asty uttarasyāṃ diśi devatātmā himālayo nāma nagādhirājaḥ / pūrvāparau toyanidhī vigāhya sthitaḥ pṛthivyā iva mānadaṇḍaḥ // 1.1	upajāti : upendravajrā [11: jtjgg], indravajrā [11: ttjgg]
yaṃ sarvaśailāḥ parikalpya vatsaṃ merau sthite dogdhari dohadakṣe / bhāsvanti ratnāni mahauṣadhīś ca pṛthūpadiṣṭāṃ duduhur dharitrīm // 1.2	upajāti : upendravajrā [11: jtjgg], indravajrā [11: ttjgg]
anantaratnaprabhavasya yasya himaṃ na saubhāgyavilopi jātam / eko hi doṣo guṇasaṃnipāte nimajjatīndoḥ kiraṇeṣv ivāṅkaḥ // 1.3	upajāti : upendravajrā [11: jtjgg], indravajrā [11: ttjgg]
yaś cāpsarovibhramamaṇḍanānāṃ saṃpādayitrīṃ śikharair bibharti / balāhakacchedavibhaktarāgām akālasaṃdhyām iva dhātumattām // 1.4	upajāti : upendravajrā [11: jtjgg], indravajrā [11: ttjgg]
āmekhalaṃ saṃcaratāṃ ghanānāṃ cchāyām adhaḥsānugatāṃ niṣevya / udvejitā vṛṣṭibhir āśrayante śṛṅgāṇi yasyātapavanti siddhāḥ // 1.5	indravajrā [11: ttjgg]
padaṃ tuṣārasrutidhautaraktaṃ yasminn adṛṣṭvāpi hatadvipānām / vidanti mārgaṃ nakharandhramuktair muktāphalaiḥ kesariṇāṃ kirātāḥ // 1.6	upajāti : upendravajrā [11: jtjgg], indravajrā [11: ttjgg]
nyastākṣarā dhāturasena yatra bhūrjatvacaḥ kuñjarabinduśoṇāḥ / vrajanti vidyādharasundarīṇām anaṅgalekhakriyayopayogam // 1.7	upajāti : upendravajrā [11: jtjgg], indravajrā [11: ttjgg]
yaḥ pūrayan kīcakarandhrabhāgān darīmukhotthena samīraṇena / udgāsyatām icchati kiṃnarāṇāṃ tānapradāyitvam ivopagantum // 1.8	upajāti : upendravajrā [11: jtjgg], indravajrā [11: ttjgg]
kapolakaṇḍūḥ karibhir vinetuṃ vighaṭṭitānāṃ saraladrumāṇām / yatra srutakṣīratayā prasūtaḥ sānūni gandhaḥ surabhīkaroti // 1.9	upajāti : upendravajrā [11: jtjgg], indravajrā [11: ttjgg]
vanecarāṇāṃ vanitāsakhānāṃ darīgṛhotsaṅganiṣaktabhāsaḥ / bhavanti yatrauṣadhayo rajanyām atailapūrāḥ suratapradīpāḥ // 1.10	upendravajrā [11: jtjgg]
udvejayaty aṅgulipārṣṇibhāgān mārge śilībhūtahime 'pi yatra / na durvahaśroṇipayodharārtā bhindanti mandāṃ gatim aśvamukhyaḥ // 1.11	upajāti : upendravajrā [11: jtjgg], indravajrā [11: ttjgg]
divākarād rakṣati yo guhāsu līnaṃ divā bhītam ivāndhakāram / kṣudre 'pi nūnaṃ śaraṇaṃ prapanne mamatvam uccaiḥśirasāṃ satīva // 1.12	upajāti : upendravajrā [11: jtjgg], indravajrā [11: ttjgg]
lāṅgūlavikṣepavisarpiśobhair itas tataś candramarīcigauraiḥ / yasyārthayuktaṃ girirājaśabdaṃ kurvanti vālavyajanaiś camaryaḥ // 1.13	upajāti : upendravajrā [11: jtjgg], indravajrā [11: ttjgg]
yatrāṃśukākṣepavilajjitānāṃ yadṛcchayā kiṃpuruṣāṅganānām / darīgṛhadvāravilambibimbās tiraskariṇyo jaladā bhavanti // 1.14	upajāti : upendravajrā [11: jtjgg], indravajrā [11: ttjgg]
bhāgīrathīnirjharasīkarāṇāṃ voḍhā muhuḥ kampitadevadāruḥ / yad vāyur anviṣṭamṛgaiḥ kirātair āsevyate bhinnaśikhaṇḍibarhaḥ // 1.15	indravajrā [11: ttjgg]
saptarṣihastāvacitāvaśeṣāṇy adho vivasvān parivartamānaḥ / padmāni yasyāgrasaroruhāṇi prabodhayaty ūrdhvamukhair mayūkhaiḥ // 1.16	upajāti : upendravajrā [11: jtjgg], indravajrā [11: ttjgg]
yajñāṅgayonitvam avekṣya yasya sāraṃ dharitrīdharaṇakṣamaṃ ca / prajāpatiḥ kalpitayajñabhāgaṃ śailādhipatyaṃ svayam anvatiṣṭhat // 1.17	upajāti : upendravajrā [11: jtjgg], indravajrā [11: ttjgg]
sa mānasīṃ merusakhaḥ pitṝṇāṃ kanyāṃ kulasya sthitaye sthitijñaḥ / menāṃ munīnām api mānanīyām ātmānurūpāṃ vidhinopayeme // 1.18	upajāti : upendravajrā [11: jtjgg], indravajrā [11: ttjgg]
kālakrameṇātha tayoḥ pravṛtte svarūpayogye surataprasaṅge / manoramaṃ yauvanam udvahantyā garbho 'bhavad bhūdhararājapatnyāḥ // 1.19	upajāti : upendravajrā [11: jtjgg], indravajrā [11: ttjgg]
asūta sā nāgavadhūpabhogyaṃ mainākam ambhonidhibaddhasakhyam / kruddhe 'pi pakṣacchidi vṛtraśatrāv avedanājñaṃ kuliśakṣatānām // 1.20	upajāti : upendravajrā [11: jtjgg], indravajrā [11: ttjgg]
athāvamānena pituḥ prayuktā dakṣasya kanyā bhavapūrvapatnī / satī satī yogavisṛṣṭadehā tāṃ janmane śailavadhūṃ prapede // 1.21	upajāti : upendravajrā [11: jtjgg], indravajrā [11: ttjgg]
sā bhūdharāṇām adhipena tasyāṃ samādhimatyām udapādi bhavyā / samyakprayogād aparikṣatāyāṃ nītāv ivotsāhaguṇena saṃpat // 1.22	upajāti : upendravajrā [11: jtjgg], indravajrā [11: ttjgg]
prasannadik pāṃsuviviktavātaṃ śaṅkhasvanānantarapuṣpavṛṣṭi / śarīriṇāṃ sthāvarajaṅgamānāṃ sukhāya tajjanmadinaṃ babhūva // 1.23	upajāti : upendravajrā [11: jtjgg], indravajrā [11: ttjgg]
tayā duhitrā sutarāṃ savitrī sphuratprabhāmaṇḍalayā cakāse / vidūrabhūmir navameghaśabdād udbhinnayā ratnaśalākayeva // 1.24	upajāti : upendravajrā [11: jtjgg], indravajrā [11: ttjgg]
dine dine sā parivardhamānā labdhodayā cāndramasīva lekhā / pupoṣa lāvaṇyamayān viśeṣāñ jyotsnāntarāṇīva kalāntarāṇi // 1.25	upajāti : upendravajrā [11: jtjgg], indravajrā [11: ttjgg]
tāṃ pārvatīty ābhijanena nāmnā bandhupriyāṃ bandhujano juhāva / u meti mātrā tapaso niṣiddhā paścād umākhyāṃ sumukhī jagāma // 1.26	upajāti : upendravajrā [11: jtjgg], indravajrā [11: ttjgg]
mahībhṛtaḥ putravato 'pi dṛṣṭis tasminn apatye na jagāma tṛptim / anantapuṣpasya madhor hi cūte dvirephamālā saviśeṣasaṅgā // 1.27	upajāti : upendravajrā [11: jtjgg], indravajrā [11: ttjgg]
prabhāmahatyā śikhayeva dīpas trimārgayeva tridivasya mārgaḥ / saṃskāravatyeva girā manīṣī tayā sa pūtaś ca vibhūṣitaś ca // 1.28	upajāti : upendravajrā [11: jtjgg], indravajrā [11: ttjgg]
mandākinīsaikatavedikābhiḥ sā kandukaiḥ kṛtrimaputrakaiś ca / reme muhur madhyagatā sakhīnāṃ krīḍārasaṃ nirviśatīva bālye // 1.29	indravajrā [11: ttjgg]
tāṃ haṃsamālāḥ śaradīva gaṅgāṃ mahauṣadhiṃ naktam ivātmabhāsaḥ / sthiropadeśām upadeśakāle prapedire prāktanajanmavidyāḥ // 1.30	upajāti : upendravajrā [11: jtjgg], indravajrā [11: ttjgg]
asaṃbhṛtaṃ maṇḍanam aṅgayaṣṭer anāsavākhyaṃ karaṇaṃ madasya / kāmasya puṣpavyatiriktam astraṃ bālyāt paraṃ sātha vayaḥ prapede // 1.31	upajāti : upendravajrā [11: jtjgg], indravajrā [11: ttjgg]
unmīlitaṃ tūlikayeva citraṃ sūryāṃśubhir bhinnam ivāravindam / babhūva tasyāś caturasraśobhi vapur vibhaktaṃ navayauvanena // 1.32	upajāti : upendravajrā [11: jtjgg], indravajrā [11: ttjgg]
abhyunnatāṅguṣṭhanakhaprabhābhir nikṣepaṇād rāgam ivodgirantau / ājahratus taccaraṇau pṛthivyāṃ sthalāravindaśriyam avyavasthām // 1.33	upajāti : upendravajrā [11: jtjgg], indravajrā [11: ttjgg]
sā rājahaṃsair iva saṃnatāṅgī gateṣu līlāñcitavikrameṣu / vyanīyata pratyupadeśalubdhair āditsubhir nūpurasiñjitāni // 1.34	upajāti : upendravajrā [11: jtjgg], indravajrā [11: ttjgg]
vṛttānupūrve ca na cātidīrghe jaṅghe śubhe sṛṣṭavatas tadīye / śeṣāṅganirmāṇavidhau vidhātur lāvaṇya utpādya ivāsa yatnaḥ // 1.35	indravajrā [11: ttjgg]
nāgendrahastās tvaci karkaśatvād ekāntaśaityāt kadalīviśeṣāḥ / labdhvāpi loke pariṇāhi rūpaṃ jātās tadūrvor upamānabāhyāḥ // 1.36	indravajrā [11: ttjgg]
etāvatā nanv anumeyaśobhaṃ kāñcīguṇasthānam aninditāyāḥ / āropitaṃ yad giriśena paścād ananyanārīkamanīyam aṅkam // 1.37	upajāti : upendravajrā [11: jtjgg], indravajrā [11: ttjgg]
tasyāḥ praviṣṭā natanābhirandhraṃ rarāja tanvī navalomarājiḥ / nīvīm atikramya sitetarasya tanmekhalāmadhyamaṇer ivārciḥ // 1.38	upajāti : upendravajrā [11: jtjgg], indravajrā [11: ttjgg]
madhyena sā vedivilagnamadhyā valitrayaṃ cāru babhāra bālā / ārohaṇārthaṃ navayauvanena kāmasya sopānam iva prayuktam // 1.39	upajāti : upendravajrā [11: jtjgg], indravajrā [11: ttjgg]
anyonyam utpīḍayad utpalākṣyāḥ stanadvayaṃ pāṇḍu tathā pravṛddham / madhye yathā śyāmamukhasya tasya mṛṇālasūtrāntaram apy alabhyam // 1.40	upajāti : upendravajrā [11: jtjgg], indravajrā [11: ttjgg]
śirīṣapuṣpādhikasaukumāryau bāhū tadīyāv iti me vitarkaḥ / parājitenāpi kṛtau harasya yau kaṇṭhapāśau makaradhvajena // 1.41	upajāti : upendravajrā [11: jtjgg], indravajrā [11: ttjgg]
kaṇṭhasya tasyāḥ stanabandhurasya muktākalāpasya ca nistalasya / anyonyaśobhājananād babhūva sādhāraṇo bhūṣaṇabhūṣyabhāvaḥ // 1.42	indravajrā [11: ttjgg]
candraṃ gatā padmaguṇān na bhuṅkte padmāśritā cāndramasīm abhikhyām / umāmukhaṃ tu pratipadya lolā dvisaṃśrayāṃ prītim avāpa lakṣmīḥ // 1.43	upajāti : upendravajrā [11: jtjgg], indravajrā [11: ttjgg]
puṣpaṃ pravālopahitaṃ yadi syān muktāphalaṃ vā sphuṭavidrumastham / tato 'nukuryād viśadasya tasyās tāmrauṣṭhaparyastarucaḥ smitasya // 1.44	upajāti : upendravajrā [11: jtjgg], indravajrā [11: ttjgg]
svareṇa tasyām amṛtasruteva prajalpitāyām abhijātavāci / apy anyapuṣṭā pratikūlaśabdā śrotur vitantrīr iva tāḍyamānā // 1.45	upajāti : upendravajrā [11: jtjgg], indravajrā [11: ttjgg]
pravātanīlotpalanirviśeṣam adhīraviprekṣitam āyatākṣyā / tayā gṛhītaṃ nu mṛgāṅganābhyas tato gṛhītaṃ nu mṛgāṅganābhiḥ // 1.46	upendravajrā [11: jtjgg]
tasyāḥ śalākāñjananirmiteva kāntir bhruvor ānatalekhayor yā / tāṃ vīkṣya līlācaturām anaṅgaḥ svacāpasaundaryamadaṃ mumoca // 1.47	upajāti : upendravajrā [11: jtjgg], indravajrā [11: ttjgg]
lajjā tiraścāṃ yadi cetasi syād asaṃśayaṃ parvatarājaputryāḥ / taṃ keśapāśaṃ prasamīkṣya kuryur vālapriyatvaṃ śithilaṃ camaryaḥ // 1.48	upajāti : upendravajrā [11: jtjgg], indravajrā [11: ttjgg]
sarvopamādravyasamuccayena yathāpradeśaṃ viniveśitena / sā nirmitā viśvasṛjā prayatnād ekasthasaundaryadidṛkṣayeva // 1.49	upajāti : upendravajrā [11: jtjgg], indravajrā [11: ttjgg]
tāṃ nāradaḥ kāmacaraḥ kadā cit kanyāṃ kila prekṣya pituḥ samīpe / samādideśaikavadhūṃ bhavitrīṃ premṇā śarīrārdhaharāṃ harasya // 1.50	upajāti : upendravajrā [11: jtjgg], indravajrā [11: ttjgg]
guruḥ pragalbhe 'pi vayasy ato 'syās tasthau nivṛttānyavarābhilāṣaḥ / ṛte kṛśānor na hi mantrapūtam arhanti tejāṃsy aparāṇi havyam // 1.51	upajāti : upendravajrā [11: jtjgg], indravajrā [11: ttjgg]
ayācitāraṃ na hi devadevam adriḥ sutāṃ grāhayituṃ śaśāka / abhyarthanābhaṅgabhayena sādhur mādhyasthyam iṣṭe 'py avalambate 'rthe // 1.52	upajāti : upendravajrā [11: jtjgg], indravajrā [11: ttjgg]
yadaiva pūrve janane śarīraṃ sā dakṣaroṣāt sudatī sasarja / tadāprabhṛty eva vimuktasaṅgaḥ patiḥ paśūnām aparigraho 'bhūt // 1.53	upajāti : upendravajrā [11: jtjgg], indravajrā [11: ttjgg]
sa kṛttivāsās tapase yatātmā gaṅgāpravāhokṣitadevadāru / prasthaṃ himādrer mṛganābhigandhi kiṃ cit kvaṇatkiṃnaram adhyuvāsa // 1.54	upajāti : upendravajrā [11: jtjgg], indravajrā [11: ttjgg]
gaṇā nameruprasavāvataṃsā bhūrjatvacaḥ sparśavatīr dadhānāḥ / manaḥśilāvicchuritā niṣeduḥ śaileyanaddheṣu śilātaleṣu // 1.55	upajāti : upendravajrā [11: jtjgg], indravajrā [11: ttjgg]
tuṣārasaṃghātaśilāḥ khurāgraiḥ samullikhan darpakalaḥ kakudmān / dṛṣṭaḥ kathaṃ cid gavayair vivignair asoḍhasiṃhadhvanir unnanāda // 1.56	upajāti : upendravajrā [11: jtjgg], indravajrā [11: ttjgg]
tatrāgnim ādhāya samitsamiddhaṃ svam eva mūrtyantaram aṣṭamūrtiḥ / svayaṃ vidhātā tapasaḥ phalānām kenāpi kāmena tapaś cacāra // 1.57	upajāti : upendravajrā [11: jtjgg], indravajrā [11: ttjgg]
anarghyam arghyeṇa tam adrināthaḥ svargaukasām arcitam arcayitvā / ārādhanāyāsya sakhīsametāṃ samādideśa prayatāṃ tanūjām // 1.58	upajāti : upendravajrā [11: jtjgg], indravajrā [11: ttjgg]
pratyarthibhūtām api tāṃ samādheḥ śuśrūṣamāṇāṃ giriśo 'numene / vikārahetau sati vikriyante yeṣāṃ na cetāṃsi ta eva dhīrāḥ // 1.59	upajāti : upendravajrā [11: jtjgg], indravajrā [11: ttjgg]
avacitabalipuṣpā vedisaṃmārgadakṣā niyamavidhijalānāṃ barhiṣāṃ copanetrī / giriśam upacacāra pratyahaṃ sā sukeśī niyamitaparikhedā tacchiraścandrapādaiḥ // 1.60	mālinī [15: nnmyy]
tasmin viprakṛtāḥ kāle tārakeṇa divaukasaḥ / turāsāhaṃ purodhāya dhāma svāyaṃbhuvaṃ yayuḥ // 2.1	anuṣṭubh (1,2: pathyā, 3,4: pathyā)
teṣām āvir abhūd brahmā parimlānamukhaśriyām / sarasāṃ suptapadmānāṃ prātar dīdhitimān iva // 2.2, / 	anuṣṭubh (1,2: pathyā, 3,4: pathyā)
atha sarvasya dhātāraṃ te sarve sarvatomukham / vāgīśaṃ vāgbhir arthyābhiḥ praṇipatyopatasthire // 2.3	anuṣṭubh (1,2: pathyā, 3,4: pathyā)
namas trimūrtaye tubhyaṃ prāk sṛṣṭeḥ kevalātmane / guṇatrayavibhāgāya paścād bhedam upeyuṣe // 2.4	anuṣṭubh (1,2: pathyā, 3,4: pathyā)
yad amogham apām antar uptaṃ bījam aja tvayā / ataś carācaraṃ viśvaṃ prabhavas tasya gīyase // 2.5	anuṣṭubh (1,2: pathyā, 3,4: pathyā)
tisṛbhis tvam avasthābhir mahimānam udīrayan / pralayasthitisargāṇām ekaḥ kāraṇatāṃ gataḥ // 2.6	anuṣṭubh (1,2: pathyā, 3,4: pathyā)
strīpuṃsāv ātmabhāgau te bhinnamūrteḥ sisṛkṣayā / prasūtibhājaḥ sargasya tāv eva pitarau smṛtau // 2.7	anuṣṭubh (1,2: pathyā, 3,4: ma-vipulā)
svakālaparimāṇena vyastarātriṃdivasya te / yau tu svapnāvabodhau tau bhūtānāṃ pralayodayau // 2.8	anuṣṭubh (1,2: pathyā, 3,4: pathyā)
jagadyonir ayonis tvaṃ jagadanto nirantakaḥ / jagadādir anādis tvaṃ jagadīśo nirīśvaraḥ // 2.9	anuṣṭubh (1,2: pathyā, 3,4: pathyā)
ātmānam ātmanā vetsi sṛjasy ātmānam ātmanā / ātmanā kṛtinā ca tvam ātmany eva pralīyase // 2.10	anuṣṭubh (1,2: pathyā, 3,4: pathyā)
dravaḥ saṃghātakaṭhinaḥ sthūlaḥ sūkṣmo laghur guruḥ / vyakto vyaktetaraś cāsi prākāmyaṃ te vibhūtiṣu // 2.11	anuṣṭubh (1,2: na-vipulā, 3,4: pathyā)
udghātaḥ praṇavo yāsāṃ nyāyais tribhir udīraṇam / karma yajñaḥ phalaṃ svargas tāsāṃ tvaṃ prabhavo girām // 2.12	anuṣṭubh (1,2: pathyā, 3,4: pathyā)
tvām āmananti prakṛtiṃ puruṣārthapravartinīm / taddarśinam udāsīnaṃ tvām eva puruṣaṃ viduḥ // 2.13	anuṣṭubh (1,2: bha-vipulā, 3,4: pathyā)
tvaṃ pitṝṇām api pitā devānām api devatā / parato 'pi paraś cāsi vidhātā vedhasām api // 2.14	anuṣṭubh (1,2: na-vipulā, 3,4: pathyā)
tvam eva havyaṃ hotā ca bhojyaṃ bhoktā ca śāśvataḥ / vedyaṃ ca veditā cāsi dhyātā dhyeyaṃ ca yat param // 2.15	anuṣṭubh (1,2: ma-vipulā, 3,4: pathyā)
iti tebhyaḥ stutīḥ śrutvā yathārthā hṛdayaṃgamāḥ / prasādābhimukho vedhāḥ pratyuvāca divaukasaḥ // 2.16	anuṣṭubh (1,2: pathyā, 3,4: pathyā)
purāṇasya kaves tasya caturmukhasamīritā / pravṛttir āsīc chabdānāṃ caritārthā catuṣṭayī // 2.17	anuṣṭubh (1,2: pathyā, 3,4: ma-vipulā)
svāgataṃ svān adhīkārān prabhāvair avalambya vaḥ / yugapad yugabāhubhyaḥ prāptebhyaḥ prājyavikramāḥ // 2.18	anuṣṭubh (1,2: pathyā, 3,4: pathyā)
kim idaṃ dyutim ātmīyāṃ na bibhrati yathā purā / himakliṣṭaprakāśāni jyotīṃṣīva mukhāni vaḥ // 2.19	anuṣṭubh (1,2: pathyā, 3,4: pathyā)
praśamād arciṣām etad anudgīrṇasurāyudham / vṛtrasya hantuḥ kuliśaṃ kuṇṭhitāśrīva lakṣyate // 2.20	anuṣṭubh (1,2: pathyā, 3,4: bha-vipulā)
kiṃ cāyam aridurvāraḥ pāṇau pāśaḥ pracetasaḥ / mantreṇa hatavīryasya phaṇino dainyam āśritaḥ // 2.21	anuṣṭubh (1,2: pathyā, 3,4: pathyā)
kuberasya manaḥśalyaṃ śaṃsatīva parābhavam / apaviddhagado bāhur bhagnaśākha iva drumaḥ // 2.22	anuṣṭubh (1,2: pathyā, 3,4: pathyā)
yamo 'pi vilikhan bhūmiṃ daṇḍenāstamitatviṣā / kurute 'sminn amoghe 'pi nirvāṇālātalāghavam // 2.23	anuṣṭubh (1,2: pathyā, 3,4: pathyā)
amī ca katham ādityāḥ pratāpakṣatiśītalāḥ / citranyastā iva gatāḥ prakāmālokanīyatām // 2.24	anuṣṭubh (1,2: pathyā, 3,4: na-vipulā)
paryākulatvān marutāṃ vegabhaṅgo 'numīyate / ambhasām oghasaṃrodhaḥ pratīpagamanād iva // 2.25	anuṣṭubh (1,2: bha-vipulā, 3,4: pathyā)
āvarjitajaṭāmaulivilambiśaśikoṭayaḥ / rudrāṇām api mūrdhānaḥ kṣatahuṃkāraśaṃsinaḥ // 2.26	anuṣṭubh (1,2: pathyā, 3,4: pathyā)
labdhapratiṣṭhāḥ prathamaṃ yūyaṃ kiṃ balavattaraiḥ / apavādair ivotsargāḥ kṛtavyāvṛttayaḥ paraiḥ // 2.27	anuṣṭubh (1,2: bha-vipulā, 3,4: pathyā)
tad brūta vatsāḥ kim itaḥ prārthayadhve samāgatāḥ / mayi sṛṣṭir hi lokānāṃ rakṣā yuṣmāsv avasthitā // 2.28	anuṣṭubh (1,2: bha-vipulā, 3,4: pathyā)
tato mandāniloddhūtakamalākaraśobhinā / guruṃ netrasahasreṇa codayām āsa vāsavaḥ // 2.29	anuṣṭubh (1,2: pathyā, 3,4: pathyā)
sa dvinetro hareś cakṣuḥ sahasranayanādhikam / vācaspatir uvācedaṃ prāñjalir jalajāsanam // 2.30	anuṣṭubh (1,2: pathyā, 3,4: pathyā)
evaṃ yad āttha bhagavann āmṛṣṭaṃ naḥ paraiḥ padam / pratyekaṃ viniyuktātmā kathaṃ na jñāsyasi prabho // 2.31	anuṣṭubh (1,2: na-vipulā, 3,4: pathyā)
bhavallabdhavarodīrṇas tārakākhyo mahāsuraḥ / upaplavāya lokānāṃ dhūmaketur ivotthitaḥ // 2.32	anuṣṭubh (1,2: pathyā, 3,4: pathyā)
pure tāvantam evāsya tanoti ravir ātapam / dīrghikākamalonmeṣo yāvanmātreṇa sādhyate // 2.33	anuṣṭubh (1,2: pathyā, 3,4: pathyā)
sarvābhiḥ sarvadā candras taṃ kalābhir niṣevate / nādatte kevalāṃ lekhāṃ haracūḍāmaṇīkṛtām // 2.34	anuṣṭubh (1,2: pathyā, 3,4: pathyā)
vyāvṛttagatir udyāne kusumasteyasādhvasāt / na vāti vāyus tatpārśve tālavṛntānilādhikam // 2.35	anuṣṭubh (1,2: pathyā, 3,4: ma-vipulā)
paryāyasevām utsṛjya puṣpasaṃbhāratatparāḥ / udyānapālasāmānyam ṛtavas tam upāsate // 2.36	anuṣṭubh (1,2: ma-vipulā, 3,4: pathyā)
tasyopāyanayogyāni ratnāni saritāṃ patiḥ / katham apy ambhasām antar ā niṣpatteḥ pratīkṣate // 2.37	anuṣṭubh (1,2: pathyā, 3,4: pathyā)
jvalanmaṇiśikhāś cainaṃ vāsukipramukhā niśi / sthirapradīpatām etya bhujaṃgāḥ paryupāsate // 2.38	anuṣṭubh (1,2: pathyā, 3,4: pathyā)
tatkṛtānugrahāpekṣī taṃ muhur dūtahāritaiḥ / anukūlayatīndro 'pi kalpadrumavibhūṣaṇaiḥ // 2.39	anuṣṭubh (1,2: pathyā, 3,4: pathyā)
ittham ārādhyamāno 'pi kliśnāti bhuvanatrayam / śāmyet pratyapakāreṇa nopakāreṇa durjanaḥ // 2.40	anuṣṭubh (1,2: pathyā, 3,4: pathyā)
tenāmaravadhūhastaiḥ sadayālūnapallavāḥ / abhijñāś chedapātānāṃ kriyante nandanadrumāḥ // 2.41	anuṣṭubh (1,2: pathyā, 3,4: pathyā)
vījyate sa hi saṃsuptaḥ śvāsasādhāraṇānilaiḥ / cāmaraiḥ surabandīnāṃ bāṣpaśīkaravarṣibhiḥ // 2.42	anuṣṭubh (1,2: pathyā, 3,4: pathyā)
utpāṭya meruśṛṅgāṇi kṣuṇṇāni haritāṃ khuraiḥ / ākrīḍaparvatās tena kalpitāḥ sveṣu veśmasu // 2.43	anuṣṭubh (1,2: pathyā, 3,4: pathyā)
mandākinyāḥ payaḥśeṣaṃ digvāraṇamadāvilam / hemāmbhoruhasasyānāṃ tadvāpyo dhāma sāṃpratam // 2.44	anuṣṭubh (1,2: pathyā, 3,4: pathyā)
bhuvanālokanaprītiḥ svargibhir nānubhūyate / khilībhūte vimānānāṃ tadāpātabhayāt pathi // 2.45	anuṣṭubh (1,2: pathyā, 3,4: pathyā)
yajvabhiḥ saṃbhṛtaṃ havyaṃ vitateṣv adhvareṣu saḥ / jātavedomukhān māyī miṣatām ācchinatti naḥ // 2.46	anuṣṭubh (1,2: pathyā, 3,4: pathyā)
uccair uccaiḥśravās tena hayaratnam ahāri ca / dehabaddham ivendrasya cirakālārjitaṃ yaśaḥ // 2.47	anuṣṭubh (1,2: pathyā, 3,4: pathyā)
tasminn upāyāḥ sarve naḥ krūre pratihatakriyāḥ / vīryavaty auṣadhānīva vikāre sāṃnipātike // 2.48	anuṣṭubh (1,2: ma-vipulā, 3,4: pathyā)
jayāśā yatra cāsmākaṃ pratighātotthitārciṣā / haricakreṇa tenāsya kaṇṭhe niṣka ivārpitaḥ // 2.49	anuṣṭubh (1,2: pathyā, 3,4: pathyā)
tadīyās toyadeṣv adya puṣkarāvartakādiṣu / abhyasyanti taṭāghātaṃ nirjitairāvatā gajāḥ // 2.50	anuṣṭubh (1,2: pathyā, 3,4: pathyā)
tad icchāmo vibho sṛṣṭaṃ senānyaṃ tasya śāntaye / karmabandhacchidaṃ dharmaṃ bhavasyeva mumukṣavaḥ // 2.51	anuṣṭubh (1,2: pathyā, 3,4: pathyā)
goptāraṃ surasainyānāṃ yaṃ puraskṛtya gotrabhit / pratyāneṣyati śatrubhyo bandīm iva jayaśriyam // 2.52	anuṣṭubh (1,2: pathyā, 3,4: pathyā)
vacasy avasite tasmin sasarja giram ātmabhūḥ / garjitānantarāṃ vṛṣṭiṃ saubhāgyena jigāya yā // 2.53	anuṣṭubh (1,2: pathyā, 3,4: pathyā)
saṃpatsyate vaḥ kāmo yaṃ kālaḥ kaścit pratīkṣyatām / na tv asya siddhau yāsyāmi sargavyāpāram ātmanā // 2.54	anuṣṭubh (1,2: ma-vipulā, 3,4: ma-vipulā)
itaḥ sa daityaḥ prāptaśrīr neta evārhati kṣayam / viṣavṛkṣo 'pi saṃvardhya svayaṃ chettum asāṃpratam // 2.55	anuṣṭubh (1,2: ma-vipulā, 3,4: pathyā)
vṛtaṃ tenedam eva prāṅ mayā cāsmai pratiśrutam / vareṇa śamitaṃ lokān alaṃ dagdhuṃ hi tattapaḥ // 2.56	anuṣṭubh (1,2: pathyā, 3,4: pathyā)
saṃyuge sāṃyugīnaṃ tam udyataṃ prasaheta kaḥ / aṃśād ṛte niṣiktasya nīlalohitaretasaḥ // 2.57	anuṣṭubh (1,2: pathyā, 3,4: pathyā)
sa hi devaḥ paraṃ jyotis tamaḥpāre vyavasthitam / paricchinnaprabhāvarddhir na mayā na ca viṣṇunā // 2.58	anuṣṭubh (1,2: pathyā, 3,4: pathyā)
umārūpeṇa te yūyaṃ saṃyamastimitaṃ manaḥ / śaṃbhor yatadhvam ākraṣṭum ayaskāntena lohavat // 2.59	anuṣṭubh (1,2: pathyā, 3,4: pathyā)
ubhe eva kṣame voḍhum ubhayor vīryam āhitam / sā vā śaṃbhos tadīyā vā mūrtir jalamayī mama // 2.60	anuṣṭubh (1,2: pathyā, 3,4: pathyā)
tasyātmā śitikaṇṭhasya saināpatyam upetya vaḥ / mokṣyate surabandīnāṃ veṇīr vīryavibhūtibhiḥ // 2.61	anuṣṭubh (1,2: pathyā, 3,4: pathyā)
iti vyāhṛtya vibudhān viśvayonis tirodadhe / manasy āhitakartavyās te 'pi pratiyayur divam // 2.62	anuṣṭubh (1,2: na-vipulā, 3,4: pathyā)
tatra niścitya kandarpam agamat pākaśāsanaḥ / manasā kāryasaṃsiddhitvarādviguṇaraṃhasā // 2.63	anuṣṭubh (1,2: pathyā, 3,4: pathyā)
atha sa lalitayoṣidbhrūlatācāruśṛṅgaṃ rativalayapadāṅke cāpam āsajya kaṇṭhe / sahacaramadhuhastanyastacūtāṅkurāstraḥ śatamakham upatasthe prāñjaliḥ puṣpadhanvā // 2.64	mālinī [15: nnmyy]
tasmin maghonas tridaśān vihāya sahasram akṣṇāṃ yugapat papāta / prayojanāpekṣitayā prabhūṇāṃ prāyaś calaṃ gauravam āśriteṣu // 3.1	upajāti : upendravajrā [11: jtjgg], indravajrā [11: ttjgg]
sa vāsavenāsanasaṃnikṛṣṭam ito niṣīdeti visṛṣṭabhūmiḥ / bhartuḥ prasādaṃ pratinandya mūrdhnā vaktuṃ mithaḥ prākramataivam enam // 3.2	upajāti : upendravajrā [11: jtjgg], indravajrā [11: ttjgg]
ājñāpaya jñātaviśeṣa puṃsāṃ lokeṣu yat te karaṇīyam asti / anugrahaṃ saṃsmaraṇapravṛttam icchāmi saṃvardhitam ājñayā te // 3.3	upajāti : upendravajrā [11: jtjgg], indravajrā [11: ttjgg]
kenābhyasūyā padakāṅkṣiṇā te nitāntadīrghair janitā tapobhiḥ / yāvad bhavaty āhitasāyakasya matkārmukasyāsya nideśavartī // 3.4	upajāti : upendravajrā [11: jtjgg], indravajrā [11: ttjgg]
asaṃmataḥ kas tava muktimārgaṃ punarbhavakleśabhayāt prapannaḥ / baddhaś ciraṃ tiṣṭhatu sundarīṇām ārecitabhrūcaturaiḥ kaṭākṣaiḥ // 3.5	upajāti : upendravajrā [11: jtjgg], indravajrā [11: ttjgg]
adhyāpitasyośanasāpi nītiṃ prayuktarāgapraṇidhir dviṣas te / kasyārthadharmau vada pīḍayāmi sindhos taṭāv ogha iva pravṛddhaḥ // 3.6	upajāti : upendravajrā [11: jtjgg], indravajrā [11: ttjgg]
kām ekapatnīvrataduḥkhaśīlāṃ lolaṃ manaś cārutayā praviṣṭām / nitambinīm icchasi muktalajjāṃ kaṇṭḥe svayaṃgrāhaniṣaktabāhum // 3.7	indravajrā [11: ttjgg] (? 3 eva pādāḥ yuktāḥ)
kayāsi kāmin suratāparādhāt pādānataḥ kopanayāvadhūtaḥ / yasyāḥ kariṣyāmi dṛḍhānutāpaṃ pravālaśayyāśaraṇaṃ śarīram // 3.8	upajāti : upendravajrā [11: jtjgg], indravajrā [11: ttjgg]
prasīda viśrāmyatu vīra vajraṃ śarair madīyaiḥ katamaḥ surāriḥ / bibhetu moghīkṛtabāhuvīryaḥ strībhyo 'pi kopasphuritādharābhyaḥ // 3.9	upajāti : upendravajrā [11: jtjgg], indravajrā [11: ttjgg]
tava prasādāt kusumāyudho 'pi sahāyam ekaṃ madhum eva labdhvā / kuryāṃ harasyāpi pinākapāṇer dhairyacyutiṃ ke mama dhanvino 'nye // 3.10	upajāti : upendravajrā [11: jtjgg], indravajrā [11: ttjgg]
athorudeśād avatārya pādam ākrāntisaṃbhāvitapādapīṭham / saṃkalpithārthe vivṛtātmaśaktim ākhaṇḍalaḥ kāmam idaṃ babhāṣe // 3.11	upajāti : upendravajrā [11: jtjgg], indravajrā [11: ttjgg]
sarvaṃ sakhe tvayy upapannam etad ubhe mamāstre kuliśaṃ bhavāṃś ca / vajraṃ tapovīryamahatsu kuṇṭḥaṃ tvaṃ sarvatogāmi ca sādhakaṃ ca // 3.12	indravajrā [11: ttjgg] (? 2 eva pādāḥ yuktāḥ)
avaimi te sāram ataḥ khalu tvāṃ kārye guruṇy ātmasamaṃ niyokṣye / vyādiśyate bhūdharatām avekṣya kṛṣṇena dehodvahanāya śeṣaḥ // 3.13	upajāti : upendravajrā [11: jtjgg], indravajrā [11: ttjgg]
āśaṃsatā bāṇagatiṃ vṛṣāṅke kāryaṃ tvayā naḥ pratipannakalpam / nibodha yajñāṃśabhujām idānīm uccairdviṣām īpsitam etad eva // 3.14	upajāti : upendravajrā [11: jtjgg], indravajrā [11: ttjgg]
amī hi vīryaprabhavaṃ bhavasya jayāya senānyam uśanti devāḥ / sa ca tvadekeṣunipātasādhyo brahmāṅgabhūr brahmaṇi yojitātmā // 3.15	upajāti : upendravajrā [11: jtjgg], indravajrā [11: ttjgg]
tasmai himādreḥ prayatāṃ tanūjāṃ yatātmane rocayituṃ yatasva / yoṣitsu tadvīryaniṣekabhūmiḥ saiva kṣamety ātmabhuvopadiṣṭam // 3.16	upajāti : upendravajrā [11: jtjgg], indravajrā [11: ttjgg]
guror niyogāc ca nagendrakanyā sthāṇuṃ tapasyantam adhityakāyām / anvāsta ity apsarasāṃ mukhebhyaḥ śrutaṃ mayā matpraṇidhiḥ sa vargaḥ // 3.17	upajāti : upendravajrā [11: jtjgg], indravajrā [11: ttjgg]
tad gaccha siddhyai kuru devakāryam artho 'yam arthāntarabhāvya eva / apekṣate pratyayam uttamaṃ tvāṃ bījāṅkuraḥ prāg udayād ivāmbhaḥ // 3.18	upajāti : upendravajrā [11: jtjgg], indravajrā [11: ttjgg]
tasmin surāṇāṃ vijayābhyupāye tavaiva nāmāstragatiḥ kṛtī tvam / apy aprasiddhaṃ yaśase hi puṃsām ananyasādhāraṇam eva karma // 3.19	upajāti : upendravajrā [11: jtjgg], indravajrā [11: ttjgg]
surāḥ samabhyarthayitāra ete kāryaṃ trayāṇām api viṣṭapānām / cāpena te karma na cātihiṃsram aho batāsi spṛhaṇīyavīryaḥ // 3.20	upajāti : upendravajrā [11: jtjgg], indravajrā [11: ttjgg]
madhuś ca te manmatha sāhacaryād āsav anukto 'pi sahāya eva / samīraṇo nodayitā bhaveti vyādiśyate kena hutāśanasya // 3.21	upajāti triṣṭubh: indravajrā [11: ttjgg], upendravajrā [11: jtjgg], ajñātam [11: Btjgl]
tatheti śeṣām iva bhartur ājñām ādāya mūrdhnā madanaḥ pratasthe / airāvatāsphālanakarkaśena hastena pasparśa tadaṅgam indraḥ // 3.22	upajāti : upendravajrā [11: jtjgg], indravajrā [11: ttjgg]
sa mādhavenābhimatena sakhyā ratyā ca sāśaṅkam anuprayātaḥ / aṅgavyayaprārthitakāryasiddhiḥ sthāṇvāśramaṃ haimavataṃ jagāma // 3.23	upajāti : upendravajrā [11: jtjgg], indravajrā [11: ttjgg]
tasmin vane saṃyamināṃ munīnāṃ tapaḥsamādheḥ pratikūlavartī / saṃkalpayoner abhimānabhūtam ātmānam ādhāya madhur jajṛmbhe // 3.24	upajāti : upendravajrā [11: jtjgg], indravajrā [11: ttjgg]
kuberaguptāṃ diśam uṣṇaraśmau gantuṃ pravṛtte samayaṃ vilaṅghya / dig dakṣiṇā gandhavahaṃ mukhena vyalīkaniḥśvāsam ivotsasarja // 3.25	upajāti : upendravajrā [11: jtjgg], indravajrā [11: ttjgg]
asūta sadyaḥ kusumāny aśokaḥ skandhāt prabhṛty eva sapallavāni / pādena nāpaikṣata sundarīṇāṃ saṃparkam āsiñjitanūpureṇa // 3.26	upajāti : upendravajrā [11: jtjgg], indravajrā [11: ttjgg]
sadyaḥ pravālodgamacārupatre nīte samāptiṃ navacūtabāṇe / niveśayām āsa madhur dvirephān nāmākṣarāṇīva manobhavasya // 3.27	upajāti : upendravajrā [11: jtjgg], indravajrā [11: ttjgg]
varṇaprakarṣe sati karṇikāraṃ dunoti nirgandhatayā sma cetaḥ / prāyeṇa sāmagryavidhau guṇānāṃ parāṅmukhī viśvasṛjaḥ pravṛttiḥ // 3.28	upajāti : upendravajrā [11: jtjgg], indravajrā [11: ttjgg]
bālenduvakrāṇy avikāsabhāvād babhuḥ palāśāny atilohitāni / sadyo vasantena samāgatānāṃ nakhakṣatānīva vanasthalīnām // 3.29	upajāti : upendravajrā [11: jtjgg], indravajrā [11: ttjgg]
lagnadvirephāñjanabhakticitram mukhe madhuśrīs tilakaṃ prakāśya / rāgeṇa bālāruṇakomalena cūtapravāloṣṭham alaṃcakāra // 3.30	upajāti : upendravajrā [11: jtjgg], indravajrā [11: ttjgg]
mṛgāḥ priyāladrumamañjarīṇāṃ rajaḥkaṇair vighnitadṛṣṭipātāḥ / madoddhatāḥ pratyanilaṃ vicerur vanasthalīr marmarapatramokṣāḥ // 3.31	upendravajrā [11: jtjgg]
cūtāṅkurāsvādakaṣāyakaṇṭhaḥ puṃskokilo yan madhuraṃ cukūja / manasvinīmānavighātadakṣaṃ tad eva jātaṃ vacanaṃ smarasya // 3.32	upajāti : upendravajrā [11: jtjgg], indravajrā [11: ttjgg]
himavyapāyād viśadādharāṇām āpāṇḍurībhūtamukhacchavīnām / svedodgamaḥ kiṃpuruṣāṅganānāṃ cakre padaṃ patraviśeṣakeṣu // 3.33	upajāti : upendravajrā [11: jtjgg], indravajrā [11: ttjgg]
tapasvinaḥ sthāṇuvanaukasas tām ākālikīṃ vīkṣya madhupravṛttim / prayatnasaṃstambhitavikriyāṇāṃ kathaṃ cid īśā manasāṃ babhūvuḥ // 3.34	upajāti : upendravajrā [11: jtjgg], indravajrā [11: ttjgg]
taṃ deśam āropitapuṣpacāpe ratidvitīye madane prapanne / kāṣṭhāgatasneharasānuviddhaṃ dvandvāni bhāvaṃ kriyayā vivavruḥ // 3.35	upajāti : upendravajrā [11: jtjgg], indravajrā [11: ttjgg]
madhu dvirephaḥ kusumaikapātre papau priyāṃ svām anuvartamānaḥ / śṛṅgeṇa ca sparśanimīlitākṣīṃ mṛgīm akaṇḍūyata kṛṣṇasāraḥ // 3.36	upajāti : upendravajrā [11: jtjgg], indravajrā [11: ttjgg]
dadau rasāt paṅkajareṇugandhi gajāya gaṇḍūṣajalaṃ kareṇuḥ / ardhopabhuktena bisena jāyāṃ saṃbhāvayām āsa rathāṅganāmā // 3.37	upajāti : upendravajrā [11: jtjgg], indravajrā [11: ttjgg]
gītāntareṣu śramavārileśaiḥ kiṃcitsamucchvāsitapatralekham / puṣpāsavāghūrṇitanetraśobhi priyāmukhaṃ kiṃpuruṣaś cucumbe // 3.38	upajāti : upendravajrā [11: jtjgg], indravajrā [11: ttjgg]
paryāptapuṣpastabakastanābhyaḥ sphuratpravālauṣṭhamanoharābhyaḥ / latāvadhūbhyas taravo 'py avāpur vinamraśākhābhujabandhanāni // 3.39	upajāti : upendravajrā [11: jtjgg], indravajrā [11: ttjgg]
śrutāpsarogītir api kṣaṇe 'smin haraḥ prasaṃkhyānaparo babhūva / ātmeśvarāṇāṃ na hi jātu vighnāḥ samādhibhedaprabhavo bhavanti // 3.40	upajāti : upendravajrā [11: jtjgg], indravajrā [11: ttjgg]
latāgṛhadvāragato 'tha nandī vāmaprakoṣṭhārpitahemavetraḥ / mukhārpitaikāṅgulisaṃjñayaiva mā cāpalāyeti gaṇān vyanaiṣīt // 3.41	upajāti : upendravajrā [11: jtjgg], indravajrā [11: ttjgg]
niṣkampavṛkṣaṃ nibhṛtadvirephaṃ mūkāṇḍajaṃ śāntamṛgapracāram / tacchāsanāt kānanam eva sarvaṃ citrārpitārambham ivāvatasthe // 3.42	indravajrā [11: ttjgg]
dṛṣṭiprapātaṃ parihṛtya tasya kāmaḥ puraḥśukram iva prayāṇe / prānteṣu saṃsaktanameruśākhaṃ dhyānāspadaṃ bhūtapater viveśa // 3.43	indravajrā [11: ttjgg]
sa devadārudrumavedikāyāṃ śārdūlacarmavyavadhānavatyām / āsīnam āsannaśarīrapātas tryambakaṃ saṃyaminaṃ dadarśa // 3.44	ajñātasamavṛtta [12: mysy] (? 2 eva pādāḥ yuktāḥ)
paryaṅkabandhasthirapūrvakāyam ṛjvāyataṃ saṃnamitobhayāṃsam / uttānapāṇidvayasaṃniveśāt praphullarājīvam ivāṅkamadhye // 3.45	upajāti : upendravajrā [11: jtjgg], indravajrā [11: ttjgg]
bhujaṃgamonnaddhajaṭākalāpaṃ karṇāvasaktadviguṇākṣasūtram / kaṇṭhaprabhāsaṅgaviśeṣanīlāṃ kṛṣṇatvacaṃ granthimatīṃ dadhānam // 3.46	upajāti : upendravajrā [11: jtjgg], indravajrā [11: ttjgg]
kiṃcitprakāśastimitogratārair bhrūvikriyāyāṃ virataprasaṅgaiḥ / netrair avispanditapakṣmamālair lakṣyīkṛtaghrāṇam adhomayūkhaiḥ // 3.47	indravajrā [11: ttjgg]
avṛṣṭisaṃrambham ivāmbuvāham apām ivādhāram anuttaraṅgam / antaścarāṇāṃ marutāṃ nirodhān nivātaniṣkampam iva pradīpam // 3.48	upajāti : upendravajrā [11: jtjgg], indravajrā [11: ttjgg]
kapālanetrāntaralabdhamārgair jyotiḥprarohair uditaiḥ śirastaḥ / mṛṇālasūtrādhikasaukumāryāṃ bālasya lakṣmīṃ glapayantam indoḥ // 3.49	upajāti : upendravajrā [11: jtjgg], indravajrā [11: ttjgg]
mano navadvāraniṣiddhavṛtti hṛdi vyavasthāpya samādhivaśyam / yam akṣaraṃ kṣetravido vidus tam ātmānam ātmany avalokayantam // 3.50	upajāti : upendravajrā [11: jtjgg], indravajrā [11: ttjgg]
smaras tathābhūtam ayugmanetraṃ paśyann adūrān manasāpy adhṛṣyam / nālakṣayat sādhvasasannahastaḥ srastaṃ śaraṃ cāpam api svahastāt // 3.51	upajāti : upendravajrā [11: jtjgg], indravajrā [11: ttjgg]
nirvāṇabhūyiṣṭham athāsya vīryaṃ saṃdhukṣayantīva vapurguṇena / anuprayātā vanadevatābhyām adṛśyata sthāvararājakanyā // 3.52	upajāti : upendravajrā [11: jtjgg], indravajrā [11: ttjgg]
aśokanirbhartsitapadmarāgam ākṛṣṭahemadyutikarṇikāram / muktākalāpīkṛtasinduvāraṃ vasantapuṣpābharaṇaṃ vahantī // 3.53	upajāti : upendravajrā [11: jtjgg], indravajrā [11: ttjgg]
āvarjitā kiṃ cid iva stanābhyāṃ vāso vasānā taruṇārkarāgam / paryāptapuṣpastabakāvanamrā saṃcāriṇī pallavinī lateva // 3.54	indravajrā [11: ttjgg]
srastāṃ nitambād avalambamānā punaḥ-punaḥ kesaradāmakāñcīm / nyāsīkṛtāṃ sthānavidā smareṇa maurvīṃ dvitīyām iva kārmukasya // 3.55	upajāti : upendravajrā [11: jtjgg], indravajrā [11: ttjgg]
sugandhiniḥśvāsavivṛddhatṛṣṇaṃ bimbādharāsannacaraṃ dvirepham / pratikṣaṇaṃ saṃbhramaloladṛṣṭir līlāravindena nivārayantī // 3.56	upajāti : upendravajrā [11: jtjgg], indravajrā [11: ttjgg]
tāṃ vīkṣya sarvāvayavānavadyāṃ rater api hrīpadam ādadhānām / jitendriye śūlini puṣpacāpaḥ svakāryasiddhiṃ punar āśaśaṃse // 3.57	upajāti : upendravajrā [11: jtjgg], indravajrā [11: ttjgg]
bhaviṣyataḥ patyur umā ca śaṃbhoḥ samāsasāda pratihārabhūmim / yogāt sa cāntaḥ paramātmasaṃjñaṃ dṛṣṭvā paraṃ jyotir upārarāma // 3.58	upajāti : upendravajrā [11: jtjgg], indravajrā [11: ttjgg]
tato bhujaṃgādhipateḥ phaṇāgrair adhaḥ kathaṃ cid dhṛtabhūmibhāgaḥ / śanaiḥ kṛtaprāṇavimuktir īśaḥ paryaṅkabandhaṃ nibiḍaṃ bibheda // 3.59	upajāti : upendravajrā [11: jtjgg], indravajrā [11: ttjgg]
tasmai śaśaṃsa praṇipatya nandī śuśrūṣayā śailasutām upetām / praveśayām āsa ca bhartur enāṃ bhrūkṣepamātrānumatapraveśām // 3.60	upajāti : upendravajrā [11: jtjgg], indravajrā [11: ttjgg]
tasyāḥ sakhībhyāṃ praṇipātapūrvaṃ svahastalūnaḥ śiśirātyayasya / vyakīryata tryambakapādamūle puṣpoccayaḥ pallavabhaṅgabhinnaḥ // 3.61	upajāti : upendravajrā [11: jtjgg], indravajrā [11: ttjgg]
umāpi nīlālakamadhyaśobhi visraṃsayantī navakarṇikāram / cakāra karṇacyutapallavena mūrdhnā praṇāmaṃ vṛṣabhadhvajāya // 3.62	upajāti : upendravajrā [11: jtjgg], indravajrā [11: ttjgg]
ananyabhājaṃ patim āpnuhīti sā tathyam evābhihitā bhavena / na hīśvaravyāhṛtayaḥ kadā cit puṣyanti loke viparītam artham // 3.63	upajāti : upendravajrā [11: jtjgg], indravajrā [11: ttjgg]
kāmas tu bāṇāvasaraṃ pratīkṣya pataṅgavad vahnimukhaṃ vivikṣuḥ / umāsamakṣaṃ harabaddhalakṣyaḥ śarāsanajyāṃ muhur āmamarśa // 3.64	upajāti : upendravajrā [11: jtjgg], indravajrā [11: ttjgg]
athopaninye giriśāya gaurī tapasvine tāmrarucā kareṇa / viśoṣitāṃ bhānumato mayūkhair mandākinīpuṣkarabījamālām // 3.65	upajāti : upendravajrā [11: jtjgg], indravajrā [11: ttjgg]
pratigrahītuṃ praṇayipriyatvāt trilocanas tām upacakrame ca / saṃmohanaṃ nāma ca puṣpadhanvā dhanuṣy amoghaṃ samadhatta bāṇam // 3.66	upajāti : upendravajrā [11: jtjgg], indravajrā [11: ttjgg]
haras tu kiṃcitpariluptadhairyaś candrodayārambha ivāmburāśiḥ / umāmukhe bimbaphalādharoṣṭhe vyāpārayām āsa vilocanāni // 3.67	upajāti : upendravajrā [11: jtjgg], indravajrā [11: ttjgg]
vivṛṇvatī śailasutāpi bhāvam aṅgaiḥ sphuradbālakadambakalpaiḥ / sācīkṛtā cārutareṇa tasthau mukhena paryastavilocanena // 3.68	upajāti : upendravajrā [11: jtjgg], indravajrā [11: ttjgg]
athendriyakṣobham ayugmanetraḥ punar vaśitvād balavan nigṛhya / hetuṃ svacetovikṛter didṛkṣur diśām upānteṣu sasarja dṛṣṭim // 3.69	upajāti : upendravajrā [11: jtjgg], indravajrā [11: ttjgg]
sa dakṣiṇāpāṅganiviṣṭamuṣṭiṃ natāṃsam ākuñcitasavyapādam / dadarśa cakrīkṛtacārucāpaṃ prahartum abhyudyatam ātmayonim // 3.70	upendravajrā [11: jtjgg]
tapaḥparāmarśavivṛddhamanyor bhrūbhaṅgaduṣprekṣyamukhasya tasya / sphurann udarciḥ sahasā tṛtīyād akṣṇaḥ kṛśānuḥ kila niṣpapāta // 3.71	upajāti : upendravajrā [11: jtjgg], indravajrā [11: ttjgg]
krodhaṃ prabho saṃhara saṃhareti yāvad giraḥ khe marutāṃ caranti / tāvat sa vahnir bhavanetrajanmā bhasmāvaśeṣaṃ madanaṃ cakāra // 3.72	indravajrā [11: ttjgg]
tīvrābhiṣaṅgaprabhaveṇa vṛttim mohena saṃstambhayatendriyāṇām / ajñātabhartṛvyasanā muhūrtaṃ kṛtopakāreva ratir babhūva // 3.73	upajāti : upendravajrā [11: jtjgg], indravajrā [11: ttjgg]
tam āśu vighnaṃ tapasas tapasvī vanaspatiṃ vajra ivāvabhajya / strīsaṃnikarṣaṃ parihartum icchann antardadhe bhūtapatiḥ sabhūtaḥ // 3.74	upajāti : upendravajrā [11: jtjgg], indravajrā [11: ttjgg]
śailātmajāpi pitur ucchiraso 'bhilāṣaṃ vyarthaṃ samarthya lalitaṃ vapur ātmanaś ca / sakhyoḥ samakṣam iti cādhikajātalajjā śūnyā jagāma bhavanābhimukhī kathaṃ cit // 3.75	vasantatilakā [14: tBjjgg]
sapadi mukulitākṣīṃ rudrasaṃrambhabhītyā duhitaram anukampyām adrir ādāya dorbhyām / suragaja iva bibhrat padminīṃ dantalagnāṃ pratipathagatir āsīd vegadīrghīkṛtāṅgaḥ // 3.76	mālinī [15: nnmyy]
atha mohaparāyaṇā satī vivaśā kāmavadhūr vibodhitā / vidhinā pratipādayiṣyatā navavaidhavyam asahyavedanam // 4.1	viyoginī = [10: ssjg] 1,3 + [11: sBrlg] 2,4
avadhānapare cakāra sā pralayāntonmiṣite vilocane / na viveda tayor atṛptayoḥ priyam atyantaviluptadarśanam // 4.2	viyoginī = [10: ssjg] 1,3 + [11: sBrlg] 2,4
ayi jīvitanātha jīvasīty abhidhāyotthitayā tayā puraḥ / dadṛśe puruṣākṛti kṣitau harakopānalabhasma kevalam // 4.3	viyoginī = [10: ssjg] 1,3 + [11: sBrlg] 2,4
atha sā punar eva vihvalā vasudhāliṅganadhūsarastanī / vilalāpa vikīrṇamūrdhajā samaduḥkhām iva kurvatī sthalīm // 4.4	viyoginī = [10: ssjg] 1,3 + [11: sBrlg] 2,4
upamānam abhūd vilāsināṃ karaṇaṃ yat tava kāntimattayā / tad idaṃ gatam īdṛśīṃ daśāṃ na vidīrye kaṭhināḥ khalu striyaḥ // 4.5	viyoginī = [10: ssjg] 1,3 + [11: sBrlg] 2,4
kva nu māṃ tvadadhīnajīvitāṃ vinikīrya kṣaṇabhinnasauhṛdaḥ / nalinīṃ kṣatasetubandhano jalasaṃghāta ivāsi vidrutaḥ // 4.6	viyoginī = [10: ssjg] 1,3 + [11: sBrlg] 2,4
kṛtavān asi vipriyaṃ na me pratikūlaṃ na ca te mayā kṛtam / kim akāraṇam eva darśanaṃ vilapantyai rataye na dīyate // 4.7	viyoginī = [10: ssjg] 1,3 + [11: sBrlg] 2,4
smarasi smara mekhalāguṇair uta gotraskhaliteṣu bandhanam / cyutakeśaradūṣitekṣaṇāny avataṃsotpalatāḍanāni vā // 4.8	viyoginī = [10: ssjg] 1,3 + [11: sBrlg] 2,4
hṛdaye vasasīti matpriyaṃ yad avocas tad avaimi kaitavam / upacārapadaṃ na ced idaṃ tvam anaṅgaḥ katham akṣatā ratiḥ // 4.9	viyoginī = [10: ssjg] 1,3 + [11: sBrlg] 2,4
paralokanavapravāsinaḥ pratipatsye padavīm ahaṃ tava / vidhinā jana eṣa vañcitas tvadadhīnaṃ khalu dehināṃ sukham // 4.10	viyoginī = [10: ssjg] 1,3 + [11: sBrlg] 2,4
rajanītimirāvaguṇṭhite puramārge ghanaśabdaviklavāḥ / vasatiṃ priya kāmināṃ priyās tvad ṛte prāpayituṃ ka īśvaraḥ // 4.11	viyoginī = [10: ssjg] 1,3 + [11: sBrlg] 2,4
nayanāny aruṇāni ghūrṇayan vacanāni skhalayan pade-pade / asati tvayi vāruṇīmadaḥ pramadānām adhunā viḍambanā // 4.12	viyoginī = [10: ssjg] 1,3 + [11: sBrlg] 2,4
avagamya kathīkṛtaṃ vapuḥ priyabandhos tava niṣphalodayaḥ / bahule 'pi gate niśākaras tanutāṃ duḥkham anaṅga mokṣyati // 4.13	viyoginī = [10: ssjg] 1,3 + [11: sBrlg] 2,4
haritāruṇacārubandhanaḥ kalapuṃskokilaśabdasūcitaḥ / vada saṃprati kasya bāṇatāṃ navacūtaprasavo gamiṣyati // 4.14	viyoginī = [10: ssjg] 1,3 + [11: sBrlg] 2,4
alipaṅktir anekaśas tvayā guṇakṛtye dhanuṣo niyojitā / virutaiḥ karuṇasvanair iyaṃ guruśokām anuroditīva mām // 4.15	viyoginī = [10: ssjg] 1,3 + [11: sBrlg] 2,4
pratipadya manoharaṃ vapuḥ punar apy ādiśa tāvad utthitaḥ / ratidūtipadeṣu kokilāṃ madhurālāpanisargapaṇḍitām // 4.16	viyoginī = [10: ssjg] 1,3 + [11: sBrlg] 2,4
śirasā praṇipatya yācitāny upagūḍhāni savepathūni ca / suratāni ca tāni te rahaḥ smara saṃsmṛtya na śāntir asti me // 4.17	viyoginī = [10: ssjg] 1,3 + [11: sBrlg] 2,4
racitaṃ ratipaṇḍita tvayā svayam aṅgeṣu mamedam ārtavam / dhriyate kusumaprasādhanaṃ tava tac cāru vapur na dṛśyate // 4.18	viyoginī = [10: ssjg] 1,3 + [11: sBrlg] 2,4
vibudhair asi yasya dāruṇair asamāpte parikarmaṇi smṛtaḥ / tam imaṃ kuru dakṣiṇetaraṃ caraṇaṃ nirmitarāgam ehi me // 4.19	viyoginī = [10: ssjg] 1,3 + [11: sBrlg] 2,4
aham etya pataṅgavartmanā punar aṅkāśrayiṇī bhavāmi te / caturaiḥ surakāminījanaiḥ priya yāvan na vilobhyase divi // 4.20	viyoginī = [10: ssjg] 1,3 + [11: sBrlg] 2,4
madanena vinākṛtā ratiḥ kṣaṇamātraṃ kila jīviteti me / vacanīyam idaṃ vyavasthitaṃ ramaṇa tvām anuyāmi yady api // 4.21	viyoginī = [10: ssjg] 1,3 + [11: sBrlg] 2,4
kriyatāṃ katham antyamaṇḍanaṃ paralokāntaritasya te mayā / samam eva gato 'sy atarkitāṃ gatim aṅgena ca jīvitena ca // 4.22	viyoginī = [10: ssjg] 1,3 + [11: sBrlg] 2,4
ṛjutāṃ nayataḥ smarāmi te śaram utsaṅganiṣaṇṇadhanvanaḥ / madhunā saha sasmitaṃ kathāṃ nayanopāntavilokitaṃ ca yat // 4.23	viyoginī = [10: ssjg] 1,3 + [11: sBrlg] 2,4
kva nu te hṛdayaṃgamaḥ sakhā kusumāyojitakārmuko madhuḥ / na khalūgraruṣā pinākinā gamitaḥ so 'pi suhṛdgatāṃ gatim // 4.24	viyoginī = [10: ssjg] 1,3 + [11: sBrlg] 2,4
atha taiḥ paridevitākṣarair hṛdaye digdhaśarair ivārditaḥ / ratim abhyupapattum āturāṃ madhur ātmānam adarśayat puraḥ // 4.25	viyoginī = [10: ssjg] 1,3 + [11: sBrlg] 2,4
tam avekṣya ruroda sā bhṛśaṃ stanasaṃbādham uro jaghāna ca / svajanasya hi duḥkham agrato vivṛtadvāram ivopajāyate // 4.26	viyoginī = [10: ssjg] 1,3 + [11: sBrlg] 2,4
iti cainam uvāca duḥkhitā suhṛdaḥ paśya vasanta kiṃ sthitam / yad idaṃ kaṇaśaḥ prakīryate pavanair bhasma kapotakarburam // 4.27	viyoginī = [10: ssjg] 1,3 + [11: sBrlg] 2,4
ayi saṃprati dehi darśanaṃ smara paryutsuka eṣa mādhavaḥ / dayitāsv anavasthitaṃ nṛṇāṃ na khalu prema calaṃ suhṛjjane // 4.28	viyoginī = [10: ssjg] 1,3 + [11: sBrlg] 2,4
amunā nanu pārśvavartinā jagad ājñāṃ sasurāsuraṃ tava / bisatantuguṇasya kāritaṃ dhanuṣaḥ pelavapuṣpapatriṇaḥ // 4.29	viyoginī = [10: ssjg] 1,3 + [11: sBrlg] 2,4
gata eva na te nivartate sa sakhā dīpa ivānilāhataḥ / aham asya daśeva paśya mām aviṣahyavyasanapradhūṣitām // 4.30	viyoginī = [10: ssjg] 1,3 + [11: sBrlg] 2,4
vidhinā kṛtam ardhavaiśasaṃ nanu mām kāmavadhe vimuñcatā / anaghāpi hi saṃśrayadrume gajabhagne patanāya vallarī // 4.31	viyoginī = [10: ssjg] 1,3 + [11: sBrlg] 2,4
tad idaṃ kriyatām anantaraṃ bhavatā bandhujanaprayojanam / vidhurāṃ jvalanātisarjanān nanu māṃ prāpaya patyur antikam // 4.32	viyoginī = [10: ssjg] 1,3 + [11: sBrlg] 2,4
śaśinā saha yāti kaumudī saha meghena taḍit pralīyate / pramadāḥ pativartmagā iti pratipannaṃ hi vicetanair api // 4.33	viyoginī = [10: ssjg] 1,3 + [11: sBrlg] 2,4
amunaiva kaṣāyitastanī subhagena priyagātrabhasmanā / navapallavasaṃstare yathā racayiṣyāmi tanuṃ vibhāvasau // 4.34	viyoginī = [10: ssjg] 1,3 + [11: sBrlg] 2,4
kusumāstaraṇe sahāyatāṃ bahuśaḥ saumya gatas tvam āvayoḥ / kuru saṃprati tāvad āśu me praṇipātāñjaliyācitaś citām // 4.35	viyoginī = [10: ssjg] 1,3 + [11: sBrlg] 2,4
tad anu jvalanaṃ madarpitaṃ tvarayer dakṣiṇavātavījanaiḥ / viditaṃ khalu te yathā smaraḥ kṣaṇam apy utsahate na māṃ vinā // 4.36	viyoginī = [10: ssjg] 1,3 + [11: sBrlg] 2,4
iti cāpi vidhāya dīyatāṃ salilasyāñjalir eka eva nau / avibhajya paratra taṃ mayā sahitaḥ pāsyati te sa bāndhavaḥ // 4.37	viyoginī = [10: ssjg] 1,3 + [11: sBrlg] 2,4
paralokavidhau ca mādhava smaram uddiśya vilolapallavāḥ / nivapeḥ sahakāramañjarīḥ priyacūtaprasavo hi te sakhā // 4.38	viyoginī = [10: ssjg] 1,3 + [11: sBrlg] 2,4
iti devavimuktaye sthitāṃ ratim ākāśabhavā sarasvatī / śapharīṃ hradaśoṣaviklavāṃ prathamā vṛṣṭir ivānvakampata // 4.39	viyoginī = [10: ssjg] 1,3 + [11: sBrlg] 2,4
kusumāyudhapatni durlabhas tava bhartā na cirād bhaviṣyati / śṛṇu yena sa karmaṇā gataḥ śalabhatvaṃ haralocanārciṣi // 4.40	viyoginī = [10: ssjg] 1,3 + [11: sBrlg] 2,4
abhilāṣam udīritendriyaḥ svasutāyām akarot prajāpatiḥ / atha tena nigṛhya vikriyām abhiśaptaḥ phalam etad anvabhūt // 4.41	viyoginī = [10: ssjg] 1,3 + [11: sBrlg] 2,4
pariṇeṣyati pārvatīṃ yadā tapasā tatpravaṇīkṛto haraḥ / upalabdhasukhas tadā smaraṃ vapuṣā svena niyojayiṣyati // 4.42	viyoginī = [10: ssjg] 1,3 + [11: sBrlg] 2,4
iti cāha sa dharmayācitaḥ smaraśāpāvadhidāṃ sarasvatīm / aśaner amṛtasya cobhayor vaśinaś cāmbudharāś ca yonayaḥ // 4.43	viyoginī = [10: ssjg] 1,3 + [11: sBrlg] 2,4
tad idaṃ parirakṣa śobhane bhavitavyapriyasaṃgamaṃ vapuḥ / ravipītajalā tapātyaye punar oghena hi yujyate nadī // 4.44	viyoginī = [10: ssjg] 1,3 + [11: sBrlg] 2,4
itthaṃ rateḥ kim api bhūtam adṛśyarūpaṃ mandīcakāra maraṇavyavasāyabuddhim / tatpratyayāc ca kusumāyudhabandhur enām āśvāsayat sucaritārthapadair vacobhiḥ // 4.45	vasantatilakā [14: tBjjgg]
atha madanavadhūr upaplavāntaṃ vyasanakṛśā paripālayāṃ babhūva / śaśina iva divātanasya lekhā kiraṇaparikṣayadhūsarā pradoṣam // 4.46	puṣpitāgrā = [12: nnry] 1,3 + [12: njjrg] 2,4
tathā samakṣaṃ dahatā manobhavaṃ pinākinā bhagnamanorathā satī / nininda rūpaṃ hṛdayena pārvatī priyeṣu saubhāgyaphalā hi cārutā // 5.1	vaṃśastha [12: jtjr]
iyeṣa sā kartum avandhyarūpatāṃ samādhim āsthāya tapobhir ātmanaḥ / avāpyate vā katham anyathā dvayaṃ tathāvidhaṃ prema patiś ca tādṛśaḥ // 5.2	vaṃśastha [12: jtjr]
niśamya caināṃ tapase kṛtodyamāṃ sutāṃ girīśapratisaktamānasām / uvāca menā parirabhya vakṣasā nivārayantī mahato munivratāt // 5.3	vaṃśastha [12: jtjr]
manīṣitāḥ santi gṛhe 'pi devatās tapaḥ kva vatse kva ca tāvakaṃ vapuḥ / padaṃ saheta bhramarasya pelavaṃ śirīśapuṣpaṃ na punaḥ patatriṇaḥ // 5.4	vaṃśastha [12: jtjr]
iti dhruvecchām anuśāsatī sutāṃ śaśāka menā na niyantum udyamāt / ka īpsitārthasthiraniścayaṃ manaḥ payaś ca nimnābhimukhaṃ pratīpayet // 5.5	vaṃśastha [12: jtjr]
kadā cid āsannasakhīmukhena sā manorathajñaṃ pitaraṃ manasvinī / ayācatāraṇyanivāsam ātmanaḥ phalodayāntāya tapaḥsamādhaye // 5.6	vaṃśastha [12: jtjr]
athānurūpābhiniveśatoṣiṇā kṛtābhyanujñā guruṇā garīyasā / prajāsu paścāt prathitaṃ tadākhyayā jagāma gaurī śikharaṃ śikhaṇḍimat // 5.7	vaṃśastha [12: jtjr]
vimucya sā hāram ahāryaniścayā vilolayaṣṭipraviluptacandanam / babandha bālāruṇababhru valkalaṃ payodharotsedhaviśīrṇasaṃhati // 5.8	vaṃśastha [12: jtjr]
yathā prasiddhair madhuraṃ śiroruhair jaṭābhir apy evam abhūt tadānanam / na śaṭpadaśreṇibhir eva paṅkajaṃ saśaivalāsaṅgam api prakāśate // 5.9	vaṃśastha [12: jtjr]
pratikṣaṇaṃ sā kṛtaromavikriyāṃ vratāya mauñjīṃ triguṇāṃ babhāra yām / akāri tatpūrvanibaddhayā tayā sarāgam asyā rasanāguṇāspadam // 5.10	vaṃśastha [12: jtjr]
visṛṣṭarāgād adharān nivartitaḥ stanāṅgarāgāruṇitāc ca kandukāt / kuśāṅkurādānaparikṣatāṅguliḥ kṛto 'kṣasūtrapraṇayī tayā karaḥ // 5.11	vaṃśastha [12: jtjr]
mahārhaśayyāparivartanacyutaiḥ svakeśapuṣpair api yā sma dūyate / aśeta sā bāhulatopadhāyinī niṣeduṣī sthaṇḍila eva kevale // 5.12	vaṃśastha [12: jtjr]
punar grahītuṃ niyamasthayā tayā dvaye 'pi nikṣepa ivārpitam dvayam / latāsu tanvīṣu vilāsaceṣṭitaṃ viloladṛṣṭaṃ hariṇāṅganāsu ca // 5.13	vaṃśastha [12: jtjr]
atandritā sā svayam eva vṛkṣakān ghaṭastanaprasravaṇair vyavardhayat / guho 'pi yeṣāṃ prathamāptajanmanāṃ na putravātsalyam apākariṣyati // 5.14	vaṃśastha [12: jtjr]
araṇyabījāñjalidānalālitās tathā ca tasyāṃ hariṇā viśaśvasuḥ / yathā tadīyair nayanaiḥ kutūhalāt puraḥ sakhīnām amimīta locane // 5.15	vaṃśastha [12: jtjr]
kṛtābhiśekāṃ hutajātavedasaṃ tvaguttarāsaṅgavatīm adhītinīm / digdṛkṣavas tām ṛṣayo 'bhyupāgaman na dharmavṛddheṣu vayaḥ samīkṣyate // 5.16	vaṃśastha [12: jtjr] (? 3 eva pādāḥ yuktāḥ)
virodhisattvojjhitapūrvamatsaraṃ drumair abhīṣṭaprasavārcitātithi / navoṭajābhyantarasaṃbhṛtānalaṃ tapovanaṃ tac ca babhūva pāvanam // 5.17	vaṃśastha [12: jtjr]
yadā phalaṃ pūrvatapaḥsamādhinā na tāvatā labhyam amaṃsta kāṅkṣitam / tadānapekṣya svaśarīramārdavaṃ tapo mahat sā carituṃ pracakrame // 5.18	vaṃśastha [12: jtjr]
klamaṃ yayau kandukalīlayāpi yā tayā munīnāṃ caritaṃ vyagāhyata / dhruvaṃ vapuḥ kāñcanapadmanirmitaṃ mṛdu prakṛtyā ca sasāram eva ca // 5.19	vaṃśastha [12: jtjr]
śucau caturṇāṃ jvalatāṃ havirbhujāṃ śucismitā madhyagatā sumadhyamā / vijitya netrapratighātinīṃ prabhām ananyadṛṣṭiḥ savitāram aikṣata // 5.20	vaṃśastha [12: jtjr]
tathābhitaptaṃ savitur gabhastibhir mukhaṃ tadīyaṃ kamalaśriyaṃ dadhau / apāṅgayoḥ kevalam asya dīrghayoḥ śanaiḥ-śanaiḥ śyāmikayā kṛtaṃ padam // 5.21	vaṃśastha [12: jtjr]
ayācitopasthitam ambu kevalaṃ rasātmakasyoḍupateś ca raśmayaḥ / babhūva tasyāḥ kila pāraṇāvidhir na vṛkṣavṛttivyatiriktasādhanaḥ // 5.22	vaṃśastha [12: jtjr]
nikāmataptā vividhena vahninā nabhaścareṇendhanasaṃbhṛtena ca / tapātyaye vāribhir ukṣitā navair bhuvā sahoṣmāṇam amuñcad ūrdhvagam // 5.23	vaṃśastha [12: jtjr]
sthitāḥ kṣaṇaṃ pakṣmasu tāḍitādharāḥ payodharotsedhanipātacūrṇitāḥ / valīṣu tasyāḥ skhalitāḥ prapedire cireṇa nābhiṃ prathamodabindavaḥ // 5.24	vaṃśastha [12: jtjr]
śilāśayāṃ tām aniketavāsinīṃ nirantarāsv antaravātavṛṣṭiṣu / vyalokayann unmiṣitais taḍinmayair mahātapaḥsākṣya iva sthitāḥ kṣapāḥ // 5.25	vaṃśastha [12: jtjr]
nināya sātyantahimotkirānilāḥ sahasyarātrīr udavāsatatparā / parasparākrandini cakravākayoḥ puro viyukte mithune kṛpāvatī // 5.26	vaṃśastha [12: jtjr]
mukhena sā padmasugandhinā niśi pravepamānādharapatraśobhinā / tuṣāravṛṣṭikṣatapadmasaṃpadāṃ sarojasaṃdhānam ivākarod apām // 5.27	vaṃśastha [12: jtjr]
svayaṃviśīrṇadrumaparṇavṛttitā parā hi kāṣṭhā tapasas tayā punaḥ / tad apy apākīrṇam ataḥ priyaṃvadāṃ vadanty aparṇeti ca tāṃ purāvidaḥ // 5.28	vaṃśastha [12: jtjr]
mṛṇālikāpelavam evamādibhir vrataiḥ svam aṅgaṃ glapayanty aharniśam / tapaḥ śarīraiḥ kaṭhinair upārjitaṃ tapasvināṃ dūram adhaś cakāra sā // 5.29	vaṃśastha [12: jtjr]
athājināṣāḍhadharaḥ pragalbhavāg jvalann iva brahmamayena tejasā / viveśa kaścij jaṭilas tapovanaṃ śarīrabaddhaḥ prathamāśramo yathā // 5.30	vaṃśastha [12: jtjr]
tam ātitheyī bahumānapūrvayā saparyayā pratyudiyāya pārvatī / bhavanti sāmye 'pi niviṣṭacetasāṃ vapurviśeṣeṣv atigauravāḥ kriyāḥ // 5.31	vaṃśastha [12: jtjr]
vidhiprayuktāṃ parigṛhya satkriyāṃ pariśramaṃ nāma vinīya ca kṣaṇam / umāṃ sa paśyann ṛjunaiva cakṣuṣā pracakrame vaktum anujjhitakramaḥ // 5.32	vaṃśastha [12: jtjr]
api kriyārthaṃ sulabhaṃ samitkuśaṃ jalāny api snānavidhikṣamāṇi te / api svaśaktyā tapasi pravartase śarīram ādyaṃ khalu dharmasādhanam // 5.33	vaṃśastha [12: jtjr]
api tvadāvarjitavārisaṃbhṛtaṃ pravālam āsām anubandhi vīrudhām / cirojjhitālaktakapāṭalena te tulāṃ yad ārohati dantavāsasā // 5.34	vaṃśastha [12: jtjr]
api prasannaṃ hariṇeṣu te manaḥ karasthadarbhapraṇayāpahāriṣu / ya utpalākṣi pracalair vilocanais tavākṣisādṛśyam iva prayuñjate // 5.35	vaṃśastha [12: jtjr]
yad ucyate pārvati pāpavṛttaye na rūpam ity avyabhicāri tad vacaḥ / tathā hi te śīlam udāradarśane tapasvinām apy upadeśatāṃ gatam // 5.36	vaṃśastha [12: jtjr]
vikīrṇasaptarṣibaliprahāsibhis tathā na gāṅgaiḥ salilair divaś cyutaiḥ / yathā tvadīyaiś caritair anāvilair mahīdharaḥ pāvita eṣa sānvayaḥ // 5.37	vaṃśastha [12: jtjr]
anena dharmaḥ saviśeṣam adya me trivargasāraḥ pratibhāti bhāvini / tvayā manonirviṣayārthakāmayā yad eka eva pratigṛhya sevyate // 5.38	vaṃśastha [12: jtjr]
prayuktasatkāraviśeṣam ātmanā na māṃ paraṃ saṃpratipattum arhasi / yataḥ satāṃ saṃnatagātri saṃgataṃ manīṣibhiḥ sāptapadīnam ucyate // 5.39	vaṃśastha [12: jtjr]
ato 'tra kiṃcid bhavatīṃ bahukṣamāṃ dvijātibhāvād upapannacāpalaḥ / ayaṃ janaḥ praṣṭumanās tapodhane na ced rahasyaṃ prativaktum arhasi // 5.40	vaṃśastha [12: jtjr]
kule prasūtiḥ prathamasya vedhasas trilokasaundaryam ivoditaṃ vapuḥ / amṛgyam aiśvaryasukhaṃ navaṃ vayas tapaḥphalaṃ syāt kim ataḥ paraṃ vada // 5.41	vaṃśastha [12: jtjr]
bhavaty aniṣṭād api nāma duḥsahān manasvinīnāṃ pratipattir īdṛśī / vicāramārgaprahitena cetasā na dṛśyate tac ca kṛśodari tvayi // 5.42	vaṃśastha [12: jtjr]
alabhyaśokābhibhaveyam ākṛtir vimānanā subhru kutaḥ pitur gṛhe / parābhimarśo na tavāsti kaḥ karaṃ prasārayet pannagaratnasūcaye // 5.43	vaṃśastha [12: jtjr]
kim ity apāsyābharaṇāni yauvane dhṛtaṃ tvayā vārddhakaśobhi valkalam / vada pradoṣe sphuṭacandratārake vibhāvarī yady aruṇāya kalpate // 5.44	vaṃśastha [12: jtjr]
divaṃ yadi prārthayase vṛthā śramaḥ pituḥ pradeśās tava devabhūmayaḥ / athopayantāram alaṃ samādhinā na ratnam anviṣyati mṛgyate hi tat // 5.45	vaṃśastha [12: jtjr]
niveditaṃ niśvasitena soṣmaṇā manas tu me saṃśayam eva gāhate / na dṛśyate prārthayitavya eva te bhaviṣyati prārthitadurlabhaḥ katham // 5.46	vaṃśastha [12: jtjr]
aho sthiraḥ ko 'pi tavepsito yuvā cirāya karṇotpalaśūnyatāṃ gate / upekṣate yaḥ ślathalambinīr jaṭāḥ kapoladeśe kalamāgrapiṅgalāḥ // 5.47	vaṃśastha [12: jtjr]
munivratais tvām atimātrakarśitāṃ divākarāpluṣṭavibhūṣaṇāspadām / śaśāṅkalekhām iva paśyato divā sacetasaḥ kasya mano na dūyate // 5.48	vaṃśastha [12: jtjr]
avaimi saubhāgyamadena vañcitaṃ tava priyaṃ yaś caturāvalokinaḥ / karoti lakṣyaṃ ciram asya cakṣuṣo na vaktram ātmīyam arālapakṣmaṇaḥ // 5.49	vaṃśastha [12: jtjr]
kiyac ciraṃ śrāmyasi gauri vidyate mamāpi pūrvāśramasaṃcitaṃ tapaḥ / tadardhabhāgena labhasva kāṅkṣitaṃ varaṃ tam icchāmi ca sādhu veditum // 5.50	vaṃśastha [12: jtjr]
iti praviśyābhihitā dvijanmanā manogataṃ sā na śaśāka śaṃsitum / atho vayasyāṃ paripārśvavartinīṃ vivartitānañjananetram aikṣata // 5.51	vaṃśastha [12: jtjr]
sakhī tadīyā tam uvāca varṇinaṃ nibodha sādho tava cet kutūhalam / yadartham ambhojam ivoṣṇavāraṇaṃ kṛtaṃ tapaḥsādhanam etayā vapuḥ // 5.52	vaṃśastha [12: jtjr]
iyaṃ mahendraprabhṛtīn adhiśriyaś caturdigīśān avamatya māninī / arūpahāryaṃ madanasya nigrahāt pinākapāṇiṃ patim āptum icchati // 5.53	vaṃśastha [12: jtjr]
asahyahuṃkāranivartitaḥ purā purārim aprāptamukhaḥ śilīmukhaḥ / imāṃ hṛdi vyāyatapātam akṣaṇod viśīrṇamūrter api puṣpadhanvanaḥ // 5.54	vaṃśastha [12: jtjr]
tadāprabhṛty unmadanā pitur gṛhe lalāṭikācandanadhūsarālakā / na jātu bālā labhate sma nirvṛtiṃ tuṣārasaṃghātaśilātaleṣv api // 5.55	vaṃśastha [12: jtjr]
upāttavarṇe carite pinākinaḥ sabāṣpakaṇṭhaskhalitaiḥ padair iyam / anekaśaḥ kinnararājakanyakā vanāntasaṃgītasakhīr arodayat // 5.56	vaṃśastha [12: jtjr]
tribhāgaśeṣāsu niśāsu ca kṣaṇam nimīlya netre sahasā vyabudhyata / kva nīlakaṇṭha vrajasīty alakṣyavāg asatyakaṇṭhārpitabāhubandhanā // 5.57	vaṃśastha [12: jtjr]
yadā budhaiḥ sarvagatas tvam ucyase na vetsi bhāvastham imaṃ janaṃ katham / iti svahastāllikhitaś ca mugdhayā rahasy upālabhyata candraśekharaḥ // 5.58	vaṃśastha [12: jtjr]
yadā ca tasyādhigame jagatpater apaśyad anyaṃ na vidhiṃ vicinvatī / tadā sahāsmābhir anujñayā guror iyaṃ prapannā tapase tapovanam // 5.59	vaṃśastha [12: jtjr]
drumeṣu sakhyā kṛtajanmasu svayaṃ phalaṃ tapaḥsākṣiṣu dṛṣṭam eṣv api / na ca prarohābhimukho 'pi dṛśyate manoratho 'syāḥ śaśimaulisaṃśrayaḥ // 5.60	vaṃśastha [12: jtjr]
na vedmi sa prārthitadurlabhaḥ kadā sakhībhir asrottaram īkṣitām imām / tapaḥkṛśām abhyupapatsyate sakhīṃ vṛṣeva sītāṃ tadavagrahakṣatām // 5.61	vaṃśastha [12: jtjr]
agūḍhasadbhāvam itīṅgitajñayā nivedito naiṣṭhikasundaras tayā / ayīdam evaṃ parihāsa ity umām apṛcchad avyañjitaharṣalakṣaṇaḥ // 5.62	vaṃśastha [12: jtjr]
athāgrahaste mukulīkṛtāṅgulau samarpayantī sphaṭikākṣamālikām / kathaṃ cid adres tanayā mitākṣaraṃ ciravyavasthāpitavāg abhāṣata // 5.63	vaṃśastha [12: jtjr]
yathā śrutaṃ vedavidāṃ vara tvayā jano 'yam uccaiḥpadalaṅghanotsukaḥ / tapaḥ kiledaṃ tadavāptisādhanaṃ manorathānām agatir na vidyate // 5.64	vaṃśastha [12: jtjr]
athāha varṇī vidito maheśvaras tadarthinī tvaṃ punar eva vartase / amaṅgalābhyāsaratiṃ vicintya taṃ tavānuvṛttiṃ na ca kartum utsahe // 5.65	vaṃśastha [12: jtjr]
avastunirbandhapare kathaṃ nu te karo 'yam āmuktavivāhakautukaḥ / kareṇa śaṃbhor valayīkṛtāhinā sahiṣyate tatprathamāvalambanam // 5.66	vaṃśastha [12: jtjr]
tvam eva tāvat paricintaya svayaṃ kadā cid ete yadi yogam arhataḥ / vadhūdukūlaṃ kalahaṃsalakṣaṇaṃ gajājinaṃ śoṇitabinduvarṣi ca // 5.67	vaṃśastha [12: jtjr]
catuṣkapuṣpaprakarāvikīrṇayoḥ paro 'pi ko nāma tavānumanyate / alaktakāṅkāni padāni pādayor vikīrṇakeśāsu paretabhūmiṣu // 5.68	vaṃśastha [12: jtjr]
ayuktarūpaṃ kim ataḥ paraṃ vada trinetravakṣaḥ sulabhaṃ tavāpi yat / stanadvaye 'smin haricandanāspade padaṃ citābhasmarajaḥ kariṣyati // 5.69	vaṃśastha [12: jtjr]
iyaṃ ca te 'nyā purato viḍambanā yad ūḍhayā vāraṇarājahāryayā / vilokya vṛddhokṣam adhiṣṭhitaṃ tvayā mahājanaḥ smeramukho bhaviṣyati // 5.70	vaṃśastha [12: jtjr]
dvayaṃ gataṃ saṃprati śocanīyatāṃ samāgamaprārthanayā kapālinaḥ / kalā ca sā kāntimatī kalāvatas tvam asya lokasya ca netrakaumudī // 5.71	vaṃśastha [12: jtjr]
vapur virūpākṣam alakṣyajanmatā digambaratvena niveditaṃ vasu / vareṣu yad bālamṛgākṣi mṛgyate tad asti kiṃ vyastam api trilocane // 5.72	vaṃśastha [12: jtjr]
nivartayāsmād asadīpsitān manaḥ kva tadvidhas tvaṃ kva ca puṇyalakṣaṇā / apekṣyate sādhujanena vaidikī śmaśānaśūlasya na yūpasatkriyā // 5.73	vaṃśastha [12: jtjr]
iti dvijātau pratikūlavādini pravepamānādharalakṣyakopayā / vikuñcitabhrūlatam āhite tayā vilocane tiryag upāntalohite // 5.74	vaṃśastha [12: jtjr]
uvāca cainaṃ paramārthato haraṃ na vetsi nūnaṃ yata evam āttha mām / alokasāmānyam acintyahetukaṃ dviṣanti mandāś caritaṃ mahātmanām // 5.75	vaṃśastha [12: jtjr]
vipatpratīkārapareṇa maṅgalaṃ niṣevyate bhūtisamutsukena vā / jagaccharaṇyasya nirāśiṣaḥ sataḥ kim ebhir āśopahatātmavṛttibhiḥ // 5.76	vaṃśastha [12: jtjr]
akiñcanaḥ san prabhavaḥ sa saṃpadāṃ trilokanāthaḥ pitṛsadmagocaraḥ / sa bhīmarūpaḥ śiva ity udīryate na santi yāthārthyavidaḥ pinākinaḥ // 5.77	vaṃśastha [12: jtjr]
vibhūṣaṇodbhāsi pinaddhabhogi vā gajājinālambi dukūladhāri vā / kapāli vā syād atha venduśekharaṃ na viśvamūrter avadhāryate vapuḥ // 5.78	vaṃśastha [12: jtjr]
tadaṅgasaṃsargam avāpya kalpate dhruvaṃ citābhasmarajo viśuddhaye / tathā hi nṛtyābhinayakriyācyutaṃ vilipyate maulibhir ambaraukasāṃ // 5.79	vaṃśastha [12: jtjr]
asaṃpadas tasya vṛṣeṇa gacchataḥ prabhinnadigvāraṇavāhano vṛṣā / karoti pādāv upagamya maulinā vinidramandārarajoruṇāṅgulī // 5.80	vaṃśastha [12: jtjr]
vivakṣatā doṣam api cyutātmanā tvayaikam īśaṃ prati sādhu bhāṣitam / yam āmananty ātmabhuvo 'pi kāraṇaṃ kathaṃ sa lakṣyaprabhavo bhaviṣyati // 5.81	vaṃśastha [12: jtjr]
alaṃ vivādena yathā śrutas tvayā tathāvidhas tāvad aśeṣam astu saḥ / mamātra bhāvaikarasaṃ manaḥ sthitaṃ na kāmavṛttir vacanīyam īkṣate // 5.82	vaṃśastha [12: jtjr]
nivāryatām āli kim apy ayaṃ baṭuḥ punar vivakṣuḥ sphuritottarādharaḥ / na kevalaṃ yo mahato 'pabhāṣate śṛṇoti tasmād api yaḥ sa pāpabhāk // 5.83	vaṃśastha [12: jtjr]
ito gamiśyāmy athaveti vādinī cacāla bālā stanabhinnavalkalā / svarūpam āsthāya ca tāṃ kṛtasmitaḥ samālalambe vṛṣarājaketanaḥ // 5.84	vaṃśastha [12: jtjr]
taṃ vīkṣya vepathumatī sarasāṅgayaṣṭir nikṣepaṇāya padam uddhṛtam udvahantī / mārgācalavyatikarākuliteva sindhuḥ śailādhirājatanayā na yayau na tasthau // 5.85	vasantatilakā [14: tBjjgg]
adyaprabhṛty avanatāṅgi tavāsmi dāsaḥ krītas tapobhir iti vādini candramaulau / ahnāya sā niyamajaṃ klamam utsasarja kleśaḥ phalena hi punar navatāṃ vidhatte // 5.86	vasantatilakā [14: tBjjgg]
atha viśvātmane gaurī saṃdideśa mithaḥ sakhīm / dātā me bhūbhṛtāṃ nāthaḥ pramāṇīkriyatām iti // 6.1	anuṣṭubh (1,2: pathyā, 3,4: pathyā)
tayā vyāhṛtasaṃdeśā sā babhau nibhṛtā priye / cūtayaṣṭir ivābhyāṣye madhau parabhṛtāmukhī // 6.2	anuṣṭubh (1,2: pathyā, 3,4: pathyā)
sa tatheti pratijñāya visṛjya katham apy umām / ṛṣīñ jyotirmayān sapta sasmāra smaraśāsanaḥ // 6.3	anuṣṭubh (1,2: pathyā, 3,4: pathyā)
te prabhāmaṇḍalair vyoma dyotayantas tapodhanāḥ / sārundhatīkāḥ sapadi prādur āsan puraḥ prabhoḥ // 6.4	anuṣṭubh (1,2: pathyā, 3,4: bha-vipulā)
āplutās tīramandārakusumotkiravīciṣu / ākāśagaṅgāsrotassu diṅnāgamadagandhiṣu // 6.5	anuṣṭubh (1,2: pathyā, 3,4: ma-vipulā)
muktāyajñopavītāni bibhrato haimavalkalāḥ / ratnākṣasūtrāḥ pravrajyāṃ kalpavṛkṣā ivāśritāḥ // 6.6	anuṣṭubh (1,2: pathyā, 3,4: ma-vipulā)
adhaḥpravarttitāśvena samāvarjitaketunā / sahasraraśminā śaśvat sapramāṇam udīkṣitāḥ // 6.7	anuṣṭubh (1,2: pathyā, 3,4: pathyā)
āsaktabāhulatayā sārdham uddhṛtayā bhuvā / mahāvarāhadaṃṣṭrāyāṃ viśrāntāḥ pralayāpadi // 6.8	anuṣṭubh (1,2: na-vipulā, 3,4: pathyā)
sargaśeṣapraṇayanād viśvayoner anantaram / purātanāḥ purāvidbhir dhātāra iti kīrtitāḥ // 6.9	anuṣṭubh (1,2: na-vipulā, 3,4: pathyā)
prāktanānāṃ viśuddhānāṃ paripākam upeyuṣām / tapasām upabhuñjānāḥ phalāny api tapasvinaḥ // 6.10	anuṣṭubh (1,2: pathyā, 3,4: pathyā)
teṣāṃ madhyagatā sādhvī patyuḥ pādārpitekṣaṇā / sākṣād iva tapaḥsiddhir babhāse bahv arundhatī // 6.11	anuṣṭubh (1,2: pathyā, 3,4: pathyā)
tām agauravabhedena munīṃś cāpaśyad īśvaraḥ / strī pumān ity anāsthaiṣā vṛttaṃ hi mahitaṃ satām // 6.12	anuṣṭubh (1,2: pathyā, 3,4: pathyā)
taddarśanād abhūc chambhor bhūyān dārārtham ādaraḥ / kriyāṇāṃ khalu dharmyāṇāṃ satpatnyo mūlasādhanam // 6.13	anuṣṭubh (1,2: pathyā, 3,4: pathyā)
dharmeṇāpi padaṃ śarve kārite pārvatīṃ prati / pūrvāparādhabhītasya kāmasyocchvāsitaṃ manaḥ // 6.14	anuṣṭubh (1,2: pathyā, 3,4: pathyā)
atha te munayaḥ sarve mānayitvā jagadgurum / idam ūcur anūcānāḥ prītikaṇṭakitatvacaḥ // 6.15	anuṣṭubh (1,2: pathyā, 3,4: pathyā)
yad brahma samyag āmnātaṃ yad agnau vidhinā hutam / yac ca taptaṃ tapas tasya vipakvaṃ phalam adya naḥ // 6.16	anuṣṭubh (1,2: pathyā, 3,4: pathyā)
yad adhyakṣeṇa jagatāṃ vayam āropitās tvayā / manorathasyāviṣayaṃ manoviṣayam ātmanaḥ // 6.17	anuṣṭubh (1,2: na-vipulā, 3,4: bha-vipulā)
yasya cetasi vartethāḥ sa tāvat kṛtināṃ varaḥ / kiṃ punar brahmayoner yas tava cetasi vartate // 6.18	anuṣṭubh (1,2: pathyā, 3,4: pathyā)
satyam arkāc ca somāc ca param adhyāsmahe padam / adya tūccaistaraṃ tasmāt smaraṇānugrahāt tava // 6.19	anuṣṭubh (1,2: pathyā, 3,4: pathyā)
tvatsaṃbhāvitam ātmānaṃ bahu manyāmahe vayam / prāyaḥ pratyayam ādhatte svaguṇeṣūttamādaraḥ // 6.20	anuṣṭubh (1,2: pathyā, 3,4: pathyā)
yā naḥ prītir virūpākṣa tvadanudhyānasaṃbhavā / sā kim āvedyate tubhyam antarātmāsi dehinām // 6.21	anuṣṭubh (1,2: pathyā, 3,4: pathyā)
sākṣād dṛṣṭo 'si na punar vidmas tvāṃ vayam añjasā / prasīda kathayātmānaṃ na dhiyāṃ pathi vartase // 6.22	anuṣṭubh (1,2: na-vipulā, 3,4: pathyā)
kiṃ yena sṛjasi vyaktam uta yena bibharṣi tat / atha viśvasya saṃhartā bhāgaḥ katama eṣa te // 6.23	anuṣṭubh (1,2: pathyā, 3,4: pathyā)
athavā sumahaty eṣā prārthanā deva tiṣṭhatu / cintitopasthitāṃs tāvac chādhi naḥ karavāma kim // 6.24	anuṣṭubh (1,2: pathyā, 3,4: pathyā)
atha mauligatasyendor viśadair daśanāṃśubhiḥ / upacinvan prabhāṃ tanvīṃ pratyāha parameśvaraḥ // 6.25	anuṣṭubh (1,2: pathyā, 3,4: pathyā)
viditaṃ vo yathā svārthā na me kāścit pravṛttayaḥ / nanu mūrtibhir aṣṭābhir itthaṃbhūto 'smi sūcitaḥ // 6.26	anuṣṭubh (1,2: pathyā, 3,4: pathyā)
so 'haṃ tṛṣṇāturair vṛṣṭiṃ vidyutvān iva cātakaiḥ / ariviprakṛtair devaiḥ prasūtiṃ prati yācitaḥ // 6.27	anuṣṭubh (1,2: pathyā, 3,4: pathyā)
ata āhartum icchāmi pārvatīm ātmajanmane / utpattaye havirbhoktur yajamāna ivāraṇim // 6.28	anuṣṭubh (1,2: pathyā, 3,4: pathyā)
tām asmadarthe yuṣmābhir yācitavyo himālayaḥ / vikriyāyai na kalpante saṃbandhāḥ sadanuṣṭhitāḥ // 6.29	anuṣṭubh (1,2: ma-vipulā, 3,4: pathyā)
unnatena sthitimatā dhuram udvahatā bhuvaḥ / tena yojitasaṃbandhaṃ vitta mām apy avañcitam // 6.30	anuṣṭubh (1,2: na-vipulā, 3,4: pathyā)
evaṃ vācyaḥ sa kanyārtham iti vo nopadiśyate / bhavatpraṇītam ācāram āmananti hi sādhavaḥ // 6.31	anuṣṭubh (1,2: pathyā, 3,4: pathyā)
āryāpy arundhatī tatra vyāpāraṃ kartuṃ arhati / prāyeṇaivaṃvidhe kārye purandhrīṇāṃ pragalbhatā // 6.32	anuṣṭubh (1,2: asamīcīna, 3,4: pathyā)
tat prayātauṣadhiprasthaṃ siddhaye himavatpuram / mahākośīprapāte 'smin saṃgamaḥ punar eva naḥ // 6.33	anuṣṭubh (1,2: pathyā, 3,4: pathyā)
tasmin saṃyaminām ādye jāte pariṇayonmukhe / jahuḥ parigrahavrīḍāṃ prājāpatyās tapasvinaḥ // 6.34	anuṣṭubh (1,2: pathyā, 3,4: pathyā)
tataḥ paramam ity uktvā pratasthe munimaṇḍalam / bhagavān api saṃprāptaḥ prathamoddiṣṭam āspadam // 6.35	anuṣṭubh (1,2: pathyā, 3,4: pathyā)
te cākāśam asiśyāmam utpatya paramarṣayaḥ / āsedur oṣadhiprasthaṃ manasā samaraṃhasaḥ // 6.36	anuṣṭubh (1,2: pathyā, 3,4: pathyā)
alakām ativāhyeva vasatiṃ vasusaṃpadām / svargābhiṣyandavamanaṃ kṛtvevopaniveśitam // 6.37	anuṣṭubh (1,2: pathyā, 3,4: na-vipulā)
gaṅgāsrotaḥparikṣiptavaprāntarjvalitauṣadhi / bṛhanmaṇiśilāsālaṃ guptāv api manoharam // 6.38	anuṣṭubh (1,2: pathyā, 3,4: pathyā)
jitasiṃhabhayā nāgā yatrāśvā bilayonayaḥ / yakṣāḥ kiṃpuruṣāḥ paurā yoṣito vanadevatāḥ // 6.39	anuṣṭubh (1,2: pathyā, 3,4: pathyā)
śikharāsaktameghānāṃ vyajante yatra veśmanām / anugarjitasaṃdigdhāḥ karaṇair murajasvanāḥ // 6.40	anuṣṭubh (1,2: pathyā, 3,4: pathyā)
yatra kalpadrumair eva vilolaviṭapāṃśukaiḥ / gṛhayantrapatākāśrīr apaurādaranirmitā // 6.41	anuṣṭubh (1,2: pathyā, 3,4: pathyā)
yatra sphaṭikaharmyeṣu naktam āpānabhūmiṣu / jyotiṣāṃ pratibimbāni prāpnuvanty upahāratām // 6.42	anuṣṭubh (1,2: pathyā, 3,4: pathyā)
yatrauṣadhiprakāśena naktaṃ darśitasaṃcarāḥ / anabhijñās tamisrāṇāṃ durdineṣv abhisārikāḥ // 6.43	anuṣṭubh (1,2: pathyā, 3,4: pathyā)
yauvanāntaṃ vayo yasminn ātaṅkaḥ kusumāyudhaḥ / ratikhedasamutpannā nidrā saṃjñāviparyayaḥ // 6.44	anuṣṭubh (1,2: pathyā, 3,4: pathyā)
bhrūbhedibhiḥ sakampoṣṭhair lalitāṅgulitarjanaiḥ / yatra kopaiḥ kṛtāḥ strīṇām āprasādārthinaḥ priyāḥ // 6.45	anuṣṭubh (1,2: pathyā, 3,4: pathyā)
saṃtānakatarucchāyāsuptavidyādharādhvagam / yasya copavanaṃ bāhyaṃ sugandhir gandhamādanaḥ // 6.46	anuṣṭubh (1,2: pathyā, 3,4: pathyā)
atha te munayo divyāḥ prekṣya haimavataṃ puram / svargābhisaṃdhisukṛtaṃ vañcanām iva menire // 6.47	anuṣṭubh (1,2: pathyā, 3,4: na-vipulā)
te sadmani girer vegād unmukhadvāḥsthavīkṣitāḥ / avaterur jaṭābhārair likhitānalaniścalaiḥ // 6.48	anuṣṭubh (1,2: pathyā, 3,4: pathyā)
gaganād avatīrṇā sā yathāvṛddhapurassarā / toyāntar bhāskarālīva reje muniparamparā // 6.49	anuṣṭubh (1,2: pathyā, 3,4: pathyā)
tān arghyān arghyam ādāya dūrāt pratyudyayau giriḥ / namayan sāragurubhiḥ pādanyāsair vasundharām // 6.50	anuṣṭubh (1,2: pathyā, 3,4: na-vipulā)
dhātutāmrādharaḥ prāṃśur devadārubṛhadbhujaḥ / prakṛtyaiva śiloraskaḥ suvyakto himavān iti // 6.51	anuṣṭubh (1,2: pathyā, 3,4: pathyā)
vidhiprayuktasatkāraiḥ svayaṃ mārgasya darśakaḥ / sa tair ākramayām āsa śuddhāntaṃ śuddhakarmabhiḥ // 6.52	anuṣṭubh (1,2: pathyā, 3,4: pathyā)
tatra vetrāsanāsīnān kṛtāsanaparigrahaḥ / ity uvāceśvarān vācaṃ prāñjaliḥ pṛthivīdharaḥ // 6.53	anuṣṭubh (1,2: pathyā, 3,4: pathyā)
apameghodayaṃ varṣam adṛṣṭakusumaṃ phalam / atarkitopapannaṃ vo darśanaṃ pratibhāti me // 6.54	anuṣṭubh (1,2: pathyā, 3,4: pathyā)
mūḍhaṃ buddham ivātmānaṃ haimībhūtam ivāyasam / bhūmer divam ivārūḍhaṃ manye bhavadanugrahāt // 6.55	anuṣṭubh (1,2: pathyā, 3,4: pathyā)
adyaprabhṛti bhūtānām adhigamyo 'smi śuddhaye / yad adhyāsitam arhadbhis tad dhi tīrthaṃ pracakṣate // 6.56	anuṣṭubh (1,2: pathyā, 3,4: pathyā)
avaimi pūtam ātmānaṃ dvayenaiva dvijottamāḥ / mūrdhni gaṅgāprapātena dhautapādāmbhasā ca vaḥ // 6.57	anuṣṭubh (1,2: pathyā, 3,4: pathyā)
jaṅgamaṃ praiṣyabhāve vaḥ sthāvaraṃ caraṇāṅkitam / vibhaktānugrahaṃ manye dvirūpam api me vapuḥ // 6.58	anuṣṭubh (1,2: pathyā, 3,4: pathyā)
bhavatsaṃbhāvanotthāya paritoṣāya mūrcchate / api vyāptadigantāni nāṅgāni prabhavanti me // 6.59	anuṣṭubh (1,2: pathyā, 3,4: pathyā)
na kevalaṃ darīsaṃsthaṃ bhāsvatāṃ darśanena vaḥ / antargatam apāstaṃ me rajaso 'pi paraṃ tamaḥ // 6.60	anuṣṭubh (1,2: pathyā, 3,4: pathyā)
kartavyaṃ vo na paśyāmi syāc cet kiṃ nopapadyate / śaṅke matpāvanāyaiva prasthānaṃ bhavatām iha // 6.61	anuṣṭubh (1,2: pathyā, 3,4: pathyā)
tathāpi tāvat kasmiṃś cid ājñāṃ me dātum arhatha / viniyogaprasādā hi kiṅkarāḥ prabhaviṣṇuṣu // 6.62	anuṣṭubh (1,2: ma-vipulā, 3,4: pathyā)
ete vayam amī dārāḥ kanyeyaṃ kulajīvitam / brūta yenātra vaḥ kāryam anāsthā bāhyavastuṣu // 6.63	anuṣṭubh (1,2: pathyā, 3,4: pathyā)
ity ūcivāṃs tam evārthaṃ darīmukhavisarpiṇā / dvir iva pratiśabdena vyājahāra himālayaḥ // 6.64	anuṣṭubh (1,2: pathyā, 3,4: pathyā)
athāṅgirasam agraṇyam udāharaṇavastuṣu / ṛṣayaś codayām āsuḥ pratyuvāca sa bhūdharam // 6.65	anuṣṭubh (1,2: pathyā, 3,4: pathyā)
upapannam idaṃ sarvam ataḥ param api tvayi / manasaḥ śikharāṇāṃ ca sadṛśī te samunnatiḥ // 6.66	anuṣṭubh (1,2: pathyā, 3,4: pathyā)
sthāne tvāṃ sthāvarātmānaṃ viṣṇum āhus tathā hi te / carācarāṇāṃ bhūtānāṃ kukṣir ādhāratāṃ gataḥ // 6.67	anuṣṭubh (1,2: pathyā, 3,4: ma-vipulā)
gām adhāsyat kathaṃ nāgo mṛṇālamṛdubhiḥ phaṇaiḥ / ā rasātalamūlāt tvam avālambiṣyathā na cet // 6.68	anuṣṭubh (1,2: pathyā, 3,4: pathyā)
acchinnāmalasaṃtānāḥ samudrormyanivāritāḥ / punanti lokān puṇyatvāt kīrtayaḥ saritaś ca te // 6.69	anuṣṭubh (1,2: pathyā, 3,4: ma-vipulā)
yathaiva ślāghyate gaṅgā pādena parameṣṭhinaḥ / prabhaveṇa dvitīyena tathaivocchirasā tvayā // 6.70	anuṣṭubh (1,2: pathyā, 3,4: pathyā)
tiryag ūrdhvam adhastāc ca vyāpako mahimā hareḥ / trivikramodyatasyāsīt sa ca svābhāvikas tava // 6.71	anuṣṭubh (1,2: pathyā, 3,4: pathyā)
yajñabhāgabhujāṃ madhye padam ātasthuṣā tvayā / uccair hiraṇmayaṃ śṛṅgaṃ sumeror vitathīkṛtam // 6.72	anuṣṭubh (1,2: pathyā, 3,4: pathyā)
kāṭhinyaṃ sthāvare kāye bhavatā sarvam arpitam / idaṃ tu bhaktinamraṃ te satām ārādhanaṃ vapuḥ // 6.73	anuṣṭubh (1,2: pathyā, 3,4: pathyā)
tad āgamanakāryaṃ naḥ śṛṇu kāryaṃ tavaiva tat / śreyasām upadeśāt tu vayam atrāṃśabhāginaḥ // 6.74	anuṣṭubh (1,2: pathyā, 3,4: pathyā)
aṇimādiguṇopetam aspṛṣṭapuruṣāntaram / śabdam īśvara ity uccaiḥ sārdhacandraṃ bibharti yaḥ // 6.75	anuṣṭubh (1,2: pathyā, 3,4: pathyā)
kalpitānyonyasāmarthyaiḥ pṛthivyādibhir ātmani / yenedaṃ dhriyate viśvaṃ dhuryair yānam ivādhvani // 6.76	anuṣṭubh (1,2: pathyā, 3,4: pathyā)
yogino yaṃ vicinvanti kṣetrābhyantaravartinam / anāvṛttibhayaṃ yasya padam āhur manīṣiṇaḥ // 6.77	anuṣṭubh (1,2: pathyā, 3,4: pathyā)
sa te duhitaraṃ sākṣāt sākṣī viśvasya karmaṇaḥ / vṛṇute varadaḥ śaṃbhur asmatsaṃkrāmitaiḥ padaiḥ // 6.78	anuṣṭubh (1,2: pathyā, 3,4: pathyā)
tam artham iva bhāratyā sutayā yoktum arhasi / aśocyā hi pituḥ kanyā sadbhartre pratipāditā // 6.79	anuṣṭubh (1,2: pathyā, 3,4: pathyā)
yāvad etāni bhūtāni sthāvarāṇi carāṇi ca / mātaraṃ kalpayanty enām īśo hi jagataḥ pitā // 6.80	anuṣṭubh (1,2: pathyā, 3,4: pathyā)
praṇamya śitikaṇṭhāya vibudhās tadanantaram / caraṇau rañjayanty asyāś cūḍāmaṇimarīcibhiḥ // 6.81	anuṣṭubh (1,2: pathyā, 3,4: pathyā)
umā vadhūr bhavān dātā yācitāra ime vayam / varaḥ śaṃbhur alaṃ hy eṣa tvatkulodbhūtaye vidhiḥ // 6.82	anuṣṭubh (1,2: pathyā, 3,4: pathyā)
astotuḥ stūyamānasya vandyasyānanyavandinaḥ / sutāsaṃbandhavidhinā bhava viśvaguror guruḥ // 6.83	anuṣṭubh (1,2: pathyā, 3,4: na-vipulā)
evaṃ vādini devarṣau pārśve pitur adhomukhī / līlākamalapatrāṇi gaṇayām āsa pārvatī // 6.84	anuṣṭubh (1,2: pathyā, 3,4: pathyā)
śailaḥ saṃpūrṇakāmo 'pi menāmukham udaikṣata / prāyeṇa gṛhiṇīnetrāḥ kanyārthe hi kuṭumbinaḥ // 6.85	anuṣṭubh (1,2: pathyā, 3,4: pathyā)
mene menāpi tat sarvaṃ patyuḥ kāryam abhīpsitam / bhavanty avyabhicāriṇyo bhartur iṣṭe pativratāḥ // 6.86	anuṣṭubh (1,2: pathyā, 3,4: pathyā)
idam atrottaraṃ nyāyyam iti buddhyā vimṛśya saḥ / ādade vacasām ante maṅgalālaṅkṛtāṃ sutām // 6.87	anuṣṭubh (1,2: pathyā, 3,4: pathyā)
ehi viśvātmane vatse bhikṣāsi parikalpitā / arthino munayaḥ prāptaṃ gṛhamedhiphalaṃ mayā // 6.88	anuṣṭubh (1,2: pathyā, 3,4: pathyā)
etāvad uktvā tanayām ṛṣīn āha mahīdharaḥ / iyaṃ namati vaḥ sarvāṃs trilocanavadhūr iti // 6.89	anuṣṭubh (1,2: bha-vipulā, 3,4: pathyā)
īpsitārthakriyodāraṃ te 'bhinandya girer vacaḥ / āśīrbhir edhayām āsuḥ puraḥpākābhir ambikām // 6.90	anuṣṭubh (1,2: pathyā, 3,4: pathyā)
tāṃ praṇāmādarasrastajāmbūnadavataṃsakām / aṅkam āropayām āsa lajjamānām arundhatī // 6.91	anuṣṭubh (1,2: pathyā, 3,4: pathyā)
tanmātaraṃ cāśrumukhīṃ duhitṛsnehaviklavām / varasyānanyapūrvasya viśokām akarod guṇaiḥ // 6.92	anuṣṭubh (1,2: bha-vipulā, 3,4: pathyā)
vaivāhikīṃ tithiṃ pṛṣṭās tatkṣaṇaṃ harabandhunā / te tryahād ūrdhvam ākhyāya celuś cīraparigrahāḥ // 6.93	anuṣṭubh (1,2: pathyā, 3,4: pathyā)
te himālayam āmantrya punaḥ prekṣya ca śūlinam / siddhaṃ cāsmai nivedyārthaṃ tadvisṛṣṭāḥ kham udyayuḥ // 6.94	anuṣṭubh (1,2: pathyā, 3,4: pathyā)
paśupatir api tāny ahāni kṛcchrād agamayad adrisutāsamāgamotkaḥ / kam aparam avaśaṃ na viprakuryur vibhum api taṃ yad amī spṛśanti bhāvāḥ // 6.95	puṣpitāgrā = [12: nnry] 1,3 + [12: njjrg] 2,4
athauṣadhīnām adhipasya vṛddhau tithau ca jāmitraguṇānvitāyām / sametabandhur himavān sutāyā vivāhadīkṣāvidhim anvatiṣṭhat // 7.1	upendravajrā [11: jtjgg]
vaivāhikaiḥ kautukasaṃvidhānair gṛhe gṛhe vyagrapuraṃdhrivargam / āsīt puraṃ sānumato 'nurāgād antaḥpuraṃ caikakulopameyam // 7.2	upajāti : upendravajrā [11: jtjgg], indravajrā [11: ttjgg]
saṃtānakākīrṇamahāpathaṃ tac cīnāṃśukaiḥ kalpitaketumālam / bhāsā jvalat kāñcanatoraṇānāṃ sthānāntarasvarga ivābabhāse // 7.3	indravajrā [11: ttjgg]
ekaiva satyām api putrapaṅktau cirasya dṛṣṭeva mṛtotthiteva / āsannapāṇigrahaṇeti pitror umā viśeṣocchvasitaṃ babhūva // 7.4	upajāti : upendravajrā [11: jtjgg], indravajrā [11: ttjgg]
aṅkād yayāv aṅkam udīritāśīḥ sā maṇḍanān maṇḍanam anvabhuṅkta / saṃbandhibhinno 'pi gireḥ kulasya snehas tadekāyatanaṃ jagāma // 7.5	indravajrā [11: ttjgg]
maitre muhūrte śaśalāñchanena yogaṃ gatāsūttaraphalgunīṣu / tasyāḥ śarīre pratikarma cakrur bandhustriyo yāḥ patiputravatyaḥ // 7.6	indravajrā [11: ttjgg]
sā gaurasiddhārthaniveśavadbhir dūrvāpravālaiḥ pratibhinnarāgam / nirnābhikauśeyam upāttabāṇam abhyaṅganepathyam alañcakāra // 7.7	indravajrā [11: ttjgg]
babhau ca saṃparkam upetya bālā navena dīkṣāvidhisāyakena / kareṇa bhānor bahulāvasāne saṃdhukṣyamāṇeva śaśāṅkalekhā // 7.8	upajāti : upendravajrā [11: jtjgg], indravajrā [11: ttjgg]
tāṃ lodhrakalkena hṛtāṅgatailām āśyānakāleyakṛtāṅgarāgām / vāso vasānām abhiṣekayogyaṃ nāryaś catuṣkābhimukhaṃ vyanaiṣuḥ // 7.9	indravajrā [11: ttjgg]
vinyastavaidūryaśilātale 'sminn aviddhamuktāphalabhakticitre / āvarjitāṣṭāpadakumbhatoyāḥ satūryam enāṃ snapayāṃ babhūvuḥ // 7.10	upajāti : upendravajrā [11: jtjgg], indravajrā [11: ttjgg]
sā maṅgalasnānaviśuddhagātrī gṛhītapatyudgamanīyavastrā / nirvṛttaparjanyajalābhiṣekā praphullakāśā vasudheva reje // 7.11	upajāti : upendravajrā [11: jtjgg], indravajrā [11: ttjgg]
tasmāt pradeśāc ca vitānavantaṃ yuktaṃ maṇistambhacatuṣṭayena / pativratābhiḥ parigṛhya ninye kḷptāsanaṃ kautukavedimadhyam // 7.12	upajāti : upendravajrā [11: jtjgg], indravajrā [11: ttjgg]
tāṃ prāṅmukhīṃ tatra niveśya tanvīṃ kṣaṇaṃ vyalambanta puro niṣaṇṇāḥ / bhūtārthaśobhāhriyamāṇanetrāḥ prasādhane sannihite 'pi nāryaḥ // 7.13	upajāti : upendravajrā [11: jtjgg], indravajrā [11: ttjgg]
dhūpoṣmaṇā tyājitam ārdrabhāvaṃ keśāntam antaḥkusumaṃ tadīyam / paryākṣipat kācid udārabandhaṃ dūrvāvatā pāṇḍumadhūkadāmnā // 7.14	indravajrā [11: ttjgg]
vinyastaśuklāguru cakrur asyā gorocanāpatravibhaṅgam aṅgam / sā cakravākāṅkitasaikatāyās trisrotasaḥ kāntim atītya tasthau // 7.15	indravajrā [11: ttjgg]
lagnadvirephaṃ paribhūya padmaṃ sameghalekhaṃ śaśinaś ca bimbam / tadānanaśrīr alakaiḥ prasiddhaiś ciccheda sādṛśyakathāprasaṅgam // 7.16	upajāti : upendravajrā [11: jtjgg], indravajrā [11: ttjgg]
karṇārpito lodhrakaṣāyarūkṣe gorocanākṣepanitāntagaure / tasyāḥ kapole parabhāgalābhād babandha cakṣūṃṣi yavaprarohaḥ // 7.17	upajāti : upendravajrā [11: jtjgg], indravajrā [11: ttjgg]
rekhābibhaktaś ca vibhaktagātryāḥ kiṃcinmadhūcchiṣṭavimṛṣṭarāgaḥ / kām apy abhikhyāṃ sphuritair apuṣyad āsannalāvaṇyaphalo 'dhraroṣṭhaḥ // 7.18	indravajrā [11: ttjgg]
patyuḥ śiraścandrakalām anena spṛśeti sakhyā parihāsapūrvam / sā rañjayitvā caraṇau kṛtāśīr mālyena tāṃ nirvacanaṃ jaghāna // 7.19	upajāti : upendravajrā [11: jtjgg], indravajrā [11: ttjgg]
tasyāḥ sujātotpalapatrakānte prasādhikābhir nayane nirīkṣya / na cakṣuṣoḥ kāntiviśeṣabuddhyā kālāñjanaṃ maṅgalam ity upāttam // 7.20	upajāti : upendravajrā [11: jtjgg], indravajrā [11: ttjgg]
sā saṃbhavadbhiḥ kusumair lateva jyotirbhir udyadbhir iva triyāmā / sarid vihaṅgair iva līyamānair āmucyamānābharaṇā cakāse // 7.21	upajāti : upendravajrā [11: jtjgg], indravajrā [11: ttjgg]
ātmānam ālokya ca śobhamānam ādarśabimbe stimitāyatākṣī / haropayāne tvaritā babhūva strīṇāṃ priyālokaphalo hi veṣaḥ // 7.22	upajāti : upendravajrā [11: jtjgg], indravajrā [11: ttjgg]
athāṅgulibhyāṃ haritālam ārdraṃ māṅgalyam ādāya manaḥśilāṃ ca / karṇāvasaktāmaladantapatraṃ mātā tadīyaṃ mukham unnamayya // 7.23	upajāti : upendravajrā [11: jtjgg], indravajrā [11: ttjgg]
umāstanodbhedam anupravṛddho manoratho yaḥ prathamo babhūva / tam eva menā duhituḥ kathaṃcid vivāhadīkṣātilakaṃ cakāra // 7.24	upendravajrā [11: jtjgg]
babandha cāsrākuladṛṣṭir asyāḥ sthānāntare kalpitasanniveśam / dhātryaṅgulībhiḥ pratisāryamāṇam ūrṇamayaṃ kautukahastasūtram // 7.25	upajāti triṣṭubh: ajñātam [11: Btjgg], upendravajrā [11: jtjgg], indravajrā [11: ttjgg]
kṣīrodaveleva saphenapuñjā paryāptacandreva śarattriyāmā / navaṃ navakṣaumanivāsinī sā bhūyo babhau darpaṇam ādadhānā // 7.26	upajāti : upendravajrā [11: jtjgg], indravajrā [11: ttjgg]
tām arcitābhyaḥ kuladevatābhyaḥ kulapratiṣṭḥāṃ praṇamayya mātā / akārayat kārayitavyadakṣā krameṇa pādagrahaṇaṃ satīnām // 7.27	upendravajrā [11: jtjgg] (? 2 eva pādāḥ yuktāḥ)
akhaṇḍitaṃ prema labhasva patyur ity ucyate tābhir umā sma namrā / tayā tu tasyārdhaśarīrabhājā paścātkṛtāḥ snigdhajanāśiṣo ' pi // 7.28	upajāti : upendravajrā [11: jtjgg], indravajrā [11: ttjgg]
icchāvibhūtyor anurūpam adris tasyāḥ kṛtī kṛtyam aśeṣayitvā / sabhyaḥ sabhāyāṃ suhṛdāsthitāyāṃ tasthau vṛṣāṅkāgamanapratīkṣaḥ // 7.29	indravajrā [11: ttjgg]
tāvad varasyāpi kuberaśaile tatpūrvapāṇigrahaṇānurūpam / prasādhanaṃ mātṛbhir ādṛtābhir nyastaṃ purastāt puraśāsanasya // 7.30	upajāti : upendravajrā [11: jtjgg], indravajrā [11: ttjgg]
tadgauravān maṅgalamaṇḍanaśrīḥ sā paspṛśe kevalam īśvareṇa / sva eva veṣaḥ pariṇetur iṣṭaṃ bhāvāntaraṃ tasya vibhoḥ prapede // 7.31	upajāti : upendravajrā [11: jtjgg], indravajrā [11: ttjgg]
babhūva bhasmaiva sitāṅgarāgaḥ kapālam evāmalaśekharaśrīḥ / upāntabhāgeṣu ca rocanāṅko gajājinasyaiva dukūlabhāvaḥ // 7.32	upendravajrā [11: jtjgg]
śaṅkhāntaradyoti vilocanaṃ yad antarniviṣṭāmalapiṅgatāram / sānnidhyapakṣe haritālamayyās tad eva jātaṃ tilakakriyāyāḥ // 7.33	upajāti : upendravajrā [11: jtjgg], indravajrā [11: ttjgg]
yathāpradeśaṃ bhujageśvarāṇāṃ kariśyatām ābharaṇāntaratvam / śarīramātraṃ vikṛtiṃ prapede tathaiva tasthuḥ phaṇaratnaśobhāḥ // 7.34	upendravajrā [11: jtjgg]
divāpi niṣṭhyūtamarīcibhāsā bālyād anāviṣkṛtalāñchanena / candreṇa nityaṃ pratibhinnamauleś cūḍāmaṇeḥ kiṃ grahaṇaṃ harasya // 7.35	upajāti : upendravajrā [11: jtjgg], indravajrā [11: ttjgg]
ity adbhutaikaprabhavaḥ prabhāvāt prasiddhanepathyavidher vidhātā / ātmānam āsannagaṇopanīte khaḍge niṣaktapratimaṃ dadarśa // 7.36	upajāti : upendravajrā [11: jtjgg], indravajrā [11: ttjgg]
sa gopatiṃ nandibhujāvalambī śārdūlacarmāntaritorupṛṣṭham / tadbhaktisaṃkṣiptabṛhatpramāṇam āruhya kailāsam iva pratasthe // 7.37	upajāti : upendravajrā [11: jtjgg], indravajrā [11: ttjgg]
taṃ mātaro devam anuvrajantyaḥ svavāhanakṣobhacalāvataṃsāḥ / mukhaiḥ prabhāmaṇḍalareṇugauraiḥ padmākaraṃ cakrur ivāntarīkṣam // 7.38	upajāti : upendravajrā [11: jtjgg], indravajrā [11: ttjgg]
tāsāṃ ca paścāt kanakaprabhāṇāṃ kālī kapālābharaṇā cakāse / balākinī nīlapayodarājī dūraṃ puraḥkṣiptaśatahradeva // 7.39	upajāti : upendravajrā [11: jtjgg], indravajrā [11: ttjgg]
tato gaṇaiḥ śūlabhṛtaḥ purogair udīrito maṅgalatūryaghoṣaḥ / vimānaśṛṅgāṇy avagāhamānaḥ śaśaṃsa sevāvasaraṃ surebhyaḥ // 7.40	upendravajrā [11: jtjgg]
upādade tasya sahasraraśmis tvaṣṭrā navaṃ nirmitam ātapatram / sa taddukūlād avidūramaulir babhau patadgaṅga ivottamāṅge // 7.41	upajāti : upendravajrā [11: jtjgg], indravajrā [11: ttjgg]
mūrte ca gaṅgāyamune tadānīṃ sacāmare devam aseviṣātām / samudragārūpaviparyaye 'pi sahaṃsapāte iva lakṣyamāṇe // 7.42	upajāti : upendravajrā [11: jtjgg], indravajrā [11: ttjgg]
tam anvagacchat prathamo vidhātā śrīvatsalakṣmā puruṣaś ca sākṣāt / jayeti vācā mahimānam asya saṃvardhayantyā haviṣeva vahnim // 7.43	upajāti : upendravajrā [11: jtjgg], indravajrā [11: ttjgg]
ekaiva mūrtir bibhide tridhā sā sāmānyam eṣāṃ prathamāvaratvam / viṣṇor haras tasya hariḥ kadācid vedhās tayos tāv api dhātur ādyau // 7.44	indravajrā [11: ttjgg]
taṃ lokapālāḥ puruhūtamukhyāḥ śrīlakṣaṇotsargavinītaveṣāḥ / dṛṣṭipradāne kṛtanandisaṃjñās taddarśitāḥ prāñjalayaḥ praṇemuḥ // 7.45	indravajrā [11: ttjgg]
kampena mūrdhnaḥ śatapatrayoniṃ vācā hariṃ vṛtrahaṇaṃ smitena / ālokamātreṇa surān aśeṣān saṃbhāvayām āsa yathāpradhānam // 7.46	indravajrā [11: ttjgg]
tasmai jayāśīḥ sasṛje purastāt saptarṣibhis tān smitapūrvam āha / vivāhayajñe vitate 'tra yūyam adhvaryavaḥ pūrvavṛtā mayeti // 7.47	upajāti : upendravajrā [11: jtjgg], indravajrā [11: ttjgg]
viśvāvasuprāgraharaiḥ pravīṇaiḥ saṃgīyamānatripurāvadānaḥ / adhvānam adhvāntavikāralaṅghyas tatāra tārādhipakhaṇḍadhārī // 7.48	upajāti : upendravajrā [11: jtjgg], indravajrā [11: ttjgg]
khe khelagāmī tam uvāha vāhaḥ saśabdacāmīkarakiṅkiṇīkaḥ / taṭābhighātād iva lagnapaṅke dhunvan muhuḥ protaghane viṣāṇe // 7.49	upajāti : upendravajrā [11: jtjgg], indravajrā [11: ttjgg]
sa prāpad aprāptaparābhiyogaṃ nagendraguptaṃ nagaraṃ muhūrtāt / puro vilagnair haradṛṣṭipātaiḥ suvarṇasūtrair iva kṛṣyamāṇaḥ // 7.50	upajāti : upendravajrā [11: jtjgg], indravajrā [11: ttjgg]
tasyopakaṇṭhe ghananīlakaṇṭḥaḥ kutūhalād unmukhapauradṛṣṭaḥ / svabāṇacihnād avatīrya mārgād āsannabhūpṛṣṭham iyāya devaḥ // 7.51	indravajrā [11: ttjgg] (? 2 eva pādāḥ yuktāḥ)
tam ṛddhimadbandhujanādhirūḍhair vṛndair gajānāṃ giricakravartī / pratyujjagāmāgamanapratītaḥ praphullavṛkṣaiḥ kaṭakair iva svaiḥ // 7.52	upajāti : upendravajrā [11: jtjgg], indravajrā [11: ttjgg]
vargāv ubhau devamahīdharāṇāṃ dvāre purasyodghaṭitāpidhāne / samīyatur dūravisarpighoṣau bhinnaikasetū payasām ivaughau // 7.53	upajāti : upendravajrā [11: jtjgg], indravajrā [11: ttjgg]
hrīmān abhūd bhūmidharo hareṇa trailokyavandyena kṛtapraṇāmaḥ / pūrvaṃ mahimnā sa hi tasya dūram āvarjitaṃ nātmaśiro viveda // 7.54	indravajrā [11: ttjgg]
sa prītiyogād vikasanmukhaśrīr jāmātur agresaratām upetya / prāveśayan mandiram ṛddham enam āgulphakīrṇāpaṇamārgapuṣpam // 7.55	indravajrā [11: ttjgg]
tasmin muhūrte purasundarīṇām īśānasaṃdarśanalālasānām / prāsādamālāsu babhūvur itthaṃ tyaktānyakāryāṇi viceṣṭitāni // 7.56	indravajrā [11: ttjgg]
ālokamārgaṃ sahasā vrajantyā kayācid udveṣṭanavāntamālyaḥ / bandhuṃ na saṃbhāvita eva tāvat kareṇa ruddho 'pi na keśapāśaḥ // 7.57	upajāti : upendravajrā [11: jtjgg], indravajrā [11: ttjgg]
prasādhikālambitam agrapādam ākṣipya kācid dravarāgam eva / utsṛṣṭalīlāgatir āgavākṣād alaktakāṅkāṃ padavīṃ tatāna // 7.58	upajāti : upendravajrā [11: jtjgg], indravajrā [11: ttjgg]
vilocanaṃ dakṣiṇam añjanena saṃbhāvya tadvañcitavāmanetrā / tathaiva vātāyanasaṃnikarṣaṃ yayau śalākām aparā vahantī // 7.59	upajāti : upendravajrā [11: jtjgg], indravajrā [11: ttjgg]
jālāntarapreṣitadṛṣtir anyā prasthānabhinnāṃ na babandha nīvīm / nābhipraviṣṭābharaṇaprabheṇa hastena tasthāv avalambya vāsaḥ // 7.60	indravajrā [11: ttjgg]
ardhācitā satvaram utthitāyāḥ pade pade durnimite galantī / kasyāścid āsīd raśanā tadānīm aṅguṣṭhamūlārpitasūtraśeṣā // 7.61	upajāti : upendravajrā [11: jtjgg], indravajrā [11: ttjgg]
tāsāṃ mukhair āsavagandhagarbhair vyāptāntarāḥ sāndrakutūhalānām / vilolanetrabhramarair gavākṣāḥ sahasrapatrābharaṇā ivāsan // 7.62	upajāti : upendravajrā [11: jtjgg], indravajrā [11: ttjgg]
tāvat patākākulam indumaulir uttoraṇaṃ rājapathaṃ prapede / prāsādaśṛṅgāṇi divāpi kurvañ jyotsnābhiṣekadviguṇadyutīni // 7.63	indravajrā [11: ttjgg]
tam ekadṛśyaṃ nayanaiḥ pibantyo nāryo na jagmur viṣayāntarāṇi / tathā hi śeṣendriyavṛttir āsāṃ sarvātmanā cakṣur iva praviṣṭā // 7.64	upajāti : upendravajrā [11: jtjgg], indravajrā [11: ttjgg]
sthāne tapo duścaram etadartham aparṇayā pelavayāpi taptam / yā dāsyam apy asya labheta nārī sā syāt kṛtārthā kim utāṅkaśayyām // 7.65	upajāti : upendravajrā [11: jtjgg], indravajrā [11: ttjgg]
paraspareṇa spṛhaṇīyaśobhaṃ na ced idaṃ dvandvam ayojayiṣyat / asmin dvaye rūpavidhānayatnaḥ patyuḥ prajānāṃ viphalo 'bhaviśyat // 7.66	upajāti : upendravajrā [11: jtjgg], indravajrā [11: ttjgg]
na nūnam ārūḍharuṣā śarīram anena dagdhaṃ kusumāyudhasya / vrīḍād amuṃ devam udīkṣya manye saṃnyastadehaḥ svayam eva kāmaḥ // 7.67	upajāti : upendravajrā [11: jtjgg], indravajrā [11: ttjgg]
anena saṃbandham upetya diṣṭyā manorathaprārthitam īśvareṇa / mūrdhānam āli kṣitidhāraṇoccam uccaistarāṃ vakṣyati śailarājaḥ // 7.68	upajāti : upendravajrā [11: jtjgg], indravajrā [11: ttjgg]
ity oṣadhiprasthavilāsinīnāṃ śṛṇvan kathāḥ śrotrasukhās trinetraḥ / keyūracūrṇīkṛtalājamuṣṭiṃ himālayasyālayam āsasāda // 7.69	upajāti : upendravajrā [11: jtjgg], indravajrā [11: ttjgg]
tatrāvatīryācyutadattahastaḥ śaradghanād dīdhitimān ivokṣṇaḥ / krāntāni pūrvaṃ kamalāsanena kakṣyāntarāṇy adripater viveśa // 7.70	upajāti : upendravajrā [11: jtjgg], indravajrā [11: ttjgg]
tam anvag indrapramukhāś ca devāḥ saptarṣipūrvāḥ paramarṣayaś ca / gaṇāś ca giryālayam abhyagacchan praśastam ārambham ivottamārthāḥ // 7.71	upajāti : upendravajrā [11: jtjgg], indravajrā [11: ttjgg]
tatreśvaro viṣṭarabhāg yathāvat saratnam arghyaṃ madhumac ca gavyam / nave dukūle ca nagopanītaṃ pratyagrahīt sarvam amantravarjam // 7.72	upajāti : upendravajrā [11: jtjgg], indravajrā [11: ttjgg]
dukūlavāsāḥ sa vadhūsamīpaṃ ninye vinītair avarodharakṣaiḥ / velāsamīpaṃ sphuṭaphenarājir navair udanvān iva candrapādaiḥ // 7.73	upajāti : upendravajrā [11: jtjgg], indravajrā [11: ttjgg]
tayā pravṛddhānanacandrakāntyā praphullacakṣuḥkumudaḥ kumāryā / prasannacetaḥsalilaḥ śivo 'bhūt saṃsṛjyamānaḥ śaradeva lokaḥ // 7.74	upajāti : upendravajrā [11: jtjgg], indravajrā [11: ttjgg]
tayoḥ samāpattiṣu kātarāṇi kiṃcidvyavasthāpitasaṃhṛtāni / hrīyantraṇāṃ tatkṣaṇam anvabhūvann anyonyalolāni vilocanāni // 7.75	upajāti : upendravajrā [11: jtjgg], indravajrā [11: ttjgg]
tasyāḥ karaṃ śailagurūpanītaṃ jagrāha tāmrāṅgulim aṣṭamūrttiḥ / umātanau gūḍhatanoḥ smarasya tacchaṅkinaḥ pūrvam iva praroham // 7.76	upajāti : upendravajrā [11: jtjgg], indravajrā [11: ttjgg]
romodgamaḥ prādur abhūd umāyāḥ svinnāṅguliḥ puṅgavaketur āsīt / vṛttis tayoḥ pāṇisamāgamena samaṃ vibhakteva manobhavasya // 7.77	upajāti : upendravajrā [11: jtjgg], indravajrā [11: ttjgg]
prayuktapāṇigrahaṇaṃ yad anyad vadhūvaraṃ puṣyati kāntim agryām / sānnidhyayogād anayos tadānīṃ kiṃ kathyate śrīr ubhayasya tasya // 7.78	upajāti : upendravajrā [11: jtjgg], indravajrā [11: ttjgg]
pradakṣiṇaprakramaṇāt kṛśānor udarciṣas tan mithunaṃ cakāse / meror upānteṣv iva vartamānam anyonyasaṃsaktam ahastriyāmam // 7.79	upajāti : upendravajrā [11: jtjgg], indravajrā [11: ttjgg]
tau dampatī triḥ pariṇīya vahnim karāgrasaṃsparśanimīlitākṣīm / tāṃ kārayām āsa vadhūṃ purodhās tasmin samiddhārciṣi lājamokṣam // 7.80	upajāti : upendravajrā [11: jtjgg], indravajrā [11: ttjgg]
sā lājadhūmāñjalim iṣṭagandhaṃ gurūpadeśād vadanaṃ nināya / kapolasaṃsarpiśikhaḥ sa tasyā muhūrtakarṇotpalatāṃ prapede // 7.81	upajāti : upendravajrā [11: jtjgg], indravajrā [11: ttjgg]
tad īṣadārdrāruṇagaṇḍalekham ucchvāsikālāñjanarāgam akṣṇoḥ / vadhūmukhaṃ klāntayavāvataṃsam ācāradhūmagrahaṇād babhūva // 7.82	upajāti : upendravajrā [11: jtjgg], indravajrā [11: ttjgg]
vadhūṃ dvijaḥ prāha tavaiṣa vatse vahnir vivāhaṃ prati pūrvasākṣī / śivena bhartrā saha dharmacaryā kāryā tvayā muktavicārayeti // 7.83	upajāti : upendravajrā [11: jtjgg], indravajrā [11: ttjgg]
ālocanāntaṃ śravaṇe vitatya pītaṃ guros tadvacanaṃ bhavānyā / nidāghakālolbaṇatāpayeva māhendram ambhaḥ prathamaṃ pṛthivyā // 7.84	upajāti : upendravajrā [11: jtjgg], indravajrā [11: ttjgg]
dhruveṇa bhartrā dhruvadarśanāya prayujyamānā priyadarśanena / sā dṛṣṭa ity ānanam unnamayya hrīsannakaṇṭhī katham apy uvāca // 7.85	upajāti : upendravajrā [11: jtjgg], indravajrā [11: ttjgg]
itthaṃ vidhijñena purohitena prayuktapāṇigrahaṇopacārau / praṇematus tau pitarau prajānāṃ padmāsanasthāya pitāmahāya // 7.86	upajāti : upendravajrā [11: jtjgg], indravajrā [11: ttjgg]
vadhūr vidhātrā pratinandyate sma kalyāṇi vīraprasavā bhaveti / vācaspatiḥ sann api so 'ṣṭamūrttav āśāsya cintāstimito babhūva // 7.87	upajāti : upendravajrā [11: jtjgg], indravajrā [11: ttjgg]
kḷptopacārāṃ caturasravedīṃ tāv etya paścāṭ kanakāsanasthau / jāyāpatī laukikam eṣitavyam ārdrākṣatāropaṇam anvabhūtām // 7.88	indravajrā [11: ttjgg]
patrāntalagnair jalabindujālair ākṛṣṭamuktāphalajālaśobham / tayor upary āyatanāladaṇḍam ādhatta lakṣmīḥ kamalātapatram // 7.89	upajāti : upendravajrā [11: jtjgg], indravajrā [11: ttjgg]
dvidhā prayuktena ca vāṅmayena sarasvatī tan mithunaṃ nunāva / saṃskārapūtena varaṃ vareṇyaṃ vadhūṃ sukhagrāhyanibandhanena // 7.90	upajāti : upendravajrā [11: jtjgg], indravajrā [11: ttjgg]
tau sandhiṣu vyañjitavṛttibhedaṃ rasāntareṣu pratibaddharāgam / apaśyatām apsarasāṃ muhūrtaṃ prayogam ādyaṃ lalitāṅgahāram // 7.91	upajāti : upendravajrā [11: jtjgg], indravajrā [11: ttjgg]
devās tadante haram ūḍhabhāryaṃ kirīṭabaddhāñjalayo nipatya / śāpāvasāne pratipannamūrtter yayācire pañcaśarasya sevām // 7.92	upajāti : upendravajrā [11: jtjgg], indravajrā [11: ttjgg]
tasyānumene bhagavān vimanyur vyāpāram ātmany api sāyakānām / kāle prayuktā khalu kāryavidbhir vijṇāpanā bhartṛṣu siddhim eti // 7.93	indravajrā [11: ttjgg]
atha vibudhagaṇāṃs tān indumaulir visṛjya kṣitidharapatikanyām ādadānaḥ kareṇa / kanakakalaśarakśābhaktiśobhāsanāthaṃ kṣitiviracitaśayyaṃ kautukāgāram āgāt // 7.94	mālinī [15: nnmyy]
navapariṇayalajjābhūṣaṇāṃ tatra gaurīṃ vadanam apaharantīṃ tatkṛtotkṣepam īśaḥ / api śayanasakhībhyo dattavācaṃ kathaṃcit pramathamukhavikārair hāsayām āsa gūḍham // 7.95	mālinī [15: nnmyy]
pāṇipīḍanavidher anantaraṃ śailarājaduhitur haraṃ prati / bhāvasādhvasaparigrahād abhūt kāmadohadamanoharaṃ vapuḥ // 8.1	rathoddhatā [11: rnrlg]
vyāhṛtā prativaco na sandadhe gantum aicchad avalambitāṃśukā / sevate sma śayanaṃ parāṅmukhī sā tathāpi rataye pinākinaḥ // 8.2	rathoddhatā [11: rnrlg]
kaitavena śayite kutūhalāt pārvatī pratimukhaṃ nipātitam / cakṣur unmiṣati sasmitaṃ priye vidyudāhatam iva nyamīlayat // 8.3	rathoddhatā [11: rnrlg]
nābhideśanihitaḥ sakampayā śaṅkarasya rurudhe tayā karaḥ / taddukūlam atha cābhavat svayaṃ dūram ucchvasitanīvibandhanam // 8.4	rathoddhatā [11: rnrlg]
evam āli nigṛhītasādhvasaṃ śaṅkaro rahasi sevyatām iti / sā sakhībhir upadiṣṭam ākulā nāsmarat pramukhavartini priye // 8.5	rathoddhatā [11: rnrlg]
apy avastuni kathāpravṛttaye praśnatatparam anaṅgaśāsanam / vīkṣitena parigṛhya pārvatī mūrdhakampamayam uttaraṃ dadau // 8.6	rathoddhatā [11: rnrlg]
śūlinaḥ karataladvayena sā saṃnirudhya nayane hṛtāṃśukā / tasya paśyati lalāṭalocane moghayatnavidhurā rahasy abhūt // 8.7	rathoddhatā [11: rnrlg]
cumbaneṣv adharadānavarjitaṃ sannahastam adayopagūhane / kliṣṭamanmatham api priyaṃ prabhor durlabhapratikṛtaṃ vadhūratam // 8.8	rathoddhatā [11: rnrlg]
yan mukhagrahaṇam akṣatādharaṃ dattam avraṇapadaṃ nakhaṃ ca yat / yad rataṃ ca sadayaṃ priyasya tat pārvatī viṣahate sma netarat // 8.9	rathoddhatā [11: rnrlg]
rātrivṛttam anuyoktum udyataṃ sā vibhātasamaye sakhījanam / nākarod apakutūhalaṃ hriyā śaṃsituṃ ca hṛdayena tatvare // 8.10	rathoddhatā [11: rnrlg]
darpaṇe ca paribhogadarśinī pṛṣṭhataḥ praṇayino niṣeduṣaḥ / prekṣya bimbam anu bimbam ātmanaḥ kāni kāni na cakāra lajjayā // 8.11	rathoddhatā [11: rnrlg]
nīlakaṇṭhaparibhuktayauvanāṃ tāṃ vilokya jananī samāśvasat / bhartṛvallabhatayā hi mānasīṃ mātur asyati śucaṃ vadhūjanaḥ // 8.12	rathoddhatā [11: rnrlg]
vāsarāṇi katicit kathañcana sthāṇunā ratam akāri cānayā / jñātamanmatharasā śanaiḥ śanaiḥ sā mumoca ratiduḥkhaśīlatām // 8.13	rathoddhatā [11: rnrlg]
sasvaje priyam uronipīḍitā prārthitaṃ mukham anena nāharat / mekhalāpaṇayalolatāṃ gataṃ hastam asya śithilaṃ rurodha sā // 8.14	rathoddhatā [11: rnrlg]
bhāvasūcitam adṛṣṭavipriyaṃ cāṭumat kṣaṇaviyogakātaram / kaiścid eva divasais tadā tayoḥ prema rūḍham itaretarāśrayam // 8.15	rathoddhatā [11: rnrlg]
taṃ yathātmasadṛśaṃ varaṃ vadhūr anvarajyata varas tathaiva tām / sāgarād anapagā hi jāhnavī so 'pi tanmukharasaikanirvṛtiḥ // 8.16	rathoddhatā [11: rnrlg]
śiṣyatāṃ nidhuvanopadeśinaḥ śaṅkarasya rahasi prapannayā / śikṣitaṃ yuvatinaipuṇaṃ tayā yat tad eva gurudakṣiṇīkṛtam // 8.17	rathoddhatā [11: rnrlg]
daṣṭamuktam adharoṣṭham āmbikā vedanāvidhutahastapallavā / śītalena niravāpayat kṣaṇaṃ maulicandraśakalena śūlinaḥ // 8.18	rathoddhatā [11: rnrlg]
cumbanādalakacūrṇadūṣitaṃ śaṅkaro 'pi nayanaṃ lalāṭajam / ucchvasatkamalagandhaye dadau pārvatīvadanagandhavāhine // 8.19	rathoddhatā [11: rnrlg]
evam indriyasukhasya vartmanaḥ sevanād anugṛhītamanmathaḥ / śailarājabhavane sahomayā māsamātram avasad vṛṣadhvajaḥ // 8.20	rathoddhatā [11: rnrlg]
so 'numānya himavantam ātmabhūr ātmajāvirahaduḥkhakheditam / tatra tatra vijahāra saṃpatann aprameyagatinā kakudmatā // 8.21	rathoddhatā [11: rnrlg]
merum etya marudāśugokṣakaḥ pārvatīstanapuraskṛtān kṛtī / hemapallavavibhaṅgasaṃstarān anvabhūt suratamardanakṣamān // 8.22	rathoddhatā [11: rnrlg]
padmanābhacaraṇāṅkitāśmasu prāptavatsv amṛtavipruṣo navāḥ / mandarasya kaṭakeṣu cāvasat pārvatīvadanapadmaṣaṭpadaḥ // 8.23	rathoddhatā [11: rnrlg]
vāraṇadhvanitabhītayā tayā kaṇṭhasaktaghanabāhubandhanaḥ / ekapiṅgalagirau jagadgurur nirviveśa viśadāḥ śaśiprabhāḥ // 8.24	rathoddhatā [11: rnrlg]
tasya jātu malayasthalīrate dhūtacandanalataḥ priyāklamam / ācacāma salavaṅgakesaraś cāṭukāra iva dakṣiṇānilaḥ // 8.25	rathoddhatā [11: rnrlg]
hematāmarasatāḍitapriyā tatkarāmbuvinimīlitekṣaṇā / khe vyagāhata taraṅgiṇīm umā mīnapaṅktipunaruktamekhalā // 8.26	rathoddhatā [11: rnrlg]
tāṃ pulomatanayālakocitaiḥ pārijātakusumaiḥ prasādhayan / nandane ciram ayugmalocanaḥ saspṛhaṃ suravadhūbhir īkṣitaḥ // 8.27	rathoddhatā [11: rnrlg]
ity abhaumam anubhūya śaṅkaraḥ pārthivaṃ ca dayitāsakhaḥ sukham / lohitāyati kadācid ātape gandhamādanagiriṃ vyagāhata // 8.28	rathoddhatā [11: rnrlg]
tatra kāñcanaśilātalāśrayo netragamyam avalokya bhāskaram / dakṣiṇetarabhujavyapāśrayāṃ vyājahāra sahadharmacāriṇīm // 8.29	rathoddhatā [11: rnrlg]
padmakāntim aruṇatribhāgayoḥ saṃkramayya tava netrayor iva / saṃkṣaye jagad iva prajeśvaraḥ saṃharaty ahar asāv aharpatiḥ // 8.30	rathoddhatā [11: rnrlg]
sīkaravyatikaraṃ marīcibhir dūrayaty avanate vivasvati / indracāpapariveṣaśūnyatāṃ nirjharās tava pitur vrajanty amī // 8.31	rathoddhatā [11: rnrlg]
daṣṭatāmarasakesarasrajoḥ krandator viparivṛttakaṇṭhayoḥ / nighnayoḥ sarasi cakravākayor alpam antaram analpatāṃ gatam // 8.32	rathoddhatā [11: rnrlg]
sthānam āhnikam apāsya dantinaḥ sallakīviṭapabhaṅgavāsitam / āvibhātacaraṇāya gṛhṇāte vāri vāriruhabaddhaṣaṭpadam // 8.33	upajāti triṣṭubh: ajñātam [11: rnrgg], rathoddhatā [11: rnrlg]
paśya paścimadigantalambinā nirmitaṃ mitakathe vivasvatā / dīrghayā pratimayā saro 'mbhasāṃ tāpanīyam iva setubandhanam // 8.34	rathoddhatā [11: rnrlg]
uttaranti vinikīrya palvalaṃ gāḍhapaṅktam ativāhitātapāḥ / daṃṣṭriṇo vanavarāhayūthapā daṣṭabhaṅgurabisāṅkurā iva // 8.35	rathoddhatā [11: rnrlg]
eṣa vṛkṣaśikhare kṛtāspado jātarūparasagauramaṇḍalaḥ / hīyamānam ahar atyayātapaṃ pīvaroru pibatīva barhiṇaḥ // 8.36	rathoddhatā [11: rnrlg]
pūrvabhāgatimirapravṛttibhir vyaktapaṅkam iva jātam ekataḥ / khaṃ hṛtātapajalaṃ vivasvatā bhāti kiñcid iva śeṣavat saraḥ // 8.37	rathoddhatā [11: rnrlg]
āviśadbhir uṭajāṅgaṇaṃ mṛgair mūlasekasarasaiś ca vṛkṣakaiḥ / āśramāḥ praviśadagnidhenavo bibhrati śriyam udīritāgnayaḥ // 8.38	rathoddhatā [11: rnrlg]
baddhakośam api tiṣṭhati kṣaṇaṃ sāvaśeṣavivaraṃ kuśeśayam / ṣaṭpadāya vasatiṃ grahīṣyate prītipūrvam iva dātum antaram // 8.39	rathoddhatā [11: rnrlg]
dūramagraparimeyaraśminā vāruṇī dig aruṇena bhānunā / bhāti kesaravateva maṇḍitā bandhujīvatilakena kanyakā // 8.40	rathoddhatā [11: rnrlg]
sāmabhiḥ sahacarāḥ sahasraśaḥ syandanāśvahṛdayaṅgamasvaraiḥ / bhānum agniparikīrṇatejasaṃ saṃstuvanti kiraṇoṣmapāyinaḥ // 8.41	rathoddhatā [11: rnrlg]
so 'yam ānataśirodharair hayaiḥ karṇacāmaravighaṭṭitekṣaṇaiḥ / astam eti yugabhugnakesaraiḥ saṃnidhāya divasaṃ mahodadhau // 8.42	rathoddhatā [11: rnrlg]
khaṃ prasuptam iva saṃsthite ravau tejaso mahata īdṛśī gatiḥ / tat prakāśayati yāvad udgataṃ mīlanāya khalu tāvataś cyutam // 8.43	rathoddhatā [11: rnrlg]
saṃdhyayāpy anugataṃ raver vapur vandyam astaśikhare samarpitam / yena pūrvam udaye puraskṛtā nānuyāsyati kathaṃ tam āpadi // 8.44	rathoddhatā [11: rnrlg]
raktapītakapiśāḥ payomucāṃ koṭayaḥ kuṭilakeśi bhānty amūḥ / drakṣyasi tvam iti saṃdhyayānayā vartikābhir iva sādhumaṇḍitāḥ // 8.45	rathoddhatā [11: rnrlg]
siṃhakesarasaṭāsu bhūbhṛtāṃ pallavaprasaviṣu drumeṣu ca / paśya dhātuśikhareṣu bhānunā saṃvibhaktam iva sāṃdhyam ātapam // 8.46	rathoddhatā [11: rnrlg]
adrirājatanaye tapasvinaḥ pāvanāmbuvihitāñjalikriyāḥ / brahma gūḍham abhisaṃdhyam ādṛtāḥ śuddhaye vidhivido gṛṇanty amī // 8.47	rathoddhatā [11: rnrlg]
tan muhūrttam anumantum arhasi prastutāya niyamāya mām api / tvāṃ vinodanipuṇaḥ sakhījano valguvādini vinodayiṣyati // 8.48	rathoddhatā [11: rnrlg]
nirvibhujya daśanacchadaṃ tato vāci bhartur avadhīraṇāparā / śailarājatanayā samīpagām ālalāpa vijayām ahetukam // 8.49	rathoddhatā [11: rnrlg]
īśvaro 'pi divasātyayocitaṃ mantrapūrvam anutasthivān vidhim / pārvatīm avacanām asūyayā pratyupetya punar āha sasmitam // 8.50	rathoddhatā [11: rnrlg]
muñca kopam animittakopane saṃdhyayā praṇamito 'smi nānyayā / kiṃ na vetsi sahadharmacāriṇaṃ cakravākasamavṛttim ātmanaḥ // 8.51	rathoddhatā [11: rnrlg]
nirmiteṣu pitṛṣu svayaṃbhuvā yā tanuḥ sutanu pūrvam ujjhitā / seyam astam udayaṃ ca sevate tena mānini mamātra gauravam // 8.52	rathoddhatā [11: rnrlg]
tām imāṃ timiravṛddhipīḍitāṃ śailarājatanaye 'dhunā sthitām / ekatas taṭatamālamālinīṃ paśya dhāturasanimnagām iva // 8.53	rathoddhatā [11: rnrlg]
sāndhyam astamitaśeṣam ātapaṃ raktalekham aparā bibharti dik / sāṃparāyavasudhā saśoṇitaṃ maṇḍalāgram iva tiryagujjhitam // 8.54	rathoddhatā [11: rnrlg]
yāminīdivasasandhisambhave tejasi vyavahite sumeruṇā / etad andhatamasaṃ niraṅkuśaṃ dikṣu dīrghanayane vijṛmbhate // 8.55	rathoddhatā [11: rnrlg]
nordhvam īkṣaṇagatir na cāpy adho nābhito na purato na pṛṣṭhataḥ / loka eṣa timiraughaveṣṭito garbhavāsa iva vartate niśi // 8.56	rathoddhatā [11: rnrlg]
śuddham āvilam avasthitaṃ calaṃ vakram ārjavaguṇānvitaṃ ca yat / sarvam eva tamasā samīkṛtaṃ dhiṅ mahattvam asatāṃ hṛtāntaram // 8.57	rathoddhatā [11: rnrlg]
nūnam unnamati yajvanāṃ patiḥ śārvarasya tamaso niṣiddhaye / puṇḍarīkamukhi pūrvadiṅmukhaṃ kaitakair iva rajobhir āvṛtam // 8.58	rathoddhatā [11: rnrlg]
mandarāntaritamūrtinā niśā lakṣyate śaśabhṛtā satārakā / tvaṃ mayā priyasakhīsamāgatā śroṣyateva vacanāni pṛṣṭhataḥ // 8.59	rathoddhatā [11: rnrlg]
ruddhanirgamanam ā dinakṣayāt pūrvadṛṣṭatanucandrikāsmitam / etad udgirati candramaṇḍalaṃ digrahasyam iva rātricoditam // 8.60	rathoddhatā [11: rnrlg]
paśya pakvaphalinīphalatviṣā bimbalāñchitaviyatsaro 'mbhasā / viprakṛṣṭavivaraṃ himāṃśunā cakravākamithunaṃ viḍambyate // 8.61	rathoddhatā [11: rnrlg]
śakyam oṣadhipater navodayāḥ karṇapūraracanākṛte tava / apragalbhayavasūcikomalāś chettum agranakhasaṃpuṭaiḥ karāḥ // 8.62	rathoddhatā [11: rnrlg]
aṅgulībhir iva keśasaṃcayaṃ sannigṛhya timiraṃ marīcibhiḥ / kuḍmalīkṛtasarojalocanaṃ cumbatīva rajanīmukhaṃ śaśī // 8.63	rathoddhatā [11: rnrlg]
paśya pārvati navenduraśmibhiḥ sāmibhinnatimiraṃ nabhastalam / lakṣyate dviradabhogadūṣitaṃ saṃprasīdad iva mānasaṃ saraḥ // 8.64	rathoddhatā [11: rnrlg]
raktabhāvam apahāya candramā jāta eṣa pariśuddhamaṇḍalaḥ / vikriyā na khalu kāladoṣajā nirmalaprakṛtiṣu sthirodayā // 8.65	rathoddhatā [11: rnrlg]
unnateṣu śaśinaḥ prabhā sthitā nimnasaṃśrayaparaṃ niśātamaḥ / nūnam ātmasadṛśī prakalpitā vedhaseha guṇadoṣayor gatiḥ // 8.66	rathoddhatā [11: rnrlg]
candrapādajanitapravṛttibhiś candrakāntajalabindubhir giriḥ / mekhalātaruṣu nidritān amūn bodhayaty asamaye śikhaṇḍinaḥ // 8.67	rathoddhatā [11: rnrlg]
kalpavṛkṣaśikhareṣu saṃprati prasphuradbhir iva paśya sundari / hārayaṣṭigaṇanām ivāṃśubhiḥ kartum āgatakutūhalaḥ śaśī // 8.68	rathoddhatā [11: rnrlg]
unnatāvanatabhāvavattayā candrikā satimirā girer iyam / bhaktibhir bahuvidhābhir arpitā bhāti bhūtir iva mattadantinaḥ // 8.69	rathoddhatā [11: rnrlg]
etad ucchvasitapītam aindavaṃ voḍhum akṣamam iva prabhārasam / muktaṣaṭpadavirāvam añjasā bhidyate kumudam ā nibandhanāt // 8.70	rathoddhatā [11: rnrlg]
paśya kalpatarulambi śuddhayā jyotsnayā janitarūpasaṃśayam / mārute calati caṇḍi kevalaṃ vyajyate viparivṛttam aṃśukam // 8.71	rathoddhatā [11: rnrlg]
śakyam aṅgulibhir uddhṛtair adhaḥ śākhināṃ patitapuṣpapeśalaiḥ / patrajarjaraśaśiprabhālavair ebhir utkacayituṃ tavālakān // 8.72	rathoddhatā [11: rnrlg]
eṣa cārumukhi yogatārayā yujyate taralabimbayā śaśī / sādhvasād upagataprakampayā kanyayeva navadīkṣayā varaḥ // 8.73	rathoddhatā [11: rnrlg]
pākabhinnaśarakāṇḍagaurayor ullasatpratikṛtiprasannayoḥ / rohatīva tava gaṇḍalekhayoś candrabimbanihitākṣṇi candrikā // 8.74	rathoddhatā [11: rnrlg]
lohitārkamaṇibhājanārpitaṃ kalpavṛkṣamadhu bibhratī svayam / tvām iyaṃ sthitimatīm upasthitā gandhamādanavanādhidevatā // 8.75	rathoddhatā [11: rnrlg]
ārdrakesarasugandhi te mukhaṃ mattaraktanayanaṃ svabhāvataḥ / atra labdhavasatir guṇāntaraṃ kiṃ vilāsini madaḥ kariṣyati // 8.76	rathoddhatā [11: rnrlg]
mānyabhaktir athavā sakhījanaḥ sevyatām idam anaṅgadīpanam / ity udāram abhidhāya śaṅkaras tām apāyayata pānam ambikām // 8.77	rathoddhatā [11: rnrlg]
pārvatī tadupayogasambhavāṃ vikriyām api satāṃ manoharām / apratarkyavidhiyoganirmitām āmrateva sahakāratāṃ yayau // 8.78	rathoddhatā [11: rnrlg]
tatkṣaṇaṃ viparivartitahriyor neṣyatoḥ śayanam iddharāgayoḥ / sā babhūva vaśavartinī dvayoḥ śūlinaḥ suvadanā madasya ca // 8.79	rathoddhatā [11: rnrlg]
ghūrṇamānanayanaṃ skhalatkathaṃ svedibindumad akāraṇasmitam / ānanena na tu tāvad īśvaraś cakṣuṣā ciram umāmukhaṃ papau // 8.80	rathoddhatā [11: rnrlg]
tāṃ vilambitapanīyamekhalām udvahañ jaghanabhāradurvahām / dhyānasaṃbhṛtavibhūtir īśvaraḥ prāviśan maṇiśilāgṛhaṃ rahaḥ // 8.81	rathoddhatā [11: rnrlg]
tatra haṃsadhavalottaracchadaṃ jāhnavīpulinacārudarśanam / adhyaśeta śayanaṃ priyāsakhaḥ śāradābhram iva rohiṇīpatiḥ // 8.82	rathoddhatā [11: rnrlg]
kliṣṭakeśam avaluptacandanaṃ vyatyayārpitanakhaṃ samatsaram / tasya tac chiduramekhalāguṇaṃ pārvatīratam abhūn na tṛptaye // 8.83	rathoddhatā [11: rnrlg]
kevalaṃ priyatamādayālunā jyotiṣām avanatāsu paṅktiṣu / tena tatparigṛhītavakṣasā netramīlanakutūhalaṃ kṛtam // 8.84	rathoddhatā [11: rnrlg]
sa vyabudhyata budhastavocitaḥ śatakumbhakamalākaraiḥ samam / mūrcchanāparigṛhītakaiśikaiḥ kinnarair uṣasi gītamaṅgalaḥ // 8.85	upajāti triṣṭubh: ajñātam [11: snrlg], rathoddhatā [11: rnrlg]
tau kṣaṇaṃ śithilitopagūhanau dampatī calitamānasor mayaḥ / padmabhedapiśunāḥ siṣevire gandhamādanavanāntamārutāḥ // 8.86	rathoddhatā [11: rnrlg]
ūrumūlanakhamārgarājibhis tatkṣaṇaṃ hṛtavilocano haraḥ / vāsasaḥ praśithilasya saṃyamaṃ kurvatīṃ priyatamām avārayat // 8.87	rathoddhatā [11: rnrlg]
sa prajāgarakaṣāyalocanaṃ gāḍhadantapadatāḍitādharam / ākulālakam araṃsta rāgavān prekṣya bhinnatilakaṃ priyāmukham // 8.88	rathoddhatā [11: rnrlg]
tena bhaṅgiviṣamottaracchadaṃ madhyapiṇḍitavisūtramekhalam / nirmale 'pi śayanaṃ niśātyaye nojjhitaṃ caraṇarāgalāñchitam // 8.89	rathoddhatā [11: rnrlg]
sa priyāmukharasaṃ divāniśaṃ harṣavṛddhijananaṃ siṣeviṣuḥ / darśanapraṇayinām adṛśyatām ājagāma vijayānivedanāt // 8.90	rathoddhatā [11: rnrlg]
samadivasaniśīthaṃ saṅginas tatra śambhoḥ śatam agamad ṛtūnāṃ sāgram ekā niśeva / na tu suratasukheṣu chinnatṛṣṇo babhūva jvalana iva samudrāntargatas tajjaleṣu // 8.91	mālinī [15: nnmyy] (? 3 eva pādāḥ yuktāḥ)
samāptam: 3.596975s