{
  "kv2.2:0.1": "Kathāvatthu ",
  "kv2.2:0.2": "Mahāpaṇṇāsaka ",
  "kv2.2:0.3": "Dutiyavagga ",
  "kv2.2:0.4": "Aññāṇakathā ",
  "kv2.2:1.1": "Atthi arahato aññāṇanti? ",
  "kv2.2:1.2": "Āmantā. ",
  "kv2.2:1.3": "Atthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:1.4": "Na hevaṁ vattabbe. ",
  "kv2.2:1.5": "Natthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:1.6": "Āmantā. ",
  "kv2.2:1.7": "Hañci natthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇaṁ, no ca vata re vattabbe—",
  "kv2.2:1.8": "“atthi arahato aññāṇan”ti. ",
  "kv2.2:2.1": "Atthi puthujjanassa aññāṇaṁ, atthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:2.2": "Āmantā. ",
  "kv2.2:2.3": "Atthi arahato aññāṇaṁ, atthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:2.4": "Na hevaṁ vattabbe. ",
  "kv2.2:3.1": "Atthi arahato aññāṇaṁ, natthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:3.2": "Āmantā. ",
  "kv2.2:3.3": "Atthi puthujjanassa aññāṇaṁ, natthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti? ",
  "kv2.2:3.4": "Na hevaṁ vattabbe. ",
  "kv2.2:4.1": "Atthi arahato aññāṇanti? ",
  "kv2.2:4.2": "Āmantā. ",
  "kv2.2:4.3": "Arahā aññāṇapakato pāṇaṁ haneyya, adinnaṁ ādiyeyya, musā bhaṇeyya, pisuṇaṁ bhaṇeyya, pharusaṁ bhaṇeyya, samphaṁ palapeyya, sandhiṁ chindeyya, nillopaṁ hareyya, ekāgāriyaṁ kareyya, paripanthe tiṭṭheyya, paradāraṁ gaccheyya, gāmaghātaṁ kareyya, nigamaghātaṁ kareyyāti? ",
  "kv2.2:4.4": "Na hevaṁ vattabbe. ",
  "kv2.2:5.1": "Atthi puthujjanassa aññāṇaṁ, puthujjano aññāṇapakato pāṇaṁ haneyya, adinnaṁ ādiyeyya, musā bhaṇeyya …pe… gāmaghātaṁ kareyya, nigamaghātaṁ kareyyāti? ",
  "kv2.2:5.2": "Āmantā. ",
  "kv2.2:5.3": "Atthi arahato aññāṇaṁ, arahā aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti? ",
  "kv2.2:5.4": "Na hevaṁ vattabbe. ",
  "kv2.2:6.1": "Atthi arahato aññāṇaṁ, na ca arahā aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti? ",
  "kv2.2:6.2": "Āmantā. ",
  "kv2.2:6.3": "Atthi puthujjanassa aññāṇaṁ, na ca puthujjano aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti? ",
  "kv2.2:6.4": "Na hevaṁ vattabbe. ",
  "kv2.2:7.1": "Atthi arahato aññāṇanti? ",
  "kv2.2:7.2": "Āmantā. ",
  "kv2.2:7.3": "Atthi arahato satthari aññāṇaṁ, dhamme aññāṇaṁ, saṅghe aññāṇaṁ, sikkhāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatāpaṭiccasamuppannesu dhammesu aññāṇanti? ",
  "kv2.2:7.4": "Na hevaṁ vattabbe. ",
  "kv2.2:8.1": "Natthi arahato satthari aññāṇaṁ, dhamme aññāṇaṁ, saṅghe aññāṇaṁ, sikkhāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatāpaṭiccasamuppannesu dhammesu aññāṇanti? ",
  "kv2.2:8.2": "Āmantā. ",
  "kv2.2:8.3": "Hañci natthi arahato satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇaṁ, no ca vata re vattabbe—",
  "kv2.2:8.4": "“atthi arahato aññāṇan”ti. ",
  "kv2.2:9.1": "Atthi puthujjanassa aññāṇaṁ, atthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti? ",
  "kv2.2:9.2": "Āmantā. ",
  "kv2.2:9.3": "Atthi arahato aññāṇaṁ, atthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti? ",
  "kv2.2:9.4": "Na hevaṁ vattabbe. ",
  "kv2.2:10.1": "Atthi arahato aññāṇaṁ, natthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti? ",
  "kv2.2:10.2": "Āmantā. ",
  "kv2.2:10.3": "Atthi puthujjanassa aññāṇaṁ, natthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti? ",
  "kv2.2:10.4": "Na hevaṁ vattabbe. ",
  "kv2.2:11.1": "Atthi arahato aññāṇanti? ",
  "kv2.2:11.2": "Āmantā. ",
  "kv2.2:11.3": "Nanu arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammoti? ",
  "kv2.2:11.4": "Āmantā. ",
  "kv2.2:11.5": "Hañci arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, no ca vata re vattabbe—",
  "kv2.2:11.6": "“atthi arahato aññāṇan”ti. ",
  "kv2.2:12.1": "Atthi arahato aññāṇanti? ",
  "kv2.2:12.2": "Āmantā. ",
  "kv2.2:12.3": "Nanu arahato doso pahīno …pe… ",
  "kv2.2:12.4": "moho pahīno …pe… ",
  "kv2.2:12.5": "anottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti? ",
  "kv2.2:12.6": "Āmantā. ",
  "kv2.2:12.7": "Hañci arahato anottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, no ca vata re vattabbe—",
  "kv2.2:12.8": "“atthi arahato aññāṇan”ti. ",
  "kv2.2:13.1": "Atthi arahato aññāṇanti? ",
  "kv2.2:13.2": "Āmantā. ",
  "kv2.2:13.3": "Nanu arahato rāgappahānāya maggo bhāvito …pe… ",
  "kv2.2:13.4": "bojjhaṅgā bhāvitāti? ",
  "kv2.2:13.5": "Āmantā. ",
  "kv2.2:13.6": "Hañci arahato rāgappahānāya bojjhaṅgā bhāvitā, no ca vata re vattabbe—",
  "kv2.2:13.7": "“atthi arahato aññāṇan”ti. ",
  "kv2.2:14.1": "Atthi arahato aññāṇanti? ",
  "kv2.2:14.2": "Āmantā. ",
  "kv2.2:14.3": "Nanu arahato dosappahānāya …pe… ",
  "kv2.2:14.4": "mohappahānāya …pe… ",
  "kv2.2:14.5": "anottappapahānāya maggo bhāvito …pe… ",
  "kv2.2:14.6": "bojjhaṅgā bhāvitāti? ",
  "kv2.2:14.7": "Āmantā. ",
  "kv2.2:14.8": "Hañci arahato anottappapahānāya bojjhaṅgā bhāvitā, no ca vata re vattabbe—",
  "kv2.2:14.9": "“atthi arahato aññāṇan”ti. ",
  "kv2.2:15.1": "Atthi arahato aññāṇanti? ",
  "kv2.2:15.2": "Āmantā. ",
  "kv2.2:15.3": "Nanu arahā vītarāgo vītadoso vītamoho …pe… ",
  "kv2.2:15.4": "sacchikātabbaṁ sacchikatanti? ",
  "kv2.2:15.5": "Āmantā. ",
  "kv2.2:15.6": "Hañci arahā vītarāgo …pe… ",
  "kv2.2:15.7": "sacchikātabbaṁ sacchikataṁ, no ca vata re vattabbe—",
  "kv2.2:15.8": "“atthi arahato aññāṇan”ti. ",
  "kv2.2:16.1": "Atthi arahato aññāṇanti? ",
  "kv2.2:16.2": "Sadhammakusalassa arahato atthi aññāṇaṁ, paradhammakusalassa arahato natthi aññāṇanti. ",
  "kv2.2:16.3": "Sadhammakusalassa arahato atthi aññāṇanti? ",
  "kv2.2:16.4": "Āmantā. ",
  "kv2.2:16.5": "Paradhammakusalassa arahato atthi aññāṇanti? ",
  "kv2.2:16.6": "Na hevaṁ vattabbe …pe…. ",
  "kv2.2:17.1": "Paradhammakusalassa arahato natthi aññāṇanti? ",
  "kv2.2:17.2": "Āmantā. ",
  "kv2.2:17.3": "Sadhammakusalassa arahato natthi aññāṇanti? ",
  "kv2.2:17.4": "Na hevaṁ vattabbe …pe…. ",
  "kv2.2:18.1": "Sadhammakusalassa arahato rāgo pahīno, atthi tassa aññāṇanti? ",
  "kv2.2:18.2": "Āmantā. ",
  "kv2.2:18.3": "Paradhammakusalassa arahato rāgo pahīno, atthi tassa aññāṇanti? ",
  "kv2.2:18.4": "Na hevaṁ vattabbe …pe…. ",
  "kv2.2:19.1": "Sadhammakusalassa arahato doso pahīno …pe… ",
  "kv2.2:19.2": "moho pahīno …pe… ",
  "kv2.2:19.3": "anottappaṁ pahīnaṁ, atthi tassa aññāṇanti? ",
  "kv2.2:19.4": "Āmantā. ",
  "kv2.2:19.5": "Paradhammakusalassa arahato anottappaṁ pahīnaṁ, atthi tassa aññāṇanti? ",
  "kv2.2:19.6": "Na hevaṁ vattabbe …pe…. ",
  "kv2.2:20.1": "Sadhammakusalassa arahato rāgappahānāya maggo bhāvito …pe… ",
  "kv2.2:20.2": "bojjhaṅgā bhāvitā, atthi tassa aññāṇanti? ",
  "kv2.2:20.3": "Āmantā. ",
  "kv2.2:20.4": "Paradhammakusalassa arahato rāgappahānāya bojjhaṅgā bhāvitā, atthi tassa aññāṇanti? ",
  "kv2.2:20.5": "Na hevaṁ vattabbe …pe…. ",
  "kv2.2:21.1": "Sadhammakusalassa arahato dosappahānāya …pe… ",
  "kv2.2:21.2": "mohappahānāya …pe… ",
  "kv2.2:21.3": "anottappapahānāya maggo bhāvito …pe… ",
  "kv2.2:21.4": "bojjhaṅgā bhāvitā, atthi tassa aññāṇanti? ",
  "kv2.2:21.5": "Āmantā. ",
  "kv2.2:21.6": "Paradhammakusalassa arahato anottappapahānāya bojjhaṅgā bhāvitā, atthi tassa aññāṇanti? ",
  "kv2.2:21.7": "Na hevaṁ vattabbe …pe…. ",
  "kv2.2:22.1": "Sadhammakusalo arahā vītarāgo vītadoso vītamoho …pe… ",
  "kv2.2:22.2": "sacchikātabbaṁ sacchikataṁ, atthi tassa aññāṇanti? ",
  "kv2.2:22.3": "Āmantā. ",
  "kv2.2:22.4": "Paradhammakusalo arahā vītarāgo vītadoso vītamoho …pe… ",
  "kv2.2:22.5": "sacchikātabbaṁ sacchikataṁ, atthi tassa aññāṇanti? ",
  "kv2.2:22.6": "Na hevaṁ vattabbe …pe…. ",
  "kv2.2:23.1": "Paradhammakusalassa arahato rāgo pahīno, natthi tassa aññāṇanti? ",
  "kv2.2:23.2": "Āmantā. ",
  "kv2.2:23.3": "Sadhammakusalassa arahato rāgo pahīno, natthi tassa aññāṇanti? ",
  "kv2.2:23.4": "Na hevaṁ vattabbe …pe…. ",
  "kv2.2:24.1": "Paradhammakusalassa arahato doso pahīno …pe… ",
  "kv2.2:24.2": "moho pahīno …pe… ",
  "kv2.2:24.3": "anottappaṁ pahīnaṁ, natthi tassa aññāṇanti? ",
  "kv2.2:24.4": "Āmantā. ",
  "kv2.2:24.5": "Sadhammakusalassa arahato anottappaṁ pahīnaṁ, natthi tassa aññāṇanti? ",
  "kv2.2:24.6": "Na hevaṁ vattabbe …pe…. ",
  "kv2.2:25.1": "Paradhammakusalassa arahato rāgappahānāya maggo bhāvito …pe… ",
  "kv2.2:25.2": "bojjhaṅgā bhāvitā …pe… ",
  "kv2.2:25.3": "dosappahānāya mohappahānāya …pe… ",
  "kv2.2:25.4": "anottappapahānāya maggo bhāvito …pe… ",
  "kv2.2:25.5": "bojjhaṅgā bhāvitā, natthi tassa aññāṇanti? ",
  "kv2.2:25.6": "Āmantā. ",
  "kv2.2:25.7": "Sadhammakusalassa arahato anottappapahānāya bojjhaṅgā bhāvitā, natthi tassa aññāṇanti? ",
  "kv2.2:25.8": "Na hevaṁ vattabbe …pe…. ",
  "kv2.2:26.1": "Paradhammakusalo arahā vītarāgo vītadoso vītamoho …pe… ",
  "kv2.2:26.2": "sacchikātabbaṁ sacchikataṁ, natthi tassa aññāṇanti? ",
  "kv2.2:26.3": "Āmantā. ",
  "kv2.2:26.4": "Sadhammakusalo arahā vītarāgo vītadoso vītamoho …pe… ",
  "kv2.2:26.5": "sacchikātabbaṁ sacchikataṁ, natthi tassa aññāṇanti? ",
  "kv2.2:26.6": "Na hevaṁ vattabbe …pe…. ",
  "kv2.2:27.1": "Atthi arahato aññāṇanti? ",
  "kv2.2:27.2": "Āmantā. ",
  "kv2.2:27.3": "Nanu vuttaṁ bhagavatā—",
  "kv2.2:27.4": "“jānatohaṁ, bhikkhave, passato āsavānaṁ khayaṁ vadāmi, no ajānato no apassato. ",
  "kv2.2:27.5": "Kiñca, bhikkhave, jānato kiṁ passato āsavānaṁ khayo hoti? ",
  "kv2.2:27.6": "‘Iti rūpaṁ, iti rūpassa samudayo, iti rūpassa atthaṅgamo, iti vedanā …pe… ",
  "kv2.2:27.7": "iti saññā … ",
  "kv2.2:27.8": "iti saṅkhārā … ",
  "kv2.2:27.9": "iti viññāṇaṁ, iti viññāṇassa samudayo, iti viññāṇassa atthaṅgamo’ti—",
  "kv2.2:27.10": "evaṁ kho, bhikkhave, jānato evaṁ passato āsavānaṁ khayo hotī”ti. ",
  "kv2.2:27.11": "Attheva suttantoti? ",
  "kv2.2:27.12": "Āmantā. ",
  "kv2.2:27.13": "Tena hi na vattabbaṁ—",
  "kv2.2:27.14": "“atthi arahato aññāṇan”ti. ",
  "kv2.2:28.1": "Atthi arahato aññāṇanti? ",
  "kv2.2:28.2": "Āmantā. ",
  "kv2.2:28.3": "Nanu vuttaṁ bhagavatā—",
  "kv2.2:28.4": "“jānatohaṁ, bhikkhave, passato āsavānaṁ khayaṁ vadāmi, no ajānato no apassato. ",
  "kv2.2:28.5": "Kiñca, bhikkhave, jānato kiṁ passato āsavānaṁ khayo hoti? ",
  "kv2.2:28.6": "‘Idaṁ dukkhan’ti—",
  "kv2.2:28.7": "bhikkhave, jānato passato āsavānaṁ khayo hoti, ‘ayaṁ dukkhasamudayo’ti—",
  "kv2.2:28.8": "jānato passato āsavānaṁ khayo hoti, ‘ayaṁ dukkhanirodho’ti—",
  "kv2.2:28.9": "jānato passato āsavānaṁ khayo hoti, ‘ayaṁ dukkhanirodhagāminī paṭipadā’ti—",
  "kv2.2:28.10": "jānato passato āsavānaṁ khayo hoti. ",
  "kv2.2:28.11": "Evaṁ kho, bhikkhave, jānato evaṁ passato āsavānaṁ khayo hotī”ti. ",
  "kv2.2:28.12": "Attheva suttantoti? ",
  "kv2.2:28.13": "Āmantā. ",
  "kv2.2:28.14": "Tena hi na vattabbaṁ—",
  "kv2.2:28.15": "“atthi arahato aññāṇan”ti. ",
  "kv2.2:29.1": "Atthi arahato aññāṇanti? ",
  "kv2.2:29.2": "Āmantā. ",
  "kv2.2:29.3": "Nanu vuttaṁ bhagavatā—",
  "kv2.2:29.4": "“sabbaṁ, bhikkhave, anabhijānaṁ aparijānaṁ avirājayaṁ appajahaṁ abhabbo dukkhakkhayāya, sabbañca kho, bhikkhave, abhijānaṁ parijānaṁ virājayaṁ pajahaṁ bhabbo dukkhakkhayāyā”ti. ",
  "kv2.2:29.5": "Attheva suttantoti? ",
  "kv2.2:29.6": "Āmantā. ",
  "kv2.2:29.7": "Tena hi na vattabbaṁ—",
  "kv2.2:29.8": "“atthi arahato aññāṇan”ti. ",
  "kv2.2:30.1": "Atthi arahato aññāṇanti? ",
  "kv2.2:30.2": "Āmantā. ",
  "kv2.2:30.3": "Nanu vuttaṁ bhagavatā—",
  "kv2.2:31.1": "“Sahāvassa dassanasampadāya, ",
  "kv2.2:31.2": "Tayassu dhammā jahitā bhavanti; ",
  "kv2.2:31.3": "Sakkāyadiṭṭhī vicikicchitañca, ",
  "kv2.2:31.4": "Sīlabbataṁ vāpi yadatthi kiñci; ",
  "kv2.2:31.5": "Catūhapāyehi ca vippamutto, ",
  "kv2.2:31.6": "Chaccābhiṭhānāni abhabba kātun”ti. ",
  "kv2.2:32.1": "Attheva suttantoti? ",
  "kv2.2:32.2": "Āmantā. ",
  "kv2.2:32.3": "Tena hi na vattabbaṁ—",
  "kv2.2:32.4": "“atthi arahato aññāṇan”ti. ",
  "kv2.2:33.1": "Atthi arahato aññāṇanti? ",
  "kv2.2:33.2": "Āmantā. ",
  "kv2.2:33.3": "Nanu vuttaṁ bhagavatā—",
  "kv2.2:33.4": "“yasmiṁ, bhikkhave, samaye ariyasāvakassa virajaṁ vītamalaṁ dhammacakkhuṁ udapādi—",
  "kv2.2:33.5": "‘yaṁ kiñci samudayadhammaṁ sabbaṁ taṁ nirodhadhamman’ti, saha dassanuppādā, bhikkhave, ariyasāvakassa tīṇi saṁyojanāni pahīyanti—",
  "kv2.2:33.6": "sakkāyadiṭṭhi, vicikicchā, sīlabbataparāmāso”ti. ",
  "kv2.2:33.7": "Attheva suttantoti? ",
  "kv2.2:33.8": "Āmantā. ",
  "kv2.2:33.9": "Tena hi na vattabbaṁ—",
  "kv2.2:33.10": "“atthi arahato aññāṇan”ti. ",
  "kv2.2:34.1": "Na vattabbaṁ—",
  "kv2.2:34.2": "“atthi arahato aññāṇan”ti? ",
  "kv2.2:34.3": "Āmantā. ",
  "kv2.2:34.4": "Nanu arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyyāti? ",
  "kv2.2:34.5": "Āmantā. ",
  "kv2.2:34.6": "Hañci arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyya, tena vata re vattabbe—",
  "kv2.2:34.7": "“atthi arahato aññāṇan”ti. ",
  "kv2.2:35.1": "Arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyyāti, atthi arahato aññāṇanti? ",
  "kv2.2:35.2": "Āmantā. ",
  "kv2.2:35.3": "Arahā sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā na jāneyyāti? ",
  "kv2.2:35.4": "Na hevaṁ vattabbe …pe…. ",
  "kv2.2:35.5": "Aññāṇakathā niṭṭhitā. "
}