkulunkulu akakwenzi okubi, uSomandla akabuhlanekezeli ubulungiswa.
Ngubani owambeka phezu komhlaba na? Ngubani owamisa izwe lonke na?
Uma ebeyakuzibheka Yena, azibuyisele umoya wakhe nomphefumulo wakhe,
bonke abantu bayakufa kanyekanye, umuntu abuyele othulini.
“Uma unengqondo, yizwa lokhu, ulalele amazwi engiwakhulumayo.
Imbala ozonda ubulungiswa uyakubusa yini na? Uyakumlahla yini olungileyo nonamandla,
othi enkosini: ‘Awuyinto yalutho,’ nasezikhulwini athi: ‘Niyizikhohlakali,’
ongakhethi buso bezikhulu, onganaki ocebileyo kunompofu na? Ngokuba bonke bangumsebenzi wezandla zakhe.
Bayafa ngokuphazima kweso, phakathi kwamabili abantu bayathuthumela, banyamalale, amaqhawe ayasuswa, kepha hhayi ngesandla somuntu.
“Ngokuba amehlo akhe asezindleleni zabo bonke, uzibona zonke izinyathelo zabo.
Abukho ubumnyama, nesigayegaye asikho, lapho abenza inkohlakalo bengacasha khona.
Ngokuba uNkulunkulu akadingi ukuba amphenyisise umuntu ukuze eze phambi kwakhe ekwehlulelweni.
Uyabaphahlaza abanamandla, engaphenyanga, abeke abanye ezikhundleni zabo.
Ngalokho uyayazi imisebenzi yabo, uyabaqumba phansi ebusuku, baphahlazwe.
Uyabashaya njengezikhohlakali kubona bonke abantu,
ngokuba bachezuka ekumlandeleni, abaze banaka neyodwa yezindlela zakhe.
Benza ukuba ukukhala kwabampofu kufinyelele kuye, wakuzwa ukukhala kwabahluphekayo.
Uma Yena ethula, ngubani ongamsola na? Uma efihla ubuso bakhe, ngubani ongambona na? Ubusa isizwe nomuntu ngokufanayo,
ukuze kungabusi muntu ongenankulunkulu, angabi wugibe kubantu.
“Ukhona yini oke wathi kuNkulunkulu: ‘Ngethweswe icala noma ngingonanga.
Lokhu engingakuboni, ngifundise khona; uma ngenzile okungalungile, angisayukuphinda.’
Uyakuphindisela ngokuthanda kwakho yini, njengoba usenqaba isifundiso sami na? Ngokuba nguwe ozakukhetha, hhayi mina; khuluma okwaziyo.
“Abantu abanokuqonda bayothi kimi, yebo, nezihlakaniphi ezingizwayo, ziyothi:
‘UJobe ukhuluma engenalwazi, amazwi akhe awanangqondo.’
Sengathi uJobe angavivinywa njalo, ngokuba uphendula njengezikhohlakali.
Uyenezelela ukuhlubuka esonweni sakhe, ushaya izandla phakathi kwethu, akhulume amazwi amaningi kuNkulunkulu.”
U-Elihu wakhuluma wathi:
“Ucabanga ukuthi lokhu kulungile yini na? Uthi: ‘Mina ngilungile phambi kukaNkulunkulu,’
uthi: ‘Kungisiza ngani na?’ nokuthi: ‘Ngizuzeni ebengingayizuza uma bengingonanga na?’
“Ngizoniphendula mina, wena nabangani bakho.
Bheka ezulwini, ubone, uqaphele ukuthi amafu angaphezu kwakho.
Uma wona, wenzani kuye na? Uma wenza iziphambeko eziningi kwenzani kuye lokho na?
Uma ulungile, utholani yena ngalokho, uzuzani esandleni sakho na?
Ukukhohlakala kwakho kuthinta abanye abantu abafana nawe, kanjalo nokulunga kwakho kuthinta abanye abantu.
“Ngenxa yokwanda kokucindezelwa, abantu bayakhononda, bayakhala, banxusa ukusizwa esandleni esinamandla.
Kepha akekho othi: ‘Uphi uNkulunkulu, uMdali wami ovusa ingoma kwesikabhadakazi.
Thina nezilwane zomhlaba usifundisa okuningi, asenze sihlakaniphe kakhulu kunezinyoni ezindiza emkhathini.’
Abantu akabaphenduli uma bekhala, ngenxa yokuzikhukhumeza kwezikhohlakali.
Impela uNkulunkulu akakulaleli ukukhala okuyize, uSomandla akakugqizi qakala.
Kakhulu kangakanani uma uthi awuboni, nokuthi icala liphambi kwakhe, wena ulindele Yena!
Kepha manje, ngoba intukuthelo yakhe ayijezisi, akazinaki kakhulu iziphambeko,
uJobe uvula umlomo wakhe, akhulume okuyize, wandisa amazwi engenalwazi.”
U-Elihu waqhubeka wathi:
“Ngibekezelele kancane, ngizokukhombisa, ngokuba ngisenamazwi okumela uNkulunkulu.
Ngizolulanda kude ulwazi lwami, ngikunike uMenzi wami ukulunga.
Impela ayikho inkohliso emazwini ami; onolwazi olupheleleyo unawe.
“Bheka, uNkulunkulu unamandla, kodwa akukho muntu ambukela phansi, mkhulu emandleni okuqonda.
Akazigcini izigilamkhuba ziphila, kepha abahluphekayo ubenzela ubulungiswa.
Amehlo akhe akawasusi kwabalungileyo, kodwa ubahlalisa namakhosi ezihlalweni zobukhosi, baphakame, kuze kube phakade.
Uma beboshwa ngamaketango, babanjwe yizintambo zokuhlupheka,
lapho uyababonisa izenzo zabo neziphambeko zabo ukuthi baziphakamisile.
Uyazivula izindlebe zabo ukuze zizwe ukuyalwa, abayale ukuba baphenduke eziphambekweni zabo.
Uma belalela, bamkhonze, imihla yabo iyophetha ngempumelelo neminyaka yabo, bethokozile.
Kepha uma bengalaleli, bayobhubha ngenkemba, bafe bengenalwazi.
“Abangenakulunga enhliziyweni baqongelela ulaka, abakhali bacele usizo lapho ebabopha.
Bafa besebasha, ukuphila kwabo kuphelele ehlazweni.
Ukhulula ompofu ngobuphofu bakhe, avule indlebe yabo ngokuhlupheka.
“Impela uyakukukhulula osizini, akubeke endaweni ebanzi, lapho kungekho ukunyinyeka khona, kubekwe okunonile etafuleni lakho.
Kepha wena uhluphekile ngokuthi izikhohlakali ziyakujeziswa yini; ukwehlulela nobulungiswa kuyokwenziwa.
Qaphela ingcebo, ingakuyengi, ungachezukiswa ngubukhulu bokufunjathiswayo.
Ukuceba kwakho, nayo yonke imizamo yezikhwepha zakho, kungakusiza yini ukuba ungabi sosizini na?
Ungabulangazaleli ubusuku lapho abantu bebhujiswa ezindaweni zabo.
Qaphela, ungaphendukeli ebubini, ngokuba ngalokho uyobe uzikhethele usizi.
“UNkulunkulu uphakeme ngamandla akhe; ngubani ofundisa njengaye na?
Ngubani ombekele indlela azohamba ngayo na? Ngubani ongathi: ‘Wenze okungalungile’ na?
Khumbula ukudumisa imisebenzi yakhe abahlabelela ngayo abantu.
Bonke abantu bayibonile, bonke bayibukela kude.
Bheka, uNkulunkulu uphakeme, asimqondi, ubungako beminyaka yakhe abunakuphenywa.
“Wenyusa amathonsi amanzi, abuye awathulule njengemvula enkungwini yakhe.
Amafu uwenza aconse, awathululele phezu kwabantu abaningi.
Ukhona yini ongakuqonda ukuthi amafu uweneke kanjani, nokuduma kwedokodo lakhe na?
Umbani wakhe uyawusabalalisa umzungeze, amboze izisekelo zolwandle.
Ngokuba ngalokho ubusa abantu, abaphe ukudla okuningi.
Usibekela izandla zakhe ngombani, awuyale ukuba ushaye inkololo.
Ukuduma kwawo kulanda ngaye, isiphepho sibikezela ngolaka lwakhe.”
“Ngenxa yalokho inhliziyo yami iyathuthumela, isuke endaweni yayo.
Lalelani, nizwe ukuduma kwezwi lakhe, nemvunge ephuma emlonyeni wakhe.
Ukuthumela phansi kwezulu lonke, unyazi lwakhe luye emagumbini omhlaba.
Emveni kwalokho izwi lakhe liyaduma, uyaduma ngezwi lakhe lobukhosi, akalunqandi unyazi uma kuzwakala izwi lakhe.
UNkulunkulu uduma ngokumangalisayo ngezwi lakhe; wenza izinto ezinkulu esingenakuziqonda.
Ngokuba uthi eqhweni: ‘Khithikela emhlabeni;’ kanjalo nasesihlambini semvula, yebo, ezihlambini zezimvula zakhe ezinamandla.
Ubeka uphawu ezandleni zabantu ukuze bonke abantu bayazi imisebenzi yakhe.
Izilwane zibuyela ezikhundleni zazo, zihlale emihumeni yazo.
Isikhwishikhwishi siphuma engosini yaso, namakhaza avela emoyeni ohlabayo.
Ngokuphefumula kukaNkulunkulu, kuvela ungqoqwane namanzi ngobuningi bawo, abe yiqhwa.
Yebo, ugcwalisa amafu ngomswakama, awendlale amafu onyazi lwakhe,
ayazungeza, ajikeleze njengalokhu ewaqondisa, ukuze akufeze konke awayale khona ebusweni bomhlaba,
noma ngabe lokho ukwenzela ukujezisa, noma umhlaba wakhe, noma ngothando, uyakuvumela ukuba kwenzeke.
“Beka indlebe kulokhu, Jobe, uthule du, uzindle ngezimangaliso zikaNkulunkulu.
Uyazi yini ukuthi uNkulunkulu uwashayela kanjani umthetho, enze unyazi lwakhe lubanize emafini na?
Uyazi yini ukuthi amafu endlaleke kanjani, umsebenzi omangalisayo walowo Ophelele olwazini,
wena ozembatho zakho zifudumele, lapho umhlaba uthule ngenxa yeshisandlu na?
Ungaseneka yini isibhakabhaka njengaye, siqine njengesibuko esibunjiweyo na?
Sifundise esiyakukusho kuye, asinakulubeka udaba lwethu, ngenxa yokuthi sidukuza oswini.
Angatshelwa yini uNkulunkulu ukuthi ngizokhuluma na? Ukhona yini ongathi ufuna ukubhujiswa na?
Abantu abazukuwubona umbani emafini ngoba umoya sewedlulile, selicwathile.
Ngasenyakatho kuqhamuka inkazimulo yegolide, uNkulunkulu wembethe ubukhosi obesabekayo.
USomandla singemqonde, mkhulu ngamandla nangobulungiswa, ngokulunga kwakhe okukhulu akoni muntu.
Ngakho-ke abantu bayamesaba, kodwa akabagqizi qakala abacabanga ukuthi bayizihlakaniphi ezinhliziyweni zabo.”
USimakade wayesemphendula uJobe esesivunguvungwini, wathi:
“Ngubani lo ofiphaza iseluleko ngamazwi angenalwazi na?
Bopha ukhalo lwakho njengendoda, ngizokubuza, wena ungazise.
Wawukuphi lapho ngibeka izisekelo zomhlaba na? Ngitshele uma ukwazi ukuqonda.
Ngubani owamisa izilinganiso zawo, ngabe uyazi na? Ngubani owelula umucu wokulinganisa phezu kwawo na?
Zabekwa phezu kwani izisekelo zawo na? Labekwa ngubani itshe lawo legumbi,
lapho izinkanyezi zokusa zihlabelela kanyekanye, nawo wonke amadodana kaNkulunkulu ejabula na?
“Ngubani owavalela ulwandle ngezivalo, lapho luqhibuka, luphuma esiswini,
ngesikhathi ngibeka amafu eba yisembatho salo, nesigayegaye siba yimbeleko yalo,
nalapho ngilumisela umngcele walo, ngimisa imigoqo nezicabha,
ngathi: ‘Uyokhuphuka ugcine lapha, kepha awuyukudlula, kulapho amaza akho aziqhenyayo azokuma khona’?
“Selokhu waba khona, sewake wakuyala yini ukusa, wenza intathakusa iyazi indawo yayo,
ukuze ibambe amagumbi omhlaba, izikhohlakali zivuthululwe kuwo na?
Uguquka njengobumba lophawu lokusicilela, ludayiwe njengesembatho.
Ukukhanya kugodliwe ezikhohlakalini, kwaqedwa nobudlova bazo.
“Wake wangena emithonjeni yolwandle, wahamba phansi ezinzulwini zalo na?
Sewake wawakhonjiswa yini amasango okufa, wabona amasango ethunzi lokufa na?
Uyabuqonda yini ububanzi bomhlaba na? Yisho uma ukwazi konke lokho.
“Iphi indlela eya lapho kuhlala khona ukukhanya, nobumnyama na? iphi indawo yabo,
ukuze ukuyise endaweni yakho, uqonde imikhondo yendlu yakho na?
Angithi uyakwazi, ngokuba wawusuzelwe, nomumo wemihla yakho mkhulu na?
“Wake wangena yini ezinqolobaneni zeqhwa, wabona izinqwaba zesichotho
engiziqongelele isikhathi sokuhlupheka nosuku lokulwa nolwempi na?
Iphi indlela eya lapho ukukhanya kuhlakazwa khona, nalapho umoya wasempumalanga uhlakazekela khona emhlabeni na?
Ngubani ovulele ukuchichima kwamanzi, umsele nonyazi lokuduma, indlela,
ukunisa imvula ezweni elingahlalwa muntu, nasehlane elingenamuntu,
ukusuthisa ihlane kwahlongasibi nokuhlumisa uhlaza na?
Ukhona yini uyise wemvula na? Ngubani owazala amathonsi amazolo na?
Iqhwa liphuma esiswini sikabani, nesithwathwa sizalwa ngubani na?
Amanzi ayaqina abe njengetshe, ubuso botwa bube yiqhwa.
“Ungawabopha yini amaketanga eSilimela, uthukulule izintambo zeMpambano na?
Ungazikhipha yini izinkanyezi ngesikhathi sazo, uhole uMthala nohoye lwezinkanyezi zawo na?
Uyazazi yini izimiso zasezulwini? Ungazibekela yini umthetho wokubusa kwazo emhlabeni na?
“Ungamemeza yini kuze kuzwakale emafini, ukuze izikhukhula zikusibekele na?
Ungayithuma yini imibani ukuba ihambe, bese ithi kuwe: ‘Bheka, silapha’ na?
Ngubani obeke ukuhlakanipha phakathi komuntu, onika ukuqonda enhliziyweni na?
Ngubani ongabala amafu ngokuhlakanipha, athulule izimvaba zamanzi zasezulwini,
lapho uthuli luphenduka isigaxa, namagabade anamathelane na?
“Ungalizingelela yini ibhubesi, impango, usuthise iphango lamabhongo amabhubesi,
lapho elala emiphandwini yawo, noma ecuthe ehlozini na?
Ngubani olungisela igwababa ukudla kwalo, lapho amaphuphu alo ekhala kuNkulunkulu, ezulazula, ngenxa yokweswela ukudla na?”
“Uyasazi yini isikhathi sokuzala kwezimbuzi zezintaba na? Uke ukuqaphele yini ukuzala kwezindluzelekazi na?
Ungazibala yini izinyanga zokumitha kwazo, wazi nokuthi zizozala nini na?
Ziyakhonkobala lapho zizala amazinyane azo, zikhululeke lapho sezizele.
Amazinyane azo ayaqina, akhulela endle, ahambe, angabe esaphindela kuzo.
“Ngubani ovumele imbongolo yasendle ukuba ihambe? Ngubani owathukulula izibopho zayo,
wenza ihlane laba yindlu yayo, nezwe likasawoti, indawo yayo yokuhlala na?
Iyawuhleka umsindo ovela emzini, ayikuzwa ukumemeza komshayeli.
Iyahamba ezintabeni eziyidlelo layo, ifuna lonke uhlaza.
“Inyathi ingavuma yini ukukusebenzela, ihlale ebusuku emkhombeni wakho na?
Ungayibophela yini inyathi ukuba ilime, noma ihlelembe esigodini emva kwakho na?
Ungayethemba yini, ngoba amandla ayo emakhulu, ushiye umshikashika wakho kuyo na?
Ungayethemba yini ukuthi ingayibuyisa imbewu yakho, iyibuthele esibuyeni sakho na?
“Intshe iphaphazela kamnandi ngamaphiko, kodwa ngabe yizimpaphe namaphiko othando na?
Ishiya amaqanda ayo emhlabathini, afudunyezwe wuthuli.
Iyakhohlwa wukuthi unyawo lungawachoboza, nokuthi isilwane sasendle singawanyathela.
Iwaphatha ngesihluku amazinyane ayo, kube sengathi akusiwo awayo, ayesabi ukuthi umshikashika wayo ungase ube yize.
UNkulunkulu uyenze ukuba ikhohlwe ngukuhlakanipha, akayabelanga ukuqonda.
Lapho indizela phezulu, ihleka amahhashi nabagibeli bawo.
“Nguwe yini onika ihhashi amandla, wembathise intamo yalo ngomhlwenga oyephuzelayo na?
Nguwe yini olenza ligxume njengesikhonyane na? Ukuthimula kwalo okukhulu kuyesabeka.
Liphanda esigodini, liyathokoza ngamandla alo, liyaphuma libhekane ngqo nempi.
Ingebhe liyihleka usulu, alesabi lutho, alihlehli phambi kwenkemba.
Umgodla uyakhehlezela, kubenyezele umkhonto nengcula.
Ngendluzula nangolaka, ligabavula kakhulu, alivinjwa wukukhala kwecilongo.
Uma kukhala icilongo, lithi: ‘Nakho-ke;’ impi liyihogela isekude, nomsindo wabakhuzi bayo neziqubulo zempi.
“Ngabe kungokuhlakanipha kwakho yini uklebe endiza, elulele amaphiko akhe ngaseningizimu na?
Ukhozi lundizela phezulu yini ngenxa yokusho kwakho, lisakhe lapho phezulu isidleke salo na?
Luhlala esiweni, lwakhe khona, iwa edwaleni liyinqaba yalo.
Luthi lulapho lube luhlola ukudla kwalo, amehlo alo akubona kukude.
Amazinyane alo aphuza igazi; lapho kukhona okubulewe, nalo lukhona.”
USimakade waqhubeka wamphendula uJobe, wathi:
“Ofuna amaphutha angaphikisana yini noSomandla na? Lowo oqagulisana noNkulunkulu, makaphendule.”
UJobe wamphendula uSimakade, wathi:
“Bheka, angiyinto yalutho, ngingakuphendula ngithini na? Kungcono ngibeke isandla sami emlonyeni, ngithule.
Ngikhulumile kanye, angisayukuphendula, yebo, kabili, kepha angisaqhubeki.”
USimakade wayesemphendula uJobe esesikhwishikhwishini, wathi:
“Bopha ukhalo lwakho njengendoda, ngizokubuza, wena ungazise.
Uyakuchitha yini ukwehlulela kwami, ungilahla ngecala ukuze wena ube ngolungileyo na?
Unengalo njengoNkulunkulu yini na? Ungaduma yini ngezwi elinjengelakhe na?
Zihlobise ngobukhosi nangokuhlonipheka, wembathe udumo nenkazimulo.
Thulula ukuphuphuma kwentukuthelo yakho, ubabheke bonke abazidlayo, ubathobise.
Babheke bonke abaziphakamisayo, ubehlisele phansi, unyathele phansi izikhohlakali ezindaweni zazo.
Bafihle othulini kanyekanye, ubophe ubuso babo endaweni efihlakeleyo.
Khona ngiyakuvuma kuwe ukuthi yisandla sakho sokunene kuphela esingasindisa.”
“Ake ubheke uBhehemothi engamenza kanye nawe, udla utshani njengenkabi.
Bheka-ke, amandla akhe asokhalo lwakhe, nezikhwepha zakhe zisemisipheni yesisu sakhe.
Uqinisa umsila wakhe njengomsedari, imisipha yamathanga akhe iphothene.
Amathambo akhe ayimibhobho yethusi, izimbambo zakhe zinjengemigoqo yensimbi.
Ungowokuqala wemisebenzi kaNkulunkulu, nguMenzi wakho kuphela ongasondela kukho ngenkemba.
Ngokuba izintaba ziveza ukudla, lapho izilwane zasendle zingqabashiya khona.
Ulala phansi kwezihlahla ezinomthunzi, ezindaweni ezisithekile, emhlangeni nasemaxhaphozini.
Izihlahla ezinomthunzi zimsitha ngomthunzi wazo, azungezwe yiminyezane esemfuleni.
Bheka, ngisho umfula ugola izintethe, akethuki, uyazethemba, noma ngabe iJordani idla izindwani.
Ukhona yini ongambamba ebhekile, amcuphe ngonoxhaka, abhoboze ikhala lakhe na?”
“Ungayidoba yini inkanyamba ngodobo, noma ubophe ulimi lwayo ngentambo na?
Ungayifaka yini umkhala ekhaleni layo, ubhoboze umhlathi wayo ngehhuku na?
Iyokwenza imikhuleko eminingi yini kuwe, ikhulume amazwi athobekileyo na?
Iyosenza yini nawe isivumelwano sokuba uyithathe, ibe yinceku, kuze kube phakade na?
Ungadlala yini nayo njengenyoni, uyibophe ngomchilo ukuze amantombazane akho adlale nayo na?
Abathengi bangathengiselana yini ngayo, abahwebi behlukaniselane ngayo na?
Isikhumba sayo ungasigwaza yini ngezinhlendla, nekhanda layo ngemikhonto yokubamba izinhlanzi na?
Beka isandla sakho kuyo, uzokhumbula impi ezosuka; awusayukukuphinda lokho.
Ithemba lakho lokuyibamba liyimbude, bonke baqumbeka phansi uma beyibona.
Akekho onesibindi sokuba angayivusa. Pho ngubani ongema phambi kwayo na?
Ngubani ongayisukela, qede aphephe na? Konke okuphansi kwezulu kungokwami.
“Angiyukuthula ngezitho zayo, nangendaba yamandla ayo, nangesimo sayo esihle.
Ngubani ongayihlubula isembatho sayo esingaphandle na? Ngubani ongangena phakathi kwemihlathi yayo emibili na?
Ngubani ongavula izicabha zomlomo wayo na? Amazinyo ayo ayesabeka nxazonke.
Umhlane wayo uyizinhla zezihlangu, zinamatheliswe njengophawu.
Zisondelene, akungeni moya phakathi kwazo.
Zihlanganiswe ndawonye, zinamathelene, azinakwehlukaniswa.
Ukuthimula kwayo kuveza ukukhanya, amehlo ayo afana nemisebe yokusa.
Emlonyeni wayo kuphuma izihlonti, kuqhashe izinhlansi zomlilo.
Kuphuma intuthu emakhaleni ayo, sengathi kubila ibhodwe noma kusha imihlanga.
Ukuphefumula kwayo kokhela amalahle, kuphuma ilangabi emlonyeni wayo.
Entanyeni yayo kuhlala amandla, ingebhe isine phambi kwayo.
Izicubu zayo zinamathelene, ziphicelwe kuyo azinakwehlukaniswa.
Inhliziyo yayo iqine njengetshe, yebo, iqinile njengetshe lokusila elingaphansi.
Uma ivuka, abanamandla bangenwa yitwetwe ngenxa yevuso, baphela amandla.
Noma inkemba, umkhonto, umcibisholo nengcula kufinyelela kuyo, akunamthelela kuyo.
Insimbi iyithatha njengotshani, nethusi njengebunga.
Umcibisholo awunakuyixosha, namatshe endwayimane aphenduka amabibi kuyo.
Izagila zifana namakhoba kuyo, iyakuhleka ukukhenceza kwengcula.
Ingaphansi layo linjengezindengezi ezibukhali, yenaba njengesibhulo odakeni.
Yenza izinzulu zibile njengebhodwe, ulwandle ilwenze lufane nomfuma wamafutha.
Ishiya umgudu ocwebezelayo emva kwayo, utwa kube sengathi lungwevu.
Emhlabeni akukho okufana nayo, yenziwe yangaba nakwesaba.
Ikubona konke okuziphakamisayo, iyinkosi phezu kwabo bonke abantwana abazikhukhumezayo.”
UJobe wayesemphendula uSimakade, wathi:
“Ngiyazi ukuthi ungakwenza konke, icebo lakho alinakuvinjwa.
Ngubani ofihla iseluleko engenalwazi na? Ngikukhulumile lokho engingakuqondiyo, izinto ezinkulu kunami engingazaziyo.
“Ake ulalele, kukhuluma mina, ngiyakubuza, wena ngiphendule.
Ngezwa ngawe ngokuzwa kwezindlebe, kodwa manje iso lami selikubonile,
ngakho-ke ngiyazenyanya, ngiyazisola, ngibhuquza othulini nasemlotheni.”
Emveni kokuba uSimakade esekhulume lawo mazwi kuJobe, uSimakade wathi ku-Elifazi, umThemani: “Ngithukuthelele wena nabangani bakho ababili, ngokuba anikhulumanga iqiniso ngami, njengenceku yami, uJobe.
Ngakho-ke zithatheleni izinkunzi eziyisikhombisa nezinqama eziyisikhombisa, niye nakho encekwini yami uJobe, nikunikele kube ngumnikelo wenu wokushiswa. UJobe, inceku yami, uyonikhulekela, ngoba ngiyakuwulalela umkhuleko wakhe, angiyukwenza kini njengobuwula benu, ngokuba anikhulumanga iqiniso ngami, njengenceku yami uJobe.”
U-Elifazi umThemani, uBhilidadi umShuhi, noZofari umNahama, bahamba benza njengokusho kukaSimakade kubo. USimakade wawemukela umkhuleko kaJobe.
USimakade wakuphendula ukuhlupheka kukaJobe ngesikhathi ekhulekela abangani bakhe. Konke uJobe ayenakho uNkulunkulu wakwenezela ngokuphindwe kabili.
Kwase kufika kuye bonke abafowabo, nabo bonke odadewabo, nabo bonke ayazana nabo phambilini, badla isinkwa naye endlini yakhe; bamkhalela, bamduduza ngakho konke okubi uSimakade ayemehlisele khona. Bamnika yilowo nalowo uhlamvu lwemali necici legolide.
USimakade wayibusisa kanjalo-ke ingxenye yokugcina yezinsuku zikaJobe, ukwedlula isikhathi sakhe sokuqala: waba nezimvu eziyizi-14 000, amakameli ayizi-6 000, izinkabi ezingamabhangqa eziyinkulungwane nezimbongolo zezinsikazi eziyinkulungwane.
Waba namadodana ayisikhombisa namadodakazi amathathu.
Wayiqamba indodakazi yokuqala wathi nguJemima, eyesibili wathi nguKheziya, eyesithathu wayibiza ngokuthi nguKhereni Haphukhi.
Akufunyanwanga ezweni lonke abesifazane ababebahle njengamadodakazi kaJobe. Uyise wawabela ifa phakathi kwabafowabo.
Emveni kwalokho uJobe waphila iminyaka eyi-140, wabona amadodana akhe namadodana amadodana akhe, kwaze kwaba yizizukulwane ezine.
UJobe wafa esemdala, esenelisekile yizinsuku zokuphila.
Ubusisiwe umuntu ongahambi ngeseluleko sababi, ongemi endleleni yezoni, ongabi mdibi munye nabaklolodayo,
kodwa othokoza ngoMthetho kaSimakade, azindle ngawo imini nobusuku.
Ufana nesihlahla esitshalwe ngasemifuleni yamanzi, esithela isithelo saso ngesikhathi esifaneleyo, esimaqabunga aso angabuni. Uyaphumelela kukho konke akwenzayo.
Kepha abanjalo ababi, kodwa bafana namakhoba apheshulwa ngumoya.
Ngakho-ke ababi abanakuma ngosuku lokwehlulelwa, nezoni, ebandleni labalungileyo.
Ngokuba uSimakade uyayazi indlela yabalungileyo, kepha indlela yababi iyakubhujiswa.
Kungani abezizwe benza ugobe, nabantu beceba okuyize na?
Amakhosi omhlaba ayazihlanganisa, nababusi baceba icebo ngogcotshiweyo kaSimakade, bathi:
“Asigqabule izibopho zabo, silahle izintambo abasibophe ngazo, zisuke kithi.”
Yena ohlezi ezulwini uyahleka, iNkosi iyababhuqa.
Iyakukhuluma nabo ngentukuthelo yayo, ibafake ingebhe ngolaka lwayo, ithi:
“Mina ngiyibekile inkosi yami, entabeni yami engcwele iZiyoni.”
Ngizakulanda ngesinqumo sikaSimakade, owathi kimi: “Wena uyindodana yami; namuhla ngikuzele.
Cela kimi, ngikunike abezizwe babe yifa lakho, nemikhawulo yomhlaba ibe ngeyakho.
Uyakubaphula ngentonga yensimbi, ubaphihlize njengokhamba lombumbi.”
Ngakho-ke hlakaniphani nina makhosi; niyaleke nina babusi bomhlaba.
Khonzani uSimakade ngokwesaba, nithokoze ngokuthuthumela.
Yangeni indodana, funa ithukuthele, bese nibhubha endleleni, ngokuba ulaka lwayo luvutha masinyane. Kepha babusisiwe bonke abaphephela kuyo.
Simakade, ziningi izitha zami. Baningi abangivukelayo.
Baningi abathi ngami: “Akukho ukukhululwa kwakhe kuNkulunkulu.”
Kepha Wena Simakade uyisihlangu kimi, uludumo lwami nophakamisa ikhanda lami.
Ngakhala kuSimakade ngezwi lami; wangiphendula esentabeni yakhe engcwele.
Ngabeka uhlangothi phansi, ngazunywa ngubuthongo; ngavuka, ngokuba uSimakade ungisekele.
Angiyukuzesaba izindimbane zabantu abangihaqe nxazonke.
Vuka, Simakade, ngisindise Nkulunkulu wami. Uzishayile zonke izitha zami emihlathini; wawawohloza amazinyo ezonakali.
Insindiso ingekaSimakade; isibusiso sakho masibe kubantu bakho.
Ngiphendule lapho ngikhala, Nkulunkulu ongukulunga kwami. Ekucindezelweni wangenzela indawo ebanzi; yiba nomusa kimi, uzwe umkhuleko wami.
Madodana abantu, kuyoze kube nini nithunaza isithunzi sami na? Kuyoze kube nini nithanda okuyize, nifuna okungamanga na?
Yazini ukuthi uSimakade uzehlukanisele abaqotho; uSimakade uyakuzwa lapho ngikhala kuye.
Thukuthelani, kodwa ningoni; zindlani enhliziyweni yenu, embhedeni wenu, nithule.
Nikelani ngeminikelo yokulunga, nethembele kuSimakade.
Baningi abathi: “Ngubani oyakusenzela okuhle na?” Simakade, phakamisela ukukhanya kobuso bakho phezu kwethu.
Ubeke injabulo enhliziyweni yami, eyedlula leyo yesikhathi lapho kunensada yokusanhlamvu, neyewayini labo elisha.
Ngiyakulala phansi ngokuthula, ngilalise okwengane, ngoba nguWena wedwa, Simakade, ongenza ngihlale ngiphephile.
Simakade, yizwa amazwi ami, uqaphele ukububula kwami.
Yizwa izwi lokukhala kwami, Nkosi yami, Nkulunkulu wami, ngokuba ngikhuleka kuwe.
Simakade, ekuseni uyalizwa izwi lami; ekuseni ngethula kuwe isicelo sami, ngilinde.
Ngokuba Wena unguNkulunkulu ongabuthokozeli ububi; ububi abunakuhlala kuwe.
Abazigqajayo abayukuma phambi kwamehlo akho. Uyabazonda bonke abenza okubi.
Uyababhubhisa bonke abakhuluma amanga; uSimakade uyabenyanya abachitha igazi nabakhohlisi.
Kepha mina ngiyakungena endlini yakho, ngenxa yobuningi bomusa wakho, ngikhothame ngokuthobeka ethempelini lakho elingcwele.
Simakade, ngihole ngokulunga kwakho, uqondise indlela yakho phambi kwami, ngenxa yezitha zami.
Ngokuba alikho iqiniso emilonyeni yabo; izibilini zabo zingukonakala: umphimbo wabo uyithuna elivulekileyo; bayathopha ngolimi lwabo.
Balahle ngecala, Nkulunkulu. Mabawe ngenxa yamacebo abo, badingise ngenxa yobuningi beziphambeko zabo, ngokuba bayamelana nawe.
Kepha mabajabule bonke abaphephela kuwe, mabakhamuluke ngenjabulo phakade, ubasibekele, bajabule kuwe abathanda igama lakho.
Simakade, Wena uyambusisa olungileyo; umhaqa ngomusa njengesihlangu.
Simakade, ungangithethisi ngentukuthelo yakho, ungangishayi ngolaka lwakho.
Yiba nesihawu kimi, Simakade, ngokuba anginamandla; ngiphilise, Simakade, ngokuba amathambo ami ayankenketha.
Umphefumulo wami uyesaba kakhulu, kepha Wena, Simakade, kuyoze kube nini na?
Buya, Simakade, ukhulule impilo yami, ngisindise ngenxa yesihe sothando lwakho.
Akukho ukukhumbula Wena kwelabafileyo; ngubani oyakukubonga endaweni yabafileyo na?
Ngikhathele ngenxa yokububula kwami. Ngimantisa umbhede wami njalo ebusuku, ngincibilikisa ukhukho lwami ngezinyembezi zami.
Iso lami liyafiphala, ngenxa yokudabuka; selibuthakathaka, ngenxa yezitha zami.
Sukani kimi nina nonke enenza okubi, ngokuba uSimakade ulizwile izwi lokukhala kwami.
USimakade ukuzwile ukunxusa kwami, uSimakade uyakuwamukela umkhuleko wami.
Zonke izitha zami ziyoba namahloni, ziphoxeke ngokwedlulele; ziyakubuyela emuva ngokuphazima kweso, zijabhile.
Simakade, Nkulunkulu wami, ngiyaphephela kuwe; ngisindise, ungikhulule kubo bonke abangixoshayo,
funa bangidwengule njengengonyama, bangidweshule kungekho ongikhululayo.
Simakade, Nkulunkulu wami, uma ngikwenzile lokho, uma kukhona ukungalungi ezandleni zami,
uma ngiphindise ngokubi kohlalisene ngokuthula nami, ngaphanga isitha sami ngaphandle kwesizathu,
isitha sami masiyizingele impilo yami, singifice. Siyidovadove phansi emhlabathini impilo yami, sidicilele phansi othulini isithunzi sami.
Phakama, Simakade, ngentukuthelo yakho. Vuka ngenxa yolaka lwezitha zami, zivuse ngokuba uyalezile ukwehlulela ngenxa yami!
Umhlangano wabezizwe mawukubunganyele, ubuyele phezulu ngaphezu kwazo.
Sengathi Simakade ungehlulela izizwe! Ngahlulele, Simakade, ngokulunga kwami nangobuqotho bami.
Makuphele ukonakala kwababi, kodwa simamisa abalungileyo, wena ohlolisisa izinhliziyo nezinso, Nkulunkulu olungileyo.
Nkulunkulu, uyisihlangu sami, ungumsindisi woqotho enhliziyweni.
UNkulunkulu ungumehluleli olungileyo, noNkulunkulu othukuthela nsuku zonke.
Uma umuntu engaphenduki, uyolola inkemba yakhe, uwukhokhile umnsalo wakhe, wama ngomumo,
umlungisele izikhali zokufa; uyenza imicibisholo yakhe ivuthe umlilo.
Sinemihelo ngobubi; sikhulelwe ububi, sizala amanga.
Umba umgodi, usewumbile; ukhalakathela emgodini abewumbile.
Ububi bubuyela ekhanda lakhe, ubudlova bakhe behlele ekhanda lakhe.
Ngizokumnika uSimakade izibongo ezifanele ukulunga kwakhe, ngilihubele indumiso igama likaSimakade Ophezukonke.
Simakade, Nkulunkulu wethu, yeka ukubabazeka kwegama lakho emhlabeni wonke! Wena obeke inkazimulo yakho phezu kwamazulu.
Emlonyeni wezingane nowabancelayo, umisile amandla ngenxa yezitha zakho, ukuze ushabalalise isitha nomphindiseli.
Lapho ngibuka izulu lakho, umsebenzi weminwe yakho, inyanga nezinkanyezi okumisileyo,
uyini umuntu ukuba umkhumbule, nendodana yomuntu ukuba uyinake na?
Umenzile waba ngaphansana kukaNkulunkulu, wamthwesa umqhele wodumo nobukhosi,
umenze wabusa phezu kwemisebenzi yezandla zakho; wakubeka konke phansi kwezinyawo zakhe:
zonke izimvu, izinkomo, izilwane zasendle,
izinyoni zezulu, izinhlanzi zasolwandle nakho konke okuhamba ezindleleni zolwandle.
Simakade, Nkulunkulu wethu igama lakho libabazeka kangaka emhlabeni wonke!
Ngiyakumbonga uSimakade ngenhliziyo yami yonke; ngilande ngazo zonke izimangaliso zakho.
Ngiyakuthokoza, ngethabe kuwe; ngilihubele igama loPhezukonke.
Lapho izitha zami, zibuyela emuva, ziyabhamazela, zibhubhe phambi kwakho.
Ngokuba ungenzele ubulungiswa, wangikhipha phambili uhlezi esihlalweni sakho, wehlulela ngokulunga.
Uzijezisile izizwe, wachitha izikhohlakali, walishabalalisa igama lazo ingunaphakade.
Izitha ziphelile, zabhujiswa, wayisiphula imizi yazo, kwaphela nya ukukhunjulwa kwazo.
USimakade umi kuze kube phakade; umisile isihlalo sakhe sokwehlulela.
Uyakuwehlulela umhlaba ngokulunga, ehlulele izizwe ngobuqotho.
USimakade uyinqaba kocindezelweyo, uyinqaba ngesikhathi sokuhlupheka.
Abalaziyo igama lakho bethembela kuwe; Simakade awubalahli labo abakufunayo.
Hubelani uSimakade ohlezi eZiyoni; memezelani izenzo zakhe phakathi kwabantu.
Ungumphindiseli, uyabakhumbula, akabakhohlwa abahluphekileyo nabathobekile, akakukhohlwa ukukhala kwabo.
Yiba nesihawu kimi, Simakade. Bona ukuhlupheka kwami abangilethela khona abangizondayo. Nguwe ongiphakamisa ngilengela egodini lokufa,
ukuze ngilande ngalo lonke udumo lwakho, ngilande ngemisebenzi yakho; emasangweni endodakazi yaseZiyoni, ngithokoze ngokungisindisa kwakho.
Abezizwe baphonseke phansi emgodini abawumbileyo, unyawo lwabo lwabhajwa enethini abangifihlele lona.
USimakade uzibonakalisile, wenzile ukwehlulela ngezandla zakhe, ngokucekela phansi ababi.
Izikhohlakali ziyakubuyela endaweni yabafileyo, yebo, zonke izizwe ezikhohlwa nguNkulunkulu.
Abampofu abasoze balibaleka; ithemba labathobekileyo nabahluphekileyo, aliyukunyamalala phakade.
Vuka, Simakade! Ungavumi ukuqonelwa ngabantu. Izizwe mazehlulelwe phambi kwakho.
Bathele ngovalo, Simakade, ukuze izizwe zazi ukuthi zingabantu nje.
Simakade, kungani umele kude na? Uzifihlelani ngezikhathi zokuhlupheka na?
Ngokuqhosha, ababi bahlupha abampofu. Mababanjwe emacebeni abawacebileyo.
Isikhohlakali siyazigabisa ngokufiswa yinhliziyo yaso. Abanomhobholo bayaqanganisa, bedelela uSimakade.
Isikhohlakali siyazigqaja, asifuni ukubuyela kuwe, ngisho nje ukuba sicabange ngawe.
Izindlela zaso zethembekile izikhathi zonke; izehlulelo zakho ziphakeme kakhulu kunokubona kwaso; zonke izitha zaso uyazidelela.
Enhliziyweni yaso sizindla sithi: “Angisoze ngazanyazanyiswa, izizukulwane ngezizukulwane, angisoze ngahlupheka.”
Umlomo waso ugcwele iziqalekiso, inkohliso nencindezelo; phansi kolimi lwaso kukhona ukuganga nobubi.
Silala unyendle emizini, ezindaweni ezinamathunzi, ukuze sibulale ongenacala; amehlo aso abheke labo abangenamandla.
Sicuthisa okwebhubesi elilambile ehlozini, sethembe ukubamba ohluphekileyo, simhudulele ogibeni lwaso.
Siyakhokhoba, simnyonyobele, simshaye phansi ngamandla aso.
Siyacabanga sithi enhliziyweni yaso: “UNkulunkulu akanakile, akabhekile ngakimi, futhi ngeke angibone.”
Simakade Nkulunkulu, yima ngomumo! Bonakalisa amandla akho, ungamkhohlwa osekuhluphekeni.
Nkulunkulu, kungani ukuba isikhohlakali sikwedelele sicabange sithi: “Ngeke wangenza lutho,” na?
Kepha Wena uyamqaphela osenkathazweni nasosizini, wenze okuthile ngaye. Abampofu bangethembela kuwe, nezintandane ngokunjalo.
Nqamula imisipha yengalo yesonakali, ujezise ababi ngenkohlakalo yabo, iphele ingabe isaphushwa nakuphushwa!
USimakade uyobusa ingunaphakade, abezizwe babhujiswe ezweni lakho.
Simakade, uyakuzwa ukukhala kokulangazelela kwabahluphekileyo. Ubanikeza ithemba, bese ukulalela ukukhala kwabo becela usizo;
umela izintandane nabacindezelweyo, ukuze kungabi bikho namunye emhlabeni, ozoba yingozi komunye.
Ngiphephela kuwe Simakade; uyisiphephelo sami. Kungani pho nithi kimi: “Balekela ezintabeni njengenyoni.
Bheka, izikhohlakali zinsala iminsalo, sezifake imicibisholo yazo emnsalweni, ukuze zicibe ebumnyameni abaqotho ngenhliziyo.
Olungileyo uyokwenzenjani, lapho zibhujiswa izisekelo zomhlaba,” na?
USimakade usethempelini lakhe elingcwele. Isihlalo sakho Simakade sisezulwini. Amehlo akho ayabona, ukubheka kwakho kuyabahlolisisa abantwana babantu.
USimakade uyamvivinya olungileyo, kodwa uyamzonda othanda ubudlova.
Uyakunisa imvula yamalahle avuthayo nesibabule phezu kwababi, nomoya weshisandlu ube yisabelo sabo.
Ngokuba uSimakade ulungile, uyazithanda izenzo ezilungileyo; abaqotho bayakububona ubuso bakhe.
Yelekelela, Simakade, ngokuba akusekho muntu oqotho, nabebethembekile abasekho kubantu.
Bakhuluma amanga, omunye kumakhelwane wakhe, ngezindebe ezithophayo, nangezinhliziyo ezimbaxambili, bayakhuluma.
Sengathi uSimakade angazinquma izindebe ezithophayo, ulimi olukhuluma amazwi okuziqhayisa.
Labo abathi: “Thina sigabe ngolimi lwethu. Sisho umathanda ngalo. Pho iphi le nkosi ethi ingasiphatha na?”
Kepha Wena Simakade, uthi: “Ngenxa yabampofu abaphangwayo, nababuswezi ababubulayo, ngizakuvuka,” kusho uSimakade, “ngimbeke endaweni ephephile, ayilangazelelayo.”
Amazwi kaSimakade ahlanzekile, anjengesiliva elihlanzwe esithandweni somlilo, lahlanzwa kasikhombisa emhlabathini.
Wena Simakade uyakubagcina, umvikele kulesi sizukulwane, kuze kube phakade.
Izikhohlakali zehla zenyuka, zibukisa, njengoba ububi budlangile nje phakathi kwabantwana babantu.
Simakade, kuyoze kube nini ungikhohliwe unomphela na? Kuyoze kube nini ungifihlela ubuso bakho na?
Kuyoze kube nini ngithwele ubuhlungu emphefumulweni wami, nosizi enhliziyweni yami, usuku lonke na? Kuyoze kube nini isitha singiqonela na?
Ngibheke, ungiphendule, Simakade, Nkulunkulu wami. Letha injabulo emehlweni ami, ngingaze ngilale ubuthongo bokufa;
funa isitha sami, sithi: “Ngimehlule.” Nabamelene nami bajabule ngokuba nginqotshiwe.
Kepha mina ngethembele emseni wakho, inhliziyo yami mayethabe ngensindiso yakho.
Ngizohlabelela kuSimakade ngokuba ungenzele okuhle.
Isiwula sithi enhliziyweni yaso: “Akekho uNkulunkulu.” Bonakele, benza okunengekayo, akekho owenza okuhle.
USimakade uyababuka abantwana babantu esezulwini, ukubona ukuthi ukhona yini ohlakaniphileyo, ofuna uNkulunkulu.
Bonke baphambukile, bonke bonakele; akekho owenza okuhle, akukho namunye.
Abaqondi lutho bonke abenza okubi, abadla abantu bami sengathi badla isinkwa, bengakhuleki kuSimakade.
Bazoba nokwesaba okukhulu, ngoba uNkulunkulu umi naso isizukulwane sabalungileyo.
Niyaliphambanisa icebo lohluphekileyo, kodwa uSimakade uyisiphephelo sakhe.
Sengathi kungavela eZiyoni, lowo oyakusindisa u-Israyeli. Mhla uSimakade ephinda ebuyisa abantu bakhe ekuthunjweni, uJakobe makajabule, u-Israyeli athokoze.
Simakade, ngubani oyakuhlala ethendeni lakho na? Ngubani oyakukwakha entabeni yakho engcwele na?
Yilowo onkambo yakhe ingenasici, futhi owenza ukulunga, okhuluma iqiniso enhliziyweni yakhe;
ongahlebi ngolimi lwakhe, ongenzi okubi kumngani wakhe, nongamhleki usulu umakhelwane wakhe;
obenyanyayo abanengekayo, kepha ebazisa abesaba uSimakade; owenza isifungo asigcine, noma isimo singamvumeli;
ongatshelekisi ngemali ukuba athole inzuzo, nongadizelwa ukuze alahle ngecala omsulwa. Owenza lezi zinto akasoze azanyazanyiswa, kuze kube phakade.
Ngilondoloze Nkulunkulu, ngoba uyisiphephelo engikhosela kuso.
Ngithi kuSimakade: “Wena uyiNkosi yami; akukho buhle kimi ngaphandle kwakho.”
Abangcwele abasemhlabeni, abahloniphekileyo, ikubo intokozo yami yonke.
“Laba abazikhethela omunye unkulunkulu, bandisa izinhlupheko zabo. Angiyukunikela ngemihlatshelo yabo yegazi, angiyukuwaphatha ngisho amagama abo ngezindebe zami.”
Simakade, uyisabelo sami nendebe yami; uphethe ukuphila kwami.
Ungabele izindawo zekhethelo, ifa elihle kakhulu.
Ngiyakudumisa uSimakade ongelulekayo. Nasebusuku inhliziyo yami iyangiqondisa.
Ngiyohlala njalo ngibheke kuwe Simakade, ngokuba Wena ungakwesokunene sami, angiyukuzanyazanyiswa.
Ngakho-ke inhliziyo yami iyathokoza, nomphefumulo wami uyethaba, ngisho nomzimba wami uyohlala ulondekile.
Ngokuba awuyiyekelanga impilo yami kwelabafileyo; nokuba othembekileyo wakho abone igodi.
Uyakungazisa indlela yokuphila; phambi kwakho kunenjabulo epheleleyo; intokozo yaphakade, ingakwesokunene sakho.
Ake ulalele udaba lwami, Simakade, ulalele ukukhala kwami, ubeke indlebe yakho emkhulekweni wami ophuma emlonyeni ongenankohliso.
NguWena kuphela ongangikhipha phambili; amehlo akho ayakubona okuliqiniso.
Uyivivinyile inhliziyo yami, wangihambela ebusuku; uyangihlolisisa, kepha awufumani lutho; nginqumile ukuba ngingoni ngomlomo wami.
Angenzi njengabantu abaningi, ngokuba ngithobela izwi lakho, ngiyazigwema izindlela zezidlova.
Izinyathelo zami zisemkhondweni wakho, izinyawo zami azizange zishelele.
Ngiyakukhala kuwe, ngokuba uyongiphendula, Nkulunkulu; beka indlebe yakho kimi, uzwe engikukhulumayo.
Bonakalisa uthando lwakho olungapheliyo, Wena osindisa ngesokunene sakho abaphephela kuwe kulabo ababavukelayo.
Ngivikele njengenhlamvu yeso, ungifihle emthunzini wamaphiko akho,
kwababi abangicindezelayo, nasezitheni zami ezingihaqileyo.
Zivalile izinhliziyo zazo, azinasihe, zikhuluma zizigqaja ngemilomo yazo.
Ziyangilandela noma ngiyaphi, ziyangizungeza, zingithe njo ngamehlo azo, ukuze zingithele othulini.
Ufana nebhubesi elilambile, nanjengebhongo lengonyama licuthe ehlozini.
Yima ngomumo, Simakade, ubhekane nazo, ziqumbe phansi. Sindisa umphefumulo wami ngenkemba yakho,
nakubantu, ngesandla sakho, Simakade, abantu abasabelo sabo kulo mhlaba sikulokhu kuphila, nabazisu zabo uzigcwalisa ngalokho obabekele khona, nabashiyela izingane zabo okuningi okusele kubo.
Kepha mina ngizobuka ubuso bakho ekulungeni, ngeneliswe ngubunjalo bakho lapho ngivuka.
Ngiyakuthanda, Simakade, ongamandla ami.
Simakade, uyidwala lami nenqaba yami, noMkhululi wami, uNkulunkulu wami; uyidwala engikhosela kulo, isihlangu sami, nophondo lwensindiso yami, inqaba yami.
Ngikhala kuSimakade omele ukudunyiswa, ngisindiswe ezitheni zami.
Izintambo zokufa zangizungeza, izikhukhula zembubhiso zangikhungatha.
Izintambo zendawo yabafileyo zangibamba. Izihibe zokufa zangehlela.
Ekuhluphekeni kwami ngakhala kuSimakade, ngakhala, uNkulunkulu walizwa izwi lami esethempelini lakhe; ukukhala kwami, kwafinyelela ezindlebeni zakhe.
Umhlaba wazamazama, wathuthumela, izisekelo zezintaba zanyakaza, zashukumela emuva naphambili, wavutha.
Ukhafula intuthu ngamakhala akhe, kuthaphuke umlilo oqothulayo emlonyeni wakhe, akhafule amalahle avuthayo.
Uqhekeza isibhakabhaka bese ehla emi ngezinyawo zakhe, phezu kwesigayegaye sobumnyama.
Uza endiza, egibele ikherubhi, eshweza ngamaphiko omoya.
Uzisonge ngobumnyama, wazemboza ngemvula yamafu amnyama bhuqe!
Wendulelwa ngumbani, amafu akhe ehlisa isichotho namalahle avuthayo.
USimakade uyaduma esibhakabhakeni; Ophezukonke uyabhodla, wehlisa isichotho namalahle ankemuzelayo.
Uciba ngemicibisholo yakhe, izitha zihlakazeke; umbani ulokhu uthi nyazi, uzidudulela kude.
Ngenkathi Wena, Simakade, uzithethisa, lapho uzifutha ngamakhala akho, umphefumulo wakho uziqumbe phansi. Izinzulu zolwandle zavela obala, nezisekelo zomhlaba zaba kwabha.
USimakade welule isandla sakhe esezulwini, wangixhakathisa, wangidonsa, engikhipha ezikhukhuleni ezesabekayo.
Wangisindisa ezitheni zami ezinamandla; bezinamandla kunami, kodwa Yena wangihlenga.
Zingihlasele ngacishe ngabhubha, kodwa uSimakade wangivikela.
Ungikhululile kuzona; wangisindisa ngoba engithanda.
USimakade ungiklomelisile, ngoba ngenza intando yakhe, ungenzele okuhle, ngoba ngimsulwa.
Ngihlala ngihamba ezinyathelweni zikaSimakade, angikuvumeli ukuziphatha kwababi, kungehlukanise noNkulunkulu wami.
Ngigcina yonke imithetho yakhe, futhi izimiso zakhe angizishayi indiva.
Ngangingenasici phambi kwakhe, ngaziqhelelanisa nesono.
USimakade wangivuza ngokwenza intando yakhe, ngoba ukubonile ukuthi ngimsulwa.
Uhlala ethembekile kulabo abethembekile kuye, abangenasici ubavuza ngezipho ezipheleleyo.
Konenhliziyo emhlophe uzibonakalisa ehlanzekile, kowonakele uzibonakalisa eyisigwegwe.
NguWena osindisa abazithobayo, ujabhise abaqhoshayo.
USimakade uNkulunkulu wami, ukhanyisa isibani sami, akhanyise ubumnyama bami.
Ngokuba ngawe ngingahlasela impi, ngoNkulunkulu wami, ngingeqa ugange.
Indlela yakho, Nkulunkulu, iphelele, izwi likaSimakade lihlanzekile, uyisihlangu sabo bonke abaphephela kuye.
Ngokuba ngubani onguNkulunkulu ngaphandle kukaSimakade na? Ngubani oyidwala ngaphandle kukaNkulunkulu wethu na?
UNkulunkulu ongibhincisa amandla, owenza indlela yami iphelele.
Wenza izinyawo zami zibe njengezendluzele, angimise ngiqine ezindaweni zami eziphakemeyo.
Uqeqesha izandla zami, ukuze ngikwazi ukulwa; izingalo zami zibe namandla okugobisa umnsalo wethusi.
Wena unginike isihlangu sensindiso yakho, isandla sakho sokunene singiphasile, ubukhona bakho bungenze ngaba mkhulu.
Wandisile izinyathelo zami phansi kwami, namaqakala ami awabhinyikanga.
Ngazixosha izitha zami, ngazifica, angibuyanga ngaze ngaziqede nya.
Ngazilimaza, azakwazi ukuvuka, zawa phansi kwezinyawo zami.
Wena ungibhincisa amandla ukuze ngimelane nempi, abangivukelayo ubenze bangikhothamela.
Unikele ngezitha zami kimi, nabangizondayo ngabaqothula.
Bakhala, kodwa akubangabikho obasindisayo, bakhala nakuSimakade, kepha akaze abaphendula.
Ngibacolisisa okothuli lupheshulwa yisiphepho, ngibashabalalisa okodaka emgwaqweni.
Wangikhulula kubantu abangivukelayo. Wangimisa ngaba yinhloko yezizwe, abantu engingabazi bangikhonza.
Banele ukungizwa nje, bangilalela; abantwana babafokazi bayathoba phansi kwami.
Abafokazi babuna, baphuma ezinqabeni zabo begubhazela.
USimakade uyaphila, malidunyiswe idwala lami. Makaphakanyiswe uNkulunkulu wensindiso yami.
UNkulunkulu owangiphindiselela, wenza izizwe zakhonza phansi kwami.
UNkulunkulu ungiphindiselele, wenza abantu bazithobe phansi kwami. Wangikhulula kumuntu oyisidlwangudlwangu.
Ngakho-ke ngiyakumbonga phakathi kwezizwe; Simakade, ngiyakulihubela igama lakho.
Uyenza ibe nkulu insindiso enkosini, wenza isihe kogcotshiweyo wakhe, kuDavide nabozalo lwakhe kuze kube phakade.
Amazulu alanda ngenkazimulo kaNkulunkulu, umkhathi umemezela ngomsebenzi wezandla zakhe.
Usuku lwedlulisela kolunye usuku ulwazi, nobusuku butshela obunye ngalolo lwazi.
Akukho nkulumo, akukho mazwi, nezwi lakho alizwakali,
nokho isilinganiso sakho siphumele emhlabeni wonke, namazwi akho emikhawulweni yomhlaba. Ulimisele ilanga ithende kuwo,
eliphuma kulo njengomyeni ephuma elawini, nanjengendoda enamandla, ligijima endleleni yalo.
Liphuma emikhawulweni yamazulu, lizungeze lize liyozilahla ekugcineni kwayo; akukho lutho olufihlakele ekushiseni kwalo.
Umthetho kaSimakade uphelele, uvuselela umphefumulo. Ubufakazi bukaSimakade buthembekile, nongebani bumnika ukuhlakanipha.
Imiyalo kaSimakade ilungile, ingumthombo wokwethaba kwenhliziyo; umyalo kaSimakade uhlanzekile, ukhanyisa amehlo.
Ukwesaba uSimakade kungukuhlanzeka, kumi kuze kube phakade. Izehlulelo zikaSimakade ziliqiniso, zilungile zonke.
Zinxanelekile kunegolide, ngisho nenqwaba yegolide elicwengekileyo. Zimnandi ukwedlula uju oluconsa emakhekhebeni.
Ngazo, ngisho inceku yakho iyexwayiswa. Ukuzigcina kunomvuzo omkhulu.
Ngubani owazi amaphutha akhe na? Ngithethelele eziphosisweni ezisithekileyo.
Nqanda inceku yakho ezonweni ezihlazisayo; mazingabusi phezu kwami. Yikhona ngizohlala ngingenasisihla, ngibe msulwa eziphambekweni ezinkulu.
Amazwi omlomo wami, nezizindlo zenhliziyo yami, makwemukeleke kuwe Simakade; dwala lami nomhlengi wami.
USimakade makakuphendule ngosuku lwenhlupheko. Igama likaNkulunkulu kaJakobe malikuvikele.
Makakuthumelele usizo oluvela endlini engcwele, akweseke eseZiyoni.
Makayikhumbule yonke iminikelo yakho, awemukele umnikelo wakho wokushiswa.
Makakuphe okufiswa yinhliziyo yakho, afeze zonke izinhloso zakho.
Sihlokome, sihalalise ngokunqoba kwakho, siphakamise ibhanela egameni likaNkulunkulu wethu. USimakade makaphumelelise konke okucelayo.
Manje sengiyaqonda ukuthi uSimakade uyamsindisa ogcotshiweyo wakhe: uyamphendula esezulwini lakhe elingcwele ngamandla okusindisa asesandleni sakhe sokunene.
Abanye bagabe ngezinqola zempi, abanye ngamahhashi, kodwa thina sethembele egameni likaSimakade uNkulunkulu wethu.
Bayowa bashaye ngamadolo phansi, kepha thina siyovuka, sime.
Sindisa, Simakade! INkosi mayisiphendule ngosuku lokukhala kwethu.
Simakade, inkosi iyethaba ngamandla akho; ithokoza kakhulu ngokuyihlenga kwakho.
Uyiphe obekufiswa yinhliziyo yayo, awuyigodlelanga ebikucela ngezindebe zomlomo wayo.
Uyihlangabeze ngezibusiso ezinhle, wayethwesa umqhele wegolide elicwengekileyo ekhanda layo.
Yacela kuwe ukuphila, wayipha khona; yaphila izinsuku eziningi, kwaze kwaba ingunaphakade.
Inkulu inkazimulo yayo ngokuyinqobisa kwakho; uyethwese udumo nobukhosi.
Ngokuba uyibeke ukuba ibe yisibusiso kuze kube phakade; uyenza ithokoze, ijabule ngobukhona bakho.
Inkosi yethembele kuSimakade, nangenxa yesihawu soPhezukonke ayiyukunyakaziswa.
Isandla sakho siyozifumana zonke izitha zakho; esokunene sakho sibathole abakuzondayo.
Ngesikhathi sentukuthelo yakho, uyobenza bafane nesithando somlilo. USimakade uyobasobozela ngentukuthelo yakhe, umlilo ubashwabadele.
Uzalo lwabo uyolubhubhisa emhlabeni, nesizukulwane sabo, phakathi kwabantu.
Uma bekwakhela uzungu, beceba okubi ngawe, abayukuphumelela;
ngokuba uyobaciba ngomcibisholo wakho bebuka, bashaye bachithe.
Phakama ngamandla akho, Simakade. Thina sizohlabelela, situse amandla akho.
Nkulunkulu wami, Nkulunkulu wami, ungishiyeleni na? Ukude namazwi okububula kwami nokusindiswa kwami.
Nkulunkulu wami, ngikhala emini, kepha awuphenduli, nasebusuku, ngingabi nakuthula.
Kepha Wena ungoNgcwele, uhlezi ezibongweni zika-Israyeli.
Okhokho bethu bethembela kuwe; bakwethemba, Wena wabakhulula.
Bakhala kuwe, bakhululwa; bethembela kuwe, abaze bajabha.
Kepha mina angisemuntu, ngiyimpethu nje; ngiyisigcono sabantu, nendelelo ezizweni.
Bonke abangibonayo bayangibhinqa, banginkonkozele, banikine amakhanda,
basho nokusho bathi: “Makabeke indaba yakhe kuSimakade; Yena makamkhulule. Makamsindise ngoba uthokozile ngaye!”
Nguwe owangihlenga esibelethweni ngaze ngazalwa, wangikhoselisa, ngavikeleka esifubeni sikamame.
Nganikelwa kuwe kwasekuzalweni kwami; nguwe owaba nguNkulunkulu wami.
Ungabi kude nami, ngokuba inhlupheko iseduze, akekho ongisizayo.
Ngihaqwe yizinkunzi zaseBhashani eziningi, ezinamandla, zingizungezile.
Zingikhamisele imilomo yazo njengebhubesi elibhodlayo nelidwengulayo.
Ngichithiwe njengamanzi; kuxega wonke amalungu ami. Inhliziyo yami incibilika njengengcina ezibilini zami.
Umlomo wami wome njengodengezi, ulimi lunamathele olwangeni; ungilalise othulini lokufa.
Ngokuba izinja zingihaqile, umgwamanda wabenzi bokubi ungizungezile. Izandla nezinyawo zami bazibhobozile.
Sengingawabala wonke amathambo ami. Bangigqolozela, beklibhiza.
Behlukaniselana ngezingubo zami, benza unkatho ngesembatho sami.
Kepha Wena Simakade, mawungabi kude, Wena mandla ami, shesha ungisize.
Hlenga umphefumulo wami enkembeni, impilo yami, esidladleni senja.
Ngisindise emlonyeni webhubesi, nasezimpondweni zenyathi; uyangiphendula.
Ngiyomemezela ngegama lakho kubafowethu, ngikudumise phakathi kwebandla.
Nina enesaba uSimakade, mdumiseni! Nina nonke, bozalo lukaJakobe, mdumiseni, nani nonke, bozalo luka-Israyeli, nimesabe,
ngokuba akamedelelanga, akanengwanga yinhlupheko yohlushwayo. Akamfihlelanga ubuso bakhe, kodwa wamuzwa ngesikhathi enxusa.
Ukudumisa kwami kuyakuvela kuwe ebandleni elikhulu, izithembiso zami ngiyozifeza phambi kwalabo abamesabayo.
Abahluphekayo bayokudla, basuthe; labo abamfunayo uSimakade, bayomdumisa. Sengathi izinhliziyo zenu zingaphila ingunaphakade.
Yonke imikhawulo yomhlaba iyokhumbula, bese iphendukela kuSimakade, nayo yonke imindeni yezizwe iyokhothama phambi kwakho;
ngokuba umbuso ungokaSimakade; nguye obusa izizwe.
Bonke abomhlaba abacebileyo bayokudla, badumise, nalabo asebewuthuli othulini, bayokhothama phambi kwakhe, ngisho nalowo ongenakuwugcina umphefumulo wakhe uphilile.
Izizukulwane ziyomkhonza, kulandwe ngayo iNkosi isizukulwane ngesizukulwane.
Bayokuza bamemezele ngokulunga kwayo kubantu abasazozalwa, babatshele ukuthi lokho kwenziwa yiyo.
USimakade ungumelusi wami, angiyukuswela.
Ungilalisa emadlelweni aluhlaza; ungiyisa ngasemanzini okuphumula.
Uvuselela umphefumulo wami. Ungiholela ezindleleni zokulunga, ngenxa yeGama lakhe.
Ngisho noma ngidabula emfundeni emnyama okwethunzi lokufa, angiyukwesaba ngozi, ngokuba Wena unami, intonga yakho nondondolo lwakho kuyangiduduza.
Udeka itafula phambi kwami, kubuka izitha zami. Ugcoba ikhanda lami ngamafutha; indebe yami iyachichima.
Impela okuhle nomusa kuyohlala kungilandela imihla yonke yokuphila kwami. Ngiyohlala endlini kaSimakade kuze kube phakade.
Umhlaba ungokaSimakade nakho konke okukuwo, izwe nabakhileyo kulo,
ngokuba nguye owawumisa phezu kwezilwandle, wawusekela phezu kwemifula.
Ngubani nje oyokhuphukela entabeni kaSimakade na? Ngubani oyokuma endaweni yakhe engcwele na?
Yilowo onezandla ezihlanzekileyo, nenhliziyo emsulwa, ongazibandakanyi nokungamanga futhi ongafungi ngenkohliso.
Uyofumana isibusiso kuSimakade, nokulunga kuNkulunkulu wensindiso yakhe.
Yilesi isizululwane salabo abamfunayo, labo abafuna ubuso bukaNkulunkulu kaJakobe.
Phakamisani, amakhanda enu masango! Niphakame nani minyango yaphakade, phakamani ukuze iNkosi yenkazimulo ingene.
Ingubani le Nkosi yenkazimulo na? InguSimakade onamandla, oyiqhawe, uSimakade oyiqhawe empini.
Phakamisani amakhanda enu masango! Niphakame nani minyango yaphakade, ukuze iNkosi yenkazimulo ingene.
Ingubani le Nkosi yenkazimulo na? InguSimakade Wamabandla, nguYena oyiNkosi yenkazimulo.
Simakade, ngiphakamisela kuwe umphefumulo wami.
Nkulunkulu wami, ngethembele kuwe; ungavumi ukuba ngihlazeke; izitha zami mazingaqhoshi ngami.
Impela, akuyukujabha noyedwa kwabathembele kuwe; mabajabhe labo abaphambuka ngeze.
Simakade, ngazise izindlela zakho, ungifundise imendo yakho.
Ngiholele eqinisweni lakho, ungifundise, ngokuba Wena unguNkulunkulu wensindiso yami; ngethembele kuwe njalo.
Simakade, khumbula umusa wakho kithi, nesihawu sakho, ngokuba kukhona kwaphakade.
Ungazikhumbuli izono zobusha bami neziphambeko zami, ngokwesihawu sakho ngikhumbule, ngenxa yokulunga kwakho, Simakade!
USimakade muhle, ulungile, yingakho izoni ezifundisa indlela.
Abathobekileyo ubaholela kokulungileyo, abathobekileyo ubafundisa indlela yakhe.
Zonke izindlela zikaSimakade ziyisihawu nokwethembeka kulabo abagcina isivumelwano sakhe, nobufakazi bakhe.
Simakade, ngenxa yegama lakho ngithethelele isiphambeko sami, ngokuba sikhulu.
Ngubani owesaba uSimakade na? Uyomfundisa indlela okumele ayikhethe.
Uyophumelela njalo, nezizukulwane zakhe ziyoba yizindlalifa zezwe.
USimakade ungumngani walabo abamesabayo, ubafundisa ukuba basazi isivumelwano sakhe.
Amehlo ami ahlala ethe njo kuSimakade, ngokuba nguye okhulula izinyawo zami ogibeni.
Bheka ngakimi, ube nomusa kimi, ngokuba ngiyinhlwa, futhi ngiyahlushwa.
Ngikhulule ezinsizini ezisenhliziyweni yami, ungikhiphe ezinhluphekweni engikuzo.
Bheka ukuhlupheka kwami nosizi lwami, ungithethelele zonke izono zami.
Bheka ukuthi ziningi kangakanani izitha zami, nokuthi zingiphethe ngendlakandla nangenzondo engakanani.
Londoloza umphefumulo wami, ungikhulule, ungavumi ngithelwe ngehlazo, ngokuba mina ngiphephela kuwe.
Ukulunga nobuqotho makungilondoloze, ngokuba ngethembele kuwe.
Nkulunkulu, khulula u-Israyeli kuzo zonke izinkathazo zakhe.
Ngahlulele, Simakade, ngokuba ngihamba ngobuqotho, ngethembele kuwe angaze ngangabaza.
Ngivivinye, Simakade, ungihlolisise, hlola izizindlo zenhliziyo yami, nengqondo yami.
Ngokuba isihawu sakho siphambi kwami, ngihamba ngeqiniso lakho.
Angihlali nabantu bamanga, angihambelani nezimbulu.
Ngiyawuzonda umgwamanda wabenza okubi, futhi ngeke ngihlale nezikhohlakali.
Ngigeza izandla zami ngingenacala, ukuze ngizungeze i-althare lakho, Simakade,
ngimemezele ihubo lokubonga, ngilandise ngazo zonke izimangaliso zakho.
Simakade, ngiyithanda kakhulu indlu ohlala kuyo, nendawo lapho kuhlala khona inkazimulo yakho.
Ungangilahli kanye nezoni, nomphefumulo wami kanye nabantu abalambele igazi,
abazandla zabo zingamathuluzi enkohlakalo, esokunene sabo sigcwele imifumbathiso.
Kepha mina ngihamba ngobuqotho; ngikhulule, ube nomusa kimi.
Unyawo lwami lumi endaweni ehlelembekile; ngisebandleni, ngizomdumisa uSimakade.
USimakade ungukukhanya kwami nensindiso yami. Ngubani engingamesaba na? USimakade uyinqaba yokuphila kwami. Ngubani engingaba novalo ngaye na?
Lapho abenzi bokubi besondela kimi ukuba bangisoconge, abamelene nami nezitha zami bayokhubeka, baqumbeke phansi.
Noma impi ingakanisa imelane nami, inhliziyo yami ayiyukwesaba, ngisho impi ingangivukela, nokho ngiyoba neqholo.
Kukodwa zwi engikucela kuSimakade, yilokhu nje engizimisele ukukwenza: ukuba ngihlale endlini kaSimakade zonke izinsuku zokuphila kwami, ngibuke ubuhle bukaSimakade, ngizindle ngisendlini yakhe.
Ngokuba uzongifihla edokodweni lakhe ngosuku lwenhlupheko, angicashise endaweni efihlakele ethendeni lakhe, angiphakamisele edwaleni.
Namanje ikhanda lami lizakuphakama phezu kwezitha zami ezingizungezile. Ngizonikela ngemihlatshelo, ngihlokome ngentokozo ngisethendeni lakhe. Ngihlabelele, ngidumise uSimakade ngokhehlegume.
Ngizwe Simakade, lapho ngikunxusa, ube nomusa kimi, ungiphendule.
Inhliziyo yami ithi uthe: “Funani ubuso bami,” inhliziyo yami ithi: “Ubuso bakho, Simakade, ngiyabufuna.”
Ungabufihli ubuso bakho kimi. Ungayixoshi inceku yakho ngentukuthelo; Wena uwusizo lwami, uze ungangilahli, ungangishiyi, Nkulunkulu wensindiso yami.
Nakuba ubaba nomame bengishiyile; uSimakade uzongemukela.
Simakade, ngifundise indlela yakho, ungihole endleleni ehlelembekile ngenxa yezitha zami.
Uze unganginikeli kokufiswa yizitha zami ngami, ngokuba ofakazi bamanga bangivukele, babhodla umlilo.
Ngiyethemba ukuthi ngizobubona ubuhle bukaSimakade, ezweni labaphilayo!
Lindela uSimakade, uqine, inhliziyo yakho ime isibindi. Yebo, lindela uSimakade.
Ngikhala kuwe, Simakade; Dwala lami, ungazenzi isithulu kimi, funa uma uthalalisa, ngifane nalabo abehlela egodini.
Yizwa izwi lokunxusa kwami, njengoba ngikhala kuwe, ngiphakamisela izandla zami endaweni yakho engcwelengcwele.
Ungangilahli kanye nezoni nabenzi bokubi, abathi becebela omakhelwane babo ububi ngezinhliziyo, babe bekhuluma kahle ngemilomo yabo.
Banike umvuzo ofanele izenzo zabo, nobubi bemisebenzi yabo, nangokwenza kwezandla zabo, uphindisele kubo abakwenzayo.
Ngokuba abayinaki imisebenzi kaSimakade, nokwenziwe yizandla zakhe. Uyobadiliza, angabe esabakha kabusha.
Makabongwe uSimakade, ngokuba ulizwile izwi lokunxusa kwami.
USimakade ungamandla ami, nesihlangu sami, inhliziyo yami yethembele kuye, yingakho ngisizakele, inhliziyo yami iyethaba. Ngizomdumisa ngehubo lami.
USimakade ungamandla abantu bakhe. Uyinqaba eyinsindiso yogcotshiweyo wakhe.
Sindisa abantu bakho, ubusise ifa lakho, ubeluse, ubathwale, kuze kube phakade.
Mnikeni udumo uSimakade, nina zidalwa zezulu. Mnikeni uSimakade udumo, inkazimulo namandla.
Mnikeni uSimakade udumo olufanele igama lakhe, mdumiseni uSimakade ebukhazikhazini bakhe obungcwele.
Izwi likaSimakade liphezu kwamanzi, uNkulunkulu wenkazimulo uyaduma; uSimakade uphezu kwamanzi amaningi.
Izwi likaSimakade linamandla. Izwi likaSimakade liyinkazimulo.
Izwi likaSimakade lephula imisedari; uSimakade uphoqoza imisedari eLebhanoni.
ILebhanoni alenze litshekule njengenkonyane, neSiriyoni, njengethole lenyathi.
Izwi likaSimakade lidlalisela kugqamuke amalangabi.
Izwi likaSimakade lizamazamisa ihlane, uSimakade unyakazisa ihlane; uSimakade unyakazisa ihlane eKadeshi.
Izwi likaSimakade liphunzisa izimbabala; liphundla amahlathi, konke okusethempelini lakhe kuthi: “Udumo!”
USimakade uhleli phezu kwezikhukhula, uSimakade uyiNkosi, ubusa kuze kube phakade.
USimakade uzokupha abantu bakhe amandla. USimakade uzobusisa isizwe sakhe ngokuthula.
Ngiyakuphakamisa Simakade, ngokuba ungitakulile, awuvumanga ukuba izitha zami zithokoze ngami.
Simakade, Nkulunkulu wami, ngikhale kuwe ngicela usizo, wangiphulukisa.
Simakade ukhulule umoya wami endaweni yabafileyo, wangigcina ngiphilile, angaze ngashona egodini.
Mdumiseni uSimakade, nina bathembekileyo bakhe, nibonge igama lakhe elingcwele.
Ngokuba intukuthelo yakhe ingeyesikhashana, umusa wakhe umi ingunaphakade. Ukulila kungadonsa kuze kuhlwe; injabulo iqhamuke ekuseni.
Mina ngathi lapho ngiphumelela: “Angisoze nganyakaziswa naphakade.”
Simakade ngomusa wakho, wangenza nganjengentaba eqinileyo. Usubufihlile ubuso bakho, ngadangala.
Ngakhala kuwe Simakade, nganxusa Nkosi yami, ngathi:
“Kunanzuzoni ukufa kwami, lapho ngishona phansi egodini na? Ngabe uthuli luzokudumisa yini na? Ngabe luzokhuluma ngokwethembeka kwakho na?
Yizwa, Simakade, ube nomusa kimi; Simakade yiba ngumsizi wami!”
Ukulila kwami ukuphendule ijadu, wangikhumula ingubo yesaka, wangembathisa injabulo,
ukuze umphefumulo wami ukudumise, ungaphezi. Simakade, Nkulunkulu wami, ngizokubonga kuze kube phakade.
Simakade, ngiphephela kuwe, mangingajabhiswa naphakade, ngikhulule ngokulunga kwakho.
Indlebe yakho ibeke kimi, ungikhulule ngokushesha. Yiba yidwala lokuphephela kimi, inqaba eqinileyo engikhosela kuyo.
Impela Wena uyidwala lami nenqaba yami; ngenxa yegama lakho uyangihola, ungiqondise.
Ngikhiphe ogibeni abangicuphe ngalo, ngokuba Wena uyisiphephelo sami.
Umoya wami ngiwubeka esandleni sakho, ungikhululile, Simakade, Nkulunkulu weqiniso.
Ngiyabazonda labo abakhonza onkulunkulu abayize, kodwa mina ngethembele kuSimakade.
Ngizokwethaba ngijabule ngomusa wakho, ngokuba ukubonile ukuhlupheka kwami, wazinaka izinsizi zomphefumulo wami;
awunginikelanga esandleni sesitha, wazimisa izinyawo zami endaweni ebanzi.
Yiba nomusa kimi, Simakade, ngokuba ngisenkathazweni, iso lami liyafiphala ngenxa yosizi, nomphefumulo nomzimba wami.
Ngokuba ukuphila kwami kuphelela osizini, neminyaka yami ekububuleni; amandla ami aphelile ngokona kwami, namathambo ami ancunzekile.
Ngiyisigcono sazo zonke izitha zami, ingasaphathwa-ke eyomakhelwane bami. Sengiyinto esabisayo kubangani bami. Engihlangana nabo emgwaqweni bayangibalekela.
Sebengikhohliwe ezinhliziyweni zabo, senginjengomuntu ofileyo, nesitsha esephukileyo.
Ngokuba ngikuzwile ukuhleba kwabaningi, nokwesabisa nxazonke. Baceba amacebo okumelana nami; bahlongoza ukungibulala.
Kepha mina ngethemba Wena Simakade, ngithi: “Wena unguNkulunkulu wami.”
Izikhathi zami zisesandleni sakho, ngikhulule esandleni sezitha zami nakulabo abangizingelayo.
Khanyisa ubuso bakho phezu kwenceku yakho, ngomusa wakho ungisindise.
Simakade mangingajabhiswa, ngokuba ngikhala kuwe, izikhohlakali mazijabhiswe, ziyiswe kwelabafileyo sezithule.
Mazithuliswe izindebe zamanga ezijivaza olungileyo ngokuzidla nangokweyisa.
Yeka ubukhulu bomusa wakho, owulondele labo abakwesabayo, owenzele labo ababalekela kuwe phambi kwabantu.
Ubafihla emphemeni wobukhona bakho, ezigungwini zababakhela uzungu. Ubagcina bephephile edokodweni lakho, olimini olumbaxambili.
Makabongwe uSimakade, ngokuba ungenzele umusa wakhe omangalisayo ngesikhathi ngisemzini ovinjezelweyo.
Ngenxa yovalo mina ngithe: “Ngixoshiwe phambi kwamehlo akho.” Kepha ukuzwile ukunxusa kwami ngesikhathi ngikhala kuwe.
Mthandeni uSimakade nina nonke abamethembayo. USimakade uyabalondoloza abathembekileyo, aziphindiselele kulowo ozidlayo.
Qinani, inhliziyo yenu ime isibindi, nina nonke enethembela kuSimakade.
Ubusisiwe umuntu osiphambeko sakhe sithethelelwe, osono sakhe sesuliwe.
Ubusisiwe umuntu uSimakade angambaleli isiphambeko, okungekho nkohliso emoyeni wakhe.
Ngenkathi ngithule, amathambo ami awohloka ngenxa yokububula usuku lonke.
Isandla sakho sangicindezela kanzima ubusuku nemini, ngaphelelwa ngamandla, kwangathi ngihlaselwe wumoya weshisandlu.
Ngase ngisivuma isono sami kuwe, angaze ngasifihla isiphambeko sami. Ngathi: “Ngizozivuma iziphambeko zami kuSimakade,” Yena wangithethelela icala lokona kwami.
Makuthi bonke abethembekileyo bakhuleke kuwe ngesikhathi senhlupheko; impela isikhukhula esinamandla asiyukufinyelela kubo.
Wena uyindawo yami yokubhaca, uyangivikela enkathazweni, ungiphahla ngenjabulo yokukhululwa.
Ngizokubonisa, futhi ngikufundise indlela ozohamba ngayo; ngizobeka iso lami kuwe, ngikweluleke.
Ungafani nehhashi nomnyuzi okungenakuqonda, okukhalinywa ngetomu nomkhala ukuze kuhambe kuqonde, kungenjalo akuyukuwulalela umthetho wakho.
Ziningi izinhlupheko zababi, kodwa umusa uyamhaqa owethemba uSimakade.
Yethabani kuSimakade nina abalungileyo; nihlokome ngentokozo nina nonke enimsulwa enhliziyweni.
Yethabani kuSimakade nina abalungileyo. Ukudumisa kubafanele abaqotho.
Mbongeni uSimakade ngomqangala, nimculele ngehabhu elinezintambo ezilishumi.
Mhlabeleleni ihubo elisha, ngenhlokomo nangobuciko, nimdlalele imiqangala.
Izwi likaSimakade lilungile, zonke izenzo zakhe zikholekile.
Uthanda ukulunga nobulungiswa, umhlaba ugcwele umusa kaSimakade.
Ngezwi nangomoya womlomo kaSimakade, kwadalwa amazulu namabandla wonke.
Uqoqela ndawonye amanzi olwandle kube sengathi asembizeni, utwa uluqoqela ezinqolobaneni.
Umhlaba wonke mawumesabe uSimakade; bonke abakhileyo ezweni, mabathuthumele phambi kwakhe.
Ngokuba wakhuluma, kwaba khona, wayaleza, kwama, kwagxila.
USimakade ushafisa icebo labezizwe, afojise amacebo ezizwe.
Icebo likaSimakade limi ingunaphakade, namasu asenhliziyweni yakhe, ezizukulwaneni ngezizukulwane.
Sibusisiwe isizwe esiNkulunkulu waso unguSimakade, isizwe azikhethele sona saba yifa lakhe.
USimakade esezulwini ubuka phansi emhlabeni, ababone bonke abantu.
Esesihlalweni sakhe sobukhosi, ubabuka bonke abakhileyo emhlabeni,
nguYena owadala izinhliziyo zabo bonke; oqaphela zonke izenzo zabo.
Inkosi ayisindiswa wubuningi bempi yayo; iqhawe alikhululwa ngamandla alo amakhulu.
Ihhashi lempi liyize ekunqobeni, alisindisi ngamandla alo amakhulu.
Impela iso likaSimakade liphezu kwalabo abamesabayo, kulabo abethembela emseni wakhe,
ukukhulula umphefumulo wabo ekufeni, nokubagcina bephilile endlaleni.
Umphefumulo wethu ulindele uSimakade; uwusizo lwethu nesihlangu sethu.
Inhliziyo yethu ithokozile ngaye, ngoba sethemba igama lakhe elingcwele.
Simakade, umusa wakho mawehlele phezu kwethu, njengalokhu sithemba Wena.
USimakade ngimbonga ngezikhathi zonke; izibongo zakhe zizohlala zisemlonyeni wami njalo njalo.
Umphefumulo wami uyozincoma ngoSimakade, abathobekileyo mabezwe, bajabule.
Mbongeni kanye nami uSimakade, siliphakamise kanyekanye igama lakhe.
Ngamfuna uSimakade, wangiphendula; wangikhulula kulo lonke uvalo lwami.
Ababheka kuye, baba nokukhanya. Ubuso babo abusoze bajabha.
Nasi isihlupheki esakhala uSimakade wasilalela, wasisindisa kuzo zonke izinhlupheko esasikuzo.
Ingelosi kaSimakade ikanisa nxazonke kulabo abamesabayo, ibakhulule.
Yizwani, nibone ukuthi uSimakade muhle; babusisiwe labo abaphephela kuye.
Mesabeni uSimakade nina bangcwele bakhe, ngokuba abamesabayo abasweli lutho.
Amabhongo amabhubesi ayeswela, alambe, kodwa abafuna uSimakade abayukweswela lutho oluhle.
Wozani bantwana, lalelani kimi, ngizonifundisa ukwesaba uSimakade.
Ngubani ofisa ukuphila, othanda izinsuku eziningi zokuthokozela okuhle na?
Londa ulimi lwakho kokubi, nezindebe zakho ekukhulumeni inkohliso.
Gwema okubi, wenze okuhle; funa ukuthula, ukuphokophelele.
Amehlo kaSimakade aqaphela abalungileyo, izindlebe zakhe zivulekele ukukhala kwabo.
Ubuso bukaSimakade bumelene nabenzi bokubi, ukuba aqede ukukhunjulwa kwabo emhlabeni.
USimakade uyakuzwa ukunxusa kwabalungileyo, abakhulule kuzo zonke izinhlupheko zabo.
USimakade useduze nabanhliziyo zidabukile, uyabasindisa abanomoya owaphukileyo.
Ziningi izinhlupheko zolungileyo, kepha uSimakade uyamkhulula kuzo zonke.
Uvikela wonke amathambo akhe, akuyukwaphulwa nalinye kuwo.
Inkohlakalo iyombulala omubi, abazonda olungileyo bayojeza.
USimakade uyakukhulula ukuphila kwezinceku zakhe, akekho ophephela kuye oyojeza.
Phikisana, Simakade, nabangiphikisayo, yilwa nabalwa nami.
Thatha ihawu nesihlangu, usukume ungisize.
Hosha umkhonto wakho, uvimbe endleleni yabangizingelayo, yithi enhliziyweni yami: “Mina ngiyinsindiso yakho.”
Mabajabhe, balulazeke abazingela ukuphila kwami. Mababuyiselwe emuva benxothozela abaceba okubi ngami.
Mababe njengamakhoba epheshulwa ngumoya; ingelosi kaSimakade ibadudule.
Indlela yabo mayibe mnyama, ishelele, ingelosi kaSimakade ibahubhe.
Ngokuba bangakhele ugobe ngaphandle kwesizathu, bayimbele umgodi impilo yami ngaphandle kwesisusa.
Mabehlelwe yinhlekelele bengazelele, ugibe abangigodlele lona kukhalakathele bona kulo, babhujiswe.
Khona umphefumulo wami uzakwethaba kuSimakade, uthokoze ngokusindisa kwakhe.
Amathambo ami wonke athi: “Simakade, ngubani onjengawe, Wena ukhulula abantekenteke kulabo abanamandla kunabo; ohluphekayo nontulayo, kulowo omphangayo.”
Ofakazi abaningi abayizidlova bangivukele, bangibuza ngezinto engingazaziyo.
Okuhle engikwenzile bakubuyisela ngokubi, inhliziyo yami bayiswabisile.
Kepha mina ngesikhathi begula, ngangembethe ingubo eyisaka, ngazihlupha ngokuzila ukudla, ngakhuleka ngigobodisile, ngaqinisela ekubakhulekeleni.
Ngangehla ngenyuka, kungathi ngizilele umngani noma umfowethu, ngakhothama, ngilila njengomuntu osebuhlubungwini bokufelwa ngunina.
Kepha ekukhubekeni kwami, babuthana, bahlekisa ngami; ophumasilwe engingabazi bangithelekela, bangishaya bangayeka.
Njengabantelayo abangakholwa, bangigedlela amazinyo.
Nkosi kuyoze kube nini ubukela na? Sindisa impilo yami ebudloveni babo, ukuphila kwami emabhubesini!
Ngizokubonga ebandleni elikhulu, ngikudumise phakathi kwabantu abaningi.
Mazingajabuli ngami izitha zami eziphafuza amanga ngami, nalabo abangizondela ize bacife amehlo.
Ngokuba abalukhulumi uxolo, kepha baceba amacebo okukhohlisa, babaqambele amanga abahleli ngokuthula emhlabeni.
Banginkonkozela kakhulu, bethi: “Ashila, ashila, besivele sibona!”
Simakade, uyakubona; mawungathuli, Nkosi, mawungabi kude nami.
Phakama, usukumele ukwehlulelwa kwami, uyimele indaba yami, Nkulunkulu wami, Nkosi yami!
Simakade Nkulunkulu wami ngahlulele ngokulunga kwakho, mabangathabi ngami.
Bangathi ezinhliziyweni zabo: “Ehhe, kuye ngesifiso sethu!” “Simgwinyile.”
Makuthi bonke labo abathabela okubi okungehlele, bahlazeke, badumale. Makuthi labo abazikhukhumeza ngami, bathelwe ngehlazo, bajabhe, balulazeke.
Mabethabe, bajabule abathokoza ngokulunga kwami; mabathi njalo njalo: “Makadunyiswe uSimakade othokoza ngenhlalakahle yenceku yakhe.”
Ulimi lwami luzoshumayela ngokulunga kwakho nangodumo lwakho, usuku lonke.
Isiphambeko sithi komubi, ekujuleni kwenhliziyo yaso: “Akukho ukwesaba uNkulunkulu phambi kwamehlo akhe.”
Ngokuba ukonakala kwakhe kuyamyenga, ukuze kungafunyanwa okumenza azondwe.
Akusho ngomlomo wakhe wukona nenkohliso, ukuyekile ukwenza ukuhlakanipha nokwenza okuhle.
Ulele ecansini, uceba ububi, uzimisele ngendlela engalungile, akakwenyanyi okubi.
Simakade, umusa wakho ufinyelela emazulwini, ukwethembeka kwakho kufika emafwini.
Ukulunga kwakho kunjengezintaba ezinkulu, ukwehlulela kwakho kunjengotwa olujulile. Simakade, usindisa abantu nezilwane ngokufanayo.
Umusa wakho uligugu, Nkulunkulu! Bonke abantu baphephela phansi komthunzi wamaphiko akho.
Bazitika ngokumtoti okusendlini yakho, ubaphuzise emfuleni wokuthokoza kwakho.
Ngokuba umthombo wokuphila ukuwe, ukukhanya sikubona ekukhanyeni kwakho.
Mawuqhubeke njalo umusa wakho kulabo abakwaziyo, nokulunga kwakho kwabaqotho ngenhliziyo.
Unyawo lozidlayo lungifihlize, noma isandla somubi singixoshe.
Bheka, abenzi bobubi bawile, baqunjwe phansi, abaseyukuvuka.
Ungakhathazeki ngababi, ungabi namona ngabenza okungalungile,
ngokuba bazosishulwa masinyane njengotshani, babune njengemifino.
Thembela kuSimakade, wenze okuhle, ukuze uhlale ezweni, uzondle ngokukholeka;
zithokozise ngoSimakade, khona ezokunika okufiswa yinhliziyo yakho.
Nikela indlela yakho kuSimakade; umethembe, Yena uzokwenzela okufisayo.
Ukulunga kwakho kukhanye njengelanga; nobulungiswa njengemini.
Thula phambi kukaSimakade, umlindele ngesineke; ungakhathazeki ngonempumelelo endleleni yakhe, ngomuntu oceba amacebo amabi.
Deda entukuthelweni, uyeke ulaka, ungakhathazeki, lokho kuholela ebubini nje.
Ngokuba ababi bayobhujiswa, kodwa labo abalindela uSimakade ngesineke, bayodla ifa lomhlaba.
Kusazothatha isikhashana engabe esababikho omubi, uyothi lapho uhlola indawo abe kuyo, ungamfumani.
Kepha abathobekileyo bazokudla ifa lezwe, bathokozele ukuthula okukhulu.
Omubi umsongela okubi olungileyo, amququdele amazinyo.
INkosi imhleka usulu, ngokuba iyabona ukuthi usuku lwakhe selusondele.
Ababi bahosha inkemba, bansale iminsalo yabo ukuze baqumbe phansi abampofu nabantulayo, babulale ohamba ngokulunga.
Izinkemba zabo zizodla bona, neminsalo yabo iphoqozwe.
Kungcono okuncane anakho umuntu olungileyo, kunengcebo yababi abaningi.
Izingalo zababi zizophoqozwa, kodwa uSimakade uyabasimamisa abalungileyo.
USimakade uyazazi izinsuku zabamsulwa, ifa labo liyokuma kuze kube phakade.
Abayukujabha ngesikhathi esibi; bayoba nenala ngezinsuku zendlala.
Ababi bayobhubha, izitha zikaSimakade zishabalale njengobuhle bamadlelo. Ziyonyamalala njengentuthu, zishabalale.
Omubi uyoboleka angakubuyiseli, kodwa olungileyo unesisa, uyaphana.
Ababusisileyo bazodla ifa lomhlaba; abaqalekisileyo babhubhe.
USimakade uyaziqinisa izinyathelo zomuntu lapho eyithanda indlela yakhe.
Uma ewa, akayukufumbeka phansi, ngokuba uSimakade ubamba isandla sakhe.
Kade ngimusha, manje sengimdala, kodwa angikaze ngimbone olungileyo eshiyiwe, nozalo lwakhe luyizinxibi.
Uphana, atshelekise ekhululekile, nozalo lwakhe luyisibusiso.
Deda kokubi, wenze okuhle, uyakuhlala kuze kube phakade.
Ngokuba uSimakade uyabuthanda ubulungiswa, abathembekileyo bakhe akabashiyi. Ubalondoloza kuze kube phakade, kodwa abozalo lwababi bazobhujiswa.
Abalungileyo bazokudla ifa lomhlaba, bahlale kuwo ingunaphakade.
Umlomo wolungileyo ushumayela ukuhlakanipha, ulimi lwakhe lukhuluma ubulungiswa.
Umthetho kaNkulunkulu wakhe usenhliziyweni yakhe, izinyathelo zakhe aziyukushelela.
Omubi uqamekela olungileyo, ufuna ukumbulala.
USimakade akayukumnikela esandleni sakhe, akuyukumlahla ngecala lapho ehlulelwa.
Lindela uSimakade, ugcine indlela yakhe, Yena uzokuphakamisa udle ifa lomhlaba, uyobona lapho sebebhujiswa ababi.
Ngimbonile omubi oyisidlova, enabise okomsedari eLebhanoni ogxilileyo.
Kwathi lapho ngedlula ngalapho, wayengasabonwa nangalukhalo, ngamfuna, kodwa angabe ngisamfumana.
Mqaphele ongenasici, umbheke oqotho, ngokuba uyobona izizukulwane onokuthula.
Kepha abaphambukayo bayobhujiswa, baphele nya, nekusasa lababi lishabalale.
Insindiso yabalungileyo ivela kuSimakade, uyinqaba yabo ngesikhathi senhlupheko.
USimakade uyobasiza, abakhulule; ubakhulula kwababi, abasindise, ngokuba bayamethemba.
Simakade, ungangijezisi ngolaka lwakho, ungangishayi ngentukuthelo yakho.
Ngokuba imicibisholo ingigwaze yagxila; isandla sakho singicindezele kanzima.
Akukho ukuphila emzimbeni wami, ngenxa yentukuthelo yakho; amathambo ami awanampilo, ngenxa yesono sami.
Ngokuba iziphambeko zami zedlula ikhanda lami, zingisinda njengomthwalo onzima.
Izilonda zami zichicha ubomvu, ziyanuka, ngenxa yobuwula bami.
Ngikhonkobele, ngithotshisiwe, usuku lonke ngiyazulazula, ngilila.
Ukhalo lwami luyaqaqamba, akukho mpilo emzimbeni wami.
Ngintekenteke, futhi ngitubeke kakhulu, ngiyakhala, ngiyaquma ngenxa yeminjunju enhliziyweni yami.
Nkosi, zonke izifiso zami ziphambi kwakho, ukububula kwami akufihlakele kuwe.
Inhliziyo yami ishaya ngamandla, umzimba ushona phansi, kunqundeke amehlo.
Abangani nezihlobo zami bangihlubukile ngenxa yokuhlupheka engikukho, omakhelwane bami bahambela kude nami.
Abaqamekela ukuphila kwami bayangicupha, abafuna ukungenzakalisa bakhuluma kabi ngami, bazindla okubi ngami usuku lonke.
Kepha mina nginjengesithulu, angizwa, nginjengesimungulu esingakwazi ukukhuluma.
Impela nginjengesithulu, nanjengesimungulu esingawuvuli umlomo waso.
Ngethembele kuwe Simakade, Wena Nkosi Nkulunkulu wami, uzongiphendula.
Ngokuba ngathi: “Labo abazikhukhumeza ngami, mabangajabuli ngami, lapho unyawo lwami lushelela.”
Sengingawa noma yinini, ubuhlungu bami buphambi kwami, izikhathi zonke.
Ngiyasivuma isiphambeko sami, ngiyazisola ngesono sami.
Izitha zami ziphilile, zinamandla, baningi abangizondela ize;
abaphindisela okuhle ngokubi, bengethwesa icala, ngokuba mina ngenza okulungileyo.
Simakade, ungangishiyi, Nkulunkulu wami ungabi kude nami.
Phuthuma ungisize, Nkosi, uyinsindiso yami.
Ngithe: “Ngizoqaphela izindlela zami, ukuze ngingoni ngolimi lwami; umlomo wami ngizowufaka isimfonyo, inkani nje uma kunababi phambi kwami.”
Bengizithulele, ngingasho lutho, ukuthula akungisizanga, inhlupheko yaya ngokuya ikhula.
Inhliziyo yami yabila ngaphakathi, kwaphembeka umlilo ngisazindla, ngakuphumisela ngolimi lwami.
“Simakade, ngazise isiphetho sami, nokuthi zingakanani izinsuku zami; mangazi ukuthi ngingodlulayo.
Bheka, izinsuku zami wazenza zaba ngangobubanzi besandla, imihla yokuphila kwami ayilutho kuwe, impela yilowo nalowo muntu ungumoya nje, noma eqine kangakanani.
“Impela umuntu uhamba njengesithunzi nje, impela uzikhathaza ngokuyize nje; unqwabela imfuyo, kepha akazi ukuthi ngubani ozakuyibutha.
“Manje, Nkosi, ngisalindeleni na? Ithemba lami likuwe.
Ngihlenge kuzo zonke izinhlupheko engikuzo. Ungangenzi inhlekisa yesiwula.
Ngithule, angiwuvuli umlomo wami, ngokuba nguwe okwenzile lokho.
Susa inhlupheko ongehlisele yona, ngenxa yokucindezelwa yisandla sakho, ngiyaphela.
Umuntu uyamjezisa ngenxa yesono sakhe, lokho okuligugu kuye, ukudla njengobuvunya, kuphele nya, wonke umuntu ungumoya nje.
“Simakade, yizwa umkhuleko wami, ubeke indlebe ekunxuseni kwami, izinyembezi zami mazingakuniki ukuthula. Ngokuba kuwe ngingumfokazi, isihambi, njengokhokho bami.
Yeka ukungigqolozela, ukuze ngibuye ngimamatheke, ngaphambi kokuba ngemuke, ngingabe ngisaba khona.”
Ngamlinda ngesineke uSimakade, wayesephendukela ngakimi, wakuzwa ukunxusa kwami.
Wangikhipha emgodini wokubhujiswa, odakeni olubishayo, izinyawo zami wazibeka edwaleni, wavikela izinyathelo zami.
Wabeka iculo elisha emlonyeni wami, ihubo lokudumisa uNkulunkulu wami, abaningi bayokubona lokho, besabe, bese bethembela kuSimakade.
Ubusisiswe umuntu owethemba uSimakade, ongaphendukeli kwabazikhukhumezayo, nakulabo abaphambukiswa ngonkulunkulu bamanga.
Simakade Nkulunkulu wami, ziningi izimangaliso zakho ozenzileyo, nezizindlo zakho ngathi; akukho okungafaniswa nawe, uma ngiyilanda, ngiyisho, miningi kunokuba ibalwe.
Awuwuthandi umhlatshelo nomnikelo wokudla. Izindlebe zami uzigeqile. Umnikelo wokushiswa nomnikelo wesono awuwubizi.
Ngase ngithi: “Bheka, ngiyeza; encwadini esongwayo kulotshiwe ngami ukuthi:
Ngiyathanda ukwenza intando yakho, Nkulunkulu wami, nomthetho wakho usenhliziyweni yami.”
Ngishumayelile ukulunga ebandleni elikhulu, angizivalanga izindebe zami, Simakade, Wena uyakwazi lokho.
Ukulunga kwakho angikuthukusanga enhliziyweni yami, ngikumemezele ukwethemba kwakho nensindiso yakho. Angizange ngilifihlele ibandla elikhulu umusa wakho neqiniso lakho.
Wena Simakade ungangigodleli ububele bakho, umusa wakho neqiniso lakho makuhlale kungilondile njalo.
Ngokuba izinhlupheko ezingenakubalwa zingihaqile, iziphambeko zami zingificile, angikwazi ukubona, ziningi ukwedlula izinwele ekhanda lami, inhliziyo yami isiphelelwe yithemba.
Makuthandeke kuwe Simakade ukuba ungikhulule. Simakade, mawuphuthume ungisize.
Mabajabhe, babe namahloni bonke abafuna umphefumulo wami ukuba bawubhubhise, abafisa ukulimala kwami mababuyiselwe emuva, bajabhiswe.
Mabashaqeke ngenxa yehlazo labo abathi kimi: “Ashila, ashila!”
Mabethabe, bajabule kuwe bonke abakufunayo, abathanda insindiso yakho mabasho njalo, bathi: “Makadunyiswe uSimakade.”
Noma ngihlupheka, ngintula, iNkosi iyanginaka, Wena ungumsizi wami nomsindisi wami, Nkulunkulu wami, mawungalibali.
Ubusisiwe onakekela ohluphekayo, uSimakade uyomsindisa ngosuku lwenhlupheko.
USimakade uyomlondoloza, amgcine ephila; uyobusiswa ezweni. Akayukumnikela ezifisweni zezitha zakhe.
USimakade uyakumsimamisa okhukhweni lokufa, amphilise kuzona zonke izifo zakhe.
Mina ngithi: “Simakade, yiba nomusa kimi, uphulukise umphefumulo wami, ngokuba ngonile kuwe.”
Izitha zami zihambe zikhuluma okubi ngami, zithi: “Uzofa nini, igama lakhe lingabe lisaphathwa na?”
Uma kukhona ozongibona, ukhuluma amanga ngami. Unqwabela okubi enhliziyweni yakhe, aphume akhulume ngakho.
Bonke abangizondayo bahlangana ngami, bahlebelane ngami, bengisongela, bethi:
“Sengathi angavelelwa ngokukhulu, alale angabe esavuka.”
Ngisho nomhlobo wami ebengimethemba, ngimupha ukudla kwami, usengiphendukele.
Kepha Wena Simakade, ngihawukele, ungilulamise, ukuze ngiziphindiselele ezitheni zami.
Ngalokho ngiyazi ukuthi uyangithanda, ukuze isitha sami singaqhoshi ngami.
Mina uyakungigcina ngiqotho, ungihlalise ebukhoneni bakho kuze kube phakade.
Makabongwe uSimakade uNkulunkulu ka-Israyeli, kusukela phakade kuze kube phakade. Amen, Amen.
Njengendluzele ilangazelela amanzi emifula, kanjalo umphefumulo wami ulangazelela Wena Nkulunkulu.
Umphefumulo wami womele uNkulunkulu, uNkulunkulu ophilayo, ngiyakufika nini ngibonakale phambi kukaNkulunkulu na?
Izinyembezi zami zingukudla kwami imini nobusuku, ngokuba usuku lonke bathi kimi: “Uphi uNkulunkulu wakho na?”
Ngiyakukhumbula lokhu, ngithulule umphefumulo wami phakathi kwami, njengalokhu ngangihamba esixukwini ngiya naso endlini kaNkulunkulu ngenhlokomo yokwethaba nokubonga, ibandla ligubha umkhosi.
Mphefumulo wami, kungani udangele, uyaluza ngaphakathi kimi na? Themba uNkulunkulu, ngokuba ngisazomdumisa ngokusindisa kobukhona bakhe.
Nkulunkulu wami, umphefumulo wami udangele ngaphakathi kimi; ngizokukhumbula eJordani naseHermoni nasentabeni iMizari.
Lapho kuhlokoma izimpophoma zakho, utwa luyenanelana, wonke amadlambi namaza akho, kudlange kwangaphezu kwami.
Emini uSimakade uyaleza umusa wakhe, ebusuku isihlabelelo sakhe sikimi, ngikhuleke kuNkulunkulu wokuphila kwami.
Ngizakuthi kuNkulunkulu, iDwala lami: “Ungikhohlweleni na? Ngihambelani ngilila, ngicindezelwe yisitha na?”
Kunjengokuphohlozwa kwamathambo ami, nxa izitha zami zingiklolodela, zithi kimi usuku lonke: “Uphi uNkulunkulu wakho na?”
Mphefumulo wami, kungani udangele, uyaluza ngaphakathi kwami na? Themba uNkulunkulu, ngokuba ngisazomdumisa ngokusindisa kobukhona bakhe.
Ngahlulele Nkulunkulu, umele indaba yami kubantu abangethembekile, ungikhulule konenkohliso nongalungile.
Ngokuba Wena Nkulunkulu uyisiphephelo sami, ungilahleleni na? Kungani ngihamba ngilila ngenxa yokucindezelwa yisitha na?
Thumela ukukhanya kwakho neqiniso lakho, makungihole kungiyise entabeni yakho engcwele, nasezindlini zakho,
ngize ngifike e-althare likaNkulunkulu, kuNkulunkulu oyinjabulo yami nokwethaba kwami; ngikudumise ngokhehlegume, Nkulunkulu, Nkulunkulu wami.
Mphefumulo wami, kungani udangele, uyaluza ngaphakathi kwami na? Themba uNkulunkulu, ngokuba ngisazomdumisa uMsindisi wami, noNkulunkulu wami.
Nkulunkulu, sizwile ngezindlebe zethu, nokhokho bethu besitshela lokho owakwenza emihleni yabo, emihleni yasemandulo.
Wena ngesandla sakho, waxosha izizwe, bona wabatshala; wazibhubhisa izizwe, bona wabakhulula.
Ngokuba abalidlanga izwe ngenkemba yabo, nengalo yabo ayibasindisanga, kodwa kwaba yisandla sakho sokunene nengalo yakho, nokukhanya kobukhona bakho, ngokuba wethaba ngabo.
Wena uyiNkosi yami, Nkulunkulu, yaleza ukunqoba kukaJakobe.
Ngawe sizakuzilahla phansi izitha zethu, ngegama lakho sizakubanyathela abasivukelayo.
Ngokuba angethembele emnsalweni wami, nenkemba yami ayingisindisanga.
Kepha nguwe osisindisile ezitheni zethu, wabathela ngehlazo abasizondayo.
Sizincoma njalo ngoNkulunkulu wethu, silibonge igama lakho ingunaphakade.
Nokho usilahlile, wasijabhisa, futhi awusaphumi nezimpi zethu.
Usihlehlisela emuva esitheni, abasizondayo bayaziphangela.
Usenze safana nezimvu zokuhlatshwa, wasihlakazela phakathi kwezizwe.
Isizwe sakho usithengise ngenani eliphansi, wangathola nzuzo ngaso.
Usenze isethuko komakhelwane bethu, inhlekisa nendumalo kwabasiphahlileyo.
Usenze isaga kwabezizwe, banikina amakhanda phakathi kwabantu.
Usuku lonke, ukudunyazwa kwami kuphambi kwami, ihlazo lemboze ubuso bami
ngenxa yoklolodayo nojivazayo, nangenxa yesitha nomphindiseleli.
Konke lokhu kusehlele, kodwa akusenzanga sakhohlwa nguwe, asisephulanga isivumelwano sakho.
Izinhliziyo zethu azikufulathelanga, izinyathelo zethu aziphambukanga endleleni yakho,
kodwa usiphahlazele endaweni yezimpungushe, wasemboza ngethunzi lokufa.
Uma singakhohlwa yigama likaNkulunkulu wethu, noma izandla zethu sizivulele unkulunkulu ongaziwa,
ngeke yini uNkulunkulu azi ngalokho na? Ngokuba Yena wazi izimfihlo ezisenhliziyweni.
Ngenxa yakho, sibulawa usuku lonke, sifana nezimvu zokuhlatshwa.
Vuka, Nkosi! Ulaleleni na? Ungasilahli njalonjalo.
Ubufihlelani ubuso bakho, ukhohlwe ukuhlupheka nokucindezelwa kwethu na?
Ngokuba sibishe othulini; imizimba yethu inamathele emhlabathini.
Sukuma, usisize. Sihlenge ngenxa yomusa wakho.
Inhliziyo yami iyaphuphuma ngenxa yendaba enhle, ngikhuluma ngegama engiliqambe ngenkosi, ulimi lwami lulusiba lobhala ngokushesha.
Wena umuhle kunabo bonke abantu, umusa uthululelwe ezindebeni zakho. Ngakho-ke uNkulunkulu ukubusisile kuze kube phakade.
Gaxa inkemba yakho enqulwini, wena qhawe, ngodumo nobukhosi bakho.
Gibela ebukhosini bakho ngokunqoba, ngenxa yeqiniso, ukuthobeka nokulunga; isandla sakho sokunene masikufundise izenzo ezimangalisayo.
Imicibisholo yakho icijile, ingena enhliziyweni yezitha zenkosi, izizwe ziwa phansi kwakho.
Nkulunkulu, isihlalo sakho sobukhosi simi kuze kube phakade. Intonga yokulunga iyintonga yombuso wakho.
Uthanda ukulunga, uzonde ububi. Yingakho uNkulunkulu, uNkulunkulu wakho, ekugcobe ngamafutha entokozo ngaphezulu kwabangani bakho.
Zonke izingubo zakho ziqholwe ngemure nenhlaba nekhasiya. Imiqangala evela ezigodlweni zophondo lwendlovu iyakwethabisa.
Amadodakazi amakhosi aphakathi kwabesifazane bakho abadumileyo, indlovukazi imi ngakwesokunene sakho, ihlobe ngegolide lase-Ofiri.
Lalela-ke, ndodakazi, qaphela, ubeke indlebe yakho, ukhohlwe ngabantu bakini nangendlu kayihlo,
khona inkosi izokhangwa ngubuhle bakho, ngokuba yona iyinkosi yakho, uboyikhothamela.
Indodakazi yaseThire nabantu abacebileyo bancenga umusa wakho ngesipho.
Indodakazi yenkosi yinhle kakhulu ilapho phakathi; ingubo yayo ifekethiswe ngegolide.
Iyiswa enkosini igqoke izingubo ezifekethisiweyo, ikhashwa yizintombi ezingabangani bayo, zilethwa kuwe.
Ngenjabulo nangentokozo, bayazihola njengoba zingena esigodlweni senkosi.
Amadodana akho ayohlala esikhundleni sawoyihlomkhulu, uwabeke abe yizikhulu emhlabeni wonke.
Igama lakho ngizolenza likhunjulwe yizizukulwane ngezizukulwane, ngakho-ke izizwe ziyokubonga kuze kube phakade.
UNkulunkulu uyisiphephelo sethu namandla ethu, ufunyaniswa elusizo impela ekuhluphekeni.
Ngakho-ke angiyukwesaba nakuba umhlaba uguquka, nezintaba zidilikela ekujuleni kolwandle,
nakuba amanzi alo ehlokoma, ekhephuzela, nezintaba zizamazama ngokudlanga kwalo.
Ukhona umfula omanzi awo athokozisa umuzi kaNkulunkulu, indlu engcwele yoPhezukonke.
UNkulunkulu uphakathi kwawo, awuyukuzanyazanyiswa, uNkulunkulu uyakuwusiza ngovivi lokusa.
Izizwe ziyaxokozela, imibuso iyazamazama; uphumisela izwi lakhe, umhlaba uncibilike.
USimakade Wamabandla unathi, uNkulunkulu kaJakobe uyinqaba yethu.
Wozani, nibone imisebenzi kaSimakade, incithakalo ayehlisele emhlabeni.
Uqeda izimpi kuze kube semikhawulweni yomhlaba, wephula umnsalo, anqume umkhonto, izinqola zempi azishise ngomlilo.
Thulani, niqonde ukuthi Mina nginguNkulunkulu, ngiyakuphakama kwabezizwe, ngiphakame emhlabeni.
USimakade Wamabandla unathi, uNkulunkulu kaJakobe uyinqaba yethu.
Zizwe zonke, shayani izandla, hlokomani ngezwi lokuhalalisa kuNkulunkulu.
Ngokuba uSimakade Ophezukonke uyesabeka, uyiNkosi enkulu phezu komhlaba wonke.
Izizwe wazithobisa zaba phansi kwethu, nabantu phansi kwezinyawo zethu.
Wasikhethela ifa lethu, udumo lukaJakobe amthandayo.
UNkulunkulu wenyuke ngenhlokomo, uSimakade ngokukhala kwecilongo.
Hubelani uNkulunkulu, mdumiseni! Hubelani iNkosi yethu, hubani!
UNkulunkulu uyinkosi yomhlaba wonke, hubani ihubo!
UNkulunkulu ubusa izizwe, uNkulunkulu uhlezi esihlalweni sakhe sobukhosi esingcwele.
Izikhulu zabantu zibuthene, zibe yisizwe sikaNkulunkulu ka-Abhrahama, ngokuba izihlangu zomhlaba zingezikaNkulunkulu, uphakeme kakhulu.
Mkhulu uSimakade, makadunyiswe emzini kaNkulunkulu wethu, entabeni yakhe engcwele.
Inhle ngokuphakama, ingukuthokoza komhlaba wonke, intaba iZiyoni isemaphethelweni enyakatho, umuzi weNkosi enkulu.
UNkulunkulu uyaziwa ezigodlweni ukuthi uyinqaba.
Ngokuba amakhosi abuthana, aqhubeka kanyekanye.
Ayibona intaba iZiyoni, amangala, ashaywa wuvalo, aphaphatheka,
akhungathwa yingebhe lapho nemihelo, njengokowesifazane otetayo.
Ngomoya wasempumalanga, waphula imikhumbi yaseTharishishi.
Njengalokhu sizwile, kanjalo sikubonile emzini kaSimakade Wamabandla, emzini kaNkulunkulu wethu, uNkulunkulu uyowumisa kuze kube phakade.
Sizindla ngomusa wakho, Simakade, siphakathi ethempelini lakho.
Njengoba linjalo igama lakho, Nkulunkulu, zinjalo nezibongo zakho kuze kube semikhawulweni yomhlaba, isandla sakho sokunene sigcwele ukulunga.
Intaba iZiyoni mayithokoze, kwethabe amadodakazi akwaJuda, ngenxa yezehlulelo zakho.
Hambani nizungeze iZiyoni, nihambe kuyo yonke indawo, nibale imibhoshongo yalo.
Qaphelani izindonga zalo, nidabule ezigodlweni zalo, ukuze nilandise ngalo isizukulwane esisazozalwa,
ukuthi impela lo Nkulunkulu, unguNkulunkulu wethu waphakade naphakade. Uzosihola kuze kube sekufeni.
Lalelani lokhu nina bantu, nonke bekani indlebe, nonke zakhamuzi zasemhlabeni,
abantukazana nezikhulu, abacebileyo nabantulayo.
Umlomo wami uzokhuluma ukuhlakanipha, ukuzindla kwenhliziyo yami kuzokuba ngukuqonda.
Ngizakubeka indlebe yami kuso isaga, ngiphenye imfumbe yami ngehabhu.
Yini ebengizoyesaba ngesikhathi senhlupheko, lapho ngihaqwa wububi babangizingelayo,
labo abethembela engcebeni yabo, baqhoshe ngobuningi bomcebo wabo na?
Impela umuntu angemhlenge umfowabo, noma amhlawulele kuNkulunkulu.
Ngokuba ukuhlengwa kwempilo yakhe kubiza kakhulu, ngeke kwafinyelelwa kukho nanini,
ukuze umuntu aphile ingunaphakade, angaliboni igodi.
Qha, uyabona ukuthi abahlakaniphileyo bayafa, nokuthi isiwula nesiphukuphuku siyabhubha; umcebo wabo bawushiyele abanye.
Ukucabanga kwabo kuthi izindlu zabo zizakuma kuze kube phakade, nemizi yabo, ezizukulwaneni ngezizukulwane; amazwe abo bawaqamba ngamagama abo.
Kepha umuntu, nakuba enodumo, akayukuhlala angafi, ufana nezilwane ezibhubhayo.
Le ndlela yabo ingubuwula babo, balandelwa ngabathokozela amazwi abo.
Baqhutshelwa endaweni yabafileyo njengezimvu, ukufa kuyakubelusa, ngakusasa abaqotho babusa phezu kwabo, isimo sabo siqedwe yindawo yabafileyo, bangabe besaba nandlu.
Kepha uNkulunkulu uyakuwukhulula umphefumulo wami esandleni sendawo yabafileyo, ngokuba uyakungamukela.
Ungesabi uma umuntu eba yisicebi, nxa umcebo wendlu yakhe wanda.
Ngokuba ekufeni kwakhe akayukumuka nalutho, umcebo wakhe awuyukwehla naye.
Noma engawubusisa umphefumulo wakhe esaphila, futhi abantu bamtuse, ngokuba uzenzele kahle,
nokho uyakuya esizukulwaneni sokhokho bakhe, abayukukubona ukukhanya naphakade.
Umuntu ebukhazikhazini bakhe engenakuqonda, unjengezilwane ezibhubhayo.
UNkulunkulu uMninimandla wonke, uSimakade uyakhuluma, ubiza umhlaba kusukela ekuphumeni kwelanga lize liyoshona.
EseZiyoni, ekupheleleni kobuhle bakhe, uSimakade uqhakazile.
UNkulunkulu wethu uyeza, akayukuthula, phambi kwakhe kunomlilo oqothulayo, uphahlwe yisivunguvungu esinamandla.
Ubiza izulu ngaphezulu nomhlaba, ukuba ahlulele isizwe sakhe:
“Buthelani kimi abathembekileyo bami, abenza isivumelwano nami ngomhlatshelo.”
Amazulu amemezela ngokulunga kwakhe, ngokuba uNkulunkulu ungumehluleli.
“Lalelani, bantu bami, ngizokhuluma, Israyeli, ngizomelana nani. NginguNkulunkulu, uNkulunkulu wakho.
Ngenxa yemihlatshelo yakho, angiyukukujezisa, ngokuba iminikelo yakho yokushiswa iphambi kwami njalo.
Angiyukuthatha nkunzi endlini yakho, nampongo ezibayeni zakho,
ngokuba zingezami zonke izilwane zehlathi, nezinkomo eziyizinkulungwane ezisezintabeni.
Ngizazi zonke izinyoni ezisezintabeni, nezilwane zasendle zaziwa yimi.
Ukuba bengilambile, bengingeke ngitshele wena, ngokuba ungowami umhlaba wonke, nakho konke okukuwo.
Mina ngizokudla inyama yezinkunzi, ngiphuze igazi lezimpongo na?
Nikela kuNkulunkulu umnikelo wokubonga, uzifeze izithembiso zakho kuye Ophezukonke,
ngibize ngosuku lwenhlupheko, ngiyakukukhulula, wena uyakungidumisa.”
Kepha komubi, uNkulunkulu uthi: “Yini ukuba ushumayele ngezimiso zami, ukhulume ngesivumelwano sami,
ingani uyakuzonda ukuyalwa, amazwi ami uwabukela phansi na?
Uma ubona isela, uvumelana nalo, neziphingi uhlanganyela nazo.
Umlomo wakho uwuyekela ebubini, ulimi lwakho lubopha inkohliso.
Uhlala ugxibha umfowenu, unyevuza indodana kanyoko.
Lokho ukwenzile, ngathula, ushaye sengathi Mina nginjengawe; ngizakukusola, ngikubeke icala.
“Nina enikhohlwa nguNkulunkulu, kuqapheleni lokho, funa nginidwengudwengule, kungabi bikho onisindisayo.
Onikela ngomnikelo wokubonga uyangidumisa, oqaphela indlela yakhe ngiyakumbonisa insindiso kaNkulunkulu.”
Ngihawukele, Nkulunkulu, ngokomusa wakho, wesule iziphambeko zami ngokobubele bakho obukhulu.
Ngigezisise ebubini bami, ungihlanze esonweni sami.
Ngiyazazi iziphambeko zami, isono sami siphambi kwami njalo.
Ngonile kuwe, kuwe wedwa, ngenza okubi emehlweni akho. Wena ulungile nxa wehlulela, futhi kucacile ukwehlulela kwakho.
Impela ngazalelwa ebubini, umame wangikhulelwa esonweni.
Wena uthanda iqiniso ngaphakathi enhliziyweni, uyongifundisa ukuhlakanipha ekujuleni kwenhliziyo.
Ngihlanze ngehisophi, ngihlambuluke, ngigeze, ngibe mhlophe kuneqhwa.
Ngizwise intokozo nenjabulo, ukuze ethabe amathambo owachobozileyo.
Fihla ubuso bakho ezonweni zami, uzesule zonke iziphambeko zami.
Nkulunkulu, dala kimi inhliziyo ehlanzekileyo, uvuse umoya oqinileyo phakathi kwami.
Ungangilahli ebusweni bakho, ungangemuki uMoya wakho oyiNgcwele.
Buyisela kimi ukuthokoza kwensindiso yakho, ungiphase ngomoya ovumayo.
Yikhona ngiyofundisa abaphambukayo izindlela zakho; nezoni ziphendukele kuwe.
Nkulunkulu, ngikhulule ecaleni legazi, Nkulunkulu wensindiso yami, yikhona ulimi lwami luzohuba ngokulunga kwakho.
Nkosi, vula izindebe zami, ukuze umlomo wami ulande ngodumo lwakho.
Ngokuba awuwuthandi umhlatshelo, noma bengizakukunika umnikelo wokushiswa, ubungayukuthokoza ngawo.
Iminikelo kaNkulunkulu ingumoya owephukileyo. Nkulunkulu, awuyukuyidelela inhliziyo eyaphukileyo nedabukileyo.
IZiyoni lenzele okuhle ngokomusa wakho, uzakhe izingange eJerusalema.
Khona uzojabulela iminikelo yokulunga engeyokushiswa naleyo eshiswa yonke, banikele nangezinkunzi phezu kwe-althare lakho.
We siqhwaga, uziqhayiselani ngokubi na? Umusa kaNkulunkulu umi njalo.
Ulimi lwakho luhlale lusongoza amacebo amabi, njengensingo ebukhali, wena menzi wobubi,
uthanda okubi kunokuhle, amanga kunokulungileyo.
Wena lulimi lwenkohliso, uthanda onke amazwi abhubhisayo.
Kepha uNkulunkulu uzokuqumba phansi kuze kube phakade; uzokubamba, akukhiphe ethendeni lakho, akusiphule nasezweni labaphilayo.
Abalungileyo bayokubona lokho, besabe; bakuhleke, bathi:
“Bheka, nasi isiqhwaga esingazange simenze uNkulunkulu abe yinqaba yaso, kodwa sethembela ebuningini bomcebo waso, sabambelela kakhulu ebubini baso.”
Kepha mina ngifana nesihlahla somhlwathi esiluhlaza, endlini kaNkulunkulu. Ngethembele emseni kaNkulunkulu kuze kube phakade.
Ngizokudumisa kuze kube phakade, ngokuba ukwenzile lokho. Ngizolindela igama lakho, ngokuba lihle phambi kwabathembekile bakho.
Isiwula sithi enhliziyweni yaso: “Akekho uNkulunkulu.” Bonakele, benze izinto ezinengekayo eziphambene nobulungiswa. Akukho noyedwa owenza okuhle.
UNkulunkulu esezulwini ubheka phansi, abone amadodana abantu, ukuze abone ukuthi ukhona yini onokuqonda, ofuna uNkulunkulu.
Bonke baphambukile, bonke bakhohlakele, akukho noyedwa owenza okuhle, akukho noyedwa.
Abanakwazi yini abenza okubi, abadla abantu bami njengalokhu bedla isinkwa, bengakhuleki kuNkulunkulu na?
Besaba kakhulu, kube kungekho okwesabisayo. UNkulunkulu uwasakazile amathambo alowo okuvimbezelayo. Wena uzobathela ngehlazo, ngokuba uNkulunkulu ubalahlile.
Ukusindiswa kuka-Israyeli kuzovela eZiyoni, lapho uNkulunkulu ebusisa abantu bakhe; uJakobe ethabe, no-Israyeli athokoze.
Nkulunkulu, ngisindise ngegama lakho, ngamandla akho ungehlulele.
Yizwa umkhuleko wami, Nkulunkulu, ubeke indlebe emazwini omlomo wami.
Abafokazi bangivukele, izidlova zizingela impilo yami. Azimgqizi qakala uNkulunkulu.
Bheka, uNkulunkulu ungumsizi wami. INkosi igcina umphefumulo wami.
Iyokuphindisela okubi okwenziwe yizitha zami; zibhubhise ngeqiniso lakho.
Ngizonikela kuwe ngenkululeko, ngibonge igama lakho Simakade, ngokuba lihle.
Igama lakho lingikhulule kuzo zonke izinkathazo, iso lami lizibonile izitha zami zinqotshwa.
Nkulunkulu, lalela umkhuleko wami, ungazifihli ekunxuseni kwami.
Ngizwele, ungiphendule; ngikhathazekile, ngiyabubula, ngixakekile,
ngenxa yezwi lesitha, nangenxa yokucindezela komubi, bagingqela okubi phezu kwami, bangizingela bengithukuthelele.
Inhliziyo yami iyathuthumela ngaphakathi, ukwesaba ukufa kungehlele.
Nginengebhe, ngiyaqhaqhazela, ngikhungethwe wukwesaba.
Ngibe sengithi: “Ukuba benginamaphiko njengejuba, ngabe ngindizela kwelikude, ngihlale khona nginethezeke.”
Bengiyakubaleka, ngiye kude, ngihlale ehlane.
Bengizophuthuma ngithole umpheme ukuze ngiphephe ezivunguvungwini naseziphephweni.
Bahlakaze, Nkosi, uphithanise ulimi lwabo, ngokuba ngibone ubudlova nengxabano emzini.
Emini nasebusuku, bazulazula bezungeza phezu kwezingange zawo, inkohlakalo nenkathazo kukuwo.
Incithakalo itholakala kuwo, ingcindezelo nenkohliso akusuki esigcawini sawo.
Ukuba bengiklolodelwa yisitha, bengizokubekezelela lokho, nokuba bekungongizondayo oziphakamise phezu kwami, bengizomcashela.
Kepha nguwe ntanga yethu, mhlobo wami nomngani wami.
Besihlala ndawonye kamnandi; besihamba simshungu munye siya endlini kaNkulunkulu nebandla elithokozayo.
Ukufa makubazume, behlele endaweni yabafileyo besaphila, ngokuba ububi busezindlini zabo, phakathi kwabo.
Kepha mina ngizokhala kuNkulunkulu uSimakade, uzongisindisa.
Ekuseni, emini nantambama ngizokhala kuye, ngibubule, uzolizwa izwi lami.
Uyakuwukhulula umphefumulo wami ngokuthula, empini engibhekene nayo, ngokuba baningi abamelene nami.
UNkulunkulu esesihlalweni kwasemandulo uzongizwa, abathobise, ngokuba abaphenduki, futhi abamesabi uNkulunkulu.
Ugadla kulabo ahlalisene kahle nabo, usijivazile isivumelwano sakhe,
amazwi akhe abushelelezi kunamafutha, kodwa inhliziyo igaya izibozi.
Phonsa umthwalo wakho kuSimakade, Yena uzokusimamisa. Akayukuvuma naphakade ukuba olungileyo azanyazanyiswe.
Wena Nkulunkulu uzobaphonsa emgodini ojulileyo abantu abomele igazi nabakhohlisayo; izinsuku zabo zokuphila aziyukuba ngisho nayingxenye yazo, kodwa mina ngizokwethemba Wena.
Nkulunkulu, yiba nomusa kimi, ngokuba abantu bafuna ukungenzakalisa. Bangilwisa usuku lonke, bayangicindezela.
Izitha zami zingenzakalisa njalo, ngokuba baningi abalwa nami ngokuqhosha.
Mhla ngesabayo ngiyokwethembela kuwe.
KuNkulunkulu engidumisa izwi lakhe, kuNkulunkulu ngibeka ithemba lami, angiyukwesaba; umuntu angangenzani na?
Usuku lonke bahlanekezela amazwi ami. Yonke imicabango yabo ihlose ukungilimaza.
Bayangihlasela, bangicuthele, baqaphe izinyathelo zami, baqamekele umphefumulo wami.
Ungabavumeli baphunyule ngenxa yobubi babo, ngentukuthelo, qumba phansi izizwe, Nkulunkulu.
Wena ukunakile ukuzulazula kwami, izinyembezi zami zethe egabheni lakho. Kanti azikho yini encwadini yakho na?
Izitha zami bese zibuyela emuva mhla ngikhalayo, ngiyakwazi lokhu, ukuthi uNkulunkulu unami.
KuNkulunkulu, engiyakulidumisa izwi lakhe, kuSimakade, engiyakulidumisa izwi lakhe.
Ithemba lami likuNkulunkulu, angiyukwesaba. Umuntu angangenzani na?
Nkulunkulu, izifungo zami zingibophezele kuwe, ngiyakunikela kuwe iminikelo yokubonga.
Ngokuba umphefumulo wami uwukhulule ekufeni, nezinyawo zami, ekukhubekeni, ukuze ngihambe phambi kukaNkulunkulu, ekukhanyeni kwabaphilayo.
Yiba nomusa kimi, Nkulunkulu, ngihawukele. Ngokuba umphefumulo wami uphephela kuwe. Ngizokhosela emthunzini wamaphiko akho, zize zedlule izinhlekelele.
Ngizokhala kuNkulunkulu oPhezukonke, kuNkulunkulu ongiphindiselelayo.
Uzothumela esezulwini, angisindise. Uyamsola ofuna ukungifihliza. UNkulunkulu uzothumela umusa wakhe neqiniso lakhe.
Umphefumulo wami uphakathi kwamabhubesi, ngilele phakathi kwabakhafula umlilo, ngisho nabantwana babantu, abamazinyo ayimikhonto nemicibisholo, abalulimi luyinkemba ebukhali.
Phakama, Nkulunkulu phezu kwezulu, inkazimulo yakho ibe phezu komhlaba wonke.
Izinyathelo zami bazicuphe ngogibe, umphefumulo wami udangele, bangimbele umgodi, kwakhalakathela bona kuwo.
Inhliziyo yami yethabile, Nkulunkulu, inhliziyo yami igxilile. Ngizohlabelela, ngihube.
Vuka mphefumulo wami, vukani lugubhu nehabhu! Ngizovusa intathakusa.
Nkosi ngizokubonga phakathi kwabantu, ngikuhashe phakathi kwezizwe.
Ngokuba umusa wakho mkhulu, kuze kube sezulwini, nokwethembeka kwakho, kuze kube semafini.
Phakama, Nkulunkulu, phezu kwezulu, inkazimulo yakho ibe phezu komhlaba wonke.
Kungabe impela nikhuluma ukulunga nobuqotho na? Madodana abantu, ngabe nehlulela ngobuqotho na?
Qha, ingani ezinhliziyweni niphehla imisebenzi yokungalungi, ezweni nikala ngendluzula evela ezandleni zenu.
Ababi bahlubuka kwasesibelethweni, abaqamba amanga baduka kwasesiswini.
Isihlungu sabo sinjengesihlungu senyoka, banjengemamba edlebelekile, esivale amadlebe
ukuze ingalizwa izwi labalumbi abalumba ngobuchule.
Nkulunkulu, yephula amazinyo abo emilonyeni yabo. Simakade, phohloza amazinyo emihlathi yamabhongo ezingonyama.
Mabahwamuke njengamanzi achithekayo; lapho ekhomba ngemicibisholo yakhe, mayibe sengathi inqundekile.
Mababe njengomnenke oncibilika uphele, njengokuphuphume kowesifazane, okungalibonanga ilanga.
Amabhodwe enu engakakuzweli ukushisa kwezinkuni zameva, uyakuziphephula, noma ziluhlaza, noma zivutha.
Olungileyo uyojabula uma ebona impindiselo, uyogeza izinyawo zakhe egazini lababi,
abantu baze bathi: “Impela ukhona umvuzo wolungileyo; impela ukhona uNkulunkulu owehlulelayo emhlabeni.”
Nkulunkulu wami, ngikhulule ezitheni zami, ungivikele kwabangivukelayo.
Ngikhulule kwabenza okubi, ungisindise kubantu abomele igazi.
Ngokuba, bheka, baqamekela impilo yami, iziqhwaga ziyangihlanganyela, kungekho siphambeko nasono kimi, Simakade.
Ziyagijima, zizilungisele, ngingenacala, vuka ungihlangabeze, uzibonele ngawakho.
Wena, Simakade Nkulunkulu Wamabandla, Nkulunkulu ka-Israyeli, vuka ujezise zonke izizwe, ungahawukeli namunye kwabahlubukileyo.
Babuya kusihlwa, bahlabe umkhulungwane njengenja, bezulazula emzini.
Bheka, bayakhafula ngemilomo yabo, amazwi abo ayizinkemba ezindebeni zabo, ngokuba bathi: “Ngubani ozwayo na?”
Kepha Wena Simakade uyabahleka, ubaklolodele bonke abezizwe.
Ngenxa yamandla akho, ngizokulindela, ngokuba uNkulunkulu uyinqaba yami.
UNkulunkulu wami uzongihlangabeza ngomusa wakhe; uNkulunkulu uzongibonisa izitha zami zinqotshwa.
Ungazibulali, funa abantu bakithi bakhohlwe, kodwa zihlakaze ngamandla akho, uziqumbe phansi, Nkosi, sihlangu sethu.
Amazwi eziwasho ngezindebe zazo ayisono esiphuma emlonyeni wazo, mazibambeke ekuqhosheni kwazo, nangenxa yesiqalekiso namanga eziwakhulumayo.
Ziqede nya, ngolaka, uzishabalalise ziphele nya, mazazi ukuthi nguNkulunkulu obusa kwaJakobe, kuze kube semikhawulweni yomhlaba.
Zibuya kusihlwa, zihlabe umkhulungwane njengenja, zizulazule emzini.
Zehla zenyuka zifuna ukudla; uma zingasuthi, ziyagwavuma.
Kepha mina ngizakuhlabelela ngamandla akho, ngithabele umusa wakho ekuseni, ngokuba uyinqaba yami nesiphephelo sami ngosuku lokuhlupheka kwami.
Mandla ami, ngizohubela Wena; ngokuba uNkulunkulu, uyinqaba yami, unguNkulunkulu wami onomusa.
Nkulunkulu usilahlile, usibhubhisile, ngoba usithukuthelele; ake usivuselele futhi.
Uwuzamazamisile umhlaba, wawuqhekeza, zivale izimfa zawo, ngokuba uyazamazama.
Isizwe sakho usibonisile izinto ezinzima, wasiphuzisa iwayini, sadiyazela.
Abakwesabayo ubanike ifulegi ukuba baliphakamise ngenxa yeqiniso.
Ukuze abathandekayo bakho bakhululwe, sindisa ngesandla sakho sokunene, usiphendule.
UNkulunkulu ukhulumile esebungcweleni bakhe, wathi: “Ngizokunqoba, ngihlukanise iShekemi, ngisilinganise iSigodi iSukhothi.
UGileyadi noManase bangabami, u-Efrayimi uyisivikelo sekhanda lami, uJuda uyintonga yami yokubusa.
UMowabi uyisitsha sami sokuhlambela, ngiphonsa isicathulo sami phezu kuka-Edomi. Filistiya, hlokoma ngenjabulo ngenxa yami.”
Ngubani oyakungiyisa emzini oqinileyo na? Ngubani oyakungiholela kwa-Edomi na?
Nkulunkulu, akuWena yini osilahlileyo na? Awusaphumi namabutho ethu, Nkulunkulu.
Sisize esitheni, ngokuba ukuhlenga kwabantu kuyize.
Sizonqoba ngoNkulunkulu; Yena uzozinyathela izitha zethu.
Nkulunkulu, yizwa ukukhala kwami, ubeke indlebe emkhulekweni wami.
Ngisemkhawulweni womhlaba, ngikhala kuwe lapho inhliziyo yami idangele. Ngiholele edwaleni eliphakemeyo kunami.
Ngokuba Wena ube yisiphephelo sami, umbhoshongo oqinileyo phambi kwesitha sami.
Mangihlale ethendeni lakho ingunaphakade. Mangikhosele emthunzini wamaphiko akho.
Ngokuba Wena, Nkulunkulu, uzizwile izifungo zami, wanginika isabelo salabo abesaba igama lakho.
Uzokwandisa izinsuku zokuphila kwenkosi, iminyaka yayo ibe miningi ngangezizukulwane.
Iyohlala embusweni, phambi kukaNkulunkulu ingunaphakade. Yiqokele ububele neqiniso, ukuba kuyilonde.
Ngakho-ke ngizolihubela igama lakho kuze kube phakade, ukuze ngifeze izifungo zami usuku nosuku.
Mphefumulo wami, thula, ulindele uNkulunkulu kuphela, ngokuba insindiso yami ivela kuye.
NguYena kuphela oyidwala lami nensindiso yami; inqaba yami, angisoze nganyakaziswa.
Kuyoze kube nini, nisukela umuntu ukuba nimbulale nonke, njengodonga olutshekile nothango oludilikayo na?
Baceba ukuwisa umuntu oqavileyo. Bathokozela amanga, bayabusisa ngemilomo yabo, kodwa ngengaphakathi, bayaqalekisa.
Mphefumulo wami, thula, ulindele uNkulunkulu kuphela, ngokuba ithemba lami livela kuye.
NguYena kuphela oyidwala lami, nensindiso yami, nenqaba yami; angiyukunyakaziswa.
Ukuhlengwa kwami nodumo lwami kukuNkulunkulu, idwala lami eliqinileyo, isiphephelo sami sikuNkulunkulu.
Bantu, yethembelani kuye ngezikhathi zonke, inhliziyo yenu niyithululele phambi kwakhe, uNkulunkulu uyisiphephelo sethu.
Abantukazana bangumoya nje, nezikhulu zingamabunga, uma bekalwa isilinganiso siyenyuka, kodwa bonke balula kunomoya.
Maningathembeli ekuqhwageni, ningazigabisi ngokuphangiweyo. Uma imfuyo yanda, ningayibeki inhliziyo kuyo.
UNkulunkulu ukhulume kanye, ngakuzwa kabili lokho: amandla angakaNkulunkulu,
nobubele bungobakho, Nkosi. Umuntu umvuza ngangokwenza kwakhe.
Nkulunkulu, Wena unguNkulunkulu wami, ngiyakufuna. Umphefumulo wami womele Wena, umzimba wami ulangazelela Wena, ezweni eligagadekileyo, lapho kungekho khona amanzi.
Yingakho ngikufuna endaweni engcwele, ngibone amandla akho nenkazimulo yakho.
Ngokuba umusa wakho muhle kunokuphila, izindebe zomlomo wami zizokudumisa.
Yingakho ngizokubonga, inqobo nje uma ngisaphila. Ngizophakamisa izandla zami egameni lakho.
Umphefumulo wami uyosutha kube sengathi usuthiswe ngamanoni namafutha, umlomo wami ukudumise ngezindebe ezethabayo,
lapho ngikukhumbula embhedeni wami, ngizindla ngawe kwesikabhadakazi.
Wena ungisizile, ngizokwethaba emthunzini wamaphiko akho.
Umphefumulo wami ubambelele kuwe, esokunene sakho singisekele.
Kepha abazingela umphefumulo wami ukuba bawenzakalise, bazokwehlela ezindaweni zomhlaba eziphansi.
Bazonikelwa esandleni senkemba, babe wukudla kwezimpungushe.
Kepha inkosi izothokoza ngoNkulunkulu, bonke abafunga Yena bayomdumisa, ngokuba imilomo yabakhuluma amanga izovalwa.
Yizwa izwi lami, Nkulunkulu, ekukhaleni kwami, ulondoloze impilo yami ezinsongweni zesitha.
Ngifihle kuyo inguyazana yababi, nasesixukwini sabenza okubi,
abalola ulimi lwabo njengenkemba, bacibe imicibisholo yabo engamazwi ababayo,
ukuze bazume ongenacala bamdubule, bamdubule engazelele; abanaluvalo.
Badudana ngecebo elibi, bahlele ukucupha izingibe, bethi: “Siyobonwa ngubani na?”
Basongoza izenzo ezimbi, bathi: “Siliphethile icebo elisongoziweyo;” izibilini nenhliziyo yomuntu kujulile.
Kepha uNkulunkulu uyakubaciba ngomcibisholo, bagwazwe ngokuzunywa.
Bayakuwiswa, bahilwe lulimi lwabo, bonke abababonayo bayonikina amakhanda.
Bonke abantu bayokwesaba, bayoshumayela ngemisebenzi kaNkulunkulu, bakuqonde akwenzileyo.
Olungileyo uyothokoza kuSimakade, aphephele kuye. Bonke abaqotho ngenhliziyo, badumise.
Udumo lufanele Wena, Nkulunkulu, eZiyoni kuyofezeka isithembiso kuwe.
Wena oyizwayo imikhuleko, bonke abantu beza kuwe.
Iziphambeko zingigabhile, uyazithethelela iziphambeko zethu.
Ubusisiwe okhethwe nguwe, wamsondeza ukuba ahlale emagcekeni akho. Siyosuthiswa ngokuhle okuvela endlini yakho, ithempeli lakho elingcwele.
Uyakusiphendula ngezenzo ezesabekayo ekulungeni, Nkulunkulu wensindiso yethu. Wena uyithemba lemikhawulo yonke yomhlaba nelolwandle olukude,
Yena omisa izintaba ngamandla akhe, obhince amandla,
othulisa ukuduma kwezilwandle, inhlokomo yamaza azo nomsindo wabantu.
Abakhile emikhawulweni yomhlaba bayesaba ngezibonakaliso zakho, ujabulisa impumalanga nentshonalanga.
Uhambela umhlaba, unisa imvula, uwuvundisa kakhulu, umfula kaNkulunkulu ugcwele amanzi, abantu ubalungisela ukudla.
Umatisa imisele yawo, ulalise amasoyi awo, uwuthambise ngezihlambi, ubusise okumila kuwo.
Unyaka uwuhlobisa ngobumnene bakho, imikhondo yakho iconsa amafutha.
Amadlelo asehlane ayaconsa, amagquma abhinca injabulo.
Amadlelo embethe izimvu, nezigodi zisibekelwe ngokusanhlamvu, konke kuyajabula, kuyahlabelela.
Mhlaba wonke, hubelani uNkulunkulu ngentokozo.
Hubelani udumo lwegama lakhe, nimnike udumo nimbonga.
Yishoni kuNkulunkulu, nithi: “Yeka ubukhulu bemisebenzi yakho! Ngenxa yobukhulu bamandla akho, izitha zakho ziyothoba phansi kwakho.
Umhlaba wonke ukhuleke kuwe, ukudumise, bahubele igama lakho.”
Wozani nibone ukuthi uNkulunkulu wenzeni, akwenzayo kuyesabeka phakathi kwabantu.
Ulwandle uluphendule umhlaba owomileyo; bawela umfula behamba ngezinyawo; sathokoza kuye lapho.
Ubusa ngamandla akhe kuze kube phakade. Amehlo akhe aqaphe izizwe, abanenkani bangaziphakamisi.
Bongani uNkulunkulu wethu nina zizwe, nizwakalise izwi lokudunyiswa kwakhe,
olonda ukuphila kwethu, ongavumanga ukuba izinyawo zethu zishelele.
Ngokuba Wena, Nkulunkulu, usivivinyile, wasihlanza njengalokhu kuhlanzwa isiliva.
Usiphonse enethini, wasethwesa umthwalo onzima.
Abantu wabavumela ukuba bakhwele phezu kwamakhanda ethu. Sadabula emlilweni nasemanzini, kodwa wasikhiphela endaweni ebanzi.
Ngizongena endlini yakho neminikelo yokushiswa, ngizifeze izifungo engazenza kuwe,
lezo engazikhipha ngezindebe zomlomo, ngazisho ngomlomo wami ngisekuhluphekeni.
Ngizonikela kuwe ngeminikelo yokushiswa yezikhuluphalisiweyo, nomusi womhlatshelo wezinqama; ngenze umnikelo ngezinkunzi nezimbuzi.
We nina nonke enesaba uNkulunkulu, wozani nilalele, nginilandise ngalokho angenzele khona.
Ngakhala kuye, nginxusa, ukudumisa kwakusolimini lwami.
Uma bengiqonde ububi enhliziyweni yami, ibingayukungizwa iNkosi.
Impela uNkulunkulu uzwile, waqaphela izwi lomkhuleko wami.
Makabongwe uNkulunkulu ongawenqabanga umkhuleko wami, noma wasisusa isihawu sakhe kimi.
UNkulunkulu makabe nomusa kithi, asibusise, makakhanyise ubuso bakhe phezu kwethu,
ukuze indlela yakho yaziwe emhlabeni, insindiso yakho, kubo bonke abezizwe.
Abantu mabakubonge, Nkulunkulu, ubongwe ngabantu bonke.
Izizwe mazijabule, zihube ngentokozo, ngokuba abantu ubehlulela ngokulunga, uhole izizwe emhlabeni.
Abantu mabakubonge, Nkulunkulu, ubongwe ngabantu bonke.
Umhlaba uthele izithelo zawo, uNkulunkulu wethu usibusisile.
Sengathi uNkulunkulu angaqhubeka asibusise, yonke imikhawulo yomhlaba imesabe.
Makavuke uNkulunkulu, izitha zakhe zihlakazeke, labo abamzondayo babaleke phambi kwakhe.
Njengokuphephuka komusi, nokuncibilika kwengcina phambi komlilo, bachithwa kanjalo ababi phambi kukaNkulunkulu.
Kepha abalungileyo mabajabule, bethabe phambi kukaNkulunkulu, bathokoze nokuthokoza.
Hubelani uNkulunkulu, nidumise igama lakhe, lowo ogibela amafu, nimenzele indlela, igama lakhe nguSimakade, yethabani phambi kwakhe.
UnguYise wezinkedama, nomvikeli wabafelokazi; unguNkulunkulu osendaweni yakhe yokuhlala engcwele.
UNkulunkulu uhlalisa imihlalaqha ezindlini, akhulule iziboshwa bese zinethezeka, abahlubukayo bodwa abahlala emaqwaqwasini.
Nkulunkulu, ekuphumeni kwakho phambi kwabantu bakho, ekudabuleni kwakho ihlane,
umhlaba wazamazama, izulu laconsa phambi kukaNkulunkulu, neSinayi yazamazama phambi kukaNkulunkulu, uNkulunkulu ka-Israyeli.
Wanisa imvula enkulu, Nkulunkulu; ifa lakho selehlulekile, waliqinisa.
Ibandla lakho lakha kulo, ngobuhle bakho, wabalungisela abahluphekayo, Nkulunkulu.
INkosi ikhiphe izwi, isixuku esikhulu sabesifazane sabika indaba ejabulisayo.
Amakhosi ahola izimpi acela empunzini, athi galo yephuka. Abesifazane abasekhaya babelana impango,
noma belala ezibuyeni, kunjengamaphiko ejuba ambozwe ngesiliva, izimpaphe zamaphiko alo zahuqwa ngegolide elikhazimulayo.
Ngesikhathi uSomandla ehlakaza amakhosi lapho, kwakhithika iqhwa eZalimoni.
Intaba kaNkulunkulu yintaba iBhashani; intaba eneziqongo.
Kungani nina zintaba ezimagqumagquma nibuka, niyibuka ngonya intaba uNkulunkulu athanda ukuhlala kuyo na? Yebo, uSimakade uzohlala kuyo kuze kube phakade.
Izinqola zempi zikaNkulunkulu ezinamandla eziyizinkulungwane ezingamashumi amabili, izinkulungwane ngezinkulungwane iNkosi iphakathi kwazo, iSinayi isendaweni engcwele.
Wena wenyukele phezulu, wathumba abathunjiweyo, wapha abantu izipho, nakulabo abebehlubukile, ukuze uSimakade uNkulunkulu ahlale khona.
Mayibongwe iNkosi esithwalela imithwalo yethu imihla ngemihla, uNkulunkulu uyinsindiso yethu.
UNkulunkulu wethu unguNkulunkulu okhululayo, ukukhulula ekufeni kungokukaSimakade, iNkosi.
Kepha uNkulunkulu uzophohloza amakhanda ezitha zakhe, ukhakhayi lwalowo onesihluthu ohamba ezindleleni zokona kwakhe.
INkosi yathi: “Ngizobabuyisa bevela eBhashani, ngibabuyise bevela ekujuleni kolwandle,
ukuze ugeze izinyawo zakho egazini, nezilimi zezinja zakho zibe nesabelo ezitheni.”
Nkulunkulu, abantu bayibonile inhlabaluhide iya endlini engcwele, izindwendwe zikaNkulunkulu wami, iNkosi yami.
Phambili kuhamba abahlabeleli, emuva abashaya ugubhu, phakathi yizintombi ezishaya izigubhu.
Bongani uNkulunkulu ebandleni elikhulu; Simakade, Wena ungumthombo ka-Israyeli.
Nango uBhenjamini ongomncinyane kubo bonke, uyababusa, izikhulu zakwaJuda zingumzimba, nezikhulu zakwaZebuloni nezakwaNafethali.
UNkulunkulu wakho ukumisele amandla akho, qinisa, Nkulunkulu, lokho osenzele khona.
Ngenxa yethempeli lakho eJerusalema, amakhosi ayokulethela izipho.
Zikhuze izilwane ezihlala emhlangeni, imihlambi yezinkunzi namankonyane ezizwe, ukuze beze bakukhothamele bonke, bethule kuwe izinhlamvu zesiliva, uhlakaze izizwe ezithokozela ukulwa.
Izikhulu ziyakuvela eGibhithe, amaKhushe ayakwelulela ngokushesha izandla zawo kuNkulunkulu.
Nina mibuso yomhlaba, mhubeleni uNkulunkulu, nidumise iNkosi,
yona ekhwela phezu kwamazulu aphezulu asendulo, iyezwakalisa izwi layo, izwi elinamandla.
Nikani uNkulunkulu amandla, ubukhosi bakhe buphezu kuka-Israyeli, amandla akhe asemafini.
Nkulunkulu, uyesabeka ezindaweni zakho ezingcwele, uNkulunkulu ka-Israyeli abantu bakhe ubapha amandla nezikhwepha. Makadunyiswe uNkulunkulu.
Ngisindise, Nkulunkulu, ngokuba amanzi asesentanyeni.
Ngibisha obhukwini lodaka, akukho ndawo yokubeka unyawo, ngingene otweni ngathi shi, imisinga iyangisibekela.
Ngikhathele wukukhala, umphimbo wami ugagadekile. Amehlo ami anqundekile ngukulindela uNkulunkulu wami.
Abangizondela ize baningi ukwedlula izinwele ekhanda lami, baningi abafuna ukungibhubhisa; izitha zami zingethwesa icala ngeze. Kumele ngibuyisele engingakwebanga.
Nkulunkulu, Wena uyabazi ubuwula bami, nezono zami azifihlakele kuwe.
Mabangahlazeki ngami abakulindelayo, Nkosi, Simakade Wamabandla. Mabangathelwa ngehlazo ngenxa yami labo abakufunayo, Nkulunkulu ka-Israyeli.
Ngokuba ngichashwa ngenhlamba ngenxa yakho, ihlazo lisibekele ubuso bami.
Sengaba ngumfokazi kubafowethu, nowezizwe kubantwana bakamame.
Ngokuba ukushisekela indlu yakho kungidlile, izinhlamba zabakuthukayo zehlele phezu kwami.
Ngakhala, umphefumulo wami wazila, kwaba ngukudunyazwa kwami.
Isaka ngalenza isembatho sami, ngaba yisaga kubo.
Abahlezi esangweni bakhuluma ngami, izidakwa zihaya ingoma ngami.
Kepha mina ngikhuleka kuwe, Simakade. Ngesikhathi esifanele, Nkulunkulu, ngobukhulu bomusa wakho, ngiphendule ngeqiniso lensindiso yakho.
Ngitakule odakeni, ngingabishi, mangikhululwe ezitheni zami nasemanzini ajulileyo.
Izikhukhula mazingangisibekeli, utwa lungangigwinyi, nomgodi ungangivaleli.
Ngiphendule, Simakade, ngokuba umusa wakho muhle, ngokwesihawu sakho esikhulu, phendukela ngakimi.
Ungayifihleli ubuso bakho inceku yakho, ngokuba ngikhathazekile, phuthuma ungiphendule.
Sondela kuwo umphefumulo wami, uwuhlenge, ngikhulule ngenxa yezitha zami.
Wena uyakwazi ukwethukwa kwami, nehlazo lami, nokudunyazwa kwami. Zonke izitha zami ziphambi kwakho.
Ukwethukwa kuyephulile inhliziyo yami, ngagula kakhulu, ngafisa ukuzwelwa, kodwa angitholanga baduduzi.
Banginika inyongo ibe ngukudla kwami, ekomeni kwami bangiphuzisa uviniga.
Itafula labo malibe wugibe kubo, nesihibe sezitha zabo.
Amehlo abo mawanqundeke ukuze bangaboni, izinkalo zabo ziqhaqhazele njalo.
Ukunengwa kwakho kuthele phezu kwabo, intukuthelo yakho evuthayo ibafice.
Umuzi wabo ubhubhe, kungabi bikho ohlala emathendeni abo.
Bahlukumeze labo obashayile, bakhuluma ngobuhlungu babalinyaziweyo bakho.
Yengeza ukona kwabo phezu kokunye, mabangezi ekulungeni kwakho.
Mabesulwe encwadini yabaphilayo, bangalotshwa kanye nabalungileyo.
Kepha mina ngihluphekile, nginobuhlungu. Nkulunkulu, insindiso yakho mayingilondoloze.
Ngizolibonga igama likaNkulunkulu ngehubo, ngimbabaze ngokubonga.
Lokho kuzomthokozisa kakhulu uSimakade, ukwedlula inkabi noma inkunzi enezimpondo nezinselo.
Akuthi lapho abacindezelweyo bekubona, bethabe, nina enifuna uNkulunkulu mazivuseleleke izinhliziyo zenu.
Ngokuba uSimakade uyabezwa abentulayo, akabadeleli abakhe ababoshiweyo.
Izulu nomhlaba makumbonge, izilwandle nakho konke okuphila kukho.
Ngokuba uNkulunkulu uzolisindisa iZiyoni, ayakhe imizi yakwaJuda, bahlale kuyo, libe yifa labo.
Abantwana bezinceku zakhe bazolidla libe yifa labo, nalabo abathanda igama lakhe bazohlala kulo.
Nkulunkulu, phangisa ungikhulule. Simakade, phuthuma ungisize.
Abazingela umphefumulo wami mabathelwe ngehlazo, bahlazeke. Nalabo abafuna ukungenzakalisa, mababuyiselwe emuva bejabhisiwe.
Abathi: “Ashila, ashila!” mababuyele emuva ngenxa yehlazo labo.
Bonke abakufunayo mabajabule, bethabe kuwe. Nalabo abathanda insindiso yakho, bahlale njalo bethi: “UNkulunkulu mkhulu.”
Kepha mina ngimpofu futhi ngiyantula, phuthuma ungisize, Nkulunkulu! Ulusizo lwami nomkhululi wami. Simakade, ungalibali.
Kuwena, Simakade, ngiyakhosela, mangingajabhi naphakade.
Ngokulunga kwakho ngikhulule, ungihlenge; beka indlebe yakho kimi, ungisindise.
Yiba yidwala lami lokukhosela, engiza kulo njalo; uyalezile ukuba ngisindiswe, ngokuba uyidwala lami nenqaba yami.
Nkulunkulu wami, ngikhulule esandleni sesikhohlakali, nasekuxhakathisweni yisandla sowenza okubi nesowonakeleyo.
Ngokuba Wena, Nkosi Simakade, uyithemba lami; ngethembele kuwe kwasebusheni bami.
Ngancika kuwe kwasekuzalweni kwami, nguwe owangikhipha esibelethweni sikamame. Ukudumisa kwami njalo kungawe.
Kwabaningi bengifana nesimangaliso, kodwa Wena uyisiphephelo sami esinamandla.
Usuku lonke, umlomo wami ugcwele ukukubonga nokukubabaza.
Ungangilahli ngesikhathi sobudala, ungangishiyi lapho sengiluphele,
ngokuba izitha zami zikhuluma ngami, nabaqamekela umphefumulo wami bahlangana ngami, bangihlebe,
bathi: “UNkulunkulu umshiyile; mxosheni, nimbambe, ngokuba akekho ongamkhulula.”
Nkulunkulu, ungabi kude nami, Nkulunkulu, phuthuma ungisize.
Abamelene nami befuna umphefumulo wami mabajabhe, baphele. Labo abafuna ukungilimaza, mabathelwe ngehlazo, bahlazeke.
Kepha mina ngizohlala ngikwethemba njalo, ngizokubonga ngingaphezi.
Umlomo wami uzolanda ngokulunga kwakho nensindiso yakho usuku lonke, ngokuba anginakukubala.
Ngizofika ngikubonge ngezenzo zamandla zeNkosi uNkulunkulu; ngizokudumisa ngokulunga kwakho, kwakho wedwa.
Nkulunkulu, wangifundisa kwasebusheni bami, namanje ngisamemezela ngemisebenzi yakho emangalisayo.
Nalapho sengimdala, sengiyimpunga, uze ungangishiyi, ukuze ngishumayele ubukhulu bakho kwabasazozalwa, namandla akho ezizukulwaneni.
Nkulunkulu, ukulunga kwakho kufinyelela ezulwini, Wena owenza izinto ezinkulu. Nkulunkulu, ngubani onjengawe na?
Wena owasikhombisa izinhlupheko ezimbi eziningi, uyobuye usiphilise, usikhuphule ezinzulwini zomhlaba.
Yandisa udumo lwami, ubuye ungiduduze.
Nkulunkulu wami, ngizobubonga ubuqotho bakho, ngogubhu lwezintambo, ngikudumise ngehabhu, Wena oNgcwele ka-Israyeli.
Izindebe zomlomo wami zizojabula, nomphefumulo wami ukuhubele, ngokuba ungihlengile.
Usuku lonke ulimi lwami luzokhuluma ngokulunga, ngokuba labo abafuna ukungenzakalisa bazothelwa ngehlazo, baphoxeke.
Nkulunkulu, yipha inkosi ubulungiswa nenkosana ukulunga kwakho.
Iyokwehlulela isizwe sakho ngeqiniso, nabampofu bakho, ngobulungiswa.
Izintaba ziyakuletha impumelelo kubantu, namagquma, ukulunga.
Mayivikele abantu abampofu, isindise abantwana babantulayo, iphohloze umcindezeli.
Bayakwesaba Wena, kusekhona ilanga nenyanga, izizukulwane ngezizukulwane.
Mayifane njengemvula otshanini, nanjengesihlambi simatisa umhlaba.
Ezinsukwini zayo olungileyo uyakuqhakaza, kuvame ukuthula, ize ingabi bikho inyanga.
Iyakubusa kusukela olwandle kuze kube solwandle, kusukela emfuleni kuze kube semikhawulweni yomhlaba.
Abakhe ehlane bayokhothama phambi kwayo, izitha zayo zikhothe uthuli.
Amakhosi aseTharishishi nawaseziqhingini ayakuletha izipho. Amakhosi aseShebha naseSebha ayoletha izipho.
Wonke amakhosi ayokhothama phambi kwayo, zonke izizwe ziyikhonze.
Ngokuba iyakukhulula ompofu ozikhalela kuyo, nohluphekayo ongenamsizi.
Iyakuhawukela odangeleyo nompofu, isindise imiphefumulo yabampofu.
Iyokhulula impilo yabo kumcindezeli nonendluzula, igazi labo liyigugu emehlweni ayo.
Mayiphile, bayinike igolide laseShebha, bayithandazele njalo, bayibusise usuku lonke.
Makube khona inala yokudla ezweni, esiqongweni sezintaba, ukudla kwalo kuyohashazela njengeLebhanoni, abemizi bayokhahlela njengotshani bomhlaba.
Igama layo malime kuze kube phakade, udumo lwayo luphakame njengelanga. Zonke izizwe mazidunyiswe ngayo, bonke abezizwe mabathi ibusisiwe.
Makabongwe uSimakade uNkulunkulu, uNkulunkulu ka-Israyeli, okunguYena kuphela owenza izimangaliso.
Malibongwe igama lakhe elikhazimulayo kuze kube phakade, umhlaba wonke ugcwale inkazimulo yakhe. Amen, Amen.
Lesi yisiphetho semikhuleko kaDavide indodana kaJese.
UNkulunkulu umnene impela ku-Israyeli, kulabo abanenhliziyo ehlanzekileyo.
Kepha mina izinyawo zami zicishe zakhubeka, kwasala kancane ukuba izinyathelo zami zishibilike.
Ngaba nomhawu ngabazidlayo, lapho ngibona ababi bephumelela.
Ngokuba abanazinhlungu, kuze kube sekufeni kwabo, bayizitetelegu.
Abahlupheki njengabanye abantu, futhi abehlelwa wubhubhane njengabanye abantu.
Ngakho-ke ukuqhosha ngumgexo wabo, indluzula bayembethe njengengubo.
Amehlo abo aphinqekile ngukunona, imicabango yenhliziyo iyachichima.
Baklolodela abanye, bakhulume okubi, baziqhenye, bahlongoze ukubacindezela.
Umlomo wabo bawuphakamisela ezulwini, ulimi lwabo luhamba emhlabeni.
Ngakho-ke isizwe sakhe sibuyela lapha, amanzi amaningi bazimuncela wona.
Bathi: “UNkulunkulu wazi kanjani? Imbala kukhona yini ukwazi koPhezukonke na?”
Bheka, laba bayizikhohlakali, bahlala bekhululekile, bandisa imfuyo.
Impela inhliziyo yami ngiyigcinele ize, ihlanzekile, nezandla zami ngazihlamba ngingenacala,
ngokuba ngahlushwa usuku lonke, kwasa ngijeziswa.
Uma bengithe ngizakukhuluma kanjalo, ngabe ngisikhohlisile isizukulwane sabantwana bakho.
Kwathi ngicabanga ukuba ngikuqonde lokho, kwaba luhlupho emehlweni ami,
ngaze ngangena endlini engcwele kaNkulunkulu, ngaqaphelisisa ukugcina kwabo.
Impela ubabeka ezindaweni ezibushelelezi, ubawise babe yincithakalo.
Maye, bachithwa ngokuphazima kweso! Bafa, babhubha benovalo.
Njengephupho ekuphaphameni, Nkosi, uyakuwedelela umfanekiso wabo ekuvukeni kwakho.
Kwathi lapho inhliziyo yami iba nomunyu, nezinso zami zibhokodwa,
ngaba yisiphukuphuku, angaze ngazi lutho, ngaba yisilwane kuwe.
Kepha mina ngiyakube nginawe njalo, ungibambile ngesandla sami sokunene.
Uyakungihola ngesiluleko sakho, andukuba ungamukele enkazimulweni.
Nginobani ezulwini na? Uma nginawe, angifuni lutho emhlabeni.
Umzimba wami nenhliziyo yami kuyaphela, nokho uNkulunkulu uyidwala lenhliziyo yami nesabelo sami kuze kube phakade.
Ngokuba abakude nawe bayakubhubha, uyabachitha bonke abahlubuka kuwe ngokuphinga.
Kepha mina kungilungele ukusondela kuNkulunkulu, ngiyenzile iNkosi uSimakade ibe yisiphephelo sami, ukuze ngishumayele zonke izenzo zakho.
Nkulunkulu, usilahleleni kwaze kwaba phakade na? Izimvu zedlelo lakho uzithunqiselelani ngentuthu yolaka lwakho na?
Khumbula ibandla lakho owalizuza kwasemandulo, walikhulula ukuze libe yisizwe esiyifa lakho, nentaba iZiyoni ohlala kuyo.
Phangisa uzobona incithakalo yaphakade, isitha sesone konke endlini engcwele.
Izitha zakho zibhonge phakathi endlini yakho yokuhlanganela, zamisa izimpawu zazo zaba ngamabhanela,
kwangathi ngumuntu ephakamisa izembe phakathi kwemithi eminyeneyo.
Konke okwayo okubaziweyo zakuphohloza ngembazo nangesando.
Indlu yakho engcwele zayokhela ngomlilo. Indlu yegama lakho zayidumaza, zayicekela phansi.
Zathi enhliziyweni yazo: “Masibabhubhise kanyekanye;” zazishisa zonke izindlu zikaNkulunkulu zokuhlanganela.
Izimpawu zethu asiziboni, akusekho mphrofethi, akekho kithi owaziyo ukuthi kuyoze kube nini.
Nkulunkulu, kuyoze kube nini umcindezeli esithuka, isitha sihlala sihlambalaza igama lakho na?
Usigodleleni isandla sakho, isandla sakho sokunene na? Sikhiphe esifubeni sakho, uzibhubhise.
UNkulunkulu uyiNkosi yami kuze kube phakade, nguye owenza insindiso emhlabeni.
NguWena owehlukanisa ulwandle ngamandla akho, waphohloza amakhanda ezilo zasemanzini ezesabekayo.
NguWena owaphohloza amakhanda kaLeviyathani, wamnika izidalwa zasendle, zamudla.
NguWena owaveza isiphethu nomfudlana; nguWena owomisa imifula egobhoza ingashi.
Usuku lungolwakho, nobusuku bungobakho; nguWena owenza ukukhanya nelanga.
NguWena owamisa yonke imikhawulo yomhlaba; nguWena owenza ihlobo nobusika.
Simakade, khumbula lokhu, isitha sisethukile, nesizwe esinobuwula silihlambalazile igama lakho.
Ungawunikeli umphefumulo wejuba lakho esilwaneni; ungakhohlwa ukuphila kwezihlupheki zakho.
Khumbula isivumelwano, ngokuba izindawo zezwe ezimnyama, zigcwele izindlu zobudlova.
Ocindezelweyo makangabuyi ejabhile, ohluphekayo nompofu mababonge igama lakho.
Vuka, Nkulunkulu, uyimele indaba yakho, khumbula ukuthi uklolodelwa yiziwula usuku lonke.
Ungakhohlwa yizwi lezitha zakho, ukuxokozela kwabakuvukelayo kuya ngokuya kwenyukela.
Siyakubonga Nkulunkulu, siyabonga; igama lakho liseduze, balanda ngezimangaliso zakho.
Wena uthi: “Uma ngiqoka isikhathi esimisiweyo, yiMina engehlulela ngokulunga.
Umhlaba uyancibilika nabo bonke abakhe kuwo; Mina ngizimisile izinsika zawo.”
Ngithe kwabazidlayo: “Ningazidli,” nakwababi: “Ningaziphakamisi.
Ningazikhukhumezi; ningakhulumi ngokwedelela nokuqhosha.”
Ngokuba ukuphakanyiswa akuveli empumalanga, entshonalanga nasehlane ezintabeni,
kodwa uNkulunkulu ungumehluleli; omunye uyamehlisa, omunye amphakamise.
Esandleni seNkosi kukhona isitsha, iwayini liyakhephuzela, sigcwele iwayini eliqungiweyo; yiyona elithunga ngaso. Bonke ababi abasemhlabeni impela boyimunca inhlese yalo, bayiphuze.
Kepha mina ngiyakumemezela ngakho kuze kube phakade, ngidumise uNkulunkulu kaJakobe.
Wonke amandla ezikhohlakali ngiyowaqeda nya, kodwa ngiwandise awabalungileyo.
UNkulunkulu uyaziwa kwaJuda, igama lakhe likhulu kwa-Israyeli.
Ithabanakeli lakhe liseSalema, nendlu yakhe iseZiyoni.
Kulapho ayephula khona imicibisholo yomnsalo, isihlangu, inkemba, nempi.
Lapho uvela ezintabeni zempango, uyakhazimula ngobukhosi.
Amaqhawe aphangiwe, alala obokugcina, akukho qhawe elikwaze ukusebenzisa izandla zalo.
Ngokusola kwakho, Nkulunkulu kaJakobe, inqola nehhashi kwehlelwe ngubuthongo.
Wena, yebo, Wena uyesabeka; ngubani ongema phambi kwakho lapho uthukuthele na?
Wezwakalisa ukwehlulela kuvela ezulwini, umhlaba wesaba, wathula
mhla evuka uNkulunkulu ukuba ahlulele, asindise bonke abathobekileyo bomhlaba.
Ngokuba ulaka lomuntu luyakukudumisa, insalelo yolaka uyakuyibhinca.
Thembisani, nizifeze izithembiso enizenza kuSimakade uNkulunkulu wenu. Bonke abamzungezileyo mabalethe izipho kuye owesabekayo.
Unquma umoya wezikhulu, uyesabeka emakhosini omhlaba.
Ngikhala kuNkulunkulu ngezwi eliphakemeyo, ngiyamemeza ukuze angizwe uNkulunkulu.
Ngosuku losizi lwami, ngifuna iNkosi, ebusuku ngelule isandla sami ngingakhathali. Umphefumulo wami uyenqaba ukududuzwa.
Ngikhumbula uNkulunkulu, ngibubule; ngiyazindla, umoya wami udangele.
Uzibambile izinkophe zami, amehlo ami awavaleki. Ngikhathazekile, akusakhulumeki.
Ngininga ngezinsuku zasemandulo, ngikhumbula iminyaka yakudala.
Ebusuku ngiyakhumbula ukubetha kwami ugubhu, ngizindla enhliziyweni yami, nomoya wami uyahlolisisa.
“Ngabe iNkosi iyokuyekelela kuze kube phakade na? Ayiyukuphinda yini ikwenzele umusa?
Ngabe ububele bayo sebuphele ingunaphakade na? Ngabe isithembiso seminyaka sesiphelile yini ezizukulwaneni ngezizukulwane na?
Ngabe uNkulunkulu usekulibele yini ukuba nozwelo? Ngabe ulaka lwakhe selugabhe uzwelo analo na?”
Ngase ngithi: “Kungukuhlupheka kimi ukuthi isandla soPhezukonke sesiguqukile.”
Ngiyakuzikhumbula izenzo zikaSimakade, yebo, ngizikhumbule izimangaliso zasendulo,
ngicabange ngawo wonke umsebenzi wakho, ngizindle ngezenzo zakho.
Indlela yakho, Nkulunkulu, ingcwele. Yimuphi unkulunkulu omkhulu njengoNkulunkulu wethu na?
Wena unguNkulunkulu owenza izimangaliso, amandla akho uwazisile ezizweni.
Ngengalo yamandla wabasindisa abantu bakho, amadodana kaJakobe noJosefa.
Amanzi akubona, Nkulunkulu, amanzi akubona, athuthumela, nezintwa zazamazama.
Laduma izulu, amafu adedela imvula, imicibisholo yakho yathi chithi saka.
Izwi lokuduma kwakho lisesiphephweni, imibani yakhanyisa izwe, umhlaba wandindizela, wazamazama.
Indlela yakho yayisolwandle, imendo yakho isemanzini amaningi, kodwa amanyathelo akho awabonakalanga.
Abantu bakho wabahola njengezimvu ngesandla sikaMose no-Aroni.
Bantu bami, yizwani umthetho wami, nibeke izindlebe zenu emazwini omlomo wami.
Umlomo wami ngizowuvula, ngisho umfanekiso, ngizobonakalisa izimfihlakalo zasemandulo,
izinto esezwa ngazo sazazi, esazitshelwa ngokhokho.
Asiyukubafihlela zona abantwana babo, kodwa siyotshela izizukulwane izibongo zikaSimakade, amandla akhe nemisebenzi emangalisayo ayenzileyo.
Wamisa isiyalo kwaJakobe, washaya umthetho kwa-Israyeli, wayala ukuba okhokho bethu bawufundise abantwana babo,
ukuze waziwe yisizukulwane esilandelayo, abantwana abayobazala nabo bavuke, batshele abantwana babo ngawo.
Bayobeka ithemba labo kuNkulunkulu, bangakhohlwa yimisebenzi kaNkulunkulu, ukuze bagcine imiyalo yakhe.
Bangabi njengawoyisemkhulu, isizukulwane esiphambeneyo nesihlubukayo, isizukulwane esingaqinisanga inhliziyo yaso, nesimoya waso wawungathembekile kuNkulunkulu.
Abantu bakwa-Efrayimi, sebehlomile bephethe iminsalo, babuyela emuva ngosuku lwempi.
Kabasigcinanga isivumelwano sikaNkulunkulu, benqaba ukuhamba ngomthetho wakhe.
Bayikhohlwa imisebenzi yakhe nezimangaliso zakhe ayebabonise khona.
Izimangaliso wazenza phambi koyisemkhulu eGibhithe, eZowani.
Wehlukanisa ulwandle, wabadabulisa kulo, amanzi wawamisa anjengodonga.
Emini wabahola ngefu, ubusuku bonke, ngokukhanya komlilo.
Waqhekeza amadwala ehlane, wabaphuzisa benela, kungathi kuvela ekujuleni.
Wenza kwagobhoza imithombo edwaleni, amanzi wawenza ageleza njengemifula.
Nokho baqhubeka bona kuye, bamhlubuka Ophezukonke ehlane.
Bamlinga uNkulunkulu enhliziyweni yabo ngokucela ukudla ababekufisa.
Bakhuluma kabi ngoNkulunkulu, bathi: “UNkulunkulu angalendlala yini itafula ehlane na?
Noma ashaya idwala kwaphuma amanzi, kwampompoza imifula; angabapha yini isinkwa noma abahlinzeke ngenyama abantu bakhe na?”
Ngakho-ke lapho uSimakade ekuzwa lokho, wathukuthela, kwavutha umlilo kwaJakobe, ulaka lwakhe lwehlela ku-Israyeli,
ngoba abakholwanga nguNkulunkulu, abaze bethembela ensindisweni yakhe.
Nokho wayala amafu, wavula iminyango yezulu,
wanisela phezu kwabo imana ukuze badle, wabapha ukudla kwasezulwini.
Abantu badla isinkwa sezingelosi, wabathumelela insada yokudla.
Wadedela umoya wasempumalanga ezulwini, ngamandla akhe waqhuba umoya waseningizimu.
Wanisa inyama phezu kwabo njengothuli, nezinyoni ezinamaphiko zafana nesihlabathi solwandle.
Lokho wakwehlisa phakathi kwenkambu yabo, naphakathi kwezindlu zabo.
Badla basutha kakhulu, ngokuba Yena wabapha ababekufisa.
Babengakehlukani nokufisa kwabo, besakumumethe ukudla kwabo emilonyeni,
ulaka lukaNkulunkulu lwehlela phezu kwabo, wazibulala iziqhwaga, waziqumba phansi izinsizwa zakwa-Israyeli.
Phezu kwakho konke lokho baqhubeka nokona, abaze bazikholwa izimangaliso zakhe.
Ngakho-ke izinsuku zabo waziqeda njengomoya, neminyaka yabo, ngokwesaba.
Lapho ebabulala, bamfuna, babuye bamfunisisa uNkulunkulu.
Bakhumbula ukuthi uNkulunkulu uyidwala labo; uNkulunkulu Ophezukonke ungumkhululi wabo.
Ngemilomo yabo babemthopha, kodwa beqamba amanga bngezilimi zabo.
Inhliziyo yabo yayingabambelele kuye, bengathembekile esivumelwanei sakhe.
Kepha Yena waba nobubele, wabathethelela ububi babo, akaze ababhubhisa, yebo, wazibamba kaningi olakeni lwakhe, wangayikhiphela kubo yonke intukuthelo yakhe.
Wakhumbula ukuthi bangabantu nje, bangumoya owedlulayo ongenakubuya.
Babemhlubuka kaningi kangakanani ehlane, bemdabukisa ogwadule!
Bamlinga uNkulunkulu bephindelela, bemdabukisa oNgcwele ka-Israyeli.
Kabazange bawakhumbule amandla akhe, nosuku abahlenga ngalo ezitheni,
ngesikhathi enza izibonakaliso nezimangaliso eGibhithe, eZowani.
Waphendula imifula yabo yaba yigazi, ukuze bangakwazi ukuphuza emithonjeni yabo.
Wabathumelela izibawu ezabalumayo, namaselesele ababhubhisayo.
Ukudla kwabo wakunika imiswenya, nomsebenzi wabo, isikhonyane.
Imivini yabo wayibulala ngesichotho, nemikhiwane yabo, ngesangquma.
Izinkomo zabo wazinikela esichothweni nezimvu nezimbuzi zabo, emibanini.
Ukuvutha kolaka lwakhe wakuthululela phezu kwabo, ulaka, ukufutheka nokuhlupheka, ngokuthuma izithunywa zobubi.
Walungisela intukuthelo yakhe indlela, akawuphephisanga umphefumulo wabo ekufeni, kepha wanikela ukuphila kwabo ezifweni.
Washaya amazibulo wonke aseGibhithe, okokuqala kwamandla abo, emathendeni kaHamu.
Kepha abantu bakhe wabakhipha njengezimvu, njengomhlambi wabahola ehlane.
Wabahola kahle, abaze besaba; ulwandle lwazisibekela izitha zabo.
Wabayisa emngceleni wakhe ongcwele entabeni eyayizungezwe yisandla sakhe sokunene.
Waxosha abezizwe phambi kwabo. Wadabula izwe, wababela lona, laba yifa labo, izizwe zakwa-Israyeli wazihlalisa emathendeni azo.
Nokho bamlinga, bamhlubuka uNkulunkulu oPhezukonke, abaze babugcina ubufakazi bakhe.
Bahlehlela emuva, njengoyisemkhulu, bamkhohlisa, baphambuka njengomnsalo ogejile.
Bamthukuthelisa ngezindawo zabo eziphakemeyo, bamcunula ngezithombe zabo.
Ngesikhathi uNkulunkulu ekuzwa lokho wabathukuthelela, wamlahla impela u-Israyeli.
Walilahla ithabanakeli eliseShilo, ithende ayelimise phakathi kwabantu bakhe.
Amandla akhe wawanikela ekuthunjweni, nenkazimulo yakhe, esandleni sesitha.
Abantu bakhe wabanikela enkembeni, ifa lakhe walithukuthelela.
Izinsizwa zakhona zagwinywa ngumlilo, izintombi zakhona zangahayelwa nkondlo.
Abaphristi bakhona bawa ngenkemba, abafelokazi bakhona abaze balila.
INkosi yayisivuka kwasengathi ibikade ilele njengeqhawe elehlulwe yiwayini.
Izitha zayo yazichithela emuva, yazithela ngehlazo elingunaphakade.
Yayilahla indlu kaJosefa, ayaze yasikhetha isizwe sakwa-Efrayimi.
Kepha yaqoka isizwe sakwaJuda, intaba iZiyoni eyithandayo.
Indlu yayo engcwele yayakha njengezintaba, nanjengomhlaba ewusekele kuze kube phakade.
Yakhetha uDavide, inceku yayo, yamthatha ezibayeni zezimvu.
Wayeselandela izimvukazi ezenyisayo, yamthatha ukuba eluse abantu bayo, uJakobe nefa layo, u-Israyeli.
Wabelusa ngenhliziyo eqotho. Wabahola ngesandla esinekhono.
Nkulunkulu, abezizwe bahlasele ifa lakho, bangcolisa ithempeli lakho elingcwele, iJerusalema baliphendula incithakalo.
Izidumbu zezinceku zakho bazinika izinyoni zezulu, zaba ngukudla kwazo, inyama yabakwesabayo bayinika izilo zomhlaba.
Igazi labo balichithe njengamanzi nxazonke zeJerusalema, akubangabikho obambelayo.
Sesiphenduke isethuko komakhelwane bethu, umbhinqo nenhlekisa kwabasiphahlileyo.
Kuyoze kube nini, Simakade, ulokhu uthukuthele, isifithifithi solaka lwakho sivutha njengomlilo na?
Thela ulaka lwakho phezu kwabezizwe abangakwaziyo, naphezu kwemibuso engalibizi igama lakho.
Ngokuba sebemdlile uJakobe, umuzi wakhe sebewubhubhisile.
Mawungasibaleli amacala akuqala, umusa wakho mawusheshe usihlangabeze, ngokuba sesibuthakathaka kakhulu.
Sisize, Nkulunkulu wensindiso yethu, ngenxa yenkazimulo yegama lakho, usikhulule, usithethelele izono zethu ngenxa yegama lakho.
Kungani abeziwe bethi phambi kwamehlo ethu: “Ukuphi uNkulunkulu wabo na?” Ukuphindiselelwa kwegazi lezinceku zakho elichithekileyo makwaziwe kwabezizwe.
Ukububula kwesiboshwa makuze phambi kwakho; londoloza ngobukhulu bengalo yakho asebengabantwana bokufa.
Ibuyisele kasikhombisa ezifubeni zomakhelwane bethu inhlamba abakuhlambalaza ngayo, Nkosi.
Khona thina, bantu bakho, izimvu zedlelo lakho, siyakukubonga kuze kube phakade, sishumayele udumo lwakho ezizukulwaneni ngezizukulwane.
Lalela, Malusi ka-Israyeli, Wena ohola uJosefa njengomhlambi. Uhlezi phezu kwamakherubhi, khazimula
phambi kuka-Efrayimi, noBhenjamini noManase, vusa amandla akho, uze usisindise.
Sibuyise, Nkulunkulu, ukhanyise ubuso bakho, khona siyakusindiswa.
Simakade, Nkulunkulu Wamabandla, kuyoze kube nini uyithukuthelele imikhuleko yabantu bakho na?
Ubondle ngesinkwa sezinyembezi, wabaphuzisa izinyembezi ngesilinganiso esikhulu.
Usenze into omakhelwane bethu ababangisana ngayo, izitha zethu zisihleka usulu.
Sibuyise, Nkulunkulu Wamabandla, ukhanyise ubuso bakho, khona siyakusindiswa.
Ukhiphe umvini eGibhithe, wasusa izizwe, wawutshala.
Wawulungisela indawo phambi kwawo, wagxila, wagcwalisa umhlaba.
Izintaba zambozwa ngumthunzi wawo, nemisedari kaNkulunkulu, ngamagatsha awo.
Wenabisa amagatsha awo, aze afika olwandle, namaxhantela awo, aze afika emfuleni.
Uludilizeleni uthango lwawo, baze bawukhe bonke abadlula ngendlela na?
Usudliwa yingulube yehlathi, uqothulwa yizilwane zasendle.
Nkulunkulu Wamabandla, phenduka, siyakucela, bheka phansi usezulwini, ubone, bese uwunakekela lo mvini,
yebo, lo mvini utshalwe yisandla sakho sokunene, nendodana yakho ozikhulisele yona.
Bawushise ngomlilo, bawunquma; mababhubhe ngokukhuza nje kwakho.
Isandla sakho masibe phezu kwalowo ongakwesokunene sakho, simvikele, lowo ozikhulisele yena.
Khona singaseyukubuye sikufulathele; siphilise, khona sizokhuleka egameni lakho.
Sibuyise, Simakade Nkulunkulu Wamabandla, ukhanyise ubuso bakho, khona siyakusindiswa.
Halalisani kuNkulunkulu ongamandla ethu, nimemeze ngenjabulo kuNkulunkulu kaJakobe.
Hubani iculo, nithathe isigubhu nohabhu; imiqangala ekhala kahle.
Shayani icilongo ngokwethwasa kwenyanga nangokugcwala kwayo, ngosuku lomkhosi wethu.
Ngokuba kuyisimiso kwa-Israyeli, nomthetho kaNkulunkulu kaJakobe.
Wakwenza kwaba ngubufakazi obumileyo kwaJosefa, mhlazana ephuma eGibhithe. Ngezwa ulimi engingalwazi luthi:
“Ngasusa ihlombe lakhe emthwalweni, nezandla zakhe zakhululeka eqomeni.
Wakhuleka usosizini, ngakukhulula; ngakuphendula ngisekusithekeni kokuduma, ngakuvivinya ngasemanzini eMeribha.
“Bantu bami, yizwani, ngizofakaza kini ngokuthi: Israyeli, sengathi ungangilalela!
Makungabi bikho kuwe omunye uNkulunkulu, ungakhuleki kunkulunkulu wabezizwe.
Mina nginguSimakade uNkulunkulu wakho owakukhuphula eGibithe; khamisa umlomo wakho, ngiwugcwalise.
“Kepha abantu bami abalilalelanga izwi lami, u-Israyeli wangishaya indiva.
Ngase ngibayekelela enkanini yenhliziyo yabo, bahamba ngokuthanda kwabo.
“Kwangathi abantu bami bangangizwa, u-Israyeli ahambe ezindleleni zami.
Izitha zabo bengizozithobisa ngokushesha, abamelene nabo ngibashaye ngesandla sami.
Abazonda uSimakade bayakuzithoba kuye, ukubhujiswa kwabo kube phakade.
Ngizonondla ngokusanhlamvu kwekhethelo, yebo, nginisuthise ngoju oluvela edwaleni.”
UNkulunkulu umi emhlanganweni wonkulunkulu; uyehlulela phakathi konkulunkulu.
Kuyoze kube nini nehlulela ngokungalungile, nenzelela izikhohlakali na?
Yahlulelani ompofu nentandane, nimenzele okufaneleyo olusizi nontulayo.
Khululani ontulayo nompofu, nibophule esandleni sezikhohlakali.
Kabanakwazi nakuqonda, badukuza ebumnyameni; zonke izisekelo zomhlaba ziyazamazama.
Mina ngathi: “Ningonkulunkulu nina, nonke ningamadodana oPhezukonke.
Kanti nokho niyakufa njengabantu nje, niwe njengesinye sezikhulu.”
Vuka, Nkulunkulu, wehlulele umhlaba, ngokuba Wena uyindlalifa yezizwe zonke.
Nkulunkulu, ungathuli, ungabi yisithulu, ungali ukukhuluma, Nkulunkulu.
Ngokuba bheka, izitha zakho ziyaxokozela, nabakuzondayo bayakuvukela.
Ngobuqili, benza uzungu ngabantu bakho, baceba ukulwa nabafihliweyo bakho.
Bathi: “Wozani sibaqothule, bangabe besaba yisizwe, negama lika-Israyeli lingabe lisakhunjulwa.”
Baceba nganhliziyonye, benza isivumelwano ngawe:
amathende ka-Edomi aka-Ishmayeli, akaMowabi nakaHagari,
noGebhali, u-Amoni, u-Amaleki, iFilistiya nabakhile eThire.
Ne-Asiriya lahlangana nabo, laba yingalo yabantwana bakaLothi.
Yenza kubo njengakuMidiyani, nakuSisera nakuJabhini ngasemfuleni iKishoni,
ababhubhela e-Eni Dori, baba ngumquba emhlabathini.
Izikhulu zabo zenze zibe njengo-Orebhi noZebhi, nawo wonke amakhosana abo abe njengoZebha noZalimuna
ababethi: “Masizithathele amadlelo kaNkulunkulu.”
Nkulunkulu wami, benze bafane nothuli lwesikhwishikazana, bafane namakhoba emoyeni.
Njengomlilo oshisa ihlathi, njengelangabi elithungela izintaba,
baxoshe kanjalo ngesivunguvungu sakho, ubethuse ngesiphepho sakho.
Ubuso babo ubuthele ngehlazo, baze bafune igama lakho, Simakade.
Mabahlazeke, baphele amandla kuze kube phakade, mabahluleke, babhubhe,
bazi ukuthi nguwe wedwa ogama lakho linguSimakade, ungoPhezukonke emhlabeni wonke.
Wo, zithandeka kangaka izindlu zakho, Simakade Wamabandla!
Umphefumulo wami ulangazelela, womela amagceke kaSimakade. Inhliziyo yami nomzimba wami kuhuba ngokwethaba kuNkulunkulu ophilayo.
Ngokuba inyoni ifumene isidleke, nenkonjane yazitholela isidleke sayo, lapho ingabeka khona amaphuphu ayo, ngisho kuma-althare akho, Simakade Wamabandla, Nkosi yami, Nkulunkulu wami.
Babusisiwe abahlala endlini yakho; bayakuhlala bebonga Wena.
Ubusisiwe umuntu omandla akhe akuwe, abazindlela zakho zisezinhliziyweni zabo.
Bedabula esigodini iBhakha, basenza saba yindawo yeziphethu, nemvula yokuqala iyayisibekela ngezibusiso.
Baqhubeka emandleni, baze babonakale phambi kukaNkulunkulu eZiyoni.
Simakade Nkulunkulu Wamabandla, yizwa umkhuleko wami, ubeke indlebe, Nkulunkulu kaJakobe.
Wena Nkulunkulu, Sihlangu sethu, bheka, ubuke ubuso bogcotshiweyo wakho.
Ngokuba usuku lulunye emagcekeni akho, luhle kunezinye eziyizinkulungwane. Ngiyakhetha ukulinda emnyango wendlu kaNkulunkulu wami, kunokuhlala emathendeni ezikhohlakali.
Ngokuba uSimakade uNkulunkulu, uyilanga nesihlangu, uSimakade uyakupha umusa nodumo, akayukubenqabela okuhle abahamba ngobuqotho.
Simakade Wamabandla, ubusisiwe okwethembayo.
Simakade, ulibusisile izwe lakho, wamenzela inhlalakahle futhi uJakobe.
Walisusa icala labantu bakho, wazisibekela zonke izono zabo.
Uyihoxisile yonke intukuthelo yakho, waphenduka ekuvutheni kolaka lwakho.
Sibuyise, Nkulunkulu wensindiso yethu, uyeke ukusicasukela.
Uzohlala usithukuthelele yini na? Ulaka lwakho ulwedlulisele phezu kwezizukulwane ngezizukulwane na?
Awuzukusivusa yini, sibuye siphile, ukuze abantu bakho bathokoze ngawe na?
Sikhombise ububele bakho, Simakade, usiphe insindiso yakho.
Ngizokuzwa lokho uNkulunkulu uSimakade azokusho, uzosho ukuthula kubantu bakhe, nakulabo abamesabayo. Mabangabuyeli ebuwuleni!
Impela insindiso yakhe iseduzane nabamesabayo, ukuze inkazimulo yakhe ihlale ezweni lakithi.
Kuyakuhlangabezana umusa neqiniso, kwangane ukulunga nokuthula.
Iqiniso liyovumbuka emhlabeni, ukulunga kubheke phansi kusezulwini.
USimakade uyoveza okuhle, nezwe lethu liyothela izithelo zalo.
Ukulunga kuyohamba phambi kwakhe, kuhlelembele izinyawo zakhe indlela.
Simakade, beka indlebe yakho ungiphendule, ngokuba ngilusizi, ngimpofu.
Londoloza umphefumulo wami, ngokuba ngingoqotho; Wena Nkulunkulu wami, sindisa inceku yakho ekwethembayo.
Yiba nomusa kimi, Nkosi, ngokuba ngikhala kuwe usuku lonke.
Thokozisa umphefumulo wenceku yakho, ngokuba kuWena, Nkosi, ngiyawuphakamisela umphefumulo wami.
Wena, Nkosi umuhle, ungothethelelayo, unomusa omkhulu kubo bonke abakhala kuwe.
Simakade, lalela umkhuleko wami, uzwe izwi lokunxusa kwami.
Ngosuku lokuhlupheka kwami ngikhala kuwe, ngokuba uzongiphendula.
Phakathi kwabo bonke onkulunkulu, akekho onjengawe, Nkosi, akukho okunjengemisebenzi yakho.
Zonke izizwe ozidalileyo zizofika, zikhuleke phambi kwakho, Nkosi, zidumise igama lakho,
ngokuba Wena umkhulu, wenza izimangaliso, unguNkulunkulu, Wena wedwa.
Simakade, ngifundise indlela yakho, ngizohamba eqinisweni lakho. Inhliziyo yami yenze iqonde into eyodwa vo, yesabe igama lakho.
Nkosi Nkulunkulu wami, ngikubonga ngenhliziyo yami yonke, igama lakho ngilidumise kuze kube phakade,
ngokuba umusa wakho phezu kwami mkhulu, ukhulule umphefumulo wami endaweni yabafileyo ephansi.
Nkulunkulu, izedeleli zingivukele, isigejana sezixhwanguxhwangu sizingele umphefumulo wami, sangaba nandaba nawe.
Wena Nkosi unguNkulunkulu ohawukelayo, unomusa nokubekezela, uvame ubumnene nokwethembeka.
Phendukela ngakimi, ube nomusa kimi, inceku yakho yiphe amandla akho, usindise indodana yencekukazi yakho.
Ngibonise isibonakaliso somusa wakho, ukuze abangizondayo bakubone lokho, bajabhe, ngokuba Wena Simakade, uyangisiza, uyangiduduza.
Isisekelo sakhe sisezintabeni ezingcwele.
USimakade uyawathanda amasango eZiyoni kunayo yonke imizi kaJakobe.
Kukhulunywa izinto ezidumisekayo ngawe, muzi kaNkulunkulu.
Ngibala iRahabhi, neBhabhele kulabo abazi mina, bheka, iFilistiya, iThire neKhushe, laba bazalelwa lapho.
Kuyothiwa ngeZiyoni: “Yilo, nalo bazalelwa khona, Ophezukonke uyaliqinisa.”
Mhla uSimakade eloba izizwe, uyakubala ukuthi lo, wazalelwa khona.
Abahubayo nabasinayo bathi: “Imithombo yami yonke ikuwe.”
Simakade, Nkulunkulu wensindiso yami, ngikhala imini nobusuku phambi kwakho.
Beka indlebe yakho ekunxuseni kwami, umkhuleko wami mawufike kuwe.
Umphefumulo wami ugcwele izinsizi, ukuphila kwami kusondele endaweni yabafileyo.
Sengibalwa nabehlela emgodini, sengifana nomuntu ongasenamandla.
Ukhukho lwami luphakathi kwabafileyo, nginjengababuleweyo, abalele ethuneni, ongasabakhumbuli, asebesusiwe esandleni sakho.
Ungibeke emgodini ojule kunayo yonke, ebumnyameni, otweni.
Ukuthukuthela kwakho kuphezu kwami; ungishaye ngamadlambi akho wonke.
Ubaxoshele kude ebengikade ngazana nabo, ungenze ngaba yisinengiso kubo; ngivalelwe, angikwazi ukuphuma.
Iso lami liyafa wusizi, ngikhala kuwe, Simakade imihla yonke, izandla zami ngizelulela kuwe.
Uyakubenzela yini abafileyo isimangaliso na? Izithunzi ziyovuka yini zikubonge na?
Ethuneni kuyolandiswa yini ngomusa wakho, nangokwethembeka kwakho, endaweni yokubhujiswa na?
Ziyaziwa yini izimangaliso zakho ebumnyameni, nokulunga kwakho ezweni lokukhohlwa na?
Simakade, mina ngikhala kuwe, ekuseni umkhuleko wami uyenyuka phambi kwakho.
Simakade, uwulahlelani umphefumulo wami? Ungifihlelelani ubuso bakho na?
Kusukela ebusheni bami ngihluphekile, ngaba ngofayo, ngathwala ukwesabeka kwakho, ngaphela.
Ulaka lwakho oluvuthayo lungehlele, ukwesabisa kwakho kungiqedile.
Imihla yonke kungizungeze njengamanzi, kungikake kanyekanye.
Ubaxoshele kude isihlobo nomngani, ubumnyama yibona obungumhlobo wami.
Ngizohlabelela ngomusa kaSimakade kuze kube phakade, ngomlomo wami, ngazise izizukulwane ngezizukulwane ukwethembeka kwakho.
Ngimemezele ngithi: “Umusa wakho umi ingunaphakade, ukwethembeka kwakho ukuqinise emazulwini.”
Ngenzile isivumelwano nokhethiweyo wami, ngafunga kuDavide, inceku yami, ngathi:
“Uzalo lwakho ngizoluqinisa kuze kube phakade, isihlalo sakho sobukhosi ngisisimamise izizukulwane ngezizukulwane.”
Simakade, izimangaliso zakho ziyodunyiswa ngamazulu, ukwethembeka kwakho, ebandleni labangcwele.
Ngubani osemafini ongalinganiswa noSimakade na? Ngubani phakathi kwamadodana kaNkulunkulu ongafaniswa noSimakade na?
UNkulunkulu uyesabeka kakhulu emkhandlwini wabangcwele, umelwe ukuhlonishwa kakhulu yibo bonke abamzungezileyo.
Simakade, Nkulunkulu Wamabandla, ngubani onjengawe na? Somandla, Simakade, ukwethembeka kwakho kukuzungezile.
Wena ubusa amadlambi olwandle lapho amaza alo ephakama, Wena uyawathulisa.
URahabi umchoboze wanjengobuleweyo, ngengalo yakho enamandla, wahlakaza izitha zakho.
Izulu lingelakho, nomhlaba ungowakho, izwe nokugcwala kwalo, kukho konke, nguwe obeke isisekelo.
Nguwe owadala inyakatho neningizimu, iThabhori neHermoni kuyathokoza egameni lakho.
Ingalo yakho inobuqhawe, isandla sakho sinamandla, esokunene sakho siphakeme.
Ukulunga nobulungiswa kuyisisekelo sesihlalo sakho sobukhosi, umusa nokwethembeka kuhamba phambi kwakho.
Sibusisiwe isizwe esikwazi ukuhlabelela ngenjabulo, sihamba ekukhanyeni kobukhona bakho, Simakade.
Sithokoza egameni lakho usuku lonke, siyaphakanyiswa ngokulunga kwakho,
ngokuba Wena uyinkazimulo yamandla abo, udumo lwethu luyophakama ngomusa wakho.
Ngokuba isihlangu sethu singesikaSimakade, inkosi yethu ingeyoNgcwele ka-Israyeli.
Ngaleso sikhathi wakhuluma ngombono kwabethembekileyo bakho, wathi: “Ngimsizile onamandla, ngimphakamisile okhethwe phakathi kwabantu.
Ngiyifumene inceku yami, uDavide, ngayigcoba ngamafutha ami angcwele.
Isandla sami siyakuba naye, simsimamise, ingalo yami imqinise.
Isitha asiyukumehlula, nendodana yobubi ayiyukumhlupha.
Izitha zakhe ngiyozichoboza ebuka, ngibhubhise abamzondayo.
Ukwethembeka kwami nomusa wami kuyakuba naye, egameni lami luyakuphakama udumo lwakhe.
Ngiyakubeka isandla sakhe phezu kolwandle, esokunene sakhe phezu kwemifula.
Uyakungibiza, athi: “UnguBaba, unguNkulunkulu wami nedwala lensindiso yami.”
Ngiyomenza abe yizibulo nophakemeyo kunamakhosi omhlaba.
Umusa wami ngiyomgcinela wona kuze kube phakade; isivumelwano sami siyohlala siqinile kuye.
Uzalo lwakhe ngiyolwenza lume kuze kube phakade, isihlalo sakhe sobukhosi siyokuma, inqobo nje kusekhona isibhakabhaka.
“Uma abantwana bakhe bewushiya umthetho wami, bengahambi ngezehlulelo zami,
uma bephula izimiso zami, bengayigcini imiyalo yami,
ngiyakujezisa iziphambeko zabo ngenduku, namacala abo ngemivimbo.
Kepha umusa wami angiyukuwususa kuye, ngingaphikisi ukuthembeka kwami.
Isivumelwano sami angiyukusaphula, nengikukhiphe ngezindebe zami angiyukukuguqula.
Ngafunga ubungcwele bami kwakanye, angiyukuwaqamba amanga kuDavide.
Abozalo lwakhe bayakuma kuze kube phakade, isihlalo sakhe sobukhosi sibe njengelanga phambi kwami.
Bayakuma kuze kube phakade njengenyanga, ibe ngufakazi esibhakabhakeni.”
Nokho ogcotshiweyo wakho usumlahlile, wamala, wamthukuthelela.
Usichithile isivumelwano senceku yakho, wawungcolisa othulini umqhele wayo.
Udilize zonke izindonga zakhe, wazenza izinqaba zakhe zaba yincithakalo.
Bonke abadlula ngendlela bayamphanga, useyihlazo kwabakhelene naye.
Uphakamise esokunene sezitha zakhe, wajabulisa zonke izitha zakhe.
Futhi uyenze yaba buthuntu inkemba yakhe, awumsekelanga empini.
Uyisusile inkazimulo yakhe, wasiwisa phansi emhlabathini isihlalo sakhe sobukhosi.
Uzifinyezile izinsuku zobusha bakhe, wamthela ngamahloni.
Simakade, kuyoze kube nini uzisithile, nentukuthelo yakho ivutha njengomlilo na?
Khumbula ukuthi isikhathi sami singakanani, nokuthi bonke abantwana babantu wabadalela ize.
Ngubani oyophila angakuboni ukufa, akhulule umphefumulo wakhe emandleni endawo yabafileyo na?
Nkosi, uphi umusa wakho wakuqala owawufungela kuDavide ngokwethembeka kwakho na?
Khumbula, Nkosi, ihlazo lezinceku zakho, nokuthi ngithwele esifubeni sami ihlazo lezizwe eziningi kakhulu,
ezisola ngalo izitha zakho, Simakade, ezisola ngalo ukuhamba kogcotshiweyo wakho.
Makabongwe uSimakade, kuze kube phakade. Amen, Amen.
Nkosi, Wena uyisiphephelo sethu izizukulwane ngezizukulwane.
Zingakaveli izintaba, umhlaba, nezwe ungakakudali, kusukela phakade kuze kube phakade, Wena, Nkulunkulu, ukhona.
Umuntu uyambuyisela othulini, uthi: “Buyani, bantwana babantu.”
Ngokuba emehlweni akho inkulungwane yeminyaka ingangosuku lwayizolo olwedlule, imfushane ngangomlindo wasebusuku.
Ubakhukhula njengesikhukhula; banjengobuthongo, nanjengotshani obuhluma ekuseni.
Ekuseni buyahluma, bukhahlele, kusihlwa bubune, bunqunywe.
Ngokuba siqedwa yintukuthelo yakho, ulaka lwakho luyasithuthumelisa.
Amacala ethu uwabeke phambi kwakho, izono zethu ezifihliweyo zisekukhanyeni kobuso bakho.
Ngokuba izinsuku zethu zidlula phansi kwentukuthelo, iminyaka yethu iphela ngokuphazima kweso.
Izinsuku esiziphilayo ziyiminyaka engamashumi ayisikhombisa, kuthi uma ziziningi, zibe yiminyaka engamashumi ayisishiyagalombili.
Ngubani owazi amandla entukuthelo yakho nolaka lwakho olunjengokwesabeka kwakho na?
Nkosi, sifundise ukubala kahle izinsuku zethu, ukuze sizuze inhliziyo enokuhlakanipha.
Buya, Simakade! Kuyoze kube nini na? Hawukela izinceku zakho.
Sisuthise ngomusa wakho ekuseni, ukuze sithokoze, sijabule izinsuku zethu zonke.
Sithokozise ngangezinsuku owasihlupha ngazo, nangangeminyaka esabona okubi ngayo.
Izenzo zakho mazibonakale kuzo izinceku zakho, nenkazimulo yakho, kubantwana bazo.
Umusa weNkosi, uNkulunkulu wethu, mawube phezu kwethu, imisebenzi yezandla zethu ichume, yisimamise imisebenzi yezandla zethu.
Lowo ohlala emphemeni woPhezukonke akhosele emthunzini kaSomandla,
uyothi kuSimakade: “Uyisiphephelo sami nenqaba yami, unguNkulunkulu wami engethembele kuye.”
Ngokuba nguYena oyokuhlenga ogibeni lomcuphi nasobhubhaneni,
uyokusibekela ngezimpaphe zakhe, uphephele phansi kwamaphiko akhe, ukwethembeka kwakhe kuyisihlangu nogange.
Awuyukwesaba okwesabisayo ebusuku, nomcibisholo ondizayo emini,
nobhubhane oluhamba ebumnyameni, nesifo esibhubhisayo emini bebade.
Bayakuwa abayizinkulungwane ngaseceleni kwakho, nabayizinkulungwane ezilishumi ngakwesokunene sakho, kodwa akuyukukuthinta wena.
Uyobona ngamehlo akho, ubone izikhohlakali zijeziswa.
Ngokuba uSimakade umenze wayisiphephelo sakho, oPhezukonke waba yinqaba yakho.
Okubi akuyukukwehlela, nesifo asiyukusondela ethendeni lakho.
Ngokuba uyakuyaleza izingelosi zakhe ngawe, zikulondoloze ezindleleni zakho zonke.
Ziyokuphakamisa ngezandla zazo, unyawo lwakho aluyukuqhuzulwa yitshe.
Uyonyathela ingonyama nebululu, ufihlize phansi ibhongo lengonyama nodrago.
Ngoba ubambelele kimi, ngizomhlenga, ngimvikele, ngokuba walazi iGama lami.
Uyakungibiza, ngimphendule, ngibe naye lapho esosizini, ngimkhulule, ngimenze abe nodumo.
Ngiyomsuthisa ngobude bezinsuku zokuphila, ngimbonise insindiso yami.
Kuhle ukubonga uSimakade, nokuhubela igama lakho, Wena oPhezukonke,
ukumemezela umusa wakho ekuseni, nokwethembeka kwakho ebusuku,
nokushaya ugubhu olunezintambo ezilishumi, umqangala nohabhu okuzwakala kamnandi.
Ngokuba Wena, Simakade, ungithokozisile ngemisebenzi yakho. Ngizohuba ngentokozo ngemisebenzi yezandla zakho.
Simakade, yeka ubukhulu bemisebenzi yezandla zakho! Imicabango yakho ijule kakhulu.
Umuntu oyisiwula akanalwazi, nesiphukuphuku asikuqondi lokhu.
Ngisho izikhohlakali zingahluma njengotshani, nabo bonke abenza okubi baqhakaze, bayobhubha ingunaphakade.
Kepha Wena, Simakade, uphakeme kuze kube phakade.
Ngokuba izitha zakho, Simakade, izitha zakho ziyakubhubha, bonke abenza okubi bayakuhlakazwa,
kodwa udumo lwami uluphakamise lwanjengophondo lwenyathi, ngagcotshwa ngamafutha amasha.
Iso lami liyakuzibona ngokujabula izitha zami, nezindlebe zami ziyakuzwa ngokuthokoza ngabenzi bokubi abangivukelayo.
Olungileyo uhluma njengesundu, akhule njengomsedari eLebhanoni.
Batshalwe endlini kaSimakade, bamilile emagcekeni kaNkulunkulu wethu.
Nalapho sebebadala bayakuthela izithelo, bahlume babe luhlaza,
ukuze bamemezele ukuthi uSimakade ulungile, uyidwala lami, kuye akukho ukungalungi.
USimakade uyiNkosi, wembethe ubukhosi, uSimakade uvunule, ubhince amandla. Izwe ulimise laqina, alinakunyakaziswa.
Isihlalo sakhe sobukhosi simi siqinile kwasemandulo. Wena ukhona kuze kube phakade.
Simakade, imifula iholoba ngamandla, imifula iholoba kakhulu, imifula iduma ngamandla amakhulu.
USimakade kweliphezulu unamandla ukwedlula ukuhlokoma kwamanzi amaningi, nokuduma kwamadlambi olwandle.
Ubufakazi bakho buqinisekile impela. Simakade, ubungcwele buyifanele indlu yakho kuze kube phakade.
Nkulunkulu ophindiselelayo, Simakade, Nkulunkulu ophindiselelayo, vela ukhanye.
Phakama, Mehluleli womhlaba, uziphindisele kwabazidlayo izenzo zabo.
Simakade, kuyoze kube nini ababi, kuyoze kube nini ababi bethaba na?
Bakhulumela futhi, bakhuluma amagama ayiziswana, bonke abenzi bokubi bayazigabisa.
Simakade, baphohloza isizwe sakho, nefa lakho balinyathela phansi.
Babulala abafelokazi nabafokazi, babulale nezintandane.
Bathi: “USimakade akaboni, uNkulunkulu kaJakobe akanaki.”
Qaphelani nina zithutha eziphakathi kwabantu, nani ziwula, niyakuqonda nini na?
Owenza indlebe kanakuzwa na? Owadala iso kanakubona na?
Othethisa abezizwe, Yena ofundisa abantu ukwazi, kanakujezisa na?
USimakade uyayazi imicabango yabantu ukuthi ingumoya nje.
Simakade, ubusisiwe umuntu omyalayo, omfundisa ngomthetho wakho.
Umenza aphumule ezinsukwini ezimbi, aze ambele umgodi lowo ongenamthetho.
Ngokuba uSimakade akayukubalahla abantu bakhe, nefa lakhe akayukulishiya.
Ngokuba ukulunga kuyakubuyela ekwehluleleni, bonke abaqotho ngenhliziyo bakulandele.
Ngubani oyakungimela phambi kwababi na? Ngubani oyakungelekelela kwabenza okubi na?
Ukuba uSimakade ubengesilo usizo lwami, umphefumulo wami ubuyakushesha ukuhlala endaweni yabafileyo.
Lapho ngithi unyawo lwami lushibilikile, umusa wakho, Simakade, wangiphasa.
Emicabangweni eminingi yenhliziyo yami, ukududuza kwakho kuyawuthokozisa umphefumulo wami.
Isihlalo sobubi singahlanganyela yini nawe, leso esisebenza okubi kungathi kusemthethweni na?
Bahlangana ukuvukela umphefumulo wolungileyo, balahla umuntu ongenacala ukuba afe.
Kepha uSimakade waba yinqaba yami, uNkulunkulu wami waba yidwala engiphephela kulo.
Ukukhohlakala kwabo ukuphindisela kubo, uyobaqeda nya ngobubi babo; uSimakade uNkulunkulu wethu uyabaqeda.
Wozani simhubele uSimakade, silihlokomele ngenjabulo idwala lensindiso yethu.
Masize phambi kwakhe ngokubonga, simhubele amahubo.
Ngokuba uSimakade unguNkulunkulu omkhulu, uyiNkosi enkulu ngaphezu konkulunkulu bonke.
Esandleni sakhe kukhona izinzulu zomhlaba, neziqongo zezintaba ngezakhe nazo.
Ulwandle ngolwakhe, walwenza, nomhlabathi owomileyo wawubumba ngezandla zakhe.
Wozani sikhuleke, sikhothame, siguqe phambi kukaSimakade, uMenzi wethu.
Ngokuba Yena unguNkulunkulu wethu, thina singabantu bedlelo lakhe nezimvu zesandla sakhe.
Ningayenzi lukhuni inhliziyo yenu njengaseMeribha, njengasosukwini lwaseMasa, ehlane,
lapho okhokho benu bangilinga khona, bangivivinya, bewubonile umsebenzi wami.
Iminyaka engamashumi amane, nganengwa yileso sizukulwane, ngaze, ngathi: “Bangabantu abanhliziyo zabo zidukile, abangazazanga izindlela zami.”
Ngafunga ngabo olakeni lwami, ngathi: “Abasoze bangena ekuphumuleni kwami.”
Hlabelelani uSimakade ihubo elisha, nimhlabelele uSimakade, mhlaba wonke.
Mhubeleni uSimakade, nibonge igama lakhe, nimemezele insindiso yakhe imihla ngemihla.
Landani ngenkazimulo yakhe kwabezizwe, nezimangaliso zakhe kubantu bonke.
Mkhulu uSimakade, udumisekile kakhulu, uyesabeka ngaphezu konkulunkulu bonke.
Bonke onkulunkulu babezizwe bayizithombe, kodwa uSimakade wenza izulu.
Udumo nobukhosi kusebusweni bakhe, amandla nenkazimulo kusendlini yakhe engcwele.
Nina mindeni yabantu nikani uSimakade, mnikeni uSimakade inkazimulo namandla.
Mnikeni uSimakade inkazimulo yegama lakhe, nilethe umnikelo, ningene emagcekeni akhe.
Khulekani kuSimakade, nihlobe ngobungcwele, nithuthumele ebusweni bakhe, mhlaba wonke.
Shonini phakathi kwezizwe, nithi: “USimakade uyinkosi;” umhlaba umi uqinile, awunakunyakaziswa. Uyokwehlulela izizwe ngobuqotho.
Malijabule izulu, umhlaba uthokoze, maluhlokome ulwandle, nakho konke okukulo.
Mawethabe amasimu, nakho konke okukuwo, kwename imithi yonke yehlathi
phambi kukaSimakade, ngokuba uyeza, impela uyeza ukuzokwehlulela umhlaba. Uzowehlulela ngobuqotho umhlaba, nezizwe ngokwethembeka kwakhe.
USimakade uyabusa, umhlaba mawuthokoze, zethabe iziqhingi eziningi.
Yena uphahlwe ngamafu nobumnyama, ukulunga nobulungiswa kuyisisekelo sesihlalo sakhe sobukhosi.
Umlilo uhamba phambi kwakhe, uzishwabadele nxazonke izitha zakhe.
Imibani yakhe ikhanyisa umhlaba, ukubona lokho umhlaba qede uthuthumele.
Izintaba zincibilikisa okwengcina phambi kukaSimakade, phambi kweNkosi yawo wonke umhlaba.
Amazulu ashumayela ngokulunga kwakhe, nezizwe zonke ziyayibona inkazimulo yakhe.
Bonke abakhonza izithombe ezibaziweyo mabajabhe, labo abazigabisa ngezithombe. Bonke onkulunkulu bakhothame phambi kwakhe.
IZiyoni liyezwa, futhi lithokozile, namadodakazi akwaJuda ayethaba, ngenxa yezehlulelo zakho, Simakade,
ngokuba Wena Simakade ungoPhezu kwawo wonke umhlaba, uphakeme kakhulu, ngaphezu kwabo bonke onkulunkulu.
Nina enithanda uSimakade kuzondeni okubi, Yena olondoloza imiphefumulo yabathembekile, abasindise ezandleni zezikhohlakali.
Ukukhanya kukhanyisela olungileyo, nokujabula kwabanhliziyo ziqotho.
Thokozani kuSimakade, nina balungileyo, nibonge lapho nikhumbula ubungcwele bakhe.
Hubelani uSimakade ihubo elisha, ngokuba wenze izimangaliso, esokunene sakhe nengalo yakhe engcwele kumzuzele ukunqoba.
USimakade uyenze yaziwa insindiso yakhe, ukulunga kwakhe wakwembula emehlweni abezizwe.
Uwukhumbulile umusa wakhe nokwethembeka kwakhe kwabendlu yakwa-Israyeli. Yonke imikhawulo yomhlaba iyibonile insindiso kaNkulunkulu wethu.
Hlokomelani uSimakade mhlaba wonke, qhumukani, nihlabelele ngenjabulo, nihube amahubo.
Mhubeleni uSimakade ngehabhu, ngehabhu nangezwi lehubo,
ngamacilongo nangokukhala komtshingo, hlokomani ngezwi lokuhalalisa phambi kweNkosi uSimakade.
Ulwandle maludume nakho konke okukulo, nezwe nabakhileyo kulo.
Imifula mayishaye ihlombe, izintaba zihube ndawonye ngentokozo,
phambi kukaSimakade, ngokuba uyeza, uzokwehlulela umhlaba. Uzolehlulela ngokulunga izwe, nezizwe ngobuqotho.
USimakade uyabusa, abantu mabathuthumele, uhleli phezu kwamakherubhi, umhlaba mawuzamazame.
USimakade mkhulu eZiyoni, uphakeme phezu kwezizwe zonke.
Mabalibonge igama lakhe elikhulu nelesabekayo; ungcwele Yena.
Nkosi enamandla, mthandi wokulungileyo, uqinise ubuqotho, waphakamisa ubulungiswa nokulunga kwaJakobe.
Mphakamiseni uSimakade uNkulunkulu wethu, nikhuleke ngasesenabelweni sezinyawo zakhe; ungcwele Yena.
UMose no-Aroni babengabanye babaphristi bakhe, uSamuweli engomunye wababekhuleka eGameni lakhe. Bakhuleka kuSimakade, Yena wabaphendula.
Wakhuluma kubo esensikeni yefu, bagcina ubufakazi bakhe nezimiso abanika zona.
Simakade Nkulunkulu wethu, Wena wabaphendula, waba nguNkulunkulu othethelelayo kubo, nophindiselayo ngezenzo zabo.
Mphakamiseni uSimakade uNkulunkulu wethu, nikhuleke nisentabeni yakhe engcwele, ngokuba uSimakade uNkulunkulu wethu ungcwele.
Hlokoma kuSimakade ngezwi lokuhalalisa, mhlaba wonke.
Mkhonzeni uSimakade ngokwethaba, nisondele phambi kwakhe, nihuba ngentokozo.
Yazini ukuthi uSimakade unguNkulunkulu; nguYena osidalileyo, asizidalanga thina, singabantu bakhe, nezimvu zedlelo lakhe.
Ngenani emasangweni akhe ngokubonga, nasemagcekeni akhe ngokudumisa, mbongeni, nidumise igama lakhe.
Ngokuba uSimakade muhle, umusa wakhe umi phakade, nokwethembeka kwakhe, ezizukulwaneni ngezizukulwane.
Ngizohuba ngomusa nobulungiswa, ngikudumise Wena Simakade.
Ngizohamba ngobuqotho, ngingabi nacala. Uyakuza nini kimi na? Ngizohamba nginenhliziyo emsulwa endlini yami.
Angizukuyibeka phambi kwamehlo ami into embi; ngiyakuzonda okwenziwa ngabahlubukayo, akuyukunamathela kimi.
Ngiyakuziqhelelanisa nenhliziyo edukileyo, omubi angiyukumnaka.
Ohleba umakhelwane wakhe esithe ngiyombhubhisa, angiyukumbekezelela ozikhukhumezayo.
Amehlo ami akwabathembekileyo bomhlaba ukuze bahlale nami, ohamba endleleni engenacala, uyakungikhonza.
Akukho namunye owenza inkohliso, oyohlala endlini yami, namunye oqamba amanga, oyokuma phambi kwamehlo ami.
Njalo ekuseni ngizobabhubhisa ababi ezweni, ngibaqede bonke abenzi bokubi emzini kaSimakade.
Simakade, yizwa umkhuleko wami, ukukhala kwami makufiyinyelele kuwe.
Ungangifihleli ubuso bakho ngosuku losizi lwami; beka indlebe yakho kimi, ngosuku engikumemeza ngalo, usheshe ungiphendule.
Izinsuku zami ziphele njengomusi, namathambo asha njengezinkuni.
Umphefumulo wami udangele, wabunisa okotshani, inhliziyo yami imnyama, ukudla akusangeni.
Ngenxa yokugqiha kwami, ngibubula, amathambo ami asenamathele esikhumbeni.
Ngifana nomandukulu ehlane, nginjengesikhova kwahlongasibi.
Abehli ubuthongo, ngifana nenyoni ehleli yodwa ophahleni lwendlu.
Izitha zami zingethuka usuku lonke, abangihlambalazayo bayangiqalekisa.
Ngikhume umlotha njengesinkwa, nengikuphuzayo ngakuxubanisa nezinyembezi,
ngenxa yentukuthelo nolaka lwakho, ungiqukule wangilahla kude.
Izinsuku zami zifana nethunzi seliyoshona, mina luqobo, ngibuna njengotshani.
Wena Simakade uyohlala kuze kube phakade, nesikhumbuzo sakho, izizukulwane ngezizukulwane.
Uzovuka, uhawukele iZiyoni, ngokuba sekuyisikhathi somusa wakho kulo, isikhathi esinqunyiweyo sesifikile.
Ngokuba izinceku zakho ziyathokoza ngamatshe alo, ziyadabuka ngothuli lwalo.
Yikhona abezizwe bezolesaba igama likaSimakade, namakhosi wonke omhlaba, inkazimulo yakho.
Ngokuba uSimakade ulakhile iZiyoni, ubonakele enkazimulweni yakhe.
Wawunaka umkhuleko wabangenalutho, akaze awedelela umthandazo wabo.
Lokhu makulotshelwe isizukulwane, ukuze abantu abangakazalwa bamdumise uSimakade.
USimakade wabuka phansi, esekuphakameni ezulwini, endaweni yakhe engcwele, wabuka emhlabeni
ukuba ezwe ukububula kweziboshwa, akhulule labo abase beqonde ekufeni,
ukuze igama likaSimakade lishunyayelwe eZiyoni, nodumo lwakhe, eJerusalema,
lapho izizwe zibuthana ndawonye nemibuso, ukuzodumisa uSimakade.
Wanciphisa amandla ami endleleni, wafinyeza izinsuku zami.
Ngithi: “Nkulunkulu wami, uze ungangithathi ngisemncane, Wena ominyaka yakho ihlezi izizukulwane ngezizukulwane.
Izisekelo zomhlaba wazibeka kwasemandulo, namazulu angumsebenzi wezandla zakho.
Kuyobhubha lokhu, kodwa Wena uyokuma, konke kuyoguga njengengubo, njengesembatho, uyokuguqula kushabalale,
kepha Wena unguwe njalo, iminyaka yakho ayinasiphetho.
Abantwana bezinceku zakho bayakuhlala, izizukulwane zabo ziyovikeleka phambi kwakho.”
Mbonge uSimakade, mphefumulo wami, konke okungaphakathi kimi makulibonge igama lakhe elingcwele.
Mbonge uSimakade, mphefumulo wami, ungaze wakhohlwa yimisebenzi yakhe yonke yomusa,
Yena othethelela zonke izono zakho, owelapha zonke izifo zakho,
okhulula ukuphila kwakho ekubhujisweni, okuqhelisa ngomusa nangobubele,
osuthisa ukulangazelela kwakho ngokuhle, ubusha bakho bubuyiswe njengokhozi.
USimakade ubenzela bonke abacindezelweyo ukulunga nobulungiswa.
Wamazisa uMose izindlela zakhe, nabantu bakwa-Israyeli, izenzo zakhe.
USimakade unobubele nesihawu, uyephuza ukuthukuthela, uvame umusa.
Akathethi njalonjalo, akayigcini intukuthelo yakhe kuze kube phakade.
Akasiphathi njengokufanele izono zethu, akasivuzi njengokwamacala ethu.
Ngokuba njengokuphakama kwezulu phezu komhlaba, unjalo umusa wakhe phezu kwabamesabayo.
Njengokuba impumalanga yahlukene nentshonalanga, uzidedise kangako iziphambeko zethu.
Njengalokhu uyise ebahawukela abantwana bakhe, kanjalo noSimakade uyabahawukela abamesabayo.
Ngokuba uyazi ukuthi sibunjwe kanjani, uyakhumbula ukuthi siluthuli nje.
Izinsuku zomuntu zinjengotshani; ukhahlela njengembali yasendle,
ipheshethwa ngumoya, bese inyamalala, nendawo yayo ingabe isayazi.
Kepha umusa kaSimakade uphezu kwabamesabayo phakade naphakade, nokulunga kwakhe kubantwana babantwana,
abagcina isivumelwane sakhe, bakhumbule ukwenza iziyalezo zakhe.
USimakade umise isihlalo sakhe sobukhosi ezulwini, umbuso wakhe ubusa phezu kwakho konke.
Bongani uSimakade nina zingelosi zakhe, nina maqhawe anamandla enigcina izwi lakhe nilalele okushiwo yilo.
Bongani uSimakade nina mabandla akhe wonke, nina zinceku zakhe enenza intando yakhe.
Bongani uSimakade, nina misebenzi yakhe yonke ezindaweni zonke zombuso wakhe. Mbonge uSimakade, mphefumulo wami.
Mbonge uSimakade, mphefumulo wami, Simakade Nkulunkulu wami, umkhulu, wembethe udumo nobukhosi,
wembethe ukukhanya njengengubo, weneka izulu njengendwangu.
Ubeka imishayo yezindlu zakhe emanzini, wenza amafu abe yinqola yakhe, uhamba ngamaphiko omoya,
wenza umoya ube yizithunywa zakhe, izikhonzi zakhe zibe yilangabi lomlilo.
Umhlaba uwumise phezu kwezisekelo zawo, ukuze unganyakaziswa kuze kube phakade naphakade.
Wawumboza ngolwandle njengengubo, amanzi ema phezu kwezintaba.
Ngokukhuza kwakho abaleka, ngezwi lokuduma kwakho ashesha asuka.
Enyuka izintaba, ehla izigodi, aze afika endaweni owawuyimisele wona.
Uwamisele umngcele ukuba angaweqi, angabuyi ukuzosibekela umhlaba.
Uthumela imithombo ezigodini, yona igijima phakathi kwezintaba.
Iphuzisa izilwane zonke zasendle, izimbongolo zasendle zicime ukoma kwazo.
Izinyoni zezulu zakhe ngakuyo, zizwakalisa izwi lazo phakathi kwamagatsha.
Uchelela izintaba ngokuvela emakamelweni akhe aphezulu, umhlaba uyaneliswa yisithelo semisebenzi yakho.
Uhlumisela izinkomo utshani nemifino yokusiza umuntu, ukuze athole ukudla okuvela emhlabeni,
newayini elijabulisa inhliziyo yomuntu, namafutha okukhazimulisa ubuso, nesinkwa esiqinisa inhliziyo yomuntu.
Imithi kaSimakade iyasuthisa, imisedari eLebhanoni ayitshalileyo,
kwakhela kuyo izinyoni, unogolantethe unesidleke kuyo imisayiphuresi.
Izintaba eziphakemeyo ngezezimbuzi zasendle, amawa ayisiphephelo sezimbila.
Wenza inyanga ukuba ibe ngeyokwehlukanisa izinkathi, ilanga liyazi ukuthi lishona nini.
Ubumnyama wenza ukuba bube wubusuku, phakathi kwabo izilo zonke zasehlathini ziyaphuma.
Amabhongo amabhubesi agwavumele inyamazane, efuna ukudla kwawo kuNkulunkulu.
Kuthi ngokuphuma kwelanga abuyele phansi emiphandwini yawo, alale.
Kube sekuphuma umuntu, aye emsebenzini wakhe nasemshikashikeni wakhe, kuze kuhlwe.
Simakade, yaze yaba miningi imisebenzi yakho, yonke uyenze ngokuhlakanipha; umhlaba ugcwele izidalwa zakho.
Bheka nje ulwandle, lukhulu, lubanzi, kulo kukhona izilwanyana ezinwabuzelayo ezingenakubalwa, izilwane ezincane nezinkulu.
Kulo kuntweza imikhumbi, inkanyamba yasolwandle oyidalileyo idlala kulo.
Zonke lezi zidalwa zibheke Wena, ukuze uzinike ukudla kwazo ngesikhathi esifaneleyo.
Uyazinika ukudla, zikubuthe; uvula isandla sakho, zisuthe ngokuhle.
Uyasitheza ubuso bakho, zethuke, uyasusa umphefumulo wazo, zife, zibuyele othulini lwazo.
Uyathumela umoya wakho, zidalwe; wenza bube busha ubuso bomhlaba.
Inkamulo kaSimakade mayime kuze kube phakade; uSimakade makathokoze ngemisebenzi yakhe,
Yena obheka umhlaba, maqede uthuthumele, athinte izintaba, zithunqe.
Ngizomhubela uSimakade, inqobo nje uma ngisaphila. Ngizohlabelelela uNkulunkulu wami ngisekhona.
Kwangathi izizindlo zami zingamthokozisa, ngokuba ukuthokoza kwami kukuSimakade.
Izoni maziphele emhlabeni, kungabe kusaba bikho zikhohlakali. Mbonge uSimakade, mphefumulo wami, Haleluya!
Bongani uSimakade, nibize igama lakhe, izenzo zakhe nizazise phakathi kwabantu.
Mhlabeleleleni, nimhubele, nikhulume ngazo zonke izimangaliso zakhe.
Dumisani igama lakhe elingcwele, mazithokoze izinhliziyo zabafuna uSimakade.
Mfuneni uSimakade namandla akhe, nifunisise ubuso bakhe njalonjalo.
Khumbulani izimangaliso zakhe azenzileyo, nezibonakaliso zakhe, nezehlulelo zomlomo wakhe,
nina bozalo luka-Abhrahama, inceku yakhe, nina bantwana bakaJakobe, abakhethiweyo bakhe.
Yena unguSimakade uNkulunkulu wethu, izehlulelo zakhe zisemhlabeni wonke.
Kuyoze kube phakade esikhumbula isivumelwano sakhe, izwi ayala ngalo izizukulwane ngezizukulwane,
avumelana ngaso no-Abhrahama, nesifungo asenza ku-Isaka,
wasiqinisa kuJakobe, saba ngumthetho naku-Israyeli saba yisivumelwano esiphakade.
Wathi: “Ngizokunika iKhanani, libe yisabelo sefa lakho.”
Ngaleso sikhathi babeyingcosana ngenani, yebo, babeseyingcosana, futhi babengabafokazi kulo.
Bazulazula ezizweni ngezizwe, besuka kulo mbuso, beya kwabanye abantu.
Akavumelanga muntu ukubahlupha, wajezisa amakhosi ngenxa yabo,
ethi: “Ningabathinti abagcotshiweyo bami, ningabalimazi abaphrofethi bami.”
Lapho ethumela indlala ezweni, kwavaleka umthombo wokudla.
Wathumela indoda, yabendulela, uJosefa owathengiswa waba yisigqila,
balimaza izinyawo zakhe ngamaketanga, waboshwa ngensimbi.
Kwaze kwaba yisikhathi elagcwaliseka ngaso izwi lakhe, izwi likaSimakade lamhola.
Inkosi yathumela, yamkhulula, umbusi wabantu wamdedela.
Wamenza umphathi wendlu yakhe, nenduna yezinto zakhe zonke,
ukuze abophe izikhulu zakhe ngokuthanda kwakhe, afundise amalunga akhe ukuhlakanipha.
U-Israyeli wayesefika eGibhithe, uJakobe wagogobala ezweni likaHamu.
USimakade wabenza banda kakhulu abantu bakhe, wabenza baba namandla kunezitha zabo.
Wayiguqula inhliziyo yabantu baseGibhithe, babazonda abantu bakhe, baziphatha ngobuqili izinceku zakhe.
Wathumela uMose inceku yakhe, no-Aroni ayemkhethile.
Benza izibonakaliso nezimangaliso zakhe phakathi kwabo, ezweni likaHamu.
Wabehlisela ngobumnyama, kwaba mnyama ezweni, kepha baphambana namazwi akhe.
Waphendula amanzi abo aba yigazi, wabhubhisa izinhlanzi zabo.
Izwe labo lagcwala amasele nasezindlini zamakhosi abo.
Wakhuluma, kwavela izibawu nomiyane emingceleni yabo yonke.
Wabanika isichotho saba yimvula yabo, amalangabi omlilo ezweni lakubo.
Washaya nemivini yabo nemikhiwane yabo, waphula imithi yasezweni labo.
Wakhuluma, kwavela isikhonyane nezinkumbi ezingenakubalwa.
Zona zadla imifino yonke yezwe lakubo, zaqothula nezithelo zomhlabathi wabo.
Washaya namazibulo wonke ezweni lakubo, okokuqala kwamandla abo.
Abantu bakhe wayesebakhipha benesiliva negolide, kungekho ontengezelayo emindenini yakubo.
IGibhithe lajabula ekuphumeni kwabo, ngokuba ukwesaba kwabehlela.
Wendlala ifu lokubasibekela, nomlilo wokubakhanyisela ebusuku.
Bacela, waletha izigwaca, wabasuthisa ngesinkwa sasezulwini.
Wavula idwala, kwampompoza amanzi, agobhoza ogwadule kwangathi ngumfula.
USimakade walikhumbula izwi lakhe elingcwele no-Abhrahama, inceku yakhe.
Wayesebakhipha abantu bakhe bethokozile, abakhethiweyo bakhe bahuba ngokwethaba.
Wabapha amazwe abezizwe, badla umcebo wabezizwe,
ukuze baqaphele ukugcina izimiso zakhe nemithetho yakhe. Haleluya!
Haleluya! Bongani uSimakade ngokuba muhle, ngokuba umusa wakhe umi phakade.
Ngubani ongalanda ngezenzo zamandla kaSimakade, ezwakalise lonke udumo lwakhe na?
Babusisiwe abagcina ubulungiswa, abenza ukulunga ngezikhathi zonke.
Ngikhumbule, Simakade, lapho wenzela abantu bakho umusa, ungihambele ngensindiso yakho,
ukuze ngibone impumelelo yabakhethiweyo bakho, ngithokoze ngentokozo yesizwe sakho, ngizibonge kanye nefa lakho.
Thina nokhokho bethu sonile, senze okubi, sikhohlakele.
Okhokho bethu beseseGibhithe abaziqondanga izibonakaliso zakho, ababukhumbulanga ubuningi bezenzo zakho zomusa, bakuhlubuka bengasolwandle, oLwandle Lomhlanga.
Nokho wabasindisa ngenxa yegama lakhe, ukuze abonakalise amandla akhe.
Wakhuza uLwandle Lomhlanga, lwasha, wabaholela ekujuleni njengasehlane.
Wabasindisa esandleni sababazondayo, wabakhulula esandleni sesitha.
Amanzi azisibekela izitha zabo, akwaze kwasala nesisodwa kuzo.
Base bewakholwa amazwi akhe, bahlabelela ngodumo lwakhe.
Kepha basheshe bayikhohlwa imisebenzi yakhe, ababe besasilandela iseluleko sakhe.
Baba nenkwankwa nokuhaha ehlane, bamlinga uNkulunkulu kwahlongasibi.
Wabanika abakufisayo, kodwa wabathumela ngesifo esincunzayo.
Baba nomona ngoMose ekamu, nango-Aroni ongcwele kaSimakade.
Umhlaba wavuleka, wamgwinya uDathani, wagqiba iviyo lika-Abhiramu.
Iviyo labo lathungelwa ngomlilo, ilangabi labashisa labaqeda ababi.
Babumba ithole eHorebhe, bakhuleka kuso isithombe esibunjiweyo.
Baguqula inkazimulo kaNkulunkulu, bayifanisa nenkabi edla utshani.
Bakhohlwa nguNkulunkulu, uMsindisi wabo, owayenze izinto ezinkulu eGibhithe,
izimangaliso ezweni lika-Hamu, nokwesabekayo ngasoLwandle Lomhlanga.
Wayesethe uzobabhubhisa, ukuba uMose okhethiweyo wakhe, akemanga phambi kwakhe wabakhulumela, ukuze adambise intukuthelo yakhe, funa ababhubhise.
Badelela izwe elihle, babengakholwa yizwi lakhe.
Bakhononda besemathendeni abo; abaze balihlonipha izwi likaSimakade.
Ngakho-ke waphakamisa isandla sakhe, wafunga kubo ukuthi uzobabhubhisa ehlane,
izizukulwane zabo azisakaze phakathi kwabezizwe, abahlakazele emazweni.
Bazihlanganisa noBhali Pheyori, badla okuhlatshelwe abafileyo.
Bamchukuluza ngezenzo zabo, kwaqubuka ubhubhane phakathi kwabo.
UFinehasi wasukuma, wabanxusela, lwase luphela ubhubhane,
lokho kwase kubalelwa kuye kuba ngukulunga ezizukulwaneni ngezizukulwane kuze kube phakade.
Bamthukuthelisa uSimakade bengasemanzini eMeribha, lokho kwaba kubi kuMose ngenxa yabo.
Ngokuba bawukhuba umoya wakhe, waze wakhuluma amagama aqinile.
Abazibhubhisanga izizwe njengalokhu uSimakade ayebayalile,
bazihlanganisa nabezizwe, bafunda ukugila imikhuba yabo.
Bakhonza izithombe ezibaziweyo zabezizwe, ezaphenduka zaba wugibe kubo.
Amadodana namadodakazi abo bawahlabela amademoni.
Bachitha igazi elingenacala, igazi lamadodana abo namadodakazi abo, abawahlabela izithombe zaseKhanani; izwe langcoliswa yigazi.
Ngenxa yezenzo zabo baba ngabangcolileyo, baphinga ngezenzo zabo.
Intukuthelo kaSimakade yabavuthela abantu bakhe, ifa lakhe laba yisinengiso kuye.
Wabanikela esandleni sabezizwe, babusiswa ngababazondayo.
Izitha zabo zabacindezela, bathotshiswa phansi kwesandla sazo.
Kaningi wabahlenga, kodwa bahlubuka ngezinhloso zabo, baqunjwa phansi yiziphambeko zabo.
Noma kunjalo, wakunaka ukuhlupheka kwabo, ngesikhathi ezwa ukukhala kwabo.
Ngenxa yabo wasikhumbula isivumelwano sakhe, wabaphendula ngokobuningi bomusa wakhe.
Wenza ukuthi bonke ababebathumbile babazwele.
Sisindise, Simakade Nkulunkulu wethu, siqoqe kwabezizwe ukuze silidumise igama lakho elingcwele, sikudumise ngentokozo.
Makabongwe uSimakade uNkulunkulu ka-Israyeli, kusukela phakade kuze kube phakade. Abantu bonke mabathi: “Amen.” Haleluya!
Bongani uSimakade ngokuba muhle, umusa wakhe umi ingunaphakade.
Abahlengiweyo bakaSimakade mabasho njalo, labo abahlenge esandleni sesitha,
wabaqoqa emazweni, kusukela empumalanga, entshonalanga, enyakatho, nasolwandle.
Bazulazula ehlane, abaze bayithola indlela yokuya emzini ababezohlala kuwo.
Belambile futhi bomile, imiphefumulo yabo yaphelelwa ngamandla.
Base bekhala kuSimakade ekuhluphekeni kwabo, wayesebakhulula ezinsizini zabo.
Wabahola ngendlela eqondileyo ukuze baye emzini ababezohlala kuwo.
Mabambonge uSimakade ngomusa wakhe nangezimangaliso zakhe kubantwana babantu.
Ngokuba Yena usuthise umphefumulo olangazelelayo, nenhliziyo elambileyo wayigcwalisa ngokuhle.
Labo ababehlezi ebumnyameni nasethunzini lokufa, bekhungethwe wusizi nenhlupheko,
ngokuba baphambana namazwi kaNkulunkulu, basidelela iseluleko soPhezukonke.
Inhliziyo yabo wayithobisa ngokuhlupheka, bawa, kepha akubanga bikho obasizayo.
Ekuhluphekeni kwabo bakhala kuSimakade, Yena wabakhulula ezinsizini zabo.
Wabakhipha ebumnyameni nasethunzini lokufa, wagqabula izibopho zabo.
Mabambonge uSimakade ngomusa wakhe nangezimangaliso zakhe kubantwana babantu.
Ngokuba wephule amasango ethusi, wanquma imigoqo yensimbi.
Babe yiziwula ngenxa yeziphambeko zabo nangenxa yobubi babo, bahlushwa.
Inhliziyo yabo yenyanya konke ukudla, basondela emasangweni okufa.
Base bekhala kuSimakade ekuhluphekeni kwabo, wayesebakhulula ezinsizini zabo.
Wathumela izwi lakhe, wabaphilisa, wabahlenga emathuneni abo.
Mabambonge uSimakade ngomusa wakhe, nangezimangaliso zakhe kubantwana babantu.
Mabanikele iminikelo yokubonga, balande imisebenzi yakhe ngokwethaba.
Abanye behlela olwandle ngemikhumbi, bahwebelana emanzini amaningi.
Labo bayibona imisebenzi kaSimakade nezimangaliso zakhe ekujuleni,
ngokuba wakhuluma, wavusa umoya wesiphepho owaphakamisa amadlambi olwandle.
Bakhuphukela emazulwini, babuye behlela ezinzulwini zolwandle, umphefumulo wadangala ngenxa yosizi.
Bayendayenda, bantengezela njengodakiweyo, konke ukuhlakanipha kwabo kwaphela nya.
Base bekhala kuSimakade ekuhluphekeni kwabo, wayesebakhulula ezinsizini zabo.
Wathulisa isiphepho, kwathula du, kwathula namadlambi olwandle.
Base bethokoza, ngokuba kwaba ngukuthula, wabaholela ethekwini lokufisa kwabo.
Mabambonge uSimakade ngomusa wakhe nangezimangaliso zakhe kubantwana babantu.
Mabamphakamise ebandleni labantu, bamdumise emhlanganweni wamalunga.
Imifula wayiphendula ihlane, nemithombo yamanzi, isigagadu,
nezwe elivundileyo laba wugwadule lukasawoti ngenxa yobubi yababehleli kulo.
Ihlane waliphendula amachibi amanzi, nomhlabathi owomileyo, imithombo yamanzi.
Wabahlalisa khona abalambileyo, bakha khona umuzi, bahlala kuwo.
Balima amasimu, batshala isivini, kwabathelela izithelo.
Wababusisa, banda kakhulu, akaze ayinciphisa imfuyo yabo.
Babuye bancipha, bathotshiswa ngokucindezelwa, ngezinkathazo nangosizi.
Izikhulu wazithela ngendelelo, wabazulazulisa ehlane kungenandlela.
Kepha owentulayo, wamtakula osizini, imindeni yabo wayenza yaba njengomhlambi.
Olungileyo uyokubona lokho, ajabule, bonke ububi buvale imilomo yabo.
Ngubani ohlakaniphileyo na? Makakuqaphelisise lokhu; bawuqonde umusa kaSimakade.
Inhliziyo yami yethabile, Nkulunkulu, ngizohlabelela, ngihube ngakho konke okwami.
Vukani, lugubhu nehabhu! Ngizakuvusa ukusa.
Simakade ngizokubonga phakathi kwabantu, ngikudumise phakathi kwezizwe,
ngokuba umusa wakho mkhulu phezu kwamazulu, ukwethembeka kwakho kufinyelela emafini.
Phakama Nkulunkulu, phezu kwamazulu! Mayibe phezu komhlaba wonke inkazimulo yakho.
Abathandekayo bakho mabakhululwe, sindisa ngesandla sakho sokunene, ungiphendule.
UNkulunkulu ukhulumile ebungcweleni bakhe, wathi: “Ngiyakwethaba, ngiyakulidabula iShekhemi, ngisilinganise isigodi iSukhothi.
Ngowami uGileyadi, ngowami uManase, u-Efrayimi uyisivikelo sekhanda lami, uJuda uyintonga yami yokubusa.
UMowabi uyisitsha sami sokugezela; phezu kuka-Edomi ngiphonsa isicathulo sami; phezu kweFilistiya, ngimemeza ngokunqoba.”
Ngubani oyakungiyisa emzini oyinqaba na? Ngubani oyakungiholela kwa-Edomi na?
Akunguwe yini Nkulunkulu osilahlileyo na? Nkulunkulu, awusaphumi nezimpi zethu.
Siphe ukuba sisizakale ekuhluphekeni, ngokuba ukusiza komuntu kuyize.
NgoNkulunkulu siyakwenza izenzo zamandla, Yena uyofihliza izitha zethu.
Ungathuli, Nkulunkulu wokubonga kwami.
Ngokuba umlomo womubi nomlomo wenkohliso kumelene nami, kuqamba amanga ngami.
Bangizungeza ngamazwi enzondo, balwa nami kungekho sizathu.
Ngenxa yothando lwami bayangizonda, mina ngisemkhulekweni njalo.
Bangibuyisele okubi ngokuhle, nenzondo ngothando lwami.
Beka isikhohlakali phezu kwakhe, makume omelene naye ngasesandleni sakhe sokunene.
Ekwehlulelweni kwakhe makalahlwe yicala, umkhuleko wakhe mawube yisono.
Mazibe yingcosana izinsuku zakhe, isikhundla sakhe sithathwe ngomunye.
Abantwana bakhe babe yizintandane, umkakhe abe ngumfelokazi.
Abantwana bakhe mababe yizintandane, baphanze, bacele bekude nezindawo zabo eseziyincithakalo.
Umtshelekisi makakubambe konke anakho, abafokazi baphange izithelo zomsebenzi wakhe.
Makungabi bikho omenzela umusa, futhi kungabi bikho ohawukela izintandane zakhe.
Abozalo lwakhe mababhujiswe, lesulwe igama labo esizukulwaneni esisazolandela.
Ububi bokhokho bakhe mabukhumbuleke kuSimakade, masingesulwa isono sikanina.
Mabahlale bephambi kukaSimakade njalo, ukuze akuqede ukukhunjulwa kwabo emhlabeni.
Kungoba wayengakhumbuli ukwenza umusa, kodwa ezingela umuntu owentulayo, ompofu nodabukileyo enhliziyweni, ukuba ababulale.
Ethanda ukuqalekisa, ngakho isiqalekiso sehlela phezu kwakhe, engathokozi ngesibusiso, isibusiso saba kude naye.
Wagqoka isiqalekiso njengengubo, sangena ezibilini zakhe njengamanzi, nasemathanjeni akhe njengamafutha.
Lokhu makube kuye njengengubo ayigqokayo, nebhande azibopha ngalo njalo.
Lokhu makube ngumvuzo wezitha ovela kuSimakade, nowabakhuluma kabi ngomphefumulo wami.
Kepha Wena Simakade, Nkosi yami, ngiphathe ngomusa ngenxa yegama lakho, njengokuba umusa wakho ulungile, ngisindise.
Ngokuba ngingompofu nontulayo, inhliziyo yami ilimele.
Njengethunzi eselilide ngiyashabalala, ngipheshulwa njengesikhonyane.
Amadolo ami ayaxega ngenxa yokuzila ukudla, nomzimba wami awusanonophele.
Ngibe yisethuko sabo, bangibheka qede banikine amakhanda.
Ngisize, Simakade Nkulunkulu wami, ngisindise ngokomusa wakho,
ukuze bazi ukuthi lokhu kuyisandla sakho, nguWena Simakade okwenzileyo.
Mabaqalekise, kodwa Wena ubusise, lapho bevuka, mabathelwe ngehlazo, kodwa inceku yakho ithokoze.
Abamelene nami mabembeswe amahloni, bagqoke ukujabha njengesembatho.
USimakade ngiyombonga ngomlomo wami, ngimdumise esixukwini.
Ngokuba umi kwesokunene sontulayo, ukuze amsindise kulabo abasongela umphefumulo wakhe.
USimakade wathi eNkosini yami: “Hlala ngakwesokunene sami, ngize ngenze izitha zakho zibe yisenabelo sezinyawo zakho.”
USimakade eseZiyoni uyakuyelula intonga yamandla akho, Wena busa phakathi kwezitha zakho.
Abantu bakho bayokuza kuwe, behlobe ngemvunulo engcwele, bayovela njengombethe entathakusa.
USimakade akayukuguquka, ufunge wagomela wathi: “Wena ungumphrofethi kuze kube phakade ngokukaMelkhizedeki.”
INkosi ingakwesokunene sakho, iyakuchoboza amakhosi ngosuku lwentukuthelo yayo.
Iyakwehlulela phakathi kwabezizwe, kugcwale izidumbu, ichoboze amakhanda ezizweni eziningi.
Iyakuphuza emfuleni ngasendleleni, ngalokho-ke iyakunqoba.
Makadunyiswe uSimakade! Ngiyakumbonga uSimakade ngenhliziyo yami yonke enhlanganweni nasebandleni labaqotho.
Mikhulu imisebenzi kaSimakade, bazindla ngayo bonke abayithokozelayo.
Ugcwele udumo nobukhosi umsebenzi wakhe, nokulunga kwakhe kumi phakade.
Wenze ukuba izimangaliso zakhe zikhunjulwe, uSimakade unomusa nobubele.
Abamesabayo ubapha ukudla, isivumelwano sakhe usikhumbula njalo.
Abantu bakhe ubabonise amandla emisebenzi yakhe, ngokubapha ifa labezizwe.
Imisebenzi yezandla zakhe yethembekile, futhi ilungile, yonke imithetho yakhe iqinisekile,
imiswe ngeqiniso nangobuqotho, ukuba ime ingunaphakade.
Wathumela ukuhlengwa kubantu bakhe, wamisa isivumelwano sakhe kuze kube phakade. IGama lakhe lingcwele, futhi liyesabeka.
Ukumesaba uSimakade kungukuqala kokuhlakanipha, banengqondo ehluzekile bonke abenza lokho. Udumo lwakhe lumi kuze kube phakade.
Haleluya! Ubusisiswe umuntu owesaba uSimakade, othokoza kakhulu ngemiyalelo yakhe.
Abozalo lwakhe bayakuba namandla emhlabeni, isizukulwane sabaqotho siyakubusiswa.
Ingcebo nemfuyo kusendlini yakhe, ukulunga kwakhe kumi phakade.
Ukukhanya kuyovela ebumnyameni kwabalungileyo: Yena unomusa, nobubele nokulunga.
Umuntu omuhle unomusa, uyatshelekisa, izindaba zakhe uzisingatha ngobulungiswa.
Akayukunyakaziswa kuze kube phakade, olungileyo uyohlala ekhunjulwa kuze kube phakade.
Akayesabi imibiko emibi, inhliziyo yakhe ayiguquki, yethemba uSimakade.
Inhliziyo yakhe yesekelwe, akesabi, aze abone izitha zakhe zinqotshwa.
Ubapha ngesihle abantulayo, ukulunga kwakhe kumi kuze kube phakade, amandla akhe ayophakama ngodumo.
Isikhohlakali siyokubona lokho, sicasuke, siququde imihlathi, sidangale; isifiso sababi siyobhuntsha.
Haleluya! Mdumiseni uSimakade zinceku zakhe, dumisani igama likaSimakade.
Malibongwe igama likaSimakade, kusukela manje, kuze kube phakade.
Malidunyiswe igama likaSimakade, kusukela ekuphumeni kwelanga, lize liyoshona.
USimakade uphakeme phezu kwezizwe zonke, inkazimulo yakhe iphezu kwamazulu.
Ngubani onjengoSimakade uNkulunkulu wethu, ohleli phezulu,
ozithobayo, abone ezulwini nasemhlabeni na?
Uvusa ontulayo othulini, amphakamise ompofu ezaleni,
amhlalise nezikhulu, iziphathimandla zabantu bakhe.
Inyumba uyayipha ukuphatha umuzi, ibe ngunina othokozayo wabantwana. Haleluya!
Ngesikhathi u-Israyeli ephuma eGibhithe, indlu kaJakobe iphuma kubantu ababekhuluma olunye ulimi,
uJuda waba yindlu kaSimakade engcwele, u-Israyeli waba ngumbuso wakhe.
Ulwandle lwakubona, lwabaleka, iJordani labuyiselwa emuva.
Izintaba zatshekula njengezinqama, amagquma, njengamawundlu.
Unani wena lulwandle ukuba ubaleke, nawe Jordani ukuba ubuyiselwe emuva na?
Ninani zintaba ukuba nitshekule njengezinqama, nani magquma, njengamawundlu na?
Thuthumela, mhlaba, phambi kweNkosi, phambi kukaNkulunkulu kaJakobe.
Yena ophendula idwala libe yichibi lamanzi, insengetsha, ibe ngumthombo wamanzi.
Ayingabi kithina Simakade, ayingabi kithina, kodwa yinike igama lakho inkazimulo, ngenxa yomusa wakho neqiniso lakho.
Kungani abezizwe bethi: “Uphi manje uNkulunkulu wabo na?”
UNkulunkulu wethu usezulwini, wenza konke ngokuthanda kwakhe.
Izithombe zabo ziyisiliva negolide, umsebenzi wezandla zomuntu.
Umlomo zinawo, kepha azikhulumi, amehlo zinawo, kepha aziboni.
Izindlebe zinazo, kepha azizwa, zinamakhala, kepha azihogeli.
Zinezandla, kepha aziphathi, zinezinyawo, kepha azihambi, azenzi msindo ngemiphimbo yazo.
Abazenzayo bayafana nazo, bonke abazethembayo.
Israyeli, themba kuSimakade, Yena ulusizo lwabo nesihlangu sabo.
Wena ndlu ka-Aroni, themba kuSimakade, Yena ulusizo lwabo nesihlangu sabo.
Nina enesaba uSimakade thembelani kuSimakade, Yena ulusizo lwabo nesihlangu sabo.
USimakade usikhumbulile, uzosibusisa, abusise indlu ka-Israyeli, abusise indlu ka-Aroni.
USimakade uzobabusisa abamesabayo, abancane nabadala.
USimakade makanandise, nina nabantwana benu.
Manibe ngababusisiweyo bakaSimakade, uMdali wezulu nomhlaba.
Izulu lingelikaSimakade, kepha umhlaba wawabela abantwana babantu.
Abafileyo abamdumisi uSimakade, namunye wabo asebehlele endaweni yabafileyo.
Kepha thina sizombonga uSimakade kusukela manje kuze kube phakade, Haleluya!
Ngiyamthanda uSimakade, ngokuba uyalizwa izwi lokukhuleka kwami.
Ngokuba ubeke indlebe yakhe kimi, ngizokhuleka kuye ngisaphila.
Izintambo zokufa zingithandele, nobuhlungu bendawo yabafileyo bungibambile, ngibhekene nosizi nezinhlupheko.
Ngase ngibiza igama likaSimakade, ngathi: “Ngiyakuncenga, Simakade, hlenga umphefumulo wami.”
USimakade unomusa, ulungile, uNkulunkulu wethu unobubele.
USimakade uyamvikela ongenakuzisiza; lapho ngithotshisiwe, Yena wangisindisa.
Buyela endaweni yakho yokuphumula, mphefumulo wami, ngokuba uSimakade ukuphathe ngomusa.
Impela uwuhlengile umphefumulo wami ekufeni, namehlo ami, ezinyembezini, nezinyawo zami, ekukhubekeni.
Ngizohamba phambi kukaSimakade ezweni labaphilayo.
Ngiyakholwa, yingakho ngathi: “Ngihlushwe ngokweqile.”
Ngisosizini, ngathi: “Bonke abantu banamanga.”
Ngiyakumnikani uSimakade ngazo zonke izenzo zakhe ezinhle angenzele zona na?
Ngiyophakamisa indebe yensindiso, ngilibize igama likaSimakade.
Ngiyakufeza izithembiso zami kuSimakade, yebo, naphambi kwabo bonke abantu bakhe.
Kuyigugu emehlweni kaSimakade, ukufa kwabangcwele bakhe.
Impela ngiyinceku yakho Simakade, ngiyinceku yakho, indodana yencekukazi yakho, uzikhumulile izintambo zami.
Ngiyakunikela kuwe umnikelo wokubonga, ngibize igama likaSimakade.
Ngiyakufeza izithembiso zami kuSimakade, yebo, naphambi kwabo bonke abantu bakhe,
emagcekeni endlu kaSimakade, phakathi kwakho, Jerusalema. Haleluya!
Dumisani uSimakade nina bezizwe zonke, nimbabaze, nina bantu bonke.
Ngokuba umusa wakhe kithina mkhulu, iqiniso likaSimakade limi ingunaphakade. Haleluya!
Bongani uSimakade ngokuba muhle, ngokuba umusa wakhe umi phakade.
Makathi u-Israyeli: “Yebo, umusa wakhe umi phakade.”
Mayithi indlu ka-Aroni: “Yebo, umusa wakhe umi phakade.”
Mabathi abamesabayo uSimakade: “Yebo, umusa wakhe umi phakade.”
Osizini lwami ngakhuleka kuSimakade, uSimakade wangiphendula, wangihola endaweni ebanzi.
USimakade ungakimi, angiyukwesaba, umuntu angangenzani na?
USimakade ungakimi ekanye nabangisizayo, ngalokho ngiyakubabuka bephansi abangizondayo.
Kuhle ukuphephela kuSimakade kunokwethemba umuntu.
Kuhle ukuphephela kuSimakade, kunokwethemba izikhulu.
Zonke izizwe zingizungezile, egameni likaSimakade ngizozibhubhisa.
Zingiphahlile, yebo, zingizungezile; egameni likaSimakade ngizozibhubhisa.
Zingibunganyele njengezinyosi, zizocinywa njengomlilo wameva; egameni likaSimakade ngizozibhubhisa.
Ungihlohlolozile ukuze ngiwe, kodwa uSimakade uyangisiza.
USimakade ungamandla ami, nesihlabelelo sami, ube yinsindiso yami.
Izwi lokwethaba nelokusindiswa lisemathendeni abaqotho, isandla sokunene sikaSimakade sigile izimanga.
Esokunene sikaSimakade siphakeme, esokunene sikaSimakade sisebenza ngamandla.
Angizukufa; ngizophila, ngishumayele ngemisebenzi kaSimakade.
USimakade wangijezisa kanzima, kodwa akanginikelanga ekufeni.
Ngivuleleni amasango okulunga, ngingene ngawo, ngimdumise uSimakade.
Yileli isango likaSimakade, olungileyo uyakungena ngalo.
Ngiyakukudumisa, ngokuba ungizwile, ube yinsindiso yami.
Itshe abalinqabayo abakhi, selaba yinhloko yegumbi.
Lona lavela kuSimakade, liyisimangaliso emehlweni ethu.
Yilolu usuku alwenzileyo uSimakade, siyakwethaba, sithokoze ngalo.
Sindisa, Simakade, ngiyakuncenga! Hlahlamelisa, Simakade, ngiyakucela!
Makabusiswe ozayo egameni likaSimakade, siyanibusisa sisendlini kaSimakade.
USimakade unguNkulunkulu, usikhanyisele, hlobisani umkhosi ngamahlamvu, kuze kube sezimpondweni ze-althare.
Wena unguNkulunkulu wami, ngiyakubonga, Nkulunkulu wami, ngiyakuphakamisa.
Bongani uSimakade, ngokuba muhle, ngokuba umusa wakhe umi phakade.
Babusisiwe abandlela iqotho, abahamba ngomthetho kaSimakade.
Babusisiwe abagcina imiyalo yakhe, abamfuna ngenhlizyo epheleleyo,
abangakwenzi okungalungile, kodwa abahamba ezindleleni zakhe.
Uyalile ukuba izimiso zakho zigcinwe impela.
Sengathi izindlela zami zingagxila ekugcineni izimiso zakho;
khona ngingeyukujabha, lapho ngihlonipha yonke imiyalelo yakho.
Ngizakukubonga ngenhliziyo eqotho, lapho ngifunda izehlulelo zakho ezilungileyo.
Ngizozigcina izimiso zakho; uze ungangishiyi.
Omusha angayigcina kanjani indlela yakhe ihlanzekile na? Ngokugcina okwezwi lakho.
Ngikufunile ngenhliziyo yami yonke, mangingaphambuki emiyalweni yakho.
Enhliziyweni yami ngiyalilonda izwi lakho, ukuze ngingoni kuwe.
Mawubongwe Wena Simakade, ungifundise izimiso zakho.
Ngomlomo wami ngimemezele zonke izehlulelo zomlomo wakho.
Ngithokoza ngendlela yobufakazi bakho kungathi ngethabela ingcebo.
Ngizozindla ngeziyalezo zakho, ngizihloniphe izindlela zakho.
Ngizothokoza ngezimiso zakho; angiyukulikhohlwa izwi lakho.
Yenzele okuhle inceku yakho, ukuze ngiphile, ngigcine izwi lakho.
Vula amehlo ami ukuba ngibone izimangaliso ezisemthethweni wakho.
Ngingumfokazi emhlabeni, ungangifihleli imiyalo yakho.
Umphefumulo wami waphukile, ngokuba ngihlala ngilangazelela izehlulelo zakho.
Uyabakhuza abazidlayo, abaqalekisiweyo, abaduka emiyalweni yakho.
Susa kimi inhlamba nokweyiswa, ngokuba ngibugcinile ubufakazi bakho.
Noma izikhulu zihlala zikhuluma ngami; inceku yakho izindla ngezimiso zakho.
Ubufakazi bakho buyintokozo yami, bungumeluleki wami.
Umphefumulo wami unamathela othulini; ngiphilise ngokwezwi lakho.
Ngimemezele izindlela zami, Wena wangizwa; ngifundise izimiso zakho.
Ngiqondise indlela yeziyalezo zakho ukuba ngikhulume ngezimangaliso zakho.
Umphefumulo wami uyakhala ngenxa yosizi; ngiqinise ngokwezwi lakho.
Susa kimi indlela yamanga, ungiphe ngomusa umthetho wakho.
Ngiyikhethile indlela yeqiniso; izehlulelo zakho ngizibeke phambi kwami.
Ngibambelele ebufakazini bakho; ungangijabhisi, Simakade.
Ngiyakugijima ngendlela yemiyalo yakho, ngokuba uyakungivumela ukuba ngenze kanjalo.
Simakade, ngikhombise indlela yezimiso zakho; ngizoyigcina kuze kube sekugcineni.
Ngiphe ingqondo, ukuze ngiwuqaphele umthetho wakho, ngiwugcine ngenhliziyo yami yonke.
Ngihambise endleleni yemiyalo yakho, ngokuba ngiyathokoza ngayo.
Inhliziyo yami yiguqulele ebufakazini bakho, ukuze ngingafuni nzuzo ngokungalungile.
Phendula amehlo ami angakuboni okuyize, ungiphilise endleleni yakho.
Yigcwalise encekwini yakho inkulumo yakho eyenza ukuba wesatshwe.
Dlulisa kimi inhlamba engiyesabayo, ngokuba izehlulelo zakho zinhle.
Ngilangazelela iziyalezo zakho; ngokulunga kwakho ngiphilise.
Umusa wakho mawuze kimi, Simakade, insindiso yakho ngokwezwi lakho.
Khona ngiyakumphendula ongichukuluzayo, ngokuba ngiyalethemba izwi lakho.
Ungalisusi emlonyeni wami izwi leqiniso, ngokuba ngiyazethemba izehlulelo zakho.
Khona ngiyowugcina njalo umthetho wakho, kuze kube phakade.
Ngizohamba ngenkululeko, ngokuba ngifuna iziyalezo zakho.
Ngizokhuluma ngobufakazi bakho phambi kwamakhosi, ngingajabhi.
Ngiyathokoza ngemiyalo yakho engiyithandayo.
Ngiyakuyihlonipha imiyalo yakho, engiyithandayo, futhi ngizozindla ngezimiso zakho.
Khumbula izwi owalisho encekwini yakho, owangenza ngalo ngaba nethemba.
Lokhu kuyinduduzo ekuhluphekeni kwami, ngokuba izwi lakho lingiphilisile.
Abazidlayo bangihleka usulu kakhulu, kepha emthethweni wakho angichezuki.
Ngiyazikhumbula Simakade, izehlulelo zakho zasendulo; ngiyaduduzeka.
Ukuvutha kolaka kungibambile, ngenxa yezikhohlakali ezilahla umthetho wakho.
Izimiso zakho zaba yizihlabelelo kimi, endlini yokugogobala kwami.
Simakade, ebusuku ngikhumbula igama lakho, ngigcine umthetho wakho.
Lokhu kwaba ngokwami, ngokuba ngizigcinile iziyalezo zakho.
USimakade uyisabelo sami; ngithi amazwi akho ngizowagcina.
Ngincenga umusa wakho ngenhliziyo yami yonke; ngihawukele ngokwezwi lakho.
Ngizindla ngezindlela zami; izinyawo zami ngiziqondisa ebufakazini bakho.
Ngiyashesha, angilibali ukugcina imiyalo yakho.
Nakuba izintambo zezikhohlakali zingithandela, angikhohlwa ngumthetho wakho.
Phakathi kwamabili ngivuka ngikubonge ngenxa yezehlulelo zakho ezilungileyo.
Ngingumngani wabo bonke abakwesabayo, abagcina iziyalezo zakho.
Umhlaba ugcwele umusa wakho, Simakade; ngifundise izimiso zakho.
Simakade, ngokwezwi lakho wayenzela okuhle inceku yakho.
Ngifundise ukwehlulela kahle nokwazi, ngokuba ngiyayikholwa imiyalo yakho.
Ngingakahlupheki ngaduka, kepha manje sengiyaligcina izwi lakho.
Umuhle Wena, futhi wenza okuhle; ngifundise izimiso zakho.
Abazikhukhumezayo bangiqambela amanga; ngizozigcina ngenhliziyo yami yonke iziyalezo zakho.
Inhliziyo yabo ilukhuni, abezwa lutho, kodwa mina ngithokoza ngomthetho wakho.
Kwaba kuhle kimi ukuba ngihlushwe, ukuze ngifunde izimiso zakho.
Umthetho womlomo wakho muhle kunezinkulungwane zegolide nezesiliva.
Ngenziwe yizandla zakho, zangibumba, ngiphe umqondo ukuze ngifunde imiyalo yakho.
Abakwesabayo bayakujabula lapho bengibona, ngokuba ngethemba izwi lakho.
Ngiyazi Simakade, ukuthi izehlulelo zakho zilungile, nokuthi ngokwethembeka wangijezisa.
Umusa wakho mawube yinduduzo encekwini yakho, ngokwezwi lakho.
Ububele bakho mabuze kimi, ukuze ngiphile, ngokuba umthetho wakho uyintokozo yami.
Abazikhukhumezayo mabajabhe, ngokuba bangicindezela ngaphandle kwesizathu; nokho mina ngizozindla ngeziyalezo zakho.
Abakwesabayo nababaziyo ubufakazi bakho mabaphendukele kimi.
Inhliziyo yami mayibe msulwa ezimisweni zakho, ukuze ngingajabhi.
Umphefumulo wami ulangazelela insindiso yakho; ngiyalethemba izwi lakho.
Amehlo ami alangazelela izwi lakho, ngithi: “Uyakungiduduza nini na?”
Noma senginjengemvaba entuthwini, izimiso zakho angizikhohlwa.
Zingaki izinsuku zenceku yakho na? Uyakubehlulela nini abangizingelayo na?
Abaqhoshayo bangimbela imigodi, labo abaphambene nomthetho wakho.
Yonke imiyalo yakho yethembekile, ngihlushwa ngaphandle kwesizathu; ngisize.
Bacishe bangiqeda emhlabeni, kodwa angizishiyanga iziyalezo zakho.
Ngesihawu sakho hlenga impilo yami, ukuze ngibugcine ubufakazi bakho obusho ngomlomo wakho.
Simakade, izwi lakho limi liqinile ezulwini, kuze kube phakade.
Ezizukulwaneni ngezizukulwane ukwethembeka kwakho kukhona; wamisa umhlaba; usemi.
Ngokwezehlulelo zakho kusekhona nanamuhla, ngokuba konke kuyizinceku zakho.
Ukuba umthetho wakho ubungesiyo intokozo yami, ngabe ngibhubhele ekuhluphekeni kwami.
Iziyalezo zakho angiyukuzikhohlwa kuze kube phakade, ngokuba ungiphilisile ngazo.
Ngingowakho, ngisindise, ngokuba ngizifunile iziyalezo zakho.
Izikhohlakali zicuthele ukungibhubhisa, kodwa mina ngigcina ubufakazi bakho.
Ngibonile ukuthi konke kunesiphetho, kodwa umyalo wakho ubanzi kakhulu.
Umthetho wakho ngiwuthanda kakhulu. Ngizindla ngawo usuku lonke.
Ngemiyalo yakho, ngiyahlakanipha kunezitha zami, ngokuba inami kuze kube phakade.
Nginokuqonda okubedlula bonke abangifundisayo, ngokuba ngizindla ngobufakazi bakho.
Ngiqonda ukwedlula izingwevu, ngokuba ngigcina iziyalezo zakho.
Ngiyazinqanda izinyawo zami ezindleleni zonke zokubi, ukuze ngigcine izwi lakho.
Ezehlulelweni zakho, angichezuki, ngokuba Wena uyangifundisa.
Anambitheka kamnandi amazwi akho, adlula uju emlonyeni wami.
Ngeziyalezo zakho ngizuza ukuqonda, ngalokho-ke ngiyazizonda zonke izindlela zamanga.
Izwi lakho liyisibani ezinyaweni zami nokukhanya endleleni yami.
Ngifungile, futhi ngakuqinisekisa ukuthi ngizozigcina izehlulelo zakho ezilungileyo.
Simakade, ngihlupheka kakhulu, ngiphilise ngokwezwi lakho.
Simakade, yamukela iminikelo yesihle yomlomo wami, ungifundise izehlulelo zakho.
Umphefumulo wami usesandleni sami njalo, nokho umthetho wakho angiwukhohlwa.
Izikhohlakali zingicuphile, kepha angichezukanga eziyalezweni zakho.
Ubufakazi bakho buyifa lami laphakade, ngokuba buwukuthokoza kwenhliziyo yami.
Inhliziyo yami ngiyinamathelise ekwenzeni izimiso zakho, kuze kube sekupheleni.
Ngiyabazonda abanhliziyo mbili, kepha umthetho wakho ngiyawuthanda.
Wena uyisiphephelo sami nesihlangu sami; ngiyalethemba izwi lakho.
Sukani kimi, nina enenza okubi, ngokuba mina ngizoyigcina imiyalo kaNkulunkulu wami.
Ngiphase ngokwezwi lakho, ukuze ngiphile, ngingajabhi ngethemba lami.
Ngisekele, ngize ngisindiswe, ukuze ngiqikelele ukugcina izimiso zakho njalo.
Uyabalahla bonke abachezuka ezimisweni zakho, ngokuba ubuqili babo buyize.
Zonke izikhohlakali emhlabeni uzichitha njengamanyela, ngalokho-ke ngiyabuthanda ubufakazi bakho.
Umzimba wami uyathuthumela ngenxa yokukwesaba, ngiyazesaba izehlulelo zakho.
Ngenze ubulungiswa nokulunga; unganginikeli kwabangicindezelayo.
Qinisekisa inhlalakahle yenceku yakho; ungabavumeli abazidlayo bangicindezele.
Amehlo ami alangazelela insindiso yakho nezwi lokulunga kwakho.
Inceku yakho iphathe ngomusa wakho, ungifundise izimiso zakho.
Ngiyinceku yakho; ngiphe ingqondo ukuba ngazi ubufakazi bakho.
Sekuyisikhathi sokuba uSimakade asukume, ngokuba bawuphulile umthetho wakho.
Ngalokho ngiyayithanda imiyalo yakho kunegolide, impela kunegolide elicwengekileyo.
Ngakho-ke ngiyavuma ukuthi imiyalo yakho yonke ilungile; ngiyazizonda zonke izindlela zamanga.
Ubufakazi bakho buyamangalisa, yingakho umphefumulo wami ubugcina.
Ukwambulwa kwamazwi akho kunika ukukhanya, kuyabaqondisa abangenalwazi.
Ngivula umlomo wami, nginelukuluku, ngokuba ngiyayilangazelela imiyalo yakho.
Bheka ngakimi, ube nomusa kimi njengoba wenza kwabathanda iGama lakho.
Izinyathelo zami ziqinise ezwini lakho; mangingabuswa nayinye inkohlakalo.
Ngihlenge ekucindezelweni ngabantu, ukuze ngizigcine iziyalezo zakho.
Yikhanyisele inceku yakho ubuso bakho, ngifundise izimiso zakho.
Kugobhoza imifula yamanzi emehlweni ami, ngokuba abawugcini umthetho wakho.
Wena Simakade ulungile; izehlulelo zakho ziqotho.
Ubufakazi bakho ubuqoke ngokulunga nangokwethembeka okukhulu.
Ukushisekela kwami kungidlile, ngokuba izitha zami zikhohliwe ngamazwi akho.
Izwi lakho lihloliwe kakhulu, yingakho inceku yakho ilithanda.
Ngimncane, ngedelelekile; nokho iziyalezo zakho angizilibali.
Ukulunga kwakho kungukulunga okuphakade; umthetho wakho uyiqiniso.
Ukuhlupheka nosizi kungehlele; imiyalo yakho iyintokozo yami.
Ukulunga kobufakazi bakho kumi ingunaphakade; ngiphe ukuqonda ukuze ngiphile.
Ngizwe Simakade, ngikhala ngenhliziyo yami yonke; ngizozigcina izimiso zakho.
Ngikhala kuwe, ngisindise; ngizobugcina ubufakazi bakho.
Ngivuka ekuseni ngovivi ngikhale; ngiyawethemba amazwi akho.
Ngiqwasha kuze kube kwesikabhadakazi, ukuze ngizindle ngezwi lakho.
Simakade, yizwa izwi lami ngokomusa wakho, ungiphilise ngokwezehlulelo zakho.
Bayasondela abalandela inkohlakalo; bakude nomthetho wakho.
Wena Simakade useduze; imiyalo yakho yonke iyiqiniso.
Kade ngazi kwasemandulo ngobufakazi bakho ukuthi ubusekele kuze kube phakade.
Bheka ukuhlupheka kwami, ungikhulule, ngokuba angiwukhohlwa umthetho wakho.
Mela indaba yami, ungihlenge, ungiphilise ngokwezwi lakho.
Ukusindiswa kukude nezikhohlakali, ngokuba azizifuni izimiso zakho.
Ububele bakho, Simakade, bukhulu; ngiphilise ngokwezehlulelo zakho.
Abangizingelayo nabayizitha zami baningi, kodwa angichezuki emiyalelweni yakho.
Uma ngibona amambuka, ngiyadikibala, ngokuba awaligcini izwi lakho.
Bheka ukuthi ngizithanda kangakanani iziyalezo zakho, Simakade; ngiphilise ngokomusa wakho.
Amazwi akho wonke ayiqiniso; zonke izehlulelo zakho ezilungileyo zimi kuze kube phakade.
Izikhulu zingizingela ngaphandle kwesizathu, kodwa inhliziyo yami yesaba izwi lakho.
Ngiyathokoza ngezwi lakho njengomuntu ejabulela impango eningi.
Amanga ngiyawazonda, futhi ngiyawenyanya, kodwa ngiyawuthanda umthetho wakho.
Kasikhombisa ngosuku, ngiyakudumisa ngezehlulelo zokulunga kwakho.
Abathanda umthetho wakho banokuthula okukhulu; akukho sikhubekiso kubo.
Simakade, ngethemba insindiso yakho, futhi nemiyalo yakho ngiyayigcina.
Umphefumulo wami ugcina ubufakazi bakho; ngibuthanda kakhulu.
Ngigcina iziyalezo zakho nemiyalo yakho, ngokuba izindlela zami zonke ziphambi kwakho.
Ukukhala kwami makufinyelele phambi kwakho, Simakade; ngiqondise ngokwezwi lakho.
Ukunxusa kwami makufinyelele phambi kwakho; ngihlenge ngokwezwi lakho.
Umlomo wami mawuchichime indumiso, ngokuba uyangifundisa izimiso zakho.
Ulimi lwami malukhulume izwi lakho, ngokuba imiyalo yakho yonke ilungile.
Isandla sakho masibe lusizo kimi, ngokuba ngikhethe iziyalezo zakho.
Ngiyayilangazelela insindiso yakho, Simakade; umthetho wakho uyintokozo yami.
Umphefumulo wami mawuphile, ukudumise; izehlulelo zakho mazingisize.
Ngiduka njengemvu elahlekileyo; funa inceku yakho, ngokuba angiyikhohlwa imiyalo yakho.
Ekuhluphekeni kwami ngakhala kuSimakade, wangiphendula.
Simakade, hlenga umphefumulo wami emlonyeni wamanga nasolimini lwenkohliso.
Uyoklonyeliswa ngani, uyokwenezelelwani wena lulimi lwenkohliso na?
Imicibisholo ebukhali yeqhawe namalahle avuthayo omtholo.
Maye kimi! Ngokuba ngigogobele kwaMeshekhi, ngihleli phakathi kwamathende akwaKhedari.
Umphefumulo wami kade wahlala nabazonda ukuthula.
Mina ngingowokuthula, kodwa uma ngikhuluma, bayalwa.
Ngiphakamisela amehlo ami ezintabeni, usizo lwami luyakuvelaphi na?
Usizo lwami luvela kuSimakade, owenzile izulu nomhlaba.
Akayukuluvumela unyawo lwakho lushibilike; okulondayo akozeli.
Impela olonda u-Israyeli akozeli, futhi akalali.
USimakade ungumvikeli wakho, uSimakade ungumthunzi wakho ngasesandleni sakho sokunene.
Ilanga aliyukukushaya emini, nenyanga ebusuku.
USimakade uzokuvikela kukho konke okubi, awugcine umphefumulo wakho.
USimakade uyolondoloza ukuphuma kwakho nokungena kwakho, kusukela manje kuze kube phakade.
Ngajabula lapho bethi kimi: “Masiye endlini kaSimakade.”
Izinyawo zethu sezimi emasangweni akho, Jerusalema,
Jerusalema, wena owakhiwe njengomuzi ohlanganiswe waqina,
lapho imindeni ikhuphukela khona, imindeni kaSimakade, ngokomthetho wakwa-Israyeli, ukuba idumise igama likaSimakade.
Ngokuba izihlalo zokwehlulela zimiswe khona, izihlalo zobukhosi zendlu kaDavide.
Khulekelani ukuthula kweJerusalema: “Abakuthandayo mabaphumelele.
Makube nokuthula phakathi kwezingange zakho, nempumelelo ezigodlweni.”
Ngenxa yabafowethu nabangani bethu ngizothi manje: “Makube khona ukuthula kuwe.”
Ngenxa yendlu kaSimakade uNkulunkulu wethu, ngiyokufunela okuhle.
Ngizowaphakamisela kuwe amehlo ami, Wena ohleli ezulwini.
Njengamehlo ezinceku, ebheke izandla zamakhosi azo, namehlo encekukazi, ebheke isandla senkosikazi yayo, kanjalo nathi amehlo ethu abheke kuSimakade uNkulunkulu wethu, aze abe nomusa kithi.
Sihawukele, Simakade, sihawukele, ngokuba sesikhathele wukwedelelwa.
Umphefumulo wethu sewudinwe kakhulu ngukweyiswa kwabaziqhenyayo nokwedelela kwabazidlayo.
Uma uSimakade ebengenathi, makasho njalo manje u-Israyeli.
Ukuba uSimakade ebengenathi, lapho sivukelwa ngabantu,
ngabe sebesigwinyile, ekuvutheni kolaka lwabo kithina.
Amanzi ngabe asesisibekele, kwadlula isikhukhula phezu komphefumulo wethu,
kwadlula phezu komphefumulo wethu amanzi anamandla.
Makabongwe uSimakade ongasinikelanga ukuba sibe yimpango abayinephuza ngamazinyo abo.
Umphefumulo wethu uphunyuke njengenyoni ogibeni lwabacuphi; ugibe lwaphukile, thina saphunyuka.
Usizo lwethu lusegameni likaSimakade owenzile izulu nomhlaba.
Abamethembayo uSimakade bafana nentaba iZiyoni engenakunyakaziswa, kepha emi phakade.
Njengalokhu izintaba zizungeze iJerusalema, noSimakade ubazungeze kanjalo abantu bakhe kusukela manje kuze kube phakade.
Ngokuba intonga yezikhohlakali ayinakuhlala phezu kwesabelo sabalungileyo, funa abalungileyo benze okungalungile ngezandla zabo.
Simakade, benzele okuhle abalungileyo nabaqotho ezinhliziyweni zabo,
kodwa abaphambukela ezindleleni zabo ezigwegwileyo, uSimakade uzobaxosha kanye nabenza okubi. Ukuthula makube phezu kuka-Israyeli.
Ngesikhathi uSimakade ekhulula uZiyoni, sasifana nabaphuphayo.
Kwaqhuma uhleko, izilimi zethu zahuba ngentokozo; abezizwe base bekhuluma, bethi: “USimakade ubenzele izinto ezinkulu.”
USimakade usenzele izinto ezinkulu, sajabula.
Sikhulule, Simakade, ekuthunjweni kwethu, sibe njengemifula eningizimu.
Abahlwanyela ngezinyembezi bayakuvuna ngokuthokoza.
Lowo ohamba ekhala, ephethe imbewu, uyakubuya ngokuthokoza, ethwele izinyanda zakhe.
Uma uSimakade engayakhi indlu, basebenzela ize abayakhayo; uma uSimakade engawuvikeli umuzi, umlindi wawo uwuqaphelele ize.
Kuyize kini ukuba nivuke ekuseni, nephuze ukuphumula, nidle isinkwa sezinhlupheko, ngokuba uyamupha othandiweyo wakhe esalele.
Bheka, abantwana bayifa elivela kuSimakade, isithelo sesibeletho singumklomelo.
Njengemicibisholo esandleni seqhawe, banjalo abantwana bobusha.
Ibusisiwe indoda emgodla wayo ugcwele bona, abayukujabha lapho bekhuluma nezitha zabo esangweni.
Ubusisiwe wonke umuntu owesaba uSimakade, ohamba ngezindlela zakhe.
Uyakudla okwezikhwepha zakho, ubusiseke, ube nempumelelo.
Umkakho uyakuba njengomvini othelayo emzini wakho, abantwana bakho babe njengezithombo zomnqumo, bahlale bazungeze itafula lakho.
Ngokuba iyobusiswa kanjalo indoda emesabayo uSimakade.
Sengathi uSimakade angakubusisa eseZiyoni, ubone impumelelo yeJerusalema, zonke izinsuku zokuphila kwakho,
ubone abantwana babantwana bakho. Ukuthula makube phezu kuka-Israyeli.
Bangihluphe kakhulu, kusukela ebusheni bami, makasho njalo u-Israyeli.
Bangihlupha kakhulu, kodwa abangehlulanga.
Kwaphambana imivimbo emhlane wami, kwangathi yimisele edatshulwe ngabalimi ensimini.
USimakade ulungile, uzinqumile izintambo zezikhohlakali.
Mabajabhiswe, babuyiselwe emuva bonke abazonda iZiyoni.
Mabafane notshani ophahleni, obubuna bungakakhuli.
Ovunayo akagcwalisi ngabo isandla sakhe, nobopha izinyanda, izingalo zakhe.
Abadlulayo mabathi: “Isibusiso sikaSimakade masibe phezu kwenu; siyanibusisa egameni likaSimakade.”
Ngikhala kuwe Simakade ngiphansi otweni.
Nkosi, yizwa izwi lami; izindlebe zakho mazilalele izwi lokunxusa kwami.
Uma Wena Simakade ungaqaphela iziphambeko, Nkosi, ngubani ongema na?
Kepha ukuthethelela kukuwe, ukuze wesatshwe.
Ngizolindela uSimakade, umphefumulo wami uzolinda, ngiyalethemba izwi lakhe.
Umphefumulo wami ulindela iNkosi kunabalindi abalindela ukusa.
U-Israyeli makethembe uSimakade, ngokuba umusa ukuSimakade, nokukhulula konke kukuye.
Uyomhlenga u-Israyeli kuzona zonke iziphambeko zakhe.
Simakade, inhliziyo yami ayizigabisi, namehlo ami awaziphakamisi, angingeni ezindabeni ezinkulu nasezintweni ezingehlulayo.
Ngiwududuzile, ngawuthulisa umphefumulo wami, njengomntwana elunyulwa ebeleni likanina, unjalo-ke nomphefumulo wami ngaphakathi kimi.
Israyeli, yethemba uSimakade kusukela manje kuze kube phakade.
Khumbula Simakade, ngenxa kaDavide, zonke izinhlupheko zakhe.
Wafunga kuSimakade, wenza isithembiso kuye onguMninimandla kaJokobe, wathi:
“Angiyukungena ethendeni lendlu yami, angiyukugibela embhedeni wami,
angiyukuwanika amehlo ami ubuthongo, nezinkophe zami, ukozela;
ngingakamtholeli uSimakade indawo, indlu yonguMninimandla kaJakobe.”
Sizwile ngakho sise-Efratha, sakuthola emasimini eJari.
“Masingene endlini yakhe, sikhuleke ngasesenabelweni sezinyawo zakhe.
Sukuma, Simakade, uye endaweni yakho yokuphumula, Wena nomphongolo wamandla akho.
Abaphristi bakho mabembeswe ukulunga, abethembekileyo bakho bathokoze.”
Ngenxa yenceku yakho uDavide mawungabufulathelisi ubuso bakho kogcotshiweyo wakho.
USimakade wafunga kuDavide, iqiniso angayukuguquka kulo, wathi: “Ovela okhalo lwakho ngiyombeka esihlalweni sakho sobukhosi.
Uma abantwana bakho besigcina isivumelwano sami nobufakazi bami engiyobafundisa bona, impela abantwana babo bayohlala esihlalweni sakho kuze kube phakade.”
USimakade uqoke iZiyoni, ulithandile ukuba libe yindawo yakhe yokuhlala, wathi:
“Nansi indawo yami yokuphumula kuze kube phakade, ngizohlala kuyo, ngokuba yiMina engiyithandile.
Ngiyakubusisa kakhulu ukudla kwalo, abantulayo ngiyakubasuthisa ngesinkwa.
Abaphristi ngiyobembesa insindiso, abethembekileyo bayohlokoma ngenjabulo.
“Ngiyakuhlumisa uphondo lukaDavide, ogcotshiweyo wami ngimlungisele isibani.
Izitha zalo ngiyozithela ngehlazo, kepha kuye, umqhele wakhe uyokhazimula.”
Bheka, kuhle, kumnandi kangaka ukuba abazalwane bahlalisane ndawonye bemunye.
Kufana namafutha amahle ekhanda, ehlela esilevini, isilevu sika-Aroni, ehlela nasemphethweni wezembatho zakhe.
Kufana namazolo eHermoni ehlela ezintabeni iZiyoni. Ngokuba uSimakade wayaleza khona isibusiso, ukuphila kuze kube phakade.
Bhekani, bongani uSimakade nina nonke zinceku zakhe, enimi endlini kaSimakade ebusuku.
Phakamiselani izandla zenu ngasendaweni engcwele, nibonge uSimakade.
USimakade makakubusise eseZiyoni, Yena owenze izulu nomhlaba.
Haleluya! Dumisani igama likaSimakade; mdumiseni nina zinceku zikaSimakade,
enikhonza endlini yakhe, emagcekeni endlu kaNkulunkulu wethu.
Mdumiseni uSimakade, ngokuba Yena muhle, lihubeleni igama lakhe, ngokuba lihle.
Ngokuba uSimakade uziqokele uJakobe no-Israyeli, ukuba abe yifa lakhe.
Impela ngiyazi ukuthi uSimakade mkhulu, nokuthi iNkosi yethu ingaphezu konkulunkulu bonke.
Noma yini uSimakade ayithandayo uyayenza, ezulwini nasemhlabeni, emanzini nasezinzulwini zonke.
Ukhuphula izinkungu emikhawulweni yomhlaba, enze imibani ibe yimvula, akhiphe umoya ezinqabeni zakhe.
Washaya amazibulo aseGibhithe, awabantu nawezilwane.
Wathumela izibonakaliso nezimangaliso phakathi kwakho, Gibhithe, phezu kukaFaro nezinceku zakhe zonke.
Washaya izizwe ezinkulu, wabulala amakhosi anamandla:
uSihoni, inkosi yama-Amori, u-Ogi, inkosi yaseBhashani, nemibuso yonke eKhanani.
Wathatha izwe labo laba yifa, laba yifa lika-Israyeli, isizwe sakhe.
Simakade, igama lakho limi ingunaphakade. Simakade, ukhunjulwa yizizukulwane ngezizukulwane.
Ngokuba uSimakade uyokwehlulela abantu bakhe, azihawukele izinceku zakhe.
Izithombe zabezizwe ziyisiliva negolide, umsebenzi wezandla zomuntu.
Umlomo zinawo, kepha azikhulumi, amehlo zinawo, kodwa aziboni.
Izindlebe zinazo, kepha azizwa, nomoya awukho emlonyeni wazo.
Abazenzayo bayafana nazo, bonke abazithembayo.
Wena ndlu ka-Israyeli, mbonge uSimakade, wena ndlu ka-Aroni, mbonge uSimakade.
Wena ndlu kaLevi, mbonge uSimakade, nina enimesabayo uSimakade, mbongeni uSimakade.
USimakade makabongwe eZiyoni, yena owakhe eJerusalema. Haleluya!
Bongani uSimakade, ngokuba muhle, ngokuba umusa wakhe umi phakade.
Bongani uNkulunkulu wonkulunkulu, ngokuba umusa wakhe umi phakade.
Bongani iNkosi yamakhosi, ngokuba umusa wayo umi phakade;
yona yodwa eyenza izimangaliso ezinkulu, ngokuba umusa wakhe umi phakade;
owenze izulu ngokuhlakanipha, ngokuba umusa wakhe umi phakade;
owendlale umhlaba phezu kwamanzi, ngokuba umusa wakhe umi phakade;
owenza izinkanyiso ezinkulu, ngokuba umusa wakhe umi phakade;
ilanga ukuba libuse emini, ngokuba umusa wakhe umi phakade;
inyanga nezinkanyezi ukuba kubuse ebusuku, ngokuba umusa wakhe umi phakade;
owabulala amazibulo abaseGibhithe, amazibulo alo, ngokuba umusa wakhe umi phakade;
owamkhipha u-Israyeli phakathi kwabo, ngokuba umusa wakhe umi phakade,
ngesandla esinamandla nangezikhwepha, ngokuba umusa wakhe umi phakade;
owehlukanisa kabili uLwandle Lomhlanga, ngokuba umusa wakhe umi phakade;
owawelisa u-Israyeli phakathi kwalo, ngokuba umusa wakhe umi phakade;
owachitha uFaro nempi yakhe oLwandle Lomhlanga, ngokuba umusa wakhe umi phakade;
owahola abantu bakhe ehlane, ngokuba umusa wakhe umi phakade;
owashaya amakhosi amakhulu, ngokuba umusa wakhe umi phakade;
owabulala amakhosi adumileyo, ngokuba umusa wakhe umi phakade:
uSihoni, inkosi yama-Amori, ngokuba umusa wakhe umi phakade,
no-Ogi, inkosi yaseBhashani, ngokuba umusa wakhe umi phakade;
owabapha izwe labo laba yifa, ngokuba umusa wakhe umi phakade,
laba yifa lika-Israyeli, inceku yakhe, ngokuba umusa wakhe umi phakade;
owasikhumbula sinqotshwe yizitha zethu, ngokuba umusa wakhe umi phakade;
owasikhulula ezitheni zethu, ngokuba umusa wakhe umi phakade;
opha bonke abantu ukudla, ngokuba umusa wakhe umi phakade.
Bongani uNkulunkulu wezulu, ngokuba umusa wakhe umi phakade.
Ngasemifuleni eBhabhele sahlala khona, sakhala, lapho sikhumbula iZiyoni.
Amahabhu ethu sawaphanyeka eminyezaneni eyayilapho.
Ngokuba ababesithumbile bacela ukuba sihlabelele ihubo, nabahluphi bethu bafuna ukujatshuliswa, bethi: “Sihlabeleleleni amanye amahubo aseZiyoni.”
Siyakulihlabelela kanjani ihubo likaSimakade sikwelinye izwe na?
Uma ngikhohlwa wena Jerusalema, isandla sami sokunene masikhohlwe ubuciko baso.
Ulimi lwami malunamathele olwangeni lwami, uma ngingakukhumbuli, uma ngingaphakamisi iJerusalema phezu kwentokozo yami enkulu.
Khumbula, Simakade, usuku lweJerusalema, ngenxa yabakwa-Edomi, abathi: “Dilizani, dilizani, kuze kube sesisekelweni salo.”
Ndodakazi yaseBhabhele, wena oyobhujiswa, ubusisiwe oyophindisela kuwe ngezenzo zakho owazenza kithina.
Ubusisiwe obamba izingane zakho aziphahlaze edwaleni.
Ngiyokubonga ngenhliziyo yami yonke, ngikuhubele phambi konkulunkulu.
Ngiyakukhuleka phambi kwethempeli lakho elingcwele, ngibonge iGama lakho, ngenxa yomusa wakho neqiniso lakho, ngokuba phezu kwakho konke, uphakamisile iGama lakho nezwi lakho.
Ngosuku engakhala ngalo, wangiphendula; waqinisa umoya wami, ngaba namandla.
Wonke amakhosi omhlaba mawakubonge, Simakade, ngokuba ezwile amazwi omlomo wakho.
Mawahlabelele ngezindlela zikaSimakade, ngokuba inkulu inkazimulo kaSimakade.
Nakuba uSimakade ephakeme, uyamnakekela ophansi; ozidlayo umazi ekude.
Noma ngihamba ngikhungethwe ukuhlupheka, uyongilondoloza, uyokwelula isandla sakho ungivikele olakeni lwezitha zami, esokunene sakho singisindise.
USimakade uzoyifeza injongo yakhe ngami. Simakade, umusa wakho umi phakade, ungayishiyi imisebenzi yezandla zakho.
Wena Simakade ungihlolisisile, uyangazi.
Uyakwazi ukuhlala kwami nokuma kwami, uqonda umcabango wami ukude.
Uhlola ukuhamba kwami nokulala kwami, uzazi zonke izindlela zami.
Ngaphambi kokuba ngiphimise izwi ngomlomo wami, Wena Simakade usuke usukwazi konke.
Ungizungeze ngemuva nangaphambili, wabeka isandla sakho phezu kwami.
Ukwazi okunjalo kuyangimangalisa, kuphakeme, anginakufinyelela kukho.
Ngiyakuya kuphi, ngisuke eMoyeni wakho na? Ngiyakubalekelaphi, ngisuke phambi kwakho na?
Uma ngikhuphukela ezulwini, Wena ulapho; uma ngendlala icansi lami endaweni yabafileyo, nangu Wena.
Uma ngithatha amaphiko okusa, ngiye ngihlale emikhawulweni yolwandle,
nalapho isandla sakho siyakungihola, esokunene sakho singibambe.
Uma bengithi: “Ubumnyama mabungehlele, ukukhanya kube ngubusuku kimi,”
ubumnyama bebungayukuba ngubumnyama kuwe, ngokuba ubusuku bebuyakukhanya njengemini, ubumnyama bufane nokukhanya.
NguWena owenza izinso zami, wangiphica ngisesesibelethweni sikamame.
Ngiyakukubonga ngokuba ngenziwa ngokwesabekayo nangokumangalisayo; imisebenzi yakho iyamangalisa, umphefumulo wami ukwazi kahle.
Amathambo ami ayengafihlekile kuwe lapho ngenziwa ekusithekeni, ngibunjwa ezindaweni ezijulileyo zomhlaba.
Amehlo akho angibona ngiseyihlule, zonke izinsuku zami zalotshwa encwadini yakho, zanqunywa, lungakafiki nolulodwa kuzo.
Imicabango yakho, Nkulunkulu, ingamagugu kimi; bukhulu kangaka ubuningi bayo.
Uma bengiyakuyibala, miningi kunesihlabathi; lapho ngivuka, bengiyakuba nawe.
Sengathi ungazibulala izikhohlakali, Nkulunkulu, ngalokho-ke sukani kimi, nina bachithi begazi.
Izitha zakho zikhuluma kabi ngawe, zihlambalaza igama lakho.
Simakade, kanti angibazondi yini abakuzondayo na? Anginengwa yini ngabakuvukelayo na?
Ngiyabazonda ngenzondo epheleleyo, bayizitha kimi.
Ngihlole, Nkulunkulu, uyazi inhliziyo yami; ngilinge, uyazi imicabango yami,
ubone ukuthi kukhona yini okubi ngaphakathi kwami, ungiholele endleleni yaphakade.
Simakade, ngikhulule kumuntu omubi, ungivikele kumuntu oyisidlova.
Baceba okubi emiqondweni yabo, njalo baphehla udweshu.
Ulimi lwabo balulola lukhaliphe njengolwenyoka, isihlungu samabululu siphansi kwezindebe zabo.
Ngivikele ezandleni zomubi, ungilonde kumuntu oyisidlova, oceba ukukhubekisa izinyawo zami.
Abazidlayo bangithukusele ugibe, ngezintambo bendlala inetha, eceleni kwendlela, bangibekela izihibe.
Ngathi kuSimakade: “Wena, unguNkulunkulu wami.” Simakade, yizwa izwi lokunxusa kwami.
Simakade, Nkosi yami, mandla ensindiso yami, uvikela ikhanda lami ngosuku lwempi.
Simakade, ungazivumeli izifiso zezikhohlakali, ungawaphumelelisi amacebo azo, funa zizikhukhumeze.
Abangibunganyele mabasibekelwe ngububi bomlomo wabo.
Amalahle ashisayo mawawele phezu kwabo, mabaphonswe emlilweni nasemigodini ejulileyo, bangabe besavuka.
Umuntu ohlebayo makangavunyelwa asimame emhlabeni, ububi mabusilandele isidlova, sibhujiswe.
Ngiyazi ukuthi uSimakade uyabamela abahluphekayo, abehlulele ngobulungiswa abampofu.
Impela abalungileyo bayolibonga iGama lakho; abaqotho bayohlala phambi kwakho.
Simakade, ngikhala kuwe, phuthuma uze kimi, lalela izwi lami lapho ngikhuleka kuwe.
Umkhuleko wami mawufane nempepho phambi kwakho, nokuphakanyiswa kwezandla zami, njengomnikelo wakusihlwa.
Simakade, bekela umlomo wami umlindi, ugcine umnyango wezindebe zami.
Ungayiphenduleli inhliziyo yami entweni embi ukuba ngenze imisebenzi yenkohlakalo kanye nabantu abenza inkohlakalo, ngingadli izibiliboco zabo.
Olungileyo makangishaye, kungumusa kimi; angisole, kungamafutha ekhanda; ikhanda lami malingawenqabi, ngokuba umkhuleko wami umelane nobubi babo.
Abehluleli babo bayakuphonswa eweni; bayakuzwa ukuthi amazwi ami amnandi.
Njengalokhu umuntu elima, eklaya umhlabathi, amathambo ethu ahlakazekile ngasemlonyeni wendawo yabafileyo.
Amehlo ami akuwe Simakade, Nkosi yami, mina ngiphephela kuwe, uze ungangishiyi ngingenamvikeli.
Ngihlenge ogibeni abangicuphe ngalo, nasezihibeni zabenza okubi.
Ababi mabawele emanetheni abo, mina ngidlule kuwo.
Ngezwi lami ngikhala kuSimakade, ngezwi lami nginxusa uSimakade.
Isikhalo sami ngisithulula phambi kwakhe, ngimtshela ngenhlupheko yami.
Lapho umphefumulo wami udangala, Wena uyayazi indlela yami, endleleni engihamba ngayo, bangithukusele ugibe.
Bheka ngakwesokunene sami, uyabona, akukho namunye onginakekelayo, angisenasiphephelo, akekho osawukhathalela umphefumulo wami.
Ngikhala kuwe Simakade, ngithi: “Wena uyisiphephelo sami nesabelo sami ezweni labaphilayo.”
Kulalele ukukhala kwami, ngokuba ngicindezeleke kakhulu, ungihlenge kwabangizingelayo, ngoba banamandla kunami.
Umphefumulo wami ukhulule ejele, ukuze ngibonge iGama lakho. Abalungileyo bayongizungeza, ngoba uzongiphatha kahle.
Simakade, yizwa umkhuleko wami, ubeke indlebe yakho ekunxuseni kwami. ungiphendule ngokwethembeka kwakho nangokulunga kwakho.
Ungayethwesi cala inceku yakho, ngokuba akukho namunye ophilayo olungile phambi kwakho.
Isitha sizingela umphefumulo wami, impilo yami siyigandaya emhlabathini, singenze ngahlala ebumnyameni njengalabo abafa kudala.
Umoya wami udikibele, inhliziyo yami idangele.
Ngiyazikhumbula izinsuku zasendulo, ngizindla ngemisebenzi yakho yonke, ngicabange ngezenzo zezandla zakho.
Izandla zami ngizelulela kuwe, umphefumulo wami womela Wena njengomhlaba owomileyo.
Simakade, shesha ungiphendule, umphefumulo wami udangele, ungangifihleli ubuso bakho, funa ngifane nabashona egodini.
Mangizwe ububele bakho ekuseni, ngokuba ngethembela kuwe; ngazise indlela engifanele ukuhamba ngayo, ngokuba umphefumulo wami ngiwuphakamisela kuwe.
Ngihlenge ezitheni zami, Simakade, ngicashe kuwe.
Ngifundise ukwenza intando yakho, ngokuba Wena unguNkulunkulu wami, uMoya wakho omuhle mawungihole emhlabathini ohlelembekile.
Simakade, ngiphilise ngenxa yegama lakho, ngokulunga kwakho uwukhiphe umphefumulo wami ekuhluphekeni.
Ngomusa wakho uzishabalalise izitha zami, ubabhubhise bonke abahlupha umphefumulo wami, ngokuba ngiyinceku yakho.
Makabongwe uSimakade, idwala lami, ofundisa izandla zami ukuhlasela, neminwe yami, ukulwa,
umusa wami nenqaba yami, umbhoshongo wami ophakemeyo nomkhululi wami, isihlangu sami, nengiphephela kuye, nothobisa izizwe phansi kwami.
Simakade, uyini umuntu ukuba umazi, nendodana yomuntu ukuba uyikhumbule na?
Umuntu ufana nomoya; izinsuku zakhe zinjengethunzi elidlulayo.
Thobisa amazulu akho, Simakade, wehle, thinta izintaba, zithunqe.
Imibani mayinyazime, ubahlakaze, thumela imicibisholo yakho, ubaphithizise.
Yelulela isandla sakho phezulu, ungikhulule, ungihlenge emanzini amaningi, nasesandleni sabafokazi
abamlomo wabo ukhuluma inkohliso, nesandla sabo sokunene singesokunene samanga.
Ngiyakuhlabelela kuwe Nkulunkulu isihlabelelo esisha, ngogubhu olunezintambo ezilishumi, ngiyakukuhubela.
Nguye opha amakhosi insindiso, osindisa inceku yakhe, uDavide, enkembeni yababi.
Ngikhulule, ungihlenge esandleni sabafokazi abamlomo wabo ukhuluma inkohliso, nesandla sabo sokunene singesokunene samanga.
Makuthi amadodana ethu, ebusheni bawo, afane nezithombo ezikhule kahle, amadodakazi ethu afane nezinsika zamakhona eziqoshelwe ukwakha isigodlo.
Kwangathi izinqolobane zethu zingaphuphuma isivuno esehlukahlukene, izimvu zethu zande ngezinkulungwane, izinkulungwane ezilishumi emadlelweni akithi.
Sengathi izinkomo zethu zingaba namathole amaningi. Makungabi bikho kufohla ogangeni, kungathunjwa muntu, futhi kungabi bikho ukukhala emigwaqweni yakithi.
Babusisiwe abantu abayokwehlelwa yizibusiso ezinjalo, babusisiwe abantu abaNkulunkulu wabo unguSimakade.
Ngiyakuphakamisa Wena Nkulunkulu wami, Nkosi, ngilituse igama lakho phakade naphakade.
Imihla yonke ngiyakukubonga, ngilidumise igama lakho phakade naphakade.
USimakade mkhulu, umelwe ukudunyiswa kakhulu, ubukhulu bakhe abuqondakali.
Isizukulwane siyakuyibabaza kwesinye imisebenzi yakho, simemezele izenzo zakho zamandla.
Ngiyakuzindla ngenkazimulo nodumo lobukhosi bakho nangezimangaliso zakho.
Abantu bayakukhuluma ngamandla ezenzo zakho ezesabekayo, ubukhulu bakho ngiyakubumemezela.
Bayakugubha umkhosi bekhumbula ubuhle bakho obukhulu, bahube ngokulunga kwakho.
USimakade unobubele nobumnene, uyephuza ukuthukuthela, unomusa omkhulu.
USimakade muhle kubo bonke, uyayihawukela imisebenzi yakhe yonke.
Yonke imisebenzi yakho iyakukudumisa, abathembekileyo bakho bakubonge.
Bayokhuluma ngenkazimulo yombuso wakho,
ukuze babazise abantwana babantu izenzo zakho zamandla nenkazimulo yobukhosi bombuso wakho.
Umbuso wakho ungumbuso kuze kube phakade, ubukhosi bakho busezizukulwaneni ngezizukulwane.
USimakade uyabaphasa bonke abawayo, abaphakamise bonke abathotshisiweyo.
Amehlo abo bonke alinda Wena; uyabanika ukudla ngesikhathi esiyiso.
Uyavula isandla sakho, usuthise ukufisa kwakho konke okuphilayo.
USimakade ulungile ezindleleni zakhe zonke, unomusa emisebenzini yakhe yonke.
USimakade useduze nabo bonke abambizayo, bonke abambiza ngeqiniso.
Usuthisa ukufisa kwabamesabeyo, uyakuzwa ukukhala kwabo, abasindise.
USimakade uyabavikela abamthandayo, kodwa zonke izikhohlakali uyozibhubhisa.
Umlomo wami uyokhuluma ngodumo lukaSimakade, abantu bonke babonge igama lakhe elingcwele kuze kube phakade.
Haleluya! Dumisa uSimakade, mphefumulo wami.
Ngisaphila ngizomdumisa uSimakade, ngihube kuNkulunkulu wami ngisadla anhlamvana.
Ningathembeli ezikhulwini nasemadodaneni abantu, eningeke nathola lusizo kubo.
Umoya wakhe uyaphuma, yena abuyele emhlabathini wakhe, ngalo lolo suku amacebo akhe ayaphela.
Ubusisiwe lowo omsizi wakhe kunguNkulunkulu kaJakobe, othemba lakhe likuSimakade uNkulunkulu wakhe,
owenze izulu nomhlaba, nolwandle, nakho konke okukulo, ogcina iqiniso kuze kube phakade.
Obenzela ubulungiswa abacindezelweyo, opha abalambileyo ukudla, uSimakade uyazikhulula iziboshwa.
USimakade uyawavula amehlo ezimpumputhe, zibone. USimakade uyabavusa abathotshisiweyo. USimakade uyabathanda abalungileyo.
USimakade uyabavikela abafokazi, asize intandane nomfelokazi, kodwa abhuntshise indlela yezikhohlakali.
USimakade ubusa kuze kube phakade, uNkulunkulu wakho, wena Ziyoni, izizukulwane ngezizukulwane. Haleluya!
Haleluya! Kumnandi kakhulu ukuhlabelelela uNkulunkulu wethu, ngokuba unomusa, indumiso imfanele.
USimakade wakha iJerusalema, uqoqa abakwa-Israyeli ababexoshiwe.
Welapha abanhliziyo zephukile, abophe izilonda zabo.
Ubala inani lezinkanyezi, azibize zonke ngamagama.
INkosi yethu inkulu, makhulu amandla ayo; ukuqonda kwayo akunakulinganiswa.
USimakade uyabaphakamisa abathobekileyo, izikhohlakali uziqumba phansi.
Hubelani uSimakade ngokubonga, nimdumise uNkulunkulu wethu ngehabhu,
osibekela izulu ngamafu, olungisela umhlaba imvula, ohlumisa utshani ezintabeni.
Unika izinkomo ukudla kwazo, namazinyane egwababa akhalayo.
Akathokozi ngamandla ehhashi, akajatshuliswa yijubane lomuntu.
USimakade ujatshuliswa ngabamesabayo, labo abathembela emuseni wakhe.
Jerusalema, mbabaze uSimakade, Ziyoni, mdumise uNkulunkulu wakho,
ngokuba imigoqo yamasango uyiqinisile, ubabusisile abantwana bakho ngaphakathi kwakho.
Wenza kube nokuthula emingceleni yakho, akusuthise ngokolo.
Uthumela umyalo wakhe emhlabeni, izwi lakhe ligijima ngesikhulu isivinini.
Wendlala iqhwa njengoboya, asakaze isithwathwa njengomlotha.
Wehlisa isichotho njengezinhlamvu; ngubani ongema phambi kwamakhaza akhe na?
Usho ngezwi, kuncibilike; wenza umoya uphephethe, amanzi ageleze.
Uzwakalisa izwi lakhe kuJakobe, izimiso zakhe nezehlulelo zakhe, ku-Israyeli.
Asikho isizwe ake wenza kanjalo kuso, azizazi izehlulelo zakhe. Haleluya!
Haleluya! Dumisani uSimakade ezulwini, nimdumise kweliphezulu.
Mdumiseni nina zingelosi zakhe zonke, nimdumise nina mabandla akhe wonke.
Mdumiseni nina langa nenyanga, nimdumise nina zinkanyezi zonke ezikhanyayo.
Mdumiseni nina mazulu amazulu, nina manzi aphezu kwezulu.
Konke makudumise igama likaSimakade, ngokuba nguYena owayaleza, kwadaleka.
Wakumisa kwaze kwaba phakade naphakade, wakushayela umthetho okungenakuweqa.
Mdumiseni uSimakade emhlabeni nina mikhomo nezintwa zonke,
nawe mlilo nesichotho, liqhwa nenkwezane, nawe siphepho esenza okwezwi lakhe,
nani zintaba namagquma wonke, nani mithi ethelayo, nayo yonke imisedari,
nani zilwane nemfuyo yonke, nani eninwabuzelayo nezinyoni ezindizayo,
nani makhosi omhlaba nabantu bonke, nani zikhulu nabehluleli bonke bomhlaba,
nani zinsizwa nezintombi, nani maxhegu nabafana.
Manidumise igama likaSimakade, ngokuba ngelakhe lodwa igama eliphakemeyo, inkazimulo yakhe iphezu komhlaba nezulu.
Useluphakamisile udumo lwabantu bakhe, ngalokho-ke abethembekileyo bakhe bayamdumisa, abantu bakwa-Israyeli; abantu abaseduze naye. Haleluya!
Haleluya! Hubelani uSimakade ihubo elisha, izibongo zakhe, emhlanganweni wabathembekileyo.
U-Israyeli makathokoze ngoMenzi wakhe, abantwana baseZiyoni bethabele iNkosi yabo.
Mabadumise igama lakhe ngokusina, bamhubele ngesigubhu nehabhu,
ngokuba uSimakade uyathokoza ngabantu bakhe abathobekileyo, ubahlobisa ngensindiso.
Abathembekileyo mabathokoze ngokunqoba, mabahlabelele ngentokozo.
Ukuphakamisa uNkulunkulu makube semilonyeni yabo, baphathe ngesandla inkemba ekhaliphe nhlangothi zombili,
ukuze baziphindiselele ezizweni, bajezise abezizwe.
Amakhosi abo bawabophe ngamaketanga, nabadumileyo babo, ngezibopho zensimbi,
ukuze babajezise ngesijeziso esilotshiweyo. Kuludumo kubo bonke abathembekileyo bakhe. Haleluya!
Haleluya! Dumisani uNkulunkulu endlini yakhe engcwele, nimdumise emkhathini wakhe wamandla.
Mdumiseni ngenxa yezenzo zakhe zamandla, nimdumise ngenxa yobukhosi bakhe obukhulu.
Mdumiseni ngezwi lecilongo, nimdumise ngogubhu nehabhu.
Mdumiseni ngesigubhu nokusina, nimdumise ngezigubhu ezinezintambo ezilishumi, nemitshingo.
Mdumiseni ngamasimbali ancencethayo, nimdumise ngezinsimbi ezikhencezayo.
Konke okuphefumulayo makudumise uSimakade. Haleluya!
Lezi yizaga zikaSolomoni, indodana kaDavide, inkosi yakwa-Israyeli.
Ngezokufunda ukuthi kuyini ukuhlakanipha, nokufundisa ukuqonda amazwi ajulile,
ukuthola ingqondo ekhanyiselwe, ubulungiswa nobuqotho.
Zibanika ubuhlakani abangenakuqonda, ulwazi nokuqaphela kwabasha,
ukunikeza ukuqonda izaga nezisho ezifihlakele, izisho zabahlakaniphe kakhulu neziphicaphicwano zabo,
ukuze aqonde izaga, nemizekeliso, namazwi ezihlakaniphi.
Ukumesaba uSimakade kuyisiqalo sobuhlakani. Iziwula ziyakwedelela ukuhlakanipha nokuyalwa.
Ndodana yami, lalela ukuqondisa kukayihlo, ungayedeleli imfundiso kanyoko,
iyoba ngumqhele wobuhle ekhanda lakho, nomgexo entanyeni yakho.
Ndodana yami, uma izoni zikuyenga, ungavumi,
uma zithi kuwe: “Woza, hamba nathi ukuze sibalalele unyendle, ngaphandle kwesizathu, sichithe igazi labangenacala!
Masibagwinye bezwa okwendawo yakwalasha, sibaphonse egodini bephila.
Siyozitholela yonke ingcebo eyigugu, sigcwalise izindlu zethu ngempango,
senze unkatho phakathi kwethu, sabelane sonke sikhwameni sinye!”
Ndodana yami, ungazibandakanyi nabo, ungalubhadi unyawo lwakho ezindleleni zabo,
ngoba izinyawo zabo zigijimela ebubini, bayashesha ukuchitha igazi.
Ngokuba balendlalele ize inetha labo, ukucupha ugibe izinyoni zonke zibuka.
Laba baqamekela elabo igazi, balala unyendle belalela impilo yabo.
Zinjalo izindlela zabo bonke abathola inzuzo ngokungafanele; leyo nzuzo iyakuthatha impilo yomniniyo.
Ukuhlakanipha kuyampongoloza emigwaqweni, kuyaqandula ezigcawini.
Kumemeza ezinkundleni nasemasangweni omuzi, kukhuluma kuthi:
“Kuyoze kube nini ziwula ndini nithanda ubuwula, nani zedeleli, nithokoziswa ngukweyisa, nani ziwula nizonda ulwazi na?
Buyani ngenxa yokusola kwami, lalelani, manginithululele okusemoyeni wami, nginazise amazwi ami.
Ngenxa yokuba ngimemezile, nenqaba, ngininike isandla sami, kodwa anizange ninake.
Anizinakanga zonke izeluleko zami, anikwemukelanga ukusola kwami.
Ngakho-ke nami ngiyonihleka usulu ngesikhathi nehlelwa yinhlekelele, nginiklolodele lapho senigcwele uvalo.
Lapho kufika isiphepho esibhubhisayo, nokwesaba kwenu sekufana nembubhiso, nenhlekelelo yenu ifika njengesivunguvungu, nalapho inhlupheko nosizi kunehlela,
khona bayakungibiza, kodwa angiyukuphendula; bayakungifunisisa, kodwa ngeke bangifumane,
ngenxa yokuba bazonde ulwazi, bakhetha ukungamesabi uSimakade.
Abasilalelanga iseluleko sami, bakudelela ukusola kwami.
Ngakho-ke bazokuvuna lokho abakutshalile, basuthiswe yizithelo zobuqili babo.
Ukweduka kwabangenamqondo kuyakubabulala, nokudembesela kweziwula kuyozibhubhisa.
Kodwa lowo ongilalelayo uyohlala ephephile, angabi naluvalo lokwehlelwa ngokubi.”
Ndodana yami, uma ulalela amazwi ami, ugcine imithetho yami,
wenze indlebe yakho ilalele ukuhlakanipha, nenhliziyo yakho ithambekele ekuqondeni;
uma ukhala ngokuhlaziya, ulizwakalisa izwi lakho ngokuqonda;
uma ukufuna njengesiliva ukufunisisa njengengcebo efihliweyo,
khona uyakuqonda ukuthi kuyini ukumesaba uSimakade, uthole ulwazi ngoNkulunkulu.
Ngokuba uSimakade uyokupha ukuhlakanipha, emlonyeni wakhe kuphuma ukwazi nokuqonda.
Uyabela abaqotho impumelelo, uyisihlangu salabo abahamba ngokwethembeka.
Uyabavikela labo abahamba ngokwendlela yezahlulelo zakhe,
khona uyoqonda ukulunga, nokwehlulela neqiniso, nezindlela zonke ezinhle.
Ngokuba ukuhlakanipha kuyongena enhliziyweni yakho, ukwazi kuthokozise umphefumulo wakho.
Amasu ayakukuvikela, ukuqonda kukugcine.
Ukuhlakanipha kuyokophula endleleni yokubi, nakulabo abakhuluma okuphambene,
abadela izindlela zobuqotho, bahambe ebumnyameni.
Abathokozela ukwenza okubi, bakikizelele okuphambeneyo,
abandlela zabo zigwegwile, nemikhondo yabo imazombezombe.
Lokhu kuyokusindisa kowesifazane ondindayo, nakowezizwe omazwi akhe ayashelela,
oshiya isithandwa sobusha bakhe, akhohlwe yisivumelwano noNkulunkulu wakhe.
Ngokuba indlu yakhe iholela ekufeni, nezindlela zakhe emathunzini.
Bonke abazisondeza kuye ababuyi, abafinyeleli emikhondweni yokuphila,
ukuze bahambe ezindleleni zabahle, bagcine izindlela zabalungileyo,
ngokuba abaqotho bayakuhlala ezweni, abamsulwa basale kulo.
Kepha izikhohlakali ziyakunqunywa ezweni, nabangethembekile bayosishulwa kulo.
Ndodana yami, ungawukhohlwa umthetho wami, kepha inhliziyo yakho mayilonde imiyalelo yami,
khona iyakwenezela kuwe izinsuku, neminyaka yokuphila nokuthula.
Ububele neqiniso makungakushiyi; kubophele entanyeni yakho, ukulobe esibhebheni senhliziyo yakho,
ukuze uthole umusa nodumo oluhle emehlweni kaNkulunkulu nabantu.
Thembela kuSimakade ngayo yonke inhliziyo yakho, unganciki kokwakho ukuqonda.
Mazise Yena ezindleleni zakho zonke, uyakuqondisa imikhondo yakho.
Ungazishayi ohlakaniphileyo emehlweni akho; mesabe uSimakade, uqhele ebubini.
Lokho kuyakuba yimpilo emzimbeni wakho, nokuhlunyelelwa kwamathambo akho.
Mhloniphe uSimakade ngempahla yakho, nangolibo lwazo zonke izithelo zakho,
ukuze izinqolobane zakho ziphuphume ngobuningi bomkhiqizo, nezikhamo zakho zichichime iwayini elisha.
Ndodana yami, ungakwedeleli ukuyala kukaSimakade, ungakwenyanyi ukusola kwakhe.
Ngokuba uSimakade uyamyala amthandayo, njengoyise eyala indodana ayithandayo.
Ubusisiwe umuntu othola ukuhlakanipha, nomuntu ozuza ukuqonda,
ngokuba inzuzo yakho yinhle kunenzuzo yesiliva; nenzuzo yakho kunegolide.
Ukuhlakanipha kuyigugu kunamarubhi, nakho konke okunxanelekayo akunakuqhathaniswa nakho.
Impilo ende isesandleni sakho sokunene, kwesokhohlo sakho kukhona ingcebo nodumo.
Izindlela zakho ziyizindlela zobumnandi; yonke imikhondo yakho ingukuthula.
Kungumuthi wokuphila kulabo abakubambayo, babusisiwe labo ababambelela baqine kukho.
USimakade wasekela umhlaba ngokuhlakanipha; wamisa amazulu ngokuqonda.
Ngokwazi kwakhe izinzulu zaqhekezwa, amafu aconsa amazolo.
Ndodana yami, makungasuki emehlweni akho, gcina ukuhlakanipha namasu,
kuyokuba ngukuphila emphefumulweni wakho, nomgexo entanyeni yakho.
Khona uyohamba endleleni yakho uphephile, unyawo lwakho lungaqhuzuki.
Uma ulala, awuyukwesaba lutho; nalapho usulele, uyoba nobuthongo obumnandi.
Awuyukwesaba inhlekelele ezumayo, nokubhujiswa okulethwa yizikhohlakali,
ngokuba uSimakade uyakuba seduze nawe, agcine unyawo lwakho ukuba lungabhajwa.
Ungabagodleli okuhle labo abakufanele, uma lokho kusemandleni akho ukuba ukwenze.
Ungathi kumakhelwane wakho: “Hamba, ubuye kusasa, ngiyokunika khona,” ube unakho lokho akufunayo.
Ungacebi okubi ngomakhelwane wakho, lapho ehlezi nawe elondekile.
Ungaphikisani namuntu ngeze uma engakonanga ngalutho.
Ungabi namhawu ngomuntu oyisidlova, ungakhethi neyodwa yezindlela zakhe,
ngokuba oyisigwegwe uyisinengiso kuSimakade, kepha abaqotho bayisifuba sakhe.
Isiqalekiso sikaSimakade sisendlini yezikhohlakali, kodwa uyalibusisa ikhaya labalungileyo.
Izedeleli uyazedelela, kepha abathobekileyo ubapha umusa.
Abahlakaniphileyo bayozuza udumo, kepha iziwula ziyothelwa ngehlazo.
Yizwani madodana ami, ukuyala kukayihlo, nilalelelisise, ukuze nazi ukuqonda.
Ngokuba ngininika imfundiso enhle; ningawushayi indiva umthetho wami.
Ngokuba ngangiyindodana kababa, ngintekentekana, futhi ngingedwa kumame,
wangifundisa, wathi, kimi: “Inhliziyo yakho mayibambelele emazwini ami, ugcine imiyalelo yami, uphile.
Zuza ukuhlakanipha, uzuze ukuqonda; ungakhohlwa, ungachezuki emazwini omlomo wami;
ungakushiyi, kuyakukugcina; kuthande, kuyakukulondoloza.
Ukuqala kokuhlakanipha yilokhu: zuza ukuhlakanipha; yebo, ngakho konke okutholileyo, zuza ukuqonda.
Kuhloniphe, kuyakukuphakamisa; kuyakukudumisa, lapho ukugona.
Kuyakukufaka umqhele womusa ekhanda lakho, kukunike umqhele wodumo.”
Yizwa ndodana yami, wemukele amazwi ami khona iminyaka yokuphila kwakho iyoba miningi.
Ngikufundisile indlela yokuhlakanipha, ngakuhola emikhondweni yobuqotho.
Lapho uhamba, izinyathelo zakho aziyukuthiywa yilutho, nalapho ugijima awuyukukhubeka.
Bambelela ekuyalweni, ungakuyeki; kulonde, ngokuba kungukuphila kwakho.
Ungalubhadi unyawo lwakho endleleni yezikhohlakali, ungahambi emkhondweni wababi.
Yigweme, ungahambi ngayo; chezuka kuyo,
Ngokuba abalali uma bengakwenzanga okubi; bayaqwasha uma bengakhubekisanga muntu;
kwazise badla isinkwa senkohlakalo, baphuze iwayini lobudlova.
Indlela yabalungileyo injengokukhanya kokusa okuqhubeka kukhanye kuze kube semini.
Indlela yezikhohlakali injengobumnyama; abazi nokuthi bakhutshwa yini.
Ndodana yami, lalela amazwi ami, ubeke indlebe yakho kukho ukukhuluma kwami.
Makungasuki emehlweni akho, ukugcine ekujuleni kwenhliziyo yakho,
ngokuba kungukuphila kwabakufumanayo, nempilo emzimbeni wonke.
Gcina inhliziyo yakho kukho konke okulondayo, ngokuba yona ingumthombo wokuphila.
Qhela ekukhulumeni okugwegwile, dedisela kude nawe izindebe ezonakele.
Amehlo akho mawabheke phambili, nezinkophe zakho ziqonde phambi kwakho.
Hlelemba indlela yezinyawo zakho ukuze ziphephe zonke izindlela zakho.
Ungaphambukeli kwesokunene nakwesokhohlo; dedisa unyawo lwakho kokubi.
Ndodana yami, lalela ukuhlakanipha kwami, ubeke indlebe yakho ekuqondeni kwami.
Amasu nokwazi makukugcine, khona kuyakulonda izindebe zakho.
Izindebe zowesifazane ondindayo ziconsa uju; umlomo wakhe ubushelelezi kunamafutha,
kodwa ekugcineni uyababa njengenhlaba, ubukhali njengenkemba ekhaliphe nhlangothi zombili.
Izinyawo zakhe zehlela ekufeni; izinyathelo zakhe zibheke endaweni yabafileyo.
Akayiqikeleli indlela yokuphila, funa ukwenza kwakhe kuguquke engazelele.
Ngakho-ke madodana ami, ngilaleleni, ningachezuki emazwini omlomo wami.
Dedisela kude naye indlela yakho, ungasondeli emnyango wendlu yakhe,
funa unikele ngodumo lwakho kwabanye, neminyaka yakho kwabanonya,
funa abafokazi badle basuthe ngamandla akho, kuthi umsebenzi wakho owukhandlekele uye endlini yomfokazi.
Uyobubula ekugcineni, lapho umzimba wakho nenyama yakho sekuphela,
uthi: “Yeka ukuzonda kwami ukuyalwa, nokwedelela kwenhliziyo yami ukusolwa!
Angililalelanga izwi labafundisi bami; angibekanga indlebe yami kubo ababengifundisa.
Ngacishe ngabhubha ngaphela phakathi kwebandla nasenhlanganweni.”
Phuza amanzi kowakho umthombokwakhiwa, amanzi agobhozayo esuka kowakho umthombo.
Ngabe imithombo yakho isisabalele yonke indawo, nemifula yamanzi ezigcawini na?
Mayibe ngeyakho wedwa nje kuphela, ingabi ngeyabafokazi abahlala phakathi kwakho.
Mawubusiswe umthombo wakho, uthokoze ngomfazi wobusha bakho.
Uyindluzelekazi ethandayo, negogokazi elihle; amabele akhe mawakwenelise njalo, uhlale ugajwe uthando lwakhe.
Ndodana yami, yini ekwenza uhlanyiswe ngumfazi ondindayo, ugone umfazi ongamazi esifubeni na?
Ngokuba izindlela zomuntu ziphambi kwamehlo kaSimakade; uyayilinganisa yonke imikhondo yakhe.
Isikhohlakali siyakubhajwa ekukhohlakaleni kwaso, sibhajwe yizintambo zesono saso.
Siyakufa ngenxa yokweswela ukuyalwa, nangenxa yobukhulu bobuwula baso, siyoduka.
Ndodana yami, uma ube yisibambiso somakhelwane wakho, naze naxhawulana nomfokazi;
usubanjwe ngamazwi akho, wabhajwa ngenxa yalokho okushilo.
Ngakho-ke yenza lokhu, ndodana yami, ukuze uzikhulule, ngokuba usuphila phansi kwesandla sikamakhelwane wakho: khothama phambi kwakhe, umncengisise.
Amehlo akho ancishe ubuthongo, nezinkophe zakho, ukozela.
Zisindise njengensephe esandleni somzingeli, nanjengenyoni esandleni somcuphi.
Yana entuthwaneni, vilandini, ubone izindlela zayo, uhlakaniphe;
yona ethi ingenamholi, nambonisi, nambusi,
nokho ilungise ehlobo isinkwa sayo, ibuthe ukudla kwayo ngesikhathi sokuvuna.
Uyakulala kuze kube nini, vilandini? Uyakuvuka nini ebuthongweni bakho na?
Ngobuthongo nje obuncane, nokozela nje okuncane, ukusonga izandla kancane kuze kulalwe;
ubuphofu buyokwehlela njengomhambuma, ukuntula kukuhlasele njengendoda ehlomileyo.
Umuntu ongenamsebenzi walutho, umuntu wokona, uhamba ephafuza inkohliso;
ucifa iso, ashuduze ngezinyawo, aqhwebe ngeminwe;
njalo uceba okubi nenkohliso enhliziyweni yakhe, futhi uphehla udweshu.
Ngakho-ke uyokwehlelwa yinhlekelele engazelele; ngokuphazima kweso, uyobhubha angasindi.
Kukhona izinto eziyisithupha azizondayo uSimakade, yebo, eziyisikhombisa eziyisinengiso esikhulu emphefumulweni wakhe:
Ngamehlo azidlayo, ulimi lwamanga, izandla ezichitha igazi elingenacala;
inhliziyo eceba okubi, izinyawo ezishesha ukugijimela ebubini;
ufakazi ofakaza amanga ophafuza inkohliso, odala ingxabano kubafowabo.
Ndodana yami, gcina umyalo kayihlo, ungawushiyi umthetho kanyoko.
Yibophele njalo enhliziyweni yakho, uyithandele entanyeni yakho.
Mayikuhole ekuhambeni kwakho, ikulinde lapho ulele, ikhulume nawe lapho uvuka.
Ngokuba imiyalo iyisibani, nomthetho ungukukhanya, nokusola ngokuyala kuyindlela yokuphila,
ukuze uvikeleke kowesifazane okhohlakeleyo, nasekuthopheni kolimi lowesifazane ondindayo.
Ungabukhanuki ubuhle bakhe enhliziyweni yakho, angakubambi ngezinkophe zakhe.
Ngokuba owesifazane oyisiphingi ungamkhokhela ngeqebelengwane lesinkwa, kepha umfazi ophingayo womuntu, uzingela impilo eyigugu yendoda.
Umuntu angawubeka yini umlilo esifubeni sakhe, izingubo zakhe zingashi na?
Umuntu angahamba yini phezu kwamalahle avuthayo, izinyawo zakhe zingashi na?
Unjalo-ke olala nomfazi kamakhelwane wakhe: noma yimuphi omthintileyo uyakujeziswa.
Abamdeleli yini oyisela uma entshontsha ukuze azisuthise lapho elambile na?
Uma ebhadanyiwe, bamhlawulisa ngokuphindwe kasikhombisa, akhokhe ngayo yonke impahla yomuzi wakhe.
Ophinga nowesifazane akanakho ukuqonda; owenza lokho ubhubhisa impilo yakhe.
Uyakuthola imivimbo nokuphoxeka, ukwethukwa kwakhe akuyukwesulwa.
Ngokuba isikhwele sivusa ulaka endodeni yakhe, uma isiziphindiselela ngeke ibe nasihawu.
Ayiyukufuna nhlawulo; ayiyukukwemukela ukufunjathiswa.
Ndodana yami, gcina amazwi ami, uzilondele imiyalelo yami.
Gcina imiyalelo yami, uphile, nemfundiso yami, njengenhlamvu yeso lakho.
Kubophele eminweni yakho, ukulobe esibhebheni senhliziyo yakho.
Yisho kukho ukuhlakanipha uthi: “Wena ungudadewethu,” ubize ukuqonda, ukubize ngokuthi yisihlobo sakho,
ukuze kukuvikele kowesifazane ondindayo, nakowezizwe onamazwi athophayo.
Ngisefasiteleni lendlu yami, ngalunguza ngekhethini lami,
ngabona phakathi kwabangenalwazi, ngabona phakathi kwabasha insizwa engenakuqonda,
idlula emgwaqweni eduze negumbi lakhe, ibheke ngasendlini yakhe;
kwasekuhwelela kusihlwa, esigayegayeni sobusuku nobumnyama.
Bheka, owesifazane wamhlangabeza egqokise okwesifebe, ezembozile.
Uyaphishaphisheka akanakuthula; izinyawo zakhe azivumi ukuhlala endlini yakhe,
manje usesemigwaqweni, nanguya esesezigcawini, uyacutha emajikeni wonke.
Uyayibamba, uyayiqabula, engenamahloni, uthi kuyo:
“Namuhla ngiyenzile iminikelo yokuthula; ngazigcwalisa izithembiso zami.
Ngakho-ke ngiphumile ngizokuhlangabeza, ngizofuna ubuso bakho, manje sengikutholile.
Umbhede wami wendlalwe ngezindwangu zokwemboza, nelineni laseGibhithe elinemishu.
Umbhede wami ngiwufafaze ngemure, ngenhlaba nangekinamona.
Woza sizanelise ngothando kuze kuse; sijabule ngokuthandana.
Indoda yami ayikho ekhaya; ithathe uhambo olude.
Ithathe isikhwama semali ngesandla; iyoze ibuye ekhaya ngokudilingana kwenyanga.”
Uyiphambukisa ngamazwi akhe amaningi ahehayo; uyiyenga ngokuthopha kwezindebe zakhe.
Iyamlandela masinyane njengenkabi iya ekuhlatshweni nanjengenyamazane ingena esihibeni;
uze umcibisholo uhlabe esibindini sayo; isheshela ogibeni njengenyoni, ingazi ukuthi lubekelwe ukuphila kwayo.
Ngakho-ke bantwana, ngizweni, nilalele amazwi aphuma emlonyeni wami.
Inhliziyo yakho mayingaphambukeli ezindleleni zakhe, ungahambi emikhondweni yakhe.
Ubawisile abaningi, bafa; ubulele izindimbane.
Indlu yakhe iyindlela eqonde endaweni yabafileyo, eyehlela emakamelweni okufa.
Ukuhlakanipha akumemezi yini, nokuqonda akuvezi yini ilaka lakho na?
Kumi ezindaweni eziphakemeyo ngasendleleni, kwakhile ngaseziphambanweni zezindlela,
ngasekungeneni, emasangweni omuzi kuyamemeza, kuthi:
“Ngiyanibiza nina bantu; izwi lami liqondiswe kubantwana babantu.
Nina eningenalwazi qondani ukuhlakanipha; nani ziwula, yibani nenhliziyo eqondayo.
Lalelani izinto ezinkulu engizikhulumayo; amazwi aphuma ezindebeni zomlomo wami angubuqotho,
ngokuba umlomo wami uzakukhuluma iqiniso; ububi buyisinengiso ezindebeni zami.
Wonke amazwi avela emlonyeni wami angukulunga; akukho lutho kuwo okuyisigwegwe nokuphambeneyo.
Kumuntu oqondayo wonke aqondile, alungile kulowo othole ulwazi.
Yamukelani ukuyala kwami kunesiliva, nolwazi, kunegolide lekhethelo,
ngokuba ukuhlakanipha kuhle kunobucwebecwebe, akukho lutho olunye olufiswayo olungaqhathaniswa nakho.
Mina kuhlakanipha ngihlala ekuqondeni, ngithola ulwazi namasu.
Ukwesaba uSimakade kungukuzonda okubi. Ukuzikhukhumeza, ukuzidla, indlela embi, nomlomo ophoxayo, ngiyakuzonda.
Kimina kuneseluleko nokuhlakanipha, ngingukuqonda, namandla angawami.
Amakhosi abusa ngami, nababusi bashaya imithetho elungile ngami.
Izikhulu zibusa ngami, namakhosana, nabo bonke abehluleli bomhlaba.
Ngiyabathanda abangithandayo; nalabo abangifunisisayo, bayangifumana.
Ingcebo, udumo, nomnotho omningi nokulunga, kukimi.
Isithelo sami sihle kunegolide, kunegolide elicolisekileyo, nenzuzo yami, kunesiliva lekhethelo.
Ngihamba endleleni yokulunga, emikhondweni yobulungiswa,
labo abangithandayo ngibanika ifa, ngigcwalise izinqolobane zabo zengcebo.
“USimakade wangidala kuqala kunayo yonke imisebenzi yakhe; ngingowokuqala emisebenzini yakhe.
Wangimisa kwasemandulo, ekuqaleni, ngaphambi kokusekelwa komhlaba.
Zingakabi bikho izinzulu nemithombo egcwele amanzi, ngazalwa.
Zingakasekelwa izintaba nangaphambi kokuba amagquma abe khona, ngazalwa,
ngaphambi kokuba enze umhlaba namasimu, nohlamvu lokuqala lothuli lomhlaba.
Ngesikhathi ehlela amazulu ngangikhona; nalapho edweba isiyingi ezinzulwini otweni.
Lapho enza isibhakabhaka phezulu siqine, nangesikhathi imithombo yezinzulu iphuphuma ngamandla;
lapho emisela ulwandle umkhawulo, ukuze amanzi angeqi umyalo wakhe; lapho emisa izisekelo zomhlaba,
ngangiseduze kwakhe, ngiyingcweti yomsebenzi, ngiyintokozo yakhe imihla ngemihla, ngiyintokozo yakhe, ngidlala phambi kwakhe sonke isikhathi.
Ngajabula kuyo yonke indawo emhlabeni wakhe, intokozo yami yayikanye nabantwana babantu.
“Ngakho-ke bantwana, ngizweni, ngokuba babusisiwe abagcina izindlela zami.
Lalelani ukuyalwa, nenze ngokuhlakanipha; ningakushayi indiva.
Ubusisiwe umuntu ongilalelayo, alinde imihla ngemihla emasangweni ami, ahlale ngasezinsikeni zeminyango yami.
Ngokuba ongifunayo, ufumana ukuphila, azuze umusa kuSimakade.
Kodwa lowo owehluleka ukungifumana, uzigwaza ngowakhe; bonke abangizondayo bathanda ukufa.”
Ukuhlakanipha sekwakhe indlu yakho; kuzibazile izinsika zakho eziyisikhombisa.
Kuhlabe umhlatshelo, kwavubela iwayini lakho, kwadeka netafula lakho.
Kuthume izintombi zakho, kuyamemeza emagqumeni aphakemeyo omuzi, kuthi:
“Ongenalwazi makaphambukele lapha;” nakulowo ongenangqondo, kuthi kuye:
“Wozani nidle isinkwa sami, niphuze iwayini engilivubeleyo.
Shiyani izinto zobuwula, niphile, nihambe ngendlela yokuqonda.
“Osola isedeleli uzibangela ukwethukwa, nothethisa isikhohlakali uziholela ukulimala.
Ungasithethisi isedeleli, funa sikuzonde; sola ohlakaniphileyo, uyakukuthanda.
Yala ohlakaniphileyo, uzohlakanipha kakhulu; ufundise olungileyo, uzothuthuka ngokuqonda.
“Ukuqala kokuhlakanipha kungukumesaba uSimakade, nokumazi oNgcwele kungukuqonda.
Izinsuku zakho ziyokwanda ngami, kwenezelwe neminyaka yokuphila kwakho.
Uma uhlakaniphile, uzihlakaniphele; uma wedelela, uyakukuthwala wena wedwa.”
Owesifazane oyisiwula unomsindo, uyisiwula, akazi lutho.
Uhlala ngasemnyango wendlu yakhe, esihlalweni esisendaweni ephakemeyo yomuzi,
ukuze ameme abedlula ngendlela, abaqondile emikhondweni yabo, athi:
“Ongenalwazi makaphambukele ngapha;” kulowo ongenangqondo, uthi kuye:
“Amanzi okwebiwa amnandi, nesinkwa esidlelwa esithe siyenamisa.”
Kepha ophambukayo akazi ukuthi kukhona izithunzi lapho, nokuthi izimenywa zakhe zisendleleni eya kwelabafileyo.
Nazi izaga zikaSolomoni: Indodana ehlakaniphileyo iyamthokozisa uyise, kodwa eyisiwula, iwusizi kunina.
Ingcebo yenkohlakalo ayisizi ngalutho, kodwa ukuziphatha ngokulunga kukhulula ekufeni.
USimakade akavumi ukuba olungileyo alambe, kepha ababi ubayeka babulawe yindlala.
Isandla esidembeselayo siletha ubuphofu, kodwa esikhutheleyo siyacebisa.
Obutha ehlobo uyindodana ehlakaniphileyo; olele ubuthongo ngesikhathi sokuvuna uyindodana ehlazisayo.
Izibusiso zisekhanda lolungileyo, kodwa umlomo wezikhohlakali ufihla ubudlova.
Ukukhunjulwa kolungileyo kuyisibusiso, kepha igama lezikhohlakali liyakubola.
Ohlakaniphile ngenhliziyo uyayemukela imiyalelo, kodwa isiwula esiyiqhalaqhala, esiphafuza ubuwula, siyakubhujiswa.
Ohamba ngobuqotho uhamba evikelekile, kodwa ohlanekezela izindlela zakhe, uyodaluleka.
Ocifa iso udala usizi, kepha osola obala uletha ukuthula.
Umlomo wolungileyo ungumthombo wokuphila, kepha umlomo wezikhohlakali ufihla ubudlova.
Inzondo ibanga ingxabano, kodwa uthando lusibekela zonke iziphambeko.
Ezindebeni zalowo ocubungulayo kufunyanwa ukuhlakanipha, kepha uswazi lungolomhlane walowo ongenangqondo.
Ohlakaniphileyo uqongelela ulwazi, kodwa umlomo wesiwula uletha imbubhiso.
Ingcebo yocebileyo iyinqaba yakhe, kodwa ubuphofu babampofu bungukubhubha.
Umvuzo wolungileyo ungukuphila, kodwa inzuzo yezikhohlakali ingukujeziswa ngesono.
Oqaphela ukuyalwa usendleleni eya ekuphileni, kepha owenqaba ukusolwa uyaduka.
Ofihla inzondo unezindebe zamanga; odalula umbiko omubi uyisiwula.
Lapho kunokukhuluma okuningi akupheli ukona; othiba ulimi lwakhe uhlakaniphile.
Ulimi lolungileyo luyisiliva elikhethekileyo; inhliziyo yezikhohlakali iyinto engelutho.
Izindebe zolungileyo zondla abaningi, kepha iziwula ziyafa ngokuswela ingqondo.
Isibusiso sikaSimakade siyacebisa; akenezeleli usizi kuso.
Ukwenza inkohlakalo kufana nomdlalo esiwuleni, kanti umuntu ohlakaniphileyo uthokozela ukuqonda.
Akwesabayo omubi kuyamehlela, kodwa abakufisayo abalungileyo bayakuphiwa khona.
Lapho kwedlula isivunguvungu omubi usuke engasabonwa, kanti olungileyo uyisisekelo esingunaphakade.
Njengoviniga emazinyweni, nentuthu emehlweni, linjalo ivila kwabalithumileyo.
Ukwesaba uSimakade kwandisa izinsuku, kodwa iminyaka yezikhohlakali iyancishiswa.
Ithemba labalungileyo liyintokozo, kodwa ithemba lezikhohlakali liyashabalala.
Indlela kaSimakade iyinqaba koqotho, kodwa ukubhujiswa kumiselwe izikhohlakali.
Olungileyo akayukuzanyazanyiswa kuze kube phakade, kepha izikhohlakali aziyukuhlala ezweni.
Umlomo wolungileyo ukhuluma ukuhlakanipha, kodwa ulimi oluphambeneyo luyanqunywa.
Izindebe zolungileyo ziyakwazi okwamukelekileyo, kepha umlomo wezikhohlakali ukhuluma okuphambeneyo.
Isilinganiso esikhohlisayo siyisinengiso kuSimakade, kepha isisindo esiyiso siyintokozo kuye.
Lapho kuvela ukuziqhenya kulandela ihlazo, kodwa kwabathobekileyo kukhona ukuhlakanipha.
Ukwethembeka kwabaqotho kuyabahola, kepha ubugwegwe babambuluzayo buyababhubhisa.
Ingcebo ayisizi ngosuku lolaka, kodwa ukulunga kuyahlenga ekufeni.
Ukulunga komsulwa kuyayiqondisa indlela yakhe, kodwa isikhohlakali siyowiswa yinkohlakalo yaso.
Ukulunga kuyabasindisa abaqotho, kodwa abanobuqili bayobhajwa ezinkanukweni zabo.
Lapho omubi efa liyashabalala nethemba lakhe, nethemba lokwenza okubi liyashabalala.
Olungileyo uyakhululwa osizini, kodwa esikhundleni sakhe kungena isikhohlakali.
Ukukhuluma komuntu ongenabunkulunkulu kuyambulala umakhelwane wakhe, kepha abalungileyo bakhululwa ngolwazi.
Uma kubahambela kahle abalungileyo umuzi uyathokoza; lapho izikhohlakali zibhubha kuba khona umsindo wentokozo.
Ngesibusiso sabaqotho umuzi uyaphakanyiswa, kepha ngomlomo wezikhohlakali ucekelwa phansi.
Umuntu owedelela umakhelwange wakhe akanakuhlakanipha, kodwa onengqondo uyazithulela.
Oyinhlebi uhamba edalula izimfihlo, kepha othembekile emoyeni uyayisibekela indaba.
Lapho kungekho zeluleko khona abantu bayawa, kodwa lapho kunabeluleki abaningi khona kuba nokuphumelela.
Oba yisibambiso somfokazi uhlupheka kakhulu, kodwa ozonda ukwenza kanjalo ulondekile.
Owesifazane onomusa uzuza udumo, kodwa izidlova zizuza ingcebo.
Umuntu onesihawu uwenzela okuhle umphefumulo wakhe, kepha ononya uzilimaza yena uqobo.
Isikhohlakali sizuza ngokukhohlisa, kepha ohlwanyela ukulunga unomvuzo weqiniso.
Ogxilile ekulungeni uyakuphila, kepha olandela okubi kuyakuba ngukufa kuye.
Abanezinhliziyo eziphambeneyo bayisinengiso kuSimakade, kodwa abahamba ngezindlela ezimsulwa bayintokozo kuye.
Impela omubi akayukuyekwa angajeziswa, kodwa isizukulwane sabalungileyo siyakuhlengwa.
Njengendandatho yegolide ekhaleni lengulube, unjalo owesifazane omuhle ebe engenangqondo.
Abalungileyo bafisa okuhle kodwa; ithemba lezikhohlakali wulaka.
Ophanayo wandelwa yingcebo yakhe, kodwa oncishanayo uzibangela ubuphofu bodwa.
Umuntu ophanayo uyakuceba; ophuzisa abanye amanzi uyakuphuziswa naye.
Abantu bayamqalekisa oncishana ngokudla, kepha isibusiso siyakuba sekhanda lothengisa ngakho.
Ofuna okuhle ufuna okwamukelekayo, kepha ofunisisa okubi kuyakumehlela.
Othembele engcebeni yakhe uyakuwa, kepha abalungileyo bayakuhluma njengamaqabunga aluhlaza.
Ohlupha indlu yakhe uyozuza ize, nesiwula siyakuba yinceku yonenhliziyo ehlakaniphileyo.
Isithelo solungileyo singumuthi wokuphila, nohlakaniphileyo uyayizuza imiphefumulo.
Olungileyo uthola umvuzo emhlabeni; kangakanani-ke isikhohlakali nesoni?
Othanda ukuyalwa uthanda ulwazi, kodwa ozonda ukusolwa uyisiwula.
Umuntu owenza kahle uthola umusa kuSimakade, kepha onamacebo amabi uyamlahla.
Umuntu akanakuma ngenkohlakalo, kepha impande yabalungileyo ayiyukunyakaziswa.
Owesifazane okhutheleyo ungumqhele kumyeni wakhe, kepha ohlazisayo ufana nokubola emathanjeni omyeni wakhe.
Amacebo abalungileyo angubulungiswa, kepha izeluleko zababi ziyinkohliso.
Amazwi ezikhohlakali aqamekela ukuchitha igazi, kepha umlomo wabaqotho uyabahlenga.
Izikhohlakali ziyobhujiswa, ziphele nya, kodwa indlu yabalungileyo iyokuma njalo.
Umuntu utuswa ngokuhlakanipha kwakhe, kepha onhliziyo iphambene uyadelelwa.
Kungcono ukuba ngodelelekile kodwa ube nenceku, kunokuba ngoziqhakambisayo ube weswele ukudla.
Olungileyo uyayinakekela impilo yesilwane sakhe, kepha isihe sezikhohlakali siwulunya.
Olima insimu yakhe uyodla asuthe, kodwa olandela amayiyane akanangqondo.
Isikhohlakali silangazelela impango yababi, kepha impande yabalungileyo iyathela.
Omubi ubanjwa ukuphambuka kwakhe kwakusho ngomlomo wakhe, kodwa olungileyo uyaphuma enkathazweni.
Umuntu uyasutha ngokuhle okuyisithelo somlomo wakhe, nemisebenzi yezandla zakhe imlethela inzuzo.
Indlela yesiwula ibukeka ilungile emehlweni aso, kepha lowo olalela iseluleko uhlakaniphile.
Isiwula sikukhombisa masinyane ukuthukuthela kwaso, kodwa onengqondo uyalifihla ihlazo.
Okhuluma ukwethembeka umemezela ukulunga, kepha ufakazi wamanga ukhuluma inkohliso.
Ukukhuluma kwabanye ngokuhlaphaza kufana nokuhlaba kwenkemba, kodwa ulimi lwabahlakaniphileyo luyaphilisa.
Izindebe ezikhuluma iqiniso ziyakuma kuze kube phakade, kepha ulimi lwamanga lungolomzuzwana nje.
Kunokukhohlisa ezinhliziyweni zabaceba okubi, kepha ukuthula nenjabulo kukubaluleki beqiniso.
Olungileyo akayukwehlelwa nangokukodwa okubi, kepha izikhohlakali zigcwele ukukhathazeka.
Izindebe ezikhuluma amanga ziyisinengiso kuSimakade, kodwa abenza iqiniso bayintokozo yakhe.
Umuntu ohlakaniphileyo uyalufihla ulwazi, kepha izinhliziyo zeziwula ziphafuza ubuwula.
Isandla sabakhuthele siyobusa, kodwa amavila ayophoqwa ukusebenza.
Ukukhathazeka enhliziyweni yomuntu kuyayidangalisa, kepha izwi elihle liyayithokozisa.
Olungileyo ungumholi womngani wakhe, kepha indlela yezikhohlakali iyazidukisa.
Ivila aliyosi inyamazane yalo, kodwa okhuthele unengcebo eningi.
Endleleni yokulunga kunokuphila, emikhondweni yakho akukho ukufa.
Indodana ehlakaniphile iyayalwa nguyise, kodwa isedeleli asilaleli lapho sikhuzwa.
Umuntu uyakudla okuhle okuvela emazwini akhe amahle, kepha abambuluzayo balambele ubudlova.
Oqaphela akushoyo ulonda impilo yakhe; uphoshozwayo uyobhubha.
Umphefumulo wevila uyafisa ungatholi lutho, kepha imiphefumulo yabakhutheleyo iyakuneliswa.
Olungileyo uyawazonda amazwi angamanga, kodwa isikhohlakali sidala amahloni nehlazo.
Ukulunga kuyamlondoloza ondlela yakhe iqotho, kodwa inkohlakalo iyasibhubhisa isoni.
Kukhona ozishaya inkinsela kodwa engenalutho, nozishaya ompofu ebe ecebe kakhulu.
Inhlawulo yokuphila komuntu yingcebo yakhe, kepha ompofu akalaleli ekhuzwa.
Ukukhanya kwabalungileyo kukhanya bha, kepha izibani zezikhohlakali ziyacima.
Ukuziqhenya kudala ingxabano yodwa, kodwa kulabo abemukela ukwelulekwa kukhona ukuhlakanipha.
Ingcebo etholakala kalula iyancipha, kepha eqongelelwa kancane, kancane, iyanda.
Ithemba elingakagcwaliseki ligulisa inhliziyo; isifiso esiphumelele singumuthi wokuphila.
Owedelela izwi uzehlisela ukubhujiswa, kepha owesaba imiyalelo uyakuvuzwa.
Ukufundisa kohlakaniphileyo kungumthombo wokuphila, ukuze kudedwe ezihibeni zokufa.
Ukuqonda kahle kuveza umusa, kepha indlela yabambuluzayo ilukhuni.
Bonke abahlakaniphileyo basebenza ngokwazi, kepha isiwula sisabalalisa ubuwula.
Isithunywa esikhohlakele siwela ebubini, kepha isigijimi esithembekileyo siletha ukuphila.
Ubuphofu nehlazo kukulowo owenqaba ukuyalwa, kepha oqaphela ukusolwa uyatuswa.
Isifiso esifezekile siyathokozisa emphefumulweni, kepha ukudeda ebubini kuyisinengiso kwabayiziwula.
Ohamba nabahlakaniphileyo uyakuhlakanipha, kepha ongumngani weziwula uyolimala.
Ingozi ilandela izoni, kepha abalungileyo bavuzwa ngokuhle.
Olungileyo ushiyela abantwana babantwana bakhe ifa, kepha ingcebo yesoni ibekelelwa olungileyo.
Emqathweni wabampofu kukhona ukudla okuningi, kepha kuyashabalala ngenxa yokungalungi.
Oyeka uswazi uyayizonda indodana yakhe, kodwa oyithandayo uyanakekela ukuba ayiyale.
Olungileyo udla asuthe eneliswe, kepha isisu sezikhohlakali seswele esingasuthiswa ngakho.
Owesifazane ohlakaniphileyo uyayakha indlu yakhe, kodwa oyisiwula uyibhidliza ngezandla zakhe.
Ohamba ngobuqotho uyamesaba uSimakade, kodwa ozindlela zakhe zigwegile uyamedelela.
Emlonyeni wesiwula kuhluma ukuziqhenya, kepha izindebe zabahlakaniphileyo ziyabalondoloza.
Lapho kungenazinkomo khona umkhombe awunalutho, kepha isivuno esikhulu siba khona ngenxa yamandla ezinkabi.
Ufakazi weqiniso akawaqambi amanga, kodwa ufakazi wamanga uphafuza inkohliso.
Isedeleli sifuna ukuhlakanipha kodwa singakutholi, kanti ulwazi lutholakala kalula koqondayo.
Suka phambi komuntu oyisiwula, ngokuba lapho awunakuwathola amazwi anolwazi.
Ukuhlakanipha koqondayo kungukuqonda indlela yakhe, kepha ubuwula beziwula buyinkohliso.
Iziwula ziyawudelela umnikelo wecala, kepha kwabaqotho wemukelekile.
Inhliziyo iyabazi ubuhlungu bayo, kodwa umfokazi akanakuhlanganyela entokozweni yayo.
Indlu yezikhohlakali iyabhujiswa, kepha ithende labaqotho liyachuma.
Kukhona indlela ebonakala sengathi ilungile kumuntu, kepha ukuphela kwayo kuyindlela yokufa.
Noma kuhlekwa inhliziyo inobuhlungu, ukuphela kwentokozo kulusizi.
Umuntu ohlehlayo uyothola umvuzo wezindlela zakhe, kodwa olungileyo uvuna akutshalileyo.
Ongenalwazi ukholwa yikho konke, kodwa ohlakaniphileyo uyaziqaphela izinyathelo zakhe.
Ohlakaniphileyo uyesaba, futhi uyadeda ebubini, kodwa isiwula siyaqhosha, asinaki lutho.
Umuntu onesififane wenza ubuwula, nomuntu onamacebo amabi uyazondwa.
Abangenalwazi badla ifa lobuwula, kepha abanokuqonda baqheliswa ngolwazi.
Ababi bakhothama phambi kwabalungileyo, nezikhohlakali, emasangweni abalungileyo.
Ompofu uyazondwa ngisho ngumakhelwane wakhe, kepha ocebileyo uthandwa ngabaningi.
Owedelela umakhelwane wakhe uyona, kodwa lowo onomusa kwabampofu ubusisiwe.
Abaduki yini abaceba okubi na? Umusa neqiniso kungokwabahlela okuhle.
Wonke umshikashika unenzuzo, kepha amazwi omlomo abanga ukuswela kuphela.
Umqhele wabahlakaniphileyo uyingcebo yabo, umgexo weziwula ungubuwula.
Ufakazi weqiniso uhlenga imiphefumulo, kepha ophafuza amanga unenkohliso.
Ekumesabeni uSimakade kunethemba elinamandla; lokho kubantwana bakhe kuyakuba yisiphephelo.
Ukwesaba uSimakade kungumthombo wokuphila, ukuze umuntu adede ezingibeni zokufa.
Udumo lwenkosi lusebuningini babantu ebabusayo, kepha ukuswela abantu kungukubhubha kombusi.
Owephuzayo ukuthukuthela unokuqonda okukhulu, kepha lowo othukuthela ngokushesha uphakamisa ubuwula.
Ingqondo enokuthula inikeza ukuphila emzimbeni, kodwa umhawu ukubolisa amathambo.
Ocindezela ompofu usola uMenzi wakhe, kodwa onomusa kontulayo uhlonipha uMenzi wakhe.
Isikhohlakali siqunjwa phansi ukukhohlakala kwaso, kodwa olungileyo unenqaba ngisho ekufeni kwakhe.
Ukuhlakanipha kuhlala enhliziyweni yonokuqonda, kodwa eziwuleni, akwaziwa.
Ukulunga kuyasiphakamisa isizwe, kodwa ukona kuyihlazo kubantu.
Isisa senkosi sisencekwini ehlakaniphileyo, kepha intukuthelo yayo ikulabo abenza okuyihlazo.
Impendulo ezothile iyaludambisa ulaka, kodwa izwi elilimazayo libhebhezela intukuthelo.
Ulimi lwabahlakaniphileyo lukhombisa ulwazi oluhle, kodwa umlomo weziwula uphafuza ubuwula.
Amehlo kaSimakade asezindaweni zonke, aqapha abahle nababi.
Ulimi oluphilisayo lungumuthi wokuphila, kepha olobuqili luyawephula umoya.
Isiwula siyakwedelela ukuyala kukayise, kepha onaka ukusolwa uhlakaniphile.
Indlu yolungileyo igcwele ingcebo eningi, kepha enzuzweni yezikhohlakali kukhona ukuhlupheka.
Izindebe zabahlakaniphileyo zisabalalisa ulwazi, kepha akunjalo enhliziyweni yeziwula.
Umhlatshelo wezikhohlakali uyisinengiso kuSimakade, kodwa umkhuleko wabaqotho uyintokozo kuye.
Indlela yezikhohlakali iyisinengiso kuSimakade, kepha uyamthanda olandela ukulunga.
Kunesijeziso esibuhlungu kulowo oshiya indlela; lowo ozonda ukusolwa uyakufa.
Indawo yabafileyo nokubhubha kuphambi kukaSimakade; kakhulu kangakanani izinhliziyo zabantwana babantu na?
Isedeleli asimfuni ozosisola, asiyi kwabahlakaniphileyo.
Inhliziyo ethokozayo yenza ubuso buchachambe, kodwa ngosizi olusenhliziyweni umoya uyephuka.
Inhliziyo ecubungulayo ifuna ulwazi, kodwa umlomo weziwula udla ubuwula.
Zonke izinsuku zohluphekayo zimbi, kepha onhliziyo yenamile uhlala enedili elingapheli.
Okuncane nje kanye nokumesaba uSimakade, kungcono kunengcebo eningi ehambisana nokukhathazeka okuningi.
Isidlo esinengxenyana yemifino lapho kukhona uthando khona, singcono kunesenkabi ekhuluphalisiweyo lapho kugcwele inzondo khona.
Umuntu ogcwele ulaka uphehla udweshu, kodwa owephuzayo ukuthukuthela udambisa ingxabano.
Indlela yevila injengothango lwameva, kodwa umkhondo wabakhutheleyo unjengomgwaqo ohlelembelekile.
Indodana ehlakaniphile iyamthokozisa uyise, kodwa umuntu oyisiwula uyamedelela unina.
Ubuwula buyintokozo kongenangqondo, kepha umuntu onokuqonda uyakuqondisa ukuhamba kwakhe.
Lapho kungekho khona ukwelulekana, amasu ayabhuntsha, kodwa uma bebaningi abeluleki ayaphumelela.
Umuntu uyathokoza ngempendulo yakhe, nezwi elikhulunywa ngesikhathi esifaneleyo lihle kakhulu.
Indlela yokuphila imholela kweliphezulu ohlakaniphileyo, ukuba angayi endaweni yabafileyo.
USimakade uyayisiphula indlu yabazidlayo, kodwa uyayiqinisa indawo yomfelokazi.
Amacebo omubi ayisinengiso kuSimakade, kepha amazwi amnene ayamenamisa.
Othola inzuzo ngokungafanele uhlupha umndeni wakhe, kepha ozonda ukufunjathiswa uyophila.
Inhliziyo yolungileyo iyacabanga ukuphendula, kepha imilomo yezikhohlakali iphafuza izinto ezimbi.
USimakade ukude nezikhohlakali, kodwa uyayizwa imikhuleko yabalungileyo.
Ubuso obuchachambileyo buyayithokozisa inhliziyo, nezindaba ezinhle ziletha impilo emathanjeni.
Indlebe elalela ukusolwa okuphilisayo iyakuhlala nabahlakaniphileyo.
Owenqaba ukuyalwa uzedelela yena, kepha olalela ukusolwa uzuza ulwazi.
Ukwesaba uSimakade kungumyalo wokuhlakanipha, nokuthobeka kwendulela udumo.
Amasu enhliziyo angawomuntu, kepha impendulo yolimi ivela kuSimakade.
Zonke izindlela zomuntu zimsulwa emehlweni akhe, kodwa nguSimakade ohlolisisa izinhloso.
Gingqela imisebenzi yakho kuSimakade, ukuze amasu akho aphumelele.
USimakade unenjongo ngakho konke akwenzayo, yebo, nomubi umenzele usuku lokuhlupheka.
Bonke abanhliziyo ezikhukhumezayo bayisinengiso kuSimakade; impela akayukuyeka ukubajezisa.
Ngomusa neqiniso isiphambeko siyathethelelwa, ngokwesaba uSimakade ububi buyadeda.
Lapho uSimakade ethokozile ngezindlela zomuntu, wenza izitha zakhe zihlalisane ngokuthula naye.
Okuncane okuhle kanye nokulunga, kungcono kunenzuzo enkulu etholakala ngokungalungi.
Inhliziyo yomuntu iceba indlela yakhe, kodwa uSimakade uyaziqondisa izinyathelo.
Izimpendulo zikaNkulunkulu zisezindebeni zenkosi; umlomo wayo awuyukuphambuka ekwehluleleni.
Ukulinganisa okulungileyo nesilinganiso esilungileyo, kungokukaSimakade; zonke izisindo ezisesikhwameni zingumsebenzi wakhe.
Ukwenza inkohlakalo kuyisinengiso emakhosini, kodwa isihlalo sobukhosi simiswa ngokulunga.
Izindebe ezilungileyo ziyintokozo yamakhosi; ayabathanda abakhuluma iqiniso.
Intukuthelo yenkosi ifana nezithunywa zokufa, kepha umuntu ohlakaniphileyo uyayidambisa.
Uma inkosi ithokozile kukhona ukuphila, nesisa sayo sinjengefu lemvula yakamuva.
Kuhle kangakanani ukuzuza ukuhlakanipha kunegolide, nokuzuza ukuqonda kunesiliva lekhethelo!
Umendo wabaqotho ungukudeda ebubini; oqaphela indlela yakhe ulondoloza umphefumulo wakhe.
Ukuzidla kwendulela ukuwa, nomoya oziqhenyayo wandulela ukubhadazela.
Kungcono ukuba nomoya othobekileyo phakathi kwabahluphekayo, kunokuhlukaniselana impango nabazidlayo.
Oqaphela akukhulumayo ufumana okuhle, ubusisiwe owethembela kuSimakade.
Onengqondo ehlakaniphileyo ubizwa ngokuthi unokuqonda, nenkulumo emtoti yandisa imfundiso.
Ukuqonda kungumthombo wokuphila konakho, kepha ubuwula buyisijeziso seziwula.
Inhliziyo yohlakaniphileyo inikeza ukuqonda okujulile kokhulumayo, yenezele imfundiso ezindebeni zakhe.
Amazwi amnene anjengamakhekheba oju; amnandi emphefumulweni, angukuphila emathanjeni.
Kukhona indlela ebonakala sengathi ilungile kumuntu, kepha ukuphela kwayo kuyindlela yokufa.
Iphango lesisebenzi liyasisebenzela, ngokuba siqhutshwa yindlala.
Isidwanyampuphu siphanda okubi, nokuphuma ezindebeni zaso kunjengomlilo weshisandlu.
Umuntu owonakeleyo udala ingxabano, nexoki lehlukanisa abangani.
Umuntu oyisidlova uyenga umakhelwane wakhe, amholele endleleni embi.
Ovala amehlo uhlela okuphambeneyo, noququda imihlathi ufeza okubi.
Ubumpunga bungumqhele wodumo; bufunyaniswa endleleni yokulunga.
Owephuza ukuthukuthela ungcono kuneqhawe, nobusa umoya wakhe, kunonqoba umuzi.
Unkatho lwenzelwa emathangeni, kepha sonke isinqumo salo sivela kuSimakade.
Ungcono onokuncane, owomileyo enokuthula, kunendlu egcwele okuhlatshiweyo nokuxabana.
Inceku eyenza okuhlakaniphileyo iyabusa phezu kwendodana ehlazisayo; iyakudla ifa njengomunye wezelamani.
Ukhamba lokuncibilikisela lungolwesiliva, nesithando somlilo ngesegolide, kepha nguSimakade ovivinya izinhliziyo.
Owenza okubi uqaphela izindebe zenkohlakalo, nomqambimanga ubeka indlebe olimini olubi.
Odelela ompofu usola uMenzi wakhe, nothokoza ngengozi akayukuyekwa angajeziswa.
Abazukulu bangumqhele wabadala, abazali bayigugu kubantwana.
Izindebe ezinobugagu azisifanele isiwula; kakhulu kangakanani-ke izindebe zenkohliso kumuntu ohloniphekileyo na?
Ukufumbathisa kunjengetshe elinqabileyo emehlweni alowo okwenzayo, noma ebhekaphi uyaphumelela.
Osibekela isiphambeko ufuna uthando, kepha olulandelayo udaba udalula imfihlo, wehlukanisa abangani abasondelene.
Ukusolwa kungena kujule kulowo onokuqonda, kunemivimbo eyikhulu koyisiwula.
Omubi ufuna ukuhlubuka kuphela, ngalokho uyakuthunyelwa isithunywa esinonya.
Kungcono ukuhlangana nebhere elephucwe amawundlu alo, kunesiwula ebuwuleni baso.
Ophindisela okuhle ngokubi, ububi abuyukusuka endlini yakhe.
Ukuqala kwengxabano kufana nokuvulelwa kwamanzi, ngakho-ke shiya kungakaqubuki ingxabano.
Othetha ngecala isikhohlakali, nolahla ngecala olungileyo, bobabili bayisinengiso kuSimakade.
Yini ukuba isiwula sibe nemali yokuthenga ukuhlakanipha esandleni, sibe singenangqondo na?
Umngani uyathanda ngezikhathi zonke, kodwa umfowenu wazalelwa ukukuthwalisa ngezikhathi zobunzima.
Umuntu oswela ukuqonda uxhawulana nomunye, enze isivumelwano, isithembiso phambi kukamakhelwane wakhe.
Owephula umthetho uthanda ingxabano; owenza isango lakhe liphakame ukhonga ukubhujiswa.
Onenhliziyo ephambeneyo akakufumani okuhle; onolimi oluphambeneyo uwela engozini.
Ozala isiwula ufumana usizi; uyise wesiwula akathokozi.
Inhliziyo eyenamileyo iyikhambi elihle, kepha umoya owaphukileyo womisa amathambo.
Isikhohlakali semukela umfumbathiso ofihliwe, ukuze sihlanekezele izindlela zokwehlulela.
Ukuhlakanipha kuphambi komuntu onokuqonda, kepha amehlo esiwula asemikhawulweni yomhlaba.
Indodana eyisiwula iwusizi kuyise, nomunyu kowayizalayo.
Ukuhlawulisa olungileyo akukuhle, nokushaya abaqotho akulungile.
Obamba amazwi akhe unokwazi; onomoya ozothile ungumuntu onokuqonda.
Nesiwula lapho sithule kuthiwa yisihlakaniphi, novala umlomo wakhe unokuqonda.
Lowo ozazi yena ofuna intando yakhe; umelana nakho konke ukuhlakanipha okungqokolo.
Isiwula asithokozi ngokuqonda, kuphela ngokuveza okusenhliziyweni yaso.
Lapho kufika onenkohlakalo kuza nokwedelela, kanye nehlazo nokuhlazeka.
Amazwi omlomo womuntu anjengamanzi ajulileyo, nomfula ogobhozayo, nomthombo wokuhlakanipha.
Akulungile ukwenzelela isikhohlakali, nokuba olungileyo ahlanekezele ukwehlulela.
Izindebe zesiwula ziletha ingxabano, nomlomo waso uletha imivimbo.
Umlomo wesiwula ungukubhujiswa kwaso, nezindebe zaso zilugibe lomphefumulo waso.
Amazwi enhlebi anjengezibiliboco, ehlela ezibilini zomuntu.
Umuntu ovilapha ukusebenza, ungumfowabo wenkosi yokubhubhisa.
Igama likaSimakade lingumbhoshongo onamandla; olungileyo ugijimela kuwo, alondeke.
Ingcebo yesicebi ingumuzi waso onamandla; injengogange oluphakemeyo emicabangweni yaso.
Inhliziyo yomuntu iyaziqhenya ngaphambi kokuba abhujiswe, kanti ukuthobeka kwandulela udumo.
Ukuphendula ungakezwa kungubuwula nehlazo kuye.
Umoya womuntu uyabumela ubuthakathaka bakhe, kodwa ngubani ongathwala umoya odabukileyo na?
Inhliziyo ehlaziyayo izuza ulwazi, nendlebe yohlakaniphileyo ifuna ulwazi.
Isipho somuntu simvulela iminyango, simphendlele indlela kwabakhulu.
Obeka udaba lwakhe kuqala kuba sengathi nguyena olungileyo, kuze kufike omunye amphenyisise.
Unkatho luyayiqeda ingxabano; luyehlukanisa phakathi kwabanamandla.
Umzalwane owoniweyo ulukhuni wedlula umuzi onamandla, nokuxabana kunjengemigoqo yenqaba.
Isisu somuntu siyasuthiswa yisithelo somlomo wakhe, saneliswe ngokukhishwa yizindebe zakhe.
Ukufa nokuphila kusemandleni olimi, nabaluthandayo bayakudla izithelo zalo.
Ofumana umfazi uthola okuhle; uzuzile isihawu kuSimakade.
Ompofu ukhuluma ngokuncenga, kepha isicebi siphendula ngesankahlu.
Umuntu wabangani uzilimaza yena, kodwa umngani weqiniso uyanamathela ukwedlula izelamani.
Ungcono umuntu ompofu ohamba ngobuqotho, kunesiwula esikhuluma okuphambene ngezindebe zaso.
Futhi akukuhle ukuba umuntu angabi nalwazi; oshesha ngezinyawo uyaduka.
Ubuwula bomuntu buyayiguqula indlela yakhe, kepha inhliziyo yakhe iyamthukuthelela uSimakade.
Ingcebo ikwenza ube nabangani abaningi, kodwa ompofu ulahlwa nangabangani bakhe.
Ufakazi wamanga akayukuyekwa angajeziswa, nophafuza amanga akayukuphunyuka.
Baningi abazincengela ezikhulwini; bonke bafuna ukuba ngumngani womuntu ophanayo.
Ompofu uzondwa ngisho nayizihlobo zakhe; kakhulu kangakanani-ke abangani bakhe? Bayaziqhelelanisa naye; noma efuna ukukhuluma nabo, abatholwa ndawo.
Ozuza ukuqonda uthanda umphefumulo wakhe; ogcina ukuqonda, ufumana okuhle.
Ufakazi wamanga akayukuyekwa angajeziswa, nophafuza amanga uyobhubha.
Ukutamasa akusifanele isiwula, kakhulu kangakanani-ke ukuba inceku ibuse phezu kwezikhulu?
Ohlakaniphile uyephuza ukuthukuthela; kuludumo lwakhe ukudlula esiphambekweni.
Ukuthukuthela kwenkosi kunjengokubhonga kwengonyama, kepha isihe sayo sinjengamazolo otshanini.
Indodana eyisiwula, iyinhlupheko kuyise, nomfazi ohlala ethetha uyiphela endlebeni.
Indlu nengcebo kuyifa elivela kubazali, kodwa umfazi ohlakaniphileyo uvela kuSimakade.
Ubuvila buletha ubuthongo obunzima; oyivila uyobulawa yindlala.
Ogcina umyalo ulonda umphefumulo wakhe, kepha onganaki izindlela zakhe uyakufa.
Onomusa kompofu wetsheleka uSimakade; uyakuthola umvuzo.
Yiyale indodana yakho lisekhona ithemba; ungayifiseli ukuba ife.
Umuntu onolaka olukhulu wojeziswa; uma umkhulula, uyophinde akwenze lokho.
Yizwa iseluleko, wemukele ukuqondiswa, ukuze ekugcineni uhlakaniphe.
Kukhona amacebo amaningi enhliziyweni yomuntu, kepha inhloso kaSimakade iyokuma.
Okulangazelelwa ngumuntu ngukuba athembeke; kungcono ukuba mpofu kunokuba ube ngumuntu wamanga.
Ukumesaba uSimakade kuholela ekuphileni; onakho uhlala enelisiwe, akehlelwa ngokubi.
Ivila liyasifihla isandla salo esitsheni; alisibuyiseli nasemlonyeni walo.
Sishaye isedeleli ukuze ongenalwazi abe nokuqonda; msole ohlakaniphileyo, uyakuzuza ulwazi.
Ohlukumeza uyise noxosha unina, uyindodana ehlazisayo nebanga amahloni.
Ndodana yami, uma uyeka ukulalela ukuyalwa, uyakuduka emazwini okwazi.
Ofakaza okuyize wedelela umthetho; umlomo wezikhohlakali ugwinya inkohlakalo.
Ukulahlwa kulungiselwe izedeleli, nemivimbo, umhlane weziwula.
Iwayini liyisedeleli, uphuzo olunamandla lungumxokozeli; bonke abadiyazeliswa yilo kabahlakaniphile.
Ulaka lwenkosi olwesabisayo lunjengokubhonga kwengonyama; oyithukuthelisayo uyakulahlekelwa ngukuphila kwakhe.
Kuludumo kumuntu ukuziqhelelanisa nengxabano, kodwa zonke iziwula ziyashesha ukuphikisana.
Ivila alilimi ngesikhathi sokulima; lihamba lethekela ngesikhathi sokuvuna, ngoba lingenalutho.
Amasu enhliziyweni yomuntu anjengamanzi ajulileyo; umuntu onokuqonda uyakhelela.
Abantu abaningi bazishaya abalungileyo, kodwa ngubani ongafumana umuntu othembekileyo na?
Olungileyo uhamba ngobuqotho; babusisiwe abantwana bakhe.
Inkosi ehlezi esihlalweni sokwehlulela, ihlunga konke okubi ngamehlo ayo.
Ngubani ongasho athi: “Ngiyigcinile inhliziyo yami ihlanzekile; ngimsulwa ezonweni zami,” na?
Izisindo ezimbili nama-efa amabili adukisayo, kuyisinengiso kuSimakade.
Ngisho nomntwana waziwa ngezenzo zakhe ukuthi akwenzayo kuhle noma kubi.
Indlebe ezwayo neso elibonayo, kokubili kwenziwe nguSimakade.
Ungathandi ubuthongo, funa ube mpofu; vula amehlo akho, uyakusutha ngesinkwa.
“Kubi, kubi,” kusho umthengi, kepha esehambile uyazigabisa.
Kukhona igolide namarubhi amaningi, kodwa izindebe ezinolwazi ziyigugu elinqabileyo.
Thatha ingubo yoyisibambiso somfokazi, umbambe abe yisibambiso omele umfokazi.
Ukudla okutholakale ngomgunyathi kumnandi, kodwa kamuva umlomo uyakugcwala uhlwayi.
Amacebo wonke aqiniswa ngokululekana; yilwa impi ngamasu aphusile.
Ohamba encetheza wambula izimfihlo; ungazihlanganisi nomuntu okhulumela safuthi.
Oqalekisa uyise nonina, isibani sakhe siyocima phakathi kwesigayegaye.
Ifa elitholwe ngokuphazima kweso, aliyukuphetha ngesibusiso.
Ungasho uthi: “Ngiyakuphindisela okubi;” lindela uSimakade, uyakukusindisa.
Izisindo ezimbili ezingezona ezeqiniso ziyisinengiso kuSimakade, nezilinganiso ezikhohlisayo azilungile.
Zonke izinyathelo zomuntu ziqondiswa nguSimakade; pho umuntu angayiqonda kanjani indlela yakhe na?
Kulugibe kumuntu ukusho ngokushesha athi: “Kungcwele,” bese ecabanga kamuva ngesifungo asenzile.
Inkosi ehlakaniphileyo iyazihlakaza izikhohlakali; ukushinga kwazo ikuthele phezu kwazo.
Isibani sikaSimakade sihlola umoya womuntu; siphenyisisa izibilini zomuntu.
Umusa neqiniso kuyayilonda inkosi; isihlalo sayo sobukhosi sisekelwa ngomusa.
Udumo lwabasha lungamandla abo, nemvunulo yabadala ingubumpunga.
Imivimbo elimazayo ihlanza ububi, nokushaywa kuhlanza izibilini.
Inhliziyo yenkosi injengemifula yamanzi esandleni sikaSimakade, uyiphendula iye noma kuphi lapho ethanda khona.
Zonke izindlela zomuntu zimsulwa emehlweni akhe, kodwa nguSimakade ohlolisisa izinhliziyo.
Ukwenza ukulunga nobulungiswa kuyathandeka kuSimakade, ngaphezu kwemihlatshelo.
Amehlo aziqhenyayo, inhliziyo eqhoshayo, nentokozo yezikhohlakali, kuyisono.
Izinhlelo zokhutheleyo ziholela enzuzweni, kodwa wonke ophangisayo ziyomyisa ebuphofini bodwa.
Ukuthola ingcebo ngolimi lwamanga kuyize elidlula njengomhwamuko nanjengezingibe zokufa.
Ubudlova bezikhohlakali buzishonisa phansi, ngoba zenqaba ukwenza ubulungiswa.
Indlela yonecala igwegwile, kodwa inkambo yolungileyo iqondile.
Kungcono ukukhosela ekhoneni lophahla, kunokuhlala ndlininye nowesifazane onothuthuva.
Umphefumulo wesikhohlakali ufisa okubi; umakhelwane waso akafumani sisa emehlweni aso.
Lapho isedeleli sijeziswa, ongenalwazi uyahlakanipha, nalapho ohlakaniphileyo efundiswa, uthola ulwazi.
Olungileyo uyayibhekisisa indlu yomubi; izikhohlakali ziqumbeka phansi, zibhubhe.
Ovala indlebe ekukhaleni kwabampofu, naye uyokhala angaphendulwa.
Isipho esikhishwa ekusithekeni sibohlisa ulaka, nomfumbathiso obuthukuswe esifubeni uyayidambisa intukuthelo enkulu.
Kuyintokozo kolungileyo ukwenza ubulungiswa, kepha kuyimbubhiso kwabenza inkohlakalo.
Umuntu oweduka endleleni yokuhlakanipha uyakuphumula ebandleni labafileyo.
Othanda injabulo uyakuba mpofu, nothanda iwayini namafutha akayukuceba.
Isikhohlakali siyinhlawulo kolungileyo, kanjalo nombuluzayo, esikhundleni soqotho.
Kungcono ukuhlala ezweni eliyihlane, kunokuhlala nowesifazane onochuku nonolaka.
Kukhona ingcebo enxanelekayo namafutha endlini yohlakaniphileyo, kepha umuntu oyisiwula uyakugwinya.
Olandela ukulunga nokwethembeka ufumana ukuphila, ukulunga, nodumo.
Ohlakaniphileyo angenyukela emzini wamaqhawe, ayiwise inqaba athembele kuyo.
Ogcina umlomo wakhe nolimi lwakhe ulonda umphefumulo wakhe ezinsizini.
Ozidlayo nozigabisayo yisedeleli igama lakhe, yena owenza konke ngokuziphakamisa okukhulu.
Isifiso sevila siyalibulala, ngokuba izandla zalo ziyenqaba ukusebenza.
Onomhobholo ufisa usuku lonke, kepha olungileyo uyapha, angagodli lutho.
Umhlatshelo wezikhohlakali uyisinengiso; kakhulu kangakanani-ke uma ulethwa ngenhloso embi.
Ufakazi wamanga uyakubhujiswa, kepha umuntu olalelayo angakhuluma njalo.
Umuntu okhohlakele uqinisa ubuso, kepha oqotho uyayinaka indlela yakhe.
Akukho ukuhlakanipha, akukho ukuqonda, asikho iseluleko, okungamelana noSimakade.
Ihhashi lilungiselwa usuku lokulwa, kepha ukunqoba kungokukaSimakade.
Igama elihle likhethekile kunengcebo enkulu, nomusa, kunesiliva negolide.
Abacebile nabampofu bayefana; bonke benziwe nguSimakade.
Ohlakaniphileyo uyayibona ingozi, acashe, kodwa abangenalwazi bayaphikelela, bajeziswe.
Umvuzo wokuthobeka nokwesaba uSimakade wudumo, nengcebo nokuphila.
Ameva nezingibe kusendleleni yabaphambukileyo, kodwa ogcina umphefumulo wakhe uhambela kude nakho.
Khulisa umntwana ngendlela eyakuba ngeyakhe; kuyakuthi lapho esekhulile angasuki kuyo.
Isicebi sibusa phezu kwabampofu, nobolekayo uyisigqila somtshelekileyo.
Ohlwanyela ububi uyakuvuna usizi, nenduku yolaka lwakhe iyakuphela.
Ophanayo uyobusiswa, ngoba wabelana ukudla nabampofu.
Xosha isedeleli, kuzophela ingxabano, ukuphikisana nehlazo.
Othanda inhliziyo ehlanzekileyo nonenkulumo enomusa, ungumngani wenkosi.
Amehlo kaSimakade alonda ulwazi, kepha uyawabhubhisa amazwi eqili.
Ivila, lithi: “Kunebhubesi ngaphandle; ngaphuma nje ngizobulawa emgwaqweni.”
Umlomo wowesifazane ondindayo ungumgodi ojulileyo; oqalekiswe nguSimakade, uyakuwela kuwo.
Ubuwula buboshelwe enhliziyweni yomntwana, kodwa induku yokumyala ibuqhelisela kude naye.
Ocindezela ompofu ukuze azicebise yena, nopha ocebileyo, kuholela ebuphofini.
Beka indlebe yakho, uzwe amazwi ezihlakaniphi, usigcine enhliziyweni yakho isifundiso sami,
ngokuba kuyokuba mnandi ukuba ukulonde enhliziyweni yakho, lapho konke sekulungele izindebe zakho.
Ukuba ithemba lakho libe kuSimakade, ngikwazisile khona namuhla, yebo, wena.
Angikulobelanga yini izeluleko nokwazi ezinsukwini ezintathu,
ukuba kukufundise iqiniso, namazwi athembekile, ukuze uthumele impendulo eyiqiniso kwabakuthumileyo na?
Ungamqoli ompofu ngoba ubona ubuphofu bakhe; ungamcindezeli ohluphekile esangweni,
ngokuba uSimakade uyayimela indaba yabo, kuthi ababephucayo Yena abephuce ukuphila kwabo.
Ungabi ngumngani womuntu onolaka, ungahambi nomuntu othukutheleyo,
funa ufunde izindlela zakhe, umphefumulo wakho uwele ogibeni.
Ungazibandakanyi nabenza izibambiso, noma ube yisibambiso sesikweletu;
uma kungekho ongakhokha ngakho, uyakuthathelwani umbhede wakho phansi kwakho na?
Ungasisusi isikhonkwane esidala esashayelwa ngokhokho bakho.
Uyambona umuntu onekhono, uyosebenzela amakhosi, hhayi abantukazana.
Uma uhlezi etafuleni udla nombusi, qaphelisisa ukuthi yini ephambi kwakho;
uma uyisiminzi uzithibe, ubeke ummese emphinjeni wakho.
Ungazihaheli izilovela ezivela kumbusi, ngokuba ziwudobo lokukuyenga.
Ungazikhandli ukuze ucebe; hlakanipha ngokwanele, ulinde.
Usathi phayiphayi amehlo, akusekho, ngokushesha sekumile amaphiko njengokhozi, kwajubalalela emazulwini.
Ungadli ukudla koneso elibi, ungafisi izilovela zakhe,
ngokuba ungozicabangelayo, athi kuwe: “Yidla uphuze,” kepha inhliziyo yakhe ayikho kuwe.
Umthamo owudlileyo uyakuwuphalaza, udlale ngamazwi akho okuncoma.
Ungasikhuzi isiwula, ngoba siyakudelela ukuhlakanipha kwamazwi akho.
Ungasusi isikhonkwane esidala, ungangeni emasimini ezintandane,
ngokuba umhlengi wazo unamandla; uyakuyimela indaba yazo.
Beka inhliziyo yakho ekuyalweni, nezindlebe zakho emazwini olwazi.
Ungayeki ukumyala umntwana, ngokuba uma umshaya ngoswazi akayukufa.
Uma umshaya ngoswazi, uhlenga umphefumulo wakhe endaweni yabafileyo.
Ndodana yami, uma inhliziyo yakho ihlakanipha, inhliziyo yami iyakuthokoza, yebo, eyami.
Izibilini zami ziyakujabula, lapho izindebe zakho zikhuluma okulungileyo.
Inhliziyo yakho mayingabi nomhawu ngezoni, kunalokho mesabe njalo uSimakade.
Impela likhona ikusasa, nethemba lakho aliyukushatshalaliswa.
Ndodana yami, lalela uhlakaniphe, inhliziyo yakho uyihole ngendlela enhle.
Ungabi mdibimunye nezinkolotshe zewayini namakloza,
ngokuba inkolotshe nesiminzi bagcina bempofu, ukozela kubenze bagqoke amanikiniki.
Lalela uyihlo owakuzalayo, ungamdeleli unyoko lapho esemdala.
Thengisisa iqiniso, ukuhlakanipha, ukuyalwa, nokuqonda, ungathengisi ngakho.
Uyise wohlakaniphileyo uyethaba nokwethaba, nozala ohlakaniphileyo uyathokoza ngaye.
Mabathokoze oyihlo nonyoko, ethabe owakuzalayo.
Ndodana yami, ngiphe inhliziyo yakho, amehlo akho enamele izindlela zami.
Ngokuba isifebe singumgodi ojulileyo, nowesifazane ondindayo uligodi eliminyeneyo.
Ucutha njengomphangi, andise inani labantu abambuluzayo.
Ngubani othi: “Maye!” Ngubani onosizi na? Ngubani onengxabano na? Ngubani okhonondayo na? Ngubani olimele kungenasisusa na? Ngubani onamehlo aklwelileyo na?
Yilabo abahlalela iwayini, abaphuza noma yiliphi iwayini elixutshiweyo.
Ungabolibuka iwayini ulibone libomvu, licwebezela endebeni, lehla kalula emphinjeni,
ekugcineni liluma njengenyoka; lihlaba njengebululu.
Amehlo akho azobona imihlola, inhliziyo yakho ikhulume okuphambeneyo.
Uyakuba njengolele ekujuleni kolwandle, nohlezi esihlokweni sensika yomkhumbi.
Uyakuthi: “Bagadlile, angalimala; bangishayile, ngangaqonda ukuthi kwenzekeni. Ekuvukeni kwami, ngisayobuye ngilifune.”
Ungabi namhawu ngabantu ababi, ungafisi ukuba nabo.
Ngokuba inhliziyo yabo iceba ubudlova, nezindebe zabo zibhunga inkathazo.
Indlu yakhiwa ngokuhlakanipha, iqiniswe ngokuqonda.
Amakamelo agcwaliswa ngolwazi, nangayo yonke ingcebo enqabileyo neyigugu.
Umuntu ohlakaniphileyo wedlula onamandla, nonolwazi wedlula onezikhwepha.
Ngokucabanga okwephusile ungaphaka impi, nokunqoba kusebuningini babeluleki.
Ukuhlakanipha kuphakeme kakhulu esiwuleni, sona asiwuvuli umlomo waso esangweni.
Ocabanga ukwenza okubi uyakubizwa ngokuthi owenza amacebo amabi.
Ukuceba ubuwula kuyisono, nobhinqayo uyisinengiso kubantu.
Uma uxega amadolo ngosuku lokuhlupheka, amandla akho mancane.
Bahlenge abayiswa ekufeni, ubambe abantengantenga beyobulawa.
Uma uthi: “Bheka, besingakwazi lokhu;” akakuqondi yini lowo ohlola izinhliziyo na? Nolonda umphefumulo wakho akakwazi na? Futhi akayukuphindisela yini kumuntu ngokwemisebenzi yakhe na?
Ndodana yami, yidla uju, ngokuba lumnandi; uju olusemakhekhebeni luyanambitheka emlonyeni.
Yazi ukuthi kunjalo ukuhlakanipha emphefumulweni wakho; uma ukutholile, likhona ikusasa, nethemba lakho aliyukushabalala.
Wena sikhohlakali ungayicutheli indlu yolungileyo, ungayibhubhisi indawo yakhe yokuphumula,
ngokuba noma olungileyo angawa kasikhombisa, uyobuye avuke, kepha izikhohlakali ziyowiswa ngokubi.
Ungathokozi lapho isitha sakho siwa, nenhliziyo yakho mayingajabuli ngokukhubeka kwaso,
funa uSimakade akubone lokho, kube kubi phambi kwakhe, ayisuse intukuthelo yakhe kuso.
Ungazikhathazi ngabenza okubi, ungabi namhawu ngezikhohlakali.
Ngokuba omubi akayukuba nalo ikusasa, nesibani sezikhohlakali siyakucima.
Ndodana yami, mesabe uSimakade nenkosi, ungazihlanganisi nabamelana nabo,
ngokuba inhlekelele izobehlela ngokuzuma. Ngubani owazi ukubhujiswa okungalethwa yibo bobabili na?
Nanka amanye amazwi okuhlakanipha: akukuhle ukubheka ubuso bomuntu lapho wehlulelwa.
Othi esikhohlakalini: “Ulungile,” abantu bayakumqalekisa, nezizwe ziyakumhlamuka.
Kwabamthethisayo kuyokuba mnandi, kwehlele phezu kwabo isibusiso esihle.
Impendulo eyiqiniso injengokuqabula ezindebeni.
Qeda umsebenzi wakho ngaphandle, uzilungiselele wona ensimini yakho, emveni kwalokho yakha indlu yakho.
Ungabi ngufakazi omelana nomakhelwane wakho kungenasizathu; uyakukhohlisa ngezindebe zakho na?
Ungabosho ukuthi: “Njengalokho enzile kimi, kanjalo ngiyakwenza kanjalo kuye; ngizakuphindisela kuye njengokwezenzo zakhe.”
Ngedlula ngasensimini yomuntu oyivila, nasesivinini somuntu ongenangqondo;
bheka, kwakumile ukhula lwameva, kwembozwe gimbici yimbabazane, nomthangala okubiyeleyo udilikele phansi.
Mina ngakubona lokho, ngacabanga; ngabona, ngathola isifundo sokuthi:
ngokozela kancane, nokuthatha isihlwathi, usonge izandla kuze kuyolalwa,
ubuphofu behlela phezu kwakho ube njengomhambuma, weswele njengebutho elihlale lithwele isihlangu.
Nazi ezinye izaga zikaSolomoni ezaphinde zaqoshwa ngamadodana kaHezekiya, inkosi yakwaJuda.
Kuludumo kuNkulunkulu ukusibekela izinto, kodwa kuludumo lwamakhosi ukuphenyisisa udaba.
Njengalokhu amazulu ephakeme, nomhlaba ujulile, injalo nenhliziyo yamakhosi, ayiphenyisiseki.
Susa amanyela esiliveni ukuze umkhandi athole azokwakha ngakho isitsha.
Susa isikhohlakali phambi kwenkosi, khona isihlalo sayo sobukhosi sizoqiniswa ngokulunga.
Ungaziphakamisi phambi kwenkosi, ungami endaweni yabakhulu,
ngokuba kungcono ukuba kuthiwe kuwe: “Yenyukela lapha,” kunokuba wehliselwe phansi phambi kwesikhulu asesibonile amehlo akho.
Ungasheshi uphume uye enkantolo, ngokuba uyokwenzenjani ekugcineni, lapho umakhelwane wakho esekuthela ngehlazo na?
Khuluma udaba lwakho nomakhelwane wakho, ungayidaluli imfihlo yomunye,
funa okuzwayo akuthele ngehlazo, ungabe usahlonishwa.
Izwi elikhulunywe ngesikhathi esifaneleyo lifana namahhabhula egolide asezitsheni zesiliva.
Njengecici legolide nemvunulo yegolide elicolisekileyo, unjalo osola ohlakaniphileyo onendlebe elalelayo.
Njengokubanda kweqhwa ngosuku lokuvuna, sinjalo isithunywa esithembekileyo kosithumileyo, ngokuba sivuselela ukuphila kumniniso.
Njengamafu nomoya ngaphandle kwemvula, unjalo umuntu ozincoma ngesipho angasiphiwanga.
Ngokubekezela, umbusi angathanjiswa, nolimi oluthambileyo luyawaphoqoza amathambo.
Uma uthole uju, yidla okwanele wena, funa lukucike, bese uphalaza.
Unyawo lwakho malungavami endlini yomakhelwane wakho, funa adinwe nguwe, bese ekuzonda.
Umuntu ofakaza amanga ngomakhelwane wakhe, ufana nesando, nenkemba, nomcibisholo obukhali.
Ukwethemba ombuluzayo ngosuku lokuhlupheka, kunjengezinyo elephukileyo nonyawo olwenyelileyo.
Ohubela inhliziyo edangeleyo izihlabelelo, unjengokhumula ibhantshi ngosuku kumakhaza, nanjengothela uviniga esilondeni.
Uma okuzondayo elambile, mnike ukudla, adle; uma omile, muphe amanzi aphuze.
Ngokuba uyakuthela amalahle omlilo ekhanda lakhe, bese kuthi wena uSimakade akuvuze.
Umoya wasenyakatho uletha imvula, nolimi oluhlebayo ludala ubuso obuthukuthele.
Kungcono ukuhlala egumbini lophahla, kunokuhlala endlini nowesifazane onothuthuva.
Njengamanzi aqandayo emphinjeni owomileyo, unjalo umbiko omuhle ovela ezweni elikude.
Njengomthombo odungekileyo nesiphethu esonakeleyo, unjalo olungileyo ozanyazanyiswa phambi komubi.
Akukuhle ukudla uju oluningi, nokuzifunela udumo phezu kodumo.
Umuntu ongakwazi ukuzithiba, ufana nomuzi odiliziwe, ongasenalo ugange.
Njengeqhwa ehlobo, nemvula ngesikhathi sokuvuna, kanjalo udumo alusifanele isiwula.
Njengenyoni ekuhambeni kwayo, nenkonjane ekundizeni kwayo, sinjalo isiqalekiso esingenasizathu.
Isiswebhu singesehhashi, netomu lingelembongolo, noswazi lungolomhlane weziwula.
Ungasiphenduli isiwula njengobuwula baso, funa ufane naso.
Phendula isiwula njengobuwula baso, funa sibe ngohlakaniphileyo emehlweni aso.
Othumela umbiko ngesiwula uzigwaza ngowakhe; ufana nozinqume izinyawo.
Njengemilenze yokhubazekileyo elengayo, sinjalo nesaga emilonyeni yeziwula.
Onika isiwula udumo ufana nobophela itshe endwayimaneni.
Njengeva elihlaba isandla sesidakwa, sinjalo nesaga emilonyeni yeziwula.
Njengomnembi ngomcibisholo olimaza bonke, unjalo oqasha isiwula esizidlulelayo.
Njengenja ebuyela ebuhlanzweni bayo, kanjalo isiwula siphinda ubuwula baso.
Kunethemba ngesiwula kunozibona ehlakaniphile emehlweni akhe.
Ivila lithi: “Kukhona ingonyama endleleni, nebhubesi phakathi esigcawini.”
Isicabha siphenduka ngezingibe zaso, nevila ecansini lalo.
Ivila liyasifihla isandla salo esitsheni; alisibuyiseli emlonyeni walo.
Ivila lihlakaniphile emehlweni alo, kunabayisikhombisa abakhuluma okuhluzekile.
Njengomuntu obamba inja eyedlulayo ngamadlebe, unjalo ozigaxa engxabanweni yabanye abantu.
Njengohlanya oluphonsa izikhuni nemicibisholo ebulalayo,
unjalo umuntu okhohlisa umakhelwane wakhe, athi: “Bengizintelela nje.”
Ngaphandle kwezikhuni, umlilo uyacima, kanjalo lapho kungekho khona abahlebayo, ingxabano iyaphela.
Njengamalahle othuthwini nezinkuni emlilweni, unjalo umuntu ophehla udweshu.
Amazwi ohlebayo anjengesibiliboco: ayehlela ezibilini zomuntu.
Njengesiliva okucakwe ngalo isitsha sobumba, zinjalo izindebe ezishelelayo nenhliziyo embi.
Onenzondo uyazenzisa ngokukhuluma kwakhe, ebe enenhloso embi enhliziyweni yakhe.
Lapho ekhuluma ngendlela emnene, ungakholwa, ngokuba kunezinengiso eziyisikhombisa enhliziyweni yakhe.
Noma inzondo yakhe isibekelwa yinkohliso, ububi bakhe buyodaluleka ebandleni.
Omba umgodi uyakuphonseka kuwo, nogingqa itshe liyakubuya ligaye yena.
Ulimi oluhubhuza amanga luyabazonda olubalimazile; nomlomo othophayo uyabhubhisa.
Ungazigabisi ngekusasa, ngoba awazi ukuthi usuku lukuphatheleni.
Mawutuswe ngomunye, kungabi ngowakho umlomo; kube ngumfokazi, hhayi izindebe zakho.
Itshe liyasinda nesihlabathi sinzima, kodwa ukuchukuluza kwesiwula kusinda ukwedlula kokubili.
Ulaka lungulunya nentukuthelo iyisikhukhula, kepha ngubani ongema phambi komhawu na?
Ukusola okusobala kungcono kunothando olufihliweyo.
Amanxeba adalwe ngumngani anokwemukeleka kunokwanga okuningi kwesitha.
Umphefumulo osuthi uyacikwa wuju, kodwa emphefumulweni olambileyo, ngisho okubabayo imbala, kumnandi.
Njengenyoni esuka ibaleka esidlekeni sayo, unjalo umuntu obalekele indawo yakhe.
Amafutha namakha kuyayithokozisa inhliziyo, kodwa umphefumulo udabukiswa yinhlupheko.
Ungamlahli umngani wakho noma okayihlo; ungabalekeli endlini yomfowenu ngosuku lwenhlekelele. Ungcono umakhelwane oseduze kunesihlobo esihlala kude.
Ndodana yami, hlakanipha, uthokozise inhliziyo yami ukuze ngiphendule ongisolayo.
Ohlakaniphile uyabubona ububi, acashe, kodwa abangenalwazi bayaqhubeka, bese beyajeziswa.
Thatha ingubo yalowo oyisibambiso somfokazi, umbambe abe yisibambiso omela abezizwe.
Obusisa umakhelwane ngokubanga umsindo evuka ekuseni, kuyobalelwa kuye, kube yisiqalekiso.
Owesifazane obeleselayo ufana nemvula engumvimbi.
Ukumvimba kufana nokuvimba umoya, nokubamba amafutha.
Insimbi ilola enye insimbi, nomuntu usizwa ngabanye.
Olonda umkhiwane uyakudla izithelo zawo; novikela inkosi yakhe, uyakuhlonishwa.
Njengamanzi ekhombisa ubuso, injalo nenhliziyo yomuntu komunye.
Indawo yabafileyo nokubhubha akusuthi, namehlo omuntu awasuthi.
Ukhamba lokuncibilikisela lungolwesiliva, nesithando somlilo singesegolide; kanjalo umuntu unjengodumo lwakhe.
Noma ungasigqula esigqulweni isiwula, usisile ngembokodo etsheni, kepha ubuwula baso abuyukusuka kuso.
Yazi nokwazi ukuma kwezimvu zakho, ubeke inhliziyo yakho emihlanjini yakho.
Ngokuba ingcebo ayiyukuhlala kuze kube phakade; nomqhele uyakuhlala yini izizukulwane ngezizukulwane na?
Lapho utshani bushabalala, kuhluma obusha, bese kukhiwa imifino ezintabeni,
izimvu zingezokuba wembathe, nezimbuzi ukuba zibe yintengo yensimu.
Kuyakuba khona ubisi lwezimbuzi olwanele, ukuba lube ukudla kwakho nokudla kwendlu yakho, kwamantombazana akho.
Izikhohlakali zibaleka noma kungekho ozixoshayo, kepha abalungileyo banesibindi njengengonyama.
Ngenxa yesiphambeko sezwe, linezikhulu eziningi, kepha ngomuntu onokuqonda nonolwazi liyakuma.
Umuntu oswelayo kodwa acindezele abampofu, unjengemvula ekhukhula ingashiyi kudla.
Abalahla umthetho batusa izikhohlakali, kepha abagcina umthetho balwa nazo.
Abantu ababi ababuqondi ubulungiswa, kodwa abafuna uSimakade, bakuqonda konke.
Ungcono ompofu ohamba ngobuqotho, kunocebileyo ohamba ngezindlela ezigwegwile.
Ogcina umthetho uyindodana ehlakaniphileyo, kanti ongumngani weziminzi uhlazisa uyise.
Owandisa ingcebo ngenzalo nangenzuzo ethe xaxa, uyiqoqela onomusa kwabampofu.
Ofulathelisa indlebe yakhe ekulaleleni umthetho nomkhuleko wakhe, uyisinengiso.
Oyengela abaqotho endleleni embi, nguyena oyokhalakathela emgodini, kepha abangenasici bayodla ifa elihle.
Ocebileyo uhlakaniphile emehlweni akhe, kodwa ompofu onokuqonda uyamhlolisisa, ambone.
Lapho abaqotho bethokoza, kuba nodumo olukhulu, kodwa uma izikhohlakali ziphakama, abantu bayacasha.
Ofihla iziphambeko zakhe akayukuphumelela, kepha ozivumayo azishiye uyakuthola umusa.
Ubusisiwe umuntu owesaba njalo, kepha oyenza lukhuni inhliziyo yakhe uyakuwela ebubini.
Umbusi okhohlakele obusa abampofu, unjengengonyama ebhodlayo nebhele elihahayo.
Umbusi ongenakuqonda ungumcindezeli ononya, kodwa ozonda inzuzo engalungile uyophila isikhathi eside.
Umuntu osindwa yigazi lomunye, uyakubaleka kuze kube segodini; makangasizwa muntu.
Ohamba ngobuqotho uzophepha, kepha ohamba ngezindlela ezigwegwile uyokuwa kwenye yazo.
Olima insimu yakhe uyosuthiswa ngukudla, kepha olandela amayiyane, uyosutha ubumpofu.
Owethembekileyo uyolandelwa yizibusiso, kepha oceba ngokushesha akayukuyekwa angajeziswa.
Ukwenzelela akukuhle, kepha ngocezwana nje lwesinkwa umuntu angenza okubi.
Umuntu onomona uyashesha ukuceba, kodwa akazi ukuthi ubuphofu buyakufika kuye.
Osola umuntu uyakuthola ngasemuva isisa kunothopha ngolimi lwakhe.
Ophanga uyise nonina, ethi: “Akusiso isiphambeko,” yena ungumngani wombhubhisi.
Umuntu ozazisayo udala ingxabano, kodwa owethembela kuSimakade uyakucetshiswa.
Owethembela enhliziyweni yakhe uyisiwula, kepha ohamba ngokuhlakanipha uyakhululwa.
Opha ompofu akayukuswela, kepha ositheza amehlo akhe uyakuba neziqalekiso eziningi.
Lapho izikhohlakali zivuka abantu bayacasha, kepha ngokubhubha kwazo abalungileyo bayanda.
Umuntu othi esolwa abe nenkani, uyochotshozwa ngokuphazima kweso, akayukuhlengwa muntu.
Abantu bayathokoza ngokwanda kwabalungileyo, kodwa bayakhononda ngokubusa kwesikhohlakali.
Umuntu othanda ukuhlakanipha uthokozisa uyise, kepha ongumngani wezifebe usaphaza imfuyo yakhe.
Inkosi iyalimisa izwe layo ngobulungiswa; umuntu olithelisayo ulicekela phansi.
Umuntu oyenga umakhelwane wakhe wendlala inetha ezinyaweni zakhe.
Ugibe lusesiphambekweni somuntu omubi, kodwa olungileyo uhlabelela ngentokozo.
Olungileyo uyalazi ilungelo lompofu, kodwa omubi akaqondi lutho.
Izedeleli ziyawushisa umuzi, kodwa abalungileyo bayaludambisa ulaka.
Uma ohlakaniphileyo ephikisana nesiwula siyadlova, sihleke, kungabi bikho ukuthula.
Abantu abathanda ukuchitha igazi bayabazonda abamsulwa, kodwa abaqotho bayakuvikela ukuphila kwakhe.
Isiwula sikhipha lonke ulaka lwaso, kepha ohlakaniphileyo uyalugodla kuze kube sekugcineni.
Uma umbusi elalela indaba yamanga, zonke izikhulu zakhe ziyakhohlakala.
Ompofu nocindezelayo bayafana; nguSimakade owenza ukuba bobabili amehlo abo abone.
Inkosi eyehlulela abampofu ngeqiniso, isihlalo sayo sobukhosi siyakuma phakade.
Uswazi nokusola kunika ukuhlakanipha, kepha umntwana oyekwayo uyakuhlaza unina.
Lapho zanda izikhohlakali, kwanda iziphambeko, kepha abalungileyo bayakubona ukuwa kwazo.
Yiyale indodana yakho, khona iyokuphumuza, yebo, iwuthokozise umphefumulo wakho.
Lapho kungekho mbono khona, abantu baba wumhlambi kazalusile, kodwa ubusisiwe ogcina umthetho.
Inceku ayisolwa ngamazwi nje, ngokuba noma iqonda ayiyukulalela.
Uyambona umuntu oshesha ukukhuluma, ungcono umuntu oyisiwula kunaye.
Inceku ekhuliswa ngokutotoswa kwasebuntwaneni, isiphetho sayo siyoba sibi.
Umuntu onolaka udala ingxabano, nalowo onesififane ubanga ukuphambuka okukhulu.
Impakamo yomuntu iyomqumba phansi, kepha onomoya othobekileyo uyazuza udumo.
Ohlanganyela nesela uzonda umphefumulo wakhe; uzwa isifungo esibi ngomunye, kepha angasidaluli.
Ukwesaba abantu ngukuzibekela ugibe, kepha owethemba uSimakade uyalondeka.
Abaningi bafuna umusa wombusi, kepha ukwehlulelwa komuntu kuvela kuSimakade.
Umuntu ongethembekile uyisinengiso kwabalungileyo, nohamba ngobuqotho uyisinengiso kokhohlakele.
Amazwi ka-Aguri, indodana kaJakhe. Yathi le ndoda ku-Itheli, no-Ukhali:
“Impela ngiyisiwula kunabanye abantu; anginakho ukuqonda komuntu.
Angifundanga ukuhlakanipha, ukuze ngazi oNgcwele.
Ngubani owenyukele ezulwini, wabuye wehla na? Ngubani oqoqele umoya ezandleni zakhe na? Ngubani osonge amanzi ngengubo yakhe na? Ngubani omise yonke imikhawulo yomhlaba na? Ngubani igama lakhe, ngubani igama lendodana yakhe; ukhona yini olaziyo na?
“Wonke amazwi kaNkulunkulu ahloliwe; uyisihlangu kwabaphephela kuye.
Ungenezeli emazwini akhe, funa akusole, ufunyanwe ungumqambimanga.
“Zimbili izinto engizicela kuwe ngingakafi; ungangincishi zona.
Dedisela kude nami okuyize namanga, unganginiki ubuphofu noma ingcebo, kepha ngiphe isinkwa esinganeleyo,
funa ngisuthe, bese ngikuphika, ngithi: ‘USimakade ungubani na?’ funa ngibe mpofu, ngebe, ngilihlambalaze igama likaNkulunkulu wami.
“Ungayihlebi inceku enkosini yayo, funa ikuqalekise, ube necala.
“Kukhona isizukulwane esiqalekisa uyise, nesingambusisi unina.
Lesi yisizukulwane esizibona simsulwa emehlweni aso, esingahlanzwanga insila yaso.
Kunesizukulwane esiziqhenya kakhulu, futhi singamaqhalaqhala.
Isizukulwane esimazinyo ayizinkemba, namazinyo emihlathi yaso ayimimese yokuqeda abampofu emhlabeni, nabasweleyo kubantu.
“Umsundu unamadodakazi amabili, athi: ‘Siphe, siphe.’ “Kukhona izinto ezintathu ezingasuthi, nezine ezingasho ukuthi: ‘Kwanele!’:
indawo yabafileyo, isibeletho soyinyumba, umhlabathi ongeneliswa ngamanzi, nomlilo ongasho ukuthi: ‘Sekwanele!’
“Iso eliklolodela uyise nelidelela ukulalela unina liyokopolotwa ngamagwababa asemfuleni, lidliwe ngamachwane okhozi.
“Kukhona izinto ezintathu ezingimangalisa kakhulu, yebo, ezine engingazaziyo:
indlela yokhozi emkhathini, indlela yenyoka edwaleni, indlela yomkhumbi phakathi nolwandle nendlela yendoda entombini.
“Injena-ke indlela yowesifazane ophingayo: uyadla, bese esula umlomo wakhe, athi: “Angenzanga okubi.”
“Umhlaba uyazamazama phansi kwezinto ezintathu, yebo, phansi kwezine ongakwazi ukuzithwala:
lapho inceku ibekwa iba yinkosi, nesiwula sisutha ngenxa yokudla okwanele,
nalapho isaliwakazi sigcagca, nencekukazi ithatha indawo yenkosikazi yayo.
“Kukhona izinto ezine ezincane emhlabeni, kodwa zihlakaniphe kakhulu:
izintuthwane ziyisizwe esingenamandla, kanti ziyalungisa ukudla kwazo ehlobo;
izimbila ziyisizwe esibuthakathaka, kanti ziyakha izindlu zazo edwaleni;
izinkumbi azinankosi, kodwa ziyaphuma zonke ngamaviyo;
isibankwa ungasibamba ngezandla zombili, kanti sisendlini yenkosi.
“Kukhona izinto ezintathu ezinyathela ngesizotha, yebo, ezine ezihamba ngesithunzi:
ingonyama, iqhawe ezilwaneni, ayihlehli phambi kwanoma yisiphi esinye;
ihhashi lempi, impongo, nenkosi lapho ihola impi yayo.
“Uma wenze ubuwula waziphakamisa, noma wakha icebo elibi, thula.
Ngokuba njengoba ukuphehla ubisi kuveza ibhotela, uma ucindezela ikhala kuphuma igazi; kanjalo uma ucindezela ulaka udala ingxabano.”
Amazwi kaLemuweli, inkosi yaseMasa, isixwayiso asinikwa ngunina.
“Hhayi, ndodana yami; hhayi! Ndodana yesibeletho sami, kwenzenjani, ndodana yezifungo zami na?
Ungabaniki abesifazane amandla akho, nezindlela zakho, kwababhubhisa amakhosi.
“Akusikho okwamakhosi, Lemuweli, ukuphuza iwayini. Akusikho nje nempela okwababusi ukuthanda uphuzo olunamandla;
funa baphuze bese bekhohlwa yizimiso, baguqule amalungelo abahluphekayo.
Nika uphuzo olunamandla kobhubhayo, newayini konomunyu enhliziyweni.
Uyophuza, akhohlwe ubuphofu bakhe, angabe esalukhumbula usizi lwakhe.
“Khulumela isimungulu, umele ilungelo labo bonke abahluphekayo.
Vula umlomo wakho wehlulele ngokulunga, uvikele amalungelo abampofu nabantulayo.”
Ngubani ongathola umfazi woqobo na? Uyigugu eledlula inani lamarubhi.
Inhliziyo yomyeni wakhe iyamethemba, ayiyukulahlekelwa yinzuzo.
Uyayenzela okuhle, hhayi okubi, zonke izinsuku zokuphila kwakhe.
Ufuna uboya bezimvu nefilakisi, asebenze ngokuzimisela ngezandla zakhe.
Unjengemikhumbi yabahwebi, ukudla kwakhe ukulanda kwelikude izwe.
Uvuka ngovivi alungisele umndeni wakhe ukudla, abele amantombazane amsizayo imisebenzi azoyenza.
Ubona insimu, ayithenge; ngezikhwepha zakhe, utshala isivini.
Ubhinca amandla okhalo lwakhe, aqinise izingalo zakhe.
Uyaqaphela ukuthi akwenzayo kunenzuzo, isibani sakhe asincinywa nasebusuku.
Ubeka izandla zakhe othini lokuphotha izintambo, neminwe yakhe ibamba insimbi kakotini.
Uyamvulela ohluphekayo isandla sakhe, yebo, uyabapha nabantulayo.
Akanaluvalo ngabendlu yakhe ngesikhathi seqhwa, ngokuba umndeni wakhe uwugqokisa ezibubende.
Uyazenzela izingubo zokuzemboza; izembatho zelineni elicolekileyo nokubukhwebezane.
Indoda yakhe iyahlonishwa emasangweni ngesikhathi ihleli namalunga ezwe.
Wenza izingubo zelineni, azithengise, athengisele abahwebi amabhande.
Wembethe amandla nesithunzi, isikhathi esizayo usemukela ngentokozo.
Uma evula umlomo wakhe kuphuma ukuhlakanipha, nesifundiso somusa sisolimini lwakhe.
Unakekela okwenzeka emzini wakhe, akasidli isinkwa sobuvila.
Abantwana bakhe bayasukuma bambusise; nendoda yakhe iyamtusa, ithi:
“Baningi abesifazane abakhutheleyo, kepha wena ubedlula bonke.”
Ubuhle buyinkohliso, nokubukeka kuyize, kepha owesifazane owesaba uSimakade uyakudunyiswa.
Mnike isabelo emsebenzini wezandla zakhe, mabawudumise umsebenzi wakhe emasangweni.
Amazwi oMshumayeli, indodana kaDavide, inkosi yaseJerusalema.
“Ize leze,” kusho uMshumayeli, “ize leze, konke kuyize!”
Uzuzani umuntu ngawo wonke umshikashika wakhe awushikashika phansi komthunzi welanga na?
Isizukulwane siyafika, sedlule, kodwa umhlaba umi ingunaphakade.
Ilanga liyaphuma, lishone, lisheshe liye endaweni yalo lapho liphuma khona.
Umoya uvunguza uye eningizimu, uphendukele enyakatho, uphenduphenduke, ubuyele lapho uqale khona.
Yonke imifula igelezela olwandle, kodwa ulwandle alugcwali; lapho imifula ike yageleza khona, isayophinde futhi igeleze khona.
Zonke izinto ziyakhandla, umuntu angezichaze. Iso alideli ngokubona, nendlebe ayigcwali ngokuzwa.
Okwake kwaba khona, kuyobuye kube khona, nokwake kwenziwa kuyobuye kwenziwe. Ayikho into entsha phansi komthunzi welanga.
Ikhona yini into okuthiwa ngayo: “Bheka, lokhu kusha?” Empeleni seyake yaba khona emandulo, singakabi bikho.
Akukho ukukhunjulwa kwezinto esezedlule, nokwalezo ezisayokwenziwa yilabo abalandelayo.
Mina Mshumayeli ngangiyinkosi yakwa-Israyeli, eJerusalema.
Ngazinikela ngenhliziyo yami yonke ukufuna nokucwaninga ngokuhlakanipha yonke into eyenziwa phansi komthunzi welanga. Kungumsebenzi okhathazayo uNkulunkulu awunikeze abantu ukuba babe matasatasa ngawo.
Ngiyibone yonke imisebenzi eyenziwa phansi komthunzi welanga; impela konke kufana nokubamba utalagu!
Okugobile ngeke kuqondiswe, okungekho ngeke kwabalwa.
Ngase ngithi enhliziyweni yami: “Ngizuze ukuhlakanipha okukhulu ukwedlula bonke abangendulela ekubuseni eJerusalema. Yebo, inhliziyo yami izuze ukuhlakanipha okukhulu nokuqonda.
Ngizinikele ngenhliziyo yami yonke ukwazi ukuhlakanipha nokwazi ubuwula nobuthutha. Ngithole ukuthi konke lokho kufana nokubamba utalagu.
Ukwanda kokuhlakanipha kwandisa inkathazo; owandisa ulwazi, wandisa usizi.”
Ngase ngithi enhliziyweni yami: “Woza ngikuvivinye ngentokozo ukuze ngibone okuhle.” Nalokho futhi kwakuyize.
Mayelana nokuhleka, ngathi: “Kungubuwula,” maqondana nentokozo, ngathi: “Inamsebenzi muni na?”
Ngacabanga enhliziyweni yami ukuthi ngingazithokozisa kanjani ngewayini, ingqondo yami ibe iholwa ngukuhlakanipha, ukuze ngikwazi ukubamba ubuwula, ngize ngibone okuhle abantu abakwenza phansi komthunzi welanga ngezinsukwana zokuphila kwabo.
Ngenza imisebenzi emikhulu, ngakha izindlu, ngazitshalela nezivini.
Ngazenzela izivande nezindawo zokuphumula, ngatshala kuzo zonke, izinhlobo zezihlahla zezithelo.
Ngazakhela amachibi okunisela amahlathi okwakumile kuwo izihlahla.
Ngathenga izigqila zesilisa nezesifazane, nalezo ezazizalelwe kwami; nganginemfuyo eningi, imihlambi yezinkomo neyezimvu nezimbuzi, kukuningi ukwedlula okukanoma ngubani owangendulelayo eJerusalema.
Ngaziqongelelela isiliva, negolide, nengcebo yamakhosi neyezifundazwe. Ngaqoqa abahlabeleli besilisa nabesifazane, nalokho okuthokozisa amadodana abantu, nezancinza eziningi.
Ngakho-ke ngaba mkhulu ukwedlula abangendulelayo eJerusalema; ukuhlakanipha kwami kwahlala kukimi.
Noma yikuphi amehlo ami ayekufuna, ngangingawancishi; inhliziyo yami angiyincishanga intokozo, ngokuba yona yathola ukuthokoza kuwo wonke umshikashika wami, lokho kwaba ngumklomelo wami wawo wonke umshikashika wami.
Ngase ngikubuka konke okwenziwe yizandla zami, nomshikashika engithathe isikhathi ngiwenza; konke futhi lokho kwakuyize, kufana nokubamba utalagu! Akukho nzuzo phansi komthunzi welanga.
Ngase ngibuye ngicabangisisa ngokuhlakanipha, ngobuhlanya nangobuwula, ngokuba angenzani lowo ongaphansi kwenkosi na? Ngaphandle kwalokho osekuvele kwenziwe.
Ngabona ukuthi ukuhlakanipha kungcono kunobuwula, njengoba nokukhanya kungcono kunobumnyama.
Umuntu ohlakaniphile uyabona ukuthi uyaphi, kodwa isiwula sidukuza ebumnyameni. Kodwa ngabona ukuthi siyafana isiphetho sabo bobabili.
Ngase ngithi enhliziyweni yami: “Okwehlela isiwula, nami kuzongehlela. Pho kungani ngihlakaniphe kakhulu na?” Ngathi enhliziyweni yami: nalokho kuyize.
Ngokuba akukho ukukhunjulwa kohlakaniphileyo nesiwula, ngoba ngokuhamba kwezinsuku, bobabili bayalibaleka. Kungenzeka kanjani ukuthi ohlakaniphile afe njengesiwula na?
Ngase ngikuzonda ukuphila ngoba umsebenzi owenziwa phansi komthunzi welanga ungububi kimi. Konke kuyize, kufana nokubamba utalagu.
Ngawuzonda wonke umshikashika wami engawushikashika phansi komthunzi welanga, lapho ngibona ukuthi ngizowushiyela ozoza emuva kwami.
Kwazi bani ukuthi uzokuba yisihlakaniphi noma yisiwula na? Nokho nguyena ozokwengamela wonke umshikashika wami, asebenzise nokuhlakanipha kwami phansi komthunzi welanga. Nalokho kuyize.
Ngase ngitheneka amandla, inhliziyo yami yadikibala ngawo wonke umshikashika engiwushikashike phansi komthunzi welanga.
Ngokuba kuyenzeka ukuba umuntu umshikashika wakhe awenze ngokuhlakanipha nangolwazi nangekhono, kodwa kufanele awushiyele umuntu ongakaze awukhandlekele, ube yifa lakhe. Nalokho kuyize nobubi obukhulu.
Umuntu utholani ngakho konke ukushikashikeka nokukhandleka kwakhe phansi komthunzi welanga na?
Ngokuba zonke izinsuku zakhe zinobuhlungu, nomsebenzi wakhe uwusizi; nasebusuku ingqondo yakhe ayikutholi ukuphumula. Nalokho kuyize.
Akukho okungcono okungenziwa ngumuntu ngaphandle kokuthi adle, aphuze, aneliseke ngomsebenzi wakhe. Nalokho futhi ngakubona ukuthi kuvela esandleni sikaNkulunkulu,
ngokuba ngaphandle kwakhe, ngubani ongadla noma athokoze na?
Ngokuba uNkulunkulu umupha ukuhlakanipha, nokuqonda nentokozo umuntu omthokozisayo, kodwa isoni usinika umsebenzi wokuqokelela nokumbondela, ukuze siwunike lowo othokozisa uNkulunkulu. Nalokho kuyize, kufana nokubamba utalagu.
Konke kunesikhathi sakho, yonke indaba inomzuzu wayo phansi komthunzi welanga.
Kukhona isikhathi sokuzalwa nesikhathi sokufa; isikhathi sokutshala, nesikhathi sokusiphula okutshaliweyo;
isikhathi sokubulala, nesikhathi sokuphilisa; isikhathi sokubhidliza, nesikhathi sokwakha;
isikhathi sokukhala, nesikhathi sokuhleka; isikhathi sokulila, nesikhathi sokusina;
isikhathi sokusakaza amatshe, nesikhathi sokuwaqoqa; isikhathi sokugona, nesikhathi sokuchiliza;
isikhathi sokufuna, nesikhathi sokulahlekelwa; isikhathi sokulondoloza, nesikhathi sokusaphaza;
isikhathi sokudabula, nesikhathi sokuthunga; isikhathi sokuthula, nesikhathi sokukhuluma;
isikhathi sokuthanda, nesikhathi sokuzonda; isikhathi sokulwa, nesikhathi sokuthula.
Uzuzani osebenzayo ngomshikashika wakhe na?
Ngiwubonile umshikashika uNkulunkulu awunike abantu ukuba babe matasatasa ngawo.
Konke ukwenze kwafanela isikhathi sakho, ngaphezu kwalokho wabeka ukulangazelela iphakade ezinhliziyweni zabantu, kodwa abakwazi ukuyazi imisebenzi kaNkulunkulu kusukela ekuqaleni kwayo kuze kube sekugcineni kwayo.
Ngiyazi ukuthi akukho okuhle kubo kunokuthokoza nokuzithokozisa, inqobo nje uma besaphila,
futhi kuyisipho esivela kuNkulunkulu, asipha umuntu ukuba wonke umuntu adle, aphuze, athokozele wonke umshikashika wakhe.
Ngiyazi ukuthi noma yini uNkulunkulu ayenzayo imi kuze kube phakade; akukho okungenezelwa kuyo, nokungasuswa kuyo; uNkulunkulu lokhu ukwenzele ukuba abantu bamesabe.
Lokhu okukhona, sekwake kwaba khona, nalokho okusazoba khona, sekuvele kukhona. UNkulunkulu uyakufuna osekwake kwenzeka.
Phezu kwalokho ngabona ukuthi phansi komthunzi welanga, esikhundleni sobulungiswa, kunenkohlakalo; esikhundleni sobuqotho, kunobubi.
Ngathi enhliziyweni yami: “UNkulunkulu uzobehlulela abaqotho nezikhohlakali, ngokuba yonke indaba nomsebenzi kubekelwe isikhathi sakho.”
Ngathi enhliziyweni yami: “Maqondana nabantu, uNkulunkulu uyabavivinya ukuze bazibonele ukuthi banjengezilwane.
Ngokuba okuvelela abantu kuyafana nokwehlela izilwane; njengoba umuntu efa, kanjalo nesilwane siyafa. Konke kunomoya ofanayo, umuntu akazedluli izilwane, ngokuba konke kuyize.
Konke kuya endaweni eyodwa; konke kuvela othulini, konke kubuyela othulini.
Ngubani owaziyo ukuthi umoya womuntu uyenyuka kuthi owesilwane wehlele emhlabeni na?”
Ngakho-ke ngabona ukuthi akukho okungcono kunokuba umuntu athokoze ngomsebenzi wakhe, ngokuba lokho kuyisabelo sakhe; ngubani ongamenza abone okuyakwenzeka nxa esefile na?
Ngabuye ngabona konke ukucindezela okwakwenziwa phansi komthunzi welanga. Bheka, izinyembezi zabacindezelwe bengenabani wokubaduduza! Uhlangothi lwabacindezeli lwalunamandla, kanti nalo lungenabani wokulududuza.
Ngacabanga ukuthi asebefile bangcono kunalabo abasaphila;
kodwa ongcono kakhulu yilowo ongakazalwa, ongakayiboni imisebenzi emibi eyenzeka phansi komthunzi welanga.
Ngase ngibona ukuthi wonke umshikashika, nalo lonke ikhono emsebenzini, kudalwa ngumona. Nalokho kuyize, kufana nokuthi uyoze ubambe utalagu.
Isiwula sisonga izandla zaso, sidle inyama yaso.
Singcono isandla esisodwa esigcwele ukuthula, kunezimbili ezigcwele umshikashika, kufana nokuthi uyoze ubambe utalagu.
Ngabuye ngabona ize phansi komthunzi welanga:
umuntu owayengenabani, engenandodana namfowabo, nokho umshikashika wakhe ungenamkhawulo, namehlo akhe enganeliseki wumcebo. Uthi: “Ngisebenzela bani kangaka, ngizincisha intokozo na?” Nalokho kuyize nomsebenzi ongajabulisi.
Ababili bangcono kunoyedwa, ngoba banomvuzo omuhle ngomshikashika wabo.
Ngokuba uma bewa, bayavusana; maye kulowo oyedwa, nxa ewa akanaye ongamvusa!
Uma ababili belala ndawonye bayafudumala, uma umuntu eyedwa angafudumala kanjani na?
Noma umuntu oyedwa engehlulwa, nxa bebabili bangazivikela. Intambo emicu mithathu ayigqabuki kalula.
Ungcono umuntu osemusha oswele kodwa ohlakaniphile, kunenkosi endala eyisiwula, engasemukeli iseluleko.
Umuntu angaphuma ejele abuse, ngisho noma ezalwe engompofu embusweni.
Ngabona abaphilayo behla benyuka phansi komthunzi welanga, belandela lowo muntu omusha owayezothatha isikhundla sobukhosi;
babengenakubalwa laba bantu ayebahola. Kodwa abeza emva kwakhe abayukuthokoza ngaye. Impela nalokho kuyize, kufana nokuthi uyoze ubambe utalagu.
Qaphela izinyathelo zakho nxa uya endlini kaNkulunkulu, kungcono ukusondela ulalele, kunokunikela umhlatshelo weziwula, ngokuba azikwazi ukubalekela ukwenza ububi.
Ungasheshi ukhulume ngomlomo wakho, futhi ungayivumeli inhliziyo yakho iphimise izwi phambi kukaNkulunkulu, ngokuba Yena usezulwini, wena usemhlabeni, ngakho-ke mawabe mbalwa amazwi akho.
Ngokuba iphupho livela nemisebenzi eminingi; nezwi lesiwula linamagama amaningi.
Uma wenza isifungo kuNkulunkulu ungephuzi ukusifeza, ngokuba akazithokozeli iziwula. Sifeze isifungo sakho.
Kungcono ukungasenzi isifungo kunokuba ufunge kodwa ungafezi.
Umlomo wakho mawungakuholeli esonweni, ungasho phambi kwesithunywa ukuthi lokho kuliphutha. Kungani uNkulunkulu ewathukuthelela amazwi akho, abhubhise umsebenzi wezandla zakho na?
Lapho kunamaphupho amaningi, kukhona nokuyize, namazwi angelutho amaningi, kodwa mesabe uNkulunkulu.
Uma esifundazweni sangakini ubona abampofu becindezelwa, kungenabulungiswa, futhi bephucwa amalungelo abo, ungamangaliswa yilokho, ngoba isikhulu esiphezulu naso sibhekwe ngesinye, kukhona nezingaphezulu kwazo.
Impumelelo yezwe isenkosini enakekela ukulinywa kwamasimu.
Othanda imali akaneliswa yiyo; nothanda ingcebo akaneliswa yinzuzo ayitholayo, nalokho kuyize.
Uma impahla yanda, bayanda nabayidlayo; uzuzani umnikazi ngaphandle kokubuka ngeso na?
Kumnandi ukulala kosebenzayo, noma ngabe udle kakhulu, noma udle kancane, kodwa ubuningi bengcebo buyamqwashisa ocebileyo.
Ngibone ububi obudabukisayo phansi komthunzi welanga; ingcebo egcinwe ngumniniyo imlethela usizi.
Lowo mcebo walahleka ngendlela embi, ngisho nendodana ayizalayo ayangathola lutho.
Njengalokhu umuntu aphuma enqunu esizalweni sikanina, kanjalo nalapho esehamba, uyohamba enjalo, kukho konke akusebenzile akukho lutho ayohamba nalo esandleni.
Nalokho kungububi obudabukisayo; wafika kanjalo, uzohamba kanjalo futhi, nzuzoni ayitholile ngokushikashikela umoya na?
Yebo, zonke izinsuku zakhe uzichithele ebumnyameni nasosizini, nasekukhathazekeni nasekuguleni nasolakeni.
Ngase ngiyabona ukuthi yini enhle nemnandi: ngukudla, ukuphuza, nokuthokozela wonke umshikashika awukhandlekele phansi komthunzi welanga, kulezi zinsukwana zokuphila uNkulunkulu amuphe zona, ngokuba kuyisabelo sakhe lokho.
Wonke umuntu uNkulunkulu amuphe umcebo, nempahla, namandla, makakuthokozele, asamukele isipho sakhe, ajabule ngomshikashika wakhe; lokhu kuyisipho asiphiwe nguNkulunkulu.
Akayukuzikhumbula kakhulu izinsuku zokuphila kwakhe, ngokuba uNkulunkulu uhlala emgcwalise ngenjabulo enhliziyweni yakhe.
Ngabona enye into embi phansi komthunzi welanga, futhi ingumthwalo onzima emahlombe abantu.
UNkulunkulu umuntu umuphe ingcebo, impahla, nodumo ukuze angesweli lutho alufisayo, kepha uNkulunkulu akamniki amandla okukudla; kufika umfokazi azitike ngakho, lokho kuyize; kungukushaywa kabuhlungu.
Uma umuntu ezele abantwana abayikhulu, aphile iminyaka eminingi, zibe ziningi izinsuku zeminyaka yakhe, kodwa angathokozeli izinto ezinhle empilweni, futhi angangcwatshwa, ngithi okuphuphumileyo kungcono kunaye,
ngokuba kufikela ezeni, kuye ebumnyameni, ubumnyama buyaligqiba igama lakho.
Akulibonanga ilanga, akwazi lutho, kodwa khona kuthola ukuphumula kunaye.
Ngisho angaphila iminyaka eyinkulungwane ephindwe kabili, kepha engehlelwa ngokuhle, kanti bonke abayi yini endaweni eyodwa na?
Konke umuntu akusebenzelayo kuya emlonyeni wakhe, kodwa akaneliswa.
Umuntu ohlakaniphile ungcono ngani koyisiwula na? Umuntu ompofu, okwazi ukuziphatha kahle phambi kwabantu, utholani na?
Kungcono ukubona ngamehlo, kunokulangazelela kwenhliziyo; lokho kuyize, kufana nokuthi uyoze ubambe utalagu.
Osekwake kwaba khona sekwaqanjwa igama, kuyaziwa ukuthi umuntu uyokuba yini, nokuthi akakwazi ukuphikisana nalowo onamandla kunaye.
Ngokwanda kwamazwi, kwanda nokuyize, umuntu ngabe ungcono ngani na?
Konje ngubani owaziyo ukuthi yini enhle kumuntu ngesikhathi esaphila lezi zinsukwana zempilo yakhe eyize, eyedlula njengethunzi na? Ngubani ongasho kumuntu ukuthi yini ezokwenzeka phansi komthunzi welanga nxa esefile na?
Igama elihle lingcono kunamakha anuka kamnandi, nosuku lokufa lungcono kunolokuzalwa.
Kungcono ukuya endlini yabalilayo, kunokuya endlini lapho kunedili khona, ngokuba lokho kuyisiphetho sabo bonke, abaphilayo mabakugcine lokhu enhliziyweni.
Usizi lungcono kunokuhleka, ngokuba ngobuso obudangele inhliziyo iba nokujabula.
Inhliziyo yohlakaniphile isendlini yabalilayo, kodwa inhliziyo yesiwula isendlini yentokozo.
Kungcono ukulalela ukusola kohlakaniphileyo, kunokulalela iculo leziwula.
Njengomsindo wokusha kwameva phansi kwebhodwe, kunjalo ukuhleka kweziwula. Nalokho kuyize.
Impela ukucindezelwa kwenza ohlakaniphile isiwula, ukufunjathiswa kuyayilutha inhliziyo.
Singcono isiphetho sendaba kunesiqalo sayo; onomoya wokubekezela ungcono kunalowo onowokuzidla.
Ungasheshi ukuthukuthela, ngokuba intukuthelo ihlala ezifubeni zeziwula.
Ungasho ukuthi: “Kungani izinsuku zasemandulo zazingcono kunezanamuhla na?” Ngokuba lokho kubuza akuveli ekuhlakanipheni.
Ukuhlakanipha kuhle njengefa, futhi kusiza labo abasalibona ilanga.
Ngokuba ukuvikeleka kokuhlakanipha kufana nokuvikeleka kwemali, kodwa ubuhle bolwazi nokuhlakanipha kulondoloza ukuphila kwalowo onakho.
Bheka umsebenzi kaNkulunkulu; ngubani ongaqondisa akugobisileyo na?
Ngosuku lwempumelelo, jabula; ngosuku lwenhlupheko, qaphela; nguNkulunkulu ozenzile zombili lezi zinsuku. Ngakho-ke umuntu ngeke akwazi ukubona okuyoba khona uma esefile.
Ngikubone konke kulokhu kuphila kwami okuyize: umuntu oqotho efela ebuqothweni bakhe, nomuntu omubi ephila isikhathi eside ebubini bakhe.
Ungabi ngolunge kakhulu, ungazenzi ohlakaniphe ngokwedlulele; uzibhubhiselani na?
Ungabi ngokhohlakele kwaze kweqa, noma oyisiwula; ufunelani ukufa kungakabi yisikhathi sakho na?
Kuhle ukuthi ukubambe lokhu; ungasisusi isandla sakho kukho, ngokuba owesaba uNkulunkulu uyaphumelela kukho konke.
Ukuhlakanipha kuletha amandla kumuntu ohlakaniphile, edlule ababusi abalishumi abasemzini.
Impela emhlabeni akekho umuntu owenza okulungile kodwa, ongoni ngalutho.
Ungayibeki inhliziyo yakho kukho konke okushiwo ngabantu, funa uzwe inceku yakho ikuqalekisa.
Inhliziyo yakho iyazi ukuthi nawe uhlale ubaqalekisa abanye.
Konke lokhu ngikuhlolisise ngokuhlakanipha; ngase ngithi: “Ngizohlakanipha,” kodwa ukuhlakanipha kwaba kude nami.
Okusemajukujukwini nokusekujuleni, ngubani ongakufumana na?
Umqondo wami ngawuguqulela ekwazini ekufuneni, nasekuphenyisiseni izinto zonke, nokwazi ububi bobuwula, nokuthi ubuwula bungukuhlanya.
Ngathola okumuncu okwedlula ukufa: owesifazane onenhliziyo ewugibe nenethi, ozandla zakhe ziyizibopho; othokozisa uNkulunkulu uyasinda kuye, kodwa isoni uyasibamba.
“Yilokhu-ke engikutholile,” kusho uMshumayeli. “Ngihlanganisa lokhu nalokhu ukuze ngithole umphumela,
ingqondo yami esiwucinge iphindelela, kodwa ingawufumani. Ngathola indoda eyodwa phakathi kwayinkulungwane, kodwa angimtholanga owesifazane phakathi kwakho konke lokho.
Yilokhu kodwa engakuthola, ukuthi uNkulunkulu wabenza abantu baba qotho, kodwa bona bazisungulela amaqhinga amaningi.”
Ngubani ofana nomuntu ohlakaniphile na? Ngubani owazi incazelo yendaba na? Ukuhlakanipha kwenza ubuso bomuntu bukhazimule, nokunyukubala kobuso bakhe kuguquke.
Ngithi: gcina umyalo wenkosi, ngenxa yesifungo sikaNkulunkulu.
Ungasheshi ukusuka phambi kwenkosi, ungalibali uma kunodaba olubi, ngokuba yona yenza ngokuthanda kwayo.
Izwi lenkosi liyabusa, ngubani ongathi kuyo: “Wenzani na?”
Lowo ohlonipha umyalo akayukwehlelwa ngokubi, ingqondo yohlakaniphileyo iyasiqonda isikhathi esifanele nokwehlulela.
Ngokuba yonke into inesikhathi sayo esiyifanele, nendlela yokuyenza, nanxa inhlupheko yomuntu inzima emahlombe akhe,
akazi ukuthi kuzokwenzekani, ngokuba ngubani ongamtshela ukuthi izokwenzeka kanjani?
Akukho muntu onamandla phezu komoya ukuba awuvimbe, noma amandla phezu kosuku lokufa. Akekho okhululekile empini, kanjalo nobubi abunakubakhulula labo ababenzayo.
Konke lokhu ngakubona ngesikhathi ngicabangisisa ngengqondo yami zonke izinto ezenzeka phansi komthunzi welanga. Kunesikhathi lapho umuntu ebusa abanye, kube ngukulimala kwakhe.
Ngabona ababi bengcwatshwa, ababevame ukungena bephuma endaweni engcwele, belibaleka emzini lapho babenza khona lezo zinto; nalokho kuyize.
Ngenxa yobubi obenziwa bungehlulelwa masinyane, izinhliziyo zabantu ngaphakathi zigcwele ukwenza okubi.
Noma isoni singona kaningi, siphile isikhathi eside, nokho ngiyazi ukuthi kuzobahambela kahle abamesabayo uNkulunkulu, ngoba bahamba ngokwesaba phambi kwakhe.
Kodwa akuzukubahambela kahle ababi, izinsuku zabo zokuphila azizukweluleka njengethunzi, ngoba abahambi ngokwesaba phambi kukaNkulunkulu.
Kunento eyize eyenziwa emhlabeni: kukhona abantu abalungile abehlelwa yizinto ezifana nezehlela ababi, nabantu ababi okwenzeka kubo izinto ezenzeka kwabalungileyo. Ngithi: “Nalokho kuyize.”
Ngakho-ke mina ngincoma ukuzijabulisa, ngokuba akukho okungcono kumuntu phansi komthunzi welanga, ngaphandle kokuba adle, aphuze, azijabulise, ngokuba lokhu kuyohlala kunaye emshikashikeni wokuphila kwakhe, ngezinsuku uNkulunkulu amuphe zona phansi komthunzi welanga.
Lapho ngifunisisa ngengqondo yami ukwazi ukuhlakanipha nokubona umsebenzi owenziwa emhlabeni umuntu engalali ubusuku nemini,
ngabona yonke imisebenzi kaNkulunkulu ukuthi umuntu ngeke ayiqonde yonke imisebenzi eyenzeka phansi komthunzi welanga. Noma umuntu angazihlupha kangakanani eyifunisisa, ngeke ayithole, noma ohlakaniphile angathi uyazi, ngeke ayifumane.
Konke lokhu ngakucabangisisa enhliziyweni yami, ngihlola ukuthi kungani abalungileyo nabahlakaniphileyo nemisebenzi yabo kusesandleni sikaNkulunkulu; noma luthando noma yinzondo, akekho umuntu okwazi konke okuphambi kwakhe.
Isiphetho sabo bonke siyefana: abalungile nabangalungile, abahle nababi, abahlanzekile nabangcolile, abethula imihlatshelo nabangayethuli. Njengoba enjalo umuntu olungileyo, sinjalo nesoni; nanjengoba enjalo ofungayo, unjalo nobalekela isifungo.
Nabu ububi obukukho konke okwenzeka phansi komthunzi welanga: bonke behlelwa yinto efanayo; izinhliziyo zabo bonke abantu zigcwele ububi, ukuhlanya kukuzo besaphila, emuva kwalokho baya kwabafileyo.
Kodwa osabalelwa kwabaphilayo usenethemba, ngokuba inja ephilayo ingcono kunebhubesi elifileyo.
Abaphilayo bayazi ukuthi bazokufa, kodwa abafileyo abasazi lutho, futhi abasenamvuzo; abasakhunjulwa nakukhunjulwa.
Kubo uthando nenzondo nomona sekuphelile, abasenaso isabelo nanini kukho konke okwenziwa phansi komthunzi welanga.
Hamba, udle ukudla kwakho ngentokozo, uphuze iwayini lakho uthokozile enhliziyweni yakho, ngokuba uNkulunkulu uvele ukuvumele lokhu okwenza manje.
Izingubo zakho azihlale zimhlophe, nekhanda lakho lihlale ligcotshwe ngamafutha.
Jabulela impilo nomkakho omthandayo, zonke izinsuku zempilo yakho eyize akunike yona phansi komthunzi welanga, ngoba yisona sabelo sempilo yakho emshikashikeni wakho owushikashika phansi komthunzi welanga.
Noma yini isandla sakho esiyitholayo yenze ngamandla akho wonke, ngokuba akukho msebenzi, namcabango, nakwazi, nakuhlakanipha endaweni yabafileyo, lapho uya khona.
Kukhona okunye engakubona phansi komthunzi welanga: umncintiswano wokugijima awuyi ngajubane, nempi akusiyo eyabanamandla, nakudla kohlakaniphileyo, namcebo, nampumelelo kwabanamakhono, kodwa isikhathi nethuba kubehlela bonke.
Ngokuba umuntu akasazi isikhathi sakhe; kunjengezinhlanzi ezibanjwa enethini elinonya, nezinyoni ezibanjwa ogibeni; kanjalo nabantu babanjwa ogibeni olubi, oluyisikhathi esibafikela bengazelele.
Ngabuye ngabona okunye phansi komthunzi welanga, okube yisibonelo esikhulu sokuhlakanipha kimi.
Kwakukhona umuzi omncane owawunabantu abayingcosana; kwase kufika inkosi enkulu yawuhlasela, yawuvimbezela, yakha izindunduma ezinkulu zokuhlasela.
Kulowo muzi kwakukhona indoda empofu ehlakaniphile, yona ngokuhlakanipha kwayo yawuhlenga, kodwa akekho oyikhumbulayo leyo ndoda empofu.
Ngase ngithi: “Ukuhlakanipha kungcono kunamandla,” ngisho noma ukuhlakanipha komuntu ompofu kwedeleleka, namazwi akhe engashaywa mkhuba.
Ukukhulumela phansi kwabahlakaniphile kuyalalelwa kunokumemeza kombusi phakathi kwezilima.
Ukuhlakanipha kungcono kunezikhali zokulwa, kodwa isikhohlakali sisinye sibhubhisa okuhle okuningi.
Izimpukane ezifile zenza amakha abe nephunga elibi; kanjalo nobuwula obuncane buyakwedlula ukuhlakanipha nodumo.
Inhliziyo yomuntu ohlakaniphile inamathela kokuhle, kodwa inhliziyo yesiwula ibheka kwesobunxele.
Ngisho sihamba emgwaqweni isiwula siveza ubuwula baso, sitshela bonke ukuthi sona siyisiwula.
Uma ulaka lombusi lukuvukela, uze ungasuki endaweni yakho; ukuthobeka kulungisa amaphutha amakhulu.
Kukhona ububi engibubonile phansi komthunzi welanga, bunjengephutha elenziwa ngumbusi:
ubuwula bubekwa ezindaweni eziningi eziphakemeyo, abacebile bahlala endaweni ephansi.
Ngibone izigqila zigibele amahhashi, izikhulu zihamba ngezinyawo njengezigqila.
Umuntu ombela omunye umgodi uyokhalakathela kuwo; nalowo odiliza udonga uyolunywa yinyoka.
Omba amatshe ulinyazwa yiwo; nocanda izinkuni ulinyazwa yizo.
Uma imbazo ibuthuntu, umuntu engayilolanga, usebenzisa amandla amakhulu; kodwa ukuhlakanipha kuletha ithuba lempumelelo.
Uma inyoka iluma ingalunjiwe, akanalusizo lwalutho umlumbi.
Amazwi ohlakaniphileyo amlethela udumo, kodwa awesiwula ayasibhubhisa.
Siwuvula nje umlomo waso sikhuluma ubuwula, kuthi ekugcineni inkulumo yaso ibe ngukuhlanya okubi.
Isiwula sikhuluma amagama amaningi, kodwa akukho muntu owaziyo ukuthi kuzokwenzekani, nongasho ukuthi yini ezolandela uma sesifile?
Umshikashika weziwula uyazikhandla zingabe zisayazi indlela eqonde emzini.
Maye, kuwe lizwe elibuswa yinkosi esencane, izikhulu zakho zizitika ngedili kusuka ekuseni!
Ubusisiwe wena lizwe obuswa yinkosi evuthiwe nehloniphekile, izikhulu zakho zizitika ngedili ngesikhathi esifaneleyo, ukuze zibe namandla, hhayi ukuba zidakwe!
Ngenxa yobuvila uphahla luyapatalala, nangenxa yokudembesela izinto indlu iyanetha.
Ukudla kwenzelwe ukwenama, newayini ukuba kuthakaswe, imali iyimpendulo yezinto zonke.
Ungayiqalekisi inkosi ngisho emcabangweni wakho; kumbe uqalekise ocebileyo, ulele ekamelweni lakho; ngokuba inyoni yezulu ingase ikuthwale okushilo, noma yini enamaphiko ingayikhuluma indaba.
Phonsa isinkwa sakho emanzini, ngokuba uzosithola emva kwezinsuku eziningi.
Yipha abayisikhombisa isabelo sakho, kanjalo abayisishiyagalombili, ngokuba awazi ukuthi bubi buni obungahle behlele umhlaba.
Uma amafu emumethe imvula, ayithululela emhlabeni; nesihlahla uma siwela ngaseningizimu noma ngasenyakatho, sitholakala lapho siwele khona.
Onaka umoya akasoze atshala; nalowo onaka amafu akasoze avuna.
Njengalokhu ungazi ukuthi umphefumulo ungena kanjani emathanjeni esibelethweni sowesifazane okhulelweyo, kanjalo kawuwazi umsebenzi kaNkulunkulu owenza izinto zonke.
Hlwanyela imbewu yakho ekuseni, ungasiphumuzi isandla sakho kuze kuhlwe, ngokuba kawazi ukuthi yiyiphi ezomila; yilena noma yileya, noma zombili zizoba zinhle ngokufanayo.
Ukukhanya kumnandi, kuthokozisa amehlo ukubuka ilanga.
Noma umuntu angaphila iminyaka eminingi, makathokoze ngayo yonke, nokho makakhumbule ukuthi izinsuku zobumnyama zizoba ziningi. Konke okuzayo kuyize.
Jabula nsizwa ebusheni bakho, inhliziyo yakho ayikujabulise ezinsukwini zobusha bakho. Landela izindlela zenhliziyo yakho, nakho konke okubonwa ngamehlo akho, kodwa khumbula ukuthi uNkulunkulu uzokwehlulela ngazo zonke lezo zinto.
Susa ukungeneliseki engqondweni yakho, uxoshe ubuhlungu emzimbeni wakho, ngokuba ubusha nokuqala kokuphila kuyize.
Khumbula uMdali wakho ezinsukwini zobusha bakho, zingakafiki izinsuku ezimbi, neminyaka ingakasondeli oyothi ngayo: “Angithokozi.”
Mkhumbule Yena ilanga nokukhanya, nenyanga nezinkanyezi kungakafiphali, lingakahlomi futhi emuva kwemvula.
Ngosuku lapho abalindi bendlu beyothuthumela, namadoda anamandla athothobale, nabasilayo beyoyeka ukugaya, ngoba sebeyingcosana, nabalunguza ngamafasitela bangabe besalunguza,
lapho neminyango ephumela emgwaqweni iyovalwa, nomsindo wesigayo ushayele phansi, abantu bavuswe ngukutshiloza kwezinyoni, nokuhlabelela kwamadodakazi sekuzwakalela phansi,
nalapho abantu besaba okuphakemeyo, isihlahla somAlimondi siyoqhakaza, intethe itotobe, izihlahla zekaphari zingatheli, ngokuba umuntu useya ekhaya lakhe laphakade, abalilayo bayazulazula emigwaqweni,
ngaphambi kokuba intambo yesiliva igqabuke, kuphahlazeke nesitsha segolide, nokhamba lufele emthonjeni, nesondo lifele emgodini wamanzi,
uthuli lubuyele emhlabathini, njengoba lwalunjalo, umphefumulo ubuyele kuNkulunkulu owawuvele kuye.
“Yize leze, konke kuyize,” kusho uMshumayeli.
Ngaphezu kokuhlakanipha, uMshumayeli wayebuye afundise abantu ukwazi, walinganisa, wacwaninga, wahlela izaga eziningi.
UMshumayeli wayefunisisa amazwi athokozisayo, ngobuqotho abhale amazwi aliqiniso.
Amazwi abahlakaniphile anjengezincijo, anjengezikhonkwane ezishayelwe zagxila, anjalo namazwi aqoqwe ngumalusi munye.
Ngaphezu kwalokhu, ndodana yami, xwaya; ukwenza izincwadi eziningi akupheli, nokufunda kakhulu kuyawutuba umzimba.
Nasi isiphetho sendaba, lapho konke sekuzwakele: mesabe uNkulunkulu, ugcine imiyalelo yakhe, ngokuba lokho kungokwabantu bonke.
Ngokuba uNkulunkulu uyoyisa yonke imisebenzi ekwahluleleni, nazo zonke izimfihlo, noma ngabe zinhle noma zimbi.
Isihlabelelo sezihlabelelo sikaSolomoni.
Makangiqabule ngokuqabula komlomo wakhe! Uthando lwakho lumnandi kunewayini.
Amafutha akho athaphuka iphunga elimnandi, igama lakho linjengamafutha atheliweyo; yingakho izintombi zikuthanda nje.
Ngidonse ngikulandele, sigijime. Inkosi isingingenisile emakamelweni ayo. Siyojabula, sithokoze ngawe; uthando lwakho siyolukhumbula ukwedlula iwayini. Abalungileyo bayakuthanda.
Madodakazi aseJerusalema, ngimnyama kodwa ngimuhle. Nginjengamathende akwaKhedari, nanjengamakhethini kaSolomoni.
Ningabuki ukuthi ngimnyama, ngifuswe yilanga. Amadodana esizalwa mfazi munye nawo, angithukuthelele, angenza umlindizivini, ngangabe ngisasilinda esami.
Ngitshele wena othandwa ngumphefumulo wami, umhlambi wakho uweluselaphi, uwuphumuzelaphi emini na? Kungani kumele ngihambe ngicinga emihlanjini yabangani bakho, njengowesifazane ogubuzele ngemvakazi na?
Uma ungazi, wena omuhle kunabo bonke abesifazane, landela imizila yomhlambi, weluse amazinyane akho ngasemathendeni abelusi.
Ngikufanisa nehhashi lami lensikazi phakathi kwezinqola zempi kaFaro, sithandwa sami.
Izihlathi zakho zinhle zinemicu yobuhlalu, intamo yakho inemigexo.
Sizokwenzela imigexo yegolide enobuhlalu besiliva.
Ngesikhathi inkosi isahleli etafuleni layo, inadi lami lathaphuka iphunga lalo.
Othandiweyo wami uyisigaxa semure kimi, ulala phakathi kwamabele ami.
Othandiweyo wami kimi ufana nesixha sehena ezivinini zase-Eni Gedi.
Waze wamuhle sithandwa sami! Bheka, umuhle, amehlo akho angamajuba.
Bheka, umuhle, wena othandiweyo wami, yebo, uyathokozisa. Indawo esicambalala kuyo iluhlaza.
Imishayo yezindlu zethu iyimisedari, uphahla luyimisayiphuresi.
Ngiyimbali yaseSharoni, nomnduze wezimfunda.
Njengomnduze phakathi kwameva, sinjalo isithandwa sami phakathi kwezintokazi.
Njengesihlahla samahhabhula phakathi kwezihlahla ehlathini, unjalo othandiweyo wami phakathi kwezinsizwa. Emthunzini wakhe, ngahlala phansi ngokwenama, isithelo sakhe sasimnandi emlonyeni wami.
Ungingenise endlini yewayini, ibhanela lakhe, phezu kwami, wuthando.
Ngondle ngamakhekhe anamagilebhisi omisiwe, ungivuselele ngamahhabhula, ngokuba ngiyafa wuthando.
Umkhono wakho wakwesokhohlo ungumqamelo wekhanda lami kuthi owangakwesokunene ungigone ngawo.
Ngiyaniyala madodakazi aseJerusalema ngezimpala nemigakla; ningaluvusi uthando kungakabi yisikhathi, Luyekeni luziqubukele lona.
Yizwi lothandiweyo wami lelo! Bheka, weqa izintaba, ugxuma phezu kwamagquma.
Othandiweyo wami ufana nensephe noma isixhumo sendluzele. Bheka, lona omi ngemuva kodonga lwakwethu; ugqolozele emafasiteleni, upopola ngamakhethini.
Othandiweyo wami waphendula wathi kimi: “Vuka sithandwa sami, simomondiya sami, woza sihambe.
Ngokuba ubusika sebudlulile, nemvula ayisekho, alisani;
umhlaba usuhlobe ngezimbali, isikhathi sokuthena imivini sesifikile, sekuzwakala nomsindo wokulilizela kwamajuba ezweni lakithi.
Umkhiwane usuthelile, amakhiwane aseluhlaza, nemivini iyaqhakaza, kuthaphuka iphunga layo. Vuka sithandwa sami, muhlekazi wami, woza sihambe.”
Juba lami elisemifantwini yedwala elisekusithekeni endaweni eyehlelayo, mangikubone siqu sakho. Mangizwe izwi lakho, ngokuba izwi lakho limnandi, nesiqu sakho siyabukeka.
Sibambeleni izimpungushe, amazinyane azo angazoni izivini, ngokuba izivini zethu zisaqhakaza.
Othandiweyo wami ungowami, nami ngingowakhe; welusela phakathi kweminduze.
Kuze kuphole ilanga, namathunzi abaleke, phenduka wena othandiweyo wami, ufane nensephe noma nesixhumo sendluzele ezintabeni ezimakhelekehle.
Ebusuku embhedeni wami ngamfuna othandwa ngumphefumulo wami; ngamfuna, kodwa angimtholanga.
Manje ngizovuka ngizungeze emzini, emigwaqweni nasemashashalazini, ngizomfuna othandwa ngumphefumulo wami. Ngamfuna, kodwa angimtholanga.
Abalindi abazungeza emzini, bazithela phezu kwami: “Animbonanga yini othandwa ngumphefumulo wami na?”
Ngithe nje ukwedlula kancane kubo, ngase ngizithela kothandwa ngumphefumulo wami. Ngambamba, ngamnkonkoshela angavuma ukuba ahambe, ngaze ngamfaka endlini kamame, nasekamelweni lalowo engavundla esiswini sakhe.
Madodakazi aseJerusalema, fungani nigomele ngezinsephe, noma ngezindluzelakazi zasendle; ngeke naluvusa uthando. Luyekeni luziqubukele lona ngokwalo!
Ngubani lowaya oqhamuka ehlane, onjengesikhatha sentuthu, eqhole ngemure nangenhlaka, nangawo wonke amakha omthengisi na?
Bheka, umbhede wakhe ngokaSolomoni! Uzungezwe ngamaqhawe angamashumi ayisithupha emaqhaweni ka-Israyeli.
Wonke aphethe izinkemba, aqeqeshelwe impi, yileyo naleyo ndoda, inkemba yayo isenqulwini yayo, ngenxa yokwesaba ebusuku.
Inkosi uSolomoni izenzele indlwana yayo yokuyithwala ngemithi yaseLebhanoni.
Izinsika zayo yazenza ngesiliva, iphansi layo ngegolide, isihlalo sayo ngokubukhwebezane, ingaphakathi layo ligandaywe ngothando, ngamadodakazi aseJerusalema.
Madodakazi aseZiyoni, phumani nibuke, inkosi uSolomoni ihlobe ngomqhele wayo eyawuqheliswa ngunina mhlazana igcagcelwa, ngosuku lokuthokoza kwenhliziyo yayo.
Uyazi, umuhle sithandwa sami! Uyazi, umuhle! Amehlo akho angamajuba ngale kwemvakazi yakho. Izinwele zakho zifana nomhlambi wezimbuzi wehla entabeni yakwaGileyadi.
Amazinyo akho afana nomhlambi wezimvukazi ezisanda kugundwa, zikhuphuka zivela kogezwa, zonke zinamaphahla, kungekho neyodwa efelweyo kuzo.
Izindebe zomlomo wakho zifana nomucu obomvu, umlomo wakho muhle, ufana nocezu lwehananadi, ngale kwemvakazi yakho.
Intamo yakho ifana nombhoshongo kaDavide onemigqa okuphanyekwa kuyo izikhali; inkulungwane yamahawu iphanyekwe kuwo, zonke izihlangu zamaqhawe.
Amabele akho amabili anjengamazinyane, izixhumo zendluzelakazi ezingamaphahla, ziklabe phakathi kweminduze.
Kuze kuphole ilanga, namathunzi abaleke, ngizoya entabeni yemure nasegqumeni lenhlaka.
Umuhle ngokuphelele sithandwa sami, akukho sici kuwe.
Woza sisuke eLebhanoni, makoti wami, usuke nami eLebhanoni, wehle esiqongweni se-Amana nasesiqongweni seShiniri naseHermoni, sisuke emiphandwini yamabhubesi nasezintabeni zezingwe.
Ungephuce inhliziyo yami, dadewethu, makoti wami. Ungephuce inhliziyo yami ngokungibuka kanye nje ngeso lakho, nangomucu owodwa nje womgexo wentamo yakho.
Lumnandi kangakanani uthando lwakho, dadewethu, makoti wami! Lumnandi kakhulu kangakanani uthando lwakho, ukwedlula iwayini, nephunga lamakha akho, kunawo wonke amakha!
Izindebe zomlomo wakho ziconsa njengamakhekheba ezinyosi; makoti wami, uju nobisi kungaphansi kolimi lwakho, iphunga lezingubo zakho linjengephunga laseLebhanoni.
Uyisivande esihluthulelwe, ungumthombo ohluthulelweyo, isiphethu esibekwe uphawu, dadewethu, makoti wami.
Izitshalo zakho ziyisivande samahananadi esithela izithelo zekhethelo; ihena elinamanadi,
inadi nesafroni, nomhlanga nesinamoni, nazo zonke izihlahla zenhlaka, zemure, zenhlaba, nazo zonke izinhlobo zamakha ekhethelo.
Isiphethu sezivande, umthombo wamanzi aphilayo, ogeleza uvela eLebhanoni!
Vuka, moya wasenyakatho, woza moya waseningizimu, uphephethe esivandeni sami, amakha aso athaphuke; othandiweyo wami makeze esivandeni sakhe, adle izithelo zaso zekhethelo.
Sengingenile esivandeni sami, dadewethu, makoti wami! Sengiyibuthile imure yami namakha ami, sengiwadlile amakhekheba ami noju lwami, ngaphuza iwayini lami nobisi lwami. Yidlani bangani, niphuze, niphuze neneliseke, zithandwa.
Bengilele, kodwa inhliziyo yami ibhekile; ngezwa izwi lothandiweyo wami engqongqoza! “Ngivulele dadewethu, sithandwa sami, juba lami, wena opheleleyo wami, ngokuba ikhanda lami ligcwele amazolo; imiyeko yami, ngamaconsi asebusuku.”
Sengiyikhumulile ingubo yami, ngingaphinde ngiyigqoke kanjani? Sengizigezile izinyawo zami, sengingazigcoliselani na?
Othandiweyo wami wangenisa isandla sakhe embotsheni, izibilini zami zamlangazelela.
Ngavuka ngamvulela othandiweyo wami, izandla zami zaconsa imure, nemure eyayiseminweni yami, yagelezela phezu kwezibambo zesihluthulelo.
Ngamvulela othandiweyo wami, kodwa othandiweyo wami wayesejike wahamba, umphefumulo wami wephuka lapho esephendukele eceleni, ngamfuna kodwa ngangamthola, ngambiza, akaze angiphendula.
Ngatholwa ngabaqaphi ababehla benyuka emzini, bangishaya, bangilimaza, abaqaphi bezingange bangihlubula ingubo yami.
Madodakazi aseJerusalema fungani! Uma nimthola othandiweyo wami, niyomtshela yini ukuthi ngiyazifela ngaye na?
Othandiweyo wakho ubedlula ngani abanye, wena omuhle phakathi kwabo bonke abesifazane na? Othandiweyo wakho ubedlula ngani abanye, ukuze usifungise kanjalo na?
Othandiweyo wami uyakhazimula ngobumhlophe, ubomvu, uyakhanga phakathi kweshumi lezinkulungwane.
Ikhanda lakhe liyigolide, igolide loqobo elicolisekileyo. Imiyeko yakhe mikhulu njengehlathi, imnyama njengegwababa.
Amehlo akhe anjengamajuba ngasemiseleni yamanzi, agezwe ngobisi ehleli ngasemiseleni egcwele.
Izihlathi zakhe zifana nombhede wamakha, imibhoshongo yamakhambi anephunga elimnandi. Izindebe zakhe zomlomo zifana neminduze econsa imure emanzi.
Izingalo zakhe ziyizindilinga zegolide ezigcwaliswe ngamakhrisolithe. Umzimba wakhe ungathi wenziwe ngophondo lwendlovu, wembozwa ngamasafire.
Imilenze yakhe iyizinsika zemabuli ezibekwe phezu kwezisekelo zegolide loqobo. Isiqu sakhe sifana neLebhanoni, sinjengemisedari ekhethekileyo.
Okuphuma emlonyeni wakhe kumnandi, konke ayikho kuyanxaneleka. Yilowo othandiweyo wami, yilowo-ke ongumngani wami, madodakazi aseJerusalema.
Uyephi othandiweyo wakho, wena omuhle kakhulu phakathi kwabesifazane na? Ushonephi othandiweyo wakho sikufunise?
Othandiweyo wami wehlele esivandeni sakhe, emibhedeni yamakha, welusele ezivandeni, ukuze akhe iminduze.
Mina ngingowothandiweyo wami, nothandiweyo wami ungowami. Welusela phakathi kweminduze.
Sithandwa sami, umuhle njengeThirisa, uyabukeka njengeJerusalema, uyahlonipheka njengempi.
Susa amehlo akho kimi, ngokuba ayangisanganisa, izinwele zakho zifana nomhlambi wezimbuzi wehla entabeni yakwaGileyadi.
Amazinyo akho afana nomhlambi wezimvukazi zikhuphuka kade zigezwa, zinamaphahla, kungekho neyodwa efelweyo kuzo.
Njengocezu lwehananadi, zinjalo izihlathi zakho ngale kwemvakazi yakho.
Ondlunkulu bangamashumi ayisithupha, izancinza zingamashumi ayisishiyagalombili, izintombi azinakubalwa.
Kodwa ijuba lami, opheleleyo wami, munye qhwaba; uzelwe yedwa kunina, uyikhethelo lalowo owamzalayo. Amadodakazi ambona qede ambize ngobusisiweyo, ondlunkulu nezancinza bambona maqede bamhashe.
Ngubani lo obukeka njengentathakusa, omuhle njengenyanga, okhanya njengelanga, ohlonipheka njengempi na?
Ngehlele esivandeni samantongomane ukuyobona izithelo eziluhlaza esihosheni, nokubona ukuthi ngabe umvini usuqhakazile namahananadi asekhahlele.
Ngingazelele nje ukulangazelela kwami kwangibeka ezinqoleni zempi, zabantu benkosana yami.
Buya, buya mShulami! Buya, buya ukuze sikubuke! Yini enizoyibona kumShulami na? Kunjengokusina phakathi kwamaqembu amabili.
Zaze zazinhle izinyawo zakho ezimbadadeni, wena ndodakazi yesikhulu! Amathanga akho ayizindilinga anjengemihlobiso, umsebenzi wezandla zengcweti.
Inkaba yakho iyisitsha esiyindilinga esingalintuli iwayini elixutshiweyo, isisu sakho simbulungene okwendundumana kakolo, ebiyelwe ngeminduze.
Amabele akho amabili anjengamazinyane amabili, amaphahla ayizixhumo zensephe.
Intamo yakho ifana nombhoshongo wophondo lwendlovu, amehlo akho afana namachibi aseHeshibhoni, ngasesangweni eBhathi Rabhimi; ikhala lakho linjengombhoshongo waseLebhanoni, obhekene neDamaseku.
Ikhanda lakho linjengeKharimeli, nomyeko okulo usabukhwebezane, inkosi ibambeke njengomthunjwa emiyekweni.
Umuhle ngokubabazekayo wena sithandwa, futhi uyangenamisa!
Isiqu sakho sifana nesihlahla sesundu, namabele akho afana namahlukuzo alo.
Ngithi: “Ngizokhwela esihlahleni sesundu, ngibambelele emagatsheni aso.” Ngiyakucela, sengathi isifuba sakho singafana namahlukuzo omvini, nephunga lokuphefumula kwakho lifane namahhabhula,
nolwanga lwakho lufane newayini elihle, elehla kabushelelezi kothandiweyo wami, lewuka ezindebeni nasemazinyweni.
Mina ngingowothandiweyo wami, naye uyangilangazelela.
Woza, wena othandiweyo wami, siye endle, silale emizaneni.
Masivuke ekuseni siye ezivinini, siyobona ukuthi umvini usuqhakazile, nezimbali zawo sezivulekile, nokuthi amahananadi asekhahlele. Kulapho ngiyokunikeza khona uthando lwami.
Amamandragora athaphuka iphunga elimnandi, ngaseminyango yethu kukhona zonke izinhlobo zezithelo zekhethelo, ezintsha nezindala, engizibekele wena, othandiweyo wami.
Sengathi ngabe ungumfowethu esancela bele linye naye kumame! Uma bengingakuthola ngaphandle bengiyakukuqabula, ngingabe ngisabukelwa muntu phansi.
Bengizakukuhola ngikuse endlini kamame owangifundisa; mina ngikuphuzise iwayini elithakwe ngezinongo, nesiphuzo sami samahananadi.
Isandla sakho sokhohlo besiyokuba phansi kwekhanda lami, nesokunene, singigone.
Madodakazi aseJerusalema ngiyaniyala, ningalunyakazisi noma niluvuse uthando luze luzivukele lona.
Ngubani lo owenyukayo evela ehlane encike kothandiweyo wakhe na? Ngakuvusa phansi kwesihlahla samahhabhula, lapho unyoko wahelelwa khona; wasikwa waze wakuzala.
Ngifake njengophawu enhliziyweni yakho, nanjengophawu engalweni yakho. Ngokuba uthando lunamandla njengokufa, isikhwele sinonya njengendawo yabafileyo, amalangabi alo angamalangabi omlilo, ilangabi elinamandla.
Amanzi amaningi ngeke alucima uthando, nemifula ayinakulukhukhula. Uma umuntu engakhipha yonke ingcebo yomuzi wakhe ngenxa yothando, impela bayomedelela nokumedelela.
Sinodadewethu omncane, ongakahlosi. Siyokwenzenjani ngaye ngosuku ayocelwa ngalo na?
Ukuba ubeludonga, besizokwakha umbhoshongwana wesiliva phezu kwakhe. Ukuba ubeyisivalo, besizomvalela ngamapulangwe omsedari.
Ngangilugange, namabele ami ayenjengemibhoshongo emehlweni akhe, njengofumene ukuthula.
USolomoni wayenesivini eBhali Hamoni. Wasiqashisela abalindi; yilowo nalowo mlindi wayezokhokha izinhlamvu zesiliva eziyinkulungwane, ngezithelo zaso.
Isivini sami siphambi kwami, inkulungwane mayibe ngeyakho, Solomoni, namakhulu amabili abe ngawabaphathi bezithelo zaso.
Wena ohlala ezivandeni, abangani balalela izwi lakho; nami ake ungizwise lona.
Shesha, njengensephe, noma isixhumo sendluzelekazi ezintabeni zamakha, wena othandiweyo wami.
Umbono ka-Izaya, indodana ka-Amozi, awubona maqondana noJuda neJerusalema emihleni ka-Uziya, uJothamu, u-Ahazi noHezekiya; amakhosi akwaJuda.
Yizwani mazulu, ubeke indlebe we mhlaba, ngokuba uSimakade ukhuluma, uthi: “Ngikhulisile, ngondla abantwana, kodwa bangihlubukile.
Inkabi iyamazi umniniyo, nembongolo umkhombe lapho umniniyo eyiphakela khona, kodwa u-Israyeli akazi, abantu bami kabaqondi.”
Maye kuwe, sizwe esonayo, bantu abasindwa ngukona, nzalo yezonakali, bantwana abonakeleyo! Bamshiyile uSimakade, bamdelela oNgcwele ka-Israyeli, bahlehlile bamfulathela.
Nisazoshaywa kuphi futhi, lokhu nisaqhubeka nokuhlubuka na? Lonke ikhanda liyagula, nenhliziyo yonke ibuthakathaka.
Kusukela ematheni onyawo kuze kube sekhanda, akukho mpilo, kodwa ngamanxeba nezilonda zodwa, amanxeba ophayo awakhanyiwe ubovu, noma aboshwe, noma athanjiswe ngamafutha.
Izwe lakini liyincithakalo, imizi yakini ishiswe ngomlilo, umhlabathi wenu udliwa ngabafokazi phambi kwenu; liyincithakalo, libhujiswe ngabafokazi.
Indodakazi yaseZiyoni isele njengedlangala esivinini, njengexhokovana ensimini kakhukhamba, nanjengomuzi ovinjezelweyo.
Ukuba uSimakade Wamabandla ubengasishiyelanga insali, besiyakufana neSodoma, sibe njengeGomora.
Lalelani izwi likaSimakade, nina babusi baseSodoma. Nibeke indlebe esifundisweni sikaNkulunkulu wethu, nina bantu baseGomora.
“Iyini kimi imihlatshelo yenu eniyenza kaninginingi na?” kusho uSimakade. “Senganele yiminikelo yenu yokushiswa yezinqama, namanoni ezilwane ezikhuluphalisiwe; angithokozi ngegazi lezinkunzi nelamawundlu nelezimbuzi.
Uma niza phambi kwami, ngubani ofune lokhu esandleni senu ukuba ninyathele emagcekeni ami na?
Khawulani ukungilethela iminikelo engasho lutho; impepho iyisinengiso kimi. Imikhosi yenu yokwethwasa kwenyanga namasabatha, nokubiza imihlangano; anginakuyibekezelela imihlangano yenu emibi.
Izinsuku zokwethwasa kwenyanga nemikhosi yenu emisiweyo, umphefumulo wami uyakuzonda; sekuphenduke umthwalo kimi, sengikhathele ukukuthwala.
Uma niphakamisa izandla zenu, ngiyowafihla amehlo ami; ngisho ningenza imithandazo eminingi, angiyukuyilalela; izandla zenu zigcwele igazi.
Gezani, nizihlambulule; susani ububi bezenzo zenu phambi kwamehlo ami. Yekani ukwenza okubi.
Fundani ukwenza okuhle, nifune ubulungiswa, nimelane nabacindezeli, nivikele izintandane, nimele abafelokazi.
“Wozani-ke sidingide lolu daba,” kusho uSimakade. “Noma izono zenu zibomvu njengegazi, ziyokuba mhlophe njengeqhwa; noma zibomvu klebhu, ziyoba mhlophe njengoboya bezimvu.
Uma nivuma, futhi nilalela, niyokudla okuhle kwezwe.
Kodwa uma nenqaba, futhi nihlubuka, niyodliwa yinkemba,” ngokuba umlomo kaSimakade ukhulumile.
Yeka umuzi obuthembekile usuphenduke isifebe, lona obugcwele ubulungiswa! Ubuqotho babuhlala kuwo; kodwa manje ngababulali.
Isiliva lakho seliphenduke amanyela; iwayini lakho lixutshwe namanzi.
Izikhulu zakho zingabahlubuki nabangani bamasela; bonke bathanda ukufunjathiswa, balandela izipho nemivuzo. Abazivikeli izintandane, nendaba yomfelokazi ayifinyeleli kubo.
Ngakho-ke iNkosi uSimakade Wamabandla, uSomandla ka-Israyeli, uthi: “Impela ngizothululela ulaka lwami ezitheni zami, ngiziphindiselele kuzo.
Ngizoguqula isandla sami ngimelane nawe, ngicwengisise wonke amanyela akho, ngisuse konke ukungcola kwakho.
Ngizobabuyisela abehluleli bakho njengakuqala, nabeluleki bakho njengasekuqaleni. Emveni kwalokho uyobizwa ngomuzi wobuqotho, umuzi othembekileyo.
“IZiyoni lizokhululwa ngobulungiswa, nalabo abakulo baphenduke ngokulunga.
Kodwa abahlubuki bayobhujiswa kanye nezoni; nalabo abashiya uSimakade bayoqedwa nya.
“Impela niyokuba namahloni ngemi-okhi ebeniyilubalubela, niphoxeke ngezivande enaseniziqokile.
Ngokuba niyofana nomu-okhi omacembe awo abunile, nanjengesivande esingenamanzi.
Umuntu onamandla uyoba njengenswani, nomsebenzi wakhe ube yinhlansi; bobabili bashe kanyekanye, akuyukubabikho ocimayo.”
Indaba eyabonwa ngu-Izaya, indodana ka-Amozi, maqondana noJuda neJerusalema.
Kuyothi ngezinsuku zokugcina, intaba yendlu kaSimakade imiswe njengephakeme kunezintaba, iphakame kunamagquma; zonke izizwe ziyakugobhozela kuyo.
Abantu abaningi bayofika, bathi: “Wozani senyukele entabeni kaSimakade, endlini kaNkulunkulu kaJakobe, ukuze asifundise izindlela zakhe, sihambe emikhondweni yakhe,” ngokuba umthetho uyakuphuma eZiyoni, nezwi likaSimakade, eJerusalema.
Uyokwehlulela phakathi kwezizwe, axazulule imibango yezizwe eziningi. Ziyocangcatha izinkemba zazo zibe ngamageja, nemikhonto yazo ibe ngocelemba. Isizwe asiyukuphakamisela esinye inkemba, zingabe zisaviviselwa ukulwa.
Wena ndlu kaJakobe, woza sihambe ekukhanyeni kukaSimakade.
Ubalahlile abantu bakho, indlu kaJakobe, ngokuba isigcwele imikhuba yasempumalanga; sebengabalumbi njengamaFilisti, bamdibimunye nabantwana babezizwe.
Izwe lakubo ligcwele isiliva negolide, ingcebo yabo ayinakubalwa; izwe labo ligcwele amahhashi, izinqola zabo zempi azinakubalwa.
Izwe lakubo ligcwele izithombe ezibaziweyo; bakhothamela umsebenzi wezandla zabo, owenziwe yiminwe yabo.
Ngakho-ke bonke abantu bathotshisiwe, bonke behliswa isithunzi; ungabathetheleli.
Ngena edwaleni, ucashe othulini, ngenxa yokwesabeka kukaSimakade nenkazimulo yobukhosi bakhe.
Amehlo omuntu oziphakamisayo azakuthotshiswa, nokuzidla kwabantu kufojiswe; nguSimakade kuphela oyophakama ngalolo lusuku.
Ngokuba uSimakade Wamabandla umise usuku ayakumelana ngalo nabo bonke abazidlayo, abazigqajayo nabazikhukhumezayo, bonke bayothotshiswa;
amelane nayo yonke imisedari eLebhanoni ezidlayo nephakemeyo, nayo yonke imi-okhi eBhashani,
nazo zonke izintaba eziphakemeyo, nawo wonke amagquma aphakemeyo,
nayo yonke imibhoshongo ephakemeyo, nazo zonke izingange eziqinisiweyo,
nemikhumbi yonke eTharishishi, nazo zonke izinto ezinxanelekayo.
Ukuzidla kwabantu kuyothotshiswa, nokuzikhukhumeza kwabantu kuyofojiswa; nguSimakade kuphela oyophakanyiswa ngalolo lusuku.
Izithombe ezibaziweyo ziyoshabalala.
Abantu bayongena emigedeni esemadwaleni, nasemigodini emhlabathini, bebalekela ukwesabeka kukaSimakade nenkazimulo yobukhosi bakhe, lapho ephakama ukuthuthumelisa umhlaba.
Ngalolo lusuku abantu bayozilahla ezimvukuzaneni nasemalulwaneni, izithombe zabo zesiliva nezithombe zabo zegolide, abazenzele zona ukuba bazikhonze.
Bayongena emihumeni esemadwaleni nasemifantwini yamawa, bebalekela ukwesabeka kukaSimakade nenkazimulo yobukhosi bakhe, lapho ekhuphuka ukuthuthumelisa umhlaba.
Bayekeni abantu abamphefumulo usemakhaleni abo, ngokuba bayini nje nempela?
Bheka, iNkosi uSimakade Wamabandla iyakususa eJerusalema nakwaJuda konke abaphila ngakho, konke ukudla namanzi:
amaqhawe namadoda empi, abehluleli nabaphrofethi, ababhuli namalunga,
izinduna zamashumi ayisihlanu nabantu abanodumo, abeluleki nezingcweti ezihlakaniphileyo, nabanolwazi lokulumba.
Ngiyobeka abafana babe yizikhulu zabo; izingane zibabuse.
Abantu bayocindezelana; yilowo nalowo acindezele omunye, kube yilowo nalowo umakhelwane wakhe; izingane ziyokwedelela abadala, nabantukazana badelele izikhulu.
Umuntu uyobamba umfowabo abavela ndlini yinye kayise, athi: “Wena unengubo, yiba ngumbusi wethu, le ncithakalo ibe phansi kwesandla sakho.”
Ngalolo lusuku uyodazuluka, athi: “Angiyukuba ngumelaphi, ngokuba akukho sinkwa nangubo endlini yami; ningangibeki umbusi wabantu.”
IJerusalema likhubekile, noJuda uwile, ngokuba abakushoyo nabakwenzayo kuphambene noSimakade, kwedelela ubukhona benkazimulo yakhe.
Ukubukeka kobuso babo kufakaza ngabo; izono zabo bazenza obala njengaseSodoma, abazifihli. Maye kubo! Ngokuba bazilethela ububi phezu kwabo.
Tshelani abalungileyo ukuthi kuyobahambela kahle, ngokuba bayokudla izithelo zezenzo zabo.
Maye komubi! Kuzomhambela kabi, ngokuba kuyakwenziwa kuye lokho izandla zakhe ezikwenzileyo.
Abantu bami bacindezelwa yizingane, babuswa ngabesifazane. Bantu bami, abaniholayo bayanidukisa; baphambanisa indlela eniziphatha ngayo.
USimakade umele isikhundla sakhe, ukuthetha icala, ehlulela izizwe.
USimakade uze ukuzokwehlulela ekanye namalunga abantu bakhe nabaholi babo, uthi: “Yini eniqede isivini, nabuthela impango yabampofu ezindlini zenu.
Nibachobozeleni abantu bami, nafihliza ubuso babampofu na?” kusho iNkosi uSimakade Wamabandla.
USimakade wathi: “Ngenxa yokuziphakamisa kwamadodakazi aseZiyoni, ahamba elule izintamo, ecwayizisa amehlo, eshayela phezulu, ekhencezisa amadavathi ezinyawo zawo;
ngenxa yalokho, iNkosi iyozenza izimpandla izinkakhayi zamadodakazi aseZiyoni; uSimakade uyowashiya eyizingengelezi.”
Ngalolo lusuku iNkosi iyosusa imihlobiso yawo: izigqizo, imiqhele, izimbedu ezinjengenyanga,
iziqhaza, amasongo, izimvakazi,
izigqoko, imihlobiso yemilenze, izibhamba, imifuma, iziqu,
izindandatho, amacici asemakhaleni,
izembatho zemikhosi, nezangaphezulu, amatshali, izinqalathi,
izibuko, ilineni elicolekileyo, imishuqulo, nezilwembu zokuhlonipha.
Esikhundleni samakha, kuyoba ngukubola; nasesikhundleni sebhande, kube yintambo; esikhundleni sezinwele ezilungiswe kahle, kube yimpandla; nasesikhundleni sesidiya, kube yisibhamba sendwangu eyisaka; nasesikhundleni sobuhle, kube yisishada.
Amadoda akho ayokuwa ngenkemba namaqhawe akini asale empini.
Amasango alo ayokhala, alile; liyakuba yize, liqumbeke phansi emhlabathini.
Ngalolo lusuku abesifazane abayisikhombisa bayobamba indoda eyodwa, bathi kuyo: “Sizozondla thina, sizembathise ngokwethu, kuphela nje masibizwe ngegama lakho, ususe ihlazo lethu.”
Ngalolo lusuku ihlumela likaSimakade liyoba lihle, libe nenkazimulo, nezithelo zomhlaba ziyoba nodumo nobuhle ensalini ephunyukileyo yakwa-Israyeli.
Kuyothi insali eseZiyoni nalabo abasele eJerusalema, bonke ababhaliselwe ukuthi basaphila eJerusalema, kuthiwe bangcwele,
lapho iNkosi isikukhucululile ukungcola kwamadodakazi aseZiyoni, yalihlanza igazi eliphakathi kweJerusalema ngomoya wokwehlulela nangomoya womlilo.
USimakade uyodala phezu kwayo yonke indawo entabeni iZiyoni, naphezu kwazo zonke izindawo zokuhlanganela ifu emini, nentuthu nokukhanya kwelangabi lomlilo ebusuku. Ngokuba phezu kwayo yonke inkazimulo, kuyoba khona isivikelo.
Iyakuba ngumpheme nomthunzi ekushiseni kwemini, nesiphephelo nompheme esivunguvungwini nasemvuleni.
Mangihlabelele ngothandiweyo wami, isihlabelelo sothandiweyo ngesivini sakhe. Othandiweyo wami wayenesivini egqumeni elivunde kakhulu.
Wamba, wakhipha amatshe kuso, watshala umvini omuhle, wakha isiqongo sokulinda phakathi kwaso, waqopha isikhamo kuso, walindela ukuba sithele izithelo zomvini, kodwa sathela izithelo zasendle.
“Manje-ke, nina enakhe eJerusalema nani nonke kwaJuda, ake nehlulele phakathi kwami nesivini sami.
Yini esafanele ukwenziwa kuso engingayenzanga kuso na? Kungani ukuba ngithi ngilindele ukuthi sithele izithelo zomvini, sona sathela izithelo zasendle na?
Ngakho-ke manginitshele engizokwenza esivinini sami: ngizosusa uthango lwaso, ukuze sidliwe, ngibhidlize ugange lwaso, ukuze sinyathelwe.
Ngizosenza sibe yincithakalo; asiyukuthenwa, asiyukulinywa, kodwa kuyakumila amakhakhasi nameva; ngiyakuyala amafu ukuba anganisi imvula phezu kwaso.”
Isivini sikaSimakade Wamabandla yindlu ka-Israyeli, bonke abantu bakwaJuda bayisithombo sakhe esithandekayo; walindela ubulungiswa, kodwa kwachitheka igazi; wabheka ukulunga, kodwa kwaba ngukukhala.
Maye kini enihlanganisa indlu nendlu, ninezelele insimu kwenye, kuze kungabe kusaba bikho ndawo, ukuze kube yini nodwa enakhe emhlabeni!
USimakade Wamabandla wathi ezindlebeni zami: “Impela iningi lezindlu liyokuba yincithakalo, izindlu ezinkulu nezinhle kungabi namuntu ohlala kuzo.
Ngokuba ama-eka alishumi esivini ayakuthela ibhathi libe linye, ihomere lembewu lithele i-efa nje.”
Maye kulabo abavuka ekuseni bathungathe uphuzo olunamandla, balibale kuze kuhlwe, badakwe yiwayini!
Emadilini abo kukhona ihabhu, ugubhu, isigubhu, igekle newayini, kodwa abayinaki imisebenzi kaSimakade; kabaziboni nezenzo zezandla zakhe.
Abantu bami bayathunjwa bengazi; amadoda ahloniphekileyo abhuqwabhuqwa yindlala, nezixuku zigangadekile ngukoma.
Ngalokho indawo yabafileyo inwebe umphimbo wayo, yakhamisa umlomo ngokungenamkhawulo; abahloniphekileyo, nesixuku esixokozelayo, nabajabulayo phakathi kwabo, behlela kuyo.
Abantu bathotshisiwe, bonke behliselwe phansi; amehlo abazigqajayo ayothotshiswa,
uSimakade Wamabandla uphakeme ekwehluleleni, uNkulunkulu oNgcwele ubonakalisile ubungcwele bakhe ngokulunga.
Izimvana ziyoklaba njengasemadlelweni azo, namazinyane adle encithakalweni yabacebileyo.
Maye kulabo abadonsa ukona ngezintambo zamanga, nezono kungathi ngamagoda ezinqola,
abathi: “Makaphangise, asheshise umsebenzi wakhe ukuze siwubone; malisondele, lifike icebo loNgcwele ka-Israyeli, ukuze sazi!”
Maye kulabo abathi okubi kuhle, nokuhle kubi, labo abathi ubumnyama kungukukhanya, nokukhanya kungubumnyama; abathi okubabayo kumtoti, nokumtoti kuyababa!
Maye kulabo abazibona behlakaniphile, nabazibona benokuqonda!
Maye kulabo abangamaqhawe ngokuphuza iwayini, nabanekhono lokuxuba uphuzo oludakisayo;
abavuna izikhohlakali ngenxa yenzuzo, bangabenzeli ubulungiswa abalungileyo!
Njengamalangabi ekhotha amabibi, nezikhotha ezomileyo zizika kuwo, impande yabo iyofana nokubola, nembali yabo ibe njengothuli; iyakuthuquka, ngokuba bawulahlile umthetho kaSimakade Wamabandla, baledelela izwi loNgcwele ka-Israyeli.
Ngenxa yalokho intukuthelo kaSimakade yasivuthela isizwe sakhe, welula isandla sakhe wasishaya. Izintaba ziyathuthumela, nezidumbu zabo ziyimfucuza emigwaqweni; kukho konke lokhu intukuthelo yakhe ayibohli, isandla sakhe silokhu sishayile.
Uyophakamisela isizwe esikude ibhanela, asihlabele ikhwelo sisemajukujukwini omhlaba; yebo, siyakuza ngokushesha.
Akukho noyedwa oyokhathala, akhubeke kuso; akekho oyokozela, alale; ibhande ezinkalo zabo aliyuqaqeka, nomchilo ezicathulweni zabo awuyukugqabuka,
abamicibisholo iloliwe, neminsalo yabo yonke insaliwe; izinyawo zamahhashi abo ziyakufaniswa nezensengetshe; namasondo abo, njengesivunguvungu.
Ukubhonga kwabo kunjengokwengonyama; bayakubhonga njengamabhongo ebhubesi; yebo, bayogwavuma, babambe impango yabo, bahambe nayo, kungekho ongayihlenga.
Ngalolo lusuku bayogwavuma phezu kwabo, njengokuduma kolwandle; uma umuntu ebuka umhlaba, kuyobe kunesigayegaye sobumnyama, ukukhanya kuphenduke ubumnyama ngenxa yamafu.
Ngonyaka wokufa kwenkosi u-Uziya, ngabona uSimakade ehleli esihlalweni sakhe sobukhosi esiphezulu nesiphakemeyo; umsila wengubo yakhe ugcwalise ithempeli.
Ngaphezu kwakhe kwakumi amaserafi; yilelo nalelo linamaphiko ayisithupha; ngamabili awo lamboza ubuso balo, ngamabili lamboza izinyawo zalo, nangamabili landiza.
Elinye lamemeza kwelinye, lathi: “Ungcwele, ungcwele, ungcwele uSimakade Wamabandla, wonke umhlaba ugcwele inkazimulo yakhe.”
Izinsika zomnyango zathuthumeliswa yizwi lomemezayo, indlu yagcwala intuthu.
Ngase ngithi: “Maye kimi! Ngokuba ngiphelile, lokhu ngingumuntu ondebe zakhe zingcolile, futhi ngihleli phakathi kwabantu abazindebe zabo zingcolile. Ngokuba amehlo ami ayibonile iNkosi uSimakade Wamabandla.”
Elinye lamaserafi landizela kimi liphethe ilahle elivuthayo esandleni salo, elalilithathe ngodlawu e-althare.
Lathinta umlomo wami, lathi: “Uyabona, lokhu kuzithintile izindebe zakho; ububi bakho sebususiwe, nezono zakho sezihlanguliwe.”
Ngabuye ngezwa izwi leNkosi lithi: “Ngiyothuma bani, ngubani oyosiyela na?” Ngase ngithi: “Bheka, nangu mina; thuma mina.”
Yathi: “Hamba uthi kulaba bantu: “ ‘Yizwani, yizwani, kodwa ningaqondi; bonani, bonani, kodwa ningazi.’
Yenza inhliziyo yalaba bantu ibe lukhuni, izindlebe zabo zibe buthuntu; ufiphaze amehlo abo, funa babone ngamehlo abo, bezwe ngezindlebe zabo, baqonde ngenhliziyo yabo, babuye, baphiliswe.”
Ngase ngithi: “Nkosi, kuyoze kube nini na?” Yathi: “Kuze kuchithwe imizi, kungabe kusaba khona ohlala kuyo, izindlu zingabe zisaba namuntu, nomhlaba ube yincithakalo neze,
uSimakade aze adedisele kude abantu, nencithakalo ibe nkulu ezweni.
Ngisho noma kusasele ingxenye yeshumi kulo, iyobuye ishiswe njengomtherebhinte nomu-okhi okusiqu sakho simi lapho kugawulwa khona, inzalo engcwele iyisiqu sakho.”
Kwathi ngezinsuku zika-Ahazi, indodana kaJothamu ka-Uziya, inkosi yakwaJuda, uRezini, inkosi yase-Aramu benoPheka indodana kaRemaliya, inkosi yakwa-Israyeli, bakhuphuka bayokulwa neJerusalema, kodwa abakwazanga ukulinqoba.
Kwathi lapho bezwa abendlu kaDavide, kuthiwa: “I-Aramu libambisene no-Efrayimi,” inhliziyo yakhe neyabantu bakhe yangenwa yitwetwe, banyakaza njengezihlahla zehlathi zinyakaziswa ngumoya.
USimakade wathi ku-Izaya: “Hamba uyobona u-Ahazi, wena noSheyari Jashubhi, indodana yakho, ungasekugcineni komsele wechibi elingenhla elingasendleleni yeNsimu Yomhlanzi.
Ubothi kuye: ‘Xwaya, uthule; ungesabi, ungadangali enhliziyweni yakho ngenxa yalezi ziphunzi zezikhuni ezimbili ezithunqayo, nangokuvutha kolaka lukaRezini ne-Aramu, nolwendodana kaRemaliya.
Ngokuba i-Aramu no-Efrayimi nendodana kaRemaliya bacebe ukukulimaza, bethi:
“Masikhuphukele kwelakwaJuda, silicekele phansi, sizinqobele lona, bese sibeka indodana kaThabheyeli, ilibuse.”
“ ‘Ngakho-ke isho kanje iNkosi uSimakade, ithi: “ ‘Akuyukuphumelela, futhi akuyukwenzeka,
ngokuba inhloko ye-Aramu yiDamaseku, inhloko yeDamaseku nguRezini; ingakapheli iminyaka engamashumi ayisithupha nanhlanu u-Efrayimi uyobe esehlakaziwe, engasesona ngisho isizwe.
Inhloko yakwa-Efrayimi yiSamariya, inhloko yeSamariya yindodana kaRemaliya. Uma ningakholwa, impela aniyukuma.’ ”
USimakade waqhubeka wakhuluma no-Ahazi, wathi:
“Zicelele isibonakaliso kuSimakade uNkulunkulu wakho, sibe ngesijule njengendawo yabafileyo noma ngesiphakame njengezulu.”
Kodwa u-Ahazi wathi: “Angiyukucela, futhi angiyukumlinga uSimakade.”
Wayesethi: “Ake ulalele wena ndlu kaDavide! Kawukhathali yini ukuhlupha abantu, sewufuna ukukhathaza ngisho uNkulunkulu wami na?
Ngakho-ke iNkosi uqobo izokunika isibonakaliso: intombi izakukhulelwa, izale indodana, iyiqambe ngokuthi ngu-Imanuweli.
Uyodla izaqheqhe noju aze akwazi ukwala okubi nokukhetha okuhle.
Ngokuba umntwana engakakwazi ukwala okubi nokukhetha okuhle, leli lizwe okhathazwa ngamakhosi alo amabili liyobe lingasenamuntu.
USimakade uzokwehlisela phezu kwakho, nabantu bakho, naphezu kwendlu kayihlo izinsuku ezingakaze zibonwe kusukela ngosuku u-Efrayimi aqembuka ngalo kwaJuda, inkosi yase-Asiriya iyoba nawe shaqa.”
Ngalolo lusuku uSimakade uyohlaba umkhosi ngekhwela kusabele izimpukane ezingasekugcineni kwemifudlana eGibhithe, nezinyosi e-Asiriya.
Ziyofike ziphumule kuzo zonke izigodi ezineziwa, nasemifantwini yamadwala, nasemahlanzeni wonke, nakuwo wonke amadlelo.
Ngalolo lusuku iNkosi iyakuphuca ngensingo eyiqashe ezifundeni ezingaphesheya komfula (okusho ukuthi inkosi yase-Asiriya), ikhanda neziboya emlenzeni, futhi iyihluthule isilevu.
Kuyothi ngalolo lusuku, umuntu uyofuya isithole nezimvu ezimbili kuphela,
bese kuthi ngobuningi bobisi esilukhiqizayo idle izaqheqhe, ngokuba izaqheqhe noju kuyodliwa yibo bonke abasele ezweni.
Kuyothi ngalolo lusuku yonke indawo lapho bekumila khona imivini eyinkulungwane, ithengise inkulungwane yezinhlamvu zesiliva, kumile ameva namakhakhasi.
Kuyoyiwa khona ngeminsalo nemicibisholo, ngokuba izwe liyobe seligcwele ameva namakhakhasi.
Izintaba zonke ebezilinywa ngamageja akusayukuyiwa kuzo ngenxa yokwesaba ameva namakhakhasi, kodwa sekuyokhashelwa kuzo izinkabi nezimvu, zikugxobe.
USimakade wathi kimi: “Zithathele isibhebhe esikhulu, ubhale kuso ngokwendlela yomuntu, uthi Mahere Shalali Hashi Bhazi.
Ngizakuzifunela ofakazi abaqotho, u-Uriya umphristi noZakhariya, indodana kaJebherekhiya.”
Ngase ngilala nomkami umphrofethikazi; wakhulelwa, wazala indodana. USimakade wathi kimi: “Mqambe uthi nguMahere Shalali Hashi Bhazi,
ngokuba uyothi umntwana engakakwazi ukuthi: ‘Baba,’ noma ‘Mama,’ ingcebo yaseDamaseku nempango yaseSamariya ibe isithuthelwe enkosini yase-Asiriya.”
USimakade wabuye wakhuluma nami, wathi:
“Ngenxa yokuthi laba bantu bawenqaba amanzi aseShilowa ageleza buthule, bathokozela uRezini nendodana kaRemaliya,
ngalokho-ke iNkosi izobakhuphulela amanzi omfula onamandla amaningi, inkosi yase-Asiriya nabo bonke ubukhosi bayo. Uyakukhuphuka wemboze lonke usebe, weqe zonke izindonga zawo,
utheleke kwaJuda. Uyogcwala, ufinyelele ezinkwazini, bese amaphiko awo elulekileyo agcwalise ububanzi bezwe lakho, Imanuweli.”
Hlanganani zizwe, nishaqeke. Bekani indlebe nina mazwe akude: bophani izinkalo zenu, nokho niyodangala; yebo, bophani izinkalo zenu, kodwa niyakudangala.
Cebani icebo, kodwa lizobhuntsha; bophani izwi libe linye, kodwa alinakuphumelela, ngokuba uNkulunkulu unathi.
UNkulunkulu ukhulumile kanjalo nami ngesandla esinamandla, wangiyala ukuba ngingahambi ngendlela yalaba bantu, wathi:
“Ningakubizi ngokuthi wuzungu konke lokhu laba bantu abathi wuzungu. Ningakwesabi abakwesabayo; ningabi naluvalo ngakho.
USimakade Wamabandla, mungcweliseni, nimesabe, kube nguye kuphela eninovalo ngaye.
Uyakuba yisiphephelo, futhi abe yitshe lokuqhuzuka, nedwala lokukhubekisa kuzo izindlu zombili zakwa-Israyeli; abe lugibe nesihibe kwabakhileyo eJerusalema.
Abaningi phakathi kwabo bayakukhubeka, bawe, bephuke; bayakucushwa, babanjwe.”
Bambisisisa ubufakazi, uwugcizelele umthetho phakathi kwabafundi bami.
Ngiyokumlindela uSimakade ositheze ubuso bakhe kuyo indlu kaJakobe, ngimlindele ngokwethemba.
Bheka, mina nabantwana uSimakade angiphe bona, siyizibonakaliso nezimangaliso kwa-Israyeli, ezivela kuSimakade Wamabandla ohleli entabeni iZiyoni.
Uma bethi kini: “Hambani nihlole kwabanamadlozi nabanemimoya, abahhumuzelayo, banyenyeze,” kanti isizwe akumele yini sibuze kuNkulunkulu waso na? Singabahlolela yini abaphilayo,
isifundiso nobufakazi kwabafileyo na? Impela abakhuluma ngalolu hlobo, kabasoze baba nakukhanya.
Bayodabula ezweni bexakekile, futhi belambile. Ekulambeni kwabo bayovutha bhe ulaka, bayethuke inkosi yabo noNkulunkulu wabo, baphenduke babheke phezulu.
Bayobheka nasemhlabeni; babone kuphela inhlupheko, ubumnyama, nokuphelelwa yithemba, bayakuxoshelwa esigayegayeni.
Akuyukubabikho bumnyama kulabo ababehlupheka. Ngesikhathi esedlule uSimakade wathobisa elakwaZebuloni nelakwaNafethali, kodwa ngomuso uyokwenza ihlonipheke indlela eya olwandle, ezweni elingaphesheya kweJordani, eGalile labezizwe.
Abantu ababehamba ebumnyameni, babonile ukukhanya okukhulu. Labo abahlala ezweni elimnyama bhuqe, ukukhanya kuyakubakhanyisela.
Uyokwandisa isizwe, usenze siphuphume injabulo; siyothokoza phambi kwakho njengokujabula ngesikhathi sokuvuna, njengoba abantu bejabula lapho babelana impango.
Ngokuba uyakunqamula ijoka lomthwalo wabo, nenduku esemahlombe abo, nentonga yocindezelayo, njengosuku mhla kunqotshwa abakwaMidiyani.
Wonke amabhuzu amabutho abefakwe empini, nezingubo ezazicwiliswe egazini, kuyoshiswa, kudliwe ngumlilo.
Ngokuba sizalelwe uMntwana, siphiwe iNdodana; umbuso uyokuba semahlombe akhe. IGama lakhe kuyothiwa nguMeluleki omangalisayo, uNkulunkulu onamandla, uYise ongunaphakade, uMbusi wokuthula.
Umbuso wakhe uyokwanda njalo, ukuthula kungaze kwaphela esihlalweni sobukhosi sikaDavide nasembusweni wakhe, ukuze usekelwe, umiswe ngobulungiswa nangobuqotho, kusukela manje kuze kube phakade. Intshisekelo kaSimakade Wamabandla iyokwenza lokho.
INkosi ithumele izwi kwaJakobe, lehlela nakwa-Israyeli.
Bonke abantu bayazi ngalo, u-Efrayimi nezakhamuzi zaseSamariya, kodwa okwathi ngokuqhosha nangokuzidla kwabo, bathi:
“Izitini ziwele phansi, kodwa sizokwakha kabusha ngamatshe abaziweyo; izihlahla zomkhiwane zigawuliwe, kodwa sizotshala ezomsedari esikhundleni sazo.”
USimakade ubavusele izitha zivela kuRezini, ukuze zimelane nabo. Wazigqugquzela izitha zabo,
ama-Aramu ngasempumalanga, namaFilisti ngasentshonalanga, bamsobozela u-Israyeli ngemilomo yabo. Phezu kwakho konke lokho, ulaka lukaSimakade alukabohli, isandla sakhe sisashaya.
Abantu ababuyelanga kulowo obashayayo, abamfunanga uSimakade Wamabandla.
Ngakho-ke ngalusuku lunye uSimakade uyanquma kwa-Israyeli: ikhanda nomsila, igatsha lesundu nomhlanga.
Impunga nophakemeyo bayikhanda, umphrofethi ofundisa ngamanga ungumsila.
Labo abahola laba bantu bayabadukisa, nalabo abaholwayo badidekile.
Ngalokho-ke iNkosi ayithokozi ngezinsizwa zabo, ayinasihawu ezintandaneni nakubafelokazi bakhona. Ngokuba yilowo nalowo kubo engenabuNkulunkulu, abenzi bokubi, bonke bakhuluma ubuwula ngemilomo yabo; kukho konke lokhu intukuthelo kaSimakade ayibohli, nesandla sakhe sisashaya.
Ngokuba inkohlakalo ivutha njengomlilo, iqothula ameva namakhakhasi, yokhele ihlozi lehlathi, kwenyuka isikhatha sentuthu sibheke phezulu.
Ngentukuthelo kaSimakade Wamabandla, izwe lashiswa; abantu bafana nenswani, badliwe ngumlilo, akwababikho ophephisa umakhelwane wakhe.
Badla okungakwesokunene, basala belambile, badla okungakwesokhohlo, kabaze beneliswa; yilowo nalowo wadla inyama yengalo yakhe,
uManase uphendukele u-Efrayimi, u-Efrayimi waphendukela uManase, bobabili baphendukele uJuda. Kukho konke lokho ulaka lukaSimakade alubohlanga, nesandla sakhe usashaya ngaso.
Maye, kulabo abashaya imithetho engalungile, nababhala izimiso ezikhathazayo,
ukuhlanekezela ubulungiswa kwabantulayo, nokuqola abantu bami abampofu amalungelo abo, ukuze abafelokazi babe yimpango yabo, nezintandane zibe yisisulu sabo.
Niyokwenzenjani ngosuku lokwehlulela, lapho nehlelwa yinhlekelele evela kude na? Niyobalekela kubani ukuba anisize na? Niyowushiya kuphi umcebo wenu na?
Maningacashi phakathi kwabathunjiweyo, noma phakathi kwababuleweyo, ngoba kukho konke lokhu, ulaka lukaSimakade alukabohli, nangesandla sakhe usashaya.
“Maye, kulo i-Asiriya, intonga yentukuthelo yami, induku esesandleni salo iyintukuthelo yami.
Ngiyithuma esizweni esingenabunkulunkulu, ngiyijube ukubhekana nabantu engibathukuthelele ukuba ibaphange impango, iqhwage impahla, ibaxove njengodaka emigwaqweni.
Kodwa akusikho lokho ama-Asiriya akuhlosile, futhi akukhona lokhu akucabangayo. Okusenhliziyweni yawo ukubhubhisa nokushabalalisa izizwe eziningi.
Ngokuba azishaya isifuba, ethi: ‘Ngabe bonke abakhuzi bempi bami abasiwo amakhosi na?
IKhalino alinjengeKharikhemishi na? IHamathi alinjenge-Ariphadi na? ISamariya alinjengeDamaseku na?
Njengoba isandla sami sifinyelele emibusweni yezithombe, ezithombe zayo zazingaphezu kwalezo eziseJerusalema naseSamariya.
Angiyukwenza yini kulo iJerusalema nezithombe zalo, lokho engikwenzile kulo iSamariya nezithombe zalo na?’ ”
Kuyothi lapho iNkosi isiwuqedile wonke umsebenzi wayo entabeni iZiyoni naseJerusalema, ijezise inkosi yase-Asiriya ngenxa yokukhuluma kwayo ngokuziqhayisa, nangokuziphakamisa kwayo.
Ngokuba ithi: “Zonke lezi zinto ngizenze ngamandla ami, nangokuhlakanipha kwami, ngokuba nginokuqonda; ngiyisusile imingcele yezizwe, ngaphanga ingcebo yazo; njengesiqhwaga ngiziqumbe phansi izakhamuzi.
Isandla sami sithole umcebo wezizwe; njengomuntu ebutha amaqanda ashiywe esidlekeni senyoni, nami ngiwubuthe kanjalo-ke umhlaba wonke. Akubangabikho lutho olwake lwathi nyaka, nolwathi nkente, nolwake lwathi tshiyo.”
Izembe lingaziqhayisa yini kuye ogawula ngalo, nesaha lingazikhukhumeza yini kosaha ngalo na? Induku ingamphakamisa yini oyiphakamisayo, nentonga lokho okungesilo ukhuni na?
Ngakho iNkosi uSimakade Wamabandla izothumela isifo esincunzayo phakathi kwamabutho akhe akhulupheleyo, iphembe umlilo ngaphansi kwenkazimulo yayo umlilo uvuthe.
Ukukhanya kuka-Israyeli kuyakuba ngumlilo, kuthi oNgcwele ka-Israyeli abe yilangabi; kuyakushisa kuqothule ameva namakhakhasi akhe ngalusuku lunye.
Iyoqeda ubuhle behlathi lakhe nensimu yakhe, njengomzimba wogulayo uncunzwa wukufa.
Insali yemithi yehlathi lakhe iyokuba yingcosana, ukuze ibalwe nangumntwana omncane.
Kuyothi ngalolo lusuku, insali yabakwa-Israyeli nabasindileyo bendlu kaJakobe, bangabe besathembela kulowo obashayileyo, kodwa bayokwethemba ngeqiniso uSimakade oNgcwele ka-Israyeli.
Insali iyobuya: insali kaJakobe, ibuyele kuNkulunkulu uSomandla.
Ngisho noma abantu bakho, Israyeli, bebengangesihlabathi solwandle, kuyobuya imithonseyana phakathi kwabo, ngoba ukubhujiswa kubahlalele; nokulunga kuyachichima.
Ngokuba iNkosi uSimakade Wamabandla uyokuphelelisa ukubhujiswa osekunqunywe emhlabeni wonke.
Ngalokho-ke isho kanje iNkosi uSimakade Wamabandla, ithi: “Bantu bami, enihlala eZiyoni, ningabesabi abase-Asiriya lapho benishaya ngentonga yabo, bephakamisa induku yabo ukumelana nani, njengoba kwenza abaseGibhithe.
Ngokuba ngesikhashana nje izokwehla intukuthelo yami, ulaka lwami kube ngolokubhujiswa kwabo.”
USimakade Wamabandla uzobaxebula ngenkalivasi njengoba enza mhla eshaya abakwaMidiyani ngasedwaleni i-Orebhi, nentonga yakhe iyakuba phezu kolwandle; uyakuyiphakamisa njengoba enza eGibhithe.
Kuyothi ngalolo lusuku umthwalo wabo uyakususwa emahlombe akho, nejoka labo entanyeni yakho, ijoka liyonqamuka ngenxa yokunona.
Liyeza i-Ayi, ledlula eMigroni; lethula impahla yalo eMikhimashi,
badlula entubeni, ebusuku bahlala eGebha; iRama liyathuthumela, iGibheya likaSawule lithi galo yephuka.
Khamuluka ndodakazi yaseGalimi; qaphela Layishi, yiphendule Anathothi.
IMadimena selibalekile, izakhamuzi zaseGebhimi sezibhacile.
Namuhla izokanisa eNobhi, izakuzivocavocela intaba yendodakazi yaseZiyoni negquma eJerusalema, isibhakela sayo.
INkosi uSimakade Wamabandla iyonquma amagatsha ngesihluku, kudicilelwe phansi abaphakemeyo, nabazikhukhumezayo behliswe.
Ihlozi lehlathi liyogencwa ngembazo, neLebhanoni liyowa ngenxa yoNamandla.
Kuyakuvela ihlumela esiqwini sikaJese, kumile igatsha ezimpandeni zakhe, lithele.
UMoya kaSimakade uyohlala phezu kwakhe, umoya wokuhlakanipha nowokuqonda, umoya wamasu nowamandla, umoya wokwazi nowokumesaba uSimakade.
Intokozo yakhe iyakuba sekumesabeni uSimakade; akayukwehlulela ngokubona kwamehlo akhe, noma anqume ngakuzwe ngosizwile.
Kepha uyakwehlulela abampofu ngokulunga, alunqume ngokufaneleyo udaba lwabathobekileyo bomhlaba, uyakushaya umhlaba ngentonga yomlomo wakhe, ababulale ababi ngokuphefumula kwezindebe zakhe.
Ukulunga kuyoba yibhande okhalo lwakhe, ukwethembeka kube yibhande lamanyonga akhe.
Inkentshane liyoquba newundlu, ingwe ibuthise ndawonye nezinyane lembuzi, ithole nebhongo lengonyama; kukhuluphaliswe ndawonye, kuqhutshwe yingane encane.
Inkomo nebhele kuyakuklaba ndawonye, namazinyane akho abuthise ndawonye, ibhubesi lidle utshani njengenkabi.
Umntwana osancela uyodlala ngasemgodini wemfezi; olunyuliwe afake isandla sakhe emgodini webululu.
Abayukukwenza okubi, noma babhubhise entabeni yami engcwele, ngokuba umhlaba wonke uyogcwala ukumazi uSimakade njengamanzi esibekela ulwandle.
Ngalolo lusuku impande kaJese iyakuma njengebhanela lezizwe; abezizwe bayoyifuna, nendawo yayo iyokuba nodumo.
Kuyothi ngalolo lusuku, iNkosi ibuye yelule isandla sayo okwesibili ukubutha insali yabantu bayo e-Asiriya, eGibhithe, ePhathirosi, eKhushe, e-Elamu, eShineyari, eHamathi, naseziqhingini ezisolwandle.
Iyophakamisela abezizwe ibhanela, ibuthe abaxoshiweyo bakwa-Israyeli, iqoqe abahlakazekileyo bakwaJuda emagumbini omane omhlaba.
Umona ka-Efrayimi uyophela, nalabo abahlukumeza uJuda bayakunqunywa; u-Efrayimi akaseyukuba nomona ngoJuda, noJuda akaseyukumhlukumeza u-Efrayimi.
Bayohlangana bahlasele amaFilisti entshonalanga, baphange abantu basempumalanga, bayakumelana nabakwa-Edomi nabakwaMowabi, ama-Amori ayoba ngaphansi kwesandla sabo.
USimakade uyoqalekisa itheku lolwandle leGibhithe, anyakazise isandla sakhe phezu komfula awuhwamukise ngekhoza lomoya wakhe, awushaye ube yimifudlana eyisikhombisa, ongayiwela uhamba ngezinyawo.
Kuyoba khona umgwaqo wensali yabantu bakhe eyosala e-Asiriya, njengalokhu kwakunjalo ku-Israyeli ngosuku akhuphuka ngalo eGibhithe.
Ngalolo lusuku uyothi: “Ngiyakubonga, Simakade, ngokuba ubungithukuthelele, kodwa intukuthelo yakho uyinqandile, wangiduduza.
UNkulunkulu uyinsindiso yami; ngiyakumethemba, angiyukwesaba, ngokuba uSimakade, Yena ungamandla ami nezikhwepha zami; uyinsindiso yami.”
Niyokukha amanzi ngokujabula emithonjeni yensindiso.
Ngalolo lusuku niyothi: “Bongani uSimakade, nibize igama lakhe, nazise phakathi kwezizwe izenzo zakhe, nimemezele ukuthi igama lakhe liphakeme.
Hlabelelani izindumiso kuSimakade, ngokuba wenze izinto ezinkulu; lokhu makwaziwe emhlabeni wonke.
Kikizani, nijabule zakhamuzi zaseZiyoni, ngokuba mkhulu oNgcwele ka-Israyeli phakathi kwenu.”
Isiphrofetho ngeBhabhele asibona u-Izaya, indodana ka-Amozi.
Phakamisani ibhanela entabeni eluqhwathule, nimemeze, nibaqhwebe, ukuba bangene emasangweni abakhulu.
Mina uqobo ngibayalile abangcwele bami. Ngiwabizile amaqhawe ami, abangabami abajabula ngokuziqhenya, ukuze babonise intukuthelo yami.
Yizwani umsindo ezintabeni, inhlokomo kungathi ngeyabantu abaningi! Yizwani ukuxokozela kwemibuso yabezizwe ihlangana ndawonye! USimakade Wamabandla uqoqa impi yakhe.
Ivela emazweni akude, emikhawulweni yezulu. USimakade uze nezikhali zentukuthelo yakhe, ukuzobhubhisa umhlaba wonke.
Lilani, ngokuba usuku lukaSimakade lusondele; luyofika njengencithakalo evela kuSomandla.
Ngalokho zonke izandla ziyakuba ntekenteke, nezinhliziyo ziphele amandla.
Bayakushaqeka, babanjwe yiminjunju nobuhlungu, bayoba neminjunju enjengemihelo yowesifazane ebeletha. Bayobhekana nomakhelwano babo ngeziqu zamehlo. Ubuso babo bubheje bube bomvu okwamalangabi.
Bheka, usuku lukaSimakade luyeza; luwusuku lolunya, nentukuthelo nolaka oluvuthayo, ukuchitha umhlaba, nokubhubhisa zonke izoni ezikuwo.
Ngokuba izinkanyezi zezulu nomthala akuyukukhanya; ukukhanya kwakho kuyofiphala, ilanga liyoshona entathakusa, nenyanga lapho iphuma ayiyukukhanya.
Umhlaba ngiyokuwujezisela iziphambeko zawo, nezikhohlakali, izono zazo, ngiyoqeda ukuzidla kwabaphakameyo, ngikuqede ukwedelela kwabacindezeli.
Ngiyokwenza umuntu abe yigugu kunegolide elicwengekileyo; yebo, umuntu muhle kunegolide elicwengekileyo lase-Ofiri.
Ngosuku lokuvutha kwentukuthelo yakhe ngiyokwenza izulu lithuthumele, nomhlaba uzamazame endaweni yawo, ngenxa yokuvutha kwentukuthelo kaSimakade Wamabandla.
Bayophendukela kubantu bakubo njengensephe ehujwayo, nanjengezimvu ezingaqoqwa muntu, babaleke, yilowo nalowo aphindele ezweni lakubo.
Bonke abayotholwa bayogwazwa, nabayobanjwa, badliwe yinkemba.
Abantwana babo bayophohlozwa bebuka, izindlu zabo ziphangwe, omkabo badlwengulwe.
Bhekani, ngizobavusela amaMede, isizwe esingenandaba nasiliva nagolide.
Ayobulala izinsizwa ngeminsalo yawo; angabi nasihe esithelweni sesibeletho sabo; abayukuba nasihawu kubantwana.
IBhabhele, udumo lwemibuso, igugu nokuzigqaja kwamaKhaledi, liyofana neSodoma neGomora lapho uNkulunkulu elichitha.
Aliyukubuye lihlale muntu, akusekho muntu oyokwakha kulo, izizukulwane ngezizukulwane, umArabhu akayukukanisa kulo, nabelusi abayukulala lapho nemihlambi yabo.
Kodwa izilwane zasehlane ziyobuthisa khona, nezindlu zalo ziyogcwala izikhova; kuyohlala lapho izintshe, kugcakagce khona amademoni.
Izimpisi ziyokhala ezinqabeni zalo, namakhanka, ezindlini zamakhosi; sesiseduze ukufika isikhathi salo, nezinsuku zalo aziyukwandiswa.
USimakade uyoba nesihawu kuJakobe, abuye amkhethe u-Israyeli, amuphe ukuthula ezweni lakhe; nabafokazi bayozihlanganisa naye, banamathele endlini kaJakobe.
Izizwe ziyobathumba, zibayise endaweni yazo; indlu ka-Israyeli iyozidla lezo zizwe, zibe yifa layo, zibe yizinceku nezincekukazi ezweni likaSimakade; iyobathumba labo ababekade beyithumbile, ibuse phezu kwabacindezeli bayo.
Kuyothi lapho uSimakade eseniphumuzile ebuhlungwini, enhluphekweni, nasemsebenzini onzima ababenenzisa wona,
nihaye le ngoma, nedelele inkosi yaseBhabhele, nithi: “Yeka ukuphela komcindezeli nokuqedwa kokuqhosha!
USimakade waphule induku yezikhohlakali nentonga yababusi,
eyashaya abantu ngentukuthelo ingaphezi, yabusa izizwe ngolaka nangokucindezela okunganqandekiyo.
Wonke umhlaba uphumule, unokuthula; kuqhumuke inhlokomo kubantu.
Ngisho imisayiphuresi nemisedari eLebhanoni, iyathokoza ngawe, ithi: ‘Selokhu walaliswa phansi, akukho mgawuli okhuphukele kithi ukuba asigawule.’
Indawo yabafileyo phansi inyakazisiwe ukuba ikuhlangabeze uma ufika kuyo, ikuvusele izithunzi zazo zonke izikhulu zomhlaba, isukumise wonke amakhosi ezizwe ezihlalweni zawo zobukhosi.
Wonke ayophendula, athi kuwe: ‘Kanti nawe usubuthakathaka njengathi, usufana nathi?’
Ukuphakama kwakho sekwehliselwe endaweni yabafileyo, kanjalo nomsindo wezingubhu zenu; izimpethu zendlaliwe phansi kwakho, nezibungu ziyakusibekela.
“Yeka ukuwa kwakho ezulwini, khwezi elikhanyayo, ndodana yokusa, nokuqunjwa kwakho phansi, wena owawunqoba izizwe.
Wena wathi enhliziyweni yakho: ‘Ngiyokhuphukela ezulwini, ngiphakamise isihlalo sami sobukhosi phezu kwezinkanyezi zikaNkulunkulu; ngiyohlala entabeni yomhlangano ngasemaphethelweni aseZafoni.
Ngiyokhuphuka ezindaweni eziphakemeyo phezu kwamafu, ngizenze ngibe njengoPhezukonke.’
Nokho wehliselwe endaweni yabafileyo, emajukujukwini omgodi.
“Abakubonayo bayokubhekisisa, bakuqaphelisise, bese bethi: ‘Nguye yini lo muntu owazamazamisa umhlaba, wanyakazisa imibuso,
owenza izwe laba yihlane, wabhubhisa imizi yalo, akazivumela iziboshwa ukuba zibuyele emakhaya na?’
Wonke amakhosi ezizwe, wonke alale ngodumo, yileyo naleyo edlinzeni layo.
Kodwa wena ulahlwe ngaphandle kwethuna lakho njengegatsha elinengekayo, ligqokwe ngababuleweyo, abagwazwe ngenkemba, behlela emgodini wamatshe njengesidumbu esinyathelweyo.
Awusoze wahlangana nabo egodini, ngokuba waba yimbangela yencithakalo ezweni lakini; wabulala abantu bakini. Sengathi izizukulwane zezikhohlakali zingebe zisaphathwa naphakade.
Lungisani indawo yokubulalela abantwana bakhe, ngenxa yenkohlakalo yokhokho babo. Mabangaphinde bavuke, ukuba badle ifa lomhlaba, bagcwalise izwe ngemizi.
“Ngiyobavukela,” kusho uSimakade Wamabandla, “nginqume eBhabhele igama nensali, indodana nomzukulu,” kusho uSimakade.
“Ngiyolenza libe yifa lezingungumbane namaxhaphozi anomhlanga, ngiyolishanela ngomshanelo wembubhiso,” kusho uSimakade Wamabandla.
USimakade Wamabandla ufunge wathi: “Impela njengoba ngihlosile kuyokuba kanjalo, nanjengoba ngihlelile kuyokuma kanjalo,
ukuthi ngiyolicoboshisa i-Asiriya ezweni lami, ngiligxobe ezintabeni zami; lisuswe kubantu bani ijoka lalo nomthwalo walo osemahlombe abo.”
Yilesi isinqumo esinqunyiwe emhlabeni wonke; yilesi isandla esizoshaya izizwe zonke.
Ngokuba uSimakade Wamabandla unqumile; ngubani oyakuguqula lokho na? Isandla sakhe sizogadla; ngubani oyakusinqanda na?
Ngonyaka wokufa kwenkosi u-Ahazi, kwavela lesi siphrofetho.
Ungathokozi wena Filistiya namaphethelo, ngokuthi intonga ekushayileyo yephukile, ngokuba esiqwini senyoka kuyophuma ibululu, nenzalo yalo ibe yinkanyamba endizayo.
Amazibulo abampofu ayodla, abantulayo balale belondekile; kodwa ngiyobulala impande yakho ngendlala, ngibhubhise nensali yakho.
Lila wena sango, udazuluke wena muzi; phela amandla wena Filistiya lonke! Ngokuba kuvela intuthu enyakatho; akekho oyokwehlukana nebutho lakhe.
Ziyophendulwa ngokuthini izithunywa zesizwe na? Kuyothiwa nguSimakade omisele abahluphekileyo babantu bakhe iZiyoni, ukuba bayophephela kulo.
Isiphrofetho ngoMowabi. Impela ngabusuku bunye i-Ari Mowabi linqotshiwe, labhujiswa. Impela ngabusuku bunye iKhiri Mowabi linqotshiwe, lachithwa.
Bayokhuphukela ethempelini; iDibhoni lenyukele ezindaweni eziphakemeyo ukuyokhala. AbakwaMowabi bayalila ngeNebho nangeMedebha; wonke amakhanda ayizimpandla, nezilevu zonke ziphuciwe.
Babhince amasaka kuyo yonke imigwaqo, nasophahleni lwabo, nasezigcawini zabo, bonke bayalila, kugobhoza izinyembezi.
IHeshibhoni ne-Elehale kuyakhala; izwi labo lizwakala naseJahazi; amabutho akwaMowabi ayamemeza, umphefumulo wawo uyathuthumela.
Inhliziyo yami ikhalela abakwaMowabi; ababalekileyo bakhona babalekela eZowari nase-Egila shelishiya; bakhuphukela eLuhithe bekhala, nasendleleni eya eHoronayimi bayadazuluka.
Ngokuba amanzi aseNimrimi ashile, utshani bomile, uhlaza luphelile, akusekho okuluhlaza.
Yingakho abakutholileyo obekusasele, nemfuyo yabo, bakuwelise uMfula Weminyezane,
ngokuba ukukhala kwabakwaMowabi kuzungeze imingcele yakhona, ukulila kwabo kuze kufinyelele e-Egelayimi, nokububula kwabo kufike eBheri Elimi.
Amanzi aseDimoni agcwele igazi; iDimoni ngisazolehlisela okukhulu, ingonyama ngiyibekele abayosinda bakwaMowabi, nabaseleyo ezweni.
Thumelani imvana kumbusi wezwe, ivela eSela ngendlela esehlane, iye entabeni yendodakazi yaseZiyoni.
Amadodakazi akwaMowabi ayoba njengezinyoni ezizulazulayo, namaphuphu ahlakazekileyo, emazibukweni e-Arinoni.
“Lulekanani, nithathe isinqumo, umphefumulo wabo ube njengobusuku phakathi kwemini, nibhacise abaxoshiweyo, ningabadaluli ababalekileyo.
Abaxoshiweyo bakwaMowabi mabagogobale phakathi kwenu, nibe yisiphephelo sabo kumbhubhisi.” Kuyothi lapho umcindezeli engasekho, nokubhujiswa sekuphelile, seziqediwe nezidlova ezweni,
kumiswe isihlalo sobukhosi ngomusa, ethendeni likaDavide, kuhlale kuso ngokwethembeka umehluleli oyofuna ubulungiswa, asheshe ukwenza okulungileyo.
Sizwile ngokuziqhayisa kukaMowabi ukuthi uphakeme kakhulu, nangokuzidla kwakhe, nokuqhosha kwakhe, nokuchwensa kwakhe; ukuzikhukhumeza kwakhe kuyize.
Ngakho-ke abakwaMowabi mabamlilele uMowabi; bonke balikhalele ikhekhe elinamagilebhisi omisiwe laseKhiri Haresethi. Lilani nidabukele kuphela abavithizwe yizinhlupheko.
Amasimu aseHeshibhoni ashaziwe, kwabuna nezivini eSibhima, ezixha zawo zamagilebhisi ekhethelo, ayedaka amakhosi ezizwe afinyelela naseJazeri, enabela nasehlane; amahlumela awo elulwa, awela ulwandle.
Ngakho-ke khalela izivini eSibhima njengokulila kweJazeri. Ngikuthela ngezinyembezi zami wena Heshibhoni, nawe Elehale, ngokuba ukujabulela isivuno sakho sezithelo nesokusanhlamvu kuphelile.
Ukuthokoza nokujabula kususiwe ensimini yezithelo, akusahlatshelelwa maculo; ezivinini akusamenyezwa, abanyathelayo abalinyatheli iwayini ezikhamweni; ngikuqedile ukumemeza.
Ngakho-ke ingaphakathi lami likhala njengehabhu ngoMowabi, nomphefumulo wami, ngeKhiri Heresi.
Kuyothi lapho uMowabi ezibonakalisa, ezikhathaza endaweni ephakemeyo, aye ethempelini lakhe ukuyothandaza, angaphumeleli.
Yilelo izwi uSimakade alisho ngoMowabi ngaleso sikhathi.
Manje uthi: “Eminyakeni emithathu, njengeminyaka yomqashwa, udumo lukaMowabi luzobukelwa phansi, ngisho noma enesixuku esikhulu; insali iyokuba yingcosana, futhi ingabi namandla.”
Isiphrofetho ngeDamaseku. “Yazini ukuthi iDamaseku liyoshatshalaliswa, lingabe lisaba ngumuzi, libe yinxiwa nencithakalo.
Imizi e-Aroweri iyakushiywa ibe ngeyemihlambi; ibuthise khona, ingethuswa muntu.
Kuyobhidlika inqaba kwa-Efrayimi, nombuso eDamaseku, nensali e-Aramu, kube njengodumo lwabantu bakwa-Israyeli,” kusho uSimakade Wamabandla.
“Ngalolo lusuku udumo lukaJakobe luyodanjiswa, kuphele ukukhuluphala emzimbeni wakhe, azace.
Kuyoba njengomuntu evuna amabele emazimbeni asamile, nengalo yakhe ivuna izikhwebu, nanjengokhothozayo esigodini samaRefa.
Umkhwanyo uyosala njengokusale kuwohlozwa iminqumo: izithelo ezimbili noma ezintathu ezihlokweni phezulu, ezine noma ezinhlanu emagatsheni omuthi,” kusho uSimakade uNkulunkulu ka-Israyeli.
Ngalolo lusuku abantu bayomfuna uMdali wabo, amehlo abo agqolozele oNgcwele ka-Israyeli.
Abasayukuwanaka ama-althare abo, umsebenzi wezandla zabo, abasayukuwubheka kulokho okwenziwe yiminwe yabo, o-Ashera nama-althare empepho.
Ngalolo lusuku imizi ebiyelweyo iyofana namanxiwa asehlathini naseziqongweni zezintaba, eyashiwa ngabantu bakwa-Israyeli, yaba yincithakalo.
Ngokuba umkhohliwe uNkulunkulu wensindiso yakho, awulikhumbulanga iDwala ophephela kulo, ngalokho-ke noma utshala izithombo zekhethelo, uhlwanyele amahlumela angaziwayo,
noma ungazenza zikhule ngosuku ezitshalwe ngalo, wenze okuhlwanyelweyo kuqhakaze ngakusasa, nokho akuyukuba khona sivuno ngalolo lusuku lokulila nobuhlungu obungelapheki.
Maye, ukuhlokoma kwezizwe eziningi, zihlokoma njengokuduma kolwandle; nomsindo wokuxokozela kwabezizwe, unjengokuhlokoma kwamanzi amaningi.
Izizwe zihlokomisa okwamanzi amaningi, kodwa uyakuzijezisa, zibalekele kude, zixoshwe njengamakhoba epheshulwa ngumoya ezintabeni, nanjengothuli lupheshulwa yisiphepho.
Ngokuhlwa, kuba yingebhe yodwa; kuthi kungakasi zibe zingasekho. Yileso-ke isabelo sabasiphangayo, nonkatho lwabasiqhwagayo.
Maye, kuwe lizwe elibhakuzisa amaphiko, eliphesheya kwemifula eKhushe,
elithumela izithunywa ngolwandle, zintweze emanzini ngemikhumbi yomhlanga! Hambani zithunywa ezinejubane, niye esizweni sabantu abade abasikhumba sibushelelezi, abantu abesatshwa kude naseduze, isizwe esinamandla nezidlova; esizwe laso lihlukaniswe yimifula.
Nina nonke enakhile ezweni, nina nonke enihlezi emhlabeni, bhekani lapho sekuphakanyiswa ibhanela ezintabeni, nilalele lapho kukhala icilongo.
Ngokuba ungitshelile uSimakade, wathi: “Ngizobuka, ngithule ngisendaweni yami, njengokushisa kwelanga, nanjengefu lamazolo ekushiseni ngesikhathi sokuvuna.”
Ngokuba ngaphambi kokuvuna, lapho imbali isiqhakaze yaze yaphenduka igilebhisi elivuthiweyo, uzowanquma wonke amagatsha ngocelemba, namagatsha enabileyo uwanqume, uwasuse.
Ayoshiywa ndawonye, abe ngawamanqe asezintabeni, nawezilwane zasemhlabeni. Amanqe ayohlala kuwo ehlobo, ebusika kuhlale kuwo zonke izilwane zomhlaba.
Ngaleso sikhathi abantu abade, abanesikhumba esibushelelezi, bayoletha izipho kuSimakade Wamabandla, zivela kubantu abesatshwa kude naseduze; isizwe esinamandla nesinqobayo, esilizwe laso lihlukaniswe yimifula. Bayoziletha entabeni iZiyoni, indawo yegama likaSimakade Wamabandla.
Isiphrofetho ngeGibhithe. Bheka, uSimakade ugibele efini elisheshayo, uyeza eGibhithe; onkulunkulu baseGibhithe bazothuthumela phambi kwakhe, nezinhliziyo zabaseGibhithe ziphele amandla phakathi kwabo.
“Ngizonyakazisa abaseGibhithe bavukelane bodwa, umfowabo alwe nomfowabo, umakhelwane alwe nomakhelwane, umuzi ulwe nomuzi, nombuso ulwe nomunye umbuso.
AbaseGibhithe bayokhanywa baphele umoya, ngizowabhuntshisa amacebo abo. Bayofuna, bahlole konkulunkulu mbumbulu, nasemimoyeni yabafileyo, nasemadlozini, nakubathakathi.
AbaseGibhithe ngiyobanikela esandleni senkosi enolunya namandla, ibabuse,” kusho uSimakade Wamabandla.
Amanzi olwandle ayokusha, umfula wome nkwe.
Imifula iyonuka, imifudlana eGibhithe iyoncipha, ishe, kubune umhlanga nebhuma.
Kuyoba namaqwaqwasi ngaseNayili, osebeni lweNayili, konke okutshalwe ngaseNayili kuyokoma, kuhlakazwe, kungabe kusaba bikho.
Abadoba izinhlanzi bayokhala; bonke abaphonsa izindobo eNayili balile, nabaphonsa amanetha emanzini ayo bayodabuka.
Abasebenza ngefilakisi, nabeluka ilineni bayodumala.
Abeluki bakhona bayodumala, nabasebenzela ukuhola badabuke ezinhliziyweni.
Izikhulu zaseZowani ziyiziwula ngempela, abeluleki abahlakaniphileyo bakaFaro beluleka ubuwula. Ningasho kanjani kuFaro, nithi: “Ngiyindodana yezihlakaniphi, isizukulwane samakhosi asemandulo” na?
Pho baphi manje abahlakaniphileyo bakini na? Mabakutshele, bakwazise okucetshwa nguSimakade Wamabandla ngeGibhithe.
Izikhulu zaseZowani seziphenduke iziwula, izikhulu zaseNofi ziluthekile. Labo abayizinsika zezizwe zalo balidukisile iGibhithe.
USimakade uthelile phakathi kwalo umoya wokudideka, balenze iGibhithe ladiyazela kukho konke elikwenzayo, njengesidakwa sididizela ebuhlanzweni baso.
Akukho lutho olungasiza iGibhithe, ngisho ikhanda noma umsila, igatsha lesundu noma umhlanga.
Ngalolo lusuku abaseGibhithe bayofana nabesifazane, bathuthumele ngukwesaba, ngenxa yesandla sikaSimakade Wamabandla esimelene nabo.
Izwe lakwaJuda liyobafaka ingebhe abaseGibhithe. Bonke okuyokhulunywa kubo ngalo bayongenwa wukwesaba ngenxa yecebo uSimakade Wamabandla alicebile ngalo.
Ngalolo lusuku, eGibhithe, kuyoba nemizi emihlanu ekhuluma ulimi lwaseKhanani, eyokwenza isifungo sokwethembeka kuSimakade Wamabandla. Omunye waleyo mizi uyobizwa ngokuthi nguMuzi Wembubhiso.
Ngalolo lusuku kuyoba khona i-althare likaSimakade phakathi nezwe eGibhithe, nensika kuSimakade emngceleni walo.
Liyokuba yisibonakaliso nobufakazi kuSimakade Wamabandla eGibhithe. Bayokhala kuSimakade ngenxa yabacindezeli; abathumelele umkhululi, abavikele, abakhulule.
USimakade uyozibonakalisa kwabaseGibhithe ngalolo lusuku, nabaseGibhithe bayomazi uSimakade, bayakumkhonza ngomhlatshelo nangomnikelo wokushiswa, benze izifungo kuSimakade, bazifeze.
USimakade uyolishaya iGibhithe, alishaye abuye aliphilise; bayobuyela kuSimakade, bamnxuse, abaphulukise.
Ngalolo lusuku kuyoba khona umgwaqo omkhulu osuka eGibhithe uye e-Asiriya, i-Asiriya liyokuya eGibhithe, neGibhithe liye e-Asiriya, abaseGibhithe bayokhonza nabase-Asiriya.
Ngalolo lusuku owakwa-Israyeli uyoba ngowesithathu, ehlangene nabaseGibhithe nabase-Asiriya, babe yisibusiso phakathi komhlaba.
USimakade Wamabandla awubusisile, ethi: “Malibusiswe iGibhithe, abantu bami ne-Asiriya, umsebenzi wezandla zami, no-Israyeli ifa lami.”
Ngonyaka okwafika ngawo umkhuzi wempi e-Ashidodi, ethunywe nguSarigoni, inkosi yase-Asiriya, walwa nalo, walinqoba.
Ngaleso sikhathi uSimakade wakhuluma ngesandla sika-Izaya, indodana ka-Amozi, wathi: “Hamba ukhumule indwangu eyisaka esokhalo lwakho, nezicathulo ezinyaweni zakho.” Wenza kanjalo, wahamba nqunu, engafake nazicathulo.
USimakade wathi: “Njengalokhu inceku yami, u-Izaya, isihambe nqunu ingafake nazicathulo iminyaka emithathu, iyisibonakaliso nesimangaliso eGibhithe naseKhushe.
Inkosi yase-Asiriya iyobahambisa benqunu abathunjwa baseGibhithe, nabaxoshiweyo baseKhushe: abadala nabancane, izinqe ziyoba sobala, kube yihlazo eGibhithe.
Bayophela amandla, babe namahloni ngeKhushe, ithemba labo, nangeGibhithe abazigabisa ngalo.
Ngalolo lusuku izakhamuzi zasogwini ziyothi: ‘Bheka ukuthi kwenzekeni kulabo ebesethembele kubo, nalabo ebesibalekela kubo ukuyocela usizo nokukhululwa enkosini yase-Asiriya. Pho thina-ke, siyophunyuka kanjani na?’ ”
Isiphrofetho ngehlane eligudle ulwandle. Njengesiphepho sivunguza eningizimu, kukhona ozayo ovela ehlane, ezweni elesabekayo.
Ngiboniswe umbono oshaqisayo: umkhapheli ekhaphela, nombhubhisi ebhubhisa. Yenyuka Elamu, uvimbezele Mediya; ngizokuqeda konke ukukhala kwenu.
Ngalokho ukhalo lwami lugcwele izinhlungu; ngibanjwe yimihelo njengowesifazane obelethayo; ngikhonkobele ngengikuzwile, ngethukile ngengikubonile.
Inhliziyo yami iyadwanguza, iyathuthumela; ukuhwelela ebengikulangazelela kungehlele, sekuphenduke ixhala kimi.
Balungisa itafula, bendlala izindwangu, bayadla, bayaphuza. Hhayi bo, zikhulu, sukumani! Gcobani amahawu.
Ngokuba iNkosi ithe kimi: “Hamba uyomisa umlindi ozakukwazisa akubonayo.
Lapho ebona umgibeli, nabagibele amahhashi ngababili, ogibele imbongolo nogibele ikameli, uyoqaphelisisa, alalele ngokucophelela okukhulu.”
Ibhubhesi lamemeza, lathi: “Nkosi, ngihlale ngimi embhoshongweni wami nsuku zonke, nasendaweni engibekwe kuyo ubusuku bonke.
Bheka, sekuza umuntu ngenqola yamahhashi. Umemeza athi: ‘Liwile, liwile iBhabhele, nazo zonke izithombe zonkulunkulu balo; kuphelele phansi.’ ”
Wena ongokubhuliweyo kwesibuya sami, lokhu engikuzwe ngoSimakade Wamabandla, uNkulunkulu ka-Israyeli; ngiyakukumemezela kuwe.
Lesi yisiphrofetho ngeDuma. Kukhona ongimemeza eseSeyiri, ethi: “Mlindi, yisikhathi sini sobusuku na? Mlindi, yisikhathi sini sobusuku na?”
Umlindi wathi: “Ukusa kuyeza, nobusuku ngokunjalo; uma nifuna ukubuza, buzani; nibuye futhi.”
Isiphrofetho nge-Arabhiya. Niyakulala ehlozini elisemathafeni e-Arabhiya, nina mahele aseDedanimi.
We zakhamuzi zakwaThema, lethelani abomileyo amanzi, bahlangabezeni ngokudla abafokazi.
Ngokuba babalekele izinkemba, izinkemba ezihoshiweyo, neminsalo ensaliweyo, nobunzima bempi.
Ngokuba iNkosi ithe kimi: “Ngesikhathi esingangonyaka, ngokubalwa kweminyaka yoqashiweyo, lonke udumo lweKhedari luzophela;
inani lensali yabaciba ngemicibisholo, amaqhawe aseKhedari, iyoba yingcosana,” ngokuba uSimakade uNkulunkulu ka-Israyeli ukhulumile.
Isiphrofetho ngesiGodi Sombono. Kwenzenjani nize nonke ngothi lwenu, nenyukele ophahleni lwendlu,
muzi ogcwele ukumemeza, muzi oxokozelayo, nomuzi othokozayo na? Ababuleweyo bakho ababulawanga ngenkemba, futhi abafelanga empini.
Bonke ababusi benu babaleke kanyekanye, babanjwa ngaphandle kokusebenzisa iminsalo. Bonke abakini abatholakala, babanjiwe noma babebalekele kude.
Ngalokho ngithi: “Ningangibuki mina, ngizonikhombisa umunyu ngokulila kalusizi; ningazami ukungiduduza ngenxa yokubhujiswa kwendodakazi yabantu bami.”
Ngokuba wusuku lweNkosi uSimakade Wamabandla, usuku lokukhathazeka nokucindezelwa, lokudideka eSigodini Sombono; usuku lokudilizwa kwezingange nolokukhalela ukusizwa ezintabeni.
I-Elamu lithathe umgodla nezinqola zempi nabamahhashi; iKhiri laveza isihlangu salo.
Izigodi zakho ezikhethekileyo zagcwala izinqola zempi, abamahhashi abanamandla bazihlela ngasesangweni.
Usisusile isembozo sikaJuda. Ngalolo lusuku wena wabheka ezikhalini zendlu yehlathi.
Nabona ukuthi miningi imifantu emzini kaDavide, nase niyokha amanzi echibini elisezansi.
Nazibala izindlu zaseJerusalema, nazibhidliza ukuze niqinise ugange.
Nakhe indawo yokugcina amanzi phakathi kwezindonga ezimbili, ukugcina amanzi echibi elidala. Kodwa anibhekanga kulowo owalenzayo, animnakanga lowo okade wanquma ukulenza.
Ngalolo lusuku iNkosi uSimakade Wamabandla wanibiza ukuba nikhale, nilile, niphuce amakhanda, nigqoke indwangu eyisaka,
kodwa kunalokho kwakunenjabulo nedili, kuhlatshwa izinkabi nezimvu, kudliwa inyama, kuphuzwa iwayini, nathi: “Masidle, siphuze, ngokuba kusasa sizokufa.”
USimakade Wamabandla uzambulile ezindlebeni zami, wathi: “Impela lesi siphambeko aniyukuthethelelwa sona nize nife,” kusho iNkosi uSimakade Wamabandla.
Isho kanje iNkosi uSimakade Wamabandla, ithi: “Woza, uhambe uye enduneni uShebhina owengamele indlu, uthi kuye:
‘Wenzani lapha? Unobani lapha ohlobene naye, ukuze uziqophele ithuna lapha, uziqophele ithuna endaweni ephakeme, uzisikele indawo yokuhlala edwaleni?’
“Bheka, wena mlisa, uSimakade uzokukulahla kude, kabuhlungu, uzakukubamba aqinise.
Uyokusonga akuqinise, akulahle njengebhola ezweni elibanzi. Uyofela lapho; izinqola zakho zodumo ziyolala lapho, wena olihlazo lendlu yenkosi yakho.
Ngiyakukwehlisa esikhundleni sakho, ngikukhiphe emsebenzini wakho, ngikuqumbe phansi.
“Kuyothi ngalolo lusuku ngibize inceku yami; u-Eliyakimi, indodana kaHilikiya;
ngimembathise ingubo yakho, ngimqinise ngebhande; ngiyakumnika esandleni amandla akho, abe nguyise wabakhileyo eJerusalema nakuyo indlu yakwaJuda.
Ngiyakubeka isihluthelelo sendlu kaDavide ehlombe lakhe; uyakuvula kungavali muntu, avale kungavuli muntu.
Ngiyomqinisa njengesikhonkwane endaweni eqinileyo, abe yisihlalo sokuhlonipheka endlini kayise.
Bayakugaxa kuye lonke udumo lwendlu kayise, abozalo nezizukulwane, zonke izitsha ezincane, imicengezi nezinkamba.
“Ngalolo lusuku,” kusho uSimakade Wamabandla. “Isikhonkwane esasibethelwe endaweni eqinileyo siyobhoncuka, sikhishwe, siyowa kuthi nomthwalo obukuso unqunywe,” kusho uSimakade.
Isiphrofetho ngeThire. Lilani Mikhumbi yaseTharishishi, ngokuba indlu yenu ishatshalalisiwe, nokungena kwayo ivela eKhithimi kwambuliwe.
Thulani nina zakhamuzi zasogwini, nina bahwebi baseSidoni, izithunywa zenu ziwele ulwandle,
emanzini amaningi; imbewu yaseSihori nokuvuna kweNayili kwakuyinzuzo yalo; laliyindawo izizwe ezazithenga kuyo.
Yiba nezinhloni wena Sidoni, ngokuba ulwandle lukhulumile, inqaba yolwandle, ithi: “Angisikwanga, angibelethanga, angikhulisanga nsizwa, angondlanga ntombi.”
Lapho umbiko ufinyelela eGibhithe, liyoba sebuhlungwini ngenxa yeThire.
Welelani eTharishishi, nilile, nina zakhamuzi zasogwini.
Ngabe ngumuzi wenu lona, enijabula ngawo, owavela ezinsukwini zasemandulo, onyawo zawo zawuthwala waze wayohlala kude na?
Ngubani owenze leli cebo ngeThire, umethwesi wemiqhele, obahwebi bakhona bekuyizikhulu, nabathengi bakhona bengabahlonishwayo emhlabeni?
NguSimakade Wamabandla ocebe lokho, ukuba konakaliswe ukuziphakamisa kwabo bonke ubukhosi, badeleleke bonke abadumileyo bomhlaba.
Sabalalani nezwe lonke, nina bomuzi waseTharishishi, kuhle komfula iNayili lapho udla izindwani, ugabha imfunda.
Isandla sakhe uselulele phezu kolwandle, wazamazamisa imibuso, uSimakade uyaleze ngeKhanani ukuba kudilizwe izinqaba zalo.
Wathi: “Awusayukujabula wena ntombi ethelwe ngehlazo, ndodakazi yaseSidoni; vuka, uwelele eKhithimi, nalapho awuyukukuthola ukuphumula.”
Bheka izwe lamaKhaledi, leso sizwe asisekho, saqedwa yi-Asiriya, laphenduka indawo yezilwane zasendle. Lamisa imibhoshongo yokuvimbezela, izindlu zamakhosi lazenza ize, izwe laphenduka incithakalo.
Lilani nina mikhumbi yaseTharishishi, ngokuba inqaba ibhujisiwe.
Kusukela ngalolo lusuku, iThire liyolibaleka iminyaka engama-70, isikhathi sokuphila kwenkosi eyodwa. Ekupheleni kweminyaka engama-70, eThire kuyokwenzeka njengokwezwi leculo lesifebe, elithi:
“Thatha ihabhu, uhambahambe emzini, wena sifebe esikhohlakeleyo, ubethe kamnandi, uhlabelele izihlabelelo eziningi, ukuze ukhunjulwe.”
Kuyothi ngasekupheleni kweminyaka engama-70, uSimakade ahambele iThire, lona libuyele enzuzweni yalo, lifebe nayo yonke imibuso yezwe ebusweni bomhlaba.
Intengo yalo nenzuzo yalo kuyoba ngcwele kuSimakade; ayiyukunqwatshelwa, ilondolozwe, ngokuba intengo yalo iyoba ngeyabahlala phambi kukaSimakade, ukuze badle, basuthe, babe nezingubo ezinhle.
Manje uSimakade usezowenza incithakalo umhlaba, ube yize, agumbuqele ubuso bawo, ahlakaze abakhileyo kuwo.
Njengoba kuyakuba njalo kubantu, kuyakuba njalo nakubaphristi; njengoba kuyakuba njalo nasesigqileni, kuyakuba njalo nakumniniso; njengoba kunjalo encekukazini, kuyakuba njalo nasenkosikazini; njengoba kunjalo kumthengi, kuyakuba njalo nakumthengisi; njengoba kunjalo kobolekisayo, kuyakuba njalo nakobolekayo; njengoba kunjalo kokweletisayo, kuyakuba njalo nakokweletayo.
Umhlaba uyokuba yincithakalo, uphangwe impela, ngokuba uSimakade ulishilo leli lizwi.
Umhlaba womile, ubunile, izwe liyashabalala, liyaphela, abahloniphekile bomhlaba bayaphela.
Umhlaba ungcolisiwe ngabakhileyo kuwo, ngokuba bayeqile imithetho, baphambuka ezimisweni, basephula isivumelwano saphakade.
Ngakho-ke isiqalekiso siyawubhuqabhuqa umhlaba, izakhamuzi zitholwe zinecala; ngalokho abakhileyo emhlabeni bayashiswa, kusale ingcosana nje kuphela.
Iwayini elisha liphelile, imivini iyabuna; bayabubula bonke abanhliziyo zeneme.
Ukuzijabulisa ngokhehlegume akusekho, ukuxokozela kwabajabulayo kuphelile, nenjabulo yehabhu inqamukile.
Abasahubi lapho bephuza iwayini, uphuzo olunamandla seluyababa kulabo abaluphuzayo.
Umuzi wenxushunxushu ubhidliziwe, zonke izindlu zivaliwe ukuze kungangeni muntu kuzo.
Kunesililo emigwaqweni, kukhalelwa iwayini; yonke intokozo iphele nya, injabulo yezwe ixoshiwe.
Kusele incithakalo emzini, amasango afahlaziwe aba yimvithi.
Kuyokuba kanjalo emhlabeni phakathi kwezizwe. Kuyakuba njengomnqumo uvithikile, nanjengokukhothoza sekwedlule isikhathi sokuvuna amagilebhisi.
Abantu bayophakamisa izwi labo, bababaze ubukhosi bukaSimakade entshonalanga.
Ngakho-ke empumalanga mdumiseni uSimakade, emazweni asogwini likhazimuliseni igama likaSimakade uNkulunkulu ka-Israyeli.
Emikhawulweni yomhlaba sizwa amahubo okudumisa, athi: “Udumo malube koLungileyo!” Kodwa mina ngithi: “Maye, kimina, ngokuba ngiyafa, ngiyafa!” Ngokuba abakhohlisi bakhohlisile, abakhohlisi bakhohlisile kakhulu.
Ukwesaba, umgodi nogibe kuphezu kwenu, nina enakhileyo emhlabeni.
Kuyothi obalekela umsindo wokwesaba awele emgodini; ophuma emgodini uyobanjwa wugibe. Ngokuba amafasitela ezulu avuliwe, nezisekelo zomhlaba ziyazamazama.
Umhlaba uyophihlizwa, ube yimvithi, uqhekezeke, umhlaba uyakuzanyazanyiswa kanzima.
Umhlaba uzontengezela njengodakiweyo, untengantenge njengexhokovana, isiphambeko sawo siyakuba nzima phezu kwawo, uwe ungaphinde uvuke nanini.
Ngalolo lusuku uSimakade uyowajezisa amabandla asezulwini phezulu, namakhosi omhlaba emhlabeni.
Bayohlanganiswa ndawonye, njengeziboshwa ziqoqelwa emgodini, bayovalelwa ejele, kuthi emva kwezinsuku eziningi, bajeziswe.
Inyanga iyakukhophozela, ilanga libe namahloni, ngokuba uSimakade Wamabandla uyobusa entabeni iZiyoni naseJerusalema, phambi kwamalunga akhe, inkazimulo yakhe ibe phambi kwamalunga akhe.
Wena Simakade unguNkulunkulu wami; ngizokuphakamisa ngilidumise igama lakho, ngokuba wenze izimangaliso ezacetshwa emandulo, ngokwethembeka nangeqiniso.
Ngokuba umuzi uwuphendule imvithi, umuzi obiyelweyo waba yincithakalo; umuzi wabafokazi awuseyiwo umuzi, awusoze wakhiwa kabusha nanini.
Ngakho-ke izizwe ezinamandla ziyokudumisa, imizi yezizwe ezinonya ikwesabe.
Ngokuba ube yinqaba kwabampofu, inqaba kwabantulayo ekuxakekeni kwabo, umpheme esivunguvungwini nomthunzi ekushiseni, lapho umoya wabanonya unjengesivunguvungu ebusika,
Umsindo wabafokazi ufana nokushisa ezweni elomileyo, uyodambisa ukushisa ngomthunzi wamafu, uthulise nehubo labanonya.
Kule ntaba kaSimakade Wamabandla uyokwenzela zonke izizwe idili ngokukhulupheleyo nokunomnkantsha, idili lewayini eliqoqodileyo, elinenhlese ecwengekileyo.
Uyobhubhisa kule ntaba isembozo esemboze bonke abantu, nomgubuzelo ogubuzele zonke izizwe.
Ukufa kuyokugwinywa kuze kube phakade. INkosi uSimakade iyokuzesula izinyembezi ebusweni bonke, isuse ihlazo labantu bayo emhlabeni wonke ngokuba uSimakade ukhulumile.
Kuyothiwa ngalolo lusuku: “Bheka, lo unguNkulunkulu wethu; simlindele, futhi uyakusisindisa, sisinde. Masijabule, sithokoze ngensindiso yakhe.”
Ngokuba isandla sikaSimakade siyophumula phezu kwale ntaba. AbakwaMowabi bayodovadovwa endaweni yakubo, njengenqwaba yotshani bunyathelwa endundumeni yobulongwe.
Noma bephakamisa izandla zabo, bephakathi kwayo njengababhukudayo, bevula izandla zabo bebhukuda, ukuphakama kwabo kuyothotshiswa naphezu kokuba begwedla kangaka ngezandla zabo.
Izinqaba eziphakemeyo ezingangeni zakhe ziyobhidlizwa, ziyakuwiselwa phansi zidicilelwe emhlabathini, ngisho othulini imbala.
Ngalolo lusuku, ezweni lakwaJuda kuyohlatshelelwa lesi sihlabelelo esithi: Sinomuzi oqinileyo, usimisela insindiso ibe yizingange nezindunduma.
Vulani amasango ukuze isizwe esilungileyo esigcina iqiniso singene.
Inhliziyo eqinileyo uyayilinda ngokuthula okupheleleyo, ngokuba yethemba kuwe.
Thembani kuSimakade kuze kube phakade, ngokuba unguSimakade, yebo, uSimakade uyidwala elingunaphakade.
Uyothobisa abakhe endaweni ephakemeyo, umuzi ophakemeyo uwubhidliza awuthele othulini.
Unyathelwe ngonyawo, yizinyawo zabampofu, ugxotshwe nangabantulayo.
Indlela yabalungileyo iqondile, Wena Olungileyo uyenza ibe bushelelezi indlela yoqotho.
Simakade siyakulindela endleleni yezehlulelo zakho. Umphefumulo wami ulangazelela igama lakho, nezikhumbuzo zakho.
Ebusuku umphefumulo wami uyakulangazelela, ngiyokufunisisa ngomoya ongaphakathi kwami. Ngokuba lapho izehlulelo zakho zisemhlabeni, izakhamuzi zasemhlabeni zifunda ukulunga.
Uma omubi enzelwa umusa akakufundi ukulunga; ezweni lobuqotho wenza ukonakala, angabuboni ubukhosi bukaSimakade.
Simakade, isandla sakho siphakeme, kodwa abasiboni. Mababone intshisekelo yakho ngabantu bakho, babe namahloni; bazoqothulwa ngumlilo owubekele izitha zakho.
Simakade, uzosenzela ukuthula, ngokuba yonke imisebenzi yethu siyenzelwe nguwe.
Simakade Nkulunkulu wethu, sibuswe ngamanye amakhosi esikhundleni sakho, kodwa thina sidumisa igama lakho kuphela.
Abafileyo abasaphili, imimoya yabo ayiyukuvuka; yingakho-ke wabajezisa, wababhubhisa, wenza ukuba bangabe besakhunjulwa.
Simakade, usandisile isizwe, sanda, wadunyiswa, wandisa yonke imingcele yezwe.
Simakade, bakufunile besosizini, bazethula kuwe ngemikhuleko lapho ubasola.
Njengowesifazane okhulelweyo osezobeletha ekhaliswa yizinhlungu zokusikwa, saba njalo phambi kwakho, Simakade.
Sasikhulelwe, sisezinhlungwini, sazala umoya nje. Akukho nsindiso esayiletha emhlabeni, asizalanga bantu balo mhlaba.
Abafileyo bakho bayophila, izidumbu zabo zivuke. Vukani, nihlokome ngenjabulo nina enihlala othulini, ngokuba amazolo akho ayoba njengokukhanya kwasekuseni, nomhlaba uyokhipha abafileyo.
Hambani bantu bami, niye ezindlini zenu, nizivalele khona, nicashe isikhashana, luze lwedlule ulaka.
Bhekani, uSimakade uyaphuma endaweni yakhe ukuba ajezise abakhileyo emhlabeni ngenxa yesiphambeko sabo. Umhlaba uzodalula igazi elichithwe kuwo, ungabe usabafihla ababulawelwe kuwo.
Ngalolo lusuku uSimakade uyojezisa uLeviyathani ngenkemba yakhe enonya, elukhuni nemandla. ULeviyathani yinkanyamba esheshayo, futhi ethandelayo, uyobulala nenkanyamba yasolwandle ehlala khona.
Ngalolo lusuku kuyoba khona isivini esinxanelekayo. Hlabelelani ngaso, nithi:
“Mina Simakade ngingumlindi waso; njalo ngiyasichelela; ngisilinda ubusuku nemini, kungaze kube khona osonakalisayo.
Angisithukutheleli. Uma singivezela ameva namakhakhasi, ngizolwa nawo ngiwashise.
Kungenjalo, masithandele kimi ukuze sivikeleke, masibe nokuthula nami, masenze ukuthula nami.”
Ngesikhathi esizayo uJakobe uyogxila, u-Israyeli aqhakaze, akhahlele, athele izithelo, agcwalise umhlaba wonke.
Ngabe uSimakade ushaye u-Israyeli ngendlela abashaya ngayo abamshayayo na? Ngabe ubabulele ngendlela abulala ngayo abambulala na?
Ngokubaxosha nokubadingisa ubajezisile, wabasusa ngomoya wakhe onamandla, ngosuku lomoya wasempumalanga.
Ngalokhu ububi bukaJakobe buzohlangulwa, kube yisithelo esiphelele sokususa isono sakhe, lapho enza wonke amatshe ase-althare abe yimvithi afane nomcako, kungabe kusamiswa nsika engu-Ashera, ngisho nama-althare empepho imbala.
Ngokuba umuzi obiyelweyo usuyize, ikhaya lishiyiwe, lalahlwa, lanjengehlane; ithole seliklaba kulo, libuthise, lidle, liphundle amagatsha.
Lapho amagatsha awo esebunile, ayogencwa, kufike abesifazane baphembe ngawo umlilo. Ngokuba laba bantu bayisizwe esingenakuqonda; owabenzayo akayukubahawukela, nowababumbayo akayukuba namusa kubo.
Kuyothi ngalolo lusuku uSimakade avuthulule emfuleni omkhulu, kuze kufike emfuleni eGibhithe, nina bantu bakwa-Israyeli niqoqwe ngamunye ngamunye.
Ngalolo lusuku kuyobethwa icilongo elikhulu, labo ababedukele e-Asiriya nalabo ababexoshwe eGibhithe, bayofika badumise uSimakade entabeni engcwele eJerusalema.
Maye, kuwo umqhele wokuzikhukhumeza kwezidakwa zakwa-Efrayimi, nasembalini ebunayo yobuhle obukhazimulayo bawo, osenhloko yesigodi esivundile, salabo abanqotshwe yiwayini!
INkosi inalowo oqinileyo nonamandla, ngesandla sakhe uyogumbuqela umhlaba njengesivunguvungu esinesichotho, nesiphepho esichithayo, namanzi anamandla akhukhulayo.
Uyakufihliza ngezinyawo umqhele wokuzikhukhumeza, wezidakwa zakwa-Efrayimi.
Imbali ebunayo yobuhle bawo obukhazimulayo, osenhloko yesigodi esivundile, iyofana nekhiwane elivuthwe kuqala lingakangeni ihlobo, noma ngubani olibonayo ulikha alisobozele lisesesandleni.
Ngalolo lusuku uSimakade Wamabandla uyoba ngumqhele wobukhosi, nesicoco esihle ensalini yabantu bakhe.
Uyoba ngumoya wobulungiswa kumehluleli, namandla kwabavimba impi esangweni.
Abaphristi nabaphrofethi bacwile shi ezinkambeni, babona imibono eyize, bakhubeke ekwehluleleni. Labo ababhukuda ewayinini, babhamazeliswa wuphuzo olunamandla.
Wonke amatafula agcwele ubuhlanzo nokungcola, akusekho ndawo ehlanzekileyo.
“Ngubani ayomfundisa ukwazi, umbiko uyowuchazela bani na? Laba abalunyulwe ebeleni, bayekiswa ukuncela ubisi na?
Ngokuba kuyisiyalezelo phezu kwesiyalezelo, isiyalezelo phezu kwesiyalezelo, umthetho phezu komthetho, umthetho phezu komthetho, ingcosana lapha, ingcosana laphaya.”
Impela uyokhuluma kulaba bantu ngezindebe ezingingizayo nangolimi olungaziwayo.
Athi kubo: “Lokhu ngukuphumula, phumuzani abantekenteke; lokhu kungukuhlunyelelwa;” nokho abezwanga.
Ngakho-ke izwi likaSimakade yileli: isiyalezelo phezu kwesiyalezelo, isiyalezo phezu kwesiyalezo, umthetho phezu komthetho, umthetho phezu komthetho, ingcosana lapha, ingcosana laphaya, ukuze bahambe, bawe nyovane, bephuke, bacushwe, babanjwe.
Nina bantu abedelelayo, ababusa abantu baseJerusalema, yizwani izwi likaSimakade,
ngokuba nithe: “Senze isivumelwano nokufa, sivumelene nendawo yabafileyo; lapho isiswebhu esiyishoba sedlula, asiyukuza kithi, ngoba amanga siwenze ayisiphephelo sethu, sacasha phansi kwenkohlakalo.”
Ngakho-ke, ithi iNkosi uSimakade: “EZiyoni ngibeka itshe lesisekelo elivivinyekileyo, itshe legumbi eliyigugu elinqabileyo lesisekelo soqobo, owethembayo akayukuxhamazela.
Ubulungiswa ngizobenza umucu wokukala, ukulunga kube ngumthofu wokuqondisa, isichotho siyophephetha inqaba yamanga, amanzi akhukhule umpheme.
Isivumelwano senu nokufa siyochithwa, ukuvumelana kwenu nendawo yabafileyo akuseyukuma; lapho isiswebhu esikhukhulayo sedlula, siyonifihliza.
Njalo lapho sedlula siyonibamba. Siyodabula njalo ekuseni, nasemini nasebusuku.” Kuyokwesabeka kakhulu ukuqondwa kombiko.
Ngokuba umbhede uyokuba mfishane ukuba umuntu azelule kuwo, nengubo ibe ncane ukuba ayembathe.
USimakade uyophakama njengentaba iPharazimi, athukuthele njengesigodi iGibheyoni, ukuze enze umsebenzi wakhe, umsebenzi wakhe awejwayelekile, afeze umsebenzi wakhe, izenzo zakhe ezimangalisayo!
Manje maningedeleli funa izibopho zenu ziqiniswe, ngokuba ngisizwile isimemezelo sokubhubhisa wonke umhlaba, siqhamuka eNkosini uSimakade Wamabandla.
Lalelani, nizwe izwi, bekani indlebe, nilalele inkulumo yami.
Ngabe abalimi balima njalo bangayeki na? Badubuza amagabade, bambe imigodi na?
Lapho sebehlelembe umhlabathi abatshali yini imbewu eyehlukene ngemigqa ibhali nokolo endaweni yakho na?
UNkulunkulu wakhe uyamkhaliphisa, amfundise indlela eyiyo.
Uphoko alubhulwa ngesibhulo esibukhali, nesondo lenqola aliphendulwa phezu kwekhumini. Kodwa uphoko lushaywa ngenduku, nekhumini ngogongolo.
Okusanhlamvu kokwenza isinkwa kuyagaywa, kodwa umuntu akakubhuli njalo, ngisho engakufihliza ngenqola edonswa ngamahhashi, akusoze kwacoliseka.
Nalokho kuvela kuSimakade Wamabandla omangalisayo ekwalulekeni, nohlakaniphe ngokwedlulele.
Maye, kuwe Ariyeli, muzi lapho uDavide ake akanisa khona. Yengeza unyaka phezu komunye, imikhosi uqhubeke nokuyigubha njengenjwayelo.
Nokho ngizolikhathaza i-Ariyeli, kuzoba nokukhala nokulila, lizofana ne-Ariyeli.
NjengoDavide ngizokanisa, ngimelane nawe, ngikuhaqe nxazonke, ngikuvimbezele ngezinqaba, ngimise izindonga.
Uzodilizwa, ukhulume usemhlabathini, amazwi akho azophuma phansi othulini, izwi lakho livele emhlabathini njengelomthakathi, inkulumo yakho iyonyenyeza, ivela othulini.
Kodwa isixuku sezitha zakho siyofana nebhuqu elicolisekileyo, noquqaba lwabacindezeli lube njengamakhoba aphephukayo, kwenzeke ngokuphazima kweso.
USimakade Wamabandla uyokuhambela ngokushesha nangokuduma, nangokuzamazama, nangomsindo omkhulu, nangesivunguvungu, nangesiphepho nangelangabi lomlilo oqothulayo.
Isixuku sezizwe ezazilwa ne-Ariyeli, zilwa nalo nenqaba yalo, zilicindezela, ziyokuba njengesiphepho nanjengombono ebusuku.
Kuyofana nalapho umuntu olambile ephupha edla, kodwa avuke esalokhu elambile, noma owomileyo ephupha ephuza, kepha avuke eyethile wukoma. Siyoba njalo-ke isixuku sezizwe zonke ezilwa nentaba iZiyoni.
Zimangaliseni, nimangale; ziphuphuthekiseni nibe yizimpumputhe; dakwani, kodwa kungengawayini; bhamazelani, kodwa kungengaluphuzo olunamandla!
Ngokuba uSimakade uthululele kini umoya wobuthongo obunzulu, uvale amehlo abaphrofethi bakini, wemboza amakhanda ezangoma zakini.
Umbono ngakho konke lokho kimi wafana namazwi encwadi esicilelweyo, uma inikwa labo abakwazi ukufunda, nomyalo othi: “Fundani lokhu,” bayothi: “Ngeke sikwazi ukukufunda, ngokuba isicilelwe.”
Kuthi lapho inikwa labo abangakwazi ukufunda, kuthiwe: “Fundani lokhu,” bathi: “Asikwazi ukufunda.”
INkosi yathi: “Ngenxa yokuthi laba bantu basondela kimi ngemilomo nje, futhi bangidumise ngezindebe zabo nje, izinhliziyo zabo zibe zikude nami, ukungidumisa kwabo kungumyalo wabantu abawufundisiweyo nje,
ngakho ngizobuye ngibenzele izinto ezimangalisayo laba bantu, ezethusayo nezimangalisayo. Ukuhlakanipha kwezihlakaniphi zakhona kuzophela, nokuqonda kwabaqondayo bakhona kusitheke.”
Manje kwabafihlela uSimakade amasu abo, abazenzo zabo zisebumnyameni, abathi: “Ngubani osibonayo? Ngubani osaziyo na?”
Izinto niyazihlanekezela. Umbumbi angathathwa yini njengebumba na? Izinto ezenziweyo zingasho yini kumenzi wazo, zithi: “Akangenzanga.” Into ebunjiweyo ingasho yini kokubumbileyo, ithi: “Akazi lutho,” na?
ILebhanoni alizukuphenduka yini maduzane nje libe yinsimu yezithelo, kuthi nensimu yezithelo ibe yihlathi na?
Ngalolo lusuku izithulu ziyowezwa amazwi encwadi, amehlo ezimpumputhe ayobona ebumnyameni obuyisigayegaye.
Abathobekileyo bayofumana kabusha intokozo kuSimakade, nabantulayo phakathi kwabantu bayojabulela oNgcwele ka-Israyeli.
Ngokuba umcindezeli akaseyukuba bikho, kungabe kusaba khona sedeleli, bonke abaceba ububi bayoqedwa nya.
Ababeka umuntu icala ngezwa bethi, babekele ugibe umthethi wamacala esigcawini, bachezukise olungileyo ngento engelutho.
Ngakho-ke uSimakade owahlenga u-Abhrahama, uthi ngendlu kaJakobe: “UJakobe akasayukuba namahloni, nobuso bakhe abusayukuphaphatheka,
ngokuba nxa ebona izingane zakhe umsebenzi wezandla zami, phakathi kwakhe, ziyongcwelisa iGama lami, zingcwelise oNgcwele kaJakobe, zimesabe uNkulunkulu ka-Israyeli.
Abaduka emoyeni, bayofinyelela ekwazini, nalabo abakhonondayo, bayokwamukela umyalo.”
USimakade uthi: “Maye, kubantwana abahlubukayo, abenza amacebo okungewona awami, abenza isivumelwano esiphambene nomoya wami, ukuze bathasisele isono phezu kwesinye.
Abehlela eGibhithe ngaphandle kweseluleko sami, ukuze baphephele ekuvikelweni nguFaro, bafune ukukhosela emthunzini eGibhithe.
Ukukhosela kwenu kuFaro kuzophenduka ichilo kini, nokukhosela emthunzini eGibhithe kuyonithela ngehlazo.
Ngisho noma izikhulu zakhona ziseZowani, nezithunywa zakhona zifinyelela eHanesi,
bonke bayodumala ngenxa yabantu abangenakubasiza abangalethi nsizakalo nanzuzo, kunalokho bengamahloni nehlazo kuphela.”
Isiphrofetho maqondana nezilwane zaseNegevu. Badabula ezweni losizi nenhlupheko, elebhubesi nebhubesikazi, elebululu nenkanyamba; umcebo wabo bawethwesa izimbongolo, ingcebo yabo bayibeka emalundeni amakameli, bayiyisa kubantu abangenakubasiza ngalutho.
Ngokuba usizo lweGibhithe luyize, futhi alunto yalutho, yingakho ngilibiza ngoRahabi ohleze ethule.
Hamba manje, ukulobe phambi kwabo esibhebheni, ukubhale encwadini ukuze kuthi ngesikhathi esizayo kube ngubufakazi baphakade.
Bangabantwana abahlubukileyo, abantwana abaqamba amanga, abantwana abangathandi ukulalela umthetho kaSimakade,
abathi ezangomeni: “Ningasibhuleli,” nakubaphrofethi, bathi: “Ningaphrofethi okuliqiniso, kodwa sitsheleni izinto ezikhohlisayo, niphrofethe inkohliso;
chezukani endleleni, niphambuke emkhondweni, msuseni phambi kwethu oNgcwele ka-Israyeli.”
Ngakho-ke uthi oNgcwele ka-Israyeli: “Ngenxa yokuba nililahlile leli lizwi, nethembela ekucindezeleni nasenkohlisweni, nencika kukho,
ngalokho lobu bubi buyofana nomfantu ovulekile obondeni oluphakemeyo, osekuseduze lubhidlike, oluyowa ngokuphazima kweso, kungalindele muntu.
Luzobhidlizwa njengokuphahlazeka kwesitsha sombumbi, esiphihlizwa singahawukelwa, kuze kungabe kusatholakala phakathi kwezingcezu ngisho nelokuthatha umlilo eziko, nelokucakula amanzi kuwo umthombokwakhiwa.”
Ngokuba yasho njalo iNkosi uSimakade oNgcwele ka-Israyeli, yathi: “Lapho niphenduka niphumula, niyakusindiswa, amandla enu abe sekuthuleni nasekwethembeni, kepha anithandanga.
Kodwa nathi: ‘Qha, siyakubaleka ngamahhashi,’ ngakho niyakubaleka: ‘Siyakubaleka sigibele anejubane,’ ngalokho abanixoshayo bayakuba nejubane.
Inkulungwane iyakubaleka isongelwa ngoyedwa; kuthi ngokusongelwa ngabayisihlanu niyakubaleka, nize nishiywe ninjengensika esiqongweni sentaba, nanjengebhanela phezu kwegquma.”
Ngalokho uSimakade ulindele ukuba abe nomusa kini; ngalokho uyakuphakama abe nesihawu kini, ngokuba uSimakade unguNkulunkulu wobulungiswa; babusisiwe bonke abamlindelayo.
Wena sizwe esakhe eZiyoni, nina zakhamuzi zaseJerusalema, ningabe nisakhala; impela uyokwenzela umusa, lapho ezwa ukukhala kwakho, uyokuphendula.
Nakuba iNkosi ikunike isinkwa sosizi namanzi okuhlupheka, abafundisi benu abasayukucasha, kodwa amehlo enu ayakubabona abafundisi benu,
nakuba niphambukela ngakwesokunene noma ngakwesokhohlo, izindlebe zenu ziyakuzwa izwi emva kwenu, lithi: “Nansi indlela; hambani ngayo.”
Niyokuthatha njengokungcolile okunamekiweyo kwezithombe zenu ezibaziweyo zesiliva, nesimbozo sezithombe zenu zegolide ezibunjiweyo; niyakuzilahla njengokowesifazane okungcolileyo, nithi kukho: “Suka lapha.”
Uyonisa imvula embewini yenu eniyihlwanyela emhlabathini, aninike umhlabathi ovundileyo, uthele kakhulu, ube nokudla okuningi. Ngalolo lusuku imfuyo yenu iyoklaba emadlelweni abanzi.
Izinkabi nezimbongolo ezilima umhlabathi ziyokudla ukudla okuyolisiweyo, okweliwe ngefosholo nangembenge.
Kuzo zonke izintaba eziphakeme nasemagqumeni amade, kuyoqhuma imifula nemifudlana, ngosuku okuyoba khona ngalo ukubulalana okukhulu, lapho kubhidlika imibhoshongo.
Ngosuku uSimakade ayobopha ngalo amanxeba abantu bakhe, aphulukise izilonda abashaya zona; ukukhanya kwenyanga kuyoba njengokukhanya kwelanga, nokukhanya kwelanga kuphindwe kasikhombisa, kube njengokukhanya kwamalanga ayisikhombisa.
Igama likaSimakade liyeza, livela kude, livutha ulaka lwakhe, ligqunqile; izindebe zakhe zigcwele intukuthelo, nolimi lwakhe lunjengomlilo oqothulayo;
ukuphefumula kwakhe kunjengomfula okhukhulayo, oze ufinyelele ezinkwazini, ukuzohlunga izizwe ngesihlungo sokubhubhisa. Itomu elidukisayo liyoba semihlathini yezizwe.
Niyakuhlabelela njengasebusuku lapho kugujwa umkhosi, nithokoze ngenhliziyo njengalokho kuhanjwa kubethwa imitshingo, kuyiwa entabeni kaSimakade, kulo iDwala lika-Israyeli.
USimakade uyokwenza izwi lakhe elimangalisayo lizwakale, enze ingalo yakhe ibonakale yehla ngolaka lwakhe oluvuthayo, nangelangabi lomlilo oqothulayo, nangesivunguvungu, nangesiphepho, nangesichotho.
Ngokuba ngezwi likaSimakade, i-Asiriya liyothuthumela lapho elishaya ngenduku.
Konke ukushaywa uSimakade abashaye ngakho kuyohambisana nomculo wamahabhu nogubhu, alwe nabo empini, ebashaya ngengalo yakhe.
Indawo yakhe yokushisela ihlelwe kudala, ilungiselwe inkosi; uyenze yajula, yaba banzi, wabeka izinkuni eziningi, nokuphefumula kukaSimakade kunjengomfula wesibabule, kuyakuyithungela ngomlilo.
Maye, kulabo abehlela eGibhithe ukuyocela usizo, abethembele emahhashini nasezinqoleni zempi ngoba ziziningi, nakubagibeli bamahhashi ngokuba benamandla, kodwa bengabheki koNgcwele ka-Israyeli, bengamfuni uSimakade!
Naye uhlakaniphile, uletha inhlekelele, kalibuyiseli emuva izwi lakhe, kodwa uyomelana nendlu yababi, nosizo lwabenza okubi.
AbaseGibhithe bangabantu, abasiye uNkulunkulu, namahhashi abo ayizilwane, awasiwo umoya. Lapho uSimakade elula isandla sakhe, umsizi uyokhubeka, nosizwayo awe, babhubhe kanyekanye.
Usho kanje uSimakade kimi, uthi: “Njengengonyama ibhodla, nebhongo lengonyama ligwavuma phezu kwenyamazane, aliphazanyiswa wumsindo wokumemeza kwabelusi abaningi abasuke bebizwe ukumelana nalo, futhi alithikanyezwa ngumsindo wabo, kanjalo uSimakade Wamabandla uyokwehla ukuba alwe entabeni iZiyoni nasegqumeni layo.
Njengezinyoni ezindiza phezu kwamakhanda, kanjalo uSimakade Wamabandla uyolivikela iJerusalema, uyolivikela, alisindise, adlule phezu kwalo, alikhulule.”
Nina bantu bakwa-Israyeli, buyelani kuye lona enimhlubuke kakhulu kangaka.
Ngokuba ngalolo lusuku, kuyoba yilowo nalowo alahle izithombe ezibaziweyo zesiliva nezegolide, enizenze ngezandla zenu zaba yisono senu.
“Abase-Asiriya bayofa ngenkemba, kungeyona eyomuntu; inkemba okungesiyona eyomuntu iyobaqothula, bayothi galo yephuka phambi kwenkemba. Izinsizwa zakhona ziyoba yizisebenzi ezingakhokhelwa.
Idwala lalo liyoshabalala ngenxa yovalo, izikhulu zakhona ziyoshiya ibhanela, ngenxa yokudangala,” kusho uSimakade omlilo wakhe useZiyoni, nosithando sakhe siseJerusalema.
Kuyoba khona inkosi eyobusa ngokulunga, nezikhulu zibuse ngobulungiswa.
Yilowo nalowo uyofana nendawo yokukhosela emoyeni, nesivikelo esivunguvungwini, njengemithombo yamanzi endaweni eyomileyo, nanjengomthunzi wedwala ezweni eligagadekile.
Amehlo alabo ababonayo awayukuvaleka, nezindlebe zalabo abezwayo ziyokuzwa.
Izinhliziyo zabanamawala ziyokwazi, zihlolisise. Izilimi zabanamalimi ziyothombuluka bakhulume kucace.
Isiwula asisayukubizwa ngokuthi siyisikhulu, nomkhohlisi akusayukuthiwa uhloniphekile.
Ngokuba isiwula sikhuluma ubuwula, nengqondo yaso iceba ububi, yenza ukungalungi, ikhulume okuphambeneyo noNkulunkulu, ingamsuthisi olambileyo nowomileyo imncishe okuphuzwayo.
Izikhali zomkhohlisi zimbi, uhlela amacebo amabi, ukuze abhubhise abampofu ngamazwi angamanga, ngisho nalapho ontulayo ekhuluma okulungileyo.
Kodwa ohloniphekileyo uceba okuhloniphekileyo, futhi umi ngezinto ezihloniphekile.
Vukani nina besifazane abanethezekileyo, yizwani izwi lami, nibeke indlebe kwengikushoyo, nina madodakazi azethembayo.
Ezinsukwini ezingaphezu konyaka niyoqhaqhazela nina besifazane abazethembayo ngokuba iwayini eliphambili lizophela, nokuvunwa kwezithelo akuyukufika.
Thuthumelani nina besifazane abazinzileyo, nihlupheke nina enizethembayo, khumulani nibe nqunu, nibophe izinkalo zenu.
Thwalani imikhono emakhanda, ngenxa yamasimu amahle, nezivini ezithelayo.
Ezweni labantu bami kuyakumila amakhakhasi nameva, yebo, kuzo zonke izindlu zokujabula emzini ojabulayo.
Inqaba iyosala dengwane, kukhale ibhungane emzini obunabantu abaningi. Igquma nombhoshongo kuyoba yimigede kuze kube phakade; kube yinjabulo yezimbongolo zasendle nedlelo lemihlambi,
kuze kuthululelwe kithi uMoya ovela phezulu, ihlane liphenduke insimu yezithelo, nensimu yezithelo kuthiwe iyihlathi.
Ubulungiswa buyohlala ehlane, nokulunga kuhlale ensimini yezithelo.
Umsebenzi wokulunga uyokuba ngukuthula, umvuzo wokulunga ube ngukuthula nokulondeka kuze kube phakade.
Abantu bami bayakuhlala emathendeni okuthula, asezindlini eziphephileyo, nasezindaweni zokuphumula ezinokuthula.
Ihlathi liyovithizwa yisichotho, liphele nya, nomuzi udilizelwe phansi.
Nibusisiwe nina enitshala ngasemifuleni yonke, enivumela izinkabi nezimbongolo zihambe ngokukhululeka.
Maye, kuwe mbhubhisi ongakaze wena ubhujiswe, nakuwe mkhohlisi ongakaze yena akhohliswe! Uma nje sewuqedile ukubhubhisa, nawe uzobhujiswa; nalapho uyeke nje ukukhohlisa, nawe abantu bazokukhohlisa.
Simakade, yiba nomusa kithi, thina sikulindile Wena. Yiba yingalo yethu enamandla njalo ekuseni, nomhlengi wethu, ngesikhathi sokuhlupheka.
Lapho bezwa umsindo wenhlokomo, abantu bayabaleka; ngokuphakama kwakho, izizwe ziyahlakazeka.
Impango yakho iyobuthwa njengalapho kubuthwa isikhonyane, nanjengesikhonyane sitheleka phezu kwayo.
USimakade uphakeme, uhlala kweliphezulu, uligcwalisile iZiyoni ngobulungiswa nokulunga.
Uyoba ngukuzinza esikhathini senu, abe ngukuphelela kokusindiswa, ukuhlakanipha nokwazi; ukumesaba uSimakade kuyakuba yingcebo yakhe.
Lalelani ukukhala kwamaqhawe emigwaqweni, izithunywa zokuthula zikhala umunyu.
Kukhala ibhungane emigwaqweni, izihambi azisabonwa ezindleleni. Isivumelwano sichithiwe, imizi kayisanakiwe, nokuphila komuntu akushaywa mkhuba.
Izwe lididekile, lidangele, iLebhanoni lithelwe ngamahloni, liyabuna, iSharoni linjengehlane, iBhashani neKharmeli kuyavuthuluka.
“Manje sengizovuka” kusho uSimakade; “manje sengizophakanyiswa, sengizophakanyiswa impela.
Niyokhulelwa amakhoba, nizale amabibi, ukuphefumula kwenu kuzokuba ngumlilo ozoqothula nina uqobo.
Abantu bayosha njengokusha komcako, nanjengameva agawuliweyo; bayoshiswa ngomlilo.”
Yizwani nina enikude engikwenzileyo; nani eniseduze, vumani amandla ami.
Izoni eZiyoni ziyesaba, abangenabunkulunkulu bakhungethwe yitwetwe. “Ngubani phakathi kwethu ongahlala nomlilo oqothulayo na? Ngubani phakathi kwethu ongahlala namalangabi aphakade na?”
Yilowo ohamba ngokulunga, okhuluma okuqotho, ongayithathi inzuzo ngokungafanele, ongavumeli izandla zakhe zamukele imivuzo yobuqili, ovala izindlebe ukuze angezwa ngokuchithwa kwegazi, ovala amehlo akhe angabuboni ububi,
yena uyohlala endaweni ephakemeyo, imigede emaweni iyoba yizinqaba zakhe, uyophiwa isinkwa, ahlale njalo ethola amanzi.
Amehlo akho ayoyibona inkosi ebuhleni bayo, ayobona izwe elendlalekile.
Umqondo wakho uyocabanga ngovalo, uthi: “Uphi lona owabalayo na? Uphi lona owakala intela na? Uphi owabala imibhoshongo na?”
Awusayukubuye uzibone izidlova, abantu abakhuluma okungaqondakali nokungezwakali, abalulimi lukwitiza kungekho ongaluqonda.
Bheka, iZiyoni umuzi wemikhosi yethu emisiweyo. Amehlo akho ayakubona iJerusalema, indlu yokuthula, ithende elingenakususwa, okungekho muntu ongabhongcula izikhonkwane zalo, nezintambo zalo akuyukugqashulwa nanini.
Kodwa lapho uSimakade ebukhosini bakhe, uyokuba nathi khona endaweni yemifula ebanzi nemithombo, lapho kungahambi khona zikebhe ezigwedlwayo, kungadabuli mikhumbi emikhulu.
Ngokuba uSimakade ungumehluleli wethu, uSimakade usishayela imithetho, uSimakade uyinkosi yethu; Yena uyokusisindisa.
Izintambo zakho ziyaxega, azinakuyiqinisa insika endaweni yayo, azinakuwugcina useyili wendlalekile. Lapho impango ephangiweyo iyokwehlukaniswa ngobuningi, ngisho nezinyonga ziyothola impango.
Akukho sakhamuzi esiyothi: “Ngiyagula.” Abantu abahlala lapho bayothethelelwa iziphambeko zabo.
Sondelani nina zizwe, nizwe, nina bantu, lalelani! Mawuzwe umhlaba nakho konke okuwugcwalisile makuzwe izwe nakho konke okuphuma kulo.
Ngokuba uSimakade uthukuthelela izizwe zonke, ufuthekela yonke impi yazo; uzakuzibhubhisa, azinikele ukuba zibulawe.
Ababuleweyo bazo bayakulahlwa ngaphandle, kwenyuke ukunuka kwezidumbu zabo, kuncibilike izintaba ngenxa yegazi labo.
Ibandla lonke ezulwini liyakuphela, izulu lisongwe njengomqulu; ibandla lonke liyakubuna njengokubuna kweqabunga emvinini, nanjengokubuna kwekhiwane emkhiwaneni.
Uma inkemba yami isidle yaneliswa ezulwini, iyokwehlela phezu kuka-Edomi naphezu kwabantu engibamisele ukubabhubhisa ngesehlulelo.
USimakade unenkemba; igcwele igazi, izinonisile ngamanoni egazi lezimvana nelezimbuzi, nangamanoni ezinso zezinqama, ngokuba uSimakade uyanikela umhlatshelo eseBhozira, uyazihlabela kakhulu kwa-Edomi.
Izinyathi ziyokuwa kanye nabo, kuwe amavukana nezinkunzi ezinamandla. Izwe labo liyogcwala igazi, nothuli lwakhona lucifike amafutha.
Ngokuba uSimakade unosuku lwempindiselo, unonyaka wempindiselo ngenxa yeZiyoni.
Imifudlana iyophenduka ikolitayi, uthuli lwakhona lube yisibabule, nezwe lakhona libe yikolitayi elivuthayo.
Aliyukucinywa ubusuku nemini, intuthu yalo iyothunqa yenyuke kuze kube phakade. Liyohlala liyincithakalo izizukulwane ngezizukulwane, akukho muntu oyodabula kulo nanini.
Liyakuba yifa lonogolantethe nenhloli, kuyohlala isikhova negwababa kulo. Uyokwelulela phezu kwalo intambo yokukala yencithakalo, nomthofu wokumisa okuyize.
Bayolibiza ngokuthi: umbuso ongelutho, abantu nezikhulu zalo bayakuba yinto engelutho.
Kuyakumila ameva namakhakhasi ezindlini zamakhosi akhona, izinqaba zalo zibe yikhaya lezimpisi, nendawo yezintshe.
Izilwane zasendle ziyakuhlangana nezimpisi, kuyakumemezana izimbuzi eziyimilalandle, imimoya emibi yasebusuku, ihlale khona, izitholele indawo yokuphumula.
Isikhova siyakuzakhela isidleke lapho, sizalele kuso, size sichamsele, sifukamele ethunzini laso; kuyobuthana khona onhloyile, yilowo nalowo nomngani wakhe.
Funani encwadini kaSimakade, nifunde; akukho nokukodwa kwalokhu okungeyukuvela, ayikho engeyukuba namngani. Ngokuba uyalezile ngomlomo wakhe, noMoya wakhe wakuhlanganisa.
Ukwenzele unkatho, isandla sakhe sakukala ngentambo, sababela, kwaba yifa labo laphakade, izizukulwane ngezizukulwane ziyohlala kulo.
Kuyakuthokoza ihlane nendawo eyomileyo, kujabule ugwadule luqhakaze njengentebe.
Luzokhahlela kakhulu luthokoze, lujabule, lugide. Inkazimulo yeLebhanoni izobuyiselwa kulo nobukhosi beKharimeli nobeSharoni. Bayakubona inkazimulo kaSimakade, ubukhosi bukaNkulunkulu wethu.
Qinisani izandla eziyethileyo, niqinise amadolo axegayo.
Yishoni kwabanhliziyo enokwesaba, nithi: “Yimani isibindi, ningesabi, bhekani, uNkulunkulu wenu uyeza ngempindiselo, impindiselo kaNkulunkulu, nguye oza ukunisindisa.”
Amehlo ezimpumputhe ayakuvuleka, izindlebe zezithulu zivuleke,
izinyonga ziyakutshekula njengendluzele, nolimi lwesimungulu luhlabelele ngentokozo. Ngokuba kuyoqubuka amanzi ehlane, nemifudlana ogwadule.
Isihlabathi esishisayo siyophenduka ichibi, umhlabathi owomileyo ube yimithombo yamanzi; ikhaya lezimpungushe liyophenduka ixhaphozi, utshani bube ngumhlanga nekhwani.
Kuyakuba khona umendo nendlela eyakuthiwa iNdlela Yobungcwele; ongcolileyo akayukuhamba ngayo, kepha iyakuba ngeyabantu bakhe; abahamba ngayo, noma beyiziwula, abayukuduka kuyo.
Akuyukuba khona lapho ingonyama, nesilwane esihahayo asiyukukhuphukela khona; lokho akuyukufunyanwa khona, kepha abakhululiweyo bayakuhamba ngayo.
Abahlengiweyo bakaSimakade bayakubuya baye eZiyoni ngokwethaba, intokozo engunaphakade ibe phezu kwamakhanda abo; bayakuthola ukujabula nokuthokoza, kubaleke usizi nokububula.
Kwathi ngonyaka we-14 wokubusa kwenkosi uHezekiya, kwasuka uSanekheribhi, inkosi yase-Asiriya, wenyuka wahlasela yonke imizi yakwaJuda ebiyelweyo, wayidla.
Inkosi yase-Asiriya yathumela uRabi Shake, esuka eLakhishi, waya eJerusalema enkosini uHezekiya, enempi enkulu; wamisa ngasemseleni wechibi elingenhla, elingasendleleni yeNsimu Yomhlanzi.
Kwase kuphuma u-Eliyakimi, indodana kaHilikiya okunguyena owayephethe isigodlo, noShebhina umabhalane, noJowa indodana ka-Asafa, umgcini mlando, baya kuye.
URabi Shake wathi kubo: “Mtsheleni uHezekiya, nithi: ‘Isho kanje inkosi enkulu, inkosi yase-Asiriya, ithi: Yini lena owethembele kuyo na?
Ucabanga ukuthi ukukhuluma nje ngomlomo kungamasu namandla okulwa na? Ngubani owethembele kuye uze uhlubuke kimi na?
Wethembe intonga yalo mhlanga ofecekileyo oyiGibhithe, eligwaza isandla sanoma ngubani oncika kulo. Unjalo-ke uFaro, inkosi yaseGibhithe, kwabathembele kuye.’
Kodwa uma nithi kimi: ‘Sethemba uSimakade uNkulunkulu wethu,’ akusiye yini uHezekiya osuse izindawo zakhe eziphakemeyo nama-althare akhe, wathi kuJuda nakulo iJerusalema: ‘Niyakukhuleka phambi kwaleli althare’ na?
“ ‘Uma wenza isivumelwano nenkosi yami, inkosi yase-Asiriya, ngiyokunika amahhashi ayizi-2 000, uma ungase ukwazi ukugibelisa abagibeli kuwo.
Pho ungaphindisela kanjani emuva induna eyodwa ezincekwini ezincane zenkosi yami na? Nokho wethembele kwabaseGibhithe ukuthola khona izinqola nabamahhashi.
Manje ngeke ngenyukele yini kuleli lizwe ngaphandle kukaSimakade ukuba ngilichithe, na? USimakade wathi kimi: “Yenyukela kuleli lizwe, ulibhubhise.” ’ ”
U-Eliyakimi noShebhina noJowa, bathi kuRabi Shake: “Ake ukhulume ezincekwini zakho ngesi-Aramu, ngokuba siyasizwa, kodwa ungakhulumi kithi ngolimi lwabaJuda ezindlebeni zabantu abasogangeni.”
Kepha uRabi Shake wathi: “Ngabe inkosi yami ayingithumile yini enkosini yakho nakuwena ukusho lawa mazwi, nakulaba bantu abahlezi ogangeni ukuba badle indle yabo, baphuze umchamo wabo kanye nani na?”
Wayesema uRabi Shake, wamemeza ngezwi elikhulu, ngolimi lwabaJuda, wathi: “Zwanini amazwi enkosi enkulu, inkosi yase-Asiriya.
Isho kanje inkosi, ithi maningakhohliswa nguHezekiya, ngokuba akayukuba namandla okunikhulula;
futhi uHezekiya makanganenzi nethembe uSimakade ngokuthi: ‘USimakade uyakusikhulula impela, nalo muzi awuyukunikelwa esandleni senkosi yase-Asiriya.’
“Ningamlaleli uHezekiya, ngokuba isho kanje inkosi yase-Asiriya, ithi: ‘Yakhani uxolo nami, niphume nize kimi, nidle, kube yilowo nalowo emvinini wakhe, kube yilowo nalowo emkhiwaneni wakhe, niphuze, yilowo nalowo amanzi omthombo wakhe,
ngize ngifike, nginiyise ezweni elinjengezwe lakini, izwe lokusanhlamvu nelewayini, izwe lesinkwa nelezivini.’
“Xwayani ukuba uHezekiya anganiyengi ngokuthi: ‘USimakade uyakusikhulula.’ Onkulunkulu bezizwe bake bawakhulula yini amazwe azo esandleni senkosi yase-Asiriya na?
Baphi onkulunkulu baseHamathi nase-Ariphadi; baphi onkulunkulu baseSefarivayimi na? Balikhululile yini iSamariya esandleni sami na?
Ngobani phakathi kwabo bonke onkulunkulu balawa mazwe abake bakhulula amazwe abo esandleni sami, ukuba uSimakade angalikhulula iJerusalema esandleni sami na?”
Bathula, abamphendulanga ngazwi, ngokuba umyalo wenkosi, wathi: “Ningamphenduli.”
U-Eliyakimi, indodana kaHilikiya owayengamele indlu, noShebhina umbhali, noJowa, indodana ka-Asafa, umabhalane, baya kuHezekiya sebedabule izingubo zabo, bamlandisa amazwi kaRabi Shake.
Kwathi ukuba inkosi uHezekiya ikuzwe lokho, yaklebhula izingubo zayo, yagqoka indwangu eyisaka, yangena endlini kaSimakade.
Yathumela u-Eliyakimi owayengamele isigodlo, noShebhina unobhala, namalunga abaphristi, bembethe izindwangu ezingamasaka, baya ku-Izaya umphrofethi, indodana ka-Amozi.
Bathi kuye: “Usho kanje uHezekiya, uthi lolu wusuku losizi, lokukhankathwa nokwedelelwa. Abantwana sebelungele ukuzalwa, kodwa amandla okubazala awekho.
Mhlawumbe uSimakade uNkulunkulu wakho uwezwile amazwi uRabi Shake awathunywe yinkosi yase-Asiriya, inkosi yakhe, okweyisa uNkulunkulu ophilayo, amsole ngawo uSimakade uNkulunkulu wakho; ngalokho phakamisela insali esaseleyo umkhuleko wakho.”
Izinceku zenkosi uHezekiya zafika ku-Izaya,
u-Izaya wathi kuzo: “Niyosho enkosini yenu, nithi: ‘Usho kanje uSimakade: “Ungawesabi amazwi owezwileyo, izinceku zenkosi yase-Asiriya ezingethuke ngawo.
Ngiyakubeka umoya kuyo, izwe amahemuhemu, ibuyele ezweni lakubo, ngiyiwise ngenkemba ezweni lakubo.” ’ ”
Wabuya uRabi Shake, wafumana inkosi yase-Asiriya ilwa neLibhina, ngokuba wayezwile ukuthi isukile eLakhishi.
Esezwile ngoThirahaka, inkosi yaseKhushe, kuthiwa: “Uphumile ukuzolwa nawe,” isikuzwile lokho, yathumela izithunywa kuHezekiya, yathi kuye:
“Anokuthi kuHezekiya, inkosi yakwaJuda: uNkulunkulu wakho omethembayo makangakuyengi ucabange ukuthi iJerusalema aliyukunikelwa esandleni senkosi yase-Asiriya.
Uzwile ukuthi amakhosi ase-Asiriya enzeni kuwo wonke amazwe ewabhubhisa; pho wena ucabanga ukuthi uyosinda kanjani na?
Onkulunkulu balezo zizwe bazophula yini izizwe ezabhujiswa ngokhokho bami, iGozani, iHarana, iRezefi, abantu base-Edene ababeseThelasari na?
Iphi inkosi yaseHamathi, neyase-Ariphadi, neyomuzi waseSefarivayimi, neyaseHena, neyase-Iva na?”
UHezekiya wayamukela incwadi esandleni sezithunywa, wayifunda; uHezekiya wayesenyukela endlini kaSimakade, wayendlala phambi kukaSimakade.
UHezekiya wakhuleka kuSimakade, wathi:
“Simakade Wamabandla, Nkulunkulu ka-Israyeli, oqhwakele phezu kwamakherubhi, unguNkulunkulu, Wena wedwa, wemibuso yonke yomhlaba, nguWena owenze izulu nomhlaba.
Beka indlebe yakho Simakade, ulalele; vula amehlo akho Simakade, ubone, yizwa wonke amazwi uSanekheribhi awathumelele ukweyisa uNkulunkulu ophilayo.
“Kuyiqiniso, Simakade, ukuthi amakhosi ase-Asiriya azibhubhisile izizwe zonke namazwe azo,
aphonsa onkulunkulu bazo emlilweni, nakuba bebengesibo onkulunkulu, bebengumsebenzi wezandla zomuntu, bewukhuni namatshe nje, ngakho-ke babhujiswa.
Manje, Simakade Nkulunkulu wethu, sisindise esandleni sakhe ukuze yonke imibuso yomhlaba yazi ukuthi Wena wedwa, unguSimakade.”
U-Izaya, indodana ka-Amozi, wayesethumela kuHezekiya, wathi: “Usho kanje uSimakade uNkulunkulu ka-Israyeli, uthi: ngenxa yokuba ukhulekile kimi mayelana noSenakheribhi, inkosi yase-Asiriya,
nanti izwi uSimakade alikhulumile maqondana naye, uthi: “Uyakwedelela, uyakungcofa, ntombi, ndodakazi yaseZiyoni; ukunikinela ikhanda, ndodakazi yaseJerusalema.
Ngubani lona omedelelile, nomethukile na? Ngubani lona omphakamisele izwi lakho, nobhekisa amehlo akho phezulu, umqhoshela na? Ngabe ukwenza lokhu koNgcwele ka-Israyeli!
Ngesandla sezinceku zakho uyidelelile iNkosi, wathi: ‘Ngezinqola zami eziningi ngenyukele phezulu ezintabeni, kuze kube semikhawulweni yeLebhanoni; ngagawulela phansi imisedari yalo emide, nemisayiphuresi yalo ekhethekileyo, ngafinyelela emajukujukwini ekuphakameni kwalo, nasesijwini sehlathi elicinene.
Ngamba, ngaphuza amanzi; ngiyonyathela ngonyawo lwami, kome yonke imifula eGibhithe.’ ”
“Awuzwanga yini ukuthi lokhu ngakuhlela kwasemandulo na? Ngakuceba ngezinsuku zakudala, lokhu engikwenzayo manje ukucekela phansi imizi ebiyelweyo, ibe yizindunduma zemvithi.
Ababakhe kuyo baphelelwa ngamandla, besaba, bajabha; baba njengembali notshani obuluhlaza, njengokuluhlaza ophahleni lwezindlu, nanjengamabele antshwamile, engakakhuli kahle.
“Ngiyakwazi ukusukuma kwakho, nokuhlala phansi kwakho; ukuphuma nokungena kwakho, nokubhovumula kwakho ngami;
ukufutheka kolaka lwakho ngami, nokuzidla kwakho sekufinyelele ezindlebeni zami; ngizofaka ingwegwe yami emakhaleni akho, netomu lami emlonyeni wakho; ngikubuyisele emuva ngendlela oweza ngayo.
“Lokhu kuyakuba yisibonakaliso kuwe: “Kulo nyaka niyokudla okuzimileleyo, ngonyaka wesibili nidle okumila kulokho, ngonyaka wesithathu hlwanyelani nivune, nitshale izivini, nidle izithelo zazo.
Abasindileyo bendlu yakwaJuda, abaseleyo bayakubuye benabise izimpande, bagxile phansi, bathele izithelo phezulu.
Ngokuba eJerusalema kuyophuma insali, nabasindileyo entabeni iZiyoni; ukushisekela kukaSimakade Wamabandla kuyokufeza lokho.
“Ngalokho usho kanje uSimakade ngenkosi yase-Asiriya, uthi: “Ayiyukuza kulo muzi, ayiyukucibishela mcibisholo kuwo, ayiyukuza kuwo iphethe isihlangu, noma yenze kuwo izindunduma zokuhlasela.
Iyophindela emuva ngendlela eyeza ngayo; ayiyukuza kulo muzi,” kusho uSimakade.
“Ngiyakuwuvikela lo muzi ngiwusindise ngenxa yami nangenxa kaDavide inceku yami.”
Ingelosi kaSimakade yaphuma yabulala enkanjini yabase-Asiriya abayizi-185 000. Kuvukwa ngakusasa, babona ukuthi bonke babefile kuyizigingqane zezidumbu.
USenakheribhi, inkosi yase-Asiriya, wasuka wabuyela emuva, wahlala eNineve.
Kwathi esakhuleka endlini kaNishirokhi, unkulunkulu wakhe, amadodana akhe, o-Adiramelekhi noSarezeri, bambulala ngenkemba, base bebalekela e-Ararathi. U-Esarihadoni, indodana yakhe, waba yinkosi esikhundleni sakhe.
Ngalezo zinsuku uHezekiya wagula wabangwa nezibi. Kwase kufika kuye umphrofethi u-Izaya, indodana ka-Amozi, wathi: “Usho kanje uSimakade, uthi: ‘Lungisa izindaba zendlu yakho ngokuba uzokufa, ngeke uze usinde.’ ”
UHezekiya waphendulela ubuso bakhe obondeni, wakhuleka kuSimakade,
wathi “Ngiyakuncenga Simakade ukuba ukhumbule ukuthi ngihambe phambi kwakho ngeqiniso nangenhliziyo epheleleyo, ngenza okuhle emehlweni akho.” UHezekiya wayesekhala umunyu.
Izwi likaSimakade lafika ku-Izaya, lathi:
“Hamba uye kuHezekiya, uthi: ‘Usho kanje uSimakade uNkulunkulu kaDavide, ukhokho wakho, uthi: “Ngiwuzwile umkhuleko wakho, ngizibonile izinyembezi zakho; ngizonezelela iminyaka eli-15 ezinsukwini zakho zokuphila.
Ngizokusindisa, wena nalo muzi, esandleni senkosi yase-Asiriya, ngiwuvikele lo muzi.
“ ‘ “Yilesi isibonakaliso esivela kuSimakade sokuthi uSimakade uzokwenza lokho akwethembisile kuwe.
Bheka, ngizokwenza isithunzi selanga sibuyele emuva izinyathelo ezilishumi ebelizehlile ezitebhisini zika-Ahazi.” ’ ” Ngakho-ke ilanga labuyela emuva izinyathelo ezilishumi, ezinyathelweni elizehlileyo.
Ihubo likaHezekiya, inkosi yakwaJuda, emveni kokugula nokusinda kwakhe:
Ngathi: “Ngangiphakathi nempilo yami ngizongena emasangweni endawo yabafileyo, ngaphucwe ingxenye yeminyaka yami.”
Ngathi: “Angiyukumbona uSimakade, uSimakade ezweni labaphilayo; angisayukubona muntu phakathi kwabakhileyo ezweni.
Idokodo lami lisishuliwe, lasuswa kimi njengethende lomelusi; Njengomaluki, ukuphila kwami ngakusonga, uyanginquma esalukweni, kusukela emini kuze kube sebusuku uyayiphelisa impilo yami.
Ngakhala ngifuna usizo kwaze kwasekuseni; uyawephula wonke amathambo ami njengengonyama; kusukela emini kuze kube sebusuku, uyayiqeda impilo yami.
Njengenkonjane noma indwa ngiyatshiyoza, ngiyakhala njengejuba; amehlo ami akhathele ukubheka phezulu; Nkosi, ngicindezelwe, yiba lusizo lwami.”
Ngingathini na? Phela ukhulumile kimi, futhi ukwenzile yena. Ngiphelelwe ngubuthongo ngenxa yomunyu emphefumulweni wami.
Nkosi, abantu baphila ngalezi zinto, nokuphila komphefumulo wami kukuzo zonke lezi zinto; ngiphulukise, ungiphilise.
Impela, kwakungenxa yami ukuba ngibe nomunyu omkhulu; nguwena owawuthanda umphefumulo wami, waze wawophula egodini lokubhujiswa, ngokuba uzintshinge emuva kwakho zonke izono zami.
Ngokuba indawo yabafileyo ayinakukubonga, nokufa akunakukudumisa; abehlela egodini abanakuthembela ekulungeni kwakho.
Abaphilayo, abaphilayo bayakubonga njengami namuhla; oyise bayabazisa abantwana ngokuthembeka kwakho.
USimakade uyakungisindisa; ngalokho siyakucula sisine zonke izinsuku zokuhamba kwethu endlini kaSimakade.
U-Izaya wayethe: “Mabathathe isigaxa samakhiwane basibeke ethumbeni, ukuze asinde.”
NoHezekiya wayethe: “Sibonakaliso sini sokuthi ngiyokwenyukela endlini kaSimakade na?”
Ngalesi sikhathi uMerodaki Bhaladani, indodana kaBhaladani inkosi yaseBhabhele, wathumela izithunywa kuHezekiya ziphethe izincwadi nesipho, ngokuba wayezwile ukuthi uHezekiya kade egula kodwa useluleme.
UHezekiya wazemukela, wayesezikhombisa indlu yengcebo yakhe, isiliva, igolide, amakha, amafutha amahle, zonke izikhali zakhe, nakho konke okwakusendlini yokugcina ingcebo yakhe, akukho lutho esigodlweni sakhe nasembusweni wakhe angabakhombisanga khona.
Kwase kufika umphrofethi u-Izaya kuHezekiya, inkosi, wathi kuye: “Bebethini laba bantu; baphumaphi njengoba beze kuwe na?”
Waqhubeka, wathi: “Baboneni endlini yakho?” UHezekiya wathi: “Bakubone konke okusendlini yami; akukho lutho olusendlini yengcebo yami engingababonisanga khona.”
U-Izaya wathi kuHezekiya: “Yizwa izwi likaSimakade Wamabandla.
Izinsuku ziyeza, lapho konke okusendlini yakho, nalokho okhokho bakho abakugcinile kuze kube namuhla, kuyakuyiswa eBhabhele; akuyukusala lutho, kusho uSimakade.
Namanye amadodana akho oyakuwazala, ayakuthathwa abe ngabathenwa esigodlweni senkosi yaseBhabhele.”
Wayesethi uHezekiya ku-Izaya: “Lihle izwi likaSimakade olikhulumileyo.” Wathi futhi: “Ngokuba kuyakuba khona ukuthula nokulondeka emihleni yami.”
Duduzani, nibaduduze abantu bami, kusho uNkulunkulu wenu.
Liqungeni isibindi iJerusalema, nimemezele kulo ukuthi ukulwa kwalo sekuphelile, nobubi balo buhlanguliwe, ngokuba lamukele kuSimakade isijeziso ngokuphindiwe ngenxa yazo zonke izono zalo.
Izwi liyamemeza, lithi: “Lungisani indlela kaSimakade ehlane, nihlelembe umgwaqo kaNkulunkulu wethu ongcwele.
Zonke izigodi ziyophakanyiswa, zonke izintaba namagquma kuyokwehliswa; amagebhugebhu ayakuhlelenjwa, nemigoxigoxi iyakuba yithafa.
Inkazimulo kaSimakade iyobonakaliswa, bonke abantu bayakuyibona kanyekanye ngokuba umlomo kaSimakade ukhulumile.”
Izwi lithi: “Memeza!” Ngathi: “Ngiyakumemeza ngithini na?” Bonke abantu bangutshani, nabo bonke ubuhle babo bunjengembali yasendle.
Utshani buyabuna, imbali iyavuthuluka, ngokuba uMoya kaSimakade uyakuphephetha. Impela abantu bangutshani.
Utshani buyabuna, imbali ivuthuluke, kodwa izwi likaNkulunkulu wethu limi kuze kube phakade.
Khuphukela entabeni ephakemeyo, wena Ziyoni, ophethe izindaba ezinhle. Phakamisa izwi lakho ngamandla, Jerusalema ophethe izindaba ezinhle; liphakamise ungesabi, yisho emizini yakwaJuda, uthi: “Bhekani, nangu uNkulunkulu wenu.”
Bhekani, iNkosi uSimakade iyeza ngamandla; izobusa ngengalo yayo; bhekani, umvuzo wayo uza nayo, nenkokhelo yayo iphambi kwayo.
Iyokwelusa umhlambi wayo njengomelusi, iqoqe izimvana ngezingalo zayo, izigone esifubeni sayo, ihole ngesinono izindlezane.
Ngubani olinganise amanzi ngentende yesandla sakhe, walinganisa izulu ngeminwe eyeluliweyo, wahlanganisa uthuli esilinganisweni, walinganisa izintaba ngesikalo namagquma ngezisindo, na?
Ngubani oqondise uMoya kaSimakade, wamfundisa, waba ngumeluleki wakhe na?
Welulekana nobani waze wamnika ukuqonda, wamfundisa indlela yobulungiswa, wamnika indlela yokwazi, wamazisa indlela yokuqonda na?
Impela, izizwe zinjengethonsi esitsheni, zifana nothuli esikalini; uyakuphakamisa iziqhingi njengothuli olucolisekileyo.
ILebhanoni alanele ukushisa, nezilwane ezikulo azanele ukuba zibe ngumnikelo wokushiswa.
Zonke izizwe ziyinto engelutho phambi kwakhe, uzithatha njengento engelutho neyize.
Ningamfanisa nobani uNkulunkulu na? Ningamqhathanisa namuphi umfanekiso na?
Isithombe esibunjwe ngumbumbi, umkhandi wasinameka ngegolide, wasincibilikisela amaketanga esiliva na?
Ompofu ukhetha ukhuni olungaboliyo anikele ngalo, bese efuna ingcweti yombazi ukuba imenzele isithombe esibaziweyo, esingenyakaziswe.
Anazi yini? Anizwa yini? Anitshelwanga yini kwasekuqaleni, aniqondanga yini kwasekusekelweni komhlaba na?
NguYena ohleli esiyingelezini somhlaba, abakhileyo kuwo banjengezintethe; nguyena oweneka izulu njengekhethini, alendlale njengethende ukuba kuhlalwe kulo;
nguyena owenza izikhulu zibe yinto engelutho, abehluleli babe yize.
Bathi besanda kutshalwa nje, beqeda nje ukuhlwanyelwa, nesiqu sabo singakagxiliswa izimpande emhlabathini, wabaphephetha, babuna, isivunguvungu sabasusa njengamabibi.
“Ngubani eningamfanisa nami neningangilinganisa naye na?” kusho oNgcwele.
Phakamiselani amehlo enu phezulu, nibone. Ngubani odale lezo zinto na? Nguye okhipha amaviyo azo, awabale; azibize zonke ngamagama. Ngokuba unamandla amakhulu nezikhwepha zakhe zinkulu, yingakho kungasilele neyodwa.
Ukhulumelani wena Jakobe, usholoni wena Israyeli, ukuthi: “Indlela yami isithekile kuSimakade, nelungelo lami akalinaki uNkulunkulu wami na?”
Awuzange wazi yini? Awuzwanga yini na? USimakade unguNkulunkulu ongunaphakade, uMdali wemikhawulo yomhlaba, akapheli amandla, akakhathali; nokuqonda kwakhe akunakuphenywa.
Nguye opha oyethileyo amandla, andise izikhwepha kongenamandla.
Izinsizwa ziyaphela amandla, zikhathale, nabasha bawa nokuwa,
kepha abamethembayo uSimakade bayakuthola amandla amasha, bayakukhuphuka ngamaphiko njengezinkozi, bagijime bengakhathali, bahambe bengapheli amandla.
“Thulani phambi kwami, nina ziqhingi, izizwe mazithole amandla amasha, mazisondele bese zikhuluma, mazisondele zonke ukuba zehlulelwe ndawonye.
“Ngubani okuvusile ukulunga ukuba kuphume empumalanga, akubize ukuba kumlandele, anikele izizwe phambi kwakhe, anyathele amakhosi, awenze abe njengothuli ngenkemba yakhe, nanjengamabibi epheshulwa ngumnsalo wakhe na?
Uyabaxosha, adlule ngokuthula, kungathi kalubeki phansi endleleni unyawo lwakhe.
Ngubani okwenzileyo lokhu, wakudala, wabiza izizukulwane kwasekuqaleni na? Mina, Simakade ngingowokuqala, futhi ngingowokugcina.”
Iziqhingi zibonile, ziyesaba; imikhawulo yomhlaba iyathuthumela, iyasondela, futhi isifikile.
Yilowo nalowo usiza umakhelwane wakhe ethi esihlotsheni sakhe: “Yima isibindi.”
Umbazi uqunga umkhandi isibindi, nololonga ngesando uqunga oshaya isikhandelo isibindi, ethi konamathelisa ngomthofi: “Kuhle,” ekuqinisa ngezipikili, ukuze kunganyakaziswa.
“Kepha wena Israyeli, nceku yami, wena Jakobe engikukhethileyo, wozalo luka-Abhrahama umngani wami,
wena engikuthathe emikhawulweni yomhlaba, ngakubiza emajukujukwini awo, ngathi kuwe: ‘Wena uyinceku yami, ngikukhethile, angikulahlanga.’
Ungesabi, ngokuba Mina nginawe; ungabi naluvalo, ngokuba Mina nginguNkulunkulu wakho; ngiyakuqinisa, futhi ngiyakusiza, yebo, ngiyakusekela ngesandla sokunene sokulunga kwami.
“Bazoba namahloni, bajabhiswe bonke abakuthukuthelele, bayoba njengento engelutho, babhubhe bonke abamelana nawe.
Uyakubafuna, kodwa awuyukubafumana; labo bantu abaxabana nawe, abalwa nawe, bayakuba njengento engelutho, nanjengeze.
Mina nginguSimakade uNkulunkulu wakho, okubamba ngesandla sakho sokunene, athi kuwe: ungesabi, ngiyakusiza.
Ungesabi wena mpethu, Jakobe, nani bantu bakwa-Israyeli; Mina ngiyokusiza,” kusho uSimakade uMhlengi wakho oNgcwele ka-Israyeli.
“Ngizokwenza ube yisibhulo esisha, esibukhali esinamazinyo; uyobhula izintaba, uzicolise, wenze amagquma abe njengamakhoba.
Uyowahlakaza, umoya uwasuse, isivunguvungu siwachithe; uyothokoza ngoSimakade, uzibonge ngoNgcwele ka-Israyeli.
“Abampofu nabaswelayo bafuna amanzi, kodwa abawafumani, ulimi lwabo lugagadekile wukoma; Mina Simakade ngiyakubaphendula, Mina Nkulunkulu ka-Israyeli angiyukubashiya.
Ngiyakuvula imifula emadulini angenalutho, nemithombo phakathi kwezigodi; ngiyalenza ihlane libe yichibi lamanzi, nomhlabathi owomileyo ube yiziphethu zamanzi.
Ngiyakutshala umsedari ehlane, umtholo, umbomvana, nomnqumo, ngibeke kwahlongasibi umsayiphuresi, umthidari nomkhoba kanyekanye,
ukuze babone futhi bazi, baqaphele, babe nokuqonda ukuthi yisandla sikaSimakade esenze lokho, nokuthi ngoNgcwele ka-Israyeli okudalile.
“Lethani udaba lwenu,” kusho uSimakade, “nisondeze izizathu zenu,” kusho iNkosi kaJakobe.
“Mabasondele, basitshele okuyakwenzeka, ukuthi zaziyini izinto zakuqala na? Mabasitshele zona ukuba sizibeke ezinhliziyweni zethu, sazi umphumela wazo, noma sazi izinto ezizayo.
Sitsheleni okuzayo ngesikhathi esizayo, sazi ukuthi ningonkulunkulu; yebo, yenzani okuhle noma okubi, ukuze sesabe, sikubone kanyekanye.
Bhekani, nivela ezeni, nemisebenzi yenu ayilutho; uyisinengiso onikhethayo.
“Ngimvusile enyakatho, futhi usefikile, kusukela ekuphumeni kwelanga, uyakubiza iGama lami; uyakwehlela phezu kwababusi njengaphezu kodaka, nanjengombumbi exovaxova ibumba.
Ngubani owakushoyo kwasekuqaleni ukuze sazi, nangaphambili ukuba sisho sithi: ‘Uqinisile’ na? Qha, akekho okumemezelileyo, akekho nokuzwisileyo, akekho nowezwa amazwi enu.
Mina ngingowokuqala okumemezele eZiyoni, nganika iJerusalema isithunywa sezindaba ezinhle.
Kepha lapho ngibheka, akukho muntu; akekho phakathi kwabo umeluleki ongaphendula ngezwi, lapho ngibabuza.
Bheka, bonke bayize; imisebenzi yabo iyinto engelutho, nezithombe zabo ezibunjiweyo zingumoya nento engekho.”
“Bheka, inceku yami engiyesekayo, okhethiweyo wami othokoza ngaye umphefumulo wami; ngibekile umoya wami phezu kwakhe, uyakwenzela izizwe ubulungiswa.
Akayukukhala, akayukuliphakamisa izwi lakhe, akayukulizwakalisa izwi lakhe emigwaqweni.
Umhlanga ofecekileyo akayukuwaphula, umongo othunqanyo akayukuwucima, uyakwenza ukwehlulela ngokweqiniso.
Akayukudangala, aphele amandla, aze amise ubulungiswa emhlabeni; neziqhingi ziyolindela ukuyala kwakhe.”
Usho kanje uNkulunkulu uSimakade owadala izulu, waleneka, wendlala umhlaba nokuvela kuwo; onika abantu abakuwo umphefumulo nomoya kwabahamba kuwo, uthi:
“Mina Simakade ngikubize ngokulunga, ngiyokubamba ngesandla sakho, ngikulondoloze, ngiyokwenza ube yisivumelwano sabantu, nokukhanya kwabezizwe,
ukuze uvule amehlo ezimpumputhe, ukhiphe iziboshwa ejele, nabahlezi ebumnyameni ejele.
“NginguSimakade; yilelo igama lami; angiyukumnika omunye inkazimulo yami, nezithombe ezibaziweyo, udumo lwami.
Izinto zakuqala zifikile, sengizakumemezela izinto ezintsha; zingakaqhamuki, ngiyakunenza nizizwe.”
Mhubeleni uSimakade ihubo elisha, indumiso yakhe kusukela emikhawulweni yomhlaba, nina enehlela olwandle nakho konke okukulo, nina ziqhingi nabakhileyo kuzo.
Ihlane nemizi yalo makujabule, nemizana okwakhe kuyo abakwaKedari, abakhileyo eSela mabajabule bathokoze, mabenanele beseziqongweni zezintaba.
Mabamnike uSimakade udumo, bamemezele udumo lwakhe eziqhingini.
USimakade uyakuphuma njengeqhawe, njengendoda yempi, uyakuvusa ukushisekela kwakhe, uyakumemeza ngezwi lokunqoba, akhuze isiqubulo sempi aziqonele izitha zakhe.
“Sengithule isikhathi eside; ngizibambile ngathula. Sengizokhala njengowesifazane ebeletha, ngihefuzele, ngibitoze ngasikhathi sinye.
Ngiyakuchitha izintaba namagquma kube yize, ngomise konke okumile kukho, ngiyokwenza imifula ibe yiziqhingi, ngishise amachibi.
Izimpumputhe ngiyozihambisa ngendlela ezingayaziyo, ngiyozihola emikhondweni ezingayaziyo, ngiyophendula ubumnyama bube ngukukhanya phambi kwazo, amagebhugebhu ahlelembeke, lezi zinto engiyozenza, angiyukuyeka ngingazenzi.
Bayakubuyiselwa emuva, bajabhe nokujabha labo abethembela ezithombeni ezibaziweyo, abathi ezithombeni ezibunjiweyo: ‘Ningonkulunkulu bethu.’
“Yizwani nina zithulu; bhekani nina zimpumputhe, ukuze nibone.
Ngubani oyimpumputhe ngaphandle kwenceku yami, nesithulu njengesithunywa sami engiyosithuma na? Ngubani oyimpumputhe njengozinikele kimi, noyimpumputhe njengenceku kaSimakade na?
Ubonile izinto eziningi, kodwa awuqaphelanga; nezindlebe zakho zivulekile, kodwa awuzwanga.”
Kwaba kuhle kuSimakade ngenxa yokulunga kwakhe, ukuba aphakamise umthetho wakhe, awenze uhlonipheke.
Kodwa laba bangabantu abaphuciweyo baphangwa; bonke bacushwe emigodini, bafihlwa emajele; bangabokuphangwa, akekho obasindisayo, bayimpango, akekho nothi: “Buyisa.”
Ngubani phakathi kwenu oyobeka indlebe kulokhu, aqaphele, ezwe okwesikhathi esizayo na?
Ngubani owanikela uJakobe ukuba aphangwe, no-Israyeli kubaphangi na? Akusiye yini uSimakade lona esonile kuye, abangavumanga ukuhamba ngezindlela zakhe, nokulalela umthetho wakhe na?
Wathela phezu kwakhe ukufutheka kwentukuthelo yakhe, nesihluku sempi; kwavutha nxazonke, kodwa akaqondanga; kwashisa, nokho akazange akubeke enhliziyweni yakhe.
Manje usho kanje uSimakade owakudala wena Jakobe, nowakubumba wena Israyeli, uthi: “Ungesabi ngokuba ngikuhlengile, ngikubize ngegama lakho; ungowami.
Uma udabula emanzini, Mina ngiyokuba nawe, nemifula ayiyukukukhukhula; nalapho udabula emlilweni, awuyukusha; ilangabi aliyukukushisa.
Ngokuba Mina nginguSimakade uNkulunkulu wakho, oNgcwele ka-Israyeli uMsindisi wakho. IGibhithe ngilinikele laba yinhlawulo yakho; iKhushe neShebha esikhundleni sakho.
Ngokuba uyigugu emehlweni ami, uhloniphekile, futhi ngiyakuthanda; ngiyonikela abantu esikhundleni sakho, nezizwe esikhundleni sokuphila kwakho.
Ungesabi, ngokuba nginawe, ngiyakuletha abozalo lwakho bevela empumalanga, ngikuqoqe nasentshonalanga.
Ngiyothi kuyo inyakatho: ‘Bakhulule,’ nakuyo iningizimu, ngithi: ‘Ungabagodli.’ Lethani amadodana ami asuka ezweni elikude, namadodakazi ami avela emikhawulweni yomhlaba,
yilowo nalowo obizwa ngeGama lami, engimdalele udumo lwami, ngambumba, futhi ngamenza.”
Lethani abantu abayizimpumputhe bebe benamehlo, nabayizithulu bebe benezindlebe.
Izizwe zonke mazihlangane ndawonye; abantu bonke babuthane. Ngubani phakathi kwabo ongasho lokhu, asitshele izinto zakuqala na? Mabalethe ofakazi babo ukuze bazobafakazela, mabezwe bese bethi: “Kuliqiniso.”
“Ningofakazi bami,” kusho uSimakade, “nenceku yami engiyikhethileyo, ukuze nazi, futhi ningikholwe, niqonde ukuthi Mina nginguye. Akukho nkulunkulu owenziwa ngaphambi kwami, futhi akekho oyokwenziwa ngasemuva kwami.
Mina, Mina nginguSimakade, ngaphandle kwami akekho uMsindisi.
Ngishilo, ngasindisa, ngamemezela, ngesikhathi kungakabi bikho nkulunkulu wabezizwe phakathi kwenu. Nina ningofakazi bami,” kusho uSimakade. “Mina nginguNkulunkulu.
Mina nginguye kwasemandulo. Akekho ongakusindisa okusesandleni sami, ngiyenza, ngubani ongakuvimba lokho na?”
Usho kanje uSimakade uMhlengi wenu oNgcwele ka-Israyeli, uthi: “Ngenxa yenu ngithumele eBhabhele, ngiyobehlisa bonke ababalekileyo, namaKhaledi ngemikhumbi, bememeza ngenjabulo.
Mina nginguSimakade oNgcwele wenu, uMdali ka-Israyeli, iNkosi yenu.”
Usho kanje uSimakade odala indlela olwandle, nomkhondo emanzini anamandla,
okhipha izinqola zempi; amahhashi, impi, namaqhawe, kulale uyaca kanyekanye kungabe kusavuka. Kucishwe, kucinywe njengentambo yesibani.
“Ningakhumbuli izinto zakuqala, ningazindli ngezindaba zasendulo.
Bhekani, sengizokwenza okusha, kuqhamuka khona manje; niyakubona na? Yebo, ngiyokwenza indlela ehlane, nemifula kwahlongasibi.
Izilwane zasendle: izimpisi nezintshe kuzongidumisa, ngokuba ngiveze amanzi ehlane nemifula kwahlongasibi, ukuphuzisa abantu bami engibakhethileyo,
abantu engizidalele bona, ukuze bamemezele udumo lwami.
“Nokho wena Jakobe, awuzange ungibize; nawe Israyeli, udiniwe yimi.
Awuzilethanga kimi izimvu zakho zomnikelo wokushiswa; awungidumisanga ngemihlatshelo yakho; angizange ngibe kuwe ngumthwalo ngeminikelo, noma ngikukhathaze ngempepho.
Awungilethelanga ngamali ikhalamusi; awungisuthisanga ngamanoni emihlatshelo yakho, kodwa ungethwese umthwalo ngezono zakho, wangikhathaza ngobubi bakho.
“Mina, Mina nginguye owesula iziphambeko zakho ngenxa yami; angiyukuzikhumbula izono zakho.
Ngikhumbuze, masiqagulisane, lubeke udaba lwakho, ukuze kubonakale ukuthi awunacala.
Ukhokho wakho wokuqala wona, nabakukhulumelayo baphambukile kimi.
Ngakho-ke ngizingcolisile izikhulu zendlu engcwele; uJakobe ngizakumnikela ukuba achithwe, no-Israyeli ukuba abe yisithuko.”
“Manje yizwa Jakobe, nceku yami, Israyeli engimkhethileyo.
Usho kanje uSimakade owakudalayo, wakubumba kwasesibelethweni, oyakukusiza, uthi: Ungesabi, Jakobe, nceku yami, wena Jeshuruni engikukhethileyo.
Ngokuba ngiyakuthela amanzi phezu kokomileyo, nezikhukhula phezu kokomileyo, ngiyakuthulula uMoya wami phezu kwabantwana bakho, nesibusiso sami phezu kwezizukulwane zakho;
bayakuhluma phakathi kotshani, njengeminyezane ngasemifudlaneni yamanzi.
Omunye uyakuthi: ‘NgingokaSimakade;’ omunye uyakuzibiza ngegama likaJakobe, omunye alobe esandleni sakhe, ngingokaSimakade, azibize ngegama lika-Israyeli.”
“Usho kanje uSimakade, iNkosi ka-Israyeli, noMhlengi wakhe, uSimakade Wamabandla, uthi: ngingowokuqala, futhi ngingowokugcina, ngaphandle kwami akekho uNkulunkulu.
Ngubani onjengami na? Makakumemezele, makakumemezele, akubeke phambi kwami. Ngubani owabikezela emandulo ngezinto ezisazokwenzeka na? Mabasitshele okusazokwenzeka.
Ningabi naluvalo, ningesabi; angimemezelanga yini kusukela emandulo, nganazisa na? Nina ningofakazi bami. Ukhona yini uNkulunkulu ngaphandle kwami na? Qha, alikho iDwala; angilazi.”
Bonke abenza izithombe ezibunjiweyo bayize, nezinto abazithokozelayo azinanzuzo kubo, ofakazi babo ababoni, futhi kabazi, bayothelwa ngehlazo.
Ngubani owenza unkulunkulu, abumbe umfanekiso ongenakukwenza okuhle na?
Bonke abasikhonzayo bayothelwa ngehlazo, nabakhandi bangabantu nje, mabahlangane bonke, mabasukume bonke, bangenwe yingebhe; bonke bayakuthelwa ngehlazo kanyekanye.
Umkhandinsimbi wenza ithuluzi, uyalisebenza emalahleni, alicangcathe ngezando, alisebenze ngamandla ezingalo zakhe. Uyalamba, angabi namandla, uma engawaphuzi amanzi, uyakhathala.
Umbazi welula intambo yokukala, adwebe umuthi ngokubomvu, awugwede ngezingwedo, awuklame ngensimbi yokudweba isiyingi, awenze ngomfanekiso womuntu, ube nobuhle bomuntu; ukuba uhlale endlini.
Uyazigawulela imisedari, athathe imikhoba nemi-okhi, akuvikele phakathi kwemithi yehlathi; utshala umsedari, imvula iwenze ukhule.
Bese kuba ngokomuntu ukuba abase ngakho; uthatha okunye kukho, othe; abase umlilo, abhake isinkwa; wenza futhi unkulunkulu, amkhothamele; wenza isithombe esibaziweyo, asikhulekele.
Ushisa ingxenye yawo emlilweni; phezu kwenye ingxenye, ose izoso, adle inyama, asuthe; yebo, uyotha athi: “Halala! Sengifudumele, ngothe umlilo.”
Ngokuseleyo wenza ngakho unkulunkulu nesithombe sakhe; akukhothamele, akhuleke kukho, athandaze kukho, athi: “Ngisindise; ungunkulunkulu wami.”
Kabazi, kabaqondi, ngokuba amehlo abo uwasilekile ukuze bangaboni, nezinhliziyo zabo ukuze bangaqondi.
Akekho okhumbulayo, nokwazi ukuqonda bese, ethi: “Ingani ingxenye yawo ngiyishise ngomlilo, ngapheka isinkwa phezu kwamalahle awo, ngosa inyama, ngayidla; ngokuseleyo kuwo, ngenza okuyisinengiso; ngakhothama phambi kwesiqu somuthi.”
Udla umlotha, inhliziyo ekhohlisiweyo imdukisile; akanakuwusindisa umphefumulo wakhe, nokuba athi: “Akukho yini amanga kwesokunene sami na?”
“Khumbula lezi zinto, Jakobe, wena Israyeli, ngokuba uyinceku yami; ngikudalile, uyinceku yami; Israyeli, angiyukukukhohlwa.
Iziphambeko zakho ngizesule njengefu, nezono zakho njengomlaza; buyela kimi, ngokuba ngikuhlengile.”
Thokozani, mazulu, ngokuba uSimakade usukumile, nijabule nina zindawo eziphansi zomhlaba, nihlabelele kakhulu nina zintaba, nawe hlathi nayo yonke imithi ekuwe, ngokuba uSimakade umhlengile uJakobe, ngokuhlabelela, wazidumisa ngo-Israyeli.
Usho kanje uSimakade uMhlengi wakho, nowakubumba kwasesiswini, uthi: “NginguSimakade owenza konke, oweneka izulu yedwa, wendlala umhlaba ngokwakhe,
oshafisa izibonakaliso zabaphrofethi bamanga, enze ababhuli ukuba bahlanye; obuyisela emuva abahlakaniphileyo, enze ukwazi kwabo kube ngubuwula;
yiMina ofeza izwi lezinceku zakhe, enze konke okubikezelwa yizithunywa zakhe, akhulume ngeJerusalema, athi: ‘Liyohlalwa,’ nangemizi yakwaJuda, athi ngayo: ‘Izokwakhiwa,’ nencithakalo, athi ngayo: ‘Ngiyoyivusa.’
Oshoyo kuwo umsinga, athi: ‘Yisha, ngiyayomisa imifula yakho;’
othi ngoKhoresi: ‘Ungumelusi wami, uyakufeza konke okwentando yami, athi ngeJerusalema: liyakwakhiwa, nakulo ithempeli: Isisekelo sakho siyakubekwa.’ ”
“Usho kanje uSimakade kogcotshiweyo wakhe, uKhoresi, osandla sakhe sokunene ngisibambile ukuba ngehlule izizwe phambi kwakhe, ngihlubule amakhosi izembatho zawo, ngivule iminyango phambi kwakhe; amasango awasayukuvalwa.
Mina ngiyakuhamba phambi kwakho, ngihlelembe amagebhugebhu, ngephule izivalo zethusi, nginqume imigoqo yensimbi.
Ngiyakukunika ingcebo yobumnyama, nemfuyo ethukusiweyo ezindaweni ezifihlakeleyo, ukuba wazi ukuthi nginguSimakade okubiza ngegama lakho, uNkulunkulu ka-Israyeli.
Ngenxa yenceku yami uJakobe, u-Israyeli okhethiweyo wami, ngikubizile ngegama lakho, ngiyakukunika igama lodumo, noma ungangazi.
Mina nginguSimakade, akekho omunye uNkulunkulu ngaphandle kwami; ngiyakukubhincisa noma ungazange ungazi,
ukuze abantu bazi, kusukela ekuphumeni kwelanga kuze kube sekushoneni kwalo, ukuthi akekho omunye ngaphandle kwami; Mina nginguSimakade, akekho omunye;
yimi engenza ukukhanya nengidala ubumnyama, ngenza ukuthula, ngidale inhlekelele; nginguSimakade owenza konke lokho.
“Consani mazulu phezulu, amafu athulule ukulunga; umhlaba mawuvuleke, kuthelwe ukusindiswa, kumile nokulunga; Mina Simakade ngikudalile.
“Maye, kuye olwa noMenzi, udengezi phakathi kwezindengezi zomhlabathi! Ibumba liyakusho yini kolibumbayo, lithi: ‘Wenzani na?’ nomsebenzi wakho, uthi: ‘Akanazo yini izandla na?’
Maye, kulowo othi kuyise: ‘Uzalani na?’ nakowesifazane, athi: ‘Unemihelo ngani na?’
“Usho kanje uSimakade, oNgcwele ka-Israyeli noMenzi wakhe, uthi: ‘Ningibuza ngezinto ezizayo, nangabantwana bami, ningiyale ngomsebenzi wezandla zami na?
Yimi engiwenzile umhlaba, ngadala abantu phezu kwawo; yizandla zami ezaleneka izulu, ngayala wonke amaviyo alo.
Mina ngimvusile lona ngokulunga; ngiyakuhlelemba zonke izindlela zakhe; uyakuwakha umuzi wami, avumele abathunjwa bami ukuba bahambe, kungabi ngomfumbathiso nangesipho,’ kusho uSimakade Wamabandla.”
Usho kanje uSimakade, uthi: “Ingcebo yaseGibhithe nokuzuziweyo kwaseKhushe, nangamaShebha, abantu abade; kuyakuza kuwe, kube ngokwakho; bayakukulandela, bafike beboshwe ngamaketanga; bakukhothamele, bakhuleke kuwe, bathi: ‘UNkulunkulu unani kuphela, akekho omunye, akekho omunye uNkulunkulu ngaphandle kwakhe.’ ”
Impela unguNkulunkulu ozifihlayo, uNkulunkulu ka-Israyeli, osindisayo.
Bayakujabha bonke ngothi lwabo, babe namahloni, bayokuhamba bedumele bonke abenza izithombe.
Kepha u-Israyeli usindisiwe nguSimakade, ngokusindiswa okuphakade; aniyukujabha, aniyukuba namahloni kuze kube phakade.
Ngokuba usho kanje uSimakade, owadala izulu, uNkulunkulu, owabumba umhlaba; wawenza, wawumisa, engawudalelanga ize; wawubumba ukuba kuhlalwe kuwo, uthi: “NginguSimakade, akekho omunye.
Angikhulumanga ekusithekeni, endaweni emnyama emhlabeni; angishongo kwabozalo lukaJakobe, ngathi: ‘Ngifuneni ngeze.’ Mina Simakade ngikhuluma ukulunga, ngimemezela okuqotho.
“Qoqanani ndawonye nize, sondelani nina abasindileyo bezizwe; abanalwazi abathwala umuthi wezithombe zabo ezibaziweyo, bakhuleka kunkulunkulu ongenakusindisa.
Kumemezeleni, nikuveze; yebo, mabaxoxe. Ngubani owakubikezela lokhu endulo, wakumemezela esikhathini sasemandulo na? AkusiMina Simakade na? Akekho uNkulunkulu ngaphandle kwami, uNkulunkulu olungileyo noMsindisi, akekho ngaphandle kwami.
“Nina nonke mikhawulo yomhlaba, phendukelani kimi, nisindiswe, ngokuba nginguNkulunkulu, akekho omunye.
Ngizifunge Mina, izwi liphumile emlonyeni wami ngokulunga, aliyukubuyela emuva: wonke amadolo, ayoguqa kimi nezilimi zonke ziyofunga.
Kuyothiwa ngami: ‘KukuSimakade kuphela ukulunga namandla.’ ” Bonke ababemthukuthelele bayakufika kuye, bajabhe.
KuSimakade zonke izizukulwane zika-Israyeli ziyolungisiswa, zibe nodumo.
UBheli uyaguqa, uNebho uyakhothama; izithombe zabo ezibaziweyo zingezezilwane nezezinkomo; lezi zinto enizithweleyo zingumthwalo onzima ezilwaneni ezikhatheleyo.
Bayazikhothamela, baguqe kanyekanye; azinakuwukhulula umthwalo, kodwa nabo luqobo baya ekuthunjweni.
“Ngilalele, wena ndlu kaJakobe, yonke insali yabendlu ka-Israyeli engayimitha ngaze ngayizala, ngayithwala esibelethweni.
Niyoze niguge nginguye, yebo, niyoze nibe yizimpunga, ngiyakunithwala; ngikwenzile lokhu, futhi ngiyakunetshatha, yebo, ngiyakunithwala, nginikhulule.
“Niyongifanisa nobani, niyongilinganisa nobani, ningiqhathanise nobani ukuba sifane na?
Abathulula igolide esikhwameni, balinganise isiliva esilinganisweni, baqashe umkhandisiliva ukuba enze unkulunkulu, bese bekhothama, bakhuleke.
Bamthwala ehlombe, bametshathe, bambeke endaweni yakhe ukuba ame lapho, angabe esasuka endaweni yakhe; kodwa uma umuntu ekhala kuye, akayukumphendula, akanakumsindisa osizini lwakhe.
“Khumbulani lokhu, nime isibindi, cabangani futhi ezinhliziyweni zenu, nina benzi bokubi.
Khumbulani izinto zakuqala, zasemandulo, ngokuba nginguNkulunkulu, akekho omunye, nginguNkulunkulu, akekho onjengami,
owamemezela phambilini okuyakuza, nasendulo izinto ezingakenziwa, ethi: ‘Icebo lami liyakuma, ngiphumelelise yonke intando yami, ngifeze zonke izimfiso zami,
obiza inqe empumalanga nomuntu engizofeza ngaye icebo lami ezweni elikude; ngikhulumile, ngiyokukwenza lokhu; nginqumile, ngiyakukufeza.
Ngilaleleni nina abanhliziyo zilukhuni, nina enikude nokulunga.
Ngikusondezile ukulunga kwami, akukho kude, insindiso yami ayiyukulibala. Ngiyonika iZiyoni insindiso, nodumo lwami ku-Israyeli.’ ”
“Yehla, uhlale othulini, ntombi eyindodakazi yaseBhabhele. Hlala phansi emhlabathini ngaphandle kwesihlalo sobukhosi, ndodakazi yamaKhaledi! Ngokuba awusayukuphinde ubizwe ngothambileyo nontengantengayo.
Thatha amatshe okusila, ugaye impuphu, susa imvakazi yakho, ukhumule ingubo yakho, wembule imilenze, uwele imifula.
Ubunqunu bakho mabuvele obala libonakale ihlazo lakho, ngiyoziphindiselela, angiyukushiya noyedwa.
UMhlengi wethu igama lakhe nguSimakade Wamabandla oNgcwele ka-Israyeli.
“Hlala uthule, uhambe ebumnyameni, ndodakazi yamaKhaledi, ngokuba awusayukuphinde ubizwe ngendlovukazi yemibuso.
Ngangibathukuthelele abantu bami, ngangcolisa ifa lami, ngalinikela esandleni sakho; awubahawukelanga, walenza ijoka lakho ukuba lisinde kakhulu phezu kwabadala.
Wathi wena: ‘Ngiyohlala ngiyindlovukazi, kuze kube phakade.’ Ngalokho awubekanga lezi zinto enhliziyweni yakho, awukhumbulanga isiphetho sazo.
“Manje yizwa lokhu, wena ozijabulisayo, ohlala ulondekile, othi enhliziweni yakho: yimi, akekho omunye; angiyukuhlalisa okomfelokazi, futhi angiyukukwazi ukufelwa ngabantwana.
Kodwa kokubili lokhu kuyokwehlela ngokuphazima kweso ngalusuku lunye, ukufelwa ngabantwana nokuba ngumfelokazi kuyokwehlela ngokupheleleyo, phezu kobuningi babalumbi bakho, namalumbo akho edlula ukwenza.
Ubuzizwa uvikelekile ebubini bakho, waze wathi: ‘Akekho ongibonayo.’ Ukuhlakanipha nokwazi kwakho kukudukisile; wathi enhliziyweni yakho: ‘Yimi, yimi kuphela, akekho omunye.’
Kodwa ububi buyakukwehlela, awuyukwazi lapho buvela khona; nengozi iyakuwela phezu kwakho, awuyukuba namandla okuyivika; incithakalo iyokwehlela phezu kwakho ngokuzumayo, ungazi.
“Yima uqine ebuthakathini bakho, nasemalumbeni akho amaningi obukusebenza kusukela ebusheni bakho, mhlawumbe uzosizakala, mhlawumbe uyokwazi ukudala uvalo.
Ukhathele ngenxa yobuningi bamacebo akho; mabasukume, bakusindise abadabula izulu, nababheka izinkanyezi, nabazisa ngezinyanga ezintsha, ukuthi kukuphi lapho kuzovela khona lokhu okuzokwehlela.
Bheka, sebefana namabibi eshiswa ngumlilo, abakwazi ukuzisindisa emandleni elangabi, akusilo ilahle lokuba lothiwe, akusiwo nomlilo wokuba uwothe.
Zinjalo-ke kuwe lezo zinto obuzikhandlekela, ebezihambisana nawe kwasebusheni bakho, yileyo naleyo iyazulazula endleleni yayo, ayisekho engakusiza.”
“Yizwa lokhu wena ndlu kaJakobe, obizwa ngegama lika-Israyeli, ovela okhalo lukaJuda, ofunga igama likaSimakade, nobiza uNkulunkulu ka-Israyeli kungengaqiniso nakulunga.
Ngokuba bazibiza ngomuzi ongcwele, bencika kuNkulunkulu ka-Israyeli, nguSimakade Wamabandla, igama lakhe.
Ngimemezele izinto zakuqala esikhathini esedlule, ezaphuma emlonyeni wami; ngazizwakalisa, ngazenza, zenzeka ngokuphazima.
Ngokuba bengazi ukuthi ninenkani, nentamo yenu ingumsipha wensimbi, nebunzi lenu liyithusi;
ngazimemezela kini kwasemandulo zingakenzeki, ngazizwakalisa, ningaze nithi: ‘Yisithombe sami esizenzile, isithombe sami esibaziweyo, nesithombe sami esibunjiweyo, esiyalezile.’
Nizwile, manje bhekani konke lokhu; aniyukukumemezela na? “Kusukela manje ngizokwazisa okusha, yebo, nokusithekileyo ongazange ukwazi.
Kudalwe manje, hhayi emandulo; awukaze uzwe ngakho ngaphambi kwalolu suku, funa uthi: ‘Bheka, bengikwazi.’
Yebo, awukaze ukuzwe, awukaze ukwazi, kwasemandulo indlebe yakho ayivulwanga, ngokuba bengazi ukuthi ukhohlakele, nokuthi kwasesibelethweni wabizwa ngomhlubuki.
Ngenxa yeGama lami, ngiyoyilibazisa intukuthelo yami; nangenxa yodumo lwami, ngizakuyibambela wena, ukuze ngingakunqumi.
Bheka, ngikucwengisisile, kodwa hhayi njengesiliva; ngakuvivinya esithandweni sezinhlupheko.
Ngenxa yami, impela ngenxa yami, ngiyokwenza. Kungani iGama lami lingcoliswa na? Angiyukuyinika omunye inkazimulo yami.
“Ngilalele, Jakobe, wena Israyeli, obiziweyo wami; ngisenguye, ngingowokuqala, futhi ngingowokugcina.
Yebo, isandla sami sibekile isisekelo somhlaba, nesokunene sami saleneka izulu. Lapho ngikubiza, kuma ndawonye.
“Qoqanani nina nonke, nizwe; ngubani phakathi kwabo omemezele lezi zinto na? USimakade uyamthanda, uyoyifeza intando yakhe eBhabhele, nengalo yakhe imelane namaKhaledi.
Mina, Mina ngikhulumile, futhi ngimbizile, ngimlethile, uyoyenza iphumelele indlela yakhe.
“Sondelani kimi, nizwe lokhu; angikushongo yini ekusithekeni kwasekuqaleni na? Kusukela esikhathini okwenzeka ngaso, ngangikhona.” Manje uSimakade uNkulunkulu ungithumile, kanye noMoya wakhe.
Usho kanje uSimakade uMhlengi wakho oNgcwele ka-Israyeli, uthi: “NginguSimakade uNkulunkulu wakho okufundise okukusizayo, nokuholile ngendlela okumele uhambe ngayo.
Sengathi ngabe wayilalelisisa imiyalo yami! Khona ukuthula kwakho bekuyokuba njengomfula, nokulunga kwakho njengamanzi olwandle,
nezizukulwane zakho zibe ngangesihlabathi, nabantwana bezibilini zakho babe njengezinhlayiya zaso. Igama labo belingayukuqedwa, belingeke lashabalala phambi kwami.”
Phumani eBhabhele nibalekele amaKhaledi; kumemezeleni lokho ngezwi lokujabula, nikuzwakalise, nikuphumisele nasemikhawulweni yomhlaba, nithi: “USimakade uyihlengile inceku yakhe, uJakobe.”
Kabazange bome lapho ebahola ezindaweni ezigagadekile; wenza ukuba amanzi agobhozele edwaleni; waqhekeza idwala, amanzi ampompoza.
“Akukho ukuthula kwababi,” kusho uSimakade.
Ngilaleleni nina ziqhingi, niqaphele nina bantu abakude; uSimakade ungibizile kwasesibelethweni, wangiqamba igama kwasesiswini sikamame.
Wawenza umlomo wami wanjengenkemba ebukhali, wangithukusa ethunzini lesandla sakhe, wangenza umcibisholo omenyezelayo, wangithukusa emgodleni wakhe.
Wathi kimi: “Wena uyinceku yami, Israyeli, engizoluveza ngayo udumo lwami.”
Kodwa ngase ngithi: “Ngikhandlekele ize, amandla ami ngiwachithele okuyize nokungelutho; nokho ubulungiswa obungifanele bukuSimakade, nomvuzo wami ukuNkulunkulu wami.”
Manje uthi uSimakade owangibumba kwasesibelethweni, ukuba ngibe yinceku yakhe yokubuyisela kuye uJakobe, nokuba kuqoqelwe kuye u-Israyeli, ngokuba ngihloniphekile emehlweni kaSimakade. UNkulunkulu wami waba ngamandla ami.
Yebo, uthi: “Kuyinto elula ukuba ube yinceku yami, ukuvusa izizwe zakwaJakobe, nokubuyisa abaseleyo bakwa-Israyeli; ngalokho ngiyakukwenza ube ngukukhanya kwabezizwe, ube yinsindiso yami kuze kube semkhawulweni womhlaba.”
Usho kanje uSimakade, uMhlengi ka-Israyeli noNgcwele wakhe, kodelelekile oyisinengiso esizweni, noyinceku yababusi, uthi: “Amakhosi ayakubona qede asukume; izikhulu zikubone, bese zikhothama ngenxa kaSimakade othembekileyo, oNgcwele ka-Israyeli; okukhethileyo.”
Usho kanje uSimakade, uthi: “Ngiyakukuphendula ngesikhathi somusa, ngikusize ngosuku lokusindiswa; ngiyakukulondoloza, ngikubeke ube yisivumelwano sabantu sokubuyisa izwe, nokubenza badle amafa achithekileyo.
Eziboshweni, uthi: ‘Phumani,’ kulabo abasebumnyameni, uthi: ‘Zibonakaliseni.’ “Bayoklaba ngasendleleni, amadlelo abo abe semagqumeni wonke.
Abayukulamba, abayukoma, abayukushaywa yisifudumezi selanga, ngokuba Yena onozwelo kubo uyakubahola abayise emithonjeni yamanzi.
Ngiyokwenza zonke izintaba zami zibe yimigwaqo, imendo yami iyakuphakanyiswa.
Bheka, laba bayakuvela kude; bheka, laba bayakuvela enyakatho nasentshonalanga; nalaba eSinimi.”
Jabulani mazulu, uthokoze nawe mhlaba, qhumukani zintaba, nihube, ngokuba uSimakade ubaduduzile abantu bakhe, unozwelo kwabahluphekileyo bakhe.
Kodwa iZiyoni lithi: “USimakade ungishiyile, iNkosi ingikhohliwe.”
“Owesifazane angakhohlwa yini ngumntwana wakhe oncelayo, angabi naluzwelo endodaneni ayizalayo na? Yebo, bona bangakhohlwa, kodwa Mina angiyukukukhohlwa wena.
Bheka, ngikulobe entendeni yezandla zami, izingange zakho ziphambi kwami njalo.
Abantwana bakho bayashesha; abakuchithayo nabakwenza ize bayophuma kuwe.
Phakamisa amehlo akho ubuke nxazonke, bonke bayaqoqana, beza kuwe; ngifunga ngiyagomela,” kusho uSimakade, “impela uyakubagqoka bonke njengemvunulo, ubabhince njengomakoti.
“Izindawo zakho ezichithekileyo neziyize, nezwe lakho eliqothuliweyo kuyakuminyana ngabakhileyo kukho, nabakugwinyileyo bayakuba kude.
Abantwana obazale ngesikhathi sakho sokuhlupheka bayothi ezindlebeni zakho: ‘Indawo engikuyo iminyene; sukani ukuze ngihlale.’
Uyothi enhliziyweni yakho: ‘Ngubani ongizalele laba bantwana, lokhu ngiphuciwe abantwana bami, angisenalutho, ngingumthunjwa nozulane na? Ngubani obakhulisile laba na? Bheka, ngasala ngedwa, babekuphi laba na?’ ”
Isho kanje iNkosi uSimakade, ithi: “Ngizakuphakamisela izizwe isandla sami, ngiphakamisele abantu ibhanela lami; bayakuletha amadodana akho bewagone esifubeni, namadodakazi akho bewathwele ehlombe.
Amakhosi ayakuba ngabazanyana bakho, nezindlovukazi zawo zibe ngabancelisi bakho; bayokukhothamela, ubuso bubheke phansi, bakhothe uthuli lwezinyawo zakho; uyokwazi ukuthi nginguSimakade, abethembela kimi abayukujabha.”
Amaqhawe angayephucwa yini impango, nolungileyo angaphunyuka ekuthunjweni na?
Noma kunjalo, uSimakade uthi: “Yebo, abathunjwa abangamaqhawe bayakuthathwa, nempango yabacindezeli yophulwe, kodwa Mina ngiyakulwa naye olwa nawe, ngibasindise abantwana bakho.
Ngiyakubadlisa abakucindezelayo, inyama yabo, badakwe yigazi labo kube ngathi bekuyiwayini elimnandi; abantu bonke bayokwazi ukuthi Mina Simakade nginguMsindisi wakho, uMhlengi wakho, uMninimandla kaJakobe.”
Usho kanje uSimakade, uthi: “Iphi incwadi yesehlukaniso engimlahle ngayo? Ngumuphi konyoko engimxoshile, ngubani enginesikweletu naye, engithengise ngani kuye na? Bhekani, nathengiswa ngenxa yobubi benu, nangeziphambeko zenu; unyoko walahlwa.
Yini eyenza kungabi bikho muntu lapho ngifika na? Kungani kungasabelanga muntu nalapho nginibiza na? Ngabe isandla sami sifinyeziwe yini ukuba singahlengi na? Noma angisenamandla okukhulula na? Ngokukhuza kwami ngiyomisa ulwandle, ngenze imifula ibe yihlane, izinhlanzi zayo zinuke; ngokuba engekho amanzi, ziyofa zibulawa wukoma.
Amazulu ngiwembathisa ubumnyama, ngenze indwangu eyisaka ibe yisembozo sawo.”
INkosi uSimakade inginikile ulimi lwabafundi ukuze ngikwazi ukuqinisa okhatheleyo ngezwi; njalo ekuseni ivusa indlebe yami, ukuba ngilalele njengofundiswayo.
INkosi uSimakade iyivulile indlebe yami, mina angihlubukanga, angihlehlanga nyovane.
Nganika abashayi umhlane, nezihlathi zami kubo abahluthula isilevu; angibusithelisanga ubuso bami ekungcofweni nasekufelweni ngamathe.
Ngokuba iNkosi uSimakade iyangisiza; ngakho-ke angizange ngithunazwe, ngalokho ubuso bami ngibumisile njengensengetsha, ngiyazi ukuthi angiyukujabha.
Ongikhiphe phambili ecaleni useduze; ngubani oyomelana nami na? Masime kanyekanye; ngubani omelene nami na? Makasondele kimi.
Mina phela iNkosi uSimakade iyangisiza; ngubani oyongilahla ngecala na? Bonke bayoguga njengengubo, badliwe yizinundu.
Ngubani phakathi kwenu omesabayo uSimakade, olilalelayo izwi lenceku yakhe, ohamba ebumnyameni, engenakho ukukhanya kodwa ethembela egameni likaSimakade, futhi encika kuNkulunkulu wakhe na?
Bhekani, nina nonke eningabaphemba umlilo, enibhinca uthuthuva, dabulani emalangabini omlilo wenu, naphakathi kodweshu eniluphembileyo. Nakhu eniyakukwamukela kuvela esandleni sami; niyakulala phansi ngobuhlungu.
“Ngilaleleni nina enilandela ukulunga, nina enifuna uSimakade. Bhekani edwaleni eniqhezulwe kulo, nasenkwalini enimbiwe kuyo.
Bhekani ku-Abhrahama, ukhokho wenu, nakuSara owanizalayo, ngokuba ngambiza eyedwa vo, kodwa ngambusisa, ngamandisa.
Ngokuba uSimakade uyoliduduza iZiyoni, aziduduze zonke izindawo zalo ezichithiweyo; enze ihlane lalo libe njenge-Edene, nogwadule lwalo lube njengensimu kaSimakade; injabulo, nentokozo, ukubonga, nezwi lokuhlabelela kuyofunyanwa khona.
“Ngizweni bantu bami, nibeke indlebe kimi, sizwe sami, ngokuba kuyakuphuma umthetho kimi, nobulungiswa bami bube ngukukhanya ezizweni.
Ukulunga kwami sekusondele, insindiso yami isiphumile, izingalo zami ziyokwehlulela izizwe; iziqhingi ziyongilindela zethembele engalweni yami.
Phakamiselani amehlo enu ezulwini, nibheke emhlabeni phansi, ngokuba izulu liyakunyamalala njengentuthu, umhlaba uguge njengengubo, nabakhileyo kuwo bafe njengomiyane, kodwa insindiso yami iyakuma kuze kube phakade, nokulunga kwami akuyukuphela.
“Ngilaleleni nina enazi ukulunga, nina bantu abamthetho wami usezinhliziyweni zabo; ningakwesabi ukusolwa ngabantu, ningapheli amandla lapho benithuka.
Ngokuba inundu iyakubadla njengengubo, nebhu libadle njengoboya bezimvu, kodwa ukulunga kwami kuyakuma kuze kube phakade, nensindiso yami ezizukulwaneni ngezizukulwane.”
Vuka, vuka, wembathe amandla, wena ngalo kaSimakade, vuka njengasezinsukwini zasendulo, ezizukulwaneni zasemandulo. Akuwena yini owamnquma kabili uRahabi, wagwaza udrago, na?
Akuwena yini owomisa ulwandle, amanzi asotweni, owenza izinzulu zolwandle zaba yindlela okwawela ngayo abahlengiweyo na?
Abahlawulelweyo bakaSimakade bayobuya, bafike eZiyoni bejabula. Intokozo engapheliyo iyoba semakhanda abo phakade, bayothola injabulo nentokozo, kubaleke usizi nokububula.
“Mina, Mina nginguye oniduduzayo; ungubani wena ukuba wesabe umuntu ofayo, nendodana yomuntu eyenziwe yanjengotshani na?
Usumkhohliwe uSimakade uMenzi wakho, owaleneka izulu, wabeka nesisekelo somhlaba. Uthuthumele usuku lonke ngenxa yolaka lomcindezeli, ozilungiselela ukubhubhisa. Kepha luphi ulaka lomcindezeli na?
Othotshisiweyo uyosheshe akhululwe; akayukufa, akayukwehlela egodini, futhi akayukuswela sinkwa.
NginguSimakade uNkulunkulu wakho, onyakazisa ulwandle, amagagasi alo ahlokome; nguSimakade Wamabandla, igama lakhe.
Ngibeke amazwi ami emlonyeni wakho, ngakufihla ethunzini lesandla sami; ngeneke amazulu, ngamisa isisekelo somhlaba, ngathi eZiyoni: ‘Wena uyisizwe sami.’ ”
Vuka, vuka, usukume wena Jerusalema ophuze esandleni sikaSimakade, indebe yolaka lwakhe; uphuze waminya esitsheni sendebe yokutengezela.
Akekho oliqondisayo phakathi kwawo wonke amadodana eliwazeleyo. Akekho olibamba ngesandla kuwo wonke amadodana eliwakhulisileyo.
Lezi zinto ezimbili zikwehlele; ngubani onozwelo kuwe na? Lapho wehlelwa yincithakalo, nokubhujiswa, indlala nenkemba, ngubani oyakukududuza na?
Amadodana akho adangele, alala emakhoneni emigwaqo yonke njengenyamazane esihibeni, agcwele ulaka lukaSimakade nesixwayiso sikaNkulunkulu wakho.
Ngakho-ke yizwa lokhu wena ohluphekayo nodakiweyo, kodwa kungeyilo iwayini;
isho kanje iNkosi yakho, uSimakade, uNkulunkulu wakho, Yona emela indaba yabantu bayo, ithi: “Bheka, ngiyisusile esandleni sakho indebe yokuntengezela; awuseyukubuye uphuze endebeni yolaka lwami.
Ngiyoyibeka esandleni sabakuhluphayo, abathi kuwe: ‘Khothama, sihambe phezu kwakho;’ abenze umhlane wakho waba njengomhlabathi, nanjengomgwaqo kulabo abedlulayo.”
Vuka, vuka, wembathe amandla akho, Ziyoni, ugqoke izingubo zakho zakwanokusho, wena Jerusalema, muzi ongcwele, ngokuba akusayukungena kuwe ongasokile nongcolileyo.
Zithintithe uthuli, usukume, uhlale, Jerusalema elithunjiweyo; zikhulule eziboshweni ezisentanyeni yakho, wena ndodakazi yaseZiyoni ethunjiweyo.
Ngokuba usho kanje uSimakade, uthi: “Nathengiswa ngento engelutho; niyakuhlengwa ngaphandle kwemali.”
Ngokuba isho kanje iNkosi uSimakade, ithi: “Ekuqaleni abantu bami behlela eGibhithe, bagogobala khona. I-Asiriya labacindezela ngaphandle kwesizathu.
“Manje ngisasalelwe yini lapha,” kusho uSimakade, “njengoba abantu bami bethunjiwe ngaphandle kwesizathu na? Ababusi babo babanga umsindo,” kusho uSimakade, “negama lami lihlanjalazwa usuku lonke.
Ngakho-ke, abantu bami bayolazi igama lami; ngalolo lusuku bayoqonda ukuthi yimi othi: bhekani, ngilapha.”
Zinhle kangakanani ezintabeni, izinyawo zomemezela ukuthula, noletha izindaba ezinhle; ezwakalise ukusindiswa, oshoyo kulo iZiyoni, ukuthi: “UNkulunkulu wakho uyabusa.”
Abalindi benu baliphakamisile izwi labo, bayakhamuluka bethokoza kanyekanye, ngokuba bayozibonela ngawabo amehlo, lapho uSimakade ebuyela eZiyoni.
Qhumukani, nikhamuluke kanyekanye ngokuthokoza, nina zindawo ezichithekileyo eJerusalema, ngokuba uSimakade ubaduduzile abantu bakhe, ulihlengile iJerusalema.
USimakade uyembulile ingalo yakhe engcwele emehlweni ezizwe zonke, yonke imikhawulo yomhlaba iyoyibona insindiso kaNkulunkulu wethu.
Hambani, hambani, phumani lapho! Ningathinti lutho olungcolileyo, phumani phakathi kwalo, zihlambululeni, nina eniphatha izitsha zikaSimakade.
Ngokuba aniyukuphuma nixhamazela. Aniyukuhamba nibaleka, ngokuba uSimakade uyohamba phambi kwenu; uNkulunkulu ka-Israyeli uyoba nasemuva kwenu.
Bheka, inceku yami iyoba nempumelelo; iyakukhuliswa, iphakanyiswe, iphakame kakhulu.
Njengalokhu babebaningi abamangala ngayo, ubuso bayo babonakele kunobabantu, nesimo sayo, kunesamadodana abantu;
kanjalo iyokwethusa izizwe eziningi; amakhosi ayovala imilomo ngenxa yayo, ngokuba ayobona lokho angazange akutshelwe, nalokho angakaze akuzwe, ayokuqonda.
Ngubani owakholwa ngesikuzwileyo; ingalo kaSimakade yambulelwa bani na?
Ngokuba yakhula njengehlumela phambi kwakhe, nanjengempande emhlabathini owomileyo; yayingenasimo nabuhle ukuba siyibuke, yayingabukeki ukuba siyifune.
Yayidelelekile, yashiywa ngabantu, umuntu wobuhlungu okujwayele ukugula; yayeyiswa, injengofihlelwa ubuso ngabantu, asiyishayanga nto yalutho.
Kodwa yazithwala izifo zethu, yabetshatha ubuhlungu bethu, kepha thina sathi ijezisiwe, ishaywe nguNkulunkulu, ihlushiwe.
Yebo, yahlatshwa ngenxa yeziphambeko zethu, yachotshozwa ngobubi bethu; isijeziso sethu saba phezu kwayo, ukuze sibe nokuthula; nangemivimbo yayo, siphilisiwe thina.
Thina sonke sidukile njengezimvu; yilowo nalowo uphendukele endleleni yakhe. USimakade wehlisela phezu kwayo ububi bethu sonke.
Yacindezelwa, yahlushwa, kodwa ayiwuvulanga umlomo wayo. Njengewundlu liyiswa ekuhlatshweni, nanjengemvu ithule phambi kwabagundi bayo, ayiwuvulanga umlomo wayo.
Yasuswa ekucindezelweni nasekwehlulelweni. Ngubani esizukulwaneni sayo owacabanga ukuthi yanqunywa ezweni labaphilayo, ishayiwe ngesiphambeko sabantu bami na?
Babeka ithuna layo kanye nababi; ekufeni yayinabenza okubi, noma ingenzanga ndluzula, kungekho nankohliso emlonyeni wayo.
Nokho uSimakade wathanda ukuyishaya ngezifo. Wenza umphefumulo wayo waba ngumnikelo wecala. Iyakusibona isizukulwane sayo, yenze izinsuku zayo zibe ziningi, nentando kaSimakade iyakuphumelela esandleni sayo.
Ekuhluphekeni kwayo iyakukubona, yaneliswe. Ngokwazi kwayo inceku yami elungileyo, iyakulungisisa abaningi, ithwale izono zabo.
Ngalokho ngiyakuyabela indawo nabakhulu, iyakuhlukanisa impango nabanamandla, ngokuba yawuthulula umphefumulo wayo ekufeni, yabalwa kanye nezelelesi; nokho yathwala izono zabaningi, yakhulekela aboni.
“Memeza ngokujabula wena nyumba, wena ongazalanga, qhumuka, umemeze ngokuthokoza, dazuluka wena ongakaze uhelelwe; ngokuba abantwana boyisikhwebu baningi kunabantwana bonendoda,” kusho uSimakade.
Yenze ibe banzi, indawo yethende lakho; mabazelule izihenqo zezindlu zenu, ungazibambezeli; yelula izintambo zakho, uziqinise izikhonkwane zakho.
Ngokuba uyakusabalalela ngakwesokunene nangakwesokhohlo; nabozalo lwakho bayakubusa izizwe, bakhe imizi echithekileyo.
“Ungesabi, ngokuba awuyukujabha; ungapheli amandla, ngokuba awuyukuthelwa ngehlazo; uyakukhohlwa yihlazo lobusha bakho, ungabe usawakhumbula amahloni obufelokazi bakho.
Ngokuba uMenzi wakho ungumyeni wakho, nguSimakade Wamabandla, igama lakhe; oNgcwele ka-Israyeli onguMhlengi wakho, obizwa ngokuthi nguNkulunkulu womhlaba wonke.
USimakade ukubizile njengomfazi oshiyiweyo nodabukileyo emoyeni; umfazi wobusha ukhona olahliweyo.” kusho uNkulunkulu wakho.
“Ngakushiya okwesikhashana, kodwa ngomusa omkhulu ngizokuqoqa.
Ngentukuthelo echichimayo, ngabusitheza ubuso bami kuwe isikhashana, kepha ngesihawu esingapheliyo, ngiyokuhawukela,” kusho uSimakade uMhlengi wakho.
“Lokho kimi kufana namanzi ezinsukwini zikaNowa: njengalokho ngafunga ukuthi amanzi kaNowa awasayukubuye awemboze umhlaba, kanjalo sengifungile ukuthi ngeke ngisakuthukuthelela, futhi ngeke ngikusole.
Yebo, izintaba zingasuswa, namagquma azanyazanyiswe, kodwa umusa wami awuyukusuka kuwe, nesivumelwano sami sokuthula asiyukususwa,” kusho uSimakade okuhawukelayo.
“Wena ohluphekayo, ohlukunyeziwe, ongaduduzwanga, bheka, ngizokufaka amatshe esiliva, izisekelo zakho zibe ngamasafire.
Imibhoshongo yakho ngiyoyenza ngamarubhi, amasango akho ngekhristalo, nayo yonke imingcele yakho ibe ngamatshe ayigugu.
Bonke abantwana bakho bayakufundiswa nguSimakade, kube nokuthula okukhulu kubantwana bakho.
Uyakumiswa ngokulunga; ube kude nokucindezelwa, ngokuba awuyukwesaba, novalo luyoba kude nawe.
Uma kukhona okuqalayo, kuyobe kungaveli kimi lokho; noma ngubani okuqalayo uyakuwa ngenxa yakho.
“Mina ngidale umkhandi ovuthela amalahle emlilweni, akhiqize izikhali ezilungele umsebenzi wakhe; Mina ngidalile futhi umbhubhisi, ukuba abhubhise.
Asikho isikhali esenzelwa wena esiyakuphumelela; uyakumisa lonke ulimi olukuvukelayo ekwehlulelweni; lokhu kuyifa lezinceku zikaSimakade nokumelwa kwazo okuvela kimi,” kusho uSimakade.
“We nina nonke enomileyo, wozani emanzini; nani eningenamali wozani nithenge, nidle; wozani nithenge mahhala, yebo, iwayini nobisi, kungabizi mali.
Niyichithelani imali kukho okungesiso isinkwa, nenzuzo yenu kukho okungenelisiyo na? Ngilaleleni nokungilalela, nidle okuhle, umphefumulo wenu ujabule ngamanoni.
Bekani izindlebe, nizwe, nize kimi, uyophila umphefumulo wenu; ngiyokwenza nani isivumelwano esiphakade, izenzo zomusa oqinisekileyo zikaDavide.
Bheka, ngimenze abe ngufakazi kubantu, umholi nomyali wabantu.
Bheka, uyobiza izizwe ongazazi, nezizwe ebezingakwazi zigijimele kuwe ngenxa kaSimakade uNkulunkulu wakho nangenxa yoNgcwele ka-Israyeli, ngokuba ukudumisile.”
Mfuneni uSimakade esenokutholwa, nimbize eseseduze.
Omubi makayishiye indlela yakhe, nomuntu owenza ibe mibi imicabango yakhe, abuyele kuSimakade, uyokuba nomusa kuye, abuyele kuNkulunkulu wethu, ngokuba uyophiwa intethelelo enkulu.
“Ngokuba imicabango yami ayisiyo imicabango yenu, nezindlela zenu azisizo izindlela zami,” kusho uSimakade.
“Njengalokhu amazulu ephakeme kunomhlaba, kanjalo izindlela zami ziphakeme kunezindlela zenu, nemicabango yami kunemicabango yenu.
Imvula neqhwa kwehla kuvela ezulwini, akubuyeli khona, kunalokho kumatisa umhlaba, kuwenze uhlume, uthele, unike ohlwanyelayo inhlwanyelo, nodlayo ukudla.
Liyoba njalo izwi lami, eliphuma emlonyeni wami: aliyukubuyela kimi lilambatha, lingakakufezi lokho engikufunayo, liphumelele kulokho engilithumelele khona.
Niyophuma ngentokozo, niholwe ngokuthula; izintaba namagquma kuyoqhumuka kuhlabelele phambi kwenu, nemithi yonke yasendle iyoshaya ihlombe.
Esikhundleni sogagane, kuyomila umsayiphuresi; nasesikhundleni samakhakhasi, kumile umbomvana. Kuyokuba yisikhumbuzo kuSimakade, nesibonakaliso saphakade esingeyukuphela, esingasayukunqunywa.”
Usho kanje uSimakade, uthi: “Gcinani ubulungiswa, nenze ukulunga, ngokuba insindiso yami iseduze ukuba ifike, nokulunga kwami ukuba kwambulwe.
Ubusisiwe umuntu oyokwenza lokhu, nendodana yomuntu eyobambelela kukho, oyogcina isabatha angalingcolisi, noyobamba isandla sakhe ukuba singenzi nayikuphi okubi.”
Indodana yowezizwe ezihlanganise noSimakade mayingathi: “Impela uSimakade uyakungehlukanisa nabantu bakhe,” nomthenwa angathi: “Bheka, ngingumuthi owomileyo.”
Usho kanje uSimakade, uthi: “Kubathenwa abagcina amasabatha ami, nabakhetha engikuthandayo, nababambelela esivumelwaneni sami;
ngiyakubanika endlini yami naphakathi kwezingange zami isikhumbuzo negama elihle kunamadodana namadodakazi; ngiyakubanika igama eliphakade, elingayukuphela.
Nabezizwe abazihlanganisa noSimakade ukuba bamkhonze, nokulithanda igama likaSimakade ukuba babe yizinceku zakhe, zonke ezigcina isabatha, zingaloni, nezibambelela esivumelwaneni sami,
yebo, nabo ngiyakubayisa entabeni yami engcwele, ngibathokozise endlini yami yokukhuleka. Iminikelo yabo yokushiswa nemihlatshelo yabo iyokwamukeleka e-althare lami, ngokuba indlu yami iyakubizwa ngokuthi iyindlu yokukhuleka yezizwe zonke.”
INkosi uSimakade oqoqa abaxoshiweyo bakwa-Israyeli, ithi: “Ngisazoqoqela kuye nabanye ngaphandle kwalaba asebeqoqiwe.”
Nina nonke zilwane zasendle, nani nonke zilwane zasehlathini, wozani nidle.
Abalindi bakho bonke ngothi lwabo, bayizimpumputhe, abanakwazi; bonke bayizinja eziyizimungulu, abakwazi ukukhonkotha, balala baphuphe; bathanda ukozela.
Yebo, bayizinja ezihahayo, abesuthi; abelusi nabo bonke ngothi lwabo abanakuqonda, baphendukele bonke ezindleleni zabo; yilowo nalowo enzuzweni yakhe.
Wozani, yikhona ngizoletha iwayini, sizozigcingca ngophuzo olunamandla; nengomuso liyakuba njenganamuhla, libe likhulu kakhulu.
Olungileyo uyabhubha, akekho okubeka enhliziyweni lokho; abantu abanomusa bayasuswa, kungaqondi muntu. Olungileyo uyasuswa enhlekeleleni,
angene ekuthuleni. Abahambe ngobuqotho bayophumula emibhedeni yabo.
“Sondelani nina madodana abahlola imihlola, nina nzalo yesiphingi neyesifebe.
Nihlekisa ngobani, nikhamisela bani umlomo, nivezela bani ulimi ngaphandle na? Anisibo yini abantwana besiphambeko, inzalo yamanga;
nina enisha yizinkanuko phakathi kwemi-okhi, phansi kwayo yonke imithi eluhlaza; enibulala abantwana ezigodini, phansi kwemifantu yamadwala na?
Isabelo sakho siphakathi kwamatshe abushelelezi asesigodini; yiwona angawonkatho lwakho; nakuwo uthululele umnikelo wokuphuzwayo, wenza umnikelo wokusanhlamvu. Ngimelwe ukweneliswa yini ngalokho na?
Uwubekile umbhede wakho entabeni ende nephakemeyo, waphinde wakhuphukela khona ukunikela ngomhlatshelo.
Wabeka isithombe sakho emva kwezicabha nezinsika, wangifulathela, wazembulela omunye kunami, wakhwela embhedeni wakho, wawandisa, wavumelana nabo, wayithanda imibhede yabo, wabuka ubuntu babo.
Waya kuMolokhi uphethe amafutha, wawandisa amakha akho. Wathumela kude izithunywa zakho, wazehlisela nasendaweni yabafileyo,
wakhathala ngenxa yobude bendlela, kodwa awuzange uthi: ‘Kuyize.’ Wathola amandla aneleyo, ngalokho awuphelanga amandla.
“Ngubani owawunovalo ngaye, futhi umesaba, waze waqamba amanga; awungikhumbulanga, futhi awukufakanga enhliziyweni yakho na? Angithulanga yini kwaze kweqa, okukwenze awaba nakungesaba na?
Mina ngiyakukudalula ukulunga kwakho nemisebenzi yakho; kepha akuyukukusiza.
Lapho ukhala, iqoqo lezithombe zakho malikusindise phela; nokho umoya uzoziphephula zonke, ukuphefumula kuzithathe; kodwa lowo ofuna ukuphephela kimi, uyakudla ifa lezwe, adle nefa lentaba yami engcwele.”
Kuyakuthiwa: “Hlelani, hlelani, lungisani indlela, nisisuse isikhubekiso endleleni yabantu bami.”
Usho kanje ophezulu nophakemeyo, ohlala kuze kube phakade, ogama lakhe lingoNgcwele, uthi: “Ngihlala endaweni ephakemeyo nengcwele, nakulowo onomoya odabukileyo nothobekileyo, ukuvuselela umoya wabathobekileyo, nokuphilisa izinhliziyo zabazisolayo.
Ngokuba angiyukulwa kuze kube phakade, angiyukuthukuthela ingunaphakade; funa umoya ophambi kwami uphelelwe ngamandla, ngisho nemiphefumulo engiyenzileyo.
Ngathukuthela ngenxa yobubi bokuhaha kwakhe, ngamshaya, ngazisitheza ngisathukuthele, kodwa waqhubeka ehlubukela ezindleleni zenhliziyo yakhe.
Ngizibonile izindlela zakhe, ngiyakumphilisa; ngizakumhola, ngimbuyisele ukududuzeka, yena nabamlilelayo.
Ngizodala izithelo zezindebe zomlomo, ngithi: ukuthula, ukuthula kuye okude, nakuye oseduze,” kusho uSimakade; “ngiyakumphilisa.”
Ababi banjengolwandle olugubhayo, olungakwazi ukuthula, olumanzi alo akhipha udaka nobishi.
“Akukho ukuthula ezikhohlakalini,” kusho uNkulunkulu wami.
“Memeza, ungazibambi, liphakamise izwi lakho njengecilongo, batshele abantu bami iziphambeko zabo, nendlu kaJakobe izono zayo.
Nokho bayangifuna nsuku zonke, bayakuthokozela ukwazi izindlela zami, ngokungathi bayisizwe esenza ukulunga, esingazishiyanga izimiso zikaNkulunkulu waso. Babuza kimi izehlulelo ezilungileyo, bayakuthokozela ukusondela kukaNkulukulu.
Bathi: ‘Sikuzileleni ukudla, ngoba awuboni na?’ ‘Sizithobeleni, ngoba awusinaki na?’ “Bhekani, ngosuku enizila ngalo, nenza enikuthandayo, nicindezele zonke izisebenzi zenu.
Niyabona-ke, nizilela ukuphikisana, nokulwa, nokushaya ngenqindi yenkohlakalo. Lokhu kuzila enikwenza namuhla akwenzi ukuba izwi lenu lizwakale ezindaweni eziphakemeyo.
Ngabe yikhona kuzila lokhu engikukhethileyo na? Ngabe wusuku lokuba umuntu athobise umphefumulo na? Ngabe kungukuba agebise ikhanda lakhe njengomhlanga, alale endwangwini eyisaka nasemlotheni na? Ngabe yikho lokhu yini enikubiza ngokuzila, nosuku olwemukelekileyo kuSimakade na?
“Ukuzila engikukhethileyo akukhona yini lokhu: ukuthukulula izibopho zenkohlakalo, ukukhumula izitilobho ejokeni, ukukhulula abacindezelweyo, nokuphula wonke amajoka na?
Akusikho yini ukwabelana nabalambileyo isinkwa sakho, ukungenisa abampofu nemihambima ekhaya lakho, lapho ubona ohambaze umembathise, nokungazifihli ezihlotsheni zakho na?
Khona ukukhanya kwakho kuyovela njengokusa, nokuphiliswa kwakho kuyovela masinyane, ukulunga kwakho kuyokukwendulela, inkazimulo kaSimakade ibe ngasemuva kwakho.
Khona uyakumemeza, kusabele uSimakade; uyakukhala, bese ethi: ‘Bheka, ngilapha.’ “Uma ususa ijoka phakathi kwenu, ukukhombana ngeminwe, nokukhuluma kabi,
unike olambileyo ukudla kwakho, usuthise othotshisiweyo; khona ukukhanya kwakho kuyovela ebumnyameni, ukuhlwa kwakho kufane nemini.
USimakade uyokuhola njalo, anelise okuntulayo ezindaweni ezomileyo, aqinise amathambo akho. Uyakuba njengensimu eniselweyo nanjengomthombo wamanzi, omanzi awo engashi.
Abanye phakathi kwenu bayokwakha kabusha incithakalo yezakhiwo zasemandulo; uyakuvusa izisekelo zezizukulwane ngezizukulwane, uyobizwa ngokuthi unguMvuseleli wezingange, noMlungisi wemigwaqo ukuba kuhlalwe kukho.
“Uma uzinqanda ekungcoliseni isabatha, ungenzi umsebenzi wakho ngosuku lwami olungcwele; isabatha ulibize ngokuthi yintokozo, nosuku olungcwele lukaSimakade ngokuthi luhloniphekile, uluhloniphe; ungahambi ngezindlela zakho, wenza okuthandwa nguwe noma imisebenzi yakho,
khona uyakuzijabulisa kuSimakade, ngiyokukhweza ezindaweni eziphakemeyo zomhlaba, ngikuphe ukuba udle ifa likaJakobe uyihlo,” ngokuba umlomo kaSimakade ukhulumile.
Isandla sikaSimakade asifinyeziwe ukuba sisindise, nendlebe yakhe ayibuthuntu ukuba izwe.
Kodwa ububi benu bunahlukanisile noNkulunkulu, nezono zenu zibusithile ubuso bakhe kini ukuba anganizwa.
Izandla zenu zingcoliswe yigazi, neminwe yenu, yinkohlakalo; izindebe zemilomo yenu zikhulume amanga, nezilimi zenu zinyenyeza okubi.
Akekho omemeza ngokulunga, akekho nowehlulela ngeqiniso; bethembela kokuyize, bakhuluma amanga; bakhulelwe ububi, bazala inkohlakalo.
Bachamsele amaqanda ebululu, baluka ubulwembu besicabucabu; odla amaqanda abo uyokufa, okuchotshozwayo kuqhamuka kuyibululu.
Ubulwembu baso abuyukuba yingubo, abanakuzimboza ngalokho abakwenzileyo; imisebenzi yabo ingeyobubi nezenzo zendluzula zisezandleni zabo.
Izinyawo zabo zigijimela ebubini; bayashesha ukuchitha igazi elingenacala; imicabango yabo iyimicabango yenkohlakalo; incithakalo nokubhujiswa kugcwele ezindleleni zabo.
Indlela yokuthula abayazi, nobulungiswa abukho emikhondweni yabo; bazenzele izindlela eziyizigwegwe, bonke abahamba ngazo abakwazi ukuthula.
Ngalokho ukwehlulela kukude nathi, nokulunga akusifumani; silindela ukukhanya simagange, kodwa sibona ubumnyama; silindela ukukhanya, kodwa sidukuza ebumnyameni.
Sidukuza sigudla udonga njengempumputhe, yebo, sidukuza siphumputha njengabangenamehlo; sikhubeka emini kungathi sekuhwalele; phakathi kwabaphilayo, sinjengabafileyo.
Sonke sigwavuma njengamabhele, siyakhala nokukhala njengamajuba; silindela ukwehlulela, kodwa akukho, nokusindiswa, kodwa kukude nathi.
Ngokuba iziphambeko zethu ziningi phambi kwakho, nezono zethu ziyafakaza ngathi; ngokuba iziphambeko zethu zikithi, nobubi bethu siyabazi:
Sonile, samphika uSimakade; sihlubukile, asamlandela uNkulunkulu wethu; sikhulume ngokucindezela, nangokwambuka, sicabangile, sakhuluma amanga asenhliziyweni.
Ubulungiswa bubuyiselwe emuva, nokulunga kuma le kude, ngokuba iqiniso liyakhubeka esigcawini, nobuqotho abukwazi ukungena.
Iqiniso alikho; osuka ebubini uphenduka impango; uSimakade ukubonile lokho, kwakukubi emehlweni akhe ukuthi ubulungiswa babungekho.
Wabona ukuthi kwakungekho muntu, wamangala ukuthi kwakungekho onxusayo; ngakho-ke ingalo yakhe yamzuzela insindiso, nokulunga kwakhe kwamphasa.
Wembatha ukulunga njengebhantshi lensimbi, nesigqoko sensindiso ekhanda lakhe; wagqoka izingubo zokuphindisela zaba ngezokwembatha; wazisonga ngokushisekela njengengubo.
Uyoziphindiselela kubo njengokwezenzo zabo, ulaka ezitheni zakhe, nenkokhelo efanele kwabamelene naye, nabaseziqhingini bayothola inkokhelo efanele izenzo zazo.
Labo abasentshonalanga bayakulesaba igama likaSimakade, abasempumalanga besabe inkazimulo yakhe, ngokuba uyakufika njengomfula ongenisayo, oqhutshwa ngumoya kaSimakade.
“Uyofika eZiyoni njengoMhlengi, nakulabo bakwaJakobe abaphenduke eziphambekweni,” kusho uSimakade.
“Mina-ke, lesi yisivumelwano sami nabo,” kusho uSimakade, “sokuthi uMoya wami ophezu kwakho namazwi ami engiwabeke emlonyeni wakho akuyukusuka emlonyeni wakho, nasemlonyeni wabantwana bakho, nasemlonyeni wezizukulwane zakho,” kusho uSimakade, “kusukela manje kuze kube phakade.”
“Vuka ukhanye, ngokuba ukukhanya kwakho kufikile; nenkazimulo kaSimakade iphumele phezu kwakho.
Ngokuba ubumnyama buyakusibekela umhlaba, nesigayegaye abantu, kodwa uSimakade uyakuphuma phezu kwakho, nenkazimulo yakhe iyobonakala phezu kwakho.
Izizwe ziyokuza namakhosi ekukhazimuleni kokuphuma kwakho.
“Phakamisa amehlo akho, ubone nxazonke; bonke bayaqoqana beza kuwe, amadodana akho ayovela endaweni ekude, namadodakazi akho ayofika ebelethwe.
Khona uyakukubona lokho, uchachambe yinjabulo; inhliziyo yakho igide, ithokoze, ngokuba ingcebo yasolwandle iyakulethwa kuwe, ingcebo yezizwe ize kuwe.
Ubuningi bamakameli buyakukusibekela, amakameli asemancane akwaMidiyani nase-Efa; bonke abaseShebha bayakuza, bethwele igolide nempepho, bememezele izindumiso zikaSimakade.
Yonke imihlambi eKedari iyoqoqelwa kuwe, nezinqama eNebhayothi ziyakukukhonza, ziyakukhuphukela e-althare lami ngokuthanda kwami; ngiyenze ibe yinhle indlu yodumo lwami.
“Ngobani laba abandiza njengefu, nanjengamajuba eya ezidlekeni zawo na?
Iziqhingi ziyakungilindela, imikhumbi yaseTharishishi iyoba ngeyokuqala ukuletha amadodana akho evela kude, ephethe isiliva negolide lawo, ekulethe egameni likaSimakade uNkulunkulu wakho, nakoNgcwele ka-Israyeli, okudumisile.
“Abezizwe bayakwakha izingange zakho, amakhosi abo akukhonze; noma ngakushaya ngentukuthelo yami, manje sengiyakuhawukela ngomusa wami.
Amasango akho ayohlala evulekile, awayukuvalwa imini nobusuku, ukuze ingcebo yezizwe ilethwe kuwe, namakhosi azo eqhutshwa.
Ngokuba isizwe nombuso okungeke kukukhonze kuyophela; yebo, lezo zizwe ziyakuqedwa nya.
“Inkazimulo yaseLebhanoni iyakuza kuwe, umsayiphuresi, ishoba nomkhoba konke kanyekanye, kuyohlobisa indawo yendlu yami engcwele, ngiyikhazimulise indawo yezinyawo zami.
Amadodana alabo abakuhluphileyo ayoza kuwe ekhokhoba, ekuhlonipha, nabo bonke abakwedelelayo bayokhothama ngasematheni ezinyawo zakho, bakubize ngokuthi nguMuzi kaSimakade neZiyoni loNgcwele ka-Israyeli.
“Nakuba bewushiyiwe, uzondwa, kungasekho muntu odabula kuwe; ngiyakukwenza ube yisivunulo saphakade, nentokozo yezizukulwane ngezizukulwane.
Uyakuncela ubisi lwezizwe, uncele emabeleni amakhosi; uyokwazi ukuthi Mina Simakade nginguMsindisi wakho, noMhlengi wakho, uMninimandla kaJakobe.
Esikhundleni sethusi ngiyoletha igolide, esikhundleni sensimbi ngilethe isiliva; esikhundleni somuthi ngilethe ithusi, nasesikhundleni samatshe ngilethe insimbi. Ngibeke ukuthula kube ngababonisi bakho, nokulunga kube ngababusi bakho.
Ayisayukubabikho indluzula ezweni lakini, nencithakalo nokubhubhisa phakathi kwemingcele yakho, kodwa izingange zakho uyozibiza ngokuthi yiNsindiso, namasango akho ngokuthi yiNdumiso.
Ilanga alisayukuba ngukukhanya kuwe emini, nenyanga ayisayukukukhanyisela ngokukhazimula ebusuku; uSimakade uyakuba ngukukhanya okuphakade kuwe, uNkulunkulu wakho abe ludumo lwakho.
Ilanga lakho alisayukushona, nenyanga yakho ayisayukufiphala, ngokuba uSimakade uyakuba ngukukhanya okuphakade kuwe, nezinsuku zokulila kwakho ziyakuphela.
Bonke abantu bakho bayakuba ngabalungileyo, badle ifa lezwe kuze kube phakade; igatsha lokutshala kwami, umsebenzi wezandla zami, ukuze ngidunyiswe.
Ingcosana iyakuba yinkulungwane, omncane abe yisizwe esinamandla; Mina nginguSimakade, ngiyokwenza sisheshe isikhathi sakho.”
UMoya weNkosi uSimakade uphezu kwami, ngokuba uSimakade ungigcobile ukuba ngishumayele izindaba ezinhle kwabathotshisiweyo; ungithumele ukubopha abanhliziyo zaphukile, ukumemezela ukukhululwa kwabathunjiweyo, nokudedelwa kweziboshwa ejele.
Ngimemezele unyaka womusa kaSimakade nosuku lokuziphindiselela kukaNkulunkulu wethu, ngiduduze bonke abalilayo,
ngenze ukuba abalilayo eZiyoni baphiwe amaqhiya esikhundleni somlotha; amafutha enjabulo esikhundleni sokulila; ingubo yokudumisa esikhundleni somoya odangeleyo; ukuze babizwe ngokuthi yimithi yokulunga, nokutshalwe nguSimakade, ukuze adunyiswe.
Bayokwakha kabusha izincithakalo ezindala, bavuse izindawo ezazidiliziwe, balungise imizi ebhujisiweyo, izindawo esezibe yincithakalo izizukulwane ngezizukulwane.
Abezizwe bayokuma beluse imihlambi yenu, abafokazi babe ngabalimi benu, nabaphathi bezivini zenu.
Kodwa nina niyakubizwa ngokuthi ningabaphristi bakaSimakade, kuyakuthiwa ngani niyizikhonzi zikaNkulunkulu wethu; niyakudla imfuyo yezizwe, nizibonge ngodumo lwazo.
Esikhundleni sehlazo lenu, niyakuphiwa ngokuphindiweyo; esikhundleni sokudumala, ukujabula kuyakuba yisabelo sabo; bayakudla ifa ngokuphindiweyo ezweni lakubo, intokozo engunaphakade ibe ngeyabo.
“Mina Simakade ngithanda ubulungiswa, ngiyakuzonda ukuphanga nokubi; ngiyakubanika umvuzo wabo ngeqiniso, ngenze nabo isivumelwano esiphakade.
Abantwana babo bayakwaziwa phakathi kwezizwe, nezizukulwane zabo phakathi kwabantu; bonke abababonayo bayovuma ukuthi bayisizukulwane uSimakade asibusisile.”
Ngiyothokoza kakhulu ngoSimakade, umphefumulo wami wename ngoNkulunkulu wami, ngokuba ungembathise izingubo zensindiso, wangisibekela ngesembatho sokulunga, okomyeni ethwele umshuqulu njengomphristi, nanjengomakoti ezihlobise ngemvunulo.
Njengokuba umhlaba uveza ihlumela lawo, nanjengokuba insimu ihlumisa okutshalwe kuyo, kanjalo iNkosi uSimakade iyokuveza ukulunga nodumo phambi kwezizwe zonke.
Ngenxa yeZiyoni angiyukuthula, nangenxa yeJerusalema angiyukuphumula, kuze ukulunga kwalo kuphume njengokukhanya, nokusindiswa kwalo njengesibani esivuthayo.
Izizwe ziyokubona ukulunga kwakho, namakhosi wonke inkazimulo yakho; uyobizwa ngegama elisha eliyonqunywa ngumlomo kaSimakade.
Uyokuba ngumqhele wodumo esandleni sikaSimakade, nomshuqulu wobukhosi esandleni sikaNkulunkulu wakho.
Akusayukuthiwa ngawe uNgoshiyiweyo, nezwe lakini alisayukuthiwa yiNcithakalo; kodwa uyobizwa ngokuthi Ontokozo yami ikuye, nezwe lakini ngokuthi Oganileyo; ngokuba uSimakade uyathokoza ngawe, nezwe lakini lendile.
Njengensizwa iganwa yintombi, kanjalo amadodana akho ayakuganwa nguwe, nanjengokuthokoza komyeni ngomakoti wakhe, uNkulunkulu wakho uyakuthokoza ngawe.
Ezingangeni zakho Jerusalema, ngimisile abalindi. Abayukuthula nakanye imini nobusuku. Nina enibakhumbuza ngoSimakade, maningaphumuli,
futhi ningamniki ukuphumula aze alakhe iJerusalema, alibeke libe yindumiso emhlabeni.
USimakade ufunge ngesandla sakhe sokunene nangengalo yamandla akhe, wathi: “Impela angisayukuphinde nginike izitha zakho okusanhlamvu kwakho, kube ngukudla kwazo. Abezizwe abayukuliphuza iwayini lakho elisha olikhandlekeleyo,
kodwa bayokudla abakuqoqileyo, badumise uSimakade, nabaliqoqileyo bayoliphuzela emagcekeni endlu yami engcwele.”
Phumani, niphume ngamasango, niyilungise indlela yabantu; yakhani, niwakhe umendo, nikhiphe amatshe; niphakamisele izizwe ibhanela.
USimakade uyezwakala kuze kube sekugcineni komhlaba, uthi: “Yishoni kuyo indodakazi yaseZiyoni, nithi: ‘Bheka, insindiso yakho iyeza. Bheka, umvuzo wakhe uza nawo, nenkokhelo yakhe iphambi kobuso bakhe.’ ”
Bayobizwa ngokuthi ngabantu abangcwele, abahlengiweyo bakaSimakade. Wena uyothiwa Ofuniweyo, uMuzi Ongashiywanga.
Ngubani lona ovela kwa-Edomi, enezingubo ezibomvu zaseBhozira; lona ohlobe ngezembatho zakwanokusho, ohamba ngamandla amakhulu na? “Yimina engikhuluma ngokulunga, nenginamandla okusindisa.”
Kungani izembatho zakho zibomvu, nezingubo zakho zinjengezonyathela esikhamweni sewayini na?
“Isikhamo sewayini ngisinyathele ngingedwa; kwakungekho noyedwa kubantu owayenami; ngabanyathela ngentukuthelo yami, ngabaciphiza ngolaka lwami, negazi labo lachaphazela izingubo zami, ngazingcolisa zonke izembatho zami.
Ngokuba usuku lokuphindisela lwalusenhliziyweni yami; unyaka wokuhlenga kwami usufikile.
Ngabheka, kodwa kwakungekho ongisizayo; ngamangala, kodwa kwakungekho osekelayo; yayisingisindisa ingalo yami, nolaka lwami lwangisekela.
Ngase nginyathela izizwe ngentukuthelo yami, ngazichoboza ngolaka lwami, ngalithululela phansi igazi lazo.”
Ngiyakuwukhumbula umusa kaSimakade, ngimdumise uSimakade ngakho konke asenzele khona, nokuhle okuningi phezu kwendlu ka-Israyeli ayenzele khona, ngobubele bakhe nangobuningi bomusa wakhe.
Wathi: “Ngempela bangabantu bami, abantwana abangenankohliso;” waba nguMsindisi wabo,
kuzo zonke izinhlupheko zabo. Ingelosi yobukhona bakhe yabasindisa. Wabahlenga ngenxa yothando lwakhe, nesihawu sakhe; wabetshatha, wabathwala zonke izinsuku zasemandulo.
Nokho bahlubuka, bawudabukisa uMoya wakhe oNgcwele, waphenduka isitha sabo, walwa nabo.
Abantu bakhe base bekhumbula izinsuku zakuqala zikaMose, bathi: uphi lowo owabakhipha olwandle nabelusi bomhlambi wakhe na? Uphi lowo owabeka uMoya wakhe oNgcwele phakathi kwabo,
owenza ukuba ingalo yakhe emangalisayo ihambe ngakwesokunene sikaMose, owehlukanisa amanzi phambi kwabo, ukuba azenzele igama eliphakade;
owabadabulisa olwandle njengehhashi ehlane, ukuze bangakhubeki na?
Njengezinkomo zehlela ethafeni, uMoya kaSimakade wabaphumuza. Wabahola kanjalo abantu bakho, ukuze uzenzele igama elimangalisayo.
Bheka usezulwini, ubone usendaweni yobukhosi bakho neyodumo lwakho: kuphi ukushisekela kwakho, nemisebenzi yakho yamandla na? Ukuvutha kwesihe sakho nobumnene bakho kugodliwe kimi.
Ngokuba Wena unguBaba, nakuba u-Abhrahama engasazi, no-Israyeli engasivumi, kodwa Wena Simakade unguBaba; igama lakho unguMhlengi wethu waphakade.
Simakade, kungani usidukisile ezindleleni zakho, uzenza lukhuni izinhliziyo zethu, zize zingakwesabi na? Buya ngenxa yezinceku zakho, izizwe zefa lakho.
Abantu bakho abangcwele balidla ifa okwesikhashana; izitha zethu ziyigxobagxobile indawo yakho engcwele.
Sinjengalabo ongazange ubuse phezu kwabo, nabangabizwanga ngeGama lakho.
Sengathi ungadabula amazulu, wehle, kuzamazame izintaba phambi kwakho,
njengalapho umlilo wokheleka ezinsabeni, nalapho umlilo ubilisa amanzi, ukuze wazise izitha zakho igama lakho, izizwe zithuthumele phambi kwakho.
Lapho wenza izinto ezimangalisayo esasingazilindele, wehla; izintaba zathuthumela phambi kwakho.
Kusukela emandulo akekho owezwayo, akukho ndlebe eyalalela, akukho liso elabona omunye uNkulunkulu ngaphandle kwakho, obasebenzelayo labo abamlindelayo.
Uyabahlangabeza labo abakuthokozelayo ukwenza ukulunga, labo abakukhumbulayo ezindleleni zakho. Wena wathukuthela; thina sona, sahlala kukho isikhathi eside, pho siyosindiswa na?
Sonke sesiphenduke saba njengongcolileyo; zonke izenzo zethu ezilungileyo sezifana nengubo engcolileyo. Sonke sesibune njengeqabunga, nobubi bethu busiphephula njengomoya.
Akukho namunye obiza iGama lakho, nozama ukubambelela kuwe, ngokuba ubusithibezile ubuso bakho kithi, wasiqeda ngenxa yobubi bethu.
Kodwa manje, Simakade, unguBaba, thina siyibumba, Wena ungumbumbi wethu, sonke singumsebenzi wesandla sakho.
Simakade, ungathukutheli kakhulu, ungazikhumbuli iziphambeko zethu kuze kube phakade. Sonke phela singabantu bakho.
Imizi yakho engcwele isifana nehlane, iZiyoni seliphenduke ihlane, neJerusalema liyincithakalo.
Indlu yethu engcwele nemangalisayo, lapho okhokho bethu babekudumisa khona, ishiswe ngomlilo, nazo zonke izinto zethu ezithandekayo, ziphenduke incithakalo.
Emva kwakho konke lokhu, usazokuzibamba yini Simakade na? Usazothula yini, sewusishaye kangaka na?
“Ngavuma ukufunwa yilabo abangangicelanga, ngafunyanwa ngabangazange bangifune, ngathi: ‘Ngilapha, ngilapha,’ esizweni esingabizwanga ngeGama lami.
Ngibelulele izandla zami usuku lonke abantu abahlubukayo, abahamba ngendlela engeyinhle nangokwemicabango yabo,
abantu abahlala njalo bengichukuluza, bengikhomba, behlabela ezivandeni, beshisa impepho phezu kwezitini;
abahlala emathuneni, balale ezindaweni ezisithekileyo, abadla inyama yezingulube, benomhluzi wezinto ezinengekayo ezitsheni zabo,
abathi: ‘Mana khona lapho, ungasondeli kimi, ngokuba ngehlukanisiwe kuwe;’ laba bantu banjengentuthu emakhaleni ami, umlilo ovutha usuku lonke.
“Bheka, kulotshwe phambi kwami ukuthi: angiyukuthula, ngiyoziphindiselela, yebo, ngiphindisele ezifubeni zabo
ububi babo, nobokhokho babo kanyekanye,” kusho uSimakade.
Usho kanje uSimakade, uthi: “Njengalokhu iwayini elisha litholwa ehlukuzweni lamagilebhisi, bese kuthiwa: ‘Ningaloni ngokuba kunesibusiso esikulo,’ ngiyokwenza kanjalo, ngenxa yenceku yami: angiyukubabulala bonke.
Ngiyakuveza izizukulwane kuJakobe, nendlalifa yezintaba zami kuJuda; abakhethiweyo bami bayakulidla, nezinceku zami ziyakukwakha khona.
ISharoni liyakuba yidlelo lezimvu, nesigodi i-Akhori sibe yindawo yokubuthisa izinkomo kubantu bami.
“Maye, kinina enishiya uSimakade, nikhohlwe yintaba yami engcwele, enihlelela iNhlanhla itafula, nenigcwalisela uMiselo iwayini elixhutshanisiweyo;
ngiyakunigweba ngenkemba, nonke niyokhothamela ukuhlatshwa, ngokuba ngesikhathi nginibiza, aniphendulanga; nalapho ngikhuluma, aningizwanga; kodwa nenze okubi emehlweni ami, nakhetha lokho engingathokozi ngakho.”
Ngalokho isho kanje iNkosi uSimakade, ithi: “Niyabona-ke, izinceku zami ziyakudla, kodwa nina niyakulamba; bhekani, izinceku zami ziyakuphuza, kepha nina niyokoma; bhekani, izinceku zami ziyakuthokoza, kodwa nina niyakujabha;
bhekani, izinceku zami ziyakumemeza ngokujabula nangokwenama kwenhliziyo, kepha nina niyakukhala ngokudabuka kwenhliziyo yenu, nilile ngobuhlungu emphefumulweni.
Niyakulishiya igama lenu, libe yisiqalekiso kwabakhethiweyo bami, iNkosi uSimakade iyonibulala, ibize izinceku zayo ngelinye igama.
Ngakho-ke lowo oyobiza isibusiso ezweni uyakuzibusisa ngoNkulunkulu weqiniso, nalowo ofungayo ezweni, uyofunga ngoNkulunkulu weqiniso, ngokuba izinhlupheko zakuqala zikhohlakele, futhi zifihlakele emehlweni ami.”
“Ngokuba bheka, ngiyakudala izulu elisha nomhlaba omusha; izinto zakuqala aziyukukhunjulwa, azinakuvuka enhliziyweni.
Kodwa jabulani nethabe kuze kube phakade ngalokho engizakukudala, ngokuba ngizakulenza iJerusalema libe ngukwethaba, nabantu balo babe yinjabulo.
Ngiyakwethaba ngeJerusalema, ngijabule ngabantu bami, akuseyukuzwakala kulo izwi lokulila nezwi lokukhala.
“Kusukela lapho akusayukuba khona usana oluyophila izinsukwana, nexhegu elingazigcwalisanga izinsuku zalo, ngokuba oyakufa eneminyaka eyikhulu yobudala, uyothathwa njengobesemusha; nalowo ofa engayihlanganisanga iminyaka eyikhulu, kuyakuthiwa uqalekisiwe.
Bayokwakha izindlu, bahlale kuzo, batshale izivini, badle izithelo zazo.
Abayukwakha, bese kuhlala omunye; abayukutshala, bese kudla omunye, ngokuba izinsuku zabantu bami ziyokuba njengezinsuku zomuthi; abakhethiweyo bami bayowuthokozela isikhathi eside umsebenzi wezandla zabo.
Abayukushikashikela ize, noma bazale izingane bezizalela ukuhlupheka, ngokuba bayizizukulwane zababusisiweyo bakaSimakade, kanjalo nabantwana babo.
Kuyakuthi bengakangibizi, ngibaphendule; besakhuluma, ngiyokuzwa.
Inkentshane liyakudla ndawonye newundlu, ingonyama idle utshani njengenkomo, uthuli lube ngukudla kwenyoka; akuyukulimazana, akuyukucekelana phansi kuyo yonke intaba yami engcwele,” kusho uSimakade.
Usho kanje uSimakade, uthi: “Izulu liyisihlalo sami sobukhosi, umhlaba uyisenabelo sezinyawo zami; iyiphi leyo ndlu eniyakungakhela yona, iyiphi indawo yami yokuphumula na?
Zonke lezi zinto zenziwe yisandla sami, ngakho-ke konke lokhu kwavela ngezwi lami,” kusho uSimakade. “Ngiyakubheka kulowo othobekile, nodabukileyo emoyeni, othuthumelayo ngenxa yezwi lami.
Ohlaba inkunzi uyefana nobulale umuntu; ohlaba iwundlu, unjengophule intamo yenja; onikela ngomnikelo wokusanhlamvu, uyafana nonikele ngegazi lezingulube; oshisa impepho, uyafana nobonga isithombe; yebo, bonke laba bakhethe izindlela zabo, futhi nemiphefumulo yabo iyathokoza ngezinengiso zabo.
Ngalokho ngiyakubakhethela isijeziso esibafanele, ngibehlisele abakwesabayo, ngokuba ngabamemeza, kodwa akwasabela muntu; ngakhuluma, kodwa abalalelanga, kepha benza okubi emehlweni ami, bakhetha lokhu engingathokozanga ngakho.”
Lalelani izwi likaSimakade nina enithuthumela ngezwi lakhe. “Izihlobo zenu ezinizondayo, ezinivalela ngaphandle ngenxa yegama lami, zishilo zathi: ‘Makadunyiswe uSimakade, ukuze sibone intokozo yenu,’ kodwa zona ziyojabhiswa.
Lalelani izwi lomsindo elivela emzini, izwi elivela ethempelini! Yizwi likaSimakade eziphindiselela ezitheni zakhe.
“IZiyoni ngaphambi kokuba libe nemihelo, lazala; lingakehlelwa zinhlungu, lazala umntwana wesilisa.
Ngubani okuzwile okunjena na? Ngubani okubonile okunjengalokhu na? Izwe lingazalwa ngasuku lunye na? Isizwe singazalwa ngalusuku lunye na? Ngokuba iZiyoni lithe lisahelelwa, lazala abantwana balo.
Mina ngingakusondeza yini ekuzalweni ngingenzi uzalwe na?” kusho uSimakade. “Mina ozalisayo ngingasivala yini isibeletho na?” kusho uNkulunkulu wakho.
“Thokozani neJerusalema, nethabe nalo nina nonke enilithandayo; jabulani ngenjabulo kanye nalo, nina nonke enilililelayo,
ukuze nincele, naneliswe ngamabele ezinduduzo zalo; ukuze nincele nizidelise ngokwenama ekugcwaleni kwenkazimulo yalo.”
Usho kanje uSimakade, uthi: “Ngiyakwelulela kulo ukuthula njengomfula, nenkazimulo yezizwe njengomfudlana okhukhulayo, niyoncela, niphathwe ngezingalo zalo, nitotoswe nisemathangeni.
Njengonina eduduza umntwana wakhe, kanjalo ngiyoniduduza, nina niduduzeke eJerusalema.”
Niyokukubona, izinhliziyo zenu zijabule, amathambo enu ahlume njengotshani, isandla sikaSimakade siyokwaziwa ukuthi sisezincekwini zakhe, azithukuthelele izitha zakhe.
Ngokuba uSimakade uyofika ngomlilo, izinqola zakhe zibe njengesivunguvungu, athulule intukuthelo yakhe ngokufutheka, nolaka lwakhe ngamalangabi omlilo.
Ngokuba ngomlilo nangenkemba, uSimakade uyokwehlulela bonke abantu, bayoba baningi abayobulawa nguSimakade.
“Labo abazingcwelisa, bazihlambululele ukungena ezivandeni belandela omiyo egcekeni, bedla inyama yezingulube, nezinto ezinengekayo nezimpuku, bayophela kanyekanye,” kusho uSimakade.
“Ngiyayazi imisebenzi yabo nemicabango yabo; ngiyeza ukuzobutha zonke izizwe nezilimi, ziyakufika, ziyibone inkazimulo yami.
“Ngiyakubeka isibonakaliso phakathi kwazo, ngithumele abasindileyo babo kwabezizwe, eTharishishi, ePhuli, naseLudi; abansala umnsalo eThubhali naseJavani, eziqhingini ezikude, ezingawuzwanga umbiko ngami, ezingayibonanga inkazimulo yami, ukuze balande ngenkazimulo yami ezizweni.
Bayoletha njengomnikelo kuSimakade, bonke abafowenu bevela ezizweni zonke ngamahhashi, ngezinqola, ngezinhlaka, ngeminyuzi nangamakameli, bayoza entabeni yami engcwele, iJerusalema,” kusho uSimakade, “njengalokhu abakwa-Israyeli bewuletha umnikelo wabo ngesitsha esihlambulukileyo endlini kaSimakade.
Ngiyakuthatha abanye kubo babe ngabaphristi nabaLevi,” kusho uSimakade.
“Njengalokhu izulu elisha nomhlaba omusha engiyakukwenza kuyakuma phambi kwami,” kusho uSimakade, “kanjalo izizukulwane zakho negama lakho kuyakuma.
Kusukela ekwethwaseni kwenyanga kuya kwenye, kusukela kwelinye isabatha kuya kwelinye; bonke abantu bayofika bazokhuleka phambi kwami,” kusho uSimakade.
“Bayophuma, babone izidumbu zabantu abaphambukile kimi, ngokuba impethu yabo ayiyukufa, nomlilo wabo awuyukucima, bayoba yisinengiso kubo bonke abantu.”
Amazwi kaJeremiya, indodana kaHilikiya, omunye wabaphristi ababese-Anathothi ezweni lakwaBhenjamini.
Izwi likaSimakade lafika kuye ezinsukwini zikaJosiya, indodana ka-Amoni inkosi yakwaJuda, ngonyaka we-13 wokubusa kwakhe.
Labuye lafika nangesikhathi sokubusa kukaJehoyakimu, indodana kaJosiya inkosi yakwaJuda, kwaze kwaba sekupheleni konyaka we-11 wokubusa kukaZedekiya, indodana kaJosiya kwaJuda, kwaze kwaba ngukuthunjwa kweJerusalema ngenyanga yesihlanu.
Izwi likaSimakade lafika kimi, lathi:
“Ngingakakubumbi esiswini ngakwazi, ungakaphumi esibelethweni ngakungcwelisa, ngakuqoka ukuba ube ngumphrofethi ezizweni.”
Kepha ngathi: “Awu, Nkosi Simakade! Mina angikwazi ukukhuluma, ngokuba ngisengumfanyana nje.”
Kepha uSimakade wathi kimi: “Ungathi kimi ungumfanyana, ngokuba uyakuya kubo bonke engikuthuma kubo, futhi uyakukhuluma konke engikuyala ngakho.
Ungabesabi, ngokuba nginawe ukuba ngikophule,” kusho uSimakade.
USimakade wayeselula isandla sakhe, wathinta umlomo wami; uSimakade wathi kimi: “Ngibekile amazwi ami emlonyeni wakho.
Bheka, ngiyakujuba namuhla phezu kwezizwe nemibuso, ukusiphula nokudiliza, ukuchitha nokubhubhisa, ukwakha nokutshala.”
Izwi likaSimakade lafika kimi, lathi: “Jeremiya, ubonani na?” Ngathi: “Ngibona igatsha lomu-alimondi.”
USimakade wayesethi kimi: “Ubone kahle, ngokuba ngiyakuqikelela ukuba izwi lami ngilifeze.”
Izwi likaSimakade labuye lafika kimi ngokwesibili, lathi: “Ubonani na?” Ngathi: “Ngibona ibhodwe elibilayo, lifulathele inyakatho.”
USimakade wayesethi kimi: “Kuzovela inhlekelele ngasenyakatho, ezokwehlela bonke abakhileyo ezweni.
Ngokuba ngiyakubiza yonke imindeni yemibuso yasenyakatho,” kusho uSimakade. “Iyakufika, kube yilowo nalowo ubeke isihlalo sawo sobukhosi ezikhaleni zamasango eJerusalema, nakuzo zonke izingange ezilizungezile, nasemizini yonke yakwaJuda.
Ngiyakubagweba ngenxa yabo bonke ububi babo, ngokuba bangihlubukile, bashisela abanye onkulunkulu impepho, bakhuleka kuyo imisebenzi yezandla zabo.
“Ngalokho-ke wena, bopha ukhalo lwakho, usuke uyokhuluma kubo konke engiyakukuyala ngakho. Ungapheli amandla ngenxa yabo, funa ngikuqede amandla phambi kwabo.
Ngokuba namuhla ngikubekile ukuba ube ngumuzi obiyelweyo, insika yensimbi, izingange zethusi kulo lonke izwe, emakhosini akwaJuda nezikhulu zakhona, abaphristi bakhona nakubantu bezwe.
Bayokulwa nawe, kodwa abasoze bakwehlula, ngokuba nginawe,” kusho uSimakade, “ukuba ngikophule.”
Izwi likaSimakade lafika kimi, lathi: “Hamba ukhulume lizwa lonke iJerusalema, uthi:
“ ‘Usho kanje uSimakade, ngiyakukhumbula umusa wobusha bakho, uthando lwakho njengomakoti, nokuthi wangilandela kanjani ehlane, ezweni okungatshalwanga lutho kulo.
U-Israyeli ungcwele kuSimakade, uwulibo lwezithelo zakhe; bonke abazidlayo bayothweswa icala, behlelwe ngokubi,’ ” kusho uSimakade.
Yizwani izwi likaSimakade nina ndlu kaJakobe, nani nonke mindeni yendlu ka-Israyeli.
Usho kanje uSimakade, uthi: “Bubi buni oyihlo ababufumana kimi, ukuba baze badede babe kude nami, balandele okuyize, baphenduke ize nabo na?
Abashongo ukuthi: ‘Uphi uSimakade owasikhuphula eGibhithe, wasihola ezweni eliyihlane nogwadule; izwe lemigodi, nesomiso, ezweni lethunzi lokufa, elingadatshulwa muntu, nalapho kungahlali muntu khona na?’
Nganingenisa ezweni elivundileyo ukuba nidle izithelo zalo nokuhle kwalo; kepha lapho seningenile, nalingcolisa izwe lami, nenza ifa lami laba yisinengiso.
Abaphristi abashongo ukuthi: ‘Uphi uSimakade na?’ Abaphethe umthetho babengazi, ababusi baphambuka kimi, abaphrofethi baphrofetha ngoBhali, balandela okungenakusiza.
“Ngakho-ke ngizophikisana nani,” kusho uSimakade, “ngiyakuphikisana nanabantwana babantwana benu.
Welelani eziqhingini eKhithimi, nibone, thumelani eKhedari, niqonde kahle, nibone ukuthi yake yenzeka yini into enjengalena na?
Isizwe sake sabalahla yini onkulunkulu baso, noma bengesibo onkulunkulu na? Kepha isizwe sami silulahlile udumo lwaso ngokungenanzuzo.
Mangalani ngalokho, mazulu, nithuthumele, nibe yincithakalo yoqobo,” kusho uSimakade.
“Ngokuba abantu bami benzile okubi okubili: bangishiyile, Mina mthombo wamanzi aphilileyo; bazigubhela imithombokwakhiwa, imithombokwakhiwa evuzayo, engenakuwagcina amanzi.
U-Israyeli uyisigqila esazalelwa ekhaya yini na? Kungani pho abe yimpango na?
Amabhongo ezingonyama alibhozomela, akhonya, alenza izwe lakhe laba yincithakalo; imizi yakhona iyincithakalo, akukho muntu owakhe kuyo.
Abantu baseNofi nabaseThahiphanesi baluphucile ukhakhayi lwakho.
Akunguwe yini oziholele amanzi ngomsele, ngokushiya uSimakade uNkulunkulu wakho ngesikhathi ekuhola endleleni na?
Ngakho-ke uzuzeni ngokuya eGibhithe uphuze amanzi eShihori na? Uzuzeni ngokuya e-Asiriya, ukuba uphuze amanzi omfula na?
Ububi bakho buyakukujezisa, nokuhlubuka kwakho kuyakukusola; yazi-ke, ubone ukuthi ukuhlubuka uSimakade uNkulunkulu wakho kuyinto embi nebaba kanjani; akusekho ukungesaba kuwe,” kusho iNkosi uSimakade Wamabandla.
“Ngokuba kwasemandulo walephula ijoka lakho, wagqabula izibopho zakho, wathi: ‘Angiyukukhonza.’ Ngokuba kuwo wonke amagquma aphakemeyo, naphansi kwayo yonke imithi eluhlaza, walala njengesifebe.
Mina ngakutshala ungumvini wekhethelo, imbewu enhle kakhulu; pho uphenduke kanjani waba yigatsha elonakeleyo kimi, elomvini wabezizwe na?
Ngokuba noma ugeza ngesoda, uzithathele insipho eningi, ububi bakho bulotshiwe phambi kwami,” kusho iNkosi uSimakade.
“Ungakusho kanjani ukuthi: ‘Angingcolile, angibalandelanga oBhali,’ na? Bheka ukuziphatha kwakho esigodini, ubone ukuthi wenzeni: uyikamela lensikazi elinejubane, elizulazula ezindleleni zalo,
nembongolo yasendle ejwayele ihlane, esezela umoya ngokukhanuka kwayo; ngubani ongavimbela inkanuko yayo na? Bonke abayifunayo abayukukhathala, bayakuyifumana ngenyanga yayo.
Nqanda unyawo lwakho lungabi olungenasicathulo, nomphimbo wakho ukuba ungomi; kepha wena wathi: ‘Kuyize; qha, ngiyabathanda onkulunkulu babezizwe, ngizobalandela.’
“Njengesela linxothoza lapho selibanjiwe, iyakuba njalo nendlu yakwa-Israyeli; iyokuba namahloni, yona namakhosi ayo, izikhulu zabo, abaphristi babo, nabaphrofethi babo
abathi emthini: ‘Ungubaba,’ nasetsheni, bathi: ‘Wena wangizala.’ Bangifulathele, abangibheki, kepha kuyothi ngesikhathi senhlekelele, bathi: ‘Vuka, usisindise.’
Baphi onkulunkulu bakho ozenzele bona na? Mabavuke, uma bengakusindisa ngesikhathi sokuhlupheka kwakho, ngokuba njengomumo wemizi yakho, banjalo onkulunkulu bakho, Juda.
“Kungani nimelana nami na? Nonke niphambukile kimi,” kusho uSimakade.
“Abantwana benu ngibashayele ize, abakwemukelanga ukuyalwa. Inkemba yenu idle abaphrofethi benu njengengonyama ebhubhisayo.
“Wena sizukulwane, lalela izwi likaSimakade. “Ngike ngaba yini yihlane ku-Israyeli, noma izwe lesigayegaye na? Kungani abantu bami bethi: ‘Sesidlubulundile, asisayukubuyela kuwe,’ na?
Intombi ingakhohlwa yini yimvunulo yayo, nomakoti ixhama lakhe na? Nokho abantu bami bangikhohliwe izinsuku ezingenakubalwa.
Uyilungisa kanjani indlela yakho uma ufuna uthando na?
Emiphethweni yezingubo zakho kufunyenwe igazi labampofu abangenacala, nanxa ungazange ubabhadame begqekeza. Phezu kwakho konke lokho,
uthi: ‘Anginacala. Impela intukuthelo yakhe ingehlele.’ Kodwa sengizokukwehlulela, ngokuba uthi: ‘Angonanga.’
Usheshelani kangaka ukuguqula indlela yakho na? NeGibhithe lizokujabhisa njengalokhu wajabhiswa yi-Asiriya.
Nalapho uyophuma uthwele imikhono ekhanda, ngokuba uSimakade ubalahlile labo owethembele kubo; abayukukuphumelelisa.”
“Uma indoda ilahla umkayo, noma yena ahambe ayogana enye indoda, ingabe isabuyela yini kuye na? Lelo lizwe liyobe lingangcoliswanga kakhulu na? Kepha wena ofebe nezithandwa eziningi uyakubuyela kimi,” kusho uSimakade.
“Phakamisela amehlo akho emadulini angamaqwaqwasi, ubone, kukuphi lapho ongazinikelanga kwalalwa khona nawe na? Ubahlalele ngasezindleleni, ubufana nomArabhi ehlane, walingcolisa izwe ngobufebe nangobubi bakho.
Yingakho-ke izihlambi zinqandiwe, nemvula yakamuva ingabangabikho. Nokho ubunesibindi sobufebe, wenqaba ukuba namahloni.
Awungibizile yini khona manje, uthi kimi: ‘Baba, Wena ungumngani wobusha bami,’ na?
Uyakuhlala uthukuthele njalonjalo na? Uyoyigcina intukuthelo kuze kube phakade na? Yiyona ndlela okhulume ngayo, kodwa wenza okubi, waphumelela ukukwenza.”
USimakade wathi kimi, ngesikhathi sokubusa kukaJosiya inkosi: “Uboneni na? U-Israyeli akahlubukanga yini na? Ukhuphukele kuzo zonke izintaba eziphakeme, nangaphansi kwazo zonke izihlahla eziluhlaza, wafeba khona.
Ngangicabanga ukuthi emva kokwenza zonke lezo zinto, uzobuyela kimi, kodwa akabuyanga. Nodadewabo uJuda okhohlisayo, ukubonile lokho.
Ubonile ukuthi ngakho konke ukungethembeki kwakhe u-Israyeli, ohlubukayo angenqenanga ukumnika incwadi yesehlukaniso, nokho udadewabo uJuda akesabanga, naye uhambile wayofeba.
Ngenxa yokuba wayengenamahloni ngokufeba kwakhe, walingcolisa izwe, ephinga namatshe nezihlahla.
Nokho kukho konke lokho lo dadewabo ombuluzayo, uJuda, akazange abuyele kimi ngenhliziyo ephelele, kodwa ngokuzenzisa nje,” kusho uSimakade.
USimakade wayesethi kimi: “U-Israyeli ohlubukayo uzibonakalise elungile kimi kunoJuda okhohlisayo.
Hamba umemezele lawa mazwi enyakatho, uthi: “ ‘Buya wena Israyeli ohlubukayo,’ kusho uSimakade; ‘angizukunibheka nginyukubele, ngokuba nginomusa,’ kusho uSimakade; ‘Angiyukuthukuthela kuze kube phakade.
Kuphela, yazi ububi bakho ukuthi uhlubukile kuSimakade uNkulunkulu wakho, izindlela zakho wazihlakazela kwabezizwe, phansi kwazo zonke izihlahla eziluhlaza; anililalelanga izwi lami,’ ” kusho uSimakade.
“Buyani, bantu abahlubukayo,” kusho uSimakade. “Ngokuba ngiyiNkosi yenu, ngizothatha abe munye emzini, babe babili emndenini, nginiyise eZiyoni.
Ngizakuninika abelusi abathandwa yinhliziyo yami, abazonelusa ngokwazi nangokuhlakanipha.
Kuyothi lapho nanda, futhi nichuma ezweni, ngalezo zinsuku,” kusho uSimakade, “abasayukusho ukuthi: ‘Umphongolo wesivumelwano sikaSimakade;’ awuyukungena enhliziyweni, abayukuwucabanga, abasayukuwukhumbula, abayukuba nesizungu sawo, awuseyukwenziwa omusha.
Ngaleso sikhathi, abantu bayobiza iJerusalema ngokuthi liyisihlalo sobukhosi sikaSimakade. Izizwe zonke ziyobuthelwa kulo, kulo igama likaSimakade eJerusalema. Azisayukuhamba ngokwenkani yenhliziyo yazo embi.
Ngalezo zinsuku indlu yakwaJuda iyakuhamba nendlu yakwa-Israyeli, ziyakubuya kanyekanye ezweni enyakatho, ziye ezweni engalinika okhokho benu ukuba libe yifa labo.
“Mina bengicabanga ukuthi: “ ‘Ngizakukubeka kanjani phakathi kwabantu, ngikuphe izwe elinxanelekayo, ifa elihle kakhulu ezizweni!’ Ngathi niyakungibiza nithi: ‘Baba,’ ningaguquki ekungilandeleni.
Impela njengomfazi ekhohlisa umyeni, kanjalo ningikhohlisile nina ndlu ka-Israyeli,” kusho uSimakade.
Izwi liyezwakala emadulini angamaqwaqwasi, likhala, linxusela abantu bakwa-Israyeli, ngokuba bayihlanekezele indlela yabo, bamkhohlwa uSimakade uNkulunkulu wabo.
“Buyani nina bantwana enihlubukayo; ngizoniphulukisa ekuhlubukeni kwenu.” “Bheka, sesilapha, siza kuwe, ngokuba unguSimakade uNkulunkulu wethu.
Impela amagquma ayize nomsindo wezintaba. Ngokwempela, ukusindiswa kuka-Israyeli kukuSimakade uNkulunkulu wethu.
Nento eyihlazo iwuqedile umshikashika wokhokho bethu, kwasebusheni bethu; izimvu nezimbuzi zabo, nezinkomo zabo; namadodana abo namadodakazi abo.
Masilale phansi sinamahloni, ihlazo lethu lisisibekele, ngokuba sonile kuSimakade uNkulunkulu wethu, thina nokhokho bethu, kusukela ebusheni bethu kuze kube namuhla, asililalelanga izwi likaSimakade uNkulunkulu wethu.”
“Uma uphenduka, Israyeli,” kusho uSimakade, “uyakubuyela kimi; uma ususa phambi kwami izinengiso zakho, awuyukuntengantenga.
Uyakufunga ngeqiniso, ngobulungiswa, nangokulunga, uthi: ‘Ngifunga phambi kukaSimakade,’ izizwe ziyakuzibusisa ngaye, zizishaye isifuba ngaye.”
Usho kanje uSimakade kubantu bakwaJuda nabaseJerusalema, uthi: “Qathani umqatho wenu, ningatshali phakathi kwameva.
Zisokeleni uSimakade, nisuse amajwabu ezinhliziyo zenu, nina bantu bakwaJuda, nani zakhamuzi zaseJerusalema, funa intukuthelo yami iphume njengomlilo, ivuthe, kungabi bikho oyicimayo, ngenxa yobubi bezenzo zenu.
“Memezelani kwaJuda, nihlabe umkhosi eJerusalema, nithi: ‘Bethani amacilongo ezweni,’ nimemeze, nithi: ‘Buthanani, masihambe siye emizini ebiyelweyo.’
Misani ibhanela libheke eZiyoni, nibaleke niyocasha, ningemi, ngokuba ngiyakwehlisa inhlekelele ivela enyakatho, nokubhujiswa okukhulu.”
Ingonyama iphumile ehlokozini, umbhubhisi wezizwe uyeza; uphumile endaweni yakhe ukuba enze izwe lakho libe yincithakalo, imizi yakini icekelwe phansi, kungabi bikho ohlala kuyo.
Ngalokho bhincani indwangu eyisaka, nikhale, nilile, ngokuba intukuthelo kaSimakade evuthayo ayikasuki kithi.
“Kuyakuthi ngalolo lusuku,” kusho uSimakade, “inhliziyo yenkosi idangale nezinhliziyo zezikhulu; abaphristi bayakumangala, abaphrofethi bathuthumele.”
Ngase ngithi: “Awu, Nkosi Simakade, impela ubakhohlisile laba bantu neJerusalema, wathi: ‘Niyakuba nokuthula,’ kodwa inkemba isemqaleni.”
Ngaleso sikhathi kuyakuthiwa kulaba bantu, nakulo iJerusalema: “Ishisandlu elivela ezindaweni eziphakeme ezingamaqwaqwasi liya endodakazini yabantu bami, aliyukubahlakaza, aliyukubahlambulula.
Umoya omkhulu kunalokho uyakuphuma kimi. Manje ngiyakukhuluma, ngibagwebe.”
Bhekani, uyakhuphuka njengamafu, izinqola zakhe zinjengesivunguvungu, amahhashi akhe anejubane kunezinkozi. Maye, kithi, ngokuba sichithiwe!
Jerusalema, hlanza ububi obusenhliziyweni yakho, ukuze usindiswe. Kuyoze kube nini imicabango yakho emibi ihleli ezibilini zakho na?
Ngokuba izwi liyamemezela, liphuma kwaDani; limemezela inhlekelele ivela kwelezintaba kwa-Efrayimi.
“Xwayisani izizwe ngalokhu; bhekani, kumemezeleni eJerusalema ukuthi abavimbezeli bayeza, bavela kwelikude izwe; bayalizwakalisa izwi labo emizini yakwaJuda.
Njengabalindi bensimu, balithelekele nxazonke, ngokuba lingihlubukile,” kusho uSimakade.
“Ukuziphatha kwakho nezenzo zakho kukulethele lezi zinto; lokhu kungenxa yokukhohlakala kwakho, ngokuba umunyu ufinyelele enhliziyweni yakho.”
O, buhlungu bami, buhlungu bami, inhliziyo yami iyaqaqamba; iyabubula inhliziyo yami, anginakuthula, ngokuba umphefumulo wami uwuzwile umsindo wecilongo, kuhlatshwa umkhosi wempi.
Kumenyezelwa ukubhujiswa phezu kokubhujiswa, ngokuba izwe lonke lenziwe incithakalo. Amathende ami ashatshalaliswe ngokushesha, namakhethini ami ngokuphazima kweso.
Kuyoze kube nini ngibona ibhanela, ngizwa umsindo wecilongo na?
“Yebo, abantu bami bayiziwula, abangazi; bangabantwana abayiziphukuphuku, abanakuqonda; bayizingcweti ekwenzeni okubi, abakwazi ukwenza okuhle.”
Ngawubuka umhlaba; bheka, wawuyize, ungenalutho, nezulu lalingenakukhanya.
Ngabuka izintaba, bheka, zazamazama, namagquma wonke anyakaza.
Ngabuka; uyabona-ke, kwakungekho muntu; zonke izinyoni zezulu zazibalekile.
Ngabuka; bheka, izwe elivundileyo laliyihlane, nemizi yalo yonke yayidiliziwe phambi kukaSimakade, naphambi kwentukuthelo yakhe evuthayo.
Ngokuba usho kanje uSimakade, uthi: “Izwe lonke liyakuba yincithakalo, kepha angiyukuliqeda liphele nya.
Umhlaba uyakhala ngalokhu, izulu phezulu liyakuba mnyama, ngokuba ngikukhulumile, nginqumile; anginakuguquka, anginakuphenduka kulokhu.”
Yonke imizi iyabaleka ngenxa yomsindo wabamahhashi, nowabaciba ngemicibisholo; abantu bangena emahlokozini, bakhuphukele emadwaleni; imizi yonke isele dengwane, akusekho ohlala kuyo.
Wena ochithiweyo, wenzani ngokuvunula ngokubomvu nangemvunulo yegolide, nokugqaba amashiya akho ngomuthi, uzenza muhle ngeze na? Izithandwa zakho ziyakwedelela, zifuna ukukubulala.
Ngizwile izwi kungathi ngelowesifazene ohelelwayo, usizi lozibulayo, izwi lendodakazi uZiyoni ihefuzela, yelula izandla zayo, ithi: “Maye, kimi! Ngokuba umphefumulo wami udangele, phambi kwababulali bami.”
“Yehlani nenyuka emigwaqweni eJerusalema, nibheke nxazonke, niqaphele, nicinge ezigcawini zalo, uma niyofumana umuntu abe munye vo owenza ubulungiswa, ofuna iqiniso; khona ngiyolithethelela.
Noma bangathi: ‘Sifunga phambi kukaSimakade,’ nokho bafunga amanga.”
Simakade, kanti amehlo akho awafuni lona yini iqiniso na? Ubashayile, kodwa abadabukanga, ubaqedile, kepha balile ukwemukela ukuyalwa; ubuso babo babenze balukhuni ukwedlula itshe, benqaba ukuphenduka.
Ngase ngithi: “Laba yizimpofana nje, benze ubuwula, ngoba kabayazi indlela kaSimakade, nokwehlulela kukaNkulunkulu wabo.
Ngizakuya kwabakhulu, ngikhulume nabo, ngokuba bona bayayazi indlela kaSimakade nesimiso sikaNkulunkulu wabo,” nokho nabo balephulile ijoka ngokufanayo, bazigqabula izibopho.
Ngakho-ke ingonyama yehlathi izobahlasela, impisi yasehlane ibabhubhise, ingwe icuthele imizi yabo; bonke abaphuma kuyo ibadweshule, ngokuba iziphambeko zabo ziningi, nokuhlubuka kwabo kukhulu.
“Kepha ngingakuthethelela kanjani na? Abantwana bakho bangishiyile, bafunga okungesibo onkulunkulu. Ngabondla basutha, kodwa baphinga, babuthana endlini yesifebe.
Bafana namahhashi akhulupheleyo andindayo; yilowo nalowo ukhanuka umfazi kamakhelwane wakhe.
Angiyukubajezisa yini ngenxa yalokho na?” kusho uSimakade. “Umphefumulo wami awuyukuziphindiselela yini esizweni esifana nalesi na?
“Khuphukelani ezingangeni zalo, nilibhubhise, nokho ningaqothi imbokodo nesisekelo kulo; susani amagatsha alo, ngokuba akusiwo akaNkulunkulu.
Indlu ka-Israyeli nendlu kaJuda zenze ubuqili obukhulu kimi,” kusho uSimakade.
Ziqambe amanga ngoSimakade, zathi: “Ngeke eze Yena, asehlisele okubi, asiyukubona nkemba nandlala.
Abaphrofethi baphenduke umoya nje, alikho izwi kubo; ngakho-ke makwenziwe kanjalo kubo.”
Ngakho-ke, usho kanje uSimakade uNkulunkulu Wamabandla, uthi: “Ngokuba nikhulume leli lizwi, amazwi ami, ngiyakuwenza amazwi ami emlonyeni wenu, abe ngumlilo laba bantu babe yizinkuni, ubadle.
Ngizakwehlisela kini, nina ndlu ka-Israyeli, isizwe esivela kude,” kusho uSimakade; “yisizwe esinamandla, isizwe esidala, isizwe ongalwazi ulimi lwaso, nongakuqondi esikushoyo.
Umgodla waso ufana nethuna elivulekileyo; sonke singamaqhawe.
Siyakudla isivuno sakho nesinkwa sakho, sidle amadodana namadodakazi akho, sidle izimvu zakho nezinkomo zakho, sidle imivini yakho nemikhiwane yakho, sibhubhise ngenkemba imizi yakini ebiyelweyo enethembele kuyo.
“Kepha nangalezo zinsuku,” kusho uSimakade, “angiyukuniqeda nya.
Kuyakuthi lapho nithi: ‘USimakade uNkulunkulu wenu ukwenzeleni kithi konke lokhu na?’ Ubatshele, uthi: ‘Njengalokhu ningishiyile, nakhonza onkulunkulu babezizwe ezweni lakini, kanjalo-ke niyakukhonza eningabaziyo ezweni elingesilo elenu.’ ”
“Memezela lokhu endlini Jakobe, ukumemezele ngisho nakwaJuda, uthi:
Yizwani lokhu, nina bantu abayiziwula neningenakuqonda; eninamehlo, kodwa aniboni; eninezindlebe, kodwa anizwa.
Aningesabi yini?” kusho uSimakade. “Anithuthumeli yini phambi kwami? Mina engibeke isihlabathi saba ngumkhawulo wolwandle, umngcele ophakade olungenakudlula kuwo na? Noma lungagubha amagagasi, alunakuwehlula, noma lungaduma, alunakuweqa.
Kepha laba bantu banenhliziyo enenkani nehlubukayo; bembukile, bahamba.
Abashongo ezinhliziyweni zabo, ukuthi: ‘Ake sesabe uSimakade uNkulunkulu wethu, onika imvula yokuqala neyakamuva ngesikhathi sayo, osigcinele amasonto anqunyiweyo okuba sivune.’
Ububi benu buzibalekisile lezi zinto, nezono zenu zakuvimba okuhle kini.
“Ababi bafunyanwa phakathi kwabantu bami, bayaqamekela njengabacupha inyoni, babeke ugibe, ukuba babambe abantu.
Njengendlwana yezinyoni igcwele izinyoni, kanjalo izindlu zabo zigcwele inkohliso; bakhulu, banothile.
Bakhuluphele, bayacwebezela, yebo, ububi babo abunamkhawulo, abehluleli ngokulunga, abazimeli izintandane ukuba nazo ziphumelele, abawalweli amalungelo abampofu.
Angiyukubajezisa yini ngalokhu na?” kusho uSimakade. “Umphefumulo wami awuyukusijezisa yini isizwe esinjengalesi na?
“Ezweni kwenzeke okumangalisayo nokwesabekayo.
Abaphrofethi baphrofetha amanga, abaphristi babusa njengoba beyalwa ngabaphrofethi. Abantu bami bathanda khona lokho, kodwa bayokwenzenjani uma kufika ukuphela na?”
“Bantu bakwaBhenjamini, balekani niyocasha, nisuke eJerusalema, nibethe amacilongo eThekhowa, niphakamise insika yomusi eBhethi Hakeremi, ngokuba inhlekelele ilunguza ivela ngasenyakatho nokubhubhisa okukhulu.
Indodakazi uZiyoni ngiyifanisa nedlelo elihle.
Abelusi nemihlambi yabo bayotheleka kuyo, bamise amathende abo ngakuyo, nxazonke, beluse, kube yilowo nalowo endaweni yakhe.
“Zingcweliseleni ukulwa nayo; vukani, masihlasele emini. Maye, kithi! Ngokuba ilanga seliyashona, namathunzi okuhlwa aselulekile.
Vukani, masihlasele ebusuku, masizibhubhise izinqaba zalo.”
Ngokuba usho kanje uSimakade Wamabandla, uthi: “Gawulani imithi yalo, ninqwabele indunduma ngakulo iJerusalema. Umuzi wonke uyojeziswa, ngayo yonke ingcindezelo ephakathi kwawo.
Njengomthombo ogcina amanzi awo emahle, nalo ligcina kanjalo ububi balo; ubudlova nokucekela phansi kuyezwakala kuwo; ukugula namanxeba kuphambi kwami njalo.
Xwaya, Jerusalema, funa ngikufulathele, ngikwenze incithakalo, izwe okungahlalwa kulo.”
Usho kanje uSimakade Wamabandla, uthi: “Insali yakwa-Israyeli bayakuyikhothoza nokuyikhothoza njengomvini. Njengovuna amagilebhisi, yedlulisa isandla sakho phezu kwamagatsha.”
Ngiyokhuluma kubani, ngixwayise bani, ukuze balalele na? Bheka, izindlebe zabo ezingasokiwe azizwa, izwi likaSimakade seliphenduke ihlazo kubo, abathokozi ngalo.
Ngakho-ke ngigcwele ulaka lukaSimakade, ngikhathele ukuzibamba. “Luthululele phezu kwabantwana emigwaqweni, nasemhlanganweni wezinsizwa, indoda nomkayo bayakubanjwa kanjalo abadala nabagugileyo.
Izindlu zabo, amasimu abo nomkabo kuyakunikelwa kwabanye kanyekanye, ngokuba ngiyakwelulela isandla sami kwabakhile ezweni,” kusho uSimakade.
“Kusukela ezinganeni kuya kwabadala bakhona, bonke bazuza inzuzo engafanele, nabaphrofethi nabaphristi baqamba amanga.
Belaphile ukuphoqoka kwabantu bami ngokuyekethisa, bethi: ‘Ukuthula, ukuthula,’ kepha kungekho ukuthula.
Abanamahloni ngenxa yezinengiso abazenzileyo, abanamahloni nakancane, abakwazi nokukhophoza; ngalokho bayakuwela kulabo asebewile; ngesikhathi sokubajezisa kwami bayakukhubeka,” kusho uSimakade.
Usho kanje uSimakade, uthi: “Yimani ezindleleni, nibone, nibuze ngemikhondo yasemandulo ukuthi ikuphi indlela enhle, nihambe kuyo, niyakufumana ukuphumula kwemiphefumulo yenu, kepha, bathi: ‘Asiyukuhamba kuyo.’
Ngase ngibeka abalindi phezu kwenu, ngithi: ‘Lalelani ukukhala kwecilongo,’ kepha, bathi: ‘Asiyukulilalela.’
Ngalokho zwanini nina zizwe, wazi wena bandla ukuthi kuzokwenzakalani kubo.
Yizwa wena mhlaba, bheka, ngiyakwehlisela inhlekelele phezu kwalaba bantu, isithelo samacebo abo, ngokuba abawalalelanga amazwi ami, nomthetho wami bawulahlile.
Inalusizo luni kimi inhlaka evela eShebha, nomhlanga othaphukayo ovela ezweni elikude na? Iminikelo yenu yokushiswa ayamukeleki, nemihlatshelo yenu ayimnandi kimi.”
Ngakho usho kanje uSimakade, uthi: “Ngiyakubekela laba bantu izikhubekiso, oyise namadodana bayakukhubeka kanyekanye kuzo, umakhelwane abhubhe nomngani wakhe.”
Usho kanje uSimakade, uthi: “Kuzakufika abantu bevela ezweni elisenyakatho; isizwe esikhulu siyakuvuswa ekugcineni komhlaba.
Babamba umnsalo nomkhonto; banonya, abanamusa, izwi labo liduma njengolwandle, bagibele amahhashi, bahleliwe njengamabutho eyokulwa, bahlelelwe ukulwa nawe, ndodakazi uZiyoni.”
Siyizwile imibiko ngabo: izandla zethu zayetha; usizi lusikhungethe, lunjengemihelo yokubeletha.
Ningaphumeli endle, ningahambi emgwaqweni, ngokuba isitha sinenkemba, kugcwele ukwesabeka nxazonke.
Ndodakazi yabantu bami, bhinca indwangu eyisaka, uzigingqe emlotheni, ulile sengathi ulilela indodana eyodwa, ukukhala okulusizi, ngokuba umbhubhisi uzotheleka phezu kwakho masinyane.
“Ngikubekile ukuba ube ngumhloli nenqaba phakathi kwabantu bami, ukuze uqaphe, futhi uhlole inkambo yabo.
Bahlubukile bonke nokuhlubuka, bahamba behleba; bayithusi nensimbi, bangababhubhisi bonke.
Indawo engaphansi iyafutha, umthofi udliwe ngumlilo; impela bahlungelwa ize nje, ngokuba ababi abakhishiwe.
Bayakuthiwa amanyela esiliva, ngokuba uSimakade ubalahlile.”
Kwafika kuJeremiya izwi livela kuSimakade, lithi:
“Yima esangweni lendlu kaSimakade, umemezele lapho leli lizwi, uthi: “ ‘Yizwani izwi likaSimakade, nina nonke bakwaJuda eningena ngalawa masango nizokhuleka kuSimakade.
Usho kanje uSimakade Wamabandla, uNkulunkulu ka-Israyeli, uthi: “Lungisani izindlela nezenzo zenu, khona ngizonenza nakhe kule ndawo.
Ningethembeli emazwini angamampunge, uma kuthiwa: leli yithempeli likaSimakade, yithempeli likaSimakade, yithempeli likaSimakade.”
“ ‘Ngokuba uma nizilungisa ngempela izindlela nezenzo zenu, nenze ubulungiswa ngempela phakathi komuntu nomakhelwane wakhe,
ningacindezeli umfokazi, intandane nomfelokazi, ningachithi gazi elingenacala kule ndawo, futhi ningabalandeli abanye onkulunkulu, funa nilimale,
ngiyakunenza nina nakhe kule ndawo, ezweni engalinika okhokho benu, kusukela emandulo kuze kube phakade.
Bhekani, nethembela emazwini angamanga angenanzuzo.
“ ‘Niyokweba yini, nibulale, niphinge, nifunge amanga, nishisele uBhali impepho, nilandele abanye onkulunkulu eningabaziyo na?
Niyofika yini nime phambi kwami, kule ndlu ebizwa ngeGama lami, nithi: “Sihlengiwe,” ukuze nenze zonke lezi zinengiso na?
Ngabe le ndlu ebizwa ngeGama lami isiphenduke umhume wabaphangi emehlweni enu na? Bhekani, nami ngiyabona, kusho uSimakade.
“ ‘Kepha ake nihambe niye endaweni yami eShilo, lapho ngaqala khona ukubeka iGama lami, nibone engakwenza kuyo ngenxa yobubi babantu bami, u-Israyeli.
Ngakho-ke ngenxa yokuthi nenze zonke lezi zenzo, kusho uSimakade, nakuba bengikhuluma ngingaphezi, anilalelanga; nganibiza kodwa anisabelanga, kusho uSimakade.
Ngizokwenza kule ndlu ebizwa ngeGama lami nenithembela kuyo, nakule ndawo enganinika yona, nina nokhokho benu, njengalokhu ngenza eShilo.
Ngiyakunixosha ebukhoneni bami njengalokhu ngenza nakubafowenu, bonke abozalo luka-Efrayimi.’
“Wena-ke ungabakhulekeli laba bantu, ungabancengeli, ungakhuleki ubakhalela, ungabanxuseli kimi ngoba angiyukukulalela.
Awukuboni yini abakwenzayo emizini yakwaJuda nasemigwaqweni eJerusalema na?
Abantwana batheza izinkuni, oyise baphemba umlilo, abesifazane baxova inhlama yokwenzela inkosikazi yezulu amaqebelengwane, bathululele abanye onkulunkulu umnikelo wokuphuzwayo ukuba bachukuluze ulaka lwami.
Akuyimi yini abamcunulayo, kusho uSimakade na? Akusibo yini uqobo, abaze bazithela ngehlazo na?
“ ‘Ngakho-ke isho kanje iNkosi uSimakade, ithi: bheka, intukuthelo nolaka kwami ngizokuthululela kule ndawo; phezu kwabantu, izilwane, izihlahla zasendle, nezithelo zomhlaba; kuzakuvutha kungacimeki.
“ ‘Usho kanje uSimakade Wamabandla uNkulunkulu ka-Israyeli, uthi: thasiselani iminikelo yenu yokushiswa emihlatshelweni yenu, nidle inyama.
Ngokuba angikhulumanga kokhokho benu, angibayalanga mhla ngibakhipha eGibhithe ngezindaba zeminikelo nemihlatshelo,
kodwa ngabayala ngalokhu, ngathi: lalelani izwi lami, ngiyakuba nguNkulunkulu wenu, nina nibe ngabantu bami, niyakuhamba ngazo zonke izindlela enganiyala ngazo, ukuze kunihambele kahle konke.
Kepha abalalelanga, abayibekanga indlebe yabo kwengikushoyo, kodwa bahamba ngokobulukhuni benhliziyo yabo embi; bahlubuka, bahlehlela emuva, abaze baqhubekela phambili.
Kusukela ngosuku okhokho benu abaphuma ngalo eGibhithe kuze kube namuhla, ngathumela kini zonke izinceku zami, abaphrofethi, ngibathumela imihla namalanga.
Nokho abazange bangilalele, abayibekanga indlebe yabo kimi, kodwa bazenza lukhuni izintamo zabo; benza okubi ukwedlula okhokho babo.’
“Uyokhuluma kubo wonke lawa mazwi, kepha abayukukulalela; uyakubabiza, kodwa abayukusabela.
Uyothi kubo: ‘Lesi yisizwe esingazange sililalele izwi likaSimakade uNkulunkulu waso, esingakwemukelanga ukuqondiswa; iqiniso lishabalele, lisusiwe emlonyeni waso.
Gunda izinwele zakho, Jerusalema, uzilahle, ukhihle isililo emagqumeni aphakemeyo angamaqwaqwasi, ngokuba uSimakade ukwalile, usilahlile isizukulwane sentukuthelo yakhe.
“ ‘Abantu bakwaJuda benzile okubi phambi kwami,’ kusho uSimakade. ‘Babeke izinto zabo ezinengisayo endlini ebizwa ngeGama lami ukuba bayingcolise.
Bakhe izindawo eziphakemeyo eThofethi, esesigodini sendodana kaHinomu, ukuba bawashisele khona amadodana namadodakazi abo, into engingabayalanga ukuba bayenze, nengingakaze ngiyicabange.
Ngakho-ke bheka, izinsuku ziyeza, kusho uSimakade, lapho ingaseyukubizwa ngeThofethi nesigodi sendodana kaHinomu, kodwa iSigodi Sokubulala, ngokuba bayakungcwaba eThofethi, kuze kungabe kusaba bikho ndawo.
Izidumbu zalaba bantu ziyakuba ngukudla kwezinyoni zezulu nezilwane zasendle; akekho oyakuzethusa.
Emizini yakwaJuda nasemigwaqweni eJerusalema ngiyakuwuthulisa umsindo wokujabula nowokuthokoza, nezwi lomyeni nelikamakoti, ngokuba izwe liyakuba yincithakalo.’ ”
“ ‘Ngaleso sikhathi,’ kusho uSimakade, ‘bayakukhipha amathambo amakhosi akwaJuda, awezikhulu zakhona, awabaphristi, awabaphrofethi nawezakhamuzi zaseJerusalema, emathuneni abo,’ kusho uSimakade.
‘Bayowaneka elangeni nasenyangeni nakuzo zonke izinkanyiso zezulu, ababekuthanda, bekukhonza, bekulandela, bebuza kukho, futhi bekhuleka kukho. Awayukubuthwa, awayukwembelwa; ayakuba njengendle ebusweni bomhlaba.
Insali yonke eseleyo kulowo nalowo mndeni omubi, iyoqoma ukufa kunokuphila, leyo eyosala ezindaweni zonke, lapho ngiyidingisele khona,’ ” kusho uSimakade Wamabandla.
“Uyokuthi futhi kubo: ‘Usho kanje uSimakade, uthi: “ ‘Abantu bayawa yini, bangabuye basukume na? Umuntu uyaphambuka yini, angabuye aphenduke na?
Pho kungani laba bantu baseJerusalema bephendukile, bahlubuka njalonjalo na? Babambelela enkohlisweni, benqaba ukubuya.
Ngiqaphelisisile, ngezwa; abalikhulumi iqiniso; akekho ophendukayo ebubini bakhe, ethi: “Ngikwenzeleni lokhu na?” Bonke bazihambela ezindleleni zabo, njengamahhashi ephulukundlela empini.
Unogolantethe emkhathini uyazazi izikhathi zakhe ezimisiweyo; ihobhe, ihhashi, inkonjane, nonohhemu, kuyazigcina izikhathi zokufika kwakho; kodwa abantu bami kabazazi izimiso zikaSimakade.
“ ‘Ningakusho kanjani ukuthi: “ ‘Sihlakaniphile, nomthetho kaSimakade ukithi na? “ ‘Impela, usiba lwababhali bamanga, luloba amanga.
Abahlakaniphileyo bayohlazeka, badangale, babhajwe; balilahlile izwi likaSimakade, pho banakuhlakanipha kuni na?
Ngakho-ke ngizonika abafazi babo abanye, ngibaphuce amasimu abo; ngokuba kusukela ezinganeni kuya kwabadala, bonke bathola inzunzo engabafanele; nabo bonke abaphrofethi nabaphristi baqamba amanga.
Belaphile kalula ukulimala kwendodakazi yabantu bami, bethi: “Ngukuthula, ngukuthula;” kube kungekho ukuthula.
Kabanamahloni ngezinengiso abazenzileyo, kabanamahloni nakancane; abakhophozi, kabazi, ngakho-ke bayakuwela phakathi kwalabo asebewile; ngesikhathi sokujeziswa kwabo bayakukhubeka, kusho uSimakade.
“ ‘Bengizobutha nokubutha, kepha awekho amagilebhisi namakhiwane emkhiwaneni; amaqabunga abunile engabanika khona bakwephuciwe,’ ” kusho uSimakade.
“Sisahlaleleni na? Buthanani, masingene emizini ebiyelweyo, ukuze sibhubhele lapho, ngokuba uSimakade uNkulunkulu wethu, usinqumele ukubhujiswa, usiphuzise amanzi anobuthi, ngokuba sonile kuSimakade.
Besilindele ukuthula, kodwa akukho okuhle; nesikhathi sokuphiliswa, kepha bheka, luvalo lodwa.
Ukuthimula kwamahhashi akhe kuzwakele kwaDani; umsindo wokukhala kwamahhashi akhe anamandla kuthuthumelise lonke izwe, ngokuba asefikile, aliqothula izwe nakho konke okukulo, umuzi nabakhileyo kuwo.”
“Bheka, ngizothumela phakathi kwenu izinyoka, izinyoka ezinesihlungu esibi, ezingenakulunjwa; ziyoniluma,” kusho uSimakade.
Akukho ukududuzeka ngosizi lwami, inhliziyo yami idangele.
Kuyezwakala izwi lokukhala kwendodakazi yabantu bami, livela ezweni elikude, lithi: “USimakade akekho yini eZiyoni na? Inkosi yalo ayikho yini kulo na?” “Bangichukuluzeleni ngezithombe zabo ezibaziweyo, nangokuyize kwabezizwe na?”
“Ukuvuna sekwedlulile, ihlobo liphelile, kodwa thina asisindiswanga.”
Ngilimele ngokulinyazwa kwendodakazi yabantu bami, ngiyalila, ukwesaba kungikhungethe.
Alikho yini ibhalisamu kwaGileyadi na? Ayikho yini inyanga lapho na? Pho abelashwa ngani abantu bami na?
Sengathi ikhanda lami lingamanzi, namehlo ami ngumthombo wezinyembezi, ukuba ngikhalele ababuleweyo babantu bami imini nobusuku.
Sengathi ngabe nginendawo yokulala izihambi ehlane, ukuze ngibashiye abantu bami, ngisuke kubo, ngokuba bonke bayiziphingi, iqembu lamaqili.
“Bagobisele umnsalo wolimi emangeni, abaqinanga eqinisweni ezweni, ngokuba basuka kulobu bubi bedlulele kobunye; abangazi Mina,” kusho uSimakade.
“Yilowo nalowo makaxwaye umakhelwane wakhe, ningethembeli nakubafowenu, ngokuba abafowenu bonke bagebenga, bonke omakhelwane behla benyuka, behleba.
Yilowo nalowo ukhohlisa umakhelwane wakhe, abalikhulumi iqiniso; ulimi lwabo balufundise ukukhuluma inkohliso, bazikhathaza ngokwenza okubi.
Bahlala phakathi kwenkohliso; ngenkohliso bayenqaba ukungazi Mina,” kusho uSimakade.
Ngakho-ke usho kanje uSimakade Wamabandla, uthi: “Ngiyakubancibilikisa, ngibavivinye, ngokuba ngizokwenza kanjani ngenxa yesono sabantu bami na?
Ulimi lwabo lungumcibisholo obulalayo, lukhuluma inkohliso; bakhuluma kahle ngomlomo wabo komakhelwane babo, kepha ezinhliziyweni bayamqamekela.
Angizukubajezisa yini ngalokho na?” kusho uSimakade. “Umphefumulo wami awuyukuziphindiselela yini esizweni esinjengalesi na?”
Ngiyakukhala, ngilile ezintabeni, nasemadlelweni asehlane, ngikhihle isililo; ngokuba aqothuliwe, akukho muntu owedlula kuwo, akuzwakali nakukhala kwemfuyo; izinyoni zezulu nezilwane zibalekile, zahamba.
“Ngizakulenza iJerusalema libe yindunduma yamatshe, nendawo yamakhanka; imizi yakwaJuda ngiyenze ibe yincithakalo, kungahlali muntu kuyo.”
Ngubani umuntu ohlakaniphileyo, ongaqonda okukhulunywe kuye ngumlomo kaSimakade, ukuze akumemezele na? Izwe libhujiselweni, lishiselweni lanjengehlane, kwangaba bikho odabula kulo na?
USimakade wathi: “Kungenxa yokuba bawushiyile umthetho wami engawubeka phambi kwabo. Abalilalelanga izwi lami futhi abahambanga ngalo.
Kepha bahambe balandela inkani yenhliziyo yabo, balandela oBhali ababafundiswa ngokhokho babo.”
Ngakho-ke usho kanje uSimakade Wamabandla, uNkulunkulu ka-Israyeli, uthi: “Ngiyakubondla laba bantu ngemifino ebabayo, ngibaphuzise amanzi anobuthi.
Ngiyakubahlakaza phakathi kwezizwe abangazazi, bona nokhokho babo, ngibalandelise ngenkemba, ngize ngibaqede nya.”
Usho kanje uSimakade Wamabandla, uthi: “Qaphelani, nibize abesifazane besililo ukuba beze; thumelani kwabesifazane abahlakaniphileyo ukuba bafike,
mabasheshe basikhihlele isililo, ukuze amehlo ethu agobhoze izinyembezi, izinkophe zethu ziphophoze amanzi.
Ngokuba izwi lesililo lizwakele livela eZiyoni, lithi: ‘Yeka ukubhujiswa kwethu! Sithelwe ngehlazo kakhulu; silishiyile izwe, ngokuba bazidilizile izindlu zethu.’ ”
Yizwani izwi likaSimakade nina besifazane, izindlebe zenu zilamukele izwi eliphuma emlonyeni wakhe, nifundise amadodakazi enu iculo lesililo, kube yilowo nalowo afundise umakhelwane wakhe ukukhihla isililo.
Ngokuba ukufa kwenyukele emafasiteleni ethu, kungene ezinqabeni zethu, kubulala izingane emigwaqweni, nezinsizwa ezigcawini.
Khuluma uthi: “Usho kanje uSimakade, uthi: “ ‘Izidumbu zabantu ziyakusabalala njengendle emasimini, nanjengokusanhlamvu okunqunyiwe okusala emva komvini, kungekho okubuthayo.’ ”
Usho kanje uSimakade, uthi: “Ohlakaniphileyo makangazishayi isifuba ngokuhlakanipha kwakhe, neqhawe malingazibongi ngobuqhawe balo, nocebileyo makangazibongi ngengcebo yakhe.
Kepha ozibongayo makazibonge ngalokhu, ukuthi uyangiqonda, futhi uyangazi ukuthi nginguSimakade owenza umusa, ubulungiswa nokulunga emhlabeni, ngokuba ngiyathokoza ngalezi zinto,” kusho uSimakade.
“Bheka, izinsuku ziyeza,” kusho uSimakade, “lapho ngiyakujezisa bonke abasoke enyameni kuphela,
iGibhithe, uJuda, u-Edomi, abantu bakwa-Amoni, uMowabi, nabo bonke abadilingiwe emaceleni amakhanda abo, abakhe ehlane. Ngokuba zonke izizwe azisokile, nendlu yonke yakwa-Israyeli ayisokile enhliziyweni.”
Yizwani izwi uSimakade alikhuluma kini, nina ndlu ka-Israyeli.
Usho kanje uSimakade, uthi: “Ningayifundi indlela yabezizwe, ningashaywa wuvalo ngezibonakaliso esibhakabhakeni, ngokuba abezizwe bayazesaba.
Imikhuba yabantu iyize; ngokuba umuntu ugawula isihlahla ehlathini, asixhoze ngembazo; umsebenzi wombazi, osibaza ngembazo.
Abantu bawuhlobise ngesiliva nangegolide, bawuqongqothele ngesando nangezipikili ukuze ungawi.
Njengesichuse ensimini yamakhukhamba, awukhulumi, impela uyathwalwa; ngokuba awuzihambeli. Ungawesabi, ngokuba awukwazi ukukulimaza, futhi awukwazi ukwenza okuhle.”
Akekho onjengawe Simakade; umkhulu, igama lakho likhulu emandleni.
Ngubani ongayukukwesaba Nkosi yezizwe na? Ngokuba kuyimfanelo yakho, akekho onjengawe phakathi kwabo bonke abahlakaniphileyo bezizwe, nakuyo yonke imibuso yabo; akekho onjengawe.
Bonke bayiziphukuphuku neziwula. Ukuyala kwezithombe kufana nokhuni nje,
nesiliva elicangcathiweyo elilethwa lisuka eTharishishi, negolide lase-Ufazi, kungumsebenzi wezandla zomcangcathi; kugqokiswe okuluhlaza nokubukhwebezane, konke kungumsebenzi wezingcweti.
Kepha uSimakade unguNkulunkulu weqiniso, uNkulunkulu ophilayo neNkosi yaphakade; ngentukuthelo yakhe, umhlaba uyazamazama; izizwe azinakumelana nolaka lwakhe.
“Uyakukhuluma kanje kubo: ‘Onkulunkulu abangalenzanga izulu nomhlaba, bayakubhubha emhlabeni naphansi kwezulu.’ ”
Umhlaba wawenza ngamandla akhe, izwe walimisa ngokuhlakanipha kwakhe, izulu walendlala ngokuqonda kwakhe.
Lapho eduma ngezwi lakhe, kuhlokoma amanzi ezulwini; ukhuphula inkungu emikhawulweni yomhlaba, athumele umbani nemvula, akhiphe umoya ezinqolobaneni zakhe.
Bonke abantu bayiziphukuphuku, abanalwazi; bonke ababumbi bathelwe ngehlazo nezithombe zabo ezibunjiweyo ziyinkohliso, azinamphefumulo.
Ziyize, umsebenzi wokuhlekwa, ngesikhathi abayojeziswa ngaso, ziyakushabalala.
Isabelo sikaJakobe asifani nalaba, ngokuba nguye okubumbileyo konke; u-Israyeli uyisizwe nefa lakhe; nguSimakade Wamabandla igama lakhe.
Qoqa umshuqulo wakho emhlabathini, wena ohlezi ekuvinjezelweni.
Ngokuba usho kanje uSimakade, uthi: “Bheka, ngalowo mzuzu ngiyozijwiba izakhamuzi zezwe, ngibacindezele ukuze bakuzwe lokho.”
Maye kimi ngenxa yokulimala kwami! Isilonda sami sibi. Kepha mina ngithi: “Impela lokhu yisifo, ngizosibekezelela.”
Ithende lami libhidliziwe, izintambo zalo zonke zigqatshuliwe; abantwana bami bangishiyile, abasekho, akasekho ongangigxumekela ithende lami futhi, nongigaxela amakhethini ami.
Abelusi bayiziphukuphuku, abazange bamfune uSimakade; ngakho-ke abaphumelelanga, nomhlambi wabo wonke uhlakazekile.
Izwi lombiko liyasondela, nokuzamazama okukhulu okuvela ezweni enyakatho, ukuba kwenze imizi yakwaJuda ibe yincithakalo, indawo ehlala amakhanka.
Simakade, ngiyazi ukuthi indlela yomuntu ayikho ezandleni zakhe ukuba aqondise izinyathelo zakhe uma ehamba.
Simakade, ngiqondise ngobulungiswa, kungabi ngentukuthelo yakho, funa ungiphendule into engelutho.
Thululela ulaka lwakho phezu kwabezizwe abangakwaziyo, naphezu kwemindeni engalibizi igama lakho, ngokuba bamdlile uJakobe; yebo, bamdlile bamqeda nya, balenza incithakalo ikhaya lakhe.
Izwi elafika kuJeremiya livela kuSimakade, lithi:
“Zwanini amazwi alesi sivumelwano, niwatshele bonke abantu bakwaJuda nezakhamuzi zaseJerusalema,
uyothi kubo usho kanje uSimakade uNkulunkulu ka-Israyeli, uthi: ‘Uqalekisiwe umuntu ongawalaleli amazwi alesi sivumelwano,
engayala ngaso okhokho benu mhla ngibakhipha eGibhithe, esithandweni sensimbi, athi: “Yizwani izwi lami, nikwenze konke lokho enginiyala ngakho, niyoba ngabantu bami, Mina ngibe nguNkulunkulu wenu;
ukuba ngifeze isifungo engasifunga kokhokho benu, sokubanika izwe elichichima ubisi noju,” njengoba kwenzeka namuhla.’ ” Ngase ngiphendula ngithi: “Amen, Simakade.”
USimakade wayesethi kimi: “Memezela wonke lawa mazwi emizini kwaJuda nasemigwaqweni eJerusalema, uthi: ‘Yizwani amazwi alesi sivumelwano, niwenze.
Ngokuba okhokho benu ngabayala nokubayala ngosuku engabakhuphula ngalo eGibhithe, kuze kube namuhla, ngabayala ngathi: “Lalelani izwi lami.”
“ ‘Kepha abalalelanga, abayibekanga indlebe yabo kulo, kodwa bahamba, kwaba yilowo nalowo ngobulukhuni benhliziyo yakhe embi. Ngehlisela phezu kwabo wonke amazwi alesi sivumelwano engabayala ukuba basigcine, kodwa abasigcinanga.’ ”
USimakade wayesethi kimi: “Kukhona uzungu phakathi kwabantu bonke bakwaJuda nezakhamuzi zaseJerusalema.
Babuyele eziphambukweni zokhokho babo bokuqala, abala ukulalela amazwi ami, balandela abanye onkulunkulu ukuba babakhonze. Indlu ka-Israyeli nendlu kaJuda zasephula isivumelwano sami engasenza nokhokho babo.
Ngakho-ke usho kanje uSimakade, uthi: ‘Bheka, ngiyakwehlisela inhlekelele phezu kwabo abangayukuphunyuka kuyo; bayakukhala kimi, kepha angiyukubezwa.
Imizi yakwaJuda nabakhileyo eJerusalema bayakuhamba, bakhale konkulunkulu ababashisela impepho, kepha abayukubasindisa nakancu, lapho behlelwa yinhlekelele.
Ngokuba ngangobuningi bemizi yenu, bangako onkulunkulu bakho, Juda, nanjengomumo wemigwaqo eJerusalema, angako ama-althare eniwamisele le nto enengekayo, ama-althare enishisela kuwo uBhali impepho.’
“Ngalokho-ke ungabakhulekeli laba bantu, ungabenzeli izinxuso; ungabakhulekeli, ngokuba angiyukubalalela mhla bekhala kimi ngenhlekelele yabo.
“Unalungelo lini othandiweyo wami endlini yami, lapho enza izinto eziningi ezimbi na? Inyama eyehlukaniselwe ingasiguqula yini isijeziso sakho, ujabule ngokwenza okubi na?”
USimakade wabiza igama lakho ngokuthi umnqumo oluhlaza obukekayo, onezithelo ezinhle. Kepha ngomsindo wesiphepho esikhulu, uyakuphemba umlilo kuwo, kuphuke amagatsha awo.
“USimakade Wamabandla owakutshala ukhulume okubi ngawe, ngenxa yobubi obenziwe yindlu ka-Israyeli nendlu yakwaJuda, bachukuluza ulaka lwami ngokushisela uBhali impepho.”
USimakade wangazisa, ngase ngazi; wangibonisa izenzo zabo.
Kepha mina nganginjengewundlu eliholwa liyohlatshwa; ngangingazi ukuthi kanti bangicebela amacebo, bethi: “Masisicekele phansi isihlahla nezithelo zaso, simnqume ezweni labaphilayo, ukuze igama lakhe lingabe lisakhunjulwa.”
Simakade Wamabandla, mehluleli olungileyo, ovivinya ingqondo nenhliziyo, mangibone impindiselo yakho kubo, ngokuba indaba yami ngiyibeke kuwe.
“Ngakho-ke usho kanje uSimakade kubantu base-Anathothi abazingela ukuphila kwakho, bethi: ‘Ungalokothi uphrofethe egameni likaSimakade, ukuze singakubulali ngezandla zethu.’
“Ngakho-ke usho kanje uSimakade Wamabandla, uthi: ‘Bheka, ngiyakubajezisa; izinsizwa ziyokufa ngenkemba. Amadodana namadodakazi azo ayobulawa yindlala,
akuyukuba bikho nsali kubo, ngokuba ngiyakubehlisela inhlekelele abantu base-Anathothi, ngonyaka wokujeziswa kwabo.’ ”
Wena, Simakade, ulungile, noma ngikumangalela. Nokho ngiyakukhuluma nawe ngokwehlulela: kungani indlela yezikhohlakali ichuma na? Kungani banethezeke abakhohlisi boqobo na?
Ubatshalile, futhi bagxila; bayakhula, futhi bathela izithelo; igama lakho lisezindebeni zemilomo yabo, kodwa izinhliziyo zabo zikude nawe.
Kepha Wena Simakade uyangazi, futhi uyangibona, uhlola inhliziyo yami ukuthi injani kuwe. Bahudule njengezimvu ziyokuhlatshwa, ubalungisele usuku lokuhlatshwa.
Kuyoze kube nini izwe ligagadekile, nemifino yonke yasendle ibuna na? Ngobubi babakhileyo kulo; izilwane nezinyoni kuyashabalala, ngokuba bathi: “Akayukusibona isiphetho sethu.”
“Ugijime nemigundatshani, yakukhathaza, pho ungancintisana kanjani namahhashi na? Uma ukhubeka ezweni eliphephile, uyakwenzenjani ehlozini eJordani na?
Abafowenu nabendlu kayihlo nabo bakukhohlisile, bamemeza bekhala emva kwakho; ungabethembi, noma bekhuluma okuhle kuwe.”
“Ngiyishiyile indlu yami, ngalilahla ifa lami, nginikele ngothandiweyo womphefumulo wami, esandleni sezitha zakhe.
Ifa lami selingiphendukele lanjengebhubesi ehlathini, liyangibhongela, ngalokho-ke ngiyalizonda.
Ngabe ifa lami liyinqe elimanakanaka kimi na? Ngabe amanqe alihaqe nxazonke na? Hambani, nibuthe zonke izilwane zasendle, nizilethe, zidle.
Abelusi abaningi basicekele phansi isivini sami, basinyathela isabelo sami, ifa lami elinxanelekayo balenze ihlane eliyincithakalo.
Basenze incithakalo, siyincithakalo, siyalila phambi kwami. Izwe lonke liyincithakalo, kepha akekho onendaba ngalokho.
Ababhubhisi batheleke bevela kuzo zonke izindawo eziphakemeyo, ezingamaqwaqwasi ehlane; inkemba kaSimakade iyabhubhisa, kusukela kulo mkhawulo womhlaba kuya komunye, akukho ukuthula kubantu.
Bahlwanyela ukolo, bavune ameva; bazikhandlile, kodwa abazuzanga lutho. Yebo, dumalani ngenxa yezithelo zenu ngenxa yokuvutha kolaka lukaSimakade.”
Usho kanje uSimakade ngabo bonke omakhelwane bami abakhohlakele, abaqhwaga ifa engabanika lona abantu bami u-Israyeli, uthi: “Bheka, ngiyakubasiphula ezweni lakubo, nendlu kaJuda ngiyisiphule phakathi kwabo.
Kuyakuthi uma sengibasiphulile, ngibuye ngibahawukele, ngibabuyise, kube yilowo nalowo efeni lakhe nasezweni lakhe.
Kuyakuthi uma bezifunda nokuzifunda izindlela zabantu bami, ukuba bafunge igama lami, bathi: ‘Kuphila kukaSimakade,’ njengalokhu befundise abantu bami ukufunga uBhali, bayakuzinziswa phakathi kwabantu bami.
Kepha uma isizwe singalaleli, ngiyakusisiphula nokusisiphula, ngisibhubhise,” kusho uSimakade.
USimakade washo kanje kimi, wathi: “Hamba uzithengele indwangu yelineni yasokhalo, uyibhince okhalo lwakho, ungayihlanzi ngamanzi.”
Ngayithenga indwangu yasokhalo njengokusho kwezwi likaSimakade, ngayibhinca okhalo lwami.
Izwi likaSimakade lafika kimi ngokwesibili, lathi:
“Thatha indwangu yasokhalo oyithengile, esokhalo lwakho, usuke uhambe, uye ePheratha, uyifihle lapho emfantwini wedwala.”
Ngahamba, ngayifihla ePheratha njengalokhu uSimakade ayengiyalile.
Kwathi ngasekupheleni kwezinsuku eziningi, uSimakade wathi kimi: “Suka uye ePheratha, uthathe lapho indwangu yasokhalo engakuyala ukuba uyifihle lapho.”
Ngaya ePheratha, ngemba, ngayithatha indwangu yasokhalo lapho ngangiyifihle khona, bheka, indwangu yasokhalo yayonakele, ingasenamsebenzi walutho.
Izwi likaSimakade lafika kimi, lathi:
“Usho kanje uSimakade: ‘Ngiyakukubhubhisa kanjalo ukuziqhenya kukaJuda, nokuzigqaja kweJerusalema.
Laba bantu ababi bayenqaba ukulalela amazwi ami, bahamba ngobulukhuni benhliziyo yabo, balandela abanye onkulunkulu ukuba babakhonze, nokuba bakhuleke kubo, bazofana nale ndwangu yasokhalo, engasenamsebenzi walutho.
Njengalokhu indwangu yasokhalo inamathela okhalo lomuntu, kanjalo ngiyenze indlu yonke yakwa-Israyeli, nayo yonke indlu yakwaJuda ukuba zinamathele kimi,’ kusho uSimakade, ‘ukuba babe ngabantu bami, ngizenzele ngabo igama, nodumo, nendumiso, kodwa kabalalelanga.’
“Uyakubatshela leli lizwi, uthi: ‘Usho kanje uSimakade uNkulunkulu ka-Israyeli, uthi: Zonke izimvaba ziyakugcwaliswa ngewayini.’ Bayakuthi kuwe: ‘Impela asazi yini ukuthi kungani zonke izimvaba zigcwaliswe ngewayini na?’
Uyokuthi kubo: ‘Usho kanje uSimakade, uthi: Bheka, ngizakuzigcwalisa ngokudakwa, zonke izakhamuzi zakuleli lizwe; amakhosi ahlala esihlalweni sobukhosi sikaDavide, abaphristi, abaphrofethi, nabo bonke abakhileyo eJerusalema.
Ngiyobaphahlaza; omunye kumfowabo, oyise nezingane kanyekanye,’ ” kusho uSimakade. “Angiyukubahawukela, angiyukuba nasisa, angiyukuba nasihe kubo, ukuba ngingababhubhisi.”
Yizwani, nibeke indlebe, ningaziqhenyi, ngokuba uSimakade ukhulumile.
Mnikeni uSimakade uNkulunkulu wenu udumo, engakabulethi ubumnyama, zingakakhubeki izinyawo zenu ezintabeni zokuhwalala, niyokuthi nisabheke ukukhanya akuphendule ithunzi lokufa, akwenze kube yisigayegaye sobumnyama.
Kepha uma ningalaleli; umphefumulo wami uyakukhala ngasese, ngenxa yokuzigqaja kwenu; iso lami liyakukhala kalusizi, liphophoze izinyembezi; ngokuba umhlambi kaSimakade uthunjiwe.
Yisho enkosini nasendlovukazini eyizalayo, uthi: “Yehlani ezihlalweni zenu zobukhosi, ngokuba umqhele wenu wodumo ekhanda uwile.”
Imizi eNegevu ivaliwe, akekho oyivulayo. UJuda wonkana uthunjiwe, uthunjwe ngokupheleleyo.
Phakamisani amehlo enu, nibone abavela enyakatho; uphi umhlambi enaphiwa wona, izimvu zakho ezinhle na?
Uyakuthini lapho emisa phezu kwakho labo okade ubafundisile ukuba babe ngabangani bakho, babe ngumholi na? Awuyukukhungathwa yini yimihelo njengowesifazane obelethayo na?
Uyakuthi enhliziyweni yakho: “Zingehleleleni lezi zinto na?” Ngobukhulu bokona kwakho, isidwaba sakho siphenyiwe, nomzimba wakho wahlukunyezwa.
UmKhushe angasiguqula yini isikhumba sakhe, nengwe amabala ayo na? Nani-ke ningekwenze okuhle, nina eniqeqeshelwe ukwenza okubi.
“Ngakho-ke ngiyakubasakaza njengamakhoba epheshulwa ngumoya wasehlane.
Lokhu kuyisabelo sakho, isabelo engikulinganisele sona,” kusho uSimakade, “ngokuba wangikhohlwa wethembela emangeni.
Ngizakuphenya isidwaba sibe sebusweni bakho, bubonakale ubunqunu bakho.
Ukuphinga kwakho, nomsindo wokushabashabeka kwakho ukhanukela ukufeba, nezinengiso zakho; ngikubonile emagqumeni asendle. Maye, kuwe Jerusalema! Awuhlambulukile. Kuyoze kube nini na?”
Izwi likaSimakade elafika kuJeremiya maqondana nesomiso, lathi:
“UJuda uyalila, amasango akhe awile, balilela izwe; ukukhala kweJerusalema kwenyukele phezulu.
Izikhulu zakhona zithumele izinceku zazo ukuyokha amanzi emithonjeni, kodwa azitholanga manzi; zibuye nezimbiza zazo zingenalutho, zinamahloni, zijabhile, zimboze amakhanda azo.
Abalimi banamahloni, bamboze amakhanda abo, ngenxa yomhlabathi ogcwele izimfa, ngokuba akufikanga mvula ezweni.
Yebo, nendluzelakazi izalele endle, yalishiya lapho izinyane, ngokuba abukho utshani.
Izimbongolo zasendle zima emadulini angamaqwaqwasi, zikhefuzele njengamakhanka; amehlo azo ayafiphala, ngoba abukho utshani.”
Simakade, nakuba izono zethu zifakaza ngathi, kodwa yenza okuthile, ngenxa yegama lakho, ngokuba ukuhlubuka kwethu kukhulu; sonile kuwe.
Themba lika-Israyeli, msindisi wakhe ngesikhathi sokuhlupheka; kungani unjengomfokazi ezweni, nanjengesihambi esingenise ukufihla ikhanda busuku bunye na?
Kungani ufana nomuntu omangele, nanjengeqhawe elingenakusindisa na? Wena Simakade, uphakathi kwethu; sibizwa ngegama lakho, ungasishiyi.
Usho kanje uSimakade kulaba bantu, uthi: “Njengoba bethandile ukuzulazula, bangazinqanda izinyawo zabo; uSimakade akabemukelanga. Manje uyakukhumbula isiphambeko sabo, abajezisele izono zabo.”
USimakade wathi kimi: “Ungabakhulekeli laba bantu ukuba babe nokuhle.
Bayakuzila ukudla, kodwa angiyukuzwa ukunxusa kwabo; bayakunikela ngomnikelo wokushiswa nangowokusanhlamvu; angiyukuthokoza ngabo, kodwa ngiyakubaqeda ngenkemba, ngendlala, nangobhubhane.”
Ngase ngithi: “Maye! Nkosi Simakade, abaphrofethi bathi kubo: ‘Aniyukubona nkemba, aniyukwehlelwa yindlala, kodwa ngiyakuninika ukuthula okungenakuphela kule ndawo.’ ”
USimakade wayesethi kimi: “Abaphrofethi baphrofetha amanga egameni lami. Angibathumanga, angibamisanga futhi angikhulumanga kubo. Baphrofetha kini imibono engamanga, nokubhula, nokuyize, nenkohliso yezingqondo zabo.
Ngakho-ke usho kanje uSimakade ngabaphrofethi abaphrofetha egameni lami, ngingabathumanga, bathi: ‘Akuyukuba bikho nkemba nandlala kuleli lizwe,’ bazokufa ngenkemba, nangendlala laba baphrofethi.
Abantu abaphrofetha kubo bayakuphonswa emigwaqweni eJerusalema ngenxa yendlala nenkemba. Akuyukuba bikho muntu oyobangcwaba, bona nomkabo, namadodana namadodakazi abo, ngiyakuthela okubi phezu kwabo.
“Uyokhuluma leli lizwi kubo, uthi: “ ‘Amehlo ami mawagobhoze izinyembezi imini nobusuku, zinganqamuki, ngokuba intombi, indodakazi yabantu bami, ilimele kakhulu impela; ukulimala kwayo kuyenze yagula kakhulu.
Uma ngiphumela endle, ngibona ababulewe ngenkemba; nalapho ngingena emzini, kunezifo, nendlala, ngokuba umphrofethi nomphristi bahambele ezweni abangazi lutho ngalo.’ ”
Ngabe uJuda usumlahle impela na? Umphefumulo wakho usunengiwe yini iZiyoni na? Usishayeleni size singabi nakuphiliswa na? Besibheke ukuthula, kodwa akukho okuhle; nesikhathi sokusindiswa, kodwa luvalo lodwa.
Simakade, siyabazi ububi bethu nokona kokhokho bethu, ngokuba sonile kuwe.
Ungasideleli ngenxa yegama lakho, ungaseyisi isihlalo sobukhosi sodumo lwakho; sikhumbule, ungasephuli isivumelwano sakho nathi.
Ngabe kukhona yini phakathi konkulunkulu babezizwe abayize onganisa imvula na? Amazulu angaziletha yini izihlambi na? Akunguwe yini Simakade esiyakukulindela ngesineke na? Ngokuba nguwe owenze konke lokhu.
USimakade wathi kimi: “Noma bekungama uMose noSamuweli phambi kwami, inhliziyo yami ibingeke ibe kulaba bantu. Basuse phambi kwami, mabaphume bahambe.
Kuyakuthi lapho bethi kuwe: ‘Sizoya kuphi na?’ Uyobatshela uthi: ‘Usho kanje uSimakade, uthi: “ ‘Abanqunyelwe ukufa, bayokufa; abanqunyelwe inkemba, inkemba; nabendlala, indlala; nabokuthunjwa, ukuthunjwa.’
“Ngiyakumisa phezu kwabo izinhlobo ezine,” kusho uSimakade: “inkemba yokubulala, izinja zokuhudula, izinyoni zezulu nezilwane zomhlaba zokudweshula nokubhubhisa.
Ngiyakubenza babe yinto engafunwa emibusweni yonke yomhlaba ngenxa yalokho okwenziwa nguManase, indodana kaHezekiya, inkosi yakwaJuda, eJerusalema.
“Ngubani oyakukuhawukela wena Jerusalema na? Ngubani oyakuba nozwelo kuwe na? Ngubani oyakuphambuka ukubuza impilo na?
Wena ungishiyile,” kusho uSimakade, “wabuyela emuva; ngiselulile isandla sami kuwe, ngakubhubhisa, ngikhathele ukukuhawukela.
Ngibelile ngembenge emasangweni ezwe, ngabephuca izingane, ngabhubhisa abantu bami, kodwa abaphendukanga ezindleleni zabo.
Abafelokazi babo baningi kimi kunesihlabathi solwandle; ngehlisele phezu kwawonina bezinsizwa umbhubhisi emini kwabha, ngehlisele phezu kwakhe ngokushesha, ukwesaba nengebhe.
Owazala abayisikhombisa usedangele, uyakhefuzela efuna umoya; ilanga limshonele emini; unamahloni, uyayangaza. Insali yabo ngiyakuyinikela enkembeni, phambi kwezitha zabo,” kusho uSimakade.
Maye, maye kimi lokhu ungizale ngaba ngumuntu wokuphikisana, nomuntu wokuxabanisa emhlabeni wonke! Angebolekanga lutho futhi angebolekwanga lutho; nokho bonke bayangiqalekisa.
USimakade, wathi: “Ngiyakukukhulula kube kuhle; impela isitha ngisenze sikunxuse ngesikhathi esibi nangesikhathi sokuhlupheka.
“Insimbi ingephuka yini, insimbi evela enyakatho, nethusi na?
Ngiyakunikela ngemfuyo yakho nangengcebo yakho, kube yimpango; ungakhokhelwa lutho ngakho, ngenxa yazo zonke izono zakho kuzo zonke izifunda zakho.
Ngiyakukwenza ukuba ukhonze izitha zakho ezweni ongalaziyo, ngokuba kuphenjwe umlilo olakeni lwami; uyakunishisa.”
Simakade, Wena uyazi; ngikhumbule, unginake, ungiphindiselele kwabangizingelayo; ungangisusi ngenxa yolaka lwakho, yazi ukuthi ngenxa yakho ngithwale ihlazo.
Amazwi akho afunyanwa, ngawadla; amazwi akho aba ngukujabula kimi, nokuthokoza kwenhliziyo yami, ngokuba ngibizwa ngegama lakho, Simakade Nkulunkulu Wamabandla.
Angihlalanga emhlanganweni wabahlekayo, futhi angizange ngithokoze; ngahlala ngedwa ngenxa yobunzima besandla sakho, ngokuba ungigcwalise ngentukuthelo.
Kungani ubuhlungu bami bungapheli, nenxeba lami lingelapheki na? Liyala ukuphola; impela kimi ufana nomfudlana okhohlisayo, nanjengamanzi angethembekile.
Ngakho-ke usho kanje uSimakade, uthi: “Uma uphenduka, ngiyakukwemukela, uyakuma phambi kwami. Uma uveza okuyigugu phakathi kokungenamsebenzi, uyakuba ngumlomo wami. Yibo abazobuyela kuwe, akusiwena ozophendukela kubo.
Ngiyakukwenza ukuba ube lugange lwethusi kulaba bantu; bayakulwa nawe, kepha abayukukwahlula, ngokuba Mina nginawe ukukusindisa nokukophula,” kusho uSimakade.
“Ngiyakukukhulula esandleni sababi, ngikuhlenge esandleni sabanonya.”
Izwi likaSimakade lafika kimi, lathi:
“Ungazithatheli umfazi, ungazali madodana namadodakazi kule ndawo.”
Ngokuba usho kanje uSimakade ngamadodana namadodakazi azalwa kule ndawo, nangonina abawabelethayo, nangoyise abawazalayo kuleli lizwe, uthi:
“Bayakubulawa yizifo, bangalilelwa, futhi bangangcwatshwa; bayakufana nendle emhlabathini, baqothulwe ngenkemba, babhujiswe yindlala, izidumbu zabo ziyakuba ngukudla kwezinyoni zezulu, nezilwane zomhlaba.”
Usho kanje uSimakade, uthi: “Ungangeni endlini okulilwa kuyo, ungayi ukuyolila, ungabakhombisi uzwelo, ngokuba ngikususile ukuthula kwami kulaba bantu, kanye nomusa, nobubele bami,” kusho uSimakade.
“Izikhulu nabantukazana bayofela kuleli lizwe, abayukungcwatshwa, abayukulilelwa. Abantu abayukuzisika, abayukuwaphuca amakhanda ngenxa yabo,
akuyukuba khona obahlephulela isinkwa sokulila ukuba abaduduze ngabafileyo, abayukuphuziswa endebeni yokududuza ngoyise nangonina.
“Awuyukungena endlini yedili ukuba uhlale nabo, udle, uphuze nabo.
Ngokuba usho kanje uSimakade Wamabandla, uNkulunkulu ka-Israyeli, uthi: ‘Ngizakuqeda kule ndawo, phambi kwenu, nasemihleni yenu, umsindo wokujabula nowentokozo, izwi lomyeni nezwi likamakoti.’
“Kuyakuthi lapho ubatshela laba bantu wonke lawa mazwi, bayokuthi kuwe: ‘USimakade ukhulumeleni wamelana nathi, ngayo yonke le nhlekelele enkulu kangaka na? Buyini ububi bethu na? Siyini isono esone ngaso kuSimakade uNkulunkulu wethu na?’
Uyakuthi kubo: ‘Kungenxa yokuthi okhokho benu bangishiya,’ kusho uSimakade, ‘balandela abanye onkulunkulu, babakhonza, bakhuleka kubo, bangishiya, abawugcinanga umthetho wami.
Nani nenze okubi ukwedlula okhokho benu, ngokuba yilowo nalowo ulandela inkani nobubi obusenhliziyweni yakhe, aningilaleli.
Ngakho-ke ngizonixosha kuleli lizwe, niye ezweni eningalaziyo, nina nokhokho benu. Lapho niyakukhonza abanye onkulunkulu imini nobusuku, ngokuba angiyukuniphatha ngobubele.’
“Ngalokho-ke bheka, izinsuku ziyeza,” kusho uSimakade, “lapho kungaseyukuthiwa: ‘Ngifunga ngiyagomela phambi kukaSimakade owakhuphula abakwa-Israyeli eGibhithe,’
kodwa sekuyothiwa: ‘Ngifunga ngiyagomela phambi kukaSimakade owabakhuphula abakwa-Israyeli enyakatho nasemazweni wonke lapho ayebaxoshele khona;’ ngiyakubabuyisela ezweni lakubo, engalinika okhokho babo.
“Ngokuba, niyabona, ngizakuthumela abadobi abaningi babadobe,” usho kanje uSimakade, “ngithumele nabazingeli abaningi, babazingele kuzo zonke izintaba, nakuwo wonke amagquma, nasemifantwini yamadwala.
Ngokuba amehlo ami ayazibona zonke izindlela zabo; azisithekile ebusweni bami, nobubi babo abufihlekile emehlweni ami.
Ngizoqala ngokubashaya ngokuphindiwe ngenxa yobubi babo nezono zabo, ngokuba balingcolisile izwe lami ngezidumbu zezinto ezinengekayo, ifa lami baligcwalisile ngezinengiso zabo.”
Simakade, mandla ami nenqaba yami, siphephelo sami ngosuku lokuhlupheka, bayakuza kuwe abezizwe, bevela emajukujukwini omhlaba, bathi: “Obaba badla ifa elingamanga kuphela, okuyize, okungenanzuzo.
Umuntu angazenzela yini onkulunkulu na? Laba abasiye uNkulunkulu.
“Ngakho-ke ngiyakubazisa, ngalesi sikhathi ngiyakubenza bazi isandla sami namandla ami, bayokwazi ukuthi igama lami nginguSimakade.”
“Isono sakwaJuda silotshwe ngosiba lwensimbi lokuloba; siqoshwe ngesihloko sedayimane ezibhebheni zenhliziyo yabo, nasezimpondweni zama-althare enu.
Abantwana babo basawakhumbula ama-althare abo nawo-Ashera babo ngasemithini eluhlaza, emagqumeni aphakemeyo.
Intaba yami ezweni, impahla nengcebo yenu yonke ngiyakukunikela kube yimpango, kanye nezindawo zenu eziphakemeyo ngenxa yezono ezifundeni zenu zonke.
Niyakulilahla nina uqobo ifa lenu enganinika lona; ngiyonenza nikhonze izitha zenu ezweni eningalaziyo, ngokuba niphembe umlilo wolaka lwami oyakuvutha kuze kube phakade.”
Usho kanje uSimakade, uthi: “Uqalekisiwe umuntu othembela kubantu, owenza izikhwepha zakhe zibe yisihlangu sakhe, nonhliziyo yakhe isukile kuSimakade.
Uyakuba njengesihlahla ogwadule, akayukukubona okuhle noma kuza kuye, uyakuhlala ezindaweni ezigagadekile ehlane, ezweni likasawoti okungahlali muntu kulo.
“Ubusisiwe umuntu othembela kuSimakade, nothemba lakhe linguSimakade.
Uyakufana nesihlahla esitshalwe ngasemanzini, esimpande zaso sizenabisele ngasemfuleni. Akayukwesaba lapho ebona ukushisa kuza, amaqabunga aso ahlala eluhlaza, ngonyaka wesigagadu awanakukhathazeka, futhi awayeki ukuthela izithelo.
“Inhliziyo iyakhohlisa ngaphezu kwakho konke, futhi ayelapheki; ngubani ongayiqonda na?
“Mina Simakade ngiyayiphenya inhliziyo, ngihlole nezinso; ukuba nginike yilowo nalowo njengokwezindlela zakhe, nanjengezithelo zezenzo zakhe.”
Owenza ingcebo ngokungalungi ufana nentendele echamusela ingazalelanga; iyakumshiya dengwane esaphile ingxenye nje yezinsuku zakhe, ekugcineni abe yisiwula.
Indawo yendlu yethu engcwele, iyisihlalo sobukhosi esikhazimulayo nesiphakemeyo.
Simakade, themba lika-Israyeli, bonke abakushiyayo bayakujabha; abasuka kimi bayakulotshwa emhlabathini, ngokuba bamshiyile uSimakade, umthombo wamanzi aphilayo.
Simakade, ngiphulukise, ngiyakuphuluka, ngihlenge, ngiyakuhlengwa, ngokuba uludumo lwami.
Bheka, bathi kimi: “Liphi izwi likaSimakade na? Malize phela.”
Kepha angiyekanga ukuba ngumelusi okusebenzelayo, futhi angilufisanga usuku olwesabekayo; Wena uyakwazi engakushoyo, ngiphambi kobuso bakho.
Ungabi ngongethusayo, ngokuba uyisiphephelo sami ngosuku lwenhlekelele.
Mabajabhiswe abangizingelayo, kodwa mina mangingadunyazwa; behlisele ngosuku lwenhlekelele, ubabhubhise ngokubhubha okuphindiweyo.
Usho kanje kimi uSimakade, uthi: “Hamba ume esangweni lamadodana abantu, okungena kuphume kulo amakhosi akwaJuda, nasemasangweni wonke eJerusalema,
uthi kuwo: ‘Yizwani izwi likaSimakade, nina makhosi akwaJuda, nani nonke baJuda, nezakhamuzi zonke zaseJerusalema eningena ngalawa masango.
Usho kanje uSimakade, uthi: “Xwayani ngenxa yemiphefumulo yenu, ukuba ningathwali mthwalo ngosuku lwesabatha, ningawungenisi emasangweni eJerusalema,
futhi ningakhiphi mthwalo ezindlini zenu ngosuku lwesabatha, futhi ningenzi msebenzi, kodwa lungcweliseni usuku lwesabatha, njengalokhu ngabayala okhokho benu,
nakuba bengalalelanga, bengayibekanga indlebe kepha bazenza lukhuni izintamo zabo, abalalelanga, futhi abakwemukelanga ukuqondiswa.
Kuyakuthi uma ningilalelisisa,” kusho uSimakade, “ningangenisi mthwalo emasangweni alo muzi ngosuku lwesabatha, kepha nilungcwelise usuku lwesabatha, ukuze ningenzi noma yimuphi umsebenzi ngalo,
kuyongena emasangweni alo muzi, amakhosi nezikhulu abahlala esihlalweni sobukhosi sikaDavide, begibele ezinqoleni nasemahhashini, bona nezikhulu zabo, nabantu bonke bakwaJuda nabakhileyo eJerusalema, lo muzi uyakuba khona kuze kube phakade.
Bayakufika bevela emizini yakwaJuda, nasemizaneni ezungeze iJerusalema, ezweni lakwaBhenjamini, emagqumeni nakwelezintaba naseNegevu, belethe iminikelo yokushiswa, imihlatshelo, iminikelo yokusanhlamvu, nenhlaka, bayofika naneminikelo yokubonga endlini kaSimakade.
Kepha uma ningangilaleli nilungcwelise usuku lwesabatha, ningathwali mthwalo nxa ningena emasangweni eJerusalema ngosuku lwesabatha, ngiyophemba umlilo emasangweni alo, oyongqongqisa izinqaba zeJerusalema, futhi ongenakucinywa.” ’ ”
Izwi likaSimakade lafika kuJeremiya lithi:
“Suka wehlele endlini yombumbi, ngizokuzwisa lapho amazwi ami.”
Ngase ngehlela endlini yombumbi; wayenza umsebenzi wakhe esondweni lokubumba.
Kepha isitsha ayesenza ngebumba sonakala esandleni sombumbi. Wabuye wenza esinye isitsha kabusha njengalokhu ayefisa ukuba asenze.
Izwi likaSimakade lafika kimi, lithi:
“Ngingenzi yini kini ndlu ka-Israyeli njengoba umbumbi enza na?” kusho uSimakade. “Bhekani, njengebumba esandleni sombumbi, ninjalo esandleni sami, nina ndlu ka-Israyeli.
Ngesinye isikhathi ngiyakukhuluma ngesizwe nangombuso ukuthi ngizowusiphula, ngiwudilize, ngiwubhubhise,
leso sizwe engikhulume ngaso uma siphenduka ebubini baso; ngiyakuyeka ukwenza okubi ebengihlose ukukwenza kuso.
Ngesinye isikhathi ngiyakukhuluma ngesizwe nangombuso ukuwakha nokuwutshala;
nokho uma senza okubi emehlweni ami, singalilaleli izwi lami, ngiyakuyeka ukusenzela okuhle ebengithe ngiyakusenzela khona.
“Ngakho-ke yisho manje kubo bonke abakwaJuda nakuzo izakhamuzi zaseJerusalema, uthi: ‘Usho kanje uSimakade, uthi: Bhekani, nginibumbela inhlekelele, ngiceba icebo ngani; phendukani, kube yilowo nalowo endleleni yakhe embi, nenze izindlela zenu nezenzo zenu zibe zinhle.’ ”
Kepha bayakuthi: “Kuyize, siyakulandela amacebo ethu, senze, kube yilowo nalowo ngenkani kagovane wakhe omubi.”
Ngakho-ke usho kanje uSimakade, uthi: “Buzani phakathi kwabezizwe ukuthi ngubani owake wazizwa lezi zinto ezinjena na? Intombi yakwa-Israyeli yenze into embi kakhulu.
Ungqoqwane eLebhanoni wake washabalala yini emadwaleni asendle, namanzi aqandayo ayeka ukugeleza na?
Nokho abantu bami bangikhohliwe, bashisela okuyize impepho; bakhubeka ezindleleni zabo, emendweni yasemandulo, ukuba bahambe ngemikhondo, nangezindlela ezingahlelwanga;
benze izwe labo laba yincithakalo nento enximfelwa njalo; bonke abadlula khona bayakumangala, banikine ikhanda.
Njengomoya wasempumalanga ngiyakubahlakaza phambi kwezitha zabo, ngibabonise umhlane, hhayi ubuso, ngosuku lwenhlekelele yabo.”
Base bethi: “Wozani simakhele uzungu uJeremiya, ngokuba umyalelo awuyukulahleka ngomphristi, ukweluleka ngohlakaniphileyo, nezwi ngomphrofethi; wozani simhlasele ngamazwi ethu, singalinaki nelilodwa lamazwi akhe.”
Simakade, ngilalele, uzwe izwi labamelene nami.
Okuhle kuyaphindiselwa yini ngokubi na? Nokho bangimbele umgodi. Khumbula ukuthi ngema phambi kobuso bakho; ngakhuluma okuhle ngabo, nokunqanda ulaka lwakho kubo.
Ngakho-ke nikela abantwana babo endlaleni, ubanikele emandleni enkemba; abafazi babo bangabi nabantwana, babe ngabafelokazi, amadodana abo abulawe wubhubhane, nezinsizwa zabo zibhuqwe ngenkemba empini.
Makuzwakale ukukhala ezindlini zabo, lapho uthumela kubo abaphangi ngokuzumayo, ngokuba bambile umgodi wokungibamba, bafihlela izinyawo zami izingibe.
Kepha Wena Simakade uyawazi wonke amacebo abo okungibulala; ungabuthetheleli ububi babo, nesono sabo ungasesuli phambi kwakho, mabathelwe phansi phambi kwakho, ubajezise ngesikhathi usathukuthele.
Usho kanje uSimakade, uthi: “Hamba uthenge uphiso lobumba lombumbi, uthathe amanye amalunga abantu namanye amalunga abaphristi,
uphume, uye esigodini sendodana kaHinomu, esingasesikhaleni seSango Lezindengezi, umemezele khona amazwi engiyakuwasho kuwe.
Uyakuthi: ‘Yizwani izwi likaSimakade, nina makhosi akwaJuda, nani zakhamuzi zaseJerusalema. Usho kanje uSimakade Wamabandla, uNkulunkulu ka-Israyeli, uthi: Bhekani, ngiyakwehlisela inhlekelele kule ndawo, bonke abayokuzwa ngayo, izindlebe zabo ziyonkeneneza.
Ngokuba bangihlubukile, baphatha le ndawo njengeyabezizwe, bashisela abanye onkulunkulu impepho kuyo, ababengabazi, bona nokhokho babo, namakhosi akwaJuda, bagcwalisa le ndawo ngegazi labangenacala.
Bakha izindawo eziphakemeyo zikaBhali, ukuze bashise ngomlilo amadodana abo, abe yiminikelo yokushiswa kuBhali, engingakuyalanga, engingakhulumanga ngakho nokungangenanga enhliziyweni yami.
Ngakho-ke ziyeza izinsuku, kusho uSimakade, lapho le ndawo ingasayukubizwa ngokuthi iThofethi, noma yisigodi sendodana kaHinomu, kepha yiSigodi Sokubulala.
“ ‘Ngiyakuliphunzisa icebo likaJuda neJerusalema kule ndawo, ngibaqumbe phansi ngenkemba phambi kwezitha zabo, nangesandla sabafuna ukuphila kwabo. Izidumbu zabo ziyokuba ngukudla kwezinyoni zezulu nokwezilwane zasendle.
Lo muzi ngiyakuwenza ube yincithakalo nento enximfelwayo; bonke abadlula kuwo bayakumangala, banximfe ngenxa yazo zonke izinhlupheko zawo.
Ngiyakubenza badle inyama yamadodana neyamadodakazi abo, kube yilowo nalowo adle inyama kamakhelwane wakhe, ngesikhathi bevinjezelwe, bexinwe yizitha zabo nalabo abafuna ukuphila kwabo.’
“Uyakuphihliza uphiso phambi kwamadoda ohambe nawo,
uthi kuwo: ‘Usho kanje uSimakade Wamabandla, uthi: Ngiyakubaphihliza kanjalo laba bantu nalo muzi, njengokuphihlizwa kwesitsha sombumbi esingayukubuye sihlanganiseke; bayakumbelwa eThofethi, ngokuba akuyukuba bikho ndawo yokungcwaba.
Ngiyokwenza kanjalo nakule ndawo, kusho uSimakade, nakuzo izakhamuzi, ukuwenza lo muzi ube njengeThofethi.
Izindlu eJerusalema nezigodlo zamakhosi akwaJuda, ziyakungcola njengeThofethi, yebo, nakuzo zonke izindlu abashisele ibandla lasezulwini impepho, phezu kwezimpahla zazo, bathululela abanye onkulunkulu iminikelo yokuphuzwayo.’ ”
UJeremiya wayesebuya eThofethi lapho uSimakade ayemthume khona ukuba ayophrofetha; wema egcekeni lendlu kaSimakade, wathi kubantu bonke:
“Usho kanje uSimakade Wamabandla, uNkulunkulu ka-Israyeli, uthi: ‘Ngiyakwehlisela phezu kwalo muzi nemizana yawo, yonke inhlekelele engikhulume ngayo, ngokuba benze lukhuni intamo yabo, bangawalalela amazwi ami.’ ”
UPhashuri, indodana ka-Imeri umphristi owayeyisikhulu esengamele indlu kaSimakade, wamuzwa uJeremiya ephrofetha ngalezo zinto.
UPhashuri wamshaya uJeremiya, umphrofethi, wamfaka ejele elalingasesangweni elingenhla kwakwaBhenjamini, ngasendlini kaSimakade.
Ngakusasa uPhashuri wamkhipha uJeremiya ejele. UJeremiya wathi kuye: “USimakade akakubizanga ngokuthi unguPhashuri, kodwa unguMagori Misabibi.
Ngokuba usho kanje uSimakade, uthi: ‘Ngizokwenza uzesabe wena luqobo, wesatshwe nayibona bonke abangani bakho. Bayokuwa ngenkemba yezitha zabo, ubuka ngawakho amehlo, uJuda wonke ngiyakumnikela esandleni senkosi yaseBhabhele; iyobathumbela eBhabhele, ibabulale ngenkemba.
Futhi ngiyakunikela yonke ingcebo yalo muzi, yonke impahla yawo, nazo zonke izinto zawo eziyigugu, yebo, yonke ingcebo yamakhosi akwaJuda ngiyoyinikela esandleni sezitha zabo, ziyiphange, ziyithathe, ziyiyise eBhabhele.
Wena, Phashuri, nabo bonke abahlala endlini yakho, niyakuthunjwa. Uyakuya eBhabhele, kodwa uyofela khona, ungcwatshwe khona, wena nabo bonke abangani bakho ophrofethe kubo amanga.’ ”
Simakade, wangiyenga, ngayengeka; ube namandla kunami, wangehlula. Ngibe yinhlekisa usuku lonke, ngaklolodelwa yibo bonke.
Njalo uma ngikhuluma, ngiyakhala, ngimemeza ngobudlova nokubhujiswa; impela izwi likaNkulunkulu seliphenduke ihlazo kimi, nenhlekisa usuku lonke.
Lapho ngithi: “Angisayukumkhumbula, angisayukukhuluma egameni lakhe,” izwi lakhe linjengomlilo ovuthayo enhliziyweni yami, ovalelwe emathanjeni ami; ngikhathele ukulibamba, angikwazi.
Ngizwile ukuhleba kwabaningi, bethi: “Luvalo nxazonke. Mmangalele! Masimmangalele!” Bonke abangani bami sebelinde ukuwa kwami. “Mhlawumbe uyakuyengeka, simehlule, siziphindisele kuye.”
Kepha uSimakade unami njengeqhawe elinamandla, ngakho-ke abangizingelayo bayakukhubeka, abayukungehlula; bayakuba namahloni amakhulu, ngokuba abayukuphumelela, nehlazo labo eliphakade aliyukulibaleka.
Simakade Wamabandla, ovivinya olungileyo, obona izinso nenhliziyo, mangibone ukuphindisela kwakho kubo, ngokuba indaba yami ngiyibeke phambi kwakho.
Hlabelelani kuSimakade, mdumiseni uSimakade, ngokuba uwuhlengile umphefumulo wompofu esandleni sababi.
Luqalekisiwe usuku engazalwa ngalo; usuku umame angibeletha ngalo malungabusiswa.
Uqalekisiwe nomuntu owabika kubaba, ethi: “Uzalelwe umntwana wesilisa,” wamthokozisa kakhulu.
Lo muntu makabe njengemizi uSimakade ayigumbuqela ngokungenasihawu, makezwe ukukhala ekuseni, nokumemeza kokwethuka ngesikhathi sasemini,
ngokuba akangibulalanga ngisesiswini, umame abe yithuna lami, nesisu sakhe sahlala singikhulelwe njalo.
Ngaphumelani esibelethweni ukuba ngibone ukuhlupheka nosizi, nezinsuku zami ziphelele ehlazweni na?
Izwi elafika kuJeremiya livela kuSimakade, ngesikhathi inkosi uZedekiya ithumele uPhashuri kaMalikhiya noZefaniya, indodana kaMahaseya, umphristi, ethi kuye:
“Ake usibuzele kuSimakade, ngokuba uNebukhadinezari, inkosi yaseBhabhele, usihlasele. Mhlawumbe uSimakade angasenzela njengakuzo zonke izimangaliso zakhe ukuba akhuphuke, ayeke ukumelana nathi.”
UJeremiya wathi kubo: “Niyakusho kanje kuZedekiya, nithi:
‘Usho kanje uSimakade uNkulunkulu ka-Israyeli, uthi: “Ngiyakuziguqula izikhali zokulwa ezisezandleni zenu, enilwa ngazo nenkosi yaseBhabhele namaKhaledi anivimbezeleyo, angaphandle kogange, ngizozibuthela phakathi kulo muzi.
Mina ngiyakulwa nani ngesandla esiluliweyo, nangengalo enamandla, ngentukuthelo, ngokufutheka nangolaka olukhulu.
Ngiyakushaya abakhe kulo muzi, abantu nezilwane; bayobulawa yisifo esikhulu.
Emveni kwalokho,” kusho uSimakade, “ngiyakunikela uZedekiya, inkosi yakwaJuda, izinceku zakhe nabantu, kulo muzi, abayosinda obhubhaneni, enkembeni, endlaleni, esandleni sikaNebukhadinezari, inkosi yaseBhabhele, esandleni sezitha zabo, esandleni sabafuna ukuphila kwabo; uyakubabhubhisa ngenkemba, angabi naluzwelo, nasihe futhi angabi namusa kubo.” ’
“Uyakuthi kulaba bantu: ‘Usho kanje uSimakade, uthi: Ngibeka phambi kwakho indlela yokuphila nendlela yokufa.
Ozosala kulo muzi uyakufa ngenkemba, ngendlala, nangobhubhane; kodwa ozophuma azinikele kumaKhaledi anivimbezeleyo, uyakuphila, aphunyuke nokuphila kwakhe.
Ngokuba ngimelene nalo muzi, ukwenza okubi kuwo, kungabi ngokuhle,’ ” kusho uSimakade. “Uyakunikelwa esandleni senkosi yaseBhabhele, iwushise ngomlilo.”
“Nakwabendlu yenkosi yakwaJuda, yithi: ‘Yizwani izwi likaSimakade, elithi:
Wena ndlu kaDavide, usho kanje uSimakade, uthi: “ ‘Yenzani ubulungiswa ekuseni, nihlenge ophangiweyo esandleni somcindezeli, funa intukuthelo yami iphume njengomlilo, iyakuvutha, kungabi bikho oyicimayo ngenxa yobubi bezenzo zenu.
Bheka, ngimelene nani, nina enakhe esigodini, wena dwala lethafa, kusho uSimakade. Nina enithi: “ ‘Ngubani oyakwehla asihlasele na? Ngubani oyakungena ezindaweni esizifihle kuzo na?’
“ ‘Ngiyakunihambela, nginijezise njengokwezithelo zezenzo zenu, ngiyakuphemba umlilo, uqothule ihlathi lawo umuzi nakho konke okuwuzungezileyo, kusho uSimakade.’ ”
USimakade washo kanje, wathi: “Yehlela esigodlweni senkosi yakwaJuda, ukhulume lapho leli lizwi,
uthi: ‘Yizwa izwi likaSimakade, nkosi yakwaJuda, ohlezi esihlalweni sobukhosi sikaDavide, wena nezinceku zakho, nabantu bakho abangena ngalawa masango.
Usho kanje uSimakade, uthi: “Yenzani ubulungiswa nokulunga, nisindise ophangiweyo esandleni somcindezeli, ningabahlukumezi abafokazi nezintandane nabafelokazi, futhi ningabaphathi kabi, nangesihluku, ningachithi igazi elingenacala kule ndawo.
Impela uma niyokwenza lokhu ngokucophelela, kuyakungena emasangweni ale ndlu amakhosi ahleli esihlalweni sobukhosi sikaDavide egibele ezinqoleni nasemahhashini, wona kanye nezinceku zawo nabantu bawo.
Kepha uma ningawalaleli lawa mazwi, ngizifunga Mina uqobo,” kusho uSimakade, “ukuthi le ndlu iyophenduka incithakalo.” ’ ”
Ngokuba usho kanje uSimakade ngesigodlo senkosi yakwaJuda, uthi: “Ufana neGileyadi kimi, nanjengesicongo seLebhanoni, kodwa ngiyokwenza ube yihlane nemizi okungahlali muntu kuyo.
Ngizakumisa ababhubhisi abazomelana nawe; yilowo nalowo nesikhali sakhe; bayakugawula imisedari yakho yekhethelo, bayiphonse emlilweni.
“Izizwe eziningi ziyokwedlula kulo muzi, kube yileso naleso sithi kwesinye: ‘USimakade ukwenzeleni okunje kulo muzi omkhulu na?’
Bayophendula ngalokho, bathi: ‘Kungokuba basishiyile isivumelwano sikaSimakade uNkulunkulu wabo, bakhuleka kwabanye onkulunkulu, babakhonza.’ ”
Ningamkhaleli ofileyo, ningamlileli; kodwa mkhaleleni kalusizi othunjwayo, ngokuba akasayukubuya; kasayukuphinde alibone izwe azalelwa kulo.
Ngokuba usho kanje uSimakade kuShalumi, indodana kaJosiya, inkosi yakwaJuda, owaba yinkosi esikhundleni sikaJosiya uyise, futhi owaphuma kule ndawo, uthi: “Akasayukubuyela lapha,
kodwa uyofela kuleyo ndawo abamthumbele kuyo; akasayukubuye futhi alibone leli lizwe.”
“Maye, kowakha indlu yakhe ngokungalungi, namakamelo akhe aphezulu ngokungenabulungiswa, osebenzisa owezwe lakubo angamholeli, angamniki iholo ngomsebenzi wakhe,
othi: ‘Ngiyakuzakhela indlu enkulu enamakamelo abanzi aphezulu,’ azibhobozele amafasitela, bese eyimboza ngemisedari, ihuqwe ngokubomvu!
“Ukuncintisana ngemisedari ngabe kukwenza ube yinkosi yini na? Angithi uyihlo wadla, waphuza, wenza ubulungiswa nokulunga, kwaba kuhle kuye na?
Walumela udaba lompofu nontulayo, kwaba kuhle; lokhu akusikho yini ukwazi Mina na?” kusho uSimakade.
“Kepha amehlo akho nenhliziyo yakho kusenzuzweni engalungile kuphela, ekuchitheni igazi elingenacala, ekucindezeleni, nasekwenzeni ubudlova.”
Ngakho-ke usho kanje uSimakade ngoJehoyakimi, indodana kaJosiya, inkosi yakwaJuda, uthi: “Abayukumlilela bathi: ‘Hawu, mfowethu,’ noma, ‘Hawu, dadewethu!’ futhi abayukumkhalela bathi: ‘Hawu, nkosi,’ noma, ‘Maye, inkazimulo yakhe!’
Uyakungcwatshiswa okwembongolo, ahudulwe, alahlwe ngale kwamasango eJerusalema.”
“Khuphukela eLebhanoni, ukhihle isililo; phakamisa izwi lakho eBhashani, ukhale use-Abharimi, ngokuba zonke izithandwa zakho zibulewe.
Ngakhuluma kuwe kusakuhambela kahle, kepha wathi: ‘Ngeke ngilalele.’ Lokhu kungumkhuba wakho, kwasebusheni bakho; ukuba ungalilaleli izwi lami.
Umoya uyakubelusa bonke abelusi bakho, nezithandwa zakho ziyakuthunjwa; impela uyakuba namahloni, ujabhe ngenxa yabo bonke ububi bakho.
Wena ohlala eLebhanoni, osidleke sakho sisemisedarini, uyobubula kanjani lapho sewuhelelwa, usunemihelo njengowesifazane obelethayo na?
“Ngifunga ngiyagomela,” kusho uSimakade, “noma ngabe uKhoniya, indodana kaJehoyakimi, inkosi yakwaJuda, ube yindandatho yokusicilela esesandleni sami sokunene, bengiyokukuhluthula khona lapho,
ngikunikele esandleni sabafuna ukuphila kwakho, nasesandleni salabo obesabayo; esandleni sikaNebukhadinezari, inkosi yaseBhabhele, nasesandleni samaKhaledi.
Ngiyakukutshinga kwelinye izwe, wena nonyoko, izwe lapho ningazalelwanga khona; nifele lapho.
Kepha abayukubuyela ezweni, abalangazelela ukubuyela kulo.”
Le ndoda, uKhoniya, iyibhodwe elidelelwayo, noma isitsha esingafunwa muntu. Kungani ukuba yena nozalo lwakhe belahliwe, balahlelwa ezweni abangalaziyo na?
Wena lizwe, lizwe, lizwe, yizwa izwi likaSimakade!
Usho kanje uSimakade, uthi: “Le ndoda yilobeni ukuthi ayinamntwana, indoda engayukuphumelela ngezinsuku zayo. Ngokuba akukho namunye ozalweni lwayo oyophumelela, ahlale esihlalweni sobukhosi sikaDavide, abuye abuse kwaJuda.”
“Maye, kubelusi ababhubhisa, bahlakaze izimvu zedlelo lami!” kusho uSimakade.
Ngakho-ke usho kanje uSimakade uNkulunkulu ka-Israyeli ngabelusi abelusa abantu bami, uthi: “Nizihlakazile nazixosha izimvu zami, anizinakekelanga. Bhekani, ngizonijezisa ngenxa yobubi bezenzo zenu,” kusho uSimakade.
“Mina, ngiyakuyiqoqa insali yezimvu zami emazweni wonke, lapho ngangiyixoshele khona, ngiyibuyisele emadlelweni ayo; iyakuchuma, yande.
Ngiyakumisa phezu kwayo abelusi, abayakuyelusa; ayisayukwesaba, ayisayukuba naluvalo, futhi ayisekho eyolahleka kuyo,” kusho uSimakade.
“Bheka, izinsuku ziyeza,” kusho uSimakade, “lapho ngiyakumvusela uDavide iHlumela elilungileyo; liyakubusa njengenkosi, libe nokuhlakanipha, lenze ubulungiswa nokulunga ezweni.
Ezinsukwini zalo, uJuda uyakusindiswa, u-Israyeli ahlale elondekile; nanti igama eliyakubizwa ngalo, lokuthi: USIMAKADE UNGUKULUNGA KWETHU.
“Ngalokho bheka, izinsuku ziyeza,” kusho uSimakade, “abangasayukusho ngazo bathi: ‘Ngifunga ngiyagomela phambi kukaSimakade owakhuphula abakwa-Israyeli eGibhithe,’
kodwa bayothi: ‘Ngifunga uSimakade, owakhuphula, wabahola abozalo lwendlu ka-Israyeli enyakatho nasemazweni wonke, lapho ngangibaxoshele khona.’ Bayakuhlala ezweni lakubo.”
Mayelana nabaphrofethi. Inhliziyo yami yephukile ngaphakathi kwami, wonke amathambo ami ayathuthumela. Sengifana nomuntu odakiweyo, nanjengomuntu owahlulwe yiwayini; ngenxa kaSimakade, nangenxa yamazwi akhe angcwele.
Ngokuba izwe ligcwele iziphingi; izwe lomisile ngenxa yesiqalekiso; amadlelo asehlane omile. Baphila impilo embi, basebenzisa namandla abo ngokungafanele.
“Abaphrofethi nabaphristi bangcolile, nasendlini yami ngithole inkohlakalo yabo,” kusho uSimakade.
“Ngakho-ke indlela yabo iyakuba bushelelezi kubo; bayakududulelwa ebumnyameni, bawe kubo; ngiyobehlisela inhlekelele ngonyaka engiyobajezisa ngawo,” kusho uSimakade.
“Ngibone into eyihlazo kubaphrofethi baseSamariya: baphrofetha ngoBhali, badukisa abantu bami, u-Israyeli.
Ngibone into embi kubaphrofethi baseJerusalema; bayaphinga, bahamba ngobuqili, bakhuthaza abenza okubi ukuze kungaphenduki muntu ebubini bakhe; bonke banjengeSodoma kimi, nezakhamuzi zakhona zinjengeGomora.”
Ngakho-ke usho kanje uSimakade Wamabandla ngabaphrofethi, uthi: “Bheka, ngiyakubenza badle okubabayo, ngibaphuzise amanzi anobuthi, ngokuba ukuziphatha kabi kusuke kubaphrofethi baseJerusalema, kwasabalala ezweni lonke.”
Usho kanje uSimakade Wamabandla, uthi: “Ningawalaleli amazwi abaphrofethi abaphrofetha kini; bayanikhohlisa, bakhuluma umbono wenhliziyo yabo, hhayi okuphuma emlonyeni kaSimakade.
Bakhuluma njalo bethi kwabangidelelayo: uSimakade ukhulume wathi: ‘Niyakuba nokuthula.’ Bathi kubo bonke abahamba ngenkani yenhliziyo yabo: ‘Aniyukwehlelwa yinhlekelele.’
Ngokuba ngubani owake wema emkhandlwini kaSimakade ukuba abone, ezwe izwi lakhe na? Ngubani olizwile izwi lakhe, waligcina na?
Bheka, isivunguvungu sikaSimakade esinolaka siphumile. Isivunguvungu esikhwishizayo siyakhwishiza phezu kwamakhanda ezikhohlakali.
Intukuthelo kaSimakade ayiyukubohla aze akwenze lokho, ayifeze inhloso yenhliziyo yakhe. Ezinsukwini zokugcina niyakukuqonda nokukuqonda lokhu.
Mina angibathumanga abaphrofethi, nokho bagijima; angikhulumanga kubo, kodwa baphrofetha.
Uma babemile emkhandlwini wami, bebeyokwenza abantu bami bawezwe amazwi ami, bebeyobanqanda endleleni yabo embi, nasezenzweni zabo zokukhohlakala.
“NginguNkulunkulu oseduze yini, angisiye uNkulunkulu okude na?” kusho uSimakade.
“Ukhona yini ongacasha ezindaweni ezisithekileyo ukuze ngingamboni na?” kusho uSimakade. “Angiligcwalisi yini izulu nomhlaba na?” kusho uSimakade.
“Ngizwile ukuthi bathini abaphrofethi abaphrofetha amanga egameni lami, bethi: ‘Ngiphuphile, ngiphuphile.’
Kuyoze kube nini bengaphenduki ezinhliziyweni, abaphrofethi abaphrofetha amanga, bengabaphrofethi benkohliso yenhliziyo yabo na?
Abaceba ukwenza ukuba abantu bami balikhohlwe igama lami ngamaphupho abo abawalandisa, kube yilowo nalowo kumakhelwane wakhe, njengoba okhokho babo balikhohlwa igama lami ngenxa kaBhali na?
Umphrofethi onephupho makalande ngalo iphupho, kepha onezwi lami makalikhulume izwi lami ngeqiniso. Amakhoba ayini kukusanhlamvu na?” kusho uSimakade.
“Izwi lami alinjengomlilo yini, nanjengesando esiqhekeza idwala na?” kusho uSimakade.
“Ngakho-ke bheka, ngimelene nabaphrofethi, abeba amazwi ami, kube yilowo nalowo kumakhelwane wakhe, kusho uSimakade.
Bheka, ngimelene nabaphrofethi,” kusho uSimakade, “abakhuluma izilimi zabo, bathi: ‘Uthi Yena.’
Bheka, ngimelene nabaphrofethi abaphupha amanga,” kusho uSimakade, “bawalandise, badukise abantu bami ngamanga abo nangobudedengu babo. Mina-ke angibathumanga, angibayalanga, futhi ababasizanga ngalutho laba bantu,” kusho uSimakade.
“Uma laba bantu, noma umphrofethi, noma umphristi bekubuza bethi: ‘Uyini umthwalo kaSimakade na?’ Uyobatshela uthi: ‘Yinina eningumthwalo,’ ubuye uthi: ‘Ngiyakunilahla, kusho uSimakade.’
Umphrofethi, umphristi nabantu abayokuthi: ‘Ngumthwalo kaSimakade,’ ngiyomjezisa lowo muntu nabendlu yakhe.
Niyakusho kanjalo, omunye kumakhelwane wakhe, nomfowabo kumfowabo, nithi: ‘USimakade uphendule wathini na?’ nokuthi: ‘USimakade utheni na?’
Kepha maningaqhubeki, nithi: ‘Umthwalo kaSimakade,’ ngokuba oyoqhubeka asho njalo, umthwalo kuyoba ngowakhe, ngoba uyobe ephendulele amazwi kaNkulunkulu ophilayo, uSimakade Wamabandla, uNkulunkulu wethu.
Ngalokho uyakusho kanje kumphrofethi, uthi: ‘USimakade ukuphendule wathini?’ nokuthi: ‘USimakade utheni na?’
Kepha uma nithi: ‘Umthwalo kaSimakade,’ khona uSimakade usho kanje, uthi: ngenxa yokuba nisebenzisa leli lizwi elithi: ‘Umthwalo kaSimakade,’ nakuba Mina ngathumela kini, ngathi: ningasho ukuthi: ‘Umthwalo kaSimakade,’
ngakho-ke ngiyakuniphakamisa nokuniphakamisa, nginilahle kude nobukhona bami, nina nomuzi enganinika wona, nina nokhokho benu,
ngiyakunithela ngehlazo namahloni angapheliyo, okungayikulibaleka.”
USimakade wangikhombisa; bheka, amaqoma amabili ayenamakhiwane ebekwe phambi kwethempeli likaSimakade, emveni kokuba uNebukhadinezari, inkosi yaseBhabhele, ayesethumbe oJekhoniya indodana kaJehoyakimi, inkosi yakwaJuda, nezikhulu zakwaJuda, nezingcweti nabacangcathi bensimbi, ebathumbe eJerusalema, wabayisa eBhabhele.
Elinye iqoma lalinamakhiwane amahle kakhulu, kungathi ayizithelo zokuqala. Elinye iqoma linamakhiwane amabi kakhulu, ayengenakudliwa ngenxa yobubi bawo.
USimakade wayesethi kimi: “Jeremiya, ubonani na?” Ngathi: “Amakhiwane; amakhiwane amahle, mahle kakhulu; namabi, mabi kakhulu, ngeke adliwa ngenxa yobubi bawo.”
Izwi likaSimakade lafika kimi, lathi:
“Usho kanje uSimakade uNkulunkulu ka-Israyeli, uthi: ‘Njengalawa makhiwane amahle ngiyakubabheka kanjalo abathunjwa bakwaJuda, engibasusile kule ndawo, baya ezweni lamaKhaledi.
Amehlo ami ngiyakuwabhekisa kubo, kube kuhle, ngibabuyisele kuleli lizwe; ngibakhe ngingababhidlizi, ngibatshale ngingabasiphuli.
Ngiyakubanika inhliziyo yokuba bangiqonde ukuthi nginguSimakade. Bayakuba ngabantu bami, Mina ngibe nguNkulunkulu wabo, bayakubuyela kimi ngenhliziyo yabo yonke.
“ ‘Kanjalo njengamakhiwane amabi angenakudliwa ngenxa yobubi bawo, “ngiyakwenza kanjalo kuZedekiya, inkosi yakwaJuda, ezikhulwini zakhe, ensalini yaseJerusalema, abasele kuleli lizwe nabakhe eGibhithe, kusho uSimakade.
Ngiyakubenza babe yisinengiso nesikhubekiso emibusweni yonke yomhlaba, babe yihlazo nesaga, inhlekisa nesiqalekiso ezindaweni zonke engiyakubaxoshela kuzo.
Ngiyakuthuma kubo inkemba, indlala, nobhubhane, baze baphele nya ezweni engalinika bona nokhokho babo.” ’ ”
Kwathi ngonyaka wesine wokubusa kukaJehoyakimi indodana kaJosiya, inkosi yakwaJuda, okwakungunyaka wokuqala wokubusa kukaNebukhadinezari, inkosi yaseBhabhele, kwafika izwi kuJeremiya maqondana nabo bonke abantu bakwaJuda.
UJeremiya, umphrofethi, wakhuluma kubo bonke abantu bakwaJuda nakuzo zonke izakhamuzi zaseJerusalema, wathi:
“Kusukela onyakeni we-13 wokubusa kukaJosiya indodana ka-Amoni, inkosi yakwaJuda, kuze kube yilolu suku, le minyaka engama-23 izwi likaSimakade lifikile kimi, ngalikhuluma kini ngiphindelela, kodwa anilalelanga.”
USimakade uthumele kini zonke izinceku zakhe, abaphrofethi, ebathumela njalonjalo, kodwa anilalelanga futhi aniyibekanga indlebe ukuba nizwe
lapho kuthiwa kini: “Ake niphenduke, kube yilowo nalowo endleleni yakhe embi, nasezenzweni zenu ezimbi, bese nihlala ezweni uSimakade alinika okhokho benu, kusukela phakade kuze kube phakade.
Ningabalandeli abanye onkulunkulu ukuba nibakhonze, nikhuleke kubo, ningangicunuli ngemisebenzi yezandla zenu, khona ngingayukunilimaza.
“Kepha aningilalelanga, ningicunulile ngemisebenzi yezandla zenu, nazigwaza ngowenu,” kusho uSimakade.
Ngakho-ke usho kanje uSimakade Wamabandla, uthi: “Ngenxa yokuba aniwalalelanga amazwi ami;
bheka, ngiyakuthumela, ngilande yonke imindeni esenyakatho,” kusho uSimakade, “noNebukhadinezari, inkosi yaseBhabhele, inceku yami. Ngiyakubaletha kuleli lizwe nakwabakhileyo kulo, nakuzo zonke lezi zizwe ezibazungezileyo, ngibabhubhise baphele nya, ngibenze ezibukwayo, into enximfelwayo nencithakalo yaphakade.
Futhi ngiyakuqeda nya kubo umsindo wokujabula nomsindo wentokozo, izwi lomyeni nelikamakoti, nomsindo wamatshe okusila nokukhanya kwesibani.
Izwe lonke leli liyakuba yincithakalo, lezi zizwe ziyakuyikhonza inkosi yaseBhabhele iminyaka engama-70.
“Kuyakuthi lapho iminyaka engama-70 isiphelile, ngiyijezise inkosi yaseBhabhele naleso sizwe, ngenxa yobubi babo, bese kuthi izwe lamaKhaledi, ngilenze libe yincithakalo yaphakade, kusho uSimakade.
Ngiyakwehlisela phezu kwalelo lizwe wonke amazwi ami engiwakhulume kulo, konke okulotshwe kule ncwadi, uJeremiya akuphrofethile ngazo zonke izizwe.
Ngokuba bayakugqilazwa nabo yizizwe eziningi nangamakhosi amakhulu, ngiyakuphindisela kubo ngokwezenzo zabo nangokwemisebenzi yezandla zabo.”
Ngokuba washo kanje uSimakade uNkulunkulu ka-Israyeli kimi, wathi: “Thatha le ndebe yewayini lentukuthelo esandleni sami, uphuzise kuyo zonke izizwe engikuthuma kuzo.
Ziyakuphuza, zidiyazele, zibe njengezinhlanya ngenxa yenkemba engiyakuyithumela kuzo.”
Ngase ngiyithatha indebe esandleni sikaSimakade, ngaziphuzisa zonke izizwe uSimakade angithume kuzo:
iJerusalema, imizi yakwaJuda, namakhosi alo, nezikhulu zalo, ukuba ngikubhubhise kube yincithakalo, into enximfelwayo neqalekisiweyo, njengoba kunjalo namuhla.
UFaro inkosi yaseGibhithe, nezinceku zakhe, nezikhulu zakhe, nabo bonke abantu bakhe,
nabo bonke abantu bezinye izizwe, wonke amakhosi ase-Uzi, wonke amakhosi asezweni lamaFilisti, e-Ashikeloni, eGaza, e-Ekhroni nensali ese-Ashidodi
nabakwa-Edomi, nabakwaMowabi, nabakwa-Amoni,
wonke amakhosi aseThire, wonke amakhosi aseSidoni, amakhosi aseziqhingini ezingaphesheya kolwandle;
iDedani, iThema, iBhuzi, nabo bonke abagunde badilinga amakhanda abo emaceleni,
nawo wonke amakhosi ase-Arabhiya, wonke amakhosi ezinye izizwe ahlala ehlane,
wonke amakhosi aseZimri, wonke amakhosi ase-Elamu, wonke amakhosi aseMediya,
wonke amakhosi asenyakatho, akude naseduze, yileyo naleyo, nayo yonke imibuso yezwe esebusweni bomhlaba; emva kwabo bonke, kuyophuza inkosi yaseSheshakhi.
“Uyakubatshela, uthi: ‘Usho kanje uSimakade Wamabandla, uNkulunkulu ka-Israyeli, uthi: phuzani, nidakwe, nihlanze, niwe, ningabe nisavuka, ngenxa yenkemba engiyakuyithumela kini.’
Kuyakuthi uma benqaba ukuyithatha indebe esandleni sakho ukuba baphuze, uthi, kubo: ‘Usho kanje uSimakade Wamabandla: impela niyakuyiphuza.
Bheka, ngizoqala ukwehlisa inhlekelele phezu komuzi obizwa ngegama lami, pho nina niyakukugwema kanjani ukujeziswa na? Aniyukuyekwa ningajeziswa, ngokuba ngibiza inkemba kubo bonke abakhileyo emhlabeni,’ kusho uSimakade Wamabandla.
“Manje wena, phrofetha kubo wonke lawa mazwi, uthi: “ ‘USimakade uyaduma kweliphezulu, uzwakalisa izwi lakhe esendaweni yakhe engcwele. Uyakuduma ngamandla phezu kwekhaya lakhe, amemeze njengabanyathela amagilebhisi kubo bonke abakhileyo emhlabeni.
Ukukhamuluka kufinyelele emikhawulweni yomhlaba, ngokuba uSimakade uyaphikisana nezizwe; uzakwehlulela abantu bonke, kodwa ababi uyakubanikela enkembeni,’ ” kusho uSimakade.
Usho kanje uSimakade Wamabandla, uthi: “Bheka, kuzakuphuma inhlekelele esizweni, yedlulele nakwesinye; kuvuswe isivunguvungu esikhulu emikhawulweni yomhlaba.”
Ngalolo lusuku ababuleweyo bakaSimakade bayakusukela komunye umkhawulo womhlaba, baze bafike komunye; abayukukhalelwa, abayukubuthwa, abayukungcwatshwa, bayakuba njengendle ebusweni bomhlaba.
Hhewulani, nina belusi, nikhihle isililo, nizibhuqabhuqe emlotheni nina zikhulu zomhlambi, ngokuba sezifikile izinsuku zokuhlatshwa nokuhlakazwa kwenu, nizakuwa njengesitsha esihle.
Iyakushabalala indawo yokucasha kubelusi, izikhulu zomhlambi aziyukuphunyula.
Bheka, izwi lokukhala kwabelusi, nokuhhewula kwezikhulu zomhlambi ngokuba uSimakade ubhubhisa idlelo labo.
Izibaya ezinokuthula ziqediwe, ngenxa yolaka oluvuthayo lukaSimakade.
Uwushiyile umphandu wakhe, njengebhongo lengonyama; ngokuba izwe labo seliyincithakalo, ngenxa yolaka lomcindezeli nangenxa yentukuthelo yakhe evuthayo.
Ekuqaleni kokubusa kukaJehoyakimi, indodana kaJosiya, inkosi yakwaJuda, kwafika leli lizwi livela kuSimakade, lathi:
“Usho kanje uSimakade, uthi: yima egcekeni lendlu kaSimakade, ukhulume kuyo yonke imizi yakwaJuda eza izokhuleka endlini kaSimakade, wonke amazwi engikuyale ukuba uwakhulume kubo, ungagodli nalinye izwi.
Mhlawumbe bayakulalela, baphenduke, kube yilowo nalowo endleleni yakhe embi; nami ngiyakuguquka ngingabehliseli inhlekelele ebengizobehlisela yona, ngenxa yobubi bezenzo zabo.
Uyakuthi kubo: ‘Usho kanje uSimakade, uthi: uma ningangilaleli, nihambe emthethweni wami engiwumise phambi kwenu,
nilalele amazwi ezinceku zami, abaphrofethi engibathumele kini, ngibathumela ngiphindelela, kodwa nina nangabalalela,
ngiyakuyenza le ndlu ibe njengeShilo, nalo muzi ngiwenze ube yisiqalekiso, kuzo zonke izizwe zomhlaba.’ ”
Abaphristi, abaphrofethi nabo bonke abantu bamuzwa uJeremiya ekhuluma lawa mazwi esendlini kaSimakade.
Kwathi lapho eseqedile uJeremiya ukukhuluma konke uSimakade ayemyale ngakho ukuba akusho kubo bonke abantu; abaphristi, abaphrofethi, nabantu bonke, bambamba, bathi: “Uzokufa nokufa.
Uphrofetheleni egameni likaSimakade, uthi: ‘Le ndlu iyakuba njengeShilo, nalo muzi uyakuba yincithakalo kungabe kusaba bikho ohlala kuwo na?’ ” Bonke abantu babuthana kuJeremiya endlini kaSimakade.
Lapho izikhulu zakwaJuda zizwa lezi zinto, zakhuphuka zisuka esigodlweni senkosi, zaya endlini kaSimakade, zahlala ngasekungeneni kwesango lendlu kaSimakade elisha.
Abaphristi nabaphrofethi base bethi ezikhulwini nakubo bonke abantu: “Lo muntu ufanelwe ngukufa, ngokuba uphrofethe ngalo muzi, njengoba nani nizizwele ngezindlebe zenu.”
UJeremiya wayesekhuluma kuzo zonke izikhulu, nakubo bonke abantu, wathi: “USimakade wangithuma ukuba ngiphrofethe ngale ndlu nangalo muzi, wonke amazwi eniwezwileyo.
Ngakho-ke lungisani izindlela zenu nezenzo zenu, nilalele izwi likaSimakade uNkulunkulu wenu, ukuze uSimakade ayeke ukunehlisela inhlekele akhulume ngayo kini.
Kepha mina, bhekani, ngisesandleni senu; ukuba nenze kimi njengalokho enikubona kukuhle futhi kulungile emehlweni enu.
Kuphela yazini nokwazi ukuthi uma ningibulala, niyakwehlisela igazi elingenacala phezu kwenu, phezu kwalo muzi, naphezu kwabakhileyo kuwo, ngokuba ngokweqiniso nguSimakade ongithume kini ukuba ngisho wonke lawa mazwi ezindlebeni zenu.”
Izikhulu nabo bonke abantu bathi kubaphristi nabaphrofethi: “Lo muntu akafanele ukufa, ngokuba ukhulume kithi egameni likaSimakade uNkulunkulu wethu.”
Kwase kusukuma abanye abangamalunga ezwe, bakhuluma kulo lonke ibandla labantu, bathi:
“UMikha waseMoreshethi waphrofetha ezinsukwini zikaHezekiya, inkosi yakwaJuda, wakhuluma kubo bonke abantu bakwaJuda, wathi: ‘Usho kanje uSimakade Wamabandla, uthi: “ ‘IZiyoni liyakulinywa njengensimu, iJerusalema libe yincithakalo, intaba yendlu ibe yizindawo eziphakemeyo zamahlathi.’
“Kambe uHezekiya, inkosi yakwaJuda noJuda wonke, bambulala yini uMikha na? Abesabanga yini uSimakade, bamncenga uSimakade, Yena wayiyeka inhlekelele ayekhulume ngayo kubo na? Pho, thina sesizakwehlisela phezu kwethu ububi obukhulu kangaka na?”
Kukhona nomunye umuntu owaphrofetha egameni likaSimakade, u-Uriya, indodana kaShemaya waseKiriyathi Jeharimi, waphrofetha kulo muzi nangaleli lizwe, njengawo wonke amazwi kaJeremiya.
Inkosi uJehoyakimi, nawo wonke amaqhawe ayo, nazo zonke izikhulu bawezwa amazwi akhe; inkosi yafuna ukumbulala, kepha u-Uriya wezwa, wesaba, wabaleka, waya eGibhithe.
Inkosi uJehoyakimi yathumela amadoda eGibhithe, u-Elinathani, indodana ka-Akhibhori namanye amadoda, baya eGibhithe.
Bambuyisa u-Uriya eGibhithe, bamyisa enkosini uJehoyakimi eyambulala ngenkemba, isidumbu sakhe yasilahla emathuneni abantukazana.
Kepha isandla sika-Ahikamu, indodana kaShafani, sasinoJeremiya ukuba anganikelwa esandleni sabantu, ukuze bambulale.
Ekuqaleni kokubusa kukaJehoyakimi, indodana kaJosiya, inkosi yakwaJuda, leli lizwi lafika kuJeremiya livela kuSimakade, lithi:
usho kanje uSimakade kimi, uthi: “Zenzele izintambo namajoka, ukubeke entanyeni yakho,
ukuthumele enkosini yakwa-Edomi, kweyakwaMowabi, enkosini nakubantu bakwa-Amoni, kweyaseThire neyaseSidoni, ngesandla sezithunywa ezifike eJerusalema kuZedekiya, inkosi yakwaJuda.
Uyakuziyala ukuba zithi emakhosini azo: ‘usho kanje uSimakade Wamabandla, uNkulunkulu ka-Israyeli, uthi: “Niyakusho kanje emakhosini enu, nithi:
Mina ngenzile umhlaba, abantu nezilwane; okusebusweni bomhlaba; ngamandla ami amakhulu, nangezikhwepha zami, futhi ngikunika noma ngubani othandekayo emehlweni ami.
Manje nginikela wonke lawa mazwe esandleni sikaNebukhadinezari, inkosi yaseBhabhele, inceku yami, futhi ngimnika nezilwane zasendle ukuba zimkhonze.
Zonke izizwe ziyakumkhonza, yena nendodana yakhe, nendodana yendodana yakhe, kuze kufike isikhathi sokuwa kwezwe lakhe, izizwe eziningi namakhosi amakhulu ayomenza isikhonzi sawo.
Kuyakuthi isizwe nombuso okungayukumkhonza uNebukhadinezari, inkosi yaseBhabhele, okungayibekanga intamo yakho phansi kwejoka lakhe, leso sizwe ngiyosijezisa ngenkemba, ngendlala, nangobhubhane, ngisiqede ngesandla sakhe, kusho uSimakade.
Kepha nina ningabalaleli abaphrofethi benu, ababhuli benu, namaphupho enu, nabahlola imihlola phakathi kwenu, nabalumbi benu abakhuluma kini, bethi: ‘Aniyukuyikhonza inkosi yaseBhabhele,’
ngokuba baphrofetha kini amanga, ukuze nisuswe ezweni lakini, niyiswe kude; ngiyakunixosha, niphele nya.
Kepha isizwe esiyakuyibeka intamo yaso phansi kwejoka lenkosi yaseBhabhele, siyikhonze; leso sizwe ngiyakusiyeka ezweni laso, sililime, sihlale kulo, kusho uSimakade.” ’ ”
Ngakhuluma amazwi afanayo enkosini yakwaJuda, uZedekiya, ngathi: “Bekani izintamo zenu phansi kwejoka lenkosi yaseBhabhele, niyikhonze, yona nabantu bayo, niphile.
Uyakufelani wena nabantu bakho ngenkemba, ngendlala nangobhubhane, njengalokho uSimakade akukhulumile maqondana nesizwe esingayukuyikhonza inkosi yaseBhabhele na?
Ningawalaleli amazwi abaphrofethi abakhuluma kini, bethi: ‘Aniyukuyikhonza inkosi yaseBhabhele,’ ngoba baphrofetha amanga kini.
‘Angibathumanga. Baphrofetha amanga egameni lami,’ kusho uSimakade. ‘Ngakho-ke ngizonixosha, niphele nya, nina nabaphrofethi abaphrofetha kini.’ ”
Ngase ngikhuluma kubaphristi nakubo bonke abantu ngithi usho kanje uSimakade, uthi: “Ningawalaleli amazwi abaphrofethi benu abaphrofetha kini, bethi: ‘Bhekani, izitsha zendlu kaSimakade ziyakubuyiswa eBhabhele masinyane.’ Ngokuba baphrofetha amanga kini.
Ningabalaleli; yikhonzeni inkosi yaseBhabhele ukuze niphile; kungani lo muzi ube ngowokubhujiswa na?
Uma-ke bengabaphrofethi, nezwi likaNkulunkulu likubo, mabanxuse kuSimakade Wamabandla, ukuba izitsha ezisasele endlini kaSimakade, esigodlweni senkosi yakwaJuda, naseJerusalema zingayi eBhabhele.
Usho kanje uSimakade Wamabandla ngezinsika, ngolwandle, ngezinqe nangezitsha ezisasele kulo muzi;
angazithathanga uNebukhadinezari, inkosi yaseBhabhele, ngesikhathi ethumba uJekhoniya, indodana kaJehoyakimi, inkosi yakwaJuda, eJerusalema, emyisa eBhabhele, nezikhulu zonke zakwaJuda naseJerusalema,
yebo, usho kanje uSimakade Wamabandla, uNkulunkulu ka-Israyeli ngempahla eyayisele endlini kaSimakade, nasesigodlweni senkosi yakwaJuda, naseJerusalema, uthi:
‘Iyakuyiswa eBhabhele, ihlale lapho, kuze kufike usuku engiyoyibuyisa ngalo, bese ngiyikhuphula, ngiyibuyisele kule ndawo,’ kusho uSimakade.” “Bese ngiyibuyisa ngiyilethe kule ndawo.”
Kwathi ngonyaka uZedekiya, inkosi yakwaJuda, aqala ngawo ukubusa; uHananiya, indodana ka-Azuri, umphrofethi waseGibheyoni, wakhuluma kimi endlini kaSimakade, phambi kwabaphristi nabantu bonke; ngonyaka wesine, ngenyanga yesihlanu, wathi:
“Usho kanje uSimakade Wamabandla, uNkulunkulu ka-Israyeli, uthi: ‘Ngizakulaphula ijoka lenkosi yaseBhabhele.
Ingakapheli iminyaka emibili, ngiyakuzibuyisela kule ndawo zonke izitsha zendlu kaSimakade ezathathwa kule ndawo nguNebukhadinezari, inkosi yaseBhabhele, waziyisa eBhabhele.
Ngiyakubuyisela futhi kule ndawo uJekhoniya, indodana kaJehoyakimi, inkosi yakwaJuda, nabo bonke abathunjwa bakwaJuda abaya eBhabhele, ngokuba ngizolephula ijoka lenkosi yaseBhabhele,’ ” kusho uSimakade.
Kepha umphrofethi uJeremiya wathi kumphrofethi uHananiya, phambi kwabaphristi nabantu bonke ababemi endlini kaSimakade,
yebo, umphrofethi uJeremiya, wathi: “Amen, makenze kanjalo uSimakade, awafakazele amazwi akho owaphrofethile, ngokubuyisela izitsha zendlu kaSimakade, nabo bonke abathunjelwa eBhabhele, kule ndawo.
Noma kunjalo, ake nilalele leli lizwi engizakulikhuluma ezindlebeni zenu, nasezindlebeni zabantu bonke, elithi:
abaphrofethi ababephambi kwami nababephambi kwakho kusukela emandulo, baphrofetha ngamazwe amaningi nangemibuso eminingi, ngezimpi, inhlekelele, nangobhubhane.
Umphrofethi ophrofetha ngokuthula uyokwaziwa kuphela, lapho izwi aliphrofethile selifezekile, ukuthi impela ungumphrofethi othunywe nguSimakade.”
Umphrofethi uHananiya wayeselisusa ijoka entanyeni yomphrofethi uJeremiya, waliphoqoza.
UHananiya wakhuluma phambi kwabo bonke abantu, wathi: “Usho kanje uSimakade, uthi: ‘Ngizolephula kanjalo-ke ijoka likaNebukhadinezari, inkosi yaseBhabhele, entanyeni yezizwe zonke, ingakapheli iminyaka emibili.’ ” Kepha umphrofethi uJeremiya wabamba eyakhe indlela.
Izwi likaSimakade lafika kuJeremiya emva kokuba uHananiya, umphrofethi, eliphoqozile ijoka elalisentanyeni yomphrofethi uJeremiya, lathi:
“Hamba ukhulume kuHananiya, uthi: ‘Usho kanje uSimakade, uthi: uwaphoqozile amajoka okhuni wenza amajoka ensimbi esikhundleni sawo.
Ngokuba usho kanje uSimakade Wamabandla, uNkulunkulu ka-Israyeli, uthi: ngizobeka ijoka lensimbi entanyeni yazo zonke lezi zizwe, ukuba zimkhonze uNebukhadinezari, inkosi yaseBhabhele, yebo, ziyakumkhonza, futhi ngimnikile nezilwane zasendle.’ ”
Umphrofethi uJeremiya wayesethi kuHananiya, umphrofethi: “Ake ulalele, Hananiya, uSimakade akakuthumanga, kodwa wena usuwenze laba bantu bethembela emangeni.
Ngakho-ke usho kanje uSimakade, uthi: ‘Uyabona-ke, ngiyakukuxosha ebusweni bomhlaba, futhi uzakufa kuwo lo nyaka ngokuba ukhulume ngokuthi abantu bahlubuke kuSimakade.’ ”
Umphrofethi uHananiya wafa-ke ngawo lowo nyaka, ngenyanga yesikhombisa.
Nanka amazwi encwadi uJeremiya, umphrofethi, ayithumela eseJerusalema ensalini yamalunga, abaphristi, abaphrofethi nakubo bonke abantu uNebukhadinezari ayebathumbile eJerusalema, wabayisa eBhabhele.
Lokhu kwenzeka emveni kokuba inkosi uJekhoniya, indlovukazi emzalayo, izikhulu zasesigodlweni, izikhulu zakwaJuda nezaseJerusalema, izingcweti nabakhandi, sebesukile eJerusalema,
ngesandla sika-Elasa, indodana kaShafani noGemariya, indodana kaHilikiya, uZedekiya, inkosi yakwaJuda, abathuma eBhabhele kuNebukhadinezari, inkosi yaseBhabhele, ethi:
Usho kanje uSimakade Wamabandla, uNkulunkulu ka-Israyeli, kubo bonke abathunjwa engabathumela ekuthunjweni eBhabhele besuka eJerusalema, uthi:
“Yakhani izindlu, nihlale kuzo; tshalani amasimu, nidle imikhiqizo yawo;
thathani abafazi, nizale amadodana namadodakazi; thathelani amadodana enu abafazi, amadodakazi enu niwaganisele amadoda, ukuba azale amadodana namadodakazi, nande lapho, ninganciphi.
Funani inhlalakahle yomuzi lapho nithunjelwe khona, niwukhulekele kuSimakade, ngokuba inhlalakahle yawo kuyoba yinhlalakahle yenu.”
Ngokuba usho kanje uSimakade Wamabandla, uNkulunkulu ka-Israyeli, uthi: “Maningakhohliswa ngabaphrofethi benu abaphakathi kwenu, nababhuli benu, ningawalaleli amaphupho enu eniwaphuphayo.
Ngokuba baphrofetha amanga kini, egameni lami, Mina angibathumanga,” kusho uSimakade.
Usho kanje uSimakade, uthi: “Uma sekuphele iminyaka engama-70 niseBhabhele, ngiyakunikhumbula, ngilifeze kini izwi lami elihle, ngokunibuyisela kule ndawo.
Ngokuba Mina ngiyawazi amacebo enginawo ngani,” kusho uSimakade, “amacebo okuba nibe nenhlalakahle, hhayi awokunilimaza, awokuninika ikusasa nethemba.
Niyakungibiza, nize nikhuleke kimi, ngiyakunizwa.
Niyakungifuna, ningifumane, lapho ningifunisisa ngenhliziyo yenu yonke.
Ngiyakufunyanwa yinina,” kusho uSimakade, “ngiyakukuqeda ukuthunjwa kwenu, nginiqoqe kuzo zonke izizwe nasezindaweni zonke lapho nginixoshele khona, nginibuyisele endaweni enganisusa kuyo nganiyisa ekuthunjweni,” kusho uSimakade.
Ngokuba nikhulume nathi: “USimakade usivusele abaphrofethi eBhabhele.”
Ngokuba usho kanje uSimakade enkosini ehlezi esihlalweni sobukhosi sikaDavide, nakubo bonke abantu abahlala kulo muzi, abafowenu abangayanga nani ekuthunjweni,
yebo, usho kanje uSimakade Wamabandla, uthi: “Bhekani, ngiyakuthumela kubo inkemba, indlala, nobhubhane, ngibenze babe njengamakhiwane abolile angenakudliwa, ngenxa yobubi bawo.
Ngiyakubalandela ngenkemba, ngendlala nangobhubhane, ngibenze into esabisayo emibusweni yonke yomhlaba, babe yisiqalekiso, incithakalo, into enximfelwayo, nehlazo ezizweni zonke engibaxoshele kuzo,
ngokuba abawalalelanga amazwi ami,” kusho uSimakade, “engawathumela kubo ngezinceku zami, abaphrofethi, ngibathumela ngingaphezi; kodwa kanilalelanga,” kusho uSimakade.
Kepha manje yizwani izwi likaSimakade, nina nonke bathunjwa, enganithumela eBhabhele nisuka eJerusalema.
Usho kanje uSimakade Wamabandla, uNkulunkulu ka-Israyeli, ngo-Ahabi, indodana kaKolaya nangoZedekiya, indodana kaMahaseya, abaphrofetha amanga kini egameni lami, uthi: “Bheka, ngiyakubanikela esandleni sikaNebukhadinezari, inkosi yaseBhabhele, uyakubabulala nibuka ngamehlo enu.
Ngenxa yabo, bonke abathunjwa bakwaJuda abaseBhabhele bayakusebenzisa lesi siqalekiso, esithi: ‘USimakade makakwenze ukuba ube njengoZedekiya no-Ahabi, abosiwa emlilweni yinkosi yaseBhabhele,’
ngokuba benza ubuwula kwa-Israyeli, baphinga nabafazi bomakhelwane babo, bakhuluma amazwi angamanga egameni lami engingabayalanga ngawo; yimi engikwaziyo lokho, ngingufakazi,” kusho uSimakade.
Uyakuthi kuShemaya waseNehelamu:
“Usho kanje uSimakade Wamabandla, uNkulunkulu ka-Israyeli, uthi: ngenxa yokuba wathumela egameni lakho izincwadi kubo bonke abantu baseJerusalema, nakuZefaniya indodana kaMahaseya, umphristi, nakubo bonke abaphristi, uthi:
‘USimakade ukubeke umphristi esikhundleni sikaJehoyada, umphristi, ukuba nibe ngabaqaphi babo bonke abantu abahlanyayo nabaphrofethayo endlini kaSimakade, ukuze ubafake ejele nasemaketangweni.
Manje awumsolanga ngani uJeremiya wase-Anathothi, ophrofetha kini na?
Ngokuba yena uthumele kithi siseBhabhele, wathi: kuyoba isikhathi eside; yakhani izindlu, nihlale kuzo; tshalani amasimu, nidle izithelo zawo.’ ”
UZefaniya, umphristi, wayifunda leyo ncwadi uJeremiya, umphrofethi, ezwa ngezindlebe zakhe.
Kwase kufika izwi likaSimakade kuJeremiya, lathi:
“Thumela kubo bonke abathunjwa, uthi: ‘Usho kanje uSimakade ngoShemaya waseNehelamu, uthi: ngenxa yokuba uShemaya ephrofethe kini Mina ngingamthumanga, wanenza nethembela emangeni,
ngalokho-ke usho kanje uSimakade ngaye, uthi: bhekani, ngiyakumjezisa uShemaya waseNehelamu nabozalo lwakhe. Akayukuba namuntu oyosala kulaba bantu, futhi akayukukubona okuhle engiyakukwenzela abantu bami, ngokuba ukhulume ngokuhlubuka kuSimakade, kusho uSimakade.’ ”
Izwi elafika kuJeremiya livela kuSimakade, lithi:
“Usho kanje uSimakade uNkulunkulu ka-Israyeli, uthi: ‘Loba encwadini, wonke amazwi engiwakhulume kuwe.
Ngokuba bheka, izinsuku ziyeza,’ kusho uSimakade, ‘lapho ngiyakuqeda ukuthunjwa kwabantu bami, u-Israyeli noJuda, bese ngibabuyisela ezweni engalinika okhokho babo ukuba balidle,’ ” kusho uSimakade.
Nanka amazwi uSimakade awakhuluma ngo-Israyeli nangoJuda.
“Ngokuba usho kanje uSimakade, uthi: “ ‘Sizwile izwi lokwesaba, nelengebhe futhi akukho ukuthula.
Ake nibuze, nibone ukuthi indoda yake yabeletha na? Pho kungani ngibona wonke amadoda ebambelele okhalo njengowesifazane ebeletha, ubuso bonke buphaphathekile na?
Maye, lukhulu lolo lusuku, alukho olunjengalo! Lesi yisikhathi sokuhlupheka kuJakobe, kodwa uzosindiswa kukho.
“ ‘Kuyakuthi ngalolo lusuku,’ kusho uSimakade Wamabandla, ‘ngephule ijoka entanyeni yabo, ngigqabule izibopho zabo, bangabe besabakhonza abafokazi,
kodwa bayakukhonza uSimakade uNkulunkulu wabo, noDavide inkosi yabo engiyakubavusela yena.
“ ‘Ungesabi wena Jakobe, nceku yami,’ kusho uSimakade, ‘ungesabi, Israyeli, ngokuba bheka, ngiyakukusindisa usekude, nabozalo lwakho ezweni othunjwelwe kulo. UJakobe uyakubuya, aphumule, agcineke angesatshiswa muntu,
ngokuba Mina nginawe,’ kusho uSimakade. ‘Ngiyakukusindisa, ngiziqede nya zonke izizwe engikuhlakazele kuzo, kodwa wena angiyukukuqeda. Ngiyakukuyala ngobulungiswa, angiyukukuyeka ngingakujezisi.’
“Ngokuba usho kanje uSimakade, uthi: “ ‘Ukulimala kwakho akunakuphola, nesilonda sakho sibi.
Akekho omela udaba lwakho, akukho muthi wokukwelapha; akukho ukuphulukiswa kuwe.
Zonke izithandwa zakho zikukhohliwe, azisakufuni, ngokuba ngikushaye njengesitha, ngakuyala njengononya, ngenxa yobukhulu bokona kwakho, nangenxa yobuningi bezono zakho.
Ukhalelani ngenxeba lakho nangobuhlungu bakho obungenakwelashwa na? Lokhu ngikwenze ngenxa yobukhulu bokona kwakho, nobuningi bezono zakho.
“ ‘Ngalokho bonke abakudlayo nabo bayakudliwa, zonke izitha zakho ngothi lwazo ziyakuthunjwa, nalabo abakuphangayo bayakuphangwa, nabo bonke abakuqhwagayo ngiyakubenza impango.
Ngokuba ngiyakukuphilisa, ngelaphe izilonda zakho,’ kusho uSimakade, ‘ngokuba bakubize ngoxoshiweyo, neZiyoni akukho muntu olifunayo.’
“Usho kanje uSimakade, uthi: “ ‘Bheka, ngizokuqeda ukuthunjwa kwamathende kaJakobe, ngiwahawukele amakhaya akhe; umuzi uyokwakhiwa egqumeni lawo, isigodlo sihlale njengokufaneleyo.
Kuyophuma kubo ukubonga nezwi lokuthokoza. Ngiyakubenza bande bangabe besancipha; ngibenze bahlonipheke, bangabe besadelelwa.
Abantwana bakhe bayakuba njengakuqala, ibandla lakhe lime phambi kwami; ngibajezise bonke abamcindezelayo.
Isikhulu siyakuba ngomunye wabo, nombusi walo uyakuvela phakathi kwabo. Ngiyakumsondeza, asondele kimi, ngokuba ngubani oke waba nesibindi sokusondela kimi na?’ kusho uSimakade.
“ ‘Niyakuba ngabantu bami kimi, Mina ngibe nguNkulunkulu wenu kinina.’ ”
Bheka, isivunguvungu sikaSimakade! Ulaka lwakhe luphumile; isivunguvungu esibhubhisayo, siyakwehlela phezu kwamakhanda ezikhohlakali.
Ukuvutha kolaka lukaSimakade akuyukunqandwa, aze akwenze, akufeze okuhloswe yinhliziyo yakhe. Ngezinsuku zokugcina niyakukuqonda lokhu.
“Ngaleso sikhathi, kusho uSimakade, ngiyakuba nguNkulunkulu wayo yonke imindeni yakwa-Israyeli, yona ibe ngabantu bami.”
Usho kanje uSimakade, uthi: “Abantu abasinde enkembeni bafumane umusa ehlane, ngesikhathi u-Israyeli eya khona ukuze athole ukuphumula.”
USimakade wabonakala kimi ekude, wathi: “Ngikuthande ngothando lwaphakade, ngakho-ke ngikudonsile ngomusa.
Ngizobuye ngikwakhe kabusha, wakheke wena ntombi engu-Israyeli. Uyophinde uvunule ngenjabulo, uphume ngokusina kwabathokozileyo.
Uyobuye utshale izivini ezintabeni eSamariya; abatshali bayozitshala, babuye badle izithelo zazo.
Ngokuba kuyakuba khona usuku abayakumemeza ngalo abalindi, entabeni yakwa-Efrayimi, bathi: ‘Sukani, asikhuphukele eZiyoni kuSimakade uNkulunkulu wethu.’ ”
Ngokuba usho kanje uSimakade, uthi: “Mhlabeleleni ngentokozo uJakobe, nihlokomele inhloko yezizwe, nizwakalise ukudumisa, nithi: ‘Simakade, sindisa abantu bakho insali yakwa-Israyeli.’
Bheka, ngiyakubabuyisa enyakatho, ngibaqoqe emikhawulweni yomhlaba; phakathi kwabo kukhona izimpumputhe, izinyonga, abakhulelwe, nabatetayo, bonke bayakubuya kanyekanye, beyibandla elikhulu.
Bayakuza bekhala, bekhuleka; lapho ngibabuyisa, ngiyakubaholela emifuleni yamanzi, ngendlela eqondileyo abangayukukhubeka kuyo, ngokuba nginguyise ka-Israyeli, no-Efrayimi uyizibulo lami.
“Nina zizwe, yizwani izwi likaSimakade, nilimemezele eziqhingini ezikude, nithi: ‘Owahlakaza u-Israyeli uzokumqoqa, amlondoloze njengomelusi elusa umhlambi wakhe.’
Ngokuba uSimakade umhlawulele uJakobe, wamhlenga esandleni sonamandla kunaye.
Bayakufika behlabelela ngokujabula, esicongweni seZiyoni bayakuthakasa ngenxa yokuhle abazokuphiwa nguSimakade; okusanhlamvu, iwayini, amafutha, amazinyane ezimvu namankonyane ezinkomo; umphefumulo wabo uyakuba njengensimu eniseliweyo, bangabe besaba nosizi nanini.
Intombi iyakuthokoza ngokusina, izinsizwa nabadala bajabule kanyekanye. Ngiyakuguqula ukukhala kwabo kube yinjabulo, ngibaduduze, ngibathokozise, bangabe besaba nosizi.
Ngiyakwenelisa umphefumulo wabaphristi ngamanoni, abantu bami basuthe ngokuhle okuvela kimi,” kusho uSimakade.
Usho kanje uSimakade, uthi: “Izwi liyezwakala eRama, ukulila nokukhala okumunyu, uRaheli ekhalela abantwana bakhe; uyala ukududuzwa ngabantwana bakhe, ngokuba abasekho.”
Usho kanje uSimakade, uthi: “Bamba izwi lakho, ungakhali, namehlo akho angabi nazinyembezi, ngokuba kuyakuba khona umvuzo ngomsebenzi wakho, babuye ezweni lesitha,” kusho uSimakade.
“Kukhona ithemba ngekusasa lakho, abantwana bakho bayakubuyela endaweni yabo,” kusho uSimakade.
“Ngimzwile nokumuzwa u-Efrayimi ezikhalela, ethi: ‘Ungishayile, ngashayeka njengethole elingaqeqeshekile; ngibuyise ukuze ngibuye, ngokuba Wena unguSimakade uNkulunkulu wami.
Lapho ngichezukile, ngazisola, nalapho sengifundisiwe, nganxothoza, ngaba namahloni, yebo, ngajabha, ngokuba ngalithwala ihlazo lobusha bami.’
Ngabe u-Efrayimi uyindodana yami ethandekayo na? Ngabe uyingane engithokoza ngayo na? Nakuba ngivame ukukhuluma kabi ngaye, nokho ngisamkhumbula. Ngakho-ke izibilini zami ziyamhawukela; ngiyakuba nesihe impela kuye,” kusho uSimakade.
“Zibekele amatshe ayinkombandlela, uzibekele izimpawu zomgwaqo, uqaphelisise umendo wakho, indlela owahamba ngayo; uzophinde ubuye ngayo. Buya ntombi engu-Israyeli, ubuyele kule mizi yakho.
Kuyoze kube nini uguquguquka, we ndodakazi ehlubukayo na? Ngokuba uSimakade udale into entsha emhlabeni: owesifazane uyakuyihaqa indoda.”
Usho kanje uSimakade Wamabandla, uNkulunkulu ka-Israyeli, uthi: “Bayakubuye basho leli lizwi ezweni lakwaJuda nasemizini yalo, ngesikhathi ngibabuyisa ekuthunjweni kwabo, bathi: ‘USimakade makakubusise wena khaya lokulunga, ntaba yobungcwele.’
UJuda nayo yonke imizi yakhe bayakuhlala kulo ndawonye, abalimi baphume nemihlambi.
Ngokuba ngizobahlumelelisa abadangeleyo, ngibaqinise abaphelelwa ngamandla.”
Ngase ngiphaphama, ngabheka; ngangikade ngilele obumnandi ubuthongo.
“Bheka, izinsuku ziyeza, lapho indlu ka-Israyeli nendlu kaJuda ngiyakuzihlwanyela ngembewu yabantu, nangembewu yezilwane,” kusho uSimakade.
“Kuyakuthi njengalokhu ngangibaqaphile ukuze ngibasiphule, ngibadilize, ngibabhidlize, ngibabhubhise, ngibalimaze, kanjalo-ke ngiyakubalinda ukuba ngibakhe, ngibatshale,” kusho uSimakade.
“Ngalezo zinsuku abasayikusho futhi ukuthi: “ ‘Oyise badla amagilebhisi amuncu, amazinyo abantwana babo aba buthuntu.’
“Yilowo nalowo uyokufa ngenxa yobubi bakhe. Bonke abantu abadla amagilebhisi amuncu, amazinyo abo azokuba buthuntu.
“Bheka, izinsuku ziyeza,” kusho uSimakade, “lapho ngiyakwenza isivumelwano esisha nendlu ka-Israyeli nendlu kaJuda,
esingafani nesivumelwano engasenza nokhokho babo; mhla ngibabamba ngesandla, ngibakhipha eGibhithe; isivumelwano sami abasephula noma ngangiyinkosi yabo,” kusho uSimakade.
“Kepha yilesi isivumelwano engizakusenza nendlu ka-Israyeli, emveni kwalezo zinsuku,” kusho uSimakade: “ngiyakufaka umthetho wami ezibilini zabo, ngiwulobe ezinhliziyweni zabo, ngiyoba nguNkulunkulu wabo, bona babe ngabantu bami.
Abasayukufundisana, kube yilowo nalowo afundise umakhelwane wakhe, noma umfowabo, athi: ‘Yazi uSimakade,’ ngokuba bonke bayakungazi, kusukela kwabancane kuya kwabadala,” kusho uSimakade, “ngokuba ngiyakubathethelela ububi babo, nesono sabo angisayukusikhumbula.”
Usho kanje uSimakade obeka ilanga ukuba likhanyise emini, nezikhathi ezimisiwe zenyanga nezezinkanyezi, ukuba zikhanyise ebusuku, ovusa ulwandle ukuba kuhlokome amaza alo; nguSimakade Wamabandla igama lakhe, uthi:
“Uma lokhu okumisiwe kungasuka ebusweni bami, yilapho-ke abozalo luka-Israyeli beyakuphela, bangabe besaba yisizwe phambi kwami zonke izinsuku,” kusho uSimakade.
Usho kanje uSimakade, uthi: “Uma amazulu phezulu engake alinganiswe, nezisekelo zomhlaba emajukujukwini ziphenyisiswe; kulapho-ke Mina ngiyobalahla khona bonke abozalo luka-Israyeli, ngakho konke abakwenzileyo,” kusho uSimakade.
“Bheka, izinsuku ziyeza, lapho uSimakade eyakwakhelwa kabusha umuzi, kusukela embhoshongweni kaHananeli kuze kube sesangweni iGumbi, kusho uSimakade.
Umucu wokulinganisa uyakusuka lapho futhi uze uqondane negquma iGarebhi, ujike uze ufike eGowa.
Isigodi sonke; lapho kugcwele khona izidumbu, nalapho kulahlwa khona umlotha, nawo wonke amasimu, kuze kube semfudlaneni iKidroni, kuze kufike egumbini leSango Lehhashi ngasempumalanga; kuyakuba ngcwele kuSimakade, kungabe kusasishulwa, noma kubhidlizwe, kuze kube phakade.”
Izwi elafika kuJeremiya livela kuSimakade ngonyaka weshumi wokubusa kukaZedekiya, inkosi yakwaJuda, okwakungunyaka we-18 wokubusa kukaNebukhadinezari.
Ngaleso sikhathi impi yenkosi yaseBhabhele yalivimbezela iJerusalema. UJeremiya, umphrofethi, wayevalelwe egcekeni labalindi elalisesigodlweni senkosi yakwaJuda.
UZedekiya, inkosi yakwaJuda, yayimvalele lapho, yathi: “Uphrofethelani uthi: ‘Usho kanje uSimakade, uthi: bheka, ngizakuwunikela lo muzi esandleni senkosi yaseBhabhele, iwudle.
UZedekiya, inkosi yakwaJuda, ayiyukuphunyuka esandleni samaKhaledi, kodwa uyonikelwa nokunikelwa esandleni senkosi yaseBhabhele, akhulume nayo umlomo nomlomo, ayibone ubuso nobuso.
Inkosi yaseBhabhele iyomyisa eBhabhele, uZedekiya, ahlale lapho ngize ngimjezise, kusho uSimakade; noma nilwa namaKhaledi, aniyukuphumelela.’ ”
UJeremiya wathi: “Izwi likaSimakade lafika kimi, lathi:
bheka, uHanameli, indodana kaShalumi umfowabo kayihlo, uzofika kuwe, athi: ‘Zithengele insimu yami ese-Anathothi, ngokuba ilungelo lokuyihlenga lingelakho ukuba uyithenge.’
“UHanameli, indodana yomfowabo kababa, wafika kimi ngisegcekeni labalindi njengokusho kwezwi likaSimakade, wathi kimi: ‘Ake uthenge insimu yami ese-Anathothi kwaBhenjamini, ngokuba ilungelo lefa lingelakho, nokuhlenga kungokwakho; zithengele yona.’ “Ngase ngazi mina ukuthi leli lizwi livela kuSimakade.
Ngayithenga-ke insimu ese-Anathothi kuHanameli, indodana yomfowabo kababa, ngamkalela isiliva, kwaba ngamashekeli esiliva ali-17.
Ngaloba incwadi, ngayisicilela, ngenza ukuba kube nofakazi, ngamkalela isiliva ngesilinganiso.
Ngase ngiyithatha incwadi yokuthengiselana, esicilelweyo futhi enemithetho nezimiso zokuthenga kanye nefuzela elalivuliwe,
ngakunika uBharukhi, indodana kaNeriya kaMahaseya, incwadi yokuthengiselana, phambi kukaHanameli indodana yomfowabo kababa, naphambi kofakazi ababelobe encwadini yokuthengiselana naphambi kwabo bonke abaJuda ababehlala egcekeni labalindi.
“Ngamyala uBharukhi phambi kwabo, ngathi:
‘Usho kanje uSimakade Wamabandla, uNkulunkulu ka-Israyeli, uthi: thatha lezi zincwadi, le ncwadi yokuthengiselana esicilelweyo nale evulekileyo, uzifake ezitsheni zebumba, ukuze zigcineke izinsuku eziningi.
Ngokuba uSimakade Wamabandla, uNkulunkulu ka-Israyeli, usho kanje, uthi: kuleli lizwe kuyakubuye kuthengwe izindlu, amasimu nezivini.’
“Sengimnikile uBharukhi, indodana kaNeriya, incwadi yokuthenga, ngakhuleka kuSimakade, ngathi:
“Awu, Nkosi Simakade, bheka, nguWena owenza amazulu nomhlaba ngamandla akho amakhulu nangezikhwepha zakho, akukho lutho olulukhuni kuwe.
Wena obenzela umusa abayizinkulungwane, futhi uyaphindisela ububi bawoyise esifubeni sabantwana babo emva kwabo, Wena Nkulunkulu omkhulu noyiqhawe, ogama lakho kunguSimakade Wamabandla.
Umkhulu ngamasu, izenzo zakho zinkulu, amehlo akho ayazibona zonke izindlela zabantu, ukuze ubanike yilowo nalowo ngokwezindlela zakhe nanjengokwezithelo zemisebenzi yakhe.
Wena wenza izibonakaliso nezimangaliso eGibhithe, kuze kube namuhla, nakwa-Israyeli nakwabanye abantu, wazenzela iGama kuze kube namuhla.
Wabakhipha abantu bakho u-Israyeli, eGibhithe, ngezibonakaliso nangezimangaliso, ngesandla esinamandla, ngezikhwepha, nangokwesabeka okukhulu.
Wabanika leli lizwe, owawufunge kokhokho babo ukuthi uyakubanika lona, izwe elichichima ubisi noju.
Bangena balidla, kodwa kabalilalenga izwi lakho, abahambanga ngemithetho yakho, konke owawubayale ngakho ukuba bakwenze abakwenzanga; wabe-ke usuwehlisela kubo yonke inhlekelele.
“Bheka, kwenziwe izindunduma zokuhlasela ukuze kudliwe umuzi; nalo muzi ubhekene nenkemba, nendlala nobhubhane, unikelwe esandleni samaKhaledi alwa nawo. Owakusho sekwenzekile, njengoba uzibonela nje.
Wena Nkosi Simakade, noma umuzi unikelwe esandleni samaKhaledi, washo kimi, wathi: ‘Zithengele insimu ngesiliva, ube nofakazi.’ ”
Izwi likaSimakade lafika kuJeremiya, lithi:
“Bheka, nginguSimakade uNkulunkulu wabantu bonke, kukhona yini okungehlulayo na?
Ngakho-ke usho kanje uSimakade, uthi: bheka, lo muzi ngizakuwunikela esandleni samaKhaledi, nasesandleni sikaNebukhadinezari, inkosi yaseBhabhele, ukuze awudle.
AmaKhaledi alwa nalo muzi ayakufika, awuthungele ngomlilo, awushise nalezo zindlu ababeshisela uBhali impepho phezu kophahla lwazo, bathululela abanye onkulunkulu iminikelo yokuphuzwayo ukuba bangicunule.
“Abantu bakwa-Israyeli nabakwaJuda benze okubi kuphela phambi kwami, kusukela ebuntwaneni babo. Ngokuba abakwa-Israyeli akukho okunye abakwenzile ngaphandle kokungicunula ngemisebenzi yezandla zabo, kusho uSimakade.
Lo muzi uvuse intukuthelo yami nolaka lwami, kusukela osukwini abawakha ngalo kuze kube namuhla, yingakho ngizowususa nje phambi kwami,
ngenxa yabo bonke ububi obenziwe ngabantu bakwa-Israyeli nabakwaJuda ukuba bangicunule, bona namakhosi abo, izikhulu zabo, abaphristi babo, abaphrofethi babo, nabo bonke abakwaJuda, nabakhileyo eJerusalema.
Nakuba ngabafundisa, ngabaxwayisa ngiphindelela, nokho bangifulathela, abazange babheke kimi, abazange bangilalele futhi kabakwemukelanga ukuyalwa.
Kepha babeka izinengiso zabo endlini ebizwa ngeGama lami, ukuba bayingcolise.
Bakha izindawo eziphakemeyo zikaBhali esigodini sendodana kaHinomu, ukuba badabulise khona amadodana namadodakazi abo emlilweni kuMoloki, engangingazange ngibayale ngakho, nokungazange kungene emqondweni wami ukuthi bangenza lesi sinengiso ukuze bamonise uJuda.
“Ngakho-ke manje usho kanje uSimakade uNkulunkulu ka-Israyeli ngalo muzi enithi ngawo: ‘Unikelwe esandleni senkosi yaseBhabhele ngenkemba, ngendlala nangobhubhane,’ uthi:
bheka, ngiyakubaqoqa emazweni wonke lapho ngibaxoshele khona ngentukuthelo, ngokufutheka, nangolaka lwami olukhulu; ngibabuyisele kule ndawo, ngibenze ukuba bahlale belondekile;
bayakuba ngabantu bami, Mina ngibe nguNkulunkulu wabo;
ngiyakubanika nhliziyonye nandlelanye, ukuba bangesabe zonke izinsuku, kube kuhle kubo nakubantwana babo emva kwabo.
Ngiyakwenza nabo isivumelwano esimi phakade, ngingayeki ukubenzela okuhle, ngiyakubeka ezinhliziyweni zabo ukungesaba, ukuze bangasuki kimi.
Ngiyakuthokoza ngabo, ngibenzele okuhle, ngibatshale ngeqiniso kuleli lizwe, ngayo yonke inhliziyo yami, nangawo wonke umphefumulo wami.
“Ngokuba usho kanje uSimakade, uthi: njengalokhu ngehlisela laba bantu yonke le nhlekelele, kanjalo ngiyakubehlisela konke okuhle engibethembise khona.
Amasimu ayothengwa kulo leli lizwe esenithi ngalo liyincithakalo, alisahlalwa muntu nasilwane, nokuthi linikelwe esandleni samaKhaledi.
Amasimu ayakuthengwa ngesiliva, kulotshwe encwadini, isicilelwe, kube nofakazi ezweni lakwaBhenjamini, nasemaphethelweni eJerusalema, emizini yakwaJuda, emizini ekwelezintaba, emizini esehlanzeni, nasemizini eseNegevu, ngokuba ngibabuyise ekuthunjweni,” kusho uSimakade.
Izwi likaSimakade labuye lafika ngokwesibili kuJeremiya esavalelwe ejele elisegcekeni labalindi, lathi:
“Usho kanje uSimakade owenza umhlaba, wawubumba, wawumisa, nguSimakade igama lakhe, uthi:
‘Ngibize, ngiyakukuphendula, ngikutshele izinto ezinkulu nezifihlekileyo ongazaziyo.’
Ngokuba usho kanje uSimakade uNkulunkulu ka-Israyeli ngezindlu zalo muzi nangezigodlo zamakhosi akwaJuda ezidiliziwe ukuze kwakhiwe indunduma yokuvikela ekuhlaselweni nasenkembeni, uthi:
‘AmaKhaledi azofika agcwalise le ndawo ngezidumbu zabantu engababulala ngentukuthelo yami nangolaka lwami, ngokuba ngiwufulathele lo muzi ngenxa yabo bonke ububi bawo.
“ ‘Bheka, ngiyakuwulethela impilo nokuphulukiswa, ngibelaphe, ngibambulele impumelelo nokulondeka okukhulu.
Ngiyoguqula ukuthunjwa kukaJuda nokuka-Israyeli, ngibakhe njengakuqala.
Ngiyakubahlambulula kubo bonke ububi babo abone ngabo kimi, ngizithethelele zonke izono zabo abazenzileyo nabaphambuke ngazo kimi.
Umuzi uyakuba kimi yigama lokujabula, nodumo, nendumiso kuzo zonke izizwe zomhlaba eziyakuzwa ngakho konke okuhle engibenzela khona. Ziyokwesaba, zithuthumele ngenxa yakho konke okuhle nangakho konke ukuthula engiwenzela khona.’
“Usho kanje uSimakade, uthi: ‘Kuyakuzwakala futhi kule ndawo enithi ngayo iyincithakalo, akuhlali muntu nasilwane kuyo, emizini yakwaJuda, nasemigwaqweni eJerusalema ebhujisiweyo engenazakhamuzi, nabantu, nazilwane,
umsindo wokujabula nowentokozo, izwi lomyeni nelikamakoti, izwi lalabo abathi: “ ‘ “Bongani uSimakade Wamabandla, ngokuba uSimakade muhle, umusa wakhe umi phakade.” “ ‘Kuyozwakala nezwi labaletha iminikelo yokubonga endlini kaSimakade, ngokuba izwe ngiyakukuguqula ukuthunjwa kwalo, liphinde libe njengakuqala,’ kusho uSimakade.
“Usho kanje uSimakade Wamabandla, uthi: ‘Kuyakuthi kule ndawo eyincithakalo, engenamuntu nazilwane, nakuyo yonke imizi yayo, kube khona amadlelo abelusi abayobuthisela khona imihlambi yabo.
Emizini esezintabeni, esehlanzeni, eseNegevu, esezweni lakwaBhenjamini, esemaphethelweni eJerusalema nasemizini yakwaJuda, kuyakubuye kudlule imihlambi ezandleni zalowo oyibalayo,’ kusho uSimakade.
“ ‘Bheka, ziyeza izinsuku, kusho uSimakade, lapho ngiyakufeza izwi elihle engilisho kuyo indlu ka-Israyeli nendlu kaJuda.
“ ‘Ngalezo zinsuku nangaleso sikhathi ngiyakuhlumisela uDavide iHlumela Lokulunga; liyakwenza ubulungiswa nokulunga emhlabeni.
Ngalezo zinsuku uJuda uyakusindiswa, neJerusalema liyakuhlala livikelekile. Yileli igama eliyakubizwa ngalo, elithi: USIMAKADE UNGUKULUNGA KWETHU.’
“Ngokuba usho kanje uSimakade, uthi: ‘UDavide akayukumswela umuntu oyohlala esihlalweni sobukhosi sendlu ka-Israyeli.
Abaphristi abangabaLevi abayukumswela umuntu oyokuma phambi kwami anikele ngeminikelo yokushiswa, ashise iminikelo yokusanhlamvu, anikele ngemihlatshelo izinsuku zonke.’ ”
Izwi likaSimakade lafika kuJeremiya, lathi:
“Usho kanje uSimakade, uthi: ‘Uma ningasephula isivumelwano sami nemini, nesivumelwano sami nobusuku, kungabe kusaba bikho mini nabusuku ngesikhathi sakho,
kanjalo nesivumelwano sami noDavide, inceku yami, sokuba kube khona ohlala esihlalweni sobukhosi abuse, siyakwephulwa kanjalo nakubaLevi, abaphristi, izikhonzi zami.
Njengalokhu ibandla lasezulwini lingenakubalwa, nesihlabathi solwandle singenakulinganiswa, kanjalo ngiyakwandisa abozalo lukaDavide, inceku yami, nabaLevi abangikhonzayo.’ ”
Izwi likaSimakade lafika kuJeremiya, lathi:
“Awuzwanga yini laba bantu bekhuluma, bethi: ‘Imindeni yomibili uSimakade ayikhethayo uyilahlile na?’ Base bebadelela abantu bami, kwaze kwangathi abasesizwe phambi kwabo.
Usho kanje uSimakade, uthi: ‘Uma bengingenzanga isivumelwano sami nemini nobusuku, nezimiso nezulu nomhlaba,
bengiyakubalahla abozalo lukaJakobe nabolukaDavide, inceku yami, ngingathathi ozalweni lwakhe ababusi bozalo luka-Abhrahama, no-Isaka, noJakobe. Ngiyakuguqula ukuthunjwa kwabo futhi ngibahawukele.’ ”
Izwi elafika kuJeremiya livela kuSimakade, ngesikhathi uNebukhadinezari, inkosi yaseBhabhele, nempi yakhe yonke, nemibuso yonke yomhlaba engaphansi kwesandla sakhe, nezizwe zonke, zilwa neJerusalema nemizana yonke elizungezile, lathi:
“Usho kanje uSimakade uNkulunkulu ka-Israyeli, uthi: hamba uye kuZedekiya, inkosi yakwaJuda, uyothi kuye: ‘Usho kanje uSimakade, uthi: bheka, ngizakuwunikela lo muzi esandleni senkosi yaseBhabhele, eyakuwungqongqisa ngomlilo.
Wena awuyukuphunyuka esandleni sayo; uyakubanjwa nokubanjwa, unikelwe esandleni sayo; niyakubonana ubuso nobuso nenkosi yaseBhabhele, nikhulume umlomo nomlomo; uyakuya eBhabhele.
“ ‘Kepha yizwa izwi likaSimakade, Zedekiya, nkosi yakwaJuda. Usho kanje uSimakade ngawe, uthi: awuyukufa ngenkemba.
Uyakufa ngokuthula; ushiselwe amakha njengalokhu ashiselwa amakhosi okuqala akwendulelayo. Bayokushisela amakha, bakulilele, bathi: “Maye nkosi!” Ngokuba Mina uqobo ngilikhulumile leli lizwi, kusho uSimakade.’ ”
UJeremiya, umphrofethi, wawakhuluma wonke lawa mazwi kuZedekiya, inkosi yakwaJuda, eJerusalema,
ngesikhathi impi yenkosi yaseBhabhele ilwa neJerusalema nemizi yonke yakwaJuda eseleyo, iLakhishi ne-Azeka, ngokuba yiyo imizi ebiyelweyo eyayisele emizini yakwaJuda.
Izwi elafika kuJeremiya livela kuSimakade, ngesikhathi inkosi uZedekiya seyenze isivumelwano nabo bonke abantu baseJerusalema ukuba kwenziwe isimemezelo sokukhululwa.
Isimemezelo sokuba yilowo nalowo akhulule isigqila sakhe, nesigqilakazi sakhe, umHebheru nomHebherukazi, ukuze kungabi bikho muntu ogqilaza umfowabo kwaJuda.
Zonke izikhulu, nabo bonke abantu ababengene esivumelwaneni ukuba bavumelane, balalela, kwaba yilowo nalowo wakhulula isigqila sakhe nesigqilakazi sakhe, ukuba sihambe sikhululekile; kungabe kusaba khona ogqilazayo, balalela, bazikhulula, zahamba.
Kepha emveni kwalokho bashaya ingwijikhwebu, bazibuyisa izigqila nezigqilakazi ababezivumele ukuba zikhululeke, bazigqilaza, zaba futhi yizigqila nezigqilakazi.
Ngakho-ke izwi likaSimakade lafika kuJeremiya livela kuSimakade, lathi:
“Usho kanje uSimakade uNkulunkulu ka-Israyeli, uthi: Mina ngenza isivumelwano nokhokho benu mhla ngibakhipha eGibhithe, endlini yobugqila, ngathi:
‘Kuyakuthi ekupheleni kweminyaka eyisikhombisa, kube yilowo nalowo akhulule umfowabo ongumHebheru, ozithengise kuwe, uyakukusebenzela iminyaka eyisithupha, bese umkhulula ukuba ahambe,’ kepha okhokho benu kabangilalelanga, abakugqizanga qakala lokho.
Nina-ke namuhla niphendukile, nenza okulungileyo phambi kwami ngokumemezela ukukhululeka, kwaba yilowo nalowo wakhulula umakhelwane wakhe, nenza isivumelwano phambi kwami, endlini ebizwa ngegama lami.
Kepha niphendukile futhi nalihlambalaza igama lami, kwaba yilowo nalowo wabuyisa isigqila sakhe nesigqilakazi sakhe enanizikhululile ngokufisa kwazo ukuba zihambe, seniphinde nazibuyisa ukuba nizicindezele futhi zibe yizigqila nezigqilakazi zenu.
“Ngakho-ke usho kanje uSimakade, uthi: nina aningilalelanga ukuba nimemezele ukukhululeka, kube yilowo nalowo kumfowabo nakumakhelwane wakhe. Bhekani, ngizakumemezela ukukhululeka kini, kusho uSimakade. Ngizokhulula inkemba, ubhubhane nendlala; nginenze nihlupheke emibusweni yonke yomhlaba.
Ngiyakubenza abantu abeqe isivumelwano sami, abangawagcinanga amazwi esivumelwano abasenzile phambi kwami; ngiyakubenza njengethole abaliklaya kabili, badabula phakathi kwezinhlangothi zalo,
ngisho izikhulu zakwaJuda nezaseJerusalema, abathenwa, abaphristi, nabo bonke abantu bezwe abebedlule phakathi kwezinhlangothi zethole.
Yebo, ngiyakubanikela esandleni sezitha zabo, nasesandleni salabo abafuna ukuphila kwabo; izidumbu zabo ziyakuba ngukudla kwezinyoni zezulu nokwezilwane zasendle.
“UZedekiya, inkosi yakwaJuda, nezikhulu zakhe ngiyakubanikela esandleni sezitha zabo, esandleni salabo abafuna ukuphila kwabo, nasesandleni sempi yenkosi yaseBhabhele, esisukile kini.
Bheka, ngiyakukhipha umyalo, kusho uSimakade, ngibabuyisele kuwo lo muzi; bayokulwa nawo, bawudle, bawushise ngomlilo. Ngiyakuyenza imizi yakwaJuda ibe yincithakalo, kungahlali muntu kuyo.”
Izwi elafika kuJeremiya livela kuSimakade ezinsukwini zikaJehoyakimi, indodana kaJosiya, inkosi yakwaJuda, lathi:
“Hamba uye endlini yamaRekhabhi, ukhulume nawo, bese uwangenisa endlini kaSimakade, kwelinye lamakamelo, uwanike iwayini ukuba aphuze.”
Ngase ngithatha uJahazaniya, indodana kaJeremiya kaHabhasiniya nabafowabo, nawo wonke amadodana akhe, nabo bonke abendlu yamaRekhabhi,
ngabangenisa endlini kaSimakade, ekamelweni lamadodana kaHanani, indodana ka-Igidaliya, umuntu kaNkulunkulu elaliseceleni kwekamelo lezikhulu, elaliphezu kwekamelo likaMahaseya, indodana kaShalumi, umlindisango.
Ngabeka phambi kwamadodana endlu yamaRekhabhi izitsha ezazigcwele iwayini nezindebe, ngathi kubo: “Phuzani iwayini!”
Kepha, bathi: “Asiliphuzi iwayini, ngokuba uJonadaba, indodana kaRekhabhi, ukhokho wethu, wasiyala, wathi: ‘Ningaliphuzi iwayini, nina namadodana enu, kuze kube phakade.
Ningakhi zindlu, ningahlwanyeli mbewu, ningatshali sivini, futhi ningabi naso, ngokuba niyakuhlala emathendeni zonke izinsuku zokuphila kwenu ukuze niphile isikhathi eside ezweni lapho nigogobele khona.’
Siligcinile izwi likaJonadaba indodana kaRekhabhi ukhokho wethu kukho konke asiyala ngakho ukuba singaliphuzi iwayini zonke izinsuku zokuphila kwethu, thina nomkethu, namadodana namadodakazi ethu,
nokuba singakhi zindlu ukuba sihlale kuzo, futhi asinazo izivini, amasimu, nembewu.
Sihlale emathendeni, salalela, senza konke uJonadaba, ukhokho wethu, asiyala ngakho ukuba sikwenze.
Kepha kwathi lapho uNebukhadinezari, inkosi yaseBhabhele, ihlasela izwe, sathi: ‘Wozani, masiye eJerusalema, sibalekele impi yamaKhaledi neyama-Aramu.’ Sasesihlala-ke lapha eJerusalema.”
Izwi likaSimakade lafika kuJeremiya, lathi:
“Usho kanje uSimakade Wamabandla, uNkulunkulu ka-Israyeli, uthi: hamba uthi kubo bonke abakwaJuda nezakhamuzi zaseJerusalema, uthi: ‘Aniyukukwamukela yini ukuyalwa ukuba nigcine amazwi ami na?’ kusho uSimakade.
‘Amazwi kaJonadaba, indodana kaRekhabhi, agciniwe, ayala ngawo abozalo lwakhe ukuba bangaliphuzi iwayini; kuze kube namuhla abaliphuzanga, ngokuba bawulalela umyalo kakhokho wabo. Nami ngikhulumile kini ngiphindelela, kodwa kaningilalelanga.
Ngathumela izinceku zami, abaphrofethi, ngibathuma ngiphindelela, ngithi: “Ake niphenduke, kube yilowo nalowo endleleni yakhe embi, nenze imisebenzi yenu ibe mihle, ningalandeli abanye onkulunkulu ukuba nibakhonze; yikhona niyakuhlala ezweni engalinika nina nokhokho benu.” “ ‘Kepha aniyibekanga indlebe yenu, aningilalelanga.
Isizukulwane sikaJonadaba, indodana kaRekhabhi, siwugcinile umyalo kakhokho waso asiyala ngawo, kodwa laba bantu kabangilalelanga.’
“Ngakho-ke usho kanje uSimakade uNkulunkulu Wamabandla, uNkulunkulu ka-Israyeli, uthi: ‘Bheka, ngizakuletha kuJuda nakuzo zonke izakhamuzi zaseJerusalema konke okubi engikukhulume kubo, ngokuba ngikhulumile kubo kodwa abalalelanga, ngababiza kepha kabasabelanga.’ ”
UJeremiya wayesethi kwabendlu yamaRekhabhi: “Usho kanje uSimakade Wamabandla, uNkulunkulu ka-Israyeli, uthi: ‘Ngenxa yokuba nawulalela umyalo kaJonadaba, ukhokho wenu, nayigcina yonke imiyalo yakhe, nenza konke ayeniyale ngakho,’
ngakho-ke usho kanje uSimakade Wamabandla, uNkulunkulu ka-Israyeli, uthi: ‘UJonadaba, indodana kaRekhabhi, akayukuswela muntu oyokuma phambi kwami kuze kube phakade.’ ”
Kwathi ngonyaka wesine wokubusa kukaJehoyakimi, indodana kaJosiya, inkosi yakwaJuda, kwafika leli lizwi kuJeremiya livela kuSimakade, lathi:
“Zithathele umqulu wencwadi, ulobe kuwo wonke amazwi engiwakhulume kuwe ngo-Israyeli, nangoJuda, nangazo zonke izizwe, kusukela ngosuku engakhuluma ngalo kuwe ngezinsuku zokubusa kukaJosiya kuze kube namuhla.
Mhlawumbe indlu kaJuda iyakuzwa konke okubi engihlela ukukwenza kubo, ukuze baphenduke, kube yilowo nalowo endleleni yakhe embi, bese ngibathethelela ububi babo nezono zabo.”
UJeremiya wayesebiza uBharukhi indodana kaNeriya. UBharukhi waloba emqulwini wencwadi wonke amazwi kaSimakade ayewakhulume kuye, ewatshelwa nguJeremiya.
UJeremiya wamyala uBharukhi, wathi: “Mina ngivalelwe, angikwazi ukuya endlini kaSimakade.
Wena hamba, uye endlini kaSimakade ngosuku lokuzila ukudla, ufunde abantu bezwa, ufundele nabo bonke abavela emizini yakwaJuda, wonke amazwi kaSimakade engikutshele wona, wawaloba emqulwini.
Mhlawumbe ukunxusa kwabo kungase kufike phambi kukaSimakade, baphenduke, yilowo nalowo endleleni yakhe embi, ngokuba inkulu intukuthelo nolaka uSimakade akhulume ngakho kulaba bantu.”
UBharukhi, indodana kaNeriya, wenza konke uJeremiya, umphrofethi, ayemyale ngakho, wafunda encwadini amazwi kaSimakade endlini kaSimakade.
Kwathi ngonyaka wesihlanu wokubusa kukaJehoyakimi, indodana kaJosiya, inkosi yakwaJuda, ngenyanga yesishiyagalolunye, bonke abantu baseJerusalema nabo bonke ababevela emizini yakwaJuda, beza eJerusalema, bamemezela ukuzila phambi kukaSimakade.
UBharukhi wayesefunda encwadini amazwi kaJeremiya, endlini kaSimakade, ekamelweni likaGemariya, indodana kaShafani umbhali, elalisegcekeni elingenhla ngasekungeneni kwesango elisha lendlu kaSimakade, wafunda bonke abantu belalele.
UMikhaya, indodana kaGemariya kaShafani wezwa wonke amazwi kaSimakade ayekule ncwadi,
wayesehlela esigodlweni senkosi, ekamelweni lombhali; bheka, kwakuhleli khona zonke izikhulu: u-Elishamu umbhali, uDelaya indodana kaShemaya, u-Elinathani indodana ka-Akhibhori, uGemariya indodana kaShafani, uZedekiya indodana kaHananiya, nazo zonke izikhulu.
UMikhaya wazibikela wonke amazwi ayewezwile, ngesikhathi uBharukhi efundela abantu incwadi.
Zonke izikhulu zathuma uJehudi, indodana kaNethaniya kaShelemiya kaKhushi kuBharukhi, zathi: “Umqulu owufundele abantu belalele wuthathe ngesandla sakho, uze nawo.” UBharukhi, indodana kaNeriya, wawuthatha umqulu ngesandla sakhe, waya kuzo.
Zathi kuye: “Ake uhlale phansi, usifundele wona, silalele.” UBharukhi wayesezifundela wona zilalele.
Kwathi lapho seziwezwile wonke amazwi, zabhekana ngokwesaba, kwaba yilowo nalowo oseduze naye, zase zithi kuBharukhi: “Impela siyakuyibikela inkosi lawa mazwi.”
Zambuza uBharukhi, zathi: “Ake usitshele ukuthi uwalobe kanjani wonke lawa mazwi na? Ngabe wonke avela emlonyeni wakhe?”
UBharukhi, wathi kuzo: “Wawaphumisela wonke lawa mazwi kimi ngomlomo wakhe, ngawaloba encwadini ngoyinki.”
Izikhulu zathi kuBharukhi: “Hamba uyocasha, wena noJeremiya, ungatsheli muntu ukuthi nikuphi.”
Zase ziya enkosini egcekeni. Umqulu zaziwubeke ekamelweni lika-Elishama, umbhali, zase ziyibikela wonke lawa mazwi inkosi ilalele.
Inkosi yayisimthuma uJehudi ukuba awulande umqulu; wawulanda ekamelweni lika-Elishama, umbhali. UJehudi wawufunda, inkosi nazo zonke izikhulu ezazimi ngasenkosini zilalele.
Inkosi yayihlezi endlini yasebusika, ngenyanga yesishiyagalolunye, kunembawula evuthayo phambi kwayo.
Kwathi lapho uJehudi esefunde amakhasi amathathu noma amane, inkosi yawasika ngommese womlobi, yawaphonsa emlilweni osembawuleni, waze waphela wonke umqulu ushiswa ngomlilo osembawuleni.
Inkosi nezinceku zayo ezezwa wonke lawo mazwi, azesabanga, futhi aziziklebhulanga izingubo zazo.
U-Elinathani, uDelaya noGemariya babeyinxusile inkosi ukuba ingawushisi umqulu, kodwa ayibalalelanga.
Inkosi yayala uJerameli, indodana yenkosi, uSeraya, indodana ka-Aziriyeli noShelemiya, indodana ka-Abhideyeli ukuba babambe uBharukhi, umbhali noJeremiya, umphrofethi, kodwa uSimakade wabafihla.
Izwi likaSimakade lase lifika kuJeremiya, emveni kokuba inkosi isiwushisile umqulu namazwi ayelotshwe nguBharukhi, evela emlonyeni kaJeremiya, lathi:
“Phinda, uthathe omunye umqulu, ubhale kuwo wonke amazwi ayesemqulwini wokuqala oshiswe nguJehoyakimi, inkosi yakwaJuda.
Uyakuthi-ke kuJehoyakimi, inkosi yakwaJuda: ‘Usho kanje uSimakade uthi: uwushisile lo mqulu, uthi: “Ulobeleni kuwo ukuthi inkosi yaseBhabhele izofika nokufika izobhubhisa leli lizwe, yenze ukuba kungabe kusaba nabantu nezilwane kulo na?”
“ ‘Ngakho-ke usho kanje uSimakade ngoJehoyakimi, inkosi yakwaJuda, uthi: akuyukuba namuntu oyohlala esihlalweni sobukhosi sikaDavide; isidumbu sakhe siyakutshingwa ngaphandle ekushiseni kwasemini nasesithwathweni sasebusuku.
Ngizomjezisa yena nabozalo lwakhe, nezinceku zakhe, ngokona kwabo, ngehlisele phezu kwabo, nabakhileyo eJerusalema, nakubantu bakwaJuda yonke inhlekelele engikhulume ngayo, ngokuba abalalelanga.’ ”
UJeremiya wayesethatha omunye umqulu, wawunika uBharukhi umbhali, indodana kaNeriya, waloba kuwo wonke amazwi encwadi akhulunywa nguJeremiya, wonke amazwi omqulu uJehoyakimi, inkosi yakwaJuda, ayewushise emlilweni. Kwathasiselwa kuwo amanye amazwi amaningi anjengawakuqala.
UZedekiya, indodana kaJosiya, wabusa eyinkosi esikhundleni sikaKhoniya, indodana kaJehoyakimi, owayebekwe nguNebukhadinezari, inkosi yaseBhabhele, ukuba abe yinkosi kwaJuda.
Kepha uZedekiya, izinceku zakhe, nabantu bezwe abawalalenga amazwi kaSimakade awakhuluma ngomlomo kaJeremiya, umphrofethi.
UZedekiya, inkosi, wathumela uJehukhali, indodana kaShelemiya, noZefaniya, indodana kaMahaseya, umphristi, kumphrofethi uJeremiya, wathi: “Ake usikhulekele kuSimakade uNkulunkulu wethu.”
UJeremiya wayesekhululekile ukuba ahambe phakathi kwabantu, ngoba babengakamfaki ejele.
Impi kaFaro yayikhuphukile ivela eGibhithe, okwathi lapho amaKhaledi ayevimbezele iJerusalema ezwa lokho, asuka eJerusalema.
Izwi likaSimakade lafika kumphrofethi uJeremiya, lathi:
“Usho kanje uSimakade uNkulunkulu ka-Israyeli, uthi: niyakusho kanje enkosini yakwaJuda enithumileyo ukuba nizobuza kimi, nithi: ‘Uyabona-ke, impi kaFaro ephume ukuzonisiza izophenduka ibuyele ezweni lakubo eGibhithe.
AmaKhaledi azobuya alwe nalo muzi, awudle, awushise ngomlilo.’
“Usho kanje uSimakade, uthi: ningazikhohlisi, nithi: ‘AmaKhaledi ayakusuka kithi noma kanjani, ahambe,’ ngokuba awayukuhamba.
Noma beningayibhubhisa yonke impi yamaKhaledi alwa nani, kusale kuphela izinkubela kubo, zona beziyakuvuka, kube yileyo naleyo ethendeni layo, ziwushise ngomlilo lo muzi.”
Kwathi lapho impi yamaKhaledi isisukile eJerusalema, ngenxa yempi kaFaro,
uJeremiya wasuka eJerusalema, waya ezweni lakwaBhenjamini ukuba ayokwamukela khona isabelo sakhe phakathi kwabantu.
Kwathi lapho engasesangweni kwaBhenjamini, bheka, umphathi wabalindi okwakuthiwa ngu-Iriya, indodana kaShelemiya kaHananiya; wambamba uJeremiya, umphrofethi, wathi: “Uhlubukela kumaKhaledi.”
UJeremiya, wathi: “Amanga lawo. Angihlubukeli kumaKhaledi.” Kepha akamlalelanga. U-Iriya wambopha uJeremiya wamyisa ezikhulwini.
Izikhulu zamthukuthelela uJeremiya, zamshaya, zamfaka ejele, endlini kaJonathani, umbhali, eyayenziwe ijele.
UJeremiya esefakwe emgodini, endlini eyijele, wahlala lapho isikhathi eside.
UZedekiya, inkosi, wathumela ukuba alandwe; inkosi yambuza ngasese esigodlweni sayo, yathi: “Likhona yini izwi elivela kuSimakade na?” UJeremiya, wathi: “Likhona.” Wathi futhi: “Uyakunikelwa esandleni senkosi yaseBhabhele.”
UJeremiya wayesethi enkosini uZedekiya: “Ngoneni kuwe, nasezincekwini zakho, nakulaba bantu ukuba ningifake ejele na?
Baphi manje abaphrofethi benu ababephrofetha, bethi: ‘Inkosi yaseBhabhele ayizukukuhlasela wena naleli lizwe na?’
Ngakho-ke ake ulalele nkosi yami, nkosi, ake kuzwakale ukunxusa kwami engikwethula kuwe, ungangibuyiseli endlini kaJonathani, umbhali, funa ngifele khona.”
UZedekiya, inkosi, wayeseyala ukuba uJeremiya bambeke egcekeni labalindi, bamnika nsuku zonke iqebelengwane lesinkwa elivela emgwaqweni wababhakizinkwa, kwaze kwaphela sonke isinkwa emzini. UJeremiya wahlala-ke egcekeni labalindi.
UShefathiya indodana kaMathani, uGedalidaya indodana kaPhashuri, uJukhali indodana kaShemaliya noPhashuri indodana kaMalikhiya bawezwa amazwi uJeremiya ayewakhuluma phambi kwabantu bonke, ethi:
“Usho kanje uSimakade, uthi: ‘Osele kulo muzi uyakufa ngenkemba, ngendlala, nangobhubhane, kodwa ozophuma aye kumaKhaledi, uyakuphila; nokuphila kwakhe kuyakuba yimpango kuye, aphile.’
Usho kanje uSimakade ngalo muzi, uthi: ‘Lo muzi uyakunikelwa nokunikelwa esandleni sempi yenkosi yaseBhabhele, iwudle.’ ”
Izikhulu zathi enkosini: “Lo muntu makabulawe, ngoba uthena amabutho asasele kulo muzi nabantu bonke amandla, ngokukhuluma kubo lawa mazwi anje, ngokuba lo muntu akafuni inhlalakahle yalaba bantu, kodwa okubi kuphela.”
UZedekiya, inkosi, wayesethi: “Bhekani, usesandleni senu, ngokuba inkosi ayinamandla okuphikisana nani.”
Bambamba uJeremiya, bamphonsa emgodini kaMalikhiya, indodana yenkosi, owawusegcekeni labalindi. Bamehlisela emgodini ngezintambo uJeremiya, kwakungekho manzi, kodwa udaka kuphela. UJeremiya wabisha odakeni.
Kepha u-Ebhedi Melekhi, umKhushe owayengumthenwa esigodlweni senkosi, wezwa ukuthi uJeremiya bamfake emgodini. Inkosi yayihleli esangweni kwaBhenjamini.
U-Ebhedi Melekhi waphuma esigodlweni, wakhuluma enkosini, wathi:
“Nkosi yami, nkosi, laba bantu benze okubi ngakho konke abakwenze kuJeremiya, umphrofethi, bamphonse emgodini; uzakufela lapho ngenxa yendlala, ngokuba akusekho kudla emzini.”
Inkosi yayisimyala u-Ebhedi Melekhi, umKhushe, ithi: “Thatha lapha amadoda angama-30, uhambe nawo, nimkhiphe uJeremiya, umphrofethi, emgodini, engakafi.”
U-Ebhedi Melekhi wathatha amadoda, wahamba nawo, waya esigodlweni senkosi endlini yengcebo engaphansi, wathatha khona amadlephudlephu namanikiniki agugileyo, wakwehlisela ngezintambo kuJeremiya emgodini.
U-Ebhedi Melekhi, umKhushe, wathi kuJeremiya: “Faka lawa madlephudlephu namanikiniki emakhwapheni, phansi kwezintambo.” UJeremiya wenza kanjalo.
Base bemdonsa ngezintambo, bamkhipha emgodini; uJeremiya wahlala egcekeni labalindi.
UZedekiya, inkosi, wathumela, wamlanda umphrofethi uJeremiya, weza kuye emnyango wesithathu osendlini kaSimakade; inkosi yathi kuJeremiya: “Kukhona into engithanda ukuyibuza kuwe, ungangifihleli lutho.”
UJeremiya wathi kuZedekiya: “Uma ngikutshela, awuyukungibulala nokungibulala na? Uma ngikweluleka, awuyukungilalela.”
Inkosi uZedekiya yafunga ngasese kuJeremiya, yathi: “Ngifunga ngiyagomela phambi kukaSimakade owasenzela lo mphefumulo, angiyukukubulala, futhi angiyukukunikela esandleni salawo madoda afuna ukuphila kwakho.”
UJeremiya wayesethi kuZedekiya: “Usho kanje uSimakade uNkulunkulu Wamabandla, uNkulunkulu ka-Israyeli, uthi: ‘Uma uphuma nokuphuma, uye ezikhulwini zenkosi yaseBhabhele, uyakuphila, futhi nalo muzi awuyukushiswa ngomlilo, uyakuphila wena nabendlu yakho, niyophila.
Kepha uma ungazinikeli ezikhulwini zenkosi yaseBhabhele, lo muzi uyakunikelwa esandleni samaKhaledi, awushise ngomlilo, wena awuyukuphunyuka esandleni sawo.’ ”
Inkosi uZedekiya yathi kuJeremiya: “Ngiyabesaba abaJuda abahlubukele kumaKhaledi, funa nginikelwe kubo, bangiphathe kabi.”
Kepha uJeremiya, wathi: “Abayukukunikela. Ake ulilalele izwi likaSimakade engilikhuluma kuwe, ukuze kube kuhle kuwe, usindise umphefumulo wakho.
Kepha-ke uma wala ukuyozinikela, uSimakade ungibonise leli lizwi, elithi:
bheka, bonke abesifazane abasele esigodlweni senkosi yakwaJuda bayakukhishelwa ezikhulwini zenkosi yaseBhabhele. Uyabona-ke, bayakuthi: “ ‘Abahlobo bakho bakwedukisile, bakwehlula; kodwa lapho izinyawo zakho sezibishe exhaphozini, babuyela emuva.’
“Bonke abafazi bakho nezingane zakho bayobayisa kumaKhaledi. Wena awuyukuphunyuka esandleni sabo, kodwa isandla senkosi yaseBhabhele siyakukubamba, nalo muzi ushiswe ngomlilo.”
UZedekiya wayesethi kuJeremiya: “Makungabi bikho muntu ozwa lawa mazwi, ukuze ungafi.
Uma izikhulu zizwa ukuthi ngikhulume nawe, bese zifika kuwe, zithi: ‘Ake usitshele ukuthi utheni enkosini, ungasifihleli khona, nalokho inkosi ekukhulume kuwe, khona asiyukukubulala,’
uyothi kubo: ‘Ngizinxusele enkosini ukuba ingangibuyiseli endlini kaJonathani, funa ngifele khona.’ ”
Zonke izikhulu zafika kuJeremiya, zambuza. Wazitshela wonke lawo mazwi njengalokhu inkosi yayimyalile. Zathula-ke, zasuka kuye, alwaze lwaziwa udaba.
UJeremiya wasala egcekeni labalindi kwaze kwaba wusuku elanqotshwa ngalo iJerusalema.
Ngonyaka wesishiyagalolunye wokubusa kwenkosi uZedekiya kwaJuda, ngenyanga yeshumi, inkosi uNebukhadinezari waseBhabhele nayo yonke impi yakhe, bafika eJerusalema, balivimbezela.
Ngonyaka we-11 wokubusa kukaZedekiya, ngenyanga yesine, ngosuku lwesishiyagalolunye lwayo, bafohla bangena emzini.
Zonke izikhulu zenkosi yaseBhabhele zangena, zahlala esangweni eliphakathi nendawo: kwakunguNerigali Sarezeri, uSamigari Nebho, uSaresekimi induna yezinceku, uNerigali Sarezeri induna yabaphristi, nazo zonke ezinye izikhulu zenkosi yaseBhabhele.
Kwathi lapho uZedekiya, inkosi yakwaJuda, nawo wonke amabutho bebabona, baphulukundlela, babaleka ebusuku emizini, bahamba ngendlela yensimu yenkosi, ngesango eliphakathi kwezingange zombili; bahamba ngendlela eya e-Arabha.
Kepha impi yamaKhaledi yabahubha, yamfica uZedekiya ezinkalweni eJerikho, yambamba, yamyisa kuNebukhadinezari, inkosi yaseBhabhele, owayeseRibhila eHamathi, wamgweba.
Inkosi yaseBhabhele yabulala amadodana kaZedekiya eRibhila phambi kwakhe, ebuka; yabulala nazo zonke izikhulu zakwaJuda.
UZedekiya yamkhipha amehlo, yambopha ngamaketanga, wayiswa eBhabhele.
AmaKhaledi asishisa ngomlilo isigodlo senkosi nezindlu zabantu, adiliza izingange eJerusalema.
Insali yabantu ababesemzini, namambuka ayehlubukele kuye, nalabo bantu ababesele kuNebuzaradani, induna yabalindi, wabathumbela eBhabhele.
UNebuzaradani, induna yabalindi, wabashiya abantu abampofu ababengenalutho ezweni lakwaJuda, wabanika izivini namasimu ngalolo lusuku.
UNebukhadinezari, inkosi yaseBhabhele, wamyala uNebuzaradani, induna yabalindi, ngoJeremiya, wathi:
“Mthathe, umphathe kahle, ungezi lutho kuye oluzomlimaza, kodwa wenze lokho akutshela khona.”
UNebuzaradani induna yabalindi, uNebushazibhani induna yezinceku, uNerigali Sarezeri induna yabaphristi, nezikhulu zonke zenkosi yaseBhabhele, bathumela,
ukuba uJeremiya akhishwe egcekeni labalindi. Bamedlulisela kuGedaliya, indodana ka-Ahikamu kaShafani, ukuba amyise ekhaya; wayesehlala phakathi kwabantu.
Izwi likaSimakade lafika kuJeremiya ngesikhathi esavalelwe egcekeni lejele, lathi:
“Hamba utshele u-Ebhedi Melekhi, umKhushe, uthi: ‘Usho kanje uSimakade Wamabandla, uNkulunkulu ka-Israyeli, uthi: bheka, ngiyakuwafeza amazwi ami amelene nalo muzi kuyoba ngokubi, hhayi okuhle, ngalolo lusuku ayofezeka phambi kwakho.
Kepha wena ngiyakukusindisa ngalolo lusuku, kusho uSimakade, awuyukunikelwa esandleni sabantu obesabayo.
Impela ngiyakukukhulula, awuyukuwa ngenkemba, kodwa ukuphila kwakho kuyofana nempango kuwe, ngokuba ungethembile, kusho uSimakade.’ ”
Izwi elafika kuJeremiya livela kuSimakade, ngemva kokuba uNebuzaradani, induna yabalindi, isimkhululile eRama, ngesikhathi imthatha, wayesaboshwe ngamaketanga phakathi kwabo bonke abathunjwa baseJerusalema nakwaJuda, abathunjelwa eBhabhele.
Induna yabalindi yamthatha uJeremiya, yathi kuye: “USimakade uNkulunkulu wakho ukhulumile konke lokhu okubi ngale ndawo,
uSimakade usekulethile, wakwenza njengokusho kwakhe, ngokuba nonile kuSimakade, kanililalelanga izwi lakhe, yingakho nehlelwe yilokhu.
Bheka, manje ngiyakukhulula namuhla emaketangeni asezandleni zakho. Uma kukuhle kuwe ukuba uye nami eBhabhele, woza, ngiyakukunakekela, kodwa uma ungafuni ukuya nami eBhabhele, hlala. Uyabona, lonke izwe liphambi kwakho; yana lapho ufisa ukuya khona.”
Engakathathi isinqumo, yathi kuye: “Buyela kuGedaliya, indodana ka-Ahikamu kaShafani, inkosi yaseBhabhele embeke ukuba abe ngumbusi obusa imizi yakwaJuda, uyohlala naye phakathi kwabantu, noma-ke uyakuya noma kuphi lapho uthanda ukuya khona.” Induna yabalindi yayisimnika umphako nesipho, yamdedela ukuba ahambe.
UJeremiya wayesehamba, waya kuGedaliya, indodana ka-Ahikamu, owayeseMizpha, wahlala naye nabantu ababesele ezweni.
Bonke abakhuzi bempi ababesehlane namabutho abo, bezwa ukuthi inkosi yaseBhabhele ibeke uGedaliya, indodana ka-Ahikamu, ukuba abe ngumbusi ezweni, nokuthi inikele kuye abesilisa, abesifazane, abantwana, nezimpofana zezwe abangathunjelwanga eBhabhele;
zaya kuGedaliya eMizpha: kwakungu-Ishmayeli indodana kaNethaniya, uJohanani noJonathani amadodana kaKhareya, uSeraya indodana kaThanihumethi, amadodana ka-Efayi waseNethofa, uJezaniya indodana kaMahakhi, bona nabantu babo.
UGedaliya, indodana ka-Ahikamu kaShafani, wafunga kubo nakubantu babo, wathi: “Ningesabi ukuzinikela kumaKhaledi, hlalani ezweni, nikhonze enkosini yaseBhabhele, ukuze konke kunihambele kahle.
Bhekani, mina ngizohlala eMizpha, ngiwakhonze amaKhaledi ayofika kithina; kodwa nina, zibutheleni ngezitsha zenu iwayini, izithelo, namafutha, nihlale emizini yenu eniyithathileyo.”
Kwathi ukuba bonke abaJuda ababekwaMowabi, kwa-Amoni, kwa-Edomi, nakuwo wonke amanye amazwe, sebezwile ukuthi inkosi yaseBhabhele iyishiyile insali kwaJuda, nokuthi ibeke uGedaliya, indodana ka-Ahikamu kaShafani, ukuba abe ngumbusi wabo,
bonke abaJuda babuya kuzo zonke izindawo ababexoshelwe kuzo, babuyela ezweni lakwaJuda, kuGedaliya eMizpha, bazibuthela iwayini nezithelo, okuningi kakhulu.
UJohanani, indodana kaKhareya, nabo bonke abakhuzi bempi ababesendle, beza kuGedaliya eMizpha,
bathi kuye: “Uyazi yini ukuthi uBhahalisi, inkosi yabakwa-Amoni, uthumele u-Ishmayeli, indodana kaNethaniya, ukuba akubulale na?” Kepha uGedaliya, indodana ka-Ahikamu, akazange abakholwe.
UJohanani, indodana kaKhareya, wakhuluma ngasese kuGedaliya eMizpha, wathi: “Mangihambe ngiyombulala u-Ishmayeli, indodana kaNethaliya, akekho oyokwazi lokhu. Ufunelani ukukubulala, enze ukuba bonke abaJuda abaqoqene kuwe bahlakazeke, ibhubhe insali yakwaJuda na?”
Kepha uGedaliya, indodana ka-Ahikamu, wathi kuJohanani, indodana kaKhareya: “Awuzukuyenza leyo nto, ngokuba uqamba amanga ngo-Ishmayeli.”
Kwathi ngenyanga yesikhombisa u-Ishmayeli, indodana kaNethaniya ka-Elishama, ongowozalo lwasebukhosini futhi engomunye wezikhulu zenkosi kanye namadoda alishumi, bafika kuGedaliya, indodana ka-Ahikamu eMizpha, badla khona ukudla ndawonye.
U-Ishmayeli, indodana kaNethaniya namadoda alishumi ayehamba nawo, basukuma, bambulala ngenkemba uGedaliya, indodana ka-Ahikamu kaShafani; uGedaliya owayebekwe yinkosi yaseBhabhele ukuba abe ngumbusi ezweni.
Bonke abaJuda ababenoGedaliya eMizpa namaKhaledi, namabutho ayelapho, wawabulala.
Kwathi ngosuku lwesibili uGedaliya ebulewe, kungazi muntu,
kwafika amadoda angama-80 evela eShekhemi, eShilo, naseSamariya egunde izilevu zawo, nezingubo zawo ziklejuliwe, nawo ezisikile uqobo, ephethe ngezandla zawo iminikelo yokusanhlamvu nempepho ukuzokunikela endlini kaSimakade.
U-Ishmayeli, indodana kaNethaniya, waphuma eMizpha ukuyowahlangabeza, ehamba ekhala. Kwathi lapho ehlangana nawo, wathi kuwo: “Wozani kuGedaliya indodana ka-Ahikamu.”
Kwathi ukuba angene phakathi emzini, u-Ishmayeli, indodana kaNethaniya, namadoda ayenaye bawabulala lawo madoda, bawaphonsa emgodini.
Kepha kwakukhona amadoda alishumi phakathi kwawo, athi ku-Ishmayeli: “Ungasibulali, ngokuba emasimini ethu sinengcebo kakolo, ibhali, amafutha, noju.” Wayesewayeka, wangawabulala nabafowabo.
Umgodi lapho u-Ishmayeli alahla khona izidumbu zamadoda ayewabulele kwakuwumgodi omkhulu owawumbiwe yinkosi u-Asa, ukuze azivikele kuBhahasha, inkosi yakwa-Israyeli. U-Ishmayeli, indodana kaNethaniya, wawugcwalisa ngezidumbu zababuleweyo.
U-Ishmayeli wathumba bonke abantu ababesele eMizpha, amadodakazi enkosi nabo bonke abantu ababesele khona, uNebuzaradani induna yabalindi ayebanikele kuGedaliya indodana ka-Ahikamu, u-Ishmayeli indodana kaNethaniya wabathumba, wahamba ukuze adlulele kwabakwa-Amoni.
Kwathi ukuba uJohanani, indodana kaKhareya, nabo bonke abakhuzi bempi ababenaye, bezwe ngobubi obenziwe ngu-Ishmayeli, indodana kaNethaliya,
baqoqa wonke amadoda, bahamba bayokulwa no-Ishmayeli, indodana kaNethaniya, bamthola ngasemanzini amaningi aseGibheyoni.
Kwathi ukuba bonke abantu ababeno-Ishmayeli bambone uJohanani, indodana kaKhareya, nabo bonke abakhuzi bempi ababenaye, bathokoza.
Bonke abantu ababethunjwe ngu-Ishmayeli eMizpha bajika, babuyela emuva noJohanani, indodana kaKhareya.
Kepha u-Ishmayeli, indodana kaNethaniya, waphunyuka kuJohanani namadoda ayisishiyagalombili, waya kwabakwa-Amoni.
UJohanani, indodana kaKhareya, nabo bonke abakhuzi bempi ababenaye, bathatha yonke insali yabantu eyayithunjwe ngu-Ishmayeli, indodana kaNethaniya, eMizpha, emveni kokuba esebulele uGedaliya indodana ka-Ahikamu, amabutho, abesifazane, izingane, nabathenwa, ayebuye nabo eGibheyoni.
Bahamba, baze bayophumula eKhimihamu eliseduze neBhethlehema, ukuze baqhubekele eGibhithe,
bebalekela amaKhaledi, ngokuba babewesaba, lokhu u-Ishmayeli, indodana kaNethaniya, wayebulele uGedaliya, indodana ka-Ahikamu, owayebekwe yinkosi yaseBhabhele ukuba abe ngumbusi ezweni.
Kwase kusondela bonke abakhuzi bempi, uJohanani indodana kaKhareya, uJezaniya indodana kaHosheya nabo bonke abantu abadala nabancane,
bathi kuJeremiya, umphrofethi: “Ake sethule ukunxusa kwethu kuwe; sikhulekele kuSimakade uNkulunkulu wakho, unxusele yonke le nsali, ngokuba sesisele siyingcosana kwabaningi, njengalokhu nawe uzibonela ngawakho amehlo.
Sinxusele ukuze uSimakade uNkulunkulu wakho asikhombise indlela esiyakuhamba ngayo, nalokho esiyakukwenza.”
UJeremiya, umphrofethi, wayesethi kubo: “Nginizwile; bhekani, ngiyakukhuleka kuSimakade uNkulunkulu wenu njengoba ninxusile, kuyakuthi noma yiliphi izwi uSimakade ayoniphendula ngalo, nginitshele lona, angiyukunigodlela lutho.”
Bathi kuJeremiya: “USimakade makabe ngufakazi oqinisileyo nowethembekileyo oyakumelana nathi uma singenzi konke lokhu uSimakade uNkulunkulu wakho ayakukuthumela kithi.
Siyakulilalela izwi likaSimakade uNkulunkulu wethu esikuthuma kuye, noma ngabe lihle noma libi, ukuze kusihambele kahle, siyakulilalela izwi likaSimakade uNkulunkulu wethu.”
Kwathi ngemuva kwezinsuku ezilishumi, izwi likaSimakade lafika kuJeremiya.
Wayesebiza uJohanani, indodana kaKhareya, abakhuzi bonke bempi ababenaye, nabantu bonke abancane nabadala,
wathi kubo: “Usho kanje uSimakade uNkulunkulu ka-Israyeli eningithume kuye ukuba ngininxusele kuye, uthi:
‘Uma niphenduka, niyakuhlala nokuhlala kuleli lizwe, ngiyakunakha nginganidilizi, ngiyakunitshala nginganisiphuli, ngokuba ngiyadabuka ngokubi engikwenzile kini.
Ningayesabi inkosi yaseBhabhele le eniyesabayo. Ningayesabi, kusho uSimakade, ngokuba nginani ukuba nginisindise, nginihlenge esandleni sayo.
Ngiyakunenzela ububele, nginiphathe ngomusa; iyakunibuyisela ezweni lakini.’
“Kepha uma nithi: ‘Asiyukuhlala kuleli lizwe,’ ngalokho ningalilaleli izwi likaSimakade uNkulunkulu wenu,
nithi: ‘Qha, siyakuya eGibhithe, sihlale khona, lapho singayukuyibona khona impi nomsindo wayo nokukhala kwamacilongo, futhi lapho singayukwentula khona ukudla, silambe.’
Ngakho-ke manje, yizwa izwi likaSimakade wena nsali yakwaJuda. Usho kanje uSimakade Wamabandla, uNkulunkulu ka-Israyeli, uthi: ‘Uma niphikelela ukuya eGibhithe, ukuze nigogobale khona,
kuyakuthi inkemba eniyesabayo inifice khona eGibhithe, nifele lapho.
Kuyakuthi bonke abantu abayakulibhekisa eGibhithe ukuba bagogobale khona; bafe ngenkemba, ngendlala nangobhubhane, akuyukuba bikho oyosinda, aphunyuke enhlekeleleni engiyobehlisela yona.’
Usho kanje uSimakade Wamabandla, uNkulunkulu ka-Israyeli, uthi: ‘Njengalokhu intukuthelo yami nolaka lwami kwathululelwa phezu kwababakhe eJerusalema, ngizothululela ulaka lwami kini uma niya eGibhithe. Niyokuba yisithuko nento esabekayo, isiqalekiso nehlazo, ngeke neze nisayibona le ndawo.’
“USimakade ukhulume kini nina nsali yakwaJuda, wathi: ‘Ningayi eGibhithe;’ impela yazini ukuthi ngiyanixwayisa namuhla.
Ngokuba nenze iphutha elikhulu ngokungithumela kuSimakade uNkulunkulu wenu, nithi: ‘Sinxusele kuSimakade uNkulunkulu wethu, usitshele konke ayakukusho uSimakade uNkulunkulu wethu, siyakukwenza.’
Nginitshelile namuhla, kodwa anililaleli izwi likaSimakade uNkulunkulu wenu, ngisho nokukodwa nje angithume khona kini.
Ngakho-ke yazini ngokweqiniso ukuthi niyakufa ngenkemba, ngendlala nangobhubhane, niyofela kuleyo ndawo enifisa ukuya kuyo ukuba niyogogobala khona.”
Kwathi ukuba uJeremiya aqede ukukhuluma kubantu bonke, wonke amazwi kaSimakade uNkulunkulu wabo, uSimakade uNkulunkulu wabo ayemthume wona kubo;
u-Azariya indodana kaHoshayiya, noJohanani indodana kaKhareya, nabantu bonke abazigqajayo, bathi kuJeremiya: “Uqamba amanga. USimakade uNkulunkulu wethu akakuthumanga ukuba, uthi: ‘Ningahambi niyogogobala eGibhithe,’
kodwa nguBharukhi, indodana kaNeriya, ekuqhatha nathi ukuze sinikelwe esandleni samaKhaledi, asibulale, asithumbele eBhabhele.”
UJohanani, indodana kaKhareya, abakhuzi bempi, nabantu bonke kabalilalelanga izwi likaSimakade lokuba bahlale ezweni lakwaJuda.
UJohanani, indodana kaKhareya, nabakhuzi bempi, bathatha yonke insali yakwaJuda eyayibuye ezizweni zonke lapho yayixoshelwe khona ukuba izogogobala ezweni lakwaJuda:
abesilisa, abesifazane, izingane, amadodakazi enkosi, bonke abantu uNebuzaradani, induna yabalindi, ayebashiye kuGedaliya indodana ka-Ahikamu kaShafani, uJeremiya umphrofethi, noBharukhi indodana kaNeriya,
baya eGibhithe, ngokuba kabaligqizanga qakala izwi likaSimakade; baze bafika eThahiphanesi.
Izwi likaSimakade lafika kuJeremiya eThahiphanesi, lathi:
“Thatha amatshe amakhulu ngezandla zakho, uwambele onqenqemeni lobumba olusekungeneni kwesigodlo sikaFaro, eThahiphanesi. Lokho ukwenze abaJuda bekubuka,
bese uthi kubo: ‘Usho kanje uSimakade Wamabandla, uNkulunkulu ka-Israyeli, uthi: bheka, ngiyakuthumela uNebukhadinezari, inkosi yaseBhabhele, inceku yami, ngibeke isihlalo sakhe sobukhosi phezu kwalawa matshe engiwembele lapha, uyakwendlala ithende lakhe lobukhosi phezu kwawo.
Uyakufika, alihlasele iGibhithe, kufe abafayo, kuthunjwe abathunjwayo, inkemba idle emdlayo.
Ngiyakuphemba umlilo emathempelini onkulunkulu baseGibhithe, uyakuwashisa, abathumbe abanye onkulunkulu bakhona, ahambe nabo, iGibhithe uyakulembatha njengomelusi embatha ingubo yakhe, aphume kulo engenamyocu.
Uyakwaphula izinsika zaseBhethi Shemeshi eziseGibhithe; ashise ngomlilo amathempeli onkulunkulu baseGibhithe.’ ”
Izwi elafika kuJeremiya mayelana nabaJuda bonke ababehlala eGibhithe, eMigidoli, eThahiphanesi, eNofi, nasePhathirosi, lathi:
“Usho kanje uSimakade Wamabandla, uNkulunkulu ka-Israyeli, uthi: niyibonile yonke inhlekelele engiyehlisele iJerusalema nemizi yonke yakwaJuda. Bhekani, namuhla iyincithakalo, akusekho muntu ohlala kuyo,
ngenxa yobubi babo ababenzayo, bachukuluza ulaka lwami, ngokuhamba bayoshisa impepho, bakhonza abanye onkulunkulu abangazange babazi bona, nani, nokhokho benu.
Kepha ngathumela kini zonke izinceku zami, abaphrofethi, ngazithumela ngiphindelela, ngithi: ‘Maningakwenzi lokhu okunengekayo engikuzondayo.’
Nokho abangilalelanga, abangishayanga mkhuba, ukuba baphenduke ebubini babo, bangabe besashisela abanye onkulunkulu impepho.
Ngase ngithulula intukuthelo nolaka lwami, kwavutha emizini yakwaJuda nasemigwaqweni eJerusalema, kwaphenduka incithakalo nembumbiso njengoba kunjalo nanamuhla.
“Ngakho-ke usho kanje uSimakade uNkulunkulu Wamabandla, uNkulunkulu ka-Israyeli, uthi: nikwenzelani lokhu okubi kangaka kinina uqobo, niqede kini abesilisa, abesifazane, izingane nabasancelayo kubaJuda, nize ningazishiyeli nansali na?
Niluchukuluzeleni ulaka lwami ngemisebenzi yezandla zenu, nishisela abanye onkulunkulu impepho eGibhithe, lapho niye ukuba niyogogobala na? Nizibhubhisa nina, ukuze nibe yisiqalekiso nehlazo ezizweni zonke zomhlaba.
Senizikhohliwe yini izenzo ezimbi zokhokho benu, ezamakhosi akwaJuda, nezamakhosikazi awo; izenzo zenu ezimbi nezamakhosikazi enu enazenzayo ezweni lakwaJuda nasemigwaqweni eJerusalema na?
Abazithobanga kuze kube namuhla, abesabanga, abahambanga ngomthetho wami nangezimiso zami, engikubeke phambi kwenu naphambi kokhokho benu.
“Ngakho-ke usho kanje uSimakade Wamabandla, uNkulunkulu ka-Israyeli, uthi: bheka, ngiyakubhekana nani ngqo, kube kubi, ngimbhubhise wonke uJuda.
Ngiyakuyishabalalisa insali yakwaJuda, eqoke ukuya eGibhithe ukuyogogobala khona, bonke bayofela eGibhithe, babulawe yinkemba nendlala; kanjalo abancane nabadala, bayobulawa yinkemba nendlala, babe yisithuko, into esabekayo, isiqalekiso nehlazo.
“Ngiyobajezisa bonke abahlala eGibhithe njengoba ngajezisa iJerusalema ngenkemba, ngendlala nangobhubhane.
Akuyukuphunyuka namunye, akuyukusinda muntu ensalini yakwaJuda eye eGibhithe ukuyogogobala khona, ukuze ibuyele ezweni lakwaJuda, efisa ukubuyela kulo ukuze ihlale khona, ngokuba akuyukubuya muntu, kuphela ingcosana ephunyukile.”
Wonke amadoda ayazi ukuthi omkawo bashisela impepho abanye onkulunkulu, kanye nabesifazane bonke ababemi lapho, ibandla elikhulu, bonke abantu ababehlala eGibhithe, ePhathirosi; bamphendula uJeremiya, bathi:
“Izwi olikhulume kithi egameni likaSimakade asiyukulilalela.
Kunalokho impela sizokwenza konke esikuthembisile ngemilomo yethu. Sizoyishisela impepho indlovukazi yezulu, siyethulele iminikelo yokuphuzwayo, njengoba besenza thina nokhokho bethu, amakhosi ethu, nezikhulu zethu, emizini yakwaJuda nasemigwaqweni eJerusalema. Ngokuba sasidla sisutha ukudla, singahlushwa yilutho.
Kepha selokhu sayeka ukushisela impepho indlovukazi yezulu, nokuyethulela iminikelo yokuphuzwayo, seswele konke, sibulawa yinkemba nayindlala.
“Abesifazane bathi kuJeremiya: lapho sishisela indlovukazi yezulu impepho, siyethulela iminikelo yokuphuzwayo, siyenzela amaqebelengwane anomfanekiso wayo, ucabanga ukuthi lokho esiyethulela khona, sasikwenza amadoda ethu engavumanga na?”
UJeremiya wathi kubantu bonke; kwabesilisa, abesifazane, nakubo bonke abantu abamphendula kanjalo, wathi:
“Ngabe impepho enayishisa emizini yakwaJuda nasemigwaqweni eJerusalema, nina nokhokho benu, namakhosi enu, nezikhulu zenu nabantu bezwe, uSimakade akayikhumbulanga yini, yavuka enhliziyweni yakhe na?
USimakade kakwazanga ukuyibekezelela, ngenxa yezenzo zenu ezimbi nangenxa yezinengiso enizenzileyo, ngakho-ke izwe lakini liphenduke laba yincithakalo, imfucuza yoqobo, nesiqalekiso, okungekho muntu ohlala kulo kuze kube namuhla.
Konke lokhu kungenxa yokuba nashisa impepho ngaleyo ndlela, nona kuSimakade, anililalelanga izwi lakhe, anihambanga ngomthetho wakhe, ngezimiso zakhe, nangezexwayiso zakhe, ngakho-ke le nhlekelele inehlele kuze kube yinamuhla.”
UJeremiya wathi kubo bonke abantu, nakubo bonke abesifazane: “Yizwani izwi likaSimakade, nina nonke bakwaJuda eniseGibhithe.
Usho kanje uSimakade Wamabandla, uNkulunkulu ka-Israyeli, uthi: nina nomkenu, nikhulume ngemilomo yenu, nakufeza ngezandla zenu, nithi: ‘Nakanjani, siyakuzifeza izithembiso zethu esizenzile, zokuba sishisele indlovukazi yezulu impepho, nokuyithululela iminikelo yokuphuzwayo.’ Qhubekani nezifungo zenu, nikwenze ngokweqiniso lokho enikwethembisile.
Ngakho-ke yizwani izwi likaSimakade nina nonke baJuda enihlala eGibhithe: ‘Bheka, ngifunga igama lami elikhulu,’ kusho uSimakade, ‘ukuthi igama lami alisayukubizwa muntu wakwaJuda ezweni lonke eGibhithe, athi: “Ngifunga ngiyagomela phambi kukaSimakade.”
“ ‘Bheka, ngiyakuqikelela ukuba kwenzeke okubi, hhayi okuhle; bonke abantu bakwaJuda abaseGibhithe bayakufela lapho, beqedwa yinkemba nayindlala, baze bafe baphele nya.
Abayakuphunyuka enkembeni bayakubuya eGibhithe, babuyele ezweni lakwaJuda, beyingcosana. Yonke insali yakwaJuda eye eGibhithe ukuba igogobale khona iyokwazi ukuthi ngelikabani izwi eliyakuma, elami noma elayo.
“ ‘Lokhu kuyakuba yisibonakaliso kini,’ kusho uSimakade: ‘Sokuthi ngiyakunijezisa kule ndawo ukuze nazi ukuthi impela amazwi ami amabi okumelana nani, ayakwenzeka.’
Usho kanje uSimakade, uthi: ‘Bhekani, ngizakumnikela uFaro Hofira, inkosi yaseGibhithe, esandleni sezitha zakhe nasesandleni salabo abafuna ukuphila kwakhe, njengalokhu nganikela uZedekiya, inkosi yakwaJuda, esandleni sikaNebukhadinezari, inkosi yaseBhabhiloni, isitha sakhe esasifuna ukuphila kwakhe.’ ”
Izwi uJeremiya, umphrofethi, alikhuluma kuBharukhi, indodana kaNeriya, ngesikhathi eloba lawa mazwi emqulwini, ewathatha emlonyeni kaJeremiya, ngonyaka wesine wokubusa kukaJehoyakimi, indodana kaJosiya, inkosi yakwaJuda, lithi:
“Usho kanje uSimakade uNkulunkulu ka-Israyeli kuwe Bharukhi:
wena uthe: ‘Maye kimi! Ngokuba uSimakade wenezele usizi ezinhlungwini zami, ngikhathele ukububula, angikutholi ukuphumula.’
“Uyakukhuluma kanje kuye, uthi: ‘Usho kanje uSimakade uthi: bheka, lokho engikwakhileyo ngiyakukubhidliza, nalokho engikutshalileyo ngiyakukusiphula, yebo, kulo lonke izwe.
Wena uzifunela izinto ezinkulu na? Qha, ungazifuni, ngokuba bheka, ngiyakwehlisela inhlekelele kubantu bonke, kusho uSimakade, ngikunike ukuphila kwakho kube njengempango, kuzo zonke izindawo oyakuya kuzo.’ ”
Izwi likaSimakade elafika kuJeremiya umphrofethi mayelana nezizwe.
NgeGibhithe: ngempi kaFaro Nekho, inkosi yaseGibhithe eyayingasemfuleni iYufrathe eKharikhemishi, eyanqotshwa nguNebukhadinezari, inkosi yaseBhabhele, ngonyaka wesine wokubusa kukaJehoyakimi, indodana kaJosiya, inkosi yakwaJuda.
“Lungisani amahawu nezihlangu, nivivele ukulwa.
Bophelani amahhashi, nigibele amahhashi empi, nime ngomumo; nifake izigqokozivikeli, nemikhonto eloliwe, nembathe namabhantshi ensimbi.
Kepha ngiboneni na? Bayathuthumela, babuyela emuva. Amaqhawe abo ayakunqotshwa, ayabaleka nokubaleka, awasabheki emuva; kukhona ukwesaba nxazonke,” kusho uSimakade.
“Onejubane makangakwazi ukubaleka, neqhawe malingaphunyuki; elingasenyakatho eceleni komfula u-Yufrathe, bayakukhubeka, bawe.
“Ngubani lo okhuphuka njengeNayili, njengomfula omanzi awo ephakama ngamandla.
IGibhithe likhuphuke njengeNayili, amanzi alo agubha njengemifula. Lithe: ‘Ngiyakukhuphuka, ngiwusibekele umhlaba; ngiwubhubhise umuzi nabahlala kuwo.’
Khuphukani, mahhashi, nibhembuluke zinqola, mawaphume amaqhawe: uKhushe noPhuthi babambe izihlangu, namaLudi abambe umnsalo.
Lolu lusuku lweNkosi uSimakade Wamabandla; usuku lokuphindisela, nolokuziphindiselela ezitheni zakhe. Inkemba iyakudla yesuthe, iyakuzanelisa ngegazi labo, ngokuba iNkosi uSimakade Wamabandla inomhlatshelo enyakatho, ngasemfuleni iYufrathe.
“Khuphukela kwaGileyadi, ubuthe ibhalisamu, wena ntombi, ndodakazi yaseGibhithe, uyisebenzisela ize imithi eminingi, ngeke waphulukiswa.
Izizwe ziyakuzwa ngehlazo lakho, ukukhala kwakho kugcwale umhlaba; ngokuba iqhawe liyakukhuba elinye, awe omabili kanyekanye.”
Leli yizwi likaSimakade alikhuluma kuJeremiya, umphrofethi, ngokuza kukaNebukhadinezari, inkosi yaseBhabhele, ukuzohlasela iGibhithe.
“Memezelani eGibhithe, nimemezele eMigidoli; yenzani isimemezelo eNofi naseThahiphanesi, nithi: ‘Sukumani, nime ngomumo, ngokuba inkemba izodla nxazonke zakho.’
Kungani abanamandla bakho belaliswe phansi na? Yingoba uSimakade ebathele othulini na?
Uyakukhubekisa izindimbane, yebo, bayakuwa omunye ewela phezu komunye, bathi: ‘Vukani, masibuyele kwabakithi, ezweni esidabuka kulo; sibaleke enkembeni yomcindezeli.’
Bayakumemeza lapho, bathi: ‘UFaro inkosi yaseGibhithe ungumsindo nje omkhulu, uliyekile ithuba lakhe.’
“Ngifunga ngiyagomela,” kusho iNkosi, egama layo kunguSimakade Wamabandla, “kukhona ozayo ofana neThabhori phakathi kwezintaba, nanjengeKharmeli ngasolwandle.
Qoqa amasaka akho ulungele ukuthunjwa, wena ndodakazi yaseGibhithe, ngokuba iMemfisi iyakuba yincithakalo, iyakushiswa kungabe kusaba bikho ohlala kulo.
“IGibhithe liyisithokazi esihle kakhulu, kodwa kunesibawu esivela enyakatho, esizakulithelekela.
Ngisho namabutho alo aqashiwe, aphakathi kulo, anjengamathole akhuluphalisiweyo; nawo aphenduka abaleka kanyekanye, awazange eme ngokuba usuku lwabo lwenhlekelele selufikile; isikhathi sokujeziswa kwabo.
IGibhithe liyakuhashaza njengenyoka ihamba, ngoba beza ngamandla, balithelekele bephethe izimbazo njengabagawuli bezihlahla.
Bazoligawula ihlathi lalo,” kusho uSimakade, “nakuba licinene; ngokuba baningi kunesikhonyane, abanakubalwa.
Indodakazi yaseGibhithe izothelwa ngehlazo, inikelwe esandleni sabantu basenyakatho.”
USimakade Wamabandla uNkulunkulu ka-Israyeli, uthi: “Bheka, ngiyakujezisa u-Amoni waseNo, uFaro, iGibhithe, onkulunkulu balo, amakhosi alo, nabethembele kuFaro.
Ngiyakubanikela esandleni salabo abafuna ukuphila kwabo, nasesandleni sikaNebukhadinezari, inkosi yaseBhabhele, nasesandleni sezinceku zakhe. Emveni kwalokho iGibhithe kuyakuhlalwa kulo njengasezinsukwini zasemandulo,” kusho uSimakade.
“Kepha ungesabi wena Jakobe, nceku yami; ungadangali, Israyeli, ngokuba bheka, ngiyakukusindisa usendaweni ekude; ngisho nabozalo lwakho ezweni abathunjelwe kulo. UJakobe uyakuba ongaphazanyiswa lutho, avikeleke, angasatshiswa muntu.
Ungesabi wena nceku yami, Jakobe,” kusho uSimakade, “ngokuba nginawe; ngiyakuqeda ngokuphelele zonke izizwe engikuxoshele kuzo, kodwa wena angiyukukuqeda. Ngiyakukuyala ngobulungiswa, angiyukukuyeka ngingakujezisi.”
Izwi likaSimakade elafika kuJeremiya, umphrofethi, mayelana namaFilisti, ngaphambi kokuba uFaro alinqobe iGaza, lathi:
Usho kanje uSimakade, uthi: “Bheka, amanzi ayenyuka enyakatho, azakuba ngumfula okhukhulayo, azokhukhula izwe nokukulo, umuzi nabakhe kuwo. Abantu bayakukhala; bonke abakhe ezweni bayakukhala, bakhihle isililo.
Ngomsindo wokugabadula kwezinselo zamahhashi akhe anamandla, ngobukhehlekhehle bezinqola zakhe, nangomsindo wamasondo akhe; oyise ababheki emuva kubantwana, ngenxa yobuntekenteke bezandla zabo,
nangenxa yosuku oluzayo ukuzobhubhisa wonke amaFilisti, nokuqeda iThire neSidoni, bonke abasizi abasalayo; ngokuba uSimakade uyakuwabhubhisa amaFilisti, insali yesiqhingi iKhafithori.
IGaza iyakuba nempandla, i-Ashikeloni lishabalele, wena nsali yensali yesigodi sabo, uyakuzisika kuze kube nini na?
“Awu wena nkemba kaSimakade, kuyoze kube nini ungathuli na? Buyela emgodleni wakho, uthule, uzole.
Kepha ingaphumula kanjani, ngokuba uSimakade uyalezile na? Uyijubile e-Ashikeloni, nasogwini lolwandle.”
Mayelana noMowabi. Usho kanje uSimakade Wamabandla, uNkulunkulu ka-Israyeli, uthi: “Maye, kulo iNebho, ngokuba liyakubhujiswa, lithelwe ngehlazo, libanjwe iKiriyathayimi, ngokuba liyakuthelwa ngehlazo, izinqaba zalo zibe yimvithi!
Udumo lukaMowabi luphelile; iHeshibhoni bacebe okubi ngalo, bathi: wozani sisiqede nya lesi sizwe. Nawe Madimeni uyakuthuliswa; inkemba iyakukuxosha.
Umsindo wokukhala okulusizi uvela eHoranayimi, incithakalo, incithakalo enkulu.
UMowabi ubhujisiwe; abancane bakhe nezinceku zakhe bakhala kalusizi.
Impela benyukela eLuhithe, behamba bekhihla isililo, nalapho sebehlela eHoronayimi, kuzwakala ukukhala okulusizi, ngenxa yencithakalo.
Balekani, nisindise impilo yenu, ukuze nibe njengesihlahla esiyize ehlane.
Ngokuba ngenxa yokwethembela emisebenzini nasengcebeni yakho, nawe uyakubanjwa, uKhemoshi aye ekuthunjweni; abaphristi bakhe nezikhulu zakhe, kanyekanye.
Umbhubhisi uyakutheleka kuyo yonke imizi, akuyukuphunyuka muzi; isigodi siyobhujiswa, ithafa liqothulwe; lokho ukushilo uSimakade.
Nikani uMowabi amaphiko, ngokuba uyakundiza, aphume; imizi yakhe iyakuba yincithakalo, kungabi bikho ohlala kuyo.
“Makaqalekiswe lowo owenza umsebenzi kaSimakade ngokunganakekeli, aqalekiswe lowo onganindi inkemba yakhe ngegazi.
“UMowabi ubephumule kwasebusheni bakhe, ephumule njengenzika yewayini; akathululwanga esitsheni, ethululelwa kwesinye; akayanga ekuthunjweni, ngakho-ke usanambitheka njengoba enjalo, nephunga lakhe aliguquki.
Ngakho-ke bheka, izinsuku ziyeza,” kusho uSimakade, “engiyakuthumela kuye abagumbuqeli abayogumbuqela izitsha zakhe, bathulule izimvaba zakhe, baziphohloze.
UMowabi uyakujabha ngoKhemoshi, njengalokhu indlu ka-Israyeli yajabha ngeBhetheli, ithemba layo.
“Ningasho kanjani, nithi: ‘Singamaqhawe namabutho anamandla okulwa na?’
UMowabi uyakubhujiswa, nemizi yakhe ihlaselwe; izinsizwa zakhe zekhethelo zehlele ukuyobulawa,” kusho iNkosi egama layo nguSimakade Wamabandla.
“Inhlekelele kaMowabi iseduze, usizi lwakhe luza ngokushesha okukhulu.
Nina nonke enimzungezile, mkhaleleni; nani nonke enazi igama lakhe, yishoni nithi: ‘Yeka ukwaphuka kwenduku enamandla, udondolo oluhle!’
“Yehla ebukhosini bakho, uhlale womile, wena sakhamuzi, ndodakazi ehlala eDibhoni, ngokuba umbhubhisi kaMowabi usefikile, uzobhubhisa izinqaba zakho.
Yima endleleni, uqaphele wena ohleli e-Aroweri, buza kobalekayo nakowesifazane ophunyukile, uthi: ‘Kwenzenjani na?’
UMowabi ujabhisiwe, uphelelwe ngamandla; khihlani isililo, nikhale, nimemezele e-Arinoni ukuthi uMowabi ubhujisiwe.
Ukwehlulela kwehlele ezweni eliyithafa: eHoloni, eJahazi, naseMefahathi;
eDibhoni, eNebho, naseBhethi Dibhilathayimi;
eKiriyathayimi, eBhethi Gamuli, naseBhethi Mehoni;
eKeriyothe, eBhozira, nakuyo yonke imizi yakwaMowabi, ekude neseduze.
Uphondo lukaMowabi lunqunyiwe, nengalo yakhe yaphuliwe,” kusho uSimakade.
“Mdakiseni, ngokuba uzikhukhumezile kuSimakade; uMowabi makahuquzele ebuhlanzweni bakhe, abe yinhlekisa futhi.
U-Israyeli wayengesiyo yini inhlekisa kuwe na? Watholakala enamasela yini, njengoba uma ukhuluma ngaye unikina ikhanda.
Shiyani imizi, nihlale phakathi kwamadwala; nina zakhamuzi zakwaMowabi, yibani njengejuba, elakha isidleke emlonyeni wesiwa.
Sizwile ngokuzidla okukhulu kakhulu, kukaMowabi; ukuziphakamisa kwakhe, ukuzithwala kwakhe, ukuziqhenya kwakhe, nokuzikhukhumeza kwenhliziyo yakhe.
Ngiyakwazi ukuzidla kwakhe,” kusho uSimakade “ukuzikhukhumeza kwakhe kuyize, nezenzo zakhe azisizi ngalutho.
Ngakho-ke ngizokhihla isililo ngoMowabi, ngimkhalele wonke uMowabi, ngizakububulela abantu baseKhiri Heresi.
Ngiyakukhalela wena mvini waseSibhina, ngikukhalela kakhulu kuneJazeri, ngokuba amagatsha akho alwedlulile ulwandle, aze afinyelela olwandle eJazeri. Umbhubhisi uzakuthelekela izithelo zenu namagilebhisi enu.
Ukuthokoza nokujabula kususiwe ensimini, nasezweni lakwaMowabi. Ngalenza laphela iwayini ezikhamweni; akusayukunyathelwa ngokujabula, ukumemeza akuseyikho ukumemeza.
“EHeshibhoni, e-Elehale naseJahazi kukhalwa kalusizi; bayezwakalisa izwi labo, kusukela eZowari kuya eHoronayimi, kuya e-Egilathi Shelishiya; ngokuba namanzi aseNimrimi aseshile.
Ngiyakumqeda nya uMowabi, lowo onikela ezindaweni eziphakemeyo, ashisele impepho onkulunkulu bakhe,” kusho uSimakade.
“Ngakho-ke inhliziyo yami ikhalela uMowabi njengomtshingo, ibubulela futhi abantu baseKhiri Heresi njengemitshingo, ngokuba umcebo ababewutholile usushabalele.
Wonke amakhanda ayizimpandla, zonke izilevu zigundiwe, nazo zonke izandla zinqunyiwe; kukhona indwangu eyisaka okhalo.
Kukhona isililo phezu kophahla lwakwaMowabi, nasemashashalazini akhona, ngokuba uMowabi ngizakumphohloza njengesitsha esingafunwa muntu,” kusho uSimakade.
“Yeka ukuphahlazeka kwakhe! Yeka ukukhala kwabo! UMowabi ufulathele enamahloni, usephenduke inhlekisa, into esabekayo kubo bonke abakhelene naye.”
Ngokuba usho kanje uSimakade, uthi: “Bheka, uyakundiza njengokhozi, elulele amaphiko akhe kuMowabi.
Imizi iyakudliwa, nezinqaba zithathwe. Ngalolo lusuku, izinhliziyo zamaqhawe akwaMowabi ziyakuba njengenhliziyo yowesifazane ohelelwayo.
UMowabi uyobhujiswa, angabe esaba yisizwe, ngokuba uzikhukhumezile kuSimakade.
Ukwesaba, nomgodi nogibe, kuphezu kwabakhileyo kwaMowabi,” kusho uSimakade.
“Obalekela ukwesaba, uyakuwela emgodini; okhuphuka emgodini, abanjwe wugibe; ngokuba ngiyakwehlisela lezi zinto phezu kwabakwaMowabi, ngonyaka wokujeziswa kwabo,” kusho uSimakade.
“Ababalekileyo bayokuma emthunzini waseHeshibhoni, bekhathele, ngokuba umlilo uyakuqubuka eHeshibhoni, nelangabi eSihoni, ungqongqise ibunzi likaMowabi, nokhakhayi lwabantu abanomsindo.
Maye kuwe Mowabi! Abantu bakaKhemoshi bayakubhubha, ngokuba amadodana akho athunjiwe, namadodakazi akho, ayiswa ekuthunjweni.
Kepha ngiyakukuguqula ukuthunjwa kukaMowabi ngezinsuku ezizayo,” kusho uSimakade. Kuphela lapha ukwehlulelwa kukaMowabi.
Kubantu bakwa-Amoni. Usho kanje uSimakade, uthi: “Kanti u-Israyeli akanamadodana, akanandlalifa na? Kungani inkosi yabo idle elakwaGadi, nabantu bayo bahlala emizini yakhona na?
Ngakho-ke bheka, izinsuku ziyeza,” kusho uSimakade, “lapho ngiyakwenza ukuba kuhlatshwe umkhosi wempi eRabha labakwa-Amoni. Liyophenduka indunduma yencithakalo, imizana yalo ishiswe ngomlilo; u-Israyeli uyokwephuca labo ababedle ifa lakhe,” kusho uSimakade.
“Khihla isililo, Heshibhoni, ngokuba i-Ayi ibhujisiwe, khalani, madodakazi aseRabha, nibhince indwangu eyisaka; nilile, nigijime phakathi kwezingange, ngokuba inkosi yalo izothunjwa, nabaphristi balo nezikhulu zalo, kanyekanye.
Uzigqajelani ngezigodi, ngesigodi sakho esivundileyo, wena ndodakazi ehlubukayo, othembele engcebeni yakho, uthi: ‘Ngubani ongangihlasela na?’
Bheka, ngizokwehlisela ukwesaba phezu kwakho,” kusho iNkosi uSimakade Wamabandla, “kuvela kubo bonke abakuzungezileyo; niyakuxoshwa; kube yilowo nalowo abambe eyakhe indlela, kungabi bikho oqoqa ababalekileyo.
“Kepha emveni kwalokho ngiyakuguqula ukuthunjwa kwabakwa-Amoni,” kusho uSimakade.
Mayelana no-Edomi. Usho kanje uSimakade Wamabandla, uthi: “Akusekho yini ukuhlakanipha eThemani na? Sekuphelile yini ukweluleka kwabanokuqonda na? Ngabe ukuhlakanipha kwabo sekushabalele na?
Phendukani, nibaleke, nibhace emigedeni ejulileyo; nina zakhamuzi zaseDedani, ngokuba ngiyakwehlisela phezu kwakhe inhlekelele ka-Esawu, ngesikhathi engiyomjezisa ngaso.
Uma kufika kuwe abavuni bamagilebhisi, abayukushiya mkhothozo yini na? Uma kutheleka amasela ebusuku, awayukuntshontsha yini lokho akudingayo na?
Kepha Mina, ngizomhlubula u-Esawu, ngambule izindawo zakhe ezifihlekile akayukukwazi ukucasha; izizukulwane zakhe, izihlobo zakhe, nomakhelwane bakhe bayakubhujiswa, baphele nya.
Zishiye izintandane zakho, Mina ngizozigcina ziphilile; abafelokazi bakho mabethembele kimi.”
Ngokuba usho kanje uSimakade, uthi: “Uma labo okungafanele baphuze endebeni, bephuzile kuyo, pho kungani wena ungenakujeziswa na? Ngeke uyekwe ungajeziswa, impela nawe uyophuza kuyo.
Ngizifunge Mina uqobo, kusho uSimakade, ukuthi iBhozira liyakuba yincithakalo, ihlazo, into esabekayo, nesiqalekiso, nayo yonke imizi yalo iyakuba yincithakalo yaphakade,” kusho uSimakade.
Ngiwuzwile umbiko ovela kuSimakade, kuthunywe isithunywa ezizweni sayokuthi: “Qoqanani, nimelane nalo; sukumani, nilungele ukulwa.”
“Ngokuba bheka, ngizakukwenza ube mncane phakathi kwezizwe, udelelwe phakathi kwabantu.
Ukwesabeka kwakho nokuziqhenya kwenhliziyo yakho kukudukisile, wena ohleli emifantwini yamadwala, esicongweni segquma. Noma isidleke sakho ungasakha phezulu njengokhozi; ngiyakwehlisa khona lapho,” kusho uSimakade.
“U-Edomi uyakuba yinto esabekayo, kuthi bonke abedlulayo bamangale, banximfe ngenxa yezinhlupheko zakhe.
Njengokuchithwa kweSodoma neGomora, nemizi eyakhe ngakhona; akuyukuhlala muntu lapho, nendodana yomuntu ayiyukugogobala khona,” kusho uSimakade.
“Bheka, njengengonyama iphuma ehlozini eJordani, iya emadlelweni aluhlaza, ngiyakubazuma kanjalo abakwa-Edomi, ngibaxoshe ezweni labo. Noma ngubani okhethiweyo ngiyombeka ababuse. Ngokuba ngubani onjengami na? Ngubani ongangiphosela inselelo na? Yimuphi umelusi ongama phambi kwami na?”
Ngakho-ke yizwani ngecebo likaSimakade; ngo-Edomi nalokho akuhlosile ngabakhileyo eThemani: impela abancinyane emhlanjini bayohudulwa basuswe, abhubhise amadlelo abo ngenxa yabo.
Umhlaba uyakuzamazama ngomsindo wokuwa kwabo; umsindo wokukhala kwabo kalusizi, uzwakale oLwandle Lomhlanga.
Bheka, uyakukhuphuka ashwize njengokhozi, ehle, elulele amaphiko akhe phezu kweBhozira. Izinhliziyo zamaqhawe akwa-Edomi ziyakufana nenhliziyo yowesifazane ohelelwayo.
Mayelana neDamaseku. “IHamathi ne-Ariphadi kujabhile, kwaphela amandla, ngokuba kuzwe izindaba ezimbi, kukhathazekile njengolwandle, olungenakuthula.
IDamaseku lidikibele, laphenduka labaleka; ingebhe ilibambile, ukudabuka nobuhlungu kulikhungethe njengowesifazane obelethayo.
Yeka ukushiywa komuzi odumileyo, umuzi wokuthokoza kwami!
Ngakho-ke izinsizwa zakhona ziyakuwa ezindaweni ezivulekileyo, nawo wonke amaqhawe empi abulawe ngalolo lusuku,” kusho uSimakade Wamabandla.
“Ngiyakuphemba umlilo ogangeni lwaseDamaseku, ungqongqise izinqaba zikaBheni Hadadi.”
Mayelana neKhedari, nangemibuso yaseHazori, eyayinqotshwe nguNebukhadinezari, inkosi yaseBhabhele. Usho kanje uSimakade, uthi: “Khuphukelani eKhedari, nibhubhise abantu basempumalanga.
Niyothatha, nithwale amathende abo, imihlambi yabo, amakhethini abo, nazo zonke izimpahla zabo, amakameli abo, nimemeze kubo nithi: ‘Kugcwele ukwesabeka nxazonke.’
“Bhembulukani nibaleke, nizulazule kude, nicashe emigedeni, nina zakhamuzi zaseHazori, kusho uSimakade; ngokuba uNebukhadinezari, inkosi yaseBhabhele, wenze icebo ngani; unakhele uzungu, waceba icebo,” kusho uSimakade.
“Sukani, nikhuphukele esizweni esizinzileyo, esihlala ngokuvikeleka, esingenamasango namigoqo, esakhe sodwa,” kusho uSimakade.
“Amakamela aso ayakuba yimpango, nemfuyo yaso eningi iyakuphangwa. Ngiyakubahlakazela ezindaweni zonke, bonke abadilingwe emaceleni amakhanda abo, ngehlisele phezu kwabo inhlekelele evela nxazonke,” kusho uSimakade.
“IHazori liyakuba yindawo ehlala amakhanka nencithakalo, kuze kube phakade. Akuyukuhlala muntu khona, nendodana yomuntu ayiyukugogobala khona.”
Izwi elafika kuJeremiya, umphrofethi, mayelana ne-Elami ekuqaleni kokubusa kukaZedekiya, inkosi yakwaJuda, lathi:
usho kanje uSimakade Wamabandla, uthi: “Bheka, ngiyakuwephula umnsalo we-Elamu, isiqalo samandla abo.
Ngiyakwehlisela phezu kwe-Elamu imimoya emine evela emkhawulweni yomine yezulu, ngibahlakazele kuyo yonke leyo mimoya, akuyukuba bikho sizwe lapho abaxoshiweyo base-Elamu bengayikufika khona.
Ngiyakuyivithiza i-Elamu phambi kwezitha zalo, naphambi kwalabo abafuna ukuphila kwabo; ngibehlisele inhlekelele, nentukuthelo yami evuthayo,” kusho uSimakade. “Ngiyothumela emva kwabo inkemba, ngize ngibaqothule baphele nya.
Ngiyakubeka isihlalo sami sobukhosi e-Elamu, ngibhubhise lapho inkosi nezikhulu,” kusho uSimakade.
“Kepha kuyakuthi ngezinsuku zokugcina ngikuguqule ukuthunjwa kwe-Elamu,” kusho uSimakade.
Izwi uSimakade alikhuluma ngeBhabhele, nangezwe lamaKhaledi, ngomlomo kaJeremiya, umphrofethi, lithi:
“Memezelani, nihlabe umkhosi phakathi kwezizwe, niphakamise ibhanela, nikumemezele lokhu ningakufihli, nithi: ‘IBhabhele liyakunqotshwa, uBheli athelwe ngehlazo, uMerodakhi abhujiswe, izithombe zalo zithelwe ngehlazo, imifanekiso yalo ibhujiswe.’
Ngokuba liyakuhlaselwa yisizwe esivela enyakatho, esiyakwenza izwe lalo libe yincithakalo, kungabi bikho ohlala kulo; abantu nezilwane kuyakubaleka, kuhambe.”
“Ngalezo zinsuku nangaleso sikhathi,” kusho uSimakade, “abakwa-Israyeli, nabakwaJuda bayakuza behamba kanyekanye, bayakuhamba bekhala, befuna uSimakade uNkulunkulu wabo.
Bayakubuza indlela eya eZiyoni, bebhekise amabombo abo kulo, bethi: wozani nizihlanganise noSimakade ngesivumelwano saphakade esingenakulibaleka.
“Abantu bami babe yizimvu ezilahlekileyo; baphambukiswe ngabelusi babo, babazulazulisa ezintabeni, basuka entabeni, baya egqumeni, bayikhohlwa indawo yabo yokuphumula.
Bonke ababafumanayo babashwabadela; abamelene nabo bathi: ‘Asinacala, ngokuba yibo abonile kuSimakade; ikhaya labo lokulunga, uSimakade, ithemba lokhokho babo.’
“Balekani eBhabhele, niphume ezweni lamaKhaledi, hambani, nifane nezimpongo zihola umhlambi.
Ngokuba bheka, ngiyakuvusa, ngiwukhuphule umfelandawonye wezizwe ezinamandla, zivela ezweni enyakatho, ngizilethe eBhabhele; ziyakuzihlela kahle, zilinqobe, lapho imicibisholo yalo iyofana neyengwazi engabuyi ilambatha.
IKhalideya liyakuba yimpango; bonke abaliphangayo bayokweneliswa,” kusho uSimakade.
“Noma ningathokoza, niqhoshe, nina baphangi befa lami; noma ningagxumagxuma njengesithokazi otshanini obuluhlaza, nikhalise okwamahhashi anamandla;
kodwa unyoko owakuzalayo uyakujabha kakhulu, ayangaze. Bheka, uyakuba yisizwe sokugcina, ihlane, umhlabathi owomileyo, nogwadule.
Ngenxa yentukuthelo kaSimakade aliyukuhlalwa muntu, kodwa lonke liyakuba yincithakalo. Bonke abadlula eBhabhele bayakumangala, banximfe ngenxa yazo zonke izinhlekelele zalo.
“Nina nonke eninsala imicibisholo, manini ngomumo, nimelane neBhabhele, nilicibe, ningayigodli imicibisholo, ngokuba lonile kuSimakade.
Khuzani iziqubulo zempi nxazonke; lize liphakamise izandla lithi: maluju! Imibhoshongo yalo iyakuwa, izingange zalo ziyakudilizwa, ngokuba lokho kuyimpindiselo kaSimakade; phindiselani kulo, njengokuba lenzile, yenzani kanjalo kulo.
Nqumani umhlwanyeli eBhabhele nophethe isikela ngesikhathi sokuvuna; ngenxa yenkemba yomcindezeli, yilowo nalowo abuyele kubantu bakubo, abalekele ezweni lakubo.
“U-Israyeli ungumhlambi ohlakazekile; izingonyama zimxoshile. Eyokuqala emudlile, yinkosi yase-Asiriya, eyokugcina eqhoboze amathambo akhe, yinkosi yaseBhabhele.”
Ngalokho-ke usho kanje uSimakade Wamabandla, uNkulunkulu ka-Israyeli, uthi: “Bheka, ngiyakuyijezisa inkosi yaseBhabhele nezwe layo, njengalokhu ngayijezisa inkosi yase-Asiriya.
Ngiyakumbuyisela u-Israyeli emadlelweni akhe, aklabe eKharmeli naseBhashani, adle, asuthe ezintabeni zakwa-Efrayimi nezakwaGileyadi.
Ngalezo zinsuku nangaleso sikhathi,” kusho uSimakade, “kuyakuphenywa ngecala lika-Israyeli, kodwa aliyukutholakala, nangezono zakwaJuda, kepha aziyukufunyanwa, ngokuba ngiyakubathethelela engiyakubashiya ukuba babe yinsali.
“Hlasela izwe eMerathayimi, nalabo abakhileyo ePhekodi, babulale, ubaqede nya, ungashiyi lutho, ukwenze konke engikuyale ngakho,” kusho uSimakade.
Kuzwakala iziqubulo zempi ezweni nezembumbiso enkulu.
Yeka ukunqunywa nokwephulwa kwesando somhlaba wonke, yeka ukwenziwa kweBhabhele incithakalo ezizweni!
Ngakucupha, wabanjwa, Bhabhele, ungakazi ngalokho; wafunyanwa, wabanjwa, ngokuba ulwile noNkulunkulu.
USimakade uyivulile indlu yakhe yezikhali, uzikhiphile izikhali zentukuthelo yakhe, ngokuba iNkosi uSimakade Wamabandla inomsebenzi ezweni lamaKhaledi.
Lithelekeleni nilihlasele; niqhamuka emingceleni, nivule izinqolobane zalo, nilinqwabele libe njengezindunduma, niliqede nya, kungasali lutho kulo.
Hlabani zonke izinkunzi zalo; mazehle ziyohlatshwa. Maye kuzo! Ngokuba usuku lwazo selufikile; isikhathi sokujeziswa kwazo.
Ngumsindo wababalekayo nabaphunyuka eBhabhele, bamemezela eZiyoni impindiselo kaSimakade uNkulunkulu wethu, impindiselo ngethempeli lakhe!
“Bizani abemicibisholo, balwe neBhabhele; bonke abansala umnsalo, nikanise nxazonke zalo, kungaphunyuki namunye; niliphindisele njengezenzo zalo, nenze kulo njengoba nalo lenzile, ngokuba lizikhukhumezile, ladelela uSimakade oNgcwele ka-Israyeli.
Ngalokho izinsizwa zalo ziyakuwa emigwaqweni yalo, nawo wonke amabutho alo ayakubhujiswa ngalolo lusuku,” kusho uSimakade.
“Bheka, ngimelene nawe ozikhukhumezileyo, ngokuba usuku lwakho selufikile, isikhathi sokujeziswa kwakho,” kusho iNkosi uSimakade Wamabandla.
“Ozikhukhumezayo uyakukhubeka, awe, angabi naye omvusayo. Ngiyakuphemba umlilo emizini yakhe, udle konke okumzungezayo.”
Usho kanje uSimakade Wamabandla, uthi: “Abantu bakwa-Israyeli nabakwaJuda bacindezelwe kanyekanye; bonke ababathumbileyo bababamba; ababavumeli ukuba bahambe.
Kepha umkhululi wabo unamandla, nguSimakade Wamabandla igama lakhe; uyakuyimela nokuyimela indaba yabo, ukuba aphumuze umhlaba, kodwa bangabi nakuthula abakhileyo eBhabhele.
“Mawadliwe yinkemba amaKhaledi, abakhileyo eBhabhele, izikhulu zalo, nezihlakaniphi zalo.
Inkemba ifike phezu kwabaphrofethi bamanga, babe yiziwula; inkemba ifike phezu kwamaqhawe alo, aphele amandla.
Inkemba ifike phezu kwamahhashi alo, izinqola zalo, naphezu kwayo yonke ingxubevange yabantu ekulo, babe njengabesifazane; inkemba ifike phezu kwengcebo yalo, ize iphangwe.
Makufike isomiso emanzini alo, aze ashe, ngokuba yizwe elinezithombe ezibaziweyo, bahlanyiswa yizithombe zabo ezibaziweyo, ezesabekayo.
“Ngalokho izilwane zasehlane ziyakuhlala nezimpungushe, kuhlale khona nezintshe; alisayukuhlalwa kuze kube phakade, lingabe lisakhiwa izizukulwane ngezizukulwane.
Njengalokho uNkulunkulu wabhubhisa iSodoma neGomora, nemizi yawo eyakhelene, kanjalo akuyukuhlala muntu khona, kungagogobali lapho indodana yomuntu,” kusho uSimakade.
“Bheka, kuqhamuka abantu enyakatho, isizwe esikhulu namakhosi amaningi, kuvuswe ekugcineni komhlaba.
Babamba umnsalo nomkhonto; banonya, abanamusa; umsindo wabo uzwakala njengokuduma kolwandle; bagibele amahhashi, bahlelwe njengamabutho eyohlasela indodakazi yaseBhabhele.
Inkosi yaseBhabhele izwile ngodumo lwabo, izandla zayo zaba buthakathaka; usizi luyibambile, nemihelo njengeyobelethayo.
Bheka, njengengonyama ephuma ehlozini eJordani, iya emadlelweni aluhlaza; ngiyakubazuma kanjalo abaseBhabhele, ngibaxoshe ezweni labo. Noma ngubani okhethiweyo, ngiyombeka ababuse. Ngokuba ngubani onjengami na? Ngubani ongangiphosela inselelo na? Yimuphi umelusi ongamelana nami na?”
Ngakho-ke yizwani amasu uSimakade awacebele iBhabhele nakuhlose ngezwe lamaKhaledi: impela abancinyane emhlanjini bayohudulwa, basuswe, indawo abakuyo ayenze ibe yincithakalo ngenxa yabo.
Ngomsindo wokuthunjwa kweBhabhele, umhlaba uyakuthuthumela, umsindo wokukhala kwabo kalusizi, uyozwakala ezizweni.
Usho kanje uSimakade, uthi: “IBhabhele nabakhileyo eLebhi Khamayi, ngiyakubavusela umoya wombhubhisi.
Ngiyothumela abafokazi eBhabhele, abayolihlunga, balithulule, balenze incithakalo izwe lalo; ngokuba ngosuku lwenhlekelele bayolithelekela nxazonke.
Ningamniki thuba lokuciba ngomnsalo wakhe owaseBhabhele, makangahlomi ngezikhali zakhe. Izinsizwa zalo ningazisindisi, niwaqede nya amabutho alo.
Bayakuwa begwaziwe ezweni lamaKhaledi, bemanxebanxeba emigwaqweni yalo.
Ngokuba u-Israyeli noJuda akabahlamukanga uNkulunkulu wabo, nakuba izwe labo lonakele koNgcwele ka-Israyeli.
“Balekani eBhabhele, kube yilowo nalowo asindise impilo yakhe, ningabhujiswa ngenxa yokona kwalo, ngokuba yisikhathi sempindiselo kaSimakade, uyakuphindisela kulo.
IBhabhele beliyindebe yegolide, esandleni sikaSimakade, eyadakisa umhlaba wonke; izizwe zaliphuza iwayini lalo, ngalokho izizwe seziyahlanya.
IBhabhele seliwe ngokuphazima kweso, libhidliziwe. Likhihleleni isililo, ubuhlungu balo nibutholele ibhalisamu, hleze lingelapheka.
“Ngabe silelaphile iBhabhele, kodwa alelapheki, lishiyeni, masihambe, kube yilowo nalowo aye ezweni lakubo, ngokuba ukwehlulelwa kwalo kufinyelela ezulwini, kuphakanyiselwe nasemafini.
“USimakade ukubonakalisile ukunqoba kwethu; wozani siyobika eZiyoni, ngomsebenzi awenzile uSimakade uNkulunkulu wethu.
“Lolani imicibisholo, nithathe izihlangu. USimakade uvivise amakhosi aseMediya, ngokuba inhloso yakhe ngeBhabhele ngukuba alibhubhise; lokhu kuyimpindiselo kaSimakade, impindiselo ngethempeli lakhe.
Phakamisani ibhanela ngasogangeni eBhabhele, nengeze abaqaphi, nimise abalindi, nibeke abazolala unyendle, ngokuba uSimakade ukuhlosile, futhi uyakukwenza lokho akhuluma ngakho kwabakhileyo eBhabhele.
Wena ohlala ngasemanzini amaningi, nonengcebo eningi; isiphetho sakho sesifikile, isikhathi sokunqanyulwa kwempilo yakho njengomucu.
USimakade Wamabandla uzifunga Yena uqobo, uthi: impela ngiyakukuthelekela ngezinkumbi zamabutho njengesikhonyane, ayokhuza iziqubulo zokunqoba ngawe.
“Umhlaba wawenza ngamandla akhe, izwe walimisa ngokuhlakanipha kwakhe, ngokuqonda kwakhe weneka izulu. Izulu walendlala ngokuqonda kwakhe.
Lapho eduma ngezwi lakhe, kuhlokoma amanzi ezulwini; ukhuphula inkungu emikhawulweni yomhlaba, athumele umbani nemvula, akhiphe umoya ezinqolobaneni zakhe.
“Bonke abantu bayiziphukuphuku, abanalwazi; bonke ababumbi bathelwe ngehlazo, nezithombe zabo ezibunjiweyo ziyinkohliso; azinamphefumulo.
Ziyize, umsebenzi wokuhlekwa, ngesikhathi abayojeziswa ngaso ziyakushabalala.
Isabelo sikaJakobe asifani nalaba, ngokuba nguye okubumbileyo konke; u-Israyeli uyisizwe nefa lakhe; nguSimakade Wamabandla igama lakhe.
“Uyizembe lami nezikhali zokulwa; ngawe ngiphahlaza izizwe, ngawe ngibhubhisa imibuso,
ngawe ngiphahlaze ihhashi nomgibeli walo, ngawe ngiphahlaze inqola nogibele kuyo,
ngawe ngiphahlaze abesilisa nabesifazane, ngawe ngiphahlaze abadala nabancane, ngawe ngiphahlaze izinsizwa nezintombi.
Ngawe ngiphahlaze umelusi nomhlambi wakhe, ngawe ngiphahlaze umlimi nezinkabi zakhe, ngawe ngiphahlaze ababusi nezikhulu.
“Ngiyakuziphindiselela kulo iBhabhele, nakubo bonke abakhileyo eKhalideya, ngakho konke okubi abakwenze eZiyoni, nizibonela ngawenu amehlo,” kusho uSimakade.
“Bheka, ngimelene nawe ntaba ebhubhisayo,” kusho uSimakade, “wena obhubhisa umhlaba wonke; ngiyakwelula isandla sami ngikushaye, ngikugingqagingqe emadwaleni, ngikuphendule intaba eshisiweyo.
Abayukuthatha kuwe itshe legumbi netshe lesisekelo, ngokuba uyakuba yincithakalo, kuze kube phakade,” kusho uSimakade.
“Phakamisani ibhanela ezweni, nishaye icilongo ezizweni, nivivise izizwe ukuba zilwe nalo, nibize imibuso yase-Ararathi, yaseMini nase-Ashikhenaze, ilihlasele. Nibeke induna yamabutho amelane nalo, nithumele khona amahhashi anjengequlu lesikhonyane.
Vivisani izizwe, amakhosi aseMediya, nezinduna zalo, nababusi balo, nezwe lonke abalibusayo.
Umhlaba uyathuthumela, uqhaqhazele; ngokuba inhloso kaSimakade ngeBhabhele izofezeka, enze iBhabhele libe yincithakalo, ukuze kungabi bikho ohlala kulo.
Amaqhawe aseBhabhele aseyekile ukulwa, asehlala ezinqabeni zawo; aphelelwe ngamandla, anjengamanina; izindlu zalo zishisiwe, imigoqo yalo inqanyuliwe.
Isigijimi siyagijma, sihlangane nesinye, nesithunywa silandela esinye ukuyobikela inkosi yaseBhabhele, ukuthi umuzi wayo usudliwe nxazonke.
Amazibuko avinjiwe, umhlanga washiswa ngomlilo, amabutho ayathuthumela.”
Usho kanje uSimakade Wamabandla, uNkulunkulu ka-Israyeli, uthi: “Indodakazi yaseBhabhele injengesibuya, ngesikhathi sinyathelwa. Kuseyisikhashana nje, sizofika nakuyo isikhathi sokuvunwa kwayo.”
UNebukhadinezari, inkosi yaseBhabhele ungidlile wangiqeda; ungenze isitsha esingenalutho, wangigwinya njengodrago; ugcwalisile isisu sakhe ngokumnandi kwami, wangiphalaza.
“Ubudlova obenziwe kimi nakubantu bakithi, mabube phezu kweBhabhele;” makasho kanjalo owakhileyo eZiyoni. “Igazi lami malibe phezu kwabakhileyo eKhalideya;” malisho kanjalo iJerusalema.
Ngakho-ke usho kanje uSimakade, uthi: “Bheka, ngiyakuyimela indaba yakho, ngikuphindiselele, ngilomise ulwandle lwalo, ngenze umthombo walo ushe.
IBhabhele liyakuba yizindunduma zamatshe, indawo ehlala amakhanka; incithakalo nento enximfelwayo, kungabi bikho ohlala khona.
Khona abantu babhonga kanyekanye njengezingonyama, babhodle njengamabhongo ezingonyama.
Kuyothi lapho sebefa yindlala, ngibenzele idili, ngibadakise ukuze baquleke, balale ubuthongo baphakade, bangavuki,” kusho uSimakade.
“Ngiyakubehlisa bayohlatshwa njengamawundlu, nanjengezinqama nezimpongo.
“Maye, ngokuthunjwa kweSheshakhi, nokubanjwa kwezwe elalinodumo emhlabeni wonke! Maye, iBhabhele seliyinto esabekayo ezizweni!
Ulwandle lwenyukele eBhabhele, lwalisibekela ngamaza alo ahlokomayo.
Imizi yakhona ibhujisiwe; sekuyizwe elomileyo, nehlane; izwe elingasahlalwa muntu, ngisho nendodana yomuntu ingedlule kulo.
Ngiyakujezisa uBheli eBhabhele, ngikukhiphe emlonyeni wakhe lokhu akugwinyileyo; izizwe azisayukugobhozela kuye, ugange lwaseBhabhele luyakuwa.
“Phumani kulo, bantu bami, kube yilowo nalowo asindise impilo yakhe olakeni lukaSimakade oluvuthayo.
Izinhliziyo zenu mazingadangali, ningayesabi imibiko eniyizwa ezweni; lapho ngalo nyaka kufika umbiko othile, kuthi ngolandelayo kufike omunye umbiko; kube nobudlova ezweni, umbusi avukele umbusi.
Ngakho bheka, ziyeza izinsuku, lapho ngiyozijezisa izithombe ezibaziweyo zaseBhabhele, izwe lakhona lijabhe, bonke ababuleweyo badindilize kulo.
Izulu nomhlaba, nakho konke okukulo, kuqhumuke, kuhlabelele ngeBhabhele, ngokuba ababhubhisi bayakulithelekela bevela enyakatho,” kusho uSimakade.
“IBhabhele kufanele ukuba nalo liwe, ngenxa yababuleweyo bakwa-Israyeli, njengoba ababulawa emhlabeni wonke, babulawa ngenxa yeBhabhele.
Nina eniphunyuke enkembeni, hambani, ningami; khumbulani uSimakade nikwelikude izwe, nicabange ngeJerusalema.
“Sijabhile, ngokuba sithukiwe; ubuso bethu buthelwe ngehlazo, ngokuba abafokazi bangene ezindaweni ezingcwele zendlu kaSimakade.”
“Ngakho bheka, ziyeza izinsuku, lapho ngiyozijezisa izithombe zalo ezibaziweyo, kulo lonke izwe lakhona kuqume abalimeleyo,” kusho uSimakade.
“Ngisho noma iBhabhele lingafinyelela esibhakabhakeni, liyiqinise inqaba yalo ephakemeyo, nokho ngiyakuthumela ababhubhisi, balithelekele,” kusho uSimakade.
“Yizwani umsindo wokukhala kalusizi uvela eBhabhele, nowencithakalo enkulu ophuma ezweni lamaKhaledi.
Ngokuba uSimakade uyalibhubhisa iBhabhele, awuqede umsindo omkhulu kulo. Amaza alo ahlokoma njengamanzi amaningi, kuzwakala nomsindo wokuhlokoma kwawo.
Ngokuba umbhubhisi uselithelekele, uhlasele iBhabhele, kuthunjwa amabutho alo, neminsalo yawo iyaphoqozwa, ngokuba uSimakade unguNkulunkulu wemivuzo, uphindisela ngokupheleleyo.
Ngiyakudakisa izikhulu zalo; izihlakaniphi zakhona, izinduna zalo, ababusi balo, namabutho alo; bayakulala ubuthongo baphakade, bangavuki,” kusho iNkosi egama layo nguSimakade Wamabandla.
Usho kanje uSimakade Wamabandla, uthi: “Ugange olubanzi lwaseBhabhele luyakubhidlizwa nokubhidlizwa, amasango alo aphakemeyo ayakushiswa ngomlilo. Abantu bakhandlekela ize, nomshikashika wezizwe uzophelela emlilweni.”
Izwi uJeremiya, umphrofethi, ayala ngalo uSeraya, indodana kaNeriya kaMakhaseya, ngesikhathi ehamba noZedekiya, inkosi yakwaJuda, beya eBhabhele, ngonyaka wesine wokubusa kwakhe. USeraya wayeyisikhulu sezindawo zokuphumula.
UJeremiya wawaloba emqulwini wonke amazwi enhlekelele yonke eyayizokwehlela iBhabhele; wonke lawo mazwi alotshwe mayelana neBhabhele.
UJeremiya wathi kuSeraya: “Kuyakuthi nje lapho ufika eBhabhele, uqikelele ukuba uwafunde wonke lawa mazwi,
uthi: ‘Simakade, Wena ukhulumile ngale ndawo ukuthi uzoyiqeda ukuze kungabi bikho muntu nasilwane okuhlala kuyo, ngoba izokuba yihlane, kuze kube phakade.’
Kuyothi lapho usuqedile ukuwufunda lo mqulu, uwubophele etsheni, uwuphonse emfuleni iYufrathe,
uthi: ‘IBhabhele liyakushona kanjalo-ke, lingabe lisavuka ngenxa yenhlekelele engiyoyehlisela kulo. Abantu bakhona bayakuphelelwa ngamandla.’ ” Aphela lapha amazwi kaJeremiya.
UZedekiya waqala ukubusa eneminyaka engama-21, wabusa iminyaka eli-11 eJerusalema. Igama likanina kwakunguHamuthali, indodakazi kaJeremiya waseLibhina.
Wenza okubi phambi kukaSimakade okunjengakho konke okwakwenziwe nguJehoyakimi.
Okwenzeka eJerusalema nakwaJuda kwaba ngenxa yentukuthelo kaSimakade, waze wabalahla phambi kwakhe. UZedekiya wayihlubuka inkosi yaseBhabhele.
Kwathi ngonyaka wesishiyagalolunye wokubusa kwakhe, ngenyanga yeshumi, ngosuku lweshumi lwayo, kwafika eJerusalema uNebhukhadinezari, inkosi yaseBhabhele, nawo wonke amabutho akhe, balivimbezela. Bakanisa ngaphandle komuzi, bakha khona udonga lokuvimbezela nxazonke.
Umuzi wawuvimbezela kanjalo-ke, kwaze kwaba ngunyaka we-11 wokubusa kukaZedekiya.
Ngenyanga yesine, mhla ziyisishiyagalolunye kuleyo nyanga, kwabhoka indlala enkulu emzini, kwakungekho kudla kwabantu bezwe.
Izingange zomuzi zabhodlozwa. Wonke amabutho abaleka, aphulukundlela emzini ebusuku, aphuma ngendlela esesangweni eliphakathi kwezingange zombili ezazingasensimini yenkosi. AmaKhaledi ayewuzungeze nxazonke umuzi, nokho amabutho ahamba ngendlela eya e-Arabha.
Kepha amabutho amaKhaledi ayihubha inkosi, amfica uZedekiya emathafeni aseJerikho, amabutho akhe wonke ahlakazeka.
Ayibamba inkosi, aya nayo enkosini yaseBhabhele, eRibhila, eHamathi, wayigweba.
Inkosi yaseBhabhele yawabulala amadodana kaZedekiya ezibonela ngawakhe amehlo. Yazibulala zonke nezikhulu zakwaJuda eRibhila.
Inkosi yaseBhabhele yamkopolota amehlo uZedekiya, yambopha ngamaketanga, yamyisa eBhabhele, yamfaka ejele, kwaze kwaba lusuku afa ngalo.
Ngenyanga yesihlanu, ngolweshumi lwenyanga, okwakungunyaka we-19 wokubusa kwenkosi uNebukhadinezari, inkosi yaseBhabhele, kwafika eJerusalema uNebuzaradani induna yabalindi, inceku yenkosi yaseBhabhele.
Washisa indlu kaSimakade, isigodlo senkosi, zonke izindlu eJerusalema, nazo zonke izindlu ezinkulu, wakushisa ngomlilo kwangqongqa.
Wonke amabutho amaKhaledi ayenenduna yabalindi azidiliza zonke izingange eJerusalema.
UNebuzaradani, induna yabalindi, wathumba abantu abathile ababempofu, ababesele emzini, nalabo ababehlubukele enkosini yaseBhabhele, nezingcweti ezazisele.
Kepha uNebuzaradani, induna yabalindi, wabashiya abantu abathile bezwe, ababempofu, ukuba basebenze ezivinini nasemasimini.
Izinsika zethusi ezazisesigodlweni, izinqe, ulwandle lwethusi, konke okwakusendlini kaSimakade; amaKhaledi akufahlaza, kwathi konke okwakwenziwe ngethusi kwathuthelwa eBhabhele.
Amabhodwe, amafosholo, izizenze, imicakulo, izinkezo, nazo zonke izitsha zethusi ababekhonza ngakho, akuthatha.
Induna yabalindi yathatha izindebe, imicengezi yomlilo, izitsha, amabhodwe, izinti zezibani, izinkezo, izinkamba, okwakwenziwe ngegolide elicwengekileyo nesiliva elicwengekileyo.
Izinsika zombili, ulwandle olwalulunye nje luhlangene nezinkabi ezili-12 zethusi ezaziphansi kwalo, inkosi uSolomoni eyayikwenzele indlu kaSimakade, ithusi lakho konke lokho lalingenakulinganiswa.
Izinsika-ke, ukuphakama kwensika eyodwa kwakungamakhubhithi ali-18; umucu ongamakhubhithi ali-12 wawuyizungeza; uhlonze lwayo lwaluyiminwe emine, yayiyigobongo.
Kwakukhona isihloko sethusi; ukuphakama kwesihloko esisodwa kwakungamakhubhithi ayisihlanu; kwakukhona nenetha namahananadi phezu kwesihloko nxazonke, konke kwakwenziwe ngethusi; yayinjengaleyo nensika yesibili eyayinamahananadi.
Kwakukhona amahananadi angama-96 ngasemaceleni; wonke amahananadi ayesenetheni nxazonke, ayeyikhulu.
Induna yabalindi yathumba uSeraya, umphristi omkhulu, noZefaniya, umphristi wesibili, nabalindimnyango abathathu.
Emzini yathumba induna eyayengamele amabutho, nabantu abayisikhombisa ababeluleka inkosi abatholakala emzini, umbhali wenduna yamabutho eyayibala abantu ezweni, nabantu ababesezweni abangama-60 abatholakala emzini.
UNebuzaradani, induna yabalindi, wabathatha, wabayisa enkosini yaseBhabhele, eRibhila.
Inkosi yaseBhabhele yabashaya, yababulala lapho eRibhila, eHamathi. UJuda wathunjwa kanjalo-ke ezweni lakubo.
Nampa abantu uNebukhadinezari abathumbayo: ngonyaka wesikhombisa wathumba abaJuda abayizi-3 023,
ngonyaka we-18 wokubusa kukaNebukhadinezari, wathumba eJerusalema abantu abangama-832.
Ngonyaka wama-23 wokubusa kukaNebukhadinezari, uNebuzaradani, induna yabalindi, wathumba abaJuda abangama-745. Sebebonke abantu abathunjwayo babeyizi-4 600.
Kwathi ngonyaka wama-37 wokuthunjwa kukaJehoyakini, inkosi yakwaJuda, ngenyanga ye-12, ngolwama-25 nanhlanu lwenyanga, u-Evili Merodakhi, inkosi yaseBhabhele; ngonyaka wokuqala wokubusa kwakhe, wamxolela uJehoyakini, inkosi yakwaJuda, wamkhipha ejele.
Wakhuluma kahle naye, wamnika isikhundla esiphezulu kunesamanye amakhosi ayenaye eBhabhele.
Wazikhumula izingubo zakhe zasejele; wadla njalo etafuleni lakhe, zonke izinsuku zokuphila kwakhe.
Isabelo sakhe kwakuyisabelo esingapheli semihla ngemihla, asiphiwa yinkosi yaseBhabhele, zonke izinsuku zokuphila kwakhe, kwaze kwaba lusuku afa ngalo.
Maye! Waze wasala dengwane umuzi obugcwele abantu! Sewuphenduke umfelokazi phakathi kwezizwe. Owesifazane obehloniphekile phakathi kwezifunda, usephenduke isigqila.
Ebusuku ukhala kalusizi, kugeleza izinyembezi ezihlathini; akasekho omduduzayo, phakathi kwezithandwa zakhe. Bonke abangani bakhe abebemkhohlisa, sebephenduke izitha zakhe.
UJuda usekuthunjweni, ngenxa yokuhlupheka nangenxa yobugqila obukhulu; uhlala phakathi kwezizwe, akakutholi ukuphumula. Bonke abamxoshayo, bamficile phakathi kobuhlungu.
Imigwaqo yaseZiyoni iyalila, akusekho muntu osaya emikhosini emisiweyo; onke amasango akhona aseyincithakalo, abaphristi bakhona bayabubula, izintombi zakhona ziyahlupheka; nalo linomunyu.
Abamelene nalo sebephenduke banjengamakhosi, izitha zalo zinokuthula. USimakade ulihluphile ngenxa yobuningi beziphambeko zalo. Izingane zalo sezihambile, zisekuthunjweni, ebusweni besitha.
Bonke ubukhazikhazi sebuphelile endodakazini iZiyoni; izikhulu zakhona sezinjengezinyamazane ezingafumani dlelo, zihamba zingenamandla phambi kwabazixoshayo.
IJerusalema ekuhluphekeni nasekuzulazuleni kwalo, liyazikhumbula zonke izinto ezinhle elalinazo emandulo. Lapho abantu balo bewela esandleni sesitha, akubanga bikho muntu owabasiza. Isitha sabukela, sababhinqa ngokuwa kwalo.
IJerusalema lone kakhulu, ngakho-ke seliyisinengiso; bonke abebelihlonipha sebeyaledelela, ngokuba bebone ubunqunu balo; nalo seliyabubula, liphenduka libafulathela.
Ukungcola kwalo kusemphethweni wezingubo zalo, alicabanganga ngomphumela wokona kwalo, liwile ngendlela emangalisayo, akekho ongaliduduza. Bheka Simakade, ukuhlupheka kwami, ngokuba isitha sinqobile.
Isitha selulele isandla saso phezu kwakho konke okuthandekayo kwalo. Impela libabonile abezizwe bengena endaweni yalo engcwele; labo owayala ukuba bangangeni ebandleni lakho.
Bonke abantu bakhona bayabubula, befuna isinkwa. Bakhipha okuthandekayo kwabo ngokuba befuna ukudla ukuze basimamise umphefumulo. Bheka, Simakade, ubone, ngokuba sengiphenduke into eyedelelwayo.
Akunithinti yini nina nonke enedlula ngendlela na? Bhekani nibone ukuthi bukhona yini ubuhlungu obunjengobuhlungu obehliselwe mina, uSimakade angihluphekise ngabo ngosuku lolaka lwakhe oluvuthayo.
“Uthumele umlilo wakhe ekweliphezulu, wangena emathanjeni ami, wawehlula; unekele izinyawo zami inethi, wangiqumba phansi; ngalala amankeyane. Ungishiye ngiyincithakalo, ngiphelelwe ngamandla usuku lonke.
“Iziphambeko zami ziboshelwe ejokeni ngesandla sakhe, waziphica ndawonye wazibeka entanyeni yami; wanqinda namandla ami. USimakade unginikele ezandleni zalabo engingakwazi ukumelana nabo.
“INkosi uSimakade iwalaxazile onke amaqhawe ami, ibize imbizo ukuze imelane nami; ifihlize izinsizwa zami, kuhle kwesikhamo sewayini inyathele intombi eyindodakazi yakwaJuda.
“Ngenxa yalokho ngiyakhala, ngikhihla isililo, ngokuba akukho mduduzi eduze nami obezohlumelela umoya wami. Abantwana bami bayincithakalo, ngoba isitha singehlulile.”
IZiyoni lelula izandla zalo, akukho noliduduzayo. USimakade uyalile ngoJakobe ukuthi labo abamzungezile bayoba yizitha zakhe. IJerusalema seliphenduke isinengiso phakathi kwabo.
“USimakade ungijezise ngokufanele, ngokuba angililalelanga izwi lakhe. Lalelani bantu, bukani nibone ubuhlungu bami. Izintombi nezinsizwa zami zihambile, zisekuthunjiweni.
“Izithandwa zami ngazibiza, zona zangikhohlisa. Abaphristi namalunga ami bafele emzini, bezama ukufuna ukudla ukuze basimamise ukuphila kwabo.
“Bheka, Simakade, ngokuba ngilusizi, kuphethuka izibilini. Inhliziyo yami iyayaluza ngaphakathi, ngokuba ngihlubuke kakhulu. Ngaphandle inkemba idla lubi; endlini ngukufa kodwa.
“Bangizwile ngibubula, kepha akekho ongiduduzile. Zonke izitha zami zizwile ngosizi lwami, zajabula ukuthi nguwe ongenze nje. Lwenze lufike lolo suku owamemezela ngalo, zenze nazo zifane nami.
“Bonke ububi bazo mabufinyelele ebusweni bakho, nakuzo yenza njengoba wenze kimi, ngenxa yazo zonke iziphambeko zami, ngokuba kukhulu ukububula kwami; idangele nenhliziyo yami.”
Maye! INkosi yembese indodakazi iZiyoni ngamafu entukuthelo yayo! Ibulahle phansi ubukhazikhazi buka-Israyeli, yabubeka emhlabeni, busuka ezulwini. Ngosuku lwentukuthelo yayo, ayilikhumbulanga ithempeli eliyisenabelo sezinyawo zayo.
INkosi izibhubhise ngokungenaluzwelo, zonke izindawo okuhlala kuzo uJakobe. Ngentukuthelo yayo, izibhidlizile izigqaba zendodakazi uJuda, yaqumba phansi emhlabathini umbuso, nababusi yabathela ngehlazo.
Ngokuvutha kolaka lwayo inqume zonke izimpondo zika-Israyeli, yagodla isandla sayo sokunene, ayamvikela ezitheni zakhe. Ulaka lwayo lwamvuthela uJakobe, lwashisa konke nxazonke.
Yansala umnsalo wayo njengesitha, isandla sayo sokunene samelana nathi, yabulala konke okwakuthandeka emehlweni ethu; ethendeni lendodakazi iZiyoni, intukuthelo yayo yayikhafulisa okomlilo.
INkosi yaphenduka yanjengesitha, yambhubhisa u-Israyeli, yachitha zonke izigodlo zakhe, yabhidliza izinqaba zakhe, yandisa ukukhala nokulila endodakazini uJuda.
Yachithachitha indlu yayo, njengedlangala ensimini, yabhubhisa indawo yayo yokuhlanganela. USimakade wenza imikhosi emisiweyo namaSabatha, akwabe kusakhunjulwa eZiyoni; ngokufutheka kolaka lwakhe, waziqhelelanisa nenkosi nabaphristi.
INkosi yalilahla i-althare layo, yashiya indawo yayo engcwele; izindonga zezigodlo zamakhosi ayo yazinikela esitheni. Sabanga umsindo omkhulu endlini kaSimakade kwangathi kungosuku lomkhosi.
USimakade wayekuhlosile ukubhubhisa udonga lwendodakazi iZiyoni; welula intambo yokulinganisa, akasibambanga isandla sakhe ekubhubhiseni; washiya imigoqo nezindonga kukhala; kuyincithakalo.
Amasango alo abishe emhlabathini; usakaze, waphoqoza imigoqo yalo. Inkosi nababusi sebephakathi kwezizwe, akasekho ofundisa umthetho, nabaphrofethi abasaboni mbono ovela kuSimakade.
Izimpunga zendodakazi iZiyoni zihleli phansi emhlabathini, zithule du; zizithele ngothuli emakhanda, zibhince namasaka. Izintombi zaseJerusalema zigebisele amakhanda emhlabathini.
Amehlo ami akhathele ukukhala, kuphethuka izibilini zami; ngiphelelwe yithemba ngenxa yokubhujiswa kwabantu bakithi, nokuquleka kwezingane nabancelayo emigwaqweni yomuzi.
Zikhalela onina, zifuna isinkwa newayini, lapho ziquleka njengabalimele kakhulu, emigwaqweni yomuzi; imiphefumulo yazo iphumela ezifubeni zonina.
Ngingafakaza ngithini ngawe Jerusalema na? Ngingakuqhathanisa nani na? Ngingathini kuwe ukuze ngikududuze, ntombi eyindodakazi iZiyoni na? Ngokuba incithakalo yakho ibanzi njengolwandle; ngubani ongakwelapha na?
Abaphrofethi bakho bakutshele imibono engamanga newubuwula, abakuvezanga obala ukuphambuka kwakho ukuze uphenduke, ungayi ekuthunjweni. Bakutshele imibono engamanga neyinkohliso.
Bonke abedlula ngakuwe, bashaya izandla, bethi: “Ashila!” Bayakunximfela, benikina amakhanda, ndodakazi Jerusalema, bathi: “Ngabe yiwo yini lo muzi ababewubiza ngokuthi ungubuhle obupheleleyo, nentokozo yomhlaba wonke na?”
Zonke izitha zakho ziyakuhleka, ziyakubhuqa; zikugedlela amazinyo, zithi: “Siligwinyile, impela yilona lolu suku obekukade silulindele, manje silutholile, silubonile.”
USimakade wenze abekusophile, ufeze izwi lakhe ayelishilo kwasemandulo; ubhidlizile ngokungenaluzwelo, isitha wasenza sathokoza phezu kwethu, waphakamisa uphondo lwezitha zethu.
Izinhliziyo zabo mazikhale eNkosini; wena ludonga lwendodakazi iZiyoni, izinyembezi mazigelezise okwemifula, mawungaphumuli imini nobusuku, inhlamvu yeso lakho ingakutholi ukuphumula.
Vuka umpongoloze ezinzulwini zobusuku, inhliziyo yakho uyithulule njengamanzi phambi kobuso beNkosi. Phakamisela izandla zakho kuyo, ukhulekele izingane zakho, ezibulawa yindlala emajikeni ayo yonke imigwaqo.
“Bheka, Simakade, ngubani omunye osuwake wamphatha ngalolu hlobo na? Kuyikho yini ukuba onina badle abantwana babo, izingane zabo abazikhulisayo na? Kuyikho yini ukuba abaphristi nabaphrofethi babulawelwe e-althare leNkosi na?
“Abancane nabadala badindilize emigwaqweni; izintombi nezinsizwa zami ziwe ngenkemba. Uzibulale ngosuku lwentukuthelo yakho; wazibulala ngokungenaluzwelo.
“Ubabize nxazonke abangesabisayo, kwaba njengasosukwini owawulumisile; akubanga bikho namunye owaphunyula nowasindayo, ngosuku lwentukuthelo kaSimakade. Labo engabazala ngabakhulisa, isitha sami sibaqothulile.”
Ngingumuntu ohlupheke kakhulu, uNkulunkulu ungijezisile ngentukuthelo yakhe.
Ungixoshele ebumnyameni obukhulu.
Ungishaye ephindelela ubusuku nemini, engenqabela ukuba ngisondele kuye.
Ugugise inyama yami nesikhumba sami; wephula amathambo ami.
Wakhe udonga, wangibiyela ngobuthi nobunzima.
Ungihlalise ebumnyameni obunzulu, njengalabo abafa kudala.
Ungihaqe nxazonke, angikwazi ukuphunyuka, wangibopha ngamaketanga asindayo.
Nalapho ngikhala ngicela usizo, akawunakanga umkhuleko wami.
Izindlela zami uzibiyele ngomthangala wamatshe, indlela yami wayigwegwisa.
Ufane kimi nebhele elicuthileyo, nanjengengonyama icuthe endaweni esithekileyo.
Ungichezukise endleleni yami, wanginikiza ngaba yizicutshana, wangishiya ngimantwenguntwengu.
Wakhokha umnsalo wakhe, wangimisa ngaba yinkololo yemicibisholo yakhe.
Wangihlaba ezinsweni ngemicibisholo yomgodla wakhe.
Sengiyinhlekisa kubo bonke abantu bakithi, bahaya ngami izingoma nsuku zonke.
Ungisuthise ngomunyu, wangiphuzisa inyongo.
Ungiqumbe othulini, amazinyo ami ephulwa ngumgubane.
Ungemuke ukuthula, angisakwazi ukujabula, nezinto ezinhle azisekho.
Ngase ngithi: “Angisakwazi ukubekezela; nethemba lami kuSimakade alisekho.”
Uma ngikhumbula ukuhlupheka kwami nokuba ngumhambuma, kufana nenhlaba nenyongo.
Lapho ngicabanga ngalezi zinto, ngiyadideka.
Noma kunjalo ngisazoqhubeka ngibe nethemba, uma ngicabanga ngoSimakade.
Uthando lwakhe lungunakaphakade, ububele bakhe abunamukhawulo.
Kusha nsuku zonke, ukwethembeka kwakhe kukhulu.
Ngathi: “USimakade uyisabelo sami, ngakho-ke ngizokwethembela kuye.”
USimakade muhle kulowo omlindelayo, kulowo omfunayo.
Kuhle ukulindela ngokuthula ukusindisa kukaSimakade.
Kuhle ukuba umuntu athwale ijoka esemusha.
Makahlale yedwa, athule, ngokuba nguSimakade omethwese lona.
Makabeke umlomo wakhe othulini, hleze lingakhona ithemba.
Makamnike isihlathi ommukulayo, asuthe inhlamba.
Ngokuba iNkosi ayinakusilahla kuze kube phakade.
Noma ikudabukisile, iyokuhawukela ngobukhulu bobubele bayo.
Ngokuba akuveli enhliziyweni yayo ukuhlupha, nokudabukisa abantwana babantu.
Lapho zonke iziboshwa emhlabeni zidovadovwa ngezinyawo;
nalapho ubulungiswa buphanjaniswa phambi koPhezukonke;
lapho icala lomangalelwe lihlanekezelwa, ngabe iNkosi ayikuboni lokho na?
Kukhona yini ongahlela bese enza akuhlelile, uma iNkosi ingakuvumelanga na?
Ngabe okuhle nokubi akwenzeki yini ngokuyala koPhezukonke na?
Kungani ukuba umuntu akhononde ngempilo yakhe na? Makakhononde ngezono zakhe.
Masibheke, sihlolisise izenzo zethu, sibuyele eNkosini.
Masiphakamise izinhliziyo zethu nezandla zethu sikuphakamisele kuNkulunkulu ezulwini, sithi:
“Sonile, sakuhlubuka, Wena Nkosi awuzithalaliselanga izono zethu.
“Uzembese ngolaka, wasixosha, wabulala, awaze waba naluzwelo.
Uzifihle efwini, ukuze imikhuleko yethu ingafinyeleli kuwe.
Usenze saba yizibi nemfucumfucu phakathi kwezizwe.
“Zonke izitha zethu ziyasiklolodela.
Sehlelwe wuvalo, sizungezwe yimigodi; ukubhujiswa nencithakalo kuphezu kwethu.”
Kugobhoza imifula yezinyembezi emehlweni ami, ngenxa yokubhujiswa kwendodakazi yabantu bami.
Amehlo ami agobhoza izinyembezi, azinqamuki, azinamkhawulo;
aze abheke uSimakade, abone esezulwini.
Lokho okubonwa ngamehlo ami, kuyayihlubula inhliziyo yami, ngenxa yalokho okwenziwe kwabesifazane bomuzi wakithi.
Abangizondela ize, bangizingelisisa okwenyoni.
Bangiphonse emgodini, bawugcika ngamatshe.
Amanzi angigubuzela ikhanda. Ngathi: “Kuphelile ngami!”
Ngakhuleka kuwe, Simakade, ngisemgodini phansi.
Walizwa izwi lami lapho ngithi: “Ungayisithezi indlebe yakho ekunxuseni kwami, ngicela usizo.”
Lapho ngikubiza, ngicela usizo, weza kimi, wathi: “Ungesabi.”
Nkosi, uyimele indaba yami, wayihlenga impilo yami.
Simakade, ukubonile okubi okwenziwe kimi; yehlulela, ungimelele.
Ukubonile ukulangazelela kwabo ukuba baphindisele, nawo wonke amacebo abo ngami.
Uyizwile yonke inhlamba abangethuke ngayo, Simakade, nozungu abangakhele lona.
Bakhuluma futhi bacabange nto yinye nje: ukuthi bangangilimaza kanjani.
Noma behleli noma bemile, ngiyihubo labo lokukloloda.
Simakade, uyaphindisela kumuntu ngokwemisebenzi yakhe; ngiphindiselele kubo ngabakwenze kimi!
Bashaye ngobumpumputhe, udide imiqondo yabo, beka isiqalekiso sakho phezu kwabo!
Baxoshe ngentukuthelo yakho, ubabhubhise, kungasali namunye phansi kwezulu likaSimakade.
Hawu, laze lafiphala igolide, igolide elihle seligqwalile! Amatshe endlu engcwele, asesakazeke kuwo wonke amakhona emigwaqo.
Amadodana aseZiyoni akhethekileyo ayefana negolide elicolekileyo, kodwa manje asefana nezitsha zebumba, ezingumsebenzi wezandla zombumbi!
Ngisho nezimpungushe ziyawancelisa amazinyane azo, kodwa abesifazane babantu bami, ababanaki abantwana babo, banonya njengezintshe zasendle.
Ulimi lomntwana oncelayo lunamathela olwangeni ngenxa yokoma. Izingane zicela isinkwa, kodwa akekho ozihlephulelayo.
Labo abebekade bedla okumnandi, sebeyimizulane emigwaqweni. Labo ababekhuliswe ngokububende, manje sebelala ezaleni.
Ukona kwendodakazi yabantu bami, kungaphezu kwesono seSodoma elachithwa ngokuphazima kweso, kungengazandla zamuntu.
Amanaziri akithi ayemhlophe kunongqoqwane, emhlophe ukwedlula ubisi. Imizimba yawo yondlekile, isimo sawo sikhazimula njengesafire.
Manje asemnyama ukwedlula ilahle, ngeke usawakhomba ngisho emigwaqweni. Isikhumba sawo sesishwabene sanamathela emathanjeni awo, sesome safana nokhuni.
Bangcono abafe ngenkemba kunalabo ababulewe yindlala, babhuqwabhuqwa yinkemane, ngenxa yokweswela ukudla okuvela emasimini.
Ngesikhathi sokuvinjezelwa nokuchithwa kwabantu bami, izandla zabesifazane ababekade benozwelo, zapheka izingane zabo, zaba ngukudla.
USimakade uyikhombise ngokugcwele intukuthelo yakhe; wathulula ukuvutha kolaka lwakhe, wathungela umlilo eZiyoni, oqothule izisekelo zalo.
Amakhosi omhlaba, nazo zonke izakhamuzi zawo, azikholwanga ngukuthi izitha nabamelene neJerusalema babengangena emasangweni alo.
Lokho kwenzeka ngenxa yezono zabaphrofethi, nobubi babaphristi bakhona, ababechitha igazi labalungile kulo.
Babephuphutheka, bezulazula emigwaqweni, bengcoliswe yigazi ngangokuthi akekho owayengathinta izingubo zabo.
Abantu babebahebeza, bethi: “Sukani lapha, ningcolile! Sukani, sukani, ningasithinti!” Ngakho-ke baphenduka abafokazi nemizulane; abantu phakathi kwezizwe bathi: “Anisoze nagogobala lapha!”
NguSimakade luqobo obahlakazile, akasayukubanakekela. Ababahloniphanga abaphristi, ababanga namusa kubanumzane.
Amehlo ethu aze akhathala, silokhu silindele usizo oluyize, simi emibhoshongweni yethu, silinde isizwe esingenakusisindisa.
Izitha zethu zasizingela nomaphi lapho sibalekela khona, sasingasakwazi ukuhamba emigwaqweni yakithi. Isiphetho sethu sase sisondele, nezinsuku zethu sezibaliwe, nokuphela kwethu kwase kufikile.
Abasixoshayo babenejubane ukwedlula izinkozi zezulu; besixosha naphezu kwezintaba, besilalele unyendle ehlane.
Ogcotshiweyo kaSimakade, ongukuphila nomphefumulo wethu, wakhalakathela emigodini yabo, esathi ngaye: “Uyoba ngumthunzi wethu wokukhosela phakathi kwezizwe.”
Jabula, uthokoze wena ndodakazi, yakwa-Edomi, wena ohlala e-Uzi, kodwa le ndebe izokwedlulela nakuwe, uzodakwa, uzihlubule, ube nqunu.
Isigwebo sakho nesikhathi sokuthunjwa kwakho sekuphelile, ndodakazi, yaseZiyoni. Kodwa wena, ndodakazi, yakwa-Edomi, uzojeziswa, Yena uzozambula izono zakho, ngenxa yobubi bakho.
Khumbula Simakade, okusehleleyo! Bheka, ubone ihlazo lethu!
Ifa lethu seliphendulwe laba ngelabafokazi, izindlu zethu zaba ngezabezizwe.
Siyizintandane, asinababa, omama bethu sebefana nabafelokazi.
Amanzi ethu siwaphuza ngemali, izinkuni zethu sesizithola ngokuzithenga.
Abasixoshayo basihleli entanyeni, sikhathele, asikutholi ukuphumula.
Sizinikele kwabaseGibhithe nakwabase-Asiriya, ukuze sithole isinkwa, sisuthe.
Okhokho bethu benza okubi, manje abasekho, kodwa sekuyithi esesithweswe ububi babo.
Sesibuswa yizigqila; akekho ongasikhulula esandleni sazo.
Uma sifuna ukuthola ukudla, sibeka impilo yethu engcupheni yokudliwa yinkemba ogwadule.
Isikhumba sethu sishisisa okweziko ngenxa yokubhuqwabhuqwa yindlala.
Badlwengula abesifazane eZiyoni, nezintombi emizini yakwaJuda.
Izikhulu ziphanyekwa ngezandla zazo; abahlonishwa nabadala.
Izinsizwa zithwaliswa amatshe okusila. Abafana babhamazeliswa yimithwalo yezinkuni.
Akusahlali zingwevu esangweni, nezinsizwa azisayivumi ingoma yazo.
Iphelile intokozo yenhliziyo yethu, ukusina kwethu sekuphenduke ukulila.
Umqhele uwile ekhanda lethu. Maye, kithi, ngokuba sonile!
Ngalokho-ke inhliziyo yethu idangele; ngenxa yalezo zinto, amehlo ethu afiphele.
Phezu kwentaba iZiyoni esiyincithakalo, sekuzulazula amanketshane.
Wena Simakade, umi ingunaphakade, isihlalo sakho sobukhosi siyoba khona izizukulwane ngezizukulwane.
Usikhohlweleni isikhathi eside kangaka na? Usilahleleni izinsuku eziningi kangaka na?
Sibuyisele kuwe, Simakade, siyakubuya; yenza izinsuku zethu zibe zintsha njengasemandulo;
ngaphandle uma ususilahle unomphelo, wasithukuthelela kakhulu.
Kwathi ngonyaka wama-30, ngenyanga yesine, ngosuku lwesihlanu lwayo, nginabathunjwa ngasemfuleni iKhebhari, izulu lavuleka, ngabona imibono kaNkulunkulu.
Ngosuku lwesihlanu lwenyanga, ngonyaka wesihlanu wokuthunjwa kukaJehoyakhini,
kwafika izwi likaSimakade kuHezekeli umphristi, indodana kaBhuzi, ezweni lamaKhaledi, ngasemfuleni iKhebhari. Isandla sikaSimakade sasiphezu kwakhe khona lapho.
Ngabheka, ngabona umoya oyisivunguvungu uvela enyakatho, ifu elikhulu, umlilo onkewuzayo nokubaneka nxazonke. Phakathi komlilo kwavela okucwazimulayo.
Kulokho kukhanya kwavela umfanekiso wezidalwa eziphilayo ezine, ezibukeka njengabantu,
kodwa yileso naleso sidalwa sasinobuso obune, namaphiko amane.
Imilenze yazo yayiqondile, amathe ezinyawo zazo efana namathe ezinselo zethole, zazimenyezela njengethusi elicwebezelisiweyo.
Phansi kwamaphiko azo, ezinhlangothini zozine, zazinezandla zomuntu. Zozine, ubuso bazo namaphiko azo kwakunje:
amaphiko azo ayethintene, yileso naleso sasingaphenduki lapho sihamba, yileso naleso sasihamba siqonde lapho kubheke khona ubuso baso.
Isimo sobuso bazo sasifana nobuso bomuntu, zozine zinobuso bengonyama ngakwesokunene, obenkomo ngakwesokhohlo, nobuso bokhozi.
Babunjalo-ke ubuso bazo zozine. Amaphiko azo ayelulekele phezulu. Kuyilelo nalelo lamaphiko amabili ethintene, kuthi amabili emboze imizimba yazo.
Yileso naleso sasihamba siqonde phambili. Kwakuthi lapho kuya khona uMoya, nazo ziye ngakhona; zazingaphenduki uma zihamba.
Isimo sezidalwa eziphilayo sasibukeka njengamalahle avutha umlilo, zivutha njengezibani, umlilo wawehla wenyuka phakathi kwezidalwa eziphilayo. Umlilo wawumenyezela kuphuma unyazi kuwo.
Izidalwa eziphilayo zazigijima ziye phambili nasemuva njengombani.
Ngathi ngisazibuka izidalwa eziphilayo, ngabona isondo emhlabathini, eceleni kwaleso naleso sidalwa esiphilayo, esinobuso obune.
Ukubukeka kwamasondo nokwakhiwa kwawo kwakunjengekhrisolithe, omane efana nse. Ayakhiwe kungathi isondo liphakathi kwelinye isondo.
Ayehamba kuyilelo ohlangothini lwalo, awazange aphenduke, kuzona zozine izinhlangothi ayekuzo.
Amarimu awo ayephakeme, futhi emangalisa; omane amarimu ayegcwele amehlo nxazonke.
Kwakuthi uma kuhamba izidalwa eziphilayo, kuhambe namasondo ayeseceleni kwaleso naleso sidalwa. Kuthi lapho izidalwa eziphilayo ziphakanyiswa emhlabeni, namasondo aphakanyiswe.
Noma kuphi lapho umoya wawuya khona, ayeya ngakhona namasondo, aphakame eceleni kwazo, umoya wezidalwa eziphilayo wawusemasondweni.
Lapho izidalwa zihamba, nawo ayehamba, kuthi lapho zima, nawo ame, nalapho izidalwa ziphakanyiswa emhlabeni, nawo aphakanyiswe kanye nazo, ngokuba umoya wezidalwa wawusemasondweni.
Phezu kwamakhanda ezidalwa, kwakukhona okungathi ngumkhathi, kunjengekhristalu elimangalisayo, kwendlalwe phezu kwamakhanda azo.
Phansi komkhathi, amaphiko azo ayeqondene, elinye nelinye, yileso naleso sinamabili embesa imizimba yazo ngapha, sinamabili nangapha.
Kwathi lapho zihamba ngezwa umsindo wamaphiko azo ufana nomsindo wamanzi amaningi, unjengezwi likaSomandla nanjengomsindo weziqubulo zempi. Kwakuthi lapho zima, ziwehlise amaphiko azo.
Kwase kuzwakala izwi phezu komkhathi owawuphezu kwamakhanda azo. Lapho sezimile zawehlisa amaphiko azo.
Ngaphezu komkhathi owawuphezu kwamakhanda azo kwakukhona okungathi yitshe lesafire, libukeka njengesihlalo sobukhosi. Phezu kwesihlalo sobukhosi kwakukhona okufana nomuntu.
Kwesingenhla sokusamuntu, okhalo lwakho, ngabona ithusi elimenyezelayo, into efana nomlilo imzungezile. Kwesingezansi sakhe kulokhu okubukeka salukhalo, ngabona umlilo ukhazimula nxazonke.
Njengothingo lwenkosazana emva kwemvula, kwakubonakala kunjalo ukumenyezela kwakho nxazonke. Kwakufana nenkazimulo kaSimakade. Kwathi lapho ngiyibona ngakhothama ngathi mbo ngobuso, ngezwa izwi lokhulumayo.
Wathi kimi: “Ndodana yomuntu, yima ngezinyawo zakho, ukuze ngikhulume nawe.”
Kwathi esakhuluma kimi, kwangena kimi uMoya, wangimisa ngezinyawo, ngamuzwa owayekhuluma kimi.
Wathi kimi: “Ndodana yomuntu, ngiyakuthuma kubantu bakwa-Israyeli, ezizweni zamambuka, ezihlubukile kimi, zona nokhokho bazo zonile kimi kuze kube namuhla.
Bangabantu abanenkani nenhliziyo elukhuni, ngiyakuthuma kubo, uyakuthi kubo: ‘Isho kanje iNkosi uSimakade, ithi...’
Noma ngabe bayalalela noma abalaleli, ngokuba bayindlu ehlubukayo, nokho bayokwazi ukuthi bekukhona umphrofethi phakathi kwabo.
Wena, ndodana yomuntu, ungabesabi, ungawesabi namazwi abo, noma ngabe afana namakhakhasi nameva kuwe, uhleli nofezela, ungawesabi amazwi abo, ungapheli amandla ngenxa yobuso babo, ngokuba bayindlu ehlubukayo.
Uyakukhuluma amazwi ami kubo, noma ngabe bayalalela noma bawashaya indiva, ngokuba bangabahlubuki.
Kepha wena ndodana yomuntu, yizwa engikusho kuwe, ungabi ngohlubukayo njengale ndlu ehlubukayo. Vula umlomo wakho, udle engikunika khona.”
Ngabona, bheka, naso isandla eselulelwe ngakimi, kuso kunomqulu wencwadi.
Wawendlala phambi kwami, wawulotshiwe ngaphandle nangaphakathi. Kuwo kwakubhalwe izililo nokuzila, nokuthi: “Maye!”
Wayesethi kimi: “Ndodana yomuntu, yidla lokhu okutholayo, wudle lo mqulu, uhambe uyokhuluma nendlu yakwa-Israyeli.”
Ngawuvula umlomo wami, wangidlisa lo mqulu.
Wathi kimi: “Ndodana yomuntu, sidlise isisu sakho, izibilini zakho uzigcwalise ngalo mqulu engikunika wona.” Ngawudla, waba mnandi njengoju emlonyeni wami.
Wayesethi kimi: “Ndodana yomuntu, hamba uye endlini yakwa-Israyeli, ukhulume amazwi ami kuyo.
Ngokuba awuthunywa kubantu abalulimi lwabo lulukhuni, lungaqondakali, kodwa uthunywa endlini yakwa-Israyeli,
futhi akuyibo abantu abaningi abakukhuluma kwabo kungezwakali nolimi lwabo lungaqondakali, ongaqondi namazwi abawashoyo. Impela ukuba bengikuthume kubantu abanjalo, bebeyakukulalela.
Kepha indlu yakwa-Israyeli ayiyukukulalela futhi ayizimisele ukungilalela nami, ngokuba yonke indlu yakwa-Israyeli inebunzi elilukhuni nenhliziyo eqinile.
Ngenza ubuso bakho bube lukhuni njengobuso babo, nebunzi lakho libe lukhuni njengamabunzi abo.
Ngilenze ibunzi lakho lalukhuni njengedayimani, lalukhuni ukwedlula insengetsha. Ungabesabi, ungapheli amandla ngenxa yabo, ngokuba bayindlu ehlubukayo.”
Wabuye wathi kimi: “Ndodana yomuntu, wonke amazwi ami engiyakuwakhuluma kuwe, afake enhliziyweni yakho, uwezwe ngezindlebe zakho.
Hamba uye kubathunjwa, kubantwana babantu bakini, ukhulume kubo, uthi: ‘Isho kanje iNkosi uSimakade,’ noma ngabe bayalalela noma abakulaleli.”
UMoya wayesengiphakamisa, ngezwa izwi lokuduma okukhulu emva kwami, lithi: “Mayibusiswe inkazimulo kaSimakade endaweni yakhe.”
Ngezwa nomsindo wokuthintana kwamaphiko ezidalwa, nowamasondo ayeseceleni kwazo, umsindo wokuduma okukhulu.
Umoya wawusungiphakamisa, wangisusa. Ngahamba nginomunyu nokuthukuthela emoyeni wami, isandla sikaSimakade sasinzima phezu kwami.
Ngafika ngaseTheli Avivi, kubathunjwa ababehlala ngasemfuleni iKhebhari. Ngahlala phakathi kwabo, ngahlala izinsuku eziyisikhombisa ngimangele.
Kwathi ekupheleni kwezinsuku eziyisikhombisa, kwafika kimi izwi likaSimakade, lathi:
“Ndodana yomuntu, ngikuqoke ukuba ngumlindi kuyo indlu yakwa-Israyeli, ngakho-ke uyakuzwa izwi eliphuma emlonyeni wami, ungixwayisele bona.
Uma ngithi komubi: ‘Uyakufa nokufa,’ bese ungamxwayisi; ungakhulumi umxwayise omubi endleleni yakhe embi, ukuba omubi umsindise, uyakufa ngenxa yezono zakhe, kodwa igazi lakhe ngiyakulibiza esandleni sakho.
Kepha wena, uma umxwayisile omubi, kodwa akaze abuyeka ububi bakhe nendlela yakhe embi, uyakufa ngenxa yesono sakhe, kodwa wena uwusindisile umphefumulo wakho.
“Lapho olungileyo eguquka ekulungeni kwakhe, enze okubi, bese ngibeka isikhubekiso phambi kwakhe, uyakufa. Uma ungamxwayisanga ngenxa yesono sakhe, uyakufa, kuthi izenzo zakhe ezilungileyo azenzile zingabe zisakhunjulwa, kodwa igazi lakhe ngiyakulibiza esandleni sakho.
Kepha uma umxwayisa olungileyo ukuze angoni, bese ngempela angoni, uyakuphila nokuphila, ngokuba exwayile, nawe-ke uyobe uwusindisile umphefumulo wakho.”
Isandla sikaSimakade saba phezu kwami, wayesethi kimi: “Sukuma, hamba uye ethafeni, ngiyakukhuluma nawe lapho.”
Ngasukuma, ngahamba ngaya ethafeni; inkazimulo kaSimakade yayimi khona, injengenkazimulo engayibona ngasemfuleni iKhebhari, ngase ngikhothama, ngathi mbo ngobuso.
UMoya wawusungena kimi, wangimisa ngezinyawo. Wakhuluma kimi, wathi: “Hamba uzivalele endlini yakho.
Kepha wena ndodana yomuntu, bayakubeka izintambo kuwe, bakubophe ngazo ukuze ungaphumi uhambe phakathi kwabo.
Ngiyakwenza ulimi lwakho lunamathele olwangeni lwakho, ube yisimungulu, ukuze ungabi ngumuntu obayalayo, ngokuba bayindlu ehlubukayo.
Kuyothi lapho ngikhuluma nawe, ngivule umlomo wakho, bese uthi kubo: ‘Isho kanje iNkosi uSimakade.’ Ozwayo makezwe, onganaki makanganaki, ngokuba bayindlu ehlubukayo.”
“Wena ndodana yomuntu, zithathele isitini, usibeke phambi kwakho, uqophe kuso umuzi iJerusalema.
Uyokwakha khona okokuvimbezela, wakhe udonga lokuvimbezela, wenze khona indunduma, umise izinkambu eduze kwawo, ubeke kuyo imigoqo yokubhidliza nxazonke.
Zithathele ucwecwe lwensimbi, ulwenze lube ludonga lwensimbi phakathi kwakho nomuzi, ubhekise ubuso bakho kuwo, wona uyakuvinjezelwa, uyakuwuvimbezela. Lokhu kuyakuba yisibonakaliso kuyo indlu yakwa-Israyeli.
“Lala ngohlangothi lwakho lwesokhohlo, ubeke isono sika-Israyeli phezu kwalo; uyakuthwala isono sabo ngazo zonke izinsuku oyobe ulele ngalo.
Ngikubekele izinsuku ezingangenani leminyaka yokona kwabo. Wena-ke uyakuthwala isiphambeko sendlu yakwa-Israyeli izinsuku ezingama-390.
“Kuyothi lapho usuziqedile lezi, uphinde ulale futhi ngohlangothi lwesokunene, ngokwesibili uyothwala isiphambeko sendlu yakwaJuda. Ngikunqumele izinsuku ezingama-40 kulokhu, yilolo nalolo suku lungunyaka.
Uyobhekisa ubuso bakho ekuvinjezelweni kweJerusalema, ingalo yakho ingemboziwe; uphrofethe, umelane nalo.
Ngiyakukubopha ngezintambo, awuyukukwazi ukuguqukela kolunye uhlangothi, zize ziphele izinsuku zokuvimbezela kwakho.
“Zithathele futhi ukolo, ibhali, ubhontshisi, imbumba, unyaluthi nesiphelithe, ukufake esitsheni esisodwa, bese uzenzela ngakho isinkwa. Uyakusidla ngokwenani lezinsuku oyozilala ngohlangothi, izinsuku ezingama-390.
Ukudla oyakukudla ngosuku kuyakuba yisilinganiso esingamashekeli angama-20, uyakukudla ngezikhathi ezimisiweyo.
Uyakuphuza amanzi akalwe aba yingxenye yesithupha yehini, uyakuwaphuza ngezikhathi ezimisiweyo.
Uyakudla iqebelengwane lebhali, ulibhake phambi kwabo ngendle ephuma kumuntu.”
USimakade wathi: “Kanjalo abantu bakwa-Israyeli bayakusidla isinkwa sabo esingcolile phakathi kwezizwe, lapho ngiyobaxoshela khona.”
Ngase ngithi: “Phinde, Nkosi Simakade; umphefumulo wami awukaze ungcoliswe, ngokuba kwasebusheni bami kuze kube manje angikaze ngiyidle ingcuba, okudweshuliweyo, nenyama engcolileyo ayikaze ingene emlonyeni wami.”
Wathi kimi: “Uyabona-ke, ngizokunika idaka lenkomo esikhundleni sendle yomuntu; isinkwa sakho uyakusenzela phezu kwalo.”
Wabuye wathi, kimi: “Ndodana yomuntu, ngiyakwaphula uzime lwesinkwa eJerusulema. Bayakudla isinkwa esikaliwe, bekhathazekile, baphuze amanzi akaliweyo, bethuthumela.
Ngokweswela kwabo isinkwa namanzi, bayobhekana bemangele, bashabalale ekoneni kwabo.”
“Wena ndodana yomuntu, zithathele inkemba ebukhali, uyisebenzise njengensingo yomgundi, ugunde izinwele zakho netshebe yakho, bese uzithathela isikali sokukala, wehlukanise izinwele.
Ingxenye yokuthathu uyakuyishisa ngomlilo phakathi komuzi, lapho seziphelile izinsuku zokuvinjezelwa; uyothatha ingxenye yokuthathu elandelayo, uyigalele ngenkemba nxazonke; kuthi ingxenye yokuthathu yokugcina, uyihlakaze emoyeni. Mina ngizohosha inkemba emva kwabo.
Uyakuthatha lapho ingcosana kulezo zinwele uzibophele emiphethweni yengubo yakho.
Uyakuthatha futhi ezinye zazo uziphonse emlilweni, uzishise emlilweni. Kuyakuqubuka umlilo lapho, umelane nayo yonke indlu yakwa-Israyeli.
“Isho kanje iNkosi uSimakade, ithi: ‘Leli yiJerusalema, ngilibeke phakathi kwezizwe, lahaqwa ngamazwe.
Lihlubukile ezehlulelweni zami nasezimisweni zami, lakhohlakala ukwedlula izizwe namazwe alizungezileyo, ngokuba balahlile izimiso zami, abaze bahamba ngazo.’
“Ngakho-ke isho kanje iNkosi uSimakade, ithi: ‘Ngokuba inxokozelo yenu inkulu ukwedlula izizwe ezinizungezileyo, anihambi ngokwezimiso zami, anizigcini izehlulelo zami, futhi anenzanga ngokwezehlulelo zezizwe ezinizungezileyo;
ngalokho-ke isho kanje iNkosi uSimakade, ithi: bheka Mina, yebo, Mina ngimelene nawe, ngizokwehlulela wena, izizwe zizibonela ngamehlo azo.
Ngizokwenza kuwe engingakaze ngikwenze, engingeyukuphinde ngikwenze futhi okufana nakho, ngenxa yazo zonke izinengiso zakho.
Ngakho-ke abazali bayakudla abantwana babo phakathi kwakho, nabantwana badle abazali, ngiyakuletha ukwehlulela kuwe, kuthi insali yenu ngiyihlakazele kuyo yonke imimoya.
Ngalokho-ke ngifunga ngiyagomela, kusho iNkosi uSimakade, ngenxa yokuba ungcolise indawo yami engcwele ngakho konke okwenyanyekayo kwakho, nangazo zonke izinengiso zakho. Nami impela, ngiyakukunciphisa, iso lami aliyukuba nasihawu, futhi Mina, angiyukuba nabubele kuwe.
Ingxenye yokuthathu yenu, iyakufa ngobhubhane nangendlala, bayoshabalala phakathi kwakho. Ingxenye yokuthathu elandelayo, iyakuwa ngenkemba nxazonke zakho, kuthi ingxenye yokuthathu yokugcina ihlakazelwe kuyo yonke imimoya, Mina ngizohosha inkemba, ngizixoshe.
“ ‘Intukuthelo yami iyakuphela-ke, nganelise ulaka lwami ngabo. Ngiyakuphindisela kubo. Bayakukwazi-ke ukuthi Mina Simakade, ngikhulumile ngomhawu wami, lapho sengikuphelelisile ukuthukuthela kwami kubo.
“ ‘Ngiyakukwenza ube yincithakalo nehlazo ezizweni ezikuzungezile nasemehlweni abo bonke abadlulayo.
Kuyakuba yihlazo, isaga, isexwayiso, nokwesabekayo ezizweni zonke ezikuzungezileyo, lapho ngikwehlulela ngentukuthelo, ngolaka nangokukuthethisa. Mina Simakade ngikhulumile.
Lapho ngibaciba ngemicibisholo yendlala elimazayo nebhubhisayo, eyakuba ngeyokubhubhisa, ngiyakuyiciba ukuba nginibhubhise; ngiyokwenza kudlange indlala kini, ngiqede nozime lwenu lwezinkwa.
Ngiyakuthumela kini indlala nezilwane ezimbi, kunishiye ningenabantwana, kubhoke ubhubhane nokuchitheka kwegazi phakathi kwenu; ngiyokwehlisela inkemba phezu kwakho. Mina Simakade ngikhulumile.’ ”
Izwi likaSimakade lafika kimi, lathi:
“Ndodana yomuntu, bhekisa ubuso bakho ezintabeni zakwa-Israyeli, uphrofethe, umelane nazo, uthi:
‘Nina zintaba zakwa-Israyeli, yizwani izwi leNkosi uSimakade. Isho kanje iNkosi uSimakade ezintabeni nasemagqumeni, emfudlaneni nasezigodini, ithi: bhekani, ngiyakwehlisela phezu kwenu inkemba, ngibhubhise izindawo zenu eziphakemeyo.
Ama-althare enu ayakuba yincithakalo, kubhidlizwe ama-althare enu empepho, ngiyokwenza ababuleweyo benu bawe phambi kwezithombe zenu.
Ngiyakubeka izidumbu zabantu bakwa-Israyeli phambi kwezithombe zabo, ngisakaze amathambo enu macala wonke ama-althare enu.
Ezindaweni zonke enihlala kuzo, imizi iyakucekelwa phansi, izindawo eziphakemeyo zibe yincithakalo, ukuze ama-althare enu abe yincithakalo, athwale isijeziso, abhidlizwe, kuphihlizwe izithombe zenu, ziphele nya, abhidlizwe nama-althare enu empepho, yonke imisebenzi yenu ishatshalaliswe.
Ababuleweyo bayowa phakathi kwenu, niyokwazi ukuthi Mina nginguSimakade.
“ ‘Kepha ngiyakushiya insali, abaphunyuke enkembeni ngiyakubahlakazela ezizweni nasemazweni.
Abasindileyo benu bayakungikhumbula besezizweni abathunjelwe kuzo, lapho ngifihliza izinhliziyo zabo eziphingayo, ezichezukile kimi, namehlo abo akhanukela izithombe zabo ukuze baphinge nazo, bayakuzenyanya bona uqobo ngenxa yezinto ezimbi abazenzileyo, nangazo zonke izinengiso zabo.
Bayakukwazi ukuthi nginguSimakade; angikhulumanga ize ukuthi ngizokwehlisela kubo le nhlekelele.’
“Isho kanje iNkosi uSimakade, ithi: ‘Shaya ihlombe ngesandla sakho, ugxobe ngonyawo lwakho, bese uthi: “Maye, ngenxa yazo zonke izinengiso zezenzo ezimbi zendlu yakwa-Israyeli!” “ ‘Bayakufa ngenkemba, ngendlala nangobhubhane.
Okude uyakufa ngobhubhane, oseduze afe ngenkemba, kuthi osele ephila nolondekile, abulawe yindlala; ngiyakukufeza kanjalo ukuthukuthela kwami kubo.
Niyakukwazi ukuthi Mina nginguSimakade, lapho ababuleweyo babo bedindilize phakathi kwezithombe zabo, macala wonke ama-althare abo, kuwo wonke amagquma aphakemeyo, kuzo zonke iziqongo zezintaba, phansi kwayo yonke imithi eluhlaza, phansi kwayo yonke imi-okhi egcwele amaqabunga, ezindaweni lapho benikele khona ngokunephunga elimnandi, kuzo zonke izithombe zabo.
Ngiyakwelula isandla sami ngimelane nabo, izwe ngilenze libe yincithakalo nokuyize ukwedlula ihlane eDibhila, nakuzo zonke izindawo zabo abahlala kuzo. Bayakukwazi ukuthi Mina nginguSimakade.’ ”
Izwi likaSimakade lafika kimi, lathi:
“Wena ndodana yomuntu, isho kanje iNkosi uSimakade ezweni lakwa-Israyeli, ithi: ‘Ukuphela! Ukuphela sekufikile emagumbini omane ezwe.
Manje, ukuphela sekuphezu kwakho; ngiyakuthumela ulaka lwami kuwe, ngikwehlulele njengezindlela zakho, ngiphindisele kuwe zonke izinengiso zakho.
Angiyukukubheka ngesihawu, angiyukuba naluzwelo kuwe; ngiyakuphindisela kuwe ngokuziphatha kwakho, izinengiso zakho zibe phakathi kwakho; niyakukwazi ukuthi Mina nginguSimakade.’
“Isho kanje iNkosi uSimakade, ithi: ‘Inhlekelele! Inhlekelele yodwa, iyeza.
Isiphetho sesifikile! Isiphetho sesifikile! Sithelekile phezu kwakho, bheka, siyeza!
Ukubhujiswa sekufikile kuwe sakhamuzi sezwe, isikhathi sesifikile, usuku lokudideka lusondele; akukho kukhamuluka ngenjabulo ezintabeni.
Manje sengiyakuthulula masinyane ulaka lwami phezu kwakho, ngifeze intukuthelo yami kuwe, ngizakukwehlulela ngokwezindlela zakho, ngiphindisele kuwe zonke izinengiso zakho.
Iso lami aliyukukubheka ngesihawu, angiyukuba naluzwelo; ngiyakuphindisela kuwe ngokwezindlela zakho, izinengiso zakho ziyokuba phakathi kwakho; niyakukwazi ukuthi Mina Simakade ngiyashaya.
“ ‘Bhekani usuku! Bhekani luyeza, ukubhubhisa kuphumile; intonga iqhakazile; ukuzidla kuhlumile.
Kuqubuke ubudlova, baba yintonga yenkohlakalo; akukho namunye kubo, akukho namunye nasesixukwini sabo; akuyukusala lutho emcebeni wabo nasebukhosini babo.
Isikhathi sesifikile, usuku selufikile; umthengi makangathokozi, nomthengisi makangalili, ngokuba ulaka luphezu kwaso sonke isixuku sabo.
Ngokuba umthengisi akayukubuyela kokuthengisiweyo, nakuba esekhona phakathi kwabaphilayo, ngokuba umbono wesixuku sonke awuyukuguqulwa, futhi akukho namunye ongasindisa ukuphila kwakhe ngenxa yesiphambeko sakhe.
Babethile icilongo, balungisa konke; kodwa akekho ophuma impi, ngokuba ulaka lwami luphezu kwaso sonke isixuku sabo.
“ ‘Ngaphandle yinkemba, ngaphakathi wubhubhane nendlala. Osensimini uyakufa ngenkemba, osemzini abhuqabhuqwe yindlala nobhubhane.
Abasindileyo kubo bayakuphunyuka, batholakale ezintabeni njengamajuba asezigodini, bonke belila, yilowo nalowo ngezono zakhe.
Zonke izandla ziyoba ntekenteke, namadolo wonke abe manzi te.
Bayakubhinca indwangu eyisaka, uvalo lubasibekele, amahloni abe sebusweni babo bonke, amakhanda abo bonke abe yizimpandla.
Isiliva labo bayoliphonsa emigwaqweni, igolide labo libe yinto engcolileyo. Isiliva negolide labo akuyukubasindisa ngosuku lwentukuthelo kaSimakade. Iphango labo abayukulisuthisa, nezibilini zabo abayukuzigcwalisa, ngokuba ububi babo sebuphenduke isikhubekiso sabo.
Ukukhazimula kwemvunulo yakho kwaba ngukuziqhenya, benza ngakho izithombe zabo ezinengekayo nezinto zabo ezenyanyekayo, ngalokho ngiyakukwenza kube yinto engcolileyo kubo.
Ngiyakukunikela esandleni sabafokazi, kube yimpango ezikhohlakalini zomhlaba, bakungcolise.
Ngiyakubufulathelisa ubuso bami kubo, bayingcolise indawo eyigugu lami; kuyakungena kuyo abaphangi, bayingcolise.
“ ‘Yenza iketanga, ngokuba izwe ligcwele ukwehlulelwa kwegazi, nomuzi ugcwele ubudlova.
Ngiyakuletha abantu abakhohlakele bezizwe, bayakudla izindlu zabo; ngikuqede ukuzidla kwabanamandla, izindawo zabo ezingcwele zingcoliswe.
Okwesabekayo kuyeza; bayakufuna ukuthula, kepha akuyukuba bikho.
Izinhlekelele ziyolandelana, umbiko ulandele umbiko. Bayakufuna umbono kumphrofethi, kepha umthetho uyakulahleka kumphristi, neseluleko emalungeni.
Inkosi iyakulila, isikhulu sembathe incithakalo, nezandla zabantu bezwe ziyakuqhaqhazela. Ngiyakubaphatha njengokuziphatha kwabo, ngibehlulele ngokwemithetho yabo, bayakukwazi ukuthi Mina nginguSimakade.’ ”
Kwathi ngonyaka wesithupha, ngenyanga yesithupha, ngosuku lwesihlanu lwayo, ngihlezi endlini yami, namalunga akwaJuda ehlezi phambi kwami, isandla seNkosi uSimakade sehlela phezu kwami ngilapho.
Ngabona; bheka, okwakubonakala kunjengomlilo, kusukela kokungathi ukhalo kwehle, kwakunomlilo. Kusukela okhalo kuya kwesingenhla kwakunjengokukhazimula futhi kungathi yinto emenyezelayo.
Wayeselula okufana nesandla, wangibamba ngezinwele zekhanda lami. UMoya wangiphakamisela emkhathini, phakathi komhlaba nezulu; wangiyisa ngemibono kaNkulunkulu eJerusalema, esivalweni sesango legceke eliphakathi, elibheke enyakatho; yilapho kwakukhona isithombe somhawu, esibanga umhawu.
Kwakukhona lapho inkazimulo kaNkulunkulu ka-Israyeli eyayifana nengayibona esigodini.
Wathi kimi: “Ndodana yomuntu, ake uphakamise amehlo akho, ubheke ngasenyakatho.” Ngawaphakamisa amehlo ami, ngabheka ngasenyakatho; ngabona ngasenyakatho yesango le-althare isithombe salo mhawu sisekungeneni.
Wathi kimi: “Ndodana yomuntu, uyakubona yini lokhu abakwenzayo; izinengiso ezinkulu indlu yakwa-Israyeli ezenza lapha, ukuze ngiqhele ngibe kude nendlu yami engcwele na? Kepha usazobuye ubone ezinye izinengiso ezinkulu.”
Wayesengiyisa esangweni legceke; ngabona kunembobo ogangeni.
Wathi kimi: “Ndodana yomuntu, ake ugqebhule ugange.” Kwathi ukuba ngilugqebhule ugange, mameshane, kwakukhona umnyango.
Wayesethi kimi: “Ngena, ubone izinengiso ezimbi abazenzayo lapha.”
Ngangena, ngabona; kwakunemifanekiso yazo zonke izinto ezinwabuzelayo, nezilwanyana ezinengekayo, nazo zonke izithombe zendlu ka-Israyeli, kudwetshwe odongeni nxazonke.
Lapho kwakumi abantu abangama-70, abangamalunga endlu yakwa-Israyeli; phakathi kwabo kunoJahazaniya, indodana kaShafani. Yilowo nalowo muntu wayephethe ngesandla isitsha sakhe sempepho, nephunga lefu lempepho lenyukela phezulu.
Wayesethi kimi: “Ndodana yomuntu, ukubonile yini okwenziwa ngamalunga endlu ka-Israyeli ebumnyameni, yilelo nalelo ekamelweni lalo elinezithombe ezibaziweyo na? Ngokuba athi: ‘USimakade akasiboni. USimakade ulilahlile leli lizwe.’ ”
Wabuye wathi: “Uzobuyela uyobona ezinye izinengiso ezinkulu abazenzayo.”
Wayesengiyisa ekungeneni kwesango lendlu kaSimakade, elalingasenyakatho. Kwakukhona lapho abesifazane ababehlezi belilela uThamuzi.
Wathi kimi: “Ndodana yomuntu, ubonile yini na? Usazobuyela uyobona izinengiso ezinkulu kunalezi.”
Wayesengingenisa egcekeni lendlu kaSimakade elaliphakathi; ngasemnyango wethempeli likaSimakade, phakathi komphemegumbi ne-althare, kwakukhona amadoda angama-25 efulathele ithempeli likaSimakade. Ubuso bawo babubheke empumalanga, ekhothamela ngasempumalanga, ekhonza ilanga.
Wathi kimi: “Ndodana yomuntu, ubonile yini na? Kuyinto engelutho yini endlini yakwaJuda ukwenza izinengiso abazenza lapho na? Ngokuba baligcwalisile izwe ngobudlova, bedlula bachukuluza ulaka lwami. Uyabona, babeka amagatsha emakhaleni abo.
Ngakho-ke ngizomelana nabo ngokuthukuthela kwami, iso lami aliyukubabheka ngesihawu, angiyukuba nasisa kubo, ngisho bangakhala, bamemeze ezindlebeni zami ngezwi elikhulu, angiyukubezwa.”
USimakade wayesememeza ezindlebeni zami ngezwi elikhulu, ethi: “Zisondele izijeziso zomuzi, yilowo nalowo uphethe ngesandla sakhe isikhali sokubulala.”
Kwase kufika amadoda ayisithupha evela ngendlela esesangweni elingenhla, elibheke enyakatho. Yileyo naleyo ndoda iphethe ngesandla sayo isikhali sokubhubhisa, enye kuwo yembethe ilineni, kunophondo lukayinki womlobi okhalo lwayo. Angena, ayesema eceleni kwe-althare lethusi.
Inkazimulo kaNkulunkulu ka-Israyeli yasuswa phezu kwekherubhi eyayikulo, yayiswa ngasemnyango wendlu. USimakade wayibiza indoda eyayembethe ilineni, inophondo lukayinki womlobi okhalo lwayo.
USimakade wathi kuyo: “Dabula emzini, phakathi eJerusalema, ubeke uphawu emabunzini abantu ababubulayo bequma ngenxa yazo zonke izinengiso ezenziwa kulo.”
Ngamuzwa ethi kulawa amanye amadoda: “Dabulani emzini nilandele leyo ndoda, nibulale, iso lenu lingahawukeli, ningabi naluzwelo.
Niyobulala niqede nya amaxhegu, izinsizwa, izintombi, izingane nabesifazane, kodwa ningasondeli kumuntu onophawu; niyakuqala endlini yami engcwele.” Amalunga aqala ngamadoda ayephambi kwendlu.
Wathi kuwo: “Ngcolisani indlu, nigcwalise amagceke ngababuleweyo. Phumani!” Ayesephuma-ke ayobulala emzini.
Kwathi esababulala, sekusele mina nje kuphela, ngakhothama ngathi mbo ngobuso, ngakhala ngathi: “Maye, Nkosi Simakade! Ingabe uzoyibhubhisa yonke insali yakwa-Israyeli lapho uthulula intukuthelo yakho phezu kweJerusalema na?”
Wathi kimi: “Ububi bendlu yakwa-Israyeli neyakwaJuda bukhulu ngokwedlulele, izwe ligcwele igazi, nasemzini kudlange ukonakala, ngokuba bathi: ‘USimakade ulishiyile leli lizwe futhi akaboni.’
“Nami-ke, iso lami aliyukubabheka ngesihawu, angiyukubanaso isisa kubo, kodwa ngiyakwehlisela lokho abakwenzileyo phezu kwamakhanda abo.”
Indoda eyayembethe ilineni, inophondo lukayinki okhalo lwayo, yangiphendula, yathi: “Ngenzile njengokungiyala kwakho.”
Ngabheka, ngabona emkhathini owawuphezu kwamakhanda amakherubhi, okwakufana netshe lesafire, kungathi yisihlalo sobukhosi, kwavela ngaphezu kwabo.
USimakade wathi endodeni eyayembethe ilineni: “Ngena phakathi kwamasondo azungezayo, phansi kwekherubhi, ugcwalise izandla zakho zombili ngamalahle avuthayo aphakathi kwamakherubhi, uwahlakaze phezu komuzi.” Yangena-ke, ngizibonela ngawami amehlo.
Amakherubhi ayemi ngaseningizimu yendlu ngesikhathi indoda ingena; ifu lagcwala igceke elingaphakathi.
Inkazimulo kaSimakade yasuka phezu kwekherubhi, yaya emphemeni wendlu. Indlu yagcwala ifu, negceke lagcwala ukukhazimula kwenkazimulo kaSimakade.
Umsindo wamaphiko amakherubhi wezwakala, kwaze kwaba segcekeni elingaphandle, njengezwi likaNkulunkulu uSomandla, lapho ekhuluma.
Kwathi lapho eyiyala indoda eyayembethe ilineni, ethi: “Thatha umlilo phakathi kwamasondo aphakathi kwamakherubhi,” yangena, yema eceleni kwesondo.
Ikherubhi elaliphakathi kwamakherubhi lelulela isandla salo emlilweni owawuphakathi kwamakherubhi, lathatha omunye wawo, lawubeka ezandleni zendoda eyayembethe ilineni, eyawuthatha yaphuma nawo.
Kwabonakala emakherubhini okwakufana nesandla somuntu, kungaphansi kwamaphiko awo.
Ngase ngibona amasondo amane eceleni kwamakherubhi, isondo ngalinye limi eceleni kwekherubhi, ukubukeka kwamasondo kwakungathi kuyitshe lekhristolithe.
Amakherubhi ayebukeka efana nse, wonke enesondo phakathi kwelinye isondo.
Kwakuthi uma ehamba, eya ezinhlangothini zozine, angaphenduki, kodwa lapho ikhanda libheke khona ayelilandela; engaphenduki ngesikhathi ehamba.
Umzimba wawo wonke: imihlane yawo, izandla zawo, amaphiko awo namasondo awo, kwakugcwele amehlo nxazonke, namasondo amane ayenawo amehlo.
Ngezwa kubizwa amasondo awo ngokuthi: “Amasondo azungezayo.”
Yilelo nalelo lalinobuso obune: ubuso bokuqala kungubuso bekherubhi, obesibili kungubuso bomuntu, obesithathu kungubuso bengonyama, obesine kungubuso bokhozi.
Amakherubhi ayesephakama, kwakuyilezo zidalwa eziphilayo engazibona ngasemfuleni iKhebhari.
Kwakuthi lapho amakherubhi ehamba, namasondo asemaceleni ahambe, kuthi uma amakherubhi evula amaphiko awo ukuba andize, asuke emhlabathini, amasondo angagudluki eceleni kwawo.
Kwakuthi uma amakherubhi ema, namasondo ame nse, kuthi uma ephakama, nawo aphakame, ngokuba umoya wezidalwa eziphilayo wawukuwo.
Inkazimulo kaSimakade yasuka emphemeni wendlu, yama phezu kwamakherubhi.
Amakherubhi avula amaphiko awo, asuka emhlabathini ngizibonela ngawami amehlo, amasondo ayesemaceleni kwawo asuka nawo. Ama ngasekungeneni kwesango lendlu kaSimakade elingasempumalanga; inkazimulo kaNkulunkulu ka-Israyeli yayiphezu kwawo.
Yilezo izidalwa eziphilayo engazibona phansi kukaNkulunkulu ka-Israyeli, ngasemfuleni iKhebhari, ngazi ukuthi zazingamakherubhi.
Yilelo nalelo lalinobuso obune, amaphiko amane, nokufana nezandla zomuntu okwakungaphansi kwamaphiko awo.
Ubuso bawo babufana nobuso engangibubone ngasemfuleni iKhebhari, ukubukeka kwabo, nawo uqobo. Yilelo nalelo lahamba laqonda ngqo lapho kubheke khona ubuso balo.
UMoya wangiphakamisa, wangiyisa esangweni lendlu kaSimakade elisempumalanga, elibheke ngasempumalanga. Ngasekungeneni kwesango kwakunamadoda angama-25. Ngabona phakathi kwawo noJahazaniya indodana ka-Azuri, noPhelathiya indodana kaBhenaya, abaholi babantu.
Wathi kimi: “Ndodana yomuntu, yilawa madoda ahlela inkohlakalo, futhi eluleka kulo muzi ngezeluleko ezimbi,
athi: ‘Akuseduze ukuba kwakhiwe izindlu, ziyibhodwe thina siyinyama.’
“Ngakho-ke phrofetha kubo; phrofetha ndodana yomuntu.”
UMoya kaSimakade wehlela phezu kwami, wathi kimi: “Yisho uthi: ‘Usho kanje uSimakade, uthi: “Nishilo kanjalo nina ndlu ka-Israyeli, kodwa Mina ngiyakwazi enikucabangayo.
Nibulale izindimbane kulo muzi, nagcwalisa imigwaqo yawo ngababuleweyo.
“ ‘ “Ngakho-ke isho kanje iNkosi uSimakade, ithi: Ababuleweyo bakini enibabeke kuwo bayinyama, futhi isebhodweni, kodwa Mina ngiyakunikhipha kuwo.
Niyesabile inkemba, kodwa ngizonehlisela yona, kusho iNkosi uSimakade.
Ngiyakunikhipha kuwo, ngininikele esandleni sabafokazi, nginijezise.
Niyakufa ngenkemba, nginehlulele emingceleni yakwa-Israyeli; niyakukwazi ukuthi Mina nginguSimakade.
Lo muzi awuyukuba yibhodwe kini, nani aniyukuba yinyama ephakathi kulo, kodwa ngiyonehlulela kuze kube semingceleni yakwa-Israyeli.
Niyakukwazi ukuthi Mina nginguSimakade, ngokuba anihambanga ngezimiso zami, nezehlulelo zami anizigcinanga, kodwa nenze njengezehlulelo zezizwe ezinizungezileyo.” ’ ”
Kwathi ngisaphrofetha, kwafa uPhelathiya, indodana kaBhenaya. Ngakhothama ngathi mbo ngobuso, ngakhala ngezwi elikhulu, ngathi: “Maye, Nkosi Simakade! Uzakuyiqeda nya yini insali yakwa-Israyeli na?”
Izwi likaSimakade lafika kimi, lathi:
“Ndodana yomuntu, bangabafowenu, yebo ngabafowenu, nibuhlobo bunye nayo yonke indlu yakwa-Israyeli, bonke abakhileyo eJerusalema abakhulume kubo, bathi: ‘Baqhelile kuSimakade. Leli lizwe selinikwe thina ukuba libe yifa lethu.’
“Ngakho-ke yisho, uthi: ‘Isho kanje iNkosi uSimakade, ithi: “Nakuba ngibayise kude ezizweni, ngabahlakazela emazweni, nokho ngibe yindawo engcwele kubo okwesikhashana, lapho emazweni abaye kuwo.” ’ ”
“Ngakho-ke wothi: ‘Isho kanje iNkosi uSimakade, ithi: “Ngiyakuniqoqa ezizweni, nginiqoqe emazweni enihlakazelwe kuwo, futhi ngininike izwe lakwa-Israyeli.” ’ ”
“Bayakufika lapho bakususe konke okunyanyekayo kwalo, nazo zonke izinengiso ezikulo.
Ngiyakubanika inhliziyo ibe yinye, ngifake umoya omusha ezibilini zabo. Ngiyakuyikhipha inhliziyo yetshe kubo, ngibanike inhliziyo yenyama,
ukuze bahambe ngokwezimiso zami, bagcine izehlulelo zami, bazenze. Bayakuba ngabantu bami, Mina ngibe nguNkulunkulu wabo.
Kepha labo abanhliziyo zabo zilandela okunyanyekayo nokunengekayo kwabo, ngiyakwehlisela phezu kwamakhanda abo lokho abakwenzileyo, kusho iNkosi uSimakade.”
Amakherubhi ayenamasondo emaceleni kwawo, avula amaphiko awo; inkazimulo kaNkulunkulu ka-Israyeli yayiphezu kwawo.
Inkazimulo kaSimakade yakhuphuka isuka phakathi komuzi, yayoma entabeni engasempumalanga yomuzi.
UMoya kaNkulunkulu wangiphakamisa, wangiyisa nombono kulabo ababethunjelwe eKhalideya. Umbono engangiwubonile wenyuka, wasuka kimi,
ngase ngikhuluma kubathunjwa konke uSimakade ayengibonise khona.
Izwi likaSimakade lafika kimi, lathi:
“Ndodana yomuntu, wena uhlala phakathi kwendlu ehlubukayo, banamehlo okubona kodwa ababoni, banezindlebe zokuzwa, kepha abezwa, ngokuba bayindlu ehlubakayo.
“Wena ndodana yomuntu, bopha umthwalo wakho ulungele ukuya ekuthunjweni, uzohamba uye ekuthunjweni emini kwabha, bekubuka. Suka endaweni ohlala kuyo, bebuka, uye kwenye indawo. Mhlawumbe bayakubona ukuthi bayindlu ehlubukayo.
Uyowukhipha umthwalo wakho emini bekubuka, njengomthwalo wabaya ekuthunjweni. Wena uyakuphuma kusihlwa bekubuka, njengalabo abaya ekuthunjweni.
Gebhula ugange bekubuka, bese uwukhipha lapho umthwalo wakho.
Uyakuwuthwala ehlombe bekubuka, uphume nawo sekuhlwile, umboze ubuso bakho ukuze ungaliboni izwe, ngokuba ngikwenze waba yisibonakaliso kuyo indlu yakwa-Israyeli.”
Ngenza kanjalo njengoba ngangiyaliwe. Ngawukhipha umthwalo wami emini kwabha, njengomthwalo wokuya ekuthunjweni. Kuthe kusihlwa ngagebhula ugange ngesandla, kwathi lapho sekumnyama, ngawukhipha umthwalo wami, ngawetshatha ehlombe, ngahamba bengibuka.
Izwi likaSimakade lafika kimi ekuseni, lathi:
“Ndodana yomuntu, ayibuzanga yini kuwe indlu yakwa-Israyeli, indlu ehlubukayo, ukuthi: ‘Wenzani na?’
“Yisho kuyo, uthi: ‘Isho kanje iNkosi uSimakade, ithi: “Lesi yisiphrofetho esimayelana nesikhulu esiseJerusalema, nayo yonke indlu yakwa-Israyeli nabakulo.” ’ ”
“Yisho, uthi: ‘Mina ngiyisibonakaliso kini.’ “Njengalokhu ngenzile, kuyakwenzeka kanjalo kubo. Bayakuya ekuthunjweni beboshiwe.
“Isikhulu esiphakathi kwabo siyakuwetshatha umthwalo ehlombe kusihlwa, sihambe. Bayakugebhula ugange ukuze kukhishwe khona umthwalo; siyokwemboza ubuso baso, ukuba singaliboni izwe ngamehlo aso.
Ngiyakwendlala inetha lami phezu kwaso, sibanjwe ogibeni lwami, ngisiyise eBhabhele, ezweni lamaKhaledi. Kepha kasiyukulibona, siyakufela lapho.
Bonke abasizungezileyo, abasizi baso, nawo wonke amabutho aso, ngiyakubahlakazela kuyo yonke imimoya, ngibalandele, ngikhokhe inkemba.
“Bayakukwazi ukuthi Mina nginguSimakade, lapho ngibahlakazela ezizweni, ngibasabalalise emazweni.
Kepha ngiyakuyishiya insali eyingcosana, isinde enkembeni, endlaleni, nasobhubhaneni, ukuze ilande ngazo zonke izinengiso zabo ezizweni lapho beyakuya khona, bayakukwazi ukuthi Mina nginguSimakade.”
Izwi likaSimakade lafika kimi, lathi:
“Ndodana yomuntu, yidla isinkwa sakho uqhaqhazela, uphuze amanzi akho uthuthumela, futhi wesaba,
bese uthi kubantu bezwe: ‘Isho kanje iNkosi uSimakade kwabakhileyo eJerusalema, ezweni lakwa-Israyeli, ithi: “Bayakudla ukudla kwabo ngokwesaba, baphuze amanzi abo ngokuthuthumela, ngokuba izwe lakubo liyakuba yincithakalo, liphundlwe konke okugcwele kulo, ngenxa yobudlova babo bonke abahlala kulo.
Imizi okuhlalwa kuyo iyakubhujiswa, izwe libe yincithakalo, niyakukwazi ukuthi Mina nginguSimakade.” ’ ”
Izwi likaSimakade lafika kimi, lathi:
“Ndodana yomuntu, saga sini lesi eninaso ezweni lakwa-Israyeli, esithi: ‘Izinsuku ziyedlula, yonke imibono iphenduka ize’ na?
“Ngakho yisho kubo uthi: ‘Isho kanje iNkosi uSimakade, ithi: “Ngizosiqeda leso saga, bangaphindi basisho nanini kwa-Israyeli,” ’ ” kodwa-ke khuluma kubo, uthi: “Izinsuku ziyasondela, nemibono iphelela ezeni.
“ ‘Ngokuba akusayukuba khona umbono oyize nokubhula okukhohlisayo endlini yakwa-Israyeli.
Kepha Mina Simakade ngiyakukhuluma lokho engiyakukukhuluma, izwi liyakufezeka, futhi aliyukubambezeleka, ngokuba ngezinsuku zenu, nina ndlu ehlubukayo, ngiyakukhuluma izwi, ngilenze, kusho iNkosi uSimakade.’ ”
Izwi likaSimakade lafika kimi, lathi:
“Ndodana yomuntu; indlu ka-Israyeli, ithi: ‘Umbono awubonayo ungowezinsuku eziningi ezizayo, uphrofetha ngezikhathi ezisekude.’
“Ngakho-ke yisho kubo uthi: ‘Isho kanje iNkosi uSimakade, ithi: “Wonke amazwi ami awayukubambezeleka; lokho engiyakukukhuluma kuyakufezeka,” ’ ” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, phrofetha umelane nabaphrofethi bakwa-Israyeli abaphrofethayo. Yithi kubaphrofethi abaphrofetha abakucabangayo: ‘Zwanini izwi likaSimakade.
Isho kanje iNkosi uSimakade, ithi: “Maye, kubaphrofethi abayiziwula, abalandela umoya wabo, nalokho abangakubonanga!
Wena Israyeli, abaphrofethi bakho bafana nezimpungushe ezindaweni eziyincithakalo.
Anenyukelanga ezikhaleni, navala ugange lwendlu ka-Israyeli, ukuze nimelane nempi ngosuku lukaSimakade.” ’ ”
Bakubonile okuyize namanga okubhula, labo abathi: “Kusho uSimakade,” kodwa uSimakade akabathumanga, nokho balindele ukuthi lifezeke izwi labo.
Anibonanga yini umbono oyize, nabhula okungamanga, lapho nithi: “Kusho uSimakade,” ngibe Mina ngingazange ngikhulume na?
“ ‘Ngakho-ke isho kanje iNkosi uSimakade, ithi: “Ngenxa yokuba nikhulume okuyize, nabona okungamanga; ngalokho-ke, ngimelene nani, kusho iNkosi uSimakade.
Isandla sami siyakumelana nabaphrofethi ababona okuyize nababhula amanga. Abayukuba semkhandlwini wabantu bami, ngeke balotshwe encwadini yendlu yakwa-Israyeli, futhi abayukungena ezweni lakwa-Israyeli, niyakukwazi ukuthi Mina ngiyiNkosi uSimakade.
“ ‘ “Ngokuba, impela, babadukisile abantu bami, bathi: Ngukuthula, kube kungekho ukuthula, nangenxa yokuthi lapho kwakhiwa ugange, bona balugudule ngomcako.
Batshele abagudula ngomcako ukuthi luyakuwa ugange. Kuyakuna imvula enkulu enezikhukhula, nina matshe esichotho niyakuwa, nomoya wesivunguvungu ulubhidlize.”
“ ‘Lapho ugange seluwile, akuyukushiwo yini kini, kuthiwe: “Uphi umcako enigudule ngawo?” na?
“ ‘Ngakho-ke isho kanje iNkosi uSimakade, ithi: “Ngiyakudedela isivunguvungu ngentukuthelo yami, nemvula enezikhukhula ngolaka lwami, kwehle isichotho ngolaka oluqothulayo.
Ngiyakulubhidliza ugange enalugudula ngomcako, ngiluthele othulini, kwambuleke nesisekelo salo. Luyakuwa, nina enikulo niqedwe nya, niyakukwazi ukuthi Mina nginguSimakade.
Ulaka lwami ngizolukhiphela ogangeni, nakulabo abalugudula ngomcako, bese ngithi kini: Alusekho ugange, abasekho nabalugudulayo,
abaphrofethi bakwa-Israyeli abaphrofetha kulo iJerusalema, nabalibonela imibono yokuthula, kube kungekho kuthula, kusho iNkosi uSimakade.” ’
“Wena ndodana yomuntu, bhekisa ubuso bakho kumadodakazi abantu bakini, umelane nawo, abaphrofetha okuvela enhliziyweni yawo, bese uphrofetha kuwo.
Uyakuthi: ‘Isho kanje iNkosi uSimakade, ithi: “Maye kwabesifazane abathunga izigqizo zezihlakala zezandla zabo bonke, benze amaveyili amade emakhanda ezithombe zonke, ukuze bazingele imiphefumulo yabantu. Niyoyizingela yini imiphefumulo yabantu bami, niyilondoloze eyenu imiphefumulo na?
Nina ningihlambalazile kubantu bami, ngoba nifuna inkeshezana yebhali nezingcezwana zesinkwa. Nibulale labo obekungafanele bafe, nalondoloza labo ebebengezukuphila, lapho nikhuluma amanga kubantu bami abawalalelile.”
“ ‘Ngakho-ke isho kanje iNkosi uSimakade, ithi: “Mina ngimelene nezigqizo enizigome ngazo, nenizingela ngazo imiphefumulo njengezinyoni. Ngizakuzidabula ezingalweni zenu, ngikhulule imiphefumulo eniyizingela njengenyoni.
Ngizakudabula amaveyili enu amade, ngibakhulule abantu bami esandleni senu, bangaphinde futhi babe yimpango esandleni senu, niyakukwazi ukuthi Mina nginguSimakade.
Ngokuba nidabukise inhliziyo yolungileyo ngamanga; Mina angizange ngimdabukise; niqinise izandla zezikhohlakali ukuze zingaphenduki endleleni yazo embi, zisindiswe.
Ngakho anisayukukubona okuyize, anisayukubhula. Ngiyakubahlenga futhi abantu bami esandleni senu, niyakukwazi ukuthi Mina nginguSimakade.” ’ ”
Kwase kufika kimi amadoda angamalunga akwa-Israyeli, ahlala phambi kwami.
Izwi likaSimakade lafika kimi, lathi:
“Ndodana yomuntu, lawa madoda azifake ezinhliziyweni izithombe zawo, abeka isikhubekiso sokona kwawo phambi kwawo. Imbala ngingawavumela yini nempela ukuba azobuza kimi na?
Ngakho-ke khuluma kuwo, uthi: ‘Isho kanje iNkosi uSimakade, ithi: “Yilowo nalowo muntu wendlu yakwa-Israyeli, ofaka izithombe zakhe enhliziyweni yakhe, nobeka isikhubekiso sokona kwakhe phambi kwakhe, bese eza kumphrofethi, Mina Simakade ngiyakumphendula ngobuningi bezithombe zakhe,
ukuze ngibambe indlu ka-Israyeli ededileyo kimi ngenhliziyo yayo ngenxa yazo zonke izithombe zayo.” ’ ”
“Ngakho-ke yisho kuyo indlu yakwa-Israyeli, uthi: ‘Isho kanje iNkosi uSimakade, ithi: “Phendukani! Nilahle izithombe zenu, nizifulathele zonke izinengiso.
“ ‘ “Ngokuba yilowo nalowo owendlu ka-Israyeli nomfokazi ogogobele kwa-Israyeli, ozehlukanisa nami, afake izithombe enhliziyweni yakhe, abeke isikhubekiso sokona kwakhe phambi kwakhe, bese eya kumphrofethi ukuba abuze ngami, Mina Simakade, ngiyakumphendula mathupha.
Ngiyakubhekana ngqo nalowo muntu, ngimenze abe yisibonakaliso nesaga, ngimsuse kubantu bami, niyakukwazi ukuthi Mina nginguSimakade.
“ ‘ “Uma umphrofethi eyengeka bese ekhuluma izwi, Mina Simakade ngimyengile lowo mphrofethi; ngiyakwelulela isandla sami kuye, ngimelane naye, ngimbhubhise kubantu bami u-Israyeli.
Bobabili bayakuthwala icala, lowo obuzile uyakuba necala kanjalo nomphrofethi okubuzwe kuye,
ukuze indlu yakwa-Israyeli ingabe isaduka futhi isuke kimi, ingazingcolisi futhi ngazo zonke iziphambeko zayo, kodwa iyakuba ngabantu bami, Mina ngibe nguNkulunkulu wayo, kusho inkosi uNkulunkulu.” ’ ”
Izwi likaSimakade lafika kimi, lathi:
“Ndodana yomuntu, uma izwe lona kimi ngokwenza ukungethembeki, ngiyakwelula isandla sami ngimelane nalo, ngiqede umthombo walo wokudla, ngithumele indlala kulo, ngibulale abantu nezilwane okukulo.
Noma ngabe bekukhona kulo lawa madoda amathathu: uNowa, uDaniyeli noJobe, bona bebeyakuyisindisa impilo yabo ngenxa yokulunga kwabo, kusho iNkosi uSimakade.
“Uma ngithumela izilwane zasendle ezweni ukuba zilenze lingabi nabantwana, libe yincithakalo, kungadluli umuntu kulo ngenxa yezilwane,
noma ngabe abekhona kulo lawo madoda amathathu, ngifunga ngiyagomela, kusho iNkosi uSimakade, abengeke akwazi ukusindisa amadodana namadodakazi awo, kodwa bekuyosindiswa wona kuphela, izwe libe yincithakalo.
“Nakuba ngehlisela inkemba ezweni, ngithi: ‘Inkemba mayidabule ezweni,’ ngibulale kulo abantu nezilwane,
noma ngabe abekhona lawo madoda amathathu kulo, ngifunga ngiyagomela, kusho iNkosi uSimakade, abengeke akwazi ukusindisa amadodana namadodakazi awo, kodwa bekuyosindiswa wona kuphela.
“Nakuba bengiyakuthumela ubhubhane kulelo lizwe, ngithululele kulo ulaka lwami ngokuba kuchitheke igazi ukuba ngiqede nya abantu nezilwane kulo,
noma ngabe bekungaba khona uNowa, uDaniyeli, noJobe kulo, ngifunga ngiyagomela, kusho iNkosi uSimakade, bebengeke bakwazi ukusindisa amadodana namadodakazi awo, kodwa bebeyosindisa impilo yabo kuphela, ngenxa yokulunga kwabo.
“Ngokuba isho kanje iNkosi uSimakade, ithi: ‘Kakhulu kangakanani, lapho sengithumela eJerusalema izehlulelo zami ezine ezimbi: inkemba, indlala, izilwane zasendle nobhubhane, ukuba kubhubhise izilwane nabantu okukulo!
Kepha, kuyosala kulo insali ephunyukileyo; amadodana namadodakazi ayakukhishwa kulo, ayokuza kini, kuyothi lapho nibona ukuziphatha kwawo nemisebenzi yawo, niduduzeke, ngenxa yobubi engibenze behlela iJerusalema, nangenhlekelele engiyehlisele phezu kweJerusalema.’ ”
Izwi likaSimakade lafika kimi, lathi:
“Ndodana yomuntu, kungani ukuba ukhuni lomvini luyedlule yonke eminye imithi, negatsha lomvini phakathi kwezinye izihlahla ehlathini na?
Kungathathwa yini ukhuni kuwo ukuba kwenziwe ngalo okuthile na? Abantu bangawenza yini amahhuku okuphanyeka okuthile?
Lapho selufakwe emlilweni ukuba kubaswe izihloko zalo zombili sezidliwe ngumlilo, kanjalo nesiqu salo sesishile, ngabe lusenawo yini umsebenzi na?
Uma ngesikhathi lusaphelele belungenamsebenzi walutho, kungenziwani ngalo lapho seludliwe ngumlilo, lwasha na?
“Ngakho-ke isho kanje iNkosi uSimakade, ithi: ‘njengokhuni lomvini oluphakathi kwezihlahla zehlathi, engilunikele emlilweni ukuba lushe, kanjalo-ke ngizinikele izakhamuzi zaseJerusalema.
Ngiyakubhekana nazo ngqo, ngimelane nazo, nakuba ziphumile emlilweni, nokho ziyakuqedwa yiwo umlilo, niyakukwazi ukuthi Mina nginguSimakade lapho sengibhekene nazo ngqo.
Izwe ngiyakulenza libe yincithakalo, ngokuba abethembekanga, kusho iNkosi uSimakade.’ ”
Izwi likaSimakade lafika kimi, lathi:
“Ndodana yomuntu, lazise iJerusalema ngezinengiso zalo,
uthi: ‘Isho kanje iNkosi uSimakade kulo iJerusalema, ithi: “Indabuko yakho nokuzalwa kwakho kuseKhanani. Uyihlo wayengumAmoni, unyoko engumHithi.
Ekuzalweni kwakho, ngosuku owazalwa ngalo, inkaba yakho ayinqunywanga, awugezwanga ngamanzi ukuba uhlambuluke, awuhlikihlwanga ngosawoti, awusongwanga nakusongwa.
Akukho liso elakubheka lakuhawukela ukuba wenzelwe okukodwa kwalokho, ukhonjiswe ububele, kodwa walahlwa endle, ngokuba wanengeka ngosuku owazalwa ngalo.
“ ‘ “Ngesikhathi ngidlula ngakuwe, ngakubona ungqashangqasha egazini lakho, ngathi kuwe: wena osegazini lakho: Phila! Yebo, ngasho kanjalo usegazini lakho, ngathi kuwe: Phila!
Wande njengehlumela lasendle. Ngakwenza wakhula, waba muhle kakhulu; wahlosa amabele, wamila izinwele, kodwa wawunqunu, uhamba ze.
“ ‘ “Ngesikhathi ngiphinda ngidlula ngakuwe, ngakubuka; ngabona ukuthi usukhulile, usungathanda. Ngase ngendlala isembatho sami phezu kwakho, ngafihla ubunqunu bakho, yebo, ngafunga kuwe, ngenza nawe isivumelwano,” ’ ” kusho iNkosi uSimakade, waba ngowami.
“ ‘ “Ngakugeza emanzini, ngasusa igazi elalikuwe, ngakugcoba ngamafutha.
Ngakwembesa ngengubo efekethisiweyo, ngakufaka izicathulo zesikhumba, ngakwethwesa ilineni elicolekileyo ekhanda, ngase ngikwemboza ngosilika.
Ngakuvunulisa ngemvunulo kanokusho, ngakufaka amasongo ezandleni zakho nomgexo entanyeni.
Ngakufaka indandatho ekhaleni, amacici ezindlebeni zakho, nomqhele omuhle ekhanda lakho.
Wahlotshiswa ngegolide nangesiliva, isembatho sakho sasiyilineni elicolekileyo, usilika, nengubo efekethisiweyo. Wadla impuphu ecolisekileyo, uju, namafutha. Impela wawumuhle kakhulu, waphumelela, waze waba yindlovukazi.
Igama lakho laduma ezizweni ngenxa yobuhle bakho, ngokuba laliphelele ngenxa yemihlobiso engangikuvunulise ngayo,” ’ ” kusho iNkosi uSimakade.
“ ‘ “Kepha wethembela ebuhleni bakho, waba yisifebe ngenxa yodumo lwakho, wabuthululela bonke ubufebe bakho kwabadlulayo, baba ngobabo.
Wathatha ezinye zezingubo zakho, wazenzela izindawo eziphakemeyo ezikhangayo, wafebela kuzo, okungakaze kwenzeke futhi okungasoze kwenzeka nanini.
Wathatha imvunulo yobuhle bakho, egolideni lami nasesiliveni lami engangikuphe khona, wazenzela izithombe zabesilisa, wafeba nazo.
Wathatha izingubo zakho ezifekethisiweyo, wasibekela ngazo izithombe, wabeka amafutha ami nempepho yami phambi kwazo.
Wathatha nesinkwa sami engangikunike sona, impuphu ecolisekileyo, amafutha, noju engangikunike khona ukuba ukudle, wakubeka phambi kwazo, kwaba yiphunga elimnandi; kwaba kanjalo-ke,” ’ ” kusho iNkosi uSimakade.
“ ‘ “Wathatha amadodana namadodakazi akho owawungizalele wona, wawahlabela zona ukuba azidle. Babubuncane yini ubufebe bakho na?
Wabulala abantwana bami, wanikela ngabo kuzo, wabadabulisa emlilweni.
Kuzo zonke izinengiso owazenza, nobufebe bakho, awuzikhumbulanga izinsuku zobusha bakho, ngesikhathi wawunqunu, uhamba ze, ungqashangqasha egazini lakho.
“ ‘ “Maye! Maye,” ’ ” kusho iNkosi uSimakade. “ ‘ “Ngokuba kwathi emveni kwakho konke lokho kona kwakho,
wazakhela iqhugwane, wazenzela indawo ephakemeyo ezigcawini zonke.
Ekuqaleni kwayo yonke imigwaqo, wakha izindawo zakho eziphakemeyo, wenza ubuhle bakho baba yisinengiso, imilenze yakho wayenekela bonke abedlulayo, wandisa ubufebe bakho.
Wafeba nabaseGibhithe, omakhelwane bakho, abagcwele inkanuko enkulu, wandisa ubufebe bakho ukuba ungichukuluze, ukuze ngithukuthele.
Ngelulela isandla sami kuwe, ngamelana nawe, ngasinciphisa isabelo sakho sokudla, ngakunikela entandweni yabakuzondayo. Amadodakazi amaFilisti ayenamahloni ngendlela owawulihathanga ngayo.
Wafeba nabantu base-Asiriya, ngokuba wawungeneliswa; yebo, wafeba nabo, kodwa kuze kube manje awukadeli.
Wandisa ubufebe bakho baze bafinyelela nasezweni labahwebi, iKhalideya, kepha nalokho akukwenelisanga.
“ ‘ “Maye, ubuthakathaka benhliziyo yakho, ngokuba wenza konke lokhu okwenziwe yisifebe esingakwazi ukuzithiba!” kusho iNkosi uSimakade.
“ ‘ “Lapho wakha iqhugwane lakho ekuqaleni kwemigwaqo, wenza indawo yakho ephakemeyo kuzo zonke izigcawu, wawungafani nesifebe esikhokhelwayo,
wena mfazi ophingayo, othatha abafokazi esikhundleni sendoda yakhe.
Zonke izifebe ziyakhokhelwa, kodwa wena nguwe okhokhela zonke izithandwa zakho, uzifumbathisile ukuba zize kuwe, zivela ezindaweni zonke, ngobufebe bakho.
Wehlukile kwabanye besifazane ngokufeba kwakho, akekho okulandelayo ukuze afebe nawe, ngokuba nguwe okhokhayo; wena awukhokhelwa lutho, ngalokho-ke wena wehlukile kwezinye izifebe.
“ ‘ “Ngakho-ke sifebe ndini, yizwa izwi likaSimakade.
Isho kanje iNkosi uSimakade, ithi: Ngenxa yokuthi inkanuko yakho ithululiwe, nobunqunu bakho bembuliwe ngobufebe bakho nezithandwa zakho, nangenxa yazo zonke izithombe zakho eziyizinengiso, nangegazi labantwana bakho owanikela ngalo;
ngakho-ke bheka, ngiyakuziqoqa zonke izithandwa zakho ozithokozise ngazo, zonke ozithandileyo, nazo zonke ozizondileyo; ngiyakuziqoqela kuwe zivela kuzo zonke izindawo, ngizembulele ubunqunu bakho ukuba zibubone bonke.
Ngiyakukwehlulela ngesehlulelo seziphingikazi nesabachithi begazi, ngehlisele phezu kwakho igazi lolaka nomhawu.
Ngiyakukunikela ezandleni zazo, zilibhidlize iqhugwane lakho, zizidilize izindawo zakho eziphakemeyo, zikuhlubule izingubo zakho, zithathe izinto zakho ezinhle, zikushiye unqunu, uhamba ze.
Ziyakuza kuwe nesixuku, zikukhande ngamatshe, zikuhlahlele ngezinkemba zazo.
Ziyakushisa izindlu zakho ngomlilo, zikwehlulele phambi kwabesifazane abaningi. Ngiyakukwenza ukuba uyeke ukufeba, ungabe usakhokhela muntu.
Ngiyakulubohlisa ulaka lwami kuwe, ngisuse umona wami kuwe, ngibe nokuthula, ngingabe ngisakuthukuthelela futhi.
“ ‘ “Ngenxa yokuthi awuzikhumbulanga izinsuku zobusha bakho, kodwa ungithukuthelisile ngakho konke lokhu, nami-ke ngizokwehlisela phezu kwekhanda lakho konke okwenzileyo, ukuze ungabe usazikhanukela zonke ezinye izinengiso zakho,” ’ ” kusho iNkosi uSimakade.
“ ‘ “Bonke abacaphuna izaga, bayakucaphuna lesi mayelana nawe, bathi: Ukhamba lufuze imbiza.
“ ‘ “Wena ufuze unyoko, owayenengwa yindoda yakhe, nayizingane zakhe. Ungudade owayenodadewabo, ababenengwa ngamadoda abo nabantwana babo. Unyoko wayengumHithi, uyihlo engumAmori.
Udadewenu omdala kwakuyiSamariya, amadodakazi akhe, akhe ngasenyakatho yakho. Udadewenu omncane kunawe, wayehlala ngaseningizimu kwakho, uyiSodoma namadodakazi alo.
Awuhambanga njengezindlela zabo, awenzanga njengezinengiso zabo, kodwa ngesikhashana nje esincane, wena wonakala ukwedlula bona, ezindleleni zakho zonke.
Ngifunga ngiyagomela,” ’ ” kusho iNkosi uSimakade, “ ‘ “udadewenu uSodoma namadodakazi akhe, akenzanga njengoba kwenze wena namadodakazi akho.
“ ‘ “Nakhu okwakungukona kukadadewenu uSodoma: ukuzikhukhumeza, ukuba yisiminzi, nokunethezeka namadodakazi akhe; kodwa ababasizanga abampofu nabantulayo.
Babeziphakamisa, benza izinengiso phambi kwami, ngase ngibasusa njengokubona kwami.
ISamariya, izono elizenzileyo azisiyo ngisho ingxenye yezono zakho; wena wandise kakhulu izinengiso zakho kunabo, odadewenu ubenze babukeka belungile kunawe ngenxa yalezi zinengiso ozenzileyo.
Zithwalele ihlazo lakho, ngokuba ubavunile odadewenu ngezono zakho ozenzileyo ezinengekayo; bona sebelungile kunawe. Yebo, mawujabhe, ulithwale ihlazo lakho lokubavuna odadewenu.
“ ‘ “Ngiyakukuguqula ukuthunjwa kwabo, ukuthunjwa kweSodoma namadodakazi alo, nokuthunjwa kweSamariya namadodakazi alo, nokuthunjwa kwabo bonke abathunjiweyo abaphakathi kwabo,
ukuze ulithwale ihlazo lakho, uthunazeke ngenxa yakho konke okwenzileyo, lapho ubaduduza.
Odadewenu, iSodoma namadodakazi alo, bayakubuyela esimweni sabo sokuqala, neSamariya namadodakazi alo, bayakubuyela esimweni sabo sokuqala, wena namadodakazi akho niyakubuyela esimweni senu sokuqala.
Udadewenu uSodoma awukhulumanga kahle ngaye ngesikhathi usazikhukhumeza,
lapho bungakambulwa ububi bakho, njengasesikhathini sehlazo lamadodakazi ase-Aramu, nawo wonke amadodakazi amaFilisti alizungezileyo, akudumaza nhlangothi zonke.
Uyakulithwala icala lokukhanuka kwakho nezinengiso zakho,” ’ ” kusho uSimakade.
“ ‘Ngokuba isho kanje iNkosi uSimakade, ithi: “Ngizokwenza uvune okutshalileyo, udelele isifungo ngokwephula isivumelwano.
Kepha Mina ngiyakusikhumbula isivumelwano sami nawe, sasemihleni yobusha bakho, bese ngikumisela isivumelwano saphakade.
Uyakuzikhumbula izindlela zakho, ube namahloni, lapho wemukela odadewenu, omdala kunawe nomncane kunawe, ngikunike bona babe njengamadodakazi, kodwa hhayi ngenxa yesivumelwano sami nawe.
Ngiyakumisa isivumelwano sami nawe, wazi ukuthi nginguSimakade,
ukuba ukhumbule, ube namahloni, ungabe usawuvula umlomo wakho futhi, ngenxa yehlazo lakho, lapho sengikuthethelele konke okwenzileyo,” ’ ” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, banike imfumbe, ukhulume ngomfanekiso kuyo indlu yakwa-Israyeli,
uthi: ‘Isho kanje iNkosi uSimakade, ithi: “Ukhozi olukhulu olunamaphiko amakhulu nezimpaphe ezinkulu, lunezimpaphe eziningi ezinemibala eyehlukeneyo, lwafika eLebhanoni, lwathatha isihloko somsedari,
lwanquma igatsha elisha eliphezulu, lwaluyisa ezweni labahwebi, lwalubeka emzini wabathengi.
“ ‘ “Lwathatha embewini yezwe, lwayoyitshala emhlabathini ovundileyo, lwayihlwanyela ngasemanzini amaningi, lwayitshala njengomnyezane.
Yamila yaba ngumvini owenabayo, nokho omfushane, ukuze amagatsha awo abheke ngakuwo, nezimpande zawo zibe phansi kwawo. Waba ngumvini-ke, waba namagatsha, kwavela amahlumela.
“ ‘ “Kepha kwafika olunye ukhozi olukhulu futhi, lunamaphiko amakhulu nezimpaphe eziningi. Lo mvini-ke wabhekisa izimpande zawo ngakulo, amagatsha awo lwawenabisela kulo ukuze luwunisele, lapho wawutshalwe khona.
Wawusemhlabathini omuhle ngasemanzini amaningi ukuba uveze amagatsha, uthele izithelo, ube ngumvini omuhle.” ’ ”
“Batshele uthi: ‘Isho kanje iNkosi uSimakade, ithi: “Ngabe uyakuphumelela na? Ukhozi aluyukuzisiphula yini izimpande zawo, lunqume izithelo zawo, ukuze ubune, kubune wonke amaqabunga abehlume kuwo, bese kungadingeki amandla amakhulu nabantu abaningi ukuba usishulwe nezimpande zawo na?
Pho lapho usutshaliwe, uyakuphumelela yini na? Awuyukubuna nokubuna yini lapho ushaywa ngumoya wasempumalanga, lapho utshalwe khona na?” ’ ”
Izwi likaSimakade lafika kimi, lathi:
“Ake ukhulume kuyo indlu ka-Israyeli ehlubukayo, uthi: ‘Anazi yini ukuthi lezi zinto ziyini na?’ Yisho uthi: ‘Inkosi yaseBhabhele yaya eJerusalema, yathumba inkosi yalo nezikhulu zakhona, yaziyisa kanye nayo eBhabhele.
Yayisithatha owozalo lwasebukhosini, yenza naye isivumelwano, yamfungisa, yathumba nabaholi balelo lizwe,
ukuze umbuso uthotshiswe, ungaziphakamisi, kodwa uqhubeke nokugcina isivumelwano sakhe.
Kepha inkosi yayivukela inkosi yaseBhabhele ngokuthumela izithunywa zayo eGibhithe, ukuba ithole amahhashi nabantu abaningi. Uyophumelela yini na? Uyophunyuka yini owenza lezi zinto? Uyophunyuka yini owephula isivumelwano na?
“ ‘Ngifunga ngiyagomela,’ ” kusho iNkosi uSimakade, “ ‘impela endaweni yenkosi eyambeka waba yinkosi, wedelela isifungo sayo, wasaphula isivumelwano sayo; naye uyakufela khona eBhabhele.
UFaro, ngempi yakhe enkulu nebandla elikhulu analo, akayukumsiza empini, nalapho kwenziwa indunduma, kwakhiwa udonga lokuvimbezela ukuze kubulawe abantu abaningi.
Ngokuba wedelele isifungo ngokwephula isivumelwano, wenza konke lokho nakuba ethembisile; ngakho-ke akayukuphunyuka.
“ ‘Ngakho-ke’ ” isho kanje iNkosi uSimakade, ithi: “ ‘Ngifunga ngiyagomela, impela isifungo sami asedeleleyo, nesivumelwano sami asaphulileyo; ngiyakukwehlisela phezu kwekhanda lakhe.
Ngiyakwendlala inetha lami phezu kwakhe, abanjwe ogibeni lwami, ngimyise eBhabhele, ngimehlulele khona lapho ngokungethembeki kwakhe kimi.
Kuyakuthi bonke ababalekayo bempi yakhe, bawe ngenkemba, kuthi abasindileyo bahlakazelwe kuzo zonke izindawo, kulapho-ke niyokwazi ukuthi Mina Simakade ngikhulumile.’
“Isho kanje iNkosi uSimakade, ithi: ‘Mina luqobo, ngiyakuthatha esihlokweni somsedari omude, ngitshale, nginqume emagatsheni amasha aphezulu, elithambileyo, ngilitshale entabeni ende ephakemeyo,
ngilitshale esicongweni sentaba yakwa-Israyeli; lihlume amagatsha, lithele izithelo, libe ngumsedari omuhle; kuhlale phansi kwamagatsha awo zonke izinyoni ezinhlobonhlobo, zihlale emthunzini wamagatsha awo.
Zonke izihlahla zasendle ziyakukwazi ukuthi Mina Simakade ngenza isihlahla eside sibhashe kuthi esibhashile ngisenze sikhule sibe side. Ngiyasomisa isihlala esiluhlaza, bese ngisihlumisa esomileyo sibe luhlaza. “ ‘Mina Simakade ngikhulumile futhi ngiyakukwenza lokho.’ ”
Izwi likaSimakade lafika kimi, lathi:
“Kungani nisho lesi saga kwa-Israyeli, esithi: “ ‘Oyise badla amagilebhisi amuncu, amazinyo abantwana aba buthuntu,’ na?
“Ngifunga ngiyagomela,” kusho iNkosi uSimakade, “asisayukubuye sishiwo lesi saga kwa-Israyeli.
Bheka, yonke imiphefumulo ingeyami. Umphefumulo kayise kanjalo nomphefumulo wengane ingeyami; umphefumulo owonayo, uyakufa.
“Uma umuntu olungileyo enza ubulungiswa nokulunga,
engadli ezintabeni, engaphakamiseli amehlo akhe ezithombeni zendlu yakwa-Israyeli, enganukubezi umfazi kamakhelwane wakhe, engasondeli kowesifazane osesikhathini,
engacindezeli muntu, ebuyisela kotshelekayo isibambiso sakhe, engaphangi nokuphanga, kepha epha abalambileyo isinkwa sakhe, embathisa abanqunu,
engabolekisi ukuze athole inzalo, engamukeli nzuzo ngokungafanele, eziqoqa ebubini, enza ubulungiswa phakathi kwabantu abaphikisanayo,
futhi ehamba ngezimiso zami, egcina izehlulelo zami ukuze enze iqiniso; ungolungileyo, impela uyakuphila nokuphila,” kusho iNkosi uSimakade.
“Uma ezala indodana eyisidlova, echitha igazi, noma eyenza okunye kwalokho,
nakuba uyise engakwenzanga lokho: idla ezintabeni, inukubeza umfazi kamakhelwane wayo,
icindezela abampofu nabantulayo, iphanga nokuphanga, ingasibuyisi isibambiso, iphakamisela amehlo ayo ezithombeni, yenza izinengiso,
ibolekisa ukuze ithole inzalo, ithatha inzalo; ngabe iyakuphila yini na? Qha, ayiyukuphila, ngokuba yenze zonke lezo zinengiso; iyakubulawa nokubulawa, igazi layo libe phezu kwayo.
“Uma le ndoda izala indodana bese ibona konke okubi okwenziwa nguyise, kodwa ingakwenzi lokho:
ingadli ezintabeni, ingaphakamiseli amehlo ayo ezithombeni zendlu yakwa-Israyeli, ingamnukubezi umfazi kamakhelwane wayo,
ingacindezeli muntu, ingasamukeli isibambiso, ingaphangi nokuphanga, kodwa ipha abampofu isinkwa sayo, yembathisa abanqunu,
ingabancishi abampofu, ingamukeli inzalo nenzuzo, yenza izehlulelo zami, futhi ihamba ngezimiso zami; ayiyukufa ngenxa yokona kukayise, iyakuphila nokuphila.
Uyise, ngokuba yena waba yiqola, waphanga nokuphanga umfowabo, wenza okungalungile phakathi kwabantu bakubo; uyakufa ngenxa yokona kwakhe.
“Kepha nithi: ‘Kungani indodana ingalithwali icala likayise na?’ Uma indodana yenzile ubulungiswa nokulunga, yagcina zonke izimiso zami, yazenza, ngalokho iyakuphila nokuphila.
Umphefumulo owonayo uyakufa. Indodana ayiyukukuthwala ukona kukayise, noyise akayukukuthwala ukona kwendodana. Olungileyo uyakuphila ngokulunga, nowonayo uyakujeziselwa ukona kwakhe.
“Kepha uma omubi ephenduka kuzo zonke izono zakhe azenzileyo, agcine zonke izimiso zami, enze ubulungiswa nokulunga, uyakuphila nokuphila, akayukufa.
Akuyukukhunjulwa nasinye kuzo zonke iziphambeko zakhe azenzileyo, kodwa uyakuphila ngenxa yokulunga kwakhe akwenzileyo.
Ngikwenamela ngempela yini ukufa komubi, kunokuba aphenduke, aphile na?” kusho iNkosi uSimakade.
“Kepha-ke uma olungileyo ephenduka ekulungeni kwakhe, enze okubi, enze nazo zonke izinengiso ezenziwa yizikhohlakali, ngabe uyakuphila yini na? Impela zonke izenzo zakhe ezilungileyo azenzileyo akukho nesisodwa esiyakukhunjulwa, uyakufela eziphambekweni azenzileyo nasezonweni one ngazo.
“Kepha nithi: ‘Indlela yeNkosi ayilungile.’ Ake nizwe nina ndlu yakwa-Israyeli: indlela yami ayilungile yini na? Akusizo yini izindlela zenu ezingalungile na?
Lapho olungileyo ephenduka ekulungeni kwakhe, bese enza okubi, uyakufa ngakho, uyakufa ngenxa yokubi akwenzileyo.
Lapho omubi ephenduka ebubini bakhe abenzileyo, enze ubulungiswa nokulunga, uyakuwusindisa umphefumulo wakhe.
Ngokuba ubonile, waphenduka eziphambekweni zakhe zonke azenzileyo, impela uyakuphila akayukufa.
Kepha indlu yakwa-Israyeli ithi: ‘Indlela yeNkosi ayilungile.’ Wena ndlu yakwa-Israyeli, izindlela zami azilungile yini na? Akusizo yini izindlela zenu ezingalungile na?
“Ngakho-ke ngiyakunehlulela nina ndlu ka-Israyeli, yilowo nalowo ngokwezindlela zakhe, kusho iNkosi uSimakade. Buyani, phendukani, eziphambekweni zenu zonke, ukuze ububi bungabi yisikhubekiso kini.
Lahlani zonke iziphambeko zenu eniphambuke ngazo, nizenzele inhliziyo entsha nomoya omusha; uyakufelani wena ndlu ka-Israyeli na?
Angikwenameli ukufa kofayo, ngakho-ke phendukani, niphile,” kusho iNkosi uSimakade.
“Wena, khihla isililo ngenxa yezikhulu zakwa-Israyeli, uthi:
“ ‘Unyoko wayeyingonyamakazi enjani phakathi kwezingonyama na? Wayebuthisa phakathi kwamabhongo, ondle amawundlu akhe.
Wakhulisa elinye lamawundlu akhe, laba yibhongo, lafunda ukudwengula inyamazane, ladla nabantu.
Izizwe zezwa ngalo, labanjwa, layiswa ngezingwegwe eGibhithe.
“ ‘Walinda, wabona ukuthi ulindele ize, ithemba lakhe selishabalele, wathatha elinye iwundlu lakhe, walenza ibhongo.
Lazulazula phakathi kwezingonyama, liyibhongo, laze lafunda ukudwengula inyamazane, ladla nabantu.
Labhidliza izinqaba zabo, labhubhisa imizi yabo; izwe laba yincithakalo, nakho konke okukulo, kwathuthumela ngenxa yokubhonga kwalo.
Izizwe zase zigasela kulo, zivela kuwo wonke amazwe akhelene nalo, zendlala inetha phezu kwalo, labanjwa ogibeni lwazo.
Zalifaka ngezingwegwe endlwaneni evaliweyo, zaliyisa enkosini yaseBhabhele, zalifaka ezinqabeni ukuze ukubhonga kwalo kuphinde kuzwakale ezintabeni zakwa-Israyeli.
“ ‘Unyoko wayenjengomvini otshalwe ngasemanzini; othela kakhulu futhi ugcwele amagatsha ngenxa yamanzi amaningi.
Wawunamagatsha aqinileyo, aba yizintonga zababusi; isiqu sawo sasiphakeme phakathi kwamagatsha amaningi, wawubonakala ngobude bawo, nangobuningi bamagatsha awo.
Kepha wasishulwa ngolaka, wathelwa othulini, umoya wasempumalanga womisa isithelo sawo; isiqu sawo esiqinileyo, sabuna, saqothulwa ngumlilo.
Manje usutshalwe ehlane, ezweni eligagadekileyo nelomileyo.
Umlilo uphumile esiqwini sawo, wadla amagatsha awo nesithelo sawo, akusalanga gatsha kuwo eliqinileyo, nantonga yokubusa.’ “Lesi yisililo; impela makube yisililo.”
Kwathi ngonyaka wesikhombisa, ngenyanga yesihlanu, ngosuku lweshumi lwenyanga, kwafika amadoda angamalunga akwa-Israyeli ukuzobuza kuSimakade; ahlala phambi kwami.
Izwi likaSimakade lafika kimi, lathi:
“Ndodana yomuntu, khuluma namalunga akwa-Israyeli, uthi kuwo: ‘Isho kanje iNkosi uSimakade, ithi: “Nize ukuzobuza kimi na? Ngifunga ngiyagomela, angiyukubuzwa yinina,” ’ ” kusho iNkosi uSimakade.
“Ndodana yomuntu uzakubehlulela yini, uzakubehlulela na? Bazise izinengiso zokhokho babo,
uthi kubo: ‘Isho kanje iNkosi uSimakade, ithi: “Ngosuku engamkhetha ngalo u-Israyeli ngafunga ozalweni lwendlu kaJakobe, ngazambula kubo eGibhithe, ngafunga ngathi: NginguSimakade uNkulunkulu wenu.
“ ‘ “Ngalolo lusuku ngafunga kubo ukuba ngibakhiphe eGibhithe, ngibayise ezweni engangibakhethele lona, izwe elichichima ubisi noju, futhi elihle kunawo wonke amazwe.
Ngathi kubo: Makube yilowo nalowo alahle okwenyanyekayo emehlweni akhe, ningazingcolisi ngezithombe zaseGibhithe; nginguSimakade uNkulunkulu wenu.”
“ ‘Kepha bangihlubuka, abafunanga ukungilalela, kwaba yilowo nalowo akaze azilahla izinto ezenyanyekayo ezaziphambi kwakhe; abazishiyanga izithombe zaseGibhithe, ngase ngithi ngiyakuthululela ulaka lwami phezu kwabo; intukuthelo yami ephelele ngiyithululele kubo eGibhithe.
Ngakwenza lokho ngenxa yegama lami ukuba lingangcoliswa phambi kwezizwe ababephakathi kwazo, engazazisa kuzo bebuka, ngokubakhipha eGibhithe.
Ngase ngibakhipha eGibhithe, ngabayisa ehlane.
Ngabanika izimiso zami, ngabazisa izehlulelo zami umuntu ayakuphila ngazo uma ezenza.
Ngabanika futhi amasabatha ami ukuba abe yisibonakaliso phakathi kwami nabo, ukuze bazi ukuthi nginguSimakade obangcwelisayo.
“ ‘Kepha indlu yakwa-Israyeli yangihlubuka ehlane; ayihambanga ngezimiso zami, yazilahla izehlulelo zami umuntu ayakuphila ngazo uma ezenza; amasabatha ami yawangcolisa kakhulu; ngase ngithi ngiyakuthulula ulaka lwami phezu kwabo ehlane, ngibaqothule.
Ngakwenza lokho ngenxa yegama lami, ukuba lingangcoliswa phambi kwezizwe engabakhipha zizibonela ngawazo.
Phezu kwalokho ngafunga kubo ehlane ukuthi angiyukubangenisa ezweni engangibanike lona, elichichima ubisi noju, elihle kunawo wonke amazwe,
ngokuba bazilahla izehlulelo zami, abahambanga ngezimiso zami, bawangcolisa amasabatha ami, ngokuba izinhliziyo zabo zalandela izithombe zabo.
Nokho iso lami lababheka ngesihawu ukuba ngingababhubhisi, ngingabaqedi nya ehlane.
Ngathi kubantwana babo ehlane: “Ningahambi ngezimiso zoyihlo, ningazigcini izehlulelo zabo, ningazingcolisi ngezithombe zabo.
NginguSimakade uNkulunkulu wenu: hambani ngezimiso zami, nizigcine izehlulelo zami, nizenze,
angcweliswe amasabatha ami, abe yisibonakaliso phakathi kwami nani, ukuze nazi ukuthi nginguSimakade uNkulunkulu wenu.”
“ ‘Kepha nabantwana bangihlubuka, abahambanga ngezimiso zami, abazigcinanga izehlulelo zami ukuba bazenze ukuze umuntu aphile ngazo; bawangcolisa amasabatha ami, ngase ngithi ngizakuthululela intukuthelo yami kubo, ngiphelelise ulaka lwami phezu kwabo ehlane.
Nokho ngayeka ukukwenza lokho ngenxa yegama lami, ukuba lingangcoliswa phambi kwezizwe engabakhipha zizibonela ngawazo.
Ngaphakamisela isandla sami ehlane ukuba ngibahlakazele ezizweni, ngibasabalalisele emazweni.
Ngokuba abazenzanga izehlulelo zami, bazilahla izimiso zami, bawangcolisa amasabatha ami, amehlo abo alangazelela izithombe zoyise.
Nami ngabanika izimiso ezazingezinhle nezehlulelo ababengayukuphila ngazo.
Ngabangcolisa ngeminikelo yabo ngokudabulisa emlilweni wonke amazibulo, ukuze ngibesabise, yikhona bezokwazi ukuthi nginguSimakade.’
“Ngakho-ke ndodana yomuntu, khuluma kwabendlu yakwa-Israyeli, uthi kubo: ‘Isho kanje iNkosi uSimakade, ithi: “Kulokhu futhi, oyihlo bangihlambalaza, benza isiphambeko,
ngesikhathi sengibangenise ezweni engangifungile ukuthi ngiyobanika lona. Kwathi lapho bebona amagquma aphakemeyo nazo zonke izihlahla ezinamacembe, base benikela lapho ngemihlatshelo yabo, bangichukuluza ngeminikelo yabo, benza lapho kwaba nephunga elimnandi, bathululela lapho iminikelo yokuphuzwayo.
Ngase ngithi kubo: iyini indawo ephakemeyo eniya kuyo na?” ’ ” Lase libizwa igama layo ngokuthi indawo ephakemeyo, kuze kube namuhla.
“Ngakho yisho kuyo indlu yakwa-Israyeli, uthi: ‘Isho kanje iNkosi uSimakade, ithi: “Niyakuzingcolisa yini nani ngendlela okhokho benu abaziphatha ngayo, nilandele ekuphingeni kwabo okunyanyekayo na?
Lapho niletha iminikelo yenu, nidabulisa amadodana enu emlilweni, niyazingcolisa ngazo zonke izithombe kuze kube namuhla. Niyakubuza kimi yini, nina ndlu ka-Israyeli na? Qha, ngifunga ngiyagomela, ngeke ngibuzwe yini,” ’ ” kusho iNkosi uSimakade.
“ ‘ “Lokhu okusengqondweni yenu, impela akusoze kwenzeka, enicabanga, nithi: Siyakufana nezizwe, sifane nabantu bezwe, nathi sikhonze ukhuni netshe.
“ ‘ “Ngifunga ngiyagomela; impela ngesandla esinamandla, nangengalo eluliweyo, nangolaka olutheliweyo; ngiyakubusa phezu kwenu,” ’ ” kusho iNkosi uSimakade.
“ ‘ “Ngiyakunikhipha phakathi kwabantu, nginiqoqe emazweni enihlakazelwe kuwo, ngesandla esinamandla, ngengalo eyeluliweyo, nangolaka olutheliweyo.
Ngiyakuniyisa ehlane labantu, nginehlulele lapho sibhekene ubuso nobuso.
Njengalokhu ngehlulelana nokhokho benu ehlane eGibhithe, ngiyakwehlulelana nani kanjalo-ke,” ’ ” kusho iNkosi uSimakade.
“ ‘ “Ngiyakunidlulisa phansi kwentonga, nginingenise phansi kwesibopho sesivumelwano,
ngihlunge kini abahlubuki nabaphambukayo kimi, ngibakhiphe ezweni lapho begogobele khona, kepha abayukungena kwelakwa-Israyeli, niyokwazi ukuthi nginguSimakade.
“ ‘ “Nina ndlu yakwa-Israyeli,” ’ ” kusho iNkosi uSimakade, “ ‘ “hambani; kube yilowo nalowo ayokhonza isithombe sakhe, kodwa kamuva niyakungilalela, ningabe nisalingcolisa igama lami elingcwele ngeminikelo yenu nangezithombe zenu.
Ngokuba entabeni yami engcwele, esicongweni sentaba yakwa-Israyeli, yonke indlu yakwa-Israyeli iyakungikhonza kuyo ezweni; ngiyakubemukela khona, ngifune iminikelo yenu, okwekhethelo kwenu nakho konke okungcwele okungokwenu,” ’ ” kusho iNkosi uSimakade.
“ ‘ “Ngiyakunemukela ngephunga elimnandi, lapho nginikhipha ezizweni, nginiqoqe emazweni lapho nihlakazekele khona, ngizibonakalise ukuthi ngingcwele phakathi kwenu, emehlweni ezizwe.
Niyokwazi ukuthi nginguSimakade, lapho nginingenisa ezweni lakwa-Israyeli, izwe engalifungela ukulinika okhokho benu.
Niyakukhumbula izindlela zenu nazo zonke izenzo zenu enizingcolise ngazo, nenyanye ubuso benu ngakho konke okubi enikwenzileyo.
Niyakukwazi ukuthi nginguSimakade lapho ngenza lokho kini ngenxa yegama lami, hhayi ngokwezindlela zenu ezimbi nezenzo zenu zenkohlakalo; nina ndlu yakwa-Israyeli,” ’ ” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, bhekisa ubuso bakho ngaseningizimu, ukhulume umelene nenyakatho, uphrofethe ngehlathi elisendle eningizimu,
uthi kulelo hlathi laseningizimu: ‘Lalela izwi likaSimakade: isho kanje iNkosi uSimakade, ithi: “Ngizothungela umlilo kuwe, udle yonke imithi eluhlaza nayo yonke imithi eyomileyo, ilangabi liyobhebhetheka lingacimeki, kushe kungqongqe konke okulapho, kusuka eningizimu kuya enyakatho.
Abantu bonke bayobona lapho-ke ukuthi Mina uSimakade ngiwuthungele, awuyukucinywa.” ’ ”
Ngathi: “Maye, Nkosi Simakade! Bathi ngami: ‘Akakhulumi ngezaga nje na?’ ”
Izwi likaSimakade lafika kimi, lathi:
“Ndodana yomuntu, bhekisa ubuso bakho ngaseJerusalema, izwi lakho lizwakale ezindaweni ezingcwele, uphrofethe ngezwe lakwa-Israyeli,
uthi kulo: ‘Usho kanje uSimakade, uthi: “Bheka, ngimelene nawe. Ngiyakuhosha inkemba yami emgodleni wayo, ngibulale abalungileyo nezikhohlakali.
Ngakho-ke inkemba yami iyakuphuma emgodleni wayo, iphumele abantu bonke kusukela eningizimu kuya enyakatho.
Bonke abantu bayokwazi ukuthi Mina Simakade, ngiyihoshile inkemba emgodleni wayo, ayisayukubuyela emuva.” ’ ”
“Kepha wena ndodana yomuntu, bubula, ububule ngomunyu bekubuka, ngenxa yokhalo lwakho olwaphukileyo.
Kuyakuthi lapho bethi kuwe: ‘Ububulelani na?’ uthi kubo: ‘Kungenxa yombiko, ngokuba ngesikhathi oyakufika ngaso, zonke izinhliziyo ziyakudikibala, izandla zidangale, yonke imiphefumulo ibe buthakathaka, kugcwale amanzi emadolweni.’ Lokhu kuyeza, futhi kuyakwenzeka,” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, phrofetha uthi: ‘Isho kanje iNkosi, ithi: “ ‘ “Inkemba, inkemba iloliwe, yamenyezeliswa.
Ilolelwe ukuba ibulale ngempela, imenyezeliselwe ukuba ibe njengonyazi. “ ‘ “Pho besiyakujabulelani na? Le ntonga, ndodana yami, idelela konke okomuthi.
“ ‘ “Inkemba inikelwe ukuba imenyezeliswe, ukuze ibanjwe ngesandla. Yebo, inkemba isiloliwe, isimenyezelisiwe ukuba inikelwe esandleni sombulali.
Khala, udinde isililo, ndodana yomuntu, ngokuba iyakwehlela kubantu bami, yehlele kuzo zonke izikhulu zakwa-Israyeli, zinikelwe enkembeni nabantu bami, ngakho-ke thwala imikhono ekhanda.
“ ‘ “Bekuyisivivinyo nje; kunganjani uma intonga edelelayo manje ingayukuba bikho na?” ’ ” kusho iNkosi uSimakade.
“Wena-ke, ndodana yomuntu, phrofetha, ushaye izandla. Inkemba mayigadle kabili, kathathu, iyinkemba yokubulala, inkemba yokubulala okukhulu, isibazungeze nxazonke.
Ukuze izinhliziyo zabo ziphele amandla, kwande nezikhubekiso kubo, ngiyokwenza babeke inkemba ekhazimulayo kuwo wonke amasango abo. Yebo, yenziwe yanjengonyazi, ihoshelwe ukubulala.
Bulala ngakwesokunene, udlulele ngakwesokhohlo, lapho ubuso bakho bubheke ngakhona.
Nami luqobo ngiyakushaya izandla, nganelise intukuthelo yami; Mina Simakade ngikhulumile.”
Izwi likaSimakade lafika kimi, lathi:
“Wena ndodana yomuntu, zenzele izindlela ezimbili okuzofika ngazo inkemba yenkosi yaseBhabhele, zombili zisuke ezweni elilodwa, wenze inkombandlela, uyibeke engosini yezindlela zomuzi.
Enye indlela okuzofika ngayo inkemba, uyenze eRabha labakwa-Amoni nakwaJuda eJerusalema elibiyelweyo.
Ngokuba inkosi yaseBhabhele isimi egumbini lezindlela, engosini yezindlela zombili, ukuba ibhule; ixhakazisa imicibisholo, ibuza amatherafi, ihlola esibindini.
Ngakwesokunene kwenziwe unkatho ngeJerusalema, ukuba kubekwe imigoqo yokubhodloza, kumenyezelwe ukubulala, ngokuthi kukhuzwe iziqubulo zempi, kubekwe imigoqo yokubhodloza emasangweni, kwenziwe izindunduma, kwakhiwe nodonga lokuvimbezela.
Kubo kuyobonakala sengathi ubhula amanga; kukhona abasenza isifungo kubo, kodwa iyakubakhumbuza ngokona kwabo, ukuze babanjwe.
“Ngakho-ke isho kanje iNkosi uSimakade, ithi: ‘Ngokuba nizikhumbuzile ngobubi benu, zembulwa iziphambeko zenu ukuze izono zenu zibonakale kukho konke enikwenzayo, yebo, ngenxa yokuba nikhunjuliwe, niyakubanjwa ngesandla.
“ ‘Wena-ke sikhulu sakwa-Israyeli, shinga elikhohlakeleyo, usuku lwakho-ke selufikile, isikhathi sakho sokujeziswa okokugcina;
isho kanje iNkosi uSimakade, ithi: “Khumula umshuqulu, wethule umqhele wakho, akusezukufana nakuqala. Phakamisa okuthobekileyo, uthobise okuphakemeyo.
Incithakalo, incithakalo, ngiyakwenza incithakalo; nalokhu akuyukwenzeka kuze kufike isehlulelo kulowo esimfanele, bese ngimnika sona.” ’
“Wena ndodana yomuntu, phrofetha uthi: ‘Isho kanje iNkosi uNkulunkulu ngabakwa-Amoni nangehlazo labo, ithi: wena batshele, uthi: “ ‘ “Inkemba, inkemba ihoshiwe, yamenyezeliselwa ukuba ibulale, futhi iqothule njengonyazi,
besalibele ukubona amanga ngawe, bebhula inkohliso ngawe, bethi uyakubekwa ezintanyeni zezikhohlakali ezabulawayo, abalusuku lwabo luyofika ngesikhathi okuyoqedwa ngalo okubi.
Mayibuyiselwe emgodleni. Endaweni lapho wadalwa khona, ezweni owadabuka kulo, ngiyakukwehlulela khona lapho.
Intukuthelo yami ngiyakuyithululela phezu kwakho, ngikufuthe ngomlilo wolaka lwami, ngikunikele ezandleni zabantu abanonya, abangongoti bokubhubhisa.
Uyakuba ngukudla komlilo, igazi lakho lichithekele emhlabathini; awusayukuphinde ukhunjulwe, ngokuba Mina Simakade ngikhulumile.” ’ ”
Izwi likaSimakade lafika kimi, lathi:
“Wena ndodana yomuntu uyakwehlulela, uyakuwehlulela yini umuzi ochitha igazi na? Nguwe oyakuwazisa zonke izinengiso zawo,
uthi: ‘Isho kanje iNkosi uSimakade, ithi: “Wena muzi ochitha igazi phakathi kwakho, isikhathi sakho siyeza; wenze izithombe ukuba uzingcolise ngazo,
unecala-ke ngegazi olichithileyo, nangezithombe ozenzileyo; ungcolile. Wenze ukuba izinsuku zakho zisheshe zifike, futhi sewufikile esiphethweni seminyaka yakho, ngakho-ke ngizokukwenza ube yihlazo ezweni, nenhlekisa emazweni wonke.
Abaseduze nabakude nawe bayakukuhleka wena onegama elingcolileyo, ogcwele isiphithiphithi.
“ ‘ “Bheka nje, yileso naleso sikhulu sakwa-Israyeli esasihlala kuwe, senza ngokusemandleni aso ukuba sichithe igazi.
Babaphatha ngendlakadla oyise nonina kuwe, abafokazi abagogobele kuwe babacindezela, kwathi izintandane nabafokazi abakuwe baphathwa kabi.
Ukwedelelile okungcwele kwami, wawona amasabatha ami.
Abantu abahlebayo babekuwe ukuba bachithe igazi, badla kuwe ezintabeni, bekuwe benza ubufebe.
Bekuwe bahlubula oyise babanqunu, bahlukumeza abesifazane abangcolileyo besesikhathini.
Omunye wenze isinengiso nomkamakhelwane wakhe. Omunye wangcolisa umalokazana wakwakhe ngobufebe, omunye kubo wone udadewabo, indodakazi kayise.
Bamukele umfumbathiso kuwe ukuba bachithe igazi, wena wathatha inzalo nenzuzo, waphanga omakhelwane bakho ngokubacindezela, kodwa wangikhohlwa Mina, kusho iNkosi uSimakade.
“ ‘ “Impela ngenxa yenzuzo engaka engalungile oyenzile, nangegazi elikuwe, Mina ngishaya izandla ngibabaza.
Uyakuba naso yini isibindi, nezandla zakho ziyakuqina yini ngezinsuku engiyakubhekana ngazo nawe na? Mina Simakade ngikhulumile, futhi ngiyakukwenza lokho.
Ngiyakukuhlakazela ezizweni, ngikusabalalisele emazweni, ngikuqede ukungcola kwakho okukuwe.
Wena uyakungcoliswa emehlweni ezizwe. Kulapho-ke uyokwazi khona ukuthi nginguSimakade.” ’ ”
Izwi likaSimakade lafika kimi, lathi:
“Ndodana yomuntu, indlu yakwa-Israyeli isingamanyela kimi. Bonke sebeyithusi, ithini, insimbi nomthofu phakathi esithandweni somlilo; bangamanyela esiliva.
Ngalokho-ke isho kanje iNkosi uSimakade, ithi: ‘Ngenxa yokuba seningamanyela nonke, ngakho-ke bhekani, ngiyakuniqoqela phakathi eJerusalema.
Njengalokhu kuqoqwa isiliva, ithusi, insimbi, umthofu, nethini phakathi esithandweni somlilo, ukuba kuvuthelwe umlilo phezu kwakho ukuze kuncibikaliswe, kanjalo-ke nami ngiyakuniqoqa ngentukuthelo yami, nangolaka lwami, nginifake khona, nginincibilikise.
Yebo, ngiyakuniqoqa, nginivuthele ngomlilo wentukuthelo yami, nincibilikiswe kuwo.
Njengalokhu isiliva lincibilikiswa phakathi esithandweni somlilo, kanjalo nani niyakuncibilikiswa phakathi kwaso, niyakukwazi-ke ukuthi Mina Simakade ngithululele ulaka lwami phezu kwenu.’ ”
Izwi likaSimakade lafika kimi, lathi:
“Ndodana yomuntu, yisho kulo izwe, uthi: ‘Wena uyizwe elingahlanjululwanga, futhi langanethwa yimvula ngosuku lolaka lwami.’
“Kukhona uzungu lwabaphrofethi bawo abakuwo, olunjengengonyama ebhongayo edwengula impango. Badle abantu, bathatha ingcebo nokuyigugu, benza baba baningi abafokazi abakuwo.
Abaphristi bawo bawudlovile umthetho wami; bazingcolisile izinto zami ezingcwele, abakwehlukanisanga okungcwele nokuyichilo. Ababafundisanga abantu ukwehlukanisa phakathi kokungcolileyo nokuhlambulukileyo, bashalazela amasabatha ami ngokungawagcini; ngihlanjalaziwe phakathi kwabo.
Izikhulu zawo ezikuwo, zinjengezimpisi ezidwengula impango ukuba zichithe igazi, zibaqede nya abantu, ukuze zithole inzuzo embi.
Abaphrofethi bakhona bawugudule ngomcako, bebona okuyize, bebabhulela amanga, bethi: ‘Isho kanje iNkosi uSimakade,’ nakuba uSimakade engakhulumanga.
Abantu bezwe bacindezele nokucindezela, baphangile nokuphanga, yebo, babaphathe kabi abampofu nabantulayo, babacindezele abafokazi ngokungenabulungiswa.
“Ngafuna kubo umuntu owayezokwakha ugange, ame esikhaleni phambi kwami ngenxa yezwe, ukuze ngingalibhubhisi, kodwa angimtholanga.
Ngase ngithululela ulaka lwami phezu kwabo, ngabaqeda nya ngomlilo wentukuthelo yami, kwathi konke abakwenzileyo ngakuthela phezu kwamakhanda abo,” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, kwakukhona abesifazane ababili, amadodakazi amfazi munye.
Babefeba eGibhithe, bafeba kusukela ebusheni babo; amabele abo awotwawotwa khona, zapotozwa lapho izingono zobuntombi babo.
Amagama abo ngu-Ohola, okunguyena omdala, no-Oholiba udadewabo; babengabami, bazala amadodana namadodakazi. Amagama abo yilawa: u-Ohola yiSamariya kuthi u-Oholiba kube yiJerusalema.
“U-Ohola wafeba esengowami, wakhanukela izithandwa zakhe, abase-Asiriya, abangamabutho empi,
ababembethe okuluhlaza, ababusi, izikhulu, izinsizwa zonke ezingamageza, nabagibeli bamahhashi.
Wazinikela kubo, wafeba nabo, bengamadoda akhethekileyo ase-Asiriya; bonke wabakhanukela, wayesezingcolisa yena ngazo zonke izithombe zabo.
Nokho akabuyekanga ubufebe bakhe ayebuqale eGibhithe, ngokuba balala naye kusukela ebusheni bakhe, bacindezela izingono zobuntombi bakhe, bathululela kuye ubufebe babo.
“Ngalokho-ke ngamnikela esandleni sezithandwa zakhe, esandleni sabase-Asiriya abakhanukelayo.
Bamambula ubunqunu bakhe, bathatha amadodana akhe namadodakazi akhe. Yena bambulala ngenkemba, waba yisaga kwabesifazane, futhi wehlulelwa.
“Udadewabo u-Oholiba wakubona lokho, kodwa wonakala ngokwedlulele kunaye ekukhanukeni kwakhe, nasebufebeni bakhe obabedlula obukadadewabo.
Wakhanukela abase-Asiriya, izikhulu, ababusi, namabutho empi, ababehlobe ngemvunulo, bengabagibeli bamahhashi, bonke beyizinsizwa ezingamageza.
Ngabona ukuthi naye uzingcolisile; bobabili bahamba ndlelanye.
“Wanezezela ebufebeni bakhe, ngokuba wabona amadoda ayedwetshwe odongeni, imifanekiso yamaKhaledi eyayidwetshwe ngebomvu,
ebophe amabhande okhalo lwawo, ethwele amaqhiya emakhanda, wonke ebukeka njengezikhulu zaseBhabhele, edabuka eKhaledi.
Kwathi nje lapho ewabona, wawakhanuka, wathumela kuwo izithunywa eKhaledi.
Amadodana aseBhabhele eza kuye, alala naye, amngcolisa ngobufebe bawo; kwathi lapho esemngcolisile, amshiya dengwane.
Wabambula ubufebe bakhe, nobunqunu bakhe. Ngazehlukanisa naye njengoba ngangimlaxazile nodadewabo.
Kepha wabandisa ubufebe bakhe, ekhumbula izinsuku zobusha bakhe ayefebe ngazo eGibhithe.
Wawakhanukela amashende alapho, azinduku zawo zinjengezinduku zezimbongolo, nemiphambili yawo echitha njengeyamahhashi.
Wakulangazelela ukukhanuka kobusha bakho useseGibhithe, lapho izingono zakho zamabele obusha bakho zazipotozwa khona.
“Ngalokho-ke Oholiba, isho kanje iNkosi uSimakade, ithi: ‘Ngiyakukuvusela izithandwa zakho, umphefumulo wakho owehlukene nazo, ngizilethe kuwe zivela macala wonke,
abaseBhabhele, amaKhaledi wonke, iPhekodi, iShowa, iKhowa, bonke abase-Asiriya, izinsizwa ezingamageza, ababusi, nezikhulu zabo, nazo zonke izikhulu ezaziwa ngabagibeli bamahhashi,
bayakuza kuwe bakuthelekele ngezikhali, izinqola, okunamasondo, nesixuku sabantu, bayakukuvimbezela nxazonke ngamahawu nezihlangu, nezigqoko zempi. Ngiyakubanika igunya lokwehlulela, bayakukwehlulela ngezehlulelo zabo.
Ngiyakumelana nawe ngenxa yesikhwele enginaso ngawe, bakuphathe ngonya, banqume ikhala lakho nezindlebe zakho, kuthi abaseleyo bakini, bafe ngenkemba. Bayakuthatha amadodana akho namadodakazi akho, bese kuthi insali yakini, idliwe ngumlilo.
Bayakukuhlubula izingubo zakho, bakuqhwage imvunulo yakho ohlobe ngayo.
Ngiyakuyiqeda nya inkanuko yakho nobufebe bakho owabuqala kusukela eGibhithe. Awuyukukubheka lokho ngokukulangazelela, ungabe usalikhumbula futhi iGibhithe.’
“Ngokuba isho kanje iNkosi uSimakade, ithi: ‘Ngiyakukunikela esandleni salabo obazondayo, esandleni salabo umphefumulo wakho owehlukane nabo usubenyanya.
Bayakukuphatha ngenzondo, bakuqhwage konke lokho osukusebenzele, bakuphundle, usale unqunu, ubunqunu bobufebe bakho bube sobala. Ukukhanuka kwakho nobufebe bakho
yikhona okwenze lokho kuwe, ngokuba ufebile, walandela abezizwe, wazingcolisa wena uqobo ngezithombe zabo.
Uhambe ngendlela kadadewenu, ngalokho-ke ngiyakunikela indebe yakhe esandleni sakho.’
“Isho kanje iNkosi uSimakade, ithi: “ ‘Uyakuphuza endebeni kadadewenu ejulileyo, futhi ebanzi, iyakwenza ukuba uhlekwe usulu, futhi wedelelwe, iqukethe okuningi.
Uyakugcincwa ngokudakwa nosizi: indebe yokwesabekayo neyencithakalo, indebe kadadewenu iSamariya.
Uyakuphuza kuyo, uze uyiminye, uyiphihlize ibe yizingcezu; uklwebhe amabele akho, ngokuba Mina ngikhulumile,’ kusho iNkosi uSimakade.
“Ngalokho-ke isho kanje iNkosi uSimakade, ithi: ‘Ngokuba ungikhohliwe Mina, wangifulathela, uyakukuthwala ukungcola kwakho nobufebe bakho.’ ”
Wayesethi uSimakade kimi: “Ndodana yomuntu, uyakubehlulela yini o-Ohola no-Oholiba na? Batshele-ke ngezinengiso zabo.
Ngokuba baphingile, negazi lisezandleni zabo; baphinge nezithombe zabo, kwathi abantwana abangizalela bona babadabulisa emlilweni, baba ngukudla kwazo.
Benza lokhu futhi kimi: ngalolo lusuku abangcolisa ngalo indlu yami engcwele, bawona namasabatha ami.
Kwathi ngalolo lusuku benzela izithombe zabo umhlatshelo ngabantwana babo, base beya endlini yami engcwele ukuba bayingcolise. Uyabona, benza kanjalo-ke endlini yami.
“Bathumela izithunywa ukuba zilande amadoda avela kude. Kwathi lapho efika, wena wageza ngenxa yawo, wagqaba amehlo akho, wahloba ngobucwebecwebe,
wahlala esihlalweni esihle esintofontofo; itafula elilungisiweyo laliphambi kwaso, wabeka kulo impepho yami namafutha ami.
“Umsindo wesixuku esihlezi kahle wawuzwakala lapho; kwalethwa nezidakwa zasehlane, bazifaka amabhengele ezandleni zazo, nemiqhele emihle emakhanda azo.
Ngase ngithi ngalo osephele nya ngukufeba: ‘Impela bayakufeba naye, naye afebe nabo, ngokuba yilokho ayikho.’
Balala naye njengalokhu amadoda elala nesifebe; balala kanjalo-ke no-Ohola no-Oholiba, abesifazane abakhanukayo.
Abantu abalungileyo bayakubehlulela ngokwehlulelwa kowesifazane ophingayo nangokwabesifazane abachitha igazi, ngokuba bayiziphingi, futhi negazi lisezandleni zabo.
“Ngokuba isho kanje iNkosi uSimakade, ithi: ‘Ngiyakuletha kubo isixuku esiyakumelana nabo, ngibanikele ekusatshisweni nasekuphangweni.
Isixuku siyakubakhanda ngamatshe, sibahlahlele ngezinkemba zaso, sibulale amadodana abo namadodakazi abo, sizishise ngomlilo izindlu zabo.
“ ‘Ngiyakukuqeda nya ukukhanuka ezweni, ukuze baxwayiswe bonke abesifazane ukuba bangakhanuki njengoba bekwenza nina.
Bayakukuphindisela kini ukukhanuka kwenu, nizithwale nina izono zezithombe zenu, niyakukwazi ukuthi Mina ngiyiNkosi uSimakade.’ ”
Izwi likaSimakade lafika kimi ngonyaka wesishiyagalolunye, ngenyanga yeshumi, ngosuku lweshumi enyangeni, lathi:
“Ndodana yomuntu, zilobele igama losuku, lona lolu lusuku; inkosi yaseBhabhele seyilivimbezele iJerusalema ngalolu lusuku.
Khuluma ngomfanekiso kuyo indlu ehlubukayo, uthi kubo: ‘Isho kanje iNkosi uSimakade, ithi: “ ‘ “Beka ibhodwe emlilweni, libeke, uthele amanzi kulo.
Faka kulo isitho senyama, isitho senyama enhle; umlenze nomkhono. Ligcwalise ngamathambo ekhethelo.
Thatha okukhethekileyo emhlanjini, ukhwezele izikhuni phansi kwalo, uligxabhise impela, kuphekwe namathambo kulo.”
“ ‘Ngakho-ke isho kanje iNkosi uSimakade, ithi: “ ‘ “Maye, kumuzi ochitha igazi, ibhodwe elinokugqwala, nokugqwala kwalo okungasukanga kulo! Khipha kulo isitho nesitho, nakuba ungadliwanga wunkatho.
“ ‘ “Ngokuba igazi elilichithile likuwo; lilichithele edwaleni elingenalutho; alilichithelanga emhlabathini ukuba limbozwe wuthuli.
Igazi lawo ngalichithela edwaleni elingenalutho, ukuba lingambozwa yilutho, ukuze kuvuswe ulaka lwami, ngiziphindiselele.
“ ‘ “Ngakho-ke isho kanje iNkosi uSimakade, ithi: “ ‘ “ ‘Maye, kumuzi ochitha igazi! Nami futhi ngiyakuzifaka kakhulu izinkuni.
Nqwabela izinkuni, ukhwezele umlilo, uqothule inyama, kushe umhluzi, ashiswe angqongqe namathambo.
Bese ulibeka emalahleni awo lingenalutho, ukuze lishise, kushe ithusi lalo, kuncibilikiswe kulo ukungcola kwalo, kuqedwe ukugqwala okukulo.
Lizikhathazele ize, nokho ukugqwala kwalo okuningi akuphelanga kulo; ukugqwala kwalo makube semlilweni.’ ”
“ ‘Ekungcoleni kwakho ngenxa yobufebe ngakuhlambulula, kodwa awuhlambulukanga ekungcoleni kwakho, ngeke uphinde uhlanzeke ngize ngilwanelise ulaka lwami, ngimelene nawe.
“ ‘Mina Simakade ngikukhulumile lokho; kuyakwenzeka, ngiyakukwenza; angiyukukuyeka, angiyukuhawukela, angiyukuzisola. Uyakwehlulelwa njengokuziphatha kwakho nangezenzo zakho,’ ” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, ngiyakususa kuwe okunxanelekayo emehlweni akho ngokuphazima kweso, kepha ungakhali, ungakhihli sililo, futhi kungaphumi zinyembezi kuwe.
Bubula buthule; ungamlileli ofileyo, uzibophele umshuqulu wakho, ufake izimbadada zakho ezinyaweni, ungawambozi amadevu akho, ungakudli ukudla okulethwe ngabantu abalilayo.”
Ngase ngikhuluma kubantu ekuseni; kwathi kusihlwa umkami wafa; ngakusasa ekuseni ngenza njengalokhu ngiyaliwe.
Abantu bangibuza, bathi: “Kusho ukuthini kithi lokhu okwenzayo na?”
Ngathi kubo: “Izwi likaSimakade lafika kimi, lathi:
‘Yisho kuyo indlu yakwa-Israyeli, uthi: “Isho kanje iNkosi uSimakade, ithi: uyabona-ke, sengizoyingcolisa indlu yami engcwele; ukuzigabisa ngamandla enu, ukunxanela kwamehlo enu, nokuthanda kwempilo yenu. Amadodana namadodakazi enu eniwashiyile, ayakudliwa yinkemba.
Niyakwenza njengoba ngenzile: aniyukuwamboza amadevu enu, ningakudli ukudla okulethwe ngabantu abalilayo.
Imishuqulu yenu iyakuba semakhanda enu, nezimbadada zenu ezinyaweni zenu; ningakhali, ningasikhihli isililo, kodwa-ke niyokonda ngenxa yeziphambeko zenu, nibubulelane omunye komunye.
UHezekeli uyakuba yisibonakaliso kini; niyakukwenza konke akwenzayo. Kuyakuthi lapho sekwenzekile lokhu, bese niyazi ukuthi Mina ngiyiNkosi uSimakade.” ’
“Wena ndodana yomuntu, angithi ngalolo lusuku engiyosusa ngalo inqaba yabo, intokozo yobuhle babo, okunxanelekayo emehlweni abo, okulangazelelwa ngumphefumulo wabo, amadodana abo namadodakazi abo,
angithi ngalolo lusuku ophunyukileyo uyakuza kuwe, akubikele ngalezo zindaba na?
Ngalolo lusuku umlomo wakho uyakuvulwa; wena uyakukhuluma nophunyukileyo, ungabe usaba yisimungulu. Uyakuba yisibonakaliso kubo, bayakukwazi ukuthi Mina nginguSimakade.”
Izwi likaSimakade lafika kimi, lathi:
“Ndodana yomuntu, bhekisa ubuso bakho kwabakwa-Amoni, uphrofethe ngabo, umelene nabo,
uthi kubo: ‘Zwanini izwi leNkosi uSimakade. Isho kanje iNkosi uSimakade, ithi: “Ngokuba wathi ashila kuyo indlu yami engcwele lapho ingcoliswa, nakulo izwe lakwa-Israyeli ngesikhathi lenziwa incithakalo, nakuyo indlu yakwaJuda lapho beya ekuthunjweni,
ngakho-ke sengizokunikela kwabasempumalanga, ube yifa labo. Bayakukanisa kuwe, bamise amathende abo kuwe, badle isithelo sakho, baphuze nobisi lwakho.
IRabha ngiyakulenza libe yidlelo lamakameli, abakwa-Amoni babe yindawo yokubuthisa izimvu, niyakukwazi ukuthi nginguSimakade.
Ngokuba isho kanje iNkosi uSimakade, ithi: njengoba ushaye ihlombe, wagidagida ngezinyawo, wathokoza ngabo bonke ububi obusenhliziyweni yakho, umelene nezwe lakwa-Israyeli,
ngalokho-ke ngiyakwelulela isandla sami kuwe, ngimelane nawe, ngikunikele ukuba ube yimpango ezizweni. Ngiyakukususa kubantu, ngikushabalalise emazweni, ngikubhubhise, uyakukwazi ukuthi nginguSimakade.” ’ ”
“Isho kanje iNkosi uSimakade, ithi: ‘Ngenxa yokuba uMowabi neSeyiri bathe: “Bheka, indlu yakwaJuda injengazo zonke ezinye izizwe,”
“ ‘uyabona-ke manje, sengizowuvula umthambeka kaMowabi, angabe esaba namizi, kusukela emizini esemingceleni, indawo enhle yezwe: iBhethi Jeshimothi, iBhali Mehoni, neKiriyathayimi,
bese ngiwunika abasempumalanga nabakwa-Amoni, ube yifa labo, ukuze abantu bakwa-Amoni bangabe besakhunjulwa ezizweni.
Ngiyakwehlisela isijeziso phezu kukaMowabi, bayakukwazi ukuthi nginguSimakade.’ ”
“Isho kanje iNkosi uSimakade, ithi: ‘Ngenxa yokuba u-Edomi uziphindiselele endlini yakwaJuda, usenecala elikhulu ngokwedlulele njengoba eziphindiselele kubo.
Ngalokho-ke isho kanje iNkosi uSimakade, ithi: “Ngiyakwelulela isandla sami ku-Edomi ngimelane naye, ngibulale abantu nezilwane, ngimenze abe yincithakalo kusukela eThemani kuze kube seDedani, bayakufa ngenkemba.
Ngiyakuziphindiselela ku-Edomi ngesandla sabantu bami, u-Israyeli; bayakwenza kwa-Edomi ngokwentukuthelo yami nangokolaka lwami, bayakuyazi-ke impindiselo yami, kusho iNkosi uSimakade.” ’
“Isho kanje iNkosi uSimakade, ithi: ‘Ngenxa yokuba amaFilisti aziphindiselele, ephindisela nokuphindisela ngobubi obusenhliziyweni yawo, ukuba abhubhise ngenzondo engapheliyo,
ngalokho-ke isho kanje iNkosi uSimakade, ithi: bheka, sengizokwelulela isandla sami kumaFilisti, ngimelane nawo, ngiwabulale amaKherethi, ngibhubhise insali esogwini lolwandle.
Ngiyakuziphindiselela ngokwedlulele kubo, ngezijeziso zolaka lwami; bayakukwazi ukuthi nginguSimakade, lapho sengiziphindiselele kubo.’ ”
Kwathi ngonyaka we-11, ngosuku lokuqala enyangeni, kwafika kimi izwi likaSimakade, lathi:
“Ndodana yomuntu, njengoba iThire likhulumile mayelana neJerusalema, lathi: ‘Ashila; liphukile isango lezizwe; seliphendukele kimi; ngiyakuphumelela njengoba lona seliyincithakalo,’
ngakho-ke isho kanje iNkosi uSimakade, ithi: ‘Ngiphezu kwakho Thire; ngiyakwenyusela kuwe izizwe eziningi njengolwandle lugubha amagagasi, zimelane nawe.
Ziyakubhidliza izingange zeThire, zidilize imibhoshongo yalo. Ngiyakuyikhukhuluza imvithi yalo, ngilenze libe yidwala elingenalutho.
Liyakuba yindawo yokwendlala amanetha phakathi kolwandle, ngokuba Mina sengikhulumile, liyakuba yimpango yezizwe,’ ” kusho iNkosi uSimakade.
“ ‘ “Amadodakazi alo asezweni ayakudliwa yinkemba, ayakukwazi ukuthi nginguSimakade.
“ ‘ “Ngokuba isho kanje iNkosi uSimakade, ithi: bheka, sengizomyisa eThire uNebukhadinezari, inkosi yaseBhabhele, ukuba amelane nalo evela enyakatho, nguye oyinkosi yamakhosi; unamahhashi, izinqola zempi, abagibeli bamahhashi, nesixuku esikhulu samabutho.
Uyakuyithelekela ngenkemba imizana yakho esezweni, akhe udonga lokukuvimbezela, enze indunduma, akuphakamisele nehawu, alwe nawe.
Uyakubeka ezingangeni zakho imigoqo yakhe yokubhidliza, abhidlize imibhoshongo yakho ngemigxala yakhe.
Ngenxa yobuningi bamahhashi akhe, uyakumbozwa wuthuli lwawo, izingange zakho zizamazame ngenxa yomsindo wabagibele amahhashi, nangenxa yobukhehlekhehle bamasondo nezinqola zempi, kuthi lapho engena emasangweni akho, kube sengathi kungenwa emzini ozingange zawo zibhidliziwe.
Uyakuyigxobagxoba yonke imigwaqo yakho ngezinselo zamahhashi akhe, abulale abantu bakini ngenkemba, nezinsika zakho eziqinileyo ziwele phansi.
Bayakuwuphanga umcebo wakho, bayithathe njengempango impahla yakho ohweba ngayo. Bayakuzibhidliza izingange zakho, badilize izindlu zakho ezinhle, balahle amatshe akho, imithi yakho, nemfucuza yakho emanzini.
Ngiyakuwuqeda umsindo wezingoma zakho, nokunkeneneza kwamahabhu akho akuseyukuzwakala nanini.
Ngiyakukwenza ube yidwala elingenalutho, indawo yokwendlala amanetha; awusayukwakhiwa kabusha futhi, ngokuba Mina Simakade ngikhulumile,” ’ ” kusho iNkosi uSimakade.
“Isho kanje iNkosi uSimakade kulo iThire, ithi: ‘Iziqhingi aziyukuzamazama yini ngenxa yomsindo wokuwa kwakho, lapho abanamanxeba bebubula, nabafayo bebulawelwa kuwe na?
Zonke izikhulu zamazwe agudle ulwandle, ziyakwehla ezihlalweni zazo zobukhosi, ziyishiye phansi imijiva yazo, zikhumule izingubo zazo ezifekethisiweyo, bese zembatha ukuthuthumela, zihlale emhlabathini, zithuthumele njalo, futhi zimangale ngawe.
Ziyakukhihla isililo ngawe, zithi kuwe: “ ‘ “Maye, ngokushabalala kwakho, wena obekuhlala kuwe abasuka olwandle; muzi odumileyo, owawunamandla olwandle; wena nabakhileyo kuwe, owenza ukuba besatshwe bonke abakhileyo kuwe!
Manje iziqhingi ziyazamazama ngosuku lokuwa kwakho; ziyazamazama iziqhingi ezisolwandle ngokubhubha kwakho.” ’ ”
Isho kanje iNkosi uSimakade, ithi: “Kuyakuthi lapho ngikwenza umuzi oyincithakalo njengemizi okungahlalwa kuyo, nalapho ngikhuphulela kuwe izinzulu zolwandle, namanzi azo amaningi akusibekele,
ngiyakukwehlisa nabehlela egodini, kubantu basemandulo, ngikuhlalise ekujuleni komhlaba nabehlela egodini njengasezindaweni eziyincithakalo, kusukela emandulo, ukuze ungaphindi ubuye, ungabi nandawo futhi ezweni labaphilayo.
Ngiyakwenza isiphetho sakho sibe ngokwesabekayo, ungabe usaba bikho; uyakufunwa, kodwa awuyukutholakala kuze kube phakade,” kusho iNkosi uSimakade.
Izwi likaSimakade lafika kimi, lathi:
“Wena ndodana yomuntu, dinda isililo ngeThire,
uthi kulo iThire elingasekungeneni kolwandle, elihwebelana nezizwe eziqhingini eziningi, isho kanje iNkosi uSimakade, ithi: “ ‘Thire, wena uthi: “ ‘Ngimuhle ngiphelele.’
“ ‘Imingcele yakho isenhliziyweni yolwandle; abakhi bakho babuphelelisile ubuhle bakho.
Bakwenzele amapulangwe akho ngemisayiphuresi yaseSeniri; balanda umsedari eLebhanoni ukuba benze insika yakho.
Ngemi-okhi yaseBhashani benzile izigwedlo zakho; indawo yakho okuhanjwa kuyo bayenze ngomsayiphuresi ovela eziqhingini eKhithimi, bayihlobisa ngophondo lwendlovu.
Ilineni elicolekileyo nelifekethisiweyo elivela eGibhithe, lalinguseyili wakho nebhanela lakho; umpheme wakho wenziwe ngokuluhlaza nokubukhwebezane, uvela eziqhingini e-Elisha.
Abakhileyo eSidoni nase-Arivadi babe ngabagwedli bakho; izingcweti zakho, Thire, zazikuwe, zingabagwedli bakho.
Amalunga aseGebhali nezihlakaniphi zakhona babekuvala izimfa. Yonke imikhumbi yasolwandle namatilosi ayo babe kuwe ukuba bahwebe ngempahla yakho.
“ ‘AbasePheresiya abaseLude nabasePhuthi babesempini yakho, bengamabutho empi yakho. Baphanyeka kuwe izihlangu nezigqoko zempi; bakuhlobisa waba muhle.
Abantu base-Arivadi namabutho akho babesezingangeni zakho nxazonke, abaseGamadi besemibhoshongweni yakho; nabo baphanyeka izihlangu zabo ezingangeni zakho nxazonke; babuphelelisa ubuhle bakho.
“ ‘ITharishishi lalihwebelana nawe ngenxa yobuningi bayo yonke ingcebo yakho; behwebelana nawe ngesiliva, ngensimbi, ngethini nangomthofu.
“ ‘AbaseJavani, abaseThubhali nabaseMeshekhe babengabahwebi bakho, behwebelana nawe ngabantu nezitsha zethusi ukuba bathole impahla yakho.
“ ‘Abendlu yaseThogarma bahweba ngamahhashi, nangamahhashi empi, nangeminyuzi ngenxa yempahla yakho.
“ ‘Abantu baseDedani bahwebelana nawe; iziqhingi eziningi kwakuyizindawo zakho zokuhweba; baletha kuwe uphondo lwendlovu nezingodo ezimnyama zomthombothi, kwaba yisipho sakho.
“ ‘Abase-Aramu babengabahwebi bakho ngenxa yobuningi bomkhiqizo wakho. Bahweba ngempahla yakho ngama-emeralidu, ngokubukhwebezane, ngokufekethisiweyo, ngelineni elicolekileyo, ngekhorali nangamarubhi.
“ ‘UJuda nezwe lakwa-Israyeli babehweba kuwe; bahweba impahla yakho ngokolo waseMinithi, ngojeqe, ngoju, ngamafutha nangebhalisamu.
“ ‘AbaseDamaseku babengabathengi bakho, ngenxa yobuningi bomkhiqizo wakho, nangawo wonke umcebo wakho, bona babekuhwebela ngewayini laseHelibhoni noboya obumhlophe.
“ ‘AbaseVedani nabaseJavani bahwebelana nawe; ngensimbi ecangcathiweyo, ikhasiya nekhalamusi, kwaba ngokwakho.
“ ‘AbaseDedani babehwebelana nawe ngezindwangu zezihlalo zamahhashi ezinhle.
“ ‘Abase-Arabhiya nazo zonke izikhulu zaseKedari babethenga kuwe; babehwebelana nawe ngamawundlu, ngezinqama nangezimbuzi.
“ ‘Abahwebi baseShebha nabaseRama babethenga kuwe, behwebelana nawe ngazo zonke izinongo zekhethelo, ngawo wonke amatshe ayigugu, nangegolide.
“ ‘AbaseHarana, abaseKhane abase-Edene, abaseShebha, abase-Asiriya nabaseKilimadi babehwebelana nawe.
Babehwebelana nawe ngezingubo ezinhle, eziluhlaza nezifekethisiweyo, ngezindwangu ezimibalabala, nangemijiva eyelukwe ngezintambo eziqinileyo, ezindaweni zakho zokuhwebelana.
“ ‘Imikhumbi yaseTharishishi yayikuthwalela impahla yakho. Wathwaliswa imithwalo, wanyinyitheka kakhulu ekujuleni kolwandle.
Abagwedli bakho bakuyisa emanzini amaningi; umoya wasempumalanga wakuphahlaza phakathi kolwandle.
Ingcebo yakho, impahla yakho, abagwedli bakho, abakuvala izimfa, abahwebelana nawe; wonke amabutho, wonke akuwe, nesixuku sonke esikuwe bayakuphonseka phakathi olwandle ngosuku oyakuwa ngalo.
Amaza ayakuzamazama ngenxa yomsindo wokukhala kwabagwedli bakho.
Bonke abagwedla izigwedlo, amatilosi nabo bonke abashayeli basolwandle, bayokuma emhlabathini,
bezwakalise izwi labo kuwe, bakhale ngomunyu, bathele uthuli emakhanda abo, bahuquzele emlotheni,
baphuce amakhanda abo ngenxa yakho, babhince indwangu eyisaka, bakulilele kalusizi.
Bayakudinda isililo ngenxa yakho, bakulilele, bathi: “ ‘ “Ngubani onjengeThire, onjengothulisiweyo phakathi kolwandle na?”
“ ‘Wasuthisa abantu abaningi ngesikhathi kuphuma impahla yakho; ngobuningi bomcebo wakho nempahla yakho, wacebisa amakhosi omhlaba.
Kwathi lapho usufahlazwe ngamanzi ekujuleni kolwandle, impahla yakho naso sonke isixuku sakho kwawela kuwe.
Bonke abakhileyo eziqhingini, bamangala ngawe; amakhosi azo athuthumela, kwashwaqa izinwele ngenxa yovalo.
Abahwebi ezizweni bayakukunximfela; usuyincithakalo; awusayukuba bikho kuze kube phakade.’ ”
Izwi likaSimakade lafika kimi, lathi:
“Ndodana yomuntu, yisho kumbusi waseThire, uthi: ‘Isho kanje iNkosi uSimakade, ithi: “ ‘ “Uqhoshile enhliziyweni yakho, wathi: “ ‘ “Ngingunkulunkulu, ngihlala esihlalweni sonkulunkulu, phakathi olwandle.” “ ‘Ingani wena ungumuntu nje, awusiye unkulunkulu, nakuba wenze inhliziyo yakho yaba njengekankulunkulu.
Wena uhlakaniphile kunoDaniyeli, ayikho imfihlakalo abangakufihlela yona;
ngokuhlakanipha kwakho nangokuqonda kwakho uzizuzele ingcebo, wafaka igolide nesiliva ezinqolobaneni zakho;
ngokuhlakanipha kwakho okukhulu, ekuhwebeni wandise ingcebo yakho; inhliziyo yakho yaqhosha ngenxa yomcebo wakho.
“ ‘Ngakho-ke isho kanje iNkosi uSimakade, ithi: “ ‘ “Ngokuba inhliziyo yakho uyenze yaba njengekankulunkulu,
ngiyakuthumela kuwe abafokazi bezizwe abanonya; bayakubuhoshela izinkemba ubuhle bokuhlakanipha kwakho, bakungcolise ukukhazimula kwakho.
Bakwehlisele egodini, ufe njengofele olwandle.
Ngabe usasho yini kokubulalayo, uthi: “ ‘ “ ‘Mina ngingunkulunkulu na?’ “ ‘ “Ingani wena ungumuntu nje, awusiye unkulunkulu, ezandleni zokugwazayo.
Uyakufa ukufa kwabangasokile, ngesandla sabafokazi; ngokuba Mina ngikhulumile,” ’ ” kusho iNkosi uSimakade.
Izwi likaNkulunkulu lafika kimi, lathi:
“Ndodana yomuntu, khihla isililo ngenkosi yaseThire, uthi kuyo: ‘Isho kanje iNkosi uSimakade, ithi: “ ‘ “Wawuyisibonelo sokupheleleyo; ugcwele ukuhlakanipha, uphelele ngobuhle.
Use-Edene, ensimini kaNkulunkulu; wonke amatshe ayigugu ekusibekele; irubhi, ithopazi, idayimani, ishohamu, ijasiphi, isafire, isimaragidu, ikhrisolithe; imvunulo yakho, nezisekelo zamatshe zaziyigolide, zilungiswe ngosuku owadalwa ngalo.
Wagcotshwa waba yikherubhi elingumlindi; ngakubeka entabeni engcwele kaNkulunkulu, wahamba ematsheni omlilo.
Wawungenasici ezindleleni zakho, kusukela osukwini owadalwa ngalo kwaze kwaba lapho kutholakala okubi kuwe.
Ngokuhweba kwakho kakhulu, wagcwala ubudlova, waphambuka; ngakulahla entabeni kaNkulunkulu usungcolile, ngakubhubhisa wena kherubhi elingumlindi, wasuka ematsheni omlilo.
Inhliziyo yakho yakhukhumala ngenxa yobuhle bakho, wakonakalisa ukuhlakanipha kwakho ngokukhazimula kwakho. Ngakuqumba phansi, ngabeka amakhosi ukuba akuqaphe.
Wazingcolisa izindlu zakho ezingcwele, ngenxa yobuningi bobubi bakho, nangenxa yokuhweba kwakho okungalungile; ngenza ukuba kuqubuke umlilo kuwe, wakushisa wangqongqa. Ngakwenza waba ngumlotha emhlabathini, phambi kwabo bonke abakubonayo.
Zonke izizwe ezazikwazi zamangala ngenxa yakho; usufike esiphethweni esesabekayo, awusayukuba bikho kuze kube phakade.” ’ ”
Izwi likaSimakade lafika kimi, lathi:
“Ndodana yomuntu, bhekisa ubuso bakho eSidoni, uphrofethe umelene nalo,
uthi kulo: ‘Isho kanje iNkosi uSimakade, ithi: “ ‘ “Bheka, ngimelene nawe Sidoni; ngiyakudunyiswa ngawe, abantu bayakukwazi ukuthi nginguSimakade, lapho sengilehlulela, ngizibonakalise ngingcwele kulo.
Ngiyakuthumela kulo ubhubhane negazi ligeleze emigwaqweni yalo. Abadliwe yinkemba bayakudindiliza kulo nxazonke, bayakukwazi ukuthi nginguSimakade.
“ ‘ “Akusayukuba bikho makhakhasi nameva okuhlabayo nokulimazayo endlini yakwa-Israyeli, kusukela kulabo abazungeze nxazonke nalabo ababadelelayo; bayakukwazi ukuthi ngiyiNkosi uSimakade.
“ ‘ “Isho kanje iNkosi uSimakade, ithi: kuyakuthi lapho sengibaqoqa abendlu yakwa-Israyeli ezizweni abahlakazelwe kuzo, ngizibonakalise ngingcwele kubo, nasemehlweni ezizwe. Bayakuhlala ezweni labo engalinika inceku yami, uJakobe.
Bahlale kulo belondekile, bakhe izindlu, batshale izivini, bahlale bevikelekile, ngesikhathi ngibehlulela bonke ababedelelayo ababazungeze nxazonke, bayakukwazi ukuthi nginguSimakade uNkulunkulu wabo.” ’ ”
Ngonyaka weshumi, ngenyanga yeshumi, ngosuku lwe-12 enyangeni, izwi likaSimakade lafika kimi, lathi:
“Ndodana yomuntu, bhekisa ubuso bakho kuFaro, inkosi yaseGibhithe, uphrofethe umelene naye nalo lonke iGibhithe,
ukhulume uthi: ‘Isho kanje iNkosi uSimakade, ithi: “ ‘ “Bheka, ngimelene nawe Faro, nkosi yaseGibhithe, silwanekazi sasolwandle, obuthisa emifuleni yakho, uthi: “ ‘ “Umfula ungowami, ngiwenze mina.”
“ ‘Ngiyakufaka amahhuku emihlathini yakho, nginamathelise izinhlanzi zemifula yakho ezingcwecweni zakho, ngikukhuphule emifuleni yakho nazo zonke izinhlanzi zemifula yakho ezinamathele ezingcwecweni zakho.
Ngiyakukulahla ehlane, wena nazo zonke izinhlanzi zemifula yakho, uwe ebusweni bomhlaba; awuyukubuthwa, noma ucoshwe; ngiyakukunikela ezilwaneni zomhlaba, nasezinyonini zezulu, ube ngukudla kwazo.
Bonke abakhileyo eGibhithe bayakukwazi ukuthi Mina nginguSimakade, ngokuba bebeludondolo lomhlanga lwendlu yakwa-Israyeli.
Kuthe lapho bekubamba ngesandla, wephuka, waklunyula amahlombe abo; nalapho bencika kuwe, waphoqoka, wazintengantengisa zonke izinkalo zabo.
“ ‘Ngalokho-ke, isho kanje iNkosi uSimakade, ithi: uyabona-ke, sengizokwehlisela phezu kwakho inkemba, ngibulale abantu bakini nemfuyo yakho.
IGibhithe lizoba yincithakalo nehlane, bazokwazi ukuthi nginguSimakade, ngokuba wathi: “INayili ingeyami, ngiyenze mina.”
“ ‘Ngalokho-ke ngimelene nawe nemifula yakho. IGibhithe ngiyakulenza libe yincithakalo, imbubhiso nehlane, kusukela eMigidoli kuye eSevene, kuze kube semngceleni eKhushe.
Akukho nyawo lwamuntu nanselo yasilwane okuyakudabula kulo, futhi aliyukuhlalwa muntu iminyaka engama-40.
Ngiyakwenza iGibhithe libe yincithakalo emazweni asenziwe incithakalo, kuthi imizi yalo esemizini esiyincithakalo, nayo ibe yincithakalo iminyaka engama-40. AbaseGibhithe ngiyakubahlakazela ezizweni, ngibasabalalisele emazweni.
“ ‘Ngokuba isho kanje iNkosi uSimakade, ithi: “Ngasekupheleni kweminyaka engama-40, ngiyakubaqoqa abaseGibhithe kubantu abahlakazekelwe kubo,
ngibabuyise ekuthunjweni, ngibabuyisele ePhathirosi, izwe abadabuka kulo, babe ngumbuso othobekileyo lapho.
IGibhithe liyakuba ngumbuso othobekileyo kuneminye imibuso, futhi alisayukuziphakamisa kwezinye izizwe, ngiyakulithena amandla ukuba lingazibusi izizwe.
Alisayukuba yithemba labendlu yakwa-Israyeli, kodwa liyakuba yisikhumbuzo sokona kwabo, lapho bephendukela kulo becela usizo, bayakukwazi ukuthi Mina ngiyiNkosi uSimakade.” ’ ”
Kwathi ngonyaka wama-20, ngenyanga yokuqala, ngosuku lokuqala enyangeni, izwi likaSimakade lafika kimi, lathi:
“Ndodana yomuntu, uNebukhadinezari, inkosi yaseBhabhele, wawasebenzisa kanzima amabutho akhe ngesikhathi emelene neThire. Wonke amakhanda enziwa izimpandla, namahlombe wonke aklunyulwa, kodwa yena namabutho akhe abakhokhelwanga lutho ngomsebenzi wabo wokuhlasela iThire.
Ngalokho-ke isho kanje iNkosi uSimakade, ithi: ‘Bheka, sengizonika uNebukhadinezari, inkosi yaseBhabhele, iGibhithe; uzoyithatha ingcebo yalo, aphange impango yalo, bese ethatha impango yalo, ibe yinkokhelo yamabutho akhe.
Ngimnike iGibhithe ukuba libe yinkokhelo yakhe ngokuzikhandla kwakhe, ngokuba yena namabutho akhe bakwenzele Mina lokho,’ ” kusho iNkosi uSimakade.
“ ‘Ngalolo lusuku ngizokwenza abendlu yakwa-Israyeli badlondlobale ngamandla, ngikuvumele ukuba ukhulume kubo, bazokwazi ukuthi nginguSimakade.’ ”
Izwi likaSimakade lafika kimi, lathi:
“Ndodana yomuntu, phrofetha uthi: ‘Isho kanje iNkosi uSimakade, ithi: “ ‘Lilani, nithi: “ ‘ “Maye, ngalolo lusuku!”
“ ‘Ngokuba usuku luseduze, usuku lukaSimakade selusondele; luzokuba lusuku lwamafu nesikhathi senhlekelele kwabezizwe.
Inkemba izokwehlela eGibhithe, kube nobumayemaye eKhushe, lapho abagwaziweyo befumbeka phansi eGibhithe; bazoyithatha ingcebo yalo, kudilizwe nezisekelo zalo.
“ ‘IKhushe, iPhuthi, iLude, neKhubi, nabantu bezwe abenze isivumelwano nabo bazokufa ngenkemba.
“ ‘Usho kanje uSimakade, uthi: “ ‘Nalabo ababesekela iGibhithe bazoqumbeka phansi, nokuzigqaja ngamandla alo kuzophela nya; bazodliwa yinkemba bekulo, kusukela eMigidoli kuze kube seSevene,’ ” kusho iNkosi uSimakade.
“ ‘Bazokuba yincithakalo emazweni aseyincithakalo, imizi yalo ibe semizini ebhidliziweyo.
Bazokwazi ukuthi nginguSimakade, lapho sengithungela ngomlilo iGibhithe, bacoboshiswe bonke abangumfelandawonye nalo.
“ ‘Ngalolo lusuku kuyakuphuma izithunywa ngemikhumbi zivela kimi, ukuba zilesabise iKhushe elinethezekileyo, kube nobumayemaye kulo ngosuku lwenhlekelele eGibhithe, ngokuba bheka, luyeza usuku.
“ ‘Isho kanje iNkosi uSimakade, ithi: “ ‘ “Isixuku saseGibhithe ngiyakusiqeda nya, ngesandla sikaNebukhadinezari, inkosi yaseBhabhele.
Yena nabantu bakhe nabezizwe abanonya, bayakuthunyelwa ukuba balibhubhise izwe, iGibhithe balihoshele izinkemba zabo, izwe baligcwalise ngababuleweyo.
Ngiyakwenza imifula ishe, ngithengise ngezwe esandleni sababi; izwe nakho konke okukulo, ngilibhubhise ngesandla sabafokazi, ngokuba Mina Simakade sengikhulumile.”
“ ‘Isho kanje iNkosi uSimakade, ithi: “ ‘Ngiyakuzishabalalisa izithombe, ngibaqede nya onkulunkulu abayize eNofi; akusayukuba bikho nkosana evela eGibhithe; ngiyakulifaka ingebhe iGibhithe.
IPhathirosi ngiyakulenza libe lihlane, ngiphembe umlilo eZowani, ngilijezise iNo.
Ngiyakuthululela ulaka lwami phezu kweSini, inqaba yaseGibhithe, ngibulale isixuku saseThebe.
Ngiyakuthungela umlilo eGibhithe; iSini libinyabinyeke ezinhlungwini, iThebe ibhodlozwe, iMemfisi ihlaselwe emini.
Izinsizwa zase-Aveni nasePhi Bhesethi ziyakufa ngenkemba, abahlala emizini bathunjwe.
Usuku luyakuba mnyama eThehafenehesi, lapho nginqamula khona amajoka aseGibhithe; nokuzikhukhumeza ngamandla alo kuyakuphela kulo. Liyakusitshekelwa yifu, kuthunjwe nabahlala emizaneni yalo.
Ngiyakulijezisa iGibhithe, futhi bayakukwazi ukuthi nginguSimakade.’ ”
Kwathi ngonyaka we-11, ngenyanga yokuqala, ngosuku lwesikhombisa, izwi likaSimakade lafika kimi, lathi:
“Ndodana yomuntu, ngiyephulile ingalo kaFaro inkosi yaseGibhithe; ayiboshiwe ukuba yelapheke, noma izongolozelwe ukuba iqine ikwazi ukubamba inkemba.
Ngakho-ke isho kanje iNkosi uSimakade, ithi: ‘Uyabona-ke, ngimelene noFaro, inkosi yaseGibhithe; ngiyakuzephula izingalo zakhe, eqinileyo neyephukileyo, ngenze ukuba inkemba iwe esandleni sakhe.
AbaseGibhithe ngiyakubahlakazela ezizweni, ngibasabalalise emazweni.
Ngiyakuziqinisa izingalo zenkosi yaseBhabhele, ngibeke inkemba yami esandleni sayo, kepha ngiyakuzephula izingalo zikaFaro, abubule phambi kwayo njengokububula komuntu olinyaziweyo.
Yebo, ngiyakuziqinisa izingalo zenkosi yaseBhabhele, bese kuthi izingalo zikaFaro ziyethe. Bayakukwazi ukuthi nginguSimakade, lapho sengibeka inkemba yami esandleni senkosi yaseBhabhele; yona iyakuyelulela phezu kweGibhithe, imelane nalo.
AbaseGibhithe ngiyakubahlakazela ezizweni, ngibasabalalise emazweni, bayakukwazi ukuthi nginguSimakade.’ ”
Kwathi ngonyaka we-11, ngenyanga yesithathu, ngosuku lokuqala enyangeni izwi likaSimakade lafika kimi, lathi:
“Ndodana yomuntu, khuluma kuFaro, inkosi yaseGibhithe nasesixukwini sakhe, uthi: “ ‘Ngubani ongalinganiswa nawe ngobukhulu na?
Cabanga nje i-Asiriya, elalingumsedari waseLebhanoni; unamagatsha amahle, namaqabunga anomthunzi, nesiqu esiphakemeyo; isihloko sawo sifinyelela emafini.
Amanzi awukhulisa, izinzulu zemithombo zawuphakamisa. Imifula yawo yayigeleza nxazonke lapho utshalwe khona; yayisithumela imifudlana yayo kuzo zonke izihlahla zasendle.
Ngalokho-ke isiqu sawo sasiphakeme kunayo yonke imithi yasendle; amagatsha awo aba makhulu, namagatsha awo enaba ngenxa yamanzi amaningi.
Zonke izinyoni zezulu zakha izidleke zazo emagatsheni awo, izilwane zonke zasendle zazalela phansi kwamagatsha awo; zonke izizwe ezinkulu zahlala phansi komthunzi wawo.
Wawumuhle ngobukhulu bawo, nangobude bamagatsha awo, ngokuba izimpande zawo zazilapho kunamanzi amaningi khona.
Imisedari esensimini kaNkulunkulu yayingenakuwusitha; imisayiphuresi ingafani namagatsha awo, nemiphelathani ingenjengamagatsha awo, kungekho nowodwa umuthi ensimini kaNkulunkulu ofana nawo ngobuhle.
Ngawenza waba muhle ngobuningi bamagatsha awo, yonke imithi yase-Edene eyayisensimini kaNkulunkulu, yaba nomhawu ngawo.
“ ‘Ngakho-ke isho kanje iNkosi uSimakade, ithi: “Njengoba ubuphakeme ngobude, wafinyelelisa isihloko sawo phakathi kwamafu, nenhliziyo yawo yazikhukhumeza ngenxa yokuphakama kwawo,
ngiyakuwunikela esandleni somholi wezizwe, impela yena uyakwenza okufanele kuwo ngangokukhohlakala kwawo, bese ngiwuxosha.
Abafokazi bezizwe ezinonya, bawunqumile, base bewushiya. Amagatsha awo awele ezintabeni nasezigodini, kwathi amagatsha awo aphukela kuyo yonke imifudlana yezwe, futhi bonke abantu basukile emthunzini wawo, bawushiya kanjalo.
Kuyakuhlala zonke izinyoni zezulu esiqwini sawo, zonke izilwane zasendle zibe semagatsheni awo,
ukuba kungabi bikho muthi ongasemanzini, oyakuba mude ngokuphakama kwawo, ungasifinyelelisi isihloko sawo emafini, futhi kungabi bikho mithi eyophuza amanzi, ikhule ibe mide ngangawo, ngokuba yonke inikelwe ekufeni phansi komhlaba, ebantwaneni babantu, labo abehlela egodini.” ’
“ ‘Isho kanje iNkosi uSimakade, ithi: “Ngosuku owehlela ngalo endaweni yabafileyo, ngenza ukuba izinzulu ziwulilele, ngawusibekela, ngavimba imifula yalo, namanzi amaningi awangageleza. ILebhanoni ngalifaka inzilo ngenxa yawo; imithi yonke yasendle yadangala ngawo.
Izizwe ngazithuthumelisa ngomsindo wokuwa kwawo, lapho ngiwehlisela endaweni yabafileyo, nalabo abehlela egodini. Yaduduzwa phansi komhlaba yonke imithi yase-Edene ekhethekileyo neyaseLebhanoni emihle, nayo yonke eniseliweyo.
Labo ababehlala emthunzini wawo, nezizwe ezazingumfelandawonye nawo, nabo behlela nawo endaweni yabafileyo, baya kulabo ababebulawe ngenkemba.
“ ‘ “Pho yimuphi umuthi wase-Edene ongalinganiswa nawe ngodumo nangobukhulu na? Nokho uyakwehliselwa phansi komhlaba nemithi yase-Edene, ulale nabangasokile nababulawe ngenkemba. Lowo-ke nguFaro, naso sonke isixuku sakhe,” ’ ” kusho iNkosi uSimakade.
Kwathi ngonyaka we-12, ngenyanga ye-12, ngosuku lokuqala enyangeni, izwi likaSimakade lafika kimi, lathi:
“Ndodana yomuntu, khihla isililo ngoFaro, inkosi yaseGibhithe, uthi kuye: “ ‘Wazifanisa nebhongo lengonyama ezizweni, kepha unjengesilwanekasi sasolwandle, lapho utheleka emifuleni yakho, ushaya idadamu ngezinyawo zakho, udunge imifula.’
“ ‘Isho kanje iNkosi uSimakade, ithi: “ ‘Ngiyakwendlala inetha lami phezu kwakho, phakathi kwesixuku sabantu abaningi, bakukhuphule ngenetha lami.
Ngiyakukulaxaza emhlabathini, ngikuntshinge endle, ngihlalise phezu kwakho zonke izinyoni zezulu, ngizisuthise ngawe zonke izilwane zomhlaba.
Ngiyakubeka inyama yakho ezintabeni, ngigcwalise izigodi ngezimpethu zakho.
Izwe ngiligcwalise ngegazi eliyakugeleza liphuma kuwe, kuze kube sezintabeni, imifula igcwaliswe ngokuphuma kuwe.
Kuyakuthi lapho sengiqeda nya ngawe, ngisibekele amazulu, ngenze izinkanyezi zawo zibe mnyama, ngilemboze ngefu ilanga, nenyanga ingakhanyisi ngokukhanya kwayo.
Zonke izikhanyisi ezikhanyayo emazulwini ngiyakuzenza zibe mnyama phezu kwakho, ngehlisele ubumnyama ezweni lakho, kusho iNkosi uSimakade.
Ngiyakuzikhathaza izinhliziyo zezizwe eziningi, lapho sengiletha ukubhujiswa kwakho ezizweni, emazweni ongawazanga.
Ngiyakwenza ukuba abantu abaningi bamangale ngawe, amakhosi abo agedezele wuvalo lapho ngisikaza ngenkemba yami phambi kwawo. Ngosuku lokuwa kwakho, yileyo naleyo iyakuthuthumela umzuzu nomzuzu ngenxa yempilo yayo.
“ ‘Ngokuba isho kanje iNkosi uSimakade, ithi: “ ‘ “Inkemba yenkosi yaseBhabhele iyakuza kuwe.
Ngiyakusiqumba phansi isixuku sakho, ngenkemba yezizwe zonke ezinonya; ziyakukuqeda nya ukuzigqaja kweGibhithe, naso sonke isixuku salo siyakubhujiswa.
Ngiyakuyibhubhisa yonke imfuyo yalo engasemanzini amaningi, angabe esanyakaziswa lunyawo lwamuntu, nenselo yemfuyo ingawadungi.
Ngiyakwenza ukuba amanzi abo abohle, ngigelezise imifula yabo njengamafutha,” ’ ” kusho iNkosi uSimakade.
“ ‘ “Kuyakuthi lapho iGibhithe sengilenze laba yincithakalo nehlane, izwe eseliphundlwe konke obekugcwele kulo, lapho sengibulala zonke izakhamuzi zalo, kulapho-ke beyakukwazi khona ukuthi nginguSimakade.
“ ‘ “Leso-ke yisililo abantu abayakusihlabelela. Amadodakazi ezizwe ayakusihlabelela, elilela iGibhithe naso sonke isixuku salo,” ’ ” kusho iNkosi uSimakade.
Kwathi ngonyaka we-12, ngosuku lwe-15 enyangeni, izwi likaSimakade lafika kimi, lathi:
“Ndodana yomuntu, lilela isixuku saseGibhithe, usehlisele phansi komhlaba, namadodakazi ezizwe ezinamandla, nalabo abehlela egodini.
Khuluma kubo uthi: ‘Wena udlula bani ngobuhle na? Yehla, ulaliswe nabangasokile.’
Bayakuwela kulabo ababulawe ngenkemba; inkemba seyihoshiwe, lihuduleni naso sonke isixuku salo.
Abaholi bamaqhawe bayakukhuluma ngalo nangomfelandawonye walo, besendaweni yabafileyo, bathi: ‘Sebehlile, sebelele nabangasokile, labo ababulawe ngenkemba.’
“Lapho kukhona i-Asiriya neviyo lalo lonke, amathuna alo alizungeze nxazonke, bonke bafe ngenkemba.
Amathuna alo asekujuleni kwegodi, iviyo lalo lizungeze ithuna nxazonke, bonke labo abafake ingebhe ezweni labaphilayo babulewe, bafe ngenkemba.
“Lapho kukhona i-Elamu naso sonke isixuku salo nxazonke zethuna, babulawe bonke, baqunjwa phansi ngenkemba, behlela phansi komhlaba bengasokile, labo abafake ingebhe ezweni labaphilayo; sebethwele ihlazo nalabo abehlela egodini.
I-Elamu balilungisele umbhede naso sonke isixuku salo, amathuna alo alizungeze nxazonke, bonke abangasokanga babulawe ngenkemba, ngokuba benza ukuba besatshwe ezweni labaphilayo, sebethwele ihlazo labo nalabo abehlela egodini; yebo, balele nababuleweyo.
“Lapho kukhona uMeshekhe, uThubhali, naso sonke isixuku sabo esizungeze amathuna abo nxazonke, bonke abangasokanga, babulawe ngenkemba, ngokuba bafaka ingebhe ezweni labaphilayo.
Abalali yini namabutho angasokile asebulewe, ehlela endaweni yabafileyo nezikhali zawo zempi, nezinkemba zawo ezabekwa phansi kwamakhanda awo na? Isijeziso sokona kwawo sasisemathanjeni awo, nakuba ukwesatshwa kwamabutho kwakusezweni labaphilayo.
“Nawe uyakuphoqozwa, ulale nabangasokile nababulawe ngenkemba.
“Lapho kukhona u-Edomi, amakhosi akhe, nazo zonke izikhulu zakhe, okuthe nakuba bebengamaqhawe nokho balaliswa nababulawe ngenkemba, abangasokile, nalabo abehlela egodini.
“Lapho kukhona zonke izikhulu zasenyakatho, nabo bonke abaseSidoni, abehlele phansi nababuleweyo. Babesatshwa ngenxa yobuqhawe babo, kepha sebehlazekile, balale bengasokile nababulawe ngenkemba, bathwele ihlazo labo nalabo abehlele egodini.
“UFaro uyakubabona, aduduzeke ngaso sonke isixuku sakhe, yena nawo wonke amabutho akhe babulawe ngenkemba,” kusho iNkosi uSimakade.
“Ufake uvalo ezweni labaphilayo, kepha uyakulaliswa phakathi kwabangasokile nalabo ababulawe ngenkemba, uFaro nezinkumbi zakhe,” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, khuluma kubantu bakini, uthi kubo: ‘Ngiyakwehlisela inkemba phezu kwezwe, bese abantu bakhona bekhetha omunye umuntu phakathi kwabo, bambeke abe ngumlindi wabo,
kuyothi lapho yena esebona kwehlela inkemba phezu kwezwe, ashaye icilongo, axwayise abantu.
Umuntu oyokuzwa ukukhala kwecilongo nokho angaxwayi, kuthi inkemba yehle imbhubhise, igazi lakhe liyakuba sekhanda lakhe.
Ngokuba ukuzwile ukukhala kwecilongo nokho akaze exwaya; igazi lakhe liyakuba kuye, ngokuba ukuba ubexwayile, ngabe uyisindisile impilo yakhe.
Kepha-ke uma umlindi eyibonile inkemba yehla, akaze alishaya icilongo ukuba abantu baxwaye, inkemba ize yehlele kubo, ibhubhise umuntu phakathi kwabo, lowo muntu uyakubhubha ngenxa yokona kwakhe, kodwa igazi lakhe ngiyakulibiza esandleni somlindi.’
“Ndodana yomuntu, wena-ke, ngikubeke umlindi wendlu yakwa-Israyeli. Lalela ilizwi eliphuma emlonyeni wami, ubaxwayise, lokho kuvela kimi.
Kuyakuthi lapho ngithi komubi: ‘Muntu omubi, uyakufa nokufa,’ bese wena ungakhulumi ukuba uxwayise umuntu omubi ayishiye indlela yakhe, lowo muntu omubi uyakufa ngenxa yokona kwakhe, kodwa igazi lakhe ngiyakulibiza kuwe.
Kepha uma umxwayisile omubi ukuba ayishiye indlela yakhe, nokho yena akaze ayishiya indlela yakhe, uyakufa nokufa ngenxa yobubi bakhe, kodwa wena uyakube uyihlengile impilo yakho.
“Wena ndodana yomuntu, tshela indlu yakwa-Israyeli, uthi kuyo: ‘Nisho kanje, nithi: “Ngenxa yokuthi iziphambeko zethu nezono zethu kuphezu kwethu, siyazaca ngenxa yazo, pho-ke sizophila kanjani na?” ’
“Batshele, uthi kubo: ‘Ngifunga ngiyagomela, kusho iNkosi uSimakade, angithokoziswa ngukufa komubi, kodwa ngithokoza uma isoni siphenduka endleleni yaso, siphile. Phendukani, nishiye izindlela zenu ezimbi, nina ndlu yakwa-Israyeli niyakufelani na?’
“Kepha wena ndodana yomuntu, batshele abantu bakini, uthi kubo: ‘Ukulunga kolungileyo akusoze kwamsindisa ngosuku ayokona ngalo, nokona komubi akuyukumkhubekisa ngosuku ayophenduka ngalo ekuphambukeni kwakhe, nolungileyo akayukuphila ngakho ngosuku lokona kwakhe.’
“Kuyakuthi lapho ngithi kolungileyo uyakuphila nokuphila, kodwa yena ethembele ekulungeni kwakhe, bese enza okubi; akusayukukhunjulwa ngisho nesisodwa sezenzo zakhe ezilungileyo, kepha uyakufela ebubini abenzileyo.
Lapho ngithi komubi: ‘Uyakufa nokufa,’ bese yena ephenduka esonweni sakhe, enze okufaneleyo nokulungileyo,
yena lowo omubi abuyise isibambiso, akhokhe ayekuthathile, ahambe ngezimiso zokuphila, angakwenzi okubi, impela uyakuphila, angafi.
Akayukukhunjulelwa nesisodwa sezono zakhe azenzileyo, ngokuba ukwenzile okufaneleyo nokulungileyo; uyakuphila.
“Kepha abantu bakini, bathi: ‘Indlela yeNkosi ayilungile.’ Kepha yindlela yabo engalungile.
Lapho olungileyo eyeka ukwenza okulungileyo, bese enza okubi, uyakufela kukho.
Nalapho omubi ephenduka ebubini bakhe, enze okufaneleyo nokulungileyo, uyakuphila ngakho.
Nokho nisho kanje, nithi: ‘Indlela yeNkosi ayilungile.’ “Nina ndlu yakwa-Israyeli ngiyakunehlulela, kube yilowo nalowo ngokwenza kwakhe.”
Kwathi ngonyaka we-12 wokuthunjwa kwethu, ngosuku lweshumi enyangeni, kwafika kimi ophunyukileyo eJerusalema, wathi: “Umuzi unqotshiwe.”
Kwathi kusihlwa, engakafiki lowo owayekade ephunyuke eJerusalema, isandla sikaSimakade saba phezu kwami, wawuvula umlomo wami engakafiki kimi ekuseni. Wavulwa-ke umlomo wami, angabe ngisaba yisimungulu.
Izwi likaSimakade lafika kimi, lathi:
“Ndodana yomuntu, izakhamuzi ezindaweni ezichithakele kwa-Israyeli, zithi: ‘U-Abhrahama wayeyedwa, wadla ifa lezwe, kodwa thina sibaningi, siliphiwe lona libe yifa lethu.’
Ngakho-ke batshele lokhu, uthi kubo: ‘Isho kanje iNkosi uSimakade, ithi: “Nina nidla okunegazi, niphakamisa amehlo enu ezithombeni zenu, nichitha igazi. Pho niyakulidla kanjani izwe libe yifa lenu na?
Nethembele enkembeni yenu, nenza izinengiso; ningcolisa, kube yilowo nalowo umkamakhelwane wakhe. Pho-ke niyakulidla kanjani izwe libe yifa lenu na?” ’
“Uyakuthi kubo: ‘Isho kanje iNkosi uSimakade, ithi: “Ngifunga ngiyagomela ngithi, labo abasezindaweni ezichithakele impela bayokufa ngenkemba, osendle ngiyakumnikela ezilwaneni ukuba zimudle, nabasezinqabeni nasemigedeni bayobulawa wubhubhane.
Izwe ngiyakulenza libe yincithakalo neze, ukuzidla ngamandla alo kuyakuphela nya; izintaba zakwa-Israyeli ziyakubhujiswa ukuze kungabi bikho odlula kuzo.
Kulapho-ke bayakungazi khona ukuthi nginguSimakade, lapho izwe sengilenze laba yincithakalo neze, ngenxa yazo zonke izinengiso zabo abazenzileyo.” ’
“Wena-ke ndodana yomuntu, abantu bakini bakhuluma ngawe ngasezindongeni naseminyango yezindlu, bakhuluma omunye komunye, omunye kumfowabo, bathi: ‘Woza uzokuzwa ukuthi yizwi elithini elivela kuSimakade.’
Bafika kuwe bengabantu, bahlale phambi kwakho njengabantu bami, balalele amazwi akho, nokho abawagcini. Ngomlomo wabo babonakalisa uthando olukhulu, kodwa inhliziyo yabo ibe ilandela inzuzo yabo engafanele.
Uyabona-ke, unjengesihlabelelo sothando, unephimbo elimnandi kubo, ulushaya kamnandi ugubhu, bayawezwa amazwi akho, kodwa abenzi lutho ngawo.
“Kuyakuthi lapho sekwenzeka lokhu; ngempela kuyeza, bayokwazi lapho ukuthi kwakukhona umphrofethi phakathi kwabo.”
Izwi likaSimakade lafika kimi, lathi:
“Ndodana yomuntu, phrofetha umelane nabelusi bakwa-Israyeli; phrofetha uthi kubo: ‘Isho kanje iNkosi uSimakade, ithi: “Maye, kubelusi bakwa-Israyeli abazicabangela bona! Kanti abelusi akumele yini ukuba beluse izimvu na?
Nina nidla amanoni, nembathe uboya, nihlabe ezikhulupheleyo, kodwa izimvu anizelusi.
Ezibuthakathaka aniziqinisi, egulayo aniyelaphi, elahlekileyo aniyicingi, kodwa niziphatha ngendlakadla.
Bezihlakazekile ngenxa yokweswela umelusi; zahlakazeka zaba ngukudla kwazo zonke izilwane zasendle.
Izimvu zami bezizulazula kuzo zonke izintaba nakuwo wonke amagquma aphakemeyo. Yebo, izimvu zami zazihlakazekele ebusweni bonke bomhlaba, akwaba bikho ozifunayo nozicingayo.
“ ‘ “Ngakho-ke belusi, yizwani izwi likaSimakade elithi:
ngifunga ngiyagomela,” ’ ” kusho iNkosi uSimakade, “ ‘ “impela ngenxa yokuthi izimvu zami zaba yimpango, futhi zaba ngukudla kwazo zonke izilwane zasendle, lokhu zingenamelusi, nokuthi abelusi bami abangazange bazicinge, baba ngogombela kwesabo, bangazelusa izimvu zami,
ngalokho-ke yizwani izwi likaSimakade, belusi, elithi:
isho kanje iNkosi uSimakade, ithi: bhekani-ke, ngimelene nabelusi, ngizozifuna izimvu zami esandleni sabo, ngenze ukuba bangabe besazelusa, futhi bangabe besaba ngogombela kwesabo. Ngizohlenga izimvu zami emlonyeni wabo, zingabe zisaba ngukudla kwabo.”
“ ‘Isho kanje iNkosi uSimakade, ithi: “Mina ngizozicinga izimvu zami, ngizifune.
Njengalokhu umelusi ewufuna umhlambi wakhe lapho uhlakazekile, kanjalo-ke ngiyakuzifuna izimvu zami, ngizihlenge kuzo zonke izindawo ezihlakazelwe kuzo ngosuku lwamafu nesigayegaye sobumnyama.
Ngiyakuzikhipha ezizweni, ngiziqoqe emazweni, ngiziyise ezweni lazo, bese ngizelusela ezintabeni zakwa-Israyeli, nangasemifuleni, nasezindaweni zonke okuhlalwa kuzo ezweni.
Ngiyakuzelusela emadlelweni amahle; amadlelo azo ayakuba sezintabeni eziphakemeyo kwa-Israyeli. Ziyakubuthisa emadlelweni amahle, ziklabe emadlelweni aluhlaza ezintabeni kwa-Israyeli.
Ngiyakuzelusela Mina izimvu zami, ngizenze zibuthise,” kusho iNkosi uSimakade.
“Ezilahlekileyo ngiyakuzifuna, ngizibuyise ezidukileyo, ngibophe ezaphukileyo, ngiqinise ezigulayo, kodwa ezikhulupheleyo nezinamandla ngiyakuzibhubhisa; ngiyakuzinakekela ngobulungiswa.
“ ‘ “Nina-ke zimvu zami, isho kanje iNkosi uSimakade, ithi: ngiyakwehlulela phakathi kwemvu nemvu naphakathi kwezinqama nezimpongo.
Kuyize yini kini ukuba niklabe edlelweni elihle bese ninyathela ngezinyawo zenu okuseleyo edlelweni lenu, nokuba niphuze amanzi acwebileyo qede niwadunge ngezinyawo zenu aseleyo na?
Izimvu zami zidla okudovadovwe ngezinyawo zenu, ziphuza okudungwe yizinyawo zenu.
“ ‘ “Ngakho-ke isho kanje iNkosi uSimakade kuzo, ithi: Mina ngiyakwehlulela phakathi kwezimvu ezikhulupheleyo nalezo ezondileyo.
Ngokuba nizisunduza ngohlangothi nangehlombe, niqhubukusha zonke ezigulayo ngezimpondo zenu, nize nizihlakazele ngaphandle,
ngiyakuzisindisa izimvu zami, azisayukuba yimpango, bese ngehlulela phakathi kwezimvu nezimvu.
Ngiyakubeka kuzo umelusi, azeluse: inceku yami uDavide; uyakuzelusa, abe ngumelusi wazo.
Mina Simakade ngiyakuba nguNkulunkulu wazo, inceku yami uDavide ibe yisikhulu kuzo; Mina Simakade ngikhulumile.
“ ‘ “Ngiyakwenza nazo isivumelwano sokuthula, ngiqede izilwane ezimbi ezweni, zihlale zilondekile ehlane, zilale emahlathini.
Ngiyakuzibusisa zona nezindawo ezizungeze intaba yami, ngehlise imvula ngesikhathi sayo, ibe yizihlambi zesibusiso.
Umuthi osendle uyakuthela izithelo zawo, umhlabathi ukhiqize ukudla kwawo, zihlale zilondekile ezweni lazo; ziyakukwazi ukuthi nginguSimakade, lapho sengizaphulile izikeyi zejoka lazo, futhi ngazihlenga esandleni salabo ababezenze izikhonzi zabo.
Azisayukuba yimpango yabezizwe, nesilwane somhlaba asiyukuzidla, kepha ziyakuhlala ngokulondeka, zingesatshiswa muntu.
Ngiyakuzivusela insimu edumileyo; azisayukususwa yindlala ezweni, azisayukulithwala ihlazo labezizwe.
Ziyakukwazi ukuthi Mina Simakade uNkulunkulu wazo nginazo, nokuthi zona, indlu yakwa-Israyeli, zingabantu bami,” ’ ” kusho iNkosi uSimakade.
“ ‘ “Nina niyizimvu zami, niyizimvu zedlelo lami, nabantu bami, Mina nginguNkulunkulu wenu,” ’ ” kusho uSimakade.
Izwi likaSimakade lafika kimi, lathi:
“Ndodana yomuntu, bhekisa ubuso bakho ngasentabeni iSeyiri uphrofethe umelane nayo,
uthi kuyo, ‘Isho kanje iNkosi uSimakade, ithi: “Ngimelene nawe ntaba iSeyiri; ngiyakwelulela isandla sami kuwe, ngikushaye, ngikwenze ube yincithakalo neze.
Imizi yakini ngiyakuyenza ibe yihlane, wena ube yincithakalo; uyakukwazi ukuthi nginguSimakade.
“ ‘ “Ngenxa yokuba unobutha obungapheliyo, futhi unikele abakwa-Israyeli ukuba badliwe yinkemba lapho behlelwa yisigemegeme, ngesikhathi bethola isijeziso sabo sokugcina,
ngakho-ke ngifunga ngiyagomela,” ’ ” kusho iNkosi uNkulunkulu, “ ‘ “ngiyakukunikela ekuchithekeni kwegazi, ukuchitheka kwegazi kube yinsakavukela kuwe, ngokuba awukuzondi ukuchitha igazi.
Intaba iSeyiri ngiyakuyenza ibe yincithakalo neze, ngimbulale odlula kuyo nobuya kuyo.
Ngiyakugcwalisa izintaba zayo ngababuleweyo bayo, abagwazwe ngenkemba bayakuwela emagqumeni akho, ezigodini zakho, nakuyo yonke imifula yakho.
Ngiyakukwenza incithakalo yaphakade, imizi yakini ingabe isahlala muntu, ukuze nazi ukuthi nginguSimakade.
“ ‘ “Ngokuba wathi: ‘Lezi zizwe ezimbili nalawa mazwe amabili kuyakuba ngokwami, ngidle ifa lakho,’ nakuba uSimakade ebelapho,
ngakho-ke ngifunga ngiyagomela,” ’ ” kusho iNkosi uSimakade, “ ‘ “ngiyakwenza njengolaka lwakho nanjengomhawu wakho obafele wona ngokubazonda kwakho, ngizazise kubo, lapho sengikwehlulela.
Kulapho-ke uyokwazi khona ukuthi nginguSimakade. Ngiyizwile yonke inhlamba yakho oyithuke usezintabeni zakwa-Israyeli, uthi: Yincithakalo; siphiwe zona ukuba sizidle.
“ ‘ “Nizikhukhumezile kimi ngomlomo wenu, naphindaphinda amazwi enu. Mina ngizwile.” ’ ”
Isho kanje iNkosi uSimakade, ithi: “Kuyakuthi lapho umhlaba wonke uthokoza, wena ngikwenze ube yincithakalo.
Njengoba nawe wathokoza ngefa lendlu yakwa-Israyeli, lapho iba yincithakalo, ngiyakwenza kanjalo nakuwe. Wena ntaba iSeyiri uyakuba yincithakalo, naye wonke u-Edomi, yebo, wonke jikelele, bayakukwazi ukuthi nginguSimakade.”
“Wena ndodana yomuntu, phrofetha kuzo izintaba zakwa-Israyeli, uthi: ‘Nina zintaba zakwa-Israyeli, zwanini izwi likaSimakade.
Isho kanje iNkosi uSimakade, ithi: “Ngenxa yokuba isitha sithe kini: Ashila, sabuye sathi: Izindawo eziphakemeyo zasemandulo seziyifa lethu.
“Ngakho-ke phrofetha, uthi: ‘Isho kanje iNkosi uSimakade, ithi: “Ngokuba impela banenza naba yincithakalo, banilimaza nxazonke ukuba nibe yifa lezizwe eziseleyo,
ngakho-ke zintaba zakwa-Israyeli, zwanini izwi leNkosi uSimakade, elithi: Isho kanje iNkosi uSimakade kuzo izintaba, emagqumeni, emifuleni, ezigodini, ezindaweni eziyincithakalo, emizini esisele dengwane, osekuyimpango nenhlekisa yezizwe eziseleyo ezizungeze gimbici,
isho kanje iNkosi uSimakade, ithi: impela ngentukuthelo yami evuthayo, ngikhulumile ngamelana nensali ezizweni naye wonke u-Edomi, abenze izwe lami laba yifa labo ngentokozo nangenhliziyo yabo embi, ukuze lilahlwe libe yimpango.” ’ ”
Ngakho-ke phrofetha ngezwe lakwa-Israyeli, uthi ezintabeni, emagqumeni, emifuleni nasezigodini: ‘Isho kanje iNkosi uSimakade, ithi: “Ngikhulume nginesikhwele nolaka oluvuthayo, ngokuba benithwele ihlazo labezizwe.
Ngakho-ke isho kanje iNkosi uSimakade, ithi: ngisiphakamisile isandla sami, ngafunga ngathi impela abezizwe abanizungeze ndawo zonke bayakulithwala ihlazo labo.
“ ‘ “Kepha nina zintaba zakwa-Israyeli niyakuhluma amagatsha, nithelele abantu bami izithelo, ngokuba sekuseduze ukuba babuye.
Bhekani, nginani; ngiyakubuyela kini, nilinywe, futhi nihlwanyelwe.
Ngiyakwandisa inani labantu bakini, bonke abendlu yakwa-Israyeli, ngothi lwabo. Yonke imizi yakhona kuyakuhlalwa kuyo, kuthi izindawo ezibhidliziweyo zakhiwe kabusha.
Ngiyakuwandisa umumo wabantu nezilwane, kwande, kuzalane. Ngiyakwenza ukuba kuhlalwe kini njengakuqala, nginenzele okuhle kunakuqala, niyakukwazi ukuthi nginguSimakade.
Ngiyakukwenza abantu bami u-Israyeli ukuba bachachaze phezu kwenu, bayakunithatha nibe yifa labo; awusayukuphinde ubaphuce abantwana.
“ ‘ “Isho kanje iNkosi uSimakade, ithi ngokuba bathi kuwe: Wena udla abantu, nguwe ophuce isizwe sakini abantwana,
“ ‘ “ngakho-ke awusayukuphinde ubadle abantu, futhi awusayukusiphuca isizwe sakini abantwana,” ’ ” kusho iNkosi uSimakade.
“ ‘ “Ngiyakwenza ukuba ungabe usazizwa izinhlamba zabezizwe. Awusayukulithwala ihlazo labantu, ungabe usasikhubekisa nesizwe sakini,” ’ ” kusho iNkosi uSimakade.
Izwi likaSimakade lafika kimi, lathi:
“Ndodana yomuntu, ngesikhathi indlu ka-Israyeli isahlala ezweni layo, balingcolisa ngokuziphatha kabi kwabo nangezenzo zabo. Indlela ababeziphethe kabi ngayo yayingcolile phambi kwami, ifana nowesifazane ekungcoleni kwakhe.
Ngase ngithululela ulaka lwami phezu kwabo ngenxa yegazi ababelichithe ezweni, nangenxa yokuba babelingcolisile ngezithombe zabo.
Ngabahlakazela ezizweni, basatshalaliselwa emazweni; ngabehlulela ngangokuziphatha kabi kwabo nangezenzo zabo.
Kwakuthi lapho befika ezizweni ababeya kuzo, balihlambalaze igama lami elingcwele, lapho kwakuthiwa ngabo: ‘Laba bangabantu bakaSimakade, kodwa nakuba kunjalo balishiyile izwe lakhe.’
Kepha ngadabukela igama lami elingcwele, indlu yakwa-Israyeli eyayilingcolisile phakathi kwezizwe ababeye kuzo.
“Ngalokho yisho kuyo indlu yakwa-Israyeli, uthi: ‘Isho kanje iNkosi uSimakade, ithi: “Angikwenzi lokhu ngenxa yenu nina ndlu yakwa-Israyeli, kepha ngenxa yegama lami elingcwele enilihlambalazileyo ezizweni, lapho benikade nikhona.
Ngiyakulingcwelisa igama lami elikhulu elihlanjalaziweyo ezizweni, enilihlambalazileyo kuzo, izizwe ziyakukwazi ukuthi nginguSimakade, lapho ngizibonakalisa ngani phambi kwazo ukuthi Mina ngingcwele,” ’ ” kusho iNkosi uSimakade.
“ ‘ “Ngiyakunithatha ezizweni, nginiqoqe emazweni wonke, nginiyise ezweni lakini.
Ngiyakunifafaza ngamanzi acwebe cwe, nihlambuluke, nginihlambulule kukho konke ukungcola kwenu nakuzo zonke izithombe zenu.
Ngiyakuninika inhliziyo entsha, ngifake umoya omusha ezibilinini zenu, ngiyikhiphe inhliziyo yetshe emzimbeni wenu, ngininike inhliziyo yobuntu.
Ngiyakufaka uMoya wami ezibilinini zenu, ngenze ukuba nihambe ngezimiso zami; niyakuzigcina izehlulelo zami, futhi nizenze.
Niyakuhlala ezweni engalinika okhokho benu, nibe ngabantu bami, Mina ngibe nguNkulunkulu wenu.
Ngiyakunihlenga kukho konke ukungcola kwenu; ngibize okusanhlamvu, ngikwenze kube yinsada, ngingabe ngisayehlisela kini indlala.
Ngiyakuzandisa izithelo ezihlahleni zenu nesivuno emasimini, ukuze ningathelwa ngehlazo ezizweni ngenxa yendlala.
Niyakuzikhumbula izindlela zenu ezimbi nezenzo zenu ezingezinhle, nizenyanye nina uqobo, ngenxa yobubi benu nangenxa yezinengiso zenu.
Makwazeke kini ukuthi lokhu angikwenzi ngenxa yenu, kodwa yibani namahloni nihlazeke ngenxa yokuziphatha kabi kwenu, nina ndlu yakwa-Israyeli.”
“ ‘Isho kanje iNkosi uSimakade, ithi: “Kuyakuthi mhla nginihlambulula ebubini benu bonke, bese ngenza ukuba kuhlalwe kuyo yonke imizi, nezindawo ezibhidliziweyo zakhiwe kabusha.
Izwe ebelisele dengwane liyakulinywa kunokuba libe yincithakalo emehlweni abo bonke abadlulayo.
Bayakuthi: “Leli lizwe ebeliyihlane selifana nensimu yase-Edene; nemizi ebibhujisiwe, ebiyincithakalo nebibhidliziwe isibiyelwe, sekukhona abahlala kuyo.
Izizwe eziyakusala zinizungeze nxazonke ziyokwazi ukuthi yiMina Simakade engiyakhe kabusha imizi ebibhidliziwe, ngatshala endaweni ebisiyincithakalo; Mina Simakade ngikhulumile, futhi ngizokwenza lokho.’ ”
“Isho kanje iNkosi uSimakade, ithi: ‘Kuyakuthi lapho indlu yakwa-Israyeli inginxusa ukuba ngiyenzele lokhu: ngiyakuyandisela abantu bayo, babe ngangezimvu.
Babe baningi ngangemihlambi yaseJerusalema eyehlukaniselwe umhlatshelo ngesikhathi esimiselwe imikhosi yakhona. Kanjalo-ke nemizi ebisele dengwane iyakugcwala izinkumbi zabantu, bayakukwazi ukuthi nginguSimakade.’ ”
Isandla sikaSimakade sasiphezu kwami, sangikhipha ngoMoya kaSimakade, sangibeka phakathi esigodini esasigcwele amathambo.
Wangidlulisa kuwo, ngawazungeza; bheka, impela ayemaningi ngokwedlulele kuso isigodi, futhi ayome kakhulu.
Wayesethi kimi: “Ndodana yomuntu, lawa mathambo angaphila na?” Ngathi: “Nkosi Simakade, nguWena owaziyo.”
Wayesethi kimi: “Phrofetha phezu kwalawa mathambo, uthi kuwo: ‘Nina mathambo omileyo, yizwani izwi likaSimakade.
Isho kanje iNkosi uSimakade kulawa mathambo, ithi: Bhekani, ngiyakufaka umoya kini, niphile.
Ngiyakubeka imisipha phezu kwenu, ngihlumise inyama phezu kwenu, nginimboze ngesikhumba, ngifake umoya kini, niphile, niyakukwazi ukuthi nginguSimakade.’ ”
Ngase ngiphrofetha njengoba ngangiyaliwe. Kwathi lapho ngisaphrofetha kwaba khona umsindo nobukhehlekhehle; amathambo asondelana, kwayilelo thambo lisondela kwelinye.
Ngase ngibona kuvela imisipha phezu kwawo, kwahluma inyama, isikhumba sawamboza ngaphezulu, kodwa umoya wawungekho kuwo.
Wayesethi kimi: “Ndodana yomuntu, phrofetha kuwo umoya, phrofetha uthi kuwo: ‘Isho kanje iNkosi uSimakade, ithi: “Woza, moya uvele emimoyeni yomine, uphefumulele laba ababuleweyo, ukuze baphile.” ’ ”
Ngase ngiphrofetha njengoba ngiyaliwe; umoya wangena kuwo, aphila, ema ngezinyawo zawo, aba yimpi enkulu kakhulu impela.
Wayesethi kimi: “Ndodana yomuntu, lawa mathambo ayindlu yonke yakwa-Israyeli, bathi: ‘Bheka, amathambo ethu omile, siphelelwe yithemba, sibhujisiwe.’
“Ngakho-ke phrofetha, uthi kubo: ‘Isho kanje iNkosi uSimakade, ithi: “Ngiyakuvula amathuna enu, nginikhuphule emathuneni enu, nina bantu bami, nginiyise kwa-Israyeli.
Niyakukwazi ukuthi nginguSimakade lapho sengiwavulile amathuna enu, nganikhuphula kuwo, nina bantu bami.
Ngiyakuwufaka uMoya wami kini, bese niphila, nginibeke ezweni lakini; niyakukwazi ukuthi Mina Simakade ngikhulumile, futhi ngiyakukwenza lokho,” ’ ” kusho uSimakade.
Izwi likaSimakade lafika kimi, lathi:
“Wena ndodana yomuntu, zithathele induku, ulobe kuyo, uthi: ‘EkaJuda nabakwa-Israyeli abangabangani bakhe.’ “Thatha enye induku futhi, ulobe kuyo, uthi: ‘EkaJosefa, induku ka-Efrayimi nendlu yonke yakwa-Israyeli, abangabangani bakhe.’
Zihlanganise ndawonye, zibe yinduku eyodwa, induku eyodwa esandleni sakho.
“Kuyothi lapho abantu bakini bekubuza, bethi: ‘Ungesitshele yini ukuthi lezi zinduku zichazani kuwe na?’
“Ubobatshela uthi: ‘Isho kanje iNkosi uSimakade, ithi: “Induku kaJosefa esesandleni sika-Efrayimi nezizwe zakwa-Israyeli ezingabangani bakhe, ngiyakukuthatha ngikubeke endukwini kaJuda, ngikwenze kube yinduku eyodwa, babe munye esandleni sami.” ’
“Izinduku olobe kuzo ziyakuba sesandleni sakho bazibonele ngawabo amehlo.
Khuluma kubo, uthi: ‘Isho kanje iNkosi uSimakade, ithi: “Ngiyakubathatha abakwa-Israyeli ezizweni lapho baya khona, ngibaqoqe nxazonke, ngibayise ezweni lakubo.
Ngiyakubenza babe yisizwe esisodwa ezweni, ezintabeni zakwa-Israyeli, kube nenkosi eyodwa eyakubabusa bonke, bangabe besaba yizizwe ezimbili, futhi bangabe besahlukaniswa babe yimibuso emibili.
Abasayukuzingcolisa ngezithombe zabo, ngokunengekayo kwabo, nangesisodwa seziphambeko zabo, kepha ngiyakubasindisa kukho konke ukuhlubuka kwabo abone ngakho, ngibahlambulule babe ngabantu bami, Mina ngibe nguNkulunkulu wabo.
“ ‘ “Inceku yami, uDavide, iyakuba yinkosi, ibabuse, bonke babe nomelusi oyedwa, bayakuhamba ezehlulelweni zami, bazigcine izimiso zami, futhi bazenze.
Bayakuhlala ezweni engilinike inceku yami, uJakobe, ababehlala kulo okhokho bakho; bayakuhlala kulo, bona nabantwana babo, nezizukulwane zabo kuze kube phakade. UDavide inceku yami uyakuba yinkosi yabo kuze kube phakade.
Ngiyakukwenza isivumelwano sokuthula nabo, sibe yisivumelwano saphakade; ngiyakubahlalisa bazinze, ngibandise, ngibeke indlu yami engcwele phakathi kwabo kuze kube phakade.
Indawo yami yokuhlala iyakuba kubo, Mina ngiyakuba nguNkulunkulu wabo, bona babengabantu bami.
Izizwe ziyakukwazi ukuthi Mina Simakade ngingcwelisa u-Israyeli, lapho indlu yami engcwele isiphakathi kwabo, kuze kube phakade.” ’ ”
Izwi likaSimakade lafika kimi, lathi:
“Ndodana yomuntu, bhekisa ubuso bakho kuGogi, izwe likaMagogi isikhulu sakwaRoshe eMeshekhe naseThubhali, uphrofethe umelene naye,
uthi: ‘Isho kanje iNkosi uSimakade, ithi: “Ngimelene nawe Gogi, sikhulu sakwaRoshe, eMeshekhe naseThubhali.
Ngiyakukuguqula, ngifake izingwegwe emihlathini yakho, ngikukhiphe nayo yonke impi yakho, amahhashi nabagibeli bawo, bonke bevunule bephelele, iviyo elikhulu eliphethe amahawu nezihlangu, bonke bephethe izinkemba zabo zimenyezela.
IPheresiya, iKhushe nePhuthi kukanye nabo, bonke bephethe izihlangu, befake nezigqoko zensimbi,
iGomere nawo wonke amabutho alo, iBhethe Thorigama engasekugcineni kwasenyakatho nawo wonke amaviyo akhe, abantu abaningi bekanye nawe.
“ ‘ “Yima ngomumo, yebo, uzilungiselele, wena nawo wonke amaviyo akho abuthene kuwe, ukuba ube ngumlindi wawo.
Kuyokwedlula izinsuku eziningi bese uqoqwa; kuyakuthi ngeminyaka yokugcina ungene ezweni elibuyiswe enkembeni, eliqoqwe ezizweni eziningi, ezintabeni zakwa-Israyeli ezazihlala ziyincithakalo, selikhishiwe kubantu, manje sebezohlala belondekile bonke.
Uyakukhuphukisa okwesishingishane, usibekele izwe njengefu, wena nawo wonke amaviyo akho, nezizwe eziningi zikanye nawe.”
“ ‘Isho kanje iNkosi uSimakade, ithi: “Kuyakuthi ngalolo lusuku kufike imizindlo enhliziyweni yakho, bese uceba amacebo amabi.
Uyakuthi: Ngiyakwenyukela ezweni elinemizana engabiyelwe, ngiye kwabazinzileyo abahlala belondekile, bonke abahlala lapho kungenalugange khona, kungekho migoqo namasango,
bese ngibaphanga, ngibaqhwage impahla, ngelule isandla sami, ngimelane nezindawo okungahlali muntu kuzo, nabantu abaqoqwe ezizweni base bezizuzela imfuyo nempahla, labo abahlala enkabeni yezwe.
“ ‘ “ISheba, iDedani nabahwebi baseTharishishi nayo yonke imizana yakini, kuyakuthi kuwe: Ngabe uzophanga yini na? Uqoqe iviyo lakho ukuba uzoqhwaga impahla, uthathe isiliva, igolide, imfuyo, nempahla, uphange impango eningi na?” ’
“Ngakho-ke ndodana yomuntu, phrofetha, uthi kuGogi: ‘Isho kanje iNkosi uSimakade, ithi: “Angithi uyakukwazi lokho ngalolo lusuku, lapho abantu bami u-Israyeli behleli ngokulondeka na?
Uyakufika usuka kude endaweni yakho esekugcineni enyakatho, wena nezizwe eziningi oyakuba uhamba nazo, bonke begibele amahhashi, iviyo elikhulu nempi enamandla.
Uyakukhuphukela khona ukuba uthelekele abantu bami u-Israyeli, njengefu lisibekela izwe. Kuyakuthi ngezinsuku ezizayo ngikuyise kubantu bami, ukuze izizwe zazi lapho ngizibonakalisa ngawe, Gogi, ukuthi ngingcwele, ziyakuzibonela ngawazo amehlo.”
“ ‘Isho kanje iNkosi uSimakade, ithi: “Akuwena yini engakhuluma ngaye ngezinsuku zasemandulo ngomlomo wezinceku zami, abaphrofethi bakwa-Israyeli ababephrofetha ngalezo zinsuku, iminyaka eminingi ukuthi ngiyakukuthumela kubo ukuba umelane nabo na?
Kuyakuthi ngalolo lusuku, mhla uGogi ehlasela izwe lakwa-Israyeli, kuvuke ulaka lwami oluvutha bhe.
Ngesikhwele nangolaka lwami oluvuthayo ngikhulumile, ngathi: Impela ngalolo lusuku kuyakuba khona ukuzamazama okukhulu ezweni lakwa-Israyeli.
Kuyakuthuthumela ebukhoneni bami izinhlanzi zolwandle, izinyoni zezulu, izilwane zasendle, zonke izilwanyana ezinwabuzelayo emhlabeni, bonke abantu abasebusweni bomhlaba, izintaba zidilikele phansi, kuwe amawa nazo zonke izingange.
Ngiyakumbizela inkemba uGogi imelane naye, ivela kuzo zonke izintaba zami, inkemba yalowo nalowo iyakumelana nomfowabo.
Ngiyakumehlulela ngobhubhane nangokuchitheka kwegazi, ngimthelekele ngemvula ekhukhulayo, ngamatshe esichotho, nesibabule esivuthayo ngisehlisele kuye, emabuthweni akhe, nasezizweni eziningi ezikanye naye.
Ngiyakububonakalisa kanjalo-ke ubukhulu bami nobungcwele bami, futhi ngizazise phambi kwezizwe eziningi, ziyakukwazi ukuthi nginguSimakade.” ’ ”
“Wena ndodana yomuntu, phrofetha umelane noGogi, uthi: ‘Isho kanje iNkosi uSimakade, ithi: “Ngimelene nawe, Gogi, sikhulu sakwaRoshe, eMeshekhe naseThubhali.
Ngiyakukuguqula, ngikuhole, ngikwenyusele ezindaweni ezikude ezisenyakatho, ngikuyise ezintabeni zakwa-Israyeli,
ngiwushaye umnsalo osesandleni sakho sokhohlo, ngiwise imicibisholo yakho esesandleni sakho sokunene.
Uyakuwa ezintabeni zakwa-Israyeli, wena namaviyo akho wonke, nezizwe ezikanye nawe, ngikunikele kuzo zonke izinyoni ezinhlobonhlobo ezidla inyama, nasezilwaneni zasendle ukuba zikudle.
Uyakuqumbeka phansi ebusweni bomhlaba, ngokuba Mina ngikhulumile,” ’ ” kusho iNkosi uSimakade.
“ ‘ “Ngiyakuthumela umlilo kuMagogi, nakulabo abahlala ngokulondeka eziqhingini; bayakukwazi ukuthi nginguSimakade.
“ ‘ “Ngiyakukwenza ukuba igama lami elingcwele laziwe phakathi kwabantu bami, u-Israyeli, ngingabe ngisavuma ukuba igama lami elingcwele lingcoliswe, izizwe ziyakukwazi ukuthi nginguSimakade, oNgcwele kwa-Israyeli.
Uyabona-ke, kuyeza, futhi kuzokwenzeka; yilolo-ke usuku engikhulume ngalo,” ’ ” kusho iNkosi uSimakade.
“ ‘ “Abahlala emizini yakwa-Israyeli bayakuphuma, baphembe umlilo ngezikhali, bazishise izihlangu, amahawu, iminsalo, imicibisholo, izinduku, nemikhonto, konke lokho bayakubasa ngakho umlilo, iminyaka eyisikhombisa.
Abayukutheza zinkuni endle, abayukugawula emahlathini, ngokuba bayakuphemba umlilo ngezikhali, baphange ababaphangayo, baqhwage impahla yalabo ababaqhwagayo,” ’ ” kusho iNkosi uSimakade.
“ ‘ “Kuyakuthi ngalolo lusuku, nginike uGogi indawo yokungcwaba kwa-Israyeli, isigodi salabo abedlula empumalanga yolwandle, abavimbe abadlulayo, bayakumngcwaba lapho uGogi naso sonke isixuku sakhe, bayibize ngokuthi isigodi iHamoni Gogi.
“ ‘ “Indlu yakwa-Israyeli iyakubangcwaba izinyanga eziyisikhombisa, ukuze ilihlambulule izwe.
Bonke abantu bezwe bayakubangcwaba, lokho kuyakuba ludumo lwabo ngosuku engiyakukhazimuliswa ngalo,” ’ ” kusho iNkosi uSimakade.
“ ‘Bayakubakhetha njalo abantu abayakudabula ezweni, behamba bengcwaba labo ababathola bedindilizile ezweni, ukuba balihlambulule izwe izinyanga eziyisikhombisa.
Kuyakuthi uma labo abahamba bedabula ezweni bebona ithambo lomuntu, babeke uphawu eceleni kwalo, ukuze kuthi labo abangcwabayo balingcwabe esigodini iHamoni Gogi.
Kuyakuba khona omunye umuzi ogama lawo liyakuba yiHamoni. Bayakulihlambulula kanjalo-ke izwe.’
“Wena ndodana yomuntu, isho kanje iNkosi uSimakade, ithi: ‘Tshela izinyoni ngezinhlobo zazo, nazo zonke izilwane zasendle, uthi: “Qoqanani, nihlangane ndawonye nisuka nxazonke, nize emhlatshelweni wami enginihlabele wona, ngumhlatshelo omkhulu osezintabeni zakwa-Israyeli; niyakuzitika ngenyama, niphuze igazi.
Niyakudla inyama yamaqhawe, niphuze igazi lezikhulu zezwe, elezinqama, elamawundlu, elezimbuzi nelazo zonke izinkunzi ezikhulupheleyo zaseBhashani.
Niyakudla amanoni nize nisuthe, niphuze igazi nize nidakwe, emhlatshelweni wami enginihlabele wona.
Etafuleni lami niyakudla nisuthe inyama yamahhashi, eyabagibeli bawo, eyamaqhawe, neyawo wonke amabutho empi,” ’ ” kusho iNkosi uSimakade.
“Inkazimulo yami ngiyakuyibonakalisa ezizweni, zonke izizwe ziyakukubona ukwehlulela kwami engikwenzileyo, nesandla sami engisibeke kuzo.
Indlu yakwa-Israyeli iyakukwazi ukuthi nginguSimakade uNkulunkulu wayo, kusukela ngalolo lusuku.
Izizwe ziyakukwazi ukuthi indlu yakwa-Israyeli yaya ekuthunjweni ngenxa yokona kwayo. Ngokuba babengathembekile kimi, ngase ngibusitheza ubuso bami kubo; ngabanikela esandleni sezitha zabo, bafa bonke ngenkemba.
Ngenza kubo njengokungcola kwabo nanjengezeqo zabo, ngabusitheza ubuso bami kubo.
“Ngakho-ke isho kanje iNkosi uSimakade, ithi: ‘UJakobe ngiyakumbuyisa ekuthunjweni, yonke indlu yakwa-Israyeli ngiyihawukele, ngibe nentshisekelo ngenxa yegama lami elingcwele.
Bayakulikhohlwa ihlazo labo, nakho konke ukungethembeki kwabo abakwenze kimi, lapho sebehleli ngokulondeka ezweni lakubo, kungekho muntu obesabisayo,
ngesikhathi sengibabuyisile ezizweni, ngabaqoqa emazweni ezitha zabo; ngizibonakalisa ngawe ngingcwele emehlweni ezizwe eziningi.
Bayakukwazi ukuthi nginguSimakade uNkulunkulu wabo, ngabayisa ekuthunjweni, ngiyakubaqoqa ukuba babuyele ezweni lakubo, futhi angiyukushiya noyedwa lapho;
angisayukubusitheza ubuso bami kubo, ngokuba ngiyakuthulula uMoya wami phezu kwendlu yakwa-Israyeli,’ ” kusho iNkosi uSimakade.
Kwathi ekuqaleni konyaka wama-25 sisekuthunjweni, ngosuku lweshumi enyangeni, ngonyaka we-14 emva kokunqotshwa komuzi, kwathi ngalolo lusuku isandla sikaSimakade saba phezu kwami, wangiyisa lapho.
Ngemibono kaNkulunkulu wangiyisa ezweni lakwa-Israyeli, wangibeka entabeni ephakeme kakhulu, okwakuphezu kwayo kwakungathi isakhiwo somuzi ongaseningizimu.
Wangiyisa khona; ngabona umuntu osimo sakhe sasinjengesimo sethusi; wayephethe intambo yelineni esandleni sakhe, nohlanga lokulinganisa, emi esangweni.
Lo muntu wathi kimi: “Ndodana yomuntu, bheka ngamehlo akho, uzwe ngezindlebe zakho, ubeke inhliziyo yakho kukho konke engizokukhombisa khona, ngokuba ulethwe lapha ukuba ngikukhombise. Tshela indlu yakwa-Israyeli ngakho konke lokhu okubonayo.”
Kwakukhona ugange ngaphandle kwendlu, luzungeze nxazonke, esandleni somuntu kukhona uhlanga lokulinganisa, lungamakhubhithi ayisithupha, yileyo naleyo iyikhubhithi engububanzi besandla. Walinganisa ububanzi besakhiwo: uhlanga olulodwa, nokuphakama: ububanzi besakhiwo babuluhlanga olulodwa, kanjalo nokuphakama kwaso kuwuhlanga olulodwa.
Wayeseya esangweni elalibheke empumalanga, wakhuphuka ngezitebhisi zalo, walinganisa umbundu wesango; ububanzi bawo babuluhlanga olulodwa.
Ubude bekamelo labalindi babuluhlanga olulodwa, nobubanzi balo buluhlanga olulodwa; okwakuphakathi kwamakamelo kwakungamakhubhithi ayisihlanu; umbundu wesango eceleni kompheme wesango ngasendlini nawo wawuluhlanga olulodwa.
Walinganisa nompheme wesango ngasendlini: uwuhlanga olulodwa.
Wayeselinganisa umpheme wesango: wawungamakhubhithi ayisishiyagalombili; nezinsika zalo: ungamakhubhithi amabili; umpheme wesango ungasendlini.
Amakamelo abalindi ayesesangweni ngasempumalanga, emathathu ngapha nangapha, eyisilinganiso esisodwa, kanjalo nezinsika zaziyisilinganiso esisodwa ngapha nangapha.
Walinganisa ububanzi besikhala sesango: sasingamakhubhithi alishumi; ubude besango: bungamakhubhithi ali-13;
ekugcineni ngaphambi kwamakamelo abalindi: uyikhubhithi elilodwa; umkhawulo ngalapha: uyikhubhithi elilodwa; namakamelo abalindi: ungamakhubhithi ayisithupha ngapha nangapha.
Walinganisa isango, kusukela ophahleni lwelinye ikamelo kuze kube sophahleni lwelinye, ububanzi bungamakhubhithi angama-25, umnyango ubhekene nomunye.
Wenza nezinsika: zingamakhubhithi angama-60, isango lifinyelela ensikeni yegceke nxazonke.
Kusukela phambi kwesango ngasekungeneni kuze kube phambi kompheme wesango elingaphakathi kwakungamakhubhithi angama-50.
Kwakukhona amafasitela avaliweyo, emakamelweni; ezinsikeni ngaphakathi kwesango nxazonke, nasemiphemeni yendlu ngaphandle; kukhona amafasitela nxazonke ngaphakathi namasundu ezinsikeni.
Wayesengingenisa egcekeni elingaphandle; uyabona-ke, lapho kwakukhona amakamelo nendawo egandayiweyo egcekeni nxazonke; kwakukhona namakamelo angama-30 endaweni egandayiweyo.
Indawo egandayiwe yayiseceleni kwamasango, ilingene nobude bamasango; lokhu kwakuyindawo egandayiwe ephansi.
Wayeselinganisa ububanzi kusukela phambi kwesango elingezansi, kuze kube phambi kwegceke elingaphakathi ngaphandle: kungamakhubhithi ayikhulu ngasempumalanga nangasenyakatho.
Wayeselinganisa ubude nobubanzi besango legceke elingaphandle elibheke ngasenyakatho.
Amakamelo alo abalindi ayemathathu ngapha nangapha; izinsika zalo nemipheme yalo kwakufana nesilinganiso sokuqala sesango; ubude balo babungamakhubhithi angama-50, ububanzi bungamakhubhithi angama-25.
Amafasitela alo, imipheme yalo, namasundu alo kwakufana nesilinganiso sesango elibheke ngasempumalanga; bakhuphukela kulo ngezitebhisi eziyisikhombisa, imipheme yalo yayiphambi kwazo.
Kwakukhona isango legceke elingaphakathi maqondana naleli sango ngasenyakatho nangasempumalanga; walinganisa kusukela esangweni kuze kube sesangweni, kwaba ngamakhubhithi ayikhulu.
Wayesengiyisa ngaseningizimu; lapho kwakukhona isango lingaseningizimu. Wazilinganisa izinsika zalo nemiphemegumbi yalo njengezilinganiso ezishiwo ngenhla.
Kwakukhona amafasitela kulo nasemiphemeni yalo nxazonke, kufana namafasitela abalulwe ngenhla; ubude babungamakhubhithi angama-50 nobubanzi bungamakhubhithi angama-25.
Kwakukhona izitebhisi eziyisikhombisa zokukhuphukela kulo, kunemiphemegumbi phambi kwazo; lalinamasundu, lilodwa ngapha nangapha ezinsikeni zalo.
Isango legceke elingaphakathi lalingaseningizimu; walinganisa, kusukela esangweni kuze kube sesangweni ngaseningizimu, kungamakhubhithi ayikhulu.
Wayesengingenisa egcekeni elingaphakathi ngesango eliseningizimu; walilinganisa lelo sango njengezilinganiso ezibalulwe ngenhla.
Amakamelo alo abalindi, izinsika zalo, nemiphemegumbi yalo kwakufana nezilinganiso ezibalulwe ngenhla, kukhona amafasitela kulo nasemiphemenigumbi nxazonke; ubude balo babungamakhubhithi angama-50, ububanzi balo bungamakhubhithi angama-25.
Kwakukhona imiphemegumbi nxazonke, ubude bayo bungamakhubhithi angama-25, ububanzi bayo bungamakhubhithi ayisihlanu.
Imiphemegumbi yalo yayibheke egcekeni elingaphandle; amasundu esezinsikeni zalo; kwakukhushukelwa kulo ngezitebhisi eziyisishiyagalombili.
Wayesengingenisa egcekeni elingaphakathi ngasempumalanga, walilinganisa isango njengezilinganiso ezishiwo ngenhla,
amakamelo alo abalindi, izinsika zalo, nemiphemegumbi yalo kwakunjengezilinganiso ezibalulwe ngenhla, kukhona amafasitela kulo nasemiphemenigumbi yalo nxazonke; ubude babungamakhubhithi angama-50, ububanzi bungamakhubhithi angama-25.
Imiphemegumbi yalo yayibheke egcekeni elingaphandle; amasundu esezinsikeni zalo, ngapha nangapha; kwakukhushukelwa kulo ngezitebhisi eziyisishiyagalombili.
Wayesengiyisa esangweni elisenyakatho, walilinganisa njengezilinganiso ezibalulwe ngenhla,
amakamelo alo abalindi, izinsika zalo, nemiphemegumbi yalo; lalinamafasitele nxazonke; ubude bungamakhubhithi angama-50, ububanzi bungamakhubhithi angama-25.
Izinsika zalo zazibheke egcekeni elingaphandle; amasundu ayesezinsikeni zalo ngapha nangapha; kwakukhushukelwa kulo ngezitebhisi eziyisishiyagalombili.
Kwakukhona ikamelo nomnyango walo ngasezinsikeni emasangweni; babewugezela lapho umnikelo wokushiswa.
Emphemenigumbi wesango kwakukhona amatafula amabili ngapha nangapha ukuba kuhlatshelwe kuwo umnikelo wokushiswa, umnikelo wesono nomnikelo wecala.
Eceleni ngaphandle lapho kwakukhushukelwa esivalweni sesango ngasenyakatho, kukhona amatafula amabili, emabili futhi nakolunye uhlangothi olungasemphemenigumbi wesango.
Amatafula amane ayengapha nangapha eceleni kwesango, amatafula ayeyisishiyagalombili ababehlabela kuwo.
Amatafula amane omnikelo wokushiswa ayenziwe ngamatshe abaziweyo, ubude buyikhubhithi nengxenye, ububanzi buyikhubhithi nengxenye, nokuphakama kuyikhubhithi; babebeka phezu kwawo lokho ababekusebenzisa uma behlaba, benza umnikelo wokushiswa nomhlatshelo.
Izingwegwe, ubude bazo obabungangobubanzi besandla, zazifakwe ngaphakathi nxazonke. Kwakukhona inyama yomnikelo ematafuleni.
Ngaphandle kwesango elingaphakathi kwakukhona amakamelo abahlabeleli esegcekeni elingaphakathi, elaliseceleni kwesango elisenyakatho, libheke ngaseningizimu, elinye eliseceleni kwesango elisempumalanga, libheke ngasenyakatho.
Wathi kimi: “Leli kamelo elibheke ngaseningizimu ngelabaphristi abagcina inkonzo yasendlini.
Ikamelo elibheke ngasenyakatho ngelabaphristi abagcina inkonzo yase-althare, abangamadodana kaZadoki, okuyibo emadodaneni kaLevi, angasondela kuSimakade ukuba amkhonze.”
Wayeselilinganisa igceke, ubude balo babungamakhubhithi ayikhulu, nobubanzi bungamakhubhithi ayikhulu, kuyizinhlangothi ezine; i-althare laliphambi kwendlu.
Wayesengingenisa emphemenigumbi wendlu, walinganisa izinsika zomphemegumbi: kungamakhubhithi ayisihlanu ngapha nangapha; ububanzi besango babungamakhubhithi amathathu ngapha nangapha.
Ubude bomphemegumbi babungamakhubhithi angama-20, nobubanzi bungamakhubhithi ali-11 ngasezitebhisini okwakukhushukelwa ngazo kulo; kukhona nezibonda ngasezinsikeni, ngapha nangapha.
Wayesengingenisa ethempelini, wakala izinsika ngayinye, ububanzi babungamakhubhithi ayisithupha ngapha nangapha, yilobo-ke ububanzi bezinsika, zethabanakeli.
Ububanzi bomnyango babungamakhubhithi alishumi, amacele omnyango engamakhubhithi amahlanu ngakulolu hlangothi emi kanjalo nangakolunye. Wakala ubude balo: babungamakhubhithi angama-40; ububanzi balo bungama-20.
Wayesengena phakathi, walinganisa izinsika zomnyango: kwaba ngamakhubhithi amabili: umnyango ungayisithupha, ububanzi bomnyango, bungayisikhombisa.
Wakala ubude bokuphakathi kwaba ngamakhubhithi angama-20 phambi kwethempeli. Wayesethi kimi: “Lena yindawo engcwele kakhulu.”
Wayesekala udonga lwendlu lwaba ngamakhubhithi ayisithupha; ububanzi bamakamelo ezinhlangothi bungamakhubhithi amane, nxazonke zendlu.
Indlu yayinamakamelo amathathu ezinhlangothini, elakanyene elinye phezu kwelinye, esewonke engama-30. Ingaphandle lodonga lwendlu kulelo nalelo kamelo lalinonqenqema olwaluzungeze udonga lwendlu, lusekele amakamelo asemaceleni ukuze angasekelwa ludonga lwendlu.
Amakamelo ezinhlangothi aba banzi ekukhuphukeni nxazonke, ngokuba okuzungeza indlu kwakukhuphuka nxazonke zendlu; ngalokho indlu yaba banzi ekukhuphukeni njalo; kwakhushukwa ekamelweni eliphansi kwaze kwaba kweliphezulu neliphakathi.
Ngabona futhi ukuthi indlu izungezwe unqenqema nxazonke, isilinganiso sezisekelo zamakamelo sasilingana nohlanga olungamakhubhithi ayisithupha ubude.
Uhlonze lodonga olungaphandle emakamelweni lwalungamakhubhithi amahlanu, kunendawo ebanzi phakathi kwamakamelo nendlu, leyo ndawo yayingeyamakamelo ayesezinhlangothini zendlu.
Phakathi kwamakamelo kwakukhona indawo ebanzi engamakhubhithi angama-20 nxazonke zendlu emaceleni wonke.
Iminyango yamakamelo ezinhlangothi yayibheke endaweni eseleyo, omunye umnyango ungasenyakatho nomunye ungaseningizimu; ububanzi bendawo eseleyo babungamakhubhithi ayisihlanu nxazonke.
Isakhiwo esasiphambi kwendawo eyahlukanisiweyo ngasentshonalanga, ububanzi baso babungamakhubhithi angama-70; uhlonze lodonga lwendlu lungamakhubhithi ayisihlanu nxazonke, ubude balo bungamakhubhithi angama-90.
Wayikala indlu, ubude bayo babungamakhubhithi ayikhulu, kuthi indawo eyahlukanisiweyo, isakhiwo nezindonga zaso, ubude bakho bungamakhubhithi ayikhulu.
Ububanzi obungaphambi kwendlu nendawo eyahlukanisiweyo ngasempumalanga babungamakhubhithi ayikhulu.
Wayesekala ubude besakhiwo esasiphambi kwendawo eyahlukanisiweyo eyayingemuva kwaso nemiphemegumbi yayo nxazonke; yaba ngamakhubhithi ayikhulu, kanjalo nethempeli elingaphakathi, nemiphemegumbi yegceke.
Imibundu, amafasitele avaliweyo, imipheme elakanyene kathathu nxazonke eqondene nombundu, kwakwembozwe ngokhuni nxazonke, kusukela phansi kuze kube semafasiteleni. Amafasitele ayemboziwe,
kuze kube phezu komnyango nasendlini engaphakathi nangaphandle. Lonke udonga lwakalwa nxazonke ngaphakathi, nangaphandle,
kwakwenziwe ngamakherubhi, nangamasundu; phakathi kwalelo nalelo kherubhi kwakunesundu. Ikherubhi ngalinye linobuso obubili.
Ubuso bomuntu babubheke ngakuleli sundu, ngakwelinye icala kunobuso bebhongo lengonyama, bubheke isundu ngale, kwakwenziwe kanjalo nxazonke zendlu.
Kusukela phansi kuze kube phezu komnyango, kwakwenziwe amakherubhi namasundu, kanjalo nasodongeni lwethempeli.
Ethempelini, izinsika zomnyango zazinezinhlangothi ezine, ubuso bendawo engcwelengcwele, isimo sabo sasifana nesethempeli.
I-althare lalenziwe ngokhuni, ukuphakama kwalo kungamakhubhithi amathathu, ubude balo bungamakhubhithi amabili; lalinamagumbi. Ubude balo nezindonga zalo kwakwenziwe ngokhuni; wathi kimi: “Leli yitafula eliyakuba phambi kukaSimakade.”
Ithempeli nendawo engcwelengcwele kwakunezivalo ezimbili.
Iminyango yayinezicabha ezimbili, izicabha ezimbili eziphendukayo, ezimbili zingezomunye umnyango, nezimbili zingezomunye.
Ezivalweni zethempeli kwakwenziwe amakherubhi namasundu njengoba ayenziwe ezindongeni. Kwakukhona isivikelo esasenziwe ngokhuni phezu komphemegumbi ngaphandle.
Ngapha nangapha emaceleni omphemegumbi kukhona amafasitele avaliweyo namasundu, nasemakamelweni ezinhlangothini zendlu, kanjalo nasesivikelweni.
Wayesengikhipha egcekeni elingaphandle elingasenyakatho, wangingenisa ekamelweni elibhekene nendawo eyahlukanisiweyo, eliqondene nesakhiwo esingasenyakatho,
ohlangothini olude, ubude balo babungamakhubhithi ayikhulu, umnyango walo ungasenyakatho. Ububanzi bawo babungamakhubhithi ayisihlanu.
Ngakolunye uhlangothi kwakungamakhubhithi angama-20, ayezungeze igceke elingaphakathi, kuthi maqondana nendawo egandayiweyo eyayingeyegceke elingaphandle kube khona umpheme oqondene nemipheme eyelakanyene kathathu.
Kwakukhona umhubhe phambi kwamakamelo, ububanzi bawo bungamakhubhithi alishumi ngaphakathi, ubude bawo buyikhulu; iminyango yawo yayingasenyakatho.
Amakamelo aphezulu ayemafishane, ngokuba imipheme yayithathe indawo enkulu kuwo kunaleyo eyayikweyangaphansi neyayiphakathi esakhiweni.
Ayengenazo izinsika ezazifana nezinsika zamagceke, njengoba wona ayelakanyene kathathu; lawo ayengaphezulu ayemancane kunalawo ayengaphansi naphakathi kusukela emhlabathini.
Ugange olwalungaphandle eceleni kwamakamelo ngasegcekeni elingaphandle lwalungamakhubhithi angama-50.
Nakuba amakamelo ayesegcekeni elingaphandle, ubude bawo babungamakhubhithi angama-50, kodwa phambi kwethempeli kwakungamakhubhithi ayikhulu.
Kusukela phansi kwalawo makamelo, kwakukhona indawo yokungena ngasempumalanga, lapho kwakungenwa khona uma uvela egcekeni elingaphandle.
Lapho ugange lwegceke lwalubanzi khona ngasempumalanga, phambi kwendawo eyahlukanisiweyo naphambi kwesakhiwo; nalapho kwakukhona amakamelo.
Indlela eyayiphambi kwawo yayifana neyamakamelo ayengasenyakatho, ububanzi bufana nobude; kanjalo nezindawo zawo zokuphuma neminyango yazo.
Njengeminyango yamakamelo ayeseningizimu, kwakukhona umnyango ekuqaleni kwendlela, indlela yayiqondene nogange ngasempumalanga, lapho kungenwa kuwo.
Wayesethi kimi: “Amakamelo asenyakatho namakamelo aseningizimu aphambi kwendawo eyahlukaniswe ngamakamelo angcwele, lapho abaphristi abaseduze noSimakade beyakudlela khona okungcwelengcwele. Bayakubeka lapho umnikelo wokusanhlamvu, umnikelo wesono nomnikelo wecala, ngokuba leyo ndawo ingcwele.
Kuyakuthi lapho abaphristi sebengenile, bangaphumeli endaweni engcwele ukuba baye egcekeni elingaphandle, bengakazibeki lapho izembatho zabo abakhonze ngazo, ngokuba zingcwele. Bayakwembatha ezinye izingubo, bese besondela kulokho okungokwabantu.”
Kwathi lapho eseqedile ukulinganisa indlu engaphakathi, wangikhipha ngendlela yesango elalingasempumalanga, walinganisa nxazonke.
Walulinganisa uhlangothi lwasempumalanga ngohlanga lokulinganisa: kwaba yizinhlanga ezingama-500 uma sekulinganiswe ngohlanga gimbici.
Walulinganisa uhlangothi lwasenyakatho: kwaba yizinhlanga ezingama-500 uma sekulinganiswe ngohlanga nxazonke.
Walulinganisa nohlangothi lwaseningizimu: kwaba yizinhlanga ezingama-500 uma sekulinganiswe ngohlanga lokulinganisa.
Wayesephendukela ohlangothini olungasentshonalanga walulinganisa: kwaba yizinhlanga ezingama-500 uma sekulinganiswe ngohlanga lokulinganisa.
Wayilinganisa ezinhlangothini zozine. Yayinogange oluyizungeze gimbici, ubude balo babungamakhubhithi angama-500 kanjalo nobubanzi balo, ukuba kwehlukaniswe phakathi kokungcwele nokungengcwele.
Umuntu wayesengithatha engiyisa esangweni elibheke ngasempumalanga.
Bheka, inkazimulo kaSimakade yavela empumalanga, izwi lakhe lezwakala njengokuhaza kwamanzi amaningi, inkazimulo yakhe yawukhanyisa umhlaba.
Isimo sombono engawubonayo sasifana nombono engangiwubone ngesikhathi ngiza ngizobhubhisa umuzi. Imibono yayinjengombono engangiwubone ngasemfuleni iKhebhari; ngase ngiwa ngobuso, ngathi mbo emhlabathini.
Inkazimulo kaSimakade yangena endlini ngendlela yesango elibheke ngasempumalanga.
UMoya wangiphakamisa, wangingenisa egcekeni elingaphakathi; bheka, inkazimulo kaSimakade yayigcwalisa indlu.
Ngase ngizwa okhuluma kimi ephakathi endlini; kwakumi umuntu eceleni kwami.
Wathi kimi: “Ndodana yomuntu, le ndawo iyisihlalo sami sobukhosi, nendawo yamathe ezinyawo zami, lapho ngiyakuhlala khona phakathi kwabantu bakwa-Israyeli kuze kube phakade. Indlu yakwa-Israyeli ayisayukulingcolisa igama lami elingcwele, yona namakhosi ayo, ngokuphinga kwayo nangezidumbu zamakhosi ayo ezindaweni zayo eziphakemeyo.
Umbundu wabo bawubeka ngasembundwini wami, nensika yabo yomnyango eceleni kwensika yami, kwaba ludonga kuphela oluphakathi kwami nabo, balingcolisa igama lami elingcwele ngezinengiso zabo abazenzayo, yingakho-ke ngabaqeda ngolaka lwami.
Manje-ke mabakudedisele kude nami ukuphinga kwabo, nezidumbu zamakhosi abo, ukuze ngihlale phakathi kwabo kuze kube phakade.
“Wena ndodana yomuntu, chaza ngendlu kwabendlu yakwa-Israyeli ukuze babe namahloni ngobubi babo, bacabangisise ngesimo sayo.
Uma benamahloni ngakho konke abakwenzileyo, mawubazise ngesimo sendlu, ngokuhleleka kwayo, ngezindawo zayo zokuphuma nezokungena, impela, sonke isimo sayo nazo zonke izimiso zayo, izimo zayo zonke nemithetho yayo yonke, ukulobe bezibonela ngawabo amehlo, ukuba basigcine sonke isimo sayo, nazo zonke izimiso zayo, bakwenze lokho.”
“Nanku umthetho wendlu: Esiqongweni sentaba, wonke umngcele wayo oyizungeze gimbici, uyakuba ngcwele kakhulu. Uyabona-ke, lokho kungumthetho wendlu.
“Nazi izilinganiso ze-althare ngokwamakhubhithi, ikhubhithi nengxenye ububanzi, isisekelo salo sinomsele oyikhubhithi ukuphakama kwawo, nobubanzi bawo buyikhubhithi. Umngcele walo, emaceleni nxazonke, wawunjengokuvuleka kweminwe: kwakunjalo-ke ukuphakama kwe-althare.
Kusukela phansi esisekelweni esinomsele kuze kube sonqenqemeni oluphansi, kwakungamakhubhithi amabili, ububanzi buyikhubhithi. Ukusuka onqenqemeni oluncane kuze kube sonqenqemeni olukhulu, kwakungamakhubhithi amane, ububanzi buyikhubhithi.
Iziko le-althare lalingamakhubhithi amane, kusukela kulo kuya phezulu, kukhona nezimpondo ezine.
Iziko le-althare ubude balo babungamakhubhithi ali-12, kanjalo nobubanzi balo; lalinezinhlangothi ezine ezilinganayo.
Ubude bonqenqema babungamakhubhithi ali-14, kanjalo nobubanzi balo, lunezinhlangothi ezine ezilinganayo. Umngcele walo, nxazonke, wawuyingxenye yekhubhithi, umsele walo wawuyikhubhithi nxazonke, izikhwelo zalo zibheke ngasempumalanga.”
Wayesethi kimi: “Ndodana yomuntu, isho kanje iNkosi uSimakade, ithi nazi izimiso ze-althare ngosuku abayakulenza ngalo, ukuba banikele phezu kwalo umnikelo wokushiswa, balifafaze ngegazi.
Uyakunika abaphristi abangabaLevi, ozalweni lukaZadoki, abaseduze nami ukuba bangikhonze, balethe iduna libe ngumnikelo wesono,” kusho iNkosi uSimakade.
“Uyakuthatha igazi ulibhece kuzona zozine izimpondo zalo, emagumbini omane onqenqema, nasemaphethelweni nxazonke, ulihlambulule, ulenzele ukubuyisana.
Uyakuthatha inkunzi yomnikelo wesono, ishiswe endaweni yendlu ekhethiweyo, engaphandle kwendlu engcwele.
“Ngosuku lwesibili uyakunikela ngempongo engenasici, ibe ngumnikelo wesono; bayakuhlambulula i-althare njengoba lihlanjululwa ngenkunzi.
Kuyakuthi lapho usuqedile ukulihlambulula, bese unikela ngeduna elingenasici, nangenqama engenasici.
Uyakukusondeza phambi kukaSimakade, abaphristi bathele usawoti kukho, banikele ngakho, kube ngumnikelo wokushiswa kuSimakade.
“Izinsuku eziyisikhombisa uyakunikela ngempongo, ibe ngumnikelo wesono, usuku nosuku, kunikelwe nangeduna nenqama, kuthathwe emhlanjini, kungabi nasici.
I-althare bayakulenzela ukubuyisana izinsuku eziyisikhombisa, balihlambulule, balingcwelise.
Kuyakuthi uma seziphelile lezo zinsuku, kube ngusuku lwesishiyagalombili kuya phambili, bese abaphristi benikela iminikelo yenu yokushiswa e-althare, neminikelo yenu yokuthula; ngiyakunamukela-ke,” kusho iNkosi uSimakade.
Wayesengibuyisa ngendlela yesango lendlu engcwele, elingaphandle, elibheke ngasempumalanga.
USimakade wathi kimi: “Leli sango liyakuvalwa, lingavulwa, kungangeni muntu ngalo, ngokuba uSimakade uNkulunkulu ka-Israyeli ungene ngalo, yingakho-ke liyakuhlala livaliwe.
Kepha isikhulu yisikhulu, sona siyakuhlala kulo, sidle phambi kukaSimakade, singene ngendlela yompheme wesango, futhi siphume ngendlela yawo.”
Wayesengiyisa phambi kwendlu ngendlela yesango esenyakatho. Ngabuka; bheka, inkazimulo kaSimakade yagcwalisa indlu yakhe; ngase ngiwa ngithi mbo ngobuso.
USimakade wathi kimi: “Ndodana yomuntu, qaphelisisa, uzibonele ngawakho amehlo, uzizwele ngezakho izindlebe konke engikukhuluma kuwe maqondana nazo zonke izimiso zendlu kaSimakade, nangayo yonke imithetho yayo; uyiqaphelisise indawo yokungena yendlu, nazo zonke izindawo zokuphuma zendlu engcwele.
Uyakusho endlini ehlubukayo yakwa-Israyeli, uthi: ‘Isho kanje iNkosi uSimakade, ithi: “Maye, nina ndlu yakwa-Israyeli, sezanele izinengiso zenu!
Ngokuba ningenise abezizwe abangasokile enhliziyweni nasenyameni, ukuba bangene endlini yami engcwele, bayingcolisa indlu yami; lapho ninikela kimi ngesinkwa, ngamanoni nangegazi; nasephula isivumelwano sami ngazo zonke izinengiso zenu.
Aniyigcinanga inkonzo yezinto zami ezingcwele, kodwa nizibekele abayakunigcinela inkonzo endlini yami engcwele.”
Isho kanje iNkosi uSimakade, ithi: ‘Endlini yami engcwele akayukungena owezizwe ongasokile enhliziyweni nongasokile enyameni, kubo bonke abezizwe abahlala nabantu bakwa-Israyeli.
“ ‘ “Kepha abaLevi baqhelela kude nami ngesikhathi u-Israyeli eduka, ephambuka, elandela izithombe zabo, nabo bayakubuthwala ububi babo.
Bayakuba yizikhonzi endlini yami engcwele, babengababonisi emasangweni endlu, bakhonze endlini, bahlabe imihlatshelo yokushiswa nabayihlabela abantu, bame phambi kwabo ukuba basize abantu.
Ngokuba babebasebenzela phambi kwezithombe zabo, baba yisikhubekiso ngobubi babo kuyo indlu yakwa-Israyeli; ngakho-ke ngiphakamise isandla sami ngamelana nabo, ukuba bakuthwale ukona kwabo,” ’ kusho iNkosi uSimakade.
“ ‘Abasayukusondela kimi ukuba bangikhonze bengabaphristi, futhi abayukusondela ezintweni zami ezingcwele, izinto ezingcwelengwele, kodwa bayakulithwala ihlazo labo nezinengiso zabo abazenzileyo.
Nokho, ngiyakubenza babe ngabagcini benkonzo yendlu, kuwo wonke umsebenzini wayo, nakukho konke okuyakwenziwa kuyo.
“ ‘Kepha abaphristi babaLevi, amadodana kaZadoki, ababegcina inkonzo yendlu yami engcwele ngesikhathi abakwa-Israyeli bephambuka kimi, yibona abayakusondela kimi, bangikhonze, bame phambi kwami, banikele ngamanoni nangegazi, kusho iNkosi uSimakade.
Bayakungena endlini yami engcwele, basondele etafuleni lami ukuba bangikhonze, futhi bayigcine inkonzo yami.
“ ‘Kuyothi lapho bengena emasangweni egceke elingaphakathi, bembathiswe izembatho zelineni, bangembathi sembatho esenziwe ngensonto ngesikhathi bekhonza emasangweni egceke elingaphakathi nasendlini.
Bayakuthwala izigqoko zelineni emakhanda abo, ngaphansi bagqoke izimpahla zelineni, bangakubhinci okhalo lwabo okujulukisayo.
Kuyothi lapho bephumela egcekeni elingaphandle, okuyigceke labantu, bazikhumule izembatho zabo abakhonza ngazo, bazibeke emakamelweni angcwele, bagqoke ezinye izingubo, funa bangcwelise abantu ngezembatho zabo.
“ ‘Abayukuphuca emakhanda abo, bangabi nazihluthu, kepha bagunde emakhanda abo.
Akukho noyedwa kulabo baphristi oyakuphuza iwayini ngesikhathi bengena egcekeni elingaphakathi.
Abayukumthatha umfelokazi nolahliweyo babe ngabafazi babo, kodwa bayakuthatha izintombi ozalweni lwendlu yakwa-Israyeli, noma umfelokazi obegane umphristi.
Bayakubafundisa abantu bami ukwehlukanisa okungcwele nokuyichilo, benze umehluko phakathi kokungcolileyo nokuhlanzekileyo.
“ ‘Kuyakuthi uma kunombango, basukume ukuba behlulele. Bayakwehlulela ngokwezehlulelo zami, bagcine imithetho yami nezimiso zami emikhosini yonke yami, futhi balingcwelise isabatha lami.
“ ‘Abayukusithinta isidumbu, funa bazigcolise, kodwa bangazingcolisa ngokuthinta esikayise, esikanina, esendodana, esendodakazi, esomfowabo, nesikadadewabo ongenandoda.
Nxa esehlambulukile, uyakubalelwa izinsuku eziyisikhombisa.
Ngosuku angena ngalo endlini engcwele, egcekeni elingaphakathi, ukuyokhonza kuyo, uyakunikela ngomnikelo wakhe wesono,’ ” kusho iNkosi uSimakade.
“ ‘Bayakuba nefa; Mina ngiyifa labo; aniyukubanika imfuyo kwa-Israyeli; Mina ngiyimfuyo yabo.
Bayakudla umnikelo wokusanhlamvu, umnikelo wesono, nomnikelo wecala, konke lokho okwehlukanisiweyo kwa-Israyeli kuyakuba ngokwabo.
Lonke ulibo lokuqala lwakho lwekhethelo, konke nayo yonke iminikelo yakho, konke eminikelweni yenu yonke, kuyakuba ngokwabaphristi, nimnike umphristi ulibo lwenhlama yenu, ukuze isibusiso sihlale endlini yakho.
Abaphristi abayukuyidla inyoni noma isilwane esizifeleyo noma esidweshuliweyo.’ ”
“ ‘Kuyothi lapho izwe senilehlukanisa ngonkatho ukuba libe yifa, bese ninikela kuSimakade ingxenye yalo ekhethekileyo, ubude balelo lizwe kube ngamakhubhithi ayizi-25 000; ububanzi bube ngamakhubhithi ayizi-10 000; liyakuba yindawo engcwele, kuyo yonke imingcele yalo nxazonke.
Ingxenye yalo iyakuba yindawo engcwele engamakhubhithi angama-500 nxazonke, nendawo eyisikwele eyizungezile engenalutho engamakhubhithi angama-50.
Kulesi siqinti esikhethekileyo uyakukala indawo engamakhubhithi ayizi-25 000 ubude, nayizi-10 000 ububanzi, ibe yindawo engcwele, nendawo engcwelengcwele.
Iyakuba yisiqinti esingcwele ezweni, ibe ngeyabaphristi, abakhonza endaweni engcwele, labo abasondela kuSimakade ukuba bamkhonze. Iyakuba yindawo yabo yokuhlala, ibuye ibe yindawo engcwele.
Esinye isiqinti sendawo esingamakhubhithi ayizi-25 000 ubude, nayizi-10 000 ububanzi, siyakuba yindawo yabaLevi abakhonza ethempelini, sibe yindawo enemizi abahlala kuyo.
“ ‘Maqondana nesiqinti esehlukaniselwe ukuba yindawo engcwele, kuyakuthi umuzi osondele kuso ube ngoka-Israyeli wonkana, ububanzi buyakuba yizi-5 000, ubude bube yizi-25 000.
“ ‘Umhlaba wesikhulu uyakusiphahla isiqinti esingcwele nefa lomuzi, ube phambi kwefa lomuzi naphambi komnikelo; ube ngasohlangothini olusentshonalanga kubheke entshonalanga, nangasohlangothini olusempumalanga kubheke empumalanga, ubude baso bulingane nesinye sezabelo zezizwe, kusukela emngceleni entshonalanga kuze kube semngceleni empumalanga.
Lesi siqinti sendawo siyakuba yifa laso ezweni lakwa-Israyeli, izikhulu zami azisayukubacindezela abantu bami, kodwa indlu yakwa-Israyeli ziyakuyinika ngangomumo wezizwe zayo.
“ ‘Isho kanje iNkosi uSimakade, ithi: “Sekwanele we zikhulu, zikhulu zakwa-Israyeli! Yekani ukucindezela abantu ngobudlova; nehlulele ngobulungiswa nobuqotho, nikuyeke ukuxosha abantu bami,” ’ ” kusho iNkosi uSimakade.
“ ‘ “Niyakusebenzisa izilinganiso ezifaneleyo, isilinganiso esifaneleyo se-efa nesifaneleyo sebhathi.
I-efa nebhathi kuyakuba nesisindo esifanayo, ibhathi libe ngokweshumi kwehomere, isilinganiso salo sifane nokwehomere.
Ishekeli liyakuba ngamagera angama-20; amashekeli angama-20, angama-25, nali-15 ayakuba ngumina kinina.
“ ‘ “Nanku umnikelo eniyakuwunikela: ingxenye yokwesithupha ye-efa lehomere likakolo, nengxenye yokwesithupha ye-efa lehomere lebhali,
isilinganiso samafutha esinqunyiweyo, ibhathi lamafutha: ingxenye yokweshumi yebhathi lekhori elingamabhathi alishumi njengehomere, ngokuba amabhathi alishumi ayihomere.
Kuyakuthathwa newundlu elilodwa ezimvini ezingama-200 ezivela emadlelweni anamanzi kwa-Israyeli, kube nomnikelo wokusanhlamvu, umnikelo wokushiswa nomnikelo wokuthula, ukuba benzelwe ukubuyisana,” ’ ” kusho iNkosi uSimakade.
“ ‘Bonke abantu bakulelo lizwe bayakuzibandakanya kulo mnikelo wesikhulu sakwa-Israyeli.
Kuyakuba ngumsebenzi wesikhulu ukunikela ngeminikelo yokushiswa, iminikelo yokusanhlamvu, iminikelo yokuphuzwayo emikhosini, ekwethwaseni kwenyanga nangamasabatha, emikhosini yonke emisiweyo yendlu yakwa-Israyeli. Isikhulu siyakuletha umnikelo wesono, umnikelo wokusanhlamvu, umnikelo wokushiswa neminikelo yokuthula, ukuba kwenzelwe indlu yakwa-Israyeli ukubuyisana.
“ ‘Isho kanje iNkosi uSimakade, ithi: ngenyanga yokuqala, ngosuku lwayo lokuqala, uyakuthatha inkunzi neduna elingenasici, bese uhlambulula indlu engcwele.
Umphristi uyakuthatha egazini lomnikelo wesono, alibhece ezinsikeni zendlu, emagumbini omane onqenqema lwe-althare nasezinsikeni zesango legceke elingaphakathi.
Uyakwenza kanjalo ngosuku lwesikhombisa enyangeni, ngenxa yanoma ngumuphi umuntu ophambukayo nongenalwazi, nenzele indlu ukubuyisana.
“ ‘Ngenyanga yokuqala, ngosuku lwe-14 enyangeni, niyakuba nephasika; umkhosi wezinsuku eziyisikhombisa, kudliwe isinkwa esingenamvubelo.
Ngalolo lusuku isikhulu siyakuzilungisela sona nabantu bonke bakulelo lizwe, inkunzi ibe ngumnikelo wesono.
Ngezinsuku eziyisikhombisa zomkhosi siyakunikela kuSimakade umnikelo wokushiswa, izinkunzi eziyisikhombisa nezinqama eziyisikhombisa ezingenasici, ngalezo zinsuku eziyisikhombisa; sinikele ngempongo usuku nosuku, ibe ngumnikelo wesono.
Siyakunikela ngokusanhlamvu; nge-efa, kube ngokweduna ngalinye, ne-efa ngenqama ngayinye, nehini lamafutha nge-efa elilodwa.
“ ‘Kuyakuthi ngenyanga yesikhombisa, ngosuku lwe-15 enyangeni yomkhosi, isikhulu siyakunikela njengoba senzile ngezinsuku eziyisikhombisa, kube ngumnikelo wesono, umnikelo wokushiswa, umnikelo wokusanhlamvu, namafutha.’ ”
“ ‘Isho kanje iNkosi uSimakade, ithi: “Isango legceke elingaphakathi, elibheke ngasempumalanga liyakuvalwa izinsuku eziyisithupha zokusebenza, kepha ngosuku lwesabatha nangosuku lokwethwasa kwenyanga, liyakuvulwa.
Isikhulu siyakungena ngendlela yomphemegumbi wesango elingaphandle, sime ngasensikeni yesango, abaphristi banikele umnikelo waso wokushiswa neminikelo yaso yokuthula, sikhuleke ngasembundwini wesango, bese siphuma, kodwa isango aliyukuvalwa kuze kube kusihlwa.
Abantu abahlala kulelo lizwe bayokhothama, bakhuleke kuSimakade phambi kwalelo sango ngamasabatha nangokwethwasa kwenyanga.
Ngosuku lwesabatha isikhulu siyakunikela kuSimakade ngomnikelo wokushiswa oyakuba ngamawundlu ayisithupha angenasici nenqama engenasici.
Siyakunikela nomnikelo wokusanhlamvu oyi-efa ngenqama; ngamawundlu, siyakuletha umnikelo wokusanhlamvu ngewundlu ngalinye, nehini lamafutha nge-efa.
Ngosuku lokwethwasa kwenyanga siyakunikela ngeduna elingenasici, amawundlu ayisithupha nenqama, konke lokhu kungabi nasici.
Isikhulu siyakuletha umnikelo wokusanhlamvu: i-efa ngenkunzi ne-efa ngenqama; ngamawundlu, kube ngangamandla aso, bese kuba yihini lamafutha nge-efa.
Lapho isikhulu singena, siyakungena ngendlela yomphemegumbi wesango, sibuye siphume ngendlela yawo.
Kuyothi lapho abantu abahlala ezweni bengena phambi kukaSimakade ngesikhathi semikhosi emisiweyo, kuthi lowo ongene ngendlela yesango elisenyakatho ukuba ayokhuleka, aphume ngesango eliseningizimu. Umuntu oyakungena ngendlela yesango eliseningizimu uyakuphuma ngendlela yesango elisenyakatho. Akayukubuyela emuva ngendlela angene ngayo, kodwa uyakuphuma esangweni elimaqondana nalelo angene ngalo.
Isikhulu siyakuba nabo lapho bengena; kuthi uma sebephuma, siphume nabo.
“ ‘ “Emikhosini nasemihlanganweni emisiweyo, umnikelo wokusanhlamvu uyakuba yi-efa ngenkunzi ne-efa ngenqama; ngamawundlu, kube ngangamandla aso, nehini lamafutha nge-efa.
Isikhulu siyakuvulelwa isango elibheke ngasempumalanga lapho siletha umnikelo wesihle, umnikelo wokushiswa neminikelo yokuthula ukuba ibe ngumnikelo wesihle kuSimakade. Siyakunikela umnikelo waso wokushiswa neminikelo yaso yokuthula njengoba senza ngosuku lwesabatha, bese siphuma. Isango liyakuvalwa uma sesiphumile.
“ ‘ “Nsuku zonke, njalo ekuseni, uyakunikela ngewundlu elinonyaka elingenasici, libe ngumnikelo wokushiswa kuSimakade.
Uyakunikela njalo ekuseni, ngomnikelo wokusanhlamvu, ingxenye yesithupha ye-efa, nengxenye yesithathu yehini lamafutha, ukuba kuxovwe impuphu ecolisekileyo, kube ngumnikelo wokusanhlamvu kuSimakade, isimiso saphakade.
Bayakunikela njalo ekuseni ngewundlu, ngomnikelo wokusanhlamvu nangamafutha, kube ngumnikelo wokushiswa imihla yonke.”
“ ‘Isho kanje iNkosi uSimakade, ithi: “Uma isikhulu sipha enye yamadodana aso isipho, siyakuba yifa lendodana yaso, nelesizukulwane sayo, kube ngokwabo ngokwabiwa kwefa.
Kepha uma isikhulu sinika enye yezinceku zaso isipho efeni laso, siyakuba ngesenceku kuze kube ngunyaka wokukhululeka, bese sibuyela esikhulwini, kodwa impela ifa laso liyakuba ngelamadodana aso.
Isikhulu asiyukuthatha lutho efeni labantu, singabaqhwagi impahla yabo, kodwa amadodana aso siyakuwabela ifa empahleni yaso, ukuze abantu bami bangahlakazeki, kube yilowo nalowo ashiye ifa lakhe.” ’ ”
Wayesengingenisa ngendawo yokungena eseceleni kwesango emakamelweni angcwele abaphristi, abheke ngasenyakatho. Kwakukhona lapho indawo esekugcineni ngasentshonalanga.
Wathi kimi: “Nansi-ke indawo lapho abaphristi beyakuphekela khona umnikelo wecala nomnikelo wesono, futhi babhakele lapho umnikelo wokusanhlamvu, ukuze bangawukhipheli egcekeni elingaphandle, bangcwelise abantu.”
Wayesengikhiphela egcekeni elingaphandle, wangedlulisa emagumbini omane egceke: kwakukhona ibala kuwo wonke amagumbi.
Ezingosini zozine zegceke kwakukhona amabala ehlukanisiweyo; ubude balelo nalelo bala babungamakhubhithi angama-40, ububanzi bungamakhubhithi angama-30. Lawo mabala amane ayesezingosini ayelingana ncimishi.
Phakathi kwawo kwakukhona ugange lwamatshe nxazonke, kanjalo namaziko ayenziwe phansi kwalo, macala wonke.
Wathi kimi: “Lezi yizindlu zalabo abaphekayo abayakuphekela kuzo imihlatshelo elethwa ngabantu.”
Wayesengibuyisela emnyango wendlu. Kwakugeleza amanzi phansi kombundu wendlu ngasempumalanga, ngokuba indlu yayibheke ngasempumalanga. Amanzi aphophoza ephuma phansi ohlangothini lwakwesokunene lwendlu, ngaseningizimu ye-althare.
Wayesengikhipha ngendlela yesango ngasenyakatho, wangizungezisa ngendlela engaphandle esangweni elingaphandle, elibheke endleleni esempumalanga. Bheka, kwakuphophoza amanzi ohlangothini lwaseningizimu.
Kwase kuphuma umuntu, eya ngasempumalanga, ephethe umucu wokulinganisa esandleni sakhe, walinganisa kwaba ngamakhubhithi ayinkulungwane, wayesengiweza emanzini, amanzi ayefinyelela emaqakaleni.
Wabuye walinganisa enye inkulungwane, wangidabulisa emanzini, amanzi ayesefinyelela amadolweni. Walinganisa enye futhi inkulungwane, wangiweza emanzini, amanzi ayesefinyelela okhalo.
Waphinda walinganisa enye inkulungwane; kwakungumfula engangingekwazi ukuwuwela, ngokuba amanzi ayesejulile, sekungamanzi okubhukuda kuwo, umfula okungenakuweleka kuwo.
Wathi kimi: “Ndodana yomuntu, usubonile yini na?” Wayesengihambisa, wangibuyisela osebeni lomfula.
Kuthe sengibuyile, ngabona izihlahla eziningi kakhulu osebeni lomfula, ziwuphahlile.
Wayesethi kimi: “Lawa manzi agelezela esifundeni empumalanga, ehlele e-Araba, aye olwandle, angene khona; lawa manzi aphophozayo aya olwandle, ukuze amanzi alo abe masha.
Noma kuphi lapho umfula ugelezela khona, zonke izidalwa eziphilayo eziswebezelayo ziyakuphila, kube khona izinhlanzi eziningi kakhulu, ngokuba lawo manzi ayakuba esegelezele khona.
Abadobi bezinhlanzi bayakuma ogwini lolwandle, kusukela e-Eni Gedi kuya e-Eni Egilayimi; kuyakuba yindawo yokuphonsa amanetha, kudotshwe izinhlanzi ezinhlobonhlobo njengezinhlanzi zoLwandle Olukhulu, zibe ziningi kakhulu.
Kepha amaxhaphozi alo nezimbuku zalo akuyukwenziwa kube kusha, kuyakuyekwa kunosawoti.
Ngasosebeni lomfula ngapha nangapha, kuyakumila zonke izinhlobo zemithi ethela izithelo, amaqabunga ayo awayukubuna, nezithelo zayo aziyukuphela; iyakuthela zinyanga zonke, ngokuba amanzi asuka endlini engcwele agelezela kuzo; izithelo zayo ziyakuba ngukudla, kuthi amaqabunga ayo abe ngawokuphilisa.”
Isho kanje iNkosi uSimakade, ithi: “Nanku umngcele eniyakulehlukanisa ngawo ifa lezwe ngokwezizwana ezili-12 zakwa-Israyeli, uJosefa abe nezabelo ezimbili.
Niyakwabelana lona ngokulinganayo, ngokuba ngasiphakamisa isandla sami, ngafunga ukuba ngilinike okhokho benu; leli lizwe liyakuba yifa lenu.
“Lona-ke kuyakuba ngumngcele wezwe: ohlangothini olusenyakatho, kusukela oLwadle Olukhulu ngendlela eseHethiloni, eZedadi,
eHamathi, eBherotha, eSibhirayimi ephakathi komngcele eDamaseku naseHamathi, kuze kube seHazeri Hathikhoni eliwumngcele ongaseHawurana.
Umngcele osuka olwandle uyakuba yiHazari Enani engumngcele eDamaseku; enyakatho, ngasenyakatho umngcele yiHamathi. Lolu-ke wuhlangothi olusenyakatho.
“Uhlangothi olusempulanga, lusukela phakathi kweHawurana neDamaseku, naphakathi kweGileyadi nakwa-Israyeli. Lolu luyakuba yiJordani; luyakusuka kulo mngcele luze lufike olwandle empumalanga naseThamari. Lolu-ke wuhlangothi olusempumalanga.
“Uhlangothi oluseningizimu: Eningizimu luyakusukela eThamari luze lufike emanzini eMeribhathi Kadeshi, ngasemfudlaneni ongasoLwandle Olukhulu. Lolu-ke wuhlangothi oluseningizimu, ngaseningizimu.
“Uhlangothi olusentshonalanga luyakuba luLwandle Olukhulu, kusukela emngceleni kuze kuqondane neLebo Hamathi. Lolu wuhlangothi olusentshonalanga.
“Leli lizwe niyakuzehlukanisela lona ngokwezizwe zakwa-Israyeli.
Niyakulehlakunisa ngonkatho, libe yifa lenu nelabafokazi abagogobele kini baze bazala abantwana behleli nani. Labo-ke seniyokubathatha njengeminsinsi yokuzimilela kubantu bakwa-Israyeli, nabo bayakwabelwa ifa kanye nani ezizweni zakwa-Israyeli.
Kuyakuthi esizweni umfokazi agogobele kuso, nimabele ifa lakhe khona lapho,” kusho iNkosi uSimakade.
“Nanka amagama ezizwe: UDani uyakuba nesabelo, kusukela emngceleni osenyakatho eceleni komgwaqo eHethiloni kuya eLebho Hamathi, kuze kuyofika eHazari Enani elingumngcele eDamaseku ngasenyakatho eceleni kweHamathi, kuya ohlangothini olusempumalanga kuze kube sentshonalanga.
U-Asheri uyakuba nesabelo ngasemngceleni wakwaDani, kusukela ohlangothini olusempumalanga kuze kube kolusentshonalanga.
“UNafethali uyakuba nesabelo ngasemngceleni wakwa-Asheri, kusukela ohlangothini olusempumalanga kuze kube kolusentshonalanga.
“UManase uyakuba nesabelo ngasemngceleni wakwaNafetali, kusukela ohlangothini olusempumalanga kuze kube kolusentshonalanga.
“U-Efrayimi uyakuba nesabelo ngasemngceleni wakwaManase, kusukela ohlangothini olusempumalanga kuze kube kolusentshonalanga.
“URubeni uyakuba nesabelo ngasemngceleni wakwa-Efrayimi, kusukela ohlangothini olusempumalanga kuze kube kolusentshonalanga.
“UJuda uyakuba nesabelo ngasemngceleni wakwaRubeni, kusukela ohlangothini olusempumalanga kuze kube kolusentshonalanga.
“Ngasemngceleni wakwaJuda, kusukela ohlangothini olusempumalanga kuze kube kolusentshonalanga, kuyakuba ngumnikelo eniyakunikela ngawo; ububanzi bube ngamakhubhithi ayizi-25 000, ubude bube njengesinye sezabelo kusukela ohlangothini olusempumalanga kuze kube kolusentshonalanga. Indlu engcwele iyakuba phakathi naso.
“Umnikelo eniyakunikela ngawo kuSimakade uyakuba ngamakhubhithi ayizi-25 000 ubude, ububanzi bube ngayizi-10 000.
Nanku umnikelo ongcwele: owabaphristi uyakuba ngamakhubhithi ayizi-25 000 ngasenyakatho, entshonalanga ube ayizi-10 000 ububanzi, empumalanga ube ayizi-10 000 ububanzi, nangaseningizimu ube ayizi-25 000 ubude. Indlu engcwele kaSimakade iyakuba phakathi nawo.
Uyakuba ngowabaphristi, abehlukaniselweyo emadodaneni kaZadoki, abagcine inkonzo yami; abangadukanga ngesikhathi kuduka abakwa-Israyeli, njengoba kwaduka abaLevi.
Kuyakuba ngumnikelo okhethekileyo kubo, umnikelo wezwe, endaweni engcwelengcwele, ngasemngceleni wabaLevi.
“Maqondana nomngcele wabaphristi, abaLevi bayakuba nesabelo esingamakhubhithi ayizi-25 000 ubude, ububanzi bube ayizi-10 000, bonke ubude bube ayizi-25 000, ububanzi bube ayizi-10 000.
Abayukuthengisa ngawo, bangananiselani ngawo; lena yindawo ekhethekileyo yezwe, bangalidluliseli komunye umuntu izwe, ngokuba lingcwele kuSimakade.
“Indawo eseleyo engamakhubhithi ayizi-5 000 ububanzi nangayizi-25 000 ubude, iyakuba ngengengcwele; ibe ngeyomuzi, eyokwakha, neyamadlelo. Umuzi uyakuba phakathi nayo.
Nazi izilinganiso zalo izwe: uhlangothi olusenyakatho kuyakuba ngamakhubhithi ayizi-4 500, oluseningizimu kube ayizi-4 500, olusempumalanga kube ayizi-4 500, nolusentshonalanga kube ayizi-4 500.
Umuzi uyakuba namadlelo: ngasenyakatho kuyakuba ngamakhubhithi angama-250, eningizimu abe ngama-250, empumalanga abe ngama-250, nangasentshonalanga abe ngama-250.
Indawo eseleyo emaqondana nendawo yomnikelo ongcwele, ubude bayo buyakuba ngamakhubhithi ayizi-10 000 ngasempumalanga, nayizi-10 000 ngasentshonalanga, kuqondane nomnikelo ongcwele. Izithelo zayo ziyakuba ngukudla kwabasebenza emzini.
Abasebenza emzini bayakuwulima, bevela kuzo zonke izizwe zakwa-Israyeli.
Wonke umnikelo uyakuba ngamakhubhithi ayizi-25 000, nayizi-25 000, ninikele ngomnikelo ongcwele, unezinhlangothi ezine nefa lomuzi.
“Okuseleyo kuyakuba ngokwesikhulu ngapha nangapha komnikelo ongcwele, nefa lomuzi maqondana namakhubhithi ayizi-25 000 zomnikelo ngasemngceleni empumalanga, nasentshonalanga maqondana namakhubhithi ayizi-25 000 ngasemngceleni entshonalanga, kuqondane nezabelo, kube ngokwesikhulu. Umnikelo ongcwele nendlu engcwele kuyakuba phakathi nakho.
Isabelo sabaLevi nendawo yomuzi kuyakuba phakathi kokwesikhulu, kuthi okwesikhulu kube phakathi komngcele wakwaJuda nomngcele wakwaBhenjamini.
“Izizwe eziseleyo-ke: UBhenjamini uyakuba nesabelo, kusukela ohlangothini olusempumalanga kuze kube kolusentshonalanga.
“Ngasemngceleni wakwaBhenjamini, uSimeyoni uyakuba nesabelo, kusukela ohlangothini olusempumalanga kuze kube kolusentshonalanga.
“Ngasemngceleni wakwaSimeyoni, u-Isakhare uyakuba nesabelo, kusukela ohlangothini olusempumalanga kuze kube kolusentshonalanga.
“Ngasemngceleni wakwa-Isakhare, uZebuloni uyakuba nesabelo, kusukela ohlangothini olusempumalanga kuze kube kolusentshonalanga.
“Ngasemngceleni wakwaZebuloni, uGadi uyakuba nesabelo, kusukela ohlangothini olusempumalanga kuze kube kolusentshonalanga.
“Ngasemngceleni wakwaGadi, ohlangothini oluseningizimu ngaseningizimu, umngcele uyakusuka eThamari kuze kube semanzini eMeribhathi Kadeshi nasemfudlaneni, ngasoLwandle Olukhulu.
“Yilo leli lizwe eniyakulehlukanisa ngonkatho, libe yifa lezizwe zakwa-Israyeli. Ilezo-ke izabelo zazo, kusho iNkosi uSimakade.”
“Nanka amasango okuphuma omuzi: Kusukela ohlangothini olusenyakatho kuyakuba ngamakhubhithi ayizi-4 500 ngokulinganisa.
Amasango omuzi ayakubizwa ngamagama ezizwe zakwa-Israyeli, amasango amathathu abe ngasenyakatho: elinye kuyakuba yisango lakwaRubeni, elinye kube ngelakwaJuda, elinye kube ngelakwaLevi.
“Nasohlangothini olusempumalanga kuyakuba ngamakhubhithi ayizi-4 500, namasango amathathu: elinye kube yisango lakwaJosefa, elinye kube ngelakwaBhenjamini, elinye kube ngelakwaDani.
“Nasohlangothini oluseningizimu kuyakuba yizi-4 500 ngokulinganisa, namasango amathathu: elinye kuyakuba yisango lakwaSimeyoni, elinye kube ngelakwa-Isakhare, elinye kube ngelakwaZebuloni.
“Ohlangothini olusentshonalanga kuyakuba ngamakhubhithi ayizi-4 500, namasango awo amathathu: elinye kuyakuba yisango lakwaGadi, elinye kube ngelakwa-Asheri, elinye kube ngelakwaNafetali.
“Kuyakuba ngamakhubhithi ayizi-18 000 nxazonke. “Igama lomuzi, kusukela ngalolo lusuku, kuyakuthiwa USIMAKADE ULAPHA.”
Ngonyaka wesithathu wokubusa kukaJehoyakimi, inkosi yakwaJuda, kwafika uNebukhadinezari, inkosi yaseBhabhele, eJerusalema, walivimbezela.
INkosi uNkulunkulu yanikela esandleni sakhe uJehoyakimi, inkosi yakwaJuda, nengxenye yezitsha zasendlini kaNkulunkulu, waziyisa eShineyari endlini kankulunkulu wakhe; izitsha wazibeka endlini yengcebo kankulunkulu wakhe.
Inkosi yakhuluma ku-Ashiphenazi, induna yabathenwa bayo, ukuba athathe kubantu bakwa-Israyeli abozalo lwenkosi nezikhulu, abalethe kuyo.
Aqoke abafana abangenasici, ababukeka kahle, abanengqondo ekuhlakanipheni konke, abanolwazi ekwazini, abanokuqonda ekwazini, abanamandla okukhonza endlini yenkosi; abafundise izincwadi nolimi lwamaKhaledi.
Inkosi yabamisela isabelo semihla ngemihla sokudla kwenkosi nesewayini eliphuzayo, ukuba bondliwe iminyaka emithathu; kuyakuthi ngasekugcineni kwayo, bame phambi kwenkosi.
Kulabo kwakukhona abantu bakwaJuda: uDaniyeli, uHananiya, uMishayeli, no-Azariya.
Induna yabathenwa yabaqamba amagama; uDaniyeli yamqamba ngokuthi uBhelitheshazari, uHananiya waba nguShadiraki, uMishayeli waba nguMeshakhi, no-Azariya waba ngu-Abhedi Nego.
Kepha uDaniyeli wazimisela enhliziyweni yakhe ukuba angazingcolisi ngesabelo sokudla kwenkosi nangewayini eliphuzayo; wayesecela enduneni yabathenwa ukuba angazingcolisi.
UNkulunkulu wenza ukuba uDaniyeli athole umusa nobumnene emehlweni enduna yabathenwa.
Induna yabathenwa yathi kuDaniyeli: “Mina ngiyesaba ukuthi inkosi yami, inkosi, emisile ukudla kwenu nokuphuza kwenu, iyakubona ubuso benu ukuthi buxhozekile kunobabafana abangontanga yenu, bese nibeka impilo yami engcupheni enkosini.”
Wayesethi uDaniyeli encekwini, induna yabathenwa eyayibekwe phezu koDaniyeli, uHananiya, uMishayeli, no-Azariya:
“Ake ulinge izinceku zakho izinsuku ezilishumi, basiphe imifino yokudla namanzi okuphuza.
Bese kuvezwa ubuso bethu phambi kwakho nobuso babafana abadla isabelo sokudla kwenkosi, wenze ezincekwini zakho njengokubona kwakho.”
Yabalalela kulokho, yabalinga izinsuku ezilishumi.
Ngasekupheleni kwezinsuku ezilishumi, ubuso babo babonakala bubuhle, babekhuluphele emzimbeni kunabo bonke abafana ababedla isabelo sokudla kwenkosi.
Inceku yayisisusa isabelo sokudla newayini lokuphuza, yabapha imifino.
Laba bafana abane uNkulunkulu wabanika ukwazi nokuqonda encwadini nasekuhlakanipheni; uDaniyeli wayenengqondo kuyo yonke imibono namaphupho.
Ngasekugcineni kwezinsuku inkosi eyayishilo ukuthi bazakungeniswa ngazo, induna yabathenwa yabangenisa phambi kukaNebukhadinezari.
Inkosi yakhuluma nabo; phakathi kwabo bonke akufunyaniswanga muntu onjengoDaniyeli, uHananiya, uMishayeli, no-Azariya, ngenkathi sebemi phambi kwenkosi.
Ezintweni zonke zokuhlakanipha nezokuqonda inkosi eyayibabuza ngazo, yabafumanisa bedlula kalishumi zonke izanusi nabathwebulayo ababesembusweni wayo wonke.
UDaniyeli wayekhona, kwaze kwaba ngunyaka wokuqala kaKhoresi, inkosi.
Ngonyaka wesibili wokubusa kukaNebukhadinezari, uNebukhadinezari waphupha amaphupho; umoya wakhe wakhathazeka, wayeseqwasha.
Yayisiyaleza inkosi ukuba kubizwe izanusi, abathwebulayo, abalumbi, namaKhaledi ukuba bachazele inkosi amaphupho ayo. Bangena, bama phambi kwenkosi.
Inkosi yayisithi kubo: “Ngiphuphe iphupho, umoya wami ukhathazekele ukulazi iphupho.”
Ayesekhuluma amaKhaledi enkosini ngesi-Aramu, athi: “Mana njalo, nkosi; yisho ezincekwini zakho iphupho, thina silichaze.”
Inkosi yaphendula, yathi kumaKhaledi: “Izwi liphumile kimi lokuthi uma ningangazisi iphupho nencazelo yalo, niyakuhlahlelwa, izindlu zenu zibe yincithakalo.
Kepha uma ningazisa iphupho, nilichaza, niyakwamukela kimi izipho, imivuzo nodumo olukhulu, ngakho-ke ngitsheleni iphupho nencazelo yalo.”
Abuye aphendula, athi: “Inkosi mayisho iphupho ezincekwini zayo, thina silichaze.”
Inkosi-ke yaphendula, yathi: “Ngiyazi impela ukuthi niyazenzela isikhathi, ngokuba nibona ukuthi izwi liphumile kimi
lokuthi uma ningangazisi iphupho, umthetho munye nje ngani, ngokuba nilungisile amazwi amanga nawonakeleyo okukhuluma phambi kwami, kuze kuguquke isikhathi: ngalokho ngitsheleni iphupho, ukuze ngazi ukuthi ningangibonisa incazelo yalo.”
AmaKhaledi aphendula phambi kwenkosi, athi: “Akukho muntu emhlabeni ongaboniswa indaba yenkosi, ngokuba akukho nkosi, nanduna, nambusi owake wabuza indaba enjalo nakwesisodwa isanusi, nothwebulayo, namaKhaledi.
Futhi kuyinto elukhuni eyifunayo inkosi, akekho omunye ongayembula phambi kwenkosi ngaphandle kwawonkulunkulu abangahlali nabasenyameni.”
Ngalokho inkosi yathukuthela, yafutheka kakhulu, yayaleza ukuba kubhujiswe bonke abahlakaniphileyo baseBhabhele.
Isimemezelo saphuma sokuthi abahlakaniphileyo babeyakubulawa; bamfuna uDaniyeli nabangani bakhe ukuba babulawe.
Khona uDaniyeli wabuyisela impendulo ngokuhlakanipha nangokuqonda ku-Ariyokhi, induna yemilindankosi, owayephumile ukubulala abahlakaniphileyo baseBhabhele;
wathatha wathi ku-Ariyokhi, induna yenkosi: “Siphumeleni enkosini lesi simemezelo esicindezelayo na?” U-Ariyokhi wayesemazisa uDaniyeli indaba.
UDaniyeli wayesengena, wacela enkosini ukuba imnike isikhathi ukuze abonise inkosi incazelo.
UDaniyeli wayeseya endlini yakhe, watshela uHananiya, uMishayeli, no-Azariya, abangani bakhe, le ndaba
ukuba bacele umusa kuNkulunkulu wasezulwini ngale mfihlakalo, ukuze uDaniyeli nabangani bakhe bangabhubhi kanye nabanye abahlakaniphileyo baseBhabhele.
Ngakho-ke yabonakaliswa imfihlakalo kuDaniyeli, ngombono ebusuku. UDaniyeli wambonga uNkulunkulu wasezulwini.
UDaniyeli wathatha, wathi: “Malibongwe igama likaNkulunkulu, kusukela kwaphakade kuze kube phakade, ngokuba ukuhlakanipha namandla kungokwakhe;
uyaguqula izikhathi nezinkathi; uyasusa amakhosi, abeke amakhosi; unika abahlakaniphileyo ukuhlakanipha, nokwazi kwabaqonda ukwazi;
uyambula okujulileyo nokufihlakeleyo; uyazi okusebumnyameni, nokukhanya kuhlezi kuye.
Ngiyakubonga, ngikudumise Wena Nkulunkulu wawobaba, ongiphile ukuhlakanipha namandla, wangazisa esasikucela kuwe, ngokuba usazisile indaba yenkosi.”
Ngalokho uDaniyeli wangena ku-Ariyokhi obemiswe yinkosi ukuba abhubhise abahlakaniphileyo baseBhabhele. Wahamba, washo kanje kuye, wathi: “Ungababhubhisi abahlakaniphileyo baseBhabhele; ngingenise phambi kwenkosi, ngibonise inkosi incazelo.”
U-Ariyokhi wayeseshesha ukumngenisa uDaniyeli phambi kwenkosi, washo kanje kuyo, wathi: “Ngifumene umuntu wabathunjwa bakwaJuda oyakwazisa inkosi incazelo.”
Inkosi yaphendula, yathi kuDaniyeli, ogama lakhe lalinguBhelitheshazari: “Ungangazisa iphupho engilibonileyo nencazelo yalo na?”
UDaniyeli waphendula phambi kwenkosi, wathi: “Imfihlakalo eyibuzayo inkosi, abahlakaniphileyo, nabathwebulayo, nezanusi, nabahlola imihlola, bangeyibonise yona inkosi.
Kepha kukhona uNkulunkulu ezulwini owambula izimfihlakalo; wazisile inkosi uNebukhadinezari okuyakuba khona ngezinsuku ezizayo. Iphupho lakho nemibono yekhanda lakho embhedeni wakho nakhu:
“Wena-ke, nkosi, imicabango yakho nokuyakuba khona emva kwalokhu, yafika kuwe usembhedeni wakho; owambula izimfihlakalo ukwazisile okuyakuba khona.
Mina-ke, akungakuhlakanipha enginakho kunabanye abakhona ukuthi le mfihlakalo yambuliwe kimi, kepha kungukuba inkosi yaziswe incazelo nokuba wazi imicabango yenhliziyo yakho.
“Wena nkosi wabona, bheka, naso isithombe esikhulu. Lesi sithombe esasisikhulu nesikucwebezela kwaso kwakukuhle, sema phambi kwakho, nesimo saso sasesabeka.
Lesi sithombe-ke, ikhanda laso liyigolide elihle, isifuba saso nezingalo zaso kuyisiliva, isisu saso namathanga aso kuyithusi,
imilenze yaso iyinsimbi, ingxenye yezinyawo zaso kuyinsimbi, enye ingxenye kuyibumba.
Wawusubona ukuthi kwaqheshulwa itshe kungengazandla, lashaya isithombe ezinyaweni zaso eziyinsimbi nebumba, lazichoboza.
Kwase kuchotshozwa kanyekanye insimbi, nebumba, nethusi, nesiliva, negolide, kwaba njengamakhoba ezibuya zasehlobo, kwasuswa ngumoya, akutholwanga ndawo; itshe elalisishaya isithombe laba yintaba enkulu, lawugcwalisa umhlaba wonke.
“Yilelo iphupho; nencazelo siyakuyisho phambi kwenkosi.
Wena nkosi uyinkosi yamakhosi onikwe umbuso, namandla, nodumo nguNkulunkulu wasezulwini.
Ezindaweni zonke lapho abantwana babantu behlezi khona, izilwane zasendle nezinyoni zezulu uzinikele esandleni sakho, wenze ukuba ubuse phezu kwazo zonke. Wena uyikhanda legolide.
“Emva kwakho kuyakuvuka omunye umbuso omncane kunawe, nomunye umbuso wesithathu wethusi oyakubusa emhlabeni wonke.
Umbuso wesine uyakuqina njengensimbi, ngokuba insimbi ichoboza, igxobe konke; nanjengensimbi ekwaphula konke lokhu, uyakugxoba, waphule.
Njengalokho wabona izinyawo nezinzwani; ingxenye iyibumba lombumbi, ingxenye iyinsimbi, uyakuba ngumbuso owehlukeneyo, kepha kuyakuba kuwo amandla ensimbi, njengokuba wabona insimbi ixubene nebumba lodaka.
Njengalokho izinzwani zezinyawo zaziyinsimbi; ingxenye nengxenye ibumba, umbuso uyakuba namandla nganxanye, ngakwenye ingxenye ube buthakathaka.
Njengalokho wabona insimbi ixubene nebumba lodaka, bayakuzixubanisa nozalo lwabantu, kepha abayukunamathelana omunye nomunye, njengokuba insimbi ingahlangani nebumba.
“Ezinsukwini zalawo makhosi, uNkulunkulu wasezulwini uyakumisa umbuso ongasoze wachithwa, nobukhosi bawo obungeke bushiyelwe abanye abantu, kepha uyakuchoboza, uqede yonke le mibuso, wona uqobo ume phakade.
Njengalokho wabona itshe ukuthi laqheshulwa entabeni kungengazandla, nokuthi lachoboza insimbi, nethusi, nebumba, nesiliva, negolide; uNkulunkulu omkhulu uyazisile inkosi okuyakuba khona emuva kwalokhu; iphupho liqinisile, nencazelo yalo iyiqiniso.”
Inkosi uNebukhadinezari yayisiwa ngobuso, yakhuleka kuDaniyeli, yayaleza ukuba banikele ngomnikelo nangempepho kuye.
Inkosi yamphendula uDaniyeli, yathi: “Ngempela uNkulunkulu wakho unguNkulunkulu wawonkulunkulu, neNkosi yamakhosi, umambuli wezimfihlakalo, njengalokhu ukwazile ukwambula le mfihlakalo.”
Inkosi yamkhulisa uDaniyeli, yamupha izipho eziningi ezinkulu, yamenza ukuba abuse sonke isifunda saseBhabhele, abe ngumholi wababusi babahlakaniphileyo baseBhabhele.
UDaniyeli wacela enkosini, yabeka oShadirakhi, noMeshakhi, no-Abhedi Nego phezu kwezindaba zesifunda saseBhabhele, kepha uDaniyeli wayesesangweni lenkosi.
UNebukhadinezari, inkosi, wenza isithombe segolide, ubude baso bungamakhubhithi angama-60, ububanzi baso bungamakhubhithi ayisithupha; wasimisa ethafeni eDura esifundeni eBhabhele.
UNebukhadinezari, inkosi, wathumela, waqoqa izikhulu, ababusi, izinduna, abehluleli, abaphathizikhwama, abomkhandlu, nabameli, nabo bonke abaphathizifunda ukuba beze ekwehlukaniselweni kwesithombe uNebukhadinezari, inkosi, asimisileyo.
Khona izikhulu, ababusi, izinduna, abehluleli, abaphathizikhwama, abomkhandlu, abameli, nabo bonke abaphathizifunda baqoqelwa ukwehlukaniselwa kwesithombe uNebukhadinezari, inkosi, abesimisile; bama phambi kwesithombe uNebukhadinezari asimisileyo.
Kwase kumemeza ngamandla ohlaba umkhosi, wathi: “We nina bantu nezizwe, nabezilimi ezehlukene, niyayalwa
ukuba ngesikhathi enizwa ngaso ukukhala kwecilongo, igenkle, ihabhu, umqangala, ugubhu, negemfe, nazo zonke izinhlobo zokubethwa; niwe phansi, nikhuleke esithombeni segolide uNebukhadinezari, inkosi, asimisileyo.
Ongayukuwa phansi, akhuleke, uyakuphonswa ngaso leso sikhathi phakathi kwesithando somlilo ovuthayo.”
Ngalokho lapho abantu bezwa ukukhala kwecilongo, igekle, ihabhu, umqangala, nogubhu, nazo zonke izinhlobo zokubethwayo; bonke abantu, izizwe, nezilimi bawa phansi, bakhuleka esithombeni segolide asimisileyo uNebukhadinezari, inkosi.
Ngaso leso sikhathi kwasondela amadoda amaKhaledi, otha abaJuda.
Akhuluma athi kuNebukhadinezari, inkosi: “Phila kade, nkosi.
Wena nkosi ukhiphe isimemezelo sokuthi bonke abantu abezwa ukukhala kwecilongo, igekle, ihabhu, umqangala, ugubhu, igemfe, nazo zonke izinhlobo zokubethwayo bawe phansi, bakhuleke esithombeni segolide,
nokuthi ongawi phansi, akhuleke, uyakuphonswa phakathi kwesithando somlilo ovuthayo.
Kukhona amadoda abaJuda, owabeke ukuba aphathe isifunda eBhabhele: uShadirakhi, uMeshakhi, no-Abhedi Nego; lawa madoda, nkosi, awawunakanga umyalo wenkosi; awabakhothameli onkulunkulu bakho, awakhuleki esithombeni segolide osimisileyo.”
Khona uNebukhadinezari wayaleza egcwele ulaka nentukuthelo, wayaleza ukuba kulethwe uShadirakhi, uMeshakhi, no-Abhedi Nego. Alethwa-ke lawo madoda phambi kwenkosi.
UNebukhadinezari wathi kuwo: “Nenze ngamabomu yini, Shadirakhi, Meshakhi, no-Abhedi Nego ukuba ningabahloniphi onkulunkulu bami, ningakhuleki esithombeni segolide engisimisileyo na?
Manje uma nilungele ukuba ngesikhathi enizwa ngaso ukukhala kwecilongo, igekle, ihabhu, umqangala, ugubhu, igemfe, nazo zonke izinhlobo zokubethwayo, niwe phansi, nikhuleke esithombeni engisenzileyo, kuhle; kepha uma ningakhuleki, niyakuphonswa ngaso leso sikhathi phakathi kwesithando somlilo ovuthayo; ngumuphi lowo nkulunkulu onganophula esandleni sami na?”
UShadirakhi, uMeshakhi, no-Abhedi Nego baphendula, bathi enkosini: “Nebukhadinezari, thina asidingi ukukuphendula kule ndaba.
Uma kunjalo, uNkulunkulu wethu esimkhonzayo unamandla okusikhulula esithandweni somlilo ovuthayo; yebo, uyakusikhulula esandleni sakho, nkosi.
Kepha noma kungenjalo, makwazeke kuwe nkosi ukuthi asiyukukhonza onkulunkulu bakho, asiyukukhuleka esithombeni segolide osimisileyo.”
Khona uNebukhadinezari wathukuthela wafa, nesimo sobuso bakhe saguquka ngenxa kaShadirakhi, uMeshakhi, no-Abhedi Nego; wakhuluma wayaleza ukuba isithando somlilo sibaselwe kasikhombisa ngaphezu kwalokho okwejwayeleke ukuba sibaselwe ngakho.
Wayeseyaleza amadoda anamandla ayengawempi yakhe ukuba abophe uShadirakhi, uMeshakhi, no-Abhedi Nego, abaphonse esithandweni somlilo ovuthayo.
Ngakho-ke aboshwa lawo madoda egqoke amayembe, amabhulukwe, izigqoko, nezinye izingubo; aphonswa phakathi kwesithando somlilo ovuthayo.
Ngalokho ngokuba umyalo wenkosi wawunesihluku, nesithando somlilo sishisa ngokwedlulele, ilangabi lomlilo lawabulala lawo madoda ayequkula uShadirakhi, uMeshakhi, no-Abhedi Nego.
Kepha lawa madoda amathathu; oShadirakhi, noMeshakhi, no-Abhedi Nego, awela phansi eboshiwe phakathi esithandweni somlilo ovuthayo.
Khona uNebukhadinezari, inkosi wethuka, wasuka ngokushesha wakhuluma kwabomkhandlu wakhe, wathi: “Angithi siphonse amadoda amathathu eboshiwe phakathi komlilo na?” Baphendula, bathi enkosini: “Uqinisile, nkosi.”
Yaphendula yathi: “Bhekani, ngibona amadoda amane akhululekileyo ehamba phakathi komlilo, awafanga; eyesine ibonakala ifana nendodana yonkulunkulu.”
Wayesesondela uNebukhadinezari emnyango wesithando somlilo ovuthayo; wakhuluma wathi: “Shadirakhi, Meshakhi, no-Abhedi Nego, nina zinceku zikaNkulunkulu oPhezukonke, phumani nize lapha.” Base bephuma oShadirakhi, noMeshakhi, no-Abhedi Nego phakathi komlilo.
Izikhulu, ababusi, izinduna, nabomkhandlu wenkosi babuthana, babona lawa madoda ukuthi umlilo awubanga namandla emizimbeni yawo, akuhangukanga nolulodwa unwele emakhanda awo, namayembe awo awaguqukanga, ngisho nephunga lomlilo alisondelanga kuwo.
UNebukhadinezari wakhuluma, wathi: “Makabongwe uNkulunkulu woShadirakhi, uMeshakhi, no-Abhedi Nego, othumele ingelosi yakhe, wakhulula izinceku zakhe ebezimethemba, zanikela imizimba yazo ukuba zingakhonzi, zingakhuleki nakoyedwa unkulunkulu, kuphela uNkulunkulu wazo, zalishaya indiva izwi lenkosi.
Ngalokho ngikhipha isimemezelo sokuba bonke abantu, izizwe, izilimi ezikhuluma okungafanele ngoNkulunkulu woShadirakhi, uMeshakhi, no-Abhedi Nego ziyakuhlahlelwa, izindlu zazo zenziwe incithakalo, ngokuba akekho omunye unkulunkulu ongasindisa ngale ndlela.”
Inkosi yabaphakamisa oShadirakhi, uMeshakhi, no-Abhedi Nego esifundeni eBhabhele.
UNebukhadinezari inkosi, kubo bonke abantu, izizwe, nezilimi ezakhe emhlabeni wonke: ukuthula makwande kini.
Kube kuhle kimi ukuba nginazise ngezibonakaliso nezimangaliso uNkulunkulu oPhezukonke azenzileyo kimi.
Maye, zinkulu kangakanani izibonakaliso zakhe! Maye, zinamandla izimangaliso zakhe! Umbuso wakhe ngumbuso ongunaphakade, nokubusa kwakhe kungokwezizukulwane ngezizukulwane.
Mina Nebukhadinezari ngangihlezi ngokuthula, ngitamasa esigodlweni sami.
Ngase ngifikelwa yiphupho, langethusa; imicabango embhedeni wami nemibono emqondweni wami yangesabisa.
Ngakho-ke, ngakhipha isimemezelo sokuba balethwe phambi kwami bonke abahlakaniphileyo baseBhabhele, ukuze bangazise incazelo yephupho.
Kwase kufika izanusi, abathwebulayo, amaKhaledi, nabahlola imihlola, ngabatshela iphupho, kodwa bahluleka ukungichazela lona.
Kepha kwathi ekugcineni kweza kimi uDaniyeli, ogama lakhe nguBhelitheshazari, okuyigama elifana nelikankulunkulu wami, okukuye umoya wonkulunkulu abangcwele; ngamtshela iphupho, ngathi:
“Bhelitheshazari, wena nduna yezanusi, ngokuba ngiyazi ukuthi umoya wonkulunkulu abangcwele ukuwe nokuthi awukhathazwa mfihlakalo, ngitshele imibono yephupho lami engilibonileyo nencazelo yalo.
Yayinje imibono emqondweni wami, engayibona ngisembhedeni wami: ngabona; bheka, kwakumi isihlahla phakathi nomhlaba, siphakeme kakhulu impela.
Isihlahla sakhula, saqina, ubude baso babufinyelela ezulwini, sibonakala emhlabeni wonke jikelele.
Amaqabunga aso ayemahle, nezithelo zaso ziziningi, kukhona kuso ukudla kwabo bonke. Izilwane zasendle zazinomthunzi phansi kwaso, izinyoni zezulu zihlala emagatsheni aso, nabantu bonke babondliwa yiso.
“Ngabona emibonweni esemqondweni wami ngisembhedeni wami; bheka, nango umlindi ongcwele ehla evela ezulwini.
Wamemeza kakhulu, esho kanje, ethi: ‘Gawula isihlahla, unqume amagatsha aso, uvuthulule amaqabunga aso, uhlakaze izithelo zaso. Izilwane mazisuke phansi kwaso, nezinyoni emagatsheni aso.
Nokho, ushiye isiqu sezimpande zaso emhlabathini, sinesibopho sensimbi nesethusi, otshanini basendle, simanziswe ngamazolo ezulu, isabelo saso sinesezilwane otshanini bomhlaba.
Inhliziyo yakhe iyakuguqulwa ingabi ngeyomuntu, aphiwe inhliziyo yesilwane, kudlule izikhathi eziyisikhombisa phezu kwakhe.
“ ‘Kunqunyiwe ngesimemezelo sabalindi nangesiyalezo sezwi labangcwele ukuba abaphilayo bazi ukuthi oPhezukonke ubusa imibuso yabantu, ayinike amthandayo, abeke phezu kwayo ozithobayo kubantu.’
“Leli phupho ngalibona mina, Nebukhadinezari. Wena-ke Bhelitheshazari, yisho incazelo yalo, ngokuba bonke abahlakaniphileyo bombuso wami abakwazanga ukungitshela incazelo, kepha wena ungakwenza lokho, ngokuba umoya wonkulunkulu abangcwele ukuwe.”
Khona lapho uDaniyeli, ogama lakhe nguBhelitheshazari, wamangala isikhashana, imicabango yakhe yamesabisa. Inkosi yathi: “Bhelitheshazari, iphupho nencazelo makungakwesabisi.” UBhelitheshazari waphendula, wathi: “Nkosi, iphupho malibe ngelabakuzondayo, nencazelo yalo ibe ngeyezitha zakho.
Isihlahla osibonileyo, sakhula, saqina, obude baso bufinyelela ezulwini nokubonakala kwaso kwaze kwaba sekugcineni komhlaba;
omaqabunga aso ayemahle, nezithelo zaso ziziningi, kukhona kuso ukudla kwabo bonke; izilwane zasendle zahlala phansi kwaso, nezinyoni zezulu zakhela emagatsheni aso:
nguwe nkosi okhulile waqina, ngokuba ubukhulu bakho bukhulile, bufinyelele ezulwini, nokubusa kwakho kuze kube sekugcineni komhlaba.
“Njengalokho inkosi yabona umlindi ongcwele ehla evela ezulwini, ethi: ‘Gawula isihlahla, usibhubhise, kodwa ushiye isiqu sezimpande zaso emhlabathini, sinesibopho sensimbi nesethusi otshanini basendle, simanziswe ngamazolo ezulu; isabelo saso sinesezilwane zasendle, kuze kudlule izikhathi eziyisikhombisa phezu kwaso.’
Nansi-ke incazelo, nkosi: yisimemezelo soPhezukonke esehlele inkosi yami, inkosi,
sokuthi uyakuxoshwa kubantu, uhlale nezilwane zasendle, udliswe utshani njengezinkabi, umanziswe ngamazolo ezulu, kudlule izikhathi eziyisikhombisa phezu kwakho, uze wazi ukuthi oPhezukonke ubusa imibuso yabantu, ayinike amthandayo.
Njengalokho bayaleza ukuba kushiywe isiqu sezimpande zesihlahla, umbuso wakho uyakuqina kuwe, lapho usufundile ukuthi izulu liyabusa.
Ngalokho, nkosi, masamukeleke kuwe iseluleko sami, ushiye izono zakho ngokwenza okulungileyo, uhlukane nobubi bakho ngokuba nomusa kwabampofu; mhlawumbe impumelelo yakho ingaqhubekela phambili.”
Konke lokho kwamehlela uNebukhadinezari, inkosi.
Ngasekupheleni kwezinyanga ezili-12 wayehamba endlini yamakhosi eBhabhele.
Inkosi yathatha, yathi: “Angithi yileli Bhabhele elikhulu engilakhileyo ukuba libe yindlu yobukhosi ngezikhwepha zamandla ami, libe ludumo lobukhosi bami na?”
Kwathi nje izwi lisesemlonyeni wenkosi, kwase kwehla ezulwini izwi, lithi: “We nkosi Nebukhadinezari, kukhulunyiwe kuwe kwathiwa: umbuso usukile kuwe;
uyakuxoshwa kubantu, uhlale nezilwane zasendle, udliswe utshani njengezinkabi, kudlule phezu kwakho izikhathi eziyisikhombisa, uze wazi ukuthi oPhezukonke ubusa imibuso yabantu, ayinike amthandayo.”
Ngaso leso sikhathi lokho kwagcwaliseka phezu kukaNebukhadinezari: waxoshwa kubantu, wadliswa utshani njengezinkabi, umzimba wakhe wamanziswa ngamazolo ezulu, zaze zakhula izinwele zakhe njengezimpaphe zezinkozi, nezinzipho zakhe njengamazipho ezinyoni.
Ngasekugcineni kwezinsuku mina, Nebukhadinezari ngaphakamisela amehlo ami ezulwini, nomqondo wami wabuyela kimi, ngambonga oPhezukonke, ngamdumisa, ngamtusa yena ohlezi phakade. Ngokuba ukubusa kwakhe kungukubusa okuphakade, nombuso wakhe ungowezizukulwane ngezizukulwane;
bonke abakhileyo emhlabeni bashaywa into engelutho; wenza ngokuthanda kwakhe empini yasezulwini naphakathi kwabakhileyo emhlabeni; akekho ongavimbela isandla sakhe, noma athi kuye: “Wenzani na?”
Ngaso leso sikhathi wabuyela kimi umqondo wami, nobukhosi bami, nobuhle bami babuyela kimi, kwaba ludumo lombuso wami; abomkhandlu wami nezinduna zami bangifuna; ngase ngibekwa embusweni wami, kwenezelelwa ubukhulu obedluleleyo kimi.
Manje-ke, mina Nebukhadinezari ngiyatusa, ngiyaphakamisa, ngidumisa iNkosi yezulu, ngokuba yonke imisebenzi yayo iyiqiniso, nezindlela zayo zingubulungiswa; inamandla okubathobisa abahamba ngokuzidla.
UBhelishazari, inkosi, wenzela izinduna zakhe eziyinkulungwane idili elikhulu, waphuza iwayini phambi kwaleyo nkulungwane.
Kwathi uBhelishazari esalinambitha iwayini wayeseyaleza ukuba kulethwe izitsha zegolide nezesiliva, lezo uNebukhadinezari, uyise, ayezithathe ethempelini eJerusalema, ukuba inkosi, izikhulu zayo, omkayo, nezancinza zayo baphuze ngazo.
Base beziletha izitsha zegolide ezazithathwe ethempelini eliyindlu kaNkulunkulu, eJerusalema; inkosi, izikhulu zayo, omkayo, nezancinza zayo baphuza ngazo.
Baphuza iwayini, badumisa onkulunkulu begolide, abesiliva, abethusi, abensimbi, abomuthi nabetshe.
Ngaso leso sikhathi kwavela iminwe yesandla somuntu, yaloba maqondana nothi lwezibani, emgudulweni wodonga lwesigodlo senkosi; inkosi yabona ingxenye yesandla esasiloba.
Kwase kuhwaqabala ubuso bayo, imicabango yayo yayiyesabisa, kwaxega amanyonga okhalo lwayo, namadolo ayo ashayana.
Inkosi yamemeza kakhulu ukuba kulethwe abathwebulayo, amaKhaledi, nabahlola imihlola. Yayisikhuluma inkosi, yathi kwabahlakaniphileyo baseBhabhele: “Noma ngubani ongafunda lo mbhalo, angitshele incazelo yawo uyakwembathiswa okubukhwebezane, afakwe nomgexo wegolide entanyeni yakhe, abuse engowesithathu embusweni.”
Base bengena bonke abahlakaniphileyo benkosi, kepha behluleka ukuwufunda umbhalo nokuyazisa inkosi ngencazelo yawo.
Khona lapho inkosi uBhelishazari yesaba kakhulu, kwahwaqabala ubuso bayo, nezinduna zayo zamangala.
Ngenxa yamazwi enkosi nawezinduna zayo kwase kungena indlovukazi endlini yedili, yakhuluma yathi: “Mana njalo, nkosi; imicabango yakho mayingakwesabisi, kungaguquki ukucwebezela kwakho.
Kukhona embusweni wakho umuntu okukuye umoya wonkulunkulu abangcwele; okwathi ngezinsuku zikayihlo kwafunyanwa kuye ukukhanya, ukuqonda, nokuhlakanipha okufana nokuhlakanipha kwawonkulunkulu. Inkosi uNebukhadinezari, uyihlo, yambeka waba yinduna yezanusi, eyabathwebulayo, eyamaKhaledi, neyabahlola imihlola, yebo, nkosi, uyihlo,
ngokuba kwafunyanwa umoya odluleleyo, ukwazi, nokuqonda ukuchaza amaphupho, ukudalula izimfumbe, nokuqaqa amafindo kukuye uDaniyeli, lowo inkosi eyambiza ngokuthi nguBhelitheshazari; manje makabizwe uDaniyeli, uyakuyisho incazelo.”
Ngakho-ke uDaniyeli walethwa phambi kwenkosi. Inkosi yakhuluma, yathi kuye: “Wena unguDaniyeli ongomunye wabathunjwa bakwaJuda, abalethwa yinkosi ubaba, bevela kwaJuda na?
Ngizwile ngawe ukuthi umoya wonkulunkulu ukuwe nokuthi kufunyenwe kuwe ukukhanya, ukuqonda, nokuhlakanipha okwedluleleyo.
Manje-ke kulethwe phambi kwami abahlakaniphileyo nabathwebulayo ukuba bafunde lo mbhalo, bangazise incazelo yawo, kepha behluleka ukungitshela incazelo yale ndaba.
Kepha ngizwile ngawe ukuthi ungakwazi ukungazisa izincazelo, usombulule le nkiyankiya. Manje-ke uma ungawufunda lo mbhalo, ungazise incazelo yawo, uyakwembathiswa okubukhwebezane, ufakwe nomgexo wegolide entanyeni yakho, ubuse ube ngowesithathu embusweni.”
Wayesephendula uDaniyeli phambi kwenkosi, wathi: “Zigcinele zona izipho zakho, imivuzo yakho uyiphe omunye, nokho ngiyakuyifundela inkosi umbhalo, ngiyazise incazelo.
“E, nkosi, uNkulunkulu oPhezukonke wanika uNebukhadinezari uyihlo umbuso, ubukhulu, udumo, nobukhosi.
Kepha ngenxa yobukhulu amnika bona, bonke abantu, izizwe, nezilimi bathuthumela, besaba phambi kwakhe; kwathi athanda ukumbulala wambulala, athanda ukumyeka wamyeka; athanda ukumphakamisa wamphakamisa, athanda ukumthobisa wamthobisa.
Kepha lapho ezikhukhumeza enhliziyweni yakhe, nomoya wakhe uba lukhuni esezidla, wehliswa esihlalweni sakhe sobukhosi, balususa udumo lwakhe kuye;
waxoshwa kubantwana babantu. Inhliziyo yakhe yaba njengeyezilwane, wahlala nezimbongolo zasendle; wadliswa utshani njengezinkabi, nomzimba wakhe wamanziswa ngamazolo ezulu, waze wazi ukuthi uNkulunkulu oPhezukonke ubusa imibuso yabantu, ubeka amthandayo phezu kwayo.
“Nawe ndodana yakhe, Bhelishazari, awuyithobisanga inhliziyo yakho, nakuba ukwazi konke lokho,
kepha uziphakamisile wamelana neNkosi yasezulwini. Balethe kuwe izitsha zendlu yakhe; wena, nezinduna zakho, nomkakho, nezancinza zakho naphuza iwayini ngazo. Wena ubadumisile onkulunkulu besiliva, abegolide, abethusi, abensimbi, abomuthi, nabetshe, abangaboni, abangezwa, abangazi, kodwa awumdumisanga uNkulunkulu omphefumulo wakho usesandleni sakhe, nokungezakhe zonke izindlela zakho.
Yayisithunyelwa le ngxenye yesandla ivela kuye, kwalotshwa lo mbhalo.
“Yilo umbhalo owalotshwa: MENE, MENE TEKEL, UFARSIN.
“Nansi incazelo yalokho: MENE: uNkulunkulu uwubalile umbuso wakho, uwuqedile.
TEKEL: ulinganisiwe esilinganisweni, ufunyenwe ulula.
PERES: umbuso wakho wahlukene, unikelwe kumaMede namaPheresiya.”
Khona lapho uBhelishazari wathi, mabembathise uDaniyeli okubukhwebezane, bafake umgexo wegolide entanyeni yakhe, bakhiphe isimemezelo ngaye sokuthi uyakubusa engowesithathu embusweni.
Ngalobo busuku uBhelishazari inkosi yamaKhaledi wabulawa.
UDariyu umMede wathatha umbuso eneminyaka engama-62.
Kwaba kuhle kuDariyu ukuba abeke phezu kombuso izikhulu eziyi-120 zibuse embusweni wonke.
Phezu kwazo wabeka omengameli abathathu, uDaniyeli engomunye wabo, ukuba izikhulu zibike kubo, ukuze inkosi ingasweli lutho.
UDaniyeli wabadlula omengameli nezikhulu, ngokuba wayenekhono eledlulele; inkosi yayicabanga ukumbeka ukuba engamele umbuso wonke.
Lokho-ke kwenza ukuthi omengameli nezikhulu bafune ukuthola utho olubi ngoDaniyeli oluqondene nombuso, kepha abatholanga lutho nacala kuye, ngokuba wayethembekile; akutholakalanga siphosiso nankohlakalo kuye.
Ayesethi lawo madoda: “Asiyikuthola lutho ngoDaniyeli, ngaphandle kokuthi sithole okuqondene nomthetho kaNkulunkulu wakhe.”
Base bebuthana labo mengameli nezikhulu baya enkosini beyisixuku, basho lokhu kuyo, bathi: “Phila kade, nkosi Dariyu.
Bonke omengameli bombuso, ababusi, izikhulu, abomkhandlu, nezinduna babonisene ukuba kumiswe isimiso senkosi, kumenyezelwe isiyalezo esiqinileyo sokuthi yilowo nalowo ocela isicelo kunoma yimuphi unkulunkulu noma kumuntu ngezinsuku ezingama-30, ngaphandle kwakho nkosi, uyakuphonswa emphandwini wezingonyama.
Manje, nkosi, khipha isimemezelo, ulobe umbhalo ongenakuguqulwa ngokomthetho wamaMede namaPheresiya ongenakuguquka.”
Ngakho-ke inkosi uDariyu yayisiloba umbhalo nesiyalezo.
Kwathi lapho uDaniyeli esazi ukuthi umbhalo ulotshiwe, wangena endlini yakhe, amafasitela ayesekamelweni lakhe eliphezulu ayevulekele ngaseJerusalema, waguqa ngamadolo kathathu ngosuku, wakhuleka, wabonga uNkulunkulu wakhe, njengalokho ayenzile kuqala.
Ayesebuthana lawo madoda, amthola uDaniyeli ekhuleka, enxusa kuNkulunkulu wakhe.
Asondela phambi kwenkosi, akhuluma kuyo ngesiyalezo sayo, athi: “Awukhiphanga yini umthetho othi yilowo nalowo ocela kunoma yimuphi unkulunkulu noma kumuntu ngezinsuku ezingama-30, ngaphandle kwakho nkosi, uyakuphonswa emphandwini wezingonyama na?” Inkosi yaphendula yathi: “Kuyiqiniso lokho ngokomthetho wamaMede namaPheresiya ongenakuguquka.”
Ayesephendula phambi kwenkosi ethi kuyo: “UDaniyeli ongomunye wabathunjwa bakwaJuda akakushayi mkhuba wena nkosi, nomthetho owulobileyo, kepha uyayenza imikhuleko yakhe yokunxusa kathathu ngosuku.”
Kuthe lapho inkosi isiwezwile lawo mazwi, yadabuka kakhulu, yazindla ngoDaniyeli ukuba imkhulule, yazama ukumhlenga kwaze kwaba sekushoneni kwelanga.
Ayesebuthana lawo madoda aya enkosini, athi kuyo: “Yazi, nkosi, ukuthi kungumthetho wamaMede namaPheresiya ukuba kungaguqulwa siyalezo nasimiso esimiswa yinkosi.”
Yayisiyaleza inkosi, walethwa uDaniyeli, waphonswa emphandwini wezingonyama. Inkosi yakhuluma, yathi kuDaniyeli: “Sengathi uNkulunkulu wakho omkhonza njalo angakuhlenga.”
Kwase kulethwa itshe, labekwa emlonyeni womphandu. Inkosi yalinamathelisa ngendandatho yayo nangendandatho yezikhulu zayo, ukuze kungaguqulwa lutho maqondana noDaniyeli.
Inkosi yase iya esigodlweni sayo, yadlulisa ubusuku izila; izinsimbi ezibethwayo azilethwanga kuyo, ayizange ibuthi quthu ubuthongo.
Inkosi yavuka kusempondozankomo, yaphuthuma emphandwini wezingonyama.
Kwathi lapho inkosi isisondele kuwo kuDaniyeli, yamemeza ngezwi elinosizi; yakhuluma, yathi kuDaniyeli: “Daniyeli, nceku kaNkulunkulu ophilayo, ngabe uNkulunkulu wakho omkhonza njalo ukwazile yini ukukuhlenga ezingonyameni na?”
UDaniyeli wathi enkosini: “Mana njalo, nkosi.
UNkulunkulu wami uthumele ingelosi yakhe, yavala imilomo yezingonyama, azingilimazanga, ngokuba kwatholakala ukuthi ngimsulwa phambi kwakhe; naphambi kwakho, nkosi, angikwenzanga okubi.”
Inkosi yajabula kakhulu, yayala ukuba uDaniyeli akhushulwe emphandwini. UDaniyeli wayesekhushulwa kuwo, akutholakalanga myocu kuye, ngokuba wayemethembile uNkulunkulu wakhe.
Inkosi yayaleza, alethwa lawo madoda ayemangalele uDaniyeli, aphonswa emphandwini wezingonyama, wona, abantwana bawo, nomkawo; izingonyama zabathelekela, zaqhobozela amathambo abo bengakafinyeleli naphansi emphandwini.
UDariyu inkosi wayeselobela bonke abantu, izizwe, nezilimi ezikhona emhlabeni wonke wathi: “Ukuthula makwande kini.
“Ngibeka umthetho wokuba ekubuseni konke kombuso wami abantu bathuthumele, besabe phambi kukaNkulunkulu kaDaniyeli, “ngokuba unguNkulunkulu ophilayo, umi kuze kube phakade. Umbuso wakhe yiwo ongayikubhujiswa, nokubusa kwakhe kuyakuma kuze kube phakade.
Uyakhulula, asindise; wenza izibonakaliso nezimangaliso ezulwini nasemhlabeni. Yena omkhululile uDaniyeli emandleni ezingonyama.”
UDaniyeli waba nempumelelo ngesikhathi sokubusa kukaDariyu, nesikaKhoresi umPheresiya.
Kwathi ngonyaka wokuqala wokubusa kukaBhelishazari, inkosi yaseBhabhele, uDaniyeli waphupha iphupho, wabona nemibono emqondweni wakhe elele embhedeni wakhe, waliloba iphupho, walanda ngengqikithi yalo.
UDaniyeli wathatha wathi: “Ngabona embonweni wami ebusuku; bheka, imimoya yomine yezulu yavumbuluka olwandle olukhulu.
Izilo ezine ezinkulu zaphuma olwandle, zehlukile esinye kwesinye.
“Esokuqala sasinjengengonyama, sinamaphiko okhozi. Ngabuka aze ahluthwa amaphiko aso, saphakanyiswa emhlabeni, samiswa ngezinyawo ezimbili njengomuntu, sanikwa inhliziyo yomuntu.
“Bheka, esinye isilo, esesibili, sasinjengebhele, samiswa ngolunye uhlangothi, kukhona izimbambo ezintathu emlonyeni waso phakathi kwamazinyo aso; kwathiwa kuso: ‘Vuka, udle inyama eningi.’
“Emveni kwalokho ngabona; bheka, esinye sasinjengengwe, sinamaphiko enyoni amane emhlane. Lesi silo sasinamakhanda amane, sanikwa ukubusa.
“Emveni kwalokho ngabona emibonweni ebusuku; bheka, isilo sesine, esesabekayo, sinamandla, siqinile kakhulu, sinamazinyo amakhulu ensimbi, sadla, saphula, sanyathela okuseleyo ngezinyawo zaso. Sasehlukile kuzo zonke izilo ezazingaphambi kwaso sinezimpondo ezilishumi.
“Kuthe ngisacabanga ngezimpondo; bheka, kwavela phakathi kwazo olunye uphondo, oluncane, kwathi izimpondo ezintathu zokuqala ezazingaphambi kwalo zabhonculwa, kulolo phondo kwakukhona amehlo anjengamehlo omuntu, nomlomo okhuluma ngokuzigqaja.
“Kuthe ngisabuka, kwase kubekwa izihlalo zobukhosi, kwahlala omdala wezinsuku. Izembatho zakhe zazimhlophe njengeqhwa, izinwele ekhanda lakhe zinjengoboya bezimvu obuhlanzekileyo. Isihlalo sakhe sobukhosi sasingamalangabi omlilo, amasondo aso engumlilo ovuthayo.
Umfula womlilo wawugeleza uqubuka phambi kwakhe. Inkulungwane yezinkulungwane yayimkhonza, nezinkulungwane ezilishumi zezinkulungwane ezilishumi zimi phambi kwakhe; kwahlala abehluleli, izincwadi zavulwa.
“Ngabheka ngaleso sikhathi ngenxa yomsindo omkhulu wamazwi ayekhulunywa luphondo. Ngabuka saze sabulawa isilo umzimba waso wabhujiswa, saphonswa emlilweni ovuthayo.
Kepha ezinye izilo, ukubusa kwazo kwasuswa, kodwa zavunyelwa ukuba ziphile kuze kube yisikhathi esithile.
“Ngabona emibonweni ebusuku; bheka, onjengendodana yomuntu wafika namafu ezulu; wafika komdala wezinsuku, wasondezwa phambi kwakhe.
Wanikwa ukubusa, ubukhosi, nombuso, ukuze bonke abantu, izizwe, nezilimi bamkhonze; ukubusa kwakhe kungukubusa okuphakade okungayukuphela, nombuso wakhe yiwo ongayukubhujiswa.
“Mina Daniyeli, umoya wami wakhathazeka edokodweni lawo, nemibono emqondweni wami yangihlupha.
Ngasondela komunye wababemi lapho, ngabuza kuye iqiniso lakho konke lokhu. Wangitshela, wangazisa incazelo yezindaba.
‘Lezo zilo ezinkulu ezine zingamakhosi amane ayakuvela emhlabeni.
Kepha abangcwele boPhezukonke bayakwemukeliswa umbuso, ube ngowabo kuze kube phakade, yebo, kuze kube phakade naphakade.’
“Ngase ngifuna ukwazi iqiniso ngesilo sesine esehlukileyo kuzo zonke ezinye, esesabeka kakhulu, esimazinyo aso ayinsimbi, nezinzipho zaso zilithusi, esasidla, siphoqoze, sigxobe okuseleyo ngezinyawo.
Ngafuna ukwazi kabanzi nangezimpondo ezilishumi ezazisekhanda laso, nolunye olwavelayo, ezawa phambi kwalo ezintathu, lolo phondo olwalunamehlo nomlomo owawukhuluma ngokuzigqaja, olwalubukeka lulukhulu kunezinye.
Kuthe ngisabuka, lolo phondo lwalwa nabangcwele, lwabehlula,
kwaze kwafika omdala wezinsuku, abangcwele boPhezukonke base bevunwa yisigwebo, kwafika isikhathi esinqunyiweyo sokuba umbuso ube ngowabangcwele.
“Wayesethi: ‘Isilo sesine siyakuba ngumbuso wesine emhlabeni, oyakwehluka kuyo yonke imibuso, uwudle wonke umhlaba, uwugxobe, uwufihlize.
Izimpondo ezilishumi-ke, zingamakhosi alishumi ayakuvela kulowo mbuso, enye iyakuvela emva kwawo; iyakwehluka kwawokuqala, iyakuwathobisa amakhosi amathathu.
Iyakukhuluma amazwi amelene noPhezukonke, ibakhathaze abangcwele bakhe; icabange ukuguqula izikhathi ezimisiweyo nomthetho. Bayakunikelwa esandleni sayo kuze kube yisikhathi, nezikhathi, nengxenye yesikhathi.
“ ‘Kepha abehluleli bayakuhlala, bakususe ukubusa kwayo kuqedwe kuphele nya kuze kube phakade.
Umbuso, ukubusa, nobukhulu bemibuso phansi kwalo lonke izulu kuyakunikwa isizwe sabangcwele boPhezukonke. Umbuso wakhe kuyakuba ngumbuso ongunaphakade; yonke imibuso iyakumkhonza, imlalele.’
“Nasi-ke isiphetho sendaba. Mina Daniyeli, imicabango yami yangikhathaza kakhulu, ubuso bami baphaphatheka, kodwa ngayigcina leyo ndaba enhliziyweni yami.”
Ngonyaka wesithathu wokubusa kwenkosi uBhelishazari kwabonakala kimi mina Daniyeli umbono emveni kwalokho okwakubonakale kimi kuqala.
Ngabona embonweni, lapho ngibheka ngangiseShushani esigodlweni senkosi esifundeni sase-Elamu; embonweni ngabona ngangingasemselenikazi i-Ulayi.
Ngase ngiphakamisa amehlo ami, ngabona; bheka, kwakumi phambi komfula inqama inezimpondo ezimbili; lezo zimpondo ezimbili zazizinde, kepha olunye lulude kunolunye, olude lwavela kamuva.
Ngabona inqama igasela entshonalanga, enyakatho, naseningizimu; kwakungekho silo esasingama phambi kwayo, kwakungekho ongophula esandleni sayo, kepha yenza njengentando yayo, yazikhulisa.
Ngisacabanga, bheka, kwavela impongo ngasentshonalanga ebusweni bawo wonke umhlaba, kodwa ayiwuthintanga umhlaba; impongo yayinophondo olugqamileyo phakathi kwamehlo ayo.
Yafika enqameni eyayinezimpondo ezimbili, engayibona imi phambi komfula, yatheleka kuyo ngokufutheka kwayo okunamandla.
Ngayibona isondela kakhulu enqameni, yaba nolaka olukhulu, yayishaya inqama, yazephula izimpondo zayo ezimbili. Inqama ayibanga namandla okuma phambi kwempongo, kodwa yayiqumba phansi, yayinyathela, akwaze kwaba bikho ongayihlenga esandleni sayo.
Impongo yayisizikhulisa kakhulu; kwathi lapho isinamandla, uphondo olukhulu lwephuka; esikhundleni salo kwamila ezine ezigqamileyo ngasemimoyeni yomine yezulu.
Kolunye lwazo kwamila uphondo oluncane olwakhula kakhulu ngaseningizimu, ngasempumalanga, nangasezweni elihle.
Lwakhula kwaze kwaba nasebandleni lasezulwini, lwakuphonsa phansi okunye kwebandla, nokwezinkanyezi, lwakunyathela.
Yebo, lwazikhulisa kwaze kwaba kumkhuzi webandla, lwasaphuca umnikelo oshiswa imihla yonke, nendawo yendlu yaso engcwele yaphonswa phansi.
Kwabekwa impi yokulwa nomnikelo oshiswa imihla yonke ngesiphambeko: lwaphonsa phansi iqiniso, lwenza njengentando yalo, lwaba nempumelelo.
Ngase ngizwa ongcwele ekhuluma, nomunye ongcwele wathi kulowo owayekhuluma: “Uyakuba khona kuze kube nini lo mbono womnikelo oshiswa imihla yonke, nesiphambeko esibhubhisayo sokuba kukhashelwe indlu engcwele nempi, kunyathelwe phansi, na?”
Wathi kimi: “Kuyoze kube yizikhathi zokuhlwa nezokusa eziyizi-2 300, bese ihlanjululwa indlu engcwele.”
Kwathi sengiwubonile umbono mina Daniyeli, ngafuna ukuwuqonda; bheka, kwase kumi phambi kwami okungathi isimo somuntu.
Ngezwa izwi lomuntu phakathi kwe-Ulayi elalimemeza lithi: “Gabhriyeli, menze lo ukuba awuqonde umbono.”
Wayesesondela lapho ngangimi khona; lapho esefika, ngashaywa luvalo, ngawa ngobuso bami, kepha wathi kimi: “Qonda, ndodana yomuntu, ngokuba umbono ungowesikhathi sokuphela.”
Esakhuluma nami, ngalala ubuthongo obukhulu, ubuso bami bubheke phansi; kepha wangithinta, wangimisa lapho kade ngimi khona.
Wathi: “Bheka, ngiyakukwazisa okuyakwenzeka ngasekupheleni kwentukuthelo, ngokuba kungokwesikhathi sokuphela.
Inqama oyibonileyo inezimpondo ezimbili, zingamakhosi aseMediya nasePheresiya.
Impongo iyinkosi yaseJavini; uphondo olukhulu olusemkhathini wamehlo ayo luyinkosi yokuqala.
Kepha esikhundleni salolo olwephukileyo kwavela ezine, kuyakuvela imibuso emine esizweni salo, kodwa ingenamandla alo.
“Ekugcineni kokubusa kwayo, lapho izihlubuki seziphelele, inkosi elukhuni ngobuso, eqonda izimfumbe, iyakuvela.
Iyakuba namandla amakhulu, kungengamandla ayo uqobo; iyakubhubhisa ngokumangalisayo, iyakuphumelela, iyakwenza, iyakuchitha abanamandla nabantu abangcwele.
Ngokuhlakanipha kwayo iyakuphumelelisa inkohliso esandleni sayo, izikhulise enhliziyweni yayo, ichithe abaningi ekuthuleni; iyakumelana nesikhulu sezikhulu, ichotshozwe kungengasandla.
“Imibono yakusihlwa neyasekuseni esilandiwe iqinisile, kepha gcina wena umbono, ngokuba ungowezinsuku eziningi.”
Mina Daniyeli ngase ngiphela amandla, ngagula izinsuku ezithile; ngavuka, ngenza umsebenzi wenkosi; ngamangala ngombono, kwakungekho owuqondayo.
Ngonyaka wokuqala kaDariyu indodana ka-Ahashiveroshi, wozalo lwamaMede, owabekwa inkosi phezu kombuso wamaKhaledi,
ngonyaka wokuqala wokubusa kwakhe, mina Daniyeli ngabona emqulwini inani leminyaka izwi likaSimakade elafika ngayo kuJeremiya umphrofethi ukuba kupheleliswe ukubhujiswa kweJerusalema, okuyiminyaka engama-70.
Ngase ngibhekisa ubuso bami kuyo iNkosi uNkulunkulu ngakhuleka, nganxusa ngokuzila ukudla, nangendwangu eyisaka, nangomlotha.
Ngakhuleka kuSimakade uNkulunkulu wami, ngavuma ngathi: “Nkosi, Nkulunkulu omkhulu nowesabekayo, ogcina isivumelwano nomusa kwabamthandayo nabagcina imiyalo yakhe,
sonile, siziphathe kabi, senzile okubi, sihlubukile, sachezuka emiyalweni yakho nasezahlulelweni zakho;
asilalelanga izinceku zakho, abaphrofethi, ezazikhuluma egameni lakho emakhosini ethu, nasezikhulwini zethu, nakokhokho bethu, nakubo bonke abantu bezwe.
“Kuwena Nkosi kukhona ukulunga, kepha thina sinamahloni njenganamuhla: kubantu bakwaJuda, nezakhamuzi zaseJerusalema, nakuye wonke u-Israyeli, abaseduze nabakude, kuwo onke amazwe obahlakazele kuwo ngenxa yezeqo zabo abeqe ngazo kuwe.
Simakade, thina sinamahloni: kuwo amakhosi ethu, nakuzo izikhulu zethu, nakokhokho bethu, ngokuba sonile kuwe.
Kepha kuyo iNkosi, uNkulunkulu wethu, kukhona umusa nokuthethelela, ngokuba simhlubukile,
asililalelanga izwi likaSimakade uNkulunkulu wethu ukuba sihambe ngemithetho yakhe ayibeka phambi kwethu ngezinceku zakhe abaphrofethi.
Wonke u-Israyeli weqile umthetho wakho, echezuka ukuze bangalilaleli izwi lakho; ngalokho isiqalekiso sithululwe phezu kwethu kanye nesifungo esilotshiwe emthethweni kaMose inceku kaNkulunkulu, ngokuba sonile kuye.
Uqinisile amazwi akhe awakhuluma ngathi nangabehluleli bethu abasahlulelayo ngokusehlisela okubi okukhulu, ngokuba phansi kwezulu lonke akwenziwanga njengokwenziwe kulo iJerusalema.
Njengokulotshiweyo emthethweni kaMose konke lokhu okubi kusehlele, nokho asincenganga ebusweni bukaSimakade uNkulunkulu wethu ukuba siphenduke ebubini bethu, siqonde iqiniso lakho.
USimakade uyilungiselele inhlekelele, wayeseyehlisela kithi, ngokuba uSimakade uNkulunkulu wethu ulungile emisebenzini yakhe yonke ayenzayo, kodwa asililalelanga izwi lakhe.
“Manje, Nkosi, Nkulunkulu wethu, wena owakhipha abantu bakho eGibhithe ngesandla esinamandla, wazenzela igama njenganamuhla, sonile, senzile okubi.
Nkosi, ngakho konke ukulunga kwakho mawubuyise intukuthelo yakho nokufutheka kwakho emzini eJerusalema, intaba yakho engcwele, ngokuba ngenxa yezono zethu nangobubi bokhokho bethu iJerusalema nabantu bakho sebeyihlazo kubo bonke abasizungezileyo.
“Kalokhu, Nkulunkulu wethu, yizwa umkhuleko wenceku yakho nokunxusa kwayo, ukhanyise ubuso bakho phezu kwendlu yakho engcwele, echithakeleyo ngenxa yeNkosi.
Nkulunkulu wami, beka indlebe yakho, uzwe; vula amehlo akho, ubheke izincithakalo zethu nomuzi obizwe ngegama lakho, ngokuba asilethi ukunxusa kwethu phambi kwakho ngenxa yokulunga kwethu kepha ngomusa wakho omkhulu.
Nkosi, yizwa; Nkosi, thethelela; Nkosi, lalela, wenze; ungalibali ngenxa yakho, Nkulunkulu wami, ngokuba umuzi nabantu bakho babizwe ngegama lakho.”
Ngisakhuluma ngikhuleka, ngivuma izono zami nezono zabantu bakithi u-Israyeli, ngiletha ukunxusa kwami phambi kukaSimakade uNkulunkulu wami ngentaba engcwele kaNkulunkulu wami,
yebo, ngisakhuluma ngomkhuleko, lowo muntu uGabhriyeli engambona embonweni kuqala, endiziswa ngokushesha, wangithinta ngesikhathi somnikelo wakusihlwa.
Wangiqondisa, wakhuluma nami, wathi: “Daniyeli, sengiphumele ukukuhlakaniphisa nokukuqondisa.
Ekuqaleni kokunxusa kwakho izwi lavela; sengifikile ukukutshela, ngokuba uthandekile; ngalokho qonda leli lizwi, uqonde nombono.
“Amasonto angama-70 anqunyelwe abantu bakho nomuzi wakho ongcwele ukuqeda iziphambeko, nokukhawula izono, nokwenza ukubuyisana ngobubi, nokungenisa ukulunga okuphakade, nokunamathelisa umbono nesiphrofetho, nokugcoba indlu engcwelengcwele.
“Ngalokho yazi, uqonde ukuthi, kusukela ekuphumeni kwezwi lokubuyisa nokwakha iJerusalema kuze kufike ogcotshiweyo, umbusi, kuyakuba ngamasonto ayisikhombisa, lihlale lakhiwe, imigwaqo yalo nogange lwalo, amasonto angama-62 nasesikhathini sokuhlupheka.
Emva kwalawo masonto angama-62 ogcotshiweyo uyakunqunywa angabi namuntu; umuzi nendlu engcwele kuyakuchithwa ngabantu bombusi ozayo, ukuphela kwakho kube sesikhukhuleni, kube ngukulwa kuze kube sekugcineni; incithakalo inqunyiwe.
Uyakuqinisa isivumelwano nabaningi isonto libe linye, imihlatshelo neminikelo ikhawuke phakathi kwesonto, kufike incithakalo ngephiko lesinengiso, kuze kuphele okunqunyiweyo, kuthululelwe phezu kombhubhisi.”
Ngonyaka wesithathu kaKhoresi, inkosi yasePheresiya, uDaniyeli ogama lakhe labizwa ngokuthi uBhelitheshazari wambulelwa izwi; izwi laliqinisile, lalingukulwa okukhulu; waliqonda izwi, waqonda nombono.
Ngalezo zinsuku mina, Daniyeli, ngangilila amasonto amathathu agcwele.
Ngangingadli sinkwa sekhethelo, nenyama newayini akungenanga emlonyeni wami, futhi angizigcobanga nakanye, kwaze kwaphela amasonto amathathu.
Ngosuku lwama-24 lwenyanga yokuqala, ngiseceleni komfula omkhulu iHidekeli,
ngaphakamisa amehlo ami, ngabona; bheka, nango umuntu embethe ilineni, ebhince okhalo igolide elicwengekileyo lase-Ufazi.
Umzimba wakhe wawunjengekhrisolithe, nobuso bakhe bunjengokubonakala konyazi, namehlo akhe enjengezibani zomlilo, izingalo zakhe nezinyawo zakhe zinjengokubenyezela kwethusi eliphucuziweyo, nezwi lamazwi akhe linjengezwi lesixuku.
Mina, Daniyeli, yimi ngedwa engawubona umbono, ngokuba abantu ababenami abawubonanga, kepha behlelwa ngukuthuthumela okukhulu, babaleka bayocasha.
Ngasala ngedwa; ngawubona lo mbono omkhulu, ngaphelelwa ngamandla, ngokuba ubuhle bami baphenduka ukonakala kimi, angaba namandla.
Ngase ngizwa izwi lamazwi akhe; lapho ngizwa izwi lamazwi akhe, ngase ngilele ubuthongo obukhulu, ubuso bami bubheke phansi.
Ngathintwa yisandla, sanginyakazisa ukuba ngigaqe ngamadolo ami nangezintende zezandla zami.
Wathi kimi: “Daniyeli, wena muntu othandekayo, qonda amazwi engiwakhuluma kuwe, ume nokuma, ngokuba ngithunywe kuwe;” lapho esekhulumile leli lizwi kimi, ngema ngithuthumela.
Wayesethi kimi: “Ungesabi, Daniyeli, ngokuba kusukela osukwini lokuqala owabeka ngalo inhliziyo yakho ukuqonda nokuzithoba phambi kukaNkulunkulu wakho amazwi akho ezwakala; mina ngifikile ngenxa yamazwi akho.
Kepha isikhulu sasembusweni wasePheresiya samelana nami izinsuku ezingama-21, kepha bheka, uMikhayeli, omunye wezikhulu zokuqala, weza wazongisiza, noma kade ngishiywe ngedwa khona namakhosi asePheresiya.
Sengifikile ukuba ngikuqondise okuyakwehlela abantu bakho ngezinsuku ezizayo, ngokuba umbono usenezinsuku.”
Esewakhulumile kimi lawo mazwi, ngabhekisa ubuso bami phansi, ngathula.
Bheka, onesimo samadodana abantu wathinta izindebe zami; ngase ngiwuvula umlomo wami, ngakhuluma, ngathi kowayemi phambi kwami: “Nkosi yami, ngenxa yombono imihelo ingehlele, angisenamandla.
Inceku enje yenkosi yami ingakhuluma kanjani nenkosi yami enje na? Ngokuba mina, khona lapho ngaphela amandla, nokuphefumula bekungasekho kimi.”
Wabuye wangithinta obonakala njengomuntu, wangiqinisa.
Wathi: “Ungesabi, muntu othandekayo; ukuthula makube kuwe; qina, yebo, mawuqine.” Lapho ekhuluma kimi, ngaqiniswa, ngathi: “Mayikhulume inkosi yami, ngokuba ungiqinisile.”
Wayesethi kimi: “Uyazi ukuthi ngifikeleni kuwe na? Kepha manje ngiyakubuya ukuba ngilwe nesikhulu sasePheresiya; lapho sengisukile kuso, kuyofika isikhulu saseJavani.
Kepha ngiyakutshela okulotshwe embhalweni weqiniso. Akekho noyedwa ozihlanganisa nami ukulwa nalaba ngaphandle kukaMikhayeli, isikhulu senu.
“Mina-ke, ngonyaka wokuqala kaDariyu umMede, ngema ukumqinisa ukuba abe namandla.
“Manje ngikutshela iqiniso. Bheka, kusezakuvela amakhosi amathathu ePheresiya; eyesine iyakunotha kunawo wonke; isiqinile ngengcebo yayo iyakuvusa konke ukulwa nombuso waseJavani.
Kuyakuvela inkosi enamandla eyakubusa ngokubusa okukhulu, yenze njengentando yayo.
Iyakuthi ingavela nje, umbuso wayo ufohlozwe, wahlukaniselwe emimoyeni yomine yezulu, ungabi ngowenzalo yayo, ungabi njengasekubuseni kwayo eyabusa ngakho, ngokuba umbuso wayo uyakusishulwa, ube ngowabanye ngaphandle kwalaba:
“Inkosi yaseningizimu iyakuba namandla, kanjalo esinye sezikhulu zayo, yebo, sibe namandla kunayo, sibuse, nokubusa kwaso kuyakuba ngukubusa okukhulu.
Ngasekupheleni kweminyaka bayakuhlangana, kufike indodakazi yenkosi yaseningizimu enkosini yasenyakatho ukwenza isivumelwano, kepha ayiyikugcina amandla engalo, nayo inkosi ayiyikuma nengalo yayo, kodwa iyakunikelwa nabayilethayo, nowayizalayo, nowayisizayo ngalezo zikhathi.
“Kepha ehlumeleni lezimpande zayo kuyakuvela omunye esikhundleni sayo oyakuya empini, angene enqabeni yenkosi yasenyakatho, amelane nabo, abahlule.
Nonkulunkulu babo nezithombe zabo ezibunjiweyo nezitsha zabo ezinxanelekayo zesiliva nezegolide uyakukuthumba, akuyise eGibhithe, ayiyeke inkosi yasenyakatho iminyaka ethile.
Kepha yona iyakungena embusweni wenkosi yaseningizimu, kodwa iyakubuyela ezweni lakubo.
Amadodana ayo ayakuhloma, abuthe isixuku sezimpi eziningi; ziyakufika nokufika, zikhukhule, zidlule; ziyakubuya, zilwe kuze kube senqabeni yayo.
“Inkosi yaseningizimu iyakuvutha ulaka, iphume, ilwe nenkosi yasenyakatho; iyakuveza isixuku esikhulu, isixuku sinikelwe esandleni sayo.
Kepha lapho isixuku sesisusiwe, inhliziyo yayo iyakuziphakamisa, iwise phansi izinkulungwane ezingamashumi amaningi, kepha ayiyukuba namandla.
Inkosi yasenyakatho iyakubuya, iveze isixuku esikhulu kunesokuqala, ifike nokufika ngasekupheleni kwezikhathi eziyiminyaka nempi enkulu nempahla eningi.
“Ngalezo zikhathi abaningi bayakuyisukela inkosi yaseningizimu, nabaphangi babantu bakho bayakuziphakamisa ukuwuqinisa umbono, kepha bayakuwa.
Iyakufika inkosi yasenyakatho, inqwabele iduli, ithathe umuzi obiyelweyo; amabutho aseningizimu awayukuma, nabantu bayo abakhethiweyo abayikuba namandla okuma.
Kepha omsukelayo uyakwenza njengentando yakhe, akakho oyakuma phambi kwakhe; uyakuma ezweni elihle, abhubhise ngesandla sakhe.
Uyakubhekisa ubuso bakhe ukuze afike nombuso wakhe namandla kanye nezinto ezilungileyo bese enza isivumelwano naye, azenze; uyakumnika indodakazi yabesifazane, ayenzakalise, kepha ayiyukuma, futhi ayiyukuba ngeyakhe.
Uyakuphendulela ubuso bakhe eziqhingini, adle eziningi, kepha isikhulu siyakuqeda ihlazo elenziwa nguye, futhi sibuyisele ihlazo lakhe kuye.
Uyakuphendulela ubuso bakhe ezinqabeni zezwe lakubo, kepha uyakukhubeka, awe, angabe esafunyanwa.
“Bese kuvela esikhundleni sakhe oyakudlulisa umthelisi emhlobisweni wombuso, kepha ngezinsuku eziyingcosana uyakubhujiswa, kungabi ngolaka nangokulwa kuphela.
“Esikhundleni sakhe kuyakuvela odelelekileyo, abangamnikanga udumo lobukhosi; uyakufika ngesikhathi sokuthula, athathe umbuso ngobuqili.
Ngamandla esifufula bayakukhukhulwa ebusweni bakhe, babhujiswe, yebo, nesikhulu sesivumelwano.
Emva kokuvumelana naye, uyakusebenza ngenkohliso, ngokuba uyakukhuphuka, abe namandla, yize enesizwe esincane nje.
Ngesikhathi sokuthula uyakusukela izindawo ezinothileyo zesifunda, akwenze okungenziwanga ngoyise nangoyisemkhulu: uyakuhlakaza phakathi kwabo impango, nengcugco, nempahla, acebe amacebo ngezinqaba kube yisikhashana.
“Uyakuvusela inkosi yaseningizimu amandla akhe nesibindi sakhe ngempi enkulu, ilwa nempi enkulu enamandla impela, kepha ayiyukuma, ngokuba bayakuceba amacebo ngayo.
Abadla ukudla kwayo okumnandi bayakuyibhubhisa, impi yayo ikhukhulwe; abaningi bayakuwa phansi begwaziwe.
Amakhosi-ke omabili, izinhliziyo zawo ziyakuba ngezokwenza okubi; ayakukhuluma amanga esetafuleni linye, kepha akuyukuphumelela, ngokuba ukuphela kusazokuba sesikhathini esimisiweyo.
Bese ibuyela ezweni lakubo inempahla eningi, inhliziyo yayo imelane nesivumelwano esingcwele; isikwenzile lokho, iyakubuyela ezweni lakubo.
“Ngesikhathi esinqunyiweyo iyakubuya, iye eningizimu, kepha akuyukuba sekugcineni njengasekuqaleni.
Imikhumbi yaseKhithimi iyakuyisukela, bese idabuka, ibuye ithukuthelele isivumelwano esingcwele, ifeze; iyakubuya, inake abasishiyile isivumelwano esingcwele.
“Izimpi ziyakuvela kuyo, zingcolise indlu engcwele, zibhidlize inqaba, zisuse umnikelo waphakade oshiswa imihla yonke, zimise isinengiso esisabisayo.
Iyakungcolisa ngamazwi aluthayo labo abanecala lokwephula isivumelwano, kepha abantu abamaziyo uNkulunkulu wabo bayakuba namandla, baphikelele.
“Abahlakaniphileyo babantu bayakuqondisa abaningi, kepha bayakuwa ngenkemba, ngelangabi, ngokuthunjwa, nangokuphangwa izinsuku eziningi.
Ekuweni kwabo bayakusizwa ngokusizwa okuncane, bese bebambelela kubo abaningi ngokuthopha.
Abanye kwabahlakaniphileyo bayakuwa ukuba bacwengisiswe, bahlanzwe, benziwe mhlophe kuze kube sesikhathini sokuphela, ngokuba kusezakuba sesikhathini esimisiweyo.
“Inkosi iyakwenza njengentando yayo, iziphakamise, izikhulise phezu kwabo bonke onkulunkulu, ikhulume okumangalisayo ngoNkulunkulu wonkulunkulu, ibe nenhlanhla luze luphelele ulaka, ngokuba okumisiweyo kuyakwenziwa.
Ayiyukubanaka onkulunkulu boyise. Ayiyukubanaka nabafiswa yisifazane kanjalo ayiyukunaka nankulunkulu mumbe, ngokuba iyakuzikhukhumeza phezu kwabo bonke.
Kepha unkulunkulu wezinqaba uyakumdumisa esikhundleni sabo, nonkulunkulu ababengamazi oyise uyakumdumisa ngegolide, ngesiliva, nangamatshe anqabileyo nangokunye okuthandiweyo.
Iyakwenza kanjalo ezinqabeni ezinamandla inonkulunkulu wabezizwe; omvumayo iyakumandisela udumo, imenze ukuba abuse abaningi, imehlukanisele izwe, libe ngumvuzo wakhe.
“Ngesikhathi sokugcina inkosi yaseningizimu iyakulwa nayo; inkosi yasenyakatho iyakuza kuye njengesishingishane inezinqola, nabamahhashi, nemikhumbi eminingi, iyakungena ngaphakathi ezweni, ikhukhule, idlule.
Iyakungena nasezweni elihle, namanye amaningi ayakukhubeka, kepha lana ayakophulwa esandleni sayo: o-Edomi, noMowabi, nemvama yabakwa-Amoni.
Iyakwelulela isandla emazweni, neGibhithe aliyukubaleka.
Iyakubusa phezu kwengcebo yegolide nesiliva, naphezu kwakho konke okuthandekayo kwaseGibhithe; amaLubi namaKhushe ayakuba sezinyathelweni zayo.
Iyakwethuswa yimibiko evela empumalanga nasenyakatho; iyakuphuma ngokufutheka okukhulu ukwenzakalisa nokubhubhisa abaningi.
Iyakumisa ithende lendlu yayo yobukhosi phakathi kolwandle nentaba enhle engcwele, kepha ilibhekise esiphethweni sayo, akakho ongayisiza.”
“Ngaleso sikhathi uyakuvela uMikhayeli, isikhulu esigqamileyo esimela abantwana babantu bakho; kuyakuba yisikhathi sokuhlupheka esingazange sibe khona kusukela ekuveleni kwabantu kuze kube yileso sikhathi. Ngalezo zinsuku abantu bakho bayakukhululwa, bonke abafunyanwa belotshiwe encwadini.
Abaningi abalele emhlabathini wothuli bayakuvuka, abanye bavukele ukuphila okuphakade, abanye bavukele ihlazo nokunengeka kwaphakade.
Abahlakaniphileyo bayakukhanya njengokukhazimula kwesibhakabhaka, nabaphendulela abaningi ekulungeni njengezinkanyezi kuze kube phakade naphakade.
Kepha wena Daniyeli, gcina amazwi, unamathelise umqulu kuze kube sesikhathini sokugcina; abaningi bayakwehla benyuka, ukwazi kuyokuba kuningi.”
Ngase ngibona mina Daniyeli; bheka, kwakumi abanye ababili, omunye ogwini lomfula nganeno, omunye ogwini lomfula ngaphesheya.
Omunye wathi kumuntu owembethe ilineni, owayephezu kwamanzi omfula: “Ziyakuphela nini lezi zimangaliso na?”
Ngezwa umuntu owayembethe ilineni, ephezu kwamanzi omfula; waphakamisela isandla sakhe sokunene nesandla sakhe sokhohlo ezulwini, wamfunga ophila kuze kube phakade ukuthi kuyakuba ngokwesikhathi, nezikhathi, nengxenye, nalapho sebeqedile ukuphohloza amandla abantu abangcwele, zonke lezo zinto ziyakuqedwa.
Ngakuzwa, kepha angiqondanga, ngase ngithi: “Nkosi yami, isiphetho salokho siyakuba yini na?”
Wathi: “Hamba, Daniyeli, ngokuba amazwi avalelwe, anamathelisiwe kuze kube sesikhathini sokugcina.
Bayakuzihlanza, bazenze mhlophe, abaningi bayakucwengisiswa, kepha ababi bayakwenza kabi, akukho noyedwa omubi oyakuba nokuqonda; abahlakaniphileyo bayakuqonda.
“Kusukela esikhathini sokususwa komnikelo oshiswa imihla yonke nokumiswa kwesinengiso esibhubhisayo kuyakuba yizinsuku eziyi-1 290.
Ubusisiwe olindayo afinyelele ezinsukwini eziyi-1 335.
“Kepha hamba wena kuze kube sekupheleni; sewuphumulile, uyakuma esabelweni sakho ekupheleni kwezinsuku.”
Izwi likaSimakade elafika kuHoziya indodana kaBheri ezinsukwini zokubusa kuka-Uziya, uJothamu, u-Ahazi noHezekiya amakhosi akwaJuda, nasezinsukwini zikaJerobhowamu indodana kaJowashi, inkosi yakwa-Israyeli.
Lapho uSimakade eqala ukukhuluma ngoHoziya, wathi kuHoseya: “Hamba uzithathele umfazi ophingayo nabantwana bokuphingwa, ngokuba izwe liyaphinga nokuphinga ngokungamlandeli uSimakade.”
Wahamba-ke, wathatha uGomeri, indodakazi kaDibhilayimi. Wakhulelwa, wamzalela indodana.
USimakade wathi kuye: “Iqambe igama uthi: ‘nguJizreyeli,’ ngokuba sekuseduze ngibajezise abendlu kaJehu ngenxa yegazi likaJizreyeli, futhi ngiyakuwuqenda nya umbuso wendlu ka-Israyeli.
Kuyakuthi ngalolo lusuku ngiwuphule umnsalo ka-Israyeli esigodini eJizreyeli.”
UGomeri wabuye wakhulelwa, wazala indodakazi. USimakade wathi kuHoziya: “Iqambe igama uthi: ‘uLo Ruhama,’ ngokuba angisayukuphinde futhi ngiyizwele indlu yakwa-Israyeli ukuba impela ngibathethelele.
Kepha indlu yakwaJuda ngiyakuyizwela, ngibasindise ngoSimakade uNkulunkulu wabo, angiyukubasindisa ngomnsalo, ngenkemba, ngempi, ngamahhashi nangabagibeli bamahhashi.”
Kwathi esemlumulile uLo Ruhama, wayesekhulelwa, wazala indodana.
Wayesethi: “Iqambe igama uthi: ‘uLo Ami,’ ngokuba aniseyibo abantu bami, nami angisenguye uNkulunkulu wenu.”
“Kepha abantu bakwa-Israyeli bayakuba ngangesihlabathi solwandle esingenakulinganiswa nakubalwa. Lapho bekuthiwa khona kubo: ‘Aniseyibo abantu bami,’ kuyakuthiwa kubo: ‘Ningamadodana kaNkulunkulu ophilayo.’
Abantu bakwaJuda nabakwa-Israyeli bayakuhlangana ndawonye, bazikhethele inhloko ibe yodwa, bakhuphuke ezweni, ngokuba luyakuba lukhulu usuku lukaJizreyeli.”
“Bizani abafowenu ngokuthi: ‘u-Ami,’ nawodadewenu ngokuthi: ‘uRuhama.’
“Phikisanani nonyoko, nimmangalele, ngokuba akayena umkami, nami angiyona indoda yakhe. Makasuse ubufebe bakhe ebusweni bakhe, nokuphinga kwakhe phakathi kwamabele akhe,
funa ngimhlubule abe nqunu, ngimbhushuzelise njengosuku azalwa ngalo, ngimenze afane nehlane, abe njengezwe eligagadekile, bese ngimbulala fi ngokoma.
Angiyukubazwela abantwana bakhe, ngokuba bangabantwana bobufebe.
Unina wazifebela, wabakhulelwa ngokwenza ihlazo, ngokuba wathi ngizakuhamba ngilandele izithandwa zami, ezingipha isinkwa sami namanzi ami, uboya bami bezimvu nefilakisi lami, amafutha ami nokuphuzwayo kwami.
Ngakho-ke bhekani, ngizoyivala indlela yakho, ngakhe ugange ngameva oluzomvimbela nendlela yakhe angayitholi.
Uyakulandela izithandwa zakhe, kodwa akayukuzifica, uyakuzifuna kepha akayukuzifumana, bese ethi: “Ngiyakuhamba ngibuyele endodeni yami yokuqala, ngokuba kwakukuhle kimi ngalezo zinsuku kunamanje.”
Kepha ubengazi ukuthi yiMina obemhlinzeka ngokusanhlamvu, ngewayini elisha, ngesiliva, ngamandisela negolide, abakusebenzisa kuBhali.
“Ngakho-ke ngiyakubuya ngithathe okwami okusanhlamvu ngesikhathi sakho newayini lami elisha ngesikhathi salo, ngithathe uboya bami bezimvu nefilakisi lami lokwemboza ubunqunu bakhe.
Manje-ke sengizokwembula ihlazo lakhe zizibonela ngawazo amehlo izithandwa zakhe, futhi akukho namunye oyakumhlenga esandleni sami.
Ngiyakuyiqeda nya yonke imigubho yakhe yentokozo, eyokwethwasa kwenyanga, amasabatha akhe, nawo wonke amadili akhe anqunyiweyo.
Ngiyakucekela phansi imivini yakhe nemikhiwane yakhe, athe ngakho: ‘Kuyinkokhelo yami ezinginike yona izithandwa zami;’ ngizokwenza kube yihlozi, izilwane zasendle zikudle.
Ngiyakumjezisela izinsuku zoBhali lezo ayebashisela ngazo impepho, ezihlobisa ngezindandatho zakhe nangobucwebecwebe bakhe, elandela izithandwa zakhe, wangikhohlwa Mina,” kusho uSimakade.
“Ngakho-ke bhekani, ngiyakumyenga, ngimholele ehlane, ngikhulume enhliziyweni yakhe.
Kulapho-ke ngiyakumnika izivini zakhe, nesigodi i-Akhori sibe ngumnyango wethemba. Uyakuphendula lapho njengasezinsukwini zobusha bakhe, nanjengosuku lokukhuphuka kwakhe eGibhithe.
“Kuyakuthi ngalolo lusuku ungibize uthi: ‘Myeni wami,’ ungaphinde ungibize futhi ngokuthi: ‘Bhali wami,’ kusho uSimakade.
“Ngiyakususa amagama oBhali emlonyeni wakhe, abasayukukhunjulwa ngamagama abo.
Ngalolo lusuku ngiyakubenzela isivumelwano nezilwane zasendle, nezinyoni zezulu, nokuhuquzelayo emhlabathini. Ngiyakunqamula umnsalo, inkemba nempi ezweni, ngibalalise phansi bephephile.
Ngiyakuzithathela wena ube ngumkami kwaphakade, ngizithathele wena ngokulunga, ngobulungiswa, ngomusa nangesihawu.
Ngiyakuzithathela wena ngokwethembeka, futhi uyakumazi uSimakade.
Kuyakuthi ngalolo lusuku ngiphendule, ngiyakuphendula amazulu, wona aphendule umhlaba,” kusho uSimakade.
“Umhlaba uyakuphendula okusanhlamvu, iwayini elisha namafutha amasha, khona kuyakuphendula iJezreyeli.
Ngiyakuzitshalela yena ezweni, ngihawukele ongahawukelwanga, ngithi kwabangesibo abantu bami: ‘Ningabantu bami,’ bona bayakuthi: ‘UnguNkulunkulu wethu.’ ”
USimakade wathi kimi: “Hamba futhi, umthande owesifazane osethandwa ngomunye, nakuba ephingile. Mthande njengalokhu uSimakade ethanda abantu bakwa-Israyeli, noma sebephendukele kwabanye onkulunkulu, bathanda amakhekhe anamagilebhisi omisiwe.”
Ngazithengela yena ngezinhlamvu ezili-15 zesiliva kanye nengxenye yehomere lebhali.
Ngase ngithi kuye: “Uyakuhlala nami izinsuku eziningi, ungafebi, ungabi ngowenye indoda, nami ngiyakwenza kanjalo kuwe.”
Ngokuba abantu bakwa-Israyeli bayakuhlala izinsuku eziningi bengenankosi, benganasikhulu, bengenamhlatshelo, bengenansika, bengenangubo yamahlombe namatherafi.
Kuyakuthi emveni kwalokho abantu bakwa-Israyeli baphenduke, bafune uSimakade uNkulunkulu wabo noDavide inkosi yabo, bayakuzithoba kuSimakade nasebuhleni bakhe ekupheleni kwezinsuku.
Yizwani izwi likaSimakade nina bantu bakwa-Israyeli, ngokuba uSimakade umangalela izakhamuzi zezwe, phela akukho kwethembeka, naqiniso, nalwazi ngoNkulunkulu ezweni.
“Kukhona ukuqalekisa nokukhohlisa, ukubulala, nokweba, nokuphinga, bayadlebeleka, kugobhoza igazi.
Ngalokho-ke izwe liyalila, bonke abahlala kulo bayonda, nezilwane zasendle, izinyoni zezulu, nezinhlanzi zasolwandle kuyashabalala.”
“Makungabi bikho owethwesa omunye icala, makungabi bikho osola omunye, ngokuba abantu bakho bafana nalabo abaphikisana nomphristi.
Uyokhubeka emini kwabha, nomphrofethi akhubeke kanye nawe ebusuku, ngimbhubhise nonyoko.
Abantu bami bayabhujiswa ngokweswela ulwazi, njengoba ulwenqabile ulwazi, nami ngiyenqaba ukuba ube ngumphristi wami. Ukhohliwe wumthetho kaNkulunkulu wakho, nami futhi ngiyakubakhohlwa abantwana bakho.
Njengoba banda nje, kanjalo kuyanda nokona kwabo kimi. Ngiyakuguqula ukuhlonishwa kwabo kube yihlazo.
Badla izono zabantu bami, balubalubele iziphambeko zabo.
Kuyakuba kanje kubantu kanjalo nakumphristi: ngiyakubajezisa ngenxa yezindlela zabo, ngibajezise ngezenzo zabo.
“Bayakudla, kodwa bangasuthi, bayakufeba, kodwa bangandi, ngokuba bamshiyile uSimakade,
bazinikela ekufebeni, ewayinini, nasewayinini elisha, okususa ingqondo.
Abantu bami babuza ukhuni olubaziweyo, induku yabo ibatshele, ngokuba umoya wobufebe ubadukisile, basuka phansi kukaNkulunkulu wabo ngenxa yokufeba.
Benza imihlatshelo ezicongweni zezintaba, bashise impepho emagqumeni, phansi kwemi-okhi, kwemiphophula nemitherebhinte, ngokuba umthunzi walokho muhle. Ngalokho-ke amadodakazi enu ayafeba, nomalokazana benu bayaphinga.
“Angiyukuwajezisa amadodakazi enu lapho efeba, nomalokazana benu lapho bephinga, ngokuba namadoda aphambukela ezifebeni, enze umhlatshelo nezifebe zethempeli, abantu abangenakuqonda bayakubhubha.
“Nakuba wena Israyeli ufeba, uJuda makangabi nacala; ungayi eGiligali, ungakhuphukeli eBhethi Aveni, ungafungi ngokuphila kukaSimakade.
Ngokuba u-Israyeli unenkani njengesithole esinenkani; pho uSimakade angabelusa kanjani njengewundlu lemvu emadlelweni abanzi na?
U-Efrayimi uzibandakanye nezithombe, myeke kanjalo.
Isiphuzo sabo sesiphelile, kodwa bayaqhubeka nokufeba, izikhulu zabo zilithanda kakhulu ihlazo.
Umoya ubasongile ngamaphiko awo, bayakujabha ngemihlatshelo yabo.”
“Yizwani lokhu nina baphristi, nilalele nina ndlu ka-Israyeli, nibeke indlebe nina ndlu yenkosi, ngokuba ukwehlulelwa ngokwenu, phela nibe wugibe eMizpha nenetha elendlaliweyo eThabhori.
Amahlubuka ashone shi ekuhlabeni, kodwa ngiyakuwaqondisa wonke.”
“Mina, ngiyamazi u-Efrayimi, no-Israyeli akafihlekile kimi, ngokuba manje, wena Efrayimi uzifebele, u-Israyeli wazingcolisa.”
“Izenzo zabo azibavumeli ukuba babuyele kuNkulunkulu wabo, ngokuba umoya wobufebe usezibilini zabo, futhi abamazi uSimakade.
Ukuzigqaja kuka-Israyeli kuyafakaza phambi kwakhe, u-Israyeli no-Efrayimi bayakukhutshwa yizenzo zabo ezimbi, noJuda uyakhutshwa kanye nabo.
Bayakuhamba nomhlambi wabo wezimvu nowezinkomo ukuyofuna uSimakade, kodwa abayukumfumana, ngokuba usesukile kubo.
Abethembekanga kuSimakade, ngokuba bazale amavezandlebe, manje-ke inyanga eyethwasayo iyakubashwabadela nezabelo zabo.
“Bethani uphondo eGibheya, nishaye icilongo eRama; nihlabe umkhosi eBhethi Aveni nithi: Baphezu kwakho Bhenjamini!
U-Efrayimi uyakuba yincithakalo ngosuku lokujeziswa, ngikumemezele lokho okuqinisekileyo phakathi kwezizwe zakwa-Israyeli.
Abaholi bakwaJuda bafana nabagudluza imingcele kwa-Israyeli. Ngiyakuthululela kubo ulaka lwami njengamanzi.
U-Efrayimi ucindezelwe, uchotshoziwe ngokwehlulelwa, ngokuba wazimisela ukulandela umyalo oyize.
Mina-ke nginjengenundu ku-Efrayimi, nanjengokubola kuyo indlu kaJuda.
“Kwathi lapho u-Efrayimi ebona ukugula kwakhe noJuda ebona isilonda sakhe, u-Efrayimi waya e-Asiriya, wathumela enkosini uJarebi, kodwa nayo ayiyukukwazi ukuniphulukisa, iyakwehluleka ukwelapha isilonda senu.
Ngokuba Mina ngiyakuba njengebhubesi ku-Efrayimi, nanjengebhongo lebhubesi kuyo indlu kaJuda. Mina luqobo, ngiyakubadwengula, bese ngihamba; ngiyakubathatha kungabi bikho obahlengayo.
Ngiyakuhamba, ngibuyele endaweni yami, bayoze balivume icala labo, bafune ubuso bami; kuyakuthi lapho sebesosizini bangifunisise.”
“Wozani, masibuyele kuSimakade, ngokuba Yena usidwengulile; uyakusiphulukisa; Yena usishayile, uyakubopha inxeba lethu.
Uyakusiphilisa emva kwezinsuku ezimbili, asivuse ngosuku lwesithathu, siphile ebukhoneni bakhe.
Masimazi, siphokophelele ukumazi uSimakade; ukuphuma kwakhe kuqinisekile njengentathakusa, uyakufika kithi njengemvula, njengemvula yasentwasahlobo ematisa umhlaba.
“Ngiyakwenzani ngawe Efrayimi na? Ngiyakwenzani ngawe Juda na? Uthando lwenu lunjengomlalamvubu ekuseni, nanjengamazolo asekuseni eshabalala.
Ngakho-ke ngibaqobaqoba babe zicubu ngabaphrofethi, ngibabulale ngamazwi omlomo wami, ukwehlulela kwami kuphume njengokukhanya.
Ngokuba Mina ngifuna ukwethembeka, hhayi umhlatshelo, nolwazi ngoNkulunkulu kuneminikelo yokushiswa.
Kodwa basephulile isivumelwano njengo-Adamu; bangathembeka kimi ngalokho.
IGileyadi lingumuzi wabenza inkohlakalo, limabhadubhadu yigazi.
Njengeqembu labaphangi lilalele umuntu unyendle, kanjalo neqembu labaphristi liyabulala endleleni eya eShekhemu, impela benza inkohlakalo.
Ngibone into ehlasimulisayo endlini yakwa-Israyeli: kukhona ubufebe kwa-Efrayimi, u-Israyeli uzingcolisile.
“Nawe Juda, ulungiselwe ukuvunwa, lapho ngibuyisa ukuthunjwa kwabantu bami.”
“Lapho nje ngimphulukisa u-Israyeli, kuyakuhlala obala isiphambeko sika-Efrayimi nobubi beSamariya, ngokuba benza inkohliso, kwagqekeza amasela, neqembu labaphangi lahlasela emigwaqweni.
Abacabangi emiqondweni yabo ukuthi ngibukhumbula bonke ububi babo. Manje sebehaqwe yizenzo zabo, eziphambi kobuso bami.
“Bathokozisa inkosi ngobubi babo, nezikhulu ngamanga abo.
Bonke bayiziphingi, banjengeziko elibaswe ngumbhaki, oyekela ukukhwezela kusukela ekuxoveni inhlama ize ikhukhumale.
Ngosuku lwenkosi yethu izikhulu zazigulisa ngokushisa kwewayini; yona yelula isandla sayo nezigebengu.
Impela bashisisa izinhliziyo zabo ngamacebo abo njengeziko, umbhaki wabo ulala ubusuku bonke; ekuseni livutha njengomlilo wamalangabi.
Bonke bashisa njengeziko, bashwabadela ababusi babo. Wonke amakhosi abo awile, akukho namunye phakathi kwabo ongibizayo.
“U-Efrayimi uzihlanganisa nezizwe, usephunduke iqebelengwana lesinkwa elingaphendulwanga.
Abafokazi badle amandla akhe, kodwa yena akazi; izinwele zakhe seziyaqhakaza, kepha yena akazi.
Ukuzigqaja kuka-Israyeli kuyafakaza ebusweni bakhe, kodwa ababuyelanga kuSimakade uNkulunkulu wabo, abamfunanga kukho konke lokho.
“U-Efrayimi usenjengejuba elingenangqondo; babize iGibhithe, baya e-Asiriya.
Kuyakuthi lapho sebehamba, ngiphonse inetha lami phezu kwabo, ngibathele othulini njengezinyoni zezulu, ngibabambe lapho ngizwa umbiko ngokuhlangana kwabo.
Maye kubo, ngokuba bangibalekele! Bazokwehlelwa yinhlekelele, ngokuba bangihlubukile. Bengiyakubahlenga Mina, kodwa bakhulume amanga ngami.
Abakhalanga kimi ngenhliziyo yabo, kodwa bahhewula emibhedeni yabo; babuthana ngenxa yokusahlamvu newayini elisha, bangifulathela Mina.
Mina ngabaqeqesha, ngaqinisa izandla zabo, kodwa bangakhela uzungu.
Babuya, kodwa hhayi koPhezukonke, babanjengomnsalo oxegayo; abaholi babo bayakufa ngenkemba ngenxa yokugxibha kolimi lwabo. Bayakuba yinhlekisa eGibhithe.”
“Beka uphondo emlonyeni wakho; onjengokhozi wehlela indlu kaSimakade, ngokuba basephulile isivumelwano sami, bamelana nomthetho wami.
Bakhala kimi bathi: ‘Nkulunkulu wethu, thina Israyeli siyakwazi.’
U-Israyeli ukwenqabile okuhle; isitha siyakumxosha.
Bazibekele bona amakhosi angaveli kimi; babeka abaholi ngingazi; bazenzela izithombe ngesiliva nangegolide labo, ukuze kunqunywe.
Samariya, ngilahle ithole lakho; intukuthelo yami iyabavuthela; kuyoze kube nini bengakwazi ukuba msulwa na?
Ngokuba livela kwa-Israyeli, ingcweti ilenzile, kodwa alisiye uNkulunkulu; impela ithole laseSamariya liyakuba zicucu.
“Ngokuba bahlwanyele umoya, bayakuvuna isivunguvungu; uhlanga alunantshakaza, alukhiqizi mpuphu; uma luyikhiqiza, iyakushwabadelwa ngabafokazi.
U-Israyeli uyagwinywa, manje sebephakathi kwabezizwe njengesitsha okungekho ntokozo kuso.
Ngokuba bakhuphukele e-Asiriya bazihambela njengembongolo yasendle; u-Efrayimi ucubuzile ezithandweni zakhe.
Noma ngabe sebezithengise kwabezizwe, kepha manje sengiyakubaqoqa, sebeqala ukonda ngenxa yomthwalo wenkosi yezikhulu.
“Ngokuba u-Efrayimi wandisile ama-althare emihlatshelo yesono; esephenduke ama-althare emihlatshelo yesono.
Noma ngimlobele okuningi komthetho wami, kodwa lokho bakubona njengento abayeshwamayo.
Imihlatshelo eyethulwa kimi bayayihlaba, badle inyama yayo, kodwa uSimakade akayithokozeli. Manje uyasikhumbula isiphabheko sabo, abajezise ngezono zabo, babuyele eGibhithe.
Ngokuba u-Israyeli ukhohliwe nguMdali wakhe, wakhe izigodlo, uJuda wandisa imizi ebiyelweyo. Ngiyakuthumela umlilo emizini yakhe, ungqongqise izinqaba zakhe.”
Israyeli, ungajabuli, ngokuthokoza okufana nokwabezizwe, ngokuba uzifebele wena, wahlubuka kuNkulunkulu wakho, wathanda inkokhelo yesifebe kuzo zonke izibuya zokusanhlamvu.
Isibuya nesikhamo sewayini akuyukubondla, newayini elisha liyakumdumaza.
Abayukuhlala ezweni likaSimakade, u-Efrayimi uyakubuyela eGibhithe, badle ukudla okungcolileyo e-Asiriya.
Abayukumthungela uSimakade iwayini, nemihlatshelo yabo ayiyukuba yintokozo kuye, isinkwa sabo siyakuba njengesinkwa sokulila kubo, kuthi bonke abasidlayo bazingcolise bona. Ngokuba isinkwa sabo singesephango labo, asiyukungena endlini kaSimakade.
Niyokwenzenjani ngosuku lwedili, nangosuku lomkhosi kaSimakade na?
Bhekani-ke, noma bangaphunyuka ekubhujisweni, kodwa iGibhithe liyakubabutha, iNofi ibambele; ingcebo yabo yesiliva idliwe yimbabazane, kube nameva emathendeni abo.
Sezifikile izinsuku zokujeziswa, izinsuku zokuphindisela, u-Israyeli makakwazi lokho. Umphrofethi uyisiwula, umuntu onomoya uyahlanya ngenxa yeziphambeko zakho eziningi nangobutha obukhulu.
Umphrofethi ungumlindi ka-Efrayimi kanye noNkulunkulu wami, kodwa umphrofethi ubekelwe ugibe lwezinyoni kuzo zonke izindlela zakhe, nobutha busendlini kaNkulunkulu wakhe.
Sebeshone shi enkohlakalweni njengasezinsukwini zaseGibheya; uyakukhumbula iziphambeko zabo, abajezisele izono zabo.
“Ngamthola u-Israyeli njengezithelo zomvini ehlane, ngabona okhokho bakho njengolibo lomkhiwane emkhiwaneni lapho uqala. Kepha bafika eBhali Pheyori, bazinikela ehlazweni, baba ngokunengekayo njengalokho abakuthandayo.
Udumo luka-Efrayimi luyakundizela kude njengenyoni, kungabi bikho kuthatha sisu, kukhulelwa nakuzala.
Noma bangakhulisa izingane zabo, kodwa ngiyakubephuca zona zonke. Maye impela kubo, lapho ngibafulathela!
Ngimbonile u-Efrayimi enjengeThire, etshalwe endaweni evundileyo, kepha u-Efrayimi uyakukhiphela izingane zakhe kumbulali.
“Simakade, banike. Ngabe uyakubanikani na? Isisu esiphuphumileyo namabele angenalubisi.
Bonke ububi babo buseGiligali, impela ngabazonda khona lapho; ngenxa yobubi bezenzo zabo ngiyakubaxosha endlini yami, angiyukubathanda futhi; zonke izikhulu zabo zingamahlubuka.
U-Efrayimi unqundiwe, impande yabo yomile, abayukuthela sithelo. Noma bangazala, kodwa ngiyakubulala okuyigugu kwesisu sabo.”
UNkulunkulu wami uyakubalahla, ngokuba abamlalelanga, bayakuba yimihambima phakathi kwezizwe.
U-Israyeli wayengumvini owenabileyo, wathela izithelo zakhe eziningi, ngokwanda kwesithelo sakhe wandisa ama-althare akhe; kwathi ngokuchuma kwezwe lakhe wenza izinsika ezingcwele.
Inhliziyo yabo inobuqili; manje-ke bayakulithwala icala labo. USimakade uyakuwacekela phansi ama-althare abo, abhidlize izinsika zabo ezingcwele.
Impela, manje bayakuthi: “Asinankosi, ngokuba asimesabanga uSimakade; pho inkosi ibizosenzelani na?”
Bakhuluma amazwi nje, bafunga amanga, benza isivumelwano; bese kuqubuka ukwehlulela njengesithombo esinobuthi emiseleni yamasimu.
Izakhamuzi zaseSamariya ziyakwesaba ngenxa yethole laseBhethi Aveni, ngokuba abantu bakhona nabaphristi balo bayakulililela, phela udumo lwalo selushabalele kulo.
Liyakuthwalwa lisiwe e-Asiriya libe yisipho senkosi uJarebi; u-Efrayimi uyakwemukela ihlazo, u-Israyeli abe namahloni ngezeluleko zakhe.
ISamariya nenkosi yalo kuyomuka njengebazela lintanta emanzini.
Izindawo eziphakemeyo e-Aveni, eziyisono sakwa-Israyeli, ziyakubhidlizwa. Kuyakumila ameva namakhakhasi kumboze ama-althare abo; bayakuthi ezintabeni: “Simbozeni,” bathi emagqumeni: “Welani phezu kwethu.”
“Israyeli, selokhu wona kusukela ezinsukwini zaseGibheya. Bahlala lapho; impi nabantu bobubi ayiyukubafica eGibheya na?
Kuyakuthi uma sengithanda, ngibajezise. Izizwe ziyakubahlanganyela lapho zibabopha ngeziphambeko zabo eziphindwe kabili.
U-Efrayimi uyisithole esifundisiweyo, esithanda ukubhula okusanhlamvu; ngizomgaxa ijoka entanyeni yakhe enhle, u-Efrayimi ngimdonsise, uJuda alime, uJakobe azicubuzele amagade.
Zihlwanyeleleni ukulunga, nivune umlomo wothando, niqathe insimu yenu engalinyiwe, ngokuba sekuyisikhathi sokufuna uSimakade, aze afike, anise ukulunga phezu kwenu.
Nilime inkohlakalo, navuma ukungalungi, nidle isithelo senkohliso, ngokuba nethembela endleleni yenu nasebuningini bamabutho enu.
Kuyakuqubuka ukuxokozela phakathi kwabantu bakho, zibe yincithakalo zonke izinqaba zakho, njengencithakalo eyenziwa uShalimani, eBhethi Aribheli ngosuku lwempi, kuphihlizwa unina nezingane.
Kuyokwenziwa kanjalo nakuwe Bhethele, ngenxa yokonakala okukhulu; inkosi yakwa-Israyeli iyobhujiswa iphele nya entathakusa.”
“Lapho u-Israyeli esengumntwana ngamthanda; ngayibiza indodana yami ukuba iphume eGibhithe.
Lapho bebabiza, basuka kubo; bayohlabela oBhali, bashisela nezithombe ezibaziweyo impepho.
Kepha yiMina engacathulisa u-Efrayimi; ngabagona ngezingalo zami, kodwa abazanga ukuthi ngabaphulukisa.
Ngabadonsa ngezintabo zomuntu, ngamagoda othando; ngaba kubo njengophakamisa ijoka entanyeni yabo, ngakhothamela kuye, ngamnika ukudla.
“Abayukubuyela eGibhithe, i-Asiriya libe yinkosi yabo, njengoba benqaba ukuphenduka na?
Inkemba iyophenduphenduka idle lubi emizini yabo, ishabalalise imigoqo yabo, ibashwabadele ngenxa yamaqhinga abo.
Abantu bami baphikelele ukuhlubuka kimi, noma bangambiza kangakanani oPhezukonke, ngeke abaphakamise.
“Ngingakuyekela kanjani, Efrayimi, ngikukhaphele kanjani, Israyeli na? Ngingakwenza kanjani ube njenge-Adima, ngikwenze kanjani ube njengeZebhoyimi na? Inhliziyo yami iyaphenduka ngaphakathi kimi, sonke isihawu sami sivusiwe.
Ngeke ngisaqhubeka nolaka lwami oluvuthayo, noma ngibhubhise u-Efrayimi, ngokuba nginguNkulunkulu, angisiye umuntu, ngingongcwele phakathi kwenu, angiyukufika ngolaka.
Bayakulandela uSimakade oyakubhonga njengengonyama, ngokuba uyakubhonga, qede kubuye abantwana bakhe bethuthumela, bevela entshonalanga.
Bayakuza bethuthumela njengenyoni bevela eGibhithe, njengejuba bephuma e-Asiriya, ngiyakubahlalisa ezindlini zabo,” kusho uSimakade.
U-Efrayimi ungizungeze ngamanga, nendlu ka-Israyeli ngenkohliso; uJuda uvukelana noNkulunkulu noNgcwele othembekileyo.
U-Efrayimi udla umoya, uxoshana nomoya wasempumalanga, abhebhethekise amanga nobudlova imihla yonke. Wenza isivumelwano ne-Asiriya, athumele amafutha eGibhithe.
USimakade uthwesa uJuda icala, uyakumjezisa uJakobe ngokwezindlela zakhe, akhokhise kuye ngokwezenzo zakhe.
Esesibelethweni wabamba umfowabo ngesithende, esenamandla wabambana noNkulunkulu.
Wabambana nengelosi, wanqoba; wakhala, wanxusa kuyo isibusiso. Yamfumana eBhethele, yakhuluma nathi lapho,
uSimakade uNkulunkulu Wamabandla, uSimakade akhunjulwa ngalo.
Kodwa kufanele wena ubuyele kuNkulunkulu wakho, ube nokwethembeka nobuqotho, ulindele uNkulunkulu wakho njalo.
IKhanani liphethe izikali zenkohliso esandleni salo, liyakuthanda ukuqola.
U-Efrayimi uthi: “Impela ngicebile, senginentilibathwa yomcebo. Kuzo zonke izithukuthuku zami abayukuthola kimi okubi okuyisono.”
Kepha Mina nginguSimakade uNkulunkulu wakho selokhu kwaba seGibhithe. Ngisazokwenza futhi uhlale emathendeni njengasezinsukwini zemikhosi enqunyiweyo.
Ngakhuluma kubaphrofethi, ngandisa imibono, ngenza imizekeliso ngesandla sabaphrofethi.
Ngabe iGiliyadi selonakele? Impela abaselutho; bahlabe izinkunzi eGiligali, ngakho-ke ama-althare abo ayakuba njengenqwaba yamatshe emiseleni yamasimu.
UJakobe wabalekela e-Aramu, u-Israyeli wasebenzela umfazi, welusa umhlambi ukuze athathe umfazi.
USimakade wakhuphula u-Israyeli eGibhithe ngomphrofethi, wamlondoloza ngomphrofethi.
Kepha u-Efrayimi umchukuluze ngokwedlulele; icala lakhe lokuchitha igazi liyakuba phezu kwakhe, iNkosi yakhe imthele ngehlazo lakhe.
Bekuthi uma u-Efrayimi ekhuluma, kube nokuthuthumela, wayephakanyisiwe kwa-Israyeli, kodwa waba necala ngokukhonza uBhali, wayesefa.
Manje bayaqhubeka nokona, bazenzele imifanekiso ebunjiweyo ngesiliva labo, nezithombe ezibaziweyo ngobungcweti babo, konke lokhu kungumsebenzi wezingcweti, bakhuluma kubo, bathi: “Abenza umhlatshelo kumele bange amathole.”
Ngakho-ke bayakuba njengofasimba, bafane namazolo asekuseni eshabalala, nanjengamakhoba epheshulwa ngumoya esibuyeni nentuntu ephuma ngoshimula.
Kepha Mina nginguSimakade uNkulunkulu wakho selokhu kwaba seGibhithe; awuyukumazi omunye uNkulunkulu ngaphandle kwami, akekho futhi omunye uMsindisi ngaphandle kwami.
Mina ngakwazi ehlane ezweni lesomiso.
Basutha ngokwamadlelo abo, kuthe sebesuthi bazigqaja, base bengikhohlwa Mina.
Ngase ngiba njengebhubesi kubo, ngacutha endleleni njengengwe.
Ngiyakubathelekela njengebhele eliphucwe amazinyane alo, ngibadabule isifuba esivikele inhliziyo yabo, ngibashwabadele lapho njengebhubesi, isilwane sasendle sibanephunephule.
Uzakubhujiswa, Israyeli, ngokuba umelene nami, umsizi wakho.
Iphi inkosi yakho manje ukuze ikusindise kuyo yonke imizi yakho, na? Baphi abaholi bakho, wena owathi ngabo: “Nginike inkosi nabaholi” na?
Ngakunika inkosi ngentukuthelo yami, ngayithatha ngolaka lwami.
Ububi buka-Efrayimi bulondoloziwe, isono sakhe siqoshiwe.
Imihelo yobelethayo iyakumfikela, uyindodana engahlakaniphile, ngokuba kuthi sekuyisikhathi sokuba azalwe angezi emnyango wesibeletho.
Ngiyakubahlawulela yini esandleni sendawo yabafileyo, ngibahlenge yini ekufeni na? Kufa, luphi ubhubhane lwakho na? Ndawo yabafileyo, kuphi ukubhubhisa kwakho na? uzwelo lufihlakele emehlweni ami.
“Noma angaba yindodana enempumelelo kubafowabo, kuyakufika umoya wasempumalanga, umoya kaSimakade ovela ehlane; umthombo wakhe uyakuba namahloni, isiphethu sakhe sishe; uyakuphanga ingcebo yakhe, nazo zonke izinto eziyigugu.
ISamariya liyakuba necala, ngokuba limhlubukile uNkulunkulu walo; bayakufa ngenkemba, izingane zabo ziphahlazwe, abakhulelweyo baqaqwe.”
Israyeli, buyela kuSimakade uNkulunkulu wakho, ngokuba ukhubekile ngenxa yobubi bakho.
Thathani amazwi, nibuyele kuSimakade, nithi kuye: “Thethelela zonke iziphambeko, uthathe amazwi ethu, ukuze sinikele ngemilomo yethu ibe njengemihlatshelo yezinkunzi.
I-Asiriya aliyukusisindisa, ngeke siwagibele amahhashi, asisayukusho futhi kuyo imisebenzi yezandla zethu ukuthi onkulunkulu bethu, ngokuba nguwe ohawukela intandane.”
Ngiyakwelapha ukuhlubuka kwabo, ngibathande ngokukhululeka, ngokuba intukuthelo yami isukile kubo.
Ngiyakuba njengamazolo ku-Israyeli, uyakuqhakaza njengomnduze, agxilise izimpande zakhe njengeLebhanoni.
Amahlumela akhe ayokwenaba, ubuhle bakhe bube njengomnqumo, iphunga lakhe liyakuba njengemisedari yaseLebhanoni.
Bayakubuya, bahlale emthunzini wakhe, bachume njengokusanhlamvu, baqhakaze njengomvini, udumo lwabo lube njengewayini laseLebhanoni.
U-Efrayimi uyakuthi: “Zizongenzelani nje izithombe ezibaziweyo na? Mina ngiyakuphendula, ngimnakekele. Mina nginjengomsayiphuresi oluhlaza, izithelo zakho zifunyanwa kimi.”
Ngubani ohlakaniphileyo na? Uyakuziqonda lezi zinto. Ngubani onengqondo na? Uyakuzazi lezi zinto. Ngokuba izindlela zikaSimakade zilungile; abalungileyo bahamba ngazo, kodwa abaphambukayo bayakhubeka kuzo.
Izwi likaSimakade elafika kuJoweli indodana kaPhethuweli.
Yizwani lokhu nina malunga, nibeke indlebe nonke nina zakhamuzi zezwe. Kwake kwenzeka yini lokhu emihleni yenu noma ezinsukwini zokhokho benu na?
Kutsheleni abantwana benu, nabantwana benu bakutshele abantwana babo, nabantwana babo bakutshele esinye isizukulwane.
Okushiywe yisikhonyane kudliwe ngamaqhwagi, nokushiywe amaqhwagi kwadliwa yisibotho, kwathi okushiywe yisibotho kwadliwa yinkasa.
Phaphamani, zidakwa, nikhale, nilile zinkolotshe zewayini, phela iwayini elimnandi selisusiwe emlonyeni wenu.
Ngokuba isizwe esinamandla nesingenakubalwa sikhuphukele ezweni lami, amazinyo aso ngamazinyo ebhubesi, namazinyo aso emihlathi angawebhubesi lensikazi.
Sicekele phansi umvini wami, nomkhiwane wami sawuphundla kwasala isiphunzi. Saxebula amagxolo awo sawalahla, amagatsha awo aba mhlophe qwa.
Khala njengentombi embethe indwangu eyisaka ililela umyeni wobusha bayo.
Iminikelo yokusanhlamvu nokuphuzwayo ayisalethwa endlini kaSimakade; abaphristi, izinceku zikaSimakade bayalila.
Amasimu onakele, umhlabathi womile, ngoba okusanhlamvu kushaziwe; iwayini elisha lihwamukile, namafutha amasha ashabalele.
Jabhani balimi, nikhale nina enilima izimvini ngenxa kakolo nebhali, ngokuba isivuno sensimu sishabalele.
Umvini ubunile, nomkhiwane womile; amahananadi, amasundu, izihlahla zamahhabhula nemithi yonke yasendle kubunile, impela intokozo iphelile kubantwana babantu.
Mbathani indwangu eyisaka nina baphristi, nilile, nikhihle isililo nina zikhonzi ze-althare. Wozani nilale ubusuku bonke nembethe indwangu eyisaka nina zinceku zikaNkulunkulu wami. Ngokuba umnikelo wokusanhlamvu nowokuphuzwayo akusalethwa endlini kaNkulunkulu wenu.
Memezelani usuku olungcwele lokuzila ukudla, nibize umhlangano, niqoqele amalunga nazo zonke izakhamuzi zezwe endlini kaSimakade uNkulunkulu wenu, nikhale kuSimakade.
Maye ngalolo lusuku! Ngokuba usuku lukaSimakade lusondele. Luyakufika luyimbubhiso evela kuSomandla.
Akuqothulwanga yini ukudla phambi kwamehlo ethu, kwaphela intokozo nenjabulo endlini kaNkulunkulu wethu, na?
Imbewu ibolile phansi kwamagade ayo; izangobo zibhidliziwe, izinqolobane zadilizwa, ngokuba okusanhlamvu kushazile.
Maye, sekububula nemfuyo! Imihlambi yezinkomo yehla yenyuka ikhungathekile, ngokuba ayinamadlelo, nemihlambi yezimvu ithwele kanzima.
Ngikhala kuwe Simakade, ngokuba amadlelo asendle angqongqiswe ngumlilo, nelangabi lizishise zonke izihlahla zasendle.
Ngisho nezilwane zasendle zilangazelela Wena, ngokuba imifula yamanzi ishile, nomlilo uqothule amadlelo asendle.
Bethani uphondo eZiyoni, nihlabe umkhosi entabeni yami engcwele, mazithuthumele zonke izakhamuzi ezweni, ngokuba luyeza usuku lukaSimakade, impela selusondele.
Usuku lobumnyama nesigayegaye, usuku lwamafu nobumnyama obukhulu, njengentathakusa yendlaleka ezintabeni, kunjalo nokuza kwezinkumbi zabantu abanamandla abangakaze babekhona kwasemandulo, nabangasoze babakhona abanjalo emva kwabo kuze kube yiminyaka yezizukulwane ngezizukulwane.
Phambi kwabo kuqothula umlilo, emva kwabo kuvutha ilangabi; izwe eliphambi kwabo linjengensimu e-Edeni, kodwa emva kwabo liyihlane elingenalutho, akukho okuphunyukayo kubo.
Ukubukeka kwabo kufana nesimo samahhashi, bagijima njengabagibele amahhashi empi.
Bagqabashiya kube sengathi ngumsindo wezinqola ezicongweni zezintaba, nanjengomsindo welangabi lomlilo ongqongqisa amahlanga, banjengabantu abanamandla abavivela ukulwa.
Phambi kwabo izizwe ziyathuthumela, ubuso bonke buphaphatheke.
Bagijima njengamaqhawe, njengamabutho empi ekhuphuka ongangeni. Bayahamba, kube yilowo nalowo ngendlela yakhe, abaphambuki endleleni yabo.
Abakhubani omunye nomunye; bayahamba, kube yilowo nalowo endleni yakhe; abayeki ukungena ngodli phakathi kwezikhali.
Batheleka emzini, bagijime ogangeni; bakhuphukele ezindlini, bangulukudele ngamafasitela njengesela.
Umhlaba uyazamazama phambi kwabo, isibhakabhaka sithuthumele phambi kwabo. Ilanga nenyanga kuyakubamnyama bhuqe, nezinkanyezi zigodle ukukhanya kwazo.
USimakade ulikhiphile izwi lakhe phambi kwempi yakhe, ngokuba amabutho akhe maningi kakhulu, impela owenza izwi lakhe unamandla. Nokho usuku lukaSimakade lukhulu, futhi luyesabeka ngokwedlulele. Pho ngubani ongalumela na?
USimakade uyakhuluma uthi: “Ngisho namanje buyelani kimi ngenhliziyo yenu nonke, ngokuzila ukudla, ngokukhala, nangokulila.”
Dabulani izinhliziyo zenu, hhayi izingubo zenu, nibuyele kuSimakade uNkulunkulu wenu, ngokuba unomusa nesihawu, uyephuza ukuthukuthela, unesihe nothando olungenamkhawulo, uyaxolela angabe esajezisa.
Ngubani owaziyo uma engabuya axolele, ashiye isibusiso emva kwakhe, kube ngumnikelo wokusanhlamvu nowokuphuzwayo kuSimakade uNkulunkulu wenu na?
Bethani uphondo eZiyoni, nimemezele usuku olungcwele lokuzila ukudla, nibize umhlangano.
Qoqani abantu, ningcwelise umhlangano, niqoqe amalunga, izingane nezinsana ezisancela. Umyeni makaphume ekamelweni lakhe nomlobokazi emgonqweni wakhe.
Abaphristi, izikhonzi zikaSimakade, mabakhale phakathi kompheme ne-althare, bathi: “Hawukela abantu bakho, Simakade, ungalenzi ifa lakho libe yinto yokuthukwa nenhlekisa, kungani kufanele bathi phakathi kwabezizwe: ‘Uphi uNkulunkulu wabo na?’ ”
USimakade walihawukela izwe lakhe, waba nesihe kubantu bakhe.
USimakade waphendula wathi kubantu bakhe: “Bhekani-ke, ngiyakunithumelela okusanhlamvu, iwayini elisha namafutha amasha, niyakusutha ngakho, ngingabe ngisanenza inhlekisa ezizweni.
Ngiyakuyidudulela kude nani impi yasenyakatho, ngiyixoshele ezweni eligagadekile neliyincithakalo, ubuso bayo bubheke ngasolwandle empumalanga, ingemuva layo lifulathele ngasolwandle entshonalanga, ukunuka kwayo kukhuphuke, kwenyuke nephunga layo elibi, ngokuba wenze izinto ezinkulu.
“Lizwe, ungesabi; jabula uthokoze, ngokuba uSimakade wenzile izinto ezinkulu.
Zilwane zasendle, ningesabi, ngokuba amadlelo ehlane aluhlaza, impela nezihlahla zithela izithelo, umkhiwane nomvini kuthele kakhulu.
Jabulani, bantu baseZiyoni, nithokoze kuSimakade uNkulunkulu wenu, ngokuba unipha imvula yokuqala ngokulunga, uninisele imvula yokuqala neyakamuva ngenyanga yokuqala.
Izibuya ziyakugcwala okusanhlamvu, izikhamo ziphuphume iwayini elisha namafutha amasha.
“Ngiyakunibuyisela iminyaka okwadla ngayo isikhonyane, amaqhwagi, isibotho nenkasa, impi yami enkulu engayithumela kini.
Impela niyakudla nisuthe, nilidumise igama likaSimakade uNkulunkulu wenu onenzele okumangalisayo; abantu bami abayukujabha ingunaphakade.
Niyakukwazi ukuthi ngiphakathi kuka-Israyeli, nokuthi Mina nginguSimakade uNkulunkulu wenu, akekho omunye; abantu bami abayukujabha kuze kube phakade.
“Kuyakuthi kamuva ngithululele uMoya wami phezu kwabo bonke abantu. Amadodana namadodakazi enu ayakuphrofetha, abadala benu baphuphe amaphupho, izinsizwa zenu zibone imibono.
Ngalezo zinsuku ngiyakuthululela uMoya wami naphezu kwezinceku nezincekukazi.
Ngiyakuveza izimangaliso ezulwini nasemhlabeni, igazi, umlilo nezikhatha zentuthu.
Ilanga liyakuphenduka ubumnyama, inyanga ibe yigazi, lungakafiki usuku olukhulu nolwesabekayo lukaSimakade.
Kepha kuyakuthi bonke ababiza igama likaSimakade baphunyuke, ngokuba entabeni iZiyoni naseJerusalema kuyakuba khona abasindileyo njengoba eshilo uSimakade, labo abayakubizwa nguSimakade.”
“Impela ngalezo zinsuku nangaleso sikhathi, lapho sengiguqula ukuthunjwa kukaJuda neJerusalema,
ngiyakuqoqa zonke izizwe, ngizehlisele esigodini sikaJehoshafathi, ngizehlulele lapho ngenxa yabantu bami nefa lami u-Israyeli, ezimhlakazele ezizweni, zabelana ngezwe lami.
Zenza unkatho ngabantu bami, zathengisa umfana ukuze zilale nesifebe, zathengisa ngentombazane ukuze zithole iwayini, zaliphuza.
“Ningifunani nje nina Thire neSidoni nazo zonke izifunda eFilistiya na? Kukhona yini enikhokhisa ngakho kimi na? Uma nizikhokhisela kimi, ngiyakusheshe ngibuyisele masinyane phezu kwamakhanda enu ukuzikhokhisela kwenu.
Phela nina nithathe isiliva negolide lami, nangenisa amagugu ami emathempelini enu,
nathengisa ngabantu bakwaJuda nabaseJerusalema kubantu bamaGriki kude le, ukuze nibasuse ezweni labo.
Niyabona-ke, sengizobabuyisa lapho nibathengisele khona, ngiphindisele kini ngesenzo senu.
Ngiyakuthengisa amadodana namadodakazi enu ngesadla sabantu bakwaJuda, bayakuwathengisa kumaSabhiyani, isizwe esikude.” Impela usekhulumile uSimakade.
“Memezelani lokhu ezizweni, zilungiseleni impi, vivisani amabutho. Awasondele, akhuphuke amabutho.
Cangcathani amageja enu abe zinkemba, iziphundli zenu zibe yimikhonto, obuthakathaka makathi ngiyiqhawe.
Sheshani nize zizwe zonke ezindaweni zonke, nihlangane ndawonye. Simakade, yehlisela amaqhawe akho lapho.
“Mabazivuse izizwe, mazikhuphukele esigodini sikaJehoshafathi, ngokuba ngiyakuhlala lapho ngehlulele zonke izizwe ezilapho nxazonke.
Fakani isikela, ngokuba isivuno sesivuthiwe; wozani nizogxoba, ngokuba isikhamo sewayini sigcwele, nezimbiza zewayini ziyachichima, impela ububi babo bukhulu.”
Yizindimbane ngezindimbane esigodini sesinqumo, ngokuba usuku lukaSimakade selusondele esigodini sesinqumo.
Ilanga nenyanga kuyakuba mnyama bhuqe, izinkanyezi zikugodle ukukhanya kwazo.
“USimakade uyabhodla eseZiyoni, azwakalise izwi lakhe eseJerusalema. Izulu nomhlaba kuyakuzamazama, kodwa uSimakade uyisiphephelo sabantu bakhe, nenqaba yabantu bakwa-Israyeli.
“Niyakukwazi-ke ukuthi Mina nginguSimakade uNkulunkulu wenu ohlala eZiyoni, intaba yami engcwele. IJerusalema liyakuba ngcwele, abafokazi abasayukudabula futhi kulo.
“Kuyothi ngalolo lusuku izintaba ziconse iwayini elimnandi, amagquma agobhoze ubisi, imihosha yonke yakwaJuda igeleze amanzi. Kuyakuqhuma umthombo endlini kaSimakade oyakunisela isigodi iShithimi.
IGibhithe liyakuba yincithakalo, i-Edomi libe yihlane elingenalutho, ngenxa yobudlova obenziwa kubantu bakwaJuda, bachitha igazi elingenacala ezweni labo.
Kepha uJuda uyakuzinza kuze kube phakade, neJerusalema liyakuba khona izizukulwane ngezizukulwane.
Angiyukubajezisela icala labo legazi engingabajeziselanga lona.” USimakade uhlala eZiyoni.
Amazwi ka-Amose owayengomunye wabelusi bezimvu edabuka eThekhowa, aqondene nalokho akubonayo ngo-Israyeli ezinsukwini zika-Uziya, inkosi yakwaJuda, nasezinsukwini zikaJerobhowamu indodana kaJowashi, inkosi yakwa-Israyeli, eminyakeni emibili ngaphambi kokuzamama komhlaba.
Wathi: “USimakade uyabhonga eZiyoni, azwakalise izwi lakhe eJerusalema. Amadlelo abelusi ayagagadeka, nesicongo seKharmeli siyabuna.”
Usho kanje uSimakade uthi: “Ngenxa yeziphambeko ezintathu zabaseDamaseku, impela, ngenxa yezine, angiyukuguquka, ngokuba babhula iGiliyadi ngezinsingo zensimbi.
Ngakho-ke ngiyakuthumela umlilo endlini kaHazayeli, uyakungqongqisa izinqaba zikaBheni Hadadi.
Ngiyakwaphula imigoqo yamasango eDamaseku, ngibhubhise izakhamuzi zasesigodini i-Aveni, nophethe intonga yobukhosi eBhethi Edeni. Abantu base-Aramu bayakuthunjelwa eKhiri,” kusho uSimakade.
Usho kanje uSimakade uthi: “Ngenxa yeziphambeko ezintathu zabaseGaza, impela, ngenxa yezine, angiyukuguquka, ngokuba bathumba abantu ngothi lwabo ukuba babakhaphele ku-Edomi.
Ngakho-ke ngiyakuthumela umlilo ogangeni eGaza, uyakungqongqisa izinqaba zalo.
Ngiyakubhubhisa izakhamuzi e-Ashidodi, nophethe intonga yobukhosi e-Ashikeloni. Ngiyakushaya ngesandla sami i-Ekroni, insali yamaFilisti iyakuphela nya,” kusho iNkosi uSimakade.
Usho kanje uSimakade uthi: “Ngenxa yeziphambeko ezintathu zabaseThire, impela, ngenxa yezine, angiyukuguquka, ngokuba bathumba abantu ngothi lwabo babakhaphela ku-Edomi, bangasikhumbula isivumelwano sabafowabo.
Ngakho-ke ngiyakuthumela umlilo ogangeni eThire, uyakungqongqisa izinqaba zalo.”
Usho kanje uSimakade uthi: “Ngenxa yeziphambeko ezintathu zabakwa-Edomi, impela, ngenxa yezine, angiyukuguquka, ngokuba wamxosha umfowabo ngenkemba, walahla isihe sakhe, wabhebhethekisa ulaka lwakhe unomphelo, waqhubeka njalo nentukuthelo yakhe.
Ngakho-ke ngiyakuthumela umlilo eThemani, uyakungqongqisa izinqaba eBhozira.”
Usho kanje uSimakade uthi: “Ngenxa yeziphambeko ezintathu zabantu bakwa-Amoni, impela, ngenxa yezine, angiyukuguquka, ngokuba baqaqe abesifazane abakhulelweyo bakwaGiliyadi ukuze bandise imingcele yabo.
Ngakho-ke ngiyakuthungela ngomlilo ugange eRabha, uyakungqongqisa izinqaba zalo, kuyozwakala ngeziqubulo nobumayemaye ngosuku lwempi, nangesiphepho ngosuku lwesivunguvungu.
Inkosi yabo iyakuthunjwa, yona kanye nezikhulu zayo,” kusho uSimakade.
Usho kanje uSimakade uthi: “Ngenxa yeziphambeko ezintathu zabakwaMowabi, impela, ngenxa yezine, angiyukuguquka, ngokuba bashisa amathambo enkosi yakwa-Edomi aba ngumcako.
Ngakho-ke ngiyakuthumela umlilo kwaMowabi, uyakungqongqisa izinqaba eKeriyothi. AbakwaMowabi bafele emsindweni, kube ubumayemaye, kukhale icilongo.
Ngiyakuqeda nya ngomehluleli wakhona, ngibulale zonke izikhulu zakhe kanye naye,” kusho uSimakade.
Usho kanje uSimakade uthi: “Ngenxa yeziphambeko ezintathu zabakwaJuda, impela, ngenxa yezine, angiyukuguquka, ngokuba bawulahlile umthetho kaSimakade, bangazigcina izimiso zakhe, amanga abo abadukisa, abawalandela nokhokho babo.
Ngakho-ke ngiyakuthumela umlilo kwaJuda, uyakungqongqisa izinqaba eJerusalema.”
Usho kanje uSimakade uthi: “Ngenxa yeziphambeko ezintathu zabakwa-Israyeli, impela, ngenxa yezine, angiyukuguquka, ngokuba bathengise olungileyo ngesiliva, nompofu ngezimbadada ezimbili.
Bagxobagxoba amakhanda abampofu othulini lomhlabathi, bachezukisa abathobekileyo endleleni; indodana noyise baya entombini, kanjalo-ke balihlambalaze iGama lami elingcwele.
Balala eceleni kwawo wonke ama-althare ngezingubo ezithathwe zaba yisibambiso. Baphuza iwayini labahlawulisiwe endlini kaNkulunkulu wabo.
“Kodwa Mina ngawabhubhisa ama-Amori phambi kwabo, ayemade njengemisedari, eqine njengemi-okhi, ngaqeda nya ngesithelo sawo kusukela phezulu nangezimpande zawo phansi.
“Mina nganikhipha eGibhithe, nganihola ehlane iminyaka engamashumi amane ukuba nidle izwe lama-Amori.
Ngavusa amanye amadodana enu aba ngabaphrofethi, nezinye izinsizwa zenu zaba ngamaNaziri. Akunjalo yini bantu bakwa-Israyeli na?” kusho uSimakade.
“Kodwa naphuzisa amaNaziri iwayini, nenqabela abaphrofethi, nithi: ‘Ningaphrofethi.’
Niyabona-ke, sengizonicindezela lapho phansi njengenqola inyinyitheka okusanhlamvu.
Onejubane ngeke aphunyuke; onamandla akayukuzihlenga ngamandla akhe, neqhawe aliyukuyisindisa impilo yalo.
Obambe umnsalo eciba akayukuma; ogijima ngezinyawo zakhe akayukusinda, nogibele ihhashi akayukuyisindisa impilo yake.
Onesibindi kumaqhawe uyakubaleka enqunu ngalolo lusuku,” kusho uSimakade.
Yizwani leli lizwi uSimakade alikhulume ngani bantu bakwa-Israyeli, nangawo wonke umndeni awukhipha eGibhithe, uthi:
“Ngaze nina kuphela emindenini yonke yomhlaba; ngakho-ke ngiyakunijezisa ngenxa yabo bonke ububi benu.”
Bangahambisana yini abantu ababili uma bengavumelananga na?
Ibhubesi lingabhodla yini ehlathini uma lingabambe nyamazane na? Ibhongo lengonyama lingagwavuma yini uma lingabambe lutho na?
Inyoni ingawela yini ogibeni olusemhlabathini uma kungekho ecushwe ngakho na? Unoxhaka ungazisukela yini emhlabathini uma impela ungabambe lutho na?
Lingabethwa yini icilongo emzini qede abantu bangathuthumeli na? Umuzi ungehlelwa yini yinhlekelele uma engayenzanga uSimakade na?
Ngokuba iNkosi uSimakade ayenzi lutho ingayambulanga imfihlakalo yayo ezincekwini zayo abaphrofethi.
Ingonyama ibhongile, pho ngubani ongayukwesaba na? INkosi uSimakade ikhulumile, pho ngubani ongayukuphrofetha na?
Memezelani ezinqabeni e-Ashidodi, nasezinqabeni eGibhithe, nithi: “Qoqanani ezintabeni eSamariya, nibone inxushunxushu enkulu nokucindezelwa okuphakathi kulo.”
“Ngokuba abakwazi ukwenza okulungileyo,” kusho uSimakade. “Banqwabelela ubudlova nempango ezinqabeni zabo.”
Ngakho-ke isho kanje iNkosi uSimakade ithi: “Isitha siyakulihaqa izwe, sibhidlize izinqaba zenu, siphange nezigodlo zenu.”
Usho kanje uSimakade uthi: “Njengomelusi ekhulula emlonyeni wengonyama imilenze emibili noma ingxenye yendlebe, bayakukhululwa kanjalo abantu bakwa-Israyeli, abahlala eSamariya ezihlalweni ezinofonofo ezembozwe ngosilika.”
“Lalelani, nixwayise indlu kaJakobe,” kusho iNkosi uSimakade, uNkulunkulu Wamabandla.
“Ngokuba mhla ngimjezisa u-Israyeli ngeziphambeko zakhe, ngiyakudiliza nama-althare eBhethele, nginqume nezimpondo ze-althare, ziwele phansi.
Ngiyakubhidliza indlu yasebusika neyasehlobo, kushabalale izindlu ezihlotshiswe ngophondo lwendlovu, kudilike izindlu eziningi,” kusho uSimakade.
Yizwani leli lizwi, nina zinkomo zaseBhashani enisentabeni eSamariya, enicindezela abampofu, niphathe kabi abantulayo, enithi emakhosini enu: “Lethani, siphuze.”
INkosi uSimakade ifungile ngobungcwele bayo, yathi: “Bhekani-ke, ziyonifikela izinsuku lapho niyakuthathwa ngezingwegwe, nezizukulwane zenu ngezindobo zokudoba.
Niyakuphuma ngamunye ngamunye ngezintuba, nilahlwe eHermoni,” kusho uSimakade.
“Wozani eBhethele, nizokona, naseGiligali, nizokwandisa iziphambeko, nilethe imihlatshelo yenu njalo ekuseni, nokweshumi kwenu ngezinsuku ezintathu.
Nishise umnikelo wokubonga ngokunemvubelo, nimemezele iminekelo yesihle, niqhoshe ngayo, ngokuba nithanda ukwenza kanjalo, bantu bakwa-Israyeli,” kusho iNkosi uSimakade.
“Mina nganilethela indlala kuyo yonke imizi yenu, nokuntula isinkwa kuzo zonke izindawo zenu, kodwa anibuyelanga kimi,” kusho uSimakade.
“Nganigodlela futhi nemvula, kusasele izinyanga ezintathu kuvunwe; ngayidedela komunye umuzi; ngangalinisa komunye, ngayidedela kwesinye isiqephu sezwe, ngangalinisa kwesinye isiqephu, kwathi isiqephu engananga kuso sasha.
Imizi emibili noma emithathu yadiyazela, yaya komunye umuzi ukuyophuza amanzi, kodwa ayaneliswanga; nakuba kunjalo kepha anibuyelanga kimi,” kusho uSimakade.
“Nganishaya ngokuhwamuka nesikhutha; izivande zenu ezininingi, izivini zenu, imikhiwane yenu neminqumo yenu kwadliwa yisikhonyane, kodwa anibuyelanga kimi,” kusho uSimakade.
“Nganithumelela ubhubhane ngendlela efanayo neyaseGibhithe, ngazibulala ngenkemba izinsizwa zenu, ngathumba amahhashi enu, ngenza ukuba iphunga lokunuka kwenkambu yenu likhuphukele emakhaleni enu, kodwa anibuyelanga kimi,” kusho uSimakade.
“Ngababhubhisa abanye benu njengalokhu uNkulunkulu abhubhisa iSodoma neGomora; nanifana nesikhuni esophulwe emlilweni, kodwa anibuyelanga kimi,” kusho uSimakade.
“Ngakho-ke ngiyakwenza kanjalo kuwe, Israyeli, njengoba-ke ngiyakwenza lokhu kuwe, zilungiselele ukuhlangana noNkulunkulu wakho, Israyeli.”
Uyabona-ke, Yena owabumba izintaba, wadala umoya, Yena otshela abantu imicabango yakhe, owenza intathakusa ibe ngubumnyama, ohamba ezindaweni eziphakemeyo zomhlaba, igama lakhe nguSimakade, uNkulunkulu Wamabandla.
Lalelani leli lizwi engilimemezela kini eliyisililo ngendlu ka-Israyeli.
“Iwile intombi yakwa-Israyeli, ayisayukuvuka; ilahliwe ezweni layo, akekho oyakuyivusa.”
Ngokuba isho kanje iNkosi uSimakade, ithi: “Umuzi owaphuma uyinkulungwane uyakushiya ikhulu, nowaphuma uyikhulu uyakushiya ishumi kuyo indlu yakwa-Israyeli.”
Ngokuba usho kanje uSimakade kuyo indlu yakwa-Israyeli, uthi: “Ngifuneni, niphile.
Kodwa ningalifuni iBhethele, ningayi eGiligali, ningadluleli eBheri Sheba, ngokuba impela iGiligali liyakuthunjwa, iBhethele liphenduke ize.
Funani uSimakade, niphile, kungenjalo uyakumemetheka njengomlilo endlini kaJosefa, ungqongqise, kungabi bikho owucimayo eBhethele.
“Nina enihlanekezela ubulungiswa bubabe njengomhlonyane, nilaxaze phansi ukulunga;
lowo owenza isilimela nomthala, oguqula ubumnyama bube yintathakusa, aphendule ubusuku bube yimini, obiza amanzi olwandle, awathululele phezu komhlaba, igama lakhe nguSimakade,
wehlisela imbubhiso kwabanamandla ngokuphazima, nencithakalo yehlele izinqaba.
Bayamzonda okhuzayo esangweni; bamenyanye okhuluma iqiniso elimsulwa.
“Ngakho-ke ngenxa yokuthi nicindezela abampofu, nithathe kubo ngenkani okusanhlamvu, noma ningakha izindlu ngamatshe abaziweyo, kodwa aniyukuhlala kuzo, noma ningatshala izivini ezinhle, kepha aniyukuliphuza iwayini lazo.
Ngokuba ngiyazi ukuthi iziphambeko zenu ziningi, nokuthi izono zenu zinkulu kangakanani, nina enicindezela abalungileyo, nemukele umfumbathiso, nithalalise udaba lwabantulayo esangweni.
Ngakho-ke ohlakaniphileyo uyakuthula ngaleso sikhathi, ngokuba yisikhathi esibi.
“Funani okuhle, hhayi okubi, ukuze niphile, uyakuba nani uSimakade uNkulunkulu Wamabandla, njengoba nani nishilo kanjalo.
Zondani okubi, nithande okuhle; niqinise ubulungiswa esangweni, hleze uSimakade uNkulunkulu Wamabandla ayihawukele insali kaJosefa.”
Ngakho-ke usho kanje uSimakade uNkulunkulu Wamabandla, iNkosi, uthi: “Kuyakulilwa kuzo zonke izigcawu, nakuyo yonke imigwaqo, kuthiwe: ‘Maye! Maye!’ Bayakubiza umlimi ukuba akhale, nongoti bokukhihla isililo.
Kuyakuba khona isililo nasezivinini zonke, ngokuba ngiyakudabula phakathi kwenu,” kusho uSimakade.
Maye kini enifisa usuku lukaSimakade! Kungani nilangazelela usuku lukaSimakade na? Usuku lukaSimakade lungubumnyama, hhayi ukukhanya.
Kunjengokuba ethi umuntu ubalekela ibhubesi, ahlangane nebhele, athi uya endlini ancike ngesandla odongeni, alunywe yinyoka.
Ngabe usuku lukaSimakade lungubumnyama, hhayi ukukhanya, luyisigayegaye esingenakho ukukhanya na?
Ngiyawazonda, futhi ngiyawenqaba amadili enu, angiyenameli nemihlangano yenu.
Impela noma ninganikela kimi ngeminikelo yokushiswa neyokusanhlamvu, ngeke ngiyamukele; ngiyoyishaya indiva iminikelo yenu yokuthula yamathole akhuluphalisiweyo.
Suka kimi nomsindo wezihlabelelo zakho, angiyukuzwa kwamvunge yamahabhu akho.
Kepha ubulungiswa mabugeleze njengamanzi, nokulunga njengomfula ongashi.
“Nake nangilethela yini imihlatshelo neminikelo ehlane iminyaka engamashumi amane, nina ndlu ka-Israyeli na?
Seniyakuthwala uSikhuthi inkosi yenu noKhiyuni inkanyezi kankulunkulu wenu, izithombe zenu enizenzele zona.
Ngiyakunenza nithunjelwe phesheya kweDamaseku,” kusho uSimakade ogama lakhe linguNkulunkulu Wamabandla.
Maye, kwabanethezekileyo eZiyoni, nabavikelekile entabeni eSamariya, izikhulu zesizwe esikhethekileyo, eya kubo indlu ka-Israyeli!
Dlulelani eKhaline, nibone; nisuke lapho niye eHamathi elikhulu, bese nehlela eGathi lamaFilisti. Bangcono yini kunale mibuso na? Ngabe izwe labo likhulu yini kunelenu na?
Nina eniluqhelisela kude usuku olubi, nisondeze isihlalo sobudlova.
Balala emibhedeni ehlotshiwe ngophondo lwendlovu, bazelule ezihlalweni zabo ezinofonofo, badle amawundlu omhlambi namathole aphuma esibayeni.
Bacula amaculo ngohambu, benze izimfijoli njengoDavide.
Baphuza iwayini ngezindebe, bazigcobe ngamafutha ekhethelo, kodwa abadabuki ngokubhujiswa kukaJosefa.
Ngakho-ke sebezothunjwa babe phakathi kwabokuqala kwabathunjwayo, kuphele ukutamasa kwabanethezekile.
INkosi uSimakade izifungile, kusho uSimakade uNkulunkulu Wamabandla, uthi: “Ngiyakwenyanya ukuzigqaja kukaJakobe, ngiyazizonda izigodlo zakhe; ngiyakuwukhaphela umuzi nokukuwo.”
Kuyakuthi uma kusele amadoda alishumi endlini eyodwa, afe.
Lapho umalume wakhe emphakamisa nalowo omshisayo endlini, bese umuntu othile athi kophakathi endlini: “Ukhona yini osele nawe endlin na?” Yena uyakuphendula athi: “Akekho,” bese ethi: “Thula, ngokuba asinakuliphatha igama likaSimakade.”
Ngokuba bhekani, uSimakade ukhipha umyalo, uyakushaya indlu enkulu ibe yizimvithi, nendlu encane ibe yimfucumfucu.
Amahhashi angagijima yini emadwaleni na? Kungalinywa yini lapho ngezinkabi na? Ngokuba nihlanekezele ubulungiswa baba ngubuthi, nesithelo sokulunga saba ngumhlonyane,
Nina enithokoza ngeLo Debhari, nithi: “Asizithathelanga yini iKharnayimi ngezikhwepha zethu na?”
“Niyabona-ke, ngiyakunivusela isizwe nina ndlu ka-Israyeli, esiyakunicindezela kusukela ekungeneni eHamathi kuze kube sesigodini i-Araba,” kusho uSimakade uNkulunkulu Wamabandla.
INkosi uSimakade yangibonisa kanje umbono: Bheka, yayenza isikhonyane ekuqaleni kokuhluma kotshani bakamuva. Uyabona-ke, kwakungutshani bakamuva osebusikiwe bungobenkosi.
Kwathi lapho isikhonyane sesibudle sabuqothula nya utshani ezweni, ngathi: “Nkosi Simakade, ake uthethelele; uyakuma kanjani uJakobe ngokuba mncane?”
USimakade waxola ngalokhu. “Ngeke kusenzeka,” kusho uSimakade.
INkosi uSimakade yangibonisa kanje: Bheka, iNkosi uSimakade yaphaka impi ngomlilo; wangqongqisa ekujuleni okukhulu, washisa nengxenye.
Ngase ngithi: “Nkosi Simakade, ake uyeke; uyakuma kanjani uJakobe ngokuba mncane?”
USimakade waxola ngalokhu. “Ngeke kusenzeka,” kusho uSimakade.
Yangibonisa kanje: Bheka, uSimakade wayemi ngasodongeni olwakhiwe lwalinganiswa ngentambo yomthofu, ephethe esandleni sakhe intambo yomthofu yokulinganisa.
USimakade wathi kimi: “Amose, ubonani na?” Ngathi: “Intambo yomthofu yokulinganisa.” INkosi yayisithi: “Uyabona-ke, sengizobeka intambo yomthofu yokulinganisa phakathi kwabantu bami u-Israyeli angisayukubaxolela.
“Izindawo eziphakemeyo zika-Isaka ziyakubhidlizwa, nezindlu zokukhonzela zakwa-Israyeli ziyakudilizwa, ngiyakubhuqabhuqa indlu kaJerobhowamu ngenkemba yami.”
U-Amaziya umphristi waseBhethele wathumela kuJerobhowamu inkosi yakwa-Israyeli, wathi: “U-Amose ukwakhele uzungu kubantu bakwa-Israyeli; izwe alinakumelana nawo wonke amazwi akhe.
Ngokuba u-Amose ukhulume kanje, wathi: “UJerobhowamu uyakufa ngenkemba, u-Israyeli athunjwe impela ezweni lakhe.”
U-Amaziya wayesethi ku-Amose: “Wena mboni, phuma uphele lapha uye ezweni lakwaJuda, udle khona isinkwa, futhi uphrofethe lapho;
ungaphindi uphrofethe futhi eBhethele, ngokuba liyindlu engcwele yenkosi, nendlu yombuso.”
U-Amose waphendula wathi ku-Amaziya: “Angiyena umphrofethi mina, futhi angiyona indodana yomphrofethi, kodwa ngangingumelusi nomlimi wemithombe.
Kepha uSimakade wangiyekisa ukwelusa umhlambi; wathi kimi: ‘Hamba uphrofethe kubantu bami u-Israyeli.’
Ngakho-ke lalela izwi likaSimakade. Wena uthi: “ ‘Ungaphrofethi ngokumelene no-Israyeli, ungalokothi uphrofethe okubi ngendlu ka-Isaka.’
“Ngakholo-ke usho kanje uSimakade, uthi: “ ‘Umkakho uyakufeba emzini, amadodana namadodakazi akho ayakufa ngenkemba, nezwe lakho liyakulinganiswa ngentambo labiwe, wena uyakufela ezweni elingcolileyo, u-Israyeli athunjwe impela ezweni lakhe.’ ”
INkosi uSimakade yangibonisa kanje: Bheka, ngabona iqoma linezithelo zasehlobo.
Yathi kimi: “Amose, ubonani na?” Ngathi: “Iqona elinezithelo zasehlobo.” USimakade wayesethi kimi: “Isikhathi sokuthalalisa kubantu bami u-Israyeli sesiphelile; angisayukubaxolela.
Ngalolo lusuku, amaculo asethempelini ayakuba ngawokukhihla isililo, ziyakuba ziningi izidumbu eziyakudindiliza, zilahlwe kuzo zonke izindawo. Thulani!” kusho iNkosi uSimakade.
Yizwani lokhu nina eninyathela abantulayo, niqede nya abasweleyo bezwe,
nithi: “Kuyakudlula nini ukwethwesa kwenyanga ukuze sithengise ngokusanhlamvu, kudlule nesabatha ukuze sithengise ngokolo na? Senze i-efa libe lincane, neshekeli libe likhulu, senze nezilinganiso zenkohliso,
ukuba kuthengwe abampofu ngesiliva nabantulayo ngezimbadada, sithengise nangomuhu wokusanhlamvu.”
USimakade uzifunge Yena ngenxa yokuziqhenya kukaJakobe, wathi: “Impela angiyukuzikhohlwa nanini izenzo zabo.
“Umhlaba awuyukuzamazama yini ngenxa yalokho, balile bonke abahlala kuwo na? Impela, uyakukhukhumala wonke njengomfula, uqonge, ubuye ubohle njengomfula eGibhithe.
“Ngalolo lusuku ngiyakwenza ukuba ilanga lishone emini, ngenze kube mnyama emhlabeni emini kwabha,” kusho iNkosi uSimakade.
“Ngiyakuguqula amadili enu abe ngukukhala, namaculo enu wonke abe yisililo, ngiyakubhincisa zonke izinkalo zenu ngendwangu eyisaka, ngenze amakhanda abe zimpandla, kube njengokulilela indodana eyodwa, ukuphela kwalokho kuyakufana nosuku olunomunyu.”
“Niyabona-ke, ziyeza izinsuku, lapho ngiyakuthumela indlala ezweni, hhayi indlala yesinkwa, hhayi eyokomela amanzi, kodwa indlala yokuzwa amazwi kaSimakade,” kusho uSimakade.
“Abantu bayodiyazela kusuka olwandle kuya olwandle, behla benyuka kusukela enyakatho kuya empumalanga, bazulazule befuna izwi likaSimakade, kodwa abayukulifumana.
“Ngalolo lusuku izintombi ezinhle nezinsizwa ziyakuquleka ngenxa yokoma.
Labo abafunga icala laseSamariya, bathi: ‘Ngokuphila konkulunkulu bakho, Dani,’ nokuthi: ‘Ngokuphila kwendlela eBheri Sheba,’ bayakuwa, bangaphinde bavuke.”
Ngabona iNkosi imi ngase-althare, yathi: “Shaya izihloko zezinsika, ukuze kuzamazame umnyango phansi, uziphihlize phezu kwamakhanda abo bonke. Abayakusala kubo ngiyakubabulala ngenkemba. Obalekayo kubo akayukuphunyuka nophunyukayo kubo akayukusinda.
Noma bangagubha endaweni yabafileyo, isandla sami siyakubakhipha khona lapho, noma bangakhuphukela ezulwini, ngiyakubehlisa khona lapho.
Noma bangacasha esiqongweni seKharmeli, ngiyakubathungatha, ngibabambe. Noma bangazifihla ekujuleni kolwandle ngingababoni ngawami amehlo, kodwa nakhona lapho ngiyakujuba inyoka ibalume.
Noma bangathunjwa yizitha zabo, nakhona lapho ngiyakujuba inkemba ukuba ibabhuqabhuqe, iso lami liyakuthi njo kubo, kube kubi, kungabi kuhle.”
INkosi uSimakade Wamabandla nguye othinta umhlaba, uncibilike, balile bonke abahlala kuyo; uyakukhukhumala wonke njengomfula, ubuye ubohle njengomfula eGibhithe;
owakhe isigodlo sakhe esinamakamelo aphezulu ezulwini, ukwendlaleka kwaso kusekelwe emhlabeni, obiza amanzi olwandle, awathululele phezu komhlaba, nguSimakade igama lakhe.
“Anifani yini kimi bantu bakaKhushe, nina bantu bakwa-Israyeli na?” kusho uSimakade. “Angimkhuphulanga yini u-Israyeli eGibhithe, namaFilisti eKhafithori, nama-Aramu eKhiri na?
Bhekani-ke, amehlo eNkosi uSimakade awubhekile umbuso owonayo; ngiyakuwuqenda nya ebusweni bomhlaba, nakuba ngingeke ngiyishabalalise ngokupheleleyo indlu kaJakobe,” kusho uSimakade.
“Ngokuba bheka, ngiyakukhipha umyalo, nginyakazise indlu yakwa-Israyeli phakwathi kwezizwe zonke, njengokunyakaziswa kwesihlungo kuhlungwa, kodwa kungabi bikho okusanhlamvu okuwela emhlabathini.
Zonke izoni eziphakathi kwabantu bami ziyakufa ngenkemba, ezithi: ‘Inhlekelele ayiyukusondela kithi, ayiyukusehlela thina, futhi ngeke isikhathaze.’ ”
“Ngalolo lusuku ngiyakuvusa idokodo eliwile likaDavide, ngivale imifantu yalo, ngivuselele kabusha okuwileyo, ngilakhe kabusha njengasezinsukwini zasemandulo,
ukuze badle ifa lensali yakwa-Edomi, nakho konke okwezizwe ezazibizwa ngeGama lami,” kusho uSimakade ozakukwenza lokhu.
“Bhekani-ke, ziyeza izinsuku, lapho olimayo eyakuficwa ovunayo, onyathela amagilebhisi aficwe ngohlwanyela imbewu; izintaba ziyakuconsa iwayini elimnandi, ligeleze emagqumeni wonke.
Ngiyakuguqula ukuthunjwa kwabantu bami u-Israyeli, bakhe kabusha imizi ebiyincithakalo, bahlale kuyo; bayakutshala izivini, baphuze iwayini lazo, balime izivande, badle izithelo zazo.
Ngiyakubatshala ezweni labo, bangabe besasishulwa futhi kwelabo izwe engibanike lona,” kusho uSimakade uNkulunkulu wakho.
Umbono ka-Obhadiya. Isho kanje iNkosi uSimakade ngo-Edomi, ithi: Sizwile umbiko ovela kuSimakade ngesithunywa esithunywe kwabezizwe ukuthi: “Vivani, masimhlasele.”
Uyabonake, ngiyakukwenza ube mncane kwabezizwe; ubukelwe phansi ngokwedlulele.
Ukuqhosha kwenhliziyo yakho kukukhohlisile wena ohlala emifantwini yamadwala, ondawo yakho iphezulu, othi enhliziyweni yakho: Ngubani nje ongangehlisela phansi emhlabeni na?
Noma ungaphakama njengokhozi, noma ngabe isidleke sakho singakhiwa phakathi kwezinkanyezi, ngiyakukwehlisa khona lapho, kusho uSimakade.
Uma uthelekelwa ngamasela, nabaphangi ebusuku, uyakuphundlwa kangakanani! Abayukweba yini bazanelise bona na? Uma abavuna izithelo zomvini begaleleka kuwe, abayukuwushiya yini umkhothozo na?
Maye, ngokuphundlwa kuka-Esawu, nokuvundululwa komcebo wakhe obufihliwe!
Bonke owenze isivumelwano nabo bayakukuxoshela emingceleni; abantu obuhleli nabo ngokuthula bayakukukhohlisa, bakunqobe; labo obudla isinkwa sakho nabo bayakubeka ugibe phansi kwakho; akekho oluqondayo.
Ngalolo lusuku, angiyubaqeda yini nya abahlakaniphileyo kwa-Edomi, nokuqonda entabeni yakwa-Esawu na? kusho uSimakade.
Amaqhawe akho, Themani, ayakuthuthumela, ukuze kube yilowo nalowo abulawe ngokunqunywa entabeni yakwa-Esawu.
Ngenxa yobudlova obenziwa kumfowenu uJakobe, uyakuthelwa ngehlazo, kuqedwe nya ngawe unomphelo.
Phela ngosuku owamela kude ngalo, mhla abafokazi bephanga umcebo wakhe, nabezizwe betheleka emasagweni akhe, benza unkatho ngeJerusalema, nawe wawufana nomunye wabo.
Kodwa kwakungafanele uthokoze ngosuku lomfowenu mhla evelelwa yishwa. Kwakungafanele ujabule mayelana nabantu bakwaJuda ngosuku lokubhujiswa kwabo. Kwakungafanele ubhuqe ngomlomo wakho ngosuku losizi.
Kwakungafanele ungene ngesango labantu bami mhla bevelelwa yinhlekelele. Kwakungafanele futhi ubuke nje usizi lwabo mhla bevelelwa yisigemegeme, Kwakungafanele welule isandla sakho uthathe umcebo wakhe mhla evelelwe yinhlekelele.
Kwakungafanele ume ezimpambanweni zemigwaqo ukuba unqume abakubo abaphunyukileyo. Kwakungafanele ukhaphele abasindileyo bakubo ngosuku losizi.
Ngokuba usuku lukaSimakade selusondele kuzo zonke izizwe; njengoba wena wenze kanjalo kuyakwenziwa kanjalo nakuwe. Izenzo zakho ziyakubuyela ekhanda lakho.
Impela njengoba niphuzile entabeni yami engcwele, zonke izizwe ziyakuphuza zingaphezi, ziphuze, zigwinye, kube sengathi azizange zibe khona.
Kepha entabeni iZiyoni kuyakuba ukuhlengwa, iyakuba yindawo engcwele, nabendlu yakwaJakobe bayakudla ifa lababaphangileyo.
Abendlu yakwaJakobe bayakuba ngumlilo, abendlu kaJosefa babe yilangabi, kuthi abendlu ka-Esawu babe ngamabibi, bayakuwashisa, aphele nya; akuyukusinda namunye kwabendlu ka-Esawu, ngokuba uSimakade usekhulumile.
Abantu baseNegevu bayakudla intaba ka-Esawu, kuthi abaseShephela badle elamaFilisti, elakwa-Efrayimi nelaseSamariya, abakwaBhenjamini badle iGileyadi.
Isigejana sabantu bakwa-Israyeli esisekudingisweni eKhanani kuze kube seZarefathi, nabathunjwa baseJerusalema abaseSefaradi bayakudla imizi eNegevu.
Abahlengi bayakukhuphukela entabeni iZiyoni, babuse elezintaba kwa-Esawu. Umbuso uyakuba ngokaSimakade.
Izwi likaSimakade lafika kuJona, indodana ka-Amithayi, lathi:
“Phuthuma uye emzini omkhulukazi, iNineve, umemezele kuwo ukuthi ububi bawo sebenyuke baze bafika phambi kwami.”
Kodwa uJona wasuka, wabaleka phambi kukaSimakade, walibhekisa eTharishishi. Wehlela eJopha, wathola umkhumbi owawuya eTharishishi. Eseyikhokhile imali, wagibela kuwo elibhekise eTharishishi, ukuba suke phambi kukaSimakade.
Kepha uSimakade wathumela isishingishane olwandle, kwaba nesiphepho esikhulu kwaze kwangathi umkhumbi uyahlephuka.
Amatilosi esaba, kwayilelo nalelo lakhala kunkulunkulu walo. Ayesephonsa olwandle impahla eyayisemkhunjini, ukuze umkhumbi ube lula. UJona wayesehlele egumbini lomkhumbi elingaphansi maphakathi nendawo, elele zwi.
Umkhuzi wamatilosi weza kuJona, wathi: “Ungalala kanjani uhuqe ubuthongo kunje? Vuka ubize owakho uNkulunkulu, mhlawumbe angasizwa, singashabalali.”
Amatilosi ahlanganisa amakhanda, athi: “Wozani senze unkatho, sibone ukuthi ngubani oyimbangela yalobu bubi obusehlelayo na? Alwenza-ke unkatho, lwadla uJona.”
Ayesethi kuye: “Sitshele ukuthi ngubani owenze sehlelwa yile nhlekelele? Wenza msebenzi muni wena? Uvela kuliphi izwe, futhi ungowasiphi isizwe na?”
Wathi kuwo: “NgingumHebheru, ngikhonza uSimakade, uNkulunkulu wamazulu, owenze ulwandle nomhlabathi owomileyo.”
Athi angezwa lokhu amatilosi esaba kakhulu, ayesethi kuye: “Wenzeni na?” (Ambuza kanjalo ngoba ayazi ukuthi ubalekela uSimakade ngoba wayeke wawaxoxela ngaphambilini.)
Ulwandle lwaya ngokuya ludlanga. Amatilosi ambuza athi: “Senzenjani ngawe ukuze ulwandle luthule na?”
Waphendula wathi: “Ngiqukuleni, ningiphonse olwandle, khona luzothula, ngokuba ngiyazi ukuthi yimi oyimbangela yalesi siphepho esinihlaseleyo.”
Amatilosi azama ukugwedlela ogwini lolwandle kepha awaphumelelanga; isiphepho samelana nawo, ulwandle lwadlanga kakhulu.
Amatilosi akhuleka kuSimakade, athi: “Ungasibhubhisi Simakade, ngenxa yale ndoda. Ungasisoli ngokuthi sibulele umuntu ongenacala; siyazi ukuthi Wena unguSimakade, wenza njengokuthanda kwakho.”
Ayesemqukula uJona, amphonsa olwandle; lwase luthula cwaka ulwandle.
Amatilosi amesaba kakhulu uSimakade, anikela kuye umhlatshelo, enza nezifungo.
USimakade wathumela inhlanzi enkulu ukuba igwinye uJona. UJona wayesesiswini senhlanzi izinsuku ezintathu, nobusuku obuthathu.
UJona esezibilini zenhlanzi, wakhuleka kuSimakade uNkulunkulu wakhe,
wathi: “Ngakhala kuSimakade ngisengozini, ngicindezelekile, Yena wangiphendula. Ngisezinzulwini kwelabafileyo, ngakhala ngicela usizo, Wena walizwa izwi lami.
Wena wangiphonsa ezinzulwini zolwandle, amagagasi angizungeza nxazonke, amadlambi akho namagagasi akho angisibekela.
Ngase ngithi: ‘Ngixoshiwe ebusweni bakho, nokho ngiyobuye ngilibone ithempeli lakho elingcwele.’
Amanzi angihaqa, ukujula kolwandle kwangizungeza nxazonke, izintandela zathandela ekhanda lami.
Ngazika ngafinyelela ezisekelweni zezintaba, endaweni yabafileyo. Izinsika zomhlaba zangivalela phakade; kepha Wena, Simakade Nkulunkulu wami, wayophula impilo yami emgodini.
“Lapho ngiphelelwa ngamandla ngamkhumbula uSimakade, umkhuleko wami wafinyelela kuwe, ethempelini lakho elingcwele.
Labo abakhonza izithombe eziyize, bamfulathele uNkulunkulu othembekileyo.
Kepha mina ngiyakuletha umhlatshelo, ngihuba amahubo okudumisa, ngiyakufeza izithembiso zami, ngokuba insindiso ivela kuSimakade.”
USimakade wayiyala inhlanzi ukuba imhlanze uJona, yase imkhafulela emhlabathini owomileyo.
Izwi likaSimakade labuye lafika kuJona okwesibili, lathi:
“Phuthuma uye eNineve, umuzi omkhulu, ufike umemezele kuwo umyalezo engikutshela wona.”
UJona wayesesuka waya eNineve, njengokusho kwezwi likaSimakade. INineve kwakungumuzi omkhulu; ukudabula kuwo kwakungathatha izinsuku ezintathu.
UJona waqala uhambo losuku lonke, enqamula emzini, eshumayela, ethi: “Sekusele izinsuku ezingama-40 nje ukuthi iNineve libhujiswe!”
Abantu baseNineve bakholwa kuNkulunkulu, base bememezela ukuzila ukudla, nokuba kugqokwe indwangu yesaka kusukela kwabakhulu babo kuya kwabancane.
Izwi lafinyelela ngisho nasenkosini yaseNineve, yase isuka esihlalweni sayo, yakhumula ingubo yayo yobukhosi, yembatha indwangu yesaka, yahlala emlotheni.
Yamemezela eNineve ngokwesimiso senkosi nezikhulu zayo, yathi: “Makungabi bikho muntu nemfuyo, mhlambi wankomo, namvu, nambuzi okuzodla noma namanzi,
kodwa abantu nemfuyo makwembathe amasaka, kukhulekwe kakhulu kuSimakade, kube yilowo nalowo aphenduke, ashiye ububi nobudlova bakhe.
Kwazi bani? Hleze uNkulunkulu angacabanga ngokunye, abe nobubele kithi, alubambe ulaka lwakhe oluvuthayo, angabe esasibhubhisa.”
UNkulunkulu wabona ukuthi sebephendukile ebubini babo, wase eyithambisa inhliziyo yakhe, wanquma ukungabe esababhubhisa njengoba ebeshilo.
UJona ekubona lokho okwenziwe, wathukuthela wagana unwabu.
Wase ekhuleka kuSimakade, wathi: “Simakade, angikushongo yini lokhu kwasekuqaleni ngesikhathi ngisesezweni lakithi na? Yingakho ngashesha ngabalekela eTharishishi, ngoba ngangazi kahle ukuthi Wena unguNkulunkulu onomusa, owephuza ukuthukuthela, unobubele obukhulu, uyayithambisa inhliziyo yakho ungabe usakwenza okubi obukuhlosile.
Manje Simakade, ngiyakucela ukuba ungibulale ngokuba kungcono kimi ukufa kunokuphila.”
USimakade wathi: “Unaso yini isizathu sokuba uthukuthele kangaka na?”
UJona wasuka waphuma emzini, wahlala ngasempumalanga yawo, wazakhela idlangala wahlala kulo elinde ukubona ukuthi yini ezokwenzeka emzini.
USimakade uNkulunkulu wahlumisa isihlahla somhlakuva esenzela uJona umthunzi. UJona wawujabulela kakhulu umthunzi womhlakuva.
Ngakusasa entathakusa uNkulunkulu wathumela impehla, yaphehla umhlakuva, wabuna.
Kuthe lapho selibalele likhipha umkhovu etsheni, uNkulunkulu wathumela umoya weshisandlu. Ilanga lahlaba ekhanda likaJona waze wacishe waquleka. Wazicelela kuNkulunkulu ukuba afe, ethi: “Kungcono ukufa kunophila.”
UNkulunkulu wathi kuJona: “Unaso yini isizathu sokuba uthukuthele kangaka ngenxa yomhlakuva na?” Wathi: “Ngithukuthele kakhulu ngangokuba ngingafa nokufa.”
USimakade wathi: “Wena ukhathazekele umhlakuva ongawukhandlekelanga, nongawukhulisanga, ovumbuke nje ngobusuku obubodwa, wabuye washabalala ngobusuku obulandelayo.
Akufanele yini mina ngikhathazeke ngeNineve, umuzi omkhulukazi, onabantu abangaphezu kwezi-120 000, abangakwazi ukwehlukanisa isandla sokunene nesokhohlo, futhi onemfuyo eningi kangaka na?”
Izwi likaSimakade lafika kuMikha waseMoreshethi ezinsukwini zokubusa kukaJothamu, u-Ahazi, noHezekiya, amakhosi akwaJuda liqondene neSamariya neJerusalema.
Yizwani nonke bantu, ulalele mhlaba nakho konke okukuwe, iNkosi uSimakade izofakaza imelene nani, iNkosi ivela ethempelini layo elingcwele.
Ngokuba uSimakade usezakuphuma endaweni yakhe, ehlele phansi, anyathele ezindaweni eziphakemeyo zomhlaba.
Izintaba ziyakuncibilika phansi kwakhe, izigodi ziqhekezeke njengengcina phambi komlilo, nanjengamanzi ethelwa emehlelweni.
Konke lokhu kungenxa yesiphambeko sikaJakobe, nangenxa yezono zendlu ka-Israyeli. Ngubani owaphambukisa uJakobe? Akusilo yini iSamariya na? Ngubani izindawo eziphakemeyo zakwaJuda? Akusilo yini iJerusalema na?
Ngiyakwenza iSamariya libe yindunduma yemvithi yasendle, libe yindawo yokutshala imivini. Ngithululele amatshe alo esigodini, ngivumbulule izisekelo zalo.
Zonke izithombe zalo ziyakuphihlizwa, konke elikukhokhelweyo kushiswe ngomlilo. Izithombe zalo ezibaziweyo ngiyakuzenza zonke zibe yincithakalo, ngokuba likuthole ngenkokhelo yobufebe, futhi kuyakubuye kube yinkokhelo yobufebe.
Ngenxa yalokhu ngiyakukhala, ngikhihle isililo, ngihambe ngingafake zimbadada, ngihamba ze, ngiklewule njengempungushe, ngilile kube sengathi ngamazinyane entshe.
Ngokuba izilonda zalo azelapheki, lokhu sekuze kwafika nakwaJuda, kwafinyelela nasesangweni labantu bami, eJerusalema.
Ningasho lutho eGathi, ningalokothi nilile. Zinginqeni othulini eBhethi Leyofra.
Dlulani nqunu ninehlazo nina enihlala eShafiri. Nina enakhe eZanani ngeke niphume, isililo eBhethi Ezeli siyakunithathela lokho enithembele kukho.
Ngokuba abakhe eMarothi basezinhlungwini ezinzima, balindele okuhle, phela inhlekelele yehlile ivela kuSimakade, ifike esangweni eJerusalema.
Nina enihlala eLakhishi, bophelani ihhashi enqoleni, kube kunguqala kwesono sendodakazi yaseZiyoni, ngokuba iziphambeko zika-Israyeli zitholakale kuwe.
Ngakho-ke iMoreshethi Gathi uyakulipha izipho zokuvalelisa. Izindlu e-Akhizibi ziyakuba yinkohliso emakhosini akwa-Israyeli.
Nina zakhamuzi zaseMaresha, ngizakunithumelela futhi umthumbi, udumo luka-Israyeli luyakufika e-Adulami.
Gunda ube yiphandla, ngenxa yabantwana obathandayo, uyandise impandla yakho njengenqe, ngokuba baya ekuthunjweni.
Maye, kulabo abaceba okubi, labo abahlela ukwenza ububi besemibhedeni yabo, kuthi ekuthatheni kokusa bakwenze! Ngokuba kusemandleni ezandla zabo ukwenza lokho.
Bafisa amasimu, bawaqhwage, nezindlu bazithathe, bacindezele indoda nabendlu yayo, umuntu nefa lakhe.
Ngakho-ke usho kanje uSimakade, uthi: “Niyabona-ke, lo mndeni ngiwuhlelela inhlekelele, eningayukukhipha izintamo zenu kuyo, futhi aniyukuhamba ngokuziqhayisa, ngokuba kuyakuba yisikhathi esibi.
Ngalolo lusuku bayakusho isaga ngani, bakhihle isililo, bethi: ‘Kuphelile, kuphele nya ngathi; isabelo sabantu bami sinikwe abanye abantu! Maye, usithathile kimi, amasimu ethu wawabela amahlubuka!’ ”
Ngakho-ke akuyukubabikho kini ophonsa intambo yokulinganisa ngonkatho ebandleni likaSimakade.
“Ningaphrofethi,” baphrofetha, bathi: “Akufanele niphrofethe ngalokho; asiyukuthelwa ngehlazo.
Kungashiwo yini nina ndlu kaJakobe ukuthi uMoya kaSimakade uphelelwa yinisineke noma lezi yizenzo zakhe na? Awamahle yini amazwi ami kohamba ngobuqotho na?
Akukapholi maseko abantu bami sebephenduke isitha; bahlubula ingubo esembathweni salabo abadlula bethi baphephile, bebuya empini.
Nixosha abesifazane babantu bami ezindlini abazithandayo; nithathe ezinganeni zabo inkazimulo yami yaphakade.
Sukumani nihambe, ngokuba lena akusiyona indawo yokuphumula, ngoba ingcolile, iyakuqotha imbokodo nesisekelo kabi.
Ukuba bekukhona ohamba ekhuluma udwadwa namanga, aqambe amanga athi: ‘Ngiyakuniphrofethela ngewayini nangophuzo olunamandla, ubeyakuba ngumphrofethi walaba bantu.’ ”
“Impela ngiyakumqoqa wonkana uJakobe; ngiyihlanganise ndawonye ngempela insali yakwa-Israyeli, ngiyiqoqele ndawonye njengezimvu esibayeni, nanjengomhlambi phakathi edlelweni lawo, kube nokuxokozela kwabantu.
Obavulela indlela uyakuhamba phambi kwabo. Bayakufohla, badlulele esangweni, baphume ngalo. Inkosi yabo isidlulile phambi kwabo, uSimakade useyinhloko yabo.”
Ngathi: “Ake nizwe nina zinhloko zakwaJakobe, nani baholi bendlu ka-Israyeli. Akunina yini okufanele nazi ubulungiswa na?
Kodwa nina nizonda okuhle, nithande okubi, nebula isikhumba sabo nibasuse inyama emathanjeni abo.
Nidle inyama yabantu bami, nabaxebula isikhumba sabo, amathambo abo nawaphoqophoqoza, nabaqobaqobela ebhodweni nakugalaza njengenyama.”
Ngakho-ke bayakukhala kuSimakade, kodwa akayukubaphendula. Uyakubafihlela ubuso bakhe ngaleso sikhathi, ngenxa yokwenza kwabo izenzo ezimbi.
Usho kanje uSimakade: “Ngabaphrofethi abadukisa abantu bami, abaluma ngamazinyo abo, bamemeze bathi: ‘Ukuthula,’ kuthi lowo ongabeki lutho emlonyeni wabo bavivele ukumthelekela ngempi.
Ngalokho ubusuku buyakunifikela, ningaboni mbono, ningabe nisabhula. Liyakubashonela ilanga abaphrofethi, usuku lube mnyama bhuqe kubo.
Ababonayo bayakuba namahloni, ababhuli bahlazeke; bonke bayakubamba amadevu abo, ngokuba kungekho mpendulo evela kuNkulunkulu.”
Kodwa mina ngigcwele amandla ngoMoya kaSimakade, ubulungiswa nesibindi, ukuba ngitshele uJakobe ngesiphambeko sakhe no-Israyeli ngesono sakhe.
Ake nizwe nina zinhloko zendlu kaJakobe, nani babusi bendlu ka-Israyeli, enenyanya ubulungiswa niphambanise konke okulungileyo;
nina enakha iZiyoni ngokuchitha igazi, neJerusalema ngokuhlanekezela ubulungiswa.
Izinhloko zalo zehlulela ngokugwazelwa, abaphristi balo bafundisa ngenxa yokukhokhelwa, nabaphrofethi babhula ngenxa yesiliva, bethembele kuSimakade, bethi: “Akekho yini phakathi kwethu uSimakade na?” Asiyukwehlelwa yinhlekele.
Ngakho-ke ngenxa yenu iZiyoni liyakulinywa libe yinsimu, neJerusalema libe yindunduma yencithakalo, intaba yendlu ibe yizindawo eziphakemeyo zamahlathi.
Kuyakuthi ngezinsuku zokugcina intaba yendlu kaSimakade iqiniswe esiqongweni sezintaba, ibe yinde kunamagquma, abantu abaningi bayakugelezela kuyo.
Izizwe eziningi ziyakufika zithi: “Wozani, masikhuphukele entabeni kaSimakade, nasendlini kaNkulunkulu kaJakobe, ukuze asifundise ezindleleni zakhe, size sikwazi ukuhamba emikhondweni yakhe, ngokuba eZiyoni kuyakuvela umthetho, nezwi likaSimakade eJerusalema.
Uyakwehlulela izizwe eziningi, akhiphe isinqumo ezizweni ezinamandla ezikude. Ziyakucangcatha izinkemba zazo zibe ngamageja, imikhonto yazo ibe yiziphundli. Isizwe asisayukuhlasela esinye isizwe ngenkemba, futhi azisayukuqeqeshelwa ukulwa.
Bayakuhlala, kube yilowo nalowo phansi komvini wakhe naphansi komkhiwane wakhe; akekho oyakubesabisa, ngokuba umlomo kaSimakade Wamabandla ukhulumile.
Nakuba bonke abantu behamba kube yilowo nalowo egameni likankulunkulu wakhe, kodwa thina siyakuhamba egameni likaSimakade uNkulunkulu wethu, kuze kube phakade.”
USimakade uthi: “Ngalolo lusuku ngiyakuqoqa abaqhugayo, ngibahlanganise ndawonye abadingisiwe nengibajezisile.
Ngiyakwenza abaqhugayo babe yinsali, nabayiswe emajukujukwini babe yisizwe esinamandla. USimakade uyakubabusa entabeni iZiyoni, kusukela manje kuze kube phakade.
Wena mbhoshongo womhlambi, nqaba yendodakazi yaseZiyoni kuyakufika kuwe, impela kuyakufika ukubusa kwakuqala, umbuso kuwe ndodakazi yaseJerusalema.
“Kungani manje usukhala ubuqanduqandu na? Awunayo yini inkosi, noma useshabalele yini umeluleki wakho, ngoba usubanjwe yimihelo njengobelethayo na?
Yobayoba ezinhlungwini, uzale, ndodakazi yaseZiyoni, njengowesifazane obelethayo, ngokuba manje uyakuphuma uphele kulo muzi, uyakuhlala endle, uye naseBhabhele, kulapho uyakukhululwa khona; uSimakade uyakukuhlenga esandleni sezitha zakho.”
Manje izizwe eziningi zihlangene ngawe, zithi: “Malingcoliswe, amehlo ethu mawaligqolozele iZiyoni.”
“Kodwa aziyazi imicabango kaSimakade, aziwaqondi amasu akhe, ngokuba uziqoqele ndawonye esibuyeni njengezithungu zokusanhlamvu ezisikiwe.
Sukuma ubhule, ndodakazi yaseZiyoni, ngokuba ngiyakwenza uphondo lwakho lube yinsimbi, nezinselo zakho ngizenze zibe yithusi; uyakuqothisisa izizwe eziningi.” Uyakwethula inzuzo yazo nomcebo wazo kuSimakade, iNkosi yomhlaba wonke.
Viva ngamabutho ndodakazi, kukhona osivimbezelayo; umehluleli ka-Israyeli bayakumshaya esihlathini.
“Kepha wena Bhethlehema Efratha, nakuba ungomncinyane emindenini yakwaJuda, ngiyakuvusa oyakuvela kuwe, uyakuba ngumbusi kwa-Israyeli, ondabuko yakhe ngeyasemandulo, ezinsukwini zaphakade.”
Ngakho-ke uyakubakhaphela kuze kube yisikhathi sokuba okhulelweyo abelethe. Kuyakuthi lapho esebelethile, abafowabo abaseleyo babuyele kubantu bakwa-Israyeli.
Uyakuma, eluse ngamandla kaSimakade nangobukhulu begama likaSimakade uNkulunkulu wakhe. Bayakuhlala bevikelekile, ngokuba uyakuba mkhulu kuze kube semaphethelweni omhlaba.
Lokhu kuyakuba ngukuthula: kuyakuthi lapho i-Asiriya litheleka ezweni lethu, linyathela ezinqabeni zethu, simelane nalo ngabelusi abayisikhombisa nangezikhulu zabantu eziyisishiyagalombili.
Bayakubusa i-Asiriya ngenkemba, nezwe lakwaNimrode ngezintuba zalo, Uyakusihlenga e-Asiriya, lapho litheleka ezweni lethu, nalapho linyathela emingceleni yethu.
Insali kaJakobe iyakuba phakathi kwezizwe eziningi njengamazolo avela kuSimakade, nanjengezihlambi otshanini ezingalindeli muntu, nezingahlaleli bantwana babantu.
Insali kaJakobe iyakuba sezizweni, kubantu abaningi, njengengonyama iphakathi kwezilwane zehlathi, nanjengewundlu lengonyama liphakathi komhlambi wezimvu, elithi uma lidabula phakathi kwawo, linyathele, linephunephuze, kungabi bikho ohlengayo.
Masiphakanyiswe isandla sakho phezu kwezitha zakho, ziqedwe nya zonke izitha zakho.
USimakade uthi: “Kuyakuthi ngalolo lusuku, nginqume amahhashi akho onawo, ngiqede nya ngezinqola zakho.
Ngiyakubhidliza imizi ezweni lakho, ngizicekele phansi zonke izinqaba zakho.
Ngiyakushabalalisa ukulumba okwenza ngezandla zakho, kungabe kusababikho ababhula kuwe.
Ngiyakunquma izithombe zakho ezibaziweyo nezinsika zakho onazo, ungaphindi futhi ukhothamele imisebenzi yezandla zakho.
Ngiyakusiphula izinsika zo-Ashera bakho onabo, ngishabalalise imizi yakho.
Ngiyakuphindisela ngentukuthelo nangolaka ezizweni ezingalalelanga.”
Ake nizwe okushiwo nguSimakade, ethi: “Sukuma umangalele izintaba, amagquma mawalizwe iphimbo lakho.
Zwanini zintaba udaba lukaSimakade, nazi zisekelo zomhlaba eziqinileyo, ngokuba uSimakade unodaba ngabantu bakhe, uzakuqagulisana no-Israyeli.
“Bantu bami, ngenzeni kinina na? Nginikhathaze ngani na? Ngiphenduleni.
Nganikhuphula eGibhithe, nganihlenga endlini yezigqila, ngathumela uMose, u-Aroni noMiriyamu ukuba banihole.
Bantu bami, ake nikhumbule okwahlelwa nguBhalaki inkosi yakwaMowabi, nokuthi wamphendula wathini uBhalamu indodana kaBheyori, nokusuka eShithimi kuya eGiligali ukuba nazi ngokulunga kukaSimakade.”
Ngiyakufika ngiphetheni nje kuSimakade, engiyakukhothama nakho kuNkulunkulu ophezulu na? Ngabe ngiyakufika kuye neminikelo yokushiswa namathole anonyaka na?
Ngabe uyakuthokoza yini uSimakade ngezinqama eziyinkulungwane, nangezinkulungwane ezilishumi zemifula yamafutha na? Ngiyakunikela ngezibulo lami yini ngenxa yesiphambeko sami, isithelo sesisu sami ngenxa yesono senhliziyo yami na?
Wena muntu, uSimakade ukutshelile ukuthi kuyini okuhle, nokuthi uSimakade ufunani kuwe, ukuthi wenze ubulungiswa, uthande ukwethembeka, uhambe ngokuthobeka kanye noNkulunkulu wakho.
Iphimbo likaSimakade limemeza umuzi. Igama lakho liyakubona impumelelo. Lalela sizwe kanye nalowo osiqokileyo.
Ngabe kusekhona ingcebo embi endlini yezikhohlakali, ne-efa elincane eliqalekisiweyo na?
Ngingathalalisa yini ngezikali zokuqola nesaka lesisindo sobuqili na?
Labo abacebileyo bakhona banobudlova obedlulele, nezakhamuzi zakhona zihubhuza amanga, nolimi lwenkohliso lusemlonyeni wazo.
Ngakho-ke Mina ngiyakukugulisa ngokukushaya, ngikwenze incithakalo ngenxa yezono zakho.
Uyakudla, kodwa ungasuthi, uyakubhekana nendlala, uthathe kodwa ungakulethi endaweni ephephileyo, noma yini oyiletha endaweni evikelekile, ngiyakuyinikela enkembeni.
“Uyakutshala, kodwa ungavuni; uyakugxoba iminqumo, kepha ungazigcobi wena ngamafutha, ukhame izithelo zomvini, kodwa wena ungaliphuzi iwayini.
Izimiso zika-Omri ziyalandelwa, nayo yonke imisebenzi yendlu ka-Ahabi nihambe ngayo, ngokwamacebo abo, ngalokho-ke ngiyakunenza incithakalo, nezakhamuzi into enximfelwayo, niyakuthwala ihlazo labantu bami.”
Maye kimi! Ngokuba sengifana nokuvunwa kwezithelo zasehlobo, nanjengokukhothozwa komvini, akukho hlukuzo lamagilebhisi elingadliwa, iphango lami linxanela amakhiwane okuqala.
Abathembekileyo bashabalele ezweni, akekho oqotho kubantu; bonke balala unyendle, bachithe igazi; yilowo nalowo uzingela umfowabo ngogibe.
Izandla zabo zenza kahle okubi. Isikhulu sinesicelo, umehluleli ubheka umfumbathiso; omkhulu ukhuluma ngesifiso somphefumulo wakhe; benze itulo ngalokho.
Omuhle kubo unjengehlokozi elinameva; oqotho kubo mubi kunothango lwameva. Usuku lwabalindi bakho nolokujeziswa kwakho sekufikile; sekuyakuba ngukudideka kwabo.
Ningathembeli kumakhelwane, ningakholwa ngumngani. Qaphela okukhuluma ngomlomo wakho kulowo olala esifubeni sakho.
Ngokuba indodana iphatha kabi uyise; indodakazi ivukela unina; umakoti umelana noninazala, nezitha zomuntu ngabantu bendlu yakhe.
Mina ngiyakubheka uSimakade, ngilindele uNkulunkulu oyakungisindisa; uNkulunkulu wami uyakungizwa.
Sitha sami, ungasini ngethambo lami; ngokuba uma ngiwile, ngiyakuvuka; lapho ngihlezi ebumnyameni, uSimakade uyakuba ngukukhanya kwami.
Ngiyakubhekana nolaka lukaSimakade, ngokuba ngonile kuye, aze alumele udaba lwami, angenzele ubulungiswa, angikhiphele ekukhanyeni, ngibone ukulunga kwakhe.
Isitha sami siyakukubona, sikhungathwe ngamahloni, leso ebesithi kimi: “Uphi uSimakade uNkulunkulu wakho na? Amehlo ami ayakusibona, manje siyakunyathelwa njengodaka emigwaqweni.
“Kuyakufika usuku lokwakha ugange lwakho, ngalolo lusuku umngcele wakho uyakunwetshwa ube kude.
Ngalolo lusuku abantu bayakufika kuwe bevela e-Asiriya nasemizini eGibhithe, kusukela eGibhithe kuze kube semfuleni, kusukela olwandle kuze kube solwandle, kusukela entabeni kuze kube sentabeni.
Umhlaba uyakuba yincithakalo ngenxa yezakhamuzi zalo nangenxa yezenzo zabo.
Yelusa abantu bakho ngentonga yakho; umhlambi oyifa lakho, ohlala wodwa ehlathini phakathi eKharimeli; mawuklabe eBhashani nakwaGileyadi njengasezinsukwini zasemandulo.
“Njengasemihleni yokuphuma kwakho eGibhithe ngiyakubabonisa izimangaliso.”
Izizwe ziyakubona zibe namahloni, ngawo wonke amandla azo, ziyakubeka isandla emlonyeni, izindlebe zazo zingezwa lutho.
Ziyokhotha uthuli njengenyoka, zihuquzele njengezinto ezihuquzela emhlabathini. Ziyakuphuma ezinqabeni zazo zithuthumela, zize kuSimakade uNkulunkulu wethu, ziyakushaywa wuvalo, zikwesabe wena.
Ngubani onguNkulunkulu njengawe othethelela ukona, ayekelele isiphambeko sensali eyifa lakhe; akahlali ethukuthele ingunaphakade ngokuba uthokozela umusa.
Uyakubuye asihawukele, anyathele iziphambeko zethu, aphonse zonke izono zethu ekujuleni kolwandle.
Uyakwethembeka kuJakobe ube nomusa ku-Abhrahama owafunga ngawo kobaba ezinsukwini zasemandulo.
Isiphrofetho ngeNineve. Incwadi yombono kaNahumi wase-Elikoshi.
USimakade unguNkulunkulu onomhawu, nophindiselayo; uSimakade uyaphindisela, uthukuthele uyabila, ngolaka lwakhe uyaphindisela kwabamelene naye, Uzithukuthelela njalo izitha zakhe.
USimakade uyaphuza ukuthukuthela, mkhulu ngamandla, impela onecala akayukumyeka angamjezisi, indlela kaSimakade isesivunguvungwini nasesiphephweni, amafu awuthuli lwezinyawo zakhe.
Ukhuza ulwandle, alomise, nemifula yonke ayishise, iBhashani neKharimeli kuyabuna, kuntshwame nezimbali eLebhanoni.
Izintaba ziyazamazama phambi kwakhe, amagquma ancibilike, umhlaba uyavokomala, nezwe nabo bonke abahlala kulo.
Ngubani ongamelana nentukuthelo yakhe na? Ngubani ongabekezelela ulaka lwakhe oluvuthayo na? Ulaka lwakhe luthululwe njengomlilo, namadwala ayaqhekezeka phambi kwakhe.
USimakade muhle, uyinqaba ngosuku lwenhlupheko, uyabazi labo abaphephela kuye.
Kepha ngesikhukhula esiqongile uyakushabalalisa indawo yakhona, izitha zakhe azixoshele ebumnyameni.
Noma ngabe yiluphi uzungu enilwakhela uSimakade uyakuluqeda nya. Ukuhlupheka akuyuphinda kabili.
Lapho bethandela njengameva, isiphuzo sabo sifana nesezidakwa, bayakuqothulwa njengenswani eyomileyo.
Kukhona ovela kuwe oceba okubi ngoSimakade, umluleki owonakele.
Usho kanje uSimakade: “Noma benamandla, futhi bebaningi, kodwa bayakuqothulwa bashabalale, nakuba ngikuhluphile, kepha ngeke futhi ngisakuhlupha.
Manje-ke sengizoliphula ijoka elikuwe, ngigqashule izibopho zakho.”
Kepha uSimakade uyalezile ngawe ukuthi akusayukuphinde kutshalwe egameni lakho, endlini yonkulunkulu bakho ngiyakunquma isithombe esibaziweyo nesithombe esibunjiweyo, ngiyakwenza ithuna lakho, ngokuba awuyinto yalutho.
Bheka ezintabeni izinyawo zoletha izindaba ezinhle, omemezela ukuthula. Gubha imikhosi yakho Juda, feza izifungo zakho, ngokuba omubi akasayukudabula futhi kuwe. unqunywe ngokupheleleyo.
Lowo ocekela phansi uzokuhlasela, qapha inqaba, ubheke emgwaqweni, uqinise ukhalo, uqinise izikhwepha ngokwedlulele.
Ngokuba uSimakade uyakubuyisa udumo lukaJakobe njengodumo luka-Israyeli, abacekela phansi babaqothulile, bashabalalisa namagatsha abo.
Izihlangu zamabutho akhe zibomvu, amadoda anamandla agqoke okubukhwebezane, izinqola zensimbi zibengezela umlilo ngosuku azilungiselela ngalo, imikhonto iyaveva.
Izinqola zenza njengezinhlanya emigwaqweni, zigijima ziya le nale; ukubonakala kwazo kunjengezibani, zigijima ziphambana njengemibani.
Usekhumbula izikhulu zakhe, ziyakhubeka ohambeni lwazo, ziphuthuma ongangeni lwakhona, izivikelo ziyalungiswa.
Amasango emifula asevuliwe, isigodlo siyabhidlika.
Kunqunyiwe ngalo, liyambulwa, liyathunjwa, nezincekukazi zalo ziyalila njengokukhala kwamajuba, azishaya phezu kwezinhliziyo.
Kepha iNineve lifana nechibi lamanzi kusukela ezinsukwini zalo, nokho bayabaleka. Yimani, yimani! Kodwa akukho namunye ophendukayo.
Phangani isiliva! Phangani igolide! Ngokuba akupheli okubekiweyo ngobuningi, nakho konke okuyigugu.
Alisenalutho, kukhala ibhungane, futhi liyincithakalo, inhliziyo iyancibilika, kushayana amadolo, izinhlungu zikhungethe lonke ukhalo, nobuso babo bonke buphaphathekile.
Uphi umphandu wezingonyama, nedlelo lamawundlu ezingonyama, lapho kwahamba khona ingonyama nengonyakazi newundlu lengonyama, lapho kungekho khona okwesabisayo na?
Ingonyama yadwengula okwanele amawundlu ayo, yakubamba entanyeni okwengonyamakazi yayo, yagcwalisa umgodi wayo ngenyamazana, umphandu wayo ngenyama edwenguliwe.
“Uyabona-ke, ngimelene nawe, ngiyakushisa izinqola zakho entuthwini, inkemba ibhuqabhuqe amawundlu akho, ngiyakuyiqeda nya inyamazane yakho ezweni, nephimbo lezithunywa zakho aliyukuphinde lizwakale,” kusho uSimakade.
Maye kuwe muzi ochitha igazi! Wonke ugcwele inkohliso nempango, ukuphanga akupheli.
Kuqhuma isiswebhu, nomsindo wokugodlozela kwamasondo, nogabadula kwamahhashi, nokugxuma kwezinqola.
Abagibeli bamahhashi bayawagadulisa, kumenyezela inkemba, kunyazime ukhonto, baningi ababuleweyo nezindumbu ezidindilizile, akukho ukuphela kwezidumbu; abantu bayakhubeka ngezidumbu zabo,
ngokuba budlangile ubufebe besifebe esibukekayo, umpetha wokuyenga, umkhunkuli othengisa izizwe ngobufebe bakhe, nemindeni ngokukhunkula kwakhe.
Uyabona-ke, ngimelene nawe; ngiyakuphakamisa isidwaba sakho sikwemboze ubuso, ngikhombise izizwe ubunqunu bakho, nemibuso ihlazo lakho.
Ngiyakuphosa phezu kwakho okunengekayo, ngikubukele phansi, ngikwenze ube yinhlekisa.
Kuyakuthi bonke abakubonayo bakubalekele, bathi: “INineve isiyincithakalo, ngubani oyakulizwela na? Ngiyakubafunaphi abaduduzi bakho na?”
Umuhle yini wena kuneNo Amoni elaliphakathi kwemifula, lizungezwe ngamanzi, ugange lwalo kuwulwandle, nodonga lwalo kungamanzi na?
IKhushe neGibhithe kwakungamandla alo angenakuphela; uPhuthi namaLibhiya kungabasizi bakho.
Nalo laya ekuthunjweni. Ekuthunjweni izingane zalo zaphahlazwa ezinhlanganweni zemigwaqo; benza unkatho ngezikhulu zalo, bonke abaholi balo baboshwa ngamaketango.
Nawe uyakudakwa, ufihlwe; uyakufuna inqaba yokucashela izitha.
Zonke izinqaba zakho ziyimikhiwane enamakhiwane okuqala asevuthiwe; uma inyakaziswa awela emlonyeni wodlayo.
Bheka nje, abantu bakho onabo bangamanina. Amasango ezwe lakho avulekele izitha zakho, umlilo uyakungqongqisa imigoqo yakho.
Zikhelele amanzi ngoba uzovinjezelwa, uqinise izinqaba zakho; uxove udaka, ubumbe izitini.
Lapho uyakukungqongqiswa ngumlilo, udliwe yinkemba, ikudle njengesikhonyane, zandise njengokhumbintethe, uzandise njengesikhonyane!
Wandisile abahwebi bakho ukwedlula izinkanyezi zezulu; isikhonyane sahluba, qede sandizela kude.
Abalindi bakho banjengokhumbintethe, nezikhulu zakho zifana nequlu lesikhonyane sihlezi odongeni ngosuku lwamakhaza, kuthi lapho kuphuma ilanga sindize, singabe sisaziwa ukuthi sikuyiphi indawo.
Abelusi bakho balele, nkosi yase-Asiriya; abahloniphekileyo bakho bayaphumula; abantu bakho bahlakazekele ezintabeni, akekho obaqoqayo.
Akukho ukwelashwa kokuphuka kwakho; isilonda sakho sinzima; bonke abezwa umbiko ngawe bashaya ihlombe, ngokuba ngubani obungadlulelanga njalo phezu kwakhe ububi bakho na?
Isiphrofetho esabonwa nguHabhakuki umphrofethi.
Kuyoze kube nini Simakade ngikhalela usizo, ungezwa, ngikhala kuwe kalusizi, ungasindisi na?
Kungani ungibonisa ububi, uthalalise ngenkathazo na? Imbubhiso nobudlova kuphambi kwami; kukhona ukulwa nombango okudlangile.
Ngalokho-ke umthetho awusathi shu, nokwehlulela akusenziwa unomphelo, ngokuba omubi uhaqa olungileyo; ngenxa yalokho ubulungiswa buphuma buhlanekezelwe.
Bhekani phakathi kwezizwe, nibuke, nishaqeke ngokumangala, ngokuba ngizakwenza isimanga ezinsukwini zenu eningayukusikholwa, lapho kulandwa ngaso.
Ngokuba niyabona-ke, sengizakuvusa amaKhaledi, isizwe esinonya nesidlovayo, esidabula ebubanzini bomhlaba siyodla izindawo zokuhlala okungesizo ezaso.
Siyethusa, siyesabeka; kuphuma kuso ukwehlulela kwaso nesithunzi saso. ukuthi yini elungileyo.
Amahhashi aso agijima ukwedlula izingwe, eyesabeka kunamankentshane ebusuku; abagibeli bamahhashi aso bayagabadula, futhi bavela kude abagibeli bamahhashi aso, bandiza njengokhozi luphuthuma elizokudla.
Sonke ngothi lwaso sitheleka ngendluzula, ubuso baso buqonde ngqo phambili; sibutha abathunjwa njengesihlabathi.
Siklolodela amakhosi, ababusi bayinhlekisa kuso; sihleka zonke izinqaba, senze izindunduma ngomhlabathi, sidle izinqaba.
Sidlula njengesiphepho, sidlulele phambili, kodwa sona sinecala, amandla aso angunkulunkulu waso.
Wena Simakade Nkulunkulu wami, oNgcwele, awusiye yini owasemandulo na? Asiyukufa; usinqumele ukwehlulelwa; Wena Dwala, usibekele ukujeziswa.
Amehlo akho ahlanzekile ukuba ungabona ububi, nokuba ungayibheki inkathazo. Pho kungani ubukana nabakhohlisi, uthalalisa lapho omubi eshwabadela olungileyo kunaye na?
Wenze abantu banjengezinhlanzi zasolwandle, nanjengezilwane ezinwabuzelayo ezingenambusi.
Uyabakhipha bonke ngodobo, abahudule ngenetha lakhe, abaqoqele enetheni lakhe elihudulwayo, ngalokho-ke uyathokoza, ajabule.
Ngakho-ke uhlabela inetha lakhe, alishisele impepho inetha lakhe elihudulwayo, ngokuba isabelo sakhe sinokudla okuningi, unokwanele azokudla.
Ngalokho uyakuthulula inetha lakhe, aqhubeke nokubhubhisa izizwe, angashiyi namunye.
Ngiyakuma endaweni yami yokulinda, ngime embhoshongweni, ngibheke ukuba ngibone ukuthi uyakukhulumani ngami, nokuthi ngiyakuphendula ngithini ngokukhononda kwami.
USimakade wangiphendula wathi: “Bhala phansi umbono, uwenze ucace ezibhebheni ukuze owufundayo asheshe nawo.
Ngokuba umbono usalokhu ungowesikhathi esinqunyiweyo, uyakushesha ufike esiphethweni, awuyukukhohlisa; nakuba uyakubambezeleka, ulinde, ngokuba impela uyakufika, awuyukwephuza.
Bheka, uyazikhukhumeza, ingaphakathi lakhe aliqotho, kodwa olungileyo uzakuphila ngokukholwa kwakhe.
Impela, iwayini liyakhohlisa, umuntu ozigqajayo akahlali ekhaya, owandisa umphimbo wakhe ufana nendawo yabafileyo; akaneliswa njengokufa; uziwolela zonke izizwe, aziqoqele bonke abantu.
Abayukukhuza yini isaga ngaye bampongoloze iculo bebhinqa benze imfumbe ngaye, omunye wathi: “ ‘Maye, kulowo owandisa okungesikho okwakhe, kuyoze kube nini na? – lowo ozethwesa umthwalo onzima ngezibambiso!
Abayukuvuka yini ngokuzumayo labo abakukhokhela inzuzo, abayukuvuka bakuthuthumelise, ube yimpango yabo na?
Phela wena uziphangile izizwe eziningi, yonke insali yabantu iyakukuphanga nawe, ngenxa yokuchitha igazi labantu nobudlova obenziwe ezweni nasemzini, nakubo bonke abahleli kuwo.’
Maye, kulowo ozuzela indlu yakhe ngokungalungile inzuzo embi ukuba abeke isidleke sakhe phezulu ukuze azihlenge esandleni senhlekelele!
Amacebo owenzile athele indlu yakho ngehlazo ngokubulala abantu abaningi wenza isono kuwe uqobo.
Ngokuba amatshe ayakukhala esogangeni, nomshayo uyakuphendula usophahleni.
Maye, kowakha umuzi ngokuchitha igazi, asekele umzana ngobubi!
Uyabona-ke, akuveli yini kuSimakade Wamabadla, ukuthi abantu bakhandleke ukuze banelise umlilo, nezizwe zizikhathaze ngokuyize na?
Ngokuba umhlaba uyakugcwala ukwazi inkazimulo kaSimakade, njengamanzi esibekela ulwadle.
“Maye, kophuzisa umakhelwane wakhe, athulule ulaka lwakhe, amdakise, ukuze abuke ubunqunu bakhe!
Uyakwaneliswa yihlazo kunokuhlonipheka, uphuze nawe, ubalwe njengongasokile, indebe yesandla sokunene sikaSimakade iyakuza kuwe, ihlazo libe phezu kodumo lwakho.
Ngokuba ubudlova obenziwe eLebhanoni buyakukuhaqa, nokubhujiswa kwezilwane kukwesabise, ngenxa yokuchithwa kwegazi labantu nendluzula eyenziwe ezweni, nasemzini, nakubo bonke abahleli kuwo.
Sisiza ngani isithombe, ngokuba umbazi usibazile, nesithombe esibunjiweyo nomfundisi wamanga, ngokuba osibumbileyo wethembele kuwo ngokwenza izithombe eziyizimungulu na?
Maye kothi okhunini: ‘Vuka!’ athi kulo itshe elithule: ‘Sukuma!’ Kungafundisa yini lokhu na? Bheka, kunanyekwe ngegolide nangesiliva, akukho kuphefumula kukho.
Kodwa uSimakade esethempelini lakhe elingcwele; thula phambi kwakhe, mhlaba wonke.”
Umkhuleko kaHabakuki umphrofethi ngeshigiyonothi.
Simakade, ngizwile umbiko ngawe, ngiyawesaba Simakade umsebenzi wakho; uvuselele nakule minyaka, wenze ukuba waziwe kule minyaka, ukhumbule isihawu sakho nasolakeni.
UNkulunkulu uvela eThemani, oNgcwele uphuma entabeni iPharanu. Inkazimulo yakhe isibekela amazulu, udumo lwakhe lugcwele umhlaba.
Ukukhanya kwakhe kufana nelanga liphuma, imisebe ivela esandleni sakhe, kulapho amandla akhe efihlwe khona.
Phambi kwakhe kuhamba ubhubhane, kulandele isifo ezinyaweni zakhe.
Uyama, azamazamise umhlaba; uyabuka, athuthumelise izizwe; izintaba zakudala ziyabhidlizwa, namagquma asemandulo ayakhothama, yizindlela zakhe zaphakade.
Ngibona amathende aseKhushani ekhungethwe wusizi, amakhethini akwaMidiyani ayathuthumela.
Simakade, ngabe ubuyithukuthelele yini imifula na? Ngabe ulaka lwakho belumelene yini nemifula noma intukuthelo yakho nolwandle, ukuba ugibele amahhashi akho, nezinqola zakho zokunqoba, na?
Umnsalo wakho usulungile, uvele obala, ubize imicibisholo emgodleni, wadabula umhlaba ngemifula.
Izintaba zikubona qede ziyobayobe; isikhukhula siyadlula; izinzulu zizwakalise ukuhlokoma kwazo, ziphakamisele phezulu izandla zazo.
Ilanga nenyanga kwama nse endaweni yakho ngokubenyezela kwemicibisholo yakho eshwezayo nangokunyazima komkhonto wakho okhanyayo.
Udabula umhlaba ngentukuthelo, ugxobagxobe izizwe ngolaka.
Uphumele ukusindiswa kwabantu bakho, ukusindiswa kogcotshiweyo wakho; uphohloza umholi endlini yababi, umhlubule kusukela phansi kuze kube sentanyeni.
Ugwaza ikhanda lomholi wabo ngeyakhe imikhonto, lapho amabutho akhe engithelekela ukuba angihlakaze, ejabula njengazoshwabadela ompofu esithe.
Unyathela ulwandle ngamahhashi akho, amanzi amaningi agubhayo.
Ngezwa, qede kwathuthumela izibilini zami, izindebe zomlomo wami zaqhaqhazela ngomsindo; ukuvendlezela kwangena emathanjeni ami, ngathuthumela lapho ngimi khona, ngizothula ngilinde kuze kufike usuku lwenhlupheko kubantu abasihlaselayo.
Noma umkhiwane ungeqhakaze, nemivini ingabi nazithelo, nomsebenzi womnqumo ungaphumeleli, amasimi angabi nasivuno, kungabi bikho mhlambi wezimvu nezimbuzi esibayeni nazinkomo esibayeni,
nokho mina ngiyakujabula ngoSimakade, ngithokoze ngoNkulunkulu wensindiso yami.
USimakade iNkosi, ungamandla ami, wenza izinyawo zami zibe njengezendluzela, enze ngihambe ezindaweni zami eziphakemeyo. Kumholi wokuhlabelelisa ngohabhu lwami.
Izwi likaSimakade elafika kuZefaniya, indodana kaKushi kaGedaliya, ka-Amariya kaHezekiya, ezinsukwini zokubusa kukaJosiya indodana ka-Amoni, inkosi yakwaJuda, lathi:
“Ngiyakubhubhisa kuphele nya konke okusebusweni bomhlaba,” kusho uSimakade.
“Ngiyakuqeda nya abantu nezilwane, ngishabalalise izinyoni zezulu nezinhlanzi zasolwandle. Ngiyakuqeda ababi kanye nezikhubekiso ngibaqothule abantu ebusweni bomhlaba,” kusho uSimakade.
“Ngiyakwelula isandla sami ngishaye uJuda nabo bonke abakhileyo eJerusalema. Ngiyakuqeda nya insali kaBhali kule ndawo, negama labaphristi bonkulunkulu nabaphristi babo,
nabakhothama ophahleni bekhuleka kulo ibandla lasezulwini, nabakhothamela ukufunga kuSimakade bebe befunga nakuMalkhamu,
nabafulathelayo beyeka ukulandela uSimakade, nalabo abangamfunanga uSimakade, abangabuzanga kuye.
Thula phambi kweNkosi uSimakade, ngokuba usuku lukaSimakade selusondele. Phela uSimakade usewulungisile umhlatshelo, usebangcwelisile abamenyiweyo bakhe.
Kuyakuthi ngosuku lomhlatshelo kaSimakade, ngijezise izikhulu namadodana enkosi, nabo bonke abembethe izingubo zabezizwe.
Ngalolo lusuku ngiyakujezisa bonke abeqa umbundu, abagcwalisa izigodlo zamakhosi abo ngobudlova nangenkohliso.
“Kuyakuthi ngalolo lusuku kube khona ukukhala kalusizi, kuvela eSangweni Lezinhlanzi, nokulila, kuvela eNgxenyeni Yesibili, nokuphihlika okukhulu, kuvela emagqumeni.
Khihlani isililo nina enihlala eMothari, ngokuba bonke abantu abahwebayo bayakubhujiswa, bonke abahweba ngesiliva bayakuqothulwa.
Kuyakuthi ngaleso sikhathi ngicinge eJerusalema ngezibani, ngijezise abantu abanethezeke njengewayini liyekwe nenzika, abathi ezinhliziyweni zabo: “ ‘USimakade akakwenzi okuhle, ngeke akwenze nokubi.’
Ingcebo yabo iyakuba yimpango, nezindlu zabo zibe yincithakalo. Bayakukwakha izindlu, kodwa abayukuhlala kuzo, bayakutshala izivini, kepha abayukuliphuza iwayini lazo.
“Usuku olukhulu lukaSimakade seluseduze, lusondele futhi luyashesha kakhulu. Umsindo wosuku lukaSimakade uwusizi, neqhawe liyakuqanduqandula lapho.
Lolo lusuku, usuku lolaka, usuku lokuhlupheka nosizi, usuku lomonakalo nencithakalo, usuku lobumnyama nethunzi elibi, usuku lwamafu nesigayegaye,
usuku lokukhala kwecilongo nokukhuza iziqubulo zempi emizini ebiyelweyo nasemibhoshongweni esemakhoneni.
“Ngiyakwenza kube nengcindezi kubantu, bahambe njengezimpumputhe, ngokuba bonile kuSimakade. Igazi labo liyakuthululwa njengothuli, nezibilini zabo njengobulongwe.
Noma ngabe yisiliva labo noma yigolide labo akuyukuba namandla okubahlenga ngosuku lolaka lukaSimakade. Umhlaba wonke uyakungqongqiswa ngumlilo womhawu wakhe, ngokuba uyakuqeda nya, impela abaqothule ngokuphazima kweso bonke abakhileyo emhlabeni.”
Qoqanani, nihlangane ndawonye, sizwe esingenamahloni,
singakaphumi isinqumo, lungakadluli lolo lusuku njengamakhoba, lungakanehleli ulaka oluvuthayo lukaSimakade, lungakafiki phezu kwenu usuku lolaka lukaSimakade.
Funani uSimakade nina nonke enithobekileyo bomhlaba, nina enenze izehlulelo zakhe, funani ukulunga, nifune ukuthobeka, mhlawumbe niyakukhoseliswa ngosuku lolaka lukaSimakade.
Impela iGaza liyakusala dengwane, i-Ashikeloni libe ngamanxiwa, i-Ashidodi balixoshe emini kwabha, kuthi i-Ekhroni lisishulwe.
Maye, kwabakhileyo ngasogwini lolwandle, sizwe samaKherithe! Izwi likaSimakade limelene nawe, Khanani, lizwe lamaFilisti. “Ngiyakukubhubhisa kungahlali muntu.”
Ugu lolwandle luyakuba ngamadlelo, amadlangala abelusi, nezibaya zezimvu.
Ugu luyakuba ngolwensali yabendlu yakwaJuda, yeluse kulo. Iyakulala ezindlini e-Ashikeloni kusihlwa, ngokuba uSimakade uNkulunkulu wayo uyakuyihambela, aguqule ukuthunjwa kwayo.
“Ngiyizwile inhlamba yabakwaMowabi, namazwi ayiziswana abakwa-Amoni abathuke ngawo abantu bami, bazandisele imingcele ezweni labo.
Ngalokho-ke ngifunga ngiyagomela,” kusho uSimakade Wamabandla, uNkulunkulu ka-Israyeli, uthi: “Impela uMowabi uyakuba njengeSodoma, abantu bakwa-Amoni bafane neGomora, izwe lembabazane nemigodi kasawoti nencithakalo yaphakade. Insali yabantu bami iyakubaphanga, nabaseleyo besizwe sami bayakudla ifa labo.”
Yilokho okuyakuba ngokwabo esikhundleni seqholo labo, ngokuba bathuke inhlamba, basongela abantu bakaSimakade Wamabandla.
USimakade uyakwesabeka kubo, ngokuba uyakushabalalisa bonke onkulunkulu bomhlaba. Bayakukhuleka kuye, kube yilowo nalowo esendaweni yakhe, kuzo zonke iziqhingi zezizwe.
“Nani futhi maKhushe, niyakubulawa ngenkemba yami.”
Uyakwelulela isandla sakhe enyakatho, abhubhise i-Asiriya, iNineve alenze libe yincithakalo, lome njengehlane.
Imihlambi iyakubuthisa kulo, zonke izilwane zesizwe, isikhova nonoxhongo kuhlale ezihlokweni zezinsika zalo ebusuku. Umsindo wokukhala kwenyoni uyakuzwakala efasiteleni, imfucumfucu ibe sembundwini, ngokuba imishayo yomsederi uyakuyibeka obala.
Yiwo lo muzi owawujabulile, uhlala uvikelekile, uthi enhliziyweni yawo: “Yimina, mina ngedwa, akekho omunye!” Maye, ngokuphenduka kwawo ube yincithakalo nendawo yokubuthisa izilwane! Bonke abadlula ngakuwo bayanximfa, banikine amakhanda.
Maye, kohlubukileyo nongcolileyo, umuzi wencindezelo!
Awulilaleli izwi, awukwemukeli ukuyalwa, awethembeli kuSimakade, awusondeli kuNkulunkulu wawo.
Izikhulu zawo zingamabhubesi abhodlayo, abehluleli bakhona bangamankentshane asebusuku, abashiyi lutho okwangomuso.
Abaphrofethi bawo bayizichwensi nabakhohlisi. Abaphristi bawo bayingcolisile indawo engcwele, bawephula umthetho.
USimakade ulungile kuwo, akakwenzi okungalungile. Njalo ekuseni ukhipha isehlulelo sakhe ekukhanyeni, akehluleki, kepha abangalungile abalazi ihlazo.
“Ngiziqothulile izizwe, imibhoshongo yazo iyincithakalo, ngenze imigwaqo yazo amagebhugebhu, ukuze kungadluli muntu kuyo, imizi yazo icekelwe phansi yasala dengwane.
Ngathi: ‘Impela uyakungesaba, ukwemukele ukuyalwa.’ Indawo yawo yokuhlala ayiyukushatshalaliswa, kungenzeki konke engiwunqumele khona. Kodwa noma kunjalo, bavuka ekuseni benze inkohlakalo ngazo zonke izenzo zabo.
“Ngakho-ke ngilindeni,” kusho uSimakade, “kuze kube lusuku engisukuma ngalo ngiphange, ngokuba kuyisinqumo sami ukuqoqa izizwe, ngihlanganise ndawonye imibuso, ukuba ngithululele kuzo intukuthelo yami, lonke ulaka lwami oluvuthayo, ngokuba wonke umhlaba uyakungqongqiswa ngumlilo womhawu wami.”
“ ‘Ngokuba ngaleso sikhathi ngiyakunika abantu izindebe zomlomo ezihlanzekileyo, ukuze bonke babize igama likaSimakade, bamkhonze bemunye.
Kusukela phesheya kwemifula eKhushe abanxusa kimi, indodakazi yabahlakazekileyo bami, bayakuletha umnikelo wami.
Ngalolo lusuku awuyukuba namahloni ngazo zonke izenzo zakho owahlubuka ngazo kimi, ngokuba ngiyakususa kuwe abajabulela ukuzigqaja kwabo; awusayukuphinde uzikhukhumeze futhi entabeni yami engcwele.
Kepha ngiyakushiya kuwe abantu abahluphekileyo nabampofu; bayakukhosela egameni likaSimakade.
Insali yakwa-Israyeli ayiyukwenza okubi, ayiyukuwaqamba amanga, futhi akuyukutholakala emlonyeni wayo ulimi lwenkohliso. Impela iyakudla, ilale phansi, kungabi bikho oyethusayo.’ ”
Hlokoma ngentokozo ndodakazi yaseZiyoni, umemeze, Israyeli, uthokoze, futhi ujabule ngenhliziyo yonke, ndodakazi yaseJerusalema.
USimakade usisusile isigwebo sakho, wasixosha nesitha sakho. INkosi yakwa-Israyeli, uSimakade, iphakathi kwakho, awusayukwesaba futhi okubi.
Ngalolo lusuku kuyakuthiwa kulo iJerusalema: “Ungesabi, Ziyoni! Izandla zakho mazingayethi.
USimakade uNkulunkulu wakho unawe, iqhawe eliyakukunqobisa. Uyakukujabulela kakhulu wena, athule othandweni lwakhe, akuthokozele ngokuhlokoma kwentokozo.”
“Labo abadabuka ngemikhosi enqunyiweyo ngiyakubaqoqa, ngibasuse kuwe, bangumthwalo nehlazo kuwe.
Uyabona-ke, ngaleso sikhathi ngiyakubhekana ngqo nabo bonke abakuhluphayo, ngisindise abaqhugayo, ngiqoqe abaxoshiweyo, ngibenze babe nodumo negama abahlazeka emhlabeni wonke.
Ngaleso sikhathi ngiyakunibuyisa, lapho nginiqoqa, ngokuba ngiyakunenza nibe negama nodumo kubo bonke abantu bomhlaba, mhla ngiguqula ukuthunjwa kwenu nizibonela ngawenu amehlo,” kusho uSimakade.
Ngonyaka wesibili wokubusa kukaDariyu inkosi, ngenyanga yesithupha, ngosuku lokuqala enyangeni, kwafika izwi likaSimakade ngesandla sikaHagayi umphrofethi kuZerubhabhele indodana kaSheyalitiyeli, umbusi wakwaJuda, nakuJoshuwa indodana kaJehozadaki, umphristi omkhulu, lathi:
Usho kanje uSimakade Wamabandla, uthi: “Laba bantu bathi: ‘Asikafiki isikhathi sokuba kwakhiwe kabusha indlu kaSimakade.’ ”
Kwase kufika izwi likaSimakade ngesandla sikaHagayi umphrofethi, lathi:
“Ngabe sekuyisikhathi senu yini lesi sokuba nihlale ezindlini zenu ezihlotshisiwe, ekubeni le ndlu iyincithakalo, na?”
“Ngakho-ke usho kanje uSimakade Wamabandla, uthi: ‘Bekani inhliziyo yenu ezindleleni zenu.
Nitshale okuningi, kodwa navuna okuncane; niyadla kepha anisuthi; niyaphuza, kodwa ananeliswa; niyembatha, kepha anifudumali, othola umholo uwufaka esikhwamemi esibhobokile.’
“Usho kanje uSimakade Wamabandla, uthi: ‘Bekani inhliziyo yenu ezindleleni zenu.
Khuphukelani entabeni, nilethe izingodo, nakhe indlu, ukuze nami ngithokoze ngayo, ngihlonishwe,’ ” kusho uSimakade.
“Benilindele okuningi, kodwa niyabona-ke, nithole okuncane, lapho nikuyisa ekhaya, ngakuphephetha. Ngobani na?” Kubuza uSimakade Wamabandla. “Ngoba indlu yami iyincithakalo, kodwa nina niyagijima, kube yilowo nalowo endlini yakhe.
Ngalokho-ke kungenxa yenu isibhakabhaka sigodle amazolo, nomhlabathi ugodle isivuno sawo.
Ngase ngibiza isomiso sibe phezu kwezwe, phezu kwezintaba, phezu kokusanhlamvu, phezu kwewayini elisha, phezu kwamafutha amasha, phezu kokuvezwa ngumhlabathi, phezu kwabantu, phezu kwemfuyo, naphezu kwawo wonke umshikashika wezandla.”
UZerubhabhele, indodana kaSheyalitiyeli noJoshuwa, indodana kaJehozadaki, umphristi omkhulu, nayo yonke insali yabantu, balilalela izwi likaSimakade uNkulunkulu wabo namazwi kaHagayi umphrofethi, njengoba uSimakade uNkulunkulu wabo ayemthumile. Abantu besaba phambi kukaSimakade.
UHagayi, isithunywa sikaSimakade, wayesethula umyalezo kaSimakade kubantu, wathi: “Mina nginani,” kusho uSimakade.
USimakade wavuselela umoya kaZerubhabhele indodana kaSheyalitiyeli, umbusi wakwaJuda, nomoya kaJoshuwa indodana kaJehozadaki, umphristi omkhulu, nomoya wensali yonke yabantu, beza, basebenza endlini kaSimakade Wamabandla, uNkulunkulu wabo,
ngosuku lwama-24, ngenyanga yesithupha, ngonyaka wesibili wokubusa kwenkosi uDariyu.
Ngenyanga yesikhombisa ngosuku lwama-21 enyangeni, kwafika izwi likaSimakade ngesandla sikaHagayi umphrofethi, lathi:
“Ake ukhulume kuZerubhabhele indodana kaSheyalitiyeli, umbusi wakwaJuda, nakuJoshuwa indodana kaJehozadaki, umphristi omkhulu, nakuyo insali yabantu, uthi:
‘Ngubani phakathi kwenu osasele owayibona le ndlu ebukhazikhazini bayo bakuqala na? Niyayibona ukuthi isinjani manje? Ayifani yini nento eyize emehlweni enu na?
Kodwa qina manje, Zerubhabhele,’ kusho uSimakade, ‘qina, nawe Joshuwa, ndodana kaJehozadaki, umphristi omkhulu, qinani nonke nina bantu bezwe,’ kusho uSimakade, ‘nisebenze ngokuba Mina nginani,’ kusho uSimakade Wamabandla.
‘Izwi engavumelana nani ngalo mhla niphuma eGibhithe noMoya wami kuyakuhlala kunani, ningesabi.’
“Ngokuba usho kanje uSimakade Wamabandla, uthi: ‘Sekuzokuba ngumzuzwana nje bese ngizamazamisa izulu nomhlaba, ulwandle nomhlabathi owomileyo.’
“Ngiyakunyakazisa zonke izizwe, kufike okuyigugu kwazo zonke izizwe, ngiyigcwalise le ndlu ngenkazimulo,” kusho uSimakade Wamabandla.
“Ngelami isiliva, ngelami negolide,” kusho uSimakade Wamabandla.
“Inkazimulo yakamuva yale ndlu iyakuba nkulu kuneyakuqala,” kusho uSimakade Wamabandla. “Ngiyakuletha ukuthula kule ndawo,” kusho uSimakade Wamabandla.
Ngosuku lwama-24 enyangeni yesishiyagalolunye, ngonyaka wesibili wokubusa kukaDariyu, kwafika izwi likaSimakade kuHagayi umphrofethi, lathi:
“Usho kanje uSimakade Wamabandla, uthi: ‘Ake ubuze abaphristi ngomthetho, uthi:
Uma umuntu ephethe inyama engcwelisiweyo ingasemphethweni wengubo yakhe, bese ethinta ngomphetho wakhe isinkwa, noma ukudla okuphekiwe, noma iwayini noma amafutha noma ngabe yikuphi ukudla, sekuyakuba ngcwele yini na?’ ” Abaphristi baphendula bathi: “Cha.”
Wayesethi uHagayi: “Uma umuntu engcoliswe yisidumbu bese ethinta noma yikuphi kwalokho, ngabe kuyakungcola yini na?” Abaphristi baphendula bathi: “Kuyakungcola.”
Waqhubeka uHagayi wathi: “Banjalo-ke laba bantu, sinjalo lesi sizwe phambi kwami,” kusho uSimakade; “unjalo wonke umsebenzi wezandla zabo, nalokho abayakukwethula nakho kungcolile.
“Ngakho-ke ake nibeke enhliziyweni yenu, kusukela ngalolu lusuku kuqhubeke, ukuthi kwakunjani kungakabekwa itshe phezu kwelinye ethempelini likaSimakade,
ngaleso sikhathi lapho umuntu eya endundumeni yezilinganiso ezingama-20, kodwa kube lishumi nje, nalapho eya emiphongolweni yewayini lezilinganiso ezingama-50, kodwa athole elezingama-20 kuphela.
Nganishaya ngokuhwamuka, ngesikhunta, nangesichotho kuyo yonke imisebenzi yezandla zenu, kodwa anibuyelanga kimi,” kusho uSimakade.
“Ake nibeke enhliziyweni yenu, kusukela ngalolu lusuku kuqhubeke, kusukela ngosuku lwama-24 enyangeni yesishiyagalolunye, mhla kubekwa isisekelo sethempeli likaSimakade, nibeke enhliziyweni yenu ngalokho.
Isekhona yini imbewu enqolobaneni na? Imivini, imikhiwane, amahananadi, iminqumo akuthelanga. Kodwa kusukela ngalolu lusuku ngiyakukubusisa.”
Izwi likaSimakade lafika okwesibili kuHagayi, ngosuku lwama-24 enyangeni, lathi:
“Tshela uZerubhabhele umbusi wakwaJuda, uthi: ‘Ngizonyakazisa amazulu nomhlaba,
ngigumbuqele izihlalo zobukhosi zemibuso, ngiwaqede amandla emibuso yabezizwe, ngiketule izinqola nabagibele kuzo; afumbeke phansi amahhashi nabagibeli bawo, kube yilowo nalowo adliwe yinkemba yomfowabo.
“ ‘Ngalolo lusuku,’ kusho uSimakade Wamabandla, ‘Ngiyakukuthatha, Zerubhabhele, nceku yami, ndodana kaSheyalitiyeli,’ kusho uSimakade, ‘ngikwenze indandatho, ngokuba ngikukhethile,’ kusho uSimakade Wamabandla.”
Ngenyanga yesishiyagalombili, ngonyaka wesibili, wokubusa kukaDariyu, izwi likaSimakade lafika kuZakhariya indodana kaBherekhiya ka-Ido, umphrofethi, lathi:
“Impela uSimakade wayebathukuthelele kakhulu okhokho bakho.
Kepha wena batshele, uthi: Usho kanje uSimakade Wamabandla, uthi: ‘Buyelani kimi,’ kusho uSimakade Wamabandla, ‘nami ngizobuyela kini,’ kusho uSimakade Wamabandla.
“Ningafani nokhokho benu okwathi lapho abaphrofethi bakuqala bememezela kubo, bethi: Usho kanje uSimakade Wamabandla, uthi: ‘Ake niphenduke ezindleleni zenu ezimbi nasezenzweni zenu zobubi,’ kodwa abalalelanga, futhi abazange banginake, kusho uSimakade.
“Baphi okhokho benu na? Ngabe abaphrofethi basaphila yini kuze kube phakade na?
Kanti amazwi ami nezimiso zami engayaleza ngakho izinceku zami abaphrofethi akufinyelelanga yini kokhokho benu na? Angithi baphenduka, bathi: ‘Njengoba uSimakade Wamabandla ebehlelile ukwenza lokhu kithi ngokwezindlela zethu nangemisebenzi yethu, wenze kanjalo-ke kithi.’ ”
Ngosuku lwama-24 ngenyanga ye-11 kaShebhati, ngonyaka wesibili wokubusa kukaDariyu, izwi likaSimakade lafika kuZakhariya indodana kaBherekhiya ka-Ido, umphrofethi, lathi:
Ngabona umuntu ebusuku egibele ihhashi elibomvu, wama phakathi kwezihlahla zombomvana ezazisemhosheni, emva kwakhe kwakukhona amahhashi abomvu, amahwaqahwaqa, namhlophe.
Ngase ngithi: “Bangobani laba na?” Ingelosi eyayikhuluma nami yathi kimi: “Ngiyakukuchazela ukuthi bangobani laba.”
Umuntu owayemi phakathi kwezihlahla zombomvana wathi: “Laba ngabathunywe nguSimakade ukuba bahambe emhlabeni.”
Base beyibikela ingelosi kaSimakade eyayimi phakathi kwezihlahla zombomvana, bathi: “Sihambile emhlabeni; uyabona-ke, wonke umhlaba uhleli ngokuthula.”
Yayisiphendula ingelosi kaSimakade, yathi: “Simakade Wamabandla, kuyoze kube nini ungalihawukeli iJerusalema nemizi yakwaJuda oyithukuthelele le minyaka engama-70 na?”
USimakade wayiphendula ingelosi eyayikhuluma nami ngamazwi amahle, aduduzayo.
Ingelosi eyayikhuluma nami yayisithi kimi: “Memezezela lokhu uthi: Usho kanje uSimakade Wamabandla, uthi: ‘Nginesikhwele ngokwedlulele ngeJerusalema neZiyoni.
Ngizithukuthelele kakhulu izizwe ezinethezekileyo, ngokuba uma ngithukuthele kancane nje, zona ziyadlanga ngobubi.’
“Ngalokho usho kanje uSimakade, uthi: ‘Ngiyakubuyela eJerusalema ngesihawu, indlu yami iyakwakhiwa kulo, kudonswe intambo yokulinganisa phezu kweJerusalema,’ kusho uSimakade Wamabandla.
“Memezela lokhu futhi, uthi: Usho kanje uSimakade Wamabandla, uthi: ‘Imizi yami iyakugcwala ichichime okuhle, uSimakade abuye aliduduze iZiyoni, aphinde alikhethe neJerusalema.’ ”
Ngase ngiphakamisa amehlo ami, ngabona kukhona izimpondo ezine.
Ngayibuza ingelosi eyayikhuluma nami, ngathi: “Ziyini lezi?” Yathi kimi: “Lezi yizimpondo ezihlakaze uJuda, u-Israyeli, neJerusalema.”
USimakade wayesengikhombisa abakhandinsimbi abane bensimbi abane.
Ngabuza ngathi: “Laba bazokwenzani na?” Waphendula wathi: “Lezi yizimpondo ezahlakaza uJuda kangangoba akukho muntu ophakamisa ikhanda lakhe. Kepha laba bakhandinsimbi bensimbi bazobathuthumelisa, balahle phansi izimpondo zabezizwe ezaphakamisa uphondo zamelana nezwe lakwaJuda ukuba lihlakazwe.”
Ngabheka, ngabona indoda iphethe esandleni intambo yokulinganisa.
Ngayibuza ngathi: “Uyakuphi na?” Yathi kimi: “Ngiyakolinganisa iJerusalema, ngibone ukuthi bungakanani ububanzi balo, nokuthi bungakanani ubude balo.”
Ingelosi eyayikhuluma nami yaphuma-ke, kwathi enye ingelosi yeza ukuyihlangabeza.
Yathi kuyo: “Gijima utshele leya nsizwa ukuthi iJerusalema alisayukubiyelwa ngogange, ngenxa yobuningi babantu nemfuyo okukulo.
‘Kepha Mina, ngiyakuba lugange lomlilo kulo oluluzungeze ngimbi ci, futhi ngibe yinkazimulo kulo,’ kusho uSimakade.
“Maye! Maye, balekani enyakatho!” kusho uSimakade, “ngokuba nginihlakaze njengemimoya emine yezulu,” kusho uSimakade.
“Maye, phulukundlela, uye eZiyoni, wena ohlala nendodakazi yaseBhabhele!”
Ngokuba usho kanje uSimakade Wamabandla ongithumile ukuyolanda inkazimulo yakhe ezizweni ezaniphanga, ngokuba othinta nina usethinte inhlamvu yeso lakhe.
Niyabona-ke, impela ngiyakuphakamisa isandla sami phezu kwabo ngimelane nabo, bayakuba yimpango yezigqila zabo, niyokwazi ukuthi ungithumile uSimakade Wamabandla.
“Hlabelela ngokujabula, uthokoze, ndodakazi yaseZiyoni, ngokuba ngiyeza, ngiyakuhlala phakathi kwakho,” kusho uSimakade.
“Izizwe eziningi ziyakuzihlanganisa noSimakade ngalolo lusuku, zibe ngabantu bami; ngiyakuhlala phakathi kwakho, uyakukwazi ukuthi nguSimakade Wamabandla ongithume kuwe.
USimakade uyakudla uJuda abe yifa lakhe, nesabelo sakhe ezweni elingcwele, abuye alikhethe iJerusalema.
Thulani du, bantu nonke phambi kukaSimakade, ngokuba usesukile, waphuma endaweni yakhe engcwele.”
Wayesengikhombisa uJoshuwa umphristi omkhulu emi phambi kwengelosi kaSimakade, noSathane wayemi ngakwesokunene sakhe emmangalela.
USimakade wathi kuSathane: “USimakade uyakukhuza, Sathane. Impela, uSimakade okhethe iJerusalema uyakukhuza. Lona akasiso yini isikhuni esophulwe emlilweni na?”
UJoshuwa wayembethe izingubo ezingcolileyo, emi phambi kwengelosi.
Yayala ababemi phambi kwakhe, yathi: “Mkhumuleni izingubo ezingcolileyo.” Yayisithi kuye: “Uyabona, sengisisusile kuwe isiphambeko sakho; ngizokwembathisa izingubo zobukhosi.”
Yayisithi: “Methweseni umshuqulu ohlanzekileyo ekhanda.” Base bemethwesa umshuqulu ohlanzekileyo ekhanda, bamembathisa izingubo, ingelosi kaSimakade yayimile.
Ingelosi kaSimakade yamyala uJoshuwa, ithi:
“Usho kanje uSimakade Wamabandla, uthi: ‘Uma uhamba ngezindlela zami, ugcine imiyalo yami, uyakuphatha endlini yami, unakekele namagceke ami; ngiyakwenza uhambe phakathi kwalaba abami lapha.
“ ‘Ake ulalele, Joshuwa, mphristi omkhulu, wena nobambisene nabo abahlala phambi kwakho, ngokuba bangabantu abayisibonakaliso: niyabona-ke, sengizakuletha inceku yami, uHlumela.
Ngokuba bheka, itshe engilibeke phambi kukaJoshuwa kukhona amehlo ayisikhombisa etsheni lilodwa ngiyakuqopha umbhalo kulo, bese ngisusa bonke ububi baleli lizwe ngalusuku lunye,’ ” kusho uSimakade Wamabandla.
“ ‘Ngalolo lusuku, yilowo nalowo uyakumema umakhelwane wakhe, phansi komvini naphansi komkhiwane.’ ”
Ingelosi eyayikhuluma nami yabuya, yangivusa njengomuntu evuswa ebuthongweni.
Yathi kimi: “Ubonani na?” Ngathi: “Ngibona, uthi lwezibani lonke luyigolide, kunesitsha phezu kwalo, nezibani eziyisikhombisa ezikulo; kukhona imibhobho eyisikhombisa kuleso naleso sibani esiphezu kwalo,
neminqumo emibili eseceleni kothi, omunye ungakwesokunene sesitsha, nomunye ngakwesokhohlo saso.”
Ngayibuza ingelosi eyayikhuluma nami, ngathi: “Mnuzane, kuyini lokhu na?”
Ingelosi eyayikhuluma nami yangiphendula, yathi: “Awazi yini ukuthi kuyini lokhu na?” Ngathi: “Qha, mnumzane.”
Yayisithi kimi: “Lokhu yizwi likaSimakade eliqondiswe kuZerubhabhele elithi: ‘Kungabi ngempi, kungabi ngamandla, kodwa kube ngoMoya wami kuphela,’ kusho uSimakade Wamabandla.
“Ungubani-ke wena ntaba enkulu na? Phambi kukaZerubhabhele uyakuba yithafa. Uyakukhipha itshe eliyinhloko ngokumemeza athi: ‘Umusa, umusa, mawube kulo!’ ”
Izwi likaSimakade lafika kimi, lathi:
“Izandla zikaZerubhabhele zibeke isisekelo sale ndlu, futhi yizona eziyakuqeda ukuyakha, uyakukwazi ukuthi nguSimakade Wamabandla ongithume kini.
Ngokuba ngubani oyakudelela usuku lwezinto ezincane na? Bayakuthokoza, babone itshe lomthofu esandleni sikaZerubhabhele. Amehlo ayikhombisa kaSimakade abheke umhlaba wonke.”
Ngase ngiyibuza, ngithi: “Zichazani lezi zihlahla ezimbili zomnqumo ezingakwesokunene sothi lwezibani nangakwesokhohlo salo na?”
Ngabuza futhi okwesibili ngathi kuyo: “Achazani lawa magatsha amabili eminqumo aseceleni kwemibhobho emibili yegolide, okuthululwa ngayo amafutha egolide na?”
Yangiphendula yathi: “Awazi ukuthi ayini?” Ngaphendula ngathi: “Qha, mnumzane.”
Yayisithi: “Lawa ngamadodana agcotshiweyo, ame ngakuMnuzane womhlaba wonke.”
Ngabuye ngabheka, ngabona umqulu wencwadi ondizayo.
Yangibuza yathi: “Ubonani na?” Ngathi: “Ngibona umqulu wencwadi ondizayo, ubude bawo bungamakhubhithi angama-20, nobubanzi bawo bungamakhubhithi alishumi.”
Yayisithi kimi: “Lesi yisiqalekiso esizokwehlela phezu komhlaba wonke, ngokuba ngokusho kwaso kulolu hlangothi bonke abantshotshayo bayakudingiswa, bese kuthi ngakolunye uhlangothi lwaso luthi bonke abafunga amanga bayakudingiswa.
‘Ngiyakusithumela, singene endlini yesela nasendlini yofunga amanga ngegama lami. Siyakuhlala phakathi endlini yakhe, siyishabalalise nezingodo zayo namatshe ayo.’ ”
Ingelosi eyayikhuluma yasondela kini, yathi: “Ake ubheke, ubone ukuthi kuyini lokhu okuphumayo?”
Ngathi: “Kuyini na?” Yaphendula yathi: “Lokhu okuphumayo yi-efa.” Yabuye yathi: “Lokhu kuyihlo labo emhlabeni wonke.”
Isivalo somthofu saphakanyiswa, kwakukhona owesifazane owayehleli phakathi kwe-efa.
Yathi: “Lokhu kungububi.” Wamphonsa phakathi kwe-efa, waphonsa netshe lomthofu emlonyeni walo.
Ngase ngiphakamisa amehlo ami, ngabona kuphuma abesifazane ababili, umoya usemaphikweni abo; babe namaphiko njengamaphiko kanogolantethe, baliphakamisa i-efa phakathi komhlaba nezulu.
Ngase ngiyibuza ingelosi eyayikhuluma nami, ngithi: “Balisaphi i-efa na?”
Yangiphendula yathi: “Bayakulakhela indlu eShineyari. Iyakulungiswa, bese libekwa khona endaweni yalo.”
Ngabuye ngabheka, ngabona kuphuma izinqola ezine phakathi kwezintaba ezimbili; kwakuyizintaba zethusi.
Enqoleni yokuqala kwakukhona amahhashi abomvu, kweyesibili kunamnyama,
kweyesithathu kunamhlophe, bese kuthi enqoleni yesine kube ngamahwaqahwaqa.
Ngase ngiyibuza ingelosi eyayikhuluma nami, ngithi: “Kuyini lokhu mnumzane?”
Ingelosi yaphendula, yathi: “Lena yimimoya emine yezulu ephumile, ibime phambi koMnuzane womhlaba wonke.
Leyo enamahhashi amnyama ilibhekise enyakatho; amhlophe ayawalandela; amahwaqahwaqa aya eningizimu.”
Lawa anamandla aphumayo, afuna ukuhamba emhlabeni wonke. Yayisithi: “Hambani, nihambe emhlabeni wonke.” Ayesehamba kuwo wonke umhlaba.
Yayisibiza, yakhuluma nami, yathi: “Uyabona-ke, lawa alibhekise enyakatho, ayakuthulisa uMoya wami enyakatho.”
Kwase kufika kimi izwi likaSimakade, lathi,
“Thatha izipho kubathunjwa, kuHelidayi, kuThobiya, nakuJedaya, uhambe ngalo lolo lusuku, uye endlini kaJosiya indodana kaZefaniya, kulapho befikele khona bevela eBhabhele.
Uyakuthatha isiliva negolide, wenze ngakho umqhele, uwubeke ekhanda likaJoshuwa indodana kaJehosadakhi, umphristi omkhulu.
Uyakuthi kuye: ‘Usho kanje uSimakade Wamabandla, uthi: Bheka, kukhona indoda egama layo nguHlumela; uyakumila endaweni yakhe, akhe ithempeli likaSimakade.
Impela nguyena oyokwakha ithempeli likaSimakade, athwale ubukhosi, ahlale, abuse esihlalweni sakhe sobukhosi, kube khona nomphristi esihlalweni sakhe sobukhosi, kube nokululekana ngokuthula phakathi kwabo bobabili.’
Umqhele uyakuba ngokaHelemi, uThobiya, uJedaya, uHeni, indodana kaZefaniya, kube yisikhumbuzo ethempelini likaSimakade.
Labo abaphuma kude bayakufika, bakhe ithempeli likaSimakade, niyakukwazi ukuthi nguSimakade Wamabandla ongithumile kini. Lokhu kuyakwenzeka, uma impela nililalela izwi likaSimakade uNkulunkulu wenu.”
Kwathi ngonyaka wesine wokubusa kwenkosi uDariyu izwi likaSimakade lafika kuZakhariya ngosuku lwesine ngenyanga yesishiyagalolunye, kuKhisilevi.
IBhethele lalithume uSharezeri, noRegemu Melekhi nabantu babo ukuyonxusa ebusweni bukaSimakade,
nokukhuluma kubaphristi abasendlini kaSimakade Wamabandla nakubaphrofethi, bathi: “Ngikhale yini ngenyanga yesihlanu, ngizile, njengoba ngenzile kule minyaka eminingi kangaka, na?”
Kwase kufika kimi izwi likaSimakade Wamadla, lathi:
“Buza kubo bonke abantu bezwe nakubaphristi, uthi: ‘Ekuzileni nasekulileni kwenu ngenyanga yesihlanu neyesikhombisa kule minyaka engama-70 ngabe ngempela nanizilele Mina yini na?
Lapho nidla niphuza, anizidleli, niziphuzele nina yini na?
Akusiwo yini amazwi lawa uSimakade awamemezela ngesandla sabaphrofethi bakuqala, lapho iJerusalema lalihleli ngokuthula, imizi yalo elizungeze nxazonke, iNegevu namagquma kwakuhleli ngokuthula na?’ ”
Izwi likaSimakade lafika kuZakhariya, lathi:
“Usho kanje uSimakade Wamabandla, uthi: ‘Yehlulelani izehlulelo eziliqiniso, nibe nokwethembeka nozwelo, kube yilowo nalowo komunye.
Ningacindezeli abafelokazi, izintandane, abafokazi, nabampofu. Kungabi bikho odlinzela omunye okubi enhliziyweni yakhe.’
“Kepha benqaba ukulalela, bapikla, bavala izindlebe zabo ukuba bangezwa.
Benza izinhliziyo zabo zaba lukhuni njengetshe, ukuba bangawuzwa umthetho namazwi uSimakade Wamabandla akuthumele ngoMoya wakhe ngesandla sabaphrofethi bakuqala; ngalokho uSimakade Wamabandla wathukuthela kakhulu.
“ ‘Kwathi nakuba ebabiza, kodwa abalalelanga, kanjalo-ke nabo bayakungibiza, kepha angiyukubalalela,’ ” kusho uSimakade Wamabandla.
“ ‘Ngiyakubaphephulela kude kuzo zonke izizwe abangazazi. Izwe selisele liyincithakalo, akekho odlulayo nobuyayo kulo, ngokuba izwe elihle balenze laba yincithakalo.’ ”
Izwi likaSimakade Wamabandla lafika lathi:
Usho kanje uSimakade Wamabandla, uthi: “Impela nginesikhwele esikhulu ngeZiyoni, Nginesikhwele esivutha bhe ngalo.”
Usho kanje uSimakade, uthi: “Ngiyakubuyela eZiyoni, ngihlale phakathi kwalo iJerusalema. IJerusalema liyakubizwa ngokuthi ‘uMuzi Othembekileyo’ nentaba kaSimakade Wamabandla ibizwe ngokuthi: ‘YiNtaba Engcwele.’ ”
Usho kanje uSimakade Wamabandla, uthi: “Kusazohlala amakhehla nezalukazi emigwaqweni eJerusalema, yilowo nalowo aphathe udondolo esandleni sakhe ngenxa yobuningi bezinsuku zakhe.
Emigwaqweni yomuzi kuyakuphithizela amantombazane nabafana bedlala emingwaqweni yawo.”
Usho kanje uSimakade Wamabandla, uthi: “Nakuba kuyakuba yisimangaliso lapho insali yalaba bantu izibonela ngawayo amehlo ngalezo zinsuku; ngabe kuyakuba yisimangaliso yini nakimi uma ngizibonela ngawami amehlo na?” kusho uSimakade Wamabandla.
Usho kanje uSimakade Wamabandla, uthi: “Niyabona-ke, ngiyakusindisa abantu bami empumalanga nasentshonalanga.
Ngiyakubabuyisa bahlale kulo iJerusalema, babe ngabantu bami, Mina ngibe nguNkulunkulu wabo ngokwethembeka nangokulunga.”
Usho kanje uSimakade Wamabandla, uthi: “Qinisani izandla zenu, nina eniwezwayo kule mihla lawa mazwi akhulunywa ngabaphrofethi ababekhona mhla kubekwa isisekelo sendlu kaSimakade, ithempeli, ukuba lakhiwe.
Ngokuba ngaphambi kwalezo zinsuku kwakungekho nkokhelo yamuntu, kungekho nkokhelo yezilwane, kungekho kuthula kophumayo noma kongenayo ngenxa yesitha, ngokuba nganiqatha ukuze kube yilowo nalowo alwe nomakhelwane wakhe.
Kepha angiyukwenza kanjalo ensalini yalaba bantu njengasezinsukwini ezedlule,” kusho uSimakade Wamabandla.
“Kuyakuba khona imbewu yokuthula, umvini uyakuthela isithelo sawo, umhlabathi ukhiqize ukudla kwawo, amazulu ehlise amazolo awo. Konke lokhu ngiyakukunika insali yalaba bantu kube yifa layo.
Njengoba beniyisiqalekiso ezizweni nina ndlu kaJuda nani ndlu ka-Israyeli, ngiyakunisindisa, nibe yisibusiso; ningesabi, kodwa maziqine izandla zenu.”
Ngokuba usho kanje uSimakade Wamabandla, uthi: “Njengokuba ngangihlele ukunenzakalisa mhla okhokho benu bengithukuthelisile, angizisolanga ngalokho,” kusho uSimakade Wamabandla,
“kanjalo-ke sengibuye ngahlela kulezi zinsuku ukulenzela okuhle iJerusalema nendlu yakwaJuda; ningasabi.”
“Nakhu eniyakukwenza: khulumani iqiniso omunye komunye, kube nokwehlulela okuqotho nesinqumo esinokuthula emasangweni enu.
Ningadlinzelani kube yilowo nalowo afune ukulimaza umakhelwane wakhe, ningathandi izifungo zenkohliso, ngokuba konke lokho ngiyakuzonda,” kusho uSimakade Wamabandla.
Izwi likaSimakade lafika kimi, lathi:
“Usho kanje uSimakade Wamabandla, uthi: ‘Ukuzila kwenyanga yesine, okwesiyesihlanu, okweyesikhombisa, nokweyeshumi kuyakuba ngukujabula nokuthokoza nemikhosi emihle endlini yakwaJuda; thandani iqiniso nokuthula.’ ”
Usho kanje uSimakade Wamabandla, uthi: “Kuyakufika izizwe nabahlala emizini eminingi,
abakhelene bahambelane omunye nomunye, bathi: ‘Masihambe manje siyonxusa phambi kukaSimakade, simfune uSimakade Wamabandla; nami impela ngizohamba.’
Kuyakuza izindimbane zabantu nezizwe ezinamandla zizofuna uSimakade Wamabandla eJerusalema, zinxuse ebusweni bakhe.”
Usho kanje uSimakade Wamabandla, uthi: “Ngalezo zinsuku amadoda alishumi, avela kuzo zonke izilimi zabezizwe, ayakubamba umphetho wengubo yomuntu wakwaJuda, athi: ‘Masihambe nani, ngokuba sizwile ukuthi uNkulunkulu unani.’ ”
Isiphrofetho sezwi likaSimakade elimelene nezwe lakwaHadirakhi. Liyakuhlala nakulo iDamaseku, ngokuba amehlo abantu nawezizwe zonke zakwa-Israyeli abheke kuSimakade,
limelene neHamathi elingumngcele kulo, neThire nesiSidoni, ngokuba kuhlakaniphe ngokwedlulele.
IThire lazakhela inqaba, lanqwabela isiliva njengothuli, negolide elicolekileyo njengodaka emigwaqweni.
Uyabona, iNkosi iyakuwuthatha kulo umcebo walo, iwuphonse olwandle, lona lingqongqiswe ngomlilo.
I-Ashikeloni liyakukubona lokho, lesabe, iGaza liyobayobe kakhulu ezinhlungwini kanye ne-Ekhroni, ngokuba ithemba lalo liyakuphela, inkosi ishabalale eGaza, kungahlali muntu e-Ashikeloni.
E-Ashidodi kuyakuhlala izinhlanga ezahlukeneyo. Ngiyakukuqeda nya ukuzigqaja kwamaFilisti.
Ngiyakukhipha igazi labo emlonyeni wabo, nokunyanyekayo emazinyweni abo, nabo bayakuba yinsali kuNkulunkulu wethu, babe ngababusi kwaJuda nase-Ekhroni njengamaJebusi.
Ngiyakuyivikela indlu yami, ukuze kungabi bikho mabutho adlulayo nabuyayo; akusayukudlula mcindezeli kubo, ngokuba manje sengizibonele ngawami amehlo.
Thokoza kakhulu ndodakazi yaseZiyoni, hlokoma ngenjabulo ndodakazi yaseJerusalema. Uyabona-ke, iNkosi yakho iza kuwe, ilungile, inqobile, ithobekile, igibele imbongolo, ithole, inkonyane yembongolokazi.
Ngiyakususa inqola yempi kwa-Efrayimi, nehhashi eJerusalema, ngisuse nomnsalo wempi. Iyakukhuluma ngokuthula ezizweni, ukubusa kwayo kuyakusukela olwandle kuze kufike olwandle, kusukele emfuleni kuze kufinyelele emaphethelweni omhlaba.
Kodwa wena-ke, ngenxa yegazi lesivumelwano sami nawe, ngiyakubakhulula abakini ababoshiweyo emgodini ongenamanzi.
Buyelani enqabeni nina baboshiweyo abanethemba. Ngiyanitshela namhlanje ukuthi ngiyakunibuyisela okungokwenu ngokuphindwe kabili.
Ngokuba ngizonweba uJuda njengomnsalo, u-Efrayimi abe njengomcibisholo. Ngiyakwenza amadodana akho Ziyoni avukele amadodana akho Javani. Ngikwenze ube njengenkemba yeqhawe.
USimakade uyakubonakala phezu kwabo, umcibisholo wakhe ushweze njengonyazi. INkosi uSimakade iyakushaya impalampala. Ihambe ngezivunguvungu zaseNingizimu.
USimakade Wamabandla uyakubavikela, bayakudla, banyathele amatshe endwayimane. Bayakuphuza igazi labo njengewayini, bagcwale baphuphume njengesitsha sigcwele, nanjengamakhona e-althare.
USimakade uNkulunkulu wabo uyakubahlenga ngalolo lusuku, njengomhlambi wabantu bakhe, ngokuba bangamatshe omqhele amenyezela phezu kwezwe lakhe.
Laze labusiseka bo! Yeka ubuhle balo! Okusanhlamvu newayini kuyokwenza izinsizwa nezintombi babe yimiqemane.
Celani imvula kuSimakade ngenkathi yayo entwasahlobo. USimakade uhlomisa izulu, anise imvula; aphe kube yilowo nalowo okudliwayo kwasendle.
Ngokuba amatherafi akhulume inkohliso, ababhuli babona imibono eyedukisayo, bakhuluma ngamaphupho angamanga, baduduza ngokuyize. Ngakho-ke bazulazula njengezimvu, bayahlupheka, ngokuba bengenamelusi.
“Intukuthelo yami ivuthela abelusi. Ngiyakubajezisa abaholi bomhlambi, ngokuba uSimakade Wamabandla uyawunakekela umhlambi wakhe, indlu yakwaJuda. Uyakubenza bafane nehhashi lobukhosi bakhe empini.
Kuyena kuyakuvela itshe legumbi, kuvele isikhonkwane, kuvele umnsalo wempi, kuvele nababusi bonke ndawonye.
Bayakuba njengamaqhawe enyathela udaka emigwaqweni lapho kuliwa. Bayakulwa, ngokuba uSimakade ungakubo, bathelwe ngehlazo abagibeli bamahhashi.
“Ngiyakuqinisa abendlu yakwaJuda, ngihlenge abendlu yakwaJosefa, ngibabuyise, ngokuba ngiyabazwela. Kuyakuba sengathi angikaze ngibalahle, ngokuba Mina Simakade uNkulunkulu wabo ngiyakubaphendula.
Abakwa-Efrayimi bayakuba njengamaqhawe; inhliziyo yabo ithokoze sengathi kungenxa yewayini. Abantwana babo bayakukubona lokho bajabule; inhliziyo yabo ithokoze ngoSimakade.
“Ngiyakubashayela ikhwelo, ngibaqoqe, ngokuba sengibahlengile. Bayakuba baningi njengakuqala.
Ngiyakubahlwanyela phakathi kwezizwe, kodwa bayakungikhumbula besemajukujukwini, bona nezingane zabo bayakusinda, bese bebuya.
Ngiyakubabuyisa eGibhithe, ngibaqoqe eSamariya, ngibayise kwaGileyadi naseLebhanoni, akuyukutholakala ndawo eyakubanela.
Bayakudabula olwandle lwezinhlupheko. Uyakushaya amagagasi olwandle, nezinzulu zonke zomfula ziyakukoma nkwe, kuyakudicilelwa phansi ukuzigqaja kwe-Asiriya, kusuke nentonga yaseGibhithe.
Ngiyakubaqinisa kuSimakade; bahambe egameni lakhe,” kusho uSimakade Wamabandla.
Vula iminyango yakho, Lebhanoni, ukuze umlilo ungqongqise imisedari yakho.
Lila msayiphuresi, ngokuba umsedari usuwile, phela izihlahla ezinkulu sezicelwe phansi. Khihlani isililo mi-okhi yaseBhashani, ngokuba ihlathi elicinene seligawuliwe.
Ngumsindo wokukhala kwabelusi! Phela udumo lwabo seluphelile. Ngumsindo wokubhonga kwamabhongo ezingonyama! Ngokuba ihlathi eJordani selicekelwe phansi.
Usho kanje uSimakade uNkulunkulu wami, uthi: “Yelusa izimvu zokuhlatshwa.
Abazithengile bazihlaba, kodwa bona abethweswa cala, nabazithengisayo bathi: ‘Makabongwe uSimakade; sengicebile.’ Abelusi bazo abanaluzwelo ngazo.
Angisayukuzizwela futhi izakhamuzi zezwe,” kusho uSimakade. “Kodwa bheka nje, ngiyakunikela abantu kube yilowo nalowo esandleni somakhelwane wakhe, esandleni senkosi yakhe. Bayakulicindezela izwe, kepha angiyukubahlenga esandleni sabo.”
Ngakho-ke ngazelusa izimvu zokuhlatshwa, lezo ezazihluphekile. Ngazithathela Mina izintonga ezimbili: enye ngayibiza ngokuthi uMusa, enye ngayibiza ngokuthi uBunye, ngase ngiwelusa umhlambi.
Ngabaxosha abelusi abathathu ngenyanga eyodwa, ngoba sengikhathele ukubabekezelela, sengidiniwe futhi yibona.
Ngase ngithi: “Angisayukuzelusa; efayo mayife, ebhujiswayo mayibhubhe, esindayo maziyishwabadele, zinephulane zodwa.”
Ngathatha-ke induku yami uMusa, ngayinqamula, ukuze ngiqede isivumelwano engangisenze nazo zonke izizwe.
Saqedwa ngalolo lusuku, kepha wawazi umhlambi wezimvu ezihluphekileyo, ezazethembele kimi ukuthi lokho kwakuyizwi likaSimakade.
Ngase ngithi kuzo: “Uma kukuhle emehlweni enu, nginikeni inkokhelo yami, kodwa uma kungenjalo, yekani.” Zayilinganisa inkokhelo yami kwaba yizinhlamvu zesiliva ezingama-30.
USimakade wathi kimi: “Ziphonse kumbumbi,” kwakuyinani elikhulu ababengilinganise nalo. Ngathatha kubo izinhlamvu zesiliva ezingama-30 ngaziphonsa kumbumbi endlini kaSimakade.
Ngayinqamula nentonga yami yesibili, uBunye, ukuze ngiqede ubuhlobo phakathi kukaJuda no-Israyeli.
USimakade wayesethi kimi: “Zithathele izikhali zomelusi oyisiwula.
Ngokuba sengizakuvusa umelusi ezweni ongayukuzinakekela ezilimeleyo, angazifuni ezihlakazekileyo, angazelaphi ezinamanxeba, angazesekeli ezintekenteke, kodwa adle inyama yezikhulupheleyo, adabule izinselo zazo.”
“Maye, kumelusi ongenamsebenzi, oshiya umhlambi wezimvu! Inkemba iyakumlimaza ingalo neso lakhe langakwesokunene. Ingalo yakhe iyakushwabana, neso lakhe lingaboni lutho!”
Isiphrofetho. Izwi likaSimakade ngo-Israyeli. USimakade wendlale izulu, wabeka isisekelo somhlaba, wabumba umoya womuntu ezibili zakhe, uthi:
“Bheka, iJerusalema ngizolenza libe yindebe yokudakisa zonke izizwe nxazonke. ElakwaJuda nalo liyakubandakanyeka lapho kuvinjezelwa iJerusalema.
Kuyakuthi ngalolo lusuku iJerusalema ngilenze libe yitshe elisindayo kuzo zonke izizwe. Zonke ezizithwesa lona ziyakulimala kanzima. Izizwe zonke zomhlaba ziyakubuthana, zilihlanganyele.”
USimakade uthi: “Ngalolo lusuku ngiyakushaya wonke amahhashi ngokudideka, nabagibeli bawo ngokuhlanya. Ngiyakuvula amehlo ami phezu kwendlu yakwaJuda ngiyihawukele, kodwa wonke amahhashi ezizwe ngiyakuwashaya ngobumpumputhe.
Ababusi bakwaJuda bayakuthi ezinhliziyweni zabo: ‘Abakhileyo eJerusalema bangamandla ami ngoSimakade Wamabandla, uNkulunkulu wabo.’
“Ngalolo lusuku ngiyakwenza ababusi bakwaJuda babe njengembawula evuthayo phakathi kwezinkuni, babe njengesihlonti esivuthayo phakathi kwezithungu zokusanhlamvu ezisikiwe. Bayakuqothula kwesokunene nakwesokhohlo zonke izizwe ezizungeze nxazonke. IJerusalema liyakuba sendaweni yalo futhi eJerusalema.
“USimakade uyakuhlenga amathende akwaJuda kuqala, ukuze udumo lwendlu kaDavide nodumo lwabakhileyo eJerusalema lungabi lukhulu phezu kukaJuda.
Ngalolo lusuku uSimakade uyakubavikela abakhileyo eJerusalema; okhubekayo kubo ngalolo lusuku uyakuba njengoDavide, indlu kaDavide ibe njengoNkulunkulu, ifane nengelosi kaSimakade phambi kwabo.
Kuyakuthi ngalolo lusuku ngiphokophelele ukushabalalisa izizwe zonke ezatheleka eJerusalema, zalihlasela.
“Ngiyakuthululela phezu kwendlu kaDavide naphezu kwabakhileyo eJerusalema umoya womusa nowokunxusa. Bayakungibuka mina, lowo abamgwazayo. Bayakumlilela njengokulilela kozelwe yedwa, babe nomunyu ngaye, njengokukhalela kalusizi izibulo.
Ngalolo lusuku kuyakuba khona isililo esikhulu eJerusalema njengesililo sokulilela uHadadi Rimoni, ethafeni iMegido.
Izwe liyakulila, kulile umndeni nomndeni; umndeni wendlu kaDavide ulile wodwa, nabesifazane bawo balilele bodwa; umndeni wendlu kaNathani ulile wodwa, nabesifazane bawo balilele bodwa,
umndeni wendlu kaLevi ulile wodwa, nabesifazane bawo balile bodwa, umndeni kaShimeyi ulile wodwa, nabesifazane bawo balile bodwa.
Yonke imindeni eseleyo, imindeni ngemindeni iyakulila yodwa, nabesifazane bayo balile bodwa.”
Ngalolo lusuku kuyakuvulwa umthombo oyakuhlanza izono nokungcola kwendlu kaDavide nabakhileyo eJerusalema.
USimakade Wamabandla uthi: “Ngalolo lusuku ngiyakushabalalisa amagama ezithombe ezweni, futhi awayukuphinde akhunjulwe; ngiyakususa abaphrofethi nemimoya engcolileyo ezweni.
Kuyakuthi uma omunye ephrofetha, uyise nonina abamzalayo bathi kuye: ‘Kufanele ufe, ngokuba uqambe amanga egameni likaSimakade,’ uyise nonina bayakumgwaza esaphrofetha.
“Kuyakuthi ngalolo lusuku kube yilowo nalowo mphrofethi abe namahloni ngombono wakhe. Abayukuyigqoka ingubo enoboya ukuze bakhohlise.
Uyakuzihlangula athi: ‘Angisiyena umphrofethi, ngingumuntu nje ozilimela umhlabathi, ngokuba ngathengwa ngumuntu othile ngisemncane.’
Omunye uyakumbuza athi: ‘Pho lawa manxeba asezandleni zakho ngawani na?’ Uyakuphendula athi: ‘Lawa manxeba ngawokushaywa ngangisendlini yabangani bami.’ ”
“Vuka nkemba, umelane nomelusi wami, umelane nomuntu ongumgani wami. Shaya umelusi, ukuze kuhlakazeke izimvu, ngiyakuphendulela isandla sami kumawundlu,” kusho uSimakade Wamabandla.
USimakade uthi: “Kuyakuthi ezweni lonke kunqunywe izingxenye ezimbili, zishabalale, kushiywe ingxenye yesithathu kulo.
Ngiyakufaka ingxenye yesithathu emlilweni, ngibacwengisise njengokucwengisiswa kwesiliva, ngibavivinye njengokuvivinywa kwegolide. Bayakubiza igama lami, ngiyakubaphendula, ngithi: ‘Bangabantu bami!’ Bona bayakuthi: ‘USimakade unguNkulunkulu wami.’ ”
Uyabona-ke, usuku lukaSimakade luyeza, lapho impango ethathwe kuwe iyakwehlukaniswa khona lapha kuwe.
Ngiyakuhlanganisa zonke izizwe zilwe neJerusalema. Ziyakudla umuzi; ziphange izindlu, kudlwengule abesifazane, ingxenye yomuzi iyiswe ekuthunjweni, kodwa abantu abaseleyo abayukubulawa emzini.
USimakade uyakuphuma alwe nezizwe, kube njengosuku lwakhe lokulwa mhla impi ibambene.
Ngalolo lusuku izinyawo zakhe ziyakuma eNtabeni Yeminqumo, leyo ephambi kweJerusalema ngasempumalanga. Intaba yeminqumo iyakuqhekezeka phakathi ngasempumalanga nangasentshonalanga, kube ngumhosha omkhulu. Ingxenye yentaba iyakuqhekezeka ngasenyakatho kuthi enye iqhekezeke ngaseningizimu.
Niyobalekela emhosheni wezintaba zami, ngokuba umhosha wezintaba uyofinyelela e-Azali. Niyobaleka njengoba nanibalekela ukuzamazama komhlaba ngezinsuku zika-Uziya inkosi yakwaJuda. USimakade uNkulunkulu wami uyakufika nabo bonke abangcwele kanye nawe.
Kuyakuthi ngalolo lusuku kungabi bikho ukukhanya, amakhaza nesithwathwa kushabalale.
Kuyakuba usuku oluyisimanga, olwaziwa nguSimakade, kungabi yimini kungabi wubusuku, kodwa kuthi sekuyisikhathi sokuhlwa kube kusakhanya bha.
Ngalolo lusuku kuyakugobhoza amanzi okuphila eJerusalema. Ingxenye yawo iyogelezela olwandle ngasempumalanga, enye ingxenye yawo igelezele olwandle ngasentshonalanga, ubusika nehlobo.
USimakade uyakuba yiNkosi emhlabeni wonke. Ngalolo lusuku uSimakade uyakuba yedwa vo, negama lakhe libe lilodwa zwi.
Izwe lonke liyakuphenduka lifane ne-Arabha kusukela eGebha kuya eRimoni ngaseningizimu yeJerusalema. IJerusalema liyakuphakama lihlale endaweni yalo, kusukela eSangweni LikaBhenjamini kuze kube seSangweni Lakuqala, kufinyelele eSangweni Legumbi; kusukela eMbhoshongweni kaHananeli kuze kube sesikhamweni sewayini lenkosi.
Kuyakuhlalwa kulo, kungabe kusaba bikho mbubhiso. IJerusalema liyakuhlala livikelekile.
Lokhu kuyakuba ubhubhane uSimakade ayakushaya ngalo izizwe ezaphaka impi zalwa neJerusalema: inyama yabo iyobola bemi ngezinyawo zabo; amehlo abo abole ezikhoxeni zawo, nolimi lwabo lubolele emlonyeni wabo.
Kuyakuthi ngalolo lusuku kube khona kubo isiphithiphithi esikhulu esivela kuSimakade. Bayakugxavulana bodwa, umakhelwane abeke isandla umakhelwane wakhe.
UJuda naye uyakulwa eJerusalema, kuqoqwe impango yomcebo wezizwe zonke macala wonke, igolide, isiliva nezingubo kube yinqwaba enkulu.
Kanjalo ubhubhane luyakufikela amahhashi, iminyuzi, amakameli, izimbongolo, nayo yonke imfuyo esezinkanjini, njengalolo bhubhane.
Kuyakuthi bonke abasalayo ezizweni zonke mhla zigasela eJerusalema bakhuphuke njalo unyaka nonyaka bayokhuleka eNkosini uSimakade Wamabandla, futhi bagubhe uMkhosi Wamadokodo.
Abangayukukhuphuka emindenini yomhlaba baye eJerusalema ukuyokhuleka eNkosini uSimakade Wamabandla, abayukuba namvula.
Uma umndeni waseGibhithe ungayukukhuphuka kulokho kukhuphuka, ubhubhane luyakwehlela kuwo, lolo uSimakade ashaya ngalo izizwe ezingakhuphukanga ukuyogubha uMkhosi Wamadokodo.
Lokho kuyakuba yisijesizo sesono saseGibhithe nesijeziso sezizwe ezingakhuphukanga ukuyogubha uMkhosi Wamadokodo.
Ngalolo lusuku kuyakulotshwa ezinsimbini zamahhashi ukuthi: “Kwehlukaniselwe uSimakade,” amabhodwe asendlini kaSimakade ayakuba njengemicengezi phambi kwe-althare.
Wonke amabhodwe aseJerusalema nakwaJuda ayakwehlukaniselwa uSimakade Wamabandla. Bonke abahlabayo bayakufika, bathathe amanye, bayopheka ngawo. Ngalolo lusuku akuyukuba khona futhi othengisayo endlini kaSimakade Wamabandla.
Isiphrofetho: Izwi likaSimakade elafika ku-Israyeli ngesandla sikaMalakhi, lathi:
“Nginithandile,” kusho uSimakade. “Kodwa nina nithi: ‘Usithande kanjani na?’ “Ngabe u-Esawu wayengeyena umnewabo kaJakobe na? kubuza uSimakade. “Ngamthanda uJakobe,
kodwa ngamzonda u-Esawu, ngenza izintaba zakhe zaba wugwadule, nefa lakhe laba ngelamankentshane asehlane.”
Uma u-Edomi ethi: “Siphihliziwe, kepha siyakubuye sikwakhe kabusha okubhidlikile.” Kodwa usho kanje uSimakade Wamabandla, uthi: “Bona bayakukwakha, kodwa Mina ngiyakubhidliza. Bayakubizwa ngokuthi Yizwe Lenkohlakalo, nabantu uSimakade abathukuthelele unomphelo.
Niyakuzibonela nina ngawenu amehlo, qede nithi: ‘Mkhulu uSimakade, kuze kudlulele nangale kwemingcele yakwa-Israyeli.’
“Indodana ihlonipha uyise, nenceku inkosi yayo. Uma nginguyihlo, pho kuphi ukuhlonishwa kwami? Uma ngiyinkosi, pho kuphi ukwesatshwa kwami?” kinina baphristi enidelela igama lami, kubuza uSimakade Wamabandla. Kodwa nithi: “Silidelele kanjani igama lakho na?”
Ngokuletha e-althare lami ukudla okungcolileyo. Qede nithi: “Sikungcolise ngani na?” Ngokusho kwenu nithi: “Itafula likaSimakade lidelelekile.”
Lapho niletha isilwane esingaboni sibe ngumhlatshelo, akukubi yini lokho na? Uma ninikela ngesilwane esiqhugayo nesigulayo, akukubi yini lokho na? Uma unganikela ngaso kumbusi wakho, angakujabulela yini na? Angakwemukela yini wena noma athokoze ngawe na? kubuza uSimakade Wamabandla.
“Manje-ke ake ninxuse uNkulunkulu ukuba abe nobubele kithi. Ngalokhu okunje okusezandleni zenu, ngabe uyakunemukela yini na?” kusho uSimakade Wamabandla.
“Sengathi bekungakhona omunye wenu ongavala izicabha, ukuze ningalibaseli ize e-althare lami! Angithokozi ngani, angiyukuwemukela umnikelo ezandleni zenu,” kusho uSimakade Wamabandla.
“Ngokuba kusukela ekuphumeni kwelanga lize liyoshona iGama lami likhulu phakathi kwezizwe. Kuzo zonke izindawo iGama lami lilethelwa impepho neminikelo ehlanzekileyo, ngokuba likhulu iGama lami ezizweni,” kusho uSimakade Wamabandla.
“Kodwa nina niyalihlambalaza ngokukhuluma kwenu nithi: ‘Itafula leNkosi lingcolile, nokudla kwalo kudelelekile.’
Niyasho futhi nithi: ‘Saze sakhathala bo! qede nilinximfele,’ ” kusho uSimakade Wamabandla. “Niletha izilwane ezebiwe, eziqhugayo nezigulayo, nethule umnikelo, ngiyakukwemukela yini lokho esandleni senu na?” kusho uSimakade.
“Makaqalekiswe oyiqili, okukhona iduna emhlanjini wakhe, afunge, ahlabele iNkosi okunesici, ngokuba ngiyinkosi enkulu, negama lami liyesabeka phakathi kwezizwe,” kusho uSimakade Wamabandla.
“Manje lo myalo uqondene nani baphristi.
Uma ningaleli, uma ningazimiseli enhliziyweni ukuhlonipha iGama lami, ngiyakunithumelela isiqalekiso, ngiqalekise izibusiso zenu, impela sengiziqalekisile, ngokuba anizimisele enhliziyweni, kusho uSimakade Wamabandla.
Niyabona-ke, ngiyakusola isizukulwane senu, ngithele umswane ebusweni benu, umswane wemikhosi yenu, niyiswe kude kanye nawo.
Niyakukwazi ukuthi nginithumelele lo myalo ukuze kuqhubeke isivumelwano sami noLevi,” kusho uSimakade Wamabandla.
“Isivumelwano sami naye sasingukuphila nokuthula, ngamnika lokho ukuba angihloniphe, wangihlonipha, futhi walesaba iGama lami.
Imfundiso yeqiniso yayisemlonyeni wakhe, okungalungile akutholakalanga ezindebeni zakhe. Wahamba nami ngokuthula nangobuqotho, wasusa abaningi esonweni.
Phela izindebe zomphristi kufanele zilondoloze ulwazi; abantu kumele bafune imfundiso emlonyeni wakhe, ngokuba uyisithunywa sikaSimakade Wamabandla.
Kodwa nina nichezukile endleleni, nakhubekisa abaningi ngemfundiso yenu; nasephula isivumelwano sikaLevi,” kusho uSimakade Wamabandla.
“Ngalokho-ke Mina nginenze nadeleleka, nathotshiswa phambi kwabo bonke abantu, ngoba ningazigcinanga izindlela zami, futhi niyenzelela emthethweni.”
“Kanti asinaBaba munye yini thina sonke na? Akamunye yini uNkulunkulu owasidalayo na? Pho sikhohlisanelani omunye nomunye, sihlambalaze isivumelwano sokhokho na?
“UJuda akathembekanga, kwenziwe okunyanyekayo kwa-Israyeli naseJerusalema, ngokuba uJuda uyingcolisile indawo engcwele kaSimakade ayithandayo, uganwe yindodakazi kankulunkulu wabezizwe.
Sengathi uSimakade angamsusa emathendeni akwaJuda umuntu owenza lokhu nalowo ophendulayo emvikela emathendeni akwaJakobe noletha umnikelo kuSikamade Wamabandla.
“Okunye enikwenzayo futhi yilokhu: nilithela ngezinyembezi i-althare likaSimakade, nikhala, nibubula, ngoba engasayinakile iminikelo yenu, futhi engayamukeli ngokuthokoza esandleni senu.
Bese nibuza nithi: ‘Ngani na?’ Ngoba uSimakade ubengufakazi phakathi kwakho nonkosikazi wobusha bakho, wena ongethembekanga kuye, obewumngani wakho nonkosikazi wesivumelwano sakho.
“Kanti uSimakade akabenzanga yini baba nyamanye na? Emoyeni nasenyameni bangabakhe. Kungani babe munye na? Wayefuna ulibo olunobuNkulunkulu. Ngakho-ke qaphela enhliziyweni yakho, ukuba ungamkhohlisi unkosikazi wobusha benu.
“USimakade uNkulunkulu ka-Israyeli uthi: ‘Phela ngiyasizonda isehlukaniso, nozimbathisa ngobudlova bube yingubo yakhe,’ ” kusho uSimakade Wamabandla. Ngalokho-ke qaphelani emoyeni wenu ukuba ningakhohlisi.
Nimkhathazile uSimakade ngamazwi enu. Bese nithi: “Simkhathaze ngani na?” Ngokukhuluma kwenu nithi: “Bonke abenza okubi bahle emehlweni kaSimakade; Yena uyathokoza ngabo,” noma nithi: “Uphi uNkulunkulu wobulungiswa na?”
“Niyabona-ke, sengizakuthumela isithunywa sami; siyakulungisa indlela phambi kwami. INkosi eniyifunayo iyakufika ethempelini layo ngokuphazima kweso; nesithunywa sesivumelwano enithokoza ngaso, bhekani, siyeza,” kusho uSimakade Wamabandla.
“Ngubani ongamela usuku lokufika kwaso na? Ngubani oyakuma lapho sibonakala na? Ngokuba sinjengomlilo womcwengi nanjengensipho yomhlanzi.
Siyakuhlala sicwengisise, sihlanze isiliva. Siyakuhlanza abaLevi sibacwenge njengegolide nesiliva, ukuze banikele iminikelo kuSimakade ngokulunga.
Iyakumthokozisa uSimakade iminikelo yakwaJuda neyaseJerusalema njengasezinsukwini zasemandulo naseminyakeni esiyadlula.
“Ngiyakusondela kini ukuzokwehlulela. Ngiyakushesha ngifakaze ngimelane nabalumbi, iziphingi, abafunga amanga, nababamba umholo womqashwa ngokungafanele, bacindezele abafelokazi nezintandane, babaphathe kabi abafokazi, futhi nami bangangesabi,” kusho uSimakade Wamabandla.
“Ngokuba Mina Simakade angiguquki, nani madodana kaJakobe anikapheli nya.
Kusukela ezinsukwini zokhokho benu niphambukile ezimisweni zami, nangazigcina. Buyelani kimi, nami ngizobuyela kini,” kusho uSimakade Wamabandla. Kodwa niyabuza nithi: “Sizobuyela kanjani na?”
“Umuntu angamqola yini uNkulunkulu na? Nokho niyangiqola. “Bese nibuza nithi: ‘Sikuqole kanjani na?’ “Ngokweshumi nangeminikelo.
Niqalekisiwe ngesiqalekiso, niyangiqola sizwe ngothi lwenu.
Lethani konke okweshumi endlini yengcebo, ukuze kube nokudla endlini yami, ake ningivivinye ngalokhu, ukuthi ngeke yini nginivulele amafasitela asezulwini, nginithululele isibusiso kuze kungabi bikho ndawo eyanele,” kusho uSimakade Wamabandla.
“Ngiyakunivimbela isikhonyane ukuba singaziqothuli izitshalo zenu ezivela emhlabathini, nemivini yenu ingabi ngengatheliyo emasimini,” kusho uSimakade Wamabandla.
“Zonke izizwe ziyakuthi kini nibusisiwe, ngokuba nina niyakuba yizwe elithokozisayo,” kusho uSimakade Wamabandla.
“Amazwi enu angigxekile,” kusho uSimakade. “Kodwa niyabuza nithi: ‘Sikhulume sathini ngawe na?’
“Nithe: ‘Akusizi ngalutho ukukhonza uNkulunkulu; sizuzeni ngokugcina imiyalo yakhe nokuthi sihambe silila phambi kukaSimakade Wamabandla na?
Kodwa manje sesithi babusisiwe abaziqhenyayo, impela labo abenza okubi bayaphumelela; nalabo abalinga uNkulunkulu bayaphunyuka.’ ”
Kuthi lapho abamesabayo uSimakade uma bekhuluma bodwa omunye nomunye; uSimakade akulalelisise, akuzwe lokho, bese kubhalwa phambi kwakhe encwadini yokukhumbula abamesabayo uSimakade, labo abalihloniphayo iGama lakhe.
USimakade Wamabandla uthi: “Bayakuba ngabami, ngosuku engiyakwenza ngalo ifa lami, ngiyakubazwela, njengomuntu ezwela indodana yakhe emsebenzelayo.
Niyakubuye futhi nehlukanise kahle phakathi kolungileyo nongalungile, phakathi kokhonza uNkulunkulu nongamkhonzi.”
“Phela bhekani nje, luyeza usuku, luvutha njengeziko. Bonke abazigqajayo nabo bonke abenza okubi bayakuba ngamabibi. Lolo lusuku oluzayo luyakubashisa, aluyukubashiyela mpande nagatsha,” kusho uSimakade Wamabandla.
“Kodwa kini enilesabayo iGama lami, kuyakuphuma ilanga lokulunga, linokuphilisa emaphikweni alo. Niyakuphuma, nitshakadule njengamathole esibayeni.
Niyakugxoba abangalungile, ngokuba bayakuba wuthuli phansi kwezinyawo zenu ngosuku engiyakukwenza ngalo,” kusho uSimakade Wamabandla.
“Khumbulani umthetho kaMose inceku yami engamyala ngawo eHorebhe mayelana no-Israyeli wonkana, oyizimiso nezehlulelo.”
“Niyabona-ke, ngiyakunithumelela u-Eliya umphrofethi, lungakafiki usuku lukaSimakade olukhulu nolwesabekayo.
Uyophendula izinhliziyo zoyise kubantwana nezinhliziyo zabantwana koyise; funa ngifike ngishaye izwe ngiliqothule.”
Nantu uhla lozalo okwavela kulo uJesu Khristu, indodana kaDavide, indodana ka-Abhrahama.
U-Abhrahama wazala u-Isaka, u-Isaka wazala uJakobe, uJakobe wazala uJuda nabafowabo;
uJuda wazala uFaresi noZara kuThamari; uFaresi wazala u-Esiromu, u-Esiromu wazala u-Aramu,
u-Aramu wazala u-Aminadaba, u-Aminadaba wazala uNasoni, uNasoni wazala uSalimoni;
uSalimoni wazala uBhowazi kuRakhabi, uBhowazi wazala u-Obhede kuRuthe, u-Obhede wazala uJesayi;
uJesayi wazala uDavide, inkosi. UDavide wazala uSolomoni kumka-Uriya;
uSolomoni wazala uRehobhowamu, uRehobhowamu wazala u-Abiya, u-Abiya wazala u-Asafa;
u-Asafa wazala uJehoshafathi, uJehoshafathi wazala uJoramu, uJoramu wazala u-Uziya;
u-Uziya wazala uJothamu, uJothamu wazala u-Ahazi, u-Ahazi wazala uHezekiya;
uHezekiya wazala uManase, uManase wazala u-Amoni, u-Amoni wazala uJosiya;
uJosiya wazala uJekhoniya nabafowabo ngesikhathi abakwa-Israyeli bethunjelwa eBhabhiloni.
Kwathi sebethunjelwe eBhabhiloni; uJekhoniya wazala uSalithiyeli, uSalithiyeli wazala uZerubhabhele;
uZerubhabhele wazala u-Abhiyudi, u-Abhiyudi wazala u-Eliyakhimi, u-Eliyakhimi wazala u-Azori;
u-Azori wazala uZadoki, uZadoki wazala u-Akhimi, u-Akhimi wazala u-Eliyudi;
u-Eliyudi wazala u-Eleyazare, u-Eleyazare wazala uMathani, uMathani wazala uJakobe;
uJakobe wazala uJosefa, indoda kaMariya; yena wazala uJesu okuthiwa uKhristu.
Zinjalo-ke izizukulwane zonke kusukela ku-Abhrahama kuya kuDavide; ziyizizukulwane ezili-14; ezisukela kuDavide kuze kube yisikhathi sokuthunjelwa eBhabhiloni, ziyizizukulwane ezili-14; nezisukela esikhathini sokuthunjelwa eBhabhiloni kuze kube yisikhathi sikaKhristu, ziyizizukulwane ezili-14.
Ukuzalwa kukaJesu kwaba kanje: uMariya unina kaJesu wayesethenjiswe umendo uJosefa; bengakahlangani, uMariya watholakala esekhulelwe ngokukaMoya oNgcwele.
Kepha uJosefa, indoda yakhe, ngenxa yokuba engumuntu olungileyo, akathandanga ukumthela ngehlazo, wayefuna ukuhlukana naye ngasese.
Kuthe esazindla ngalokhu; bheka kwabonakala kuye ingelosi yeNkosi ephusheni, ithi: “Josefa, ndodana kaDavide, ungesabi ukumthatha uMariya abe ngumkakho, ngokuba lokho akukhulelweyo kungokukaMoya oNgcwele.
Uzakuzala iNdodana, uyiqambe igama uthi nguJesu, ngokuba nguye oyakusindisa abantu bakhe ezonweni zabo.”
Konke lokho kwenzeka ukuze kugcwaliseke okwakhulunywa yiNkosi ngomphrofethi, yathi:
“Intombi iyakukhulelwa, izale indodana; bayakuyiqamba igama bathi ngu-Immanuweli,” okusho ukuthi: “UNkulunkulu unathi.”
UJosefa esevukile ebuthongweni, wenza njengalokhu imyalile ingelosi yeNkosi, wamthatha umkakhe;
akazange alale naye, waze wazala indodana; wayiqamba igama wathi nguJesu.
UJesu esezelwe eBhethlehema eJudiya ngezinsuku zokubusa kukaHerode inkosi; bheka, kwafika izazi eJerusalema, zivela empumalanga, zathi:
“Uphi lowo ozelwe eyinkosi yabaJuda na? Ngokuba siyibonile inkanyezi yakhe empumalanga, ngakho-ke size ukuzokhuleka kuye.”
UHerode, inkosi, esekuzwile lokho wakhathazeka nalo lonke iJerusalema.
Waqoqa bonke abaphristi abakhulu nezazimthetho zesizwe, wabuza kubo ukuthi uKhristu uzakuzalelwa kuphi.
Bathi kuye: “EBhethlehema eJudiya, ngokuba kulotshiwe kanjalo ngomphrofethi, ukuthi:
“ ‘Nawe Bhethlehema, lizwe lakwaJuda awumncinyane kubabusi bakwaJuda, ngokuba kuwe kuyakuvela umbusi oyakwelusa isizwe sami u-Israyeli.’ ”
UHerode wayesezibiza ngasese izazi, wazibuzisisa ngesikhathi inkanyezi ebonakale ngaso,
wazithuma eBhethlehema, wathi: “Hambani nifike nibuzisise ngomntwana, kuyothi nxa nimtholile ningibikele ukuze nami ngiye ngiyokhuleka kuye.”
Seziyizwile inkosi, zaqhubeka nohambo. Inkanyezi ezayibona empumalanga yahamba phambi kwazo, yaze yafika yema phezu kwalapho ekhona umntwana.
Zathi zingayibona inkanyezi, zathokoza ngokuthokoza okukhulu kakhulu.
Zase zingena endlini, zabona umntwana nonina uMariya, zawa phansi, zakhuleka kuye. Zavula amagugu azo, zamkhunga ngezipho: igolide, amakha, nenhlaka.
Emveni kokuba sezixwayisiwe ngephupho ukuba zingabuyeli kuHerode, zaphindela ezweni lakubo ngenye indlela.
Kuthe sezihambile izazi; bheka, ingelosi yeNkosi yabonakala kuJosefa ngephupho, yathi: “Vuka uthathe umntwana nonina, ubalekele eGibhithe, uhlale khona, ngize ngikutshele, ngokuba uHerode uzakumfuna umntwana ukuze ambulale.”
Wavuka khona ebusuku wathatha umntwana nonina, baya eGibhithe.
Wahlala khona, waze wakhothama uHerode ukuze kugcwaliseke okwashiwo yiNkosi ngomphrofethi, yathi: “Ngayibiza indodana yami ukuba iphume eGibhithe.”
Kwathi ukuba uHerode abone ukuthi izazi zimshaye ngemfe iphindiwe, wathukuthela kakhulu. Wathumela, wabulala bonke abantwana besilisa baseBhethlehema, nasezindaweni zonke ezakhelene nalo, ababeneminyaka emibili nangaphansi, njengokwesikhathi izazi ezazimtshele sona.
Ngakho-ke kwagcwaliseka okwakhulunywa nguJeremiya, umphrofethi, ukuthi:
“Kwezwakala izwi eRama, ukukhala nokulila okukhulu, uRaheli ekhalela abantwana bakhe, engavumi ukududuzwa, ngokuba bengasekho.”
Esekhotheme uHerode; bheka, ingelosi yeNkosi yabonakala ngephupho kuJosefa eGibhithe,
yathi: “Vuka uthathe umntwana nonina, uye kwa-Israyeli, ngokuba ababezingela impilo yomntwana sebefile.”
UJosefa wavuka, wathatha umntwana nonina, waya kwa-Israyeli.
Kepha esezwile ukuthi sekubusa u-Arikhelawusi, indodana kaHerode, eJudiya, wesaba ukuya khona. Esexwayisiwe ngephupho, waya eGalile.
Wafika khona wakha emzini okuthiwa yiNazaretha ukuze kugcwaliseke okwashiwo ngabaphrofethi ukuthi: “Uyakubizwa ngokuthi umNaziri.”
Ngaleyo mihla kwavela uJohane uMbhabhadisi eshumayela ehlane eJudiya,
ethi: “Phendukani, ngokuba umbuso wezulu ususondele!
Nguye lo umphrofethi u-Izaya akhuluma ngaye, ethi: “ ‘Izwi lomemeza ehlane, lithi: “Lungisani indlela yeNkosi, nenze imikhondo yayo iqonde!” ’ ”
UJohane wayenengubo yoboya bekameli noqhotho lwesikhumba okhalo lwakhe. Wayedla izinkumbi noju lwasendle.
Kweza kuye iJerusalema, nalo lonke iJudiya, nazo zonke izifunda ezizungeze iJordani,
babhabhadiswa nguye emfuleni iJordani, bevuma izono zabo.
Kepha kwathi lapho ebona abaFarisi nabaSadusi abaningi beza embhabhadisweni, wathi kubo: “Nzalo yezinyoka, ngubani onixwayise ukuba nibalekele intukuthelo ezayo na?
Ngakho-ke vezani izithelo ezifanele ukuphenduka.
Ningacabangi ukuthi nizakuthi phakathi kwenu: ‘Sinobaba u-Abhrahama,’ ngokuba ngithi kini: uNkulunkulu angamvusela abantwana u-Abhrahama kulawa matshe.
Izembe selibekiwe empandeni yemithi, ngakho-ke yonke imithi engatheli izithelo ezinhle iyanqunywa, iphonswe emlilweni.
“Mina nginibhabhadisa ngamanzi, kube ngukuphenduka. Kepha oza emva kwami, unamandla kunami, engingafanele ukuthukulula izicathulo zakhe. Uzakunibhabhadisa ngoMoya oNgcwele nangomlilo.
Yena ombenge yakhe yokwela isesandleni sakhe; uzakushanelisisa isibuya sakhe, abuthele amabele enqolobaneni yakhe, kodwa amakhoba uzakuwashisa ngomlilo ongacimekiyo.”
Kwafika uJesu evela eGalile, weza kuJohane eJordani ukuze abhabhadiswe nguye.
Kepha uJohane wazama ukumenqabela, ethi: “Yimi engidinga ukubhabhadiswa nguwe, kepha Wena uza kimi na?”
UJesu waphendula, wathi kuye: “Vuma manje, ngokuba kusifanele ukugcwalisa kanjalo ukulunga konke.” Ngakho-ke wamvumela.
UJesu esebhabhadisiwe, waphuma masinyane emanzini; bheka, izulu lavuleka, wabona uMoya kaNkulunkulu ehla njengejuba, ehlela phezu kwakhe.
Kwase kuzwakala izwi ezulwini, lithi: “Lo uyiNdodana yami ethandekayo, engithokozile ngayo.”
UJesu wayeseholelwa nguMoya ehlane ukuba alingwe nguSathane.
Kwathi esezile ukudla izinsuku ezingama-40 nobusuku obungama-40, ekugcineni walamba.
Kwase kufika umlingi, wathi kuye: “Uma uyiNdodana kaNkulunkulu, yisho kulawa matshe abe yizinkwa.”
Kepha uJesu waphendula wathi: “Kulotshiwe ukuthi: ‘Akusinkwa sodwa umuntu angaphila ngaso, kodwa ngamazwi wonke aphuma emlonyeni kaNkulunkulu.’ ”
USathane wamthatha, wamyisa emzini ongcwele, wammisa esiqongweni sethempeli,
wathi kuye: “Uma uyiNdodana kaNkulunkulu, ziphonse phansi, ngokuba kulotshiwe ukuthi: “ ‘Uyakuyala izingelosi zakhe ngawe, zikuthwale ngezandla, funa unyawo lwakho luqhuzuke etsheni.’ ”
UJesu wathi kuye: “Kulotshiwe futhi ukuthi: ‘Ungayilingi iNkosi uNkulunkulu wakho.’ ”
USathane wabuye wamyisa entabeni ende kakhulu, wamkhombisa imibuso yonke yomhlaba nenkazimulo yayo;
wathi kuye: “Konke lokhu ngizakukunika khona, uma ungikhothamela, ukhuleke kimi.”
UJesu wayesethi kuye: “Suka, Sathane, ngokuba kulotshiwe ukuthi: ‘Wokhuleka eNkosini uNkulunkulu wakho, umkhonze Yena yedwa.’ ”
USathane wayesesuka kuye; kwafika izingelosi zamkhonza.
Kuthe uJesu esezwile ukuthi uJohane uboshiwe, wahamba waya eGalile.
Wasuka eNazaretha, wayohlala eKhaphernawume elingasolwandle, ezifundeni kwaZebuloni nakwaNafethali
ukuze kugcwaliseke okwakhulunywa ngo-Izaya umphrofethi, ukuthi:
“Izwe lakwaZebuloni nelakwaNafethali elisemgwaqweni oya olwandle phesheya kweJordani, iGalile labezizwe;
isizwe esasihlezi ebumnyameni sibonile ukukhanya okukhulu; nababehlezi ezweni esigayegayeni sethunzi lokufa, ukukhanya kubakhanyisele.”
Kusukela ngaleso sikhathi, uJesu waqala ukushumayela, ethi: “Phendukani, ngokuba umbuso wezulu ususondele.”
Kwathi ehamba ngasolwandle iGalile, wabona izelamani ezimbili, uSimoni okuthiwa nguPhethro no-Andreya umfowabo, bephonsa inetha olwandle, ngokuba babengabadobi.
Wathi kubo: “Wozani, ngilandeleni; ngiyakunenza abadobi babantu.”
Bashiya amanetha abo ngokushesha, bamlandela.
Esedlulele phambili, wahlangana nezelamani ezimbili, uJakobe kaZebedewu noJohane umfowabo, besesikebheni noyise uZebedewu, belungisa amanetha abo; wababiza.
Base beshiya masinyane isikebhe noyise, bamlandela.
Walihamba lonke iGalile efundisa emasinagogeni abo, eshumayela ivangeli lombuso, ephilisa abantu ezifweni zonke nasebuthakathakeni bonke.
Udumo lwakhe lwasabalala kulo lonke iSiriya. Baletha kuye bonke abagulayo ababephethwe yizifo ngezifo nezinhlungu, ababehlukunyezwa futhi bekhwelwe ngamadimoni, abanesithuthwane, nababefe uhlangothi, wabaphulukisa.
Izixuku eziningi zamlandela kusukela eGalile, eDekapholi, eJerusalema, eJudiya nangaphesheya kweJordani.
Kwathi uJesu ebona izixuku, wenyukela entabeni; esehlezi phansi, abafundi bakhe beza kuye.
Wayesevula umlomo, waqala ukubafundisa, ethi:
“Babusisiwe abampofu emoyeni, ngokuba umbuso wezulu ungowabo.
Babusisiwe abakhalayo, ngokuba bayakududuzwa.
Babusisiwe abamnene, ngokuba bayakudla ifa lomhlaba.
Babusisiwe abalambele, bomele ukulunga, ngokuba bayakusuthiswa.
Babusisiwe abanesihawu, ngokuba bayakuhawukelwa.
Babusisiwe abanenhliziyo ehlanzekileyo, ngokuba bayakumbona uNkulunkulu.
Babusisiwe abalamulayo, ngokuba bayakuthiwa ngabantwana bakaNkulunkulu.
Babusisiwe abazingelwa ngenxa yokulunga, ngokuba umbuso wezulu ungowabo.
“Nibusisiwe nxa benithuka, benizingela, bekhuluma konke okubi ngani, beqamba amanga ngenxa yami.
Jabulani, nithokoze ngokuba umvuzo wenu mkhulu ezulwini, ngokuba babazingela kanjalo abaphrofethi abanenduleleyo.”
“Nina ningusawoti womhlaba, kepha uma usawoti uduma, ubusawoti bovuswa ngani na? Awunamsebenzi walutho, kuphela ukuba ulahlwe ngaphandle, unyathelwe ngabantu.
“Nina ningukukhanya kwezwe. Umuzi owakhiwe entabeni ungesitheke.
Umuntu akasokheli isibani asibeke phansi kwesitsha, kodwa usifaka othini ukuze sibakhanyisele bonke abasendlini.
Kanjalo, makukhanye ukukhanya kwenu phambi kwabantu, ukuba babone imisebenzi yenu emihle, bamdumise uYihlo osezulwini.
“Ningasho ukuthi ngizochitha umthetho nabaphrofethi. Angizelanga ukuzochitha, kodwa ngize ukuzogcwalisa.
Ngokuba ngiqinisile ngithi kini: kuyokwedlula izulu nomhlaba, kodwa akusoze kwadlula nalinye igama, nasicashana sinye somthetho, kuze kufezeke konke.
“Ngakho-ke oweqa owodwa kule miyalelo emincinyane, afundise abantu kanjalo, uyakuthiwa omncinyane embusweni wezulu; kepha oyigcinayo, ayifundise, lowo uyakuthiwa mkhulu embusweni wezulu.
Ngokuba ngithi kini: uma ukulunga kwenu kungadluli okwezazimthetho nokwabaFarisi, anisoze nangena embusweni wezulu.
“Nizwile, kwathiwa kwabasemandulo: ‘Ungabulali; yilowo nalowo obulalayo uyakuba necala ehlulelwe.’
Kepha Mina ngithi kini: yilowo nalowo othukuthelela umfowabo, uyakuba necala ayokwehlulelwa ngalo. Nalowo othi kumfowabo: ‘Silima,’ uyakuba necala emphakathini, nalowo othi: ‘Siwula,’ kumfowabo uyakuba necala, aphonswe esihogweni somlilo.
“Ngakho-ke nxa uletha umnikelo wakho e-althare, bese ukhumbula lapho ukuthi umfowenu ukubambele igqubu,
wushiye lapho phambi kwe-althare umnikelo wakho, uhambe ubuyisane nomfowenu kuqala, andukuba uzonikela umnikelo wakho.
“Shesha uzwane nolwa nawe nisesendleleni, funa olwa nawe akunikele kumehluleli, umehluleli akunikele esikhonzini, uphonswe ejele.
Ngiqinisile ngithi kuwe: kawusoze waphuma khona, uze ukhiphe ifadingi lokugcina.
“Nizwile, kwathiwa: ‘Ungaphingi.’
Kepha Mina ngithi kini: yilowo nalowo obuka owesifazane, amkhanuke, usephingile naye enhliziyweni yakhe.
Uma iso lakho lesokunene likukhubekisa, likhiphe, ulilahle, ngokuba kungcono kuwe ukuba kubhubhe sibe sinye ezithweni zakho, kunokuba wonke umzimba wakho uphonswe esihogweni.
Noma lapho isandla sakho sokunene sikukhubekisa, sinqume, usilahle, ngokuba kungcono kuwe ukuba kubhubhe sibe sinye ezithweni zakho, kunokuba wonke umzimba wakho uphonswe esihogweni.
“Kwathiwa: ‘Yilowo nalowo olahla umkakhe makamnike incwadi yesehlukaniso.’
Kepha Mina ngithi kini: yilowo nalowo olahla umkakhe kungengenxa yokuphinga, umenza aphinge, noganwa ngolahliweyo, uyaphinga.
“Nizwile futhi, kwathiwa kwabasendulo: ‘Ungafungi amanga, kepha uqinise izifungo zakho eNkosini.’
Kepha Mina ngithi kini: ningafungi nakanye, noma izulu, ngokuba liyisihlalo sobukhosi sikaNkulunkulu,
noma umhlaba, ngokuba uyisenabelo sezinyawo zakhe, noma iJerusalema, ngokuba lingumuzi weNkosi enkulu.
Ungafungi nekhanda lakho, ngokuba awunakuphendula nalunye unwele lube mhlophe noma lube mnyama.
Kepha izwi lenu malibe ngukuthi: yebo, yebo, noma qhabo, qhabo. Okudlula lapha kuvela komubi.
“Nizwile kwathiwa: ‘Iso ngeso, izinyo ngezinyo.’
Kepha Mina ngithi kini: ningamelani nokubi, kodwa uma umuntu ekumukula esihlathini sokunene, mphendulele nesinye.
Nofuna ukukumangalela, akwemuke ingubo, mnike nejazi.
Nosuke ekucindezela ukuba uhambe imayela libe linye, hamba naye abe mabili.
Muphe ocela utho kuwe, ungamlanduleli ofuna ukutsheleka kuwe.
“Nizwile kwathiwa: ‘Wothanda umakhelwane wakho, uzonde isitha sakho.’
Kepha Mina ngithi kini: thandani izitha zenu, nibabusise abaniqalekisayo, nibaphathe kahle abanizondayo, nibakhulekele abanizingelayo
ukuze nibe ngabantwana bakaYihlo osezulwini. Ngokuba Yena uphumisa ilanga lakhe phezu kwababi nabahle, anise imvula yakhe phezu kwabalungileyo nabangalungile.
Ngokuba uma nithanda abanithandayo, ninamvuzo muni na? Abenzi yini kanjalo nabathelisi na?
Nalapho nibingelela abafowenu kuphela, yini ebalulekile eniyenzayo ngalokho na? Kanti abenzi yini kanjalo nabezizwe na?
Yibani ngabapheleleyo, njengalokhu noYihlo wasezulwini uphelele.”
“Kepha qaphelani, ningenzi ukulunga kwenu phambi kwabantu ukuze nibonwe yibo, funa ningabi nawo umvuzo kuYihlo osezulwini.
“Ngakho-ke nxa upha ompofu, ungashayi icilongo utshela abanye, njengalokhu kwenza abazenzisi emasinagogeni nasemigwaqweni ukuze badunyiswe ngabantu. Ngiqinisile ngithi kini: sebewamukele umvuzo wabo.
Kepha nxa upha odingayo, isandla sakho sokhohlo masingakwazi okwenziwa ngesokunene,
ukuze ukupha kwakho kube sekusithekeni; noYihlo obona ekusithekeni uzakukuvuza.”
“Nalapho nikhuleka, ningabi njengabazenzisi, ngokuba bayathanda ukukhuleka bemi emasinagogeni nasezinhlanganweni zezindlela ukuba babonwe ngabantu. Ngiqinisile ngithi kini: sebewamukele umvuzo wabo.
Kepha nxa ukhuleka, ngena ekamelweni lakho, uthi usuvale umnyango wakho, ukhuleke kuYihlo osekusithekeni; uYihlo obona ekusithekeni uzakukuvuza.
Kepha uma nikhuleka, ningathemelezi njengabezizwe, ngokuba bacabanga ukuthi bayakuzwakala ngokukhuluma kwabo okuningi.
Ngakho-ke ningabi njengabo, ngokuba uYihlo uyakwazi enikuswelayo ningakakuceli.
Ngakho-ke anokhuleka kanje: “ ‘Baba wethu osezulwini, malingcweliswe igama lakho;
mawufike umbuso wakho; mayenziwe intando yakho emhlabeni njengasezulwini;
siphe namuhla isinkwa sethu semihla ngemihla;
sithethelele amacala ethu, njengalokhu nathi sibathethelela abanecala kithi;
ungasingenisi ekulingweni, kodwa usikhulule kokubi; ngokuba umbuso ungowakho, namandla, nenkazimulo, kuze kube phakade. Amen.’
“Ngokuba uma nithethelela abantu iziphambeko zabo, noYihlo wasezulwini uyakunithethelela nani.
Kepha uma ningabathetheleli abantu, noYihlo akayukunithethelela iziphambeko zenu.
“Futhi nxa nizila ukudla, ninganyukubali njengabazenzisi, ngokuba bayabipha, ukuze babonwe ngabantu ukuthi bazilile. Ngiqinisile ngithi kini: sebewamukele umvuzo wabo.
Kepha, nxa uzila, gcoba ikhanda lakho, ugeze ubuso bakho,
ukuze ungabonakali kubantu ukuthi uzilile, kodwa kuYihlo osekusithekeni; uYihlo obona ekusithekeni uzakukuvuza.”
“Ningazibekeleli ingcebo emhlabeni, lapho inokoniwa khona yinundu nokugqwala, nalapho amasela efohla khona, ebe.
Kepha zibekeleni ingcebo ezulwini, lapho inundu nokugqwala kungoni khona, nalapho amasela engafohli khona, ebe.
Ngokuba lapho kukhona ingcebo yakho, nenhliziyo yakho iyakuba khona lapho.
“Isibani somzimba yiso. Ngakho-ke uma iso lakho lilihle, umzimba wakho wonke uzakukhanya.
Kepha uma iso lakho lilibi, umzimba wakho wonke uzakuba mnyama. Ngakho-ke uma ukukhanya okukuwe kungubumnyama, bukhulu kangakanani ubumnyama!
“Akekho ongakhonza amakhosi amabili. Ngokuba uyakuzonda enye, athande enye; noma abambelele kwenye, ayedelele enye. Ningeke nakhonza uNkulunkulu noMamona.
“Ngalokho-ke ngithi kini: ningakhathazeki ngokuphila kwenu ukuthi niyakudlani noma niyakuphuzani, nangomzimba wenu ukuthi niyakwembathani. Ukuphila akukukhulu kunokudla, nomzimba kunesembatho na?
Bhekani izinyoni zezulu ukuthi azihlwanyeli, azivuni, azibekeleli ezinqolobaneni, nokho uYihlo osezulwini uyazondla. Nina anizidluli yini kakhulu na?
Ngubani phakathi kwenu okuthi ngokuzikhathaza kwakhe athasisele umzuzwana ebudeni bempilo yakhe na?
“Kungani nikhathazeka ngokokwembatha na? Qaphelani iminduze yasendle ukuthi imila kanjani; kayikhandleki, kayiphothi,
kepha ngithi kini: noSolomoni ebukhazikhazini bakhe bonke wayengembathisile okomunye wayo.
Uma uNkulunkulu embathisa kanjalo utshani basendle obukhona namuhla, ngomuso buphonswe eziko, akayukunembathisa yini kakhulu nina eninokukholwa okuncane na?
Ngakho-ke ningakhathazeki nithi: ‘Siyakudlani?’ noma: ‘Siyakuphuzani?’ noma: ‘Siyakwembathani na?’
Ngokuba konke lokhu kufunwa ngabezizwe; ingani uYihlo wasezulwini uyazi ukuthi niyakudinga konke lokhu.
Kodwa funani kuqala umbuso wakhe nokulunga kwakhe, yikhona konke lokhu kuyakwenezelelwa kinina.
Ngakho-ke ningakhathazeki ngengomuso, ngokuba ingomuso liyakukhathalela okwalo. Inkathazo yosuku yanele lona.”
“Ningahluleli ukuze nani ningahlulelwa.
Ngokuba ngokwahlulela enahlulela ngakho, nani niyakwahlulelwa ngakho, nangesilinganiso enilinganisa ngaso, nani niyakulinganiselwa ngaso.
“Kungani ubona uthi olusesweni lomfowenu, kepha ube ungaluboni ugongolo olusesweni lakho na?
Ungasho kanjani kumfowenu uthi: ‘Ake ngikhiphe uthi olusesweni lakho;’ kube kukhona ugongolo kwelakho iso na?
Mzenzisi, khipha kuqala ugongolo olusesweni lakho, yikhona-ke uzakubonisisa kahle ukuze ukhiphe uthi olusesweni lomfowenu.
“Ningaziniki izinja okungcwele, ningawaphonsi amapharele enu phambi kwezingulube, funa ziwanyathele ngezinyawo, ziphenduke, zinidwengule.
“Celani, khona nizakuphiwa; funani, khona nizakufumana; ngqongqothani, khona nizakuvulelwa.
Ngokuba yilowo nalowo ocelayo uyamukeliswa, nofunayo uyafumana, nongqongqothayo uzakuvulelwa.
“Ngumuphi umuntu kini ongathi, uma indodana yakhe icela isinkwa, ayinike itshe,
noma icela inhlanzi, ayinike inyoka na?
Ngakho-ke uma nina enibabi nikwazi ukubapha abantwana benu izipho ezinhle, kangakanani-ke ukuba uYihlo osezulwini abaphe okuhle labo abacelayo kuye!
Ngakho-ke kukho konke, ngisho nokungakanani enifuna ukuba abantu bakwenze kini, kwenzeni nani kanjalo kubo, ngokuba lokhu kungumthetho nabaphrofethi.
“Ngenani ngesango elincane, ngokuba libanzi isango, inkulu nendlela eholela ekubhujisweni; baningi abangena khona.
Kepha isango lincane nendlela ingumngcingo eholela ekuphileni; bayingcosana abayifumanayo.
“Xwayani abaphrofethi bamanga abeza kini bembathise okwezimvu, kepha ngaphakathi beyizimpisi eziphangayo.
Niyakubazi ngezithelo zabo. Kungakhiwa yini izithelo zomvini emeveni noma amakhiwane ekhakhasini na?
Kanjalo yilowo nalowo muthi omuhle uthela izithelo ezinhle, kepha umuthi omubi uthela izithelo ezimbi.
Umuthi omuhle awukwazi ukuthela izithelo ezimbi, nomuthi omubi ngeke uthele izithelo ezinhle.
Yilowo nalowo muthi ongatheli izithelo ezinhle uyanqunywa, uphonswe emlilweni.
Kanjalo-ke niyakubazi ngezithelo zabo.
“Akusibo bonke abathi kimi: ‘Nkosi, Nkosi,’ abayakungena embusweni wezulu, kodwa kuphela yilowo owenza intando kaBaba osezulwini.
Abaningi bayakuthi kimi ngalolo suku: ‘Nkosi, Nkosi, asiphrofethanga yini ngegama lakho, sakhipha amadimoni ngegama lakho, senza imisebenzi eminingi yamandla ngegama lakho na?’
Khona ngiyakubatshela emehlweni, ngithi: ‘Angizange nginazi; sukani kimi nina benzi bokubi.’
“Ngakho-ke yilowo nalowo owezwayo lawa mazwi ami, awenze, uyakufaniswa nendoda ehlakaniphileyo, eyakha indlu yayo phezu kwedwala.
Layithela imvula, kwafika izikhukhula nezivunguvungu zomoya, zayishaya leyo ndlu, kepha kayiwanga, ngokuba yayisekelwe edwaleni.
Kodwa yilowo nalowo owezwayo lawa mazwi ami, angawenzi, uyakufaniswa nendoda eyisiwula eyakha indlu yayo esihlabathini.
Yafika imvula, kwafika izikhukhula nezivunguvungu zomoya; zayishaya leyo ndlu, yawa, kwaba kukhulu ukuwa kwayo!”
Kwathi uJesu eseqedile ukukhuluma la mazwi, izixuku zamangala ngokufundisa kwakhe,
ngokuba wayebafundisa njengonegunya, kungenjengezazimthetho zabo.
Kwathi lapho uJesu ehla entabeni, walandelwa yizixuku eziningi.
Kwase kuza umuntu onochoko, wakhuleka kuye, wathi: “Nkosi, uma uthanda, ungangihlambulula.”
UJesu welula isandla sakhe, wamthinta, wathi: “Ngiyathanda; hlambuluka.” Wayesehlambuluka ngokushesha ochokweni lwakhe.
UJesu wayesethi kuye: “Qaphela, ungatsheli muntu, kepha hamba uyozibonakalisa kumphristi, unikele ngomnikelo owayalelwa nguMose, kube ngubufakazi kubo.”
Kwathi lapho uJesu engena eKhaphernawume, kweza kuye induna yekhulu, yamnxusa,
yathi: “Nkosi, umfana wami ulele endlini, ufe uhlangothi; usezinhlungwini ezinzima.”
UJesu wayesethi kuyo: “Mina ngizakuza ngimphulukise.”
Kepha induna yekhulu yaphendula yathi: “Nkosi, angifanele ukuba ungangena phansi kophahla lwami, kodwa khipha izwi nje, khona umfana wami uyakusinda.
Ngokuba nami ngingumuntu ophansi komthetho, nginamabutho phansi kwami; ngithi kwelinye: ‘Hamba,’ lihambe; ngithi kwelinye: ‘Woza,’ lize; nasencekwini yami ngithi: ‘Yenza lokhu,’ ikwenze.”
UJesu ekuzwa lokhu wamangala, wayesethi kwababemlandela: “Ngiqinisile ngithi kini: angikaze ngikufumane kumuntu ukukholwa okungaka kwa-Israyeli.
Kepha ngithi kini: baningi abayakuza bevela empumalanga nasentshonalanga, bahlale, badle no-Abhrahama no-Isaka noJakobe embusweni wezulu.
Kepha abantwana bombuso bayakukhishelwa ngaphandle ebumnyameni obungayiwa; lapho kuyakuba khona ukukhala nokugedla amazinyo.”
UJesu wayesethi enduneni yekhulu: “Hamba, makwenzeke kuwe njengokukholwa kwakho.” Umfana wasinda ngalo lelo hora.
UJesu wayesengena endlini kaPhethro, wabona umkhwekazi kaPhethro elele phansi, enomkhuhlane.
Wathinta isandla sakhe, umkhuhlane waphela; wayesevuka, wamkhonza.
Kwathi kusihlwa, baletha kuye abaningi abanamadimoni, wabakhipha omoya ngezwi, wabaphulukisa bonke abagulayo,
ukuze kugcwaliseke okwakhulunywa ngo-Isaya umphrofethi, ukuthi: “Yena wabetshatha ubuthakathaka bethu, wazithwala izifo zethu.”
UJesu ebona isixuku simzungezile, wayala ukuba kuwelelwe ngaphesheya.
Esinye isazimthetho seza kuye, sathi: “Mfundisi, ngizakukulandela, nomaphi lapho uya khona.”
UJesu wayesethi kuso: “Izimpungushe zinemigodi, nezinyoni zezulu zinezidleke, kodwa iNdodana yomuntu kayinandawo lapho ingacamelisa khona ikhanda.”
Kepha omunye wabafundi bakhe wathi kuye: “Nkosi, ngivumele ngihambe ngiyombela ubaba kuqala.”
Kepha uJesu wathi kuye: “Ngilandele, yekela abafileyo bambele abafileyo babo.”
UJesu wayesengena esikebheni, abafundi bakhe bamlandela.
Nakho-ke sekuvuka isiphepho esikhulu olwandle, isikebhe saze sambozwa ngamagagasi, kodwa uJesu wayelele.
Basondela, bamvusa, bethi: “Nkosi, sisindise, siyabhubha.”
UJesu wayesethi kubo: “Yini nesabe kangaka, nina eninokukholwa okuncane na?” Wavuka wayesewukhuza umoya nolwandle, kwaba nokuthula okukhulu.
Abantu bamangala, bathi: “Unhloboni lo muntu olalelwa umoya nolwandle na?”
Kwathi esefikile ngaphesheya ezweni lamaGadara, wahlangana nabantu ababili abanamadimoni, bephuma emathuneni. Babeyingozi kakhulu kangangokuthi kwakungekho muntu owayengalokotha adlule ngaleyo ndlela.
Bezwakala sebememeza bethi: “Ufunani kithi Ndodana kaNkulunkulu na? Uze lapha ukuzosizwisa ubuhlungu, kungakabi yisikhathi na?”
Kwakukhona buqamama umhlambi omkhulu wezingulube, ziklabile.
Amadimoni amncenga, athi: “Uma usikhipha, sithumele singene emhlanjini wezingulube.”
UJesu wathi kuwo: “Hambani.” Ayesephuma, angena ezingulubeni. Bheka, umhlambi wonke wakhalakathela esiweni, waphonseka olwandle, wafela emanzini.
Ababezelusile babaleka, baya emzini, babika konke okwakwenzekile, nalokho okwakwenzeke kwabanamadimoni.
Umuzi wonke waphuma ukuyobona uJesu; kwathi lapho bembona, bamncenga ukuba aphume aphele emingceleni yakwelakubo.
UJesu wangena esikebheni, wawelela ngaphesheya, waya emzini wakubo.
Base beletha kuye umuntu ofe uhlangothi, elele ohlakeni. UJesu ebona ukukholwa kwabo, wathi kofe uhlangothi: “Yima isibindi, ndodana, uthethelelwe izono zakho.”
Abathile kuzazimthetho bakhuluma bodwa, bathi: “Lo muntu uyahlambalaza.”
UJesu eyazi imidlinzo yabo, wathi: “Yini nidlinze okubi ezinhliziyweni zenu na?
Ngokuba yikuphi okulula phakathi kokuthi: ‘Uthethelelwe izono zakho,’ nokuthi: ‘Vuka uhambe’ na?
Kepha ukuze nazi ukuthi iNdodana yomuntu inegunya lokuthethelela izono emhlabeni...,” wathi kofe uhlangothi: “Vuka, uthathe uhlaka lwakho, uye endlini yakho.”
Wavuka, waya endlini yakhe.
Izixuku zikubona lokho zethuka, zamdumisa uNkulunkulu onike abantu igunya elinjalo.
Kuthe uJesu edlula lapho, wabona umuntu okuthiwa nguMathewu ehleli endaweni yokuthelisa, wathi kuye: “Ngilandele.” Wasuka-ke wamlandela.
Kwathi uJesu ehleli esidlweni endlini, kwase kufika abathelisi abaningi nezoni, bahlala, badla naye nabafundi bakhe.
AbaFarisi, bekubona lokho, bathi kubafundi bakhe: “Kwenziwa yini ukuba umfundisi wenu adle nabathelisi nezoni na?”
Kwathi lapho ekuzwa lokho, wathi: “Abaphilileyo abayidingi inyanga, kodwa ngabagulayo kuphela.
Ngakho-ke hambani nifunde ukuthi kusho ukuthini ukuthi: ‘Ngifuna isihawu, hhayi umhlatshelo.’ Ngokuba angizanga ukuzobiza abalungileyo, kodwa izoni.”
Khona kwafika kuJesu abafundi bakaJohane, bathi: “Kungani thina nabaFarisi sizila ukudla, kodwa abafundi bakho bengazili na?”
UJesu wathi kubo: “Ikhetho lingalila yini umyeni esenalo na? Kepha ziyeza izinsuku lapho umyeni eyakususwa kulo; kulapho-ke lizakuzila khona.
Akekho ochibiyela ngendwangu entsha engutsheni endala, ngokuba isichibi sizoyiklebhuka ingubo endala, bese imbobo yanda kakhulu.
Newayini elisha alithelwa ezimvabeni ezindala, funa izimvaba zidabuke, lichitheke iwayini, nezimvaba zonakale. Kepha iwayini elisha balithela ezimvabeni ezintsha, kokubili kulondeke.”
Esakhuluma lokho kubo; kwafika umphathi othile, wakhuleka kuye, wathi: “Indodakazi yami isanda kufa khona manje, kodwa woza, ubeke isandla sakho phezu kwayo, izakuphila.”
UJesu wayesesuka-ke, wamlandela, ekanye nabafundi bakhe.
Kwakukhona owesifazane owayenesifo somopho iminyaka eli-12, wasondela emuva kukaJesu, wathinta umphetho wengubo yakhe.
Ngokuba wayezindla, ethi: “Uma nje ngingathinta ingubo yakhe, ngizakusindiswa.”
UJesu waphenduka, wambona, wathi: “Yima isibindi, ndodakazi; ukukholwa kwakho kukusindisile.” Owesifazane wasinda ngaleso sikhathi.
UJesu esefikile endlini yomphathi, ebona khona ababethi bemitshingo nesixuku esethukile,
wathi kubo: “Dedani, ngokuba intombazane ayifile, kodwa ilele.” Bamhleka usulu.
Kuthe isixuku sesikhishiwe, wangena, wayibamba ngesandla; yavuka intombazana.
Umbiko ngalokhu wasabalala kulo lonke lelo lizwe.
Ngenkathi uJesu edlula lapho, walandelwa yizimpumputhe ezimbili ezazimemeza zithi: “Ndodana kaDavide, sihawukele!”
Esefikile endlini, izimpumputhe zeza kuye. UJesu wathi kuzo: “Niyakholwa yini ukuthi ngingakwenza lokhu na?” Zathi kuye: “Yebo, Nkosi.”
Wayesethinta amehlo azo, wathi: “Makwenzeke kini njengokukholwa kwenu.”
Ayesevuleka amehlo azo. UJesu wazidonsa ngendlebe, wathi: “Qaphelani ukuba lokhu kungaziwa muntu.”
Kepha zathi ziphuma nje, zamdumisa kulo lonke lelo lizwe.
Ngesikhathi ziphuma, kwalethwa kuye umuntu oyisimungulu enamadimoni.
Kuthe selikhishiwe idimoni, isimungulu sakhuluma. Izixuku zamangala, zathi: “Hawu, akukaze kubonwe okunje kwa-Israyeli!”
Kepha abaFarisi, bathi: “Ukhipha amadimoni ngombusi wamadimoni.”
UJesu wahamba imizi yonke nemizana efundisa emasinagogeni abo, eshumayela ivangeli lombuso, ephulukisa bonke abanezifo ezahlukene, nokugula konke.
Kwathi lapho ebona izixuku, waba nesihe ngazo, ngokuba zazikhathazekile, zithithibele njengezimvu ezingenamalusi.
Wayesethi kubafundi bakhe: “Isivuno sikhulu, kodwa izisebenzi ziyingcosana.
Ngakho-ke nxusani iNkosi yokuvuna ukuba ithume izisebenzi, ziye ekuvuneni kwayo.”
UJesu wayesebiza abafundi bakhe abali-12, wabanika igunya phezu komoya abangcolileyo, ukuze babakhiphe. Wabanika nelokuphulukisa izifo zonke nokugula konke.
Nanka amagama abaphostoli abali-12: owokuqala nguSimoni okuthiwa nguPhethro, u-Andreya umfowabo, uJakobe noJohane umfowabo, amadodana kaZebedewu,
uFiliphu, uBhartholomewu, uThomase, uMathewu umthelisi, uJakobe ka-Alifewu, uThadewu,
uSimoni umKhanani, noJuda Iskariyothe, lo owakhaphela uJesu.
Laba abali-12 wabathuma, wabayala wathi: “Ningayi kwabezizwe, ningangeni nasemzini wamaSamariya,
kodwa yanini ezimvini ezilahlekileyo zendlu ka-Israyeli.
Ekuhambeni kwenu shumayelani nithi: ‘Umbuso wezulu ususondele.’
Phulukisani abagulayo, nivuse abafileyo, nihlambulule abanochoko, nikhiphe amadimoni. Namukelisiwe ngesihle, yiphani ngesihle.
Ningaphathi golide, siliva, nathusi emixhakeni yenu.
Ningaphathi kwasikhwama sokwethekela, nabhantshi lesibili, kwazicathulo, kwaludondolo, ngokuba isisebenzi kufanele sinikwe ukudla kwaso.
“Nakunoma yimuphi umuzi noma umuzana eniyakungena kuwo, anocinga ofaneleyo, bese nihlala kuwo, nize nihambe kuleyo ndawo.
Kuyothi lapho ningena kulelo khaya, nibingelele.
Uma lelo khaya lifanele, ukuthula kwenu makube phezu kwalo, kodwa uma lingafanele, ukuthula kwenu makubuyele kini.
Yilowo nalowo ongayukunamukela ezwe amazwi enu, anothi niphuma nje kulelo khaya noma kulowo muzi, nithintithe uthuli ezinyaweni zenu.
Ngiqinisile ngithi kini: kuyakuba ngcono eSodoma naseGomora ngosuku lokwehlulelwa kunakulowo muzi.”
“Bhekani lapha, ngiyanithuma njengezimvu phakathi kwezimpisi, ngakho-ke hlakaniphani njengezinyoka, nibe mnene njengamajuba.
“Kepha xwayani abantu, ngokuba bayakunikhaphela ezigcawini zokwehlulela, banishaye emasinagogeni abo.
Niyakuyiswa phambi kwababusi namakhosi ngenxa yami, kube ngubufakazi kubo nakwabezizwe.
“Kepha kuyakuthi nxa benikhaphela, ningakhathazeki ngokuthi niyakukhuluma nithini, ngokuba niyakuphiwa ngaleso sikhathi eniyakukukhuluma.
Ngokuba akuyinina eniyakukhuluma, kodwa uMoya kaYihlo, nguye oyakukhuluma kini.
“Umuntu uyakumkhaphela ekufeni umfowabo, noyise akhaphele umntwana wakhe. Abantwana bayakuvukela abazali, bababulale.
Niyakuzondwa ngabantu bonke ngenxa yegama lami, kodwa oqiniselayo kuze kube sekupheleni, uyakusindiswa.
Nxa benizingela komunye umuzi, balekelani komunye, ngokuba ngiqinisile ngithi kini: niyakuthi ningakayihambi yonke imizi yakwa-Israyeli, bese ifika iNdodana yomuntu.
“Umfundi akangaphezulu komfundisi wakhe, nenceku kayingaphezulu kwenkosi yayo.
Kwanele uma umfundi enjengomfundisi wakhe, nenceku injengenkosi yayo. Uma umninindlu bembize ngokuthi uBhelzebhule, kakhulu kangakanani abendlu yakhe.
“Ngakho-ke ningabesabi, ngokuba akukho okusitshekelweyo okungayukwambulwa nokufihliweyo okungayukwaziwa.
Lokhu enginitshela khona ebumnyameni, kukhulumeni ekukhanyeni; nalokhu enikuzwayo endlebeni, kumemezeleni phezu kwezindlu.
Ningabesabi ababulala umzimba bengenamandla okubulala umphefumulo, kepha kakhulu mesabeni onamandla okubhubhisa umphefumulo nomzimba esihogweni.
Akuthengiswa yini imizwilili emibili ngendibilishi na? Nokho akukho namunye oyakuwela phansi ngaphandle kwemvume kaYihlo.
Kepha nani, zibaliwe zonke izinwele zekhanda lenu.
Ngakho-ke maningesabi; nina niyayidlula imizwilili eminingi.
“Ngalokho-ke yilowo nalowo oyakungivuma phambi kwabantu, nami ngiyakumvuma phambi kukaBaba osezulwini.
Kepha lowo oyakungiphika phambi kwabantu, nami ngiyakumphika phambi kukaBaba osezulwini.
“Ningasho ukuthi ngize ukuletha ukuthula emhlabeni; angizanga ukuletha ukuthula kepha inkemba.
Yebo, ngize ukuphambanisa umuntu noyise, indodakazi nonina, umalokazana noninazala.
Izitha zomuntu kuyakuba ngabendlu yakhe.
“Othanda uyise nonina kunami, akangifanele; nothanda indodana noma indodakazi kunami, akangifanele;
nalowo ongasithathi isiphambano sakhe angilandele, akangifanele.
Ofumana ukuphila kwakhe, uyakulahlekelwa yikho; olahlekelwa ngukuphila kwakhe ngenxa yami, uyakukufumana.
“Onamukelayo nina, uyangamukela Mina; nongamukelayo Mina, wamukela ongithumileyo.
Owamukela umphrofethi ngokuba engumphrofethi, uyakuzuza umvuzo womphrofethi; nowamukela olungileyo ngokuba lowo elungile, uyakuzuza umvuzo wolungileyo.
Yilowo nalowo oyakuphuzisa abe munye kulaba abancinyane, ngisho inkezo eyodwa nje yamanzi aqandayo, ngokuba lowo engumfundi, ngiqinisile ngithi kini: kasoze alahlekelwa ngumvuzo wakhe.”
Kwathi ukuba uJesu aqede ukuyala abafundi bakhe abali-12, wahamba lapho wayofundisa, futhi eshumayela emizini yakubo.
Kuthe lapho uJohane esejele, ezwa ngemisebenzi kaKhristu wayesethumela ngabafundi bakhe,
wathi kuye: “Unguye yini ozayo, noma silindele omunye na?”
UJesu waphendula wathi kubo: “Hambani nimlandise uJohane ngalokho enikuzwileyo nenikubonileyo:
Izimpumputhe ziyabona, izinyonga ziyahamba, abanochoko bayahlanjululwa, izithulu ziyezwa, abafileyo bayavuswa, nabampofu bashunyayezwa ivangeli.
Ubusisiwe ongayukukhubeka ngenxa yami.”
Kwathi labo bafundi sebehamba, uJesu waqala ukukhuluma ezixukwini ngoJohane, wathi: “Naphuma naya ehlane niyobonani na? Umhlanga ontengantengiswa ngumoya na?
Kanti naphuma ukuyobonani na? Umuntu owembethe ezinofonofo na? Phela abembethe ezinofonofo basezindlini zamakhosi.
Kanti naphumelani na? Ukuyobona umphrofethi na? Yebo, ngithi kini: owedlula umphrofethi.
Nguye okulotshwe ngaye ukuthi: “ ‘Ngiyakuthuma isithunywa sami phambi kobuso bakho, esiyakulungisa indlela yakho, phambi kwakho.’
“Ngiqinisile ngithi kini: akukho namunye osewake wavela kwabazelwe ngabesifazane omkhulu kunoJohane uMbhabhadisi; kodwa omncane embusweni wezulu, mkhulu kunaye.
Kepha kusukela emihleni kaJohane uMbhabhadisi kuze kube manje, umbuso wezulu uyaphangwa, nabawuphangayo bayawuhlwitha.
Ngokuba bonke abaphrofethi bomthetho baphrofetha kwaze kwafika uJohane.
Uma nivuma ukukwamukela lokho, lo ungu-Eliya obezakufika.
Onezindlebe makezwe.
“Kepha ngizakusifanisa nani lesi sizukulwane na? Sifana nezingane ezihleli esigcawini zimemeza ezinye zithi:
‘Sinishayele imitshingo, kodwa anisinanga; sahlabelela ingoma yesililo, kodwa anililanga.’
“Phela uJohane wafika engadli, engaphuzi, kodwa bathi: ‘Unedimoni.’
INdodana yomuntu yafika yadla, yaphuza, kodwa bathi: ‘Bhekani, umuntu oyisiminzi nenkolotshe, umngani wabathelisi nezoni.’ Kepha ukuhlakanipha kukaNkulunkulu kubonakala ukuthi kuyiqiniso ngemiphumela yakho.”
Wayeseqala ukuyisola imizi okwakwenziwe kuyo imisebenzi yakhe yamandla eminingi, ngokuba ingaphendukanga, wathi:
“Maye, kuwe Khorazini! Maye, kuwe Bhethsayida! Ngokuba ukuba le misebenzi yamandla eyenziwe kini, yayenziwe eThire naseSidoni, ngabe kudala yambatha isaka, yazithela ngomlotha, yaphenduka.
Nokho ngithi kini: kuyakuba ngcono kulo iThire neSidoni ngosuku lokwehlulelwa, kunakinina.
Nawe Khaphernawume, uthi kambe uyakuphakanyiselwa ezulwini na? Phinde, uyakwehliselwa eHayidesi, ngokuba, ukuba imisebenzi yamandla eyenziwe kuwe yayenziwe eSodoma, ngabe lisekhona nanamuhla.
Kepha ngithi kini: kuyakuba ngcono ezweni laseSodoma ngosuku lokwahlulela kunakuwe.”
Kwathi ngaleso sikhathi uJesu wakhuluma wathi: “Ngiyakubonga Baba, Nkosi yezulu nomhlaba, ngokuba ukufihlile lokhu kwabahlakaniphileyo, nakulabo abanokuqonda, kodwa wakwambulela izingane.
Yebo, Baba, ngokuba kwaba kuhle phambi kwakho ukuba kube njalo.
“Konke ngikunikwe nguBaba. Akekho owazi iNdodana, kuphela uYise, futhi akekho owazi uYise, kuphela iNdodana, nalowo iNdodana ethanda ukumambulela.
“Zanini kimi, nina nonke enikhatheleyo nenisindwayo, ngizakuniphumuza.
Bekani ijoka lami phezu kwenu, nifunde kimi, ngokuba ngimnene, ngithobile ngenhliziyo; yikhona imiphefumulo yenu iyakufumana ukuphumula.
Ngokuba ijoka lami alinzima, nomthwalo wami ulula.”
Ngaleso sikhathi uJesu wadabula emasimini kakolo ngosuku lwesabatha. Abafundi bakhe babelambile, baqala ukukha izikhwebu, badla.
AbaFarisi bekubona lokho, bathi kuye: “Awubheke ukuthi abafundi bakho benzani, benza okungavunyelwe ngesabatha.”
Wathi kubo: “Anifundanga yini okwenziwa nguDavide nayehamba nabo mhla elambile,
ukuthi wangena endlini kaNkulunkulu, wadla izinkwa zobukhona okungavunyelwe ukuba azidle, kodwa ezidliwa abaphristi kuphela na?
Futhi anifundanga yini emthethweni ukuthi ngesabatha abaphristi bayona ethempelini, kodwa bangabekwa cala na?
Kepha ngithi kini: kukhona lapha okukhulu kunethempeli.
Kodwa ukuba benazi ukuthi kusho ukuthini ukuthi: ‘Ngifuna isihawu, hhayi umhlatshelo,’ ngabe anibalahlanga labo abangenacala.
Ngokuba iNdodana yomuntu iyinkosi yesabatha.”
UJesu wasuka lapho, wangena esinagogeni labo.
Kwakukhona umuntu owayenesandla esishwabene; bambuza bathi: “Kuvunyelwe yini ukuphilisa ngesabatha na?” Babembuza nje ukuze bammangalele.
Ngakho-ke wathi kubo: “Ngubani kini othi enemvu eyodwa, bese iwela emgodini ngesabatha, ongeyibambe, ayikhiphe lapho na?
Pho-ke umuntu uyedlula kangakanani imvu? Ngakho-ke kuvunyelwe ukwenza okuhle ngesabatha.”
UJesu wayesethi kulowo muntu oshwabene isandla: “Yelula isandla sakho.” Wayeseselula, saphila, safana nesinye.
AbaFarisi baphuma, bafakana imilomo ukuthi bangambhubhisa kanjani.
Kepha uJesu ekwazi lokho wasuka lapho. Abaningi bamlandela, wabaphilisa bonke.
Wabayalisisa ukuba bangakhulumi ngaye,
ukuze kugcwaliseke okwashiwo ngo-Izaya umphrofethi, ukuthi:
“Nansi inceku yami engiyikhethileyo, othandiweyo wami; umphefumulo wami uyathokoza ngaye. Ngiyakufaka uMoya wami kuye, amemezele ukwahlulelwa kwabezizwe.
Akayukudazisana namuntu inkani, akayukuklabalasa, akekho oyakuzwa izwi lakhe emigwaqweni.
Umhlanga ofecekileyo akayukuwaphula, umongo othunqayo akayukuwucima, aze aphumelelise ubulungiswa, bunqobe.
Izizwe ziyakwethembela egameni lakhe.”
Kwase kulethwa kuye onamadimoni, eyimpumputhe futhi eyisimungulu; wamphulukisa, waze wabona, wakhuluma lo obeyisimungulu.
Zonke izixuku zamangala kakhulu, zathi: “Lo akusiyo yini indodana kaDavide na?”
AbaFarisi bekuzwa lokhu, bathi: “Lo ukhipha amadimoni kuphela ngombusi wamadimoni, uBhelzebhule.”
UJesu ekwazi abakucabangayo, wathi kubo: “Yilowo nalowo mbuso owehlukene wodwa uyachitheka, nalowo nalowo muzi noma yindlu eyehlukene yodwa ayiyukuma.
Uma uSathane ekhipha uSathane, kusho ukuthi wehlukene yedwa. Pho umbuso wakhe uyakuma kanjani na?
Uma Mina ngikhipha amadimoni ngoBhelzebhule, amadodana enu awakhipha ngobani na? Ngakho-ke yiwona ayakuba ngabehluleli benu.
Kepha uma Mina ngikhipha amadimoni ngoMoya kaNkulunkulu, kusho ukuthi umbuso kaNkulunkulu usufikile kini.
“Umuntu angangena kanjani endlini yesiqhwaga, aphange impahla yaso, uma engaqalanga ngokubopha isiqhwaga, andukuba aphange indlu yaso na?
“Ongahambisani nami, umelene nami; ongaqoqi nami, uyahlakaza.
Ngakho-ke ngithi kini: zonke izono zabantu nokuhlambalaza kuyakuthethelelwa, kodwa ohlambalaza uMoya akuyukuthethelelwa.
Yilowo nalowo oyakukhuluma izwi elimelene neNdodana yomuntu, uyakuthethelelwa; kodwa lowo oyakukhuluma izwi elimelene noMoya oNgcwele, akayukuthethelelwa kuleli lizwe nakwelizayo.
“Kuphakathi kokuba nithi umuthi muhle, nesithelo sawo sibe sihle; noma nithi mubi, nesithelo sawo sibe sibi; ngokuba umuthi waziwa ngesithelo sawo.
Nzalo yezinyoka, ningakukhuluma kanjani okuhle nibe nibabi na? Ngokuba umlomo ukhuluma okuchichima enhliziyweni.
Umuntu omuhle ukhipha okuhle engcebeni yakhe enhle; nomuntu omubi ukhipha okubi engcebeni yakhe embi.
Kepha ngithi kini: amazwi wonke ayize akhulunywa ngabantu, bayakulanda ngawo ngomhla wokwehlulelwa.
Ngokuba uyakwehlulelwa ngamazwi akho, icala likuthethe, futhi uyakulahlwa ngamazwi akho.”
Kwase kuphendula abathile kuzazimthetho nakubaFarisi, bathi: “Mfundisi, sithanda ukuba usikhombise isibonakaliso esenziwa nguwe.”
Kepha waphendula, wathi kubo: “Isizukulwane esibi nesiphingayo sifuna isibonakaliso, kodwa asiyukunikwa sibonakaliso, kuphela leso sikaJona, umphrofethi.
Njengalokhu uJona wayesesiswini somkhomo izinsuku ezintathu nobusuku obuthathu, kanjalo-ke neNdodana yomuntu iyakuba semathunjini omhlaba izinsuku ezintathu nobusuku obuthathu.
Amadoda aseNineve ayakuma kanye nalesi sizukulwane ekwahlulelweni, asilahle ngecala, ngokuba aphenduka ngokushumayela kukaJona. Lapha kukhona okukhulu kunoJona.
Indlovukazi yaseningizimu nayo iyakuma nalesi sizukulwane ekwahlulelweni, isilahle ngecala. Ngokuba yasuka emikhawulweni yomhlaba izolalela ukuhlakanipha kukaSolomoni. Lapha kukhona okukhulu kunoSolomoni.
“Uma umoya ongcolileyo uphuma kumuntu, uyazula, udabule ezindaweni ezigagadekileyo, ufuna ukuphumula; kodwa ungakufumani.
Bese uthi: ‘Ngizakubuyela endlini yami engaphuma kuyo.’ Usufikile, uyifumana ingenalutho, ishaneliwe futhi ihlotshisiwe.
Uyahamba-ke, ulande eminye imimoya eyisikhombisa emibi ukwedlula wona; ingene ihlale kuyo. Isiphetho salowo muntu sibe sibi kunakuqala. Kuyakuba kanjalo-ke nakulesi sizukulwane esibi.”
Kwathi uJesu esakhuluma nezixuku, unina nabafowabo bema ngaphandle befuna ukukhuluma naye.
Omunye wathi kuye: “Kukhona unyoko nabafowenu abami ngaphandle, bafuna ukukhuluma nawe.”
Kepha uJesu waphendula, wathi kuye: “Ngubani umame, nabafowethu bangobani na?”
Welula isandla sakhe wakhomba abafundi bakhe, wathi: “Niyabona, nangu umame, nabafowethu.
Ngokuba yilowo nalowo owenza intando kaBaba osezulwini, ungumfowethu nodadewethu nomame.”
Ngalolo lusuku uJesu waphuma endlini, wahlala ngasolwandle.
Kwabuthana izixuku eziningi, waze wangena esikebheni, wahlala phansi; isixuku sonke sasimi ogwini.
Wakhuluma kubo okuningi ngemizekeliso, wathi: “Kwake kwaphuma umhlwanyeli wayohlwanyela.
Ekuhlwanyeleni kwakhe enye imbewu yawela ngasendleleni, kwafika izinyoni zezulu zayidla, zayiqeda.
Enye imbewu yawela edwaleni, lapho kwakungenamhlabathi omningi khona. Yamila masinyane, ngokuba yayingekho emhlabathini ojulileyo.
Kepha kwathi lapho seliphumile ilanga, yabuna, ngokuba ingenazimpande ezigxilileyo.
Enye yawela emeveni, ameva akhula, ayiminyanisa.
Enye yawela emhlabathini ovundileyo; yathela izithelo, ngekhulu, ngama-60 nangama-30.
Onezindlebe makezwe.”
Abafundi bakhe beza kuye, bathi: “Ukhulumelani kubo ngemizekeliso na?”
UJesu waphendula, wathi kubo: “Yingokuba nina niphiwe ukwazi izimfihlakalo zombuso wezulu, kodwa bona kabakuphiwanga lokho.
Ngokuba yilowo nalowo onakho uyakuphiwa, kuthi xaxa, kodwa lowo ongenakho uyakwamukwa nalokho anakho.
Yingakho-ke ngikhuluma kubo ngemizekeliso, ukuze bathi bebona, kodwa bangabonisisi; bathi bezwa, kepha bangezwisisi futhi bangaqondi.
Kugcwaliseka kubo isiphrofetho sika-Isaya esithi: “ ‘Niyakuzwa nokuzwa, kepha ningaqondi; niyakubona nokubona, kepha ningabonisisi;
ngokuba inhliziyo yalesi sizwe seyaba lukhuni; bezwa kanzima ngezindlebe, namehlo abo bawacimezile; funa babone ngamehlo, bezwe ngezindlebe, baqonde ngenhliziyo, baphenduke, ngibaphilise.’
“Kepha abusisiwe amehlo enu, ngokuba ayabona; nezindlebe zenu, lokhu ziyezwa.
Ngokuba ngiqinisile ngithi kini: baningi abaphrofethi nabalungileyo ababefisa ukubona lokhu enikubonayo, kodwa abakubonanga; nokuzwa lokhu enikuzwayo, kepha abakuzwanga.
“Lalelani nginichazele ngomzekeliso womhlwanyeli.
Yilowo nalowo ozwa izwi lombuso, angaliqondi, kufika omubi ahlwithe okuhlwanyelwe enhliziyweni yakhe. Leyo ngehlwanyelwe ngasendleleni.
Okuhlwanyelwe edwaleni, yilowo ozwa izwi, alamukele masinyane ngokuthokoza,
kepha kanampande ngaphakathi; ulibamba nje okwesikhashana, kuthi lapho kufika ukuhlupheka nokuzingelwa ngenxa yezwi, akhubeke ngokushesha.
Lokho okuhlwanyelwe emeveni, yilowo ozwa izwi, kuthi iminako yalesi sikhathi nokukhohlisa kwengcebo kuliminyanise izwi, abe ngongatheliyo.
Lokho okuhlwanyelwe emhlabathini ovundileyo, yilowo olizwayo izwi maqede aliqonde, athele izithelo, athele ngekhulu, omunye ngama-60 nomunye ngama-30.”
Wabuye wabatshela omunye umzekeliso, wathi: “Umbuso wezulu ufaniswa nomuntu owahlwanyela imbewu enhle ensimini yakhe;
kuthe abantu besalele, kwafika isitha sakhe, sahlwanyela ukhula phakathi kwamabele, qede sashaya sachitha.
Kwathi lapho amabele esekhahlela, kwavumbuka ukhula.
“Izisebenzi zaya kumninindlu, zathi kuye: ‘Nkosi, awuhlwanyelanga yini imbewu enhle ensimini yakho na? Pho luvelaphi ukhula na?’
“Wathi kuzo: ‘Lokhu kwenziwe ngumuntu oyisitha.’ “Izisebenzi zathi kuye: ‘Uyathanda yini ukuba sihambe siyolusiphula na?’
“Kepha wathi: ‘Qha, funa nithi nxa nisiphula ukhula, nisiphule namabele kanye nalo.
Kuyekeni kukhule kokubili ndawonye, kuze kuvunwe. Ngesikhathi sokuvuna ngiyakuyala abavuni ngithi: buthani kuqala ukhula, nilubophe izinyanda ukuze lushiswe, bese nibuthela amabele enqolobaneni yami.’ ”
Wabuye wabatshela omunye umzekeliso, wathi: “Umbuso wezulu ufana nohlamvu lwesinaphi aluthatha umuntu waluhlwanyela ensimini yakhe;
lona luthi lungoluncane kunazo zonke izimbewu, kodwa lukhule lube lukhulu kunakho konke okumilayo, lube yisihlahla esikhulukazi; zize izinyoni zezulu, zakhele emagatsheni aso.”
Wabuye wabatshela omunye umzekeliso, wathi: “Umbuso wezulu ufana nomuntu wesifazane, owathatha imvubelo wayifaka emicengezini emithathu yempuphu, kwaze kwabila konke.”
UJesu wakukhuluma konke lokhu ezixukwini ngemizekeliso, akukho lutho olunye ake walukhuluma kubo ngaphandle kwemizekeliso,
ukuze kugcwaliseke okwashiwo ngomphrofethi ukuthi: “Ngizakuvula umlomo wami, ngikhulume ngemizekeliso. Ngikhulume izinto ezifihlakeleyo, selokhu kwasekelwa umhlaba.”
UJesu wayesezihlakaza izixuku, waya endlini. Abafundi bakhe basondela kuye, bathi: “Sichazele ngomzekeliso wokhula ensimini.”
Wayesebaphendula, ethi: “Ohlwanyela imbewu enhle yiNdodana yomuntu.
Insimu yizwe, imbewu enhle yilabo abangabantwana bombuso; ukhula ngabantwana bomubi.
Kepha isitha esaluhlwanyelayo nguSathane, ukuvuna kungukuphela kwesikhathi, abavuni yizingelosi.
Ngakho-ke njengalokhu ukhula lubuthwa lushiswe emlilweni, kuyakuba kanjalo ekupheleni kwezwe.
INdodana yomuntu iyakuthuma izingelosi zayo, zibuthe, zikhiphe embusweni wayo konke okukhubekisayo nabenza okubi,
zibaphonse esithandweni somlilo; lapho kuyakuba khona ukukhala nokugedla amazinyo.
Kepha abalungileyo bayakukhanya njengelanga embusweni kaYise. Onezindlebe makezwe.
“Umbuso wezulu ufana nengcebo efihlwe ensimini, umuntu wayifumana, wayithukusa; wahamba ethokozile, wathengisa ngakho konke anakho, wayithenga leyo nsimu.
“Futhi umbuso wezulu ufana nomthengi ofuna amapharele amahle;
kuthi angalithola ipharele elilodwa lenani elikhulu, ahambe athengise ngakho konke anakho, alithenge.
“Umbuso wezulu ufaniswa futhi nenetha elaphonswa olwandle, lawola inhlanganisela yezinhlanzi.
Kuthe seligcwele, balidonsela ogwini, bahlala phansi, bakhetha ezinhle, bazifaka ezitsheni, kwathi ezimbi bazilahla.
Kuyakuba kanjalo ekupheleni kwezwe. Kuyakuphuma izingelosi, zahlukanise ababi kwabalungileyo.
Ababi zibaphonse esithandweni somlilo; lapho kuyakuba khona ukukhala nokugedla amazinyo.
“Nikuqondile yini konke lokhu na?” Bathi kuye: “Yebo.”
Wayesethi kubo: “Ngakho-ke yileso naleso sazimthetho esifundiselwe umbuso wezulu, sifana nomuntu, umnumzane okhipha engcebeni yakhe okusha nokudala.”
Kwathi lapho uJesu eseqedile ukukhuluma ngemizekeliso, wasuka lapho.
Esefikile emzini wakubo, wabafundisa esinagogeni labo, baze bamangala, bathi: “Lo ngabe ukuthatha kuphi lokhu kuhlakanipha nala mandla na?
Lo akasiyo yini indodana yombazi? Unina akusiye yini uMariya, nabafowabo akusibo yini oJakobe, uJosefa, uSimoni noJuda na?
Odadewabo abekho yini phakathi kwethu lapha na? Pho-ke lo ukuthatha kuphi konke lokhu na?”
Base bekhubeka ngaye, kepha uJesu wathi kubo: “Umphrofethi akadelelwa ngaphandle kwasezweni lakubo nasendlini yakwabo.”
Akayenzanga lapho imisebenzi eminingi yamandla ngenxa yokungakholwa kwabo.
Ngaleso sikhathi uHerode, uMthethraki, wezwa kubikwa ngoJesu,
waseyesethi ezincekwini zakhe: “Lo nguJohane uMbhabhadisi, uvukile kwabafileyo, yingakho-ke lawa mandla esebenza kuye nje.”
Ngokuba nguye uHerode owayebambe uJohane, wamfaka ejele ngenxa kaHerodiya, umkaFiliphu, umfowabo.
Lokhu uJohane wayesho kuye ukuthi: “Awuvunyelwe ukuba umthathe.”
Kwathi nakuba ayefuna ukumbulala, kodwa wesaba abantu ngokuba babethi ungumphrofethi.
Kepha ngosuku lokuzalwa kukaHerode, indodakazi kaHerodiya yasina phambi kwabo, yamjabulisa uHerode,
wayeseyethembisa ngokufunga ukuthi uyakuyinika lokho eyakukucela.
Kuthe eseyicebisile unina, yathi: “Ngiphe ngoqwembe ikhanda likaJohane, uMbhabhadisi.”
Lokho kwayephula umoya inkosi, kepha ngenxa yezifungo eyayizenzile, nangenxa yababehleli nayo esidlweni, yayaleza ukuba inikwe.
Yathumela, yamnquma uJohane ikhanda ejele.
Ikhanda lakhe lalethwa ngoqwembe, lanikwa intombazane; yayisilinika unina.
Kwafika abafundi bakaJohane basithatha isidumbu sakhe, basimbela, base beyobikela uJesu.
Kwathi uJesu esekuzwile lokho, wasuka lapho ngesikebhe waya endaweni eyihlane, yedwa. Zithe ukuba izixuku zikuzwe lokho, zamlandela ngezinyawo, ziphuma emizini.
Waphuma esikebheni, wabona isixuku esikhulu; waba nesihe ngaso, waphulukisa abagulayo babo.
Kuthe selishonile, abafundi bakhe beza kuye, bathi: “Le ndawo iyihlane futhi nelanga selizilahle kunina; tshela izixuku zihambe ziye emizaneni, ziyozithengela ukudla.”
Kepha uJesu wathi kubo: “Akudingekile ukuba bahambe; bapheni nina ukudla.”
Bathi kuye: “Asinalutho lapha, kuphela izinkwa ezinhlanu nezinhlanzi ezimbili.”
Wayesethi: “Kuletheni lapha kimi.”
Wayeseyala izixuku ukuba zihlale phansi otshanini, wathatha izinkwa ezinhlanu nezinhlanzi ezimbili, wabheka ngasezulwini, wakubusisa, wakuhlephula, wakunika abafundi, baphakela izixuku.
Badla bonke, basutha, babutha imvuthuluka eyayisele, yagcwala iziqabetho ezili-12.
Labo abadlayo kwakungamadoda abalelwa ezi-5 000, ngaphandle kwabesifazane nezingane.
Wabacindezela abafundi bakhe ukuba bangene esikebheni masinyane, bamendulele, baye ngaphesheya, ukuze ahlakaze izixuku.
Esezihlakazile, wenyukela entabeni eyedwa eyokhuleka; kwasekuhlwile, futhi eyedwa lapho.
Kepha isikebhe sasesiqhele ibanga ogwini, sishukunyiswa ngamaza, ngokuba umoya wawuphambana nabo.
Kuthe ngomlindo wesine wobusuku uJesu weza kubo ehamba phezu kolwandle.
Kepha abafundi sebembonile ehamba phezu kolwandle bashaywa wuvalo, bethi ngumungcwi; bakhala ngokwesaba.
UJesu wakhuluma nabo ngokushesha, wathi: “Yimani isibindi; yiMina, ningesabi.”
UPhethro wayesephendula, wathi kuye: “Nkosi, uma kunguwe ngempela, yisho ukuba ngize kuwe phezu kwamanzi.”
UJesu wayesethi: “Woza.” UPhethro wehla-ke esikebheni, wahamba phezu kwamanzi, waya kuJesu.
Kepha kuthe ebona umoya onamandla, wesaba; eseqala ukucwila wakhala wathi: “Nkosi, ngisindise!”
Masinyane uJesu welula isandla, wambamba, wathi kuye: “Wena onokukholwa okuncinyane, ungabazeleni na?”
Sebegibele esikebheni, umoya wathula.
Ababesesikebheni bakhuleka kuye, bathi: “Ngempela uyiNdodana kaNkulunkulu.”
Sebewelele ngaphesheya, bafika eGenezaretha.
Kwathi ukuba amadoda akuleyo ndawo ambone, athumela izigijimi kulo lonke izwe; baletha kuye bonke abagulayo.
Bamnxusa ukuba bathinte nje umphetho wengubo yakhe; bonke abawuthintayo baphiliswa.
AbaFarisi nezazimthetho beza kuJesu bevela eJerusalema, bathi:
“Kwenziwa yini ukuba abafundi bakho beqe isiko labadala na? Ngokuba abazihlambi izandla uma bedla isinkwa.”
Kepha uJesu waphendula wathi kubo: “Nani, yini ukuba neqe umyalo kaNkulunkulu ngenxa yesiko lenu na?
Ngokuba uNkulunkulu wathi: ‘Hlonipha uyihlo nonyoko,’ wathi futhi: ‘Othuka uyise nonina makafe nokufa.’
Kepha nina nithi: ‘Lowo othi kuyise noma kunina: Lokho ebengizokusiza ngakho sengikwehlukanisile kwaba ngumnikelo kuNkulunkulu,’
akusadingeki ukuba ahloniphe uyise; kanjalo-ke nilenza libe yize izwi likaNkulunkulu ngenxa yesiko lenu.
Bazenzisi, u-Izaya waphrofetha kahle ngani, lapho ethi:
“ ‘Lesi sizwe singidumisa ngezindebe zomlomo, kepha inhliziyo yaso ikude nami;
kodwa bangikhonza ngeze, befundisa izifundiso eziyimiyalo yabantu.’ ”
Wayesebiza isixuku, wathi kuso: “Yizwani, niqonde.
Akusikho okungena emlonyeni okumngcolisayo umuntu, kodwa yilokho okuphuma emlonyeni okumngcolisayo umuntu.”
Kwase kusondela abafundi bakhe, bathi kuye: “Uyazi yini ukuthi abaFarisi bathe bangalizwa lelo lizwi, bakhubeka na?”
Kepha waphendula wathi: “Yileso naleso sithombo esingatshalwanga nguBaba wasezulwini, siyakusishulwa.
Bayekeni; bangabaholi abayizimpumputhe. Kepha uma impumputhe ihola enye impumputhe, zombili ziyakukhalakathela emgodini.”
UPhethro waphendula wathi kuye: “Sichazele lo mzekeliso.”
Wayesethi: “Kanti nani anikabi nakuqonda na?
Aniqondi yini ukuthi konke okungena emlonyeni kuya esiswini, kuze kulahlelwe ngaphandle na?
Kepha okuphuma emlonyeni kuvela enhliziyweni; lokho-ke kuyamngcolisa umuntu.
Ngokuba enhliziyweni kuvela imidlinzo emibi, ukubulala, ukuphinga, ubufebe, ukweba, ukufakaza amanga, nokuhlambalaza.
Yilezo zinto ezimngcolisayo umuntu, kodwa ukudla ngezandla ezingahlanjiwe akumngcolisi umuntu.”
UJesu esephumile lapho, wahamba, waya ezifundeni eThire naseSidoni.
Kwase kufika owesifazane waseKhanani evela emingceleni yakhona, wakhala wathi: “Ngihawukele, Nkosi, Ndodana kaDavide! Indodakazi yami ihlaselwe kabi yidimoni.”
Kepha akamphendulanga ngazwi. Kwase kusondela kuye abafundi bakhe, bamncenga bathi: “Mmukise, ngokuba uyakhala emva kwethu.”
Kepha uJesu waphendula wathi: “Angithunyelwanga kwabanye, kodwa kuphela ezimvini ezilahlekileyo zendlu yakwa-Israyeli.”
Owesifazane weza, wakhuleka kuye, wathi: “Nkosi ngisize.”
UJesu waphendula wathi: “Akukuhle ukuthatha isinkwa sabantwana, usiphonse ezinjeni.”
Owesifazane wathi: “Yebo, Nkosi, kepha nezinjana zidla imvuthuluka ewa etafuleni labaninizo.”
Khona uJesu waphendula, wathi kuye: “Awu mame, kukhulu ukukholwa kwakho; makwenzeke kuwe njengokuthanda kwakho.” Indodakazi yakhe yasinda ngaleso sikhathi.
UJesu wasuka lapho, waya ngasolwandle iGalile, wenyukela entabeni, wahlala phansi lapho.
Isixuku esikhulu seza kuye silethe izinyonga, izimpumputhe, izimungulu, izilima, nabanye abaningi. Bababeka ngasezinyaweni zakhe; wabaphulukisa.
Isixuku saze samangala sibona izimungulu zikhuluma, abakhubazekile besinda, izinyonga zihamba, nezimpumputhe zibona. Base bemdumisa uNkulunkulu ka-Israyeli.
UJesu wababiza abafundi bakhe, wathi: “Ngiyasihawukela isixuku, ngokuba sekuyizinsuku ezintathu sihleli nami, singenakho esingakudla. Angithandi ukubamukisa belambile, funa baphelelwe ngamandla endleleni.”
Abafundi bathi kuye: “Pho singazitholaphi lapha ehlane izinkwa eziningi ezingenela isixuku esingaka na?”
UJesu wathi kubo: “Ninezinkwa ezingaki na?” Bathi: “Eziyisikhombisa, nezinhlanzana ezimbalwa.”
Wayala isixuku ukuba sihlale phansi,
wathatha izinkwa eziyisikhombisa nezinhlanzi, wabonga, wazihlephula, wanika abafundi bakhe, bona baphakela izixuku.
Badla bonke, basutha, babutha imvuthuluka eseleyo, yagcwala iziqabetho eziyisikhombisa.
Abadlayo kwakungamadoda ayizi-4 000, ngaphandle kwabesifazane nezingane.
Esezihlakazile izixuku, wangena esikebheni, waya eMagadana.
AbaFarisi nabaSadusi beza kuJesu bemlinga, bacela ukuba abakhombise isibonakaliso esivela ezulwini.
Kepha waphendula, wathi kubo: “Nxa sekuhlwile nithi: ‘Liyobe lisile, lokhu izulu libhejile;’
kuthi kusasa nithi: ‘Namuhla lizakuphendula, ngokuba libhejile, liguqubele.’ Niyakwazi ukuchaza isimo sezulu, kepha yini ningakwazi ukubona izibonakaliso zezikhathi na?
Isizukulwane esibi nesiphingayo sifuna isibonakaliso, kepha asiyukunikwa sibonakaliso, kuphela isibonakaliso sikaJona, umphrofethi.” Wayesebashiya, wahamba.
Kuthe sebefike ngaphesheya, kwahlaluka ukuthi abafundi bakhe bakhohliwe ukuphatha izinkwa.
UJesu wayesethi kubo: “Qaphelani, nixwaye imvubelo yabaFarisi nabaSadusi.”
Baqagulisana bodwa, bathi: “Kungokuba singaziphathanga izinkwa.”
Kepha uJesu ekwazi abakucabangayo, wathi: “Niqagulisana nithini phakathi kwenu, nina bokukholwa okuncane, nithi yingokuba ningenazinkwa na?
Anikaqondi yini, futhi anizikhumbuli izinkwa eziyisihlanu ezondla izi-5 000 nokuthi nabutha iziqabetho ezingaki na?
Nezinkwa eziyisikhombisa ezondla izi-4 000 nokuthi nabutha iziqabetho ezingaki na?
Aniqondi ngani ukuthi bengingakhulumi kini ngesinkwa na? Kepha xwayani imvubelo yabaFarisi nabaSadusi.”
Base beqonda ukuthi akashongo ukuba baxwaye imvubelo yezinkwa, kepha imfundiso yabaFarisi nabaSadusi.
UJesu esefikile esifundeni saseKhesariya Filiphi wababuza abafundi bakhe, wathi: “Abantu bathi iNdodana yomuntu ingubani na?”
Bathi: “Abanye bathi inguJohane, uMbhabhadisi; abanye bathi ingu-Eliya; abanye bathi inguJeremiya noma ingomunye wabaphrofethi.”
Wayesethi kubo: “Nina-ke nithi ngingubani na?”
USimoni Phethro waphendula wathi: “Wena unguKhristu, iNdodana kaNkulunkulu ophilayo.”
UJesu waphendula, wathi kuye: “Ubusisiwe wena Simoni kaJona, ngokuba inyama negazi akukwambulelanga lokhu, kodwa uBaba osezulwini.
Nami-ke ngithi kuwe: Wena unguPhethro; phezu kwaleli dwala ngiyakulakha ibandla lami; amasango eHayidese awayukulahlula.
Ngiyakukunika izihluthulelo zombuso wezulu. Oyakukubopha emhlabeni, kuyakube kuboshiwe nasezulwini; nalokho oyakukukhulula emhlabeni kuyakube kukhululiwe nasezulwini.”
Wayesebayala abafundi ukuba bangatsheli muntu ukuthi unguKhristu.
Kusukela lapho, uJesu waqala ukubachazela abafundi bakhe ukuthi kufanele aye eJerusalema, ahlushwe ngokuningi ngamalunga, nabaphristi abakhulu nezazimthetho, abulawe, kepha avuswe ngosuku lwesithathu.
UPhethro wagudluka naye, wayeseqala ukumkhuza, ethi: “Phinde, Nkosi, lokho akusoze kwenzeke kuwe.”
Kepha uJesu waphenduka wathi kuPhethro: “Buyela emuva kwami, Sathane; uyisikhubekiso kimi, ngokuba awukuqondi okukaNkulunkulu, kepha okwabantu.”
UJesu wayesethi kubafundi bakhe: “Uma umuntu ethanda ukuza emuva kwami, makazidele, athabathe isiphambano sakhe, angilandele.
Ngokuba yilowo nalowo othanda ukusindisa ukuphila kwakhe, uyakulahlekelwa yikho; kepha olahlekelwa ngukuphila kwakhe ngenxa yami, uyakukufumana.
Ngokuba kuyakumsiza ngani umuntu, uma ezuza izwe lonke, kepha alahlekelwe ngukuphila kwakhe na? Yini angayikhipha umuntu, ibe yisihlengo sokuphila kwakhe na?
Ngokuba iNdodana yomuntu iyakuza ngenkazimulo kaYise nezingelosi zayo; khona-ke iyakuvuza yilowo nalowo ngesenzo sakhe.
Ngiqinisile ngithi kini: bakhona abanye kwabemi lapha, abangayukukuzwa ukufa, baze bayibone iNdodana yomuntu iza nombuso wayo.”
Sekwedlule izinsuku eziyisithupha, uJesu wathatha uPhethro, uJakobe, noJohane umfowabo, wenyukela nabo entabeni ende, bebodwa.
Waphenduka esinye isimo bezibonela ngawabo; ubuso bakhe bakhanya njengelanga, izingubo zakhe zaba mhlophe njengokukhanya.
Bheka, base bebona uMose no-Eliya bekhuluma naye.
UPhethro wayesethi kuJesu: “Nkosi, kuhle ukuba sibe lapha. Uma uthanda, ngizakwakha lapha amadokodo amathathu, elinye kube ngelakho, elinye kube ngelikaMose, nelinye kube ngelika-Eliya.”
Esakhuluma, kwafika ifu elikhanyayo labemboza, kwezwakala izwi livela efwini, lithi: “Lo uyiNdodana yami ethandekayo, engithokozile ngayo; yilaleleni.”
Kuthe lapho bekuzwa lokho abafundi, bathi mbo ngobuso phansi, ngokuba babethukile kakhulu.
Kepha uJesu wasondela, wabathinta, wathi: “Sukumani, ningesabi.”
Kwathi lapho bephakamisa amehlo abo, ababona muntu, ngaphandle kukaJesu kuphela.
Sebehla entabeni, uJesu wabayala wathi: “Ningalokothi nitshele muntu ngalo mbono, ize ivuswe kwabafileyo, iNdodana yomuntu.”
Abafundi bambuza, bathi: “Pho kungani izazimthetho zithi u-Eliya kumele afike kuqala na?”
Wabaphendula wathi kubo: “Impela uyeza u-Eliya, uyakubuyisela konke esimeni sakho,
kodwa ngithi kini: u-Eliya sewafika; nokho abamazanga, kodwa benza kuye abakuthandayo. Kanjalo neNdodana yomuntu izakuhlushwa yibo.”
Abafundi bakuqonda ukuthi wayekhuluma ngoJohane uMbhabhadisi.
Sebefikile esixukwini, kweza kuye umuntu, waguqa ngamadolo phambi kwakhe,
wathi: “Nkosi, hawukela indodana yami, ngokuba inesithuthwane, iyahlukumezeka kakhulu; kukaningi iwela emlilweni nasemanzini.
Ngiyilethe kubafundi bakho, kodwa bahluleka ukuyiphulukisa.”
UJesu waphendula wathi: “Maye, kinina, sizukulwane esingakholwayo nesiphambeneyo; kuyoze kube nini nginani na? Kuyoze kube nini nginibekezelela na? Yiletheni lapha kimi.”
UJesu wayeselikhuza idimoni, laphuma kuyo; umfana wasinda ngaleso sikhathi.
Abafundi base beya kuJesu bebodwa, bathi: “Kungani thina singakwazanga ukulikhipha idimoni na?”
Wayesethi kubo: “Kungenxa yokukholwa kwenu okuncane. Ngokuba ngiqinisile ngithi kini: uma ninokukholwa okungangembewu yesinaphi, niyakuthi kule ntaba: ‘Suka lapha, uye laphaya,’ iyakusuka, ngokuba akukho okuyakunahlula.
Kepha lolu hlobo lwedimoni aluphumi ngaphandle kokukhuleka nokuzila ukudla.”
Besahamba eGalile, uJesu wathi kubo: “INdodana yomuntu izakukhashelwa ezandleni zabantu;
bayakuyibulala, kodwa ngosuku lwesithathu izakuvuswa.” Badabuka kakhulu.
Kuthe sebefikile eKhaphernawume, abaqoqi bemali yethempeli baya kuPhethro, bambuza, bathi: “Kungani umfundisi wenu engayitheli imali yethempeli na?”
Wathi: “Uyayithela.” Esengene endlini, uJesu wamandulela ngenkulumo, wathi: “Uthini umbono wakho, Simoni ngalokhu na? Amakhosi omhlaba ayithatha kobani intela yempahla neyekhanda; emadodaneni awo noma ebafokazini na?”
Wathi: “Ebafokazini.” UJesu wayesethi kuye: “Ngakho-ke amadodana akhululekile ukungayikhokhi.
Kepha-ke ukuze singabakhubekisi, hamba uye olwandle, uphonse udobo, uthathe inhlanzi eyakubanjwa kuqala; kuyakuthi lapho usuyivule umlomo, ufumane imali; yithathe, ubanike yona, uthelele Mina nawe.”
Ngaleso sikhathi abafundi basondela kuJesu, bathi: “Ngubani omkhulu embusweni wezulu na?”
UJesu wayesebiza umntwana, wammisa phakathi kwabo,
wathi: “Ngiqinisile ngithi kini: uma ningaphenduki nibe njengabantwana, anisoze nangena embusweni wezulu.
Ngakho-ke yilowo nalowo oyakuzithoba njengalo mntwana, nguyena omkhulu embusweni wezulu.
Nalowo oyakwemukela umntwana onje abe munye ngegama lami, uyangamukela Mina.
“Kepha okhubekisa abe munye kulaba abancinyane abakholwa yimi, kungcono kuye ukuba itshe elikhulu lokusila ligaxwe entanyeni yakhe, azikiswe ekujuleni kolwandle.
“Maye, kulo izwe ngenxa yezikhubekiso! Ngokuba izikhubekiso zimelwe ukufika, kodwa maye kulowo muntu esiza ngaye isikhubekiso!
Kepha uma isandla sakho sikukhubekisa noma ngabe wunyawo lwakho, kunqume, ukulahle. Kungcono kuwe ukuba ungene ekuphileni uyingini noma ulunyonga, kunokuba uphonswe emlilweni ongunaphakade unezandla zombili nezinyawo zombili.
Uma iso lakho likukhubekisa, likhiphe, ulilahle. Ngokuba kungcono kuwe ukuba ungene ekuphileni uneso elilodwa, kunokuba uphonswe esihongweni somlilo unamehlo omabili.
Qaphelani ukuba ningadeleli namunye kulaba abancinyane, ngokuba ngithi kini: izingelosi zabo ezulwini zibubona njalo ubuso bukaBaba osezulwini.
Ngokuba iNdodana yomuntu ize ukuzosindisa okulahlekileyo.”
“Nicabangani ngalokhu na? Uma umuntu enezimvu eziyikhulu, bese kuduka eyodwa kuzo, akayukuzishiya yini ezingama-99 ezintabeni, ahambe ayofuna edukileyo na?
Kuthi lapho eyithola, ngiqinisile ngithi kini, uthokoza kakhulu ngayo kunangalezi ezingama-99 ebezingadukile.
Kanjalo-ke, akusiyo intando kaYihlo osezulwini ukuba kubhubhe noyedwa kulaba abancinyane.
“Kepha uma umfowenu ekona, hamba umsole ninodwa. Uma ekulalele, uyobe umzuzile.
Kepha uma engakulaleli, thatha abe munye noma babe babili, ukuze konke okuzodingidwa kuqiniswe ngomlomo wofakazi ababili noma abathathu.
Uma enqaba ukubezwa, tshela ibandla; uma engafuni ukulalela ngisho nalo ibandla, makabe njengowezizwe nomthelisi kuwe.
“Ngiqinisile ngithi kini: noma yikuphi eniyakukubopha emhlabeni, kuyobe kuboshiwe ezulwini; nanoma yikuphi eniyakukukhulula emhlabeni, kuyobe kukhululiwe ezulwini.
“Ngiqinisile futhi ngithi kini: uma ababili kini emhlabeni bevumelana noma ngaluphi udaba abalucelayo, bayakwenzelwa nguBaba osezulwini.
“Ngokuba lapho kuhlangene khona ababili noma abathathu egameni lami, ngikhona lapho phakathi kwabo.”
Kwase kusondela uPhethro, wathi kuye: “Nkosi, umfowethu uyakungona kuze kube kangaki ngilokhu ngimthethelela na? Kuze kube kasikhombisa na?”
UJesu wathi kuye: “Angisho kuwe ukuthi kuze kube kasikhombisa, kodwa kuze kube kama-70 aphindwe kasikhombisa.
“Ngakho-ke umbuso wezulu ufaniswa nomuntu oyinkosi, obethanda ukubala akukweletwa yizinceku zakhe.
Kwathi eseqalile ukubala, kwalethwa kuye omunye owayekweleta amathalenta ayizi-10 000.
Kepha engenalutho lokukhokha, inkosi yayala ukuba kuthengiswe ngaye, ngomkakhe, nabantwana bakhe nangakho konke ayenakho, ukuze kukhokhwe isikweletu.
Ngakho-ke inceku yawa phansi, yakhuleka kuyo, yathi: ‘Ake ungibekezelele, ngizakukukhokhela konke.’
Inkosi yaleyo nceku inesihe, yayikhulula, yayithethelela icala.
“Kepha kwathi iphuma nje leyo nceku, yahlangana nenye yezinceku ezikanye nayo eyayiyikweleta odenariyu abayikhulu, yayibamba, yayiklinya, ithi: ‘Khokha lokho ongikweleta khona.’
“Nokho inceku ekanye nayo yawa phansi, yayincenga yathi: ‘Ake ungibekezelele, ngizakukukhokhela.’
Kepha ayivumanga, kunalokho yahamba yayifaka ejele, ize isikhokhe sonke isikweletu sayo.
“Izinceku ezikanye nayo zathi ukuba zikubone okwenzekileyo, zadabuka kakhulu, zahamba zayobika enkosini yazo konke okwenzekileyo.
Inkosi yayo yayibiza, yathi kuyo: ‘Nceku embi, ngikuthethelele isikweletu sakho ngokuba ungincengile.
Pho kungani wena ungayihawukelanga inceku efana nawe, njengalokhu nami ngikuhawukele na?’
Inkosi yayo yathukuthela, yayinikela kubaphathi bejele, ize isikhokhe isikweletu sayo.
“Kanjalo-ke noBaba osezulwini uyakwenza lokho kini, uma ningathetheleli ngezinhliziyo zenu kube yilowo nalowo umfowabo.”
Kwathi uJesu eseqedile ukukhuluma lawo mazwi, wasuka eGalile, waya emingceleni eJudiya, phesheya kweJordani.
Izixuku ezinkulu zamlandela, waziphulukisa.
Kwase kusondela kuye abaFarisi, bamlinga bathi: “Kuvunyelwe yini ukuba indoda ilahle umkayo noma ngaliphi icala na?”
Waphendula, wathi kubo: “Anifundanga yini ukuthi owadala ekuqaleni wabenza owesilisa nowesifazane,
wayesethi: ‘Ngenxa yalokho indoda iyakushiya uyise nonina, inamathele kumkayo: labo ababili bayakuba nyamanye’ na?
Ngalokho-ke abasebabili, kodwa sebenyamanye. Ngakho-ke lokho akuhlanganisileyo uNkulunkulu, makungehlukaniswa muntu.”
Bathi kuye: “Pho uMose wayalelani ukuba akanikwe incwadi yesehlukaniso, alahlwe na?”
UJesu wathi kubo: “Ngenxa yobulukhuni benhliziyo yenu, uMose wanivumela ukuba nehlukane nabo omkenu, kodwa-ke kwakungenjalo kusukela ekuqaleni.
Namanje ngithi kini: yilowo nalowo olahla umkakhe kungengenxa yokuphinga, bese eganwa ngomunye, uyaphinga. Nalowo oganwa ngolahliweyo uyaphinga.”
Abafundi bathi kuye: “Uma injalo-ke indaba yendoda nomkayo, kungcono ukungaganwa.”
Kepha wathi kubo: “Akusibo bonke abangalamukela leli lizwi, kuphela labo abakunikiweyo.
Ngokuba kukhona abathenwa abazalwa benjalo kwasesiswini sikanina; kukhona nabathenwa abathenwe ngabantu, futhi kukhona abathenwa abazithenileyo ngenxa yombuso wezulu. Okwazi ukukwemukela lokhu, makakwemukele.”
Kwase kulethwa kuye abantwana ukuze abeke izandla phezu kwabo, abakhulekele, kodwa abafundi babakhuza.
Kepha uJesu wathi: “Vumelani abantwana beze kimi, ningabenqabeli, ngokuba umbuso wezulu ungowabanjalo.”
Wayesebeka izandla phezu kwabo, qede wasuka lapho.
Nakho-ke sekusondela kuye othile, wathi: “Mfundisi, ngingenzani enhle ukuba ngibe nokuphila okuphakade na?”
Wathi kuye: “Ungibuzelani ngokuhle na? Munye kuphela omuhle, kodwa uma uthanda ukungena ekuphileni, gcina imiyalelo.”
Wathi kuye: “Miphi na?” UJesu wathi kuye: “Yile: Ungabulali, ungaphingi, ungebi, ungafakazi amanga;
hlonipha uyihlo nonyoko; wothanda umakhelwane wakho njengalokhu uzithanda wena.”
Insizwa yathi kuJesu: “Konke lokhu ngikugcinile, pho ngisasalelwe yini na?”
UJesu wathi kuyo: “Uma uthanda ukuba ngopheleleyo, hamba uthengise ngempahla yakho, uphe abampofu, yikhona uyoba negugu ezulwini, bese uza ungilandele.”
Kuthe insizwa seyilizwile lelo lizwi, yahamba ilusizi, ngokuba yayicebe kakhulu.
Kepha uJesu wathi kubafundi bakhe: “Ngiqinisile ngithi kini: kulukhuni konothileyo ukungena embusweni wezulu.
Futhi ngithi kini: kulula ukuba ikameli lingene ngembobo yosungulo kunokuba isicebi singene embusweni kaNkulunkulu.”
Sebekuzwile lokhu abafundi, bamangala kakhulu, bathi: “Pho ngubani-ke ongasindiswa na?”
Kepha uJesu wababheka, wathi kubo: “Kubantu lokhu akunakwenzeka, kodwa kuNkulunkulu zonke izinto zingenzeka.”
UPhethro wayesethi kuye: “Thina sishiye konke, sakulandela. Pho uyini umvuzo wethu na?”
UJesu wathi kubo: “Ngiqinisile ngithi kini: nina eningilandelayo, ezweni elisha, lapho iNdodana yomuntu isihlezi esihlalweni senkazimulo yayo, nani niyakuhlala ezihlalweni zobukhosi ezili-12, nehlulele izizwe ezili-12 zakwa-Israyeli.
Yilowo nalowo oshiye izindlu, noma abafowabo, noma odadewabo, noma uyise, noma unina, noma abantwana, noma amazwe ngenxa yegama lami, uyakwemukeliswa okuphindwe kayikhulu, adle ifa lokuphila okuphakade.
Kepha abaningi abangabokuqala bayakuba ngabokugcina, nabangabokugcina bayakuba ngabokuqala.”
“Ngokuba umbuso wezulu ufana nomuntu ongumninindlu, owaphuma ekuseni ukuyoqasha izisebenzi ukuba ziye esivinini sakhe.
Esevumelene nezisebenzi ngodenariyu ngosuku, wazithumela esivinini sakhe.
“Waphuma futhi ngehora lesithathu, wabona abanye bemi esigcawini, bengenzi lutho;
nakubo wathi: ‘Hambani nani niye esivinini; ngiyakuninika okufaneleyo.’
Bahamba-ke. “Wabuye waphuma futhi ngehora lesithupha nangelesishiyagalolunye, wenza kanjalo.
Kuthe ngehora le-11, wathola abanye bemile, wayesethi kubo: ‘Nimeleni lapha usuku lonke ningenzi lutho na?’
“Bathi kuye: ‘Ngokuba akukho muntu osiqashileyo.’ “Wathi kubo: ‘Hambani nani niye esivinini.’
“Kusihlwa, umninisivini wathi enduneni yakhe: ‘Biza izisebenzi, uziholele imali yazo, uqale ngezokugcina, ugcine ngezokuqala.’
“Kuthe lapho zifika ebeziqashwe ngehora le-11, kwaba yileso naleso sahola udenariyu.
Kepha kuthe sekusondela ezokuqala, zacabanga ukuthi zizokwemukela okukhulu, kodwa nazo zaholelwa udenariyu, umuntu ngamunye.
“Kuthe seziwemukela zakhononda kumninindlu,
zathi: ‘Laba abokugcina basebenze ihora elilodwa nje, kodwa ubaholela njengathi esithwale ubunzima nesifudumezi semini.’
“Kepha waphendula wathi komunye wabo: ‘Mngani, angikuqoli; kanti asivumelananga yini ngodenariyu na?
Thatha okungokwakho, uhambe; kepha ngiyathanda ukumholela nalo wokugcina njengokuba ngikuholele nawe.
Angivunyelwe yini ukwenza engikuthandayo ngokungokwami na? Ngabe iso lakho libi, ngenxa yokuba ngiyephana na?’
“Kanjalo-ke abokugcina bayakuba ngabokuqala; abokuqala babe ngabokugcina.”
Kwathi uJesu esekhuphukele eJerusalema, wathatha abafundi abayishumi nambili, waqhelela nabo eceleni. Sebesendleleni, wathi kubo:
“Bhekani, sikhuphukela eJerusalema, iNdodana yomuntu izakukhashelwa kubaphristi abakhulu nezazimthetho; banqume ukuba ife.
Bazakuyinikela kwabezizwe ukuba iklolodelwe, ishaywe, ibethelwe esiphambanweni, kodwa ngosuku lwesithathu izakuvuswa.”
Kwase kuza kuye unina wamadodana kaZebedewu namadodana akhe. Wakhuleka, wayesecela okuthile kuye.
UJesu wathi kuye: “Ufunani na?” Wathi kuJesu: “Yisho ukuthi lawa madodana ami amabili ayakuhlala, enye ngakwesokunene sakho, enye ngakwesokhohlo sakho, embusweni wakho.”
UJesu waphendula wathi: “Anikwazi enikucelayo. Ningasiphuza yini isitsha engizakusiphuza na?” Bathi kuye: “Singasiphuza.”
Wathi kubo: “Kuyiqiniso, nizakusiphuza isitsha sami, kodwa ukuhlala ngakwesokunene nangakwesokhohlo sami, akusikho okwami ukuphana ngakho, kepha kungokwalabo abakulungiselelwe nguBaba.”
Sebekuzwile lokhu abayishumi, bazithukuthelela izelamani ezimbili.
Kepha uJesu wababiza, wathi: “Niyazi ukuthi ababusi bezizwe bazithwalisa kanzima, nezikhulu zazo ziziphethe ngamandla anzima.
Nokho akuyukuba njalo phakathi kwenu, kodwa yilowo nalowo ofuna ukuba mkhulu phakathi kwenu, makabe yisikhonzi senu.
Nalowo ofuna ukuba ngowokuqala phakathi kwenu, makabe yinceku yenu,
njengalokhu iNdodana yomuntu ingezelanga ukukhonzwa, kodwa ukukhonza nokunikela ngokuphila kwayo, kube yisihlengo sabaningi.”
Kuthe sebephuma eJerikho, balandelwa yisixuku esikhulu.
Kwakuhleli izimpumputhe ezimbili ngasendleleni. Zathi zingezwa ukuthi uJesu uyadlula, zamemeza zathi: “Nkosi, Ndodana kaDavide, sihawukele!”
Kepha isixuku sazikhuza, sathi azithule, kodwa zamemeza kakhulu kunakuqala, zithi: “Sihawukele, Nkosi, Ndodana kaDavide!”
UJesu wema, wazibiza wathi: “Nifuna ukuba nginenzeleni na?”
Zathi kuye: “Nkosi, ukuba amehlo ethu avuleke.”
UJesu waba nesihawu wathinta amehlo azo; zase ziyabona masinyane, zamlandela.
Kwathi sebesondele eJerusalema, sebefike eBhethifage ngaseNtabeni Yeminqumo, uJesu wathuma abafundi ababili,
wathi kubo: “Hambani niye emzaneni oqondene nani; nxa nifika nizakufumana imbongolo ikhulekiwe nethole linayo. Zithukululeni nizilethe kimi.
Uma kukhona umuntu osho utho kini, niyakuthi: ‘INkosi iyazidinga;’ uyakuzibuyisa ngokushesha.”
Lokhu kwenzeka ukuze kugcwaliseke okwashiwo ngomphrofethi ukuthi:
“Yishoni kuyo indodakazi yaseZiyoni, nithi: Bheka, iNkosi yakho iza kuwe ithobekile, igibele embongolweni; yebo, etholeni, inkonyane yesilwane esiboshelwayo.”
Abafundi bahamba, benza njengokuba uJesu ebatshelile.
Bayiletha imbongolo nethole, base bebeka izingubo zabo phezu kwazo, uJesu wayesehlala phezu kwezingubo.
Isixuku esikhulu sendlala izingubo zaso endleleni, abanye bagawula amagatsha emithi, bawendlala endleleni.
Izixuku ezazihamba phambili nezazimlandela zazimemeza zithi: “Hosana kuyo iNdodana kaDavide! Ubusisiswe ozayo egameni leNkosi. Hosana kweliphezulu!”
Kwathi esangena eJerusalema, umuzi wonke wanyakaza, uthi: “Ngubani lo na?”
Izixuku zazithi: “Lo ngumphrofethi, uJesu waseNazaretha laseGalile.”
UJesu wangena ethempelini, waxosha bonke abathengisayo nabathengayo ethempelini, wagumbukuqela amatafula abashintshisa ngemali, nezihlalo zabathengisa ngamajuba.
Wathi kubo: “Kulotshiwe ukuthi: ‘Indlu yami iyakubizwa ngokuthi indlu yokukhuleka,’ kepha nina niyenza umhume wabaphangi.”
Kwase kufika kuye izimpumputhe, nezinyonga esesethempelini, waziphulukisa.
Kepha abaphristi abakhulu nezazimthetho, sebezibonile izimangaliso ayezenza, nabantwana bememeza ethempelini, bethi: “Hosana kuyo iNdodana kaDavide,” bacasuka,
bathi kuye: “Uyakuzwa yini lokhu abakushoyo laba na?” UJesu wathi kubo: “Yebo, anifundanga yini ukuthi: ‘Emlonyeni wezingane nowabancelayo, uzilungisele indumiso’ na?”
Wahamba, waphuma emzini, waya eBhethaniya, walala ubusuku lapho.
Kepha ekuseni, ekhuphukela emzini, walamba.
Wabona umkhiwane owodwa ngasendleleni, waya kuwo, kodwa akatholanga lutho kuwo, ngaphandle kwamaqabunga kuphela. Wayesethi kuwo: “Akungabe kusavela sithelo kuwe naphakade.” Umkhiwane wabuna ngaso leso sikhathi.
Bekubona lokho abafundi bamangala, bathi: “Umkhiwane ubune kanjani masinyane kanje na?”
UJesu wabaphendula, wathi kubo: “Ngiqinisile ngithi kini: Uma nikholwa ningangabazi, aniyukwenza kuphela lokhu okwenzeke emkhiwaneni, kodwa noma nithi kule ntaba: ‘Zimbuka, uphonseke olwandle,’ lokho kuyakwenzeka.
Konke eniyakukucela emkhulekweni, nikholwa, niyakukwamukeliswa.”
Kuthe esengene ethempelini, esafundisa, kweza kuye abaphristi abakhulu namalunga esizwe, bathi: “Ukwenza ngagunya lini lokhu na? Futhi ngubani okunike leli gunya?”
UJesu wabaphendula wathi: “Nami ngizakunibuza izwi libe linye vo; uma ningiphendula, nami ngizakunitshela ukuthi lokhu ngikwenza ngagunya lini.
Umbhabhadiso kaJohane wawuvelaphi, ezulwini noma kubantu na?” Babonisana bodwa, base bethi: “Uma sithi: ‘Ezulwini,’ uzakuthi kithi: ‘Pho kungani ningakholwanga nguye na?’
Kepha uma sithi: ‘Kubantu,’ siyasesaba isixuku, ngokuba bonke bathi uJohane ungumphrofethi.”
Base bemphendula uJesu, bethi: “Asazi.” Wayesethi naye kubo: “Nami angizukunitshela ukuthi lokhu ngikwenza ngagunya lini.”
“Nina-ke nithini na? Umuntu wayenamadodana amabili; waya kweyokuqala wathi: ‘Mntanami, hamba uyosebenza namuhla esivinini.’
“Kepha yaphendula yathi: ‘Angithandi,’ kodwa kamuva yaguqula umqondo wayo, yaya.
“Waya nakwenye, washo okufanayo kuyo. Yona yaphendula yathi: ‘Ngizoya, nkosi,’ kepha kayiyanga.
“Iyiphi kula madodana amabili eyenza intando kayise na?” Bathi kuye: “Eyokuqala.” UJesu wathi kubo: “Ngiqinisile ngithi kini: abathelisi nezifebe bangena ngaphambi kwenu embusweni kaNkulunkulu.
Ngokuba uJohane weza kini ngendlela yokulunga, anikholwanga nguye, kodwa abathelisi nezifebe bakholwa nguye. Kepha nina, nakuba nikubona akwenzileyo, aniguqukanga nakamuva ukuba nikholwe nguye.”
“Lalelani nanku omunye umzekeliso. Kwakukhona umuntu ongumninindlu. Lo muntu watshala isivini, wasibiyela ngothango, wemba lapho isikhamo, wakha isiqongo sokulinda, wayeseqashisa ngaso kubalimi; waya kwelinye izwe.
Kwathi sekusondele isikhathi sokuvuna, wathumela izinceku zakhe kubalimi ukuba zilande izithelo zakhe.
“Abalimi bazibamba izinceku zakhe, enye bayishaya, enye bayibulala, enye bayikhanda ngamatshe.
Waphinda wathumela ezinye izinceku eziningi kunezakuqala. Nakulezo benza okufanayo.
Ekugcineni wathumela kubo indodana yakhe, ethi: ‘Bazakuyihlonipha indodana yami.’
“Kepha abalimi, beyibona indodana yakhe, bakhuluma bodwa, bathi: ‘Le yindlalifa; wozani siyibulale, sidle ifa layo.’
“Bayibamba, bayiphonsa ngaphandle kwesivini, bayibulala.
“Pho-ke mhla kufika umninisivini, uzakubenzenjani labo balimi na?”
Bathi kuye: “Uzakubabhubhisa kabi labo benzi bokubi. Isivini sakhe asiqashise kwabanye abalimi abayakumnika isivuno ngesikhathi saso.”
UJesu wathi kubo: “Anizange nifunde yini emibhalweni ukuthi: “ ‘Itshe abalinqabayo abakhi yilona elaba yinhloko yegumbi. Lona lavela eNkosini; liyisimangaliso emehlweni ethu’ na?
“Ngalokho-ke ngithi kini: niyakwamukwa umbuso kaNkulunkulu, uphiwe isizwe esiyakuveza izithelo zawo.
Owela phezu kwaleli tshe uyakuphohlozwa, kodwa yilowo nalowo eliyakuwela phezu kwakhe liyakumcolisa.”
Abaphristi abakhulu nabaFarisi sebeyizwile imizekeliso yakhe, baqonda ukuthi ukhuluma ngabo.
Bafuna ukumbamba, kodwa besaba izixuku, ngokuba zazithi ungumphrofethi.
UJesu wabuye wakhuluma kubo ngemizekeliso, wathi:
“Umbuso wezulu ufaniswa nomuntu oyinkosi, owenzela indodana yakhe umshado.
Wathumela izinceku zakhe ukuba ziyobiza labo ababemenyiwe emshadweni, kodwa abavumanga ukuza.
“Wabuye wathumela ezinye izinceku, wathi: ‘Tshelani abamenyiweyo, nithi: sengilungise ukudla kwami; izinkabi zami nezinkomo zami ezikhulupheleyo sezihlatshiwe; konke sekulungile, wozani emshadweni.’ ”
“Kepha bakushaya indiva lokho, bahamba; omunye waya ensimini yakhe, omunye waya lapho ayethengisela khona.
Abaseleyo bazibamba izinceku zakhe, bazihlukumeza, bazibulala.
Ngakho inkosi yathukuthela, yathumela amabutho ayo, yabulala labo babulali, yashisa nomuzi wabo.
“Yayisithi ezincekwini zayo: ‘Idili lomshado selilungisiwe, kepha ababemenyiwe bebengafanele,
ngakho-ke hambani niye ezinhlanganweni zemigwaqo, nimeme noma yimuphi enimtholayo ukuba eze emshadweni.’
“Lezo zinceku zaphuma, zaya emigwaqweni, zaqoqa bonke ezabafumanayo, ababi nabahle. Indlu yomshado yagcwala phama ababemenyiwe.
“Inkosi isingenile ukuzobona izimenywa ezazihleli etafuleni, yabona khona umuntu owayengayembethe ingubo yomshado.
Yathi kuye: ‘Mngani, ungene kanjani lapha ungayembethe ingubo yomshado na?’ Kepha akaphendulanga.
“Ngakho-ke inkosi yathi ezincekwini: ‘Mbopheni izinyawo nezandla, nimphonse phandle ebumnyameni, lapho kuyakuba khona ukukhala nokugedla amazinyo.’
“Ngokuba baningi ababiziweyo, kodwa bayingcosana abakhethiweyo.”
AbaFarisi basuka lapho, babonisana ukuba bamhile ngezwi.
Bathumela kuye abafundi babo nabakaHerode, bathi: “Mfundisi, siyazi ukuthi uqinisile, ufundisa indlela kaNkulunkulu ngeqiniso, awubunaki ubunjalo bomuntu, ngokuba Wena awubheki buso bamuntu.
Ngakho-ke sitshele ukuthi yikuphi okulungile. Kuvunyelwe yini ukukhokha intela kuKhesari noma qha na?”
UJesu, ebazi ububi babo, wathi: “Bazenzisi, ningilingelani na?
Ngitshengiseni uhlamvu lwemali yokuthela.” Base bemkhombisa udenariyu.
Wayesethi: “Ngokabani lo mfanekiso nalo mbhalo na?”
Bathi: “NgokaKhesari.” Wayesethi kubo: “Ngakho-ke nikani uKhesari okukaKhesari noNkulunkulu okukaNkulunkulu.”
Sebekuzwile lokho bamangala, base bemshiya, bahamba.
Ngalolo lusuku kwafika kuye abaSadusi abathi akukho ukuvuka kwabafileyo, bambuza,
bathi: “Mfundisi, uMose wathi: ‘Uma umuntu efa engazele bantwana, umfowabo makamngene umkakhe, amvusele umfowabo umuzi.’
Kwakukhona-ke ngakithi izelamani eziyisikhombisa. Owokuqala waganwa, wafa engenamntwana, umkakhe wangenwa ngumfowabo.
Kanjalo nowesibili nowesithathu, kwaze kwaba kowesikhombisa.
Ekugcineni, wafa nowesifazane.
Ngakho-ke ekuvukeni kwabafileyo uyakuba ngumkabani kulezi zelamani eziyikhombisa; ngokuba zonke zaganwa nguye na?”
UJesu waphendula, wathi kubo: “Nidukile, aniyazi imibhalo namandla kaNkulunkulu.
Ngokuba ekuvukeni kwabafileyo abaganwa, futhi abendiswa, kodwa banjengezingelosi ezulwini.
Maqondana nokuvuka kwabafileyo anifundanga yini okwakhulunywa nguNkulunkulu kini, ethi:
‘Mina nginguNkulunkulu ka-Abhrahama, uNkulunkulu ka-Isaka noNkulunkulu kaJakobe’ na? “Akasiye uNkulunkulu wabafileyo, kodwa owabaphilayo.”
Kwathi izixuku sezikuzwile lokho, zamangala ngemfundiso yakhe.
Kepha abaFarisi, sebezwile ukuthi uJesu ubavale umlomo abaSadusi, babuthana ndawonye.
Omunye wabo, isazimthetho, wamlinga, wathi:
“Mfundisi, yimuphi umyalo omkhulu emthethweni na?”
UJesu wathi kuye: “ ‘Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho.’
Yilowo umyalo omkhulu nowokuqala.
Owesibili ofana nawo, uthi: ‘Wothanda umakhelwane wakho njengalokhu uzithanda wena.’
Kuleyo miyalo yomibili kubambelele umthetho wonke nemfundiso yabaphrofethi.”
Besabuthene abaFarisi, uJesu wababuza
wathi: “Nithini ngoKhristu na? Uyindodana kabani?” Bathi kuye: “EkaDavide.”
Wathi kubo: “Pho uDavide ngoMoya wambiza kanjani ngokuthi iNkosi? Phela uthi:
“ ‘INkosi yathi eNkosini yami: “Hlala ngakwesokunene sami, ngize ngibeke izitha zakho phansi kwezinyawo zakho.” ’
“Ngakho-ke uma uDavide embiza ngokuthi iNkosi, uyindodana yakhe kanjani na?”
Akukho namunye owaba nezwi lokumphendula. Kusukela ngalolo lusuku, akukho muntu owaba nesibindi sokumbuza lutho.
UJesu wakhuluma ezixukwini nakubafundi bakhe,
wathi: “Izazimthetho nabaFarisi bahleli esihlalweni sikaMose.
Ngakho-ke konke abanitshela khona kwenzeni, nikugcine, kodwa ningakwenzi abakwenzayo. Ngokuba bayakhuluma, kodwa bangakwenzi abakushoyo.
Babopha imithwalo enzima, bayibeke emahlombe abantu, kodwa bona abafuni ngisho ukuyithinta ngomunwe wabo.
“Yonke imisebenzi yabo bayenza ukuba babukwe ngabantu. Amabhande abo abawabopha ebunzini uma bekhuleka bawenza abe banzi, benze izinsephe ezinkulu.
Bathanda ukuhlala ezindaweni eziqavile emadilini, nasezihlalweni eziphambili emasinagogeni,
nokubingelelwa ezigcawini, nokubizwa ngabantu ngokuthi: ‘Rabi.’
“Kepha-ke nina maningabizwa ngokuthi: ‘Rabi,’ ngokuba munye umfundisi wenu, nina nonke ningabazalwane.
Ningabizi muntu emhlabeni ngokuthi: ‘Baba,’ ngokuba munye uyihlo, osezulwini.
Futhi ningabizwa ngokuthi ningabaholi, ngokuba munye umholi wenu, nguKhristu.
Omkhulu kini makabe yisikhonzi senu.
Kepha yilowo nalowo oziphakamisayo uzakuthotshiswa, nalowo ozithobayo uzakuphakanyiswa.
“Maye, kini zazimthetho nabaFarisi, bazenzisi, ngokuba nivalela abantu umbuso wezulu! Nani aningeni, kodwa abangenayo anibavumeli ukuba bangene.
Maye, kini zazimthetho nabaFarisi, bazenzisi, ngokuba nidla izindlu zabafelokazi, nenze imikhuleko emide nizenzisa! Ngakho-ke niyakwemukeliswa ukulahlwa okukhulu.
“Maye, kinina zazimthetho nabaFarisi, bazenzisi, ngokuba niwela ulwandle, nidabule amazwe ukuba nithole abe munye ophendukela enkolweni yenu, athi esephendukile, nimenze indodana yesihogo ngokuphindiwe kunani!
“Maye, kini baholi abayizimpumputhe, enithi: ‘Umuntu ofunga ithempeli akusho lutho lokho, kodwa lowo ofunga igolide lasethempelini uzibophile!’
Ziwula, zimpumputhe, kanti yikuphi okukhulu phakathi kwegolide nethempeli elingcwelisa igolide na?
Nibuye nithi: ‘Yilowo ofunga i-althare akulutho lokho, kodwa ofunga umnikelo ophezu kwalo uzibophile.’
“Zimpumputhe, yikuphi okukhulu phakathi komnikelo ne-althare elingcwelisa umnikelo na?
Ngakho-ke ofunga i-althare, ufunga lona nakho konke okuphezu kwalo.
Ofunga ithempeli, ufunga lona nohleli kulo.
Nofunga izulu ufunga isihlalo sobukhosi sikaNkulunkulu, nohlezi phezu kwaso.
“Maye, kini zazimthetho nabaFarisi, bazenzisi, ngokuba ninikela okweshumi kwesinkuntshane, nokwentshungu, nokodonqa, kodwa nikushaye indiva okudingwa ngumthetho: ubulungiswa, isihawu, nokukholwa! Benifanele ukwenza lokho, kodwa ningakuyeki nalokhu komthetho.
Baholi abayizimpumputhe, nikhetha impukane kwenikuphuzayo, kodwa ningwinye ikameli.
“Maye, kini zazimthetho nabaFarisi, bazenzisi, ngokuba nihlanza ingaphandle lenkezo nesitsha, kodwa ngaphakathi kugcwele impango nobugovu.
MFarisi oyimpumputhe, hlanza kuqala ingaphakathi lenkezo, ukuze kuhlanzeke nengaphandle layo.
“Maye, kini zazimthetho nabaFarisi, bazenzisi, ngokuba nifana namathuna acakiweyo, abonakala emahle ngaphandle kanti ngaphakathi agcwele amathambo abafileyo nokungcola konke!
Kanjalo nani; ingaphandle lenu libonakala kubantu lilungile, kanti ingaphakathi lenu ligcwele ukuzenzisa nobubi.
“Maye, kini zazimthetho nabaFarisi, bazenzisi, ngokuba nakha amaliba abaphrofethi, nihlobise amathuna abalungileyo!
Nithi: ‘Ukuba sasikhona emihleni yobaba, sasingayukuhlanganyela nabo ekuchitheni igazi labaphrofethi.’
Ngakho-ke nizifakazela nina ukuthi ningamadodana alabo ababulala abaphrofethi.
Salani senikufeza lokhu okwaqalwa ngoyihlomkhulu.
“Zinyoka, nzalo yamabululu, niyakukubalekela kanjani ukulahlwa esihogweni na?
Ngalokho-ke bhekani, ngithumela kini abaphrofethi, abahlakaniphileyo nezazimthetho. Abanye niyakubabulala, abanye nibabethele, abanye nibashaye emasinagogeni enu, nibaxoshe imizi ngemizi.
Liyakubizwa kini lonke igazi labalungileyo elachithwa emhlabeni, kusukela egazini lika-Abela olungileyo, kuze kube kwelikaZakhariya indodana kaBharakiya, enambulala phakathi kwethempeli ne-althare.
Ngiqinisile ngithi kini: konke lokhu kuyakwehlela phezu kwalesi sizukulwane.
“Jerusalema, Jerusalema, wena obulala abaphrofethi, ubakhande ngamatshe labo abathunyelwe kuwe, kukaningi kangakanani ngilangazelela ukuqoqa abantwana bakho, ngibakhusele phansi kwamaphiko njengesikhukhukazi sikhusele amachwane aso phansi kwamaphiko aso, kodwa anivumanga.
Bhekani nje, indlu yenu enisele nayo, isisele dengwane.
Ngokuba ngithi kini: anisayukubuye ningibone, nize nithi: ‘Ubusisiwe ozayo egameni leNkosi.’ ”
Kuthe uJesu esephumile ethempelini, wahamba, kwasondela abafundi bakhe, bamkhombisa izakhiwo zethempeli.
Waphendula wathi kubo: “Anikuboni yini konke lokhu na? Ngiqinisile ngithi kini: akuyukushiywa lapha itshe phezu kwelinye elingayikudilizelwa phansi.”
Esahleli eNtabeni Yeminqumo, abafundi beza kuye ngasese, bathi: “Sitshele ukuthi lokhu kuyakwenzeka nini, futhi siyakuba yini isibonakaliso sokufika kwakho, nomhla wokuphela na?”
UJesu waphendula, wathi kubo: “Qaphelani ningadukiswa muntu.
Ngokuba kuyakufika abaningi ngegama lami, bathi: ‘Mina nginguKhristu,’ badukise abaningi.
Niyakuzwa ngezimpi, namahemuhemu ezimpi. Nina ningethuki, ngokuba kumele ukuba lokhu kwenzeke, kodwa ukuphela kuyakube kungakafiki.
Isizwe siyakuvukela esinye, nombuso uvukele omunye; kuyakuba khona indlala, nokuzamazama komhlaba izindawo ngezindawo.
Kepha konke lokho kungukuqala nje kwemihelo.
“Ngaleso sikhathi bayakunikhaphela osizini, banibulale, nizondwe yizizwe zonke ngenxa yegama lami.
Abaningi bayakukhubeka, bakhaphelane, futhi bazondane.
Kuyakuvela abaphrofethi mbumbulu abaningi, badukise izindimbane zabantu.
Luyakuphola uthando ngenxa yokwanda kobubi.
Kepha okhuthazelayo kuze kube sekupheleni, nguyena oyakusindiswa.
Leli vangeli lombuso liyakushunyayelwa ezweni lonke, kube ngubufakazi ezizweni zonke, andukuba kufike umhla wokuphela.
“Ngakho-ke uma nibona amanyala anyantisayo, akhuluma ngawo uDaniyeli umphrofethi emi endaweni engcwele – ofundayo makaqaphele ukuthi kusho ukuthini.
AbaseJudiya mababalekele ezintabeni;
ophezu kophahla lwendlu, makangehli ukuyothatha okusendlini yakhe;
osensimini, makangabuyeli emuva ukuyothatha ingubo yakhe.
Maye, kwabakhulelweyo nabancelisayo ngalezo zinsuku!
Khulekelani ukuba ukubaleka kwenu kungabi sebusika noma ngesabatha.
Ngokuba kuyakuba khona usizi olukhulu olungakaze lube khona kwasekuqaleni kwezwe, kuze kube manje, futhi olungasoze lwaba khona.
Ukuba lezo zinsuku bezingafinyezwanga, bekungesindiswe muntu, kodwa ngenxa yabakhethiweyo ziyakufinyezwa.”
“Uma umuntu ethi kini: ‘Bhekani, nangu uKhristu,’ noma ethi: ‘Nanguya,’ ningakholwa.
Ngokuba kuyakuvela okhristu mbumbulu nabaphrofethi bamanga. Bayakuveza izibonakaliso ezinkulu nezimangaliso, ukuze badukise, uma kungenzeka, abakhethiweyo.
Niyabona-ke, nginitshele kungakenzeki lokho.
“Ngakho-ke uma bethi kini: ‘Nango usehlane,’ ningayi lapho; noma bethi: ‘Nangu, usendlini,’ ningabakholwa.
Njengonyazi luphuma empumalanga, lubonakale ngisho entshonalanga, kuyakuba njalo-ke ukufika kweNdodana yomuntu.
“Noma kuphi lapho kunesidumbu khona, kulapho amanqe ebuthana khona.
“Masinyane nje emva kosizi lwalezo zinsuku, “ ‘ilanga liyakufiphazwa, inyanga ayiyukukhanya, izinkanyezi ziyakuwa emkhathini, namandla ezulu ayakuzanyazanyiswa.’
“Khona kuyakubonakala isibonakaliso seNdodana yomuntu ezulwini, bese zikhala zonke izizwe zomhlaba. Zonke ziyakuyibona iNdodana yomuntu iza emafini ezulu, inamandla nenkazimulo enkulu.
Iyakuthuma izingelosi zayo ngokukhala kwecilongo okukhulu, ziqoqe abakhethiweyo bayo emagumbini omane omhlaba, kusukela emkhawulweni wezulu kuze kube komunye.
“Fundani emzekelisweni womkhiwane; uma igatsha lawo selithamba, kuhlume amacembe, nisuke senazi-ke ukuthi seliyathwasa ihlobo.
Kanjalo nani, lapho nibona kwenzeka konke lokhu, yazini ukuthi iNkosi iseduze ngasemnyango.
Ngiqinisile ngithi kini: lesi sizukulwane asiyukwedlula kungakenzeki konke lokhu.
Izulu nomhlaba kuyakudlula, kodwa amazwi ami awasoze adlula.
“Kepha mayelana nalolo lusuku nalelo hora, akekho owazi utho ngalo, ngisho izingelosi zasezulweni, neNdodana uqobo; nguBaba kuphela.
Ngokuba njengasemihleni kaNowa, kuyakuba njalo ukufika kweNdodana yomuntu.
Njengasezinsukwini lezo ezandulela uzamcolo babedla, bephuza, beganwa, bendiswa; kwaze kwafika usuku uNowa angena ngalo emkhunjini.
Abazanga; kwaze kwafika uzamcolo wabakhukhula bonke; kuyakuba njalo nokufika kweNdodana yomuntu.
Kuyakuba khona ababili ensimini; omunye athathwe, omunye ashiywe.
Ababili bayakube begaya etsheni lokusila; omunye uyakuthathwa, omunye ashiywe.
“Ngakho-ke lindani, ngokuba anazi ukuthi iNkosi yenu iyakufika ngaluphi usuku.
Kepha yazini lokhu ukuthi, ukuba umninindlu ubazi ukuthi isela liyakugasela nini ebusuku, ubeyakulinda, angavumi ukuba indlu yakhe igqekezwe.
Ngakho-ke nani hlalani nimi ngomumo, ngokuba iNdodana yomuntu iyakufika ningazelele.
“Pho ngubani oyinceku ethembekileyo nehlakaniphileyo, inkosi yayo eyibeke ukuba yengamele abendlu yayo, ibanike ukudla ngesikhathi esifaneleyo na?
Ibusisiwe leyo nceku okuyakuthi lapho inkosi yayo ifika, iyifumane isebenza.
Ngiqinisile ngithi kini, iyakuyibeka yengamele konke enakho.
Kepha uma leyo nceku embi ithi enhliziyweni yayo: ‘Inkosi yami isalibele,’
bese iqala ukushaya izinceku ezikanye nayo, idle, iphuze nezidakwa,
inkosi yaleyo nceku iyakufika ngosuku engalulindele nangehora engalaziyo,
iyinqamule kabili, iyabele isabelo sayo nabazenzisi; kuyakuba khona lapho ukukhala nokugedla amazinyo.”
“Khona umbuso wezulu uzakufaniswa nezintombi ezilishumi ezathatha izibani zazo, zaphuma zayohlangabeza umyeni.
Kepha eziyisihlanu kuzo zaziyiziwula, neziyisihlanu zihlakaniphile.
Ngokuba eziyiziwula zathatha izibani, kodwa aziwaphathanga amafutha.
Kepha ezihlakaniphileyo zawaphatha amafutha ngezitsha nezibani zazo.
Kuthe umyeni esalibele, zonke izintombi zozela, zalala.
“Kwathi phakathi kwamabili, kwamenyezwa kwathiwa: ‘nangu umyeni eza; phumani nimhlangabeze!’
“Zavuka zonke lezo zintombi, zalungisa izibani zazo.
Kepha eziyiziwula zathi kwezihlakaniphileyo: ‘Sipheni amafutha kwawenu, ngokuba izibani zethu ziyacima.’
“Kepha ezihlakaniphileyo zaphendula, zathi: ‘Qha, funa angasaneli amafutha thina, nani. Okungcono hambani niye kwabathengisayo, nizithengele awenu.’
“Zisahambile ukuyokuthenga, wafika umyeni. Lezo ezazilungele, zangena naye edilini lomshado; kwase kuvalwa umnyango.
“Kamuva, zafika nezinye izintombi, zathi: ‘Nkosi, nkosi, sivulele.’
“Kepha umyeni waphendula, wathi: ‘Ngiqinisile ngithi kini, anginazi.’
“Ngakho-ke hlalani nilindile, ngokuba anilwazi usuku nehora.”
“Umbuso wezulu ufaniswa nomuntu okwathi esezakuhambela kwelinye izwe, wabiza izinceku zakhe, wazinika impahla yakhe.
Enye wayinika amathalenta ayisihlanu, enye aba mabili, enye laba lilodwa vo; yileyo naleyo ngokwamandla ayo; wayesehamba-ke.
Esehambile, inceku eyayinikwe amathalenta ayisihlanu ayipholisanga maseko; yasebenza ngawo, yazuza amanye ayisihlanu.
Kanjalo neyayithole amabili, yazuza amanye amabili.
Kepha leyo eyayithole elilodwa, yahamba, yamba emhlabathini, yayifihla lapho imali yenkosi yayo.
“Emveni kwesikhathi eside, yabuya inkosi yalezo zinceku, yalandisana nazo.
Kweza eyayinikwe amathalenta ayisihlanu, yaletha amanye ayisihlanu, yathi: ‘Nkosi, wanginika amathalenta ayisihlanu; bheka nje, ngizuze amanye ayisihlanu.’
“Inkosi yayo yathi kuyo: ‘Kuhle, nceku enhle nethembekileyo, uthembekile ezintweni eziyingcosana; ngizakukubeka wengamele okuningi; ngena ekuthokozeni kwenkosi yakho.’
“Kweza-ke eyayinikwe amathalenta amabili, yathi: ‘Nkosi, wanginika amathalenta amabili; bheka nje, ngizuze amanye amabili.’
“Inkosi yayo yathi kuyo: ‘Kuhle, nceku enhle nethembekileyo, uthembekile ezintweni eziyingcosana; ngizakukubeka wengamele okuningi; ngena ekuthokozeni kwenkosi yakho.’
“Kwase kuza eyayithole ithalenta elilodwa, yathi: ‘Nkosi, bengazi ukuthi ungumuntu onenhliziyo elukhuni; uvuna lapho ungahlwanyelanga khona, uqoqe lapho ungasakazanga khona.
Ngesaba, ngase ngihamba ngalithukusa emhlabathini ithalenta lakho; bheka, nakhu okungokwakho.’
“Kepha inkosi yayo yaphendula, yathi kuyo: ‘Nceku embi nevilaphayo, kanti bewazi ukuthi ngivuna lapho ngingahlwanyelanga khona, ngiqoqe lapho ngingafazanga khona na?
Ngalokho-ke bekufanele ukuba imali yami uyifake ebhange; ngabe lapho ngifika ngikutholile okwami nenzalo.
“ ‘Ngakho-ke mephuceni lelo thalenta, nilinike onamathalenta alishumi.
Ngokuba yilowo nalowo onakho uyakuphiwa, kube kuningi, kodwa ongenalutho uyakwephucwa ngisho nalokho okuncane anakho.
Leyo nceku engenamsebenzi walutho yiphonseni ebumnyameni obungaphandle, lapho kuyakuba khona ukukhala nokugedla amazinyo.’ ”
“Kuyakuthi lapho iNdodana yomuntu iza ngenkazimulo yayo nezingelosi zonke ezingcwele zikanye nayo, iyakuhlala esihlalweni sayo senkazimulo.
Zonke izizwe ziyakubuthelwa phambi kwayo; ihlukanise abanye kwabanye, njengomelusi ehlukanisa izimvu nezimbuzi.
Iyakumisa izimvu ngakwesokunene sayo, kodwa izimbuzi izimise ngakwesokhohlo sayo.
“INkosi iyakuthi kwabangakwesokunene sayo: ‘Zanini nina enibusiswe nguBaba, nidle ifa lombuso eniwulungiselweyo, selokhu kwasekelwa umhlaba.
Ngokuba ngangilambile, nangipha ukudla; ngangomile, nangiphuzisa; ngangingumfokazi, nangingenisa;
ngihamba ze, nangembathisa; ngangigula, nangihambela; ngangisejele, nangivakashela.’
“Khona abalungileyo bayakuyiphendula, bathi: ‘Nkosi, sakubona nini ulambile, sakupha ukudla; noma womile, sakuphuzisa na?
Sakubona nini ungumfokazi, sakungenisa ezindlini zethu; noma uhamba ze, sakwembathisa na?
Sakubona nini ugula, noma usejele, sakuvakashela na?’
“INkosi iyakuphendula, ithi kubo: ‘Ngiqinisile ngithi kini, njengokuba nakwenza lokho kulaba bafowethu abancane, nakwenza kimi uqobo.’
“Kepha iNkosi iyakuthi kwabangakwesokhohlo sayo: ‘Dedani kimi, nina baqalekisiweyo, niye emlilweni ophakade olungiselwe uSathane nezingelosi zakhe.
Ngokuba ngangilambile, aningiphanga ukudla; ngangomile, aningiphuzisanga;
ngangingumfokazi, anangingenisa ezindlini zenu; ngihamba ze, aningembathisanga; ngigula, ngisetilongweni, aningivakashelanga.’
“Bayakuphendula-ke nabo, bathi: ‘Nkosi, sakubona nini ulambile, noma womile, noma ungumfokazi, noma uhamba ze, noma ugula, noma usejele, sangakusiza na?’
“INkosi iyakubaphendula, ithi: ‘Ngiqinisile ngithi kini: lokhu eningakwenzanga komunye walabo abancinyane, anikwenzanga kimi uqobo.’
“Labo-ke bayakuhamba, baye ekujezisweni okuphakade; kodwa abalungileyo, bayakuya ekuphileni okuphakade.”
Kwathi lapho uJesu eseqedile ukusho wonke lawo mazwi, wathi kubafundi bakhe:
“Niyazi ukuthi emuva kwezinsuku ezimbili kuzakuba yiPhasika; iNdodana yomuntu izakukhashelwa ukuze ibethelwe esiphambanweni.”
Kwabuthana abaphristi abakhulu namalunga esizwe emzini womphristi omkhulu okuthiwa nguKhayifase.
Bakha uzungu lokuba bambambe uJesu ngobuqili, bambulale.
Kepha bathi: “Makungabi ngomkhosi, funa kube khona isiyaluyalu esizweni.”
Kuthe uJesu eseBhethaniya, endlini kaSimoni owayenochoko,
kwafika kuye owesifazane ephethe umfuma esitsheni se-alabhaste, owawungowenani elikhulu; wawuthela ekhanda likaJesu owayehleli esidlweni.
Kepha abafundi bakhe bekubona lokho, bathukuthela, bathi: “Kumoselwani lokhu na?
Ngokuba ngabe kuthengisiwe ngenani eliphezulu, kwaphiwa abampofu.”
Kepha uJesu ekwazi ababekusho, wathi kubo: “Nimhluphelani lo wesifazane na? Ngokuba wenze umsebenzi omuhle kimi.
Ngokuba abampofu ninabo njalo, kodwa Mina aniyukuhlala ninami njalo.
Ngokuba lo wesifazane, ngokuthela lawa mafutha emzimbeni wami, ukwenzele ukungilungisela ukumbelwa.
Ngiqinisile ngithi kini: noma kuphi lapho leli vangeli liyakushunyayelwa khona, emhlabeni wonke, kuyakukhulunywa nangalokhu akwenzile lo wesifazane, kube yisikhumbuzo ngaye.”
Kwasuka omunye wabali-12, okuthiwa nguJuda Iskariyothe, waya kubaphristi abakhulu,
wathi: “Niyakunginika ini, uma ngimkhaphela kini na?” Base bemkalela, bamnika izinhlamvu zesiliva ezingama-30.
Kusukela ngaleso sikhathi, wafuna ithuba lokumkhaphela.
Kwathi ngosuku lokuqala lwesinkwa esingenamvubelo, abafundi baya kuJesu, bathi: “Uthanda ukuba sikulungisele kuphi ukuba udle iPhasika na?”
Wathi: “Hambani niye emzini, kumuntu othile, nithi kuye: ‘Uthi uMfundisi: Isikhathi sami sesiseduze; ngizakwenza iPhasika kwakho nabafundi bami.’ ”
Abafundi benza njengalokhu uJesu ebayalile; balungisa iPhasika.
Sekuhlwile, ehlezi esidlweni nabafundi bakhe abali-12,
besadla, wathi: “Ngiqinisile ngithi kini: omunye wenu uzakungikhaphela.”
Baba lusizi kakhulu, baqala, kwaba yilowo nalowo wathi: “Ngabe yimi yini, Nkosi na?”
Kepha waphendula, wathi: “Lowo ofake isandla kanye nami esitsheni, nguye ozakungikhaphela.
Impela iNdodana yomuntu izakuhamba njengokulotshiwe ngayo, kodwa maye, kulowo muntu iNdodana yomuntu ekhashelwa ngaye! Bekuyakuba ngcono kulowo muntu ukuba akazalwanga.”
Wayesebuza uJuda omkhaphelayo, wathi: “Kungaba yimi, Rabi na?” UJesu wathi kuye: “Usho khona.”
Kuthe besadla, uJesu wathatha isinkwa, wasihlephula, wanika abafundi bakhe, wathi: “Thathani nidle, lokhu kungumzimba wami.”
Wayesethatha indebe, wabonga, wabanika, wathi: “Phuzani kuyo, nina nonke;
ngokuba lokhu kuyigazi lami lesivumelwano elithululwa ngenxa yabaningi ukuze kuthethelelwe izono.
Kepha ngithi kini: Kusukela manje angisayukuphuza kulesi sithelo somvini, kuze kufike lolo suku engiyakusiphuza ngalo nani, sisisha, embusweni kaBaba.”
Sebehlabelele iculo lokubonga, baphuma, baya eNtabeni Yeminqumo.
UJesu wathi kubo: “Nina nonke nizakukhubeka ngami ngalobu busuku, ngokuba kulotshiwe ukuthi: ‘Ngiyakushaya umalusi, izimvu zomhlambi zihlakazeke,’
kodwa emva kokuba sengivusiwe ngiyakunandulela ukuya eGalile.”
UPhethro waphendula, wathi kuye: “Noma bonke bangakuhlamuka, mina angisoze ngakushiya.”
UJesu wathi kuye: “Ngiqinisile ngithi kuwe: ngalobu busuku, ngaphambi kokuba iqhude likhale, uzakungiphika kathathu.”
UPhethro wathi kuye: “Noma ngabe kufanele ukuba ngife nawe, angisoze ngakuphika.” Bonke abafundi basho kanjalo.
UJesu wafika nabo endaweni okuthiwa yiGetsemane, wathi kubafundi bakhe: “Hlalani lapha, ngisayokhuleka laphaya.”
Wathatha uPhethro namadodana amabili kaZebedewu, waqala ukuba nomunyu nosizi.
Khona wathi kubo: “Umphefumulo wami ulusizi kakhulu, kuze kube sekufeni; hlalani lapha, nilinde kanye nami.”
Waqhubeka ibangana, wawa ngobuso, wakhuleka wathi: “Baba, uma kungenzeka, mayedlule kimi le ndebe, kodwa kungabi njengokuthanda kwami, kube njengokuba uthanda wena.”
Wabuyela kubafundi, wabafica belele, wathi kuPhethro: “Kodwa beningehlale nilinde nami ihora libe linye na?
Lindani, nikhuleke ukuze ningangeni ekulingweni; umoya uyavuma, kodwa umzimba ubuthakathaka.”
Wabuye wahamba okwesibili, wakhuleka wathi: “Baba, uma le ndebe ingenakudlula kimi ngingakayiphuzi, mayenziwe intando yakho.”
Wabuyela kubo futhi, wabafumana belele, ngokuba amehlo abo ayegcwele ubuthongo.
Wabuye wabashiya, wayokhuleka ngokwesithathu elokhu esho lona lelo lizwi.
Wayesephindela kubafundi, wathi kubo: “Namanje nisalele, niphumule. Phela ihora selisondele; iNdodana yomuntu izakukhashelwa ezandleni zezoni.
Sukumani sihambe; niyabona-ke, ongikhaphelayo useseduze.”
Kwathi esakhuluma; kwafika uJuda, omunye wabali-12, ehamba nesixuku sabantu esikhulu siphethe izinkemba nezinduku, sivela kubaphristi abakhulu namalunga esizwe.
Omkhaphelayo wayebanike isibonakaliso, wathi: “Lowo engiyakumanga nguye; mbambeni.”
Wayeseya kuJesu ngokushesha, wathi: “Rabi!” Wamanga.
UJesu wayesethi kuye: “Mngani, yenza lokho oze ngakho.” Base besondela, bambamba uJesu.
Omunye walabo ababenoJesu wagqashula inkemba yakhe, wagenca inceku yomphristi omkhulu, wanquma indlebe yayo.
UJesu wathi kuye: “Buyisela inkemba yakho emgodleni wayo, ngokuba bonke abaphatha inkemba bayakubhubha ngenkemba.
Ucabanga ukuthi bengingecele yini kuBaba angithumelele amaviyo ezingelosi angaphezu kwali-12 na?
Pho-ke ingafezeka kanjani imibhalo ethi kufanele ukuba kwenzeke kanjalo na?”
Ngaleso sikhathi uJesu wathi ezixukwini: “Niphume kungathi nize kumphangi, niphethe izinkemba nezinduku, nizongibamba na? Nsuku zonke bengifundisa ethempelini, kodwa anizange ningibambe.
Kepha konke lokho kwenzekile ukuba kugcwaliseke imibhalo yabaphrofethi.” Khona bonke abafundi bamshiya babaleka.
Labo ababembambile uJesu bamyisa kuKhayifase, umphristi omkhulu, lapho kwakubuthene khona izazimthetho namalunga.
Kepha uPhethro wamlandela uJesu ebuqamama, kwaze kwaba segcekeni lomphristi omkhulu. Naye wangena ngaphakathi, wahlala phansi nezikhonzi ukuze abone isiphetho.
Abaphristi abakhulu nomkhandlu wonke bafuna ubufakazi obungamanga ngoJesu, ukuze bambulale.
Kepha ababutholanga, nakuba kwase kufike ofakazi abaningi bamanga. Kodwa kamuva kwavela ababili,
bathi: “Lo wathi: ‘Nginamandla okudiliza ithempeli likaNkulunkulu, ngibuye ngilakhe ngezinsuku ezintathu.’ ”
Kwase kusukuma umphristi omkhulu, wathi kuye: “Awuphenduli ngalutho kulokhu abakufakaza ngawe na?”
Kepha uJesu wathula du. Umphristi omkhulu wayesethi kuye: “Ngikufungisa uNkulunkulu ophilayo ukuba usitshele uma unguKhristu, iNdodana kaNkulunkulu.”
UJesu wayesethi kuye: “Usho khona. Nokho ngithi kini: kusukela manje niyakuyibona iNdodana yomuntu ihleli ngakwesokunene saMandla, iza ngamafu ezulu.”
Umphristi omkhulu waklebhula izingubo zakhe, wathi: “Usehlambalazile; sisabadingelani ofakazi na? Nani senizizwele ngezindlebe zenu ehlambalaza.
Pho nithini ngalokhu na?” Baphendula bathi: “Ufanelwe ngukufa.”
Base bemkhafulela ngamathe ebusweni, bamdushuza, abanye bammukula,
bathi: “Siphrofethele, Khristu; ngubani okushayileyo na?”
UPhethro wayehleli phandle egcekeni, enye yamantombazane yeza kuye, yathi: “Nawe ubunoJesu waseGalile.”
Kepha waphika phambi kwabo bonke, wathi: “Angazi ukuthi ukhuluma ngani.”
Esephumile esangweni, enye intombazane yambona, yathi kwababelapho: “Lona ubenoJesu waseNazaretha.”
Wafunga wagomela ephika futhi, ethi: “Angimazi lowo muntu.”
Emva kwesikhashana, esesondele kwababemi lapho, bathi kuPhethro: “Impela nawe ungomunye wabo, udalulwa ngisho nangukukhuluma kwakho.”
UPhethro waqala ukuqalekisa nokufunga, ethi: “Angimazi lowo muntu.” Masinyane, lakhala iqhude.
UPhethro wayesekhumbula izwi abelishilo uJesu, lokuthi: “Iqhude lingakakhali, uzakube usungiphike kathathu.” Waphumela ngaphandle, wakhala kalusizi.
Kwathi sekusile, bonke abaphristi abakhulu namalunga esizwe bahlangana, bakha itulo lokumbulala uJesu.
Bambopha, bahamba naye, bamnikela kuPilatu, umbusi.
Kuthe uJuda owayemkhaphelile ebona ukuthi icala limlahlile, wazisola, wayesezibuyisela kubaphristi namalunga izinhlamvu zesiliva ezigama-30,
wathi: “Ngonile ngakhaphela ongenacala.” Bona bathi: “Pho uthi asenzeni thina? Zibonele wena.”
Waziphonsa ethempelini izinhlamvu zesiliva, wahamba; esehambile, wazikhunga.
Kepha abaphristi abakhulu bazithatha izinhlamvu zesiliva, bathi: “Akuvunyelwe ukuba zifakwe emnikelweni, ngokuba ziyimali yegazi.”
Bakha icebo, base bethenga ngazo insimu yombumbi, yaba yindawo yokungcwaba abafokazi.
Yingakho-ke leyo nsimu kuthiwa yinsimu yegazi kuze kube namuhla.
Ngakho-ke kwagcwaliseka okwashiwo ngomphrofethi uJeremiya, ukuthi: “Bathatha izinhlamvu zesiliva ezingama-30, inani elamiswa ngabakwa-Israyeli lokuthengiselana.
Bathenga ngazo insimu yombumbi, njengokuba iNkosi ingiyalile.”
Ngaleso sikhathi uJesu wayemi phambi kombusi, umbusi wambuza wathi: “Wena uyinkosi yabaJuda na?” UJesu wathi kuye: “Usho khona.”
Nakuba abaphristi abakhulu namalunga bemethwesa icala, kodwa Yena akaphendulanga.
Kepha uPilatu wathi kuye: “Awukuzwa yini ukuthi kungakanani abakufakaza ngawe na?”
Kepha uJesu akazange amphendule nangelilodwa izwi, umbusi wamangala kakhulu.
Kwakuthi njalo ngomkhosi, umbusi akhululele isixuku isiboshwa sibe sinye esisithandayo.
Ngaleso sikhathi kwakukhona isiboshwa esiluhlupho okwakuthiwa uJesu Bharabha.
Ngakho-ke sebebuthene, uPilatu wathi kubo: “Nifuna ukuba nginikhululele bani uJesu onguBharabha, noma uJesu okuthiwa nguKhristu na?”
UPilatu wayazi ukuthi uJesu bamnikele ngenxa yomona.
Esahleli esihlalweni sokwehlulela, umkakhe wathumela kuye, wathi: “Ungayingeni indaba yalowo muntu olungileyo, ngokuba ngikhathazeke kakhulu ngaye namuhla ephusheni.”
Kepha abaphristi abakhulu namalunga bazinxenxa izixuku ukuba zicele uBharabha, kodwa zimbulale uJesu.
Wayesephendula umbusi, wathi kubo: “Nithanda ukuba nginikhululele muphi kulaba ababili na?” Bathi: “UBharabha.”
UPilatu wathi: “Pho ngenzenjani ngoJesu okuthiwa nguKhristu na?” Bonke bathi: “Makabethelwe.”
Kepha uPilatu wathi: “Bubi buni abenzile na?” Kepha bamemeza kakhulu kunakuqala, bathi: “Makabethelwe esiphambanweni!”
Kuthe uPilatu esebona ukuthi akukho angakwenza, futhi sekuqala isiyaluyalu, wathatha amanzi, wageza izandla phambi kwesixuku, wathi: “Anginacala egazini lalo muntu; ziboneleni nina.”
Abantu bonke baphendula, bathi: “Igazi lakhe malibe phezu kwethu naphezu kwabantwana bethu.”
UPilatu wayesebakhululela uBharabha, kodwa eseshayiwe uJesu, wamnikela ukuba abethelwe esiphambanweni.
Amabutho ombusi ayesemthatha uJesu, amngenisa enqabeni, ayeseqoqela kuye iviyo lonke lamabutho.
Amhlubula izingubo zakhe, amembathisa ingubo ebomvu,
eluka umqhele wameva, awufaka ekhanda, amphathisa umhlanga esandleni sakhe sokunene, aguqa ngamadolo phambi kwakhe, ambhinqa, athi: “Bayede, nkosi yabaJuda!”
Amkhafulela ngamathe, athatha umhlanga, amshaya ekhanda.
Esembhinqile, amkhumula ingubo, amembathisa izingubo zakhe, ahamba naye ayombethela esiphambanweni.
Kuthe amabutho esaphuma lapho, ahlangana nomuntu waseKhurene, nguSimoni igama lakhe; amphoqa ukuba athwale isiphambano sikaJesu.
Esefike endaweni okuthiwa yiGolgotha, okusho iNdawo Yekhanda,
amphuzisa iwayini elixutshwe nenyongo, kodwa eselinambithile, akathandanga ukuliphuza.
Amabutho esembethele esiphambanweni, abelana ngezingubo zakhe, enza unkatho,
ayesehlala lapho, amqapha.
Abeka ngaphezu kwekhanda lakhe icala ayethweswe lona, kubhalwe kwathiwa: LO NGUJESU, INKOSI YABAJUDA.
Kwakubethelwe kanye naye abaphangi ababili; omunye engakwesokunene, omunye engakwesokhohlo.
Ababedlula bamhlambalaza, benikina amakhanda abo,
bethi: “Wena odiliza ithempeli, ubuye ulakhe ngezinsuku ezintathu, zisindise; uma uyiNdodana kaNkulunkulu, yehla esiphambanweni.”
Kanjalo nabaphristi abakhulu nezazimthetho namalunga nabo bambhinqa, bathi:
“Wasindisa abanye, kodwa akakwazi ukuzisindisa Yena. Uyinkosi yakwa-Israyeli, akehle manje esiphambanweni; sizakukholwa nguye.
Wethembele kuNkulunkulu; makamkhulule manje, uma emthanda, ngokuba wathi: ‘NgiyiNdodana kaNkulunkulu.’ ”
Ngisho nabaphangi ababebethelwe esiphambanweni kanye naye, bamhlaza kanjalo.
Kusukela ngehora lesithupha, kwaba mnyama ezweni lonke, kwaze kwaba yihora lesishiyagalolunye.
Kepha ngehora lesishiyagalolunye, uJesu wamemeza ngezwi elikhulu, wathi: “Eli, Eli, lama sabakthani?” okungukuthi: “Nkulunkulu wami, Nkulunkulu wami, ungishiyeleni na?”
Abanye kwababemi lapho bekuzwa lokho, bathi: “Lo ubiza u-Eliya.”
Omunye wabo wagijima, wathatha isiponji, wasicwilisa kuviniga, wayesesihloma emhlangeni, wamphuzisa.
Kepha abanye bathi: “Myeke, sibone ukuthi u-Eliya uzakuza yini amsindise.”
UJesu wabuye wamemeza ngezwi elikhulu, wafa.
Isihenqo sethempeli sadabuka kabili; kusukela phezulu kuze kufike phansi. Umhlaba wazamazama, amadwala aqhekezeka,
kwavuleka amathuna, izidumbu eziningi zabangcwele ababelele, zavuswa;
baphuma emathuneni emva kokuvuka kwakhe, bangena emzini ongcwele, babonakala kwabaningi.
Induna yekhulu nalabo ababenayo beqaphe uJesu, bebona umhlaba uzamazama nalokho okwenzekileyo, besaba kakhulu, bathi: “Impela lo ubeyiNdodana kaNkulunkulu.”
Kwakukhona lapho abesifazane abaningi, ababemi buqamama, bebukela: babekadebemlandela uJesu, bevela eGalile, bemkhonza.
Phakathi kwabo kwakukhona uMariya Magdalena, uMariya unina kaJakobe, uJose, nonina wamadodana kaZebedewu.
Sekuhlwile, kwafika umuntu ocebileyo wase-Arimatheya, igama lakhe nguJosefa, naye wayengumfundi kaJesu;
waya kuPilatu, wacela isidumbu sikaJesu. UPilatu wayalela ukuba anikwe sona.
UJosefa wasithatha isidumbu, wasisonga ngendwangu yelineni enhle ehlanzekileyo;
wasibeka ethuneni lakhe elisha ayeliqophe edwaleni; wagingqela itshe elikhulu emnyango wethuna, wahamba.
Kepha kwakukhona lapho uMariya Magdalena nomunye uMariya, behleli phambi kwethuna.
Ngakusasa, ngosuku olulandela uSuku Lokulungisela, abaphristi abakhulu nabaFarisi babuthana kuPilatu,
bathi: “Nkosi, siyakhumbula ukuthi lo mkhohlisi esaphila, wathi: ‘Emva kwezinsuku ezintathu, ngizakuvuka.’
“Ngakho-ke khipha umyalo ukuba iliba liqashelwe kuze kube lusuku lwesithathu, funa abafundi bakhe bafike bamebe, bese bethi kubantu: ‘Uvusiwe kwabafileyo;’ kuthi inkohliso yokugcina igqame ngokwedlulele kuneyakuqala.”
UPilatu wathi kubo: “Nampa abalindi, hambani niliqaphe njengokubona kwenu.”
Base behamba, balilinda iliba; babeka uphawu etsheni bekanye nabalindi.
Kwathi seledlulile isabatha, ekuseni kusempondozankomo, ngosuku lokuqala lweviki, kwafika uMariya Magdalena nomunye uMariya, ukuzobona iliba.
Kwaba khona ukuzamazama komhlaba okukhulu, ngokuba ingelosi yeNkosi yehla ezulwini, yeza, yaligingqa itshe, yahlala phezu kwalo.
Yayibukeka injengonyazi, isembatho sayo simhlophe njengongqoqwane.
Ababelinde iliba bathuthumela ngenxa yokuyesaba, baba njengabafileyo.
Ingelosi yaphendula yathi kwabesifazane: “Ningesabi, ngokuba ngiyazi ukuthi nifuna uJesu obebethelwe esiphambanweni.
Akekho lapha, ngokuba uvukile njengokusho kwakhe. Wozani nibone indawo lapho ebelele khona.
Phuthumani, nitshele abafundi bakhe ukuthi uvukile kwabafileyo. Useyanandulela ukuya eGalile, nizakumbona khona. Niyabona-ke, senginitshelile.”
Bashesha basuka ethuneni benokwesaba nokuthokoza okukhulu, bagijima bayobikela abafundi bakhe.
UJesu wahlangana nabo, wathi: “Sanibona.” Basondela babamba izinyawo zakhe, bakhuleka kuye.
UJesu wayesethi kubo: “Ningesabi; hambani, nibikele abafowethu ukuba bahambe baye eGalile; bayakungibona lapho.”
Besahamba, abanye kubalindi bafika emzini, babikela abaphristi abakhulu konke okwakwenzekile.
Sebebuthene abaphristi abakhulu namalunga, bakha icebo, base benika amabutho imali eningi,
bathi: “Anibothi abafundi bakhe bafikile ebusuku, bameba silele.
Uma lolu daba luzwakala kumbusi, thina siyakumchazela, nina ningahlushwa lutho.”
Abalindi bayithatha imali, benza njengalokhu beyaliwe. Lolo daba lwasabalala kubaJuda kuze kube namuhla.
Abafundi abali-11 baya eGalile, kuleyo ntaba uJesu ayebayalele yona.
Kwathi lapho bembona, bakhuleka kuye; kodwa abanye bangabaza.
UJesu wasondela, wakhuluma kubo, wathi: “Ngiphiwe amandla wonke ezulwini nasemhlabeni.
Ngakho-ke hambani, nenze izizwe zonke abafundi, nibabhabhadise egameni likaYise neleNdodana nelikaMoya oNgcwele.
Nibafundise ukukugcina konke enginiyale ngakho. Niyabona, Mina nginani izinsuku zonke, kuze kube sekupheleni kwezwe.”
Isiqalo sevangeli elimayelana noJesu Khristu, iNdodana kaNkulunkulu.
Kunjengalokhu kulotshiwe encwadini kamphrofethi u-Izaya, ukuthi: “Bheka, ngithuma isithunywa sami phambi kwakho, esiyakulungisa indlela yakho;
izwi lomemezayo ehlane, lithi: ‘Lungisani indlela yeNkosi, nenze imikhondo yayo iqonde.’ ”
Kwavela uJohane ebhabhadisa ehlane, eshumayela umbhabhadiso wokuphenduka, kube ngukuthethelelwa kwezono.
Kwaphuma, kweza kuye lonke iJudiya, nazo zonke izakhamuzi zaseJerusalema, babhabhadiswa nguye emfuleni iJordani, bevuma izono zabo.
UJohane wayegqoke ingubo yoboya bekameli, ebophe umchilo woqhotho lwesikhumba okhalo lwakhe, edla izinkumbi noju lwasendle.
Wayeshumayela ethi: “Emva kwami kuza onamandla kunami, engingafanele nokuba ngikhothame ngithukulule umchilo wezicathulo zakhe.
Mina nginibhabhadisa ngamanzi, kepha Yena uzakunibhabhadisa ngoMoya oNgcwele.”
Ngalezo zinsuku kwafika uJesu evela eNazaretha eGalile, wabhabhadiswa nguJohane eJordani.
Kwathi nje ukuba aphume emanzini, wabona izulu livuleka, noMoya ehlela phezu kwakhe njengejuba.
Kwezwakala izwi livela ezulwini, lithi: “Wena uyiNdodana yami ethandekayo; ngithokozile ngawe.”
Masinyane uMoya wamkhiphela ehlane elilugwadule.
Wahlala khona izinsuku ezingama-40 elingwa nguSathane, wayephakathi kwezilwane zasendle, kodwa izingelosi zazimkhonza.
Emva kokuboshwa kukaJohane, uJesu wafika eGalile; washumayela ivangeli likaNkulunkulu,
ethi: “Isikhathi sigcwalisekile, umbuso kaNkulunkulu ususondele; phendukani, nikholwe yivangeli.”
Kwathi uJesu edlula ngasolwandle iGalile, wabona uSimoni no-Andreya, umfowabo, bephonsa inetha olwandle, kwazise phela babengabadobi.
UJesu wathi kubo: “Ngilandeleni. Ngizakunenza abadobi babantu.”
Masinyane bashiya phansi amanetha abo, bamlandela.
Esehambe ibangana elifishane, wabona uJakobe kaZebedewu noJohane umfowabo besesikebheni, belungisa amanetha abo.
Wababiza, masinyane base bemshiya esikebheni uyise uZebedewu nezisebenzi eziqashiweyo, bamlandela.
Base bengena eKhaphernawume; kwathi ngosuku lwesabatha, uJesu wangena esinagogeni, wafundisa.
Abantu bamangaliswa ngukufundisa kwakhe, ngokuba wayebafundisa njengonegunya, hhayi njengezazimthetho.
Khona manjalo esinagogeni labo kwakukhona umuntu onomoya ongcolileyo, wamemeza,
wathi: “Ufunani kithi Wena Jesu waseNazaretha na? Uze ukuba uzosibhubhisa na? Ngiyakwazi ukuthi ungubani – ungoNgcwele kaNkulunkulu.”
UJesu wawukhuza umoya ongcolileyo, wathi: “Thula uthi du, uphume kuye!”
Umoya ongcolileyo wamhlukumeza, wakhala ngezwi elikhulu; waphuma kuye.
Bonke bethuka, babuzana bodwa, bathi: “Kuyini lokhu na? Yisifundiso esisha, esinegunya; uyala ngisho nomoya abangcolileyo, bamlalele.”
Udumo lwakhe lwasabalala ngokushesha kuso sonke isifunda eGalile.
Sebephumile esinagogeni, baya masinyane endlini kaSimoni no-Andreya, benoJakobe noJohane.
Umkhwekazi kaSimoni wayelele, ephethwe ngumkhuhlane; baphangisa bambikela uJesu ngaye.
Esesondele kuye, wambamba ngesandla, wamsukumisa; umkhuhlane waphela; wabakhonza.
Kwathi ngokuhlwa, ilanga selizilahle kunina, baletha kuye bonke abagulayo nabanamadimoni.
Wonke umuzi wabuthana ngasemnyango waleyo ndlu.
Waphilisa abaningi ababephethwe yizifo ezinhlobonhlobo, wakhipha amadimoni amaningi; akawavumelanga amadimoni ukuba akhulume, ngokuba ayemazi.
Kwathi ekuseni ngovivi, wavuka, waphuma, waya endaweni eyihlane, wayokhuleka khona.
USimoni nababenaye bamfuna.
Kwathi ukuba bamfumane, bathi kuye: “Bonke bayakufuna.”
Wathi kubo: “Masihambe siye nakwezinye izindawo, emizaneni eseduze, ukuze ngishumayele nakhona, ngokuba ngeza ngenxa yaleso sizathu.”
Wahamba eshumayela emasinagogeni abo kulo lonke iGalile, futhi ekhipha namadimoni.
Kwase kufika kuye onochoko, wamncenga eguqe ngamadolo, ethi kuye: “Uma uthanda ungangihlambulula.”
UJesu egcwele isihawu, welula isandla sakhe, wamthinta, wathi kuye: “Ngiyathanda; hlambuluka.”
Masinyane lwaphela uchoko kuye, wahlambuluka.
Esemdonsile ngendlebe, wammukisa ngokushesha,
wathi kuye: “Uyabona-ke, ungathi vu kumuntu, kodwa hamba uzibonakalise kumphristi, unikele ngenxa yokuhlanjululwa kwakho, njengalokhu kwayala uMose, kube ngubufakazi kubo.”
Kepha owayenochoko esephumile, waqala ukuyisabalalisa le ndaba, kangangokuthi uJesu akabange esakwazi ukungena emzini bembona; wahlala ngaphandle ezindaweni eziyihlane. Nokho abantu beza kuye bevela nxazonke.
UJesu waphinde wangena eKhaphernawume emva kwezinsuku eziningi; kwezwakala ukuthi usekhaya.
Kwase kubuthana isixuku; akwabe kusaba khona ndawo ngasemnyango. UJesu wayekhuluma izwi kubo.
Kweza kuye abantu abane, bethwele ngohlaka umuntu ofe uhlangothi.
Bengakwazi ukumsondeza kuye ngenxa yesixuku, baqaqa uphahla lwendlu lapho uJesu ayekhona. Kuthe sebevule isikhala behlisa uhlaka ayelele kulo ofe uhlangothi.
UJesu ebona ukukholwa kwabo, wathi kofe uhlangothi: “Ndodana, uthethelelwe izono zakho.”
Kwakukhona lapho izazimthetho ezithile, zadlinza ezinhliyweni zazo, zathi:
“Kungani lo ekhuluma kanje na? Uyahlambalaza. Ngubani ongathethelela izono ngaphandle kukaNkulunkulu na?”
UJesu wakwazi ngaleso sikhathi emoyeni wakhe ezazidlinza ngakho, wayesethi kuzo: “Nidlinzelani ngalokhu ezinhliziyweni zenu na?
Yikuphi okulula ukuba kuthiwe kofe uhlangothi: ‘Uthethelelwe izono zakho,’ noma kuthiwe: ‘Vuka uthathe uhlaka lwakho, uhambe’ na?
Kepha ukuze nazi ukuthi iNdodana yomuntu inamandla okuthethelela izono emhlabeni,” wathi kofe uhlangothi:
“Ngithi kuwe: Vuka, uthathe uhlaka lwakho, uye endlini yakho.”
Wayesevuka, wathatha uhlaka lwakhe masinyane, waphuma phambi kwabo bonke. Bamangala bonke, bamdumisa uNkulunkulu, bathi: “Asikaze sikubone okunje.”
UJesu wayesephuma futhi, waya ngasolwandle; sonke isixuku seza kuye, wayesesifundisa.
Kwathi edlula, wabona uLevi ka-Alifewu ehlezi endaweni yokuthela, wathi kuye: “Ngilandele.” Wathi lacu, wamlandela.
Kuthe uJesu ehlezi edla endlini kaLevi, kwangena abathelisi abaningi nezoni, bahlala etafuleni noJesu nabafundi bakhe, ngokuba babebaningi bemlandela.
Izazimthetho ezingabaFarisi, zibona ukuthi uJesu udla nezoni nabathelisi, zathi kubafundi bakhe: “Kungani ukuba adle nabathelisi nezoni na?”
UJesu esekuzwile lokho, wathi kuzo: “Abaphilileyo abayidingi inyanga, kodwa idingwa ngabagulayo kuphela. Mina angizelanga ukuzobiza abalungileyo, kodwa izoni.”
Abafundi bakaJohane nababaFarisi babezila ukudla. Abathile baya kuJesu, bathi kuye: “Kwenziwa yini ukuba abafundi bakaJohane nabafundi babaFarisi bazile ukudla, kodwa abafundi bakho bangazili na?”
UJesu wathi kubo: “Kambe ikhetho lingazila yini umyeni esahlezi nalo na? Phinde neze, alisoze lazila uma umyeni esenalo.
Kepha izinsuku ziyeza, lapho umyeni ezakususwa kulo; yilapho-ke lizakuzila ngalolo lusuku.
Akekho othungela isichibi esingashukekile engutsheni endala, funa lokhu okusha okuchitshelwe ngakho kuklebhule lokhu okudala, bese kwanda ukuklebhuka.
Akekho futhi othela iwayini elisha ezimvabeni ezindala, funa liqhumise izimvaba, bese kuchitheka iwayini, nezimvaba ziqhekezeke. Kepha iwayini elisha lithelwa ezimvabeni ezintsha.”
Kwathi ngesabatha edabula emasimini okusanhlamvu, abafundi bakhe baqala ukukha izikhwebu bedlula.
AbaFarisi bathi kuye: “Kungani abafundi bakho benze okungavumelekile ngesabatha na?”
Wathi kubo: “Kanti anifundanga yini ngokwenziwa nguDavide mhla eswele, futhi elambile, yena nayehamba nabo na?
Akangenanga yini endlini kaNkulunkulu ngesikhathi sika-Abhiyathara, umphristi omkhulu, wadla izinkwa zobukhona bukaNkulunkulu ezingavunyelwe ukudliwa muntu, ngaphandle kwabaphristi kuphela, wayesenika nababenaye na?”
UJesu wayesethi kubo: “Isabatha lenzelwa umuntu, umuntu akenzelwanga isabatha.
Ngokunjalo-ke, iNdodana yomuntu iyiNkosi ngisho neyesabatha imbala.”
UJesu wabuye wangena esinagogeni. Kwakukhona lapho umuntu owayenesandla esishwabeneyo.
Babembheke ngeso lokhozi ukuthi ngabe uzomphilisa yini lowo muntu ngesabatha, ukuze bamthwese icala.
UJesu wathi kumuntu onesandla esishwabeneyo: “Sukuma, ume phakathi nendawo.”
Wayesethi kubo: “Kuvunyelwe yini ngesabatha ukwenza okuhle noma okubi na? Ukusindisa noma ukubulala na?” Kepha bathula du.
UJesu waqalaza nxazonke ebabuka, ethukuthele, edabukile kakhulu ngenxa yobulukhuni bezinhliziyo zabo. Wayesethi kulowo muntu: “Yelula isandla sakho.” Waselula, saphiliswa isandla sakhe.
AbaFarisi baphuma ngokushesha bayohlanganisa amakhanda ngaye nabakaHerodi ukuthi bangambhubhisa kanjani.
UJesu nabafundi bakhe basuka baya ngasolwandle. Izixuku zamlandela, zivela eGalile naseJudiya,
eJerusalema nase-Idumiya, nangaphesheya kweJordani, naseThire naseSidoni. Isixuku esikhulu seza kuye lapho sesizwile ngakho konke ayekwenza.
UJesu wayesebatshela abafundi bakhe ukuba bamlungisele isikebhe ngenxa yesixuku, ukuze singamminyanisi.
Ngokuba waphulukisa abaningi, kangangokuthi bonke ababegula babedudulana, bewela phezu kwakhe, ukuze bamthinte.
Nomoya abangcolileyo lapho bembona, babewa phansi phambi kwakhe, bamemeze, bathi: “Wena uyiNdodana kaNkulunkulu.”
UJesu wabayalisisa omoya ababi ukuba bangalokothi bakudalule ukuthi ungubani.
UJesu wayesenyukela entabeni, wabiza labo ayebafuna; beza kuye.
Waqoka abali-12, ababiza futhi ngabaphostoli ukuze babenaye, nokuba aphinde abathume ukuba bayoshumayela,
nokuba babe negunya lokukhipha amadimoni.
Wabamisa abali-12, wabaqamba lawa magama: uSimoni wamqamba wathi nguPhethro,
uJakobe kaZebedewu, noJohane umfowabo; wabaqamba ngokuthi ngoBhowanergesi okusho ukuthi bangozulu liyaduma;
u-Andreya, uFiliphu, uBhartholomewu, uMathewu, uThomase, uJakobe ka-Alifiyose, uThadewu, uSimoni uMkhanani,
noJuda Iskariyothe owamkhaphelayo.
Kwathi lapho uJesu efika ekhaya, kwaphinde kwabuthana futhi isixuku, kangangokuthi uJesu nabafundi bakhe abakwazanga ukudla isinkwa.
Abakubo, sebekuzwile lokho, baphuma ukuyomthatha, ngokuba bathi usangene.
Nezazimthetho ezazehlile zivela eJerusalema, zathi: “UnoBhelzebhule, ukhipha amadimoni ngombusi wamadimoni.”
Wayesezibiza, wakhuluma kuzo ngemizekeliso, wathi: “Kungenzeka yini ukuba uSathane akhiphe uSathane na?
Uma umbuso wehlukene wodwa, awusoze wema.
Kanjalo uma nendlu yehlukene yodwa, leyo ndlu ayisoze yema.
NoSathane, uma ezivukela yena uqobo, ahlukane, akanakuma, kodwa uyakushabalala.
Kanjalo, akekho ongangena endlini yesiqhwaga, aphange impahla yaso, uma engaqalanga ngokubopha isiqhwaga bese ephanga indlu yaso.
Ngiqinisile ngithi kini: abantwana babantu bayakuthethelelwa izono zonke nokuhlambalaza, noma ngabe kungakanani abangahlambalaza ngakho,
kepha lowo ohlambalaza uMoya oNgcwele kanakuthethelelwa naphakade, kodwa unecala lesono esingapheliyo.”
UJesu wakusho lokho ngokuba babemthuke bathi unomoya ongcolileyo.
Kwase kufika unina kaJesu nabafowabo, bema ngaphandle, base bethumela kuye ukuba ayobizwa.
Isixuku esasimngungile sathi kuye: “Unyoko, abafowenu, nawodadewenu bemi ngaphandle; bayakufuna.”
Wabaphendula wathi: “Ngubani umame nabafowethu na?”
Waqalaza ebuka ababehlezi bemngungile, wathi: “Niyabona-ke, nangu umame nabafowethu.
Ngokuba noma ngubani owenza intando kaNkulunkulu, nguye ongumfowethu nodadewethu nomame.”
UJesu wabuye waqala ukufundisa ngasolwandle. Kwabuthana kuye isixuku esikhulu kakhulu kangangoba waze wangena esikebheni, wahlala olwandle. Sonke isixuku sasimi emhlabathini ngasolwandle.
Wabafundisa okuningi ngemizekeliso, ethi kubo ngenkathi ebafundisa:
“Lalelani! Kwakukhona umuntu owaphuma ukuyohlwanyela.
Kwathi ehlwanyela imbewu, enye yawela ngasendleleni; kwafika izinyoni, zayidla, zayiqeda.
Enye imbewu yawela edwaleni, lapho kungenamhlabathi khona omningi. Yamila ngokushesha, ngokuba umhlabathi wawungajulile.
Ekuphumeni kwelanga yantshwama, ngokuba izimpande zayo zazingajulile; yabuna.
Enye imbewu yawela emeveni, ameva akhula, ayiminyanisa, ayaze yathela sithelo.
Enye imbewu yawela emhlabathini ovundileyo; yaqhuma, yakhula, yathela isithelo. Enye yathela ngama-30, enye ngama-60, enye ngekhulu.”
Wayesethi: “Onezindlebe zokuzwa makezwe.”
Kwathi eseyedwa, ababenaye nabali-12 bambuza ngale mizekeliso.
Wathi kubo: “Nina nambulelwe imfihlakalo yombuso kaNkulunkulu, kodwa abangaphandle, konke kuza kubo ngemizekeliso,
ukuze bathi bebona nokubona, kodwa bangabonisisi; bathi bezwa nokuzwa, kepha bangaqondi, funa bapheduke, bathethelelwe.”
Wayesethi kubo: “Uma ningawuqondi lo mzekeliso, pho niyakuyazi kanjani yonke eminye imizekeliso na?
Umhlwanyeli uhlwanyela izwi.
Abangasendleleni yilabo okuthi selihlwanyeliwe kubo izwi, balizwa, kodwa uSathane afike ngokushesha, alisuse izwi ebeselihlwanyelwe kubo.
Imbewu ewele edwaleni, imele labo abathi bangalizwa izwi, balamukele masinyane ngokuthokoza,
kodwa lingagxili kubo, ngokuba kabanampande; bahlala isikhashana nje, kuthi lapho kuvela ukuhlupheka nokuzingelwa ngenxa yezwi, bahlubuke ngokushesha.
Abahlwanyelwe emeveni yilabo abathi sebelizwile izwi,
kodwa liminyaniswe yiminako yalesi sikhathi: ukukhohlisa kwengcebo, nokunxanela ezinye izinto. Lokhu kuyangena kuliminyanise izwi, bese liba ngelingatheliyo.
Abahlwanyelwe emhlabathini ovundileyo yilabo abalizwa izwi, qede balamukele, bathele isithelo ngama-30, ngama-60 nangekhulu.”
UJesu wayesethi kubo: “Ngabe isibani siyabekwa yini phansi kwesitsha noma phansi kombhede; kanti asibekwa othini na?
Ngokuba akukho okusithekileyo okungayukubekwa obala, akukho okuyisifuba okungayukudalulwa.
Uma ekhona onezindlebe zokuzwa, makezwe.”
Wayesethi kubo: “Kuqapheleni enikuzwayo, ngokuba ngaleso silinganiso enilinganisa ngaso, nani niyakulinganiselwa ngaso; kuze kwenezelwe.
Ngokuba onakho uyakuphiwa, kodwa ongenakho uyakwemukwa ngisho nalokho anakho.”
Wayesethi: “Umbuso kaNkulunkulu unje: ufana nomhlwanyeli ophonsa imbewu emhlabathini,
alale, avuke ubusuku nemini; imile imbewu, ikhule, kodwa engazi ukuthi lokho kwenzeka kanjani.
Umhlabathi uthela isithelo ngokwawo; kuqala ikhaba, ukhahlele, kuvele izikhwebu, bese kuba nezinhlamvu ezipheleleyo kuso.
Uma isithelo sesivuthwe ngokupheleleyo, usingenela ngesikela ngokushesha, ngokuba sekufike isikhathi sokuvuna.”
Wabuye wathi: “Ngabe umbuso kaNkulunkulu siyakuwufanisa nani na? Mzekeliso muni esingawuchaza ngawo na?
Singawufanisa nenhlamvu yesinaphu, ethi incane kunazo zonke izimbewu ezisemhlabeni,
kodwa kuthi lapho isihlwanyelwe, ikhule ibe nkulu kunakho konke okumilayo, ibe namagatsha amakhulu; izinyoni zezulu zakhe izidleke emthunzini wayo.”
UJesu walisho izwi kubo ngemizekeliso eminingi enjalo, ngangokwamandla abo okuzwa.
Akazange akhulume lutho kubo ngaphandle kwemizekeliso. Kepha sebebodwa ngasese, wayesebachasisela konke abafundi bakhe.
Kuthe sekuhlwile ngalolo lusuku, wathi kubo: “Asiwelele ngaphesheya.”
Base besishiya isixuku, bahamba naye njengoba ayesesikebheni, kwakunezinye izikebhe ezabe zihambisana kanye naye.
Kusenjalo kwavuka isivunguvungu esikhulu, amagagasi ayesizamazamisa kakhulu isikebhe futhi sesiqala ukugcwala amanzi.
UJesu wayesemuva esikebheni elele esicamelweni, bamvusa, bathi kuye: “Mfundisi, wabhudla ubuthongo, sibhubha na?”
Wayesevuka, wawukhuza umoya, wathi kulo ulwandle: “Thula, uthi du.” Umoya wawusuthula, kwaba nokuthula okukhulu.
Wayesethi kubo: “Yini nibe ngamagwala na? Anikabi nakukholwa namanje na?”
Base beba nokwesaba okukhulu, bakhuluma bodwa, bathi omunye komunye: “Kanti ungubani lo, lokhu ngisho umoya nolwandle kuyamlalela na?”
Bafinyelela ngaphesheya kolwandle, ezweni lamaGerasa.
Kwathi lapho esephumile esikebheni, wahlangana masinyane nomuntu ovela emathuneni, onomoya ongcolileyo.
Lowo muntu wayesehlala emathuneni, kungasekho muntu owayengambopha ngeketango,
ngokuba wayeseboshwe kaningi ngozankosi nangamaketango, kodwa ewagqabula amaketango, futhi ephule nozankosi. Kwakungekho noyedwa owayenamandla okumthambisa.
Wayesehlala njalo ubusuku nemini esemathuneni nasezintabeni, ememeza, futhi ezilimaza ngamatshe.
Wathi ukuba ambone uJesu esebuqamama, wagijima, wakhuleka kuye;
wayesememeza ngezwi elikhulu, ethi: “Ufunani kimi Wena Jesu, Ndodana kaNkulunkulu oPhezukonke na? Ngikufungisa uNkulunkulu, ungangihluphi.”
UJesu wathi kuye: “Phuma kulo muntu, moya ongcolileyo!”
Wayesembuza ethi: “Ungubani igama lakho na?” Waphendula wathi kuye: “NginguLegiyona igama lami, ngokuba sibaningi.”
Wayesemncenga kakhulu ukuba angabaxoshi kulelo lizwe.
Kwakukhona lapho ngasentabeni umhlambi omkhulu wezingulube owawuklabile.
Yamncenga imimoya engcolileyo, yathi: “Sithumele ezingulubeni ukuze singene kuzo.”
Wayivumela. Yaphuma-ke imimoya engcolileyo, yangena ezingulubeni. Umhlambi wakhalakathela eweni, waphonseka olwandle; lowo mhlambi wawuyizi-2 000 zezingulube, ezaminza olwandle.
Ababezelusile babaleka, bayobika emzini nasemaphandleni. Abantu beza ukuzozibonela ngawabo okwakwenzekile.
Bafika kuJesu, bambona obenamadimoni ehlezi embethe, futhi esesangulukile engqondweni, lowo owayenoLegiyona; base besaba.
Labo ababezibonele ngawabo, babalandisa ukuthi kwenzekeni kulowo muntu owayenamadimoni, nokwenzeka ezingulubeni.
Base beqala ukumnxenxa ukuba aphume aphele ezweni lakubo.
Kuthe lapho uJesu engena esikebheni, lowo owayenamadimoni, wamncenga ukuba ahambe naye.
Kepha uJesu wamnqabela, kunalokho wathi kuye: “Hamba uye ekhaya kwabakini, ubabikele ukuthi kungakanani iNkosi ekwenzele khona, yakuhawukela.”
Wahamba-ke, waqala ukulanda ngalokho emizini elishumi konke lokho uJesu ayemenzele khona; bamangala bonke.
Kuthe uJesu esewelele ngaphesheya futhi ngesikebhe, kwabuthana izindimbane zabantu kuye, engasolwandle.
Kwafika omunye wabaphathi besinagoge, ogama lakhe nguJayiru. UJayiru wathi angambona uJesu, waziphonsa phansi ngasezinyaweni zakhe,
wamncenga kakhulu, ethi: “Indodakazi yami isiyalayela, ake uze, ubeke izandla phezu kwayo ukuba isinde, iphile.”
UJesu wahamba naye. Isixuku esikhulu samlandela, samminyanisa.
Kwakukhona owesifazane owayenomopho iminyaka eli-12.
Wayehluphekile kakhulu, ehla enyuka ezinyangeni eziningi, futhi esechithe konke ayenakho, kodwa kunhlanga zimuka nomoya; kubhebhetheka okwakumphethe.
Esezwile ngoJesu, waya esixukwini ngasemuva, wathinta ingubo kaJesu,
ngokuba wathi: “Uma nje ngingathinta izingubo zakhe, ngizakusindiswa.”
Masinyane, umthombo wegazi lakhe wanqamuka, wezwa emzimbeni wakhe ukuthi usesindile esifeni ebesimhlupha.
Kwathi uJesu angezwa kuye ukuthi amandla aphumile, waphendukela esixukwini, wathi: “Ngubani othinte izingubo zami na?”
Abafundi bakhe bathi kuye: “Ingani uyabona ukuthi isixuku sikuminyanisile. ‘Pho ubuzelani ukuthi ngubani okuthintileyo na?’ ”
Waqalaza ukuba abone ukuthi ngubani owayenze lokho.
Kepha owesifazane ekwazi okwakwenzekile kuye, wesaba, wathuthumela, weza waziphonsa phansi phambi kukaJesu, wamtshela lonke iqiniso.
UJesu wayesethi kuye: “Ndodakazi, ukukholwa kwakho kukusindisile, hamba ngokuthula; uphulukisiwe enhluphekweni yakho.”
Kuthe uJesu esakhuluma, kwafika abanye bevela endlini kaJayiru, umphathi wesinagoge, bathi: “Indodakazi yakho isifile; usamkhathazelani uMfundisi na?”
Kwathi ukuba uJesu akuzwe lokho abakushoyo, wathi kumphathi wesinagoge: “Ungesabi, kholwa nje kuphela.”
Akavumelanga muntu ukuba amlandele ngaphandle kukaPhethro, uJakobe, noJohane, umfowabo kaJakobe.
Bafika-ke endlini yomphathi wesinagoge. UJesu wabona isiyaluyalu; abakhalayo, nababelila kakhulu.
Esengenile wathi kubo: “Niyaluzelani, futhi nikhalelani na? Umntwana akafile, kodwa ulele.”
Bamhleka usulu. Kepha esebakhiphile bonke ababesendlini, wathatha uyise nonina womntwana nababenaye, wangena nabo lapho umntwana ayekhona.
Wabamba umntwana ngesandla, wathi kuye: “Thalitha khumi,” okungukuthi uma kuhunyushwa: “Ntombazana, ngithi kuwe, vuka!”
Masinyane intombazane yavuka, yahamba, ngokuba yayineminyaka eli-12. Khona lapho bamangala ngokumangala okukhulu.
UJesu wabadonsa ngendlebe ukuba lokhu kungaziwa muntu, futhi wabatshela ukuba bayiphe ukudla intombazane.
UJesu wasuka lapho, waya ezweni lakubo; abafundi bakhe bamlandela.
Selifikile isabatha, waqala ukufundisa esinagogeni. Abaningi ababelalele bamangala, bathi: “Ngabe lo ukuthatha kuphi lokhu na? Kuhlakanipha kuni lokhu akunikiwe na? Zimangaliso zini futhi lezi azenza ngezandla zakhe?
Lo akusiye yini umbazi, indodana kaMariya, nomfowabo kaJakobe, uJose, uJuda noSimoni na? Nodadewabo abekho yini lapha phakathi kwethu na?” Base bekhubeka ngaye.
UJesu wayesethi kubo: “Umphrofethi akadelelwa ezizweni, ngaphandle kwelakubo, nasezihlotsheni zakhe, nakwabendlu yakwabo.”
Akakwazanga ukwenza lapho nesisodwa isimangaliso, ngaphandle nje kokubeka izandla phezu kwabagulayo abayingcosana; wabaphulukisa.
Wamangala ngokungakholwa kwabo. Wahamba imizi ngemizana efundisa.
UJesu wayesebiza abali-12, waqala ukubathuma ngababili, wabanika igunya lokukhipha omoya abangcolileyo.
Wabayala ukuba bangaphathi lutho lwendlela, baphathe kuphela udondolo; bangaphathi sinkwa, sikhwama sokuthekela, namali emigodleni yabo.
Bafake izicathulo, kepha bangembathi amabhantshi amabili.
Wayesethi kubo: “Nakuyiphi indlu eniyakungenisa kuyo, hlalani kuyo nize nihambe lapho.
Noma kuyiphi indawo lapho bengayukunamukela khona, nalapho bengayukunilalela khona, anothi uma senisuka kuyo, nithintithe uthuli oluphansi kwezinyawo zenu, lokho kube ngubufakazi kubo.”
Bahamba-ke beshumayela ukuba abantu baphenduke.
Bakhipha amadimoni amaningi, bagcoba abaningi abagulayo ngamafutha, babaphulukisa.
INkosi uHerode yezwa ngalokhu, ngokuba igama likaJesu lase lidumile. Kwakuthiwa uJohane uMbhabhadisi uvukile kwabafileyo, yingakho enza izimangaliso ezingaka kuye.
Kepha abanye bathi: “Ngu-Eliya;” abanye bathi: “Ngumphrofethi onjengabanye abaphrofethi.”
Kepha uHerode esekuzwile lokho, wathi: “UJohane, lo engamnquma ikhanda, uvusiwe.”
UHerode uqobo nguye owayethumele ukuba abanjwe uJohane, wayesemfaka ejele, ngenxa kaHerodiya umkaFiliphu umfowabo, ngokuba wamthatha wamgana.
Phela uJohane wayethe kuHerode: “Awuvunyelwe ukungena umkamfowenu.”
Ngakho-ke uHerodiya wambambela igqubu, wafuna ukumbulala, kodwa akabanga nawo amandla.
UHerode wayemesaba uJohane, emazi ukuthi uyindoda elungileyo, engcwele, futhi wayemvikela. Lapho uHerode emlalela uJohane wayesala ekhathazekile kakhulu, nokho wayethanda ukumlalela.
Ekugcineni lwafika olungaliyo, lapho uHerode ngosuku lwakhe lokuzalwa wenzela izikhulu zakhe idili; izinduna zempi nabanumzane baseGalile;
kwase kungena indodakazi kaHerodiya; yasina, yajabulisa uHerode nababehleli naye. Inkosi yathi entombazaneni: “Cela kimi noma yini oyithandayo, ngizakukunika yona.”
Yafunga kuyo yathi: “Noma yini oyicelayo kimi ngizakukunika yona, noma ngabe yingxenye yombuso wami.”
Intombazane yaphuma, yathi kunina: “Ngizakucelani na?” Yena wathi: “Ikhanda likaJohane uMbhabhadisi.”
Yabuyela enkosini ngokushesha, yacela yathi: “Ngithanda ukuba ungiphe, khona manje ngomcengezi, ikhanda likaJohane uMbhabhadisi.”
Inkosi yadabuka kakhulu, kodwa ngenxa yesifungo eyayisenzile nangenxa yalabo ababehlezi nayo esidlweni, ayithandanga ukwenqaba.
Inkosi yayisithuma masinyane ozokwenza lokhu, yamyala ukuba alethe ikhanda likaJohane. Wasuka, wamnquma ikhanda ejele.
Waliletha ikhanda lakhe ngomcengezi, wayinika intombazane, yona yalinika unina.
Kwathi ukuba abafundi bakhe bakuzwe lokho, beza, bathatha isidumbu sakhe, basibeka ethuneni.
Abaphostoli babuthana kuJesu, bambikela konke ababekwenzileyo nabakufundisileyo.
Wayesethi kubo: “Wozani ngasese, nina nodwa, siye endaweni eyihlane, nihlabe ikhefu.” Ngokuba babebaningi abezayo nabahambayo, abaze balithola nethuba lokuba badle.
Base behamba ngomkhumbi, baya ngasese, endaweni eyihlane.
Abaningi bababona behamba, baqonda ukuthi baya kuphi, base begijima ngezinyawo, besuka kuyo yonke imizana, bafika lapho kuqala kunabo.
Esehlile uJesu, ephuma esikebheni, wabona isixuku esikhulu, wasihawukela, ngokuba sasinjengezimvu ezingenamelusi; wayeseqala esifundisa okuningi.
Kwathi isikhathi sesihambile, abafundi bakhe beza kuye, bathi: “Le ndawo iyihlane, futhi seliyozilahla kunina.
Bahambise ukuba baye ezindaweni eziseduze nasemizaneni ukuze bazithengele ukudla.”
Wayesephendula, ethi kubo: “Bapheni nina ukudla.” Bathi kuye: “Sihambe yini siyothenga izinkwa zodenariyu abangama-200, sibaphe badle na?”
Wathi kubo: “Ninezinkwa ezingaki? Hambani niyobheka.” Sebazi bathi: “Ziyisihlanu, nezinhlanzi ezimbili.”
Wabayala ukuba bonke bahlale phansi otshanini obuluhlaza, izigaba ngezigaba.
Base behlala phansi amaqoqo ngamaqoqo, amanye ngekhulu, amanye ngama-50.
Wazithatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula izinkwa, wazinika abafundi ukuba bazabele abantu; nezinhlanzi ezimbili wababela bonke zona.
Bonke badla, basutha.
Babutha imvuthuluka yezinkwa neyezinhlanzi, kwagcwala iziqabetho ezili-12.
Abadla izinkwa lapho kwakungamadoda ayizi-5 000.
UJesu wayesephoqa ngokushesha abafundi bakhe ukuba bangene esikebheni, bamandulele ukuya phesheya eBhethsayida, aze yena ahlakaze isixuku.
Esevalelisile esixukwini, wahamba waya entabeni ukuyokhuleka.
Kwathi sekuhlwile, isikebhe siphakathi nolwandle, Yena esele yedwa emhlabathini,
wababona ukuthi banobunzima obukhulu lapho begwedla, ngokuba umoya wawuphambana nabo. Kwathi ngomlindo wesine wobusuku, weza kubo ehamba phezu kolwandle; kwaba sengathi uyadlula kubo.
Kepha bambona ehamba phezu kolwandle, bacabanga ukuthi ngumungcwi; bakhala.
Phela bonke bambona, bethuka. Kepha washesha wakhuluma nabo, wathi kubo: “Yimani isibindi; yiMina, ningesabi.”
Wayesekhwela esikebheni ababekuso, umoya wanqamuka; bamangala kakhulu impela phakathi kwabo.
Ngokuba abakuqondanga okwenzeke ezinkweni, lokhu inhliziyo yabo yayilukhuni.
Kuthe sebewelile, bafika eGenesaretha, babophela isikebhe lapho osebeni.
Kwathi bephuma nje esikebheni, abantu bambona uJesu.
Bagijimela kuzo zonke izifunda, baqala ukuletha abagulayo ngezinhlaka, babayisa lapho bezwe kuthiwa ukhona.
Kwathi noma kuphi lapho engena khona, emizaneni, emizini, nasemakhaya, babeke abagulayo ezigcawini, bamncenge ukuba bathinte noma umphetho wengubo yakhe kuphela; bonke abamthintayo baphiliswa.
Kwabuthana kuJesu abaFarisi nezazimthetho, bevela eJerusalema.
Babona abanye babafundi bakhe bedla izinkwa ngezandla ezingcolileyo, okungukuthi ezingageziwe.
Ngokuba abaFarisi nabaJuda bonke abadli bengazigezanga izandla, belandela isiko lokhokho;
nalapho bebuya endalini kabadli bengazihlambile izandla. Kukhona nokunye okuningi abakwemukelayo futhi ababambelele kukho; njengokugeza izinkomishi, izinkamba, nezitsha zethusi.
AbaFarisi nezazimthetho bambuza bathi: “Kungani abafundi bakho bengaqhubi ngokwenkambiso yabadala na?”
UJesu wayesethi kubo: “U-Izaya waphrofetha kahle ngani, nina bazenzisi, njengokuba kulotshiwe ukuthi: “ ‘Lesi sizwe singidumisa ngezindebe zomlomo, kodwa inhliziyo yaso ikude nami;
bangikhonza ngeze, bafundisa izifundiso eziyimiyalo yabantu.’
“Niyeka umyalo kaNkulunkulu, nibambelele esikweni labantu.”
Wayesethi kubo: “Yebo, nilahla umyalo kaNkulunkulu ukuze nigcine isiko lenu.
Ngokuba uMose wathi: ‘Hlonipha uyihlo nonyoko,’ nokuthi: ‘Noma ngubani othuka uyise noma unina, makafe nokufa.’
Kepha nina nithi: ‘Uma umuntu ethi kuyise noma kunina: Lokhu kungumnikelo engethembise ukuwunikela kuNkulunkulu, esho isipho abebengasizakala ngaso,’
lowo muntu anisamvumeli ukuba asize uyise noma unina.
Nilenza ize izwi likaNkulunkulu ngenxa yesiko lenu enalamukelayo, nokunye okuningi okunjalo enikwenzayo.”
UJesu wabuye wabiza isixuku, wathi kuso: “Ngilaleleni, nina nonke, niqonde.
Akukho lutho olungaphandle komuntu olungangena kuye lumngcolise, kuphela lokho okuphuma kuye, yikho okumngcolisayo.
Onezindlebe zokuzwa, makezwe.”
Kuthe esengene endlini, esuka esixukwini, abafundi bakhe bambuza ngalo mzekeliso.
Wayesethi kubo: “Kanti nani aninakuqonda na? Aniqondi yini ukuthi konke okungaphandle uma kungena kumuntu akunakumngcolisa na?
Ngokuba akungeni enhliziyweni yakhe, kodwa kuya esiswini, kuphumele ngaphandle.” Ngokusho kanjalo wayechaza ukuthi konke ukudla kuhlanzekile.
Wayesethi: “Kepha okuphuma kumuntu, yikho okumngcolisayo.
Ngokuba ngaphakathi enhliziyweni yomuntu kuvela imicabango emibi: ubufebe, ukweba, ukubulala,
ukuphinga, umona, nabo bonke ububi, inkohliso, ukonakala okukhulu, iso elibi, ukuhlambalaza, ukuzidla, nobuwula.
Zonke lezi zinto ezimbi zivela ngaphakathi, futhi ziyamngcolisa umuntu.”
UJesu wasuka lapho, waya ezifundeni eThire. Wangena endlini, nokho wayengathandi ukuba kube khona owaziyo ngalokho, kodwa akwenzakalanga ukuba akwazi ukuzifihla.
Kwathi masinyane owesifazane owayenendodakazi encane eyayinomoya ongcolileyo, esezwile ngaye, wafika waziphonsa ngasezinyaweni zikaJesu.
Kepha lo wesifazane wayengumGriki owayezalelwe eSirofenike, wamnxusa uJesu ukuba akhiphe idimoni endodakazini yakhe.
UJesu wayesethi kuye: “Ake kusuthe abantwana kuqala, ngokuba akukuhle ukuthatha isinkwa sabantwana, usiphonse ezinjaneni.”
Kepha owesifazane waphendula, wathi kuye: “Yebo, Nkosi, kodwa nezinjana zidla imvuthuluka yabantwana phansi kwetafula.”
Wayesethi kuye: “Ngenxa yaleli lizwi, hamba; idimoni seliphumile endodakazini yakho.”
Esehambile wabuyela endlini yakhe owesifazane, wafica umntwana elele embhedeni, idimoni seliphumile.
UJesu esephumile futhi ezifundeni eThire, wadabula eSidoni, waya ngasolwandle iGalile, enqamula eDekhapholi.
Baletha kuye isithulu esinamalimi, bamncenga ukuba abeke isandla sakhe phezu kwaso.
UJesu wagudluka naso esixukwini, baba bodwa, wayesefaka iminwe yakhe ezindlebeni zaso, wafela amathe, wathinta ulimi lwaso,
wabheka ngasezulwini, wabubula, wathi kuso: “Efatha!” okungukuthi: “Vuleka!”
Izindlebe zaso zavuleka ngokushesha, lwaqaqululeka nolimi lwaso, sakhuluma kahle.
Wabadonsa ngendlebe ukuba bangatsheli muntu. Kepha kwathi noma ebayalisisa kwaba sengathi uyababhebhezela, bayisabalalisa kakhulu indaba.
Bamangala ngokwedlulele, bathi: “Wenze konke kahle; izithulu uzenza zizwe, nezimungulu zikhulume.”
Ngalezo zinsuku kwabuye kwabuthana izindimbane zabantu, kepha babengenakudla. UJesu wabiza abafundi bakhe, wathi kubo:
“Ngiyasihawukela isixuku, ngokuba sekuphele izinsuku ezintathu sinami, futhi singenakho esingakudla.
Uma ngisihambisa silambile, sibuyele emakhaya, siyophelelwa ngamandla endleleni, ngokuba abanye baso bavela kude.”
Abafundi bakhe bamphendula, bathi: “Umuntu angazithatha kuphi izinkwa lapha ehlane ezingasuthisa laba bantu na?”
Wababuza abafundi bakhe, wathi: “Ninezinkwa ezingaki na?” Bathi: “Eziyisikhombisa.”
Wayeseyala isixuku ukuba sihlale phansi; wazithatha izinkwa eziyisikhombisa, wabonga, wazihlephula, wabanika abafundi bakhe ukuze basabele; basabela-ke isixuku.
Babenezinhlanzana futhi eziyingcosana; nazo wazibusisa, wabayala ukuba basabele zona.
Abantu badla, basutha, babutha imvuthuluka eningi eyayisele, yagcwala iziqabetho eziyisikhombisa.
Babebalelwa ezi-4 000; wayesebamukisa.
Esengene masinyane esikebheni nabafundi bakhe, waya esifundeni eDalimanutha.
Kwafika kuye abaFarisi, baqala ukuqophisana naye, befuna isibonakaliso esivela ezulwini, bemlinga.
UJesu wabubula emoyeni wakhe, wathi: “Lesi sizukulwane sifunelani isibonakaliso na? Ngiqinisile ngithi kini: lesi sizukulwane asiyukunikwa sibonakaliso.”
Wabashiya, wangena futhi esikebheni, walibangisa ngaphesheya.
Kepha babekhohliwe ukuphatha izinkwa; babengenalutho ngaphandle kwesinkwa esisodwa esasisesikebheni.
Wayesebayala ethi: “Qaphelani, nixwaye imvubelo yabaFarisi nekaHerode.”
Babephikisana bodwa, bethi ukusho lokhu ngokuba bengenazinkwa.
UJesu ekwazi abadlinza ngakho, wathi kubo: “Nikhulumelani nodwa ngokuthi aninazinkwa na? Anikaboni yini, futhi anikaqondi? Inhliziyo yenu iselukhuni na?
Ninamehlo, kodwa aniboni yini, ninezindlebe kodwa anizwa na? Anisakhumbuli yini
mhlazana ngihlephulela abayizi-5 000 izinkwa eziyisihlanu ukuthi nabutha iziqabetho ezingaki ezigcwele imvuthuluka na?” Bathi kuye: “Ezili-12.”
“Mhlazana izinkwa ziyisikhombisa kwabayizi-4 000, lapho nabutha iziqabetho ezingaki ezigcwele imvuthuluka na?” Bathi kuye: “Eziyisikhombisa.”
Wathi kubo: “Anikaqondi yini namanje na?”
Bafika eBhethsayida, baletha kuye impumputhe, bamncenga ukuba ayithinte.
UJesu wayibamba ngesandla impumputhe wayiholela ngaphandle komuzi, waphimisela amathe emehlweni ayo, wabeka izandla zakhe phezu kwayo, wayibuza, wathi: “Kukhona yini okubonayo na?”
Yabheka, yathi: “Ngibona abantu, ngibabona behamba; kungathi yizihlahla.”
Waphinda futhi wabeka izandla zakhe emehlweni ayo, yavula amehlo, yasinda, yabonisisa konke ngokucacileyo.
Wayiphindisela ekhaya, wathi kuyo: “Ungangeni emzini wabantu.”
UJesu wasuka nabafundi bakhe, waya emizaneni eKhesariya Filiphi. Besesendleleni, wababuza abafundi bakhe, wathi kubo: “Abantu bathi ngingubani na?”
Baphendula bathi kuye: “UnguJohane uMbhabhadisi;” abanye bathi: “Ungu-Eliya,” abanye bathi: “Ungomunye wabaphrofethi.”
Wayesebabuza ethi: “Nina-ke nithi ngingubani na?” UPhethro waphendula, wathi kuye: “Wena unguKhristu.”
Wabayalisisa ukuba bangatsheli muntu ngaye.
Waqala ukubafundisa ngokuthi iNdodana yomuntu imelwe ukuhlupheka ngokuningi, ilahlwe ngamalunga, abaphristi abakhulu, nezazimthetho, ibulawe, kepha ivuke emva kwezinsuku ezintathu.
Leli lizwi walisho ngokusobala. UPhethro wamdonsela eceleni, waqala ukumthethisa.
Kepha uJesu waphenduka, wabheka abafundi bakhe, wamthethisa uPhethro, ethi: “Buyela emva kwami, Sathane. Awuzibuki izinto ngeso likaNkulunkulu, kodwa ngelabantu.”
UJesu wayesebiza isixuku nabafundi bakhe, wathi kubo: “Uma umuntu ethanda ukungilandela, makazidele, athathe isiphambano sakhe, angilandele.
Ngokuba yilowo nalowo othanda ukusindisa ukuphila kwakhe uyakulahlekelwa yikho, kodwa olahlekelwa ngukuphila kwakhe ngenxa yami nangenxa yevangeli, uyakukusindisa.
Ngokuba kuyakumsiza ngani umuntu ukuzuza izwe lonke, alahlekelwe ngukuphila kwakhe na?
Yini umuntu anganikela ngayo ukuze ibe yisihlengo sokuphila kwakhe na?
Ngokuba yilowo nalowo onamahloni ngami nangamazwi ami kulesi sizukulwane esiphingayo nesonakeleyo, neNdodana yomuntu iyakuba namahloni ngaye lapho iza ngenkazimulo kaYise kanye nezingelosi ezingcwele.”
Wayesethi kubo: “Ngiqinisile ngithi kini: kukhona abanye kulaba abemi lapha abangayukufa, baze bawubone umbuso kaNkulunkulu ufika ngamandla.”
Kwathi kungedlula izinsuku eziyisithupha, uJesu wathatha uPhethro, uJakobe, noJohane, wakhuphukela nabo entabeni ende, bebodwa. UJesu waguquka esinye isimo phambi kwabo.
Izingubo zakhe zacwebezela zaba mhlophe qwa, ngangokuba umhlanzi wasemhlabeni wayengeke akwazi ukuzihlanza zibe mhlophe kanjalo.
Base bebona u-Eliya noMose bekhuluma noJesu.
UPhethro wayesethi kuJesu: “Rabi, kuhle kithi ukuba sibe lapha, masakhe amadokodo amathathu, elinye kube ngelakho, elinye kube ngelikaMose, nelinye kube ngelika-Eliya.”
Wayengazi ukuthi uthini, ngokuba babesaba kakhulu.
Khona manjalo kwafika ifu labasibekela; kwezwakala izwi efini, lithi: “Lo uyiNdodana yami ethandekayo; yilaleleni.”
Ngokushesha bathi bethi qala qala, ababe besabona muntu, ngaphandle kukaJesu yedwa owayenabo.
Sebehla entabeni, uJesu wabayala ukuba bangatsheli muntu ngabakubonileyo, iNdodana yomuntu ingakavuki kwabafileyo.
Lokho kwaba yisifuba sabo, belokhu bebuzana bodwa ukuthi kuyini lokho kuvuka kwabafileyo.
Base bembuza, bethi: “Zisholoni izazimthetho ukuthi kufanele kufike u-Eliya kuqala na?”
Wayesethi kubo: “Impela u-Eliya uyakubuya kuqala ukuze abuyisele konke, kodwa kulotshweni ngeNdodana yomuntu ukuthi izakuhlupheka ngokuningi, idelelwe na?
Kepha ngithi kini: u-Eliya sewafika, benza kuye abakuthandayo njengalokhu kulotshiwe ngaye.”
Kwathi lapho sebefikile kubafundi, babona isixuku esikhulu sibangungile nezazimthetho ziqagulisana nabo.
Isixuku sathi singambona uJesu samangala, sagijima saqonda kuye, sambingelela.
Wayesebabuza ethi: “Yini eniphikisana ngayo nabo na?”
Omunye wesixuku wamphendula, wathi: “Mfundisi, ngilethe kuwe indodana yami enomoya wobumungulu.
Njalo lapho uyibamba, uyiqumba phansi, ikhihlize amagwebu, igedle amazinyo, futhi yome ibe luqhotho. Ngikhulumile nabafundi bakho ukuba bawukhiphe, kodwa behluleka.”
UJesu waphendula, wathi: “Maye, sizukulwane esingenakukholwa, kuyoze kube nini nginibekezelela na? Yiletheni kimi.”
Base beyiletha kuye. Kwathi umoya ungambona, wayihlukumeza kakhulu ngokushesha, yafumbeka phansi emhlabathini, yazigingqa ikhihliza amagwebu.
UJesu wambuza uyise wathi: “Sekunesikhathi esingakanani kwenzeka kuyo lokhu na?” Wathi: “Kusukela isengumntwana.
Lo moya usuyiphonse kaningi emlilweni nasemanzini ukuba uyibhubhise, kodwa uma unamandla okwenza okuthile, sihawukele, usisize.”
UJesu wayesethi kuye: “Uthi: ‘Uma unamandla!’ Konke kuyenzeka kulowo okholwayo.”
Uyise womntwana wayesememeza masinyane, wathi: “Ngiyakholwa, siza ukungakholwa kwami.”
UJesu ebona ukuthi isixuku sigijima siya ndawonye, wawukhuza umoya ongcolileyo, wathi kuwo: “Wena moya oyisimungulu nesithulu, ngiyakuyala, ngithi kuwe: phuma kuye, ungaphindi futhi ungene kuye.”
Umoya wamemeza, wamhlukumeza kakhulu, waphuma kuye; umntwana waba njengofileyo, baze bathi abaningi: “Usefile.”
Kepha uJesu wambamba ngesandla, wamphakamisa; wayesesukuma.
Sebengenile endlini, abafundi bakhe bambuza ngasese, bathi: “Kungani thina sehlulekile ukuwukhipha na?”
UJesu wathi kubo: “Lolu hlobo lungephume ngalutho, kuphela ngokukhuleka.”
Basuka lapho, badabula iGalile; uJesu akathandanga ukuba kwazi muntu,
ngokuba wayefundisa abafundi bakhe. Wathi kubo: “INdodana yomuntu izakukhashelwa ezandleni zabantu, bazakuyibulala; kuyakuthi isibulewe, ivuke emva kwezinsuku ezintathu.”
Kepha abakuqondanga lokho ayekusho, besaba nokumbuza.
Base beya eKhaphernawume. Kwathi esengene endlini, wababuza, ethi: “Yini le ebeniqagulisana ngayo endleleni na?”
Kepha bathula du, ngokuba babephikisana endleleni ngokuthi ngubani omkhulu.
Wahlala phansi, wabiza abali-12, wathi kubo: “Uma umuntu ethanda ukuba ngowokuqala, makabe ngowokugcina kubo bonke, nesikhonzi sabo bonke.”
Wayesethatha umntwana, wammisa phakathi kwabo, wamgona, maqede wathi kubo:
“Yilowo nalowo owamukela abe munye kubantwana abanje ngegama lami, uyangamukela Mina. Ongamukelayo, akamukeli Mina nje, kodwa wamukela ongithumileyo.”
UJohane wayesethi kuye: “Mfundisi, sibone umuntu ekhipha amadimoni ngegama lakho; samenqabela, ngokuba engesiye umlandeli wethu.”
Kepha uJesu wathi: “Ningamenqabeli, ngokuba akekho owenza izimangaliso ngegama lami ongaguquka ngokuphazima kweso akhulume kabi ngami;
ongamelene nathi, ungakithi.
Yilowo nalowo oniphuzisa inkezo yamanzi ngegama lami ngokuba ningabakaKhristu, ngiqinisile ngithi kini: akasoze alahlekelwa ngumvuzo wakhe.
“Nalowo okhubekisa abe munye kulaba abancinyane abakholwa kimi, kuyakuba ngcono kuye ukuba itshe lokusila ligaxwe entanyeni yakhe, aphonswe olwandle.
“Uma isandla sakho sikukhubekisa, sinqume. Kungcono kuwe ukuba ungene ekuphileni uyingini kunokuba uye esihogweni, emlilweni ongacimekiyo, unezandla zombili.
Lapho impethu yakhona ingafi, nomlilo wakhona ungacimi.
Uma unyawo lwakho lukukhubekisa, lunqume. Kungcono ungene ekuphileni uyinquge kunokuba uphonswe esihongweni, emlilweni ongacimekiyo, unezinyawo zombili.
Lapho impethu yakhona ingafi, nomlilo wakhona ungacimi.
Uma iso lakho likukhubekisa, likhiphe. Kungcono ungene embusweni kaNkulunkulu uyindlobho kunokuba uphonswe esihongweni unamehlo omabili.
Lapho impethu yakhona ingafi, nomlilo wakhona ungacimi.
“Yilowo nalowo uyovivinywa ngomlilo.
“Usawoti muhle, kodwa uma usawoti usuduma, niyakuwubuyisela kanjani ubusawoti bawo na? Yibani nosawoti phakathi kwenu, nihlalisane ngokuthula.”
UJesu wasuka lapho, waya ezifundeni eJudiya nangaphesheya kweJordani. Izixuku zabuye zabuthana kuye, waphinda wabafundisa abantu njengasemihleni.
Kwase kusondela abaFarisi, bambuza ukuthi kuvunyelwe yini ukuba indoda ilahle umkayo. Babemlinga.
Kepha waphendula, wathi kubo: “Kanti uMose waniyala wathini na?”
Bathi: “UMose wavuma ukuba kulotshwe incwadi yesehlukaniso, alahlwe.”
UJesu wayesethi kubo: “UMose wanibhalela lo myalo ngenxa yobulukhuni benhliziyo yenu.
Kepha kusukela ekuqaleni kokudalwa, uNkulunkulu wabenza owesilisa nowesifazane.
Ngenxa yalokho, indoda iyakushiya uyise nonina, inamathele kumkayo.
Labo ababili bayakuba nyamanye, ngakho abasebabili, kepha sebenyamanye.
Ngakho-ke lokho akuhlanganisileyo uNkulunkulu, makungehlukaniswa ngumuntu.”
Sebesendlini, abafundi babuye bambuza ngalokho.
Wathi kubo: “Yilowo nalowo olahla umkakhe, aganwe ngomunye, unecala lokuphinga kumkakhe.
Nowesifazane uma elahla indoda yakhe, agane enye, uyaphinga.”
Base beletha kuye abantwana abancane ukuba abaphathe, kodwa abafundi babakhuza.
UJesu ekubona lokho wathukuthela, wathi kubo: “Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.
Ngiqinisile ngithi kini: yilowo nalowo ongawemukeli umbuso kaNkulunkulu njengomntwana, kasoze angena kuwo.”
Wayesebagona, wababusisa, ebeka izandla phezu kwabo.
Ekuphumeni kwakhe, esendleleni, kweza kuye umuntu egijima, waguqa phambi kwakhe, wambuza wathi: “Mfundisi omuhle, ngiyakwenzenjani ukuze ngizuze ifa lokuphila okuphakade na?”
Kepha uJesu wathi kuye: “Ungibizelani ngokuthi ngimuhle na? Akekho omuhle, munye kuphela, uNkulunkulu.
Uyayazi imiyalelo ethi: Ungabulali, ungaphingi, ungebi, ungafakazi amanga, ungaqhwagi muntu, hlonipha uyihlo nonyoko.”
Kepha yena wathi: “Mfundisi, ngikugcinile konke lokho kusukela ebusheni bami.”
UJesu wambheka, wamthanda, wayesethi kuye: “Kunye vo okusakusilele; hamba uthengise ngakho konke onakho, uphe abampofu, khona-ke uzakuba nengcebo ezulwini, bese uza, ungilandele.”
Kepha lelo lizwi lamnyukubalisa, waphindela emuva ebhocobele, ngokuba wayecebe kakhulu.
UJesu waqalaza, wayesethi kubafundi bakhe: “Maye, kulukhuni kuyitshe kwabanothileyo ukuba bangene embusweni kaNkulunkulu!”
Abethusa abafundi lawo mazwi akhe. UJesu waqhubeka wathi: “Bantwana, kulukhuni kakhulu ukungena embusweni kaNkulunkulu.
Kulula ukuba ikameli lingene ngembobo yosungulo, kunokuba onothileyo angene embusweni kaNkulunkulu.”
Bamangala kakhulu, omunye wathi komunye: “Pho ngubani ongasindiswa na?”
UJesu wababuka, wayesethi kubo: “Lokho akunakwenzeka kubantu, kepha kuNkulunkulu akunjalo, ngokuba kuNkulunkulu konke kungenzeka.”
UPhethro wayesethatha ethi kuye: “Uyabona, thina sikushiye konke, sakulandela.”
UJesu wathi: “Ngiqinisile ngithi kini: akukho muntu oshiye indlu, noma abafowabo, noma odadewabo, noma unina, noma uyise, noma abantwana, noma amasimu ngenxa yami nangenxa yevangeli,
ongayukwemukeliswa ngekhulu manje kulesi sikhathi: izindlu, abafowabo, odadewabo, onina, abantwana, amasimu, nokuhlushwa; esikhathini esizayo ukuphila okuphakade.
Kepha abaningi abangabokuqala bayakuba ngabokugcina, nabokugcina bayakuba ngabokuqala.”
Besendleleni bekhuphukela eJerusalema, uJesu ehamba phambi kwabo, ababemlandela babemangele, benokwesaba. Waphinda futhi wathatha abali-12, wayeseqala ukubatshela ngokwakuzomehlela, ethi:
“Manje sikhuphukela eJerusalema; iNdodana yomuntu izakukhashelwa kubaphristi abakhulu nezazimthetho. Bazakuyigweba ukuba ife, bayikhaphele kwabezizwe,
bayiklolodele, bayikhafulele ngamathe, bayishaye, bayibulale, kepha emva kwezinsuku ezintathu izakuvuka.”
Kwase kusondela kuye uJakobe noJohane, amadodana kaZebedewu, bathi kuye: “Mfundisi, siyathanda ukuba usenzele lokhu esizakukucela kuwe.”
Wathi kubo: “Nifuna ukuba nginenzeleni na?”
Bathi kuye: “Siphe ukuba sihlale, omunye ngakwesokunene sakho, omunye ngakwesokhohlo sakho, enkazimulweni yakho.”
Kepha uJesu wathi kubo: “Anikwazi enikucelayo. Ningasiphuza yini isitsha engisiphuzayo, nibhabhadiswe ngombhabhadiso engibhabhadiswa ngawo na?”
Bathi kuye: “Singakwenza.” UJesu wathi kubo: “Yebo, isitsha engisiphuzayo niyakusiphuza, nibhabhadiswe ngombhabhadiso engibhabhadiswa ngawo.
Kepha ukuhlala ngakwesokunene sami nangakwesokhohlo sami, akusikho okwami ukuba ngiphane ngakho, kodwa kungokwalabo abakulungiselelweyo.”
Kwathi ukuba abalishumi bakuzwe lokho, base bebathukuthelela oJakobe noJohane.
UJesu wayesebabiza, wathi kubo: “Niyazi ukuthi abangababusi bezizwe babusa ngesandla esiqinile, nezikhulu zazo zibaphatha ngonya.
Kepha akunjalo phakathi kwenu, kodwa yilowo nalowo ofuna ukuba mkhulu phakathi kwenu, makabe yisikhonzi senu,
nalowo ofuna ukuba ngowokuqala phakathi kwenu, makabe yinceku yabo bonke.
Ngokuba nayo iNdodana yomuntu ayizelanga ukukhonzwa, kepha ukukhonza nokunikela ukuphila kwayo, kube yisihlengo sabaningi.”
Bafika eJerikho. Ngesikhathi uJesu ephuma eJerikho nabafundi bakhe nesixuku esikhulu, uBharthimewu owayeyimpumputhe eyisinqibi, eyindodana kaThimewu, wayehleli ngasendleleni.
Kwathi ukuba ezwe ukuthi nguJesu waseNazaretha owayedlula, waqala ukumemeza ethi: “Jesu, Ndodana kaDavide, ngihawukele!”
Abaningi bamkhuza, bathi makathule, kepha kwaba sengathi bayambhebhezela, wamemeza kakhulu ethi: “Ndodana kaDavide, ngihawukele!”
UJesu wayesema, wathi: “Mbizeni.” Bayibiza impumputhe, bathi kuyo: “Yima isibindi, usukume, uyakubiza.”
Yayisilahla ingubo yayo, yagxuma, yaya kuJesu.
UJesu wathi kuyo: “Ufuna ukuba ngikwenzeleni na?” Impumputhe yathi kuye: “Rabuni, ukuba ngibone.”
UJesu wathi kuyo: “Hamba, ukukholwa kwakho kukusindisile.” Yabona khona lapho, yayisimlandela endleleni.
Kwathi lapho besondela eJerusalema, naseBhethifage, naseBhethaniya ngaseNtabeni Yeminqumo, uJesu wayesethuma abafundi bakhe ababili,
wathi kubo: “Hambani niye emzaneni oqondene nani, kuyakuthi nje lapho ningena kuwo, nifumane ithole lembongolo elingakaze ligitshelwe muntu, likhulekiwe; lithukululeni, nililethe.
Uma kukhona umuntu othi kini: ‘Nikwenzelani lokhu na?’ anothi ‘INkosi iyalidinga, izakulibuyisa lapha masinyane.’ ”
Bahamba-ke, balithola ithole liboshelwe ngasesangweni ngaphandle emgwaqweni; balithukulula.
Abanye kwababemi lapho bathi kubo: “Nenzani, nilithukululelani ithole na?”
Babaphendula njengalokhu uJesu ayeshilo, base bebayeka.
Baliletha ithole kuJesu, babeka izingubo zabo phezu kwalo, wahlala kulo.
Abaningi bendlala izingubo zabo endleleni, abanye amahlamvu ababewagawule endle.
Labo ababehamba phambili nalabo ababelandela, bamemeza bathi: “Hosana! Ubusisiwe ozayo egameni leNkosi.
Ubusisiwe umbuso ozayo kababa uDavide. Hosana kweliphezulu!”
UJesu wangena eJerusalema, waya ethempelini. Esebuke nxazonke, waphuma. Kuthe sekuhlwile, waya eBhethaniya nabali-12.
Ngakusasa lapho bephuma eBhethaniya, uJesu walamba.
Wabona umkhiwane buqamama, unamaqabunga, wasondela kuwo ethi hleze angathola okuthile kuwo. Esefikile kuwo akatholanga lutho, kodwa amacembe wodwa nje, ngokuba kwakungesiso isikhathi samakhiwane.
UJesu wathi kuwo: “Akungabe kusadla noyedwa isithelo esivela kuwe kuze kube phakade.” Abafundi bakhe bakuzwa lokho.
Bafika eJerusalema. UJesu wangena ethempelini, waqala ukuxosha abathengisayo nabathengayo ethempelini. Wagumbuqela amatafula alabo ababeshintshelana imali, nezihlalo zabathengisa ngamajuba.
Akavumelanga muntu ukuba adabule ethempelini ethwele umthwalo.
Wafundisa, wathi kubo: “Akulotshiwe yini ukuthi: ‘Indlu yami iyakubizwa ngokuthi yindlu yokukhuleka yezizwe zonke’ na? Kodwa nina seniyiphendule umhume wabaphangi.”
Abaphristi abakhulu nezazimthetho bakuzwa lokho, bafuna ukuthi bangambhubhisa kanjani, ngokuba babemesaba, kwazise izindimbane zabantu zazimangaliswa ngukufundisa kwakhe.
Kwathi kungahlwa, baphumela ngaphandle komuzi.
Ngakusasa ekuseni badlula bawubona umkhiwane ubunile kusukela ezimpandeni.
UPhethro ekhumbula okwakwenzekile, wathi kuJesu: “Rabi, bheka, umkhiwane owuqalekisileyo ubunile.”
UJesu waphendula, wathi kubo: “Kholwani nguNkulunkulu.
“Ngiqinisile ngithi kini: yilowo nalowo oyakuthi kule ntaba: ‘Zimbuka uphonseke olwandle,’ engangabazi enhliziyweni yakhe, kodwa ekholwa ukuthi lokho akushoyo kuzokwenzeka, uyakukwenzelwa lokho.
Ngakho-ke ngithi kini: konke enikukhulekelayo nenikucelayo, kholwani ukuthi nikwamukele, nizakuba nakho.
Uma futhi nimi nikhuleka, thethelelanani, uma ninamagqubu nomunye, ukuze noYihlo osezulwini anithethelele iziphambeko zenu.
Kepha uma nina ningathethelelani, noYihlo osezulwini akayukunithethelela iziphambeko zenu.”
Babuye babuyela eJerusalema, kwathi ehamba ethempelini, kweza kuye abaphristi abakhulu, izazimthetho namalunga,
bathi kuye: “Lezi zinto uzenza ngagunya lini na? Ngubani okunike leli gunya ukuze wenze lokhu?”
UJesu wathi kubo: “Ngizakunibuza igama libe linye vo, ningiphendule, ukuze nami nginitshele ukuthi ngenza lezi zinto ngagunya lini.
Ukubhabhadisa kukaJohane ngabe kwakuvela ezulwini noma kubantu na? Ngiphenduleni.”
Bahlanganisa amakhanda, bathi: “Uma sithi: ‘Ezulwini,’ uzakuthi: ‘Pho anikholwa ngani nguye na?’
Kepha uma sithi: ‘Kubantu’ ngeke kulunge.” Babesaba isixuku, ngokuba bonke abantu babethi uJohane ungumphrofethi impela.
Base bemphendula uJesu bathi: “Asazi.” UJesu wayesethi kubo: “Nami ngeke nginitshele ukuthi ngenza lezi zinto ngagunya lini.”
UJesu wayeseqala ukukhuluma kubo ngemizekeliso, ethi: “Umuntu watshala isivini, wasibiyela, wemba isikhamo, wakha isiqongo sokulinda. Wasiqashisa kubalimi, wahamba waya kwelinye izwe.
Ngesikhathi sokuvuna, wathumela inceku kubalimi ukuba ilande kubalimi izithelo zesivini.
Bayibamba, bayishaya, bayibuyisela emuva ilambatha.
Waphinda wathumela enye inceku kubo; yona bayilimaza ekhanda, futhi bayichapha ngenhlamba.
Wabuye wathumela enye futhi; yona bayibulala nezinye eziningi. Ezinye bazishaya, ezinye bazibulala.
“Kwase kusele umuntu oyedwa, indodana yakhe ethandekayo. Ekugcineni wathumela yona kubo, ethi: ‘Bazakuyihlonipha indodana yami.’
“Kepha labo balimi bakhuluma bodwa, bathi: ‘Lo uyindlalifa; wozani siyibulale, khona ifa kuzakuba ngelethu.’
Base beyibamba bayibulala, bayiphonsa ngaphandle kwesivini.
“Uzakwenzenjani umninisivini na? Uzofika, ababhubhise labo balimi, isivini asiqashise kwabanye.
Aniwufundanga yini lo mbhalo othi: “ ‘Itshe abalinqabayo abakhi, selaba yinhloko yegumbi.
Lona lavela eNkosini liyisimangaliso emehlweni ethu’ na?”
Base beceba ukumbamba, kodwa besaba isixuku, ngokuba babazi ukuthi ukhulume ngalowo mzekeliso ewuqondise kubo. Base bemshiya, bahamba.
Abanye babaFarisi nabalandeli bakaHerode bathunyelwa kuye ukuba bamhile ngezwi.
Bafika kuye, bathi: “Mfundisi, siyazi ukuthi ukhuluma iqiniso, futhi awuzikhathazi ngokuthi abantu bathini. Ngokuba awukhethi buso bamuntu, kodwa ufundisa indlela kaNkulunkulu ngeqiniso. Ngabe kuvunyelwe yini ukuthela intela kuKhesari noma qha na? Sithele yini noma singatheli?”
Kepha Yena ekwazi ukuzenzisa kwabo wathi kubo: “Ningilingelani na? Lethani kimi udenariyu, ngiwubone.”
Bawuletha. Wayesethi kubo: “Ngokabani lo mfanekiso nalo mbhalo na?” Bathi kuye: “NgokaKhesari.”
UJesu wathi kubo: “Nikani uKhesari okukaKhesari, noNkulunkulu okukaNkulunkulu.” Bamangala ngaye.
Kwase kufika kuye abaSadusi abathi akukho ukuvuka kwabafileyo, bambuza bathi:
“Mfundisi, uMose wasilobela ukuthi, uma kufa umfowabo womuntu, eshiya umkakhe engenamntwana, umfowabo makamngene umkakhe, amvusele umfowabo abolibo.
Kwakukhona izelamani eziyisikhombisa, owokuqala wathatha umfazi; wafa engashiyanga mntwana.
Nowesibili wamthatha, naye wafa engazalanga mntwana, kanjalo nowesithathu.
Abayisikhombisa bafa bengashiyanga mntwana; ekugcineni wafa nowesifazane.
Ekuvukeni, mhla bevuswayo, uyakuba ngumkabani kubo, lokhu bonke abayisikhombisa ubengumkabo na?”
UJesu wathi kubo: “Angithi nidukile ngenxa yokuba ningayazi imibhalo namandla kaNkulunkulu na?
Ngokuba mhla bevuka kwabafileyo abaganwa, abendiswa, kodwa banjengezingelosi ezulwini.
Kepha maqondana nabafileyo ukuthi bayavuswa, anifundanga yini encwadini kaMose ngasesihlahleni sameva ukuthi uNkulunkulu wakhuluma kuye, wathi: ‘NginguNkulunkulu ka-Abhrahama, noNkulunkulu ka-Isaka, noNkulunkulu kaJakobe’ na?
Akasiye uNkulunkulu wabafileyo, kodwa owabaphilayo. Niduke kakhulu.”
Kwase kusondela kuJesu omunye wezazimthetho owayebezwile bebuzana, wabona ukuthi uJesu ubaphendule kahle, wambuza, wathi: “Yimuphi umyalo wokuqala kuyo yonke na?”
UJesu waphendula wathi: “Owokuqala yilo othi: ‘Yizwa Israyeli, iNkosi uNkulunkulu wethu, iNkosi, yinye.
Woyithanda iNkosi, uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho, nangawo wonke amandla akho.’
Owesibili yilo: ‘Womthanda umakhelwane wakho njengalokhu uzithanda wena.’ Awukho omunye umyalo omkhulu kunaleyo.”
Isazimthetho sasesithi kuJesu: “Yebo, Mfundisi lokhu okushilo kuyiqiniso kokuthi yinye iNkosi nokuthi ayikho enye ngaphandle kwayo.
Ukuyithanda ngenhliziyo yonke, nangengqondo yonke, nangamandla wonke, nokuthanda umakhelwane njengalokhu umuntu ezithanda yena kuyayedlula yonke iminikelo yokushiswa nemihlatshelo.”
UJesu embona ukuthi uphendule ngokuqonda, wathi kuye: “Awukude nombuso kaNkulunkulu.” Akubange kusabakhona onesibindi sokumbuza.
Kwathi uJesu esafundisa ethempelini wabuza, wathi: “Zikusho kanjani izazimthetho ukuthi uKhristu uyiNdodana kaDavide na?
UDavide luqobo lwakhe washo ngoMoya oNgcwele, wathi: “ ‘INkosi yathi eNkosini yami: “Hlala ngakwesokunene sami, ngize ngibeke izitha zakho phansi kwezinyawo zakho.” ’
“UDavide luqobo umbiza ngokuthi yiNkosi. Pho-ke uyindodana yakhe kanjani na?” Isixuku esikhulu sasimlalele ngokujabula.
Ngesikhathi efundisa, wathi: “Xwayani izazimthetho ezithanda ukuhamba zembethe izingubo ezinde, nokubingelelwa ezigcawini,
nezihlalo eziphambili emasinagogeni, nezindawo eziqavile emadilini,
ezidla izindlu zabafelokazi, zithandaze isikhathi eside, zizenzisa. Laba bayakwemukeliswa ukulahlwa okukhulu.”
UJesu wayesehlala phansi, maqondana nomphongolo womnikelo, wayebuka ukuthi isixuku sinikela kanjani umnikelo emphongolweni. Abaningi abacebileyo babenikela kakhulu.
Kepha kwafika umfelokazi ompofu wanikela ngamafadingi amabili, okuyisitebela.
Wayesebiza abafundi bakhe, wathi kubo: “Ngiqinisile ngithi kini: lo mfelokazi ompofu unikele kakhulu kunabo bonke abanikele emphongolweni,
ngokuba bonke bacaphune kokuningi abanakho banikela, kodwa lo mfelokazi ekusweleni kwakhe, unikele ngakho konke anakho, konke abephila ngakho.”
Kuthe lapho ephuma ethempelini, omunye wabafundi bakhe, wathi kuye: “Mfundisi, ake ubheke ubuhle balawa matshe nobuhle balezi zakhiwo!”
UJesu wathi kuye: “Uyazibona lezi zakhiwo ezinkulu na? Akuyukusala litshe phezu kwetshe elingayukudilizelwa phansi.”
Esahlezi eNtabeni Yeminqumo, maqondana nethempeli, uPhethro, uJakobe, uJohane, no-Andreya bambuza ngasese,
bathi: “Sitshele ukuthi lokhu kuyakwenzeka nini, nokuthi siyakuba yini isibonakaliso, nesikhathi okuyakufezeka ngaso konke lokhu na?”
UJesu waqala ukukhuluma kubo, ethi: “Qaphelani, funa kube khona onidukisayo.
Kuyakufika abaningi ngegama lami, bathi: ‘Nginguye,’ badukise abaningi.
Kepha nxa nizwa ngezimpi nemibiko ngezimpi, ningakhathazeki; kumele ukuba lokho kwenzeke, kodwa ukuphela kuyakube kungakafiki.
Ngokuba isizwe siyakuvukela esinye isizwe, nombuso uvukele omunye umbuso. Kuyakuba nokuzamazama komhlaba izindawo ngezindawo, kube khona nendlala. Lokhu kuyakuba ngukuqala kwemihelo.
“Ngakho-ke ziqapheleni nina. Bayakunikhaphela emikhandlwini, nishaywe emasinagogeni, nimiswe phambi kwababusi namakhosi ngenxa yami, kube ngubufakazi kubo.
Kepha ivangeli limelwe ukushumayelwa kuqala ezizweni zonke.
Uma beniqhuba, benikhaphela, ningaqali nikhathazeke ngokuthi niyakuthini, kodwa lokho eniyakukunikwa ngaleso sikhathi kukhulumeni, ngokuba akunina enikhulumayo, kodwa nguMoya oNgcwele.
“Khona umuntu uyakukhaphela ekufeni umfowabo, noyise akhaphele umntwana wakhe. Yebo, abantwana bayakubavukela abazali babo, bababulale.
Niyakuzondwa yibo bonke ngenxa yegama lami, kodwa obekezelayo kuze kube sekupheleni, nguye oyakusindiswa.
“Kepha uma nibona amanyala echithakele lapho kungafanele khona – ofundayo makaqaphele. AbaseJudiya mababalekele ezintabeni,
kuthi ophezu kwendlu angabe esehla, ukuba angene athathe okuthile endlini yakhe,
nosensimini makangabuyeli emuva ukuyothatha ingubo yakhe.
Kepha maye, kwabakhulelweyo nabancelisayo, ngalezo zinsuku!
Khulekelani ukuthi kungabi sebusika.
Ngokuba lezo zinsuku ziyakuba nosizi olungazange lube khona kusukela ekuqaleni kwendalo, lapho uNkulunkulu edala konke okudaliweyo kuze kube manje, nolungayukubuye lube khona.
Ukuba iNkosi ibingazifinyezanga lezo zinsuku, ngabe akusindiswanga muntu, kodwa ngenxa yabakhethiweyo eyabakhetha, yazifinyeza lezo zinsuku.
Uma umuntu mumbe ethi kini: ‘Bhekani, nangu uKhristu,’ noma athi: ‘Bhekani, nanguya,’ ningakholwa.
Ngokuba kuyakuvela okhristu mbumbulu nabaphrofethi bamanga, benze izibonakaliso nezimangaliso, ukuze, uma kungenzeka, badukise abakhethiweyo.
Kepha nina qaphelani; nginixwayisile ngalezi zinto.
“Kodwa ngalezo zinsuku, selwedlule lolo sizi, ilanga liyakufiphazwa, inyanga ingakhanyi,
izinkanyezi ezulwini ziyakuwa, namandla asezulwini ayakuzanyazanyiswa.
Khona-ke niyakubona iNdodana yomuntu iza emafini, inamandla amakhulu nenkazimulo.
Kulapho-ke iyakuthumela izingelosi, iqoqe abakhethiweyo bayo emagumbini omane omhlaba, kusukela emkhawulweni womhlaba kuze kube semkhawulweni wezulu.
“Fundani emzekelisweni womkhiwane; nxa igatsha lawo selithamba, liveza amacembe, niyazi ukuthi ihlobo seliseduze.
Kanjalo nani, uma nibona kwenzeka lezi zinto, niyokwazi ukuthi iNdodana yomuntu isiseduze ngasemnyango.
Ngiqinisile ngithi kini: Lesi sizukulwane asiyukudlula, kungakenzeki konke lokhu.
Kuyakudlula izulu nomhlaba, kodwa amazwi ami awayukudlula.
“Kepha lolo lusuku nalelo hora akekho owazi utho ngalo, nazingelosi ezulwini, naNdodana; nguBaba kuphela.
Qaphelani, nilinde, ngokuba anisazi isikhathi ukuthi siyakuba nini.
Kufana nomuntu owahamba waya kwelinye izwe, washiya indlu yakhe. Wanika izinceku zakhe amandla, yileyo naleyo wayinika umsebenzi wayo, wayeseyala umlindisango ukuba alinde.
“Ngakho-ke lindani, ngokuba anazi ukuthi umnikazi wendlu uyakufika nini, noma kusihlwa, noma kwesikabhadakazi, noma ngokukhala kwezinkukhu noma ekuseni,
funa afike ngokuzuma, anifumane nilele.
Lokhu engikusho kini ngikusho kubo bonke, ngithi: ‘Lindani.’ ”
Emva kwezinsuku ezimbili, kwaba khona iPhasika nomkhosi wesinkwa esingenamvubelo; abaphristi abakhulu nezazimthetho babefuna ithuba lokuthi bangambamba kanjani ngobuqili, bambulale.
Base bethi: “Makungabi ngomkhosi, funa kusuke isiyaluyalu esizweni.”
Kwathi eseseBhethaniya ehleli edla, endlini kaSimoni owayenochoko, kwafika owesifazane ephethe umfuma we-alabhaste wamafutha enadi lodwa, elibiza inani elikhulu. Wawuchoboza umfuma, wathela amafutha ekhanda likaJesu.
Kepha abanye bathukuthela base bekhuluma bodwa, bethi: “Kungani kumoswa lawa mafutha na?
Ngokuba lawa mafutha ngabe athengisiwe ngodaneriyu abangaphezu kwama-300, kwaphiwa abampofu.” Base bemthukuthelela owesifazane.
Kepha uJesu wathi: “Myekeni; nimhluphelani na? Wenze umsebenzi omuhle kimi.
Abampofu niyohlala ninabo njalo; ningabenzela okuhle noma nini uma nithanda, kodwa Mina aninami njalo.
Wenze okungangamandla akhe; uwugcobile umzimba wami, ewugcobela ukuba umbelwe ngaphambi kwesikhathi.
Ngiqinisile ngithi kini: Nomaphi lapho liyakushunyayelwa khona ivangeli ezweni lonke, kuyakukhulunywa nangalokho akwenzileyo, kube yisikhumbuzo ngaye.”
UJuda Iskariyothe, ongomunye wabali-12, waya kubaphristi abakhulu ukuba akhaphele uJesu kubo.
Sebekuzwile lokho bathokoza, bathembisa ukumnika imali. Wayesefuna ithuba elihle lokumkhaphela.
Kwathi ngosuku lokuqala lwesinkwa esingenamvubelo okwakuhlatshwa ngalo iPhasika, abafundi bakhe bathi kuye: “Uthanda ukuba siyokulungiselela kuphi ukuba udle iPhasika na?”
Wayesethuma ababili kubafundi bakhe, wathi kubo: “Hambani niye emzini; nizakuhlangana nomuntu othwele imbiza yamanzi, mlandeleni.
Lapho engena khona niyokuthi kumninindlu: ‘UMfundisi uthi: “Iphi indlu yami lapho ngingadlela khona iPhasika nabafundi bami na?” ’
Yena uzakunikhombisa ikamelo elikhulu eliphezulu, elendlelweyo, lilungisiwe; silungiseleni khona.”
Bahamba abafundi bafika emzini, bafica kunjengokuba eshilo; base belungisa iPhasika.
Wafika kusihlwa nabali-12.
Sebehlezi ekudleni, uJesu wathi: “Ngiqinisile ngithi kini omunye phakathi kwenu, odla kanye nami, uzakungikhaphela.”
Baqala ukuba nosizi, bathi kuye ngamunye: “Kungaba yimi na?”
Wathi kubo: “Ngomunye wabali-12, okha kanye nami esitsheni.
INdodana yomuntu izakuhamba njengalokhu kulotshiwe ngayo, kodwa maye, kulowo muntu iNdodana yomuntu eyakukhashelwa ngaye! Kuyakuba ngcono kulowo muntu ukuba kazalwanga.”
Kuthe besadla, uJesu wathatha isinkwa, wasibusisa, wasihlephula, wanika abafundi bakhe, wathi: “Thathani lokhu: kungumzimba wami.”
Wayesethabatha indebe, wabonga, wabanika, baphuza kuso bonke.
Wathi kubo: “Lokhu kuyigazi lami lesivumelwano elithululwa ngenxa yabaningi.
Ngiqinisile ngithi kini: angisayukuphuza okwesithelo somvini, kuze kufike lolo lusuku engiyakusiphuza ngalo sisisha embusweni kaNkulunkulu.”
Kwathi sebehlabelele, baphuma baya eNtabeni Yeminqumo.
UJesu wathi kubo: “Nonke nizakukhubeka, ngokuba kulotshiwe ukuthi: ‘Ngiyakushaya umelusi, izimvu zihlakazeke.’
Kepha emva kokuvuswa kwami ngiyakunandulela ukuya eGalile.”
UPhethro wathi kuye: “Noma bonke bangakuhlamuka, kodwa mina ngeke.”
UJesu wathi kuye: “Ngiqinisile ngithi kuwe: namhlanje, ngalobu busuku, lingakakhali kabili iqhude, uzakungiphika kathathu.”
Kepha uPhethro wagcizelela ngamandla, wathi: “Noma ngabe kubiza ukuba ngife nawe, angisoze ngakuphika.” Basho kanjalo bonke.
Base befika endaweni okuthiwa iGethsemane; wayesethi kubafundi bakhe: “Hlalani lapha, ngisaya kokhuleka.”
Wayesethatha uPhethro, uJakobe, noJohane; waqala ukubhocobala nokuba nosizi.
Wathi kubo: “Umphefumulo wami ulusizi kakhulu kuze kube sekufeni; hlalani lapha, nilinde.”
Wayeseqhubeka ibangana, wawa phansi, wathandaza ukuba uma kungenzeka, mawedlule lo mzuzu.
Wathi: “Abba, Baba! Konke kungenzeka kuwe. Susa kimi lesi sitsha, kodwa kungabi njengokuthanda kwami, kepha njengokuba Wena uthanda.”
Wayesebuyela kubafundi bakhe, wabafumana belele; wayesethi kuPhethro: “Simoni, ulele na? Ubungelinde nje ihora libe linye na?
Lindani, nikhuleke ukuze ningangeni ekulingweni. Umoya uyavuma, kodwa inyama ibuthakathaka.”
Wabuye wasuka wayokhuleka, ephinda lona lelo lizwi.
Waphinde wabuyela kubo, wabafica futhi belele, ngokuba amehlo abo ayesinda ubuthongo; abazanga ukuthi bangamphendula bathini.
Wabuyela kubo ngokwesithathu, wathi: “Namanje nisalele, niphumule. Kwanele, selifikile ihora; iNdodana yomuntu isizokhashelwa ezandleni zezoni.
Sukumani sihambe. Niyabona-ke, ongikhaphelayo usesondele.”
Kuthe nje uJesu engakaligwinyi, kwase kufika uJuda, omunye wabali-12, nesixuku esihlome ngezinkemba nezinduku, sithunywe abaphristi abakhulu, izazimthetho namalunga.
Lo omkhaphelayo wayebanike uphawu lokuthi: “Lowo engiyakumanga, nguye; mbambeni, nihambe naye nimqaphile.”
Esefikile uJuda wasondela kuJesu ngokushesha, wathi: “Rabi!” Wayesemanga.
Base bemdumela, bambopha.
Omunye kwababemi lapho wahosha inkemba, wayigenca inceku yomphristi omkhulu, wayinquma indlebe.
UJesu wathatha wathi kubo: “Niphume sengathi nize kumphangi, niphethe izinkemba nezinduku ukuba nizongibamba.
Benginani imihla ngemihla ethempelini, ngifundisa, anizange ningibambe; kodwa ifanele ukugcwaliseka imibhalo.”
Base bemshiya bonke, babaleka.
Insizwa ethile eyayimlandela, yayembethe ingubo yelineni emzimbeni; bayibamba,
kodwa yayishiya ingubo yayo yelineni, yabaleka inqunu.
Base bemhola uJesu, bamyisa kumphristi omkhulu, kwabuthana bonke abaphristi abakhulu, amalunga nezazimthetho.
UPhethro wamlandela ebuqamama, waze wangena egcekeni lomphristi omkhulu. UPhethro wahlala nezikhonzi, otha umlilo.
Abaphristi abakhulu nomkhandlu wonke bafuna ubufakazi ngoJesu ukuze bambulale, kodwa ababutholanga.
Abaningi bafakaza amanga ngaye, kodwa ubufakazi babo abuhlangananga.
Kwasukuma abathile, bafakaza amanga ngaye, bathi:
“Thina simzwile ethi: ‘Ngiyakulidiliza leli thempeli elenziwe ngezandla, kuthi emva kwezinsuku ezintathu, ngakhe elinye elingenziwanga ngezandla.’ ”
Nakuba sekunjalo, ubufakazi babo abuzange buhlangane.
Kwasukuma umphristi omkhulu phakathi kwabo, wabuza uJesu, wathi: “Awuphenduli ngalutho kulobu bufakazi abakumangalela ngabo na? Kuyikho yini lokhu abakufakaza ngawe?”
Kepha wathula, akazange aphendule ngalutho. Umphristi omkhulu wabuye wambuza, wathi kuye: “Ngabe Wena unguKhristu, iNdodana yoBongekayo na?”
UJesu wathi: “Nginguye. Niyakuyibona iNdodana yomuntu ihlezi ngakwesokunene saMandla, iza ngamafu ezulu.”
Khona umphristi omkhulu waklebhula izingubo zakhe, wathi: “Sisabadingelani ofakazi na?
Senizizwele ehlambalaza; pho nithini?” Bonke bamlahla ngecala, bethi ufanelwe ngukufa.
Abanye baqala ukumkhafulela ngamathe, nokumgubuzela ubuso nokumshaya, bethi kuye: “Phrofetha.” Nezikhonzi zamthatha, zammukula.
Kwathi uPhethro esesegcekeni ezansi, kwafika enye yamantombazane omphristi omkhulu,
yathi ukumbona uPhethro otha umlilo, yambhekisisa, yayisithi kuye: “Nawe, ubunoJesu waseNazaretha.”
Kepha waphika, wathi: “Angikwazi, futhi angikuqondi lokhu okushoyo;” waphumela phandle enkundleni; laselikhala iqhude.
Intombazane imbona, yabuye yathi futhi kulabo ababemi lapho: “Lo ungomunye wabo.”
Kepha uPhethro wabuye waphika. Emva kwesikhashana futhi labo ababemi lapho bathi kuPhethro: “Impela wena ungomunye wabo, ngokuba ungowaseGalile.”
UPhethro wayeseqala ukwethuka, futhi wafunga ethi: “Angimazi lo muntu enikhuluma ngaye.”
Masinyane laselikhala iqhude okwesibili. UPhethro wayeselikhumbula izwi alisho uJesu kuye, ethi: “Iqhude lingakakhali kabili, uzakungiphika kathathu.” Waqhumuka wakhala.
Masinyane, ekuseni, abaphristi abakhulu, amalunga, izazimthetho nomkhandlu wonke bakha icebo, base bembopha uJesu, bamqhuba, bamnikela kuPilatu.
UPilatu wambuza, wathi: “Wena uyinkosi yabaJuda na?” Waphendula wathi kuye: “Usushilo.”
Abaphristi abakhulu bamethwesa amacala amaningi.
UPilatu wabuye wambuza, wathi: “Awuziphenduleli ngalutho na? Bheka nje ukuthi maningi kangakanani amacala abakwethwesa wona.”
Kepha uJesu akabuyanga waphendula utho, waze wamangala uPilatu.
Kwakuthi njalo ngesikhathi somkhosi, uPilatu abakhululele isiboshwa sibe sinye abasicelileyo.
Kwakukhona omunye owayebizwa ngoBharabha, owayeboshwe namahlubuka, okwathi ngesikhathi sokuhlubuka, babulala umuntu.
Isixuku sakhuphuka saya kuPilatu siyomcela ukuba asenzele njengalokhu ayejwayele ukusenzela.
Kepha uPilatu wabaphendula, wathi: “Nithanda ukuba nginikhululele inkosi yabaJuda na?”
UPilatu wayazi kahle ukuthi abaphristi abakhulu bamnikele ngenxa yomona.
Kepha abaphristi abakhulu babhebhezela isixuku ukuba sithi kungcono asikhululele uBharabha.
UPilatu wabuye waphendula, wathi kubo: “Pho nithi angenzenjani ngalona enithi uyinkosi yabaJuda na?”
Babuye bamemeza, bathi: “Mbethele esiphambanweni!”
Kepha uPilatu wathi kubo: “Ngokuba wenze bubi buni na?” Kepha bamemeza kakhulu, bathi: “Mbethele!”
Khona uPilatu ethanda ukuthokozisa isixuku wasikhululela uBharabha, kepha wamshaya uJesu, wamnikela ukuba abethelwe.
Amabutho ayesemhola, amngenisa endlini ethiwa iPhrethoriyu, aqoqela ndawonye lonke ibutho.
Amembathisa ingubo ebukhwebezane, amethwesa umqhele ayeweluke ngameva.
Aqala ukumkhulekela, athi: “Bayede, nkosi yabaJuda!”
Amshaya ekhanda ngomhlanga, amkhafulela ngamathe, aguqa ngamadolo, akhuleka kuye.
Esembhinqile, amhlubula ingubo ebukhwebezane, amembathisa izingubo zakhe, ayesephuma naye ukuba ayombethela esiphambanweni.
Baphoqa umuntu owayedlula ngendlela, evela endle, okwakuthiwa uSimoni waseKhurene, uyise ka-Aleksandru noRufu, ukuba amthwalele isiphambano.
Amabutho amyisa endaweni okuthiwa yiGolgotha okungukuthi: “INdawo Yekhanda.”
Amnika iwayini elalixutshwe nemure, kodwa akalemukelanga.
Ambethela esiphambanweni, abelana ngezingubo zakhe ngokwenza unkatho, ukuze kwazeke ukuthi yilowo nalowo uthathani.
Kwase kuyihora lesithathu ngesikhathi embethela esiphambanweni.
Umbhalo wecala abekwe lona wawulotshwe phezulu esiphambanweni sakhe, uthi: INKOSI YABAJUDA.
Kwakunabaphangi ababili ababebethelwe kanye naye, omunye engakwesokunene sakhe, omunye engakwesokhohlo sakhe.
Wagcwaliseka kanjalo umbhalo othi: “Wabalwa kanye nezelelesi.”
Ababedlula lapho bamhlambalaza, benikina amakhanda, bethi: “Ashila, wena odiliza ithempeli ubuye ulakhe ngezinsuku ezintathu,
zisindise, wehle esiphambanweni.”
Kanjalo nabaphristi abakhulu nezazimthetho, bambhinqa, bathi: “Wasindisa abanye, kodwa akakwazi ukuzisindisa.
UKhristu, iNkosi yakwa-Israyeli, makehle manje esiphambanweni, ukuze sibone, sikholwe.” Nababebethelwe naye, bamhlambalaza.
Ngehora lesithupha kwaba mnyama ezweni lonke, kwaze kwaba yihora lesishiyagalolunye.
Ngehora lesishiyagalolunye, uJesu wamemeza ngezwi elikhulu, wathi: “Eloyi, Eloyi, lama sabakthani?” okungukuthi: “Nkulunkulu wami, Nkulunkulu wami, ungishiyeleni na?”
Abanye balabo ababemi lapho bekuzwa lokho, bathi: “Niyamuzwa-ke, ubiza u-Eliya.”
Omunye wagijima, wagcwalisa ilula ngoviniga walichoma emhlangeni, wamphuzisa, wathi: “Yekani sibone ukuthi u-Eliya uzokuza yini azomehlisa.”
UJesu wayesememeza ngezwi elikhulu, wafa.
Isihenqo sethempeli sadabuka kabili, kusuka phezulu kuze kufike phansi.
Kepha induna yekhulu eyayimi lapho iqondene naye, kwathi lapho imbona efa, yathi: “Impela lo muntu ubeyiNdodana kaNkulunkulu.”
Kwakukhona nabesifazane ababebukela, bebuqamama. Phakathi kwabo kwakukhona uMariya Magdalena, uSalome, uMariya ozala uJakobe omncane noJose.
Laba babengabalandeli bakaJesu eseseGalile, bemkhonza. Kwakunabanye futhi abesifazane abaningi ababenyukele naye eJerusalema.
Kwathi sekuhlwile, ngokuba kwakulusuku lokulungiselela usuku olwandulela isabatha,
kwafika uJosefa wase-Arimatheya, ilunga elidumileyo lomkhandlu, owayewubhekile naye umbuso kaNkulunkulu; wangena ngesibindi kuPilatu, wacela isidumbu sikaJesu.
UPilatu wamangala ukuthi uJesu wayesefile, waze wabiza induna yekhulu, wabuza kuyo ukuthi usefile yini na?
Esezwile ngenduna yekhulu, wamnika uJosefa isidumbu.
UJosefa wathenga indwangu yelineni, wamethula, wamsonga ngayo, wambeka ethuneni elaliqoshwe edwaleni, wagingqela itshe emnyango wethuna.
UMariya Magdalena noMariya, unina kaJose, babona lapho ayebekwe khona uJesu.
Seledlule isabatha, uMariya Magdalena, uMariya unina kaJakobe, noSalome bathenga amakha ukuze bahambe bamgcobe ngawo.
Ekuseni kakhulu ngosuku lokuqala lweviki, bafika ethuneni ekuphumeni kwelanga.
Bakhuluma bodwa, bethi: “Ngubani oyakusigingqela itshe, lisuke emnyango wethuna na?”
Kwathi lapho bebheka, babona ukuthi itshe ligingqiwe, ngokuba lalilikhulu kakhulu.
Kuthe sebengena ethuneni, babona insizwa ihlezi ngakwesokunene, yembethe ingubo emhlophe; bethuka.
Kepha yathi kubo: “Ningethuki; nifuna uJesu waseNazaretha obebethelwe esiphambanweni. Uvukile; kakho lapha; bonani nansi indawo lapho bebembeke khona.
Kepha hambani nibikele abafundi bakhe noPhethro ukuthi uzakunandulela ukuya eGalile. Kulapho-ke nizakumbona khona, njengalokhu ayenitshelile.”
Baphuma, babaleka ethuneni, ngokuba behlelwa ngukuthuthumela nokumangala, kabatshelanga muntu ngalokho, ngokuba babesaba.
UJesu esevukile ekuseni ngosuku lokuqala lweviki, wabonakala kuqala kuMariya Magdalena ayekhiphe kuye amadimoni ayisikhombisa.
Yena wahamba wayobabikela bonke labo ababehamba noJesu, ababelila, bekhala.
Kwathi sebezwile ukuthi uyaphila nokuthi uMariya umbonile, abazange bakholwe.
Emveni kwalokho wabonakala engesinye isimo kwababili babo ababehamba beya emzaneni.
Nabo bahamba bayobikela abanye; nalabo abakholwanga.
Kamuva wabonakala kwabali-11, behlezi bedla. Wabasola ngokungakholwa kwabo, nangobulukhuni bezinhliziyo zabo, ngokuba bengabakholwanga labo ababembonile esevukile.
Wayesethi kubo: “Hambani niye ezweni lonke, nishumayele ivangeli kukho konke okudaliweyo.
Okholwayo abhabhadiswe uyakusindiswa, kodwa ongakholwayo uyakulahlwa.
Lezi zibonakaliso ziyakubonakala kwabakholwayo: Bayakukhipha amadimoni ngegama lami, bakhulume ngezilimi ezintsha.
Bayakubamba izinyoka; uma bephuza okubulalayo, akuyukuba nangozi kubo, bayakubeka izandla phezu kwabagulayo, basinde.”
Kwathi lapho iNkosi uJesu isibatshelile konke lokho, yakhushulelwa ezulwini, yahlala ngakwesokunene sikaNkulunkulu.
Baphuma bashumayela ezindaweni zonke; iNkosi yayisebenza nabo, iqinisa izwi ngezibonakaliso ezazibalandela.
Njengokuba abaningi bezamile ukulanda ngokuhlelekileyo ngalezo zindaba ezigcwaliseke phakathi kwethu,
njengalokhu basinika zona labo ababekhona kwasekuqaleni, bezibonela ngamehlo, futhi beyizikhonzi zezwi,
nami ngizwa kufanale, njengalokhu ngizihlolisisile ngokucophelela zonke izinto, kusukela ekuqaleni, ukuba ngikulobele ngokuhlelekile, Theyofilu odumileyo,
ukuze wazi ukuqiniseka kwalezo zindaba ozifundisiweyo.
Kwakukhona emihleni kaHerode inkosi yaseJudiya, umphristi othile, ogama lakhe nguZakhariya, esigabeni sika-Abhiya, nomkakhe engowamadodakazi ka-Aroni, igama lakhe ngu-Elizabethe.
Babelungile bobabili phambi kukaNkulunkulu, behamba ngayo yonke imiyalo nezimiso zeNkosi, bengasoleki.
Kepha babengenamntwana, ngokuba u-Elizabethe wayeyinyumba, futhi bobabili base bekhulile.
Kwathi-ke uZakhariya enza umsebenzi wakhe wobuphristi phambi kukaNkulunkulu, njengokuhlelwa kwesikhathi sesigaba ayekuso,
ngokomthetho wobuphristi, kwaba nguye owadliwa wunkatho ukuba angene ethempelini leNkosi, azoshisa impepho.
Isixuku sonke sasikhuleka ngaphandle ngesikhathi sokunikelwa kwempepho.
Kwabonakala kuye ingelosi yeNkosi imi ngakwesokunene se-althare lempepho.
Kuthe uZakhariya eyibona wethuka, wehlelwa luvalo.
Kepha ingelosi yathi kuye: “Ungesabi, Zakhariya, ngokuba isicelo sakho sizwakele; umkakho u-Elizabethe uzakukuzalela indodana, uyiqambe igama uthi nguJohane.
Uzakujabula uthokoze ngaye; nabaningi bazakujabula ngokuzalwa kwakhe.
Ngokuba uzakuba mkhulu emehlweni eNkosi; akayukuliphuza iwayini nophuzo olunamandla; uzakugcwaliswa nguMoya oNgcwele esesesiswini sikanina.
Uyakuphendulela abaningi kubantu bakwa-Israyeli, eNkosini uNkulunkulu wabo.
Uyakuhamba phambi kwayo enomoya namandla ka-Eliya ukuphendula izinhliziyo zawoyise, babuyisane nabantwana, abangalaleliyo babe nokuqonda kwabalungileyo, ukulungisela iNkosi isizwe esikulungiselweyo ukufika kwayo.”
UZakhariya wathi engelosini: “Ngiyakukwazi ngani lokhu na? Sengiyindoda endala, nomkami usekhule kakhulu.”
Ingelosi yaphendula, yathi kuye: “NginguGabhriyeli mina, omi phambi kukaNkulunkulu; ngithunyiwe ukuba ngikhulume nawe, nokuba ngikubikele lezi zindaba ezinhle.
Wena-ke uzakuba yisimungulu, ungakwazi ukukhuluma kuze kube wusuku okwenzeka ngalo lokhu, ngokuba awuwakholwanga amazwi ami azakugcwaliseka ngesikhathi sawo.”
Abantu babemlindele uZakhariya nokho bamangala ngokulibala kwakhe ethempelini.
Esephumile, kakwazanga ukukhuluma kubo; bakhanyelwa ukuthi ubone umbono ethempelini; wayelokhu ekhuluma ngezandla, wahlala-ke eyisimungulu.
Kwathi seziphelile izinsuku zokukhonza kwakhe, wahamba waya ekhaya.
Emva kwalezo zinsuku u-Elizabethe, umkakhe, wakhulelwa, wazifihla izinyanga eziyisihlanu, ethi:
“INkosi yenze kanje kimina emihleni engibheke ngayo ngomusa ukuba ilisuse ihlazo lami phakathi kwabantu.”
Ngenyanga yesithupha, ingelosi uGabhriyeli yathunywa nguNkulunkulu emzini eGalile, okuthiwa yiNazaretha,
entombini eyayithenjiswe umendo yindoda enguJosefa, wendlu kaDavide; igama lentombi kwakunguMariya.
Seyifikile, yasondela ingelosi lapho ayekhona, yathi kuye: “E! Wena ophiwe umusa! INkosi inawe; ubusisiwe esifazaneni.”
Kepha yena wethuka lapho ezwa izwi layo, wazindla ngokuthi kungaba kubingelela kuni lokhu.
Ingelosi yathi kuye: “Ungesabi, Mariya, ngokuba ufumene umusa kuNkulunkulu.
Uzakukhulelwa, uzale indodana, uyiqambe igama uthi nguJesu.
Yena uyakuba mkhulu, abizwe ngokuthi yiNdodana yoPhezukonke. INkosi uNkulunkulu iyakumnika isihlalo sobukhosi, sikayise uDavide;
uyakubusa phezu kwendlu kaJakobe kuze kube phakade, nombuso wakhe awuyukuphela.”
UMariya wathi engelosini: “Kuyokwenzeka kanjani lokhu, njengokuba ngingayazi indoda na?”
Ingelosi yaphendula, yathi kuye: “UMoya oNgcwele uzakuza phezu kwakho, amandla oPhezukonke akusibekele; ngakho-ke lo ongcwele, ozakuzalwa, uzakubizwa ngokuthi yiNdodana kaNkulunkulu.
Phela u-Elizabethe, isihlobo sakho, obekuthiwa inyumba naye ukhulelwe indodana esemdala; le yinyanga yakhe yesithupha.
Ngokuba akukho lutho olungenzeke kuNkulunkulu.”
UMariya wathi: “Ngiyincekukazi yeNkosi; makwenzeke kimi njengezwi lakho.” Ingelosi yemuka kuye.
Ngalezo zinsuku uMariya wasuka waya ngokushesha kwelezintaba emzini wakwaJuda.
Wangena endlini kaZakhariya, wambingelela u-Elizabethe.
Kwathi ukuba u-Elizabethe ezwe uMariya ebingelela, umntwana wagxuma esiswini sakhe; u-Elizabethe wagcwala uMoya oNgcwele,
wamemeza ngezwi elikhulu, wathi: “Ubusisiwe wena esifazaneni! Sibusisiwe nesithelo sesisu sakho!
Kwenzeka kanjani lokhu kimi ukuba ngihanjelwe ngunina weNkosi yami na?
Ngokuba kuthe lapho izwi lokubingelela kwakho lifika ezindlebeni zami, umntwana wagxuma ngokujabula esiswini sami.
Ubusisiwe lowo owakholwa ukuthi kuzakufezeka lokho okwakhulunywa yiNkosi kuye.”
Wayesethi uMariya: “Umphefumulo wami uyayitusa iNkosi,
nomoya wami uyathokoza kuNkulunkulu, uMsindisi wami,
ngokuba ubhekile ubuphansi bencekukazi yakhe. Kusukela manje izizukulwane zonke ziyakuthi, ngibusisiwe.
Ngokuba uSomandla ungenzele izinto ezinkulu: igama lakhe lingcwele.
Isihawu sakhe sisezizukulwaneni ngezizukulwane kubo abamesabayo.
Wenzile amandla ngengalo yakhe; uchithile abazidlayo ekuzidleni kwenhliziyo yabo.
Uwisile amakhosi ezihlalweni, uphakamisile abantukazana.
Usuthisile abalambileyo ngezinto ezinhle, abacebileyo wabahambisa bevathazela.
Uyisizile inceku yakhe u-Israyeli, ukuze akhumbule isihawu,
njengalokhu akhuluma kokhokho bethu ku-Abhrahama nolibo lwakhe kuze kube phakade.”
UMariya wahlala naye cishe izinyanga ezintathu, wayesebuyela ekhaya.
Safika-ke isikhathi sika-Elizabethe sokuba abelethe; wazala indodana.
Abakhelene naye nezihlobo zakhe bezwa ukuthi iNkosi imenzele isihawu esikhulu, bathokoza naye.
Kwathi ngosuku lwesishiyagalombili beza ukuzosoka umntwana, bamqamba ngegama likayise uZakhariya.
Unina wayesephendula ethi: “Qha, uzakuthiwa nguJohane.”
Bathi kuye: “Akukho noyedwa emndenini wakini obizwa ngalelo gama.”
Bakhuluma ngezandla noyise ukuthi ufuna ukumqamba ngaliphi.
Wacela isileti, waloba wathi. “NguJohane igama lakhe.” Bamangala bonke.
Khona manjalo wavuleka umlomo wakhe nolimi lwakhe lwathombuluka, wayesekhuluma edumisa uNkulunkulu.
Bonke abakhelene nabo behlelwa ngukwesaba, bakhuluma ngazo zonke lezo zindaba kulo lonke elezintaba eJudiya,
nabo bonke abazizwayo bazigcina ezinhliziyweni zabo, bethi: “Ingabe uyakuba yini lo mntwana na?” Ngokuba impela isandla seNkosi sinaye.
UZakhariya, uyise, wagcwala uMoya oNgcwele, waphrofetha wathi:
“Mayibongwe iNkosi, uNkulunkulu ka-Israyeli, ngokuba ibahambele abantu bayo, yabahlenga.
Yasiphakamisela uphondo lwensindiso endlini kaDavide, inceku yayo,
njengalokhu yakhuluma ngomlomo wabaphrofethi bayo abangcwele selokhu kwadabuka umhlaba,
ukusisindisa ezitheni zethu, nasesandleni sabo bonke abasizondayo;
ukwenzela okhokho bethu isihawu, nokukhumbula isivumelwano sayo esingcwele;
isifungo eyasifunga kubaba u-Abhrahama,
ukusinika ukuba sikhululwe esandleni sezitha zethu; siyikhonze singenakwesaba
ngobungcwele nangokulunga phambi kwayo, zonke izinsuku zethu.
Nawe-ke, mntwana, uyakuthiwa ungumphrofethi woPhezukonke, ngokuba uyakuyandulela iNkosi; ulungisa izindlela zayo
ukukhanyisela abantu bayo ukuyazi insindiso ngokuthethelelwa kwezono zabo,
ngemisesane yesihawu sikaNkulunkulu wethu esihanjelwe ngakho ukukhanya okuvela phezulu,
ukubakhanyisela abahlezi ebumnyameni nasethunzini lokufa, nokuqondisa izinyawo zethu endleleni yokuthula.”
Umntwana wakhula, waba namandla emoyeni; wahlala ehlane kwaze kwaba lusuku lokubonakaliswa kwakhe ku-Israyeli.
Kwathi ngalezo zinsuku, uKhesari Awugustu wakhipha isimemezelo sokuba kubalwe abantu ezweni lonke.
Lokhu kubalwa kwabantu kokuqala kwenzeka lapho uKhwiriniyu engumbusi waseSiriya.
Abantu bonke bahamba kwaba yilowo nalowo ukuyobalwa emzini wakubo.
UJosefa naye wakhuphukela eGalile, emzini iNazaretha, waya eJudiya, umuzi kaDavide, okuthiwa yiBhethlehema, ngokuba wayengowendlu nowolibo lukaDavide,
ukuze ayobalwa kanye noMariya owayemethembise ukuba abe ngumkakhe, ekhulelwe.
Kwathi beselapho, safika isikhathi sokuba uMariya abelethe.
Wazibula ngendodana, wayisonga ngendwangu, wayilalisa emkhombeni, ngokuba beswela indawo endlini yezihambi.
Kwakukhona abelusi kulelo lizwe ababehlezi endle, belinda umhlambi wabo ebusuku.
Ingelosi yeNkosi yabonakala kubo, inkazimulo yeNkosi yabakhanyisa nxazonke; bagcwala ukwesaba okukhulu.
Ingelosi yathi kubo: “Ningesabi, ngokuba nginibikela izindaba ezinhle zokuthokoza okukhulu okuzakuba kubantu bonke,
ukuthi namuhla nizalelwe uMsindisi, onguKhristu iNkosi, emzini kaDavide.
Lokhu kuyisibonakaliso kini: Niyakufumana umntwana esongiwe, elele emkhombeni.”
Masinyane kwaba khona kanye nengelosi uquqaba lwebandla lasezulwini, lumdumisa uNkulunkulu, luthi:
“Udumo kuNkulunkulu kweliphezulu, nokuthula emhlabeni kubantu abathokozelwa nguye.”
Kwathi ukuba zihambe izingelosi, zibuyela ezulwini, abelusi bathi omunye komunye: “Masihambe manje siye eBhethlehema, sibone le nto eyenzekileyo, iNkosi esazise ngayo.”
Baphuthuma baya khona, bafica uMariya, noJosefa, nomntwana elele emkhombeni.
Sebebonile, balanda ngalelo lizwi ababelitsheliwe ngalo mntwana.
Bonke abezwayo bamangala ngokukhulunywe kubo ngabelusi.
Kepha uMariya wawalonda wonke lawo mazwi, ezindla ngawo enhliziyweni yakhe.
Abelusi baphindela emuva bemdumisa, bembonga uNkulunkulu ngakho konke ababekuzwile nababekubonile, njengokuba kwakukhulunyiwe kubo.
Kwathi seziphelile izinsuku eziyisishiyagalombili, umntwana wasokwa, wayeseqanjwa igama kwathiwa nguJesu, igama elalishiwo yingelosi unina engakakhulelwa.
Kwathi ukuba ziphelele izinsuku zokuhlanjululwa kwabo ngokomthetho kaMose, benyukela naye eJerusalema ukuba bayomethula eNkosini,
njengalokhu kulotshiwe emthethweni weNkosi ukuthi: “Konke okwesilisa okuyizibulo kuyakuthiwa okwehlukaniselwe iNkosi,
nokuba banikele ngomhlatshelo njengokushiwo emthethweni weNkosi, amahobhe amabili noma amaphuphu amabili amajuba.”
Kwakukhona umuntu eJerusalema, ogama lakhe kunguSimeyoni. Lo muntu wayelungile, futhi emesaba uNkulunkulu, elindele induduzo ka-Israyeli, uMoya oNgcwele wayephezu kwakhe.
Wembulelwa nguMoya oNgcwele ukuthi akayukufa engakamboni uKhristu, iNkosi.
Wafika ngoMoya ethempelini. Kwathi ukuba abazali balethe umntwana uJesu ethempelini ukuba bamenzele lokho okuyisiko lomthetho,
wamemukela ngokumgona, wambonga uNkulunkulu, wathi:
“Nkosi, sale usumukisa inceku yakho ngokuthula, njengezwi lakho,
ngokuba amehlo ami ayibonile insindiso yakho
oyilungisele ebusweni babantu bonke;
ukukhanya kokwambulela abezizwe nenkazimulo yesizwe sakho u-Israyeli.”
Uyise nonina bamangala ngalokho okukhulunywa ngaye.
USimeyoni wababusisa, wathi kuMariya, unina: “Lo umiselwe ukuwa nokuvuka kwabaningi ku-Israyeli, nokuba yisibonakaliso esiphikwayo –
yebo, inkemba iyakudabula nowakho umphefumulo – ukuba kwambulwe izizindlo zezinhliziyo eziningi.”
Kwakukhona nomphrofethikazi, u-Ana, owayeyindodakazi kaFanuweli, wesizwe sika-Aseri; wayesekhule kakhulu. Wayehlale nendoda yakhe iminyaka eyisikhombisa emva kobuntombi bakhe.
Wayengumfelokazi waze waba neminyaka engama-84, engasuki ethempelini, ekhonza ngokuzila nangokukhuleka ubusuku nemini.
Naye-ke wafika ngaleso sikhathi, wamtusa uNkulunkulu, wabatshela ngaye bonke ababebheke ukukhululwa kweJerusalema.
Kwathi sebekufeze konke okungokomthetho weNkosi babuyela eGalile, emzini wakubo, iNazaretha.
Wakhula umntwana, waba namandla, wagcwala ukuhlakanipha; umusa kaNkulunkulu wawuphezu kwakhe.
Kwakuthi minyaka yonke abazali bakaJesu baye eJerusalema ngoMkhosi wePhasika.
UJesu eseneminyaka eli-12 bakhuphuka njengokomthetho womkhosi.
Seziphelile izinsuku, sebebuyela emuva, umntwana uJesu wasala eJerusalema, abazali bakhe bengazi.
Becabanga ukuthi uphakathi kwababehambisana nabo, bahamba ibanga losuku bamfuna phakathi kwezihlobo nabazana nabo.
Kwathi lapho bengamtholi babuyela eJerusalema, beyomfuna.
Kuthe sekwedlule izinsuku ezintathu, bamfumana ethempelini, ehleli phakathi kwabafundisi, ebalalele, futhi ebabuza.
Bonke ababemuzwa bamangala ngokuqonda nangokuphendula kwakhe.
Abazali bakhe bathi bengambona bamangala, unina wathi kuye: “Mntanami, ukwenzeleni lokhu kithi na? Uyihlo nami besikufuna, sikhathazekile.”
Wabaphendula wathi: “Kade ningifunelani na? Beningazi yini ukuthi kumele ukuba ngibe kokukaBaba na?”
Kepha abaliqondanga izwi alikhuluma kubo.
Wehla nabo, wafika eNazaretha, wabathobela. Kepha unina wawalonda wonke lawo mazwi enhliziyweni yakhe.
UJesu wakhula ekuhlakanipheni nasemzimbeni, ethokozelwa nguNkulunkulu nangabantu.
Kwathi ngonyaka we-15 wokubusa kukaThibheriyu Khesari, uPontiyu Pilatu engumbusi eJudiya, uHerode enguMthethrakhi eGalile, umfowabo uFiliphu enguMthethrakhi e-Ithureya naseThrakhonithi, uLisaniya enguMthethrakhi e-Abhilene,
ngesikhathi u-Anase engumphristi omkhulu kanye noKhayifase, kwafika izwi likaNkulunkulu kuJohane, indodana kaZakhariya, esehlane.
Wahamba kulo lonke iJordani, eshumayela ngombhabhadiso wokuphenduka, bese kuthethelelwa izono,
njengalokhu kulotshiwe encwadini yamazwi ku-Izaya, umphrofethi, ukuthi: “Izwi lomemezayo ehlane, lithi: ‘Lungisani indlela yeNkosi, nenze imikhondo yayo iqonde.
Izigodi zonke ziyakugqitshwa, zonke izintaba namagquma kuyakuhlelenjwa; kuqonde izinsongansonga, nemigoxigoxi ibe yizindlela ezihlelembekile;
abantu bonke bazakuyibona insindiso kaNkulunkulu.’ ”
Ngakho-ke wayesethi ezixukwini eziza kuye ukuba azibhabhadise: “Nzalo yezinyoka, ngubani onixwayisile ukuba nibalekele intukuthelo ezayo na?
Ngakho-ke vezani izithelo ezifanele ukuphenduka, ningaqali nithi ngaphakathi kwenu: ‘Sinobaba u-Abhrahama,’ ngokuba ngithi kini: uNkulunkulu unamandla okuvusela u-Abhrahama abantwana kulawa matshe.
“Izembe selivele libekiwe ezimpandeni zemithi, ngakho-ke yonke imithi engatheli isithelo esihle, iyakunqunywa, iphonswe emlilweni.”
Izixuku zambuza zathi: “Pho sizakwenzenjani na?”
UJohane waphendula, wathi kubo: “Onezingubo ezimbili, makaphe ongenangubo, nonokudla enze kanjalo.”
Kwafika nabathelisi ukuba babhabhadiswe, bathi kuye: “Mfundisi, kufanele senzenjani na?”
Wathi kubo: “Maningaqoqi okungaphezu kokumisiwe lapho niqoqa intela.”
Namabutho ambuza athi: “Thina-ke kumele senzenjani na?” Wathi kuwo: “Kumele ningephuci muntu utho ngendluzula, futhi ningamxabheleli, kodwa yeneliswani yilokho enikukhokhelwayo.”
Abantu babesabhekile futhi bonke bezibuza ngoJohane ukuthi, ngabe mhlawumbe unguye uKhristu,
uJohane waphendula wathi kubo bonke: “Mina nginibhabhadisa ngamanzi, kodwa uyeza onamandla kunami engingafanele ngisho ukuthukulula umchilo wezicathulo zakhe, Yena-ke uzakunibhabhadisa ngoMoya oNgcwele nangomlilo.
Lo oqoma lakhe lokwela lisesandleni sakhe, ukushanelisisa isibuya sakhe, abuthe ukolo awufake enqolobaneni yakhe; amakhoba awashise ngomlilo ongacimekiyo.”
UJohane washumayela ivangeli kubantu, ebayala nangokunye okuningi.
Kepha uHerode, uMthethrakhi, wasolwa nguJohane ngenxa kaHerodiya, umkafowabo, nangenxa yakho konke okubi ayekwenzile uHerode,
waze wenezela nangalokhu ebubini bakhe, wavalela uJohane etilongweni.
Lapho bonke abantu sebebhabhadisiwe, noJesu esebhabhadisiwe, ekhuleka, izulu lavuleka,
uMoya oNgcwele wehlela phezu kwakhe, enesimo somzimba wejuba; kwezwakala izwi livela ezulwini, lithi: “Wena uyiNdodana yami ethandekayo; ngithokozile ngawe.”
UJesu uqobo waqala umsebenzi wakhe eseneminyaka cishe engama-30 ubudala. Wayeyindodana, njengalokhu babesho, kaJosefa, ka-Heli,
kaMathathi, kaLevi, kaMelikhi, kaJanayi, kaJosefa,
kaMathathiya, ka-Amose, kaNahume, kaHesili, kaNagayi,
kaMahathi, kaMathathiyase, kaShimeyi, kaJozekhi, kaJoda,
kaJohanani, kaReza, uZerubhabhele Salathiyeli, kaNeri,
kaMelikhi, ka-Adi, kaKhosamu, ka-Elimadamu, ka-Eri,
kaJoshuwa, ka-Eliyezeri, kaJorimu, kaMathathi, kaLevi,
kaSimeyoni, kaJuda, kaJosefa, kaJonamu, ka-Eliyakimu,
kaMeleya, kaMena, kaMathatha, kaNathani, kaDavide,
kaJese, ka-Obhedi, kaBhowazi, kaSala, kaNahashoni,
ka-Aminadaba, ka-Adimini, ka-Arini, kaHezironi, kaPherezi, kaJuda,
kaJakobe, ka-Isaka, ka-Abhrahama, kaThera, kaNahori,
kaZerugi, kaRagawu, kaPhelegi, ka-Ebheru, kaSala,
kaKhenani, ka-Arifaksadi, kaShemu, kaNowa, kaLameki,
kaMethusela, ka-Enokhi, kaJaredi, kaMahalaleli, kaKhenani,
ka-Enose, kaSethi, ka-Adamu kaNkulunkulu.
UJesu egcwele uMoya oNgcwele, wabuya eJordani, wayeseholelwa nguMoya ehlane,
walingwa nguSathane izinsuku ezingama-40. Akadlanga lutho ngalezo zinsuku; kuthe seziphelile, walamba.
USathane wayesethi kuye: “Uma uyiNdodana kaNkulunkulu, yisho kuleli litshe ukuba libe yisinkwa.”
UJesu wamphendula wathi: “Kulotshiwe ukuthi: ‘Umuntu akanakuphila ngesinkwa kuphela.’ ”
USathane wamenyusela entabeni ende, wambonisa yonke imibuso yomhlaba ngomzuzwana nje.
USathane wathi kuye: “Ngiyakukunika wonke lawa mandla nenkazimulo yawo, ngokuba kunikwe mina, futhi ngikunika noma ngubani ngokuthanda kwami.
Ngakho-ke uma ukhuleka phambi kwami, konke kuzakuba ngokwakho.”
UJesu waphendula, wathi kuye: “Kulotshiwe ukuthi: ‘Wokhuleka eNkosini uNkulunkulu wakho, umkhonze Yena yedwa.’ ”
USathane wayesemholela eJerusalema, wammisa esiqongweni sethempeli, wathi kuye: “Uma uyiNdodana kaNkulunkulu, ziphonse phansi lapha,
ngokuba kulotshiwe kwathiwa:
“ ‘Uyakuyaleza izingelosi zakhe ngawe, zikulinde,’ “nokuthi: “ ‘Ziyakukuthwala ngezandla, ungaze waqhuzuka etsheni ngonyawo lwakho.’ ”
UJesu waphendula wathi kuye: “Kwathiwa: ‘Ungayilingi iNkosi uNkulunkulu wakho.’ ”
USathane eseqedile konke ukumlinga, wamshiya kuze kufike isikhathi esifanele.
UJesu wabuyela eGalile ngamandla kaMoya. Udumo lwakhe lwasabalala kulo lonke lelo lizwe.
Wayefundisa emasinagogeni abo, edunyiswa yibo bonke.
Wafika eNazaretha lapho akhulela khona, wangena esinagogeni ngosuku lwesabatha njengalokhu ayevame ukwenza kanjalo, wasukuma ukuba afunde.
Wanikwa umqulu ka-Izaya, umphrofethi, wawuvula, wafumana indawo okulotshwe kuyo kwathiwa:
“UMoya weNkosi uphezu kwami, ngokuba ingigcobile ukuba ngishumayele ivangeli kwabampofu; ingithumele ukumemezela ukukhululwa kwabathunjiweyo, ukuvula amehlo ezimpumputhe, ukuhlenga abacindezelweyo,
nokumemezela unyaka omuhle weNkosi.”
Wawugoqa umqulu, wawunika isikhonzi, wahlala; amehlo wonke ababesesinagogeni amgqolozela.
Waqala ukukhuluma kubo, ethi: “Namhlanje ugcwalisekile lo mbhalo njengoba nizwa ngezenu izindlebe.”
Bonke bakhuluma kahle ngaye, bemangaliswa ngamazwi omusa aphuma emlonyeni wakhe, bathi: “Kanti lo akasiyo yini indodana kaJosefa na?”
Wathi kubo: “Impela niyakusisho kimi lesi saga, nithi: ‘Nyanga, zelaphe wena. Lokhu esizwa ukuthi ukwenzile eKhaphernawume, kwenze phela nalapha ezweni lakini.’ ”
Wathi-ke: “Ngiqinisile ngithi kini: akukho mphrofethi owemukelekayo ezweni lakubo.
Kepha impela ngithi kini: ngezinsuku zika-Eliya kwakukhona abafelokazi abaningi kwa-Israyeli; izulu lomisile iminyaka emithathu nezinyanga eziyisithupha; kwaba khona indlala enkulu ezweni lonke.
Kepha u-Eliya akathunyelwanga nakoyedwa wabo, kuphela kowesifazane ongumfelokazi, eZarephitha eSidoni.
Kwakukhona abaningi ababenochoko kwa-Israyeli ngesikhathi sika-Elisha, umphrofethi, kodwa akukho namunye kubo owahlanjululwa, kuphela uNayimani, umSiriya.”
Bonke ababesesinagogeni bagcwala intukuthelo enkulu lapho bekuzwa lokho.
Basukuma, bamxosha emzini, bamqhubela esiweni esasisentabeni umuzi wabo owawakhiwe phezu kwayo, ukuze bamkhalakathelise kuso.
Kepha Yena wadabula phakathi kwabo wahamba.
Wehlela eKhaphernawume, umuzi iGalile. Wayebafundisa abantu kulusuku lwesabatha.
Bamangala ngokufundisa kwakhe, ngokuba izwi lakhe lalinegunya.
Kwakukhona esinagogeni umuntu onomoya wedimoni elingcolileyo, wamemeza ngezwi elikhulu, wathi:
“Habe, ufunani nje kithi Jesu waseNazaretha? Uze ukuzosibhubhisa yini na? Ngiyakwazi ukuthi ungubani: ungoNgcwele kaNkulunkulu.”
UJesu wamkhuza, wathi: “Thula, uphume kuye!” Idimoni lamqumba phansi phambi kwabo, laphuma kuye lingamlimazanga.
Bonke bafikelwa ngukwesaba, bakhuluma bodwa, bathi: “Lizwi lini leli, ngokuba ukhuluma ngegunya namandla, ukhuza imimoya engcolileyo, iphume na?”
Udumo lwakhe lwasabalala kuzo zonke lezo zindawo.
Waphuma esinagogeni, wangena endlini kaSimoni. Kepha umkhwekazi kaSimoni wayebanjwe ngumkhuhlane onzima; bamnxusa uJesu ukuba amsize.
UJesu wamengama, wawukhuza umkhuhlane, waphela. Wasuka ngokushesha wabakhonza.
Kwathi selishona ilanga, baletha kuye bonke abagulayo nababekhwelwe yizifo ezehlukene; wabeka izandla phezu kwabo ngamunye, wabaphilisa.
Kwaphuma amadimoni kwabaningi, ememeza ethi: “Wena uyiNdodana kaNkulunkulu.” Kepha wawakhuza, kawavumelanga ukuba akhulume, ngokuba ayemazi ukuthi unguKhristu.
Kuthe sekusile, wathi shelele, waya endaweni eyihlane. Izixuku zamfuna, zaze zamthola, zazama ukumvimba ukuba angamuki kuzo.
Kepha wathi kuzo: “Kufanele ukuba ngishumayele ivangeli lombuso kaNkulunkulu nakweminye imizi, ngokuba ngathunyelelwa lokhu.”
Waqhubeka eshumayela emasinagogeni eJudiya.
Kwathi uJesu emi ngasolwandle iGenezaretha, isixuku samngunga ukuze sizwe izwi likaNkulunkulu.
Wabona izikebhe ezimbili zimi ngasolwandle, abadobi babengekho kuzo, besahlanza amanetha.
Wangena kwesinye sezikebhe okwakungesikaSimoni, wamcela ukuba athi ukuqhela kancane emhlabathini. UJesu wahlala phansi, wasifundisa isixuku esesikebheni.
Eseqedile ukukhuluma, wathi kuSimoni: “Qhubekela ekujuleni, nehlise amanetha enu, nibambe.”
USimoni waphendula, wathi: “Nkosi, sisebenze ubusuku bonke, kodwa asibambanga lutho. Kepha njengoba usho, ngizakuwehlisa amanetha.”
Sebekwenzile lokho babamba izinhlanzi eziningi kakhulu, aze amanetha abo aqala ukudabuka.
Baqhweba abangani babo abakwesinye isikebhe ukuba beze, babasize. Beza-ke, bagcwalisa zombili izikebhe, zaze zacishe zazika.
Kuthe uSimoni Phethro ekubona lokho, waziphonsa phansi ngasemadolweni kaJesu, wathi: “Suka kimi, Nkosi, ngokuba ngingumuntu oyisoni.”
Phela yena kanye nabo bonke bamangaliswa ukubona ubuningi bezinhlanzi ababezibambile,
kanjalo noJakobe noJohane amadodana kaZebedewu ababesizana noSimoni. UJesu wathi kuSimoni: “Ungesabi; kusukela manje usuzakudoba abantu.”
Kuthe izikebhe sebezisondeze emhlabathini, bashiya phansi konke, bamlandela uJesu.
Kwathi ekomunye wemizi; kwafika indoda eyayigcwele uchoko. Kuthe imbona uJesu, yawa ngobuso, yamnxusa ithi: “Nkosi, uma uthanda ungangihlambulula.”
UJesu welula isandla sakhe, wayithinta, wathi: “Ngiyathanda, hlambuluka.” Masinyane uchoko lwaphela kuyo.
Wayiyala ukuba ingatsheli muntu, kepha wathi: “Hamba, uzibonakalise kumphristi, unikele umnikelo wokuhlanjululwa kwakho njengalokhu uMose wayala, kube ngubufakazi kubo.”
Kepha imibiko ngaye yasabalala kakhulu. Izixuku eziningi zaba naye ukuze zilalele, futhi ziphulukiswe ezifweni zazo.
Kepha uJesu wamonyuka, waya ehlane, ukuyokhuleka.
Ngolunye lwalezo zinsuku uJesu efundisa, kwakuhleli lapho abaFarisi nezazimthetho ababephuma kuzo zonke izifunda eGalile, eJudiya naseJerusalema. Amandla eNkosi ayekuye ukuba aphulukise.
Kwafika amadoda ethwele ngohlaka umuntu ofe uhlangothi. Ayefuna ukungena naye endlini, ambeke phambi kukaJesu.
Kepha lapho engayitholi indlela yokumngenisa ngenxa yesixuku, agibela ophahleni lwendlu, aluqaqa, amehlisela phansi ngohlaka phambi kukaJesu.
UJesu ekubona ukukholwa kwawo, wathi: “Mngani, uthethelelwe izono zakho.”
Izazimthetho nabaFarisi baqala ukuphikisana, bethi: “Ngubani lo muntu ohlambalazayo na? Ngubani ongathethelela izono ngaphandle kukaNkulunkulu kuphela na?”
Kepha uJesu eyazi imidlinzo yabo, waphendula, wathi kubo: “Nidlinzelani ezinhliziyweni zenu na?
Yikuphi okulula ukukusho, ukuthi: ‘Uthethelelwe izono zakho,’ noma ngukuthi: ‘Vuka uhambe na?’
Kepha ukuze nazi ukuthi iNdodana yomuntu inegunya lokuthethelela izono emhlabeni,” wathi kofe uhlangothi: “Ngithi kuwe: vuka uthabathe uhlaka lwakho, uye endlini yakho.”
Wasukuma masinyane bebuka, wathatha uhlaka ayelele kulo, wahamba waya endlini yakhe, emdumisa uNkulunkulu.
Bonke bathuthumela, base bemdumisa uNkulunkulu futhi begcwele ukwesaba, bathi: “Sibone izinto ezimangalisayo namuhla.”
Emveni kwalokho uJesu waphuma, wabona umthelisi ogama lakhe nguLevi, ehleli endaweni okuthelwa kuyo, wathi kuye: “Ngilandele.”
Wakushiya konke, wasukuma, wamlandela.
ULevi wamenzela uJesu idili elikhulu endlini yakhe. Kwakukhona isixuku sabathelisi esikhulu nabanye ababehleli nabo esidlweni.
AbaFarisi nezazimthetho bakhononda kubafundi bakhe, bathi: “Yini ukuba nidle niphuze nabathelisi nezoni na?”
UJesu waphendula, wathi kubo: “Abaphilileyo abayidingi inyanga, kodwa labo abagulayo kuphela.
Kangizanga ukuzobiza abalungileyo, kodwa izoni, ukuze ziphenduke.”
Base bethi kuye: “Abafundi bakaJohane bazila kaningi, futhi bakhuleke, kanjalo nababaFarisi, kodwa abakho bayadla, bayaphuza.”
Kepha uJesu wathi kubo: “Ikhetho ningalenza yini lizile nxa umyeni esenalo na?
Kepha izinsuku ziyeza lapho umyeni eyakususwa kulo, liyakuzila-ke ngalezo zinsuku.”
Wabatshela futhi nomzekeliso othi: “Akukho muntu oklebhula isichibi engutsheni entsha achibele ngaso ingubo endala. Uma enza lokho, zombili ziyakuklebhuka, isichibi esisha siklebhule ingubo endala.
Akukho muntu futhi othela iwayini elisha ezimvabeni ezindala, funa iwayini elisha lidabule izimvaba, lichitheke, bese konakala nezimvaba.
Kepha iwayini elisha lithelwa ezimvabeni ezintsha.
Akukho muntu othi esephuze iwayini elidala, abuye afune elisha, ngokuba uthi elidala limnandi.”
Kwathi ngesabatha, uJesu nabafundi bakhe bedabula emasimini, abafundi bakhe bakha izikhwebu, bazihlikihla ngezandla, bazidla.
Kepha abanye babaFarisi bathi: “Nikwenzelani okungavunyelwe ngesabatha na?”
UJesu wabaphendula, wathi: “Anifundanga yini ngokwenziwa nguDavide mhlazana yena nababenaye belambile,
ukuthi wangena endlini kaNkulunkulu, wathatha izinkwa zobukhona, okungavunyelwe ukuba zidliwe yinoma ngubani ngaphandle kwabaphristi kuphela, wazidla, wanika nababenaye na?”
Wathi kubo: “Indodana yomuntu iyiNkosi yesabatha.”
Kwathi ngelinye isabatha uJesu wangena esinagogeni, wafundisa. Kwakukhona lapho umuntu owayeshwabene isandla sokunene.
Izazimthetho nabaFarisi babeqaphile ukuthi uzakuphulukisa yini ngesabatha, ukuze bathole utho abangambeka icala ngalo.
Kepha uJesu ekwazi abakudlinzayo, wathi endodeni enesandla esishwabeneyo: “Sukuma ume phakathi nendawo.” Yasukuma, yema.
UJesu wathi kubo: “Ngiyanibuza ukuthi kuvunyelwe yini ukwenza okuhle noma okubi ngesabatha, ukusindisa noma ukubulala na?”
Wabaqalaza bonke qede wathi kuyo: “Yelula isandla sakho.” Yenza kanjalo, isandla sayo saphiliswa.
Bathukuthela bathelwa ngamanzi, bakhuluma bodwa bebonisana ukuthi bangamenzenjani uJesu.
Kwathi ngalezo zinsuku uJesu waphuma waya entabeni eyokhuleka; wahlala ubusuku bonke ekhuleka kuNkulunkulu.
Kuthe sekusile, wababiza abafundi bakhe, wakhetha kubo abali-12, wababiza ngokuthi abaphostoli:
USimoni owamqamba wathi nguPhethro, abanye kwakungo-Andreya umfowabo, uJakobe, uJohane, uFiliphu, uBhartholomewu,
uMathewu, uThomase, uJakobe ka-Alifewu, uSimoni okuthiwa isishisekeli,
uJuda kaJakobe, noJuda Iskariyothe owamkhaphelayo.
Wayesehla nabo, wema endaweni eyithafa nesixuku esikhulu sabafundi bakhe, noquqaba lwabantu ababevela kulo lonke iJudiya, eJerusalema, nangasolwandle iThire neSidoni,
ababeze ukuzomlalela nokuba baphulukiswe ezifeni zabo, nalabo ababehlushwa ngomoya abangcolileyo; baphulukiswa.
Sonke isixuku sasifuna ukumthinta, ngokuba kwakunamandla ayephuma kuye aphilisa bonke.
UJesu, ewaphakamisela amehlo ngakubafundi, wathi: “Nibusisiwe nina enimpofu, ngokuba umbuso kaNkulunkulu ungowenu.
Nibusisiwe nina enilambileyo manje, ngokuba niyakusuthiswa. Nibusisiwe nina enikhalayo manje, ngokuba niyakuhleka.
Nibusisiwe nxa abantu benizonda, benihlulula, benithuka, belichitha igama lenu sengathi libi, ngenxa yeNdodana yomuntu.
“Thokozani ngalolo lusuku, nitshekulise okwamathole yinjabulo. Ngokuba umvuzo wenu mkhulu ezulwini. Oyise benza kanjalo kubaphrofethi.
“Kepha maye, kinina enicebileyo, ngokuba senikwemukele ukududuzwa kwenu!
Maye, kinina enisuthiyo manje, ngokuba niyakulamba! Maye, kinina enihlekayo manje, ngokuba niyakukhala, nikhihle isililo!
Maye, kinina nonke abantu abakhuluma kahle ngani, ngokuba oyise benza kanjalo kubaphrofethi mbumbulu.
“Kepha kinina eningilaleleyo, ngithi kini: thandani izitha zenu, nenze okuhle kwabanizondayo,
nibabusise abaniqalekisayo, nibakhulekele abanihlukumezayo.
Lowo okushaya esihlathini, mnike nesinye, nokwaphuca ingubo, ungamnqabeli nebhantshi.
Yilowo nalowo ocela utho kuwe, muphe, nalowo okwephuca okungokwakho, ungakufuni futhi kuye.
Lokhu enithanda ukuba abantu bakwenze kini nani kwenzeni kanjalo kubo.
“Uma nithanda abanithandayo, niyakutuswa ngani na? Ngokuba nezoni ziyabathanda abazithandayo.
Uma nenza okuhle kwabenza okuhle kini, pho niyakubongwa ngani na? Ingani nezoni ziyakwenza khona lokho.
Uma nitsheleka labo enithemba ukwemukela kubo, niyakubongwa ngani na? Ingani nezoni ziyazitsheleka izoni, zibuyelwe okungangalokho ezikubolekisile.
Kepha thandani izitha zenu, nenze okuhle, nitshelekise ningalindele kubuyiselwa, uma nenze kanjalo uyakuba mkhulu umvuzo wenu, nibe ngabantwana boPhezukonke, ngokuba Yena umnene kwabangabongiyo nababi.
Yibani nesihawu, njengalokhu uYihlo enesihawu.
“Ningehluleli, khona ningayukwehlulelwa; ningalahli muntu ngecala, khona ningayukulahlwa ngecala; thethelelani, khona niyakuthethelelwa.
Yiphani, khona niyakuphiwa; bayakunipha eziqabethweni zenu isilinganiso esihle, esigxishiweyo, sashukuziswa, sagcwala phama, ngokuba ngesilinganiso enilinganisa ngaso, nani niyakulinganiselwa ngaso.”
Wabatshela nomzekeliso, wathi: “Impumputhe ingayihola yini enye impumputhe na? Aziyukukhalakathela emgodini zombili na?
Umfundi kangaphezulu komfundisi, kepha lowo oqeqeshwe ngokuphelelisiweyo, uyakuba njengomfundisi wakhe.
“Ubhekelani uthi olusesweni lomfowenu, ube ungaluboni ugongolo olukwelakho iso na?
Ungasho kanjani kumfowenu uthi: ‘Mfowethu, ake ngikhiphe uthi olusesweni lakho,’ ube wena ungaluboni ugongolo olukwelakho iso na? Mzenzisi, khipha kuqala ugongolo olusesweni lakho, khona uzakubonisisa uthi olusesweni lomfowenu ukuze ulukhiphe.
“Ngokuba awukho umuthi omuhle othela isithelo esibi, futhi nomuthi omubi awutheli isithelo esihle.
Ngokuba yilowo nalowo muthi waziwa ngesithelo sawo. Akukhiwa amakhiwane emeveni, nezithelo zomvini azikhiwa ejikijolweni.
Umuntu omuhle uveza okuhle engcebweni yenhliziyo enhle, nomubi uveza okubi engcebweni embi, ngokuba umlomo wakhe ukhuluma ngokuchichima kwenhliziyo.
“Ningibizelani nithi: ‘Nkosi, Nkosi,’ nibe ningakwenzi engikushoyo na?
Yilowo nalowo oza kimi, ezwe amazwi ami, awenze, ngizakunikhombisa ukuthi ufana nobani.
Ufana nomuntu owathi uma akha indlu, wemba wajula, wabeka isisekelo edwaleni. Kwafika izikhukhula, umfula wayishaya leyo ndlu, kepha awukwazanga ukuyinyakazisa, ngokuba yayakhiwe kahle.
Kodwa ozwayo angenzi, unjengomuntu owakha indlu emhlabathini ngaphandle kwesisekelo; umfula wayishaya, yawa masinyane; kwaba kukhulu ukudilika kwaleyo ndlu.”
Kwathi uJesu eseqedile ukukhuluma wonke lawo mazwi kubantu, wangena eKhaphernawume.
Induna yekhulu yayinenceku eyithandayo eyayisigulela ukufa.
Isizwile ngoJesu, yathumela kuye amalunga abaJuda, ukuba ayomcela eze azokwelapha inceku yayo.
Esefikile kuJesu, amncengisisa, ethi: “Ufanelekile lona ukuba umenzele lokhu,
ngokuba uyasithanda isizwe sakithi, nguye futhi osakhele isinagoge.”
UJesu wayesehamba nawo. Kuthe eseseduze nendlu yenduna yekhulu, induna yekhulu yathumela abahlobo bayo ukuba bathi kuye: “Nkosi, ungazihluphi, ngokuba angifanele ukuba ungangena phansi kophahla lwami.
Ngakho-ke angifanele ukuba ngingeza kuwe, kodwa khipha izwi nje, ukuze inceku yami isinde.
Ngokuba nami ngingumuntu ophethe, nginamabutho aphansi kwami. Ngithi kwelinye: ‘Hamba,’ lihambe. Kwelinye ngithi: ‘Woza,’ lize, nasencekwini yami ngithi: ‘Yenza lokhu,’ ikwenze.”
UJesu ewezwa lawo mazwi, wamangala ngayo, wayesephendukela esixukwini esasimlandela, wathi: “Ngithi kini: angikaze ngikufumane ukukholwa okungaka kwa-Israyeli.”
Lapho sebebuyela endlini yenduna yekhulu, bafika inceku isisindile.
Kwathi ngakusasa, uJesu waya emzini okuthiwa yiNayini; abafundi bakhe babehamba naye nesixuku esikhulu.
Esesondele ngasesangweni lomuzi, wathola kukhona ofileyo owayethwelwe eyongcwatshwa, indodana eyodwa vo kunina, owayengumfelokazi. Kwakunesixuku esikhulu sabantu balowo muzi ababemphelekezela.
INkosi yakubona lokho, yaba nesihe, yathi kuye: “Ungakhali.”
Yasondela, yathinta uhlaka; ababeluthwele bema. Yayisithi: “Nsizwa, ngithi kuwe: vuka!”
Obefile wavuka, wahlala ngezinqe, waqala ukukhuluma. Wayesemnikeza unina.
Bonke behlelwa wukwesaba, bamdumisa uNkulunkulu, bathi: “Kufike umphrofethi omkhulu phakathi kwethu,” bathi futhi: “UNkulunkulu ubahambele abantu bakhe.”
Lezi zindaba ngoJesu zasabalala kulo lonke iJudiya nasezindaweni ezakhelene nalo.
Abafundi bakaJohane bambikela ngazo zonke lezi zinto. UJohane wayesebiza ababili kubafundi bakhe,
wabathumela eNkosini, wathi: “Unguye yini ozayo, noma silindele omunye na?”
Afika kuye lawo madoda, athi: “Sithunyiwe kuwe nguJohane uMbhabhadisi, obuza ukuthi: ‘Unguye yini ozayo, noma silindele omunye na?’ ”
Ngaleso sikhathi iNkosi yaphulukisa abaningi ababekhungethwe yizifo, nezinhlungu, nomoya ababi. Wavula namehlo ezimpumputhe eziningi, zabona.
UJesu waphendula, wathi kuwo: “Hambani nilandise uJohane ngalokho enikubonileyo nenikuzwileyo, nithi: izimpumputhe ziyabona, izinyonga ziyahamba, abanochoko bayahlanjululwa, izithulu ziyezwa, abafileyo bayavuswa, abampofu bayashunyayezwa ivangeli.
Ubusisiwe lowo ongayukukhubeka ngami.”
Kuthe sezihambile izithunywa zikaJohane, waqala ukukhuluma ezixukwini ngoJohane, ethi: “Naphuma naya ehlane ukuyobonani na? Umhlanga ontengantengiswa ngumoya na?
Kanti naphuma ukuyobonani na? Umuntu owembethe izingubo ezintofontofo na? Phela abembethe okukhazimulayo, futhi betamasa, basezigodlweni zamakhosi.
Kepha naphuma ukuyobonani na? Umphrofethi? Yebo, ngithi kini: owedlula umphrofethi.
Nguye okulotshwe ngaye ukuthi: “ ‘Ngiyathuma isithunywa sami phambi kwakho, esiyakulungisa indlela yakho phambi kwakho.’
“Ngithi kini: akukho namunye kwabazelwe ngowesifazane omkhulu kunoJohane, kepha omncinyane embusweni kaNkulunkulu, mkhulu kunaye.”
Abantu bonke, yebo, nabathelisi sebekuzwile lokho bavuma ukuthi uNkulunkulu ulungile, babhabhadiswa ngombhabhadiso kaJohane.
Kepha abaFarisi nezazimthetho abayemukelanga inhloso kaNkulunkulu emaqondana nabo, benqaba ukubhabhadiswa nguye.
“Ngakho, ngingabafanisa nani abantu balesi sizukulwane na? Bafana nani?
Bafana nabantwana abahlezi esigcawini, bememezana bethi: “ ‘Sinishayele imitshingo, kodwa anisinanga; sahlabelela ingoma yesililo, kodwa anililanga.’
“Ngokuba uJohane uMbhabhadisi wafika engadli sinkwa, engaphuzi wayini; nathi: ‘Unedimoni.’
INdodana yomuntu ifike yadla, yaphuza, kepha nithi: ‘Bhekani lo umuntu oyisiminzi nenkolotshe, umngani wabathelisi nezoni.’
Kepha ukuhlakanipha kubonakaliswa kuyiqiniso kulabo abakwemukelayo.”
Omunye wabaFarisi wamema uJesu ukuba azokudla naye. UJesu wafika-ke endlini yomFarisi, wahlala naye esidlweni.
Owesifazane wakulowo muzi, owayeyisoni, esezwile ukuthi uJesu usesidlweni endlini yomFarisi, waya khona ephethe umfuma wamafutha ngojeke we-alabhasta.
Wema ngemuva kukaJesu, ngasezinyaweni zakhe, ekhala. Waqala ukumatisa izinyawo zikaJesu ngezinyembezi zakhe, wayesezesula ngezinwele zakhe, wazanga izinyawo ephindelela, wayesezigcoba ngamakha.
Kepha lapho umFarisi owayemmemile ekubona lokhu, wadlinza wathi: “Lo muntu ukuba ubengumphrofethi, ngabe wazile ukuthi ngubani futhi uluhlobo luni lo wesifazane omthintayo, ngokuba uyisoni.”
UJesu wamphendula, wathi kuye: “Simoni, kukhona engifuna ukukutshela khona.” Wathi: “Mfundisi, ngitshele.”
“Umbolekisi othile wayenabantu ababili ababemkweleta. Omunye wayekweleta odenariyu abangama-500, omunye ekweleta odenariyu abangama-50.
Lokhu babengenalutho lokumkhokhela, wabaxolela bobabili. Imuphi kulaba oyakumthanda kakhulu na?”
USimoni waphendula wathi: “Ngicabanga ukuthi yilowo oxolelwe kokuningi.” UJesu wathi kuye: “Uyihlabe esikhonkosini.”
Waphendukela kowesifazane, wathi kuSimoni: “Uyambona lo wesifazane na? Ngingene endlini yakho, awunginikanga amanzi okugeza izinyawo, kodwa lo wesifazane umantisile izinyawo zami ngezinyembezi zakhe, wazesula ngezinwele zakhe.
Awunganganga, kepha lo wesifazane, yilokhu ngingenile, akazange ayeke ukwanga izinyawo zami.
Awuligcobanga ikhanda lami ngamafutha, kepha lo wesifazane uzigcobile izinyawo zami ngamafutha.
Ngenxa yalokho, ngithi kuwe: izono zakhe eziningi zithethelelwe, ngokuba uveze uthando olukhulu. Kepha lowo othethelelwe okuncane, uthanda kancane.”
Wayesethi kowesifazane: “Izono zakho zithethelelwe.”
Ababehleli naye esidlweni baqala ukukhuluma bodwa, bethi: “Ngubani kanti lo, othethelela nezono na?”
Kepha wathi kowesifazane: “Ukukholwa kwakho kukusindisile. Hamba, ngokuthula.”
Emveni kwalokho, uJesu wahamba ephuma engena emizini nasemizaneni, ememezela, eshumayela ivangeli lombuso kaNkulunkulu. Abali-12 babenaye.
Kwakukhona nabanye besifazane ababephulukiswe komoya ababi nasezifweni: kwakungoMariya obizwa ngoMagdalena, okwakuphume kuye amadimoni ayisikhombisa,
uJowana umkaKhuza, induna kaHerodi, uSusana, nabanye abaningi ababebalekelela ngalokho ababenakho.
Kwabuthana ndawonye isixuku esikhulu sivela emizini ngemizi, size kuye. Wayesekhuluma ngomzekeliso, wathi:
“Kwaphuma umhlwanyeli wayohlwanyela imbewu yakhe. Ekuhlwanyeleni kwakhe, enye imbewu yawela ngasendleleni; yanyathelwa, zayidla nezinyoni zezulu.
Enye yawela edwaleni; yamila, kodwa yasheshe yabuna, ngokuba kwakungekho mswakama.
Enye yawela phakathi kwameva; akhula kanye nayo, ayiminyanisa.
Enye yawela emhlabathini ovundileyo; yamila, yathela izithelo ngekhulu.” Washo lokhu, wayesememeza ethi: “Onezindlebe zokuzwa makezwe.”
Abafundi bakhe bambuza ukuthi uchazani lo mzekeliso na.
Wathi: “Nina ninikezwe ukuba nazi izimfihlakalo zombuso kaNkulunkulu, kodwa abanye batshelwa ngemizekeliso, ukuze kuthi bebona, kodwa bangabonisisi, bathi bezwa, kepha bangaqondi.
“Nakhu-ke okuqondwe yilo mzekeliso: imbewu iyizwi likaNkulunkulu.
Abangasendleleni, yilabo abathi sebelizwile, izwi, bese kufika uSathane, alisuse enhliziyweni yabo, funa bathi bangakholwa, basindiswe.
Abasedwaleni, yilabo okuthi lapho belizwa izwi, balamukele ngokuthokoza, kodwa laba kabanampande, bayakholwa isikhashana, kuthi uma kufika isikhathi sokulingwa bahlubuke.
Abawele emeveni, yilabo okuthi sebelizwile izwi, bahambe, baminyaniswe yiminako, yingcebo, nenjabulo yokuphila, bangatheli izithelo eziqhamileyo.
Abasemhlabathini ovundileyo, yilabo abathi uma sebelizwile izwi, balamukele, babambelele kulo ngenhliziyo eqotho nelungileyo, kuthi ngokubekezela, bathele izithelo.
“Akekho othi angokhela isibani, bese esimboza ngesitsha noma asibeke phansi kombhede, kodwa usifaka othini, ukuze abangenayo babone ukukhanya.
Ngokuba akukho okufihliweyo okungayukuvela obala, nokuyisifuba okungayukudaluleka, kube sobala.
Ngakho-ke qaphelani ukuthi nizwa kanjani, ngokuba yilowo nalowo onakho, uyakuphiwa, kodwa lowo ongenakho, uyakwemukwa nalokho anakho.”
Kwase kufika kuye unina nabafowabo, kepha behluleka ukufinyelela kuye ngenxa yesixuku.
Wabikelwa ukuthi: “Unyoko nabafowenu bami ngaphandle, bafuna ukukubona.”
Kepha waphendula, wathi kubo: “Umame nabafowethu yilabo abathi bangalizwa izwi likaNkulunkulu, balenze.”
Kwathi ngolunye usuku uJesu wagibela esikebheni nabafundi bakhe, wayesethi kubo: “Ake siwelele ngaphesheya kolwandle.” Basuka-ke.
Besagwedla, bewelela ngaphesheya ngesikebhe, uJesu wazunywa ngubuthongo, walala. Kwase kuhlasela isivunguvungu somoya olwandle, isikebhe sagcwala amanzi, baze baba sengozini.
Base besondela kuye, bamvusa bethi: “Nkosi, Nkosi, siyafa.” Wavuka, wawukhuza umoya namagagasi agubhayo. Kwanqamuka, kwathula kwathi du.
Wayesethi kubo: “Kuphi ukukholwa kwenu na?” Besaba; bamangala, bathi omunye komunye: “Ngubani kanti lo okhuza umoya namanzi, kumlalele na?”
Bafika ngesikebhe ezweni lamaGerasa, elimaqondana neGalile.
Esehlele emhlabathini, indoda ethile eyayinamadimoni, ivela emzini, yamhlangabeza. Kwase kuyisikhathi lowo muntu engasagqoki lutho, futhi engasahlali ekhaya kodwa ehlala emathuneni.
Lowo muntu, embona uJesu, wadazuluka, wayesewa phansi phambi kwakhe, washo ngezwi elikhulu wathi: “Ufunani kimi, Jesu Ndodana kaNkulunkulu oPhezukonke na? Ngiyakuncenga, ungangihluphi,”
ngokuba uJesu wayesewuyalile lo moya omubi ukuba uphume kulo muntu. Izikhathi eziningi, lo moya wawusumbambe kaningana, kwale noma eseboshwe ngozankosi nangamaketango ezinyaweni, eqashelwe. Wayezigqabula izibopho; wayeqhutshwa yilawo madimoni, amuyise ehlane.
UJesu wambuza wathi: “Ungubani igama lakho?” Wathi: “NginguLegiyona,” ngenxa yokuba kwakungene kuye amadimoni amaningi.
Kepha amadimoni amncenga ukuba angawayali ukuya kwalasha.
Kwakukhona budebuduze entabeni umhlambi omkhulu wezingulube owawuklabe lapho. Amncenga ukuba awavumele ukuba angene kuzo, nempela wawavumela.
Ngakho-ke amadimoni aphuma kulowo muntu, angena ezingulubeni; umhlambi wabaleka wakhalakathela eweni olwandle, waminza.
Ababelusile bebona okwenzekileyo, babaleka bayobika emzini nasemakhaya.
Baphuma ukuyozibonela okwenzekileyo, bafika kuJesu, bafica umuntu obenamadimoni ehleli ezinyaweni zikaJesu, idimoni seliphumile kuye, egqokile futhi ingqondo yakhe ibuye ngokuphelele, baba nokwesaba.
Ababezibonele ngawabo, babatshela ukusuka nokuhlala kwendaba ukuthi wayesinde kanjani obekade ephethwe ngamadimoni.
Bonke abantu, nomakhelwane baseGerasa, bamcela ukuba asuke kubo, ahambe, ngokuba babekhungethwe ngukwesaba okukhulu. Ngakho-ke uJesu wangena esikebheni, wabuyela lapho ayevela khona.
Indoda okwakuphume kuyo amadimoni yamnxusa ukuba ahambe nayo, kodwa wayibuyisela emuva, ethi:
“Buyela ekhaya, ubalandise ukuthi uNkulunkulu ukwenzele ini.” Nempela yahamba yabalandisa emzini wakubo wonke, ukuthi kungakanani uJesu ayeyenzele khona.
Ekubuyeni kwakhe uJesu, isixuku samemukela ngokuba sasimlindele ngabomvu.
Kwase kufika indoda okuthiwa nguJayiru. Le ndoda eyayingumphathi wesinagoge, yaziphonsa phansi ngasezinyaweni zikaJesu, yamncenga ukuba angene endlini yayo,
ngokuba yayinendodakazi eyodwa vo, eneminyaka eli-12, eyayigulela ukufa. UJesu esaya lapho isixuku samminyanisa.
Owesifazane owayenesifo somopho iminyaka eli-12, owayesezame kwabaningi efuna ukuphulukiswa kodwa akaze akuthola.
Wasondela ngasemuva, wathinta umphetho wengubo kaJesu, umopho wathi nqamu, khona manjalo.
UJesu wathi: “Ngubani ongithintileyo na?” Lapho bonke bephika, uPhethro wathi: “Nkosi, izixuku zikuhaqile futhi ziyadudulana ukuba zisondele kuwe.”
Kepha uJesu waqhubeka wathi: “Ukhona ongithintileyo, ngokuba ngizwile amandla ephuma kimi.”
Owesifazane ebona ukuthi ngeke esazifihla, weza ethuthumela, waziphonsa phambi kukaJesu, walanda phambi kwabo bonke abantu ukuthi nguye othinte ingubo kaJesu, nokuthi uphulukiswe kanjani khona manjalo.
UJesu wayesethi kuye: “Ndodakazi, ukukholwa kwakho kukusindisile. Hamba ngokuthula.”
Esakhuluma uJesu, kwafika othile evela emzini womphathi wesinagoge, wathi kuye: “Indodakazi yakho isifile; ungabe usamkhathaza uMfundisi.”
UJesu emuzwa lowo, waphendula wathi kuye: “Ungesabi; kholwa kuphela; indodakazi izakusinda.”
Sebefikile endlini yomphathi wesinagoge, akavumelanga muntu ukuba angene endlini naye, kuphela uPhethro, uJohane, uJakobe uyise nonina bentombazane.
Bonke babekhala, belila, kodwa wathi kubo: “Ningakhali, ayifile; ilele.”
Bamhleka usulu ngoba bazi ukuthi ife ngempela.
Kepha Yena wayibamba ngesandla, wamemeza wathi: “Ntombazana, vuka!”
Khona manjalo umoya wayo wabuyela kuyo, yavuka ngokushesha; wabayala ukuba bayinike ukudla.
Abazali bayo bamangala. UJesu wabayala ukuba bangatsheli muntu ngalokho okwenzekileyo.
UJesu esebabizele kuye abali-12, wabanika amandla negunya lokukhipha amadimoni nokuphilisa abagulayo.
Wabathuma ukuba bashumayele ngombuso kaNkulunkulu nokuba baphilise abagulayo.
Wathi kubo: “Ningaphathi lutho lwendlela: naludondolo, nasikhwama sokuthekela, nasinkwa, namali; ningawaphathi amabhantshi amabili.
Noma yiyiphi indlu eningenisa kuyo, hlalani kuyo, nize nihambe lapho.
Bonke abangayukunamukela, anothi uma senisuka kulowo muzi, nithintithe uthuli ezinyaweni zenu, ukuze kube ngubufakazi obumelene nabo.”
Baphuma-ke, badabula imizi ngemizi, bevangela, futhi bephilisa abagulayo ezindaweni zonke.
Kwathi uHerode, uMthethrakhi, ezwa ngakho konke okwakwenzeka, wadideka kakhulu, ngokuba abanye bathi kuye uJohane uvukile kwabafileyo,
abanye bathi u-Eliya uvukile, nabanye bathi kuvuke umphrofethi othile wasemandulo.
Kepha uHerode wathi: “UJohane ngamnquma ikhanda; pho-ke ngubani lo engizwa ngaye ngalezi zinto na?” Wafuna ukumbona.
Sebebuyile abaphostoli, bamlandisa ngakho konke abakwenzileyo; wabathatha, wahamba nabo ngasese, baya emzini okuthiwa yiBhethsayida.
Kepha izixuku sezazi ngalokho zamlandela; wazemukela, wakhuluma kuzo ngombuso kaNkulunkulu, wabaphulukisa abadinga ukuphiliswa.
Kuthe seliyozilahla kunina, abafundi abali-12 beza kuye, bathi: “Baxoshe abantu baye emizaneni nasemakhaya azungezileyo, bangenise khona, ukuba bathole ukudla, ngokuba lapha sisendaweni eyihlane.”
Wathi kubo: “Bapheni nina ukudla.” Kepha bathi: “Esinakho yizinkwa eziyisihlanu nezinhlanzi ezimbili kuphela, ngaphandle-ke uma singahamba siyothengela bonke laba bantu ukudla.”
Lapho kwakukhona amadoda ayelinganiselwa ezi-5 000. Wathi kubafundi bakhe: “Bahlaliseni ngamaqembu angama-50.”
Benza kanjalo, babahlalisa bonke.
Wazithatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula, wazinika abafundi ukuba bazabele isixuku sabantu.
Badla, basutha bonke, kwabuthwa imvuthuluka eyasala kubo, engamaqoma ali-12.
Kwathi esakhuleka eyedwa, abafundi benaye, wayesebabuza ethi: “Abantu bathi ngingubani na?”
Baphendula bathi: “UJohane uMbhabhadisi”, kepha abanye bathi: “Ngu-Eliya”, abanye bathi: “Kuvuke umphrofethi othile wasemandulo.”
Wayesethi kubo: “Nina-ke nithi ngingubani na?” UPhethro waphendula wathi: “UnguKhristu kaNkulunkulu.”
Wabadonsa ngendlebe, wabayala ukuba bangakutsheli muntu lokho,
wathi: “INdodana yomuntu imelwe ukuhlupheka ngokuningi, ilahlwe ngamalunga nabaphristi abakhulu nezazimthetho, ibulawe, ivuswe ngosuku lwesithathu.”
Wayesethi kubo bonke: “Uma umuntu ethanda ukungilandela, makazidele, athathe isiphambano sakhe imihla ngemihla, angilandele.
Ngokuba yilowo nalowo othanda ukusindisa ukuphila kwakhe, uyakulahlekelwa yikho; kepha lowo olahlekelwa ngukuphila kwakhe ngenxa yami, uyakukusindisa.
Ngokuba kuyakumsiza ngani umuntu ukuzuza izwe lonke, kepha yena alahlekelwe noma alimaze ukuphila kwakhe na?
Ngokuba yilowo nalowo onamahloni ngami nangamazwi ami, iNdodana yomuntu iyakuba namahloni ngalowo lapho iza ngenkazimulo yayo, nekaYise neyezingelosi ezingcwele.
Kepha nginitshela iqiniso ukuthi bakhona abanye kwabemi lapha abangayukufa, baze bawubone umbuso kaNkulunkulu.”
Kwathi cishe emva kwezinsuku eziyisishiyagalombili ekukhulumile lokho, wathatha uPhethro, uJohane, noJakobe; wenyukela nabo entabeni ukuba ayokhuleka.
Esakhuleka, isimo sobuso bakhe saguquka, nezingubo zakhe zaba mhlophe qwa, zacwebezela.
Kwase kubonakala amadoda amabili, uMose no-Eliya, bekhuluma naye;
abonakala ngenkazimulo, ekhuluma naye ngohambo lwakhe okumele aluphothule eJerusalema.
Kepha uPhethro nababenaye babelele zwi, kodwa kuthe sebephapheme, babona inkazimulo yakhe namadoda amabili ayemi naye.
Kuthe esehlukene naye, uPhethro wathi kuJesu: “Nkosi, kuhle ukuba sibe lapha; masakhe amadokodo amathathu, elinye kube ngelakho, elinye kube ngelikaMose, elinye kube ngelika-Eliya.” Wayengazi ukuthi uthini.
Esakhuluma lokhu, kwafika ifu, labasibekela; besaba lapho ifu libamboza.
Kwezwakala izwi efini, lithi: “Lo uyiNdodana yami ekhethiweyo; yizweni.”
Kuthe selizwakele izwi, uJesu wabonakala esesele yedwa. Bathula du, abangatshela muntu lokho ababekubonile ngaleyo mihla.
Kwathi ngosuku olulandelayo, sebehlile entabeni, isixuku esikhulu samhlangabeza.
Indoda eyayisesixukwini yamemeza yathi: “Mfundisi, ngiyakunxusa ukuba uzongibonela indodana yami, okungukuphela kwayo.
Umoya uyayidumela, idazuluke masinyane, uyithele phansi, ikhihlize amagwebu, kuthi uqambe uhamba, ibe isiyimvithi nje.
Ngibanxusile abafundi bakho ukuba bawukhiphe, kepha behluleka.”
UJesu waphendula wathi: “Hhawu, sizukulwane esingakholwayo nesonakeleyo, kuyoze kube nini nginani, nginibekezelela na? Yilethe lapha indodana yakho.”
Kuthe iseza, idimoni layiqumba phansi, layihlukumeza kakhulu; uJesu wawukhuza umoya ongcolileyo, umfana waphiliswa, wayesembuyisela kuyise.
Bamangala bonke ngamandla amakhulu kaNkulunkulu. Kuthe besamangele bonke ngakho konke akwenzileyo, wathi kubafundi bakhe:
“Vulani izindlebe zenu nilalele lawa mazwi, ngokuba iNdodana yomuntu izakukhashelwa ezandleni zabantu.”
Kabaqondanga ukuthi isho ukuthini inkulumo yakhe, ngokuba yayifihliwe kubo, funa bayiqonde, futhi besaba ukumbuza ngayo.
Kwaqubuka impikiswano phakathi kwabo yokuthi ngubani ongomkhulu kubo.
UJesu eyazi impikiswano esenhliziyweni yabo, wathatha umntwana, wammisa eduze kwakhe,
wathi kubo: “Yilowo nalowo oyakwamukela lo mntwana egameni lami, wamukela Mina; ongamukelayo Mina, uyamamukela nongithumileyo, ngokuba omncinyane kini nonke nguye omkhulu.”
UJohane waphendula wathi: “Nkosi, sibone umuntu ekhipha amadimoni ngegama lakho, samnqabela, ngokuba engahambisani nathi.”
Kepha uJesu wathi kuye: “Ningamnqabeli, ngokuba ongamelene nani, ungakini.”
Kwathi sekusondele izinsuku zokuba enyuselwe ezulwini, wanquma ukuya eJerusalema.
Wathumela izithunywa, zamendulela; zahamba, zangena emzini wamaSamariya ukuba zimlungiselele.
Kepha awamemukelanga, ngokuba wayelibangise eJerusalema.
Abafundi bakhe, oJakobe noJohane, bekubona lokho, bathi: “Nkosi, uyathanda yini ukuba sibize umlilo wehle ezulwini, uwabhubhise na?”
Kepha waphenduka, wabathethisa, wathi: “Anazi ukuthi ningabamuphi umoya.
Ngokuba iNdodana yomuntu ayizanga ukuzobhubhisa imiphefumulo yabantu, kodwa ukuzoyisindisa;” base bedlulela komunye wemizana.
Kuthe besahamba endleleni, othile wathi kuye: “Ngizakukulandela, noma kuphi lapho uya khona.”
UJesu wayesethi kuye: “Izimpungushe zinemigodi, nezinyoni zezulu zinezidleke, kepha iNdodana yomuntu kayinandawo lapho ingacamelisa khona ikhanda.”
Wayesethi komunye: “Ngilandele.” Kepha yena wathi: “Ngivumele ngiyongcwaba ubaba kuqala.”
Kepha wathi kuye: “Yekela abafileyo bambele abafileyo babo, kodwa wena hamba, ushumayele ngombuso kaNkulunkulu.”
Omunye futhi wathi: “Nkosi, ngizakukulandela, kodwa ngivumele ngiyovalelisa kuqala kwabasekhaya.”
Kepha uJesu wathi kuye: “Akekho othi esebeke isandla sakhe egejeni, aphinde abheke emuva, owufanele umbuso kaNkulunkulu.”
Sekwedlule konke lokho, iNkosi yakhetha abanye abangama-70, yabathumela ngababili ukuba bayandulele, baye emizini nasezindaweni zonke ezakuya kuzo.
Yathi kubo: “Isivuno sikhulu, kepha ziyingcosana izisebenzi, ngakho-ke nxusani ukuba inkosi yokuvuna ithumele izisebenzi esivunweni sayo.
Nina hambani, ngiyanithuma; ninjengamawundlu phakathi kwezimpisi.
Ningaphathi sikhwama samali, nasikhwama sokuthekela, nazicathulo, futhi ningabingeleli muntu endleleni.
“Noma iyiphi indlu eningenisa kuyo, niyakuqala nithi: ‘Ukuthula makube kule ndlu.’
Uma kukhona lapho umuntu wokuthula, ukuthula kwenu kuyakuhlala phezu kwakhe, kepha uma kungenjalo, kuyakubuyela kini.
Hlalani kuleyo ndlu, nidle, niphuze abanipha khona, ngokuba isisebenzi siyifanele inkokhelo yaso. Ningaphumi ningena izindlu ngezindlu.
“Noma yimuphi umuzi eningena kuwo, banamukele, yidlani lokho abakubeka phambi kwenu,
baphiliseni abagulayo abakuwo, nithi kubo: ‘Umbuso kaNkulunkulu ususondele kini.’
Noma yimuphi umuzi eningena kuwo, banganamukeli, phumelani emigwaqweni yawo, nithi:
‘Ngisho uthuli lomuzi wakini olunamathele ezinyaweni zethu, siluthintithela kini, nokho yazini lokhu ukuthi umbuso kaNkulunkulu ususondele.’
Ngithi kini: kuyakuba ngcono kwabaseSodoma ngalolo lusuku kunakulowo muzi ngomhla wokwehlulela.”
“Maye, kuwe Khorazini! Maye, kuwe Bhethsayida! Ngokuba ukuba le misebenzi yamandla eyenziwe kini beyenziwe eThire naseSidoni, ngabe kade baphenduka, bembatha eyamasaka, bazihuqa ngomlotha.
Kepha kuyakuba ngcono eThire naseSidoni ngosuku lokwehlulelwa kunakini.
Nawe Khaphernawume uthi kambe uyakuphakanyiselwa ezulwini na? Phinde, uyakwehliselwa eHayidesi.
“Onizwayo nina, uyangizwa Mina; onganemukeli nina, akangamukeli Mina; ongangemukeli Mina, akamemukeli ongithumileyo.”
Abangama-70 babuya bejabulile, bethi: “Nkosi, ngisho namadimoni ayasithobela ngegama lakho.”
Kepha wathi kubo: “Ngabona uSathane ewa ezulwini njengonyazi.
Niyabona, ngininike igunya lokunyathela izinyoka nawofezela, naphezu kwamandla wonke esitha; akukho lutho oluyakunilimaza.
Nokho ningathokozi ngalokhu ukuthi imimoya iyanithobela, kodwa jabulelani ukuthi amagama enu alotshiwe ezulwini.”
Ngaleso sikhathi uJesu wathokoza kuMoya oNgcwele, wathi: “Ngiyakubonga, Baba, Nkosi yezulu nomhlaba, ngokuba ukufihlile lokhu kwabahlakaniphileyo nabanokuqonda, wakwembulela izingane; yebo, Baba, ngokuba kwaba kuhle phambi kwakho ukuba kube kanjalo.
Konke kunikelwe kimi nguBaba; akekho owaziyo ukuthi iNdodana ingubani, kuphela uYise, nokuthi uYise ungubani, kuphela iNdodana, nalowo iNdodana ethanda ukumembulela yena.”
Wayesephendukela kubafundi bakhe, wakhuluma nabo bebodwa, wathi: “Abusisiwe amehlo abona enikubonayo.
Ngokuba ngithi kini: baningi abaphrofethi namakhosi ababefisa ukubona enikubonayo, kodwa abakubonanga; nokuzwa enikuzwayo, kepha abakuzwanga.”
Kwase kusukuma isazimthetho esithile, samlinga sathi: “Mfundisi, ngizakwenzani ukuba ngidle ifa lokuphila okuphakade na?”
Wathi kuso: “Kulotshweni emthethweni na? Uwufunda kanjani na?”
Saphendula sathi: “Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangawo wonke amandla akho, nangayo yonke ingqondo yakho; umthande nomakhelwane wakho njengalokhu uzithanda wena.”
Wayesethi kuso: “Uphendule kahle; yenza lokho, uzakuphila.”
Kepha sona sithanda ukuzithetha, sathi kuJesu: “Umakhelwane wami ngubani na?”
UJesu wathatha wathi: “Umuntu othile wehla eJerusalema eya eJerikho; wazithela phezu kwezigcwelegcwele, zamhlubula izingubo, zamshaya, zahamba, zimshiya sekusele umndondo nje.
Kwathi kungalindelekile, kwehla umphristi othile ngaleyo ndlela; kuthe lapho embona, wachezuka endleleni.
Kanjalo nomLevi; kwathi uma efika kuleyo ndawo embona, wamgwema wedlula.
Kepha umSamariya othile owayesendleleni, wazithela kuye; kuthe embona, wamhawukela;
waya kuye, wambopha amanxeba, wathela amafutha newayini kuwo, wamgibelisa esilwaneni sakhe, wamusa endlini yezihambi, wamnakekela.
Ngakusasa wakhipha odenariyu ababili, wabanika umninindlu yezihambi, wathi kuye: ‘Mnakekele, zonke izindleko ezenzekayo ngaphezu kwalokhu, ngiyakukukhokhela zona uma sengibuya.’
“Ngumuphi kulaba abathathu owaba ngumakhelwane walo owazithela phezu kwezigcwelegcwele na?”
Sathi: “Yilowo owamhawukelayo.” Wayesethi uJesu kuso: “Hamba wenze kanjalo nawe.”
Besahamba, wangena emzaneni othile; owesifazane mumbe, ogama lakhe nguMartha, wamemukela endlini.
Wayenodadewabo okuthiwa nguMariya, owahlala ngasezinyaweni zeNkosi, walalela izwi layo.
Kepha uMartha wayematasatasa, enza imisebenzi eminingi; waya kuJesu, wathi: “Nkosi, akukukhathazi yini ukuthi udadewethu ungishiyile, ngisebenza ngedwa na? Ngakho-ke mtshele angisize.”
Kepha iNkosi yamphendula, yathi: “Martha, Martha, ukhathazekile futhi uphazanyiswa yizinto eziningi.
Kepha kunye okudingekileyo; uMariya ukhethe okuyikhona kungcono, angayukwephucwa khona.”
Ngelinye ilanga uJesu eseqedile ukukhuleka endaweni ethile, omunye wabafundi bakhe weza kuye, wathi: “Nkosi, sifundise ukukhuleka, njengokuba noJohane wabafundisa abafundi bakhe.”
Wayesethi kubo: “Uma nikhuleka, anothi: “ ‘Baba, malingcweliswe igama lakho; mawufike umbuso wakho;
siphe namuhla isinkwa sethu semihla ngemihla;
sithethelele izono zethu, njengokuba nathi sibathethelela bonke abanecala kithi; ungasingenisi ekulingweni.’ ”
Wayesethi kubo: “Ngubani kini othi enomngani, aye kuye phakathi kobusuku, athi kuye: ‘Mngani, ake ungenanele izinkwa ezintathu,
ngokuba ngifikelwe ngumhlobo wami osohambeni, kepha anginalutho engingamupha khona adle;’
bese umngani esendlini aphendule athi: ‘Ungangihluphi; sekuvaliwe emnyango, sesilele, mina kanye nabantwana bami; anginakuvuka, ukuba ngikunike utho.’
Ngithi kini: noma engezukuvuka amnike utho ngokuba engumngani wakhe, kodwa ngenxa yokubelesela kwakhe uyakumnikeza konke akudingayo.
“Ngakho-ke ngithi kini: celani, niyakuphiwa; funani, niyakufumana; ngqongqothani, niyakuvulelwa.
Ngokuba yilowo nalowo ocelayo uyamukeliswa, nofunayo uyafumana, nongqongqothayo uyakuvulelwa.
“Ngubani kini nina bobaba, okungathi uma indodana icela inhlanzi, ayinike inyoka esikhundleni senhlanzi;
kuthi uma icela iqanda, ayinike ufezela na?
Ngakho-ke uma nina eningababi, nikwazi ukubapha abantwana benu izipho ezinhle, kakhulu kangakanani-ke uYihlo osezulwini uzakubapha abacelayo kuye uMoya oNgcwele.”
UJesu wakhipha idimoni elaliyisimungulu; kuthe seliphumile, wakhuluma obeyisimungulu, isixuku samangala.
Kepha abanye babo bathi: “Ukhipha amadimoni ngoBhelzebhule, umbusi wamadimoni.”
Abanye bamlinga, bafuna ukuba enze isibonakaliso esivela ezulwini.
Kepha Yena eyazi imicabango yabo, wathi kubo: “Yilowo nalowo mbuso owehlukene wodwa, uyakuchithwa; nendlu ehlukene yodwa, iyakuwa.
Kanjalo uma uSathane ehlukene yedwa, umbuso wakhe uyakuma kanjani na? Ngokuba nithi ngikhipha amadimoni ngoBhelzebhule.
Uma Mina ngikhipha amadimoni ngoBhelzebhule, pho amadodana enu awakhipha ngobani na? Ngakho-ke amadodana enu ayakuba ngabehluleli benu.
Kepha uma ngikhipha amadimoni ngomunwe kaNkulunkulu, kusho ukuthi umbuso kaNkulunkulu usufikile kini.
“Uma isiqhwaga sihlome saphelela, silinda umuzi waso, impahla yaso ihlala iphephile.
Kepha uma onamandla kunaso esihlasela, asinqobe, uyasiqhwaga izikhali zaso ebesigabe ngazo, bese eyaba impango yaso.
“Ongahambisani nami, umelene nami; ongabuthi nami, uyahlakaza.
“Lapho umoya ongcolileyo uphuma kumuntu, uyahamba udabule ezindaweni ezigagadekile, ufuna indawo yokuphumula; uma ungayifumani, bese uthi: ‘Ngizakubuyela endlini yami engaphuma kuyo.’
Uma ufika, uyifice ishaneliwe, futhi ilungiswe kahle;
uyahamba ulande abanye omoya abayisikhombisa, ababi kunawo, bangene bahlale lapho, kuthi isiphetho sibe sibi ngokwedlulele kunesiqalo.”
Kuthe esakhuluma ngalokho, owesifazane othile esixukwini wamemeza, wathi kuye: “Sibusisiwe isisu esakuthwalayo namabele owawancelayo.”
Kepha uJesu wathi: “Yebo kunjalo, kodwa kakhulu babusisiwe abalizwa izwi likaNkulunkulu, balilondoloze.”
Ngesikhathi isixuku sikhula, waqala ukukhuluma, wathi: “Lesi sizukulwane siyisizukulwane esibi, sifuna isibonakaliso, kodwa asiyukunikwa sibonakaliso, ngaphandle kwesibonakaliso sikaJona.
Ngokuba njengalokhu uJona waba yisibonakaliso kwabaseNineve, iNdodana yomuntu iyakuba kanjalo kulesi sizukulwane.
Mhla kwehlulelwa, indlovukazi yaseningizimu iyakusukuma kanye namadoda alesi sizukulwane, iwalahle ngecala, ngokuba yasuka kwelikude izwe izokuzwa ukuhlakanipha kukaSolomoni; lapha kukhona omkhulu kunoSolomoni.
Amadoda aseNineve ayakusukuma kanye nalesi sizukulwane ngosuku lokwehlulela, asilahle ngecala. Ngokuba aphenduka lapho ngokushumayela kukaJona. Lapha kukhona omkhulu kunoJona.”
“Akukho muntu othi angokhela isibani asibeke ekusithekeni, phansi kwesitsha, kodwa usifaka othini ukuze abangenayo babone ukukhanya.
Iso lakho liyisibani somzimba; uma iso lakho liphilile, umzimba wakho wonke ugcwele ukukhanya; kepha uma lilibi, umzimba wakho ungubumnyama.
Ngakho-ke qaphela, funa ukukhanya okukuwe kube ngubumnyama.
Uma umzimba wakho wonke ungukukhanya, kungekho cashaza elimnyama, uyakukhanya wonke njengesibani sikukhanyisa ngokukhanya kwaso.”
Esakhuluma, omunye umFarisi wammema ukuba azokudla naye. UJesu esengenile endlini, wahlala esidlweni.
Kepha umFarisi ebona ukuthi uJesu udla engaqalanga ngokugeza, wamangala.
INkosi uJesu yayisithi kuye: “Nina baFarisi nigeza ingaphandle lenkezo nesitsha, kepha ingaphakathi lenu ligcwele ubugovu nokonakala.
Ziwula, lo owenza ingaphandle, akalenzanga yini nengaphakathi na?
Kepha-ke lokho okungaphakathi kupheni abampofu, konke kuzakube kuhlambulukile kini.
“Kepha, maye, kini baFarisi, ngokuba nikhipha okweshumi kweshaladi nopelepele, nazo zonke izinhlobo zemifino, kodwa nibushaya indiva ubulungiswa nokuthanda uNkulunkulu. Lokho-ke bekufanele nikwenze, kodwa ningaziyeki nezinye.
“Maye, kini baFarisi, ngokuba nithanda ukuhlala ezihlalweni eziphambili emasinagogeni, nokukhothanyelwa ezindaweni zokuhwebelana!
“Maye, kini, ngokuba nifana namathuna angasabonakali, asebehamba phezu kwawo, bengawaboni!”
Omunye wezazimthetho wayesephendula, wathi kuye: “Mfundisi, uma ukhuluma kanje phela, uyaseyisa thina.”
Kepha uJesu wathi: “Maye, nakini zazimthetho, maye, ngokuba nithwesa abantu imithwalo enzima! Nina uqobo lwenu nibe ningayithinti leyo mithwalo nangowodwa weminwe yenu.
“Maye, kini, ngokuba nakha amatshe amahle emathuneni abaphrofethi ababulawa ngokhokho benu.
Ngalokho-ke niyafakaza, futhi nivuma imisebenzi eyenziwa ngoyihlomkhulu, ngokuba bona bababulala abaphrofethi, nina-ke senakha amatshe amathuna abo.
Ngenxa yalokho, lowo ongukuhlakanipha kukaNkulunkulu, wathi: ‘Ngiyakuthumela kubo abaphrofethi nabaphostoli, abanye benu bayakubabulala, abanye babazingele.’
Lokho kwenzeka ukuze igazi labaphrofethi bonke elachithwa kusukela umhlaba wasekelwa, libizwe kulesi sizukulwane;
kusukela egazini lika-Abela kuze kufike egazini likaZakhariya, owabulawa phakathi kwe-althare nethempeli. Yebo, ngithi kini: lizakubizwa kulesi sizukulwane.
“Maye, kini zazimthetho, ngokuba nisithathile isihluthulelo solwazi! Nina luqobo aningenanga, nabangenayo nabavimbela.”
Kuthe ephuma lapho, izazimthetho nabaFarisi baqala ukumthukuthelela kakhulu. Base bemxina ngemibuzo ngezinto eziningi;
behlose ukumhila, ukuze bambambe ngamazwi akhe.
Ngaleso sikhathi kwabuthana izindimbane zabantu, zaze zanyathelana; uJesu wayeseqala ukukhuluma kubafundi bakhe, ethi: “Xwayani imvubelo yabaFarisi engukuzenzisa.
Akukho okusitshekelweyo okungayukwambulwa, nokufihliweyo okungayukwaziwa.
Ngakho-ke konke enikukhuluma ebumnyameni, kuyakuzwakala ekukhanyeni; nalokho enikukhuluma nikuhleba emakamelweni, kuyakumenyezelwa phezu kwezindlu.
“Kepha ngithi kini, bangani bami: ningabesabi ababulala umzimba, bengenakwenza lutho okunye emva kwalokho.
Kepha-ke ngizakunitshengisa okufanele nimesabe. Mesabeni lo othi esebulele, abuye abe namandla okuphonsa esihogweni. Impela, ngithi kini: mesabeni lowo.
Akuthengiswa yini imizwilili emihlanu ngezindibilishi ezimbili na? Nokho akukho namunye awukhohlwayo uNkulunkulu.
Phela ngisho izinwele ezisekhanda lakho uyazazi, zonke uzibalile. Ningesabi, ngokuba nina niyayedlula imizwilili.”
“Ngithi kini, yilowo nalowo oyakungivuma phambi kwabantu, neNdodana yomuntu iyakumvuma phambi kwezingelosi zikaNkulunkulu.
Kepha ongiphikayo phambi kwabantu, uyakuphikwa phambi kwezingelosi zikaNkulunkulu.
Noma ngubani okhuluma kabi ngeNdodana yomuntu, uyakuthethelelwa; kodwa ohlambalaza uMoya oNgcwele, akayukuthethelelwa.
“Uma benihudulela emasinagogweni nakubabusi neziphathimandla ukuba nehlulelwe, ningakhathazeki ukuthi niyakuphendula kanjani, nokuthi niyakuthini.
Ngokuba uMoya oNgcwele uyakunifundisa ngaleso sikhathi okufanele nikusho.”
Omunye esixukwini wathi kuye: “Mfundisi, tshela umfowethu ukuba angabele nami ifa lakwethu.”
Kepha uJesu wathi kuye: “Mngani, ngubani ongibeke ukuba ngibe ngumehluleli noma ngumabi wefa lakwenu na?”
UJesu wayesethi kubo: “Qaphelani, nilwexwaye lonke uhlobo lokuhaha, ngokuba ukuphila komuntu akumisiwe ngubuningi bomcebo wakhe.”
Wabalandisa umzekeliso, wathi: “Amasimu omuntu othile owayeyisicebi ayekhiqiza isivuno esihle.
Wazindla wathi: ‘Ngizokwenzenjani, ngokuba anginandawo engizofaka kuyo isivuno sami na?’
“Wayesethi: ‘Nakhu engizakukwenza: ngizakuzidiliza izinqolobane zami, ngakhe ezinkulu, ngibuthele kuzo sonke isivuno sokusanhlamvu, nempahla yami.
Bese ngithi emphefumulweni wami: “Mphefumulo, usunezimpahla eziningi ezilondolozelwe wena iminyaka eminingi. Ngakho-ke phumula, udle, uphuze, futhi ujabule.”’
“Kepha uNkulunkulu wathi kuye: ‘Siwula ndini, ngalobu busuku umphefumulo wakho uzakuthathwa kuwe. Pho-ke ziyakuba ngezikabani lezi zinto ozilungisileyo na?’
“Kubanjalo-ke kumuntu ozibekelela ingcebo ebe engacebile ngokukaNkulunkulu.”
Wayesethi kubafundi bakhe: “Ngakho-ke ngithi kini: ningakhathazeki ngokuphila kwenu nangemizimba yenu ukuthi niyakudlani, nanokuthi niyakwembathani.
Ngokuba ukuphila kubalulekile kunokudla, nomzimba kunesembatho.
Ake nibheke nje amagwababa; awalimi, awavuni, futhi awanazilulu nazinqolobane, kepha uNkulunkulu uyawondla. Kakhulu kangakanani-ke nina eniyigugu ukwedlula izinyoni!
Ngubani kini okuthi ngenxa yokukhathazeka, athasisele usuku olulodwa nje eminyakeni yokuphila kwakhe na?
Ngakho-ke njengokuba ningenamandla okwenza nokuncane nje, pho nizikhathazelani ngalokhu okunye na?
“Bhekani nje, nansi iminduze yasendle, ukuthi ikhula kanjani. Ayizikhandli, ayizithungeli zembatho, kodwa ngithi kini: ngisho noSolomoni, ebukhazikhazini bakhe bonke, wayengavunulisile okomunye wayo.
Uma-ke uNkulunkulu embathisa utshani basendle obukhona namuhla, kuthi ngakusasa buphonswe eziko, kakhulu kangakanani nina eninokukholwa okuncane.
Ningafuni ukuthi niyakudlani nokuthi niyakuphuzani; ningakhathazeki ngalokho.
Ngokuba konke lokhu kufunwa ngabezizwe baleli lizwe; kodwa uYihlo uyazi ukuthi niyakudinga lokhu.
Kepha funani umbuso kaNkulunkulu, yikhona konke lokhu kuyakwenezelwa kini.
“Ungesabi, mhlambi omncane, ngokuba kuyintando kaYihlo ukuba aninike umbuso.
Thengisani ngeninakho, nabele abampofu, nizenzele izikhwama zemali ezingagugiyo, ingcebo engapheliyo ezulwini; lapho kungasondeli khona sela nanundu, ukuba yone.
Ngokuba lapho ingcebo yenu ikhona, nenhliziyo yenu iyakuba khona lapho.”
“Izinkalo zenu mazihlale ziboshiwe, nezibani zenu zivutha.
Yibani njengezinceku ezilindele inkosi yazo ezobuya emshadweni, ukuze kuthi lapho ifika, ingqongqoza, ziyivulele masinyane.
Zibusisiwe lezo zinceku okuyakuthi lapho inkosi yazo ifika, izifice zilindile. Ngiqinisile ngithi kini: inkosi yazo iyakubopha ibhande okhalo, izihlalise phansi, ize yona uqobo iziphe ukudla.
Zibusisiwe lezo zinceku okuyakuthi noma inkosi yazo ifika kwesikabhadakazi noma entathakusa, izifumane zilindile.
Kepha-ke yazini lokhu, ukuthi uma umninindlu ebesazi isikhathi isela eliyakufika ngaso, ubengayukuvuma ukuba indlu yakhe igqekezwe.
Nani-ke hlalani nilindile, ngokuba anilazi ihora iNdodana yomuntu eyakufika ngalo.”
UPhethro wayesethi: “Nkosi, ngabe lo mzekeliso uwuqondise kithi noma kubantu bonke na?”
INkosi yaphendula yathi: “Iyiphi inceku ethembekileyo nehlakaniphileyo, inkosi yayo eyakuyibeka ukuba yengamele abendlu yayo, ibabele isabelo sokudla ngesikhathi esifaneleyo na?
Ibusisiwe leyo nceku okuyakuthi lapho inkosi yayo ifika, iyifumane yenza kanjalo.
Ngiqinisile, ngithi: iyakuyibeka phezu kwakho konke enakho ukuba ikwengamele.
Kepha uma leyo nceku ithi enhliziyweni yayo: ‘Inkosi yami isalibele ukuba ifike,’ bese iqala ukushaya izisebenzi zesilisa nezesifazane, idle, iphuze, idakwe,
inkosi yaleyo nceku iyakufika ngosuku engayilindele ngalo, nangomzuzu engawaziyo, iyijezise ngokuyibulala kabuhlungu, bese iyilahla nabangakholwayo.
“Inceku eyaziyo ukuthi inkosi ifunani, kodwa ingazilungiseleli ukwenza lokho okufunwa yinkosi, iyakushaywa imivimbo eminingi.
Kepha leyo eyenze okungafanele ngenxa yokungazi, iyakushaywa imivimbo embalwa. Yilowo nalowo ophiwe okuningi, kuyakufunwa okuningi kuye, nophathiswe okuningi, kuyakubizwa okuningi kakhulu kuye.”
“Ngize ukuphonsa umlilo emhlabeni; ngifisa kakhulu kangakanani ukuba ngabe sewokhelekile!
Nginombhabhadiso engizakubhabhadiswa ngawo; ngikhathazekile kakhulu, uze ufezeke.
Nicabanga ukuthi ngilethe ukuthula emhlabeni na? Phinde! Kepha ngithi kini: ngilethe ukwehlukana.
Ngokuba kusukela manje kuyakuba khona abayisihlanu endlini, abathathu bamelane nababili, nababili bamelane nabathathu.
Kuyokuba khona ukwehlukana: uyise amelane nendodana, nendodana imelane noyise, unina amelane nendodakazi, nendodakazi nonina, uninazala amelane nomalokazana, nomalokazana amelane noninazala.”
Wayesethi nakuzo izixuku: “Uma nibona kukhuphuka ifu entshonalanga, nisheshe nithi: ‘Kuza isiphepho,’ kube njalo.
Uma kuvunguza umoya weningizimu, nithi: ‘Lizakushisa likhiphe umkhovu etsheni,’ kube njalo nempela.
Bazenzisi, niyakwazi ukubona okwenzeka emhlabeni nasesibhakabhakeni, pho kungani ningakwazi ukuqonda okwalesi sikhathi na?
“Yini ningakwazi ukubona okufanele nikwenze na?
Uma uhambisana nesitha sakho, niya kumehluleli, sincenge nisesendleleni, nibuyisane, funa nifike kumehluleli, umehluleli akwedlulisele ephoyiseni, bese iphoyisa likuphonsa ejele.
Ngithi kuwe: awusoze waphuma ejele, uyoze ukhiphe ifadingi lokugcina.”
Kwakukhona ngaleso sikhathi abathile ababikela uJesu ngabaseGalile, abagazi labo uPilatu ayelixube nelemihlatshelo yabo.
Waphendula wathi kubo: “Nicabanga ukuthi labo bantu baseGalile babeyizoni kunabo bonke yini abanye baseGalile, ngokuba behlelwa yilowo mshophi na?
Ngithi kini: akunjalo, kodwa uma ningaphenduki, niyakubhubha nonke njengabo.
Nalabo abali-18 okwawela kubo umbhoshongo eSilowama, wababulala, nisho ukuthi babeyizoni ukwedlula bonke abantu ababehlala eJerusalema na?
Ngithi akunjalo: kodwa uma ningaphenduki niyakubhubha nonke njengabo.”
Wayesebalandisa lo mzekeliso wathi: “Umuntu othile wayetshale umkhiwane esivinini sakhe. Waya kuwo efuna isithelo sawo, kepha akafumananga lutho.
Wayesethi kosebenza esivinini: ‘Phela sekuyiminyaka emithathu ngifika ngizofuna amakhiwane kulo mkhiwane, kodwa ngingatholi lutho. Ngakho-ke wunqume: kungani ulokhu ugugisa umhlabathi na?’
“Kepha waphendula, wathi: ‘Nkosi, ake uwuyeke nakulo nyaka, ngize ngimbe umhlabathi emaceleni awo, ngithele umquba;
mhlawumbe ungase uthele ngonyaka ozayo, kodwa-ke uma kungenjalo, uyowunquma.’ ”
UJesu wayefundisa kwelinye lamasinagoge ngesabatha.
Lapho kwakukhona owesifazane owayenomoya omubi usumgulise iminyaka eli-18; wayeseze waqhotha, engasakwazi ukuma aqonde.
UJesu embona, wambiza, wathi kuye: “Mame, usuphilisiwe ekuguleni obunakho.”
Wabeka izandla phezu kwakhe, wayeselulama khona manjalo, wamdumisa uNkulunkulu.
Umphathi wesinagoge wacasuka ngokuba uJesu esindise umuntu ngesabatha, wayesekhuluma esixukwini ethi: “Kunezinsuku eziyisithupha okufanele ukuba kusetshenzwe ngazo. Ngakho-ke wozani ngalezo zinsuku ukuze niphiliswe, hhayi ngosuku lwesabatha.”
Kepha iNkosi yamphendula, yathi: “Bazenzisi, yilowo nalowo kini kayikhiphi yini ngesabatha inkabi yakhe noma imbongolo yakhe esibayeni, ayiqhube ukuba iyophuza na?
Bekungafanele yini-ke lo oyindodakazi ka-Abhrahama, obeboshwe nguSathane, iminyaka eli-18, ukuba akhululwe kulokho kuboshwa ngosuku lwesabatha na?”
Wathi ukuba asho lokho, bajabha bonke ababemelene naye, kepha isixuku sonke sathokoza ngenxa yemisebenzi yonke emangalisayo ayenzileyo.
Ngakho-ke uJesu wathi: “Umbuso kaNkulunkulu ufana nani na? Ungafaniswa nani na?
Ufana nohlamvu lwesinaphi aluthatha umuntu, waluhlwanyela ensimini yakhe; lwamila, lwaba yisihlahla; izinyoni zezulu zakhela emagatsheni aso.”
Wabuye wathi: “Umbuso kaNkulunkulu ungafaniswa nani na?
Ufana nemvubelo eyathathwa ngowesifazane, wayifaka emaqomeni amathathu empuphu, kwaze kwabila konke.”
UJesu wahamba phakathi kwemizi nemizana efundisa, esendleleni, elibhekise eJerusalema.
Umuntu othile wayesethi kuye: “Nkosi, bayingcosana yini abasindiswayo na?” UJesu wathi kubo:
“Phikelelani ukungena ngomnyango omncane. Ngokuba ngithi kini: baningi abayakufuna ukungena, kodwa behluleke.
Uma umninindlu esesukumile wavala umnyango, niyakuma ngaphandle, ningqongqoze emnyango, nithi: ‘Nkosi, sivulele,’ yena uyakuphendula, athi: ‘Anginazi ukuthi nivela kuphi.’
“Kulapho niyakuqala khona, nithi: ‘Sasidla, siphuza nawe, wawufundisa emigwaqweni yakithi.’
“Kepha yena uyakuthi: ‘Ngithi kini: anginazi ukuthi nivela kuphi. Sukani kimi nina nonke, benzi bobubi.’ ”
“Lapho kuyakuba khona ukukhala nokugedla amazinyo, uma senibona u-Abhrahama, u-Isaka, uJakobe, nabaphrofethi bonke embusweni kaNkulunkulu, kodwa nina nikhishelwe phandle.
Bayakufika bevela empumalanga, entshonalanga, enyakatho, naseningizimu; bonke bahlale esidlweni embusweni kaNkulunkulu.
Bakhona abokugcina abayakuba ngabokuqala, bakhona nabokuqala abayakuba ngabokugcina.”
Ngaleso sikhathi kweza kuJesu, abanye babaFarisi bathi kuye: “Suka, uhambe lapha, ngokuba uHerode ufuna ukukubulala.”
UJesu wathi kubo: “Hambani nitshele leyo mpungushe nithi: ‘Ngikhipha amadimoni, ngiphilise abagulayo, namuhla nakusasa, kuthi ngosuku lwesithathu ngipheleliswe.’
Nokho kumele ukuba namuhla nakusasa nangomhlomunye ngihambe, ngokuba akunakwenzeka ukuba umphrofethi afele ngaphandle kwaseJerusalema.
“Jerusalema! Jerusalema! Wena obulala abaphrofethi, ukhande ngamatshe labo abathunyelwe kuwe, kukaningi ngilangazelela ukuqoqa abantu bakho njengesikhukhukazi sikhoselise amachwane aso phansi kwamaphiko aso, kodwa anivumanga.
Indlu yenu isele iyinxiwa kini, kodwa ngithi kini: anisoze nangibona, kuze kube mhla nithi: ‘Ubusisiwe ozayo egameni leNkosi.’ ”
Kwathi ngesabatha uJesu waya endlini yomunye wabaFarisi oyisikhulu, eyokudla, bembheke ngeso lokhozi.
Kwakukhona phambi kwakhe umuntu othile owayenesifo sokuvuvuka.
UJesu wayesebuza kuzo izazimthetho nabaFarisi, wathi: “Kuvunyelwe yini ukuphilisa ngesabatha noma qha na?”
Kepha bathula du. Wayesemthinta lowo muntu, wamphilisa, wammukisa.
Wayesethi kubo: “Ngubani kini okungathi indodana yakhe noma inkabi yakhe ikhalakathele emgodini, angaphuthumi ayikhiphe, ngosuku lwesabatha na?”
Bahluleka ukumphendula nakulokho.
Wayesebalandisa abamenyiweyo umzekeliso, ebona beziqokela izihlalo eziphambili, wathi kubo:
“Uma umenyiwe emshadweni, ungahlali esihlalweni esiphambili, hleze kukhona omkhulu kunawe ammemileyo.
Bese eza kuwe onimemileyo, athi: ‘Dedela lona, kule ndawo ohleli kuyo’, bese wena uhamba uyohlala kwesingezansi, uphoxekile.
Kepha uma umenyiwe, hamba uhlale endaweni engezansi, ukuze kuthi lapho efika okumemileyo, athi kuwe: ‘Mngani, yenyukela ngenhla;’ khona uyakuba nodumo phambi kwabo bonke abahlezi nawe esidlweni.
Ngokuba bonke abaziphakamisayo bayakuthotshiswa; nozithobayo uyakuphakanyiswa.”
Wayesethi kommemileyo: “Uma wenza isidlo sasemini noma sakusihlwa, ungamemi abangani bakho, abafowenu, umndeni wakini, nomakhelwane bakho abacebileyo, funa nabo babuye bakumeme, lokho kube ngumvuzo kuwe.
Kepha uma wenza idili, mema abampofu, abakhubazekileyo, izinyonga, nezimpumputhe;
uyakubusiswa, ngokuba abananto yokukubuyisela, kepha uyakuthola umvuzo ekuvukeni kwabalungileyo.”
Esekuzwile lokho omunye wababehlezi naye esidlweni, wathi kuye: “Ubusisiwe lowo oyakudla isinkwa embusweni kaNkulunkulu.”
Kepha uJesu wathi kuye: “Umuntu othile wenza isiphihli sedili, wamema abaningi,
wayesethumela inceku yakhe ngesikhathi sedili, kulabo abamenyiwe, ukuyokuthi: ‘Wozani, ngokuba sekulungisiwe konke.’
“Kepha bonke ngothi lwabo, baqala ukuzilandulela, bebeka izaba; owokuqala wathi kuye: ‘Ngithenge insimu, kudingekile ukuba ngihambe ngiyoyibona; ngiyakucela, ngixolisele impela.’
“Omunye wathi: ‘Ngithenge amabhanqa ezinkabi eziyisihlanu, ngisayozihlola; ngiyakucela, ngixolisele impela.’
“Omunye wathi: ‘Ngisanda kuthatha umfazi, ngalokho-ke angiphumeleli ukuza.’
“Inceku isibuyile, yayibikela inkosi yayo ngalokho. Umninindlu wathukuthela, khona wayesethi encekwini yakhe: ‘Phuthuma, uye emigwaqweni nasemihubheni yomuzi; ungenise lapha abampofu, abakhubazekile, izimpumputhe, nezinyonga.’
“Yathi inceku: ‘Nkosi, sekwenziwe lokho obuyale ngakho, kepha isekhona indawo.’
“Inkosi yathi encekwini: ‘Phuma uye emigwaqweni nasezindleleni, ubanxenxe ukuba beze ukuze indlu yami igcwale phama.’
Ngokuba ngithi kini: akukho namunye kulabo abamenyiweyo oyakukuthi mbibi ukudla kwedili lami.”
Kwakukhona izixuku eziningi ezazihamba noJesu; waphenduka, wathi kuzo:
“Uma umuntu eza kimi, kepha engamdeli uyise, unina, umkakhe, abantwana, abafowabo, odadewabo, ngisho nokuphila kwakhe imbala, ngeke abe ngumfundi wami.
Nalowo ongathwali isiphambano sakhe, angilandele, ngeke abe ngumfundi wami.
“Ngokuba ngubani kini ongathi efuna ukwakha umbhoshongo, angaqali ahlale phansi, abale izindleko ukuthi unakho yini okokuwuqeda na?
Funa kuthi lapho esebeke isisekelo, bese engabi namandla okuwuqeda, kuthi bonke abakubonayo lokho, baqale ukumbhuqa,
bathi: ‘Lo muntu waqala ukwakha kodwa kakwazanga ukuqeda.’
“Noma iyiphi inkosi eya kwenye inkosi iyoyihlasela, ingaqalanga ngokuhlala phansi, icabangisise ukuthi iyokwazi yini ukubhekana nayo njengoba yona inezi-10 000 leyo eya kuyo inezi-20 000 na?
Kungenjalo, ingathi isekude leyo nkosi, bese ithumela amanxusa, ukuba acele uxolo.
Kanjalo-ke yilowo nalowo kini ongakudeli konke anakho, ngeke abe ngumfundi wami.
“Usawoti muhle, kepha uma usawoti usuduma, uyakuyoliswa ngani na?
Awusakufanele ngisho ukusetshenziswa emhlabathini nasemqubeni, kepha ukuba ulahlwe ngaphandle. Onezindlebe zokuzwa makezwe.”
Kwase kusondela kuye abathelisi nezoni ukuba bamlalele.
Kepha abaFarisi nezazimthetho bakhononda, bethi: “Lo muntu wamukela izoni, futhi adle nazo.”
UJesu wayesebalandisa lo mfanekiso, ethi:
“Ngubani kini ongathi enezimvu eziyikhulu, alahlekelwe ngenye yazo, angazishiyi edlelweni ezingama-99, ahambe ayofuna elahlekileyo, aze ayithole na?
Kuthi lapho eseyitholile, ayetshathe emahlombe ethokoza.
Esefikile ekhaya ameme abangani nomakhelwane, athi kubo: ‘Thokozani nami, ngokuba ngiyitholile imvu yami ebilahlekile.’
Ngithi kini: kanjalo kuyakuba khona ukuthokoza ezulwini ngesoni sisinye esiphendukayo, kunabalungileyo abangama-99 abangakudingi ukuphenduka.
“Noma-ke ngumuphi owesifazane ongathi enezinhlamvu zesiliva ezilishumi, alahlekelwe wuhlamvu olulodwa, angokheli isibani, ashanele endlini, alufunisise, aze aluthole na?
Kuthi eselutholile ameme abangani nomakhelwane, athi: ‘Thokozani nami, ngokuba ngilutholile uhlamvu lwami obelungilahlekele.’
Ngithi kini: kanjalo-ke kukhona ukuthokoza phambi kwezingelosi zikaNkulunkulu ngesoni esisodwa esiphendukayo.”
Wayesethi: “Umuntu othile wayenamadodana amabili.
Encane yathi kuyise: ‘Baba, nginike isabelo sefa esingesami;’ uyise wawabela ifa.
“Kwathi emva kwezinsukwana nje, indodana encane yaqoqa konke okungokwayo yahamba, yaya ezweni elikude, yafike yalisaphaza ifa layo, iphila ngendlela eyonakeleyo.
Kuthe isilisaphaze lonke, kwaba khona indlala enkulu kulelo lizwe; yaqala ukweswela.
Yahamba-ke yayosebenza komunye umuntu walelo lizwe. Wayithumela emadlelweni akhe ukuba iyokwelusa izingulube.
Yafisa ukuthiba iphango ngemidumba edliwa yizingulube, kepha kayiphiwanga muntu.
“Kuthe sekubuye umqondo, yathi: ‘Kambe bangaki abaqashwe ngubaba abadla baze bakubuke, mina ngibe ngibulawa yindlala lapha na?
Ngiyakusuka, ngiye kubaba, ngithi kuye: baba, ngonile kuNkulunkulu nakuwe;
angisafanele ukubizwa ngendodana yakho; ngenze ngibe njengomunye wezisebenzi zakho.’
Yayisisuka, yaya kuyise. Kepha kuthe isekude, uyise wayibona, waba nesihe, wagijima, wayisingatha entanyeni, wayanga.
“Indodana yayisithi kuye: ‘Baba, ngonile kulo izulu nakuwe; angisafanele ukubizwa ngendodana yakho.’
“Kepha uyise wathi ezincekwini zakhe: ‘Sheshani nilethe ingubo yakwanokusho, niyembathise, niyifake indandatho esandleni sayo nezicathulo ezinyaweni,
nilethe ithole elikhuluphalisiweyo, nilihlabe, sidle, sijabule.
Ngokuba le ndodana yami ibifile, yabuye yaphila; ibilahlekile, isitholakele,’ base beqala ukujabula.
“Kepha indodana yakhe endala yayisensimini; kuthe lapho isondela ngasekhaya, yezwa kuhlatshelelwa, futhi kusinwa.
Yabiza enye yezinceku, yabuza ukuthi kwenzenjani.
Yathi kuyo: ‘Kufike umnawakho, uyihlo wayesehlaba ithole elikhuluphalisiweyo, ngokuba ubuye wamthola esaphila.’
“Kepha indodana endala yathukuthela, yenqaba ukungena ekhaya. Uyise wayesephuma, wayincenga.
Kepha yaphendula, yathi kuyise: ‘Bheka nje, iminyaka engaka ngikusebenzela; angizange ngiweqe umyalo wakho, kepha mina awukaze ungihlabise ngisho nezinyane lembuzi leli, ukuba ngithokoze nabangani bami.
Kepha kuthe ukuba kufike le ndodana yakho ebhubhudle ifa lakho nezifebe, wayihlabisa ithole elikhuluphalisiweyo.’
“Wayesethi uyise kuyo: ‘Ndodana, wena uhlala nami njalo; konke okwami kungokwakho.
Kepha kufanele sijabule, sithokoze, ngokuba umfowenu lo ubefile, manje useyaphila; ubelahlekile, kodwa usetholakele.’ ”
UJesu wayesekhuluma futhi kubafundi bakhe, ethi: “Kwakukhona umuntu othile oyisicebi, owayenenduna; yamangalelwa kuye ngokuthi isaphaza impahla yakhe.
Wayibiza wathi kuyo: ‘Yini le engiyizwayo ngawe na? Ngilandise ngobunceku bakho, ngokuba ngeke usaqhubeka ukuba yinduna.’
“Yayisicabanga induna, ithi: ‘Ngizakwenzenjani, lokhu inkosi yami ingiyekisa ukuba yinduna na? Anginamandla okulima, futhi nginamahloni okunxiba.
Ngiyakwazi engiyakukwenza ukuze lapho sengikhishiwe ebuduneni, bangamukele ezindlini zabo.’
“Yababiza ngamunye ababekweleta inkosi yayo, yathi kowokuqala: ‘Uyikweleta okungakanani inkosi yami na?’
“Wathi: ‘Amabhati ayikhulu amafutha.’ “Yayisithi kuye: ‘Thatha incwadi yakho yesikweletu, usheshe uhlale phansi, ubhale angama-50.’
“Yayisithi komunye: ‘Wena-ke ukweleta okungakanani na?’ “Wathi: ‘Izilinganiso eziyikhulu zikakolo.’ “Yathi kuye: ‘Thatha incwadi yakho yesikweletu, ubhale ezingama-80.’
“Inkosi yayibabaza induna engathembekile, ngokuba yenza ngokuhlakanipha, ngokuba abantu balesi sikhathi esizukulwaneni sabo bahlakaniphile kunabantwana bokukhanya.
Nami ngithi kini: zenzeleni nina abangani ngomamona ongalungile, ukuze kuthi nxa esephelile, banemukele emakhaya aphakade.
“Othembekile kokuncinyane, uthembekile nakokukhulu; ongalungile kokuncinyane, kalungile nakokukhulu.
Ngakho uma ningathembekile ekuphatheni umcebo ongalungile, pho ngubani oyakuniphathisa umcebo woqobo na?
Uma futhi ningathembekile kokomunye, ngubani oyakuninika okungokwenu na?
“Akukho nceku engakhonza amakhosi amabili, ngokuba iyakuzonda enye, ithande enye; noma ibambelele kwenye, iyeyise enye. Ningeze nakhonza uNkulunkulu nengcebo.”
Kuthe abaFarisi ababethanda imali, bangakuzwa konke lokho, bamedelela.
Wayesethi kubo: “Nina nizenza abalungileyo phambi kwabantu, kodwa uNkulunkulu uyazazi izinhliziyo zenu, ngokuba lokho okutuseka kakhulu kubantu kuyisinengiso emehlweni kaNkulunkulu.
“Umthetho nabaphrofethi kwakukhona kwaze kwafika uJohane; kusukela ngaleso sikhathi, ivangeli lombuso kaNkulunkulu liyashunyayelwa, wonke umuntu uyafuzula ukuba angene kuwo.
Kepha kulula ukuba kudlule izulu nomhlaba kunokuba kusuke icashazana lokulotshwe emthethweni.”
“Yilowo nalowo olahla umkakhe, aganwe ngomunye, uyaphinga; noganwa ngolahlwe yindoda yakhe, uyaphinga.
“Kwakukhona umuntu othile onothileyo, owayegqoka ezibukhwebezane nezelineni elihle, ezithokozisa imihla ngemihla, etamasa.
Kwakukhona futhi othile ompofu, igama lakhe kunguLazaru. Wayebekiwe ngasesangweni lesicebi, egcwele izilonda,
elangazelela ukudla imvuthuluka ewa etafuleni lesicebi. Yebo, kweza nezinja zamkhotha izilonda.
“Wayesefa ompofu, wathwalwa yizingelosi, wayiswa esifubeni sika-Abhrahama. Safa nesicebi, sangcwatshwa.
Kuthe sesisendaweni yabafileyo sisezinhlungwini, saphakamisa amehlo aso, sabona u-Abhrahama ekude, noLazaru esesifubeni sakhe.
Samemeza sathi: ‘Baba Abhrahama, ngihawukele, uthume uLazaru, ukuba agcobhoze isihloko somunwe wakhe emanzini, apholise ulimi lwami, ngokuba ngisezinhlungwini ezinzima kabi kuleli langabi.’
“Kepha u-Abhrahama wathi: ‘Ndodana, khumbula ukuthi wamukela okuhle kwakho ngesikhathi usaphila, noLazaru ngokunjalo wamukela okubi, kodwa manje uyaduduzwa yena lapha, wena usuyahlupheka.
Ngaphezu kwakho konke lokho, kubekiwe umhosha omkhulu phakathi kwethu nani, ukuze abafuna ukusuka lapha baye kini bangaphumeleli; kanjalo nabalapho, bangaweleli kithi.’
“Isicebi sase sithi: ‘Ngakho-ke ngiyacela, baba, ukuba umthumele endlini kababa,
ngokuba nginabafowethu abayisihlanu, ukuze abaxwayise, funa nabo beze kule ndawo yobuhlungu.’
“Kepha u-Abhrahama wathi: ‘Abafowenu banemithetho kaMose nemibhalo yabaphrofethi, mabalalele bona.’
“Sathi-ke: ‘Qha, baba Abhrahama, kodwa uma kusuka umuntu kwabafileyo, aye kubo, bayakuphenduka.’
“Kepha u-Abhrahama wathi kuso: ‘Uma bengakulaleli okushiwo nguMose nabaphrofethi, abayukuzwa, noma kungavuka umuntu kwabafileyo.’ ”
Wayesethi kubafundi bakhe: “Akunakwenzeka ukuba zingabi bikho izikhubekiso, kodwa maye, kulowo eziza ngaye!
Kungangcono kuye ukuba itshe lokusila ligaxwe entanyeni yakhe, aphonswe olwandle, kunokuba akhubekise abe munye kulaba abancinyane.”
“Qaphelani nina. Uma umfowenu ona, mkhuze, uma ephenduka, mthethelele.
Uma ekona kuze kube kasikhombisa ngosuku, elokhu ebuyela kuwe kasikhombisa, athi: ‘Ngiyaphenduka,’ womthethelela.”
Abaphostoli base bethi eNkosini: “Yandisa ukukholwa kwethu.”
INkosi yayisithi: “Uma beninokukholwa okungangohlamvu lwesinaphi, beningathi kulesi sihlahla somthombe: ‘Zimbuka, utshaleke olwandle,’ sinilalele.
“Ngubani kini ongathi enenceku elimayo noma eyelusayo, bese kuthi isanda kubuya nje endle, athi kuyo: ‘Sondela ngokushesha, uhlale phansi, udle’ na?
Kunalokho akayukusho yini kuyo, athi: ‘Faka iphinifa lakho, ungilungisele engizokudla, ngidle, ngiphuze, andukuba wena udle, uphuze’ na?
Uyayibonga yini inceku, ngokuba ikwenzile lokho ekuyalelweyo na?
Kanjalo nani, uma senikwenzile konke enikuyalelweyo, anothi: ‘Asizinceku zalutho, ngokuba sikwenzile lokho obekufanele ukuba sikwenze.’ ”
Kwathi uJesu esahamba elibangise eJerusalema, wadabula eSamariya naseGalile.
Esangena emzaneni othile, wahlangana namadoda alishumi anochoko, ema buqamama,
ayesememeza ethi: “Jesu Nkosi, sihawukele!”
Lapho esewabonile, wathi kuwo: “Hambani, niyoziveza kubaphristi.” Kwathi esahamba, ahlanjululwa.
Enye yawo ibona ukuthi iphilisiwe, yabuyela emuva imdumisa uNkulunkulu ngezwi elikhulu.
Yakhothama, yathi mbo ngobuso ngasezinyaweni zikaJesu, imbonga; yayingumSamariya.
Kepha uJesu wakhuluma, wathi: “Akuhlanjululwanga yini abalishumi na? Pho baphi abayisishiyagalolunye?
Abatholakalanga yini abazobuya bamnike udumo uNkulunkulu, ngaphandle kwalo wabezizwe na?”
UJesu wayesethi kuye: “Sukuma uhambe; ukukholwa kwakho kukusindisile.”
AbaFarisi bambuza uJesu ukuthi umbuso kaNkulunkulu uzakufika nini. Wabaphendula wathi: “Umbuso kaNkulunkulu awufiki nje ubonwa ngamehlo.
Futhi abayukusho, bathi: ‘Bhekani, nanku,’ noma ‘nankuya,’ ngokuba phela umbuso kaNkulunkulu ukini.”
Wayesethi kubafundi: “Izinsuku ziyeza, lapho niyakufisa ukubona lube lunye lwezinsuku zeNdodana yomuntu, kodwa aniyukulubona.
Bayakuthi kini: ‘Bhekani, nansiya; bhekani, nansi.’ Ningayi lapho, futhi ningabalandeli.
Ngokuba njengonyazi, nxa lunyazima kusukela ngapha kwesibhakabhaka kuya ngale, iyakuba njalo-ke iNdodana yomuntu ngosuku lwayo.
Kepha kuqala, kufanele ihlupheke ngokuningi, ilahlwe yilesi sizukulwane.
“Njengokuba kwakunjalo emihleni kaNowa, kuyakuba kanjalo nasemihleni yeNdodana yomuntu.
Babedla, bephuza, beganwa, bendiswa, kwaze kwaba wusuku uNowa angena ngalo emkhunjini; kwafika uzamcolo, wababhubhisa bonke.
“Kanjalo njengalokhu kwenzeka ngezinsuku zikaLothi, babedla, bephuza, bethenga, bethengisa, betshala futhi bakha.
Kepha kwathi ngosuku uLothi aphuma ngalo eSodoma, lana umlilo nesibabule kuvela ezulwini, kwababhubhisa bonke.
Kuyakuba njalo-ke ngosuku eyakubonakaliswa ngalo iNdodana yomuntu.
Ngalolo lusuku oyakube ephezu kophahla lwendlu, impahla yakhe isendlini, makangehli ukuyoyithatha; kanjalo nosensimini, makangabuyeli emuva.
Khumbulani umkaLothi.
Ofuna ukulondoloza ukuphila kwakhe, uyakulahlekelwa yikho; kepha olahlekelwa yikho, uyakukulondoloza.
Ngithi kini: ngalobo busuku, kuyakuba khona ababili embhedeni munye; omunye uyakuthathwa, omunye ashiywe.
Kuyakuba khona ababili begaya ndawonye; omunye uyakuthathwa, omunye ashiywe.
Kuyakuba khona ababili ensimini; omunye uyakuthathwa, omunye ashiywe.”
Base bephendula, bethi kuye: “Nkosi, lokho kuyokwenzeka kuphi na?” Wathi kubo: “Lapho kunesidumbu khona, kulapho-ke namanqe ebuthana khona.”
UJesu wayesebalandisa umzekeliso, ebafundisa ukuthi kufanele bakhuleke njalo, bangadangali.
Wathi: “Emzini othile kwakukhona umehluleli othile owayengamesabi uNkulunkulu, futhi engenandaba namuntu.
Kulowo muzi kwakukhona futhi umfelokazi owayelokhu egqigqa, ethi kuye: ‘Ngenzele ubulungiswa maqondana nomelene nami.’
“Kwaba yisikhathi eside umehluleli engathandi. Kepha kamuva wadlinza, wathi: ‘Nakuba ngingamesabi uNkulunkulu, futhi ngingenandaba namuntu,
kodwa-ke ngokuba lo mfelokazi ulokhu engibelesele, ngizakumenzela ubulungiswa, funa ekugcineni angicasule.’ ”
INkosi yayisithi: “Lalelani-ke ukuthi wathini umehluleli okhohlakeleyo.
UNkulunkulu akayukubenzela yini ubulungiswa abakhethiweyo bakhe, abakhala kuye imini nobusuku, ababekezelele na?
Ngithi kini: uyakubenzela ubulungiswa ngokushesha. Ngabe iNdodana yomuntu iyokufumana yini ukukholwa emhlabeni mhla ifika na?”
UJesu wakhuluma nabanye ababezigabisa ngokuthi balungile, bedelela abanye; wabatshela lo mzekeliso, wathi:
“Abantu ababili benyukela ethempelini ukuyokhuleka, omunye engumFarisi, omunye engumthelisi.
UmFarisi wema, wakhuleka wathi: ‘Nkulunkulu, ngiyakubonga ngokuba ngingenjengabo abanye abantu: izigebengu, izikhohlakali, iziphingi, nanjengalo mthelisi.
Ngizila ukudla kabili ngeviki, nginikela ngokweshumi kwakho konke engikutholayo.’
“Kepha umthelisi wema kude engafuni ngisho nokuphakamisela amehlo akhe ngasezulwini, kodwa wazithoba ezisola, ethi: ‘Nkulunkulu, ngihawukele mina soni.’
“Ngithi kini: lo wabuyela ekhaya elungisisiwe kunomFarisi. Ngokuba yilowo nalowo oziphakamisayo, uzakuthotshiswa; kodwa ozithobayo, uzakuphakanyiswa.”
Baletha futhi kuJesu abantwana ukuba abaphathe; kodwa abafundi bekubona lokho, babakhuza.
Kepha uJesu wababiza, ethi: “Vumelani abantwana beze kimi, ningabenqabeli, ngokuba umbuso kaNkulunkulu ungowabanje.
Ngiqinisile ngithi kini: yilowo nalowo ongawemukeli umbuso kaNkulunkulu njengomntwana, kasoze angena kuwo.”
Umbusi othile wayesembuza, ethi: “Mfundisi omuhle, ngiyakwenzenjani ukuze ngidle ifa lokuphila okuphakade na?”
Kepha uJesu wathi kuye: “Ungibizelani ngokuthi ngimuhle na? Akekho omuhle, kuphela, uNkulunkulu.
Uyayazi imiyalelo ethi: ‘Ungaphingi, ungabulali, ungebi, ungafakazi amanga, hlonipha uyihlo nonyoko.’ ”
Kepha yena wathi: “Konke lokho ngikugcinile kusukela ebusheni bami.”
Esekuzwile lokho, uJesu wathi kuye: “Kunye kuphela okusakusalele: thengisa ngakho konke onakho, uphe abampofu, khona-ke uzakuba nengcebo ezulwini, bese uza, ungilandele.”
Kuthe ekuzwa lokho, waphatheka kabi, ngokuba wayecebe kakhulu.
UJesu embona ukuthi ulimele kakhulu, wathi: “Kulukhuni kuyitshe kwabanothileyo ukuba bangene embusweni kaNkulunkulu.
Kulula ukuba ikameli lingene ngembobo yosungulo, kunokuba onothileyo angene embusweni kaNkulunkulu.”
Abakuzwayo lokho base bethi: “Pho kuyakusindiswa bani na?”
Kepha uJesu wathi kubo: “Okungenzeki kubantu, kungenzeka kuNkulunkulu.”
UPhethro wayesethi: “Thina sishiye okungokwethu, sakulandela.”
UJesu wathi kubo: “Ngiqinisile ngithi kini: akukho muntu oshiye indlu, noma umkakhe, noma abafowabo, noma abazali, noma abantwana, ngenxa yombuso kaNkulunkulu,
ongayukukwamukeliswa okuphindwe kaningi kulesi sikhathi, esikhathini esizayo, ukuphila okuphakade.”
Wabasondeza kuye abali-12, wathi kubo: “Lalelani, sikhuphukela eJerusalema; konke okulotshwe ngabaphrofethi maqondana neNdodana yomuntu, kuzakugcwaliseka.
Izakukhashelwa kwabezizwe, iklolodelwe, iphathwe kabi, ikhafulelwe ngamathe,
bayishaye, bayibulale; kodwa ngosuku lwesithathu, izakuvuka.”
Kepha abakuqondanga lokho; leli lizwi laliyimpicabadala kubo, abakuqondanga lokho akushoyo.
Kwathi esesondela eJerikho, impumputhe ethile yayihleli ngasendleleni inqiba.
Kuthe lapho izwa isixuku sidlula ngakuyo, yabuza yathi: “Ngabe kuyini lokhu na?”
Base beyitshela bathi: “NguJesu waseNazaretha owedlulayo.”
Yayisimemeza ithi: “Jesu, Ndodana kaDavide, ngihawukele!”
Ababehamba ngaphambili bayikhuza ukuba ithule, kodwa kwayilapho isho kakhulu ngengila, ithi: “Ndodana kaDavide, ngihawukele!”
UJesu wema, wabayala ukuba bayilethe kuye. Kuthe isisondele wayibuza wathi:
“Ufuna ukuba ngikwenzeleni na?” Yathi: “Nkosi, ukuba ngibuye ngibone.”
UJesu wathi kuyo: “Bona! Ukukholwa kwakho kukusindisile.”
Yayisibona khona manjalo, yamlandela imdumisa uNkulunkulu, nabantu bonke bekubona lokho bamdumisa uNkulunkulu.
UJesu wangena eJerikho, wadabula kulo.
Kwakukhona indoda okuthiwa nguZakewu, ingumthelisi omkhulu, futhi icebile.
Yayifuna ukumbona uJesu ukuthi ungubani, kodwa yehluleka ngenxa yesixuku sabantu, ngokuba yayimfushane.
Yagijimela phambili, yagibela esihlahleni somthombe, ukuze imbone, ngokuba wayezakwedlula ngalapho.
UJesu esefikile kuleyo ndawo, wabheka phezulu, wathi kuyo: “Zakewu, shesha wehle, ngokuba namuhla kufanele ngingenise endlini yakho.”
UZakewu washesha wehla, wamemukela ngokuthokoza.
Kuthe lapho bekubona lokho, bakhononda bonke, bathi: “UJesu ungenise endlini yendoda eyisoni.”
Kepha uZakewu wasukuma, wathi eNkosini: “Nkosi, ngipha abampofu ingxenye yempahla yami; kuthi uma ngimqolile umuntu okuthile, ngikubuyisele kuye sekuphindwe kane.”
UJesu wathi kuye: “Namuhla insindiso ifikile kule ndlu, lokhu naye uyindodana ka-Abhrahama.
Ngokuba iNdodana yomuntu ize ukuzofuna nokusindisa okulahlekileyo.”
Kuthe abantu besalalele lokho, uJesu waqhubeka wabalandisa umzekeliso, ngokuba wayeseduze neJerusalema, nangokuba babethi umbuso kaNkulunkulu uzakubonakala masinyane.
Wathi-ke: “Kwakukhona umuntu wasebukhosini owaya ezweni elikude eyozithathela umbuso bese ebuya.
Wabiza izinceku zakhe ezilishumi, wazinika uhlamvu lwemali ngayinye, wathi kuzo: ‘Hwebani ngazo ngize ngibuye.’
“Kepha abantu bezwe lakhe babemzonda, ngakho-ke bathumela amanxusa, amlandela, ukuba afike lapho, athi: ‘Asithandi ukuba lo abuse phezu kwethu.’
“Kwathi esebuyile ekuthatheni umbuso, wazibiza lezo zinceku ayezinike imali ukuze ezwe ukuthi zizuzeni ngokuhweba.
“Kweza eyokuqala, yathi: ‘Nkosi, uhlamvu lwakho lwemali luzuze izinhlamvu zemali ezilishumi.’
“Wathi kuyo: ‘Kuhle-ke, nceku enhle, ngokuba wethembekile kokuncane, uzakubusa imizi elishumi.’
“Kweza neyesibili, yathi: ‘Nkosi, uhlamvu lwakho lwemali luzuze eziyisihlanu.’
“Wathi nakuleyo: ‘Nawe busa imizi emihlanu.’
“Kweza nenye, yathi: ‘Nkosi, nantu uhlamvu lwakho lwemali engalusonga ngendwangu ngalulondoloza.
Phela bengikwesaba, kwazise ungumuntu olukhuni. Uthatha ongazange ukubeke, uvune ongazange ukuhlwanyele.’
“Wathi kuyo: ‘Ngizakwehlulela ngamazwi akho, wena nceku embi. Ubuwazi kahle ukuthi ngingumuntu olukhuni: ngithatha engingazange ngikubeke, ngivune engingakuhlwanyelanga.
Kungani ungalufakanga uhlamvu lwemali yami ebhange, khona kuzothi ekubuyeni kwami, ngiluthole nenzalo na?’
“Wayesethi kwababemi lapho: ‘Mephuceni uhlamvu lwemali, nilunike onezilishumi.’
“Kepha bathi kuye: ‘Nkosi, unezinhlamvu zemali ezilishumi.’
“Ngithi kini: yilowo nalowo onakho, uyakuphiwa; kodwa lowo ongenakho, uyakwemukwa nalokho anakho.
Kepha lezo zitha zami ezazingathandi ukuba ngizibuse, ziletheni lapha, nizibulale ngizibonela ngawami.”
Kuthe esekushilo lokho wayeseqhubeka nohambo, wakhuphukela eJerusalema.
Kwathi uJesu esesondele eBhethifage naseBhethani, ngasentabeni okuthiwa eYeminqumo, wathuma abafundi ababili,
ethi: “Hambani niye emzaneni oqondene nani, kuzakuthi lapho ningena, nifumane ithole lembongolo likhulekiwe, okungazange kuhlale muntu kulo. Lithukululeni, nililethe lapha.
“Uma kukhona umuntu onibuzayo, ethi: ‘Nilithukulelani na?’ anothi: ‘INkosi iyalidinga.’ ”
Ababethunyiwe bahamba, bathola kunjengalokhu ayebatshelile.
Kuthe besalithukulula ithole, abaninilo bathi kubo: “Nilithukululelani ithole na?”
Bathi: “INkosi iyalidinga.”
Base beliletha kuJesu, babeka izingubo zabo phezu kwalo, bamgibelisa kulo uJesu.
Esahamba, bendlala izingubo zabo endleleni.
Kuthe esesondele emehlelweni weNtaba Yeminqumo isixuku sonke sabafundi saqala ukuthokoza nokudumisa uNkulunkulu ngezwi elikhulu ngazo zonke izimangaliso esizibonileyo,
sithi: “Ubusisiwe uMbusi ozayo egameni leNkosi, ukuthula ezulwini nenkazimulo kweliphezulu!”
Abanye babaFarisi besesixukwini, bathi kuye: “Mfundisi, bakhuze abafundi bakho.”
Waphendula wathi: “Ngithi kini: uma bethula laba, amatshe azakumemeza.”
Kwathi lapho esondela, ewubona umuzi, wawukhalela.
Wathi: “Sengathi ngabe nawe ubuwazi ngalolu lusuku, lokho okungakulethela ukuthula. Kepha manje kufihlakele emehlweni akho.
Ngokuba uyakufikelwa yizinsuku lapho izitha zakho ziyakwakha ugange, zikuhaqe, zikuvimbezele macala wonke.
Zikuqumbe phansi othulini, wena nabantu abanawe; aziyukushiya litshe phezu kwelinye phakathi kwakho. Ngokuba awusazanga isikhathi sokuhanjelwa kwakho.”
UJesu wangena ethempelini, waqala ukuxosha abathengisayo,
wathi kubo: “Kulotshiwe ukuthi: ‘Indlu yami iyakuba yindlu yokukhuleka,’ kodwa nina niyenze ‘umhume wabaphangi.’ ”
Wayefundisa ethempelini imihla ngemihla. Kepha abaphristi abakhulu, izazimthetho, nezikhulu zabantu, zafuna ukumbulala.
Kepha babengazi ukuthi bazokwenza kanjani, ngokuba bonke abantu babenamathele kuye, bemlalele.
Kwathi ngolunye usuku uJesu efundisa abantu ethempelini futhi eshumayela ivangeli, abaphristi abakhulu, izazimthetho namalunga, bamvukela.
Bakhuluma bathi kuye: “Sitshele ukuthi lokhu ukwenza ngagunya lini, nokuthi ngubani okunike leli gunya na?”
Waphendula wathi kubo: “Nami ngizakunibuza igama elilodwa zwi, ningiphendule.
Umbhabhadiso kaJohane wawuvelaphi, ezulwini noma kubantu na?”
Babonisana bodwa, base bethi: “Uma sithi: ‘Ezulwini,’ uzakuthi: ‘Pho anikholwanga ngani nguye na?’
“Kepha uma sithi: ‘Kubantu,’ abantu bonke bazakusikhanda ngamatshe, ngokuba bayakholwa ngukuthi uJohane ungumphrofethi.”
Base bephendula bethi: “Asazi ukuthi wavela kuphi.”
UJesu wayesethi kubo: “Nami angizukunitshela ukuthi lokhu ngikwenza ngagunya lini.”
Waqala ukulandisa abantu lo mzekeliso, wathi: “Umuntu othile watshala isivini, wasiqashisa kubalimi, wayesehamba isikhathi eside.
Ngesikhathi sokuvuna wathumela inceku kubalimi, ukuba bamnike ezithelweni zesivini. Kepha abalimi bayishaya, bayibuyisela emuva ilambatha.
Waphinda wathumela enye inceku, naleyo bayishaya, bayidumaza, bayibuyisela emuva ilambatha.
Wabuye wathumela eyesithathu; naleyo bayilimaza, bayiphonsa ngaphandle kwesivini.
“Umnininisivini wathi: ‘Ngizakwenzenjani manje na? Ngizakuthumela indodana yami ethandekayo; mhlawumbe bazakuyihlonipha.’
“Kepha kwathi lapho abalimi beyibona, babonisana bathi: ‘Lo uyindlalifa; masimbulale ukuze ifa kube ngelethu.’
Bayikhiphela ngaphandle kwesivini, bayibulala. Manje-ke uzokwenzenjani umninisivini kubo na?
Uzakuza, ababhubhise labo balimi, isivini asiqashise kwabanye.” Kuthe bekuzwa lokho bathi: “Qha, makungenzeki kanjalo.”
UJesu wababheka, wayesethi: “Pho kuyini lokhu okulotshiweyo ukuthi: “ ‘Itshe abalinqabayo abakhi, lona laba yinhloko yegumbi’ na?
“Yilowo nalowo owela phezu kwaleli litshe uyakuphihlizeka, kepha lowo eliyakuwela phezu kwakhe, liyakumfihliza.”
Izazimthetho nabaphristi bafuna ukumbamba ngezandla khona lapho, kodwa besaba abantu, ngokuba babazi ukuthi ukhulume lo mzekeliso ewuqondise kubo.
Bamqaphela, base bethumela izinhloli ezazizenza abalungileyo ukuba zimhile ngakushoyo, ukuze bamnikele kumbusi nasegunyeni lesiphathimandla.
Zambuza-ke zathi: “Mfundisi, siyazi ukuthi ukhululma futhi ufundise okulungileyo, awukhethi buso bamuntu, kodwa ufundisa indlela kaNkulunkulu ngokweqiniso.
Sivunyelwe yini ukuba sithele intela kuKhesari noma qha na?”
Kepha uJesu eqonda ubuqili babo, wathi kubo:
“Ngikhombiseni udenariyu; umfanekiso nombhalo kabani okuwo na?” Bathi: “OkaKhesari.”
Wayesethi kubo: “Ngakho-ke nikani uKhesari okukaKhesari, noNkulunkulu okukaNkulunkulu.”
Abakwazanga ukumhila ngamazwi akhe phambi kwabantu. Yabamangalisa impendulo yakhe, bathula du.
Kwase kufika kuye abathile babaSadusi abathi akukho ukuvuka kwabafileyo;
bambuza bathi: “Mfundisi, uMose wasilobela ukuthi, uma umfowabo womuntu efa enomfazi, kodwa engenabantwana, umfowabo makamngene owesifazane, amvusele inzalo umfowabo ongasekho.
Kwakukhona izelamani eziyisikhombisa. Esokuqala saganwa, safa singenamntwana;
umfazi wangenwa ngesesibili,
nesesithathu samngena; zonke izelamani eziyisikhombisa zamngena, kodwa zafa zingashiyanga bantwana.
Ekugcineni wafa nowesifazane.
Ngakho-ke ekuvukeni kwabafileyo uyakuba ngumfazi kabani, lokhu zonke izelamani eziyisikhombisa wayeziganile na?”
UJesu wathi kubo: “Abantu balesi sikhathi bayaganwa, bayendiswa.
Kepha labo okuzakuthiwa bafanele ukufinyelela kwelizayo nasekuvukeni kwabafileyo, kabaganwa futhi kabendiswa.
Kabasafi kodwa bafana nezingelosi; njengalokhu bengabantwana bakaNkulunkulu, bangabantwana bokuvuka.
Kepha lokhu ukuthi bayakuvuswa abafileyo, ngisho noMose wakuveza obala esihlahleni esivuthayo, lapho ebiza iNkosi ngokuthi, nguNkulunkulu ka-Abhrahama, noNkulunkulu ka-Isaka, noNkulunkulu kaJakobe.
UNkulunkulu kasiye owabafileyo, kodwa ungowabaphilayo, ngokuba bonke bayaphila kuye.”
Abathile bezazimthetho baphendula bathi: “Mfundisi, ukhulume kahle.”
Babengelokothe babuye bambuze utho.
UJesu wayesethi kubo: “Basho kanjani ukuthi uKhristu uyiNdodana kaDavide na?
Ngokuba uDavide uqobo, uthi eNcwadini yaMahubo: “ ‘INkosi yathi eNkosini yami, hlala ngakwesokunene sami,
ngize ngibeke izitha zakho, zibe yisenabelo sezinyawo zakho.’ ”
“Ngakho-ke uDavide umbiza ngeNkosi. Pho-ke uyiNdodana yakhe kanjani na?”
Kuthe bonke abantu besalalele, wathi kubafundi bakhe:
“Zixwayeni izazimthetho, ezifuna ukuhamba zigqoke izingubo ezinde; zithanda ukubingelelwa ezindaweni zokuhwebelana, nokuhlala ezihlalweni eziqavile emasinagogeni, nasemadilini.
Zidla izindlu zabafelokazi, zikhuleke isikhathi eside, zizenzisa. Laba bayakwemukela ukwehlulelwa okukhulu.”
Kwathi lapho ebheka, wabona izicebi zifaka iminikelo yazo emphongolweni womnikelo.
Wabona futhi nomfelokazi othile, ompofu, efaka kuwo izinhlamvana zemali ezimbili.
UJesu wayesethi: “Ngiqinisile ngithi kini: lo mfelokazi ompofu ufake okuningi kunabo bonke.
Ngokuba bonke laba abanye bafake emnikelweni bethatha kokuningi; kodwa yena ekuntuleni kwakhe, ukhiphe konke abephila ngakho.”
Kwathi abanye besababaza ubuhle bethempeli ukuthi lihlotshiswe ngamatshe amahle nangezipho ezinhle, uJesu wayesethi kubo:
“Kuyakufika izinsuku lapho kulokhu enikubonayo, kungayukushiywa itshe phezu kwelinye elingayukudilizelwa phansi.”
Base bembuza bethi: “Mfundisi, lokhu kuyakwenzeka nini, futhi siyakuba yini isibonakaliso sokuthi sekuzakwenzeka na?”
Wathi: “Qaphelani, ningadukiswa, ngokuba kuyakuvela abaningi egameni lami, bathi: ‘Nginguye,’ babuye bathi: ‘Isikhathi sesisondele.’ Ningabalandeli.
Uma nizwa ngezimpi nangeziyaluyalu, ningesabi, ngokuba kufanele ukuba zenzeke lezi zinto kuqala, kodwa kuyobe kungakabi umhla wokuphela.”
Wayesethi kubo: “Isizwe siyakuvukela isizwe, nombuso uvukele umbuso.
Kuyakuba khona ukuzamazama komhlaba okukhulu, kubhoke indlala ezindaweni eziningi, kube khona ubhubhane, izinto ezesabekayo nezibonakaliso ezinkulu ezivela ezulwini.
“Kepha kungakenzeki konke lokho, bayakunibamba, banihluphe, banikhaphele emasinagogeni nasemajele, baniyise phambi kwamakhosi nababusi ngenxa yegama lami.
Lokhu kuyakuninika ithuba lokuba nifakaze.
Ngakho-ke kugcineni ezinhliziyweni zenu ukuze ningazindli ngokuthi niyakuziphendulela nithini,
ngokuba Mina ngiyakunifunza amazwi nokuhlakanipha abangayukwazi ukumelana nakho noma baphikisane nakho bonke labo abalwa nani.
Impela niyakukhashelwa ngisho ngabazali, abafowenu, izihlobo nabangani; abanye benu bayakubulawa yibo.
Niyakuzondwa yibo bonke ngenxa yegama lami.
Nokho akuyukulahleka nalunye ezinweleni zekhanda lenu.
Ekubekezeleni kwenu, niyakuzuza ukuphila kwenu.”
“Kuyakuthi nxa nibona iJerusalema lihaqwe yizimpi, bese nazi-ke ukuthi sekusondele ukubhujiswa kwalo.
Ngakho-ke labo abaseJudiya mababalekele ezintabeni; abakulo, mabaphume baphele; abasemasimini, abangangeni kulo.
Ngokuba lezi kuyakube kuyizinsuku zempindiselo ukuze kugcwaliseke konke okulotshiweyo.
Wo, kwabakhulelweyo nakwabancelisayo ngalezo zinsuku! Ngokuba kuyakuba khona ukuhlupheka okukhulu emhlabeni, nentukuthelo yehlele phezu kwalesi sizwe.
Abanye bayakubulawa ngenkemba, abanye bathunjwe, bayiswe ezizweni zonke. IJerusalema liyakunyathelwa phansi ngabezizwe, kuze kuphele isikhathi sabezizwe.”
“Kuyakuba khona izibonakaliso elangeni, enyangeni, nasezinkanyezini. Izizwe emhlabeni zehlelwe usizi nokudideka ngenxa yokuhlokoma kolwandle nokudlanga kwamaza alo.
Abantu bayakuquleka ngenxa yokwesaba nangokulindela lokho okuyakwehlela umhlaba, ngokuba amandla ezulu ayakunyakaziswa.
Khona-ke bayakuyibona iNdodana yomuntu iza ngefu, inamandla nenkazimulo enkulu.
Kepha uma sekuqala ukwenzeka lokho, sukumani nime, niphakamise amakhanda enu, ngokuba ukuhlengwa kwenu sekusondele.”
Wabatshela umzekeliso, wathi: “Ake nibheke umkhiwane nezihlahla zonke.
Kuthi uma kuhluma amacembe, nibone, futhi nazi ukuthi sekuthwasa ihlobo.
Kanjalo nani, nxa nibona konke lokhu kwenzeka, yazini ukuthi umbuso kaNkulunkulu ususeduze.
“Ngiqinisile ngithi kini: lesi sizukulwane asiyukwedlula kungakenzeki konke lokho.
Kuyakudlula izulu nomhlaba, kepha amazwi ami awasoze adlula.
“Qaphelani, funa izinhliziyo zenu zisindwe ukuminza, ukudakwa, neminako yalokhu kuphila, bese lolo lusuku lunizume,
ngokuba luyakufika njengogibe kubo bonke abantu abasebusweni bomhlaba wonke.
Ngakho-ke lindani, nikhuleke ngezikhathi zonke ukuze nikwazi ukuphunyuka kukho konke lokhu okuzakukwenzeka, nokuba nime phambi kweNdodana yomuntu.”
Ngalezo zinsuku uJesu wayefundisa ethempelini emini, bese kuthi ebusuku ahambe ayolala entabeni okuthiwa eYeminqumo.
Bonke abantu babevuka ekuseni ngovivi baye ethempelini, ukuba bamlalele.
Wawususondele umkhosi wesinkwa esingenamvubelo, okuthiwa yiPhasika.
Abaphristi abakhulu nezazimthetho babefuna iqhinga lokuthi bangambulala kanjani uJesu, ngokuba babesaba abantu.
USathane wangena kuJuda okuthiwa u-Iskariyothe, owayengomunye wabalishumi nambili.
Wasuka wayobhunga nabaphristi abakhulu nezinduna, ukuthi angamkhaphela kanjani uJesu kubo.
Bathokoza, base bevumelana naye ngokumkhokhela imali.
Wavuma-ke, wayesefuna ithuba lokumkhaphela, singekho isixuku.
Lwase lufika usuku lwesinkwa esingenamvubelo, okufanele ukuba kuhlatshwe ngalo iPhasika.
UJesu wathuma uPhethro noJohane, wathi: “Hambani niyosilungisela iPhasika ukuba sidle.”
Bathi kuye: “Uthanda ukuba sililungisele kuphi na?”
Wathi kubo: “Niyothi uma seningenile emzini, nihlangane nomuntu ethwele imbiza yamanzi; mlandeleni, niye endlini angena kuyo,
bese nithi kumninindlu: ‘UMfundisi uthi kuwe: “Liphi ikamelo lezihambi engingadlela kulo iPhasika nabafundi bami, na?” ’
Lowo-ke uzakunikhombisa ikamelo elikhulu eliphezulu, elilungisiweyo; lilungiseleni lapho-ke.”
Sebehambile, bafumana kunjengoba ayeshilo kubo, base belungisela iPhasika.
Kwathi ukuba kufike isikhathi, wahlala phansi esidlweni, nabaphostoli benaye.
Wayesethi kubo: “Bengilangazelela nokulangazelela okukhulu ukuba ngidle leli Phasika nani ngingakahlupheki.
Ngokuba ngithi kini: angisayukulidla futhi, kuze kufezeke inhloso yalo embusweni kaNkulunkulu.”
Wathabatha indebe, wabonga wathi: “Thabathani lokhu, nabelane;
ngokuba ngithi kini, kusukela manje angisayukuphuza kulesi sithelo somvini, kuze kufike umbuso.”
Wayesethabatha isinkwa, wabonga, wasihlephula, wabanika sona, ethi: “Lokhu kungumzimba wami onikelelwe nina; yenzani lokhu ukuba ningikhumbule.”
Kanjalo-ke wathabatha nendebe sebedlile, wathi: “Le ndebe iyisivumelwano esisha egazini lami elithululelwa nina.
Kepha isandla songikhaphelayo sinami lapha etafuleni.
Ngokuba iNdodana yomuntu izakufa njengokumisiweyo, kepha maye, kulowo muntu ekhashelwa ngaye!”
Base beqala ukubuzana bodwa ukuthi ngabe ngubani kubo ozakukwenza lokho.
Kwaqubuka nempikiswano yokuthi ngubani phakathi kwabo okungathiwa mkhulu.
UJesu wayesethi kubo: “Ababusi bezizwe bazithwalisa kanzima izizwe, nalabo abayiziphathimandla babizwa ngokuthi ngabenzi bokuhle.
Kepha akunjalo kinina; kodwa omkhulu kini, makabe njengomncinyane; nongumholi, abe njengesisebenzi.
Ngokuba ngubani omkhulu, ngabe ngohleli elindele ukunikwa ukudla noma yisisebenzi esiphakayo na? Akusiye yini ohlezi esidlweni na? Kepha Mina ngiphakathi kwenu njengesisebenzi.
Nina-ke benilokhu ninami ekulingweni kwami.
Njengalokhu uBaba enginikile umbuso, nami ngininika wona,
ukuze nidle, niphuze etafuleni lami embusweni wami. Niyakuhlala ezihlalweni zobukhosi, nibuse izizwe ezili-12 zakwa-Israyeli.”
“Simoni, Simoni, lalela la; uSathane unicelile ukuba anihlunge njengokolweni.
Kepha Mina ngikunxusele ukuba ukukholwa kwakho kungapheli. Wena-ke, uma usuphendukile, uqinise abafowenu.”
Kepha wathi kuye: “Nkosi, ngikulungele ukuya nawe ejele nasekufeni.”
UJesu wayesethi: “Ngiyakutshela, Phethro, ukuthi iqhude aliyukukhala namhlanje, ungakangiphiki kathathu ukuthi awungazi.”
Wayesethi kubo: “Mhla nginithuma ningenasikhwama semali, nasikhwama sokwethekela, nazicathulo, ngabe kukhona yini enakweswelayo na?” Bathi: “Qha.”
Wayesethi kubo: “Kepha manje onesikhwama semali makasithathe, kanjalo nonesokwethekela; ongenankemba makathengise ngengubo yakhe, ayithenge inkemba.
Ngokuba ngithi kini: kufanele ukuba kugcwaliseke lokho okulotshiweyo ngami, ukuthi: ‘Wabalwa kanye nezelelesi;’ ngokuba lokho okulotshiwe ngami, sekuyafezeka.”
Base bethi: “Nkosi, bheka, nazi izinkemba ezimbili.” Wathi kubo: “Kwanele.”
Wayesephuma, waya eNtabeni Yeminqumo njengalokhu kwakungumkhuba wakhe, abafundi bakhe bamlandela.
Kuthe esefikile lapho, wathi kubo: “Khulekani ukuze ningangeni ekulingweni.”
Wayesesuka kubo ibanga elingangokuphonsa itshe, waguqa phansi, wakhuleka,
wathi: “Baba, uma uthanda yisuse kimi le ndebe, nokho kungabi ngokwentando yami, kube njengokuba kuthanda wena.”
Kwabonakala kuye ingelosi ivela ezulwini, imqinisa.
Esosizini olunzima, wakhuleka eqinisela, izithukuthuku zakhe zaze zaba njengamathonsi egazi econsela emhlabathini.
Esesukumile ekukhulekeni, waya kubafundi bakhe, wabafica belele, ngokuba babedabukile kakhulu.
Wathi kubo: “Nilaleleni na? Vukani nikhuleke ukuba ningangeni ekulingweni.”
Esakhuluma, kwatheleka isixuku siholwa nguJuda, omunye wabali-12, wasondela kuJesu ukuba amange.
Kepha uJesu wathi kuye: “Juda, uyayikhaphela iNdodana yomuntu ngokuyanga na?”
Sebebonile ababenoJesu okuzakwenzeka, bathi: “Nkosi, sigadle yini ngenkemba na?”
Omunye othile kubo wagalela inceku yomphristi omkhulu, wayinquma indlebe yakwesokunene.
Kepha uJesu waphendula wathi: “Yekani; sekwanele!” Wayithinta indlebe yayo, wayelapha.
Wathi uJesu kubaphristi abakhulu, ezinduneni zethempeli, nakumalunga ababeze kuye ukuzombopha: “Niphume niphethe izinkemba nezagila sengathi nize kumphangi na?
Benginani imihla ngemihla ethempelini, anelulanga zandla ukuba nimelane nami, kepha manje yithuba lenu leli, namandla obumnyama.”
Base bembamba, bahamba naye, bamyisa endlini yomphristi omkhulu. UPhethro walandela ekude.
Sebewubasile umlilo phakathi negceke, bahlala phansi ndawonye; uPhethro wahlala nabo.
Intombazana ethile, eyisisebenzi, imbona ehlezi otha umlilo, yamgqolozela, yayisithi: “Impela nalo ubenaye.”
Kepha waphika, wathi: “Sifazane, angimazi.”
Emva kwesikhashana omunye wambona, wathi: “Nawe ungomunye wabo.” Kepha uPhethro, wathi: “Muntundini, angisiye.”
Sekwedlule isikhathi esingaba yihora, omunye umuntu othile wagcizelela, wathi: “Impela lo ubenaye, ngokuba futhi ungowaseGalile.”
Kepha uPhethro wathi: “Muntundini, angazi ukuthi ukhuluma ngani.” Masinyane esakhuluma, lakhala iqhude.
INkosi yayisiphenduka, yambheka uPhethro. UPhethro walikhumbula izwi leNkosi, njengokuba yayithe kuye: “Iqhude lingakakhali namuhla, uzakungiphika kathathu.”
Waphumela phandle, wakhala kalusizi.
Amadoda ayembambile uJesu, ambhinqa emshaya.
Ammboza ubuso, ambuza athi: “Phrofetha ukuthi ngubani okushayileyo na?”
Basho nokunye okuningi, bemhlambalaza.
Kuthe sekusile, kwaqoqana umkhandlu wamalunga abantu, abaphristi abakhulu, nezazimthetho, bamyisa esigcawini somkhandlu wabo omkhulu,
bathi: “Uma unguKhristu, sitshele.” Wathi kubo: “Uma nginitshela, anisoze nakholwa;
noma nginibuza, anisoze naphendula.
Kepha kusukela manje iNdodana yomuntu izakuhlala ngakwesokunene samandla kaNkulunkulu.”
Base bembuza bonke, bethi: “Kanti uyiNdodana kaNkulunkulu yini na?” Wathi kubo: “Kusho nina ukuthi ngiyiyo.”
Bathi: “Pho sisadinga buphi ubufakazi na? Ngokuba sesizizwele thina uqobo ezisholo yena ngowakhe umlomo.”
Kwasuka lonke uquqaba lwamqhuba uJesu, lwamyisa kuPilatu.
Baqala ukumthwesa icala, bathi: “Lo muntu simthole edukisa isizwe sakithi, esenqabela ukuba sithele intela kuKhesari, ethi nguyena onguKhristu, inkosi.”
UPilatu wambuza, wathi: “Wena uyinkosi yabaJuda na?” Wamphendula wathi: “Kusho wena.”
UPilatu wayesethi kubaphristi abakhulu nasezixukwini: “Angitholi cala kulo muntu.”
Kepha baqinisa kakhulu, bethi: “Ubhebhezela abantu, efundisa kulo lonke iJudiya, eqalile eGalile, waze wazofika lapha.”
UPilatu esezwa lokho wabuza ukuthi lo muntu ungowaseGalile yini na?
Esezwile ukuthi uvela esifundeni sikaHerode, wamdlulisela kuHerode owayeseJerusalema ngalezo zinsuku.
UHerode lapho ebona uJesu, wathokoza kakhulu, ngokuba kwase kuyisikhathi eside efisa ukumbona, lokhu wayesezwile ngaye futhi enethemba lokuthi uzakubona isibonakaliso esithile senziwa nguJesu.
UHerode wambuza ngokuningi, kodwa kamphendulanga ngalutho.
Abaphristi abakhulu nezazimthetho babemile, belokhu bephikelele bemmangalela.
Kepha uHerode namabutho akhe bamedelela, bambhinqa, baze bamembathisa ingubo ecwebezelayo, bambuyisela kuPilatu.
Ngalolo lusuku uPilatu noHerode baba ngabangani, njengokuba phambilini kwakukhona ubutha phakathi kwabo.
UPilatu wabizela ndawonye abaphristi abakhulu, ababusi nabantu,
wathi kubo: “Nimlethe kimi lo muntu ngoba nithi wedukisa abantu. Mina ngimgwexile ngemibuzo phambi kwenu, kodwa angitholanga cala lalezo zinto enimmangalela ngazo.
Kanjalo noHerode, ngokuba umbuyisele lapha kithi. Akenzanga lutho olufanele isigwebo sokufa.
Ngakho-ke ngiyakumshaya, bese ngimkhulula.”
UPilatu kwakumele abakhululele isiboshwa sibe sinye ngoMkhosi wePhasika.
Kepha bamemeza ngazwi linye, bathi: “Susa lo, usikhululele uBharabha.”
UBharabha wayeboshwe ngenxa yokudala isiyaluyalu emzini, nangenxa yokubulala.
UPilatu wakhuluma futhi kubo efuna ukumkhulula uJesu,
kodwa bamemeza, bathi: “Mbethele, mbethele esiphambanweni!”
Ngokwesithathu uPilatu, wathi kubo: “Kanti lo wenze bubi buni na? Angitholanga cala kuye elifanele isigwebo sokufa. Ngakho-ke ngizomshaya, bese ngimkhulula.”
Kepha bamcindezela bememeza kakhulu, befuna ukuba abethelwe. Kwaphumelela ukumemeza kwabo.
UPilatu wayesenquma ukuba kwenziwe lokho abakufunayo.
Wamkhulula lowo owayeboshwe ngenxa yokudala isiyaluyalu nokubulala, ababemcelile, kodwa uJesu wamnikela kubo njengokuthanda kwabo.
Kuthe besahamba naye uJesu, babamba uSimoni othile waseKhurene, owayevela emakhaya. Bametshathisa isiphambano walandela emuva kukaJesu.
Kwakulandela isixuku esikhulu, kukhona nabesifazane ababemkhalela, bekhihla isililo.
Kepha uJesu waphendukela kubo, wathi: “Madodakazi aseJerusalema, ningangikhaleli Mina, kodwa zikhaleleni nina nabantwana benu.
Ngokuba izinsuku ziyeza abayakuthi ngazo: ‘Zibusisiwe izinyumba nezibeletho ezingazalanga, namabele angancelisanga.’
Khona “bayakuqala bathi ezintabeni: ‘Welani phezu kwethu,’ nasemagqumeni, bathi: ‘Sisibekeleni.’
“Ngokuba uma benza lokho emthini oluhlaza, kuyakuba njani-ke kowomileyo na?”
Kwakukhona nabanye, izelelesi ezimbili, ezaziqhutshwa ukuba ziyobulawa kanye naye.
Kuthe sebefikile endaweni okuthiwa iKhanda, bambethela lapho uJesu nezelelesi, esinye singakwesokunene esinye singakwesokhohlo.
UJesu wathi: “Baba, bathethelele, ngokuba abakwazi abakwenzayo.” Babelana ngezingubo zakhe, benzelana unkatho.
Abantu bema, bebukela, kanti ababusi babemklolodela, bethi: “Wasindisa abanye; makazisindise Yena, uma enguKhristu, okhethiweyo kaNkulunkulu.”
Namabutho ambhinqa, eza kuye, amnika isimuncwana sewayini,
ethi: “Uma uyinkosi yabaJuda, zisindise.”
Kwakukhona nombhalo phezu kwekhanda lakhe, othi: LO YINKOSI YABAJUDA.
Esinye sezelelesi esasiphanyekiwe, samhlambalaza sathi: “Wena awusiye yini uKhristu na? Zisindise kanye nathi.”
Kepha esinye saphendula, sasithethisa sathi: “Kanti awumesabi yini uNkulunkulu, ingani nawe uthole isigwebo esifanayo na?
Thina kusifanele, ngokuba sijeziselwa izenzo zethu, kepha lo akenzanga lutho olubi.”
Sase sithi: “Jesu, uze ungikhumbule uma usufike embusweni wakho.”
Wathi kuso: “Ngiqinisile ngithi kuwe: namuhla uzakuba nami ePharadisi.”
Kwathi ngehora lesithupha kwaba mnyama ezweni lonke, kwaze kwaba yihora lesishiyagalolunye.
Ilanga lafiphala, isihenqo sethempeli sadabuka phakathi.
UJesu wamemeza ngezwi elikhulu, wathi: “Baba, ezandleni zakho, ngiyawubeka umoya wami.” Esekushilo lokho, wafa.
Kwathi induna yekhulu isikubonile okwenzekileyo, yamdumisa uNkulunkulu, yathi: “Ngempela lo muntu ube ngolungileyo.”
Zonke izixuku ezazibuthene lapho zibukela lesi sehlakalo, kuthe sezibonile okwenzekileyo, zabuyela emakhaya, zidangele.
Bonke abazana naye, nabesifazane ababemlandela bevela eGalile, bema kude, bebuka lezi zinto.
Kwakukhona indoda igama layo kunguJosefa, iyilungu lomphakathi, iqotho, futhi ilungile.
Yona yayingahambisani necebo nesenzo sabo. Yayivela e-Arimatheya, umuzi wabaJuda; yayilinde ukufika kombuso kaNkulunkulu.
Yaya kuPilatu yayocela isidumbu sikaJesu.
Yasehlisa, yasisonga ngendwangu enhle, yasibeka ethuneni elaliqoshwe edwaleni, lapho kungakabekwa muntu khona.
Kwakulusuku lokulungiselela, futhi sekuzoqala isabatha.
Abesifazane ababehamba noJesu bevela eGalile balandela, balibona ithuna nokubekwa kwesidumbu sakhe.
Base bebuyela emuva, bayolungisa amafutha namakha, kodwa ngesabatha baphumula njengokusho komthetho.
Kepha ngosuku lokuqala lweviki, kusantwela ezansi, bafika ethuneni bephethe amakha ababewalungisile.
Bafica itshe ligingqiwe ethuneni.
Kuthe sebengenile, bangasithola isidumbu seNkosi uJesu.
Kwathi besakhungathekile yilokho, babona nanko amadoda amabili emi eduze kwabo, egqoke izingubo ezicwebezelayo.
Besaba, base bekhothama bathi mbo ngobuso phansi, ayesethi kubo: “Nimfunelani ophilayo kwabafileyo na?
Akekho lapha; uvukile. Khumbulani ukuthi wakhuluma wathini kini eseseGalile,
ethi: ‘INdodana yomuntu imelwe ukunikelwa ezandleni zabantu abayizoni, ibethelwe, bese ivuka ngosuku lwesithathu.’ ”
Base bewakhumbula-ke amazwi akhe.
Kuthe sebebuyile ethuneni, babika konke lokho kwabali-11, nakubo bonke abanye.
KwakunguMariya Magdalena, uJowana, uMariya unina kaJakobe nabanye, ababikela abaphostoli lezo zinto.
Kepha lawo mazwi eyefana nembudane nje kubaphostoli, abawakholwanga neze.
Nokho uPhethro wasukuma, wagijima eqonde ethuneni, wafike walunguza, wazibona izindwangu zelineni zisele zodwa. Wayesehamba, waya ekhaya emangele ngokwenzekileyo.
Kwaba nabafundi ababili ababehamba ngalolo lusuku, beya emzaneni okuthiwa i-Emawuse, ukude neJerusalema, amastadiyu angama-60.
Babehamba bexoxa ngazo zonke lezo zinto ezehlakeleyo.
Besakhuluma bebuzana, uJesu uqobo wasondela, wahambisana nabo.
Kepha wafihlakala kubo, bangambona ukuthi ungubani.
Wayesethi kubo: “Zindaba zini lezi enihamba nizidingida na?” Base bema bedangele.
Omunye wabo, ogama lakhe nguKleyophase, waphendula, wathi kuye: “Ngabe nguwe wedwa yini oyisihambi eJerusalema, ongazazi izinto ezenzekileyo khona kulezi zinsuku na?”
Wayesethi kubo: “Zinto zini na?” Bathi: “NgoJesu waseNazaretha, obengumphrofethi onamandla ngezenzo nangezwi phambi kukaNkulunkulu nabantu bonke,
nokuthi abaphristi abakhulu nababusi bethu bamnikela kanjani ukuba agwetshelwe ukufa, bambethele esiphambanweni.
Thina-ke besethembile ukuthi nguye ozakuhlenga u-Israyeli. Kepha sekuwusuku lwesithathu zenzekile zonke lezi zinto.
Phezu kwalokho abesifazane abathile bakithi basethusile, abebeyile ethuneni ekuseni ngovivi.
Kuthe uma bengasitholi isidumbu sakhe, bafika bathi babone nombono wezingelosi ezithe uyaphila.
Nabanye bethu bayile ethuneni, bafica kunjengokuba beshilo abesifazane, kodwa Yena uqobo abambonanga.”
UJesu wayesethi kubo: “Maye, nina eningaqondiyo nenilibele enhliziyweni ukukholwa yikho konke okwashiwo abaphrofethi!
Kanti uKhristu ubengamelwe yini ukuba ahlupheke ngalokho, bese engena enkazimulweni yakhe na?”
Wayesebachazela konke okusemibhalweni ngaye, kusukela kuMose nakubaphrofethi bonke.
Base besondela emzaneni ababeya kuwo. Yena washaya sengathi uyedlula lapho,
kodwa bamncengisisa, bathi: “Hlala nathi, ngokuba sekuzakuhlwa, nemini isiyadlula.” Wangena wahlala nabo.
Kuthe esehleli nabo sebezokudla, wathatha isinkwa, wabonga, wasihlephula, wabanika sona.
Ayesevuleka amehlo abo, bambona ukuthi ungubani, wayesenyamalala kubo.
Bathi omunye komunye: “Inhliziyo yethu ibingavuthi yini phakathi kwethu, ngesikhathi ekhuluma nathi endleleni, esichazela imibhalo na?”
Basuka ngaleso sikhathi, babuyela eJerusalema, bafica abali-11 behlangene ndawonye nabanye ababenabo,
bethi: “Nembala iNkosi ivukile, izibonakalisile kuSimoni.”
Base nabo bebalandisa ngokwakwenzeke endleleni, nokuthi bayazi kanjani ukuthi yiyo iNkosi, ngokuhlephula isinkwa.
Kuthe besakhuluma ngalezi zinto, uJesu uqobo wema phakathi kwabo, wathi: “Ukuthula makube kini.”
Kepha bona bethuka kakhulu, kwaphela nasozwaneni becabanga ukuthi babona umungcwi.
Wayesethi kubo: “Nethuswa yini na? Kungani ningabaza ezinhliziyweni zenu na?
Bhekani izandla zami nezinyawo zami ukuthi yiMina uqobo. Ngithinteni, nizibonele, ngokuba umungcwi awunanyama namathambo, njengokuba ningibona nginakho.”
Esekushilo lokho wabakhombisa izandla nezinyawo.
Kepha babengakholwa ngenxa yentokozo nokumangala, wathi kubo: “Ninakho yini ukudla lapha na?”
Bamnika iqatha lenhlanzi eyosiweyo.
Walithatha, walidla bebuka.
Wayesethi kubo: “Yiwo lawo mazwi engawakhuluma ngisenani, ngathi: ‘Kumele ukuba kugcwaliseke konke okulotshwe ngami emthethweni kaMose, kubaphrofethi, nasemaHubweni.’ ”
Wayeseyivula imiqondo yabo ukuze bayiqonde imibhalo.
Wathi kubo: “Kulotshiwe kanje ukuthi uKhristu uzakuhlupheka, avuke kwabafileyo ngosuku lwesithathu.
Kushunyayelwe egameni lakhe ukuphenduka, kube ngukuthethelelwa kwezono ezizweni zonke; kuqalwe eJerusalema.
Nina-ke ningofakazi balezi zinto.
Sengiyathumela kini isithembiso sikaBaba, kodwa hlalani emzini, nize nembathiswe amandla avela phezulu.”
Wayesebahola, baphuma baze bayofika eBhethaniya, waphakamisa izandla zakhe, wababusisa.
Kuthe esababusisa, wasuka kubo, wenyuselwa ezulwini.
Bakhuleka kuye, base bebuyela eJerusalema benokuthokoza okukhulu.
Babekhona njalo ethempelini, bemdumisa uNkulunkulu.
Ekuqaleni wayekhona uLizwi. ULizwi wayekuNkulunkulu, uLizwi wayenguNkulunkulu.
Yena lowo, wayekhona ekuqaleni kuNkulunkulu.
Konke kwavela ngaye; akukho lutho olwadalwayo kukho konke okudaliweyo, olungavelanga ngaye.
Kuye kwakukhona ukuphila; lokhu kuphila okungukukhanya kwabantu.
Ukukhanya kukhanya ebumnyameni, kepha ubumnyama abukwazanga ukukucima.
Kwafika umuntu owayethunywe nguNkulunkulu, igama lakhe nguJohane.
Wezela ukuba ngufakazi, ofakaza ngokukhanya ukuze bonke abantu bakholwe ngaye.
Yena wayengesikho ukukhanya, kodwa wayengozofakaza ngokukhanya.
Kwakungukukhanya kweqiniso, okukhanyisa bonke abantu, okwase kuza ezweni.
ULizwi wayekhona ezweni. Izwe lavela ngaye, kodwa izwe alimazanga.
Weza kokwakhe, kodwa abakhe abamemukelanga.
Kepha bonke abamemukelayo, labo abakholwa egameni lakhe, wabapha igunya lokuba babe ngabantwana bakaNkulunkulu,
abangazalwanga ngagazi, ngandlela yemvelo noma ngantando yendoda, kodwa bazalwa nguNkulunkulu.
ULizwi waba ngumuntu, wahlala phakathi kwethu. Sabona inkazimulo yakhe, inkazimulo yozelwe yedwa kuYise, egcwele umusa neqiniso.
UJohane wafakaza ngaye, wamemeza wathi: “Lona nguye engikhulume ngaye ngathi: ‘Emva kwami kuza lowo omkhulu kunami, ngokuba wayekhona ngaphambi kwami.’ ”
Ngokuba ekugcwaleni kwakhe, sonke samukele umusa phezu komusa.
Umthetho wanikezwa ngoMose, umusa neqiniso kweza ngoJesu Khristu.
Akekho osewake wabona uNkulunkulu; nguNkulunkulu, iNdodana ezelwe yodwa, esesifubeni sikaYise embonakalisile.
Lokhu kungubufakazi bukaJohane, lapho abaJuda bethumele abaphristi nabaLevi bevela eJerusalema ukuba bambuze, bathi: “Wena ungubani na?”
Wavuma, kahlonizanga; wavuma wathi: “Angisiye uKhristu mina.”
Bambuza bathi: “Kanti pho ungubani na? Ungu-Eliya na?” Wathi: “Qha, angisiye.” Bathi: “UnguMphrofethi na?” Wathi: “Qha.”
Base bethi kuye: “Kanti ungubani na? Ukuze sibaphendule abasithumileyo; zichaze ukuthi ungubani.”
Wathi: “Ngiyizwi lomemeza ehlane, ethi: “ ‘Lungisani indlela yeNkosi, njengalokhu asho u-Izaya, umphrofethi.’ ”
Labo ababethunyiwe babevela kubaFarisi.
Bambuza bathi: “Pho ubhabhadiselani uma ungesiye uKhristu, noma u-Eliya noma uMphrofethi na?”
UJohane wabaphendula, wathi: “Mina ngibhabhadisa ngamanzi, kepha kumi phakathi kwenu eningamaziyo.
Lo ozayo emuva kwami, angifanele ngisho nokuthukulula umchilo wezicathulo zakhe.”
Konke lokhu kwenzeka eBhethani, ngaphesheya komfula iJordani, lapho uJohane wayebabhabhadisa khona.
Ngakusasa uJohane wabona uJesu eza kuye, wayesethi: “Bheka, iWundlu likaNkulunkulu elisusa isono somhlaba.
Nguye lo ebengikhuluma ngaye, ngithi: ‘Emva kwami kuza owavela ngaphambi kwami, owayekhona kuqala kunami.’
Nami bengingamazi, kodwa ukuze abonakaliswe ku-Israyeli, ngizile, ngibhabhadisa ngamanzi.”
UJohane wafakaza wathi: “Ngibonile uMoya ehla njengejuba evela ezulwini; wahlala phezu kwakhe.
Bengingamboni mina, kodwa owangithumayo ukuba ngibhabhadise ngamanzi, wathi kimi: ‘Lowo oyakubona uMoya ehla, ahlale phezu kwakhe, nguyena obhabhadisa ngoMoya oNgcwele.’
Ngibonile futhi ngiyafakaza, ngithi: lo uyiNdodana kaNkulunkulu.”
Nangakusasa uJohane wayemi nabafundi bakhe ababili.
Kuthe ebona uJesu edlula, wathi: “Nanti iWundlu likaNkulunkulu.”
Abafundi ababili bamuzwa ekhuluma, base bemlandela uJesu.
UJesu waphenduka, wababona bemlandela, wathi kubo: “Nifunani na?” Bathi: “Rabi,” okusho ukuthi Mfundisi: “Uhlala kuphi na?”
Wabaphendula wathi: “Wozani nibone.” Ngakho-ke bahamba, babona lapho ehlala khona, bahlala naye ngalolo lusuku; cishe kwase kuyihora leshumi.
U-Andreya, umfowabo kaSimoni Phethro, wayengomunye walabo ababili abathi ukumuzwa uJohane, bamlandela uJesu.
U-Andreya waqala wafumana umfowabo uSimoni, wathi kuye: “Simtholile uMesiya,” okungukuthi uma lihunyushwa, uKhristu.
Wamyisa kuJesu. UJesu wambheka, wathi: “Wena unguSimoni kaJona; usuzakubizwa ngokuthi uKhefase,” okusho ukuthi ngokuhunyushwa, uPhethro.
Ngangomuso uJesu wanquma ukuya eGalile. Wafica uFiliphu, wathi kuye: “Ngilandele.”
UFiliphu wayedabuka eBhethsayida, umuzi okwakuhlala kuwo u-Andreya noPhethro.
UFiliphu wafumana uNathaniyeli, wathi kuye: “Simtholile lowo uMose aloba ngaye emthethweni, kanye nabaphrofethi, uJesu waseNazaretha, indodana kaJosefa.”
UNathaniyeli wathi kuye: “Kukhona yini okuhle okungavela eNazaretha na?” UFiliphu wathi: “Woza uzozibonela!”
UJesu wambona uNathaniyeli eza kuye, wakhuluma ngaye wathi: “Nangu-ke umIsrayeli woqobo, ongenankohliso.”
UNathaniyeli wathi kuye: “Ungazelaphi na?” UJesu waphendula, wathi kuye: “Ngaphambi kokuba uFiliphu akubize phansi komkhiwane, ngakubona.”
UNathaniyeli wamphendula, wathi: “Rabi, Wena uyiNdodana kaNkulunkulu, uyiNkosi ka-Israyeli.”
UJesu wamphendula, wathi kuye: “Uyakholwa ngokuba ngithe kuwe ngakubona uphansi komkhiwane na? Uzakubona okukhulu kunalokho.”
Wathi kuye: “Ngiqinisile, ngiqinisile ngithi kini: nizakubona izulu livuliwe nezingelosi zikaNkulunkulu zenyuka zehla phezu kweNdodana yomuntu.”
Kwathi ngosuku lwesithathu, kwaba khona umshado eKhana eGalile. Unina kaJesu wayekhona lapho.
UJesu nabafundi bakhe babemenyiwe emshadweni.
Kwathi sekuphele iwayini, unina kaJesu wathi kuye: “Abanalo iwayini.”
UJesu wathi kuye: “Mame, ungene ngani kokwami na? Isikhathi sami asikafiki.”
Unina wayesethi ezincekwini: “Yenzani noma yini azakunitshela yona.”
Kwakukhona lapho izimbiza eziyisithupha ezazenziwe ngamatshe, zibekwe ngokwesiko labaJuda lokugeza izandla. Imbiza ngayinye yayimumatha umthamo othi awube yizilinganiso ezimbili noma ezintathu.
UJesu wathi ezincekwini: “Gcwalisani izimbiza ngamanzi.” Zazigcwalisa.
Wayesethi kuzo: “Cakulani manje, nihambise kumphathi wokudla.” Zahambisa-ke.
Umphathi wokudla ezwa amanzi aphenduke iwayini, kodwa engazi ukuthi livela kuphi, kepha izinceku ezaziwakhile amanzi zazi, wabiza umyeni.
Wathi kuye: “Wonke umuntu ukhipha iwayini elimnandi kuqala, kuthi uma abantu sebephuze kakhulu, akhiphe elibi, kodwa wena ugcine iwayini elimnandi kuze kube manje.”
Lesi kwakuyisibonakaliso sokuqala uJesu asenza eKhana eGalile, ebonakalisa inkazimulo yakhe. Abafundi bakhe bakholwa nguye.
Emva kwalokho, wehlela eKhaphernawume: Yena nonina nabafowabo nabafundi bakhe, bahlala lapho izinsukwana ezimbalwa.
Lase lisondele iPhasika labaJuda, uJesu wenyukela eJerusalema.
Wafumana ethempelini ababethengisa ngezinkomo, ngezimvu nangamajuba, abanye behlezi beshintsha imali.
Wayesephotha inkalivasi ngezintambo, wabaxosha bonke ethempelini, izimvu nezinkomo; wasakaza imali yabashintshisayo, wagumbuqela amatafula.
Wathi kulabo abathengisa ngamajuba: “Susani lokhu lapha, ningayenzi indlu kaBaba ibe yindlu yokuthengiselana.”
Abafundi bakhe bakhumbula ukuthi kulotshwe ukuthi: “Ukushisekela indlu yakho kuyakungidla.”
Ngakho-ke abaJuda bambuza, bathi: “Usibonisa sibonakaliso sini ngokwenza lokhu na?”
UJesu waphendula, wathi kubo: “Dilizani leli thempeli, ngizakulivusa ngezinsuku ezintathu.”
AbaJuda bathi kuye: “Leli thempeli lathatha iminyaka engama-46 lakhiwa, wena uthi uzakulivusa ngezinsuku ezintathu na?”
Kepha uJesu wayekhuluma ngethempeli elingumzimba wakhe.
Ngakho-ke kuthe esevusiwe kwabafileyo, abafundi bakhe bakhumbula ukuthi wayekushilo lokho. Bakholwa ngumbhalo nayizwi uJesu ayelikhulumile.
Kwathi uJesu eseJerusalema ngoMkhosi wePhasika, abaningi bakholwa egameni lakhe lapho bebona izibonakaliso azenzayo.
Kepha uJesu akazange abethembe, ngokuba wayebazi bonke ubunjalo babo.
Wayengadingi futhi ukuba atshelwe ngomuntu, lokhu wayekwazi okungaphakathi kumuntu.
Kwakukhona umuntu owayengumFarisi, igama lakhe nguNikhodimu, engumholi wabaJuda.
Lo weza kuJesu ebusuku, wathi kuye: “Rabi, siyazi ukuthi ungumfundisi ovela kuNkulunkulu, ngokuba akekho ongenza lezi zibonakaliso ozenzayo, uma uNkulunkulu engenaye.”
UJesu waphendula, wathi kuye: “Ngiqinisile, ngiqinisile ngithi kuwe: uma umuntu engazalwa kabusha, ngeke awubone umbuso kaNkulunkulu.”
UNikhodimu wathi kuye: “Umuntu angazalwa kanjani esemdala na? Angangena yini esibelethweni sikanina ngokwesibili, ukuba azalwe na?”
UJesu waphendula, wathi: “Ngiqinisile, ngiqinisile ngithi kuwe: uma umuntu engazalwa ngamanzi nangoMoya, ngeke angene embusweni kaNkulunkulu.
Lokho okuzelwe ngokwenyama kuyinyama; nalokho okuzelwe nguMoya, kungumoya.
Ungamangali ngokuba ngithe kuwe: ‘Nimelwe ukuzalwa kabusha.’
Umoya uvunguza lapho uthanda khona. Uyawuzwa umsindo wawo, kodwa awuwazi lapho uqhamuka khona nalapho uqonde khona. Banjalo-ke bonke abazelwe nguMoya.”
UNikhodimu waphendula, wathi kuye: “Lokhu kungenzeka kanjani na?”
UJesu waphendula, wathi kuye: “Wena ungumfundisi ka-Israyeli, kodwa awukwazi lokho na?
Ngiqinisile, ngiqinisile ngithi kuwe: sikhuluma esikwaziyo, sifakaza ngesikubonileyo, kodwa anibemukeli ubufakazi bethu.
Uma nginitshelile ngokomhlaba, kanakholwa; pho ningakholwa kanjani uma nginitshela ngokwasezulwini na?
Akekho noyedwa owenyukele ezulwini, ngaphandle kwalowo owehla ezulwini, iNdodana yomuntu.
Njengalokhu uMose wayiphakamisa inyoka ehlane, kanjalo neNdodana yomuntu imele ukuphakanyiswa,
ukuze yilowo nalowo okholwa yiyo abe nokuphila okuphakade.
“Ngokuba uNkulunkulu walithanda izwe kangaka, waze wanikela ngeNdodana yakhe ezelwe yodwa, ukuba yilowo nalowo okholwa yiyo angabhubhi, kodwa abe nokuphila okuphakade.
Ngokuba uNkulunkulu kayithumelanga iNdodana yakhe ezweni ukuba izokwehlulela izwe, kodwa ukuba izwe lisindiswe ngayo.
Okholwa yiyo akehlulelwa, kodwa ongakholwa, usevele wehlulelwe, ngokuba engakholwanga eNdodaneni kaNkulunkulu ezelwe yodwa.
Yilesi isehlulelo ukuthi ukukhanya kufikile emhlabeni, kodwa abantu bathanda ubumnyama kunokukhanya, ngoba imisebenzi yabo imibi.
Ngokuba yilowo nalowo owenza okubi, uyakuzonda ukukhanya; akezi ekukhunyeni, funa imisebenzi yakhe idaluleke.
Kepha lowo owenza iqiniso, uyeza ekukhanyeni, ukuze imisebenzi yakhe ibonakaliswe ukuthi yenziwe kuNkulunkulu.”
Emva kwalokho uJesu nabafundi bakhe baya eJudiya, bahlala khona, wabhabhadisa.
UJohane naye wayebhabhadisa e-Ayenoni eduze naseSalimi, ngokuba kwakunamanzi amaningi lapho. Abantu beza, babhabhadiswa.
Lokho kwenzeka uJohane engakafakwa ejele.
Kwaqubuka impikiswano phakathi kwabafundi bakaJohane nomJuda othile mayelana nokuhlambulula.
Beza kuJohane, bathi kuye: “Rabi, lowo owawunaye ngaphesheya kweJordani, owafakaza ngaye useyabhabhadisa, abantu bonke baya kuye.”
UJohane waphendula, wathi: “Umuntu angemukele lutho, uma engaluphiwanga luvela ezulwini.
Nani ngokwenu niyangifakazela ukuthi ngathi: ‘Angisiye uKhristu mina, kodwa ngithunyiwe ukuba ngimandulele.’
Lowo onomakoti, ungumyeni; kepha umngani omise umyeni uyathokoza lapho ezwa izwi lomyeni. Ngakho-ke ukuthokoza kwami sekuphelelisiwe.
Kufanele akhule Yena, kodwa mina nginciphe.
“Lowo ovela phezulu, uphezu kwakho konke; kanti ovela emhlabeni, ungowomhlaba, ukhuluma okomhlaba. Lowo ovela ezulwini, uphezu kwakho konke.
Ufakaza ngakubonileyo nakuzwileyo, kodwa akekho owemukela ubufakazi bakhe.
Lowo owamukela ubufakazi bakhe, uyaqinisekisa ukuthi uNkulunkulu uqinisile.
Othunywe nguNkulunkulu ukhuluma amazwi kaNkulunkulu, ngokuba uNkulunkulu umuphe ngokupheleleyo uMoya.
UYise uyayithanda iNdodana, ngakho-ke unikele konke ezandleni zayo.
Okholwa yiNdodana unokuphila okuphakade, kodwa ongakholwa yiyo, akayukukubona ukuphila, kepha intukuthelo kaNkulunkulu ihlezi phezu kwakhe.”
Kwathi ukuba uJesu ezwe ukuthi abaFarisi sebezwile ukuthi uthola abafundi, futhi abhabhadise abaningi kunoJohane,
nakuba uJesu uqobo ayengabhabhadisi, kodwa kwakubhabhadisa abafundi bakhe,
wayesesuka eJudiya, wabuyela eGalile.
Kwakufanele ukuba adabule eSamariya.
Ngakho-ke wafika eSamariya emzini okuthiwa yiSikhari, eduze nesiqinti uJakobe asinika uJosefa, indodana yakhe.
Kwakukhona umthombo kaJakobe lapho. Ngakho-ke uJesu esekhathele ukuhamba, wahlala ngasemthonjeni. Kwakungaba yihora lesithupha.
Kwafika owesifazane waseSamariya ezokukha amanzi. UJesu wathi kuye: “Ake ungiphuzise.”
Abafundi bakhe babesahambile beyothenga ukudla emzini.
Owesifazane waseSamariya waphendula, wathi: “Kungenzeka kanjani ukuba Wena ungumJuda, ucele kimi engingowesifazane waseSamariya ukuba ngikuphuzise na?” Phela abaJuda abadlelani namaSamariya.
UJesu waphendula, wathi kuye: “Ukuba ubusazi isipho sikaNkulunkulu, nokuthi ngubani lo othi kuwe: ‘Ngiphuzise,’ ngabe ucele kuye, Yena ubezakukunika amanzi aphilayo.”
Owesifazane wathi kuye: “Nkosi, awuphethe sitsha sokukha, kanti umthombo ujulile. Pho uwathathaphi lawo manzi aphilayo na?
Ngabe Wena umkhulu yini kunokhokho wethu uJakobe owasipha lo mthombo, waphuza kuwo, yena namadodana akhe nemihlambi yakhe na?”
UJesu waphendula, wathi kuye: “Yilowo nalowo ophuza lawa manzi uyakuphinde ome.
Kepha lowo oyakuphuza amanzi engiyakumnika wona, akayikoma naphakade. Ngokuba amanzi engiyakumnika wona ayakuba kuye ngumthombo wamanzi aphuphumsayo, kube ngukuphila kwaphakade.”
Owesifazane wathi kuye: “Nkosi, ngiphe lawo manzi ukuze ngingaphinde ngome, futhi ngingabe ngiseza lapha ukuzokha amanzi.”
UJesu wathi kuye: “Hamba ubize indoda yakho, uze nayo lapha.”
Owesifazane waphendula, wathi: “Anginandoda.” UJesu wathi kuye: “Usho kahle uma uthi: ‘Anginandoda,’
ngokuba sewuke waba namadoda ayisihlanu, nale onayo manje akusiyo eyakho. Lokhu okushoyo kuyiqiniso.”
Owesifazane wathi: “Nkosi, sengiyabona ukuthi Wena ungumphrofethi.
Okhokho bethu babekhonza uNkulunkulu kule ntaba, kepha nina nithi iseJerusalema indawo lapho kufanele kukhonzelwe khona.”
UJesu wathi kuye: “Sifazane, ngikholwe. Siyeza isikhathi lapho ningasayukumkhonza uBaba kule ntaba naseJerusalema.
Nina nikhonza eningakwaziyo, kodwa thina sikhonza esikwaziyo, ngokuba insindiso ivela kubaJuda.
Kepha isikhathi siyeza, sesifikile manje, lapho abakhonza ngokweqiniso beyakumkhonza uBaba ngomoya nangeqiniso, ngokuba uBaba ufuna abamkhonza kanjalo.
UNkulunkulu unguMoya, ngakho-ke abamkhonzayo kufanele bamkhonze ngomoya nangeqiniso.”
Owesifazane wathi kuye: “Ngiyazi ukuthi uMesiya, okuthiwa nguKhristu uyeza; uma esefikile uyakusitshela konke.”
UJesu wathi kuye: “Nginguye Mina engikhuluma nawe.”
Ngaleso sikhathi kwase kufika abafundi bakhe, bamangala lapho bemfica ekhuluma nowesifazane. Kepha akekho noyedwa owabuza, wathi: “Ufunani na?” noma “Ukhulumelani nowesifazane na?”
Owesifazane washiya imbiza yakhe yamanzi, waya emzini, wathi kubantu:
“Wozani nizobona umuntu ongitshele konke engikwenzileyo. Ngabe lona akusiye uKhristu na?”
Baphuma emzini, beza kuJesu.
Khona manjalo, abafundi bamncenga, bethi: “Rabi, yidla.”
Kepha wathi kubo: “Nginokudla engikudlayo eningakwaziyo nina.”
Abafundi base bekhuluma bodwa, bethi: “Ngabe kukhona yini omlethele ukudla na?”
UJesu wathi kubo: “Ukudla kwami kungukuba ngenze intando yongithumileyo, nokuba ngiwuphothule umsebenzi wakhe.
Anejwayele yini ukuthi sekusele izinyanga ezine kuvunwe. Lalelani-ke, ngithi kini: phakamisani amehlo enu nibone ukuthi amasimu asemhlophe, alungele ukuvunwa.
Lowo ovunayo uthola umvuzo, aqoqe isithelo kube ngukuphila okuphakade ukuze ohlwanyelayo athokoze novunayo.
Ngokuba kulokhu liqinisile izwi elithi: ‘Omunye uyahlwanyela, omunye avune.’
Mina nganithumela ukuba nivune lokho eningakusebenzanga. Abanye basebenzile, nina-ke senizuza ngezithukuthuku zabo.”
AmaSamariya amaningi alowo muzi akholwa kuJesu ngenxa yezwi lowesifazane owafakaza, wathi: “Ungitshele konke engikwenzileyo.”
Ngakho-ke athi amaSamariya esefikile kuye, amncenga ukuba ahlale nawo. Wahlala lapho izinsuku ezimbili.
Abaningi kakhulu bakholwa ngenxa yezwi lakhe.
Base bethi kowesifazane: “Asisakholwa ngenxa yokuba sitshelwe nguwe, kodwa sesizizwele ngokwethu, sesiyazi ukuthi lo impela unguMsindisi wezwe.”
Emva kwezinsuku ezimbili, uJesu wasuka lapho, waya eGalile.
Ngokuba uJesu uqobo wafakaza ukuthi umphrofethi akahlonishwa ezweni lakubo.
Kuthe esefikile eGalile, abaseGalile bamamukela, njengalokhu babekubonile konke akwenzayo eJerusalema ngomkhosi, ngokuba nabo babeyile emkhosini.
Ngakho-ke waphinda waya eKhana eGalile, lapho aguqula khona amanzi aba yiwayini. Kwakukhona induna ethile yenkosi eyayigulelwa yindodana yayo eKhaphernawume.
Kwathi ukuba izwe ukuthi uJesu ufikile eGalile evela eJudiya, yaya kuye, yamncenga ukuba ehlele eKhaphernawume aphilise indodana yayo, ngokuba yayisizokufa.
Ngakho-ke uJesu wathi enduneni: “Ngaphandle kokuba nina nibone izibonakaliso nezimangaliso, anisoze nakholwa.”
Induna yenkosi yathi kuye: “Nkosi, yehla engakafi umntanami.”
UJesu wathi kuyo: “Hamba, indodana yakho isiphilile.” Induna yakholwa yizwi uJesu alikhuluma kuyo, yahamba.
Kwathi isehla, izinceku zayo zayihlangabeza, zathi: “Umntanakho uphilile.”
Yazibuzisisa izinceku isikhathi aqale ngaso ukuba ngcono. Zathi-ke kuyo: “Umkhuhlane umyeke izolo ngehora lesikhombisa.”
Ngakho-ke wazi ukuthi yilelo hora uJesu asho ngalo kuye wathi: “Indodana yakho isiphilile.” Wakholwa nomndeni wakhe wonke.
Lesi yisibonakaliso sesibili uJesu asenza eGalile, esebuyile eJudiya.
Emva kwalokho kwaba khona umkhosi wabaJuda, uJesu wakhuphukela eJerusalema.
Kwakukhona-ke eJerusalema, ngaseSangweni Lezimvu, ichibi ngesiHebheru elibizwa ngokuthi iBhethzatha, linemipheme emihlanu.
Kwakulala kuyo izinkumbi zabagulayo: izimpumputhe, izinyonga, nabafe uhlangothi. Babelindele ukuzanyazanyiswa kwechibi.
Ingelosi kaNkulunkulu yayehla ngezikhathi ezithile, ifike izamazamise ichibi, bese kuthi lowo ongene kuqala emva kokuzanyazanyiswa kwalo, asinde esifweni esimphetheyo, noma ngabe sifo sini.
Kwakukhona lapho umuntu othile owayesegule iminyaka engama-38.
UJesu embona elele lapho, futhi azi ukuthi sekuyisikhathi eside egula, wathi kuye: “Uyathanda yini ukusinda na?”
Waphendula, wathi: “Nkosi, anginamuntu ongangifaka echibini lapho lizanyazanyiswa. Kuthi nje ngiseza kulo, ngidlulwe ngomunye, angene kuqala.”
UJesu wathi kuye: “Sukuma, uthathe uhlaka lwakho, uhambe.”
Umuntu wasinda ngaleso sikhathi, wayesethatha uhlaka lwakhe, wahamba.
Ngakho-ke abaJuda bathi kulowo muntu owayesephilisiwe: “Yisabatha namuhla, akuvumelekile ukuba uthwale uhlaka lwakho.”
Kepha waphendula, wathi: “Lowo ongiphilisileyo uthe kimi: ‘Thatha uhlaka lwakho uhambe.’ ”
Bambuza bathi: “Ngubani lo muntu othe kuwe: ‘Thatha uhlaka lwakho uhambe’ na?”
Kepha owayephilisiwe wayengazi ukuthi ungubani, ngokuba uJesu wayemonyukile, lokhu kwakukhona isixuku kuleyo ndawo.
Emva kwalokho uJesu wamfica lowo muntu ethempelini, wathi kuye: “Usuphilisiwe; ungabe usona, funa wehlelwe ngokubi kunalokhu.”
Lowo muntu wahamba wayobikela abaJuda ukuthi nguJesu omphilisileyo.
AbaJuda bamzingela uJesu ngenxa yalokho, ngokuba wayenze lokho ngesabatha.
UJesu wathi kubo: “UBaba uyasebenza kuze kube manje, nami-ke ngiyasebenza.”
Ngakho-ke ngenxa yalokhu, abaJuda babefuna kakhulu ukumbulala, ngokuba akephulanga nje isabatha, futhi wathi uNkulunkulu unguYise; ngaleyo ndlela ezenza olingana noNkulunkulu.
Ngakho-ke uJesu waphendula, wathi kubo: “Ngiqinisile, ngiqinisile ngithi kini: iNdodana ingenze lutho ngokwayo, ngaphandle kwalokho ekubona kwenziwa nguYise, ngokuba lokho akwenzayo Yena, neNdodana iyakwenza kanjalo.
Ngokuba uYise uyayithanda iNdodana, uyikhombisa konke akwenzayo. Uyakuyikhombisa ngisho imisebenzi emikhulu kunale, ukuba nimangale.
Njengalokhu uYise evusa abafileyo, abenze baphile, kanjalo neNdodana iyabaphilisa labo ethanda ukubaphilisa.
Ngokuba noYise akehluleli muntu, kodwa igunya lonke lokwehlulela ulinike iNdodana,
ukuze bonke bayihloniphe iNdodana njengalokhu behlonipha uYise. Ongayihloniphi iNdodana, kamhloniphi noYise oyithumileyo.
“Ngiqinisile, ngiqinisile ngithi kini: olizwayo izwi lami, akholwe ngongithumileyo, unokuphila okuphakade. Akayi ekwehlulelweni, kepha udlulisiwe ekufeni, wangena ekuphileni.
Ngiqinisile, ngiqinisile ngithi kini: isikhathi siyeza, sesifikile namanje, lapho abafileyo beyakulizwa iphimbo leNdodana kaNkulunkulu; abalizwayo bayakuphila.
Njengalokhu uYise enokuphila ngokwakhe, kanjalo neNdodana uyiphile ukuba ibe nokuphila ngokwayo.
Uyinikile igunya lokwehlulela, ngokuba iyiNdodana yomuntu.
“Ningamangali ngalokho, ngokuba isikhathi siyeza lapho bonke abasemathuneni beyakulizwa iphimbo layo,
abenze okulungileyo baphumele ekuvukeni kokuphila; kuthi abenze okubi ekuvukeni kokulahlwa.”
“Mina angenzi lutho ngokwami, ngehlulela njengokuba ngizwa, futhi ukwehlulela kwami kuqotho, ngokuba angifuni yona eyami intando, kodwa intando yongithumileyo.
“Uma ngizifakazela Mina, ubufakazi bami abusilo iqiniso.
Kepha kukhona omunye ofakaza ngami, futhi ngiyazi ukuthi ubufakazi abufakazile ngami buyiqiniso.
“Nina nathumela kuJohane, walifakazela iqiniso.
Kepha Mina angemukeli ubufakazi kumuntu; lokhu ngikusho ukuze nisindiswe.
UJohane wayeyisibani esivuthayo nesikhanyisayo. Nina-ke nakhetha ukuzijabulisa okwesikhashana ekukhanyeni kwakhe.
“Kepha nginobufakazi obedlula obukaJohane, ngokuba imisebenzi uBaba anginike yona ukuba ngiyifeze, le misebenzi engiyenzayo, iyafakaza ngami ukuthi nguBaba ongithumileyo;
naye uBaba ongithumileyo uyifakazile ngami. Nina anikaze nilizwe iphimbo lakhe noma nibone isiqu sakhe.
Nezwi lakhe alihlali kini, ngokuba animkholwa lowo amthumileyo.
Nihlola imibhalo ngokuba nicabanga ukuthi kuyo nizothola ukuphila okuphakade, kanti-ke yiyo efakaza ngami.
Kepha anifuni ukuza kimi ukuze nibe nokuphila.
“Mina angemukeli udumo kubantu,
kodwa ngiyanazi nina ukuthi aninalo uthando lukaNkulunkulu kini.
Ngize egameni likaBaba, kepha aningemukeli; kodwa uma kuza omunye ezizela egameni lakhe, lowo niyakumemukela.
Pho ningakholwa kanjani nisadumisana nodwa, ningalufuni udumo oluvela kuNkulunkulu okunguye yedwa na?
“Ningacabangi ukuthi ngiyonimangalela kuBaba, kukhona oyedwa onimangalelayo, nguMose lo enethembele kuye.
Ngokuba uma benikholwa nguMose, beniyakukholwa yiMina, ngokuba yena wabhala ngami.
Kodwa uma ningakholwanga yimibhalo yakhe, pho niyakukholwa kanjani ngamazwi ami na?”
Emva kwalokho uJesu wawelela ngaphesheya kolwandle iGalile, oluseThibheriya.
Isixuku esikhulu samlandela, ngokuba sasibone izibonakaliso ayezenza kulabo abagulayo.
UJesu wenyukela entabeni, wahlala lapho nabafundi bakhe.
UMkhosi wePhasika labaJuda wawususondele.
Kuthe lapho uJesu ephakamisa amehlo, wabona isixuku esikhulu siza kuye, wathi kuFiliphu: “Sizakuzithenga kuphi izinkwa ukuba laba badle na?”
Lokhu wayekusho emvivinya, ngokuba Yena wayekwazi ayezokwenza.
UFiliphu wamphendula, wathi: “Izinkwa zawodenariyu abangama-200 zingeke zanele ukuba kube yilowo nalowo athole okuncane.”
Omunye wabafundi bakhe, u-Andreya umfowabo kaSimoni Phethro, wathi kuJesu:
“Kukhona umfana lapha onezinkwa zebhali ezinhlanu nezinhlanzi ezimbili, kodwa kuyini lokhu kubantu abaningi kangaka na?”
UJesu wathi: “Bahlaliseni abantu.” Kwakunotshani obuningi kuleyo ndawo. Ahlala phansi-ke amadoda, ayebalelwa ezi-5 000.
Ngakho-ke uJesu wathatha izinkwa, wabonga, wayesezabela ababehleli lapho, wenza kanjalo futhi nangezinhlanzi, njengokuthanda kwabo.
Kuthe sebesuthi, wathi kubafundi bakhe: “Buthani imvuthuluka eseleyo, kungachitheki lutho.”
Bayibutha imvuthuluka yezinkwa ezinhlanu zebhali eyayisele ngenkathi abantu bedla, yagcwala iziqabetho ezili-12.
Kwathi abantu bebona isibonakaliso asenzileyo, bathi: “Impela, lo nguMphrofethi ozayo emhlabeni.”
Ngakho-ke uJesu azi ukuthi bazakuza, bambambe, ukuze bambeke abe yinkosi, wathi nyelele, futhi waya yedwa entabeni.
Kuthe sekuhwalala, abafundi bakhe behlela olwandle,
bagibela esikebheni, bawela ulwandle beya ngaphesheya eKhaphernawume. Kwase kuhlwile, kepha uJesu wayengakafiki kubo.
Kwasuka isivunguvungu esikhulu, kwadlanga amaza olwandle.
Kuthe sebegwedle ibanga elingaba ngamastadiyu angama-25 noma angama-30, bambona uJesu ehamba phezu kolwandle esondela esikebheni, besaba.
Kepha wathi kubo: “YiMina, ningesabi.”
Ngakho-ke bafuna ukumgibelisa esikebheni, kepha isikebhe safika masinyane ezweni ababeya kulo.
Ngakusasa isixuku esasisele ngaphesheya kolwandle sabona ukuthi asikho esinye isikebhe lapho, kukhona esisodwa kuphela, nokuthi uJesu wayengagibelanga esikebheni nabafundi bakhe, kodwa babehambe bodwa.
Kwafika ezinye izikebhe zivela eThibheriya zema eduze nendawo lapho babedle khona isinkwa emuva kokuba iNkosi isibongile.
Ngakho-ke lapho isixuku sibona ukuthi uJesu nabafundi bakhe abekho lapho, sangena ezikebheni, saya eKhapernawume siyofuna uJesu.
Sesimfumene ngaphesheya kolwandle, sathi kuye: “Rabi, ufike nini lapha na?”
UJesu wabaphendula, wathi: “Ngiqinisile, ngiqinisile ngithi kini: aningifuni ngokuba nabona izibonakaliso, kodwa ngokuba nadla izinkwa, nasutha.
Ningasebenzeli ukudla okuphelayo, kepha ukudla okuhlala kuze kube ngukuphila okuphakade, eyakunipha khona iNdodana yomuntu, ngokuba uYise uNkulunkulu ubekile uphawu lwakhe kuyo.”
Ngakho-ke bathi kuye: “Singenzani ukuba senze imisebenzi kaNkulunkulu na?”
UJesu waphendula, wathi kubo: “Umsebenzi kaNkulunkulu yilowo wokuba nikholwe nguye amthumileyo.”
Nokho-ke bathi kuye: “Pho sibonakaliso sini ozakusenza, ukuba sibone, ukuze sikholwe nguwe na? Uzokwenzani?
Okhokho bethu badla imana ehlane njengalokhu kulotshiwe ukuthi: ‘UNkulunkulu wabapha isinkwa esivela ezulwini ukuba badle.’ ”
Ngakho-ke uJesu wathi kubo: “Ngiqinisile, ngiqinisile ngithi kini: kwakungeyena uMose owanipha isinkwa esivela ezulwini, kodwa nguBaba onipha isinkwa soqobo esivela ezulwini.
Ngokuba isinkwa sikaNkulunkulu siyilowo owehla evela ezulwini, oliphayo izwe ukuphila.”
Ngakho bathi kuye: “Nkosi, siphe leso sinkwa njalo njalo.”
UJesu wathi kubo: “Mina ngiyisinkwa sokuphila. Ozayo kimi akasoze alamba, nalowo okholwa yimi akasoze oma.
Kepha nginitshelile ngathi: ningibonile, kodwa anikholwanga.
Konke uBaba angipha khona, kuyakuza kimi; lowo ozayo kimi, angisoze ngamlahla ngaphandle.
Ngokuba ngehle ezulwini, hhayi ukuzokwenza intando yami, kodwa intando yalowo ongithumileyo.
Manje yilena intando yongithumileyo, ukuba konke angiphe khona ngingalahlekelwa nangokukodwa kukho, kodwa ngikuvuse ngomhla wokuphela.
Ngokuba lokhu kuyintando kaBaba, ukuba yilowo nalowo obona iNdodana, akholwe yiyo, abe nokuphila okuphakade; Mina ngiyakumvusa ngomhla wokuphela.”
Ngalokho-ke abaJuda bakhononda ngoJesu, ngokuba ethe: “Ngiyisinkwa esehle ezulwini.”
Bathi: “Lo muntu akusiye uJesu, indodana kaJosefa, uyise nonina esibaziyo na? Pho kungani manje, ethi: ‘Ngehle ezulwini,’ na?”
UJesu waphendula, wathi kubo: “Ningakhonondi nodwa.
Akekho ongeza kimi, uma uBaba ongithumileyo engamdonseli kimi. Mina-ke ngiyakumvusa ngomhla wokuphela.
Kulotshiwe kubaphrofethi ukuthi: ‘Bonke bayakuba ngabafundiswe nguNkulunkulu.’ Yilowo nalowo omzwile uBaba, wafunda, uza kimi.
Lokho akusho ukuthi ukhona oseke wambona uBaba, ngaphandle kwalowo ovela kuNkulunkulu, nguYena ombonileyo uBaba.
“Ngiqinisile, ngiqinisile ngithi kini: okholwayo unokuphila okuphakade.
Mina ngiyisinkwa sokuphila.
Okhokho benu badla imana ehlane, bafa.
Lesi yisinkwa esehla ezulwini ukuze umuntu osidlayo angafi.
Mina ngiyisinkwa sokuphila esehla ezulwini. Uma umuntu edla lesi sinkwa, uyakuphila ingunaphakade. Phezu kwalokho, isinkwa engisinikelayo ngenxa yokuphila kwezwe, singumzimba wami.”
Base bephikisana bodwa abaJuda, bethi: “Lo muntu angasinika kanjani inyama yakhe, ukuba siyidle na?”
Khona uJesu wathi kubo: “Ngiqinisile, ngiqinisile ngithi kini: uma ningayidli inyama yeNdodana yomuntu, niphuze igazi layo, aninakuphila.
Lowo odla inyama yami, aphuze igazi lami, unokuphila okuphakade; ngiyakumvusa ngomhla wokuphela.
Ngokuba inyama yami ingukudla isibili, negazi lami liyisiphuzo isibili.
Odla inyama yami, aphuze igazi lami, uhlala kimi, nami kuye.
Njengokuba uBaba ophilayo ungithumile, nami ngiphila ngaye, kanjalo nalowo ongidlayo, naye uyakuphila ngami.
Lesi yisinkwa esehla ezulwini, asinjengaso esadliwa ngokhokho benu, bafa. Odla lesi sinkwa uyakuphila phakade.”
UJesu wakukhuluma lokhu efundisa esinagogeni, eKhaphernawume.
Lapho abaningi kubafundi bakhe bekuzwa lokho, bathi: “Leli lizwi lilukhuni, pho ngubani ongaliqonda na?”
Kepha uJesu, azi ukuthi abafundi bakhe bayakhononda ngalokho, wathi kubo: “Ngabe lokho kuyanicasula yini na?
Pho-ke niyakuthini lapho nibona iNdodana yomuntu yenyukela lapho yavela khona na?
NguMoya ongophilisayo, inyama ayisizi ngalutho. Amazwi engiwakhulume kini angumoya, futhi angukuphila.
Kepha bakhona abanye kini abangakholwayo.” UJesu wayazi kwasekuqaleni ukuthi ngobani abangakholwayo, nokuthi ngubani ozakumkhaphela.
Wayesethi: “Yingakho-ke ngithe kini: akekho ongeza kimi uma engakuphiwe lokho nguBaba.”
Kusukela lapho, abaningi kubafundi bakhe babuyela emuva, ababe besahamba naye.
Ngakho-ke uJesu wathi kwabayishumi nambili: “Nani senifuna ukungihlamuka yini na?”
USimoni Phethro wamphendula, wathi: “Nkosi, siyakuya kubani na? Amazwi okuphila okuphakade akuwe.
Thina siyakholwa, futhi siyazi ukuthi Wena ungoNgcwele kaNkulunkulu.”
UJesu wabaphendula, wathi: “Anginikhethanga yini nina enili-12 na? Kepha omunye wenu ungusathane.”
Wayekhuluma ngoJuda, indodana kaSimoni Iskariyothe, ongomunye wabali-12, ngokuba nguye owayezakumkhaphela.
Emva kwalokho uJesu wahlala eGalile, ngokuba wayengathandi ukuya eJudiya, lokhu abaJuda babefuna ukumbulala.
Wawususondele uMkhosi wabaJuda wamaDokodo.
Abafowabo bakaJesu, bathi kuye: “Suka lapha, uye eJudiya, ukuze nabafundi bakho babone imisebenzi yakho oyenzayo.
Ngokuba akukho muntu owenza utho ekusithekeni, ebe yena uqobo efuna ukwaziwa. Uma wenza lezi zinto, zibonakalise ezweni.”
Phela ngisho abafowabo imbala babengakholwa nguye.
Ngakho-ke uJesu wathi kubo: “Isikhathi sami asikafiki, kodwa esenu sihlale silungile njalo.
Izwe ngeke linizonde nina, kodwa Mina liyangizonda, ngokuba ngifakaza ngalo ukuthi imisebenzi yalo mibi.
Nina khuphukelani emkhosini. Mina angiyi kulo mkhosi, ngokuba isikhathi sami asikapheleli.”
Esekukhulumile lokho, wahlala eGalile.
Kepha lapho abafowabo sebenyukele emkhosini, naye-ke wenyuka, hhayi ngokusobala kodwa isinyenyela.
Khona abaJuda babemfuna emkhosini, bethi: “Kanti uphi lo muntu na?”
Kwakukhona ukuvungazela okukhulu ngaye ezixukwini, abanye bethi: “Ungumuntu olungileyo.” Abanye bethi: “Qha, ukhohlisa isixuku.”
Kepha akekho noyedwa owaphumela obala wakhuluma ngaye ngenxa yokwesaba abaJuda.
Kuthe sekuphakathi nomkhosi, uJesu wenyukela ethempelini, wafundisa.
Ngakho-ke abaJuda bamangala, bathi: “Lo muntu uyazi kanjani imibhalo engafundanga na?”
UJesu wabaphendula, wathi: “Imfundiso yami akusiyona eyami, kodwa ngeyongithumileyo.
Uma umuntu efuna ukwenza intando kaNkulunkulu, uyakwazi ngemfundiso, ukuthi ivela kuNkulunkulu noma ngizikhulumela okwami nje.
Ozikhulumela ngokwakhe ufuna udumo lwakhe, kodwa ofuna udumo lwalowo omthumileyo, lowo uqinisile, akukho ukungalungi kuye.
UMose akaninikanga yini uMthetho na? Nokho akekho kini ogcina uMthetho. Pho kungani nifuna ukungibulala na?”
Isixuku saphendula, sathi: “Unedimoni wena, ngubani ofuna ukukubulala na?”
UJesu waphendula, wathi kubo: “Ngenze umsebenzi owodwa nje, kodwa nonke niyamangala.
UMose uninike ukusoka, kungesikho ukuthi kuvela kuye kodwa kokhokho. Niyamsoka umuntu ngeSabatha.
Uma umuntu emukela ukusoka ngeSabatha ukuze kungeqiwa umthetho kaMose, pho kungani ningithukuthelele ngokuba ngisindise umuntu ngeSabatha na?
Ningehluleli ngokubuka ngamehlo, kodwa yehlulelani ngokwehlulela okulungileyo.”
Ngakho-ke abanye baseJerusalema bathi: “Lo muntu, akusiye yini abafuna ukumbulala na?
Nangu nje ukhuluma esidlangalaleni, kodwa abasho nolunci kuye. Ngabe mhlawumbe ababusi bayazi ngokweqiniso ukuthi lo muntu unguKhristu na?
Kepha lo, siyazi ukuthi uvela kuphi, kodwa mhla uKhristu efika, akukho namunye oyokwazi lapho evela khona.”
Ngakho-ke uJesu wamemeza efundisa ethempelini, wathi: “Niyangazi Mina, futhi niyazi nokuthi ngivela kuphi. Kepha angizizelanga Mina, kodwa lowo ongithumileyo, uqinisile, eningamaziyo nina.
Ngiyamazi Mina, ngokuba ngivela kuye, futhi nguye ongithumileyo.”
Ngakho-ke bafuna ukumbopha, kodwa akukho namunye owamubamba, ngokuba isikhathi sakhe sasingakafiki.
Kepha abaningi esixukwini bakholwa nguye, bathi: “Ngabe uKhristu nxa esefikile uyakwenza izimangaliso eziningi ezedlula azenzileyo lo na?”
AbaFarisi bezwa isixuku sivungazela ngaye ngalokho; abaphristi abakhulu nabaFarisi base bethumela izinceku ukuba zimbophe.
Ngakho-ke uJesu wathi: “Kusazokuba yisikhashana nginani, bese ngibuyela kulowo ongithumileyo.
Niyakungifuna ningangitholi, futhi nalapho ngikhona, ngeke nikwazi ukuza lapho.”
Ngakho-ke abaJuda babuzana bodwa, bathi: “Uzakuya kuphi lo muntu lapho singeke samthola khona na? Ngabe uzakuya kwabahlakazekele kumaGriki, ayofundisa amaGriki na?
Uchaza ukuthini uma ethi: ‘Niyakungifuna, ningangifumani, futhi nalapho ngikhona, anikwazi ukuza khona’ na?”
Kepha ngosuku lomkhosi lokugcina, uJesu wasukuma wamemeza, wathi: “Uma kukhona owomileyo, makeze kimi, aphuze.
Okholwa yimi, njengokusho kombhalo, esiswini sakhe kuyakugobhoza imifula yamanzi aphilayo.”
Wayekusho lokho ngoMoya abazakumamukela labo abakholwa nguye, ngokuba uMoya wayengakafiki, ngenxa yokuba uJesu wayengakakhazimuliswa.
Ngalokho-ke abanye esixukwini, bewezwa lawo mazwi, bathi: “Impela lo muntu unguMphrofethi.”
Abanye bathi: “Lo muntu unguKhristu.” Kepha abanye babethi: “Kanti uKhristu uvela eGalile yini na?
Awushongo yini umbhalo ukuthi uKhristu uvela olibeni lukaDavide naseBhethlehema, emzaneni ayehlala kuwo uDavide na?”
Ngakho-ke kwaba khona ukwehlukana ngaye esixukwini.
Abanye babo babefuna ukumbopha, kodwa akukho muntu owambambayo.
Izinceku zabuyela kubaphristi abakhulu nakubaFarisi, abazibuza, bathi: “Animlethanga ngani na?”
Izinceku zaphendula, zathi: “Akukho muntu osewake wakhuluma njengaloya muntu.”
AbaFarisi baziphendula, bathi kuzo: “Nani seniluthekile yini na?
Ukhona yini ezikhulwini noma kubaFarisi oke wakholwa nguye na?
Kepha lesi sixuku esingawazi umthetho siqalekisiwe.”
UNikhodimu, omunye wabaFarisi, owake waya kuJesu, wathi kubo:
“Konje umthetho wakithi uyamlahla yini umuntu ngecala ungakamuzwa eziphendulela kuqala, bese wazi-ke ukuthi wenzeni na?”
Baphendula, bathi kuye: “Kanti nawe ungowaseGalile yini na? Hlolisisa kahle umbhalo, ubone ukuthi akukho mphrofethi ovela eGalile.”
Base behamba, kwaba yilowo nalowo waya ekhaya.
Khona uJesu waya eNtabeni Yemihlwathi.
Entathakusa wabuyela ethempelini, bonke abantu beza kuye, wayesehlala phansi wabafundisa.
Izazimthetho nabaFarisi baletha kuye owesifazane owayebanjwe oqotsheni, ephinga. Bammisa phakathi kwabo,
bathi: “Mfundisi, lo wesifazane ubanjwe oqotsheni, ephinga.
Emthethweni, uMose wasiyala ngabanje ukuba bakhandwe ngamatshe. Ngakho-ke Wena uthini na?”
Babekusho lokhu bemlinga, ukuze babe notho lokummangalela. Kepha uJesu wakhothama, waloba ngomunwe emhlabathini.
Kuthe besambuza waphakama, wathi kubo: “Ongenasono phakathi kwenu makabe ngowokuqala ukumkhanda ngetshe.”
Waphinde wakhothama, waloba emhlabathini.
Bathi ukuzwa lokho, baphuma ngamunye ngamunye, kuqala kwabadala kwaze kwaba ngabokugcina. UJesu wasala yedwa nowesifazane emile khona lapho.
UJesu waphakama wathi kuye: “Sifazane, baphi labo abakumangaleleyo na? Akekho yini okulahla ngecala na?”
Waphendula, wathi: “Akukho noyedwa, Nkosi.” UJesu wathi kuye: “Nami angikulahli ngacala. Hamba, ungabe usona.”
Ngakho uJesu wabuye wakhuluma kubo, wathi: “Mina ngingukukhanya kwezwe. Ongilandelayo kasoze ahamba ebumnyameni, kodwa uyakuba nokukhanya kokuphila.”
Ngakho-ke abaFarisi bathi kuye: “Uyazifakazela Wena; ubufakazi bakho abusilo iqiniso.”
UJesu waphendula, wathi kubo: “Ngisho noma ngizifakazela Mina, ubufakazi bami buyiqiniso, ngokuba ngiyazi ukuthi ngivelaphi nokuthi ngiyaphi. Nina anazi ukuthi ngivelaphi nokuthi ngiyaphi.
Nina nahlulela ngokwenyama, kodwa Mina angehluleli muntu.
Noma ngehlulela, ukwehlulela kwami kungokweqiniso, ngokuba angingedwa, kodwa yiMina nongithumileyo.
Kanjalo nasemthethweni wakini kulotshiwe ukuthi ubufakazi babantu ababili buyiqiniso.
Mina ngiyazifakazela, noBaba ongithumileyo ufazaka ngami.”
Base bethi kuye: “Uphi uyihlo na?” UJesu waphendula, wathi: “Aningazi Mina kanjalo noBaba; ukuba beningazi Mina, beniyakumazi noBaba.”
Lawo mazwi wawakhuluma ngasemphongolweni weminikelo, efundisa ethempelini kodwa akukho muntu owambophayo, ngokuba isikhathi sakhe sasingakafiki.
Ngakho-ke wabuye wathi kubo: “Ngiyamuka Mina, niyakungifuna, kodwa niyakufela ezonweni zenu. Lapho ngiya khona Mina, anikwazi nina ukuza khona.”
AbaJuda base bethi: “Ngabe uzakuzibulala yini nempela na? Ngokuba uthi: ‘Lapho ngiya khona Mina, anikwazi nina ukuza khona’ na?”
UJesu wathi kubo: “Nina ningabalapha ezweni, kodwa Mina ngingowaphezulu. Nina ningabaleli lizwe, kodwa Mina angisiye owaleli lizwe.
Ngakho-ke ngithe kini niyakufela ezonweni zenu, ngokuba uma ningakholwa ukuthi Mina Nginguye, niyakufela ezonweni zenu.”
Base bethi kuye: “Kanti Wena ungubani na?” UJesu waphendula, wathi kubo: “Ngiyilowo ebenginitshela ngaye kusukela kwasekuqaleni.
Nginokuningi engingakusho ngani nenginganehlulela ngakho, kodwa ongithumileyo uqinisile, nami lokho engikuzwa kuye, ngikukhuluma ezweni.”
Babengazi ukuthi ukhuluma kubo ngoYise.
Ngakho-ke wathi kubo: “Uma seniyiphakamisile iNdodana yomuntu, kulapho-ke niyakukwazi ukuthi nginguye, nokuthi angenzi lutho ngokwami, kodwa ngikhuluma lokhu engikufundiswe nguBaba.
Ongithumileyo unami, kangishiyanga ngingedwa, ngokuba ngenza njalo okuthandekayo kuye.”
Esakhuluma lokho, abaningi bakholwa kuye.
Ngakho-ke uJesu wakhuluma kubaJuda abase bekholwa kuye, wathi: “Uma nimi esifundisweni sami, ningabafundi bami uqobo,
niyakulazi iqiniso, neqiniso liyakunikhulula.”
Bamphendula, bathi: “Thina singabolibo luka-Abhrahama, asikaze sibe yizigqila zamuntu. Usho kanjani ukuthi: ‘Nizakuba ngabakhululekileyo’ na?”
UJesu wabaphendula, wathi: “Ngiqinisile, ngiqinisile ngithi kini: yilowo nalowo owenza isono, uyisigqila sesono.
Isigqila asihlali nomndeni unomphela, kodwa indodana ehlala phakade.
Ngakho-ke uma iNdodana inikhulula, niyakuba ngabakhululekileyo impela.
Ngiyazi ukuthi ningabolibo luka-Abhrahama, kodwa nifuna ukungibulala, ngokuba izwi lami alinandawo kini.
Ngikhuluma lokho engikubonileyo kuBaba; nani-ke nenza lokho enikuzwileyo kuyihlo.”
Baphendula, bathi kuye: “Ubaba wethu ngu-Abhrahama.” UJesu wathi kubo: “Uma beningabantwana baka-Abhrahama beniyakukwenza imisebenzi ka-Abhrahama.
Kepha manje nifuna ukungibulala, Mina muntu onitshele iqiniso, engilizwe kuNkulunkulu. U-Abhrahama akakwenzanga lokho.
Nina nenza imisebenzi kayihlo.” Bathi kuye: “Thina asisibo abantwana bokuphingwa; sinoBaba munye, uNkulunkulu.”
UJesu wathi kubo: “Uma uNkulunkulu ubenguYihlo, beniyakungithanda Mina, ngokuba ngivela kuNkulunkulu. Angizizelanga ngokwami, kodwa nguye ongithumileyo.
Kwenziwa yini ukuba ningayizwisisi inkulumo yami na? Yingokuba anifuni ukuzwa izwi lami.
Nina-ke ningabakayihlo usathane, nithanda ukufeza izifiso zakhe. Yena wayengumbulali kwasekuqaleni, akami eqinisweni, ngokuba iqiniso alikho kuye. Uma ekhuluma amanga, usuke ekhuluma into yakhe, ngokuba ungumqambimanga noyise wamanga.
Kepha ngenxa yokuba ngikhuluma iqiniso, aningikholwa.
Ngubani-ke kini ongadalula isono engisenzileyo na? Uma ngikhuluma iqiniso, pho aningikholwa ngani na?
Ovela kuNkulunkulu uyawezwa amazwi kaNkulunkulu, ngakho-ke nina aniwezwa, ngokuba anisibo abakaNkulunkulu.”
AbaJuda baphendula, bathi kuye: “Asikhulumi lona yini iqiniso uma sithi ungumSamariya futhi unedimoni na?”
UJesu waphendula, wathi: “Anginadimoni, kodwa ngihlonipha uBaba, nina-ke niyangijivaza.
Kepha angizifuneli udumo lwami, kodwa ukhona ofunayo nowahlulelayo.
Ngiqinisile, ngiqinisile ngithi kini: uma umuntu egcina izwi lami, akasoze akubona ukufa nanini.”
AbaJuda bathi kuye: “Manje sesiyazi ukuthi unedimoni. U-Abhrahama wafa, nabaphrofethi bafa, kepha wena-ke uthi: ‘Uma umuntu egcina izwi lami, akasoze akuzwa ukufa nanini.’
Ngabe wena umkhulu yini kunobaba u-Abhrahama owafa na? Nabaphrofethi bafa. Pho wena uzenza bani na?”
UJesu waphendula, wathi: “Uma ngizidumisa Mina, udumo lwami luyize. NguBaba onginika udumo, lo enikhuluma ngaye nithi unguNkulunkulu wenu.
Animazi, kodwa Mina ngiyamazi. Uma ngingathi angimazi, ngingaba ngumqambimanga njengani. Kepha ngiyamazi, ngigcina izwi lakhe.
U-Abhrahama, uyihlo, wathokoza ukuthi uzobona usuku lwami, walubona, wajabula.”
AbaJuda bathi kuye: “Awukahlanganisi ngisho iminyaka engama-50, kanti sewake wambona yini u-Abhrahama na?”
UJesu wathi kubo: “Ngiqinisile, ngiqinisile ngithi kini: engakabi bikho u-Abhrahama, ngangikhona Mina.”
Base becosha amatshe ukuze bamkhande ngawo, kodwa uJesu wafihlakala kubo, waphuma ethempelini.
Kuthe uJesu edlula, wabona indoda eyayiyimpumputhe kwasekuzalweni.
Abafundi bakhe bambuza, bathi: “Rabi, ngubani owonayo; yilo noma ngabazali bakhe, ukuze azalwe eyimpumputhe na?”
UJesu waphendula, wathi: “Akonanga yena noma abazali bakhe, kodwa ukuze kubonakaliswe imisebenzi kaNkulunkulu kuye.
Kufanele senze imisebenzi yongithumileyo kusesemini; buyeza ubusuku lapho kungekho ongasebenza khona.
Ngisekhona ezweni, ngingukukhanya kwezwe.”
Esekushilo lokho wafela amathe emhlabathini, wenza ngawo udaka, wayeseninda amehlo ayo ngalo,
wathi kuyo: “Hamba uyogeza echibini laseSilowama,” igama elihunyushwa kuthiwe, oThunyiweyo. Yahamba-ke, yageza, yabuya isibona.
Ngakho-ke omakhelwane nalabo ababeyibone phambilini inqiba, babuzana bodwa, bathi: “Le ndoda akusiyo yini ebihlala inqiba na?”
Abanye bathi: “Yiyona,” abanye bathi: “Qha, kodwa ifana nayo.” Indoda yathi: “Yimina.”
Base bethi kuyo: “Pho amehlo akho avulwe kanjani na?”
Yaphendula yathi: “Umuntu okuthiwa nguJesu wenza udaka, waninda amehlo ami, wayesethi kimi: ‘Hamba uye eSilowama, uyogeza.’ Ngahamba-ke, ngageza, ngase ngiyabona.”
Bathi kuyo: “Uphi pho na?” Yathi: “Angazi.”
Base bemyisa kubaFarisi obekade eyimpumputhe.
KwakuyiSabatha mhla uJesu enza udaka, evula amehlo ayo.
AbaFarisi nabo bambuza futhi ukuthi kwenzeke kanjani ukuba abone. Wathi kubo: “Uninde amehlo ami ngodaka, ngageza, ngase ngiyabona.”
Ngakho-ke abanye kubaFarisi bathi: “Lo muntu akaveli kuNkulunkulu, ngokuba akawuhloniphi umthetho wesabatha.” Abanye bathi: “Umuntu oyisoni angazenza kanjani izibonakaliso ezinje na?” Kwaba khona ukwehlukana phakathi kwabo.
Ngalokho-ke baphinde bathi kobeyimpumputhe: “Wena uthini ngaye, njengoba evule amehlo akho na?” Yathi: “Ungumphrofethi.”
Kepha abaJuda abakholwanga ukuthi ubeyimpumputhe nokuthi useyabona, baze babiza abazali balowo osebona.
Bababuza bathi: “Ngabe lo uyindodana yenu enithi ngayo yazalwa ingaboni na? Pho kukanjani ukuba manje ibone na?”
Abazali bayo baphendula bathi: “Siyazi ukuthi lo muntu uyindodana yethu nokuthi wazalwa eyimpumputhe.
Kepha ukuthi usebona kanjani manje nokuthi ngubani ovule amehlo akhe, asazi; buzani yena; usekhulile, uzakuziphendulela yena.”
Abazali bayo basho lokho, ngokuba babesaba abaJuda, lokhu abaJuda base bevumelene ngokuthi, uma kukhona ovuma ukuthi unguKhristu, uzakunqunywa esinagogeni.
Ngakho-ke abazali bayo bathi: “Isikhulile, buzani yona.”
Bayibiza ngokwesibili le ndoda ebiyimpumputhe, bathi kuyo: “Mnike uNkulunkulu udumo; thina siyazi ukuthi lo muntu uyisoni.”
Khona indoda yaphendula, yathi: “Ukuthi uyisoni noma qha, angazi; kunye engikwaziyo, ukuthi bengiyimpumputhe, manje sengiyabona.”
Ngakho bathi kuyo: “Wenzeni kuwe na? Uwavule kanjani amehlo akho na?”
Yaphendula, yathi: “Senginitshelile, kodwa anilalelanga. Nifunelani ukuzwa futhi na? Ngabe nani senifuna ukuba ngabafundi bakhe na?”
Bamthuka, bathi: “Nguwe ongumfundi walowo muntu, kodwa thina singabafundi bakaMose.
Siyazi ukuthi uNkulunkulu wakhuluma kuMose, kepha asimazi lo muntu ukuthi uvela kuphi.”
Indoda yaphendula, yathi kubo: “Lokhu kuyamangalisa ukuthi nina anazi ukuthi uvela kuphi, kepha uvule amehlo ami.
Siyazi ukuthi uNkulunkulu akazilaleli izoni, kodwa uma umuntu emesaba uNkulunkulu, enza intando yakhe, uyamlalela lowo.
Selokhu kwathi nhlo, akukaze kuzwakale ukuthi ukhona owake wavula amehlo omuntu ozelwe eyimpumputhe.
Uma lo muntu ebengaveli kuNkulunkulu, ubengenakwenza lutho.”
Baphendula, bathi kuyo: “Wena wazalelwa esonweni ngokupheleleyo, wena usufundisa thina na?” Base beyikhiphela ngaphandle kwesinagoge.
UJesu wezwa ukuthi bayikhiphele ngaphandle. Kuthe lapho eyifumana, wathi: “Uyakholwa yini yiNdodana yomuntu na?”
Yamphendula, yathi: “Ingubani, Nkosi, ukuze nami ngikholwe yiyo na?”
UJesu wathi kuyo: “Usuyibonile, yiyona le ekhuluma nawe.”
Yayisithi: “Nkosi, ngiyakholwa.” Yakhuleka kuye.
UJesu wathi: “Mina ngize lapha emhlabeni ukuzokwahlulela ukuba abangaboniyo babone, kuthi nababonayo babe yizimpumputhe.”
Abanye babaFarisi ababekhona lapho bakuzwa lokho, base bethi kuye: “Pho nathi siyizimpumputhe yini na?”
UJesu wathi kubo: “Uma beniyizimpumputhe, ngabe aninasono. Kepha lokhu nithi: ‘Siyabona;’ isono senu sikinina.”
UJesu wathi: “Ngiqinisile, ngiqinisile ngithi kini: ongangeni ngesango esibayeni sezimvu, kodwa oweqa uthango, afohle, uyisela nomphangi.
Kepha ongena ngesango, ungumelusi wezimvu.
Umlindisango uyamvulela lowo, nezimvu ziyalizwa iphimbo lakhe; ezakhe izimvu uzibiza ngamagama, bese eziholela ngaphandle.
Uma esezikhiphile zonke ezakhe, uhamba phambi kwazo, izimvu zimlandele, ngokuba ziyalazi iphimbo lakhe.
Kepha azisoze zamlandela umfokazi, kodwa ziyakumbalekela, ngokuba azilazi iphimbo labafokazi.”
UJesu wabalandisa lowo mzekeliso, kodwa abaqondanga ukuthi wayekhuluma ngani kubo.
Ngalokho-ke uJesu wabuye wathi: “Ngiqinisile, ngiqinisile ngithi kini: Mina ngiyisango lezimvu.
Bonke abafika ngaphambi kwami babengamasela nabaphangi; izimvu azibalalelanga.
Mina ngiyisango; uma umuntu engena ngami, uyakusindiswa, angene, aphume, aklabe edlelweni.
Isela kalizi kungengokweba, ukubulala nokubhubhisa. Mina ngize lapha ukuba babe nokuphila, babe nakho kuchichime.
“Mina ngingumelusi omuhle. Umelusi omuhle udela ukuphila kwakhe ngenxa yezimvu.
Oqashiweyo engesiye umelusi, nezimvu zingesizo ezakhe, uma ebona inkentshane liza, uyazishiya izimvu, athi galo yephuka, bese inkentshane lizibhozomela, lizihlakaze,
ngokuba ungoqashiweyo, akanandaba nezimvu.
“Mina ngingumelusi omuhle. Ngiyazazi ezami, nezami ziyangazi,
njengalokhu uBaba engazi, nami ngiyamazi uBaba, ngidela ukuphila kwami ngenxa yezimvu.
Nginezinye izimvu ezingesizo ezalesi sibaya; nalezo kufanele ngiziqoqe, ziyakulizwa iphimbo lami, bese ziba mhlambi munye nomelusi munye.
Ngakho-ke uBaba uyangithanda, ngokuba ngidela ukuphila kwami ukuba ngibuye ngikuthathe futhi.
Akekho ongangephuca ukuphila kwami, kodwa ngikudela ngokwami. Nginegunya lokukudela, negunya lokubuye ngikuthathe. Lo myalo ngiwamukele uvela kuBaba.”
Kwaba khona futhi ukwehlukana phakathi kwabaJuda ngenxa yalawa mazwi.
Iningi labo lathi: “Unedimoni, uyahlanya. Kungani nje nimlalela na?”
Abanye bathi: “Lawa mazwi awaphumi kumuntu onedimoni. Kanti idimoni lingawavula yini amehlo empumputhe na?”
Kwase kuba khona uMkhosi Wokuhlanjululwa kwethempeli eJerusalema, kusebusika.
UJesu wayehamba ethempelini, emphemeni kaSolomoni.
Base bemngunga abaJuda, bathi kuye: “Kuyakuze kube nini silokhu sidukuza oswini na? Uma unguKhristu, sitshele ngokusobala.”
UJesu wabaphendula wathi: “Nganitshela, kodwa anikholwanga. Imisebenzi engiyenzayo egameni likaBaba, yiyona efakaza ngami,
kodwa nina anikholwa, ngokuba anisizo izimvu zami.
Izimvu zami ziyalizwa iphimbo lami; ngiyazazi, ziyangilandela.
Ngizinika ukuphila okuphakade, azisoze zabhubha nanini, futhi akekho ongazihlwitha esandleni sami.
UBaba onginike zona mkhulu kunabo bonke; akakho ongazihlwitha esandleni sikaBaba.
Mina noBaba simunye.”
AbaJuda bacosha amatshe futhi, ukuze bamkhande ngawo.
UJesu wathi kubo: “Nginikhombisile imisebenzi eminingi emihle evela kuBaba; yiwona muphi eningikhandela wona ngamatshe na?”
AbaJuda bamphendula, bathi: “Asikukhandi ngamatshe ngenxa yomsebenzi omuhle, kodwa ngenxa yokuhlambalaza, ngokuba wena ungumuntu, uzenza uNkulunkulu.”
UJesu wabaphendula, wathi: “Akulotshiwe yini emthethweni wenu ukuthi: ‘Ngithe: nina ningonkulunkulu’ na?
Uma athi bangonkulunkulu, labo izwi lakhe elafika kubo, nombhalo ungechithwe,
pho ningakhuluma kanjani ngalowo amehlukanisa wamthumela emhlabeni, ukuthi uyahlambalaza, ngokuba ngithe: ‘NgiyiNdodana kaNkulunkulu’ na?
Uma ngingenzi imisebenzi kaBaba, maningakholwa yimi.
Kepha uma ngiyenza, nakuba ningakholwa yimi, kholwani-ke yimisebenzi, ukuze nazi futhi niqonde ukuthi uBaba ukimi, nami ngikuye.”
Ngakho-ke bafuna ukumbamba, kodwa waphunyuka ezandleni zabo.
Wahamba futhi, waya phesheya kweJordani lapho uJohane aqala khona ukubhabhadisa, wahlala khona.
Abaningi beza kuye, bathi: “Impela uJohane akenzanga nasinye isibonakaliso, kodwa-ke konke uJohane akukhuluma ngalo muntu kuyiqiniso.”
Abaningi bakholwa nguye lapho.
Kwakukhona othile owayegula, onguLazaru waseBhethaniya, isigodi okwakuhlala kuso uMariya nodadewabo uMartha.
UMariya owayegulelwa nguLazaru umnewabo, nguye lowo owagcoba ngamafutha iNkosi uJesu, wesula izinyawo zayo ngezinwele zakhe.
Ngakho-ke odadewabo bathumela kuJesu, bathi: “Nkosi, bheka, umngani wakho omkhonzile uyagula.”
UJesu ekuzwa lokho, wathi: “Lokhu kugula akukhona okokufa, kodwa ukuze kudunyiswe uNkulunkulu, neNdodana kaNkulunkulu idunyiswe ngakho.”
UJesu wayebathanda oMartha nodadewabo noLazaru.
Ngakho-ke lapho esezwa ukuthi uLazaru uyagula, wahlala izinsuku ezimbili kuleyo ndawo ayekuyo.
Emva kwalokho wathi kubafundi bakhe: “Masihambe, siphindele eJudiya.”
Abafundi bathi kuye: “Rabi, akukapholi maseko abaJuda befuna ukukukhanda ngamatshe, usuya khona futhi na?”
UJesu waphendula, wathi: “Imini ayinawo yini amahora ali-12 na? Uma umuntu ehamba emini akakhubeki, ngokuba ubona ukukhanya kwaleli lizwe.
Kepha uma ehamba ebusuku uyakhubeka, ngokuba kungekho ukukhanya kuye.”
Wakukhuluma lokho, qede wathi kubo: “ULazaru, umngani wethu ulele, kodwa ngiyahamba ukuze ngimvuse ebuthongweni.”
Ngakho-ke abafundi bakhe bathi kuye: “Nkosi, uma elele, uzosinda.”
Kepha uJesu wayekhuluma ngokufa kwakhe, kodwa bona babethi ukhuluma ngokulala ubuthongo.
Ngakho-ke uJesu wabatshela ngokucacileyo wathi kubo: “ULazaru ufile.
Kepha ngiyathokoza ngenxa yenu ngokuthi bengingekho lapho, ukuze nikholwe, kodwa masihambe siye kuye.”
Khona uThomase okuthiwa nguDidimu, wathi kwabanye abafundi ababenaye: “Masihambe nathi, ukuze sife kanye naye!”
Esefikile uJesu, wafumana ukuthi usenezinsuku ezine uLazaru esethuneni.
IBhethaniya laliseduze neJerusalema, kungamastadiyu ali-15.
Iningi labaJuda lalifikile ukuzoduduza uMartha noMariya ngomnewabo.
UMartha ezwa ukuthi uJesu uyeza, wamhlangabeza, kodwa uMariya wayehleli endlini.
UMartha wathi kuJesu: “Nkosi, ukuba ubukhona, umfowethu ngabe akafanga.
Kepha namanje, ngiyazi ukuthi noma yini ongayicela kuNkulunkulu, uzakukunika yona.”
UJesu wathi: “Umfowenu uzakuvuka.”
UMartha wathi kuye: “Ngiyazi ukuthi uyakuvuka ekuvukeni ngomhla wokuphela.”
UJesu wathi kuye: “Mina ngingukuvuka nokuphila; okholwa yimi noma efa uyakuphila,
nalowo ophilayo, akholwe yimi, akasoze afa nanini. Uyakukholwa yilokho na?”
Waphendula, wathi: “Yebo Nkosi, ngiyakholwa ukuthi Wena unguKhristu, iNdodana kaNkulunkulu, obezakuza emhlabeni.”
Esekushilo lokho uMartha, wahamba wayobiza uMariya, udadewabo ngasese, wathi: “UMfundisi ukhona, futhi uyakubiza.”
Lapho ekuzwa lokho, uMariya wathi lacu masinyane, waya kuye.
Kepha uJesu wayengakafiki emzini; wayesekuleyo ndawo uMartha ayemhlangabeze kuyo.
Ngakho-ke abaJuda ababenaye endlini bemduduza, kuthe bebona uMariya esukuma ngokushesha ephuma, bamlandela, ngoba babecabanga ukuthi uya ethuneni ukuba ayokhala khona.
Ngakho uMariya esefikile lapho uJesu ayekhona, wathi ukuba ambone wazilahla ngasezinyaweni zakhe, wathi: “Nkosi, ukuba ubukhona, umfowethu ngabe akafanga.”
Ngakho-ke uJesu embona ekhala, nabaJuda ababefike naye bekhala, wathinteka kakhulu emoyeni, wakhathazeka,
wayesethi: “Nimngcwabe kuphi na?” Bathi kuye: “Nkosi, woza uzobona.”
UJesu wakhala izinyembezi.
Ngakho-ke abaJuda bathi: “Bheka, indlela abemkhonze ngayo.”
Kepha abanye kubo bathi: “Lo akavulanga yini amehlo empumputhe, pho ubengekwenze ngani ukuba le ndoda ingafi na?”
Ngakho-ke uJesu wathinteka kakhulu emoyeni, waya ethuneni. Ithuna lalingumhume, kubekwe itshe, livundle kuwo.
UJesu wathi: “Susani itshe.” UMartha, udadewabo kamufi, wathi kuye: “Nkosi, useyanuka, ngokuba sekulusuku lwesine lolu.”
UJesu wathi kuye: “Angikutshelanga yini ukuthi uma ukholwa, uzakubona inkazimulo kaNkulunkulu na?”
Balisusa-ke itshe. UJesu waphakamisa amehlo akhe, wathi: “Baba, ngiyakubonga, ngokuba ungizwile.
Bengazi Mina ukuthi uhlala ungizwa, kodwa ngenxa yesixuku esingiphahlileyo ngikushilo lokho, ukuze sikholwe wukuthi nguwe ongithumileyo.”
Esekushilo lokho, wamemeza ngezwi elikhulu, wathi: “Lazaru, phuma.”
Waphuma obefile eboshwe ngezindwangu ezinyaweni nasezandleni, ubuso bakhe bumbozwe ngesiqephu sendwangu. UJesu wathi kubo: “Mthukululeni, nimyeke ahambe.”
Ngakho abaJuda abaningi ababeze kuMariya bebona akwenzileyo, bakholwa kuye.
Kepha abanye babo baya kubaFarisi, babatshela ngalokho uJesu akwenzileyo.
Ngakho-ke abaphristi abakhulu nabaFarisi babiza umkhandlu, bathi: “Sizokwenzenjani ngokuba lo muntu wenza izibonakaliso eziningi na?
Uma simyeka, bonke bazakukholwa kuye, bese kufika amaRoma asithumbe, athathe nethempeli lethu nesizwe sakithi.”
Kepha omunye wabo, uKhayifase, owayengumphristi omkhulu ngalowo nyaka, wathi kubo: “Anazi lutho nina,
futhi aniboni ukuthi kungcono kini ukuba umuntu oyedwa afele abantu, ukuze isizwe sonke singabhubhi.”
Lokho ayekukhuluma kwakungaveli kuye, kodwa ngenxa yokuba wayengumphristi omkhulu ngalowo nyaka, wayephrofetha ngokufa uJesu azakufa ngakho, efela isizwe;
kungesona isizwe nje kuphela, kodwa ukuba aqoqele ndawonye abantwana bakaNkulunkulu abahlakazekileyo, babe munye.
Ngakho kusukela kulolo suku, bakha uzungu lokumbulala.
Ngakho-ke uJesu akabange esahamba obala phakathi kwabaJuda, kodwa wasuka lapho waya ezweni eliseduze nogwadule, emzini okuthiwa yi-Efrayimi. Wahlala lapho nabafundi bakhe.
Lase liseduze iPhasika labaJuda, abaningi ababevela emaphandleni bakhuphukela eJerusalema kungakabi yiPhasika ukuze bazihlambulule.
Ngakho-ke bamfuna uJesu, futhi bekhuluma omunye nomunye bemi ethempelini, bethi: “Nithini na? Akezi ngempela yini emkhosini na?”
Abaphristi abakhulu nabaFarisi babekhiphe umyalo wokuthi uma kukhona owaziyo ukuthi ukuphi, ababikele, ukuze bambambe.
Sekusele izinsuku eziyisithupha kube yiPhasika, uJesu waya eBhethaniya lapho kwakuhlala khona uLazaru ayemvuse kwabafileyo.
Bamenzela ukudla lapho. UMartha waphaka. ULazaru wayengomunye wababehlezi esidlweni.
UMariya wayesethatha ingxenye yamafutha enadi, enani eliphezulu, wagcoba izinyawo zikaJesu, wazesula ngezinwele zakhe. Iphunga elimnandi lamakha lagcwalisa indlu.
Kepha uJuda Iskariyothe, omunye wabafundi bakhe owayezakumkhaphela, wathi:
“Kungani lawa mafutha engathengiswanga ngawodenariyu abangama-300, kwabelwe abampofu na?”
Lokho wakusho, hhayi ngokuba ekhathalela abampofu, kodwa ngokuba eyisela futhi ephatha isikhwama semali, ayebuye ebe okufakwa kuso.
Ngakho uJesu wathi: “Myeke, ukuze awalondolozele usuku lokungcwatshwa kwami.
Ngokuba abampofu ninabo njalo, kodwa Mina aniyukuba nami njalo.”
Isixuku esikhulu sabaJuda sezwa ukuthi uJesu ulapho. Saya khona, hhayi ngokuba siyakubona uJesu kuphela, kodwa nokuba sibone noLazaru ayemvuse kwabafileyo.
Kepha abaphristi abakhulu benza uzungu lokuba babulale noLazaru,
ngokuba ngenxa yakhe, abaningi babaJuda base behlubukile bakholwa kuJesu.
Ngakusasa abantu abaningi abebeze emkhosini, sebezwile ukuthi uJesu uyeza eJerusalema,
bathatha amagatsha esundu, baphuma bayomhlangabeza. Bamemeza bathi: “Hosana! Ubusisiwe ozayo egameni leNkosi. Yebo, iNkosi yakwa-Israyeli!”
UJesu esefumene ithole lembongolo, wagibela kulo, njengalokhu kulotshiwe ukuthi:
“Ungesabi, ndodakazi yaseZiyoni; inkosi yakho iyeza, igibele ithole lembongolo.”
Abafundi bakhe abakuqondanga lokhu ekuqaleni, kodwa lapho uJesu esekhazimulisiwe, bakhumbula ukuthi kulotshiwe lokho ngaye, nokuthi lokho babekwenzile kuye.
Ngakho-ke isixuku esasinaye ngesikhathi ebiza uLazaru ukuba aphume ethuneni, emvusa kwabafileyo, safakaza.
Yingakho-ke isixuku sahamba samhlangabeza, ngokuba sasizwile ukuthi wenze leso sibonakaliso.
Ngakho-ke abaFarisi bakhuluma bodwa, bathi: “Niyabona, akukho lutho esingalwenza; izwe lonke liyamlandela.”
Kwakukhona amaGriki athile kulabo abakhuphukele emkhosini ukuba bayokhonza.
Laba-ke baya kuFiliphu, waseBhethsayida eGalile, bamcela, bathi: “Mnumzane, sicela ukubona uJesu.”
UFiliphu waya wabikela u-Andreya, base behamba bobili beyobikela uJesu.
UJesu wabaphendula, wathi: “Sesifikile isikhathi sokuba iNdodana yomuntu ikhazimuliswe.
Ngiqinisile, ngiqinisile ngithi kini: uma uhlamvu lukakolo luwela emhlabathini, lungafi, luhlala lodwa, kodwa uma lufa, luthela izithelo eziningi.
Lowo othanda ukuphila kwakhe, ulahlekelwa yikho; nozonda ukuphila kwakhe kulo mhlaba, uyakukulondela ukuphila okuphakade.
Uma umuntu efuna ukungikhonza, makangilandele; lapho ngikhona Mina, siyakuba khona lapho nesikhonzi sami. Uma umuntu engikhonza, uBaba uyakumazisa.
“Manje umphefumulo wami ulusizi, ngizakuthini na? Ngithi Baba, ngisindise kulo mzuzu na? Kepha kungenxa yalokhu ngifinyelele kulo mzuzu.
Baba, khazimulisa igama lakho.” Kwase kufika izwi livela ezulwini, lithi: “Ngilikhazimulisile, futhi ngizobuye ngilikhazimulise.”
Ngakho-ke abantu ababemile bezwa, bathi: “Beliduma;” abanye bathi: “Ingelosi ikhulume kuye.”
UJesu waphendula, wathi: “Leli zwi alifikanga ngenxa yami, kodwa ngenxa yenu.
Manje sekungukwehlulelwa kwalo mhlaba. Manje-ke umbusi walo mhlaba uzakuxoshwa.
Mina-ke, uma sengiphakanyisiwe emhlabeni, ngiyakudonsela kimi bonke abantu.”
Wakusho lokhu ekhombisa indlela azakufa ngayo.
Ngakho isixuku samphendula, sathi: “Sizwile emthethweni ukuthi uKhristu uyakuphila phakade. Pho usho kanjani ukuthi iNdodana yomuntu ifanelwe ukuphakanyiswa na? Ingubani le Ndodana yomuntu na?”
UJesu wayesethi kubo: “Kuseyisikhashana ukukhanya kukhona phakathi kwenu. Hambani nisenokukhanya, ukuze ningaficwa ngubumnyama. Ohamba ebumnyameni, akazi ukuthi uya kuphi.
Nisenokukhanya, kholwani ngukukhanya, ukuze nibe ngabantu bokukhanya.” UJesu washo lokhu wamuka kubo, wafihleka kubo.
Nakuba ayezenzile izibonakaliso eziningi, bezibonela ngawabo, kodwa abakholwanga kuye,
ukuze kugcwaliseke izwi lika-Isaya, umphrofethi, elithi: “Nkosi, ngubani owakholwa ngumbiko wethu na? Ingalo yeNkosi yambulelwa bani na?”
Ngalokho-ke kabakwazanga ukukholwa, njengokuba u-Izaya washo futhi, wathi:
“Uphuphuthekisile amehlo abo, wayenza lukhuni inhliziyo yabo, ukuze bangaboni ngamehlo abo, bangaqondi ngenhliziyo yabo, funa baphenduke, ngibaphilise.”
U-Isaya wakusho lokho ngokuba ebona inkazimulo yeNkosi, futhi wakhuluma ngayo.
Nokho-ke nakuba kunjalo, ababusi abaningi bakholwa kuye, kodwa ngenxa yabaFarisi abamvumanga esidlangalaleni, funa baxoshwe esinagogeni,
ngokuba babethanda udumo lwabantu, kunodumo lukaNkulunkulu.
Kepha uJesu wamemeza, wathi: “Okholwa yimi akakholwa kimi nje, kodwa kulowo ongithumileyo.
Obona Mina ubona ongithumileyo.
Ngize emhlabeni njengokukhanya ukuba yilowo nalowo okholwa yimi angahlali ebumnyameni.
“Uma umuntu ezwa amazwi ami, kodwa engawalondolozi, angimehluleli Mina, ngokuba angizanga ukuba ngehlulele umhlaba, kepha ukuba ngiwusindise.
Lowo ongalayo, engawemukeli amazwi ami, unomehlulelayo; izwi engalikhulumayo, yilo eliyakumehlulela ngomhla wokuphela.
Ngokuba angikukhulumanga ngokwami, kodwa uBaba ongithumileyo, nguye onginike umyalo wokuthi ngithini, futhi ngikhulumeni.
Ngiyazi ukuthi umyalo wakhe ungukuphila okuphakade. Ngakho-ke lokhu engikukhulumayo ngikukhuluma njengalokhu uBaba engitshela khona.”
Kwathi sekuzakuba nguMkhosi wePhasika uJesu azi ukuthi sesifikile isikhathi sakhe sokuba amuke kulo mhlaba aye kuYise, kepha wayebathandile abangabakhe abasemhlabeni kwaze kwaba sekugcineni.
Sekudliwa isidlo sakusihlwa, usathane wayesekufakile enhliziyweni kaJuda Iskariyothe kaSimoni ukuba amkhaphele.
UJesu wayekwazi ukuthi uYise unikele konke ezandleni zakhe, nokuthi Yena wavela kuNkulunkulu, futhi ubuyela kuye.
Wasukuma esidlweni, wabeka izingubo zakhe, wathatha ithawula, walibopha okhalo.
Wayesethela amanzi emcengezini, waqala ukugeza abafundi bakhe izinyawo, ezesula ngethawula ayelibophele okhalo.
Wayesefika kuSimoni Phethro. UPhethro wathi kuye: “Nkosi, Wena, ugeza izinyawo zami na?”
UJesu waphendula, wathi kuye: “Engikwenzayo manje awukwazi, kodwa uzakuqonda emva kwalokhu.”
UPhethro wathi kuye: “Awusoze wazigeza izinyawo zami naphakade.” UJesu waphendula, wathi: “Uma ngingakugezi, awunasabelo nami.”
USimoni Phethro wathi kuye: “Nkosi, makungabi yizinyawo zodwa, kodwa nezandla nekhanda.”
UJesu wathi kuye: “Ogeziweyo kadingi lutho olunye, kuphela ukugezwa izinyawo, ngalokho umzimba wonke ugezekile. Nina-ke nigezekile, kodwa hhayi nina nonke.”
Ngokuba wayemazi obezakumkhaphela, yingakho athi: “Anigezekile nonke.”
Ngakho-ke esezigezile izinyawo zabo, wathatha izingubo zakhe, wabuye wahlala esidlweni, wayesethi kubo: “Niyakuqonda yini lokhu engikwenze kini na?
Ningibiza nithi: ‘Mfundisi, Nkosi.’ Yebo, nisho kahle, ngokuba ngiyikho.
Uma Mina, iNkosi noMfundisi, ngigeze izinyawo zenu, nani-ke kufanele nigezane izinyawo.
Ngokuba ngininikile isibonelo sokuba nani nenze njengalokhu ngenzile kini.
Ngiqinisile, ngiqinisile ngithi kini: isisebenzi kasingaphezulu komqashi waso, nothunyiweyo akangaphezulu komthumileyo.
Uma nikwazi lokhu, nibusisiwe nxa nikwenza.
“Angikhulumi ngani nonke, ngokuba ngiyabazi engibakhethileyo. Kepha ukuze kugcwaliseke umbhalo othi: “ ‘Odla isinkwa sami ungiphendukele.’
“Kusukela manje ngiyanitshela kungakenzeki, ukuze nxa sekwenzeka, nikholwe ukuthi ngiNguye.
Ngiqinisile, ngiqinisile ngithi kini: owamukela noma ngubani engimthumileyo, wamukela Mina; owamukela Mina, wamukela ongithumileyo.”
UJesu esekushilo lokho wakhathazeka emoyeni, wayesefakaza ngokusobala ethi: “Ngiqinisile, ngiqinisile ngithi kini: omunye wenu uzakungikhaphela.”
Abafundi babhekana bodwa, bengazi ukuthi ukhuluma ngobani.
Omunye wabafundi, lo uJesu ayemthanda kakhulu, wayehleli eduze naye, encike esifubeni sakhe.
USimoni Phethro wamqhweba, wathi: “Mbuze ukuthi ukhuluma ngobani na?”
Lo mfundi waqethuka, wancika esifubeni sikaJesu, wathi kuye: “Nkosi, ngabe ngubani lowo na?”
UJesu waphendula, wathi: “Yilowo engizakugcobhoza ucezu lwesinkwa ngimnike lona.” Wayesegcobhoza ucezu, walunika uJuda Iskariyothe.
Emva kokuba emukele ucezu, uSathane wangena kuye. UJesu wayesethi kuJuda: “Lokhu okwenzayo, kwenze masinyane.”
Kepha kulaba ayehleli nabo esidlweni, akekho owazi ukuthi ukusholani lokho kuye.
Abanye babecabanga ukuthi kungenxa yokuba uJuda wayengumgcinisikhwama, ngakho uJesu, wayethi kuye: “Thenga esikusweleyo koMkhosi,” noma ukuthi makabele abampofu okuthile.
Kuthe uJuda eseluthathile ucezu, waphuma ngokushesha; kwakusebusuku.
Esephumile, uJesu wathi: “Manje iNdodana yomuntu ikhazimulisiwe, noNkulunkulu ukhazimuliswe kuyo.
Uma uNkulunkulu ekhazimulisiwe kuyo, noNkulunkulu uyakuyikhazimulisa kuye, uyakuyikhazimulisa ngokuphazima kweso.
“Bantwanyana, kuseyisikhashana nginani. Niyakungifuna, njengokuba ngasho kubaJuda ukuthi lapho ngiya khona,nina anikwazi ukuza khona. Ngisho lokho nakini manje.
“Ngininika umyalo omusha wokuba nithandane; njengalokhu nginithandile, nani-ke thandanani.
Ngalokho bonke abantu bayakukwazi ukuthi ningabafundi bami uma nithandana.”
USimoni Phethro wathi kuye: “Nkosi, uyakuphi na?” UJesu waphendula wathi: “Lapho ngiya khona, ungengilandele manje, kodwa uyakungilandela kamuva.”
UPhethro wayesethi kuye: “Nkosi, kungani ngingekulandele manje na? Ngizakudela ukuphila kwami ngenxa yakho.”
UJesu waphendula, wathi: “Uzakudela ukuphila kwakho ngenxa yami na? Ngiqinisile, ngiqinisile ngithi kuwe: iqhude ngeke likhale, ungakangiphiki kathathu.”
“Inhliziyo yenu mayingakhathazeki. Kholwani nguNkulunkulu, nikholwe nayimi.
Ekhaya likaBaba kukhona izindlu eziningi; ukuba bekungenjalo, bengiyakunitshela ukuthi ngiya ukuyonilungisela indawo.
Nakuba ngiya ukunilungisela indawo, ngiyobuye ngize, nginilande ukuze nani nibe lapho ngikhona.
Lapho ngiya khona, niyayazi indlela.”
UThomase wathi kuye: “Nkosi, asazi lapho uya khona. Pho singayazi kanjani indlela na?”
UJesu wathi: “Mina ngiyindlela, neqiniso, nokuphila; akakho oza kuBaba ngaphandle kwami.
Ukuba beningazi Mina, beniyakumazi noBaba; kodwa niyamazi manje, futhi nimbonile.”
UFiliphu wathi kuye: “Nkosi, sikhombise uYihlo, lokho kuyakwenela kithi.”
UJesu wathi kuye: “Isikhathi esingaka ngihleli nani, namanje awukangazi, Filiphuna? Ongibonile Mina, umbonile uBaba. Pho usho kanjani ukuthi: ‘Sikhombise uYihlo’ na?
Awukholwa yini ukuthi ngikuBaba, noBaba ukimi na? Amazwi engiwakhulumayo Mina kini, angiwakhulumi ngokwami; kodwa uBaba ohleli kimi wenza imisebenzi yakhe.
Kholwani ukuthi Mina ngikuBaba, noBaba ukimi. Uma kungenjalo, kholwani ngenxa yemisebenzi uqobo lwayo.
Ngiqinisile, ngiqinisile ngithi kini: okholwa yimi, imisebenzi engiyenzayo Mina, naye uyakuyenza; uyakwenza nemikhulu kunale, ngokuba Mina ngiya kuBaba.
Noma yini eniyakuyicela egameni lami, ngiyakuyenza ukuba uBaba akhazimuliswe eNdodaneni.
Uma nicela utho kimi egameni lami, ngiyakulwenza.
“Uma ningithanda, niyakuyigcina imiyalo yami.
Ngiyakucela kuBaba ukuba aniphe omunye uMduduzi ukuba ahlale kini kuze kube phakade;
uMoya weqiniso, izwe elingemamukele, ngokuba lingamboni, futhi lingamazi. Nina niyamazi Yena, lokhu uhlala nani, uyakuba kini.
“Angiyukunishiya niyizintandane, kodwa ngiyakubuya ngize kini;
kungesikhathi eside, izwe ngeke lisangibona, kepha nina niyangibona, ngokuba ngiyaphila, nani nizakuphila.
Ngalolo suku niyakukwazi ukuthi Mina ngikuBaba, nani nikimi, nami ngikini.
“Lowo onemiyalo yami ayigcine, nguyena ongithandayo. Ongithandayo uyakuthandwa nguBaba; nami ngiyakumthanda, ngizibonakalise kuye.”
UJuda, ongesiye u-Iskariyothe, wathi kuye: “Nkosi, kungani ukuba uthi uyakuzibonakalisa kithi, kodwa ungazibonakalisi kulo izwe na?”
UJesu waphendula, wathi kuye: “Uma umuntu engithanda, uyakugcina izwi lami. UBaba uyakumthanda; siyakuza kuye, sihlale naye.
Ongangithandiyo akawagcini amazwi ami. Izwi enilizwayo akusilo elami, kodwa ngelikaBaba ongithumileyo.
“Nginitshelile lokhu ngisahleli nani.
Kepha uMduduzi, uMoya oNgcwele, uBaba ayakumthumela egameni lami, uyakunifundisa konke, anikhumbuze konke enginitshele khona.
“Ukuthula ngikushiya kini, ukuthula kwami nginipha khona. Ukunipha kwami akufani nokupha kwezwe. Inhliziyo yenu mayingakhathazeki, futhi ingesabi.
“Nizwile, nganitshela ngathi: ngiyahamba, kodwa ngiyakubuya ngize kini. Uma ningithanda beniyojabula, ngokuba ngiya kuBaba, lokhu uBaba mkhulu kunami.
Manje senginitshelile kungakenzeki, ukuze nikholwe lapho sekwenzekile.
Angisezukukhuluma nani ngenabe, ngokuba umbusi waleli lizwe uyeza, nokho-ke akanamandla kimi,
kepha ukuze izwe lazi ukuthi ngiyamthanda uBaba, nokuthi ngenza njengalokhu uBaba engiyalile. “Sukumani, sihambe lapha.”
“Mina ngingumvini woqobo, uBaba ungumlimi.
Yilelo nalelo gatsha elikimi, elingatheli izithelo, uyalisusa. Kepha yilelo nalelo elithela izithelo, uyalithena ukuze lithele kakhulu.
Nina senihlanzekile ngenxa yezwi engilikhulume kini.
Hlalani kimi, nami kini. Njengokuba igatsha lingezithele izithelo ngokwalo, kuphela uma lisemvinini, kanjalo nani, kuphela uma nihlala kimi.
“Mina ngingumvini, nina ningamagatsha. Ohlala kimi, nami kuye, lowo-ke uthela izithelo eziningi, ngokuba ngaphandle kwami ningenze lutho.
Uma umuntu engahlali kimi, ulahlwa ngaphandle njengegatsha, abune. Lawo magatsha bayawabutha, bawaphonse emlilweni, ashe.
Uma nihlala kimi, namazwi ami ehlala kini, niyakucela enikuthandayo, nikwenzelwe.
UBaba uyakhazimuliswa ngalokhu, ukuba nithele izithelo eziningi, nibe ngabafundi bami.
“Njengalokhu uBaba engithandile, nami nginithandile; hlalani othandweni lwami.
Uma niyigcina imiyalo yami, niyakuhlala othandweni lwami, njengalokhu nami ngiyigcinile imiyalo kaBaba, ngihlala othandweni lwakhe.
“Nginitshelile lokhu ukuba ukuthokoza kwami kube kini, nokuthokoza kwenu kuchichime.”
“Yilo umyalo wami wokuba nithandane njengalokho nami nginithandile.
Akekho onothando olwedlula olokuba umuntu adele ukuphila kwakhe ngenxa yabangani bakhe.
Nina ningabangani bami, inqobo nje uma nenza lokhu enginiyala ngakho.
Angisasho ukuthi niyizinceku, ngokuba inceku ayikwazi okwenziwa yinkosi yayo, kodwa nginibize ngabangani ngokuba konke engikuzwile kuBaba, nginazisile khona.
Aningikhethanga nina, kodwa yiMina enginikhethile, ukuba nihambe, nithele izithelo; nezithelo zenu zihlale, ukuze kuthi noma yini eniyakuyicela kuBaba egameni lami, aninike yona.
Nginiyala ngalezo zinto ukuze nithandane.”
“Uma izwe linizonda, yazini ukuthi langizonda ngaphambi kwenu.
Ukuba beningabezwe, izwe belizakunithanda ngokuba ningabalo, kodwa lokhu ningesibo abalo, kodwa nganikhetha Mina ezweni, kungakho izwe linizonda.
Khumbulani izwi enganitshela lona, ngathi: ‘Isisebenzi kasingaphezulu komqashi waso.’ Uma Mina bengihlupha, nani bayakunihlupha; uma beligcina izwi lami, kanjalo bayakuligcina nelenu.
Kepha konke lokho bayakukwenza kini ngenxa yegama lami, ngokuba bengamazi ongithumileyo.
Uma bengingezanga, ngakhuluma kubo, ngabe abanasono. Kepha manje abanazaba ngesono sabo.
Ozonda Mina, uzonda noBaba.
Ukuba bengingayenzanga imisebenzi phakathi kwabo, engazange yenziwe muntu omunye, ngabe abanasono; kepha manje bayibonile, bangizonda Mina kanye noBaba.
Kepha ukuze kugcwaliseke izwi elilotshwe emthethweni wakubo elithi: ‘Bangizonda ngeze.’
“Lapho esefikile uMduduzi engiyakumthumela kini evela kuBaba; uMoya weqiniso, ophuma kuBaba, nguYena oyakufakaza ngami.
Nani niyakufakaza, ngokuba beninami kwasekuqaleni.”
“Nginitshele lokhu ukuze ningakhubeki.
Bayakunikhipha emasinagogeni; yebo, isikhathi siyeza lapho bonke abanibulalayo beyakuthi basebenzela uNkulunkulu.
Bayakukwenza lokho ngokuba bengamazanga uBaba nami.
Kepha nginitshelile ngalezo zinto ukuze kuthi lapho sekufika leso sikhathi, nikhumbule ukuthi nganitshela ngazo; anginitshelanga lokho kwasekuqaleni, ngokuba benginani.”
“Kepha manje sengiyahamba, ngiya kongithumileyo kodwa akekho phakathi kwenu ongibuzayo athi: ‘Uya kuphi na?’
Ngokuba ngikhulume lokhu kini, inhliziyo yenu isigajwe wusizi.
Kepha Mina nginitshela iqiniso: kunifanele ukuba ngihambe, ngokuba uma ngingamuki, uMduduzi ngeke eze kini, kodwa uma ngihamba, ngiyakumthumela kini.
Lapho esefikile Yena, uyokulambulela izwe ukuthi leduke kangakanani mayelana nesono, nangokulunga, nangokwahlulela.
Mayelana nesono, ngokuba bengakholwa yimi;
ngokulunga, ngokuba ngiya kuBaba, anisayukubuye ningibone;
ngokwahlulela, ngokuba umbusi waleli lizwe wahlulelwe.
“Kusekuningi enginganitshela khona, kodwa manje ningekuthwale.
Kepha lapho esefikile Yena, uMoya weqiniso, uzakuniholela kulo lonke iqiniso. Ngokuba akayukukhuluma okwakhe, kodwa lokho akuzwayo uyakukukhuluma, anibikele okuzayo.
Uyakungikhazimulisa, ngokuba uyakuthatha kokwami anibikele khona.
Konke uBaba anakho, kungokwami; yingakho-ke ngithe uyakuthatha kokwami, anibikele khona.
“Kusazokuba yisikhashana ningabe nisangibona, kubuye kube yisikhashana ningibone.”
Abanye babafundi bakhe babuzana bodwa, bathi: “Ngabe uqonde ukuthini uma ethi kithi: ‘Kusazokuba yisikhashana ningabe nisangibona, kubuye kube yisikhashana, ningibone,’ nokuthi: ‘Ngokuba ngiya kuBaba’ na?”
Bathi: “Uchaza ukuthini uma ethi: ‘Yisikhashana’ na? Asazi ukuthi uthini.”
UJesu wayazi ukuthi bebefuna ukumbuza, wayesethi kubo: “Ngabe nibuzana ngalokho engikushilo yini, ngathi: ‘Kusezakuba yisikhashana, ningabe nisangibona, kubuye kube yisikhashana, ningibone’ na?
Ngiqinisile, ngiqinisile ngithi kini: niyakukhala nilile nina, kepha izwe liyakujabula; niyakuba lusizi nina, kodwa usizi lwenu luyakuba yintokozo.
Owesifazane nxa esabeletha, uba lusizi, ngokuba sesifikile isikhathi sakhe; kepha uma esembelethile umntwana, akabe esazikhumbula izinhlungu ngenxa yenjabulo yokufika komntwana emhlabeni.
Nani-ke nilusizi manje, kodwa ngiyakubuye nginibone, inhliziyo yenu ithokoze; futhi akekho onganephuca intokozo yenu.
Ngalolo suku aniyukungibuza lutho. Ngiqinisile, ngiqinisile ngithi kini: noma yini eniyakuyicela kuBaba egameni lami, uyakuninika yona.
Kuze kube manje anicelanga lutho egameni lami. Celani, niyakuphiwa ukuze intokozo yenu igcwale.
“Lokho ngikukhulume kini ngemifanekiso, kodwa siyeza isikhathi lapho ngingasayukukhuluma ngemifanekiso, kodwa ngiyakukhuluma ngoBaba ngokusobala.
Ngalolo lusuku niyakucela egameni lami; angisho kini ukuthi ngiyakunicelela kuBaba.
Ngokuba uBaba luqobo uyanithanda, lokhu nina ningithandile, nakholwa ukuthi Mina ngavela kuNkulunkulu.
Ngavela kuBaba, ngeza emhlabeni; manje ngiyawushiya umhlaba, ngibuyela kuBaba.”
Abafundi bakhe bathi kuye: “Manje-ke usukubeka ngembaba lokhu okushoyo, awusakhulumi ngemifanekeliso.
Siyazi ukuthi wazi konke, awudingi ukuba umuntu akubuze, yingakho sikholwa ukuthi wavela kuNkulunkulu.”
UJesu waphendula, wathi: “Seniyakholwa manje na?
Isikhathi siyeza, yebo, sesifikile, sokuba nihlakazeke, yilowo nalowo aye kokwakhe, ningishiye ngedwa, nokho angingedwa, ngokuba uBaba unami.
“Lokho ngikukhulume kini ukuba nibe nokuthula ngami. Emhlabeni niyakuba lusizi, kodwa yimani isibindi, Mina ngiwunqobile umhlaba.”
UJesu wakhuluma lezi zinto, wayesephakamisela amehlo akhe ezulwini, wathi: “Baba, isikhathi sesifikile, khazimulisa iNdodana, ukuze iNdodana ikukhazimulise.
Njengokuba uyiphe amandla phezu kwabantu bonke, ukuze bonke oyiphe bona, ibaphe ukuphila okuphakade.
Ukuphila okuphakade yilokhu ukuba bazi Wena wedwa, Nkulunkulu oqinisileyo, nomthumileyo, uJesu Khristu.
Ngikukhazimulisile emhlabeni, ngiwufezile umsebenzi onginike wona ukuba ngiwenze.
Manje-ke ngikhazimulise Wena Baba, kanye nawe uqobo, ngenkazimulo ebenginayo ngikuwe, umhlaba ungakabi bikho.
“Ngilibonakalisile igama lakho kubantu ongiphe bona kwabasemhlabeni. Babengabakho, wangipha bona; baligcinile izwi lakho.
Sebeyazi ukuthi konke ongiphe khona kuvela kuwe.
Ngokuba amazwi ongiphe wona, ngibaphile wona, bawamukela; bazi impela ukuthi ngavela kuwe, futhi bakholwa ukuthi ngithunywe nguwe.
Ngiyabakhulekela; angikhulekeli umhlaba, kodwa kuphela labo ongiphe bona, ngokuba bangabakho.
Konke okwami kungokwakho, nalokho okungokwakho kungokwami. Ngikhazimulisiwe kubo.
Angisekho emhlabeni kodwa bona basemhlabeni. Baba ongcwele, bagcine egameni lakho, labo ongiphe bona, ukuze babe munye njengathi.
Ngesikhathi ngisenabo emhlabeni, ngibalondile egameni lakho labo onginike bona. Ngibalondile, akwalahleka namunye kubo, kuphela lowo owayemiselwe ukulahlwa, ukuze kugcwaliseke umbhalo.
“Manje sengiza kuwe, ngikhuluma lokhu emhlabeni ukuba babe nokuthokoza kwami, kugcwale kubo.
Ngibanikile izwi lakho, umhlaba wabazonda, ngokuba bengesibo abawo; nami angisiye owomhlaba.
Angiceli ukuba ubasuse emhlabeni, kodwa ukuba ubavikele komubi.
Abasibo abezwe, njengalokhu nami ngingesiye owomhlaba.
Bangcwelise ngeqiniso, izwi lakho liyiqiniso.
Njengalokho wangithumela emhlabeni, nami ngibathumela emhlabeni.
Ngenxa yabo ngiyazingcwelisa, ukuze nabo bangcweliswe ngeqiniso.
“Angiceleli laba bodwa, kepha nalabo abakholwa yimi ngezwi labo,
ukuze bonke babe munye, njengalokhu Wena Baba ukimi, nami ngikuwe, ukuba nabo babe kithina, ukuze izwe likholwe ukuthi ungithumile.
Inkazimulo ongiphe yona, nabo ngibaphile, ukuze babe munye, njengalokhu thina simunye.
Mina ngikubo, nawe ukimi, baze bapheleliswe ebunyeni, ukuze umhlaba wazi ukuthi Wena ungithumile, nabo wabathanda njengalokhu ungithandile.
“Baba, ngithanda ukuba labo ongiphe bonababe nami lapho ngikhona, ukuze bayibone inkazimulo yami ongiphe yona, ngokuba wangithanda umhlaba ungakasekelwa.
“Baba olungileyo, izwe alikwazanga, kodwa Mina ngikwazile, nalaba bazile ukuthi ungithumile.
Ngibazisile igama lakho, ngizakubazisa lona ukuba uthando ongithande ngalo lube kubo, nami ngibe kubo.”
UJesu esekukhulumile lokho, waphuma nabafundi bakhe; bawelela ngaphesheya komfudlana, iKhedroni. Kwakukhona lapho insimu angena kuyo nabafundi bakhe.
UJuda owamkhaphelayo wayeyazi leyo ndawo, ngokuba uJesu wayejwayele ukuhlangana lapho nabafundi bakhe.
UJuda esetholile isigejana samabutho, izikhonzi zabaphristi abakhulu, nabaFarisi, wahamba nabo baya kuleyo ndawo, bephethe izihlonti, izibani nezikhali.
Ngakho-ke uJesu ekwazi konke okuzakumehlela, waphuma, wathi kubo: “Nifuna bani na?”
Bamphendula, bathi: “UJesu waseNazaretha.” Wayesethi kubo: “YiMina.” UJuda, okunguyena owayemkhaphele, wayemi nabo.
UJesu eseshilo kubo wathi: “YiMina,” base behlehla nyovane, bafumbeka phansi.
Ngakho-ke wabuye wababuza, wathi: “Nifuna bani na?” Bathi: “UJesu waseNazaretha.”
UJesu waphendula, wathi: “Nginitshelile ukuthi yiMina. Uma-ke nifuna Mina, bayekeni laba, bahambe,”
ukuze kugcwaliseke izwi alishoyo, wathi: “Kulabo ongiphe bona, angilahlekelwanga namunye.”
USimoni Phethro wayesegqabula inkemba ayeyiphethe, wagenca inceku yomphristi omkhulu, wayinquma indlebe yesokunene. Igama lenceku kwakunguMalkhusi.
UJesu wayesethi kuPhethro: “Buyisela inkemba emgodleni wayo; kanti angiyukusiphuza yini isitsha uBaba anginike sona na?”
Isigejane samabutho, induna yenkulungwane, nezikhonzi zabaJuda bambamba uJesu, bambopha.
Bamhola, bamyisa ku-Anase kuqala, ngokuba engumukhwe kaKhayifase owayengumphristi omkhulu ngalowo nyaka.
Phela uKhayifase nguyena owaluleka abaJuda ngokuthi kungcono ukuba umuntu oyedwa afele abantu.
USimoni Phethro nomunye umfundi owayaziwa ngumphristi omkhulu, bamlandela uJesu. UJesu wangena-ke egcekeni lomphristi omkhulu.
Kepha uPhethro wayemi ngaphandle kwesango. Waphuma lowo mfundi owayaziwa ngumphristi omkhulu, wakhuluma nentombazane engumlindimnyango, yayisimngenisa uPhethro.
Intombazana engumlindimnyango yayisithi kuPhethro: “Ngabe impela nawe awusiye yini omunye wabafundi balo muntu na?” Wathi yena: “Angisiye.”
Kwakumi lapho izinceku nezikhonzi zibase umlilo wamalahle, zotha, ngokuba kwakumakhaza; noPhethro wayemi nazo, otha umlilo.
Kepha umphristi omkhulu wabuza uJesu ngabafundi bakhe nangemfundiso yakhe.
UJesu wamphendula, wathi: “Ngikhulumile esidlangalaleni ezweni. Ngezikhathi zonke, bengifundisa esinagogeni nasethempelini, lapho kubuthana khona bonke abaJuda, angikhulumanga lutho ngasese.
Pho ubuzelani kimi na? Buza kulabo abezwile lokho engakukhuluma kubo; bona bayakwazi engakushoyo.”
Esasho lokho, esinye isikhonzi esasimi eduze sammukula uJesu, sathi: “Uphendula umphristi omkhulu kanjalo na?”
UJesu wasiphendula, wathi: “Uma ngikhulume kabi, fakaza ngalobo bubi; kodwa uma kukuhle, ungishayelani na?”
U-Anase wamthumela eboshiwe kuKhayafase, umphristi omkhulu.
Kepha uSimoni Phethro wayemi, otha. Bathi-ke kuye: “Ngabe impela nawe awusiye yini omunye wabafundi bakhe na?” Waphika wathi: “Angisiye.”
Enye yezinceku zomphristi omkhulu, eyisihlobo salowo ondlebe yaso uPhethro wayeyinqumile, yathi: “Angikubonanga yini ensimini naye na?”
UPhethro wabuye waphika; masinyane lakhala iqhude.
Khona bamhola uJesu esuka kuKhayafase, bamyisa enkundleni yokwehlulela; kwakusekuseni. Kepha bona kabangenanga enkundleni yokwehlulela ukuze bangazingcolisi, kodwa bakwazi ukudla iPhasika.
Ngakho-ke uPilatu waphumela kubo ngaphandle, wathi: “Nimethwesa cala lini lo muntu na?”
Baphendula, bathi kuye: “Uma lo muntu ubengenzanga okubi, ngabe asimlethanga kuwe.”
Ngakho-ke uPilatu, wathi kubo: “Mthatheni nina, nimehlulele ngomthetho wakini.” AbaJuda bathi kuye: “Asivunyelwe thina ukubulala umuntu,”
lokho kwenzeka ukuze kufezeke izwi uJesu alikhulumayo, ekhomba indlela ayakufa ngayo.
UPilatu wabuye wangena endlini yokwehlulela, wabiza uJesu, wathi kuye: “Wena uyinkosi yabaJuda na?”
UJesu waphendula, wathi: “Uzisholo lokho wena yini, noma abanye bakutshele kanjalo ngami na?”
UPilatu waphendula, wathi: “Kanti ngingumJuda yini mina na? Isizwe sakini nabaphristi abakhulu bakulethe kimi; pho wenzeni na?”
UJesu waphendula, wathi: “Umbuso wami akusiwo owaleli lizwe. Uma umbuso wami ubungowaleli lizwe, izikhonzi zami beziyakungilwela ukuze nginganikelwa kubaJuda. Kepha manje umbuso wami akusiwo owalapha.”
Wayesethi uPilatu kuye: “Kanti uyinkosi ngempela na?” UJesu waphendula, wathi: “Usho khona ukuthi ngiyinkosi; ngokuba ngazalelwa lokho, ngafikela lokho emhlabeni, ukuba ngifakazele iqiniso. Bonke abeqiniso bayalizwa izwi lami.”
Wathi uPilatu kuye: “Iqiniso liyini na?” Esekushilo lokho wabuye waphumela kubaJuda, wathi kubo: “Angifumani cala kuye.
Kepha ninesiko lokuba nginikhululele omunye ngePhasika. Ngakho niyathanda yini ukuba nginikhululele inkosi yabaJuda na?”
Bamemeza futhi bonke, bathi: “Hhayi lo muntu, kodwa uBharabha.” Nakuba uBharabha wayengumphangi.
UPilatu wayesemthatha uJesu, wambhaxabula.
Amabutho ayeluke umqhele wameva, awufaka ekhanda lakhe, amembathisa ingubo ebukhwebezane,
aya kuye, athi: “Bayede, nkosi yabaJuda!” Ammukula.
UPilatu waphuma futhi, wathi kubo: “Niyabona-ke, ngimnikela kini, ukuba nazi ukuthi mina angifumananga cala kuye.”
Wayesephumela ngaphandle uJesu ethwele umqhele wameva, embethe nengubo ebukhwebezane. Wayesethi kubo: “Nangu-ke lo muntu!”
Kwathi ukuba abaphristi abakhulu nezikhonzi bambone, bamemeza, bathi: “Mbethele, mbethele esiphambanweni!” UPilatu wathi kubo: “Mthatheni nina, nimbethele esiphambanweni, ngokuba mina angifumani cala kuye.”
AbaJuda bamphendula, bathi: “Sinomthetho thina; ngokwalo mthetho ufanele ukuba afe, ngokuba uzenze iNdodana kaNkulunkulu.”
Kuthe lapho uPilatu ezwa leli lizwi, wesaba kakhulu,
wabuye wangena endlini yokwehlulela, wathi kuJesu: “Ungowaphi wena na?” Kepha uJesu akamphendulanga.
UPilatu wayesethi kuye: “Kungani ungakhulumi nami na? Awazi yini ukuthi mina nginegunya lokukukhulula, negunya lokukubethela esiphambanweni na?”
UJesu waphendula, wathi: “Ngabe awunalo igunya phezu kwami, ukuba awulinikwanga ngaphezulu. Ngakho-ke onginikele kuwe, nguyena onesono esikhulu.”
Ngenxa yalokhu, uPilatu wayefuna ukumkhulula, kodwa abaJuda bamemeza, bathi: “Uma umkhulula lo muntu, awusiye umngani kaKhesari. Noma ngubani ozenza inkosi, umelene noKhesari.”
Ngakho-ke uPilatu esezwile lawo mazwi, wamkhiphela ngaphandle uJesu. Wahlala esihlalweni sokwehlulela endaweni okuthiwa: “EGandaywe Ngamatshe,” ngesiHebheru okuthiwa iGabhatha.
Kwakulusuku lokulungiselela iPhasika, cishe sekuyihora lesithupha. UPilatu wathi kubaJuda: “Nansi-ke, inkosi yenu.”
Kepha bamemeza, bathi: “Msuse, msuse, mbethele esiphambanweni!” Wathi kubo uPilatu: “Ngibethele inkosi yenu na?” Abaphristi abakhulu baphendula, bathi: “Asinayo inkosi, kuphela uKhesari.”
Wayesemnikela kubo ukuba abethelwe esiphambanweni. Bamthatha-ke, bahamba naye.
Ezithwalele isiphambano, bahamba naye, baya endaweni okuthiwa iNdawo Yekhanda, ngesiHebheru okuthiwa iGolgotha.
Bambethela lapho nabanye ababili ababemphahlile uJesu.
UPilatu waloba isaziso, sashayelelwa esiphambanweni. Kwakulotshwe ukuthi: UJESU WASENAZARETHA, INKOSI YABAJUDA.
AbaJuda abaningi basifunda lesi saziso, ngokuba indawo lapho ayebethelwe khona uJesu yayiseduze nomuzi. Kwakulotshwe ngesiHebheru, ngesiRoma, nangesiGriki.
Abaphristi abakhulu babaJuda bathi kuPilatu: “Ungabhali ukuthi: ‘Inkosi yabaJuda,’ kodwa ukuthi Yena wathi: ‘Ngiyinkosi yabaJuda.’ ”
UPilatu waphendula, wathi: “Esengikulobile, ngikulobile.”
Kuthe amabutho esembethele uJesu esiphambanweni, ayesethatha izingubo zakhe, azehlukanisa amaqoqo amane, kwaba yilelo nalelo butho laba nesabelo, neyembe futhi. Kepha iyembe lalingenamthungo, lalukiwe lonke kusukela phezulu.
Ngakho-ke abonisana odwa athi ngalo: “Asingalidabuli, kodwa asenze unkatho, ukuze kubonakale ukuthi lizakuba ngelikabani.” Ukuze kugcwaliseke umbhalo othi: “Babelana ngezingubo zami, benza unkatho ngesembatho sami.” Amabutho akwenza-ke lokho.
Ngasesiphambanweni sikaJesu kwakumi unina, udadewabo kanina, uMariya umkaKleyophase, noMariya Magdalena.
Kuthe uJesu embona unina nomfundi amthandayo bemi ngalapho, wathi kunina: “Mame, bheka indodana yakho.”
Wayesethi kumfundi: “Bheka unyoko.” Kusukela ngaleso sikhathi, lowo mfundi wamthatha uMariya, wamnakekela.
Emva kwalokho, uJesu azi ukuthi konke sekuphelelisiwe, ukuba kugcwaliseke umbhalo, wathi: “Ngomile.”
Kwakubekiwe lapho isitsha esigcwele iwayini elixutshwe noviniga; base bechoma ilula othini lwehisophi ligcwele uviniga, baliyisa emlonyeni wakhe.
Kwathi ukuba uJesu awemukele uviniga, wayesethi: “Kufeziwe;” wagebisa ikhanda, wafa.
Ngakho-ke abaJuda, lokhu kwakulusuku lokulungisela, nokuba izidumbu zingahlali esiphambanweni ngesabatha, ngenxa yokuba isabatha kwakulusuku olukhulu, bacela kuPilatu ukuba kwephulwe imilenze yababethelweyo, bese besuswa.
Ayeseza-ke amabutho, ayaphula imilenze yowokuqala neyomunye owayebethelwe naye.
Kuthe lapho efika kuJesu, abona ukuthi usefile, awayephulanga imilenze yakhe.
Kepha elinye lamabutho lamgwaza ngomkhonto ohlangothini, kwaphuma igazi namanzi ngokushesha.
Lowo obonileyo ufakazile futhi ubufakazi bakhe buqinisile, futhi lowo uyazi ukuthi ukhuluma iqiniso, ukuze nani nikholwe.
Ngokuba lokhu kwenzeka ukuba kugcwaliseke umbhalo othi: “Akuyukwaphulwa thambo lakhe.”
Kukhona nomunye umbhalo othi: “Bayakumbheka abamgwazileyo.”
Kuthe sekwenzekile lokho, uJosefa wase-Arimatheya, owayengomunye wabafundi bakaJesu owayengazivezi ngenxa yokwesaba abaJuda, wahamba wayocela ukuba asisuse isidumbu sikaJesu. UPilatu wamvumela, wayesehamba, wasisusa isidumbu sikaJesu.
Kwafika noNikhodemu, owake wafika kuJesu ebusuku, yena-ke wayelethe ingxube yemure nenhlaba okungaba ngamalitha ayikhulu.
Base besithatha isidumbu sikaJesu, basisonga ngezindwangu zelineni, basigquma ngamakha njengokosiko lwabaJuda lokungcwaba.
Ngakuleyo ndawo ayebethelwe khona kwakunensimu, kukhona ithuna elisha kuyo, okungakaze kubekwe muntu kulo.
Ngakho-ke ngenxa yokuthi kwakulusuku lwabaJuda lokulungisela iSabatha, bambeka kulelo thuna uJesu ngoba laliseduze.
Kwathi ngosuku lokuqala lweviki, uMariya Magdalena wafika ethuneni ekuseni kusemnyama, wabona itshe lisusiwe emnyango wethuna.
Ngakho-ke wagijima, waya kuSimoni Phethro nakulowo mfundi uJesu ayemthanda, wathi kubo: “Bayithathile iNkosi ethuneni, asazi lapho beyibeke khona.”
UPhethro nomunye umfundi, basuka baqonda ethuneni.
Bobabili bagijima, kodwa lo omunye umfundi wagijima kakhulu kunoPhethro, wafika kuqala ethuneni.
Walunguza wabona izindwangu zelineni zikhona, kodwa akangenanga.
Wafika noSimoni Phethro owayemlandela, wangena ethuneni, wabona izindwangu zelineni zilapho,
neduku ebelisekhanda likaJesu lingekho ezindwangwini zelineni, kodwa lisongwe lodwa likwenye indawo.
Ngakho-ke wangena-ke nomfundi omunye obefike kuqala ethuneni, wabona, wakholwa,
ngokuba bebengakawuqondi umbhalo othi ubefanele ukuvuka kwabafileyo.
Base behamba abafundi, baphindela kubo.
Kepha uMariya wema ngaphandle kwethuna ekhala, wayeselunguza ethuneni,
wabona izingelosi ezimbili zembethe okumhlophe, zihleli. Enye yayingasekhanda, enye ingasezinyaweni, lapho isidumbu sikaJesu besibekwe khona.
Izingelosi zathi kuye: “Mame, ukhalelani na?” Wathi kuzo: “Bayithathile iNkosi yami, futhi angazi ukuthi bayibeke kuphi.”
Esekushilo lokho waphenduka, wabona uJesu emile, kodwa wayengazi ukuthi nguJesu.
UJesu wathi kuye: “Mame, ukhalelani na? Ufuna bani na?” Kepha ecabanga ukuthi lo ngumphathi wensimu, wathi: “Nkosi, uma umsusile lapha, ngitshele ukuthi umbeke kuphi, ukuze ngihambe ngiyomthatha mina.”
UJesu wathi kuye: “Mariya!” Waphenduka, wathi kuye ngesiHebheru: “Rabuni,” okusho ukuthi: “Mfundisi.”
UJesu wathi kuye: “Ungangithinti, ngokuba angikenyukeli kuBaba. Kepha hamba uye kubazalwane bami, ubatshele ukuthi ngenyukela kuBaba noYihlo, kuNkulunkulu wami noNkulunkulu wenu.”
UMariya Magdalena wafika wabikela abafundi, wathi: “Ngiyibonile iNkosi,” wathi futhi: “Ikushilo lokhu kimi.”
Kwathi kusihlwa, ngalolo lusuku lokuqala lweviki, iminyango ivaliwe lapho abafundi babekhona ngenxa yokwesaba abaJuda, uJesu wafika wema phakathi kwabo, wathi kubo: “Ukuthula makube kini.”
Esekushilo lokho wabakhombisa izandla zakhe nohlangothi lwakhe. Base bethokoza abafundi lapho beyibona iNkosi.
UJesu wabuye wathi kubo: “Ukuthula makube kini. Njengalokhu uBaba engithumile Mina, nami ngiyanithuma nina.”
Esekushilo lokho, wabaphephetha, wathi kubo: “Yamukelani uMoya oNgcwele.
Enibathethelela izono zabo, bathethelelwe; neningabathetheleli, abathethelelwe.”
Kepha uThomase, omunye wabali-12, okuthiwa nguDidimu, wayengekho mhla uJesu efika.
Ngakho-ke abanye abafundi bathi kuye: “Siyibonile iNkosi.” Kepha wathi kubo: “Uma ngingaliboni inxeba lezipikili ezandleni zayo, ngifake umunwe wami enxebeni lezipikili, ngifake isandla sami ohlangothini lwayo, angisoze ngakholwa.”
Emva kwezinsuku eziyisishiyagalombili abafundi bakaJesu besendlini noThomase ekhona, uJesu wangena iminyango ivaliwe, wema phakathi kwabo, wathi: “Ukuthula makube kini.”
Wayesethi kuThomase: “Letha umunwe wakho lapha, ubone izandla zami; letha isandla sakho, usifake ohlangothini lwami; ungabi ngongakholwa, kodwa okholwayo.”
UThomase waphendula, wathi kuye: “Nkosi yami, Nkulunkulu wami!”
UJesu wathi kuye: “Ngenxa yokuba usungibonile, usuyakholwa yini na? Babusisiwe abakholwa bengabonanga.”
Ziningi ezinye izibonakaliso uJesu azenza phambi kwabafundi bakhe, ezingalotshiwe kule ncwadi.
Kepha lezi zilotshiwe ukuba nikholwe ukuthi uJesu unguKhristu, iNdodana kaNkulunkulu, nokuthi nikholwe, nibe nokuphila egameni lakhe.
Sekwedlule lokho, uJesu wabuye wazibonakalisa kubafundi bakhe ngasolwandle iThibheriya. Wazibonakalisa kanje:
kwakukhona lapho uSimoni Phethro, uThomase okuthiwa nguDidimu, uNathanayeli waseKhana eGalile, amadodana kaZebedewu, nabanye abafundi bakhe ababili.
USimoni Phethro wathi kubo: “Ngisayodoba.” Bathi kuye: “Nathi sihamba nawe.” Bahamba, bangena esikebheni; kodwa ngalobo busuku ababambanga lutho.
Kuthe sekusa, uJesu wabonakala emi ogwini, kodwa abafundi babengazi ukuthi nguYena.
UJesu wathi kubo: “Bantwana, aninakho yini ukudla na?” Bamphendula bathi: “Qha.”
Wayesethi kubo: “Phonsani inetha ngakwesokunene sesikebhe, nizakubamba.” Base beliphonsa, kodwa behluleka ukulidonsa ngenxa yobuningi bezinhlanzi.
Ngakho-ke lowo mfundi uJesu amthandayo wathi kuPhethro: “YiNkosi.” USimoni Phethro, ekuzwa ukuthi yiNkosi, wagqoka, ngokuba wayehamba ze, waziphonsa olwandle.
Kepha abanye abafundi beza ngesikebhe bedonsa inetha elinezinhlanzi, ngokuba babengekude nogu, kungaba yibanga elingamakhubhithi angama-200.
Kuthe sebephumele emhlabathini, babona umlilo wamalahle, nezinhlanzi zibekwe kuwo, nesinkwa.
UJesu wathi kubo: “Lethani izinhlanzi kwenizibambe manje.”
USimoni Phethro wasuka, walihudulela emhlabathini inetha. Laligcwele izinhlanzi ezinkulu eziyi-153. Nakuba izinhlanzi zaziziningi kangako, nokho inetha alidabukanga.
UJesu wathi kubo: “Wozani nizokudla.” Kepha akekho kubafundi owaba nesibindi sokumbuza, athi: “Ungubani Wena na?” Kwabacacela ukuthi yiNkosi.
UJesu weza, wathatha isinkwa, wabapha, nangezinhlanzi wenza kanjalo.
Lokhu kwase kungokwesithathu uJesu ebonakaliswa kubafundi, esevukile kwabafileyo.
Kwathi sebeqedile, uJesu wathi kuSimoni Phethro: “Simoni kaJona, uyangithanda kunalaba na?” UPhethro wathi kuye: “Yebo, Nkosi, uyazi Wena ukuthi ngiyakuthanda.” UJesu wathi kuye: “Yipha amawundlu ami.”
Wabuye wathi kuye okwesibili: “Simoni kaJona, uyangithanda na?” UPhethro wathi kuye: “Yebo, Nkosi, uyazi Wena ukuthi ngiyakuthanda.” UJesu wathi kuye: “Yalusa izimvu zami.”
UJesu wathi kuye okwesithathu: “Simoni kaJona, uyangithanda na?” UPhethro wadabuka, ngokuba wathi kuye ngokwesithathu: “Uyangithanda na?” Wathi kuJesu: “Nkosi, Wena wazi konke, uyazi ukuthi ngiyakuthanda.” UJesu wathi kuye: “Yondla izimvu zami.
Ngiqinisile, ngiqinisile ngithi kuwe: usemusha wawugqoka, uhambe lapho uthanda khona, kodwa uma usumdala, uyakwelula izandla zakho, omunye akugqokise, futhi akuyise lapho ungathandi khona.
Lokho wakusho ekhombisa ukufa azakumdumisa ngakho uNkulunkulu.” Esekushilo lokho wathi: “Ngilandele.”
UPhethro ephenduka, wabona umfundi uJesu amthandayo elandela, yena lowo owayencike esifubeni sakhe esidlweni, nowathi: “Nkosi, ngubani ozakukukhaphela na?”
Kuthe uPhethro embona lowo, wathi kuJesu: “Pho Nkosi, lona uthini ngaye na?”
UJesu wathi kuye: “Uma Mina ngithanda ukuba ahlale ngize ngibuye, uhlushwe yini wena ngalokho na? Wena landela Mina.”
Lokho okwashiwo nguJesu kwasabalala kubazalwane, baze bacabanga ukuthi lowo mfundi akayukufa. Empeleni uJesu akashongo ukuthi akayukufa, kodwa wathi: “Uma ngithanda ukuba ahlale ngize ngibuye, wena uhlushwe yini ngalokho na?”
Nguye lo mfundi ofakaza ngalezi zinto, futhi nobhale ngalokhu. Siyazi ukuthi ubufakazi bakhe buyiqiniso.
Kukhona nezinye izinto eziningi uJesu azenza; ukuba bezingalotshwa ngayinye, ngithi nomhlaba wonke ungebe nandawo eyanele yokugcina lezo zincwadi ezingase zilotshwe.
Incwadi yokuqala ngayiloba, Theyofilu, ngakho konke uJesu aqala ukukwenza nokukufundisa,
kwaze kwaba wusuku akhushulwa ngalo, emva kokuba esebayalile ngoMoya oNgcwele abaphostoli ayebakhethile.
Emva kokuhlupheka kwakhe, wazibonakalisa kubo ephilile ngobufakazi obuningi, eziveza kubo ngalezi zinsuku ezingama-40, ekhuluma nabo ngombuso kaNkulunkulu.
Kwathi esahleli nabo, wabayala ukuba bangamuki eJerusalema, kodwa balindele isithembiso sikaYise abasizwe ngaye.
Ngokuba uJohane wayebhabhadisa ngamanzi, kodwa nina nizakubhabhadiswa ngoMoya oNgcwele zingakadluli izinsuku eziningi.
Labo ababebuthene lapho bambuza bathi: “Nkosi, uzowubuyisela yini umbuso ku-Israyeli ngalesi sikhathi na?”
Wathi kubo: “Akusikho okwenu ukwazi izikhathi noma imizuzu uBaba akumisileyo ngamandla akhe.
Kepha nizakwamukeliswa amandla, uMoya oNgcwele esefikile phezu kwenu, nibe ngofakazi bami eJerusalema, eJudiya lonke naseSamariya, kuze kube sekugcineni komhlaba.”
Kwathi esekushilo lokho, wakhushulwa bebuka, ifu lamsusa emehlweni abo.
Bathi besagqolozele ezulwini ehamba, kwabonakala amadoda amabili emi ngakubo, egqoke izingubo ezimhlophe,
athi: “Madoda aseGalile, nimeleni nigqolozele ezulwini na? UJesu lo, osuswe kini wenyuselwa ezulwini, uyakubuya kanjalo, njengalokhu nimbonile eya ezulwini.”
Base bebuyela eJerusalema, besuka entabeni okuthiwa eyeMinqumo eseduze neJerusalema, eyibanga lohambo lwesabatha.
Kuthe sebengenile, benyukela ekamelweni eliphezulu, lapho babehleli khona: uPhethro, uJohane, uJakobe, u-Andreya, uFiliphu, uThomase, uBhartholomewu, uMathewu, uJakobe ka-Alfewu, uSimoni umZelothe, noJuda kaJakobe.
Bonke laba baqinisela ekukhulekeni benhliziyonye bekanye nabesifazane, noMariya unina kaJesu, nabafowabo.
Kwathi ngaleyo mihla, uPhethro wasukuma phakathi kwabazalwane, isixuku sabantu esasibuthene lapho kwakungathi yi-120, wathi:
“Madoda, bazalwane, kwakumele ukuba ugcwaliseke umbhalo, uMoya oNgcwele awukhuluma phambilini ngomlomo kaDavide ngoJuda owayengumholi walabo ababamba uJesu,
ngokuba wayebalwe kanye nathi, futhi enesabelo kule nkonzo.”
Ngakho-ke lowo wazuza insimu ngomvuzo wokungalungi, wawa ngekhanda, waphahlazeka, kwachitheka nezibilini zakhe zaphumela ngaphandle.
Lokho kwaziwa yibo bonke abakhe eJerusalema, yaze leyo nsimu yaqanjwa igama ngolimi lwakubo, kwathiwa i-Akheldama, okusho ukuthi iNsimu Yegazi.
Ngokuba kulotshiwe encwadini yaMahubo ukuthi: “Umuzi wakhe mawube yihlane, kungahlali muntu kuwo,” nokuthi: “Isikhundla sakhe masithathwe ngomunye.”
“Ngakho-ke kubalulekile ukuba kula madoda ayehamba nathi isikhathi sonke, lapho iNkosi uJesu ingena iphuma phakathi kwethu,
kusukela embhabhadisweni kaJohane kuze kube wusuku akhushulwa ngalo kithi, enye yawo ibe ngufakazi kanye nathi, wokuvuka kwakhe.”
Base baphakamisa ababili, uJosefa okuthiwa nguBharisabha, owayebizwa futhi ngokuthi nguJustu kanye noMathiyase.
Base bekhuleka bethi: “Wena Nkosi, wazi izinhliziyo zabantu bonke, sikhombise ukuthi ngubani omkhethileyo kulaba ababili,
ukuba athathe indawo kulo msebenzi nobuphostoli obulaxazwe nguJuda, waya endaweni yakhe.”
Base bebenzela unkatho, lwadla uMathiyase; wayesebalwa kanye nabaphostoli abali-11.
Kwathi sekufike usuku lwePhentekhoste, bebuthene bonke ndawonye.
Kuthe bengazelele, kwezwakala inhlokomo ivela ezulwini, kungathi eyokuvunguza komoya onamandla, wagcwalisa indlu yonke ababehleli kuyo.
Kwase kubonakala kubo izilimi ezehlukeneyo kungathi ezomlilo; zahlala phezu kwalowo nalowo.
Bonke bagcwala uMoya oNgcwele, baqala ukukhuluma ngezinye izilimi, njengalokhu uMoya wabapha ukuphumisela.
Kepha kwakukhona abaJuda ababakhe eJerusalema, amadoda akholwayo, ayevela ezizweni zonke phansi komthunzi welanga.
Sekuzwakele lokhu kuduma, kwabuthana uquqaba, ludidekile, ngokuba yilowo nalowo wayebezwa bekhuluma ngolimi lwakubo.
Bethuka, bamangala, bathi: “Bonke laba abakhulumayo abasibo yini abaseGalile na?
Pho kwenziwa yini ukuba sonke, ngabanye, sibezwe ngolimi esazalwa nalo na?
AmaPharthe, amaMede, ama-Elamithi, abantu abakhe eMesophothamiya, eJudiya, eKhaphadosiya, ePhontu, e-Asiya,
eFrigiya, ePhamfiliya, eGibhithe, eLibhiya ngaseKhurene, izihambi ezivela eRoma,
abaJuda namaphroselithe, abaseKhrethe nabase-Arabhiya, siyabezwa bekhuluma ngezilimi zakithi, ngemisebenzi emikhulu kaNkulunkulu.”
Bonke bamangala, bakhungatheka, bathi omunye komunye: “Kusho ukuthini lokhu na?”
Kepha abanye bababhuqa, bethi: “Badakwe yiwayini elimnandi.”
Wayesesukuma uPhethro nabali-11, waphakamisa izwi lakhe, wathi kubo: “Madoda akwaJuda nani nonke enakhileyo eJerusalema, makwazeke lokhu kini, ngipheni indlebe, nilalele amazwi ami.
Akunjengoba nicabanga, ukuthi laba badakiwe, ngokuba kuseyihora lesithathu losuku.
Kepha lokhu yilokho okwakhulunywa ngomphrofethi uJoweli, ukuthi:
“ ‘Kuyakuthi ezinsukwini zokugcina, kusho uNkulunkulu, ngiyakuthululela uMoya wami phezu kwenyama yonke; amadodana enu namadodakazi enu ayakuphrofetha, izinsizwa zenu zibone imibono, abadala benu baphuphe amaphupho;
yebo, naphezu kwezinceku nezincekukazi zenu, ngiyothululela uMoya wami ngalezo zinsuku, ziyakuprofetha.
Ngiyoveza izimangaliso esibhakabhakeni phezulu, nezibonakaliso emhlabeni phansi; igazi nomlilo nesikhatha sentuthu.
Ilanga liyakuphenduka ubumnyama, inyanga iphenduke igazi, ngaphambi kokuba kufike usuku olukhulu nolubalulekileyo lweNkosi.
Kuyakuthi yilowo nalowo obiza igama leNkosi, asindiswe.’
“Madoda akwa-Israyeli, lalelani lawa mazwi: uJesu waseNazaretha, indoda efakazelwe nguNkulunkulu phambi kwenu ngemisebenzi yamandla, ngezimangaliso nangezibonakaliso uNkulunkulu azenza ngaye phambi kwenu, njengalokhu nani luqobo nazi,
Yena lowo esenikelwe ngesu elimisiwe phambilini nangokwazi kukaNkulunkulu, nambethela ngezandla zabangenamthetho, nambulala.
Lowo uNkulunkulu wamvusa eseyiqede nya iminjunju yokufa, ngokuba kwakungeke kwenzeke ukuba abanjwe ngukufa.
Ngokuba uDavide uthi ngaye: “ ‘Ngayibona iNkosi phambi kwami njalo, ngokuba ingakwesokunene sami, ukuze nginganyakaziswa.
Ngalokho, inhliziyo yami iyajabula, nolimi lwami luyethaba; ngisho nenyama yami iyakuhlala ngokwethemba.
Ngokuba awuyukuwushiya umphefumulo wami eHayidese, futhi awuyukuvuma oNgcwele wakho abone ukubola.
Wangazisa izindlela zokuphila; uyakungigcwalisa ngokujabula ebusweni bakho.’
“Madoda, bazalwane, ake ngisho lokhu kini ngesibindi mayelana nokhokho uDavide, ukuthi wafa, wembelwa, nokuthi ithuna lakhe lisekhona nanamuhla.
Ngakho-ke lokhu engumphrofethi, ekwazi ukuthi uNkulunkulu wafunga kuye ngesifungo ukuthi olibeni lokhalo lwakhe uyakubeka omunye esihlalweni sakhe sobukhosi.
Ekubonile phambilini, wakhuluma ngokuvuka kukaKhristu ukuthi akashiywanga eHayidesi, nomzimba wakhe awukubonanga ukubola.
Lo Jesu, uNkulunkulu wamvusa; thina sonke singofakazi balokho.
Ngakho-ke waphakanyiselwa ngakwesokunene sikaNkulunkulu, esemukele kuYise isithembiso sikaMoya oNgcwele, ukuthululile lokhu enikubonayo nenikuzwayo.”
Ngokuba uDavide akenyukelanga ezulwini, kodwa yena uthi: “INkosi yathi eNkosini yami: ‘Hlala ngakwesokunene sami,
ngize ngibeke izitha zakho zibe yisenabelo sezinyawo zakho.’ ”
“Ngakho-ke yonke indlu yakwa-Israyeli mayazi ngokweqiniso ukuthi nguNkulunkulu omenzile iNkosi noKhristu lo Jesu enambethela nina esiphambanweni.”
Sebekuzwile lokho, bahlabeka enhliziyweni, bathi kuPhethro nakwabanye abaphostoli: “Madoda, bazalwane, sizokwenzenjani na?”
UPhethro wayesethi: “Phendukani, kube yilowo nalowo ababhabhadiswe egameni likaJesu Khristu, kube ngukuthethelelwa kwezono zenu, khona niyakwemukeliswa isiphiwo sikaMoya oNgcwele.
Ngokuba isithembiso singesenu nesabantwana benu, futhi singesabo bonke abakude, bonke iNkosi uNkulunkulu wethu eyakubabiza.”
Wafakaza nangamanye amazwi amaningi, ebancenga ethi: “Zisindiseni kulesi sizukulwane esonakeleyo.”
Ngakho-ke abalamukelayo izwi lakhe babhabhadiswa, kwanezelelwa ngalolo suku abantu okungathi bayizi-3 000.
Bazinikela njalo esifundisweni sabaphostoli, ekuhlanganeni, ekuhlephuleni isinkwa, nasemikhulekweni.
Kwaba yilowo nalowo muntu wehlelwa wukwesaba; abaphostoli benza izimangaliso nezibonakaliso eziningi.
Bonke abakholwayo babendawonye, behlanganyela ezintweni zonke.
Bathengisa ngomhlaba nangempahla, bababela bonke ngangokwezidingo zabo.
Imihla ngemihla bazinikela nganhliziyonye ethempelini, ekuhlephuleni isinkwa emakhaya, badla ukudla kwabo ngentokozo nangenhliziyo emsulwa,
bemdumisa uNkulunkulu, bethandeka kubantu bonke. INkosi yenezela ebandleni imihla ngemihla labo abasindiswayo.
UPhethro noJohane bakhuphukela ethempelini ngehora lesishiyagalolunye elingelokukhuleka.
Indoda ethile eyisishosha kwasesizalweni sikanina, yayithwelwe yilabo ababeyibeka nsuku zonke ngasemnyango wethempeli obizwa ngokuthi “Omuhle” ukuba inqibe kulabo ababengena ethempelini.
Kwathi ukuba ibone uPhethro noJohane bezongena ethempelini, yacela ukuphiwa isipho.
Kepha uPhethro noJohane bayigqolozela, wathi kuyo: “Sibheke!”
Yayisibabheka, yethembe ukuba yamukele okuthile kubo.
Kepha uPhethro wathi: “Isiliva negolide anginalo, kepha lokho enginakho ngikupha khona: egameni likaJesu uKhristu waseNazaretha, sukuma uhambe.”
Wayeseyibamba ngesandla sokunene, wayisukumisa. Masinyane izinyawo zayo namaqakala kwaqina,
yagxuma, yema, yahamba, yangena nabo ethempelini, ihamba igxumagxuma, imdumisa uNkulunkulu.
Abantu bonke bayibona ihamba, idumisa uNkulunkulu.
Kepha bayibona ukuthi iyona le ebihlala ngaseMnyango Omuhle wethempeli, inqiba, bagcwala ukumangala nokwesaba ngokwakwenzeke kuyo.
Isabambelele kuPhethro noJohane, bonke abantu bagijimela kubo emphemeni okuthiwa okaSolomoni, beshaqeke kakhulu.
UPhethro ekubona lokho wakhuluma kubantu wathi: “Madoda akwa-Israyeli, kungani nimangele ngalokhu futhi nisigqolozelelani sengathi simenze ngamandla ethu nangokukholwa kwethu ukuba ahambe na?
“UNkulunkulu ka-Abhrahama noka-Isaka nokaJakobe, uNkulunkulu wokhokho bethu uyidumisile iNceku yakhe uJesu enayikhaphela, nayiphika phambi kukaPilatu, yena esenqumile ukuyikhulula.
Kodwa nina namphika oNgcwele noLungileyo, nacela ukuba nikhululelwe umbulali,
nambulala oNgumthombo wokuphila, uNkulunkulu amvusayo kwabafileyo, thina esingofakazi balokho.
Ngokukholwa egameni lakhe lo enimbonayo nenimaziyo, yigama lakhe elimenze waqina, nokukholwa okungayo kumnike le mpilo phambi kwenu nonke.
“Manje, bazalwane, ngiyazi ukuthi nakwenza lokho ngokungazi njengababusi benu.
Kepha lokho uNkulunkulu akubikezele ngaphambilini ngomlomo wabo bonke abaphrofethi, ukuthi uKhristu wakhe uyakuhlupheka, ukugcwalise kanje.
Ngakho-ke phendukani, niguquke ukuba zithethelelwe izono zenu,
khona kuzakufika izikhathi zokuhlunyelelwa ezivela ebusweni beNkosi nokuba ithume uKhristu uJesu enimmiselweyo,
okufanele ukuba izulu limamukele, kuze kube yizikhathi zokubuyiselwa kwakho konke uNkulunkulu akhuluma ngakho ngomlomo wabaphrofethi bakhe abangcwele, kusukela emaphakadeni.
UMose impela wathi: ‘INkosi uNkulunkulu uyakunivusela umphrofethi onjengami kubazalwane benu, niyakukulalela konke akukhuluma kini.’
“Kuyakuthi wonke umuntu ongayukumlalela lowo mphrofethi, abhujiswe kubantu.
“Yebo, nabaphrofethi bonke, kusukela kuSamuweli nabamlandelayo, bonke ababekhulume, bamemezela ngalezo zinsuku.
Nina ningamadodana abaphrofethi nawesivumelwano uNkulunkulu asenza kokhokho benu, ethi ku-Abhrahama: ‘Ngolibo lwakho, iyakubusiswa imindeni yonke yomhlaba.’
“UNkulunkulu eseyivusile iNceku yakhe wayithumela kini kuqala ukuba anibusise ngokuniphendula, kube yilowo nalowo aphenduke ebubini bakhe.”
Kwathi besakhuluma nabantu, kwatheleka abaphristi nenduna yethempeli nabaSadusi,
benengwe kakhulu ngokufundisa kwabo abantu, nokumemezela ngoJesu ukuvuka kwabafileyo.
Bababamba, babafaka ejele kwaze kwaba lusuku olulandelayo, ngokuba kwase kuhlwile.
Kodwa abaningi abalizwayo izwi bakholwa, babebalelwa emadodeni ayizi-5 000.
Kwathi ngakusasa, kwabuthana eJerusalema ababusi, amalunga, izazimthetho,
u-Anase umphristi omkhulu, uKhayifase, uJohane, u-Aleksandru, nabo bonke abendlu yomphristi omkhulu;
babamisa phakathi kwabo, bababuza bathi: “Nikwenze lokhu ngaliphi igunya nangaliphi igama na?”
UPhethro egcwele uMoya oNgcwele, wathi kubo: “Babusi besizwe nani malunga,
uma sibuzwa namuhla ngomsebenzi omuhle owenzelwe umuntu ogulayo ukuthi uphiliswe kanjani,
makwazeke kini nonke nasesizweni sonke sakwa-Israyeli ukuthi ngegama likaJesu uKhristu waseNazaretha enambethela esiphambanweni, uNkulunkulu amvusayo kwabafileyo, kungaye lo muntu emi phambi kwenu, esindile.
Yena uyitshe elanqatshwa yinina bakhi, manje eseliyinhloko yegumbi.
“Ayikho insindiso ngomunye, ngokuba alikho elinye igama phansi kwezulu elinikiwe ebantwini, esimelwe ukusindiswa ngalo.”
Kwathi bebona isibindi sikaPhethro noJohane, futhi bazi ukuthi bangabantu abangafundile nabangaqeqeshiwe, bamangala, bazi nokuthi kade benoJesu,
kodwa akukho ababengakuphika lapho bembona nomuntu ophilisiweyo emi nabo.
Base bebayala ukuba baphumele phandle, bashiye umkhandlu, balulekana bodwa,
bethi: “Sizakwenzani ngalaba bantu na? Ngokuba kusobala kubo bonke abakhileyo eJesuralema ukuthi yibona abenze isibonakaliso esikhulu esingenakho ukusiphika.
Kodwa ukuze lokhu kungandi phakathi kwabantu, masibadonse ngendlebe, ukuthi bangalokothi baliphathe lelo gama kunoma ngubani.”
Base bebabiza, babadonsa ngendlebe ukuba bangakhulumi, futhi bangafundisi nakanye ngegama likaJesu.
Kepha uPhethro noJohane babaphendula, bathi kubo: “Nqumani nina ukuba kulungile yini ebusweni bukaNkulunkulu ukulalela nina kunoNkulunkulu,
ngokuba thina asinakuyeka ukukhuluma ngalokho esikubonileyo nesikuzwileyo.”
Sebebesabisile babadedela, ngokuba abazanga ukuthi bazobajesiza kanjani lokhu kwakunabantu, bonke bedumisa uNkulunkulu ngalokho okwakwenzekile.
Umuntu okwakwenziwe kuye leso sibonakaliso sokuphiliswa wayeseneminyaka eyevile kwengama-40.
Kuthe sebededelwe, baya kwabakubo; bababikela konke abaphristi abakhulu namalunga abakushilo kubo.
Sebezwile, benyusela izwi labo nganhliziyonye kuNkulunkulu, bathi: “Somandla, wena owenza izulu, umhlaba, ulwandle nakho konke okukukho,
nguWena owakhuluma ngoMoya oNgcwele ngomlomo kababa uDavide inceku yakho, wathi: “ ‘Kungani ukuba abezizwe baxokozele, nabantu bacebe okuyize na?
Amakhosi omhlaba aviva ndawonye, nababusi bahlangene ukumelana neNkosi kanye noGcotshiweyo wayo.’
“Ngokuba kuwo lo muzi, uHerode, uPhontiyu Pilatu, nabezizwe nabantu bakwa-Israyeli bahlangana bamelana neNceku yakho engcwele, uJesu owamgcobayo,
ukufeza lokho owawuyimisele ukuba ikwenze kwaphambilini, ngesandla nangecebo lakho ukuba kwenzeke.
Manje, Nkosi, bheka ukusongela kwabo, unike izinceku zakho ukuba zikhulume izwi lakho ngaso sonke isibindi,
wena welule isandla sakho ukuphulukisa, ukwenza izibonakaliso nezimangaliso ngegama leNceku yakho engcwele uJesu.”
Kwathi sebekhulekile, kwazanyazanyiswa indawo ababehlanganele kuyo, bonke bagcwaliswa nguMoya oNgcwele, bakhuluma izwi likaNkulunkulu ngesibindi.
Isixuku sabakholwayo sasinhliziyonye namphefumulo munye, akubanga bikho noyedwa owathi ngempahla yakhe, ingeyakhe, kodwa bahlanganyela kukho konke.
Abaphostoli bethula ngamandla amakhulu ubufakazi ngokuvuka kweNkosi uJesu; umusa omkhulu wawuphezu kwabo bonke.
Kwakungekho osweleyo phakathi kwabo, ngokuba bonke ababengabanikazi bamazwe noma bezindlu bathengisa ngakho, imali yalokho ababekuthengisile bayiletha,
bayibeka ngasezinyaweni zabaphostoli, kwaba yilowo nalowo wabelwa njengokuntula kwakhe.
Kwathi uJosefa owaqanjwa ngabaphostoli ngokuthi uBharnabha, okusho ukuthi indodana ekhuthazayo, engumLevi waseKhuphro ngokuzalwa,
enensimu, wathengisa ngayo, waletha imali, wayibeka ngasezinyaweni zabaphostoli.
Indoda ethile, egama layo kungu-Ananiya, kanye nomkayo uSafira, bathengisa ngendawo.
Kepha yagodla enye ingxenye yemali, nomkayo azi, yaletha ingxenye ethile, yayibeka ngasezinyaweni zabaphostoli.
UPhethro wayesethi: “Ananiya, kungani ukuba uSathane agcwalise inhliziyo yakho, uqambe amanga kuMoya oNgcwele, ugodle ingxenye yemali yezwe na?
Le ndawo ingakathengiswa bekungesiyo yini eyakho na? Lapho seyithengisiwe ibingekho yini emandleni akho na? Pho yini unqume ukwenza lobu bubi enhliziyweni yakho na? Awuqambanga nje amanga kubantu kodwa kuNkulunkulu.”
Kuthe u-Ananiya ezwa lawo mazwi, waqumbeka phansi, wafa. Bonke abezwa ngalokho behlelwa wukwesaba okukhulu.
Izinsizwa zasuka, zamsonga, zamkhiphela phandle, zamngcwaba.
Kwathi emuva kwesikhathi esingaba ngamahora amathathu, kwangena nomkakhe, wayengazi okwenzekileyo.
UPhethro wayesethi kuye: “Ngitshele ukuthi indawo niyithengise ngenani elingaka na?” Wathi: “Yebo, ngelingako.”
Kepha uPhethro wathi kuye: “Kungani nivumelene ngokulinga uMoya weNkosi na? Uyabona-ke, izinyawo zabangcwabe umyeni wakho zisemnyango, nawe-ke bazakukukhiphela phandle.”
Wawa ngokuphazima kweso ngasezinyaweni zikaPhethro, wafa. Izinsizwa zangena, zamfumana efile, zamkhiphela phandle, zamngcwaba nomyeni wakhe.
Ukwesaba okukhulu kwalehlela lonke ibandla nabo bonke abezwa ngalokho.
Kwenziwa izimangaliso nezibonakaliso eziningi kubantu, ngezandla zabaphostoli. Bonke babenhliziyonye besemphemeni kaSolomoni.
Kepha kwabanye abantu akukho namunye owaba nesibindi sokuzihlanganisa nabo, kodwa abantu babebazisa kakhulu.
Kwanezelwa abaningi abakholwa eNkosini, izinkumbi zabesilisa nabesifazane,
kangangokuthi baze bakhiphela phandle emigwaqweni abagulayo, bababeka emacansini nasezinhlakeni, ukuze kuthi lapho uPhethro edlula, isithunzi sakhe sibeleke abanye babo.
Kwabuthana nezindimbane zivela emizini ezungeze iJerusalema, zithwele abagulayo nabahlukunyezwa ngomoya abangcolileyo. Baphulukiswa bonke.
Kwase kusuka umphristi omkhulu, nabo bonke ababenaye beqembu labaSadusi, begcwele umona.
Babamba abaphostoli, babafaka ejele lombuso.
Kepha ingelosi yeNkosi yavula iminyango yejele ebusuku; isibakhiphile, yathi:
“Hambani, niye ethempelini, nikhulume kubantu bonke amazwi alokhu kuPhila.”
Sebezwile, bangena ethempelini entathakusa, bafundisa. Kepha kwafika umphristi omkhulu nayehamba nabo, babizela ndawonye umkhandlu namalunga wonke abantu bakwa-Israyeli, base bethumela ejele ukuba balethwe kubo.
Kepha izikhonzi zafika azabafumana ejele; zase zibuyela emuva, zabika,
zathi: “Ijele silithole livaliwe, nabaqaphi bemi eminyango, kepha sesivulile asitholanga muntu ngaphakathi.”
Kuthe lapho iwezwa lawa mazwi induna yethempeli nabaphristi abakhulu, bamangala ukuthi ngabe kwenzekeni.
Kepha kwafika omunye, wababikela wathi: “Amadoda ebeniwafake ejele asethempelini, afundisa abantu.”
Yaphuma-ke induna kanye nezikhonzi, zabaletha, hhayi ngempoqo, ngokuba babesaba abantu, funa bakhandwe ngamatshe.
Kuthe sebefikile, babamisa emkhandlwini; umphristi omkhulu wababuza,
wathi: “Asinidonsanga yini ngendlebe ukuba ningafundisi ngaleli gama, kodwa senigcwalise iJerusalema ngemfundiso yenu, futhi nizimisele ukwehlisela igazi lalo muntu phezu kwethu.”
Kodwa uPhethro nabaphostoli baphendula bathi: “Simelwe ukulalela uNkulunkulu kunabantu.
UNkulunkulu wokhokho bethu wamvusa uJesu enambulala nina ngokumphanyeka emthini.
Lowo, uNkulunkulu wamphakamisa ngakwesokunene sakhe ukuba abe yiNkosi noMsindisi, anike u-Israyeli ukuphenduka nokuthethelelwa kwezono.
Thina singofakazi balezo zinto kanye noMoya oNgcwele uNkulunkulu amnikile labo abamlalelayo.”
Kuthe sebekuzwile lokho bathukuthela, bafuna ukubabulala.
Kwase kusukuma omunye emkhandlwini, umFarisi ogama lakhe nguGamaliyeli, isazimthetho esihlonishwayo esizweni sonke, wayala ukuba laba abantu bakhishelwe phandle isikhashana;
wayesethi kubo: “Madoda akwa-Israyeli, cabangisisani ngalokho enizakukwenza kulaba bantu.
Ngokuba kulezi zinsuku ezedlule, kwasuka uThewuda wazenza umuntu omkhulu; waba nabalandeli, amadoda angaba ngama-400. Wabulawa, kwathi bonke abamlalelayo, bahlakazeka baphela nya.
Emva kwalowo, kwavela uJuda waseGalile ezinsukwini zokubalwa kwabantu; wadukisa abantu ukuba bamlandele; naye wabulawa, kwathi bonke abamlalelayo bahlakazeka.
Manje ngithi kini: hlukanani nalaba bantu, bayekeni phansi, ngokuba uma lokhu kungumsebenzi ovela kubantu, kuyakushabalala,
kodwa uma kuvela kuNkulunkulu, aniyukuba namandla okubachitha, funa mhlawumbe nifunyanwe ningabaphikisana noNkulunkulu.” Bamvumela-ke.
Sebebabizile abaphostoli, babashaya, babaxwayisa ngokuthi bangakhulumi ngegama likaJesu, base bebakhulula.
Ngakho-ke basuka phambi komkhandlu bethokoza, ngokuba betholakale bekufanele ukuthelwa ngehlazo ngenxa yalelo gama.
Abayekanga ukufundisa nokushumayela ivangeli ngoKhristu uJesu imihla ngemihla, ethempelini nasemakhaya.
Kwathi ngalezo zinsuku, abafundi sebanda, kwaba khona ukukhononda kulabo abakhuluma isiGriki, ngamaHebheru, ngokuthi abafelokazi bakubo bayancishwa uma kwabiwa imihla ngemihla.
Abali-12 babiza ibandla labafundi, bathi: “Akukuhle ukuba thina sishiye izwi likaNkulunkulu, sikhonze ematafuleni.
Qokani phakathi kwenu, bazalwane, amadoda ayisikhombisa anegama elihle, agcwele uMoya nokuhlakanipha, esiyakuwamisa ukuba enze lo msebenzi.
Kodwa thina sizakuzinikela ekukhulekeni nasenkonzweni yezwi.”
Leli lizwi lathakaselwa yilo lonke ibandla, base bekhetha uStefani, umuntu owayegcwele ukukholwa noMoya oNgcwele, uFiliphu, uPhrokhoro, uNikhanori, uThimoni, uPharmena, noNikholawu, oyiphroselithe lase-Antiyokhiya.
Babamisa phambi kwabaphostoli; bakhuleka, babeka izandla phezu kwabo.
Izwi likaNkulunkulu lasabalala, kwathi inani labafundi lakhula kakhulu eJerusalema, nesixuku esikhulu sabaphristi sayamukela inkolo.
UStefani, egcwele umusa namandla, wenza izimangaliso nezibonakaliso ezinkulu phakathi kwabantu.
Kepha kwasuka abanye besinagoge elibizwa ngokuthi elabaLibherithino, nabaseKhurene, abase-Aleksandriya nababevela eKhilikhiya nase-Asiya, baphikisana noStefani.
Kepha abakwazanga ukumelana nokuhlakanipha noMoya ayekhuluma ngakho.
Base beshusha amadoda ngasese ukuba athi: “Simzwile ekhuluma amazwi ahlambalazayo ngoMose nangoNkulunkulu.”
Bashusha abantu, amalunga, nezazimthetho ukuba batheleke kuye; bambamba, bamyisa emkhandlwini.
Base bemisa ofakazi bamanga abathi: “Lo muntu akayeki ukukhuluma amazwi amelene nale ndawo engcwele nangomthetho,
ngokuba simzwile ethi uJesu waseNazaretha uzakuyibhidliza le ndawo, aguqule namasiko esawanikwa nguMose.”
Bonke ababesemkhandlwini bamgqolozela uStefani, babona ubuso bakhe kungathi ubuso bengelosi.
Umphristi omkhulu wayesethi: “Ngabe impela lokhu kunjalo yini na?”
Yena wathi: “Madoda, bazalwane, nani bobaba, lalelani. UNkulunkulu wenkazimulo wabonakala kukhokho wethu u-Abhrahama eseMesophothamiya, engakathutheli eHarana,
wathi kuye: ‘Phuma ezweni lakini nasezihlotsheni zakho, uye ezweni engizakukhombisa lona.’
“Waphuma ezweni lamaKhaledi, wayokwakha eHarana. Emva kokufa kukayise, uNkulunkulu wamsusa lapho, wamhlalisa kuleli lizwe enakhe kulo nina manje.
Kepha akamnikanga ifa kulo, ngisho nesiqinti esingangonyawo, kodwa wethembisa ukuthi uzakumnika lona libe ngelakhe nenzalo yakhe, emva kwakhe, engakabi namntwana.
UNkulunkulu wakhuluma kanje, wathi: ‘Ulibo lwakhe luzakuba ngumfokazi ezweni lezizwe; bayakulugqilaza, baluphathe kabi iminyaka engama-400.
Kepha leso sizwe abayakuba yizigqila zaso; ngiyakusehlulela,’ kusho uNkulunkulu, ‘emveni kwalokho bayakuphuma, bangikhonze kule ndawo.’
“Wayesemnika isivumelwano sokusoka. Waba kanjalo-ke nguyise ka-Isaka, wamsoka ngosuku lwesishiyagalombili. U-Isaka wazala uJakobe, uJakobe wazala okhokho abali-12.
“Okhokho baba nomhawu ngoJosefa, base bethengisa ngaye eGibhithe, kodwa uNkulunkulu wayenaye.
Wamkhulula kuzo zonke izinhlupheko ezamehlelayo, wamupha umusa nokuhlakanipha phambi kukaFaro, iNkosi yaseGibhithe. UFaro wambeka ukuba abe ngumbusi eGibhithe nakuyo yonke indlu yakhe.
“Kepha kwafika indlala kulo lonke iGibhithe naseKhanani, nokuhlupheka okukhulu; okhokho kabakutholanga ukudla.
Kuthe uJakobe esezwile ukuthi kukhona ukudla eGibhithe, wayesethumela okhokho okokuqala.
Kwathi sebebuyela okwesibili, uJosefa waziveza kubafowabo, uFaro wayesaziswa ngomndeni kaJosefa.
UJosefa wathumela, walanda uyise uJakobe nabo bonke abakubo, abantu abangama-75.
UJakobe wehlela eGibhithe; wafela khona, yena nawokhokho.
Babuyiswa eShekhemu, babekwa ethuneni u-Abhrahama ayelithenge ngenani lesiliva kumadodana kaHamori eShekhemu.
“Kwathi sesisondele isikhathi sesithembiso uNkulunkulu asethembisa ku-Abhrahama, base banda ngokuphindiwe eGibhithe,
kwaze kwabusa enye inkosi eGibhithe eyayingamazi uJosefa.
Yona yasiphatha ngobuqili isizwe sakithi, yabahlukumeza okhokho ngokubaphoqa ukuba balahle izingane zabo zingaphili.
“Ngaleso sikhathi kwazalwa uMose; wayethandeka kuNkulunkulu. Wondliwa endlini yakwabo izinyanga ezintathu.
Eselahliwe, watholwa yindodakazi kaFaro, yazikhulisela yena, waba yindodana yayo.
UMose wafundiswa konke ukuhlakanipha kwabaseGibhithe, waba namandla ngamazwi nangemisebenzi yakhe.
“Kuthe eseneminyaka engama-40 yobudala, kwafika enhliziyweni yakhe ukuba akayobona abantu bakubo, abantwana bakwa-Israyeli.
Kuthe ebona umuntu ephathwa kabi, wamvikela, wamphindiselela ocindezelweyo, wambulala owaseGibhithe.
Wayenethemba lokuthi abafowabo bayakuqonda ukuthi uNkulunkulu ubalethela inkululeko ngesandla sakhe, kodwa abakuqondanga lokho.
Ngakusasa wafica abakubo belwa, wazama ukubalamula, ukuze babuyisane, wathi: ‘Madoda, nina ningabandawonye, pho kungani nilimazana na?’
“Kepha lowo owayelimaza owakubo wamhlohloloza, wathi: ‘Ngubani okubeke ukuba ngumbusi nomehluleli phezu kwethu na?
Usufuna ukungibulala nami njengokuba ubulele umGibhithe izolo na?’
“UMose ezwa lokho, wabaleka, wayokuba ngumfokazi kwaMidiyani, lapho afika wazala khona amadodana amabili.
“Kuthe sekwedlule iminyaka engama-40, kwabonakala kuye esehlane elingasentabeni iSinayi, ingelosi iselangabini lomlilo esihlahleni.
UMose ewubona lowo mbono wamangala. Kwathi esondela ukuba abhekisise, wezwa izwi leNkosi lithi:
‘NginguNkulunkulu woyihlo, uNkulunkulu ka-Abhrahama noka-Isaka nokaJakobe.’ “UMose wathuthumela, akaba nasibindi sokubhekisisa.
“INkosi yayisithi kuye: ‘Khumula izimbadada ezinyaweni zakho, ngokuba indawo omi kuyo ingumhlabathi ongcwele.
Ngibonile nokukubona ukuhlushwa kwesizwe sami esiseGibhithe, ngizwile ukububula kwaso; sengehlile ukuba ngibakhiphe. Woza khona manje, ukuze ngikuthumele eGibhithe.’
“UMose lowo abamalayo bethi: ‘Ubekwe ngubani ukuba ube ngumbusi nomehluleli na?’ nguyena kanye uNkulunkulu amthuma ngesandla sengelosi eyabonakala kuye esihlahleni, ukuba abe ngumbusi nomhlengi wabo.
Nguye lo owabakhipha eGibhithe enzile izimangaliso nezibonakaliso, nasoLwandle Olubomvu, nasehlane iminyaka engama-40.
“Nguye lo Mose owathi kwabakwa-Israyeli: ‘UNkulunkulu uyakunivusela umphrofethi onjengami kubafowenu.’
“Nguye lowo owayesebandleni ehlane nengelosi eyakhuluma naye entabeni iSinayi kanye nokhokho, nowemukela amazwi okuphila ukuze aninike wona.
“Kepha okhokho abavumanga ukumlalela, kodwa bamsunduzela eceleni, babuyela emuva eGibhithe ngezinhliziyo zabo,
bathi ku-Aroni: ‘Senzele onkulunkulu abazakuhamba phambi kwethu, ngokuba uMose lo owasikhipha eGibhithe, asazi ukuthi wehlelwe yini.’
“Benza ithole ngaleyo mihla, bethula umhlatshelo esithombeni, bathokoza emsebenzini wezandla zabo.
Kepha uNkulunkulu wabafulathela, wabanikela ukuba bakhonze ibandla lezulu, njengokuba kulotshiwe encwadini yabaphrofethi, ukuthi: “ ‘Nanginika yini imihlatshelo neminikelo iminyaka engamashumi amane nisehlane, nina ndlu ka-Israyeli na?
Qha, nathatha ithende likaMolokhi nenkanyezi kankulunkulu uRemfani, imifanekiso enayenza ukuba nikhuleke kuyo. Ngiyakunidingisela ngale kweBhabhiloni.’
“Okhokho bethu babenethende lobufakazi ehlane njengalokhu kwakuyale uNkulunkulu ngoMose ukuba alenze ngomfanekiso ayemkhobise wona.
Okhokho bethu noJoshuwa balemukela, balingenisa ezweni labezizwe azixosha phambi kobaba, kwaze kwaba semihleni kaDavide,
owafumana umusa phambi kukaNkulunkulu, wacela ukwenzela uNkulunkulu kaJakobe idokodo.
Kepha uSolomoni wamakhela uNkulunkulu indlu.
“Kepha oPhezukonke akahlali ezindlini ezakhiwe ngezandla, njengokuba esho umphrofethi, ethi:
“ ‘Izulu liyisihlalo sami sobukhosi, umhlaba uyisenabelo sezinyawo zami; luhlobo luni lwendlu oyakungakhela lona’, kusho iNkosi. ‘Iyiphi indawo yami yokuphumula na?
Akusona yini isandla sami esenze konke lokhu na?’
“Nina bontamolukhuni, abangasokile ezinhliziyweni nasezindlebeni, nimelana njalo noMoya oNgcwele, nani nifuze okhokho benu.
Yimuphi kubaphrofethi ongahlushwanga ngokhokho benu na? Bababulala ababememezela phambilini ukuza koLungileyo, nani manje seningabakhapheli nababulali bakhe.
Nina enemukela umthetho ngokuyala kwezingelosi, kodwa anawugcina.”
Bekuzwa lokho, bahlabeka ezinhliziyweni, bamgedlela amazinyo.
Kepha yena, egcwele uMoya oNgcwele, wagqolozela ezulwini, wabona inkazimulo kaNkulunkulu, noJesu emi ngakwesokunene sikaNkulunkulu,
wathi: “Bheka, ngibona izulu livuliwe, neNdodana yomuntu imi ngakwesokunene sikaNkulunkulu.”
Base bekhamuluka ngezwi elikhulu, bavala izindlebe, bamthelekela kanyekanye,
bamkhiphela ngaphandle komuzi, bamkhanda ngamatshe. Ofakazi babeka izingubo zabo ngasezinyaweni zensizwa ogama layo kuthiwa nguSawula.
UStefani bamkhanda ngamatshe, yena ekhuleka, ethi: “Nkosi uJesu, yemukela umoya wami.”
Wayeseguqa phansi, wamemeza ngezwi elikhulu, wathi: “Nkosi, ungababaleli lesi sono.” Esekushilo lokho walala ubuthongo.
USawula wayevumelene nabo ngokuthi akabulawe. Ngalolo lusuku kwaba nokuhlushwa kwebandla okukhulu eJerusalema. Abazalwane bonke bahlakazekela ezifundeni eJudiya naseSamariya; kwasala abaphostoli kuphela.
Amadoda akholwayo amngcwaba uStefani, amkhalela isililo esikhulu.
Kodwa uSawula walichitha ibandla, engena izindlu ngezindlu, ehudula abesilisa nabesifazane; ebafaka ejele.
Abahlakazekileyo bahamba beshumayela izwi levangeli.
UFiliphu wehlela emzini eSamariya, wabashumayeza uKhristu.
Izixuku zalalela nganhliziyonye okwakushiwo nguFiliphu, zizwa, futhi zibona izibonakaliso ayezenza.
Kwaphuma imimoya engcolileyo kwabaningi ababenayo, iphuma imemeza ngezwi elikhulu. Kwaphiliswa abaningi abafe uhlangothi, nabayizinyonga.
Kwakukhona ukuthokoza okukhulu kulowo muzi.
Kwakukhona indoda ethile igama layo kunguSimoni, eyayikade yenza imilingo kulowo muzi, imangalisa abantu abaningi baseSamariya, izishaya umuntu omkhulu.
Babemnaka bonke, kusukela kwabancane kuya kwabadala, bethi: “Lo ungamandla kaNkulunkulu abizwa ngokuthi Makhulu.”
Babemnakile ngoba isikhathi eside wayebamangalisa ngemilingo yakhe ayenzayo.
Kepha kwathi ukuba bakholwe yivangeli elashunyayelwa nguFiliphu ngombuso kaNkulunkulu nangegama likaJesu uKhristu, babhabhadiswa abesilisa nabesifazane.
USimoni naye wakholwa; esebhabhadisiwe wamlandela uFiliphu, emangaliswa izibonakaliso nemisebenzi emikhulu yamandla eyayenzeka.
Kuthe lapho abaphostoli eJerusalema sebezwile ukuthi abaseSamariya balemukele izwi likaNkulunkulu, bathumela kubo uPhethro noJohane.
Kuthe sebefikile, babakhulekela ukuba bamukele uMoya oNgcwele,
ngokuba wayengakehleli nakoyedwa kubo, kodwa babebhabhadiswe egameni leNkosi uJesu kuphela.
Ngakho-ke babeka izandla phezu kwabo, base bemukela uMoya oNgcwele.
Kepha uSimoni, esebonile ukuthi ngokubekwa kwezandla zabaphostoli abantu bemukela uMoya, waletha imali kubo,
wathi: “Ngipheni nami leli gunya ukuze yilowo nalowo engibeka izandla phezu kwakhe, amukele uMoya oNgcwele.”
Kepha uPhethro wathi kuye: “Isiliva lakho malibhubhe kanye nawe, ngokuba ucabanga ukuthi isipho sikaNkulunkulu singathengwa ngemali.
Awunasabelo nalifa kuleli lizwi, ngokuba inhliziyo yakho ayilungile phambi kukaNkulunkulu.
Ngakho-ke phenduka kulobu bubi, ukhuleke eNkosini, hleze ikuthethelele umdlinzo wenhliziyo yakho,
ngokuba ngiyabona ukuthi ugcwele umona futhi uyisigqila sobubi.”
USimoni wayesephendula ethi: “Nginxuseleni nina eNkosini, ukuze ngingehlelwa yilokho enikushilo.”
Kuthe sebefakazile, balikhuluma izwi leNkosi, base bebuyela eJerusalema, bashumayela ivangeli emizaneni eminingi yabaseSamariya.
Ingelosi yeNkosi yakhuluma kuFiliphu, yathi: “Suka uye ngaseningizimu, endleleni ephuma eJerusalema yehlele eGaza, le ndawo iyihlane.”
Wasuka-ke wahamba. Wase ebona indoda yase-Etopiya, umthenwa, isikhulu sikaKhandakhe, indlovukazi yase-Etopiya, eyayengamele yonke ingcebo yendlovukazi. Yayikade ize eJerusalema ukuzokhuleka.
Isibuyela emuva, yayihleli enqoleni yayo, ifunda umphrofethi u-Izaya.
UMoya wathi kuFiliphu. “Sondela, uhambisane nale nqola.”
UFiliphu wagijima wasondela kuyo, wayizwa ifunda umphrofethi u-Izaya, wayesethi kuyo: “Uyakuqonda yini lokho okufundayo na?”
Yona yathi: “Ngingakuqonda kanjani, uma kungekho ongichasisela khona?” Yayisimnxusa uFiliphu ukuba agibele enqoleni ahlale nayo.
Kepha isahlukwana sombhalo eyayisifunda yilesi esithi: “Njengewundlu liyiswa ekuhlatshweni, nanjengemvu ithule phambi komgundi wayo, akawuvulanga umlomo wakhe.
Ekudunyazweni kwayo, ukwehlulelwa kwakhe kwasuswa. Ngubani oyakulanda ngesizukulwane sakhe na? Ngokuba ukuphila kwakhe kuyasuswa emhlabeni.”
Umthenwa wathi kuFiliphu: “Ngiyacela, umphrofethi ukukhuluma ngobani lokhu? Ngabe uzisho yena noma ukhuluma ngomunye na?”
UFiliphu wakhuluma naye, eqala kulowo mbhalo; wamshumayeza ivangeli ngoJesu.
Besahamba endleleni, bafika emanzini. Umthenwa wathi: “Nanka phela amanzi; kwalani ukuba ngibhabhadiswe na?”
UFiliphu wathi kuye: “Uma ukholwa ngenhliziyo yonke, kungenziwa.” Waphendula wathi: “Ngiyakholwa ukuthi uJesu uKhristu uyiNdodana kaNkulunkulu.”
Wayeseyala ukuba ime inqola. Umthenwa noFiliphu behla baya emanzini, uFiliphu wayesembhabhadisa umthenwa.
Kuthe sebephumile emanzini, uMoya weNkosi wamhlwitha uFiliphu, umthenwa akabe esambona, kodwa waqhubeka nohambo lwakhe ethokozile.
Kepha uFiliphu wafunyanwa e-Azothu, ehamba eshumayela ivangeli kuyo yonke imizi, waze wayofika eKhesariya.
USawula esabhodla umlilo, esongela ukubulala abafundi beNkosi, waya kumphristi omkhulu,
wacela kuye izincwadi zokuya eDamaseku emasinagogeni, ukuze kuthi uma efumana abantu baleyo Ndlela, abesilisa nabesifazane, abayise eJerusalema beboshiwe.
Kepha esaqhubeka nohambo lwakhe, esesondela eDamaseku, kwabanika ngokuphazima kweso nxazonke ukukhanya okuvela ezulwini.
Wawela phansi emhlabathini, wezwa izwi lithi kuye: “Sawula, Sawula, ungihluphelani na?”
Kepha wathi: “Ungubani, Nkosi?” Wayesethi: “NginguJesu omhluphayo.
Kepha vuka ungene emzini, uzakutshelwa lokho okumele ukwenze.”
Amadoda ayehamba naye ayemi ekhungathekile, ngokuba alizwa izwi, kodwa awabonanga muntu.
USawula wayesevuka phansi, kepha kuthe evula amehlo akaze abona lutho. Base bembamba ngesandla, bamyisa eDamaseku.
Izinsuku zaba ntathu engaboni, engadli, futhi engaphuzi.
Kwakukhona eDamaseku umfundi othile, igama lakhe kungu-Ananiya. INkosi yakhuluma kuye ngombono, yathi: “Ananiya!” Yena wathi: “Ngilapha, Nkosi.”
INkosi yayisithi kuye: “Suka uye emgwaqweni okuthiwa uQondile, ufune endlini kaJuda umuntu, igama lakhe nguSawula waseTharsu, ngokuba uyakhuleka;
ubonile embonweni indoda, egama layo ngu-Ananiya, ingena, ibeka izandla phezu kwakhe ukuba abone.”
Kepha u-Ananiya waphendula wathi: “Nkosi, ngizwile ngabaningi ngaleyo ndoda konke okubi ekwenzile kwabangcwele bakho eJerusalema;
nalapha unegunya alithole kubaphristi abakhulu lokuzobopha bonke abakhuleka egameni lakho.”
Kepha iNkosi yathi kuye: “Hamba, ngokuba lo uyisitsha sami esikhethiweyo sokuphatha igama lami phambi kwabezizwe, emakhosini, nakubantu bakwa-Israyeli.
Ngokuba ngizakumbonisa ukuthi kumele ahlupheke kangakanani ngenxa yegama lami.”
U-Ananiya wahamba, wangena endlini, wabeka izandla phezu kukaSawula, wathi: “Sawula, mzalwane, iNkosi uJesu ebonakale kuwe endleleni obuza ngayo, ingithumile ukuba ubuye ubone, ugcwaliswe ngoMoya oNgcwele.”
Kwavuthuluka masinyane emehlweni akhe okungathi yinkwethu, wayesebona; esesukumile, wabhabhadiswa.
Kuthe esedlile, abuya amandla. Wahlala nabafundi baseDamaseku izinsuku ezithile.
Kwathi kungakapholi maseko, wayeseshumayela ngoJesu emasinagogeni, ukuthi Yena uyiNdodana kaNkulunkulu.
Bonke ababemlalele bamangala, bathi: “Lo akusiye yini owabhubhisa abakhuleka kuleli gama eJerusalema? Nalapha akezile yini ngenhloso yokuba abaqhube beboshiwe abayise kubaphristi abakhulu na?”
Kepha uSawula wadlondlobala ngamandla; bashaqeka abaJuda ababehlala eDamaseku, eqinisa ukuthi lowo unguKhristu.
Kuthe sekudlule izinsuku eziningi, abaJuda benza icebo lokuba bambulale.
Kepha icebo labo laziwa nguSawula. Babemlindela ngisho nasemasangweni, imini nobusuku, ukuze bambulale.
Kepha abafundi bamshushumbisa ebusuku, bamehlisa ogangeni bemfake eqomeni.
Kuthe esefikile eJerusalema, wazama ukuzihlanganisa nabafundi, kodwa bonke babemesaba, bengakholwa ukuthi ungumfundi.
Kepha uBharnabha wamthatha, wamyisa kubaphostoli, wabalandisa ukuthi uyibonile iNkosi endleleni, nokuthi ikhulumile kuye, nokuthi wayeshumayele kanjani ngesibindi ngegama likaJesu eDamaseku.
Wayenabo eJerusalema, engena ephuma, ekhuluma ngesibindi ngegama leNkosi,
wayekhuluma futhi ephikisana nabaJuda abakhuluma isiGriki, kepha bazama ukumbulala.
Kwathi ukuba abazalwane bakuzwe lokho bamehlisela eKhesariya, base bemthumela eTharsu.
Ngakho-ke ibandla laba nokuthula kulo lonke iJudiya, eGalile, naseSamariya, lakheka, lihamba ngokuyesaba iNkosi, nangenduduzo kaMoya oNgcwele, likhula kakhulu.
UPhethro ehambela izindawo zonke, wehlela nakwabangcwele ababakhe eLida.
Wafumana lapho umuntu othile ogama lakhe kungu-Eneya, owayeselale ecansini iminyaka eyisishiyagalombili, efe uhlangothi.
UPhethro wathi kuye: “Eneya, uJesu uKhristu uyakuphilisa; vuka, wendlule icansi lakho.” Wayesevuka ngokushesha.
Bonke labo abakhe eLida naseSarona bambona, baphendukela eNkosini.
EJopha kwakukhona owesifazane othile okholwayo, ogama lakhe linguThabitha, okungukuthi uma lihunyushwa uDokhasi; wayenemisebenzi eminingi emihle, futhi abela abampofu izipho.
Kwathi ngalezo zinsuku wagula, wafa. Bamgeza base bembeka ekamelweni eliphezulu.
Nokho-ke iLida lalakhelene neJopha, ngakho-ke abafundi sebezwile ukuthi uPhethro ukhona lapho, bathumela kuye amadoda amabili, bamcela bathi: “Yiza kithi ngokushesha, ungalibali.”
Wayesesuka uPhethro, wahamba nabo. Esefikile, bamyisa ekamelweni eliphezulu; bonke abafelokazi bema eduze kwakhe bekhala, bembonisa izembatho nezingubo ezazenziwe nguDokhasi esaphila.
Kepha uPhethro esebakhiphele ngaphandle bonke, waguqa ngamadolo, wakhuleka, wayesephendukela esidunjini, wathi: “Thabitha, vuka!” Wavula amehlo akhe, wabona uPhethro, wayesehlala.
UPhethro wambamba ngesandla, wamsukumisa, wayesebiza abangcwele nabafelokazi, wambeka phambi kwabo ephile saka.
Lokho kwezwakala kulo lonke iJopha; abaningi bakholwa yiNkosi.
Wayesehlala izinsuku eziningi eJopha kwaSimoni, umshuki wezikhumba.
Kwakukhona indoda ethile eKhesariya, igama layo kunguKhorneliyu, iyinduna yekhulu yebutho okuthiwa elase-Ithaliya.
Wayengumuntu okholwayo nomesabayo uNkulunkulu kanye nabendlu yakhe yonke. Wayabela abantu abampofu izipho eziningi, ekhuleka kuNkulunkulu engaphezi.
Waba nombono lapho abona kuwo ngokusobala ingelosi kaNkulunkulu ifika kuye, cishe ngehora lesishiyagalolunye emini, ithi: “Khorneliyu!”
Wayigqolozela enovalo, wathi: “Kwenzenjani, Nkosi na?” Yathi kuye: “Imikhuleko yakho nokwabela kwakho abampofu izipho kwenyukile, kwaba yisikhumbuzo phambi kukaNkulunkulu.
Ngakho-ke thumela amadoda eJopha, ayobiza uSimoni othile, okuthiwa nguPhethro;
ungenise emzini kaSimoni othile, umshuki wezikhumba, indlu yakhe ingasolwandle.”
Isihambile ingelosi ebikhuluma naye, wabiza ababili kwabendlu yakhe nebutho elikholwayo kulawo ayeyizinceku zakhe,
wabachazela konke, wayesebathumela eJopha.
Kuthe ngakusasa besahamba labo, sebesondela emzini, uPhethro wenyukela phezu kwendlu ukuba ayokhuleka ngehora lesithupha.
Walamba, wafuna ukudla, kodwa kwathi besamlungisela wafikelwa yisiyezi.
Wabona izulu livulekile kunesitsha esithile sehla sinjengendwangu enkulu, sehliselwa emhlabeni ngamachopho amane.
Kwakukhona kuso izilwane zomhlaba ezinhlobonhlobo ezinezinyawo ezine, nezinwabuzelayo nezinyoni zezulu.
Kwezwakala izwi lithi kuye: “Vuka, Phethro; hlaba, udle.”
Kepha uPhethro wathi: “Qha, Nkosi, ngokuba selokhu kwathi nhlo angikaze ngidle okuyichilo nokungcolileyo.”
Izwi laphinda ngokwesibili lathi kuye: “Ungasho ukuthi kungcolile lokho uNkulunkulu akuhlambululile!”
Lokhu kwenzeka kwaze kwaba kathathu, isitsha sase senyuselwa ezulwini ngokuphazima kweso.
Esamangele uPhethro ukuthi lo mbono awubonile ngabe uchaza ukuthini, amadoda ayethunywe nguKhorneliyu, ayesemi ngasesangweni, emva kokuba esebuzile ukuthi ngabe yiyo yini indlu kaSimoni.
Amemeza, ebuza ukuthi ngabe uSimoni okuthiwa nguPhethro ungenisile yini lapho.
Kuthe uPhethro esazindla ngombono, uMoya wathi kuye: “Amadoda amathathu ayakufuna;
sukuma, wehle, uhambe nawo, ungangabazi, ngokuba yiMina engiwathumileyo.”
Esehlile uPhethro, wathi kula madoda: “Yimina enimfunayo; ngabe nize ngaludaba luni lapha na?”
Athi: “UKhorneliyu induna yekhulu, indoda elungileyo nemesabayo uNkulunkulu, futhi enegama elihle esizweni sonke sabaJuda, uyalwe yingelosi engcwele ukuba akubize, uye endlini yakhe, ukuze ezwe amazwi avela kuwe.”
USimoni wayesewabiza, wawangenisa endlini yakhe. Ngakusasa wasuka wahamba nawo, ephelezelwa ngabazalwane abathile baseJopha.
Kwathi ngosuku olulandelayo bafika eKhesariya. UKhorneliyu wayebalindele, esememe izihlobo nabangani bakhe abakhulu.
Kuthe uPhethro esezofika khona, uKhorneliyu wamhlangabeza, wawa ngobuso, wathi mbo phansi ngasezinyaweni zikaPhethro, wakhuleka.
Kepha uPhethro wamsukumisa ethi kuye: “Sukuma, nami ngingumuntu nje.”
Esakhuluma naye, wangena, wafica abantu abaningi bebuthene lapho.
Wathi kubo: “Niyazi ukuthi akuvunyelwe ukuba umuntu ongumJuda ahlangane noma ahambelane nowesinye isizwe, kodwa uNkulunkulu ungitshengisile ukuba ngingasho nakoyedwa ngithi unechilo noma ungcolile.
Ngakho-ke angizange ngenqabe, ngibiziwe, ngeza. Ngakho-ke ngiyabuza ukuthi ungibizeleni na?”
UKhorneliyu wathi: “Kuthe ngikhuleka ngehora lesishiyagalolunye endlini yami, ezinsukwini ezine ezedlule, ngabonasekumi phambi kwami indoda eyayembethe ingubo ekhazimulayo,
yathi: ‘Khorneliyu, kuzwakele ukukhuleka kwakho, nokwabela kwakho abampofu izipho, kukhunjuliwe phambi kukaNkulunkulu.
Ngakho, thumela eJopha, ubize uSimoni okuthiwa nguPhethro; ungenise endlini kaSimoni, umshuki wezikhumba, ngasolwandle.’
“Ngase ngithumela kuwe khona manjalo; wenze kahle-ke wafika. Manje sesilapha sonke phambi kukaNkulunkulu ukuba sizwe konke okuyalelwe yiNkosi.”
UPhethro wayesethatha ekhuluma, ethi: “Impela kuyangicacela ukuthi uNkulunkulu akabheki ubuso bomuntu,
kodwa ezizweni zonke lowo omesabayo nowenza ukulunga uyemukeleka kuye.
Walithumela izwi kubantu bakwa-Israyeli, eshumayela ivangeli lokuthula ngaye uJesu uKhristu; okunguYena oyiNkosi yabo bonke.
Niyalazi izwi elamenyezelwa kulo lonke iJudiya, elaliqale eGalile, emva kombhabhadiso ayewushumayele uJohane.
Lelo lizwi lalithi: uNkulunkulu wamgcoba uJesu waseNazaretha ngoMoya oNgcwele nangamadla, owahamba enza okuhle, ephilisa bonke ababephansi kwamandla kaSathane, ngokuba uNkulunkulu wayenaye.
“Thina singofakazi bazo zonke izinto azenzayo ezweni labaJuda naseJerusalema, Yena lo bambulala ngokumphanyeka emthini.
UNkulunkulu wamvusa ngosuku lwesithathu, wamenza ukuba abonakale,
hhayi kubantu bonke, kodwa kithina esingofakazi ababekhethwe nguNkulunkulu phambilini, esasidla siphuza naye, emva kokuba esemvusile kwabafileyo.
Wasiyala ukuba sishumayele kubantu, sifakaze ukuthi nguye omiswe nguNkulunkulu ukuba abe nguMahluleli wabaphilayo nabafileyo.
Nguye, bonke abaphrofethi abafakaza ngaye ukuthi bonke abakholwa nguye bayakwemukela ukuthethelelwa kwezono ngegama lakhe.”
Esakhuluma uPhethro lawo mazwi, uMoya oNgcwele wehlela kubo bonke ababelilalele izwi.
Abasokileyo abakholwayo ababefike noPhethro bamangala kakhulu bebona ukuthi isipho sikaMoya oNgcwele sithululelwe naphezu kwabezizwe.
Ngokuba babezwa bekhuluma ngezilimi, betusa uNkulunkulu. UPhethro wayesephendula ethi:
“Ukhona yini ongenqaba namanzi ukuba babhabhadiswe laba abamukele uMoya oNgcwele njengathi na?”
Wayeseyala ukuba babhabhadiswe egameni leNkosi. Base bemncenga ukuba ahlale nabo izinsukwana.
Abaphostoli nabazalwane baseJudiya bezwa ukuthi nabezizwe balemukele izwi likaNkulunkulu.
Kepha kuthe ukuba uPhethro enyukele eJerusalema, abasokileyo baphikisana naye,
bathi: “Ungene emzini wabantu abangasokile, wadla nabo!”
Kepha uPhethro waqala wabalandisa konke ukusuka nokuhlala, wathi:
“Bengisemzini eJopha, ngikhuleka; ngafikelwa yisiyezi, ngabona umbono, kwehla isitsha esithile sinjengendwangu enkulu, sehliswa ezulwini ngamachopho amane, saze safika kimi.
Ngasibhekisisa, ngasigqolozela, ngabona izilwane zomhlaba ezinezinyawo ezine, izilo zasendle, nezinwabuzelayo, nezinyoni zezulu.
Ngezwa izwi lithi kimi: ‘Sukuma, Phethro; hlaba, udle.’
“Kepha ngathi: ‘Qha, Nkosi, ngokuba okuyichilo nokungcolileyo akukaze kungene emlonyeni wami.’
“Nokho izwi elivela ezulwini laphendula ngokwesibili, lathi: ‘Ungasho ukuthi kungcolile lokho uNkulunkulu akuhlambululileyo.’
“Lokho-ke kwenzeka kwaze kwaba kathathu, konke kwabuye kwenyuselwa ezulwini.
“Ngaso leso sikhathi kwema amadoda amathathu phambi kwendlu esasikuyo, ethunywe kimi, evela eKhesariya.
UMoya wayesethi kimi angihambe nawo ngingangabazi ngalutho. Bangiphelezela laba bazalwane abayisithupha, saze sayongena endlini yaleyo ndoda.
Yasibikela ukuthi yayibone ingelosi imi endlini yayo, ithi: ‘Thumela eJopha, ulande uSimoni okuthiwa nguPhethro,
uzakukutshela amazwi ozakusindiswa ngawo, wena nabo bonke abendlu yakho.’
“Ngathi ngisaqala ukukhuluma, uMoya oNgcwele wehlela phezu kwabo njengalokhu kwenzeka nakithina ekuqaleni.
Ngase ngilikhumbula izwi iNkosi eyalikhuluma, ithi: ‘UJohane wayebhabhadisa ngamanzi, kodwa nina nizakubabhabhadisa ngoMoya oNgcwele.’
“Ngakho-ke uma uNkulunkulu ebanikile isipho njengathi esakholwa yiNkosi uJesu uKhristu, pho ngingubani ukuba ngivimbe uNkulunkulu na?”
Sebekuzwile lokho, bathula du, badumisa uNkulunkulu, bethi: “Impela uNkulunkulu ubanikile nabezizwe ukuphendukela ekuphileni.”
Kepha labo ababehlakazekile ngenxa yokuhlushwa okwaqala ngoStefani, bahamba baze bayofika eFenikhe, eKhuphro, nase-Antiyokhiya, bengakhulumanga zwi nakoyedwa, ngaphandle kwabaJuda.
Kepha abanye kubo, amadoda ayevela eKhuphro naseKhurene, kwathi ukuba bafike e-Antiyokhiya, bakhuluma nakumaGriki, beshumayela ivangeli ngeNkosi uJesu.
Isandla seNkosi sasinabo, abantu abaningi kakhulu bakholwa, baphendukela eNkosini.
Umbiko ngabo wafinyelela ezindlebeni zebandla laseJerusalema, lathumela uBharnabha ukuba aye e-Antiyokhiya.
Esefikile, wabona umusa kaNkulunkulu, wathokoza, wabagqugquzela bonke ukuba bazinikele ngenhliziyo, banamathele eNkosini.
Wayeyindoda elungile, egcwele uMoya oNgcwele nokukholwa; kwenezelwa eNkosini abantu abaningi.
UBharnabha wayesedlulela eTharsu eyofuna uSawula.
Kwathi ukuba amfumane, wamyisa e-Antiyokhiya. Kwenzeka ukuba bahlanganyele ebandleni isikhathi esiwunyaka, befundisa abantu abaningi. Kwaqala-ke e-Antiyokhiya ukuba abafundi kuthiwe ngamaKhristu.
Ngalezo zinsuku abaphrofethi behlela e-Antiyokhiya bevela eJerusalema.
Kwase kusukuma omunye wabo, ogama lakhe kungu-Agabhu, wabikezela ngoMoya ukuthi kuzakubhoka indlala enkulu ezweni lonke, lokho okwenzeka ngesikhathi sikaKlawudiyu.
Abafundi bazimisela ukuba kube yilowo nalowo ngangamandla akhe, bathumele okokusiza abazalwane eJudiya.
Bonke bakwenza, bakuthumela emalungeni ngesandla sikaBharnabha noSawula.
Ngaleso sikhathi uHerode inkosi welula isandla sakhe ukuba ahluphe abathile bebandla.
Wabulala ngenkemba uJakobe umfowabo kaJohane.
Esebonile ukuthi lokhu kuyabathokozisa abaJuda, waqhubeka wabamba noPhethro. Kwakuyizinsuku zezinkwa ezingenamvubelo.
Esembambile, wamfaka etilongweni, wamnikela emaviyweni amane, yilelo nalelo linamabutho amane, ukuba amlinde, ehlose ukuba emuva kwePhasika, amkhuphulele kubantu.
Ngakho-ke uPhethro wagqunywa ejele. Ibandla lamkhulekela ngesineke kuNkulunkulu.
Kwathi ngosuku uHerode ayehlose ukumkhuphula ngalo amyise kubantu, ngalobo busuku uPhethro walala phakathi kwamabutho amabili, eboshwe ngamaketanga amabili, kukhona nabalindi phambi komnyango ababeqaphe ijele.
Nakho-ke sekufika ingelosi yeNkosi, kwakhanya bha ejele. Ingelosi yamthinta ohlangothini uPhethro, yamvusa ithi: “Sukuma ngokushesha.” Ayesewa amaketanga ezandleni zakhe.
Ingelosi yathi kuye: “Gqoka, ufake nezicathulo zakho.” Wenza kanjalo; yayisithi kuye: “Yembatha ingubo yakho, ungilandele.”
Waphuma, wayilandela; wayengazi ukuthi lokhu okwenzekayo ngengelosi kuyiqiniso, kodwa wayecabanga ukuthi ubona umbono nje.
Sebedlulile kubalindi bokuqala nakwabesibili, bafika esangweni lensimbi eliya emzini, elazivulekela ngokwalo, baphuma, badlula umgwaqo owodwa, ingelosi yayisimshiya ngokushesha.
Isisangulukile ingqondo kaPhethro, wathi: “Manje sengiyazi ngokweqiniso ukuthi iNkosi ithumele ingelosi yayo, ingikhululile esandleni sikaHerode nakukho konke okubhekwe yisizwe sabaJuda.”
Sekumkhanyele lokho, wafika endlini kaMariya, unina kaJohane okuthiwa uMakhu, lapho kwakubuthene khona abaningi bekhuleka.
Kwathi esengqongqozile esivalweni sesango, kweza intombazana ukuba ilalele; igama layo kunguRoda.
Kuthe ukuba ilizwe izwi likaPhethro ayavula esangweni ngenxa yokuthokoza, kodwa yagijima yayobika ukuthi uPhethro umi ngasesangweni.
Kepha bathi kuyo: “Uyahlanya.” Kepha yagcizelela ithi: “Ngempela kunjalo.” Bona bathi: “Yingelosi yakhe.”
Kepha uPhethro waqhubeka engqongqoza. Kuthe sebevulile babona ukuthi nguye impela, bamangala.
Esebathulisile ngesandla, wabalandisa ukuthi iNkosi imkhiphe kanjani ejele, wathi: “Bikelani uJakobe nabazalwane ngalokho.” Waphuma, waya kwenye indawo.
Ngakusasa, kwasuka isidumo esinamathambo phakathi kwabalindi, bengazi ukuthi kwenzekeni kuPhethro.
UHerode esemfune waze wancama engamtholi, wabuzisisa kubalindi, wayeseyala ukuba babulawe. Yena wehla eJudiya, waya eKhesariya, wahlala khona.
UHerode wayebathukuthelele abantu baseThire nabaseSidoni, kodwa beza kuye benhliziyonye. Kuthe sebevumelene noBlastu, induna yesigodlo senkosi, bacela ukuba babe nokuthula, ngokuba izwe lakubo lalondliwa ngelenkosi.
Kwathi ngosuku olumisiweyo, uHerode wagqoka ingubo yakhe yobukhosi, wahlala esihlalweni sokwehlulela, wayesekhuluma kubantu.
Abantu bamemeza bathi: “Yizwi likaNkulunkulu, akusilo elomuntu.”
Kepha ingelosi yeNkosi yamshaya khona lapho, ngokuba engamnikanga uNkulunkulu udumo; wadliwa yizimpethu, wafa.
Izwi likaNkulunkulu laqhubeka, lasabalala.
UBharnabha noSawula babuyela eJerusalema, ngokuba base bekuqedile ukukhonza kwabo, behamba noJohane okuthiwa nguMakhu.
Kwakukhona ebandleni lase-Antiyokhiya abaphrofethi nabafundi: uBharnabha, uSimeyoni okuthiwa uNigeri, uLukhiyu waseKhurene, uManayeni umnawabo kaHerode, umThethrarkhi noSawula.
Kwathi bekhonza iNkosi, bezila ukudla, uMoya oNgcwele wathi: “Ngahlukaniseleni uBharnabha noSawula ukuba baye emsebenzini engibabizele wona.”
Sebezilile ukudla, bakhuleka, bababeka izandla, babamukisa.
Bethunyiwe nguMoya oNgcwele, behlela eSelukhiya, basuka lapho baya eKhuphro ngomkhumbi.
Lapho befika eSalami, bashumayela izwi likaNkulunkulu emasinagogeni abaJuda; babehamba noJohane owayebasiza.
Sebedabulile esiqhingini sonke, baze bayofika ePhafu, bafumana indoda thize lapho eyabe ingumlumbi nomphrofethi wamanga, umJuda, ogama lakhe kunguBharjesu,
enombusi wezwe, uSergiyu Pawula, umuntu owayehlakaniphile; wabiza uBharnabha noSawula, wafuna ukuzwa izwi likaNkulunkulu.
Kepha u-Elimasi, umlumbi, ngokuba yigama lakhe lelo uma lihunyushwa, wamelana nabo, efuna ukuphambukisa umbusi ekukholweni.
Kepha uSawula, okuthiwa nguPawula, egcwele uMoya oNgcwele, wamgqolozela,
wathi: “Maye, kuwe wena ogcwele inkohliso yonke nobubi bonke, ndodana kaSathane, sitha sokulunga konke, awuyukuyeka yini ukuphambukisa izindlela eziqondileyo zeNkosi na?
Isandla seNkosi siphezu kwakho manje. Uzakuba yimpumputhe, ungaliboni ilanga okwesikhashana.” Ngokushesha wehlelwa yinkungu nobumnyama, wahamba efuna ongahle amhole.
Kwathi ukuba umbusi abone okwenzekile, wakholwa, emangaliswa nayimfundiso yeNkosi.
UPawula nababehambisana naye basuka ePhafu ngomkhumbi baze bayofika ePherge ePhamfiliya, kepha uJohane wehlukana nabo, wabuyela eJerusalema.
Sebesukile ePherge baya e-Antiyokhiya ePhisidiya, kwathi sebengenile esinagogeni ngosuku lweSabatha, bahlala phansi.
Kuthe usufundiwe umthetho nabaphrofethi, abaphathi besinagoge bathumela kubo, bathi: “Madoda, bazalwane, uma ninezwi lokugqugquzela abantu, likhulumeni.”
UPawula wayesesukuma, waphakamisa isandla, wathi: “Madoda akwa-Israyeli, nani enesaba uNkulunkulu, lalelani:
uNkulunkulu walesi sizwe sakwa-Israyeli waqoka okhokho bethu, wabenza abantu baba yisizwe esikhulu eGibhithe ababengabafokazi kulo, wabakhipha ngengalo ephakemeyo.
Wababekezelela ehlane, kungathi iminyaka engama-40.
Esezibhubhisile izizwe eziyisikhombisa eKhanani, wababela izwe lazo, laba yifa labo.
Kwedlula iminyaka ebalelwa ema-450, emveni kwalokho wabanika abehluleli, kwaze kwaba nguSamuweli umphrofethi.
Kusukela lapho, bacela inkosi. UNkulunkulu wabanika uSawule, indodana kaKhishi, umuntu wesizwe sakwaBhenjamini, iminyaka engama-40.
Esemsusile esihlalweni, wabavusela uDavide abe yinkosi, afakaza ngaye ukuthi: ‘Ngimfumene uDavide indodana kaJesayi, umuntu ongowenhliziyo yami, oyakwenza yonke intando yami.’
“Olibeni lwakhe, uNkulunkulu walethela u-Israyeli uMsindisi uJesu, njengokwesithembiso.
Engakafiki Yena, uJohane wayeseshumayele umbhabhadiso wokuphenduka kuso sonke isizwe sakwa-Israyeli.
Ngasekupheleni kwempilo yakhe uJohane, wathi: ‘Nicabanga ukuthi ngingubani mina na? Mina angisiye, kodwa bhekani, uyeza emva kwami engingafanele ukukhumula ngisho isicathulo ezinyaweni zakhe.’
“Madoda, bazalwane, madodana olibo luka-Abhrahama, nalabo phakathi kwenu abesaba uNkulunkulu; izwi lale nsindiso lithunyelwe kithi.
Ngokuba abakhileyo eJerusalema nababusi babo abamazanga Yena, namazwi abaphrofethi afundwa masabatha wonke, kodwa bawafeza ngokumlahla.
Nakuba bengafumananga cala lokufa kuye, nokho bamnxenxa uPilatu ukuba abulawe.
Kwathi sebekufeze konke okwakulotshiwe ngaye, bamehlisa emthini, bambeka ethuneni.
Kepha uNkulunkulu wamvusa kwabafileyo.
Wabonwa izinsuku eziningi yilabo ayekhuphuke nabo eGalile, waya eJerusalema, asebengofakazi bakhe manje kubantu.
“Nathi sinishumayeza ivangeli lesithembiso esenziwa kokhokho,
ukuthi uNkulunkulu usigcwalisile sona kubantwana bethu ngokumvusa uJesu, njengokuba kulotshiwe futhi kulo ihubo lesibili, ukuthi: “ ‘Wena uyiNdodana yami, namuhla ngikuzele.’
“Maqondana nokuthi wamvusa kwabafileyo engasayukubuyela ekuboleni, wakhuluma kanje, wathi: “ ‘Ngizakuninika izimiso ezethembekileyo zikaDavide.’
“Ngakho-ke uthi nakwenye indawo: “ ‘Awuyukuvuma ukuba oNgcwele wakho abone ukubola.’
“Ngokuba uDavide esekhonzile icebo likaNkulunkulu esizukulwaneni sakhe, walala ubuthongo, wabekwa kokhokho bakhe, wabona ukubola.
Kepha Yena uNkulunkulu amvusayo, akakubonanga ukubola.
Ngakho-ke makwazeke kini madoda, bazalwane, ukuthi ngalowo kumenyezelwa kini ukuthethelelwa kwezono, nakukho konke ebeningenakulungisiswa kukho ngomthetho kaMose,
ngaye lowo, yilowo nalowo okholwayo uyakulungisiswa.
Ngakho-ke qaphelani, funa nehlelwe ngokwashiwo ngabaphrofethi abathi:
“ ‘Bonani nina zideleli nimangale, nibhubhe, ngokuba mina ngisebenza umsebenzi emihleni yenu, umsebenzi eningayukuwukholwa ngisho noma kungakhona onilandisa ngawo.’ ”
Sebephuma, babanxusa ukuba baphinde bawakhulume lawa mazwi kubo ngeSabatha elilandelayo.
Kuthe sebehlakazekile ababesesinagogeni, iningi labaJuda nabaphroselithe akhonzayo balandela uPawula noBharnabha, abakhuluma nabo bebancenga ukuba bahlale emseni kaNkulunkulu.
NgeSabatha elilandelayo, kwabuthana cishe bonke abavela emzini ukuba bazokuzwa izwi likaNkulunkulu.
Kepha abaJuda, bebona izixuku, bagcwala umona baqala ukuphikisana nokwakushiwo nguPawula futhi behlambalaza.
UPawula noBharnabha bakhuluma ngesibindi, bathi: “Bekuswelekile ukuba izwi likaNkulunkulu lishunyayelwe kini kuqala, kepha njengalokhu nilinqaba, nizisholo nina ngokwenu ukuthi anifanele ukuphila okuphakade, bhekani-ke, sesiphendukela kwabezizwe.
INkosi isiyale kanjalo yathi: “ ‘Ngikubekile ube ngukukhanya kwabezizwe, ube yinsindiso kuze kube semkhawulweni womhlaba.’ ”
Bekuzwa lokho abezizwe bathokoza, balidumisa izwi leNkosi, bakholwa bonke labo ababemiselwe ukuphila okuphakade.
Izwi leNkosi lasabalala kulo lonke izwe.
Kepha abaJuda bavukuza abesifazane bezizwe ababalulekile, ababekhonza nabo nezikhulu zomuzi, babavusela ukuba oPawula noBharnabha bahlushwe futhi babaxosha emikhawulweni yezwe labo.
Sebethintithile uthuli lwezinyawo zabo, baqhubekela e-Ikhoniya.
Abafundi bagcwala intokozo noMoya oNgcwele.
Kwathi sebese-Ikhoniya bangena esinagogeni sabaJuda, bakhuluma kwaze kwakholwa isixuku esikhulu sabaJuda namaGriki.
Kepha abaJuda abangakholwanga, bavukuza bazithukuthelisa bazenza zaba zimbi izinhliziyo zabezizwe ngabazalwane.
Nokho-ke, bahlala isikhathi eside, befundisa ngesibindi ngeNkosi eyafakazela izwi lomusa wayo, ngokubanika ukuba benze izibonakaliso nezimangaliso ngezandla zabo.
Kepha uquqaba lomuzi lwalwehlukene phakathi, abanye babemi nabaJuda, abanye nabaphostoli.
Kwase kuba khona imizamo ngabaJuda kanye nababusi yokuba babaphathe kabi nokubakhanda ngamatshe.
Sebekwazi lokho, babalekela emizini eLikhawoniya, iListra, eDerbe nasezweni langakhona.
Bashumayela ivangeli lapho.
EListra kwakuhleli indoda eyayikhubazeke ngezinyawo; iyisishosha kwasesizalweni sikanina; ingakaze ihambe nakanye.
Yezwa uPawula ekhuluma, owayigqolozela wabona ukuthi inokukholwa kokuthi ingabuye iphile,
wathi ngezwi elikhulu: “Sukuma, ume ngezinyawo zakho, uqonde.” Yagxuma, yahamba.
Kwathi lapho izixuku zibone lokho akwenzile uPawula, zaphakamisa izwi lazo zathi ngesiLikhawoniya: “Onkulunkulu befana nabantu, behlele kithi.”
UBharnabha bambiza ngokuthi nguZeyusi, uPawula bambiza ngoHermesi, ngokuba nguye yedwa owayehola ekukhulumeni.
Kwasuka umphristi kaZeyusi, othempeli lakhe lalingaphandle komuzi, waletha izinkunzi nemigexo yezimbali ngasesangweni lomuzi, ekanye nezixuku, efuna ukubahlabela.
Kepha bathi ukuba abaphostoli, uBharnabha noPawula, bezwe ngalokhu, baklebhula izingubo zabo, baphuthuma esixukwini, bamemeza,
bathi: “Madoda, nikwenzelani lokhu na? Nathi singabantu njengani ngemvelo, sinishumayeza ivangeli ukuba niphenduke kulokho okuyize, niphendukele kuNkulunkulu ophilayo, owadala izulu nomhlaba nolwandle, nakho konke okukukho,
othe ezizukulwaneni ezidlulileyo, waziyeka izizwe zonke ukuba zihambe ngezindlela zazo.
Nokho akayekanga ukuzifakazela ngokwenza okuhle; waninika imvula yasezulwini ngezikhathi zenala, egcwalisa izinhliziyo zenu ngokuhle nangokunjalo.”
Nangakho lokhu abakushoyo, kwaba nzima ukuyekisa izixuku ukuba zingabahlabeli.
Kepha kwafika abaJuda ababevela e-Antiyokhiya nase-Ikhoniyu, sebezizuzile izixuku zaba ngakubo, bamkhanda uPawula ngamatshe, base bemhudulela ngaphandle komuzi, becabanga ukuthi ufile.
Abafundi sebemngungile, wavuka wangena emzini. Ngakusasa wahamba noBharnabha, baya eDerbe.
Sebelishumayele ivangeli kulowo muzi, bazuza abafundi abaningi, base bebuyela eListra, nase-Ikhoniyu nase-Antiyokhiya,
beqinisa imiphefumulo yabafundi, bebagqugquzela ukuba beme ekukholweni, bethi: “Simelwe ukungena embusweni kaNkulunkulu ngezinhlupheko eziningi.”
Sebebakhethele amalunga amabandla ezindaweni ababekuzo, bakhuleka bezila ukudla, babanikela eNkosini abasebekholwa yiyo.
Basuka lapho badabula ePhisidiya, baya ePhamfiliya.
Kwathi sebelikhulumile izwi ePherge, behlela e-Athaliya.
Basuka lapho bantweza ngomkhumbi, baya e-Antiyokhiya, lapho banikelwa khona emseni kaNkulunkulu ngomsebenzi abase bewufezile.
Ekufikeni kwabo, baliqoqa ibandla, balilandisa ngakho konke uNkulunkulu akwenzile ngabo, nokuthi uvulele nabezizwe isango lokukholwa.
Base behlala nabafundi isikhathi esijana.
Kwehla abathile bevela eJudiya, bafundisa abazalwane ukuthi: “Uma ningasokwa ngomthetho kaMose, ningesindiswe.”
Lokho kwadala ukungaboni ngaso linye nempikiswano phakathi kwabo noPawula noBharnabha, base benquma ukuba uPawula, uBharnabha, nabathile babo bakhuphukele eJerusalema, baye kubaphostoli nakumalunga maqondana nalolu daba.
Ngakho-ke ibandla labathuma, badabula eFenike naseSamariya. Balandisa abazalwane ngokuphenduka kwabezizwe, baletha intokozo enkulu kubazalwane.
Sebefikile eJerusalema, ibandla, abaphostoli, namalunga babemukela, base bebika ngakho konke uNkulunkulu ayekwenze ngabo.
Kepha kwasukuma abathile behlelo labaFarisi abakholwayo, bathi kumele ukuba basokwe, bayalwe ukuba bawugcine umthetho kaMose.
Abaphostoli namalunga babuthana ukuze baluhlole lolu daba.
Kuthe sebeludingide kabanzi, kwase kusukuma uPhethro, wathi kubo: “Madoda, bazalwane, niyazi ukuthi kade uNkulunkulu angikhetha phakathi kwenu ukuba abezizwe bezwe izwi levangeli ngomlomo wami, bakholwe.
UNkulunkulu owazi izinhliziyo, wabafakazela ngokubapha uMoya oNgcwele njengathi.
Akenzanga mehluko phakathi kwethu nabo, ehlambulula izinhliziyo zabo ngokukholwa.
Ngakho-ke kungani manje nilinga uNkulunkulu ngokuthi nibeke ijoka entanyeni yabafundi, obaba kanye nathi esingabanga namandla okulithwala na?
Kepha siyakholwa wukuthi sisindiswa ngomusa weNkosi uJesu ngokufanayo nabo.”
Isixuku sonke sathula; salalela uBharnabha noPawula belanda ngezibonakaliso nangezimangaliso uNkulunkulu ayezenze ngabo kwabezizwe.
Besathule, kwakhuluma uJakobe, wathi: “Madoda, bazalwane, ngilaleleni.
USimeyoni usechazile ukuthi kwaba kanjani kwasekuqaleni ukuba uNkulunkulu aziqokele kwabezizwe isizwe esibizwa ngegama lakhe.
Amazwi abaphrofethi ayavumelana nalokhu, njengalokhu kulotshiwe ukuthi:
“ ‘Emveni kwalokho ngiyakubuya, ngiyakhe futhi indlu kaDavide ewileyo, ngibuye ngakhe okudilikileyo kwayo, ngiyimise,
ukuze abaseleyo babantu nabezizwe bonke bayifune iNkosi, elibizwe phezu kwabo igama lami,’ kusho iNkosi ekwenzayo lokhu,
okwaziwayo kwaphakade.
“Ngakho-ke mina ngithi masingabakhathazi labo abezizwe abaphendukela kuNkulunkulu.
Kepha masibalobele ukuba bayeke amanyala ezithombe, nawobufebe, nawokudla inyama yesilwane esiklinyiwe, nokusenegazi.
Ngokuba kusukela ezizukulwaneni zasendulo, kuyo yonke imizi, bakhona abashumayela ngoMose, ngokuba kuyafundwa masabatha wonke, kuwo wonke amasinagoge.”
Ngakho-ke kwaba kuhle kubaphostoli, kumalunga, nakulo lonke ibandla ukuba kukhethwe amadoda phakathi kwabo, athunyelwe e-Antiyokhiya noPawula noBharnabha, bakhetha uJuda okuthiwa uBharsabha noSila, ababengabaholi phakathi kwabazalwane.
Baloba ngesandla sabo incwadi ethi: “Abaphostoli, amalunga, nabazalwane, bayababingelela abazalwane babezizwe kulo lonke elase-Antiyokhiya, eSiriya naseKhilikhiya.
Sizwile ukuthi abanye abavela kithi banikhathaze ngamazwi, balimaza imiphefumulo yenu, esingabathumanga ukuba bakwenze.
Kube kuhle kithi, sinhliziyonye, ukuba sithumele kini amadoda akhethiweyo kanye nabathandiweyo bethu uBharnabha noPawula,
abantu abadele ukuphila kwabo ngenxa yegama leNkosi yethu uJesu uKhristu.
Ngakho-ke sithumele uJuda noSila ukuba bazonitshela mathupha lezo zinto.
Ngokuba kube kuhle kuMoya oNgcwele nakithi ukuba singanethwesi mthwalo ngaphezu kwalokho okumele nikwenze:
ukuba niyeke okuhlatshelwe izithombe, okunegazi, nenyama yesilwane esiklinyiweyo, nobufebe; uma nizithiba kulokho niyokuba nenza kahle. Salani kahle.”
Ngakho-ke kuthe bangabemukisa, behlela e-Antiyokhiya, kuthe sebeqoqele ndawonye ibandla, balinika incwadi.
Sebeyifundile, bathokoza ngamazwi ayo akhuthazayo.
UJuda noSila, njengokuba nabo babengabaphrofethi, bakhuthaza abazalwane ngamazwi amaningi abawakhulumayo, babaqinisa.
Sebehlale lapho isikhathi, bavaleliswa ngokuthula ngabazalwane, base bebuyela kulabo ababebathumile.
Kepha kwaba kuhle kuSila ukuba asale khona.
Kodwa uPawula noBharnabha bahlala e-Antiyokhiya, befundisa, futhi beshumayela ivangeli leNkosi kanye nabanye abaningi.
Kwathi sekwedlule izinsuku ezithile, uPawula wayesethi kuBharnabha: “Ake sibuyele emuva, sihambele abazalwane kuyo yonke imizi ngamunye esesishumayele kuyo izwi leNkosi, sibone ukuthi bahlezi kanjani.”
UBharnabha yena wanquma ukuhamba noJohane okuthiwa uMakhu.
Kepha uPawula waqinisa ukuthi akufanele bahambe nalowo owabashiya ePhamfiliya, akaze ahamba nabo ukuyosebenza.
Kwaba khona ukuphikisana okunzima, baze bahlukana: uBharnabha wahamba noMakhu, wawelela naye eKhuphro ngomkhumbi.
UPawula wazikhethela uSila, bahamba benikelwe emseni weNkosi ngabazalwane.
Wadabula eSiriya naseKhilikhiya, ehamba eqinisa amabandla.
UPawula wahamba waze wafika eDerbe naseListra. Lapho kwakukhona umfundi othile, igama lakhe kunguThimothewu, indodana yowesifazane okholwayo wakwaJuda, kodwa uyise wayengumGriki,
owayenconywa ngabazalwane baseListra nabase-Ikhoniyu.
UPawula wathanda ukuba ahambe naye, wamthatha, wamsoka ngenxa yabaJuda ababekulezo zindawo, ngokuba bonke babazi ukuthi uyise ungumGriki.
Lapho bedabula emizini, babedlulisela kubo izinqumo ezathathwa ngabaphostoli namalunga aseJerusalema, ukuba bazigcine.
Ngakho-ke amabandla akhula ekukholweni, anda ngesibalo imihla ngemihla.
Badabula eFrigiya naseGalathiya, kodwa uMoya oNgcwele wabanqabela ukukhuluma izwi e-Asiya.
Sebefikile eMisiya, bazama ukuya eBhithiniya, kodwa uMoya kaJesu awubavumelanga.
Badlula eMisiya, behlela eThrowa.
UPawula wabona umbono ebusuku: indoda ethile yaseMakhedoniya yayimi imncenga, ithi: “Welela eMakhedoniya, usisize.”
Kuthe esewubonile lowo mbono; wafuna ukuya ngokushesha eMakhedoniya, ngokuba sasikholwa ukuthi uNkulunkulu usibizile ukuba sishumayele ivangeli kubo.
Sasuka eThrowa ngomkhumbi, saqonda eSamothrake, kwathi ngakusasa safika eNeyapholi.
Sasuka lapho saya eFiliphi, elingumuzi ovelele esifundeni saseMakhedoniya, ikoloni. Sahlala kulo muzi izinsuku ezithile.
Ngosuku lweSabatha, saphumela ngaphandle kwesango ngasemfuleni, lapho esasifuna kube yindawo yokukhuleka. Sesihleli phansi, sakhuluma nabesifazane ababebuthene lapho.
Owesifazane othile, ogama lakhe linguLidiya, wasemzini waseThiyathira, othengisa ezibukhwebezane, okhonza uNkulunkulu, walalela. INkosi yayivula inhliziyo yakhe ukuba alalelisise lokho okwakukhulunywa nguPawula.
Kuthe esebhabhadisiwe nabendlu yakhe, wasincenga wathi: “Uma nithi ngethembekile eNkosini, ngenani endlini yami, nihlale khona.” Wasehlula.
Kwathi lapho siya endaweni yokukhuleka, kweza intombazane enomoya wobungoma, eyayitholela abaniniyo inzuzo enkulu ngokubhula.
Yalandela uPawula kanye nathi, imemeza ithi: “Laba bantu bayizinceku zikaNkulunkulu oPhezukonke, ezimemezela kini indlela yensindiso.”
Yakwenza lokhu izinsuku eziningi, kodwa uPawula esecasukile waphenduka, wathi kumoya: “Ngiyakuyala egameni likaJesu uKhristu ukuba uphume kuyo.” Waphuma ngaso leso sikhathi.
Kwathi ukuba abaniniyo babone ukuthi ithemba labo lokuthola inzuzo seliphelile, babamba uPawula noSila, babahudulela esigcawini phambi kwababusi,
babayisa ezinduneni, bathi: “Laba bantu banyakazisa umuzi wakithi, bebe bengabaJuda,
bafundisa amasiko esingavunyelwe ukuba siwamukele noma siwenze thina esingamaRoma.”
Isixuku sabavukela, izinduna zayalela ukuba bakhunyulwe izingubo, bashaywe ngezinduku.
Sebebashayile imivimbo eminingi, bagqunywa etilongweni. Izinduna zayala umgciniziboshwa ukuba abaqaphelisise impela.
Kwathi eseyalwe kanjalo, qede wabafaka ejele elingaphakathi, wabophela izinyawo zabo ogongolweni.
Kepha phakathi nobusuku uPawula noSila bekhuleka bedumisa uNkulunkulu ngamahubo, iziboshwa zazibalalele.
Ngokuphazima kweso kwaba khona ukuzamazama komhlaba okukhulu, kwaze kwanyakaza nezisekelo zejele; masinyane yonke iminyango yavuleka, namaketango ababeboshwe ngawo, athukululeka.
Umgciniziboshwa esephapheme, wabona iminyango yejele ivulekile, wayesehosha inkemba efuna ukuzibulala, ngokuba wayecabanga ukuthi iziboshwa zeqile.
Kepha uPawula wamemeza ngezwi elikhulu, wathi: “Ungazilimazi, ngokuba sikhona sonke.”
Wayesethi akulethwe izibani, wagijima ethuthumela, wangena ngaphakathi, wafike wazilahla phambi kukaPawula noSila.
Wabakhiphela ngaphandle, wathi: “Banumzane, ngimelwe ukwenzani ukuba ngisindiswe na?”
Bona bathi: “Kholwa yiNkosi uJesu, yikhona uzakusindiswa, wena nendlu yakho.”
Base bekhuluma ngezwi likaNkulunkulu kuye nakubo bonke ababesendlini yakhe.
Wabathatha khona ebusuku, wabageza amanxeba, yena wabhabhadiswa nabo bonke abendlu yakhe,
wabenyusela endlini, wababekela ukudla, wathokoza kanye nendlu yakhe yonke ngokukholwa nguNkulunkulu.
Kepha sekusile izinduna zathumela izikhonzi, zathi: “Bakhulule labo bantu!”
Umgciniziboshwa wabikela uPawula lawa mazwi, wathi: “Izinduna zithumele ukuba nikhululwe. Ngakho-ke phumani khona manje, nihambe ngokuthula.”
Kepha uPawula wathi kuzo: “Basishayile phambi kwabantu, singalahlwanga cala, thina singabantu abangamaRoma, basigquma ejele. Manje basikhipha ngasese na? Phinde, neze! Abeze bona, basikhiphe.”
Izikhonzi zazibikela izinduna lawo mazwi. Zesaba lapho zizwa ukuthi bangamaRoma.
Sezifikile zabancenga, sezibakhiphile zabanxusa ukuba basuke kulowo muzi.
Sebephumile ejele, bangena kwaLidiya, kwathi sebebabonile abazalwane, babakhuthaza, base behamba.
Kwathi sebedabulile e-Amfipholi nase-Apholoniya, bafika eThesalonikha, lapho kwakukhona isinagoge labaJuda.
UPawula, njengokwejwayelekile, wangena khona kwaze kwaba ngamasabatha amathathu, ephendulana nabo ngokusemibhalweni,
ebachazela futhi ekhombisa ukuthi uKhristu kwakumele ukuba ahlupheke, avuke kwabafileyo, nokuthi: “UJesu lo engimshumayela kini unguKhristu.”
Abanye kubo bakuvuma lokho, bazihlanganisa noPawula noSila, nesixuku esikhulu samaGriki akholwayo, nabesifazane abaningi abadumileyo.
Kepha abaJuda benomhawu, baqoqa abantu ababi, baba yisixuku, base bedala isiyaluyalu emzini. Bahlasela indlu kaJasoni befuna ukubakhiphela ngaphandle kubantu.
Kepha kuthe lapho bengabatholi base behudula uJasoni nabazalwane abathile, babayisa kumphathimuzi, bememeza bethi: “Laba abanyakazisa izwe lonke sebefikile nalapha,
uJasoni ubemukele, bonke laba abenza okuphambene nezimiso zikaKhesari, bethi kukhona enye inkosi enguJesu.”
Kepha basivukuza isixuku nabaphathimuzi abezwa lokho,
bathatha isibambiso kuJasoni nakwabanye, base bebakhulula.
Ngokushesha ngalobo busuku, abazalwane babaphelezela oPawula noSila ukuba baye eBhiriya. Kuthe sebefikile khona, bangena esinagogeni labaJuda.
Laba babengcono kunabaseThesalonika, ngokuba balemukela izwi ngenhliziyo yonke, behlolisisa imibhalo imihla ngemihla ukuba zinjalo yini lezo zinto.
Ngakho-ke iningi labo lakholwa, nabesifazane abaqavile bamaGriki namadoda amaningana.
Kepha lapho abaJuda baseThesalonikha bezwa ukuthi uPawula ulishumayele izwi likaNkulunkulu naseBhiriya, banikela khona, bafike bazinyakazisa, bazivukuza izixuku.
Masinyane, abazalwane bamhambisa uPawula waze wayofika olwandle, kepha uSila noThimothewu basala lapho.
Labo abaphelezela uPawula, baze bamshiya e-Athene. Kwathi uSila noThimothewu sebethole umyalezo wokuthi mabaphuthume beze kuye, base bemuka.
Kuthe uPawula esabalindile e-Athene, umoya wakhe wathinteka kakhulu lapho ebona umuzi ugcwele izithombe.
Ngakho-ke wayexoxa esinagogeni nabaJuda nakuwo amakholwa nasesigcawini, nsuku zonke kulaba ababelapho.
Kepha abathile kubo, osonjulalwazi bama-Ephikhuru nabamaStoyikhu, baphikisana naye, abanye bathi: “Leli phoshophosho lithini na?” Abanye bathi: “Sengathi lishumayela ngonkulunkulu abangaziwa,” ngenxa yokuba wayeshumayela ivangeli ngoJesu nangokuvuka kwabafileyo.
Base bemthatha, bamyisa e-Areyophagu, bethi: “Ungasazisa ukuthi iyini le mfundiso entsha okhuluma ngayo na?
Ngokuba usitshela ngezinto ezimangalisayo, ngakho siyafuna ukwazi ukuthi lokhu kusho ukuthini?”
Ngokuba bonke abase-Athene nabafokazi ababakhe khona babengazilibazisi ngokunye, kuphela ngokukhuluma nokuzwa izindaba ezintsha.
UPawula wema phakathi ne-Areyophagu, wathi: “Madoda ase-Athene, ngibona kahle ngakho konke enikwenzayo ukuthi ningabantu abakholwayo.
Ngokuba ngithe ngihamba ngibuka izinto enizikhonzayo, ngafumana ngisho ne-althare okulotshwe kulo ukuthi: ELIKANKULUNKULU ONGAZIWA. Lokho-ke enikukhonza ningakwazi, yikho kanye lokhu engishumayela ngakho kini.
“UNkulunkulu owenza umhlaba nakho konke okukuwo, Yena uyiNkosi yezulu nomhlaba, akahlali emathempelini enziwe ngezandla,
futhi akakhonzwa ngezandla zabantu, kube sengathi udinga utho oluthile. NguYena obapha ukuphila nokuphefumula nakho konke.
Wazenza izizwe zonke ngagazi linye ukuba zakhe ebusweni bomhlaba, wamisa izinkathi ezinqunyiweyo nemingcele yokuhlala kwazo,
ukuze zimfune uNkulunkulu, mhlawumbe zingase zimphumputhe, zimfumane; ingani akakude kulowo nalowo wethu.
‘Ngokuba siphila, sihamba, sikhona kuye,’ njengalokhu izimbongi ezithile zakini zishilo zathi: “ ‘Ngokuba futhi sibozalo lwakhe.’
“Ngakho-ke njengalokhu singabozalo lukaNkulunkulu, akufanele ukuba sithi ubuNkulunkulu bufana negolide noma isiliva noma itshe, izinto eziqoshwe ngekhono nangesu lomuntu.
Ngalokho uNkulunkulu wazithalalisa izikhathi zokungazi, kodwa manje usememezela kubantu ukuba bonke ezindaweni zonke baphenduke,
ngokuba umisile usuku azakwehlulela ngalo izwe ngokulunga, ngomuntu ammisele khona, lapho enika bonke ithemba ngokumvusa kwabafileyo.”
Kwathi lapho bezwa ngokuvuka kwabafileyo, abanye bahleka usulu, kodwa abanye bathi: “Siyophinde sikulalele ngalolu daba.”
UPawula wayesesuka phakathi kwabo.
Kepha amadoda athile anamathela kuPawula, akholwa. Phakathi kwawo kwakunoDiyonisiyu wase-Areyophagu, nowesifazane okuthiwa nguDamari igama lakhe, nabanye ababe nabo.
Emveni kwalokho, uPawula wasuka e-Athene waya eKhorinte.
Wafumana lapho umJuda othile, ogama lakhe ngu-Akhwila odabuka ePhontu, owayesanda kufika evela e-Ithaliya, nomkakhe uPhrisila, ngenxa yesimemezelo sikaKlawudiyu sokuba bonke abaJuda baphume baphele eRoma; naye-ke weza kubona.
Ngokuba wayenza umsebenzi ofanayo nowabo, wahlala nabo, basebenza, ngokuba umsebenzi wabo kwakungukuthunga amathende.
Wayeqagulisana nabo njalo ngeSabatha esinagogeni, wazuza abaJuda namaGriki.
Kwathi sekufike uSila noThimothewu bevela eMakhedoniya, uPawula wagxila kakhulu ezwini, efakaza kubaJuda ngokuthi uJesu unguKhristu.
Kepha bamphikisa, behlambalaza, wayesethintitha izingubo zakhe, wathi kubo: “Igazi lenu malibe phezu kwamakhanda enu, mina anginacala; kusukela manje ngizakuya kwabezizwe.”
Esesukile lapho, wangena endlini yomuntu, ogama lakhe nguThithu Justu, owayekhonza uNkulunkulu; indlu yakhe iseceleni kwesinagoge.
UKhrisphu, umphathi wesinagoge nabo bonke abendlu yakhe, bakholwa yiNkosi; nabanye abaningi baseKhorinte abalalela, bakholwa, babhabhadiswa.
INkosi yathi kuPawula ngombono ebusuku: “Ungesabi, kodwa khuluma, ungathuli,
ngokuba Mina nginawe, akukho namunye ozakukuhlasela, akulimaze, lokhu nginabantu abaningi kulo muzi.”
Wahlala lapho unyaka nezinyanga eziyisithupha, efundisa izwi likaNkulunkulu phakathi kwabo.
Kwathi uGaliyu esengumbusi wase-Akhaya, abaJuda nganhliziyonye, bamvukela uPawula, bamyisa phambi kwesihlalo sokwehlulela,
bathi: “Lo muntu unxenxa abantu ukuba bakhonze uNkulunkulu ngokuphambene nomthetho.”
Kuthe uPawula esathi nje uvula umlomo, uGaliyu wathi kubaJuda: “Nina baJuda ndini, ukuba bekuyicala noma ubugebengu obubi, bekufanele nginibekezelele,
kodwa uma kungukuqophisana ngamazwi, ngamagama nangomthetho wakini, ziboneleni nina. Mina angifuni ukuba ngumehluleli walokho.”
Wayesebaxosha phambi kwesihlalo sokwehlulela.
Khona bonke badumela uSostene, umphathi wesinagoge, bamshaya phambi kwesihlalo sokwehlulela, kodwa uGaliyu wakushaya indiva lokho.
Kuthe uPawula esehlale lapho izinsuku eziningi, wavalelisa kubazalwane, wahamba ngomkhumbi, waya eSiriya noPhrisila no-Akhwila; eseligundile ikhanda lakhe eKhenikhreya, ngokuba wayezibophezele ngesifungo.
Bafika e-Efesu, wayesebashiya lapho; yena wangena esinagogeni, waqophisana nabaJuda.
Kwathi noma bemncenga ukuba ahlale nabo isikhathi esijana, akaze avuma,
kodwa wavalelisa, wathi: “Ngizobuya futhi lapha kini, uma uNkulunkulu evuma.” Wayesesuka e-Efesu ngomkhumbi.
Kuthe esefikile eKhesariya, wakhuphuka wayobingelela ibandla, wayesehlela e-Antiyokhiya.
Kwathi esehlale khona isikhathi esithile, wahamba, wadabula eGalathiya naseFrigiya ngokulandelana, eqinisa bonke abafundi.
UmJuda othile, ogama lakhe kungu-Apholo, wase-Aleksandriya ngokudabuka, indoda efundile futhi enolwazi olunzulu emibhalweni, wafika e-Efesu.
Yena wayeyifundisiwe indlela yeNkosi, evutha emoyeni, wakhuluma, wafundisa ngokucacile ngezindaba eziqondene noJesu, kodwa wayazi kuphela umbhabhadiso kaJohane.
Waqala ukushumayela ngesibindi esinagogeni, kwathi ukuba bamuzwe oPhrisila no-Akhwila, bamthatha bamcacisela kahle indlela kaNkulunkulu.
Kuthe esefuna ukwedlulela e-Akhaya esekhuthaziwe, abazalwane base belobela abafundi ukuba bamamukele. Esefikile lapho, wabasiza kakhulu labo abakholwayo ngomusa,
ngokuba wabaphikisa abaJuda ngamandla phambi kwabantu, ekhomba ngemibhalo ukuthi uJesu unguKhristu.
Kwathi u-Apholo eseseKhorinte, kwafika uPawula e-Efesu, esenqamule ezifundeni ezingenhla; wafica abafundi abathile,
wathi kubo: “Namamukela yini uMoya oNgcwele mhla nikholwa na?” Kepha bathi kuye: “Qha, asikaze sizwe nakuzwa ukuthi kukhona uMoya oNgcwele.”
Wayesethi: “Kanti nabhabhadiswa kukuphi?” Bathi: “Ngombhabhadiso kaJohane.”
UPawula wayesethi: “UJohane wabhabhadisa ngombhabhadiso wokuphenduka, ethi kubantu mabakholwe nguYena ozakufika emuva kwakhe; lowo nguJesu.”
Sebekuzwile lokho, babhabhadiswa egameni leNkosi uJesu.
UPawula esebekile izandla phezu kwabo, uMoya oNgcwele wehlela phezu kwabo, base bekhuluma ngezilimi, futhi baphrofetha.
Babengamadoda abalelwa eshumini nambili sebebonke.
Wayesengena esinagogeni, wakhuluma ngesibindi izinyanga ezintathu, ephikisana nabo futhi ebanxenxa ngombuso kaNkulunkulu.
Kepha lapho abanye sebeqinise amakhanda, bengalaleli futhi bejivaza leyo Ndlela phambi kwesixuku, wasuka kubo, wathatha abafundi, waba nezinkulumompikiswano imihla ngemihla esikoleni sikaTharanu.
Lokho kwenzeka iminyaka emibili, kwaze kwathi bonke abakhile e-Asiya balizwa izwi leNkosi, abaJuda namaGriki.
UNkulunkulu wenza imisebenzi yamandla engavamile ngezandla zikaPawula,
ngangokuthi baze bathatha amaduku nezindwangu emzimbeni wakhe, bakubeka phezu kwabagulayo; zase zisuswa kubo izifo zabo, baphuma nomoya ababi.
Kepha abathile abayizanusi kubaJuda, ababehla benyuka, nabo bazama ukubiza igama leNkosi uJesu phezu kwabanomoya ababi, bethi: “Ngiyaniyala ngoJesu amshumayelayo uPawula.”
Kwakukhona uSkeva othile, umJuda, ongumphristi omkhulu, owayenamadodana ayisikhombisa ayekwenza lokho.
Kepha umoya omubi waphendula, wathi kuwo: “UJesu ngiyamazi, noPawula ngimejwayele, pho nina ningobani?”
Lowo muntu onomoya omubi wabadumela, esebahlulile bonke, wabanqoba; baze baphunyuka kuleyo ndlu babaleka behambaze, futhi belimele.
Lokho kwaziwa yibo bonke abaJuda namaGriki akhileyo e-Efesu, bonke behlelwa ngukwesaba; ladunyiswa igama leNkosi uJesu.
Abaningi kulabo abakholwayo beza bavuma futhi badalula izenzo zabo.
Kepha abanye balabo ababenza imilingo baqoqa izincwadi zabo, bazishisa phambi kwabo bonke. Lapho sekubalwa inani lazo, kwatholakala ukuthi liyizinhlamvu zesiliva eziyizi-50 000.
Kanjalo izwi landa ngamandla eNkosi, lasabalala, laba namandla.
Kwathi sekwenzekile lokho, uPawula wanquma emoyeni wakhe ukuya eJerusalema, esenqamulile eMakhedoniya nase-Akhaya, wathi: “Uma sengifinyelele lapho kufanele ukuba ngiyobona neRoma.”
Wayesethumela eMakhedoniya ababili abamsizayo, uThimothewu no-Erastu; yena uqobo wahlala isikhathi e-Asiya.
Kepha ngaleso sikhathi kwasuka isiphithiphithi esikhulu maqondana neNdlela.
Ngokuba umuntu othile ogama lakhe linguDemethriyu, umkhandi wesiliva owayenza amathempelana esiliva ka-Artemisi, wabalethela inzuzo enkulu abakhandi besiliva.
Wabaqoqa laba kanye nezisebenzi ezenza lowo msebenzi, wayesethi: “Madoda, niyazi ukuthi umcebo wethu uvela kulo msebenzi.
Kepha, niyabona futhi niyezwa ukuthi akusikho kuphela e-Efesu, kodwa cishe kulo lonke i-Asiya, uPawula lona usenxenxe waphendula abantu abaningi, ethi akusibo onkulunkulu laba abenziwe ngezandla.
Ngakho akusikho nje lokhu kuphela ukuthi umsebenzi wethu usengozini yokwedelelwa, kodwa nethempeli likankulunkulukazi omkhulu, u-Artemisi, kuyakuthiwa aliyinto yalutho, nobukhulukazi bakhe buphele nya, yena elimkhonzayo lonke i-Asiya nezwe lonke.”
Sebekuzwile lokho, bathukuthela bathelwa ngamanzi, bamemeza bethi: “Mkhulu u-Artemisi wabase-Efesu.”
Umuzi wonke wagcwala isiphithiphithi, baphuthuma kanyekanye enkundleni okubukelwa kuyo, bamdumela uGayu no-Aristarku baseMakhedoniya, ababehamba noPawula.
UPawula wayesefuna ukungena phakathi kwabantu, kodwa abafundi abamvumelanga.
Abanye futhi bababusi base-Asiya, abangabahlobo bakhe, bathumela kuye, bamncenga ukuba angalokothi angene esigcawini.
Abanye babememeza besho lokhu, abanye besho lokhuya, ngokuba isixuku sasiyaluza nje, futhi abaningi bengazi nokuthi kungani bebuthene.
Base bekhipha u-Aleksandru esixukwini, abaJuda bamqhuba phambili, kodwa u-Aleksandru waphakamisa isandla, efuna ukuziphendulela kubantu.
Kwathi ukuba bazi ukuthi ungumJuda, base bememeza bonke ngazwi linye, cishe amahora amabili, bethi: “Mkhulu u-Artemisi wabase-Efesu.”
Kepha unobhala womuzi wabathulisa abantu, wathi: “Madoda ase-Efesu, ngubani lapha phakathi kwabantu ongazi ukuthi lo muzi wase-Efesu ungumuzi okugcinwe kuwo ithempeli lika-Artemisi omkhulu nesithombe esawa ezulwini na?
Ngakho-ke njengoba lezo zinto zingephikwe, kufanele ukuba nizibambe, ningenzi lutho ngamawala.
Ngokuba nilethe la madoda angesibo abaphangi bamathempeli noma ahlambalaza uNkulunkulu wethu.
Ngakho-ke uma uDemethriyu nezingcweti zabakhandi besiliva benodaba nomuntu, zikhona izinsuku zokuthetha amacala, futhi bakhona nababusi; mabamangalelane.
Kepha uma nifuna okungaphezu kwalokho, kuyakudingidwa ebandla ngokusemthethweni.
Impela sisengozini yokumangalelwa ngenxa yesiphithiphithi sanamuhla, ngokuba akukho sizathu esingazilandulela ngaso ngalesi siyaluyalu.”
Kuthe esekukhulumile lokho wawuhlakaza umbuthano.
Kwathi sesiphelile isiphithiphithi, uPawula wabiza abafundi, wabakhuthaza, wayesevalelisa, wahamba waya eMakhedoniya.
Wanqamula kulezo zindawo, ekhuthaza abafundi ngokuningi, waze wayofika ezweni lamaGriki.
Wahlala khona izinyanga ezintathu. Kuthe eselungiselela ukuya eSiriya ngomkhumbi, abaJuda bakha uzungu lokumbulala, wayesecabanga ukuba abuyele emuva ngendlela edabula eMakhedoniya.
Wayephelezelwa nguSophathru kaPhiru waseBhiriya, abaseThesalonikha: u-Aristarku, uSekhundu, uGayu waseDerbe, uThimothewu, nabase-Asiya uThikhiku noThrofimu.
Laba ababehambe phambili sabafica sebesilinde eThrowa.
Thina santweza ngomkhumbi sisuka eFiliphu, emva kwezinsuku zezinkwa ezingenamvubelo, saze safika kubo eThrowa ezinsukwini ezinhlanu, sahlala khona izinsuku eziyisikhombisa.
Kwathi ngosuku lokuqala lweviki, sibuthanele ukuba sihlephule isinkwa, uPawula wayelokhu eshumayele lokho, kwaze kwaba phakathi kwamabili, ngoba wayehlose ukuhamba ngakusasa.
Kwakukhona izibani eziningi endlini ephezulu lapho sasibuthene khona.
Insizwa ethile, igama layo linguYuthikhusi, yayihleli efasiteleni, yazunywa ngubuthongo obunzima, ngokuba uPawula wayeshumayele isikhathi eside, seyehlulwe ngubuthongo, yawa isuka esitezi sesithathu, yathathwa isifile.
Kepha uPawula wehla, walala phezu kwayo, wayisingatha, wathi: “Ningakhathazeki, ngokuba umphefumulo wayo usekhona kuyo.”
Esenyukele phezulu, wahlephula isinkwa, wadla, ngokuba wakhuluma nabo isikhathi eside kwaze kwasa; wayesehamba.
Base bemletha umfana ephilile, baduduzeka kakhulu.
Kepha thina sahamba phambili, sayogibela isikebhe, salibhekisa e-Asu, lapho sasizomgibelisa khona uPawula, ngokuba wayehlele kanjalo, enqume yena ukuthi uzakuhamba ngezinyawo.
Kuthe lapho ehlangana nathi e-Asu, samgibelisa, saya naye eMithilene.
Sasuka lapho ngomkhumbi, ngakusasa safika maqondana neKhiyu, kwathi ngomhlomunye sanqamula saya eSamu; ngosuku olulandelayo safika eMilethu.
Ngokuba uPawula wayenqumile ukudlula e-Efesu ngomkhumbi ukuze angachithi sikhathi e-Asiya. Phela wayephuthuma ukuze, uma kwenzeka, abe seJerusalema ngosuku lwePhentekhoste.
EseseMilethu, wathumela e-Efesu, wabiza amalunga ebandla.
Kuthe esefikile kuye, wathi kuwo: “Niyazi ukuthi kusukela osukwini lokuqala engafika ngalo e-Asiya ngaziphatha kanjani isikhathi sonke nginani.
Ngikhonza iNkosi ngokuthobeka okukhulu, ngezinyembezi, nangokulingwa okwangehlela ngenxa yamacebo abaJuda.
Angizange futhi ngikugweme ukunitshela lokho okuwusizo nokunifundisa phambi kwabantu nakuzo izindlu ngezindlu.
Ngifakaza kubaJuda nakumaGriki ukuba baphendukele kuNkulunkulu nokuba bakholwe yiNkosi yethu uJesu.
“Bhekani manje, ngiya eJerusalema ngokulalela nokuboshwa nguMoya, futhi angikwazi okuzakungehlela khona,
ngaphandle kokuthi uMoya oNgcwele uyangazisa ukuthi kulowo nalowo muzi ngilindelwe ukuboshwa nezinhlupheko.
Kepha ukuphila kwami ngikushaya indiva ukuze kungabi yigugu kimi; okubalulekile ukuba ngiluphothule uhambo lwami nomsebenzi engawunikwa yiNkosi uJesu ukuba ngifakaze ngevangeli lomusa kaNkulunkulu.
“Manje ngiyazi ukuthi anisayukububona ubuso bami, nina nonke engahamba phakathi kwenu, ngishumayela umbuso.
Ngakho-ke ngiyafakaza kini ngalolu lusuku lwanamuhla ukuthi anginacala egazini labo bonke.
Ngokuba anginigodlelanga lutho, ukuba nginganitsheli konke okuyintando kaNkulunkulu.
Ziqapheleni nina nawo wonke umhlambi uMoya oNgcwele anibeke kuwo ukuba nibe ngabaphathi abelusa ibandla likaNkulunkulu azithengela lona ngegazi lakhe.
Ngiyazi ukuthi kuzofika izimpisi ezinonya emuva kokuba sengihambile, ezingenakuwuhawukela umhlambi,
naphakathi kwenu kuzakuvela amadoda akhuluma okudukisayo, ayenge abafundi ukuba bawalandele.
Ngakho qaphelani, nikhumbule ukuthi iminyaka emithathu, ubusuku nemini angiyekanga ukuniluleka nonke ngamunye ngezinyembezi.
“Manje senginethula kuNkulunkulu nasezwini lomusa wakhe, Yena unamandla okwakha nokwabela ifa kubo bonke abangcwelisiweyo.
Angifisanga siliva, nagolide, nangubo yamuntu.
Nina niyazi ukuthi ngazisebenzela ngalezi zandla zami ukwenelisa izidingo zami nezalabo enganginabo.
Kukho konke lokhu, nganikhombisa ukuthi kumele ukuba nisebenze kanzima, nibasize ababuthakathaka, niwakhumbule futhi amazwi eNkosi uJesu ukuthi Yona yathi: ‘Kubusesikile kakhulu ukupha kunokwemukela.’ ”
Esekushilo lokho, waguqa phansi kanye nabo bonke, wakhuleka.
Bonke bakhala kakhulu, bamxhawula, bamanga,
belusizi kakhulu ngezwi alisho kubo elithi abasayukubuye babubone ubuso bakhe. Bamphelezela, baya emkhunjini.
Kwathi lapho sesihlukene nabo, sahamba ngomkhumbi, sahamba ngendlela eqondile saze safika eKhose, ngakusasa safinyelela eRode, sedlula lapho saya ePhathara,
sesitholile isikebhe esiwelela eFonesiya, sangena kuso, sahamba.
Kwathi sesiyibona iKhuphro saze sayedlula, siyishiya ngemuva ngakwesokhohlo, saya eSiriya. Safika echwebeni eThire, ngokuba umkhumbi wawuzokwethula lapho izimpahla.
Emva kokubafuna abafundi, sahlala khona izinsuku eziyikhombisa; beqhutshwa nguMoya, bamtshela uPawula ukuba angalubeki eJerusalema.
Kepha kuthe seziphelile lezo zinsuku, saphuma sahamba, siphelezelwa yibo bonke, nomkabo nabantwana, baze basibeka ngaphandle komuzi. Saguqa ngamadolo ogwini, sakhuleka,
savalelisana, sangena emkhumbini, kodwa bona babuyela emakhaya.
Thina sesiluqedile uhambo sisuka eThire, safika ePhetholemayi, sesibabingelele abazalwane, sahlala nabo usuku.
Ngakusasa sahamba saze safika eKhesariya, sangena emzini kaFiliphu umvangeli, owayengomunye wabayisikhombisa, sahlala naye.
Yena-ke wayenamadodakazi amane, ayizintombi eziphrofethayo.
Kwathi sisahleli lapho izinsukwana, kwafika umphrofethi evela eJudiya, igama lakhe lingu-Agabhu.
Esefikile kithi, wathatha ibhande likaPawula, wazibopha ngalo izinyawo nezandla, wathi: “Usho lokhu uMoya oNgcwele, uthi: ‘Lo muntu ongumnikazi waleli bhande, abaJuda eJerusalema bazakumbopha kanje, bamkhaphele ezandleni zabezizwe.’ ”
Lapho sikuzwa lokhu, samncenga thina kanye nabantu bakuleya ndawo ukuba angakhuphukeli eJerusalema.
Nokho uPawula waphendula wathi: “Nenzani ukuba nikhale nidabukise inhliziyo yami na? Ngokuba mina sengikulungele, hhayi nje ukuboshwa kuphela, kodwa nokufa eJerusalema ngenxa yegama leNkosi uJesu.”
Sesehlulekile ukumvimba, sathula sathi: “Mayenziwe intando yeNkosi.”
Emva kwalezo zinsuku umthwalo waba sobhokweni, sakhuphukela eJerusalema.
Abanye babafundi baseKhesariya bahamba nathi, basiyisa kuMnasoni othile waseKhuphro, umfundi omdala, esangenisa kwakhe.
Sesifikile eJerusalema, abazalwane basemukela ngokujabula.
Ngakusasa uPawula wahamba nathi waya kuJakobe; onke amalunga eza.
UPawula esewabingelele, wawalandisa ngakho konke, ngakunye ngakunye, uNkulunkulu ayekwenze kwabezizwe ngenkonzo yakhe.
Sebekuzwile lokho bamdumisa uNkulunkulu, bathi kuye: “Uyabona, mzalwane, ukuthi ziningi kangakanani izinkulungwane zalabo asebekholwa, ezikhona phakathi kwabaJuda, futhi bonke bayizishisekeli zomthetho!
Babikelwe ngawe ukuthi ufundisa bonke abaJuda, abaphakathi kwabezizwe, ukuhlubuka kuMose, uthi mabangabasoki abantwana babo, futhi bangawagcini amasiko.
Pho manje sesizokwenzenjani na? Impela bazakuzwa ukuthi usufikile.
Ngakho-ke yenza lokhu esizakukutshela khona: kukhona phakathi kwethu amadoda amane azibophile ngesifungo,
wathathe uzihlambulule kanye nawo, uwakhokhele ukuze aphuce amakhanda, khona bonke bezokwazi ukuthi akukho lutho oluliqiniso kulokho okubikiwe ngawe, kodwa ukuthi nawe uyavumelana nomthetho futhi uyawugcina.
Kepha maqondana nabezizwe abakholwayo, sesibalobele sanquma ukuthi mabakugweme okuhlatshelwe izithombe, igazi, inyama yesilwane esiklinyiweyo nobufebe.”
Ngakho-ke uPawula wathatha lawo madoda, kwathi ngakusasa wazihlambulula kanye nawo, wangena ethempelini, wabazisa ngokuphela kwezinsuku zokuhlanjululwa, kuze kwenziwe umnikelo walowo nalowo.
Kuthe sekuzophela izinsuku eziyisikhombisa, abaJuda base-Asiya bembonile ethempelini, bagovuza sonke isixuku, bambamba,
bamemeza bathi: “Madoda akwa-Israyeli, yelekelelani! Nguye lo muntu ofundisa bonke ezindaweni zonke okuphambene nesizwe, nomthetho, nale ndawo, futhi ufike namaGriki wawangenisa ethempelini, wayingcolisa le ndawo engcwele.”
Ngokuba babekade bembonile phambilini uThroyifimu wase-Efesu esemzini naye, ababecabanga ukuthi uPawula umngenise ethempelini.
Umuzi wonke wanyakaziswa, abantu babuthanela ndawonye, bambamba uPawula, bamhudulela ngaphandle kwethempeli; iminyango yavalwa ngokuphazima kweso.
Kuthe sebefuna ukumbulala, kwafika izwi enduneni yenkulungwane elithi lonke iJerusalema liyaphithizela.
Yathatha ngokushesha amabutho nezinduna zekhulu, yagijimela kubo. Kuthe sebebona induna yenkulungwane namabutho, bayeka ukumshaya uPawula.
Yayisisondela induna yenkulungwane, yamthatha, yayala ukuba aboshwe ngamaketanga amabili, yayisibuza ukuthi ungubani nokuthi wenzeni.
Abanye esixukwini babememeza besho lokhu, nabanye besho lokhuya, ayangakwazi ukuthola iqiniso ngenxa yomsindo, yase iyala ukuba ayiswe enkanjini.
Kuthe lapho esefikile esikhwelweni, wathwalwa ngamabutho ngenxa yokuminyana kwesixuku,
ngokuba isixuku sabantu sasisimemeza sithi: “Msuseni!”
Lapho esezongeniswa enkanjini, uPawula wathi enduneni yenkulungwane: “Ngabe ngivunyelwe yini ukuba notho engilushoyo kuwe na?” Yona yathi: “Uyasazi yini isiGriki na?
Kanti awusiye yini umGibhithe, okwathi ngaphambi kwalezi zinsuku wadala isiyaluyalu, wembuka, waholela amadoda ayizi-4 000 ehlane, angababulali na?”
Kepha uPawula, wathi: “Mina ngingumJuda waseTharsu eKhilikhiya, isakhamuzi somuzi odumileyo. Ngiyacela ukuba ungivumele ngikhulume kubantu.”
Esemvumele, uPawula wema esikhwelweni, wathulisa abantu ngesandla. Kwase kuthula kuthi cwaka, wayesekhuluma ngolimi lwesiHebheru, ethi:
“Madoda, bazalwane, nani bobaba, lalelani ukuziphendulela kwami phambi kwenu manje.”
Sebezwa ukuthi ukhuluma nabo ngolimi lwesiHebheru, bathula bathi du. Wayesethi:
“Mina ngiyindoda engumJuda ezalwa eTharsu eKhilikhiya, kodwa ngakhulela kuwo lo muzi, ngasezinyaweni zikaGamaliyeli, ngafundiswa ngesineke ngomthetho wobaba, ngishisekela uNkulunkulu njengalokhu nani ninjalo namuhla.
Ngayizingela le Ndlela kwaze kwaba sekufeni, abesilisa nabesifazane ngibabopha, ngibakhaphela emajele,
njengoba nomphristi omkhulu ufakaza ngami, namalunga wonke. Yibona engemukela kubo izincwadi ezilotshelwe abazalwane, ngangiya eDamaseku ukuba abakhona lapho ngibayise eJerusalema beboshiwe, ukuze bajeziswe.
“Kwathi ngisendleleni ngihamba, sengisondela eDamaseku emini kwabha, kwabanika masinyane nxazonke ukukhanya okukhulu kuvela ezulwini,
ngawela phansi emhlabathini, ngezwa izwi lithi kimi: ‘Sawula, Sawula, ungihluphelani na?’
“Ngaphendula ngathi: ‘Ungubani, Nkosina?’ “Wathi kimi: ‘NginguJesu waseNazaretha omzingelayo.’
“Kepha labo ababenami bakubona ukukhanya, kodwa izwi lowakhuluma nami abalizwanga.
“Ngathi: ‘Ngizakwenzani, Nkosi, na?’ “INkosi yayisithi kimi: ‘Sukuma, uye eDamaseku, uzotshelwa lapho konke okubekelwe ukuba ukwenze.’
“Njengalokhu ngangingasaboni ngenxa yenkazimulo yalokho kukhanya, ngaholwa ngengalo yilabo engangihamba nabo, ngaze ngafika eDamaseku.
“Indoda ethile okuthiwa ngu-Ananiya, eyayikholwa, iwugcina umthetho, eyayifakazelwa yibo bonke abaJuda ababakhe lapho,
yafika kimi, yema, yathi kimi: ‘Sawula, mzalwane, phinda ubone.’ “Ngase ngibona ngaso leso sikhathi.
“Wayesethi: ‘UNkulunkulu wokhokho wakumisela phambilini ukuba uyazi intando yakhe, nokumbona oLungileyo, nokulizwa izwi eliphuma emlonyeni wakhe.
Ngokuba uzakuba ngufakazi wakhe kubantu bonke ngalokho okubonileyo nokuzwileyo.
Pho usalindeleni na? Sukuma, ubhabhadiswe, uhlambulule izono zakho ngokukhuleka egameni lakhe.’
“Kwathi sengibuyele eJerusalema, ngikhuleka ethempelini, ngafikelwa yisiyezi,
ngambona; wathi kimi: ‘Shesha uphume masinyane eJerusalema, ngokuba abazukubamukela ubufakazi bakho ngami.’
“Mina ngathi: ‘Nkosi, bayazi bona uqobo ukuthi yimina engangibabopha, ngibashaya emasinagogeni labo abakholwa nguwe,
futhi namhla kuchithwa igazi likaStefani, ufakazi wakho, ngangimi khona lapho nami, ngivumelana nokwakwenzeka, ngiqaphe izingubo zabambulalayo.’
“Wathi kimi: ‘Hamba, ngokuba ngizakukuthuma kwabezizwe.’ ”
Bamlalela kwaze kwaba kuleli lizwi, base bekhamuluka bethi: “Msuseni onje emhlabeni, ngokuba akafanele ukuba aphile.”
Kwathi besakhamuluka, bekhumula izingubo zabo, bethunquza uthuli phezulu,
induna yenkulungwane yayala ukuba angeniswe enkanjini, yathi akahlolwe ngenduku, ukuze iqonde ukuthi kungasici sini esibenza bamemeze kanje ngaye.
Kuthe besambophe ngemichilo, uPawula wathi enduneni yekhulu eyayimi lapho: “Kuvumelekile yini ukuba kushaywe umuntu ongumRoma engakalahlwa yicala na?”
Yathi ukuba induna yekhulu ikuzwe lokho, yaya enduneni yenkulungwane, yabika yathi: “Uzokwenzenjani na? Ngokuba lo muntu ungumRoma?”
Induna yenkulungwane yaya kuPawula, yathi kuye: “Ngitshele, ngabe wena ungumRoma yini na?” Yena wathi: “Yebo.”
Kepha induna yenkulungwane yaphendula, yathi: “Mina ngalithenga lelo lungelo ngemali enkulu.” Kepha uPawula wathi: “Mina-ke ngazalwa nalo.”
Bamshiya masinyane labo ababezomhlola, nenduna yenkulungwane yesaba, lapho seyizwe ukuthi ungumRoma nokuthi ibimbophile.
Ngakusasa ifuna ukwazi umsuka wendaba yokuthi abaJuda bamsola ngani, yamkhulula, yayisiyaleza ukuba abaphristi abakhulu nomkhandlu wonke ubuthane, yayisimehlisa uPawula, yammisa phambi kwabo.
UPawula wawubuka umkhandlu, wathi: “Madoda, bazalwane, mina ngihambe phambi kukaNkulunkulu nginonembeza omsulwa, kuze kube namuhla.”
Umphristi omkhulu, u-Ananiya, wayala ababemi eduze naye ukuba bamshaye umlomo.
Khona uPawula wathi kuye: “UNkulunkulu uzakukushaya wena ludonga olucakiweyo; uhleli ukuba ungehlulele ngokomthetho, kodwa wephula umthetho ngokuyala ukuba ngishaywe na?”
Ababemi lapho base bethi: “Uthuka umphristi omkhulu kaNkulunkulu na?”
UPawula wayesethi: “Bengingazi, bazalwane, ukuthi ungumphristi omkhulu, ngokuba kulotshiwe ukuthi: “ ‘Ungakhulumi kabi ngombusi wesizwe sakini.’ ”
UPawula azi ukuthi bangamaqembu, enye ingxenye ingeyabaSadusi, enye ingeyabaFarisi, wayesememeza emkhandlwini, wathi: “Madoda, bazalwane, mina ngingumFarisi, nendodana yomFarisi, ngibekwe icala lokuthi nginethemba lokuvuka kwabafileyo.”
Esekushilo lokho, kwaqubuka impikiswano phakathi kwabaFarisi nabaSadusi, izixuku zehlukana kabili.
Ngokuba abaSadusi bathi akukho ukuvuka kwabafileyo, nangelosi, namoya, kodwa abaFarisi bayakuvuma konke.
Kwaqubuka omkhulu umsindo, kwase kusukuma abathile beqembu labaFarisi abayizazimthetho, balwa kakhulu, bethi: “Asifumani lutho olubi kulo muntu. Siyothini uma kukhulume ingelosi noma umoya kuye na?”
Kuthe sekusuke esinamathambo, induna yenkulungwane yesaba ukuthi uPawula bangahle bamenzakalise, yayisiyala amabutho ukuba ehle, amsuse phakathi kwabo, amyise enkanjini.
Ngobusuku obulandelayo iNkosi yema ngakuye, yathi: “Yima isibindi; njengokuba ufakaze ngami eJerusalema, kanjalo umelwe ukufakaza naseRoma.”
Kwathi kungasa, abaJuda benza itulo, bazibophezela ukuthi abasoze badla futhi baphuze lutho bengakambulali uPawula.
Babengama-40 labo abenza lelo tulo.
Baya kubaphristi abakhulu nakumalunga, bathi: “Sizibophezele esifungweni sokuthi asiyukukuthi mbibi ukudla, size simbulale uPawula.
Ngakho-ke manje, nina kanye nomkhandlu yazisani induna yenkulungwane ukuba imehlisele kini ngokungathi nihlose ukuhlolisisa udaba lwakhe; thina-ke sikulungele ukumbulala engakasondeli.”
Kepha umshana kaPawula walizwa icebo labo lokumlalela unyendle, bambulale, wayeseya enkanjini, wangena, wambikela uPawula.
UPawula wabiza enye induna yekhulu, wathi kuyo: “Ake uyise le nsizwa enduneni yenkulungwane, kunokuthile ezakukubika kuyo.”
Ngakho-ke isiyithathile, yayiyisa enduneni yenkulungwane, yathi: “Isiboshwa uPawula singibizile, sangicela ukuba ngilethe le nsizwa kuwe, kunokuthile ezakukutshela khona.”
Induna yenkulungwane yayibamba ngesandla, yathi ukugudluka nayo, yayisiyibuza sebebodwa, yathi: “Kuyini ofuna ukungibikela khona na?”
Yathi: “AbaJuda bavumelene ukuza bakucele ukuba kusasa wehlisele uPawula emkhandlwini, ngokungathi bahlose ukuhlolisisa udaba lwakhe.
Ngakho-ke ungabavumeli, ngokuba phakathi kwabo kunamadoda angaphezulu kwama-40 azomlalela unyendle, ngokuba azibophe ngesifungo ukuthi awazukudla futhi awazukuphuza engakambulali uPawula. Manje bakulungele lokho, futhi balindele ukuba uvume.”
Ngakho-ke induna yenkulungwane yayimukisa insizwa, yayiyala ukuba ingatsheli muntu lokho ebizombikela khona.
Induna yenkulungwane yayisibiza izinduna zekhulu ezimbili, yathi kuzo: “Hlelani amabutho angama-200 ukuze alungele ukuya eKhesariya ngehora lesithathu ebusuku, nabagibele amahhashi abangama-70, nabemicibisholo abangama-200.
Nilungisele noPawula isilwane azogibela kuso, ukuze nimyise kuFelikisi, umbusi, ephephile.”
Yase iloba incwadi eyayihlelwe kanje:
“UKlawudiyu Lisiya, kuye uFelikisi umbusi odumileyo, ngiyabingelela.
“Le ndoda ibibanjwe ngabaJuda, kwathi lapho sebezoyibulala, ngafika namabutho, ngayisindisa sengizwile ukuthi ingumRoma.
Ngifuna ukwazi icala abayimangalela ngalo, ngayehlisela emkhandlwini wabo.
Ngafumana ukuthi imangalelwe ngezindaba zomthetho wakubo, kodwa kungekho lutho olufanele ukubulawa noma ukuboshwa.
Kuthe sekudaluliwe kimi ukuthi kunozungu eboshelwe lona, ngayithumela kuwe ngokushesha, ngabayala nabayimangalelayo ukuba beze kuwe bazokhuluma ngayo phambi kwakho.”
Ngakho-ke amabutho amthatha uPawula njengalokhu ayeyaliwe, amyisa e-Antiphatheri ebusuku.
Ngakusasa ashiya ababegibele amahhashi ukuba bahambe naye, wona ayesebuyela enkanjini.
Ekufikeni kwabo eKhesariya banika umbusi incwadi, bammisa noPawula phambi kombusi.
Umbusi eseyifundile incwadi, wambuza uPawula ukuthi ungowakusiphi isifunda, wathi ukuba ezwe ukuthi ungowaseKhilikhiya,
wathi: “Sengiyakuluzwa kahle udaba nxa sebefikile abakumangaleleyo.” Wayeseyala ukuba agcinwe enqabeni kaHerode.
Emva kwezinsuku ezinhlanu, umphristi omkhulu, u-Ananiya, namanye amalunga, wehlela eKhesariya nommeli thizeni okuthiwa nguTherthulu; owachazela umbusi amacala abekwe wona uPawula.
Esebiziwe uPawula, uTherthulu waqala ukumbeka icala, ethi kuFelikisi: “Ngenxa yakho, selokhu waqala ukubusa, sesibe nokuthula isikhathi eside, futhi sekube nezinguquko ezinhle ozenzele lesi sizwe, ngenxa yobuhlakani bakho.
Felikisi oHlonipheke kakhulu, siyakwamukela lokhu ngokubonga ngezikhathi zonke nasezindaweni zonke.
Kepha angithandi ukukuchithela isikhathi, ngiyacela ukuba ngobumnene bakho usiphe indlebe nje okwethutshana.
“Le ndoda siyithole iluhlupho, iphehla udweshu kubaJuda kulo lonke izwe, ingumholi wehlelo lamaNazaretha,
futhi yazama ukungcolisa ithempeli; sayibopha, safuna ukuyehlulela ngomthetho wakithi.
Kepha kwafika uLisiya, induna yenkulungwane, wayithatha ngendluzula enkulu ezandleni zethu.
Wayala abayibeka icala ukuba beze kuwe, ukuze uyiphenye ngemibuzo wena uqobo, uzwe konke esiyimangalela ngakho.”
NabaJuda bakuvuma lokho, bathi kunjalo.
Umbusi wavuma ngokunqekuzisa ikhanda ukuba uPawula akhulume, waphendula wathi: “Ngiyazi ukuthi sekuyiminyaka eminingi ungumehluleli kulesi sizwe, ngiyathokoza ukuziphendulela ngalezi zinto,
njengalokhu nawe uzitholela ukuthi akukapheli nezinsuku ezili-12 ngikhuphukele eJerusalema ukuyokhuleka.
Abangificanga ngixoxa namuntu ethempelini, noma ngimi ngidala isiphithiphithi esixukwini, emasinagogeni, noma emzini wonke.
Futhi abanakubeka bufakazi kuwe ngalokhu abangibeka icala ngakho manje.
Kepha ngiyakuvuma lokhu kuwe ukuthi mayelana neNdlela abayibiza ngokuthi wukuduka, ngikhonza kanjalo uNkulunkulu wokhokho, futhi ngiyakholwa yikho konke okulotshwe emthethweni nakubaphrofethi;
nginethemba kuNkulunkulu abalibhekile nabo uqobo lokuthi kuyakuba khona ukuvuka kwabafileyo, okwabalungile nokwabangalungile.
Ngakho-ke nami ngiyazama ukuba njalo ngihlale nginonembeza omsulwa phambi kukaNkulunkulu nabantu.
“Kwathi emva kweminyaka eminingi, ngabuyela esizweni sakithi, ngilethe izipho neminikelo,
okuthe ngisenza lokho, bangifica ethempelini ngihlanjululiwe, kungekho sixuku nasiphithiphithi.
Kepha abaJuda abathile base-Asiya yibo okufanele ngabe bakhona ukuze bangimangalele, uma benodaba oluthile olumelene nami.
Noma-ke mabasho laba ukuthi cala lini abalithola mhla ngimi phambi komkhandlu,
ngaphandle kwalokho okukodwa zwi engakumemeza ngimi phakathi kwabo, kokuthi: ‘Mina ngehlulelwa yinina namuhla ngokuvuka kwabafileyo.’ ”
Kepha uFelikisi ekwazi kahle okuqondene naleyo Ndlela, wakuguqisa ukuqulwa kwecala, ethi: “Kuyakuthi uma sekufike uLisiya, induna yenkulungwane, bese nginquma ngodaba lwenu.”
Wajuba induna yekhulu ukuba imgcine uPawula, kodwa imnike inkululeko, futhi inganqabeli muntu wakubo ukuzomsiza.
Kwathi emva kwezinsuku ezithile, wafika uFelikisi noDrusila, umkakhe, owayengumJuda; wambiza uPawula, ukuze amlalele ekhuluma ngokukholwa kuKhristu uJesu.
Kuthe esakhuluma ngokulunga, ngokuzithiba, nangokwehlulela okuzayo, uFelikisi washaywa luvalo, wayesephendula ethi: “Okwamanje hamba, kodwa uma ngithola ithuba, ngizokubiza.”
Wayenethemba futhi lokuthi uPawula uzakumnika imali, ngalokho-ke wayelokhu ethumela embiza, akhulume naye.
Kepha sekuphele iminyaka emibili, isikhundla sikaFelikisi sathathwa nguPhorkiyu Festu, kodwa yena efuna ukuthokozisa abaJuda wamshiya uPawula eboshiwe ejele.
Kwathi uFestu esefikile esifundeni, emva kwezinsuku ezintathu, wasuka eKhesariya, wakhuphukela eJerusalema.
Abaphristi abakhulu nezikhulu zabaJuda bamchazela ngoPawula. Bamncenga,
becela umusa kuye ukuba ambizele eJerusalema uPawula; base bakhe uzungu lokumbulala endleleni.
Kepha uFestu wabaphendula ngokuthi uPawula njengoba egcinwe eKhesariya nje, naye usazobuyela khona lapho ngokushesha.
Wayesethi: “Makwehle kanye nami izikhulu phakathi kwenu, uma kukhona utho olubi elwenzileyo le ndoda, aziyimangalele.”
Esehlalile nabo izinsuku ezingaphezu kweziyisishiyagalombili noma ezilishumi, wehlela eKhesariya. Ngakusasa wahlala esihlalweni sokwehlulela, wayaleza ukuba uPawula alethwe kuye.
Esefikile, abaJuda ababehle bevela eJerusalema bema bemngungile, bambeka uxhaxha lwamacala anzima abangenabufakazi bawo.
UPawula eziphendulela, wathi: “Angonanga ngalutho emthethweni wabaJuda, nasethempelini, nakuKhesari.”
Kepha uFestu ethanda ukubongwa ngabaJuda, wamphendula uPawula, wathi: “Uyathanda yini ukwenyukela eJerusalema, wehlulelwe khona phambi kwami ngalezi zinto, na?”
UPawula wayesethi: “Ngimi phambi kwesihlalo sokwehlulela sikaKhesari, lapho kumele ngehlulelwe khona. Akukho okubi engikwenze kubaJuda njengalokhu nawe wazi kahle.
Uma ngenzile utho olubi olufanele ukufa, mangife, angenqabi, kodwa nxa kungekho utho olunjalo kulokhu laba abangimangalela ngakho, akekho-ke onganginikela kubo. Ngilidlulisela kuKhesari.”
Ngakho-ke uFestu esekhulumile nomphakathi, waphendula wathi: “Ulidlulisele kuKhesari, uzokuya kuKhesari.”
Kuthe sekwedlule izinsuku ezithile, u-Agripha inkosi, noBhernisi bafika eKhesariya ukuyobingelela uFestu.
Bahlala khona izinsuku eziningi; uFestu walubeka ezithebeni phambi kwenkosi udaba lukaPawula, wathi: “Kunendoda ethile eyisiboshwa eyashiywa nguFelikisi,
okwathi ngiseJerusalema, abaphristi abakhulu namalunga abaJuda bangibikela ngayo becela ukuba ilahlwe ngecala.
Ngabaphendula ngathi akusiwo umkhuba wamaRoma ukudlulisa umuntu omangalelwe engakamiswa phambi kwabammangaleleyo, athole ithuba lokuziphendulela ngecala amangalelwe ngalo.
Ngakho-ke sebebuthene lapha, angipholisanga maseko, ngahlala esihlalweni sokwehlulela ngakusasa. Ngayaleza ukuba le ndoda ilethwe,
basukuma-ke, abayimangalelanga ngacala engangilindele ukuthi bazolisho.
Kepha babenokuphikisana ngokuthile mayelana nenkolo yakubo nangomuntu othile, uJesu owafayo, athi ngaye uPawula uyaphila.
Kepha mina njengoba ngingaziqondi lezi zinto, ngabuza ukuthi uyafuna yini ukuya eJerusalema ayobhekana namacala abekwe wona lapho.
Kepha uPawula eseledlulisile icala wacela ukuba agcinwe lize lithethwe yinkosi enkulu, ngayala ukuba agcinwe ngize ngimthumele kuKhesari.”
U-Agripha wathi kuFestu; “Nami ngiyathanda ukumuzwa lo muntu.” Wathi: “Uzomuzwa kusasa.”
Ngakho-ke ngakusasa kwafika u-Agripha noBhernisi, bemukelwa ngokuhlonishwa okukhulu, bangena endlini yamacala nezinduna zenkulungwane nezikhulu zomuzi. UFestu wayaleza ukuba uPawula alethwe kubo.
UFestu wathi: “Nkosi, Agripha, nani nonke madoda enilapha kanye nathi, niyambona lo uquqaba lwabaJuda olwangincenga ngaye eJerusalema nalapha, lumemeza luthi akafanele ukuphila,
mina angifumananga lutho olufanele ukufa kwakwenzileyo, kodwa ngenxa yokuthi ulwedlulisele kuKhesari udaba lwakhe, nginqume ukumthumela lapho.
Anginalutho oluqinisekileyo ngaye engingayilobela yona inkosi, yingakho-ke ngimlethe phambi kwakho, nkosi, Agripha, ukuze kuthi uma sewuluvavanyile udaba lwakhe, ngibe nakho engingakuloba.
Ngokuba akunamqondo ngokwami ukuba ngithumele isiboshwa, kungakabikwa ukuthi ayini amacala aso.”
U-Agripha wayesethi kuPawula: “Uvumelekile ukuba uzikhulumele.” UPawula wayesephakamisa isandla sakhe, waziphendulela wathi:
“Maqondana nakho konke engimangalelwe ngakho ngabaJuda, nkosi Agripha, ngizibona nginenhlanhla, ngokuba ngizakuziphendulela namuhla phambi kwakho,
ikakhulu lokhu uyingcweti yawo wonke amasiko nokuphikisana kwabaJuda. Ngakho-ke ngiyakunxusa ukuba ungilalele ngesineke.
“Bonke abaJuda bayayazi inkambo yami kusukela ekuqaleni, ebusheni bami phakathi kwabakithi naseJerusalema.
Bengazi kwasekuqaleni, uma bethanda ukufakaza ukuthi ngangihamba ngehlelo eliqinileyo lenkonzo yakithi ngingumFarisi.
Manje ngimi ngimangalelwe ngenxa yethemba lesithembiso asenzayo uNkulunkulu kokhokho,
isithembiso ezithemba ukufinyelela kuso izizwe zakithi ezili-12 ezikhonza ngesineke ubusuku nemini. Kungalelo themba, nkosi, ngimangalelwe ngabaJuda.
Kungani kuyinsumansumane kini ukuthi uNkulunkulu uyabavusa abafileyo na?
“Kepha mina ngokwami ngazimisela ukwenza okuningi okuphambene negama likaJesu waseNazaretha.
Lokho ngakwenza eJerusalema, ngafaka abaningi abangcwele emajele, ngigunyazwe ngabaphristi abakhulu; nalapho abangcwele bebulawa yimi engangibalahla ngevoti lami.
Emasinagogeni wonke, kukaningi ngibajezisa, ngibaphoqa ukuba bahlambalaze; ngibathukuthelele kakhulu, ngibahlupha kwaze kwaba semizini yabezizwe.”
“Kwathi ngiya eDamaseku ngegunya nangemvume yabaphristi abakhulu,
emini bebade, nkosi, ngisendleleni, ngabona ukukhanya okuvela ezulwini, okwedlula ngisho ukukhazimula kwelanga, kwangikhanyisa nxazonke kanye nababehamba nami.
Kwathi sonke sesiwe phansi emhlabathini, ngezwa izwi lithi kimi ngolimi lwesiHebheru: ‘Sawula, Sawula, ungihluphelani na? Kulukhuni kuwe ukukhahlela ezinkandini.’
“Kepha ngathi: ‘Ungubani, Nkosi, na?’ INkosi yathi: ‘Mina nginguJesu omhluphayo.
Sukuma ume ngezinyawo zakho, ngokuba ngibonakele kuwe ukuze ngikubeke ube yisikhonzi nofakazi walokhu, wokuthi ungibonile nowalokho engizakuzibonakalisa kuwe ngakho.
Ngizakukusindisa esizweni sakini nakwabezizwe engikuthumela kubo,
ukuze uvule amehlo abo basuke ebumnyameni, baphendukele ekukhanyeni, basuke emandleni kaSathane, baphendukele kuNkulunkulu, baze bamukeliswe ukuthethelelwa kwezono nesabelo phakathi kwalabo abangcweliswe ngokukholwa kimi.’ ”
“Ngalokho, nkosi Agripha, angizange ngingawulaleli umbono wasezulwini,
kodwa ngamemezela kwabaseDamaseku kuqala, nakwabaseJerusalema, nakulo lonke iJudiya nakwabezizwe ukuba baphenduke, baguqukele kuNkulunkulu, benze imisebenzi efanele ukuphenduka.
Ngenxa yalokho, abaJuda bangibamba ethempelini, bazama ukungibulala.
Kepha ngathola usizo kuNkulunkulu, yingakho ngimi lapha namuhla ngifakaza kwabancane nabadala. Angikhulumi lutho ngaphandle kwalokho abakukhulumile abaphrofethi noMose ukuthi kuzokwenzeka,
ukuthi uKhristu uzakuhlupheka nokuthi uzakuba ngowokuqala ukuvuka kwabafileyo, ozomemezela ukukhanya kuso isizwe nakwabezizwe.”
Kwathi esaziphendulela kanjalo, uFestu wathi ngezwi elikhulu: “Pawula, uyahlanya; ukufunda okuningi kuyakuhlanyisa.”
Kepha uPawula wathi: “Festu odumileyo, angihlanyi, kodwa ngikhuluma iqiniso elimsulwa namazwi anomqondo.
Ngokuba iNkosi engikhuluma kuyo ngokukhululeka iyakwazi lokho, angikholwa ngukuthi kukhona utho lwalokhu olufihlekileyo kuyo, lokhu akwenziwanga ekusithekeni.
Nkosi, Agripha, uyakholwa yini ngabaphrofethi na? Ngiyazi ukuthi uyakholwa.”
U-Agripha wathi kuPawula: “Kusilele kancane ungivumise ngibe ngumKhristu.”
UPawula wayesethi: “Bengingafisa ukuba uNkulunkulu noma kukancane noma kukakhulu, kungabi nguwe wedwa, kodwa bonke abangizwayo namuhla babe njengami, ngaphandle kwalezi zibopho.”
Inkosi yayisisukuma nombusi noBhernike nababehlezi nabo;
kwathi sebegudlukile, bakhuluma bodwa, bathi: “Lo muntu akenzanga lutho olufanele ukuba afe noma ukuboshwa.”
Kepha u-Agripha wathi kuFestu: “Lo muntu ngabe simkhululile ukuba icala akaledluliselanga kuKhesari.”
Kwathi sekunqunyiwe ukuba siye e-Ithaliya ngomkhumbi, banikela uPawula nezinye iziboshwa ezithile esandleni senduna yekhulu, igama layo nguJuliyase, eyebutho likaKhesari.
Sangena emkhunjini wase-Adramathiyu owawusazosuka ugudle ugu e-Asiya, u-Aristarkhu umMakhedoniya waseThesalonikha wayekanye nathi.
Ngakusasa safika echwebeni eSidoni, uJuliyase wamphatha kahle uPawula, wamvumela ukuba aye kubangani bakhe, anakekelwe kahle.
Sasuka lapho, sagudla ngezansi kweKhuphro, ngokuba umoya wawuphikisana nathi.
Sesidabule olwandle olungaseKhilikhiya nePhamfiliya, safika eMira laseLikhiya.
Lapho-ke induna yathola umkhumbi wase-Aleksandriya oqonde e-Ithaliya, yasigibelisa kuwo.
Sahamba kancane ngenxa yomoya, kwasithatha isinsuku eziningi saze safika kanzima ngaseKhinidu, kwazise umoya wawusivimbile, sagudla iKhrethe maqondana neSalimone,
saligudla kunzima, saze safika endaweni ethile okuthiwa iMatheku Mahle, eduze nayo kukhona umuzi iLaseya.
Kwathi sekwedlule isikhathi eside, sekuyingozi ukuhamba ngomkhumbi, kwazise isikhathi sokuzila sase sedlule; uPawula wabeluleka,
wathi kubo: “Madoda, ngiyabona ukuthi lolu hambo luzokuba nobunzima nokulahlekelwa okukhulu, hhayi impahla nje nomkhumbi kuphela, kodwa nempilo yethu.”
Induna yekhulu yethemba umshayeli womkhumbi nomniniwo kakhulu kunalokho okwakhulunywa nguPawula.
Kepha itheku lakhona lalingakulungele ukuba kuhlalwe kulo ebusika, iningi labo laphakamisa ukuba kusukwe lapho, hleze kwenzeke bafike eFenikisi, itheku eKhrethe elibheke entshonalanga yaseningizimu, nasentshonalanga ngasenyakatho bahlale khona kuze kwedlule ubusika.
Kuthe lapho iningizimu isiheleza kahle, bacabanga ukuthi inhloso yabo isifezekile, base bekhuphula ihange, bagudla iKhrethe.
Kungakabi yisikhathi esingakanani, kwasuka isivunguvungu okuthiwa i-Ewurakhiloni,
sazithola sesiphakathi kwaso, kwathi ngenxa yokuthi umkhumbi wawungasalawuleki ngoba ubhekene nomoya, sawudedela wadudulwa ngumoya.
Kwathi sisagudla ngezansi kwesiqhingana okuthiwa iKhawuda, sakwazi ukubamba isikebhe somkhumbi kunzima.
Sebesikhuphulile bafaka okokuweseka ngaphansi, kwathi ngoba babesaba ukuthi umkhumbi ungase ushayeke esihlabathini esisogwini eSirti, kwehliswa iseyili, umkhumbi wadudulwa ngumoya.
Sasilokhu sishukunyiswa kanzima yisivunguvungu saze ngosuku olulandelayo saphonsa ngaphandle umthwalo;
kwathi ngolwesithathu balahla izimpahla zomkhumbi ngezandla zabo.
Kwaphela izinsuku eziningi ilanga nezinkanyezi kungasabonakali.
Kwase kuyisikhathi eside bengadli lutho, uPawula wasukuma phakathi kwabo, wathi: “Madoda, ngabe nalalela mina, anasuka eKhrethe, naphepha kule ngozi nakulokhu kulahlekelwa.
Manje ngiyaneluleka ukuba nime isibindi, ngokuba akuzukufa namunye phakathi kwenu, kodwa umkhumbi kuphela.
Ngokuba ngalobu busuku bekumi ngakimi ingelosi kaNkulunkulu engingowakhe nengimkhonzayo,
yathi: ‘Ungesabi, Pawula, kumele ukuba ume phambi kukaKhesari. UNkulunkulu ukuphile bonke abahamba nawe kulo mkhumbi.’
“Ngakho-ke yimani isibindi, madoda, ngiyakholwa nguNkulunkulu ukuthi kuzakuba njengokuba ekhulumile kimi.
Kepha kufanele ukuba siphumele esiqhingini esithile.”
Kwathi ebusuku, phakathi kwamabili, ngolwe-14 silokhu sintanta olwandle e-Adriya, ababesemkhunjini bacabanga ukuthi sebesondela ezweni thizeni,
base bephonsa intambo yokukala, bathola ukuthi ngamafathome angama-20. Baphinda baqhubeka kancane, bayiphonsa futhi, base bethola ukuthi sekungamafathome ali-15.
Besaba ukuthi hleze singase sishayeke ezindaweni ezinamadwala, base bephonsa amahange amane ngemuva, bafisa sengathi ngabe sekusile.
Ababegibele emkhunjini base befuna ukubaleka kuwo, behlisela isikebhe olwandle, kwaba sengathi bazakuphonsa amahange enhlokweni yomkhumbi,
uPawula wathi enduneni yekhulu nasemabuthweni: “Uma laba bengahlali emkhunjini, anisoze nasinda nina.”
Amabutho anquma amagoda esikebheni, asidedela sawa.
Kwathi sekuzokusa, uPawula wabancenga bonke ukuba badle. Wathi: “Namuhla wusuku lwe-14 nilindile, nilokhu nizilile, ningadli lutho.
Ngiyanincenga ukuba nidle, ngokuba lokhu kuzakuba ngukusinda kwenu, akuyukulahleka nwele ekhanda nakoyedwa phakathi kwenu.”
Esekushilo lokho wathatha isinkwa, wabonga uNkulunkulu phambi kwabo bonke, wasihlephula, waqala ukudla.
Bonke base bema isibindi, nabo badla.
Sesisonke emkhunjini sasingama-276.
Kwathi lapho sebesuthi, bawulahla olwandle ukolo ukuze umkhumbi ungasindwa.
Kuthe sekusile, abaze balazi izwe, kepha babona itheku elithile elinesihlabathi, abanquma ukuba baqhubele kulo umkhumbi, uma kungenzeka.
Banquma amahange, bawashiya olwandle; bathukulula izintambo zamaphini okuqondisa umkhumbi; indwangu engaphambili bayiphakamisela emoyeni, base beqonda ogwini.
Kepha bafika endaweni enolwandle nxazombili, umkhumbi waphahlazeka. Inhloko yawo yagxumekeka, yema, ayaze yanyakaza, kodwa ingemuva lephulwa ngamandla amaza.
Amabutho ayehlose ukuzibulala iziboshwa, ukuze kungabi bikho nasinye esihlambayo siphunyuke,
kodwa induna yekhulu ithanda ukusindisa uPawula yawavimba enhlosweni yawo. Yayaleza ukuba labo abakwaziyo ukuhlamba baziphonse kuqala emanzini, baze bafike emhlabathini.
Ababesele balandele, abanye ngamapulangwe, abanye ngezinye izinto zomkhumbi. Kwenzeka kanjalo-ke ukuthi bonke baphumele emhlabathini bephephile.
Kwathi sesifikile endaweni ephephile, sezwa ukuthi leso siqhingi kuthiwa iMelitha.
Abantu bakhona basiphatha ngobubele obungavamile, sebebase umlilo, basemukela sonke, ngenxa yokuba lalina futhi kumakhaza.
UPawula esethezile isixha sezinswani, wasifaka emlilweni, kwathi ngenxa yokushisa kwaphuma inyoka, yazithandela esandleni sakhe.
Lapho abantu bendawo bebona isilwane silenga esandleni sakhe, bakhuluma bodwa, bathi: “Impela lo muntu ungumbulali, kuthi noma esesinde olwandle, kodwa ukuLunga kungavumi ukuba aphile.”
Kepha wasinikinela isilwane emlilweni, akaze alimala.
Babheka belindele ukuthi usazovuvuka noma afumbeke phansi ngokushesha, afe, kodwa sebelinde isikhathi eside, bebona engehlelwa ngozi, base beguqula umqondo, bathi ungunkulunkulu.
Kuleyo ndawo kwakukhona izwe lesikhulu sesiqhingi, igama lesikhulu kwakunguPhubhiliyu, sona sasamukela sasiphatha kahle; sahlala izinsuku ezintathu.
Kepha uyise kaPhubhiliyu wayenomkhuhlane, elele phansi. UPawula wangena lapho elele khona, wathandaza, wabeka izandla phezu kwakhe, wamphilisa.
Sekwenzekile lokho, iningi labantu basesiqhingini baletha nabanye ababenezifo, baphiliswa.
Basihlonipha kakhulu impela, kwathi mhla sihamba ngomkhumbi, basipha esikudingayo.
Emva kwezinyanga ezintathu, sahamba ngomkhumbi wase-Aleksandriya owawume esiqhingini ukuze kwedlule ubusika, owawunophawu lwamaWele.
Sesingene echwebeni eSirakhuse, sahlala izinsuku ezintathu.
Sesisuka lapho sagwegwa saze safika eRegiyu, ngokuba kwavuka umoya waseningizimu, kwathi ngosuku lwesibili safinyelela ePhutheyoli.
Safumana khona abazalwane, basimema ukuba sihlale nabo izinsuku eziyisikhombisa; emveni kwalokho safika eRoma.
Kuthe abazalwane sebezwile ngathi basuka khona, beza kithi bezosihlangabeza, baze bafika e-Aphiyo Foru naseThresi Thaberne. Kwathi ebabona uPawula, wabonga uNkulunkulu, wama isibindi.
Sesifikile eRoma, uPawula wavunyelwa ukuhlala yedwa enebutho elimlindayo.
Kwathi sekwedlule izinsuku ezintathu, wabiza labo abadumile babaJuda ukuba beze kuye. Sebebuthene, wathi kubo: “Madoda, bazalwane, nakuba mina kungekho lutho oluphambene nesizwe namasiko okhokho engilwenzileyo, nokho ngisuswe eJerusalema ngiboshiwe, nganikelwa ezandleni zamaRoma.
Athi esengihlolile, afuna ukungikhulula, ngokuba athi awafumani cala kimi elifanelwe ukuba ngife.
Kepha abaJuda bakuphikisa lokho, ngaze ngaphoqeka ukuba icala ngiledlulisele eRoma kuKhesari, hhayi ngoba ngimangalela isizwe sakithi ngento ethile.
Ngakho-ke ngenxa yaleso sizathu, nginibizele lapha ukuba nginibone, ngikhulume nani, ngokuba kungenxa yethemba lika-Israyeli ngiboshiwe ngaleli ketanga.”
Base bethi kuye: “Thina akukho ncwadi evela eJudiya esiyitholile emayelana nawe, futhi akukho muntu kubazalwane ofikile ukubika noma ukukunyembenya.
Kepha thina siyathanda ukuzwa ukuthi ucabangani, ngokuba siyazi ngaleli hlelo ukuthi liyaphikiswa ezindaweni zonke.”
Sebemmisele usuku, baya kuye endlini ngobuningi, wabacacisela efakaza ngombuso kaNkulunkulu, ebanxenxa ngoJesu ethathela emthethweni kaMose nakubaphrofethi, kusukela ekuseni kwaze kwaba kusihlwa.
Abanye baneliswa yilokho okwakhulunywayo, kodwa abanye abakholwanga.
Kwathi ukuba bangezwani bodwa, base behlakazeka, uPawula wakhuluma izwi laba linye lokuthi: “UMoya oNgcwele wakhuluma kahle ngo-Izaya umphrofethi kokhokho benu, ethi:
“ ‘Hamba uye kulesi sizwe, uthi: “Niyakuzwa nokuzwa, kepha ningaqondi, niyakubona nokubona, ningabonisisi,
ngokuba inhliziyo yalesi sizwe seyaba buthuntu; sizwa kanzima ngezindlebe, amehlo aso siwavalile, funa mhlawumbe sibone ngamehlo, sizwe ngezindlebe, siqonde ngenhliziyo, siphenduke; ngisiphilise.” ’
“Ngakho-ke makwazeke kini ukuthi le nsindiso kaNkulunkulu ithunyelwe kwabezizwe; bona-ke bayakulalela.”
Kwathi esekushilo lokho, abaJuda baphuma benokuphikisana okukhulu phakathi kwabo.
UPawula wahlala iminyaka emibili epheleleyo endlini yakhe ayeyiqashile, emukela bonke abeza kuye,
eshumayela umbuso kaNkulunkulu, efundisa ngaso sonke isibindi izindaba zeNkosi uJesu uKhristu, ngaphandle kokuphazanyiswa.
UPawula, inceku kaKhristu uJesu, obiziwe ukuba ngumphostoli nowehlukaniselwe ivangeli likaNkulunkulu,
alethembisa phambilini ngabaphrofethi bakhe emibhalweni engcwele,
mayelana neNdodana yakhe evela olibeni lukaDavide ngokwenyama,
kodwa ebizwe ngeNdodana kaNkulunkulu ngamandla ngokoMoya wobungcwele nangokuvuka kwabafileyo, uJesu Khristu iNkosi yethu,
okungaye samukela umusa nobuphostoli ukuze kube khona ukulalela kokukholwa ezizweni zonke ngenxa yegama lakhe,
okukhona phakathi kwabo nani eningababiziweyo bakaJesu Khristu,
kubo bonke abathandiweyo bakaNkulunkulu abaseRoma, ababizwa ngabangcwele: makube kini umusa nokuthula okuvela kuNkulunkulu uBaba wethu naseNkosini uJesu Khristu.
Kuqala, ngibonga uNkulunkulu wami ngoJesu Khristu ngani nonke, ngokuba ukukholwa kwenu kukhulunywa ngakho emhlabeni wonke.
Ngokuba uNkulunkulu, engimkhonzayo ngenhliziyo yami yonke ngokulishumayela ivangeli leNdodana yakhe, ungufakazi wami, ukuthi nginikhumbula njalo
ngingaphezi emikhulekweni yami, nginxusa ukuba uma kungenzeka ngokwentando kaNkulunkulu ngiphumelele ukufika kini.
Ngokuba ngilangazelela ukunibona ukuze nginabele isipho esithile sokomoya ukuba niqiniswe,
okungukuthi sikhuthazane, omunye ngokukholwa komunye, okwenu nokwami.
Angithandi bazalwane, ukuba ningazi ukuthi kukangakanani ngihlela ukuza kini, kodwa ngithiyeka kuze kube manje ukuba nakini ngibe nesithelo phakathi kwenu njengalokhu nginaso kwezinye izizwe.
Nginomthwalo omkhulu emahlombe ami ngamaGriki nabezizwe, kwabahlakaniphileyo nakwabayiziwula.
Ngokwami ngiyalangazelela ukushumayela ivangeli nakinina baseRoma.
Ngokuba anginamahloni ngevangeli, ngokuba lingamandla kaNkulunkulu, kube yinsindiso kulowo nalowo okholwayo, kumJuda kuqala, nakumGriki;
ngokuba ukulunga kukaNkulunkulu kwambulwa kulo, kuvela ngokukholwa kuya ekukholweni, njengalokhu kulotshiwe ukuthi: “Olungileyo uzakuphila ngokukholwa.”
Ngokuba intukuthelo kaNkulunkulu yambuliwe, ivela ezulwini, phezu kwakho konke ukungamesabi uNkulunkulu nokungalungi kwabantu abathiya iqiniso ngokungalungi kwabo;
ngokuba lokho okwazeka ngokusobala ngoNkulunkulu kwambuliwe kwaba sobala kubo, ngokuba uNkulunkulu ukwambulile kubo.
Ngokuba selokhu kwadabuka umhlaba, amandla akhe aphakade nobuNkulunkulu bakhe, nakuba kungabonakali, kwambuliwe kwaba sobala ezintweni ezidaliweyo; ngakho-ke abanazaba zokuzilandulela.
Ngokuba kuthe bemazi uNkulunkulu, kabaze bamdumisa noma bambonge njengoNkulunkulu, kodwa balutheka ekucabangeni kwabo, ingqondo yabo nenhliziyo yabo yafiphazwa.
Bezitshela ukuthi bahlakaniphile, baba yiziwula,
baguqula inkazimulo kaNkulunkulu ongabhubhiyo ukuba ifane nomfanekiso womuntu obhubhayo, owezinyoni, nowezilwane ezinezinyawo ezine nezinwabuzelayo.
Ngakho-ke uNkulunkulu wabanikela ezinkanukweni zezinhliziyo zabo ukuba baqhubeke ekungcoleni, bathela ngehlazo imizimba yabo.
Baguqula iqiniso likaNkulunkulu, balenza amanga, badumisa futhi bakhonza okudaliweyo kunoMdali odumisekayo kuze kube phakade. Amen.
Ngenxa yalokho, uNkulunkulu wabanikela ezinkanukweni eziyihlazo; ngokuba ngisho nabesifazane babo baguqula ukwenza kwemvelo, kwaba ngokuphambene nemvelo.
Kanjalo nabesilisa, bayeka ukwenza kwemvelo kowesifazane, basha ukukhanukelana bodwa. Abesilisa benza okuyichilo kwabesilisa, bazitholela umvuzo ofanele ukuduka kwabo.
Njengalokhu benqaba ukukubona, kuyinto enhle ukumazi uNkulunkulu, uNkulunkulu wabayekela ekungaqondini kwabo ukwenza okungemukelekile.
Bagcwele konke ukungalungi; ukonakala, umhobholo nobubi; begcwele umhawu, ukubulala, ukuphikisana, inkohliso, ubuqili nokuhleba.
Banyembenya abanye, bazonda uNkulunkulu; bayizidlova, bayazidla, bayazigabisa, bangabaqambi bokubi, nabangabalaleli abazali;
abanangqondo, abathembekile, abanaluthando, futhi abanasihe.
Bathi nakuba bezazi izimiso ezilungileyo zikaNkulunkulu zokuthi abenza lezi zinto bafanele ukufa, kabagcinanga nje ngokuzenza, kodwa babuye bavuna labo abazenzayo.
Ngakho-ke awunakuzilandulela wena muntu owehlulelayo, noma ngabe ungubani, ngokuba ngalokho owehlulela ngakho omunye, uzehlulela wena; ngokuba zona lezo zinto obehlulela ngazo, ingani wena kanye uyakwenza khona lokho.
Kepha siyazi ukuthi ukwehlulela kukaNkulunkulu kungokweqiniso kulabo abenza izinto ezinjalo.
Ngabe ucabanga wena muntu ukuthi ngokwehlulela labo abenza lezi zinto nawe ozenzayo, uyakuphepha yini ekwehluleleni kukaNkulunkulu na?
Kumbe uyayidelela yini ingcebo yobumnene bakhe, neyokubekezela, kungakukhanyeli ukuthi ubumnene bukaNkulunkulu bukuholela ekuphendukeni na?
Kepha ngenxa yobulukhuni bakho, nenhliziyo engaphendukiyo, uziqongelelela ulaka ngosuku lwentukuthelo nolokwambulwa kokwehlulela okuqotho kukaNkulunkulu,
oyakuklomelisa lowo nalowo ngokwemisebenzi yakhe:
kulabo okuthe ngokubekezela ekwenzeni okuhle bayifuna inkazimulo nodumo nokungaboli, bafumana ukuphila okuphakade.
Kepha kulabo okwathi ngenxa yokuzazi bona, abangalilalela iqiniso, kepha balalela ukungalungi, bayobhekana nolaka nentukuthelo.
Usizi nobuhlungu kuyakubehlela bonke abantu abenza okubi, umJuda kuqala, nomGriki.
Kepha inkazimulo, udumo, nokuthula kuyakuba kubo bonke abenza okuhle, kumJuda kuqala, nakumGriki futhi.
Ngokuba uNkulunkulu akenzeleli.
Phela bonke abonileyo bengenamthetho, bayakubhubha bengenamthetho; kepha bonke abonileyo benomthetho, bayakwehlulelwa ngomthetho.
Ngokuba akusibo abezwa umthetho abangabalungileyo phambi kukaNkulunkulu, kodwa labo abawenzayo umthetho, yibona abayakulungisiswa.
Ngokuba uma abezizwe ababengenawo umthetho ngokwemvelo, benza okomthetho, labo abangenamthetho, bangumthetho ngokwabo,
bayabonakalisa ukuthi lokho okungumsebenzi womthetho kulotshiwe ezihliziyweni zabo, nonembeza wabo uyafakaza ngalokho, futhi nemicabango yabo iyakubamangalela noma ibavune,
ngosuku lapho uNkulunkulu eyakwehlulela izimfihlo zabantu ngokwevangeli lami ngoKhristu uJesu.
Kepha uma ubizwa ngomJuda futhi wethembela emthethweni, uzigqaja ngoNkulunkulu,
futhi uyazi intando, wemukela lezo zinto ezemukelekileyo; ungofundisiweyo emthethweni;
uzethembile wena ukuthi ungumholi wezimpumputhe; ungukukhanya kwalabo abasebumnyameni,
umyali weziwula nomfundisi wezingane; uyisibonakaliso solwazi lweqiniso emthethweni.
Pho wena-ke ofundisa omunye, awufundiswanga yini wena na? Wena kanye oshumayela ukuthi kungebiwa, uyeba yini na?
Wena othi makungaphingwa, uyaphinga yini na? Wena onyanya izithombe, awuwaphangi yini amathempeli na?
Wena luqobo ozigqaja ngomthetho, awukhombisi yini ukungamhloniphi uNkulunkulu ngokweqa umthetho na?
Ngokuba igama likaNkulunkulu liyahlanjalazwa phakathi kwabezizwe ngenxa yenu, njengokuba kulotshiwe.
Ngokuba ukusoka kuyasiza uma uwugcina umthetho, kodwa uma uyisephulamthetho, ngokusoka kwakho ufana nongasokile.
Ngakho-ke uma ongasokile egcina izimiso zomthetho, ukungasoki kwakhe akuyukubalwa yini ukuthi kungukusoka na?
Khona labo abangasokile ngokwemvelo, kodwa bewugcina umthetho, bayakunehlulela nina eninomthetho obhaliwe kanye nokusoka kodwa niwephula umthetho.
Ngokuba umJuda akasiye umJuda woqobo ngezinto ezibonwayo, kanjalo nokusoka akusikho nje okubonwa enyameni.
Kepha umJuda yilowo onguye ngaphakathi, nokusoka kungokwenhliziyo ngomoya, hhayi ngomthetho nje obhaliweyo; okutuswa kwakhe akuveli nje kubantu, kodwa kuNkulunkulu.
Ngabe umJuda ubedlula ngani abanye na? Ngabe ubedlula ngokuthi usokile na?
Yebo, kukhona abedlula ngakho ngezindlela eziningi. Okokuqala ngukuthi yibo abaphathiswa amazwi kaNkulunkulu.
Kungani pho abanye bengakholwanga na? Ukungakholwa kwabo akukwenzanga ukwethembeka kukaNkulunkulu ize na? Ngabe kunjalo na?
Phinde, neze, kepha makwazeke ukuthi: uNkulunkulu uqinisile, kodwa bonke abantu bangabaqambimanga, njengokuba kulotshiwe ukuthi: “Ukuze uthiwe ungolungileyo emazwini akho, unqobe ekwahlulelweni kwakho.”
Kepha uma ukungalungi kwethu kubonakalisa ukulunga kukaNkulunkulu, pho siyakuthini na? Singasho yini ukuthi uNkulunkulu kalungile ngokuba ethululele ulaka lwakhe phezu kwethu na? Ngikhuluma njengomuntu.
Makungabi njalo neze, ngokuba uma kunjalo, uNkulunkulu angawehlulela kanjani umhlaba na?
Kepha uma iqiniso likaNkulunkulu livama ngenxa yamanga ami, kube yinkazimulo kuye, pho ngisahlulelelwani mina njengesoni na?
Kungani kungashiwo njengokuba abanye bekhuluma kabi ngathi, bethi: masenze okubi, ukuze kuvele okuhle na? Ukwehlulelwa kwabo kubafanele.
Singabuye sithini na? Sibadlula ngani na? Ngalutho, ngokuba sesivele sahlulele ukuthi bonke abaJuda namaGriki baphansi kwamandla esono,
njengokuba kulotshiwe ukuthi: “Akekho olungileyo, akekho noyedwa;
akekho onokuqonda, akekho ofuna uNkulunkulu;
bonke baphambukile, baphenduka into engenamsebenzi walutho; akekho namunye owenza okuhle, akukho noyedwa vo.
Umphimbo wabo uyithuna elivulekileyo, bayakhohlisa ngezilimi zabo, isihlungu sezinyoka siphansi kwezindebe zabo;
umlomo wabo ugcwele iziqalekiso nobuthi;
izinyawo zabo ziyashesha ukuyochitha igazi,
incithakalo nosizi kusezindleleni zabo,
abayazi indlela yokuthula.
Akukho ukwesaba uNkulunkulu phambi kwamehlo abo.”
Kepha siyazi ukuthi lokho okushiwo ngumthetho ukukhuluma kulabo abaphansi komthetho ukuze yonke imilomo ithuliswe, umhlaba wonke ubhekane necala kuNkulunkulu.
Ngokuba akukho muntu oyakulungisiswa ngemisebenzi yomthetho phambi kwakhe; ngenxa yomthetho, kwaba khona ukwazi isono.
Kepha manje ukulunga kukaNkulunkulu kubonakalisiwe ngaphandle komthetho, kufakazelwa ngumthetho nabaphrofethi,
ukulunga kukaNkulunkulu okuvela ngokukholwa nguJesu Khristu kubo bonke abakholwayo, ngokuba akukho mehluko.
Ngokuba bonke bonile, basilalelwe yinkazimulo kaNkulunkulu.
Balungisiswe ngesihle, ngomusa wakhe ngokuhlengwa okukuKhristu uJesu,
ammisileyo uNkulunkulu ukuba abe yinhlawulo ngokukholwa egazini lakhe, ukuze kubonakaliswe ukulunga kukaNkulunkulu, ngokuyekelwa kwezono ezazenziwe phambilini,
ngenxa yokubekezela kukaNkulunkulu, ukuba kubonakaliswe ukulunga kwakhe esikhathini samanje, ukuze Yena abe ngolungileyo, abe ngumlungisisi walowo okholwa nguJesu.
Ngakho-ke kuphi ukuzigabisa na? Akukho nhlobo. Ngenxa yamuphi umthetho na? Ngowemisebenzi na? Qhabo, kodwa ngomthetho wokukholwa.
Ngakho-ke sithi umuntu ulungisiswa ngokukholwa, ngaphandle kwemisebenzi yomthetho.
Ngabe uNkulunkulu ungowabaJuda kuphela na? Ngabe akasiye yini nowabezizwe na? Yebo, nowabezizwe futhi,
njengalokhu emunye uNkulunkulu oyakulungisisa abasokileyo nabangasokile ngokukholwa.
Ngakho-ke umthetho siwenza ize yini ngenxa yokukholwa na? Qha akunjalo, kodwa siyawuqinisa umthetho.
Ngakho-ke siyakuthi uzuzeni u-Abhrahama ukhokho wethu ngokwenyama na?
Ngokuba uma u-Abhrahama walungisiswa ngemisebenzi, unokuzigabisa, kodwa hhayi phambi kukaNkulunkulu.
Kanti umbhalo uthini na? Uthi: “Kepha u-Abhrahama wakholwa nguNkulunkulu, kwabalelwa kuye kwaba ngukulunga.”
Kodwa kumuntu osebenzayo, umholo awutholayo awubalelwa kuye ngokomusa, kodwa njengemfanelo yakhe.
Kepha kulowo ongasebenziyo, nokho ekholwa yilowo olungisisa ongamesabi uNkulunkulu, ukukholwa kwakhe kubalelwa kuye, kube ngukulunga.
Njengalokhu noDavide ekhuluma ngokubusiswa komuntu, uNkulunkulu ambalela ukulunga ngaphandle kwemisebenzi, ethi:
“Babusisiwe abazeqo zabo zithethelelwe, nabazono zabo zisitshekelwe;
ubusisiwe umuntu iNkosi engayikumbalela isono.”
Ngakho-ke lokhu kubusiswa ngabe kuqondene nabasokileyo noma nabangasokile yini na? Ngokuba sithi: ukukholwa kwabalelwa ku-Abhrahama, kwaba ngukulunga.
Kanti kwabalelwa kanjani na? Esesokile noma engakasoki na? Qha, akubanga esesokile, kodwa engakasoki.
Wasemukela isibonakaliso sokusoka saba luphawu lokulunga kokukholwa ayenakho engakasoki ukuba abe nguyise wabo bonke abakholwayo bengasokile, ukuze ukulunga kubalelwe kubo,
futhi abe nguyise wabasokileyo, kungabi ngowabasokileyo kuphela, kodwa nowalabo abahamba endleleni yokukholwa, ubaba u-Abhrahama ayenakho engakasoki.
Ngokuba isithembiso sokuthi uyakuba yindlalifa yezwe asenziwanga ku-Abhrahama nasolibeni lwakhe ngomthetho, kodwa ngokulunga kokukholwa.
Uma izindlalifa ziyizo ngenxa yomthetho, ukukholwa kwenziwa ize, nesithembiso asiselutho,
ngokuba umthetho udala intukuthelo, kodwa lapho ungekho khona umthetho akukho nakweqa.
Ngalokho, kuya ngokukholwa ukuba kube ngokomusa, ukuze isithembiso siqiniseke enzalweni yonke, kungabi kweyomthetho kuphela, kodwa nakuleyo engeyokukholwa kuka-Abhrahama ongubaba wethu sonke,
njengokuba kulotshiwe ukuthi: “Ngikuqokile ukuba ube nguyise wezizwe eziningi” phambi kwalowo Nkulunkulu akholwa nguye, Yena ophilisa abafileyo, nobiza okungekho kube sengathi kukhona,
owathi kungekho themba, waba nethemba, wakholwa ukuthi uzakuba nguyise wezizwe eziningi, njengokuba kwashiwo ukuthi: “Luyakuba njalo ulibo lwakho.”
Akabanga buthakathaka ekukholweni nalapho esewubona umzimba wakhe obusufile, eneminyaka engaba yikhulu, nesibeletho sikaSara sesifile.
Nokho akasingabazanga isithembiso sikaNkulunkulu ngokungakholwa, kodwa waqina ekukholweni, enika uNkulunkulu udumo,
eqinisekile ukuthi lokho akwethembisile, unamandla okukwenza.
Ngakho-ke kwabalelwa kuye, kwaba ngukulunga.
Lokho akulotshwanga ngenxa yakhe yedwa ukuthi kwabalelwa kuye,
kodwa nangenxa yethu esiyakubalelwa khona, thina esikholwa nguye owavusa uJesu iNkosi yethu kwabafileyo,
owanikelwa ngenxa yeziphambeko zethu, wavuswa ngenxa yokulungisiswa kwethu.
Ngakho-ke lokhu sesilungisisiwe ngokukholwa, sinokuthula kuNkulunkulu ngeNkosi yethu uJesu Khristu,
okungaye sinokungena ngokukholwa kulo musa esimi kuwo, sizigabisa ngethemba lenkazimulo kaNkulunkulu.
Kepha akusikho lokho kuphela, kodwa siyazigabisa nangezinhlupheko, sazi ukuthi ukuhlupheka kuveza ukubekezela,
ukubekezela kuveza ukuqiniseka, ukuqiniseka kuveza ithemba.
Ithemba alijabhisi, ngokuba uthando lukaNkulunkulu lutheliwe ezinhliziyweni zethu ngoMoya oNgcwele esimphiweyo.
Ngokuba sisebuthakathaka, uKhristu wafela abangamesabi uNkulunkulu ngesikhathi esifaneleyo,
ngokuba akwandile ukuba umuntu angafela olungileyo, kodwa hleze kube khona ongazidela afele umuntu oqotho.
Kepha uNkulunkulu ubonakalisa ukusithanda kwakhe ngalokhu, ukuthi siseyizoni, uKhristu wasifela.
Ngakho-ke kakhulu kangakanani sesilungisisiwe ngegazi lakhe, siyakusindiswa ngaye olakeni.
Ngokuba uma sathi siseyizitha, sathola ukubuyisana noNkulunkulu ngokufa kweNdodana yakhe, kuyacaca bha ukuthi siyakusindiswa ngokuphila kwayo sesikutholile ukubuyisana.
Kepha akusikho lokho kuphela, kodwa siyazigabisa ngoNkulunkulu ngeNkosi yethu uJesu Khristu, esamukeliswe ngayo ukubuyisana.
Ngakho-ke njengalokhu isono sangena emhlabeni ngamuntu munye, nangesono kwangena ukufa, ngokunjalo ukufa kwabehlela abantu bonke, ngokuba bonke bonile.
Ngokuba isono sasikhona emhlabeni, kwaze kwafika umthetho; kodwa isono asibalelwa lapho kungekho khona umthetho.
Nokho ukufa kwabusa kusukela ku-Adamu kwaze kwaba kuMose, nakulabo abangonanga ngesiphambeko esifanayo nesika-Adamu oyisifanekiso salowo ozayo.
Kepha isipho somusa asinjengesiphambeko, ngokuba uma ngesiphambeko samuntu munye kwafa abaningi; ikakhulu kwanda kwabaningi umusa nesipho sikaNkulunkulu, ngomusa wamuntu munye, uJesu Khristu.
Isipho asinjengakho ukona kwamuntu munye, ngokuba uma ukwehlulela kwaba ngoyedwa, kube ngukulahlwa, isipho somusa sona saba ngeziphambeko eziningi, kube ngukulungisiswa.
Ngokuba uma ngesiphambeko samuntu munye ukufa kwabusa ngalowo emunye, kusobala-ke ukuthi abemukela ukuvama komusa nokuvama kwesipho sokulunga, bayakubusa ekuphileni ngalowo oyedwa zwi, uJesu Khristu.
Ngakho-ke njengokuba ngasiphambeko sinye, kwaba khona ukulahlwa kubantu bonke, kanjalo ngasenzo sinye sokulunga, kwaba khona ukulungisiswa kokuphila kubantu bonke.
Ngokuba ngokungalaleli kwamuntu munye, abaningi benziwa izoni; kanjalo ngokulalela kwamuntu munye, abaningi bayakwenziwa abalungileyo.
Kepha umthetho wangena ukuze kwande isiphambeko, kodwa lapho kuvama khona isono, kwavama kakhulu umusa ngokwedlulele,
ukuze njengalokhu isono sabusa ngokufa, kanjalo nomusa ubuse ngokulunga, kube ngukuphila okuphakade ngoJesu Khristu iNkosi yethu.
Sizakuthini na? Siqhubeke sihlale esonweni ukuze kuvame umusa na?
Phinde, neze. Thina esafa maqondana nesono singabuye siphile kanjani kuso na?
Kanti anazi yini ukuthi sonke esabhabhidiselwa kuKhristu uJesu, sabhabhadiselwa kukho ukufa kwakhe na?
Ngakho sembelwa naye ngokubhabhadiselwa kukho ukufa ukuba njengalokhu uKhristu wavuswa kwabafileyo ngenkazimulo kaYise, kanjalo nathi sihambe ekuphileni okusha.
Ngokuba uma sihlanganiswe naye ngokufa okufanayo, siyakuba njalo nangokuvuka.
Sazi lokhu ukuthi umuntu wethu omdala wabethelwa kanye naye esiphambanweni, ukuze umzimba wesono wenziwe ize, singabe sisakhonza isono,
ngokuba ofileyo ukhululiwe.
Kodwa uma safa kanye noKhristu, siyakholwa ukuthi siyakuphila kanye naye,
sazi ukuthi uKhristu esevusiwe kwabafileyo, akasayukufa, ukufa akusabusi phezu kwakhe.
Ngokuba ukufa afa ngakho, wakufa kwaba kanye kuphela ngenxa yesono; kodwa ukuphila akuphilayo ukuphilela uNkulunkulu.
Kanjalo nani zishoni ukuthi ningabafileyo maqondana nesono, kodwa niphilele uNkulunkulu kuKhristu uJesu.
Ngakho-ke isono masingabusi emzimbeni wenu ofayo, nize nithobele izinkanuko zawo,
futhi ninganikeli ngezitho zenu esonweni, ukuba zibe yizikhali zokungalungi, kodwa zinikeleni nina kuNkulunkulu njengabaphilayo, abavukile kwabafileyo; nezitho zenu nizinikeleni kuNkulunkulu, zibe yizikhali zokulunga,
ngokuba isono asiyukubusa phezu kwenu, phela anikho phansi komthetho, kodwa niphansi komusa.
Pho senzenjani na? Siyakona yini ngokuba singekho phansi komthetho, kodwa siphansi komusa na? Qha akunjalo.
Anazi yini ukuthi lowo enizinikela kuye ukuba nibe yizinceku ezimthobelayo, niyizinceku zalowo enimthobelayo; noma ezesono esiholela ekufeni, noma ezokuthobeka kube ngukulunga na?
Kepha makabongwe uNkulunkulu ukuthi nina enaniyizinceku zesono, senilalela ngenhliziyo indlela yemfundiso enanikelwa kuyo,
nokuthi senikhululiwe esonweni, naba yizinceku zokulunga.
Ngikhulumisa okomuntu ngenxa yobuthakathaka benyama yenu. Ngokuba njengalokhu nanikela izitho zenu ukuba zibe yizinceku zamanyala, nokungalungi kwaba ngukungalungi; kanjalo nikelani manje izitho zenu zibe yizinceku zokulunga, kube ngukungcweliswa.
Ngokuba ngesikhathi niseyizinceku zesono, nanikhululekile maqondana nokulunga.
Naninasithelo sini ngaleso sikhathi eseninamahloni ngaso manje, ngokuba isiphetho salokho ngukufa.
Kepha manje senikhululiwe esonweni, naba ngabakhonza uNkulunkulu; seninazo izithelo enizithelayo, kube ngukungcweliswa, nesiphetho salokho ngukuphila okuphakade.
Ngokuba inkokhelo yesono ingukufa, kodwa isipho somusa sikaNkulunkulu singukuphila okuphakade kuKhristu uJesu iNkosi yethu.
Kanti anazi yini bazalwane, ngikhuluma kwabawaziyo umthetho, ukuthi umthetho uyabusa phezu komuntu ngaso sonke isikhathi esaphila na?
Ngokuba owesifazane oganile ubophelekile ngokomthetho endodeni yakhe, inqobo nje uma isaphila; kodwa uma indoda isifile, ukhululiwe emthethweni wendoda.
Ngalokho-ke uma indoda isaphila, yena bese eba ngowenye indoda, uyakubizwa ngesindindwa, kodwa uma indoda isifile, ukhululekile emthethweni, akasiso isindindwa, uma eba ngowenye indoda.
Kanjalo nani bazalwane bami, nafa maqondana nomthetho ngomzimba kaKhristu, ukuba nibe ngabomunye, lowo owavuswa kwabafileyo, ukuze sithele izithelo kuNkulunkulu.
Ngokuba sisesenyameni, izinkanuko zezono ezavela ngomthetho, zasebenza ezithweni zethu ukuze zithele izithelo zokufa.
Kepha manje sikhululiwe emthethweni, sifile maqondana nalokho okwakusithiya ukuba sikhonze emoyeni omusha, hhayi ngendlela endala yomthetho.
Pho sizakuthini na? Ngabe umthetho uyisono na? Qha nakanye, kepha ngabe angisazanga isono ukuba kwakungekho umthetho, ngokuba ngangingekwazi nokufisa ukuba umthetho awushongo ukuthi: “Ungafisi.”
Kepha isono sathola ithuba ngomyalo, saveza kimi zonke izinhlobo zokufisa; ngokuba ngaphandle komthetho, isono sifile.
Mina-ke ngake ngahamba ngaphandle komthetho, kodwa kwathi ukuba kufike umyalo, savuka isono,
ngafa mina; kwathi umyalo obungowokuphila, wafunyanwa ungowokufa kimi.
Ngokuba isono sathola ithuba ngomyalo, sangikhohlisa, kwathi ngawo, sangibulala.
Ngakho-ke umthetho ungcwele, nomyalo ungcwele, ulungile, futhi muhle.
Pho okuhle kwaba ngukufa kimi na? Phinde, akunjalo, kodwa isono, ukuze sibonakale ukuthi siyisono, sangibangela ukufa ngokusebenzisa okuhle, ukuba isono ngomyalo sibe sibi kakhulu.
Ngokuba siyazi ukuthi umthetho ungowomoya, kodwa mina ngingumuntu othengisiwe phansi kwesono.
Ngokuba engikwenzayo angikuqondi; engikwenzayo akusikho lokhu engikuthandayo, kodwa lokho engikuzondayo, yikho kanye engikwenzayo.
Kepha uma ngenza lokho engingakuthandiyo, ngiyawuvumela umthetho ukuthi muhle.
Kodwa manje akuseyimi engikwenzayo, kepha yisono esihlala kimi.
Ngokuba ngiyazi ukuthi kimi, okungukuthi emzimbeni wami, akuhlali lutho oluhle, ngokuba ukuthanda ukwenza okulungileyo kukhona kimi, kodwa ukwenza okuhle akukho.
Okuhle engikuthandayo angikwenzi, kodwa okubi engingakuthandiyo, yikho kanye engikwenzayo.
Uma-ke ngenza lokho engingakuthandiyo akuseyimi engenza lokho, kodwa yisono esihlala kimi.
Ngalokho ngithola ukuthi kunomthetho kimi, okuthi uma ngifuna ukwenza okuhle, okubi kube nami shaqa,
nokho ngiyawuthanda umthetho kaNkulunkulu ngokomuntu ongaphakathi.
Kodwa ngibona omunye umthetho ezithweni zami, olwayo nomthetho osengqondweni yami, ungithumbela emthethweni wesono osezithweni zami.
Maye, kimi muntu wosizi! Ngubani oyakungikhulula kulo mzimba wokufa na?
Kepha makabongwe uNkulunkulu ngoJesu Khristu iNkosi yethu. Ngakho-ke mina ngokwami ngikhonza umthetho kaNkulunkulu ngengqondo, kodwa umthetho wesono ngomzimba.
Kanjalo akusekho ukulahlwa kwabakuKhristu uJesu.
Ngokuba umthetho kaMoya wokuphila okuKhristu uJesu ungikhululile emthethweni wesono nowokufa.
Phela lokho okwakwehlula umthetho, ngokuba inyama yemvelo iwuthene amandla, uNkulunkulu wakwenza ngokuthumela iNdodana yakhe inesimo somzimba wesono, ukuze ibhekane ngqo nesono, sinqotshwe isono enyameni,
ukuze izimfanelo ezinhle ezifunwa ngumthetho zifezeke kithi, thina esingahambi ngokwenyama, kodwa ngokukaMoya.
Ngokuba abokwenyama banaka okwenyama, kepha abakaMoya banaka okukaMoya.
Ngokuba ukubeka ingqondo ezintweni zenyama kungukufa, kepha ukuyibeka ezintweni zikaMoya kungukuphila nokuthula.
Ngokuba ukucabanga komuntu esenyameni kungubutha kuNkulunkulu, lokhu akuwuthobeli umthetho kaNkulunkulu, futhi akusoze kwawuthobela,
ngokuba abasabuswa yimvelo abanakumthokozisa uNkulunkulu.
Kepha nina anibuswa yinyama yemvelo, kodwa nikuye uMoya, inqobo nje uma uMoya kaNkulunkulu ehlala kini. Kepha uma umuntu engenaye uMoya kaKhristu, lowo kasiye owakhe.
Uma uKhristu ekini, umzimba ufile ngenxa yesono, kodwa umoya ungukuphila ngenxa yokulunga.
Uma-ke uMoya walowo owavusa uJesu kwabafileyo ehlala kini, lowo owamvusa uKhristu uJesu kwabafileyo uyakuyiphilisa nemizimba yenu efayo ngaye uMoya wakhe ohlala kini.
Ngakho-ke bazalwane, asinasikweletu kuyo inyama ukuba siphile ngayo.
Ngokuba uma nihamba ngokwenyama, nizakufa noma kanjani, kodwa uma nibulala imisebenzi yomzimba ngoMoya, nizakuphila.
Bonke abaholwa nguMoya kaNkulunkulu, labo-ke bangabantwana bakaNkulunkulu,
ngokuba anamukeliswanga umoya wobugqila ukuba nibuye nesabe, kepha namukeliswa umoya wobuntwana esimemeza ngaye sithi: “Abba, Baba!”
Yena lowo Moya ufakaza kanye nomoya wethu ukuthi singabantwana bakaNkulunkulu.
Uma-ke singabantwana, siyizindlalifa futhi; izindlalifa zikaNkulunkulu, nezindlalifa kanye noKhristu, uma nje sihlupheka kanye naye, ukuze futhi sikhazimuliswe kanye naye.
Ngokuba ngithi izinhlupheko zesikhathi samanje azinakulinganiswa nenkazimulo ezayo, eyakwembulwa kithina;
ngokuba okudaliweyo kulindele ngokulangazelela ukwembulwa kwabantwana bakaNkulunkulu.
Ngokuba indalo yabekwa phansi kobuze, kungengentando yayo, kodwa ngentando yowayibekayo, ngethemba lokuthi,
nayo indalo uqobo iyakukhululwa ebugqileni bokubhubha, ikhululelwe enkazimulweni yabantwana bakaNkulunkulu.
Ngokuba siyazi ukuthi yonke indalo iyabubula kanyekanye, inezinseka ezinzima kuze kube manje.
Akusikho nje lokho kuphela, kodwa nathi uqobo lwethu esinolibo lokuqala lukaMoya, siyabubula phakathi kwethu; silindele ngethemba elikhulu isimo sobuntwana, ukukhululwa komzimba wethu.
Ngokuba ngethemba sisindisiwe, kepha ithemba elibonwayo alisilo ithemba, ngokuba lokhu umuntu akubonayo usakwethembelani na?
Kepha uma sithemba lokho esingakuboniyo, siyakulindela ngokubekezela.
Ngokunjalo noMoya uyasisiza ebuthakathakeni bethu, ngokuba asikwazi esifanele ukukucela, kodwa uMoya uqobo uyasinxusela ngokububula okungakhulumeki ngamazwi.
Kepha Yena ohlola izinhliziyo uyakwazi okuqondwa nguMoya, ngokuba unxusela abangcwele ngokwentando kaNkulunkulu.
Siyazi ukuthi kwabamthandayo uNkulunkulu, konke kusebenzelana kube ngokuhle, kulabo ababiziweyo ngokwecebo lakhe.
Ngokuba labo ayebazi phambilini, wabamisa kwaphambilini ukuba bafane nesimo seNdodana yakhe, ukuze yona ibe yizibulo kubazalwane abaningi;
labo abamisile ngaphambilini, ubabizile futhi; labo ababizile, ubalungisisile futhi; labo abalungisisile, ubakhazimulisile futhi.
Sesiyakuthini ngalokho na? Uma uNkulunkulu emi ngakithi, ngubani ongamelana nathi na?
Yena ongayigodlanga eyakhe iNdodana, kodwa wayinikela ngenxa yethu sonke. Kungaba kanjani pho, ukuba angasiphi konke kanye nayo na?
Ngubani oyakumangalela abakhethiweyo bakaNkulunkulu na? UNkulunkulu ungolungisisayo.
Kanti ngubani ozakulahla ngecala na? NguKhristu uJesu owafayo, yebo owavuswa kwabafileyo, ongakwesokunene sikaNkulunkulu, nguYena osinxuselayo.
Pho ngubani ozakusehlukanisa nothando lukaKhristu na? Ngabe ukuhlupheka noma usizi; ukuhlushwa noma indlala ukuhamba ze noma ingozi, noma yinkemba na?
Ngokuba kulotshiwe ukuthi: “Ngenxa yakho, sibulawa usuku lonke; sifana nezimvu zokuhlatshwa.”
Kepha kukho konke lokho, siyanqoba nokunqoba ngowasithandayo.
Ngiyakholwa ukuthi nakufa, nakuphila, nazingelosi, nababusi, nakho okukhona, nakho okuzayo, namandla,
nakuphakama, nakujula, nanoma yini enye edaliweyo; akuyukuba namandla okusehlukanisa nothando lukaNkulunkulu olukuKhristu uJesu, iNkosi yethu.
Ngikhuluma iqiniso ngikuKhristu, angiqambi manga, unembeza wami ufakazelana nami kuMoya oNgcwele,
ukuthi nginosizi olukhulu nobuhlungu obungapheliyo enhliziyweni yami,
ngokuba ngangifisa ukuba ngoqalekisiweyo, ngisuswe kuKhristu ngenxa yabazalwane bami abangabakithi ngokobuzwe,
abangaba-Israyeli, okungesabo isimo sobuntwana nenkazimulo; izivumelwano, ukumiswa komthetho, inkonzo, nezithembiso;
okungababo okhokho, nadabuka kubo uKhristu ngokwenyama, Yena onguNkulunkulu ophezu kwakho konke, obongekayo kuze kube phakade. Amen.
Nokho akusikho ukuthi izwi likaNkulunkulu lehlulekile, ngokuba akusibo bonke abavela ku-Israyeli abangabakwa-Israyeli.
Akuyibo bonke abawulibo luka-Abhrahama abangabolibo lwakhe loqobo, kodwa ngo-Isaka bayakubizwa ngolibo lwakho.
Lokhu kusho ukuthi akusibo abantwana ngokwenyama abangabantwana bakaNkulunkulu, kodwa labo abangabantwana besithembiso, yibo ababizwa ngabolibo.
Ngokuba lingesithembiso leli elithi: “Ngizobuya ngalesi sikhathi, uSara uzobe esenendodana.”
Akuyilokho kuphela, kodwa kwaba kanjalo nakuRibheka owathola abantwana koyedwa, u-Isaka, ukhokho wethu.
Ngokuba engakazalwa amawele, engakakwenzi okuhle noma okubi, ukuze icebo likaNkulunkulu eliya ngokukhetha lifezeke,
elingayi ngokwemisebenzi, kodwa ngalowo obizayo, kwashiwo kuye uRibheka ukuthi: “Omkhulu uyakukhonza omncane,”
njengalokhu kubhaliwe ukuthi: “UJakobe ngamthanda, kodwa u-Esawu ngamzonda.”
Pho siyakuthini na? Ukuthi kukhona ukungalungi kuNkulunkulu na? Qha nakanye.
Ngokuba kuMose uthi: “Ngizakumhawukela engimhawukelayo, ngimzwele engimzwelayo.”
Ngakho-ke akuyi ngokuthanda nangokuzikhandla komuntu, kodwa kuya ngesihawu sikaNkulunkulu.
Ngokuba umbhalo uthi kuFaro: “Ngakuphakamisela khona lokhu, ukuba ngibonakalise amandla ami kuwe nokuba igama lami lishunyayelwe emhlabeni wonke.”
Ngakho-ke unesihawu kulowo athanda ukumhawukela, umenza lukhuni lowo athanda ukumenza lukhuni.
Ngakho-ke nizakuthi kimi: “Kungani pho esasithola sinecala na? Ngokuba ngubani ongamelana naye na?”
Maye, muntu ndini! Ungubani-ke wena ukuba uqagulisane noNkulunkulu na? Okubunjiweyo kungasho yini kumbumbi ukuthi: “Wangenzelani ngaba njena na?”
Kambe umbumbi akanamandla yini ukuba esigaxeni esisodwa sebumba enze isitsha esihloniphekayo nesinye esingahloniphekiyo na?
Uma uNkulunkulu ebethanda ukubonakalisa ulaka lwakhe nokuveza amandla akhe, ababekezelela labo ababemiselwe ulaka lwakhe, ukuba babhujiswe,
ukuze abonakalise ingcebo yenkazimulo yakhe ezitsheni zomusa ayezilungisele inkazimulo ngaphambilini,
asibizayo nathi phakathi kwabo, hhayi kubaJuda kuphela, kodwa nakubo abezizwe.
Njengalokhu esho nakuHoziya ethi: “Ngiyakubiza abangesiso isizwe sami, ngokuthi yisizwe sami; nalowo ongathandiwe, ngokuthi uthandiwe;
Lokhu kuyokwenzeka endaweni lapho kwathiwa kubo: ‘Anisibo abantu bami,’ lapho bayakubizwa ngokuthi: ‘Abantwana bakaNkulunkulu ophilayo.’ ”
U-Izaya wamemeza ngo-Israyeli, wathi: “Nakuba isibalo sabantu bakwa-Israyeli singangesihlabathi solwandle, yinsali eyakusindiswa,
ngokuba iNkosi iyakufeza izwi layo emhlabeni; iyakuliphelelisa futhi ikhawuleze.”
Nanjengalokhu u-Izaya washo phambilini wathi: “Ukuba iNkosi Yamabandla ibingasishiyelanga ulibo, besiyakuba njengeSodoma, sibe njengeGomora.”
Pho sesiyakuthini na? Siyakuthi abezizwe abangakufunisisanga ukulunga bafumene ukulunga, ukulunga okutholakala ngokukholwa.
Kepha u-Israyeli, owayelandela umthetho wokulunga, akafinyelelanga kuwo.
Kungani na? Kungenxa yokuthi babengawulandeli ngokukholwa, kodwa kungemisebenzi; baqhuzuka etsheni lokuqhuzula,
njengalokhu kulotshiwe ukuthi: “Bukani, ngibeka eZiyoni itshe lokukhubekisa, nedwala lokuwisa; okholwa yilo akayukujabhiswa.”
Bazalwane, isifiso senhliziyo yami nokunxusa kwami kuNkulunkulu ngukuba abakwa-Israyeli basindiswe.
Ngokuba ngiyabafakazela ukuthi banayo intshisekelo kaNkulunkulu, kodwa engasuki ekwazini,
lokhu bengakwazi ukulunga kukaNkulunkulu, bafuna ukumisa okwabo ukulunga; abakuthobelanga ukulunga kukaNkulunkulu.
Ngokuba isiphetho somthetho nguKhristu, kube ngukulunga kubo bonke abakholwayo.
UMose waloba mayelana nokulunga okuza ngomthetho, ukuthi umuntu owenza ukulunga okuvela emthethweni, uyakuphila ngakho.
Kepha ukulunga okuvela ngokukholwa kuthi: “Ungasho enhliziyweni yakho uthi: ‘Ngubani ozakwenyukela ezulwini na?’ okungukuthi ukwehlisa uKhristu,
noma uthi: ‘Ngubani ozakwehlela endaweni yabafileyo na?’ ” okungukuthi ukukhuphula uKhristu kwabafileyo.
Kepha kuthini na? Izwi liseduze nawe, emlonyeni wakho nasenhliziyweni yakho, okungukuthi izwi lokukholwa esilishumayelayo.
Ngokuba uma uvuma ngomlomo wakho ukuthi uJesu uyiNkosi, ukholwa enhliziyweni yakho ukuthi uNkulunkulu wamvusa kwabafileyo, uyakusindiswa.
Ngokuba umuntu ukholwa ngenhliziyo kube ngukulunga, avume ngomlomo wakhe kube ngukusindiswa.
Umbhalo uthi: “Bonke abakholwa kuye abayukujabhiswa.”
Ngokuba akukho mahluko phakathi komJuda nomGriki, lokhu Yena uyiNkosi yabo bonke, futhi ubacebele bonke abakhuleka kuye,
ngokuba: “Bonke abakhuleka egameni leNkosi bayakusindiswa.”
Kepha bayakukhuleka kanjani kulowo abangakholwa nguye na? Bayakukholwa kanjani kuye bengezwanga ngaye na? Bayakuzwa kanjani kungekho oshumayelayo na?
Bayakushumayela kanjani uma bengathunywa na? Njengokuba kulotshiwe ukuthi: “Yeka, zinhle kangakanani izinyawo zabashumayela izindaba ezinhle.”
Kepha abalilalelanga bonke ivangeli. Ngokuba u-Izaya, uthi: “Nkosi, ngubani owakholwa ngumbiko wethu na?”
Ngakho-ke ukukholwa kuvela ngokuzwa, ukuzwa kuvela ngezwi likaKhristu.
Kepha ngithi: abezwanga yini na? Impela bezwa kahle: “Izwi labo liphumele emhlabeni wonke, namazwi abo emikhawulweni yomhlaba.”
Kepha ngithi: u-Israyeli akazanga yini na? Okokuqala, uMose uthi: “Mina ngiyakunenza nibe nesikhwele ngabangesiso isizwe, nginithukuthelise ngesizwe esingenakuqonda.”
Kepha u-Izaya unesibindi sokuthi: “Ngafunyanwa yilabo abangangifunanga, ngabonakala kulabo abangangibuzanga.”
Kepha ku-Israyeli uthi: “Usuku lonke ngelulela izandla zami esizweni esingalaleliyo nesiphikisayo.”
Ngalokho-ke ngithi: ngabe uNkulunkulu usilahlile yini isizwe sakhe na? Qha nakanye, ngokuba nami ngingumIsrayeli, wenzalo ka-Abhrahama, wesizwe sakwaBhenjamini.
UNkulunkulu akasilahlile isizwe sakhe ayesazi phambilini. Kanti anazi yini ukuthi uthini umbhalo ngo-Eliya lapho enxusa uNkulunkulu emelene no-Israyeli na?
Uthi: “Nkosi, bababulele abaphrofethi bakho, badiliza ama-althare akho; kusele mina ngedwa, sebefuna ukungibulala nami.”
Kepha ithini impendulo kaNkulunkulu kuye na? Ithi: “Ngizishiyele amadoda ayizi-7 000 angazange amkhothamele uBhali.”
Kanjalo nangalesi sikhathi samanje ikhona insali ekhethwe ngokomusa.
Kepha uma kungokomusa, akusayi ngemisebenzi; ngokuba uma kungenjalo, umusa awuseyiwo umusa.
Pho kwenzekani na? Lokhu u-Israyeli akufunayo akakufumananga, kodwa kwatholwa ngabakhethiweyo, abanye benziwa baba lukhuni,
njengalokhu kulotshiwe ukuthi: “UNkulunkulu wabanika umoya wobuthongo obunzulu, namehlo okungaboni, nezindlebe ezingezwa, kuze kube lusuku lwanamuhla.”
NoDavide uthi: “Itafula labo malibe yisihibe nogibe, nesikhubekiso nempindiselo kubo;
amehlo abo mawafiphazwe ukuze angaboni; kuthi umhlane wabo uqhothe njalo.”
Ngakho-ke ngithi: abakhubekanga ukuze bawe na? Qha akunjalo; kepha ngesiphambeko sabo, insindiso ifinyelele kwabezizwe ukuze kuvuswe isikhwele kubo.
Uma-ke isiphambeko siletha ingcebo emhlabeni, nokwehluleka kwabo kuletha ingcebo kwabezizwe, kuyoba kangakanani ngokuphelela kwabo.
Ngikhuluma kini nina bezizwe, njengokuba ngingumphostoli kwabezizwe, ngidumisa umsebenzi wami,
uma nje kungenzeka ukuba ngivuse isikhwele kulabo abangabesizwe sakithi, ngisindise abanye babo.
Ngokuba uma ukulahlwa kwabo kulethe ukubuyisana emhlabeni, pho ukwamukelwa kwabo kuyakulethani uma kungesikho ukuphila kwabafileyo na?
Uma ulibo lungcwele, nenhlama injalo; uma impande ingcwele, anjalo namagatsha.
Kepha uma amanye amagatsha anqunywa, kwase kuthi wena oyigatsha lesihlahla somnqumo wasendle wafakwa phakathi kwawo ukuze uhlanganyele engcebeni yempande yomnqumo;
ungazigabisi phezu kwamagatsha. Kepha uma uzigabisa, khumbula ukuthi akunguwe othwele impande, kodwa yimpande ethwele wena.
Wena uzakuthi: “Amagatsha anqunywa ukuze kuxhunywe mina esiqwini na?”
Kulungile, anqunywa ngenxa yokungakholwa, kodwa wena umi ngokukholwa. Ngakho-ke ungazikhukhumezi, kodwa yesaba.
Ngokuba uma uNkulunkulu engawayekanga amagatsha emvelo, mhlawumbe nawe akayukukuyeka.
Ngakho-ke bhekani ubumnene nobunzima besandla sikaNkulunkulu kulabo abawa kanzima; kodwa bukuwe ubumnene bukaNkulunkulu, inqobo nje uma uhleli ebubeleni bakhe; nxa kungenjalo, nawe uzakunquma.
Nakulabo abanye uma bengaqhubekanga abangakholwa, nabo bayakuxhunywa, ngokuba uNkulunkulu unamandla okubaxhuma futhi esiqwini.
Phela uma wena wanqunywa kulokho ngokwemvelo yakho okungumnqumo wasendle, kwathi ngokuphambene nemvelo waxhunywa emnqumweni otshaliwe, pho kuyoba kangakanani nxa sekuxhunywa esiqwini sakubo labo abangumnqumo ngokwemvelo.
Bazalwane, angithandi ukuba ningayazi le mfihlakalo, funa nizishaye abahlakaniphileyo: yazini ukuthi u-Israyeli usenziwe waba lukhuni okwamanje, kuze kupheleliswe isibalo sabezizwe.
Kanjalo u-Israyeli wonke uyakusindiswa, njengalokhu kulotshiwe ukuthi: “Kuyakuvela uMhlangulisi eZiyoni, asuse ukungalungi kuJakobe.
Lesi yisivumelwano sami nabo, lapho ngizisusa izono zabo.”
Ngokwevangeli, bayizitha ngenxa yenu, kodwa ngokukhethwa, bangabathandekayo ngenxa yokhokho babo.
Ngokuba izipho zomusa nokubiza kukaNkulunkulu akaguquki kukho.
Ngokuba njengalokhu nina kade ningamlaleli uNkulunkulu, kodwa manje nihawukelwe ngenxa yokungalaleli kwabezizwe.
Kanjalo manje laba abalalelanga, ukuze kuthi ngesihawu enenzelwe sona, nabo bahawukelwe manje.
Ngokuba uNkulunkulu ubavalele bonke ekungalalelini ukuze abahawukele bonke.
Yeka ukujula kwengcebo, nokuhlakanipha, nokwazi kukaNkulunkulu! Yeka izehlulelo zakhe ezingaphenyekiyo, nezindlela zakhe ezingaqondakaliyo!
Ngokuba: “Ngubani owawazi umqondo weNkosi na? Ngubani owaba ngumeluleki wayo na?”
Noma-ke: “Ngubani owaqala ukuyipha ukuze kubuyiselwe kuye na?”
Ngokuba konke kuvela kuye, kukhona ngaye, kubuyela kuye; makube kuye inkazimulo kuze kube phakade. Amen.
Ngakho-ke ngiyanincenga bazalwane, ngobubele bukaNkulunkulu ukuba ninikele imizimba yenu ibe ngumnikelo ophilileyo, ongcwele, othandekayo kuNkulunkulu; kube ngukukhonza kwenu ngokomoya.
Ningalingisi leli lizwe, kodwa niguqulwe isimo ngokwenziwa ibe yintsha ingqondo yenu ukuze nikwazi ukuhlolisisa okuyintando kaNkulunkulu, okuhle, okuthandekayo, nokupheleleyo.
Ngokuba ngomusa engiwuphiweyo ngithi kulowo nalowo kini akangazicabangi ukuthi mkhulu, kunalokho afanele ukukucabanga; kodwa acabange kube ngokuqonda, njengalokhu uNkulunkulu abele yilowo nalowo isilinganiso sokukholwa.
Njengalokhu sinezitho eziningi emzimbeni munye, kepha izitho zonke azenzi msebenzi munye,
kanjalo nathi esibaningi, nokho simzimba munye kuKhristu, kepha ngabanye siyizitho, omunye esomunye.
Sinezipho zomusa ezahlukeneyo ngokomusa esiwuphiweyo: uma kungesokuphrofetha, asiphrofethe ngesilinganiso sokukholwa.
Uma kungesokukhonza, kube sekukhonzeni; esokufundisa, kube sekufundiseni;
esokugqugquzela, kube sekukhuthazeni; esokuphana, aphane ngokukhululeka; esokuhola, ahole ngenkuthalo; kanye nesesihe, akwenze ngentokozo.
Uthando malungabi nakuzenzisa; nyanyani okubi, nibambelele kokuhle.
Thandanani ngokujulile ngothando lobuzalwane; nindulelane ekuhloniphaneni,
ekukhuthaleni, ningabi ngamavila; nivuthe emoyeni, nikhonze iNkosi;
ethembeni nithokoze, osizini nibekezele, nasekukhulekeni ningaphezi,
nifune njalo ukuhlanganyela ekusweleni kwabangcwele, nisize nabayizihambi.
Babusiseni abanihluphayo; busisani, ningaqalekisi.
Thokozani nabathokozayo, nikhale nabakhalayo.
Nibe mqondo munye, nicabangelane ngokufanayo; ningazikhukhumezi, kodwa zihlanganiseni nabathobekileyo. Ningazishayi abahlakaniphileyo.
Ningaphindisi okubi ngokubi, khuthalelani ukwenza okuhle phambi kwabantu bonke.
Uma kungenzeka, hlalani ngokuthula nabantu bonke.
Bathandekayo, ningaphindiseli, kodwa dedelani ulaka lukaNkulunkulu, ngokuba kulotshiwe ukuthi: “Ingeyami impindiselo, ngiyakuphindisela,” kusho iNkosi.
Kepha-ke: “Uma isitha sakho silambile, siphe sidle; uma somile, siphuzise, ngokuba ngokwenza lokho, uyakube ufumbela amalahle avuthayo ekhanda laso.”
Unganqotshwa ngokubi, kodwa nqoba okubi ngokuhle.
Akube yilowo nalowo azithobe phansi kwamandla ombuso. Ngokuba akukho mandla ombuso angaveli kuNkulunkulu. Lawa akhona amiswe nguNkulunkulu.
Ngakho-ke omelana nabasemagunyeni, umelana nesimiso sikaNkulunkulu. Abamelana nabo bayakwemukeliswa ukulahlwa.
Ngokuba ababusi abesabeki kulabo abenza okuhle, kodwa kwabenza okubi. Uyathanda yini ukungamesabi osemagunyeni na? Yenza-ke okuhle, yena uyakukuncoma,
ngokuba uyisikhonzi sikaNkulunkulu, ukuze sikwenzele okuhle. Kepha uma wenza okubi, yesaba, ngokuba akayiphatheli ize inkemba, phela uyisikhonzi sikaNkulunkulu, nophindisela ulaka kulowo owenza okubi.
Ngakho-ke kudingekile ukuwuthobela, hhayi nje ngenxa yolaka, kodwa nangenxa kanembeza.
Yingakho nithela intela, ngokuba bayizikhonzi zikaNkulunkulu ezikukhuthalele lokho.
Nikani bonke okubafaneleyo: intela kofanele intela; inkokhelo kofanele inkokhelo; ukwesaba kofanele ukwesatshwa; udumo kofanele udumo.
Ningabi nacala lanoma yini kunoma ngubani, kodwa elokuthandana, ngokuba othanda omunye, uwugcwalisile umthetho.
Lokhu ukuthi: “Ungaphingi, ungabulali, ungebi, ungafisi,” noma ngabe ukhona omunye umyalo, kodwa kufingqwe kuleli lizwi elithi: “Wothanda umakhelwane wakho njengalokhu uzithanda wena.”
Uthando alukwenzi okubi kumakhelwane, ngakho-ke uthando lungukugcwaliseka komthetho.
Yenzani lokhu, ngokuba nazi isikhathi ukuthi sekuyihora lokuba nivuke ebuthongweni. Ngokuba manje insindiso isisondele kithi kunangaleso sikhathi esaqala ngaso ukukholwa.
Ubusuku sebuyedlula, imini isisondele. Ngakho-ke masilahle imisebenzi yobumnyama, sihlome ngezikhali zokukhanya.
Asiziphathe kahle njengasemini, kungabi ngokuminza nokudakwa, kungabi ngobufebe namanyala, kungabi ngokuxabana nomhawu.
Kepha yembathani iNkosi uJesu Khristu, ninganakekeli inyama yenu, kuvuswe izinkanuko.
Kepha memukeleni obuthakathaka ekukholweni, kungabi ngemidlinzo yokumehlulela.
Omunye ukholwa ukuthi angakudla konke, kodwa obuthakathaka udla imifino kuphela.
Odlayo makangamdeleli ongadliyo, ngokunjalo nongadliyo makangamehluleli odlayo, ngokuba uNkulunkulu umamukele.
Lapho ungubani nje wena owehlulela inceku yomunye na? Kuphambi kwenkosi yayo ukuma noma ukuwa kwayo, kodwa iyakumiswa, ngokuba iNkosi inamandla okuyimisa.
Omunye uqhakambisa olunye usuku kunolunye, omunye azithathe ngokufana zonke izinsuku; makube yilowo nalowo aqiniseke emqondweni wakhe ngakucabangayo.
Ohlonipha usuku uluhloniphela iNkosi, nodlayo udlela iNkosi, ngokuba ubonga uNkulunkulu, nongadliyo, akadli ngenxa yeNkosi, naye ubonga uNkulunkulu.
Ngokuba akakho phakathi kwethu oziphilela yena, akakho nozifela yena;
ngokuba uma siphila, siphilela iNkosi, uma sifa, sifela iNkosi. Ngakho-ke noma siphila noma sifa, singabeNkosi.
Ngenxa yalokho uKhristu wafa, wabuye waphila ukuze abe yiNkosi yabafileyo neyabaphilayo.
Umehlulelelani-ke wena umzalwane wakho na? Futhi umedelelelani umzalwane wakho na? Ngokuba sonke siyakumiswa phambi kwesihlalo sokwehlulela sikaNkulunkulu.
Ngokuba kulotshiwe ukuthi: “ ‘Ngifunga ukuphila kwami, wonke amadolo ayoguqa kimi, nezilimi zonke ziyovuma, uNkulunkulu.’ ”
Ngalokho-ke yilowo nalowo phakathi kwethu uyakuziphendulela kuNkulunkulu.
Ngakho masingabe sisehlulelana, kodwa kunalokho nqumani ukuthi akukho mzalwane oyakuba yisithiyo noma ugibe.
Ngiyazi, njengokuba nginesiqiniseko eNkosini uJesu, ukuthi akukho lutho olungcolileyo ngokwalo, kuphela kulowo othi kungcolile, kuyena-ke kungcolile.
Ngokuba uma umzalwane wakho ekhubeka ngenxa yokudla okudlayo, awusahambi ngothando. Ungambhubhisi ngokudla kwakho lowo amfelayo uKhristu.
Ngalokho-ke okuhle kwenu makunganyembenywa.
Ngokuba umbuso kaNkulunkulu awusikho ukudla nokuphuza, kodwa ungukulunga, ukuthula, nokuthokoza kuMoya oNgcwele;
lowo okhonza uKhristu kulokhu, uyathandeka kuNkulunkulu, uyancomeka nakubantu.
Ngalokho-ke masiphokophelele lezo zinto eziletha ukuthula nokwakhana.
Ungawuchithi umsebenzi kaNkulunkulu ngenxa yokudla. Konke kuhlanzekile, kepha kungcolile kulowo muntu okudla qede akhubeke.
Kuhle ukungayidli inyama nokungaliphuzi iwayini noma yikuphi okunye okwenza umzalwane wakho akhubeke.
Ukukholwa onakho, yiba nakho phambi kukaNkulunkulu. Ubusisiwe ongazehluleli ngalokho akukhethayo,
kodwa ongabazayo, nxa edla, wehlulelwe, ngokuba konke okungaveli ekukholweni, kuyisono.
Kepha thina esinamandla sifanele ukuthwala ubuthakathaka balabo abangenamandla, singazithokozisi thina.
Yilowo nalowo kithi makathokozise umakhelwane ngokumenzela okuhle, ukuze amakhe;
ngokuba noKhristu akazithokozisanga Yena, kodwa njengokulotshiwe ukuthi: “Inhlamba yabakuthukayo yehlela phezu kwami.”
Nakuba yikuphi okwakulotshwe phambilini, kwalotshelwa ukuba kusifundise ukuthi ngokubekezela nangokugqugquzelwa yimibhalo, sibe nethemba.
Sengathi uNkulunkulu wokubekezela nokugqugquzeleka anganipha nibe nakuqonda kunye phakathi kwenu maqondana nokukaKhristu uJesu,
ukuze nganhliziyonye nangamlomo munye nidumise uNkulunkulu uYise weNkosi yethu uJesu Khristu.
Ngalokho-ke yamukelanani, njengalokhu noKhristu wanamukela, kube ludumo kuNkulunkulu.
Ngokuba ngithi, uKhristu waba yisikhonzi sabasokileyo ngenxa yeqiniso likaNkulunkulu, ukuze aqinise izithembiso ezaphiwa okhokho;
nabezizwe bamdumise uNkulunkulu ngenxa yesihawu sakhe, njengalokhu kulotshiwe ukuthi: “Ngakho ngiyakukudumisa phakathi kwabezizwe, ngihubele igama lakho;”
aphinde athi: “Jabulani, nina bezizwe nikanye nesizwe sakhe,”
nokuthi: “Dumisani iNkosi, nina bezizwe nonke, niyibabaze, nina bantu bonke.”
U-Izaya ubuye athi: “Kuyakuvela impande esiqwini sikaJesayi, eyakuvuka ukuba ibuse abezizwe; abezizwe bayakwethembela kuye.”
Sengathi uNkulunkulu wethemba anganigcwalisa ngenjabulo yonke, nangokuthula konke ekukholweni, ukuze nichichime ethembeni ngamandla kaMoya oNgcwele.
Kepha nami bazalwane bami, nginesiqiniseko ngani ukuthi nani uqobo nigcwele ukulunga, nigcwalisiwe ngalo lonke ulwazi, futhi ninamandla okuyalana.
Nokho nginilobela kokunye ngesibindi ukuze nginikhumbuze ngenxa yomusa engiwuphiwe nguNkulunkulu,
ukuze ngibe yisikhonzi sikaKhristu uJesu kwabezizwe, ngikhonze ivangeli likaNkulunkulu emsebenzini ongcwele, ukuze abezizwe babe ngumnikelo owamukelekayo, sebengcweliswe nguMoya oNgcwele.
Ngakho-ke ngiyazigabisa kuKhristu uJesu mayelana nokukaNkulunkulu,
ngokuba anginakuba nasibindi sokusho utho ngaphandle kwezinto uKhristu azenze ngami, kube ngukulalela kwabezizwe, ngezwi nangezenzo,
ngamandla ezibonakaliso nezimangaliso, ngamandla kaMoya kaNkulunkulu, njengokuba ngasuka eJerusalema, ngazungeza izwe ngaze ngafika e-Ilirikhu, ngishumayela ivangeli likaKhristu ngokupheleleyo.
Ngokwenza kanjalo ngangihlose ukushumayela lapho uKhristu ayengakaziwa khona, ukuze ngingakhi phezu kwesisekelo somunye.
Kepha njengalokhu kulotshiwe ukuthi: “Abangatshelwanga ngaye, bayakubona; nabangezwanga, bayakuqonda.”
Ngenxa yalokho, ngathiyeka kaningi ukuba ngize kini.
Kepha manje, njengokuba ngingasenayo indawo kula mazwe, futhi sekuyiminyaka eminingi ngilangazelela ukuza kini,
ngiyokuza ngesikhathi ngiya eSpaniya. Ngokuba ngiyethemba ukuthi ekwedluleni kwami, ngizakunibona, bese nina ningiphelezela nxa senganelisekile ukuhlala nani.
Kepha okwamanje ngisaya eJerusalema ukuyokhonza abangcwele.
Ngokuba kwaba kuhle kwabaseMakhedoniya nabase-Akhaya ukuba banikelele abampofu okuthile kwabangcwele baseJerusalema.
Lokho kwabajabulisa; phela kwakudingekile ngempela ukuba benze kanjalo. Ngokuba uma abezizwe behlanganyela nabo ezintweni zabo zokomoya, nabo kufanele ukuba babakhonze ngezinto eziphathekayo.
Ngakho nxa sengikufezile lokho, ngabeka leso sithelo esandleni sabo, ngizakuhamba, ngidlule kini, ngiye eSpaniya.
Ngiyazi ukuthi lapho ngiza kini, ngizakufika nokugcwala kwesibusiso sikaKhristu.
Ngiyanincenga manje, bazalwane, ngenxa yeNkosi yethu uJesu Khristu nangenxa yothando lukaMoya, ukuba nibambisane nami ekungikhulekeleni kuNkulunkulu,
ukuze ngiphephe engozini kulabo abangakholwayo baseJudiya nokuba inkonzo yami eJerusalema yamukeleke kwabangcwele,
nokuthi ngize ngifike kini ngokuthokoza, ngentando kaNkulunkulu, ngiphumule kanye nani.
UNkulunkulu wokuthula makabe nani nonke. Amen.
Ngiyamncoma kini udadewethu, uFoyibe, oyidikoni ebandleni laseKhenikhreya,
ukuba nimamukele eNkosini njengokufanele abangcwele, nimsize kukho konke angahle akudinge kini, ngokuba ulusizo impela kwabaningi, ngisho nakimi imbala.
Khonzani kuPhriska no-Akhwila, izisebenzi, kanye nami kuKhristu uJesu,
abadela ukuphila kwabo ngenxa yokuphila kwami, akubongi mina kuphela kodwa namabandla onke abezizwe.
Khonzani nasebandleni elisendlini yabo naku-Efenethu, othandekayo kimi, owulibo lwabase-Asiya kuKhristu.
Khonzani kuMariya owanisebenzela kakhulu.
Nikhonze ku-Anidroniku noJuniya abayizihlobo zami, ababeyiziboshwa kanye nami, abaqavile kubaphostoli, nababekuKhristu ngaphambi kwami.
Khonzani ku-Amphiliyathu wami othandekayo eNkosini.
Nikhonze ku-Urbhanu, isisebenzi kanye nathi kuKhristu, nakuStakuwami othandekayo.
Khonzani ku-Aphele owethembekile kuKhristu. Nikhonze nakwabendlu ka-Aristobhulu.
Khonzani kuHerodiyone, isihlobo sami, nakwabendlu kaNarkisu abaseNkosini.
Khonzani koThrayifina noThrayifosa abasebenza nathi eNkosini. Khonzani kuPhersisi othandekayo, owasebenza kakhulu eNkosini.
Khonzani kuRufu okhethiweyo eNkosini, nakunina ongumame nakimi.
Nikhonze ku-Asinkirithu, uFilegu, uHerme, uPhathroba, uHerma nakubazalwane abakanye nabo.
Khonzani nakuFilologu, uJuliheya, uNerewu, nodadewabo, naku-Olimpa, nakwabangcwele bonke abakanye nabo.
Bingelelanani ngokwanga okungcwele. Ayakhonza onke amabandla kaKhristu.
Ngiyanincenga, bazalwane, ukuba nibaqaphele abadala ukwahlukana nabaphazamisa imfundiso enafundiswa yona, nihlukane nabo,
ngokuba abanjalo abayizo izikhonzi zeNkosi yethu uKhristu, kepha bakhonza isisu sabo; kuthi ngamazwi ashelelayo nathophayo badukise izinhliziyo zabangenacala.
Ngokuba njengoba ukulalela kwenu kuzwakele kubo bonke, ngakho-ke ngiyathokoza ngani, kodwa ngithanda ukuba nihlakaniphe kokuhle, nibe ngabangahlakaniphile kokubi.
Kepha uNkulunkulu wokuthula uzakumchoboza masinyane uSathane phansi kwezinyawo zenu. Umusa weNkosi yethu uKhristu mawube nani.
Uyakhonza kini uThimothewu oyisisebenzi kanye nami, noLukhiyu, uJasoni noSosiphathru, izihlobo zami.
Mina, Therthiyu, olobe le ncwadi ngiyakhonza kini eNkosini.
Uyakhonza kini uGayu ongingenise kwakhe, mina nebandla lonke. Uyakhonza kini u-Erastu, umphathisikhwama womuzi, noKwartu, umzalwane.
Umusa weNkosi yethu uJesu Khristu mawube nani nonke. Amen.
Manje, kuye onamandla okuniqinisa ngokwevangeli lami nangentshumayelo kaJesu Khristu, ngokwambulwa kwemfihlakalo eyayifihliwe kusukela ngezikhathi zaphakade.
Kepha manje esibonakalisiwe ngemibhalo yabaphrofethi, ngokomyalo kaNkulunkulu ongunaphakade, yazisiwe ezizweni zonke, kube ngukulalela kokukholwa.
Kuye uNkulunkulu, Yena yedwa onokwazi, makube kuye inkazimulo ngoJesu Khristu kuze kube phakade. Amen.
UPawula, obizwe ngokwentando kaNkulunkulu ukuba abe ngumphostoli kaJesu Khristu, benoSostene umzalwane,
ngibhalela ibandla likaNkulunkulu eliseKhorinte, kwabangcwelisiwe kuKhristu uJesu, ababiziweyo ukuba babe ngcwele. Ngibhalela nabo bonke abakhuleka egameni leNkosi yethu uJesu Khristu ezindaweni zonke abakuzo:
makube kini umusa nokuthula okuvela kuNkulunkulu uBaba wethu naseNkosini uJesu Khristu.
Ngimbonga njalo uNkulunkulu wami ngani, ngenxa yomusa wakhe eniwuphiweyo kuKhristu uJesu,
ukuba ezintweni zonke, nicetshiswe kuye; ekukhulumeni nasekwazini konke
njengalokhu ubufakazi ngoKhristu buqinisiwe kini,
ukuze ningasesweli nesisodwa nje isiphiwo somusa, njengokuba nikulindele ngokushisekela ukwambulwa kweNkosi yethu uJesu Khristu.
NguYena oyakuniqinisa nani kuze kube sekugcineni, ningabi nacala ngosuku lweNkosi yethu uJesu Khristu.
Wethembekile uNkulunkulu owanibizela ebudlelwaneni neNdodana yakhe, uJesu Khristu iNkosi yethu.
Bazalwane, ngiyanincenga, ngegama leNkosi yethu uJesu Khristu, ukuba nikhulume ngazwi linye, kungabi bikho ukwahlukana phakathi kwenu, kodwa nipheleliswe ekubumbaneni; nibe mqondo munye, nambono munye.
Ngokuba bazalwane bami, bangitshelile ngani abendlu kaKlowe ukuthi kukhona ukungaboni ngaso linye phakathi kwenu.
Ngikusho lokhu ngokuba yilowo nalowo kini uthi: “Mina ngingokaPawula;” omunye athi: “Mina ngingoka-Apholo;” omunye uthi: “Mina ngingokaKhefase;” nomunye athi: “Mina ngingokaKhristu.”
Ngabe uKhristu wahlukanisiwe yini na? UPawula wabethelwa yini esiphambanweni ngenxa yenu na? Kanti nina nabhabhadiswa egameni likaPawula yini na?
Ngiyambonga uNkulunkulu ngokuba angibhabhadisanga muntu kini, ngaphandle kukaKhrisphu noGayu,
funa kube khona othi ubhabhadiswe egameni lami.
Yebo, ngababhabhadisa nabendlu kaStefana; ngaphandle kwabo, angikhumbuli ngibhabhadisa omunye.
Ngokuba uKhristu akangithumanga ukuba ngibhabhadise, kodwa ukuba ngishumayele ivangeli, hhayi ngokuhlakanipha kwamazwi abantu, funa isiphambano sikaKhristu senziwe ize.
Ngokuba izwi lesiphambano lingubuwula kwababhubhayo, kodwa kithina esisindiswayo lingamandla kaNkulunkulu.
Phela kulotshiwe ukuthi: “Ngiyakuqeda nya ukuhlakanipha kwabahlakaniphileyo, ngikwenze ize ukuqonda kwabanokuqonda.”
Siphelelephi isazi na? Sikuphi isazimthetho na? Uphi oqophisana ngamazwi wakulesi sikhathi na? UNkulunkulu akakwenzanga yini kwaba wubuwula ukuhlakanipha kwakuleli lizwe na?
Ngokuba njengalokhu ngokuhlakanipha kukaNkulunkulu izwe lingazange limazi uNkulunkulu ngokuhlakanipha kwalo, lokho kwaba kuhle kuNkulunkulu ukusindisa abakholwayo ngobuwula bentshumayelo.
Ngokuba abaJuda bafuna izibonakaliso, kuthi amaGriki afune ukuhlakanipha.
Kodwa thina sishumayela uKhristu obethelwe esiphambanweni, isikhubekiso kubaJuda nobuwula kwabezizwe.
Kepha kulabo ababiziweyo, abaJuda namaGriki sishumayela uKhristu, ongamandla kaNkulunkulu nokuhlakanipha kukaNkulunkulu.
Ngokuba ubuwula bukaNkulunkulu buhlakaniphile kunobabantu, nobuthakathaka bukaNkulunkulu bunamandla kunobabantu.
Ngokuba bazalwane, khumbulani ukubizwa kwenu ukuthi kababaningi abahlakaniphileyo ngokwenyama, kababaningi abanamandla, futhi kababaningi abayizikhulu.
Kodwa izinto zobuwula zezwe, uNkulunkulu uzikhethile ukuba abajabhise ngazo abahlakaniphileyo. Kanjalo nezinto ezibuthakathaka zezwe, uNkulunkulu uzikhethile ukuba azijivaze ezinamandla.
Izinto zezwe ezibukelwa phansi, izinto ezidelelwayo, nezinto ezingekho, uNkulunkulu wazikhetha, ukuba achithe ngazo ezikhona,
ukuze kungabi bikho muntu ozigabisayo phambi kukaNkulunkulu.
Kepha ngoNkulunkulu, nikuJesu Khristu owenzelwe thina, waba ngukuhlakanipha kwethu okuvela kuNkulunkulu nokulunga, nokungcweliswa kanye nokuhlengwa,
ukuba kube njengalokhu kulotshiwe ukuthi: “Ozibongayo makazibonge eNkosini.”
Nami bazalwane, ekufikeni kwami lapho kini, angifikanga ngobugagu bokukhuluma noma bokuhlakanipha, kodwa ngimemezele kini imfihlakalo kaNkulunkulu.
Ngokuba nganquma ukuthi angiyukukwazi okunye kini, kuphela uJesu Khristu, lowo obethelwe esiphambanweni.
Mina ngafika kini ngibuthakathaka, ngesaba, ngithuthumela kakhulu,
futhi ukukhuluma nokushumayela kwami akubanga ngamazwi ahehayo obugagu, kodwa kwaba ngesibonakaliso sikaMoya nesamandla,
ukuze ukukholwa kwenu kunganciki ekuhlakanipheni kwabantu, kodwa kume ngamandla kaNkulunkulu.
Kepha ukuhlakanipha sikukhuluma kulabo asebekhulile, kodwa lokhu ngukuhlakanipha okungesikho okwalesi sikhathi noma okwababusi balesi sikhathi, ababhubhayo.
Kepha sikhuluma ukuhlakanipha kukaNkulunkulu okusemfihlakalweni efihliweyo, uNkulunkulu akumisela phambilini ukuba kube yinkazimulo yethu umhlaba ungakadalwa.
Akukho namunye kubabusi balesi sikhathi obekwazi, ngokuba ukuba bebekwazi, babengeke bayibethele iNkosi yenkazimulo.
Kepha kulotshiwe ukuthi: “Lokho iso elingakubonanga nendlebe engakuzwanga, okungaphumanga enhliziyweni yomuntu, uNkulunkulu wakulungisela labo abamthandayo.”
Ngokuba uNkulunkulu ukwambulile kithi ngoMoya; phela uMoya ukuhlolisisa konke, ngisho nokujulileyo kukaNkulunkulu.
Ngokuba ngubani kubantu okwaziyo okomuntu, uma kungesiye umoya womuntu okuye na? Kanjalo-ke nokukaNkulunkulu akwaziwa muntu, kuphela nguMoya kaNkulunkulu okwaziyo.
Kepha thina asamukelanga umoya wezwe, kodwa umoya ovela kuNkulunkulu, ukuze sikwazi esikuphiwe nguNkulunkulu ngomusa,
esikhuluma ngakho futhi, kungengamazwi afundiswa ngukuhlakanipha kwabantu, kodwa afundiswa nguMoya, sichaza okomoya ngokomoya.
Umuntu wemvelo akakwamukeli okukaMoya kaNkulunkulu, ngokuba kungubuwula kuye, futhi angekuqonde lokho; kuqondisiswa ngokomoya.
Kepha umuntu onoMoya kaNkulunkulu uphenyisisa konke, kanti Yena akukho muntu ongamphenyisisa.
Ngokuba ngubani owawazi umqondo weNkosi, ukuba angaze ayifundise na? Kepha thina sinomqondo kaKhristu.
Nami-ke bazalwane, ngangingakhulumi nani njengabantu bakamoya, kodwa njengabantu bomhlaba nje, abaseyizinsana kuKhristu.
Nganiphuzisa ubisi; anginiphanga ukudla okuqinileyo, ngokuba naningakakulungeli. Yebo, namanje anikakulungeli,
ngokuba niphila ngokwenkambiso yabantu. Uma nje kusekhona kini umhawu nokuphikisana, anisibo yini abenyama? Anihambisi yini okwabantu na?
Ngokuba uma omunye phakathi kwenu ethi: “Mina ngingokaPawula,” omunye athi: “Mina ngingoka-Apholo,” anisibo yini abenyama na?
Pho ubeyini nje u-Apholo na? Ubeyini nje uPawula na? Bayizikhonzi enakholwa ngazo, kuyilowo nalowo njengalokhu iNkosi imphile.
Mina ngafike ngatshala, u-Apholo wanisela, kodwa uNkulunkulu wakhulisa.
Noma kunjalo otshalayo noniselayo kabalutho, kodwa okunguYena kuphela uNkulunkulu okhulisayo.
Otshalayo noniselayo bayalingana, yilowo nalowo uyakwemukeliswa owakhe umvuzo ngangokomsebenzi wakhe.
Ngokuba thina siyizisebenzi nje zikaNkulunkulu ezibambisene naye, nina niyinsimu yakhe, niyisakhiwo sikaNkulunkulu.
Ngokomusa kaNkulunkulu engiphiwe wona, njengengcweti yomakhi, ngabeka isisekelo, omunye wakha phezu kwaso. Kepha makube yilowo nalowo aqaphelisise ukuthi wakha kanjani phezu kwaso.
Ngokuba akekho ongabeka esinye isisekelo, ngaphandle kwaleso esibekiweyo, esinguJesu Khristu.
Kepha uma umuntu akha phezu kwalesi sisekelo ngegolide, ngesiliva, ngamatshe enani eliphezulu, ngezingodo, ngotshani nangezinhlanga,
umsebenzi walowo nalowo uyakuvela obala, ngokuba usuku luyakuwudalula. Ngokuba lokho kuyakwambulwa ngomlilo, nokuthi umsebenzi womuntu ngamunye unjani. Umlilo luqobo uyakukuvivinya lokho.
Uma umsebenzi womuntu awakhileyo umi phezu kwaso, lowo muntu uyakwamukela umvuzo,
kodwa uma umsebenzi wakhe usha, uyakulahlekelwa yiwo, kepha yena luqobo uyakusindiswa; kuyakuba sengathi uphunyuke emlilweni.
Anazi yini ukuthi nina niyithempeli likaNkulunkulu, nokuthi uMoya kaNkulunkulu uhlala kini na?
Uma umuntu ebhidliza ithempeli likaNkulunkulu, uNkulunkulu uyakumbhubhisa, ngokuba ithempeli likaNkulunkulu lingcwele; niyilo-ke nina.
Makungabi bikho ozikhohlisayo: uma kukhona umuntu phakathi kwenu othi uhlakaniphile kulesi sikhathi, makabe yisiwula, ukuze ahlakaniphe.
Ngokuba ukuhlakanipha kwaleli lizwe kungubuwula kuNkulunkulu. Kulotshiwe ukuthi: “Abahlakaniphileyo ubabamba ebuqilini babo,”
nokuthi: “INkosi iyayazi imidlinzo yabahlakaniphileyo ukuthi iyize.”
Ngakho-ke makungabi bikho kini ozigabisayo kubantu, ngokuba konke kungokwenu,
noma uPawula, noma u-Apholo, noma uKhefase noma izwe, noma ukuphila, noma ukufa, noma okukhona, noma okusazokuba khona, konke kungokwenu.
Nina-ke ningabakaKhristu, uKhristu ungokaNkulunkulu.
Umuntu makasazi ukuthi siyizikhonzi zikaKhristu nabaphathi bezimfihlakalo zikaNkulunkulu.
Phezu kwalokho kufuneka ukuthi umuntu ophathisiweyo afunyanwe engothembekileyo.
Kepha kimi kuyinto elula ukuba ningahlulele, noma ngahlulelwe ngabantu; nami luqobo angizahluleli.
Ngokuba angizinyezi ngalutho, nokho angilungisisiwe ngalokho, kodwa ongahlulelayo yiNkosi.
Ngakho-ke ningahluleli lutho singakafiki isikhathi, ingakafiki iNkosi eyakukuveza ekukhanyeni lokho okufihlakeleyo kobumnyama, izidalule izizindlo zezinhliziyo; kulapho-ke yilowo nalowo eyakuthola khona ukubongwa kuNkulunkulu.
Bazalwane, lokhu-ke ngikuqondise kimi naku-Apholo, ngenxa yenu, ukuba nifunde kithi ukungeqisi kokulotshiweyo ukuze ningazikhukhumezi, omunye akhethe omunye kunomunye.
Ngubani okwenze waba ngcono kunabanye wena na? Yini onayo ongayiphiwanga na? Uma-ke uyiphiwe, pho kungani uzigabisa kube sengathi awuyamukeliswanga na?
Senize nasutha, naceba, nibusa ngaphandle kwethu. Yebo-ke, sengathi ningabusa, ukuze nathi sibuse kanye nani.
Ngokuba ngiyabona ukuthi thina baphostoli, uNkulunkulu usenze saba ngabokugcina, njengabanqunyelwe ukuba bafe, ngokuba sesiphenduke into yokubukwa yizwe, yizingelosi, nabantu.
Thina siyiziwula ngenxa kaKhristu, kodwa nina nihlakaniphile kuKhristu. Thina sibuthakathaka, kepha nina ninamandla. Nina niyadunyiswa, kodwa thina siyadunyazwa.
Kuze kube yilesi sikhathi siyalamba, somile, sihamba ze, siyashaywa, siyimihambima,
siyakhandleka, sisebenza ngezandla zethu. Kuthi lapho sethukwa, thina sibusise; uma sizingelwa, thina siqinisele.
Kuthi lapho sinyembenywa; thina siphendule kahle, sehlise umoya. Kuze kube namuhla, sithathwa njengezibi zomhlaba, nokungcola okuvela ezintweni zonke.
Anginilobeli lokhu ukuba nginenze nizenyeze, kodwa ukuba ngineluleke njengezingane zami ezithandekayo.
Nakuba ningaba nabafundisi abayizi-10 000 kuKhristu, nokho oyihlo ababaningi, ngokuba yimina enganizala kuKhristu uJesu ngevangeli.
Ngakho-ke ngiyanincenga ukuba ningilingise.
Yingakho ngithumele kini uThimothewu, umntwana wami othandekayo nothembekileyo eNkosini. Yena uyakunikhumbuza ngokuhamba kwami okukuKhristu, njengalokhu ngifundisa ezindaweni zonke nasemabandleni onke.
Abanye bakhukhumele sengathi angisezi lapho kini.
Kodwa ngizofika kini kungakapholi maseko, uma iNkosi ivuma, ukuze ngithole kahle, hhayi ngamazwi alaba abazikhukhumezayo, kodwa ngamandla abo.
Ngokuba umbuso kaNkulunkulu awuyi ngamazwi nje, kodwa ngamandla.
Pho nifunani na? Ngize lapho kini ngihlome ngenduku, noma ngothando nomoya omnene na?
Impela kubikwa ukuthi kudlange ubufebe phakathi kwenu, futhi lobu obungekho ngisho nakwabezizwe: njengokuba kubikwa ukuthi omunye wenu ulala nomkayise.
Kodwa nina nilibele wukuzigabisa kunokuba nilile, ukuze asuswe kini lowo owenze leso sono.
Ngokuba mina, nakuba ngingekho phakathi kwenu ngokomzimba, kodwa ngikhona ngokomoya, futhi sengimahlulele lowo muntu okwenzileyo lokho, sengathi nami ngikhona lapho.
Ekuhlanganeni kwenu egameni leNkosi uJesu, nami nginani ngomoya nangamandla eNkosi yethu uJesu,
ukuba lowo muntu anikelwe kuSathane, kubhujiswe umzimba, ukuze kusindiswe umoya wakhe ngosuku lweNkosi uJesu.
Ukuzigabisa kwenu akukuhle neze. Kanti anazi yini ukuthi imvubelo encane iyikhukhumalisa yonke inhlama na?
Khiphani imvubelo endala ukuze nibe yinhlama entsha, njengokuba ningenamvubelo. Ngokuba nelethu iPhasika elinguKhristu lihlatshiwe.
Ngakho-ke asiwugubhe umkhosi, hhayi ngemvubelo endala yokonakala nobubi, kodwa ngesinkwa esingenamvubelo sobumsulwa neqiniso.
Encwadini yami nganibhalela ukuthi ningahlangani nezifebe.
Angisho nje izifebe zakuleli lizwe, noma abahahayo, noma abaphangi, noma abakhonza izithombe; ngokuba uma kunjalo kungamele niphume ezweni.
Kepha manje-ke nginibhalela ukuba ningazibandakayi nomuntu obizwa ngokuthi ungumzalwane, kodwa ebe eyisifebe, noma ohahayo, noma okhonza izithombe, noma othuka inhlamba, noma eyisidakwa, noma engumphangi; ningalokothi nidle nomuntu onjalo.
Kambe nginandabani nokwehlulela abangaphandle na? Akusibo yini abangaphakathi okumele nibehlulele na?
Kepha uNkulunkulu uyakubahlulela abangaphandle. Mxosheni-ke lo omubi phakathi kwenu.
Uma omunye wenu enombango nomunye, angalokotha yini ammangalele kwabangakholwayo, kunokuba udaba alwethule kubazalwane na?
Anazi yini ukuthi abangcwele bayakuwehlulela umhlaba na? Kepha uma umhlaba wahlulelwa yinina, pho ningehlulwa yini ukukhipha izigwebo zamacala amancane na?
Anazi yini ukuthi siyakwehlulela ngisho nezingilosi na? Kangakanani-ke amacala alokhu kuphila na?
Ngakho-ke uma ninamacala alokhu kuphila, niyababeka yini abangenasithunzi ebandleni ukuba babe ngabehluleli na?
Lokhu ngikusho ukuze nibe namahloni. Kanti kunjalo: ngabe akukho namunye yini phakathi kwenu ohlakaniphileyo onganquma udaba phakathi kwabazalwane bakhe na?
Kanti umzalwane uyammangalela yini omunye, futhi akwenze lokho phambi kwabangakholwayo na?
Empeleni kwakhona nje ukuthi niyamangalelana kukhombisa ukuthi niyizehluleki. Kungebe ngcono ngani ukuba kwenziwe okubi kini na? Kungebe ngcono ngani ukuba nani niqolwe na?
Kepha nina luqobo nenza okubi, niyaqola; lokho nikwenza ngisho nakubazalwane benu.
Kanti anazi yini ukuthi ababi abayukulidla ifa lombuso kaNkulunkulu na? Ningayengeki, ngokuba izifebe, abakhonza izithombe, iziphingi, abahlobongayo, abaphangi, abalalanayo benobulili obufanayo,
amasela, abanomona, izidakwa, abathuka inhlamba nabaphangi; abayukulidla ifa lombuso kaNkulunkulu.
Abanye benu babenjalo, kodwa senahlanzwa, nangcweliswa, nalungisiswa ngegama leNkosi uJesu Khristu nangoMoya kaNkulunkulu wethu.
Konke kuvunyelwe kimi, kepha akusikho konke okusizayo. Konke kuvunyelwe kimi, kodwa mina anginakubuswa yilutho.
Ukudla kungokwesisu, nesisu singesokudla, kodwa uNkulunkulu uyakushabalalisa kokubili. Umzimba akusiwo owobufebe, ungoweNkosi, neNkosi ingeyomzimba.
UNkulunkulu wayivusa iNkosi, nathi uyakusivusa ngamandla akhe.
Kanti anazi yini ukuthi imizimba yenu iyizitho zikaKhristu na? Pho ngizithatha kanjani izitho zikaKhristu, ngizenze izitho zesifebe na? Qha nakanye.
Anazi yini ukuthi ozihlanganisa nesifebe uba mzimba munye naso na? Phela kulotshiwe ukuthi: “Labo bobabili bayakuba nyamanye.”
Kepha ozihlanganisa neNkosi uyakuba moya munye nayo.
Ngakho-ke balekelani ubufebe. Zonke izono umuntu azenzayo zenzeka ngaphandle komzimba, kodwa ofebayo ungcolisa owakhe umzimba.
Anazi yini ukuthi umzimba wenu uyithempeli likaMoya oNgcwele eninaye, enimemukele evela kuNkulunkulu, nokuthi anizimele ngokwenu na?
Ngokuba nathengwa ngenani elikhulu. Ngakho-ke mngcweliseni uNkulunkulu emizimbeni yenu.
Manje, maqondana nalokho enangilobela ngakho: kuhle ukuba indoda ingamthinti owesifazane.
Kepha ngenxa yobufebe, akube yileyo naleyo ndoda ibe nomfazi, kanjalo nowesifazane abe neyakhe indoda.
Indoda mayimenelise umfazi ngokocansi, kanjalo nomfazi enze kanjalo endodeni.
Umfazi kanamandla phezu komzimba wakhe, kodwa yindoda enawo, kanjalo nendoda kayinamandla phezu komzimba wayo, kodwa ngumfazi onawo.
Ningagodlelani, kuphela kube ngokwesikhashana ngokuvumelana ukuba nithole ithuba lokukhuleka, nibuye nibe ndawonye, ukuze uSathane anganiyengi ngokungazibambi kwenu.
Kepha lokhu ngikusho ngokuvunyelwa yini, anginishayeli umthetho.
Ngifisa ukuba abantu bonke babe njengami, kodwa yilowo nalowo muntu unesiphiwo sakhe esivela kuNkulunkulu, omunye uphiwe lesi, omunye uphiwe lesiya.
Kepha kulabo abangaganiwe nakubafelokazi ngithi bekungaba kuhle ukuba bahlale benjengami.
Uma bengakwazi ukuzithiba, mabagane, ngokuba kuhle ukugana kunokusha yinkanuko.
Kepha kwabaganiweyo ngiyabayala, kodwa kungemina, kuyiNkosi, umfazi makangahlukani nendoda yakhe.
Kepha uma ehlukene nayo, makahlale engaganile, noma abuyisane nendoda yakhe. Nendoda mayingahlukani nomfazi wayo.
Manje-ke kwabanye ngithi, kungasho yona iNkosi ukuthi, uma umzalwane enomfazi ongakholwa, yena evuma ukuhlala naye, makangamlahli.
Kanjalo nomfazi, uma enendoda engakholwa, yona ivuma ukuhlala naye, makangayishiyi indoda.
Ngokuba indoda engakholwayo ingcwelisiwe ngenxa yomfazi okholwayo, nomfazi ongakholwa ungcwelisiwe ngenxa yendoda, kungenjalo izingane zenu zingcolile, kodwa kalokhu zingcwele.
Kepha uma ongakholwa ehlukana nomkakhe, makahlukane naye. Umzalwane noma umzalwanekazi ukhululekile kulokho, kodwa uNkulunkulu unibizile ukuba nibe nokuthula.
Ngokuba wena wesifazane, wazi ngani ukuthi ungeyisindise indoda yakho na? Nawe ndoda, wazi ngani ukuthi ungemsindise umkakho na?
Kunye nje kuphela, ukuba yilowo nalowo ahambe njengalokhu iNkosi imabele, kube yilowo nalowo njengalokhu uNkulunkulu embizile. Ngiwayala kanjalo onke amabandla.
Ukhona yini obizwe esesokile na? Makangabi njengongasokile. Ukhona yini obizwe engasokile na? Makangasoki.
Ukusoka akulutho, nokungasoki akulutho, okubalulekile ngukugcina imiyalo kaNkulunkulu.
Akube yilowo nalowo ahlale obizweni abizelwe kulo.
Ngabe ubizwe uyisigqila na? Ungakhathazeki ngalokho, kodwa uma kwenzeka ukuba ukhululwe, sebenzisa lelo thuba.
Ngokuba lowo owabizelwa eNkosini eyisigqila, usengokhululekile weNkosi, ngokunjalo nalowo owabizwa engokhululekile, uyisigqila sikaKhristu.
Nina nathengwa ngenani elikhulu: ningabi yizigqila zabantu.
Bazalwane, akube yilowo nalowo ahlale noNkulunkulu kulokhu abizwe ekukho.
Kepha maqondana nezintombi, anginawo umyalo weNkosi, kodwa ngibeka uvo lwami njengothembekileyo nowahawukelwa yiNkosi.
Ngakho-ke ngithi ngenxa yenkathazo ekhona, kuhle ukuba indoda ihlale injengalokhu injalo.
Ngabe uboshelwe kumkakho na? Ungafuni ukukhululeka. Ukhululekile kumkakho na? Ungafuni omunye umfazi.
Kepha uma uganwa, awenzi sono, nentombi uma igana ayoni, kodwa abanjalo bayakuba nosizi enyameni, kepha mina ngiyaniphephisa.
Bazalwane, ngithi isikhathi sesisifushane; kusukela manje abaganiweyo mabafane nabangaganiwe,
nabakhalayo mabafane nabangakhaliyo, abathokozayo mababe njengabangathokozi, abathengayo mababe njengabangenalutho,
nabasebenzisa leli lizwe mababe njengabangalisebenzisi, ngokuba isimo saleli lizwe siyadlula.
Kepha ngifuna ukuba ningakhathazeki. Ongaganiwe ukhuthalela okweNkosi, ukuthi angayithokozisa kanjani iNkosi.
Kepha oganiweyo ukhuthalela okwezwe ukuba angamthokozisa kanjani umkakhe,
unemicabango eyahlukene. Nongaganile, oyintombi, ukhathalela okweNkosi, ukuze abe ngcwele emzimbeni nasemoyeni. Kepha oganileyo ukhathalela okwezwe ukuthi angayithokozisa kanjani indoda yakhe.
Ngikhuluma lokhu ukuze nisizakale, angiqondile ukunicindezela; kodwa ukuba nihambe ngokufanele, nibambelele eNkosini, ningaphazanyiswa yilutho.
Kepha uma umuntu ecabanga ukuthi wenza okungafanele entombini eyingoduso yakhe, uma isikhulile, makenze akubonayo, mabaganane uma kufanele ukuba kwenziwe kanjalo; akoni ngalokho.
Kepha omi eqinile enhliziyweni yakhe, engacindezelwa yilutho, futhi eyibusa imizwa yakhe, makenze akubonayo; uma esenqumile enhliziyweni yakhe ukuthi uzakuyiyeka ingoduso yakhe iyintombi, wenza kahle.
Ngakho-ke oganwa yintombi eyingoduso yakhe, wenza kahle, kodwa ongaganwa yiyo wenza kahle kakhulu.
Umfazi uboshiwe ngesikhathi indoda yakhe isaphila, kodwa uma isifile, ukhululekile, angendela nakubani ngokuthanda kwakhe, kuphela ukuba lokho kube seNkosini.
Kepha ubusisekile kakhulu uma ehlala enjalo; lowo-ke ngumbono wami, futhi ngicabanga ukuthi ngiholwa nguMoya kaNkulunkulu.
Mayelana nokuhlatshelwe izithombe siyazi ukuthi sonke sinolwazi ngalokho. Ulwazi luyakhukhumeza, kodwa uthando luyakha.
Uma umuntu ecabanga ukuthi wazi okuthile, akakazi njengokuba kufanele ukuba azi.
Kepha uma umuntu ethanda uNkulunkulu, lowo-ke uyaziwa nguye.
Ngakho-ke maqondana nokudla okuhlatshelwe izithombe, siyazi ukuthi isithombe yinto engelutho emhlabeni, nokuthi akakho omunye uNkulunkulu, munye kuphela.
Ngokuba nakuba kukhona okuthiwa onkulunkulu, noma ngabe kusezulwini noma kusemhlabeni, njengalokhu kukhona onkulunkulu abaningi namakhosi amaningi,
kodwa kithina kukhona uNkulunkulu munye, uYise, okuvela konke kuye, futhi esiphilela Yena, neNkosi yinye, uJesu Khristu, okungaye kukhona konke, nathi sikhona ngaye.
Kepha akusibo bonke abantu abanalolo lwazi. Abanye lokhu basajwayele izithombe kuze kube manje, basakudla ukudla sengathi kuhlatshelwe isithombe, nonembeza wabo obuthakathaka uyangcola.
Ukudla akusisondezi kuNkulunkulu, ngokuba uma singadli, asilahlekelwa yilutho, noma sidla, asizuzi lutho.
Kepha qaphelani, funa leli lungelo lenu libe yisikhubekiso kwababuthakathaka.
Ngokuba uma umuntu ebona wena onolwazi udla ethempelini lesithombe, ngabe unembeza walowo osebuthakathaka awuyukudideka yini, aze adle okuhlatshelwe isithombe na?
Lowo obuthakathaka uyakubhubha ngenxa yolwazi lwakho, umzalwane uKhristu afa ngenxa yakhe.
Kanjalo uma nona kubazalwane, nilimaza unembeza wabo obuthakathaka, nona kuKhristu.
Ngakho-ke uma ukudla kumkhubekisa umzalwane wami, angisoze ngayidla inyama kuze kube phakade, ukuze ngingamkhubekisi umzalwane wami.
Angikhululekile yini na? Angisiye yini umphostoli na? Angimbonanga yini uJesu iNkosi yethu na? Anisiwo yini nina umsebenzi wami eNkosini na?
Uma kwabanye ngingesiye umphostoli, kodwa kini nginguye, ngokuba nina niluphawu lobuphostoli bami eNkosini.
Yiyona-ke le impendulo yami kulabo abangibuzayo.
Asinalo yini ilungelo lokudla nokuphuza na?
Asinalo yini ilungelo lokuhamba nomzalwanekazi ongumkethu njengabanye abaphostoli, abafowabo beNkosi, noKhefase na?
Kanti yimi noBharnabha kuphela yini esingenalo ilungelo lokuyeka ukusebenza na?
Ngubani oke aye empini ngezakhe izindleko na? Ngubani otshala isivini, angadli isithelo saso na? Ngubani owalusa umhlambi, angaludli ubisi lomhlambi na?
Ngabe ngikusho lokho ngokubona kwabantu na? Umthetho nawo kawusho yini kanjalo na?
Ngokuba kulotshiwe emthethweni kaMose, ukuthi: “Ungayifaki inkabi isimfonyo, uma ibhula okusanhlamvu.” Ngabe uNkulunkulu ukhathalela izinkabi yini na?
Akakusho yini ngenxa yethu na? Yebo, kwalotshwa ngenxa yethu, ngokuba olimayo kumele alime enethemba, nobhulayo abhule okusanhlamvu enethemba lokwabelwa naye.
Uma thina sihlwanyele kini okomoya, ngabe sekuyinto enkulu yini uma sivuna kini izinto eziphathekayo na?
Uma abanye benaleli lungelo kini, pho thina asinalo yini eledlula elabo na? Nokho asilisebenzisanga leli gunya, kepha sibekezele ngakho konke, ukuze singalithiyi ivangeli likaKhristu.
Anazi yini ukuthi abaphethe imisebenzi yethempeli badla okwethempeli, nokuthi abakhonza e-althare bathola khona isabelo sabo na?
Kanjalo iNkosi imisile ukuba labo abashumayela ivangeli, baphile ngevangeli.
Kepha mina angizange ngisebenzise nakunye kwalezo zinto, futhi angilobi lokhu ukuze kwenziwe kanjalo kimi, ngokuba kungcono kimi ukufa kunokuba umuntu akwenze ize ukuzigqaja kwami.
Ngokuba uma ngishumayela ivangeli, lokho akuyona into engingazikhukhumeza ngayo, ngokuba ngimele ukuba ngenze kanjalo. Maye, kimina uma ngingalishumayeli ivangeli!
Ngokuba uma ngikwenza lokho ngokuthanda kwami, nginomvuzo, kodwa uma kungesikho ukuthanda kwami, khona kungumsebenzi engiwuphathisiweyo.
Pho uyini-ke umvuzo wami na? Ungukuthi uma ngishumayela ivangeli, ngenze ivangeli lingabizi lutho ukuze ngingalisebenzisi ilungelo lami enginalo evangelini.
Ngokuba nakuba ngikhululekile kubo bonke, kodwa ngazenza isigqila sabo bonke, ukuze ngizuze abaningi.
KubaJuda ngaba njengomJuda, ukuze ngizuze abaJuda. Kwabaphansi komthetho ngaba njengophansi komthetho nakuba mina ngingephansi komthetho, ukuze ngizuze abaphansi komthetho.
Kwabangenamthetho ngaba njengongenamthetho, noma ngingesiye ongenamthetho kuNkulunkulu, kodwa ngiphansi komthetho kaKhristu, ukuze ngizuze abangenamthetho.
Kwababuthakathaka ngaba buthakathaka, ukuze ngizuze ababuthakathaka. Sengaba yikho konke kubo bonke, ukuze ngakho konke ngisindise abanye.
Ngikwenza konke ngenxa yevangeli, ukuze nami ngibe ngumhlanganyeli kulo.
Anazi yini ukuthi abagijimayo bencintisana, bagijima bonke, kodwa munye othola umklomelo na? Gijimani kanjalo, ukuze niwuthole.
Bonke abancintisanayo bayazithiba ezintweni zonke; labo bakwenza lokho ukuze bathole umqhele ophelayo, kodwa thina ukuba sithole umqhele ongapheliyo.
Ngakho-ke mina ngiyagijima, kungekhona ukuthi kangiqondi; ngiyagadla, kungekhona ukuthi ngishaya umoya.
Ngiyawutuba umzimba wami, ngiwenza isigqila, ukuba mina engishumayeza abanye ngingaliwa mina luqobo, kuthiwe angifanele.
Angithandi bazalwane, ukuba ningazi ukuthi okhokho bethu bonke babephansi kwefu, bonke badabula olwandle,
bonke babhabhadiswa kuMose efini nasolwandle.
Bonke badla ukudla okufanayo komoya,
baphuza okufanayo komoya, ngokuba baphuza edwaleni lomoya elabalandelayo, lelo dwala lalinguKhristu.
Kepha uNkulunkulu akathokozanga ngeningi labo, ngakho-ke izidumbu zabo zasakazwa ehlane.
Lezo zinto zenzeka ukuze zibe yisibonelo kithi, ukuze singafisi okubi, njengokuba bona bakufisa.
Ningabi ngabakhonza izithombe njengabanye babo, ngokuba kulotshiwe ukuthi: “Abantu bahlala phansi ukuba badle, baphuze; basukuma, basina.”
Masingafebi njengokuba abanye babo bafeba, bafa ngalusuku lunye abayizi-23 000.
Masingamlingi uKhristu njengokuba abanye babo bamlinga, babhujiswa yizinyoka.
Maningakhonondi njengokuba abanye babo bakhononda, babhujiswa ngumbhubhisi.
Lezo zinto zenzeka kulabo ukuze zibe yisibonelo, ngokuba zilotshiwe ukusiyala thina, osekufike kithi izikhathi zokugcina.
Ngakho-ke lowo othi umile, makaqaphele ukuba angawi.
Anifikelwanga ngukulingwa okungenjengokwamuntu, kodwa uNkulunkulu uthembekile, akayukuvuma ukuba nilingwe ngokungaphezu kwamandla enu. Kepha kuyakuthi lapho nilingwa, anenze nibe namandla okuphunyuka, nibe namandla okubekezela.
Ngakho-ke bazalwane bami abathandekayo, balekelani ukukhonza izithombe.
Ngikhuluma njengakubantu abakhaliphileyo; nqumani nina ngalokhu engikhushoyo.
Indebe yesibusiso esiyibusisayo, ayisiyo yini inhlanganyelo yegazi likaKhristu na? Isinkwa esisihlephulayo asiyiyo yini inhlanganyelo yomzimba kaKhristu na?
Ngokuba isinkwa sinye, nokho thina esibaningi singumzimba munye, lokhu thina sonke sihlanganyela leso sinkwa sinye.
Bhekani u-Israyeli ngokwenyama. Labo abadla imihlatshelo abasibo yini abahlanganyela ne-althare na?
Pho ngichazani ngalokho na? Ngabe ngithi okuhlatshelwe isithombe kuwutho noma isithombe siwutho na?
Qha, kodwa ngithi: lokho okuhlatshwa ngabezizwe bakuhlabela amadimoni, kabakuhlabeli uNkulunkulu. Kangithandi ukuba nibe nenhlanganyelo namadimoni.
Anikwazi ukuphuza indebe yeNkosi kanye nendebe yamadimoni. Anikwazi ukuhlanganyela itafula leNkosi kanye netafula lamadimoni.
Kanti senza iNkosi ibe nesikhwele na? Ngabe sinamandla yini kunayo na?
Konke kuvunyelwe, kodwa akusizi konke; konke kuvunyelwe, kodwa akwakhi konke.
Makungabi bikho ozifunela okwakhe, kepha akube yilowo nalowo afunele omunye.
Konke okuthengiswa esilaheni kudleni, ningaphenyi lutho ngakho ngenxa kanembeza,
ngokuba umhlaba ungoweNkosi, nakho konke okukuwo.
Uma omunye wabangakholwayo enimema, nithanda ukuya lapho, kudleni konke okubekwa phambi kwenu, ningabuzi mbuzo ngenxa kanembeza.
Kepha uma kukhona othi kini: “Lokhu kuhlatshelwe izithombe,” ningalokothi nikudle ngenxa yalowo osho kanjalo nangenxa kanembeza.
Angisho unembeza wakho, kodwa unembeza walowo muntu. Kungani inkululeko yami ithiywe ngunembeza womunye na?
Uma ngidla ngokubonga, pho ngigxekelwani ngalokho engikubongayo na?
Ngakho-ke noma niyadla, noma niyaphuza, noma nenzani nje, konke kwenzeleni udumo lukaNkulunkulu.
Ningabi yisikhubekiso kubaJuda, kumaGriki, noma kulo ibandla likaNkulunkulu,
njengalokhu nami ngithokozisa bonke ngakho konke, ngingafuni okuzosiza mina kuphela, kodwa okusiza abaningi, ukuze basindiswe.
Ngilingiseni njengokuba nami ngilingisa uKhristu.
Ngiyanibonga, ngokuba ningikhumbula ezintweni zonke, futhi nibambelele emfundisweni engayedlulisela kini.
Kepha ngithanda ukuba nazi ukuthi uKhristu uyinhloko yawo wonke amadoda, inhloko yowesifazane yindoda, nenhloko kaKhristu nguNkulunkulu.
Yileyo naleyo ndoda ekhuleka noma ephrofetha yemboze ikhanda layo, ihlazisa ikhanda layo.
Kepha yilowo nalowo owesifazane okhuleka noma aphrofethe lingemboziwe ikhanda, uhlazisa ikhanda lakhe, ngokuba kuyafana lokho nokuthi uphucile.
Uma owesifazane engathwele ekhanda, kungcono agundwe. Uma kuyihlazo kowesifazane ukuba agundwe noma aphucwe, makamboze.
Ngokuba indoda ngokweqiniso ayifanele ukwemboza ikhanda, lokhu ingumfanekiso nodumo lukaNkulunkulu, kodwa owesifazane uwudumo lwendoda.
Indoda ayivelanga kowesifazane, kodwa ngowesifazane owavela endodeni.
Ngokuba indoda ayidalwanga ngenxa yowesifazane, kepha owesifazane wadalwa ngenxa yendoda.
Ngenxa yalokhu, owesifazane kufanele abe nophawu lwesithunzi ekhanda ngenxa yezingelosi.
Nokho eNkosini, owesifazane akalutho ngaphandle kwendoda, nendoda ayilutho ngaphandle kowesifazane,
ngokuba njengalokhu owesifazane evela endodeni, kanjalo nendoda izalwa ngowesifazane, kodwa konke kuvela kuNkulunkulu.
Nqumani nina ngokwenu, ukuthi kufanele yini ukuba owesifazane akhuleke kuNkulunkulu engathwele ekhanda na?
Kanti imvelo luqobo lwayo ayinifundisi yini ukuthi uma indoda inezinwele ezinde, kuyihlazo lokho kuyo,
nokuthi uma owesifazane enezinwele ezinde, kuludumo kuye na? Ngokuba uphiwe izinwele ukuba zibe yisembozo kuye.
Kepha uma umuntu efuna ukuphika inkani, thina asinawo umkhuba onjalo, futhi namabandla kaNkulunkulu awanawo.
Kepha kulezi ziyalo ezilandelayo anginincomi, ngokuba uma nihlangana anihlanganeli okuhle, kepha okubi.
Ngokuba okokuqala, uma nihlangana ebandleni, ngizwa ukuthi kukhona ukwehlukana phakathi kwenu; lokho nganxanye ngiyakukholwa.
Empeleni kufanele ukuba kube khona amaqembu phakathi kwenu, ukuze abaqotho bavele obala.
Ngakho-ke uma nihlangana ndawonye akusikho ukuba nidle isidlo seNkosi,
ngokuba lapho sekudliwa, yilowo nalowo uphuthuma okwakhe ukudla kuqala, adle, omunye alambe, kuthi omunye adakwe.
Kepha aninazindlu yini lapho ningadlela niphuzele khona na? Ngabe niyaledelela yini ibandla likaNkulunkulu; nenza abangenalutho babe namahloni na? Ngizakuthini kini? Nginincome na? Anginincomi ngalokho.
Ngokuba ngakwamukela eNkosini lokho engakwedlulisela kini, ukuthi: iNkosi uJesu, ngobusuku eyakhashelwa ngabo yathabatha isinkwa,
yabonga, yasihlephula, yathi: “Lokhu kungumzimba wami ohleshulelwe nina; kwenzeni lokhu ukuba ningikhumbule.”
Kanjalo, yathabatha nendebe emuva kokudla kwakusihlwa, yathi: “Le ndebe iyisivumelwano esisha egazini lami; kwenzeni lokhu ngezikhathi zonke eniphuza ngazo, ukuba ningikhumbule.”
Ngokuba ngaso sonke isikhathi lapho nidla lesi sinkwa, niphuza le ndebe nimemezela ukufa kweNkosi ize ibuye.
Ngakho-ke lowo odla lesi sinkwa aphuze indebe yeNkosi engafanele, unecala kuwo umzimba negazi leNkosi.
Kepha umuntu makazihlole yena, bese edla lesi sinkwa, aphuze le ndebe.
Ngokuba odla aphuze, uzidlela aziphuzele icala, uma engawahlukanisi umzimba weNkosi.
Ngenxa yalokho, abaningi phakathi kwenu babuthakathaka, bayagula; nabaningi sebafa.
Kepha uma sizehlulela thina, ngeke sehlulelwe.
Kepha ngokwehlulelwa yiNkosi, siyayalwa ukuze singalahlwa kanye nezwe.
Ngakho-ke bazalwane bami, uma nibuthana ukuba nidle, anolindana.
Uma omunye elambile, makadle ekhaya ukuze ningabuthaneli ukulahlwa. Okunye-ke okuseleyo, sengiyokulungisa mhla ngifika lapho.
Bazalwane, maqondana neziphiwo zokoMoya, angithandi ukuba ningazi.
Niyazi ukuthi ngesikhathi nisengabezizwe naniholwa futhi nihuhwa yizithombe eziyizimungulu.
Ngakho-ke ngiyanazisa ukuthi: akukho muntu okhuluma ngoMoya kaNkulunkulu ongathi: “Makaqalekiswe uJesu,” futhi akekho ongathi: “UJesu uyiNkosi,” ebe engaholwa nguMoya oNgcwele.
Kukhona iziphiwo ezahlukeneyo, kodwa zivela kuMoya munye.
Kukhona imisebenzi eyehlukene yokukhonza, kodwa ivela kuyo leyo Nkosi.
Kukhona imisebenzi eminingi eyehlukahlukene, kodwa uNkulunkulu munye osebenza kukho konke, nakubo bonke.
Kepha yilowo nalowo uphiwa okokubonakalisa uMoya ukuba basizakale abanye.
Ngokuba omunye uphiwa ngoMoya izwi lokuhlakanipha, omunye izwi lokwazi ngaye lowo Moya.
Omunye uphiwa ukukholwa nguye lowo Moya, omunye aphiwe iziphiwo zokuphulukisa nguye lowo Moya munye;
omunye uphiwa ukwenza imisebenzi yamandla, omunye ukuphrofetha, omunye ukwehlukanisa omoya, omunye ukukhuluma izilimi ngezilimi, omunye ukuhumusha izilimi.
Konke lokho kwenziwa nguye lowo Moya munye, owabela lowo nalowo ngokuthanda kwakhe.
Njengokuba umzimba umunye, kodwa unezitho eziningi, nakuba izitho zonke zomzimba ziziningi, kepha zingumzimba munye, unjalo-ke noKhristu.
Ngokuba thina sonke sabhabhadiswa ngaMoya munye, ukuba sibe mzimba munye, noma ngabe singabaJuda noma singamaGriki, noma siyizigqila noma singabakhululekileyo; sonke saphuziswa Moya munye.
Ngokuba umzimba awusiso isitho esisodwa, kodwa eziningi.
Uma unyawo lungathi: “Ngenxa yokuba angisiso isandla, angisikho okomzimba,” nokho aluyeki ukuba yisitho somzimba.
Uma indlebe ithi: “Ngenxa yokuba angisilo iso, angiyiso isitho somzimba,” ayinakuyeka ngalokho ukuba yisitho somzimba.
Uma wonke umzimba ubuyiso, ukuzwa ngabe kukuphi na? Uma wawungukuzwa, ngabe ukunuka kukuphi na?
Kepha manje uNkulunkulu umisile izitho, yileso naleso emzimbeni ngokuthanda kwakhe.
Uma zonke zaziyisitho esisodwa, ngabe uphi umzimba na?
Nakuba izitho ziziningi, kodwa munye umzimba.
Iso alinakusho esandleni ukuthi: “Angikudingi;” nekhanda alinakusho ezinyaweni ukuthi: “Anginidingi.”
Kepha kunalokho, lezo zitho zomzimba okungathi zibuthakathaka kunezinye, ziyadingeka;
nalezo esicabanga ukuthi zedelelekile ukuba zibe ngezomzimba, yizona ezembathiswe ngodumo olukhulu; nalezo esinamahloni ngazo, yizona esizinakekela kakhulu.
Kanti lezo ezibukeka zizinhle, azikudingi lokho. Kepha uNkulunkulu uwuhlanganisile umzimba, kwathi lezo ezidelelekile wazinika udumo olukhulu kakhulu,
ukuze kungabi bikho ukwehlukana emzimbeni, kodwa izitho zonke zinakekelane ngokufanayo.
Uma kuhlupheka isitho esisodwa, zonke izitho zihlupheka kanye naso. Uma kuhlonishwa esisodwa, zonke zijabula kanye naso.
Manje-ke, nina ningumzimba kaKhristu, yilowo nalowo uyisitho nabanye.
UNkulunkulu ubekile abathile ebandleni: okokuqala abaphostoli, okwesibili abaphrofethi, okwesithathu abafundisi, bese kuba yilabo abenza imisebenzi yamandla, abaneziphiwo zokuphulukisa, ezokusiza, ezokuphatha, nezilimi ngezilimi.
Ngabe bonke bangabaphostoli na? Bonke bangabaphrofethi na? Bonke bangabafundisi na? Bonke bangabenza imisebenzi yamandla na?
Bonke baneziphiwo zokuphulukisa na? Bonke bakhuluma ngezilimi na? Bonke bayahumusha na?
Ngakho-ke langazelelani iziphiwo ezibalulekileyo. Kanti-ke sengizakunikhombisa indlela okuyiyona enhle kakhulu.
Noma ngikhuluma ngezilimi zabantu nezezingelosi, kodwa uma ngingenalo uthando, ngifana nethusi elikhencezayo nensimbi encencethayo.
Noma ngingaphrofetha, ngiqonde izimfihlakalo zonke, ngibe nokwazi konke, noma nginganokukholwa konke okungagudluza izintaba, kodwa uma ngingenalo uthando, angiyinto yalutho.
Noma nginganikela ngakho konke enginakho, nginikele ngisho nangomzimba wami ukuze ngizigabise, kodwa uma ngingenalo uthando, akungisizi ngalutho.
Uthando luyabekezela, lumnene; uthando alunamhawu, aluzigabisi, aluzikhukhumezi;
aluziphathi ngokungafanele, aluzifuneli okwalo, alucunuki, alunagqubu;
aluthokozi ngokungalungile, kodwa luthokozela iqiniso;
lusibekela zonke izinto, lukholwa yizinto zonke, lubekezelela izinto zonke.
Uthando alusoze lwaphela, nakuba kukhona ukuphrofetha, kodwa kuyakukhawuka. Nakuba kuyizilimi, ziyakunqamuka; nakuba kungulwazi, luyakuphela.
Ngokuba sazi ingxenye, siphrofetha ingxenye.
Kepha lapho sekufike okupheleleyo, lokho okuyingxenye kuyakuphela.
Lapho ngisenguntwana, ngakhulumisa okomntwana, ngacabangisa okomntwana, futhi ngazindlisa okomntwana. Kepha lapho sengiyindoda, ngakuyeka ukwenza okobuntwana.
Ngokuba manje sibona esibukweni kalufifi, kepha lapho sobukana ubuso nobuso, ngokuba manje ngazi ingxenye, kepha lapho ngiyokwaziwa ngokupheleleyo, njengokuba bengaziwa ngokupheleleyo.
Manje-ke, kumi lokhu okuthathu: ukukholwa, ithemba, nothando, kodwa okukhulu kulokhu wuthando.
Phokophelani uthando, futhi nilangazelele iziphiwo zomoya, ikakhulu ukuba niphrofethe.
Okhuluma ngezilimi akakhulumi kubantu, kodwa ukhuluma kuNkulunkulu, ngokuba akekho ozwayo, kepha ekumoya ukhuluma izimfihlakalo.
Kepha ophrofethayo ukhuluma kubantu ukuba bakheke, bagqugquzeleke, baduduzeke.
Kanti lowo okhuluma ngezilimi uzakha yena, kodwa ophrofethayo wakha ibandla.
Ngifisa ukuba nonke nikhulume ngezilimi, kodwa ngifisa kakhulu ukuba niphrofethe. Mkhulu ophrofethayo kunokhuluma ngezilimi, ngaphandle kokuba azihumushe ukuze kwakheke ibandla.
Manje-ke, bazalwane, uma ngifika kini ngikhuluma ngezilimi, ngiyonisiza ngani, ngaphandle kokuba ngikhulume kini ngesambulo, noma ngolwazi noma ngokuphrofetha noma ngokufundisa na?
Ngisho nezinto ezingenamphefumulo ezikhaliswayo kungaba igenkle noma ihabhu, kungezwakala kanjani ukuthi leli yigenkle noma yihabhu uma kungakhali ngokwehlukana kwakho na?
Ngokuba uma icilongo likhala ngomsindo ongaqondakaliyo, ngubani ozakuzilungisela impi na?
Kanjalo-ke nani uma nikhuluma ngezilimi umbiko ongacacile, ngubani oyokwazi ukuthi kuthiwani na? Ngokuba niyakuba nikhuluma emoyeni.
Kungaba khona izinhlobo eziningi zezilimi emhlabeni, kodwa alukho nalunye olungasho okuthile.
Ngakho-ke uma ngingakuqondi okukhulunywayo, ngifana nowezizwe kokhulumayo, naye ufana nowezizwe kimi.
Ngokunjalo nani, njengalokhu nishisekela iziphiwo zomoya, phokophelani-ke ukuba nibe nazo kakhulu, ukuze kwakheke ibandla.
Ngakho-ke lowo okhuluma ngezilimi, makakhulekele ukuba akwazi ukuzihumusha.
Ngokuba uma ngikhuleka ngezilimi, kukhuleka umoya wami, kodwa ingqondo yami ayenzi lutho.
Pho kumele ngenzenjani na? Ngizakukhuleka ngomoya, ngikhuleke futhi nangengqondo; ngizakuhuba ngomoya, ngihube futhi nangengqondo.
Uma ngingenzi kanjalo lowo ongazi lutho uyosho kanjani ukuthi Amen ekubongeni kwakho na? Lokhu akazi ukuthi uthini.
Wena kungenzeka ukuba ubonga kahle, kodwa lowo omunye akakheki.
Ngibonga uNkulunkulu ngokuba ngikhuluma ngezilimi kakhulu kunani nonke.
Kepha ebandleni ngithanda ukukhuluma amazwi ayisihlanu ngengqondo yami, ukuze ngibafundise abanye, kunokuba ngikhulume amazwi ayizi-10 000 ngezilimi.
Bazalwane, ningabi ngabantwana ngengqondo, kepha yibani njengezingane ebubini, ekuqondeni nibe ngabakhulileyo.
Emthethweni kulotshiwe ukuthi: “Ngezinye izilimi, nangezindebe zabanye, ngiyakukhuluma kulesi sizwe; kodwa noma kunjalo asiyukungizwa,” kusho iNkosi.
Kunjalo-ke, izilimi ziyisibonakaliso kwabangakholwayo, hhayi kwabakholwayo. Kepha ukuphrofetha kuyisibonakaliso kwabakholwayo, hhayi kwabangakholwayo.
Ngakho-ke uma ibandla lihlangene ndawonye, bonke bakhulume ngezilimi, bese kungena abangenalwazi noma abangakholwa, abazukusho yini ukuthi niyahlanya na?
Kodwa uma bonke bephrofetha, bese kungena ongakholwa noma ongenalwazi, uyakusolwa yibo bonke, bamahlulele bonke;
kuthi izimfihlo zenhliziyo yakhe zidalulwe, lowo uyakukhothama athi mbo ngobuso, akhuleke kuNkulunkulu, avume ukuthi: “Impela uNkulunkulu ukhona phakathi kwenu.”
Pho kufanele kwenziwe njani bazalwane na? Uma nihlangana ndawonye, omunye unehubo, omunye unesifundiso, omunye unesambulo, omunye unezilimi, omunye uyahumusha; konke lokho makwenzelwe ukwakhiwa kwebandla.
Uma kukhona okhuluma ngezilimi, ababe babili noma babe bathathu, bezihumusha ngokudedelana.
Kepha uma kungekho ohumushayo, lowo-ke okhulumayo makathule ebandleni, azikhulumele eyedwa nakuNkulunkulu.
Abaphrofethi, makukhulume ababili noma abathathu, abanye bakuhlole lokho.
Kepha uma kwambulwa okuthile komunye ohleli phansi, owokuqala obekhuluma makathule.
Ngokuba ningaphrofetha nonke ngamunye ngamunye, ukuze bonke bafunde, futhi bakhuthazeke.
Imimoya yabaphrofethi iyabathobela abaphrofethi,
ngokuba uNkulunkulu akasiye owesiphithiphithi, kodwa ungowokuthula, njengokuba kunjalo kuwo wonke amabandla abangcwele.
Abesifazane mabathule emabandleni, ngokuba kabavunyelwe ukuba bakhulume, kodwa mabazithobe njengalokhu usho kanjalo nomthetho.
Kepha uma bethanda ukufunda okuthile, mababuze emadodeni abo emakhaya, ngokuba kuyihlazo ukuba owesifazane akhulume ebandleni.
Ngabe izwi likaNkulunkulu laphuma kini yini na? Noma lafika kini nodwa yini na?
Uma umuntu ethi ungumphrofethi, noma ethi unesiphiwo somoya, makakuqonde kahle lokhu enginilobele khona ukuthi kungumyalo weNkosi.
Kepha-ke uma umuntu engakugqizi qakala lokhu, naye makanganakwa.
Ngakho-ke bazalwane bami, langazelelani ukuphrofetha, kodwa ningakuvimbeli ukukhuluma ngezilimi.
Kepha konke makwenziwe kahle nangendlela ehlelekile.
Bazalwane, ngiyanazisa ukuthi ivangeli enganishumayeza lona nalamukela, futhi enimi kulo,
enisindiswa ngalo uma nibambelela ezwini enganishumayeza lona, ngaphandle kokuba ukukholwa kwenu kwaba yize.
Ngokuba nganinika lokho okubalulekileyo kakhulu engakwamukela nami ukuthi uKhristu wafa ngenxa yezono zethu, njengokwemibhalo,
nokuthi wambelwa, wavuswa kwabafileyo ngosuku lwesithathu njengokwemibhalo,
nokuthi wabonwa nguKhefase, wayesebonwa ngabayishumi nambili.
Emveni kwalokho, wabonwa ngabazalwane abangaphezu kwama-500 ngasikhathi sinye, iningi labo elisaphila namanje, kodwa abanye sebalala.
Emveni kwalokho, wabonwa nguJakobe, wayesebonwa ngabaphostoli bonke;
ekugcineni kwabo bonke, wabonwa nayimi enginjengozalwe kungakabi yisikhathi.
Ngokuba mina ngingomncane kubaphostoli, engingafanele ukubizwa ngomphostoli, lokhu ngalihlupha ibandla likaNkulunkulu.
Kepha ngomusa kaNkulunkulu ngiyikho engiyikho, futhi umusa wakhe kimi awubanga yize, kodwa ngasebenza kakhulu kunabo bonke; kodwa kungesimina, kepha kungumusa kaNkulunkulu okimi.
Ngakho-ke noma yimina noma yibo, sishumayela kanjalo, nani nakholwa kanjalo.
Kepha-ke uma kushunyayelwa ukuthi uKhristu uvusiwe kwabafileyo, bakusho kanjani pho abanye phakathi kwenu ukuthi akukho ukuvuka kwabafileyo na?
Uma kungekho ukuvuka kwabafileyo, noKhristu akavuswanga.
Uma uKhristu engavuswanga kwabafileyo, ukushumayela kwethu kuyize, nokukholwa kwenu kuyize.
Yebo, sifunyanwa singofakazi bamanga ngoNkulunkulu, ngokuba sifakaze ngoNkulunkulu ukuthi wamvusa uKhristu, angamvusanga uma kanti abafileyo bengavuswa.
Ngokuba uma abafileyo bengavuswa, akavuswanga noKhristu.
Kepha uma uKhristu engavuswanga, ukukholwa kwenu akusizi lutho, nisesezonweni zenu.
Yebo, nalabo asebalala bekuKhristu babhubhile.
Uma sithembela kuKhristu kulokhu kuphila kuphela, singabokudatshukelwa kunabantu bonke.
Kodwa manje uKhristu uvusiwe kwabafileyo, uwulibo lwabaleleyo.
Ngokuba lokhu, ukufa kweza ngomuntu, nokuvuka kwabafileyo nakho kweza ngomuntu.
Njengalokhu ku-Adamu bonke bayafa, kanjalo-ke nakuKhristu bonke bayaphiliswa.
Kepha yilowo nalowo ngokwesigaba sakhe: uKhristu kuqala, bese kuba ngabakaKhristu ekubuyeni kwakhe,
andukuba kufike umhla wokuphela, lapho ebuyisela umbuso kuNkulunkulu uYise, esechithile bonke ababusi, bonke abasemagunyeni, nabanamandla.
Ngokuba Yena umelwe ukuba abuse, aze azibeke phansi kwezinyawo zakhe zonke izitha zakhe.
Isitha sokugcina esiyakubhujiswa ngukufa.
Ngokuba zonke izinto zithotshisiwe zaba phansi kwezinyawo zakhe. Nxa ethi: “Izinto zonke zithotshisiwe phansi kwakhe,” kusobala ukuthi yena ozithobisileyo zonke izinto, akahlangene nazo.
Kepha lapho zonke izinto sezithotshiselwe phansi kwakhe, nayo-ke iNdodana uqobo lwayo iyakuzithoba phansi kwalowo owathobisa zonke izinto phansi kwayo, ukuze uNkulunkulu abe yikho konke, kukho konke.
Pho bayokwenzenjani labo ababhabhadiselwa abafileyo na? Uma impela abafileyo bengavuswa, babhabhadiselwani ngenxa yabo na?
Thina-ke sizibekelani engcupheni umzuzu nomzuzu na?
Bazalwane, ngiyaqinisa ukuthi mina ngifa imihla ngemihla ngenxa yokubongwa enginakho ngani kuKhristu uJesu iNkosi yethu.
Uma njengomuntu ngalwa nezilo e-Efesu, pho nginanzuzoni ngalokho na? Uma abafileyo bengavuswa, masidle, siphuze, ngokuba ngomuso sizakufa.
Ningakhohliswa; ukujwayelana nababi konakalisa ukuziphatha okuhle.
Phaphamani, niziphathe kahle, yekani ukona, ngokuba abanye kabamazi uNkulunkulu; lokhu ngikusho ukuze nibe namahloni.
Kepha omunye uyakuthi: “Abafileyo bavuswa kanjani na? Bavuswa benomzimba onjani na?”
Silima ndini, lokho okuhlwanyelayo akutholi ukuphila uma kungafanga.
Lokho futhi okuhlwanyelayo awuhlwanyeli umzimba ozakuba khona, kodwa uhlwanyela uhlamvu oluze, noma ngabe ngolukakolo, noma ngolokunye.
Kepha uNkulunkulu ulunika isimo salo ngokuthanda kwakhe, kube yileyo naleyo mbewu, owayo umzimba.
Inyama yonke ayifani: kodwa kukhona eyabantu, eyezilwane, eyezinyoni neyezinhlanzi.
Ikhona futhi nemizimba yasezulwini nemizimba yasemhlabeni, kodwa inkazimulo yemizimba yasezulwini iyodwa, neyasemhlabeni iyodwa.
Iyodwa inkazimulo yelanga, iyodwa inkazimulo yenyanga, iyodwa nenkazimulo yezinkanyezi. Yebo, enye inkanyezi yahlukile kwenye inkanyezi ngokukhazimula.
Kunjalo nokuvuka kwabafileyo. Kuhlwanyelwa kunokubola, kuvuswa kungenakubola;
kuhlwanyelwa kunokudelwa, kuvuswa kunenkazimulo; kuhlwanyelwa kunobuthakathaka, kuvuswa kunamandla.
Kuhlwanyelwa kungumzimba wemvelo, kuvuswa kungumzimba womoya. Uma ukhona umzimba wemvelo, ukhona nowomoya.
Kulotshiwe futhi ukuthi umuntu wokuqala u-Adamu waba ngumuntu ophilayo. U-Adamu wokugcina waba ngumoya ophilisayo.
Kepha akusikho okomoya kuqala, kodwa okwemvelo, bese kuba ngokomoya.
Umuntu wokuqala wavela emhlabeni, enziwe ngomhlabathi; umuntu wesibili uvela ezulwini.
Njengokuba enjalo umuntu ongowenhlabathi, banjalo nabangabenhlabathi; njengokuba enjalo umuntu wasezulwini, banjalo nabangabasezulwini.
Njengalokhu futhi sinesimo songowenhlabathi, siyakuba futhi nesimo songawasezulwini.
Bazalwane, ngisho lokhu ukuthi inyama negazi akuyukulidla ifa lombuso kaNkulunkulu, kanjalo nokubola akunakulidla ifa elingukungaboli.
Manje senginitshela imfihlakalo; asiyukulala sonke, kodwa sonke siyakuguqulwa,
ngomzuzwana nje, ngokuphazima kweso, ngecilongo lokugcina. Ngokuba kuyakukhala icilongo, abafileyo bavuswe bengenakubola, thina siguqulwe.
Ngokuba okubolayo kumelwe ukwembatha ukungaboli, nalokhu okufayo kumelwe ukwembatha ukungafi.
Kepha lapho okubolayo sekwembethe ukungaboli, nokufayo sekwembethe ukungafi, kuzakugcwaliseka izwi elilotshiweyo, elithi: “Ukufa kugingiwe kwaba ngukunqoba.”
“Kufa, kuphi ukunqoba kwakho na? Kufa, luphi udosi lwakho na?”
Udosi lokufa yisono; amandla esono ngumthetho.
Kepha makabongwe uNkulunkulu osinika ukunqoba ngeNkosi yethu uJesu Khristu.
Ngakho-ke bazalwane bami abathandekayo, yibani ngabagxilileyo, abangaxegiyo, abavame njalo emsebenzini weNkosi, nazi ukuthi ukusebenza kwenu akusilo ize eNkosini.
Maqondana nomnikelo oqoqelwa abangcwele, njengalokhu ngawayala amabandla aseGalathiya, nani-ke yenzani kanjalo.
Ngosuku lokuqala lweviki akube yilowo nalowo azibekele, aqongelele azakunikela ngakho njengokuphumelela kwakhe, ukuze kuthi lapho ngifika, kungabi yima kuqalwa kuqoqwa umnikelo.
Kuyakuthi ekufikeni kwami, ngithumele eJerusalema labo enibaqokileyo, bephethe izincwadi, baziyise izipho zenu zothando.
Uma nami kufanele ukuba ngihambe, ngiyakuhamba nabo.
Ngiyakuza kini uma sengedlulile eMakhedoniya, ngokuba ngiyakudlula khona eMakhedoniya.
Mhlawumbe kungenzeka ngihlale nani isikhathi esithile, noma kuze kwedlule ubusika, ukuze ningiqhube ohambeni lwami noma kuphi lapho ngiya khona.
Ngokuba manje angithandi ukunibona ngedlula, lokhu ngithemba ukuthi ngizakuhlala nani isikhathi, uma iNkosi ivuma.
Kepha ngizakuhlala e-Efesu, kuze kufike umkhosi wePhentekhoste,
ngokuba ngivulelwe umnyango omkhulu wethuba lokusebenza; nakuba bebaningi abamelene nami.
Uma uThimothewu efika lapho, anoqikelela ukuba ahlale nani engenalo uvalo, ngokuba naye usebenza umsebenzi weNkosi njengami,
ngakho-ke makungabi bikho omedelelayo. Uma esehamba anomkhapha ngokuthula endleleni, ngokuba ngimlindele yena nabazalwane.
Maqondana nomzalwane u-Apholo, ngamncenga kakhulu ukuba eze kini nabazalwane, kodwa kwakungesiyo intando yakhe ukuba eze manje. Kepha uyakuza kini uma esethole ithuba.
Lindani, nime niqinile ekukholweni, nime isibindi, nibe namandla.
Konke enikwenzayo, kwenzeni ngothando.
Ngiyanincenga manje bazalwane, niyazi ukuthi indlu kaStefana iwulibo lokuqala lwase-Akhaya, nokuthi bazinikela ukuba basize abangcwele,
ukuba nibathobele abanjalo nabo bonke abasebenzisana nabo bezikhandla.
Ngiyathokoza ngokufika kukaStefana, uFortunatu no-Akhayiku, lokhu basivalile isikhala sokungabi bikho kwenu lapha.
Ngokuba bawuvuselele umoya wami nowenu, ngakho-ke basizeni abantu abanjalo.
Ayakhonza kini amabandla ase-Asiya. U-Akhwila, uPhriska kanye nebandla elisendlini yabo, bayakhonza kakhulu kini eNkosini.
Bonke abazalwane bayakhonza kini. Bingelelanani ngokwangana okungcwele.
Nanku umkhonzo wami, mina Pawula, engiwuloba ngesandla sami.
Uma umuntu engayithandi iNkosi, makabe ngoqalekisiweyo. Woza, Nkosi yethu!
Umusa weNkosi uJesu mawube nani.
Uthando lwami malube nani nonke kuKhristu uJesu.
UPawula, umphostoli kaKhristu uJesu ngokwentando kaNkulunkulu, noThimothewu umzalwane, kulo ibandla likaNkulunkulu eliseKhorinte nabo bonke abangcwele abakulo lonke i-Akhaya:
makube kini umusa nokuthula okuvela kuNkulunkulu uBaba wethu naseNkosini uJesu Khristu.
Makabongwe uNkulunkulu uYise weNkosi yethu uJesu Khristu, uYise wobubele bonke, uNkulunkulu wenduduzo yonke,
osiduduzayo osizini lwethu lonke, ukuze nathi sibe namandla okududuza abasosizini, noma ngabe lunjani, ngenduduzo esiduduzwe ngayo nathi nguNkulunkulu.
Njengokuba izinhlupheko zikaKhristu ziziningi kithi, kanjalo nokududuzeka kwethu kuyaphuphuma ngoKhristu.
Kepha noma sikhathazwa manje, kungenxa yokududuzwa nokusindiswa kwenu; uma siduduzwa, kungenxa yokududuzwa kwenu okuveza ukubekezela ezinhluphekweni ezifanayo nalezi esihlupheka ngazo nathi.
Ithemba lethu ngani liqinile, sazi ukuthi njengabahlanganyela ezinhluphekweni, kanjalo ningabahlanganyeli nasenduduzweni.
Bazalwane, asithandi ukuba ningazi ngosizi lwethu olwasehlela e-Asiya, ukuthi sabhekana nobunzima obungaphezu kwamandla ethu, saze salahlekelwa nayithemba lokuphila.
Thina ngokwethu sazibonela ukufa, ukuze singazethembi thina, kodwa sethembele kuNkulunkulu ovusa abafileyo.
Nguye owasihlenga ekufeni okungaka, futhi oyakusiphephisa; sethembele kuye ukuthi uyakusihlenga.
Njengalokhu nani nisizana nathi ngokusinxusela, ukuze babe baningi ababongayo ngenxa yethu ngesipho esisinikiweyo ngokucela kwabaningi.
Ngokuba ukuzibonga kwethu yilokhu okungubufakazi bukanembeza wethu, ukuthi sibe msulwa, sahamba ngobuqotho bukaNkulunkulu emhlabeni, ikakhulu maqondana nani; asihambanga ngokuhlakanipha kwabantu, kodwa ngomusa kaNkulunkulu.
Ngokuba asinilobeli lutho olunye ngaphandle kwalokho enikufundayo, noma enikwaziyo. Ngiyethemba futhi ukuthi niyakukwazi ngokupheleleyo kuze kube sekugcineni,
njengalokhu nisazile ingxenye, ukuthi siyiqholo lenu, kanjalo-ke nani ningelethu ngosuku lweNkosi yethu uJesu.
Ngenxa yaleli themba, ngahlela ukuba ngize kini kuqala, ukuze nithole umusa ngokuphindiwe, ngokunivakashela kwami;
okokuqala ngiya eMakhedoniya, okwesibili nalapho sengibuya eMakhedoniya ngize kini, bese ngiphelezelwa yini uma sengiya eJudiya.
Ngabe ngangidlala yini uma ngihlela ukwenza lokho na? Noma kumbe izinto engizihlelayo ngikwenza lokho ngokwenyama ngilindele ukuthi yebo, yebo, noma qha, qha, ngesikhathi esifanayo na?
Kepha njengalokhu uNkulunkulu ethembekile, izwi lethu kini alisiye uyebo noqhabo.
Ngokuba iNdodana kaNkulunkulu uJesu Khristu eyashunyayelwa yithi kini: mina, noSilvanu, noThimothewu, ayisiye uyebo noqhabo, kodwa kuYena, kuhlala kunguyebo.
Nakuba izithembiso zikaNkulunkulu ziziningi kakhulu, kuYena zinguyebo, ngakho-ke ngaye zingu-Amen; kudunyiswe uNkulunkulu ngathi.
Kepha nguNkulunkulu osimise kanye nani kuKhristu, nowasigcobayo,
nguye futhi owasibeka uphawu, nowasipha uMoya oyisibambiso ezinhliziyweni zethu.
Mina ngibiza uNkulunkulu abe ngufakazi emphefumulweni wami, ukuthi nganginiphephisa ngokuba ngingaphindi ngize eKhorinte,
kungesikho ukuthi sinethwesa imithwalo ngenxa yokukholwa kwenu, kodwa siyizisebenzi ezibambisene nani ekujabuleni kwenu, ngokuba nimile ekukholweni.
Kepha nganquma ukuba ngingezi futhi kini ukunidabukisa.
Ngokuba uma mina nginidabukisa, pho ngubani ongithokozisayo, uma kungesiye lowo odabukiswa yimi na?
Ngilobe lezi zinto, ukuze kuthi uma ngifika, ngingezwiswa ubuhlungu yilabo obekufanele ngithokoze ngabo. Nginesibindi ngani nonke ukuthi ukuthokoza kwami kungokwenu nonke.
Ngokuba nganilobela ngisezinhlungwini, ngidabukile enhliziyweni, futhi kuphophoza izinyembezi, hhayi ukuba nginizwise ubuhlungu, kodwa ukuba nazi ukuthi nginithanda kakhulu.
Kepha uma kukhona onizwise ubuhlungu, uzwise mina ubuhlungu, ukuze ngingenzi ihaba, unidabukise nonke.
Kumfanele onjalo ukuba ajeziswe ngalokho ngabaningi,
kodwa kunalokho, mthetheleleni, nimduduze, funa owenze lokho ahaqwe wusizi.
Ngakho-ke ngiyanincenga ukuba nimkhombise ukuthi niyamthanda.
Ngokuba ngaloba ngaleso sizathu ukuba nginihlole ukuthi niyalalela yini kukho konke.
Lowo enimthethelela okuthile, nami ngiyamthethelela, ngokuba lokhu engikuthethelele, uma kukhona noma yini engiyithetheleleyo, ngiyithethelele ngenxa yenu, ebukhoneni bukaKhristu,
ukuze singehlulwa nguSathane, ngokuba asisibo abangawazi amaqhinga akhe.
Kepha ekufikeni kwami eThrowa ukuba ngishumayele ivangeli likaKhristu, ngavulelwa umnyango yiNkosi,
nokho angibanga nakho ukuthula emoyeni wami lapho ngingamfumani uThithu umzalwane wami, kodwa ngavalelisa, ngadlulela eMakhedoniya.
Kepha makabongwe uNkulunkulu osihola njalo odwendweni lokunqoba ngoKhristu, nothaphukisa ngathi iphunga lokwazi kwakhe ezindaweni zonke.
Ngokuba siyiphunga elimnandi likaKhristu kuNkulunkulu kulabo abasindiswayo nakulabo ababhubhayo.
Kwababhubhayo, siyiphunga lokufa kube ngukufa; kodwa kwabasindiswayo, siyiphunga lokuphila kube ngukuphila. Pho ngubani ongakwazi ukwenza lokho na?
Ngokuba asinjengabo abaningi abadunga izwi likaNkulunkulu ngenxa yenzuzo, kodwa sikwenza njengabaqotho, njengabavela kuNkulunkulu sikhuluma phambi kukaNkulunkulu sikuKhristu.
Ngabe sesiqala ukuzincoma yini na? Kumbe nathi sidinga izincwadi zokusincoma kini noma ezivela kini njengoba abanye bezidinga na?
Nina niyincwadi yethu ebhalwe ezinhliziyweni zethu, eyaziwa futhi ifundwa ngabantu bonke.
Nibonakalisa ukuthi niyincwadi kaKhristu eyenziwe ngokukhonza kwethu, elotshwe hhayi ngoyinki, kepha ngoMoya kaNkulunkulu ophilayo. Ayilotshiwe ezibhebheni zamatshe, kodwa ezibhebheni eziyizinhliziyo zenyama.
Sinethemba elinjalo ngoKhristu kuNkulunkulu,
kungesikho ukuthi kukhona thina esingakukhomba sithi kuvela kithi, kodwa amandla ethu avela kuNkulunkulu,
okunguye owasenza safaneleka ukuba yizikhonzi zesivumelwano esisha kungesiso esomthetho, kodwa esikaMoya. Ngokuba incwadi ebhaliwe iyabulala, kodwa uMoya uyaphilisa.
Uma inkonzo yokufa eyayiqoshiwe ematsheni yafika inenkazimulo, kangangokuba abantwana bakwa-Israyeli babengakwazi ukububuka ubuso bukaMose, ngenxa yenkazimulo ephelayo eyayisebusweni bakhe,
pho inkonzo kaMoya ayiyukuba nenkazimulo enkulu kunayo na?
Ngokuba uma inkonzo yokulahlwa ibinenkazimulo, inkonzo yokulunga inenkazimulo enkulu kakhulu.
Nalokho okwakhazimuliswa, kwakukade kungenankazimulo, uma kuqhathaniswa nale nkazimulo edluleleyo.
Uma lokhu okuphelayo kwakunenkazimulo, pho kakhulu kangakanani inkazimulo yalokhu okumiyo njalo.
Ngakho-ke sinethemba elinjalo, senza ngesibindi,
asenzi njengoMose owamboza ubuso bakhe ngendwangu ukuze abakwa-Israyeli bangakuboni ukufiphala kwenkazimulo ephelayo.
Kepha yaba lukhuni ingqondo yabo, ngokuba kuze kube yinamuhla uma kufundwa isivumelwano esidala, leyo ndwangu isalokhu ihlezi ingembuliwe, kodwa yembulwa kuphela kuKhristu.
Yebo, kuze kube yinamuhla noma yinini lapho kufundwa uMose, indwangu isayimbozile inhliziyo yabo.
Kepha lapho umuntu ephendukela eNkosini, indwangu iyasuswa.
INkosi inguye uMoya, lapho kukhona khona uMoya weNkosi kunenkululeko.
Kepha thina sonke ubuso bethu obambuliwe esibuka inkazimulo yeNkosi ngokungathi esibukweni siyaguqulwa, sibe njengalowo mfanekiso, kusuka kuleli zinga lenkazimulo kuya kwelinye, lokhu kuvela eNkosini enguMoya.
Ngakho-ke sinale nkonzo, ngokuba sahawukelwa, asidangali;
sizilahlile izinto ezifihliwe zehlazo, asihambi ngobuqili, futhi asiliphambanisi izwi likaNkulunkulu, kodwa ngokuveza obala iqiniso, sizincoma kunembeza wabantu bonke phambi kukaNkulunkulu.
Kepha uma ivangeli lethu lifihlakele, lifihlakele kwababhubhayo,
okuyibona unkulunkulu waleli lizwe eyiphuphuthekisile ingqondo yabangakholwa, ukuze lingakhanyi kubo ivangeli lenkazimulo kaKhristu ongumfanekiso kaNkulunkulu.
Ngokuba asizishumayeli thina, kodwa sishumayela uJesu uKhristu eyiNkosi, nathi siyizikhonzi zenu ngenxa kaJesu.
Ngokuba nguNkulunkulu owathi: “Akuvele ukukhanya ebumnyameni kukhanye,” nguYena owakhanyisa ezinhliziyweni zethu ukuze zikhanyelwe wulwazi lwenkazimulo kaNkulunkulu ebusweni bukaKhristu.
Kepha le ngcebo sinayo ezitsheni zebumba, ukuze ubukhulu bamandla obukhulu kakhulu bube ngobukaNkulunkulu, hhayi obuvela kithi.
Sicindezelwa nxazonke, kepha asifihlizeki; siyaxakeka, kodwa asidikibali.
Siyahlushwa, kepha asilahlwa; siqunjwa phansi, kodwa asibhujiswa.
Sithwele njalo emzimbeni wethu ukufa kukaKhristu, ukuze ukuphila kukaJesu kubonakaliswe emzimbeni wethu.
Ngokuba sisaphila, sinikelwa njalo ekufeni ngenxa kaJesu, ukuze ukuphila kukaJesu kubonakaliswe emzimbeni yethu efayo.
Ngakho-ke kithina kusebenza ukufa, kodwa kinina ukuphila.
Njengalokhu sinawo lowo moya wokukholwa kuNkulunkulu njengokuba kusho embhalweni, ukuthi: “Ngakholwa, ngakho ngakhuluma.” Nathi siyakholwa, ngakho-ke siyakhuluma,
sazi ukuthi lowo owayivusa iNkosi uJesu uyakusivusa nathi kanye noJesu, asethule kanye nani.
Ngokuba konke kwenzelwe nina, ukuze umusa ngesikhathi wenabela kubantu abaningi, kwande ukubonga kwabo, kube ludumo kuNkulunkulu.
Ngakho asidangali, nakuba umuntu wethu wangaphandle ebhubha, nokho owangaphakathi wenziwa musha imihla ngemihla.
Ngokuba usizi lwethu oluncane lwesikhashana lusilungisela inkazimulo enkulu yaphakade, engenakulinganiswa.
Thina asibheki okubonwayo, kodwa okungabonwayo; ngokuba okubonwayo kungokwesikhashana, kepha okungabonwa kungokwaphakade.
Ngokuba siyazi ukuthi uma idokodo eliyindlu yethu yasemhlabeni lidilizwa, thina sinesakhiwo esivela kuNkulunkulu, indlu engenziwanga ngezandla, engeyaphakade, esezulwini.
Ngenxa yalokho siyabubula, silangazelela ukuba sembathiswe indlu yethu yasezulwini,
ukuze sithi sesiyikhumulile, singafunyanwa sihamba ze.
Ngokuba thina esisekhona kuleli dokodo siyabubula, siyasindwa, ngokuba asithandi ukwambulwa, kodwa ukwembathiswa, ukuze okufayo kugingwe ngukuphila.
Kepha owasenzela lokho nguNkulunkulu, owasipha futhi isibambiso esinguMoya.
Ngakho-ke sihlala sinesibindi, sazi ukuthi nxa ikhaya lethu lisesemzimbeni, sehlukene nekhaya eliseNkosini,
ngokuba sihamba ngokukholwa, hhayi ngokubona.
Simi isibindi, singathanda ukwehlukana nekhaya elisemzimbeni, ukuba sibe sekhaya eliseNkosini.
Ngakho-ke nakuba sisekhaya noma sehlukene nalo, siphokophele ukuba ngabathandekayo kuye.
Ngokuba thina sonke simelwe ukuba sibonakaliswe phambi kwesihlalo sikaKhristu sokwehlulela, ukuze yilowo nalowo amukeliswe njengalokho akwenzileyo esesemzimbeni; noma okuhle noma okubi.
Ngakho-ke njengalokhu sazi ukuthi kuyini ukwesaba uNkulunkulu, siyabancenga abantu. Kepha thina sibonakalisiwe kuNkulunkulu; ngiyethemba ukuthi nakuye unembeza wenu, sibonakalisiwe.
Asizincomi futhi kini, kodwa sininika ithuba lokuzitusa ngathi, ukuze nikwazi ukuphendula labo abazigabisa ngokubonakalayo kungesikho okusenhliziyweni.
Ngokuba noma singathi siyahlanya, kungenxa kaNkulunkulu; noma sisangulukile, kungenxa yenu.
Uthando lukaKhristu luyasiqhubezela; lokhu sibona ukuthi munye owafela bonke, ngakho-ke bonke sebafa;
wafela bonke ukuze abaphilayo bangabe besaziphilela bona, kodwa baphilele Yena owabafelayo, wabuye wavuka.
Kanjalo thina kusukela manje, asisazi muntu ngokwenyama; nakuba besimazi uKhristu ngokwenyama, nokho manje asisamazi.
Ngokuba uma umuntu ekuKhristu, uyisidalwa esisha, okwakuqala kudlulile; sekuvele okusha.
Konke lokho kuvela kuNkulunkulu owenza ukuba sibuyisane naye ngoKhristu, wasinika inkonzo yokubuyisana,
okungukuthi, uNkulunkulu ekuKhristu wenza ukuba izwe libuyisane naye, engababaleli iziphambeko, ebeka kithi izwi lokubuyisana.
Singamanxusa kaKhristu ngokungathi uNkulunkulu unxusa ngathi; siyanincenga esikhundleni sikaKhristu sithi: “Buyisanani noNkulunkulu.”
Ongasazanga isono wamenza isono ngenxa yethu, ukuze kuYena senziwe sibe ngukulunga kukaNkulunkulu.
Thina esisebenza kanye naye, siyanincenga ukuba ningawemukeleli ize umusa kaNkulunkulu,
ngokuba uthi: “Ngesikhathi esihle ngikuzwile nangosuku lwensindiso ngakuhlenga.” Qaphela, manje sekuyisikhathi esihle kakhulu. Impela, manje wusuku lwensindiso.
Asibekeli muntu isikhubekiso, funa inkonzo yethu igxekwe.
Kepha kukho konke sizibonakalisa sinjengezikhonzi zikaNkulunkulu ekubekezeleni okukhulu, osizini, ekwesweleni, ekubandezekweni,
ekushayweni, ekuboshweni, eziphithiphithini, ekukhandlekeni, ekuqwasheni, ekuzileni ukudla;
ngenhlanzeko, ngolwazi, ngokubekezela, ngobumnene, ngoMoya oNgcwele, ngothando olungazenzisi,
ngezwi leqiniso, ngamandla kaNkulunkulu, ngezikhali zokulunga zesokunene nezesokhohlo,
ngodumo nangehlazo, ngokuhletshwa nangokutuswa, njengabakhohlisi kanti singabeqiniso,
njengabangaziwa kanti saziwa kakhulu, njengabafayo kanti siyaphila, njengabashaywayo kanti asibulawa,
njengabadabukileyo, kodwa sithokoza njalo, njengabampofu, kepha sibe sicebisa abaningi, njengabangenalutho kanti sinakho konke.
Sikhuluma kini nina baseKhorinte, sikhululekile, inhliziyo yethu ivulekile kini,
asinigodleli uthando lwethu, kodwa anisivulelanga ingaphakathi lenu,
kepha ukuze kube khona ukwenana, ngikhuluma kini njengabantwana; nani-ke vulani izinhliziyo zenu.
Maningaboshelwa ejokeni linye nabangakholwayo, ngokuba ukulunga kunakuhlanganyela kuni nokungalungi na? Kunabudlelwane buni ukukhanya nobumnyama na?
Unakuvumelana kuni uKhristu noBheliyali na? Unasabelo sini okholwayo nongakholwayo na?
Linakuvumelana kuni ithempeli likaNkulunkulu nezithombe na? Ngokuba thina siyithempeli likaNkulunkulu ophilayo njengalokhu uNkulunkulu, ethi: “Ngiyakuhlala phakathi kwabo, ngihambe phakathi kwabo. Ngiyakuba nguNkulunkulu wabo, bona babe ngabantu bami.”
Ngakho-ke: “Phumani phakathi kwabo, nehlukane nabo,” kusho iNkosi. “Ningathinti okungcolileyo; khona ngiyakunamukela,
ngibe nguYihlo, nina nibe ngamadodana, namadodakazi ami,” kusho iNkosi uSomandla.
Bathandekayo, lokhu sinalezo zithembiso, masizihlambulule kukho konke ukungcola kwenyama nokomoya, siphelelise ubungcwele ngokwesaba uNkulunkulu.
Sivuleleni indawo ezinhliziyweni zenu, asonanga muntu, asonakalisanga muntu, futhi asidlalanga ngamuntu.
Lokhu angikusho ukuze nginilahle, njengalokhu nganitshela naphambilini ukuthi nisezinhliziyweni zethu; ukuba sife nani, siphile nani.
Ngineqholo ngani, nginokuzigabisa okukhulu ngani, ngigcwele ukugqugquzeleka, futhi ngichichima intokozo phezu kosizi lonke olusikhungethe.
Nangesikhathi sifika eMakhedoniya, imizimba yethu ayibanga nakuphumula, kodwa sakhathazeka nxazonke; kunezingxabano ngaphandle, nokwesaba ngaphakathi.
UNkulunkulu oduduza abadangeleyo, wasiduduza ngokufika kukaThithu,
hhayi nje ngokufika kwakhe kuphela, kodwa nangokugqugquzela agqugquzeleka ngakho ngani. Wasilandisa futhi ngokungilangazelela kwenu, nangokulila kwenu, nogqozi lwenu ngami; ngaze ngathokoza kakhulu.
Nakuba nganidabukisa ngencwadi yami, angizisoli; nakuba ngangizisola, ngokuba ngiyabona ukuthi leyo ncwadi yanidabukisa noma kwaba yisikhathi nje –
manje ngiyathokoza, kungengokuba nadabukiswa, kodwa ngokuba nadabuka kwaba ngukuphenduka, ngokuba nadabukiswa ngokukaNkulunkulu, ukuze ningalahlekelwa lutho ngathi.
Ukudabuka okwenziwa nguNkulunkulu kuholela ensindisweni, umuntu angasoze azisola ngakho, kube ngukusindiswa, kodwa ukudabuka okuya ngokwezwe, kuholela ekufeni.
Ake nibheke nje ukuthi ukudabukiswa kwenu nguNkulunkulu kwanenza naba nokukhuthala okukhulu kanjani; yebo, nokuziphendulela, ukuthukuthela, ukwesaba, ukulangazela, ukushisekela nokuphindisela. Kukho konke nizibonakalise nimhlophe kule ndaba.
Nakuba nganibhalela, anginibhalelanga ngenxa yothile owonileyo, kodwa ukuze ukukhuthala kwenu ngenxa yethu kubonakaliswe kini phambi kukaNkulunkulu.
Ngakho-ke siduduzekile, futhi ekududuzekeni kwethu sathokoza, ikakhulu ngenxa kaThithu omoya wakhe uhlunyeleliswe yinina nonke.
Ngokuba uma bengizincoma ngani kuye, angidumazekanga, njengalokhu konke esanitshela khona kuyiqiniso, ngakho nokunincoma kwethu kuThithu kutholakale kuyiqiniso.
Inhliziyo yakhe inilangazelela kakhulu uma ekhumbula ukulalela kwenu nonke nokuthi namemukela kanjani ngokwesaba nangokuthuthumela.
Ngiyathokoza, ngokuba kukho konke nginesibindi kini.
Kepha manje siyanazisa bazalwane, ngomusa kaNkulunkulu awuphiweyo amabandla aseMakhedoniya,
ngesikhathi esinzima sokuvivinywa, ukuthokoza kwawo kwavama ngisho esebuphofini obukhulu, kunalokho kwanda ukuphana okukhulu kuwo.
Ngokuba ngingafakaza ukuthi anikela engaphoqiwe ngokwamandla awo nangaphezu kwamandla awo.
Yiwona asinxusela kakhulu ecela umusa wokuba ahlanganyele ekukhonzeni abangcwele;
lokhu akubanga njengokuba sasilindele, kodwa azinikela wona kuqala eNkosini nakithi ngentando kaNkulunkulu,
saze samncenga uThithu njengokuba wayesevele eqalile phambilini ukuba nakini awufeze futhi lowo msebenzi womusa.
Kepha nakuba nivamile kukho konke: ekukholweni, emazwini, ekwazini, nasekukhuthaleni konke, nasothandweni esinithanda ngalo, manje nivame nakuwo lowo msebenzi womusa.
Angikusho lokhu njengomyalo, kodwa ukuba ngokukhuthala kwabanye ngivivinye ubuqotho bothando lwenu.
Ngokuba niyawazi umusa weNkosi yethu uJesu uKhristu ukuthi, ngenxa yenu waba mpofu nakuba ayecebile, ukuze ngobuphofu bakhe nina nicebe.
Kulolu daba, ngininika isiyalo sami ukuthi kungcono kini enaqala ngonyaka odlule ukuthi ningenzi nje okuthile, kodwa ukuba nifise ukwenza okuthile.
Manje-ke, qedani enikwenzayo, ukuze ukulangazelela nokufisa kwenu kuhambisane nokuwuqeda kwenu ngokwamandla enu.
Uma kukhona ukulangazela, nesipho siyemukeleka njengalokhu umuntu ethanda, kungayi ngalokho angenakho.
Lokhu angikusho ukuze nina nikhathazeke, abanye bakhululeke, kodwa makube ngokulinganayo,
ukuze kuthi ngalesi sikhathi ninenala nisize abanye ekusweleni kwabo, nabo ngokunjalo enaleni yabo, basize nani ekusweleni kwenu, ukuze kube khona ukulingana,
njengalokhu kulotshiwe ukuthi: “Kowaba nokuningi kakusalanga, nowaba nokuncane kantulanga.”
Kepha makabongwe uNkulunkulu obeke enhliziyweni kaThithu le nkuthalo ngani,
ngokuba naye kagcinanga ngokwemukela umyalo wethu, kodwa eqhutshwa yinkuthalo enkulu, uphumile weza kini engaqhutshwa muntu.
Simthume kanye nomunye umzalwane odumile kuwo wonke amabandla ngenxa yokushumayela kwakhe ivangeli.
Kungesikho lokho kuphela, kodwa ukhethiwe futhi ngamabandla ukuba ahambe nathi ngenxa yalo mnikelo onikelwe yini, ukuze udumo lube ngolweNkosi, kubonakaliswe ukukhuthala kwethu.
Sigwema lokhu ukuba kungabi bikho osisolayo ngenxa yalesi sipho esikhulu esisiphetheyo,
ngokuba siyazihlonipha izinto ezinhle, hhayi nje phambi kweNkosi, kepha nasemehlweni abantu imbala.
Sithumele kanye nabo umzalwane wethu esimfumene kaningi ekhuthele ezintweni eziningi, manje-ke ukhuthele kakhulu ngenxa yokunethemba kwakhe okukhulu.
Uma kubuzwa ngoThithu, ngibambisene naye futhi uyisisebenzi kanye nabazalwane bethu, bayizithunywa zamabandla, bayinkazimulo kaKhristu.
Ngakho bonakalisani kubo phambi kwamabandla ubufakazi bothando lwenu nokuzincoma kwethu ngani.
Mayelana nokukhonza abangcwele, akuswelekile ukuba nginilobele,
ngokuba ngiyayazi intshisekelo yenu engihlala nginitusa ngayo kwabaseMakhedoniya, ukuthi abase-Akhaya bazilungiselele kusukela nyakenye ukunikela, nokuthi ugqozi lwenu lugqugquzele abaningi.
Kepha ngithume abazalwane ukuba ukuzincoma kwethu ngani kungaphenduki kube yize maqondana nalokhu, ukuze, njengalokhu bengisho, nibe senizilungisele,
funa uma sengifika nabaseMakhedoniya banifumane ningazilungiselele, bese siyaphoxeka singasakwazi ukunitusa ngalo msebenzi.
Ngakho ngikubona kudingeka ukuba ngibagqugquzele abazalwane ukuba bahambe beze kini kuqala, ukuze balungisele kuqala lesi sipho nesibusisekile kangaka esethenjiswa sona phambilini, ukuze sihlale silungisiwe, sibe yisibusiso, singabi njengesokuncishana.
Kepha nakhu: ohlwanyela ingcosana uyakuvuna ingcosana, nohlwanyela kakhulu uyakuvuna kakhulu.
Ngakho-ke yilowo nalowo makanikele njengalokhu enqumile enhliziyweni, kungabi ngokudabuka noma ngokucindezelwa, ngokuba uNkulunkulu uyamthanda onikela ethokoza.
UNkulunkulu unamandla okuninika umusa wonke uchichime, ukuze nithi ninokwaneleyo ngezikhathi zonke, nichichime emisebenzini yonke emihle.
Njengokuba kulotshiwe ukuthi: “Uyahlaphaza, aphe abampofu, ukulunga kwakhe kuhlala kuze kube phakade.”
Kepha lowo onika ohlwanyelayo inhlwanyelo nesinkwa sokudliwa, uyakuninika ngokuphindiwe inhlwanyelo yenu, aphinde andise isivuno sokulunga kwenu,
ukuze nithi nicetshisiwe kokuningi nibe ngabaphanayo, okuyakuveza ngathi ukubonga uNkulunkulu.
Ngokuba ukukhonza ngale nkonzo, akuqedi nje ukweswela kwabangcwele, kodwa kwenza ukuba kuvame ukubonga uNkulunkulu kwabaningi.
Ngokuvivinyeka kwale nkonzo, abantu badumisa uNkulunkulu ngenxa yokulalela, nangokuvuma kwenu ivangeli likaKhristu, nangenxa yokuphana kubo, nakubo bonke abanye,
benilangazelela; bayanikhulekela ngenxa yomusa kaNkulunkulu okini omkhulu kakhulu.
Makabongwe uNkulunkulu ngenxa yesipho sakhe esingachazekiyo.
Mina Pawula uqobo, ngiyanincenga ngobumnene nangobubele bukaKhristu. Mina engithobile uma ngiphambi kwenu, kodwa uma ngingekho phambi kwenu nginesibindi.
Ngiyacela manje ukuba uma nginani kungadingeki ukuba ngibonise isibindi ngokubaqonda ngqo labo abathi sihamba ngokwenyama.
Nakuba siphila sisenyameni, kasilwi ngokwenyama,
ngokuba izikhali esilwa ngazo akusizo ezenyama, kodwa ngoNkulunkulu zinamandla okubhidliza izinqaba, zichithe imidlinzo emibi,
nakho konke okujulileyo okuziphakamisayo ukuze kumelane nokumazi uNkulunkulu, kepha sithumba yonke imicabango ukuze ilalele uKhristu.
Sihlala sikulungele ukujezisa konke ukungalaleli lapho ukulalela kwenu sekuphelele.
Ake nibheke nje lokhu okuphambi kwenu. Uma umuntu ezazi kahle ukuthi ungokaKhristu, makakuqonde lokhu ngokwakhe ukuthi njengokuba yena engokaKhristu, nathi sinjalo.
Nakuba ngingaze ngizincome ngokwedlulele ngegunya lethu eyasipha lona iNkosi lokwakha kungabi ngukubhidliza, angiyukuba namahloni ngalo.
Angifuni ukuba ngibonakale sengathi ngiyanethusa ngezincwadi enginibhalela zona.
Bathi izincwadi zakhe zinzima futhi zinamandla, kodwa uma esekhona ngokomzimba ubuthakathaka, futhi ukukhuluma kwakhe kudelelekile.
Onjalo makaqonde ukuthi esiyikho ngamazwi ezincwadini ngesikhathi singekho, siyakuba yikho futhi ngezenzo uma sesikhona.
Ngokuba asithandi neze ukuzilinganisa nokuzifanisa nabathile balabo abazincomayo. Kepha lapho bezilinganisa nabanye phakathi kwabo, bazifanisa nabanye ngendlela engenangqondo.
Kepha thina asinakuzibonga ngaphezu kwalokho esifanele ukuzilinganisa ngakho, kodwa kuyakuba ngesilinganiso salokhu uNkulunkulu asimisele khona, ukuze sikwazi ukufinyelela nakini.
Ngokuba asizincomi ngokungaphezu kokufanele ngokungathi asizange sifinyelele kini, saba ngabokuqala ukufinyelela kini nevangeli likaKhristu.
Asizibongi ngokwedlulele ngemisebenzi yabanye, kodwa ithemba lethu ngelokuthi ngesikhathi ukholo lwenu lukhula, nendawo yethu phakathi kwenu iyakwandiswa kakhulu,
ukuze silishumayele ivangeli nasezindaweni eziphambi kweyakini, singazincomi ngezinto ezenziwe endaweni yomunye.
Kepha ozincomayo, makazincome eNkosini.
Ngokuba akusiye lowo ozincomayo okufanele amukelwe, kodwa yilowo iNkosi emncomayo.
Sengathi ningangibekezelela kulobu buwulana bami, yebo, ngibekezeleleni.
Ngokuba nginomona ngani, umona kaNkulunkulu, lokhu nganendisela endodeni eyodwa ukuze nginiyise kuKhristu niyintombi emsulwa.
Kepha nginovalo ukuthi njengalokho inyoka yamkhohlisa u-Eva ngobuqili bayo, kanjalo izingqondo zenu mhlawumbe zedukiswe, ziyeke ubuqotho nobumhlophe kuKhristu.
Uma kufika umuntu eshumayela omunye uJesu esingakaze sinishumayeze Yena, noma namukela omunye umoya eningawemukeliswanga, noma elinye ivangeli elehlukile eningalemukeliswanga, niyashesha ukukubekezelela lokho.
Ngokuba ngicabanga ukuthi angehluke ngalutho kulabo baphostoli abaziwa kakhulu.
Noma ngakolunye uhlangothi ngiyibhimbi lokukhuluma, nokho angisilo ngolwazi; lokho sikubonakalisa kinina ngezindlela zonke nasezintweni zonke.
Kumbe ngonile yini ngokuzithoba, ukuze nina niphakanyiswe, kwazise ivangeli likaNkulunkulu nganishumayeza lona ngesihle na?
Ngawaphanga amanye amabandla ngokuthatha umholo kuwo, ukuze ngikhonze nina.
Nalapho nginani ngeswele, angibanga mthwalo kumuntu, ngokuba abazalwane abavela eMakhedoniya bakuqeda ukweswela kwami. Ezintweni zonke ngaqinisela ukuba ngingabi ngumthwalo kini, namanje ngisazokuzilinda.
Njengokuba iqiniso likaKhristu likimi, ukuzincoma kwami anginakuphucwa khona ezifundeni e-Akhaya.
Ngani na? Ngenxa yokuba nginganithandi na? UNkulunkulu uyazi.
Kepha engikwenzayo ngizoqhubeka ngikwenze, ukuze ngibancishe ithuba labo abafuna ithuba lokuba babonakale kungathi bayalingana nathi ngalokho abazincoma ngakho.
Ngokuba abanjalo bangabaphostoli bamanga, izisebenzi zenkohlakalo, eziziguqula zizenze abaphostoli bakaKhristu.
Nokho akumangalisi, ngokuba noSathane waziguqula wazenza ingelosi yokukhanya.
Ngakho-ke akuyona into enkulu uma nezikhonzi zakhe ziziguqula izikhonzi zokulunga, kodwa ukuphela kwazo kuyakuba njengokwemisebenzi yazo.
Ngiyaphinda ngithi: makungabi bikho muntu ocabanga ukuthi ngiyisiwula, noma ngabe nicabanga kanjalo, kepha ngamukeleni njengesiwula, ukuze nami ngizincome kancane.
Engikushoyo maqondana nalokhu kuzincoma, angikusho ngegunya elivela eNkosini, kodwa njengesiwula.
Ngenxa yokuba baningi abazincomayo ngokwenyama, nami-ke ngiyazincoma.
Nina niyazibekezelela ngenjabulo iziwula, nibe nihlakaniphile nina,
ngokuba niyakubekezela uma umuntu enenza izigqila, enichutha, enibamba, ezikhukhumeza, nalapho enimukula ebusweni.
Nginamahloni ukuba ngisho lokhu, ngokuba kade sibuthakathaka, kodwa manje umuntu anesibindi ngakho – ngikhuluma ngobuwula, nami nginesibindi ngakho.
BangamaHebheru yini na? Nami nginguye. Bangaba-Israyeli na? Nami nginguye. Bangabolibo luka-Abhrahama na? Nami ngiyilo.
Bayizikhonzi zikaKhristu na? Ngikhulumisa okohlanya, ngokuba mina ngiyisikhonzi ukwedlula bona. Ngasebenza ngokuzikhandla okukhulu kunabo, ngaboshwa izikhawu eziningi kunabo, ngashaywa kaningi impela, ngaba phakathi kokufa kaningi.
KubaJuda, ngabhaxatshulwa imivimbo engama-40, amahlandla ayisihlanu, kusala kuphela owodwa ema-40.
Ngashaywa ngezinduku izikhathi ezintathu, ngakhandwa kanye ngamatshe, izikhathi ezintathu ngalinyalelwa ngumkhumbi, ngaba semanzini olwandle ubusuku bunye nemini.
Ngangisendleleni njalo, ngisengozini emifuleni, kubaphangi, kubantu bakithi, kwabezizwe, ngisengozini emzini, ngisengosini ehlane, olwandle, ngisengozini nakubazalwane bamanga.
Ngokusebenza nangokukhandleka, ngiqwashile kaningi ebusuku, ngokulamba, ngokoma, ngokuzila ukudla izikhathi eziningi, ngokuququdwa ngamakhaza, nangokuhamba ze.
Ngaphandle kwalokhu, ngihlale ngiphansi kokucindezelwa imihla yonke ngenxa yokukhathazeka kwami ngamabandla wonke.
Ngubani obuthakathaka, nami ngingabi buthakathaka na? Ngubani okhubekiswayo, ngingamzweli ubuhlungu na?
Uma kufanele ngizincome, ngiyakuzincoma ngobuthakathaka bami.
UNkulunkulu uYise weNkosi uJesu, obongekayo phakade naphakade, uyazi ukuthi angiqambi manga ngalokho.
NgiseDamaseku induna yenkosi u-Aretha yawuqapha umuzi wabaseDamaseku ukuze ingibambe;
ngehliswa ngefasitela ogangeni ngifakwe esilulwini, ngaphunyuka kanjalo ezandleni zayo.
Kumele ukuba ngizigabise noma kungasizi ngalutho lokho, kodwa sengizakukhuluma ngemibono nezambulo zeNkosi.
Ngiyamazi umuntu owayekuKhristu, okwathi eminyakeni eli-14 eyedlulile, noma wayesemzimbeni, angazi, noma wayengaphandle komzimba, angazi; nguNkulunkulu owaziyo; lo muntu wahlwithwa, wenyuselwa ezulwini lesithathu.
Yebo, ngiyamazi umuntu onjalo, noma wayesemzimbeni, noma wayengaphandle kwawo, angazi; nguNkulunkulu owaziyo;
ngiyazi ukuthi wahlwithwa, wayiswa ePharadisi, wezwa amazwi angakhulumeki; okungavunyelwe ukuba umuntu awakhulume.
Ngizakuzigabisa ngomuntu onjalo, kodwa mina luqobo angizukuzigabisa ngalutho, ngaphandle kobuthakathaka bami.
Ngokuba uma ngifuna ukuzigabisa, bengingezukuba yisiwula, ngokuba bengizobe ngikhuluma iqiniso. Kepha ngiyayeka, funa umuntu acabange ngami ngokungaphezu kwalokho angibona ngiyikhona nakuzwa ngami,
ikakhulu uma umuntu ezwa ngemibono yami exakileyo. Ngakho-ke ukuze ngingaziphakamisi kakhulu, nganikwa iva emzimbeni, ukuba ingelosi kaSathane ingimukule, funa ngiziphakamise kakhulu.
Mayelana nalokhu, ngayinxusa iNkosi, amahlandla amathathu, ukuba ilisuse kimi.
Kodwa yathi kimi: “Umusa wami ukwanele, ngokuba amandla ami ayapheleliswa ebuthakathakeni.” Ngakho-ke kunalokho ngiyakujabulela ukuzigabisa ngobuthakathaka bami, ukuze amandla kaKhristu ahlale phezu kwami.
Ngalokho ngiyathokoza ebuthakathakeni bami, ekwedelelweni, ebunzimeni, ekuhlushweni, nasebunzimeni bonke ngenxa kaKhristu, ngokuba uma ngibuthakathaka, kulapho-ke nginamandla khona.
Sengize ngaba yisiwula; nina ningiphoqile. Ngokuba mina kufanele ngabe nginconywa yinina. Angisilele ngalutho kubaphostoli abaqavile kakhulu, noma ngingento yalutho.
Impela izibonakaliso zobuphostoli zenziwe kini ngokubekezela konke, ngezibonakaliso, ngezimangaliso, nangemisebenzi yamandla.
Ngokuba yikuphi eningenzelwanga khona kunamanye amabandla, uma kungeyisikho ukuthi mina angibanga mthwalo kini na? Ngithetheleleni-ke lelo cala.
Sekungokwesithathu manje ngikulungele ukuza kini; angiyukuba mthwalo kini, ngokuba angifune zinto zenu, kodwa ngifuna nina. Ngokuba akusibona abantwana okufanele baqongelelele abazali, kodwa ngabazali abaqongelelela abantwana.
Kepha ngizakunikela ngokujabula okukhulu, nginikele ngakho konke, nangami uqobo, ngenxa yemiphefumulo yenu. Pho uma nginithanda kakhulu ngabe kufanele mina ngithandwe kancane yini na?
Kepha makube ngukuthi angibanga mthwalo kini, kodwa nibalisa ngokuthi ngaba yiqili, nganilutha ngobuqili.
Ngake nganiqola yini ngomunye walabo engabathumela kini na?
Ngamnxusa uThithu, ngathumela kanye naye umzalwane. UThithu wake waniqola yini na? Asihambanga ngamoya munye, nangendlela efanayo yini na?
Ngabe sonke lesi sikhathi nicabanga ukuthi sizama ukuzivikela yini kini? Sikhuluma sikuKhristu naphambi kukaNkulunkulu. Konke esikwenzayo, bazalwane, kungokokwakha nina.
Ngokuba nginovalo lokuthi lapho ngifika kini, mhlawumbe ngizakunifumana ningenjengalokho engikulindele, nami ningifumane nginjengalokho eningakulindele. Nginovalo, hleze kube khona ukuphikisana, umona, ukuthukuthela, imibango, ukuhleba, ukuzikhukhumeza nezinxushunxushu,
funa kuthi ekufikeni kwami futhi, uNkulunkulu wami angithobise phambi kwenu, ngililele abaningi abebekade bonile, bengaphendukanga kulokho abakwenzileyo, ekungcoleni, ebufebeni, nasemanyaleni.
Lokhu sekungokwesithathu ngiza kini. “Noma yiliphi izwi malifakazelwe ngomlomo wofakazi ababili noma abathathu, bese liyaqiniswa.”
Bengishilo ngaphambilini ngesikhathi ngifikile okwesibili, namanje njengalokhu ngingekho, kulabo abekade bonile nakubo bonke abanye, ukuthi nxa ngifika futhi, angiyukuba nasihawu.
Lokhu nifuna ubufakazi bokuthi nguKhristu yini okhuluma kimi, Yena akabuthakathaka ukubhekana nani, kodwa unamandla kini.
Ngokuba wabethelwa esiphambanweni ngobuthakathaka, kodwa uyaphila ngamandla kaNkulunkulu. Ngokuba nathi sibuthakathaka kuye, kepha lapho sibhekene nani, sizakuphila kanye naye ngamandla kaNkulunkulu.
Zihloleni nina, nibone ukuthi nisekukholweni yini, zivivinyeni nina. Noma anazi yini ukuthi uJesu uKhristu ukini na? Uma kungenjalo, ningabokwaliwa.
Kepha ngethemba ukuthi niyazi ukuthi thina asiyibo abokwaliwa.
Siyakhuleka kuNkulunkulu ukuba ningenzi lutho olubi, hhayi ukuba thina sibonakale sinempumelelo, kepha ukuba nina nenze okuhle, noma thina singaba njengabahlulekile.
Ngokuba asinamandla okwenza lutho olumelene neqiniso, kuphela ukuba simele iqiniso.
Ngokuba siyajabula lapho sibuthakathaka, nina ninamandla, yilokhu esikukhulekelayo, ukuba nipheleliswe.
Ngalokho, ngiloba lezi zinto ngingekho, ukuze kuthi uma sengifikile nginganiphathi ngesandla esiqinileyo, ngokwegunya iNkosi eyanginika lona, lokuba ngakhe, ngingabhidlizi.
Elokugcina bazalwane, thokozani, nihlumeleleke, nigqugquzeleke, nibe namqondo munye, futhi nibe nokuthula; khona uNkulunkulu wothando nokuthula uyakuba nani.
Bingelelanani ngokwangana okungcwele.
Bonke abangcwele bayakhonza kini.
Umusa weNkosi uJesu uKhristu, nothando lukaNkulunkulu, nokuhlangana kukaMoya oNgcwele makube nani nonke. Amen.
UPawula, umphostoli ongaveli kubantu noma ngomuntu, kodwa ngoJesu Khristu noNkulunkulu uYise, Yena owavusa uJesu kwabafileyo,
nabazalwane bonke abanami kuwo wonke amabandla aseGalathiya:
makube kini umusa nokuthula okuvela kuNkulunkulu uBaba wethu naseNkosini uJesu Khristu,
owazinikela ngenxa yezono zethu ukuze asisindise kulesi sikhathi samanje esibi ngokwentando kaNkulunkulu uBaba wethu.
Makube udumo kuye kuze kube phakade naphakade. Amen.
Ngiyamangala ukuthi senimhlubuke ngokushesha okungaka owanibiza ngomusa kaKhristu, nina-ke seniya kwelinye ivangeli.
Kungeyikho ukuthi ngelinye nje, kodwa kukhona abanididayo, beqonde ukuhlanekezela ivangeli likaKhristu.
Kepha noma ngabe yithi noma ingelosi evela ezulwini enishumayeza ivangeli ngaphandle kwalelo esanishumayeza lona, lowo makaqalekiswe.
Njengalokho sasho phambilini, sisasho namanje ukuthi uma kukhona onishumayeza ivangeli ngaphandle kwalelo enalemukelayo, lowo makaqalekiswe.
Ngabe manje ngizama ukuzincengela kubantu noma kuNkulunkulu na? Ngabe ngizama ukuthokozisa abantu na? Uma ngisazama ukuthokozisa abantu, ngabe angisiyo inceku kaKhristu.
Ngokuba ngiyanazisa, bazalwane, ukuthi ivangeli elishunyayelwe yimi akusilo elivela kubantu.
Nami angilemukeliswanga ngumuntu, futhi angilifundiswanga, kodwa ngalemukela ngokwambulelwa nguJesu Khristu.
Phela nizwile ngenkambo yami yakuqala ebuJudeni, ukuthi ngalihlupha kakhulu kangakanani ibandla likaNkulunkulu, ngilichitha.
Ngangilishoshozela ebuJudeni, elidlula abaningi kontanga nasesizweni sakithi, ngiwashisekela kakhulu kunabo amasiko okhokho bami.
Kepha ngomhla okwaba kuhle ngawo kuNkulunkulu owangehlukanisela ngisesesibelethweni sikamame, wangibiza ngomusa wakhe,
ukuba iNdodana yakhe ayambule kimi, ukuze ngishumayele ivangeli lakhe kwabezizwe, angizange ngibuze muntu ngaleso sikhathi.
Angenyukelanga ngisho naseJerusalema kubaphostoli ababephambi kwami, kodwa ngaya e-Arabhiya ngase ngibuyela eDamaseku.
Kwathi emva kweminyaka emithathu, ngakhuphukela eJerusalema ukuze ngiyobonana noKhefase futhi ngazane naye. Ngahlala naye izinsuku ezili-15.
Angibabonanga abanye abaphostoli ngaphandle kukaJakobe umnewabo weNkosi.
Manje-ke, izinto enginilobela zona, phambi kukaNkulunkulu, azisiwona amanga.
Emveni kwalokho, ngaya ezifundeni eSiriya naseKhilikhiya.
Kepha mina siqu ngangingaziwa ngamabandla aseJudiya akuKhristu,
kuphela nje ayezwa ukuthi: “Lowo owayesizingela, manje useshumayela ivangeli lokukholwa ayekade elichitha.”
Ayesemdumisa uNkulunkulu ngami.
Kwathi emva kweminyaka eli-14, ngabuye ngakhuphukela eJerusalema, ngihamba noBharnabha noThithu.
Ngakhuphuka ngenxa yesambulo, ngabalandisa ivangeli engilishumayelayo phakathi kwabezizwe. Kepha lokho ngakukhuluma sesisodwa nalabo abadumileyo, funa mhlawumbe ngigijimele ize, noma sengaligijimela.
Kepha ngisho uThithu esasihamba naye engumGriki, akaphoqwanga ukuba asoke.
Kukhona abazalwane mbumbulu abangena isinyenyela bezokuba yizinhloli zenkululeko esinayo kuKhristu uJesu, ukuze basenze izigqila.
Kepha ukuze nilondelwe iqiniso levangeli ukuba liqhubeke ngani, asizange sihlehle ngisho nakancane nje ukuba sibathobele.
Kodwa kulabo abacabanga ukuthi bawutho, nokuthi babe yini, kwakungelutho lokho kimi, ngokuba uNkulunkulu akakhethi buso bamuntu, ngokuba kimi labo abazibona beqavile, abanezelelanga lutho.
Kepha kunalokho, sebebonile ukuthi nginikezwe ukushumayela ivangeli kwabangasokile njengokuba uPhethro enikezwe ukwenza kanjalo kwabasokayo.
Ngokuba Yena owanika uPhethro ukuba abe ngumphostoli kwabasokileyo, uyasebenza nakimi kwabezizwe.
Lapho bebona umusa engiwuphiweyo, uJakobe, noKhefase, noJohane: labo ababaziwa ngokuthi bayizinsika, banginika mina noBharnabha isandla sokunene sobudlelwano, ukuba thina sisebenze kwabezizwe, kodwa bona basebenze kwabasokileyo,
Kuphela sikhumbule abampofu, okuyiyona nto nami ebengilangezelela ukuyenza.
Kepha lapho uKhefase efika e-Antiyokhe, ngamelana naye ubuso nobuso, lokhu wayenecala.
Ngokuba bengakafiki abanye ababevela kuJakobe, wayedla nabezizwe, kodwa lapho sebefikile, wamonyuka, wazehlukanisa nabo, ngokuba esaba abokusoka.
Nabanye abaJuda bazenzisa njengaye, noBharnabha waze wathatheka ngokuzenzisa kwabo.
Kepha lapho ngikubona lokhu ukuthi abahambi ngokufanele iqiniso levangeli, ngathi kuKhefase phambi kwabo bonke: “Uma wena ungumJuda uziphatha njengowezizwe, hhayi njengokwabaJuda, pho baphoqelwani abezizwe ukuba baphile njengabaJuda na?
“Thina esingabaJuda ngokwemvelo, singesizo izoni zabezizwe;
sazi ukuthi umuntu akalungisiswa ngemisebenzi yomthetho, kodwa ngokukholwa kuphela kuJesu Khristu, nathi sikholwa kuJesu Khristu ukuba silungisiswe ngokukholwa kuKhristu, hhayi ngemisebenzi yomthetho, ngokuba ngemisebenzi yomthetho, akukho muntu oyakulungisiswa.
“Kepha manje, uma nathi sifuna ukulungisisiswa ngoKhristu, safunyanwa nathi siyizoni, ngabe uKhristu uyisikhonzi sesono na? Akunjalo neze.
Ngokuba uma ngivuselela lokho engangikubhidlizile, ngiyafakaza ukuthi ngiyisephulamthetho.
Ngokuba mina ngafa kuwo umthetho, ukuze ngiphile noNkulunkulu ngibethelwe noKhristu.
Ngiyaphila, kodwa akuseyimi ophilayo, kepha uKhristu ophila kimi, ngakho-ke ukuphila engikuphilayo manje enyameni, ngikuphila ngokukholwa yiNdodana kaNkulunkulu eyangithanda, yazinikela ngenxa yami.
Angiwushayi indiva umusa kaNkulunkulu, ngokuba uma ukulunga kuya ngomthetho, lokho kusho ukuthi uKhristu wafela ize.”
Maye ziwula zamaGalathiya! Niluthwe ngubani nina enachazelwa ngoJesu Khristu ebethelwe esiphambanweni, kwaba sengathi nimbona ngamehlo na?
Ngifuna ukwazi lokhu kuphela kini, ukuthi namamukela uMoya ngemisebenzi yomthetho noma ngokuzwa izwi lokukholwa na?
Nilutheke kangako yini ukuba nithi niqale kuMoya, kodwa senigcina ngemisebenzi yenyama na?
Nahlushwa ngazo zonke lezi zinto ngeze na? Phela lokho impela kungabe kwakuyize.
Ngabe oninika uMoya aveze imisebenzi yamandla phakathi kwenu ukwenza lokho ngenxa yemisebenzi yomthetho noma ngokuzwa izwi lokukholwa na?
Njengalokho u-Abhrahama akholwa nguNkulunkulu, kwabalelwa kuye ukuthi kungukulunga,
yazini lokhu ukuthi abokukholwa yibo abalulibo luka-Abhrahama.
Umbhalo wakubona ngaphambi kwalokho ukuthi uNkulunkulu uyakuzilungisisa izizwe ngokukholwa, ngakho-ke ivangeli lashunyayelwa phambilini ku-Abhrahama, ukuthi: “Zonke izizwe ziyakubusiswa kuwe.”
Ngalokho-ke abokukholwa babusisiwe kanye no-Abhrahama owayekholwa.
Ngokuba bonke abayeme emisebenzini yomthetho, baphansi kwesiqalekiso, ngokuba kulotshiwe ukuthi: “Baqalekisiwe bonke abangabambeleli, bakwenze konke njalo okulotshwe encwadini yomthetho.”
Kusobala manje ukuthi akekho umuntu olungisiswa ngomthetho phambi kukaNkulunkulu, ngokuba olungileyo uzakuphila ngokukholwa.
Kepha umthetho awusiwo owokukholwa, kodwa lowo owenza zonke lezi zinto uyakuphila ngazo.
UKhristu wasihlenga esiqalekisweni somthetho ngokwenziwa abe yisiqalekiso ngenxa yethu, ngokuba kulotshiwe ukuthi: “Baqalekisiwe bonke abalengiswa emthini,”
ukuba isibusiso sika-Abhrahama ngoJesu Khristu sifinyelele kwabezizwe, ukuze samukeliswe isithembiso sikaMoya ngokukholwa.
Bazalwane, ngikhulumisa okwabantu, ukuthi akukho muntu ongesula noma anezele esivumelwaneni esenziwe saqiniswa ngumuntu.
Manje-ke izithembiso zanikwa u-Abhrahama nolibo lwakhe; akasho ukuthi: “Olibeni,” eqonde abaningi, kodwa eqondise koyedwa, nasolibeni lwakho, olunguKhristu.
Yilokhu engikushoyo ukuthi isivumelwano esaqiniswa phambilini nguNkulunkulu, akukho mthetho obekwe emva kweminyaka engama-430 ongasesula noma usiqede, sona kanye nesithembiso.
Ngokuba uma ifa lizuzwa ngomthetho, akusayi ngesithembiso, kodwa uNkulunkulu umnikile u-Abhrahama lona ngesethembiso.
Pho kwakuhlosweni ngomthetho na? Umthetho wanikezwa ngenxa yeziphambeko kuze kufike ulibo olwanikwa isithembiso, owamiswa ngezingelosi nangesandla somlamuleli.
Umlamuleli ubalulekile uma kukhona izinhla ezimbili; kasiye owoyedwa, kepha uNkulunkulu munye.
Ngabe pho umthetho umelene yini nezithembiso zikaNkulunkulu na? Phinde neze! Uma umthetho owanikezwa wawunamandla okunikeza ukuphila, ngabe salungisiswa ngawo umthetho.
Kepha umbhalo ukuvalela konke phansi kwesono, ukuze isithembiso ngokukholwa kuJesu Khristu samukeliswe labo abakholwayo.
Kodwa ngaphambi kokuba kufike ukukholwa, sasivalelwe phansi komthetho, sasiqashelwe yiwo kwaze kwembulwa ukukholwa.
Ngakho umthetho wawungumqaphi wethu osiyisa kuKhristu, ukuze silungisiswe ngokukholwa.
Lokhu ukukholwa sekwafika, asisekho phansi komthetho.
Ngokuba nonke ningabantwana bakaNkulunkulu ngokukholwa kuJesu Khristu.
Ngokuba nonke enabhabhadiselwa kuKhristu, nembatha uKhristu.
Akusekho mJuda namGriki, oboshiweyo nokhululekileyo; akusekho owesilisa nowesifazane, ngokuba nonke nimunye kuKhristu uJesu.
Kepha uma ningabakaKhristu, seningabolibo luka-Abhrahama, niyizindlalifa ngokwesithembiso.
Manje ngithi, ngesikhathi indlalifa iseyingane, ayehlukile neze esigqileni nanxa iyinkosi yakho konke.
Iphansi komqaphi nomphathi, kuze kufike isikhathi esamiswa nguyise phambilini.
Nathi ngokunjalo, siseyizingane, sasiyizigqila phansi kwezimfundiso zomhlaba.
Kepha lapho sesifikile isikhathi esimisiweyo, uNkulunkulu wathumela iNdodana yakhe, eyazalwa ngowesifazane, izelwe phansi komthetho,
ukuze ikhulule labo abaphansi komthetho, samukele ukuba ngamadodana.
Lokhu ningamadodana, uNkulunkulu uthumele uMoya weNdodana yakhe ezinhliziyweni zethu, omemeza ethi: “Abba, Baba!”
Ngakho-ke awusesona isigqila, kodwa indodana; kepha uma uyindodana, uyindlalifa ngaye uNkulunkulu.
Ngesikhathi ningakamazi uNkulunkulu, naniyizigqila zonkulunkulu mbumbulu.
Lokhu manje seniyamazi uNkulunkulu noma seniyaziwa nguNkulunkulu, kungani pho seniphindela ezintweni ezingelutho, senifuna futhi ukuba yizigqila zazo na?
Senigcina izinsuku, izinyanga nezikhathi, neminyaka.
Nginovalo ngani, funa ngikhandlekele ize ngenxa yenu.
Ngifuzeni, ngokuba nami nginjengani, ngiyanincenga bazalwane. Aningonanga ngalutho.
Niyazi ukuthi ngenxa yokuba buthaka enyameni, ngashumayela ivangeli kini okokuqala,
nanxa ubuthaka bami babuyijoka kini, kodwa anizange ningicunukele noma ningenyanye. Nangamukela ngokungathi ngiyingelosi kaNkulunkulu, kwangathi nginguKhristu uqobo.
Pho selushonephi loluya gqozi enaninalo na? Ngiyaqinisa ukuthi naningawakhipha amehlo enu niwanike mina uma kwakunokwenzeka.
Ngabe sengiphenduke isitha senu ngokunitshela iqiniso na?
Bakhombisa intshisekelo ngani engenabuhle, bafuna ukunahlukanisa nami ukuze nihungeke nilandele bona.
Kepha kuhle ukuba nentshisekelo ngokuhle, kodwa makungabi nxa ngikhona kini kuphela.
Bantwana bami, enginezinseka ngani, uKhristu aze abunjwe kini;
ngifisa sengathi ngabe nginani manje, ukuze lishintshe iphimbo lokukhuluma kwami, ngenxa yokuba ngikhathazekile kakhulu ngani.
Ngitsheleni nina enifuna ukuba phansi komthetho, aniwuzwa yini umthetho na?
Ngokuba kulotshiwe ukuthi u-Abhrahama wayenamadodana amabili, enye kungeyesigqilakazi enye kungeyokhululekileyo.
Kepha eyesigqilakazi yayizelwe ngokwenyama, kodwa eyokhululekileyo izelwe ngokwesithembiso.
Lokhu kungukufanekisa nje, ngokuba laba bayizivumelwano ezimbili. Esinye ngesasentabeni iSinayi esiletha ubugqila, esinguHagari.
UHagari manje uyintaba iSinayi ese-Arabhiya, efanayo neJerusalema manje, ngokuba lisebugqileni nabantwana balo.
Kepha iJerusalema eliphezulu likhululekile, lingumama wethu.
Ngokuba kulotshiwe ukuthi: “Thokoza wena nyumba ongazalanga, dazuluka wena ongakaze uhelelwe, ngokuba abantwana boyisikhwebu baningi kunabantwana bonendoda.”
Kepha nina bazalwane, ningabantwana besithembiso, njengo-Isaka.
Njengalokhu owayezelwe ngokwenyama wamhlupha owayezelwe ngokukaMoya, kusenjalo namanje.
Kepha uthini umbhalo na? Uthi: “Xosha isigqilakazi nendodana yaso, indodana yesigqilakazi ayinakulidla ifa kanye nendodana yokhululekileyo.”
Ngakho-ke bazalwane, asisibo abantwana besigqilakazi, kodwa singabantwana bokhululekileyo.
UKhristu wasikhulula ukuze sibe ngabakhululekileyo. Ngakho-ke yimani niqine, ningabe nisaboshelwa ejokeni lobugqila.
Mina Pawula ngithi kini: uma nisoka, uKhristu akanalusizo lwalutho kini.
Ngiyaphinda ngiyafakaza kubantu bonke ukuthi osokayo uphoqelekile ukuba awufeze wonke umthetho.
Nahlukene noKhristu nina nonke enifuna ukulungisiswa ngomthetho; niwile emseni.
Ngokuba thina, ngaye uMoya, silindele ithemba lokulungisiswa ngokukholwa.
KuKhristu ukusoka nokungasoki akusho lutho, kodwa ukukholwa okuvezwa wuthando.
Benigijima kahle, pho ngubani onithiyile ukuba ningalilandeni iqiniso na?
Lokhu kuhehwa akuveli kulowo owanibizayo.
Imvubelo encane iyikhukhumalisa yonke inhlama.
Nginethemba ngani eNkosini ukuthi aniyukucabanga ngenye indlela. Kepha noma ngabe ngubani lowo onikhathazayo, uyakuthwala ukwehlulelwa.
Kepha mina, bazalwane, uma ngisashumayela ukusoka, pho ngizingelelwani na? Ukuba bekunjalo ngabe sisusiwe isikhubekiso sesiphambano.
Sengathi bangazithena bona labo abanihluphayo.
Ngokuba nina bazalwane nabizelwa enkululekweni, ningayisebenzisi-ke inkululeko njengezaba zokwenza imisebenzi yenyama, kodwa khonzanani ngothando.
Ngokuba umthetho wonke uqoqwe ezwini linye lokuthi: “Wothanda umakhelwane wakho njengalokhu uzithanda wena.”
Kepha uma nilumana, ninephulana nodwa, qaphelani, funa niqedane.
Kepha ngithi: hambani ngoMoya, khona aniyukuzifeza izinkanuko zemvelo yenu eyonakeleyo.
Ngokuba imvelo eyonakeleyo ikhanuka okuphambene noMoya, noMoya okuphambene nemvelo eyonakeleyo. Lezi zinto ziyamelana, ukuze ningakwenzi lokho enikufisayo.
Kepha uma niholwa nguMoya, anikho neze phansi komthetho.
Imisebenzi yemvelo eyonakeleyo isobala, yilena: ubufebe, ukungcola, amanyala,
ukukhonza izithombe, ukuthakatha, ubutha, ukulwa, umona, ulaka, ubugovu, ukwehlukana, ukuba maqembuqembu,
umhawu, ukudakwa nokuxokozela, izinto ezifana nalezi engiqeda ukunitshela ngazo, njengokuba ngasho, abenza lezi zinto abanakulidla ifa loMbuso kaNkulunkulu.
Kepha izithelo zikaMoya ziluthando, ukujabula, ukuthula, ukubekezela, ububele, ukulunga, ukukholwa,
ubumnene, nokuzithiba. Akukho mthetho ongamelana nalezi zinto.
Kepha abakaKhristu bayibethele imvelo eyonakeleyo nokuhuheka nezinkanuko zayo.
Uma siphila ngoMoya, masenze futhi okuhambisana noMoya.
Masingaziqhenyi, siqalane, noma sibe nomhawu omunye ngomunye.
Bazalwane, uma umuntu ebhabheka ebubini, nina bomoya mbuyiseni lowo ngomoya wobumnene, niqaphele nani, funa nilingwe.
Thwalisanani imithwalo yenu, niwugcwalise kanjalo umthetho kaKhristu.
Ngokuba uma kukhona ozishaya utho abe engelutho, uyazikhohlisa.
Kepha makube yilowo nalowo ahlole owakhe umsebenzi, khona eyakuzincoma ngawo, angawuqhathanisi nowomunye.
Ngokuba yilowo nalowo muntu uyakuthwala umthwalo wakhe.
Kepha yena ofundiswa izwi makahlanganyele nalowo omfundisayo ezintweni zonke ezinhle.
Ningadukiswa, uNkulunkulu akabhuqwa, ngokuba lokho akuhlwanyelayo umuntu, lokho uyakukuvuna.
Ohlwanyela imisebenzi yakhe yemvelo eyonakeleyo, uyakuvuna ukubhubha kuyo imvelo eyonakeleyo; kodwa ohlwanyela kuMoya, uyakuvuna ukuphila okuphakade kuMoya.
Masingakhathali ngukwenza okuhle, ngokuba siyovuna ngesikhathi esifaneleyo, uma singadangali.
Ngakho-ke njengokuba sinethuba, masenze okuhle kubo bonke, ikakhulu kwabendlu yokukholwa.
Ake nibone nje ukuthi nginilobela amagama angakanani ngesami isandla.
Yilabo abafuna ukuzibonakalisa enyameni, abaniphoqa ukuba nisoke kuphela nje, ukuze bangazingelwa ngenxa yesiphambano sikaKhristu.
Ngokuba ngisho nabo abasokayo, kabawugcini umthetho, kodwa bafuna ukuba nisoke ukuze bazincome ngani.
Kepha mina makungabi bikho lutho olunye engizincoma ngalo, ngaphandle kwesiphambano seNkosi yethu uJesu Khristu, okungaye izwe selabethelwa kimi, nami kulo.
Ngokuba ukuthi usokile noma awusokile akusho lutho, kepha okumqoka ukuba yisidalwa esisha.
Bonke abahamba ngale ndlela makube kubo ukuthula nesihawu, yebo, nakuye u-Israyeli kaNkulunkulu.
Kusukela manje, mangingabe ngisakhathazwa muntu, ngokuba ngithwele emzimbeni wami izimpawu zikaJesu.
Umusa weNkosi yethu uJesu Khristu mawube nomoya wenu, bazalwane. Amen.
UPawula, umphostoli kaKhristu uJesu ngokwentando kaNkulunkulu, kubo abangcwele abase-Efesu nakubo abakholwa nguKhristu uJesu:
makube kini umusa nokuthula okuvela kuNkulunkulu uBaba wethu, naseNkosini uJesu Khristu.
Makabongwe uNkulunkulu uYise weNkosi yethu uJesu Khristu, osibusisile ezulwini kuKhristu ngaso sonke isibusiso sokomoya;
njengalokhu asikhetha kuye ngothando ungakasekelwa umhlaba ukuba sibe ngcwele, singabi nasici phambi kwakhe.
Wakumisa phambilini ukuba sibe ngabantwana kuye ngoJesu Khristu, njengalokhu kwaba kuhle kuye ngentando yakhe,
ukuze kudunyiswe inkazimulo yomusa wakhe asinike wona ngesihle ngothandiweyo,
esinokuhlengwa kuye ngegazi lakhe, ukuthethelelwa kweziphambeko ngokwengcebo yomusa wakhe,
asiphe wona ngokwedlulele kukho konke ukuhlakanipha nokuqonda,
esazisa imfihlakalo yentando yakhe ayimisile kuye ngokuthanda kwakhe,
azokuphelelisa ngesikhathi esifanele, ukuhlanganisa konke kuKhristu, konke okusezulwini nokusemhlabeni;
kuye futhi sabelwa ifa, njengokuba sasikumiselwe ngaphambilini ngokwecebo lalowo owenza konke ngokwentando yakhe,
ukuze thina esethembele kuKhristu ngaphambilini, sibe ludumo lwenkazimulo yakhe.
Kuye, nani senilizwile izwi leqiniso, ivangeli lokusindiswa kwenu, nakholwa nguye futhi, nabekwa uphawu ngoMoya oNgcwele wesethembiso
oyisibambiso sefa lethu, kube ngukuhlengwa kwabangabakhe, ukuze kutuswe inkazimulo yakhe.
Ngalokho nami, sengizwile ngokukholwa kwenu eNkosini uJesu nangothando kubo bonke abangcwele,
angiyeki ukubonga ngenxa yenu, nginikhumbula emikhulekweni yami,
ukuba uNkulunkulu weNkosi yethu uJesu Khristu, uYise wenkazimulo, aniphe umoya wokuhlakanipha nokwambulelwa, ukuze nimazi kangcono Yena,
esekhanyisiwe amehlo enhliziyo yenu, ukuze nikwazi lokho okuyithemba lobizo lwakhe nokuthi iyini ingcebo yenkazimulo yefa lakhe kubo abangcwele,
nokuthi makhulu kangakanani amandla akhe kithina esikholwayo, njengokusebenza kwamandla akhe amakhulu,
asebenze ngawo kuKhristu emvusa kwabafileyo, wamhlalisa ngakwesokunene sakhe emazulwini,
ngaphezu kakhulu kwakho konke ukubusa, negunya, namandla, nobukhosi, namagama wonke aphathwayo, kungekulesi sikhathi kuphela, kepha nakwesizayo.
Wakubeka konke phansi kwezinyawo zakhe, wammisa ukuba abe yinhloko phezu kwakho konke kulo ibandla,
lona elingumzimba wakhe, ukuphelela kwakhe okuphelelisa konke, kubo bonke.
Nani nanifile ngenxa yeziphambeko nezono zenu,
lezi enanikade nihamba kuzo ngokwendlela yaleli lizwe, ngokombusi wamandla omkhathi, ongumoya osebenza kubantwana bokungalaleli,
esasikade sihamba sonke phakathi kwabo ezinkanukweni zenyama yethu eyonakeleyo, senza intando yenyama eyonakeleyo neyemicabango; sasingabantwana bolaka ngokwemvelo njengabo bonke abanye.
Kepha uNkulunkulu ecebile ngesihawu, nangenxa yothando lwakhe olukhulu asithanda ngalo,
nalapho sasifile ngenxa yeziphambeko, wasiphilisa kanye noKhristu – ngomusa nisindisiwe.
Wasivusa kanye naye, wasihlalisa naye ezulwini kuKhristu uJesu,
ukuze esikhathini esizayo abonakalise kithi ingcebo emangalisayo yomusa wakhe ngobubele bakhe, kuKhristu uJesu.
Ngokuba ngomusa nisindisiwe ngokukholwa; lokhu akuveli kini, kodwa kuyisipho sikaNkulunkulu,
futhi akuyi ngemisebenzi, funa kube khona ozibongayo.
Thina singumsebenzi wakhe, sidalelwe imisebenzi emihle kuKhristu uJesu, uNkulunkulu ayilungisela phambilini ukuba sihambe ngayo.
Ngakho-ke khumbulani ukuthi nanikade ningabezizwe ngokwenyama, nibizwa ngokuthi ningabangasokile yilabo abaziwa ngokuthi basokile, okwenziwa ngezandla enyameni,
ukuthi ngaleso sikhathi naningenaye uKhristu, ningaphandle komphakathi wabakwa-Israyeli, ningabafokazi ezivumelwaneni zesithembiso, ningenathemba, futhi ningenaNkulunkulu emhlabeni.
Kepha manje kuKhristu uJesu, nina enanikade nikude, senenziwe nabaseduze ngegazi likaKhristu.
Yena ungukuthula kwethu, owenza okubili kwaba kunye, wabhidliza udonga olwehlukanisayo olungubutha enyameni yakhe.
Waqeda umthetho, imiyalo nezimiso, ukuze adale kuYena labo ababili, bahlangane babe muntu munye omusha, enze ukuthula.
Wenza ngesiphambano ukubuyisana kwababili kuNkulunkulu emzimbeni munye, wabuqeda ubutha ngaso.
Weza washumayela ivangeli lokuthula kini enanikude, yebo, ukuthula nakubo abaseduze.
Ngokuba ngaye sinokungena sobabili ngoMoya munye kuBaba.
Ngakho-ke aniseyibo abafokazi nezihambi, kodwa seniyizakhamuzi kanye nabangcwele, ningabendlu kaNkulunkulu,
nakhiwe phezu kwesisekelo sabaphostoli nabaphrofethi, uKhristu uJesu uqobo eyitshe legumbi,
okuhlanganiselwe kuye isakhiwo sonke, sikhule sibe yithempeli elingcwele eNkosini,
okukuyo nani, nakhiwe ukuba nibe yindlu kaNkulunkulu ngoMoya.
Ngenxa yalokho, mina Pawula ngiyisiboshwa sikaKhristu uJesu ngenxa yenu, nina bezizwe.
Uma impela senizwile ngohlelo lomusa kaNkulunkulu angiphe wona ngenxa yenu,
ukuthi wangambulela ngesambulo imfihlakalo, njengoba nganilobela kafushane ngaphambilini;
okuyothi uma niyifunda niqonde ukwazi kwami ngemfihlakalo kaKhristu.
Akayazisanga amadodana abantu ezizukulwaneni ezandulelayo, njengalokhu seyambuliwe manje kubaphostoli bakhe abangcwele nabaphrofethi ngoMoya,
ukuthi abezizwe bayizindlalifa kanye nathi, bamzimba munye nathi, nokuthi bangabahlanganyeli besithembiso kanye nathi kuKhristu uJesu ngevangeli;
engenziwa isikhonzi salo ngokwesipho somusa kaNkulunkulu engiwuphiwe ngokokusebenza kwamandla akhe.
Mina engimncinyane kunabo bonke abangcwele, ngaphiwa lo musa wokushumayeza abezizwe ivangeli lengcebo kaKhristu engaphenyekiyo.
Ngikhanyisele bonke abantu ukuthi luyini uhlelo lwemfihlakalo ebifihliwe kwaphakade kuNkulunkulu owadala konke,
ukuze ngebandla baziswe manje ababusi nabanamandla emazulwini ukuhlakanipha okuninginingi kukaNkulunkulu,
ngokwecebo laphakade alenzayo ngoKhristu uJesu iNkosi yethu;
okungaye sinesibindi sokungena ngethemba, ngokukholwa kuye.
Ngakho-ke ngiyaninxusa ukuba ningadangali ngezinhlupheko engikuzo ngenxa yenu, eziwudumo kini.
Ngenxa yalokho, ngiguqa ngamadolo kuYise
eyethiwe ngaye imindeni yonke ezulwini nasemhlabeni,
ukuba ngokwengcebo yenkazimulo yakhe aninike ukuba niqiniswe emandleni kumuntu wangaphakathi ngoMoya wakhe.
UKhristu ahlale ezinhliziyweni zenu ngokukholwa, ukuze nigxile, nisekelwe othandweni,
nibe namandla okuqonda kanye nabangcwele bonke okungububanzi, ubude, ukuphakama, nokujula kothando lwakhe,
nilwazi uthando lukaKhristu olwedlula ukuqonda konke, ukuze nipheleliswe ngokuphelela konke kukaNkulunkulu.
KuYena onamandla okwenza okukhulu kakhulu kunakho konke esikucelayo nesikuqondayo ngokwamandla asebenza kithi,
makube kuye udumo ebandleni nakuKhristu uJesu ezizukulwaneni zonke, phakade naphakade. Amen.
Ngakho-ke mina siboshwa eNkosini ngiyanikhuthaza ukuba nihambe ngokufanele ukubizwa enabizwa ngakho,
ngokuthobeka nobumnene, ngokubheka kade, nibekezelelane ngothando,
nishisekele ukugcina ubunye bukaMoya ngesibopho sokuthula;
munye umzimba, munye uMoya; njengalokhu nabizelwa ethembeni linye lokubizwa kwenu;
yinye iNkosi, yinye inkolo, munye umbhabhadiso,
munye uNkulunkulu, uYise wabo bonke, ophezu kwabo bonke, okubo bonke, futhi ophakathi kwabo bonke.
Kepha yilowo nalowo phakathi kwethu, uphiwe umusa ngokwesilinganiso sesipho sikaKhristu.
Ngakho kuthi: “Esenyukele phezulu wathumba ababethunjiwe, wapha abantu izipho.”
Kusho ukuthini ukuthi wenyuka, uma kungesikho ukuthi wehlela ezindaweni zomhlaba eziphansi na?
Lowo owehlayo, nguYena owenyukela phezu kwamazulu wonke, ukuze akuphelelise konke.
NguYena futhi owanika abanye ukuba babe ngabaphostoli, abanye abaphrofethi, abanye abavangeli, abanye abelusi nabafundisi,
ukuze bahlomisele abangcwele umsebenzi wokukhonza, kwakhiwe umzimba kaKhristu;
size sifinyelele sonke ebunyeni bokukholwa nasekwazini iNdodana kaNkulunkulu, ebudodeni obupheleleyo, esilinganisweni sobukhulu bokuphelela kukaKhristu,
ukuze singabe sisaba yizingane, siphonswa le nale ngamagagasi, sipheshulwa yinoma yimuphi umoya wemfundiso ngokukhohlisa kwabantu nangobuqili obunamacebo adukisayo.
Kepha sithi sibambelele eqinisweni ngothando, sikhule ngakho konke kuKhristu, oyinhloko,
okungaye umzimba wonke uhlanganisiwe, ubambene ngokwelekelelana kwamalungu onke awo, ngokusebenza okulinganiselwe yilelo nalelo lungu, ukuba kukhuliswe umzimba, ube yisakhiwo othandweni.
Ngakho-ke ngiyafakaza eNkosini, ngithi ningabe nisahamba njengalokhu kuhamba abezizwe ngobuze bengqondo yabo,
abangqondo yabo ifiphazwe ngubumnyama, bahlukaniswa nokuphila kukaNkulunkulu ngenxa yokungazi kwabo nangenxa yobulukhuni benhliziyo yabo,
okuthe bangalahlekelwa ngukuzisola, bazinikela emanyaleni amakhulu, ukuze benze ukungcola konke ngokuhuheka.
Kepha nina animfundanga uKhristu kanjalo,
uma nimzwile nafundiswa kuye, njengokuba iqiniso likuJesu,
ukuba nikhumule umuntu omdala ongowenkambo yakuqala, owonakele ngenxa yezinkanuko zenkohlakalo,
nenziwe basha emoyeni wengqondo yenu,
nokuba nembathe umuntu omusha odalwe ngokukaNkulunkulu ekulungeni nasebungcweleni beqiniso.
Ngakho-ke hlukanani namanga, nikhulume iqiniso, kube yilowo nalowo nomakhelwane wakhe, ngokuba singamalungu omunye elomunye.
Thukuthelani ningoni; ilanga malingashoni nisathukuthele.
Ningamniki uSathane indawo.
Owebayo makangabe eseba, kepha kunalokho makakhuthale asebenze okuhle ngezandla zakhe, ukuze abe notho alwabela ontulayo.
Makungaphumi emlonyeni wenu nalinye izwi elibolileyo, kodwa kube ngelilungele ukwakha njengokuba kudingeka, ukuze libaphe umusa abezwayo.
Ningamdabukisi uMoya oNgcwele kaNkulunkulu enabekwa uphawu ngaye kuze kube wusuku lokuhlengwa.
Makususwe kini bonke ubumunyu, intukuthelo, ulaka, umsindo, ukuhlambalaza, nakho konke okubi.
Maniphathane ngobumnene, nizwelane, nithethelelane, njengoba noNkulunkulu wanithethelela kuKhristu.
Ngakho-ke yibani ngabalingisa uNkulunkulu njengabantwana abathandekayo,
nihambe othandweni, njengoba uKhristu wasithanda, wazinikela ngenxa yethu, ukuba abe ngumnikelo; umhlatshelo, nephunga elimnandi kuNkulunkulu.
Kepha ubufebe, nakho konke ukungcola, noma umhobholo, makungaphathwa neze phakathi kwenu, njengoba kufanele abangcwele,
kanjalo nehlazo, nokubheda, nokulawula, okuyizinto ezingafanele; kodwa kunalokho, makube ngukubonga.
Ngokuba yazini lokhu, nikuqonde ukuthi akukho sifebe, noma ongcolileyo, noma onomhawu okungukuthi okhonza izithombe, oyoba nefa embusweni kaKhristu noNkulunkulu.
Maningakhohliswa muntu ngamazwi ayize, ngokuba ngenxa yalokho ulaka lukaNkulunkulu lwehlela phezu kwabantwana bokungalaleli.
Ngakho-ke ningabi ngabahlanganyela nabo.
Ngokuba kade ningubumnyama, kodwa manje seningukukhanya eNkosini; hambani njengabantwana bokukhanya,
ngokuba isithelo sokukhanya sisebuhleni bonke, ekulungeni naseqinisweni;
nihlolisise ukuthi kuyini okuthandekayo eNkosini.
Ningahlanganyeli emisebenzini yobumnyama engenazithelo, kodwa kunalokho niyidalule,
ngokuba lokho okwenziwa esithe kuyihlazo ngisho nokukhuluma ngakho,
kepha konke okubonakaliswa ngukukhanya kuyabonakala,
ngokuba konke okubonakalayo kungukukhanya. Ngalokho kuthiwa: “Phaphama wena oleleyo, uvuke kwabafileyo, uKhristu uzakukukhanyisa.”
Ngakho-ke bhekisisani ukuthi nihamba kanjani, ningabi njengabangahlakaniphile, kodwa njengabahlakaniphileyo,
nithengisise isikhathi, ngokuba izinsuku zimbi.
Ngakho-ke ningabi yiziwula, kodwa qondani okuyintando yeNkosi.
Ningadakwa yiwayini, ngokuba kulo kuvela ukuhuheka, kodwa nigcwaliswe ngoMoya,
niphendulane ngamahubo, ngezihlabelelo nangamaculo okomoya, nicule niyihubele iNkosi enhliziyweni yenu,
nimbonge njalo uNkulunkulu uYise ngakho konke, egameni leNkosi yethu uJesu Khristu,
nithobelane ngenxa yokumesaba uKhristu.
Abafazi mabathobele amadoda abo kube sengathi bathobela iNkosi,
ngokuba indoda iyinhloko yomfazi, njengokuba noKhristu eyinhloko yebandla, Yena engumsindisi womzimba.
Kepha njengalokhu ibandla lithobela uKhristu, kanjalo nabafazi mabathobele amadoda abo ezintweni zonke.
Madoda, thandani omkenu, njengalokhu noKhristu elithandile ibandla, wazinikela ngenxa yalo,
ukuba alingcwelise, alihlambulule ngokuligeza ngamanzi, nangezwi,
ukuze azimisele ibandla elinenkazimulo, lingenasisihla nambimbi, nanto enjalo, kodwa libe ngcwele, lingabinacala.
Kanjalo amadoda afanele ukuthanda omkawo njengemizimba yawo. Othanda umkakhe uzithanda yena.
Ngokuba akekho umuntu owake wazonda umzimba wakhe, kunalokho uyawondla, awuphathe kahle, njengalokhu noKhristu enza kulo ibandla,
ngokuba singamalungu omzimba wakhe.
Ngenxa yalokho umuntu uyakushiya uyise nonina, anamathele kumkakhe; labo ababili bayakuba nyamanye.
Le mfihlakalo inkulu, kepha ngikhuluma ngoKhristu nebandla.
Ngakho-ke nani makube yilowo nalowo athande umkakhe, njengalokhu ezithanda yena, kodwa inkosikazi mayihloniphe indoda yayo.
Bantwana, hloniphani abazali benu eNkosini, ngokuba lokho kulungile.
Hlonipha uyihlo nonyoko, okungumyalelo wokuqala onesithembiso:
ukuze kube kuhle kuwe, uhlale kade emhlabeni.
Nani boyise, ningabathukuthelisi abantwana benu, kodwa nibondle ngokuyala nangokuqondisa kweNkosi.
Zinceku, hloniphani abangamakhosi enu ngokwenyama, ngokwesaba, ngokuthuthumela nangobuqotho benhliziyo yenu, kube sengathi kukuKhristu.
Ningathengi amehlo njengabathokozisa abantu; kodwa njengezinceku zikaKhristu, yenzani intando kaNkulunkulu ngenhliziyo.
Khonzani ngenhliziyo ephelele kungathi nikhonza iNkosi, hhayi abantu,
nazi ukuthi yilowo nalowo owenza okuhle uzakwemukela okunjalo eNkosini, noma ngabe uyinceku noma ungokhululekileyo.
Nani makhosi, yenzani kanjalo ezincekwini, niyeke ukuzisongela, nazi ukuthi iNkosi yazo neyenu isezulwini, nokuthi kuyo akukho ukukhetha umuntu.
Elokugcina, qinani eNkosini nasemandleni ayo amakhulu.
Hlomani izikhali zonke zikaNkulunkulu, ukuze nibe namandla okumelana namaqhinga kaSathane.
Ngokuba asibambene negazi nenyama, kodwa sibambene nemibuso, namandla, nababusi bezwe balobu bumnyama, nabomoya bobubi emkhathini.
Ngakho hlomani izikhali zonke zikaNkulunkulu, ukuba nibe namandla okuzabalaza ngosuku olubi, nalapho senifeze konke, nime.
Ngakho-ke yimani izinkalo zenu ziboshiwe ngeqiniso, nifakile isivikelo sesifuba sokulunga,
izinyawo zigqokisiwe ukulungela ukushumayela ivangeli lokuthula;
kukho konke, nithathe isihlangu sokukholwa eniyakuba namandla okucima ngaso yonke imicibisholo yomubi evuthayo,
namukele futhi isigqoko sensindiso, nenkemba kaMoya eyizwi likaNkulunkulu,
ngokukhuleka konke nokunxusa, nikhuleka ngezikhathi zonke nikuMoya; kulokho nilinde ngesineke sonke nangokunxusela abangcwele bonke,
ninginxusele nami ukuba ngiphiwe izwi nxa ngivula umlomo wami, ngize ngiyishumayele ngesibindi imfihlakalo yevangeli;
engiyinxusa lalo eliboshwe ngamaketanga, ukuze ngikhulume ngesibindi ngalo, njengokuba kufanele ukuba ngikhulume.
Kepha ukuze nani nazi ukuthi nginjani futhi ngenzani, uThikhiku, umzalwane othandekayo nesikhonzi esikholekileyo eNkosini, uyakunazisa konke.
Ngimthumele kini ukuba nazi ukuthi sihleli kanjani, nokuba azigqugquzele izinhliziyo zenu.
Ukuthula makube kubazalwane, nothando kanye nokukholwa okuvela kuNkulunkulu uYise naseNkosini uJesu Khristu.
Umusa mawube nabo bonke abathanda iNkosi yethu uJesu Khristu ngothando olungapheliyo.
UPawula noThimothewu, izinceku zikaKhristu uJesu, kubo bonke abangcwele kuKhristu uJesu abaseFiliphi, nababheki bebandla kanye nabadiyakhoni.
Makube kini umusa nokuthula okuvela kuNkulunkulu uBaba wethu naseNkosini uJesu Khristu.
Ngiyambonga uNkulunkulu wami ngezikhathi zonke enginikhumbula ngazo.
Njalo ekuninxuseleni kwami, nginxusa ngokuthokoza,
ngenxa yokuhlanganyela kwenu evangelini, kusukela ngosuku lokuqala kuze kube manje.
Nginesibindi ngempela sokuthi owuqalile umsebenzi omuhle kini uzakuwufeza, kuze kube wusuku lukaKhristu uJesu.
Nakuba kufanele ukuba ngicabange kanjalo ngani nonke, ngokuba nisenhliziyweni yami nonke, lokhu nina nonke nihlanganyele nami emseni, ekuboshweni kwami, ekulivikeleni nasekuliqiniseni ivangeli.
UNkulunkulu ungufakazi wami ukuthi nginilangazelela kangakanani nonke ngenxa yesihe sikaJesu Khristu.
Ikakhulukazi ngikhulekela ukuba uthando lwenu lwande kakhulu, lujule ekwazini nasekuqondeni konke,
ukuba nikwazi ukukhetha okusemqoka, ukuze nibe mhlophe, futhi ningabi nasici osukwini lukaKhristu;
nigcwaliswe ngezithelo zokulunga ngaye uJesu Khristu, kube yinkazimulo nodumo kuNkulunkulu.
Bazalwane, ngithanda ukuba nazi ukuthi lokho okwangehlelayo kugcine sekuqhubekisela phambili ivangeli.
Kwaze kwabacacela bonke abasendaweni yokwahlulela nabo bonke abanye, ukuthi ukuboshwa kwami kungenxa kaKhristu.
Kanjalo-ke iningi labazalwane eNkosini laba neqholo ngokuboshwa kwami, lakulungela ukukhuluma izwi lingesabi.
Abanye kambe bashumayela uKhristu ngomhawu nangombango, kodwa abanye ngenhliziyo enhle.
Abanye bashumayela ngothando, bazi ukuthi ngimiselwe ukuvikela ivangeli.
Kepha labo abanye bashumayela uKhristu ngombango, kungengokwethembeka, bezitshela ukuthi bangangidalela uchuku ngisaboshiwe.
Pho kunani na? UKhristu uyashunyayelwa ngezindlela zonke, kungaba ngokuzenzisa noma ngokweqiniso. Kukho konke lokho mina ngiyathokoza, yebo, ngiyakuthokoza.
Ngokuba ngiyazi ukuthi imikhuleko yenu nokungisiza kwenu okukhulu ngokukaMoya kaJesu Khristu, kuzakwelekelela ekukhululweni kwami.
Ngiyalangazelela, futhi ngethemba ukuthi akukho lutho oluzongijabhisa, kodwa ngizokuba nesibindi esanele ukuze njengokuba kuhlala kwenzeka, uKhristu enziwe mkhulu emzimbeni wami, noma kungokuphila noma kungokufa.
Ngokuba kimina ukuphila kunguKhristu, ukufa kuyinzuzo.
Kepha uma ukuphila kulo mzimba kuyisithelo somsebenzi kimi, engizakukukhetha angikwazi.
Manje ngimanqikanqika; nginesifiso sokumuka ngibe noKhristu, ngokuba yilokho okuhle kakhulu;
kanti futhi ukuhlala kulo mzimba kudingeke kakhulu ngenxa yenu.
Nginaso lesi siqiniseko, futhi ngiyazi ukuthi ngiyakuhlala, yebo, ngihlale nani nonke, kuqhubeke ukuthokoza kwenu ekukholweni,
ukuze ukuzibonga kwenu ngami kuvame kuKhristu uJesu ngobukhona bami futhi kini.
Okubalulekile, hambani ngokufanele ivangeli likaKhristu, ukuze kuthi noma ngiza ukuzonibona noma ngizwa ngani ngingekho, ngizwe ukuthi nimi niqinile emoyeni munye, nangomphefumulo munye; nilwela inkolo yevangeli.
Maningethuswa ngalutho yilabo abamelene nani, okuyisiboniso kubo sokubhubha kwabo, kodwa nina niyakusindiswa; lokhu impela kuvela kuNkulunkulu.
Ngokuba nina nabelwe ngenxa kaKhristu, hhayi nje ukuba nikholwe kuye, kodwa nokuba nihlupheke ngenxa yakhe,
lokhu nani-ke nisalwa leyo mpi enangibona ngiyilwa, namanje nizwile ukuthi ngisayibambile.
Ngakho-ke uma kukhona induduzo kuKhristu, uma kukhona ukududuzeka ngothando, uma kukhona inhlanganyelo kaMoya, uma kukhona isisa nesihawu,
gcwalisani ukuthokoza kwami ukuba nibe namqondo munye, ninothando lunye, nibe nhliziyonye, nicabanga into yinye.
Ningenzi lutho ngombango nangokuziphakamisa okuyize, kodwa ngokuzithoba, nazise abanye ngokungathi bakhulu kunani.
Yilowo nalowo anganaki okungokwakhe, kodwa anake nokwabanye.
Mawube kini lowo mqondo owawukhona nakuKhristu uJesu,
owathi enesimo sikaNkulunkulu, akaze asho ukuthi kuyinto yokuphangwa ukulingana noNkulunkulu.
Kepha wazidela, wathatha isimo senceku, wazalwa waba ngumuntu, wabonakala enesimo somuntu.
Wazithoba, elalela kwaze kwaba sekufeni, yebo, ekufeni kwesiphambano.
Ngalokho-ke uNkulunkulu wamphakamisa, wamnika igama elingaphezu kwamagama wonke,
ukuze kuthi ngegama likaJesu amadolo wonke aguqe, awabasezulwini, nawabasemhlabeni, nawabangaphansi komhlaba
nezilimi zonke zivume ukuthi UJESU KHRISTU UYINKOSI, kube yinkazimulo kuNkulunkulu uYise.
Ngakho-ke bathandekayo bami, njengalokhu nalalela ngezikhathi zonke, hhayi nje uma ngikhona, kodwa ikakhulu manje njengokuba ngingekho; fezani ukusindiswa kwenu ngokwesaba nangokuthuthumela.
Ngokuba uNkulunkulu nguye osebenza kini ukuba nithande, futhi nenze ngokwentando yakhe.
Kwenzeni konke ngaphandle kokukhononda nokuphikisana,
ukuze nibe ngabangasolekiyo nabangenacala; abantwana bakaNkulunkulu abangenasici phakathi kwesizukulwane esiyisigwegwe nesiphambeneyo, enikhanya phakathi kwaso njengezinkanyiso emhlabeni,
nibambelele ezwini lokuphila, ngize ngibe nokuzigqaja ngosuku lukaKhristu ngokuthi angigijimelanga ize, futhi angisebenzelanga ubala.
Yebo, nakuba nginikelwa emhlatshelweni nasenkonzweni yokukholwa kwenu, ngiyathokoza, ngithokoza nani nonke.
Nani-ke ngokunjalo thokozani, nithokoze kanye nami.
Kepha ngethembela eNkosini uJesu ukuthi ngizothumela kini uThimothewu ngokushesha, ukuze nami ngigqugquzeleke nxa sengizwe izindaba ezivela kini.
Ngokuba anginamuntu onenhliziyo enjengeyakhe, onganakekela izindaba zenu ngobuqotho.
Bonke bazifunela okwabo, abafuni okukaJesu Khristu.
Kepha niyakwazi ukwethembeka kwakhe ukuthi ukubonakalisile ngokusebenza nami, njengendodana isebenza noyise ngenxa yevangeli.
Ngakho-ke ngiyethemba ukuthi ngizomthumela kungakapholi maseko, uma nje sekwehlukene inhloko nesixhanti maqondana nalokhu engibhekene nakho.
Kepha nginethemba eNkosini ukuthi ngizakuza masinyane.
Kepha ngibone kudingekile ukuba ngithumele u-Ephafrodithu, umzalwane, isisebenzi nebutho kanye nami, isithunywa senu, nesikhonzi ekwesweleni kwami.
Lokhu ulangazelela ukunibona nonke, ukhathazekile ngenxa yokuba nizwile ukuthi ubegula.
Impela wayegula, kwembulwa kwembeswa, kodwa uNkulunkulu wamhawukela, kungeyena yedwa, nami imbala wangihawukela, ukuze ngingabi nosizi phezu kosizi.
Ngakho-ke ngizimisele kakhulu ukuba ngimthumele kini, ukuze kuthi nxa senimbona futhi nithokoze, nakimi lunciphe usizi.
Ngakho-ke mamukeleni eNkosini ngokuthokoza okupheleleyo, abanjalo-ke nibahloniphe,
ngokuba, ngenxa yomsebenzi kaKhristu, ucishe wafa edela impilo yakhe, ukuze agcwalise okusileleyo ekungisizeni kwenu.
Elokugcina, bazalwane bami, thokozani eNkosini. Akungikhathazi ukuphinde nginilobele khona lokho, kodwa nina kuyanilonda.
Xwayani izinja, nixwaye izisebenzi ezimbi, nixwaye nabazisika imizimba.
Ngokuba singabasokile thina esikhonza ngoMoya kaNkulunkulu, sizigqaja kuKhristu uJesu, asilibekile ithemba lethu enyameni,
nakuba bengingethembela enyameni. Uma kukhona ocabanga ukuthi unesizathu sokwethembela enyameni, mina ngineziningi.
Ngasokwa ngosuku lwesishiyagalombili, ngingowohlanga luka-Israyeli, owesizwana sakwaBhenjamini, umHebheru wamaHebheru, ngokomthetho ngingumFarisi.
Ngangiyisishisekeli esizingela ibandla, ngokokulunga okusemthethweni ngingongasolekiyo.
Kepha lokho okwakuyinzuzo kimi ngakushaya indiva ngenxa kaKhristu.
Yebo impela, ngikushaya indiva ngenxa yobukhulu bokumazi uKhristu uJesu iNkosi yami, engilahlekelwe yikho konke ngenxa yakhe, ngikushaya izibi ukuze ngizuze uKhristu,
ngifunyanwe kuye ngingenakho ukulunga okungokomthetho, kodwa lokho okuvela ngokukholwa nguKhristu, ngisho ukulunga okuvela kuNkulunkulu ngokukholwa,
ukuze ngimazi Yena, namandla okuvuka kwakhe, ngibe nokuhlanganyela ezinhluphekweni zakhe, ngimfuze nangokufa kwakhe,
mhlawumbe ngingaze ngifinyelele ekuvukeni kwabafileyo.
Akusho ukuthi sengifinyelele kulokhu kumbe sengiphelelisiwe, kodwa ngiyaphikelela ukuba kambe ngingaze ngikubambe lokho nami engabanjelwa khona nguKhristu uJesu.
Bazalwane, angisho ukuthi mina uqobo sengikubambile, kodwa kunye engikwenzayo: ngikhohlwa okungasemuva, ngizelulela kokungaphambili;
ngiphokophele emgomeni, emklomelweni wokubizwa okukhulu kwaphezulu, nguNkulunkulu kuJesu Khristu.
Thina sonke esipheleleyo masibe nokuqonda okunjalo. Kepha uma kwenzeka niba nokuqonda okwehlukileyo, nalokho uNkulunkulu uyakunambulela khona,
kuphela masibambelele kulokho esesifinyelele kukho.
Bazalwane, ngilingiseni, futhi nibabhekisise abahamba njengathi esiyisibonelo kini.
Abaningi enganitshela ngabo ngiphindelela, kumanje ngisanitshela ngabo ngikhala izinyembezi, bahamba beyizitha zesiphambano sikaKhristu.
Isiphetho sabo ngukubhujiswa; abankulunkulu wabo yizisu zabo, nodumo lwabo lungukwenza ihlazo; bacabanga ngezinto zomhlaba kuphela.
Kepha thina singabombuso wezulu, lapho futhi silangazelele khona ukubona uMsindisi, iNkosi uJesu Khristu.
NguYena oyakuguqula isimo somzimba wethu wokuthotshiswa, ufane nomzimba wakhe wenkazimulo. Lokho uyakukwenza ngamandla akhe akwazi ukuzihlelela ngawo konke phansi kwakhe.
Ngakho-ke bazalwane bami abathandekayo nengibalangazelela kakhulu, ntokozo yami nomqhele wami, yimani nigxile eNkosini, bathandwa.
Ngiyabayala o-Ewodiya noSintike ukuba babe nokuqonda okufanayo eNkosini.
Yebo, ngiyakunxusa nawe mhlobo wami oqotho, ukuba ubalekelele labo besifazane, ngokuba bahlanganyela nami evangelini, benoKlemente nezinye izisebenzi zami, amagama azo alotshiwe encwadini yokuphila.
Thokozani eNkosini njalonjalo; ngiyaphinda ngithi: thokozani!
Ukubekezela kwenu akwaziwe ngabantu bonke; iNkosi iseduze.
Ningakhathazeki ngalutho, kodwa kukho konke izicelo zenu mazaziwe nguNkulunkulu ngomkhuleko, ngokunxusa nangokubonga.
Ukuthula kukaNkulunkulu okudlula ukuqonda konke kuyakuzilondoloza izinhliziyo zenu nemicabango yenu kuKhristu uJesu.
Elokugcina, bazalwane, konke okuyiqiniso, konke okuhloniphekayo, konke okulungileyo, konke okumhlophe, konke okuthandekayo, konke okutusekayo, uma kukhona okuhle, noma okubongekayo, zindlani ngakho.
Enakufunda, nakwemukela, nakuzwa, nakubona kimi, kwenzeni konke lokho; uNkulunkulu wokuthula uyakuba nani.
Ngathokoza kakhulu eNkosini, ngokuba manje senibuye nathola ithuba lokunginakekela; kwazise beninginakekela, kodwa ningalitholi ithuba.
Akusikho ukuthi ngikusho lokhu ngokuba ngeswele, kodwa mina ngifundile ukweneliswa noma ezimeni ezinjani.
Ngiyakwazi ukuntula, ngiyakwazi futhi nokubusa. Kukho konke nasezintweni zonke, ngiyifundisiwe imfihlakalo: ukusutha, ukulamba, ukubusa nokuntula.
Ngingakwenza konke ngaye ongiqinisayo.
Nokho nenze kahle ngokuhlanganyela nami ekuhluphekeni kwami.
Nina baseFiliphi niyazi ukuthi ekuqaleni kwevangeli, ngesikhathi ngiphuma eMakhedoniya, kwakungekho ngisho nelilodwa ibandla elahlanganyela nami maqondana nokupha nokwamukela, ngaphandle kwenu kuphela.
Nalapho ngiseThesalonikha nangithumelela usizo kanye nakabili ngenxa yokweswela kwami.
Akusikho ukuthi ngifuna isipho, kodwa ngifuna isithelo esiyakwandisa okubalelwa kini.
Kepha nginakho konke ngokwevile, impela nganelisiwe ngengikwamukeliswe ngu-Ephafrodithu obekuvela kini; kuliphunga elimnandi, umhlatshelo omuhle nothokozisayo kuNkulunkulu.
UNkulunkulu wami uyakunabela konke enikudingayo ngokwengcebo yakhe ekukhazimuleni kuKhristu uJesu.
Makube ludumo kuNkulunkulu uBaba wethu, kuze kube phakade naphakade. Amen.
Ngikhonzeleni kwabangcwele bonke abakuKhristu uJesu. Abazalwane abanami lapha bayakhonza kini.
Bayakhonza bonke abazalwane abangcwele, ikakhulu abendlu kaKhesari.
Umusa weNkosi uJesu Khristu mawube nomoya wenu.
UPawula, umphostoli kaKhristu uJesu ngokwentando kaNkulunkulu, noThimothewu umzalwane,
kubo abangcwele baseKholose, nabazalwane abakholekileyo kuKhristu: makube kini umusa nokuthula okuvela kuNkulunkulu uBaba wethu.
Simbonga njalo uNkulunkulu uYise weNkosi yethu uJesu Khristu, uma sinikhulekela,
ngokuba sizwile ngokukholwa kwenu kuKhristu uJesu nangothando eninalo kubo bonke abangcwele,
ngenxa yethemba enibekelwe lona ezulwini, enezwa ngalo phambilini ngezwi leqiniso levangeli,
elifikile kini, njengalokhu likhona ezweni lonke, lithela izithelo, landa, njengalokhu kwenzeka naphakathi kwenu, kusukela ngosuku enalizwa ngalo, nawazi umusa kaNkulunkulu ngeqiniso,
njengalokhu nafunda ku-Ephafra othandekayo, oyinceku kanye nathi, isikhonzi esethembekileyo sikaKhristu ngenxa yenu;
okunguyena futhi owasitshela ngothando lwenu ngoMoya.
Ngakho-ke nathi, kusukela ngosuku esezwa ngalo, asiyeki ukunikhulekela sicela ukuba nigcwaliswe ngolwazi lwentando yakhe kukho konke ukuhlakanipha nokuqonda okungokomoya,
ukuze nihambe ngokufanele iNkosi, niyithokozise ngakho konke, nithela izithelo kuyo yonke imisebenzi elungileyo, nikhula ekumazini uNkulunkulu,
niqiniswe ngokuqiniswa konke ngokwamandla enkazimulo yakhe, ukuze nikwazi ukuqinisela kukho konke, nibekezela ngokujabula,
nibonga uYise owanenza nafanela ukuba nesabelo sefa labangcwele ekukhanyeni,
owasikhulula emandleni obumnyama, wasingenisa embusweni weNdodana yothando lwakhe;
okukuyo sinokuhlengwa nokuthethelelwa kwezono.
Yona ingumfanekiso kaNkulunkulu ongabonwayo, iyizibulo lakho konke okudaliweyo,
ngokuba konke kwadalwa ngayo; okusezulwini nokusemhlabeni, okubonwayo nokungabonwayo, nakuba kuyizihlalo zobukhosi, noma imibuso, noma izikhulu, noma iziphathimandla; konke kwadalwa ngayo, kwadalelwa Yona.
Yona ingaphambi kwakho konke, zonke izinto zibambene zimi ezindaweni zazo ngayo.
Yona iyinhloko yomzimba, ibandla; iyisiqalo, izibulo kwabafileyo, ukuze Yona ibe ngowokuqala ezintweni zonke.
Ngokuba kwaba kuhle ukuba ukuphelela konke kukaNkulunkulu kuhlale kuyo,
nokuba ngayo abuyisane nakho konke, esenzile ukuthula ngegazi lesiphambano sayo, yebo ngayo, noma yizinto ezisemhlabeni noma ezisezulwini.
Nani ekade ningabafokazi nezitha engqondweni ngemisebenzi emibi,
nokho manje usebuyisene nani emzimbeni wenyama yayo ngokufa ukuba animise ningcwele, ningenasisihla nacala phambi kwakhe,
uma kambe nihlala ekukholweni, nisekeliwe, nigxilile, futhi ningagudluzwa ethembeni levangeli enalizwayo, elashunyayelwa kukho konke okudaliweyo okuphansi kwezulu, engenziwa isikhonzi salo mina Phawula.
Manje ngiyathokoza ezinhluphekweni zami ngenxa yenu, ngokuba ngigcwalisa okusileleyo ezinhluphekweni zikaKhristu enyameni yami ngenxa yomzimba wakhe oyibandla,
engenziwe isikhonzi salo ngokwesimiso sikaNkulunkulu owanginika sona maqondana nani, ukuze ligcwaliseke izwi likaNkulunkulu,
ngisho imfihlakalo ebifihlakele kusukela emandulo nasezizukulwaneni, kodwa manje yambuliwe kwabangcwele bakhe,
okuyibona uNkulunkulu athanda ukubazisa ukuthi iyini ingcebo yenkazimulo yale mfihlakalo phakathi kwabezizwe. Le mfihlakalo inguKhristu phakathi kwenu, ithemba lenkazimulo.
OkunguYena esimshumayelayo, siluleka wonke umuntu, sibafundisa bonke abantu ngokuhlakanipha konke, ukuze sethule wonke umuntu ephelele kuKhristu,
engiyisebenzelayo futhi ngokukhandleka, ngilwa ngokusebenza kwakhe okusebenza kimi ngamandla.
Ngiyathanda ukuba nazi ukuthi nginikhandlekela kakhulu kangakanani nina nabaseLawodikheya nabo bonke abangakaze bangibone ngamehlo,
ukuze izinhliziyo zabo zigqugquzeleke, behlanganisiwe othandweni, ukuze babe nengcebo yonke yokuqonda kweqiniso, bayazi imfihlakalo kaNkulunkulu enguKhristu;
okufihlwe kuye wonke amagugu okuhlakanipha nawokwazi.
Ngikusho lokhu ukuze kungabi bikho muntu onikhohlisa ngamazwi ayengayo.
Noma mina siqu sami ngingekho phakathi kwenu, kodwa nginani ngomoya, ngiyathokoza uma ngibona ukuhleleka kwenu nokuqina kokukholwa kwenu kuKhristu.
Ngakho-ke njengalokhu nimamukele uKhristu uJesu iNkosi, hambani nikuye,
nigxilile, nakhiwe kuye, niqinisiwe ekukholweni, njengalokhu nifundisiwe, nivame ukubonga.
Qaphelani funa kube khona onithumbayo ngokuhlakanipha nangenkohliso eyize ngokwemvelo yabantu, ngezimfundiso zokucathula kwezwe, okungesikho okukaKhristu.
Ngokuba kuhlala kuye ngokomzimba konke ukuphelela kukaNkulunkulu.
Nina niphelelisiwe kuye, oyinhloko yemibuso yonke namandla,
enasokelwa kuye, hhayi ngokusoka okwenziwa ngezandla ngokukhumula umzimba wenyama, kodwa ngokusoka kukaKhristu;
nimbelwe kanye naye ngombhabhadiso, okungawo futhi navuswa kanye naye ngokukholwa ngamandla kaNkulunkulu owamvusa kwabafileyo.
Nani-ke ebenifile ngeziphambeko zenu nokungasokwa kwenyama yenu, wanenza ukuba niphile kanye naye, esithethelela zonke iziphambeko zethu.
Wayesula incwadi yecala lethu, eyayimelene nathi ngemiyalo ekuyo, wayisusa ngokuyibethela esiphambanweni.
Wabephuca izikhali ababusi nabanamandla, wabathela ngehlazo obala, ebanqoba ngesiphambano.
Ngakho-ke makungabi bikho muntu onehlulela ngokudla, nangokuphuzwayo, noma ngemikhosi, noma ngokwethwasa kwenyanga noma ngamasabatha,
okuyisithunzi nje salokhu obekuzofika, kodwa okuyikhonakhona nguKhristu.
Makungabi bikho muntu onephuca umvuzo wenu, othanda ukuzenza othobile ekhonza izingelosi, ephike ngemibono yakhe, ezikhukhumeza ngeze ngengqondo yakhe yemvelo,
engabambeleli kulowo oyinhloko, okungaye umzimba wonke uyondliwa, futhi uhlanganiswa ndawonye ngamalungu nemisipha, ukhula ngokukhula kukaNkulunkulu.
Uma nafa kanye noKhristu, nakhululwa ezimfundisweni zokucathula kwezwe, pho kungani kungathi nisaphila ngokwezwe, nithobela izimfundiso ezithi:
“Ungathinti, unganambithi ngolimi, futhi ungabambi!”
Konke lokho kuyizinto eziphelayo uma sezisetshenzisiwe ngokwemiyalo nezimfundiso zabantu.
Konke kubonakala sengathi kunokuhlakanipha kokwenza abantu baziqokele inkolo eluthayo, nokuzenza abathobileyo, nokukhandla umzimba, kodwa akusizi ngalutho maqondana nokuzithiba ezinkanukweni zenyama.
Ngakho-ke uma navuswa kanye noKhristu, funani okwaphezulu, lapho ekhona uKhristu, ehleli ngakwesokunene sikaNkulunkulu;
nakani okwaphezulu, ninganaki okusemhlabeni.
Ngokuba nafa, ukuphila kwenu kufihlwe noKhristu kuNkulunkulu,
nxa ebonakaliswa uKhristu ongukuphila kwethu, nani-ke niyakubonakaliswa kanye naye enkazimulweni.
Ngakho-ke bulalani amalungu enu asemhlabeni: ubufebe, ukungcola, ukuhuheka, inkanuko embi, umhobholo, nokukhonza izithombe,
okuza ngakho ulaka lukaNkulunkulu kubantu bokungalaleli;
ebeniphila kukho ngesikhathi nisahlezi kulezi zinto.
Kepha manje lahlani konke lokhu: ulaka, ukuthukuthela, ububi, ukuhlambalaza, nokukhuluma amahlazo ngemilomo yenu.
Ningaqambi amanga omunye komunye, ngokuba senikhumule umuntu omdala nezenzo zakhe;
nembethe omusha, owenziwa musha njalo ekwazini ngokomfanekiso walowo owamdalayo;
lapho kungekho mGriki namJuda, ukusoka nokungasoki, owezizwe noma umSkithe, isigqila noma okhululekileyo, kodwa uKhristu uyikho konke, kubo bonke.
Ngakho-ke njengabakhethiweyo bakaNkulunkulu, abangcwele nabathandekayo, yembathani ububele enhliziyweni; isisa, ukuzithoba, ubumnene, nokuqinisela ekuhluphekeni;
nibekezelelane, nithethelelane, uma umuntu enesikhalo ngomunye, njengokuba neNkosi yanithethelela, nani yenzani kanjalo.
Phezu kwakho konke lokho, yembathani uthando oluyisibopho sokuphelela.
Ukuthula kukaKhristu makubuse ezinhliziyweni zenu, enabizelwa kukho futhi emzimbeni munye; yibani ngababongayo.
Izwi likaKhristu malihlale kini njalo, nifundisane ngokuhlakanipha konke, niyalane ngamahubo, ngezihlabelelo nangamaculo okomoya; nimhubele uNkulunkulu ezinhliziyweni zenu ngokubonga.
Konke enikwenzayo, noma kungezwi noma kungomsebenzi, kwenzeni konke egameni leNkosi uJesu, nimbonge uNkulunkulu uYise ngaye.
Bafazi, thobelani amadoda enu njengokufanele eNkosini.
Madoda, thandani omkenu, ningabacasukeli.
Bantwana, lalelani abazali benu ezintweni zonke, ngokuba lokho kuyathandeka eNkosini.
Boyise, ningabathukuthelisi abantwana benu, funa badikibale.
Zinceku, lalelani ezintweni zonke labo abangamakhosi enu, ngokwemvelo, kungabi ngokuthenga amehlo njengabathokozisa abantu, kodwa ngenhliziyo eqotho, nesabe iNkosi.
Konke enikwenzayo kwenzeni ngenhliziyo, kungathi nikwenzela iNkosi, hhayi abantu,
nazi ukuthi niyakwemukeliswa umvuzo oyifa eNkosini. Khonzani iNkosi uKhristu.
Ngokuba lowo owenza okungalungile, uyakuvuna ukungalungi akwenzileyo, ngokuba akukho ukwenzelela kuyo.
Makhosi, ziphatheni kahle nangokufaneleyo izinceku zenu, nikhumbule ukuthi nani nineNkosi ezulwini.
Qiniselani ekukhulekeni, nilinde nikuwo ninokubonga.
Nisikhulekele nathi ukuba uNkulunkulu asivulele umnyango wezwi ukuba sishumayele imfihlakalo kaKhristu engiboshwe ngenxa yayo,
ukuze ngiyibonakalise njengalokhu ngifanele ukukhuluma.
Hambani ngokuhlakanipha kubo abangaphandle, nithengisise isikhathi.
Ukukhuluma kwenu makube nomusa njalo, kuyoliswe ngosawoti, ukuze nazi enifanele ukubaphendula ngakho bonke abantu.
UThikhikhu, umzalwane othandekayo nesikhonzi esithembekileyo, oyinceku kanye nami eNkosini, uyakunazisa konke okuqondene nami.
Ngimthumele kini ngenxa yakho lokho ukuba nazi ukuthi sihlezi kanjani, futhi agqugquzele izinhliziyo zenu.
Uhambisana no-Onesimu, umzalwane othembekileyo nothandekayo, ongomunye wenu; bazakunazisa konke okwenzeka lapha.
Uyakhonza kini u-Aristarkhu oyisiboshwa kanye nami, noMakhu umzala kaBharnabha, enatshelwa ngaye. Uma efika kini, mamukeleni,
noJesu okuthiwa nguJustu. Yibo bodwa abangabasokileyo, abasebenzela umbuso kaNkulunkulu kanye nami, bayinduduzo kimi.
Uyakhonza kini u-Efratha ongomunye wenu, inceku kaKhristu uJesu, enilwela njalo emithandazweni, ukuze nime niphelele, niqinisekile entandweni yonke kaNkulunkulu.
Ngokuba ngiyamfakazela ukuthi uyanisebenzela kakhulu nina, nabaseLawodikheya, nabaseHiyerapholi.
Uyakhonza kini uLuka, inyanga ethandekayo, noDema.
Khonzani kubazalwane baseLawodikheya, nakuNimfa, nebandla elihlanganela endlini yakhe.
Kuyakuthi uma le ncwadi seniyifundelwe, bese niqinisekisa ukuthi iyafundwa nasebandleni laseLawodikheya, nani niyifunde leyo ncwadi evela eLawodikheya.
Nitshele u-Arkhiphu, nithi: “Qaphela ukuba uwufeze umsebenzi owawemukelayo eNkosini.”
Lo mkhonzo ngiwubhale ngesandla sami, mina Pawula. Khumbulani izibopho zami. Umusa mawube nani.
UPawula, uSilvanu, noThimothewu kulo ibandla laseThesalonikha elikuNkulunkulu uBaba, naseNkosini uJesu Khristu: makube kini umusa nokuthula.
Simbonga njalo uNkulunkulu ngani nonke, sinikhulekela singaphezi emikhulekweni yethu,
sikhumbula umsebenzi wenu wokukholwa, umshikashika wothando, nethemba lenu eliqinileyo eNkosini yethu uJesu Khristu phambi kukaNkulunkulu uBaba wethu.
Siyazi ukukhethwa kwenu nguNkulunkulu, bazalwane abathandiweyo,
ngokuba ivangeli lethu alifikanga ngamazwi nje kuphela, kodwa ngamandla, nangoMoya oNgcwele, nangokwethemba okukhulu, njengokuba nazi ukuthi saba ngabantu abanjani phakathi kwenu, ngenxa yenu.
Nani naba ngabalingisa thina neNkosi, ngokuba nanxa nahlushwa kanzima, kodwa nalemukela izwi ngenjabulo evela kuMoya oNgcwele,
ngangoba naba yisibonelo kubo bonke abakholwayo abaseMakhedoniya nase-Akhaya.
Ngokuba izwi leNkosi lizwakele livela kini, hhayi nje kuphela eMakhedoniya nase-Akhaya, kodwa ezindaweni zonke lapho bezwe khona ngokukholwa kwenu kuNkulunkulu, ngakho-ke akusadingeki ukuba sikhulume ngakho.
Ngokuba bona luqobo babika ngathi ukuthi nasemukela kanjani, nokuthi naphendukela kanjani kuNkulunkulu nashiya izithombe, ukuze nikhonze uNkulunkulu ophilayo noweqiniso;
nilindele iNdodana yakhe ivela ezulwini, ayivusa kwabafileyo, enguJesu, osihlengayo olakeni oluzayo.
Nina bazalwane niyazi ukuthi ukunihambela kwethu akubanga yize.
Kepha noma sasihlushiwe phambilini, futhi saphathwa kabi eFiliphi, njengokuba nazi, nokho saba nesibindi kuNkulunkulu wethu, sanishumayeza ivangeli likaNkulunkulu, sibhekene nobunzima obukhulu.
Ngokuba ukuyala kwethu akusikho okwedukisayo nokokungcola nokobuqili,
kodwa njengalokhu uNkulunkulu evumile ukuba siphathiswe ivangeli, ngakho-ke siyakhuluma, hhayi ukuba sithokozise abantu, kodwa uNkulunkulu ovivinya izinhliziyo zethu.
Ngokuba asizange sibe namazwi okuthopha, njengokuba nazi, futhi asikaze sibe nobuqili bobugovu; uNkulunkulu ungufakazi.
Asizange sifune ukutuswa ngabantu, noma yinina, noma ngabanye;
nakuba sasingaba yisisindo kini njengoba singabaphostoli bakaKhristu, nokho saba mnene phakathi kwenu njengonina onakekela abantwana bakhe.
Kanjalo njengoba besinilangazelela, sakuthokozela ukwedlulisela kini, hhayi nje ivangeli likaNkulunkulu kuphela, kodwa ngisho thina uqobo, ngokuba nase ningabathandekayo kithi.
Bazalwane, niyakukhumbula ukukhandleka nokushikashikeka kwethu; sisebenza ubusuku nemini, ukuze singabi ngumthwalo nakoyedwa kini, lapho sinishumayeza ivangeli likaNkulunkulu.
Nina kanye noNkulunkulu ningofakazi bokuthi sahlala kanjani nani, nina enikholwayo ngobungcwele, ngobuqotho nangokungasoleki.
Niyazi futhi ukuthi yilowo nalowo kini samphatha njengalokhu uyise ephatha abantwana bakhe;
sinikhuthaza, sinimisa isibindi, sigcizelela ukuba nihambe ngokufaneleyo phambi kukaNkulunkulu onibizele embusweni nasenkazimulweni yakhe.
Ngenxa yalokhu, nathi sibonga uNkulunkulu singaphezi, ngokuba nithe ukulamukela izwi likaNkulunkulu enalizwa ngathi, anilamukelanga njengezwi labantu, kodwa njengoba liyizwi likaNkulunkulu isibili, elisebenza kini nina enikholwayo.
Ngokuba nina bazalwane nalingisa amabandla kaNkulunkulu aseJudiya akuKhristu uJesu, ngokuba nani nahlushwa ngabesizwe sakini, njengalokhu nawo ahlushwa ngabaJuda.
Bona bayibulala iNkosi uJesu nabaphrofethi, basizingela nathi kanzima, bengamthokozisi uNkulunkulu, bemelana nabantu bonke,
besivimbela ukuba sikhulume nabezizwe ukuze basindiswe. Ngalokho-ke bazinqwabela njalo izono zabo, kodwa ulaka selwehlele phezu kwabo ngokupheleleyo.
Kepha thina bazalwane, besehlukanisiwe nani okwesikhashana, kodwa hhayi ngezinhliziyo, yingakho sikushisekele kakhulu ukuba sinibone, okuyikhona sikunxanele kakhulu.
Ngakho-ke besithanda ukuza kini, impela mina Pawula, ngizame kaningana, kodwa uSathane wasivimbela.
Ngokuba liyini ithemba lethu, ukuthokoza nomqhele wokuzibonga phambi kweNkosi yethu uJesu ekufikeni kwakhe, uma kungeyini na?
Nina niludumo lwethu nokuthokoza kwethu.
Kwathi singasenakubekezela, sabona kukuhle ukuba sisale sodwa e-Athene.
Sathumela uThimothewu umzalwane wethu, isikhonzi sikaNkulunkulu kanye nathi evangelini likaKhristu, ukuba aniqinise, anikhuthaze ekukholweni kwenu,
ukuze kungabi bikho muntu ozanyazanyiswa yilezo zinhlupheko, ngokuba niyazi ukuthi siqokelwe lokho.
Nalapho sisenani, sanitshela kungakenzeki ukuthi siyakuhlushwa, njengokuba kwenzeka, futhi niyazi.
Ngakho-ke nami lapho sekungiphelele ukubekezela, ngathumela ukuba ngazi ngokukholwa kwenu, funa kambe umlingi wanilinga, bese ukukhandleka kwethu kuba yize.
Kepha lapho uThimothewu esefikile kithi, evela kini, wasibikela izindaba zokukholwa ezihlabahlosile, nothando lwenu, nokuthi ukusikhumbula kwenu kuhle njalo, futhi niyalangazelela ukusibona, njengokuba nathi sifisa ukunibona.
Ngakho-ke bazalwane, kulo lonke usizi nobunzima esasibhekene nakho, sagqugquzeleka ngani ngokukholwa kwenu.
Nokho sesiyaphila manje, uma nimi niqinile eNkosini.
Kodwa singambonga ngani uNkulunkulu ngokuthokoza konke esithokoza ngakho ngenxa yenu phambi kukaNkulunkulu wethu na?
Ubusuku nemini siyanxusa singaphezi ukuba sinibone ubuso nobuso, siphelelise okusileleyo ekukholweni kwenu.
Sengathi uNkulunkulu, uBaba wethu uqobo, neNkosi yethu uJesu bangayiqondisa indlela yethu eza kini;
iNkosi ilwandise luchichime uthando lwenu, nithandane, futhi nibathande nabanye, njengokuba nathi sinithanda,
ukuze izinhliziyo zenu zisimame, zingabi nakusoleka ebungcweleni phambi kukaNkulunkulu uBaba wethu, ekufikeni kweNkosi yethu uJesu kanye nabo bonke abangcwele bayo.
Elokugcina, bazalwane, siyaninxusa, sinigqugquzela eNkosini uJesu ukuba njengalokhu nakwemukela kithi ukuthi nifanele niziphathe, futhi nimthokozise kanjani uNkulunkulu, njengalokhu nivele nenza kanjalo, khuthalani-ke kakhulu ukwenza lokho.
Ngokuba niyayazi imiyalo esaninika yona ngeNkosi uJesu.
Ngokuba lokhu kuyintando kaNkulunkulu ukuba ningcweliswe, nidede ebufebeni;
kube yilowo nalowo kini akwazi ukuhlala nomkakhe ngobungcwele nangokuhlonipha,
kungabi ngokushisa kwenkanuko njengabezizwe abangamazi uNkulunkulu,
ukuze kungabi bikho noyedwa owonayo ngalokhu, aphambe umfowabo; ngokuba iNkosi ingumphindiseli kukho konke lokho, njengokuba sanitshela phambilini, futhi sagcizelela.
Ngokuba uNkulunkulu kasibizelanga emanyaleni, kodwa wasibizela ebungcweleni.
Ngakho-ke okwalayo lokhu akali umuntu, kodwa wala uNkulunkulu, okunguYena oninika uMoya wakhe oNgcwele.
Kepha mayelana nothando lobuzalwane anidingi ukuba nilotshelwe ngalokho, ngokuba nina luqobo nifundisiwe nguNkulunkulu ukuba nithandane.
Lokho niyakukwenza kubo bonke abazalwane abakulo lonke elaseMakhedoniya. Nokho bazalwane, siyanigqugquzela ukuba lokho nikwenze kakhulu.
Nikhuthalele ukuhlala ngokuthula, ninake izindaba zenu, nisebenze ngezandla zenu, njengalokhu saniyala,
ukuze nihambe ngokufaneleyo phambi kwabangakholwa, futhi ningantuli lutho.
Kepha asithandi, bazalwane, ukuba ningabi nakwazi ngabalalayo, ukuze ningadabuki njengabanye abangenalo ithemba.
Ngokuba uma sikholwa ukuthi uJesu wafa, wavuka, ngokunjalo-ke uNkulunkulu uyakubaletha nabaleleyo kuJesu kanye naye.
Ngokuba sikusho lokhu kini ngezwi leNkosi ukuthi thina, esisaphila sisasele kuze kube sekufikeni kweNkosi, asiyukubandulela ngempela abaleleyo,
ngokuba iNkosi uqobo iyakukwehla ezulwini ngezwi lenhlokomo, ngephimbo lengelosi enkulu, nangecilongo likaNkulunkulu; abafileyo kuKhristu bayakuvuka kuqala.
Lapho-ke, thina esisaphila, sisele, siyakuhlwithwa kanye nabo emafini, sihlangane neNkosi emoyeni. Siyakuhlala nayo njalo iNkosi.
Ngakho-ke duduzanani ngalawa mazwi.
Bazalwane, mayelana nezikhathi nangemizuzu, aniswele ukulotshelwa ngakho,
ngokuba nina luqobo niyazi ukuthi usuku lweNkosi luza njengesela ebusuku.
Uma bethi: “Ukuthula nokuhlala kahle,” khona ukubhujiswa kuyakubazuma njengemihelo ifikela okhulelweyo; kabasoze baphunyuka.
Kepha nina bazalwane anikho ebumnyameni, ukuze lolo suku lunifice ningazelele, njengesela,
ngokuba nina nonke ningabantwana bokukhanya, nabantwana bemini; asisibo abobusuku noma abobumnyama.
Ngakho-ke masingalali njengabanye, kodwa masiqwashe, sizithibe.
Ngokuba abalalayo balala ebusuku, nabadakwayo badakwa ebusuku.
Kepha thina esingabemini masizithibe, sifake isivikelo sesifuba sokukholwa nesothando, isigqoko sibe yithemba lokusindiswa,
ngokuba uNkulunkulu kasimiselanga ulaka, kodwa ukuba sizuze ukusindiswa ngeNkosi yethu uJesu Khristu,
owasifelayo; ukuba noma siqwashile noma silele, siphile kanye naye.
Ngakho-ke gqugquzelanani, nakhane njengalokhu nenza.
Manje siyanincenga, bazalwane, ukuba nibazise abazikhandlayo phakathi kwenu, benihola eNkosini, futhi beneluleka.
Baziseni kakhulu othandweni ngenxa yomsebenzi wabo. Hlalisanani ngokuthula.
Bazalwane, siyanikhuthaza futhi niwayale amavila; duduzani abajabhileyo, nisekele ababuthakathaka, futhi nibabekezelele bonke.
Qaphelani ukuba kungabi bikho muntu ophindisela komunye okubi ngokubi, kodwa phokophelani njalo ukwenza okuhle, omunye komunye, nakubo bonke abanye.
Thokozani njalo,
nikhuleke ningaphezi.
Kukho konke, bongani, ngokuba lokho kuyintando kaNkulunkulu kuKhristu uJesu ngani.
Ningamcimi uMoya,
ningakudeleli ukuphrofetha.
Vivinyani konke, nibambisise okuhle.
Dedani kulo lonke uhlobo lobubi.
Sengathi uNkulunkulu wokuthula, Yena uqobo, anganingcwelisa ngokupheleleyo, alondoloze umoya wenu wonke, nomphefumulo nomzimba, kungabi nasici ekufikeni kweNkosi yethu uJesu Khristu.
Uthembekile onibizayo, futhi oyakukwenza lokho.
Bazalwane, sikhulekeleni.
Khonzani kubo bonke abazalwane ngokwanga okungcwele.
Ngiyaniyala eNkosini ukuba le ncwadi ifundwe kubo bonke abazalwane.
Umusa weNkosi yethu uJesu Khristu mawube nani.
UPawula, uSilvanu, noThimothewu kulo ibandla laseThesalonikha elikuNkulunkulu, uBaba wethu, naseNkosini uJesu Khristu:
makube kini umusa nokuthula okuvela kuNkulunkulu uBaba wethu naseNkosini uJesu Khristu.
Simelwe ukumbonga njalo uNkulunkulu ngani bazalwane, njengokuba kufanele, ngokuba ukukholwa kwenu kuyanda kakhulu, kanjalo futhi luyanda nothando lwenu nonke enithandana ngalo omunye nomunye.
Thina uqobo sizincoma ngani emabandleni kaNkulunkulu ngenxa yokukhuthazela kwenu nokukholwa, nibekezela kukho konke ukuzingelwa kwenu, nokuhlushwa kwenu.
Lokho kungubufakazi obucacileyo bokwehlulela kukaNkulunkulu okulungileyo, ukuze kuthiwe ningabawulungeleyo umbuso kaNkulunkulu enihlupheka ngenxa yawo.
Uma kuyinto elungile kuNkulunkulu uyakukubuyisela ukuhlupheka kulabo abanihluphayo,
bese nina enihluphekayo aniphe ukuphumula kanye nathi ekwambuleni kweNkosi uJesu, ivela ezulwini, inezingelosi zamandla ayo,
iselangabini lomlilo, ukuba ijezise labo abangamaziyo uNkulunkulu nabangalilaleli ivangeli leNkosi yethu uJesu.
Laba-ke bazakujeziswa ngokubhujiswa okuphakade, basuswe ebukhoneni beNkosi naphambi kwenkazimulo yamandla akhe,
lapho ifika ukuba ikhazimuliswe kubo abangcwele bayo, idunyiswe ngalolo lusuku yibo bonke abakholwayo, ngokuba nakholwa ngukufakaza kwethu.
Ngenxa yalokho, siyanikhulekela njalo, ukuze uNkulunkulu wethu anenze nifanele ukubizwa kwenu, akuphelelise ngamandla konke okuhle enikuthandayo nomsebenzi wokukholwa,
ukuze igama leNkosi yethu uJesu likhazimuliswe kini, nani kuye, ngokomusa kaNkulunkulu wethu noweNkosi uJesu Khristu.
Mayelana nokubuya kweNkosi yethu uJesu Khristu, nokubuthanela kwethu kuyo, siyaninxusa bazalwane,
ukuba ningasheshi ukuxoveka emqondweni wenu, futhi ningethuswa noma ngomoya, noma ngezwi, noma ngencwadi okungathi ivela kithi, sengathi usuku lukaKhristu selufikile.
Makungabi bikho muntu onikhohlisayo noma ngayiphi indlela, ngokuba aluyukufika usuku kungakafiki kuqala ukuhlubuka, nokwembulwa komuntu ongenamthetho, indodana yembubhiso,
omelene nakho konke, nozikhukhumezayo kukho konke okubizwa ngoNkulunkulu noma yini ekhonzwayo, aze azihlalise ethempelini likaNkulunkulu, ezenza uNkulunkulu.
Anikhumbuli yini ukuthi ngisenani nganitshela ngalokho na?
Seniyakwazi okumbambezeleyo manje, ukuze ambulwe ngesikhathi sakhe.
Ngokuba imfihlakalo yokungabi namthetho isiyasebenza, kuphela nje ukuba kudediswe yena obambezelayo manje.
Kulapho-ke eyakwambulwa khona lowo ongenamthetho, eyakumqothula ngomoya womlomo wayo iNkosi uJesu, imbhubhise ngokubonakala kwayo mhla ifika.
Ukufika kwalowo ongenamthetho kuyacaca emsebenzini kaSathane, osebenza ngawo onke amandla, nangezibonakaliso, nezimangaliso ezingamanga,
nangayo yonke inkohliso yokungalungi kwababhubhayo, ngenxa yokuba bengakuvumanga ukuthanda iqiniso, ukuze basindiswe.
Ngalokho-ke uNkulunkulu ubathumela ukulutheka okunamandla, ukuze bakholwe ngamanga,
ukuba behlulelwe bonke abangakholwanga yiqiniso, kodwa bejabulela ukungalungi.
Kepha thina simelwe ukumbonga njalo uNkulunkulu ngani, bazalwane abathandwa yiNkosi, ngokuba uNkulunkulu wanikhetha ukuba nibe ngabokuqala ukusindiswa ngokungcwelisa kukaMoya nangokukholwa yiqiniso,
anibizela kukho ngevangeli lethu, nize nizuze inkazimulo yeNkosi yethu uJesu Khristu.
Ngalokho-ke bazalwane, yimani niqine, nibambelele kulelo qiniso enalifundiswa noma ngezwi noma ngencwadi yethu.
Sengathi iNkosi yethu uJesu Khristu uqobo, noNkulunkulu uBaba wethu owasithanda nowasipha ngomusa induduzo yaphakade nethemba elihle,
angazigqugquzela izinhliziyo zenu, aniqinise emisebenzini yonke nasemazwini onke amahle.
Elokugcina, bazalwane, sikhulekeleni ukuba izwi leNkosi lisabalale ngokushesha, lidunyiswe, njengalokhu kunjalo nakini.
Sikhulekeleni nokuba sikhululwe kubantu abonakeleyo nababi, ngokuba akusibo bonke abakholwayo.
Kepha iNkosi ithembekile, iyakuniqinisa, inilondoloze komubi.
Sinesibindi eNkosini ngani ukuthi lokhu esiniyala ngakho niyakukwenza, nokuthi nizakuqhubeka nikwenze.
Sengathi iNkosi ingaziqondisa izinhliziyo zenu othandweni lukaNkulunkulu nasekubekezeleni kukaKhristu.
Kepha bazalwane, siyaniyala egameni leNkosi yethu uJesu Khristu ukuba nibagweme abazalwane abangamavila, abangawulandeli umyalo enawemukela kithi.
Ngokuba nina luqobo niyazi ukuthi kubaluleke kanjani ukuba nisilingise, ngokuba asizange sibe ngabavilaphayo lapho sinani.
Asidlanga sinkwa samuntu ngesihle, kodwa sazikhandla, sisebenza kanzima ubusuku nemini, ukuba singabi mthwalo kumuntu,
hhayi ngoba sasingenalo ilungelo lalokho, kodwa ukuze sibe yisibonelo kini sokuba nani nisilingise.
Ngokuba nangesikhathi sisenani, saniyala ngalokhu, sathi: “Uma umuntu engathandi ukusebenza, makangadli.”
Ngokuba siyezwa ukuthi abanye benu bangamavila, behla benyuka bengenzi nolunci, kodwa bezigaxa ezindabeni zabanye.
Kulabo abanjalo, siyabayala, futhi siyabakhuthaza eNkosini uJesu Khristu ukuba basebenze ngokuthula, badle esabo isinkwa.
Kepha nina bazalwane, ningadinwa ngukwenza okuhle.
Kepha uma kukhona ongalilaleli izwi lethu kule ncwadi, mphawuleni lowo, ningahlanganyeli naye, ukuze abe namahloni,
kodwa ningamthathi njengesitha, kepha melulekeni njengomzalwane.
Sengathi iNkosi yokuthula uqobo inganipha ukuthula ngezikhathi zonke nangezindlela zonke. INkosi mayibe nani nonke.
Lo mkhonzo ngiwubhale ngesandla sami, mina Pawula, okuwuphawu kuzo zonke izincwadi engizibhalayo.
Umusa weNkosi yethu uJesu Khristu mawube nani nonke.
UPawula, umphostoli kaKhristu uJesu, ngokomyalo kaNkulunkulu uMsindisi wethu nokaKhristu uJesu ithemba lethu,
kuThimothewu, umntanami isiminya okholweni: makube kuwe umusa, ububele nokuthula okuvela kuNkulunkulu uBaba nakuKhristu uJesu iNkosi yethu.
Njengalokhu ngakunxusa ngesikhathi ngilibangise eMakhedoniya ukuba uhlale e-Efesu, ukuze uyale abathile ukuba bangafundisi okwahlukileyo,
futhi bangazinaki izinganekwane nezindaba zolibo lwemindeni ezingapheliyo, ezidala impikiswano kunokuba ziqhakambise isimiso sikaNkulunkulu ngokukholwa.
Kepha umgomo womyalo wuthando oluvela enhliziyweni ehlanzekileyo, nakunembeza omuhle, nasekukholweni okungazenzisiyo.
Abanye baphaphalazile kulokho, baphambukela ekukhulumeni okuyize,
befuna ukuba ngabafundisi bomthetho, nakuba bengakuqondi abakushoyo nalokho abakugcizelela ngeqholo.
Kepha thina siyazi ukuthi umthetho muhle, uma umuntu ewusebenzisa ngokufaneleyo,
siyazi lokhu, ukuthi umthetho awubekelwanga olungileyo, kodwa abahlubukayo, abangamesabi uNkulunkulu, izoni ezihlazisayo, abadumazayo, ababulala oyise nonina, ababulala abantu,
izifebe, abesilisa abalalanayo, abathumba abantu, abaqambimanga, abafunga amanga, nanoma yikuphi okunye okuphambene nemfundiso elungileyo;
ngokwevangeli lenkazimulo kaNkulunkulu odumisekayo, engaphathiswa lona mina.
Ngiyambonga uKhristu uJesu iNkosi yethu owangipha amandla, wangibona ngethembekile, wangiqokela emsebenzini wakhe,
nakuba ngangikade ngingohlambalazayo, nozingela amakholwa, nohluphayo. Kepha ngahawukelwa, ngokuba ngangikwenza ngokungazi nangokungakholwa.
Kepha umusa weNkosi yethu wachichima nokukholwa kanye nothando olukuKhristu uJesu.
Lithembekile leli lizwi, futhi lifanele impela ukwemukelwa, elithi: uKhristu uJesu weza emhlabeni ukuzosindisa izoni, engingesikhulu mina kuzo.
Kepha ngahawukelwa ngalokhu ukuze uKhristu uJesu akubonakalise kimi engingesikhulu isoni, konke ukubekezela kwakhe, ngibe yisibonelo kulabo abazakukholwa kuye, baze babe nokuphila okuphakade.
Manje kuyo iNkosi yaphakade, engabhubhiyo, nengabonwayo; uNkulunkulu munye, makube ludumo nenkazimulo kuze kube phakade naphakade. Amen.
Thimothewu mntanami, ngikunika lo myalo njengokweziphrofetho ezandulelayo ngawe, ukuze ngazo ulwe ukulwa okuhle,
unokukholwa nonembeza omuhle, abanye abakulahlile, bafelwa ngumkhumbi wabo wokukholwa,
kulabo kukhona uHimenewu no-Aleksandru, engibanikele kuSathane, ukuze bayalwe ukuba bangahlambalazi.
Ngakho-ke okokuqala nje, ngigqugquzela ukuba ukunxusa, ukukhuleka, ukucela nokubonga kwenzelwe abantu bonke;
amakhosi nazo zonke iziphathimandla, ukuze sihlale kahle ngokuthula, ngokwesaba uNkulunkulu, nangakho konke ukuhlonipheka.
Lokhu kuhle, futhi kwamukelekile emehlweni kaNkulunkulu uMsindisi wethu,
othanda ukuba bonke abantu basindiswe, bafinyelele ekulazini iqiniso.
Ngokuba munye uNkulunkulu, munye nomlamuleli phakathi kukaNkulunkulu nabantu, ngumuntu uKhristu uJesu,
owazinikela ukuba abe yinhlawulo yabo bonke, kube ngubufakazi besikhathi esifaneleyo.
Ngamiselwa mina ukuba ngibe ngummemezeli nomphostoli walokho; ngikhuluma iqiniso, angisengi ezimithiyo; yebo, umfundisi wabezizwe ekukholweni naseqinisweni.
Ngalokho ngithanda ukuba amadoda akhuleke ezindaweni zonke, ephakamise izandla ezingcwele, engenalulaka nakuphikisana.
Kanjalo-ke nabesifazane mabagqoke izingubo ezifaneleyo, bahlobe ngokuhlakanipha nokuqonda, kungabi ngezinwele ezelukiweyo, ngegolide, ngamapharele noma ngezembatho ezibizayo.
Kepha okufanele abesifazane abathi bayamesaba uNkulunkulu, ukuba bahlobe ngemisebenzi emihle.
Owesifazane makafunde ukuthula nokuthobeka konke.
Angimvumeli owesifazane ukuba afundise, noma abe negunya phezu kwendoda, kodwa makathule.
Ngokuba u-Adamu wabunjwa kuqala, kwase kulandela u-Eva,
futhi u-Adamu akakhohliswanga, kodwa owesifazane okwathi esekhohlisiwe, waphambuka.
Kepha uyakusindiswa ngokuzala abantwana, uma behlala ekukholweni, othandweni, nasebungcweleni, futhi bezithoba.
Lithembekile leli lizwi elithi: uma umuntu efisa ukuba ngumphathi, ulangazelela umsebenzi omuhle.
Ngakho-ke kufanele ukuba umphathi abe ngumuntu ongasolekiyo, indoda emfazi munye, abe ngozikhuzayo, ozithibayo, ohloniphekileyo, opha izihambi, onobuciko bokufundisa,
ongesiyo inkolotshe yewayini, ongesiso isidlova, kodwa omnene, ongenalo uchuku, ongayikhonzile imali,
ophatha kahle umuzi wakhe; abantwana bakhe bemthobela ngenhlonipho yonke.
Kepha uma umuntu engakwazi ukuphatha kahle umuzi wakhe, pho angaliphatha kanjani ibandla likaNkulunkulu na?
Umphathi makangabi ngumuntu osanda kukholwa, funa athi ngokuphakama, awele ekulahlweni kukaSathane.
Kufanele abe negama elihle kubantu abangesibo abebandla, funa ahlazeke futhi awele esihibeni sikaSathane.
Ngokunjalo namadikoni kufanele abe ngahloniphekile, angabi nolimi olumbaxambili, angabi zinkolotshe zewayini, angayihaheli inzuzo embi,
kodwa agcine imfihlakalo yokukholwa ngonembeza omsulwa.
Kufanele ahlolwe kuqala andukuba abe ngamadikoni, abe ngangasolekiyo.
Ngokunjalo nabesifazane mababe ngabahloniphekileyo, abangahlebi, abazithibayo, futhi abathembekile ezintweni zonke.
Amadikoni mawabe mfazi munye, akwazi ukuphatha kahle abantwana bawo nemizi yawo.
Ngokuba lawo akhonze kahle, azuza igama elihle nesibindi esikhulu ekukholweni kuKhristu uJesu.
Ngikulobela lokhu ngethemba lokuthi ngizakuza kuwe kungakapholi maseko.
Kepha uma ngilibala, yazi ukuthi abantu kumele baziphathe kanjani endlini kaNkulunkulu, eyibandla likaNkulunkulu ophilayo, insika nesisekelo seqiniso.
Akuthandabuzwa ukuthi inkulu imfihlakalo yenkolo yethu yokuthi: Owabonakaliswa engumuntu nje, wafakazelwa nguMoya, wabonwa yizingelosi, washunyayelwa kwabezizwe, bakholwa nguye emhlabeni, wenyuselwa enkazimulweni.
Manje uMoya usho ngokucacileyo ukuthi ngezikhathi zokugcina abanye bayakuhlubuka ekukholweni, banake imimoya edukisayo nezimfundiso zamadimoni,
ngenxa yobumbulu babaqambimanga, abashiswe uphawu kunembeza wabo.
Benqabela ukuganana, bethi akuzilwe ukudla okwadalwa nguNkulunkulu ukuba kwamukelwe, ngokubonga yibo bonke abakholwayo nabalaziyo iqiniso.
Ngokuba konke okudalwe nguNkulunkulu kuhle; akukho nakunye okumele kulahlwe, uma kwamukelwa ngokubonga,
ngokuba kungcweliswa ngezwi likaNkulunkulu nomkhuleko.
Uma ubayala abazalwane ngalokhu, uyakuba yisikhonzi esihle sikaKhristu uJesu, wondliwe ngamazwi okukholwa nemfundiso enhle oyilandelayo.
Kepha zale izinganekwane ezingcolileyo zezalukazi, nokho zejwayeze ukumesaba uNkulunkulu,
ngokuba ukuvocavoca umzimba kusiza kancane, kodwa ukwesaba uNkulunkulu kusiza ezintweni zonke, futhi kunesithembiso kulokhu kuphila nakulokho okuzayo.
Lithembekile leli lizwi, lifanele impela ukwemukelwa,
ngokuba yilokho esikukhandlekelayo, nesikushikashikelayo; lokhu sithembele kuNkulunkulu ophilayo onguMsindisi wabantu bonke, ikakhulu wabakholwayo.
Yala ngalezi zinto, futhi ufundise ngazo.
Makungabi bikho muntu owedelela ubusha bakho, kodwa yiba yisibonelo kwabakholwayo ngokukhuluma, ngokuziphatha, ngothando, ngokukholwa nangokuhlanzeka.
Qikelela ukuba ufunde, uyale, ufundise, ngize ngifike.
Ungasidebeseli isiphiwo sakho, owasiphiwa ngezwi elaphrofethwa, nangokubeka izandla ngamalunga.
Yenza lezi zinto, uzinikele kuzo, ukuze ukuqhubekela phambili kwakho kubonwe yibo bonke.
Ziqaphele wena nemfundiso, uphikelele kukho, ngokuba ngokwenza lokho uyakuzisindisa wena nalabo abakuzwayo.
Ungayikhaci indoda endala, kodwa yiyale njengoyihlo, abesilisa abasebasha njengabafowenu,
abesifazane asebekhulile ubayale njengonyoko, nalabo abasebasha njengodadewenu, ngenhlanzeko yonke.
Hlonipha abafelokazi, abangabafelokazi ngempela.
Kepha uma umfelokazi enabantwana noma abazukulu, labo-ke mabafunde kuqala ukuhlonipha indlu yakwabo, benze okufaneleyo kubazali babo bekhombisa ukubonga, ngokuba lokho kwamukelekile phambi kukaNkulunkulu.
Lowo ongumfelokazi ngempela, ongenabani, uthembele kuNkulunkulu, uhlala enxusa, ekhuleka ubusuku nemini.
Kepha lowo ozinikela ekutamaseni, ufile esaphila.
Bayale ngalezo zinto, ukuze bangabi nakusoleka.
Kodwa uma umuntu engabondli abakubo, ikakhulu abomndeni wakhe, ukulahlile ukukholwa, mubi ukwedlula nongakholwa.
Umfelokazi obegane indoda eyodwa makangafakwa esibalweni uma engakabi neminyaka engama-60.
Kufanele ukuba aziwe ngemisebenzi emihle, njengalowo okhulise kahle abantwana, obe nokuphana ezihambini, ogeze izinyawo zabangcwele, osize abahluphekayo, futhi ozinikele ekwenzeni yonke imisebenzi emihle.
Kepha abafelokazi abasebasha ungabafaki ohlwini, ngokuba uma sebeshiswa yinkanuko bayamdela uKhristu, bafune ukugana,
ngakho-ke bathole icala, ngokuba besaphulile isithembiso sabo sokuqala.
Phezu kwalokho, bafunda ukuvilapha, baphuma bengena izindlu ngezindlu; abagcini nje ngokuvilapha, kodwa bayahleba, bazigaxe kokungesikho okwabo, bakhulume okungafanele.
Ngakho-ke ngiyabayala abafelokazi abasebasha ukuba bagane, bazale izingane, banakekele indlu yabo, ukuze bangasiniki isitha ithuba lokuthuka.
Ngokuba vele kumanje, bakhona abanye asebechezukele kuSathane.
Uma owesifazane okholwayo enezihlobo ezingabafelokazi ngempela, makazisize; ibandla lingasindwa, ukuze lisize abafelokazi boqobo.
Amalunga aphathe kahle, afanele ukuba atuswe ngokuphindwe kabili, ikakhulu lawo akhuthalela ukushumayela nokufundisa.
Ngokuba umbhalo, uthi: “Ungayifaki isimfonyo inkabi ebhulayo,” futhi uthi: “Isisebenzi sifanelwe wumholo waso.”
Ungalemukeli icala elethweswe ilunga kungekho ofakazi ababili noma abathathu.
Labo abonayo ubasole phambi kwabo bonke, ukuze nabanye besabe.
Ngiyaqinisa phambi kukaNkulunkulu noKhristu uJesu nezingelosi ezikhethiweyo, ukuba ulondoloze lezi zinto, ungabandlululi, futhi ungenzi lutho ngokukhetha.
Ungaxhamazeli ubeke izandla kunoma ngubani, futhi ungahlanganyeli ezonweni zabanye, kodwa uhlale umsulwa.
Ungaphuzi amanzi wodwa, kodwa phuza kancane newayini ngenxa yesisu sakho nobuthakathaka obukuvamileyo.
Izono zabanye abantu zisobala, ziyabandulela, zibaholele ekwehlulelweni, kodwa abanye ziyabalandela.
Kanjalo nemisebenzi emihle isobala, noma ingabonakali kodwa ingefihleke.
Bonke abaphansi kwejoka lobugqila mababazise abanumzane babo njengabafanelwe yinhlonipho yonke, ukuze igama likaNkulunkulu nemfundiso kungahlanjalazwa.
Izigqila ezinabanumzane abakholwayo, mazingabedeleli, ngokuba bangabazalwane njengazo, kodwa mazibasebenzele kakhulu, ngokuba bengabakholwayo nabathandekayo, labo abasizakala ngokusebenza kahle kwazo. Fundisa lezi zinto futhi ugqugquzele.
Uma kukhona umuntu ofundisa okwahlukileyo, ephikisana namazwi aqinisileyo eNkosi yethu uJesu Khristu nemfundiso enokwesaba uNkulunkulu;
esekhukhumele, ebe engaqondi lutho, enelukuluku lokuphikisana nokuba nengxabano okuvela kukho umona, umbango, ukuhlambalaza, ukudlinza okubi,
ukuxabana okungapheliyo kwabantu abangqondo yabo yonakalisiwe, futhi abaphucwe iqiniso, abathi ukuzenzela inzuzo kungubuNkulunkulu.
Yebo, ukumesaba uNkulunkulu nokwaneliswa kuyinzuzo enkulu,
ngokuba asilethanga lutho emhlabeni, kusobala futhi ukuthi asiyukumuka nalutho.
Kepha masaneliswe uma sinokudla nokokwembatha.
Kodwa labo abathanda ukuceba, bawela esilingweni, ogibeni, nasezinkanukweni zobuwula eziningi ezilimazayo, ezikhalakathisela abantu ekufeni nasekubhujisweni,
ngokuba ukuthanda imali kuyimpande yabo bonke ububi. Abanye ngokuyifisa kwabo bahlubuka ekukholweni, bazigwaza ngeminjunju eminingi.
Wena muntu kaNkulunkulu, baleka kulezo zinto, kodwa phokophelela ukulunga, ukwesaba uNkulunkulu, ukukholwa, uthando, ukubekezela nobumnene.
Yilwa ukulwa okuhle kokukholwa, ubambelele ekuphileni okuphakade owabizelwa kukho, wakuvuma ukuvuma okuhle phambi kofakazi abaningi.
Ngiyakuyala phambi kukaNkulunkulu onika ukuphila kukho konke, naphambi kukaKhristu uJesu owavuma ukuvuma okuhle phambi kukaPhontiyu Pilatu,
ukuba uwugcine lo myalo ungenasisihla, nakusoleka, kuze kube ngukubonakaliswa kweNkosi yethu uJesu Khristu,
ngesikhathi ayakubonakaliswa ngaso obongekayo nokunguYena ongaphezu kwakho konke, iNkosi yamakhosi, noMbusi wababusi.
Nguye kuphela ongafiyo, ohlala ekukhanyeni okungenakusondelwa kukho, ongakaze abonwe muntu, futhi ongebonwe. Makube kuye udumo namandla aphakade. Amen.
Bayale abacebileyo kuleli lizwe lamanje ukuba bangazikhukhumezi, bangathembeli engcebeni ephelayo, kodwa bathembele kuNkulunkulu osipha konke, ukuba sithokoze ngakho.
Bayale ukuba benze okuhle, bacebe ngokwenza imisebenzi emihle, baphane, futhi babelane.
Ngalokho bazibekela isisekelo esihle sesikhathi esizayo, ukuze bazuze ukuphila okuyikho.
Thimothewu, londa lokhu okubekwe kuwe, ukugweme ukukhuluma okuyize nokuphikisana okuthiwa ulwazi kube kungesilo,
okuthe lapho abanye bekwamukela, baphambuka ekukholweni. Umusa mawube nani.
UPawula, umphostoli kaKhristu uJesu ngokwentando kaNkulunkulu nangokwesithembiso sokuphila okukuKhristu uJesu,
kuThimothewu umntwana othandekayo: makube kuwe umusa, ububele, nokuthula okuvela kuNkulunkulu uBaba nakuKhristu uJesu iNkosi yethu.
Ngiyambonga uNkulunkulu engimkhonzayo ngonembeza omsulwa kusukela kokhokho, njengokuba ngikukhumbula njalo emikhulekweni yami ubusuku nemini,
ngilangazelela ukukubona; ngikhumbula izinyembezi zakho, ukuze ngigcwaliswe ngentokozo.
Lokho kungikhumbuza ukukholwa kwakho okungenakho ukuzenzisa, okwaqala kugogo wakho uLuwisi nakunyoko uYunisi, futhi nginesiqiniseko sokuthi kukhona nakuwe.
Ngakho-ke ngiyakukhumbuza ukuba usivuselele njalo isipho somusa sikaNkulunkulu esikuwe owasithola ngokubekwa yimi izandla.
Ngokuba uNkulunkulu akasiphanga umoya wobugwala, kodwa owamandla, owothando, nowokuzithiba.
Ngakho-ke ungabi namahloni ngobufakazi ngeNkosi yethu, nangami engiyisiboshwa sayo, futhi hlanganyela nami ekulihluphekeleni ivangeli ngamandla kaNkulunkulu.
Lowo owasisindisa, wasibiza ngobizo olungcwele; hhayi ngokwemisebenzi yethu, kodwa ngokwenhloso yakhe, nomusa esawuphiwa kuKhristu uJesu zingakabi bikho izikhathi;
kepha manje osubonakalisiwe ngokufika koMsindisi wethu uKhristu uJesu, owachitha ukufa, waletha ekukhanyeni ukuphila nokungabhubhi ngevangeli.
Ngamiselwa lona ukuba ngibe ngummemezeli, umphostoli, nomfundisi,
okungenxa yalo ngihlupheka. Kodwa anginamahloni, ngokuba ngiyamazi engikholwa kuye, futhi nginesiqiniseko sokuthi Yena unamandla okulondoloza lokho angithwese khona, kuze kufike lolo lusuku.
Landela isibonelo samazwi amahle owawezwa kimi ngokukholwa, nothando olukuKhristu uJesu.
Kulonde lokhu okuhle okubekwe kuwe ngoMoya oNgcwele ohlala kithi.
Uyazi ukuthi bonke abase-Asiya bangihlamukile, kubo kukhona uFilegu noHermogene.
Sengathi iNkosi ingabenzela umusa abendlu ka-Onesiforu, ngokuba ubengihlumelela njalo futhi engenamahloni ngokuboshwa kwami.
Kwathi nalapho esefike eRoma, wangifunisisa waze wangithola.
Sengathi iNkosi ingamenza athole ububele ngalolo lusuku. Wena ukwazi kahle konke angenzela khona e-Efesu.
Ngakho-ke wena mntanami, qina emseni okuKhristu uJesu.
Lokho okuzwile kimi phambi kofakazi abaningi, kwedlulisele kubantu abathembekileyo, abafanele ukufundisa abanye.
Hlanganyela nami ekuhluphekeni njengebutho elihle likaKhristu.
Akekho othi esebenza njengebutho alibale yiminako yalokhu kuphila, kodwa ulwela ukuthokozisa lowo ombuthileyo.
Kanjalo futhi uma umuntu esemncintiswaneni, akanikwa umqhele uma engayilandelanga imithetho yokuncintisana.
Kufanele ukuba umlimi osebenzayo kube nguye othola isabelo sezithelo zokuqala.
Kucabangisise lokhu engikushoyo, ngokuba iNkosi iyakukunika ukuba uziqonde zonke lezi zinto.
Khumbula uJesu Khristu owavuswa kwabafileyo, owolibo lukaDavide, ngokwevangeli lami,
engihlupheka ngenxa yalo kuze kube sekuboshweni njengeselelesi, kodwa izwi likaNkulunkulu aliboshiwe.
Ngakho-ke ngibekezelela konke ngenxa yabakhethiweyo, ukuze nabo bazuze insindiso ekuKhristu uJesu, nenkazimulo yaphakade.
Lithembekile leli lizwi elithi: ngokuba uma safa naye, siyakuphila futhi naye.
Uma sikhuthazela, siyakubusa futhi sikanye naye; uma simphika naye uyakusiphika.
Uma singethembekile, Yena uhlala ethembekile, ngokuba akakwazi ukuziphika.
Bakhumbuze ngalokhu, futhi ubaxwayise phambi kukaNkulunkulu ukuba bangaqophisani ngamazwi, ngokuba lokho akusizi ngalutho, kodwa kukhubekisa abalaleleyo.
Khuthalela ukuba uziveze wethembekile kuNkulunkulu, isisebenzi esingenamahloni, esilifundisa siliqonde izwi leqiniso.
Kepha kugweme ukukhuluma kwezwe okuyize, ngokuba kubhebhezela ukungamesabi uNkulunkulu,
kuthi ukukhuluma kwabo kubhibhe njengesilonda somuna esibhucukayo, okukhona kulabo oHimenewu noFiletu,
abaphambukileyo eqinisweni, bethi ukuvuka kwabafileyo sekwedlulile, futhi bachitha ukholo lwabanye.
Nokho isisekelo esiqinileyo sikaNkulunkulu simi siqinile, sinalolu phawu oluthi: “INkosi iyabazi abangabayo,” nokuthi: “Yilowo nalowo ophatha igama likaKhristu makadede kukho ukungalungi.”
Kepha endlini enkulu akuhlali kuphela izitsha zegolide nezesiliva, kodwa nezokhuni nezebumba; ezinye ngezihloniphekileyo, ezinye ngezingahloniphekile.
Ngakho-ke uma umuntu ezihlanza kulezi zinto, uyakuba yisitsha esihloniphekileyo, esingcwelisiweyo, esinosizo kumninindlu, esilungiselwe wonke umsebenzi omuhle.
Ngakho-ke zibalekele izinkanuko zobusha, uphokophelele ukulunga, ukukholwa, uthando, ukuthula kanye nalabo abakhuleka eNkosini ngenhliziyo ehlanzekileyo.
Kodwa ziqhelelanise empikiswaneni engubuwula nengenangqondo, wazi ukuthi lokho kudala ukulwa.
Inceku yeNkosi ayifanele ukulwa, kodwa ifanele ibe mnene kubo bonke, ibe nekhono lokufundisa, ibekezele,
ibayale ngomoya omnene abamelene nayo, hleze uNkulunkulu abanike ithuba lokuphenduka, baze balivume iqiniso,
basanguluke engqondweni, baphunyuke ogibeni lukaSathane, ababambe ngalo ukuze benze intando yakhe.
Kepha yazi lokhu, ukuthi ngezinsuku zokugcina kuyakufika izikhathi ezinzima.
Ngokuba abantu bayakuba ngabazithandayo, abathandimali, abazigabisayo, abazidlayo, abahlambalazayo, abangabalaleli abazali, abangabongiyo, abahlazisayo,
abangenalo uthando, abangavumi ukubuyisana, abahlebayo, abangenakuzithiba, abayizidlwangudlwangu, abazonda okuhle,
abangabakhapheli, abanamawala, abakhukhumele, abathanda injabulo kunokuthanda uNkulunkulu,
abanesimo sokumesaba uNkulunkulu, kodwa bewaphika amandla okukholwa; labo-ke wobagwema.
Ngokuba kulabo kukhona abacathama bangene ezindlini, bathumbe abesifazane abangenasimilo abanyinyithekiswa yizono, beqhutshwa yizinkanuko ezinhlobonhlobo.
Bafunda njalo, kodwa abafinyeleli ekwazini iqiniso.
Njengokuba uJane noJambre bamelana noMose, kanjalo nalaba bamelana neqiniso, bangabantu abangqondo yabo yonakele, abehlulekayo ekukholweni.
Kepha abayikuqhubekela phambili, ngokuba ubuwula babo buyakuba sobala kubo bonke, njengalokhu baba kanjalo nobalawo madoda.
Kodwa wena walandela ngokucophelela imfundiso yami, ukuziphatha, umgomo, ukukholwa, ukubekezela, uthando, ukuhlupheka,
ukuhlushwa nezinhlupheko ezangehlela e-Antiyokhiya, e-Ikhoniyu naseListra. Izinhlupheko engazihluphekayo, ngazibekezelela, iNkosi yangikhulula kukho konke.
Yebo, bonke abathanda ukuphila ngokumesaba uNkulunkulu bekuKhristu uJesu, bayakuzingelwa.
Kepha abantu ababi nabakhohlisi bazakudlebeleka ebubini, badukise, njengokuba bedukisiwe.
Kodwa wena bambelela kulokho okufundile nowakukholwa, wazi ukuthi ukufunde kobani,
nokuthi kwasebuntwaneni wayazi imibhalo engcwele, enamandla okuhlakaniphisa, kube yinsindiso ngokukholwa kuKhristu uJesu.
Yonke imibhalo iphefumulelwe nguNkulunkulu, ilungele ukufundisa, ukusola, ukuqondisa, nokuyala ekulungeni,
ukuze umuntu kaNkulunkulu aphelele, ahlonyiselwe yonke imisebenzi emihle.
Ngiyakuyala ngokweqiniso phambi kukaNkulunkulu noKhristu uJesu oyakwehlulela abaphilayo nabafileyo, ngokubonakala kwakhe nangombuso wakhe, ngithi:
shumayela izwi, ulungele ukulishumayela, noma kuyisikhathi noma kungesiso. Sola, ukhuze, ugqugquzele ngakho konke ukubekezela nokufundisa.
Ngokuba kuyakufika isikhathi abangayukuyamukela ngaso imfundiso elungileyo, kodwa bayakuzibuthela abafundisi ngokwezinkanuko zabo nangokubatshwa kwezindlebe zabo.
Bayakufulathelisa izindlebe zabo eqinisweni, baphambukele ezinganekwaneni.
Kepha wena zithibe ezintweni zonke, ubekezele ebunzimeni, wenze umsebenzi womvangeli, futhi uwufeze umsebenzi wakho ngokupheleleyo.
Ngokuba mina sengivele ngiyanikelwa, nesikhathi sokumuka sesifikile.
Ngikulwile ukulwa okuhle, ngiliqedile ibanga, ngikugcinile ukukholwa;
manje sengibekelwe umqhele wokulunga eyakungipha wona ngalolo lusuku iNkosi, umehluleli olungileyo, kungeyimi ngedwa, kodwa bonke abakuthandile ukubonakala kwayo.
Phangisa uze kimi ngokushesha.
Ngokuba uDema wangishiya waya eThesalonikha ngenxa yokuthanda leli lizwe lamanje. UKhreske waya eGalathiya, uThithu waya eDalmathiya;
uLuka nguye kuphela onami. Ubokuza noMakhu, ngokuba uwusizo kimi emsebenzini.
UThikhiku ngimthume e-Efesu.
Ijazi engalishiya eThrowa kuKharphu uboliphatha uma uza lapha, nezincwadi, ikakhulu ezesikhumba.
U-Aleksandru, umkhandi wethusi, wenza okubi okuningi kimi; iNkosi iyakuphindesela kuye ngokwemisebenzi yakhe.
Nawe-ke umxwaye, ngokuba wamelana kakhulu namazwi ethu.
Ekuziphenduleleni kwami kokuqala, kwakungekho noyedwa owayengakimi, kodwa bonke bangihlamuka; sengathi lokho kungebalelwe kubo.
Kepha iNkosi yangimela, yangipha amandla ukuba intshumayelo ipheleliswe ngami, kuthi bonke abezizwe bayizwe, futhi ngakhululwa emlonyeni wengonyama.
INkosi iyakungihlenga kuyo yonke imisebenzi emibi, ingivikele, ngize ngifinyelele embusweni wayo ezulwini: makube kuyo inkazimulo kuze kube phakade naphakade.
Khonza kuPhriska, ku-Akhwila nakwabendlu ka-Onesiforu.
U-Erastu wasala eKhorinte, kodwa uThrofimu ngamshiya egula eMilethu.
Phangisa uze lapha, bungakangeni ubusika. Bayakhonza o-Ewubulu, uPhude, uLinu, uKlawudiya nabo bonke abazalwane.
INkosi mayibe nomoya wakho. Umusa ube nani.
UPawula, inceku kaNkulunkulu nomphostoli kaJesu Khristu, ngenxa yokokukholwa kwabakhethiweyo bakaNkulunkulu, nangokulazi iqiniso eliholela ekumesabeni uNkulunkulu,
nasethembeni lokuphila okuphakade, uNkulunkulu ongawaqambi amanga akwethembisa zingakabi bikho izikhathi zaphakade,
okuthe ngesikhathi esifaneleyo walibonakalisa izwi lakhe entshumayelweni engayiphathiswa ngokomyalo kaNkulunkulu uMsindisi wethu.
KuThithu, umntanami, ngokweqiniso ekukholweni esikuhlanganyele sonke: makube kuwe umusa nokuthula okuvela kuNkulunkulu uBaba nakuKhristu uJesu uMsindisi wethu.
Ngakushiya eKhrethe ngenhloso yokuba uqondise obekusasele, futhi njengalokhu ngakuyala, uqoke amalunga kuyo yonke imizi,
uma kungumuntu ongasolekiyo, indoda emfazi munye, enabantwana abakholwayo, abangasoleki ngokungabi nasimilo nangokungalaleli.
Ngokuba kubalulekile ukuba umphathi abe ngongasolekiyo njengomphathimuzi kaNkulunkulu, angabi ngoziqhenyayo, oshesha ukuthukuthela, oyinkolotshe, oyisidlova, ohahela inzuzo embi.
Kepha makabe ngophanayo kuzo izihambi, othanda okuhle, onengqondo, oqotho, ongcwele, ozithibayo,
obambelele ezwini elithembekileyo ngokwemfundiso, okwaziyo ukugqugquzela abanye ngemfundiso elungileyo nokudalula abaphikisana nayo.
Ngokuba baningi abamelene neqiniso, abakhuluma okuyize, nabakhohlisayo, ikakhulu abokusoka,
okufanele bavalwe umlomo bathuliswe, abadunga wonke umndeni, befundisa okungafanele ngenxa yenzuzo embi.
Omunye wabo, umphrofethi wakubo, wathi: “AbaseKhrethe bangabaqambimanga njalo, izilwane ezimbi, neziminzi ezivilaphayo.”
Lobo bufakazi buqinisile. Ngalokho-ke bakhuzisise, ukuze baphile ekukholweni,
benganaki izinganekwane zabaJuda nemiyalo yabantu abafulathela iqiniso.
Kwabahlanzekileyo konke kuhlanzekile, kepha kwabangcolileyo nabangakholwayo akukho lutho oluhlanzekileyo, kodwa kungcole ingqondo nonembeza wabo.
Bavuma ukuthi bayamazi uNkulunkulu, kepha bayamphika ngemisebenzi yabo, bangabenyanyekayo, abangalaleli, abangalungele lutho oluhle abangalwenza.
Kepha wena khuluma ngalokho okufanele imfundiso elungileyo,
ethi: amadoda amadala mawabe ngazithibayo, ahloniphekile, anengqondo, aphilile ekukholweni, othandweni nasekubekezeleni.
Kanjalo nabesifazane abadala mabaziphathe ngokufanele ubungcwele, bangabi yizinhlebi, nezigqila zewayini, kodwa babe ngabafundisi bokuhle,
ukuze bagqugquzele abesifazane abasebasha ukuba bathande abayeni babo, nabantwana babo,
babe ngabanengqondo, abamsulwa, abaphatha kahle amakhaya abo, abalungile, abathobela abayeni babo, ukuze lingahlanjalazwa izwi likaNkulunkulu.
Kanjalo bayale nabesilisa abasebasha ukuba babe ngabanengqondo.
Zibonakalise kukho konke lokhu uyisibonelo semisebenzi emihle, ubonise ubuqotho ekufundiseni nesizotha,
ukhulume okuqotho okungasolekiyo, ukuze ahlazeke omelana nathi, angabi nalutho olubi angalusho ngathi.
Ngokunjalo ziyale izinceku ukuba zibathobele ezibasebenzelayo, zibathokozise kukho konke, zingaqagulisani nabo,
zingantshontshi, zikhombise konke ukukholwa okuhle, ukuze ivunuliswe ngobuhle imfundiso kaNkulunkulu uMsindisi wethu ezintweni zonke.
Ngokuba umusa kaNkulunkulu wokusindisa ubonakalisiwe kubantu bonke;
uyasifundisa ukuba sidele ukungakholwa nezinkanuko zezwe, sihambe ngokuqonda, ngokulunga, nangokumesaba uNkulunkulu kulesi sikhathi samanje,
silindele ithemba elibusisiweyo nokubonakala kwenkazimulo kaNkulunkulu omkhulu noMsindisi wethu uJesu Khristu,
owazinikela ngenxa yethu, ukuze asihlenge ebubini bonke, azihlambululele isizwe esingesakhe, esinokushisekela imisebenzi emihle.
Khuluma ngalokho, ugqugquzele, ukhuze ngawo wonke amandla. Makungabi bikho namunye okwedelelayo.
Bakhumbuze ukuba bathobele ababusi neziphathimandla, balalele, futhi bakulungele ukwenza yonke imisebenzi emihle;
bangahlambalazi muntu, bangabi ngophumasilwe, kodwa babe nenhliziyo enhle, babe mnene kubo bonke abantu.
Ngokuba nathi kade sasiyiziwula, singalaleli, sidukiswa, siyizigqila zezinkanuko nokutamasa okunhlobonhlobo, siphila ebubini, sinomona, sizondwa futhi sizondana.
Kepha lapho sebubonakalisiwe ububele bukaNkulunkulu uMsindisi wethu nothando lwakhe kubantu,
wasisindisa; hhayi ngemisebenzi yokulunga esayenza, kodwa ngokwesihawu sakhe, ngokugezwa kokuphindu kuzalwa, ngokuba senziwe basha ngoMoya oNgcwele,
amthululela ngokwevileyo phezu kwethu, ngaye uJesu Khristu uMsindisi wethu,
ukuze sithi silungisiswe ngomusa wakhe, sibe yizindlalifa zokuphila okuphakade ngokwethemba.
Lithembekile leli lizwi: ngithanda ukuba ugcizelele impela ngalokhu, ukuze abakholwa nguNkulunkulu bakhuthalele ukwenza imisebenzi emihle. Phela lezo zinto zinhle, futhi zinosizo kubantu,
kodwa yigweme impikiswano ewubuwula, izindaba zolibo lokuzalana, imibango, nokuphikisana ngomthetho, ngokuba lokho akusizi, futhi kuyimbude.
Mgweme umuntu odala ukwehlukana uma usumyale kanye nomakabili,
wazi ukuthi lowo muntu uphambukile, uyona, futhi uzahlulela yena.
Kuyakuthi uma sengithuma u-Arethema noma uThikhiku kuwe, uphuthume uze kimi eNikhopholi, ngokuba senginqumile ukuthi ngihlale lapho ebusika.
UZena, ummeli, no-Apholo basendleleni, uqinisekise ukuthi abasweli lutho.
Abantu bakithi mabakukhuthalele ukwenza imisebenzi emihle ukuba basize lapho kuswelekile, ukuze bangabi ngabangenazithelo.
Bonke abanami bayakhonza kuwe. Khonza kwabasithandayo ekukholweni. Umusa mawube nani nonke.
UPawula, isiboshwa sikaKhristu uJesu noThimothewu umzalwane, kuFilemoni isithandwa nesisebenzi kanye nathi,
naku-Afiya udadewethu no-Arkhiphu obutho linye nathi, nasebandleni elibuthanela emzini wakho:
makube kini umusa nokuthula okuvela kuNkulunkulu uBaba wethu naseNkosini uJesu Khristu.
Ngiyambonga uNkulunkulu wami njalo lapho ngiphatha igama lakho emkhulekweni wami,
ngokuba ngiyezwa ngothando nokukholwa onakho eNkosini uJesu, nakubo bonke abangcwele.
Ngikhulekela ukuba ukwabelana ngokholo lwakho kungaba nempumelelo lapho ubona konke okuhle esinakho kuKhristu.
Uthando lwakho lwangithokozisa kakhulu futhi lwangigqugquzela, ngokuba izinhliziyo zabangcwele zivuselelekile ngawe mfowethu.
Ngakho-ke nanxa nginesibindi esikhulu kuKhristu ukukujuba ukuba wenze okufaneleyo,
nokho kungcono ukuba, ngenxa yothando, mina Pawula, osemdala futhi oyisiboshwa sikaKhristu uJesu, ngikuncenge.
Ngikuncenga ngomntanami u-Onesimu, engimzale njengoba ngiboshiwe.
Wayekade engenamsebenzi walutho kuwe, kodwa manje uselusizo kithi sobabili.
Ngimthumele kuwe, yena oyinhliziyo yami,
ebengifisa ukumgcina ahlale lapha ukuze angisize esikhundleni sakho, njengoba ngisaboshwe ngenxa yevangeli.
Kepha angithandanga ukwenza utho ngaphandle kwemvume yakho, ukuze okuhle okwenzayo kungabi ngokuphoqwa, kodwa kube ngokuthanda kwakho.
Mhlawumbe yingakho nehlukana okwesikhashana, ukuze abuyele kuwe, abe ngowakho kuze kube phakade,
engaseyiso isigqila, kodwa okungaphezu kwesigqila, esengumzalwane othandekayo kimi, kakhulu kangakanani kuwe, enyameni naseNkosini.
Ngakho-ke uma singababambisene, memukele yena kungathi wemukela mina.
Kepha uma kukhona akone ngakho noma anecala kuwe ngakho, kubalele kimi lokho.
Mina, Pawula, ngikulobele ngesandla sami, ngiyakukubuyisela, ukuze ngingasho kuwe ukuthi unecala kimi ngoba oyikho, uyikho ngami.
Yebo, mfowethu, sengathi ngingakufumana lokhu kuwe eNkosini. Hlumelela inhliziyo yami kuKhristu.
Ngikulobela lokhu ngoba ngineqiniso lokuthi uzongilalela, ngiyazi futhi ukuthi engikushilo ngenhla uzokwenza.
Okunye-ke ngilungiseleni indawo lapho ngizogogobala khona, ngoba ngiyethemba ukuthi ngenxa yemikhuleko yenu, ngizobuyiselwa kini.
Uyakhonza u-Ephafra, engiyisiboshwa kanye naye ngenxa kaKhristu uJesu,
kanjalo noMakhu, u-Aristakhusi, uDema noLuka, esibambisene nabo emsebenzini.
Umusa weNkosi yethu uJesu Khristu mawube nomoya wenu.
UNkulunkulu wakhuluma emandulo kokhokho ngabaphrofethi, ngezindlela eziningi nangamathuba amaningi.
Ekugcineni kwale mihla, ukhulume kithi ngeNdodana ayimise ukuba ibe yindlalifa yakho konke, futhi owadala ngayo izwe.
Yona ethi ingukubengezela kwenkazimulo yakhe futhi ifuze Yena luqobo, iphasa konke ngezwi lamandla ayo. Ithe seyenzile ukuhlanzwa kwezono, yahlala ngakwesokunene soMkhulu kweliphezulu.
Seyaba nkulu kunezingelosi, njengoba igama eliyifa layo likhulu kunelazo.
Ngokuba yiyiphi phakathi kwezingelosi ake athi kuyo: “Wena uyiNdodana yami, namuhla ngikuzele,” na? nokuthi: “Ngiyakuba nguYise kuyona, Yona ibe yiNdodana kimina,” na?
Mhla futhi eletha izibulo emhlabeni uthi: “Izingelosi zonke zikaNkulunkulu mazikhuleke kuye.”
Nangezingelosi, uthi: “Owenza izingelosi zakhe zibe yimimoya, izikhonzi zakhe zibe ngamalangabi omlilo.”
Kepha ngeNdodana, uthi: “Isihlalo sakho sobukhosi, Nkulunkulu, simi kuze kube phakade; nentonga yokulunga, iyintonga yombuso wakho.
Uthandile ukulunga, wazonda ububi; ngakho-ke uNkulunkulu, uNkulunkulu wakho, ukugcobile ngamafutha enjabulo ngaphezu kwabangani bakho.”
Nokuthi: “Wena Nkosi, ekuqaleni wabeka isisekelo somhlaba; amazulu angumsebenzi wezandla zakho.
Wona ayobhubha, kodwa Wena umi njalo, wona wonke ayoguga njengengubo.
Njengesembatho uyakuwasonga, ayakuguquka njengengubo, kodwa Wena unguye njalo iminyaka yakho ayiyukuphela.”
Kepha yiyiphi ezingelosini ake asho kuyo ukuthi: “Hlala ngakwesokunene sami, ngize ngibeke izitha zakho zibe yisenabelo sezinyawo zakho” na?
Izingelosi zonke aziyibo yini omoya bokukhonza abathunyelwe ukukhonza ngenxa yalabo abayakudla ifa lensindiso na?
Ngakho-ke kufanele kakhulu ukuba sibambisisise lokho esikuzwileyo, funa siphambuke kukho.
Ngokuba izwi elakhulunywa ngezingelosi laqiniswa, nakho konke ukuphambuka nokungalaleli kwajeziswa ngokufanaleyo.
Pho thina siyakuphunyuka kanjani, uma sidebesela insindiso enkulu kangaka na? Lena eyashunyayelwa kuqala ngeNkosi, yaqiniswa kithina yilabo abayizwayo.
UNkulunkulu efakaza kanye nabo ngezibonakaliso, ngezimangaliso, ngemisebenzi yamandla enhlobonhlobo, nangokwabelwa kukaMoya oNgcwele ngokwentando yakhe.
Ngokuba izwe elizayo esikhuluma ngalo kalithobiselanga phansi kwezingilosi.
Kepha omunye ufakazile kwenye indawo, wathi: “Umuntu uyini ukuba umkhumbule, noma indodana yomuntu ukuba uyinake na?
Okwesikhashana wamenza ngaphansana kwezingelosi, wamfaka umqhele wenkazimulo nodumo, wammisa phezu kwemisebenzi yezandla zakho, zonke izinto wazibeka phansi kwezinyawo zakhe.”
Lapho ebeka konke phansi kwezinyawo zakhe, kashiyanga lutho okungabekwanga phansi kwakhe. Kepha manje asikaziboni izinto zonke zibekwe phansi kwakhe.
Kepha siyambona uJesu, owenziwa waba ngaphansana kwezingelosi isikhashana, esethweswe manje umqhele wenkazimulo nodumo, ngenxa yokuba wahlupheka waze wafa, ukuze ngomusa kaNkulunkulu ezwe ukufa ngenxa yabo bonke.
Ngokuba kwakumfanele Yena, okukhona konke ngenxa yakhe, futhi okukhona ngaye, ukuba lapho eyisa amadodana amaningi enkazimulweni, amphelelise ngezinhlupheko lowo oyisiqalo sensindiso yabo.
Ngokuba ongcwelisayo nalabo abangcweliswayo bonke bavela koyedwa. Yingakho engenamahloni okubabiza ngokuthi ngabafowethu,
ethi: “Ngizakushumayela igama lakho kubafowethu, ngikuhubele phakathi kwebandla,”
futhi uthi: “Ngiyakubeka ithemba lami kuye,” abuye athi: “Sengilapha, mina nabantwana uNkulunkulu anginike bona.”
Ngakho-ke njengalokhu abantwana bahlanganyela igazi nenyama, naye uqobo wahlanganyela khona lokho, ukuze ngokufa kwakhe ambhubhise onamandla phezu kokufa; uSathane,
akhulule bonke okwathi ngokwesaba ukufa besaphila, baboshelwa ebugqileni.
Ngokuba kuyakhanya ukuthi akezanga ukuzosiza izingelosi, kodwa labo abayinzalo ka-Abhrahama.
Ngakho kwamfanela ukuba abe njengabafowabo kukho konke, ukuze abe ngumphristi omkhulu onozwelo nothembekileyo kokukaNkulunkulu, kube yinhlawulo yezono zabantu.
Njengalokhu Yena uqobo wahlupheka elingwa, unamandla okusiza abalingwayo.
Ngakho-ke bazalwane abangcwele enihlanganyela obizweni lwasezulwini, bhekisisani umPhostoli nomPhristi omkhulu wesivumo sethu, uJesu,
owethembeka kulowo owammisayo, njengoMose naye owayenjalo endlini yakhe yonke.
Ngokuba lo ubonakale eyifanele inkazimulo enkulu kunoMose, njengalokhu umakhi wendlu unodumo olukhulu kunendlu.
Ngokuba indlu nendlu yakhiwa ngothile, kodwa owakhe konke nguNkulunkulu.
UMose wayethembekile endlini yakhe yonke njengenceku, ukuze kube ngubufakazi balokho obekuzakukhulunywa.
Kepha uKhristu uthembekile njengendodana phezu kwendlu yakhe, esiyindlu yakhe thina, uma sibambisisa ngeqholo nangokuzigabisa ngethemba kuze kube sekupheleni.
Ngakho-ke njengalokhu uMoya oNgcwele esho: “Namuhla, uma nilizwa izwi lakhe,
ningazenzi lukhuni izinhliziyo zenu njengasekuhlubukeni ngosuku lokulingwa ehlane,
lapho okhokho benu bangilinga bengihlola, nakuba babeyibonile imisebenzi yami.
Ngalokho-ke iminyaka engamashumi amane, nganengwa yileso sizukulwane, ngaze ngathi: ‘Bayaduka njalonjalo enhliziyweni yabo, abazange bazazi izindlela zami,’
njengalokhu ngafunga ngithukuthele, ngathi: ‘Abayukungena ekuphumuleni kwami.’ ”
Bazalwane, qaphelani ukuba kungabi bikho nakoyedwa inhliziyo embi, engakholwayo, emhlubukisa kuNkulunkulu ophilayo,
kodwa gqugquzelanani imihla ngemihla inqobo nje uma kusathiwa namuhla, ukuze kungabi bikho kini eyenziwa lukhuni inhliziyo yakhe ikhohliswa yisono.
Ngokuba singabahlanganyela kuKhristu, uma impela sibambisisa ithemba lethu lokuqala kuze kube sekupheleni.
Uma kuthiwa: “Namuhla, uma nilizwa izwi lakhe, ningazenzi lukhuni izinhliziyo zenu njengasekuhlubukeni.”
Pho-ke yibaphi abezwayo bahlubuka na? Akusibo yini bonke abaphuma eGibhithe ngoMose na?
Ngobani-ke ayebathukuthelele iminyaka engama-40 na? Kwakungesibo yini labo abonayo, abazidumbu zabo zadindiliza ehlane na?
Ngobani futhi afunga kubo wathi abayukungena ekuphumuleni kwakhe uma kungesibo labo abangamlalelanga na?
Siyabona ukuthi babengeke bangene ngenxa yokungakholwa.
Ngakho-ke lokhu kusekhona isithembiso sokungena ekuphumuleni kwakhe, masesabe, ukuze kungabi bikho namunye, funa kube khona oyedwa kini obonakala esala emuva esithembisweni sokungena, esisekhona.
Ngokuba impela nathi sashunyayezwa ivangeli njengabo, kodwa izwi abalizwayo alizange libasize bona, lokhu bengalemukelanga ngokukholwa lapho belizwa.
Ngokuba thina esikholwayo siyangena ekuphumuleni njengokusho kwakhe, ethi: “Kanjalo ngafunga ngithukuthele, ngathi: ‘Abasoze bangena ekuphumuleni kwami,’ ” nakuba imisebenzi yakhe yayisiqediwe kwasekusekelweni komhlaba.
Phela endaweni ethile ushilo ngosuku lwesikhombisa ukuthi: “UNkulunkulu waphumula ngosuku lwesikhombisa emisebenzini yakhe yonke.”
Nakule ndawo futhi, uthi: “Abayukungena nhlobo ekuphumuleni kwami.”
Ngakho-ke kuyakhanya ukuthi abathile babekelwe ukungena ekuphumuleni, nalabo ekuqaleni abalizwa ivangeli abangenanga ngenxa yokungalaleli kwabo.
Uyanquma futhi usuku okuthiwa Namuhla, esho ngoDavide emva kwesikhathi esingaka, njengalokhu kwashiwo ngaphambilini ukuthi: “Namuhla, uma nilizwa izwi lakhe, ningazenzi lukhuni izinhliziyo zenu.”
Ngokuba ukuba uJoshuwa wayebafikisile endaweni yokuphumula, wayengayukuphinda akhulume ngolunye usuku.
Ngakho-ke likhona iSabatha kubantu bakaNkulunkulu.
Ngokuba ongenile ekuphumuleni kwakhe yena uyaphumula emisebenzini yakhe njengalokhu uNkulunkulu aphumula kweyakhe.
Ngakho-ke masikukhuthalele ukungena kulokho kuphumula, ukuze kungawi muntu ngenxa yokulandela isibonelo sokungalaleli.
Phela izwi likaNkulunkulu liphilile, linamandla, libukhali kunezinkemba zonke ezisika nganhlangothi zombili, lihlaba kuze kuhlukaniswe umphefumulo nomoya, amalunga nomnkantsha, lehlulela imicabango, nezizindlo zenhliziyo.
Akukho lutho futhi oludaliweyo olungabonakali phambi kwakhe, kodwa konke kwambuliwe kwaba sobala emehlweni akhe, yena esiyakuzilanda kuye.
Ngakho-ke lokhu sinomPhristi omkhulu kakhulu odabule amazulu, uJesu iNdodana kaNkulunkulu, masibambelele kuso isivumo sethu.
Ngokuba asinaye umPhristi omkhulu ongenakuzwelana nobuthakathaka bethu, kodwa lowo olingiwe kukho konke njengathi, ebe engenasono.
Ngakho-ke masisondele ngesibindi esihlalweni somusa ukuze samukeliswe isihawu, sifumane umusa wokusiza ngesikhathi esifaneleyo.
Ngokuba yilowo nalowo mphristi omkhulu okhethwa kubantu, umiselwa abantu kokukaNkulunkulu, ukuze anikele izipho nemihlatshelo ngenxa yezono;
ukuba babaphathe kahle labo abangazi nabadukayo, lokhu naye uhaqwe ngubuthakathaka;
ngenxa yabo, kufanele ukuba njengalokhu enikela imihlatshelo ngenxa yezono zabantu, anikele kanjalo nangezakhe.
Akukho muntu ozithathela leso sikhundla, kodwa uyabizwa nguNkulunkulu njengalokhu kwaba njalo naku-Aroni.
Kanjalo noKhristu akazinikanga Yena udumo lokuba ngumPhristi Omkhulu, kodwa wadunyiswa yilowo owakhuluma kuye wathi: “Wena uyiNdodana yami; namuhla ngikuzele.”
Njengalokhu esho kwenye indawo, ethi: “Wena ungumphristi kuze kube phakade ngokokuma kukaMelkhizedeki.”
Okwathi ngezinsuku esesemhlabeni wanikela ngemikhuleko, nangokunxusa, nangokukhala okukhulu, nangezinyembezi kulowo onamandla okumsindisa ekufeni; wezwakala ngenxa yokumesaba uNkulunkulu.
Nakuba eyiNdodana, wafunda ukulalela ngalokho ahlupheka ngakho,
okuthe esephelelisiwe waba ngumthombo wensindiso yaphakade kubo bonke abamlalelayo.
Wabizwa nguNkulunkulu ngokuthi ungumphristi omkhulu ngokokuma kukaMelkhizedeki.
Kuningi esingakusho ngalokho, kodwa kulukhuni ukunichazela, ngokuba nilukhuni ukuzwa.
Lokhu benifanele ukuba nibe ngabafundisi, ukuba kuya ngesikhathi eninaso, niyadinga ukuba kube khona ozakunicathulisa, anifundise iziqalo zemfundiso yezwi likaNkulunkulu; nisadinga ubisi, hhayi ukudla okuqinileyo.
Ngokuba lowo nalowo osaphuza ubisi akakakuqondi okwezwi lokulunga, ngokuba useyingane.
Kepha ukudla okuqinileyo kungokwabakhulileyo, asebenomqondo oqeqeshekileyo, asebekwazi ukwehlukanisa okuhle nokubi.
Ngakho-ke masedlule emfundisweni yokuqala ngoKhristu, siqhubekele phambili kokupheleleyo, singabuyi sibeke isisekelo sokuphenduka emisebenzini efileyo, nokukholwa nguNkulunkulu,
nemfundiso ngombhabhadiso, ngokubeka izandla, ukuvuka kwabafileyo, nokwehlulelwa okuphakade.
Lokho siyakukwenza uma uNkulunkulu evuma.
Ngokuba akunakwenzeka ukuba labo asebake bakhanyiswa, banambitha isiphiwo sasezulwini, benziwa abahlanganyeli kuMoya oNgcwele,
banambitha izwi elihle likaNkulunkulu namandla ezwe elizayo;
akunakwenzeka ukuba bathi sebehlubukile, bayibethela bona uqobo iNdodana kaNkulunkulu, ukuba babuye futhi baphenduke, lokhu bayithele ngehlazo obala.
Ngokuba umhlabathi uyayiphuza imvula elokhu iwela kuwo, uhlumise imifino ebasizayo labo abawulinyelwayo, wamukele isibusiso kuNkulunkulu.
Kepha uma uveza ameva namakhakhasi, awunamsebenzi walutho, futhi kusele kancane ukuba uqalekiswe, ngokuba isiphetho sawo ngukushiswa.
Kepha bathandekayo, noma sikhuluma kanje, sineqholo lokuthi ninakho okungcono okuqondene nensindiso.
Ngokuba uNkulunkulu akasiye ongalungile ukuba akhohlwe ngumsebenzi wenu nothando enalubonakalisa egameni lakhe, lokhu ngokukhonza abangcwele, futhi enisalokhu niqhubeka nibakhonza.
Sifisa sengathi kungaba yilowo nalowo kini akhombise lokho kushisekela okufanayo, lize lipheleliswe ithemba lenu kuze kube sekugcineni;
ukuze ningabi ngamavila, kodwa nilingise labo okuthe ngokukholwa nangokubekezela badla ifa lezithembiso.
Ngokuba ngesikhathi uNkulunkulu ethembisa u-Abhrahama, wazifunga Yena uqobo, ngokuba wayengekho omkhulu kunaye ayengamfunga,
wathi: “Impela ngiyakukubusisa nokukubusisa, ngikwandise nokukwandisa.”
Ngakho-ke esebekezele, wakuzuza akwethenjiswayo.
Phela abantu bafunga omkhulu kunabo; kubona isifungo siyakuqeda ukuphikisana konke, siqinise.
Ngalokho-ke uNkulunkulu ethanda kakhulu ukubonisa izindlalifa zesithembiso icebo lakhe elingaguquki, waliqinisekisa ngesifungo,
ukuze ngezinto ezimbili ezingenakuguquleka, okungelula ukuba uNkulunkulu angaqamba amanga ngazo: thina esigijimile ukuyobamba ithemba esilimiselweyo, sifumane ukugqugquzeleka okukhulu.
Leli themba sinalo linjengehange lomphefumulo, liqinile, ligxilile, lingena kokungaphakathi kwesihenqo,
lapho uJesu eyisigijimi wasandulela wangena khona, sewaba ngumphristi omkhulu kuze kube phakade, ngokokuma kukaMelkhizedeki.
UMelkhizedeki lo, yinkosi yaseSalema, umphristi kaNkulunkulu oPhezukonke, owahlangabeza u-Abhrahama mhla ebuya ekubulaleni amakhosi, wambusisa;
u-Abhrahama wamabela okweshumi kukho konke, yena ogama lakhe okokuqala uma lihunyushwa lisho ukuthi inkosi yokulunga, bese kuba yinkosi yaseSalema, okuchaza ukuthi inkosi yokuthula.
Kanayise, kananina, kanaluzalo, kanasiqalo sezinsuku nakuphela kokuphila, kodwa enziwe wafana neNdodana kaNkulunkulu, uyohlala engumphristi kuze kube phakade.
Bonani-ke ukuthi mkhulu kangakanani lo owanikwa okweshumi kwempango ngu-Abhrahama ukhokho.
Nalabo bamadodana kaLevi abamukeliswa ubuphristi, bayaliwe ukuba bathathe okweshumi kubantu ngokomthetho, okusho ukuthi kubafowabo, nakuba nabo bengabokhalo luka-Abhrahama.
Kepha yena ongaveli olibeni lwabo, wemukela okweshumi ku-Abhrahama, wambusisa lowo onezithembiso.
Kepha akunakuphikwa ukuthi omncinyane ubusiswa ngomkhulu.
Lapha-ke abantu abafayo bemukeliswa okweshumi, kodwa lapho ngofakazelwa ukuthi uyaphila.
Kungashiwo ukuthi uLevi uqobo wemukela okweshumi, wakhokha okweshumi ngaye u-Abhrahama,
ngokuba wayesesokhalo lukayise mzukwana uMelkhizedeki emhlangabeza.
Uma-ke ukuphelela kutholakala ngobuphristi bukaLevi ngokuba isizwe samiselwa bona ngomthetho, pho kusadingeke ngani ukuba kuvele omunye umphristi ngokokuma kukaMelkhizedeki, kungabi ngokohlelo luka-Aroni na?
Ngokuba lapho kunoguquko ebuphristini, kuba nesidingo sokuba kuguqulwe nomthetho.
Ngoba lowo okushiwo ngaye lokho, ungowesinye isizwe okungakaze kube khona muntu kuso owake wakhonza e-althare.
Kusobala ukuthi iNkosi yethu ivele kuJuda, isizwe uMose angakhulumanga lutho ngaso mayelana nobuphristi.
Kusobala kakhulu lokho, uma kumiswa omunye umphristi ofana noMelkhizedeki,
ongamiswanga ngokomthetho womyalo wabantu, kodwa ngamandla okuphila okungabhubhiyo.
Ngokuba kufakazwa ngaye ukuthi: “Wena ungumphristi kuze kube phakade, ngokokuma kukaMelkhizedeki.”
Kukhona ngakolunye uhlangothi ukwesulwa komthetho wokuqala ngenxa yokuba ubuthakathaka, futhi ungasizi ngalutho,
lokhu akukho okupheleliswe ngomthetho, yingakho-ke sesinikwe ithemba elingcono, okungalo sisondela kuNkulunkulu.
Lokho akubanga ngenxa yokufunga, ngokuba laba babekwa baba ngabaphristi ngaphandle kokufunga,
kepha yena wabekwa ngokufunga nguye owakhuluma kuye, ethi: “INkosi yafunga, ayiyukuzisola, yathi: ‘Wena ungumphristi kuze kube phakade.’ ”
Kungenxa yalokho-ke uJesu waba yisiqinisekiso sesivumelwano esingcono.
Kepha abaphristi bokuqala babebaningi, ngokuba bathiywa ngukufa ukuba baqhubeke njalo,
kodwa uJesu Yena, ngenxa yokuthi uphila ingunaphakade, unobuphristi obungenakuguquka.
Ngakho-ke unamandla okusindisa ngokupheleleyo laba abeza kuNkulunkulu ngaye, lokhu ephila ukuba abamele njalo.
Ngokuba umphristi omkhulu onjengaye usifanele thina; ongcwele, ongenacala, ongenasici, owehlukanisiwe kwabayizoni, owenziwe waphakama phezu kwamazulu.
Akadingi, njengabanye abaphristi abakhulu, ukuba imihla ngemihla anikele ngemihlatshelo ngenxa yezono zakhe kuqala, bese kuba ngenxa yezabantu, ngokuba wakwenza lokho kwaba kanye mhla ezinikela Yena.
Ngokuba umthetho ubeka abantu abanobuthakathaka ngokwemvelo ukuba babe ngabaphristi abakhulu, kodwa izwi lesifungo elalandela umthetho libeka iNdodana ephelelisiwe, kuze kube phakade.
Umongo walokhu esinitshela khona yilo: sinomphristi omkhulu onjalo, osewahlala ngakwesokunene sesihlalo sobukhosi soMkhulu emazulwini,
uyisikhonzi sokungcwele nesethabanakeli lempela, elamiswa yiNkosi, hhayi umuntu.
Ngokuba yilowo nalowo mphristi omkhulu, ugcotshelwe ukunikela ngeminikelo nemihlatshelo. Ngakho-ke kudingekile ukuba naye luqobo abe nakho okuthile azonikela ngakho.
Ukuba ubesemhlabeni ubengeke abe ngumphristi nakanye, ngokuba bakhona abaphristi abanikela ngeminikelo ngokomthetho,
bekhonza okungumfanekiso nesithunzi sokwasezulwini, njengalokhu wayalwa uMose esezakuqeda ukwenza ithabanakeli, kwathiwa: “Uyokwenza konke ngesifanekiso salokho owakuboniswa entabeni.”
Kepha manje unikwe inkonzo enhle ngokwedlulele, njengalokhu engumxhumanisi wesivumelwano esihle kakhulu, esimisiwe ngokwezithembiso ezinhle kakhulu.
Ngokuba uma leso sivumelwano sokuqala sasingenasici, bekungeke kufunwe isivumelwano sesibili.
Kepha lapho ebasola, uthi kubo: “Niyabona, izinsuku ziyeza,” kusho iNkosi, “lapho ngiyakwenza isivumelwano esisha nendlu ka-Israyeli nendlu kaJuda,
esingafani nesivumelwano engasenza nokhokho babo mhla ngibabamba ngesandla ngibakhipha eGibhithe; ngokuba abasigcinanga isivumelwano sami, nami angibanakanga,” kusho iNkosi.
“Ngokuba yilesi isivumelwano engiyakusenza nendlu ka-Israyeli emva kwalezo zinsuku,” kusho iNkosi: “ngiyakufaka imithetho yami engqondweni yabo, ngiyilobe ezinhliziyweni zabo, ngiyoba nguNkulunkulu wabo, bona babe ngabantu bami.
Abasayukufundisana, kube yilowo nalowo efundisa owakubo, nomunye efundisa umfowabo, ethi: ‘Yazi iNkosi.’ Ngokuba bonke bayakungazi, kusukela kwabancane kuya kwabadala.
Ngokuba ngiyakubahawukela nakuba bonile, ngingabe ngisazikhumbula nezono zabo.”
Uma ethi: “Esisha,” kusho ukuthi esokuqala sesiphelelwe yisikhathi, ngakho-ke osekuphelelwe yisikhathi, futhi sekukudala, sekuseduze ukuba kushabalale.
Kanjalo nesivumelwano sokuqala sasinezimiso zenkonzo nendlu engcwele yasemhlabeni.
Ngokuba kwakhiwa ithabanakeli lokuqala okwakukhona kulo uthi lwezibani, itafula, nesinkwa sokubukwa; libizwa ngokuthi yiNdawo eNgcwele.
Emva kwesihenqo sesibili kwakukhona ithabanakeli okuthiwa ngelingcwelengcwele.
Kwakukhona kuyo i-althare legolide lempepho, kanye nomphongolo wesivumelwano owawuhuqwe ngegolide nxazonke, okwakukhona kuwo isitsha segolide esasiphethe imana, induku ka-Aroni eyahlumayo, nezibhebhe zesivumelwano.
Phezu kwawo, kwakukhona amakherubhi enkazimulo engame isihlalo somusa, nokunye okungechazwe ngakunye njengamanje.
Uma konke sekuhleliwe, abaphristi bayangena njalo engxenyeni yokuqala engcwele ukuzokwenza imisebenzi yabo yokukhonza.
Kepha ngumphristi omkhulu kuphela ongena engxenyeni yesibili engcwelengcwele kanye ngonyaka, ephethe igazi lokuzonikelela yena uqobo, nangenxa yezono abantu abazenze ngokungazi nangokungaqondi.
Ngalokho uMoya oNgcwele usicacisela kahle ukuthi indlela eya endaweni engcwelengcwele ayikabonakaliswa, inqobo nje uma kusekhona ithabanakeli lokuqala.
Ngokuba ingumfanekiso walesi sikhathi samanje, okulethwa ngaso iminikelo nemihlatshelo, engenakumenza okhonzayo abe nonembeza omsulwa.
Kepha iqondene nokudla, ukuphuza, nokugeza okunhlobonhlobo okuyizimiso zabantu, kuze kulethwe isikhathi senqubo entsha.
Kepha manje uKhristu usefike waba ngumphristi omkhulu wezinto ezinhle ezizayo, wadabula ithabanakeli elikhulu nelipheleleyo, elingenziwanga ngezandla, okusho ukuthi okungesilo elalokhu kudalwa;
wangena kwaba kanye kuphela endaweni engcwele, hhayi ngegazi lezimbuzi nelamathole, kodwa ngegazi lakhe, esezuzile ukuhlengwa okuphakade.
Ngokuba uma igazi lezimbuzi nelezinkunzi nomlotha wesithole kufafaza labo abangcolileyo, kuhlambulula kuhlanzeke ngokwenyama,
kakhulu kangakanani igazi likaKhristu, okwathi ngoMoya ophakade wazinikela kuNkulunkulu engenasici, lizakuhlanza unembeza wethu emisebenzini efileyo, ukuze sikhonze uNkulunkulu ophilayo.
Ngalokho-ke ungumxhumanisi wesivumelwano esisha, ukuze kuthi ngokufa okungenxa yokukhululwa eziphambekweni zesivumelwano sokuqala, ababiziweyo bazuze isithembiso sefa eliphakade.
Ngokuba lapho kukhona isabiwo sefa, kufuneka ukuba kube nesiqiniseko sokuthi owasenzayo usefile,
ngokuba isabiwo sefa sisebenza kuphela uma sekufiwe, asikwazi ukuba namandla nxa esekhona owasenzayo.
Ngalokho-ke isivumelwano sokuqala asimiswanga ngaphandle kwegazi.
Ngokuba isikhulunyiwe imiyalelo yonke ngokomthetho nguMose kubantu bonke, wathatha igazi lamathole, elezimbuzi, amanzi, uboya obubomvu nehisophi, wafafaza incwadi nabantu bonke,
ethi: “Lokhu kuyigazi lesivumelwano aniyale ngaso uNkulunkulu.”
Kanjalo wafafaza ithabanakeli nazo zonke izitsha zenkonzo ngegazi.
Yebo, cishe zonke izinto zihlanjululwa ngegazi ngokomthetho; ngaphandle kokuchitha igazi, akukho ukuthethelelwa.
Ngakho-ke kudingekile ukuba imifanekiso yokusezulwini ihlanzwe kanjalo, kodwa okusezulwini kufanele kuhlanzwe ngeminikelo engcono kunalena.
Ngokuba uKhristu kangenanga endaweni engcwele eyenziwe ngezandla, engumfanekiso waleyo okuyiyo ngempela, kepha wangena ezulwini uqobo ukuba manje abonakale ebusweni bukaNkulunkulu ngenxa yethu,
kungesikho futhi ukuba azinikele kaningi, njengalokhu umphristi omkhulu engena endaweni engcwele iminyaka ngeminyaka, ephethe igazi elingesilo elakhe.
Kungenjalo wayemelwe ukuhlupheka ngokuphindiweyo selokhu kwasekelwa umhlaba, kepha manje ubonakaliswe kwaba kanye ekupheleleni kwezikhathi, ukuba asuse izono ngokuzinikela kwakhe.
Njengokuba futhi kumisiwe ukuba abantu bafe kanye, emva kwalokho kube ngukwehlulelwa,
kanjalo noKhristu, wanikelwa kwaba kanye ukuba athwale izono zabaningi, uyakubonakala ngokwesibili engenasono, kulabo abamlindele ngokulangazelela, kube ngukusindiswa.
Njengalokhu umthetho uyisithunzi sezinto ezinhle ezizayo, ungesiwo umfanekiso wazo uqobo, ngeke waba namandla ngemihlatshelo enikelwa njalo iminyaka ngeminyaka ukubenza baphelele labo abasondelayo.
Uma-ke kwakungenjalo, ngabe ayiyekwanga yini ukunikelwa, ngoba abakhonzayo sebehlanjululiwe kwaba kanye, bengasayukuba nakho ukukhumbula isono na?
Kodwa kuleyo mihlatshelo kukhona ukukhunjulwa kwezono iminyaka ngeminyaka,
ngokuba akunakwenzeka ukuba igazi lezinkunzi nelezimbuzi lisuse izono.
Ngalokho-ke esezakufika emhlabeni, uthi: “Umhlatshelo nomnikelo awuwuthandanga, kodwa ungilungisele umzimba.
Iminikelo yokushiswa nemihlatshelo ngenxa yesono awuyithokozelanga.
Ngase ngithi: ‘Manje ngiyeza. Kulotshiwe ngami emqulwini wencwadi, ukuba ngiyenze, Nkulunkulu, intando yakho.’ ”
Eseshilo ngenhla ukuthi: “Imihlatshelo, iminikelo, iminikelo yokushiswa, nemihlatshelo ngenxa yezono awuyithandanga, awuyithokozelanga,” okuyiyona enikelwa njengoba kushiwo emthethweni.
Wabuye wathi: “Ngiyeza ukwenza intando yakho.” Ususa okokuqala, ukuze amise okwesibili.
Ngaleyo ntando singcwelisiwe ngokunikelwa komzimba kaJesu Khristu, kwaba kanye kuphela.
Yilowo nalowo mphristi uyama ekhonza imihla ngemihla, enikela engaphezi ngayo leyo mihlatshelo engakwazi ukususa izono.
Kodwa Yena, esenikele ngomhlatshelo kwaba kanye ngenxa yezono, wahlala phakade ngakwesokunene sikaNkulunkulu,
ulindele ukuba izitha zakhe zize zenziwe isenabelo sezinyawo zakhe.
Ngokuba ngamnikelo munye nje, ubaphelelise unomphelo labo abangcwelisiweyo.
NoMoya oNgcwele uyafakaza kithi, ngokuba esekushilo ukuthi:
“Yilesi sivumelwano engizakusenza nabo, emva kwalezo zinsuku, kusho iNkosi. Ngiyakufaka imithetho yami ezinhliziyweni zabo, ngiyiqophe engqondweni yabo,
ngingabe ngisazikhumbula izono zabo nobubi babo.”
Kepha lapho kukhona ukuthethelelwa kwalokho, akusadingeki ukunikela ngenxa yesono.
Ngakho-ke bazalwane, njengokuba sinesibindi sokungena endaweni engcwele ngegazi likaJesu,
ngendlela entsha nephilayo asivulela yona, edabula isihenqo, okungukuthi umzimba wakhe,
njengokuba sinomphristi omkhulu wendlu kaNkulunkulu,
masisondele ngenhliziyo eqinisileyo nangokwethemba kokukholwa okupheleleyo, zifafaziwe izinhliziyo zethu konembeza ababi, nomzimba wethu ugeziwe ngamanzi acwebileyo.
Masibambisise isivumo sethemba lethu; singantengantengi, ngokuba uthembekile lowo owethembisayo.
Masinakekelane, ukuze kuvuswe uthando nemisebenzi emihle.
Singakuyeki ukuhlangana kwethu njengoba kungumkhuba wabanye, kodwa sigqugquzelane, ikakhulu njengokuba nilubona usuku lusondela.
Ngokuba uma sona ngamabomu, emva kokuba sesilwemukele ulwazi olupheleleyo lweqiniso, akusekho mhlatshelo ongenziwa ngenxa yezono,
kepha kuphela ukulindela ukwehlulelwa okwesabekayo nomlilo ovutha bhe ozakungqongqisa amaphikankani.
Noma ngubani ophule umthetho kaMose uyakufa engenakuhawukelwa ngezwi lofakazi ababili noma abathathu.
Pho-ke nicabanga ukuthi singakanani isijeziso salowo obukele phansi iNdodana kaNkulunkulu, wadelela igazi lesivumelwano angcweliswa ngalo, wahlambalaza uMoya womusa, na?
Ngokuba siyamazi owathi: “Ingeyami impindiselo, ngiyakuphindisela,” futhi-ke: “INkosi iyakubehlulela abantu bayo.”
Kuyinto esabekayo ukuwela ezandleni zikaNkulunkulu ophilayo.
Kepha khumbulani izinsuku esezadlula, okwathi senikhanyisiwe, nabhekana nobunzima obukhulu bezinhlupheko.
Ngesinye isikhathi nithukwa, nihlukunyezwa, kubukiswa ngani, nangesinye isikhathi nizihlanganisa nalabo ababephila kanjalo.
Nezwelana impela nababoshiweyo, nakwemukela ngokuthokoza ukuqhwagwa kwempahla yenu, nazi ukuthi nina ninempahla engcono kunaleyo, futhi engeyaphakade.
Ngakho-ke ningayeki ukuba neqholo, elinomvuzo omkhulu.
Ngokuba niyadinga ukubekezela, lokho kuyintando kaNkulunkulu ukuze kuthi lapho senikwenzile namukele isithembiso.
Akusensuku zatshwala afike ozayo, akayukulibala.
Kepha olungileyo wami uyakuphila ngokukholwa, kodwa uma ehlehla nyovane, umphefumulo wami awuyukuthokoza ngaye.
Kepha thina asisibo abokuhlehlela ekubhujisweni, kodwa singabokukholwa, kuze kube ngukusindiswa komphefumulo.
Kepha ukukholwa kungukuqiniseka ngezinto ezithenjwayo, kuyiqiniso ngezinto ezingabonwayo.
Ngokuba okhokho bafakazelwa ngakho.
Ngokukholwa, siqonda ukuthi umhlaba wadalwa ngezwi likaNkulunkulu, kwaze kwathi kulokho okungabonakaliyo kwavela okubonakalayo.
Ngokukholwa, u-Abela wanikela kuNkulunkulu ngomnikelo owamukelekayo kunokaKhayini. Ngalokhu wathola ukunconywa ngokuthi ulungile, uNkulunkulu efakazela izipho zakhe. Nakuba esafa, usakhuluma nokho ngawo.
Ngokukholwa, u-Enokhi wathathwa ukuze angaboni ukufa, akazange esafunyanwa, ngokuba uNkulunkulu wayemthabathile. Ngokuba engakathathwa wafakazelwa ukuthi wayemthokozisa uNkulunkulu,
kodwa-ke ngaphandle kokukholwa, kulukhuni ukumthokozisa, ngokuba lowo ozayo kuNkulunkulu umelwe ukukholwa ukuthi ukhona nokuthi uyabavuza labo abamfunayo.
Ngokukholwa, uNowa exwayisiwe ngezinto ebezingakabonwa, ehlonipha uNkulunkulu, wakha umkhumbi wokusindisa indlu yakhe, ngokwenza kanjalo wawehlulela umhlaba, waba yindlalifa yokulunga okuvela ngokukholwa.
Ngokukholwa, u-Abhrahama walalela ebizwa ukuba aphume aye endaweni abezakuyamukeliswa, ibe yifa lakhe; waphuma engazi lapho eya khona.
Ngokukholwa, waba ngumfokazi ezweni lesithembiso, izwe angalazi, ehlala emathendeni beno-Isaka noJakobe, ababeyizindlalifa kanye naye zaleso sithembiso,
ngokuba wayebheke umuzi onezisekelo, omdwebimumo nomakhi wawo kunguNkulunkulu.
Ngokukholwa, naye uSara uqobo wathola amandla okukhulelwa esedlulelwe yisikhathi, ngokuba wathi ukholekile owethembisayo.
Ngakho-ke koyedwa, owayesefana nonjengosewafa, kwavela abangangezinkanyezi zezulu ngobuningi, bengangesihlabathi esisogwini lolwandle esingenakubalwa.
Bonke laba bafa bekholiwe, bengazamukeliswanga izithembiso, kodwa bezibonile, bazithakasela zikude, bevumile ukuthi bangabafokazi nezihambi emhlabeni.
Ngokuba abasho kanjalo, babonakalisa ngokusobala ukuthi bafuna izwe lakubo.
Uma kambe bebecabanga ngalelo ababephuma kulo, bebeyakuba nethuba lokubuyela kulo.
Kepha manje balangazelela lelo elihle kunalelo, okungukuthi elasezulwini. Ngakho uNkulunkulu akanamahloni ngabo ukuba abizwe ngoNkulunkulu wabo, ngokuba ubalungisele umuzi.
Ngokukholwa, u-Abhrahama evivinywa wanikela ngo-Isaka, yebo, yena owayemukele izithembiso, wanikela ngozelwe yedwa wakhe,
okwathiwa kuye: “Inzalo yakho iyakubizwa ngo-Isaka,”
wabona ukuthi uNkulunkulu unamandla okuvusa kwabafileyo; ngokungathekisa singathi wabuye wayithola indodana yakhe kungathi ivela kwabafileyo.
Ngokukholwa, u-Isaka wabusisa uJakobe no-Esawu ngezinto ezizayo.
Ngokukholwa, uJakobe esezokufa wabusisa yileyo naleyo yamadodana kaJosefa, wakhuleka eyeme esihlokweni sodondolo lwakhe.
Ngokukholwa, uJosefa esezakufa wakhuluma ngofuduko lwabantu bakwa-Israyeli, wayaleza nangamathambo akhe.
Ngokukholwa, uMose esezelwe wafihlwa ngabazali bakhe izinyanga ezintathu, ngokuba bembona engumntwana omuhle; abawesabanga umyalo wenkosi.
Ngokukholwa, uMose esekhulile wenqaba ukubizwa ngendodana yendodakazi kaFaro,
kunalokho wakhetha ukuphathwa kabi kanye nabantu bakaNkulunkulu kunokuba athokoze okwesikhashana esonweni,
wabona ukuthi ukuthukwa ngenxa kaKhristu kuyinzuzo enkulu kunengcebo yaseGibhithe, ngokuba wayebheke umklomelo.
Ngokukholwa, washiya iGibhithe akaze alushaya nto yalutho ulaka lwenkosi, ngokuba wakhuthazela sengathi uyambona ongabonwayo.
Ngokukholwa, wamisa iPhasika nokufafaza ngegazi, ukuze umbhubhisi angawathinti amazibulo abo.
Ngokukholwa, badabula uLwandle Olubomvu kungathi bahamba emhlabathini owomileyo, okwathi lapho abaseGibhithe bezama ukuwela, baminza.
Ngokukholwa, zawa izingange eJerikho emva kokuzungezwa izinsuku eziyisikhombisa.
Ngokukholwa, uRahabi isifebe, akabhubhanga nalabo ababengalalelanga, ngokuba wemukela izinhloli ngokuthula.
Ngingabuye ngithini ngokukholwa na? Ngingaphelelwa yisikhathi uma ngingaqhubeka ngilande ngoGideyoni, uBharaki, uSamsoni, uJeftha; ngoDavide noSamuweli nangabaphrofethi,
okwathi ngokukholwa, banqoba imibuso, basebenza ukulunga, bazuza izithembiso, bavimba imilomo yezingonyama,
bacima amandla omlilo, baphunyuka enkembeni, baphiwa amandla ebuthakathakeni, baba yiziqhwaga empini, baxosha izimpi zabezizwe.
Abesifazane babuyiselwa abakubo ababefile sebevusiwe,
abanye balingwa, bajivazwa, bashaywa; yebo, baboshwa, bafakwa ejele.
Bakhandwa ngamatshe, banqunywa ngamasaha, babulawa ngenkemba, bazulazula bembethe izikhumba zezimvu nezezimbuzi, beswele, behlushwa, bephathwa kabi;
izwe lalingabafanele, bahamba emahlane, ezintabeni, emihumeni nasemigedeni yomhlaba.
Bonke labo babenconyiwe ngokukholwa, nokho abasizuzanga isithembiso,
ngokuba uNkulunkulu wayesibonele okuhle kunalokho, ukuze bangapheleliswa ngaphandle kwethu.
Ngakho-ke nathi, njengalokhu sinefu elingaka lawofakazi abasihaqileyo, masilahle konke okusindayo nesono esithandela kangaka kithi, sigijime ngokubekezela kulokhu kuncintisana esikumiselweyo,
sibhekile kuJesu ongumqalisi nomphelelisi wokukholwa kwethu, owathi esikhundleni sentokozo ayibekelweyo, wathwala isiphambano engalinaki ihlazo, wahlala ngakwesokunene sesihlalo sobukhosi sikaNkulunkulu.
Yebo, mqondeni yena owakhuthazela ephikwa kangaka yizoni, ukuze ningakhathali nidangale emiphefumulweni yenu.
Anikamelani nezono, nilwe kuze kube segazini.
Senikhohliwe yini ukugqugquzela aniyala ngakho nina eningabantwana, ethi: “Ndodana yami, ungakwedeleli ukuyala kweNkosi, ungadangali nxa Yona ikusola;
ngokuba iNkosi iyamyala emthandayo, ishaye leyo naleyo ndodana eyamukelayo.”
Bekezelani nxa niyalwa; uNkulunkulu uniphathisa okwabantwana, ngokuba yiyiphi indodana uyise angayiyaliyo na?
Kepha uma nina ningayalwa, njengalokhu kwenziwa kanjalo kubo bonke, khona-ke ningamavezandlebe, anisiwo amadodana.
Futhi-ke sasinobaba bethu begazi ababesiyala, futhi sibahlonipha. Pho singemthobele ngani kakhulu uYise wawomoya kunobaba, siphile na?
Bona babesiyala okwesikhashana njengokubona kwabo, kodwa Yena usiyala ukuze sisizakale, sithole ukuhlanganyela ebungcweleni bakhe.
Ukuyala konke esikhathini samanje akusiyo into emnandi, kodwa kubuhlungu, ekugcineni kuyabathelela isithelo sokuthula nokulunga labo abaqeqeshwe yikho.
Ngakho-ke qinisani izandla ezibuthakathaka namadolo axegayo.
Nizenzele izinyawo zenu izindlela eziqondileyo ukuze okuqhugayo kungaphinyizeki, kunalokho kuphiliswe.
Phokophelelani ukuthula nabo bonke kanye nokungcweliswa; ongenakho akasoze ayibone iNkosi.
Qaphelisisani ukuba kungabi bikho osilelayo emseni kaNkulunkulu, funa kumile impande yimbe ebabayo, inidunge, abaningi bangcole ngenxa yayo.
Makungabi bikho muntu oxegelwa yisimilo, kumbe odumazayo njengo-Esawu owathengisa ngobuzibulo bakhe ngesidlo esisodwa nje.
Niyazi ukuthi kamuva esethanda ukudla ifa lesibusiso, waliwa, akabe esalithola ithuba lokuphenduka, nakuba esekufunisisa ngezinyembezi.
Ngokuba anizanga entabeni ethintekayo nevutha umlilo, nasekufiphaleni, nasebumnyameni, nasesivunguvungwini,
nasekukhaleni kwecilongo, nasekuzwakaleni kwamazwi, abathe ukukuzwa, bancenga ukuba kungabe kusakhulunywa izwi kubo,
ngokuba babengenakukuthwala lokho abayalwa ngakho kokuthi: “Ngisho nesilwane, uma sithinta intaba, siyakukhandwa ngamatshe.”
Yebo, umbono wesabeka kangaka, waze wathi uMose: “Nginovalo olukhulu, ngiyathuthumela.”
Kepha nize entabeni iZiyoni nasemzini kaNkulunkulu ophilayo, iJerusalema lasezulwini, izigidigidi zezingelosi embuthanweni womkhosi,
nasebandleni lamazibulo abhaliwe ezulwini, nakuNkulunkulu, uMehluleli wabo bonke, nakuyo imimoya yabalungileyo abaphelelisiweyo,
nakuJesu, umxhumanisi wesivumelwano esisha, nasegazini lokufafaza elikhuluma okukhulu kunelika-Abela.
Qaphelani ukuba ningamchithi okhulumayo; ngokuba labo abamchithayo lowo owayebaxwayisa emhlabeni, abazange baphunyuke, kakhulu kangakanani-ke thina esimfulathelayo oxwayisa esezulwini ukuba singaphunyuka na?
Ozwi lakhe lanyakazisa umhlaba ngaleso sikhathi, kodwa manje wethembisile, wathi: “Ngisazophinda ngizamazamise, hhayi umhlaba kuphela, kodwa nezulu ngokunjalo.”
Lokhu ukuthi: “Ngisazophinda,” kutshengisa ukususwa kwezinto ezinyakaziswayo, okungukuthi izinto ezidaliweyo, ukuze lokho okungazanyazanyiswanga kume.
Ngakho-ke njengalokhu samukeliswa umbuso ongenakunyakaziswa, masibambelele emseni, simkhonze uNkulunkulu ngendlela efaneleyo; ngokumthokozisa, ngokumhlonipha nangokuthuthumela,
ngokuba uNkulunkulu wethu ungumlilo oqothulayo.
Uthando lobuzalwane maluqhubeke njalo.
Ningakhohlwa wukuphatha kahle izihambi, ngokuba abanye benu ngokwenza kanjalo baphatha kahle izingelosi bengazi.
Khumbulani ababoshiweyo kube sengathi nani luqobo niboshwe kanye nabo, nibakhumbule nabaphethwe kabi, njengalokhu nani nisesemzimbeni.
Ukuganana makuhlonishwe yibo bonke, umbhede mawungangcoliswa, ngokuba uNkulunkulu uyakuzehlulela izifebe nabaphingayo.
Maningaphili ngokuthanda imali, yaneliswani ngeninakho, ngokuba Yena ushilo wathi: “Angisoze ngakulahla, futhi angisoze ngakushiya,”
ukuze sisho ngesibindi, sithi: “INkosi ingumsizi wami, angiyukwesaba; umuntu angangenzani na?”
Khumbulani ababenihola, bekhuluma izwi likaNkulunkulu; nazi umphumela wokuhamba kwabo, nilingise ukukholwa kwabo.
UJesu Khristu nguYena izolo, nanamuhla, yebo, naphakade.
Ningadukiswa yizimfundiso ezehlukahlukeneyo nezingaziwayo, ngokuba kuhle ukuba inhliziyo iqiniswe ngomusa, kungabi ngokudla okungabasizanga nalabo abaphila ngakho.
Thina sine-althare, abangenalungelo lokudla kulo labo abakhonza ethabanakelini.
Izidumbu zezilwane igazi lazo elingeniswa ngumphristi omkhulu endaweni engcwele, zikhishelwa ngaphandle kwenkambu ngenxa yezono.
Ngakho-ke naye uJesu, ukuze angcwelise abantu ngegazi lakhe, wahlupheka ngaphandle kwesango.
Ngakho-ke masiphumele kuye ngaphandle kwenkambu, sithwale ihlazo lakhe.
Asinawo lapha umuzi omiyo, kodwa sifuna umuzi ozayo.
Ngakho-ke ngaye, masinikele umhlatshelo wokudumisa kuNkulunkulu, okuyisona sithelo sezindebe zomlomo wethu, sivume igama lakhe.
Ningakhohlwa ukwenza okuhle nokwabelana, ngokuba uNkulunkulu uyathokoza ngeminikelo enjalo.
Lalelani abaniholayo, nibathobele, ngokuba balinda imiphefumulo yenu, futhi bayakuphendula ngayo, ukuze bakwenze lokhu ngokujabula bengakhonondi, ngokuba lokhu akunakunisiza.
Sikhulekeleni, ngokuba siyethemba ukuthi sinonembeza omuhle, sithanda ukuhamba kahle ezintweni zonke.
Ngiyanincenga kakhulu ukuba nenze lokho, ukuze ngibuyiselwe kinina masinyane.
Kepha uNkulunkulu wokuthula, owakhuphula kwabafileyo umelusi omkhulu wezimvu ngegazi lesivumelwano saphakade, iNkosi yethu uJesu,
makanihlomise ngakho konke okuhle, ukuze nenze intando yakhe, enza kithina lokho okuthandekayo kuye ngoJesu Khristu; makube kuye inkazimulo, kuze kube phakade naphakade. Amen.
Ngiyanincenga bazalwane, lamukeleni kahle izwi lokuyala, ngokuba nginilobele lona ngamazwi amafuphi.
Yazini ukuthi umfowethu uThimothewu usekhululiwe. Uma efika masinyane ngizakunibona kanye naye.
Khonzani kubo bonke abaniholayo, nakubo bonke abangcwele. Abase-Ithaliya bayakhonza kini.
Umusa mawube nani nonke. Amen.
Mina Jakobe, inceku kaNkulunkulu neyeNkosi uJesu Khristu, kuzo zonke izizwana ezili-12 ezihlakazekileyo, ngiyabingelela.
Bazalwane bami, uma nehlelwa yizilingo ezinhlobonhlobo, zithatheni ngokuthi zingukuthokoza kuphela,
nazi ukuthi ukuvivinywa kokukholwa kwenu kuveza ukukhuthazela.
Ukukhuthazela makube nomphumela opheleleyo, ukuze nibe ngabakhulile nabapheleleyo, nabangaswele lutho.
Kepha uma kukhona omunye phakathi kwenu oswele ukuhlakanipha, makacele kuNkulunkulu obapha bonke ngokungagodli futhi engabalisi; uyakuphiwa lokho.
Kepha makacele ngokukholwa, engangabazi nakancane, ngokuba ongabazayo ufana nedlambi lolwandle elidudulwa ngumoya, ulise le nale.
Ngakho-ke lowo muntu makangasho ukuthi uyakwemukeliswa utho yiNkosi,
ngokuba ungumuntu ongqondo imbaxambili, engazinzile ezindleleni zakhe zonke.
Umzalwane ompofu makazincome ngokuphakanyiswa kwakhe,
noyisicebi azituse ngokuthotshiswa kwakhe, ngokuba uyakushabalala njengembali yotshani.
Ngokuba ilanga liphuma libalele, libunise utshani, imbali ekubo ivuthuke, nobuhle bokubukeka kwayo bunyamalale; kanjalo-ke nesicebi siyakushabalala ezindleleni zaso.
Ubusisiwe umuntu okhuthazelayo lapho elingwa, ngokuba uma esevivinyiwe uyakwemukeliswa umqhele wokuphila, iNkosi ewuthembise labo abayithandayo.
Makungabi bikho muntu othi uma elingwa, athi: “Ngilingwa nguNkulunkulu,” ngokuba uNkulunkulu angelingwe ngokubi, naye luqobo kalingi muntu.
Kepha yilowo nalowo muntu ulingwa, ahuhwe yizinkanuko zakhe, futhi ahuheke.
Phela uma inkanuko isibambile, izala isono; nesono uma sesiphelelisiwe, sizala ukufa.
Bazalwane bami abathandekayo, ningadukiswa.
Izipho zonke ezinhle neziphiwo zonke ezipheleleyo zivela phezulu, zehla ziphuma kuYise wokukhanya, okungekho kuye ukuguquka nasithunzi sokuphenduka.
Wasizala ngezwi leqiniso ngokuthanda kwakhe, ukuze sibe ngamazibulo ezidalwa zakhe.
Yazini lokhu, bazalwane bami abathandekayo, ukuthi: makube yilowo nalowo muntu asheshe ukuzwa, aphuze ukukhuluma, aphuze nokuthukuthela.
Ngokuba ulaka lomuntu aluzuzi ukulunga kukaNkulunkulu.
Ngakho-ke lahlani konke ukungcola nobubi okukini, namukele ngobumnene izwi elitshalwe kini, elinamandla okusindisa imiphefumulo yenu.
Yibani ngabalenzayo izwi, ningabi ngabalizwayo nje kuphela, nizikhohlisa.
Ngokuba uma umuntu engolizwayo izwi, engesiye olenzayo, lowo ufana nomuntu obuka ubuso bakhe bemvelo esibukweni;
uyazibuka, athi angahamba, akhohlwe masinyane ukuthi ubenjani.
Kepha lowo obukisisa emthethweni opheleleyo, umthetho wenkululeko nohlala kuwo, engesiye nje olizwayo bese ekhohlwa, kodwa engowenzayo umsebenzi, lowo uyakuba ngobusisiweyo ekwenzeni kwakhe.
Uma umuntu ethi uyakholwa, kodwa engabophi ulimi lwakhe kube sengathi ngetomu, kodwa ezikhohlisa enhliziyweni yakhe, ukukholwa kwalowo kuyize.
Ukukholwa okumhlophe nokungangcolisiwe phambi kukaNkulunkulu uBaba yilokhu: ukuhambela izintandane nabafelokazi osizini lwabo, nokuba umuntu azigcine engenacala lokwezwe.
Bazalwane bami, ukukholwa yiNkosi yethu uJesu Khristu, iNkosi yenkazimulo, makungabi nokukhetha abantu.
Ngokuba uma kungena esinagogeni lenu umuntu ofake indandatho yegolide emnweni wakhe, egqoke nezingubo zakwanokusho, bese kungena nompofu ogqoke izingubo ezimbi,
niyabheka, bese nithi kogqoke izingubo zakwanokusho: “Hlala lapha wena kule ndawo enhle,” bese nithi kompofu: “Yima lapho wena,” noma: “Hlala phansi kwesenabelo sezinyawo zami.”
Anibandlululanga yini phakathi kwenu, naba ngabehluleli abanemidlinzo emibi na?
Lalelani, bazalwane bami abathandekayo, uNkulunkulu akabakhethanga yini abampofu bomhlaba ukuba babe ngabacebileyo okholweni, nezindlalifa zombuso awuthembisa kulabo abamthandayo na?
Kepha nina nimehlisa isithunzi ompofu. Abacebileyo kabanicindezeli yini, banihudulele ezigcawini na?
Akusibo yini abahlambalaza igama elihle enibizwa ngalo na?
Kepha uma niwugcina umthetho wobukhosi njengokombhalo othi: “Wothanda umakhelwane wakho njengalokhu uzithanda wena,” nenza kahle.
Kepha uma nikhetha abantu, nenza isono, umthetho univeza obala njengezephulamthetho.
Ngokuba ogcina wonke umthetho, kodwa akhubeke kowodwa nje, unecala kuwo wonke.
Ngokuba lowo owathi: “Ungaphingi,” wathi futhi: “Ungabulali,” uma-ke ungaphingi, kodwa ubulala, uyisephulamthetho.
Ngakho khulumani kanjalo, nenze kanjalo, njengokufanele abayakwehlulelwa ngomthetho wenkululeko.
Ngokuba ukwehlulela akuyukuba nasihawu kulowo ongabanga nesihe; isihawu siyakunqoba phezu kokwehlulela.
Kusiza ngani, bazalwane bami, uma umuntu ethi uyakholwa, kepha engenayo imisebenzi na? Ukukholwa kungamsindisa na?
Uma umzalwane noma umzalwanekazi ehlubule, eswele ukudla imihla ngemihla,
bese omunye wenu ethi kuye: “Hamba ngokuthula, uthokomale; usuthe,” kodwa engamuphi lokho okudingwa ngumzimba, kusiza ngani lokho na?
Kanjalo-ke uma ukukholwa kungenayo imisebenzi, kufile ngokwakho.
Kepha omunye uyakuthi: “Unokukholwa, mina nginemisebenzi;” ngikhombise ukukholwa kwakho ngaphandle kwemisebenzi, mina ngizakukhombisa ukukholwa kwami ngemisebenzi yami.
Uyakholwa ukuthi uNkulunkulu munye na? Wenza kahle; ingani namadimoni ayakholwa, futhi athuthumele.
Siwula ndini, uyathanda yini ukwazi ukuthi ukukholwa okungenayo imisebenzi kuyize na?
U-Abhrahama, ukhokho wethu, akalungisiswanga yini ngemisebenzi lapho enikela ngendodana yakhe u-Isaka e-althare na?
Uyabona ukuthi ukukholwa kwakusebenza kanye nemisebenzi yakhe, nokuthi ukukholwa kwapheleliswa ngemisebenzi.
Kwagcwaliseka umbhalo othi: “U-Abhrahama wakholwa nguNkulunkulu, kwabalelwa kuye ukuthi kungukulunga.” Wayesebizwa ngokuthi ungumngani kaNkulunkulu.
Niyabona ukuthi umuntu uyalungisiswa ngemisebenzi, hhayi ngokukholwa kuphela.
Kanjalo uRahabi isifebe akalungisiswanga yini ngemisebenzi ngokuba wemukela izithunywa, wabuye wazishushumbisa ngenye indlela na?
Ngokuba njengalokhu umzimba ngaphandle komoya ufile, kanjalo nokukholwa ngaphandle kwemisebenzi kufile.
Bazalwane bami, iningi lenu malingabi ngabafundisi, ngokuba niyazi ukuthi siyakwemukeliswa ukwehlulelwa okunzima.
Ngokuba sonke siyakhubeka ngezindlela eziningi. Uma umuntu engakhubeki ngezwi alikhulumayo, lowo ungophelele impela, umuntu okwazi ukubamba umzimba wakhe wonke ngokungathi ngetomu.
Uma sifaka amatomu emilonyeni yamahhashi, sikwenza lokho ukuze asilalele, siyawuqondisa wonke nomzimba wawo.
Bhekani, nemikhumbi njengoba imikhulu nje, idudulwa yimimoya enamandla, iqondiswe ngumshayeli ngephini elincane, iye lapho efuna ukuba iye khona.
Lunjalo-ke nolimi, luyisitho esincane, kodwa luzigabisa kakhulu. Phela inhlansana nje ingathungela ihlathi elikhulu.
Kanjalo-ke nolimi lungumlilo, phakathi kwezitho zomzimba, ulimi lugcwele ukonakala, luyawungcolisa wonke umzimba, luthungele konke ukuphila, bese lona lubabelwa yisihogo.
Ngokuba lonke uhlobo lwezilwane nolwezinyoni nolwezilwane ezihuquzelayo, zonke zithanjiswa futhi zathanjiswa ngabantu.
Kepha akukho muntu kubantu onamandla okuluthambisa ulimi; lungububi obungalawuleki, lugcwele isihlungu esibulalayo.
Ngolimi sibonga iNkosi uBaba, nangalo futhi siqalekisa abantu abenziwe ngomfanekiso kaNkulunkulu.
Emlonyeni owodwa kuphuma izibusiso neziqalekiso. Bazalwane bami, akufanele ukuba lokho kube kanjalo.
Umthombo uyakhipha yini amanzi amnandi nababayo esiphethwini esisodwa na?
Bazalwane bami, umkhiwane ungathela yini izithelo zomnqumo, noma umvini uthele amakhiwane na? Kanjalo namanzi anosawoti angewakhiphe amanzi amtoti.
Ngubani ohlakaniphileyo noqondayo phakathi kwenu na? Makakhombise ngenkambo enhle ukuthi imisebenzi yakhe yenziwe ngobumnene bokuhlakanipha.
Kepha uma ninomhawu onzima nobugovu ezinhliziyweni zenu, ningazigabisi, niqambe amanga nimelane neqiniso.
Lokho kuhlakanipha akuveli phezulu, kodwa kungokomhlaba, okwemvelo nokwamadimoni,
ngokuba lapho kukhona umhawu nobugovu, kukhona inxushunxushu nezenzo zonke ezimbi.
Kepha ukuhlakanipha okuvela phezulu okokuqala nje, kuhlanzekile, bese kuba nokuthula, uzwela, ukulalela, futhi kugcwele ububele nezithelo ezinhle; akunalubandlululo nakuzenzisa.
Kepha isithelo sokulunga sihlwanyelwa ngokuthula yilabo abenza ukuthula.
Zivelaphi izimpi nokulwa phakathi kwenu na? Akuveli yini ezinkanukweni zenu ezilwayo ezithweni zenu na?
Niyafisa, kodwa aninalutho. Niyabulala, ninomhawu, kepha anizuzi lutho; niyalwa, nidala izimpi. Aninalutho ngoba aniceli.
Niyacela, kodwa anamukeliswa, ngokuba nicela kabi, ukuze nikusaphaze ezinkanukweni zenu.
Ziphingi, anazi yini ukuthi ukuthanda izwe kungubutha kuNkulunkulu na? Ngakho-ke lowo othanda ukuba ngumngani wezwe, uzenza isitha sikaNkulunkulu.
Nicabanga ukuthi kuyize yini lokhu okushiwo wumbhalo, othi: “Umoya awubeka kithi uwunxanela ngomhawu” na?
Kepha unikeza umusa kakhulu ngakho, uthi: “UNkulunkulu umelana nabazidlayo, kodwa abathobekileyo ubapha umusa.”
Ngakho-ke thobelani uNkulunkulu, nimelane noSathane, khona eyakunibalekela.
Sondelani kuNkulunkulu, naye uyakusondela kini. Hlanzani izandla, nina zoni, nihlambulule izinhliziyo, nina bonhliziyombili.
Yibani lusizi, nibubule, nikhale; ukuhleka kwenu makuphenduke ukububula, nokujabula kube ngukujabha.
Zithobeni ebusweni beNkosi, khona iyakuniphakamisa.
Bazalwane, ningakhulumi okubi omunye ngomunye. Okhuluma okubi ngomunye noma ahlulele omunye, ukhuluma okubi ngomthetho futhi wehlulela umthetho. Uma wehlulela umthetho, awusiye owenza okomthetho kodwa ungumehluleli.
Munye oshaya umthetho nongumehluleli, nguYena onamandla okusindisa nokubhubhisa. Pho-ke ungubani wena owehlulela umakhelwane wakho na?
Wozani manje nina enithi: “Namuhla noma ngomuso sizakuya kulo muzi noma kulowaya, sihlale khona kuze kuphele unyaka, sihwebelane, sithole inzuzo.”
Kepha anilazi ikusasa ukuthi liniphatheleni nokuthi impilo yenu iyakuba yini na? Ngokuba niyinkungu ebonakala isikhashana bese iyanyamalala.
Empeleni ngabe nithi: “Uma iNkosi ithanda, siyakuphila, senze lokhu nalokhuya.”
Kepha manje niyazigabisa nina; konke ukuzigabisa okunjalo kubi.
Ngakho-ke lowo okwaziyo okuhle okumele akwenze, kodwa angakwenzi, wenza isono.
Wozani manje nina bacebileyo; khalani, nikhihle isililo ngenxa yezinhlupheko ezizakunehlela.
Ingcebo yenu ibolile, nezingubo zenu zidliwe yinundu.
Igolide lenu nesiliva kugqwalile, nokugqwala kwakho kuzakuba ngubufakazi obumelene nani, kuyakudla inyama yenu njengomlilo. Niqongelele ingcebo ngezinsuku zokugcina.
Bhekani, umholo wezisebenzi ezivuna emasimini enu, eniwugodlileyo uyakhala, nokukhala kwababevuna sekufinyelele ezindlebeni zeNkosi Yamabandla.
Nibusile emhlabeni, natamasa, izinhliziyo zenu nazondla ngosuku lokuhlaba.
Nilahle ngecala, nambulala olungileyo ongakwazi ukumelana nani.
Ngakho-ke bazalwane, bekezelani, kuze kufike iNkosi. Bhekani, umlimi uyalindela isithelo somhlabathi esiyigugu. Uyasibekezelela, size sithole imvula yokuqala neyakamuva.
Nani-ke bekezelani, niqinise izinhliziyo zenu, ngokuba ukubuya kweNkosi sekusondele.
Bazalwane, ningakhonondi omunye ngomunye ukuze ningehlulelwa. Nango umehluleli umi ngasemnyango.
Bazalwane, thathani njengesibonelo sokuhlupheka okubi nokubekezela, abaphrofethi ababekhuluma egameni leNkosi.
Niyazi ukuthi babusisiwe labo ababekezelile. Nizwile ngokubekezela kukaJobe, futhi nibonile isiphetho esilethwe yiNkosi, ukuthi iNkosi inesihe esikhulu nesihawu.
Ngaphezu kwakho konke bazalwane bami, ningafungi ngezulu noma ngomhlaba noma nganoma yini. Kepha uyebo wenu makabe nguyebo, noqhabo abe nguqhabo, ukuze ningehlulelwa.
Ukhona ohluphekayo phakathi kwenu na? Makakhuleke. Ukhona onamileyo na? Makahube.
Ukhona ogulayo phakathi kwenu na? Makabize amalunga ebandla amkhulekele, amgcobe ngamafutha egameni leNkosi.
Umkhuleko wokukholwa uyakumsindisa ogulayo, iNkosi imvuse; noma enzile izono, uyakuthethelelwa zona.
Ngakho-ke vumani izono omunye komunye, nikhulekelane ukuze niphulukiswe. Umkhuleko wolungileyo unamandla kakhulu.
U-Eliya wayengumuntu efana nathi; wakhuleka nokukhuleka ukuba lingani; alinanga emhlabeni iminyaka emithathu nezinyanga eziyisithupha.
Wabuye wakhuleka; izulu lana, nomhlaba wathela izithelo zawo.
Bazalwane bami, uma omunye wenu ephambuka eqinisweni, omunye ambuyise;
yazini ukuthi lowo obuyise isoni ekudukeni kwaso endleleni uyakusindisa umphefumulo wakhe ekufeni, asibekele izono eziningi.
UPhethro, umphostoli kaJesu Khristu, kwabakhethiweyo abayizihambi, abahlakazekele ePhontu, eGalathiya, eKhaphadosiya, e-Asiya naseBhithiniya,
abakhethiweyo, ngokwazi phambilini kukaNkulunkulu uYise, ngokungcwelisa kukaMoya ukuze balalele futhi bafafazwe ngegazi likaJesu Khristu. Sengathi umusa nokuthula kungandiswa kini.
Makabongwe uNkulunkulu uYise weNkosi yethu uJesu Khristu, owasizala kabusha ngokwesihawu sakhe esikhulu, ukuba sibe nethemba eliphilileyo ngokuvuka kukaJesu Khristu kwabafileyo,
sibe nefa elingapheliyo, elingenasisihla, elingabuniyo, enililondolozelwe ezulwini.
Nina nilondolozwa ngamandla kaNkulunkulu ngokukholwa, kube yinsindiso eyakwambulwa ngesikhathi sokugcina;
enithokoza kakhulu ngalokho, nakuba manje nidatshukiswa yizilingo ezinhlobonhlobo,
ukuze ubuqotho bokukholwa kwenu, okuyigugu kunegolide elibhubhayo noma livivinywa ngomlilo, kufunyanwe kube ngukubongwa, udumo, nokutuseka mhla kwembulwa uJesu Khristu,
enimthanda ningambonanga, kuthi nakuba ningamboni manje, kodwa nikholwa nguye, nithokoza ngentokozo engenakuchazwa ngamazwi netusekayo,
namukela umphumela wokukholwa kwenu oyinsindiso yemiphefumulo.
Mayelana nensindiso, abaphrofethi bafunisisa becwaningisisa ngomusa okwaphrofethwa ngawo ebenizakwenzelwa wona.
Baphenyisisa ukuthi yisiphi, futhi sinjani leso sikhathi esakhonjwa nguMoya kaKhristu owayekubo, efakaza ngaphambilini ngezinhlupheko zikaKhristu nangenkazimulo eyayizakulandela kamuva.
Bambulelwa ukuthi lokho ababekwenza babengazenzeli nje bona, kodwa kwakuqondene nani, njengokuba bakhuluma ngalezo zinto, nani esenizizwa ngabashumayela ivangeli kini ngoMoya oNgcwele othunywe evela ezulwini, lezo zinto izingelosi ezilangazelela ukuzibona.
Ngakho-ke hluzani izingqondo zenu, nime ngomumo, nizithibe, niwethembe ngokupheleleyo umusa enizakuwabelwa mhla kwembulwa uJesu Khristu.
Njengabantwana abalalelayo, ningahuhwa-ke yizinkanuko zakuqala ngenxa yokungazi kwenu.
Kepha njengalokhu onibizileyo engcwele, yibani ngcwele nani kukho konke enikwenzayo,
ngokuba kulotshiwe ukuthi: “Manibe ngcwele, ngokuba Mina ngingcwele.”
Uma nimbiza ngokuthi uBaba Yena owehlulela lowo nalowo ngokwemisebenzi yakhe engakhethi, ngakho-ke hambani ngokwesaba ngesikhathi nisaphila.
Nina niyazi ukuthi nahlengwa ezintweni ezingasho lutho zokhokho benu, hhayi ngezinto eziphelayo njengesiliva noma igolide,
kodwa nahlengwa ngegazi likaKhristu elinqabileyo, kungathi elewundlu elingenacala nasici.
Wakhethwa umhlaba ungakasekelwa, kodwa wabonakaliswa ngezikhathi zokugcina ngenxa yenu,
okungaye nikholwa kuNkulunkulu, Yena owamvusa kwabafileyo, wamnika inkazimulo, ukuze ukukholwa kwenu nethemba lenu kube kuNkulunkulu.
Senihlambululile imiphefumulo yenu ngokulalela iqiniso, ukuze uthando lwenu lobuzalwane lungabi nakuzenzisa; nithandane ngokuphelele, omunye nomunye, kuqubuka enhliziyweni emhlophe.
Senizelwe kabusha nina, hhayi ngembewu ephelayo, kodwa ngengapheliyo, ngezwi eliphilileyo nelimiyo likaNkulunkulu,
ngokuba: “Yonke inyama injengotshani, nobuhle bayo bonke bunjengembali yotshani. Utshani buyabuna, nembali ivuthuluke. Kepha izwi leNkosi limi kuze kube phakade.”
Lelo yizwi levangeli elashunyayelwa kini.
Ngakho-ke lahlani bonke ububi, bonke ubuqili, ukuzenzisa, umhawu, nakho konke ukunyembenya.
Njengezinsana ezisanda kuzalwa, langazelelani ubisi olungokomoya olungenakonakala, ukuze ngalo nikhule kube ngukusindiswa,
uma seninambithile nezwa ukuthi iNkosi imnene.
Sondelani kuyo, iyitshe eliphilileyo, elinqatshwe ngabantu, kepha kuNkulunkulu likhethekile, liyigugu.
Nani njengamatshe aphilileyo, nakhiwe nibe yindlu yokomoya, ubuphristi obungcwele, ukuze ninikele ngemihlatshelo yokomoya eyamukelekayo kuNkulunkulu, ngaye uJesu Khristu.
Ngokuba umbhalo, uthi: “Ngibeka eZiyoni itshe legumbi elikhethekileyo, eliyigugu. Okholwa kuye akasoze ajabhiswa.”
Ngakho-ke kini enikholwayo liyigugu, kodwa kwabangakholwayo; itshe abalinqabayo abakhi, yilo elaba yinhloko yegumbi,
netshe lokukhubekisa, nedwala lokuwisa. Bayakhubeka ngokuba bengalilaleli izwi okuyikhona abakumiselweyo.
Kepha nina niluhlanga olukhethiweyo, ubuphristi basebukhosini, isizwe esingcwele, abantu abangabakaNkulunkulu, ukuze nishumayele ngobuhle balowo owanibiza, ukuba niphume ebumnyameni ningene ekukhanyeni kwakhe okumangalisayo.
Nina naningesiso isizwe, kepha manje seniyisizwe sikaNkulunkulu; naningahawukelwanga, kodwa manje senihawukelwe.
Bathandekayo, ngiyanincenga njengabafokazi nezihambi ukuba nidede ezinkanukweni zenyama ezilwa nomphefumulo.
Ziphatheni kahle phakathi kwabezizwe, ukuze kuthi lapho beninyembenya ngokuthi ningabenzi bokubi, kodwa kuthi lapho bebona imisebenzi yenu emihle, bamdumise uNkulunkulu ngosuku lokuhanjelwa.
Thobelani bonke abantu abasezikhundleni ngenxa yeNkosi, noma ngabe yinkosi njengalokhu isesikhundleni,
noma ngabe ngababusi, njengokuba bethunywe yiyo ukuba babajezise abenza okubi, kodwa batuse abenza okuhle,
ngokuba injalo-ke intando kaNkulunkulu; ukuba ngokwenza okuhle, nithulise ukungazi kwabantu abayiziwula.
Nina ningabakhululekileyo, kodwa ningakwenzi ukukhululeka kwenu kube yisembozo sokubi, kepha ziphatheni njengezinceku zikaNkulunkulu.
Bahlonipheni bonke, nibathande abazalwane, nesabe uNkulunkulu, futhi niyihloniphe inkosi.
Zinceku, bathobeleni abaqashi benu ngokwesaba konke, kungabi nje kwabalungileyo nabamnene kuphela, kodwa nalabo abanesihluku.
Ngokuba lokhu kuyabongeka uma umuntu, ngenxa kanembeza, ngokuyintando kaNkulunkulu, ethwala izinsizi noma ehlushwa ngokungafanele.
Kunamvuzo muni ukubekezela lapho nishayelwa enikonileyo na? Kepha uma nibekezela lapho nihlushwa nibe nenze okuhle, lokho kuyancomeka kuNkulunkulu.
Nabizelwa khona lokho, ngokuba uKhristu wahlushwa ngenxa yenu, wanishiyela isibonelo sokuba nilandele ezinyathelweni zakhe.
“Ongazange enze isono, nokungafunyanwanga nkohliso emlonyeni wakhe;”
owathi ethukwa akaze aphindisela, ehlushwa akaze asongela muntu, kodwa wazinikela kulowo owehlulela ngokulunga;
owathwala izono zethu emzimbeni wakhe, emthini, ukuze kuthi sesifile ezonweni, siphile ekulungeni. Ngemivimbo yakhe naphiliswa,
ngokuba naninjengezimvu ezidukileyo, kodwa manje senibuyele kumelusi nomphathi wemiphefumulo yenu.
Kanjalo bafazi, thobelani amadoda enu ukuze kuthi uma kukhona amadoda angalilaleli izwi, azuzeke ngenxa yokuziphatha kahle kwabafazi bawo, ngaphandle kwezwi;
kepha ngokubona inkambo yenu emsulwa, esekwesabeni.
Ukuhloba kwenu makungabi ngokungaphandle, okokwaluka izinwele, okokufaka igolide, noma okokugqoka izingubo ezikhangayo,
kepha makube ngumuntu osekusithekeni enhliziyweni, ohloba ngokungabhubhiyo komoya omnene onokuthula, okuyigugu phambi kukaNkulunkulu.
Ngokuba babekade bezihlobisa kanjalo abesifazane abakholwayo, labo abethemba uNkulunkulu, futhi bewathobela amadoda abo,
njengoSara owamlalela u-Abhrahama embiza ngokuthi inkosi. Nina-ke ningabantwana bakhe uma nje nenza okuhle, ningesabi lutho okwesabisayo.
Kanjalo nani madoda, hlalani nabafazi benu niqonda ukuthi owesifazane unjengesitsha esibuthakathaka; nibanike inhlonipho, lokhu beyizindlalifa zomusa wokuphila kanye nani, ukuze imikhuleko yenu ingathiywa.
Okokugcina yibani nhliziyonye nonke, nizwelane, nithandane ngokwabazalwane, nibe nobubele nokuthobeka.
Ningaphindisi okubi ngokubi, inhlamba ngenhlamba; kepha busisani, ngokuba nabizelwa lokho, ukuba nidle ifa lokubusiswa.
Umbhalo uthi: “Lowo othanda ukuphila nokubona izinsuku ezinhle makanqande ulimi lwakhe kokubi, nezindebe zakhe zingakhulumi inkohliso.
Akugweme okubi, enze okuhle, afune ukuthula, akuphokophelele,
ngokuba amehlo eNkosi aphezu kwabalungileyo, izindlebe zayo ziyayizwa imikhuleko yabo, kodwa ubuso beNkosi bumelene nabenza okubi.”
Pho ngubani onganilimaza uma nishisekela ukwenza okuhle na?
Kepha uma nihlupheka ngenxa yokulunga, nibusisiswe. Ningakwesabi ukwesabisa kwabo, futhi ningakhathazeki.
Kodwa mngcweliseni uKhristu njengeNkosi ezinhliziyweni zenu, nihlale nilindele ukubaphendula bonke abanibuza ngethemba eninalo.
Kepha kube ngobumnene nangokwesaba, ninonembeza omsulwa, ukuze kuthi kulokho abaninyembenya ngakho, bajabhiswe laba abahlambalaza ukuhamba kwenu okuhle kuKhristu.
Ngokuba kungcono ukuhlupheka ngokwenza okuhle, uma lokho kuyintando kaNkulunkulu, kunokuhlupheka ngokwenza okubi.
UKhristu wahlupheka kwaba kanye ngenxa yezono; olungileyo ehluphekela abangalungile, ukuze aniyise kuNkulunkulu; wabulawa emzimbeni, kodwa waphiliswa kuMoya.
Wahamba wayoshumayeza imiphefumulo eboshiweyo,
kulabo abangalalelanga lapho uNkulunkulu ebalindele ngokubekezela emihleni kaNowa, umkhumbi usakhiwa, okwasindiswa abayingcosana, abayisishiyagalombili ababekuwo, ngawo amanzi.
Lawo manzi angumfanekiso wombhabhadiso enisindiswa ngawo manje, okungesikho ukukhuculula insila emzimbeni, kodwa isithembiso kuNkulunkulu esivela kunembeza omsulwa, ngokuvuka kukaJesu Khristu,
othe esenyukele ezulwini, wahlala ngakwesokunene sikaNkulunkulu, esebekile phansi kwakhe izingelosi, ababusi neziphathimandla.
Njengalokhu uKhristu ahlupheka emzimbeni, hlomani nani ngokuqonda okunjalo, ngokuba ohlupheke emzimbeni uyayeka ukona,
ukuze ngalesi sikhathi esisasele nisesemzimbeni ningabe nisaphila ngezinkanuko zabantu, kodwa ngentando kaNkulunkulu.
Ngokuba isikhathi esedlule sasanele ukwenza okuthandwa ngabezizwe, ukuphila ngamanyala edlulele, ngezinkanuko, ngokudakwa, ngokuminza, ngokuxokozela nangokukhonza izithombe okuyichilo.
Bayamangala ukuthi anisahambisani nabo kulawo manyala edlulele, behlambalaza.
Kepha bayakuziphendulela kulowo olungele ukwehlulela abaphilayo nabafileyo.
Ngenxa yalokho-ke, ivangeli lashunyayelwa nakwabafileyo, ukuba bahlulelwe ngokwabantu emzimbeni, kodwa baphile ngokukaNkulunkulu emoyeni.
Kepha ukuphela kwezinto zonke sekusondele, ngakho zikhuzeni, nizithibe, ukuze nikhuleke.
Kunalokho yibani nokuthandana okungapheliyo, ngokuba uthando lusibekela inqwaba yezono.
Yamukelanani yilowo nalowo, ningabi nakukhononda.
Yilowo nalowo ngokwesipho asemukelisiwe, makakhonze abanye njengezinceku ezinhle zomusa kaNkulunkulu owehlukahlukene.
Uma umuntu ekhuluma, makakhulume ngokwamazwi avela kuNkulunkulu. Uma umuntu ekhonza, makakhonze njengokwamandla awanikwa nguNkulunkulu, ukuze uNkulunkulu adunyiswe kukho konke ngoJesu Khristu okukuye inkazimulo namandla kuze kube phakade naphakade. Amen.
Bathandekayo, ningamangali ngomlilo ophakathi kwenu, enifikelwa yiwo ukuba nilingwe ngokungathi nehlelwe yinto engaziwayo.
Kepha thokozani njengalokhu nihlanganyela ezinhluphekweni zikaKhristu, ukuze futhi nithokoze, nethabe nasekwambulweni kwenkazimulo yakhe.
Uma nithukwa ngenxa yegama likaKhristu, nibusisiwe, ngokuba uMoya wenkazimulo nokaNkulunkulu uhleli phezu kwenu.
Makungabi bikho namunye kini ohlupheka ngokuba engumbulali, noma eyisela, noma engowenza okubi, noma eyisigilamkhumba, noma engozigaxa ezindabeni zabanye.
Kepha uma ehlupheka ngokuba engumKhristu, makangabi namahloni, kodwa makadumise uNkulunkulu, ngenxa yalelo gama.
Manje sekuyisikhathi sokuba ukwehlulela kuqale endlini kaNkulunkulu, kepha uma kuqala kithi, siyakubanjani isiphetho salabo abangalilaleli ivangeli likaNkulunkulu na?
“Uma kunzima ukusindiswa kolungileyo, uyakubonakalaphi ongamesabi uNkulunkulu noyisoni na?”
Ngakho labo abahluphekayo ngokwentando kaNkulunkulu, mabanikele imiphefumulo yabo kuMdali owethembekileyo, baqhubeke benze okuhle.
Ngakho-ke ngiyawagqugquzela amalunga aphakathi kwenu, mina engiyilunga kanye nawo, nofakazi wezinhlupheko zikaKhristu, nomhlanganyeli enkazimulweni ezakwembulwa, ngithi:
yelusani umhlambi kaNkulunkulu ophakathi kwenu, ningawuphathi ngokungathi niphoqiwe, kodwa ngokuthanda, njengalokhu uNkulunkulu enza, kungabi ngenxa yenzuzo eyihlazo, kodwa kube ngenhliziyo eshisekelayo.
Makungabi njengabazenza amakhosi phezu kwalabo enibaphathisiwe ukubanakekela, kodwa nibe yizibonelo emhlanjini.
Kuyakuthi lapho uMelusi omkhulu esebonakaliswa, nizuze umqhele wenkazimulo ongabuniyo.
Kanjalo nani zinsizwa, thobelani amalunga, kodwa nonke yembathani ukuthobeka, nithobelane, ngokuba uNkulunkulu umelene nabazidlayo, kodwa abathobekileyo ubapha umusa.
Ngalokho zithobeni phansi kwesandla sikaNkulunkulu esinamandla, ukuze aniphakamise ngesikhathi esifaneleyo,
niphonse izinkathazo zenu zonke phezu kwakhe, ngokuba uyanikhathalela.
Zithibeni, nilinde. Isitha senu, uSathane, siyahamba njengebhubesi elibhodlayo, sifuna esingamdwengula.
Melanani naye niqinile ekukholweni, nazi ukuthi zona lezo zinhlupheko ziyabehlela nabazalwane benu abasemhlabeni.
Kepha uNkulunkulu womusa wonke owanibizela enkazimulweni yakhe yaphakade ngoKhristu, emva kokuhlupheka isikhashana, Yena luqobo uyakunihlumelela, anisekele, aniqinise, animise nisimeme.
Makube kuye amandla kuze kube phakade naphakade. Amen.
NgoSilvanu, umzalwane othembekile kithi, nginibhalele ngamafuphi ukunikhuthaza, nokufakaza ukuthi yiwo ngokwempela umusa kaNkulunkulu enimi kuwo.
Liyakhonza kini ibandla eliseBhabhiloni elikhethiweyo kanye nani, uyakhonza noMakhu indodana yami.
Bingelelanani ngokwanga kothando. Ukuthula makube kini nonke enikuKhristu.
USimoni Phethro, inceku nomphostoli kaJesu Khristu, kulabo abemukele ukukholwa okuyigugu kanye nathi, ngokulunga kukaNkulunkulu wethu noMsindisi uJesu Khristu:
sengathi umusa nokuthula kungandiswa kini ngokumazi uNkulunkulu noJesu iNkosi yethu.
Njengokuba sinikiwe zonke izinto eziqondene nokuphila nokumesaba uNkulunkulu, ngamandla akhe obuNkulunkulu, ngokumazi Yena owasibiza ngenkazimulo nobuhle bakhe,
aniphe ngakho izithembiso eziyigugu nezinkulukazi, ukuze ngazo nibe ngabahlanganyeli besimo sobuNkulunkulu, nibalekele ukubhubha ngezinkanuko okusezweni.
Ngaleso sizathu-ke, khuthalelani ukwengeza ubuhle ekukholweni, nasebuhleni ukwazi,
nasekwazini ukuzithiba, nasekuzithibeni ukukhuthazela, nasekukhuthazeleni ubunkulunkulu,
ebunkulunkulwini ukuthanda abazalwane, nasekuthandeni abazalwane uthando.
Ngokuba uma lezo zinto zikhona kini futhi zivamile, ziyakunenza ningabi ngabavilaphayo nabangenazithelo ekwazini iNkosi yethu uJesu Khristu.
Ngokuba ongenazo lezo zinto uyimpumputhe, ebona kalufifi, esikhohliwe ukuhlanjululwa ezonweni zayo zakudala.
Ngakho-ke bazalwane, khuthalani kakhulu ukuze nikhombise ukubizwa nokukhethwa kwenu. Phela uma nikwenza lokho, anisoze nakhubeka nakanye.
Ngokuba ngokwenza kanjalo, niyakuphiwa ilungelo elipheleleyo lokungena embusweni waphakade weNkosi yethu noMsindisi uJesu Khristu.
Ngakho-ke ngihlose ukuba nginikhumbuze njalo ngalezo zinto, nakuba nivele nizazi, futhi nimile naqina eqinisweni elikhona.
Ngibona kufanele, inqobo nje uma ngisaphila kuleli dokodo, ukuba nginivuselele ngokunikhumbuza,
nakuba ngazi kahle ukuthi akusensuku zatshwala ngilishiye leli dokodo, njengalokhu neNkosi uJesu Khristu yangitshela ngokusobala.
Kepha ngizozama ngakho konke okusemandleni ukuba nisale nizikhumbula njalo lezo zinto noma ngingasekho mina.
Ngokuba sasingalandeli izinganekwane zobuqili, ngesikhathi sinazisa ngamandla nokufika kweNkosi yethu uJesu Khristu, kodwa sasingofakazi abazibonele ngawabo ubukhosi bakhe.
Ngokuba wemukela kuNkulunkulu uYise udumo nenkazimulo, lapho kufika kuye izwi elinje, livela enkazimulweni emangalisayo, lithi: “Lo uyiNdodana yami ethandekayo, engithokozile ngayo.”
Impela, leli lizwi salizwa livela ezulwini, sikanye naye entabeni engcwele.
Ngakho-ke sinalo izwi lesiphrofetho eliqiniswe kakhulu, eniyokwenza kahle ukuba niliqaphelisise, njengesibani esikhanya ebumnyameni kuze kuntwele ezansi, bese ikhwezi lokusa likhanyisa ezinhliyweni zenu.
Yazini lokhu kuqala, ukuthi asikho isiphrofetho sombhalo esingacaciswa ngumuntu ngokwakhe ukuqonda.
Ngokuba akukho siphrofetho noma nini esake seza ngentando yomuntu, kodwa abantu beqhutshwa nguMoya oNgcwele bakhuluma okukaNkulunkulu.
Kepha kwakukhona nabaphrofethi bamanga phakathi kwesizwe, njengokuba naphakathi kwenu kuzokuba khona abafundisi bamanga abazongenisa ngesinyenyela izimfundiso ezidukisayo nezibhubhisayo, bephika noMbusi owabathengayo, bazilethele ukubhujiswa okusheshayo.
Abaningi bayakulandela amanyala abo adluleleyo, ngokuba ngenxa yabo indlela yeqiniso iyakuhlanjalazwa,
futhi ngenxa yobugovu babo, bayakunihlukumeza ngamazwi obuqili. Ukulahlwa kwabo okwamenyezelwa kusukela emandulo akulibali, nokubhujiswa kwabo akozeli.
Uma ngempela uNkulunkulu engazange aziyeke izingelosi ezona, kodwa wazilahla kwalasha, emigodini yesigayegaye sobumnyama, ziboshwe ngamaketango, ukuze zigcinwe lapho futhi zilethwe ekwehlulelweni,
engawuyekanga nomhlaba wasemandulo, kodwa walondoloza uNowa, ummemezeli wokulunga, owayengowesishiyagalombili emkhunjini, mhla ehlisa uzamcolo emhlabeni walabo ababengamesabi uNkulunkulu.
Imizi iSodoma neGomora uNkulunkulu wayilahla ngecala, wayeseyingqongqisa ngomlilo, yaba ngumlotha. Wayenza yaba yisibonelo salokho okuzakubehlela labo abangayikumesaba uNkulunkulu.
Kepha wamhlenga uLothi owayelungile, owayekhathazwe ngamanyala axakile ayenziwa ngabangenamthetho.
Ngokuba leyo ndoda elungileyo, eyayihlala phakathi kwabangalungile, nsuku zonke yadatshukiswa ukuzwa nokubona izenzo zabo ezimbi zokungamesabi uNkulunkulu.
Ngakho-ke iNkosi iyakwazi ukukhulula ekulingweni labo abamesabayo uNkulunkulu, nokugcina abangalungile ukuze ibajezise ngosuku lokwehlulelwa,
ikakhulu labo abenza izinto ezixakile behudulwa yizinkanuko zabo ezimbi futhi bedelela nabasemagunyeni. Banesibindi futhi bangabaphikeleli abangesabi ukuhleba abenkazimulo,
nakuba izingelosi zibedlula ngobuqhawe nangamandla, kodwa azibahlebi ngokuletha izehlulelo ezimelene nabo eNkosini.
Kepha laba bantu bafana nezilwane ezingenangqondo, izidalwa eziphila ngokwemvelo, ezizalelwe ukuba zibanjwe zibulawe. Bakhuluma kabi ngalokho abangakuqondi, kepha nabo bayakubhujiswa bashabalale njengazo.
Bayakwemukeliswa isijezo esifanele ukwenza kwabo okubi. Bacabanga ukuthi ukutamasa nokuminza imini yonke kungukujabula, kepha bayizisihla nehlazo bezitika ekuzikhohliseni kwabo, okunenza nibe namahloni uma bedla nani.
Banamehlo agcwele ukulangazelela ukuphinga, futhi awakuyeki ukona. Bayenga ababuthakathaka, banenhliziyo eyejwayele ukuba nomhobholo, bangabantu abaqalekisiweyo.
Bashiye indlela eqondileyo, baduka, balandela indlela kaBhalamu indodana kaBheyori owayethanda umvuzo ongalungile.
Kepha wasolwa ngesiphambeko sakhe. Imbongolo engakhulumi yakhuluma ngezwi lomuntu, yanqanda isenzo sokuhlanya somphrofethi.
Laba bayimithombo eshileyo nenkungu epheshulwa yisiphepho, bagcinelwe isigayegaye sobumnyama.
Ngokuba bakhuluma udwadwa, kuthi ngamazwi ayize, bayenge ngezinkanuko zenyama nangamanyala adlangileyo, labo abasanda kuphunyuka kulabo abaphambukileyo.
Babathembisa inkululeko, kodwa bona luqobo bayizigqila zenkohlakalo, phela lokho okumehlulayo umuntu, uyisigqila sakho.
Ngokuba lapho sebephunyukile ekungcoleni kwaleli lizwe ngokwazi iNkosi yethu noMsindisi uJesu Khristu kodwa baphinde babanjwa yikho, kwabehlula, futhi isiphetho sabo sibasibi kakhulu kunesiqalo.
Ngokuba kwakungcono kubo ukuthi kabazange bayazi indlela yokulunga kunokuba bathi sebeyazi baphenduke bafulathele umyalo ongcwele ababewunikiwe.
Kwenzekile kubo njengokusho kwesaga esiqinisileyo, esithi: “Inja yabuyela emhlanzweni wayo,” nesithi: “Ingulube igezwe qede yabuye yazibhixa odakeni.”
Bathandekayo, le ncwadi ngeyesibili enginilobela yona, ngizama kuyo ukuvusa ingqondo yenu ngokunikhumbuza,
ukuba nikhumbule amazwi akhulunywa phambilini ngabaphrofethi abangcwele nomyalo weNkosi noMsindisi owashunyayelwa ngabaphostoli benu.
Okokuqala, nidinga ukuba nazi ukuthi ngezinsuku zokugcina, kuyakufika ababhinqayo bebhinqa behamba ngokwezinkanuko zabo,
bethi: “Siphi isithembiso sokufika kwakhe na? Ngokuba selokhu okhokho balala, zonke izinto zisenjengoba zazinjalo kusukela ekuqaleni kokudalwa.”
Ngokuba benza sengathi kufihlekile kubo ukuthi izulu lalikhona kwasemandulo, kanye nomhlaba owavela emanzini nangawo amanzi, kwadalwa ngezwi likaNkulunkulu,
okwathi ngamanzi umhlaba owawukhona phambilini wabhujiswa ngawo.
Ngalo lelo lizwi, izulu nomhlaba okukhona manje kubekelwe umlilo, kulindele usuku lokwehlulelwa nolokubhujiswa kwabantu abangamesabi uNkulunkulu.
Bathandekayo, nize ningakhohlwa yilokhu okukodwa qwaba, ukuthi usuku lunye eNkosini lunjengeminyaka eyinkulungwane, nokuthi iminyaka eyinkulungwane injengosuku lunye.
INkosi ayilibali ngesithembiso sayo, njengalokhu abanye becabanga ukuthi ilibele, kepha iyanibekezelela, ngoba ingafuni kubhubhe namunye, kodwa ukuba bonke bafinyelele empendukweni.
Kepha usuku lweNkosi luyakufika njengesela lapho amazulu eyakushabalala ngokushesha okukhulu; kuyakusha konke emlilweni, kubhujiswe; nomhlaba nayo yonke imisebenzi yawo, kungabe kusaba bikho.
Njengokuba konke kuyakubhujiswa kanjalo, nifanele nibe ngabantu abanjani ekuziphatheni ngobungcwele, nangokumesaba uNkulunkulu,
nilindele futhi nimagange ngokufika kosuku lukaNkulunkulu okuyakuthi ngalo, amazulu adunqiswe ngomlilo abhubhe, konke kushe kungqongqe, kuncibilike.
Kepha thina njengokwesithembiso sakhe, silindele amazulu amasha nomhlaba omusha, okukhona kuwo ukulunga.
Ngakho, bathandekayo, njengokuba nisalindele lezi zinto, phokophelani ukuba nifunyanwe ninokuthula, ningenabala, nasici kuye.
Bonani ukuthi ukubekezela kweNkosi kuyinsindiso, njengalokhu nomzalwane wethu othandekayo uPawula anilobela ngokuhlakanipha ayekuphiwe.
Kanjalo futhi nasezincwadini zakhe zonke uyakhuluma ngalezi zinto, okukho nakuzo okunzima ukuba kuqondakale, okuthe abangenalwazi nabantekenteke bakuhlanekezela, njengalokhu benze kanjalo nangezinye izincwadi, bazidonsela ukubhujiswa.
Ngakho-ke nina bathandekayo, njengokuba nazi lokhu phambilini, qaphelani, ukuze ningadukiswa ngokukhohlisa kwabangenamthetho, bese niwa kulokhu eniqine kukho.
Kepha khulani emseni nasekwazini iNkosi noMsindisi wethu uJesu Khristu. Kuye makube udumo kusukela manje kuze kube usuku lwaphakade. Amen.
Lokho okwakukhona kwasekuqaleni, esakuzwa, sakubona ngamehlo ethu, sakubheka, sakuphatha ngezandla zethu, okwezwi lokuphila.
Lokho kuphila kwabonakaliswa, sakubona, sifakaza ngakho, futhi sinishumayeza ngalokho kuphila okuphakade okwakukhona kuYise, kwabonakaliswa kithi.
Lokho esikubonileyo, sakuzwa, sinishumayeza khona nani, ukuba nibe nenhlanganyelo nathi. Kepha thina sinenhlanganyelo noYise naneNdodana yakhe, uJesu Khristu.
Ngakho-ke sesiyanilobela lokhu, ukuze kuphelele intokozo yenu.
Nanti izwi esalizwa kuye, sinishumayeza lona, ukuthi uNkulunkulu ungukukhanya, abukho nakanye ubumnyama kuye.
Uma sithi sinobudlelwane naye, kodwa sibe sisahamba ebumnyameni, siqamba amanga, asikwenzi okuyiqiniso.
Kepha uma sihamba ekukhanyeni, njengalokhu Yena esekukhanyeni; sinenhlanganyelo omunye nomunye, negazi likaJesu iNdodana yakhe liyasihlambulula ezonweni zonke.
Uma sithi asinasono, siyazikhohlisa, neqiniso alikho kithi.
Kepha uma sizivuma izono zethu, uthembekile, ulungile ukuba asithethelele izono, asihlambulule kukho konke ukungalungi.
Uma sithi asonanga, simenza umqambimanga uNkulunkulu, futhi nezwi lakhe alikho kithi.
Bantwana bami, nginilobela lokhu ukuze ningoni. Kepha uma umuntu ona, sinoMmeli osimela kuYise, uJesu Khristu olungileyo.
Yena uyinhlawulo ngenxa yezono zethu, kungezona nje ezethu kuphela, kodwa nangenxa yezezwe lonke.
Ngalokho siyazi ukuthi siyamazi Yena, uma siyigcina imiyalo yakhe.
Lo othi: “Ngiyamazi,” kodwa engayigcini imiyalo yakhe, ungumqambimanga, akanalo iqiniso.
Kepha ogcina izwi lakhe, impela uthando lukaNkulunkulu luphelelisiwe kuye.
Lowo othi uhlala kuye, kufanele ahambe njengalokhu ahamba Yena.
Bathandekayo, anginilobeli umyalo omusha, kodwa umyalo omdala enaninawo kwasekuqaleni. Umyalo omdala uyizwi enalizwayo.
Nginibhalela futhi umyalo omusha, oyiqiniso kuye nakini, ngokuba ubumnyama buyedlula nokukhanya kweqiniso sekuvele kuyakhanya.
Umuntu othi usekukhanyeni, kodwa abe ezonda umzalwane wakhe, usesebumnyameni kuze kube manje.
Othanda umzalwane wakhe, uhlala ekukhanyeni; akukho sikhubekiso kuye.
Kepha ozonda umzalwane wakhe, usebumnyameni, uhamba ebumnyameni, akazi lapho eya khona, ngokuba ubumnyama buwaphuphuthekisile amehlo akhe.
Ngilobela nina bantwanyana, ngokuba nithethelelwe izono ngenxa yegama lakhe.
Ngilobela nina boyise, ngokuba niyamazi Yena okhona kwasekuqaleni. Ngilobela nina zinsizwa, ngokuba nimnqobile omubi.
Nginilobele, bantwanyana, ngokuba niyamazi uYise. Nginilobele, boyise, ngokuba niyamazi Yena okhona kusukela kwasekuqaleni. Nginilobele, zinsizwa, ngokuba ninamandla; izwi likaNkulunkulu lihlala kini, nimnqobile omubi.
Ningalithandi izwe nezinto ezikulo. Uma umuntu ethanda izwe, alukho kuye uthando lukaYise.
Ngokuba konke okusezweni; inkanuko yemvelo yomuntu, inkanuko yamehlo, ukuzigabisa ngalokhu kuphila, akuveli kuYise, kodwa ezweni.
Izwe liyadlula nenkanuko yalo. Kepha owenza intando kaNkulunkulu uhlala kuze kube phakade.
Bantwanyana, sekuyisikhathi sokugcina, njengalokhu nezwa ukuthi uyeza umphikukhristu; namanje-ke sekukhona abaphika uKhristu abaningi, ngalokho sesiyazi ukuthi sekuyisikhathi sokugcina.
Bahlubukile kithi, kwazise bebengesibo abakithi, ngokuba uma bebengabakithi bebezohlala nathi. Kepha basihlamukile ukuze babonakalise ukuthi bonke abasibo abakithi.
Ninogcobo oluvela koNgcwele futhi nazi konke.
Anginilobelanga ngokuba ningalazi iqiniso, kodwa ngenxa yokuthi niyalazi nokuthi akukho manga avela eqinisweni.
Ngubani ongumqambimanga, uma kungesiye lowo ophika ukuthi uJesu unguKhristu na? Yilowo ongumphikukhristu, ophika uYise neNdodana.
Yilowo nalowo ophika iNdodana akanaye uYise, kodwa oyivumayo iNdodana unaye noYise.
Lokho enakuzwayo kwasekuqaleni, makuhlale kini. Uma kuhlala kini enakuzwayo kwasekuqaleni, nani niyakuhlala kuyo iNdodana nakuye uYise.
Nasi-ke isithembiso Yena asethembisa sona: ukuphila okuphakade.
Nganilobela lokho maqondana nalabo abanidukisayo.
Nina-ke, ugcobo enalwamukela kuye luhlala kini, anidingi ukuba anifundise, kodwa lokho kunigcoba kwakhe yikhona okunifundisayo ngakho konke; kuyiqiniso, akusiwo amanga, njengalokhu-ke kunifundisile, hlalani kuye.
Namanje bantwanyana, hlalani kuye ukuze kuthi nxa ebonakala, sibe nesibindi, singabi namahloni phambi kwakhe lapho efika.
Uma nazi ukuthi Yena ulungile, yazini-ke futhi ukuthi yilowo nalowo owenza ukulunga uzelwe nguye.
Ake nibheke uthando olungaka asinike lona uBaba, ukuba kuthiwe singabantwana bakaNkulunkulu, futhi siyibo. Nokho izwe alisazi, ngokuba naye alimazanga.
Bathandekayo, manje singabantwana bakaNkulunkulu, kodwa akukabonakali esiyakuba yikho. Nokho siyazi ukuthi, nxa ebonakaliswa, siyakuba njengaye, ngokuba siyakumbona njengokuba enjalo.
Bonke abanalelo themba kuye, bayazihlambulula, njengokuba Yena ehlambulukile.
Bonke abenza isono bayaweqa umthetho, ngokuba isono singukweqa umthetho.
Seniyazi ukuthi Yena wabonakaliswa, ukuze asuse izono; akukho sono kuye.
Lowo okuye akoni; owonayo akambonanga, futhi akamazi.
Bantwanyana, maningadukiswa muntu. Umuntu owenza ukulunga, ulungile, njengokuba Yena elungile.
Owenza isono, ungokaSathane, ngokuba uSathane wona kwasekuqaleni. INdodana kaNkulunkulu yabonakaliswa ngalokhu, ukuze iyiqede iphele nya imisebenzi kaSathane.
Umuntu ozelwe nguNkulunkulu akasenzi isono, ngokuba imbewu kaNkulunkulu ihlala kuye, futhi akanakwenza sono, ngokuba uzelwe nguNkulunkulu.
Ngalokho-ke bayabonakala abangabantwana bakaNkulunkulu nabangabantwana bakasathane; lowo ongakwenzi ukulunga akasiye okaNkulunkulu, nalowo ongamthandi umzalwane wakhe.
Yilo umyalo enawuzwayo kwasekuqaleni wokuthi sithandane,
kungabi njengoKhayini owaba ngowomubi, wabulala umfowabo; wambulalelani na? Ngokuba imisebenzi yakhe yayimibi, kodwa eyomfowabo ilungile.
Ningamangali bazalwane uma izwe linizonda.
Siyazi ukuthi sidlulile ekufeni, sangena ekuphileni, ngokuba siyabathanda abazalwane; ongabathandiyo uhlezi ekufeni.
Umuntu ozonda umzalwane wakhe ungumbulali. Niyazi-ke ukuthi akukho mbulali onokuphila okuphakade.
Uthando silwazi ngalokhu ukuthi Yena wakudela ukuphila kwakhe ngenxa yethu. Kanjalo nathi sifanele ukudela ukuphila kwethu ngenxa yabazalwane.
Kepha uma umuntu enengcebo yezwe, bese ebona umzalwane wakhe eswele, angamenzeli sihawu, uthando lukaNkulunkulu lungahlala kanjani kuye na?
Bantwanyana, masingathandi ngezwi nangokukhuluma nje, kodwa makubonakale ngezenzo nangeqiniso.
Ngalokho siyazi ukuthi singabeqiniso; inhliziyo yethu iyakuba neqholo phambi kwakhe.
Ngokuba uma inhliziyo yethu isilahla, uNkulunkulu mkhulu kunayo, futhi Yena uyakwazi konke.
Bathandekayo, uma inhliziyo ingasilahli, sinesibindi sokuma phambi kukaNkulunkulu,
nalokho esikucelayo Yena uyakusamukelisa khona, ngokuba siyigcina imiyalo yakhe, futhi senza okuthandekayo kuye.
Yilo umyalo wakhe, ukuba sikholwe egameni leNdodana yakhe uJesu Khristu, sithandane, njengokuba asinika umyalo.
Ogcina imiyalo yakhe uhlala kuye, naye uqobo uhlala kuye. Ngalokho siyazi ukuthi uhlala kithi ngaye uMoya oNgcwele asinike Yena.
Bathandekayo, ningakholwa yibo bonke omoya, kodwa bahloleni omoya ukuthi ngabe bangabakaNkulunkulu yini. Ngokuba baningi abaphrofethi bamanga abaphumele ezweni.
UMoya kaNkulunkulu niyakumazi ngalokhu: bonke omoya abakuvumayo ukuthi uJesu Khristu uzelwe waba ngumuntu bangabakaNkulunkulu.
Lowo moya ongamvumi uJesu Khristu, akasiye okaNkulunkulu; lowo moya-ke ungokamphikukhristu, lo enitshelwe ngaye ukuthi uyeza, manje-ke usefikile ezweni.
Nina bantwanyana ningabakaNkulunkulu, nibahlulile, ngokuba lo okini mkhulu kunalowo osezweni.
Bona bangabezwe; ngalokho bakhuluma okwezwe, nezwe liyabezwa.
Thina singabakaNkulunkulu; omaziyo uNkulunkulu uyasizwa, ongesiye okaNkulunkulu akasizwa. Ngalokho siyamazi umoya weqiniso nomoya wokuduka.
Bathandekayo, kumele sithandane, ngokuba uthando luvela kuNkulunkulu; bonke abanothando bazelwe nguNkulunkulu, futhi bayamazi uNkulunkulu.
Ongathandiyo akamazi uNkulunkulu, ngokuba uNkulunkulu uluthando.
Uthando lukaNkulunkulu walubonakalisa kithi ngokuthi athumele ezweni iNdodana yakhe ezelwe yodwa, ukuba siphile ngayo.
Uthando lukulokhu: akusikho ukuthi thina samthanda uNkulunkulu, kodwa Yena wasithanda thina, wathumela iNdodana yakhe ibe yinhlawulo ngezono zethu.
Bathandekayo, uma uNkulunkulu asithanda kanjalo, nathi simelwe ukuthandana.
Akekho umuntu osewake wabona uNkulunkulu. Uma sithandana, uNkulunkulu uhlala kithi, nothando lwakhe luphelele kithi.
Ngenxa yokuba esiphe okoMoya wakhe, ngalokho siyazi ukuthi sihlala kuye, naye kithi.
Thina sibonile, futhi siyafakaza ukuthi uYise wayithuma iNdodana ukuba ibe nguMsindisi wezwe.
Lowo ovuma ukuthi uJesu uyiNdodana kaNkulunkulu, uNkulunkulu uhlala kuye, naye kuNkulunkulu.
Thina siyalwazi, futhi siyakholwa yilolu thando uNkulunkulu analo ngathi. UNkulunkulu uluthando nalowo ohlala othandweni uhlala kuNkulunkulu, noNkulunkulu uhlala kuye.
Ngenxa yalokho uthando luphelelisiwe kithi, ukuze kuthi ngosuku lokwahlulelwa sime ngesibindi, ngokuba njengalokhu Yena eluthando, nathi sinjalo kuleli zwe.
Akukho ukwesaba othandweni. Uthando olupheleleyo luyakuxosha ukwesaba, ngokuba ukwesaba kunesijeziso nowesabayo akaphelele othandweni.
Thina siyathanda, ngokuba nguYena owasithanda kuqala.
Kepha uma umuntu, ethi: “Ngiyamthanda uNkulunkulu,” kodwa ezonda umzalwane wakhe, ungumqambimanga. Ngokuba lowo ongamthandi umzalwane wakhe ambonayo angemthande uNkulunkulu angambonanga.
Yebo, wasinika lo myalo, uvela kuNkulunkulu, masiwugcine. Lo myalo uthi othanda uNkulunkulu, makamthande nomzalwane wakhe.
Yilowo nalowo okholwa wukuthi uJesu unguKhristu, uzelwe nguNkulunkulu. Lowo othanda ozelweyo uthanda nomzeleyo.
Ngalokho siyazi ukuthi siyabathanda abantwana bakaNkulunkulu, nxa sithanda uNkulunkulu, senza imiyalo yakhe.
Ngokuba ukuthanda uNkulunkulu yilokhu ukuba siyigcine imiyalo yakhe, futhi imiyalo yakhe ayinzima.
Konke okuzelwe nguNkulunkulu kuyalinqoba izwe, lokhu kungukunqoba okunqobe izwe: ukukholwa kwethu.
Ngubani onqoba izwe uma kungesiye lowo okholwa ukuthi uJesu uyiNdodana kaNkulunkulu na?
UJesu weza ngamanzi wabhabhadiswa, akubanga ngamanzi qha, kodwa kwaba nangegazi lakhe, lokhu noMoya oNgcwele uyafakaza ngalokho, ngokuba unguMoya weqiniso.
Ngokuba bathathu ofakazi:
uMoya, amanzi negazi. Bobathathu bavumelana ngento eyodwa.
Uma sibemukela ubufakazi babantu, ubufakazi bukaNkulunkulu bukhulu kunalobo, ngokuba ubufakazi bukaNkulunkulu buyilobu abufakazile ngeNdodana yakhe.
Okholwa yiNdodana kaNkulunkulu unobufakazi ngaphakathi kuye. Ongakholwayo, umenze umqambimanga uNkulunkulu, ngokuba engakholwanga ngubufakazi uNkulunkulu abufakazile ngeNdodana yakhe.
Yilobu ubufakazi ukuthi uNkulunkulu usiphile ukuphila okuphakade, nalokhu kuphila kuseNdodaneni yakhe.
Onayo iNdodana unokuphila; ongenayo iNdodana kaNkulunkulu akanakho ukuphila.
Nginilobele lokho ukuze nazi ukuthi ninokuphila okuphakade, nina enikholwa egameni leNdodana kaNkulunkulu.
Yilesi isibindi esinaso kuye sokuthi uma sicela utho ngokwentando yakhe, uyasizwa.
Uma sazi ukuthi uyasizwa noma sicelani, siyazi ukuthi sinakho esikucelileyo, esikucele kuye.
Uma umuntu ebona umzalwane wakhe enza isono okungeyiso esibhubhisayo, lo ombonileyo makamcelele kuNkulunkulu ukuphila lokhu akunika labo abasuke benze isono okungesona esibhubhisayo.
Konke ukungalungi kuyisono, kodwa kukhona isono esingesiso esokufa.
Siyazi ukuthi yilowo nalowo ozelwe nguNkulunkulu akoni, ngokuba ozelwe nguNkulunkulu uyazigcina, nomubi akamthinti.
Siyazazi ukuthi thina singabakaNkulunkulu, nokuthi umhlaba wonke ubuswa ngamandla obubi.
Kepha siyazi ukuthi iNdodana kaNkulunkulu isifikile, yasinika ukuqonda namandla ukuze simazi oyiqiniso. Sikuye oweqiniso, iNdodana yakhe, uJesu Khristu. Lo nguNkulunkulu weqiniso nokuphila okuphakade.
Bantwanyana, dedani ezithombeni ezibaziweyo.
Ilunga, kuye owesifazane okhethiweyo nakubantwana bakhe, engibathanda ngokweqiniso; hhayi mina ngedwa, kodwa bonke abalaziyo iqiniso;
ngenxa yeqiniso elihlala kithi, neliyakuhlala kithi kuze kube phakade.
Umusa, isihawu nokuthula okuvela kuNkulunkulu uBaba nakuJesu Khristu iNdodana kaYise ngokweqiniso nangothando, kuzakuba nathi.
Ngithokozile kakhulu, ukuthi ngitholile ukuthi abanye babantwana bakho bahamba eqinisweni, njengokomyalo esiwamukele kuBaba.
Kepha manje ngiyakunxusa nkosikazi, kungekungathi ngikulobela umyalo omusha, kodwa lowo esasinawo kwasekuqaleni owokuba sithandane.
Uthando yilolu-ke, ukuba sihambe ngokwemiyalo yakhe. Yilo umyalo, njengalokho nawuzwa kwasekuqaleni, okumelwe sihambe ngawo.
Baningi abakhohlisi abaphumele ezweni; labo abangavumi ukuthi uJesu Khristu uze emhlabeni waba ngumuntu. Lowo osho kanjalo ungumkhohlisi nomphikukhristu.
Ziqapheleni nina, ukuze ningalahlekelwa yilokho esikusebenzeleyo, kunalokho namukele umvuzo opheleleyo.
Lowo oweqisayo, engemi esifundisweni sikaKhristu, akanaye uNkulunkulu; kodwa ohlezi esifundisweni, unaye uYise neNdodana.
Uma kufika kini umuntu, engafundisi lesi sifundiso, ningamemukeli endlini yenu, futhi ningambingeleli.
Ngokuba ombingelelayo uyobe uhlanganyela naye emisebenzini yakhe emibi.
Kuningi ebenginokunilobela ngakho, kodwa angithandanga ukukuloba ephepheni ngoyinki. Ngiyethemba ukuthi ukuza kwami kini, ngikhulume nani bukhoma, kuyokwenza ukuthokoza kwethu kuphelele.
Bayakhonza kuwe abantwana bakadadewenu okhethiweyo.
Ilunga, kuGayu othandekayo, engimthanda ngeqiniso.
Mzalwane, ngikufisela ukuba uphumelele kukho konke, futhi ube nokuphila okuhle, njengokuba umphefumulo wakho uphilile.
Ngathokoza kakhulu ngesikhathi kufika abazalwane, befakaza ngokwethembeka kwakho eqinisweni, njengalokhu uhamba kulo.
Ayikho intokozo eyedlula leyo yokuba ngizwe ukuthi abantwana bami bahamba eqinisweni.
Mzalwane, wenza umsebenzi wokwethembeka ngokunakekela abazalwane ikakhulukazi labo ongabazi.
Bona bafakazile ngothando lwakho, phambi kwebandla. Kuyakuba yinto enhle kakhulu ukuba nxa sebehamba, ubanike usizo ngendlela eyamukelekayo kuNkulunkulu.
Ngokuba ngenxa yeGama, baphuma bengaphethe lutho phakathi kwabezizwe.
Ngakho-ke simele ukubamukela nokubasiza abantu abanjalo, ukuze sibe yizisebenzi zeqiniso kanye nabo.
Ibandla ngalibhalela okuthile, kodwa uDiyothrefesi othanda ukuba ngungqaphambili, akasemukeli.
Ngakho-ke mhla ngafika lapho, ngiyakumkhumbuza imisebenzi yakhe ayenzayo, namazwi amabi esihleba. Kagcini nje ngokwenqaba ukwamukela abazalwane, kodwa udukisa nalabo abafisa ukwenzenjalo, abaxoshe ngisho nasebandleni.
Mzalwane, ungalokothi ulandele okubi, kodwa ulandele okuhle kuphela. Owenza okuhle ungokaNkulunkulu, kodwa owenza okubi akambonanga uNkulunkulu.
UDemethriyu ufakazelwa yibo bonke abantu, ngisho neqiniso uqobo. Nathi-ke siyafakaza ngaye, uyazi-ke nawe ukuthi ubufakazi bethu buliqiniso.
Bengisenokuningi ebenginganilobela ngakho, kodwa angithandi ukukubhala ngoyinki nosiba.
Kepha ngiyethemba ukuthi ngizakunibona masinyane, sikhulume ubuso nobuso.
Ukuthula makube nawe. Bayakhonza kuwe abazalwane, nawe khonza kubo bonke abazalwane abalapho, ubagagule ngamagama.
UJuda, inceku kaJesu Khristu nomfowabo kaJakobe, kubo bonke ababiziweyo nabathandiweyo bakaNkulunkulu uYise, nabagciniwe kuJesu Khristu.
Umusa nothando nokuthula makuphindwaphindwe kini.
Bathandekayo, ngisha amashushu ngifuna ukunilobela ngensindiso esiyihlanganyele sonke, ngikuthola kubalulekile ukuba nginilobele, nginikhuthaze ukuba nilulwele ukholo olwabekwa kwabakanye kwabangcwele.
Ngokuba abathile sebengene isinyenyela phakathi kwenu, okwalotshwa ngabo phambilini ukuthi bamiselwe ukubhujiswa njengabangalungile. Bahlanekezela umusa kaNkulunkulu wethu, bawenze ube yizaba zokwenza amanyala, beyiphika iNkosi yethu uJesu Khristu okunguYena kuphela uMbusi.
Kepha ngithanda ukunikhumbuza, nanxa nikwazi konke lokhu ukuthi iNkosi isisikhululile isizwe eGibhithe, emveni kwalokho yabhubhisa labo abangakholwanga.
Nezingelosi ezingayigcinanga indawo yazo yokubusa, kepha ezayishiya indawo yazo yokuhlala; uzigcine ziboshwe ngezinsinga ingunaphakade, ebumnyameni obuphakade, ukuze zehlulelwe ngosuku olukhulu.
NjengeSodoma neGomora nemizi eyakhelene nayo, yenza ubufebe ngokufanayo, yalandela ubufebe obuxakile. Bayisibonelo sokubhujiswa ngomlilo ongunaphakade.
Ngokunjalo, nalaba abaphuphayo banukubeza imizimba yabo, futhi baphika ubukhosi, bahlambalaze nezidalwa ezingcwele.
Kepha lapho uMikhayeli, ingelosi enkulu ephikisana nosathane, bebanga isidumbu sikaMose, akalokothanga wakhuluma okubi ngaye, kodwa wathi: “INkosi mayikusole.”
Kepha laba, bahlambalaza nalezo zinto abangazaziyo, babhujiswa nayilezo zinto abazaziyo ngokwemvelo, njengezilwane ezingenakuqonda.
Maye, kubo, ngokuba bahamba endleleni kaKhayini, bagijimela nasephutheni likaBhalamu alenza ngenxa yomvuzo; babhubha njengoKhora owahlubukayo.
Yibo laba abayichilo emadilini enu, abadla nani bengenakwesaba, bezenelisa. Bangamafu angenamvula apheshulwa wumoya, izihlahla zasehlobo ezingenazithelo, bafe imfakabili, basishuliwe.
Bakhefuza amahlazo abo njengamaza adlangalalayo, bayantunta njengezinkanyezi ezigcinelwe ubumnyama baphakade.
U-Enokhi, owayengowesikhombisa kusukela ku-Adamu, waphrofetha ngalaba, wathi: “Uyabona, iNkosi iyeza nezindimbane zabangcwele bayo,
ukubehlulela bonke nokujezisa yonke imiphefumulo ngenxa yemisebenzi yokungamesabi uNkulunkulu, abayenze ngokungahloniphi, nangawo wonke amazwi anesihluku abawakhuluma ngaye; lezi yizoni ezimbi.”
Yibo laba abangabakhonondayo nabasolayo, abahamba ngokubuswa yizinkanuko zabo, bekhuluma amazwi aluwangala, betusa abanye ukuze bazuze.
Kepha nina bathandekayo, khumbulani amazwi akhulunywe kini phambilini ngabaphostoli beNkosi yethu uJesu Khristu.
Basho ukuthi ngesikhathi sokugcina kuyakuba khona ababhinqayo, bebuswa yizinkanuko zabo zokungcola.
Yibo laba abadala ukwahlukana bengabemvelo, bengenaye uMoya.
Kepha nina bathandekayo zakheni, nigxile ekukholweni kwenu okungcwele kakhulu, nikhuleke ngoMoya oNgcwele,
nizigcine othandweni lukaNkulunkulu, nilindele umusa weNkosi yethu uJesu Khristu oholela ekuphileni okuphakade.
Nibahawukele abanye abangabazayo.
Nibasindise abanye ngokubahlwitha emlilweni, nibahawukele abanye, kodwa nibe nokwesaba, nenyanye ngisho nesembatho esingcoliswe yinyama yabo.
Kepha kuYena onamandla okunilonda ningakhubeki, animise phambi kwenkazimulo yakhe ningenasici, ninokuthokoza.
Kuye uNkulunkulu munye, uMsindisi wethu ngaye uJesu Khristu iNkosi yethu, makube udumo, nobukhosi, namandla, negunya, kusukela zingakabi bikho izikhathi, namanje, kuze kube phakade. Amen.
Isambulo sikaJesu Khristu uNkulunkulu amnika sona ukuba akhombise izinceku zakhe izinto ezizokwenzeka masinyane. Wathumela ingelosi yakhe ukuba iyikhombise inceku yakhe uJohane,
owafakaza ngezwi likaNkulunkulu nangobufakazi bukaJesu Khristu, ngakho konke akubona.
Ubusisiwe lowo ofundayo nalabo abezwa amazwi alesi siphrofetho, bese bekugcina okulotshwe kuso, ngokuba isikhathi sesiseduze.
UJohane, kuwo amabandla ayisikhombisa ase-Asiya: makube kinina umusa nokuthula okuvela kuye okhona, nowayekhona nozayo, nakoMoya abayisikhombisa abaphambi kwesihlalo sakhe sobukhosi,
nakuJesu Khristu, ufakazi othembekileyo, izibulo labafileyo nombusi wamakhosi omhlaba. Kuye osithandayo nowasikhulula ezonweni zethu ngegazi lakhe,
wasenza saba ngumbuso nabaphristi kuNkulunkulu uYise, makube kuye inkazimulo namandla kuze kube phakade. Amen.
Bhekani, uyeza ngamafu, onke amehlo ayakumbona, nalabo abamgwazayo; zonke izizwe zomhlaba ziyakulila ngaye. Yebo, Amen.
“Mina ngiyiSiqalo neSiphetho,” kusho iNkosi uNkulunkulu, “okhona, owayekhona, nozayo, uSomandla.”
Mina Johane, umzalwane wenu nomhlanganyeli kanye nani ezinhluphekweni, nasembusweni nasekubekezeleni kuJesu, ngangisesiqhingini okuthiwa iPhatmose, ngenxa yezwi likaNkulunkulu nangenxa yobufakazi bukaJesu.
NgangikuMoya ngosuku lweNkosi, ngezwa emuva kwami izwi elikhulu kungathi elecilongo,
lithi: “Lokhu okubonayo kulobe encwadini, ukuthumelele emabandleni ayisikhombisa: e-Efesu, eSimirna, ePhergamu, eThiyathira, eSardesi, eFiladelfiya naseLawodikheya.”
Ngaphenduka ukuba ngibone leli lizwi elalikhuma nami. Sengiphenduka, ngabona izinti zezibani zegolide eziyisikhombisa.
Phakathi kwezinti zezibani kwakukhona ofana nendodana yomuntu, embethe ingubo ekhawula ezinyaweni, ezibophe ngebhande legolide ezibeleni.
Ikhanda lakhe nezinwele zakhe kwakumhlophe njengoboya bezimvu, nanjengeqhwa, amehlo akhe enjengamalangabi omlilo.
Izinyawo zakhe zazifana nethusi elikhazimula sengathi lisesithandweni somlilo, izwi lakhe linjengokuhlokoma kwamanzi amaningi.
Wayephethe esandleni sakhe sokunene izinkanyezi eziyisikhombisa, emlonyeni wakhe kwaphuma inkemba ebukhali nhlangothi zombili, ubuso bakhe bukhazimula njengelanga likhanya bha.
Lapho ngimbona ngawa phansi ngasezinyaweni zakhe, nganjengofileyo. Wayesebeka isandla sakhe sokunene phezu kwami, ethi: “Ungesabi; Mina ngingowokuqala nowokugcina,
nophilayo. Ngangifile; manje ngiyaphila kuze kube phakade naphakade, futhi ngiphethe izihluthulelo zokufa nezeHayidesi.
“Ngakho-ke loba lokhu okubonileyo, nokukhona, nokuzakwenzeka emuva kwalokho.
Imfihlakalo yezinkanyezi eziyisikhombisa ozibonileyo esandleni sami sokunene, nezinti zegolide zezibani eziyisikhombisa, yile: izinkanyezi eziyisikhombisa yizingelosi zamabandla ayisikhombisa, kuthi izinti zegolide zezibani eziyisikhombisa zingamabandla ayisikhombisa.”
“Kuyo ingelosi yebandla lase-Efesu loba, ukuthi: “ ‘Nakhu okushiwo yilowo ophethe izinkanyezi eziyisikhombisa esandleni sakhe sokunene, ohamba phakathi kwezinti zegolide zezibani eziyisikhombisa, uthi:
ngiyayazi imisebenzi yakho, ukusebenza kanzima, nokubekezela kwakho, nokuthi awubabekezeleli ababi, nokuthi wabavivinya labo ababezibiza ngabaphostoli bebe bengesibo, wabafumana beqamba amanga.
Wakhuthazela, futhi wabekezela ngenxa yegama lami; awuzange ukhathale.
“ ‘Kepha ngihlushwa yilokhu ngawe, ukuthi usululahlile uthando lokuqala.
Ngakho-ke khumbula lapho uwe khona, uphenduke, wenze imisebenzi yakuqala, kodwa uma kungenjalo, ngiyeza kuwe, ngizakulususa uthi lwesibani sakho endaweni yalo, uma nje ungaphenduki.
Kepha okuhle ngawe yilokhu ukuthi uyayizonda imisebenzi yamaNikholawu, engiyizondayo nami.
“ ‘Onendlebe makezwe lokho akushoyo uMoya emabandleni. Onqobayo ngiyakumnika ukuba adle kuwo umuthi wokuphila osePharadisi likaNkulunkulu.’
“Nakuyo ingelosi yebandla laseSimirna loba ukuthi: “ ‘Nakhu akushoyo ongowokuqala nowokugcina, owayefile kodwa osephila, uthi:
ngiyakwazi ukuhlupheka kwakho nobumpofu bakho, kodwa ube ucebile, nenhlamba yalabo abathi bangabaJuda bengesibo, kodwa beyisinagoge likaSathane.
Ungakwesabi lokho ozakuhlupheka ngakho. USathane uzakubaphonsa ejele abanye benu ukuze nilingwe, futhi nizakuhlupheka izinsuku ezilishumi. Thembekani kuze kube sekufeni, ngizakuninika umqhele wokuphila.
“ ‘Onendlebe makezwe lokho akushoyo uMoya emabandleni. Onqobayo akasoze oniwa ngukufa kwesibili.’
“Nakuyo ingelosi yebandla lasePhergamu loba, ukuthi: “ ‘Usho lokhu onenkemba ebukhali esika nhlangothi zombili, uthi:
ngiyazi lapho uhlala khona; lapho kukhona isihlalo sobukhosi sikaSathane. Kepha ubambelele egameni lami, awuluphikanga ukholo lwami nasemihleni ka-Antiphase, ufakazi wami owethembekileyo, owabulawa phakathi kwenu lapho kuhlala khona uSathane.
“ ‘Kepha nginokumbalwa okungihluphayo ngawe, kukhona labo ababambelele emfundisweni kaBhalami owafundisa uBhalaki ukuba abeke isikhubekiso phambi kwabantu bakwa-Israyeli ukuba badle okuhlatshelwe izithombe nokuthi bafebe.
Kanjalo nakuwe bakhona futhi ababambisise imfundiso yamaNikholawu.
Ngakho-ke phendukani, uma kungenjalo, ngizoza kini ngokuphazima kweso, ngilwe nabo ngenkemba yomlomo wami.
“ ‘Onendlebe makezwe lokho akushoyo uMoya emabandleni. Onqobayo ngiyakumnika okwemana efihliweyo, ngimuphe itshe elimhlophe, futhi kulotshiwe etsheni igama elisha elingaziwa muntu, kuphela lowo olemukelayo.’
“Kuyo ingelosi yebandla laseThiyathira loba, ukuthi: “ ‘Nakhu okushiwo yiNdodana kaNkulunkulu enamehlo anjengamalangabi omlilo, nezinyawo zayo ezifana nethusi elikhazimulayo, ithi:
ngiyayazi imisebenzi yakho, uthando, ukukholwa, ukukhonza nokubekezela kwakho, nokuthi imisebenzi yakho yokugcina miningi kuneyokuqala.
“ ‘Kepha enginakho okungihluphayo ngawe, ukuthi uvumela owesifazane uJezebheli, lo ozibiza ngomphrofethikazi, ukuba afundise, adukise izinceku zami ukuze zifebe, futhi zidle okuhlatshelwe izithombe.
Ngamnika ithuba lokuba aphenduke, kodwa akavumi ukuphenduka ebufebeni bakhe.
Manje ngimphonsa embhedeni nalabo abaphinga naye, ngibaphonsa ekuhluphekeni okukhulu, ngaphandle kokuba baphenduke emisebenzini yakhe.
Ngiyakubulala abantwana bakhe ngokufa; onke amabandla ayakukwazi ukuthi nginguye ophenya izingqondo, nezinhliziyo, futhi ngiyakumnika, yilowo nalowo wenu, ngokwemisebenzi yakhe.
Kepha ngithi kini eniseleyo eThiyathira, nina nonke eningenayo le mfundiso, eningakwazi okujulileyo kukaSathane njengalokhu besho, anginethwesi omunye umthwalo,
kodwa bambisisani lokhu eninakho, ngize ngifike.
“ ‘Onqobayo nogcina imisebenzi yami kuze kube sekupheleni, ngiyakumnika ilungelo lokubusa phezu kwezizwe.
Uyakuzibusa ngentonga yensimbi, ziphihlizwe njengezitsha ezibunjiweyo.
Njengalokhu nami ngamukele kuBaba; ngiyakumnika futhi indonsa.
Onendlebe makezwe lokho uMoya akushoyo emabandleni.’ ”
“Nakuyo ingelosi yebandla laseSardesi loba, ukuthi: “ ‘Nakhu akushoyo onoMoya abayisikhombisa bakaNkulunkulu nezinkanyezi eziyisikhombisa, uthi: ngiyayazi imisebenzi yakho nokuthi unegama lokuthi uyaphila kanti ufile.
Linda, uqinise okuseleyo obesekuzakufa, ngokuba angiyifumananga imisebenzi yakho iphelelisiwe phambi kukaNkulunkulu wami.
Ngakho-ke khumbula ukuthi wemukela, wezwa kanjani, ukugcine, uphenduke. Ngokuba uma ungalindi, ngiyakuza kuwe njengesela; kawusoze walazi ihora engiyakufika ngalo kuwe.
“ ‘Nokho kusekhona abantu abambalwa eSardesi abangazingcolisanga izingubo zabo. Bayakuhamba nami bembethe ezimhlophe, ngokuba bafanele.
Onqobayo uyakwembathiswa kanjalo izingubo ezimhlophe, igama lakhe angisoze ngalesula encwadini yokuphila, futhi ngiyakulivuma igama lakhe phambi kukaBaba naphambi kwezingelosi zakhe.
Onendlebe makezwe lokho akushoyo uMoya emabandleni.’
“Nakuyo ingelosi yebandla laseFiladelfiya loba ukuthi: “ ‘Nakhu akushoyo ongcwele, oqinisileyo, onesihluthulelo sikaDavide, ovula kungavali muntu, novala kungavuli muntu, uthi:
ngiyayazi imisebenzi yakho. Ngimise phambi kwakho umnyango ovuliweyo, okungekho muntu ongawuvala, ngokuba unamandla amancane, kanti waligcina izwi lami, futhi awuliphikanga igama lami.
Lalela-ke, ngiyakubakhipha esinagogeni likaSathane labo abazishaya abaJuda bengesibo, kodwa beqamba amanga. Ngiyakubenza ukuba beze bakhuleke phambi kwezinyawo zakho, bazi ukuthi ngikuthandile.
Ngokuba uligcinile izwi lami, wabekezela, nami ngizakukulonda ngehora lokulingwa eliyakufika emhlabeni wonke, ukulinga bonke abahlala kuwo.
“ ‘Ngiyeza masinyane; bambisisa lokho onakho, ukuze kungabi bikho muntu okwephuca umqhele wakho.
Onqobayo ngiyakumenza insika ethempelini likaNkulunkulu wami, futhi akasoze aphuma khona. Ngiyakuloba kuye igama likaNkulunkulu wami, negama lomuzi kaNkulunkulu wami, iJerusalema elisha elehla ezulwini livela kuNkulunkulu wami, negama lami elisha.
Onendlebe makezwe lokho uMoya akushoyo emabandleni.’
“Nakuyo ingelosi yebandla laseLawodikheya loba, ukuthi: “ ‘Nakhu akushoyo u-Amen, ufakazi othembekileyo noqinisileyo, ukuqala kokudaliweyo kukaNkulunkulu, uthi:
ngiyayazi imisebenzi yakho ukuthi kawubandi, kawushisi. Ngifisa sengathi ngabe uyabanda noma ushise.
Ngakho-ke njengalokhu usivivi, ungashisi, ungabandi, ngizakukukhafula uphume emlonyeni wami.
Ngokuba uthi: “Ngicebile, nginomnotho omningi, angiswele lutho,” kanti kawazi ukuthi nguwe kanye olusizi, odabukisayo, ompofu, ophuphuthekayo nohamba ze.
Ngiyakweluleka ukuba uthenge igolide elihlanzwe ngomlilo kimi ukuze ucebe, nezingubo ezimhlophe ukuba wembathe, lingabonakali ihlazo lobuze bakho, futhi uthole nomuthi wokugcoba amehlo akho ukuze ubone.
“ ‘Bonke engibathandayo ngiyabasola, ngibayale. Ngakho-ke yiba ngoshisayo, uphenduke.
Bheka, ngimi ngasemnyango ngingqongqotha, uma umuntu ezwa izwi lami, avule umnyango, ngiyakungena kuye, ngidle naye, naye adle nami.
“ ‘Onqobayo ngiyakumnika ukuba ahlale nami esihlalweni sami sobukhosi, njengoba nami nganqoba, ngase ngihlala noBaba esihlalweni sakhe sobukhosi.
“ ‘Onendlebe makezwe lokho uMoya akushoyo emabandleni.’ ”
Emveni kwalokho, ngase ngibona umnyango uvulekile ezulwini, nezwi engangilizwe kuqala linjengelecilongo lakhuluma nami, lathi: “Yenyukela lapha, ngizakukutshengisa okumele ukuba kwenzeke emva kwalokhu.”
Masinyane ngaba kuMoya. Kwase kumiswa isihlalo sobukhosi ezulwini, kukhona ohlezi phezu kwaso;
ohleziyo wayefana netshe lejasphi nesardiyu ngendlela ayebukeka ngayo, nothingo lwenkosazana luzungeze isihlalo sobukhosi, lufana nesimaragidu ukubukeka kwalo.
Isihlalo sobukhosi sasizungezwe yizihlalo zobukhosi ezingama-24; phezu kwezihlalo zobukhosi kuhlezi amalunga angama-24, embethe izingubo ezimhlophe, ethwele imiqhele yegolide emakhanda.
Esihlalweni sobukhosi kwaphuma imibani, amazwi, nokuduma. Izibani zomlilo eziyisikhombisa zavutha phambi kwesihlalo sobukhosi, ezingoMoya bakaNkulunkulu abayisikhombisa.
Phambi kwesihlalo sobukhosi kwakukhona okunjengolwandle lwengilazi, lunjengekhristalu; ngaphakathi kwesihlalo sobukhosi nasekuzungezeni isihlalo sobukhosi kukhona izidalwa ezine zigcwele amehlo phambili nasemuva.
Isidalwa sokuqala sasifana nengonyama, esesibili sifana nethole, esesithathu sinobuso obunjengobomuntu, nesesine sinjengokhozi olundizayo.
Kwakukhona nezidalwa ezine, yileso naleso kuzo sinamaphiko ayisithupha. Nhlangothi zonke nangaphakathi zigcwele amehlo, zingakhawuli imini nobusuku ukuthi: “Ingcwele, ingcwele, ingcwele, iNkosi uNkulunkulu uSomandla owayekhona nokhona nozayo.”
Kwakuthi lapho izidalwa zimdumisa zimbonga ohleli esihlalweni sobukhosi, Yena ophilayo kuze kube phakade naphakade,
amalunga angama-24 awe phansi, athi mbo ngobuso phansi, phambi kwakhe ohleli esihlalweni sobukhosi, akhuleka kuye ophilayo kuze kube phakade, aphonse imiqhele yawo phambi kwesihlalo sobukhosi, ethi:
“Ufanele Wena Nkosi noNkulunkulu wethu ukwemukela inkazimulo nodumo namandla, ngokuba wadala izinto zonke, futhi zonke zikhona, zadalwa, ngokuthanda kwakho.”
Ngase ngibona esandleni sokunene salowo owayehleli esihlalweni sobukhosi incwadi ilotshwe ngaphakathi nangaphandle, inamatheliswe yasicilelwa ngezisicilelo eziyisikhombisa.
Ngabona ingelosi enamandla imemeza ngezwi elikhulu, ithi: “Ngubani ofanele ukuvula le ncwadi nokuqaqa izimpawu zayo na?”
Kwakungekho namunye ezulwini nasemhlabeni, nangaphansi komhlaba owayenamandla okuyivula incwadi, nokuba nje abuke kuyo.
Ngakhala kakhulu ngokuba kungafunyanwanga namunye ofanele ukuvula leyo ncwadi, nokuba nje abuke kuyo.
Omunye wamalunga wayesethi kimi: “Ungakhali. INgonyama yesizwe sakwaJuda, iMpande kaDavide, inqobile, ukuze ivule incwadi nezisicilelo zayo eziyisikhombisa.”
Ngabona phakathi kwesihlalo sobukhosi nezidalwa ezine naphakathi kwamalunga kumi iMvana kungathi ihlatshiwe, inezimpondo eziyisikhombisa namehlo ayisikhombisa angoMoya abayisikhombisa bakaNkulunkulu abathunyelwe emhlabeni wonke.
Yeza, yayithabatha esandleni sokunene salowo owayehlezi esihlalweni sobukhosi.
Kuthe isiyithabathile incwadi, izidalwa ezine namalunga angama-24 awa athi mbo ngobuso phambi kweMvana, yilelo nalelo liphethe ihabhu, nezitsha zegolide zigcwele impepho eyimikhuleko yabangcwele.
Ahlabelela iculo elisha, elithi: “Ufanele Wena ukuyithabatha incwadi, nokuqaqa izimpawu zayo, ngokuba wahlatshwa, wabathengela uNkulunkulu ngegazi lakho abavela kuyo yonke imindeni, izilimi, abantu, nezizwe.
Wabenza baba ngumbuso nabaphristi kuNkulunkulu wethu, babuse emhlabeni.”
Ngase ngibona, futhi ngezwa izwi lezingelosi eziningi zihaqe isihlalo sobukhosi, izidalwa, namalunga, inani lezingelosi kwakuyizigidi nezinkulungwane zezinkulungwane,
zithi ngezwi elikhulu: “Ifanele iMvana eyahlatshwa ukwemukela amandla, ingcebo, ukuhlakanipha, ukunqoba, udumo, inkazimulo, nesibusiso.”
Ngase ngizwa zonke izidalwa ezulwini, emhlabeni, phansi komhlaba, nasolwandle, zonke zithi: “KuYena ohleli esihlalweni sobukhosi nakuyo iMvana; makube udumo, inkazimulo, namandla, kuze kube phakade naphakade.”
Nezidalwa ezine, zathi: “Amen,” namalunga awa phansi athi mbo, akhuleka.
Ngase ngibona lapho iWundlu livula olunye lwezimpawu eziyisikhombisa, ngezwa esinye sezidalwa ezine sisho ngezwi okungathi ngumsindo wokuduma kwezulu, sithi: “Woza!”
Ngase ngibona: kwakukhona ihhashi elimhlophe, nogibele kulo ephethe umnsalo, wanikwa umqhele, waphuma ngokunqoba eya ukuyonqoba.
Kwathi lapho selivula uphawu lwesibili, ngezwa isidalwa sesibili sithi: “Woza!”
Kwase kuphuma elinye ihhashi elibomvu, nogibele kulo wanikwa ukuba ayoqeda ukuthula emhlabeni, ukuze abantu babulalane; wanikwa futhi nenkemba enkulu.
Kuthe selivula uphawu lwesithathu, ngezwa isidalwa sesithathu sithi: “Woza!” Ngase ngibona: nanto ihhashi elimnyama, nogibele kulo ephethe isilinganisi esandleni sakhe.
Ngase ngizwa kusengathi yizwi phakathi kwezidalwa ezine lithi: “Imbenge kakolo ngodenariyu, nezimbenge ezintathu zebhali ngodenariyu, kodwa amafutha newayini ungakoni.”
Kwathi lapho selivula uphawu lwesine, ngezwa izwi lesidalwa sesine, lithi: “Woza!”
Ngase ngibona: nanto ihhashi elimpofu nogibele kulo, igama lakhe kwakunguKufa, neHayidesi lamlandela, base benikwa amandla phezu kokwesine komhlaba ukuba babulale ngenkemba, ngendlala, ngobhubhane, nangezilwane zasendle.
Kuthe nalapho selivula uphawu lwesihlanu, ngabona phansi kwe-althare imiphefumulo yababebulewe ngenxa yezwi likaNkulunkulu nangenxa yobufakazi ababenabo.
Bamemeza ngezwi elikhulu, bathi: “Kuyoze kube nini, Mbusi ongcwele noqinisileyo, ungehluleli, uphindiselele igazi lethu kulaba abakhileyo emhlabeni na?”
Base benikwa, yilowo nalowo ingubo emhlophe, batshelwa ukuthi kusazokuba yisikhashana baphumule, size sipheleliswe isibalo sabayizinceku kanye nabo, nabazalwane babo ababesazobulawa njengabo.
Ngase ngibona lapho livula uphawu lwesithupha, kwaba khona ukuzamazama komhlaba okukhulu, ilanga laba mnyama bhuqe njengendwangu eyisaka loboya, nenyanga yonke yaba njengegazi,
izinkanyezi esibhakabhakeni zawela emhlabeni njengomkhiwane uvuthulula amakhiwane awo angakavuthwa, lapho unyakaziswa ngumoya omkhulu,
izulu lagoqwa njengomqulu wencwadi usongwa, izintaba zonke neziqhingi zazimbulwa ezindaweni zazo.
Amakhosi omhlaba, izikhulu, izinduna, abacebileyo, iziphathimandla, izigqila zonke, nabakhululekileyo bacasha emigedeni nasemaweni ezintaba,
base bethi ezintabeni nasemaweni: “Welani phezu kwethu, nisifihle ebusweni balowo ohlezi esihlalweni sobukhosi, nasolakeni lweWundlu,
ngokuba usuku olukhulu lolaka lwabo selufike qathatha; ngubani onamandla okuma na?”
Emveni kwalokho, ngabona izingelosi ezine zimi emagumbini omane omhlaba, zibambe imimoya emine yomhlaba, ukuze kungavunguzi moya emhlabeni, olwandle, nakwesisodwa sezihlahla.
Ngase ngibona enye ingelosi yenyuka empumalanga, inophawu lukaNkulunkulu ophilayo, yamemeza ngezwi elikhulu kuzo izingelosi ezine ezanikwa amandla okuba ziwone umhlaba nolwandle,
yathi: “Ningawoni umhlaba, noma ulwandle noma izihlahla, size sizibeke uphawu emabunzini izinceku zikaNkulunkulu wethu.”
Ngase ngizwa ukuthi inani lababekwa uphawu ezizwaneni zonke zakwa-Israyeli babeyizi-144 000:
esizwaneni sakwaJuda babeyizi-12 000 ababekwa uphawu,
esizwaneni sakwa-Asheri beyizi-12 000, esizwaneni sakwaNafethali beyizi-12 000, esizwaneni sakwaManase beyizi-12 000,
esizwaneni sakwaSimeyoni beyizi-12 000, esizwaneni sakwaLevi beyizi-12 000, esizwaneni sakwa-Isakhare beyizi-12 000,
esizwaneni sakwaZabuloni beyizi-12 000, esizwaneni sakwaJosefa beyizi-12 000, esizwaneni sakwaBhenjamini beyizi-12 000.
Emveni kwalokho ngabona: kwakunesixuku esikhulu esasingenakubalwa muntu sivela ezizweni zonke, emindenini, kubantu, nezilimi, simi phambi kwesihlalo sobukhosi, naphambi kweWundlu, sembethe izingubo ezimhlophe, siphethe amahlamvu esundu ngezandla.
Samemeza ngezwi elikhulu, sathi: “Insindiso ingekaNkulunkulu wethu ohlezi esihlalweni sobukhosi, neyeWundlu!”
Izingelosi zonke ezazimi zihaqe isihlalo sobukhosi, amalunga, nezidalwa ezine zawa zathi mbo phansi ngobuso, phambi kwesihlalo sobukhosi, zakhuleka kuNkulunkulu, zithi:
“Amen! Udumo, nenkazimulo, nokuhlakanipha, nokubongwa, nokuhlonishwa, namandla, nokunqoba kungokukaNkulunkulu wethu kuze kube phakade naphakade. Amen!”
Elinye lamalunga laphendula, lathi kimi: “Bangobani laba abembethe izingubo ezimhlophe, futhi bavelaphi na?”
Ngase ngithi kulo: “Nkosi yami, nguwena owaziyo.” Lase lithi kimi: “Laba yibo abaphuma osizini olukhulu, bahlanza izingubo zabo, bazenza zaba mhlophe egazini leWundlu.
Ngakho-ke bami phambi kwesihlalo sobukhosi sikaNkulunkulu, bamkhonza imini nobusuku ethempelini lakhe, nalowo ohleli esihlalweni sobukhosi uyakwendlala ithabanakeli phezu kwabo.
Kabasalambi, kabasomi, kabasashiswa yilanga, nanoma ngabe luhlobo luni lokushisa,
ngokuba iWundlu elingaphakathi kwesihlalo sobukhosi liyabelusa, libaholele emithonjeni yamanzi okuphila, noNkulunkulu uyakuzesula zonke izinyembezi emehlweni abo.”
Kuthe lapho livula uphawu lwesikhombisa, kwathi cwaka ezulwini cishe ingxenye yehora.
Ngase ngibona izingelosi eziyisikhombisa zimi phambi kukaNkulunkulu, zanikwa amacilongo ayisikhombisa.
Enye ingelosi yeza, yema ngase-althare, iphethe isithunqiso segolide, yanikwa impepho eningi ukuba iyenezelele emikhulekweni yabangcwele bonke, phezu kwe-althare legolide eliphambi kwesihlalo sobukhosi.
Intuthu yempepho kanye nemikhuleko yabangcwele kwenyukela phambi kukaNkulunkulu, kusuka esandleni sengelosi.
Ingelosi yathabatha isithunqiso, yasigcwalisa ngamalahle omlilo wase-althare avuthayo, yasiphonsa emhlabeni, kwase kuba khona ukuduma, umsindo, imibani, nokuzamazama komhlaba.
Izingelosi eziyisikhombisa ezaziphethe amacilongo ayisikhombisa; zazilungiselela ukuwabetha.
Eyokuqala yalibetha icilongo; kwase kuba khona isichotho nomlilo kuxutshwe negazi, kwaphonswa emhlabeni. Kwathi okwesithathu komhlaba kwasha kwangqongqa, okwesithathu kwezihlahla nakho kwasha kwaphela, nabo bonke utshani obuluhlaza, basha baba ngumlotha.
Ingelosi yesibili yabetha icilongo; kwaba sengathi intaba enkulu ivutha umlilo, yaphonswa olwandle. Okwesithathu kolwandle kwaphenduka igazi,
kwafa okwesithathu kokudaliweyo okuphilayo okwakusolwandle, nokwesithathu kwemikhumbi kwabhujiswa.
Ingelosi yesithathu yabetha icilongo; kwase kuwa ezulwini inkanyezi enkulu ivutha njengesibani, yawela phezu kokwesithathu kwemifula naphezu kwemithombo yamanzi.
Igama lenkanyezi kuthiwa uMhlonyane. Okwesithathu kwamanzi kwaba ngumhlonyane, kwafa abantu abaningi ngenxa yamanzi, ngokuba ayenziwe ababa.
Ingelosi yesine yayisibetha icilongo; kwashaya ingxenye yokwesithathu kwelanga, okwesithathu kwenyanga, okwesithathu kwezinkanyezi, ukuze okwesithathu kokukhanya kwakho kube mnyama nokwesithathu kwemini kungakhanyi, kanjalo nobusuku.
Ngase ngibona, futhi ngezwa ukhozi lundiza emkhathini wezulu, lumemeza ngezwi elikhulu, luthi: “Maye, maye, maye kulabo abakhileyo emhlabeni, lapho sekukhala amacilongo asasele, njengoba izingelosi ezintathu zizakuwabetha!”
Ingelosi yesihlanu yayisibetha icilongo; ngase ngibona inkanyezi ivela ezulwini, iwela emhlabeni, yanikwa isihluthulelo somgodi wakwalasha.
Yavula umgodi wakwalasha; kwaphuma isikhatha sentuthu kungathi intuthu iphuma eziko elikhulu, kwafiphazwa ilanga nomkhathi ngentuthu eyayiphuma emgodini.
Kwaphuma isikhonyane entuthwini, saqonda emhlabeni, sanikwa amandla afana nalawo anikwa ofezela bomhlaba.
Satshelwa ukuba singalokothi sone utshani bomhlaba, noma yini eluhlaza, noma nje isihlahla esisodwa, kuphela labo bantu abangenalo uphawu lukaNkulunkulu emabunzini abo.
Sanikwa ukuba singababulali, kodwa sibahluphe izinyanga ezinhlanu. Ukuhlushwa kwabo kwakufana nobuhlungu bokulunywa ngufezela.
Ngaleyo mihla abantu bayakukufuna ukufa, kodwa bangakufumani; futhi bayakukufisa ukufa, kepha ukufa kubabalekele.
Isikhonyane sasifana namahhashi aboshelelwe ukuya empini, emakhanda aso kukhona okufana nemiqhele enjengegolide, ubuso baso bufana nobuso babantu.
Sasinezinwele ezinjengezinwele zabesifazane, amazinyo aso efana nawezingonyama.
Sasinezivikelo zezifuba ezinjengezivikelo ezenziwe ngensimbi, umsindo wamaphiko aso wawufana nomdumo wezinqola zamahhashi amaningi egijima eqonde empini.
Sasinemisila efana nofezela, inezindonsi; nasemisileni yaso kukhona amandla aso okulimaza abantu izinyanga ezinhlanu.
Sinenkosi esibusayo, ingelosi yakwalasha, igama layo ngesiHebheru kungu-Abhadoni, kodwa ngesiGriki ingu-Apholiyoni.
UMaye wokuqala usudlulile, kodwa kuseza oMaye ababili emva kwalokho.
Ingelosi yesithupha yayisibetha icilongo; ngezwa izwi livela ezimpondweni ezine ze-althare legolide eliphambi kukaNkulunkulu,
lithi kuyo ingelosi yesithupha ephethe icilongo: “Thukulula izingelosi ezine eziboshwe ngasemfuleni omkhulu iYufrathe.”
Izingelosi ezine ezazilungiselwe ihora, usuku, inyanga, nonyaka, zakhululwa ukuba zibulale okwesithathu kwabantu.
Ngezwa ukuthi inani lamabutho ayegibele amahhashi lalingaphindwa kabili, liyizi-10 000 eziphindwe kazi-10 000.
Khona manjalo ngabona embonweni amahhashi nabawagibele befake izivikelo zezifuba, zibomvu njengomlilo nezehiyakinte nezesibabule. Amakhanda amahhashi ayenjengamakhanda amabhubesi, ekhafula umlilo emilonyeni yawo, umusi nesibabule.
Ngalezo zinhlupheko ezintathu kwabulawa okwesithathu kwabantu, ngomlilo, ngentuthu, nangesibabule okwakukhafulwa yimilomo yawo.
Ngokuba amandla amahhashi ayesemilonyeni nasemisileni yawo, lokhu imisila yawo yayinjengezinyoka, inamakhanda elimaza ngawo.
Kepha abanye abantu abangabulawanga ngalezo zinhlupheko abaphendukanga emisebenzini yezandla zabo, ukuba bangakhuleki kuwo amadimoni, nakuzo izithombe zegolide, ezesiliva, ezethusi, ezamatshe, ezemithi, ezingaboni, ezingezwa, nezingahambi.
Abaphendukanga futhi ekubulaleni, ekuthakatheni, ebufebeni, nasekwebeni kwabo.
Ngase ngibona enye ingelosi enamandla yehla ivela ezulwini, yembethe ifu, nothingo lwenkosazana luphezu kwekhanda layo, ubuso bayo babunjengelanga, izinyawo zayo zinjengezinsika zomlilo,
iphethe esandleni sayo incwadi encane evuliweyo. Yayisibeka unyawo lwayo lwesokunene phezu kolwandle, kwathi olwesokhohlo yalubeka phezu kwezwe,
yamemeza ngezwi elikhulu elinjengokubhodla kwengonyama, lapho imemeza, imidumo eyisikhombisa yakhuluma ngamaphimbo ayo.
Seyikhulumile imidumo eyisikhombisa, ngase ngizobhala, kodwa ngezwa izwi livela ezulwini, lithi: “Sicilela ngophawu olukhulunywe yimidumo eyisikhombisa, kodwa ungakubhali.”
Ingelosi engayibona ime phezu kolwandle naphezu komhlabathi, yaphakamisa isandla sayo sokunene yasibhekisa ezulwini,
yafunga Yena ophilayo kuze kube phakade naphakade, owadala izulu nakho konke okukulo, umhlaba nakho konke okukuwo, nolwandle nakho konke okukulo, yathi: “Akusayukuba bikho kubambezeleka.
Kepha kuyakuthi ngezinsuku lapho ingelosi yesikhombisa isizakubetha icilongo layo, kulapho-ke imfihlakalo kaNkulunkulu iyakube isifeziwe, njengalokhu amemezela ezincekwini zakhe, abaphrofethi, ngezindaba ezijabulisayo.”
Izwi engalizwa livela ezulwini laphinda futhi lakhulma nami, lathi: “Hamba uthabathe incwadi evulekileyo esesandleni sengelosi emi phezu kolwandle naphezu komhlaba.”
Ngaya-ke engelosini; ngayitshela ukuba inginike incwadi encane. Yathi kimi: “Yithathe, uyidle; izakubaba esiswini sakho, kodwa emlonyeni wakho izakuba mnandi njengoju.”
Ngayithatha incwadi encane esandleni sengelosi, ngayidla. Yayimnandi njengoju emlonyeni wami, nalapho sengiyidlile, yababa esiswini sami.
Zase zithi kimi: “Kufanele ukuba uphrofethe futhi ngabantu abaningi, izizwe, izilimi, namakhosi.”
Nganikwa umhlanga wokulinganisa ofana nenduku, kwathiwa: “Sukuma ulinganise ithempeli likaNkulunkulu, i-althare, nalabo abakhulekayo kulo.
Kepha igceke elingaphandle kwethempeli uliyeke, ungalilinganisi, ngokuba linikwe izizwe, nomuzi ongcwele ziyakuwugxobagxoba izinyanga ezingama-42.
Ngiyakubanika igunya ofakazi bami ababili ukuba baphrofethe izinsuku eziyi-1 260, bembathiswe indwangu eyisaka.”
Labo bayiminqumo emibili nezinti zezibani ezimbili ezimi phambi kweNkosi yomhlaba.
Uma kukhona ofuna ukubenzakalisa laba, kuphuma umlilo emilonyeni yabo, ubhubhise izitha zabo. Yebo, uma kukhona ofuna ukubalimaza, kufanele ukuba abulawe kanjalo.
Laba banamandla okuvala izulu ukuba lingani ngezinsuku lapho bephrofetha, futhi banamandla phezu kwamanzi ukuba bawaphendule igazi, nokushaya umhlaba ngezinhlupheko eziningi, noma nini lapho bethanda ukwenzenjalo.
Kuyakuthi lapho sebeqedile ubufakazi babo, isilo esiphuma kwalasha silwe nabo, sibanqobe, sibabulale.
Izidumbu zabo ziyakudindiliza emigwaqweni yomuzi omkhulu okuthiwa ngokomoya iSodoma neGibhithe, lapho neNkosi yabo yabethelwa khona.
Abanye kubantu, imindeni, izilimi, nabezizwe bayakuzibona izidumbu zabo izinsuku ezintathu nengxenye, bengavumi ukuba izidumbu zabo zingcwatshwe.
Abakhileyo emhlabeni bayakujabula ngabo, bethabe, bathumelelane izipho, ngokuba laba baphrofethi ababili bebahluphile abakhileyo emhlabeni.
Kwathi sekwedlule lezo zinsuku ezintathu nengxenye, umoya wokuphila ovela kuNkulunkulu wangena kubo, bema ngezinyawo zabo, behlelwa ukwesaba okukhulu labo abababonayo.
Bezwa izwi elikhulu livela ezulwini, lithi kubo: “Yenyukelani lapha.” Base benyukela ezulwini ngefu; izitha zabo zibabuka.
Ngalelo hora kwaba khona ukuzamazama komhlaba okukhulu, kwathi okweshumi komuzi kwawa, kwafa ekuzamazameni komhlaba abantu abayizi-7 000, kwathi abasalayo bashaywa wuvalo, bamdumisa uNkulunkulu wezulu.
UMaye wesibili wedlula; uMaye wesithathu uyeza masinyane.
Ingelosi yesikhombisa yabetha icilongo; kwase kuzwakala amazwi ahlokomayo ezulwini ethi: “Umbuso wezwe usungoweNkosi yethu nokaKhristu wayo; iyakubusa kuze kube phakade naphakade.”
Amalunga angama-24 ayehleli phambi kukaNkulunkulu ezihlalweni zawo zobukhosi, akhothama athi mbo ngobuso bawo, akhuleka kuNkulunkulu,
ethi: “Siyakubonga, Nkosi Nkulunkulu, Somandla, okhona nowawukhona, ngokuba uthabathe amandla akho amakhulu, wabusa;
izizwe zathukuthela, kwase kufika ulaka lwakho, nesikhathi sokwehlulelwa kwabafileyo, nokunika izinceku zakho umvuzo, abaphrofethi nabangcwele nabesaba igama lakho, abancane nabakhulu, nokubhubhisa ababhubhisa umhlaba.”
Kwase kuvulwa ithempeli likaNkulunkulu elisezulwini, kwabonakala umphongolo wesivumelwano sakhe ethempelini lakhe. Kwaba khona imibani, ukuhlokoma kwamazwi, ukuduma, ukuzamazama komhlaba nesichotho esikhulu.
Kwabonakala isibonakaliso esikhulu ezulwini: owesifazane embethe ilanga, nenyanga iphansi kwezinyawo zakhe, ekhanda lakhe ethwele umqhele wezinkanyezi ezili-12.
Wayekhulelwe, wakhala ngenxa yemihelo, esikwa, enobuhlungu bokubeletha.
Kwabonakala futhi esinye isibonakaliso ezulwini; nango udrago omkhulu, obomvu, onamakhanda ayisikhombisa nezimpondo ezilishumi. Emakhanda akhe wayenemiqhele eyisikhombisa.
Umsila wakhe wadonsa okwesithathu kwezinkanyezi zezulu, waziphonsa emhlabeni. Udrago wayemi ngaphambi kowesifazane owayezobeletha, ukuze kuthi uma esebelethile, amshwabadele umntwana wakhe.
Wabeletha umntwana wesilisa ozokwelusa izizwe zonke ngentonga yensimbi. Umntwana wahlwithwa kuye wayiswa kuNkulunkulu nasesihlalweni sakhe sobukhosi.
Owesifazane wabalekela ehlane, lapho enendawo ayeyilungiselelwe nguNkulunkulu, ukuba anakekelwe izinsuku eziyi-1 260.
Kwase kuba khona ukulwa ezulwini; uMikhayeli nezingelosi zakhe balwa nodrago. Udrago walwa ekanye nezingelosi zakhe,
kodwa abazange babe namandla okunqoba, nendawo yabo yaphela ezulwini.
Udrago omkhulu, inyoka endala okuthiwa nguMhlebi noSathane, odukisa umhlaba wonke; waphonswa phansi emhlabeni nezingelosi zakhe ezazinaye.
Ngase ngizwa izwi elikhulu livela ezulwini lithi: “Manje isifikile insindiso, namandla, nobukhosi bukaNkulunkulu wethu, negunya likaKhristu wakhe, ngokuba usephonswe phansi ummangaleli wabazalwane bethu, obamangalela phambi kukaNkulunkulu imini nobusuku.
Bamnqobile ngegazi leWundlu nangezwi lobufakazi babo, ngokuba abathandanga ukuphila kwabo kwaze kwaba sekufeni.
Ngakho-ke jabulani nina mazulu nalabo abahlala kuwo. Maye, kuwe mhlaba, nakuwe lulwandle, ngokuba uSathane wehlele kini enolaka olukhulu, azi kahle ukuthi isikhathi sifushane!”
Kuthe udrago esebona ukuthi uphonswe phansi emhlabeni, wazingela owesifazane owayezale umntwana wesilisa.
Owesifazane wayesenikwa amaphiko amabili okhozi olukhulu ukuba andizele ehlane endaweni yakhe, lapho enakekelwa khona isikhathi nezikhathi, nengxenye yesikhathi, engekho ebusweni benyoka.
Inyoka yamkhwifa imlandela owesifazane, kwaphuma emlonyeni wayo amanzi kungathi ngumfula ukuze immukise nalowo mfula.
Umhlaba wamsiza owesifazane, wavula umlomo wawo, wawugwinya umfula owawukhwifwa wudrago ngomlomo wakhe.
Udrago wamthukuthelela owesifazane, wahamba wayokulwa nabaseleyo benzalo yakhe, labo abagcina imiyalo kaNkulunkulu nabanobufakazi bukaJesu.
Wayesema esihlabathini solwandle.
Ngase ngibona kukhuphuka isilo olwandle, sinezimpondo ezilishumi namakhanda ayisikhombisa, ezimpondweni zaso kukhona imiqhele elishumi, emakhanda aso kunamagama ahlambalazayo.
Isilo engasibonayo sasifana nengwe, izinyawo zaso zinjengezebhere, umlomo waso ufana nomlomo webhubesi. Udrago wasinika amandla akhe, isihlalo sakhe sobukhosi, negunya lakhe elikhulu lokubusa.
Elinye lamakhanda aso lalingathi lishayelwe ukufa, kodwa nokho inxeba lalo lase lipholile, umhlaba wonke wamangala, wase usilandela isilo.
Bakhuleka kudrago, ngokuba wanika isilo amandla, bakhuleka nakuso isilo, bethi: “Ngubani ofana nesilo, ngubani futhi ongalwa naso na?”
Sase sinikwa umlomo wokukhuluma izinto ezinkulu nezihlambalazayo, sanikwa amandla okwenza lokho izinyanga ezingama-42.
Savula umlomo waso, sahlambalaza uNkulunkulu, sahlambalaza igama lakhe nethabanakeli lakhe, nabo bonke abasezulwini.
Sanikwa ukuba silwe nabangcwele, sibanqobe. Sanikwa futhi igunya phezu kwemindeni yonke, abantu, izilimi, nezizwe.
Bonke abakhileyo emhlabeni bayakukhuleka kuso, bonke abamagama abo engalotshiwe encwadini yokuphila yeWundlu elahlatshwayo, selokhu kwasekelwa umhlaba.
Uma ekhona onendlebe, makezwe.
Uma uthathwa uyiswa ekuthunjweni, uyakuya ekuthunjweni; uma kukhona obulawa ngenkemba, uyakufa ngenkemba. Lokhu kungukubekezela nokukholwa kwabangcwele.
Ngase ngibona esinye isilo siphuma emhlabeni, sinezimpondo ezimbili ezifana nezewundlu, futhi sikhulumisa okukadrago.
Sasebenzisa lonke igunya lesilo sokuqala; saphoqelela umhlaba nabo bonke abakhileyo kuwo ukuba bakhonze isilo sokuqala, okwapholiswa inxeba laso.
Senza izibonakaliso ezinkulu, ngisho nokwehlisa umlilo ezulwini wehlele emhlabeni phambi kwabantu.
Siyabakhohlisa labo abakhileyo emhlabeni ngenxa yezibonakaliso esanikwa zona ukuba sizenze phambi kwesilo. Sitshela abakhileyo emhlabeni ukuba benze umfanekiso wesilo esasinenxeba lenkemba, kodwa esasinda.
Sanikwa futhi ukuba siwuphe umfanekiso wesilo umoya, ukuze umfanekiso wesilo ukhulume, senze futhi ukuba bonke abangakhuleki emfanekisweni wesilo babulawe.
Senza bonke abancane nabadala, abacebileyo nabampofu, abakhululekileyo nabayizigqila, ukuba babekwe uphawu esandleni sabo sokunene noma ebunzini labo,
nokuba kungabi bikho oyothenga noma athengise ngalo, ngaphandle kwalowo onophawu, igama lesilo noma inombolo yegama laso.
Nakhu ukuhlakanipha. Onengqondo makabale isibalo sesilo, ngokuba siyisibalo somuntu: isibalo sakhe singama-666.
Ngabona: nanto iWundlu limi entabeni iZiyoni, likanye nabayizi-144 000, belotshiwe igama lalo negama likaYise emabunzini abo.
Ngase ngizwa izwi livela ezulwini, linjengezwi lokuhlokoma kwamanzi amaningi, nanjengomsindo wokuduma okukhulu. Izwi engalizwa lalifana nokubethwa kwamahabhu, ebethwa ngababethi bawo.
Bahlabelela kwangathi yigama elisha phambi kwesihlalo sobukhosi, naphambi kwezidalwa ezine namalunga, kodwa akubanga bikho noyedwa owaba namandla okufunda lelo culo, kuphela abayizi-144 000 ababehlengwe emhlabeni.
Laba, yilabo abangangcoliswanga ngabesifazane, ngokuba bayizindela. Laba yibo abalandela iWundlu noma kuphi lapho laliya khona. Laba bathengwa ebantwini ukuba babe lulibo kuNkulunkulu nakulo iWundlu,
okungafunyanwanga manga emlonyeni wabo; bengenasici.
Ngabona futhi enye ingelosi indiza emkhathini wezulu, inevangeli eliphakade, eyakulishumayela kulabo abahleli emhlabeni, nakuzo zonke izizwe, imindeni, izilimi nabantu.
Yasho ngezwi elikhulu, ithi: “Mesabeni uNkulunkulu, nimnike udumo, ngokuba ihora lokwehlulela kwakhe selifikile. Mkhonzeni lowo owadala izulu, umhlaba ulwandle, nemithombo yamanzi.”
Kwalandela futhi enye ingelosi yesibili, ithi: “Liwile, liwile iBhabhiloni elikhulu, eliphuzise izizwe zonke iwayini lezinkanuko nobufebe balo.”
Kwabuye kwalandela futhi enye ingelosi yesithathu yamemeza ngezwi elikhulu, ithi: “Uma kukhona okhonza isilo nomfanekiso waso, nofumene futhi uphawu ebunzini lakhe noma esandleni sakhe,
naye uyakuliphuza iwayini lolaka lukaNkulunkulu elilungisiwe lingaxutshiwe, lathanjiswa esitsheni solaka lwakhe, uyakuhlushwa ngomlilo nesibabule phambi kwezingelosi ezingcwele naphambi kweWundlu.
Intuthu yokuhlushwa kwabo iyenyuka kuze kube phakade naphakade. Abasenakuphumula imini nobusuku labo abakhonza isilo nesithombe saso, nakulabo abemukele uphawu lwegama laso.”
Nakhu ukubekezela kwabangcwele abagcina imiyalo kaNkulunkulu nokukholwa nguJesu.
Ngase ngizwa izwi livela ezulwini, lithi: “Loba ukuthi: babusisiwe abafileyo abafele eNkosini, kusukela manje.” “Yebo,” kusho uMoya, “ukuze baphumule emisebenzini yabo, ngokuba imisebenzi yabo iyabalandela.”
Ngabona futhi: nanto ifu elimhlophe, phezu kwalo kuhleli ofana neNdodana yomuntu enomqhele wegolide ekhanda lakhe, ephethe isikela elibukhali esandleni sakhe.
Enye ingelosi yaphuma ethempelini, imemeza ngezwi elikhulu, ithi kohleli phezu kwefu: “Sebenzisa isikela lakho, uvune, ngokuba isikhathi sokuvuna sesifikile, futhi isivuno somhlaba sesilungile.”
Ohlezi phezu kwefu waliphonsa isikela emhlabeni; wawusuvunwa umhlaba.
Enye ingelosi yaphuma futhi ethempelini elisezulwini, nayo iphethe isikela elibukhali.
Nenye yaphuma futhi e-althare, inegunya phezu komlilo, yamemeza ngezwi elikhulu kuleyo ephethe isikela elibukhali, ithi: “Sika ngesikela lakho elibukhali, ubuthe amahlukuzo omvini omhlaba, ngokuba amahlukuzo amagilebhisi asevuthiwe.”
Ingelosi yaliphonsa isikela layo emhlabeni, yawuvuna umvini womhlaba, yawuphonsa esikhamweni sewayini, solaka olukhulu lukaNkulunkulu.
Isikhamo sanyathelwa ngaphandle komuzi, kwaphuma igazi esikhamweni, laze lafika ematomini amahhashi, laqeda amastadiyu ayi-1 600.
Ngase ngibona esinye isibonakaliso ezulwini, esikhulu nesimangalisayo: izingelosi eziyisikhombisa zinezinhlupheko eziyisikhombisa zokugcina, ngokuba ngazo kwase kupheleliswa ulaka lukaNkulunkulu.
Ngabona kungathi ulwandle lwengilazi luxubene nomlilo, nalabo abanqobe isilo nomfanekiso waso nesibalo segama laso bemi ngasolwandle lwengilazi, bephethe amahabhu kaNkulunkulu.
Bahlabelela igama likaMose, inceku kaNkulunkulu negama leWundlu, bathi: “Mikhulu, iyamangalisa imisebenzi yakho, Nkosi Nkulunkulu, Somandla; zilungile, ziqinisile izindlela zakho, wena Nkosi yezizwe.
Ngubani ongayukukwesaba, Nkosi, adumise igama lakho, na? Ngokuba Wena wedwa ungcwele, zonke izizwe ziyakuza zikhuleke phambi kwakho, ngokuba izenzo zakho zokulunga sezisobala.”
Emveni kwalokho ngabona, kwavulwa ithempeli, ithabanakeli lobufakazi ezulwini,
kwase kuphuma ethempelini izingelosi eziyisikhombisa ziphethe izinhlupheko eziyisikhombisa. Zazembethe ingubo yelineni ehlanzekileyo nekhazimulayo, zizibophe ezifubeni ngamabhande egolide.
Esinye sezidalwa ezine sanika izingelosi eziyisikhombisa izitsha zegolide, zigcwele ulaka lukaNkulunkulu ophilayo kuze kube phakade naphakade.
Ithempeli lagcwala intuthu ivela enkazimulweni kaNkulunkulu nasemandleni akhe. Akekho owayengangena ethempelini zingakapheleli izinhlupheko eziyisikhombisa zezingelosi eziyisikhombisa.
Ngase ngizwa izwi elikhulu livela ethempelini, lithi kuzo izingelosi eziyisikhombisa: “Hambani nithululele emhlabeni izitsha eziyisikhombisa zolaka lukaNkulunkulu.”
Yahamba eyokuqala, yathululela isitsha sayo emhlabeni, kwavela isilonda esibi nobubi kubantu abanophawu lwesilo, nabakhuleka emfanekisweni waso.
Eyesibili yathululela isitsha sayo olwandle, lwase luphenduka igazi elinjengelofileyo, kwafa konke okuphilayo olwandle.
Eyesithathu yathululela isitsha sayo emifuleni nasemithonjeni yamanzi, kwase kuphenduka igazi.
Ngezwa ingelosi yamanzi, ithi: “Ulungile Wena okhona nowawukhona, oNgcwele, ngokuba nguwe owakunquma lokho,
ngokuba bachitha igazi labangcwele nelabaphrofethi, ubanike igazi ukuba baliphuze; okuyikhona kubafanele.”
Ngase ngizwa i-althare, lithi: “Yebo, Nkosi Nkulunkulu Somandla, ziqinisile, futhi zilungile izehlulelo zakho.”
Ingelosi yesine yathululela isitsha sayo elangeni; lase linikwa ukubashisa abantu ngomlilo.
Abantu bashiswa ngukushisa okukhulu, kodwa balihlambalaza igama likaNkulunkulu onamandla phezu kwalezi zinhlupheko, futhi abaphendukanga ukuba bamnike udumo.
Eyesihlanu yathululela isitsha sayo esihlalweni sobukhosi sesilo: umbuso waso waba mnyama, babeziluma izilimu zabo ngenxa yobuhlungu.
Kepha bahlambalaza uNkulunkulu wezulu ngenxa yobuhlungu nezilonda zabo, kodwa abaphendukanga emisebenzini yabo.
Eyesithupha yasithululela isitsha sayo emfuleni omkhulu iYufrathe, kwase kusha amanzi kuwo, ukuze kulungiswe indlela yamakhosi avela empumalanga.
Ngabona kuphuma emlonyeni kadrago nasemlonyeni wesilo nasemlonyeni womphrofethi wamanga, omoya abathathu abangcolileyo abafana nezingxangxa;
babeyimimoya yamadimoni, benza izibonakaliso, baphuma baya emakhosini omhlaba wonke ukuze bawahlanganisele ukulwa ngosuku olukhulu lukaNkulunkulu uSomandla.
Qaphelani, ngiyeza njengesela; ubusisiwe olindayo, alonde izingubo zakhe ukuba angabi ngohamba ze, baze babone ihlazo lakhe.
Wayesebahlanganisela endaweni ebizwa ngesiHebheru ukuthi iHarmagedoni.
Eyesikhombisa yathululela isitsha sayo emoyeni, kwase kuphuma izwi elikhulu ethempelini esihlalweni sobukhosi lithi: “Sekwenzekile!”
Kwase kuba khona imibani, amazwi, ukuduma, nokuzamazama komhlaba okukhulu okwakungakaze kube khona okunjalo selokhu kwaba khona abantu emhlabeni.
Umuzi omkhulu wanqamuka kathathu, nemizi yabezizwe yawa. IBhabhiloni elikhulu lakhunjulwa phambi kukaNkulunkulu ukuba alinike isitsha sewayini lolaka lwakhe oluvuthayo.
Iziqhingi zonke zabaleka, nezintaba azifunyanwanga.
Abantu bahlaselwa yisichotho esikhulu esasisinda ngangethalenta, sivela ezulwini. Abantu bahlambalaza uNkulunkulu ngenxa yenhlupheko yesichotho, ngokuba yayinkulu kakhulu.
Kwase kuza enye yezingelosi eziyisikhombisa ezaziphethe izitsha eziyisikhombisa, yakhuluma nami, yathi: “Woza, ngikutshengise ukwehlulelwa kwesifebe esikhulu esihleli phezu kwamanzi amaningi,
afeba naso amakhosi omhlaba; nabakhileyo emhlabeni badakwa yiwayini lobufebe baso.”
Yangithwala ngikuMoya, yangiyisa ehlane. Ngabona lapho owesifazane egibele isilo esibomvu, sigcwele amagama ahlambalazayo, sinamakhanda ayisikhombisa nezimpondo ezilishumi.
Owesifazane wayembethe okubukhwebezane nokubomvu, evunule ngegolide nangamatshe amahle namapharele, ephethe indebe yegolide esandleni sakhe; yayigcwele amanyala nokungcola kobufebe bakhe,
ebunzini lakhe kulotshwe igama eliyimfihlakalo, elithi: IBHABHILONI ELIKHULU, UNINA WEZIFEBE NOWAMANYALA OMHLABA.
Ngase ngibona owesifazane edakwe yigazi labangcwele negazi lofakazi bakaJesu. Ngamangala ngokumangala okukhulu.
Ingelosi yayisithi kimi: “Yini umangele na? Ngizakukutshela imfihlakalo yowesifazane nesilo esimthweleyo, esinamakhanda ayisikhombisa nezimpondo ezilishumi.
Isilo owasibonayo sasikhona, kodwa asisekho; sizakwenyuka, siphuma kwalasha, siye ekubhujisweni. Laba abakhileyo emhlabeni, abamagama abo engalotshwanga encwadini yokuphila, kusukela kwasekelwa umhlaba, lapho bebona ukuthi isilo kanti sasikhona, kepha asisekho, sisazobuye sibe khona, bayakumangala.
“Lokhu kudinga umqondo ophusileyo. Amakhanda ayisikhombisa ayizintaba eziyisikhombisa, lapho owesifazane eqhwakele khona, futhi angamakhosi ayisikhombisa.
Ayisihlanu kuwo asewile, enye isekhona, enye ayikafiki, nalapho isifikile kufanele ihlale isikhashana.
Isilo esasikhona, kodwa esingasekho, sona singesesishiyagalombili, sikuwo ayisikhombisa, futhi siya ekubhujisweni.
“Izimpondo ezilishumi owazibonayo zingamakhosi alishumi angakawemukeli umbuso, kodwa asewamukelisiwe amandla obukhosi isikhathi esiyihora elilodwa kanye nesilo.
Lawa amqondo munye, futhi anika isilo amandla negunya lawo.
Ayakulwa neWundlu; iWundlu liwanqobe, ngokuba liyiNkosi yamakhosi noMbusi wababusi, likanye nabanalo ababiziweyo balo, abakhethiweyo nabathembekileyo.”
Yayisithi kimi: “Amazwi owabonileyo lapho bekuhleli khona isifebe, ngabantu, izixuku, izizwe nezilimi.
Izimpondo ezilishumi ozibonileyo nesilo, lezi ziyakusizonda isifebe zisibhubhise, zisihlubule sibe ze, zidle inyama yaso, zisishise ngomlilo.
Ngokuba uNkulunkulu ufakile ezinhliziyweni zazo ukuba zifeze okuyisinqumo sakhe, zikwenze zimqondo munye, zinike isilo umbuso wazo, aze agcwaliseke amazwi kaNkulunkulu.
Owesifazane ombonileyo ungumuzi omkhulu, onombuso obusa phezu kwamakhosi omhlaba.”
Emveni kwalokho ngabona enye ingelosi yehla ezulwini, inamandla amakhulu, umhlaba wakhanyiswa yinkazimulo yayo.
Yamemeza ngezwi elikhulu, yathi: “Liwile, liwile iBhabhiloni elikhulu, seliphenduke indawo ehlala amadimoni, nejele layo yonke imimoya engcolileyo, nazo zonke izinyoni ezingcolileyo nezinengekayo, nazo zonke izilwane ezingcolile nezinengekayo.
Ngokuba zonke izizwe ziliphuzile iwayini lezinkanuko nobufebe balo, amakhosi omhlaba afebe nalo, nabahwebi bomhlaba bacebile ngengcebo yokutamasa kwalo.”
Ngase ngizwa elinye izwi livela ezulwini, lithi: “Bantu bami, phumani kulo, ukuze ningahlanganyeli ezonweni zalo, futhi ningehlelwa yizinhlupheko zalo.
Ngokuba izono zalo sezifinyelele ezulwini, noNkulunkulu wakhumbula ukungalungi kwalo.
Yenza kulo lokho elikwenzile, ukuphindaphinde kabili okwemisebenzi yalo; endebeni ebelixubela kuyo, lixubele ngokuphindiwe;
kube ngangalokho elizidumise latamasa ngakho, ligidlabezeni ngokuhlupheka nokulila. Ngokuba enhliziyweni yalo lithi: ‘Ngihleli ngiyindlovukazi, angisiye umfelokazi, futhi angisoze ngakubona ukulila.’
“Ngakho-ke kuyakufika ngalusuku lunye izinhlupheko zalo: ukufa, ukulila, nendlala, futhi liyakushiswa ngomlilo lingqongqe, ngokuba iNkosi uNkulunkulu elahlulelayo inamandla.
“Amakhosi omhlaba, lawo ayefeba atamasa nalo, ayakukhala alile ngenxa yalo, lapho ebona intuthu yalo lisha.
Ayomela kude ngenxa yokwesaba ukuhlupheka kwalo, athi: ‘Maye, maye kuwe muzi omkhulu waseBhabhiloni, muzi onamandla, ngokuba ukwehlulelwa kwakho kufike ngehora linye nje!’
“Nabahwebi bomhlaba bayakhala, bayalililela, ngokuba akusekho muntu othenga impahla yabo:
impahla yegolide, eyesiliva, eyamatshe ayigugu, amapharele, ilineni elicolekileyo, okubukhwebezane, usilika, okubomvu, imithi yonke enamakha, zonke izitsha zamazinyo endlovu, izitsha zonke zomuthi onenani elikhulu, ezethusi, ezensimbi, ezetshe elimhlophe,
isinamoni, okunephunga elimnandi, impepho, amafutha okuqhola, inhlaka, iwayini, amafutha omnqumo, impuphu ecolisekileyo, ukolo, izinkomo, izimvu, amahhashi, izinqola, izigqila, imizimba nemiphefumulo yabantu.
“Izithelo ezazinxanelwa wumphefumulo wakho zimukile kuwe, nakho konke ukutamasa nobukhazikhazi kushabalele kuwe, akusayukuphinde kutholakale kuwe.
Abahwebi balezi zinto, abaceba ngokuhwebelana nalo, bayakumela kude ngenxa yokwesaba ukuhlupheka kwalo, bekhala, belila,
bethi: ‘Maye, maye kuwe muzi omkhulu owawembethe ilineni elicolekileyo, okubukhwebezane, nokubomvu, uvunule ngegolide, ngamatshe ayigugu nangamapharele!
Ngokuba ngehora linye vo, ingcebo engaka isishabalalisiwe.’ “Bonke abashayeli bemikhumbi, bonke abaya noma kuphi ngomkhumbi, amatilosi, nabo bonke abasebenza olwandle bamela kude,
bekhala lapho bebona intuthu yokusha kwalo, bethi: ‘Yimuphi umuzi ofana nalowo muzi omkhulu na?’
“Base bezithela ngothuli emakhanda, badazuluka bakhala, balila, bathi: ‘Maye, maye kuwe muzi omkhulu, abaceba ngawe bonke abanemikhumbi olwandle ngenxa yengcebo yakho eningi, ngokuba ngehora elilodwa nje ubhujisiwe!
Thokoza ngawo wena zulu, nani bangcwele, nani baphostoli, nani baphrofethi, ngokuba uNkulunkulu uwahlulele, waniphindiselela kuwo.’ ”
Ingelosi enamandla yaqukula itshe lokugaya elikhulu, yaliphonsa olwandle, ithi: “Liyakwenziwa kanjalo iBhabhiloni umuzi omkhulu, liphonswe ngamandla, lingabe lisatholakala nanini.
Umsindo wababetha ihabhu, owabahlabeleli, owabashaya imitshingo namacilongo, awusophinde futhi uzwakale kuwe. Zonke izingcweti ezenza noma yimiphi imisebenzi azisayukuba bikho kuwe nanini, umsindo wetshe lokusila awusayukuphinde uzwakale kuwe,
ukukhanya kwesibani akuyukubuye kukhanye kuwe, izwi lomyeni nelomlobokazi alisoze laphinda lizwakale kuwe, ngokuba abahwebi bakho babengabadumile emhlabeni, futhi udukisile izizwe zonke ngokuthakatha kwakho,
futhi kwatholakala kuwe igazi labaphrofethi, elabangcwele, nelabo bonke ababebulewe emhlabeni.”
Emveni kwalokho, ngezwa sengathi izwi elikhulu lesixuku esikhulu ezulwini, lithi: “Haleluya! Insindiso, inkazimulo, namandla ngokukaNkulunkulu wethu,
ngokuba ziqotho, futhi zilungile izehlulelo zakhe, ngokuba usehlulele isifebe esikhulu esonakalisa umhlaba ngobufebe baso, uliphindiselele igazi lezinceku zakhe esandleni saso.”
Bathi ngokwesibili: “Haleluya! Intuthu evela kuso yenyuka kuze kube phakade naphakade.”
Amalunga angama-24 ayesethi mbo ngobuso, kanye nezidalwa ezine, akhuleka kuNkulunkulu ohleli esihlalweni sobukhosi, athi: “Amen! Haleluya!”
Kwase kuphuma izwi esihlalweni sobukhosi, lithi: “Dumisani uNkulunkulu wethu nonke nina zinceku zakhe, nina enimesabayo, abancane nabadala.”
Ngase ngizwa okungathi yizwi lesixuku esikhulu, linjengokuhlokoma kwamanzi amaningi, nanjengezwi lokuduma okunamandla, lithi: “Haleluya! Ngokuba iNkosi uNkulunkulu wethu, uSomandla, iyabusa.
Masithokoze, sethabe, futhi simnike udumo, ngokuba umshado weWundlu ufikile, nomakoti walo uzilungiselele.
Wanikwa ukuba embathe ilineni elicolekileyo, elikhazimulayo nelihlanzekileyo.” Ngokuba ilineni elicolekileyo liyizenzo zabangcwele ezilungileyo.
Yayisithi kimi: “Loba ukuthi: ‘Babusisiwe labo abamenyelwe esidlweni somshado weWundlu.’ ” Yayisithi futhi kimi: “Lawo ngamazwi aqinisileyo kaNkulunkulu.”
Ngawa phansi phambi kwezinyawo zayo, ngakhuleka kuyo. Yayisithi kimi: “Ungakwenzi lokho; ngiyinceku kanye nawe, nabazalwane bakho abaphethe ubufakazi bukaJesu; khuleka kuNkulunkulu, ngokuba ubufakazi bukaJesu bungumoya wokuphrofetha.”
Ngase ngibona izulu livulekile: nanto ihhashi elimhlophe nogibele kulo, obizwa ngokuthi ngoThembekileyo noQinisileyo, uyahlulela, futhi ulwa ngokulunga.
Amehlo akhe anjengamalangabi omlilo, ekhanda lakhe kukhona imiqhele eminingi, enegama elilotshiwe elingaziwa muntu, ngaphandle kwakhe uqobo.
Wayembethe ingubo ecwiliswe egazini; igama lakhe nguLizwi kaNkulunkulu.
Amaviyo empi yasezulwini amlandela, egibele amahhashi amhlophe, embethe ilineni elicolekileyo, elimhlophe nelihlanzekileyo.
Emlonyeni wakhe kwaphuma inkemba ebukhali, ukuze ashaye izizwe ngayo. Uyakuzibusa ngentonga yensimbi, Yena anyathele isikhamo sewayini lentukuthelo yolaka lukaNkulunkulu uSomandla.
Engutsheni yakhe nasethangeni lakhe kulotshwe igama elithi: INKOSI YAMAKHOSI NOMBUSI WABABUSI.
Ngase ngibona ingelosi imi elangeni, yamemeza ngezwi elikhulu ezinyonini zonke ezindizayo emkhathini wezulu, ithi: “Wozani, nibuthane esidlweni esikhulu sikaNkulunkulu,
ukuze nidle inyama yamakhosi, inyama yezinduna, inyama yamaqhawe, inyama yamahhashi neyabagibele kuwo, inyama yabo bonke abakhululekileyo neyalabo abayizigqila, abancane nabadala.”
Ngase ngibona isilo, amakhosi omhlaba kanye nempi yawo kubuthene ukuze balwe nalowo ohleli ehhashini nempi yakhe.
Isilo sabanjwa kanye nomphrofethi wamanga owenza izibonakaliso phambi kwaso, abadukisa ngazo labo abemukela uphawu lwesilo nabakhuleka emfanekisweni waso. Labo bobabili baphonswa bephila echibini lomlilo elivutha isibabuli.
Kwathi ababesele babulawa ngenkemba eyayiphuma emlonyeni wakhe lowo owayehleli ehhashini, izinyoni zonke zasutha yinyama yabo.
Ngase ngibona ingelosi yehla ezulwini, esandleni sayo iphethe isihluthulelo sakwalasha neketango elikhulu esandleni sayo.
Yambamba udrago, inyoka endala, uMhlebi noSathane, yambopha iminyaka eyinkulungwane,
yamphonsa kwalasha, yamvalela phakathi, yavala ngci ngophawu ngaphezu kwakhe, ukuze angabe esazidukisa izizwe, ize iphele iminyaka eyinkulungwane. Emva kwalokho kumele ukuba akhululwe okwesikhashana.
Ngase ngibona izihlalo zobukhosi, bahlala kuzo, banikwa amandla okwahlulela. Ngabona imiphefumulo yalabo ababenqunywe amakhanda ngenxa yobufakazi ngoJesu, nangenxa yezwi likaNkulunkulu, nalabo abangakhulekanga kuso isilo nasemfanekisweni waso, nabangalwemukelanga uphawu lwaso emabunzini abo nasezandleni zabo. Baphila babusa noKhristu iminyaka eyinkulungwane.
Abafileyo ababesele abavukanga, kwaze kwaphela iminyaka eyinkulungwane. Lokhu kungukuvuka kokuqala.
Ubusisiwe, futhi ungcwele onesabelo ekuvukeni kokuqala. Kulabo ukufa kwesibili akunamandla, kodwa bayakuba ngabaphristi bakaNkulunkulu nabakaKhristu, babuse kanye naye iminyaka eyinkulungwane.
Kuyakuthi lapho isiphelile iminyaka eyinkulungwane, uSathane akhululwe ejele akulo,
uyakuphuma ayodukisa izizwe emagumbini omane omhlaba, uGogi noMagogi, uyakuziqoqa ukuba ziyokulwa. Ziyakuba ngangezihlabathi zolwandle.
Zase zikhuphukela phezu kobubanzi bomhlaba, zazungeza inkambu labangcwele nomuzi othandiweyo, kwase kwehla umlilo uvela ezulwini, wazidla waziqeda.
USathane owazidukisa waphonswa echibini lomlilo nesibabuli, lapho kukhona isilo nomphrofethi wamanga. Kulapho beyakuhlushwa khona imini nobusuku kuze kube phakade naphakade.
Ngase ngibona isihlalo sobukhosi esikhulu esimhlophe nohleli kuso; obuso bakhe babalekelwa yizulu nomhlaba, akwatholelwa ndawo.
Ngabona abafileyo, abadala nabancane, bemi phambi kwesihlalo sobukhosi; kwase kuvulwa izincwadi; nenye incwadi yavulwa, okuyincwadi yokuphila. Abafileyo bahlulelwa ngalokho okwakulotshwe ezincwadini njengokwemisebenzi yabo.
Nolwandle lwakhipha abafileyo abakulo, ukufa neHayidesi nakho kwakhipha abafileyo ababekukho, bahlulelwa, kwaba yilowo nalowo njengokwemisebenzi yakhe.
Ukufa neHayidesi kwaphonswa echibini lomlilo. Lokhu kungukufa kwesibili, ichibi lomlilo.
Uma ekhona ongafunyaniswanga elotshiwe encwadini yokuphila, waphonswa echibini lomlilo.
Ngase ngibona izulu elisha nomhlaba omusha, ngokuba izulu lokuqala nomhlaba wokuqala kudlulile, nolwandle alusekho.
Ngabona umuzi ongcwele, iJerusalema elisha, wehla uvela ezulwini kuNkulunkulu, ulungisiwe njengomlobokazi ovunuliselwe umyeni wakhe.
Ngase ngizwa izwi elikhulu livela esihlalweni sobukhosi, lithi: “Ithabanakeli likaNkulunkulu likubantu, uyakuhlala nabo, babe ngabantu bakhe, Yena abe nguNkulunkulu wabo.
Uyakuzesula zonke izinyembezi emehlweni abo. Ukufa akusayukuba khona; ukudabuka, ukukhala, nobuhlungu akusayukuba khona, ngokuba okokuqala kudlulile.”
Ohleli esihlalweni sobukhosi wayesethi: “Manje ngenza konke kube kusha.” Wathi: “Loba, ngokuba lawa mazwi athembekile, futhi aliqiniso.”
Wayesethi kimi: “Sekwenzekile. Ngingu-Alfa no-Omega, ukuqala nokugcina. Owomileyo ngiyakumphuzisa ngesihle emthonjeni wamanzi okuphila.
Onqobayo uyakudla ifa lalezo zinto, futhi ngiyakuba nguNkulunkulu kuye, yena abe yindodana kimi.
“Kepha amagwala, abangakholwayo, abanengekayo, ababulali, izifebe, abathakathi, abakhonza izithombe, nabo bonke abaqamba amanga, isabelo sabo siyakuba sechibini elivutha umlilo nesibabuli; lokho-ke ngukufa kwesibili.”
Kwase kufika enye yezingelosi eziyisikhombisa ezaziphethe izitsha eziyisikhombisa zigcwele izinhlupheko zokugcina eziyisikhombisa, yakhuluma nami, yathi: “Woza, ngikukhombise umlobokazi, umakoti weWundlu.”
Yahamba nami ngikuMoya, yaya nami entabeni enkulu nephakeme, yangikhombisa umuzi ongcwele, iJerusalema, wehla ezulwini kuNkulunkulu.
Wawunenkazimulo kaNkulunkulu; ukucwazimula kwawo kunjengetshe eliyigugu sengathi yitshe ijasphi elicwebezelayo.
Wawunogange olukhulu noluphakeme, unamasango ali-12; emasangweni kukhona izingelosi ezili-12, kuwo kulotshwe amagama ezizwana ezili-12 zakwa-Israyeli.
Ngasempumalanga kwakunamasango amathathu, ngasenyakatho kunamasango amathathu, ngaseningizimu kunamasango amathathu, nangasentshonalanga kunamasango amathathu.
Ugange lomuzi lwalunezisekelo ezili-12, phezu kwazo kulotshwe amagama abaphostoli beWundlu abali-12.
Owayekhuluma nami wayephethe induku yegolide yokulinganisa, ayezolinganisa ngayo umuzi, amasango awo, nogange lwawo.
Umuzi wawunezinhlangothi ezine, ubude bawo bulingana nobubanzi bawo. Wawukala umuzi ngenduku; ubude, ububanzi, nokuphakama kwawo kwakulingana, kungamastadiyu ayizi-12 000.
Walukala nogange lwawo, lwalungamakhubhithi ayi-144, ngokulinganisa kwengelosi, okungokwabantu futhi.
Ugange nalo lwalwakhiwe ngejasphi, umuzi wenziwe ngegolide elihle elinjengengilazi ecwebezelayo.
Izisekelo zogange lomuzi zihlotshiswe ngawo wonke amatshe ayigugu. Isisekelo sokuqala kwakuyijasphi, esesibili kuyisafire, esesithathu kuyikhalkedoni, esesine kuyisimaragidu,
esesihlanu kuyisaridonikisi, esesithupha kuyisardiyu, esesikhombisa kuyikhrisolithe, esesishiyagalombili kuyibherile, esesishiyagalolunye kuyithophazi, eseshumi kuyikhrisophrasi, ese-11 kuyihiyakhinte, ese-12 kuyi-amethiste.
Amasango ali-12 ayengamapharele ali-12; yilelo nalelo sango ngalinye, laliyipharele elilodwa. Umgwaqo womuzi wawuyigolide elicwengekileyo, elifana nengilazi ekhanyayo.
Angilibonanga ithempeli kuwo, ngokuba iNkosi uNkulunkulu, uSomandla, iyithempeli lawo kanye neWundlu.
Umuzi awudingi ilanga nenyanga ukuze kuwukhanyise, ngokuba inkazimulo kaNkulunkulu iyawukhanyisa, nesibani sawo yiWundlu.
Izizwe ziyakuhamba ekukhanyeni kwawo, namakhosi omhlaba alethe kuwo ubukhosi bawo.
Amasango awo awasoze avalwa emini, ngokuba ubusuku abuyukuba bikho lapho.
Bayakuletha kuwo ubukhosi nodumo lwezizwe.
Akukho lutho olungcolileyo oluyakungena kuwo nanini, owenza amanyala noqamba amanga, kuphela labo abalotshiwe encwadini yokuphila yeWundlu.
Wayesengikhombisa umfula wamanzi okuphila, ucwebezelisa okwekhristalu, uvela esihlalweni sobukhosi sikaNkulunkulu neseWundlu.
Phakathi komgwaqo wawo nomfula kuleli cala, ngakwelinye kukhona umuthi wokuphila, owawuthela izithelo ezili-12, izithelo zawo uzithela nyanga zonke, amacembe omuthi angawokuphilisa izizwe.
Akusayukuba khona nokukodwa ukuqalekisa. Isihlalo sobukhosi sikaNkulunkulu neseWundlu siyakuba kuwo, nezinceku zakhe ziyakumkhonza,
zibone ubuso bakhe, negama lakhe liyakuba semabunzini azo.
Ubusuku abusayukuba bikho, abasakudingi ukukhanya kwesibani nokukhanya kwelanga, ngokuba iNkosi uNkulunkulu iyakubakhanyisela. Bayakubusa kuze kube phakade naphakade.
Wayesethi kimi: “Lawa mazwi athembikile, futhi aliqiniso, neNkosi uNkulunkulu wemimoya yabaphrofethi iyithumele ingelosi yayo ukuzokhombisa izinceku zayo okuzakwenzeka ngokuphazima kweso.”
“Bheka, ngiyeza masinyane. Ubusisiwe ogcina amazwi esiphrofetho sale ncwadi.”
Mina Johane nginguye owezwa, nowabona lezi zinto. Kuthe sengizwile, ngabona, ngathi mbo phansi ngobuso ukuba ngikhuleke phambi kwezinyawo zengelosi engikhombise lezo zinto.
Kepha yathi kimi: “Ungakwenzi lokho, nami ngiyinceku kanye nawe nabazalwane bakho, abaphrofethi nalabo abagcina amazwi ale ncwadi. Khuleka kuNkulunkulu.”
Yathi kimi: “Amazwi esiphrofetho sale ncwadi ungawavali ngophawu, ngokuba isikhathi siseduze.
Ongalungile makaqhubeke enze kanjalo okungalungile, ongcolileyo makazingcolise njalo, kodwa olungileyo makenze njalo ukulunga, kuthi nongcwele azingcwelise njalo.”
“Qaphelani, ngiyeza ngokushesha, ngiphethe umvuzo wami ukuba nginike yilowo nalowo ngokomsebenzi wakhe.
Ngingu-Alfa no-Omega, owokuqala nowokugcina, isiqalo nesiphetho.
“Babusisiwe abahlanza izingubo zabo ukuba bathole ilungelo labo emthini wokuphila, bangene emzini ngamasango.
Ngaphandle kukhona izinja, abathakathi, izifebe, ababulali, abakhonza izithombe, nabo bonke abathanda nabenza amanga.
“Mina Jesu, ngiyithumile ingelosi yami ukuba ifakaze kini ngalezi zinto emabandleni. Ngiyimpande nowolibo lukaDavide, inkanyezi yokusa ecwebezelayo.”
UMoya nomakoti bathi: “Woza!” Nozwayo makathi: “Woza!” Nowomileyo makeze; othandayo makathabathe amanzi okuphila ngesihle.
Ngiyafakaza kubo bonke abezwa amazwi esiphrofetho sale ncwadi. Uma kukhona owenezela kuwo, uNkulunkulu uyakwenezela kuye izinhlupheko ezilotshwe kule ncwadi.
Uma futhi ekhona osusa utho kuwo amazwi encwadi yalesi siphrofetho, uNkulunkulu uyakususa isabelo sakhe emthini wokuphila, emzini ongcwele, nakulokhu okulotshwe kule ncwadi.
Ofakaza ngalezi zinto uthi: “Yebo, ngiyeza masinyane.” Amen. Woza, Nkosi uJesu!
Umusa weNkosi yethu uJesu Khristu mawube nani nonke.