pasuvaïṇo rosāruṇapaḍimāsaṃkaṃtagorimuhaaṃdam / gahiagghapaṃkaaṃ mia saṃjhāsalilaṃjaliṃ ṇamaha // 1
amiaṃ pāuakavvaṃ paḍhiuṃ souṃ ca je ṇa āṇaṃti / kāmassa tattatattiṃ kuṇaṃti te kaha ṇa lajjaṃti // 2
satta saāiṃ kaïvacchaleṇa koḍīa majjhaārammi / hāleṇa viraïāiṃ sālaṃkārāṇa gāhāṇaṃ // 3
ua ṇiccalaṇippaṃdā bhisiṇīvattammi rehaï valāā / nimmalamaragaabhāaṇapariṭṭhiā saṃkhasutti vva // 4
tāva ccia raïsamae mahilāṇaṃ vibbhamā virāaṃti / jāva ṇa kuvalaadalasacchahāi maülaṃti ṇaaṇāiṃ // 5
ṇohaliam appaṇo kiṃ ṇa maggase maggase kuravaassa / eaṃ khu suhaa tuha hasaï valiamuhapaṃkaaṃ jāā // 6
tāvijjaṃti asoehi laḍahavilaāu daïavirahammi / kiṃ sahaï ko vi kassa vi pāapahāraṃ pahuppaṃto // 7
attā taha ramaṇijjaṃ aṃhaṃ gāmassa maṃḍaṇīhūaṃ / luatilavāḍisaricchaṃ sisireṇakaaṃ bhisiṇisaṃḍaṃ // 8
kiṃ ruasi oṇaamuhī dhavalāaṃtesu sālichettesu / hariālamaṃḍiamuhī ṇaḍi vva saṇavāḍiā jāā // 9
sahi erisi ccia gaī mā ruvvasu taṃsavaliamuhaaṃdaṃ / eāṇa vālavāluṃkitaṃtukuḍilāṇa pemmāṇaṃ // 10
pāapaḍiassa païṇo puṭṭhiṃ putte samāruhaṃtammi / daḍhamaṇṇudūmiāi vihāso ghariṇīa ṇikkaṃto // 11
saccaṃ jāṇaï daṭṭhaṃ sarisammi jaṇammi jujjae rāo / maraü ṇa tumaṃ bhaṇissaṃ maraṇaṃ pi salāhanijjaṃ se // 12
raṃdhaṇakammaṇiuṇie mā jūrasu rattapāḍalasuaṃdhaṃ / muhamāruaṃ piaṃto dhūmāi sihī ṇa pajjalaï // 13
ghariṇīa mahāṇasakammalaggamasimaïlieṇa hattheṇa / chittaṃ muhaṃ hasijjaï caṃdāvatthaṃ gaaṃ païṇā // 14
kiṃ kiṃ de paḍihāsaï sahīhi ia pucchiāi muddhāe / paḍhamuggaadohaliṇīa ṇavara daïaṃ gaā diṭṭhī // 15
amaamaa gaaṇasehara raaṇīmukhatilaa caṃda de chivasu / chitto jehi jiaamo mamaṃ pi tehiṃ cia karehiṃ // 16
ehijja so paüttho ahaaṃ kuppejja so vi aṇuṇejja / ia kassa vi phalaï maṇoramāṇa mālā piaamammi // 17
duggaakuḍaṃvaaṭṭhī kaha ṇu mae dhoieṇa soḍhavvā / dasiosaraṃtasalileṇa uaha ruṇṇaṃ va paḍaeṇa // 18
kosaṃvakisalavaṇṇaa taṇṇaa uṇṇāmiehi kaṇṇehiṃ / hiaaṭṭhiaṃ gharaṃ vaccamāṇa dhavalattaṇaṃ pāva // 19
aliapasuttaa viṇimīliaccha de suhaa majjha oāsaṃ / gaṃḍapariuṃ vaṇāpulaïaṃga ṇa puṇo cirāissaṃ // 20
asamatta maṃḍaṇa ccia vacca gharaṃ se sakouhallassa / volāviahalahalaassa putti citte ṇa laggihisi // 21
āarapaṇāmioṭṭaṃ aghaḍiaṇāsaṃ asaṃhaaṇiḍālaṃ / vaṇṇaghialittamuhie tīe pariuṃvaṇaṃ bharimo // 22
āṇāsaāi deṃtī taha surae harisaviasiakavolā / gose vi oṇaamuhī aha se tti piaṃ ṇa saddhahimo // 23
piaviraho appiadaṃsaṇaṃ ca garuāi do vi dukkhāi / jīa tumaṃ kārijjasi tīa ṇamo āhijāīe // 24
ekko vi kālasāro ṇa dei gaṃtuṃ paāhiṇa calaṃto / kiṃ uṇa vāhāuliaṃ loaṇajualaṃ piaamāe // 25
ṇa kuṇaṃto ccia māṇaṃ ṇisāsu suhasuttadaravivuddhānaṃ / suṇṇaïapāsaparimusaṇaveaṇaṃ jaï si jānaṃto // 26
paṇaakuviāṇa doṇha vi aliapasuttāṇa māṇaïllāṇa / ṇiccalaṇiruddhaṇīsāsadiṇṇaaṇṇāṇa ko mallo // 27
ṇavalaïpaharaṃ aṃge jahiṃ jahiṃ mahaï dearo dāuṃ / romaṃca daṃdarāī tahiṃ tahiṃ dīsaï vahūe // 28
ajja mae teṇa viṇā aṇuhūasuhāi saṃbharaṃtīe / ahiṇavamehāṇa ravo ṇisāmio vajjhapaḍato vva // 29
ṇikkiva jāābhīrua duddaṃsaṇa ṇiṃvakīḍasāriccha / gāmo gāmaṇiṇaṃdaṇa tujjha kae taha vitaṇuāi // 30
paharavaṇamaggavisame jāā kiccheṇa lahaï se ṇiddaṃ / gāmaṇiuttassa ure pallī uṇa se suhaṃ suaï // 31
aha saṃbhāviamaggo suhaa tue ccea ṇavara ṇivvūḍho / eṇhiṃ hiae aṇṇaṃ aṇṇaṃ vāāi loassa // 32
uṇhāi ṇīsasaṃto kīsa maha paraṃmuhīa saaṇaddhe / hiaaṃ palīviuṃ aṇusaeṇa puṭṭhiṃ palīvesi // 33
tuha virahe ciraāraa tissā ṇivaḍaṃtavāhamaïleṇa / raïrahasiharadhaeṇa va muheṇa chāhi ccia ṇa pattā // 34
diarassa asuddhamaṇassa kulavahūṇiaakuḍḍalihiāi / diahaṃ kahei rāmāṇulaggasomitticariāiṃ // 35
cattaraghariṇī piadaṃsaṇā a taruṇī paütthavaïāa / asaī saajjiāduggaā a ṇaha khaṃḍiaṃ sīlaṃ // 36
tālūrabhamāulakhuḍiakesaro giriṇaīapūreṇa / daravuḍḍavuḍḍaṇivvuḍḍamahuaro hīlaï kalaṃvo // 37
ahiāimāṇiṇo duggaassa chāiṃ païssa rakkhaṃhī / ṇiavaṃdhavāṇa jūraï ghariṇī vihaveṇa eṃtāṇaṃ // 38
sāhīṇe vi piaame patte vi chaṇe ṇa maṃḍio appā / duggaapaütthavaïaṃ saajjiaṃ saṃṭhavaṃtīe // 39
tujjha vasaï tti hiaaṃ imehi diṭṭho tumaṃ ti acchīiṃ / tuha virahe kisiāi ti tīe aṃgāi vi piāiṃ // 40
sabbhāvaṇe habharie ratte rajjijjaï tti juttam iṇaṃ / aṇahiae uṇa hiaaṃ jaṃ dijjaï taṃ jaṇo hasaï // 41
āraṃbhaṃtassa dhuaṃ lacchī maraṇaṃ va hoi purisassa / taṃ maraṇam aṇāraṃbhe vi hoi lacchī uṇa ṇa hoi // 42
virahāṇalo sahijjaï āsāvaṃdheṇa vallahajaṇassa / ekkaggāmapavāso māe maraṇaṃ visesei // 43
akkhaḍaï piā hiae aṇṇaṃ mahilāaṇaṃ ramaṃtassa / diṭṭhe sarisammi guṇe sarisammi guṇe aīsaṃte // 44
ṇaïpūrasacchahe jovvaṇammi aïpavasiesudiahesu / aṇiattāsu a rāīsu putti kiṃ daḍḍhamāṇeṇa // 45
kallaṃ kira kharatiao pavasihaï pio tti suvvaï jaṇammi / taha vaḍḍha bhaavaï ṇise jaha se kallaṃ cia ṇa hoi // 46
hoṃtapahiassa jāā āucchaṇajīadhāraṇarahassaṃ / pucchaṃtī bhamaï gharaṃ ghareṇa piavirahasahirīo // 47
aṇṇamahilāpasaṃgaṃ de devva karesu amha daïassa / purisā ekkaṃtarasā ṇa hu dosaguṇe viāṇaṃti // 48
thoaṃ pi ṇa ṇīi imā majjhaṇhe ua sarīratalalukkā / āavabhaeṇa chāhī vi tā pahia kiṃ ṇa vīsamasī // 49
suhaücchaaṃ jaṇaṃ dullahaṃ pi dūrāhi amha āṇeṃta / uaāraa jara jīaṃ pi ṇeṃta ṇa kaāvarāhosi // 50
āma jaro me maṃdo ahava ṇa maṃdo jaṇassa kā tattī / suhaücchaa suhaa suaṃdhagaṃdha mā gaṃdhiriṃ chivasu // 51
sihipicchaluliakese vevaṃtoru viṇimīliaddhacchī / darapurisāini visamiri jāṇasu purisāṇa jaṃ dukkhaṃ // 52
pemmassa virohiasaṃdhiassa paccakkhadiṭṭhaviliassa / uaassa va tāviasīalassa viraso raso hoi // 53
vajjavaḍanāirikkaṃ païṇo soūṇa siṃjiṇīghosaṃ / pusiāi karimarīe sarivaṃdīṇaṃ pi acchīiṃ // 54
karimari aālagajjirajalaāsaṇivaḍaṇapaḍiravo eso / païṇo dhaṇurava kaṃkhiri romaṃcaṃ kiṃ muhā vahasi // 55
sahaï sahaï tti teṇa tahā ramiā suraaduvviaḍḍeṇa / pavvāasirīsāi va jaha se jāāi aṃgāiṃ // 56
agaṇiasesajuāṇā vālaa volīṇaloamajjāā / aha sā bhamaï disāmuhapasāriacchī tuha kaeṇa // 57
ajjaṃ cea paüttho ujjāgarao jaṇassa ajjea / ajjea haliddāpiṃjarāi golāi tūhāiṃ // 58
asarisacitte diare suddhamaṇā piaame visamasīle / ṇa kahaï kuḍuṃvavihaḍaṇabhaeṇa taṇuāae soṇhā // 59
ciṃtāṇiadaïasamāgamammi kaamaṇṇuāi bhariūṇa / suṇṇaṃ kalahā aṃtī sahīhi ruṇṇā ṇa ohasiā // 60
hiaaṇṇuehi samaaṃ asamattāiṃ pi jaha suhāveṃti / kajjāi maṇe ṇa tahā iarehi samāṇiāiṃ pi // 61
daraphuḍiasippisaṃpuḍaṇilukkahālāhalaggacheppaṇihaṃ / pikkaṃvaṭṭhiviṇiggaakomalam aṃvaṃkuraṃ uaha // 62
uaha paḍalaṃtaroiṇṇaṇiaataṃtuddhapāapaḍilaggaṃ / dullakkhasuttagutthekkavaülakusumaṃ va makkaḍaaṃ // 63
uaridaraḍiṭṭhakhaṇṇuaṇilukkapārāvaāṇa viruehiṃ / ṇitthaṇaï jāaviaṇaṃ sūlāhiṇṇaṃ va devaülaṃ // 64
jaï hosi ṇa tassa piā aṇudiahaṃ ṇīsahehi aṃgehiṃ / ṇavasūapīapeosamattapāḍi vva kiṃ suasi // 65
hemaṃtiāsu aïdīharāsu rāīsu taṃ si aviṇiddā / ciraarapaütthavaïe ṇa suṃdaraṃ jaṃ diā suasi // 66
jaï cikkhillabhaüppuapaam iṇam alasāi tuha pae diṇṇaṃ / tā suhaa kaṃḍaïjjaṃtam aṃgam eṇhiṃ kiṇo vahasi // 67
patto chaṇo ṇa sohaï aïppahāe vva puṇṇimāaṃdo / aṃtaviraso vva kāmo asaṃpaāṇo a parioso // 68
pāṇiggahaṇe ccia pavvaīa ṇāaṃ sahīhi sohaggaṃ / pasuvaïṇā vāsuikaṃkaṇammi osārie dūraṃ // 69
giṃhe davaggimasimaïliāi dīsaṃti viṃjhasiharāiṃ / āsasu paütthavaïe ṇa hoṃti ṇavapāusabbhāiṃ // 70
jettiamettaṃ tīraï ṇivvoḍhuṃ desu tettiaṃ paṇaaṃ / ṇa jaṇo viṇiattapasāadukkhasahaṇakkhamo savvo // 71
vahuvallahassa jā hoi vallahā kaha vi paṃca diahāiṃ / sā kiṃ chaṭṭhaṃ maggaï katto miṭṭhaṃ ca vahuaṃ ca // 72
jaṃ jaṃ so ṇijjhāaï aṃgoāsaṃ mahaṃ aṇimisaccho / pacchāemi a taṃ taṃ icchāmi a teṇa dīsaṃtaṃ // 73
daḍhamaṇṇudūmiāi vi gahio daïammi pechaha imīe / osaraï vāluāmuṭṭhio vva māṇo surasuraṃto // 74
ua pommarāamaragaasaṃvaliā ṇahaalāu oaraï / ṇahasirikaṃṭhabbhaṭṭha vva kaṃṭhiā kīrariṃcholī // 75
ṇa vi taha viesavāso doggaccaṃ maha jaṇei saṃtāvaṃ / āsaṃsiatthavimuho jaha paṇaïaṇo ṇiattaṃto // 76
khaṃdhaggiṇā vaṇesuṃ taṇehi gāmammi rakkhio pahio / ṇaaravasio ṇaḍijjaï sāṇusaeṇa vva sīeṇa // 77
bharimo se gahiāharadhuasīsapaholirālaāuliaṃ / vaaṇaṃ parimalataraliabhamarālipaïṇṇakamalaṃ va // 78
hallaphalaṇhāṇapasāhiāṇa chaṇavāsare savattīṇa / ajjāi majjaṇāṇāareṇa kahiaṃ va sohaggaṃ // 79
ṇhāṇahaliddābhariaṃtarāi jālāi jālavalaassa / sohaṃti kiliṃciakaṃṭaeṇa kaṃ kāhisi kaatthaṃ // 80
addaṃsaṇeṇa pemmaṃ avei aïdaṃsaṇeṇa vi avei / pisuṇajaṇakaṃpieṇa vi avei emea vi avei // 81
addaṃsaṇeṇa mahilāaṇassa aïdaṃsaṇeṇa ṇīassa / mukkhassa pisuṇaaṇajaṃpieṇa emea vi khalassa // 82
poṭṭapaḍiehi dukkhaṃ acchijjaï uṇṇaehi hoūṇa / ia ciṃtaṃtāṇa maṇe thaṇāṇa kasaṇaṃ muhaṃ jāaṃ // 83
so tujjha kae suṃdari taha jhīṇo sumahilo haliaütto / jaha se macchariṇīa vi doccaṃ jāāi paḍivaṇṇaṃ // 84
dakkhiṇṇeṇa vi eṃto suhaa suhāvesi aṃha hiaāiṃ / ṇikkaïaveṇa jāṇaṃ gao si kā ṇivvuī tāṇaṃ // 85
ekkaṃ paharugghāaṃ hatthaṃ muhamārueṇa vīaṃto / so vi hasaṃtīa mae gahio vīeṇa kaṃṭhammi // 86
avalaṃviamāṇaparaṃmuhīa eṃtassa māṇini piassa / puṭṭhipulaüggamo tuha kahei samuhaṭṭhiaṃ hiaaṃ // 87
jānaï jāṇāveuṃ aṇuṇaaviddaviamāṇaparisesaṃ / païrikkammi vi viṇaāvalaṃvaṇaṃ sa ccia kuṇaṃtī // 88
muhamārueṇa taṃ kaṇha goraaṃ rāhiāi avaṇeṃto / eāṇa vallavīṇaṃ aṇṇāṇa vi goraaṃ harasi // 89
kiṃ dāva kaā ahavā karesi kāhisi a suhaa ettāhe / avarāhāṇa alajjira sāhasu kaarā khamijjaṃti // 90
ṇūmaṃti je pahuttaṃ kuviaṃ dāsa vva je pasāaṃti / te ccia mahilāṇa piā sesā sāmi ccia varāā // 91
taïā kaaggha mahuara ṇa ramasi aṇṇāsu pupphajāīsu / vaddhaphalabhāragaruiṃ mālaïm eṇhiṃ pariccaasi // 92
aviaṇhapecchaṇijjeṇa takkhaṇaṃ māmi teṇa diṭṭheṇa / siviṇaapīeṇa va pāṇieṇa taṇha ccia ṇa phiṭṭā // 93
suaṇo jaṃ desam alaṃkarei taṃ cia karei pavasaṃto / gāmāsaṇṇummūlia mahāvaḍaṭṭhāṇasāricchaṃ // 94
so ṇāma saṃbharijjaï pabbhasio jo khaṇaṃ pi hiaāhi / saṃbhariavvaṃ ca kaaṃ gaaṃ ca pemmaṃ ṇirālaṃvaṃ // 95
ṇāsaṃ va sā kavoleajja vituha daṃtamaṃḍalaṃ vālā / ubbhiṇṇapulaavaïveḍhaparigaaṃ rakkhaï varāī // 96
diṭṭhā cūā agghāiā surā dakkhiṇāṇilo sahio / kajjāiṃ cia garuāi māmi ko vallaho kassa // 97
ramiūṇa paaṃ pi gao jāhe uvaūhiuṃ paḍiṇiutto / ahaaṃ paütthavaïa vva takkhaṇaṃ so pavāsi vva // 98
aviaṇhapecchaṇijjaṃ samasuhadukkhaṃ viiṇṇasabbhāvaṃ / aṇṇoṇṇahiaalaggaṃ puṇṇehi jaṇo jaṇaṃ lahaï // 99
dukkhaṃ deṃto vi suhaṃ jaṇei jo jassa vallaho hoi / daïaṇahadūmiāṇa vi vaḍḍhaï thaṇaāṇa romaṃco // 100
dhario dhario vialaï uvaeso piasahīhi dijjaṃto / maaraddhaavāṇapahārajajjare tīa hiaammi // 101
taḍasaṃṭhiaṇīḍekkaṃtapīluārakkhaṇekkadiṇṇamaṇā / agaṇiaviṇivāabhaā pūreṇa samaṃ vahaï kāī // 102
vahupupphabharoṇāmiabhūmīgaasāha suṇasu viṇṇattiṃ / golāaḍaviaḍakuḍaṃga mahua saṇiaṃ galijjāsu // 103
ṇippacchimāi asaī dukkhāloāi mahuapupphāiṃ / cīe vaṃdhussa va aṭṭhiāi ruarī samucciṇaï // 104
o hiaa maḍahasariājalaraahīraṃtadīhadāru vva / ṭhāṇe ṭhāṇe ccia laggamāṇa keṇā 'vi ḍajjhihisi // 105
jo tīa ahararāo rattiṃ uvvāsio piaameṇa / so ccia dīsaï gose savattiṇaaṇesu saṃkaṃto // 106
golāaḍaṭṭhiaṃ pecchiūṇa gahavaïsuaṃ haliasoṇhā / āḍhattā uttariuṃ dukkhuttārāi paavīe // 107
calaṇoāsaṇisaṇṇassa tassa bharimo aṇālavaṃtassa / pāaṃguṭṭhāveḍhiakesadaḍhāaḍḍhaṇasuhelliṃ // 108
phālei acchabhallaṃ va uaha kuggāmadeuladdāre / hemaṃtaālapahio vijjhāaṃtaṃ palālaggiṃ // 109
kamalāarā ṇa maliā haṃsā uḍḍāviā ṇa a piucchā / keṇa vi gāmataḍāe abbhaṃ uttāṇiaṃ chūḍhaṃ // 110
keṇa maṇe bhaggamaṇoraheṇa saṃlāviaṃ pavāso tti / savisāi va alasāaṃti jeṇa vahuāi aṃgāiṃ // 111
ajja vi vālo dāmoaro tti ia jaṃpie jasoāe / kaṇhamuhapesiacchaṃ ṇihuaṃ hasiaṃ vaavahūhiṃ // 112
te viralā sappurisā jāṇa siṇeho ahiṇṇamuharāo / aṇudiaha vaḍḍhamāṇo riṇaṃ va puttesu saṃkamaï // 113
ṇaccaṇasalāhaṇaṇiheṇa pāsaparisaṃṭhiā ṇiuṇagovī / sarigoviāṇa cuṃvaï kavolapaḍimāgaaṃ kaṇhaṃ // 114
savvattha disāmuhapasariehi aṇṇoṇṇakaḍaalaggehiṃ / challiṃ va muaï viṃjho mehehi visaṃghaḍaṃtehiṃ // 115
āloaṃti puliṃdā pavvaasiharaṭṭhiā dhaṇuṇisaṇṇā / hatthiulehi va viṃjhaṃ pūrijjaṃtaṃ ṇavabbhehiṃ // 116
vaṇadavamasimaïlaṃgo rehaï viṃjho ghaṇehi dhavalehiṃ / khīroamaṃthaṇucchaliaduddhasitto vva mahumahaṇo // 117
vaṃdīa ṇihaavaṃdhavavimaṇāi vi pakkalo tti corajuvā / aṇurāeṇa pulaïo guṇesu ko maccharaṃ vahaï // 118
ajja kaïmo vi diaho vāhavahū rūvajovvaṇummattā / sohaggaṃ dhaṇuruṃpacchaleṇa racchāsu vikkiraï // 119
ukkhippaï maṃḍalimārueṇa gehaṃgaṇāhi vāhīe / sohaggadhaavaḍāa vva uvaha dhaṇuruṃpariṃcholī // 120
gaagaṃḍatthalaṇihasaṇamaamaïlīkaakaraṃjasāhāhiṃ / eṃtīa kulagharāo ṇāaṃ vāhīa païmaraṇaṃ // 121
ṇavavahupemmatanuio paṇaaṃ paḍhamaghariṇīa rakkhaṃto / alihiaduppariallaṃ pi ṇei raṇṇaṃ dhaṇuṃ vāho // 122
hāsāvio jaṇo sāmalīa paḍhamaṃ pasūamāṇāe / vallahavāeṇa alaṃ mama tti vahuso bhaṇaṃtīe // 123
kaïavarahiaṃ pemmaṃ ṇa tthi ccia māmi māṇuse loe / aha hoi kassa viraho virahe hoṃtammi ko jiaï // 124
accheraṃ va ṇihiṃ miva sagge rajjaṃ va amaapāṇaṃ va / āsi mha taṃ muhuttaṃ viṇiaṃsaṇadaṃsaṇaṃ tissā // 125
sā tujjha vallahā taṃ si majjha veso si tīa tujjha ahaṃ / vālaa phuḍaṃ bhaṇāmo pemmaṃ kira vahuviāraṃ ti // 126
ahaaṃ lajjāluiṇī tassa a ummaccharāi pemmāiṃ / sahiāaṇo vi ṇiuṇo alāhi kiṃ pāarāeṇa // 127
mahumāsamāruāhaamahuarajhaṃkāraṇibbhare raṇṇe / gāi virahakhharāvaddhapahiamaṇamohaṇaṃ govī // 128
taha māṇo māṇadhaṇāi tīa emea dūram aṇuvaddho / jaha se aṇuṇīa pio ekkaggāma ccia paüttho // 129
sāloa ccia sūre ghariṇī gharasāmiassa ghettūṇa / ṇecchaṃtassa vi pāe dhuaï hasaṃtī hasaṃtassa // 130
vāharaü maṃ sahīo tissā gotteṇa kiṃ tha bhaṇieṇa / thirapemmā hou jahiṃ tahiṃ pi mā kiṃ pi ṇaṃ bhaṇaha // 131
rūaṃ acchīsu ṭhiaṃ phariso aṃgesu jaṃpiaṃ kaṇṇe / hiaaṃ hiae ṇihiaṃ vioiaṃ kiṃ tha devveṇa // 132
saaṇe ciṃtāmaïaṃ kāūṇa piaṃ ṇimīliacchīe / appāṇo uvaūḍho pasiḍhilavalaāhi vāhāhiṃ // 133
paribhūeṇa vi diahaṃ gharagharabhamireṇa aṇṇakajjammi / cirajīvieṇa imiṇā khavia mho ḍaḍḍhakāeṇa // 134
vasaï jahiṃ cea khalo posijjaṃto siṇehadāṇehiṃ / taṃ cea ālaaṃ dīvao vva aïreṇa maïlei // 135
hoṃtī vi ṇipphala ccia dhaṇariddhī hoi kiviṇapurisassa / gimhāavasaṃtattassa ṇiaachāhi vva pahiassa // 136
phurie vāmacchi tae jaï ehii so pio jja tā suiraṃ / sammīlia dāhiṇaaṃ tui aviaṇhaṃ puloissaṃ // 137
suṇahapaürammi gāme hiṃḍaṃtī tuha kaeṇa sā vālā / pāsaasāri vva gharaṃghareṇa kaïā vi khajjihaï // 138
aṇṇaṇṇaṃ kusumarasaṃ jaṃ kira so mahaï mahuaro pāuṃ / taṃ ṇīrasāṇa doso kusumāṇaṃ ṇea bhamarassa // 139
racchāpaïṇṇaṇaaṇuppalā tumaṃ sā paḍicchae eṃtaṃ / dāraṇihiehi dohi vi maṃgalakalasehi va thaṇehiṃ // 140
tā ruṇṇaṃ jā ruvvaï tā jhīṇaṃ jāva jhijjae aṃgaṃ / tā ṇīsasia varāīa jāva sāsā pahuppaṃti // 141
samasokkhadukkhaparivaḍḍhiāṇa kāleṇa rūḍhapemmāṇa / mihuṇāṇa maraï jaṃ taṃ khu jiaï iaraṃ muaṃ hoi // 142
harihii piassa ṇavacūapallavo paḍhamamaṃjarisaṇāho / mā ruasu putti patthāṇakalasamuhasaṃṭhio gamaṇaṃ // 143
jo kaha vi maha sahīhiṃ chiddaṃ lahiūṇa pesio hiae / so māṇo coriakāmuo vva diṭṭhe pie ṇaṭṭho // 144
sahiāhi bhaṇṇamāṇā thaṇae laggaṃ kusuṃbhaüpphaṃ ti / muddhavahuā hasijjaï papphoḍaṃtī ṇahavaāiṃ // 145
ummūleṃti va hiaaṃ imāi re tuha virajjamāṇassa / avahīraṇavasavisãṭhulavalaṃtaṇaaṇaddhadiṭṭhāiṃ // 146
ṇa muaṃti dīhasāse ṇa ruaṃti ciraṃ ṇa hoṃti kisiāo / dhaṇṇāu tāu jāṇaṃ vahuvallaha vallaho ṇa tumaṃ // 147
ṇiddālasaparighummirataṃsavalaṃtaddhatāraāloā / kāmassa vi duvvisahā diṭṭhiṇivāā sasimuhīe // 148
jīviasesāi mae gamiā kaha kaha vi pemmaduddolī / eṇhuṃ viramasu re ḍaḍḍha hiaa mā rajjasu kahiṃ pi // 149
ajjāi ṇavaṇahakkhaaṇirikkhaṇe garuajovvaṇuttuṃgaṃ / paḍimāgaaṇiaṇaaṇuppalacciaṃ hoi thaṇavaṭṭhaṃ // 150
taṃ ṇamaha jassa vacche lacchimuhaṃ kotthuhammi saṃkaṃtaṃ / dīsaï maaparihīṇaṃ sasiviṃvaṃ sūraviṃva vva // 151
mā kuṇa paḍivakkhasuhaṃ aṇuṇesu piaṃ pasāalohillaṃ / aïgahiagaruamāṇeṇa putti rāsi vva jhijjihisi // 152
virahakaravattadūsaha phālijjaṃtammi tīa hiaammi / aṃsū kajjalamaïlaṃ pamāṇasuttaṃ va paḍihāi // 153
duṇṇikkhevaam eaṃ puttaa mā sāhasaṃ karijjāsu / ettha ṇihittāi maṇe hiaāi puṇo ṇa labbhaṃti // 154
ṇivvuttaraā vi vahū suraavirāmaṭṭhiiṃ aāṇaṃtī / aviraahiaā aṇṇaṃ pi kiṃ pi atthi tti ciṃtei // 155
ṇaṃdaṃtu suraasuharasataṇhāvaharāi saalaloassa / vahukaïavamaggaviṇimmiāi vesāṇa pemmāiṃ // 156
appattamaṇṇudukkho kiṃ maṃ kisia tti pucchasi hasaṃto / pāvasi jā calacittaṃ piaṃ jaṇaṃ tā tuha kahissaṃ // 157
avahatthiūṇa sahijaṃpiāi jāṇaṃ kaeṇa ramio si / eāi tāi sokkhāi saṃsao jehi jīassa // 158
īsāluo paī se rattiṃ mahuaṃ ṇa dei ucceuṃ / uccei appaṇa ccia māe aïujjuasahāo // 159
acchoḍiavatthaddhaṃtapatthie maṃtharaṃ tumaṃ vacca / ciṃtesi thaṇaharāāsiassa majjhassa vi ṇa bhaṃgaṃ // 160
uddhaccho piaï jalaṃ jaha jaha viralaṃgulī ciraṃ pahio / pāvāliā vi taha taha dhāraṃ taṇuaṃ pi taṇuei // 161
bhicchaaro pecchaï ṇāhimaṃḍalaṃ sā vi tassa muhaaṃdaṃ / taṃ caṭṭuaṃ karaṃkaṃ doṇha vi kāā viluṃpaṃti // 162
jeṇa viṇā ṇa jivijjaï aṇuṇijjaï so kaāvarāho vi / patte vi ṇaaraḍāhe bhaṇa kassa ṇa vallaho aggī // 163
vaṃkaṃ ko pulaïjjaü kassa kahijjaü suhaṃ va dukkhaṃ va / keṇa samaṃ va hasijjaü pāmarapaüre haaggāme // 164
phalahīvāhaṇapuṇṇāhamaṃgalaṃ laṃgale kuṇaṃtīe / asaīa maṇorahagabbhiṇīa hatthā tharaharaṃti // 165
pahiullūraṇasaṃkāulāhi asaīhi vahalatimirassa / āippaṇeṇa ṇihuaṃ vaḍassa sittāi pattāiṃ // 166
bhaṃjaṃtassa vi tuha saggagāmiṇo ṇaïkaraṃjasāhāo / pāā ajja vi dhammia tuha kaha dharaṇiṃ cia chivaṃti // 167
acchaü dāva maṇaharaṃ piāi muhadaṃsaṇaṃ aïmahagghaṃ / taggāmachettasīmā vi jhatti diṭṭhā suhāvei // 168
ṇikkammāhi vi chettāhi pāmaro ṇea vaccae vasahiṃ / muapiajāāsuṇṇaïagehadukkhaṃ pariharaṃto // 169
jhaṃjhāvāuttiṇagharavivarapaloṭṭaṃtasaliladhārāhiṃ / kuḍḍalihiohidiahaṃ rakkhaï ajjā karaalehiṃ // 170
golāṇaīa kacche cakkhaṃto rāiāi pattāiṃ / upphaḍaï makkaḍo khokkhei a poṭṭaṃ ca piṭṭei // 171
gahavaïṇā muaseihaḍuṃḍumadāmaṃ ciraṃ vaheūṇa / vaggasaāiṃ ṇeūṇa ṇavari ajjāhare vaddhaṃ // 172
sihipehuṇāvaaṃsā vahuā vāhassa gavvirī bhamaï / gaamottiaraïapasāhaṇāṇa majjhe savattīṇa // 173
vaṃkacchipecchirīṇaṃ vaṃkullavirīṇa vaṃkabhamirīṇaṃ / vaṃkahasirīṇa puttaa puṇṇehi jaṇo pio hoi // 174
bhama dhammia vīsaddho so suṇaho ajja mārio teṇa / golāaḍaviaḍakuḍuṃgavāsiṇā dariasīheṇa // 175
vāerieṇa bhariaṃ acchiṃ kaṇṇaraïuppalaraeṇa / phukkaṃto aviaṇhaṃ cuṃvaṃto ko si devvāṇaṃ // 176
sahi dummeṃti kalaṃvāiṃ jaha maṃ taha ṇa sesakusumāiṃ / ṇūṇaṃ imesu diahesu vahaï guliādhaṇuṃ kāmo // 177
ṇā 'haṃ dūī ṇa tumaṃ pio tti ko amha ettha vāvāro / sā maraï tujjha aaso eaṃ dhammakkharaṃ bhaṇimo // 178
tīa muhāhi tuha muhaṃ tujjha muhāo a majjha calaṇammi / hatthāhatthīa gao aïdukkarakārao tilao // 179
sāmāi sāmalijjaï addhacchipaloirīa muhasohā / jaṃvūdalakaakaṇṇāvaaṃsabhamire haliaütte // 180
dūi tumaṃ cia kusalā kakkhaḍamaüāi jāṇase vottuṃ / kaṃḍūipaṃḍaraṃ jaha ṇa hoi taha taṃ karejjāsu // 181
mahilāsahassabharie tuha hiae suhaa sā amāaṃtī / diahaṃ aṇaṇṇakammā aṃgaṃ taṇuaṃ pi taṇuei // 182
khaṇamettaṃ pi ṇa phiṭṭaï aṇudiaha viiṇṇagaruasaṃtāvā / pacchaṇṇapāvasaṃka vva sāmalī majjha hiaāo // 183
aṇṇua ṇā 'haṃ kuviā uvaūhasu kiṃ muhā pasāesi / tuha maṇṇusamuppāeṇa majjha māṇeṇa vi ṇa kajjaṃ // 184
dīhuṇhapaüraṇīsāsapaavio vāhasalilaparisitto / sāhei sāmasavalaṃ va tīa aharo tuha vioe // 185
sarae mahaddahāṇaṃ aṃtosisirāi vāhiruṇhāiṃ / jāāi kuviasajjaṇahiaasaricchāi salilāiṃ // 186
āassa kiṃ ṇu kāhaṃ kiṃ vocchaṃ kaha ṇu hohii imaṃ ti / paḍhamuggaasāhasaāriāi hiaaṃ tharaharei // 187
ṇeurakoḍivilaggaṃ ciuraṃ daïassa pāapaḍiassa / hiaaṃ paütthamāṇaṃ ummoaṃti ccia kahei // 188
tujjha 'ṃgarāaseseṇa sāmalī taha khareṇa somārā / sā kira golātūhe ṇhāā jaṃvūkasāeṇa // 189
ajjaṃ cea paüttho ajjaṃ cia suṇṇaāi jāāiṃ / racchāmuhadeulacaccarāi amhaṃ ca hiaāiṃ // 190
ciriḍiṃ pi aāṇaṃtā loā loehi goravabbhahiā / soṇāratula vva ṇirakkharā vi khaṃdhehi vubbhaṃti // 191
āaṃvaṃtakavolaṃ khaliakkharajaṃpiriṃ phuraṃtoṭṭhiṃ / mā chivasu tti sarosaṃ samosaraṃtiṃ piaṃ bharimo // 192
golāvisamoāracchaleṇa appā urammi se mukko / aṇuaṃpāṇiddosaṃ teṇa vi sā gāḍham uvaūḥā // 193
sā taï sahatthadiṇṇaṃ ajja vi re suhaa gaṃdharahiaṃ pi / uvvasiaṇaaragharadevaa vva omāliaṃ vahaï // 194
kelīa vi rūseuṃ ṇa tīrae tammi cukkaviṇaammi / jāiaehi vi māe imehi avasehi aṃgehiṃ // 195
upphulliāi khelaü mā ṇaṃ vārehi hou parikhāmā / mā jahaṇabhāragaruī purisāaṃtī kilimmihaï // 196
paürajuāṇo gāmo mahumāso jovvaṇaṃ paī ṭhero / juṇṇasurā sāhīṇā asaī mā hou kiṃ maraü // 197
vahuso vi kahijjaṃtaṃ tuha vaaṇaṃ majjha hatthasaṃdiṭṭhaṃ / ṇa suaṃ ti jaṃpamāṇā puṇaruttasaaṃ kuṇaï ajjā // 198
pāaḍiaṇehasabbhāvaṇibbharaṃ tīa jaha tumaṃ diṭṭho / saṃvaraṇavāvaḍāe aṇṇo vi jaṇo taha ccea // 199
geṇhaha puloaha imaṃ pahasiavaaṇā païssa appei / jāā suapaḍhamubbhiṇṇadaṃtajualaṃkiaṃ voraṃ // 200
acchaü tā jaṇavāo hiaaṃ cia attaṇo tuha pamāṇaṃ / taha taṃ si maṃdaṇeho jaha ṇa uvālaṃbhajoggo si // 201
appacchaṃdapahāvira dullahalaṃbhaṃ jaṇaṃ vimaggaṃta / āāsavahehi bhamaṃta hiaa kaïā vi bhajjihisi // 202
ahava guṇa ccia lahuā ahavā guṇaaṇṇuo ṇa so loo / ahava mhi ṇigguṇā vā vahuguṇavaṃto jaṇo tassa // 203
phuṭṭaṃteṇa vi hiaeṇa māmi kaha ṇivvarijjae tammi / addāe paḍiviṃva vva jammi dukkhaṃ ṇa saṃkamaï // 204
pāsāsaṃkī kāo ṇe 'cchaï diṇṇaṃ pi pahiaghariṇīe / oṇattakaraaloaliavalaamajjhaṭṭhiaṃ piṃḍaṃ // 205
ohidiahāgamāsaṃkirīhi sahiāhi kuḍḍalihiāo / do tiṇṇi tahiṃ mia coriāi rehā pusijjaṃti // 206
tuha muhasāricchaṃ ṇa lahaï tti saṃpuṇṇamaṃḍalo vihiṇā / aṇṇamaaṃ va ghaḍeuṃ puṇo vi khaṃḍijjaï miaṃko // 207
ajjaṃ gao tti ajjaṃ gao tti ajjaṃ gao tti gaṇirīe / paḍhama ccia diahaddhe kuḍḍo rehāhi cittalio // 208
ṇa vi taha paḍhamasamāgamasuraasuhe pāvie vi parioso / jaha vīadiahasavilakkhalakkhie vaaṇakamalammi // 209
je samuhāgaavolaṃtavaliapiapesiacchivicchohā / aha maṇṇe maaṇasarā jaṇassa je hoṃti te hoṃtu // 210
iaro jaṇo ṇa pāvaï tuha jahaṇāruhaṇasaṃgamasuhelliṃ / aṇuhavaï kaṇaadoro huavahavaruṇāṇa māhappaṃ // 211
jo jassa vihavasāro taṃ so dei tti kiṃ tha accheraṃ / aṇahoṃtaṃ pi hu diṇṇaṃ dohaggaṃ taï savattīṇaṃ // 212
caṃdasarisaṃ muhaṃ se saraso amaassa muharaso tissā / sakaaggaharahasujjalacuṃvaṇaaṃ kassa sarisaṃ se // 213
uppaṇṇatthe kajje aïciṃtaṃto guṇāguṇe tammi / ciraālamaṃdapecchittaṇeṇa puriso haṇaï kajjaṃ // 214
vālaa tumāhi ahiaṃ ṇiaaṃ cia vallahaṃ mahaṃ jīaṃ / taṃ taï viṇā ṇa hoi tti teṇa kuviaṃ pasāemi // 215
pattia ṇa pattiaṃtī jaï tujjha ime ṇa majjha ruirīe / puṭṭhīa vāhaviṃdū pulaübbhee ṇa bhijjaṃtā // 216
taṃ mittaṃ kāavvaṃ jaṃ kira vasaṇammi desaālammi / ālihiabhittivāullaa vva ṇa paraṃmuhaṃ ṭhāi // 217
vahuāi ṇaïṇiuṃje paḍhamuggaasīlakhaṃḍaṇavilakkhaṃ / uḍḍei vihaṃgaülaṃ hāhā pakkhehi va bhaṇaṃtaṃ // 218
saccaṃ bhaṇāmi vālaa ṇa tthi asakkaṃ vasaṃtamāsassa / gaṃdheṇa kuruvaāṇaṃ maṇaṃ pi asaïttanaṃ ṇa gaā // 219
ekkekkamavaïveḍhaṇavivaraṃtaradiṇṇataralaṇaaṇāe / taï volaṃte vālaa paṃjarasaüṇāiaṃ tīe // 220
tā kiṃ kareu jaï taṃ si tīa vaïveḍhapelliathaṇīe / pāaṃguṭṭhaggukkhittaṇīsahaṃgīa vi ṇa diṭṭho // 221
piasaṃbharaṇapaloṭṭaṃtavāhadhārāṇivāabhīāe / dijjaï vaṃkaggīvāi dīvao pahiajāāe // 222
taï volaṃte vālaa tissā aṃgāi taha ṇu valiāiṃ / jaha puṭṭhimajjhaṇivaḍaṃtavāhadhārāu dīsaṃti // 223
tā majjhimo ccia varaṃ dujjaṇasuaṇehi dohi vi ṇa kajjaṃ / jaha diṭṭho tavaï khalo tahea suaṇo aīsaṃto // 224
addhacchipecchiaṃ mā karehi sāhāviaṃ paloehi / so vi sudiṭṭho hohii tumaṃ pi muddhā kalijjhihisi // 225
diahaṃ khuḍukkiāe tīe kāūṇa gehavāvāraṃ / garue vi maṇṇudukkhe bharimo pāaṃtasuttassa // 226
pāṇaüḍīa vi jaliūṇa huavaho jalaï jaṇṇavāḍammi / ṇa hu te parihariavvā visamadasāsaṃṭhiā purisā // 227
jaṃ tujjha saī jāā asaīo suhaa jaṃ ca amhe vi / tā kiṃ phuṭṭaü vīaṃ tujjha samāṇo juā ṇa tthi // 228
savvassammi vi ḍaḍḍhe taha vi hu hiaassa ṇivvui ccea / jaṃ tena gāmaḍāhe hatthāhatthiṃ kuḍo gahio // 229
jāejja vaṇuddese khujjo vi hu ṇīsaho siḍhilavatto / mā māṇusammi loe cāī rasio dariddo a // 230
tassa a sohaggaguṇaṃ amahilasarisaṃ ca sāhasaṃ majjha / jāṇaï golāūro vāsārattaddharatto a // 231
te voliā vaassā tāṇa kuḍuṃgāṇa khaṇṇuā sesā / amhe vi gaavaāo mūluccheaṃ gaaṃ pemmaṃ // 232
thaṇajahaṇaṇiaṃvovari ṇaharaṃkā gaavaāṇa vilaāṇaṃ / uvvasiāṇaṃgaṇivāsamūlavaṃdha vva dīsaṃti // 233
jassa jahiṃ cia paḍhamaṃ tissā aṃgammi ṇivaḍiā diṭṭhī / tassa tahiṃ cea ṭhiā savvaṃgaṃ keṇa vi ṇa diṭṭhaṃ // 234
virahe visaṃ va visamā amaamaā hoi saṃgame ahiaṃ / kiṃ vihiṇā samaaṃ cia dohiṃ pi piā viṇimmaviā // 235
addaṃsaṇeṇa puttaa suṭṭhu vi ṇehāṇuvaṃdhaghaḍiāiṃ / hatthaüḍapāṇiāi va kāleṇa galaṃti pemmāiṃ // 236
païpurao ccia ṇijjaï viṃchuaḍaṭṭhe 'ti jāravejjagharaṃ / ṇiuṇasahīkaradhariā bhuajualaṃdolirī vālā // 237
vikkiṇaï māhamāsaṃmi pāmaro pāriḍiṃ vaïlleṇa / ṇiddhūmamummure sāmalīa thaṇae ṇiacchaṃto // 238
saccaṃ bhaṇāmi maraṇe ṭhia mhi puṇṇe taḍammi tāvīe / ajja vi tattha kuḍuṃge ṇivaḍaï diṭṭhī taha ccea // 239
aṃdhaaravorapatthiṃ va māuā maha païṃ viluṃpaṃti / īsāaṃti maha ccia cheppāhiṃto phaṇo jāo // 240
appattapattaaṃ pāviūṇa ṇavaraṃgaaṃ haliasoṇhā / uaha taṇuī ṇa māaï ruṃdāsu vi gāmaracchāsu // 241
vakkhevaāi piajaṃpiāi parahiaaṇivvuiarāi / viralo hu jāṇaï jaṇo uppaṇṇe jaṃpiavvāiṃ // 242
chajjaï pahussa laliaṃ piāi māṇo khamā samatthassa / jāṇaṃtassa a bhaṇiaṃ moṇaṃ ca aāṇamāṇassa // 243
vevirasiṇṇakaraṃgulipariggahakkhalialegaṇīmagge / sotthi ccia ṇa samappaï piasahi lehammi kiṃ lihimo // 244
devvammi parāhutte pattia ghaḍiaṃ pi vihaḍaï ṇarāṇaṃ / kajjaṃ vāluavaraṇaṃ va kaha vi vaṃdhaṃ cia ṇa dei // 245
māmi hiaaṃ va pīaṃ teṇa juāṇeṇa majjamāṇāe / ṇhāṇahaliddākaḍuaṃ aṇusotta jalaṃ piaṃteṇa // 246
jiviaṃ asāsaaṃ cia ṇa ṇiattaï jovvaṇaṃ aïkkaṃtaṃ / diahā diahehi samā ṇa hoṃti kiṃ ṇiṭṭhuro loo // 247
uppāiadavvāṇa vi khalāṇa ko bhāaṇaṃ khalo ccea / pikkāi vi ṇiṃvaphalāi ṇavara kāehi khajjaṃti // 248
ajja mae gaṃtavvaṃ ghaṇaṃdhaāre vi tassa suhaassa / ajjā ṇimīliacchī paaparivāḍiṃ ghare kuṇaï // 249
suaṇo ṇa kuppaï ccia aha kuppaï vippiaṃ ṇa ciṃtei / aha ciṃtei ṇa jaṃpaï aha jaṃpaï lajjio hoi // 250
so attho jo hatthe taṃ mittaṃ jaṃ ṇiraṃtaraṃ vasaṇe / taṃ rūaṃ jattha guṇā taṃ viṇṇāṇaṃ jahiṃ dhammo // 251
caṃdamuhi caṃdadhavalā dīhā dīhacchi tuha vioammi / caüjāmā saajāma vva jāmiṇī kaha vi volīṇā // 252
aülīṇo domuhao tā mahuro bhoaṇaṃ muhe jāva / murao vva khalo jiṇṇammi bhoaṇe virasam ārasaï // 253
taha soṇhāi pulaïo daravaliāvaṃgatāraaṃ pahio / jaha vārio vi gharasāmieṇa āliṃdae vasio // 254
lahuaṃti lahuṃ purisaṃ pavvaamettaṃ pi do vi kajjāiṃ / ṇivvaraṇam aṇivvūḍhe ṇivvūḍhe jaṃ aṇivvaraṇaṃ // 255
kaṃ tuṃgathaṇukkhitteṇa putti dāraṭṭhiā paloesi / uṇṇāmiakalasaṇivesiagghakamaleṇa va muheṇa // 256
vaïvivaraṇiggaadalo eraṃḍo sāhaï vva taruṇāṇaṃ / ettha ghare haliavahū eddahamettatthaṇī vasaï // 257
gaakalahakuṃbhasaṃṇihaghaṇapīṇaṇiraṃtarehi tuṃgehiṃ / gūsasiuṃ pi ṇa tīraï kiṃ puṇa gaṃtuṃ haathaṇehiṃ // 258
māsapasūaṃ chammāsagabbhiṇiṃ ekkadiahajariaṃ ca / raṃguttiṇṇaṃ ca piaṃ puttaa kāmaṃtao hohi // 259
paḍivakkhamaṇṇupuṃje lāvaṇṇaüḍe aṇaṃgagaakuṃbhe / purisasaahiaadharie kīsa thaṇaṃtī thaṇe vahasi // 260
ghariṇīghaṇathaṇapellaṇasuhellipaḍiassa hoṃtapahiassa / avasaüṇaṃgāraavāraviṭṭhidiahā suhāveṃti // 261
sā tujjha kae vālaa aṇisaṃ gharadāratoraṇaṇisaṇṇā / osūsaï vaṃdaṇamālia vva diahaṃ cia varāī // 262
hasiaṃ sahatthatālaṃ sukkhavaḍaṃ uvagaehi pahiehiṃ / pattaaphalāṇa sarise uḍḍīṇe pūsaviṃdammi // 263
ajja mhi hāsiā māmi teṇa pāesu taha paḍaṃteṇa / tīe vi jalaṃtiṃ dīvavattim abbhuttaaṃtīe // 264
aṇuvattaṇaṃ kuṇaṃto vese vi jaṇe ahiṇṇamuharāo / appavaso vi hu suaṇo paravvaso āhiāīe // 265
aṇudiahavaḍḍhiāara viṇṇāṇaguṇehi jaṇiamāhappo / puttaa ahiāajaṇo virajjamāṇo vi dullakkho // 266
viṇṇāṇaguṇamahagghe purise vesattaṇaṃ pi ramaṇijjaṃ / jaṇaṇiṃdie uṇa jaṇe piattaṇeṇā 'vi lajjhāmo // 267
kaha ṇāma tīa taha so sahāvagaruo vi thaṇaharo paḍio / ahavā mahilāṇa ciraṃ ko vi ṇa hiaammi saṃṭhāi // 268
suanu vaaṇaṃ chivaṃtaṃ sūraṃ mā sāulīa vārehi / eassa paṃkaassa a jāṇaü kaaraṃ suhapphaṃsaṃ // 269
māṇosahaṃ va pijjaï piāi māṇaṃsiṇīa daïassa / karasaṃpuḍavaliuddhāṇaṇāi maïrāi gaṃḍūso // 270
kaha sā ṇivvaṇṇijjaü jīa jahāloiammi aṃgammi / diṭṭhī duvvalagāi vva paṃkapaḍiā ṇa uttaraï // 271
kīraṃti ccia ṇāsaï uae reha vva khalaaṇe mettī / sā uṇa suaṇammi kaā aṇahā pāhāṇareha vva // 272
avvo ukkaraāraa puṇo vi tattiṃ karesi gamaṇassa / ajja vi ṇa hoṃti saralā veṇīa taraṃgiṇo cihurā // 273
ṇa vi taha chearaāi vi haraṃti puṇaruttarāarasiāiṃ / jaha jattha va tattha va jaha va taha va sabbhāvaṇeharamiāiṃ // 274
ujjhasi piāi samaaṃ taha vi hu re bhaṇasu kīsa kisia tti / uaribhareṇa aāṇua muaï vaïllo vi aṃgāiṃ // 275
daḍhamūlavaddhagaṃṭhi vva moiā kaha vi teṇa me vāhū / amhehi vi tassa ure khutta vva samukkhaā thaṇaā // 276
aṇuṇaapasāiāe tujjha 'varāhe ciraṃ gaṇaṃtīe / apahuttohaahatthaṃgurīa ruṇṇaṃ varāīe // 277
seacchaleṇa pecchaha taṇue aṃgammi se amāaṃtaṃ / lāvaṇṇaṃ osaraï va tivalīsovāṇavaṃtīhiṃ // 278
devvāattammi phale kiṃ kīraü ettiaṃ puṇo bhaṇimo / kaṃkellipallavāṇaṃ ṇa pallavā hoṃti sāricchā // 279
dhuaï vva maakalaṃkaṃ kavolapaḍiassa māṇiṇī uaha / aṇavaraavāhajalabhariaṇaaṇakalasehi caṃdassa // 280
gaṃdheṇa appaṇo māliāṇa ṇomāliā ṇa phuṭṭihaï / aṇṇo ko vi haāsāi maṃsalo parimaluggāro // 281
phalasaṃpattīa samoṇaāi tuṃgāi phalavipattīe / hiaāi supurisāṇaṃ mahātarūṇaṃ va siharāiṃ // 282
āsāsei pariaṇaṃ parivattaṃtīa pahiajāāe / ṇitthāmuvvattaṇavaliahatthamuhalo valaasaddo // 283
tuṃgo ccia hoi maṇo maṇaṃsiṇo aṃtimāsu vi dasāsu / atthamaṇammi vi raïṇo kiraṇā uddhaṃ cia phuraṃti // 284
poṭṭaṃ bharaṃti saüṇā vi māuā appaṇo aṇuvviggā / vihaluddharaṇasahāvā huvaṃti jaï ke vi sappurisā // 285
ṇa viṇā sabbhāveṇaṃ gheppaï paramatthajāṇuo loo / ko juṇṇamaṃjaraṃ kaṃjieṇa veāriuṃ taraï // 286
raṇṇāu taṇaṃ raṇṇāu pāṇiaṃ savvado saaṃgāhaṃ / taha vi maāṇa maīṇa a āmaraṇaṃtāi pemmāiṃ // 287
tāvam avaṇei ṇa tahā caṃdaṇapaṃko vi kāmimihuṇāṇaṃ / jaha dūsahe vi gimhe aṇṇoṇṇāliṃgaṇasuhellī // 288
tuppāṇaṇā kiṇo acchasi tti paripucchiāi vahuāi / viuṇāveḍhiajahaṇatthalāi lajjoṇaaṃ hasiaṃ // 289
hiaa ccea vilīṇo ṇa sāhio jāṇiūṇa gharasāraṃ / vaṃdhavaduvvaaṇaṃ miva dohalao duggaavahūe // 290
dhāvaï vialiadhammillasicaasaṃjamaṇavāvaḍakaraggā / caṃḍilabhaavivalāaṃtaḍiṃbhaparimaggiṇī ghariṇī // 291
jaha jaha uvvahaï vahū ṇavajovvaṇamaṇaharāi aṃgāi / taha taha se taṇuāaï majjho daïo a paḍivakkho // 292
jaha jaha jarāpariṇao hoi paī duggao virūo vi / kulavāliāṇa taha taha ahiaaraṃ vallaho hoi // 293
eso māmi juāṇo vāraṃ vāreṇa jaṃ aḍaaṇāo / gimhe gāmekkavaḍodaaṃ va kiccheṇa pāvaṃti // 294
gāmavaḍassa piucchā āvaṃḍumuhāṇa paṃḍuracchāhaṃ / hiaeṇa samaṃ asaīṇa paḍaï vāāhaaṃ pattaṃ // 295
pecchaï aladdhalakkhaṃ dīhaṃ ṇīsasaï suṇṇaaṃ hasaï / jaha jaṃpaï aphuḍatthaṃ taha se hiaaṭṭhiaṃ kiṃ pi // 296
gahavaï gao mha saraṇaṃ rakkhasu eaṃ ti aḍaaṇā bhaṇiuṃ / sahasāgaassa turiaṃ païṇo ccia jāram appei // 297
hiaechiassa dijjaü taṇuāaṃtiṃ ṇa pecchaha piucchā / hiaechio mha katto bhaṇiuṃ mohaṃ gaā kuarī // 298
khiṇṇassa ure païṇo ṭhavei gimhāvaraṇharamiassa / ollaṃ galaṃtakusumaṃ ṇhāṇasuaṃdhaṃ cihurabhāraṃ // 299
aha sarasadaṃtamaṃḍalakavolapaḍimāgao maacchīe / aṃtosiṃdūriasaṃkhavattakaraṇiṃ vahaï caṃdo // 300
aha amha āao ajja kulaharāo tti cheṃchaī jāraṃ / sahasāgaassa turiaṃ païṇo kaṃṭhammi lāei // 301
pusiā kaṇṇāharaṇeṃdaṇīlakiraṇāhaā sasimaūhā / māṇiṇivaaṇammi sakajjalaṃsusaṃkāi daïeṇa // 302
eddahamettammi jae suṃdaramahilāsahassabharie vi / aṇuharaï ṇavara tissā vāmaddhaṃ dāhiṇaddhassa // 303
jaha jaha vāei pio taha taha ṇaccāmi caṃcale pemme / vallī valei aṃgaṃ sahāvathaddhe vi rukkhammi // 304
dukkhehi labbhaï pio laddho dukkhehi hoi sāhīṇo / laddho vi aladdho ccia jaï jaha hiaaṃ taha ṇa hoi // 305
avvo aṇuṇaasuhakaṃkhirīa akaaṃ kaaṃ kuṇaṃtīe / saralasahāvo vi pio aviṇaamaggaṃ valā ṇīo // 306
hatthesu a pāesu a aṃguligaṇaṇāi aïgaā diahā / eṇhiṃ uṇa keṇa gaṇijjaü tti bhaṇiuṃ ruaï muddhā // 307
kīramuhasacchahehiṃ rehaï vasuhā palāsakusumehiṃ / vuddhassa calaṇavaṃdaṇapaḍiehi va bhikkhusaṃghehiṃ // 308
jaṃ jaṃ pihulaṃ aṃgaṃ taṃ taṃ jāaṃ kisoari kisaṃ te / jaṃ taṃ taṇuaṃ taṃ taṃ pi ṇiṭṭhiaṃ kiṃ tha māṇeṇa // 309
ṇa guṇeṇa hīraï jaṇo hīraï jo jeṇa bhāvio teṇa / mottūṇa puliṃdā mottiāi guṃjāu geṇhaṃti // 310
laṃkālaāṇa puttaa vasaṃtamāsekkaladdhapasarāṇa / āpīalohiāṇaṃ vīhei jaṇo palāsāṇaṃ // 311
ghettūṇa cuṇṇamuṭṭhiṃ harisūsuiāi veamāṇāe / bhisiṇemi tti piaamaṃ hatthe gaṃdhodaaṃ jāaṃ // 312
puṭṭhiṃ pusasu kisoari paloharaṃkollapattacittaliaṃ / cheāhi diarajāāhi ujjue mā kalijjihisi // 313
acchīi tā thaïssaṃ dohi vi hatthehi tammi diṭṭhammi / aṃgaṃ kalaṃvakusumaṃ va pulaïaṃ kaha ṇu ḍhakkissaṃ // 314
jhaṃjhāvāuttiṇie gharammi roūṇa ṇīsahaṇisaṇṇaṃ / dāvei va gaavaïaṃ vijjujjoo jalaharāṇaṃ // 315
bhuṃjasu jaṃ sāhīṇaṃ katto loṇaṃ kugāmariddhammi / suhaa saloṇeṇa vi kiṃ teṇa siṇeho jahiṃ ṇatthi // 316
suhapucchiāi halio muhapaṃkaasurahipavaṇaṇivvaviaṃ / taha piaï paaïkaḍuaṃ pi osahaṃ jaha ṇa ṇiṭṭhāi // 317
aha sā tahiṃ tahiṃ vvia vāṇīravaṇammi cuvakasaṃkeā / tuha daṃsaṇaṃ vimaggaï pabbhaṭṭaṇihāṇaṭhāṇaṃ ca // 318
daḍharosakalusiassa vi suaṇassa muhāhi vippiaṃ kaṃto / rāhumuhammi vi sasiṇo kiraṇā amaaṃ via muaṃti // 319
avamānio vi ṇa tahā dummijjaï sajjaṇo vihavahīṇo / paḍikāuṃ asamattho māṇijjaṃto jaha pareṇa // 320
kalahaṃtare vi aviṇiggaāi hiaammi jaramuvagaāiṃ / suaṇakaāi rahassāi ḍahaï āukkhae aggī // 321
lumbīo aṃgaṇamāhavīṇa dāraggalāu jāāu / āsāso paṃthapaloaṇe vi piṭṭho gaavaīṇaṃ // 322
piadaṃsaṇasuharasamaüliāi jaï se ṇa hoṃti ṇaaṇāiṃ / tā keṇa kaṇṇaraïaṃ lakkhijjaï kuvalaaṃ tissā // 323
cikkhillakhuttahalamuhakaḍḍhaṇasiḍhile païmmi pāsutte / appattamohaṇasuhā ghaṇasamaaṃ pāmarī savaï // 324
dummeṃti deṃti sokkhaṃ kuṇaṃti aṇurāaaṃ ramāveṃti / araïraïvaṃdhavāṇaṃ ṇamo ṇamo maaṇavāṇāṇaṃ // 325
kusumamaā vi aïkharā aladdhaphaṃsā vi dūsahapaāvā / bhiṃdaṃtā vi raïarā kāmassa sarā vahuviappā // 326
īsaṃ jaṇeṃti dāveṃti mammahaṃ vippiaṃ sahāveṃti / virahe ṇa deṃti mariuṃ aho guṇā tassa vahumaggā // 327
ṇīāi ajja ṇikkiva piṇaddhaṇavaraṃgaāi varaīe / gharaparivāḍīa paheṇaāi tuha daṃsaṇāsāe // 328
sūijjaï hemaṃtammi duggao phuṃphuāsuaṃdheṇa / dhūmakavileṇa pariviralataṃtuṇā juṇṇapaḍaeṇa // 329
kharasippīrullihiāi kuṇaï pahio himāgamapahāe / āamaṇajalolliahatthaphaṃsamasiṇāi aṃgāiṃ // 330
ṇakkhukkhuḍiaṃ sahaāramaṃjariṃ pāmarassa sīsammi / vaṃdiṃ miva hīraṃtiṃ bhamarajuāṇā aṇusaraṃti // 331
sūracchaleṇa puttaa kassa tumaṃ aṃjaliṃ paṇāmesi / hāsakaḍakkhummissā ṇa hoṃti devāṇa jokkārā // 332
muhavijjhaviapaīvaṃ ṇiruddhasāsaṃ sasaṃkiullāvaṃ / savahasaarakkhioṭṭhaṃ coriaramiaṃ suhāvei // 333
geacchaleṇa bhariuṃ kassa tumaṃ ruasi ṇibbharukkaṃṭhaṃ / maṇṇupaḍiruddhakaṃṭhaddhaṇiṃtakhaliakkharullāvaṃ // 334
vahalatamāhaarāī ajja paüttho paī gharaṃ suṇṇaṃ / taha jaggesu saajjia ṇa jahā amhe musijjāmo // 335
saṃjīvaṇosahaṃ miva suassa rakkhaï aṇaṇṇavāvārā / sāsū ṇavabbhadaṃsaṇakaṃṭhāgaajīviaṃ soṇhaṃ // 336
ṇūṇaṃ hiaaṇihittāi vasasi jāāi amha hiaammi / aṇṇaha maṇorahā me sāhasu kaha tīa viṇṇāā // 337
taï suhaa aīsaṃte tissā acchīhi kaṇṇalaggehiṃ / diṇṇaṃ gholiravāhehi pāṇiaṃ daṃsaṇasuhāṇaṃ // 338
uppekkhāgaa tuha muhadaṃsaṇapaḍiruddhajīviāsāi / duhiāi mae kālo kettiametto vva ṇeavvo // 339
volīṇālakkhiarūajovvaṇā putti kaṃ ṇa dūmesi / diṭṭhā paṇaṭṭhaporāṇajaṇavaā jammabhūmi vva // 340
pariosaviasiehiṃ bhaṇiaṃ acchīhi teṇa jaṇamajjhe / paḍivaṇṇaṃ tīa vi uvvamaṃtaseehi aṃgehiṃ // 341
ekkakkamasaṃdesāṇurāavaḍḍhaṃtakouhallāiṃ / dukkhaṃ asamattamaṇorahāi acchaṃti mihuṇāiṃ // 342
jaï so ṇa vallaho ccia gottaggahaṇeṇa tassa sahi kīsa / hoi muhaṃ te raviaraphaṃsavisaṭṭaṃ va tāmarasaṃ // 343
māṇadumaparusapavaṇassa māmi savvaṃgaṇivvuiarassa / avaūhaṇassa bhaddaṃ raïṇāḍaapuvvaraṃgassa // 344
ṇiaāṇumāṇaṇīsaṃka hiaa de pasia virama ettāhe / amuṇiaparamatthajaṇāṇulagga kīsa mha lahuesi // 345
osahiajaṇo païṇā salāhamāṇeṇa aïciraṃ hasio / caṃdo tti tujjha vaaṇe viiṇṇakusumaṃjalivilakkho // 346
jhijjaṃtehi aṇudiṇaṃ paccakkhammi vi tumammi aṃgehiṃ / vālaa pucchijjaṃtī ṇa āṇimo kassa kiṃ bhaṇimo // 347
aṃgāṇaṃ taṇuāraa sikkhāvaa dīharoiavvāṇaṃ / viṇaāikkamaāraa mā mā ṇaṃ pamhasijjāsu // 348
aṇṇaha ṇa tīraï ccia parivaḍḍhaṃtagaruaṃ piaamassa / maraṇaviṇoeṇa viṇā viramāveuṃ virahadukkhaṃ // 349
vaṇṇaṃtīhi tuha guṇe vahuso amhehi chiṃchaīpurao / vālaa saam ea kao si dullaho kassa kuppāmo // 350
jāo so vi vilakkho mae vi hasiūṇa gāḍham uvaūḍho / paḍhamosariassa ṇiaṃsaṇassa gaṃṭhiṃ vimaggaṃto // 351
kaṃḍujjuā varāī ajja tae sā kaāvarāheṇa / alasāiaruṇṇaviaṃbhiāi diaheṇa sikkhaviā // 352
avarāhehi vi ṇa tahā pattia jaha maṃ imehi dummesi / avahatthiasabbhāvehi suhaa dakkhiṇṇabhaṇiehiṃ // 353
mā jūra piāliṃgaṇasarahasabhamirīṇa vāhulaïāṇaṃ / tuṇhikka paruṇṇenaṃ imiṇā māṇaṃsiṇi muheṇaṃ // 354
mā vacca pupphalāvira devā uaaṃjalīhi tūsaṃti / golāṇaīa puttaa sīlummūlāi kūlāiṃ // 355
vaaṇe vaaṇammi calaṃtasīsasuṇṇāvahāṇahuṃkāraṃ / sahi deṃtī ṇīsāsaṃtaresu kīsa mha dūmesi // 356
sabbhāvaṃ pucchaṃtī vālaa roāviā tuha piāe / ṇa tthi ccia kaasavahaṃ hāsummissaṃ bhaṇaṃtīe // 357
ettha mae ramiavvaṃ tīa samaṃ ciṃtiūṇa hiaeṇa / pāmarakaraseullā ṇivaḍaï tuvarī vavijjaṃtī // 358
gahavaïsuocciesu vi phalahīveṃṭesu uaha vahuāi / mohaṃ bhamaï pulaïo vilaggaseaṃgulī hattho // 359
ajjaṃ mohaṇasuhiaṃ mua tti mottuṃ palāie halie / daraphuḍiaveṃṭabhāroṇaāi hasiaṃ va phalahīe // 360
ṇīsāsukkaṃpiapulaïehi jāṇaṃti ṇacciuṃ dhaṇṇā / amhārisīhi diṭṭhe piammi appā vi vīsario // 361
taṇueṇa vi taṇuijjaï khīṇeṇa vi khijjae valā imiṇā / majjhattheṇa vi majjheṇa putti kaha tujjha paḍivakkho // 362
vāhi vva vejjarahio dhaṇarahio saaṇamajjhavāso vva / riuriddhidaṃsaṇaṃ miva dūsahaṇīo tuha vioo // 363
ko ttha jaammi samattho thaïuṃ vitthiṇṇaṇimmaluttuṃgaṃ / hiaaṃ tujjha ṇarāhiva gaaṇaṃ va paohare mottuṃ // 364
āaṇṇei aḍaaṇā kuḍuṃgaheṭṭhammi diṇṇasaṃkeā / aggapaapelliāṇaṃ mammaraaṃ juṇṇapattāṇaṃ // 365
ahileṃti surahiṇīsasiaparimalāvaddhamaṃḍalaṃ bhamarā / amuṇiacaṃdaparihavaṃ apuvvakamalaṃ muhaṃ tissā // 366
dhīrāvalaṃvirīa vi guruaṇapurao tumammi volīṇe / paḍio se acchiṇimīlaṇeṇa pamhaṭṭhio vāho // 367
bharimo se saaṇaparaṃmuhīa vialaṃtamāṇapasarāi / kaïavasuttuvvattaṇathaṇaalasappellaṇasuhelliṃ // 368
phaggucchavaṇiddosaṃ keṇa vi kaddamapasāhaṇaṃ diṇṇaṃ / thaṇaalasamuhapaloṭṭaṃtaseadhoaṃ kiṇo dhuasi // 369
kiṃ ṇa bhaṇio si vālaa gāmaṇidhūāi guruaṇasamakkhaṃ / aṇimisam īsīsi valaṃtavaaṇaṇaaṇaddhatiṭṭhehiṃ // 370
ṇaaṇabbhaṃtaragholaṃtavāhabharamaṃtharāi diṭṭhīe / puṇaruttapeccharīe vālaa kiṃ jaṃ ṇa bhaṇio si // 371
jo sīsammi viiṇṇo majjha juāṇehi gaṇavaī āsi / taṃ cia eṇhiṃ paṇamāmi haajare hohi saṃtuṭṭhā // 372
aṃtohuttaṃ ḍajjhaï jāāsuṇṇe ghare haliaütto / ukkhāaṇihāṇāi va ramiaṭṭhāṇāi pecchaṃto // 373
ṇiddābhaṃgo āvaṃḍurattaṇaṃ dīharā a ṇīsāsā / jāaṃti jassa virahe teṇa samaṃ kīriso māṇo // 374
teṇa ṇa marāmi maṇṇūhi pūriā ajja jeṇa re suhaa / taggaamaṇā maraṃtī mā tujjha puṇo vi laggissaṃ // 375
avarajjhasu vīsaddhaṃ savvaṃ te suhaa visahimo amhe / guṇaṇibbharammi hiae pattia dosā ṇa māaṃti // 376
bhariuccaraṃtapasariapiasaṃbharaṇapisuṇo varāīe / parivāho via dukkhassa vahaï ṇaaṇaṭṭhio vāho // 377
jaṃ jaṃ karesi jaṃ jaṃ jaṃpasi jaha jaha tumaṃ ṇiacchesi / taṃ tam aṇusikkhirīe dīho diaho ṇa saṃpaḍaï // 378
bhaṃḍaṃtīa taṇāiṃ sottuṃ diṇṇāi jāi pahiassa / tāi ccea pahāe ajjā āaḍḍhaï ruaṃtī // 379
vasaṇammi aṇuvviggā vihavammi agavviā bhae dhīrā / hoṃti ahiṇṇasahāvā samesu visamesu sappurisā // 380
ajja sahi keṇa gose kaṃ pi maṇe vallahaṃ bharaṃteṇa / amhaṃ maaṇasarāhaahiaavaṇapphoḍaṇaṃ gīaṃ // 381
uṭṭhaṃtamahāraṃbhe thaṇae daṭṭhūṇa muddhavahuāe / osaṇṇakavolāe ṇīsasiaṃ paḍhamaghariṇīe // 382
garuachuhāuliassa vi vallahakariṇīmuhaṃ bharaṃtassa / saraso muṇālakavalo gaassa hatthe ccia milāṇo // 383
pasia pie kā kuviā suaṇu tumaṃ paraaṇammi ko kovo / ko hu paro ṇāha tumaṃ kīsa aüṇṇāṇa me sattī // 384
ehisi tumaṃ ti ṇimisaṃ va jaggiaṃ jāmiṇīa paḍhamaddhaṃ / sesaṃ saṃtāvaparavvasāi varisaṃ va volīṇaṃ // 385
avalaṃvaha mā saṃkaha ṇa imā gahalaṃghiā paribbhamaï / atthakkagajjiubbhaṃtahitthahiaā pahiajāā // 386
kesararaavicchaḍḍe maaraṃdo hoi jettio kamale / jaï bhamara tettio aṇṇahiṃ pi tā sohasi bhamaṃto // 387
pecchaṃti aṇimisacchā pahiā haliassa piṭṭhapaṃḍuriaṃ / dhūaṃ duddhasamudduttaraṃtalacchiṃ via saaṇhā // 388
kassa bharasi tti bhaṇie ko me atthi tti jaṃpamāṇīe / uvviggaroirīe amhe vi ruāviā tīe // 389
pāapaḍiaṃ ahavve kiṃ dāṇi ṇa uṭṭhavesi bhattāraṃ / eaṃ cia avasāṇaṃ dūraṃ pi gaassa pemmassa // 390
taḍaviṇihiaggahatthā vāritaraṃgehi gholiraṇiaṃvā / sālūrī paḍiviṃve purisāaṃti vva paḍihāi // 391
sikkariamaṇiamuhaveviāi dhuahatthasiṃjiavvāi / sikkhaṃtu voḍahīo kusuṃbha tumhaṃ pasāeṇa // 392
jettiamettā racchā ṇiaṃva kaha tettio ṇa jāo si / jeṇa chivijjaï guruaṇalajjosario vi so suhao // 393
maragaasūīviddhaṃ va mottiaṃ piaï āaaggīvo / moro pāusaāle taṇaggalaggaṃ uaaviṃduṃ // 394
ajjāi ṇīlakaṃcuabhariuvvariaṃ vihāi thaṇavaṭṭaṃ / jalabhariajalaharaṃtaradaruggaaṃ caṃdaviṃvaṃ va // 395
rāaviruddhaṃ va kahaṃ pahio pahiassa sāhaï sasaṃkaṃ / jatto amvāṇa dalaṃ tatto daraṇiggaaṃ kiṃ pi // 396
dhaṇṇā tā mahilāo jā daïaṃ siviṇae vi pecchaṃti / ṇidda ccia teṇa viṇā ṇa ei kā pecchae siviṇaṃ // 397
parihariakaṇaakuṃḍalagaṃḍatthalamaṇaharesu savaṇesu / aṇṇua samaavaseṇaṃ parihijjaï tālaveṃṭajuaṃ // 398
majjhaṇhapatthiassa vi gimhe pahiassa haraï saṃtāvaṃ / hiaaṭṭhiajāāmuhamaaṃkajoṇhājalappavaho // 399
bhaṇa ko ṇa rūsaï jaṇo patthijjaṃto adesaālammi / raïvāvaḍā ruvaṃtaṃ piaṃ pi puttaṃ savaï māā // 400
ḍajjhasi ḍajjhasu kutthasi kutthasu aha phuḍasi hiaa tā phuḍasu / taha vi parisesio ccia so khu mae galiasabbhāvo // 401
daṭṭhūṇa raṃdatuṃḍaggaṇiggaaṃ ṇiasuassa dāḍhaggaṃ / bhoṃḍī viṇā vi kajjeṇa gāmaṇiaḍe jave caraï // 402
helākaraggakaḍḍhiajalarikkaṃ sāaraṃ paāsaṃto / jaaï aṇiggahavaḍavaggibhariagaaṇo gaṇāhivaī // 403
eeṇa ccia kaṃkelli tujjha taṃ ṇa tthi jaṃ ṇa pajjattaṃ / uvamijjaï jaṃ tuha pallaveṇa varakāmiṇīhattho // 404
rasia viaḍḍha vilāsia samaaṇṇua saccaaṃ asoo si / varajuvaïcalaṇakamalāhao vi jaṃ viasasi saaṇhaṃ // 405
valiṇo vāāvaṃhe cojjaṃ ṇiuṇattaṇaṃ ca paaḍaṃto / surasatthakaāṇaṃdo vāmaṇarūvo harī jaaï // 406
vijjhāvijjaï jalaṇo gahavaïdhūāi vitthaasiho vi / aṇumaraṇaghaṇāliṃgaṇapiaamasuhasijjiraṃgīe // 407
jāramasāṇasamubbhavabhūisuhapphaṃsasijjiraṃgīe / ṇa samappaï ṇavakāvāliṇīa uddhūlaṇāraṃbho // 408
ekko paṇhaaï thaṇo vīo pulaei ṇahamuhālihio / puttassa piaamassa a majjhaṇisaṇṇāi ghariṇīa // 409
ettāi ccia mohaṃ jaṇei vālattaṇe vi vaṭṭaṃtī / gāmaṇidhuā visalaa vva vaḍḍhiā kāhii aṇatthaṃ // 410
apahuppaṃtaṃ mahimaṃḍalammi ṇahasaṃṭhiaṃ ciraṃ hariṇo / tārāupphappaaraṃciaṃ va taïaṃ paaṃ ṇamaha // 411
suppaü taïo vi gao jāmo tti sahīu kīsa maṃ bhaṇaha / sehāliāṇa gaṃdho ṇa dei sottuṃ suaha tumhe // 412
kaha so ṇa saṃbharijjaï jo me taha saṃṭhiāi aṃgāiṃ / ṇivvattie vi surae ṇijjhāaï suraarasio vva // 413
sukkhaṃtavahalakaddamaghammavisūraṃtakamaḍhapāḍhīṇaṃ / diṭṭhaṃ aïṭṭhaüvvaṃ kāleṇa talaṃ taḍāassa // 414
coriaraasaddhāluṇi mā putti bhammasu aṃdhaārammi / ahiaaraṃ lakkhijjasi tamabharie dīvaasiha vva // 415
vāhittā paḍivaaṇaṃ ṇa dei rūsei ekkamekkassa / asaī kajjeṇa viṇā palippamāṇe ṇaīkacche // 416
āma asaï mha osara païvvae ṇa tuha maïliaṃ gottaṃ / kiṃ uṇa jaṇassa jāa vva caṃḍilaṃ tā ṇa kāmemo // 417
ṇiddaṃ lahaṃti kahiaṃ suṇaṃti khaliakkharaṃ ṇa jaṃpaṃti / jāhi ṇa diṭṭho si tumaṃ tāo ccia suhaa suhiāo // 418
vālaa tumāi diṇṇaṃ kaṇṇe kāūṇa vorasaṃghāḍiṃ / lajjāluiṇī vi vahū gharaṃ gaā gāmaracchāe // 419
aha so vilakkhahiao mae ahavvāi agahiāṇuṇao / paravajjaṇaccirīhiṃ tumhehi uvekkhio ṇiṃto // 420
dīsaṃto ṇaaṇasuho ṇivvudijaṇaṇo karehi vi chivaṃto / abbhatthio ṇa labbhaï caṃdo vva pio kalāṇilao // 421
je līṇabhamarabharabhaggagocchaā āsi ṇaïaḍucchaṃge / kāleṇa vaṃjulā piavaassa te khaṇṇuā jāā // 422
khaṇabhaṃgureṇa pemmeṇa māuā dūmia mhi ettāhe / siviṇaaṇihilaṃbheṇa va diṭṭhapaṇaṭṭheṇa loammi // 423
cāo sahāvasaralaṃ vicchuhaï saraṃ guṇammi ṇivaḍaṃtaṃ / vaṃkassa ujjuassa a saṃvaṃdho kiṃ ciraṃ hoi // 424
paḍhamaṃ vāmaṇavihiṇā pacchā hu kao viaṃbhamāṇeṇa / thaṇajualeṇa imīe mahumahaṇeṇa vva valivaṃdho // 425
mālaïkusumāi kuluṃciūṇa mā jāṇa ṇivvuo sisiro / kāavvā ajja vi ṇigguṇāṇa kuṃdāṇa sāmiddhī // 426
tuṃgāṇa visesaṇiraṃtarāṇa sarasavaṇaladdhasohāṇaṃ / kaakajjāṇa bhaḍāṇa va thaṇāṇa paḍaṇaṃ pi ramaṇijjaṃ // 427
parimalaṇasuhā garuā aladdhavivarā salakkhaṇāharaṇā / thaṇaā kavvālāa vva kassa hiae ṇa laggaṃti // 428
khippaï hāro thaṇamaṃḍalāhi taruṇīhi ramaṇapariraṃbhe / acciaguṇā vi guṇiṇo lahaṃti lahuattaṇaṃ kāle // 429
aṇṇo ko vi sahāvo vammahasihiṇo halā haāsassa / vijjhāi ṇīrasāṇaṃ hiae sarasāṇa pajjalaï // 430
taha tassa māṇaparivaḍḍhiassa cirapaṇaavaddhamūlassa / māmi paḍaṃtassa suo saddo vi ṇa pemmarukkhassa // 431
pāapaḍio ṇa gaṇio piaṃ bhaṇaṃto vi appiaṃ bhaṇio / vaccaṃto vi ṇa ruddho bhaṇa kassa kae kao māṇo // 432
pusaï khaṇaṃ dhuaï khaṇaṃ papphoḍaï takkhaṇaṃ aāṇaṃtī / muddhavahū thaṇavaṭṭe diṇṇaṃ daïeṇa ṇakkhavaaṃ // 433
vāsāratte uṇṇaapaohare jovvaṇe vva volīṇe / paḍhamekkakāsakusumaṃ dīsaï paliaṃ va dharaṇīe // 434
kattha gaaṃ raïviṃvaṃ kattha paṇaṭṭhāu caṃdatārāu / gaaṇe valāavaṃtiṃ kālo horaṃ va kaṭṭhei // 435
aviralapaḍaṃtaṇavajaladhārārajjughaḍiaṃ paatteṇa / apahutto ukkhiviuṃ rasaï va meho mahiṃ uaha // 436
o hiaa ohidiahaṃ taïā paḍivajjiūṇa daïassa / atthakkāula vīsaṃbhaghāi kiṃ taï samāḍhattaṃ // 437
jo vi ṇa āṇaï tassa vi kahei bhaggāi teṇa valaāiṃ / aïujjuā varāī ahava pio se haāsāe // 438
sāmāi garuajovvaṇavisesabharie kavolamūlammi / pijjaï ahomuheṇa va kaṇṇavaaṃseṇa lāvaṇṇaṃ // 439
seulliasavvaṃgī gottaggahaṇeṇa tassa suhaassa / dūiṃ appāheṃtī tassea gharaṃgaṇaṃ pattā // 440
jammaṃtare vi calaṇe jīeṇaṃ maaṇa tujjha accissaṃ / jaï taṃ pi teṇa vāṇeṇa vijjhase jeṇa haṃ viddhā // 441
ṇiavakkhāroviadehabhāraṇiuṇaṃ rasaṃ lahaṃteṇa / viasāviūṇa pijjaï mālaïkaliā mahuareṇa // 442
kuruṇāho via pahio dummijjaï māhavassa milieṇa / bhīmeṇa jahicchāe dāhiṇavāeṇa chippaṃto // 443
jāva ṇa kosaviāsaṃ pāvaï īsīsi mālaīkaliā / maaraṃdapāṇalohilla bhamara tāva ccia malesi // 444
akaaṇṇua tujjha kae pāusarāīsu jaṃ mae khuṇṇaṃ / uppekkhāmi alajjira ajja vi taṃ gāmacikkhillaṃ // 445
rehaï galaṃtakesakkhalaṃtakuṃḍalalalaṃtahāralaā / addhuppaïā vijjāhari vva purisāirī vālā // 446
jaï bhamasi bhamasu emea kaṇha sohaggagavviro goṭṭhe / mahilāṇaṃ dosaguṇe viāriuṃ jaï khamo si tumaṃ // 447
saṃjhāsamae jalapūriaṃjaliṃ vihaḍiekkavāmaaraṃ / gorīa kosapāṇujjaaṃ va pamahāhivaṃ ṇamaha // 448
gāmaṇiṇo savvāsu vi piāsu aṇumaraṇagahiavesāsu / mammaccheesu vi vallahāi uvariṃ valaï diṭṭhī // 449
māmi sarisakkharāṇa vi atthi viseso paaṃpiavvāṇaṃ / ṇehamaïāṇam aṇṇo aṇṇo uvarohamaïāṇaṃ // 450
hiaāhiṃto pasaraṃti jāi aṇṇāi tāi vaaṇāi / osarasu kiṃ imehiṃ aharaṃtaramettabhaṇiehiṃ // 451
kaha sā sohaggaguṇaṃ mae samaṃ vahaï ṇigghiṇa tumammi / jīa harijjaï ṇāmaṃ hariūṇa a dijjae majjha // 452
sahi sāhasu sabbhāveṇa pucchimo kiṃ asesamahilāṇaṃ / vaḍḍhaṃti karattha ccia valaā daïe paütthammi // 453
bhamaï parido visūraï ukkhiviuṃ se karaṃ pasārei / kariṇo paṃkakkhuttassa ṇehaṇialāviā kariṇī // 454
raïkelihiaṇiaṃsaṇakarakisalaaruddhaṇaaṇajualassa / ruddassa taïaṇaaṇaṃ pavvaïpariuṃviaṃ jaaï // 455
dhāvaï purao pāsesu bhamaï diṭṭhīpahammi saṃṭhāi / ṇavalaïkarassa tuha haliaütta de paharasu varāiṃ // 456
kārimam āṇaṃdavaḍaṃ bhāmijjaṃtaṃ vahūa sahiāhiṃ / pecchaï kumārijāro hāsummīsehi acchīhiṃ // 457
saṇiaṃ saṇiaṃ laliaṃgulīa maaṇavaḍalāaṇaṇiheṇa / vaṃdhaï dhavalavvaṇavaṭṭaaṃ va vaṇiāhare taruṇī // 458
raïviramalajjiāo appattaṇiaṃsaṇāu sahasa tti / ḍhakkaṃti piaamāliṃgaṇeṇa jahaṇaṃ kulavahūo // 459
pāaḍiaṃ sohaggaṃ taṃvāe uaha goṭṭhamajjhammi / duṭṭhavusahassa siṃge acchiuḍaṃ kaṃḍuaṃtīe // 460
ua saṃbhamavikkhittaṃ ramiavvaalaṃpaḍāi asaīe / ṇavaraṃgaaṃ kuḍaṃge dhaaṃ va diṇṇaṃ aviṇaassa // 461
hatthapphaṃseṇa jaraggavī vi paṇhaaï dohaaguṇeṇa / avaloiapaṇhuiriṃ puttaa puṇṇehi pāvihisi // 462
masiṇaṃ caṃkammaṃtī pae pae kuṇaï kīsa muhabhaṃgaṃ / ṇūṇaṃ se mehaliā jahaṇagaaṃ chivaï ṇahavaṃtiṃ // 463
saṃvāhaṇasuharasatosieṇa deṃteṇa tuha kare lakkhaṃ / calaṇeṇa vikkamāiccacariam anusikkhiaṃ tissā // 464
pāapaḍaṇāṇa muddhe rahasavalāmoḍicuṃviavvāṇaṃ / daṃsaṇamettapasaṇṇe cukkā si suhāṇa vahuāṇaṃ // 465
de suaṇu pasia eṇhiṃ puṇo vi sulahāi rūsiavvāiṃ / esā maacchi maalaṃchaṇujjalā galaï chaṇarāī // 466
āvaṇṇāi kulāiṃ do ccia jāṇaṃti uṇṇaïṃ ṇeuṃ / gorīa hiaadaïo ahavā sālāhaṇaṇariṃdo // 467
ṇikkhaṃdhadurārohaṃ puttaa mā pāḍaliṃ samāruhasu / ārūḍhaṇivaḍiā ke imīa ṇa kaā haāsāe // 468
gāmaṇigharammi attā ekka ccia pāḍalā ihaggāme / vahupāḍalaṃ ca sīsaṃ diarassa ṇa suṃdaraṃ eaṃ // 469
aṇṇāṇa vi hoṃti muhe pamhaladhavalāi dīhakasaṇāi / ṇaaṇāi suṃdarīṇaṃ taha vi hu daṭṭhuṃ ṇa āṇaṃti // 470
haṃsehi va tuha raṇajalaasamaabhaacaliavihalavakkhehiṃ / parisesiapommāsehi māṇasaṃ gammaï riūhiṃ // 471
duggaagharammi ghariṇī rakkhaṃtī āulattaṇaṃ païṇo / pucchiadohalasaddhā puṇo vi uaaṃ cia kahei // 472
āaṃvaloaṇāṇaṃ ollaṃsuapāaḍorujahaṇāṇaṃ / avaraṇhamajjirīṇaṃ kaeṇa kāmo vahaï cāvaṃ // 473
ke uvvariā ke iha ṇa khaṃḍiā ke ṇa luttaguruvihavā / ṇaharāi vesiṇīo gaṇaṇārehāu va vahaṃti // 474
viraheṇa maṃdareṇa va hiaaṃ duddhoahiṃ va mahiūṇa / ummūliāi avvo amhaṃ raaṇāi va suhāiṃ // 475
ujjuarae ṇa tūsaï vaṃkammi vi āamaṃ viappei / ettha ahavvāi mae pie piaṃ kaha ṇu kāavvaṃ // 476
vahuvihavilāsarasie surae mahilāṇa ko uvajjhāo / sikkhaï asikkhiāi vi savvo ṇehāṇuvaṃdheṇa // 477
vaṇṇavasie viatthasi saccaṃ cia so tue ṇa saṃbhavio / ṇa hu hoṃti tammi diṭṭhe sutthāvatthāi aṃgāiṃ // 478
āsaṇṇavivāhadiṇe ahiṇavavahusaṃgamussuamaṇassa / paḍhamaghariṇīa suraaṃ varassa hiae ṇa saṃṭhāi // 479
jaï loaṇiṃdiaṃ jaï amaṃgalaṃ jaï vi mukkamajjāaṃ / pupphavaïdaṃsaṇaṃ taha vi dei hiaassa ṇivvāṇaṃ // 480
jaï ṇa chivasi pupphavaïṃ purao tā kīsa vārio ṭhāsi / chitto si culaculaṃtehi dhāviūṇa ămha hatthehi // 481
ujjāgaraakasāiagaruacchī mohamaṃḍaṇavilakkhā / lajjaï lajjāluiṇī sā suhaa sahīṇa vi varāī // 482
ṇa vi taha aïgarueṇa vi tammaï hiae bhareṇa gabbhassa / jaha vivarīaṇihuaṇaṃ piammi soṇhā apāvaṃtī // 483
agaṇiajaṇāvavāaṃ avahatthiaguruaṇaṃ varāīe / tuha galiadaṃsaṇāsāi tīa valiuṃ ciraṃ ruṇṇaṃ // 484
hiaaṃ hiae ṇihiaṃ cittālihia vva tuha muhe diṭṭhī / āliṃgaṇarahiāiṃ ṇavaraṃ jhijjaṃti aṃgāiṃ // 485
ahaaṃ vioataṇuī dusaho virahāṇalo calaṃ jīaṃ / appāhijjaü kiṃ sahi jāṇasi taṃ cea jaṃ juttaṃ // 486
tuha virahujjāgarao siviṇe vi ṇa dei daṃsaṇasuhāi / vāheṇa pahāloaṇaviṇoaṇaṃ se haaṃ taṃ pi // 487
aṇṇāvarāhakuvio jaha taha kāleṇa gacchaï pasāaṃ / vesattaṇāvarāhe kuviaṃ kaha taṃ pasāemi // 488
dīsasi piāi jaṃpasi sabbhāvo suhaa ettio ccea / phāleiūṇa hiaaṃ sāhasu ko dāvae kassa // 489
uaaṃ lahiuṃ uttāṇiāṇaṇā hoṃti ke vi savisesaṃ / rittā ṇamaṃti suiraṃ rahaṭṭaghaḍia vva kāpurisā // 490
bhaggapiasaṃgamaṃ kettiaṃ va joṇhājalaṃ ṇahasarammi / caṃdaarapaṇālaṇijharaṇivahapaḍaṃtaṃ ṇa ṇiṭṭhāi // 491
suṃdarajuāṇajaṇasaṃkule vi tuha daṃsaṇaṃ vimaggaṃtī / raṇṇe va bhamaï diṭṭhī varāiāe samuvviggā // 492
aïkovaṇā vi sāsū ruāviā gaavaīa soṇhāe / pāapaḍanoṇaāe dosu vi galiesu valaesu // 493
rovaṃti vva araṇṇe dūsaharaïkiriṇaphaṃsasaṃtattā / aïtārajhilliviruehi pāavā gimhamajjhaṇhe // 494
paḍhamaṇilīṇamahuramahulohillāliulavaddhajhaṃkāraṃ / ahimaarakiraṇaṇiuruṃvacuṃviaṃ dalaï kamalavaṇaṃ // 495
gottakkhalaṇaṃ soūṇa piaame ajja tīa chaṇadiahe / vajjhamahisassa māla vva maṃḍaṇaṃ uaha paḍihāi // 496
mahamahaï malaavāo attā vārei maṃ gharā ṇiṃtiṃ / aṃkollaparimaleṇa vi jo kkhu muo so muo ccea // 497
muhapecchao paī se sā vi hu savisesadaṃsaṇummaïā / do vi kaatthā puhaïṃ amahilapurisaṃ va maṇṇaṃti // 498
khemaṃ katto khemaṃ jo so khujjaṃvao gharaddāre / tassa kira matthaāo ko vi aṇattho samuppaṇṇo // 499
rasiajaṇahiaadaïe kaïvacchalapamuhasukaïṇimmaïe / sattasaammi samattaṃ paṃcamagāhāsaaṃ eaṃ // 500
āucchaṇavicchāaṃ jāāi muhaṃ ṇiacchamāṇeṇa / pahieṇa soaṇialāvieṇa gaṃtuṃ cia ṇa iṭṭhaṃ // 501
sūīvehe musalaṃ vicchuhamāṇeṇa ḍaḍḍhaloeṇa / ekkaggāme vi pio samehi acchīhi vi ṇa diṭṭho // 502
ajjaṃ pi dāva ekkaṃ mā maṃ vārehi piasahi ruaṃtiṃ / kalliṃ uṇa tammi gae jaï ṇa muā tā ṇa roissaṃ // 503
ehi tti vāharaṃtammi piaame uaha oṇaamuhīe / viuṇāveḍhiajahaṇatthalāi lajjoṇaaṃ hasiaṃ // 504
māresi kaṃ ṇa muddhe imeṇa rattaṃtatikkhavisameṇa / bhulaācāvaviṇiggaatikkhaaraddhacchibhalleṇa // 505
tuha daṃsaṇe saaṇhā saddaṃ soūṇa ṇiggaā jāiṃ / taï volīṇe tāiṃ paāi voḍhavvaā jāā // 506
īsāmacchararahie hi ṇivviārehi māmi acchīhiṃ / eṇhiṃ jaṇo jaṇam miva ṇiacchae kuha ṇa jhijjāmo // 507
vāuddhaasicaavihāviorudiṭṭheṇa daṃtamaggeṇa / vahumāā tosijjaï ṇihāṇakalasassa va muheṇa // 508
hiaammi vasasi ṇa karesi maṇṇuaṃ taha vi ṇehabhariehiṃ / saṃkijjasi juaïsahāvagaliadhīrehi amhehiṃ // 509
aṇṇaṃ pi kiṃ pi pāvihisi mūḍha mā tamma dukkhametteṇa / hiaa parāhīṇajaṇaṃ mahaṃta tuha kettiaṃ eaṃ // 510
veso si jīa paṃsula ahiaaraṃ sā hu vallahā tujjha / ia jāṇiūṇa vi mae ṇa īsiaṃ ḍaḍḍhapemmassa // 511
sā āma suhaa guṇarūasohirī āma ṇigguṇā ahaaṃ / bhaṇa tīa jo ṇa sariso kiṃ so savvo jaṇo maraü // 512
saṃtam asaṃtaṃ dukkham suhaṃ ca jāo gharassa jāṇaṃti / tā puttaa mahilāo sesāu jarā maṇussāṇaṃ // 513
hasiehi uvālaṃbhā accuvaārehi khijjiavvāiṃ / aṃsūhi bhaṃḍaṇāiṃ eso maggo sumahilāṇaṃ // 514
ullāvo mā dijjaü loaviruddhaṃ ti ṇāma kāūṇa / samuhāvaḍie ko uṇa vese diṭṭhiṃ ṇa pāḍei // 515
sāhīṇapiaamo duggao vi maṇṇaï kaattham appāṇaṃ / piarahio uṇa puhaviṃ pi pāviuṃ duggao ccea // 516
kiṃ ruasi kiṃ va soasi kiṃ kuppasi suaṇu ekkamekkassa / pemmaṃ visaṃ va visamaṃ sāhasu ko ruṃbhiuṃ taraï // 517
te a juāṇā tā gāmasaṃpaā taṃ ca amha tāruṇṇaṃ / akkhāṇaaṃ va loo kahei amhe vi taṃ suṇimo // 518
vāhohabhariagaṃḍāharāi bhaṇiaṃ vilakkhahasirīe / ajja vi kiṃ rūsijjaï savahāvatthaṃ gaaṃ pemmaṃ // 519
vaṇṇagghaatuppamuhiṃ jo maṃ aïāareṇa cuṃvaṃto / eṇhiṃ so bhūsaṇabhūsiaṃ pi alasāaï chivaṃto // 520
ṇīlavaḍapāuaṃgi tti mā hu ṇaṃ pariharijjāsu / paṭṭaṃsuaṃ pi ṇaddhaṃ raammi avaṇijjaï ccea // 521
saccaṃ kalahe kalahe suraāraṃbhā puṇo ṇavā hoṃti / māṇo uṇa māṇaṃsiṇi garuo pemmaṃ viṇāsei // 522
māṇummattāi mae akāraṇaṃ kāraṇaṃ kuṇaṃtīe / addaṃsaṇeṇa pemmaṃ viṇāsiaṃ poḍhavāeṇa // 523
aṇuūlaṃ cia vottuṃ vahuvallaha vallahe vi vese vi / kuviaṃ ca pasāeuṃ sikkhaï loo tumāhiṃto // 524
lajjā cattā sīlaṃ ca khaṃḍiaṃ ajasaghosaṇā diṇṇā / jassa kaeṇaṃ piasahi so ccea jaṇo jaṇo jāo // 525
hasiaṃ aïṭṭhadaṃtaṃ bhamiam aṇikkaṃtadehalīdesaṃ / diṭṭam aṇukkhittamuhaṃ eso maggo kulavahūṇaṃ // 526
dhūlimaïlo vi paṃkaṃkio vi taṇaraïadehabharaṇo vi / taha vi gaïṃdo garuattaṇeṇa ḍhakkaṃ samuvvahaï // 527
karamari kīsa ṇa gammaï ko gavvo jeṇa masiṇagamaṇā si / adiṭṭhadaṃtaṃ hasirīa jaṃpiaṃ cora jāṇihisi // 528
thoraṃsuehi ruṇṇaṃ savattivaggeṇa pupphavaïāe / bhuasiharaṃ païṇo pecchiūṇa siralaggatuppaliaṃ // 529
loo jūraï jūraü vaaṇijjaṃ hoi hou taṃ ṇāma / ehi ṇimajjasu pāse pupphavaï ṇa ei me ṇiddā // 530
jaṃ jaṃ pulaemi disaṃ purao lihio vva īsase tattha / tuha paḍimāparivāḍiṃ vahaï va saalaṃ disācakkaṃ // 531
osaraï dhuṇaï sāhaṃ khokkhāmuhalo puṇo samullihaï / jaṃvūphalaṃ ṇa geṇhaï bhamaro tti kaī paḍhamaḍakko // 532
ṇa chivaï hatteṇa kaī kaṃḍūibhaeṇa pattalaṇiuṃje / daralaṃvigocchakaïkacchusacchahaṃ vāṇarīhatthaṃ // 533
sarasā vi sūsaï ccia jāṇaï dukkhāi muddhahiaā vi / rattā vi paṃḍura ccia jāā varaī tuha vioe // 534
āruhaï juṇṇaaṃ khujjaaṃ pi jaṃ uaha vallarī taüsī / ṇīluppalaparimalavāsiassa saraassa so doso // 535
uppahapahāviajaṇo paviaṃbhiakalaalo pahaatūro / avvo so ccea chaṇo teṇa viṇā gāmaḍāho vva // 536
ullāvaṃteṇa ṇa hoi kassa pāsaṭṭhieṇa thaḍḍeṇa / saṃkā masāṇapāavalaṃviacoreṇa va khaleṇa // 537
asamattagaruakajje eṇhiṃ pahie gharaṃ ṇiattaṃte / ṇavapāuso piucchā hasaï va kuḍaaṭṭahāsehiṃ // 538
daṭṭhūṇa uṇṇamaṃte mehe āmukkajīviāsāe / pahiaghariṇīa ḍiṃbho oruṇṇamuhīa saccavio // 539
avihavalakkhaṇavalaaṃ ṭhāṇaṃ ṇeṃto puṇo puṇo galiaṃ / sahisattho ccia māṇaṃsiṇīa valaārao jāo // 540
pahiavahū vivaraṃtaragaliajalolle ghare aṇollaṃ pi / uddesaṃ aviraavāhasalilaṇivaheṇa ollei // 541
jīhāi kuṇaṃti piaṃ hoṃti a hiaammi ṇivvuiṃ kāuṃ / pīḍijjaṃtā vi rasaṃ jaṇeṃti ucchū kulīṇā a // 542
dīsaï ṇa cūamaülaṃ attā ṇa a vāi malaagaṃdhavaho / pattaṃ vasaṃtamāsaṃ sāhaï ukkaṃṭhiaṃ cea // 543
aṃvavaṇe bhamaraülaṃ ṇa viṇā kajjeṇa ūsuaṃ bhamaï / katto jalaṇeṇa viṇā dhūmassa sihāu dīsaṃti // 544
daïakaraggahalulio dhammillo sīhugaṃdhiaṃ vaaṇaṃ / maaṇammi ettiaṃ cia pasāhaṇaṃ haraï taruṇīṇaṃ // 545
gāmataruṇīu hiaaṃ haraṃti cheāṇa thaṇaharillīo / maaṇe kusuṃbharāillakaṃcuābharaṇamettāo // 546
āloaṃta disāo sasaṃta jaṃbhaṃta gaṃta roaṃta / mucchaṃta paḍaṃta khalaṃta pahia kiṃ te paüttheṇa // 547
daṭṭhūṇa taruṇasuraaṃ vivihavilāsehi karaṇasohillaṃ / dīvo vi taggaamaṇo gaaṃ pi tellaṃ ṇa lakkhei // 548
puṇaruttakarapphālaṇam uhaataḍullihaṇapīḍaṇasaāiṃ / jūhāhivassa māe puṇo vi jaï ṇammaā sahaï // 549
voḍasuṇao vivaṇṇo attā mattā paī vi aṇṇattho / phaḍahī vi moḍiā mahisaeṇa ko kassa sāheu // 550
sakaaggaharahasuttāṇiāṇaṇā piaï piamuhaviiṇṇaṃ / thoaṃ thoaṃ rososahaṃ va ua māṇiṇī maïraṃ // 551
girisotto tti bhuaṃgaṃ mahiso jīhāi lihaï saṃtatto / mahisassa kaṇhapattharajharo tti sappo piaï lālaṃ // 552
paṃjarasāriṃ attā ṇa ṇesi kiṃ ettha raïharāhiṃto / vīsaṃbhajaṃpiāiṃ esā loāṇa paaḍei // 553
eddahamette gāme ṇa paḍaï bhikka tti kīsa maṃ bhaṇasi / dhammia karaṃjabhaṃjaa jaṃ jīasi taṃ pi de vahuaṃ // 554
jaṃtia gulaṃ vimaggasi ṇa a me icchāi vāhase jaṃtaṃ / aṇarasia kiṃ ṇa āṇasi ṇa raseṇa viṇā gulo hoi // 555
pattaṇiaṃvapphaṃsā ṇhāṇuttiṇṇāi sāmalaṃgīe / jalaviṃduehi cihurā ruaṃti vaṃdhassa va bhaeṇa // 556
gāmaṃgaṇaṇiaḍiakaṇhavakkha vaḍa tujjha dūram aṇulaggo / tattillapaḍikkhaabhoio vi gāmo ṇa uvviggo // 557
suppaṃ ḍaḍḍhaṃ caṇaā ṇa bhajjiā so juā aïkkaṃto / attā vi ghare kuviā bhūāṇa va vāio vaṃso // 558
pisuṇeṃti kāmiṇīṇaṃ jalalukkapiāvaūhaṇasuhelliṃ / kaṃḍaïakavolupphullaṇiccalacchīi vaaṇāi // 559
ahiṇavapāusarasiesu sŏhaï sāmāiesu diahesu / rahasapasāriagīvāṇa ṇacciaṃ moravuṃdāṇaṃ // 560
mahisakkhaṃdhavilaggaṃ gholaï siṃgāhaaṃ simisimaṃtaṃ / āhaavīṇājhaṃkārasaddamuhalaṃ masaavuṃdaṃ // 561
rehaṃti kumuadalaṇiccalaṭṭhiā mattamahuaraṇihāā / sasiaraṇīsesapaṇāsiassa gaṃṭhi vva timirassa // 562
uaha tarukoḍarāo ṇikkaṃtaṃ pūsuāṇa riṃcholiṃ / sarae jario vva dumo pittaṃ va salohiaṃ vamaï // 563
dhārādhuvvaṃtamuhā laṃviavakkhā ṇiuṃciaggīvā / vaïveḍhaṇesu kāā sūlāhiṇṇa vva dīsaṃti // 564
ṇa vi taha anālavaṃtī hiaaṃ dūmei māṇiṇī ahiaṃ / jaha dūraviaṃbhiagaruarosamajjhatthabhaṇiehiṃ // 565
gaṃdhaṃ agghāaṃtaa pikkakalaṃvāṇa vāhabhariaccha / āsasu pahiajuāṇaa ghariṇimuhaṃ mā ṇa pecchihisi // 566
gajja mahaṃ cia uvariṃ savvatthāmeṇa lohahiaassa / jalahara laṃvālaïaṃ mā re mārehisi varāiṃ // 567
paṃkamaïleṇa chīrekkapāiṇā diṇṇajāṇuvaḍaṇeṇa / ānaṃdijjaï halio putteṇa va sālichetteṇa // 568
kaha me pariṇaïāle khalasaṃgo hohii tti ciṃtaṃto / oṇaamuho sasūo ruaï va sālī tusāreṇa // 569
saṃjhārāotthaïo dīsaï gaaṇammi paḍivaācaṃdo / rattaduūlaṃtario thaṇaṇahaleho vva ṇavavahūe // 570
aï diara kiṃ ṇa pecchasi āāsaṃ kiṃ muhā paloesi / jāāi vāhumūlammi addhaaṃdāṇa parivāḍiṃ // 571
vāāi kiṃ bhaṇijjaü kettiamettaṃ va likkhae lehe / tuha virahe jaṃ dukkhaṃ tassa tumaṃ cea gahiattho // 572
maaṇaggiṇo vva dhūmaṃ mohaṇapicchiṃ va loadiṭṭhīe / jovvaṇadhaaṃ va muddhā vahaï suaṃdhaṃ ciurabhāraṃ // 573
rūaṃ siṭṭhaṃ cia se asesapurise ṇiattiaccheṇa / vāholleṇa imīe ajaṃpamāṇeṇa vi muheṇa // 574
ruṃdāraviṃdamaṃdiramaaraṃdāṇaṃdiāliriṃcholī / jhaṇajhaṇaï kasaṇamaṇimehala vva mahumāsalacchīe // 575
kassa karo vahupuṇṇapphalekkataruṇo tuhaṃ visammihaï / thaṇapariṇāhe mammahaṇihāṇakalase vva pāroho // 576
corā sabhaasataṇhaṃ puṇo puṇo pesaaṃti diṭṭhīo / ahirakkhiaṇihikalase vva poḍhavaïāthanucchaṃge // 577
uvvahaï ṇavataṇaṃkuraromaṃcapasāhiāi aṃgāiṃ / pāusalacchīa paoharehi paripellio viṃjho // 578
āma vahalā vaṇālī muhalā jalaraṃkuṇo jalaṃ sisiraṃ / aṇṇaṇaīṇa vi revāi taha vi aṇṇe guṇā ke vi // 579
eha imīa ṇiacchaha pariṇaamālūrasacchahe thaṇae / tuṃge sappurisamaṇorahe vva hiae amāaṃte // 580
hatthāhatthiṃ aham ahamiāi vāsāgamammi mehehiṃ / avvo kiṃ pi rahassaṃ chaṇṇaṃ pi ṇahaṃgaṇaṃ galaï // 581
kettiamettaṃ hohii sohaggaṃ piaamassa bhamirassa / mahilāmaaṇachuhāulakaḍakkhavikkhevagheppaṃtaṃ // 582
ṇiadhaṇiaṃ uvaūhasu kukkuḍasaddeṇa jhatti paḍivuddho / paravasahivāsasaṃkira ṇiae vi gharammi mā bhāsu // 583
kharapavaṇaraagalatthiagiriūḍāvaḍaṇabhiṇṇadehassa / dhukkādhukkaï jīaṃ va vijjuā kālamehassa // 584
mehamahisassa ṇajjaï uare suracāvakoḍibhiṇṇassa / kaṃdaṃtassa saviaṇaṃ aṃtaṃ va palaṃvae vijjū // 585
ṇavapallavaṃ visaṇṇā pahiā pecchaṃti cūarukkhassa / kāmassa lohiuppaṃgarāiaṃ hatthabhallaṃ va // 586
mahilāṇaṃ cia doso jeṇa pavāsammi gavviā purisā / do tiṇṇi jāva ṇa maraṃti tā ṇa virahā samappaṃti // 587
vālaa de vacca lahuṃ maraï varāī alaṃ vilaṃveṇa / sā tujjha daṃsaṇeṇa vi jīvejja ṇa ettha saṃdeho // 588
taṃmirapasariahuavahajālolipalīvie vaṇābhoe / kiṃsuavaṇaṃ ti kaliūṇa muddhahariṇo ṇa ṇikkamaï // 589
ṇihuaṇasippaṃ taha sāriāi ullāviaṃ mha gurupurao / jaha taṃ velaṃ māe ṇa āṇimo kattha vaccāmo // 590
paccaggupphulladalullasaṃtamaaraṃdapāṇalehalao / taṃ ṇa tthi kuṃdakaliāi jaṃ ṇa bhamaro mahaï kāuṃ // 591
so ko vi guṇāisao ṇa āṇimo māmi kuṃdalaïāe / acchīhiṃ cia pāuṃ ahilassaï jeṇa bhamarehiṃ // 592
ekka ccia rūaguṇaṃ gāmaṇidhūā samuvvahaï / aṇimisaṇaaṇo saalo jīe devīkao gāmo // 593
maṇṇe āsāo ccia ṇa pāvio piaamāhararasassa / tiasehi jeṇa raaṇāarāhi amaaṃ samuddhariaṃ // 594
āaṇṇāaḍḍhiaṇisiabhallamammāhaāi hariṇīe / addaṃsaṇo pio hohii tti valiuṃ ciraṃ dittho // 595
visamaṭṭhiapikkekkaṃvadaṃsaṇe tujjha sattughariṇīa / ko ko ṇa patthio pahiāṇaṃ ḍiṃbhe ruaṃtammi // 596
mālārī laliulluliavāhumūlehi taruṇahiaāiṃ / ullūraï sajjullūriāi kusumāi dāveṃtī // 597
majjho pio kuaṃḍo pallijuāṇā savattīo / jaha jaha vaḍḍhaṃti thaṇā taha taha jhijjaṃti paṃca vāhīe // 598
mālārīe vellahalavāhumūlāvaloaṇasaaṇho / aliaṃ pi bhamaï kusumagghapucchiro paṃsulajuāṇo // 599
rasiajaṇahiaadaïe kaïvacchalapamuhasukaïṇimmaïe / sattasaammi samattaṃ saṭṭhaṃ gāhāsaaṃ eaṃ // 600
akaaṇṇua ghaṇavaṇṇaṃ ghaṇavaṇṇaṃtariataraṇiaraṇiaraṃ / jaï re re vāṇīraṃ revāṇīraṃ pi ṇo bharasi // 601
maṃdaṃ pi ṇa āṇaï haliaṇaṃdaṇo iha hi ḍaḍḍhagāmammi / gahavaïsuā vivajjaï avejjae kassa sāhāmo // 602
ekkakkamaparirakkhaṇapahārasamuhe kuraṃgamihuṇammi / vāheṇa maṇṇuvialaṃtavāhadhoaṃ dhaṇuṃ mukkaṃ // 603
tā suhaa vilaṃva khaṇaṃ bhaṇāmi kīa vi kaeṇa alam ahavā / aviāriakajjāraṃbhaāriṇī maraü ṇa bhaṇissaṃ // 604
bhoiṇidiṇṇapaheṇaacakkhiadussikkhio haliaütto / ettāhe aṇṇapaheṇaāṇa chīvollaaṃ dei // 605
paccūsamaūhāvaliparimalaṇasamūsasaṃtavattāṇaṃ / kamalāṇa raaṇivirame jialoasirī mahaṃmahaï // 606
vāuvvelliasāhuli thaesu phuḍadaṃtamaṃḍalaṃ jahaṇaṃ / caḍuāraaṃ païṃ mā hu putti jaṇahāsiaṃ kuṇasu // 607
vīsatthahasiaparisakkiāṇa paḍhamaṃ jalaṃjalī diṇṇo / pacchā vahūa gahio kuḍaṃvabhāro ṇimajjaṃto // 608
gammihisi tassa pāsaṃ suṃdari mā tuara vaḍḍhaü miaṃko / duddhe duddhaṃ miva caṃdiāi ko pecchaï muhaṃ de // 609
jaï jūraï jūraü ṇāma māmi paraloavasaṇio loo / taha vi valā gāmaṇiṇaṃdaṇassa vaaṇe valaï diṭṭhī // 610
gehaṃ va vittarahiaṃ ṇijjharakuharaṃ va salilasuṇṇaïaṃ / gohaṇarahiaṃ goṭṭhaṃ va tīa vaaṇaṃ tuha vioe // 611
tuha daṃsaṇeṇa jaṇio imīa lajjāulāi aṇurāo / duggaamaṇoraho via hiaa ccia jāi pariṇāmaṃ // 612
jaṃ taṇuāaï sā tuha kaeṇa kiṃ jeṇa pucchasi hasaṃto / aha gimhe maha paaī evvaṃ bhaṇiūṇa oruṇṇā // 613
vaṇṇakkamarahiassa vi esa guṇo ṇavari cittakammassa / ṇimisaṃ pi jaṃ ṇa muṃcaï pio jaṇo gāḍham uvaūḍho // 614
avihattasaṃdhivaṃdhaṃ paḍhamarasubbheapāṇalohillo / uvvelliuṃ ṇa āṇaï khaṃḍaï kaliāmuhaṃ bhamaro // 615
daravevirorujualāsu maüliacchīsu luliacihurāsu / purisāirīsu kāmo piāsu sajjāuho hoi // 616
jaṃ jaṃ te ṇa suhāaï taṃ taṃ ṇa karemi jaṃ mam' āattaṃ / ahaaṃ cia jaṃ ṇa suhāmi suhaa taṃ kiṃ mam' āattaṃ // 617
vāvāravisaṃvāaṃ saalāvaavāṇa kuṇaï haalajjā / savaṇāṇa uṇo gurusaṃṇihe vi ṇa ṇiruṃjhaï ṇioaṃ // 618
kiṃ bhaṇaha maṃ sahīo mā mara dīsihaï so jiaṃtīe / kajjālāo eso siṇehamaggo uṇa ṇa hoi // 619
ekkallamao diṭṭhīa maïa taha pulaïo saaṇhāe / piajāassa jaha dhaṇuṃ paḍiaṃ vāhassa hatthāo // 620
ṇaliṇīsu bhamasi parimalasi sattalaṃ mālaïṃ pi ṇo muasi / taralattaṇaṃ tuha aho mahuara jaï pāḍalā haraï // 621
doaṃgulaakavālaapiṇaddhasavisesaṇīlakaṃcuiā / dāvei thaṇatthalavaṇṇiaṃ va taruṇī juajaṇāṇaṃ // 622
rakkhei puttaaṃ matthaeṇa occhoaaṃ paḍicchaṃtī / aṃsūhi pahiaghariṇī ollijjaṃtaṃ ṇa lakkhei // 623
sarae sarammi pahiā jalāi kaṃdoṭṭasurahigaṃdhāi / dhavalacchāi saaṇhā piaṃti daïāṇa va muhāiṃ // 624
abbhaṃtarasarasāo uvariṃ pavvāavaddhapaṃkāo / caṃkammaṃtammi jaṇe samūsasaṃti vva racchāo // 625
muhapuṃḍarīachāāi saṃṭhie uaha rāahaṃse vva / chaṇapiṭṭhakuṭṭaṇucchaliadhūlidhavale thaṇe vahaï // 626
taha teṇa vi sā diṭṭhā tīa vi taha tassa pesiā diṭṭhī / jaha doṇha vi samaaṃ cia ṇivvuttaraāi jāāi // 627
vāuliāparisosaṇaṇiuṃjapattalaṇasulahasaṃkeā / sohaggakaṇaakasavaṭṭa gimha mā kaha vi jhijjihisi // 628
dussikkhiaraaṇapasikkhaehi ghiṭṭho si patthare tāva / jā tilamettaṃ vaṭṭasi maragaa kā tujjha mullakahā // 629
jaha ciṃtei pariaṇo āsaṃkaï jaha a tassa paḍivakkho / vāleṇa vi gāmaṇiṇaṃdaṇeṇa taha rakkhiā pallī // 630
aṇṇesu pahia pucchasu vāhaaputtesu pusiacammāiṃ / amhaṃ vāhajuāṇo hariṇesu dhaṇuṃ ṇa ṇāmei // 631
gaavahuvehavvaaro putto me ekkakaṃḍaviṇivāī / taha soṇhāi pulaïo jaha kaṃḍavaraṃḍaaṃ vahaï // 632
viṃjhāruhaṇālāvaṃ pallī mā kuṇaü gāmaṇī sasaï / paccujjivio jaï kaha vi suṇaï tā jīviaṃ muaï // 633
appāhei maraṃto puttaṃ pallīvaī paatteṇa / maha ṇāmeṇa jaha tumaṃ ṇa lajjase taha karejjāsu // 634
aṇumaraṇapatthiāe paccāgaajīvie piaamammi / vehavvamaṃḍaṇaṃ kulavahūa sohaggaaṃ jāaṃ // 635
mahumacchiāi daṭṭhaṃ daṭṭhūṇa muhaṃ piassa sūṇoṭṭhaṃ / īsāluī puliṃdī rukkhacchāaṃ gaā aṇṇaṃ // 636
dhaṇṇā vasaṃti ṇīsaṃkamohaṇe vahalapattalavaïmmi / vāaṃdolaṇaoṇaviaveṇugahaṇe giriggāme // 637
pupphullaghaṇakalaṃvā ṇiddhoasilāalā muiamorā / pasaraṃtojjharamuhalā ucchāhaṃte giriggāmā // 638
taha parimaliā goveṇa teṇa hatthaṃ pi jā ṇa ollei / sa ccia khaḍaṇā eṇhiṃ pecchaha kuḍadohiṇī jāā // 639
dhavalo jiaï tuha kae dhavalassa kae jiaṃti giṭṭhīo / jia taṃve amha vi jīvieṇa goṭṭhaṃ tumāattaṃ // 640
agghāi chivaï cuṃvaï ṭhavei hiaammi jaṇiaromaṃco / jāākavolasarisaṃ pecchaha pahio mahuapupphaṃ // 641
ua ollijjaï mohaṃ bhuaṃgakittīa kaḍaalaggāi / ojjharadhārāsaddhālueṇa sīsaṃ vaṇagaeṇa // 642
kamalaṃ muaṃta mahuara pikkakaïtthāṇa gaṃdhaloheṇa / ālekkhalaḍḍuaṃ pāmaro vva chiviūṇa jāṇihisi // 643
gijjaṃte maṃgalagāiāhi varagottadiṇṇaaṇṇāe / souṃ va ṇiggao uaha hoṃtavahuāi romaṃco // 644
maṇṇe āaṇṇaṃtā āsaṇṇavivāhamaṃgaluggīaṃ / tehi juāṇehi samaṃ hasaṃti maṃ veasakuḍuṃgā // 645
uagaacaütthimaṃgalahoṃtavioasavisesalaggehi / tīa varassa a seaṃsuehi ruṇṇaṃ va hatthehiṃ // 646
ṇa a diṭṭhiṃ ṇei muhaṃ ṇa a chiviuṃ dei ṇā lavaï kiṃ pi / taha vi hu kiṃ pi rahassaṃ ṇavavahusaṃgo pio hoi // 647
aliapasuttavalaṃtammi ṇavavare ṇavavahūa vevaṃto / saṃvelliorusaṃjamiavatthagaṃṭhiṃ gao hattho // 648
pucchijjaṃtī ṇa bhaṇaï gahiā papphuraï cuṃviā ruaï / tuṇhikkā ṇavavahuā kaāvarāheṇa uvaūḍhā // 649
tatto ccia hoṃti kahā viasaṃti tahiṃ tahiṃ samappaṃti / kiṃ maṇṇe māucchā ekkajuāṇo imo gāmo // 650
jāi vaaṇāi amhe vi jaṃpimo tāi jaṃpaï jaṇo vi / tāiṃ cia teṇa pajaṃpiāi hiaaṃ suhāveṃti // 651
savvāareṇa maggaha piaṃ jaṇaṃ jaï suheṇa vo kajjaṃ / jaṃ jassa hiaadaïaṃ taṃ ṇa suhaṃ jaṃ tahiṃ ṇa tthi // 652
dīsaṃto diṭṭhisuho ciṃtijjaṃta maṇavallaho attā / ullāvaṃta suisuho pio jaṇo ṇicca ramaṇijjo // 653
ṭhāṇabbhaṭṭhā parigaliapīṇaā uṇṇaīa paricattā / amhe uṇa ṭheripaohara vva uare ccia ṇisanṇā // 654
paccūsāgaa raṃjiadeha piāloa loaṇāṇaṃda / aṇṇattakhaviasavvari ṇahabhūsaṇa diṇavaï ṇamo de // 655
vivarīasuraalehaḍa pucchasi maha kīsa gabbhasaṃbhūiṃ / oatte kuṃbhamuhe jalalavakaṇiā vi kiṃ ṭhāi // 656
accāsaṇṇavivāhe samaṃ jasoāi taruṇagovīhiṃ / vaḍḍhaṃte mahumahaṇe saṃvaṃdhā ṇiṇhuvijjaṃti // 657
jaṃ jaṃ ālihaï maṇo āsāvattīhi hiaaphalaammi / taṃ taṃ vālo vva vihī ṇihuaṃ hasiūṇa pamhusaï // 658
aṇuhutto karaphaṃso saalaalāpuṇṇa puṇṇadiahammi / vīāsaṃgakisaṃgaa eṇhiṃ tuha vaṃdimo calaṇe // 659
dūraṃtarie vi pie kaha vi ṇiattāi majjha ṇaaṇāi / hiaaṃ uṇa teṇa samaṃ ajja vi aṇivāriaṃ bhamaï // 660
tassa kahākaṃtaïe saddāaṇṇaṇasamosariakove / samuhāloaṇakaṃpiri uvaūḍhā kiṃ pavajjihisi // 661
bharaṇamiaṇīlasāhaggakhaliacalaṇaddhavihuavakkhaüḍā / tarusiharesu vihaṃgā kaha kaha vi lahaṃti saṃṭhāṇaṃ // 662
aharamahupāṇaghorilliāi jaṃ ca ramio si savisesaṃ / asaï alajjiri vahusikkhiri tti mā ṇāha maṇṇihisi // 663
khāṇeṇa a pāṇeṇa a taha gahio maṃḍalo aḍaaṇāi / jaha jāraṃ ahiṇaṃdaï bhukkaï gharasāmie eṃte // 664
kaṃḍaṃteṇa akaṃḍaṃ pallīmajjhammi viaḍakoaṃdaṃ / païmaraṇāhi vi ahiaṃ vāheṇa ruāviā attā // 665
amhe ujjuasīlā pio vi piasahi viāraparioso / ṇa hu aṇṇā kā vi gaī vāhohā kaha pusijjaṃtu // 666
dhavalo si jaï vi suṃdari taha vi tue majjha raṃjiaṃ hiaaṃ / rāabharie vi hiae suhaa ṇihitto ṇa ratto si // 667
caṃcupuḍāhaavialiasahaāraraseṇa sittadehassa / kīrassa maggalaggaṃ gaṃdhaṃdhaṃ bhamaï bhamaraülaṃ // 668
ettha ṇimajjaï ettā ettha ahaṃ ettha pariaṇo saalo / paṃthia rattīaṃdhaa mā maha saaṇe ṇimajjihisi // 669
pariosasuṃdarāiṃ suraesu lahaṃti jāi sokkhāi / tāiṃ cia uṇa virahe khāuggiṇṇāi kīraṃti // 670
maggaṃ cia alahaṃto hāro pīṇuṇṇaāṇa thaṇaāṇa / uvviggo bhamaï ure jamuṇāṇaïpheṇapuṃjo vva // 671
ekkeṇa vi vaḍavīaṃkureṇa saalavaṇarāimajjhammi / taha teṇa kao appā jaha sesadumā tale tassa // 672
je je guṇiṇo je je a cāiṇo je viaḍḍhaviṇṇāṇā / dāridda re viakkhaṇa tāṇa tumaṃ sāṇurāo si // 673
jaï kottio si suṃdara saalatihīcaṃdadaṃsaṇasuhāṇaṃ / tā masiṇaṃ moijjaṃtakaṃcuaṃ pekkhasu muhaṃ se // 674
samavisamaṇivvisesā samaṃtao maṃdamaṃdasaṃcārā / aïrā hohiṃti pahā maṇorahāṇaṃ pi dullaṃghā // 675
aïdīharāi vahue sīse dīsaṃti vaṃsavattāi / bhaṇie bhaṇāmi attā tumhāṇa vi paṃḍarā puṭṭhī // 676
atthakkarūsaṇaṃ khaṇapasijjaṇaṃ aliavaaṇaṇivvaṃdho / ummaccharasaṃtāvo puttaa paavī siṇehassa // 677
pijjaï kaṇṇaṃjalihiṃ jaṇaravamiliaṃ pi tujjha saṃlāvaṃ / duddhaṃ jalasammiliaṃ sā vālā rāahaṃsi vva // 678
aï ujjue ṇa lajjasi pucchijjaṃtī piassa cariāiṃ / savvaṃgasurahiṇo maruvaassa kiṃ kusumariddhīhi // 679
muddhe apattiaṃtī pavālaaṃkuraaṇiddhalohiae / ṇiddhoadhāurāe kīsa sahatthe puṇo dhuasi // 680
ua siṃdhavapavvaasacchahāi dhuatūlapuṃjasarisāiṃ / sohaṃti suaṇu mukkoaāi sarae siabbhāiṃ // 681
āucchaṃti sirehi vivaliehi ua khaḍiehi ṇijjaṃtā / ṇippacchimavaliapaloiehi mahisā kuḍaṃgāi // 682
pusasu muhaṃ tā puttia vāhoaraṇaṃ visesaramaṇijjaṃ / mā eaṃ cia muhamaṃḍaṇaṃ ti so kāhii puṇo vi // 683
majjhe paaṇuapaṃkaṃ avahovāsesu sāṇacikkhillaṃ / gāmassa sīsasīmaṃtaaṃ va racchāmuhaṃ jāaṃ // 684
avaraṇhāgaajāmāuassa viuṇei mohaṇukkaṃṭhaṃ / vahuāi gharapaloharamajjaṇapisuṇo valaasaddo // 685
jujjhacaveḍāmoḍiajajjarakaṇṇassa juṇṇamallassa / kacchāvaṃdho ccia bhīrumallahiaaṃ samukkhaṇaï // 686
āṇaṃdaṃtena tumaṃ païṇo pahaeṇa paḍahasaddeṇa / malli ṇa lajjasi ṇaccasi dohagge pāaḍijjaṃte // 687
mā vaccaha vīsaṃbhaṃ imāṇa vahucāḍuammaṇiuṇāṇaṃ / ṇivvattiakajjaparammuhāṇa suṇaāṇa va khalāṇaṃ // 688
aṇṇaggāmapaütthā kaḍḍhaṃtī maṃḍalāṇa riṃcholiṃ / akkhaṃḍiasohaggā varisasaaṃ jiaü me suṇiā // 689
saccaṃ sāhasu deara taha taha caḍuāraeṇa suṇaeṇa / ṇivvattiakajjaparammuhattaṇaṃ sikkhiaṃ katto // 690
ṇippaṇṇasassariddhī sacchaṃdaṃ gāi pāmaro sarae / daliaṇavasālitaṃḍuladhavalamiaṃkāsu rāīsu // 691
alihijjaï paṃkaale halālicalaṇeṇa kalamagovīe / keārasoaruṃbhaṇataṃsaṭṭhiakomalo calaṇo // 692
diahe diahe sūsaï saṃkeaabhaṃgavaḍḍhiāsaṃkā / āvaṃḍuroṇaamuhī kalameṇa samaṃ kalamagovī // 693
ṇavakammieṇa ua pāmareṇa daṭṭhūṇa pāuhārīo / mottavve jottaapaggahammi avahāsiṇī mukkā // 694
daṭṭhūṇa hariadīhaṃ gose saṃḍhāṇa jūrae halio / asaīrahassamaggaṃ tusāradhavale tilacchette // 695
saṃkellio vva ṇijjaï khaṃḍaṃ khaṃḍaṃ kao vva pīo vva / vāsāgamammi maggo gharahuttamuheṇa pahieṇa // 696
saṃjhāgahiajalaṃjalipaḍimāsaṃkaṃtagorimuhakamalaṃ / aliaṃ cia phurioṭṭhaṃ vialiamaṃtaṃ haraṃ ṇamaha // 697
ia sirihālaviraïe pāuakavvammi sattasae / sattamasaaṃ samattaṃ gāhāṇa sahāvaramaṇijjaṃ // 698
eṇhiṃ vārei jaṇo taïā mūillao kahiṃ va gao / jāhe visaṃ va jāaṃ savvaṃgapaholiraṃ pemmaṃ // 699
kaha taṃ pi tui ṇa ṇāaṃ jaha sā āsaṃdiāṇa vahuāṇaṃ / kāūṇa uccavaciaṃ tuha daṃsaṇalehaḍā paḍiā // 700
corāṇa kāmuāṇa a pāmarapahiāṇa kukkuro vaḍaï / re ramaha vahaha vāhayaha ettha taṇuāae raaṇī // 701
aṇṇoṇṇakalakkhaṃtarapesiamelīṇadiṭṭhipasarāiṃ / do ccia maṇṇe kaabhaṃḍaṇāi samaaṃ pahasiāiṃ // 702
suhaa iaṃ majjha sahī tujjha vioeṇa dhāriuṃ pāṇe / savvaha cia ṇa samattha tti vujjhiuṃ virama gamaṇāo // 703
dhaṇṇā vahiraṃdharaā te ccia jīaṃti māṇuse loe / ṇa suṇaṃti pisuṇavaaṇaṃ khalāṇa addhiṃ ṇa pekkhaṃti // 704
gāmāruha mhi gāme vasāmi ṇaaraṭṭhiiṃ ṇa āṇāmi / ṇāariāṇaṃ païṇo haremi jā homi sā homi // 705
osara rottuṃ cia ṇimmiāi mā pusasu me haacchīiṃ / daṃsaṇamettummaïehi jehi sīlaṃ tuha ṇa ṇāaṃ // 706
raṇaraṇaasuṇṇahiao ciṃtaṃto virahaduvvalaṃ jāaṃ / amuṇiaṇiavasahī so volīṇo gāmamajjheṇa // 707
ettha caütthaṃ viramaï gāhāṇa saaṃ sahāvaramaṇijjaṃ / soūṇa jaṃ ṇa laggaï hiae mahurattaṇeṇa amiaṃ pi // 708
eso kaïṇāmaṃkiagāhāpaḍivaddhavaḍḍhiāmoo / sattasaao samatto sālāhaṇaviraïo koso // 709
suaṇo ṇi dīsaï ccia khalabahula ḍaḍḍhajīaloammi / jaha kāasaṃkulā taha ṇa haṃsaparivāriā puhavī // 710
jaṃ mucchiāi ṇa suo kalaṃvagaṃdheṇa taṃ guṇe paḍiaṃ / iarā gajjiasaddo jīeṇa viṇā ṇa volaṃto // 711
pīṇapaoharalaggaṃ disāṇa pavasaṃtajalaasamaaviiṇṇaṃ / sohaggapaḍhamaïṇhaṃ paccāaï saraṇahapaham iṃdadhaṇuṃ // 712
ettī mattammi thavā puttīmattammi laaṇā bhattī / agaīa avatthāe diahāiṃ bhittaraṃ taraï // 713
jaṃ asaraṇo vva ḍaḍḍho gāmo sāhīṇavahujuāṇo vi / saṃbhamavisaṃṭhulāṇaṃ taṃ duccariaṃ tuha thaṇāṇaṃ // 714
so vi juā māṇahaṇo tumaṃ pi māṇassa asahaṇā putti / mattacchaleṇa gammaü surāi uvariṃ pusasu hatthaṃ // 715
keaïgaṃdhahagavviāraaraṃjiāddaṇehiṃ / kaṃṭhaasavalitaṇutava chaḍḍiabhavalāṇaṃ // 716
aha suaï diṇṇapaḍivakkhaveaṇā pasiḍhilehi aṃgehiṃ / ṇivvattiasuraarasāṇuvaṃdhasuhaṇibbharaṃ vahuā // 717
jaï teṇa tujjha vaaṇaṃ ṇa kaaṃ maha kāraṇeṇa a haāse / sā kīsa khaṃḍiataḍaṃ ṇiāharaṃ dūi dummesi // 718
nirmalagaganataḍāge tārāgaṇakusumabhitetimire / bhikaravobālaṃ carati mṛgāṃko marāla iva // 719
diṭṭhāi jaṃ ṇa diṭṭho saralasahāvāi jaṃ ca ṇā 'lavio / uvaāro jaṃ ṇa kao taṃ cia kaliaṃ chaïllehiṃ // 720
aviralaṇiggaapulao paaḍiakaṃpo pamukkasikkāro / hemaṃte pahiajaṇo suraāsatto vva paḍihāi // 721
vahuvihavilāsabharie surae labbhaṃti jāi sokkhāiṃ / virahammi tāi piasahi khāuggiṇṇāi kīraṃti // 722
seullaṇiaṃvālaggasaṇhasicaassa maggam alahaṃto / sahi mohagholiro ajja tassa hasio mae hattho // 723
dūīkajjāaṇṇaṇapaḍirohaṃ mā karehii imaṃ ti / utthaṃghei va turiaṃ tissā kaṇṇuppalaṃ pulao // 724
mā vaccasu vīsaṃbhaṃ puttaa caḍuārao imo loo / sūīveho kaṇṇassa peccha kiṃ ṇijjaï pamāṇaṃ // 725
amiamaaṃ cia hiaaṃ hatthā taṇhāharā saaṇhāṇaṃ / caṃdamuhi kattha ṇivasaï amittadahaṇo tuha paāvo // 726
diṭṭhīa jāva pasaro tāva tumaṃ suhaa ṇivvuiṃ kuṇasi / volīṇadaṃsaṇo taha tavesi jaha houdiṭṭheṇa // 727
gajjaṃti ghaṇā paṃthāṇo vahutaṇā a pasāriā sariā / ajja vi ujjuasīle païṇo maggaṃ paloesi // 729
uṇho tti samatthijjaï ḍāheṇa saroruhāṇa hemaṃto / cariehi ṇajjaï jaṇo saṃgovaṃto vi appāṇaṃ // 730
uvahāriāi samaaṃ piṃḍāre ua kahaṃ kuṇaṃtammi / ṇavavahuāi sarosaṃ savva ccia vacchaā mukkā // 731
pajjāliūṇa aggiṃ muheṇa puttia kiṇo samosarasi / thaṇaalasapaḍiapaḍimā phuraṃti ṇa chivaṃti te jālā // 732
aggiṃ abbhuttaṃtīa putti paḍimāgaā kavolammi / kaṇṇālaṃviapallavalacchiṃ saṃdhei te jālā // 733
kaha de dhūmaṃdhāre abbhuttaṇaṃ aggiṇo samappihaï / muhakamalacuṃvaṇālehaḍammi pāsaṭṭhie diare // 734
āaṃvacchaṃ paalaṃtavāham āvaddhathaṇaharukkaṃpaṃ / asamattaṃ cia ciṭṭhaü sihiṇo abbhuttaṇam iṇaṃ te // 735
chaṇapāhuṇie 'tti kiṇo ajja vi ṇaṃ bhaṇaha aṃgasaṃtāvaṃ / jāā amha gharillaaguṇeṇa gharasāmiṇi ccea // 736
vaṇṇakkamaṃ ṇa āṇasi ṭhāṇavisuddhī vi de ṇa ṇivvaḍiā / cittaara taha vi maggasi bhoiṇikuḍḍammi ālihiuṃ // 737
vialiakalākalāvo caṃdo mittassa maṃḍalaṃ visaï / ṇissaraï tādiso ccia gaavihavaṃ ko samuddharaï // 738
ṇā 'haṃ dūī suṃdara tīe pio si ṇa amha vāvāro / sā maraï tujjha virahe eaṃ dhammakkharaṃ bhaṇimo // 739
jo hoi rasāisao suviṇaṭṭhāṇaṃ vi puṃḍaïcchūṇaṃ / katto so hoi raso mohāsāṇaṃ aṇicchūṇaṃ // 740
jaï vi hu dilliṃdiliā taha vi hu mā putti ṇaggiā bhamasu / cheā ṇaarajuāṇo māaṃ dhūāi lakkhaṃti // 741
gaagaṃḍaagavaasarabhaserihasaddūlarikkhajāīṇaṃ / thaṇaā vāhavahūe abhaaṃ dāuṃ va ṇikkaṃtā // 742
bhiuḍīa puloissaṃ ṇibbhacchissaṃ paraṃmuhī hossaṃ / jaṃ bhaṇaha taṃ karissaṃ sahīu jaï taṃ ṇa pecchissaṃ // 743
jaṃ keaveṇa pemmaṃ jaṃ ca valā jaṃ ca atthaloheṇa / jaṃ uvarohaṇimittaṃ ṇamoṇamo tassa pemmassa // 744
kassa ṇa saddhā garuattaṇammi païṇo pasāamāṇassa / jaï māṇabhaṃjaṇīo ṇa hoṃti hemaṃtarāīo // 745
avvo tahiṃtahiṃ cia gaaṇe bhamiūṇa vīsamaṃteṇa / vohittavāaseṇa vva hāsiā ḍaḍḍhapemmeṇa // 746
de ā dumasu tumaṃ ciya mā parihara putti paḍhamadumiyaṃ ti / kiṃ kuḍḍaṃ ṇiamuhaaṃdakaṃtidumiaṃ ṇa lakkhesi // 747
vijjaṃti taṇuṃ uvaṇeṃti veaṇaṃ ṇeyatāṇa khayamagge / abbo aïṭṭhapuvvo aṇaṃgabāṇāṇa māhappo // 748
āmoḍaūṇa balāu hatthaṃ majjhaṃ gao si bho pahia / hiaāu jaï a ṇīhasi sāmatthaṃ tujjha jāṇissaṃ // 749
saddhā me tujjha piyattaṇassa ahayaṃ tu taṃ ṇa yāṇāmi / de pasiya tumaṃ ciya sikkhavesu jaha te piyā homi // 750
pemmummaïyāi mae uvaūḍho haliyaüttabuddhīe / phaṃsemi jāva pharuso taṇapuriso gāmasīmāe // 751
be maggā dharaṇiyale māṇiṇi māṇoṇṇayāṇa purisāṇa / ahavā pāvaṃti siriṃ ahava bhamaṃtā samappaṃti // 752
katto kamalāṇa raī katto kumuyāṇa sīalo caṃdo / taha sajjaṇāṇa ṇeho ṇa calaï dūraṭṭhiāṇaṃ pi // 753
hā hā kiṃ teṇa kayaṃ mālaïvirahammi putti bhasaleṇaṃ / kaṃkellikusumamajjhe jalaṇo tti samappio appā // 754
ḍhaṃkharaseso vi hu mahuareṇa mukko ṇa mālaīviḍavo / daraviyasiyakaliyāmoyabahalimaṃ saṃbharaṃteṇa // 755
samuhāgayavolaṃtammi sā tume aghaḍiyaṃgasaṃṭhāṇā / ruṃdaṃ vi gāmaracchaṃ ṇiṃdaï taṇuaṃ ca appāṇaṃ // 756
samam acchaṃti ṇiattaṃti pasariyā raṇaraṇaṃti taddhiyahaṃ / calacitta tujjha laggā maṇorahā tīĕ hiyayammi // 757
ḍahiūṇa sayalaraṇṇaṃ aggī samavisamalaṃghaṇuvvāyo / taḍalaṃbaṃtataṇehiṃ tisiya vva ṇaïṃ samosaraï // 758
sa cciya rāmeu tumaṃ paṃḍiya ṇiccaṃ alaṃ mha ramieṇa / sabbhāvabāhirāiṃ jā jāṇaï aṭṭamaṭṭāiṃ // 759
raaṇāyarassa sāhemi ṇammae ajja mukkadakkhiṇṇā / veḍisalayāharaṃteṇa miliyā jaṃ si pūreṇa // 760
rakkhaï aṇaṇṇahiyao jīvaṃ piva mahuaro payatteṇa / daraṇeṃtadīvidāḍhaggasacchahaṃ mālaīmaülaṃ // 761
taha ṇehalāliyāṇa vi avāhirillāṇa sayalakajjesu / jaṃ kasaṇaṃ hoi muhaṃ taṃ bhaṇṇaï kiṃ paīvāṇaṃ // 762
tisiyā piyaü tti mao mao vi tisio maī kareūṇa / iya mayamihuṇaṃ tisiyaṃ piyaï ṇa salilaṃ siṇeheṇa // 763
tuha sāmali dhavalacalaṃtataralatikkhaggaloyaṇabaleṇa / mayaṇo puṇo vi icchaï hareṇa saha viggahāraṃbhaṃ // 764
suhaya suhaṃ ciya kuḍali vva pehuṇo ṇiggayassa caḍuvassa / jaṇaraṃjaṇiggaho te gharammi suṇaho atihivaṃto // 765
ṇivaḍihisi suṇṇahiyae jalaharajalapaṃkilammi maggammi / uppekkhāgayapiyayamahatthe hatthaṃ pasāreṃtī // 766
ucchaṃgiyāĕ païṇā ahisāraṇapaṃkamaliṇaperaṃte / āsaṇṇapariyaṇo via sea cciya dhuvaï se pāe // 767
jaha laṃghesi paravaïṃ niyayavaïṃ bharasahaṃ pi mottūṇaṃ / taha maṇṇe kohalie ajjaṃ kallaṃ pi phuṭṭihasi // 768
aṇusoyaï haliyabahū raïkiraṇoluggapaṃḍuracchāyaṃ / raṇṇuṃduradaṃtukkhuttavisamavaliyaṃ tilacchettaṃ // 769
ovālaammi sīāluāṇa vaïmūlam ullihaṃtāṇaṃ / diṃbhāṇa kaliṃcayavāvaḍāṇa suṇṇo jalaï aggī // 770
mā mā muya parihāsaṃ deara aṇahoraṇā varāī sā / sīyammi vi pāsijjaï puṇo vi esiṃ kuṇasu chāyaṃ // 771
kiṃ tassa pāraeṇaṃ kim aggiṇā kiṃ ca gabbhaharaeṇa / jassa ṇisammaï uare uṇhāyaṃtatthaṇī jāyā // 772
kamalāyarāṇa uṇho hemaṃto sīalo jaṇavayassa / ko kira bhiṇṇasahāvaṃ jāṇaï paramatthayaṃ loe // 773
hema.mte himaraadhūsarassa oasaraṇassa pahiyassa / sumariyajāyāmuhasijjirassa sīyaṃ ciya paṇaṭṭhaṃ // 774
uvaïsaï laḍiyāṇa kaḍḍhei rasaṃ ṇa dei sottuṃ je / jaṃtassa juvvaṇassa ya ṇa hoi icchu cciya sahāvo // 775
bahuehi jaṃpiehiṃ siṭṭhaṃ amha savahe kareūṇa / saddo cciya se bhaddo bhoiṇijaṃte raso ṇa tthi // 776
paḍhamaṃ ciya māhavapaṭṭayaṃ va ghettūṇa ḍāhiṇo vāo / aṃkollapaḍhamavattaṃ pahiṃḍio gāmaracchāsu // 777
so māṇo piyamuhaaṃdadaṃsaṇe kaha thiro dharijjihaï / aṃkollakoraāṇa vi jo phuṭṭamuhāṇa bīhei // 778
kāraṇagahio vi mae māṇo emea jaṃ samosariyo / atthakkaphulla aṃkolla tujjha taṃ matthae paḍaü // 779
raṃjeha deha rūvaṃ raeha kusumāi deha vicchittiṃ / ṇa vi taha puhavīsassa vi halahalao jaha vasaṃtassa // 780
sisire vaṇadavaḍaḍḍhaṃ vasaṃtamāsammi uaha saṃbhūyaṃ / maṃkusakaṇṇasaricchaṃ dīsaï pattaṃ palāsassa // 781
dūrapaïṇṇaparimalaṃ sapallavaṃ muddhapupphapaṃguraṇaṃ / aṃgacchittaṃ piva vammaheṇa diṇṇaṃ mahusirīe // 782
kāraṇagahiaṃ pi imā māṇaṃ moei māṇiṇiaṇassa / sahayāramaṃjarī piyasahi vva kaṇṇe samallīṇā // 783
ajjaṃ ciya chaṇadiaho mā putti ruehi ehaï pio tti / suṇhaṃ āsāsaṃtī paḍiyattamuhī ruvaï sāsū // 784
diyahediyahe ṇivaḍaï gihavaïdhūāṇiheṇa māucchā / saṃgahaṇaï tti vāvaü vasuhārā khujjasahayāre // 785
āucchaṇovaūhaṇakaṃṭhasamosariyabāhulaïyāe / valayāi pahiyacalaṇe bahūĕ ṇiyalāi va paḍaṃti // 786
uḍḍiyapāsaṃ taṇachaṇṇakaṃdaraṃ ṇihuasaṃṭhiyāvakkhaṃ / jūhāhiva parihara muhamettasarīyaṃ kala // 787
guṇasāliṇo vi kariṇo hohaï jūhāhivattaṇaṃ katto / ṇavasālikavalalohilliāĕ viṃjhaṃ muaṃtassa // 788
vihiṇā aṇujjueṇaṃ puttaya jāo kulammi paḍhamammi / jāivisuddho bhaddo vi baṃdhaṇaṃ pāvaï khaṇammi // 789
caüpāsadiṇṇahuyavahavisamāha haveḍhaṇāpiulaṃ / ṇivvāheuṃ jāṇaï jūhaṃ jūhāhivo cceva // 790
allaggakavoleṇa vi gayamaïṇā pattadasāvasaṇammi / ajja vi māĕ saṇāhaṃ gayavaïjūhaṃ dharaṃteṇa // 791
ṇa vi taha dūmei maṇaṃ gayassa baṃdho vi kariṇiviraho vi / dāṇavioyavimuhie jaha bhamaraüle bhamaṃtammi // 792
gāmammi mohaṇāiṃ diṇṇe khagge vva corahitthāiṃ / gahavaïṇo ṇāmeṇaṃ kiyāi aṇneṇa vi jaṇeṇa // 793
maliṇāiṃ aṃgāiṃ bāhiraloeṇa maṃsaluddheṇa / hiyayaṃ hiyaeṇa viṇā ṇa dei vāhī bhamaï haṭṭaṃ // 794
kaḍhiṇakharavīrapellaṇahalaṃ va pattharaviṇiggayaggikaṇe / dhacaloāyariyavahe kasarā vi suheṇa vaccaṃti // 795
ṇakkhamaūhesu khaṇaṃ kusumesu khaṇaṃ khaṇaṃ kisalaesu / hatthesu khaṇaṃ kusumocciyāi loḍāviyā bhasalā // 796
chettammi jeṇa ramiyā tāo kira tassa ceya maṃdei / jaï tīa imaṃ ṇisuyaṃ phuṭṭaï hiyayaṃ harisayāe // 797
hiyayaṃ ṇiyāmi kaḍhiṇaṃ pā hāseṇa ghaḍiyaṃ me / virahāṇaleṇa tattaṃ rasasittaṃ aṃtitā phuḍaha // 798
aṇṇe te kila sihiṇo siṇarasaseeṇa huṃti vicchāyā / āsāiyarasaseo hoi viseseṇa ṇehajo dahaṇo // 799
aṃto ṇibhuaṭhṭhiapariaṇāi oruddhadāraṇaaṇāi / gimhe ghoraṭṭaghagghararaveṇa ghoraṃti va gharaṭṭa // 800
jīhāi paraṃ libbhaï daṃtoṭṭheṇaṃ ṇa tīrae gahiuṃ / aharo vva savvaṇo gohaṇeṇa paḍhamo taṇuccheo // 801
jaha vellīhi ṇa māasi jaha icchasi paravaïṃ pi laṃgheuṃ / taha ṇūṇaṃ kohalie ajjaṃ kalhiṃ va phullihisi // 802
vilāsaṇiguruṇiaṃvo tīraü calaṇehi dohi uvvahiuṃ / eāī uṇa majjho thaṇabhāraṃ kaï ṇu uvvahaī // 803
vārijjaṃtī ṇavakomui tti mā putti aṃgaṇe suvasu / mā te aṃvupisāo caṃdo tti muhaṃ gasijjihii // 804
suvvaṃto āsi paraṃparāi kahakaha vi diṭṭhimilio 'si / de suhaa kiṃ pi jaṃpasu piaṃtu kaṇṇāi me amiaṃ // 805
virahakisiā varāī diṇāi āsaṇṇagimhapariṇāmāiṃ / kaḍhiṇahiao pavāsī ṇa āṇimo kaha samappihii // 806
roāvia mha māe aṃgaṇapahieṇa darapasutteṇa / parivattasu māṇiṇi māṇiṇi tti siviṇe bhaṇaṃteṇa // 807
māṇaṃsiṇīa païṇā ṇaaṇakavolāharappahābhiṇṇā / ujjuasuracāvaṇihā vāhoārā ciraṃ diṭṭhā // 808
sarahasaviṇiggaāi vi icchāi tumaṃ ṇa tīa saccavio / sīsāhaavaliabhuaṃgavaṃkaracche haaggāme // 809
sā tuha virahe ṇikkiva saṃdhārijjaï sahīhi ṇiuṇāhi / caṃḍālahatthagaasaüṇia vva jīe ṇirālaṃvā // 810
kappāsaṃ kuppāsaṃtarammi taï khittam itti bhaṇiūṇa / attā valā 'hireṇaṃ thaṇāṇa maha kāriā 'vatthā // 811
gāīu paṃcakhāriṃbharīu cattāri pakkalavaïllā / saṃpaṇṇaṃ vālāvallaraaṃ sevā sivaṃ kuṇaü // 812
aṇurāaraaṇabhariaṃ kaṃcaṇakalasa vva taruṇithaṇavaṭṭaṃ / tassa cia muhammi kiā masimuddā maaṇarāeṇa // 813
vijja piāsā vahalaï ghaṇatāo khaṇakhaṇammi romaṃco / hiae ṇa bhāi aṇṇaṃ lajjāpatthehi tejiā pāṇā // 814
gāhāṇa a geāṇa a tantīsaddāṇa poḍhamahilāṇa / tāṇaṃ so ccia daṇḍo je tāṇa rasaṃ ṇa āṇaṃti // 815
vivarīaraammi sirī bamhaṃ daṭṭhūṇa ṇāhikamalatthaṃ / hariṇo dāhiṇaaṇaṃ rasāulā jhatti ḍhakkei // 816
laḍahavilaāṇa loaṇakaḍakkhavikkhevajaṇiasaṃdāvā / jhijjaṃti mahāsattā cittuvveaṇasahā hoṃti // 817
taha hasa jaha ṇa hasijjasi taha jaṃpa jahā parappiaṃ hoi / taha jia jaha lahasi jasaṃ taha mara jaha ṇa uṇa saṃbhavasi // 818
chappaa gammasu sisiraṃ pāsākusumehi tāva mā marasu / jīaṃto dacchihisi a puṇo vi riddhiṃ vasaṃtassa // 819
savvattha hoi ṭhāṇaṃ rāsahamahisāṇa mesavusahāṇaṃ / bhaddagaïṃdāṇam aho mahāvaṇam ahava mahārāo // 820
avvo ṇa āmi chettaṃ khajjaü sālī vi kīraṇivahehiṃ / jāṇaṃtā avi pahiā pucchaṃti puṇopuṇo maggaṃ // 821
atthakkāgaadiṭṭhe vahuā jāmāduammi gurupurao / jūraï ṇivaḍaṃtāṇaṃ harisaviphaṃdaṃtavalaāṇaṃ // 822
acchīhi tujjha suṃdari bāhiradhavalehi majjhakasaṇehi / eehi ko ṇa damio pisuṇehi va kaṇṇalaggehi // 823
eha imīa ṇiacchaha vimhiahiaā sahī puloei / addāammi kavolaṃ kavolapaṭṭammi addāaṃ // 824
kaïā jāā kaïā ṇu sikkhiā māiā haakumārī / taṃtaṃ jāṇaï savvaṃ jaṃjaṃ mahilāŏ jāṇaṃti // 825
khaṇapiṭṭhadhūsaratthaṇi mahumaataṃbacchi kuvalaābharaṇe / kaṇṇagaacūamaṃjari putti tue maṃḍio gāmo // 826
maggialaddhe balamoḍicuṃbie appaṇeṇa uvaṇīde / ekkammi piāahare aṇṇaṇṇā hoṃti rasaheā // 827
upphullaloaṇeṇaṃ kavolabosaṭṭamāṇaseeṇaṃ / ahaṇaṃteṇa vi bhaṇiā muheṇa se kajjaṇivvuttī // 828
jattha ṇa ujjāgarao jattha ṇa īsā visūraṇaṃ māṇo / sabbhāvacāḍuaṃ jattha ṇa tthi ṇeho tahiṃ ṇa tthi // 829
maha païṇā thaṇajuale pattaṃ lihiaṃ ti gavviā kīsa / ālihaï mahaṃ pi pio jaï se kaṃpo ccia ṇa hoi // 830
kaṇṇe paḍiaṃ hiae paḍiaṃ cia o mae abhavvāe / jāmi tti tujjha vaaṇaṃ kiṃ va ṇa sahiaṃ pavāsassa // 831
samapaṃthapatthiassa vi pahiassa khalaṃti puḍhamadiahammi / hiaaṭṭhiajāāguruṇiaṃvahāreṇa va paāi // 832
saṃdeso vi ṇa lihio lehe pahieṇa kattha gharatattī / aṇavaraalihiagehiṇigottakkharapūrie patte // 833
uppekkhāgaadaïaṃgasaṃgamuccaliaviuṇaseāe / bolīṇo vi ṇa ṇāo paütthapaïāi hemaṃto // 834
siviṇaaladdhapiaamapulaïuggamaṇibbharehi aṃgehiṃ / pariraṃbhaṇe suhāiṃ pāvaü mā ṇaṃ paboheha // 835
vijjhāvei paīvaṃ abbhuṭṭhaṃtīĕ pahiajāāe / piaamavioadīharaṇīsahaṇīsāsariṃcholī // 836
jaṃ pīaṃ maṃgalavāsaṇāĕ patthāṇapaḍhamadiahammi / bāhasalilaṃ ṇa ciṭṭhaï taṃ cia virahe ruvaṃtīe // 837
ukkaṃṭhāṇicchāā savvaṃ uṇa pariaṇaṃ ruāvei / āaṃbirehi ajjhā phusiaparuṇṇehi acchīhi // 838
jaha diahavirāmo ṇavasirīsagaṃdhuddhurāṇilagghavio / pahiaghariṇīa ṇa tahā tavei tivvo vi majjhaṇho // 839
cirapavasiadaïakahā ṇiuṇāhi sahīhi virahasahaṇatthaṃ / aliā avi avarāhā vahūĕ kamaso kahijjaṃti // 840
jaṃjaṃ paütthapaïā piaamaṇāmakkharaṃ lihaï lehe / taṃtaṃ tallehaṇiāṇusāragalio pusaï seo // 841
acchaü ṇimīliacchī mā mā vāreha piaamāsāe / teṇa viṇā kiṃ pecchaü ummillehiṃ vi acchīhiṃ // 842
dīhuṇhā ṇīsāsā raṇaraṇao rujjagaggiraṃ geaṃ / piavirahe jīviavallahāṇa eso ccia viṇoo // 843
jaï devva tuṃ pasaṇṇo mā karihisi majjha māṇusaṃ jammaṃ / jaï jammaṃ mā pemmaṃ jaï pemmaṃ mā jaṇe dulahe // 844
rāīṇa bhaṇaï loo jā kila gimhammi hoṃti maḍahāo / maha uṇa daïeṇa viṇā ṇa āṇimo kīsa vaḍḍhaṃti // 845
ekke aaṇe diahā vīe raaṇīŏ hoṃti dīhāo / virahāaṇo apuvvo ettha duve ccea vaḍḍhaṃti // 846
cirajīvittaṇakaṃkhiri mā tamma rasāaṇehi athirehi / virahaṃ pavajja jāaṃti jeṇa juadīharā diahā // 847
ruaï ruaṃtīĕ mae ohidiṇe gaṇaï jhijjaï ahaṃ va / piavirahe māmi saajjhiāĕ ṇeho ccia apuvvo // 848
kaṃṭhaggahaṇeṇa saajjhiāĕ abbhāgaovaāreṇa / vahuāĕ païmmi vi āgaammi sāmaṃ muhaṃ jāaṃ // 849
caṃdo vi caṃdavaaṇe muṇālabāhālae muṇālāiṃ / iṃdīvarāi iṃdīvaracchi tāveṃti tuha virahe // 850
guruaṇaparavasa pia kiṃ bhaṇāmi tuha maṃdabhāiṇī ahaaṃ / ajja pavāsaṃ vajjasi vacca saaṃ cea muṇasi karaṇijjaṃ // 851
vitthiṇṇaṃ mahiveḍhaṃ viulaṇiaṃbāŏ pīṇathaṇiāo / labbhaṃti visālacchīŏ suhaa juvaīŏ mā tamma // 852
kajjaṃ viṇā vi vialaṃtapemmarāaṃ tumaṃ ṇiacchaṃtī / hiaāsaṃkiaṇiadosadummaṇā tāmaï varāī // 853
dūī ṇa ei caṃdo vi uggao jāmiṇī vi bolei / savvaṃ savvattho ccia visaṃṭhulaṃ kassa kiṃ bhaṇimo // 854
dūī gaā cirāaï kiṃ so maha pāsam ehii ṇa ve 'tti / jīviamaraṇaṃtarasaṃṭhiāĕ aṃdolae hiaaṃ // 855
so ṇā 'gao tti pecchaha parihāsullāvirīĕ dūīe / ṇūmaṃtīa pahariso osaṭṭaï gaṃḍapāsesu // 856
kaha ṇu gaā kaha diṭṭho kiṃ bhaṇiaṃ kiṃ va teṇa paḍibhaṇiaṃ / eaṃ cia ṇa samappaï puṇaruttaṃ jaṃpamāṇīe // 857
dūīmuhaaṃdapuloirīĕ kiṃ bhaṇihii tti ajjhāe / piasaṃgamalaliamaṇorahāĕ hiaaṃ tharatharei // 858
appāhiāi tuha teṇa jāi tāiṃ mae ṇa muṇiāi / accuṇhassāsaparikkhalaṃtavisamakkharapaāiṃ // 859
sāheṃtī sahi suhaaṃ khaṇekhaṇe dūmiā si majjha kae / sabbhāvaṇehakaraṇijjasarisaaṃ dāva viraïaṃ tumae // 860
jaṃ tuha kajjaṃ taṃ cia kajjaṃ majjha tti jaṃ saā bhaṇasi / o dūi saccavaaṇe ajja si pāraṃ gaā tassa // 861
ṇavalaapaharuttatthāĕ taṃ kaaṃ haliavahuāe / jaṃ ajja vi juvaïjaṇo ghareghare sikkhiuṃ mahaï // 862
dhaṇṇo si re haliddaa haliasuāpīṇathaṇabharucchaṃge / pecchaṃtassa vi païṇo jaha tuha kusumāi ṇivaḍaṃti // 863
saccaṃ cia kaṭṭhamao suraṇāho jeṇa haliadhūāe / hatthehi kamaladalakomalehi cikko ṇa pallavio // 864
emea akaapuṇṇā appattamaṇorahā vivajjissaṃ / jaṇavāo vi ṇa jāo teṇa samaṃ haliaütteṇa // 865
lajjāpajjattapasāhaṇāi paratattiṇippivāsāiṃ / aviṇaadiṃmohāiṃ dhaṇṇāṇa ghare kalattāiṃ // 866
hasiam aviāramuddhaṃ bhamiaṃ virahiavilāsasacchāaṃ / bhaṇiaṃ sahāvasaralaṃ dhaṇṇāṇa ghare kalattāṇaṃ // 867
païṇā vaṇṇijjaṃte akkhāṇaasuṃdarīĕ rūvammi / īsāmaccharagaruaṃ ghariṇī huṃkāraaṃ dei // 868
vāhijjaṃti ṇa kassa vi rottūṇaṃ ṇea pāaḍijjaṃti / māṇaviārā kulapāliāĕ hiae vilāveṃti // 869
ahiaṃ suṇṇāi ṇiraṃjaṇāi vaïrikkaruṇṇapusiāi / virahukkaṃṭhaṃ kulapāliāi sāhaṃti acchīiṃ // 870
kulapāliāĕ pecchaha jovvaṇalāaṇṇavibbhamavilāsā / pavasaṃti vva pavasie eṃti vva pie gharaṃ eṃte // 871
païpurao ccia rabhaseṇa cuṃbio devaro aḍaaṇāe / maha vaaṇaṃ maïrāgaṃdhiaṃ ti hāā tuhaṃ bhaṇaï // 872
taha aḍaaṇāĕ ruṇṇaṃ païmaraṇe bāharuddhakaṃṭhīe / aṇumaraṇasaṃkiṇo jaha jārassa vi saṃkiaṃ hiaaṃ // 873
vāṇīrakuḍuṃguḍḍīṇasaüṇikolāhalaṃ suṇaṃtīe / gharakammavāvuḍāe vahūĕ sīaṃti aṃgāiṃ // 874
ṇollei aṇollamaṇā attā maṃ gharabharammi saalammi / khaṇamettaṃ jaha saṃjhāĕ ṇavara ṇa va hoi vīsāmo // 875
ṭhāṇeṭhāṇe valiā valaṇevalaṇe saveḍasakuḍuṃgā / ṇa gao si amha gāmaṃ diara ṇa diṭṭhā tue muralā // 876
mahuehi kiṃ va vālaa harasi ṇiaṃbāhi jaï vi me siaaṃ / sāhāmi kassa raṇṇe dūre gāmo ahaṃ ekkā // 877
kālakkharadūsikkhia dhammia re ṇiṃbakīḍaasariccha / doṇṇa vi ṇiraaṇivāso samaaṃ jaï hoi tahi hodu // 878
paṃthaa ṇa ettha saṃtharam atthi maṇaṃ pattharatthale gāme / uṇṇaapaohare pekkhiūṇa jaï vasasi tā vasasu // 879
vihalakkhaṇaṃ tumaṃ sahi daṭṭhūṇa kuḍeṇa taralataradiṭṭhiṃ / vārapphaṃsaṇiheṇa a appā garuo tti pāḍiavihiṇṇo // 880
aïviulaṃ jalakuṃbhaṃ ghettūṇa samāgaa mhi sahi turiaṃ / samaseasalilaṇīsāsaṇīsahā vīsamāmi khaṇaṃ // 881
aṇumaraṇe hasaï jaṇo rottuṃ vi ṇa labbhaï jahecchaṃ / tā ettha kiṃ karissaṃ coriaramaṇe vivajjaṃte // 882
mā putti vaṃkabhaṇiaṃ jaṃpasu purao tumaṃ chaüllāṇaṃ / hiaeṇa jaṃ ca bhaṇiaṃ taṃ pi haāsā viāṇaṃti // 883
vaṃkabhaṇiāi katto katto addhacchipecchiavvāi / ūsasiuṃ pi ṇa tīraï chaüllaparivārie gāme // 884
tattha vi hoṃti sahīo puttali mā ruvasu jattha diṇṇā si / tattha vi ṇiuṃjalīlā tattha vi girivāhiṇī golā // 885
kassa va ṇa hoi roso daṭṭhūṇa piāĕ savvaṇaṃ aharaṃ / sabhamarakamalagghāiri vāriavāme sahasu eṇhiṃ // 886
chappattiā vi khajjaï ṇippatte putti ettha ko doso / ṇiapurise vi ramijjaï parapurisavivajjie gāme // 887
amuṇiaparapurisasuho jaṃpaü jaṃ kiṃ pi aṇṇao loo / ṇiapurisehi vi amhe parapuriso tti ccia ramāmo // 888
māe gharovaaraṇaṃ ajja khu ṇa tthi tti sāhiaṃ tumae / tā bhaṇa kiṃ karaṇijjaṃ emea ṇa vāsaro ṭhāi // 889
sacchaṃdaramaṇadaṃsaṇasaṃvaḍḍhiagaruavammahavilāsaṃ / suviaḍḍhavesavilaāramiaṃ ko vaṇṇiuṃ taraï // 890
sāmaṇṇasuṃdarīṇaṃ vibbhamam āvahaï aviṇao ccea / dhūmo vi hu pajjaliāṇaṃ mahuro hoi surabhidārūṇaṃ // 891
avvo kālassa gaī so vi juā sarasakavvadullalio / paḍhaï parāsarasaddaṃ amhe vi ṇiaṃ païṃ gamimo // 892
paṇamaha māṇassa halā calaṇe kiṃ devaehi aṇṇehiṃ / jassa pasāeṇa pio gholaï pāaṃtapāsesu // 893
aṇuṇaapasaraṃ pāapaḍanūsavaṃ rabhasacuṃbaṇasuhelliṃ / eāi a aṇṇāi a avaso vva kao phalaï māṇo // 894
jaï puttali bahuehiṃ aṇuṇaasokkhehi atthi de kajjaṃ / tāva rua geṇha māṇaṃ khaṇamettaṃ tammi suhaammi // 895
āṇā aṇālavaṃtīĕ kīrae dīsae parāhutto / ṇiṃtammi ṇīsisijjaï putti apuvvokkhu de māṇo // 896
jaṃjaṃ bhaṇaha sahīo āma karissāma savvahā taṃtaṃ / jaï taraha ruṃbhiuṃ maha dhīraṃ samuhāgae tammi // 897
alliaï diṭṭhiṇibbhacchio vi vihuo vi laggae siae / pahao vi cuṃbaï balā alajjae kaha ṇu kuppissaṃ // 898
himajoacuṇṇahatthāŏ jassa dappaṃ kuṇaṃti rāīo / kaha tassa piassa mae tīraï māṇo halā kāuṃ // 899
kiṃ bhaṇaha maṃ sahīo karehi māṇaṃ ti kiṃ tha māṇeṇa / sabbhāvavāhire tammi majjha māṇeṇa vi ṇa kajjaṃ // 900
jaïā pio ṇa dīsaï bhaṇaha halā kassa kīrae māṇo / aha diṭṭhammi vi māṇo tā tassa piattaṇaṃ katto // 901
jāṇimi kaāvarāhaṃ jāṇimi aliāi bhaṇaï saalāi / aṇuṇeṃte uṇa jāṇe kaāvarāhaṃ va appāṇaṃ // 902
avarāhasahassāiṃ bharimo hiaeṇa tammi addiṭṭhe / diṭṭhammi uṇa piasahī ekkaṃ pi hu ṇaṃ ṇa saṃbharimo // 903
bhaṇabhaṇa jaṃjaṃ paḍihāi tujjha taṃtaṃ sahāmimo amhe / asahattaṇaṃ ca jīaṃ ca vallabhe doi ṇa ghaḍaṃti // 904
eaṃ cia maha ṇāmaṃ bhaṇabhaṇa de suhaa kiṃ vilakkho si / paḍihāi jaṃ ṇa tujjha vi mamaṃ pi kiṃ deṇa ṇāmeṇa // 905
suhaa muhuttaṃ suppaü jaṃ te paḍihāi taṃ pi bhaṇṇihisi / ajja ṇa pecchaṃti tuhaṃ ṇiddāgaruāi acchīi // 906
mā velavesu bahuaṃ puttaa aliehi gottehiṃ / esā vi jāṇaï ccia parihāsummissabhaṇiāiṃ // 907
aï caṃḍi kiṃ ṇa pecchasi jaï so vāharaï aṇṇagotteṇa / aha de icchaï maccharapaṇacciacchaṃ muhaṃ daṭṭhuṃ // 908
veārijjasi muddhe gottakkhaliehi mā khu tuṃ ruvasu / kiṃ va ṇa pecchaï aṇṇaha eddahamettehi acchīhiṃ // 909
sottuṃ suhaṃ ṇa labbhaï avvo pemmassa vaṃkavisamassa / dugghaḍiamaṃcaassa va khaṇekhaṇe pāapaḍaṇeṇa // 910
ekkasaaṇammi sumuhī vimuhī garueṇa māṇabaṃdheṇa / siviṇakalahammi hoṃtī parammuhī sammuhī jāā // 911
vaḍḍhaü tā tuha gavvo bhaṇṇasi re jaï vihaṃḍaṇaṃ vaaṇaṃ / saccaṃ ṇa ei ṇiddā tue viṇā dehi oāsaṃ // 912
kaaviccheo sahibhaṃgibhaṇiasabbhāviāvarāhāe / jhaḍi āpallavaï puṇo ṇaaṇakavolesu kovatarū // 913
ummūlaṃti va hiaaṃ aṇuṇijjaṃtīŏ māṇavaṃtīo / saṃbhariamaṇṇuṇibbharabāhabharoruṃbhiamuhīo // 914
ṇa vi taha takkhaṇasuamaṇṇudukkhaviaṇāŏ vi ruvaṃti / jaha diṭṭhammi piaame aṇuṇijjaṃtīŏ taruṇīŏ // 915
hiae rosukkhittaṃ pāapahāraṃ sireṇa patthaṃto / ṇa hao daïo māṇaṃsiṇīĕ thoraṃsuaṃ ruṇṇaṃ // 916
piaamaviiṇṇacasaaṃ acakkhiaṃ piasahīĕ deṃtīe / abhaṇaṃtīĕ vi māṇaṃsiṇīĕ kahio ccia viroho // 917
vaccihii so gharaṃ se lahihii oāsam ehii saāsaṃ / bhaṇihii jaṃ bhaṇiavvaṃ paccuttaṃ kiṃṇu pāvihii // 918
taṇuāiā varāī diahediahe miaṃkaleha vva / bahalapaoseṇa tue ṇisaṃsa aṃdhāriamuheṇa // 919
dāvaṃteṇa tuha muhaṃ bhumaābhaṃgammi hoṃtaṇavasohaṃ / akaeṇa uvakaaṃ ajja maṇṇuṇā majjha pasiacchi // 920
bhiuḍī ṇa kaā kaḍuaṃ ṇā 'laviaṃ aharaaṃ ṇa pajjuṭṭhaṃ / uvaūhiā ṇa ruṇṇā eeṇa vi jāṇimo māṇaṃ // 921
kiṃ pi ṇa jaṃpasi kāmaṃ bhaṇiaṃ ca karesi taṃ tahā turiaṃ / hiaaṃ rosuvveaṃ ti tujjha viṇao ccia kahei // 922
paripucchiā ṇa jaṃpasi cuṃbijjaṃtī balā muhaṃ harasi / parihāsamāṇavimuhe pasiacchi maṇaṃ mha dūmesi // 923
aï pīṇatthaṇaütthaṃbhiāṇaṇe suaṇu suṇasu maha vaaṇaṃ / athirammi jujjaï ṇa jovvaṇammi māṇo pie kāduṃ // 924
taralacchi caṃdavaaṇe thoratthaṇi kariaroru taṇumajjhe / dīhā ṇa samappaï sisirajāmiṇī kaha ṇu de māṇo // 925
suhaā vi suṃḍarī vi hu taruṇī vi hu māṇiṇi tti ā putti / caṃdaṇalaṭṭhi vva huaṃgadūmiā kiṃ ḍu dūmesi // 926
paḍivakkhassa vi purao samuhaṃ bhaṇiā si teṇa pasia tti / avalaṃbiassa māṇiṇi māṇassa a kiṃ phalaṃ aṇṇaṃ // 927
kaḍḍhesi caliavalae hatthe muṃcesi ahamuhī bāhaṃ / paḍiruṃbhasi ṇīsāse bahuaṃ te māṇaviṇṇāṇaṃ // 928
kajjaṃ viṇā vi kaamāṇaḍaṃbarā pulaabhiṇṇasavvaṃgī / ujjallāliṃgaṇasokkhalālasā putti muṇiā si // 929
haṃho kiṃ va ṇa diṭṭhaṃ halā mae jīviaṃ dharaṃtīe / so maṃ aṇuṇei pio ahaṃ pi aṇuṇijjimi haāsā // 930
tā sokkhaṃ tāva raī tā raṇaraṇaassa ṇa tthi oāso / jā dukkhekkaṇihāṇe ṇa hoi bahuvallahe pemmaṃ // 931
māṇahariehi gaṃtuṃ ṇa tīrae so ṇaei avarāhī / ko vi apatthiamuṇio ṇejjaṃ maṃtaṃ va āṇejja // 932
uvvahaï daïagahiā haroṭṭhajhijjaṃtakovagaarāaṃ / pāṇosaraṃtamaïraṃ va phalihacasaaṃ muhaṃ bālā // 933
gāḍhāliṃgaṇarabhasujjaammi daïe lahuṃ samosaraï / māṇaṃsiṇīĕ māṇo phellaṇabhīo vva hiaāhi // 934
tuṃgo thiro visālo jo sahi me māṇapavvao raïo / so daïadiṭṭhivajjāsaṇīĕ ghāe viṇa pahuṃto // 935
sahi viraïūṇa māṇassa majjha dhīrattaṇeṇa oāsaṃ / piaamadaṃsaṇavihalakkhaṇammi sahase 'tti teṇa osariaṃ // 936
ṇahapaapasāhiaṃgo ṇiddāghummaṃtaloaṇo ṇa tahā / jaha ṇivvaṇāharo sāmalaṃga dūmesi maha hiaaṃ // 937
paccakkhamaṃtukāraa jaï cuṃbasi me ime haakavole / tā majjha piasahīe visesao kīsa taṇhāo // 938
taïā maha gaṃḍatthalaṇimiaṃ diṭṭhiṃ ṇa ṇesi aṇṇatto / eṇhiṃ sa ccea ahaṃ te a kavolā ṇa sā diṭṭhī // 939
tāṇa guṇaggahaṇāṇaṃ tāṇ' ukkaṃṭhāṇa tassa pemmassa / tāṇa bhaṇiāṇa suṃdara īrisaaṃ jāam avasāṇaṃ // 940
aliakuviaṃ pi kaamaṃtuaṃ va maṃ jesu suhaa aṇuṇeṃto / tāṇa diahāṇa haraṇe ruāmi ṇa uṇo ahaṃ kuviā // 941
āma tuha ṇā 'varāho piaama me loaṇāṇa iha doso / māṇāsahammi caḍulehi vāsio jehi hiaammi // 942
ko suhaa tujjha doso haahiaaṃ ṇiṭṭhuraṃ majjha / pecchasi aṇimisaṇaaṇo jaṃpasi viṇaaṃ ṇa jaṃpase piṭṭhaṃ // 943
vacca maha ccia ekkāĕ hoṃtu ṇīsāsaroiavvāi / mā tujjha vi tīĕ viṇā dakkhiṇṇahaassa jāṇīaṃtu // 944
aṇuvattaṃto amhārisaṃ jaṇaṃ āhijāīe / ciṃtesi uṇo hiae aṇāhijāī suhaṃ jaaï // 945
huṃ ṇillajja samosara taṃ cia aṇuṇesu jīĕ de eaṃ / pāaṃgụṭṭhālattaaraseṇa tilaaṃ viṇimmaviaṃ // 946
sā vasaï tujjha hiae sa ccia acchīsu sā a siviṇesu / amhārisāṇa suṃdara oāso kattha pāvāṇa // 947
taṇhā me tujjha piattaṇassa kaha taṃ ti ṇo hi jāṇāmo / de suhaa tumaṃ cia sikkhavesu jaha de piā homi // 948
maliṇavasaṇāṇa kiavaṇiāṇaṃ āpaṃḍugaṃḍapālīṇaṃ / pupphavaïāṇa kāmo aṃgesu kaāuho vasaï // 949
pupphavaïa mhi bālaa mā civasu adīharāuso hosi / ajjaṃ cea marijjaü maacchi kiṃ kālaharaṇeṇa // 950
vāṇiaa hatthidaṃtā katto amhāṇa vagghakattīo / jāva luliālaamuhī gharammi parisakkae soṇhā // 951
gaṇhaṃti piaamāṇa vaaṇāhi haṃsīŏ visalaaddhāi / hiaāi va kusumāuhabāṇakaāṇearaṃdhāi // 952
haṃsāṇa sarehi sirī sārijjaï aha sarāṇa haṃsehi / aṇṇoṇṇaṃ cia ee appāṇaṃ ṇavara garuaṃti // 953
aṇudiahakaābhoā jahajaha thaṇaā viṇiṃti kumarīe / tahataha laddhoāso vva vammaho hiaam āvisaï // 954
kesā paṃḍurachāā asaīsaṃgeṇa camma jajjariaṃ / cittaṃ tuha sohaggaṃ godā dūittaṇaṃ kuṇaï // 955
ṇiṇṇiddaṃ dobballaṃ ciṃtā alasattaṇaṃ saṇīsasiaṃ / maha maṃdabhāiṇīe kae sahi tumaṃ vi ahaha paribhavaï // 956
ṇiadaïadaṃsaṇūsua paṃthia aṇṇeṇa vaccasu paheṇa / gharavaïdhūā dullaṃ ghavāurā ṭhāi haagāme // 957
āsāiam aṇṇāeṇa jettiaṃ tā tui ṇa bahuā dhiī / uvaramasu vusaha eṇhiṃ rakkhijjaï gehavaïkhettaṃ // 958
ucciṇasu paḍiakusumaṃ mā dhuṇa sehāliaṃ haliasuṇhe / esa avasāṇaviraso sasureṇa suo valaasaddo // 959
pavisaṃtī gharadāraṃ vivaliavaaṇā viloiūṇa pahaṃ / khaṃdhe mottūṇa ghaḍaṃ hāhā ṇaṭṭho tti ruasi sahi kiṃ ti // 960
mā paṃtha ruṃdhasu paham abehi bālaa asesiahirīa / amhe aṇirikkāo suṇṇaṃ gharaaṃ va akkamasi // 961
suvvaï samāgamissaï tujjha pio ajja paharametteṇa / emea kiṃ pi ciṭṭhasi tā sahi sajjesu karaṇijjaṃ // 962
khaṇapāhuṇiā dearajāyā e suhaya kiṃ ti de haṇidā / ruaï gharopaṃtaphaliṇigharammi aṇuṇijjaü varāī // 963
pupphabharoṇamiabhūmigaasāhatarūṇa viṇṇavaṇaṃ / golāaḍaviaḍakuḍuṃgamahua... // 964
gṛhiṇipraveśitajāre gṛhe gṛhe (gṛhiṇī) sthāpitā / militāvadati(asatī?)jārau paścād gṛhiṇī gṛhasthaś ca // 965
ekkatto ruaï piā aṇṇatto samaratūraṇigghoso / pemmeṇa raṇaraseṇa a bhaḍassa ḍolāiaṃ hiaaṃ // 966
kelīgottakkhalaṇe vikuppae keavaṃ aāṇaṃtī / duṭṭha uasu parihāsaṃ jāā saccaṃ cia paruṇṇā // 967
de ā pasia ṇiattasu muhasasijoṇhāviluttatamaṇivahe / ahisāriāṇa vigghaṃ karesi aṇṇāṇa vi haāse // 968
aṇṇaṃ lahuattaṇaaṃ aṇṇa ccia kāi vattaṇacchāā / sāmā sāmaṇṇapaāvaïṇo reha ccia ṇa hoi // 969
alasasiromaṇi dhuttāṇa aggimo putti dhaṇasamiddhimao / ia bhaṇieṇa ṇaaṃgī papphullaviloaṇā jāā // 970
ullollakaraaraaṇakkhaehi tuha loaṇesu maha diṇṇaṃ / rattaṃsuaṃ pasāo koveṇa puṇo ime ṇa akkamiā // 971
e ehi dāva suṃdari kaṇṇaṃ dāūṇa suṇasu vaaṇijjaṃ / tujjha muheṇa kisoari caṃdo uamijjaï jaṇeṇa // 972
eddahamettatthaṇiā eddahamettehi acchivattehiṃ / eddahamettāvatthā eddahamettehi diahehiṃ // 973
karajuagahiajasoāthaṇamuhaviṇivesiāharapuḍassa / saṃbhariapaṃcajaṇṇassa ṇamaha kaṇhassa romaṃcaṃ // 974
kā visamā devvagaī kiṃ dullabbhaṃ jaṇo guṇaggāhī / kiṃ sokkhaṃ sukalattaṃ kiṃ dukkhaṃ jaṃ khalo loo // 975
kivaṇāṇa dhaṇaṃ ṇāāṇa phaṇamaṇī kesarāi sīhāṇaṃ / kulavāliāṇa a thaṇā katto jhiyyaṃti amuāṇaṃ // 976
kesesu valāmoḍia teṇa samarammi jaassirī gahiā / jaha kaṃdarāhi vihurā tassa daḍhaṃ kaṃṭhaammi saṃṭhaviā // 977
khalavavahārā dīsaṃti dāruṇā jaha vi taha vi dhīrāṇaṃ / hiaavaassavahumaā ṇa hu vavasāā vimujjhaṃti // 978
jaṃ parihariuṃ tīraï maṇaṃ pi ṇa suṃdaraattaṇaguṇeṇa / aha ṇavaram assa doso paḍivacchehiṃ pi paḍivaṇṇo // 979
jassa raṇaṃteurae kare kuṇaṃtassa maṃḍalaggalaaṃ / rasasammuhī vi sahasā parammuhī hoi riuseṇā // 980
jassea vaṇo tassea veaṇā bhaṇaï taṃ jaṇo aliaṃ / daṃtakkhaaṃ kavole vahūĕ viaṇā savattīṇaṃ // 981
jahā gahiro jahā raaṇaṇibbharo jaha a ṇimmalacchāo / taha kiṃ vihiṇā eso sabāṇio jalaṇihī ṇa kio // 982
jā ṭheraṃ va hasaṃtī kaïvaaṇaṃvuruhavaddhaviṇivesā / dāvei bhuaṇamaṃḍalam aṇṇaṃ via (cia?) jaaï sā vāṇī // 983
joṇhāi mahuraseṇa a viiṇṇatāruṇṇaücchuamaṇā sā / vuḍḍhā vi ṇavoḍha vva paravahū aha haraï tuha hiaaṃ // 984
ṭuṃṭuṇṇaṃto marihisi kaṃṭaakaliāi keaïvaṇāiṃ / mālaïkusumasaricchaṃ bhamara bhamaṃto ṇa pāvihisi // 985
ṇavapuṇṇimāmiaṃkassa suhaa ko taṃ si bhaṇasu maha saccaṃ / kā sohaggasamaggā paosaraaṇi vva tuha ajja // 986
ṇihuaramaṇammi loaṇapahammi paḍie guruaṇamajjhammi / saalaparihārahiaā vaṇagamaṇaṃ cea mahaï vahū // 987
taṃ tāṇa sirisahoararaaṇāharaṇammi hiaam ekkarasaṃ / viṃvāhare piāṇaṃ ṇivesiaṃ kusumavāṇeṇa // 988
tālā jāaṃti guṇā jālā de sahiaehi gheppaṃti / raïkiraṇāṇugahiāi hoṃti kamalāi a kamalāiṃ // 989
tuha vallahassa gosammi āsi aharo milāṇakamaladalo / ia ṇavavahuā soūṇa kuṇaï vaaṇaṃ mahīsamuhaṃ // 990
maha desu rasaṃ dhamme tamavasam āsaṃ gamāgamā hara ṇe / haravahu saraṇaṃ taṃ cittamoham avasaraü me sahasā // 991
rāīsu caṃdadhavalāsu laliam āphāliūṇa jo cāvaṃ / ekkacchattaṃ ccia kuṇaï bhuaṇarajjaṃ viaṃbhaṃto // 992
lahiūṇa tujjha vāhupphaṃsaṃ jīe sa ko vi ullāso / jaalacchī tuha virahe ṇa hu 'jjalā duvvalāṇaṃ sā // 993
vārijjaṃto vi uṇo saṃdāvakaatthieṇa hiaeṇa / thaṇaharavaassaeṇaṃ visuddhajāī ṇa calaï se hāro // 994
saalakaraṇaparavīsāmasiriviaraṇaṃ ṇa sarasakavvassa / dīsaï aha va ṇisammaï sarisaṃ aṃsaṃsametteṇa // 995
sahi ṇavaṇihuvaṇasamarammi aṃkavālīsahīĕ ṇiviḍāe / hāro ṇivārao ccia ucchīraṃto tadā kahaṃ ramiaṃ // 996
so ṇa tthi ettha gāmo jo eaṃ mahamahaṃtalāaṇṇaṃ / taruṇāṇaṃ hiaaluḍiṃ parisakkaṃtiṃ ṇivārei // 997
so suddhasāmalaṃgo dhammillo kalialaliaṇiadeho / tīe khaṃdhāhi valaṃ gahia saro suraasaṃgare jaaï // 998
homi vahatthiareho ṇiraṃkuso aha vivearahio vi / siviṇe vi tumammi puṇo pattihi bhattiṃ ṇa sumarāmi // 999
sajjei surahimāso ṇa āpaṇei juaïjaṇalakkhasahe / ahiṇaasahaāramuhe ṇaapallavapattaṇe aṇaṃgasare // 1000