{
  "kv1.5:0.1": "Kathāvatthu ",
  "kv1.5:0.2": "Mahāpaṇṇāsaka ",
  "kv1.5:0.3": "Paṭhamavagga ",
  "kv1.5:0.4": "Jahatikathā ",
  "kv1.5:1.0": "Nasuttāharaṇakathā ",
  "kv1.5:1.1": "Jahati puthujjano kāmarāgabyāpādanti? ",
  "kv1.5:1.2": "Āmantā. ",
  "kv1.5:1.3": "Accantaṁ jahati, anavasesaṁ jahati, appaṭisandhiyaṁ jahati, samūlaṁ jahati, sataṇhaṁ jahati, sānusayaṁ jahati, ariyena ñāṇena jahati, ariyena maggena jahati, akuppaṁ paṭivijjhanto jahati, anāgāmiphalaṁ sacchikaronto jahatīti? ",
  "kv1.5:1.4": "Na hevaṁ vattabbe …pe…. ",
  "kv1.5:2.1": "Vikkhambheti puthujjano kāmarāgabyāpādanti? ",
  "kv1.5:2.2": "Āmantā. ",
  "kv1.5:2.3": "Accantaṁ vikkhambheti, anavasesaṁ vikkhambheti, appaṭisandhiyaṁ vikkhambheti, samūlaṁ vikkhambheti, sataṇhaṁ vikkhambheti, sānusayaṁ vikkhambheti, ariyena ñāṇena vikkhambheti, ariyena maggena vikkhambheti, akuppaṁ paṭivijjhanto vikkhambheti, anāgāmiphalaṁ sacchikaronto vikkhambhetīti? ",
  "kv1.5:2.4": "Na hevaṁ vattabbe …pe…. ",
  "kv1.5:3.1": "Jahati anāgāmiphalasacchikiriyāya paṭipanno puggalo kāmarāgabyāpādaṁ, so ca accantaṁ jahati, anavasesaṁ jahati …pe… ",
  "kv1.5:3.2": "anāgāmiphalaṁ sacchikaronto jahatīti? ",
  "kv1.5:3.3": "Āmantā. ",
  "kv1.5:3.4": "Jahati puthujjano kāmarāgabyāpādaṁ, so ca accantaṁ jahati, anavasesaṁ jahati …pe… ",
  "kv1.5:3.5": "anāgāmiphalaṁ sacchikaronto jahatīti? ",
  "kv1.5:3.6": "Na hevaṁ vattabbe …pe…. ",
  "kv1.5:4.1": "Vikkhambheti anāgāmiphalasacchikiriyāya paṭipanno puggalo kāmarāgabyāpādaṁ, so ca accantaṁ vikkhambheti, anavasesaṁ vikkhambheti …pe… ",
  "kv1.5:4.2": "anāgāmiphalaṁ sacchikaronto vikkhambhetīti? ",
  "kv1.5:4.3": "Āmantā. ",
  "kv1.5:4.4": "Vikkhambheti puthujjano kāmarāgabyāpādaṁ, so ca accantaṁ vikkhambheti, anavasesaṁ vikkhambheti …pe… ",
  "kv1.5:4.5": "anāgāmiphalaṁ sacchikaronto vikkhambhetīti? ",
  "kv1.5:4.6": "Na hevaṁ vattabbe …pe…. ",
  "kv1.5:5.1": "Jahati puthujjano kāmarāgabyāpādaṁ, so ca na accantaṁ jahati, na anavasesaṁ jahati …pe… ",
  "kv1.5:5.2": "na anāgāmiphalaṁ sacchikaronto jahatīti? ",
  "kv1.5:5.3": "Āmantā. ",
  "kv1.5:5.4": "Jahati anāgāmiphalasacchikiriyāya paṭipanno puggalo kāmarāgabyāpādaṁ, so ca na accantaṁ jahati …pe… ",
  "kv1.5:5.5": "na anāgāmiphalaṁ sacchikaronto jahatīti? ",
  "kv1.5:5.6": "Na hevaṁ vattabbe …pe…. ",
  "kv1.5:6.1": "Vikkhambheti puthujjano kāmarāgabyāpādaṁ, so ca na accantaṁ vikkhambheti, na anavasesaṁ vikkhambheti …pe… ",
  "kv1.5:6.2": "na anāgāmiphalaṁ sacchikaronto vikkhambhetīti? ",
  "kv1.5:6.3": "Āmantā. ",
  "kv1.5:6.4": "Vikkhambheti anāgāmiphalasacchikiriyāya paṭipanno puggalo kāmarāgabyāpādaṁ, so ca na accantaṁ vikkhambheti, na anavasesaṁ vikkhambheti …pe… ",
  "kv1.5:6.5": "na anāgāmiphalaṁ sacchikaronto vikkhambhetīti? ",
  "kv1.5:6.6": "Na hevaṁ vattabbe …pe…. ",
  "kv1.5:7.1": "Jahati puthujjano kāmarāgabyāpādanti? ",
  "kv1.5:7.2": "Āmantā. ",
  "kv1.5:7.3": "Katamena maggenāti? ",
  "kv1.5:7.4": "Rūpāvacarena maggenāti. ",
  "kv1.5:7.5": "Rūpāvacaro maggo niyyāniko khayagāmī bodhagāmī apacayagāmī anāsavo asaṁyojaniyo aganthaniyo anoghaniyo ayoganiyo anīvaraṇiyo aparāmaṭṭho anupādāniyo asaṅkilesiyoti? ",
  "kv1.5:7.6": "Na hevaṁ vattabbe. ",
  "kv1.5:7.7": "Nanu rūpāvacaro maggo aniyyāniko na khayagāmī na bodhagāmī na apacayagāmī sāsavo saṁyojaniyo …pe… saṅkilesiyoti? ",
  "kv1.5:7.8": "Āmantā. ",
  "kv1.5:7.9": "Hañci rūpāvacaro maggo aniyyāniko na khayagāmī …pe… ",
  "kv1.5:7.10": "saṅkilesiyo, no ca vata re vattabbe—",
  "kv1.5:7.11": "“jahati puthujjano rūpāvacarena maggena kāmarāgabyāpādan”ti. ",
  "kv1.5:8.1": "Jahati anāgāmiphalasacchikiriyāya paṭipanno puggalo anāgāmimaggena kāmarāgabyāpādaṁ, so ca maggo niyyāniko khayagāmī bodhagāmī apacayagāmī anāsavo …pe… ",
  "kv1.5:8.2": "asaṅkilesiyoti? ",
  "kv1.5:8.3": "Āmantā. ",
  "kv1.5:8.4": "Jahati puthujjano rūpāvacarena maggena kāmarāgabyāpādaṁ, so ca maggo niyyāniko khayagāmī bodhagāmī apacayagāmī anāsavo …pe… ",
  "kv1.5:8.5": "asaṅkilesiyoti? ",
  "kv1.5:8.6": "Na hevaṁ vattabbe …pe…. ",
  "kv1.5:9.1": "Jahati puthujjano rūpāvacarena maggena kāmarāgabyāpādaṁ, so ca maggo aniyyāniko na khayagāmī na bodhagāmī na apacayagāmī sāsavo …pe… ",
  "kv1.5:9.2": "saṅkilesiyoti? ",
  "kv1.5:9.3": "Āmantā. ",
  "kv1.5:9.4": "Jahati anāgāmiphalasacchikiriyāya paṭipanno puggalo anāgāmimaggena kāmarāgabyāpādaṁ, so ca maggo aniyyāniko na khayagāmī na bodhagāmī na apacayagāmī sāsavo …pe… ",
  "kv1.5:9.5": "saṅkilesiyoti? ",
  "kv1.5:9.6": "Na hevaṁ vattabbe …pe…. ",
  "kv1.5:10.1": "Puthujjano kāmesu vītarāgo saha dhammābhisamayā anāgāmiphale saṇṭhātīti? ",
  "kv1.5:10.2": "Āmantā. ",
  "kv1.5:10.3": "Arahatte saṇṭhātīti? ",
  "kv1.5:10.4": "Na hevaṁ vattabbe …pe…. ",
  "kv1.5:11.1": "Puthujjano kāmesu vītarāgo saha dhammābhisamayā anāgāmiphale saṇṭhātīti? ",
  "kv1.5:11.2": "Āmantā. ",
  "kv1.5:11.3": "Apubbaṁ acarimaṁ tayo magge bhāvetīti? ",
  "kv1.5:11.4": "Na hevaṁ vattabbe …pe…. ",
  "kv1.5:12.1": "Apubbaṁ acarimaṁ tayo magge bhāvetīti? ",
  "kv1.5:12.2": "Āmantā. ",
  "kv1.5:12.3": "Apubbaṁ acarimaṁ tīṇi sāmaññaphalāni sacchikarotīti? ",
  "kv1.5:12.4": "Na hevaṁ vattabbe …pe…. ",
  "kv1.5:13.1": "Apubbaṁ acarimaṁ tīṇi sāmaññaphalāni sacchikarotīti? ",
  "kv1.5:13.2": "Āmantā. ",
  "kv1.5:13.3": "Tiṇṇaṁ phassānaṁ tissannaṁ vedanānaṁ tissannaṁ saññānaṁ tissannaṁ cetanānaṁ tiṇṇaṁ cittānaṁ tissannaṁ saddhānaṁ tiṇṇaṁ vīriyānaṁ tissannaṁ satīnaṁ tiṇṇaṁ samādhīnaṁ tissannaṁ paññānaṁ samodhānaṁ hotīti? ",
  "kv1.5:13.4": "Na hevaṁ vattabbe …pe…. ",
  "kv1.5:14.1": "Puthujjano kāmesu vītarāgo saha dhammābhisamayā anāgāmiphale saṇṭhātīti? ",
  "kv1.5:14.2": "Āmantā. ",
  "kv1.5:14.3": "Sotāpattimaggenāti? ",
  "kv1.5:14.4": "Na hevaṁ vattabbe …pe…. ",
  "kv1.5:15.1": "Sakadāgāmimaggenāti? ",
  "kv1.5:15.2": "Na hevaṁ vattabbe. ",
  "kv1.5:15.3": "Katamena maggenāti? ",
  "kv1.5:15.4": "Anāgāmimaggenāti. ",
  "kv1.5:15.5": "Anāgāmimaggena sakkāyadiṭṭhiṁ vicikicchaṁ sīlabbataparāmāsaṁ jahatīti? ",
  "kv1.5:15.6": "Na hevaṁ vattabbe …pe…. ",
  "kv1.5:16.0": "Suttāharaṇakathā ",
  "kv1.5:16.1": "Anāgāmimaggena sakkāyadiṭṭhiṁ vicikicchaṁ sīlabbataparāmāsaṁ jahatīti? ",
  "kv1.5:16.2": "Āmantā. ",
  "kv1.5:16.3": "Nanu tiṇṇaṁ saṁyojanānaṁ pahānā sotāpattiphalaṁ vuttaṁ bhagavatāti? ",
  "kv1.5:16.4": "Āmantā. ",
  "kv1.5:16.5": "Hañci tiṇṇaṁ saṁyojanānaṁ pahānā sotāpattiphalaṁ vuttaṁ bhagavatā, no ca vata re vattabbe—",
  "kv1.5:16.6": "“anāgāmimaggena sakkāyadiṭṭhiṁ vicikicchaṁ sīlabbataparāmāsaṁ jahatī”ti. ",
  "kv1.5:16.7": "Anāgāmimaggena oḷārikaṁ kāmarāgaṁ oḷārikaṁ byāpādaṁ jahatīti? ",
  "kv1.5:16.8": "Na hevaṁ vattabbe …pe…. ",
  "kv1.5:17.1": "Anāgāmimaggena oḷārikaṁ kāmarāgaṁ oḷārikaṁ byāpādaṁ jahatīti? ",
  "kv1.5:17.2": "Āmantā. ",
  "kv1.5:17.3": "Nanu kāmarāgabyāpādānaṁ tanubhāvā sakadāgāmiphalaṁ vuttaṁ bhagavatāti? ",
  "kv1.5:17.4": "Āmantā. ",
  "kv1.5:17.5": "Hañci kāmarāgabyāpādānaṁ tanubhāvā sakadāgāmiphalaṁ vuttaṁ bhagavatā, no ca vata re vattabbe—",
  "kv1.5:17.6": "“anāgāmimaggena oḷārikaṁ kāmarāgaṁ oḷārikaṁ byāpādaṁ jahatī”ti. ",
  "kv1.5:18.1": "Puthujjano kāmesu vītarāgo saha dhammābhisamayā anāgāmiphale saṇṭhātīti? ",
  "kv1.5:18.2": "Āmantā. ",
  "kv1.5:18.3": "Ye keci dhammaṁ abhisamenti, sabbe te saha dhammābhisamayā anāgāmiphale saṇṭhahantīti? ",
  "kv1.5:18.4": "Na hevaṁ vattabbe …pe…. ",
  "kv1.5:19.1": "Na vattabbaṁ—",
  "kv1.5:19.2": "“jahati puthujjano kāmarāgabyāpādan”ti? ",
  "kv1.5:19.3": "Āmantā. ",
  "kv1.5:19.4": "Nanu vuttaṁ bhagavatā—",
  "kv1.5:20.1": "“Ahesuṁ te atītaṁse, ",
  "kv1.5:20.2": "Cha satthāro yasassino; ",
  "kv1.5:20.3": "Nirāmagandhā karuṇedhimuttā, ",
  "kv1.5:20.4": "Kāmasaṁyojanātigā. ",
  "kv1.5:21.1": "Kāmarāgaṁ virājetvā, ",
  "kv1.5:21.2": "brahmalokūpagā ahu; ",
  "kv1.5:21.3": "Ahesuṁ sāvakā tesaṁ, ",
  "kv1.5:21.4": "anekāni satānipi. ",
  "kv1.5:22.1": "Nirāmagandhā karuṇedhimuttā, ",
  "kv1.5:22.2": "Kāmasaṁyojanātigā; ",
  "kv1.5:22.3": "Kāmarāgaṁ virājetvā, ",
  "kv1.5:22.4": "Brahmalokūpagā ahū”ti. ",
  "kv1.5:23.1": "Attheva suttantoti? ",
  "kv1.5:23.2": "Āmantā. ",
  "kv1.5:23.3": "Tena hi jahati puthujjano kāmarāgabyāpādanti. ",
  "kv1.5:24.1": "Jahati puthujjano kāmarāgabyāpādanti? ",
  "kv1.5:24.2": "Āmantā. ",
  "kv1.5:24.3": "Nanu vuttaṁ bhagavatā—",
  "kv1.5:24.4": "“so hi nāma, bhikkhave, sunetto satthā evaṁ dīghāyuko samāno evaṁ ciraṭṭhitiko aparimutto ahosi jātiyā jarāya maraṇena sokehi paridevehi dukkhehi domanassehi upāyāsehi ‘aparimutto dukkhasmā’ti vadāmi. ",
  "kv1.5:24.5": "Taṁ kissa hetu? ",
  "kv1.5:24.6": "Catunnaṁ dhammānaṁ ananubodhā appaṭivedhā. ",
  "kv1.5:24.7": "Katamesaṁ catunnaṁ? ",
  "kv1.5:24.8": "Ariyassa sīlassa ananubodhā appaṭivedhā, ariyassa samādhissa, ariyāya paññāya, ariyāya vimuttiyā ananubodhā appaṭivedhā. ",
  "kv1.5:24.9": "Tayidaṁ, bhikkhave, ariyaṁ sīlaṁ anubuddhaṁ paṭividdhaṁ, ariyo samādhi anubuddho paṭividdho, ariyā paññā anubuddhā paṭividdhā, ariyā vimutti anubuddhā paṭividdhā, ucchinnā bhavataṇhā, khīṇā bhavanetti, natthi dāni punabbhavo”ti. ",
  "kv1.5:25.1": "“Sīlaṁ samādhi paññā ca, ",
  "kv1.5:25.2": "vimutti ca anuttarā; ",
  "kv1.5:25.3": "Anubuddhā ime dhammā, ",
  "kv1.5:25.4": "gotamena yasassinā. ",
  "kv1.5:26.1": "Iti buddho abhiññāya, ",
  "kv1.5:26.2": "dhammamakkhāsi bhikkhunaṁ; ",
  "kv1.5:26.3": "Dukkhassantakaro satthā, ",
  "kv1.5:26.4": "cakkhumā parinibbuto”ti. ",
  "kv1.5:27.1": "Attheva suttantoti? ",
  "kv1.5:27.2": "Āmantā. ",
  "kv1.5:27.3": "Tena hi na vattabbaṁ—",
  "kv1.5:27.4": "“jahati puthujjano kāmarāgabyāpādan”ti. ",
  "kv1.5:27.5": "Jahatikathā niṭṭhitā. "
}